གཉིས་པ། འཁོར་ལོ་བཅུའི་ལེའུ།
བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་སྟན་ལས་ལངས་ཏེ་བླ་གོས་ཕྱོགས་གཅིག་ཏུ་བྱས་ཏེ། བཅོམ་ལྡན་འདས་ཀྱི་ཞབས་ལ་སྤྱི་བོས་གཏུགས་ཏེ། པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་བ་བཏུད་དེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཡོན་ཏན་ཚད་མེད་རྒྱ་མཚོ་ཅན། །བཅོམ་ལྡན་འདས་ལ་ཞུ་གསོལ་བ། །ཐེ་ཙོམ་ནེམ་ནུར་ཅི་མཆིས་པ། །བདག་ལ་རྒྱས་པར་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། སྐྱེས་བུ་ཡང་དག་པ་ཁྱོད་ནི་ཆོས་ཐམས་ཅད་ཡེ་ཤེས་ཀྱིས་མཐོང་བ་ལ་ཐོགས་པ་མེད་དོ། །འོན་ཀྱང་སེམས་ཅན་ལ་ཕན་པ་དང་བདེ་བར་འདོད་པའི་ཕྱིར་ཁྱོད་དེ་བཞིན་གཤེགས་པ་ལ་ཅི་དང་ཅི་འདོད་པ་དྲིས་ཤིག་དང་། བཅོམ་ལྡན་འདས་ཀྱིས་དྲིས་པ་དེ་དང་དེའི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོས་ཚིགས་སུ་བཅད་དེ་གསོལ་པ། བདག་སྔོན་བསྐལ་པ་བཅུ་གསུམ་དུ། །སྤྱོད་པ་དཀའ་བ་ཤིན་དུ་སྤྱད། །སོ་སོའི་སྐྱེ་བོ་ཀུན་དོན་དུ། །འཇིགས་པ་གསུམ་དང་རྙོག་ལྔ་བསལ། །སངས་རྒྱས་བྱེ་བ་ཁྲག་ཁྲིག་ལ། །ཚད་མ་མཆིས་པའི་མཆོད་བགྱིས་པས། །བསམ་པ་དག་པའི་འཁོར་འདི་དང་། །ཚོགས་ཆེན་འདུས་པའང་སྔོན་མཐོང་ངོ་། །བློ་ཅན་བརྩོན་འགྲུས་རྩོལ་བ་དག །ཐམས་ཅད་འདུས་ཤིང་ཚོགས་འདིར་ལྷགས། །ཤིན་ཏུ་སྐྱོན་མེད་འཁོར་འདི་དག །མཐོང་བར་གྱུར་པ་ངོ་མཚར་རྨད། །ཅི་སླད་སངས་
རྒྱས་ཞིང་འདི་ཀུན། །སྡིག་པས་དགེ་བ་ཉམས་བགྱིས་ཤིང་། །བློ་ཅན་དག་གིས་སྤངས་པ་ཡི། །ངན་པར་སྤྱོད་ཀུན་ལྷན་ཅིག་གནས། །མཚམས་མེད་སྡིག་པ་བགྱིད་པ་དང་། །ཡང་དག་དམ་པའི་ཆོས་ལ་སྐུར། །འཕགས་ལ་སྨོད་ཅིང་ལོག་ལྟ་བས། །རྟག་དང་ཆད་པའི་གཙུག་ལག་འཆད། །སྡིག་པ་བཅུ་ཡི་ལས་བགྱིད་ཅིང་། །འཇིག་རྟེན་ཕྱི་མས་མི་འཇིགས་པ། །ཐེག་པ་རྣམ་གསུམ་རིང་སྤངས་ཤིང་། །སྡིག་ཅན་དག་ལ་ངན་འགྲོར་གཞོལ། །མ་རིག་པས་ནི་བསྒྲིབས་པའི་མིག །འདོད་ཆགས་ཕྲག་དོག་སྒྱུས་འཚོ་བ། །སངས་རྒྱས་འཁོར་ལོ་རབ་བསྐོར་ཏེ། །སེམས་ཅན་འདི་དག་སྒྲོལ་བར་མཛད། །ཇི་ལྟར་ཉིང་མཚམས་སྦྱོར་བ་ཡི། །ཉོན་མོངས་རྡོ་རྗེ་ལྟ་བུས་བཅད། །ཇི་ལྟ་བུར་ན་གཟུངས་དག་འཐོབ། །དེ་བཞིན་བཟོད་པའང་ངེས་པར་འགྱུར། །བདག་གིས་འདྲེན་པ་ཚོགས་ཆེན་དག །མཐོང་བར་གྱུར་པ་ངོ་མཚར་ཆེ། །འདི་འདྲའི་ཡོན་ཏན་ཀུན་ཚོགས་པ། །ཕྱོགས་གཞན་དག་ན་མ་མཐོང་ངོ་། །ཡོན་ཏན་མང་པོ་ཀུན་ལྡན་ཞིང་། །བྱང་ཆུབ་ལམ་ལ་རབ་བརྩོན་པས། །ཇི་ལྟར་བྱིས་པའི་འཁོར་དག་ལ། །སངས་རྒྱས་འཁོར་ལོ་བསྐོར་བ་མཛད། །བཅོམ་ལྡན་འདས་ཀྱིས་བཀའ་སྩལ་པ། ལེགས་སོ་ལེགས་སོ། །རིགས་ཀྱི་བུ་ཁྱོད་ཀྱི་སྔོན་འདས་པའི་དུས་ན་ཡང་ཆུ་ཀླུང་གང་གཱའི་བྱེ་མ་སྙེད་ཀྱི་སངས་རྒྱས་དག་གི་ཞིང་ན་རྙོག་པ་ལྔའི་ཚེ། སངས་རྒྱས་བཅོམ་ལྡན་འདས་ཆུ་ཀླུང་གང་གཱའི་བྱེ་མ་སྙེད་ལ་སྔོན་འདི་ལྟ་བུའི་དོན་དག་ཞུ་བ་ཞུས་སོ། །ཁྱོད་ཀྱིས་དྲིས་པའི་དོན་འདི་དག་ལ་སྔོན་ཡང་ནན་ཏན་ཤིན་ཏུ་བྱས་པས་ཤིན་ཏུ་རྟོགས་ཤིང་ཁོང་དུ་ཆུད་དོ། །སྤྱོད་པ་མང་པོ་ཕུན་སུམ་ཚོགས་པ་ཕ་རོལ་ཏུ་ཕྱིན་པས་ཤིན་ཏུ་ཐབས་མཁས་པའི་ཤེས་རབ་དང་ལྡན་ཏེ། སེམས་ཅན་ཐམས་ཅད་ཡོངས་སུ་སྨིན་པར་བྱ་བ་དང་། ཕན་པ་དང་བདེ་བའི་དོན་ཐོབ་པར་བྱ་བ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་ཐབས་མཁས་པས་འཕགས་པའི་སྤྱོད་པའི་གཏེར་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་གིས་སེམས་ཅན་ཐམས་ཅད་ཡོངས་སུ་སྨིན་པར་བྱ་བའི་སྤྱོད་པའི་ཁྱད་པར་དང་། ཐམས་ཅད་མཁྱེན་པའི་ཡེ་ཤེས་ཀྱི་ཡོན་ཏན་རྒྱ་མཚོ་ཡོངས་སུ་རྫོགས་
པར་བྱ་བ་དང་། རྒྱལ་རིགས་སྤྱི་བོ་ནས་དབང་བསྐུར་བའི་རྒྱལ་པོ་སྤྱོད་པ་མི་དགེ་བ་ལ་གནས་པ་ཐམས་ཅད་ངན་སོང་གསུམ་ལས་བཟློག་ཅིང་མི་ལྟུང་བར་བྱ་བ་དང་། ཞིང་འདིར་དཀོན་མཆོག་གསུམ་གྱི་གདུང་ཤིན་ཏུ་རྒྱས་ཤིང་ཡུན་རིང་དུ་གནས་པར་བྱ་བའི་ཕྱིར་འདི་ལྟ་བུའི་དོན་དྲིས་པ་ལེགས་སོ། །ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། ངས་བསྟན་པར་བྱའོ། །བཅོམ་ལྡན་འདས་དེ་ལྟར་བགྱིའོ་ཞེས་གསོལ་ནས། བཅོམ་ལྡན་འདས་ལ་སླར་ཉན་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་བཞིན་གཤེགས་པ་ནི་སྔོན་གྱི་སྨོན་ལམ་གྱི་ཤུགས་ཀྱིས་སངས་རྒྱས་ཀྱི་འཁོར་ལོ་རྣམ་པ་བཅུ་དང་ལྡན་ཏེ། སངས་རྒྱས་ཀྱི་ཞིང་རྙོག་པ་ལྔ་ཅན་གྱི་སེམས་ཅན་ཐམས་ཅད་རྣམ་པར་དཀར་བའི་ཆོས་ཐམས་ཅད་ལས་ཕྱིར་ལྡོག་པ་དང་། འཕགས་པའི་ནོར་རིན་པོ་ཆེ་བདུན་གྱིས་བྲེལ་བ་དང་། མཁས་པ་དག་དང་རིང་དུ་གྱུར་པ་ཆད་པ་དང་། རྟག་པའི་དྲ་བས་ཀུན་ནས་གླགས་པ་དང་། ངན་སོང་དུ་འགྲོ་བའི་ཤིང་རྟ་ལ་སྤྲོ་ཞིང་དགའ་བ་དང་། སྐྱེ་བ་ཕྱི་མའི་སྡུག་བསྔལ་ལ་འཇིགས་པར་མི་ལྟ་བ་དང་། མ་རིག་པའི་མུན་ནག་ཐིབས་པོ་ལ་གནས་པ་ལ་དད་པ་དང་། མི་དགེ་བ་བཅུའི་ལས་ཀྱི་ལམ་རྫོགས་པར་བྱེད་པ་དང་། མཚམས་མེད་པ་ལྔ་བྱེད་པ་དང་། དམ་པའི་ཆོས་ལ་སྐུར་ཅིང་འཕགས་པ་ལ་དབང་ཟ་བ། དགེ་བའི་ཆོས་ཐམས་ཅད་རིང་དུ་སྤོང་ཞིང་མི་དགེ་བའི་ཆོས་རྫོགས་པར་བྱེད་པའི་གནས་ན་བཞུགས་སོ། །དེ་ལྟ་བུའི་སྡུག་བསྔལ་རྣམ་པ་སྣ་ཚོགས་དང་ལྡན་པའི་ཞིང་ན་བཞུགས་ཀྱང་རབ་ཏུ་བདེ་བར་བཞུགས་ཏེ། བག་ཚ་བ་མེད་པ་དང་། འཇིགས་སྐྲག་པ་མེད་པས་དྲང་སྲོང་ཆེན་པོའི་གནས་སུ་ཕྱིན་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ནས། སོ་སོའི་སྐྱེ་བོ་ཐམས་ཅད་ཀྱི་རིགས་ལ་ཉོན་མོངས་པ་ཤིན་ཏུ་སྲ་བ་རྡོ་རྗེ་ལྟ་བུ་དག་བསལ་ནས་ཅི་ལ་མོས་པ་བཞིན་དུ་སོ་སོར་བཀོད་དོ། །མཐུ་དང་ལྡན་པའི་སེམས་ཅན་དག་ནི་ཐེག་པ་གསུམ་ལས་ཕྱིར་མི་ལྡོག་པར་ཡང་མཛད་དོ། །
རིགས་ཀྱི་བུ་འདི་ལྟ་སྟེ། ཡུལ་ཁ་ཅིག་ཏུ་སྲིད་མེད་པར་འགྱུར་བ་ན་དེ་ན་གནས་པའི་མི་ཐམས་ཅད་བདག་གི་དམག་དང་། གཞན་གྱི་དམག་གིས་ཡོངས་སུ་གཙེས་ཤིང་ཉོན་མོངས་པ་དང་སྡུག་བསྔལ་བར་གྱུར་ཏེ། དེ་ན་གནས་པའི་མི་མང་པོ་ཡང་མི་བདེ་བས་འཐབ་པ་དང་། རྩོད་པ་དང་། གཅིག་ལ་གཅིག་སྨོད་པ་ཚད་མེད་པ་སྙེད་འབྱུང་སྟེ། བརྫུན་དུ་སྨྲ་བ་དང་། གཡོ་སྒྱུ་དང་། ཚིག་རྩུབ་པོར་སྨྲ་བ་དང་། སྐུར་ཀླང་འདེབས་ཤིང་འཁྲུག་པ་དང་། དམུས་ལོང་དང་། ལིང་ཏོག་ཅན་དུ་འགྱུར་བ་དང་། ནད་རྣམ་པ་སྣ་ཚོགས་ཀྱིས་གཟིར་བ་དང་། གྲང་བ་དང་། ཚ་བའི་ནད་མ་རུངས་པ་དང་། རིམས་རྣམ་པ་མང་པོ་དང་། སྨྱོ་བ་དང་། སྐེམ་བྱེད་དང་། ཁ་ཟས་མི་འཇུ་བ་དང་། སེམས་འཁྲུག་ཅིང་མྱོས་པ་དང་། དབང་པོ་མ་ཚང་ཞིང་ཡན་ལག་དང་ཉིང་ལག་ཉམས་པ་དང་། བགོ་བ་དང་། བཟའ་བ་དང་། འཚོ་བའི་ཡོ་བྱད་རྣམ་པ་སྣ་ཚོགས་ཀྱིས་ཕོངས་ཤིང་བྲེལ་ཏེ། བདོག་པ་ཐམས་ཅད་ཡིད་དུ་མི་འོང་བ་དང་། སྐྱེ་བོ་ཐམས་ཅད་མུ་སྟེགས་ཅན་དང་། འཇིག་རྟེན་གྱི་ལྷ་ལ་སྐྱབས་སུ་སོང་ཞིང་ལྟ་བ་ངན་པ་དང་། བསམ་པ་ངན་པ་དང་། མོས་པ་ངན་པ་ཡོངས་སུ་རྒྱས་ཏེ། ཡང་དག་པའི་ལམ་སྟོར་ནས་ངན་སོང་དུ་ལྟུང་བར་འགྱུར་བ་ན། དེའི་ཚེ་ཡུལ་དེ་ན་གནས་པའི་རྒན་པོ་བློ་དང་ལྡན་ཞིང་ཡིད་གཞུངས་པ། མང་དུ་ཐོས་པ། དྲང་དཀན་ཆེ་བ་འདུས་ནས་གྲོས་སུ་བགྲོས་ཏེ། ཡུལ་དང་གྲོང་མི་ཀུན་བསྡུས་ནས་ཐམས་ཅད་ཀྱིས་འཐུན་པར་རྒྱལ་བུ་གཅིག་བཏུས་པ་ནི་སྔོན་སྦྱིན་པ་རབ་ཏུ་བྱས་པ། ཚུལ་ཁྲིམས་ཤིན་ཏུ་བསྲུངས་པ། བརྩོན་འགྲུས་ལ་བརྟུན་པ། ཤིན་ཏུ་དཀའ་བ་སྤྱོད་པ་དང་ལྡན་པ། མཆོག་ཏུ་གྱུར་པའི་བསོད་ནམས་ཀྱི་མཚན་དང་ལྡན་པ། དབང་པོ་ཡོངས་སུ་རྫོགས་ཤིང་ཡན་ལག་མ་ཉམས་པ། ལུས་བྱད་ཆེ་ཆུང་རན་པ། མཚན་དང་དཔེ་བྱད་བཟང་པོས་བརྒྱན་པ། ཕུལ་དུ་གྱུར་པའི་མདོག་དམ་པ་དང་ལྡན་པ། ཐམས་ཅད་ཀྱིས་བཀུར་སྟི་དང་རིམ་གྲོ་བྱེད་པ། ཡུལ་དེ་ན་གནས་པའི་མི་ཐམས་ཅད་ཀྱི་ཡིད་དུ་འོང་ཞིང་ལྟ་འདོད་པ། རང་བཞིན་གྱིས་དྲང་ཞིང་བརྟན་པ། བྱམས་པ་དང་སྙིང་རྗེར་ལྡན་པ། མང་དུ་ཐོས་པ། རྩལ་ཐམས་ཅད་དང་ལྡན་པ་དང་། ངེས་
པའི་བཟོད་པས་སེམས་རབ་ཏུ་བརྒྱན་པ། བཙུན་མོ་དམ་པའི་སྲས་ཐུ་བོར་གྱུར་པ། སྤོས་དམ་པ་རྣམ་པ་སྣ་ཚོགས་རྣམ་པར་དག་པའི་ཆུས་ལུས་བཀྲུས་ནས། རིན་པོ་ཆེས་བརྒྱན་པའི་གོས་དམ་པ་སྤོས་ཀྱིས་བདུགས་པ་རྣམ་པ་སྣ་ཚོགས་གྱོན་ཞིང་། ནོར་བུ་རིན་པོ་ཆེ་སྤྱི་བོའི་གཙུག་ཕུད་ལ་བཏགས་པ། རིན་པོ་ཆེའི་མེ་ཏོག་གི་ཕྲེང་བས་བརྒྱན་པའི་གསེར་གྱི་ཅོད་པན་མགོ་ལ་ཐོགས་པ། རབ་ཏུ་ཡང་ལ་འཇམ་པའི་དར་གྱིས་བཅིངས་པ། གཞན་ཡང་ནོར་བུ་རིན་པོ་ཆེ་དང་། མུ་ཏིག་དང་། གསེར་དང་། དངུལ་ལ་སོགས་པ་རིན་པོ་ཆེ་རྣམ་པ་སྣ་ཚོགས་ལས་བྱས་པའི་རྣ་ཆ་དང་། སེ་མོ་དོ་དང་། དཔུང་རྒྱན་དང་། གདུ་བུ་ལ་སོགས་པ་ཐོགས་པ། རིན་པོ་ཆེ་རྣམ་པ་སྣ་ཚོགས་ལས་བྱས་པའི་ལྷམ་གྱིས་རྐང་པ་བཏེག་པ། རིན་པོ་ཆེ་རྣམ་པ་སྣ་ཚོགས་ལས་བྱས་པའི་གདུགས་ཀྱིས་སྟེང་གི་བླ་རེས་བྲེས་པ། སྔོན་ལྷ་དང་དྲང་སྲོང་ཐམས་ཅད་ཀྱིས་བསྲུང་ཞིང་འཛིན་པའི་ཁྲི་བཤམས་པ། བརྒྱ་བྱིན་ལ་སོགས་པ་ཐམས་ཅད་ཀྱིས་བསྲུང་ཞིང་སྐྱོབ་པ། བཟོ་ཤིན་ཏུ་མཁས་པས་ལས་སུ་བྱས་པའི་གཞལ་མེད་ཁང་ཆེན་པོར་སྔོན་རྒྱལ་པོ་སྔ་མ་འདུག་འདུག་པའི་ཁྲི་ལ་བཞག་ནས་རྒྱལ་པོར་བཅུག་གོ །རྒྱལ་སར་ཞུགས་ནས་ལྷའི་དབང་པོ་དང་། ཀླུའི་དབང་པོ་དང་། གནོད་སྦྱིན་གྱི་དབང་པོ་དང་། ལྷ་མ་ཡིན་གྱི་དབང་པོ་དང་། གྲུལ་བུམ་གྱི་དབང་པོས་བསྲུང་ཞིང་འཛིན་པའི་ དྲིལ་བུ 
་དང་། རྔ་ཆེན་པོ་བརྡུངས་ནས་དེའི་སྒྲས་ཡུལ་ཁམས་ཀུན་དུ་གྲགས་པར་གྱུར་ཏེ། རྒྱལ་རིགས་ལ་སོགས་པ་རིགས་ཆེན་པོ་བཞི་ལ་གཏོགས་པའི་མི་ཚད་མེད་པ་སྙེད་ལུས་ཡང་དག་པར་བཀྲུས་ནས་གོས་གཙང་མ་གྱོན་ཏེ། ལག་ན་རྣམ་པ་སྣ་ཚོགས་ཀྱི་རིན་པོ་ཆེའི་གདུགས་དང་། རྒྱལ་མཚན་དང་། བ་དན་དང་། ནོར་བུ་རིན་པོ་ཆེ་དང་། མུ་ཏིག་དང་། གསེར་དང་། དངུལ་དང་། དུང་དང་། མན་ཤེལ་དང་། བྱི་རུ་དང་། བཻ་དཱུཪྱ་ལ་སོགས་པ་ཚད་མེད་པ་སྙེད་ཐོགས་ཏེ་རྒྱལ་པོ་དེ་ལ་ཕུལ་ལོ། །གཞན་ཡང་རིགས་མཐོ་ཞིང་བཙུན་པ་ཚངས་པར་སྤྱོད་པ། ཐོས་པ་དང་ལྡན་ཞིང་ཤེས་པ་ཆེ་བའི་བྲམ་ཟེ་ཐམས་ཅད་ཀྱིས་ཀྱང་ཚིགས་སུ་བཅད་པས་བསྟོད་པ་དང་། གླུ་དང་དབྱངས་དམ་པ་ཚད་མེད་པ་སྙེད་ཀྱིས་རྒྱལ་པོ་དེ་ལ་
བསྟོད་པ་བྱས་སོ། །ལེགས་པར་འགྱུར་བ་རྣམ་པ་སྣ་ཚོགས་ཐོབ་པར་གྱུར་ཅིག་ཅེས་སྨོན་ལམ་ཡང་བཏབ་བོ། །བཀྲ་ཤིས་པ་རྣམ་པ་སྣ་ཚོགས་ཀྱིས་རྒྱལ་པོའི་སྤྱི་བོར་གཏོར་ཏོ། །རྒྱལ་པོ་སྔ་མའི་བློན་པོའི་རིགས་ལ་གཏོགས་པ་ཐོས་པ་དང་ལྡན་ཞིང་ཤེས་པ་ཆེ་བ། དྲང་བ། གཡོ་མེད་པ། མཛངས་པ་དག་ཀྱང་ཅི་རིགས་སུ་བློན་པོར་རིམ་པར་ཕྱེ་སྟེ་བཅུག་ནས། རྒྱལ་པོའི་ལས་བྱེད་པས་སྔོན་ཡུལ་དེ་ན་བདག་དང་གཞན་གྱི་དམག་ཐམས་ཅད་ཀྱིས་གཙེ་བར་འགྱུར་བ་དང་། ཕྱིར་རྒོལ་བ་དང་གྲོགས་པོ་ངན་པ་ཐམས་ཅད་མེད་པར་བྱས་ནས་ཕས་རྒོལ་བའི་དགྲ་དང་། གནོད་པ་བྱེད་པ་ཐམས་ཅད་ཞི་བར་གྱུར་ནས། ནག་པོའི་ཕྱོགས་ཐམས་ཅད་བྱང་ཞིང་རྣམ་པར་དཀར་བའི་ཕྱོགས་ཐམས་ཅད་སྐྱེས་ཏེ་འཕེལ་བར་གྱུར་ཏོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟ་བུའི་འཁོར་ལོ་གཅིག་དང་ལྡན་ན། འཁོར་ལོ་དེའི་དབང་གིས་བདག་གི་རྒྱལ་སྲིད་རབ་ཏུ་ཆེ་ཞིང་ཕས་རྒོལ་བའི་དགྲ་ཐམས་ཅད་ཤིན་ཏུ་ཐུལ་བ་ལས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་རྙོག་པ་ལྔའི་འཇིག་རྟེན་གྱི་ཁམས་མི་མཇེད་ཀྱི་སངས་རྒྱས་ཀྱི་ཞིང་འདིར་སངས་རྒྱས་མི་བཞུགས་པའི་ཚེ། དེ་ན་གནས་པའི་སེམས་ཅན་ཐམས་ཅད་རང་གི་སེམས་ཀྱི་བག་ལ་ཉལ་བའི་ཉོན་མོངས་པས་ཡོངས་སུ་བཅིངས་ནས་ནང་གི་དགྲ་དང་། ཕྱི་རོལ་གྱི་དགྲས་རྣམ་པར་གཙེས་ཏེ། ཀུན་ནས་ཉོན་མོངས་པས་ཉོན་མོངས་ནས་གཏི་མུག་གིས་ལྡོངས་ཏེ། མི་བདེ་བར་གྱུར་པས་རྟག་པ་དང་ཆད་པ་ལ་རྣམ་པར་ཞེན་ཅིང་ཆགས་པ་ཚད་མེད་པ་བསྐྱེད་ནས་ཕན་ཚུན་རྩོད་ཅིང་འགལ་བར་བྱེད་དེ། གཅིག་ལ་གཅིག་དབང་ཟ་ཞིང་སྨོད་པས་འདོད་ཆགས་དང་། ཞེ་སྡང་དང་། གཏི་མུག་བསྐྱེད་དེ་གཡོ་དང་སྒྱུའི་ཚུལ་དུ་སྨྲ་ཞིང་མི་དགེ་བ་བཅུའི་ལས་ཀྱི་ལམ་རྫོགས་པར་བྱེད་པ་དང་། རྣམ་པར་ཞེན་ཅིང་ཆགས་པའི་སྐྱེ་བོ་དག་ཉོན་མོངས་པའི་འཇིག་རྟེན་གྱི་ཁམས་འདིར་རྣམ་པ་སྣ་ཚོགས་ཀྱི་ཉོན་མོངས་པའི་ནད་ཀྱིས་གཟིར་བ་དང་ལྡན་པས་ཡང་དག་པའི་ཆོས་ཀྱི་མིག་ལྡོངས་ཏེ། ཞེ་སྡང་དང་ཁོང་ཁྲོ་བས་གདུངས་ཤིང་འཁྲུགས་ཀྱང་ཡང་དག་པ་བདེན་པའི་ཆོས་ཅུང་ཟད་ཀྱང་ཡིད་ལ་མི་བྱེད་དེ།
ཡང་དག་པའི་ཆོས་ཀྱི་རོ་ཡོངས་སུ་བཏང་ནས་དགེ་བ་བྱེད་པ་ལ་དབང་ཟ་ཞིང་སྨོད་དོ། །དེ་སྔར་བདེ་ཞིང་སྐྱིད་པས་ནི་བྲེལ་ཅིང་ཕོངས་པར་འགྱུར་གྱི་རྟག་ཏུ་ཉོན་མོངས་པའི་དྲ་བ་རྣམ་པ་མང་པོས་དཀྲིས་ཤིང་གླགས་ནས་མུ་སྟེགས་ཅན་གྱི་སྟོན་པ་རྣམ་པ་དྲུག་པོ་ལ་སྐྱབས་སུ་སོང་སྟེ། འཕགས་པའི་ལམ་ལས་ཕྱིར་ལོག་ཅིང་ངན་སོང་གསུམ་ལས་གཞོལ་བར་གྱུར་ཏོ། །དེའི་ཚེ་ཞིང་དེ་ན་བྱང་ཆུབ་སེམས་དཔའ་སེམས་དཔའ་ཆེན་པོ་སྔོན་སངས་རྒྱས་ཚད་མེད་པ་སྙེད་ལ་མཆོད་ཅིང་བསྙེན་བཀུར་བྱས་པ། སངས་རྒྱས་ཀྱི་ཡོན་ཏན་གྱི་རྒྱ་མཚོར་ཞུགས་པ། སྔ་མ་འདས་པའི་སངས་རྒྱས་ཀྱི་སྤྱོད་ཡུལ་ལ་གནས་པ་ཐམས་ཅད་འདུས་ཤིང་ཚོགས་ནས་ངའི་སྤྱན་སྔར་ལྷགས་ཏེ་ཚིག་འཐུན་པར་འདི་སྐད་ཟེར་རོ། །ཁྱོད་སྔོན་འདས་པའི་དུས་ན་སྦྱིན་པ་ཚད་མེད་པ་ལ་ནན་ཏན་བྱས་པ་དང་། ཚུལ་ཁྲིམས་རབ་ཏུ་བསྲུངས་པ་དང་། ཤིན་ཏུ་འབད་པའི་བརྩོན་འགྲུས་ཀྱིས་ཤིན་ཏུ་སྤྱད་དཀའ་བ་སྤྱད་དེ། ཐམས་ཅད་ཡོངས་སུ་རྫོགས་པར་བསྒོམས་སོ། །དེ་ལྟ་བུའི་བསོད་ནམས་དང་ཡེ་ཤེས་ཀྱི་ཚོགས་དང་། ཤེས་རབ་དང་། ཐབས་མཁས་པ་དང་། སྙིང་རྗེ་ཆེན་པོ་ལ་སོགས་པས་ཡོངས་སུ་བརྒྱན་པས་ཡོན་ཏན་ཆེན་པོའི་གཏེར་དུ་གྱུར་པ། ཏིང་ངེ་འཛིན་ཐམས་ཅད་དང་གཟུངས་རྣམས་ལས་རབ་ཏུ་བཟོད་པ། སའི་ཡོན་ཏན་ཐམས་ཅད་ཡོངས་སུ་རྫོགས་པའི་རྒྱ་མཚོར་གྱུར་པའོ། །གཡོ་དང་སྒྱུ་མེད་ཅིང་ལུས་བྱད་ཤིན་ཏུ་རིང་ལ་མཚན་དང་དཔེ་བྱད་ཕུན་སུམ་ཚོགས་པར་གྱུར་པ་དང་དེས་པའི་བཟོད་པ་དང་ལྡན་ཞིང་ཤིན་ཏུ་མཛེས་པར་གྱུར་པ། གཞན་གྱི་དྲིང་ལ་མི་འབྲང་བས་བྱང་ཆུབ་ཀྱི་ལམ་བསྒོམ་པར་ཡེ་ཤེས་ཀྱི་རྒྱ་མཚོ་ཐམས་ཅད་ཡོངས་སུ་རྫོགས་པར་གྱུར་པ། ཕུལ་དུ་གྱུར་པའི་མདོག་མཆོག་དམ་པ་དང་ལྡན་པར་གྱུར་པ། ཉན་ཐོས་དང་རང་སངས་རྒྱས་ཐམས་ཅད་ཀྱི་སྟོན་པ་ཆེན་པོར་གྱུར་པ། འཁོར་བས་འཇིགས་སྐྲག་པའི་སེམས་ཅན་ཐམས་ཅད་ཀྱི་དཔུང་གཉེན་དུ་གྱུར་པ། བྱམས་པ་དང་སྙིང་རྗེ་ཆེན་པོ་ལ་སོགས་པ་ཡོན་ཏན་ཚད་མེད་པས་ཡོངས་སུ་བརྒྱན་པ། བཅོམ་ལྡན་འདས་ལོག་པར་དད་སེལ་དང་། གསེར་ཐུབ་དང་། འོད་
སྲུང་ལ་སོགས་པའི་སྲས་ཡང་དག་པ་བསྐལ་པ་བཟང་པོ་འདིར་མངོན་པར་འཚང་རྒྱ་བ། བྱང་ཆུབ་སེམས་དཔའ་ཐམས་ཅད་ཀྱི་ནང་ན་གཙོ་བོར་གྱུར་པ། ཡོན་ཏན་རྣམ་པ་སྣ་ཚོགས་ཀྱི་སྤོས་ཅན། ཞི་གནས་དང་ལྷག་མཐོང་གི་ཆུ་ཡོངས་སུ་དག་པས་ཁྲུས་བྱས་པ། ཁྲེལ་བ་དང་འཛེམ་པའི་གོས་གྱོན་པ། རྣམ་པར་དག་པའི་ཆོས་ཀྱི་དབྱིངས་གཙུག་གི་ནོར་བུར་ཐོགས་པ། སངས་རྒྱས་ཐམས་ཅད་ཀྱི་སྤྱོད་ཡུལ་རྒྱ་ཆེན་པོའི་མེ་ཏོག་གི་ཕྲེང་བའི་ཅོད་པན་ཐོགས་པ། རྣམ་པར་གྲོལ་བའི་སྲད་བུས་བཅིངས་པ། གཞན་ཡང་རྣམ་པ་ཐམས་ཅད་མཁྱེན་པའི་ཡེ་ཤེས་དང་། མི་སྐྱེ་བའི་བཟོད་པ་ལ་སོགས་པ་ཡོན་ཏན་གྱི་རིན་པོ་ཆེས་ཡོངས་སུ་བརྒྱན་པ། བྱམས་པ་ཆེན་པོ་དང་། སྙིང་རྗེ་དང་། དགའ་བ་དང་། བཏང་སྙོམས་ཀྱི་ལྷམ་རིན་པོ་ཆེ་གྱོན་པ། ཁམས་གསུམ་ཡོངས་སུ་ཁེབས་པའི་སྤྱོད་པ་རྣམ་གསུམ་གྱིས་འཕགས་པའི་རྒྱུ་ཡོངས་སུ་རྫོགས་པར་འགྱུར་བའི་གདུགས་ཀྱིས་བཀབ་པ། སྔོན་གྱི་སངས་རྒྱས་དང་། ལྷ་དང་། དྲང་སྲོང་གིས་ཡོངས་སུ་བཟུང་བའི་རྡོ་རྗེ་ལྟ་བུའི་ཏིང་ངེ་འཛིན་གྱི་གདན་བཤམས་པ། ཉན་ཐོས་དང་། རང་སངས་རྒྱས་ཐམས་ཅད་ཀྱིས་བཀུར་སྟི་དང་བཅས་ཏེ་ཡོངས་སུ་བཟུང་བའི་དྲན་པ་ཉེ་བར་གཞག་པ་བཞི་ལ་བཞུགས་པ། སྔོན་གྱི་སངས་རྒྱས་ཐམས་ཅད་ཀྱིས་བཏིང་བའི་གདན་ལ་བཞུགས་ནས་བླ་ན་མེད་པའི་བྱང་ཆུབ་ཏུ་མངོན་པར་སངས་རྒྱས་སོ། །ཐམས་ཅད་མཁྱེན་པའི་ཡེ་ཤེས་སུ་གྱུར་པ་དཀོན་མཆོག་གསུམ་གྱི་གདུང་མི་གཅད་པའི་ཕྱིར་ཆོས་ཀྱི་འཁོར་ལོ་བསྐོར་ཏོ། །ཆོས་ཀྱི་རྔ་རབ་ཏུ་བརྡུངས་ནས་ཁམས་གསུམ་ཀུན་དུ་ཆོས་ཀྱི་སྒྲ་བསྒྲགས་ཏེ། ལྷ་དང་། ཀླུ་དང་། གནོད་སྦྱིན་དང་། སྲིན་པོ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། གྲུལ་བུམ་དང་། འབྱུང་པོ་དང་། ཤ་ཟ་དང་། སྲུལ་པོ་དང་། ལུས་སྲུལ་པོ་དང་། མི་དང་མི་མ་ཡིན་པ་ལ་སོགས་པ་ཐམས་ཅད་འཕགས་པའི་བདེན་པ་བཞིས་གྲོལ་བར་བྱས་སོ། །ཡན་ལག་བཅུ་གཉིས་དང་ལྡན་པའི་ཆོས་ཀྱི་འཁོར་ལོ་གང་འཇིག་རྟེན་དུ་བཅས་པ་དགེ་སྦྱོང་དང་། བྲམ་ཟེ་དང་། ལྷ་དང་། བདུད་དང་། ཚངས་པ་
དང་། མི་དང་མི་མ་ཡིན་པ་ལ་སོགས་པ་གང་གིས་ཀྱང་མ་བསྐོར་བ་དེ། འཇིག་རྟེན་དུ་བཅས་པ་ལྷ་དང་མི་ཚད་མེད་པ་དག་ལ་ཕན་པ་དང་བདེ་བའི་དོན་ཆེན་པོ་མཆོག་དམ་པ་ཐོབ་པར་བྱ་བའི་ཕྱིར་སྔོན་གང་གིས་ཀྱང་མ་བསྐོར་བ་དེ་རྣམ་པ་གསུམ་དུ་རབ་ཏུ་བསྐོར་ཏོ། །རིགས་ཀྱི་བུ་ང་དེ་ལྟ་བུའི་སངས་རྒྱས་ཀྱི་འཁོར་ལོ་གཅིག་པ་དེ་དང་ལྡན་ཏེ། འཁོར་ལོ་དེའི་དབང་གིས་ཡང་དག་པ་ཇི་ལྟ་བ་བཞིན་དུ་འཇིག་རྟེན་འདི་དང་འཇིག་རྟེན་ཕྱི་མ་དང་། གནས་དང་གནས་མ་ཡིན་པ་མངོན་སུམ་དུ་མཁྱེན་པས་འཇིགས་པ་མེད་པ་ཐོབ་སྟེ། བདེ་བར་གནས་ཤིང་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་ཤིན་ཏུ་བཏུལ་ནས་ཚངས་པ་ཆེན་པོའི་འཁོར་ལོ་བསྐོར་ཏེ། ཚངས་པ་ཆེན་པོའི་སྤྱད་པ་ཤིན་ཏུ་གྲུབ་པས་ང་ནི་རྙོག་པ་ལྔའི་སྡིག་པ་ཅན་གྱི་འཇིག་རྟེན་གྱི་ཁམས་འདིར་འཁོར་གྱི་དཀྱིལ་འཁོར་དུ་སེང་གེའི་སྒྲ་ཡང་དག་པར་བསྒྲགས་ཏེ། སེམས་ཅན་ཐམས་ཅད་ཀྱི་མཚམས་མེད་པ་ལྔའི་ལས་ཞི་བར་བྱས་སོ། །དེ་བཞིན་དུ་མི་དགེ་བའི་རྩ་བར་གཏོགས་པ་ཐམས་ཅད་བསལ་ནས་སྐྱེ་བོ་ཐམས་ཅད་ཀྱི་ཉོན་མོངས་པའི་རྒྱུན་རྡོ་རྗེ་ལྟར་སྲ་བ་དག་ཀྱང་ཞི་བར་བྱེད་དོ། །ཟག་པ་ཐམས་ཅད་ཡོངས་སུ་ཟད་པ་རྣམ་པར་གྲོལ་བའི་འབྲས་བུ་དམ་པ་ལ་རྣམ་པར་བཞག་ནས་ཅི་དང་ཅི་ལ་མོས་པ་བཞིན་དུ་ཐམས་ཅད་བདེ་བར་འཇོག་པ་དང་། མཐུ་དང་ལྡན་པའི་སེམས་ཅན་དག་ནི་ཐེག་པ་གསུམ་ལ་བཞག་སྟེ་ཕྱིར་མི་ལྡོག་པར་ཡང་མཛད་དོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཐོག་མ་རྒྱལ་སར་ཞུགས་ནས་རྒྱལ་པོའི་སྲིད་བཟུང་མ་ཐག་ཏུ་འདས་པ་དང་། མ་འོངས་པ་དང་། ད་ལྟར་གྱི་རྒྱལ་པོ་ཐམས་ཅད་ཀྱིས་ཆོས་དང་ཁྲིམས་ལ་ཤིན་ཏུ་ལྟ་ཞིང་རྟོག་གོ །དེ་ལྟར་རྒྱལ་པོ་ཀུན་གྱི་ལས་ཀྱི་འཁོར་ལོ་ཤིན་ཏུ་རྟོགས་ནས་རྒྱུ་དང་འབྲས་བུ་སྨིན་པ་ཡང་ཤེས་ཏེ། ཅི་དང་ཅིར་ལྡན་པ་བཞིན་དེ་དང་དེ་ལྟ་བུའི་ཐབས་བྱིན་ཏེ་ལས་སུ་བཅུག་པས། ཡུལ་དེ་ན་གནས་པའི་མཛངས་ངན་ལས་ལས་ཀྱི་འཁོར་ལོ་རྣམ་པ་གསུམ་བྱེད་དུ་བཅུག་གོ །ལས་ཀྱི་འཁོར་ལོ་དེའི་དབང་གིས་
དེ་ན་གནས་པའི་སེམས་ཅན་ཐམས་ཅད་ཡུན་རིང་པོར་འཚོ་བའི་ཡོ་བྱད་ཡིད་དུ་འོང་བ་རྣམ་པ་སྣ་ཚོགས་ལ་ལོངས་སྤྱོད་པ་དང་། བདེ་སྐྱིད་འཕེལ་ཞིང་སྐྱེ་བ་དང་། ཕས་རྒོལ་བའི་དགྲ་ཐམས་ཅད་ཀྱང་ཐུལ་བར་གྱུར་ཏོ། །ལས་ཀྱི་འཁོར་ལོ་རྣམ་པ་གསུམ་གང་ཞེ་ན། འདི་ལྟ་སྟེ། རྒྱལ་པོ་སྲིད་ཀྱི་ལས་ཀྱི་འཁོར་ལོ་རྣམ་པར་བཞག་པས་གང་དགྲ་ཐབས་མཁས་པར་བསླབས་ཤིང་རྩལ་སྦྱངས་ཏེ། ཕས་རྒོལ་བའི་དགྲ་འདུལ་ཞིང་མི་མང་པོ་སྲུང་བར་བྱེད་པ་དང་། ཞིང་དང་གནས་བྱེད་པའི་ལས་ཀྱི་འཁོར་ལོ་རྣམ་པར་བཞག་པས་གང་ཁང་ཁྱིམ་བརྩིགས་པ་དང་ཞིང་གི་ལས་ལག་བྱད་ཀྱིས་ཕྱིན་པར་བྱེད་དུ་འཇུག་ཅིང་བདེ་བར་བྱས་པས་བཟའ་བ་དང་བཏུང་བས་མི་བྲེལ་བར་བྱེད་པ་དང་། ནོར་རིན་པོ་ཆེ་ཚོལ་བའི་ལས་ཀྱི་འཁོར་ལོ་རྣམ་པར་བཞག་པས་གང་ཚོང་སྤོགས་དང་། བཟོ་རྣམ་པ་སྣ་ཚོགས་སློབ་ཏུ་གཞུག་ཅིང་འཚོ་བའི་ཡོ་བྱད་རྣམ་པ་སྣ་ཚོགས་ཡིད་བཞིན་དུ་སྤྱད་དུ་ཡོད་ལ་བདེ་ཞིང་སྐྱིད་པ་འཕེལ་བར་བྱེད་པའོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་འཁོར་ལོ་གསུམ་པོ་འདི་དང་ལྡན་ན་འཁོར་ལོ་འདིའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་དང་གྲོགས་པོ་ངན་པ་བཏུལ་ཞིང་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པའི་ཡང་ཐོག་མ་མངོན་པར་སངས་རྒྱས་ཏེ་བླ་ན་མེད་པའི་ཡེ་ཤེས་ཐོབ་ནས་འདས་པ་དང་། མ་འོངས་པ་དང་། ད་ལྟར་གྱི་སངས་རྒྱས་ཐམས་ཅད་ཀྱི་ཆོས་ཀྱི་མིག་ལ་ཤིན་ཏུ་རྟོག་གོ །དེ་ལྟར་ཤིན་ཏུ་བརྟགས་པས་ལས་དང་ཆོས་རྣམས་ཀྱི་རྒྱུ་དང་འབྲས་བུ་རབ་ཏུ་མཁྱེན་ཏེ། འདུལ་བར་འགྱུར་བའི་སེམས་ཅན་ཐམས་ཅད་ལ་ལས་ཀྱི་འཁོར་ལོ་རྣམ་པ་གསུམ་རྣམ་པར་གཞག་གོ །ལས་ཀྱི་འཁོར་ལོ་དེའི་དབང་གིས་དཀོན་མཆོག་གསུམ་གྱི་གདུང་དང་། ཆོས་ཀྱི་མིག་ཡུན་རིང་དུ་གནས་པ་དང་། བླ་ན་མེད་པ་ཡང་དག་པའི་ཆོས་རྒྱ་ཆེར་ཀུན་དུ་ཁྱབ་པ་དང་། སྐྱེ་བོ་ཐམས་ཅད་རྟག་ཏུ་མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བར་དུ་ཤིན་ཏུ་བདེ་
བ་ཐོབ་པ་དང་། མུ་སྟེགས་ཅན་ལོག་པར་སྨྲ་བ་ཐམས་ཅད་ཀྱིས་མི་ཚུགས་ཤིང་ཡང་དག་པའི་ཆོས་ཀྱི་མིག་གིས་ཕས་རྒོལ་བ་ཐམས་ཅད་ཆོས་བཞིན་དུ་ཐུལ་བར་འགྱུར་རོ། །དེ་ལ་རིགས་ཀྱི་བུ་ལས་ཀྱི་འཁོར་ལོ་རྣམ་པ་གསུམ་གང་ཞེ་ན། འདི་ལྟ་སྟེ། ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་རྣམ་པར་གཞག་པ་དང་། ཁ་དོན་གོམས་པར་བྱ་བའི་ལས་ཀྱི་འཁོར་ལོ་རྣམ་པར་གཞག་པ་དང་། བསོད་ནམས་བྱ་བའི་ལས་ཀྱི་འཁོར་ལོ་རྣམ་པར་གཞག་པ་དང་གསུམ་མོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་གང་ཞེ་ན། ཏིང་ངེ་འཛིན་རྣམ་པ་བཅུ་སྟེ། བཅུ་གང་ཞེ་ན། ཡང་དག་པ་ཇི་ལྟ་བ་བཞིན་དུ་རྣམ་པར་ཤེས་པ་དང་བཅས་པའི་ལུས་འདི་ལ་བརྟགས་ན་ཡུལ་དྲུག་དང་། བདག་དང་བདག་གིར་ཞེན་ཅིང་ཆགས་པའི་རྒྱུ་དང་། ལས་ཀྱི་ཞིང་དང་། མ་རིག་པས་བསྒྲིབས་པ་དང་། སྲེད་པའི་ཆུས་བརླན་པའི་དབང་མེད་པར་གཞན་གྱི་དབང་གིས་ཡོད་པར་གྱུར་པས་རྐྱེན་མང་པོ་ལ་རག་ལས་པའོ། །ལས་དང་ཉོན་མོངས་པ་དང་སྡུག་བསྔལ་གྱི་རྒྱུན་རྣམ་པ་གསུམ་པོ་དགག་པའི་ཕྱིར་དེ་ལྟར་བརྟག་གོ །ལས་ཀྱི་རྒྱུན་གང་ཞེ་ན། གང་སེམས་ཅན་རྣམས་ཇི་སྙེད་ཀྱི་འདུ་བྱེད་མངོན་དུ་སྤྱོད་པ་དེ་མ་རིག་པ་དང་། སྲེད་པའི་རྒྱུ་ལས་སྲིད་པ་སྐྱེ་བས་ཉོན་མོངས་པའི་རྒྱུན་ཅེས་བྱའོ། །ཉོན་མོངས་པའི་དབང་གིས་རྣམ་པར་ཤེས་པའི་རྒྱུ་དང་རྐྱེན་མང་པོ་འདུས་པ་ལས་མིང་དང་གཟུགས་སྐྱེའོ། །མིང་དང་གཟུགས་ཀྱི་རྒྱུ་དང་རྐྱེན་མང་པོ་འདུས་པ་ལས་སྐྱེ་མཆེད་དྲུག་སྐྱེའོ། །སྐྱེ་མཆེད་དྲུག་གི་རྒྱུ་དང་རྐྱེན་མང་པོ་འདུས་པ་ལས་རེག་པ་དང་། ཚོར་བ་དང་། སྲིད་པ་ཕྱི་མའི་སྐྱེ་བ་དང་། རྒ་བ་དང་། འཆི་བ་ལ་སོགས་པ་རིམ་གྱིས་འབྱུང་བ་ནི་སྡུག་བསྔལ་གྱི་རྒྱུན་ཅེས་བྱའོ། །དེ་ལྟར་རྒྱུན་གསུམ་པོ་འདི་ནི་ལས་ཀྱི་ཞིང་ལ་མ་རིག་པའི་རྒྱུ་དང་། སྲེད་པའི་བརླན་གྱིས་སྐྱེ་བར་གྱུར་ཏོ། །འདི་ལྟར་ལས་ཀྱི་ཞིང་ལ་མ་རིག་པའི་རྒྱུ་དང་། སྲེད་པའི་བརླན་གྱིས་རྣམ་པ་གསུམ་པོ་བསྐམ་པའི་ཕྱིར་ཉེ་བར་ལེན་པའི་ཕུང་པོ་ལྔ་ལ་མི་རྟག་པ་དང་། སྡུག་བསྔལ་བ་དང་། བདག་མེད་པ་དང་། བེམས་པོ་དང་། གཡོ་བ་མེད་པ་དང་། སྒྱུ་
མ་ལྟ་བུ་དང་། སྨིག་རྒྱུ་བ་ལྟ་བུ་དང་། ཆུའི་ཟླ་བ་ལྟ་བུ་དང་། རྨི་ལམ་ལྟ་བུ་སྟོང་པ་ཅི་ཡང་མེད་པ། མཚན་མ་མེད་པ། སྨོན་པ་མེད་པ། བྱས་པ་མེད་པ། མ་བྱུང་བ། མ་སྐྱེས་པ། གཟུགས་མེད་པ། ཞི་བ་དང་། དབེན་པ་དང་། བྱུང་བ་དང་། སྐྱེ་བའི་གནས་མེད་པར་རྟོགས་སོ། །དེ་ལྟར་ཉེ་བར་ལེན་པའི་ཕུང་པོ་ལྔ་ལ་ཤིན་ཏུ་བརྟགས་པས་སྟོང་པ་ཉིད་དང་རྗེས་སུ་འཐུན་པའི་བཟོད་པ་དང་། མཚན་མ་མེད་པའི་རྗེས་སུ་འཐུན་པའི་བཟོད་པ་དང་། སྨོན་པ་མེད་པའི་རྗེས་སུ་འཐུན་པའི་བཟོད་པ་ལ་ཕྱོགས་སོ། །ཡང་ཉེ་བར་ལེན་པའི་ཕུང་པོ་ལྔ་ལ་རྗེས་སུ་བརྟག་པར་བྱ་བའི་ཕྱིར་གཞན་ཡང་ཐབས་མཁས་པས་དབུགས་ཕྱི་ནང་དུ་རྒྱུ་བ་ལ་རྟོག་སྟེ་ནང་དུ་རྒྱུ་བ་དང་། ཕྱིར་རྒྱུ་བའི་དྲན་པ་གོམས་པར་བྱེད་དོ། །དེ་ལ་ཇི་ལྟར་ན་དྲན་པའི་དབང་གིས་ཡང་དག་པ་ཇི་ལྟ་བ་བཞིན་དུ་དབུགས་ཕྱི་ནང་དུ་རྒྱུ་བ་ལ་རྟོག་ཅེ་ན། ཡང་དག་པ་ཇི་ལྟ་བ་བཞིན་དུ་བགྲང་བ་དང་། རྗེས་སུ་འབྲང་བ་དང་། ཞི་གནས་དང་། ལྷག་མཐོང་དང་། འཇུག་པ་དང་། ཡོངས་སུ་དག་པ་ལ་རྟོག་གོ །དེ་ལ་བགྲང་བས་ནི་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། རྟེན་དུ་གྱུར་པས་རྣམ་པར་རྟོག་པ་དང་། རྣམ་པར་དཔྱོད་པ་རྣམས་ཐུལ་བ་དང་། དབུགས་ཕྱི་ནང་དུ་རྒྱུ་བའི་མཚན་ཉིད་འཛིན་པར་ནུས་པའོ། །རྗེས་སུ་འབྲང་བས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། ཡང་དག་པར་འབྱུང་བ་ལ་རྟེན་ཅིང་རྣམ་པར་རྟོག་པ་དང་། རྣམ་པར་དཔྱོད་པ་དང་བྲལ་བ་དང་། དབུགས་ཕྱི་ནང་དུ་རྒྱུ་བའི་འཇུག་པའི་མཚན་ཉིད་ལ་མཁས་པར་གྱུར་པའོ། །ཞི་གནས་ཀྱིས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་བྲི་བར་མངོན་དུ་སྟོན་པ་དང་། ཏིང་ངེ་འཛིན་གྱི་མཆོག་ལ་གནས་པར་ནུས་པའོ། །ལྷག་མཐོང་གིས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། དབུགས་ཕྱི་ནང་དུ་རྒྱུ་བ་ཟད་པར་མངོན་དུ་སྟོན་པ་དང་། སེམས་དང་སེམས་ལས་བྱུང་བའི་ཆོས་སོ་སོར་རྟོགས་པ་ལ་གནས་པའོ། །འཇུག་པས་ཀྱང་ལས་ཀྱི་དངོས་པོ་རྣམ་པ་གཉིས་བྱེད་པར་འགྱུར་ཏེ། ཉེ་བར་ལེན་པའི་ཕུང་པོ་སྤོང་བའི་སྦྱོར་བ་ལ་མཁས་པ་དང་། འཕགས་པའི་སར་འཇུག་
པ་ལ་སྦྱོར་བའོ། །ཡོངས་སུ་དག་པས་ཀྱང་བྱ་བའི་ལས་ཀྱི་དངོས་པོ་གཉིས་བྱེད་པར་འགྱུར་ཏེ། ཀུན་ནས་ཉོན་མོངས་པ་སྤོང་བ་དང་། ལྟ་བ་ཡོངས་སུ་དག་པའོ། །དེ་ལྟར་སྦྱོར་བ་རྣམ་པ་དྲུག་གིས་དབུགས་ཕྱི་ནང་དུ་རྒྱུ་བ་ལ་རྟོག་པ་བསྒོམས་པས་ཉེ་བར་ལེན་པའི་ཕུང་པོ་ལྔ་རྟོགས་པ་དང་རྗེས་སུ་འཐུན་པར་འཇུག་གོ །དེ་ཅིའི་ཕྱིར་ཞེ་ན། ཇི་ལྟར་དབུགས་ཕྱི་ནང་དུ་རྒྱུ་བའི་རང་བཞིན་ནི་གཟུགས་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་ལེན་ཅིང་མྱོང་བར་བྱེད་པ་ནི་ཚོར་བ་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བའི་མཚན་ཉིད་ལེན་པ་ནི་འདུ་ཤེས་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་མངོན་དུ་བྱེད་པ་ནི་འདུ་བྱེད་ཉེ་བར་ལེན་པའི་ཕུང་པོའོ། །དབུགས་ཕྱི་ནང་དུ་རྒྱུ་བ་བྱེ་བྲག་ཏུ་འབྱེད་པ་ནི་རྣམ་པར་ཤེས་པ་ཉེ་བར་ལེན་པའི་ཕུང་པོ་སྟེ། དེ་ལྟར་ཉེ་བར་ལེན་པའི་ཕུང་པོ་རྣམ་པ་ལྔ་བཤད་པ་ནི་སོ་སོ་བ། ཐ་དད་པ་མི་འདྲ་བ། གསར་མ་ཡིན་པ། རྙིང་མ་ཡིན་པ། གནས་མེད་པ། སྤུངས་པ་མེད་པ་མ་ཡིན་པ། བརྗོད་དུ་མེད་པའོ། །དེ་ལྟར་ཉེ་བར་ལེན་པའི་ཕུང་པོ་ལྔ་ཤིན་ཏུ་རྟོགས་པས་འདུ་བྱེད་རྣམ་པ་གསུམ་ཡོངས་སུ་སྤོང་བར་འགྱུར་རོ། །གལ་ཏེ་དེ་ལྟར་འདུ་བྱེད་རྣམ་པ་གསུམ་ཡོངས་སུ་ཟད་པར་རྗེས་སུ་བརྟགས་པའི་མཐར་ཕྱིན་ན་རྣམ་པར་ཤེས་པ་དང་བཅས་པའི་ལུས་དང་། ཡུལ་དྲུག་རྗེས་སུ་རྟོགས་པའི་མཐར་ཕྱིན་པར་འགྱུར་རོ། །བདག་དང་བདག་གིར་ཞེན་པ་དང་། ལས་དང་། མ་རིག་པ་དང་། སྲིད་པའི་རྒྱུ་དང་། ཞིང་དང་། ཀུན་ནས་འགེབས་པའི་རླན་པ་ཡང་ཐམས་ཅད་ཟད་པར་འགྱུར་རོ། །དེ་བཞིན་དུ་དྲན་པ་ཉེ་བར་གཞག་པ་བཞི་བསྒོམ་པ་ཡང་ཡོངས་སུ་རྫོགས་པ་ནས་འཕགས་པའི་ལམ་ཡན་ལག་བརྒྱད་པའི་བར་དུ་ཡང་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་བར་དུ་ཡང་བསྒོམ་པ་ཡོངས་སུ་རྫོགས་པར་འགྱུར་རོ། །དེ་བཞིན་དུ་རྣམ་པ་ཐམས་ཅད་མཁྱེན་པའི་ཡེ་ཤེས་དང་། མི་སྐྱེ་བའི་ཆོས་ཀྱི་བཟོད་པ་དང་། དཔའ་བར་འགྲོ་བའི་ཏིང་ངེ་འཛིན་ལ་སོགས་པའི་བར་དུ་བསྒོམ་པ་ཡོངས་སུ་རྫོགས་པར་འགྱུར་
རོ། །དེ་བཞིན་དུ་འགྲོ་བ་དང་འོང་བ་རྗེས་སུ་དྲན་པས་གཟུང་བར་བསམ་གཏན་དག་ལ་ཞུགས་པ་ནི་ཡང་དག་པའི་ཆོས་དོན་དམ་པ་ལ་གནས་པའི་སེམས་ཅན་ཞེས་བྱའོ། །བསམ་གཏན་ཡང་དག་པ་ཇི་ལྟ་བ་བཞིན་དུ་བསྒོམ་པ་ཞེས་བྱའོ། །དུས་གསུམ་གྱི་སངས་རྒྱས་བཅོམ་ལྡན་འདས་ལ་ཡང་དག་པར་མཆོད་པ་ཞེས་བྱའོ། །སངས་རྒྱས་ཐམས་ཅད་ཀྱི་ཐུགས་ལས་བྱུང་བའི་སྲས་ཐམས་ཅད་ཀྱི་གསུང་ལས་སྐྱེས་པ། ཆོས་ཀྱིས་གྲུབ་པ། ཆོས་ཀྱིས་བཏུལ་བ་ཞེས་བྱའོ། །བྱང་ཆུབ་སེམས་དཔའ་ལ་ལས་དེ་ལྟར་བསྒོམས་པ་ལས་བགས་ཀྱིས་ཕྱིར་ནུར་ན་ཡང་ཟག་པ་ཟད་པའི་དགྲ་བཅོམ་པར་གྱུར་པ་ནས་མངོན་པར་ཤེས་པ་དྲུག་དང་ལྡན་པར་འགྱུར་རོ། །བྱང་ཆུབ་སེམས་དཔའ་ལ་ལ་དེ་ལྟར་བསྒོམས་པས་གོང་ནས་གོང་དུ་འཕར་བ་ནི་ཡོན་ཏན་ཐམས་ཅད་ཡོངས་སུ་རྫོགས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོར་གྱུར་པ་ནས་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། རྣམ་པ་ཐམས་ཅད་མཁྱེན་པའི་ཡེ་ཤེས་ཀྱི་བར་དུ་ཡོངས་སུ་རྫོགས་པར་འགྱུར་ཏེ། རིང་པོ་མི་ཐོགས་པར་བླ་ན་མེད་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །རིགས་ཀྱི་བུ་ངས་རྣམ་པ་དེ་སྙེད་ཀྱི་ལས་དང་། ཆོས་དང་། ཚོར་བ་དང་། རྒྱུ་དང་། འབྲས་བུ་དང་། རྣམ་པར་སྨིན་པ་ལ་ཡེ་ཤེས་ཀྱིས་དུས་གསུམ་གྱི་སངས་རྒྱས་ཀྱི་ཆོས་ལ་བརྟགས་ན་སེམས་ཅན་དག་ཏིང་ངེ་འཛིན་བསྒོམ་པའི་ལས་ཀྱི་འཁོར་ལོ་བཅུ་རྣམ་པར་བཞག་ལ་སྒོམ་དུ་འཛུད་དོ། །རིགས་ཀྱི་བུ་དེ་དག་ནི་དེ་བཞིན་གཤེགས་པའི་ཏིང་ངེ་འཛིན་སྒོམ་པའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་ཁ་ཏོན་གོམས་པའི་ལས་ཀྱི་འཁོར་ལོ་ཞེ་ན། གང་དགེ་སློང་དང་། དགེ་སློང་མ་དང་། དགེ་བསྙེན་དང་། དགེ་བསྙེན་མ་དང་། རིགས་ཀྱི་བུའམ། རིགས་ཀྱི་བུ་མོ་དགེ་བའི་རྩ་བ་ཆུང་ཞིང་སྲབ་པ་དང་། ཀུན་རྫོབ་ཀྱི་བདེན་པ་ལ་གནས་པ་དབང་པོ་ཡོངས་སུ་མ་སྨིན་པ་དག་ལ་ངས་ཁ་ཏོན་གོམས་པར་བྱ་བ་ལ་བཙུད་དེ། སྲོད་དང་ཐོ་རངས་ལ་ལེ་ལོ་མེད་པར་ཤིན་ཏུ་བརྩོན་འགྲུས་རྩོམ་པ་དང་། སེམས་ཅན་གང་བླ་ན་མེད་པའི་ཡེ་
ཤེས་ཚོལ་བ་དག་ནི་ངས་རྣམ་པར་དཀར་བའི་ཐེག་པ་ཆེན་པོ་ལ་བཙུད་དེ། བདག་ཉིད་ཀློག་པ་དང་། ཕ་རོལ་པོ་གཞན་ཀློག་ཏུ་འཇུག་པ་དང་། བདག་ཉིད་འདོན་པ་དང་། ཕ་རོལ་པོ་གཞན་འདོན་དུ་འཇུག་པ་དང་། བདག་ཉིད་འཆང་བ་དང་། ཕ་རོལ་པོ་གཞན་འཆང་དུ་འཇུག་པ་དང་། ཐེག་པ་ཆེན་པོ་ལ་བདག་གོམས་པར་བྱ་བ་དང་། ཕ་རོལ་པོ་གཞན་གོམས་པར་བྱེད་དུ་འཇུག་པ་དང་། བདག་དང་གཞན་གྱི་ཀུན་ནས་ཉོན་མོངས་པ་བསལ་བ་དང་། བླ་ན་མེད་པའི་ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བ་དང་། སེམས་ཅན་ཐམས་ཅད་ཀྱི་སྡུག་བསྔལ་ཞི་བར་བྱ་བ་དང་། འཇིགས་པ་མེད་པའི་གྲོང་ཁྱེར་ཆེན་པོར་བཞུགས་པའི་ཕྱིར་རྩོལ་ལོ། །སེམས་ཅན་གང་རང་སངས་རྒྱས་ཀྱི་ཐེག་པ་འདོད་པ་དག་ནི་ངས་རྟེན་ཅིང་འབྲེལ་བར་འབྱུང་བའི་ཆོས་ལ་བཙུད་ནས་ཁ་ཏོན་གོམས་པར་བྱེད་དུ་བཅུག་གོ །སེམས་ཅན་གང་ཉན་ཐོས་ཀྱི་ཐེག་པ་འདོད་པ་དག་ལ་ནི་ངས་གཞུང་ཚིགས་སུ་བཅད་པ་སྟོང་ཕྲག་བརྒྱ་པ་དང་། འདུལ་བ་ཚིགས་སུ་བཅད་པ་སྟོང་ཕྲག་བརྒྱ་པ་དང་། ཆོས་མངོན་པ་དང་མངོན་པར་སྨྲ་བ་ཚིགས་སུ་བཅད་པ་སྟོང་ཕྲག་བརྒྱ་པ་ལ་སོགས་པ་ཁ་ཏོན་གོམས་པར་བྱེད་དུ་བཅུག་པ་དེ་ནི་རིགས་ཀྱི་བུ་དེ་བཞིན་གཤེགས་པའི་ཁ་ཏོན་གོམས་པར་བྱ་བའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལ་ཇི་ལྟར་ན་དེ་བཞིན་གཤེགས་པའི་བསོད་ནམས་བྱ་བའི་ལས་ཀྱི་འཁོར་ལོ་ཞེ་ན། འདི་ལྟ་སྟེ། སེམས་ཅན་གང་དབང་པོ་རྟུལ་བ། དགེ་བའི་རྩ་བ་མ་བསྐྱེད་པ། ཤེས་རབ་ཞན་པ་དང་། ལེ་ལོ་དང་བཅས་པ། དྲན་པ་ཉམས་པ་འཚོ་བའི་ཡོ་བྱད་རྣམ་པ་ཀུན་ལ་ཞེན་ཅིང་ཆགས་པ། དགེ་བའི་བཤེས་གཉེན་ཡོངས་སུ་སྤོང་བ་དག་ནི་ངས་བསོད་ནམས་བྱ་བའི་ལས་ལ་བཙུད་དོ། །འདི་ལྟ་སྟེ། སངས་རྒྱས་དང་། ཆོས་དང་། དགེ་འདུན་ལ་བྱ་བ་བྱེད་པ་དང་། མཁན་པོ་དང་། སློབ་དཔོན་ལ་བྱ་བ་བྱེད་པ་སྟེ། རིགས་ཀྱི་བུ་དེ་ནི་དེ་བཞིན་གཤེགས་པའི་བསོད་ནམས་སྒྲུབ་པའི་ལས་ཀྱི་འཁོར་ལོ་ཞེས་བྱའོ། །རིགས་ཀྱི་བུ་དེ་ལྟར་ན་ནི་སངས་རྒྱས་ཀྱི་འཁོར་ལོ་གཉིས་པ་འདི་དང་ལྡན་ཏེ། འཁོར་ལོ་དེའི་
དབང་གིས་བླ་ན་མེད་པའི་དུས་གསུམ་གྱི་ལས་ཀྱི་ཡེ་ཤེས་ཀྱིས་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་ལས་དང་། ཆོས་དང་། ཚོར་བ་དང་། རྒྱུ་དང་། འབྲས་བུ་ཡོངས་སུ་སྨིན་པ་མཁྱེན་ཏེ། ཅིས་འདུལ་བ་བཞིན་དུ་ལས་ཀྱི་འཁོར་ལོ་རྣམ་པ་གསུམ་རྣམ་པར་བཞག་ནས་སྣོད་དུ་གྱུར་པའི་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དང་། འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ནས་ཚངས་པ་ཆེན་པོའི་འཁོར་ལོ་བསྐོར་ཞིང་། ཚངས་པ་ཆེན་པོའི་སྤྱད་པ་ཡོངས་སུ་གྲུབ་པས་ཡང་དག་པ་ཇི་ལྟ་བ་བཞིན་དུ་སེམས་ཅན་གྱི་རྒྱུ་དང་འབྲས་བུ་ཀུན་མངོན་པར་མཁྱེན་ཏོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་ཐབས་མཁས་པའི་བློ་དང་ལྡན་པས་དགེ་སྦྱོང་དང་། བྲམ་ཟེ་དང་། རྒྱལ་རིགས་དང་། རྗེའུ་རིགས་དང་། དམངས་རིགས་ལ་སོགས་པ་ཡོན་ཏན་རྣམ་པ་སྣ་ཚོགས་དང་། མང་དུ་ཐོས་པ་དང་། དཔའ་བོ་དང་། བཟོ་བོ་དང་། རྩལ་ཆེ་བ་དང་། སེམས་ཅན་གང་ཕྱུག་ཅིང་ཡོན་ཏན་དང་ལྡན་པ། ཐབས་མཁས་པའི་བློ་དང་ལྡན་པ། དཔའ་ཞིང་རྟུལ་ཕོད་པ། བརྟན་པ། ཕྱིར་མི་ལྡོག་པ། བསོད་ནམས་རྣམ་པ་སྣ་ཚོགས་ཀྱིས་ཡོངས་སུ་བརྒྱན་པ་དེ་དག་ལ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་དེ་དག་ཅི་དང་ལྡན་པ་བཞིན་ཅི་འོས་ཅི་རིགས་སུ་རིན་པོ་ཆེ་དང་། ནོར་གྱི་དབྱིག་དང་། ཞིང་འབྲོག་དང་། ཁང་ཁྱིམ་དང་། བྲན་དང་། ལས་བྱེད་པའི་མི་ལ་སོགས་པ་ཅི་རིགས་སུ་སྦྱིན་པར་བྱེད་དོ། །ཡུལ་དེ་ན་གནས་པའི་མི་ཡོན་ཏན་དང་ཤེས་པ་ཞན་པ། ལས་བྱས་པ་ཆུང་བ་དག་ལ་ནི་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་དེ་དག་ལ་ཡང་ཅི་འོས་ཅི་རིགས་སུ་ཤས་ཀྱིས་སྦྱིན་པར་བྱེད་དོ། །ཡུལ་དེ་ན་གནས་པ་བསོད་ནམས་མེད་ཅིང་བརྩོན་འགྲུས་ཆུང་བ། ལེ་ལོ་ཆེ་བ། བག་མེད་པ། དྲན་པ་ཉམས་པ། སྙིང་རྗེའི་སེམས་མེད་པ། བྱས་པ་མི་གཟོ་བ། འཇིག་རྟེན་
ཕྱི་མའི་སྡུག་བསྔལ་ལ་འཇིགས་པར་མི་ལྟ་བ། ཁྱིམ་གྱི་འདམ་དུ་བྱིང་བ། སྡིག་པ་མང་པོ་བྱེད་པ་དེ་དག་ལ་ནི་རྒྱལ་པོ་ཆེན་པོས་ཅི་རིགས་ཅི་འོས་སུ་ཆད་པ་རྣམ་པ་སྣ་ཚོགས་ཀྱིས་གཅོད་དེ། ཁ་ཅིག་ལ་ནི་ཚིག་ན་བས་སྤྱོས་ཤིང་བརྒྱད་པ་དག་བྱེད་དོ། །ཁ་ཅིག་ལ་ནི་རིན་པོ་ཆེ་དང་ནོར་རྫས་ལ་སོགས་པ་འཕྲོག་གོ །ཁ་ཅིག་ལ་ནི་འཚོ་བའི་ཡོ་བྱད་དག་ཀྱང་འཕྲོག་གོ །ཁ་ཅིག་ལ་ནི་ལྕག་གིས་གཞུ་བ་དང་བཙོན་རར་བཅུག་གོ །ཁ་ཅིག་ལ་ནི་ཡན་ལག་དང་ཉིང་ལག་གཅོད་དོ། །ཁ་ཅིག་ལ་ནི་མགོ་དང་ལུས་ཀྱང་གཅོད་དེ་དེ་དག་ལ་སོགས་པ་ཆད་པ་རྣམ་པ་སྣ་ཚོགས་ཀྱིས་ཆད་པ་གཅོད་དོ། །རིགས་ཀྱི་བུ་དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་འཁོར་ལོ་གསུམ་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པས་ཕས་རྒོལ་བའི་དགྲ་ཐམས་ཅད་དང་། གྲོགས་པོ་ངན་པ་བཏུལ་ཅིང་ལུས་སྲུང་བའི་ནན་ཏན་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་དབང་པོ་ལ་ཤིན་ཏུ་མཁས་པའི་ཡེ་ཤེས་དང་ལྡན་པས་འཁོར་གང་བསོད་ནམས་དང་ཡེ་ཤེས་ཀྱི་ཚོགས་དང་། ཐབས་དང་ཤེས་རབ་ལས་རིང་དུ་གྱུར་པ། སྦྱིན་པ་དང་། དུལ་བ་དང་། ཞི་བ་ཡོངས་སུ་སྤངས་ཏེ་དྲན་པ་ཉམས་ནས་སེམས་འཁྲུགས་པར་གྱུར་པ་དག་ང་གང་ན་བ་དེར་འོངས་ཏེ་ང་ལ་སྐྱབས་སུ་འོངས་ནས་དེ་དག་གི་དབང་པོ་དང་། དད་པ་དང་། བག་ལ་ཉལ་བ་དང་། མོས་པ་ཤིན་ཏུ་མཁྱེན་པས་ཅི་དང་ཅིས་འདུལ་བ་བཞིན་དུ་ཆད་པས་གཅད་པའི་ཐབས་འདུལ་བ་ལ་སོགས་པའི་ཆོས་སྟོན་ཏོ། །སེམས་ཅན་གང་ང་རྒྱལ་གྱི་དབང་དུ་གྱུར་ཏེ། བསླབ་པ་མང་པོ་གཟུངས་སུ་མི་འཛིན་པ་དག་ལ་ནི་ངས་བསྟན་པའི་དམ་པའི་ཆོས་ཡུན་རིང་དུ་གནས་པར་བྱ་བའི་ཕྱིར་དངོས་པོ་འདི་དག་བྱེད་དུ་གཞུག་གོ །ལ་ལར་ནི་དྲན་པར་བྱ་བའི་དམ་བཅའ་བས་ཆད་པས་གཅོད་དོ། །ལ་ལར་ནི་ཚིག་ན་བས་བསྡིགས་པ་དང་། གཤེ་བ་དང་། སྤྱོ་བས་གཅོད་དོ། །ལ་ལར་ནི་སྐད་ཅིག་དགར་ཞིང་སྨ་དབབ་པས་གཅོད་དོ། །ལ་ལར་ནི་ཕྱག་འཚལ་བ་དང་། མི་སྨྲ་བ་
དང་། རྙེད་པ་ལྷན་ཅིག་ཏུ་མི་སྤྱོད་པས་གཅོད་དོ། །ལ་ལར་ནི་རྩ་དགྲམ་པ་ལྟ་བུ་དང་། ལ་ལར་ནི་བསྐྲད་པ་ལ་སོགས་པའི་ཆད་པས་བཅད་པ་སྟེ། དེ་ལྟར་གང་ཟག་དེ་དག་གི་དབང་པོ་དང་། དད་པ་དང་། བག་ལ་ཉལ་བ་དང་། མོས་པ་ཀུན་མཁྱེན་པས་ཅི་རིགས་ཅི་འོས་སུ་ཆད་པས་གཅོད་དོ། །དེ་ཡང་དོན་མེད་པའི་མུན་པའི་ཚོགས་བསགས་པ་གཞོམ་པ་དང་། ཉོན་མོངས་པའི་ཆུ་བོ་བསྐམ་པ་དང་། མཐོ་རིས་ཀྱི་ལྷར་སྐྱེ་བ་ནས་མྱ་ངན་ལས་འདའ་བའི་བདེ་བ་ཐོབ་པའི་ཕྱིར་མི་དགེ་བ་སྤྱོད་པའི་གང་ཟག་འདུལ་བའི་ཕྱིར་ཅི་དང་ཅི་རིགས་སུ་ཆད་པས་གཅད་པའི་ཆོས་བསྟན་ཏོ། །མདོ་སྡེ་མང་པོ་ལས་ཀྱང་མི་དགེ་བ་སྤྱོད་པ་ཆད་པས་གཅད་པའི་ཆོས་ཅི་དང་ཅི་རིགས་པ་དེ་དང་དེའི་ཆོས་རྒྱ་ཆེར་བཤད་དོ། །ངས་མཆོག་དམ་པའི་ཡེ་ཤེས་ཀྱིས་སེམས་ཅན་གང་ལྷག་པའི་བསམ་པ་དང་། དད་པ་དང་། མོས་པ་ཡོངས་སུ་དག་པ་དང་ལྡན་པ་ཡང་ཤིན་ཏུ་མཁྱེན་པས་ཅི་དང་ཅིས་འདུལ་བ་བཞིན་དུ་དགེ་བའི་ཕྱོགས་ཀྱི་ཁྱད་པར་རྣམ་པ་སྣ་ཚོགས་བསྟན་ཏེ། བསླབ་ཅིང་གོམས་སུ་བཅུག་པ་ནས་དགེ་བའི་རྩ་བ་ཐམས་ཅད་ཀྱི་བར་དུ་ཡོངས་སུ་རྫོགས་ཤིང་འཇིགས་པ་མེད་པའི་གྲོང་ཁྱེར་ཆེན་པོར་བཙུད་དོ། །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་གསུམ་པོ་འདི་དང་ལྡན་ཏེ་འཁོར་ལོ་འདིའི་དབང་གིས་སེམས་ཅན་ཐམས་ཅད་ཀྱི་དབང་པོ་རྣམ་པ་སྣ་ཚོགས་དང་། དད་པ་དང་། བག་ལ་ཉལ་བ་དང་། མོས་པ་དང་། བསམ་པ་དང་། ལས་དང་། མྱོང་བའི་ཆོས་ཀུན་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་དམ་བཅའ་ཞིང་སངས་རྒྱས་ཀྱི་འཁོར་ལོ་རབ་ཏུ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བདག་གི་ཡུལ་ན་གང་ཟག་ཇི་སྙེད་ཅིག་འཇིག་རྟེན་གྱི་ལྷ་དང་མུ་སྟེགས་ཅན་རྣམ་པ་སྣ་ཚོགས་
ལ་སྐྱབས་སུ་སོང་ཞིང་ལོག་པ་ལ་དད་པ་དང་། ལོག་པར་ལྟ་བ་དང་། ལོག་པ་ལ་སློབ་པ་དང་། ལོག་པའི་བརྟུལ་ཞུགས་ལ་མངོན་པར་ཞེན་ཏེ། ལོག་པའི་ལྟས་བཟང་ངན་ལ་ཆགས་ནས་དོན་མེད་པའི་སྡུག་བསྔལ་རྣམ་པ་སྣ་ཚོགས་ཀྱིས་སྡུག་བསྔལ་བར་གྱུར་པ་དག་རྒྱལ་པོ་ཆེན་པོ་དེས་ཤེས་ནས་རྟག་ཏུ་ཡང་དང་ཡང་བསྡུས་ཏེ། རྒྱལ་པོ་སྔ་མའི་དམ་པའི་ཆོས་ལུགས་ཀྱིས་རྒྱས་པར་བསྟན་ནས་ལོག་པར་ལྟ་བ་དང་། ལོག་པར་དད་པ་སྤོངས་ལ། རྒྱལ་པོ་སྔ་མའི་ཆོས་ལུགས་བསླབ་པ་ལ་ནན་ཏན་དུ་སྤྱོད་ཅིག་པར་བཀས་བཏགས་ཏེ། ཡུལ་དེ་ན་གནས་པའི་སེམས་ཅན་ཐམས་ཅད་འཇུག་པ་གཅིག །ཕྱོགས་པ་གཅིག །བསམ་པ་གཅིག །འདོད་པ་གཅིག་པར་ཐམས་ཅད་འཐུན་པར་རྒྱལ་པོ་སྔ་མའི་དམ་པའི་ཆོས་བཞིན་དུ་གནས་པ་དང་། བཀའ་བཞིན་དུ་ཉན་ཅིང་རྗེས་སུ་སྤྱོད་པས་དེ་ན་གནས་པ་ཐམས་ཅད་འཐུན་པར་གང་བྱ་བར་རིགས་པ་རྣམས་བྱེད་དོ། །རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཡང་རྟག་ཏུ་བློན་པོ་རྣམས་དང་འདུས་ནས་སྟོན་མོ་བྱེད་ཅིང་ལོངས་སྤྱོད་དེ། དགའ་བས་རོལ་ཅིང་གཤེགས་པས་གྲོས་འཐུན་པས་རྒྱལ་པོའི་ལས་བྱེད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་རྒྱལ་པོའི་འཁོར་ལོ་བཞི་པོ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་ཐམས་ཅད་དང་། གྲོགས་པོ་ངན་པ་བཏུལ་ཞིང་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་ཤིན་ཏུ་ཐབས་མཁས་པའི་མོས་པ་མཁྱེན་པའི་ཡེ་ཤེས་དང་ལྡན་པས་འཇིག་རྟེན་ན་ལོག་པ་ལ་ཕྱོགས་པ་རྣམ་པ་སྣ་ཚོགས་དང་། ལོག་པར་ལྟ་བ་དང་། ལོག་པའི་བསམ་པ་དང་། ལོག་པའི་ཆོས་ལ་མོས་པ་དང་། ལོག་པའི་ལས་སྤྱོད་པ་དེའི་རྒྱུ་དེའི་རྐྱེན་གྱིས་སྡུག་བསྔལ་ཚད་མེད་པ་མྱོང་བར་དེ་བཞིན་གཤེགས་པས་མཁྱེན་ཅིང་གཟིགས་ནས་རྟག་ཏུ་ཡང་དང་ཡང་འཁོར་མང་པོ་བསྡུས་ཏེ་སྔ་མ་འདས་པའི་སངས་རྒྱས་བཅོམ་ལྡན་འདས་ཀྱི་
དཀོན་མཆོག་གསུམ་གྱི་གདུང་བསབ་པའི་རྒྱུ་དང་། འབྲས་བུ་དང་། ཕ་རོལ་ཏུ་ཕྱིན་པ་དྲུག་དང་། རྣལ་འབྱོར་པའི་རྒྱུ་དང་། སྡོམ་པ་གསུམ་ལ་སོགས་པའི་རྒྱུ་དང་འབྲས་བུའི་ཆོས་རྒྱས་པར་ཕྱེ་སྟེ་མངོན་པར་བསྟན་ནས་འཁོར་མང་པོ་རྣམས་རྣམ་པར་གྲོལ་བར་བྱེད་དོ། །ཕྱིན་ཅི་ལོག་ཏུ་ལྟ་བ་རྣམས་ཡང་དག་པའི་ལྟ་བ་དང་། དགེ་བ་བཅུའི་ཡང་དག་པའི་ལས་ཀྱི་ལམ་ལ་རྣམ་པར་འཇུག་གོ །སེམས་ཅན་རྣམས་ནི་རྟག་ཏུ་འཐུན་པར་ཆོས་ལ་འཇུག །ཆོས་ལ་སྤྱོད་པར་ཐབས་ཀྱིས་དྲང་ཞིང་སྒོམ་དུ་འཛུད་པས་རྒྱུ་དང་འབྲས་བུ་རྒྱུན་མི་འཆད་པར་བྱེད་དོ། །སེམས་ཅན་རྣམས་འཁོར་རྣམ་བཞི་དང་འཐུན་པར་དགེ་བ་སྤྱོད་པའི་ཁྱད་པར་ལ་ནན་ཏན་བྱེད་དུ་བཅུག་ནས་དྲན་པ་ཉེ་བར་གཞག་པ་བཞི་དང་། ཏིང་ངེ་འཛིན་དང་། རྣམ་པར་གྲོལ་བའི་ཡེ་ཤེས་སྟོན་པ་དང་། ལམ་གྱི་ཡན་ལག་ལ་སྤྲོ་བཞིན་དུ་རྩེའོ། །འཕགས་པའི་བསྟན་པ་ཡུན་དུ་གནས་པར་བྱ་བ་དང་། དཀོན་མཆོག་གསུམ་གྱི་གདུང་རྒྱུན་མི་འཆད་པར་བྱ་བའི་ཕྱིར་ཡང་དག་པར་སྤོང་བ་བཞི་དང་། རྫུ་འཕྲུལ་གྱི་རྐང་པ་བཞི་དང་། དབང་པོ་ལྔ་དང་། སྟོབས་ལྔ་དང་། བྱང་ཆུབ་ཀྱི་ཡན་ལག་བདུན་དང་། འཕགས་པའི་ལམ་ཡན་ལག་བརྒྱད་པ་དང་། དེ་མ་ཡིན་པ་ཏིང་ངེ་འཛིན་དང་། རྣམ་པར་གྲོལ་བའི་ཡེ་ཤེས་སྟོན་པ་དང་། བྱང་ཆུབ་ཀྱི་ཕྱོགས་ཀྱི་ཁྱད་པར་རྣམ་པ་སྣ་ཚོགས་ལ་ཅི་དགར་རྩེར་བཅུག་གོ །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་བཞི་པ་འདི་དང་ལྡན་ཏེ། འཁོར་ལོ་དེའི་དབང་གིས་སོ་སོའི་སྐྱེ་བོ་ཅི་དང་ཅི་ལ་མོས་པ་དང་། ཅི་ལ་ཕྱོགས་པ་དང་། ཅི་ལ་དགའ་བ་ཀུན་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་ནང་དུ་སེང་གེའི་སྒྲ་བསྒྲགས་སོ་ཞེས་གསུངས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་
བདག་གི་ཡུལ་ན་གནས་པའམ། ཕ་རོལ་པོ་གཞན་གྱི་ཡུལ་ན་གནས་པའི་སེམས་ཅན་ཚད་མེད་པ་སྙེད་པ་དག་གི་ནོར་དང་གཟུགས་ལ་ཆགས་ཤིང་སྐྱོ་མི་ཤེས་པ་དང་། ཕ་རོལ་པོ་གཞན་གྱི་ནོར་དང་གཟུགས་ལ་ཆགས་ཤིང་འདོད་པས་དེ་བསྲུང་བའི་ཕྱིར་གྲོང་དང་། གྲོང་ཁྱེར་དང་། གྲོང་འདབ་དང་། རྒྱལ་པོའི་ཕོ་བྲང་ཡང་འཁོར་དང་ར་བས་བསྐོར་བ་ནས་བྱ་ཤ་ལ་དང་། ནེ་ཙོའི་བར་དུ་སྲུང་དུ་འཛུད་དེ་སྟོར་ཅིང་གོད་པར་མི་བྱེད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་འདི་ལྟར་རྒྱལ་པོའི་འཁོར་ལོ་ལྔ་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་ཐམས་ཅད་དང་། གྲོགས་པོ་ངན་པ་བཏུལ་ཅིང་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་བཞིན་དུ་དེ་བཞིན་གཤེགས་པ་ཡང་རང་བཞིན་ལ་ཤིན་ཏུ་ཐབས་མཁས་པས་མཁྱེན་པའི་ཡེ་ཤེས་དང་ལྡན་པས་བདུད་སྡིག་ཅན་མ་རུངས་པ་དང་། མུ་སྟེགས་ཅན་དགུ་བཅུ་རྩ་ལྔ་པོ་དང་། དེ་མ་ཡིན་པ་གཞན་ཡང་བདུད་ཀྱི་རིས་དང་། མུ་སྟེགས་ཅན་ཚད་མེད་པ་སྙེད་ཀྱིས་བསླུས་པ་ཀུན་མཁྱེན་ཏེ། སེམས་ཅན་གང་བདག་གི་ནོར་དང་གཟུགས་ལ་མངོན་པར་ཆགས་པ་དང་། ཕ་རོལ་པོ་གཞན་གྱི་ནོར་དང་གཟུགས་ལ་ཡང་ཆགས་ཤིང་འདོད་པས་ཚོལ་ལོ། །ང་དང་ངའི་འཁོར་རྣམས་ལ་ཕྲག་དོག་བསྐྱེད་དེ་ང་གསད་པའི་ཕྱིར་བསོད་སྙོམས་ཀྱི་ནང་དུ་དུག་བཅུག་པ་དང་། མེ་དོང་གི་སྟེང་དུ་གདན་བཏིང་བ་དང་། སྟེང་ནས་དབབ་བཏང་བ་དང་། བལ་གླང་སྨྱོས་པ་སྦད་པ་དང་། རལ་གྲི་ཕྱུང་སྟེ་སྙེགས་པ་དང་། ས་དང་མི་གཙང་བ་འཐོར་བ་དང་། མི་ཚངས་པར་སྤྱོད་དོ་ཞེས་སྐུར་པ་དང་། མ་ནིང་ཡིན་ནོ་ཞེས་བཏགས་པ་དང་། མི་མ་ཡིན་པའོ་ཞེས་བརྗོད་པ་དང་། སྒྱུ་མའོ་ཞེས་ཚིག་ངན་པ་རྣམ་པ་སྣ་ཚོགས་ཀྱིས་ཀྱང་ང་ལ་སྨོད་ཅིང་སྐུར་ཏོ། །ངའི་ཉན་ཐོས་ཀྱི་སློབ་མ་ལ་ཡང་ཕྲག་དོག་བསྐྱེད་དེ་དེའི་རྒྱུ་དེའི་རྐྱེན་གྱིས་སྐུར་ཅིང་སྨོད་པ་རྣམ་པ་མང་པོ་བྱེད་པར་མཁྱེན་ནས། དེ་བཞིན་གཤེགས་པ་དབང་པོ་དྲུག་བསྲུང་བ་ལ་མཁས་པ་དང་། ཚངས་པའི་གནས་བཞི་ལ་གནས་པ་དང་། སོ་སོ་
ཡང་དག་པར་རིག་པ་བཞི་དང་ལྡན་པར་གྱུར་པ་དང་། ཉན་ཐོས་རྣམས་ལ་ཡང་ཆོས་ཀྱི་མདོ་རྣམ་པར་ཐར་པའི་སྒོ་གསུམ་ཡོངས་སུ་དག་པ་རྣམ་པར་གཞག་པ་བསྟན་ཏོ། །ངས་ད་ལྟར་འཇིག་རྟེན་དང་། འཇིག་རྟེན་ལས་འདས་པའི་རང་བཞིན་ཀུན་ཡང་དག་པ་ཇི་ལྟ་བ་བཞིན་དུ་མཁྱེན་ཏོ། །དེ་ལྟར་སེམས་ཅན་གྱི་རང་བཞིན་ཐ་དད་པ་རྣམ་པ་སྣ་ཚོགས་ཀུན་མཁྱེན་ནས། དེ་དག་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་མཛད་དོ། །རིགས་ཀྱི་བུ་ངས་དེ་ལྟར་སངས་རྒྱས་ཀྱི་འཁོར་ལོ་ལྔ་པ་འདི་དང་ལྡན་ཏེ། འཁོར་ལོ་དེའི་དབང་གིས་འཇིག་རྟེན་པ་དང་འཇིག་རྟེན་ལས་འདས་པའི་རང་བཞིན་མཁྱེན་པའི་ཡེ་ཤེས་ཀྱིས་སེམས་ཅན་གྱི་རང་བཞིན་ཚད་མེད་པ་རྣམ་པ་སྣ་ཚོགས་ཀུན་སོ་སོར་མཁྱེན་པས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཤིང་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ། འཁོར་མང་པོའི་དཀྱིལ་འཁོར་དུ་སེང་གེའི་སྒྲ་རབ་ཏུ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཇི་ལྟར་གྲོང་ཁྱེར་དང་། གྲོང་རྡལ་དང་། གྲོང་འདབ་དང་། རྒྱལ་པོའི་ཕོ་བྲང་བརྟན་པར་བསྲུང་བའི་ཕྱིར་འོབས་ཀྱིས་བསྐོར་བ་ནས་གཞུང་དེ་བཞིན་དུ་རྒྱས་པར་ཤ་རི་དང་ནེ་ཙོའི་བར་དུ་སྲུང་མ་བཙུད་དོ། །ཕོ་བྲང་ན་འཁོར་དང་། བཙུན་མོ་དང་བུ་མོར་བཅས་པས་ཡོངས་སུ་བསྐོར་ཅིང་འདོད་པ་ལྔ་ལ་རྩེ་ཞིང་ལོངས་སྤྱོད་རྣམ་པ་སྣ་ཚོགས་ལ་བག་མེད་པར་དབང་པོ་དྲུག་ཉམ་རངས་སུ་སྤྱོད་དོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་དེ་ལྟར་རྒྱལ་པོའི་འཁོར་ལོ་དྲུག་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་དང་། གྲོགས་པོ་ངན་པ་ཐམས་ཅད་བཏུལ་ཏེ་ལུས་སྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་
གཤེགས་པ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ཉན་ཐོས་ཆེན་པོ་རྣམས་ཀྱང་ཐམས་ཅད་འཕགས་པས་བསྟན་པའི་གྲོང་ཁྱེར་བརྟན་པར་བཙུད་ནས། དེའི་འོག་ཏུ་བསམ་གཏན་མཆོག་དམ་པ་ལ་སྙོམས་པར་འཇུག་པ་ནས་བསམ་གཏན་བཞིའི་བར་དུ་སྙོམས་པར་འཇུག་པ་དང་། ནམ་མཁའ་མཐའ་ཡས་སྐྱེ་མཆེད་ཀྱི་ཏིང་ངེ་འཛིན་ལ་སྙོམས་པར་འཇུག་པ་ནས། དེ་བཞིན་དུ་རྒྱས་པར་འདུ་ཤེས་མེད་འདུ་ཤེས་མེད་མིན་གྱི་སྐྱེ་མཆེད་ཀྱི་ཏིང་ངེ་འཛིན་གྱི་བར་དུ་སྙོམས་པར་འཇུག་པ་དང་། དེ་བཞིན་དུ་སངས་རྒྱས་ཐམས་ཅད་ཀྱི་སྤྱོད་ཡུལ་གྱི་ཏིང་ངེ་འཛིན་གྱི་བར་དུ་སྙོམས་པར་འཇུག་པར་འགྱུར་རོ། །ཏིང་ངེ་འཛིན་དེ་དག་ཏུ་ཞུགས་ནས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་དང་། འབྱུང་པོ་དང་། ཤ་ཟ་དང་། སྲུལ་པོ་དང་། ལུས་སྲུལ་པོ་ལ་སོགས་པ་སེམས་ཅན་ལ་གནོད་ཅིང་འཚེ་བ། བྱམས་པ་དང་། སྙིང་རྗེའི་སེམས་མེད་པ། འཇིག་རྟེན་ཕྱི་མའི་སྡུག་བསྔལ་གྱིས་མི་འཇིགས་པ་ཚད་མེད་པ་བྱེ་བ་བརྒྱ་སྟོང་སྙེད་ངས་སངས་རྒྱས་ཐམས་ཅད་ཀྱི་སྤྱོད་ཡུལ་གྱི་ཏིང་ངེ་འཛིན་དུ་ཞུགས་པ་མཐོང་ནས་ཐམས་ཅད་ང་ལ་ཤིན་ཏུ་དགའ་བའི་སེམས་བསྐྱེད་དེ། བསམ་པ་ཡོངས་སུ་དག་པས་དཀོན་མཆོག་གསུམ་ལ་མཆོག་དམ་པའི་དགའ་བ་དང་དང་བ་བསྐྱེད་ནས་བསྟི་སྟང་དང་བཅས། བཀུར་སྟི་དང་བཅས་ཏེ། ངོ་མཚར་རྨད་དུ་གྱུར་ནས་ཉེས་པ་ཐམས་ཅད་སོ་སོར་བཤགས་ཏེ་ཡོངས་སུ་གཅད་པར་དམ་བཅའོ། །དེའི་རྒྱུ་དེའི་རྐྱེན་གྱིས་སྐད་ཅིག་ཡུད་ཙམ་གྱིས་ཚད་མེད་དཔག་ཏུ་མེད་པའི་ཉོན་མོངས་པའི་སྒྲིབ་པ་དང་། ལས་ཀྱི་སྒྲིབ་པ་དང་། ཆོས་ཀྱི་སྒྲིབ་པ་ཀུན་བྱང་བར་འགྱུར་ཏེ། ཚད་མེད་དཔག་ཏུ་མེད་པའི་བསོད་ནམས་ཀྱི་ཚོགས་དང་། ཡེ་ཤེས་ཀྱི་ཚོགས་ཀུན་ཡོངས་སུ་རྫོགས་པར་གྱུར་ནས། འཁོར་བ་ལ་རྒྱབ་ཀྱིས་བལྟས་ཤིང་མྱ་ངན་ལས་འདའ་བ་ལ་ཕྱོགས་ནས། དེ་བཞིན་གཤེགས་པ་བླ་ན་མེད་པ་ཡང་དག་པའི་ཆོས་སྲུང་ཞིང་འཛིན་ཏོ། །རིགས་ཀྱི་བུ་ང་ཡང་དེ་ལྟར་སངས་རྒྱས་ཀྱི་འཁོར་ལོ་དྲུག་པ་འདི་དང་ལྡན་ཏེ། འཁོར་ལོ་དེའི་
དབང་གིས་དེ་བཞིན་གཤེགས་པ་བསམ་གཏན་དང་། ཏིང་ངེ་འཛིན་དང་། རྣམ་པར་གྲོལ་བ་དང་། སྙོམས་པར་འཇུག་པ་དང་། མཉམ་པར་བཞག་པ་ཚད་མེད་པ་བརྒྱ་སྟོང་སྙེད་ལ་རྣམ་པར་དག་པའི་ཡེ་ཤེས་ཀྱིས་འཇུག་ཅིང་། སེམས་ཅན་གྱི་ཉོན་མོངས་པ་ཚད་མེད་པ་སྙེད་བསལ་ནས་ཅི་དང་ཅིས་འདུལ་བ་བཞིན་དུ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་འགོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་དམ་བཅའ་ཞིང་སངས་རྒྱས་ཀྱི་འཁོར་ལོ་བསྐོར་ནས། ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ་འཁོར་མང་པོའི་དཀྱིལ་འཁོར་དུ་སེང་གེའི་སྒྲ་བསྒྲགས་སོ་ཞེས་གསུང་ངོ་། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བློན་པོ་དང་། དམག་རྣམ་བཞི་དང་བཅས་ཏེ་བདག་གི་རིས་སུ་དབང་བའི་གྲོང་ཁྱེར་དང་། གྲོང་རྡལ་དང་། གྲོང་འདབ་དང་། རི་དང་། ལྗོངས་དང་། ལུང་པ་དང་། ལུང་ཕྲན་དང་། སྐྱེད་མོས་ཚལ་དང་། ཞིང་དང་། འབྲོག་དང་། འབབ་ཆུ་དང་། རྫིང་དང་། མཚེའུ་དང་། ཆུ་མིག་དང་། འབྲོག་དགོན་པ་དང་། ནགས་ཚལ་ལ་སོགས་པར་ཀུན་དུ་བྱུལ་ཞིང་བརྟགས་ནས། ཡུལ་དེ་ཕྱོགས་ཀྱི་འཇིགས་པ་དང་ཐེ་ཙོམ་དུ་བཅས་པའི་གནས་སམ། གཡང་ཟ་བ་བསྡུར་མི་རུང་བའི་གནས་སམ། ཕ་རོལ་གྱི་དགྲ་འཁྲས་ཤིང་འཚེ་བའི་གནས་རྣམས་སུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོས་རང་གི་ཉམས་ཀྱིས་དཔགས་ཤིང་རྣམ་པ་ཐམས་ཅད་དུ་སྦྱངས་ཏེ། བདེ་བར་འཇོག་པ་ལ་སྦྱོར་བ་དང་། ལེགས་པར་བསྲུང་ཞིང་བརྟན་པར་བྱས་པས་གནས་པའི་ཕྱོགས་དེ་དག་མཉམ་པ་ལས་བྱར་རུང་བ་ཕས་ཀྱི་དགྲ་དང་། གྲོགས་པོ་ངན་པ་གླགས་ལྟ་ཞིང་འཁྲས་པའི་གནས་མེད་པར་བྱས་ཏེ། འཇིགས་པ་དང་བག་ཚ་བ་བསལ་བའི་ཕྱིར་ཡུལ་དེ་ན་གནས་པའི་སེམས་ཅན་ཐམས་ཅད་མི་བདེ་བའི་སྡུག་བསྔལ་དང་བྲལ་ཞིང་རབ་ཏུ་བདེ་ཞིང་སྐྱིད་པར་སྐྱབས་སོ། །རིགས་ཀྱི་བུ་དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་རྒྱལ་པོའི་
འཁོར་ལོ་བདུན་པ་དེ་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་དང་། གྲོགས་པོ་ངན་པ་ཐམས་ཅད་བཏུལ་ཞིང་ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་སངས་རྒྱས་ཀྱི་སྤྱན་གྱིས་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་འདོད་ཆགས་དང་། ཞེ་སྡང་དང་། གཏི་མུག་གི་བསམ་པ་གང་དང་ལྡན་པ་རབ་ཏུ་མཁྱེན་ཏོ། །ཡང་དག་པ་ཇི་ལྟ་བ་བཞིན་དུ་ཉོན་མོངས་པ་རྣམ་པ་སྣ་ཚོགས་ཀྱི་ནད་མི་འཐུན་པ་ཡང་རབ་ཏུ་མཁྱེན་ཏོ། །དེ་བཞིན་གཤེགས་པས་དེ་ལྟར་མཁྱེན་པས་ཤིན་ཏུ་འབད་པའི་བརྩོན་འགྲུས་ཚད་མེད་པ་དང་། ཐབས་མཁས་པའི་ཤུགས་ཀྱིས་ཅི་དང་ཅིས་འདུལ་བ་བཞིན་དུ་ཏིང་ངེ་འཛིན་རྣམ་པ་སྣ་ཚོགས་སྒྲུབ་པའི་སྨན་དམ་པ་བྱིན་པས་སེམས་ཅན་དག་ཉོན་མོངས་པའི་ནད་བསལ་བ་ལ་ནན་ཏན་དང་བརྩོན་འགྲུས་བྱེད་དུ་བཅུག་གོ །སེམས་ཅན་གང་མི་གཙང་བ་ལ་རྟོག་པའི་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་མི་གཙང་བ་ལ་རྟོག་པའི་སྨན་སྒོམ་དུ་བཅུག་གོ །སེམས་ཅན་གང་ཚངས་པའི་གནས་ལ་ནན་ཏན་བྱས་པས་ཉོན་མོངས་པའི་ནད་ཞི་བར་འོས་པ་ཞིག་ན་ཚངས་པའི་གནས་ཀྱི་སྨན་སྒོམ་དུ་བཅུག་གོ །སེམས་ཅན་གང་རྟེན་ཅིང་འབྲེལ་ཏེ་འབྱུང་བ་བསྒོམས་པས་ཉོན་མོངས་པའི་ནད་སེལ་བར་འོས་པ་ཞིག་ན། དེ་ལ་རྟེན་ཅིང་འབྲེལ་ཏེ་བྱུང་བའི་སྨན་སྒོམ་དུ་བཅུག་གོ །སེམས་ཅན་གང་དབུགས་འགྲང་བ་ཡིད་ལ་བྱས་པས་ནད་ཞི་བར་འོས་པ་ཞིག་ན། དེ་ལ་དབུགས་འགྲང་བ་ཡིད་ལ་བྱ་བའི་སྨན་སྒོམ་དུ་བཅུག་གོ །སེམས་ཅན་གང་རྣམ་པར་ཐར་པའི་སྒོ་གསུམ་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་རྣམ་པར་ཐར་པའི་སྒོ་གསུམ་གྱི་སྨན་སྒོམ་དུ་བཅུག་གོ །སེམས་ཅན་གང་བསམ་གཏན་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་བསམ་གཏན་གྱི་སྨན་སྒོམ་དུ་བཅུག་གོ །སེམས་ཅན་གང་གཟུགས་མེད་པའི་བསམ་གཏན་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་གཟུགས་མེད་པའི་བསམ་གཏན་སྒོམ་
དུ་བཅུག་གོ །སེམས་ཅན་གང་དཔའ་བར་འགྲོ་བའི་ཏིང་ངེ་འཛིན་གྱི་བར་བསྒོམས་པས་ཉོན་མོངས་པའི་ནད་ཞི་བར་འོས་པ་ཞིག་ན། དེ་ལ་དཔའ་བར་འགྲོ་བའི་ཏིང་ངེ་འཛིན་གྱི་སྨན་སྒོམ་དུ་བཅུག་གོ །དེ་བས་ན་དེ་བཞིན་གཤེགས་པས་སེམས་ཅན་དག་ལ་དེ་ལྟ་བུའི་ཆོས་ཀྱི་སྨན་གྱི་སྦྱིན་པ་མཛད་དོ། །སྣོད་དུ་གྱུར་པའི་སེམས་ཅན་ཐམས་ཅད་བདུད་རྣམ་བཞིའི་དབང་དུ་འགྱུར་བར་མི་མཛད་དོ། །སྣོད་དུ་གྱུར་པའི་སེམས་ཅན་ཐམས་ཅད་ལྷ་དང་མིའི་ཐེག་པ་ལ་རྒྱབ་ཀྱིས་ཕྱོགས་ཤིང་ངན་སོང་དུ་གཞོལ་བར་མི་མཛད་དོ། །དེ་བཞིན་གཤེགས་པ་བླ་ན་མེད་པའི་ཆོས་ཀྱི་སྨན་དང་། དཀོན་མཆོག་གསུམ་གྱི་གདུང་མྱུར་དུ་མེད་པར་འགྱུར་བར་མི་མཛད་དེ། དེ་ལྟར་ན་དེ་བཞིན་གཤེགས་པས་སེམས་ཅན་རྣམས་ལ་དེ་ལྟ་བུའི་ཆོས་ཀྱི་སྨན་གྱི་སྦྱིན་པ་མཛད་དོ། །རིགས་ཀྱི་བུ་དེ་བཞིན་གཤེགས་པ་དེ་ལྟ་བུའི་སངས་རྒྱས་ཀྱི་འཁོར་ལོ་བདུན་པ་དང་ལྡན་ཏེ། འཁོར་ལོ་དེའི་དབང་གིས་བླ་ན་མེད་པ་ཀུན་དུ་འགྲོ་བའི་ཡེ་ཤེས་ཀྱི་སྤྱོད་པས་སེམས་ཅན་ཐམས་ཅད་ལ་ཆོས་ཀྱི་སྨན་རྣམ་པ་སྣ་ཚོགས་བྱིན་པ་དེ་སྒོམ་དུ་བཙུད་ན་ཉོན་མོངས་པའི་ནད་ཀུན་ཞི་ཞིང་འཇིགས་པ་མེད་པ་ལ་བདེ་བར་གནས་པར་འགྱུར་རོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏེ། འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་བདག་དང་གཞན་གྱི་རིགས་དང་། ཐོག་མ་བཙས་པ་དང་། གཞོན་ནུའི་ཚེ་རྩེ་བ་ལ་སོགས་པ་ཐམས་ཅད་ལ་དྲན་པ་མངོན་པར་བཞག་ཞེས་སེམས་སོ། །འདི་ལྟ་སྟེ། གནས་གང་དུ་ཐོག་མ་བཙས་པ་དང་། ཁྲུས་བྱས་པ་དང་། པང་དུ་བླངས་ཤིང་ནུ་ཞོ་བསྣུན་པ་དང་ལུས་དང་ཡན་ལག་གི་ཚོགས་མཉེས་པ་དང་། དགའ་བཞིན་དུ་རྩེ་བ་དང་། ས་དང་བྱེ་མ་ལ་རྩེ་བ་དང་། འཁོར་དང་བཅས་ཏེ་བག་མེད་པ་རྣམ་པ་མང་པོས་རྩེ་བ་དང་། རྩལ་སྦྱོང་བ་དང་། དེ་མ་ཡིན་པའི་ལས་རྣམ་པ་གཞན་བྱེད་པ་དང་། རྒྱལ་པོ་གཞན་གྱི་ཡུལ་དུ་རྒྱུ་ཞིང་འགྲོ་བ་
དང་། རྒྱལ་པོའི་བྱ་བ་སྒྲུབ་པ་དང་། རྒྱལ་པོའི་ལས་བྱེད་པ་དང་། རྒྱལ་ཚབ་བྱེད་པ་དང་། རྒྱལ་ཐབས་ཐོབ་ནས་དབང་དུ་གྱུར་ཏེ། བདེ་བའི་ལོངས་སྤྱོད་ཆེན་པོ་མྱོང་བ་དང་། གྲགས་པ་ཆེན་པོས་ཕྱོགས་ཀུན་དུ་གྲགས་པ་དང་། དངོས་པོ་དེ་དག་ལ་སོགས་པ་བསམས་ཏེ་དྲན་ནས། རྒྱལ་པོ་སྔ་མའི་ཆོས་ལུགས་ཡང་དག་པ་རྣམ་པར་བཞག་ནས་དེ་ན་གནས་པའི་སེམས་ཅན་ཐམས་ཅད་ལ་འཚོ་སྐྱོང་སྟེ། བདག་གི་སྲིད་འཛིན་ཅིང་ཕ་རོལ་མི་འཚེའོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་རྒྱལ་པོའི་འཁོར་ལོ་བརྒྱད་པ་འདི་དང་ལྡན་ཏེ། འཁོར་ལོ་དེའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་དང་གྲོགས་པོ་ངན་པ་ཐམས་ཅད་བཏུལ་ཏེ། ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་འཁོར་གྱི་དཀྱིལ་འཁོར་ན་བཞུགས་པའི་ཚེ་བདག་དང་ཕ་རོལ་པོ་གཞན་གྱི་སྔོན་གྱི་སྐྱེ་བ་ཚད་མེད་པ་སྙེད་ན་ཅི་བྱས་པའི་དངོས་པོ་ཀུན་དགོངས་སོ། །འདི་ལྟ་སྟེ། སྐྱེ་བ་གཅིག་དང་། སྐྱེ་བ་གཉིས་དང་། སྐྱེ་བ་གསུམ་ནས་སྐྱེ་བ་ཚད་མེད་པ་བརྒྱ་སྟོང་གི་བར་གྱི་ཅི་བྱས་པའི་དངོས་པོ་ཀུན་དགོངས་སོ། །དེ་བཞིན་དུ་བསྐལ་པ་འགྲུབ་པ་དགོངས་པ་ནས་བསྐལ་པ་འཇིག་པ་ཡང་དགོངས་སོ། །བསྐལ་པ་ཚད་མེད་པ་འགྲུབ་པ་དང་། བསྐལ་པ་ཚད་མེད་པ་འཇིག་པའི་བར་དུ་ཐམས་ཅད་དགོངས་ཏེ། འདི་ནི་སྔོན་འདས་པའི་དུས་ན་ཆེ་གེ་མོ་ཞིག་ན་འདུག་འདུག་སྟེ་རིགས་ནི་འདི་ཞེས་བྱའོ། །མིང་ནི་འདི་ཞེས་བྱའོ། །རུས་ནི་འདི་ཞེས་བྱའོ། །ཁ་ཟས་ནི་འདི་ཟ་ཟའོ། །བདེ་བ་དང་སྡུག་བསྔལ་ཡང་འདི་དག་མྱོང་ངོ་། །ཚེ་ནི་འདི་སྙེད་ཅིག་གོ །འདི་སྙེད་ཀྱི་བར་དུ་འདུག་འདུག་གོ །ཚེའི་མཐར་ཐུག་པ་ན་ཆེ་གེ་མོ་ཞིག་ཏུ་ཚེ་འཕོས་ནས་འདི་དག་ཏུ་སྐྱེས་སོ། །འདི་དག་ཏུ་ཚེ་འཕོས་ནས་ཆེ་གེ་མོ་ཞིག་ཏུ་སྐྱེས་པ་ལ་སོགས་པ་དངོས་པོ་ཚད་མེད་དཔག་ཏུ་མེད་པ་ཀུན་དགོངས་པས་སེམས་ཅན་གྱི་དབང་པོ་སོ་སོ་ཇི་ལྟ་བ་བཞིན་དུ་དམ་པའི་ཆོས་སྟོན་ཏེ། ཕན་པ་དང་
བདེ་བའི་དོན་མཛད་དོ། །རིགས་ཀྱི་བུ་ང་དེ་ལྟར་སངས་རྒྱས་ཀྱི་འཁོར་ལོ་བརྒྱད་པ་འདི་དང་ལྡན་ཏེ། འཁོར་ལོ་དེའི་དབང་གིས་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལ་སོགས་པ་ལོག་པར་སྨྲ་བ་ཐམས་ཅད་བཏུལ་ཏེ། འཁོར་མང་པོའི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ། རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་བསམས་པ་བཞིན་དུ་བདག་གི་རིས་ན་གནས་པའི་སེམས་ཅན་གྱི་རིགས་དང་། རུས་དང་། རྩལ་ཅི་ཡོད་པ་དང་། ལས་ཀྱི་དངོས་པོ་ཅི་བྱེད་པ་དང་། འདི་ནས་ཚེ་འཕོས་ནས་གང་དུ་སྐྱེ་བ་དང་། རྒྱུ་དང་འབྲས་བུ་བཟང་ངན་གྱི་ཁྱད་པར་མི་འཐུན་པ་ཀུན་ཤིན་ཏུ་རྟོག་གོ །སེམས་ཅན་གང་སུའི་ཁྱིམ་དུ་སྐྱེས་ན་རྟུལ་ཕོད་ཅིང་དཔའ་བ་དང་། ཞན་ཅིང་སྡར་བ་དང་། བཟོ་རྩལ་བསླབས་ན་ལོབས་པ་དང་། མི་ལོབས་པ་དང་། ལས་ཅི་བྱེད་པ་དང་། དགེ་བ་བྱེད་པ་དང་། སྡིག་པ་བྱེད་པ་དང་། ཕྱུག་ཅིང་བཙན་པ་དང་། དབུལ་ཞིང་ཉེན་པ་དང་། མཛེས་པ་དང་། མི་མཛེས་པ་ལ་སོགས་པ་ཀུན་ཤེས་པ་ནས་ཚེ་འཕོ་བའི་བར་དུ་ཀུན་ཤེས་ཏེ་གང་སུ་ཞིག་ལས་མ་ཟད་པར་འཆི་བ་དང་། གང་ནི་ལས་ཟད་དེ་འཆི་བ་དང་། གང་ནི་རྒྱལ་པོའི་ཁྲིམས་དང་འགལ་ནས་བསད་པ་དང་། གང་ནི་དགྲས་བསད་པ་དང་། གང་ནི་ལྕག་གིས་གཞུས་པས་འཆི་བ་དང་། གང་ནི་བཙོན་རར་བཅུག་པས་འཆི་བ་དང་། གང་ནི་བཟོ་རྩལ་སྦྱོང་བའི་ཕྱིར་འཆི་བ་དང་། གང་ནི་ཕས་རྒོལ་བའི་དགྲའི་གཡུལ་ངོར་འཆི་བ་དང་། གང་ནི་རྩོད་ཅིང་འཐབས་ནས་འཆི་བ་དང་། གང་ནི་ནོར་དབྱིག་སྲུང་བའི་ཕྱིར་འཆི་བ་དང་། གང་ནི་འདོད་ཆགས་ཀྱི་དབང་གིས་འཆི་བ་དང་། གང་ནི་ཁོང་ཁྲོ་ཞིང་འཁོན་དུ་འཛིན་པའི་ཕྱིར་འཆི་བ་དང་། གང་ནི་ངལ་ཆད་ནས་འཆི་བ་དང་། གང་ནི་ལྟོགས་ཏེ་འཆི་བ་དང་། གང་ནི་ཉེས་པའི་སྐྱོན་དང་བཅས་ཏེ་འཆི་བ་དང་། གང་ནི་སྐྱོན་མེད་
པར་འཆི་བ་དང་། གང་ནི་རྒས་འཁོགས་ཏེ་འཆི་བ་པ་དང་། གང་ནི་དར་ལ་བབ་སྟེ་འཆི་བ་དང་། གང་ནི་གཞོན་ནུ་བྱིས་པའི་ཚེ་འཆི་བ་དང་། གང་ནི་དགེ་བའི་ལས་རྣམ་པ་མང་པོ་བྱས་ནས་འཆི་བ་དང་། གང་ནི་མི་དགེ་བའི་ལས་རྣམ་པ་མང་པོ་བྱས་ཏེ་འཆི་བ་དག་ཀྱང་རབ་ཏུ་ཤེས་སོ། །སེམས་ཅན་གང་ནི་དགེ་བ་སྤྱད་པའི་རྒྱུས་ཤི་ནའང་མཐོ་རིས་སུ་སྐྱེ་བར་འགྱུར་བའང་ཤེས་ཏེ། སེམས་ཅན་གང་ནི་མི་དགེ་བ་སྤྱད་པའི་རྒྱུས་ཚེ་འཕོས་ནས་ངན་སོང་དུ་སྐྱེ་བར་འགྱུར་བའང་རབ་ཏུ་ཤེས་སོ། །དེ་ལྟར་དངོས་པོ་དེ་དག་ཀུན་རབ་ཏུ་ཤེས་པས་འདི་སྙམ་དུ་བདག་ཀྱང་བརྩོན་པའི་སྦྱོར་བ་ལ་ལུས་དགེ་བ་དང་། ངག་དགེ་བ་དང་། ཡིད་དགེ་བ་ལ་སྤྱོད་པ་ལ་ཤིན་ཏུ་བརྩོན་པར་བྱའོ་སྙམ་དུ་སེམས་སོ། །བདག་གིས་ཐབས་རྣམ་པ་སྣ་ཚོགས་ཀྱིས་སྦྱིན་པ་ལ་གོམས་པར་བྱ་བ་དང་། ཞི་ཞིང་དུལ་བར་བྱ་སྟེ་ཚེ་འཕོས་ནས་གནས་བཟང་པོར་སྐྱེ་བར་བྱའི་ངན་སོང་དུ་ལྟུང་བར་མི་བྱའོ་སྙམ་དུ་སེམས་སོ། །དེ་ལྟར་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟ་བུའི་དངོས་པོ་བསམས་ནས་ཤིན་ཏུ་འབད་པའི་བརྩོན་འགྲུས་ཀྱིས་ལུས་དང་ངག་དང་ཡིད་གསུམ་གྱིས་དགེ་བ་སྤྱོད་པ་ལས་ཤིན་ཏུ་རྩོལ་ཏེ། རྟག་ཏུ་སྦྱིན་པ་སྤྱོད་པ་ནི་འདི་ལྟ་སྟེ། ཟས་དང་། སྐོམ་དང་། གོས་དང་། བལ་གླང་དང་། རྟ་དང་། བཞོན་པའི་ཐེག་པ་དང་། མལ་ཆ་དང་། ནད་ཀྱི་གསོས་སྨན་དང་། ཁང་ཁྱིམ་དང་། མར་མེ་དང་། སྒྲོན་མ་དང་། དེ་མ་ཡིན་པ་འཚོ་བའི་ཡོ་བྱད་ཐམས་ཅད་དང་། བྲན་དང་ལས་བྱེད་པའི་མི་དང་། གཞན་ཡང་རིན་པོ་ཆེ་དང་། ནོར་དབྱིག་རྣམ་པ་སྣ་ཚོགས་དང་། མགོ་དང་། མིག་དང་། ལག་པ་དང་། རྐང་པ་ནས་ལུས་དང་། སྲོག་གི་བར་དུ་ཕངས་པ་མེད་པར་ཐམས་ཅད་གཏོང་ངོ་། །སྲོག་གཅོད་པ་ཡོངས་སུ་སྤོང་བ་ནས་མ་བྱིན་པར་ལེན་པ་དང་། འདོད་པས་ལོག་པར་གཡེམ་པ་དང་། བརྫུན་དུ་སྨྲ་བ་དང་། ངག་རྩུབ་པོར་སྨྲ་བ་དང་། ཚིག་ཀྱལ་པ་དང་། ཕྲ་མ་དང་། འདོད་ཆགས་དང་། ཞེ་སྡང་དང་། ལོག་པར་ལྟ་བའི་བར་དུ་ཡོངས་སུ་སྤོང་ངོ་། །དེའི་རྒྱུ་དེའི་རྐྱེན་གྱིས་རྒྱལ་རིགས་རྒྱལ་
ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ཡོན་ཏན་གྱི་ཁྱད་པར་རྣམ་པ་བཅུ་ཐོབ་བོ། །བཅུ་གང་ཞེ་ན་འདི་ལྟ་སྟེ། གྲགས་པ་ཆེན་པོ་དང་ལྡན་པ་ཡིན། ནོར་རིན་པོ་ཆེ་དང་ལྡན་པ་ཡིན། མཚན་ཕུན་སུམ་ཚོགས་པ་དང་ལྡན་པ་ཡིན། འཁོར་མང་པོ་དང་ལྡན་པ་ཡིན། མི་བདེ་བ་དང་ནད་མེད་པ་ཡིན། འཁོར་དང་གཉེན་བཤེས་ཀུན་ཤེས་རབ་རྣོ་ཞིང་མང་དུ་ཐོས་པ་ཡིན། ཡང་དག་པ་དང་ཡང་དག་པའི་སྤྱོད་པ་ཅན་ལ་སྟེན་ཅིང་མཆོད་པ་བྱེད་པ་ཡིན། ཕྱོགས་བཅུ་ཀུན་དུ་ཤིན་ཏུ་སྙན་པས་རྒྱ་ཆེར་གྲགས་པ་ཡིན། གཟི་བརྗིད་ཆེན་པོའི་མཐུ་དང་ལྡན་པའི་ལྷས་རྟག་ཏུ་སྲུང་བ་ཡིན། ཚེ་འཕོས་པར་གྱུར་ན་ཡང་མཐོ་རིས་ཀྱི་ལྷར་སྐྱེ་ཞིང་རྟག་ཏུ་གནས་བཟང་པོར་རབ་ཏུ་བདེ་བའི་ལོངས་སྤྱོད་དང་ལྡན་པ་ཡིན་ནོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་འཁོར་ལོ་དགུ་པ་འདི་དང་ལྡན་ཏེ། འཁོར་ལོ་དེ་དང་ལྡན་པའི་དབང་གིས་བདག་གི་ཡུལ་རབ་ཏུ་བདེ་ཞིང་སྐྱིད་པ་དང་། ཕས་རྒོལ་བའི་དགྲ་དང་། གྲོགས་པོ་ངན་པ་ཐམས་ཅད་བཏུལ་ཏེ་ལུས་བསྲུང་བའི་ནན་ཏན་ལ་མཁས་པས་ཚེ་ཡང་རིང་བར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་ཡང་དག་པ་ཇི་ལྟ་བ་བཞིན་དུ་སེམས་ཅན་ཐམས་ཅད་ཀྱི་སྐྱེ་བ་དང་འཆི་འཕོ་བའི་དངོས་པོ་ཀུན་མཁྱེན་ཏོ། །ཡང་དག་པ་ཇི་ལྟ་བ་བཞིན་དུ་སེམས་ཅན་གང་ནི་ལུས་མི་དགེ་བ་སྤྱོད་པ་དང་ལྡན། སེམས་ཅན་གང་ནི་ངག་མི་དགེ་བ་སྤྱོད་པ་དང་ལྡན། སེམས་ཅན་གང་ནི་ཡིད་མི་དགེ་བ་སྤྱོད་པ་དང་ལྡན་ཞིང་འཕགས་པ་རྣམས་ལ་དབང་ཟ་སྟེ། ངན་པར་ལྟ་བ་དང་ལྡན་པས་ངན་པར་ལྟ་བའི་དབང་གིས་ཚེ་འཕོས་ནས་ངན་སོང་དུ་ལྟུང་བ་དང་། གང་ནི་སེམས་ཅན་དམྱལ་བར་ལྟུང་བ་དང་། གང་ནི་བྱོལ་སོང་གི་སྐྱེ་གནས་སུ་སྐྱེ་བ་དང་། གང་ནི་ཡི་དགས་སུ་སྐྱེ་བ་ཡང་རབ་ཏུ་མཁྱེན་ཏོ། །སེམས་ཅན་གང་ནི་ལུས་དགེ་བ་སྤྱོད་པ་དང་ལྡན། གང་ནི་ངག་དགེ་བ་སྤྱོད་པ་དང་ལྡན། གང་ནི་ཡིད་དགེ་བ་སྤྱོད་པ་དང་ལྡན་ཞིང་འཕགས་པ་རྣམས་ལ་དབང་མི་ཟ་བ་དང་། ཡང་དག་པར་ལྟ་བ་དང་ལྡན་ཏེ། ཡང་དག་པར་
ལྟ་བའི་རྐྱེན་གྱིས་ཚེ་འཕོས་ནས་མཐོ་རིས་ཀྱི་ལྷར་སྐྱེ་བ་དང་། མིར་སྐྱེ་བ་དང་། ཟག་པ་ཟད་པར་འགྱུར་བ་ཡང་རབ་ཏུ་མཁྱེན་ཏོ། །དེ་ལྟར་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་དུ་མཁྱེན་པས་སེམས་ཅན་དེ་དག་ལ་བྱམས་པ་དང་། སྙིང་རྗེ་ཆེན་པོ་བསྐྱེད་དེ། ཤིན་ཏུ་འབད་པའི་བརྩོན་འགྲུས་ཀྱིས་ཆོ་འཕྲུལ་རྣམ་པ་གསུམ་མངོན་པར་བསྟན་ཏེ། སེམས་ཅན་དེ་དག་སངས་རྒྱས་ཀྱིས་བསྟན་པའི་ཆོས་དང་། འདུལ་བ་ལ་ཕྱོགས་ཤིང་འཇིག་རྟེན་དང་འཇིག་རྟེན་ལས་འདས་པའི་དད་པ་ལ་བཀོད་དོ། །གསུམ་གང་ཞེ་ན། འདི་ལྟ་སྟེ། མངོན་པར་ཤེས་པའི་ཆོ་འཕྲུལ་དང་། ཆོས་སྟོན་པའི་ཆོ་འཕྲུལ་དང་། ཕ་རོལ་གྱི་སེམས་ཤེས་པའི་ཆོ་འཕྲུལ་ལོ། །ཆོ་འཕྲུལ་རྣམ་པ་དེ་གསུམ་གྱིས་སེམས་ཅན་དེ་དག་བསྐུལ་ནས་བསྟན་པ་ལ་བཀོད་དེ། འཇིག་རྟེན་དང་འཇིག་རྟེན་ལས་འདའ་བའི་དད་པ་ཐོབ་པར་བྱས་ནས། སྲིད་པ་ན་འཁོར་བའི་སེམས་ཅན་ཐམས་ཅད་རྣམ་པར་གྲོལ་བར་མཛད་དོ། །རིགས་ཀྱི་བུ་ང་དེ་ལྟར་སངས་རྒྱས་ཀྱི་འཁོར་ལོ་དགུ་པ་འདི་དག་དང་ལྡན་ཏེ། འཁོར་ལོ་དེའི་དབང་གིས་སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ་སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་ལྟ་བ་ཐམས་ཅད་བཏུལ་ཏེ། འཁོར་གྱི་དཀྱིལ་འཁོར་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་འདི་ལྟ་སྟེ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་ནི་གླིང་བཞི་པའི་སེམས་ཅན་ཚད་མེད་པའི་ལུས་ཀྱི་ནད་རྣམ་པ་སྣ་ཚོགས་བསལ་བའི་ཕྱིར་རྒྱལ་ཐབས་བཏང་ནས་སྤོས་ཆུས་ལུས་བཀྲུས་ནས་གོས་གཙང་མ་སར་པ་གྱོན་ནས་ལུས་དྲང་པོར་བསྲང་སྟེ། སེམས་ཅན་ཐམས་ཅད་ལ་བྱམས་པ་དང་། སྙིང་རྗེ་དང་མཉམ་པའི་སེམས་ཡིད་ལ་བྱས་ཏེ། ནད་ཐམས་ཅད་ལས་ཐར་བར་བྱ་བའི་ཕྱིར་མེ་ཏོག་དང་། སྤོས་དང་། རོལ་མོ་རྣམ་པ་སྣ་ཚོགས་དང་། དེ་མ་ཡིན་པའི་མཆོད་པའི་ཡོ་བྱད་རྣམ་པ་སྣ་ཚོགས་མང་
པོས་མཐུ་ཆེ་བ་གཟི་བརྗིད་དང་ལྡན་པའི་ལྷ་ཐམས་ཅད་ལ་མཆོད་པ་བྱེད་དོ། །དེའི་ཚེ་ན་ལྷའི་དབང་པོ་དང་། ཀླུའི་དབང་པོ་ནས་ལྟོ་འཕྱེ་ཆེན་པོའི་དབང་པོའི་བར་དུ་ཐམས་ཅད་ཀྱིས་དེ་ལྟར་ཤེས་ནས་གཅིག་ལ་གཅིག་འདི་སྐད་ཅེས་ཟེར་རོ། །རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་འདི་ཡོན་ཏན་དང་ལྡན་ཏེ། གཟི་བརྗིད་ཆེ་བས་ན་གླིང་བཞི་ལ་དབང་བའི་འཁོར་ལོས་སྒྱུར་བའི་རྒྱལ་པོར་འོས་ཀྱིས་བདག་ཅག་གིས་དེར་དོང་ལ་གླིང་བཞི་ལ་དབང་བའི་རྒྱལ་པོར་དབང་བསྐུར་བ་དང་། སེམས་ཅན་རྣམས་ནད་མེད་ཅིང་བདེ་བར་བྱ་བའི་ཕྱིར་འདོང་ངོ་ཞེས་སྨྲས་ནས་ལྷའི་དབང་པོ་ནས་ལྟོ་འཕྱེ་ཆེན་པོའི་དབང་པོའི་བར་དུ་ཐམས་ཅད་ལྷགས་ནས་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་འཁོར་ལོས་སྒྱུར་བའི་རྒྱལ་པོར་དབང་བསྐུར་ཏེ། རིན་པོ་ཆེ་སྣ་བདུན་དང་ལྡན་པ་དང་། གླིང་བཞི་ལ་དབང་བྱེད་པ་དང་། བུ་སྟོང་དང་ལྡན་ཏེ་ཐམས་ཅད་ཀྱང་དཔའ་ཞིང་རྟུལ་ཕོད་པ་དང་། མཛེས་ཤིང་ཡིད་དུ་འོང་བ་དང་། ཕས་རྒོལ་བའི་དགྲ་ཐུལ་བ་དང་། དབང་བར་གྱུར་པའི་ས་ཆེན་པོ་དེ་ལྟར་རྒྱ་མཚོའི་མཐའ་ནས་ཕོ་བྲང་དུ་ཐུག་གི་བར་དུ་མཚོན་ཆ་མི་སྤྱོད་ཅིང་ཐམས་ཅད་དམ་པའི་ཆོས་སྤྱོད་དེ་བདེ་སྐྱིད་པར་བྱས་སོ། །རིགས་ཀྱི་བུ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བའི་རྒྱལ་པོ་ཆེན་པོ་དེ་ལྟར་འཁོར་ལོ་བཅུ་པ་འདི་དག་དང་ལྡན་ཏེ། འཁོར་ལོ་དེའི་དབང་གིས་གླིང་ཆེན་པོ་བཞི་ནས་ཕྱོགས་མཚམས་བརྒྱད་དང་། གླིང་ཕྲན་བརྒྱད་ཁྲི་བཞི་སྟོང་དག་ན་སེམས་ཅན་ཇི་སྙེད་གནས་པ་དེ་དག་ཐམས་ཅད་དགེ་བ་བཅུའི་ལས་ཀྱི་ལམ་ལ་གནས་ཤིང་། བདག་གི་ལུས་ཤིན་ཏུ་སྲུང་བ་དང་། ཚེ་ཡང་རིང་བར་འགྱུར་རོ། །ཚེ་འཕོས་ནས་ཀྱང་མཐོ་རིས་ཀྱི་ལྷར་སྐྱེ་ཞིང་ལོངས་སྤྱོད་དམ་པ་དང་ལྡན་པར་འགྱུར་རོ། །རིགས་ཀྱི་བུ་དེ་ལྟར་དེ་བཞིན་དུ་དེ་བཞིན་གཤེགས་པ་ཡང་སྔོན་བྱང་ཆུབ་སེམས་དཔའི་ཚེ་ན་བདག་དང་གཞན་གྱི་ལུས་ལ་ཉོན་མོངས་པའི་ནད་རྣམ་པ་ཚད་མེད་པ་སྙེད་ཡོད་པར་མཁྱེན་ནས་ཏིང་ངེ་འཛིན་གྱི་སྤོས་ཆུས་ནི་ལུས་བཀྲུས། བདེན་པའི་ཆོས་དང་། བྱམས་པ་ཆེན་པོ་དང་། སྙིང་རྗེ་ཆེན་པོའི་ཆུས་ཁྲུས་བྱས་པ་ཁྲེལ་བ་དང་འཛེམ་པའི་
གོས་གྱོན་ནས་ཕྱོགས་བཅུའི་སངས་རྒྱས་བཅོམ་ལྡན་འདས་ཐམས་ཅད་ཀྱིས་བསམ་གཏན་དང་། སྙོམས་པར་འཇུག་པ་དང་། བརྩོན་འགྲུས་དང་། ཐབས་དང་། ཤེས་རབ་དང་། བྱམས་པ་དང་། ཐུགས་རྗེས་རྗེས་སུ་བཟུང་སྟེ་ཐམས་ཅད་ཀྱིས་གསུང་འཐུན་པར་འདི་སྐད་དུ་སྐྱེས་བུ་ཆེན་པོ་འདི་ནི་བསོད་ནམས་དང་། ཡེ་ཤེས་ཆེན་པོའི་ཚོགས་ཀྱིས་ཡོངས་སུ་བརྒྱན་པའི་སྣོད་དུ་གྱུར་པས་རྣམ་པར་ཐར་པ་གསུམ་དང་མི་འཇིགས་པ་བཞི་དང་། དེ་བཞིན་གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་ཀྱི་སྣོད་དུ་གྱུར་པའོ། །བླ་ན་མེད་པ་ཐམས་ཅད་མཁྱེན་པའི་ཡེ་ཤེས་ཐོབ་པའི་གནས་བྱམས་པ་ཆེན་པོ་དང་། སྙིང་རྗེ་ཆེན་པོ་ཡོངས་སུ་རྫོགས་པ། སེམས་ཅན་ཐམས་ཅད་ལ་ཕན་པ་དང་བདེ་བའི་དོན་བྱེད་པ་ལ་སྤྲོ་བ། སངས་རྒྱས་རིན་པོ་ཆེ་ཚོལ་བའི་ཚོང་དཔོན་དུ་གྱུར་པ། འཁོར་བས་སྡུག་བསྔལ་བའི་སེམས་ཅན་ཡོངས་སུ་སྒྲོལ་བ། སེམས་ཅན་ལ་མྱ་ངན་ལས་འདའ་བའི་བདེ་བ་ཆེན་པོ་རབ་ཏུ་སྟོབས་པ་ཡིན་ཏེ། བདག་ཅག་སངས་རྒྱས་བཅོམ་ལྡན་འདས་ཐམས་ཅད་བདེན་པའི་གསུང་གིས་ཅི་དང་ཅི་འདོད་པ་དེ་དག་ཐམས་ཅད་བྱིན་ཏེ། ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་ནས་བླ་ན་མེད་པའི་ཆོས་ཐོབ་ནས་ཆོས་ཀྱི་རྒྱལ་པོ་ཆེན་པོར་གྱུར་ཏེ། ང་དེའི་ཚེ་ན་བསོད་ནམས་དང་ཡེ་ཤེས་ཀྱི་ཚོགས་ལ་བརྟེན་ཏེ་ཤིན་ཏུ་བརྟན་པའི་བརྩོན་འགྲུས་ཀྱིས་འཕགས་པའི་བདེན་པ་བཞི་ཡང་དག་པ་ཇི་ལྟ་བ་བཞིན་དུ་ཆུད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་སངས་རྒྱས་སོ། །རིགས་ཀྱི་བུ་ཇི་ལྟར་འཁོར་ལོས་སྒྱུར་བའི་རྒྱལ་པོ་གླིང་བཞི་ལ་དབང་ཞིང་དབང་སྒྱུར་བ་བཞིན་དུ་དེ་བཞིན་གཤེགས་པ་ཡང་བསམ་གཏན་བཞི་དང་། གཟུགས་མེད་པའི་ཏིང་ངེ་འཛིན་བཞི་དང་། ཚངས་པའི་གནས་བཞི་དང་། སོ་སོ་ཡང་དག་པར་རིག་པ་བཞི་དང་། འཕགས་པའི་བདེན་པ་བཞི་དང་། འཇིགས་པ་མེད་པ་བཞི་དང་། དེ་བཞིན་གཤེགས་པའི་སྟོབས་བཅུ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དང་། རྣམ་པ་ཐམས་ཅད་མཁྱེན་པའི་ཡེ་ཤེས་ལ་དབང་དུ་གྱུར་ཏོ། །
ཇི་ལྟར་འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པ་ལྟར། དེ་བཞིན་གཤེགས་པ་ཡང་བྱང་ཆུབ་ཀྱི་ཡན་ལག་རྣམ་པ་བདུན་དང་ལྡན་ནོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་བུ་སྟོང་དང་ལྡན་ཏེ་ཐམས་ཅད་དཔའ་ཞིང་རྟུལ་ཕོད་པ། མཛེས་ཤིང་ཡིད་དུ་འོང་བས་ཕ་རོལ་པོའི་དགྲ་ཐམས་ཅད་ཐུལ་བ་བཞིན་དུ་དེ་བཞིན་གཤེགས་པ་ཡང་དང་པོར་འཕགས་པ་ཅང་ཤེས་ཀཽ་དི་ནྱ་ནས་ཐ་མར་ཚེ་དང་ལྡན་པ་རབ་ཏུ་བཟང་པོ་དང་། རབ་དེ་ལ་སོགས་པ་ཉན་ཐོས་ཀྱི་འཁོར་ཆེན་པོ་སངས་རྒྱས་ཀྱི་ཐུགས་ལས་བྱུང་བ། བཅོམ་ལྡན་འདས་ཀྱི་གསུང་ལས་སྐྱེས་པ། བསྟན་པའི་ཆོས་ལས་སྐྱེས་པ། སངས་རྒྱས་ཀྱི་ཆོས་ཐོབ་པ་དག་ཡོད་དེ། ཟག་པ་ཡོངས་སུ་ཟད་པའི་ཕྱིར་དཔའ་ལ་རྩལ་ཆེ་བ་ཞེས་བྱ། ཚངས་པའི་གནས་བཞི་དང་ལྡན་པས་མཛེས་ཤིང་ཡིད་དུ་འོང་བ་ཞེས་བྱ། ལྷའི་བདུད་དང་མུ་སྟེགས་ཅན་ཐུལ་བས་ཕས་རྒོལ་བའི་དགྲ་ཐུལ་བ་ཞེས་བྱའོ། །ཇི་ལྟར་འཁོར་ལོས་སྒྱུར་བའི་རྒྱལ་པོ་གླིང་ཕྲན་བརྒྱད་ཁྲི་བཞི་སྟོང་འདུལ་ཞིང་སྟོན་པ་བཞིན་དུ། དེ་བཞིན་གཤེགས་པ་ཡང་འཛམ་བུའི་གླིང་བྱེ་བ་ཕྲག་བརྒྱ་དང་། ནུབ་ཀྱི་བན་གླང་སྤྱོད་བྱེ་བ་ཕྲག་བརྒྱ་དང་། ཤར་གྱི་ལུས་འཕགས་བྱེ་བ་ཕྲག་བརྒྱ་དང་། བྱང་གི་སྒྲ་མི་སྙན་བྱེ་བ་ཕྲག་བརྒྱ་དང་། རྒྱ་མཚོ་ཆེན་པོ་བྱེ་བ་ཕྲག་བརྒྱ་དང་། རི་རབ་ལྷུན་པོ་བྱེ་བ་ཕྲག་བརྒྱ་དང་། རྒྱལ་ཆེན་རིས་བཞི་བྱེ་བ་ཕྲག་བརྒྱ་དང་། འདུ་ཤེས་མེད་འདུ་ཤེས་མེད་མིན་སྐྱེ་མཆེད་བྱེ་བ་ཕྲག་བརྒྱ་དང་། ཁོར་ཡུག་ཆེན་པོ་བྱེ་བ་ཕྲག་བརྒྱ་དེ་དག་སངས་རྒྱས་ཀྱི་ཞིང་ཤིན་ཏུ་རྒྱ་ཆེ་བ་གཅིག་ཏུ་གྱུར་པར་གསུང་གིས་དབང་སྒྱུར་བ་ལ་མངའ་བརྙེས་པར་གྱུར་ཏོ། །རིགས་ཀྱི་བུ་ང་འདི་ལྟར་སངས་རྒྱས་ཀྱི་འཁོར་ལོ་བཅུ་པ་འདི་དང་ལྡན་ཏེ། འཁོར་ལོ་དེའི་དབང་གིས་ཡང་དག་པ་ཇི་ལྟ་བ་བཞིན་དུ་བདག་དང་གཞན་གྱི་ལུས་ཀྱི་ཟག་པ་ཐམས་ཅད་ཡོངས་སུ་ཟད་པ་མཁྱེན་ནས། སེམས་ཅན་ཚད་མེད་པ་ལ་ཕན་པ་དང་བདེ་བའི་དོན་གྱིས་འཇིགས་པ་མེད་པ་ལ་བདེ་བར་བཀོད་དོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་
བཏུལ་ཏེ། འཁོར་མང་པོའི་ནང་དུ་སེང་གེའི་སྒྲ་སྒྲོགས་སོ། །རིགས་ཀྱི་བུ་ང་ནི་དེ་ལྟར་སངས་རྒྱས་ཀྱི་འཁོར་ལོ་བཅུ་པ་འདི་དག་དང་ལྡན་ཏེ། སྔོན་གྱི་སྨོན་ལམ་གྱི་ཤུགས་ཀྱིས་སངས་རྒྱས་ཀྱི་ཞིང་རྙོག་པ་ལྔ་ཅན་གྱི་སེམས་ཅན་ཐམས་ཅད་རྣམ་པར་དཀར་བའི་ཆོས་རྣམས་ཉམས་པ། འཕགས་པའི་ནོར་བདུན་གྱིས་བྲེལ་བ། མཁས་པ་དག་དང་རིང་དུ་གྱུར་པ། རྟག་པ་དང་ཆད་པའི་དྲ་བས་ཀུན་ནས་གླགས་ཤིང་ཟིལ་གྱིས་ནོན་པ། ངན་སོང་དུ་འགྲོ་བའི་ཤིང་རྟ་ལ་སྤྲོ་ཞིང་དགའ་བ་སྐྱེད་པ། ཕྱི་མའི་སྡུག་བསྔལ་གྱིས་མི་འཇིགས་པ། རྟག་ཏུ་ཀུན་ནས་ཁེབས་པའི་མ་རིག་པའི་མུན་པར་གནས་པ་ལ་དད་པ། མི་དགེ་བ་བཅུའི་ལས་ཀྱི་ལམ་རྫོགས་པར་བྱེད་པ། མཚམས་མེད་པ་ལྔའི་ལས་བྱེད་པ། དམ་པའི་ཆོས་ལ་སྐུར་ཅིང་འཕགས་པ་ལ་དབང་ཟ་བ། དགེ་བའི་ཆོས་ཐམས་ཅད་རིང་དུ་སྤོང་བ། མི་དགེ་བའི་ཆོས་རྫོགས་པར་བྱེད་པ་འདིར་བཞུགས་ཏེ། ང་ནི་སངས་རྒྱས་ཀྱི་འཁོར་ལོ་རྣམ་པ་བཅུ་པོ་འདི་དང་ལྡན་པས་འཇིགས་པ་མེད་པར་བདེ་བར་གནས་སོ། །འཇིགས་པ་མེད་པས་ང་ནི་དྲང་སྲོང་ཆེན་པོའི་གནས་སུ་བཞུགས་ཏེ། སངས་རྒྱས་ཀྱི་འཁོར་ལོ་བསྐོར་ནས་ལྷ་དང་བདུད་དུ་བཅས་པའི་མུ་སྟེགས་ཅན་ལོག་པར་སྨྲ་བ་ཐམས་ཅད་བཏུལ་ཏོ། །སེམས་ཅན་ཐམས་ཅད་ཀྱི་རིགས་ལ་རྡོ་རྗེ་ལྟར་སྲ་བའི་ཉོན་མོངས་པ་ཐམས་ཅད་བཅོམ་ནས་ཅི་དང་ཅིས་འདུལ་བ་བཞིན་དུ་སྣོད་དུ་གྱུར་པའི་སེམས་ཅན་ཐམས་ཅད་ཐེག་པ་གསུམ་ལས་ཕྱིར་མི་ལྡོག་པར་རྣམ་པར་བཞག་གོ །དེ་ནས་འཁོར་དེའི་ནང་ནས་འདུལ་བའི་བྱང་ཆུབ་སེམས་དཔའ་སེམས་དཔའ་ཆེན་པོ་ཐམས་ཅད་དང་། ཉན་ཐོས་ཀྱི་དགེ་འདུན་ཐམས་ཅད་དང་། ལྷ་དང་ཀླུའི་འཁོར་ཐམས་ཅད་ནས། ལུས་སྲུལ་པོ་དང་། མི་དང་མི་མ་ཡིན་པ་ལ་སོགས་པའི་བར་དུ་འཁོར་མང་པོ་ཐམས་ཅད་རབ་ཏུ་དགའ་ནས། སྐད་འཐུན་པར་ལེགས་སོ་ཞེས་སྨྲས་ཏེ། སྤོས་ཀྱི་ཆར་ཆེན་པོ་རབ་ཏུ་ཕབ་བོ། །མེ་ཏོག་གི་ཆར་ཆེན་པོ་ཡང་རབ་ཏུ་ཕབ་བོ། །རིན་པོ་ཆེའི་ཆར་ཆེན་པོ་ཡང་རབ་ཏུ་ཕབ་བོ། །ན་བཟའི་ཆར་ཆེན་པོ་ཡང་རབ་ཏུ་ཕབ་སྟེ།
བརྒྱ་སྟོང་ས་ཆེན་པོ་འདི་ཡང་རབ་ཏུ་གཡོས་སོ། །དེ་ལྟར་སངས་རྒྱས་ཀྱི་འཁོར་ལོ་རྣམ་པ་བཅུ་པོ་འདི་བཤད་པའི་ཚེ། འཁོར་གྱི་དཀྱིལ་འཁོར་དེའི་ནང་ན་བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱད་ཅུ་རྩ་བཞི་སྙེད་ཀྱིས་མི་སྐྱེ་བའི་ཆོས་ལ་བཟོད་པ་ཐོབ་བོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་པ་སྙེད་ཀྱིས་གཟུངས་དང་། ཏིང་ངེ་འཛིན་དང་། གཞན་ཡང་སེམས་ཅན་ཚད་མེད་གྲངས་མེད་པ་སྙེད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་དེ་ཕྱིར་མི་ལྡོག་པར་གྱུར་ཏོ། །གཞན་ཡང་སེམས་ཅན་ཚད་མེད་གྲངས་མེད་པ་སྙེད་ཀྱིས་འབྲས་བུ་ཐོབ་པར་གྱུར་ཏོ། །འདུས་པ་ཆེན་པོ་ལས་བྱང་ཆུབ་སེམས་དཔའ་སེམས་དཔའ་ཆེན་པོའི་སའི་སྙིང་པོ་འཁོར་ལོ་བཅུ་པ་ཞེས་བྱ་བ་ལས་འཁོར་ལོ་བཅུའི་ལེའུ་སྟེ་གཉིས་སོ།། །།