གཉིས་པ། རྫུ་འཕྲུལ་མངོན་པར་འདུ་མཛད་པའི་ཆེ་བའི་བདག་ཉིད་ཀྱི་བསྔགས་པ་བརྗོད་པའི་ལེའུ།
ཡང་དེའི་ཚེ་འཁོར་འདུས་པ་དེ་ཉིད་དུ་པད་མ་དཔལ་གྱི་སྙིང་པོ་ཞེས་བྱ་བ་གཞོན་ནུར་གྱུར་པ་ཞིག་འདུས་པར་གྱུར་ཏེ་འདུག་གོ །དེ་ནས་པད་མ་དཔལ་གྱི་སྙིང་པོ་གཞོན་ནུར་གྱུར་པ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་འདུག་གོ །དེ་ལྟར་འདུག་པ་དེའི་སེམས་ལ་རྣམ་པར་རྟོག་པ་འདི་ལྟ་བུ་བྱུང་སྟེ། བདག་ནི་དེ་བཞིན་གཤེགས་པ་ལ་ཆོས་ཀྱི་སྒོ་རྣམས་ཞུ་བར་འདོད་པ་ཡིན། རྡོ་རྗེའི་ཚིག་རྣམས་དང་། རྒྱུན་མི་གཅོད་པ་སྒྲུབ་པའི་ཚིག་རྣམས་ཞུ་བར་འདོད་པ་ཡིན། སྨྲ་བ་ཐམས་ཅད་ཚར་གཅད་པ་སྒྲུབ་པའི་ཚིག་རྣམས་དང་རིམ་པར་ཕྱེ་བའི་ཚིག་རྣམས་དང་། ཆོས་ཐམས་ཅད་བསྡུ་བའི་ཚིག་རྣམས་ཞུ་བར་འདོད་པ་ཡིན་ན། རིགས་ཀྱི་བུ་དང་། རིགས་ཀྱི་བུ་མོ་དག་ཕྱག་རྒྱའི་སྒོ་གང་དག་ལ་བསླབས་ན། ཆོས་ཐམས་ཅད་ལ་སྒྲིབ་པ་མེད་པའི་མིག་དང་ཤེས་པ་ལ་མཁས་པ་ཉིད་རྗེས་སུ་ཐོབ་པར་འགྱུར། བཅོམ་ལྡན་འདས་ཀྱེ་མ་བདག་གིས་བསམ་པའི་ཚོགས་གང་དག་དང་འཇུག་པ་སྒྲུབ་པ་གང་དག་གིས་གོ་ཆ་བགོས་པ་སྔོན་གྱི་དགེ་བའི་རྩ་བའི་ཚོགས་སྐྱེ་བ་ལ་བསམ་པ་སྒྲུབ་པའི་ཚོགས་ལ་དགོངས་པར་འགྱུར་སྙམ་མོ། །དེ་ནས་བཅོམ་ལྡན་འདས་ཀྱིས་པད་མ་དཔལ་གྱི་སྙིང་པོ་གཞོན་ནུར་གྱུར་པའི་བསམ་པ་ཐུགས་སུ་ཆུད་ཅིང་སྨོན་ལམ་དང་། དགེ་བའི་རྩ་བའི་ཚོགས་བསྒྲུབ་པ་ཐུགས་སུ་ཆུད་ནས། དེའི་ཚེ་ཕྱོགས་བཞིར་རྣམ་པར་གཟིགས་སོ། །ཕྱོགས་བཞིར་གཟིགས་པ་ན། བཅོམ་ལྡན་འདས་ཀྱི་ཞལ་གྱི་སྒོ་ནས་འོད་ཟེར་ཆེན་པོ་བཞི་བྱུང་སྟེ། དེ་དག་བྱུང་ནས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་ཏུ་དོང་ངོ་། །འོད་ཟེར་དེ་དག་ཀྱང་ཤིང་ལྗོན་པའམ། རྩིག་པའམ། རིའམ། སའམ། བར་སྣང་གང་དུ་བབ་པ་དེ་དག་ཐམས་ཅད་གསེར་གྱི་ཁ་དོག་ཏུ་ཁ་དོག་གཅིག་ཏུ་གྱུར་ཏོ། །ཕྱོགས་དང་ཕྱོགས་མཚམས་ཐམས་ཅད་དུ་ཡང་འོད་ཟེར་དེ་དག་ཐོགས་པ་མེད་པར་རབ་ཏུ་དོང་སྟེ། དེ་ལྟར་
སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་འོད་དེ་དག་གིས་རེག་པའི་སེམས་ཅན་ཇི་སྙེད་པ་དེ་དག་ཐམས་ཅད་ཀྱིས་རང་གི་ལུས་དག་གསེར་གྱི་ལུས་ལྟ་བུར་ཤེས་སོ། །གང་དག་འདོད་ཆགས་ཀྱི་ཡོངས་སུ་གདུང་བས་ཡོངས་སུ་གདུངས་པ་དང་། ཞེ་སྡང་གི་ཡོངས་སུ་གདུང་བས་ཡོངས་སུ་གདུངས་པ་དང་། གཏི་མུག་གི་ཡོངས་སུ་གདུང་བས་ཡོངས་སུ་གདུངས་པ་དེ་དག་ཐམས་ཅད་ཀྱིས་ནི་བདག་ཉིད་འདོད་ཆགས་ཆུང་བ་དང་། ཞེ་སྡང་ཆུང་བ་དང་། གཏི་མུག་ཆུང་བར་མངོན་པར་ཤེས་སོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན་སེམས་ཅན་དམྱལ་བ་ཇི་སྙེད་ཡོད་པ་དེ་དག་ཏུ་སེམས་ཅན་སྐྱེས་པ་གང་དག་སྡུག་བསྔལ་ཚ་བ་མི་བཟད་པ་འཆི་བའི་མཐར་བྱེད་པའི་ཚོར་བ་ཉམས་སུ་མྱོང་བ་དེ་དག་ཐམས་ཅད་ཀྱིས་ནི་བཅོམ་ལྡན་འདས་ཀྱི་མཐུ་དང་། བྱང་ཆུབ་སེམས་དཔའ་དེའི་སྔོན་གྱི་སྨོན་ལམ་གྱི་མཐུས་བདེ་བ་སྙམ་དུ་ཤེས་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ལས་ཀྱི་སྒྲིབ་པས་བསྒྲིབས་པ་དང་། ཉོན་མོངས་པའི་སྒྲིབ་པས་བསྒྲིབས་པ་དང་། ལས་ཀྱི་རྣམ་པར་སྨིན་པའི་སྒྲིབ་པས་བསྒྲིབས་པར་གྱུར་པའི་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཀྱིས་ཀྱང་བཅོམ་ལྡན་འདས་ཀྱི་མཐུ་དང་། བྱང་ཆུབ་སེམས་དཔའ་དེའི་སྔོན་གྱི་སྨོན་ལམ་གྱིས་སྒྲིབ་པ་དང་བྲལ་བར་གྱུར་ཏོ། །དེའི་ཚེ་སེམས་ཅན་རྣམས་ཀྱི་དགེ་བའི་རྩ་བ་ཆེར་གསལ་བར་བྱ་བའི་ཕྱིར། བཅོམ་ལྡན་འདས་ཀྱིས་སྤུའི་ཁུང་བུ་ཐམས་ཅད་ནས་འོད་ཟེར་དག་ཕྱུང་སྟེ། འོད་ཟེར་དེ་དག་ཀྱང་ཤར་ཕྱོགས་སུ་འཇིག་རྟེན་གྱི་ཁམས་ཚད་མེད་པ་དག་འདས་སོ། །དེ་བཞིན་དུ་ལྷོ་དང་། ནུབ་དང་། བྱང་དང་། སྟེང་དང་། འོག་ཏུ་འཇིག་རྟེན་གྱི་ཁམས་ཚད་མེད་པ་དག་འདས་སོ། །དེ་ནས་བཅོམ་ལྡན་འདས་ཀྱིས་འོད་ཟེར་དེ་དག་ཕྱུང་ནས་གསུང་བསལ་བའི་སྒྲ་མཛད་དོ། །གསུང་བསལ་བའི་སྒྲ་དེས་ཀྱང་འཇིག་རྟེན་གྱི་ཁམས་ཐམས་ཅད་མངོན་པར་གོ་བར་གྱུར་ཏོ། །དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་པ་དག་འདས་པ་ན་འཇིག་རྟེན་གྱི་ཁམས་གདུགས་གཅིག་པ་ཞེས་བྱ་བ་དེ་ན། དེ་བཞིན་
གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་བཀོད་པ་གཅིག་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་བཀོད་པ་གཅིག་པ་དེས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་འདི་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་དེ་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསུང་བསལ་བའི་སྒྲ་དང་། འོད་ཀྱི་སྣང་བ་ཆེན་པོ་གདའ་བ་དེ་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་བཀོད་པ་གཅིག་པས་བྱང་ཆུབ་སེམས་དཔའ་དྲ་བ་ཅན་གྱི་འོད་ལ་བཀའ་སྩལ་པ། རིགས་ཀྱི་བུ་ནུབ་ཕྱོགས་སུ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་ཚད་མེད་གྲངས་མེད་པ་དག་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ་འདི་ལྟ་སྟེ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །འཁོར་དེར་བྱང་ཆུབ་སེམས་དཔའ་སེམས་དཔའ་ཆེན་པོ་པད་མ་དཔལ་གྱི་སྙིང་པོ་ཞེས་བྱ་བ་འདུས་ཏེ། བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་འདི་ལྟ་སྟེ། ཆོས་ཐམས་ཅད་ལ་ཡང་དག་པར་གཞོལ་བའི་ཕྱག་རྒྱ་ཡི་གེ་མངོན་པར་སྒྲུབ་པའི་སྒོ་ཞུ་བར་འདོད་དོ། །དྲ་བ་ཅན་གྱི་འོད་སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ། ཐ་མི་
དད་པར་སྤྱོད་པའི་གོ་ཆ་བགོས་པ་དག་འཁོར་དེར་འདུས་ཏེ་འཁོད་དོ། །དྲ་བ་ཅན་གྱི་འོད་བྱང་ཆུབ་སེམས་དཔའ་སེམས་དཔའ་ཆེན་པོ་གོ་ཆ་དེ་དག་དང་ལྡན་པ་དེ་དག་གིས་སངས་རྒྱས་ཀྱི་ཞིང་གཞན་དག་ཀྱང་སྟོངས་སོ། །དྲ་བ་ཅན་གྱི་འོད་དེ་བཞིན་གཤེགས་པ་ཤཱཀྱ་ཐུབ་པ་དེའི་སངས་རྒྱས་ཀྱི་ཞིང་དུ་སྐྱེས་པ་གང་དག་ཡིན་པ་དེ་དག་མཐོང་བ་དང་ཐོས་པ་ཡང་བྱང་ཆུབ་སེམས་དཔའ་དེ་དག་གི་གཅེས་སྤྲས་བྱེད་པར་ང་སྨྲ་ན། དྲ་བ་ཅན་གྱི་འོད་གང་དག་གིས་དེ་དག་མཐོང་ནས་བཀུར་སྟི་བྱེད་དམ། བླ་མར་བྱེད་དམ། རི་མོར་བྱེད་དམ། མཆོད་པར་བྱེད་དམ། འདྲི་བར་བྱེད་པ་ལྟ་ཅི་སྨོས། དེ་ནས་དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པ་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་བལྟ་བའི་སླད་དུ་འཇིག་རྟེན་གྱི་ཁམས་དེར་མཆི་ཞིང་འཇིག་རྟེན་གྱི་ཁམས་དེ་ཡང་བལྟ་བར་བགྱིའོ། །དེ་སྐད་ཅེས་གསོལ་པ་དང་། དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་ལ་ད་བབ་པར་ཤེས་ན་སོང་ལ་སངས་རྒྱས་ཀྱི་ཞིང་དེར་ཤེས་བཞིན་དུ་ཡང་སྤྱོད་ཅིག །དེ་ཅིའི་ཕྱིར་ཞེ་ན། རིགས་ཀྱི་བུ་འཇིག་རྟེན་གྱི་ཁམས་མི་མཇེད་དེ་ན་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་བསྙེན་པར་དཀའ་བའི་ཕྱིར་རོ། །དེ་ནས་དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ལ་ལག་པ་ལྟ་བུའི་ཨུད་པ་ལ་བྱིན་ཏེ། དྲ་བ་ཅན་གྱི་འོད་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ཁྱོད་ཀྱིས་ལག་པ་ལྟ་བུའི་ཨུད་པ་ལ་འདིས་མཆོད་ཅིག །ངའི་ཚིག་གིས་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་
བཀོད་པ་གཅིག་པ་དེ་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་བསྙུན་གསོལ་ལོ། །ཞེས་དེ་སྐད་ཅེས་གསོལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་བཀོད་པ་གཅིག་པ་དེའི་ཞབས་ལ་མགོ་བོས་ཕྱག་འཚལ་ཏེ་ལན་གསུམ་བསྐོར་བ་བྱས་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་དག་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་ག་ལ་བ་དེར་སོང་སྟེ། སེམས་ཀྱི་སྐད་ཅིག་གིས་འཇིག་རྟེན་གྱི་ཁམས་མི་མཇེད་དེར་འདུག་པར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དེར་སོང་ནས། བཅོམ་ལྡན་འདས་ག་ལ་བ་དེར་ཡང་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་དྲ་བ་ཅན་གྱི་འོད་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ལོ། །བཅོམ་ལྡན་འདས་བདག་དྲ་བ་ཅན་གྱི་འོད་ལགས་སོ། །བདེ་བར་གཤེགས་པ་བདག་དྲ་བ་ཅན་གྱི་འོད་ལགས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ལ་འདི་སྐད་ཅེས་བཀའ་སྩལ་ཏོ། །དྲ་བ་ཅན་གྱི་འོད་ཁྱོད་ཡུན་རིང་དུ་འཚོ་བར་གྱུར་ཅིག །ཁྱོད་བདེ་བ་དང་ནད་མེད་པར་གྱུར་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པ་
བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་བསྙུན་གསོལ་ལོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་བཀོད་པ་གཅིག་པ་དེས་བཅོམ་ལྡན་འདས་ལ་ལག་པ་ལྟ་བུའི་ཨུད་པ་ལ་འདི་ཡང་བསྐུར་ལགས་ན། བཅོམ་ལྡན་འདས་བྱང་ཆུབ་སེམས་དཔའ་དྲ་བ་ཅན་གྱི་འོད་ལས་ལག་པ་ལྟ་བུའི་ཨུད་པ་ལ་བཞེས་སུ་གསོལ། དེ་ནས་བཅོམ་ལྡན་འདས་ཀྱིས་ལག་པ་ལྟ་བུའི་ཨུད་པ་ལ་བཞེས་ནས་བྱང་ཆུབ་སེམས་དཔའ་མ་ཕམ་པ་ལ་བྱིན་ནོ། །དེ་ནས་བྱང་ཆུབ་སེམས་དཔའ་མ་ཕམ་པས་ལག་པ་ལྟ་བུའི་ཨུད་པ་ལ་དེ་ཐོགས་ནས་བྱང་ཆུབ་སེམས་དཔའ་བཟང་སྐྱོང་ལ་སོགས་པ་ལྔ་བརྒྱ་ལ་སྨྲས་པ། རྒན་རབས་དག་ལག་པ་ལྟ་བུའི་ཨུད་པ་ལ་འདི་ནི་དེ་བཞིན་གཤེགས་པས་བྱིན་པའོ། །དེ་ནས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་པོ་དེ་དག་གིས་ལག་པ་ལྟ་བུའི་ཨུད་པ་ལ་དེ་ཐོགས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་དེ་ལྟར་ཡང་དག་པར་ཞུགས་པ་ལགས་ན། ཅི་བདག་ཅག་བྱང་ཆུབ་སེམས་དཔའི་སྤྱད་པ་སྤྱོད་པ་ན་སེམས་ཅན་གང་དག་གིས་མིང་ཐོས་པར་གྱུར་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་ལགས་སམ། བཅོམ་ལྡན་འདས་ལག་པ་ལྟ་བུའི་ཨུད་པ་ལ་འདི་ནི་བྱང་ཆུབ་སེམས་དཔའ་མ་ཕམ་པས་བདག་ཅག་ལ་སྩལ་ལགས་ཏེ། བཅོམ་ལྡན་འདས་བདག་ཅག་གིས་ནི་ལག་པ་ལྟ་བུའི་ཨུད་པ་ལ་འདི་རང་གི་སྨོན་ལམ་གྱི་སྟོབས་དང་། སྤྱོད་པའི་སྟོབས་དང་། བསམ་པའི་སྟོབས་དང་། སེམས་ཅན་ཐམས་ཅད་ཡོངས་སུ་མི་གཏོང་བའི་སྟོབས་ཀྱིས་དེ་བཞིན་གཤེགས་པ་ལ་གསོལ་བ་འདེབས་པའི་སླད་དུ་ལག་པ་ལྟ་བུའི་ཨུད་པ་ལ་དེ་གཏོར་བར་བགྱིའོ། །བཅོམ་ལྡན་འདས་ཤར་ཕྱོགས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཇི་སྙེད་ཅིག་བཞུགས་ཏེ་འཚོ་ཞིང་གཞེས་
པ་དག་དང་། གང་དག་མ་བྱུང་བ་དག་དང་། འབྱུང་བར་འགྱུར་བ་དག་དང་། འབྱུང་བའམ། འཇིག་པ་དེར་ཡང་བཅོམ་ལྡན་འདས་གཏོར་བར་བགྱིའོ། །དེ་བཞིན་དུ་ལྷོ་ཕྱོགས་དང་། དེ་བཞིན་དུ་ནུབ་ཕྱོགས་དང་། དེ་བཞིན་དུ་བྱང་ཕྱོགས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་སྟེང་གི་ཕྱོགས་དང་། དེ་བཞིན་དུ་ཕྱོགས་མཚམས་ཀྱི་འཇིག་རྟེན་གྱི་ཁམས་རྣམས་ན་སངས་རྒྱས་བཅོམ་ལྡན་འདས་ཇི་སྙེད་བྱུང་བ་དང་། འབྱུང་བར་འགྱུར་བའི་འཇིག་རྟེན་གྱི་ཁམས་དེ་དག་ཏུ་ཡང་གཏོར་བར་བགྱིའོ། །བཅོམ་ལྡན་འདས་གང་སུ་དག་གིས་ལག་པ་ལྟ་བུའི་ཨུད་པ་ལ་དེ་མཐོང་བར་གྱུར་པ་དེ་དག་ཐམས་ཅད་ཨུད་པ་ལའི་དྲི་སྣོམ་པར་གྱུར་ཅིག །དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་གྱུར་ཅིག །དེ་བཞིན་དུ་སངས་རྒྱས་ཀྱི་ཞིང་ཐམས་ཅད་དུ་ཡང་མཆི་བར་གྱུར་ཅིག །དེ་དག་གིས་ལག་པ་ལྟ་བུའི་ཨུད་པ་ལ་དེ་གཏོར་ནས་དེ་ནས་དེ་མ་ཐག་ཏུ་བཅོམ་ལྡན་འདས་ཀྱིས་ཕྱག་གཡས་པས་རེག་སྟེ། ལག་པ་ལྟ་བུའི་ཨུད་པ་ལ་དེ་བཅོམ་ལྡན་འདས་ཀྱིས་རེག་ནས་ཀྱང་དེ་ནས་དེ་མ་ཐག་ཏུ་སྐད་ཅིག་དེ་ཉིད་ལ་ཨུད་པ་ལ་དེའི་ནང་ནས་དེ་བཞིན་གཤེགས་པའི་སྐུའི་ཕྱེད་མངོན་པར་བྱུང་ཞིང་ཨུད་པ་ལ་རེ་རེ་ལས་ཀྱང་དེ་བཞིན་གཤེགས་པའི་སྐུའི་ཕྱེད་མངོན་པར་བྱུང་སྟེ། དེ་བཞིན་གཤེགས་པའི་སྐུའི་ཕྱེད་པོ་དེ་དག་གིས་གང་དག་ཆོས་ཐམས་ཅད་སྒྱུ་མ་ལྟ་བུར་མི་ཤེས་ཤིང་མོས་པར་མི་བྱེད་ལ། ཆོས་ཐམས་ཅད་སྒྲིབ་པ་མེད་པ་དང་། ཆོས་ཐམས་ཅད་མཚན་ཉིད་མེད་པར་མི་ཤེས་ཤིང་མོས་པར་མི་བྱེད། ཁོང་དུ་ཆུད་པར་མི་བྱེད་པ་དེ་དག་གི་སྟོན་པ་ནི་དེ་བཞིན་གཤེགས་པ་མ་ཡིན་ཞིང་། དེ་དག་དེ་བཞིན་གཤེགས་པའི་ཉན་ཐོས་དག་ཀྱང་མ་ཡིན་ནོ་ཞེས་དེ་ལྟ་བུའི་ཚིག་དེ་དག་གསུངས་ཏེ། གསུངས་ནས་ཀྱང་བཞུད་དོ། །ཚིགས་སུ་བཅད་པ་འདི་དག་ཀྱང་བཀའ་སྩལ་ཏོ། །སྒྱུ་མ་འདྲ་ཆོས་གཟུང་དུ་མེད་པ་སྟེ། །གཟུང་མིན་ཐམས་ཅད་ཆུ་ཟླ་འདྲ་བ་ཡིན། །སྟོང་པས་སྟོང་པའི་རང་བཞིན་མི་འཛིན་པ། །ཆོས་ཉིད་འདི་
ནི་རྒྱལ་བས་དེ་འདྲར་གསུངས། །མཚན་ཉིད་མེད་ཆོས་རྣམ་དག་མཚན་ཉིད་ཡིན། །མཚན་ཉིད་མེད་པའི་རང་བཞིན་དེ་འདྲ་སྟེ། །བརྟགས་པས་སྟོང་ཞིང་བདག་མེད་ཆོས་རྣམས་ལ། །འཛིན་པ་མེད་ཅིང་རྩོད་པ་མེད་པར་འགྱུར། །གང་དག་དེ་ལྟར་ཆོས་ཉིད་དེ་འདོད་པ། །དེ་དག་སྟོན་པ་རྒྱལ་བ་མཐུ་བོ་ཆེ། །ཕྱོགས་བཅུར་འཇིག་རྟེན་སྤྱོད་པ་ཐམས་ཅད་ལ། །དེ་འདྲ་འདི་ནི་དེ་ཡིས་བྱིན་རླབས་སོ། །དེ་ལྟར་དེ་བཞིན་གཤེགས་པའི་སྤྲུལ་པ་དེ་དག་གིས་ཚིགས་སུ་བཅད་པ་དེ་དག་གསུངས་ནས་ཕྱོགས་བཅུར་བཞུད་དོ།། །།བམ་པོ་གཉིས་པ། དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དྲ་བ་ཅན་གྱི་འོད་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུ་དེ་དག་གིས་ཇི་ཙམ་དུ་སྨོན་ལམ་དག་ཤིན་ཏུ་ཡོངས་སུ་སྦྱངས་པ་དང་སེམས་ཅན་གང་དག་གིས་དེ་དག་གི་སྨོན་ལམ་དེ་དག་ཐོས་པ་དང་། མིང་ཡང་བསྒྲགས་པ་དེ་དག་སྡུག་བསྔལ་མང་པོས་རེག་པའི་སྡུག་བསྔལ་དེ་དག་ལས་ཡོངས་སུ་ཐར་བར་འགྱུར་བ་དང་། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་བ་ནི་ངོ་མཚར་ལགས་སོ། །བཅོམ་ལྡན་འདས་འོན་ཀྱང་བཅོམ་ལྡན་འདས་དང་རིགས་ཀྱི་བུ་དེ་དག་འཇིག་རྟེན་གྱི་ཁམས་འདིར་འབྱུང་བའི་ཆ་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དཔེར་བགྱི་ན་སྐྱེས་པའམ་བུད་མེད་ལ་ལ་ཞིག་རིན་ཐང་མ་མཆིས་པའི་ནོར་བུ་རིན་པོ་ཆེ་དྲི་མ་ཐམས་ཅད་དང་བྲལ་བ། ཕན་པ་དང་བདེ་བ་ཐམས་ཅད་ཉེ་བར་སྒྲུབ་པར་བགྱིད་པའི་ནོར་བུ་རིན་པོ་ཆེ་དེའི་ཡོན་ཏན་བསྒྲགས་པ་ཐོས་ནས་ཡོངས་སུ་བཙལ་བར་སེམས་ཤིང་། ནོར་བུ་རིན་པོ་ཆེ་དེའི་མཚན་མ་དག་ཀྱང་ལེགས་པར་འཛིན་པར་བགྱིད་ལ། ཆབ་ཁུང་སའམ་དེ་ལས་གཞན་མི་གཙང་བ་དང་འདྲེས་པའི་ཕྱོགས་དག་ན་ནོར་བུ་རིན་པོ་ཆེ་ཤིན་ཏུ་ཡོངས་སུ་བྱང་བ་དེ་འདམ་བུ་བསལ་བ་མཐོང་ཞིང་། ལྷག་པར་ཡང་ནོར་བུ་རིན་པོ་ཆེ་དེའི་ཁོར་ཡུག་ན་སྨིག་མ་མཁན་གྱི་རིགས་སམ། གདོལ་པའི་རིགས་སམ། གཡུང་པོའི་རིགས་སམ།
དེ་དག་ལས་གཞན་ཡང་ཚེགས་ཀྱིས་འཚོ་བ་དམའ་བའི་རིགས་དག་མཆིས་པར་གྱུར་ན། དེ་དག་ནི་ནོར་བུ་རིན་པོ་ཆེ་དེའི་མིང་ཡང་མ་འཚལ་ན་ཡོན་ཏན་འཚལ་བར་འགྱུར་བ་ལྟ་སྨོས་ཀྱང་ཅི་འཚལ་ཏེ། དེ་ནི་གནས་མ་མཆིས་ལགས་སོ། །དེ་ནས་མི་དེས་མི་གཙང་བ་བསལ་བའི་ནོར་བུ་རིན་པོ་ཆེ་དེ་མཐོང་ནས་ནོར་བུ་རིན་པོ་ཆེ་དེའི་སྣོད་ནི་མཛེས་པ་མ་ཡིན་ནོ་ཞེས་དེ་སྐད་ཅེས་སྨྲ་བར་བགྱིད་ལ། དེ་ནས་དམའ་བའི་མི་དེ་དག་འདི་སྐད་ཅེས་སྨྲ་བར་བགྱིད་དེ། ཁྱོད་ཀྱིས་གང་གིས་བསྔགས་པ་སྨྲས་པའི་ནོར་བུ་རིན་པོ་ཆེ་དེ་གང་ཡིན་ཞེས་དེ་སྐད་ཅེས་སྨྲས་པ་དང་། མི་དེས་ནོར་བུ་རིན་པོ་ཆེ་དེ་བསྟན་ལ། དེ་སྟོན་པ་ན་མི་བྱིས་པའི་རང་བཞིན་ཅན་དེ་དག་མ་འཚལ་བཞིན་དུ། ཀྱེ་མི་ཁྱོད་ཀྱིས་ནོར་བུ་རིན་པོ་ཆེ་དེའི་ཡོན་ཏན་ཅིའི་ཕྱིར་སྨྲས། ཁྱོད་ཀྱིས་གང་སྨྲས་པའི་ནོར་བུ་རིན་པོ་ཆེ་དེའི་ཡོན་ཏན་དེ་དག་ནི་ཡོད་པ་མ་ཡིན་ནོ། །ཁྱོད་ནི་བརྫུན་དུ་སྨྲ་བ། གཞན་དུ་སྨྲ་བ་སྟེ། ཁྱོད་ཀྱི་ཚིག་དེ་དག་ཡིད་མི་ཆེས་སོ་ཞེས་སྨྲས་ལ། དེའི་ཚེ་མི་དེས་ནོར་བུ་རིན་པོ་ཆེ་དེ་མི་གཙང་བའི་གནས་དེ་ནས་མངོན་པར་བཏེག་ཅིང་བླངས་ནས་མཆིས་ཏེ། དེ་ནས་ནོར་བུ་རིན་པོ་ཆེ་དེ་ཕྱུང་ནས་མི་དེ་མཆིས་མ་ཐག་ཏུ་མི་དབུལ་པོའི་རང་བཞིན་ཅན་དེ་དག་གཅིག་ལ་གཅིག་ཤིན་ཏུ་རབ་ཏུ་རྣམ་པར་འཁྲུག་པར་གྱུར་ནས། དེའི་རྗེས་ལ་གནོད་པ་མང་པོས་ཡོངས་སུ་བསྐོར་བ་དེ་བཞིན་དུ། བཅོམ་ལྡན་འདས་བདག་ཅག་ནི་དགེ་བའི་རྩ་བ་ཆུང་ངུ་དང་ལྡན་པ་རྣམས་ཀྱི་འཇིག་རྟེན་གྱི་ཁམས་མི་མཇེད་དབུལ་པོས་བལྟམ་པར་མཆིས་ལགས་ཏེ། བཅོམ་ལྡན་འདས་ཇི་ལྟར་མི་གཙང་བའི་འདམ་གྱི་སྣོད་དུ་སྩལ་བའི་ནོར་བུ་རིན་པོ་ཆེ་དེ་མཁས་པའི་རང་བཞིན་ཅན་གྱི་མི་དེས་ངོ་འཚལ་བ་དེ་ལྟ་བུར་ནི་བཅོམ་ལྡན་འདས་འཇིག་རྟེན་གྱི་ཁམས་མི་མཇེད་ན་བདག་ཅག་བལྟ་བར་བགྱིའོ། །བཅོམ་ལྡན་འདས་ཇི་ལྟར་བདེ་བ་ཐམས་ཅད་ཉེ་བར་བསྒྲུབ་པར་བགྱིད་པའི་ནོར་བུ་རིན་པོ་ཆེ་དེ་ལེགས་པར་སྦྱངས་ཤིང་རྣམ་པར་དག་པ་དེ་ལྟ་བུར་ནི་བཅོམ་ལྡན་འདས་དེ་བཞིན་གཤེགས་པ་དང་། བྱང་ཆུབ་སེམས་
དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་བལྟ་བར་བགྱིའོ། །བཅོམ་ལྡན་འདས་ཇི་ལྟར་ནོར་བུ་རིན་པོ་ཆེ་དེའི་ཁོར་ཡུག་ན་དམའ་བས་འཚོ་བ་དབུལ་པོས་དམའ་བའི་མི་དེ་དག་གནས་པ་དེ་ལྟ་བུར་ནི་བཅོམ་ལྡན་འདས་འཇིག་རྟེན་གྱི་ཁམས་མི་མཇེད་འདི་ན་དེ་དག་ལས་གཞན་པའི་སེམས་ཅན་རྣམས་བལྟ་བར་བགྱིའོ། །བཅོམ་ལྡན་འདས་ཇི་ལྟར་སྐྱེས་པའམ། བུད་མེད་ཀྱིས་ནོར་བུ་རིན་པོ་ཆེ་དེའི་ཡོན་ཏན་དག་ཐོས་ནས། ནོར་བུ་རིན་པོ་ཆེ་དེ་ཡོངས་སུ་བཙལ་བར་སེམས་ཤིང་། མི་གཙང་བའི་སྣོད་ན་མཆིས་པའི་ནོར་བུ་རིན་པོ་ཆེ་དེ་མཐོང་ནས་ཀྱང་། ནོར་བུ་རིན་པོ་ཆེ་དེའི་སྣོད་དེ་ནི་འཚམ་པ་མ་ཡིན་ནོ་ཞེས་སྨྲ་བར་བགྱིད་པ་དེ་བཞིན་དུ། བཅོམ་ལྡན་འདས་ཕྱོགས་བཅུ་དག་ན་སངས་རྒྱས་བཅོམ་ལྡན་འདས་དང་། བྱང་ཆུབ་སེམས་དཔའ་གང་དག་ལགས་པ་དེ་དག་བཅོམ་ལྡན་འདས་ཀྱིས་སངས་རྒྱས་ཀྱི་ཞིང་དེ་ནི་འཚམ་པ་མ་ཡིན་ནོ་ཞེས་སངས་རྒྱས་བཅོམ་ལྡན་འདས་རྣམས་དང་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་གི་བསྔགས་པ་བརྗོད་ལགས་སོ། །བཅོམ་ལྡན་འདས་དཔེར་བགྱི་ན་སྐྱེས་པའམ། བུད་མེད་ཀྱིས་ནོར་བུ་རིན་པོ་ཆེ་དེའི་ཡོན་ཏན་དག་ཐོས་ནས་ཡོངས་སུ་བཙལ་བར་སེམས་ཤིང་། མི་གཙང་བའི་སྣོད་ན་མཆིས་པ་དེ་ཡང་མཐོང་ནས། སྣོད་དེ་ནི་འཚམ་པ་མ་ཡིན་ནོ་ཞེས་ཚིག་སྨྲ་བར་བགྱིད་པ་དེ་བཞིན་དུ། བཅོམ་ལྡན་འདས་བདག་ཅག་གིས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་གི་ཡོན་ཏན་གྱི་བསྔགས་པ་ཐོས་ནས་བལྟ་བའི་སླད་དུ་བདག་ཅག་འདིར་མཆིས་ཏེ། བཅོམ་ལྡན་འདས་འཇིག་རྟེན་གྱི་ཁམས་འདིར་མཆིས་ནས་བདག་ཅག་གིས་ནི་འཇིག་རྟེན་གྱི་ཁམས་འདི་གནོད་པ་བརྒྱ་ཕྲག་དུ་མས་བལྟམ་ཞིང་སེམས་ཅན་དགེ་བའི་རྩ་བ་ཆུང་ངུ་དང་ལྡན་པ་དག་གིས་བལྟམ་པར་མཐོང་ལགས་སོ། །བཅོམ་ལྡན་འདས་དཔེར་བགྱིད་
ན་འདམ་དུ་སྩལ་བའི་ནོར་བུ་རིན་པོ་ཆེ་དེའི་འོད་དེ་མི་འདོར་བ་དེ་བཞིན་དུ། བཅོམ་ལྡན་འདས་ཕྱོགས་བཅུ་དག་ན་དེ་བཞིན་གཤེགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་དེ་དག་གི་འོད་དེ་མི་འདོར་ལགས་ཏེ། འདིར་ནི་སེམས་ཅན་རྣམས་ཀྱི་བསམ་པ་དང་མོས་པ་ཆུང་བའི་སླད་དུ། བཅོམ་ལྡན་འདས་ཀྱིས་འོད་འདོམ་གང་ཙམ་དུ་བྱིན་གྱིས་རླབ་པར་མཛད་ལགས་སོ། །བཅོམ་ལྡན་འདས་དཔེར་བགྱིད་ན་མི་དེ་ནོར་བུ་རིན་པོ་ཆེ་དེའི་ཡོན་ཏན་དག་སྒྲོགས་པ་ན་མི་དབུལ་བའི་རང་བཞིན་ཅན་དེ་དག་མངོན་པར་ཡིད་མི་ཆེས་པ་དེ་བཞིན་དུ། བཅོམ་ལྡན་འདས་སེམས་ཅན་དེ་དག་ནི་དེ་བཞིན་གཤེགས་པའི་འོད་ཤིན་ཏུ་རྒྱས་པའམ། སྨོན་ལམ་ཆེན་པོའམ། རྣམ་པར་འཕྲུལ་པ་ཆེན་པོའམ། སངས་རྒྱས་ཀྱི་ཡོན་ཏན་དག་ལའང་ཡིད་ཆེས་པར་མི་བགྱིད་ན། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གི་ལ་ལྟ་སྨོས་ཀྱང་ཅི་འཚལ། བཅོམ་ལྡན་འདས་དཔེར་བགྱི་ན་མི་དེས་མི་གཙང་བའི་སྣོད་དེ་ནས་ནོར་བུ་རིན་པོ་ཆེ་དེ་བླངས་ནས་མཆིས་ལ། དེ་མཆིས་མ་ཐག་ཏུ་ཡང་སེམས་ཅན་དེ་དག་གནོད་པ་རྣམ་པ་དུ་མས་ཤས་ཆེར་ཡོངས་སུ་བསྐོར་བ་དེ་བཞིན་དུ། བཅོམ་ལྡན་འདས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་ཀྱང་འཇིག་རྟེན་གྱི་ཁམས་གཞན་དུ་མཆིས་ནས། འདི་ལྟ་བུའི་མདོ་སྡེ་འཛིན་པ། བྱང་ཆུབ་སེམས་དཔའ་ཡང་དག་པར་འཛིན་དུ་སྩོལ་བ་རྣམས་གཅིག་ལ་གཅིག་རབ་ཏུ་རྣམ་པར་འཁྲུག་པར་འགྱུར་ཞིང་། ཆོས་ཀྱི་སྒྲ་ཡང་འབྱུང་བར་མི་འགྱུར་ལ། ཆོས་མ་ལགས་པ་ཉིད་ཀྱི་སྒྲ་འབྱུང་བ་ཁོ་ནར་བས་སོ་ཞེས་དེ་སྐད་ཅེས་གསོལ་པ་ལགས་སོ། །དེ་ཅིའི་སླད་དུ་ཞེ་ན། འདི་ལྟར་སེམས་ཅན་དེ་དག་ནི་ཆོས་མ་ལགས་པ་ལ་གནས་པར་འགྱུར་ཞིང་ཆོས་མ་ལགས་པས་འཚོ་བ་ཉིད་ཡང་དག་པར་བླངས་ནས་གནས་པར་འགྱུར་ལ། གཅིག་ལ་གཅིག་འཐབ་མོ་དང་། སུན་འབྱིན་པ་དང་། མཚང་འདྲུ་
བ་དང་སྨོད་པ་ལ་འཇུག་པར་བགྱིད་པར་འགྱུར་ཏེ། དེ་དག་གཅིག་ལ་གཅིག་དགེ་བའི་ཆོས་ལས་ཉམས་ནས་སྡུག་བསྔལ་ཐོབ་པར་འགྱུར་ཞིང་། དེ་དག་ཆོས་སྩོགས་པ་དང་། དགེ་བ་སྩོགས་པ་ལྷུར་ལེན་པར་མི་འགྱུར་བའི་སླད་དུའོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་དོན་འཚལ་བ། དོན་ཡོངས་སུ་ཚོལ་བར་འཚལ་བ། སངས་རྒྱས་ཀྱི་བྱང་ཆུབ་ཡང་དག་པར་སྒྲུབ་པར་འཚལ་བ་དང་། ཉན་ཐོས་ཀྱི་ཐེག་པ་པས་ཀྱང་འཇིག་རྟེན་གྱི་ཁམས་འདིར་སྐྱེ་བར་མི་བགྱི་ན། བྱང་ཆུབ་སེམས་དཔའི་ཐེག་པ་པས་ལྟ་སྨོས་ཀྱང་ཅི་འཚལ། དེ་ཅིའི་སླད་དུ་ཞེ་ན། བཅོམ་ལྡན་འདས་དཔེར་བགྱི་ན་སེམས་ཅན་དམྱལ་བ་ཆེན་པོ་མནར་མེད་པ་དང་། ཡང་སོས་དང་། ཐིག་ནག་དང་། ཚ་བ་དང་། རབ་ཏུ་ཚ་བ་དང་། དེ་དག་ལས་གཞན་པ་སེམས་ཅན་དམྱལ་བ་ཆེན་པོ་དག་ཏུ་སེམས་ཅན་གང་དག་སྐྱེས་པ་དེ་དག་ལ་སྐད་ཅིག་ཐང་ཅིག་ཡུད་ཙམ་ཡང་བདེ་བ་མི་དམིགས་པ་དེ་བཞིན་དུ། བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པ་དེའི་འཇིག་རྟེན་གྱི་ཁམས་རིན་པོ་ཆེའི་གདུགས་གཅིག་པ་ན་བྱང་ཆུབ་སེམས་དཔའ་གང་དག་མཆིས་པ་དེ་དག་གིས་འཇིག་རྟེན་གྱི་ཁམས་མི་མཇེད་འདི་ན་སེམས་ཅན་མནར་མེད་པར་སྐྱེས་པ་རྣམས་དང་འདྲ་བར་བྱང་ཆུབ་སེམས་དཔའ་སེམས་དཔའ་ཆེན་པོ་འདིར་སྐྱེས་པ་དེ་དག་ལ་ཡང་བདེ་བ་ཅི་ཡང་ཡང་དག་པར་རྗེས་སུ་མ་མཐོང་ལགས་སོ། །སངས་རྒྱས་ཀྱི་ཞིང་བདེ་བ་གཅིག་པུ་མཆོག་ཏུ་གྱུར་པ་དང་། འཇིག་རྟེན་གྱི་ཁམས་དེ་ན་སེམས་ཅན་དེ་དག་ནི་རང་བཞིན་གྱིས་བདེ་བ་ལགས་སོ། །བཅོམ་ལྡན་འདས་བདག་ནི་སེམས་ཅན་འདིར་སྐྱེས་པ་རྣམས་ཀྱིས་དེ་མངོན་པར་ཡིད་ཆེས་པར་དཀའ་བར་འགྱུར་བར་སྨྲ་ལགས་ཏེ་བཅོམ་ལྡན་འདས་འོན་ཀྱང་ཆོས་ཀྱི་ཐེ་ཚོམ་གཅད་པ་དང་། ཆོས་ཀྱི་ཕྱག་རྒྱའི་སྒོ་མཉན་པའི་སླད་དུ་གང་གི་དོན་དུ་བདག་འདིར་མཆིས་པ་དེ་བཅོམ་ལྡན་འདས་ལས་བདག་ཅག་ཐོས་པར་འཚལ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདེ་བ་
དང་སྡུག་བསྔལ་དེ་དག་ཐམས་ཅད་མི་རྟག་པ་ལགས་པའི་སླད་དུའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལས་གང་ལ་བདེ་བ་མ་མཆིས་པ་དང་། སྡུག་བསྔལ་བ་མ་མཆིས་པ་དང་། རྟག་པ་མ་མཆིས་པ་དང་། མི་རྟག་པ་མ་མཆིས་པ་དང་། རྟོག་པ་མ་མཆིས་པ་དང་། རྣམ་པར་རྟོག་པ་མ་མཆིས་པ་དང་། དངོས་པོ་མ་མཆིས་པ་དང་། དངོས་པོ་མ་མཆིས་པ་མ་མཆིས་པ་དང་། འདུས་བྱས་མ་མཆིས་པ་དང་། འདུས་མ་བྱས་མ་མཆིས་པ་དང་། གདགས་པ་མ་མཆིས་པ་དང་། གདགས་པ་མ་མཆིས་པ་མ་མཆིས་པ་དང་། འཇིག་རྟེན་པ་མ་མཆིས་པ་དང་། འཇིག་རྟེན་ལས་འདས་པ་མ་མཆིས་པ་དང་། ཟག་པ་དང་བཅས་པ་མ་མཆིས་པ་དང་། ཟག་པ་མ་མཆིས་པ་མ་མཆིས་པ་དང་། བདེན་པ་མ་མཆིས་པ་དང་། བརྫུན་པ་མ་མཆིས་པ་དང་། བྱང་ཆུབ་མ་མཆིས་པ་དང་། བྱང་ཆུབ་ཀྱི་ཡན་ལག་རྣམས་མ་མཆིས་པ་དང་། སྟོབས་རྣམས་མ་མཆིས་པ་དང་། སྣང་བ་མ་མཆིས་པ་དང་། མུན་པ་མ་མཆིས་པ་དང་། རྣམ་པར་རིག་པ་མ་མཆིས་པ་དང་། རྣམ་པར་རིག་པ་མ་ལགས་པ་མ་མཆིས་པ་དང་། འབྲས་བུ་མ་མཆིས་པ་དང་། འབྲས་བུ་མ་ལགས་པ་མ་མཆིས་པ་དང་། ལམ་མ་མཆིས་པ་དང་། ལམ་མ་ལགས་པ་མ་མཆིས་པ་དང་། འཇུག་པ་མ་མཆིས་པ་དང་། མཐར་ཐུག་པ་མ་མཆིས་པ་དང་། འཇིག་རྟེན་མ་མཆིས་པ་དང་། འཇིག་རྟེན་ནས་ངེས་པར་འབྱུང་བ་མ་མཆིས་པ་རྣམ་པ་དེ་ལྟ་བུའི་ཆོས་ཐོས་པར་འཚལ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བསོད་ནམས་ཀྱི་ཚོགས་ལས་ཡང་དག་པར་བྱུང་བ། ཀུན་ཏུ་རྟོག་པ་ལས་བྱུང་བའི་བདེ་བ་དེ་དག་དང་གཞན་ཐམས་ཅད་འཇིག་རྟེན་ལ་བསྟན་པར་བགྱི་བའི་སླད་དུའོ། །བཅོམ་ལྡན་འདས་སངས་རྒྱས་ཀྱི་ཆོས་རྣམས་ནི་བསྟན་དུ་མི་རུང་ལགས་ཏེ། བཅོམ་ལྡན་འདས་དེ་ལ་སྟོབས་རྣམས་མ་མཆིས། མི་འཇིགས་པ་རྣམས་མ་མཆིས། རྫུ་འཕྲུལ་མ་མཆིས། རྫུ་འཕྲུལ་གྱི་
ཆོ་འཕྲུལ་མ་མཆིས། ཀུན་བརྗོད་པ་མ་མཆིས། ཀུན་བརྗོད་པའི་ཆོ་འཕྲུལ་མ་མཆིས། རྗེས་སུ་བསྟན་པ་མ་མཆིས། རྗེས་སུ་བསྟན་པའི་ཆོ་འཕྲུལ་མ་མཆིས་ལགས་སོ། །མི་འཇིགས་པ་རྣམས་མ་མཆིས་ཤིང་སྟོབས་རྣམས་མ་མཆིས་ལ། བདེ་བ་མ་མཆིས་ཤིང་སྡུག་བསྔལ་མ་མཆིས་ལགས་ཏེ། དེ་དག་ཐམས་ཅད་ནི་རློམ་སེམས་ལགས་ཤིང་། དེ་དག་ཐམས་ཅད་ནི་གཡོ་བ་ལགས་པའི་སླད་དུའོ། །བཅོམ་ལྡན་འདས་དེ་བཞིན་ཉིད་རྗེས་སུ་ཐོབ་པ་དང་། རྗེས་སུ་མ་ཐོབ་པའི་སླད་དུ་དེ་བཞིན་གཤེགས་པ་ནི་དེ་བཞིན་གཤེགས་པ་ཞེས་བགྱི་བའི་གྲངས་སུ་མཆི་བ་མ་ལགས་ཏེ། འདི་ལྟར་དེ་དག་ཐམས་ཅད་ནི་གཡོ་བ་དང་། རློམ་སེམས་དང་། གཡོས་པ་དང་། སྤྲོས་པ་ལགས་པའི་སླད་དུའོ། །དེ་བཞིན་གཤེགས་པས་ནི་བདེན་པའམ། བརྫུན་པའམ། འདུས་བྱས་སམ། འདུས་མ་བྱས་སམ། ཟག་པ་དང་བཅས་པའམ། ཟག་པ་མ་མཆིས་པའམ། ཁ་ན་མ་ཐོ་བ་དང་བཅས་པའམ། ཁ་ན་མ་ཐོ་བ་མ་མཆིས་པའམ། འཇིག་རྟེན་པའམ། འཇིག་རྟེན་ལས་འདས་པའམ། ཚུལ་ཁྲིམས་སམ། འཆལ་པའི་ཚུལ་ཁྲིམས་སམ། སྟོབས་རྣམས་སམ། སྟོབས་མ་མཆིས་པའམ། མི་འཇིགས་པའམ། མི་འཇིགས་པ་མ་མཆིས་པའམ། སྦྱིན་གནས་སམ། སྦྱིན་གནས་མ་ལགས་པའམ། དེ་བཞིན་གཤེགས་པའམ། སངས་རྒྱས་སམ། བྱང་ཆུབ་སེམས་དཔའ་འམ། ཉན་ཐོས་སམ། རང་སངས་རྒྱས་སམ། སྨོན་ལམ་རྣམས་སམ། བྱིན་གྱི་རླབས་རྣམས་ཀྱི་རློམ་སེམས་ཐམས་ཅད་ཡང་དག་པར་བཅོམ་ཞིང་ལམ་ཡོངས་སུ་མཁྱེན་ཏེ། དེ་བས་ན་དེ་བཞིན་གཤེགས་པ་ནི་བག་ཚ་བ་མི་མངའ་བར་སེང་གེ་ལྟ་བུ་དང་། གླང་པོ་ཆེ་ལྟ་བུའི་སྒྲ་སྒྲོགས་པར་མཛད་ལགས་སོ། །དེ་བཞིན་གཤེགས་པ་ནི་བཞེད་ན་མི་འཐུན་པ་རྣམས་ལ་མི་འཐུན་པའི་འདུ་ཤེས་ཅན་དུ་གནས་པར་མཛད། འཐུན་པ་རྣམས་ལ་འཐུན་པའི་འདུ་ཤེས་ཅན་དུ་གནས་པར་མཛད་དོ། །དེ་བཞིན་གཤེགས་པ་ནི་བཞེད་ན་
དྲན་པ་དང་ལྡན་ཞིང་མཁྱེན་བཞིན་དུ་དེ་གཉི་གས་ཀྱང་བཏང་སྙོམས་པར་གནས་པར་མཛད་དོ། །བཅོམ་ལྡན་འདས་དེ་བཞིན་གཤེགས་པའི་གནས་པ་དེ་དག་ནི་སངས་རྒྱས་ཀྱི་གནས་པ་དག་དང་། རང་བྱུང་གི་གནས་པ་དག་དང་། ཉན་ཐོས་དང་། རང་སངས་རྒྱས་རྣམས་དང་། ཡང་ཐུན་མོང་མ་ལགས་པའི་གནས་པ་དག་ལགས་ན། དེ་དག་ལས་གཞན་པའི་སེམས་ཅན་ཐ་ཆད་རྣམས་དང་ཐུན་མོང་མ་ལགས་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཅིའི་སླད་དུ་ཐུན་མོང་མ་ལགས་ཤེ་ན། དེ་ལས་གཞན་པའི་སེམས་ཅན་ཐ་ཆད་ཀྱིས་དེ་ལྟ་བུའི་གནས་པ་དེ་དག་དང་། དེ་སྙེད་ཀྱི་གནས་པ་དེ་དག་དང་། ཡུན་ཇི་སྲིད་ནས་གནས་པ་དེ་དག་དང་། སྦྱོར་བ་དེ་ལྟ་བུའི་གནས་པ་དེ་དག་དང་། བདེ་བ་དེ་ལྟ་བུའི་གནས་པ་དེ་དག་འཚལ་བར་རྔོ་མི་ཐོག་ཅིང་། བཅོམ་ལྡན་འདས་དེ་བཞིན་གཤེགས་པ་དང་བྲལ་བའི་སེམས་ཅན་རྣམས་ཀྱི་གནས་དེ་དག་འཚལ་བར་རྔོ་མི་ཐོག་པའི་སླད་དུའོ། །བཅོམ་ལྡན་འདས་དེ་དག་ནི་སེམས་ཅན་གཞན་དག་གི་སྤྱོད་ཡུལ་མ་ལགས་ཤིང་། དེ་བཞིན་གཤེགས་པའི་གནས་པ་དེ་ལྟ་བུ་དེ་དག་ནི་ཉན་ཐོས་དང་རང་སངས་རྒྱས་ཐམས་ཅད་ཀྱི་སྤྱོད་ཡུལ་མ་ལགས་ཏེ། བཅོམ་ལྡན་འདས་སྤྱོད་ཡུལ་མ་ལགས་ཞེས་བགྱི་བ་ནི་སྤྱོད་པ་མ་མཆིས་ཤིང་། རྣམ་པར་སྤྱོད་པ་མ་མཆིས་པ་སྟེ། དེས་ན་སྤྱོད་ཡུལ་མ་ལགས་ཞེས་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ལ་ཉན་ཐོས་དག་གམ། རང་སངས་རྒྱས་དག་གི་སྤྱོད་པ་མ་མཆིས་པའི་སླད་དུའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གནས་པ་དེ་མཐའ་ཡས་པའི་སླད་དུའོ། །བཅོམ་ལྡན་འདས་ཅིའི་སླད་དུ་གནས་པ་མཐའ་ཡས་པ་ལགས་ཤེ་ན། བཅོམ་ལྡན་འདས་དེ་བཞིན་གཤེགས་པ་དག་གི་མོས་པ་ནི་མཐའ་ཡས་ཏེ། གང་གིས་ཀྱང་འཚལ་བར་རྔོ་མི་ཐོག་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་གནས་པ་དེ་ནི་ཡི་གེ་མ་མཆིས་པ་ལགས་ཏེ། ཡི་གེ་མ་མཆིས་པ་ཞེས་བགྱི་བ་ནི་བརྗོད་དུ་མ་མཆིས་པ་ལགས་ལ། ཡི་གེ་
ནི་བརྗོད་པ་ཁོ་ན་ལགས་པས་དེའི་སླད་དུ་བཅོམ་ལྡན་འདས་དེ་ནི་རང་བྱུང་གི་གནས་པ་མ་ལགས་སོ། །བཅོམ་ལྡན་འདས་གང་དག་གནས་པ་དེ་ལ་རྣམ་པར་ལྟ་བར་མི་འགྱུར་ཞིང་རབ་ཏུ་འཚལ་བར་མི་འགྱུར་བའི་སེམས་ཅན་དེ་དག་འཇིག་རྟེན་གྱི་ཁམས་གཞན་ནས་ཤི་འཕོས་པ་ལགས་སོ། །གང་དག་གནས་པ་དེ་གློ་བར་ཆུད་པར་མི་འགྱུར་བ་དེ་དག་གིས་ནི་གནོད་པ་ཆེན་པོ་དང་ལྡན་པར་འཚལ་བར་བགྱིའོ། །བཅོམ་ལྡན་འདས་དེ་བཞིན་གཤེགས་པའི་གནས་པ་དེ་ནི་བཅོམ་ལྡན་འདས་དོན་གྱི་སྒོ་དང་། ཆོས་ཀྱི་སྒོ་དེ་ལགས་ཏེ། འཁོར་སྒོ་དྲུག་ཁྲི་བརྒྱད་སྟོང་དང་ལྡན་པ་ལགས་སོ། །དེ་བཞིན་གཤེགས་པ་རིན་པོ་ཆེའི་བཀོད་པ་གཅིག་པའི་བྱང་ཆུབ་ནི་ནམ་མཁའ་ལྟ་བུར་ཚད་མ་མཆིས་ཤིང་། བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་སྒོ་གཅིག་པའི་ཚད་ལས་རྗེས་སུ་ཐོབ་པ་ལགས་སོ། །སྒོའི་ཚིག་འདི་བསྟན་ཅིང་བཤད་པ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བདུན་ཁྲི་བདུན་སྟོང་གིས་ནི་སྒྲིབ་པ་མེད་པའི་ཆོས་ཀྱི་སྒོ་རྗེས་སུ་ཐོབ་སྟེ། འདི་ལྟ་སྟེ། དེ་བཞིན་གཤེགས་པའི་གནས་པ་དེ་ཉིད་དོ། །དེ་དག་ཐམས་ཅད་ཀྱིས་བདག་ཅག་གིས་དེང་བྱང་ཆུབ་ཐོབ་པོ། །བདག་ཅག་གིས་དེང་བྱང་ཆུབ་ཐོབ་པོ་ཞེས་བྱ་བའི་ཚིག་ཀྱང་སྨྲས་སོ། །སྲོག་ཆགས་བྱེ་བ་ཁྲག་ཁྲིག་ཕྲག་དྲུག་ཅུ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེས་ཏེ། བཅོམ་ལྡན་འདས་ཀྱིས་དེ་དག་སེམས་དང་པོ་བསྐྱེད་པ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །སྲོག་ཆགས་བྱེ་བ་ཁྲག་ཁྲིག་ས་ཡ་ཕྲག་བརྒྱད་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་སོ། །དགེ་སློང་སུམ་སྟོང་ནི་ལེན་པ་མེད་པར་ཟག་པ་རྣམས་ལས་སེམས་རྣམ་པར་གྲོལ་ལོ། །དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དེ། བཅོམ་ལྡན་འདས་ཀྱིས་འཛུམ་པ་མཛད་ནས་ཀྱང་། དེ་ནས་དེ་མ་ཐག་ཏུ་དེའི་ཚེ་འཇིག་རྟེན་དུ་འོད་ཆེན་པོ་བྱུང་བར་གྱུར་ཅིང་། ས་ཆེན་པོ་ཡང་གཡོས་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོས་ཆོས་
གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འཛུམ་པ་མཛད་པ་དང་། འཇིག་རྟེན་དུ་སྣང་བ་ཆེན་པོ་བྱུང་བ་དང་། འཇིག་རྟེན་དུ་ས་ཆེན་པོ་གཡོས་པའི་རྒྱུ་ནི་གང་ལགས། རྐྱེན་ནི་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་ཆོས་ཀྱི་སྒོ་དེ་བསྟན་ཅིང་བཤད་པ་ན། བྱང་ཆུབ་སེམས་དཔའ་བདུན་ཁྲི་བདུན་སྟོང་གིས་སྒྲིབ་པ་མེད་པའི་ཆོས་ཀྱི་ཕྱག་རྒྱའི་སྒོ་ཐོབ་པར་གྱུར་ཅིང་། ཀུན་དགའ་བོ་བྱང་ཆུབ་སེམས་དཔའ་དྲ་བ་ཅན་གྱི་འོད་ཀྱིས་ཆོས་ཀྱི་སྒོའི་ཚིག་བསྟན་པ་དེ་ནི་ནམ་མཁས་ཡོངས་སུ་ཟིན་པའི་ས་ཕྱོགས་དེ་ཉིད་དུ་སངས་རྒྱས་བརྒྱད་སྟོང་ལས་བླངས་ཏེ། བླངས་ནས་ཀྱང་དེའི་རྗེས་ལ་བྱང་ཆུབ་སེམས་དཔའ་དྲ་བ་ཅན་གྱི་འོད་སྒྲིབ་པ་མེད་པའི་ཆོས་ཀྱི་སྒོས་ངེས་པར་བྱུང་བ་དང་སངས་རྒྱས་ཀྱི་ཞིང་ནས་སངས་རྒྱས་ཀྱི་ཞིང་དུ་འགྲོ་བ་ལ་མཁས་པར་གྱུར་པའི་ཕྱིར་རོ། །ཡང་དེའི་ཚེ་ཤར་ཕྱོགས་སུ་སངས་རྒྱས་ཀྱི་ཞིང་གྲངས་མེད་པ་བདུན་ཅུ་རྩ་བརྒྱད་འདས་པ་ན་འཇིག་རྟེན་གྱི་ཁམས་རིན་པོ་ཆེ་བརྩེགས་པ་གཅིག་པ་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མཐའ་ཡས་ཁྱུ་མཆོག་ཅེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ་འཁོར་འབུམ་ཕྲག་དུ་མ་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེའི་རྒྱལ་ཚབ་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་ཅེས་བྱ་བ་དེ་འཁོར་དེར་འདུས་པར་གྱུར་ཏེ་འདུག་ནས། དེས་གསུང་བསལ་བའི་སྒྲ་དེ་ཐོས་ཏེ། དེ་བཞིན་གཤེགས་པ་ཤཱཀྱ་ཐུབ་པའི་འོད་དེ་ཡང་མཐོང་ནས་དེ་བཞིན་གཤེགས་པ་རིན་ཆེན་མཐའ་ཡས་ཁྱུ་མཆོག་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསུང་བསལ་བའི་སྒྲ་དང་འོད་གདའ་བ་དེ་སུའི་ལགས། དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་
པའི་སངས་རྒྱས་རིན་ཆེན་མཐའ་ཡས་ཁྱུ་མཆོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་དེ་ལ་བཀའ་སྩལ་པ། དོན་ཡོད་ཁྱུ་མཆོག་རྣམ་པར་གནོན་ནུབ་ཕྱོགས་སུ་སངས་རྒྱས་ཀྱི་ཞིང་འདི་ནས་སངས་རྒྱས་ཀྱི་ཞིང་གྲངས་མེད་པ་བདུན་ཅུ་རྩ་བརྒྱད་འདས་པ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བ་ད་ལྟར་བཞུགས་ཏེ་འཚོ་ཞིང་གཞེས་ལ། འདི་ལྟ་སྟེ། སེམས་པ་དཔེ་མེད་པའི་བྱང་ཆུབ་སེམས་དཔའ་རྣམས་ལས་བརྩམས་ནས་བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ། སེམས་ཅན་ཐམས་ཅད་ཀྱི་ཐེ་ཚོམ་གཅོད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མཐའ་ཡས་ཁྱུ་མཆོག་ལ་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བ་དང་། སེམས་པ་དཔེ་མེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་དག་བལྟ་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་དེ་བཞིན་གཤེགས་པ་རིན་ཆེན་མཐའ་ཡས་ཁྱུ་མཆོག་གིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱོད་དེའི་དུས་ལ་ད་བབ་པར་ཤེས་ན་རིགས་ཀྱི་བུ་ཁྱོད་སོང་ལ་སངས་རྒྱས་ཀྱི་ཞིང་དེར་ཤེས་བཞིན་དུ་གནས་པར་ཡང་བྱོས་ཤིག །དེ་ཅིའི་ཕྱིར་ཞེ་ན། དོན་ཡོད་ཁྱུ་མཆོག་རྣམ་པར་གནོན་འཇིག་རྟེན་གྱི་ཁམས་མི་མཇེད་དེར་སྐྱེས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་གང་དག་སྐྱེས་པ་དེ་དག་བསྙེན་པར་
དཀའ་བའི་ཕྱིར་རོ། །ངའི་ཚིག་གིས་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་བསྙུན་གསོལ་ལ། དེ་བཞིན་གཤེགས་པ་དེ་ལ་ལག་པ་ལྟ་བུའི་པད་མ་འདི་ཡང་ཕུལ་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་སྟན་ལས་ལངས་ནས། བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ། བསྐོར་བ་ཡང་བྱས་ནས་བྱང་ཆུབ་སེམས་དཔའ་བདུན་ཁྲི་བརྒྱད་སྟོང་དང་ལྷན་ཅིག་ཏུ་འཇིག་རྟེན་གྱི་ཁམས་མི་མཇེད་དུ་འོངས་ཏེ། དེ་འོངས་ནས་དེ་མ་ཐག་ཏུ་འཇིག་རྟེན་གྱི་ཁམས་མི་མཇེད་ན་མེ་ཏོག་གི་ཤིང་ངམ། འབྲས་བུའི་ཤིང་ཇི་སྙེད་ཡོད་པ་དེ་དག་ཐམས་ཅད་ཀྱིས་དེའི་ཚེ་དུས་མ་ཡིན་པའི་མེ་ཏོག་དག་དང་། དུས་མ་ཡིན་པའི་འབྲས་བུ་དག་གཏོར་ཏོ། །མེ་ཏོག་གི་ཆར་པ་ཡང་བབ་པོ། །སྤོས་ཀྱི་ཆར་པ་རྣམ་པ་སྣ་ཚོགས་དག་ཀྱང་བབ་པོ། །རོལ་མོའི་སྒྲ་རྣམ་པ་སྣ་ཚོགས་དག་ཀྱང་གྲག་གོ །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། ལག་པ་གཉི་གས་བཅོམ་ལྡན་འདས་ཀྱི་ཞབས་ལ་བཟུང་ངོ་། །གདོང་གིས་ཀྱང་ཡོངས་སུ་གཏུགས་ཏེ། ཚིག་དེ་སྐད་ཅེས་ཀྱང་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་དོན་ཡོད་ཁྱུ་མཆོག་རྣམ་པར་གནོན་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ལོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་ལ་འདི་སྐད་ཅེས་བཀའ་སྩལ་ཏོ། །དོན་ཡོད་ཁྱུ་མཆོག་རྣམ་པར་གནོན་བཀུར་སྟི་བྱས་པ་དང་། མཆོད་པ་དང་། རི་མོ་བྱས་པར་གྱུར་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་ས་ལས་ལངས་
ཏེ་སྤྱན་སྔར་འདུག་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་ཆེན་མཐའ་ཡས་ཁྱུ་མཆོག་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ། ཞེས་བསྙུན་གསོལ་ཞིང་། བཅོམ་ལྡན་འདས་ལ་བཅོམ་ལྡན་འདས་ཀྱིས་ལག་པ་ལྟ་བུའི་པད་མ་བསྐུར་བ་ལགས་ན། བཅོམ་ལྡན་འདས་ཀྱིས་ཐུགས་བརྩེ་བ་ཉེ་བར་བཟུང་སྟེ། བྱང་ཆུབ་སེམས་དཔའ་དོན་ཡོད་ཁྱུ་མཆོག་རྣམ་པར་གནོན་ལས་བཞེས་སུ་གསོལ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་དོན་ཡོད་ཁྱུ་མཆོག་རྣམ་པར་གནོན་ལས་ལག་པ་ལྟ་བུའི་པད་མ་དེ་བཞེས་ཏེ། བཞེས་ནས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་དོན་ཡོད་ཁྱུ་མཆོག་རྣམ་པར་གནོན་ལ་བཀའ་སྩལ་པ། དོན་ཡོད་ཁྱུ་མཆོག་རྣམ་པར་གནོན་ཅི་བཅོམ་ལྡན་འདས་དེ་བཞིན་གཤེགས་པ་རིན་ཆེན་མཐའ་ཡས་ཁྱུ་མཆོག་གནོད་པ་ཆུང་ངམ། ཉམ་ང་བ་ཉུང་ངམ། འགྱུར་བ་མི་མངའ་འམ། གསོལ་པ། བཅོམ་ལྡན་འདས་དེ་བཞིན་གཤེགས་པ་རིན་ཆེན་མཐའ་ཡས་ཁྱུ་མཆོག་དེ་གནོད་པ་ཆུང་ཞིང་སྟོབས་དང་ལྡན་ལ་འགྱུར་བ་མི་མངའ་སྟེ། སངས་རྒྱས་ཀྱི་ཞིང་དེ་ན་བདེ་བར་རེག་པ་ལ་གནས་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པ་ལ་ལག་པ་ལྟ་བུའི་པད་མ་དེ་བྱིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མ་ཕམ་པས་ལག་པ་ལྟ་བུའི་པད་མ་དེ་བླངས་ནས་ཚིག་གསོལ་པ། བཅོམ་ལྡན་འདས་དགེ་བའི་རྩ་བ་འདིས་རིགས་ཀྱི་བུ་དང་། རིགས་ཀྱི་བུ་མོ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྐྱེད་པ་དེ་དག་གི་སངས་རྒྱས་ཀྱི་ཞིང་ཡོངས་སུ་དག་པར་གྱུར་ཅིག །སེམས་ཅན་ཡོངས་སུ་སྨིན་པར་གྱུར་ཅིག །དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་
ཡོངས་སུ་མ་སྨིན་པ་རྣམས་ལ་ཆོས་བསྟན་པ་དང་། སེམས་ཅན་དགེ་བའི་རྩ་བ་མ་སྐྱེད་པ་རྣམས་དང་། དགེ་བའི་རྩ་བ་ཆུང་ངུ་རྣམས་དང་། དམན་པ་ལ་མོས་པ་རྣམས་ལ་ཆོས་བསྟན་པ་དཀའ་བའི་སླད་དུ་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས་ལག་པ་ལྟ་བུའི་པད་མ་འདི་ལས་འཇིག་རྟེན་གྱི་ཁམས་ཇི་སྙེད་མཐོང་བར་འཚལ་བ་དེ་སྙེད་ཀྱང་མཐོང་བ་དང་། ལག་པ་ལྟ་བུའི་པད་མ་འདི་ཉིད་ལས་བཅོམ་ལྡན་འདས་དེ་བཞིན་གཤེགས་པ་རིན་ཆེན་མཐའ་ཡས་ཁྱུ་མཆོག་དེའི་འཇིག་རྟེན་གྱི་ཁམས་རིན་པོ་ཆེའི་ཕུང་པོ་ཞེས་བགྱི་བ་གང་ལགས་པ་དེ་ཡང་མཐོང་བ་དང་། འཇིག་རྟེན་གྱི་ཁམས་དེ་ན་བྱང་ཆུབ་སེམས་དཔའ་གང་དག་ཐེག་པ་ལ་ཡང་དག་པར་ཞུགས་པ་དེ་དག་ཀྱང་མཐོང་བ་དང་། དེ་ན་གང་ཉན་ཐོས་ཕུན་སུམ་ཚོགས་པ་ཕལ་ཆེར་རིག་པ་གསུམ་དང་ལྡན་པ་དང་། རིག་པ་དྲུག་དང་ལྡན་པ་དེ་དག་ཀྱང་མཐོང་བར་འགྱུར་བའི་སླད་དུའོ། །བཅོམ་ལྡན་འདས་དེ་བཞིན་གཤེགས་པ་དེའི་སངས་རྒྱས་ཀྱི་ཞིང་དེར་པད་མ་དེ་དག་ལས་ཀྱི་རྣམ་པར་སྨིན་པ་ཆེན་པོས་མངོན་པར་གྲུབ་པ་ལགས་ཏེ། བཅོམ་ལྡན་འདས་དེ་ལྟ་ལགས་པས་ན་དགེ་བའི་རྩ་བ་དེ་ནི་བྱང་ཆུབ་སེམས་དཔའ་དག་ཆོས་ཐམས་ཅད་ལ་སྒྲིབ་པ་མ་མཆིས་པར་བགྱི་བའི་སླད་དུ་ཡོངས་སུ་བསྔོ་བར་བགྱིའོ། །བཅོམ་ལྡན་འདས་དགེ་བའི་རྩ་བ་དེ་ནི་བྱང་ཆུབ་སེམས་དཔའ་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་མ་བསྐྱེད་པ་དེ་དག་ཀྱང་བྱང་ཆུབ་ཏུ་སེམས་བསྐྱེད་པའི་སླད་དུ་ཡོངས་སུ་བསྔོ་བར་བགྱིའོ། །དགེ་བའི་རྩ་བ་དེ་ཡང་ཇི་ལྟར་དེ་བཞིན་གཤེགས་པས་ཆོས་ཐམས་ཅད་ཀྱི་དེ་བཞིན་ཉིད་མངོན་པར་རྫོགས་པར་སངས་རྒྱས་པ་དང་། འཁྲུག་པ་མ་མཆིས་པའི་དེ་བཞིན་ཉིད་མངོན་པར་རྫོགས་པར་སངས་རྒྱས་པར་དེ་ལྟར་ཡོངས་སུ་བསྔོ་བར་བགྱིའོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཁྱོད་ཀྱིས་བྱམས་པས་གང་སྨྲས་པ་ཤེས་སམ། དེ་བཞིན་གཤེགས་པས་མངོན་པར་རྫོགས་པར་སངས་རྒྱས་
པའི་ཆོས་དེ་དག་གང་ཡིན། གསོལ་པ། བཅོམ་ལྡན་འདས་གང་དག་དེ་བཞིན་གཤེགས་པས་དེ་བཞིན་ཉིད་མངོན་པར་རྫོགས་པར་སངས་རྒྱས་ཤིང་། མི་འཁྲུགས་པ་ཉིད་མངོན་པར་རྫོགས་པར་སངས་རྒྱས་པའི་ཆོས་དེ་དག་གང་ཡང་མ་མཆིས་ལགས་ཏེ། བཅོམ་ལྡན་འདས་འདི་ལྟར་དེ་བཞིན་གཤེགས་པས་ཆོས་དེ་དག་དམིགས་པ་མ་ལགས་ཤིང་། དེ་དག་ནི་ཆོས་ཀྱང་མ་ལགས་ཆོས་མ་མཆིས་པ་ཡང་མ་ལགས་པའི་སླད་དུའོ། །བཅོམ་ལྡན་འདས་གལ་ཏེ་ཆོས་ཤིག་དམིགས་པར་གྱུར་ན་ནི་དེ་བཞིན་གཤེགས་པས་ཆོས་ཀྱི་འདུ་ཤེས་དམིགས་པ་ཁོ་ནར་འགྱུར་བ་ཞིག་ན་འདུ་ཤེས་ནི་མི་དམིགས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདུ་ཤེས་ཐམས་ཅད་མ་མཆིས་ལགས་ཏེ་རེ་ཞིག་དེ་བཞིན་གཤེགས་པས་བདག་ཉིད་ཀྱང་མ་དམིགས་ལགས་ན་འདུ་ཤེས་རྣམས་ཡང་དག་པར་དམིགས་པར་འགྱུར་བ་ལྟ་སྨོས་ཀྱང་ཅི་འཚལ། ཆོས་རྣམས་ལ་ཆོས་ཀྱི་འདུ་ཤེས་ཡང་དག་པར་འཇུག་པར་འགྱུར་བ་ལྟ་སྨོས་ཀྱང་ཅི་འཚལ། བཅོམ་ལྡན་འདས་ཆོས་དེ་དག་ཀྱང་འདུ་ཤེས་ཇི་ལྟ་བ་བཞིན་ལགས་ཏེ། དེ་ལྟ་ལགས་པས་བཅོམ་ལྡན་འདས་ཀྱིས་ཆོས་གང་ཡང་གཟུང་བར་མ་གསུངས། ངེས་པར་འབྱུང་བར་མ་གསུངས། ཡང་དག་པར་འདའ་བར་མ་གསུངས། འཐོབ་པར་མ་གསུངས་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་གལ་ཏེ་དེ་བཞིན་གཤེགས་པས་ཆོས་རྣམས་བཙལ་བར་བགྱི་ན་དེ་གང་ནས་བཙལ་བར་བགྱི་ལགས། ཆོས་དེ་དག་ནི་དེ་བཞིན་ཉིད་དེ་དེ་བཞིན་ཉིད་ལ་དེ་བཞིན་གཤེགས་པ་མ་མཆིས་པ་དང་། དེ་བཞིན་གཤེགས་པ་ནི་དེ་བཞིན་ཏེ། དེ་བཞིན་ཉིད་ཀྱི་རྣམ་པས་དེ་བཞིན་གཤེགས་པ་ལགས་པ་དང་། དེ་བཞིན་གཤེགས་པ་ནི་མཚན་མ་མ་མཆིས་པ་སྟེ་མཚན་མ་མ་མཆིས་པའི་རྣམ་པས་དེ་བཞིན་གཤེགས་པ་ལགས་པ་དང་། དེ་བཞིན་གཤེགས་པ་ནི་མཚན་མ་དང་བྲལ་བ་སྟེ། མཚན་མ་དང་བྲལ་བའི་རྣམ་པས་དེ་བཞིན་གཤེགས་པ་ལགས་པ་དང་། དེ་བཞིན་གཤེགས་པ་ནི་བས་མ་འཚལ་བ་སྟེ་བས་མ་འཚལ་བའི་རྣམ་པས་དེ་བཞིན་
གཤེགས་པ་ལགས་པ་དང་། དེ་བཞིན་གཤེགས་པ་ནི་འཁྲུག་པ་མ་མཆིས་པ་སྟེ། འཁྲུག་པ་མ་མཆིས་པའི་རྣམ་པས་དེ་བཞིན་གཤེགས་པ་ལགས་པ་དང་། ཆོས་ཐམས་ཅད་ཀྱང་དེ་བཞིན་གཤེགས་པ་ཇི་ལྟ་བ་བཞིན་ཏེ། ཇི་ལྟ་བ་བཞིན་གྱི་རྣམ་པས་དེ་བཞིན་གཤེགས་པ་ལགས་ཤིང་། བཅོམ་ལྡན་འདས་དེ་ལྟར་ཆོས་ཐམས་ཅད་ནི་དེ་བཞིན་གཤེགས་པ་ལགས་ཏེ། བཅོམ་ལྡན་འདས་དེས་ན་དེ་བཞིན་གཤེགས་པ་པད་མ་དག་ལ་བཞུགས་པ་ལགས་ཤིང་། པད་མ་དག་ལ་བཞུགས་པ་ཇི་ལྟ་བ་བཞིན་དུ་དེ་བཞིན་གཤེགས་པ་ཉིད་དང་སངས་རྒྱས་ཉིད་ལ་བཞུགས་པ་ཡང་དེ་དང་འདྲ་ལགས་ཏེ། གང་ལ་བཞུགས་པ་དེ་ལ་ཡང་མི་འཛིན་ཅིང་མི་དམིགས་པ་དེ་དག་ནི་འཇིག་རྟེན་ན་སྦྱིན་གནས་རྣམས་ཞེས་བགྱི་བའི་གྲངས་སུ་མཆི་བའི་སླད་དུའོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཁྱོད་གང་ལ་གནས་ནས་དེ་སྐད་ཅེས་སྟོན། བཟང་སྐྱོང་གིས་གསོལ་པ། བཅོམ་ལྡན་འདས་བདག་ནི་འཇིག་རྟེན་གང་ལ་གནས་པ་དེ་ཉིད་ལ་གནས་ནས་དེ་སྐད་ཅེས་སྟོན་ལགས་ཏེ། ཇི་ལྟར་བྱིས་པ་དག་གིས་བཟུང་བ་བཞིན་དུ་ནི་མ་ལགས་སོ། །བྱིས་པ་དག་གིས་བཟུང་བ་གང་ཞེ་ན། འཁྲུག་པ་ལགས་ཏེ། གང་གི་སླད་དུ་འཁྲུག་པ་བཟུང་བ་དེའི་སླད་དུ་འཁྲུག་ཅིང་རབ་ཏུ་འཁྲུག་ལགས་སོ། །བཅོམ་ལྡན་འདས་འཇིག་རྟེན་ནི་མི་གནས་པ་ལགས་ཏེ ཇི་ལྟར་འཇིག་རྟེན་མི་གནས་པ་ལགས་ཤེ་ན། སྒྱུ་མའི་གནས་ལ་འཇིག་རྟེན་མི་གནས་ཏེ། བྱིས་པ་རྣམས་ནི་དེ་ལ་བདག་གི་གནས་ནི་འཇིག་རྟེན་གྱི་གནས་ལགས་སོ། །ཞེས་རྩོད་དེ། དེ་ནི་བྱིས་པ་རྣམས་ཀྱི་འགྲོ་བ་མ་ལགས་པའི་སླད་དུའོ། །སྨིག་རྒྱུའི་གནས་ལ་འཇིག་རྟེན་མི་གནས་ཤིང་མི་རྟག་པའི་གནས་ལ་འཇིག་རྟེན་མི་གནས་ཏེ་བྱིས་པ་རྣམས་ཀྱི་སྐྲག་པ་ལགས་པའི་སླད་དུའོ། །མིག་ཡོར་གྱི་གནས་ལ་འཇིག་རྟེན་མི་གནས་ཏེ། འཕགས་པ་རྣམས་དང་
ཐ་མི་དད་པའི་སླད་དུའོ། །མི་སྡུག་པའི་གནས་ལ་འཇིག་རྟེན་མི་གནས་ཏེ། བྱིས་པ་རྣམས་ནི་ལས་ཀྱི་ཀུན་ནས་སློང་བའི་སླད་དུའོ། །བཅོམ་ལྡན་འདས་འཇིག་རྟེན་གྱི་གནས་འདི་ལ་འཇིག་རྟེན་གྱི་འཁྲུག་པའི་སྐབས་མ་མཆིས་ལགས་ཏེ། བཅོམ་ལྡན་འདས་དེ་ལྟ་ལགས་པས་བདག་གི་གནས་ནི་འཇིག་རྟེན་གྱི་གནས་ཁོ་ན་ལགས་སོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་བཟང་སྐྱོང་ལ་བཀའ་སྩལ་པ། བཟང་སྐྱོང་ཅི་ཁྱོད་ཀྱིས་ཆོས་ཡང་དག་པར་མཐོང་བས་དེ་སྐད་ཅེས་སྟོན་ཏམ། གསོལ་པ། བཅོམ་ལྡན་འདས་ཆོས་གང་དག་ལགས་པ་དེ་དག་ནི་བཅོམ་ལྡན་འདས་ཀྱིས་ཀྱང་མངོན་པར་རྫོགས་པར་སངས་མ་རྒྱས་པ་ཁོ་ན་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཅི་ངས་ཆོས་རྣམས་མངོན་པར་རྫོགས་པར་སངས་མ་རྒྱས་སམ། གསོལ་པ། བཅོམ་ལྡན་འདས་ཅི་ཆོས་རྣམས་མངོན་པར་རྫོགས་པར་འཚང་རྒྱ་ལགས་སམ། བཅོམ་ལྡན་འདས་ཀྱིས་མངོན་པར་རྫོགས་པར་སངས་རྒྱས་པ་གང་དག་ལགས་པ་དེ་དག་ཀྱང་ཅི་ཆོས་རྣམས་ལགས་སམ། འོན་ཏེ་ཆོས་མ་མཆིས་པ་རྣམས་ལགས། བཅོམ་ལྡན་འདས་ཀྱིས་བཀའ་སྩལ་པ། བཟང་སྐྱོང་ལེགས་སོ་ལེགས་སོ། །དེ་བཞིན་གཤེགས་པས་ཆོས་རྣམས་མངོན་པར་རྫོགས་པར་སངས་རྒྱས་པ་གང་དག་ཡིན་པ་དེ་དག་ནི་ཆོས་རྣམས་ཀྱང་མ་ཡིན། ཆོས་རྣམས་མེད་པ་ཡང་མ་ཡིན་ཏེ། བཟང་སྐྱོང་དེ་ལ་ངའི་ཡེ་ཤེས་མི་རྒྱུ་ཞིང་མིག་མི་འཇུག་ལ། འགྲོ་བ་མི་ཤེས་ཤིང་བློ་མི་འཇུག་སྟེ། སྣང་བ་མི་ཤེས་ཤིང་ཡོངས་སུ་གཅོད་པ་མི་ཤེས་ལ་མི་འཛིན་ཏེ། དེ་དག་ནི་ཀུན་ནས་ཉོན་མོངས་པ་ཡང་མ་ཡིན། རྣམ་པར་བྱང་བ་ཡང་མ་ཡིན་པའི་ཕྱིར་རོ། །བཟང་སྐྱོང་འོན་ཀྱང་གལ་ཏེ་གང་མཚན་ཉིད་མེད་པའི་སྤྱོད་པའི་འདུ་ཤེས་དང་། མཚན་ཉིད་མེད་པའི་སྤྱོད་པའི་ཆོས་དེ་དག་ངས་བསྟན་ཀྱང་བཟང་སྐྱོང་སེམས་ཅན་རྣམས་
དེ་ལ་རྨོངས་པར་འགྱུར་རོ། །བཟང་སྐྱོང་ཆོས་དེ་ལ་དེ་བཞིན་གཤེགས་པ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་མ་གཏོགས་པར་ཆོག་ཤེས་པ་སུ་ཡང་མི་རྙེད་མི་དམིགས་སོ། །བཟང་སྐྱོང་བྱང་ཆུབ་སེམས་དཔའ་སེམས་དཔའ་ཆེན་པོ་སྲིད་པ་ཐ་མ་པ་དང་། སྐྱེ་བ་གཅིག་གིས་ཐོགས་པ་གང་དག་ཡིན་པ་དེ་དག་ཀྱང་ཆོས་དེ་དག་བསྟན་པ་ཐོས་ན་སྐྲག་པར་འགྱུར་ན་དེ་དག་པས་གཞན་པའི་སེམས་ཅན་ཐ་ཆད་རྣམས་ལྟ་ཅི་སྨོས་ཏེ། དེ་དག་གིས་ཆོས་དེ་དག་རྟོགས་པར་འགྱུར་བ་འདི་ནི་གནས་མེད་དོ། །བཟང་སྐྱོང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་ལུས་མ་བསྒོམས་པ་དག་དང་། སེམས་མ་བསྒོམས་པ་དག་དང་། ཚུལ་ཁྲིམས་མ་བསྒོམས་པ་དག་དང་། ཤེས་རབ་མ་བསྒོམས་པ་དག་འབྱུང་བར་འགྱུར་བའི་དུས་དེ་ལྟ་བུ་འབྱུང་བར་འགྱུར་ཞིང་། བཟང་སྐྱོང་ཚོད་དེ་ལྟ་བུ་འབྱུང་བར་འགྱུར་ཏེ། དེ་དག་གིས་རྣམ་པར་མི་རྟོག་ཅིང་ཀུན་ནས་ཉོན་མོངས་པ་མེད་ལ། སྣང་བ་མེད་པའི་བྱང་ཆུབ་ལ་མ་ཞུགས་པའི་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་གཏེར་དང་། ཆོས་ཀྱི་གཏེར་བསྟན་པའི་ཆོས་ཀྱི་རྣམ་གྲངས་དེ་ཐོས་ནས་སྐྲག་ཅིང་དངང་ལ་དངང་བར་འགྱུར་ཞིང་གཡང་ས་ཆེན་པོར་ཡང་ལྟུང་བར་འགྱུར་རོ། །དེ་བཞིན་གཤེགས་པས་ཆོས་ཐམས་ཅད་མངོན་པར་རྫོགས་པར་སངས་རྒྱས་སོ་ཞེས་ཇི་སྐད་བརྗོད་དེ། དེ་ལ་ངའི་ཡེ་ཤེས་མི་འཇུག་ཅིང་མིག་མི་འཇུག་ལ། བློ་མི་འཇུག་གོ་ཞེས་དེ་སྐད་ཅེས་ཀྱང་གསུངས་པའི་ཕྱིར་རོ། །དེའི་ཕྱིར་དེ་ལྟ་བུའི་མདོ་སྡེ་འཛིན་པའི་དགེ་སློང་དེ་དག་ལ་གནོད་སེམས་སུ་གྱུར་པའི་སེམས་དང་ལྡན་པ་དག་དང་། ཞེ་འགྲས་པར་གྱུར་པའི་སེམས་དང་ལྡན་པ་དག་གསོད་པའི་འདུ་ཤེས་བསྐྱེད་པར་འགྱུར་ཞིང་། འཁྲུག་ལོང་གི་འདུ་ཤེས་བསྐྱེད་པར་འགྱུར་རོ། །བཟང་སྐྱོང་ང་ལ་འཁྲུག་ལོང་བྱེད་པ་གང་དག་ཡིན་པ་དེ་དག་ཡོངས་སུ་འཛིན་པར་འགྱུར་ཞིང་། ངའི་ཡང་དག་པའི་ཡེ་ཤེས་རབ་ཏུ་སྟོན་པར་བྱེད་པ་དེ་དག་བརྙས་པར་འགྱུར་
བའི་དུས་དེ་ལྟ་བུ་ཇི་ཙམ་དུ་ཕྱིན་ཅི་ལོག་ཏུ་འགྱུར་བ་ལ་ལྟོས། བཟང་སྐྱོང་དེ་བཞིན་གཤེགས་པ་སློབ་དཔོན་མི་མངའ་ཞིང་རང་བྱུང་ལ་ད་ལྟར་འཁོར་གྱི་ནང་དུ་སེང་གེའི་སྒྲ་ཡང་དག་པར་སྒྲོགས་པར་མཛད་ན། མི་བླུན་པོ་དེ་དག་ནི་དེ་བཞིན་གཤེགས་པ་མི་ཤེས་ཤིང་། དེ་བཞིན་གཤེགས་པའི་ཆོས་ཉིད་མི་ཤེས་ཏེ། དེ་དག་མི་ཤེས་ཤིང་མ་མཐོང་བས་དེའི་ཚེ་ངའི་བསྔགས་པ་གང་ཡིན་པ་དེ་ལ་དེ་དག་བསྔགས་པ་མ་ཡིན་པའི་འདུ་ཤེས་འབྱུང་བར་འགྱུར་ཞིང་། གང་ངའི་བསྔགས་པ་མ་ཡིན་པ་དེ་ལ་ནི་དེ་དག་བསྔགས་པའི་འདུ་ཤེས་འབྱུང་བ་ལ་ལྟོས། བཟང་སྐྱོང་ངའི་བསྔགས་པ་མ་ཡིན་པ་ཡང་གང་ཞེ་ན། བཟང་སྐྱོང་ཆོས་གང་ལ་ལ་འཛིན་པའི་ཆོས་འདི་ནི་བཟང་སྐྱོང་ངའི་བསྔགས་པ་མ་ཡིན་པ་སྟེ། དེའི་ཚེ་དེ་དག་ནི་བསྔགས་པ་མ་ཡིན་པ་སྨྲ་བ་དག་དང་། འཁྲུག་ལོང་བྱེད་པ་དག་དང་། དགེ་སྦྱོང་སུན་འབྱིན་པ་དག་དང་། དགེ་སྦྱོང་གདོལ་པ་དག་དང་། དགེ་སྦྱོང་མྱགས་པ་དག་དང་། དགེ་སྦྱོང་ཤིང་རུལ་པ་ལྟ་བུ་དག་དང་། མུ་སྟེགས་ཅན་གཞན་གྱི་སྤྱོད་ཡུལ་གྱི་ལྟ་བ་ཅན་དག་དང་། གཉིས་ལ་སྤྱོད་པ་དག་དང་། རྟག་ཆད་དུ་སྨྲ་བ་དག་དང་། ཆོས་འཛིན་པ་ཆོས་ཀྱི་རློམ་སེམས་ཉིད་ལ་གནས་པ་དག་དང་། སྤྲོས་པ་དང་བཅས་པ་དག་དང་། མངོན་པར་འདུ་བྱེད་པ་དང་བཅས་པ་དག་དང་། འཇིག་རྟེན་རྒྱང་པན་པ་ལ་དགའ་བ་དག་དང་། འཁོར་བ་ན་སྤྱོད་པ་དག་དང་། ཡང་དག་པའི་ལྟ་བའི་ལམ་ལ་ཕྱིར་ཕྱོགས་པ་དག་ཡིན་པར་ངས་རབ་ཏུ་བསྟན་པ་ཡིན་ནོ། །དེའི་ཚེ་དེ་དག་ནི་དོན་དམ་པའི་འདུ་ཤེས་ཅན་དག་དང་། མེའི་སྦྱིན་བསྲེག་འཛིན་པ་དག་དང་། རལ་པ་ཅན་མ་ཡིན་པ་དག་དང་། ལས་སྨྲ་བ་དག་དང་། བྱེད་པ་སྨྲ་བ་དག་ཏུ་འགྱུར་ཏེ། བཟང་སྐྱོང་གལ་ཏེ་ཏིང་ངེ་འཛིན་དེ་ལྟ་བུ་ཞིག་ཡོད་པར་གྱུར་ན་དེ་དག་ཀྱང་བྱང་ཆུབ་མངོན་པར་རྫོགས་པར་སངས་རྒྱས་པར་འགྱུར་རོ། །བཟང་སྐྱོང་དེ་དག་ནི་ང་ཡོངས་སུ་མྱ་ངན་ལས་འདས་ནས་དེ་ལ་ལས་དང་བྱེད་པ་དག་གིས་སྐྱོན་དག་མཐོང་སྟེ། ལྡོག་པ་རྗེས་སུ་ཐོབ་ནས། ངའི་བསྟན་པ་ལ་རབ་ཏུ་འབྱུང་བར་འགྱུར་ཞིང་ཆོས་དེ་
དག་ནུབ་པར་བྱེད་པར་འགྱུར་ཏེ། བཟང་སྐྱོང་དེ་ལྟ་བས་ན་ང་ཡོངས་སུ་མྱ་ངན་ལས་འདས་ནས། མི་བླུན་པོ་དེ་དང་དེ་དག་མེའི་མཆོད་སྦྱིན་པ་རལ་པ་ཅན་ལྟ་བུ་དང་། རྒན་ཞུགས་ལྟ་བུ་དང་། རྨུན་པོ་ལྟ་བུར་ཡང་འགྱུར་རོ། །བཟང་སྐྱོང་དེ་དག་ནི་དམིགས་པ་དང་བཅས་པ་དང་། སྤྲོས་པ་དང་བཅས་པ་དང་། མངོན་པར་འདུ་བྱེད་པ་དང་བཅས་པ་དང་། འཇིག་རྟེན་པའི་ཡང་དག་པའི་ལྟ་བས་ངའི་ལས་དང་བྱེད་པ་ལ་འཇུག་པར་བྱེད་ཅིང་། སངས་རྒྱས་ཀྱི་ཡེ་ཤེས་ཅུང་ཟད་ཙམ་རྗོད་པར་བྱེད་པ་གང་དག་ཡིན་པ་དེ་དང་དེ་དག་ནི་ངའི་བསྔགས་པ་མ་ཡིན་པ་སྨྲ་བ་དག་སྟེ། དེ་དག་ངེས་པར་འབྱུང་བར་མ་ཡིན་པར་སྨྲ་བའོ་ཞེས་ང་སྨྲའོ། །དེ་ཅིའི་ཕྱིར་ཞེ་ན། བཟང་སྐྱོང་དེ་དང་དེ་དག་ནི་བསྐལ་པ་གྲངས་མེད་པ་བྱེ་བས་ཡང་དག་པར་བསྒྲུབས་པའི་བྱང་ཆུབ་དེ་སྤོང་བའི་མེ་མདག་ཕྲ་མོ་དག་གིས་སྲེག་པར་བྱེད་པ་ཡིན་ཏེ། བཟང་སྐྱོང་དེ་དག་ནི་དེ་བཞིན་གཤེགས་པའི་བསྔགས་པ་མ་ཡིན་པ་སྨྲ་བ་དག་དང་། འཁྲུག་ལོང་བྱེད་པ་དག་ཡིན་ནོ། །བཟང་སྐྱོང་དེ་བཞིན་གཤེགས་པའི་བསྔགས་པ་སྨྲ་བ་དག་དང་། གསུངས་པ་སྨྲ་བ་དེ་དག་ཀྱང་གང་ཞེ་ན། བཟང་སྐྱོང་ཆོས་ཐམས་ཅད་འཛིན་པ་མེད་པ་དག་དང་། སྤྲོས་པ་མེད་པ་དག་དང་། མངོན་པར་འདུ་བྱེད་པ་མེད་པ་དག་དང་། དུས་གསུམ་རྗེས་སུ་ཚོལ་བ་དག་དང་། ཡི་གེ་མེད་པ་དག་དང་། འདོར་བ་མེད་པ་དག་སྟེ། བཟང་སྐྱོང་དེ་དང་དེ་དག་ནི་དེ་བཞིན་གཤེགས་པའི་བསྔགས་པ་སྨྲ་བ་དག་དང་། གདགས་པ་མི་བྱེད་པ་དག་དང་། སངས་རྒྱས་ཀྱི་སྲས་དག་དང་། ཐུགས་ཀྱི་སྲས་དག་དང་། ཆོས་ལས་སྐྱེས་པ་དག་ཡིན་ནོ། །བཟང་སྐྱོང་མདོ་སྡེ་འདི་ལྟ་བུ་སྟོན་པ་དང་། མདོ་སྡེ་འདི་ལྟ་བུ་ཡང་དག་པར་ལེན་པ་གང་དག་ཡིན་པ་དེ་དང་དེ་དག་ནི་བཟང་སྐྱོང་དེ་བཞིན་གཤེགས་པས་གསུངས་པ་སྨྲ་བ་དག་དང་། ཆོས་སྨྲ་བ་དག་དང་། དེ་བཞིན་གཤེགས་པའི་བསྟན་པ་ལ་ཆོས་ཀྱི་རྗེས་སུ་འཐུན་པའི་ཆོས་ལ་ཞུགས་པ་དག་དང་། ངའི་སྲས་དག་དང་། ཐུགས་ཀྱི་སྲས་དག་དང་། ཞལ་ནས་སྐྱེས་པ་དག་དང་། ངས་བྱིན་གྱིས་
བརླབས་པ་དག་དང་། ངས་བསྐོས་པ་དག་དང་། ངས་ཡང་དག་པར་དགའ་བར་བྱས་པ་དག་ཡིན་ཞིང་དེ་དག་གིས་ཆོས་ཀྱི་མཆོད་སྡོང་བཙུགས་པ་ཡིན། དེ་དག་གིས་ཆོས་ཀྱི་རྔ་ཡང་བརྡུངས་པ་ཡིན་ཞིང་དེ་དག་གིས་ཆོས་ཀྱི་དུང་ཡང་བུས་པ་ཡིན། དེ་དག་གིས་ཆོས་ཀྱི་རྒྱལ་མཚན་ཡང་བསྒྲེང་བ་ཡིན་ཞིང་། སངས་རྒྱས་བཅོམ་ལྡན་འདས་རྣམས་ཀྱིས་དེ་དག་གིས་སྤྱོད་པ་བསྩགས་པ་ཡིན། དེ་དག་གི་ཡོན་ཏན་གྱི་ཕྲེང་བ་འདི་ཡང་རྗེས་སུ་འབྲང་བར་བྱེད་ཅིང་དེ་དག་གི་སྲུང་བ་བཞག་པ་ཡང་ཡིན། དེ་དག་ནི་ཕྱིར་རྒོལ་བ་རྣམས་ཚར་གཅོད་པར་ཡང་འགྱུར་ཞིང་དེ་དག་ནི་འཇིག་རྟེན་གྱི་མེ་ཏོག་ལྟ་བུ་དག་ཀྱང་ཡིན། དེ་དག་འབྱུང་བ་ཡང་མཆོག་ཏུ་རྙེད་པར་དཀའ་ཞིང་དེ་དག་གི་མཐོང་བ་ཡང་རྣམ་པར་དག་པ་ཡིན། དེ་དག་ནི་བྱང་ཆུབ་ཀྱི་སྣོད་ཀྱང་ཡིན་ཞིང་དེ་དག་ནི་བྱང་ཆུབ་སེམས་དཔའ་རྣམས་ཀྱིས་ཡང་དག་པར་དགའ་བར་བྱས་པ་དག་ཀྱང་ཡིན། དེ་དག་ནི་དེ་བཞིན་གཤེགས་པ་རྣམས་ཀྱིས་ཡང་དག་པར་དགའ་བར་བྱས་པ་དག་ཀྱང་ཡིན། དེ་དག་གི་ཆོས་ཀྱི་མིག་ཀྱང་ཕྱེ་བ་ཡིན་ཞིང་དེ་དག་ཆོས་ཐམས་ཅད་ལ་སྒྲིབ་པ་མེད་པ་ཡང་ཡིན། དེ་དག་ནི་དེ་བཞིན་གཤེགས་པ་མཉེས་པར་བྱེད་པར་འོས་པ་དག་ཀྱང་ཡིན་ཞིང་དེ་དག་ནི་དེ་བཞིན་གཤེགས་པ་རྣམས་ལ་བྱས་པ་གཟོ་བ་དག་ཀྱང་ཡིན། དེ་དག་ནི་ཆོས་ཀྱི་རྒྱན་གྱིས་བརྒྱན་པ་དག་ཀྱང་ཡིན་ཞིང་ཡེ་ཤེས་ཀྱིས་བརླན་པ་དག་ཀྱང་ཡིན། དེ་དག་ནི་ཆོས་ཀྱི་ཆར་པ་འབེབས་པར་བྱེད་པ་དག་ཀྱང་ཡིན་ཞིང་རྒྱལ་བའི་ཐུགས་ཀྱི་སྲས་དག་ཚིམ་པར་བྱེད་པ་དག་ཀྱང་ཡིན། དེ་དག་ནི་སངས་རྒྱས་ཀྱི་ཆོས་རྣམས་ཀྱིས་རྣམ་པར་འཕེལ་བར་བྱེད་པ་དག་ཀྱང་ཡིན་ཞིང་དེ་དག་ནི་ཡོན་ཏན་གྱི་ལོ་མ་རྣམས་སྐྱེས་པ་དག་ཀྱང་ཡིན། དེ་དག་ནི་བྱང་ཆུབ་ཀྱི་ཡན་ལག་གི་མེ་ཏོག་རྣམས་ཀྱིས་མེ་ཏོག་ཀུན་ཏུ་རྒྱས་པ་དག་ཀྱང་ཡིན་ཞིང་། དེ་དག་གི་ནི་འདོད་ཆགས་དང་བྲལ་བའི་འབྲས་བུ་རྣམས་རབ་ཏུ་བྱེད་པ་དག་ཀྱང་ཡིན། དེ་དག་ནི་བྱང་ཆུབ་ཀྱི་སྙིང་པོ་ལ་འདུག་པ་དག་ཀྱང་ཡིན་ཞིང་དེ་དག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་
ཐོབ་པ་ཡང་ཡིན། དེ་དག་ནི་ལམ་སྟོན་པར་བྱེད་པ་དག་ཀྱང་ཡིན་ཞིང་དེ་དག་ནི་ཆོས་ཀྱི་སྦྱིན་པས་རླན་པར་བྱེད་པ་དག་ཀྱང་ཡིན་ནོ། །བཟང་སྐྱོང་མདོར་ན་རིགས་ཀྱི་བུ་དེ་དག་གི་ཡོན་ཏན་རྣམས་ཏེ། བཟང་སྐྱོང་གལ་ཏེ་དེ་བཞིན་གཤེགས་པས་ཐམས་ཅད་ཡང་དག་པར་བསྟན་ཀྱང་དེ་ནི་ཡིད་ཆེས་པར་དཀའ་བར་འགྱུར་རོ། །བཟང་སྐྱོང་དེ་དང་དེ་དག་ནི་ངའི་བསྔགས་པ་སྨྲ་བ་དག་དང་། ཆོས་ཀྱི་རྗེས་སུ་འཐུན་པའི་ཆོས་སྨྲ་བ་དག་ཡིན་ནོ། །བཟང་སྐྱོང་འདི་ལྟ་སྟེ། དཔེར་ན་མི་ཞིག་གིས་མཚོ་མ་དྲོས་པ་མཐོང་བར་གྱུར་ཅིང་དེའི་བསྔགས་པ་ཡང་ཐོས་པར་གྱུར་ལ། དེའི་ཚེ་དེས་སྔོན་མ་མཐོང་བའི་མཚོ་ཆེན་པོ་གཞན་ཞིག་ཀྱང་མཐོང་ནས་མཚོ་མ་དྲོས་པ་དེ་ནི་འདིའི་ཚད་ཁོ་ནའོ་ཞེས་ཚིག་སྨྲ་བར་བྱེད་ཅིང་དེ་བདག་གིས་མ་དྲོས་པའི་བསྔགས་པ་བརྗོད་དོ་ཞེས་ཟེར་ལ། བསྔགས་པ་མ་ཡིན་པ་ཉིད་སྨྲ་བ་དེ་བཞིན་དུ་བཟང་སྐྱོང་དེ་དག་ནི་མི་བླུན་པོ་དག་ཡིན་ཞིང་དེ་དག་ནི་ཡོན་ཏན་དེ་ལྟ་བུ་དག་དང་། ཡེ་ཤེས་དེ་ལྟ་བུ་དག་དང་བྲལ་བ་དག་སྟེ། དེ་དག་ནི་བདག་ཅག་གིས་དེ་བཞིན་གཤེགས་པའི་བསྔགས་པ་བརྗོད་པར་བྱའོ་ཞེས་ཟེར་ལ། འཇིག་རྟེན་པའི་ཡང་དག་པའི་ལྟ་བ་དང་། མངོན་པར་འདུ་བྱེད་པ་དང་བཅས་ཤིང་ཟག་པ་དང་བཅས་པའི་ཕུང་པོ་ཐམས་ཅད་ཀྱི་སྦྱོར་བས་ཀུན་ཏུ་སྤྱོད་པར་བྱེད་ཅིང་། དེ་བཞིན་གཤེགས་པའི་ཡེ་ཤེས་དེ་ནི་ཐོགས་པ་མེད་པའོ་ཞེས་ཚིག་དེ་སྐད་ཅེས་ཀྱང་སྨྲ་བར་བྱེད་དེ། དེ་དག་ནི་བདག་ཅག་གིས་བསྔགས་པ་བརྗོད་པར་བྱའོ་ཞེས་ཟེར་ལ། བསྔགས་པ་མ་ཡིན་པ་ཉིད་སྨྲ་བར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན་མི་ལ་ལ་ཞིག་གིས་གསེར་ནི་ཁ་དོག་སེར་པོ་དང་གསེར་ནི་ཁ་དོག་སེར་པོ་སྣང་བའོ་ཞེས་གསེར་གྱི་མིང་ཐོས་པར་གྱུར་ལ། དེས་འཛམ་བུའི་ཆུ་བོའི་གསེར་གྱི་ཁ་དོག་མཐོང་ཞིང་རིན་ཐང་ཡང་ཐོས་ནས། ཀྱེ་མི་ཁྱོད་ནི་བརྫུན་དུ་སྨྲ་བ་སྟེ། ཁྱོད་ཀྱིས་སྨྲས་པ་དེ་ལ་གསེར་གྱི་ཁ་དོག་སེར་པོ་དེ་མེད་དོ་ཞེས་སྤོང་བར་བྱེད་ཅིང་། གཤེ་བར་བྱེད་པ་དེ་བཞིན་དུ་བཟང་སྐྱོང་མི་བླུན་པོ་མིག་མེད་པ་དེ་དག་གིས་དེ་བཞིན་གཤེགས་པའི་མཚན་ཐོས་ཤིང་ཆོས་
ཀྱི་མིང་ཐོས་ཀྱང་། ཆོས་ཀྱི་མིང་དེ་ཡང་ཡང་དག་པའི་ལྟ་བའོ་ཞེས་དེ་སྐད་ཐོས་ཤིང་། དེ་བཞིན་གཤེགས་པའི་མཚན་དེ་ཡང་མཚན་ཕུན་སུམ་ཚོགས་པ་དང་། རིགས་ཕུན་སུམ་ཚོགས་པ་དང་། སྤྱོད་ཡུལ་ཕུན་སུམ་ཚོགས་པ་དང་། འཁོར་ཕུན་སུམ་ཚོགས་པ་དང་། ཆོ་ག་དང་སྤྱོད་པ་ཕུན་སུམ་ཚོགས་པའོ་ཞེས་དེ་སྐད་ཐོས་ལ། དེ་བཞིན་གཤེགས་པ་ཡེ་ཤེས་ཀྱི་མཚན་ཉིད་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བའི་གྲངས་སུ་འགྲོ་བ་དང་། ཆོས་ཀྱི་མཚན་ཉིད་གང་གིས་དེ་བཞིན་གཤེགས་པས་ཆོས་ཐམས་ཅད་གསུངས་པའི་དེ་བཞིན་གཤེགས་པའི་མཚན་ཉིད་ཀྱི་ཡེ་ཤེས་དེ་ནི་ཐོས་པར་མ་གྱུར་ཏེ། གང་གི་ཚེ་དེ་དག་དེ་བཞིན་གཤེགས་པའི་ཡེ་ཤེས་ཀྱི་མཚན་ཉིད་དེ་ཐོས་པར་གྱུར་པ་དེའི་ཚེ་མི་བླུན་པོ་དེ་དག་དེ་ནི་དེ་ལྟར་མ་ཡིན་ནོ། ། ཞེས་དེ་སྐད་ཅེས་སྨྲ་བར་འགྱུར་རོ། །བཟང་སྐྱོང་འདི་ལྟ་སྟེ་དཔེར་ན་མི་ལ་ལ་ཞིག་གིས་རྒྱ་མཚོ་ཆེན་པོའི་མིང་ཐོས་པར་གྱུར་ལ། རྒྱ་མཚོ་ཆེན་པོའི་ཡོན་ཏན་རྣམས་ནི་ཐོས་པར་མ་གྱུར་ཏེ། གང་གི་ཚེ་དེས་རྒྱ་མཚོ་ཆེན་པོ་ནི་འཕང་དུ་དཔག་ཚད་བརྒྱད་ཁྲི་བཞི་སྟོང་ཡོད་ལ་ཐད་ཀར་ནི་དཔག་ཚད་ཚད་མེད་པ་དང་། རིན་པོ་ཆེ་རྣམ་པ་སྣ་ཚོགས་ཀྱིས་གང་བ་དང་རོ་གཅིག་ཅིང་གང་བ་ཡང་མེད་བྲི་བ་ཡང་མེད་པ་ཡིན་ནོ་ཞེས་རྒྱ་མཚོ་ཆེན་པོའི་ཡོན་ཏན་བསྒྲགས་པ་ཐོས་ཤིང་ཡོན་ཏན་བསྒྲགས་པ་དེ་དེས་ཐོས་ནས་ཆུ་བོ་ཆེན་པོ་དག་ཀྱང་འབབ་ལ། གང་བར་ཡང་མི་འགྱུར་བ་དང་། དེ་ལས་རིན་པོ་ཆེ་དེ་སྙེད་འབྱུང་བར་ཡང་འགྱུར་བ་དང་། དེ་ཡང་རྒྱར་ནི་དཔག་ཏུ་མེད་པ་ཡིན་ནོ་ཞེས་ཇི་སྐད་བྱ་ཞེས་ཡིད་མི་ཆེས་ཤིང་རྒྱ་མཚོ་ཆེན་པོའི་ཡོན་ཏན་དེ་ལྟ་བུ་དེ་དག་ཡིན་པ་འདི་ནི་གནས་མེད་དོ་ཞེས་ཟེར་བ་དེ་བཞིན་དུ། བཟང་སྐྱོང་མི་བླུན་པོ་དེ་དག་གིས་དེ་བཞིན་གཤེགས་པའི་མཚན་ཐོས་པར་གྱུར་ཅིང་སངས་རྒྱས་ཀྱི་སྒྲ་ཐོས་པར་གྱུར་ཀྱང་། དེ་བཞིན་གཤེགས་པའི་ཡོན་ཏན་དེ་དག་དེས་ཐོས་པར་མ་གྱུར་ཅིང་ཆོས་ཤེས་པའི་ཡོན་ཏན་དག་ཐོས་པར་མ་གྱུར་ཏེ། གང་གི་ཚེ་དེས་ཐམས་ཅད་
མཁྱེན་པའི་ཡེ་ཤེས་ཆོས་དཀོན་མཆོག་དཔག་ཏུ་མེད་པས་གང་བ། འདོད་ཆགས་དང་བྲལ་བ་དང་། རྣམ་པར་གྲོལ་བ་ཆེན་པོ་སྒྲུབ་པར་བྱེད་པ་དཔག་ཏུ་མེད་པ། སངས་རྒྱས་ཀྱི་སྤྱན་སྒྲིབ་པ་མེད་པ། ཟག་པ་མེད་པའི་ཆོས་གང་བ་ཡང་མེད། བྲི་བ་ཡང་མེད་པ་དང་། གཏིང་དཔག་དཀའ་བ་དང་། མི་འཁྲུགས་པ་དང་། ཆོས་ཐམས་ཅད་ཀྱི་ཡེ་ཤེས་ཀྱི་ཕྱག་རྒྱ་དང་། ཇི་ལྟར་རྒྱ་མཚོ་ཆེན་པོ་མིའི་རོ་དང་ལྷན་ཅིག་ཏུ་མི་གནས་པ་དེ་བཞིན་དུ་དེ་བཞིན་གཤེགས་པ་ལྟ་བ་ཐིབས་པོ་ཐམས་ཅད་ཀྱིས་ཆུད་ཟོས་པའི་སེམས་ཅན་རྣམས་དང་ལྷན་ཅིག་མི་གནས་པ་དང་། ཇི་ལྟར་རྒྱ་མཚོ་ཆེན་པོ་འདི་ལྟ་སྟེ། ལན་ཚྭའི་རོར་རོ་གཅིག་པ་དེ་བཞིན་དུ་དེ་བཞིན་གཤེགས་པའི་རྣམ་པར་གྲོལ་བར་རོ་གཅིག་པར་འགྱུར་བའི་ཆོས་ཀྱི་རྣམ་གྲངས་དེ་ལྟ་བུ་དེ་ཐོས་ཤིང་དེ་དག་དེ་སྐད་ཅེས་ཐོས་ནས་ཁོང་དུ་ཆུད་པར་མི་བྱེད་ཅིང་མངོན་པར་ཡིད་ཆེས་པར་མི་བྱེད་ལ། མོས་པར་མི་བྱེད་དེ། དེ་ལྟ་མ་ཡིན་ནོ་ཞེས་ཚིག་སྨྲ་བར་བྱེད་དོ། །བཟང་སྐྱོང་མི་བླུན་པོ་དེ་དག་བདག་ཅག་གིས་ཅི་ཤེས་ཞེའམ། བདག་ཅག་གིས་ཇི་སྙེད་བསླབས་ཞེས་དེ་ལྟར་ཡང་ལྟ་བར་མི་འགྱུར་བ་ལ་ལྟོས། རེ་ཞིག་བདག་ཅག་ཉིད་ཀྱི་སྤྱོད་པ་ཡང་མི་ཤེས་པ་དང་། བདག་ཅག་ག་ལས་སྤྱད་ཅེས་གནས་མི་ཤེས་པ་དང་། ལས་མི་ཤེས་པ་དང་། རྣམ་པར་སྨིན་པ་མི་ཤེས་པ་དང་། བདག་ཅག་ལས་གང་གིས་འདིར་སྐྱེས་པ་དང་། བདག་ཅག་གི་ལས་འདིར་སྐྱེས་པ་དང་། བདག་ཅག་གི་འགྲོ་བ་ཡང་གང་ཡིན་པ་དང་། བདག་ཅག་རྣམ་པ་ཇི་ལྟ་བུ་དང་། སྦྱོར་བ་ཇི་ལྟ་བུ་དང་། བདག་ཅག་ཤེས་པ་དང་ལྡན་ཞིང་ལས་བྱེད་དམ། ཤེས་པ་དང་མི་ལྡན་ཞིང་ལས་བྱེད་ཅེས་དེ་དག་གིས་དེ་སྐད་ཅེས་བདག་ཉིད་བརྗོད་པར་བྱའོ། །གལ་ཏེ་ཆོས་དེ་དག་ལ་མི་བླུན་པོ་དེ་དག་ཆོས་ཀྱི་འདུ་ཤེས་དང་ངའི་བསྔགས་པ་མ་ཡིན་པའི་འདུ་ཤེས་བསྐྱེད་ན་ངའི་ཚིག་གིས་མི་བླུན་པོ་དེ་དག་མདོ་སྡེ་དག་ལ་མི་རྟོན་པར་འགྱུར་རོ། །ང་འདས་ནས་དེ་བཞིན་གཤེགས་པའི་བསྔགས་པ་བརྗོད་པ་དང་། ཆོས་ཀྱི་བསྔགས་པ་
བརྗོད་པ་དང་། དགེ་འདུན་གྱི་བསྔགས་པ་བརྗོད་པ་ན་དེ་ལ་ཁྱེད་ཅག་གིས་མི་གུས་པར་མི་བྱ་ཞིང་ཡིད་མི་ཆེས་པར་མ་ཡིན་ལ། སེམས་གཞན་དུ་འགྱུར་བ་དང་། མངོན་པར་མི་དགའ་བར་མི་བྱའོ་ཞེས་ཀྱང་དེ་བཞིན་གཤེགས་པས་གསུངས་སོ། །གལ་ཏེ་དེ་ལ་ངས་གདམས་ངག་བསྐྱེད་པར་བྱ་ན་འདི་ལྟ་སྟེ་ཞེ་འགྲས་པའི་སེམས་དང་ལྡན་པ་དེ་ནི་དགེ་སྦྱོང་གི་ཆོས་མ་ཡིན་ཞིང་། དགེ་སྦྱོང་མ་ཡིན་པ་དང་ཐུན་མོང་བ་འདི་ལྟ་སྟེ། དགེ་སྦྱོང་མ་ཡིན་པ་རྣམས་དང་དགེ་སྦྱོང་མ་ཡིན་པར་ཐུན་མོང་བའི་ལམ་ལ་ཞུགས་པའི་གནས་དེ་ནི་སྐྱོན་མང་པོའི་ཤས་ཆེ་བ་ཡིན་ཞིང་། དེ་བཞིན་གཤེགས་པ་རྣམས་ཀྱི་བྱང་ཆུབ་གཏིང་དཔག་དཀའ་བ་ཡིན་ཏེ། དེའི་ཕྱིར་བདག་གིས་དྲན་པ་ཉེ་བར་གཞག་པ་རྣམས་ཁོ་ན་བསྟན་པར་བྱའོ་ཞེས་གདམས་པར་བྱའོ། །བཟང་སྐྱོང་དེ་ལ་ཆོས་ཐམས་ཅད་ཀྱི་ངོ་བོ་ཉིད་ཀྱིས་གནས་པ་དག་ནི་མི་གནས་པ་དག་ཉིད་དེ། ཆོས་ཐམས་ཅད་དེ་ལྟར་གནས་པ་དག་ཉིད་རྣམ་པར་མི་རྟོག་པ་དག་གོ །བཟང་སྐྱོང་འདི་ལྟ་སྟེ་འཇུག་པའི་སྒོ་དང་། རྟོགས་པའི་སྒོ་དང་། རྣམ་པར་ཐར་པའི་སྒོ་དེ་ནི་དྲན་པ་ཉེ་བར་གཞག་པ་རྣམས་ཀྱི་སྒོ་ཡིན་ནོ། །བཟང་སྐྱོང་གནས་དང་གནས་མ་ཡིན་པ་དེ་ནི་གཉིས་ཡིན་ནོ། །བཟང་སྐྱོང་ཡང་དག་པའི་ལྟ་བ་དང་མཐའ་མི་དམིགས་པའི་ཕྱིར་མཐའ་རྣམ་པར་སྤངས་པ་ནི་གཉིས་ལ་མ་ཆགས་པ་ཡིན་ནོ། །བཟང་སྐྱོང་དེ་བཞིན་གཤེགས་པས་མཐའ་མ་བརྙེས་པའི་ཕྱིར་མཐའ་རྣམ་པར་སྤངས་པ་མ་ཡིན་མོད་ཀྱི། འོན་ཀྱང་གང་གི་ཕྱིར་མི་དམིགས་པ་དེ་ཉིད་ཀྱི་ཕྱིར་དེ་བཞིན་གཤེགས་པས་དེ་རྣམ་པར་སྤངས་པ་ཡིན་ནོ། །བཟང་སྐྱོང་དེ་བཞིན་གཤེགས་པས་རྣམ་པར་སྤངས་པའི་ཆོས་དེ་དག་ཇི་ལྟར་བྱིས་པ་དག་གིས་བཟུང་བ་དེ་བཞིན་དུ་མཁས་པ་དག་འཛིན་པར་མི་བྱེད་དོ། །བཟང་སྐྱོང་ཇི་ལྟར་ཆོས་རྣམས་ཀྱི་ཆོས་ཀྱི་མཚན་ཉིད་དེ་ལྟར་རྣམ་པར་སྤངས་པ་མ་ཡིན་ཞིང་། ཡང་དག་པར་འདས་པ་མ་ཡིན་ལ། བོར་བ་མ་ཡིན་ཞིང་རྙེད་པ་མ་ཡིན་ནོ། །བཟང་སྐྱོང་གང་ངའི་ཐད་དུ་ཕྱིན་ནས་འདི་སྐད་ཅེས་སྨྲ་བའི་ལྷ་དེའི་
ཚིག་ལན་ངས་འདི་སྐད་ཅེས་བཏབ་སྟེ། དགེ་སྦྱོང་དགྱེས་པ་མཛད་དམ། ངས་སྨྲས་པ། ལྷ་ངས་ཅི་སྙེད། དགེ་སྦྱོང་ཐུགས་ངན་མཛད་དམ། ངས་སྨྲས་པ། ལྷ་ངའི་ཅི་ཆུད་ཟོས། དེས་གསོལ་པ། དགེ་སྦྱོང་དགྱེས་པའང་མ་ལགས་ཐུགས་ངན་ཡང་མི་མཛད་པ་ནི་དགེ་སྦྱོང་ལེགས་སོ་ལེགས་སོ། །བཟང་སྐྱོང་ལྷ་དེ་འཁོར་འདི་ཉིད་དུ་འདུས་པར་གྱུར་ནས་འདུག་སྟེ། བཟང་སྐྱོང་དེས་ཆོས་ཐམས་ཅད་རང་བཞིན་གྱིས་ཡོངས་སུ་མྱ་ངན་ལས་འདས་པ་དག་ཀུན་དུ་ཤེས་སོ། །ལྷ་དེས་ནི་སྔོན་སངས་རྒྱས་ལྔ་བརྒྱ་དག་མཉེས་པར་བྱས་ཏེ། དེ་དག་མཉེས་པར་བྱས་པས་ལྷ་དེ་དེ་ལྟར་མངོན་པར་ཤེས་པ་མྱུར་བར་གྱུར་ཏོ། །བཟང་སྐྱོང་སེམས་ཅན་དགེ་བའི་རྩ་བ་མ་བསྐྱེད་པ་རྣམས་དང་། དགེ་བའི་རྩ་བ་ཡོངས་སུ་མ་སྨིན་པ་རྣམས་ཆོས་དེ་དག་ལ་འདུལ་བའི་ཕྱིར་མོས་པར་ང་མི་སྨྲའོ། །དེ་བཞིན་དུ་ཉན་ཐོས་རྣམས་ཀྱི་མོས་པ་མ་མཐོང་ངོ་། །བཟང་སྐྱོང་ཆོས་དེ་དག་གང་ལ་ལས་ཐོས་ནས་ཐོས་པའི་མོད་ལ་མོས་པར་འགྱུར་བའམ། དད་པར་འགྱུར་བའམ། ཡིད་ཆེས་པར་འགྱུར་བའི་དགེ་བའི་རྩ་བ་དེ་ནི་ནང་གི་ཆུང་ངུར་འགྱུར་ཏེ། དེའི་གོང་ན་ཤེས་རབ་ཀྱི་ཕུང་པོའི་ཡེ་ཤེས་ཤིན་ཏུ་རྒྱས་པས་ཡེ་ཤེས་ལ་འཇུག་པའི་དགེ་བའི་རྩ་བ་རྣམས་ནི་རྒྱ་ཆེ་བར་བལྟ་བར་བྱའོ། །དེ་ནས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱ་ཙམ་པོ་དེ་དག་གིས་བཅོམ་ལྡན་འདས་ལ་ལག་པ་ལྟ་བུའི་པད་མ་དེས་གཏོར་ཅིང་མངོན་པར་གཏོར་ནས་ཚིག་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དག་ལག་པ་ལྟ་བུའི་པད་མའི་ཆོས་ཀྱི་རྣམ་གྲངས་དེ་ལ་དམིགས་ནས་ཡོངས་སུ་ཚོལ་བར་བགྱིད་པའམ། ཉན་པར་བགྱིད་པ་དེ་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འགྱུར་ལགས་སོ། །བཅོམ་ལྡན་འདས་ཕྱོགས་བཅུ་ན་སངས་རྒྱས་བཅོམ་ལྡན་འདས་གང་དག་བཞུགས་ཏེ་འཚོ་ཞིང་གཞེས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་དམིགས་པ་དེས་འདི་ལྟ་སྟེ། སེམས་ཅན་རྣམས་ཀྱི་བྱང་ཆུབ་ཀྱི་
ཕྱོགས་ཀྱི་ཆོས་ཡོངས་སུ་སྨིན་པར་བགྱི་བའི་སླད་དུ་ཆོས་བསྟན་པར་གསོལ་བ་འདེབས་ལགས་སོ། །དེ་ནས་བཅོམ་ལྡན་འདས་ཀྱིས་མཁྱེན་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་འདི་སྐད་ཅེས་བཀའ་སྩལ་ཏོ། །བཟང་སྐྱོང་ཁྱོད་ལ་སེམས་ཅན་རྣམས་ཀྱིས་ཕན་བཏགས་སམ་ཞེ་ན་གང་གི་ཕྱིར་ཁྱོད་སེམས་ཅན་རྣམས་ཀྱི་བྱང་ཆུབ་ཀྱི་ཕྱོགས་ཀྱི་ཆོས་ཡོངས་སུ་སྨིན་པར་བྱ་བའི་ཕྱིར་སེམས་ཅན་རྣམས་ཀྱི་དོན་དུ་གོ་ཆ་བགོས་ཤིང་། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་ཆོས་བསྟན་པར་གསོལ་བ་འདེབས། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་སེམས་ཅན་དེ་དག་གིས་སྨན་བཏགས་པས་བདག་གིས་དེ་དག་ཀྱང་སངས་རྒྱས་ཀྱི་ཞིང་དག་ཏུ་དགོད་པར་བགྱི་བའམ། དེ་དག་གིས་གནོད་པ་བགྱིས་པས་དེ་དག་སངས་རྒྱས་ཀྱི་ཞིང་དག་ཏུ་དགོད་པར་མི་བགྱིའོ་ཞེས་གནོད་པར་བགྱི་བའམ། ཕན་གདགས་པའི་སླད་དུ་སེམས་ཅན་རྣམས་ཀྱི་དོན་དུ་གོ་ཆ་དེ་བགོས་པ་མ་ལགས་ཏེ། བཅོམ་ལྡན་འདས་བྱང་ཆུབ་སེམས་དཔའ་རྣམས་དེ་ལྟ་བུའི་གོ་ཆ་མི་འཚལ་བའི་སླད་དུའོ། །བཅོམ་ལྡན་འདས་དཔེར་བགྱི་ན་ཡན་ལག་ཐམས་ཅད་ལས་མེ་ཏོག་ཀུན་དུ་རྒྱས་པའི་ཤིང་ཡོངས་འདུ་ས་བརྟོལ་གྱིས་སུམ་ཅུ་རྩ་གསུམ་པའི་ལྷ་རྣམས་དགའ་བར་འགྱུར་བ་དང་། ཡན་ལག་ཐམས་ཅད་ལས་མེ་ཏོག་ཀུན་དུ་རྒྱས་པའི་ཤིང་ཡོངས་འདུ་ས་བརྟོལ་མཐོང་ནས། དེ་ལ་ཡང་སུམ་ཅུ་རྩ་གསུམ་པའི་ལྷ་རྣམས་མིའི་མ་ལགས་པའི་འདོད་པའི་ཡོན་ཏན་ལྔ་པོ་དག་གིས་རྩེ་ཞིང་དགའ་ལ་དགའ་མགུར་སྤྱོད་པར་བགྱིད་པར་གྱུར་ན། བཅོམ་ལྡན་འདས་འོ་ན་ཅི་སུམ་ཅུ་རྩ་གསུམ་པའི་ལྷ་རྣམས་ཀྱིས་ཡན་ལག་ཐམས་ཅད་ལས་མེ་ཏོག་ཀུན་དུ་རྒྱས་པའི་ཤིང་ཡོངས་འདུ་ས་བརྟོལ་ལ་གནོད་པར་བགྱི་བའམ། སྨན་གདགས་པར་བགྱིས་ལགས་སམ། གང་གི་སླད་དུ་ཡོངས་འདུ་ས་བརྟོལ་མཐོང་ནས་སུམ་ཅུ་རྩ་གསུམ་པའི་
ལྷ་རྣམས་དགའ་བར་འགྱུར་ཞིང་། མིའི་མ་ལགས་པའི་འདོད་པའི་ཡོན་ཏན་ལྔ་པོ་དག་གིས་རྩེ་ཞིང་དགའ་ལ་དགའ་མགུར་སྤྱོད་པར་བགྱིད་ཅིང་ཡན་ལག་ཐམས་ཅད་ལས་མེ་ཏོག་ཀུན་ཏུ་རྒྱས་པའི་ཤིང་ཡོངས་འདུ་ས་བརྟོལ་དུ་རེག་ནས་སུམ་ཅུ་རྩ་གསུམ་པའི་ལྷ་རྣམས་དགའ་བར་འགྱུར། བཅོམ་ལྡན་འདས་སུམ་ཅུ་རྩ་གསུམ་པའི་ལྷ་རྣམས་ཀྱིས་ཡོངས་འདུ་ས་བརྟོལ་ལ་གནོད་པར་བགྱི་བའམ། སྨན་གདགས་པ་ཅི་ཡང་མ་བགྱིས་ལགས་མོད་ཀྱི། འོན་ཀྱང་སུམ་ཅུ་རྩ་གསུམ་པའི་ལྷ་རྣམས་ཀྱིས་འདོད་པ་ལ་ལོངས་སྤྱོད་པར་བགྱི་བའི་སླད་དུ་ཡན་ལག་ཐམས་ཅད་ལས་མེ་ཏོག་ཀུན་ཏུ་རྒྱས་པའི་ཤིང་ཡོངས་འདུ་ས་བརྟོལ་གྱི་ཐད་དུ་མངོན་པར་མཆི་བར་འོས་པ་ལགས་པ་དེ་བཞིན་དུ། བཅོམ་ལྡན་འདས་བདག་ལ་སེམས་ཅན་རྣམས་ཀྱིས་གནོད་པར་བགྱི་བའམ། སྨན་གདགས་པ་མ་བགྱིས་ལགས་མོད་ཀྱི་འོན་ཀྱང་ཡེ་ཤེས་སངས་རྒྱས་ཀྱི་ཡེ་ཤེས་དེ་བསྒྲུབས་ཏེ། ཡན་ལག་ཐམས་ཅད་ལས་མེ་ཏོག་ཀུན་དུ་རྒྱས་པའི་ཤིང་ཡོངས་འདུ་ས་བརྟོལ་བཞིན་དུ་ཅི་ནས་ཀྱང་སེམས་ཅན་གྲངས་མ་མཆིས་དཔག་ཏུ་མ་མཆིས་པ་དེ་དག་མངོན་པར་མཆི་བའི་འོས་སུ་བགྱི་བའི་སླད་དུ་སེམས་ཅན་རྣམས་ཀྱི་དོན་དུ་དེ་ལྟ་བུའི་གོ་ཆ་འཚལ་ལགས་ཏེ། དེ་ལ་ཡང་སེམས་ཅན་རྣམས་དགའ་བ་མ་མཆིས་པའི་དེ་བཞིན་གཤེགས་པའི་དབང་པོ་ལྔ་པོ་དག་གིས་སུམ་ཅུ་རྩ་གསུམ་པའི་ལྷ་དག་བཞིན་དུ་རྩེ་ཞིང་དགའ་ལ་དགའ་མགུར་སྤྱོད་པར་བགྱིད་ལགས་སོ། །བཅོམ་ལྡན་འདས་བདག་ཅག་གིས་གོ་ཆ་དེ་ཡང་སེམས་ཅན་ལས་དབེན་པར་བགྱི་བའི་སླད་དུ་བགོས་ལགས་ཀྱི། སེམས་ཅན་དམིགས་པར་བགྱི་བའི་སླད་དུ་མ་ལགས། བདག་ལས་དབེན་པར་བགྱི་བའི་སླད་དུ་བགོས་ལགས་ཀྱི། བདག་དམིགས་པར་བགྱི་བའི་སླད་དུ་མ་ལགས། ཆོས་ལས་དབེན་པར་བགྱི་བའི་སླད་དུ་བགོས་ལགས་ཀྱི། ཆོས་དམིགས་པར་བགྱི་བའི་སླད་དུ་མ་ལགས། ཕུང་པོ་ལས་དབེན་པར་བགྱི་བའི་སླད་དུ་བགོས་ལགས་ཀྱི། ཕུང་པོ་དམིགས་པར་བགྱི་བའི་སླད་དུ་མ་ལགས། ཁམས་ལས་
དབེན་པར་བགྱི་བའི་སླད་དུ་བགོས་ལགས་ཀྱི། ཁམས་དམིགས་པར་བགྱི་བའི་སླད་དུ་མ་ལགས། སྐྱེ་མཆེད་ལས་དབེན་པར་བགྱི་བའི་སླད་དུ་བགོས་ལགས་ཀྱི། སྐྱེ་མཆེད་དམིགས་པར་བགྱི་བའི་སླད་དུ་མ་ལགས་ཏེ། འདི་ལྟ་སྟེ། དབེན་པའི་གོ་ཆ་དེ་ལྟ་བུའི་གོ་ཆ་དེ་བགོས་ལགས་སོ། །བཅོམ་ལྡན་འདས་གོ་ཆ་དེ་ནི་དབེན་པའི་གོ་ཆ་ལགས་ཏེ། དེ་ལ་ནི་གོ་ཆ་མ་མཆིས་གོ་ཆའི་འབྲས་བུ་མ་མཆིས་ཏེ། གང་ཡང་ཐོབ་པར་བགྱི་བའི་སླད་དུ་མ་ལགས། དོར་བར་བགྱི་བའི་སླད་དུ་མ་ལགས་པ་དེ་ལྟ་བུའི་གོ་ཆ་དེ་བགོས་ལགས་སོ། །བདག་འདི་ནི་གོ་ཆའོ་ཞེས་མོས་པར་མི་བགྱིད་ཅིང་གཡར་གྱིས་མི་ལེན་པ་དང་། གོ་ཆ་འདི་ནི་འདི་ལྟ་བུའོ་ཞེས་གཡར་གྱིས་མི་ལེན་པ་དང་། ཚད་དེ་ལྟ་བུའོ་ཞེས་གཡར་གྱིས་མི་ལེན་པ་དང་། གོ་ཆ་འདི་ནི་འདིའི་ཕྱིར་རོ་ཞེས་གཡར་གྱིས་མི་ལེན་པ་དེ་ལྟ་བུའི་གོ་ཆ་དེ་བགོས་ལགས་སོ། །བཅོམ་ལྡན་འདས་གལ་ཏེ་གཡར་གྱིས་བླངས་ན་ནི་བདག་ཉེ་བར་བླངས་པར་འགྱུར་བ་ཞིག་ན། བཅོམ་ལྡན་འདས་བདག་ཉེ་བར་མི་ལེན་ལགས་ཏེ། དེ་ཉེ་བར་མི་ལེན་ཅིང་བྱང་ཆུབ་སེམས་དཔའ་ནི་བདག་གམ་བདག་མ་མཆིས་པ་ལ་མི་གནས་པའི་སླད་དུའོ། །བཅོམ་ལྡན་འདས་གལ་ཏེ་བདག་མ་མཆིས་པ་ལ་གནས་ན་ནི་བདག་ཁོ་ན་ལ་གནས་པར་འགྱུར་བ་ཞིག་ན། བཅོམ་ལྡན་འདས་ཆོས་ཐམས་ཅད་མི་གནས་པའི་སླད་དུའོ། །བཅོམ་ལྡན་འདས་འཇིག་རྟེན་དུ་གོ་ཆ་དེ་དེ་ལྟར་རབ་ཏུ་བསྒོམས་པ་ལགས་ཏེ། བཅོམ་ལྡན་འདས་ཇི་ལྟར་ཅི་ཡང་མ་བསྒོམས་པ་དེ་ལྟར་རབ་ཏུ་བསྒོམས་པ་ལགས་པའི་སླད་དུའོ། །གཞན་ཡང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གིས་སོ་སོའི་སྐྱེ་བོའི་ཆོས་རྣམས་ཐག་རིང་ཞེས་བགྱི་བར་ཡང་དག་པར་རྗེས་སུ་མ་མཐོང་ཞིང་། སངས་རྒྱས་ཀྱི་ཆོས་རྣམས་ཐག་ཉེ་ཞེས་བགྱི་བར་ཡང་དག་པར་རྗེས་སུ་མ་མཐོང་། སློབ་པའི་ཆོས་རྣམས་ཐག་རིང་ཞེས་བགྱི་བར་ཡང་དག་པར་རྗེས་སུ་མ་མཐོང་ཞིང་། སངས་རྒྱས་ཀྱི་ཆོས་
རྣམས་ཐག་ཉེ་ཞེས་བགྱི་བར་ཡང་དག་པར་རྗེས་སུ་མ་མཐོང་། སངས་རྒྱས་ཀྱི་ཆོས་དེ་དག་ཅེས་དེ་ལྟར་ཡང་ཡང་དག་པར་རྗེས་སུ་མ་མཐོང་ཞིང་། སངས་རྒྱས་ཀྱི་ཆོས་དེ་དག་དེ་བཞིན་ཞེས་ཡང་དག་པར་རྗེས་སུ་མ་མཐོང་ལགས་ཏེ། བཅོམ་ལྡན་འདས་བདག་གིས་ཕན་ཡོན་ཅི་ཡང་ཡང་དག་པར་རྗེས་སུ་མ་མཐོང་ཞིང་ཉེས་དམིགས་ཅི་ཡང་ཡང་དག་པར་རྗེས་སུ་མ་མཐོང་བ་དེ་ལྟ་བུའི་གོ་ཆ་བགོས་ལགས་ཏེ། འཇིག་རྟེན་དུ་གོ་ཆ་དེ་དེ་ལྟར་རབ་ཏུ་བགོས་པ་ལགས་སོ། །དེ་ནས་བཟང་སྐྱོང་ལ་སོགས་པ་བྱང་ཆུབ་སེམས་དཔའ་ལྔ་བརྒྱས་བཅོམ་ལྡན་འདས་ལ་པད་མ་གང་དག་གཏོར་བ་དེ་དག་ཕྱོགས་བཅུའི་འཇིག་རྟེན་གྱི་ཁམས་དག་ཏུ་དོང་ནས། སངས་རྒྱས་བཅོམ་ལྡན་འདས་རྣམས་ཀྱི་སྟེང་དུ་ཆར་བབ་ཅིང་སེམས་ཅན་ཡོངས་སུ་སྨིན་པར་ཡང་བྱས་སོ།། །།བམ་པོ་གསུམ་པ། ཡང་དེའི་ཚེ་ཤར་ཕྱོགས་སུ་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་དེའི་ཕ་རོལ་གྱི་ཡང་ཆེས་ཕ་རོལ་ན་འཇིག་རྟེན་གྱི་ཁམས་མཚན་གྱི་གཟི་བརྗིད་རྒྱལ་པོ་ཞེས་བྱ་བ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་མ་མེད་པའི་ང་རོ་ཞེས་བྱ་བ་བཞུགས་ཏེ། འཚོ་ཞིང་གཞེས་ལ་ཆོས་ཀྱང་སྟོན་ཏོ། །བཅོམ་ལྡན་འདས་དེས་ཀྱང་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བ་འདི་ནི་ངའི་འོག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་སྣང་བ་ཆེན་པོ་དེ་མཐོང་ཞིང་གསུང་བསལ་བའི་སྒྲ་དེ་ཡང་ཐོས་ཏེ། དེ་ཐོས་ནས་ཀྱང་དེ་བཞིན་གཤེགས་པ་མཚན་མ་མེད་པའི་ང་རོ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འོད་གདའ་བ་འདི་དང་། གསུང་བསལ་བའི་སྒྲ་གྲག་པ་འདི་སུའི་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་
བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་འདི་སྐད་ཅེས་བཀའ་སྩལ་ཏོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་སངས་རྒྱས་ཀྱི་ཞིང་འདི་ནས་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་དེའི་ཕ་རོལ་གྱི་ཡང་ཆེས་ཕ་རོལ་ན་འཇིག་རྟེན་གྱི་ཁམས་མི་མཇེད་ཅེས་བྱ་བ་ཡོད་དེ། དེ་ན་དེ་བཞིན་གཤེགས་པ་ཤཱཀྱ་ཐུབ་པ་ཞེས་བྱ་བ་བཞུགས་ཏེ་འཚོ་ཞིང་གཞེས་ལ། བྱང་ཆུབ་སེམས་དཔའི་སྡེ་སྣོད་སེམས་ཅན་ཐམས་ཅད་ཡང་དག་པར་ཚིམ་པར་བྱེད་པ་སེམས་ཅན་ཐམས་ཅད་ཀྱི་ཐེ་ཚོམ་གཅོད་པ་ཞེས་བྱ་བའི་ཆོས་ཀྱི་རྣམ་གྲངས་ཀྱི་ཆོས་ཀྱང་སྟོན་ཏེ། འོད་དེ་དང་གསུང་བསལ་བའི་སྒྲ་གྲག་པ་དེ་ནི་དེའི་ཡིན་ནོ། །སངས་རྒྱས་ཀྱི་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་བསམ་གྱིས་མི་ཁྱབ་པའི་གོ་ཆ་བགོས་པ་མཐའ་ཡས་ཤིང་དཔག་ཏུ་མེད་པ་དག་མཚམས་སུ་ལྷགས་སོ། །དེ་ནས་བཅོམ་ལྡན་འདས་དེ་ལ་བྱང་ཆུབ་སེམས་དཔའ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་བལྟ་བ་དང་། ཕྱག་བགྱི་བ་དང་། བསྙེན་བཀུར་བགྱི་བའི་སླད་དུ་འཇིག་རྟེན་གྱི་ཁམས་མི་མཇེད་དེར་བདག་མཆི་བར་བགྱིའོ། །བྱང་ཆུབ་སེམས་དཔའ་དེ་དག་ཀྱང་བལྟ་བར་བགྱིའོ། །དེ་ཅིའི་སླད་དུ་ཞེ་ན། སེམས་ཅན་དེ་ལྟ་བུ་དེ་དག་ཐོས་པར་ཡང་ཤིན་ཏུ་དཀའ་ལགས་ན་ལྟ་བ་ལྟ་སྨོས་ཀྱང་ཅི་འཚལ་ཞིང་བསྙེན་བཀུར་བགྱི་བ་ལྟ་སྨོས་ཀྱང་ཅི་འཚལ་བའི་སླད་དུའོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་མ་མེད་པའི་ང་རོས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེའི་དུས་ལ་དབབ་པར་ཤེས་ན་སོང་ཤིག །དེ་བཞིན་གཤེགས་པས་སྐབས་ཕྱེ་བས། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་སྟན་ལས་ལངས་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་བསྐོར་བ་ཡང་བྱས་ནས་སོང་སྟེ། བཅོམ་ལྡན་འདས་
ཀྱིས་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཁྱོད་ཀྱིས་པད་མ་འདི་ངའི་ཚིག་གིས་བཅོམ་ལྡན་འདས་དེ་བཞིན་གཤེགས་པ་ཤཱཀྱ་ཐུབ་པ་དེ་ལ་ཕུལ་ཅིག་ཅེས་དེའི་ལག་ཏུ་པད་མ་གཅིག་བྱིན་ནོ། །དེ་ནས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་པད་མ་དེ་ལག་པས་བླངས་ནས་འཇིག་རྟེན་གྱི་ཁམས་མི་མཇེད་དུ་འོངས་སོ། །པད་མ་ཆེན་པོ་དེ་ལས་ཀྱང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་མ་མེད་པའི་ང་རོ་བྱང་ཆུབ་སེམས་དཔའི་སྤྱད་པ་སྤྱོད་པ་ན་འཁོར་ཁྱད་པར་དུ་འཕགས་པ་གང་དག་བྱུང་བར་གྱུར་པ་དེ་དག་ཐམས་ཅད་ཀུན་ཏུ་སྣང་སྟེ། སེམས་ཅན་དེ་དག་གིས་ལོངས་སྤྱད་པར་བྱ་བའི་ཕྱིར་པད་མ་ཆེན་པོ་དེ་ལྟ་བུ་དག་གིས་ཀྱང་འཇིག་རྟེན་གྱི་ཁམས་དེ་ཁྱབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་པད་མ་དེ་ཐོགས་ནས། འཇིག་རྟེན་གྱི་ཁམས་མི་མཇེད་དུ་སོན་ཏོ། །འཇིག་རྟེན་གྱི་ཁམས་མི་མཇེད་འདིར་དེ་ཕྱིན་ནས། དེ་ནས་དེ་མ་ཐག་ཏུ་དེ་ཉིད་ཀྱི་ཚེ་འཇིག་རྟེན་གྱི་ཁམས་མི་མཇེད་འདི་ན་ཤིང་ལྗོན་པའི་རྣམ་པའམ། འབྲས་བུའི་རྣམ་པའམ། མེ་ཏོག་གི་རྣམ་པའམ། ལོ་མའི་རྣམ་པ་ཇི་སྙེད་ཡོད་པ་དང་། ཐ་ན་སོར་བཞི་ཙམ་པ་དེ་ཐམས་ཅད་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་ལག་པ་ལས་ཀུན་ཏུ་སྣང་ངོ་། །འཇིག་རྟེན་གྱི་ཁམས་མི་མཇེད་འདི་ན་སེམས་ཅན་ཇི་སྙེད་ཡོད་པ་དེ་དག་གིས་རང་རང་གི་སྐད་དག་མངོན་པར་བརྗོད་དེ། དེ་དག་མངོན་པར་བརྗོད་པ་ན་མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་གྲག་ཅིང་། དབང་པོ་དང་། སྟོབས་དང་། བྱང་ཆུབ་ཀྱི་ཡན་ལག་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པའི་སྒྲ་དག་ཀྱང་གྲག་གོ །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །ཨ་ལ་ལ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་རྫུ་འཕྲུལ་
མངོན་པར་འདུ་མཛད་པ་ཆེན་པོ་འདི་ཀུན་ཏུ་གདའ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་རྫུ་འཕྲུལ་མངོན་པར་འདུ་བྱེད་པ་འདི་ནི་དེ་བཞིན་གཤེགས་པའི་མ་ཡིན་ཏེ། ཤ་ར་དྭ་ཏིའི་བུ་རྫུ་འཕྲུལ་མངོན་པར་འདུ་བྱེད་པ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་ཡིན་ནོ། །ཤ་ར་དྭ་ཏིའི་བུ་སངས་རྒྱས་ཀྱི་ཞིང་འདི་ནས་ཤར་ཕྱོགས་ཀྱི་ཕྱོགས་ཆར་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་འདས་པ་ན། འཇིག་རྟེན་གྱི་ཁམས་མཚན་གྱི་གཟི་བརྗིད་རྒྱལ་པོ་ཞེས་བྱ་བ་ཡོད་དེ། དེ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཚན་མ་མེད་པའི་ང་རོ་ཞེས་བྱ་བ་བཞུགས་ཏེ། འཚོ་ཞིང་གཞེས་པའི་འཇིག་རྟེན་གྱི་ཁམས་དེ་ནས། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཞེས་བྱ་བ་འཇིག་རྟེན་གྱི་ཁམས་མི་མཇེད་འདིར་འོངས་ཏེ། བྱང་ཆུབ་སེམས་དཔའ་དེའི་སྔོན་གྱི་ལས་ཀྱི་རྣམ་པར་སྨིན་པས་འདི་སྣང་ངོ་། །དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་དགེ་བའི་རྩ་བ་ཇི་སྙེད་ཅིག་བསགས་ཤིང་དགེ་བའི་རྩ་བ་གང་དག་བསགས་པས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་རྣམ་པར་སྨིན་པར་ཡོངས་སུ་སྦྱང་བ་དེ་ལྟ་བུ་དེ་དག་ཀུན་དུ་གདའ་ལགས། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ཁྱོད་ཀྱིས་དེ་བཞིན་གཤེགས་པ་ལ་དོན་དེ་དྲི་བར་སེམས་པ་ནི་ལེགས་སོ་ལེགས་སོ། །ཤ་ར་དྭ་ཏིའི་བུ་དེ་བཞིན་གཤེགས་པའི་མཐུ་ཁོ་ནས་ཁྱོད་ཀྱི་སྤོབས་པ་དེ་ཡང་སྐྱེས་པ་ཡིན་ཏེ། ཤ་ར་དྭ་ཏིའི་བུ་དེའི་ཕྱིར་ཉོན་ཅིག་དང་ངས་ཁྱོད་ལ་བཤད་དོ། །བྱང་ཆུབ་སེམས་དཔའ་སེམས་
དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་སངས་རྒྱས་བཅོམ་ལྡན་འདས་བྱང་ཆུབ་མངོན་པར་རྫོགས་པར་སངས་རྒྱས་ཏེ། བྱང་ཆུབ་ཀྱི་སྙིང་པོ་དམ་པ་ན་བཞུགས་པ་ཇི་སྙེད་བྱུང་བ་ལ། སྔོན་ཐོག་མར་ཆོས་བསྐུལ་བ་བྱས་ཤིང་གསོལ་བ་བྱས་ཏེ། འདིས་སྔོན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཚོགས་ཀྱི་དགེ་བའི་རྩ་བ་དག་བསྐྱེད་དེ། དེ་དག་གི་ཐད་དུ་སོང་ནས་ཁ་ཅིག་ལ་ནི་ཚངས་པར་གྱུར་པས་བསྐུལ་བ་བྱས་ཤིང་གསོལ་བ་བཏབ་བོ། །དེ་དག་གི་ཐད་དུ་སོང་ནས་ཁ་ཅིག་ལ་ནི་བརྒྱ་བྱིན་དུ་གྱུར་པ་དང་། ཁ་ཅིག་ལ་ནི་འཁོར་ལོས་སྒྱུར་བར་གྱུར་པ་དང་། ཁ་ཅིག་ལ་ནི་རྒྱལ་པོ་དྲང་སྲོང་དུ་གྱུར་པས་བསྐུལ་བ་བྱས་ཤིང་གསོལ་བ་བཏབ་བོ། །ཤ་ར་དྭ་ཏིའི་བུ་འདི་ལྟ་སྟེ་དཔེར་ན། ང་ཐོག་མར་མངོན་པར་རྫོགས་པར་སངས་རྒྱས་ནས་ཚངས་པ་ཆེན་པོས་སེམས་ཅན་ལས་ཀྱི་སྒྲིབ་པ་ཆུང་ངུ་དང་ལྡན་པ་དག་མཆིས་ཏེ། ཆོས་མ་ཐོས་པ་དག་ལས་ཉམས་ཤིང་བཅོམ་ལྡན་འདས་ཀྱི་བཀའ་བཞིན་དུ་བགྱིད་པར་ཡང་འགྱུར་ན། བཅོམ་ལྡན་འདས་ཆོས་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ་ཞེས་ཆོས་ཀྱི་འཁོར་ལོ་རབ་ཏུ་བསྐོར་བའི་ཕྱིར་བསྐུལ་ཅིང་གསོལ་བ་བཏབ་པ་དེ་བཞིན་དུ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་སངས་རྒྱས་བཅོམ་ལྡན་འདས་ཇི་སྙེད་བྱུང་བ་ལ་བཅོམ་ལྡན་འདས་ཆོས་བསྟན་དུ་གསོལ། བཅོམ་ལྡན་འདས་ཆོས་ཀྱི་འཁོར་ལོ་བསྐོར་དུ་གསོལ་ཞེས་བསྐུལ་ཅིང་གསོལ་བ་བཏབ་བོ། །འདིས་དགེ་བའི་རྩ་བ་གང་དག་བསགས་པ་དེ་དག་ཆོས་ཀྱི་འཁོར་ལོ་བསྐོར་བར་གསོལ་བ་གདབ་པ་མ་གཏོགས་པར་གང་དུ་ཡང་ཡོངས་སུ་མ་བསྔོས་ཏེ། ཤ་ར་དྭ་ཏིའི་བུ་དེའི་ཕྱིར་དོན་དེ་རབ་ཏུ་གྲུབ་པར་བྱ་བའི་ཕྱིར་ཁྱོད་ལ་དཔེ་བྱ་སྟེ། ཤ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་དེ་ནི་གདན་ཟླ་བ་ཐེར་འབུམ་དང་། ཉི་མ་ཐེར་འབུམ་རྒྱུ་ཞིང་གླིང་ཆེན་པོ་བཞི་པའི་འཁོར་རྒྱ་མཚོ་ཆེན་པོ་ཐེར་འབུམ་ཕྲག་བཞི་དང་། གླིང་བཞི་པ་ཐེར་འབུམ་ཕྲག་བཞི་དང་། གླིང་
ཁྲག་ཁྲིག་ཕྲག་བདུན་ཅུ་དང་། འཁོར་རིའི་རྒྱལ་པོ་རི་རབ་ཐེར་འབུམ་དང་། ནང་གི་ཁོར་ཡུག་ཐེར་འབུམ་ཡོད་པ་སྟེ། ཤ་ར་དྭ་ཏིའི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ནི་ཡོངས་སུ་བརྟག་པ་བཟུང་ན་འདི་ལྟ་སྟེ། དཔེར་ན་རྒྱ་མཚོ་ཆེན་པོ་དཔག་ཚད་བརྒྱད་ཁྲི་བཞི་སྟོང་དང་ལྡན་པ་བཞིན་དུ་འཕང་དུའང་དེ་ཙམ་དུ་གྱུར་ལ། ཤ་ར་དྭ་ཏིའི་བུ་དེ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡུངས་འབྲུས་གང་བར་གྱུར་ཏེ། དེ་ལ་སྟོབས་དང་ལྡན་ཞིང་མཐུ་དང་བརྩོན་འགྲུས་ཐོབ་པའི་མི་ལ་ལ་ཞིག་བྱུང་ལ། དེས་ཡུངས་འབྲུའི་ཕུང་པོ་ཆེན་པོ་དེ་ལས་སྤར་གང་བླངས་ནས་ཕྱོགས་བཞིར་གཏོར་ཏེ། དེ་ཡང་རླུང་གིས་མངོན་པར་དེད་ལ། གང་ཡུངས་འབྲུ་རེ་རེ་ནས་བླངས་ཏེ་འཇིག་རྟེན་གྱི་ཁམས་རེ་རེར་འཕངས་ན། ཤ་ར་དྭ་ཏིའི་བུ་འདི་ཇི་སྙམ་དུ་སེམས། ཡུངས་ཀར་གྱི་འབྲུ་རེ་རེས་བཟུང་བའི་འཇིག་རྟེན་གྱི་ཁམས་དེ་དག་ཇི་སྙེད་དུ་འགྱུར། དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་དཔག་ཏུ་མ་མཆིས་ལགས་སོ། །བདེ་བར་གཤེགས་པ་དཔག་ཏུ་མ་མཆིས་ལགས་སོ། །བཀའ་སྩལ་པ། ཤ་ར་དྭ་ཏིའི་བུ་ཁྱོད་མོས་པར་བྱ། ཁོང་དུ་ཆུད་པར་བྱ་སྟེ། ཤ་ར་དྭ་ཏིའི་བུ་ཡུངས་འབྲུས་ཡོངས་སུ་ཟིན་པའི་འཇིག་རྟེན་གྱི་ཁམས་ཇི་སྙེད་ཡོད་པ་དེ་དག་ཐམས་ཅད་གྲོང་ཁྱེར་ཆེན་པོ་གཅིག་ཏུ་གྱུར་ལ། གྲོང་ཁྱེར་ཆེན་པོ་དེའི་ཆུ་ཞེང་དུ་ཇི་ཙམ་དུ་གྱུར་པར་འཕང་དུ་འང་དེ་ཙམ་དུ་གྱུར་ཏེ། དེའི་ར་བ་སྲ་ཞིང་བརྟན་ཏེ་མི་ཕྱེད་ལ་མི་ཤིགས་པ་དག་ཀྱང་དེ་ཙམ་དུ་གྱུར་ལ། ཤ་ར་དྭ་ཏིའི་བུ་གྲོང་ཁྱེར་ཆེན་པོ་དེ་ཡང་འདི་ལྟ་སྟེ་དཔེར་ན། འབྲུའི་སྣོད་བྱུར་བུར་གྱུར་པ་བཞིན་དུ་བྱེ་མས་གང་བར་གྱུར་ན། ཤ་ར་དྭ་ཏིའི་བུ་འདི་ཇི་སྙམ་དུ་སེམས། བྱེ་མའི་ཕུང་པོ་དེ་དག་ཇི་ཙམ་དུ་འགྱུར། གསོལ་པ། བཅོམ་ལྡན་འདས་དཔག་ཏུ་མ་མཆིས་ལགས་སོ། །བདེ་བར་གཤེགས་པ་གྲངས་མ་མཆིས་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་ཁྱོད་མོས་པར་བྱ།
ཁོང་དུ་ཆུད་པར་བྱ་སྟེ། རྩིས་མཁན་ནམ། རྩིས་མཁན་ཆེན་པོ་དག་གིས་བྱེ་མའི་ཕུང་པོ་དག་གི་ཚད་གཟུང་བར་ནི་ནུས་ཀྱང་སྲིད་ཀྱི། བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་ཐོག་མ་མངོན་པར་རྫོགས་པར་སངས་རྒྱས་ཏེ་བྱང་ཆུབ་ཀྱི་སྙིང་པོ་དམ་པ་ན་བཞུགས་པ་གང་དག་མཉེས་པར་བྱས་ནས། བཅོམ་ལྡན་འདས་ཀྱིས་ཆོས་ཀྱི་འཁོར་ལོ་བསྐོར་དུ་གསོལ་ཞེས་བསྐུལ་ཅིང་གསོལ་བ་བཏབ་པའི་དེ་བཞིན་གཤེགས་པ་དེ་དག་གི་ཚད་གཟུང་བར་ནི་མི་ནུས་སོ། །དེ་བས་ཆེས་མང་བའི་སངས་རྒྱས་བཅོམ་ལྡན་འདས་རྣམས་ལ་རིན་པོ་ཆེ་སྣ་བདུན་ལས་བྱས་པའི་ཆོས་ཀྱི་འཁོར་ལོ་དག་བྱས་ཏེ་ཕུལ་བ་དང་། དེ་བས་ཆེས་མང་བའི་སངས་རྒྱས་བཅོམ་ལྡན་འདས་རྣམས་ལ་མེ་ཏོག་གི་འཁོར་ལོ་དག་དང་། སྤོས་ཀྱི་འཁོར་ལོ་དག་ཕུལ་བ་ཡང་རེ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་མ་བསྔོས་ན། སངས་རྒྱས་བཅོམ་ལྡན་འདས་དག་ལ་གསེར་དངུལ་དང་། ཤིང་ལས་བྱས་པ་རྣམ་པ་སྣ་ཚོགས་ཀྱིས་ཤིན་ཏུ་བརྒྱན་པའི་འཁོར་ལོ་གཞན་དག་ཕུལ་བ་ལྟ་ཅི་སྨོས་ཏེ་འདི་ལྟ་སྟེ། སངས་རྒྱས་བཅོམ་ལྡན་འདས་དག་ལ་དེ་དག་དབུལ་བ་ན་ཆོས་ཀྱི་འཁོར་ལོ་བསྐོར་བར་བྱ་བའི་ཕྱིར་དང་། ཡང་དང་ཡང་དུ་གསོལ་བ་གདབ་པའི་ཕྱིར་ཡོངས་སུ་བསྔོས་སོ། །དེའི་འོག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རབ་ཀྱི་རྩལ་གྱིས་རྣམ་པར་གནོན་པའི་ཁྱུ་མཆོག་རྒྱལ་པོ་ཞེས་བྱ་བ་འཇིག་རྟེན་དུ་བྱུང་ངོ་། །དེའི་ཚེ་རྒྱལ་པོ་རྣམ་པར་བསྒྲགས་པའི་སྟོབས་ཀྱིས་ འབར་བ 
་ཞེས་བྱ་བ་ཞིག་བྱུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་མིའི་སྐྱེ་དགུའི་འཁོར་ལོས་སྒྱུར་བའི་དབང་ཕྱུག་ལ་དབང་བྱེད་དོ། །དེ་གང་གི་ཚེ་བཙུན་མོའི་འཁོར་ཏམ། སྐྱེད་མོས་ཚལ་ན་འདུག་པར་གྱུར་ཀྱང་རུང་སྟེ། འདོད་པའི་ཡོན་ཏན་དག་གིས་དགའ་བར་འདོད་དམ། རྩེ་བར་འདོད་དམ། དགའ་མགུར་སྤྱོད་པར་འདོད་ན་དེ་ལ་བཙུན་མོའི་འཁོར་དེ་གླུ་གར་དང་རོལ་མོ་འདོད་པ་དང་ལྡན་པ་
དག་བྱེད་ཅིང་། དེའི་ཚེ་དེས་མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་ཐོས་སོ། །དེའི་ཚེ་དེ་འདོད་པའི་ཡོན་ཏན་དག་ལས་ཡིད་བྱུང་བར་གྱུར་ཏེ། མ་ཆགས་པའི་ཡིད་དང་། སྐྲག་པའི་ཡིད་དང་། སྐྱོ་བའི་ཡིད་དང་ལྡན་པས་དེ་བཞིན་གཤེགས་པ་རབ་ཀྱི་རྩལ་གྱིས་རྣམ་པར་གནོན་པ་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་དེའི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་པ་དང་། འོངས་པ་དེ་ལ་བཅོམ་ལྡན་འདས་དེས་སྔོན་གྱི་དགེ་བའི་རྩ་བ་གླེང་བ་མཛད་དེ། དེས་དེ་ཐོས་ནས་འདི་སྙམ་དུ་སེམས་ཏེ། དེ་བཞིན་གཤེགས་པ་དེ་ནི་འདི་ལྟར་སྒྲིབ་པ་མི་མངའ་བའི་ཡེ་ཤེས་གཟིགས་པ་དང་ལྡན་ཏེ། བཅོམ་ལྡན་འདས་དེ་ནི་དུས་དེ་སྲིད་འདས་ཀྱང་དགེ་བའི་རྩ་བ་དག་ཐུགས་སུ་ཆུད་ཀྱི། བདག་གིས་ནི་དེ་ལས་དགེ་བའི་རྩ་བ་གཅིག་ཀྱང་མི་ཤེས་སོ་སྙམ་མོ། །འདི་ལྟ་སྟེ། སངས་རྒྱས་བཅོམ་ལྡན་འདས་དེ་སྙེད་ལ། འདོད་པའི་ཡོན་ཏན་གྱི་སྦག་པས་སྦགས་པ། རྒྱལ་སྲིད་ཀྱི་སྦག་པས་སྦགས་པ། དབང་ཕྱུག་གིས་སྦགས་པ་བདག་གིས་དགེ་བའི་རྩ་བ་དག་བྱས་ཤིང་བྱས་ནས་ཀྱང་མངོན་པར་མི་ཤེས་ལ། བྱང་ཆུབ་ཏུ་ཡང་ཡོངས་སུ་མ་བསྔོས་སུ་ཟིན་ཀྱང་གང་ད་ལྟར་བདག་དགེ་བའི་རྩ་བ་གང་ངེས་པར་མངོན་པར་འདུ་བྱེད་པ་དེ་སེམས་ཅན་ཐམས་ཅད་ཀྱི་དོན་དུ་ཡོངས་སུ་བསྔོ་བར་གྱུར་ཅིག །གང་དང་གང་དུ་སོ་སོར་སྐྱེ་བ་དང་། གང་དང་གང་དུ་སྐྱེ་བ་དང་། སངས་རྒྱས་ཀྱི་ཞིང་གང་དང་གང་དུ་འགྲོ་བར་གྱུར་པ་ཐམས་ཅད་དུ་སེམས་ཅན་དེ་དག་ལ་རང་རང་གི་སྒྲ་མངོན་པར་བརྗོད་པས་སྒྲ་འབྱིན་པར་གྱུར་ཅིག །དེ་ཐམས་ཅད་ཀྱང་སེམས་ཅན་རྣམས་ཀྱིས་མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་ཐོས་པར་གྱུར་ཅིག །འཇིག་རྟེན་གྱི་ཁམས་དེ་དག་ན་རྩྭ་དང་། ནགས་ཚལ་གང་དག་ཡོད་པ་དག་ཐ་ན་སོར་བཞི་ཙམ་པ་དག་ཀྱང་རུང་སྟེ། ཐམས་ཅད་ལས་མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་འབྱུང་བར་གྱུར་ཅིག །སྒྲ་དེ་ཡང་སེམས་ཅན་ཐམས་ཅད་ཀྱིས་ཐོས་པར་གྱུར་ཅིག །ཚོགས་ཀྱི་དགེ་
བའི་རྩ་བ་དེ་ཐམས་ཅད་ཀྱང་འདི་ལྟ་སྟེ། དེ་བཞིན་གཤེགས་པ་རབ་ཀྱི་རྩལ་གྱིས་རྣམ་པར་གནོན་པའི་ཁྱུ་མཆོག་གི་ཡེ་ཤེས་ཇི་འདྲ་བ་དེ་ལྟ་བུའི་ཐེག་པ་ཆེན་པོ་ཐོབ་པར་བྱ་བའི་ཕྱིར་སེམས་ཅན་ཐམས་ཅད་དང་ཐུན་མོང་དུ་བྱའོ་ཞེས་རྒྱལ་པོ་རྣམ་པར་བསྒྲགས་པའི་སྟོབས་ཀྱིས་འབར་བས་དེ་ལྟར་རིག་ནས་སྟན་ལས་ལངས་ཏེ་བཅོམ་ལྡན་འདས་དེའི་སྤྱན་སྔར་འདུག་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་དུ་བདག་དབང་ཕྱུག་ལ་དབང་བགྱིད་པའི་རྣམ་པར་རྒྱལ་བ་ན་བདག་གི་བདོག་པ་གང་ཅི་ཡང་རུང་། དེ་ཐམས་ཅད་སངས་རྒྱས་ལ་སོགས་པ་འཕགས་པའི་དགེ་འདུན་གྱིས་ལོངས་སྤྱད་པའི་སླད་དུ་ཕུལ་ལགས་སོ། །ཕུལ་ནས་ཀྱང་འཁོར་ལོས་སྒྱུར་བའི་རྒྱལ་པོ་རྣམ་པར་བསྒྲགས་པའི་སྟོབས་ཀྱིས་
འབར་བ ་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དེ་རབ་ཏུ་བྱུང་བར་རིག་ནས་རྒྱལ་པོ་དེའི་དཔུང་གི་ཚོགས་ཡན་ལག་བཞི་པ་ཡང་རྗེས་སུ་རབ་ཏུ་བྱུང་ངོ་། །རབ་ཏུ་བྱུང་བར་རིག་ནས་རྒྱལ་པོའི་བཙུན་མོའི་འཁོར་ལས་ཁྲག་ཁྲིག་ཕྲག་བཞི་བཅུ་རབ་ཏུ་བྱུང་ངོ་། །དེ་དག་རབ་ཏུ་བྱུང་བར་རིག་ནས་གྲོང་མི་དང་། ཡུལ་མི་དག་ཀྱང་རྗེས་སུ་རབ་ཏུ་བྱུང་ངོ་། །ཤ་ར་དྭ་ཏིའི་བུ་མདོར་ན་ཁྲག་ཁྲིག་ཕྲག་བརྒྱད་ཅུ་རྗེས་སུ་རབ་ཏུ་བྱུང་སྟེ། དེ་དག་དེ་ལྟར་རབ་ཏུ་བྱུང་མ་ཐག་ཏུ་བརྩོན་འགྲུས་བརྩམས་པས་གནས་སོ། །དགེ་བའི་ཆོས་ཡོངས་སུ་ཚོལ་བ་ལ་མངོན་པར་བརྩོན་པས་དེ་དག་རིང་པོ་མ་ཐོགས་པ་ཉིད་དུ་མངོན་པར་ཤེས་པ་ལྔ་སྐྱེས་སོ། །དེ་དག་རང་གི་མངོན་པར་ཤེས་པ་དང་། རྫུ་འཕྲུལ་གྱི་སྟོབས་དང་། ལུས་དེ་ཉིད་དང་། སྐྱེ་བ་དེ་ཉིད་ཀྱིས་ཤར་ཕྱོགས་སུ་སངས་རྒྱས་ཀྱི་ཞིང་གང་གའི་ཀླུང་གི་བྱེ་མ་སྙེད་དག་ཏུ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་ལ་བཅོམ་ལྡན་འདས་ཆོས་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ་ཞེས་ཆོས་ཀྱི་འཁོར་ལོ་བསྐོར་བར་བསྐུལ་ཅིང་གསོལ་བ་བཏབ་བོ། །དེ་བཞིན་དུ་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། སྟེང་གི་ཕྱོགས་དང་། དེ་བཞིན་དུ་འོག་གི་ཕྱོགས་དང་། དེ་བཞིན་དུ་ཕྱོགས་
མཚམས་རྣམས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་དག་ཏུ་སངས་རྒྱས་བཅོམ་ལྡན་འདས་གང་གཱའི་ཀླུང་གི་བྱེ་མ་སྙེད་དག་ལ་བཅོམ་ལྡན་འདས་ཆོས་བསྟན་དུ་གསོལ། བདེ་བར་གཤེགས་པ་ཆོས་བསྟན་དུ་གསོལ་ཞེས་ཆོས་ཀྱི་འཁོར་ལོ་བསྐོར་བར་བསྐུལ་ཅིང་གསོལ་བ་བཏབ་བོ། །དེ་ཕྱིན་ཆད་བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་བསྒྲགས་པའི་སྟོབས་ཀྱིས་ འབར་བ ་དེ་སངས་རྒྱས་ཀྱི་ཞིང་ཡོངས་སུ་མ་དག་པར་ནམ་ཡང་མ་སྐྱེས་ཤིང་མངལ་དུ་སྐྱེ་བ་ནམ་ཡང་ཡོངས་སུ་མ་བཟུང་ངོ་། །སངས་རྒྱས་ཀྱི་ཞིང་གང་དང་གང་དུ་སོང་བའི་སངས་རྒྱས་ཀྱི་ཞིང་དེ་ན་ཡལ་གའམ། འདབ་མའམ། ལོ་མའམ། ཤིང་ལྗོན་པའམ། ནགས་ཚལ་གང་དག་ཡོད་པ་དེ་དག་ཐམས་ཅད་ལས་མི་རྟག་པ་དང་། སྡུག་བསྔལ་བ་དང་། སྟོང་པ་དང་། བདག་མེད་པའི་སྒྲ་དག་གྲག་གོ །འཇིག་རྟེན་གྱི་ཁམས་དེ་དག་ན་སེམས་ཅན་གང་དག་འཁོད་པ་དེ་དག་ཀྱང་དེའི་ཚེ་རང་རང་གི་སྒྲ་རབ་ཏུ་བརྗོད་དེ། ཕན་ཚུན་སྒྲ་ཐོས་ཤིང་མི་རྟག་པ་དང་། སྡུག་བསྔལ་བ་དང་། བདག་མེད་པའི་སྒྲ་ཐོས་སོ། །ཤ་ར་དྭ་ཏིའི་བུ་དེའི་ཚེ་དེའི་དུས་ན་དེ་བཞིན་གཤེགས་པ་རབ་ཀྱི་རྩལ་གྱིས་རྣམ་པར་གནོན་པའི་ཁྱུ་མཆོག་རྒྱལ་པོ་དེ་ལས་སྔོན་གྱི་ཚོགས་ཀྱི་དགེ་བའི་རྩ་བ་ཐོས་ནས་ཁྱིམ་ནས་ཁྱིམ་མེད་པར་རབ་ཏུ་བྱུང་སྟེ། དགེ་བའི་རྩ་བ་དེ་ཡང་སེམས་ཅན་ཐམས་ཅད་དང་ཐུན་མོང་དུ་བྱས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོས་ཤིང་ལུས་ཐོབ་པ་དེས་ཀྱང་མངོན་པར་ཤེས་པ་རྣམས་སོ་སོར་ཐོབ་ལ། ཏིང་ངེ་འཛིན་གྱི་སྟོབས་བསྐྱེད་པས་ཀྱང་ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ཏུ་སོང་ནས། སངས་རྒྱས་བཅོམ་ལྡན་འདས་བྱང་ཆུབ་ཀྱི་སྙིང་པོ་དམ་པ་ན་བཞུགས་པ་གང་གཱའི་ཀླུང་གི་བྱེ་མ་སྙེད་དག་ལ་ཆོས་ཀྱི་འཁོར་ལོ་བསྐོར་བར་བསྐུལ་ཅིང་གསོལ་བ་བཏབ་ལ། དེ་བཞིན་དུ་ཕྱོགས་བཅུ་ཐམས་ཅད་དུ་སོང་ནས་རྒྱས་པར་བྱས་པའི་འཁོར་ལོས་སྒྱུར་བའི་རྒྱལ་པོ་རྣམ་པར་བསྒྲགས་པའི་སྟོབས་ཀྱིས་ འབར་བ ་ཞེས་
བྱ་བ་དེ་གཞན་ཞིག་ཡིན་པ་སྙམ་དུ་སེམས་ན། ཤ་ར་དྭ་ཏིའི་བུ་ཁྱོད་ཀྱིས་དེ་ལྟར་བལྟ་བར་མི་བྱ་སྟེ། ཤ་ར་དྭ་ཏིའི་བུ་དེ་ནི་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་འདི་ཡིན་ནོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ག་ལ་བ་དང་། འོད་མའི་ཚལ་བྱ་ཀ་ལན་ད་ཀ་གནས་པ་ག་ལ་བ་དང་། བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ །ཕྱོགས་གཅིག་ཏུ་འདུག་ནས་ཀྱང་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་འདི་སྐད་ཅེས་གསོལ་ཏོ། ། བཅོམ་ལྡན་འདས་དེ་བཞིན་གཤེགས་པ་མཚན་མ་མེད་པའི་ང་རོ་བཅོམ་ལྡན་འདས་ལ་གནོད་པ་ཆུང་ངམ། ཉམ་ང་བ་ཉུང་ངམ། བསྐྱོད་པ་ཡང་ངམ། སྟོབས་དང་བདེ་བར་རེག་པ་ལ་གནས་སམ་ཞེས་སྙུན་གསོལ་ཞིང་། བཅོམ་ལྡན་འདས་དེས་པད་མ་ཆེན་པོ་འདི་ཡང་བསྐུར་བ་ལགས་ན་བཅོམ་ལྡན་འདས་བཞེས་སུ་གསོལ། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལས་པད་མ་ཆེན་པོ་དེ་བཞེས་ཏེ། བཞེས་ནས་ཀྱང་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཅི་སངས་རྒྱས་ཀྱི་ཞིང་དེ་ན་བཅོམ་ལྡན་འདས་དེ་བཞིན་གཤེགས་པ་མཚན་མ་མེད་པའི་ང་རོ་དེ་སྟོབས་དང་ལྡན་ནམ། བསྙུན་མི་མངའ་འམ། འགྱུར་བ་མི་མངའ་འམ། བདེ་བར་རེག་པ་ལ་གནས་སམ། བཅོམ་ལྡན་འདས་དེ་བཞིན་གཤེགས་པ་མཚན་མ་མེད་པའི་ང་རོ་དེ་སྟོབས་དང་ལྡན་ཞིང་བསྙུན་མི་མངའ་ལ་འགྱུར་བ་མི་མངའ་སྟེ། བདེ་བར་རེག་པ་ལ་གནས་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་སངས་རྒྱས་ཀྱི་ཞིང་དེར་ནི་འདི་ལྟ་
སྟེ། གསུམ་ཡོངས་སུ་དག་པ་དང་ལྡན་པའི་སེམས་ཅན་ཡོངས་སུ་དག་པ་དག་འདུས་ལགས་ཏེ། གསུམ་པོ་གང་ཞེ་ན། བདེན་པར་ཡོངས་སུ་བསྔོ་བའི་ཕྱིར་དགེ་བའི་རྩ་བ་ཡོངས་སུ་དག་པ་དང་། སྨོན་ལམ་གྱིས་ཚུལ་ཁྲིམས་ཚད་མ་མཆིས་པ་ཡོངས་སུ་དག་པ་དང་། ཆོས་ཐམས་ཅད་མི་དམིགས་པའི་ལྷག་མཐོང་གིས་ཡོངས་སུ་བསྔོ་བའི་ཕྱིར་ལྟ་བ་ཚད་མ་མཆིས་པ་ཡོངས་སུ་དག་པའོ། །བཅོམ་ལྡན་འདས་སངས་རྒྱས་ཀྱི་ཞིང་དེ་ན་ཚུལ་ཁྲིམས་ཉམས་པའམ། ལྟ་བ་ཉམས་པའམ། ཆོ་ག་ཉམས་པའི་སེམས་ཅན་གང་ཡང་མ་མཆིས་ལགས་སོ། །བཅོམ་ལྡན་འདས་སངས་རྒྱས་ཀྱི་ཞིང་དེ་ན་ཉམས་པ་གསུམ་པོ་དག་གི་མིང་ཡང་མི་གདའ་ལགས་སོ། །བཅོམ་ལྡན་འདས་འཇིག་རྟེན་གྱི་ཁམས་དེ་ལས་བརྩམས་ན་མི་མཇེད་ཀྱི་འཇིག་རྟེན་གྱི་ཁམས་འདི་ནི་དགུམ་པའི་རིབ་མ་དང་འདྲ་སྟེ། གཅིག་ལ་གཅིག་འགུམས་པར་བགྱིད་པ་ལགས་ཀྱིས། བཅོམ་ལྡན་འདས་ཚུར་གཤེགས་འཇིག་རྟེན་གྱི་ཁམས་དེར་གཤེགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་འཇིག་རྟེན་གྱི་ཁམས་དེར་ཅི་ཞིག་བྱ་སྟེ། འཇིག་རྟེན་གྱི་ཁམས་མི་མཇེད་འདི་ཉིད་དུ་སེམས་ཅན་རྣམས་ལ་ཆོས་བསྟན་པས་ཆོག་གོ །བཅོམ་ལྡན་འདས་ལ་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་ལན་གཉིས་སུ་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་ཚུར་གཤེགས་འཇིག་རྟེན་གྱི་ཁམས་དེར་གཤེགས་སོ། །འཇིག་རྟེན་གྱི་ཁམས་དེར་གལ་ཏེ་བཅོམ་ལྡན་འདས་མི་གཤེགས་ན་ནི་བདག་གིས་རང་གི་རྫུ་འཕྲུལ་གྱི་སྟོབས་དང་། སེམས་ཀྱི་སྨོན་ལམ་གྱི་མཐུས་འཇིག་རྟེན་གྱིས་ཁམས་འདི་སུག་པར་བཞག་སྟེ། ནམ་མཁའ་ལས་འཇིག་རྟེན་གྱི་ཁམས་དེར་གཞག་པར་བགྱིའོ། །བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་མཐུ་
ཡང་དག་པར་བསྟན་པའི་ཕྱིར་དང་། སེམས་ཅན་རྣམས་ཀྱི་དགེ་བའི་རྩ་བ་ཡང་དག་པར་བསྐྱེད་པའི་ཕྱིར་དང་། ཡིད་དང་བར་བྱ་བའི་ཕྱིར་བཏང་སྙོམས་སུ་མཛད་དོ། །དེ་ནས་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འདི་ལྟ་སྟེ། དཔེར་ན་རྫ་མཁན་ནམ། རྫ་མཁན་གྱི་སློབ་མ་མཁས་པ་ཞིག་གིས་རྫ་མཁན་གྱི་འཕང་ལོ་ལ་དབྱུག་གུས་བཙུགས་པ་འཁོར་བར་བྱེད་ཅིང་། མིག་ཀྱང་སྦྲིད་པར་བྱེད་པ་དེ་བཞིན་དུ་དེའི་ཚེ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་ཡོངས་སུ་བསྒྱུར་ནས་མངོན་པར་བཏེག་གོ །དེ་ནས་འཇིག་རྟེན་གྱི་ཁམས་དེ་མངོན་པར་བཏེག་ཅིང་ཀུན་ཏུ་འཁྲུགས་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་འཇིག་རྟེན་གྱི་ཁམས་འདི་ཁྲིད་ལགས་སོ། །བདེ་བར་གཤེགས་པ་འཇིག་རྟེན་གྱི་ཁམས་འདི་ཁྲིད་ལགས་སོ། །དེ་ནས་བཅོམ་ལྡན་འདས་ཀྱིས་རྣར་སྙན་པ་དང་། སྙན་ཅིང་འཇེབས་པ་དང་། དགའ་བར་བྱེད་པ་དང་། མཉན་པར་འོས་པ་དང་། ཡིད་དུ་འོང་བ་དང་། ཕོ་བྲང་འཁོར་སྐྱོང་གི་སྐད་དང་། སྐྱེ་བོ་མང་པོ་དགའ་བ་དང་། ཟབ་པ་དང་། མ་ཚང་བ་མེད་པ་དང་། ཤིན་ཏུ་རྣམ་པར་རིག་པར་བྱེད་པ་ཡེ་ཤེས་ཀྱི་རྗེས་སུ་འཇུག་པའི་ཚིག་གིས་ཚེ་དང་ལྡན་པ་ཤ་ར་དྭ་ཏིའི་བུ་ལ་བཀའ་སྩལ་པ། ཤ་ར་དྭ་ཏིའི་བུ་འདི་ལ་ང་ལ་དབང་མེད་དོ་ཞེས་དེ་སྐད་ཅེས་བཀའ་སྩལ་ནས། བཅོམ་ལྡན་འདས་ཀྱིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་གོ་བར་མཛད་དོ། །དེ་ལྟར་དེའི་ཚེ་སེམས་ཅན་གང་དག་འཇིག་ཚོགས་ལ་ལྟ་བ་ཀུན་ཏུ་ཆགས་པ་དང་། འཇིག་ཚོགས་ལ་ལྟ་བ་ལ་གནས་པ་དང་། འཇིག་ཚོགས་ལ་རྟེན་པ་དེ་དག་ཐམས་ཅད་དེའི་ཚེ་སྐྱོ་བར་གྱུར་ཅིང་སྐྱོ་བ་ཐོབ་བོ། །དེ་ལྟར་འཁོར་བཞི་པོ་དག་གིས་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་སེམས་དཔས་ཡོངས་སུ་བསྐོར་ཅིང་ཆོས་སྟོན་པ་འཁོར་ལོས་སྒྱུར་བའི་རྒྱལ་པོ་བཞིན་དུ་ཆོས་ཀྱི་གདན་ལ་
བཞུགས་ཤིང་ཆོས་སྟོན་པ། མི་མཇེད་ཀྱི་བདག་པོ་ཚངས་པ་བཞིན་དུ་ཚངས་པས་ཡོངས་སུ་བསྐོར་ཏེ་ཚངས་པའི་གདན་ལ་བཞུགས་ཤིང་ཆོས་སྟོན་པ་མཐོང་ངོ་། །དེ་ནས་དེའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བས་སངས་རྒྱས་ཀྱི་ཞིང་གཞན་ཡང་ཡང་དག་པར་བསྟན་པ་བྱས་སོ། །དེ་ནས་བཅོམ་ལྡན་འདས་ཀྱིས་ཇི་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་པས་རླུང་གི་དཀྱིལ་འཁོར་ཆེན་པོ་མངོན་པར་སྤྲུལ་པ་མཛད་པ་དེ་ལྟ་བུའི་རྫུ་འཕྲུལ་མངོན་པར་འདུ་བྱ་བ་མངོན་པར་འདུ་མཛད་དོ། །ཅི་ནས་སངས་རྒྱས་ཀྱི་ཞིང་དེ་དག་ཕན་ཚུན་ཐུག་པར་མཛད་དོ། །འཇིག་རྟེན་གྱི་ཁམས་དེ་དག་ཀྱང་ཁོང་སྟོང་དུ་གྱུར་ཅིང་བུ་ག་བྱུང་བར་གྱུར་ཏེ། སོ་སོར་ཞིག་ཅིང་རབ་ཏུ་རྣམ་པར་ཞིག་གོ །དེ་ལྟར་དེའི་ཚེ་དེ་བཞིན་གཤེགས་པའི་ཆོ་འཕྲུལ་ཆེན་པོ་དེ་ལྟ་བུ་དེ་ཡང་དག་པར་བསྟན་པ་ན་འཇིག་རྟེན་གྱི་ཁམས་འདི་ན་གང་དག་ལྟ་བའི་འདུ་ཤེས་ཅན། རྟག་པ་དང་ཐེར་ཟུག་གི་འདུ་ཤེས་ཅན་ཚངས་པའམ། ཚངས་པ་ཆེན་པོ་དེ་དག་ནི་རང་རང་གི་ཚངས་པའི་གནས་ཞིག་ཅིང་། རབ་ཏུ་རྣམ་པར་ཞིག་ལ་འདི་ལྟ་སྟེ། དཔེར་ན་ཆུའི་ཕུང་པོ་ཆེན་པོས་དབུ་བ་རྡོས་པ་ཆེན་པོ་བསྐྱེད་ན་མངོན་པར་འཇིག་པ་དང་། རླུང་གི་ཕུང་པོ་ཆེན་པོས་གཏོར་ན་རྡུལ་དུ་འགྱུར་ཞིང་རབ་ཏུ་འཇིག་པ་དེ་བཞིན་དུ་ཚངས་པ་དེ་དག་རང་རང་གི་གནས་སུ་དོང་ནས་རྡུལ་དུ་འགྱུར་ཞིང་འཇིག་པ་དག་མཐོང་ངོ་། །མཐོང་ནས་ཀྱང་ཤས་ཆེར་སྐྱོ་བར་གྱུར་ཏོ། །དེ་དག་སྐྱོ་བར་གྱུར་ནས་བཅོམ་ལྡན་འདས་ཉག་གཅིག་ལ་ཕྱག་འཚལ་ཞིང་འཁོད་དོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤ་ར་དྭ་ཏིའི་བུ་ལ་འདི་སྐད་ཅེས་བཀའ་སྩལ་ཏོ། །ཤ་ར་དྭ་ཏིའི་བུ་ངས་སྔོན་ཡང་བསྟན་པ་ཡིན་ལ། ད་ཡང་བསྟན་པར་བྱ་སྟེ། ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་ཡོངས་སུ་སྦག་པས་ཡོངས་སུ་སྦགས་པའོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་སྙིང་པོ་མེད་པ་ཉིད་ཀྱི་ཕྱིར་དང་། སྒྱུ་མ་ལྟ་བུའི་ཕྱིར་དབུ་བ་
རྡོས་པ་ལྟ་བུར་གཟུང་དུ་མེད་པའོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་ཕྱིན་ཅི་ལོག་ཏུ་ཀུན་བརྟགས་པའི་ཕྱིར་སྒྱུ་མ་ལྟ་བུའོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་ནམ་མཁའ་ལ་ཀུན་དུ་རྒྱུག་པའི་ཀུན་དུ་རྟོགས་པས་ཡོངས་སུ་བཅད་པའི་ཕྱིར་སྨིག་རྒྱུ་ལྟ་བུའོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་དངོས་པོར་གཟུང་དུ་མེད་པའི་ཕྱིར་མིག་ཡོར་ལྟ་བུའོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་ནམ་མཁའི་ཀུན་དུ་རྟོག་པའི་ལས་ཀྱིས་ཀུན་ནས་བསླང་བའི་ཕྱིར་བྲག་ཅ་ལྟ་བུའོ། །ཤ་ར་དྭ་ཏིའི་བུ་འཇིག་རྟེན་གནས་པ་འདི་ཇི་ལྟ་བ་བཞིན་དུ་ཤ་ར་དྭ་ཏིའི་བུ་འཇིག་རྟེན་གནས་པ་འདི་ཕྱིན་ཅི་ལོག་ཏུ་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། །ཤ་ར་དྭ་ཏིའི་བུ་ཀྱེ་མ་འཇིག་རྟེན་གནས་པ་འདི་ནི་གསོག་ཡིན་ཏེ། ཀྱེ་མ་འཇིག་རྟེན་གནས་པ་འདི་ནི་ཆགས་པ་མེད་པར་དེ་བཞིན་གཤེགས་པས་མངོན་པར་རྫོགས་པར་སངས་རྒྱས་སོ། །ཤ་ར་དྭ་ཏིའི་བུ་འཇིག་རྟེན་འདི་ནི་རོ་མྱང་བ་མེད་པ་དང་། ཉེས་དམིགས་དང་། ངེས་པར་འབྱུང་བ་མེད་པའི་བར་དུ་ཡང་དག་པ་ཇི་ལྟ་བ་བཞིན་དུ་ངས་མངོན་པར་མཁྱེན་ཏེ། དེ་ལྟར་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བདག་ཉིད་མངོན་པར་མཁྱེན་ཏོ། །ཤ་ར་དྭ་ཏིའི་བུ་ངས་འཇིག་རྟེན་འདི་ཇི་ལྟ་བ་བཞིན་དུ་མངོན་པར་མཁྱེན་པ་དེ་བཞིན་དུ་འཇིག་རྟེན་ཀུན་འབྱུང་བ་དང་། འཇིག་རྟེན་འགོག་པར་འགྱུར་བའི་ལམ་ཡང་མངོན་པར་མཁྱེན་ཏེ། ཤ་ར་དྭ་ཏིའི་བུ་ད་ལྟར་ངས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་བདག་ཉིད་མངོན་པར་མཁྱེན་ཏོ། །ཤ་ར་དྭ་ཏིའི་བུ་དེ་ལ་འཇིག་རྟེན་གང་ཞེ་ན། ཤ་ར་དྭ་ཏིའི་བུ་འཇིག་རྟེན་ཞེས་བྱ་བ་ནི་ཕུང་པོ་ལྔ་དག་གོ །ལྔ་གང་ཞེ་ན། གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོའོ། །ཤ་ར་དྭ་ཏིའི་བུ་དེ་ལ་གཟུགས་ཀྱི་ཕུང་པོ་གང་ཞེ་ན། ཤ་ར་དྭ་ཏིའི་བུ་གཟུགས་ཀྱི་ཕུང་པོ་ནི་དེ་བཞིན་གཤེགས་
པས་འདས་པ་དང་། མ་འོངས་པ་དང་། ད་ལྟར་བྱུང་བ་སྤངས་པ་སྟེ། དེ་ལ་ངས་འདས་པ་དང་། མ་འོངས་པ་དང་། ད་ལྟར་བྱུང་བའི་གཟུགས་ཀྱི་ཕུང་པོ་གང་སྤངས་པ་དེ་ནི་སེམས་ཅན་རྣམས་གང་འདས་པ་དང་། གང་མ་འོངས་པ་དང་། གང་ད་ལྟར་བྱུང་བ་དེ་ཐམས་ཅད་ནི་གཟུགས་ཀྱི་ཕུང་པོ་མ་ཡིན་ནོ་ཞེས་དེ་སྐད་ཅེས་སྨྲ་བར་གྱུར་ན་མི་རུང་སྟེ། ཤ་ར་དྭ་ཏིའི་བུ་དེ་ལ་དེ་བཞིན་གཤེགས་པ་ནི་ནང་ངམ། ཕྱི་རོལ་ལམ། ཆེན་པོའམ། ཆུང་ངུའམ། བཟང་པོའམ། ངན་པའམ། གང་དག་རྒྱང་རིང་བའམ། གང་དག་ཐག་ཉེ་བ་དུས་གསུམ་དུ་བསྡུས་པ་དེ་དག་ཐམས་ཅད་ནི་གཟུགས་ཀྱི་ཕུང་པོ་སྟེ། མཚན་ཉིད་མེད་དོ་ཞེས་བསྟན་ཏོ། །དཔེར་ན་ནམ་མཁའི་ཕུང་པོ་ནི་རླུང་གི་རྣམ་པ་དང་། ཆུའི་རྣམ་པ་དང་། མེའི་རྣམ་པ་དང་། སའི་རྣམ་པ་ཡིན་པ་དེ་བཞིན་དུ་གཟུགས་ཀྱི་ཕུང་པོ་དང་། ཚོར་བའི་ཕུང་པོ་དང་། འདུ་ཤེས་ཀྱི་ཕུང་པོ་དང་། འདུ་བྱེད་ཀྱི་ཕུང་པོ་དང་། རྣམ་པར་ཤེས་པའི་ཕུང་པོར་བརྗོད་པར་བྱའོ། །ཤ་ར་དྭ་ཏིའི་བུ་ཅིའི་ཕྱིར་འདི་སྐད་ཅེས་གཟུགས་ཀྱི་ཕུང་པོ་ཞེས་བྱ་ཞེ་ན། ཤ་ར་དྭ་ཏིའི་བུ་བྱིས་པ་སོ་སོའི་སྐྱེ་བོ་རྣམས་ནི་མུན་པར་གྱུར་པ་སྟེ། དེ་དག་ལུས་ལ་གཟུགས་ཀྱི་མཚན་ཉིད་ཇི་ལྟ་བ་བཞིན་དང་། ཇི་སྙེད་པ་རབ་ཏུ་མི་ཤེས་པས་བདག་གཟུགས་ཡིན་ནོ། །གཟུགས་བདག་གི་ཡིན་ནོ་ཞེས་རྣམ་པར་རྟོག་པར་བྱེད་ལ། བདག་གོ་ཞེས་ཀྱང་ཀུན་དུ་ཤེས་ཤིང་གནས་པར་བྱེད་དེ། དེ་དག་དེ་ལྟར་ཀུན་དུ་ཤེས་ཤིང་གནས་པར་བྱེད་ལ། རློམ་སེམས་སུ་བྱེད་པས་དངོས་པོ་དེ་ལ་ཡོངས་སུ་སྲེད་པ་སྐྱེད་པར་བྱེད་དེ། ཤ་ར་དྭ་ཏིའི་བུ་དངོས་པོའི་ཚུལ་ཤེས་པ་དེ་ནི་དེ་ལྟ་མ་ཡིན་ནོ། །དེ་དག་ནི་དེ་ལྟར་མིག་དང་གཟུགས་དངོས་པོ་མེད་དོ་ཞེས་ཤེས་པ་མི་སྐྱེད་དེ། དེ་ལྟར་མེད་པའི་ཆོས་རྣམས་ཡོངས་སུ་གཟུང་ནས་བྱིས་པ་རྣམས་རྟོགས་པ་སྐྱེད་པར་བྱེད་དོ། །རྟོག་པ་སྐྱེས་པའི་བྱིས་པ་དེ་དག་ནི་དངོས་པོ་དེ་ལ་འཇུག་པར་འགྱུར་ཞིང་། དེ་དག་གི་ཉེས་པའི་ཁམས་དག་ཀྱང་སྐྱེ་བར་འགྱུར་རོ། །དེ་ལྟར་དངོས་པོ་མེད་པ། སྤྱོད་ཡུལ་པ།
ཁ་དོག་དང་བྲལ་བ་སྤྱོད་ཡུལ་པ། ཁ་དོག་མེད་པ། སྤྱོད་ཡུལ་པ་དེ་དག་ནི་ཤས་ཆེར་རྨོངས་པར་འགྱུར་རོ། །རྨོངས་པ་དེ་དག་ནི་ཞིང་ལས་བྱེད་པར་འགྱུར་ཞིང་། མཚོན་ཆ་སྣ་ཚོགས་ཀྱིས་འདེབས་པ་ལྷུར་ལེན་པར་ཡང་འགྱུར་རོ། །དེ་དག་གི་མངོན་པར་འདུ་བྱེད་པ་དེ་ནི་རྨོངས་པ་ཡིན་ནོ། །དེ་ལ་དེ་བཞིན་གཤེགས་པས་ནི་དངོས་པོ་མཉམ་པ་ཉིད་ཀྱིས་ལྟ་བ་མཉམ་པ་ཉིད་རྗེས་སུ་སངས་རྒྱས་ཤིང་། དེ་རྗེས་སུ་སངས་རྒྱས་པས་ཡང་དག་པའི་ལྟ་བ་འདོགས་པར་མངོན་པར་མཛད་དེ། ལྟ་བ་དེ་ནི་མཉམ་པ་ཡིན་པས་དེས་ན་ཡང་དག་པའི་ལྟ་བ་ཞེས་བྱའོ། །ཡང་དག་པར་བརྩོན་པ་རྣམས་དང་། ཡང་དག་པར་རྣམ་པར་གྲོལ་བ་རྣམས་ཀྱི་ལྟ་བ་དེ་ནི་ཡང་དག་པར་ཞུགས་པ་ཡིན་པས་དེས་ན་ཡང་དག་པའི་ལྟ་བ་ཞེས་བྱའོ། །ཤ་ར་དྭ་ཏིའི་བུ་ངས་ཡང་དག་པའི་ལྟ་བ་གང་བཤད་པ་དེ་ནི་སྒྲས་བསྟན་པར་མི་ནུས་ཏེ། བསྟན་པར་བཟོད་པར་དཀའ་བ་ཡིན། ཤ་ར་དྭ་ཏིའི་བུ་དེ་ལ་སྒྲུབས་ཤིག་དང་བསྒྲུབས་ན་ཁྱེད་ཅག་ཀྱང་མུན་པ་མེད་པར་འགྱུར་རོ། །ཤ་ར་དྭ་ཏིའི་བུ་ཆོས་ཀྱི་ཕུང་པོ་འདི་ནི་འཁོར་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་དང་ལྡན་པ་ཞེས་བྱའོ། །འདི་ནི་འདུས་བྱས་དང་། འདུས་མ་བྱས་ཀྱི་ཆོས་ཐམས་ཅད་ཀྱི་སྒོ་ཡིན་ཏེ། ཆོས་ཀྱི་ཚུལ་ཡང་དེ་ཡིན་ནོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཆོས་ཀྱི་ཕུང་པོ་བསྟན་པ་འདི་བཤད་པ་ན་ཁྲག་ཁྲིག་ཕྲག་བདུན་ཅུ་རྩ་བདུན་ནི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །འདོད་པ་ན་སྤྱོད་པའི་ལྷ་ཁྲག་ཁྲིག་ཀྱང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །མིའི་སྐྱེ་དགུའི་སེམས་ཅན་དཔག་ཏུ་མེད་པ་དག་ཀྱང་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་རྣམ་པར་དག་གོ །འཛམ་བུའི་གླིང་པ་བྱེ་བ་བརྒྱ་ཕྲག་ཇི་སྙེད་ཡོད་པ་དང་། དེ་དག་གི་ནང་ན་བྱང་ཆུབ་སེམས་དཔའ་གང་དག་གནས་པ་དེ་དག་ནི་མི་སྐྱེ་བའི་ཆོས་ལ་བཟོད་པ་ཐོབ་པར་གྱུར་ཏོ། །སེམས་ཅན་དཔག་ཏུ་མེད་པ་དག་གིས་ནི་བླ་ན་མེད་
པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་རྫུ་འཕྲུལ་མངོན་པར་འདུ་མཛད་པ་དེ་ཕྱིར་བསྡུ་བ་མཛད་དོ། །དེ་ནས་འཁོར་བཞི་པོ་དང་། ཚངས་པའི་འཁོར་དེ་དང་། འདོད་པ་ན་སྤྱོད་པའི་ལྷའི་འཁོར་དང་། གཞན་ཡང་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དག་གིས་ཀྱང་འཇིག་རྟེན་གྱི་ཁམས་ཇི་ལྟར་གནས་པ་བཞིན་དུ་མཐོང་ངོ་། །དེ་ནས་དེའི་ཚེ་ཚེ་དང་ལྡན་པ་མཽང་གལ་གྱི་བུ་ཆེན་པོ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བ་ཇི་ཙམ་དུ་ཤིན་ཏུ་རྫུ་འཕྲུལ་ཆེན་པོ་དང་ལྡན་པ་ནི་ངོ་མཚར་ལགས་སོ། །བཅོམ་ལྡན་འདས་འཇིག་རྟེན་གྱི་ཁམས་འདི་དང་། བཅོམ་ལྡན་འདས་ཀྱང་མངོན་པར་བཏེག་ནས་འཇིག་རྟེན་གཞན་དུ་བཞག་ལགས་ཀྱང་། དེའི་ཚེ་བདག་གིས་མཚན་མ་ཡང་མ་འཚལ་ཅིང་། རྫུ་འཕྲུལ་གྱི་མིང་ཡང་མི་དྲན་ལགས་ན་རྫུ་འཕྲུལ་མངོན་པར་འགྲུབ་པ་ལྟ་སྨོས་ཀྱང་ཅི་འཚལ། བཅོམ་ལྡན་འདས་བདག་ནི་འདི་སྙམ་དུ་སེམས་ལགས་ཏེ། ཨ་ལ་ལ་བྱང་ཆུབ་སེམས་དཔའ་དེ་རྫུ་འཕྲུལ་ཆེན་པོ་དང་ལྡན་པ་ནི་ངོ་མཚར་རོ་སྙམ་ལགས་སོ། །བཅོམ་ལྡན་འདས་བདག་གིས་དུས་འགྱུར་བ་ཡང་གློ་བར་མ་ཆུད་ཅིང་བདག་ཅག་ཡུན་ཇི་སྲིད་ནས་དྲངས་པའམ། ཡུན་ཇི་སྲིད་ནས་ཁྲིད་པ་ཡང་སྐད་ཅིག་གཅིག་དང་། ཐང་ཅིག་གཅིག་ཙམ་ཡང་གློ་བར་མ་ཆུད་ལ། ཡུད་ཙམ་གཅིག་ཀྱང་རྗེས་སུ་མི་དྲན་ལགས་ཀྱང་བདག་ནི་འདི་སྙམ་སེམས་ལགས་ཏེ། རེ་ཞིག་བྱང་ཆུབ་སེམས་དཔའི་རྫུ་འཕྲུལ་དེ་ཡང་དེ་ལྟ་བུ་ལགས་ན་དེ་བཞིན་གཤེགས་པའི་ལྟ་སྨོས་ཅི་འཚལ་སྙམ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་
འདས་ཀྱིས་ཚེ་དང་ལྡན་པ་མཽང་གལ་གྱི་བུ་ལ་བཀའ་སྩལ་པ་མཽང་གལ་གྱི་བུ་ཁྱོད་འཇིག་རྟེན་གྱི་ཁམས་འདི་དྲངས་ཤིང་ཀུན་དུ་དྲངས་པའམ། དེ་བཞིན་གཤེགས་པ་ཁྲིད་ཅིང་ཀུན་དུ་ཁྲིད་དོ་སྙམ་དུ་སེམས་ན། མཽང་གལ་གྱི་བུ་ཁྱོད་ཀྱིས་དེ་ལྟར་བལྟ་བར་མི་བྱའོ། །མཽང་གལ་གྱི་བུ་དེ་བཞིན་གཤེགས་པའི་ཆོས་གོས་ཀྱི་གྲྭ་ཙམ་ཡང་བསྒུལ་བའི་བདག་པོར་གྱུར་པ་གཞན་དགེ་སྦྱོང་ངམ་། བྲམ་ཟེའམ། ཉན་ཐོས་སམ། རང་སངས་རྒྱས་སམ་ལྷ་ནས་ལྟོ་འཕྱེ་ཆེན་པོའི་བར་དུ་ཡང་ངས་ཡང་དག་པར་རྗེས་སུ་མ་མཐོང་ན་དེ་བཞིན་གཤེགས་པ་མངོན་པར་འདེགས་པར་ནུས་པར་འགྱུར་བ་ལྟ་ཅི་སྨོས་ཏེ་དེ་ནི་གནས་མེད་དོ། །མཽང་གལ་གྱི་བུ་རེ་ཞིག་ལྷ་དང་བཅས་པའི་འཇིག་རྟེན་ལྟ་ཞོག་གི། མཽང་གལ་གྱི་བུ་ཡོངས་སུ་བརྟག་པ་བཟུང་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་གཟུགས་ཅན་ནམ། གཟུགས་ཅན་མ་ཡིན་པའམ། འདུ་ཤེས་ཅན་ནམ། འདུ་ཤེས་ཅན་མ་ཡིན་པའམ། འདུ་ཤེས་ཅན་ཡང་མ་ཡིན་འདུ་ཤེས་ཅན་མ་ཡིན་པ་ཡང་མ་ཡིན་པ་ཇི་སྙེད་ཡོད་པ་སེམས་ཅན་དུ་གདགས་པས་གདགས་པ་ཇི་སྙེད་ཡོད་པ་དེ་དག་ཐམས་ཅད་མིའི་ལུས་ཐོབ་པར་གྱུར་ཏེ། མིའི་ལུས་ཐོབ་ནས་རབ་ཏུ་བྱུང་བར་གྱུར་ལ། རབ་ཏུ་བྱུང་བ་དེ་དག་ཐམས་ཅད་ཀྱིས་དགྲ་བཅོམ་པ་ཉིད་རྗེས་སུ་ཐོབ་པར་གྱུར་ཅིང་མངོན་པར་ཤེས་པ་དྲུག་མངོན་དུ་བྱས་པར་གྱུར་ལ། མཽང་གལ་གྱི་བུ་དཔེར་ན་ད་ལྟར་ཁྱོད་བཞིན་དུ་རྫུ་འཕྲུལ་གྱི་སྟོབས་དེ་ལྟ་བུ་དང་ཡང་ལྡན་པར་གྱུར་ན། མཽང་གལ་གྱི་བུ་འདི་ཇི་སྙམ་དུ་སེམས། རྫུ་འཕྲུལ་དང་ལྡན་པ་འདུས་པ་དེ་མང་བ་ཡིན་ནམ། གསོལ་པ། བཅོམ་ལྡན་འདས་དེ་ལྟ་ལགས་སོ། །མཽང་གལ་གྱི་བུ་ཉན་ཐོས་དེ་དག་གིས་སྟོང་གི་འཇིག་རྟེན་གྱི་ཁམས་ལག་པ་གཅིག་གིས་བླངས་ཤིང་། སྟོང་གཉིས་པ་དང་། སྟོང་གསུམ་གྱི་འཇིག་རྟེན་གྱི་ཁམས་ཀྱང་ལག་པ་གཅིག་གིས་བླངས་ནས་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དུ་འཆག་པར་གྱུར་ཀྱང་། རྫུ་འཕྲུལ་དམ་པ་ཐོབ་པ་དེ་ལྟ་བུ་དེ་དག་གིས་ཀྱང་དེ་བཞིན་གཤེགས་པའི་ཆོས་གོས་ནམ་མཁའ་ལ་འདུག་
པའི་གྲྭ་གཅིག་ཀྱང་བསྒུལ་བར་མི་ནུས་སོ། །མཽང་གལ་གྱི་བུ་ཁྱོད་དང་འདྲ་བ་དེ་སྙེད་འདུས་པ་ལྟ་ཞོག་གི། མཽང་གལ་གྱི་བུ་གལ་ཏེ་འདིར་སེམས་ཅན་ལ་ལ་ཞིག་སྐྱེས་པར་གྱུར་ཅིང་། འདི་ལྟ་སྟེ། གང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དེ་བཞིན་གཤེགས་པས་བྱིན་གྱིས་མ་བརླབས་པ་ཁའི་རླུང་གཅིག་གིས་རྣམ་པར་འཐོར་བར་བྱེད། རྡུལ་དུ་རློག་པར་བྱེད། རྣམ་པར་འཇོམས་པར་བྱེད་པའི་རྫུ་འཕྲུལ་དེ་ལྟ་བུ་དང་ལྡན་པར་གྱུར་ལ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལས་བྱུང་བའི་རྡུལ་དེས་ཀྱང་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀུན་ཏུ་ནོག་ནོག་པོར་གྱུར་ཅིང་། འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ལས་བྱུང་བའི་རྡུལ་དེ་དེས་ཕྱིར་ཡང་བརྟུལ་ནས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སུ་སོ་སོར་བཞག་པར་གྱུར་ན། མཽང་གལ་གྱི་བུ་འདི་སྙམ་དུ་སེམས། འོ་ན་སེམས་ཅན་དེ་རྫུ་འཕྲུལ་གྱི་ཕ་རོལ་དུ་ཕྱིན་པ་ཐོབ་པ་ཡིན་ནམ། གསོལ་པ། བཅོམ་ལྡན་འདས་དེ་ལྟ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། མཽང་གལ་གྱི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི། འདི་ལྟ་སྟེ། དཔེར་ན་བུ་རམ་ཤིང་གི་ཚལ་ལམ། འདམ་བུའི་ཚལ་ལམ། སྐམ་སའི་འདམ་བུའི་ཚལ་ལམ། འབྲས་ཀྱི་ཞིང་ངམ། ཏིལ་གྱི་ཞིང་བཞིན་དུ་སེམས་ཅན་དེ་ལྟ་བུ་དག་གིས་གང་བར་གྱུར་ཀྱང་མཽང་གལ་གྱི་བུ་སེམས་ཅན་རྫུ་འཕྲུལ་དམ་པའི་ཕ་རོལ་ཏུ་སོན་པ་དེ་ལྟ་བུ་དེ་དག་གིས་ཀྱང་དེ་བཞིན་གཤེགས་པའི་ཆོས་གོས་ཀྱི་གྲྭ་ཙམ་ཡང་བསྒུལ་བར་མི་ནུས་ན་དེ་བཞིན་གཤེགས་པ་མངོན་པར་གདེགས་པར་བྱ་བ་ལྟ་ཅི་སྨོས་ཏེ་དེ་ནི་གནས་མེད་དོ། ། མཽང་གལ་གྱི་བུ་དེ་བཞིན་གཤེགས་པ་གནས་དེ་ཉིད་དུ་གནས་ཤིང་སེང་གེའི་གདན་དེ་ཉིད་ལ་བཞུགས་ནས། ཤར་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་གཡོ་བར་མཛད། ཀུན་དུ་གཡོ་བར་མཛད། ཀུན་ཏུ་རབ་ཏུ་གཡོ་བར་མཛད་ཀྱང་སེམས་ཅན་
དེ་དག་འདི་སྙམ་དུ་བདག་ཅག་འཇིག་རྟེན་གྱི་ཁམས་གཞན་དུ་ཁྲིད་དོ། །ཀུན་དུ་ཁྲིད་དོ་སྙམ་འམ། ཀྱེ་མ་འཇིག་རྟེན་གྱི་ཁམས་འདི་འཇིག་གོ་འཆགས་སོ་སྙམ་དུ་མི་སེམས་སོ། །དེ་དག་འདི་སྙམ་དུ་ཀྱེ་མ་འཇིག་རྟེན་གྱི་ཁམས་འདི་འཐོར་རོ། །རྣམ་པར་འཇིག་གོ་སྙམ་དུ་མི་སེམས་ཏེ། སེམས་ཅན་དེ་དག་ལ་འདུལ་བའི་དབང་གིས་ཁ་ཅིག་ལ་ནི་སངས་རྒྱས་ཀྱི་གཟུགས་ཀྱིས་མཚན་མ་མེད་པའི་ཚུལ་དག་གིས་ཆོས་སྟོན་ཏེ། ཉན་ཐོས་དང་། ལྷ་དང་། མི་དང་། ཀླུ་དང་། ཁྱེའུ་དང་། བུ་མོའི་གཟུགས་ཀྱིས་ཀྱང་དེ་བཞིན་ནོ། །མཽང་གལ་གྱི་བུ་སངས་རྒྱས་ཀྱི་སྟོབས་དང་། མི་འཇིགས་པ་དང་། མ་འདྲེས་པ་དང་། རྫུ་འཕྲུལ་ཁྱུ་མཆོག་དུ་གྱུར་པ་ཇི་སྙེད་པ་དེ་སྙེད་ཀྱི་ཆོས་ཀྱི་རྣམ་གྲངས་དག་ལ་ཁྱོད་ཡིད་ཆེས་པར་གྱིས་ཤིག །ཕྱོགས་བཅུ་ཐམས་ཅད་དུ་ཡང་དེ་བཞིན་ནོ། །མཽང་གལ་གྱི་བུ་གལ་ཏེ་ཁྱོད་ཀྱིས་དེ་བཞིན་གཤེགས་པའི་སྤྱོད་ཡུལ་ཤེས་པ་ལྟ་ན་དེ་ལ་ཡང་ཁྱོད་སྤོབས་པར་མི་འགྱུར་རོ། །མཽང་གལ་གྱི་བུ་ངས་དགེ་སློང་ཀུན་དགའ་བོ་ལ་འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པ་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། རྟོགས་པ་བརྗོད་པའི་སྡེ་དང་། གཏན་ལ་ཕབ་པར་བསྟན་པའི་སྡེའི་གཟུངས་ཀྱི་སྒོ་དག་བསྟན་ཀྱང་། མཽང་གལ་གྱི་བུ་དགེ་སློང་ཀུན་དགའ་བོས་ནི་དེ་བཞིན་གཤེགས་པའི་སྤྱོད་ཡུལ་ཀུན་ཤེས་པར་མི་ནུས་སོ། །དེ་ཅིའི་ཕྱིར་ཞེ་ན། མཽང་གལ་གྱི་བུ་དེ་བཞིན་གཤེགས་པའི་ཡི་གེ་གཅིག་ཀྱང་ཉན་ཐོས་ཐམས་ཅད་ཀྱིས་བསྐལ་པའམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་འབུམ་དུའང་ཀུན་ཤེས་པའམ། བསམ་པའམ། ཀུན་ཆུབ་པར་མི་ནུས་པའི་ཕྱིར་ཏེ། དེ་བཞིན་གཤེགས་པའི་སྤྱོད་ཡུལ་ལྟ་ཅི་སྨོས། མཽང་གལ་གྱི་བུ་དེ་ལ་དེ་བཞིན་གཤེགས་པ་དམིགས་པ་དང་། སྤྱོད་པ་དང་། སྤྱོད་ལམ་རྣམ་པ་སྣ་ཚོགས་ཀྱིས་སེམས་ཅན་རྣམས་ལ་འདོམས་
པར་མཛད་ཅིང་། སེམས་ཅན་རྣམས་ལ་ཆོས་སྟོན་པར་མཛད་ཀྱང་། མཽང་གལ་གྱི་བུ་དེ་བཞིན་གཤེགས་པའི་ཆོས་གོས་གསོལ་བ་ལས་སེམས་ཅན་ཇི་སྙེད་ཀྱི་དོན་མཛད་པ་དང་། དེ་ལས་ཆོས་བསྟན་པ་ཇི་ལྟ་བུ་འབྱུང་བ་ཡང་ཉན་ཐོས་ཐམས་ཅད་ཀྱིས་ཀུན་ཤེས་པར་མི་ནུས་ཏེ། མཽང་གལ་གྱི་བུ་དེ་ལ་ཡང་ཁྱོད་སྤོབས་པར་མི་འགྱུར་ན་དེ་བཞིན་གཤེགས་པའི་སྤྱོད་ཡུལ་རབ་ཏུ་ཤེས་པ་ལྟ་ཅི་སྨོས་ཏེ་དེ་ནི་གནས་མེད་དོ། །དེ་ནས་བཅོམ་ལྡན་འདས་ཀྱིས་དེའི་ཚེ་པད་མ་ཆེན་པོ་དེ་བཞེས་ནས། བྱང་ཆུབ་སེམས་དཔའ་སེམས་དཔའ་ཆེན་པོ་བཟང་སྐྱོང་ལ་སོགས་པ། བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་ཀྱི་གྲོང་ཁྱེར་ཡོངས་སུ་སྐྱོང་བར་བྱེད་པ་དེ་དག་ལ་བཀའ་སྩལ་པ། རིགས་ཀྱི་བུ་དག་ཁྱེད་ཀྱིས་དེ་བཞིན་གཤེགས་པའི་ཆོས་ཀྱི་གཏེར་དེ་བསྲུང་བའམ། སྦ་བའམ། དེ་བཞིན་གཤེགས་པའི་སྤྱོད་ཡུལ་ཀུན་ཤེས་པའམ། བརྗོད་པའམ། བསྟན་པའམ། ཡང་དག་པར་རབ་ཏུ་བསྟན་པར་ནུས་སམ། དེ་དག་གིས་གསོལ་པ། བཅོམ་ལྡན་འདས་རྔོ་ཐོགས་ལགས་སོ། །བཀའ་སྩལ་པ། རིགས་ཀྱི་བུ་དག་དེའི་ཕྱིར་ཁྱེད་ཀྱིས་ཆོས་གང་དང་གང་ཁོ་ན་སྟོན་པ་དེ་ཐམས་ཅད་དེ་བཞིན་གཤེགས་པའི་གཏེར་དེ་བཞིན་གཤེགས་པའི་སྤྱོད་ཡུལ་ལ་རྣམ་པར་བལྟས་ནས་བསྟན་པར་བྱའོ། །རིགས་ཀྱི་བུ་དག་གང་སངས་རྒྱས་ཀྱི་ཡེ་ཤེས་ཡོངས་སུ་རྫོགས་པ་དང་། སངས་རྒྱས་ཀྱི་བྱང་ཆུབ་ཡོངས་སུ་རྫོགས་པ་དང་། སངས་རྒྱས་ཀྱི་ཡེ་ཤེས་གྲུབ་པ་དང་། སངས་རྒྱས་ཀྱི་བྱང་ཆུབ་གྲུབ་པ་ཡང་དག་པར་བརྗོད་པས་བརྗོད་པ་དེས་ན་རིགས་ཀྱི་བུ་དག་དེ་བཞིན་གཤེགས་པའི་སྤྱོད་ཡུལ་དེ་ཡང་དག་པར་བརྗོད་པས་བརྗོད་པར་བྱའོ། །རིགས་ཀྱི་བུ་དག་གང་དུ་དམིགས་པ་མཐོང་བ་དེར་དེ་བཞིན་གཤེགས་པའི་སྤྱོད་ཡུལ་ལ་རྣམ་པར་བལྟས་ནས་ངེས་པར་བསྟན་པར་བྱའོ། །དེ་བཞིན་གཤེགས་པས་ཆོས་བསྟན་པ་དེ་ནི་གང་དུ་སེམས་ཅན་གྱི་སྤྱོད་པ་མཐོང་བ་དེར་དེ་བཞིན་གཤེགས་པའི་སྤྱོད་ཡུལ་ལ་རྣམ་པར་བལྟས་ནས་སེམས་ཅན་དེ་
དག་གི་སྤྱོད་པ་དེ་བཞིན་གཤེགས་པས་ཆོས་བསྟན་པའི་སྤྱོད་པས་དེ་དག་རྣམ་པར་བཟློག་པར་བྱ་བའི་ཕྱིར་བསྟན་པ་མ་ཡིན་ནོ། །གང་དག་དེ་བཞིན་གཤེགས་པས་མཁྱེན་པའི་དབང་པོ་སྟོང་ཕྲག་དགུ་བཅུ་རྩ་དགུ་ནི་འདོད་ཆགས་སྤྱོད་པ་རྣམས་ཀྱི་སྤྱོད་པ་དེ་དག་དང་། ཞེ་སྡང་སྤྱོད་པ་རྣམས་དང་། གཏི་མུག་སྤྱོད་པ་རྣམས་ཀྱི་སྤྱོད་པ་དེ་དག་དང་། འདོད་ཆགས་དང་། ཞེ་སྡང་དང་། གཏི་མུག་བཅོས་མ་སྤྱོད་པ་རྣམས་ཀྱི་སྤྱོད་པ་དེ་དག་དང་། འདོད་ཆགས་དང་། ཞེ་སྡང་སྤྱོད་པ་རྣམས་ཀྱི་སྤྱོད་པ་དེ་དག་དང་། འདོད་ཆགས་དང་། ཞེ་སྡང་བཅོས་མ་སྤྱོད་པ་རྣམས་ཀྱི་སྤྱོད་པ་དེ་དག་དང་། འདོད་ཆགས་དང་། གཏི་མུག་སྤྱོད་པ་རྣམས་ཀྱི་སྤྱོད་པ་དེ་དག་དང་། འདོད་ཆགས་དང་། གཏི་མུག་བཅོས་མ་སྤྱོད་པ་རྣམས་ཀྱི་སྤྱོད་པ་དེ་དག་དང་། ཞེ་སྡང་དང་། གཏི་མུག་སྤྱོད་པ་རྣམས་ཀྱི་སྤྱོད་པ་དེ་དག་དང་། ཞེ་སྡང་དང་། གཏི་མུག་བཅོས་མ་སྤྱོད་པ་རྣམས་ཀྱི་སྤྱོད་པ་དེ་དག་དང་། བསམ་པ་ཡོངས་སུ་སྦྱོང་བར་བྱེད་པའི་དབང་པོ་དེ་དག་དང་། དངོས་པོ་སྒྲུབ་པའི་ཡོངས་སུ་སྦྱོང་བར་བྱེད་པའི་དབང་པོ་དེ་དག་དང་། སྲིད་པ་སྒྲུབ་པ་ཡོངས་སུ་སྦྱོང་བར་བྱེད་པའི་དབང་པོ་དེ་དག་དང་། སྦྱོར་བ་ལས་བྱུང་བའི་དབང་པོ་དེ་དག་དང་། ལས་བྱེད་པ་སྒྲུབ་པ་ཡོངས་སུ་སྦྱོང་བར་བྱེད་པའི་དབང་པོ་དེ་དག་དང་། ནག་པོའི་ཆོས་སློང་བར་བྱེད་པའི་དབང་པོ་དེ་དག་དང་། དཀར་པོའི་ཆོས་ཀུན་ནས་སློང་བར་བྱེད་པའི་དབང་པོ་དེ་དག་དང་། གནག་ཅིང་དཀར་བའི་ཆོས་སློང་བར་བྱེད་པའི་དབང་པོ་དེ་དག་དང་། ལམ་གྱི་རྗེས་སུ་འཐུན་པར་བྱེད་པའི་དབང་པོ་དེ་དག་དང་། ཞི་གནས་ཀྱི་རྗེས་སུ་འཐུན་པའི་དབང་པོ་དེ་དག་དང་། ལྷག་མཐོང་གི་རྗེས་སུ་འཐུན་པའི་དབང་པོ་དེ་དག་དང་། ཟད་པའི་རྗེས་སུ་འཐུན་པའི་དབང་པོ་དེ་དག་དང་། སྐྱེ་བའི་རྗེས་སུ་འཐུན་པར་བྱེད་པའི་དབང་པོ་དེ་དག་དང་། བདེན་པའི་རྗེས་སུ་འཐུན་པའི་དབང་པོ་དེ་དག་གོ ། །མཽང་གལ་གྱི་བུ་དེ་ལ་སྔོན་གྱི་སྤྱོད་པའི་ཚོགས་དང་ལྡན་པའི་དབང་པོ་སྟོང་ཕྲག་ཉི་ཤུ་ནི་གང་གིས་ཁ་དོག་ནག་པོའམ། དཀར་ཤམ་མམ། མདོག་
བཟང་པོའམ། མདོག་མི་སྡུག་པའམ། གྱོལ་པོའམ། ལག་སོར་རྡུམ་པོའམ། ཞ་བོའམ། འོན་པའམ། ཞར་བའམ། ལྕེ་མེད་པ་སྒྲུབ་པར་བྱེད་པ་ནག་པོའམ། གནག་ཅིང་དཀར་བའི་ལས་ཀུན་ནས་སློང་བར་བྱེད་པ་དག་གོ །སྔོན་གྱི་སྤྱོད་པའི་ཚོགས་དང་ལྡན་པའི་དབང་པོ་སྟོང་ཕྲག་ཉི་ཤུ་ནི་གང་གིས་དབྱིབས་རིང་པོའམ། ཐུང་ངུའམ། སྐེམ་པོའམ། སྦོམ་པོའམ། བར་མ་སྒྲུབ་པར་བྱེད་པའི་ལས་ཀུན་ནས་སློང་བར་བྱེད་པ་དག་གོ །གང་དག་མིག་དང་། རྣ་བ་དང་། སྣ་དང་། ལྕེ་དང་། ལུས་དང་། ཡིད་ཀྱི་དབང་པོ་འགྱུར་བ་རྣམས་ཀྱི་སྦྱོར་བ་ལ་གནས་ཤིང་སྔོན་གྱི་ལས་མངོན་པར་སྒྲུབ་པའི་དབང་པོ་སྟོང་ཕྲག་ཉི་ཤུ་ནི་འདོད་ཆགས་པའམ། ཞེ་སྡང་བའམ། གཏི་མུག་པའམ། འདོད་ཆགས་དང་བྲལ་བའམ། ཞེ་སྡང་དང་བྲལ་བའམ། གཏི་མུག་དང་བྲལ་བ་ཡིན་ནོ། །སྐྱེ་བའི་འབྲས་བུ་མངོན་པར་འགྲུབ་པའི་དབང་པོ་སྟོང་ཕྲག་སུམ་ཅུ་ནི་འཆི་བའི་དུས་བྱེད་པ་ཡིན་ནོ། །དེ་དག་ནི་འགྱུར་བ་མངོན་པར་གྲུབ་པའམ། མཚན་མ་མངོན་པར་འགྲུབ་པ་ན་སྣང་བར་གྱུར་ཏེ། ཡན་ལག་རྣམས་འགྲེ་ལྡོག་པ་དང་། དབང་པོ་འགྱུར་བ་དང་། ཡན་ལག་གི་ཚིགས་དག་འཆད་ཅིང་གནད་དག་འཇིག་པ་ན་མདོག་མི་སྡུག་པ་ཉིད་དུ་སྣང་བ་དེ་དག་ནི་མགུལ་སྒྲ་ངར་ངར་པོས་འགགས་པ་ཡིན་པར་ཤེས་པར་བྱ་སྟེ། དེ་ནི་སེམས་ཅན་དམྱལ་བའི་སྐྱེ་གནས་སམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་དུ་འདྲེན་པར་བྱེད་ཅིང་། སངས་རྒྱས་རྣམས་མངོན་དུ་བྱ་བའི་ཕྱིར་མི་རྣམས་ཀྱི་ནང་དུའམ། ལྷ་རྣམས་ཀྱི་ནང་དུའམ། འཇིག་རྟེན་གྱི་ཁམས་གཞན་དུ་སྐྱེ་བའམ། ཟག་པ་ཟད་པ་མངོན་དུ་བྱེད་པར་འདྲེན་པར་བྱེད་པའོ། །དེ་ལ་དབང་པོ་སྟོང་ཕྲག་བདུན་ཅུ་རྩ་བདུན་ནི་དགེ་བའི་རྩ་བའི་རྣམ་པ་ལ་མོས་པ་ལས་བལྟ་བར་བྱའོ། །དབང་པོ་སྟོང་ཕྲག་ཉི་ཤུ་ནི་མི་དགེ་བའི་རྩ་བའི་རྣམ་པ་ཡོངས་སུ་འདྲེན་པར་བྱེད་པ་དག་སྟེ། འཆི་བའི་དུས་བྱེད་པའི་ཡིན་པར་ཤེས་པར་བྱའོ། །དེ་བཞིན་གཤེགས་པའི་གཏེར་དེ་
ནི་དེ་བཞིན་གཤེགས་པ་རྣམས་ཀྱི་སྤྱོད་ཡུལ་ཡིན་ཏེ། དེ་བཞིན་གཤེགས་པ་དག་དེ་ལ་གནས་ནས་ཆོས་རྣམ་པར་འགྲེལ་པར་མཛད་ཅིང་ཟད་པར་ཡང་མི་འགྱུར་ལ་ངོམས་པར་ཡང་དག་པར་རྗེས་སུ་མ་མཐོང་ངོ་། །རྫུ་འཕྲུལ་མངོན་པར་འདུ་མཛད་པའི་ཆེ་བའི་བདག་ཉིད་ཀྱི་བསྔགས་པ་བརྗོད་པའི་ལེའུ་ཞེས་བྱ་སྟེ་གཉིས་པའོ།། །།