དཔལ་ཡེ་ཤེས་རྡོ་རྗེ་ཀུན་ལས་བསྡུས་པ།
རྒྱུད་འབུམ་ཆ་བ་བཞུགས་སོ། །
རྒྱ་གར་སྐད་དུ། ཤྲཱི་ཛྙཱ་ན་བཛྲ་ས་མུཙྩ་ཡ། བོད་སྐད་དུ། དཔལ་ཡེ་ཤེས་རྡོ་རྗེ་ཀུན་ལས་བསྡུས་པ། དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་ཡི། །དུས་གཅིག་ཚེ་ན་བཅོམ་ལྡན་འདས། །དེ་བཞིན་གཤེགས་པ་ཐམས་ཅད་ཀྱི། །གསང་བའི་དབྱིངས་སུ་བདག་ཉིད་ཀྱིས། །ཡེ་ཤེས་ངོ་བོར་བཞུགས་གྱུར་པས། ། སངས་རྒྱས་ཀུན་གྱི་སྐུ་གསུང་ཐུགས། །རོ་མཉམ་དམ་ཚིག་རྡོ་རྗེ་ཉིད། །མི་ཕྱེད་ཏིང་འཛིན་སྙོམས་ཞུགས་སོ། །དེ་ནས་བྱང་ཆུབ་སེམས་དཔའ་ནི། །སེམས་དཔའ་ཆེན་པོ་བྱམས་པ་སོགས། །རྣམས་ཀྱིས་ཞུས་ཤིང་གསོལ་བཏབ་ནི། །དེ་ནས་བཅོམ་ལྡན་འདས་ལ་ཞུས། །མ་རིག་པ་དང་སེམས་བྱུང་དང་། །སེམས་ཞེས་བགྱི་བ་ཇི་ལྟར་ལགས། །དེ་སྐད་ཅེས་ནི་གསོལ་པ་དང་། །བཅོམ་ལྡན་དེ་བཞིན་གཤེགས་ཀུན་གྱི། །སྐུ་གསུང་ཐུགས་ཉིད་རྡོ་རྗེ་ཡི། །བདག་ཉིད་ཅན་གྱིས་བཀའ་སྩལ་པ། །རིགས་ཀྱི་བུ་རྣམས་ལེགས་ཉོན་ཅིག །ཡེ་ཤེས་
གསུམ་ནི་རྡོ་རྗེ་ལས། །བྱང་སེམས་རྡོ་རྗེ་དེ་བཞིན་ཉིད། །ཡང་དག་འབྱུང་པ་དེ་ཡི་ཕྱིར། །ཡེ་ཤེས་རྡོ་རྗེའི་རང་བཞིན་ནི། །དེ་ཡི་དོན་ནི་འདི་ལྟ་སྟེ། །ཡེ་ཤེས་གསུམ་ནི་དག་པའི་སེམས་སྣང་བ་གསུམ་གྱི་འབྱུང་གནས་རྡོ་རྗེ་ལས་མི་ཕྱེད་པ་རླུང་རིག་ཐ་མི་དད་དུ་གནས་པ་ཉིད་དེ། བྱང་ཆུབ་སེམས་ནི་ཀུན་རྫོབ་དོན་དམ་དབྱེར་མེད་པ་སྟེ། རྡོ་རྗེ་དེ་བཞིན་ཉིད་ནི་གདོད་མ་ནས་ལྷུན་གྱིས་གྲུབ་པའི་ཆོས་ཉིད་ལས་ཡང་དག་པར་འབྱུང་བ་ནི། ཆོས་ཐམས་ཅད་ཀྱི་ངོ་བོ་བདེ་ཆེན། སངས་རྒྱས་ཀྱི་སྐུ་གསུང་ཐུགས་རྡོ་རྗེ་ལས་འབྱུང་ཞིང་འཇུག་ལ་གནས་པ་དེའི་ཕྱིར་ན། འཁོར་འདས་ཀྱི་ཆོས་ཐམས་ཅད་ཡེ་ཤེས་རྡོ་རྗེ་རླུང་སེམས་དབྱེར་མེད་ཐོགས་པ་མེད་པས་ཁྱབ་ཅིང་དབང་བྱེད་པ་ཉིད་དོ། །དེ་བཞིན་གཤེགས་པ་ཀུན་གྱི་ དགོངས་པ 
་ནི། །དབྱིངས་དང་ཡེ་ཤེས་གཉིས་སུ་མེད་པ་ཉིད། །མངོན་བར་བྱང་ཆུབ་ཉིད་ལས་རབ་འབྱུང་བ། །རླུང་རིག་དབྱེར་མེད་པ་ལས་དུས་ཀུན་ཏུ། །སྣང་བ་གསུམ་དུ་ཤར་བ་འགག་པ་མེད། །དེ་ཉིད་ལྷན་ཅིག་སྐྱེས་པར་རབ་རྟོགས་བྱ། །ཡང་དག་དོན་ནི་ཟབ་པ་སྟེ། །རྡོ་རྗེའི་ངོ་བོར་ཡང་དག་བཤད་ཀྱི་དོན་ལ་ནི། ། གསང་བ་ཡང་དག་བྱང་ཆུབ་སེམས། །རླུང་སེམས་དབྱེར་མེད་ཆོས་ཉིད་ལས། །ཟབ་པ་མི་འགྱུར་རང་རིག་ནི། །སྤྲོས་མེད་འགག་པ་མེད་ཅིང་ཞི། །སྐྱེ་མེད་མཉམ་ཉིད་ངང་ལས་ནི། །རྟོགས་པ་མེད་ཀྱང་རྒྱུ་རྐྱེན་ལས། །ཤེས་པ་མ་རིག་དེ་ཉིད་ནི། །འབྱུང་གནས་ཐོག་མ་མཐའ་མ་མེད། །དེ་ལས་ལྷན་སྐྱེས་མ་རིག་པ། །ཉེ་བར་ཐོབ་པ་དངོས་མེད་པ། །བདག་མེད་ཐམས་ཅད་སྙིང་པོ་ལས། །སྣང་མེད་པ་ལས་མ་འགགས་པས། །རིམ་པ་མ་ཡིན་འཆར་བ་ཡང་། །ཟབ་པ་སྟོང་ཆེན་པོར་འབྱུང་བའི། །མ་རིག་པ་ལས་
རྐྱེན་སྣང་བ། །སྣང་བ་ཐོབ་པ་མི་རྟོག་པ། །དེ་ལས་རང་བཞིན་སེམས་ལས་བྱུང་། །དེ་ལས་སྣང་བ་མཆེད་པ་སྟེ། །ཤིན་ཏུ་གསལ་ཞིང་སྟོང་པ་ཆེ། །སེམས་ལས་འབྱུང་བའི་རྒྱན་དག་ནི། །རྒྱུ་དང་མིག་ཡུལ་དབང་པོ་དང་། །མཚུངས་པའི་དེ་མ་ཐག་པ་ལས། །སེམས་ཞེས་བྱ་བ་འབྱུང་བ་སྟེ། །དེ་ནི་སྣང་བའི་དོན་དང་ནི། །སྟོང་པ་ཉིད་དུ་གསུངས་པ་ཡིན། །སེམས་ནི་དོན་ལ་གནས་པ་སྟེ། །སེམས་བྱུང་བྱེ་བྲག་རྣམ་པར་སྟོན། །མ་རིག་དེ་ཉིད་ཆོས་ཉིད་དེ། །ཆོས་ཉིད་བདག་ཉིད་མི་གནས་པས། །སྣང་དང་སྟོང་པ་དེ་དག་ནི། །གསུམ་གསུམ་སྤྲོས་པ་མེད་འབྱུང་བ། །འོད་གསལ་ངང་ལས་འབྱུང་བ་སྟེ། །གསལ་བདེ་སྟོང་པ་དབྱེར་མེད་པས། །རྡོ་རྗེ་བྱང་སེམས་ངོ་བོར་བསྟན། །ཅེས་པས་བསྟན་ཏེ། དེ་ནས་བྱམས་པ་ལ་སོགས་པ་བྱང་ཆུབ་སེམས་དཔའ་དེ་དག་དེའི་དུས་ལ་ཤིན་ཏུ་ངོ་མཚར་ཅན་དུ་ངོ་མཚར་སྐྱེས་ཏེ་ཅང་མི་སྨྲ་བར་གྱུར་ཏོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི། སྐུ་དང་གསུང་དང་ཐུགས་རྡོ་རྗེའི་བདག་ཉིད་ཅན་གྱི། བྱང་ཆུབ་སེམས་དཔའ་དེ་རྣམས་ཅང་མི་སྨྲ་བར་གྱུར་པ་གཟིགས་ནས་བཀའ་སྩལ་པ་ཅིའི་ཕྱིར་ཅང་མི་སྨྲ་བར་འདུག །དེ་ནས་བྱང་ཆུབ་སེམས་དཔའ་ཆེན་པོ་རྣམས་ཀྱིས། བཅོམ་ལྡན་འདས་ཀྱི་ཞབས་གཉིས་ལ་ཕྱག་འཚལ་ཏེ། མགོ་བོས་གཏུགས་ཏེ་གཞན་ཡང་ཞུས་པ། ཨེ་མ་ཧོ་སྟོན་པ་རྡོ་རྗེ་འཛིན། །རྟོགས་པར་དཀའ་བའི་རྣམ་ཤེས་ནི། །གསུམ་གྱི་དབྱེ་བ་མཆོག་ཟབ་པ། །བཅོམ་ལྡན་འདས་ཀྱིས་བཤད་དུ་གསོལ། །བདེ་བར་གཤེགས་པས་གསུང་དུ་གསོལ། །དེ་སྐད་ཅེས་ནི་ཞུས་པ་དང་། །བཅོམ་ལྡན་འདས་ཀྱིས་བཀའ་སྩལ་པ། །གང་དག་འོད་གསལ་ལས་བྱུང་དེ་ཉིད་ནི། །སེམས་དང་ཡིད་དང་རྣམ་པར་ཤེས་པ་ཞེས། །ཆོས་རྣམས་ཀུན་གྱི་རྩ་བར་གྱུར་པ་སྟེ། །ཀུན་ཉོན་མོངས་དང་རྣམ་པར་བྱང་བ་ཡི། །བདག་ཉིད་དེ་ལས་རྟོགས་པ་གཉིས་རིག་བྱེད། །རྣམ་ཤེས་དེ་ཡི་བཞོན་པ་རླུང་ཡིན་ཏེ། །རླུང་ལས་མེ་དང་མེ་ལས་ཆུ་འབྱུང་ཞིང་། །ཆུ་ལས་ས་ཡང་རབ་ཏུ་འབྱུང་བར་བཤད། །དེ་རྣམས་འདུས་ལས་ཕུང་པོ་ལྔ་
ཉིད་དང་། །སྐྱེ་མཆེད་དྲུག་དང་ཡུལ་ལྡར་སྣང་བ་གང་། །དེ་དག་རྟེན་ཅིང་འབྲེལ་བར་འབྱུང་བ་སྟེ། །རླུང་དང་རྣམ་ཤེས་ཉེ་བར་འདྲེས་པའོ། །དེ་ནས་རྣམ་པར་ཤེས་པ་གསུམ་གྱིས་ནི། །རང་བཞིན་གྱི་ནི་སྣང་བར་རབ་གསལ་བར། །སྤྱོད་པ་རྗེས་སུ་མྱོང་བར་བྱེད་བའོ། །སྣང་བའི་རྒྱུ་འབྲས་ཀྱིས་ནི་རང་བཞིན་རྣམས། །ཡང་དག་པར་ཡང་རབ་ཏུ་འབྱུང་བ་དང་། །རྨི་ལམ་སྒྱུ་མ་ལྟར་ནི་སྣང་བའོ། །དེ་ཡང་འོད་གསལ་གནས་པ་མེད་པ་དང་། །འགག་པ་དང་ནི་སྐྱེ་བ་མེད་པ་སྟེ། །དོན་དམ་བདེན་པ་ཡང་དག་པ་ཡི་མཐའ། །དེ་ལས་འབྱུང་བ་མུན་པའི་སྣང་བ་ནི། །འགོག་པ་མ་རིག་པ་ཞེས་བྱ་བར་བསྟན། །དེ་ཡི་རང་བཞིན་སྣང་བ་དང་། །འཁྲུལ་དང་རྣམ་པར་གཡེང་བ་དང་། །དྲན་པ་མེད་དང་ལེ་ལོ་དང་། །མི་སྨྲ་བ་དང་མི་གསལ་བའོ། །མ་རིག་པ་ཡང་སེམས་ལས་བྱུང་བ་སྟེ། །ངོ་བོ་ཆོས་ཉིད་རྣམ་པར་མི་རྟོག་པ། །མར་མེ་ལྟར་འབར་སྣང་བ་ཉེར་ཐོབ་ལས། །རླུང་གི་ཁམས་ཉིད་ཕྲ་བར་འཇུག་པས་ནི། །མ་ནིང་ལྟར་ནི་ཤེས་དང་མི་གསལ་བའོ། །ཉི་མའི་སྣང་བ་ལྟ་བུར་བསྟན་པ་དང་། །ཤིན་ཏུ་གསལ་བའི་སྨིག་རྒྱུ་ལྟ་བུ་སྟེ། །དེ་ཡི་རང་བཞིན་ཆགས་དང་དགའ་བ་དང་། །མཆོག་ཏུ་དགའ་དང་དྲག་པོ་ལ་སོགས་པའོ། །ཀུན་རྫོབ་ཏུ་ནི་མངོན་སུམ་གྱིས་བསྟན་དང་། །སྐྱེས་པའི་གཟུགས་དང་ཡབ་ལྷའི་ཚོགས་དག་དང་། །མཚན་མ་རྡོ་རྗེ་ཞེས་ནི་རང་བརྟགས་པའོ། །སེམས་ལས་སེམས་ཞེས་བཤད་པ་ཡིན། །ཟླ་བའི་སྣང་དང་ཤིན་ཏུ་གསལ་བ་སྟེ། །ཆུ་ཡི་ཟླ་བ་ལྟ་བུར་བསྟན་པའོ། །རང་བཞིན་ནི་འདོད་ཆགས་དང་བྲལ་བ་ལ་སོགས་པའོ། །ཀུན་རྫོབ་ཏུ་གསལ་བ་ལས། བུད་མེད་དང་། བྷ་ག་དང་། པདྨ་དང་ལྷ་མོའི་ཚོགས་ཀྱི་བརྡའོ། །འདིར་ཆོས་ཐམས་ཅད་ཀྱི་གནས་ལུགས་བསྟན་པར་བྱ་བའི་ཕྱིར། གང་དག་འོད་གསལ་ལས་བྱུང་དེ་ཉིད་ནི་ཆོས་ཉིད་རང་བཞིན་གྱིས་རྣམ་པར་དག་པ་འོད་གསལ་དབྱིངས་ལས། རིག་པ་རྟོག་མེད་ཀྱི་ཤེས་པ་ཕྲ་བའི་རླུང་དང་ལྷན་ཅིག་ཏུ་འབྱུང་བས་ན། སེམས་ནི་ཀུན་གཞིའོ། །ཡིད་ཀྱི་རྣམ་པར་ཤེས་པ་ནི་སྤྲོ་བ་དང་སྡུད་པར་བྱེད་པའོ། །རྣམ་པར་ཤེས་པ་ནི་ཚོགས་བརྒྱད་དང་ལྡན་
པའོ། །ཆོས་རྣམས་ཀུན་གྱི་རྩ་བར་གྱུར་པ་ནི། བྱང་ཆུབ་ཀྱི་སེམས་མི་འགྱུར་བ་རྡོ་རྗེ་ནམ་མཁའ་མཉམ་པ་ཉིད་དོ། །ས་བོན་མ་དག་པ་ལས་འགྲོ་བ་འཁྲུལ་པ་ཀུན་ནས་ཉོན་མོངས་པར་སྣང་ལ། བག་ཆགས་དག་ལས་འཁྲུལ་པ་ལས་ལོག་པ། རྣམ་པར་བྱང་བ་ཉིད་དུ་ཡང་དག་པར་སྣང་བའོ། །ཕྱི་རོལ་པས་བརྟགས་པའི་ཐ་སྙད་སྣ་ཚོགས་པ་བདག་ཏུ་བརྟགས་པ་དེ་ལས། རྟོག་པ་གཉིས་སུ་གྱུར་པ་སྟེ། གཟུང་འཛིན་དུ་འབྱུང་བའོ། །བདག་དང་གཞན་ནི་བདག་དང་བདག་གི་བར་འཛིན་པ་གཉིས་སུ་བརྟགས་པས། དངོས་པོ་དང་མཚན་མར་འཛིན་པ། སེམས་སུ་རིག་པར་བྱེད་པ་ཉིད་དོ། །དེ་ལས་རྣམ་པར་ཤེས་པ་ཉིད་དུ་སྣང་། དེ་ཉིད་དུ་ཆོས་ཉིད་ཀྱི་རླུང་ལས། འོད་སྣང་རང་བྱུང་གི་སྣང་བར་ཤར་བའོ། །དེར་ལས་རླུང་ལས་ཀུན་དུ་གཡོ་བས། ཆགས་པ་ལས་མེ་བྱུང་། བསྲུབ་པ་ལས་ཞེ་སྡང་གི་ཆུ་སྣང་། དྲོད་གཤེར་ལས་གཏི་མུག་གི་སའི་ཁམས་བསྐྱེད་ཅིང་། དེར་འབྱུང་བ་ལྔ་ལྷན་ཅིག་ཏུ་ཚོགས་ཤིང་འདུས་པ་ལས། རྩ་ཀུན་གཞིའི་རིག་པ་སྙིང་ག་ཙམ་དུ་བརྟེན་ཏེ།དེ་ལས་གཟུང་འཛིན་དུ་འཁྲུལ་པ་ལས། དེ་རྣམས་འདུས་པ་ལས་ཕུང་པོ་ལྔ་དང་ནི་སྐྱེ་མཆེད་དྲུག་དང་ཡུལ་ལྔར་སྣང་བ་སྟེ། དེ་ཉིད་རླུང་དང་རྣམ་ཤེས་ཐ་དད་མེད་པར་ཉེ་བར་འདྲེས་པས། འགག་པ་མེད་པ་ཀུན་དུ་སྣང་བརྟེན་ཅིང་འབྲེལ་པར་འབྱུང་བ་ཉིད་དུའོ། །ཆོས་ཉིད་རྟོག་མེད་ཀྱི་ངང་ལས། རླུང་དང་ལྷན་ཅིག་ཏུ་འབྱུང་བས། སྲིད་པ་བར་དོར་ཡུལ་ལ་སྤྱོད་ཚུལ་ནི། དེ་ནས་རྣམ་པར་ཤེས་པ་གསུམ་གྱི་ནི། རྐྱེན་ལས་འཆར་བའི་སྣང་བ་དང་། སྣང་བ་མཆེད་པ་དང་། སྣང་བ་མཆེད་པ་དང་། སྣང་བ་ཐོབ་པ་སྟེ། རྒྱུའི་རྐྱེན་དང་། དམིགས་པ་དང་། དབང་པོ་བདག་པོ་དང་། མཚུངས་པ་དེ་མ་ཐག་པ་ལས། མངོན་པར་འབྱུང་བ། རྟོག་པ་དང་ལྡན་པའི་རང་བཞིན་གྱི་སྣང་བ། རང་བཞིན་སུམ་ཅུ་རྩ་གསུམ་དང་། མཚན་ཉིད་བཞི་བཅུ་དང་མ་རིག་པའི་སྐད་ཅིག་མ་བདུན་དུ་རབ་ཏུ་གསལ་བར་ཉིན་དང་མཚན་དུ་སྤྱོད་པས། རྗེས་སུ་ཉམས་སུ་མྱོང་བར་བྱེད་པ་མ་དག་པའི་དུས་སོ། །ཡང་རླུང་དལ་ཞིང་རིག་པ་ཅུང་ཟད་གནས་པའི་ཚེ། སྣང་བ་གསུམ་གྱི་རྒྱུ་འབྲས་ཐམས་ཅད་སྒྱུ་མ་ལྟ་བུར་གྱུར་པས། རང་བཞིན་རྣམ་པ་ཐམས་
ཅད་ཡེ་ཤེས་ཀྱི་ངང་དུ་རང་དག་རང་ཞི་རང་སར་གྲོལ་བས། ཡང་དག་པར་རབ་ཏུ་འབྱུང་བ། དེ་བཞིན་ཉིད་དུ་བདེ་བ། གསལ་བ། སྟོང་ཞིང་བདག་མེད་པའི་རྣམ་པར་མི་རྟོག་པའི་ཡེ་ཤེས་འཆར་བས། བག་ཆགས་རྣམ་པར་དག་པའི་བར་དོར་རྨི་ལམ་གྱི་བར་དོར་ལུས་ངག་སྒྱུ་མ་ལྟར་ཀུན་དུ་སྣང་བའོ། །སྒྱུ་ལུས་ཀྱི་སྣང་བ་དེ་ཉིད་ཀུན་རྫོབ་ཀྱི་སྤྱོད་པ་དག་པར་བྱེད་པའི་ཕྱིར། དེ་ཡང་འོད་གསལ་བ་ལ་རབ་ཏུ་འཇུག་པས་རིལ་པོར་འཛིན་པ་དང་། རྗེས་སུ་གཞིག་པའི་བསམ་གཏན་གྱིས་ལྷན་ཅིག་སྐྱེས་པའི་དྲི་མ་རྣམ་པར་དག་པའི་ཚེ། གང་ལ་ཡང་གནས་པ་མེད་པ་དང་། ཆོས་རྣམས་ཀུན་ལ་འགག་པ་མེད་པ་དང་། གནས་པ་མེད་ཅིང་། སྐྱེ་བ་མེད་པ་སྟེ། སྤྲོས་མེད་དོན་དམ་པའི་བདེན་པ་རབ་ཏུ་མི་གནས་པའི་དོན། ཡང་དག་པའི་མཐའ་སྣང་བ་མེད་པ་ཞེས་བྱའོ། །དེ་ཉིད་ལས་ནི་ལུགས་ལས་བཟློག་གྱུར་པའི། །མུན་པ་ལྟ་བུའི་སྣང་བ་ཕྲ་རླུང་ལས། །འགོག་པ་མ་རིག་པ་ཞེས་བྱ་བར་བསྟན། །དེ་ཡི་རང་བཞིན་སྣང་བ་འབྱུང་བ་དང་། །འཁྲུལ་དང་རྣམ་གཡེང་ཐེ་ཚོམ་དང་། བརྗེད་ངས་བ་དང་ལེ་ལོ་དང་། །མི་སྨྲ་གྱུར་དང་སྐྱོ་གྱུར་པའོ། །མ་རིག་པ་ཡང་སེམས་ལས་བྱུང་བ་སྟེ། །སྣང་བ་ཉེར་ཐོབ་མར་མེ་ལྟར་འབར་ལས། །ངོ་བོ་ཆོས་ཉིད་རྣམ་པར་མི་རྟོག་པ། །རླུང་གི་ཁམས་ཉིད་ཕྲ་བར་འཇུག་པས་ནི། །མ་ནིང་ལྟར་ནི་ཤེས་པ་མ་གཡོས་པའོ། །པདྨ་འདབ་བརྒྱད་ལྟེ་བར་ལྡན་པ་ལ། །སྟོང་པ་བཞི་བཅས་མ་ནིང་ཡི་གེ་གནས། ཧྲཱིཿནི་ཐིག་ལེ་ལྡན་པ་དབུས་སུ་དམིགས། ། སྣང་བ་ཐོབ་པ་ཉིད་ཀྱི་དོན་འདིའོ། །སྣང་བ་མཆེད་པ་ཉི་མ་ལྟ་བུར་བསྟན། །ཤིན་ཏུ་གསལ་བ་སྨིག་རྒྱུ་ལྟ་བུ་སྟེ། །དེ་ཡི་རང་བཞིན་འདོད་ཆགས་དགའ་བ་དང་། །མཆོག་ཏུ་དགའ་བ་དྲག་པོ་ལ་སོགས་པའོ། །ཀུན་རྫོབ་ཏུ་ནི་མངོན་སུམ་གྱིས་བསྟན་དང་། །སྐྱེས་པའི་གཟུགས་དང་ལྷ་ཡི་ཚོགས་དག་དང་། །མཚན་མ་རྡོ་རྗེ་ཞེས་ནི་རང་བརྟགས་པའོ། །པདྨ་དེ་ཉིད་ལྟེ་བར་ཉི་མའི་དལ། །དབུས་སུ་རྡོ་རྗེ་ཐིག་ལེ་ལྡན་པ་ལ། ཀཱ་ལི་གསལ་བྱེད་ཡི་གེ་སུམ་ཅུ་བདུན། །སྣང་བ་མཆེད་པ་དེ་ཉིད་གསལ་བའོ། །སེམས་ལས་བྱུང་བ་ལ་ནི་སེམས་ཞེས་བཤད། །ཟླ་བའི་སྣང་བ་
རབ་ཏུ་གསལ་བ་སྟེ། །ཆུ་ཡི་ཟླ་བ་ལྟ་བུར་བསྟན་པའོ། །རང་བཞིན་ཆགས་པ་དང་བྲལ་ལ་སོགས་པའོ། །ཀུན་རྫོབ་གསལ་བ་ལས་ནི་བུད་མེད་དང་། །བྷ་ག་པདྨ་ལྷ་མོའི་ཚོགས་ཀྱི་བརྡའོ། །སྔ་མ་ལྟར་ལས་ཟླ་དབུས་པདྨར་བཅས། །དབྱངས་ཡིག་ཕྱོགས་སུ་བརྐྱང་བ་འོད་འབར་བ། །མཚམས་སུ་ཟུང་བཅས་བཅུ་གཉིས་རིམ་པར་དགོད། །གསང་སྔགས་འཁོར་ལོ་རིམ་པ་ཀུན་རྫོགས་བྱེད། །དམིགས་བཅས་བཟླས་པ་སེམས་གསུམ་སྒྱུ་མར་འཆར། །འོད་གསལ་ཡེ་ཤེས་ངང་ལས་ཟུང་འཇུག་པའོ། །སྣང་བ་མཆེད་པ་བདེ་བ་སྟེ། །གཟུང་དུ་མེད་པས་ཆགས་ཞེན་བྲལ། །ཉི་མ་ལྟར་གསལ་ངང་གིས་བདེ། །འགྲོ་འོང་གནས་ཉིད་སྐད་ཅིག་མ། །མཚན་མ་བྲལ་བའི་ཏིང་ངེ་འཛིན། །གོ་འབྱེད་མུན་པ་འཇོམས་པའོ། །སྣང་བ་ཐོབ་པའི་ཡེ་ཤེས་སེམས། །རྣམ་པར་མི་རྟོག་བདག་ཉིད་ཅན། །མ་རིག་དེ་ཉིད་རྣམ་དག་པ། །མུན་པ་མེད་ཅིང་སྣང་བ་བྲལ། །སྒྲོན་མེ་ལྟར་འཆར་ལྷུན་གྲུབ་པ། །གཡོ་མེད་མི་གཡོ་རྣམ་དག་པའོ། །གནས་མེད་ཆོས་ཉིད་ངང་དུ་དག །སྟོང་དང་སྟོང་པ་ཆེན་པོ་དང་། །ཤིན་ཏུ་སྟོང་པ་དངོས་མེད་པ། །ཐམས་ཅད་སྟོང་པ་ཟག་པ་མེད། །ཉེ་བར་ཐོབ་པ་སྣང་མེད་པ། ། མཁའ་ལྟར་དག་པ་འོད་གསལ་བ། །མཉམ་མེད་གཉིས་མེད་ཕྱག་རྒྱ་ཆེ། །ལྷན་ཅིག་སྐྱེས་པ་ཆོས་ཀྱི་དབྱིངས། །ལྷག་མཐོང་དམིགས་པ་ཀུན་ལས་འདས། །ཀུན་ཁྱབ་ཞི་བ་སྤྲོས་མེད་པ། །སྟོང་ཉིད་ངང་ལས་རྟོག་པ་དང་། །མི་རྟོག་མཐའ་ལས་འདས་པ་སྟེ། །ཆོས་ཉིད་ཟབ་དང་རྒྱ་ཆེ་བའི། །རྒྱ་མཚོ་ཆེན་པོ་རང་དངོས་ལ། །རྩྭ་ཤིང་གཡོ་བཅས་སྣ་ཚོགས་པ། །སྟེང་དུ་ལྷུང་ཞིང་འགྲོ་འོང་ཉིད། །དུ་མས་ཁེབས་ཤིང་བསྐྱོད་གྱུར་ཀྱང་། །རྟོག་མེད་རང་བཞིན་གནས་མེད་པས། །རོ་གཅིག་འགྱུར་མེད་མཁའ་ལྟར་རོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་དང་པོའོ། །རྣལ་འབྱོར་ལུས་ཉིད་སྒྱུ་མ་རྨི་ལམ་ལྟར། །གནས་ལུས་ངེས་པར་འགྱུར་བ་དེ་ཉིད་ལས། །རྡོ་རྗེ་པདྨ་ཡང་དག་པར་སྦྱོར་བ་ཤེས་རབ་ཀྱི་ཡེ་ཤེས་རབ་ཏུ་འབྱུང་བ་ལས་རང་གི་རྡོ་རྗེ་སྦྱོར་བ་ལས་མེའོ། །མེ་ལས་ཆུ། ཆུ་ལས་ནུར་
ནུར་པོ་རྣམས་དང་། དེ་ནས་མེར་མེར་པོ་རྣམས་དང་། ནར་ནར་པོ་དང་། གོར་གོར་པོ་དག་གོ། །དེ་ནས་འདོད་ཆགས་དང་བྲལ་བའི་སྣང་བ་ལས་ཏེ། ཁྲག་གི་གོང་བུ་ལས་མཁྲང་འགྱུར་རྣམས་སོ། །ཁྱབ་འཇུག་རུས་སྦལ་གྱི་རྣམ་པ་ཅན་དེ་དག་ཕ་མའི་ཁུ་ཁྲག་དག་གིས་བསྐྱེད་པའོ། །དེ་ནས་དབང་པོ་གཉིས་མཉམ་པར་སྦྱོར་བའི་ཆགས་པ་ལས། འདོད་ཆགས་དང་བྲལ་བ་དང་། འདོད་ཆགས་དང་བྲལ་བ་བར་མའི་ཆ་ལས་ཤེས་པར་བྱ་སྟེ། དེ་ལས་རྩ་རྣམས་ལུས་ལ་མངོན་པར་འབྱུང་བ། སྟོང་ཕྲག་བདུན་ཅུ་རྩ་གཉིས་ལ་སོགས་པ། ཀུན་འདར་མ་དང་། རོ་མ་དང་། བརྐྱང་མ་དང་། ལྟེ་བ་དང་། སྙིང་ག་དང་། མགྲིན་པ་དང་།སྤྱི་བོ་དང་། གསང་བ་དང་། མཛོད་སྤུའི་འཁོར་ལོ་དག་དང་། ཡང་ན་སུམ་ཅུ་གཉིས་དང་། རྩ་ཁ་གསུམ་པ་དང་། རྩ་ལུ་གུ་རྒྱུད་དང་། རྩ་བའི་མིག་ལྟ་བུ་དང་། རྩ་བར་ཏ་ཀ་རིན་པོ་ཆེའི་ཕོ་བྲང་དང་། རྩ་རིག་པའི་གནས་དང་། གཞུ་ཆེན་གྱི་དབྱིབས་དང་། བདེ་སྐྱོང་ནོར་བུའི་འཁོར་ལོ་སྟེ། དབྱིབས་ཐ་དད་དུ་མ་ལས་ཡི་གེའི་རྣམ་པ་སོགས་སྲོག་ཏུ་གྱུར་པ་སྙིང་པོར་གནས་པ་ལས། ཁམས་གསུམ་པའི་འགྲོ་བའི་རྒྱུད་དཔག་ཏུ་མེད་པ་ལས་སྐྱོན་དང་ཡོན་ཏན་མཐའ་དག་གི་རྟེན་ཅན་ཏེ། དེའི་ཕྱིར་ལུས་དང་ལུས་ལས་འབྱུང་བའི་དཀྱིལ་འཁོར་དུ་འཆར་བ་ལ་སོགས་པའི་ཕྱག་རྒྱ་དང་། གསུང་གི་བཟླས་པའི་ཕྱིར་ཕྱག་རྒྱ་དང་། བསྒོམ་པའི་ཕྱག་རྒྱ་གསུམ་དུ་གྱུར་པ་དང་། ཨཱ་ལི་ཀཱ་ལི་ལས་ཡང་དག་པར་འབྱུང་བའི་སྔགས་དང་སེམས་ཀྱི་ཐབས་སུ་གྱུར་པ་ཤེས་རབ་དང་། མི་ཕྱེད་པས་བདེ་བ་ཆེན་པོ་ལྟར་དམིགས་པའོ། །ཡབ་ཡུམ་བསྲུབས་པའི་བདེ་བ་དེ་ཉིད་ལས། །གནས་སྐབས་དག་ལས་རིགས་ཀྱི་ཆ་ཐོབ་པ། །མངོན་པར་བྱང་ཆུབ་ཡེ་ཤེས་ལྔར་འབྱུང་ལས། །ལུས་རྫོགས་འབྱུང་བས་བྱ་བ་བྱེད་འགྱུར་བའོ། །ཆོས་རྣམས་ཀུན་ནི་བདག་ཏུ་བསྒྲུབ་པ་དང་། །བདག་ནི་ལྷར་བསྒྲུབ་ལྷ་ཉིད་ཡེ་ཤེས་སོ། །གཟུགས་ལ་སོགས་པའི་ཡུལ་དབང་པོ་གཉིས་ཐབས་སུ་གྱུར་པའོ། །རྡོ་རྗེ་དང་པདྨ་ཡང་དག་པར་སྦྱོར་བ་ནི། སེམས་དང་སེམས་ལས་འབྱུང་བ་
དག་གི་ཐབས་སུ་གྱུར་པའོ། །སེམས་ལས་བྱུང་བ་མཉམ་པར་སྦྱོར་བའི་བདེ་བ་ཆེན་པོའི་ཏིང་ངེ་འཛིན་གྱིས་ཐབས་ཤེས་རབ་རོ་མཉམ་པར་གྱུར་པའོ། །དེ་སྒྱུ་མ་ལྟ་བུའི་དཔེ་ཉེ་བར་མཚོན་ཏེ། དེ་ནས་དེ་བཞིན་གཤེགས་པ་གངྒའི་བྱེ་མ་སྙེད་ཀྱི་ཞིང་ཁམས་རྣམས། སྒྱུ་མ་ལྟ་བུ་དང་། ཆུ་ཟླ་དང་། མིག་ཡོར་དང་། སྨིག་རྒྱུ་དང་། རྨི་ལམ་དང་། སྒྲ་བརྙན་དང་། དྲི་ཟའི་གྲོང་ཁྱེར་དང་། མིག་འཕྲུལ་དང་། དབང་པོའི་གཞུ་དང་། གློག་དང་། ཆུ་བུར་དང་། མེ་ལོང་ནང་གི་གཟུགས་བརྙན་ལྟ་བུ་སྟེ། སྒྱུ་མའི་དཔེ་བཅུ་གཉིས་ཀྱིས། བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པའི་ཚུལ་ལོ། །རྡོ་རྗེ་ལུས་ཀྱི་རྩ་དང་རླུང་། །ཡི་གེ་ཐིག་ལེ་གནས་པ་དག །དབྱངས་དང་གསལ་བྱེད་ཚོགས་རྣམས་ལས། །ཐབས་དང་ཤེས་རབ་རོ་མཉམ་འཆར། །གསལ་དང་བདེ་བ་བརྟེན་པ་ཉིད། །མི་རྟོག་ཆོས་ཉིད་དང་ལས་ནི། །རླུང་དང་ཤེས་པ་མཉམ་དུ་ཡང་། །འབྱུང་འཇུག་གནས་པ་ཉིད་ཡིན་ནོ། །ཆོས་ཉིད་སྣང་བ་ཀུན་གཞི་སྟེ། །རྣམ་ཤེས་མ་བཅོས་རང་གསལ་བ། །སྒྲིབ་མེད་རང་བྱུང་ཀུན་ཏུ་ནི། །གཡོ་བཅས་འགྱུར་མེད་ཀུན་ཏུ་ནི། །དེ་ཉིད་གནས་པ་རྟེན་གྱུར་པའོ། །རྣམ་པ་སེམས་བྱུང་འཆར་བ་ཡང་། །དུ་མ་ཉིད་ནི་གོ་རིམས་དང་། །གོ་རིམས་མེད་པའི་རང་བཞིན་རྣམས། །རྟོག་པའི་འདུ་འཕྲོ་རྐྱེན་གྱིས་བསྒྱུར། །ཆགས་བྲལ་གསུམ་དུ་འབྱུང་བ་ཉིད། །ཡིད་ལ་བྱེད་པ་འགྲོ་འོང་དང་། །རིག་པ་རྒོད་པར་བྱེད་དང་ཡིད་འབྱུང་བའོ། །མྱ་ངམ་གསུམ་ནི་མ་དད་པ། །ཞེ་སྡང་མེད་པས་ཞི་བར་གནས། །ཀུན་ཏུ་རྟོག་པ་ཁོང་ཁྲོ་བ། །འཇིགས་པ་ཙམ་མོ་འཚིག་པ་སྟེ། །རེག་པ་ཁྲེ་བོའི་སྤྱོད་པ་དང་། །འཁོན་དུ་འཛིན་ཉིད་འཇིགས་ཆེན་པོ། །སྲེད་པ་ཆེ་འབྲིང་གསུམ་འབྱུང་བ། །ཉེར་ལེན་བཞི་སྟེ་འཆབ་པ་ཅན། །མི་དགེ་བཀྲེས་སྐོམ་གདུང་བ་པོ། །རིག་འཛིན་ཡིད་ལ་བྱེད་པ་བཞི། །རིག་པ་པོ་སྟེ་གནས་པ་ལས། །ཚོམ་པར་བྱེད་པ་ཚོར་བ་ནི། །རྣམ་པ་གསུམ་སྟེ་སེམས་པའོ། །གཉིད་དང་འགྱོད་པ་རྟོག་དཔྱོད་པ། །ངོ་ཚ་ཤེས་དང་བག་ཡོད་པ། །རྣམ་པར་མི་འཚེ་སྙིང་རྗེ་དང་། །བརྩེ་བ་བྱམས་
པ་གསུམ་གསུམ་དང་། །དོགས་དང་བསགས་པ་སེར་སྣ་དང་། །ཕྲག་དོག་རྟོག་པ་རང་བཞིན་ཏེ། །སྣང་བའི་ངང་དུ་སྤྲོ་ཞིང་སྡུད། །ཆགས་པ་ཞེན་དང་དགའ་བ་དང་། །དགའ་ཞིང་ཤིན་ཏུ་དགའ་བ་སྟེ། །འདོད་ཆགས་རྟོགས་པར་འབྱུང་བའོ། །བདེ་བས་ཡི་རངས་གཏི་མུག་མེད། །རབ་ཏུ་མགུ་བ་ཤེས་རབ་དང་། །ངོ་མཚར་དགོད་པར་བྱེད་དང་ཚིམ། །འཁྱུད་པ་ཁ་སྤྲོད་འཇིབ་པ་དང་། །རྟེན་པ་དེ་ཉིད་ཏིང་འཛིན་ཏེ། །བརྩོན་འགྲུས་བྱེད་དང་རྒྱལ་བ་དང་། །བྱ་དང་འཕྲོག་པ་ལས་གྱུར་ཡིན། །སྟོབས་ངོམ་རྒྱགས་པ་དྲེགས་བྱེད་དོ། ། མོས་པས་སྤྲོ་བར་གྱུར་པ་སྟེ། །ལྷན་ཅིག་སྐྱེས་བདག་བཏང་སྙོམས་སོ། །ཐ་དད་མེད་པ་ཤིན་ཏུའོ། །དྲུག་པོ་རྣམ་སྒེག་ཞེ་འགྲས་བྱེད། །བག་ཡོད་པ་ཡི་དགེ་བ་སྟེ། །ཚིག་གསལ་བདེན་སྨྲ་དད་པ་དང་། །གཡོ་མེད་དྲན་པ་ལྡན་པ་ཅན། །མི་བདེན་པ་དང་དེ་བཞིན་ངེས། ། ཤེས་བཞིན་མ་ཡིན་མ་ངེས་པ། །ཉེ་བར་མི་ལེན་མ་ཆགས་སེམས། །སྦྱིན་བྱེད་བསྐུལ་བ་མདུན་པ་ཉིད། །དེ་བཞིན་དེས་དང་ངོ་ཚ་མེད། །དཔའ་བས་རྣམ་པར་འཚེ་བྱེད་པ། །བག་མེད་པ་དང་ཁྲེལ་མེད་པ། །ཤེས་བཞིན་བྲལ་བ་མ་ཡིན་པ། །གཡོ་སྒྱུ་སྟོན་པས་མི་བསྲུན་དང་། །གྱ་གྱུར་བྱེད་པ་རྒོད་བག་ཅན། །འདི་དག་རྟོག་པ་འབྱུང་བ་སྟེ། །སྣང་བ་མཆེད་པའི་ཤེས་པ་ལས། །ཀུན་ཏུ་རྒྱུ་ཞིང་འཇུག་པར་བྱེད། །མཚན་ཉིད་འདི་དག་བསྟན་པའོ། །ཆགས་པ་བར་མའི་སྐད་ཅིག་མ། །མ་རིག་པ་ཉིད་མིན་པ་ལྟར། །འཐིབས་ཤིང་སྣང་བ་མེད་པའོ། །བརྗེད་ངས་པ་དང་རྨུགས་པའོ། །འཁྲུལ་ཆེན་ལོག་པར་ལྟ་བ་ཅན། །བརྗོད་མེད་འགོག་པས་འཇུག་པ་ཟད། །སྐྱོ་ཞིང་ལེ་ལོ་སྙོམ་ལས་བྱེད། །ཐེ་ཚོམ་གྱུར་པ་ཡིད་དཔྱོད་པ། །མ་ནིང་འབྱུང་བ་ཕྲ་བ་དང་། །རགས་པ་སྐྱེ་འགག་གནས་པ་ལས། །བག་ཆགས་དྲི་མའི་རྟོག་པ་ཀུན། །སྣང་བ་ཐོབ་པའི་དེ་ཉིད་དུ། །སྟོང་ཉིད་སྤྲོས་པ་བྲལ་གྱུར་པས། །རྣམ་པར་དག་པ་འོད་གསལ་བའོ། །ནང་གི་རྣམ་པར་ཤེས་པ་དེ་ཉིད་ནི། །ལྷན་ཅིག་སྐྱེས་པའི་ཆོས་ཉིད་རྟོག་མེད་པ། །འོད་གསལ་ངོ་བོ་སྟོང་ཞིང་བདག་མེད་པ། །རླུང་གིས་བསྐྱོད་པས་
མཚན་མའི་རྣམ་པར་བྱུང་། །དེ་ཡི་སྐད་ཅིག་རང་བཞིན་འབྱུང་འཇུག་པ། །མཚན་མ་སྣང་བ་གསུམ་དུ་མངོན་པར་འབྱུང་། །དེ་བས་ན་འདི་དག་ངེས་པར་རྟོགས་པས་ཇི་ལྟར་འོ་མ་དང་། ཏིལ་དག་གིས་ཡང་དག་པའི་མངོན་པར་འདུ་བྱ་བ་མེད་པ་དང་། ཏིལ་མར་གྱི་འབྱུང་བ་དེ་བཞིན་དུ་སྔགས་དང་ཕྱག་རྒྱ་མངོན་པར་འདུ་བྱ་བའི་རྡོ་རྗེ་དང་པདྨ་མཉམ་པར་སྦྱོར་བ་མེད་པར་རྣམ་པར་ཤེས་པ་གསུམ་ཉེ་བར་བརྟག་པར་མི་ནུས་སོ། །གང་དུ་རླུང་མེད་ན་ཀུན་གཞི་རྟེན་པ་མེད་པའོ། །གང་དུ་ཀུན་གཞིའི་རྟེན་པ་མེད་ན་རྣམ་པར་ཤེས་པར་མི་འགྱུར་རོ། །རྣམ་པར་ཤེས་པ་ཉིད་མེད་ན་གང་བྷ་ག་དང་ལིངྒ་ཡང་དག་པར་སྦྱོར་བར་ནུས་པ་མེད་དེ། དེས་ནི་བདེ་བ་ཆེན་པོའི་ཏིང་ངེ་འཛིན་མི་རྙེད་དོ། །ཇི་ལྟར་འོ་མ་བསྲུབས་པ་ལས་མར་དང་། ཇི་ལྟར་ཏིལ་མར་ཏེ། དེ་བཞིན་དུ་རྡོ་རྗེ་ཐབས་ཀྱི་ཡེ་ཤེས་ཉེ་བར་བརྟག་པའི་ཕྱིར་དང་། པདྨ་ཤེས་རབ་ཀྱི་ཡེ་ཤེས་ཉེ་བར་བརྟག་པའི་ཕྱིར་རོ། །ཡུལ་འཇུག་པ་མེད་ཅིང་། དེ་ལ་སེམས་པ་མེད་པས། རྣམ་པར་ཤེས་པའི་བཞོན་པ་རླུང་མེད་དོ། །དེ་མེད་པས་ཕྱི་རོལ་འབྱུང་བ་ཆེན་པོ་བཞི་དང་། ནང་ཁམས་དང་སྐྱེ་མཆེད་མེད་པར་འགྱུར་ཏེ། སྣང་བ་གསུམ་དུ་དམིགས་པ་ཡང་མི་འབྱུང་བས། ཡང་དག་པའི་མཐའ་ལ་རབ་ཏུ་འཇུག་པ་མེད་པ་ན། ཟུང་དུ་འཇུག་པར་མི་འགྱུར་རོ། །བྱང་ཆུབ་སེམས་ཀྱི་ངོ་བོ་ཉིད། །བླ་མ་རྡོ་རྗེ་འཛིན་པ་ལ། །མོས་གུས་མཐར་ཕྱིན་གྱུར་པས་ནི། །ལམ་གྱི་རིམ་པ་ཀུན་རྫོགས་པ། །སྒྲིབ་དག་ཡོན་ཏན་ཐོབ་པ་སྟེ། །དབང་གི་རྒྱལ་བ་རྙེད་པ་བཞིན། །ལས་དང་དངོས་གྲུབ་མ་ལུས་པ། །ཡེ་ཤེས་མི་ཟད་གནས་ཐོབ་བོ། །གང་རྣལ་འབྱོར་ལམ་གྱི་རིམ་པ་ཐམས་ཅད་ཅིག་ཅར་དུ་རྫོགས་པ་བདེ་བ་ཆེན་པོའི་ཏིང་ངེ་འཛིན་གྱིས་ལྷག་པར་མོས་པ་ཙམ་གྱིས། ལས་དང་པོ་པ་ལ་གནས་པར་འགྱུར་ཏེ་ཕྱིར་མི་ལྡོག་པ་ལ་ཡང་གནས་པར་འགྱུར་རོ། ། དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་གཉིས་པའོ། །སྤྱི་དོན་མདོ་ལྟར་སྟོན་པ་བདག་མེད་པ། །ཨེ་ནི་ཆོས་ཏེ་བྃ་ནི་གང་ཟག་གིས། །སྟོང་པ་ཞི་བ་དངོས་པོ་མེད་པ་ཉིད། །ཕུང་པོ་ཁམས་དང་སྐྱེ་མཆེད་ཐམས་ཅད་ཀུན། །རང་བཞིན་མེད་པའི་ཆོས་
རྣམས་ཐམས་ཅད་བྲལ། །བླང་དོར་མེད་པའི་ཡེ་ཤེས་མཉམ་པ་ཉིད། །ཨེ་ནི་སྟོང་ཉིད་སྤྲོས་དང་བྲལ་བ་ལས། བཾ་ནི་ཐབས་མཆོག་སྙིང་རྗེ་ཆེན་པོར་བསྟན། །གཉིས་མེད་མཉམ་པ་བྱང་སེམས་རོ་གཅིག་པའོ། །རྣམ་ཐར་སྒོ་གསུམ་ཕ་རོལ་ཕྱིན་པ་དྲུག ། ཚད་མེད་བཞི་དང་བསྡུ་བའི་དངོས་པོ་བཞི། །བྱང་ཆུབ་ཕྱོགས་ཆོས་སུམ་ཅུ་རྩ་བདུན་ཏེ། །སོ་སོ་ཡང་དག་རིག་དང་མ་འདྲེས་ཆོས། །སྟོབས་བཅུ་མི་འཇིགས་བཞི་དང་བསྲུང་བ་མེད། །མཁྱེན་པ་རྒྱས་པ་དེ་ཉིད་ཀུན་ཁྱབ་མཛད། །ཨེ་བྃ་བརྟན་གཡོ་སྣང་དང་སྟོང་པ་ལས། །ཕུང་པོ་ཁམས་དང་སྐྱེ་མཆེད་ཐམས་ཅད་ནི། །ལྷ་ཡི་བདག་ཉིད་དཀྱིལ་འཁོར་དག་ཏུའོ། །ཡིག་དོན་སྒྲ་དང་ཐ་སྙད་དུ་མ་རྣམས། །བརྟགས་པ་མེད་དེ་སྣ་ཚོགས་རྐྱེན་གྱུར་ལས། །རྒྱུ་འབྲས་རབ་བྱེད་སྒྱུ་མར་སྣང་བ་ཀུན། །འཇིག་རྟེན་རིགས་བྱེད་མཚོན་བྱེད་སྒྲ་ལྡན་པའོ། །འདོད་ཆགས་ཆོས་ཀྱི་སྦས་པ་ཞེས་བྱ་བ། །རྣལ་འབྱོར་ཐབས་དང་ཤེས་རབ་མཉམ་སྦྱོར་ལས། །སྣ་ཚོགས་དགའ་བ་དང་པོ་རྗེས་ཆགས་དང་། །རྣམ་པར་སྨིན་པ་མཆོག་ཏུ་བདེ་བ་ཉིད། །མཚན་ཉིད་བྲལ་བ་སྐད་ཅིག་ལྷན་ཅིག་སྐྱེས། །བདེ་བ་མི་འགྱུར་ཡེ་ཤེས་ཕྱག་རྒྱ་ཆེ། །རྣམ་པར་ཉིད་པ་དགའ་བྲལ་རྗེས་ལའོ། །དེ་ཉིད་སྙིང་པོ་བླ་མེད་བྱང་ཆུབ་སེམས། །བདེ་སྟོང་དབྱེར་མེད་བྱང་ཆུབ་ཆེན་པོའོ། །ཀུན་དབྱང་སེམས་ཡེ་ཤེས་མེས་སྦྱངས་པས། །ཟག་མེད་བདེ་བས་ལུས་སེམས་རྣམ་དག་པའོ། །འཇིག་རྟེན་ཀུན་དུ་བརྟན་པ་སྣ་ཚོགས་པ། །དེ་རྟེན་འབྱུང་བ་འདུས་པའི་རི་རབ་དང་། ། གཞལ་མེད་ཁང་སོགས་དངོས་པོ་འཁྲུལ་ལས་སྣང་། །བརྟེན་པ་འགྲོ་བརྒྱུད་ཁམས་གསུམ་སེམས་ཅན་ཀུན། །སྒྱུ་མ་ལྟ་བུར་སྐྱེ་ཞིང་འགག་པར་འགྱུར། །འཁོར་བ་ཡུལ་དང་དབང་པོ་རྟོག་པར་བྱུང་། །དེ་བཞིན་གཤེགས་པ་བྱིན་གྱིས་བརླབས་པ་ལས། །ཟློག་བྱེད་ཡང་དག་ཀུན་རྫོབ་ལམ་བསྟན་པས། །དངོས་པོ་མཚན་མར་འཛིན་པ་ལས་ལོག་ནས། །རང་བཞིན་བདེན་དོན་རྟོགས་པས་བྱང་ཆུབ་ཐོབ། །འོད་གསལ་བ་ཡི་དེ་ཉིད་ནི། །ཤེས་པ་སྤྱི་ཡི་ཁྱད་པར་ལས། །དེ་ལས་སེམས་ནི་མ་བཅོས་པ། །གནས་ལུགས་ཕྱོགས་སུ་མ་ལྷུང་བས། །དེ་ཡང་རྟོག་
མེད་ཆོས་ཉིད་ཀྱི། །སྣང་བ་གསུམ་དུ་མངོན་པར་འབྱུང་། །ཡུལ་དང་ཡུལ་ཅན་གནས་སྐབས་ལས། །རྒྱ་མཚོ་རབ་ཏུ་དངས་པ་ལས། །དེ་ལས་རླུང་གིས་བསྐྱོད་གྱུར་པས། །རྦ་རླབས་འབྱུང་བ་ཇི་བཞིན་དུ། །རང་བཞིན་སེམས་བྱུང་རྟོག་ཚོགས་བྱུང་། །གནས་རྒྱུ་དུས་དང་རྐྱེན་དབང་གིས། གནས་ན་འོད་གསལ་སྟོང་ཉིད་ལས། །རྒྱུ་ནི་རླུང་སེམས་དབྱེར་མེད་པས། །དུས་གསུམ་དུས་མེད་སྐད་ཅིག་མར། །ངོ་བོ་སྟོང་པ་རླུང་གིས་བསྐྱོད། །རྐྱེན་ལས་མཚན་མའི་ཆོས་སུ་སྣང་། །གནས་སྒྲུབ་བྱེ་བྲག་ཐ་དད་པས། །རྣམ་ཤེས་དེ་ཉིད་འབུལ་བ་དང་། །མ་འཁྲུལ་པ་ལས་ཁྱད་པར་དུ། །དགེ་དང་མི་དགེ་སྣ་ཚོགས་ལས། །བདེ་སྡུག་ཉམས་སུ་མྱོང་གྱུར་པས། །ལས་དང་ཉོན་མོངས་བག་ཆགས་ལས། །ལུས་ངག་ཡིད་ཀྱིས་སྤྱོད་པར་སྣང་། །མ་དག་དག་བྱེད་བླ་མ་ཡི། །གདམས་པས་ཀུན་ལས་གྲོལ་བར་འགྱུར། །བསོད་ནམས་བསོད་ནམས་མ་ཡིན་ལས། །རྒྱུ་འབྲས་སྣ་ཚོགས་སྣང་བ་ཡང་། །ནམ་མཁའ་ལྟ་བུའི་ངང་ལས་ནི། །ནམ་མཁའ་ལྟ་བུའི་ཆོ་འཕྲུལ་བྱུང་། །དེ་ཉིད་སྐྱེ་མེད་རང་བཞིན་ལས། །འགག་པ་མེད་པར་གནས་པའོ། །རྟེན་ཅིང་འབྲེལ་པར་འབྱུང་བ་སྟེ། །དེ་ཉིད་བདག་མེད་ཆོས་ཉིད་ལས། །སྤྲོས་མེད་དངོས་དང་དངོས་མེད་ཀྱི། །མ་འདྲེས་ཡོངས་རྫོགས་གནས་མེད་པའོ། །རྒྱར་ནི་གོ་རིམས་བཞིན་དུ་གནས་པ་ལ། །སྡུད་བྱེད་གོ་རིམས་འཆོལ་བ་འཁོར་ལོ་བརྟན། །དམ་ཚིག་ཀུན་ལྡན་ཕྱག་རྒྱ་སྙིང་པོ་ཉིད། །ཀུན་དོར་འབྱུང་ལྔ་ལྷ་མོ་རྡོ་རྗེ་དབྱིངས། །བདེ་ཆེན་རྡོ་རྗེ་གསང་བ་ཕུན་སུམ་ཚོགས། ། དེ་ཉིད་མི་འགྱུར་འབྱུང་གནས་ཐིམ་གྱུར་གང་། །སྐད་ཅིག་རྒྱན་རྫོགས་བུམ་པ་གང་བ་ལྟར། །བདུད་རྩི་གཙུག་ཏོར་ཡེ་ཤེས་རྒྱལ་བར་གྱུར། །རྗོད་བྱེད་འབྲུ་གསུམ་བརྗོད་བྱ་བཛྲ་དྷྲྀཀ །བྱ་བ་རྫོགས་པའི་རྣམ་པར་སྐྱེ་བ་སྟེ། །སྣང་བ་ཐོབ་པ་ལྷན་ཅིག་ཏུ་གནས་[པས་]ཡུལ་ལྡན་པ་སྣང་བ་མཆེད་པ། རྟོག་ཅིང་བའི་བྱེ་བྲག་ལ་རིག་པ་འཇུག་པས་བྲད་པ་སྣང་བའོ། །བྱམས་པས་གསོལ་བ། སྦས་པའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཀུན་རྫོབ་བདེན་པས་སྦས་པ་ནི་གང་དུ་སྣོད་བཅུད་མ་ལུས་པ་སྣང་བ་སྒྱུ་མ་ལྟ་བུར་བདག་བྱིན་གྱིས་བརླབ་པ་རང་བཞིན་གྱིས་བདེན་
པ་རྣམ་པར་དག་པའོ། །སེམས་སྣང་བ་གསུམ་གྱིས་སྦས་པ་ནི་གང་ཆོས་ཉིད་ལས་ཡང་དག་པར་འབྱུང་བ། ཐོབ་པ་དང་། མཆེད་པ་དང་། སྣང་བ་ནི་སེམས་ཡེ་ཤེས་ཀུན་ཏུ་རྣམ་པར་རྟོག་པ་མེད་པ་བཞིན་དུ་རང་བཞིན་དང་བཅས་པར་འབྱུང་བའོ། །ཆོས་ཀྱིས་སྤས་པ་ནི་བདེ་བའི་དོན་གང་རྡོ་རྗེ་དང་པདྨ་མཉམ་པར་སྦྱར་བའི་བདེ་བས། རང་བཞིན་རྣམ་པར་དག་པའི་སྣང་བ་གསུམ་ཉེ་བར་མཚོན་པར་བྱེད་པ་དེ་ནི། བདེ་བ་ཆེན་པོའི་གོ་འཕང་རབ་ཏུ་གནས་པར་འགྱུར་རོ། །འདི་ནི་སྦས་པའི་བཤད་པའོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་གསོལ་བ། བཅོམ་ལྡན་འདས་སྤྱིའི་དོན་ཅི་ལགས། བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ལ་སོགས་པ་འདོད་ཆགས་དང་བྲལ་པའི་ཆོས་ལ་སྤྱོད་པ། རྣམ་པར་རྟོག་པའི་བག་ཆགས་ལས་མ་གྲོལ་བ། རྣལ་འབྱོར་ཆེན་པོའི་རྒྱུད་མཐའ་དག་ཏུ། རྡོ་རྗེ་བཙུན་མོའི་བྷ་ག་ལ་བཞུགས་ཞེས་བྱ་བ་ལ་སོགས་པའི་འདོད་ཆགས་ཀྱི་ཆོས་གསལ་བར་བྱེད་པ་ངོ་མཚར་གྱི་རྡོ་རྗེའི་ཚིག་ཐོས་ནས་སྨོད་པར་བྱེད་པ་དེ་རྣམས་ལས་མི་འགལ་བའི་སྒོ་ནས་བཤད་པ་དེ་ནི་སྤྱིའི་དོན་དུ་གསུངས་པའོ། །བྱམས་པས་གསོལ་པ། ཡི་གེའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཡང་ཨཱ་ལི་ཀཱ་ལི་སྒྲའི་དོན་ལ་བརྟེན་ནས་རྗོད་པར་བྱེད་པ། བརྗོད་པའི་མཐའི་བྱེད་པ། མཐའ་དང་བརྗོད་པ་རྐྱེན་རྣམས་ལས་རྣམ་པར་འབྱུང་བ། རབ་ཏུ་བྱེད་པ་དང་བཅས་པ་ཐ་སྙད་སྣ་ཚོགས་པ་ལ་བརྟེན་ནས་ཆ་ཤས་ཙམ་དུ་བསྟན་པའོ། །བྱམས་པས་གསོལ་པ། ཐུན་མོང་མ་ཡིན་པ་བླ་ན་མེད་པ་འདི་ལྟར་མཐར་ཐུག་པར་བཤད་པ་ཇི་ལྟར་བཤད་པ་ལགས། དེ་ནས་བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ལེགས་སོ་ཞེས་བྱ་བ་བྱིན་ནས། ལེགས་སོ་ལེགས་སོ། །བྱང་ཆུབ་སེམས་དཔའ་སྙིང་རྗེ་མཆོག་དང་ལྡན་པ་ཉོན་ཅིག །མཐའ་ནི་མུ་སྟེ། འོད་གསལ་བ་ཡང་དག་པའི་ཚུལ་ཞེས་བྱ་བ་མཐར་ཐུག་པའོ། །མཐའ་ལྡན་མཐའ་བཅས་གྲོལ་བ་ཡང་དག་མཐའ། །མཐའ་ཉིད་བཟློག་བྲལ་གྲུབ་མཐའ་ལས་འདས་པའོ། །བྱང་ཆུབ་སེམས་དཔའ་ཆེན་པོས་གསོལ་པ།
བཅོམ་ལྡན་འདས་ཐབས་གང་གིས་མཐར་ཐུག་ཐོབ་པ་ལགས། བཅོམ་ལྡན་འདས་ཀྱིས་བཀའ་སྩལ་པ། ཕུང་པོ་དང་ཁམས་དང་སྐྱེ་མཆེད་ལ་སོགས་པའི་མཐའ་སྣང་བ་གསུམ་ལས་སྟོང་པ་གསུམ་མོ། །དམིགས་པ་མེད་པ་སྒྱུ་མ་ལྟ་བུ་ལས་སྟོང་པ་གསུམ་གྱི་མཐའ་བདེ་སྟོང་འོད་གསལ་བའོ། །བྱང་ཆུབ་སེམས་དཔའ་ཆེན་པོས་གསོལ་པ། སྟོང་པ་གསུམ་འོད་གསལ་བའི་མཐར་ཇི་ལྟར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། ཇི་ལྟར་མེས་ཤིང་བསྲེགས་པ་སྟེ་འབར་བར་བྱེད་པ་དེ་བཞིན་དུ་འོད་གསལ་བར་ཤེས་རབ་ཀྱི་སྣང་བ་ཡེ་ཤེས་ཡུན་རིང་པོས་རྣམ་པར་སྤྱོད་པར་བྱེད་དོ། །ཇི་ལྟར་ཏ་ལའི་ལོ་མ་ཡང་འབར་བར་བྱེད་པ་དེ་བཞིན་དུ་སྟེ་འོད་གསལ་བར་བྱེད་པ་དེ་བཞིན་དུ་ཐབས་ཀྱིས་ཡེ་ཤེས་ལ་མཆེད་པ་རྣམ་པར་སྦྱོང་བར་བྱེད་དོ། །ཇི་ལྟར་རས་བལ་གྱི་འདབ་མ་བསྲེགས་པ་དེ་བཞིན་དུ་སྣང་བ་ཐོབ་པའི་ཡེ་ཤེས་མཆོག་ཏུ་གྱུར་པས་རྣམ་པར་སྦྱོང་བར་བྱེད་དོ། །དེའི་ཕྱིར་ཤིང་ཏ་ལའི་ལོ་མ་དང་རས་བལ་གྱི་འདབ་མ་བསྲེགས་པས་འབར་ཞིང་ཐལ་བར་གྱུར་པ་དེ་བཞིན་དུ་སྟོང་པ་དང་། སྟོང་པ་ཆེན་པོ་དང་། ཤིན་ཏུ་སྟོང་པ་དང་། ཐམས་ཅད་སྟོང་པ་རྣམས་སྣང་བ་ཉེ་བར་ཐོབ་པ་འོད་གསལ་བར་འགྱུར་རོ། །འོད་གསལ་དོན་དམ་བདེན་པ་ཉིད། །མཉམ་ཉིད་ཡེ་ཤེས་རྟོགས་པས་ནི། །དབྱིངས་ཀྱི་དང་དུ་རྟོག་པའི་ཚོགས། །མ་དག་གཉེན་པོའི་བྱེད་པ་དང་། །རྒྱུ་རྐྱེན་ཡུལ་སྤྱོད་དངོས་པོ་ཀུན། །རྟོག་མེད་རང་འབྱུང་མེ་འབར་བས། །ཤིང་གི་བྱེ་བྲག་སྣ་ཚོགས་དང་། །རས་བལ་ཕུང་པོ་དུ་མ་ཡང་། །ཚིག་ཅིང་དངོས་མེད་བྱེད་པ་ལྟར། །དེ་བཞིན་གཟུགས་འཛིན་མ་ལུས་པ། །ཆོས་ཀྱི་དབྱིངས་ཀྱི་གནས་ཉིད་དུ། །བསྲེགས་ཤིང་ཐིམ་གྱུར་མི་གནས་པའོ། །རྡོ་རྗེ་ལྟ་བུའི་ཏིང་འཛིན་གྱིས། །ཀུན་རྟོག་མ་ལུས་བཅོམ་གྱུར་པའི། །རྣམ་པར་དག་པའི་ཡེ་ཤེས་ཀྱི། །མཁྱེན་པ་བྱང་ཆུབ་སེམས་ཀྱི་རྒྱུན། །མི་འགག་ཕྲིན་ལས་རྒྱུན་མི་འཆད། །མི་འགྱུར་སྟོང་ཉིད་བདེ་ཆེན་པོ། །ཟུང་འཇུག་རབ་ཏུ་མི་གནས་པ། །ཐོབ་ཏུ་མེད་ལས་ཀུན་དུ་འབྱུང་། །ལྷུན་གྲུབ་དེ་བཞིན་ཉིད་གནས་པའོ། །དེ་ཁོ་ན་ཉིད་ལས་རྟོག་པ་དང་མི་རྟོག་པ་རྣམ་པར་དག་པར་གྱུར་པས། ཪང་བཞིན་
སློབ་པ་དང་མི་སློབ་པའི་བྱེ་བྲག་གིས་རབ་ཏུ་མི་གནས་པའི་ངོ་བོར་འགྱུར་རོ། །འདི་ནི་མཐར་ཐུག་པའི་བཤད་པ་གསུངས་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་གསུམ་པའོ། །བྱམས་པས་གསོལ་པ། བཅོམ་ལྡན་འདས། རྣལ་འབྱོར་གྱི་རྒྱུད་དུ་དེ་བཞིན་གཤེགས་པ་ཐམས་ཅད་ཀྱིས་མཐའ་དྲུག་གིས་བཤད་པ་ཇི་ལྟར་ལགས། །བཅོམ་ལྡན་འདས་ཀྱིས་བཀའ་སྩལ་
པ་དགོངས ་པས་བཤད་པ་དང་ དགོངས་པ ་མ་ཡིན་པས་བཤད་པ་དང་། དྲང་བའི་དོན་དང་། ངེས་པའི་དོན་དང་། སྒྲ་ཇི་བཞིན་པ་དང་། སྒྲ་ཇི་བཞིན་མ་ཡིན་པ་རྣམས་སོ། །བྱམས་པས་གསོལ་པ། ཐུགས་བརྩེ་བ་ཉེ་བར་གཞག་ཅིང་། བཅོམ་ལྡན་འདས་ཚིག་རེ་རེའི་དབྱེ་བ་བསྟན་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། མཐར་ཐུག་པས་བཤད་ པ་དེ་ཉིད་དགོངས ་པས་འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བ་བཤད་པ་ནི་འདི་ལྟ་སྟེ། འདོད་ཆགས་མ་ཡིན་པ་དང་། འདོད་ཆགས་དང་བྲལ་བ་ཡང་མ་ཡིན་པ་དང་། བར་མ་དབུ་མ་ཉེ་བར་མི་དམིགས་པ་ཞེས་བྱ་བ་ལ་སོགས་ པ་རྡོ་རྗེའི་ཚིག་རྣམས་ནི་དགོངས ་པས་བཤད་པའོ། །བདེ་བ་ཟག་བཅས་མ་ཡིན་ཏེ། །ཟག་པ་མེད་པའི་བདེ་བ་ཉིད། ། བདེ་བ་སྤངས་ཤིང་འབྲས་མེད་པས། །སྒྱུ་མ་ལྟ་བུར་བྱུང་བ་སྟེ། །དེ་ཉིད་བདེ་བའི་ཡེ་ཤེས་ནི། །དབུ་མ་ཙམ་དུའང་མི་དམིགས་སོ། །གང་ཟག་དབང་པོ་དམན་པ་རྣམས། །སྐྲག་བྱེད་འགལ་བ་ལྟར་སྣང་ངོ་། །དབང་པོ་མཆོག་རྣམས་ཆོས་ལ་ནི། །སྔོན་ཆད་མ་བྱུང་ཆོས་ཐོས་པས། །ངོ་མཚར་ངེས་ཤེས་སྐྱེས་པ་ཡིས། །རྨད་དུ་གྱུར་པའི་ཏིང་འཛིན་ཐོབ། །རྣམ་པར་གྲོལ་ཐོབ་མཚན་ཉིད་དོ། །ཕྱི་རོལ་གསང་བར་སྨྲ་ལ་སོགས། །མ་དག་དག་པར་འདོད་པ་དང་། །མ་གྲོལ་གྲོལ་འདོད་དགག་པ་དང་། །རང་གར་འཇུག་པ་དགག་པའི་ཕྱིར། །ཅུང་ཟད་འཇིག་རྟེན་བརྟགས་པ་ལས། །བཟློག་ཕྱིར་ཡེ་ཤེས་ཟབ་མོའི་དོན། །གནས་ལུགས་འཁྲུལ་ པ་རྣམ་དག་སྟེ། །དེ་ཉིད་སྙིང་པོ་དགོངས ་ཏེ་བཤད། །ལུས་དང་ངག་དང་ཡིད་མེད་པ་དང་། བདག་མེད་པ་དང་། ཐམས་ཅད་སྟོང་པ་དང་། དག་པ་དང་། འོད་གསལ་བ་ཞེས་བྱ་བ་ལ་སོགས་པའི་རྡོ་རྗེའི་ཚིག་ནི་
དགོངས་པ ་མ་ཡིན་པས་བཤད་པའོ། །ཆོས་ཐམས་ཅད་ལ་དངོས་པོ་དང་མཚན་མར་འཛིན་པ་དང་། བདག་ཏུ་འཛིན་པ་ལ་ དགོངས་པ ་མ་ཡིན་པའི་ཕྱིར་ དགོངས་པ ་མིན་ཏེ། ཆོས་ཐམས་ཅད་བདག་མེད་པར་སྟོན་ཅིང་སྤྲོས་མེད་དེ་བཞིན་ཉིད་ལས་སྟོང་པ་ཉིད་དུ་སྟེན་པ་དང་། ཆོས་ཐམས་ཅད་ནི་རང་བཞིན་གྱིས་རྣམ་པར་དག་པ་དང་། ལུས་མེད་པ་སྟེ་ཕུང་པོ་དང་ཁམས་དང་སྐྱེ་མཆེད་མི་དམིགས་པ་དང་། བརྗོད་པ་ལས་འདས་པས་བདག་མེད་པ་དང་། ངོ་བོ་ཉིད་ཀྱིས་སྟོང་པའི་ཕྱིར་ཡིད་མེད་ པ་ནི་དགོངས ་མིན་དུ་བཤད་པའོ། །ག་པུར་དང་། ཁྲག་ཆེན་པོ་དང་། ཙནྡན་དམར་པོ་དང་རྡོ་རྗེ་དང་། པདྨ་དང་། ཡི་གེ་དང་། ཕྱག་རྒྱ་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ནི་དྲང་བའི་དོན་ཏེ། ག་པུར་ནི་ཁུ་བ་དང་། ཁྲག་ཆེན་པོ་ནི་ཟླ་མཚན་གྱི་ཁྲག་དང་། ཙནྡན་དམར་པོའི་ཁུ་བ་དང་བསྲེས་པ་ནི་ཙནྡན་དམར་པོའི་ཁུ་བའོ། །རྡོ་རྗེ་དང་མཚན་མ་དང་། ཐབས་དང་། པདྨ་བྷ་ག་དང་། ཤེས་རབ་དང་། ཡི་གེ་དང་། ཕྱག་རྒྱ་དང་། བཙུན་མོ་རྣམས་དང་ཞེས་བྱ་བ་ལ་སོགས་པ་རྡོ་རྗེའི་ཚིག་རྣམས་ངེས་པའི་དོན་ནོ། །ག་པུར་ནི་དཀྱིལ་འཁོར་ཡིག་འབྲུ་དང་། ཁྲག་ཆེན་པོ་ཉི་མའི་དཀྱིལ་འཁོར་ཡིག་འབྲུ་དང་། ཙནྡན་དམར་པོ་ནི་པདྨ་དམར་པོ་འདབ་བརྒྱད་ཡིག་འབྲུ་གསུམ་དང་བཅས་པ་དང་། །རྡོ་རྗེའི་རྒྱུད་མཚན་མ་ཡབ་དང་། །པདྨ་མཚན་མ་སྟེ་ཡུམ་དང་། ཡི་གེ་ནི་སྔགས་ཏེ་ས་བོན་དང་། ཕྱག་རྒྱ་ནི་ཕྱག་མཚན་ཏེ་སྐུ་ཡོངས་སུ་གྲུབ་པ་ཕྱག་རྒྱ་བཞི་ལྡན་ནོ། །ལྷའི་སྐུ་ཡོངས་སུ་རྫོགས་པ་ཡོངས་སུ་བརྟགས་པའི་ལྷ་རྣམས་འཁྲུལ་པ་བཟློག་པ་ཐ་མལ་པ་ལས་ནུས་པ་ཅུང་ཟད་ལྡན་པ་སྟེ་ཐུན་མོང་པའོ། །ཡང་རང་བཞིན་ཐ་མི་དད་པའི་དོན་ལས་ག་པུར་ནི་ཁུ་བ་ཀ་པུར་ཤུ་ཀི་སྟེ་རྣམ་པ་ཀུན་འདར་ལས་རྒྱུ་བ་དང་། ཁྲག་ཆེན་པོ་ནི་རང་འབྱུང་གི་ཁྲག་སྟེ་སིཧླ་རཀྟ་རྩ་རོ་མ་ནས་རྒྱུ་བ་དང་། ཙནྡན་དམར་པོའི་ཁུ་བ་ནི་ཆོས་འབྱུང་ནང་དུ་འདྲེས་པ་ལས་ཡུམ་གྱི་པདྨའི་ཁོངས་སུ་ཡོངས་སུ་འདྲེས་ལ་དབྱེར་མེད་པ་ལས་འགྲོ་བའི་ལུས་མངོན་པར་བྱང་ཆུབ་པའི་ཚུལ་དུ་ཡོངས་སུ་རྫོགས་པ་ཉིད་དོ། །པདྨ་བྷ་ག་སྟེ་ཤེས་རབ་ཀྱི་ཆ་དང་། རྡོ་རྗེ་ལིངྒ་སྟེ་ཐབས་ཀྱི་ཆ་དང་། ཟླ་ཉི་ནུབ་པའི་ལྡོག་པ་ཆ་མཉམ་པར་གྱུར་པ་ལས་ཡི་གེ་སྟེ་ས་བོན་ཡོན་ཏན་
གྲུབ་བྱེད། ཕྱག་རྒྱ་བཞི་ལྡན་གྱི་ཡབ་ཡུམ་རྡོ་རྗེ་བཙུན་མོ་རྣམས་ཆོས་འབྱུང་ལས་མངོན་པར་བདེ་བའི་དོན་ཡེ་ཤེས་ཡང་དག་པར་བསྟན་པ་ཐུན་མོང་མ་ཡིན་པའོ། །བྱམས་པས་གསོལ་བ། དེ་དག་གི་དྲང་བའི་དོན་གང་ལགས། བཅོམ་ལྡན་འདས་ཀྱིས་བཀའ་སྩལ་པ། གང་ཡང་ཨཱ་ལི་དང་ཀཱ་ལིའི་ཡི་གེ་སྣ་ཚོགས་སྒྲའི་དོན་གྱི་སྒོ་ནས་རྗོད་པར་བྱེད་པའི་མཐའ་དང་། བརྗོད་པར་བྱ་བའི་ཐུན་མོང་གི་ཆོས་དང་། ཐུན་མོང་མ་ཡིན་པའི་གསང་བ་བྱང་ཆུབ་སེམས་དཔའ་ཆེན་པོ་རྣམས་ལ་བླ་ན་མེད་པ་གསང་བ་ཆེན་པོའི་གཟུངས་སྔགས་དང་རིག་སྔགས་འདི་སྒྲའི་དེ་ཁོ་ན་ཉིད་ལ་བརྟེན་ནས་རབ་ཏུ་རྟོགས་པར་བྱ་བ་དང་། ཡང་གང་ཟག་རྟོག་གེ་པར་གྱུར་པ་རྣམས་ལ་བསྟན་གྱི་རྗོད་བྱེད་ཐུན་མོང་དུ་གྱུར་པ་མི་ཕྱེད་རྡོ་རྗེའི་ཡི་གེ་སྲོག་ཏུ་གྱུར་པ་ཆོས་ཀྱི་ཕུང་པོ་དུ་མ་ཡང་དེ་ཉིད་ལས་བྱུང་ཞིང་དེ་ཉིད་དུ་ཐིམ་པ་ནི་དྲང་བའི་དོན་དུ་བསྟན་པའོ། ། དེ་དག་ལ་ཡང་ཕུང་པོ་ལྔ་དང་། རིགས་ལྔ་དང་། འབྱུང་བ་ལྔ་དང་ཡེ་ཤེས་ལྔ་རྣམ་པར་དག་པ། ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་མཐོང་བའི་ཕུང་པོ་དག་གོ། །ཐུག་པ་ཕྱོགས་བཅས་འགྱུར་བ་ཉིད། །ཉི་ཟླ་ལུས་ཀྱིས་གནས་ལས་སྐྱེས། །དབང་གི་དཀྱིལ་འཁོར་གཡོ་ལྡན་པ། །གནས་བཞི་པ་ལས་ཕྱོགས་གྱུར་པ། །ཆུ་བོས་བརྒྱད་ཅུ་རྩ་བཞི་སྟེ། །སྟོང་དང་བརྒྱད་ཅུ་དྷྲྀ་འོད་ཅན། །དེ་དག་ཆོས་ཀྱི་སྒོར་གྱུར་པ། །ཕུང་པོ་བླ་ན་མེད་པར་འགྱུར། །གཉིས་ཀ་དང་བྱ་བའི་རྒྱུད་ལ་སོགས་པ་རྣམས་སུ་དོན་གསལ་བར་གསུངས་པ་ནི་སྒྲ་ཇི་བཞིན་པ་སྟེ། འདི་ལྟ་སྟེ་དཀྱིལ་འཁོར་དང་མཆོད་སྦྱིན་དང་། གཏོར་མ་དང་། སྨན་དང་། ཞི་བ་ལ་སོགས་པའི་ལས་ཀྱི་ཚོགས་རྣམས་དང་། དེ་བཞིན་དུ་འཇིག་རྟེན་པའི་དངོས་གྲུབ་ཆེན་པོ་བརྒྱད་གསུངས་པ་རྣམས་ནི་སྒྲ་ཇི་བཞིན་པ་སྟེ་ཡི་གེའི་དོན་གྱིས་བཤད་པའོ། །དཀྱིལ་འཁོར་རྟོག་པའི་ཆོ་ག་སོགས། །སྤྱོད་པ་བསྙེན་བསྒྲུབ་འབྲས་ལྡན་པ། །ཡན་ལག་དོན་རྒྱས་རྣམ་བཤད་པ།།ཇི་བཞིན་སྒྲ་ཞེས་བསྟན་པ་ཡིན། །ཀོ་ཊ་ཀྵ། ཀོ་ཊ་བྷ་ཎ། ཀོ་ཊ་ཝེ། ཀོ་ཊ་བྷ་ཤྭ་པ། ཀ་ཏིར་ཀ །ཀོ་ལ་ཁྱ། ཀོ་ལ་བ།
ཀོ་ལ་བྷཤྠ། ཀོ་ལ་སྟ་ཐཱ། ཀོ་ལ་བྷ་བྷི། འདིས་དབང་པོ་དང་ཡུལ་གསུངས་ཏེ། དེ་ལྟ་བུ་ལ་སོགས་པ་རྡོ་རྗེའི་ཚིག་ནི་སྒྲ་ཇི་བཞིན་མ་ཡིན་པའི་སྒོ་ནས་སྦས་པའི་བཤད་པའོ། །དེ་བཞིན་གཤེགས་པའི་བརྡའི་གསང་བ་གང་། །ཀོ་ཊ་ཀྵ་སོགས་མཁའ་འགྲོས་བསྟན་པ་དང་། ། བརྡ་སྤྱོད་གསང་བ་འཇིག་རྟེན་མ་གྲགས་པས། །ཇི་བཞིན་མ་ཡིན་སྒྲར་བསྟན་པའོ། །བྱང་ཆུབ་སེམས་ཉིད་སྤྲོས་མེད་ལས། །མཐའ་བྲལ་རྣམ་པར་མི་རྟོག་པས། །དམིགས་མེད་ཕྱག་རྒྱ་ཆེན་པོ་སྟེ། །མི་གནས་ཟུང་འཇུག་བླ་ན་མེད། །རྡོ་རྗེ་རང་འབྱུང་ཏིང་ངེ་འཛིན། །དེ་བཞིན་གཤེགས་པའི་ངོ་བོ་ཉིད། །རྒྱལ་བས་ངེས་པའི་དོན་དུ་གསུངས། །མཐའ་དྲུག་རྣམ་པར་དབྱེ་བ་གཏན་ལ་ཕབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཞི་པའོ། །བྱང་ཆུབ་སེམས་དཔའ་ཆེན་པོས་གསོལ་པ། བཅོམ་ལྡན་འདས་རྡོ་རྗེ་ཐེག་པ་ཆེན་པོའི་རྒྱུད་སྡེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱུད་སྡེ་ནི་འདི་ལྟ་སྟེ། རྣལ་འབྱོར་བླ་ན་མེད་པའི་རྒྱུད་དང་། གཉིས་ཀའི་རྒྱུད་དང་། སྤྱོད་པའི་རྒྱུད་དང་། བྱ་བའི་རྒྱུད་དང་། རྟོག་བའི་རྒྱུད་དོ། །བྱམས་པས་གསོལ་པ། རྒྱུད་དེ་རྣམས་ཀྱི་ཚད་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། རྣལ་འབྱོར་བླ་ན་མེད་པའི་རྒྱུད་ནི་སྟོང་ཕྲག་བཅུ་གཉིས་ཏེ་རྒྱས་པར་ཕྱེ་ན་གྲངས་མེད་དོ། །རྣལ་འབྱོར་གྱི་རྒྱུད་ལ་སྟོང་ཕྲག་དྲུག་གོ། །སྤྱོད་པའི་རྒྱུད་ལ་སྟོང་ཕྲག་བརྒྱད་དོ། །བྱ་བའི་རྒྱུད་ལ་སྟོང་ཕྲག་བཞིའོ། །རྟོག་པ་དང་ཕྲ་མོའི་རྒྱུད་ལ་སྟོང་ཕྲག་བཞིའོ། །དེ་དག་སྟོང་ཕྲག་སུམ་ཅུ་རྩ་བཞི་སྟེ་རྒྱུད་དང་རྟོག་པའི་མིང་གི་མཐའ་མའི་ཡི་གེ་ཇི་སྙེད་པ་ནི། ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་ངྷ་མ། ཡ་ར་ལ་ཝ། ཤ་ཥ་ས་ཧ་ཀྵཿ། ཨ་ཨཱ་ཨི་ཨཱི་ཨུ་ཨཱུ། རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨྃ་ཨཿ འདི་དག་ནི་མིང་གི་ཡི་གེའི་ཚོགས་རྣམས་སོ། །བྱང་ཆུབ་སེམས་དཔའ་ཆེན་པོས་གསོལ་བ། བཅོམ་ལྡན་འདས་དེ་རྣམས་ཀྱི་བྱེད་པའི་ཆོ་ག་དང་སྒྲུབ་པ་དེ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དོན་དམ་པའི་བདེན་པ་ལས་རང་བྱིན་གྱིས་
བརླབ་པའི་རིམ་གྱིས་ལངས་ཏེ་འདོད་ཆགས་ལས་བྱུང་བའི་བྱང་ཆུབ་ཀྱི་གནས་རབ་ཏུ་བསྟན་པའི་ཕྱིར་བཙུན་མོའི་འཁོར་གྱི་དབུས་སུ་འཁོར་ལོས་སྒྱུར་བའི་གཟུགས་ཀྱིས་བདེ་བ་ཆེན་པོའི་ཏིང་ངེ་འཛིན་གྱིས་རྡོ་རྗེ་བཙུན་མོའི་བྷ་ག་ལ་ཡང་དག་པར་བཞུགས་ཏེ། འཇིག་རྟེན་གྱི་སྤྱོད་པ་དང་འགལ་བ་རྨད་དུ་བྱུང་བ་རྡོ་རྗེའི་ཚིག་གི་མཐའ་དྲུག་དང་ཚུལ་བཞིའི་སྒོ་ནས་རབ་ཏུ་སྤྱོད་དེ་བསྒྲུབ་པར་བྱའོ། །ཞེས་རྣལ་འབྱོར་ཆེན་པོའི་རྒྱུད་དུ་གནས་སོ། །རིག་མ་དང་ལྷ་མོ་དང་ལྷན་ཅིག་ཏུ་དཀྱིལ་འཁོར་གྱི་འཁོར་ལ་དགོད་པར་བྱའོ། །དེ་ནས་ལས་བྱེད་པའི་སྒྲུབ་པ་ལ་སོགས་པ་དེ་ཁོ་ན་ཉིད་རྣམ་པ་བཅུ་རབ་ཏུ་སྤྱོད་དེ་སྒྲུབ་པར་བྱེད་པ་རྣལ་འབྱོར་གྱི་རྒྱུད་ལ་བཞུགས་སོ། །ལས་ཀྱི་བྱ་བ་སྣ་ཚོགས་རྒྱ་ཆེན་པོ་བྱ་བའི་རྒྱུད་ཕྱག་རྒྱ་དམིགས་པའི་མཚན་ཉིད་རབ་ཏུ་སྤྱད་པ་སྒྲུབ་པར་བྱེད་པ་ནི་སྤྱོད་པའི་རྒྱུད་ལ་བཞུགས་སོ། །འཁོར་བ་ལ་ཤིན་ཏུ་འཇིགས་པར་དམིགས་ཤིང་ཤིན་ཏུ་གཙང་སྦྲ་བྱེད་པ་དང་། ཡེ་ཤེས་སེམས་དཔའི་བདེ་བ་མེད་པ་དང་། བདག་ཉིད་ལྷའི་བསྙེམས་པ་མེད་པ་དང་། རྨད་དུ་བྱུང་བའི་སྤྱོད་ཡུལ་རང་རྐྱེན་གྱིས་རྒྱུའི་བར་སྤྱོད་པ་སྒྲུབ་པར་བྱེད་པ་ནི་བྱ་བའི་རྒྱུད་ལ་བཞུགས་སོ། །སྔགས་དང་སྨན་དང་། སྦྱིན་སྲེག་དང་མིག་སྨན་དང་རྐང་མགྱོགས་ལ་སོགས་པ་དངོས་གྲུབ་ཆེན་པོ་བརྒྱད་རབ་ཏུ་སྤྱད་པ་སྒྲུབ་པར་བྱེད་པ་ཕྲ་མོ་དང་རྟོག་པའི་རྒྱུད་ལ་བཞུགས་སོ། །གསང་ཆེན་རྒྱུད་ཀྱི་ངོ་བོ་དང་། །ངེས་ཚིག་སྒྲ་འཇུག་རྒྱུ་མཚན་དང་། །ཁྱད་པར་དབྱེ་ཐབས་དང་ལྡན་པ། ། གཞུང་ཚད་དང་ནི་ལྡང་ཚད་དང་། བརྗོད་བྱ་རྗོད་བྱེད་སྟོན་ཚུལ་ལོ། །སེམས་བསྐྱེད་སྔོན་འགྲོ་མཚུངས་ལྡན་པས། །ཁྱད་པར་སྨིན་ལམ་བྱིན་རླབས་ལམ། །རྗེས་སྣང་འབྲེལ་པ་ཐུན་མོང་མིན། །བདེ་བ་ལམ་མྱུར་མཐོང་ཆོས་འགྱུར། །དེ་ཉིད་ཐབས་ཟབ་བླ་ན་མེད། །དཔལ་ལྡན་རྡོ་རྗེ་འཆང་ཆེན་གྱི། །སྐུ་གསུང་ཐུགས་ལས་མི་ཕྱེད་པ། །བདེ་ཆེན་མཆོག་གི་སྙིང་པོ་ཉིད། །ངོ་བོ་ཡེ་ཤེས་དྲི་མེད་པའོ། །ཏནྟྲ་ཞེས་པ་རྒྱུད་ཡིན་ཏེ། །ཏེནྟ་ཤེས་པ་དངོས་ལ་རྒྱུན། །ཏྲ་ཡ་དུས་གསུམ་ཐོག་མེད་པས། །འདྲེན་པ་རྟོག་ཚོགས་འཇོམས་བྱེད་པའོ། །རྒྱུན་
ཆགས་འབྲེལ་པ་མ་ཚང་མེད། །རྒྱས་བྱེད་སེམས་ཅན་ཁམས་ལས་ནི། །བྱང་ཆུབ་སེམས་དཔའ་རྣལ་འབྱོར་པ། །སངས་རྒྱས་མཛད་པ་མཐའ་ཡས་པ། །བར་མི་བཅད་ཅིང་ཡེ་ཤེས་རྒྱུན། །ཕྲིན་ལས་མི་ཟད་འཁོར་ལོ་སྟེ། །རྒྱུད་ཅེས་སྒྲར་བཏགས་དེ་ཉིད་དོ། །གླེང་གཞི་གླེང་སློང་གསང་ཆེན་ལ། །རྒྱས་བསྡུས་ངོ་བོ་མི་འགྱུར་བ། །འཇུག་གནས་མཐར་ཕྱིན་བླ་ན་མེད། །རྡོ་རྗེ་ཐེག་པའི་ལྡང་ཚད་དོ། །སྔོན་རྒྱུ་གདུང་བ་ཤས་ཆེ་ལ། །སྤོང་བར་མི་ནུས་འཇུག་ཕྱིར་ན། །དབང་ཕྱུག་ཆེན་པོ་ལྟ་བུའོ། །ལམ་ལ་གནས་པ་རིམ་གཉིས་ཆོས། ། ངོ་བོ་མི་འགྱུར་མཆོག་གསང་བ། །ས་ལམ་བགྲོད་པ་མཐར་ཕྱིན་པས། །བླ་མའི་ལམ་ནི་གཙོར་གྱུར་པ། །བླ་ན་མེད་པ་ཚེ་འདིས་ཐོབ། །རྒྱུ་དང་ཐབས་ལམ་འབྲས་བུ་སྟེ། །གྲུབ་བྱེད་གསང་བ་རྩ་བའི་རྒྱུད། །སྙིང་པོ་མཆོག་ལས་རབ་འབྱམ་སྤྱོད། །གསལ་བྱེད་ཕྱི་མ་བདེ་བླག་འགྱུར། །དཀའ་བ་སྤྱོད་དང་ཁ་སྐོང་བྱེད། །ཐེ་ཚོམ་སེལ་ངེས་སྟེར་བ་དང་། །དུས་རྟགས་བློ་ལ་སྦྱར་བ་སྟེ། །སྣོད་རིག་སྐལ་བའི་ཁྱད་པར་བསྟན། །གསང་བ་ཆེན་པོ་སྤྱི་དང་བྱེ་བྲག་ཐམས་ཅད་དུ། །ཐ་དད་པ་དང་གཅིག་ཏུ་གནས་པ་ཏིང་འཛིན་དང་། །མཐར་ཐུག་རིམ་པ་དམ་ཚིག་སྐུ་གསུང་ཐུགས་དང་ནི། །སྡོམ་པའི་དེ་ཉིད་ཀུན་ཏུ་ཁྱབ་པ་བྱང་ཆུབ་སེམས། །ཡང་དག་བདེ་བ་ཆེན་པོ་ཕྱག་རྒྱས་རྒྱས་བཏབ་པ། །ཡེ་ཤེས་ཚད་མེད་རྒྱ་ཆད་ཕྱོགས་སུ་ལྷུང་བ་མེད། །མཉམ་ཉིད་སྤྲོས་པ་མེད་པ་དག་པ་ཆེན་པོ་སྟེ། །སྒྲ་དང་སྒྲ་མིན་ལས་འདས་རྒྱུད་ནི་བླ་མེད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ལྔ་པའོ། །བྱམས་པས་གསོལ་པ། བཅོམ་ལྡན་འདས་སྦྱོར་བ་དང་པོའི་མཛད་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། དཔལ་བདེ་བ་ཆེན་པོ་མི་འགྱུར་བ་འོག་མིན་ཆོས་ཀྱི་དབྱིངས་དཀྱིལ་འཁོར་ཆེན་པོ་ཡོངས་སུ་དག་པ་ཚད་མེད་པའི་ཕོ་བྲང་དུ། དེ་བཞིན་གཤེགས་པ་བྱང་ཆུབ་ཀྱི་སེམས་རྡོ་རྗེས་དེ་བཞིན་གཤེགས་པ་ཐམས་ཅད་ཀྱི་འཁོར་གྱིས་ཡོངས་སུ་བསྐོར་བའི་དབུས་སུ་བཞུགས་ཏེ། བྱང་
ཆུབ་སེམས་དཔའ་སེམས་དཔའ་ཆེན་པོ་དཔག་ཏུ་མེད་པ་དང་། དེ་བཞིན་གཤེགས་པ་འདུས་པའི་གསང་བ་བླ་ན་མེད་པར་དབང་བསྐུར་བ། སྐུ་གསུང་ཐུགས་རྡོ་རྗེའི་སྙིང་པོ་གསང་བ་ཆེན་པོ་ཡོངས་སུ་དག་ཅིང་ཡེ་ཤེས་ཡོངས་སུ་དག་པ་ཐོབ་པ་ནི། དཀྱིལ་འཁོར་མ་ལུས་པའི་ཡོན་ཏན་ཕྲིན་ལས་མི་ཟད་པ་རྒྱན་གྱི་འབྱུང་གནས་སུ་གྱུར་པ། སྤྲོ་བ་དང་བསྡུ་བར་མཛད་པ། སྤྲོས་པ་མེད་ཅིང་སྣང་བ་རྣམ་པར་དག་པ་དེ་ཉིད་ལ་གནས་པ་ནི་སྦྱོར་བ་དང་པོ་ཞེས་བྱའོ། །བྱམས་པས་གསོལ་པ། དཀྱིལ་འཁོར་རྒྱལ་པོ་མཆོག་ཇི་ལྟར་དུ་སྟོན་པར་འགྱུར་བ་ལགས། བཅོམ་ལྡན་འདས་ཀྱིས་བཀའ་སྩལ་པ། །འདི་ཉིད་ཚད་མེད་དཀྱིལ་འཁོར་དུ། །དེ་བཞིན་གཤེགས་པའི་སྐུ་གསུང་ཐུགས། །རྡོ་རྗེ་བླ་ན་མེད་པའི་མཆོག །རྟེན་དང་བརྟེན་པར་བཅས་པ་ཡི། །བདེ་གཤེགས་ཕོ་བྲང་སྙིང་པོ་ནི། །འདོད་པ་ཁམས་ཀྱི་འགྲོ་བ་རྣམས། །རི་རབ་ཆེན་པོའི་སྟེང་དུ་ནི། །ཁང་བུ་བརྩེགས་པ་ག་ལ་བར། །དབང་པོ་བརྒྱ་བྱིན་འཁོར་བཅས་པ། །ཉེ་དབང་སུམ་ཅུ་རྩ་གཉིས་སོགས། །རིན་ཆེན་རང་བྱུང་མཆོད་སྤྲིན་ལྡན། །དབང་བསྐུར་རིམ་པ་སྟོན་པར་མཛད། ། དབང་ཕྱུག་ཨུ་མར་བཅས་པ་དང་། །ཚངས་པ་ཁྱབ་འཇུག་གདོང་དྲུག་སོགས། །འདུལ་ཕྱིར་ཡུལ་དང་དབང་པོ་ནི། །གཉིས་མེད་མཉམ་པར་སྦྱོར་བ་ལས། །ལོངས་སྤྱོད་བདེ་བའི་སྤྱོད་པ་ཡིས། །རྣམ་པར་དག་པ་བྱ་བའི་ཕྱིར། །དཀྱིལ་འཁོར་དུ་ནི་འཇུག་པར་མཛད། ། དེ་ནས་དག་ཁམས་དེ་ཉིད་དུ། །དེ་བཞིན་ཉིད་ཀྱི་ངང་ལས་འདས་པ་ཡི། །བྱང་ཆུབ་སེམས་མཆོག་རྡོ་རྗེ་བླ་མེད་པ། །ཟིལ་གནོན་རྡོ་རྗེ་ཏིང་ངེ་འཛིན་ལ་ཞུགས། །དབྱིངས་དང་ཡེ་ཤེས་དབྱེར་མེད་མཉམ་ཉིད་དང་། །རྣལ་འབྱོར་བདེ་ཆེན་མངོན་པར་བྱང་ཆུབ་པ། །ཉི་ཟླ་པདྨ་ཨཱ་ལི་ཀཱ་ལི་བཅས། །ཐུགས་གསུང་སྐུ་ཡི་རྡོ་རྗེ་དེ་ཉིད་ལས། །འོད་སྤྲོས་འཇིག་རྟེན་ཁམས་སུ་ཁྱབ་གྱུར་པས། །བརྟན་གཡོར་བཅས་པ་ཡོངས་སུ་དག་པར་གྱུར། །བྱིན་གྱིས་བརླབས་ཀྱི་སྣང་བའི་རྒྱུད་སྦྱངས་པས། །འགྲོ་བ་རྡོ་རྗེ་སེམས་དཔའི་གོ་འཕང་བཀོད། །བདེ་
བ་དང་ནི་ཡིད་བདེ་ཐོབ་གྱུར་ཏེ། །རྗེས་སུ་རྣལ་འབྱོར་ཡེ་ཤེས་རྒྱ་མཚོ་ལས། །མི་ཕྱེད་དབང་ཕྱུག་བྱང་ཆུབ་སེམས་ཀྱི་སྐུ། །ཡེ་ཤེས་འབྱུང་བ་རྡོ་རྗེའི་ཏིང་འཛིན་ལས། །བྱིན་གྱིས་བརླབས་པའི་ཆོ་འཕྲུལ་བསྟན་པ་དང་། །སྔགས་ཀྱི་བྱིན་གྱིས་བརླབས་པ་དེ་ཉིད་མཆོག །དབང་བསྐུར་བ་ཡི་ཆོ་འཕྲུལ་བླ་ན་མེད། །གསང་བ་ལྷུན་གྲུབ་སྙིང་པོའི་ངང་ལ་སྟེ། །ཨོཾ་ཨཱཿཧཱུྃ་དང་སྭཱ་ཧཱ་འོད་འཕྲོ་བ། །འོད་ཟེར་གྱིས་ནི་ཕྱོགས་བཅུར་ཁྱབ་པར་མཛད། ལཱཾ་མཱཾ་པཱཾ་ཏཱཾ་ཨཱཾ་ལས་འབྱུང་བ་བཞི། མེཾ་བྷཱཧཱེཾ་ཨོཾ་ཨོཾ་ཨོཾ་ཧཱུྃ་ཨོཾ་སཾ་ལས། །རྣམ་ཤེས་བརྒྱད་ཀྱི་རང་བཞིན་སེམས་དཔའ་ཆེ། །རཱུ་ཤ་ག་ར་སྤ་སྟེ་འདོད་ཡོན་ཉིད། ཛཿཧཱུྃ་བཾ་ཧོཿཧཱུྃ་དྲུག་འོད་འབར་ལས། །མཐར་བྱེད་ཁྲོ་བོའི་རྒྱལ་པོ་ཡུམ་བཅས་བཅུ། །ཡན་ལག་ཚོགས་གནས་ཕྱོགས་ཀྱི་གདོན་འཇོམས་པའོ། །ཤིན་ཏུ་རྣལ་འབྱོར་རྫུ་འཕྲུལ་ཆོ་འཕྲུལ་སྟོན། །དེ་ནས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས་ཀྱི་རྡོ་རྗེ་འཆང་དེ་ཉིད། ཞལ་གསུམ་ཕྱག་དྲུག་རྒྱན་བཅས་གཟིགས་པར་གྱུར། །མཚན་དཔེ་རྫོགས་པ་ཕྱག་རྒྱ་ལྡན་པར་སྣང་། །དེ་ཉིད་ཆོས་དབྱིངས་རྡོ་རྗེ་ཡུམ་བཅས་བཞི། །ཆོས་འབྱུང་ནས་བྱོན་ཐུགས་ཀའི་དབུས་མ་ནས། །དེ་བཞིན་གཤེགས་པ་དུ་མ་སྤྲོས་པ་ལས། །ཆེད་དུ་བརྗོད་པ་གསང་བ་དེ་ཉིད་གསུངས། །ཀུན་རྫོབ་ཆོ་འཕྲུལ་མི་ཟད་འཁོར་ལོ་བསྟན། །དེ་རྗེས་འདོད་པ་ཁམས་པ་གདུལ་དོན་དུ། །རྡོ་རྗེ་སེམས་དཔའི་གཟུགས་ཀྱིས་དང་བའི་ཚུལ། །རྣམ་སྣང་མཛད་པ་རྡོ་རྗེ་འཛིན་སྐུ་ལས། །སྐུ་ཡི་ཆ་ཞུ་ལྷ་མོའི་ཚུལ་བསྟན་པ། །སྤྲོ་དང་བསྡུ་བ་ཡེ་ཤེས་མངོན་རོལ་པའི། །སྤྱོད་པ་བདེ་ཆེན་དགྱེས་པར་བསྟན་པའོ། །དཔལ་ལྡན་མི་བསྐྱོད་རྡོ་རྗེའི་དཀྱིལ་འཁོར་མཆོག །རྡུལ་མེད་པ་ཉིད་གྲུ་བཞིར་བྱིན་བརླབས་པ། །དེ་ནས་དེ་བཞིན་གཤེགས་པའི་ཚོགས་དཔག་མེད། །ཕྱོགས་དུས་ཀུན་ནས་ཁྱབ་ཅིང་ཡོངས་སུ་བསྐོར། །བྱང་ཆུབ་སེམས་ཉིད་རྡོ་རྗེ་དབུས་བཞུགས་སོ། །བཅོམ་ལྡན་རྣམ་སྣང་མཛད་པ་རིན་ཆེན་འབྱུང་། །འོད་དཔག་མེད་པ་གདོན་མི་ཟབ་ཉིད། །
བདེར་གཤེགས་དཔག་མེད་རྣམས་དང་ལྷན་ཅིག་ཏུ། །རང་སྣང་ཡེ་ཤེས་ཡུམ་དང་གཉིས་མེད་པ། །ཤིན་ཏུ་རྣལ་འབྱོར་རིམ་པ་ཡང་དག་པའོ། །སྐུ་གསུང་ཐུགས་ཀྱི་རྡོ་རྗེས་བྱིན་རླབས་པ། །དམ་ཚིག་པ་དང་ཡེ་ཤེས་སེམས་དཔའ་ཆེ། ། ནུས་པ་བརྟན་དང་དབང་བསྐུར་རྒྱས་གདབ་པའོ། །ཏིང་འཛིན་སེམས་དཔའ་ཐུགས་ཀར་ངེས་གནས་པ། །རྣལ་འབྱོར་ཆེན་པོ་ཡི་ནི་མགོན་པོ་མཆོག །རིག་པ་ཆེན་པོའི་སྐྱེས་བུ་དེ་བཞིན་གཤེགས། །ཐབས་དང་ཤེས་རབ་གཉིས་མེད་བཞུགས་པའོ། །དེ་བཞིན་གཤེགས་པ་དཔག་མེད་འདུས་པའི་དུས། །འཁོར་གྱི་དཀྱིལ་འཁོར་དཔག་མེད་བརྗོད་མི་མི་ལང་། །རྡོ་རྗེ་རིན་ཆེན་པདྨ་སྤྲིན་ཕྲེང་བའི། །མཆོད་པའི་ཚོགས་ཀྱིས་བར་སྣང་གང་བས་མཆོད། །རྡོ་རྗེ་འཆང་ཆེན་དེ་བཞིན་གཤེགས་པ་ལ། །དེ་བཞིན་གཤེགས་དང་སེམས་དཔའ་ཐམས་ཅད་ཀྱིས། །ཐུན་མོང་དུ་ནི་གསོལ་བ་བཏབ་གྱུར་པ། །དེ་བཞིན་གཤེགས་པ་ཐམས་ཅད་ཀྱི། །འདུས་པ་གསང་བ་ལས་བྱུང་བ། །རྡོ་རྗེ་སྙིང་པོས་བསྡུས་པ་ཡི། །བཅོམ་ལྡན་སྙིང་པོ་བཤད་དུ་གསོལ། །ཞེས་ཞུས་ཤིང་གསོལ་བ་བཏབ་པར་གྱུར་ལ། དེ་ཚེ་རྡོ་རྗེ་འཆང་གིས་བཀའ་སྩལ་པ། །འདིར་ནི་ལེགས་ཅེས་གསང་བ་ངེས་པ་ལ། །སྤྲོ་བས་ཞུས་པ་གསང་ཆེན་བླ་མེད་ལ། །དེ་བཞིན་གཤེགས་པ་མཆོག་གྱུར་ཐམས་ཅད་ཀྱང་། །ཐེ་ཚོམ་སྐྱེ་བར་གྱུར་པ་ཡིན་པས་ན། །སེམས་དཔའ་ཁྱེད་རྣམས་ཀུན་གྱིས་ཇི་ལྟར་རྟོགས། །བྱང་ཆུབ་སེམས་དཔའ་ཀུན་གྱིས་གསོལ་བ་ནི། །རྡོ་རྗེ་དམ་ཚིག་འབྱུང་བའི་ཚིག་གིས་ནི། །ཤིན་ཏུ་རྟོགས་པར་དཀའ་བར་གྱུར་པ་ལ། །དེ་བཞིན་གཤེགས་པ་ཉིད་ཀྱི་མཐུ་སྟོབས་ཀྱིས། །སྐལ་བར་ལྡན་པ་རྗེས་སུ་འཛིན་པར་ནི། །ནུས་པ་མཆོག་ལྡན་ཕུན་སུམ་ཚོགས་པ་ཡི། །ཤིན་ཏུ་རབ་ཏུ་རྟོགས་པར་བྱིན་རླབས་ཤིང་། །དབང་བསྐུར་མཛད་པས་མངོན་པར་རྟོགས་མཛད་གསོལ། །རྨད་དུ་བྱུང་བའི་ཡེ་ཤེས་ཆོ་འཕྲུལ་ཀུན། །ད་ལྟ་ཉིད་དུ་གསལ་བར་བསྟན་མཛད་གསོལ། །སྦྱོར་བ་དང་པོའི་རིམ་པའོ། །དཔལ་ལྡན་
རྡོ་རྗེ་འཛིན་པ་ཡིས། །མངོན་རྫོགས་བྱང་ཆུབ་རྡོ་རྗེ་ཡི། །ཏིང་ངེ་འཛིན་ལ་བཞུགས་ནས་ནི། །དང་པོའི་མགོན་པོ་ཉིད་ཀྱིས་ནི། །རིག་པ་ཆེན་པོའི་སྐྱེས་བུ་སྟེ། །ཆོས་དབྱིངས་རྡོ་རྗེ་མ་གཉིས་མེད། །དཀྱིལ་འཁོར་སྤྲོ་དང་སྡུད་པར་མཛད། །དཔལ་ལྡན་མི་བསྐྱོད་རྡོ་རྗེས་ནི། །ཡེ་ཤེས་སྒྲོན་མ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་པས། །བཛྲ་དྷྲྀཀ་ལས་ཕྱུང་གྱུར་ནི། །ཞལ་གསུམ་ཕྱག་ནི་དྲུག་པ་སྟེ། །ཨིནྡྲ་ནཱི་ལ་ཀུནྡ་ལྟར། །རཱ་ག་འབར་བའི་ཞལ་མངའ་བ། །གཡས་གཡོན་རྡོ་རྗེ་དྲིལ་བུ་འཛིན། །པདྨ་འཁོར་ལོ་ནོར་བུ་དང་། །པདྨ་རལ་གྲི་གཡོན་དུ་སྟེ། །རྡོ་རྗེ་སྐྱིལ་ཀྲུང་རྒྱན་སྤྲས་པ། །དེ་ཉིད་སྐུ་ལས་འོད་ཟེར་ཚོགས། །སྤྲོས་ནས་ཀུན་ཏུ་བདེར་གཤེགས་ཀྱིས། །ཕྱོགས་བཅུའི་ཞིང་ཁམས་ཁྱབ་མཛད་ནས། །འགྲོ་སྦྱངས་དག་པར་གྱུར་ནས་ནི། །སྨིན་བར་ནས་ཞུགས་ཐུགས་ཀར་ཐིམ། །དེ་ནི་དེ་མ་ཐག་ཏུ་ཡང་། །བཅོམ་ལྡན་ཞེ་སྡང་རྡོ་རྗེར་གྱུར། །རིན་ཆེན་སྣ་ཚོགས་སེང་གེའི་ཁྲི། །ཟླ་བ་ཉི་མའི་སྟེང་དུ་བཞུགས། །དཀྱིལ་འཁོར་ཆེན་པོའི་དབུས་གནས་པའོ། །དཀྱིལ་འཁོར་གཙོ་བོ་མངོན་པར་འབྱུང་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་དྲུག་པའོ། །དཔལ་ལྡན་རྣམ་པར་སྣང་མཛད་ཀྱིས། །མངོན་པར་རྟོགས་པ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཞལ་གསུམ་ཕྱག་དྲུག་ཀུནྡའི་མདོག །འཁོར་ལོ་དྲིལ་བུ་ཡུམ་དང་རོལ། །རྡོ་རྗེ་ནོར་བུ་གཡས་པ་ལ། །གཡོན་པ་པདྨ་རལ་གྲི་འཛིན། །སྔོ་དང་དམར་དང་གཡས་དང་གཡོན། །གླང་ཆེན་ཁྲི་སྟེང་པད་ཟླའི་སྟེང་། །རྒྱན་བཅས་སྐྱིལ་ཀྲུང་བཞུགས་པའོ། །བདེ་གཤེགས་རིན་ཆེན་འབྱུང་གནས་ཀྱིས། །བདག་མེད་རྡོ་རྗེ་ལ་བཞུགས་ཏེ། རཧྣདྷྲྀཀ་ཕྱུང་གསེར་གྱི་མདོག །ཡིད་བཞིན་ནོར་བུ་དྲིལ་བུ་དང་། །འཁོར་ལོ་པདྨ་རལ་གྲི་ཅན། །དུང་དང་ཨུཏྤལ་མཚུངས་པ་ནི། །རིན་ཆེན་རྒྱན་སྤྲས་རྟ་མཆོག་སྟེ། །ཡུམ་བཅས་སྐྱིལ་ཀྲུང་བཞུགས་པའོ། །དཔལ་ལྡན་ཚེ་དཔག་མེད་པ་ནི། །འོད་ཟེར་འབར་བ་རྡོ་རྗེར་བཞུགས། །
ཨ་རོ་ལི་ཀ་ཅེས་རཱ་གའི་འོད། །སྔོ་དཀར་པདྨ་དྲིལ་བུ་དང་། །རྡོ་རྗེ་འཁོར་ལོ་རལ་གྲི་བཅས། །ཡུམ་བཅས་རྨ་བྱའི་ཁྲི་ལ་བཞུགས། །རིན་ཆེན་རྒྱན་ལྡན་འོད་འཕྲོ་བས། །མཉམ་པའི་སྐྱིལ་ཀྲུང་གིས་བཞུགས་པའོ། །བཅོམ་ལྡན་གདོན་མི་ཟ་བའི་སྐུ། ། ཟིལ་གནོན་རྡོ་རྗེ་ལ་བཞུགས་ཏེ། པྲཛྙཱ་དྷྲྀཀ་ལས་མརྐཏ་མདོག །དཀར་དམར་རལ་གྲི་དྲིལ་བུས་འཁྱུད། །རྡོ་རྗེ་འཁོར་ལོ་ནོར་བུ་དང་། །པདྨ་རིན་ཆེན་རྒྱན་ལྡན་ཉིད། །ཡུམ་བཅས་ཤང་ཤང་ཁྲིར་བཞུགས་པ། །རྡོ་རྗེ་སྐྱིལ་ཀྲུང་གིས་བཞུགས་པའོ། །དེ་བཞིན་གཤེགས་པའི་རིགས་ཀྱི་འཁོར་ལོ་མངོན་པར་འབྱུང་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བདུན་པའོ། །དེ་བཞིན་གཤེགས་པ་ཐམས་ཅད་ཀྱི། །རྡོ་རྗེ་བཙུན་མོ་སྤྱན་མ་ཡིས། །རྡོ་རྗེ་འཛིན་པ་ཐམས་ཅད་ཀུན། །མཉམ་བྱེད་དམ་ཚིག་ལ་བཞུགས་ཏེ། །མོ་ཧཱ་ར་ཏི་ལས་བྱུང་བ། །དུང་མདོག་སྔོ་དང་དམར་བའི་ཞལ། །སྐུ་ཡི་རྡོ་རྗེ་དང་མཚུངས་པ། །པདྨ་ཟླ་ཉི་ཤར་ལྷོར་བཞུགས། །རྡོ་རྗེ་བཙུན་མོ་མཱ་མ་ཀཱིས། །སངས་རྒྱས་རྗེས་སུ་མཉེས་བྱེད་པའི། །ཏིང་ངེ་འཛིན་ལ་སྙོམས་ཞུགས་ནས། །དྭེ་ཥ་ར་ཏི་ལས་བྱོན་པ། །ཐུགས་ཀྱི་རྡོ་རྗེ་མཚུངས་པ་ཉིད། བཻ་ཌཱུར་དུང་དང་རཱ་གའི་ཞལ། །རིན་ཆེན་སྣ་ཚོགས་རྒྱན་སྤྲས་འགྱིང་། །པད་ཟླར་ལྷོ་ནུབ་གྲྭར་བཞུགས་སོ། །རྡོ་རྗེ་བཙུན་མོ་གོས་དཀར་གྱིས། །རྗེས་སུ་ཆགས་པ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། རཱ་ག་ར་ཏི་ལས་བྱོན་པ། །གསུང་གི་རྡོ་རྗེ་མཚུངས་པ་ཉིད། །བནྡུ་རི་ག་སྔོ་དང་དཀར། །སྒེག་ཅིང་རིན་ཆེན་རྒྱན་སྤྲས་པ། །པད་ཟླར་ནུབ་བྱང་གྲྭར་བཞུགས་པའོ། །རྡོ་རྗེ་བཙུན་མོ་སྒྲོལ་མ་ཡི། །གླུ་མ་རྡོ་རྗེ་ཞེས་བྱ་བའི། །ཏིང་ངེ་འཛིན་ལ་སྙོམས་ཞུགས་ཏེ། །བཛྲ་ར་ཏི་ལས་བྱུང་སྒེག །མརྐཏ་དུང་དང་བྷནྡུ་ཀ །ཕྲིན་ལས་རྡོ་རྗེ་དང་མཚུངས་པ། །རིན་ཆེན་རྒྱན་གྱིས་ལེགས་སྤྲས་པ། །པད་ཟླར་བྱང་ཤར་གྲྭར་བཞུགས་པའོ། །ལུས་ཀྱི་གནས་སུ་ལྟེ་བ་དང་། །སྙིང་ག་མགྲིན་པ་གསང་བ་དང་། ལཱྃ་མཱྃ་པཱྃ་ཏཱྃ་ས་
བོན་ཉིད། །འབྱུང་བ་ལ་ནི་ལྷན་ཅིག་སྤྱོད་པ་ཡི། །ལྷ་མོ་ཡེ་ཤེས་བདེ་བར་རོལ། །དེ་ཉིད་མཉམ་པ་ཕྱག་རྒྱ་ཆེ། །ཡེ་ཤེས་མཉམ་པར་སྦྱོར་བ་ལྷ་མོའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བརྒྱད་པའོ། །ལྷ་མོ་གཟུགས་ཀྱི་རྡོ་རྗེ་མས། །དམ་ཚིག་མཆོག་གི་མཆོད་པ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །བཛྲ་རཱུ་པེ་ཞེས་སྔགས་ལས། །སྐུ་མཆོག་དཀར་མོ་མེ་ལོང་འཛིན། །རྡོ་རྗེ་སྤྱན་མ་དང་མཚུངས་པ། །རིན་ཆེན་རྒྱན་རྣམས་ཀྱིས་མཛེས་སྤྲས། །མེ་ཡི་ཕྱོགས་ཀྱི་གྲྭར་བཞུགས་པའོ། །ལྷ་མོ་སྒྲ་ཡི་རྡོ་རྗེ་ལས། །ནམ་མཁའི་འོད་ཀྱི་སྤྲིན་རྡོ་རྗེ། །ཚིམ་བྱེད་ཏིང་འཛིན་ལ་བཞུགས་ཏེ། །བཛྲ་ཤབྡེ་ལས་བྱོན་པ། །རྡོ་རྗེ་མཱ་མ་ཀཱི་དང་མཚུངས། །ཨ་གཽ་རྒྱུད་མངས་སྦྲེང་མཛད་གླུ། །དབྱངས་ཀྱིས་ཀུན་ཏུ་མཆོད་བྱེད་པ། །བདེན་བྲལ་ཕྱོགས་ཀྱི་གྲར་བཞུགས་སོ། །ལྷ་མོ་དྲི་བྱུག་རྡོ་རྗེ་མས། །མངོན་པར་བྱང་ཆུབ་བདུན་སྟོན་པ། །དེ་ཉིད་རྡོ་རྗེའི་ཏིང་འཛིན་བཞུགས། །བཛྲ་གནྡྷེ་ལས་ཕྱུང་བ། །གོས་དཀར་ཡུམ་དང་མཚུངས་པ་སྟེ། །དུང་ཆོས་ལྷ་རྫས་མཆོག་འཛིན་པ། །རིན་ཆེན་རྒྱན་སྤྲས་འགྱིང་བག་ལྡན། །རིག་འཛིན་ཕྱོགས་ཀྱི་གྲྭར་བཞུགས་པའོ། །རྡོ་རྗེ་རོ་མཆོག་ལྷ་མོ་ནི། །དམ་ཚིག་ཆེན་པོའི་མཆོད་པ་ནི། །ཀུན་མཆོད་ཏིང་འཛིན་ལ་བཞུགས་ཏེ། །བཛྲ་རཱ་སྱ་ལས་བྱུང་བ། །རིན་ཆེན་པད་སྣོད་བདུད་རྩི་ནི། །རོ་མཆོག་བཅུད་ལྡན་འཛིན་མཛད་པ། །སྒྲོལ་མ་དང་ནི་མཚུངས་པ་སྟེ། །དབང་ལྡན་ཕྱོགས་ཀྱི་གྲྭར་བཞུགས་སོ། །རིག་མ་མཆོད་ལྷ་རྣམས་ཀྱིས་ནི། །མཆོད་སྤྲིན་རྒྱ་མཚོས་མཆོད་གྱུར་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་དགུ་པའོ། །བྱང་ཆུབ་སེམས་དཔའ་སའི་སྙིང་ནི། ། ཞི་བའི་དམ་ཚིག་མཆོག་གནས་ལས། །ཀྵི་ཏི་གརྦྷའི་སྔགས་ལས་བྱུང་། །མདོག་དཀར་འཁོར་ལོ་རྩིབས་བཅུ་འཛིན། །ཐོར་ཚུགས་ཅོད་པན་རྒྱན་གྱིས་སྤྲས། །ཤར་ཁྱམས་སྐྱིལ་ཀྲུང་དག་གིས་བཞུགས། །སེམས་དཔའ་རྡོ་རྗེ་འཛིན་པ་ནི། །དངོས་དང་དངོས་
མེད་དམ་ཚིག་སྟེ། །རོ་མཉམ་ཏིང་འཛིན་ལ་བཞུགས་པ། །བཛྲ་པཱ་ཎི་ཨཾ་ཞེས་ལས། །གསེར་མདོག་རྡོ་རྗེ་འབར་བ་འཛིན། །ལྷོ་ཕྱོགས་ཁྱམས་ལ་སྐྱིལ་ཀྲུང་བཞུགས། །བྱང་ཆུབ་ནམ་མཁའི་སྙིང་པོ་ནི། །དམ་ཚིག་མཆོག་ལ་གཟིགས་པ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཨཱ་ཀཱ་ཤ་གརྦྷའི་སྔགས་ལས་བྱུང་། །གསེར་མདོག་མརྐ་ཏ་འཛིན་པ། །འགྱིང་བཅས་ལྷོ་ཕྱོགས་ཁྱམས་ལ་བཞུགས། །སེམས་དཔའ་འཇིག་རྟེན་དབང་ཕྱུག་གིས། །གསུང་མཆོག་རྡོ་རྗེ་ཡེ་ཤེས་ཀྱི། །ཏིང་ངེ་འཛིན་ལ་སྙོམས་ཞུགས་ཏེ། །ལོ་ཀེ་ཤྭ་ར་བཛྲ་ལས། །བྱོན་པ་པདྨ་རཱ་གའི་འོད། །གཡོན་པའི་པདྨ་གཡས་པ་ཡིས། །འབྱེད་མཛད་ནུབ་ཀྱི་ལྷ་ཁྱམས་བཞུགས། །བྱང་སེམས་མགོན་པོ་འཇམ་དབྱངས་ཀྱིས། །ནམ་མཁའི་རྡོ་རྗེ་ཚུལ་གཅིག་པའི། །ཏིང་ངེ་འཛིན་ལ་སྙོམས་ཞུགས་ཏེ། །གྷོ་ཥ་ནཱ་ཐ་ལས་བྱུང་བའི། །དམར་སེར་རིན་ཆེན་རྒྱན་སྤྲས་པའི། །ཨུཏྤལ་དམར་པོ་འཛིན་མཛད་པ། །གཡས་པས་འབྱེད་པར་མཛད་པ་ནི། །སྐྱིལ་ཀྲུང་ནུབ་ཀྱི་ཁྱམས་ལ་བཞུགས། །བྱང་སེམས་སྒྲིབ་པ་ཀུན་སེལ་གྱིས། ། ཆོས་རྣམས་ཀུན་ལ་འཇུག་པའི་སྒོ། །རྡོ་རྗེ་ཞེས་པའི་ཏིང་འཛིན་བཞུགས། །ནི་ཝ་ར་ནི་ལས་བྱུང་བའི། །མརྐཏ་འོད་འཕྲོ་རལ་གྲི་ཅན། །རྒྱན་ལྡན་བྱང་གི་ཁྱམས་ལ་བཞུགས། །དཔལ་ལྡན་བྱམས་པའི་མགོན་པོས་ནི། །རྡོ་རྗེ་སྤྲོས་པའི་སྔགས་བཀོད་ཀྱི། ། ཏིང་ངེ་འཛིན་ལ་སྙོམས་ཞུགས་ཏེ། མཻ་ཏྲི་ནཱ་ཐ་ལས་བྱུང་བ། །དུང་མདོག་ཀླུ་ཤིང་སྤྱི་བླུགས་ཅན། །རིན་ཆེན་རྒྱན་གྱིས་སྤྲས་པ་སྟེ། །ཤར་གྱི་ཁྱམས་ལ་བཞུགས་མཛད་པའོ། །སེམས་དཔའ་ཀུན་ཏུ་བཟང་པོ་ནི། །ཞིང་ཁམས་ཀུན་ཁྱབ་མཆོད་སྤྲིན་གྱི། །ཏིང་ངེ་འཛིན་ལ་སྙོམས་ཞུགས་ཏེ། །ས་མནྟ་བྷ་དྲ་ལས་ཕྱུང་བ། །ལྗང་མདོག་སྣ་ཚོགས་རྡོ་རྗེ་ཅན། །རིན་ཆེན་སྣ་ཚོགས་རྒྱན་སྤྲས་པ། །བྱང་ཕྱོགས་ཁྱམས་ལ་སྐྱིལ་ཀྲུང་བཞུགས། །པདྨ་ཉི་མའི་གདན་ལ་ནི། །འགྱིང་བཅས་ཐོར་ཚུགས་རྒྱན་སྤྲས་པ། །ཀུན་ཀྱང་ཞལ་གསུམ་
ཕྱག་དྲུག་སྟེ། །གཙོ་ལ་བསྣོལ་མའི་ཚུལ་གྱིས་གཟིགས། མེཾ་ཐླྀཾ་ཨོཾ་ཨོཾ་ཨོཾ་དང་ནི། ཧཱུྃ་ཨོཾ་སྃ་ཉིད་རྣམ་ཤེས་བརྒྱད། །རྣམ་པར་དག་པ་སེམས་དཔའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་པའོ། །ཚོགས་སློབ་གང་ཟག་སྒྲ་དོན་སྟོན། །བདེན་པ་གཉིས་སུ་ཡོངས་བསྡུས་པ། །ཁྱད་པར་རྣམ་པར་ངེས་འགྱུར་རོ། །དེ་ནས་དཀྱིལ་འཁོར་སྒོ་བཞི་དང་། །ཕྱོགས་རྣམས་ཀུན་ཏུ་ཁྲོ་བོ་བཅུ། །འཇིགས་པའི་གཟུགས་ཅན་བགེགས་འཇོམས་མཛད། །ཞལ་གསུམ་ཕྱག་དྲུག་ལྡན་པའོ། །ཁྲོ་བོ་ཆེན་པོ་གཤིན་རྗེའི་གཤེད། །རྡོ་རྗེ་འཁོར་ལོ་འབར་བ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཡ་མཱནྟ་ཀྲྀཏ་ལས་ཕྱུང་བ། །མཐིང་ནག་གཡས་དཀར་གཡོན་དམར་ཞིང་། །རྡོ་རྗེ་ཐོ་བ་འཁོར་ལོ་དང་། །རལ་གྲི་ནོར་བུ་སྡིགས་མཛུབ་ཅན། ། ཤར་སྒོར་དྲི་ཟའི་སྟེང་བཞུགས་པའོ། །ཁྲོ་རྒྱལ་ཤེས་རབ་མཐར་བྱེད་ཀྱིས། །མངོན་པར་བྱང་ཆུབ་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། པྲཛྙཱནྟ་ཀྲྀཏ་སྔགས་ལས་ཕྱུང་། །དུང་མདོག་སྔོ་དང་དམར་བའི་ཞལ། །བེ་ཅོན་དགྲ་སྟ་འཁོར་ལོ་དང་། ། རལ་གྲི་ནོར་བུ་པདྨ་འཛིན། །ལྷོ་སྒོར་གྲུལ་བུ་མ་གནོན་མཛད་པའོ། །ཁྲོ་བོའི་རྒྱལ་པོ་རྟ་མཆོག་གིས། །རྡོ་རྗེ་ཆགས་མེད་པདྨ་ནི། །ཡེ་ཤེས་འབྱུང་བའི་ཏིང་འཛིན་ལས། །པདྨ་དྷྲྀཀ་ལས་ཕྱུང་བ་ནི། །བྷནྡུ་རི་ཀའི་མདོག་འདྲ་བ། །གཡས་མཐིང་གཡོན་དཀར་འཇིགས་པར་བྱེད། །པདྨ་རྡོ་རྗེ་ཐོ་བ་དང་། །རལ་གྲི་འཁོར་ལོ་དགྲ་སྟ་ཅན། །ནུབ་སྒོར་ཀླུ་དབང་སྟེང་བཞུགས་པའོ། །ཁྲོ་རྒྱལ་བདུད་རྩི་འཁྱིལ་པ་ཡིས། །རྡོ་རྗེ་བྱིན་རླབས་སྙིང་པོའི་ཚུལ། །རྡོ་རྗེ་ཏིང་འཛིན་ལ་ཞུགས་ཏེ། བིགྷྣ་ནྟ་ཀྲྀཏ་ལས་བྱུང་བ། །མརྐཏ་དཀར་དང་དམར་བའི་ཞལ། །རྒྱ་གྲམ་འཁོར་ལོ་རལ་གྲི་དང་། །གཏུན་ཤིང་དགྲ་སྟ་སྡིགས་མཛུབ་ཅན། །བྱང་སྒོར་གནོད་སྦྱིན་སྟེང་བཞུགས་སོ། །ཁྲོ་རྒྱལ་མི་གཡོ་མགོན་པོ་ཡིས། །ཆོས་དབྱིངས་མི་ཟད་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། ཨཱརྱ་ཨ་
ཙ་ལས་ཕྱུང་ཉིད། བཻ་ཌཱུར་དཀར་དང་དམར་བའི་ཞལ། །རལ་གྲི་འཁོར་ལོ་དགྲ་སྟ་དང་། །པདྨ་ནོར་བུ་སྡིགས་མཛུབ་བོ། །མེ་ཕྱོགས་དྲང་སྲོང་གནོན་མཛད་པའོ། །ཁྲོ་བོ་འདོད་པའི་རྒྱལ་པོ་ཡིས། །བསམ་གཏན་ཐོགས་མེད་རྡོ་རྗེ་ཡི། ། ཏིང་ངེ་འཛིན་ལ་སྙོམས་ཞུགས་ཏེ། །ཊཀྐི་རཱ་ཛའི་སྔགས་ལས་ཕྱུང་། །ཨིནྡྲ་ནཱི་ལ་ཀུནྡ་དམར། །ཕྱག་རྒྱ་བསྣོལ་བའི་སྡིགས་མཛུབ་ཅན། །ལྕགས་ཀྱུ་རལ་གྲི་ཨུཏྤལ། །སྡིགས་མཛུབ་ཞགས་པ་འཛིན་པ་སྟེ། །བདེན་བྲལ་སྟེང་དུ་བཞུགས་པའོ། །ཁྲོ་བོ་རྡོ་རྗེ་བེ་ཅོན་ཅན། །འཇིགས་མཛད་སྙིང་རྗེའི་ཏིང་ངེ་འཛིན། ནཱི་ལ་དཎྜ་ལས་བྱུང་བ། །ཆར་སྤྲིན་མདོག་འདྲ་དཀར་དམར་ཞལ། །དབྱུག་པ་རལ་གྲི་ནོར་བུ་དང་། །འཁོར་ལོ་པདྨ་སྡིགས་མཛུབ་མཛད། །གཏུམ་པོ་མི་བཟད་མེ་དཔུང་ཀློང་། །རླུང་ལྷའི་གདན་ལ་བཞུགས་པའོ། །རྡོ་རྗེ་ཁྲོ་བོ་སྟོབས་པོ་ཆེ། །སྐུ་གསུམ་མི་ཕྱེད་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །མ་ཧཱ་བ་ལའི་སྔགས་ལས་ཕྱུང་། །ཨུཏྤལ་སྤྲིན་དཀར་བྱི་རུའི་ཞལ། །རྩེ་གསུམ་རྔ་ཡབ་རལ་གྲི་དང་། །འཁོར་ལོ་ནོར་བུ་སྡིགས་མཛུབ་ཅན། །འབྱུང་པོའི་གདན་སྟེང་བཞུགས་མཛད་པའོ། །ཁྲོ་རྒྱལ་རྡོ་རྗེ་གཙུག་ཏོར་ཅན། །རིག་པའི་སྟོབས་མཆོག་རྡོ་རྗེ་ཡི། །ཏིང་ངེ་འཛིན་ལ་སྙོམས་ཞུགས་ཏེ། །ཨུཥྞཱི་ཥ་བི་ཛའི་སྔགས་ལས་ཕྱུང་། །ནམ་མཁའི་མདོག་ཅན་གཙུག་ཏོར་གྱི། །ཕྱག་རྒྱ་སྤྱི་བོར་བཅིངས་པ་སྟེ། །རྡོ་རྗེ་རལ་གྲི་པདྨ་དང་། །སྡིགས་མཛུབ་ཞགས་པ་འཁོར་ལོ་འཛིན། །རྣམ་འཚེ་འཇོམས་མཛད་ས་བདག་གནོན། །ལྷ་རྒྱལ་ཚངས་པ་གནོན་མཛད་པའོ། །རྡོ་རྗེ་གནོད་མཛེས་ཁྲོས་པའི་སྐུ། །རབ་ཏུ་འབྱུང་གནས་ཡེ་ཤེས་ཀྱི། །རྡོ་རྗེའི་ཏིང་འཛིན་ལ་ཞུགས་ནས། །བརྟན་གཡོ་གདུག་པ་དུག་ཅན་གྱི། །དྲག་པོ་འཇོམས་མཛད་མཐིང་ནག་ཉིད། །སུམ་བྷ་རཱ་ཛའི་སྔགས་ལས་བྱུང་། །རྡོ་རྗེ་འཁོར་ལོ་རལ་གྲི་དང་། །ནོར་བུ་པདྨ་སྡིགས་མཛུབ་མཛད། །རྣམ་འཚེ་ཞི་མཛད་ས་བདག་གནོན། །ལུས་ཀྱི་གནས་སུ་ཁྲོ་བོ་རྣམས། །ས་བོན་ཕྱག་
མཚན་རྩ་གནས་ལ། །གཡས་མཐིང་ཐོད་དབྱུག་གཡོན་པར་ནི། །བེ་ཅོན་མགྲིན་པར་པདྨ་ཅན། །གསང་བར་སྣ་ཚོགས་རྡོ་རྗེ་འཁྱིལ། །ཛཿཧཱུྃ་བཾ་ཧོཿསྒོ་བཞི་བསྲུང་། །དྲུག་ལྡན་ཧཱུྃ་གིས་བརྒྱན་པ་ནི། །ལྕགས་ཀྱུ་དཔུང་གཡས་རྩེ་གསུམ་གཡོན། །ལྷ་ངར་དབྱུག་པ་ཏྲི་ཤུ་ལ། །ལོང་བུར་རྡོ་རྗེ་སྤྱི་གཙུག་ཏུ། །འཁོར་ལོ་གྱེའུ་འཕགས་གྱུར་པའོ། །ཁྲོ་རྒྱལ་ཐམས་ཅད་ཡུམ་དང་ལྡན། །རིན་ཆེན་ཀླུ་དབང་རྒྱན་གྱིས་སྤྲས། །དབུ་སྐྲ་གྱེན་བརྗེས་མེ་དཔུང་དབུས། །ཡན་ལག་རགས་ཤིང་བཇིདཔའི་སྐུ། །ཧ་ཧ་ཧཱུཾ་ཧཱུཾ་སྒྲ་སྒྲོགས་པས། །སྲིད་གསུམ་གཡོ་བར་མཛད་པ་པོ། །དངོས་པོ་མཚན་མར་འཛིན་པའི་གདོན། །ལོག་ལྟ་ཅན་རྣམས་འདུལ་མཛད་པ། །ཡབ་ཡུམ་གཉིས་མེད་སྦྱོར་བ་དགྱེས། །གསང་བ་བདེ་བ་ཆེན་པོ་ཡི། །དཀྱིལ་འཁོར་ཡེ་ཤེས་སྙིང་པོ་བསྟན། །ལྷ་ཚོགས་མངོན་པར་འབྱུང་བའི་འཁོར་ལོའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གཅིག་པའོ། །ཟབ་པའི་རྒྱན་ལ་རྣམ་པར་དབྱེ་བ་གང་། །མཐའ་ལྡན་དང་ནི་བཤད་ཚུལ་དབྱེ་བ་ཡིས། །ནུས་པ་ཁྱད་པར་གྱུར་པ་རྒྱན་དང་ལྡན། །ས་ཡི་དབང་ཕྱུག་གསང་བའི་རྒྱན་བསྟན་པའོ། །རྒྱ་ཆེའི་རྒྱན་ལ་སྤྱི་དང་བྱེ་བྲག་ཅན། །རྒྱ་ཆེ་ལ་ནི་མཚོན་དོན་སྟོན་པ་དང་། །རིགས་ཅན་ལྔས་ནི་ངེས་པར་འཇུག་གྱུར་པ། །གང་ཟག་དང་ནི་དངོས་གྲུབ་སྒྲུབ་པའི་གནས། །ལྔ་ཚད་གཟུགས་ཁམས་ཚད་མེད་ལྡན། །ཚུལ་ལྡན་སྟོན་པའི་མཚན་ཉིད་དང་། །རྒྱུད་དང་གླེང་གཞི་ངེས་པའི་ཚིག །རྒྱུ་ཡིས་མཐར་འབྱིན་སྤྱོད་པའོ། །ཆོས་ཀྱི་ཐ་དད་པ་ཡི་རྒྱན། །ཚོགས་སློབ་གཉིས་དང་བདེན་གཉིས་སོ། །དེ་ནས་བྱང་ཆུབ་སེམས་དཔའ་ཆེན་པོ་བྱམས་པས་གསོལ་པ། དོན་དམ་པའི་བདེན་པ་ལ་གནས་པའི་རྣལ་འབྱོར་ཆེན་པོ་ལས་ཀྱི་རྒྱལ་པོ་མཆོག་གི་ཏིང་ངེ་འཛིན་ལ་བརྟེན་ནས་སེམས་ཅན་གྱི་དོན་ཇི་ལྟར་རབ་ཏུ་སྤྱད་པར་བགྱི། བཅོམ་ལྡན་འདས་ཀྱིས་བཀའ་སྩལ་བ། ཇི་སྲིད་དུ་ཞི་བ་ལ་སོགས་པའི་ལས་ཀྱི་སེམས་ཅན་གྱི་དོན་མི་བྱེད་པ་དེ་
སྲིད་དུ་ཡང་དག་པའི་མཐའ་ལ་རབ་ཏུ་གནས་པར་འགྱུར་རོ། །གང་དུ་སེམས་ཅན་ཐམས་ཅད་ཀྱི་དོན་བྱ་བར་མཐོང་བ་དེའི་ཚེ་ཡང་དག་པའི་མཐའ་ལས་ལངས་ཏེ་སེམས་ཅན་གྱི་དོན་བྱས་ནས་ཡང་དག་པའི་མཐའ་ཉིད་དུ་འཇུག་ཅིང་མི་གནས་པའི་མྱ་ངན་ལས་འདས་པ་མངོན་དུ་བྱེད་དོ། །གང་དུ་འགྲོ་བའི་དོན་འབྱུང་བ། །དུས་ལ་བབ་པ་དེ་ཡི་ཚེ། །རྡོ་རྗེའི་སྤྱན་གྱིས་གཟིགས་པའི་ཚེ། །ཐོགས་པ་མེད་པར་ཕྲིན་ལས་ཀུན། །གདུལ་བྱའི་བསམ་པ་ཇི་ལྟ་བར། །ངེས་པ་ཉིད་དུ་འབྱུང་འགྱུར་བའོ། །ས་རླུང་བརྟན་པོ་ཐོབ་པ་དང་། །རླུང་གིས་རྣམ་པར་འདེགས་བྱེད་པ། །ཐབས་དང་ཤེས་རབ་སྲོག་རྩོལ་ལ། །བརྟེན་པས་རྡོ་རྗེ་རྐང་མགྱོགས་འགྲུབ། །ཐ་མལ་ལུས་ངག་ཡིད་དག་ལ། །ལྷ་སྔགས་རླུང་སེམས་རྩེ་གཅིག་ལས། །བསམ་གཏན་ཡ་རླུང་མ་རླུང་གིས། །ཀུན་ཏུ་བསྒྱུར་བས་གསེར་འགྱུར་ཐོབ། །ལྷ་བྱེད་སྒྱུ་མའི་རྣམ་ཤེས་ལས། །ཏིང་འཛིན་ཆུ་རླུང་གསལ་སྣང་གིས། །ལྐོག་ཏུ་གྱུར་པའི་རྫས་མཐོང་བ། །དེ་ཉིད་མིག་སྨན་རིལ་བུ་འགྲུབ། །རླུང་གི་དམིགས་པ་རྣོན་པོ་ཡི། །རྣལ་འབྱོར་པ་ཡི་མཚོན་ཆ་མཆོག །གར་བསྒྱུར་གཅོད་པར་བྱེད་པ་ཡི། །ཐོགས་མེད་རལ་གྲིའི་དངོས་གྲུབ་བོ། །རྟོག་མེད་ཐ་མལ་དབུགས་བྲལ་ལ། །ཞིང་སྐྱོང་ཆོ་འཕྲུལ་ཡུམ་གཞན་བཞུགས། །ཕོ་ཉ་སྔགས་ཀྱི་ནུས་པ་ལས། །གྲུབ་སྟེར་རོ་ལངས་གྲུབ་པ་འབྱུང་། །བདུད་རྩི་རང་ལུས་གནས་པ་ལས། ། སྟོབས་གྱུར་འབྱུང་བ་རོ་སྙོམས་པས། །སྨན་མཆོག་ཟིལ་ལྡན་རྙེད་པ་ལྟར། །བཅུད་ལེན་ཡོན་ཏན་ཁྱད་པར་འགྲུབ། །ནམ་མཁའི་རླུང་ལས་རྩ་གནས་དེར། །རླུང་སྒྲོམ་དག་བྱེད་སྦེད་ཤེས་པས། །གྲིབ་མ་མི་འབྱུང་བདེ་ཐོབ་པ། །མི་སྣང་བར་སྣང་བྱེད་པ་ཉིད། །གསང་སྒོ་རྩ་ཡི་བུ་ག་ལས། །འདུས་པ་སྒྲོན་མེས་ཁམས་དགུ་ཡི། །དངས་སྙིགས་བྱེད་པས་ལྷ་མིན་གྱི། །བུག་རྙེད་ལ་ནི་ས་འོག་འགྲུབ། །དབང་དང་དགུག་དང་བསྐྲད་པ་དང་། །མནན་དང་རེངས་བྱེད་མངོན་སྤྱོད་དང་། །ཞི་དང་རྒྱས་པ་ཀླུས་ལས་བྱེད། །
བརྗོད་བྱ་དང་ནི་རྗོད་བྱེད་དང་། །དཔེ་དང་མངོན་གྱུར་སྟོབས་དང་ནི། །ཆོས་དོན་ཁྱད་པར་གྱུར་པའི་ཕྱིར། །ནུས་ལྡན་གསང་བའི་རྒྱན་ཡིན་ནོ། །གནས་པ་དང་ནི་གསལ་རྫུ་འཕྲུལ། །ཡོན་ཏན་ཕྲིན་ལས་རྒྱན་རིམ་བཞིན། །དེ་ནི་རྗོད་བྱེད་རྟག་པར་བརྒྱན། །དོན་གྱུར་དགོས་པ་བླ་ན་མེད། །དོན་གནས་བྱེད་དང་ཡེ་ཤེས་ཀྱི། །གསང་ཆེན་དོན་མཐོང་སྙིང་པོ་སྟེ། །རྒྱན་པས་དབྱེ་བསྡུ་བསྟན་པའོ། །དུག་ཞི་བ་དང་བསྲུང་བ་དང་། །རྒོལ་བའི་ནུས་འཇོམས་ཕྲིན་ལས་ཏེ། །རབ་འབྱམ་ལས་ཚོགས་དུ་མ་བསྟན། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གཉིས་པའོ། །བྱང་ཆུབ་སེམས་དཔའ་ཆེན་པོ་བྱམས་པས་གསོལ་པ། བཅོམ་ལྡན་འདས་རྒྱན་རྣམ་པ་བདུན་ཇི་ལྟར་ལགས། བཅོམ་ལྡན་འདས་ཀྱིས་བཀའ་སྩལ་པ། གླེང་བསླང་བ་རྣམ་པ་ལྔ་དང་། རིགས་པ་རྣམ་པ་བཞི་དང་། མཐའ་དྲུག་གིས་བཤད་པ་དང་། བཤད་ཚུལ་རྣམ་པ་བཞི་དང་། དབྱེ་བ་རྣམ་པ་གཉིས་དང་། གང་ཟག་རྣམ་པ་ལྔའི་སྒོ་ནས་སློབ་མ་བརྟག་པ་དང་། བདེན་ པ་གཉིས་ཀྱི་དགོངས ་པའོ། །གླེང་བསླང་བ་རྣམ་པ་ལྔ་ནི་འདི་ལྟ་སྟེ། མཚན་དང་། གང་ཟག་དང་། བྱེད་པ་པོ་དང་། ཚད་དང་། དགོས་པ་རྣམས་སོ། །དང་པོ་གླེང་གཞི་གླེང་སློང་བསྟན་པ་ལས། །ཕུན་སུམ་ཚོགས་པ་ལྔ་དང་ལྡན་བསྡུས་པ། །གསེར་གྱི་འཁོར་ལོ་རིན་ཆེན་ཆོས་མཐུན་པ། །སྤྱི་བོའི་གནས་སུ་ཨེ་བྃ་རྡོ་རྗེ་བཞུགས། །སྟོན་པ་ཆགས་ཅན་འཁོར་དང་དེ་བཞིན་ཆོས། །ཡེ་ཤེས་དུས་ལྡན་ཚད་ལས་དགོས་པ་བསྒྲུབ། །བྱང་སེམས་རྡོ་རྗེ་ཆོ་ག་དབང་བསྐུར་བ། །རྣམ་གྲངས་ལེའུ་གནས་ཚུལ་ལྔ་ལྡན་པ། །རིམ་གཉིས་རྒྱུད་གསུམ་དོན་གྱིས་ཕྱེ་བ་ཉིད། །བྱང་ཆུབ་ཕྱོགས་ལས་དུམ་བུ་དབྱེ་བར་གྱུར། །རྣལ་འབྱོར་བསྙེན་བསྒྲུབ་ཡན་ལག་མཆོག་དང་ནི། །རྡོ་རྗེ་རྣམ་བཞི་ཡན་ལག་རིམ་པས་བསྡུས། །དགོས་པའི་ཁྱད་པར་ལས་དང་དངོས་གྲུབ་ལས། །གྲུབ་པ་བརྒྱད་དང་མཆོག་ལྡན་ཡང་དག་པའོ། །བདེ་ཆེན་འཁོར་ལོར་ཐིག་ལེ་གཙོར་གྱུར་བའི། །དགུ་བརྒྱ་ཕྲག་
གཅིག་ཡེ་ཤེས་རླུང་གྱུར་པ། །བཅུ་གཅིག་བཞི་ཆ་ཕྲག་ལྔའི་རྩ་གནས་སོ། །ལྔ་བཅུ་ཕྲག་གཉིས་ཨཱ་ལི་ཀཱ་ལི་སྟེ། །རྩིབས་སྟོང་ལྡན་པ་སྦས་པའི་འཁོར་ལོའོ། །སྤྱོད་པ་རིམ་ལྡན་རྗེས་སུ་གསང་བ་སྟེ། །རྨད་བྱུང་དཀྱིལ་འཁོར་སྙིང་པོ་བསྐུལ་བ་དང་། སྔགས་དང་ཡེ་ཤེས་སྐུ་བསྐྱེད་ཕྲིན་ལས་དག །རབ་འབྱམས་རིགས་འཛིན་ཡན་ལག་འབྲས་བུ་བསྟན། །སྔགས་དང་ནད་ལ་མཆོག་གཞོལ་རྣལ་འབྱོར་གྲུབ། །ལས་ཚེགས་ཚར་གཅོད་རྗེས་འཛིན་རྨི་ལམ་ཆོས། །རྣམ་དག་དཀྱིལ་འཁོར་ལས་ཀྱི་ཕྲིན་ལས་ཚོགས། ། དམ་ཚིག་སྔོམ་པ་རབ་རྫོགས་གཞུང་བསྡུས་བསྟན། དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་གསུམ་པའོ། །སྙིང་ག་ཆོས་ཀྱི་འཁོར་ལོ་དེ་ཉིད་དུ། །ལྷན་ཅིག་སྐྱེས་པའི་སྙིང་པོ་གསང་བ་གང་། །རྒྱལ་ཆེན་ཤཱཀྱའི་རིགས་རྒྱུད་དུས་ལྡན་མཆོག །དོན་གྱི་ཕོ་བྲང་དུ་འཁྲུངས་དབུགས་འབྱིན་པ། །བྱང་ཆུབ་གླེང་གཞི་ཨ་ཁཾ་བཱིར་ཧཱུྃ་ལས། །འཇུག་པ་ཆུ་སྒོ་ཡང་དག་ཐར་པའི་རྟེན། གཟིགས་ལས་རླུང་ཡུལ་ལས་འདས་ཀུན་འདར་མཐོང་། །གཤེགས་པ་ཡེ་ཤེས་ས་བོན་དྲུག་ཏུ་ནི། །ངེས་འབྱུང་རང་འབྱུང་གཉིས་སུ་མེད་པའི་རྟེན། །སྡོམ་ཞིང་འགོག་པས་ངེས་པ་སྙིང་པོར་བསྐུལ། །རྡོ་རྗེ་འཛིན་པ་མངོན་བྱེད་ཤེས་སྤྱོད་པ། །འཁོར་ལོ་བསྐོར་བསྟན་སྙིང་པོ་མཆོག་ཐོབ་པས། །ཐམས་ཅད་མཁྱེན་པ་བླ་ན་མེད་པར་གྱུར། །དེ་ནི་རྒྱུད་ཅེས་མངོན་པར་བྱང་ཆུབ་ལྔ། ། ཕུང་པོ་དག་པ་ཁམས་གསང་རིགས་གཅིག་ཉིད། །གླེང་གཞི་ངེས་པ་དབང་སོགས་ལམ་རྡོ་རྗེ། །རྒྱུ་ནི་སྤྱོད་པ་ཞི་དྲག་ཁྲོ་ཚོགས་འདྲེན། །གླེང་གཞི་དབྱེ་བ་ཚུལ་གཉིས་རྟོགས་པར་བྱ། །ཡིད་བཞིན་ནོར་བུ་ངོ་བོ་ཉིད་ལྡན་སྐུ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་བ་བཅུ་བཞི་པའོ། །མགྲིན་པ་ལོངས་སྤྱོད་འཁོར་ལོར་གསུང་རྡོ་རྗེ། །མཐའ་ལྡན་དྲུག་ནི་གླང་ཆེན་སྟོབས་ལྡན་པ། །བརྗོད་བྱ་མིང་ཚིག་རབ་བྱེད་སྒྲ་ཚོགས་ལས། །ཟུང་གྱུར་རོ་དྲུག་ལོངས་སྤྱོད་དོན་ལྡན་བརྗོད། །འགྲོ་དྲུག་གནས་
དོན་ངེས་པ་རྒྱན་དུ་གྱུར། འཇིག་རྟེན་གནས་དང་འཇིག་རྟེན་འདས་ལས་གྲོལ། །ཡངས་ཐོབ་རྣལ་འབྱོར་རྒྱུ་འབྲས་རྨི་ལམ་དང་། །མཚུངས་པ་སྒྱུ་མར་སྟོན་པ་དྲང་བའི་དོན། །གྲུབ་མཐའ་རིམ་ལྡན་གཟུངས་ལས་ཡོན་ཏན་ཚོགས། །ངོ་བོ་ཉིད་ཀྱིས་གྲོལ་བ་སྟོང་པ་ཉིད། །རྣམ་པར་མི་རྟོག་སྐྱེ་མེད་དངོས་རྣམ་དག །སྤྲོས་བྲལ་དེ་བཞིན་ཉིད་ལས་ཀུན་དུ་སྟོན། །ཡེ་ཤེས་ཡོངས་སུ་དག་པ་ངེས་པའི་དོན། །དངོས་པོ་མཚན་མར་འཛིན་པའི་བློ་བཟློག་བྱེད། །ཡང་དག་གཉིས་མེད་ཡེ་ཤེས་ལམ་སྟོན་ཅིང་། །དམན་པ་ཟིལ་གནོན་མཆོག་དོན་རྨད་གྱུར་པ། །དགོངས་བཤད་གསང་ཆེན་འབྱུང་གནས་དོན་ཀུན་བསྒྲུབ། །ཆོས་རྣམས་འབྱུང་བ་རྒྱ་མཚོ་ཆེན་པོ་ལས། །ཐུགས་རྗེའི་ཞགས་པས་འདྲེན་པ་བློ་གྲོས་མཆོག །ཚིག་དོན་སྤྲོ་བསྡུས་བྱང་ཆུབ་གནས་ཐོབ་བྱེད། ཡོན་ཏན་ དགོངས་པ ་མིན་པ་ཞེས་བརྗོད་དོ། །རྩ་རླུང་བྱང་སེམས་ཡི་གེ་གནས་དག་པ། །རོ་རྐྱང་སྲོག་རྩོལ་དྲང་ངེས་ཁྱད་པར་གསང་། །སྙིང་གར་འབྲུ་ལྔ་རྩ་བ་འབྲུ་ལྔ་ལྷུང་བ་དག །དགོངས་བཤད་དྲུག་ལྔ་ཤེས་བྱེད་ལམ་སྦྱང་བའོ། །དགོངས་མིན་ཨཱ་ལི་གསུང་དབྱངས་ཡན་ལག་གནས། །དེ་ཉིད་ཆོས་རྣམས་བདག་མེད་སྒྲ་སྒྲོགས་པ། ཨཱ་ལི་ཀཱ་ལི་དྲུག་ལྡན་མཚན་དཔེ་ནི། །ཇི་བཞིན་སྒྲ་ལས་རྒྱན་སྤྲས་བླ་ན་མེད། །ཇི་བཞིན་མིན་སྒྲ་བཅུ་གནས་རྡོ་རྗེའི་དབྱིངས། །གསང་བ་སྙིང་པོ་བསྡུས་པ་བརྡས་བཤད་ཉིད། །ཐོག་མ་བར་དང་མཐའ་མར་དགེ་བའི་ཆོས། ། བླ་མེད་མི་ཟད་རྣམ་པ་ཐམས་ཅད་དུ། །རབ་འབྱམ་དོན་བསྒྲུབ་རྟོག་པ་ཕྲིན་ལས་ཚོགས། །གྲུབ་སྟེང་གནས་ལས་ཇི་བཞིན་སྒྲར་འབྱུང་སྟོན། །ཕྱིར་མི་བཟློག་པ་བྲལ་དང་མཐའ་ལས་འདས། །ཁྱད་པར་བརྡ་ལས་ཟབ་པ་སྙིང་པོའི་དོན། །རྒྱལ་བའི་སྤྱོད་ཡུལ་ཐ་སྙད་ལས་གྲོལ་བ། །ཇི་བཞིན་མ་ཡིན་སྒྲ་ཞེས་རྣམ་པར་བསྒྲགས། །དུས་གཞན་ལ་ དགོངས་པ ་ནི་དྲང་བའི་དོན་ཏོ། །གང་ཟག་གཞན་ལ་ དགོངས་པ ་ནི་དྲང་བའི་དོན་ཏོ། །མཉམ་པ་ཉིད་ལ་ དགོངས་པ ་ནི་ངེས་པའི་དོན་ཏོ། །དོན་གཞན་ལ་ དགོངས་པ ་ནི་ངེས་པའི་དོན་ཏོ། །གང་ཟག་
གི་བསམ་པ་ལ་ དགོངས་པ ་ནི་དགོངས་བཤད་དོ། །བསྒྱུར་བ་ལ་ལྡེམ་པོར་ དགོངས་པ ་ནི་དགོངས་བཤད་དོ། །གཉེན་པོ་ལ་ལྡེམ་པོར་ དགོངས་པ ་ནི་དགོངས་བཤད་དོ། །གཞུང་ལ་ལྡེམ་པོར་ དགོངས་པ ་ནི་སྒྲ་ཇི་བཞིན་མ་ཡིན་པའོ། །མཚན་ཉིད་ལ་ལྡེམ་པོར་ དགོངས་པ ་ནི་སྒྲ་ཇི་བཞིན་མ་ཡིན་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅྭ་ལྔ་པའོ། །ལྟེ་བ་སྤྲུལ་པའི་འཁོར་ལོར་གནས་པ་ནི། །རྣམ་པར་བཤད་པ་ཚུལ་བཞིན་ལྡན་པ་ནི། །མ་ནོར་ཕྱིན་ཅི་མ་ལོག་སྟོན་པ་སྟེ། །འདི་ནི་རྡོ་རྗེ་བཙུན་མོའི་ཆོས་ཚུལ་མཚུངས། །ལྟེ་བའི་འཁོར་ལོ་སྒྲ་ལྡན་ཡིག་འབྲུ་བརྒྱད། །མདོ་ལས་ཨེ་བྃ་མ་ཡཱ་གསང་བ་ཉིད། །རྒྱུད་སྤྱི་བརྡ་དབྱིབས་སྒྲ་དང་རྒྱས་འདེབས་ཏེ། །ཀུན་རྫོབ་རང་གཞན་བདག་བྱིན་བརླབས་པ་ལས། །རྨི་ལམ་སྒྱུ་ལུས་མཚོན་པ་བར་དོ་སྦྱང་། །སེམས་གསུམ་སྟོང་ཉིད་ཡེ་ཤེས་སྦས་པ་ཉིད། །སྣང་བ་གསུམ་ལས་དྲང་བཞིན་དག་འོད་གསལ། །བདེ་བ་ལས་ནི་གཏུམ་མོ་འབར་འཛག་ལས། །ཕྱི་རོལ་གཉིས་མེད་གསང་བའི་སྙོམས་འཇུག་པ། །སྒྱུ་མའི་རོལ་པ་བཙུན་མོ་ལྟ་བུར་བསྟན། ། དང་པོ་ཡི་གེའི་དོན་ཏེ་སྤྱི་མིང་ཙམ། །སྨོས་པས་ཨཱ་ལི་ཀཱ་ལིས་རྐྱེན་སྦྱར་ནས། །རྣམ་པ་དུ་མའི་བྱེད་པ་སྒྲར་བཅས་པ། །ལས་རྣམས་ལུས་དང་ཡན་ལག་འབྲེལ་པས་མཚོན། །སྤྱི་དོན་གཉིས་ལས་མོད་དོན་ཉན་རང་དང་། །བྱང་ཆུབ་སེམས་དཔའི་ལམ་མཆོག་ལ་དབང་སྟེ། །འཇུག་པ་རྣམ་ཐར་ལ་སོགས་དྲུག་ལྡན་པ། །ཆོས་རྣམས་ཡོངས་རྫོགས་མཁྱེན་བཅས་འདིར་སྟོན་བྱེད། །རྡོ་རྗེ་ཐེག་པ་སྤྱི་དོན་རྒྱུད་ཀུན་གྱི། །དགོངས་པ་བལྟ་བའི་རྣལ་འབྱོར་གསང་སྟོན་པ། །རིག་སྔགས་གཟུངས་བཅས་གསང་སྔགས་དེ་ཉིད་ཀྱི། ། འདུས་པར་འཇུག་པའི་རིམ་པ་ལམ་གྱུར་པའོ། །སྦས་པའི་དོན་ལས་སྙིང་པོ་གསང་བ་མཆོག །བླ་ན་མེད་པའི་འབྱུང་གནས་བཙུན་མོ་དང་། །ཕྱོགས་མཚུངས་ཕྱི་ལྟར་རིན་ཆེན་རྒྱན་སྤྲས་བཞིན། །སྤྱི་དོན་གཉིས་ཀྱིས་ན་བཟའ་གོས་རིམ་ན། །སྦས་དོན་གསང་བ་
བཙུན་མོའི་ལུས་ངག་ཡིད། །ལུས་ནི་སྒྱུ་མ་ཀུན་རྫོབ་རྨི་ལམ་ལྟར། །ངག་ནི་རླུང་སྔགས་གཉིས་མེད་སྦྱོར་བ་ལས། །རྣམ་ཤེས་སེམས་ཉིད་སྣང་བ་གསུམ་སྦས་པ། །བདེ་བའི་ལམ་གྱིས་སྦས་པ་དགའ་བ་བཞི། །ཡེ་ཤེས་ཆེན་པོ་རོལ་པའི་གསང་བ་མཆོག །སྙིང་པོ་བདེ་ཆེན་ལྷན་ཅིག་སྐྱེས་པའོ། །ཡེ་ཤེས་འབྱུང་གནས་ཉིད་ནི་སྐད་ཅིག་བཞི། །མཐར་ཐུག་དེ་ཁོ་ན་ཉིད་འོད་གསལ་བ། །དེ་ལ་བརྟེན་པས་ལམ་མྱུར་བགྲོད་པ་སྟེ། །རང་འབྱུང་ཞི་གནས་ལྷག་མཐོང་རོ་མཉམ་པ། །ཟུང་འཇུག་མི་འགྱུར་བྱང་ཆུབ་སེམས་རྡོ་རྗེ། །ལམ་མཐར་ཕྱིན་པ་ལྷུན་གྲུབ་ངོ་བོ་ཉིད། །བརྗོད་འདས་རྒྱ་ཆེན་པོ་ཡང་དེ་ཉིད་དོ། །ཨེ་བྃ་ལས་ནི་ཕུན་ཚོགས་ལྔ་ལྡན་པ། །དཔེ་དོན་གྱུར་པ་སྒྲ་དང་རྟགས་ལས་ཤེས། །ཡི་གེ་བཞི་བཅུ་གསང་བ་གླེང་གཞི་ལས། ཨེ་བྃ་གསང་བ་གླེང་བསླང་མདོ་རྒྱས་པ། །འཛམ་གླིང་གནས་སུ་དཀྱིལ་འཁོར་སྣང་བ་བསྟན། །གསང་སྔགས་དབྱིབས་དང་བརྡ་སྔགས་དོན་སྦྱར་བ། །ཐུན་མོང་གྱུར་པ་ཐེ་ཚོམ་སེལ་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་དྲུག་པའོ། །སྨིན་མཚམས་མཛོད་སྤུའི་འཁོར་ལོ་མུ་ཁྱུད་ལས། །རྩ་ཡི་བྱེད་པ་རོ་རྐྱང་ཐབས་ཤེས་ལས། །སྲོག་རྩོལ་འབྱུང་འཇུག་བྱང་སེམས་སྤྲོ་བསྡུ་དང་། །སྒྲོ་འདོགས་གཅོད་པ་ཕྱི་དང་གསང་བའི་ཚུལ། །རྡོ་རྗེའི་ལུས་ཀྱི་གནས་ལུགས་ཁྱད་པར་ལས། །དམག་དཔོན་རལ་གྲི་ཐོགས་པ་ལྟ་བུ་སྟེ། །ཚོགས་སློབ་གཉིས་ལ་སྤྱི་དང་རང་མཚན་ཉིད། །སྤྲོས་དང་སྤྱོད་པ་དེ་ཉིད་སྣང་བ་ལམ། །རྣམ་ཤེས་ཡེ་ཤེས་དབང་པོ་སྒོ་འབྱེད་པ། །ཆོས་ལ་རབ་ཏུ་དབྱེ་བའི་སྒོ་ནས་བསྟན། །གང་ཟག་རིགས་པ་དབྱེ་བ་གཉིས་སུ་ཤེས། །དབང་གིས་ཕྱེ་བ་ཁྱད་པར་ཆོས་ལ་ཡང་། །ཕྱི་ལས་གཞོལ་དང་གསང་བ་ནང་གནས་བྱེད། །དེ་ཉིད་ཁྱད་པར་དབྱེ་བ་དེ་ནི་མཚོན་པར་བྱ། །འཇིག་རྟེན་པ་རྣམས་ཁམས་གསུམ་བསམ་གཏན་ཕྱིར་ལྡོག་ལམ། །འཇིག་རྟེན་ལས་འདས་ཕྱིར་མི་ལྡོག་པ་ཡང་དག་སྟོན། །ཡེ་ཤེས་ལས་ནི་བླ་མའི་ལམ་རྟེན་འདོན་རྫོགས་ཐོབ། །
བྱིན་རླབས་ཆུ་རྒྱུན་གྱིས་ནི་བདེ་ཆེན་བླ་མེད་དོན། །རབ་གྲུབ་བདེ་བ་དཔེ་མེད་མ་རྟོགས་ལོག་རྟོག་ཐེ་ཚོམ་སེལ། །སྒྲོ་འདོགས་སྐུར་འདེབས་བྲལ་བ་དྲི་མེད་གསང་བ་གྲུབ་པ་ཅན། །མཐར་ཐུག་སྙིང་པོ་རྫོགས་སངས་འབྲས་བུ་ལམ་གྱུར་སྤྱོད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་བདུན་པའོ། །གསང་བའི་འཁོར་ལོ་ལ་བརྟེན་རིགས་ལས་ནི། །འགྲོ་བ་བློ་རིགས་ལྔ་ལྡན་དབང་པོ་ནི། །རབ་དང་ཡང་རབ་དམན་པ་འབྲིང་རྣམས་ཏེ། །ཡན་ལག་རླུང་སྒོ་དབང་པོ་ལྔ་སྤྱོད་ཡུལ། །བདུད་རྩི་ལྔ་ལྡན་དེ་ཉིད་བློན་པོ་སྟེ། །བྱང་སེམས་ཐིག་ལེ་བདེ་བའི་འབྱུང་གནས་སོ། །གསང་བ་བདེ་སྐྱོང་འཁོར་ལོ་དེ་ཉིད་ནི། །སྐལ་ཅན་བློ་ལྡན་འགྲོ་བའི་རྒྱུད་ཀྱིས་བསྡུས། །གང་ཟག་བློ་རིགས་དཔེ་དང་སྦྱར་བ་སྟེ། །སྣོད་ཀྱི་བྱེ་བྲག་ཆོས་མཐུན་མཚུངས་པ་སྟེ། །རྒྱུད་ལ་འཇུག་པའི་དབང་པོའི་རིམ་པ་ནི། །ཐ་དད་ཆོས་ཅན་བློན་པོར་ཆོས་མཐུན་པ། །ཙནྡན་ལྟ་བུ་དབང་པོ་དམན་པའོ། །ཨུཏྤལ་ལྟ་བུ་ཐ་མར་གྱུར་པ་དང་། །པད་དཀར་སྐལ་ལྡན་འབྲིད་གྱུར་ཅུང་ཟད་དག །པད་དམར་དབང་པོ་རབ་འགྱུར་བརྩོན་པ་ཆེ། ཡང་རབ་རིན་ཆེན་ལྟ་བུ་བླ་ན་མེད། །རྩ་དང་བྱང་སེམས་ཡི་གེ་རླུང་དག་པ། །ངེས་པ་ཅན་དང་མ་ངེས་པར་འབྱུང་ལ། །སྦྱངས་པ་ཅན་དང་ཐོག་མ་མེད་ནས་ཀྱི། །རང་བཞིན་ཡོན་ཏན་གུས་པ་ཐོབ་གྱུར་པའོ། །ཙནྡན་ལྟ་བུ་ནི་ཉན་ཐོས་ཀྱི་རིགས་ཅན། །ཨུཏྤལ་ལྟ་བུ་ནི་རང་རྒྱལ་བའོ། །པདྨ་དཀར་པོ་ནི་བྱང་ཆུབ་སེམས་དཔའ་རྣམས་སོ། །པད་དམར་ལྟ་བུ་ནི་གསང་སྔགས་ལ་འཇུག་པའོ། །རིན་ཆེན་ལྟ་བུ་ཡོན་ཏན་དང་ལྡན་པ་ནི། དཔལ་རྡོ་རྗེ་འཆང་གི་རིགས་སོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅྭ་བརྒྱད་པའོ། །ཀུན་རྫོབ་ཀྱི་བདེན་པ་ནི་ཆུ་ཟླ་ལ་སོགས་པའོ། །དོན་དམ་པའི་བདེན་པ་ནི་སྟོང་པ་ཉིད་བཅྭ་བརྒྱད་དོ། །དེའི་དོན་ནི་རྒྱ་མཚོར་གཟའ་སྐར་ཤར་བ་ལྟར་སྐད་ཅིག་ལ་འཆར་བའོ། །གཙུག་ཏོར་གནས་ལས་ཡོན་ཏན་ཀུན་མཐར་ཕྱིན། །རྡོ་རྗེ་གསུམ་གྱི་སྙིང་པོ་སྐུ་གསུམ་རྫོགས། །
ཀུན་འདར་བྱང་ཆུབ་སེམས་ཀྱིས་བརྟན་གྱུར་པ། །སྒྲོ་འདོགས་གཅོད་བྱེད་དམག་དཔོན་རལ་གྲི་འཛིན་པའོ། །དོན་དམ་ཀུན་རྫོབ་དབྱེར་མེད་རྟ་མཆོག་སྟེ། །དབུ་མ་ཟུང་འཇུག་རབ་ཏུ་མི་གནས་པ། །སྐུ་བཞི་ལྷུན་གྲུབ་ཡེ་ཤེས་རྫོགས་སངས་རྒྱས། །སྦྱང་གཞི་སྦྱོང་བྱེད་ལྡན་པར་རིམ་པ་ཉིད། །རྡོ་རྗེ་ལུས་ཀྱི་རྩ་གནས་ཐམས་ཅད་ནི། །དབུ་མ་ལ་བརྟེན་ཆ་ཤས་ཕྲ་རགས་གང་། །མཚུངས་གྱུར་རྡོ་རྗེ་གསང་ཆེན་གྱུར་པ་གང་། །ལམ་གྱུར་བདེན་པ་གཉིས་ཀྱི་དེ་ཉིད་ནི། །ཐམས་ཅད་སྡུད་བྱེད་རིམ་པ་རབ་རྫོགས་ལ། །རྡོ་རྗེ་ལྟ་བུའི་ཏིང་འཛིན་བྱང་ཆུབ་བས། ཐོག་མ་བར་དང་མཐའ་མ་ཀུན་དུ་ཡང་། །དུས་དང་རྣམ་པ་ཐམས་ཅད་རྟེན་བྱེད་པ། །ཁྱབ་ཅིང་གནས་མེད་གནས་ནི་བསམ་མི་ཁྱབ། །རྒྱུ་འབྲས་འགག་མེད་རྟེན་ཅིང་འབྲེལ་འབྱུང་གི། །སྐུ་སོགས་དབང་ཕྱུག་ཡོན་ཏན་ཚད་མེད་པ། །ནམ་མཁའ་ཁྱབ་པ་ཡང་དག་ཞིང་ཁམས་ཉིད། །ཟུང་འཇུག་གང་དུ་ཐིམ་པ་གནས་གར་འཇུག །རང་གི་ངོ་བོ་བྱང་སེམས་འགྱུར་མེད་པ། །གཉིས་མེད་རོ་མཉམ་གྱུར་པ་ལམ་དང་ནི། །ལྟ་ལ་སྤྱོད་པ་ཀུན་དུ་ཟུང་འཇུག་པ། །ཐོགས་པ་མེད་པར་འབྱུང་བའི་དཔལ་དང་ལྡན། །ཡེ་ཤེས་བླ་མེད་དབང་ཕྱུག་བཅུ་གསུམ་ས། །མཐར་ཕྱིན་སྐད་ཅིག་བྱང་ཆུབ་དབྱིངས་ཡེ་ཤེས། །དབྱེར་མེད་བྱང་ཆུབ་ཆེན་པོ་མགོན་པོ་ཉིད། །བདེ་ཆེན་མཉམ་ཉིད་རང་འབྱུང་ཆེན་པོའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཅུ་དགུ་པའོ།། །།ནང་སྟོང་བ་ཉིད་དང་། ཕྱི་སྟོང་པ་ཉིད་དང་། ཕྱི་ནང་སྟོང་པ་ཉིད་དང་། སྟོང་པ་ཉིད་སྟོང་པ་ཉིད་ནི་ཏིང་ངེ་འཛིན་གྱིས་བསྡུས་སོ། །ཆེན་པོ་སྟོང་པ་ཉིད་དང་། དོན་དམ་པ་དང་། འདུས་བྱས་དང་། འདུས་མ་བྱས་ནི་བརྩོན་འགྲུས་ཀྱིས་སོ། །མཐའ་ལས་འདས་པ་དང་། ཐོག་མ་དང་ཐ་མ་མེད་པ་དང་། དོར་བ་མེད་པ་ནི་དགའ་བ་ཡང་དག་པས་སོ། །རང་བཞིན་སྟོང་པ་ཉིད་དང་། ཆོས་ཐམས་ཅད་སྟོང་པ་ཉིད་ནི་ཤིན་ཏུ་སྦྱངས་པས་སོ། །རང་གི་མཚན་ཉིད་དང་། མི་དམིགས་པ་ནི། ཆོས་རབ་ཏུ་རྣམ་པར་འབྱེད་པ་ཡང་དག་
བྱང་ཆུབ་ཀྱི་ཡན་ལག་གིས་སོ། །དངོས་པོ་མེད་པ་སྟོང་པ་ཉིད་དང་། ངོ་བོ་ཉིད་སྟོང་པ་ཉིད་ནི་དྲན་པ་ཡང་དག་པས་སོ། །དངོས་པོ་མེད་པའི་ངོ་བོ་ཉིད་སྟོང་པ་ཉིད་ནི། བཏང་སྙོམས་ཡང་དག་པ་བྱང་ཆུབ་ཀྱི་ཡན་ལག་དང་ལྡན་པས་སོ། །སྐད་ཅིག་མ་སྟེ་ཆོས་ཉིད་བདེན་པའི་དོན་ཏོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་པ། མགོན་པོ་བྱམས་པ་ལ་ཅུང་ཟད་ཅིག་བཞེངས་ལ་བཟོད་པར་གསོལ་ནས། བཅོམ་ལྡན་འདས་ལ་ཞུས་པ། བདག་ཟབ་དོན་ཅུང་ཟད་ཅིག་ཞུ་བས། སྐབས་དབྱེ་བར་གསོལ་ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། དེའི་དུས་ལ་བབ་པར་ཤེས་ན་ཅི་རིགས་པར་ཞུས་ཤིག །ངས་ལེགས་པར་བསྟན་པར་བྱའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོས་གསོལ་པ། གསང་བ་ཆེན་པོའི་རྒྱུད་འདི་ཡི། །དགོངས་པ་ཟབ་ཅིང་རྒྱ་ཆེ་བས། །གཏིང་དཔག་དཀའ་བར་གྱུར་པས་ན། །ཟབ་དོན་སྙིང་པོ་གསུང་དུ་གསོལ། །ཞེས་ཞུས་པ་དང་། བཅོམ་ལྡན་འདས་ཀྱིས་བཀའ་སྩལ་པ། །ནམ་མཁའི་སྙིང་པོ་ཤིན་ཏུ་ལེགས། །གསང་ཆེན་དེ་ཉིད་གོང་འོག་ཏུ། །སྔ་ཕྱིའི་རིམ་པའི་ཁྱད་པར་ཀུན། །བཤད་ཀྱིས་གུས་པས་ལེགས་པར་ཟུང་། །གསང་བའི་དེ་ཉིད་བླ་ན་མེད། །རྒྱུ་འབྲས་ཟབ་ཅིང་རྒྱ་ཆེ་བ། །ཐབས་དང་ཤེས་རབ་འདུས་པའི་རྒྱུད། །ཟུང་འཇུག་བདེ་ཆེན་བསྟན་པར་བྱ། །ཐོག་མ་བར་དང་མཐའ་དགེ་བ། །བྱང་ཆུབ་སེམས་མཆོག་བསྟན་པ་ཉིད། །གཞི་དང་དངོས་པོའི་ཁྱད་པར་དང་། །ལམ་བྱེད་ནུས་པ་ཕྲིན་ལ་སོགས། །འབྱུང་གནས་ཡེ་ཤེས་བསྟན་པ་ལ། སྨོན་བ་དང་ནི་འཇུག་སེམས་བསྐྱེད། དོན་དམ་བསྟན་པའི་བྱང་ཆུབ་སེམས། ཡང་དག་དོན་གྱི་སེམས་བསྐྱེད་པ། ཀུན་ཏུ་བཟང་པོའི་ཏིང་འཛིན་ལས། །སྤྱི་བོར་པདྨ་ཟླ་ཉི་ལ། །འཁོར་ལོ་ཨོཾ་དཀར་འོད་འཕྲོ་བ། །མགྲིན་པར་པད་དམར་ཨཱཿའོད་འབར། །ཐུགས་ཀར་ཟླ་བ་རྡོ་རྗེ་ནི། །དཀར་པོ་རྩེ་ལྔ་འོད་འཕྲོ་བ། །དངུལ་ཆུའི་མདོག་འདྲའི་ཧཱུྃ་ཡེ་ཤེས། །ཀུན་རྫོབ་
དོན་དམ་བྱང་ཆུབ་སེམས། །དེ་ཉིད་ཏིང་འཛིན་གནས་པར་བྱ། །དཔྲལ་བར་རིན་ཆེན་ས་ཡིག་གསེར། །ལྟེ་བར་རལ་གྲི་ཧ་ལྗང་བ། །འོད་འཕྲོ་ཡེ་ཤེས་ལྔ་བདག་ཉིད། །འོད་འགྱེད་འགྲོ་བ་སྦྱངས་པ་ལས། །སླར་འདུས་རིགས་ཀྱི་བདག་པོ་ནི། །རྡོ་རྗེ་བཻ་ཌཱུརྻ་ཡི་འོད། ། ཐུགས་ཀར་རྡོ་རྗེ་ལ་ཐིམ་པས། །ཁྲོ་བོའི་རྡོ་རྗེ་ཁ་གྱེས་པས། །འདུས་པ་རྡོ་རྗེ་འཆང་ངོ་བོ། །བྱང་ཆུབ་སེམས་ཀྱི་རྡོ་རྗེ་ཉིད། །གཉིས་མེད་བདེ་བ་ཆེན་པོར་གནས། །རྟོགས་པ་བརྗོད་པས་བསྟན་པར་འགྱུར། །རྣལ་འབྱོར་ཏིང་འཛིན་གནས་པ་ནི། འཇིག་རྟེན་ལམ་ལ་གནས་པ་སྟེ། ཕྱི་ལ་མཆོག་ཏུ་གཞོལ་བས་ནི། །འཇིག་རྟེན་ཆོས་བརྒྱད་རྟོག་པ་འདབ། །མ་སྤངས་ལྷ་ཡི་དམིགས་པ་ལས། །ཕྲ་མོ་རླུང་ལ་བསླབ་པ་དང་། །རགས་པ་ཐིག་ལེ་བསྒོམ་པས་ནི། །ལས་ཆེན་ཐུན་མོང་དངོས་གྲུབ་ལ། །དམིགས་ཕྱིར་གནས་སྐབས་འབྲས་བུ་ཐོབ། །རིམ་གཉིས་ལྡན་པའི་ཏིང་འཛིན་ལས། །སྤྲོ་བསྡུ་རིགས་ཀྱི་རྣལ་འབྱོར་ལམ། །ས་བོན་ཐིག་ལེའི་དེ་ཉིད་ལས། །ངོ་བོ་ཡེ་ཤེས་བདེ་ཆེན་འགྲུབ། །མཆོག་གྱུར་ནང་དོན་མངོན་དུ་བྱ། །རྣམ་པར་བཀོད་པའི་དཀྱིལ་འཁོར་དང་། །བྱང་ཆུབ་སེམས་དང་ལུས་གནས་པའི། དཀྱིལ་འཁོར་བདེ་ཆེན་འབྱུང་གནས་ཉིད། སེམས་ཀྱི་དཀྱིལ་འཁོར་མཆོག་གྱུར་པ། །བུམ་པ་གསང་བ་ཤེས་རབ་དང་། །དེ་ཉིད་སྙིང་པོའི་དཀྱིལ་འཁོར་ཏེ། །ཡེ་ཤེས་མཆོག་ཏུ་དབང་བསྐུར་བའོ། །གསང་བའི་དེ་ཁོ་ན་ཉིད་ཡེ་ཤེས་ཀྱི་དཀྱིལ་འཁོར་ཆེན་པོར་བདེ་བ་ཆེན་པོ་ལྷུན་གྱིས་གྲུབ་པ་ལྷན་ཅིག་སྐྱེས་པ། སྐལ་བ་དང་ལྡན་པ་རྣམས་ལས། ཚད་མེད་པའི་དོན་དམ་པའི་ཡེ་ཤེས་ཀྱི་དབང་རྡོ་རྗེས་ཐོགས་པ་མེད་པར་ཀུན་ཏུ་དབང་བསྐུར་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་པའོ། །དེ་བཞིན་གཤེགས་པའི་མཛད་པ་ཡི། །ཆོས་དོན་དེ་ཉིད་བླ་ན་མེད། །སྤྱོད་པའི་གསང་བ་མངོན་དུ་བྱུང་། །ཁྱད་པར་སྣོད་ལྡན་རྟོགས་གྱུར་པའོ། །དག་པའི་གནས་དང་འཁོར་འདུས་ལ། །ཅི་ཕྱིར་ཚིག་ནི་འདི་ལྟ་བུ། །རིགས་པ་མ་ཡིན་ཅེས་པའི་
དོན། །ཐེ་ཚོམ་གནས་སུ་གྱུར་པ་ལས། །ཕྱི་རོལ་གྱུར་དང་ཐུན་མོང་དང་། །ཇི་བཞིན་སྒྲ་དང་མ་ཡིན་དང་། །བསྟན་ལ་རང་དགར་འཇུག་པ་ཅན། །ཡིན་ནམ་སྙམ་དུ་རྟོག་པ་ལ། །བཟློག་པ་དེ་བཞིན་གཤེགས་རྣམས་ཀྱིས། །ཕྱིན་ཅི་ལོག་ཏུ་གྱུར་ལས་བཟློག །ལན་གསུངས་སྒྲོ་འདོགས་བཅད་པའོ། །སེམས་ལ་དམིགས་པ་བདག་མེད་པ། །རྣམ་པར་དབེན་དོན་བསྟན་པ་ལས། །གསང་བ་བྱང་ཆུབ་རིམ་གྱིས་དང་། །ཅིག་ཅར་རིམ་པ་ཉེར་བསྟན་པ། །དེ་ཉིད་ལམ་དུ་མངོན་པར་འབྱུང་། །སྤྱོད་དང་གྲོལ་བ་བླ་མེད་པ། །སྣ་ཚོགས་ཐབས་ཀྱིས་གདུལ་དོན་དུ། །སྒྱུ་མ་ལྟ་བུའི་སྤྱོད་པ་སྤྱོད། །རྣལ་འབྱོར་བརྟུལ་ཞུགས་མཆོག་འཛིན་པའི། །ཀུན་འགྲོ་ཀུན་ལ་དབང་བསྐུར་བ། །མི་འཇིགས་དགྲ་ལས་རྒྱལ་བ་སྟེ། །རིག་པ་བརྟུལ་ཞུགས་སྤྱོད་བྱ་བ། །ཀུན་བཟང་མགོན་པོ་ཀུན་སྤྱོད་དོ། །སྤྲོས་པའི་སྤྱོད་པས་མཉམ་གཞག་དང་། །རྗེས་ཐོབ་གཉིས་མེད་ལམ་དུ་བླང་། །ཕྱོགས་ལས་རྣམ་རྒྱལ་སྤྱོད་ཐོབ་ནས། །ཡེ་ཤེས་ཆེན་པོའི་སྤྱད་བྱ་བ། །ཟུང་འཇུག་བདེ་ཆེན་རོ་མཉམ་ལས། །མཐར་ཐུག་སྤང་བླང་མེད་པར་གྲོལ། །ཨ་བ་དྷཱ་ཏཱིའི་སྤྱོད་པ་ལས། །སྤྲོས་བཅས་སྤྲོས་མེད་དག་དང་ནི། །ཤིན་ཏུ་སྤྲོས་མེད་སྤྱོད་པ་སྤྱོད། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་གཅིག་པའོ། །སངས་རྒྱས་ཀུན་གྱི་བླ་མེད་པ། །གསང་བ་བྱང་ཆུབ་སེམས་དབང་བསྐུར། །དབང་པོ་རབ་དང་ཡང་རབ་དང་། ། འབྲིང་གྱུར་མོས་པའི་དབང་བྱས་པས། །ཐམས་ཅད་མོས་སྤྱོད་ལམ་མཚན་པ། །གསང་ཆེན་མཆོག་གི་དོན་ལས་ནི། །ཡེ་ཤེས་ལམ་བསྟན་དེ་ཉིད་དོ། །དཀྱིལ་འཁོར་ཆེན་པོའི་ཚད་གྱུར་བ། །ཡེ་ཤེས་ཚད་མེད་རི་རབ་སྟེ། །སྤྱོད་ཡུལ་བླ་མེད་འདིར་བསྟན་པ། །མཆོད་པའི་རོལ་པ་ལྷ་མོ་སྟེ། །པདྨ་སྣ་ཚོགས་བདེ་བས་མཆོད། །ཕྱོགས་བཅུ་དུས་གསུམ་རྒྱལ་བ་ཀུན། །གསང་ཆེན་ཐེག་པ་ལ་བརྟེན་ནས། །རྡོ་རྗེ་ཡེ་ཤེས་ཏིང་འཛིན་བརྙེས། །རྡོ་རྗེ་འཆང་གི་ངོ་བོར་ནི། །བདེ་ཆེན་མཉམ་པ་ཉིད་གྱུར་པས། །མི་ཕྱེད་ཡེ་ཤེས་མངོན་སངས་རྒྱས། །
རིགས་ལྡན་མཆོད་པ་བླ་ན་མེད་པ་སྟེ། །དྲན་པ་གཅིག་པ་ནས་ནི་ལུས་དབེན་པར། །རགས་པའི་ཏིང་འཛིན་སློབ་དུས་མཉམ་རྗེས་ལས། །ཡུལ་ལྔ་གཟུགས་ཀྱི་རྡོ་རྗེ་མ་ལ་སོགས། །ས་ཡི་སྙིང་པོ་ལ་སོགས་དབང་པོ་ལྔ། །ཡབ་ཡུམ་ལྷར་བརྟེན་སློབ་པ་སྤྱོད་པ་སྟེ། ། གཟུང་འཛིན་མ་སྤངས་སྤྲོས་པ་ལྡན་པའི་ཕྱིར། །སྤྲོས་བཅས་སྤྱོད་པ་ཞེས་ནི་གྲགས་པའོ། །མཆོད་ཡུལ་རིགས་ལྔ་རྣམ་སྣང་ལ་སོགས་པ། །མཆོད་རྫས་ཡུལ་ལྔ་ལྷ་དང་ལྷ་མོར་སྣང་། །མཆོད་བྱེད་སྤྲོས་བཅས་སྤྱོད་པ་ལ་གནས་པ། །མཆོད་ཐབས་སོ་སོར་རིགས་ཀྱིས་མཆོད་པའོ། །རྟེན་སློབ་སྤྲོས་མེད་དག་དབེན་སེམས་དབེན་ལྡན། །བདག་བྱིན་བརླབས་པས་ཏིང་འཛིན་ཕྲ་བས། །སློབ་མ་མཉམ་རྗེས་ཐབས་དང་ཤེས་རབ་དག །གཉིས་མེད་རྟེན་པའི་ལུས་སེམས་བརྟེན་སློབ་པ། །མཆོད་བྱ་རིགས་ཀྱི་བདག་པོ་ལྔ་སོགས་སོ། །མཆོད་དངོས་རྣམ་གསུམ་ཁྱད་པར་དག་ཏུའོ། །མཆོད་བྱེད་རྣལ་འབྱོར་གྱིས་ནི་ཐབས་བཅས་མཆོད། །རྟེན་སློབ་ཤིན་ཏུ་སྤྲོས་མེད་འོད་གསལ་ནས། །སྒྱུ་ལུས་དག་པའི་བར་དུ་ཏིང་འཛིན་ནི། །ཤིན་ཏུ་ཕྲ་བ་སློབ་པ་མཉམ་རྗེས་ལ། །བསམས་པས་ཐབས་དང་ཤེས་རབ་དབང་པོ་དང་། །ཡུལ་ལྔ་གཉིས་མེད་རང་བཞིན་མེད་པར་བསླབ། །སྤྲོས་པ་རྣམ་པར་བྱེད་པ་དེ་ཡི་ཕྱིར། །ཤིན་ཏུ་སྤྲོས་མེད་དེ་ལ་བྱེ་བྲག་ཏུ། །མཆོད་བྱའི་ཡུལ་ནི་ཡེ་ཤེས་སྐུ་འབྱུང་བ། །མཆོད་བྱེད་གང་ཟག་སྒྱུ་མར་གནས་པས་སོ། །དོན་ནི་སྣང་གསུམ་སྒྱུ་མར་ལྡན་པ་ལས། ། མཆོད་དངོས་སྒྱུ་མའི་འདོད་ཡོན་ཉིད་ཡིན་ནོ། །མཆོད་པའི་ཐབས་ནི་བསམ་གཏན་གཉིས་ཀྱིས་ནི། །འོད་གསལ་ངང་དུ་ཐིམ་པ་དེ་ཉིད་དོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་གཉིས་པའོ། །རྗེས་སུ་མདོར་བསྟན་དྲུག་གིས་ནི། ། དབེན་པ་གསུམ་དང་སྒྱུ་ལུས་དང་། །འོད་གསལ་སྔོན་འགྲོ་རྒྱུ་དག་ལས། །ཏིང་འཛིན་ལས་སྤྱོད་དེས་སྤྱོད་པའི། །སྙོམས་འཇུག་རིམ་པ་གཉིས་ལྡན་ལས། །དག་པའི་སྒྱུ་ལུས་རྫོགས་རིམ་གྱི། །རིགས་ལྔའི་གསང་བའི་སྤྱོད་པ་ལས། །སློབ་བཞིན་ཟུང་འཇུག་ཡེ་ཤེས་
འཐོབ། །བསྐྱེད་རིམ་པས་ནི་མཁའ་གསང་དག །བྱིན་བརླབས་སྙོམས་ཞུགས་སྤྱོད་པའོ། །རྗེས་སུ་དྲན་པ་བཅུ་དྲུག་གིས། །ལམ་དང་སྤྱོད་པ་བསྟན་པ་ལས། །དག་པའི་སྒྱུ་མ་ལ་གནས་ནས། །མཚན་མ་མེད་པའི་ཏིང་ངེ་འཛིན། །རིགས་ལྔའི་དང་པོའི་སྦྱོར་བ་བསྟན། །སངས་རྒྱས་རྗེས་དྲན་ལ་སོགས་ལྔས། །སྒྱུ་དག་འོད་གསལ་ལུགས་བཟློག་ལས། །རྫོགས་པའི་རིམ་པ་བསྟན་པའོ། །སྣང་གསུམ་ངང་ལས་ལོངས་སྐུ་ནི། །རྡོ་རྗེ་འཆང་དུ་གནས་པ་ལས། །ཡབ་ཡུམ་བདེ་བའི་ངང་ལས་ནི། །རྣམ་སྣང་མཛད་ཀྱི་སྤྲོ་བསྡུ་ཡིས། ། སྤྲུལ་སྐུའི་སྤྲོས་ནས་བསྡུ་བར་བྱ། །རྗེས་དྲན་དྲུག་པས་ལྕེ་ཆུང་གི། །བདུད་རྩི་འབབ་བྱེད་བཅུད་ལེན་བསྟན། །བདུན་པས་བདག་ཉིད་ཡབ་ཡུམ་ལྡན། །མཚན་མ་མེད་ལ་གནས་པ་ཡིས། །དཀྱིལ་འཁོར་རྒྱལ་པོ་མཆོག་གནས་པ། །བརྒྱད་པ་དགུ་བ་བཅུ་པ་ལས། །སྐུ་གསུང་ཐུགས་རྣམས་བྱིན་བརླབ་པ། །ལྷ་ཡི་རྣལ་འབྱོར་བསྟན་པའོ། །བཅུ་གཅིག་པ་དང་བཅུ་གཉིས་པས། །རྒྱུ་དག་ལྷ་ཡི་སྐུ་གསུང་ཐུགས། །བྱིན་རླབས་བཞི་ཡི་བསྡུས་པ་ལ། །ཐམས་ཅད་ཡེ་ཤེས་དབྱིངས་འཇུག་པ། །ཕྱི་མར་མཆོག་ཐོབ་བསྟན་པའོ། ། བཅུ་གསུམ་པ་ནི་བར་མ་དོར། །སངས་རྒྱས་ལམ་ནི་སྟོན་པའོ། །བཅུ་བཞི་པ་དང་བཅོ་ལྔ་པས། །ཕྱག་རྒྱ་ཆེན་པོ་གྲུབ་པ་སྟེ། །ཚེ་འདིར་འཚང་རྒྱའི་ལམ་སྟོན་བྱེད། །དེ་ལྟར་རྗེས་དྲན་བཅོ་ལྔ་པས། །ཏིང་ངེ་འཛིན་ནི་བསྟན་པའོ། །སྤྱོད་པ་རྗེས་དྲན་བཅུ་དྲུག་པས། ། དཀྱིལ་འཁོར་ཏིང་འཛིན་བསྡུས་ནས་ནི། །སྤྱོད་པ་ལྷ་མོ་དགུའམ་ལྔ། །སྤྱོད་པ་མཐར་ཕྱིན་བྱེད་པའོ། །རྗེས་དྲན་བཅུ་དྲུག་གིས་ནི་འདིར། །མྱུར་བར་སྐྱོབ་པའི་ཁྱད་པར་ཡང་། །ཟབ་དང་རྒྱ་ཆེ་བསྟན་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་གསུམ་པའོ། །འཇིག་རྟེན་འཇིག་རྟེན་འདས་པ་ཡི། །བདེར་གཤེགས་བྱང་ཆུབ་སེམས་དཔར་བཅས། །ཐེ་ཚོམ་གཅོད་མཛད་རྡོ་རྗེའི་ཚིག །ཡང་དག་དོན་ནི་སྟོན་པར་མཛད། །གསང་བ་ཡེ་ཤེས་སྨིན་གྲོལ་གྱིས། །ཏིང་འཛིན་ཡེ་ཤེས་ཆོས་བསྟན་ཏོ། །
དགོངས་ཏེ་གསུངས་པ ་གང་ལ་གང་། །སྔོན་བྱུང་རྗེས་འཇུག་ལྡེམ་དགོངས་ཉིད། །གསལ་བ་གཞན་ལས་ཁྱད་པར་གྱུར། །དཀྱིལ་འཁོར་དབུས་དབྱུང་རིགས་བསྡུས་པའི། །དེ་ཉིད་རྒྱལ་བ་བསླང་བར་མཛད། །གཅོད་བྱེད་རྡོ་རྗེ་བཟླས་པ་སྟེ། །མ་བྱིན་ལེན་པ་སེམས་དམིགས་ཀྱིས། །མི་ཚངས་སྤྱོད་པའི་འོད་གསལ་བ། །སྒྱུ་མས་བརྫུན་དུ་སྨྲ་བ་ཉིད། །ཟུང་འཇུག་རབ་ཏུ་མི་གནས་པས། །ཚིག་རྩུབ་དངོས་འཛིན་ཟློག་པར་བྱེད་པའོ། །ལས་རླུང་ཅུང་ཟད་དུལ་བར་གྱུར་པ་ཡིས། ཡེ་ཤེས་རླུང་གི་ནུས་པ་རྙེད་གྱུར་ནས། ། ཏིང་འཛིན་གསལ་ཞིང་ཕྲ་རབ་འཇུག་པ་ཉིད། །ཀུན་འདར་དུ་ནི་སྲོག་རྩོལ་རབ་སིམ་གྱུར། །དབུ་མར་གནས་པས་འབྱུང་འཇུག་གཡོ་མི་འགྱུར། །དེ་ལས་ཡེ་ཤེས་འོད་ཟེར་གློག་ལྟ་བུ། །ཀུན་ནས་འབྱུང་བ་དེ་ཉིད་ཐིག་ལེའི་དབུས། །དཀར་དམར་གོང་བུ་འདྲེས་པའི་བྱང་ཆུབ་སེམས། །འབྱུང་བའི་སྒོ་དང་འཇུག་པའི་སྒོ་ཉིད་ནི། །མི་འཕོ་རི་བོང་འཛིན་པ་ཟླ་རྒྱས་པས། །སྣ་ཡི་བུ་ག་གཡས་གཡོན་རྣལ་འབྱོར་པའི། །གཅིག་ནས་འབྱུང་ཞིང་གཅིག་ཏུ་འཇུག་པ་ནི། །ཚིམ་བྱེད་བདེ་གནས་སྙིང་གི་ལྟེ་བར་ནི། །གནས་པ་རྡོ་རྗེ་འཛིན་པའི་སྙིང་པོ་ནི། །བསྐུལ་བར་གྱུར་པའི་བདེ་གཤེགས་ཐམས་ཅད་ལ། །ཕྱོགས་བཅུར་མཆོད་ནས་དགྱེས་པར་གྱུར་པ་ལས། །བདུད་རྩི་སྤྱན་གྱི་མཛོད་སྤུ་ནས་ཕྱུང་སྟེ། །འཇུག་པ་རྣལ་འབྱོར་སྤྱི་གཙུག་འཁོར་ལོར་ཞུགས། །མགྲིན་པར་ལོངས་སྤྱོད་ཐུགས་ཀར་ཐིམ་གྱུར་པས། །བྱང་ཆུབ་ཆེན་པོ་ཨ་བ་དྷཱུ་ཏཱི་ར་གནས། །དེ་ཉིད་སྤྲོས་མེད་བདུད་རྩི་རབ་རྒྱས་པས། །གནས་བཅུར་ཁྱབ་པ་ཀུན་འདར་མི་ལྡོག་གྱུར། །བདེ་བ་ཆེན་པོའི་སྙིང་པོ་བསྐུལ་བ་ནི། །སྐུ་གསུང་ཐུགས་ཀྱི་རྡོ་རྗེ་རོ་མཉམ་པས། །བྱང་སེམས་རྡོ་རྗེ་ཉིད་དུ་མཆོག་མངོན་འགྱུར། །རྒྱལ་སྲས་ཐམས་ཅད་རབ་ཏུ་དགྱེས་གྱུར་པས། །ཡེ་ཤེས་སྙིང་པོ་ནུས་པ་བརྟན་བྱེད་འགྱུར། །འདི་ནི་ཡེ་ཤེས་ཕོ་ཉ་མཆོག་གིས་ནི། །སྐད་ཅིག་ཉིད་ལ་བྱང་ཆུབ་མངོན་དུ་བྱེད། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་བཞི་
པའོ། །ཡེ་ཤེས་མངོན་པར་འབྱུང་བ་ལས། །སྔགས་ཀྱིས་ལྷ་ཡི་སྐུ་བསྐྱེད་པ། །མངོན་པར་བྱང་ཆུབ་རྣམ་ལྔ་ལས། །རྡོ་རྗེ་འཆང་ཉིད་གྲུབ་བྱེད་པའི། །བདེན་གཉིས་རྣམ་དག་རྒྱུ་འབྲས་ཏེ། །ཡོངས་སུ་དག་པའི་སྐུར་རྫོགས་བྱེད། །རིགས་ཀྱི་ལྷ་ཡི་རྣལ་འབྱོར་པ། །རིམ་པ་ཇི་བཞིན་རྫོགས་བྱེད་པ། །སྔགས་ཀྱིས་བསྐྱེད་པའི་རྣལ་འབྱོར་རོ། །ཡེ་ཤེས་ཀྱིས་ནི་སྐུ་བསྐྱེད་པ། །རྡོ་རྗེ་འཆང་ཉིད་རྣལ་འབྱོར་པ། །སྒྱུ་མ་སྟོང་ཉིད་འཇུག་པ་སྟེ། །དངོས་པོས་མཐོང་བར་མི་འགྱུར་རོ། །ཁམས་གསུམ་བརྟན་གཡོ་བདག་ཉིད་བཅས། །རིལ་འཛིན་རྗེས་གཞིག་ཏིང་འཛིན་གྱིས། །ཐམས་ཅད་འོད་གསལ་གནས་འཇུག་པ། །ཡེ་ཤེས་ཟུང་འཇུག་ཐོབ་འགྱུར་བའོ། །བྱང་ཆུབ་སེམས་དཔའི་ཏིང་འཛིན་གྱིས། །མངོན་ཤེས་སྒྲུབ་བྱེད་ས་བོན་བཅས། །དེ་ལས་ཡང་དག་རབ་གྲུབ་འགྱུར། ། དེ་བཞིན་གཤེགས་པ་ཐམས་ཅད་ཀྱི། །སྐུ་གསུང་ཐུགས་ཀྱི་ཕྲིན་ལས་སྟོབས། །མཚུངས་མེད་ཡོན་ཏན་རྒྱ་མཚོ་སྟེ། །མི་ཟད་རྒྱན་གྱི་འཁོར་ལོ་མཆོག །ཨཱ་ལི་བཅུ་གཉིས་དབྱངས་ལྡན་པ། །འབྱུང་བ་ལྔ་ཡི་རླུང་གིས་ནི། །ལྷ་མོ་ལྔ་རུ་གྱུར་པ་ལ། །དབྱངས་ཀྱི་ཡན་ལག་དྲུག་ཅུར་བརྗོད། ཀཱ་ལི་གསལ་བྱེད་ཡི་གེ་ནི། །ཌ་ཌྷ་ད་དྷ་ཡ་ལ་ཏ། །སུམ་ཅུ་རྩ་བཞི་དེ་སྙེད་ལས། །དྲུག་བཅས་བཞི་བཅུ་ཉིས་འགྱུར་ལས། །དཔེ་བྱད་བཟང་པོ་བརྒྱད་ཅུར་འགྱུར། །རང་བཞིན་དག་པས་གནས་འགྱུར་བའོ། །ཡང་ན་དབྱངས་ཡིག་ཉིས་འགྱུར་བཅས། །མཚན་མཆོག་སུམ་ཅུ་རྩ་གཉིས་པོ། །འགྲུབ་འགྱུར་རྒྱུ་རྐྱེན་ཉེར་ལེན་ལས། །རྒྱུ་འབྲས་མངོན་དུ་གསལ་བར་འབྱུང་། །རྫོགས་སངས་རྒྱས་ཀུན་ཡོན་ཏན་ནི། །འཁོར་ལོས་སྒྱུར་ལས་ཁྱད་འཕགས་པ། །མཛོད་སྤུ་སྨིན་མཚམས་འོད་འབར་བ། །གསང་བ་སྦུབས་སུ་ནུབ་པ་དང་། །གཙུག་ཏོར་ལྟ་བས་མི་མངོན་པ། །འོད་ཟེར་དཀྱིལ་འཁོར་ཁྱབ་བྱེད་པ། །དབང་གི་ནུས་པ་བརྟན་གྱུར་པས། །གཟུགས་སྐུའི་ཡོན་ཏན་རྒྱུ་འབྲས་ཀྱི། བྱེད་ལས་སྟོབས་ལྡན་འབྱུང་འགྱུར་ཉིད། །གསང་སྔགས་ཟབ་དང་རྒྱ་ཆེ་བ། མྱུར་བ་ཉིད་
དུ་བྱིན་བརླབས་ཤིང་། །བདེ་བ་ལམ་བྱེད་ཚེ་འདི་དང་། །བར་དོར་ཡེ་ཤེས་མངོན་དུ་བྱེད། །བླ་མ་ལས་ནི་གྲོལ་སྤྱོད་འཐོབ། །མངོན་སུམ་རྟེན་འབྲེལ་ཁྱད་པར་རོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་ལྔ་པའོ། །དེ་ནས་རང་བཞིན་རྟོག་པ་ནི། །དཔེར་ན་རྒྱ་མཚོ་ཆེན་པོ་ལ། །བྱ་ཡི་ཚོགས་རྣམས་རྒྱུ་བ་ཀུན། །འགྲོ་འོང་དུ་མ་བྱེད་གྱུར་ཀྱང་། །རྒྱ་མཚོ་གཡོ་བ་མེད་པ་བཞིན། །སྣང་བ་གསུམ་གྱི་ཡེ་ཤེས་ལ། །གོས་པ་མེད་ཅིང་རྟོག་པ་མེད། །རྩ་རྣམས་རྣམ་པར་དག་པས་ནི། །གཏུམ་མོ་ཡེ་ཤེས་མེ་འབར་བའོ། ། རླུང་ནི་སྲོག་རྩོལ་དག་པ་ན། །སྒྱུ་མ་སྨིག་རྒྱུ་ཆུ་ཟླར་འཆར། །ཐིག་ལེ་དག་པར་གྱུར་པ་ན། །འོད་གསལ་བདེ་བ་ཆེན་པོར་འཆར། །བག་ཆགས་རྟོག་པ་དག་པ་ལས། །རྨི་ལམ་སངས་རྒྱས་ཞིང་ཁམས་མཐོང་། །ཡི་གེ་དག་ཅིང་ཁམས་དངས་པས། །མཁྱེན་པ་བརྐྱང་བས་རྣམ་གྲོལ་འཐོབ། །སེམས་གསུམ་ཞིག་ནས་ཆ་དང་ནི། །སེམས་གསུམ་ལྷག་མཐོང་གང་ཡིན་པ། །རྣལ་འབྱོར་པ་ལ་ངེས་པར་འཆར། །རྟོག་པའི་རྦ་རླབས་ངང་གིས་ཞི། །སྣང་བ་སྐྱེ་བ་མེད་པ་སྟེ། །སྣང་བ་ཐོབ་པ་འགག་པ་མེད། །སྣང་བ་མཆེད་པ་མི་གནས་ཤིང་། །གནས་པ་མེད་པས་མི་རྟག་པ། །ཉེར་ཐོབ་སྟོང་ཉིད་དོན་གནས་པའོ། །འོད་གསལ་ཆོས་ཉིད་དེ་བཞིན་ཉིད། །མཁའ་ལྟར་དག་པ་བདེ་བ་ཆེ། །མ་འགགས་དྲི་མ་མེད་ཞི་བ། །དོན་དམ་ཕྱག་རྒྱ་ཆེན་པོ་ཉིད། །ས་ལམ་ནུས་པ་ཀུན་རྫོགས་པ། ། སློབ་པའི་ཟུང་འཇུག་སྙིང་པོ་ཉིད། །རྡོ་རྗེ་སྒོ་གསུམ་རྣམ་དག་པས། །མི་སློབ་ཟུང་འཇུག་མངོན་དུ་གྱུར། །དེ་ཉིད་མཐར་ཕྱིན་བླ་མེད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་དྲུག་པའོ། །དེ་ནས་དཔལ་ལྡན་རྡོ་རྗེ་འཆང་། །འཇམ་པའི་རྡོ་རྗེའི་ཏིང་འཛིན་གྱིས། །བསམ་གཏན་གཉིས་ཀྱིས་ཡེ་ཤེས་འཇུག །དེ་ཡི་ཁྱད་པར་བཅས་པ་བསྟན། །རིག་པ་འཛིན་པ་ལྔ་གྲུབ་པ། །རྣལ་འབྱོར་དངོས་གྲུབ་ཐོབ་འགྱུར་བཤད། །འབྲུ་གསུམ་བདུད་རྩི་རིལ་བུ་ཡི། །ཡོན་ཏན་ནུས་པ་མྱུར་གྲུབ་བྱེད། རྡོ་རྗེ་དགུག་པའི་ཕྲིན་ལས་
དབང། །དམ་ཚིག་ཤ་ལྔའི་ཡོན་ཏན་ཚུལ། །དེ་ལས་དངོས་གྲུབ་དབང་ཕྱུག་འཐོབ། །མངོན་གྱུར་འབྲས་བུ་ཕྲིན་ལས་འགྲུབ། །ད་ནི་བསྙེན་བསྒྲུབ་ཡན་ལག་བཞི། །རྡོ་རྗེ་རྣམ་བཞི་ལྷ་ཡི་སྐུ། །ལུས་དབེན་རྡོ་རྗེ་བཟླས་པ་དང་། །སྣང་གསུམ་སྒྱུ་ལུས་འོད་གསལ་བ། །སོ་སོར་བསྡུས་པ་བསམ་གཏན་ལམ། །སྲོག་རྩོལ་འཛིན་པ་དེ་བཞིན་ཉིད། །རྗེས་དྲན་ཡན་ལག་ཏིང་འཛིན་སྟོབས། །ཟུང་འཇུག་རིམ་པ་བསྟན་པ་ལས། །རིགས་ཀྱི་ཆ་ལས་དེ་ཉིད་གནས། །རྒྱུ་རྐྱེན་ལམ་དང་ནུས་འབྲལ་གང་། །མངོན་འགྱུར་ལྟ་སྟངས་སྤྱོད་ཡུལ་ཀུན། །རིམ་གྱིས་འཆར་དང་ཅིག་ཅར་བ། །དེ་ཉིད་ཐོད་རྒལ་རིམ་རྟོགས་བྱ། །ཚེ་འདིར་སངས་རྒྱས་ལམ་དང་ནི། །བར་དོར་དངོས་གྲུབ་འབྱུང་ལམ་དང་། །སྒོ་གསུམ་བྱིན་བརླབས་རྡོ་རྗེ་ཡི། །སྨོན་ལམ་ཕྱི་དུས་འགྲུབ་པར་གྱུར། །བསམ་གཏན་གནས་པ་དབང་པོ་ཐབས། །ཡུལ་ཉིད་ཤེས་རབ་ཏིང་ངེ་འཛིན། །དབྱེར་མེད་སྦྱོར་བ་གསང་གནས་ཏེ། །དུས་གསུམ་ལས་འདས་རྟོག་པའོ། །རྣམ་ཤེས་དེ་ཉིད་གསལ་བ་ལས། །མ་འགགས་ཡུལ་རྗེས་མི་འབྲང་ཞིང་། །མི་གཡོ་ཉོན་མོངས་ལས་དག་པ། །རྣམ་པར་སྤྱོད་པ་བྱེ་བྲག་གསལ། །རྣམ་པར་མི་རྟོག་དམིགས་མེད་པ། །མི་འཁྲུལ་ལུས་སེམས་ཐ་མི་དད། །ཚོར་བ་ལས་འདས་དགའ་བ་ཉིད། །འཕྲོ་བ་མེད་པས་སེམས་གནས་པའོ། །ཟུག་རྔུའི་རྡུལ་མང་རྣམ་འཚེ་དག །སྒོ་གསུམ་ངང་དུ་དུལ་ཞིང་ཞི། །བདེ་བ་ཟག་མེད་ཆོས་ཉིད་གནས། །འདུ་འབྲལ་མེད་པར་གྱུར་པས་སོ། །རབ་ཏུ་དུལ་བ་རྣམ་ཤེས་ཚོགས། །དག་གྱུར་ཤེས་བྱ་ཆོས་ཀྱི་ཁམས། །ཟད་ཅིང་གཟུང་འཛིན་རྣམ་དག་པས། །སྟོང་ཉིད་ཡེ་ཤེས་རྩེ་གཅིག་པ། །རྣམ་པ་ཀུན་དུ་མི་ལྡོག་པས། །མཚན་མ་མེད་པ་བྱང་ཆུབ་པའོ། །སྣང་བ་ཐོབ་པ་སྟོང་པ་ཉིད། མཆོད་པ་སྟོང་ཆེན་གྱུར་པ་སྟེ། །སྣང་ཙམ་ཐམས་ཅད་སྟོང་པ་དང་། །ཉེར་ཐོབ་ཐམས་ཅད་སྟོང་པ་ཉིད། །དག་པ་རབ་གསལ་མཆོག་གྱུར་པས། །རོ་གཅིག་གྱུར་པ་ལུགས་འབྱུང་དང་། །ལུགས་བཟློག་རྟོག་ཚོགས་ཞི་བ་སྟེ། །སངས་རྒྱས་ཀུན་དངོས་
འཇིག་རྟེན་ལམ། །དེ་ཉིད་མཆོག་ཏུ་བསྟན་པ་ཡིན། །དེ་བཞིན་གཤེགས་ཀུན་བདག་ཉིད་ལས། །རྐྱེན་ལས་འབྱུང་བ་ལམ་གྱུར། །རྣལ་འབྱོར་གསལ་དང་མི་རྟོག་པ། །བདེ་བའི་བྱེད་པ་ལྟ་སྟངས་ལས། །ཀ་ར་ཎ་བཅིངས་ནུས་པས་ནི། །སྲིད་པ་གསུམ་པོ་གཡོ་མི་འགྱུར། །བིདྷུ་ཀུན་དོར་གནང་སྡོམ་ལས། །མི་འགྱུར་བརྟན་བྱེད་ཡོན་ཏན་ཐོབ། །ལུས་གནས་རྩ་ཡི་ཕོ་བྲང་ལས། །གཡས་པའི་ཉི་མ་རྩོལ་བ་སྟེ། །གཡོན་པ་ཟླ་བ་སྲོག་བཅིང་བ། །འབྱུང་འཇུག་གནས་པ་ལམ་བསྟན་པའོ། །དབུ་མར་བྱང་སེམས་རྟེན་བྱེད་པ། །ཀུན་འདར་ངེས་གནས་འཕོ་མེད་བཟུང་། །མཚན་མར་མི་འགྱུར་མཆོག་གི་རྩ། །ལས་ཀྱི་རླུང་སྒོམ་བྱེ་བྲག་པ། །འགོག་པས་མུན་པ་སྒྲ་གཅན་འཛིན། །གསང་བའི་སྣ་རྩེའི་སྟེང་འོག་ཏུ། །འབྱུང་བ་རྐྱེན་རླུང་སྣང་བ་གྲོགས། །སྒོ་ལྔ་བཟློག་ལས་གནས་པར་བྱ། །ཡེ་ཤེས་སྒྲོན་མེ་སྣང་བ་སྐྱེ། །རྣལ་འབྱོར་གང་ཞིག་མངོན་གྱུར་པས། །རླུང་སེམས་རྣམ་དག་རྟགས་འཆར་པ། །ཡང་ན་འཕོ་ཚེ་ལམ་འཐོབ་འགྱུར། །དེ་ལས་རང་བཞིན་དག་པའི་ཚེ། །འོད་གསལ་ངང་ལས་སྤྲོ་བསྡུ་ཉིད། །དབུ་མའི་ལམ་ནས་འཇུག་པར་འགྱུར། །བདེ་བའི་ཐིག་ལེ་ཐབས་དང་ནི། །ཡེ་ཤེས་མེ་ནི་ཤེས་རབ་ཆེ། །གཉིས་མེད་དྷཱུ་ཏཱིའི་ནང་ཞུགས་པས། །བདུད་རྩི་མི་འཕོ་གསང་ལམ་གནས། །དེ་ཉིད་དུ་ནི་སྲོག་བརྟེན་ཅིང་། །འཛིན་པ་ཡེ་ཤེས་ལམ་གྱུར་པའོ། །དེ་ལས་གཏུམ་མོ་འབར་གྱུར་ཞིང་། །ལས་རླུང་གྱེན་ལོག་ལྟེ་བར་ཕྱིན། ། ཧོ་ལས་བདུད་རྩི་འབར་འཛག་གྱུར། །མགྲིན་པར་དགའ་བ་སྙིང་གར་ནི། །མཆོག་དགའ་ལྟེ་བར་ཁྱད་པར་ཅན། །གསང་བར་མི་ལྡོག་ལྷན་ཅིག་སྐྱེས། །མཆོག་ཏུ་མི་འགྱུར་འཐོབ་པའོ། །དེ་ཉིད་ཡེ་ཤེས་རྗེས་དྲན་གཅེས། ལུས་ངག་ཡིད་དང་ཡེ་ཤེས་ཞི། །ཕྱག་རྒྱའི་དེ་ཉིད་མངོན་གྱུར་པའོ། །ཤེས་པ་དག་ནི་རྣམ་དག་པ། །ལྟེ་བར་འདོད་ཆགས་རྟོག་པ་དག །སྙིང་གར་གཉིད་ཀྱི་རྟོག་བཞི། མགྲིན་པར་རྨི་ལམ་ཤེས་པ་དག །དཔྲལ་བར་སད་པའི་ཤེས་པ་སྤངས། །ལས་རླུང་རྩ་ཡི་འཁོར་ལོ་ཡི། །ཐིག་ལེར་གནས་པ་རྟེན་དང་ནི། །བརྟེན་པ་
བྱང་སེམས་མི་འགྱུར་ཐོབ། །ལས་ཀྱི་ཕུང་པོ་ལོག་གྱུར་ཅིང་། །མཉམ་པའི་བདེན་པ་ལ་འཇུག་པ། །གཙུག་ཏོར་སྒོ་ནི་ཕྱེ་གྱུར་པས། །འབིགས་བྱེད་བརྟན་པའི་དོན་ཐོབ་པས། །ཡོན་ཏན་དཔག་མེད་མངོན་དུ་གྱུར། །ཐབས་དང་ཤེས་རབ་དབྱེར་མེད་པ། །དཔལ་ལྡན་རྡོ་རྗེ་འཆང་དུ་གྱུར། །དེ་ཉིད་ཡོན་ཏན་ཕྲིན་ལས་ཚོགས། །རྟོག་མེད་ངང་ལས་ཀུན་དུ་འབྱུང་། །སྐད་ཅིག་མངོན་རྫོགས་ཟུང་འཇུག་པ། །ཏིང་ངེ་འཛིན་ཞེས་བརྗོད་པ་སྟེ། །གསང་ཆེན་གནས་འཐོབ་མངོན་སངས་རྒྱས། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་བདུན་པའོ།། །།དེ་ནས་ཡེ་ཤེས་ཀུན་མཁྱེན་པའི། །གསང་བ་རབ་འབྱམ་གྲུབ་པ་སྟེ། འཇིག་རྟེན་འཇིག་རྟེན་འདས་པ་ཡི། །ཡང་དག་སྦྱོར་བའི་དོན་གྱིས་ནི། །ཐོགས་མེད་ནུས་པ་ལྡན་གྱུར་པ། །བདེན་པ་གཉིས་བསྲེས་དོན་བསྟན་པའོ། །ཕྲིན་ལས་བཞི་ཡི་བྱེད་པ་ལས། །གྲུབ་ཚུལ་དེ་ཉིད་བསྟན་པའོ། །བཟླས་ཐབས་བཅུ་ཡིས་གྲུབ་པའི་དོན། །སྔགས་རྣམས་ཀུན་གྱི་དེ་ཉིད་ཀྱིས། །ལམ་རྫོགས་ས་རྣམས་མངོན་གྱུར་པས། །བདག་བྱིན་བརླབ་པར་གྱུར་པའོ། །ཚེ་འདི་ཉིད་དང་བར་དོར་ནི། །ཡེ་ཤེས་དངོས་གྲུབ་ཐོབ་པར་བཤད། །གོང་དུ་འཕོ་བའི་དོན་གྲུབ་བྱེད། །བཅུ་བདུན་ལྷ་ཡི་འཁོར་ལོ་ལས། །གྲུབ་པ་རབ་གསལ་བདེ་ཐོབ་པའོ། །མཚོན་བྱའི་འབྲས་བུ་མངོན་གྲུབ་ན། །མཚོན་བྱེད་ནུས་པ་ཐོགས་མེད་འབྱུང་། །གསལ་བྱ་གསལ་བྱེད་རྒྱུ་འབྲས་དང་། །བསྐྱེད་བྱ་སྐྱེད་བྱེད་རྒྱུ་འབྲས་སོ། །ངོ་བོ་ཉིད་ཀྱི་རྒྱུ་འབྲས་ལས། །རྒྱུས་ནི་འབྲས་བུ་སྐྱེད་བྱེད་པས། །འབྲས་བུ་རྒྱུ་ལས་འབྱུང་བས་ན། །ཕན་ཚུན་ལྟོས་པའི་རྒྱུ་འབྲས་སོ། །ངོ་བོ་གཅིག་པར་གྲུབ་འགྱུར་ཏེ། །རྒྱུ་འབྲས་རྣམ་པ་ཐ་དད་ཀྱང་། །རིགས་མཐུན་གནས་ཉིད་མཚུངས་འབྲལ་བས། །གྲུབ་སྡེ་གཅིག་པར་གྲུབ་པའོ། །རྒྱུ་འབྲས་མ་ལུས་རྟེན་འབྲེལ་ཏེ། །དེ་ཉིད་ནམ་མཁའི་ངོ་བོ་ཉིད། །སྟོང་ཉིད་དངོས་པོ་སྣ་ཚོགས་པར། །གནས་ཀྱང་རོ་མཉམ་འགག་པ་མེད། །ཆོས་རྣམས་སྣང་བ་མ་ལུས་ལ། །ནམ་མཁའི་རང་
བཞིན་ངང་ལས་འབྱུང་། །སྒྲིབ་ཕྱོགས་དང་ནི་སྣང་ཕྱོགས་དག །སྐྱེ་འགག་དེ་ཉིད་དངོས་མེད་པས། །བདེན་གཉིས་ཐ་དད་གྱུར་པ་ན། །ཡེ་ཤེས་ལམ་ནི་དོན་མེད་འགྱུར། །གསལ་སྟོང་གཉིས་ནི་ཐ་དད་ན། །རྟག་ཆད་མཐར་ནི་ལྟུང་བར་འགྱུར། །དངོས་པོའི་གནས་ལུགས་ལ་བརྟེན་ནས། །དངོས་མེད་ཡེ་ཤེས་འོད་གསལ་བ། །ཟབ་དང་རྒྱ་ཆེ་གཉིས་མེད་པ། །རྒྱུ་རྐྱེན་མ་ལུས་དག་བྱེད་པས། བསམ་གཏན་ཏིང་འཛིན་མཐར་ཐུག་ནི། །རྡོ་རྗེ་ལྟ་བུའི་ངོ་བོ་ཉིད། །དངོས་པོ་ཐམས་ཅད་ཟློག་བྱེད་པ། །ཤིང་གི་ཚོགས་ལ་མེ་འབར་བས། །བསྲེགས་ཏེ་དངོས་མེད་འགྱུར་བ་ལྟར། །མཐར་ནི་ཐམས་ཅད་སྟོང་ཉིད་དུ། །ཡེ་ཤེས་མེས་ནི་རྣམ་པར་སྦྱངས། །ནམ་མཁའ་ལྟ་བུའི་དབྱིངས་ལས་ནི། །ཡེ་ཤེས་ཕྲིན་ལས་འགག་མེད་འབྱུང་། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་བརྒྱད་པའོ། །་ནས་རྒྱལ་པོ་རྡོ་རྗེ་འཛིན། །དཔལ་ལྡན་ལུས་ཀྱི་རྣམ་ཤེས་དང་། །ཡེ་ཤེས་སྒྱུ་འཕྲུལ་ལ་སོགས་བསྟན། །ལྷ་མོ་བཞི་དང་ཁྲོ་བོ་བཅུ། །སྣ་ཚོགས་ཕྲིན་ལས་དུ་མ་མཆོག །འགྲོ་བ་འདུལ་བའི་དོན་དུའོ། །སྐུ་གསུང་ཐུགས་ཀྱི་རྡོ་རྗེ་ལས། །ཕྱི་ནང་དབྱེ་བ་རིམ་པ་ཡིས། །མ་གྲུབ་སྤོགས་པའི་ཆོ་ག་ནི། །ཕུར་གདབ་དེ་ཉིད་བསྟན་པའོ། །འདོད་པའི་ཁམས་ན་འགྲོ་བ་ཀུན། །རྣམ་རྟོག་རླུང་གི་ར་བར་ཚུད། །བདག་འཛིན་མདུད་པས་བསྡམས་པ་ལ། །སྨིན་གྲོལ་ཡེ་ཤེས་ལམ་རྟོགས་པ། །བླ་མའི་ཞལ་ལས་ཤེས་པར་བྱ། །པདྨ་འདབ་བརྒྱད་བཀོད་པ་ལ། ། སོ་བདུན་ཡི་གེ་ལ་དམིགས་པ། །བཅུ་དྲུག་ཆ་དང་ལྡན་པའོ། །དྲོད་ནི་སྣང་བ་རྟོག་བྲལ་སེམས། །སྤངས་ཐོབ་ཡོན་ཏན་འབྱུང་བའི་གཞི། །རྩེ་མོ་མཆོད་པ་ནུས་པ་རྙེད། །འཇིགས་པ་ལས་གྲོལ་བརྟན་པར་འགྱུར། །བཟོད་པ་སྣང་བ་ཐོབ་པ་ཉིད། །རྟོག་པ་ཀུན་ལས་རྣམ་པར་གྲོལ། །ཆོས་མཆོག་སྣང་བ་ཉེར་ཐོབ་ཉིད། །ཡེ་ཤེས་དེ་མ་ཐག་པ་ཆེ། །ཟིལ་གནོན་རྟེན་འབྲེལ་ཕྱོགས་ཆ་འཆར། །རིགས་པ་མངོན་གྱུར་རྟོག་པ་འདག །དེ་ཉིད་འཁོར་འདས་ཡོན་ཏན་ཐོབ། །གཟུང་འཛིན་ཆ་འདས་ལམ་དུ་གྱུར། །རྒྱལ་བའི་ དགོངས་པ ་རྟོགས་
པར་བྱ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་ཉི་ཤུ་རྩ་དགུ་པའོ། །སྤྲོས་པ་མེད་པའི་སྤྱོད་པ་ཡེ་ཤེས་ཀྱི་གྲུབ་པའི་དོན་བསྟན་པའི་ཕྱིར། དབེན་གནས་དབེན་པ་ཡོན་ཏན་ཀུན་དང་ལྡན་པ། ལུས་གནས་སེམས་ཀྱི་དུར་ཁྲོད་རབ་ཏུ་སྒྲུབ་པ་ཉིད་དུ་བྱ་བ་སྟེ། དངོས་འཛིན་རྣམ་པར་དག་པ་ཉིད་ཀྱིས་སོ། །སྨེ་ཤ་ཅན་ནི་རྟོག་མེད་མའི་ཤ་ལ་རོལ་པ་ཉིད་དེ། ཁྱད་པར་དུ་ཡེ་ཤེས་ཡང་དག་པ་བསྒྲུབ་པ་སྟེ། དུས་རྟག་ཏུ་ཡེ་ཤེས་ཀྱི་ངང་ལས་མི་འདའ་བར་བསྒྲུབ་པའོ། །རིག་མ་ཤེས་རབ་ཡེ་ཤེས་ལས་སྐྱེས་མ། རྣམ་པ་ཉི་ཤུས་བྱང་ཆུབ་པ་སྟེ་བཅུ་ཕྲག་གཉིས་མ་ཉིད་དོ། །རྡོ་རྗེའི་དཀྱིལ་འཁོར་བསྒོམ་པ་ནི། ཡེ་ཤེས་ཀྱི་སྐུ་བསྐྱེད་པ། འོད་གསལ་ལས་བྱུང་བའི་ལུས་རྟེན་དང་བརྟེན་པར་བཅས་པའི་དཀྱིལ་འཁོར་རྡོ་རྗེ་འཛིན་པ་ཆེན་པོའི་ཕོ་བྲང་དང་ལྡན་པའོ། ། དེ་ཉིད་ཕུང་པོ་དང་ཁམས་དང་སྐྱེ་མཆེད་རྣམ་པར་དག་པ། དཔལ་རྡོ་རྗེ་འཆང་ཆེན་པོའི་དཀྱིལ་འཁོར་དུ་དམིགས་པའོ། །བཤང་གཅིའི་དམ་ཚིག་ནི་ཡུལ་དང་དབང་པོ་གཉིས་མེད་དུ་སྦྱར་བའོ། །ལ་སོགས་ནི་བདེ་བ་སྟོང་པ་ཉམས་སུ་མྱོང་བའི་ཟས་ཀྱིས་ཁྱད་པར་ཡུལ་ལ་སྤྱོད་པའོ། ། དེ་རུ་ཆོ་ག་བཞིན་དུ་ཞེས་པ་རྡོ་རྗེ་འཛིན་པ་ཡབ་ཡུམ་རོལ་པ་བདེ་ཆེན་མི་འགྱུར་པ་ཡོངས་སུ་གྲུབ་པའོ། །དེའི་དཀྱིལ་འཁོར་རྟེན་གཞལ་ཡས་ཁང་ཆོས་འབྱུང་དང་། འབྱུང་བ་རིམ་བརྩེགས་དང་བཅས་པ་རྟེན་དང་བརྟེན་པའི་ལྷ་ཚོགས་ཐམས་ཅད་ཡེ་ཤེས་ལས་སྐྱེས་པ། ཡེ་ཤེས་ལས་བྱུང་བའི་མཚན་ཉིད་བདེ་སྟོང་རོ་མཉམ་དུ་འབྱུང་བའི་ངོ་བོ་ཉིད་ཡོངས་སུ་རྫོགས་པའོ། །རབ་ཏུ་བཟང་བས་ན་འོད་གསལ་བའི་ཡེ་ཤེས་ལས་སྐྱེས་པ། བཞིན་རབ་ཏུ་མཛེས་པ་ཡེ་ཤེས་ཀྱི་དབང་པོ་དང་སྟོབས་ལས་བྱུང་བ་ཉིད་དོ། །རྒྱན་རྣམས་ནི་བྲལ་བ་དང་རྣམ་པར་སྨིན་པའི་ཆ་ལས་འཕགས་པའི་ནོར་ལས་ཡན་ལག་བདུན་ལྡན་ཡེ་ཤེས་ཀྱི་ཆེ་བས་ཡོངས་སུ་རྫོགས་པའོ། །དཀྱིལ་འཁོར་གྱི་དབུས་སུ་བཞག་པ་ནི། རྡོ་རྗེ་འཛིན་པ་ཉིད་དང་། རེག་བྱ་རྡོ་རྗེ་མ་ཆོས་ཀྱི་དབྱིངས་ཀྱི་རྡོ་རྗེ་མར་གྱུར་པ་རྣམ་པར་བསྒོམ་ཞེས་པའོ། །དཀྱིལ་འཁོར་ལྔའི་
འཁོར་ལོ་ནི། དེ་བཞིན་གཤེགས་པ་ལྔའི་དཀྱིལ་འཁོར། དཔྲལ་བ་མགྲིན་པ་ཐུགས་ཀ་ལྟེ་བ་གསང་བ་དང་བཅས་པར་སངས་རྒྱས་ཀྱི་སྐུའི་མཚན་དཔེ་དང་། སྐུ་མདོག་ཕྱག་མཚན་རྒྱན་དང་ལྡན་པ། ཡེ་ཤེས་ལས་འབྱུང་བ་སྐད་ཅིག་གིས་སོ། །དེར་རྣལ་འབྱོར་གྱི་དབང་ཕྱུག་གསང་སྔགས་ཀྱི་རྣམ་པར་བསམ་པའི་འཁོར་ལོ་ཅན་གྱི་གསང་བ་ཡེ་ཤེས་ཀྱི་བསྒྲུབ་པ་སྟེ། བདེ་སྟོང་གཉིས་སུ་མེད་པའི་ཕྱག་རྒྱ་ཆེན་པོར་ངོ་བོ་ཉིད་མི་འགྱུར་བའི་མཆོད་པའི་གནས། ཚད་མེད་པས་ཡང་དག་པར་མཆོད་པ། དམིགས་པ་རྣམ་པར་གྱུར་བའི་ཉམས་ཀྱི་ཏིང་ངེ་འཛིན་གྱིས་སོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་ཅུ་པའོ། །དེ་ཉིད་ལས་གསང་བ་བླ་ན་མེད་པའི་བསྒྲུབ་པ་བསྟན་པའི་ཕྱིར། སྐུ་གསུང་ཐུགས་ཀྱི་རྡོ་རྗེ་ཅན་ཞེས་པ་སྟེ། སྐུ་རྡོ་རྗེ་མི་འགྱུར་ན་གཤེགས་པ་ཐམས་ཅད་དང་། བྱང་ཆུབ་སེམས་དཔའ་ཐམས་ཅད་ལ་ཀུན་ཏུ་རྣམ་པར་སྣང་བར་མཛད་པ། རྡོ་རྗེ་འཆང་ཆེན་པོ། སྐུའི་འོད་ཀྱི་སྣང་བ་ལས་སྤྲོ་བ་དང་བསྡུ་བར་མཛད་པའི་ཕྱིར་འོད་ཟེར་ཆེན་པོ་དང་རབ་ཏུ་ཆེན་པོ། །སྤྲོ་བ་དང་བསྡུ་བ་བསམ་གྱིས་མི་ཁྱབ་པའི་ཡེ་ཤེས་ཀྱི་རོལ་པ་སྟོན་པའོ། །ཡང་དེ་ཉིད་དུ་རིག་མའི་རིགས་དག་པས། ཡེ་ཤེས་བསྒྲུབ་པ་ཕུན་སུམ་ཚོགས་པ་བསྟན་པའི་ཕྱིར། བྲམ་ཟེ་མ་ལ་སོགས་པ་སྟེ། རྡོ་རྗེ་རིགས་ཀྱི་སྨེ་ཤ་ཅན་ལྟ་བུའོ། །དེ་བཞིན་གཤེགས་པའི་རིགས་ལ་ནི། བཙོ་བླག་མཁན་ཏེ་དངོས་པོ་ཐམས་ཅད་ཡེ་ཤེས་སུ་སྒྱུར་བར་བྱེད་པའོ། །ཡང་ན་བྲམ་ཟེ་ཞེས་པ་སྟེ། སྡིག་པའི་དྲི་མས་མ་གོས་པའོ། །རྒྱལ་རིགས་ནི་རིན་པོ་ཆེའི་རིགས་ལ་སྟེ། ཡེ་ཤེས་འབར་བའི་ཆེ་བ་དང་ལྡན་པའོ། །རྗེའུ་རིགས་ནི་པདྨ་ཅན་ལ་སྟེ་ཆགས་པ་མེད་པའོ། །རྡོ་རྗེ་ཆོས་ཀྱི་རིགས་ཆགས་པ་མེད་པ་པདྨའི་འདམ་ལས་ཐོན་པ་ལྟ་བུར་བསྒྲུབ་པ་ཉིད་དོ། །ཡང་ན་གར་མཁན་གྱི་རིགས་ཀྱིས་ཀུན་ཏུ་སྒྱུར་བར་བྱེད་པས། འདི་ནི་ཡེ་ཤེས་བདེ་ཆེན་གསང་
བ་ཡེ་ཤེས་མྱུར་དུ་ཐོབ་པར་བྱེད་པ་ཉིད་དོ། །ཡང་ན་པདྨའི་རིགས་ཀྱི་རིག་མ་ལྟ་བུའམ། གཏུམ་པ་མ་རྣམ་རྟོག་རྩད་ནས་གཅོད་པ་དག་གམ། ཁྱད་པར་དུ་རྡོ་རྗེ་སེམས་དཔའི་སྦྱོར་བ་ཡིས། ཞེ་སྡང་རྡོ་རྗེའི་འཁོར་ལོ་དང་ལྡན་པས། སྙིང་གའི་གནས་སུ་སྟོང་པ་དང་སྙིང་རྗེ་ཐ་མི་དད་པ། བྱང་ཆུབ་རྡོ་རྗེའི་སྦྱོར་བ་དང་ལྡན་པས། རིག་མ་ཨུཏྤལ་མཐིང་གའི་མདོག་འདྲ་བ། སེམས་དཔའ་ཨུཏྤལ་ལ་ཆུའི་དྲི་མས་མ་གོས་པ་དང་མཚུངས་པ། བཙོ་བླག་མཁན་ཐམས་ཅད་ཡེ་ཤེས་སུ་སྒྱུར་བར་བྱེད་པ་ཉིད་དེ། སངས་རྒྱས་ཀྱི་ཡེ་ཤེས་དང་མཚུངས་པ་དག་ནི། བརྟེན་བསྒྲུབ་པ་མཉམ་རྗེས་གཉིས་སུ་མེད་པས་རབ་ཏུ་གྲུབ་པའི་དབང་ཕྱུག་འཐོབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་ཅུ་སོ་གཅིག་པའོ། །ཡང་ཤིན་ཏུ་སྤྲོས་པ་མེད་པའི་རྣལ་འབྱོར་བསྟན་པ་ལས་ནི། དམ་པ་གཉིས་ཀྱི་སྦྱོར་བ་ནི། ཐབས་རླུང་གི་སྦྱོར་བ་དང་། ཤེས་རབ་རིག་པ་སྟོང་ཉིད་སྤྲོས་མེད་ལྷན་ཅིག་སྐྱེས་པ་རང་འབྱུང་རོ་མཉམ་བདེ་བ་ཆེན་པོའི་སྦྱོར་བས་ཡེ་ཤེས་ལ་རོལ་པ་གར་གྱི་ཉམས་ཀྱི་སྤྱོད་པ་ཐམས་ཅད་འོད་གསལ་བའི་ངང་ལས། ཟུང་འཇུག་བདེ་བ་ཆེན་པོར་ཕྲིན་ལས་ཐམས་ཅད་བརྩམ་པར་བྱ་བའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་སེམས་འདའ་བར་མི་བྱ་བས་འདའ་བར་དཀའ་བ་སྟེ་ད་ཕན་ཡོན་ནི་སྐུ་གསུང་ཐུགས་གསང་བ་གསུམ་གྱི་ཡེ་ཤེས་དང་ལྡན་པ་དེ་ནི་སྐད་ཅིག་དེ་མ་ཐག་ཏུ་ཡང་། དཔལ་རྡོ་རྗེ་འཆང་བྱང་ཆུབ་སེམས་རྡོ་རྗེ་དང་ཕྲིན་ལས་ཐ་མི་དད་པ་འཐོབ་པར་འགྱུར་བའི་མཚན་ཉིད་ཀྱི་ཐ་ཚིག་གོ། །རྡོ་རྗེ་ཉི་མ་ནུབ་པ་རྡོ་རྗེ་ནི། སྒྱུ་ལུས་དག་པ་ཐབས་མི་ཕྱེད་པ། ཉི་མ་ནི་སྣང་བ་དང་སྣང་བ་མཆེད་པའི་ཆ་ལས་ནུབ་པ་སྣང་བ་ཐོབ་པ་ལས། ཁྱད་པར་དུ་རང་བཞིན་གྱི་རྟོག་པ་ཐམས་ཅད་རྩ་རོ་རྐྱང་གཉིས་རླུང་དང་ཤེས་པ་དབྱེར་མེད་དུ་བསྡུས་ནས། རྩ་དབུ་མ་ཡེ་ཤེས་ཀྱི་ངང་དུ། སྤང་བླང་མེད་པར་ནུབ་པ་ཆེན་པོ་ཉིད་དེ། དེ་ཉིད་དུ་ནམ་མཁའ་རྣམ་པར་དག་པ་ལྟ་བུའི་བདེ་སྟོང་དབྱེར་མེད་འོད་གསལ་ཆེན་པོ་རབ་ཏུ་མི་གནས་པའི་ངང་དུ་གནས་པར་འགྱུར་
བའོ། །དེ་ལས་སློབ་པའི་ཟུང་འཇུག་ཏུ་ལྡང་བས། སྐྱ་རེངས་ཤར་བ་ལྟ་བུ་སྟེ། མཁྱེན་པའི་ཡེ་ཤེས་དུས་གསུམ་ཕྱོགས་བཅུར་ཁྱབ་པའི་སྐད་ཅིག་མའི་ཁྱད་པར་ལ། རྣམ་པ་ཐམས་ཅད་མཁྱེན་པ་ཉིད་དུ་གྱུར་པའོ། །ཁྱད་པར་སྒྱུ་ལུས་རྣམ་པར་དག་པ་ཡེ་ཤེས་ཀྱི་རབ་ཏུ་བྱེད་པ་བསྟན་པའི་ཕྱིར། རྒྱལ་པོ་སེམས་དཔའ་སྟེ། ཆོས་རྣམས་ཀུན་དང་མཚུངས་པར་ལྡན་པ་རྒྱལ་པོ་འཁོར་ལོས་སྒྱུར་བ་ནི། རིན་པོ་ཆེ་བདུན་དང་ལྡན་པ་སྟེ། གནས་སྐབས་སུ་འཕགས་པའི་ནོར་བདུན་གྱི་རྒྱན་གྱིས་སྤྲས་པ་ན། རྒྱུད་གསང་ཆེན་ལ་རྒྱན་བདུན་གྱིས་སྤྲས་པར་གྱུར་པས། སྐུ་གསུམ་ཡན་ལག་བདུན་ལྡན་དུ་གྲུབ་པ་འདོད་དང་ཐར་པ་རབ་ཏུ་གྲུབ་པ་སྟེ། དབང་ཕྱུག་བརྒྱད་ལྡན་ཟུང་འཇུག་བླ་ན་མེད་པ་རབ་ཏུ་གྲུབ་པ་ཉིད་དོ། །དངོས་པོ་དང་མཚན་མར་འཛིན་པ་ཐམས་ཅད་རྣམ་པར་འཛིན་པ། རྣམ་པར་དག་པར་སྒྱུ་མ་རབ་ཏུ་མི་གནས་པར་བསྟན་པའི་དོན་དུ། དེ་ནི་རྡོ་རྗེ་ཆོས་ཀྱི་བདག་ཅེས་ཚད་མེད་པའི་བྱང་ཆུབ་སེམས་ལས་བྱུང་བའི་ཆོས་ཀྱི་དབང་ཕྱུག་ཆེན་པོ། ཕྱིར་མི་ལྡོག་པའི་གནས་ཐོབ་པ། དག་པའི་ས་ལ་གནས་པར་འགྱུར་བ་ནི། ས་བཅུ་ལ་ནི་གནས་པར་འགྱུར་བ་སྟེ། སྣང་བ་གསུམ་པོ་རང་བཞིན་དང་བཅས་པ། ཐམས་ཅད་དག་པས་བདག་བྱིན་གྱིས་བརླབ་པའི་རིམ་པ་ཐོབ་པས། ལུས་ཀྱི་གནས་དང་ཉེ་བའི་གནས་ལ་སོགས་པར་བགྲོདཔས། རྟེན་དང་བརྟེན་པ་རང་བྱིན་གྱིས་བརླབས་པར་འགྱུར་བའི་ཕྱིར། རྒྱལ་པོ་དཔུང་གི་དམ་ཚིག་འཛིན་ན་ཐོགས་པ་མེད་པའི་ཡེ་ཤེས་ཀྱིས་ཕྲིན་ལས་ཡོན་ཏན་མི་ཟད་པ་སྟོབས་དང་མི་འཇིགས་པ་ལ་སོགས་པའི་དབང་ཕྱུག་དམ་པ་བརྒྱད་ལ་སོགས་པ་མ་འདྲེས་པའི་ཆོས་སྤོབས་ལ་དབང་སྒྱུར་བ། ཀུན་གྱི་མཆོག་ཚད་མེད་མངོན་དུ་གྱུར་པའོ། །མངོན་པར་བྱང་ཆུབ་རྣམ་གཉིས་ལས། །ཕྱི་ནང་གཉིས་སུ་དགོས་པས་བཤད། །ནང་གི་དུས་ཏེ་ཆོ་འཕྲུལ་བསྟན། །བདུད་ལས་རྣམ་པར་རྒྱལ་བ་སྟེ། །རྡོ་རྗེ་སྒོ་གསུམ་སོ་སོར་དག །སློབ་བའི་ཕྱི་ཡི་མངོན་བྱང་ཆུབ། །ཐོ་རངས་མི་སློབ་ཟུང་འཇུག་སྟེ། །སྐུ་བཞི་གཅིག་ཏུ་འདུས་པ་སྟེ། །སྐད་ཅིག་ཡེ་ཤེས་རྣམ་གྲོལ་བའོ། །དཔལ་
ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་ཅུ་སོ་གཉིས་པའོ། །དེ་ལས་མངོན་པར་བྱང་ཆུབ་པ་བདེ་བ་ཆེན་པོའི་དབང་ཕྱུག་བསྟན་པའི་ཕྱིར། རྡོ་རྗེ་རྣལ་འབྱོར་པས་རྡོ་རྗེ་ལུས་ཀྱི་ཁྱད་པར་ལ་བསྟན་ནས། རིག་མ་མངོན་པར་འདུ་བྱ་བ་ལས། མཁའ་གསང་བྱིན་རླབས་དང་ལྡན་པས། ཐབས་དང་ཐབས་ལས་འབྱུང་བའི་རྡོ་རྗེ་ཆོས་འབྱུང་པདྨར་ནུབ་པས། ཤེས་རབ་ཟེ་འབྲུ་རྒྱས་པར་ཟླ་བ་དང་ཉི་མ་ངོ་མཉམ་པར་གྱུར་པས། སྣང་བ་དང་སྣང་བ་མཆེད་པ་དང་སྣང་བ་ཐོབ་པ་དང་། ཉེ་བར་ཐོབ་པ་ནུབ་པ་ཅན་གྱི་ཡེ་ཤེས་ཀྱི་བསྒྲུབ་པ་ཀུན་ཏུ་བརྩམ་པའོ། །འོད་གསལ་བའི་ཡེ་ཤེས་ཐོག་མ་དང་མཐར་འབྱུང་བ་ཉིད་ཀྱིས་རང་བཞིན་རྣམས་ཀུན་འདར་དུ་ནུབ་ཅིང་རྣམ་པར་དག་པའོ། །སྐྱ་རེངས་འཆར་བའི་ཆ་ནི་མཁའ་སྣང་དག་པའི་ངང་དུ་ཡེ་ཤེས་འཇུག་པ་དང་བཟློག་པར་གྱུར་པས། སྟོང་པ་བཞི་ལས་འདས་པའི་ཏིང་ངེ་འཛིན་མཆོག་སྟེ། རྒྱུ་ཀུན་ཏུ་བྱང་ཆུབ་སེམས་འཕེལ་བ་ལས། རྐྱེན་རིག་མའི་སྟོབས་ཀྱིས། རྩ་གནས་ཐམས་ཅད་དུ་ཐིག་ལེ་འཕེལ་ཞིང་རྒྱས་པ་ལས། དགའ་བའི་དུས་སུ་རྣམ་པ་སྣ་ཚོགས་པའི་སྐད་ཅིག་མ་དང་། མཆོག་དགའི་དུས་སུ་རྣམ་པར་སྨིན་པའི་ཁྱད་པར་གྱི་དགའ་བའི་དུས་སུ་རྣམ་པར་ཉེད་པ་ཉིད་དོ། །སྐད་ཅིག་མ་གསུམ་ལས་འདས་པའི་དུས་དེ་མ་ཐག་པ་ལས། ལྷན་ཅིག་སྐྱེས་པའི་དགའ་བ་ལས་མཚན་ཉིད་བྲལ་བའི་སྐད་ཅིག་མ་མངོན་དུ་གྱུར་པ། བདེ་སྟོང་རོ་མཉམ་གྱི་ཡེ་ཤེས་ཕྱག་རྒྱ་ཆེན་པོ་རབ་ཏུ་མི་གནས་པའི་དོན་ཟུང་འཇུག་ཆེན་པོ་ཐོབ་པར་གྱུར་པའོ། །དེ་ཉིད་ཡོངས་སུ་དག་པ་བླ་ན་མེད་པའི་ཆེ་བ་བསྟན་པ་ལ། རྒྱན་རྣམས་དོན་གྱི་རྒྱན་ཡེ་ཤེས་ཀྱི་ཆེ་བ་བསམ་གྱིས་མི་ཁྱབ་ཏུ་འཆར་ལ། རྣམ་གྲངས་ཡོན་ཏན་གྱི་ཆེ་བ་ཚད་མེད་པར་འཆོར་བའོ། །རྣམ་པ་ཐམས་ཅད་དུ་རིམ་དང་ཅིག་ཅར་དུ་ཀུན་ཏུ་སྣང་བའོ། །མེ་ཏོག་ནི་གཟུགས་རྡོ་རྗེ་སྤོས་ནི་དྲི་རྡོ་རྗེ་མ་ལ་སོགས་ཀྱིས་སྒྲ་རྡོ་རྗེ། རོ་རྡོ་རྗེ་དང་། རེག་བྱ་རྡོ་རྗེ་མའི་རྣམ་པར་སྣང་བའོ། །རྡོ་རྗེ་སེམས་དཔའ་སྟེ། བྱང་ཆུབ་སེམས་རྡོ་རྗེའི་ཕྲིན་ལས། ཕུང་པོ་
ཁམས་དང་སྐྱེ་མཆེད་ཐམས་ཅད་རྟེན་དང་བརྟེན་པར་གྱུར་པ། སྤྱི་གཙུག་ནས་རྐང་མཐིལ་གྱི་བར་དུ་བདེ་བ་ཚད་མེད་པ་སྐྱེས་པས། སྣང་སྲིད་ཐམས་ཅད་བདེ་བ་ཚད་མེད་པར་གྱུར་པ། ས་གསུམ་ཀུན་ཏུ་སྒྱུ་མའི་རོལ་པས་མི་ཟད་པའི་ཆོ་འཕྲུལ་དཔག་ཏུ་མེད་པ་སྐད་ཅིག་གཅིག་ལ་འཆར་བར་འགྱུར་བའོ། །དེའི་ཚེ་བསྟན་པ་སྐུ་གསུམ་མཆོག་ནི། བདེ་བ་ལོངས་སྐུ། གསལ་བ་སྤྲུལ་སྐུ། མི་རྟོག་པ་ཆོས་ཀྱི་སྐུ་སྟེ། དབྱེར་མེད་ངོ་བོ་ཉིད་ལྷུན་གྲུབ་དེ་ལ། ཕྲིན་ལས་ཐོགས་པ་མེད་པར་འཆར་བས་རབ་ཏུ་བསྒོམ་པའོ། ། དཔག་ཚད་བརྒྱའི་ནི། དེ་བཞིན་གཤེགས་པའི་ཞིང་ཁམས་ཚད་མེད་པའི་སྣང་བ་ཆེན་པོས་ཀུན་ཏུ་བྱས་པ་སྤྲོ་བསྡུའི་མཛད་པ་སྟོན་པའོ། །དེ་ལས་དབང་པོ་གཉིས་ཀྱི་སྦྱོར་བ་ནི། ཐབས་སྙིང་རྗེ་ཆེན་པོ་བླ་ན་མེད་པ་ནི་ཤེས་རབ་རྣམ་པ་ཐམས་ཅད་ཀྱི་མཆོག་དང་ལྡན་པའི་སྟོང་ཉིད་ཀྱི་ཏིང་ངེ་འཛིན་དབྱིངས་དང་ཡེ་ཤེས་དབྱེར་མེད་དུ་གྱུར་པའོ། །སངས་རྒྱས་ནི་སློབ་པ་ལས་འདས་པ་མི་སློབ་པའི་ཟུང་འཇུག་སྟེ། བྱང་ཆུབ་ནི་ཡང་དག་པའི་ཡེ་ཤེས་ཐུགས་སུ་ཆུད་པའོ། །གནས་ཞི་བ་སྟེ་མཐའ་ཐམས་ཅད་དང་བྲལ་བ་གཉིས་མེད་ཟུང་འཇུག་ཆེན་པོ་མངོན་དུ་གྱུར་པས་ས་བཅུ་གསུམ་པའི་དབང་ཕྱུག་དམ་པའོ། །ཉེ་བར་བསྡུ་བ་ལ་གདམས་པ་སྟེ། རྡོ་རྗེ་ཅན་ནི་དག་པའི་སྒྱུ་ལུས་ལ་གནས་པ་སྟེ། མི་སློབ་པའི་ཟུང་འཇུག་ལམ་ཐམས་ཅད་མཐར་ཕྱིན་པས་སྲོད་དུས་སུ་བདུད་བཅོམ་སྟེ། བྱང་ཆུབ་སེམས་དཔའ་རྡོ་རྗེ་སྙིང་པོའི་ནུས་པ་ཐོབ་པ། ཐོབ་པས་ཡེ་ཤེས་ཆེན་པོ་གསང་བའི་གནས་གྲུབ་པའོ། །ཐོ་རངས་ཤིན་ཏུ་རྣམ་པར་དག་པའི་གྲུབ་པ། ཡེ་ཤེས་རབ་ཏུ་མི་གནས་པ། གཙུག་ཏོར་ཆེན་པོ་རབ་ཏུ་རྫོགས་པ་བདེ་བ་ཆེན་པོ་མི་ཤིགས་པ་བླ་ན་མེད་པ་ཐོབ་པའོ། །བཤང་གཅིའི་དམ་ཚིག་བཟའ་བ་ནི། དབྱིངས་ཀྱི་ངང་དུ་ཡེ་ཤེས་རོ་མཉམ་དུ་ཐིམ་པས་དངོས་གྲུབ་མ་ཟད་པ་ཡེ་ཤེས་རྒྱ་མཚོ་རྣམ་པར་དག་པ། རྡོ་རྗེ་སྐུ་གསུང་ཐུགས་ཀྱི་གསང་བ་བྱང་ཆུབ་ཆེན་པོ་རབ་ཏུ་རྟོགས་པའི་སྐད་ཅིག་གཅིག་རྡོ་རྗེ་འཆང་དེ་བཞིན་གཤེགས་པ་མངོན་དུ་གྱུར་
པའོ། །ཡང་དག་པར་གསུངས་པ་ཕྱིའི་མངོན་པར་བྱང་ཆུབ་ པ་སྟེ། དགོངས ་པས་བཤད་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་གསུམ་པའོ། །དེ་ལ་འདིར་ཆོས་ཐམས་ཅད་ནི་སྒྱུ་མ་དང་མཚུངས་པ། སྒྱུ་མ་ལྟ་བུར་སྤྱོད་ཅིང་འཇུག་པ་ཉིད། །སྒྱུ་མ་དེ་དག་བྱིན་གྱིས་རླབས་པའི་རིམ་པ་ལས། །མ་དག་པ་ལས་རྣམ་དག་ལྷ་ཡི་སྐུ། །ལུས་ངག་ཡིད་གསུམ་སྒྱུ་མར་ལམ་དུ་འཆང་། །ཕུང་པོ་ཁམས་དང་སྐྱེ་མཆེད་འབྱུང་སོགས་རྣམས། །ཤེས་པ་གཉིས་ལ་དེ་ཉིད་ཡོངས་བསྡུས་ནས། ། གང་ཞིག་སྟོང་ཆེན་གཉིད་ལོག་གྱུར་པ་སྟེ། །རླུང་གི་བྱེད་པས་རྨི་ལམ་མཐོང་བར་འགྱུར། །རྨི་ལམ་ཡུལ་ལས་བྱེ་བྲག་འཁྲུག་པར་སྣང་། །ཀུན་དུ་རྟོག་པའི་རྒྱུ་འབྲས་རྨི་ལམ་རྟོག །གང་གིས་མཚན་དང་ཉིན་དུ་གཉིད་འཇུག་པས། །གཉིད་ལོག་སད་པ་ཐ་དད་གྱུར་པ་མིན། །ས་མཐུག་བསྒྲིབས་པས་རབ་ཏུ་རིང་གཉིད་ལོག །སྔར་བྱས་འབྲས་བུ་མ་སྨིན་ལས་རྣམས་ཀུན། །དེ་ནས་རླུང་གིས་ལས་རྣམས་འབྱུང་འཇུག་འགྱུར། །སྔོན་ལས་སྨིན་པར་གྱུར་ན་རླུང་སེམས་དག །འཇིག་རྟེན་འཕོ་བ་གནས་གཞན་དག་ཏུ་འགྲོ། །ཇི་ལྟར་ཕྱོགས་བཅུར་བཞུགས་པའི་རྒྱལ་བ་རྣམས། །དེ་ཡི་སྐུ་ལ་རྐང་རུས་ཤ་ཁྲག་མེད། །སེམས་ཅན་དོན་དུ་ཁམས་ལ་འཇུག་པར་མཛད། །སྤྲུལ་པ་སྒྱུ་མས་འགྲོ་དོན་མཛད་པ་བཞིན། །དེ་བཞིན་གཉིད་ལོག་སད་གྱུར་རིམ་པས་སེམས། །རྣམ་རྟོག་དྲ་བས་བཅིངས་པས་ཐ་དད་ཅན། །ཆོས་རྣམས་ལས་ནི་ཡོངས་སུ་མ་འདས་ཕྱིར། བདེན་དང་བརྫུན་པ་གཅིག་དང་དུ་མར་མིན། །ཕྱི་རོལ་དོན་དུ་གྱུར་པ་ཅི་ཡང་མེད། །དེ་ཕྱིར་རང་སེམས་སྟོང་ཉིད་ཆོ་འཕྲུལ་ཡིན། །སྒྱུ་མར་སྣང་བ་འཁྲུལ་བ་ལས་བཟློག་བྱ། །ཅིར་སྣང་མེད་བདག་རྟོགས་པར་བྱ། །རྨི་ལམ་དེ་ཉིད་རྟོག་མེད་རང་གསལ་བ། །འབྱུང་བའི་གནས་ལ་ཁམས་འདུས་སྣང་བ་གང་། །སས་བརྟན་ཆུས་སྡུད་མེས་རྣོ་ངར་ཆགས་པ། །རླུང་གིས་ཡང་ཞིང་གཡོ་བྱེད་མི་བརྟན་པའོ། །ནམ་མཁའ་ལ་འདུས་ལུས་བདེ་ཉམས་བཟང་བ། །བདུད་རྩི་དག་ལས་ནུས་པ་འབྱུང་བ་སྟེ། །གླ་རྩིས་ཞེ་སྡང་བཞི་
མཉམ་གཏི་མུག་ཉིད། །ག་བུར་ཆགས་བྱེད་སི་ཧླས་ང་རྒྱལ་བསྐྱེད། །སྣ་ཚོགས་ལས་ཀྱིས་ཕྲག་དོག་འདུ་འཕྲོ་བྱེད། །ལམ་གྱུར་དམིགས་པས་ཡོན་ཏན་པ་རྣམ་འཆར། །སྔར་ཕྱུང་བ་ལས་ཕྱིས་འབྱུང་རྟགས་སུ་འཆར། །ཡུལ་དུས་མཚན་མ་ངེས་པ་དྲན་པའི་བློ། ། ཉམས་སྣང་བློ་ལས་མ་བཅོས་སྒྱུ་མར་སྣང་། །དེ་ཉིད་རོས་ཟིན་ཡེ་ཤེས་གྲོགས་ཡིན་ནོ། །རང་སྲོག་སྙིང་པོར་གྱུར་པ་སེམས་ཉིད་ལས། །ཆོས་ཉིད་སེམས་ལུས་ཁམས་གསུམ་སྣང་བ་ལ། །གཞན་པ་མེད་ཅིང་རླུང་ལས་ཁམས་གསུམ་སྤྲུལ། །སྒྱུ་ལུས་རྨི་ལམ་རྨིས་པ་བཞིན་དུ་མཐོང་། །ཁམས་གསུམ་རླུང་རིག་བདག་ཉིད་དེ་བཞིན་ཉིད། །རྗེས་སུ་རྟོགས་པ་འབྲིང་གིས་ཆོས་རྣམས་ཀུན། །སྒྱུ་མ་རྨི་ལམ་ལྟ་བུར་འཆར་བ་དང་། །རབ་ཀྱི་ནམ་མཁའ་ལྟ་བུར་རྟོགས་པ་ནི། །འོད་གསལ་བ་ལ་བསམ་གཏན་ཏིང་འཛིན་ལྡན། །རྗེས་སུ་རྟོགས་པ་ཤིན་ཏུ་རབ་གྱུར་བས། ཡིད་བཞིན་ནོར་བུ་ལྟ་བུར་རྟོགས་པ་ཉིད། །ཟུང་འཇུག་མངོན་དུ་གྱུར་པའི་དོན་ཉིད་དེ། །ངོ་བོ་ཉིད་ལས་འབད་མེད་གཞན་དོན་དུ། །རྟོག་མེད་མི་གཡོ་ལྷུན་གྲུབ་གྱུར་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་བཞི་པའོ། །དེ་བཞིན་གཤེགས་པ་ཐམས་ཅད་ཀྱི། དཀྱིལ་འཁོར་ཐམས་ཅད་བསྡུས་པ་ཡི། འཁོར་ལོ་འབྱུང་བ་བླ་མེད་པ། གསང་ཆེན་དཀྱིལ་འཁོར་བསྟན་པའོ། །སྐུ་གསུང་ཐུགས་ཀྱི་རྡོ་རྗེ་ཡིས། །ཡབ་ཡུམ་རོལ་པ་གསང་བ་ཡི། ། འོག་མིན་གནས་ནས་འདིར་གཤེགས་པ། །བྱིན་རླབས་ཡེ་ཤེས་དབབ་པར་བྱེད། །འདི་ནི་རྡོ་རྗེ་ཆེན་པོ་ཡི། །དབང་བསྐུར་ཡེ་ཤེས་གསང་བ་སྟེ། །རྣལ་འབྱོར་ལུས་ཀྱི་གནས་རྣམས་སུ། །སྤྱི་བོ་ལྟེ་བ་དཔྲལ་བ་དང་། །མགྲིན་པ་སྙིང་ག་གསང་བར་ནི། །བདེར་གཤེགས་རྡོ་རྗེ་ཆེན་པོ་ཡི། །ཡབ་ཡུམ་ཕྱི་ནང་གསང་བ་ལ། །གཉིས་མེད་རོལ་པས་དབང་བསྐུར་བ། །བདེ་ཆེན་ཡེ་ཤེས་མི་འགྱུར་བའི། །གསང་ཆེན་དབང་ནི་དྲི་མེད་པའོ། །གསང་བ་རྡོ་རྗེ་ཐེག་པ་ཡི། །སྡོམ་པ་གསང་བ་རྒྱས་གདབ་པ། །རིག་པ་འཛིན་པའི་སྙིང་པོ་ནི། །
ཡང་དག་སྡོམ་པ་བསྟན་པའོ། །རླུང་སེམས་འགྱུར་ལྡོག་དུས་གནད་འགྱུར་བ་ཉིད། །རླུང་སེམས་གཅིག་ཏུ་གནས་སམ་ཐ་དད་འགྱུར། །གལ་ཏེ་རླུང་སེམས་གཅིག་ཏུ་མཚུངས་ལྡན་ན། །ཐོག་མར་སྔོན་དུ་འགྲོ་བ་གང་ཡིན་པ། །འགྲོ་འོང་རིམ་པ་བཞིན་དུ་བྱེད་འགྱུར་ན། །སྔོན་དུ་འགྲོ་བ་གང་ཡིན་དེ་རྗེས་སུ། །འབྲངས་ལས་གང་གང་བྱེད་པ་གང་དེ་སྙེད། །སོ་སོར་བྱེད་དམ་གཅིག་ཏུ་མཉམ་པར་བྱེད། །སོ་སོར་བྱེད་ན་གཅིག་པའི་ཁྱད་པར་ཉམས། །གཅིག་ཏུ་བྱེད་ན་སྔ་ཕྱི་མེད་པར་འགྱུར། །རླུང་འགགས་ན་ནི་རྟོག་པ་འགག་མི་འགག །གལ་ཏེ་རྟོག་པ་བཟློག་པར་གྱུར་པ་ན། །རླུང་གིས་ལས་ནི་ཇི་ལྟར་བྱེད་པར་གྱུར། །འབྱུང་བ་རླུང་དང་རང་བཞིན་རྟོག་པ་དག །མཉམ་དུ་འབྱུང་འཇུག་བྱེད་དམ་མི་བྱེད་བརྟག །སྲོག་སྟེ་རླུང་དང་རྣམ་ཤེས་གང་ཡིན་པ། །ཕྱི་རོལ་འབྱུང་བའི་རླུང་ནི་འགགས་པ་ན། །ལུས་ཅན་རྣམས་ཀྱི་སྲོག་ཀྱང་འགག་པར་འགྱུར། །ཕྱི་ཡི་རླུང་དང་ནང་གི་རླུང་དག་ལས། །གཅིག་འགགས་པས་ན་ཕྱི་མ་འགག་འགྱུར་རམ། ། གཅིག་ནི་ལོག་ན་ཐམས་ཅད་ལོག་འགྱུར་གྲང་། །གཅིག་ནི་ལོག་ཀྱང་གསུམ་པོ་མི་ལྡོག་འགྱུར། །འདི་ཡི་དབྱེ་བ་ཁྱད་པར་རྟོགས་པར་བྱ། །རླུང་སེམས་འགྲོ་ལྡོག་གི་གནས་ལུགས་བསྟན་པའོ། །རྟག་ཏུ་མ་བྱིན་ལེན་པ་ནི། །ཡོན་ཏན་ཡེ་ཤེས་ཕྲིན་ལས་ཀུན། །དུས་མེད་པར་ནི་ནུས་པས་བླང་། །རྣམ་རྟོག་ལྟུང་བྱེད་མ་ལུས་པ། །རང་བཞིན་ཤེས་པས་རྩ་བ་བཅད། །ཆོས་རྣམས་སྒྱུ་མ་རྨི་ལམ་ལྟར། །གསང་བ་བདེ་ཆེན་གྲུབ་པ་ལ། །རྨད་བྱུང་བདེ་ཆེན་འདོད་ཆགས་ཉིད། །ཤེས་པས་རང་བཞིན་མེད་པར་སྨྲ། །རྡོ་རྗེ་འཛིན་པར་གནས་པར་སྤྱད། །བཟློག་པ་སྨན་ཉིད་ཡེ་ཤེས་ཆེ། །ལོག་པར་ལྟུང་བར་མི་འགྱུར་རོ། །སྡོམ་པ་ཐབས་དང་ཤེས་རབ་དག །གཉིས་མེད་ཕྱག་རྒྱ་ཆེན་པོར་ན། དུས་ཀུན་དུ་
ནི་དེ་ཉིད་སྡོམ། །སྡོམ་པ་ཐམས་ཅད་ཀྱི་གསང་བ་ཟིལ་གནོན་རྡོ་རྗེ་ཞེས་བྱ་བའི་ཏིང་ངེ་འཛིན་སྤྱོད་པའི་བརྟུལ་ཞུགས་སོ། །རྡོ་རྗེའི་བདག་ཉིད་གསུམ་འདུས་ནས། །རྡོ་རྗེ་རྣལ་འབྱོར་པ་ཐིམ་འགྱུར། །དེ་གཉིས་སྐུ་གསུང་ཐུགས་རྡོ་རྗེ། །རྟོག་པའི་དཔའ་རླབས་རབ་ཞི་བ། །ཉེར་དཔྱད་ཡེ་ཤེས་སྒྱུ་མ་དག་པ་ལས། །ཡོངས་དག་རྣལ་འབྱོར་སྤྲོས་བཅས་དང་། སྤྲོས་མེད་ལས་འདས་སྟོང་པ་ཉིད། འོད་གསལ་ཤིན་ཏུ་སྤྲོས་མེད་ལས། ཕྱག་རྒྱ་ཆེན་པོ་ཟུང་འཇུག་ཐོབ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་ལྔ་པའོ། །འདི་ནི་སྔགས་རྣམས་ཐམས་ཅད་ཀྱི། །དེ་ཉིད་གསང་ཆེན་ཚུལ་མཆོག་སྟེ། །རྡོ་རྗེ་གསུམ་ལས་འཁོར་ལོ་འབྱུང་། །བྱང་ཆུབ་སངས་རྒྱས་གནས་འཇུག་པའོ། །དེ་ཁོ་ན་ཉིད་ལས་མངོན་རྟོགས། །བསམ་གྱིས་མི་ཁྱབ་རྒྱན་གྱུར་པའོ། །བརྗོད་བྱ་དང་ནི་རྗོད་བྱེད་དང་། །དཔའ་དང་མངོན་གྱུར་སྟོབས་དང་ནི། །ཆོས་དོན་ཁྱབ་པར་གྱུར་པའི་ཕྱིར། །སྟོབས་ལྡན་ཁྱད་པར་རྒྱན་ཡིན་ནོ། །གནས་པ་དང་ནི་གསལ་རྫུ་འཕྲུལ། ། ཡོན་ཏན་ཕྲིན་ལས་རྒྱན་རིམ་བཞིན། །དེ་ནི་རྗོད་བྱེད་རྟག་ཏུ་རྒྱན། །དོན་གྱུར་དགོས་པ་བླ་ན་མེད། །དོན་གནས་བྱེད་པ་ཡེ་ཤེས་ཀྱི། །གསང་ཆེན་བདེ་མཐོང་ཁྱད་པར་ཏེ། །རྒྱན་ལས་དབྱེ་བསྡུ་བསྟན་པའོ། །དེ་ནས་བདེར་གཤེགས་རྡོ་རྗེ་འཛིན། ། འདུས་པའི་ཚོགས་ལ་རྗེས་བརྩེ་བས། །རྡོ་རྗེ་གསང་བ་གསུང་དག་པ། །ཡེ་ཤེས་རྡོ་རྗེས་འདིར་གསུངས་པ། །ཨེ་མའོ་སངས་རྒྱས་མ་ལུས་པའི། །ཆོས་ཀྱི་དབྱིངས་ནི་ཡེ་ཤེས་ཆེ། །འོད་གསལ་རང་བཞིན་ཡོངས་སུ་དག །དྲི་མེད་ནམ་མཁའི་དབྱིངས་བཞིན་ནོ། །ཡེ་ཤེས་ངོ་བོ་ཉིད་འབྱུང་བ། །ཁམས་གསུམ་དག་ན་བྱང་ཆུབ་སྤྱོད། །འགྲོ་བ་ཀུན་ལ་བདེ་འབྱུང་བའི། །དགེ་བ་ཡོངས་སུ་དག་གྱུར་བྱོས། །དག་པའི་ལུས་ནི་རྣམ་ཐར་གྱི། །སྒོ་གསུམ་གྲུབ་པ་སྐུ་རྡོ་རྗེ། །ངག་ནི་དག་པ་ཆོས་ཀྱི་
ཚུལ། །སོ་སོར་ཡང་དག་རིག་པ་ཆེ། །གསུང་གི་དབྱངས་ནི་མི་ཕྱེད་འགྱུར། །རྣམ་ཤེས་དུས་གསུམ་དུས་མེད་དུ། །ཡེ་ཤེས་བྱང་ཆུབ་ཆེན་པོར་འབྱུང་། །དབྱེར་མེད་བདེ་ཆེན་མི་གནས་པའོ། །དེ་ནས་སྒྲིབ་པ་ཐམས་ཅད་རྣམ་པར་སེལ་བ་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ངོ་མཚར་དུ་གྱུར་རྨད་དུ་གྱུར་ཏེ། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་བདག་པོ་འདི་ཅིའི་སླད་དུ་དེ་བཞིན་གཤེགས་པ་རྣམས་ཀྱི་འཁོར་གྱི་ནང་དུ། འདི་ལྟ་བུའི་ཚིག་ངན་པ་གསུང་ཞེས་གསོལ་ཏོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས། བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་རྣམས་ཐོང་། དེ་སྐད་ཅེས་མ་ཟེར་ཅིག་ཅེས་པ་ནས། འཇིགས་སྐྲག་དངངས་ནས་བརྒྱལ་བར་གྱུར་ཏོ་ཞེས་པ་དང་། དེ་དག་ལ་སླར་གསོལ་ཞེས་པའི་བར་གྱི་དཔལ་རྡོ་རྗེ་འཆང་གི་བར་གྱིས་གསུངས་པ་ནི། བཞུགས་ པ་ལ་ལྡེམ་པོར་དགོངས ་པའི་ཐེ་ཚོམ་སེལ་བ་བསྟན་པའོ། །སྲོག་ཆགས་གསོད་ལ་དགའ་བ་ཞེས་པ་ནས། འདི་ནི་སངས་རྒྱས་འགྲུབ་པར་འགྱུར་གྱི་བར་གྱིས་གསུངས་པ་ནི།འོད་ཀྱིས་རེག་པ་ཙམ་གྱིས། དེ་དག་རང་རང་གི་སྟན་ལ་གནས་པར་གྱུར་ཏོ་ཞེས་པས་བསྟན་ནོ། །འདི་ལྟ་བུ་ཡང་དག་པ་མ་ཡིན་པའི་ཚིག་གི་ལམ། རྡོ་རྗེའི་ཚིག་ཅིའི་སླད་དུ་གསུང་ཞེས་དྲིས་པ་དང་། དེ་བཞིན་གཤེགས་པ་རྣམས་ཀྱིས་བཀའ་སྩལ་པ། རིགས་ཀྱི་བུ་རྣམས་འདུ་ཤེས་ངན་པ་དང་། དམན་པའི་འདུ་ཤེས་དེ་ལྟ་བུ་མ་སྐྱེད་ཅིག་ཅིའི་ཕྱིར་ཞེ་ན། རིགས་ཀྱི་བུ་འདི་ལྟ་སྟེ། སྔགས་ཀྱི་སྤྱོད་པའི་མཆོག་གོ། ། འདི་ལྟ་སྟེ་སྔགས་ཀྱི་སྤྱོད་པ་ནི་དེ་བཞིན་གཤེགས་པའི་སྤྱོད་པའོ་ཞེས་པ་ནས། དམ་ཚིག་དེ་དག་རྗེས་སུ་རིག་པར་བྱའོ་ཞེས་པས། བསྒྱུར་བ་ལ་ལྡེམ་པོར་ དགོངས་པའི་ཐེ་ཚོམ་སེལ་བའོ། །སྐུ་མི་འགྱུར་བ་མི་གནས་པ ་མ་སྐྱེས་པ་ཞེས་པ་ལ་སོགས་པ་ནས།
ཡང་དེ་ནས་འཕགས་པ་འཇམ་དཔལ་ལ་སོགས་པས་དེ་བཞིན་གཤེགས་པ་རྣམས་ལ་ཞུས་པ་དང་། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། ཁྱེད་རྣམས་ལྟ་ཅི་སྨོས་ཏེ། ངེད་སྒོ་གསུམ་རྡོ་རྗེའི་གསང་བ་མི་འགྱུར་བ་རྙེད་པ་ཡང་སྐུ་དང་གསུང་དང་ཐུགས་རྡོ་རྗེའི་བྱང་ཆུབ་མི་ཤིས་སོ་ཞེས་པ་དང་། དེ་ཅིའི་ཕྱིར་ཞེ་ན། སྐྱེ་བ་མེད་པའི་རྡོ་རྗེ་མངོན་པར་བྱང་ཆུབ་པའི་ངོ་བོ་ཉིད་མེད་པ་མི་འགྱུར་བ་ལས་བྱུང་བའོ། །ཞེས་ངོ་བོ་ཉིད་ཆོས་ཀྱི་མཚན་ཉིད་ལ་ལྡེམ་པོར་ དགོངས་པའི་ཐེ་ཚོམ་སེལ་བའོ། །དགོངས་པ ་སྒྱིད་ལུག་པ་སྤང་བའི་ཕྱིར། རིགས་ཀྱི་བུ་སེམས་ཅན་ཆེན་པོའི་ཞེས་པ་ནས། རྡོ་རྗེའི་ཡེ་ཤེས་ཐོབ་པའོ་ཞེས་པས་བསྟན་པའོ། །བཅོམ་ལྡན་འདས་མར་མེ་མཛད་ཅེས་པ་ནས་སྐལ་བ་མེད་པའི་ཕྱིར་གྱི་བར་གྱིས་གསང་སྔགས་རྡོ་རྗེ་ཐེག་པ་འབྱུང་བ་དཀོན་པ་ལ་གདམས་པའོ། །ཡང་ལམ་མ་ལུས་པ་ཡོངས་སུ་རྫོགས་ཤིང་ཚེ་གཅིག་ལུས་གཅིག་གིས་སངས་རྒྱས་པ་བསྟན་པ་ནི་འོན་ཀྱང་ཞེས་པ་ནས། སངས་རྒྱས་ཞེས་བྱ་བའི་གྲངས་སུ་འགྲོའོ་ཞེས་གསུངས་སོ། །དེ་ནས་བྱང་ཆུབ་སེམས་དཔའ་དེ་དག་གིས་གསུང་རྡོ་རྗེའི་ཡི་གེའི་ཚིག་འདི་ཐོས་ནས་རབ་ཏུ་ངུས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་དཔའ་ཁྱེད་རྣམས་མ་ངུ་ཅིག །སྡུག་བསྔལ་གསུམ་བསྒོམ་པར་མ་བྱེད་ཅིག །བྱང་ཆུབ་སེམས་དཔའ་ཐམས་ཅད་ཀྱིས་གསོལ་པ། བཅོམ་ལྡན་འདས་གསང་བའི་ཡི་གེའི་མིང་ཙམ་ཐོས་པའི་སྐལ་བ་ཡང་མ་མཆིས་ན་ཇི་ལྟར་མི་ངུ་བར་བགྱི། དེ་བཞིན་གཤེགས་པ་ཐམས་ཅད་ཀྱིས་བཀའ་སྩལ་པ། དེ་སྐད་ཅེས་མ་ཟེར་ཅིག །གཉེན་པོ་ལ་ལྡེམ་པོར་ དགོངས་པས་ན་སྒྱིད་ལུག་པ ་སྤང་བའི་ཕྱིར་ཡི་གེ་ནི་ཐུན་མོང་སྟེ། རིགས་ཀྱི་བུ་ཁྱེད་རྣམས་ཀྱིས་ཇི་ལྟར་མི་ཤེས་པ་དང་མ་ཐོས་པ་དེ་བཞིན་དུ་ངེད་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱིས་ཀྱང་། རིགས་ཀྱི་བུ་གསང་བའི་ཡི་གེ་འདི་དག་མ་མཐོང་མ་ཐོབ་
ཅིང་མངོན་པར་རྫོགས་པར་སངས་མ་རྒྱས་སོ། །དེ་ཅིའི་ཕྱིར་ཞེ་ན། གསང་བ་གསུམ་གྱི་ཡི་གེ་རྣམ་པར་དག་པའི་ཕྱིར་རོ་ཞེས་ཐེ་ཚོམ་བསལ་བའོ། །སྔགས་ཀྱི་སེམས་དཔའ་མི་བྱ་སྟེ། བྱས་ན་བྱང་ཆུབ་རྙེད་པར་དཀའ་ཞེས་པ་ལ་ཞེན་པ་དང་མ་བྲལ་ན་འཆིང་བར་འགྱུར་ཞེས་ པ་གང་ཟག་གཞན་ལ་དགོངས ་པའོ། །མདོར་ན་ཕུང་པོ་ལྔ་རྣམས་ནི་སངས་རྒྱས་ལྔར་ནི་རབ་ཏུ་བསྒྲགས་ཞེས་པ་ལ་སོགས་ པ་དོན་གཞན་ལ་དགོངས ་པའོ། །ཆོས་ཐམས་ཅད་ལ་མཉམ་པ་ཉིད་མཐོང་ངམ་ཞེས་པ་མཉམ་ པ་ཉིད་ལ་དགོངས ་པའོ། །ཆོས་ཀྱི་རྣམ་གྲངས་འདི་ལ་སྐལ་བ་ཡོད་པའི་ཕྱིར་རོ་ཞེས་གསུངས་པས་ནི་དུས་གཞན་ལ་ དགོངས་པའོ། །དགོངས་པ ་ཉིད་ནི་ཕྱིར་མི་ལྡོག་པའི་དོན་ལ་ དགོངས་པ ་ནི་ལྡེམ་པོར་ དགོངས་པ ་དག་གོ། །དགོངས་པ་སྤྱི་ནི་ཡང་དག་པར་ དགོངས་པའོ། །དེ་བཞིན་གཤེགས་པ ་ཐམས་ཅད་ཀྱི་ དགོངས་པའི་ཁྱད་པར་བསྟན་པ ་ཞེས་བྱ་བའི་ཏིང་ངེ་འཛིན་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་སུམ་ཅུ་སོ་དྲུག་པའོ། །བྱང་ཆུབ་སེམས་ཀྱི་ངོ་བོ་ཉིད། །བླ་མ་རྡོ་རྗེ་འཛིན་པ་ལ། །མོས་གུས་མཐར་ཕྱིན་གྱུར་པས་ནི། །ལམ་གྱི་རིམ་པ་ཀུན་རྫོགས་པས། །སྒྲིབ་དག་ཡོན་ཏན་ཐོབ་པ་སྟེ། །དབང་གི་རྒྱལ་པོ་རྙེད་པ་བཞིན། །ལས་དང་དངོས་གྲུབ་མ་ལུས་པ། །ཡེ་ཤེས་མི་ཟད་གནས་འཐོབ་པའོ། །དམ་ཚིག་དག་གི་འཁོར་ལོར་ནི། །དགའ་བ་ཆེན་པོས་རོལ་པ་ནི། ། ལུས་ཀྱི་གནས་སུ་རྩ་གནས་པ། །འཁོར་ལོ་དྲུག་གི་རྣམ་པ་ལ། །ཐིག་ལེ་ཡི་གེ་རླུང་དག་པ། །བདེ་གསང་སྟོང་ཉིད་ཡེ་ཤེས་ལས། །དབང་ཕྱུག་མཛོད་སྤུ་གཙུག་ཏོར་དུ། །གཉིས་མེད་མཉམ་པ་བདེ་ཆེན་དུ། །རབ་ཏུ་ཐིམ་པས་རྣམ་གྲོལ་ཉིད། །རྟེན་འབྲེལ་ཐམས་ཅད་མཁྱེན་པར་འགྱུར། །ལས་རྒྱལ་མཆོག་གི་ཕྲིན་ལས་ནི། །དོན་དམ་སྟོང་ཉིད་ངང་ལས་ནི། །རྡོ་རྗེ་སེམས་དཔའི་སྐུར་གྱུར་ལས། །རྣམ་པར་སྣང་མཛད་སྐུར་བསྒྱུར་བ། །ཟླ་བའི་གདན་ལ་གནས་པ་ཡི། །སྤྱན་དང་གཉིས་མེད་སྦྱོར་བ་ལས། །ཞི་བར་འདོད་རྣམས་ཐམས་ཅད་ཀྱི། །དེར་
གནས་གནོད་པ་ཞི་བར་བྱེད། །རྒྱས་ལ་རིན་ཆེན་འབྱུང་གནས་དཔལ། མཱ་མ་ཀཱི་དང་གཉིས་མེད་པས། །སྤྲོ་བསྡུས་རིན་ཆེན་ཆར་དབབ་བྱ། །དབང་ལ་འོད་དཔག་མེད་པ་ཉིད། །གོས་དཀར་ཡུམ་དང་གཉིས་མེད་པས། སྤྲོས་པས་དབང་དུ་བསྡུ་བར་བྱ། །མངོན་སྤྱོད་གདོན་མི་ཟ་བ་ཉིད། །པདྨ་ཉི་མ་ལ་གནས་པས། །སྒྲོལ་མ་དང་ནི་གཉིས་སུ་མེད། །སྤྲོ་བསྡུས་ཁྲོ་བོས་ལས་ལ་སྦྱར། །དེ་དག་ལས་ཚོགས་ཐམས་ཅད་ཀུན། །སྒྱུ་མ་རྨི་ལམ་ལྟར་གསལ་བས། །བདག་བྱིན་བརླབ་པ་ཉིད་དུ་ལྟ། །སྒྱུ་མའི་དཔེ་བཅུ་གཉིས་ཀྱིས་བདེ་བ་ཆེན་པོའི་ཏིང་ངེ་འཛིན་ཉེ་བར་མཚོན་པར་འགྱུར་བ་ཡིན་ཏེ། དེ་ལྟར་ཕྱོགས་བཅུའི་འཇིག་རྟེན་གྱི་ཁམས་ན་གནས་པའི་དེ་བཞིན་གཤེགས་པ་མ་ལུས་ཤིང་ལུས་པ་མེད་པ་ཀུན་འཁོར་བའི་རྒྱ་མཚོ་ཇི་སྲིད་གནས་པའི་བར་དུ་ཆོས་ཐམས་ཅད་ལ་དབང་སྒྱུར་བ། ཟབ་པ་དང་རྒྱ་ཆེ་བ་བླ་ན་མེད་པ་སྒྱུ་མ་ལྟ་བུའི་ཏིང་ངེ་འཛིན་གྱིས་བཞུགས་ནས། འདོད་པའི་ཡོན་ཏན་དུ་མ་རྣམས་ཀྱིས་རོལ་པར་མཛད་ཅིང་རབ་ཏུ་དགའ་བར་མཛད་པས། ཐམས་ཅད་མཁྱེན་པའི་ཡོན་ཏན་གསང་བ་བསམ་གྱིས་མི་ཁྱབ་པ་དང་ལྡན་པས།བདག་ཇི་ལྟར་བཞེད་པ་ཙམ་གྱིས་སངས་རྒྱས་ཀྱི་ཞིང་ནས། སངས་རྒྱས་ཀྱི་ཞིང་ཁམས་དཔག་ཏུ་མེད་པར་མི་ཟད་པ་རྒྱན་གྱི་འཁོར་ལོས་ཕྲིན་ལས་ཐོགས་པ་མེད་པར་རབ་ཏུ་མངོན་པར་འབྱུང་བའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་བདུན་པའོ།། །།ཨེ་མའོ་རྡོ་རྗེ་ནི་སྣང་བ། ཨེ་མའོ་རྡོ་རྗེ་ནི་མཆེད་པ། ཨེ་མའོ་རྡོ་རྗེ་ཡིན་པར་བཤད་པ་ནི་སྣང་བ་ཐོབ་པའི་ཡེ་ཤེས་སོ། །སྒྱུ་རླུང་སེམས་སྒྱུ་མ་ཙམ་ལས་འབྱུང་བའི་གང་དུ་ཞེས་འོད་གསལ་བའི་ངང་དུའོ། །དེར་ནི་སྒྱུ་མ་རྨི་ལམ་ལྟ་བུའི་ལུས་མེད་སྣང་ཙམ། ངག་མེད་གྲག་ཙམ་སེམས་མེད་རྟོག་མེད་སྟོང་པ་ཉིད་དོ། །དེར་སྟོང་ཉིད་འོད་གསལ་བའི་ངང་ལས། ལུས་ནི་རྣམ་པར་བསྒོམ་པ་སྒྱུ་ལུས་རྣམ་པར་དག་པའི་སྐད་ཅིག་གིས་
འབྱུང་བའི་ཟུང་འཇུག་གི་སྐུ་ཐོབ་པར་གྱུར་པའོ། །ཟུང་འཇུག་སློབ་བཞིན་པ་ལ་གནས་པས་ནི། ལྷུན་གྱིས་གྲུབ་པའི་དབྱིངས་ཀྱི་དོན་ནམ་མཁའ་འོད་གསལ་ལས་བྱུང་བའི་ཡེ་ཤེས་ཀྱི་ལྷ་མོ་རིག་མ་དང་། ཡང་དེ་ཉིད་དུ་ཐབས་སྙིང་རྗེ་ཆེན་པོ་དང་ལྡན་པའི་ཐབས་ཤེས་རབ་གཉིས་མེད་དུ་སྦྱོར་བས་མཉེས་པར་གྱུར་པའི་ངོ་བོ་ཉིད་དོ། །བདུད་འདུལ་བར་མཛད་པས་རིག་མ་ནི་རྣམ་པ་སྒྱུ་མ་ལྟ་བུ་ལས་སྐྱེས་བུ་རྣལ་འབྱོར་པ་དགའ་བ་ཆེན་པོའི་རོལ་པ་ཡེ་ཤེས་མི་འགྱུར་བའི་རྡོ་རྗེ་སྟེ། ཤེས་རབ་པདྨ་ཆོས་ཀྱི་འབྱུང་གནས་དང་མཉམ་པར་སྦྱོར་བས་ནི་གང་ཞིག་འདི་དག་སྒོམ་པ་ཞེས་སྐུ་རྡོ་རྗེ་དག་པ་དགའ་བའི་སྐད་ཅིག །གསུང་རྡོ་རྗེ་མཆོག་དགའི་སྐད་ཅིག །ཐུགས་རྡོ་རྗེ་དག་པ་དགའ་བྲལ་གྱི་སྐད་ཅིག་དང་གསུམ་ལས་རྡོ་རྗེ་སྐུ་གསུམ་གྱིས་མཚན་པ་ནི་སྐད་ཅིག་བཞི་ལ་ལྷན་ཅིག་སྐྱེས་པ་རོ་མཉམ་བདེ་བ་ཆེན་པོ་ངོ་བོ་ཉིད་ཀྱི་སྐུ་མངོན་དུ་བྱེད་པ་སྟེ། ཁྱུ་མཆོག་བྱང་ཆུབ་སེམས་རྡོ་རྗེ་དེ་ནི་མཉེས་པར་གྱུར་པ། ཟུང་འཇུག་སློབ་བཞིན་པའི་བྱང་ཆུབ་སེམས་དཔའ་གྲགས་ཆེན་ས་བཅུ་པའི་ཏིང་ངེ་འཛིན་ཐོབ་པ་དང་མཉམ་པར་འགྱུར་ཏེ།དུས་དག་པ་ཡེ་ཤེས་སྐད་ཅིག་བདུན་པ་ལ་གཟི་བརྗིད་ཆེ་བ་ནི། ཡེ་ཤེས་དབང་ཕྱུག་ནུས་པ་རྫོགས་པ་ཐོབ་པར་ཡན་ལག་བདུན་དང་ལྡན་པའི་སྐུ་གསུམ་མངོན་དུ་གྱུར་པས་ལོངས་སྤྱོད་རྫོགས་སྐུ་ཡེ་ཤེས་ཁ་སྦྱོར་དུ་གྱུར་པ་བདེ་བ་ཆེན་པོ་དང་། སྙིང་རྗེ་ཆེན་པོས་འགྲོ་དོན་མངོན་པར་འབྱུང་བ། འགོག་པ་མེད་པའི་ཡེ་ཤེས་རྒྱུན་མི་འཆད་པའི་ཕྱག་རྒྱ་ཆེན་པོ་རང་བཞིན་གྱིས་རྣམ་པར་དག་པ་དབྱིངས་དང་ཡེ་ཤེས་དབྱེར་མེད་འཐོབ་པའོ། །སབྷ་ཞེས་བདུན་པའི་སྒྲ་སྟེ་དེས་ཡན་ལག་དང་ལྡན་པར་བརྗོད་པའོ། །དེ་ཉིད་ཀུན་དུ་འོང་ཞེས་དང་། །ཡེ་ཤེས་མཚོན་པའི་ས་ཐོབ་པ། །རྡོ་རྗེ་འཛིན་པའི་ས་ལ་གནས་པས་མངོན་པར་བྱང་ཆུབ་ཆེན་པོ་ཉིད། བདག་གི་ལུས་ངག་སེམས་རྡོ་རྗེ། །མཉམ་རྗེས་གཉིས་སུ་མེད་པར་ནི། །འགྱུར་བ་མེད་དོན་རབ་རྟགས་དང་། །ཕྱག་རྒྱ་ཆེན་པོ་མངོན་གྲུབ་པའི། །གསང་བ་དབང་ཕྱུག་ཆོ་ག་ནི། །བྱང་ཆུབ་
ཡེ་ཤེས་རྡོ་རྗེ་ཡི། །སྐུར་གྱུར་སྒོམ་པ་སྒྲིབ་བྲལ་བའི། །ཟུང་འཇུག་བླ་ན་མེད་པ་ནི། །མཁྱེན་པ་རྒྱས་པས་རབ་མི་གནས། །རྟོག་མེད་སྣང་བ་མེད་པ་ཡི། །སྐད་ཅིག་ཉིད་ལ་ཡོན་ཏན་རྫོགས། །དེ་བཞིན་གཤེགས་པར་གྱུར་པ་ཡིས། །ཐམས་ཅད་མཁྱེན་པ་ཉིད་དུ་གནས། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་བརྒྱད་པའོ། །དེ་ནས་ནམ་མཁའི་དབྱིངས་འདི་ཐམས་ཅད་ནི། །དེ་བཞིན་གཤེགས་པ་ཀུན་གྱི་སྐུ་གསུང་ཐུགས། །དམ་ཚིག་ཆེན་པོ་རྡོ་རྗེ་ཡེ་ཤེས་ཀྱི། །བྱང་ཆུབ་སེམས་ཀྱི་བདེ་བའི་རང་བཞིན་གྱིས། །དཀྱིལ་འཁོར་མ་ལུས་ཀུན་དུ་སྣང་བར་མཛད། །ས་གསུམ་ཀུན་དུ་ཁྱབ་ཅིང་ཡོངས་གང་བ། །བུམ་པ་རྡོ་རྗེ་མི་འགྱུར་ཆུས་གང་ལྟར། །ཡོངས་སུ་དག་པས་བྱིན་གྱིས་བརླབས་པའོ། །དེ་ནས་རྡོ་རྗེ་ནམ་མཁའི་དབྱིངས་འདི་ཐམས་ཅད་ཀྱི། །གང་དུ་འགྲོ་བ་སྐུ་གསུམ་ལས་བྱུང་བ། །དེ་དག་རྣམས་ལ་རྡོ་རྗེའི་འོད་ཟེར་གྱི། །དཔལ་གྱིས་རེག་ནས་དབང་བསྐུར་གྱུར་ཐོབ་པས། །འགྲོ་ཀུན་བདེ་བར་གཤེགས་པ་དགྲ་བཅོམ་པ། །རྡོ་རྗེ་གསུམ་གྱི་ཡེ་ཤེས་རོ་མཉམ་ཐོབ། །དབྱེར་མེད་ཟུང་འཇུག་བླ་ན་མེད་པར་གྱུར། །ཡང་དག་པར་ནི་མངོན་པར་སངས་རྒྱས་པའོ། །ཆོས་ཀུན་སྙིང་པོ་ལམ་ལས་འདས་པས་ན། །མཐར་ཕྱིན་གྱུར་པས་འབད་རྩོལ་ལས་ལས་གྲོལ། །ལྷན་ཅིག་སྐྱེས་པའི་ཡེ་ཤེས་རྣམ་དག་པ། །ཟུང་འཇུག་རབ་ཏུ་མི་གནས་གྱུར་པའོ། ། དངོས་དང་དངོས་མེད་སྤངས་ཐོབ་བྲལ་བའི་ཕྱིར། །མཚན་མའི་ཆོས་ལས་རྒྱུ་རྐྱེན་བྲལ་བའོ། །མཁྱེན་པའི་ཡེ་ཤེས་བདག་མེད་མཉམ་པ་ཉིད། །དམིགས་མེད་ངང་འབྱུང་འོད་གསལ་དེ་ཉིད་ལས། །རང་དག་དབྱིངས་དང་དབྱེར་མེད་རང་གྲོལ་བ། །ཕྲིན་ལས་ཡོངས་སུ་དག་པ་བླ་ན་མེད། །ཡུལ་དང་ཡུལ་ཅན་བྱང་ཆུབ་ཐོབ་མེད་པ། །རྣམ་པར་མི་རྟོག་མཐའ་བྲལ་བརྗོད་དུ་མེད། །དེ་བཞིན་ཉིད་དག་བདེ་ཆེན་ལྷུན་གྲུབ་པའོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས། རབ་ཏུ་བྱེད་པ་སུམ་ཅུ་སོ་དགུ་པའོ། །དེ་བཞིན་
གཤེགས་པ་དུས་གསུམ་དང་། །ཕྱོགས་བཅུ་ཀུན་དུ་ཞིང་ཁམས་རབ་འབྱམ་དང་། །ཀུན་དུ་གཟིགས་ཤིང་ཀུན་མཁྱེན་པ། །མ་ལུས་ཡོངས་དག་ཏིང་ངེ་འཛིན། །ཐམས་ཅད་མཁྱེན་པས་སྐད་ཅིག་ལས། །ནམ་མཁའ་ལྟར་ནི་རྟོག་མེད་པས། །གདུལ་བྱ་དུས་ལ་བབ་པ་ལ། །འབད་མེད་པར་ནི་སྐུ་གསུང་ཐུགས། །རྒྱུན་མི་འཆད་ཅིང་ཐོགས་མེད་དོན། །སྣང་མེད་ངང་ལས་འབྱུང་འགྱུར་བའོ། །རྒྱུད་ཀྱིས་བསྡུས་དང་མ་བསྡུས་ལས། །རྡོ་རྗེ་ངོ་བོ་ཉིད་སྟོན་འགྱུར། །དེ་ལས་མངོན་པར་བྱང་ཆུབ་པ་བླ་ན་མེད་པ་ཡེ་ཤེས་ཀྱི་སྐུ་དེ་བཞིན་གཤེགས་པ་འཇུག་པ་དང་། གནས་པ་དང་། འབྱུང་བར་འགྱུར་བ་མཉམ་པ་ནི་ཆོས་ཉིད་དེ་བཞིན་ཉིད་ལས་བྱང་ཆུབ་པ་སྟེ། རང་བཞིན་གྱིས་སྤྲོས་པ་མེད་པ་ལྷུན་གྲུབ་སྟོང་པ་ཉིད་དོ། །ཁྱབ་ཅིང་གསལ་བའི་ངོ་བོ་མངོན་པར་བྱང་ཆུབ་པ་ནི། དངོས་པོ་མེད་པའི་གསལ་བར་གྱུར་པའི་ཁྱབ་བདག་རྡོ་རྗེའོ། །མི་ཟད་པ་སྣང་བའི་ཡེ་ཤེས་མངོན་པར་བྱང་ཆུབ་པ་ནི། མི་མཚུངས་པ་མེད་པའི་སྣང་བ་འོད་གསལ་བའི་མཚན་ཉིད་རྟག་ཏུ་མི་འགྱུར་བའི་དེ་བཞིན་ཉིད་དོ། །སྒྱུ་འཕྲུལ་དྲ་བ་མངོན་པར་བྱང་ཆུབ་པ་ནི། ཀུན་ཏུ་འབྱུང་བ་ཐོགས་པ་མེད་པའི་དུས་དང་། རྣམ་པ་ཐམས་ཅད་དུ་འགག་པ་མེད་པའོ། །ཡོངས་སུ་དག་པ་ཆོས་ཀྱི་དབྱིངས་མངོན་པར་བྱང་ཆུབ་པ་ནི། ཐ་དད་པར་དམིགས་པ་མེད་པའི་ཡེ་ཤེས་ཀྱི་སྐུ། སངས་རྒྱས་ཐམས་ཅད་ཀྱི་བྱང་ཆུབ་ཀྱི་སེམས་དུས་གསུམ་ཐོག་མཐའ་ཀུན་དུ་དཀྱིལ་འཁོར་ཆེན་པོ། །གསང་བའི་བདེ་བ་ཆེན་པོ་སྐུ་གསུང་ཐུགས་རྡོ་རྗེ་དམ་ཚིག་གི་འཁོར་ལོས་ཞི་བ་དང་། ཁྲོ་བོའི་སྐུ་སྣ་ཚོགས་སུ་སྣང་བའོ། ། ལོངས་སྤྱོད་རྫོགས་པ་མཚན་དཔེ་ལྡན། །ཡབ་ཡུམ་བདེ་ཆེན་ངོ་བོ་ཉིད། །སྙིང་རྗེ་ཆེན་པོ་ཚད་མེད་པས། །རྒྱུན་མི་འཆད་པར་བསམ་པ་དང་། །མཐུན་པར་འཇུག་པས་ཞི་མི་འགྱུར། །རང་བཞིན་མེད་པས་མི་འགྱུར་བའོ། །དཔལ་ཡེ་ཤེས་རྡོ་རྗེ་
ཀུན་ལས་བསྡུས་པ་ལས། རབ་ཏུ་བྱེད་པ་བཞི་བཅུ་པའོ།། །།དེ་ནས་དེ་བཞིན་གཤེགས་པའི་ཚོགས། །དཔག་མེད་འདུས་པ་ཐམས་ཅད་ཀྱི། །རྟག་ཏུ་དགའ་བའི་གཟུགས་ཅན་མཆོག །བཅོམ་ལྡན་རྡོ་རྗེ་འཆང་ཆེན་གྱི། །གསུང་དབྱངས་རྡོ་རྗེ་སྒྲ་སྒྲོགས་པ། ། ཉེ་བ་ཉིད་དུ་ཐོས་པ་ཡིས། །བདེ་བ་དང་ནི་ཡིད་བདེ་ཐོབ། །དེ་ཉིད་དུ་ནི་སྐད་ཅིག་ལ། །ཡང་དག་ཏིང་འཛིན་སྒོ་ཐོབ་ཅིང་། །རྨད་བྱུང་ཡེ་ཤེས་དབྱངས་ཀྱིས་བསྟོད། །ཆོས་ཀྱི་དབྱིངས་ལས་མ་གཡོས་ཀྱང་། །ཐུགས་རྗེ་ཚད་མེད་འགྲོ་སྐྱོབ་མཛད། །བྱང་ཆུབ་ཡེ་ཤེས་གཙོ་ཆེན་པོ། །བདེ་ཆེན་དཔེ་བྲལ་ཕྱག་འཚལ་ལོ། །རྡོ་རྗེ་གསང་བ་མི་འགྱུར་བ། །མཆོག་ཏུ་གྱུར་པ་བདེ་ཆེན་པོ། །ཐབས་དང་ཤེས་རབ་གཉིས་མེད་པའི། །གར་གྱི་བདག་པོ་ཕྱག་འཚལ་ལོ། །དྲག་པོ་མ་རུངས་ཐམས་ཅད་ཀུན། །གསུང་གི་ང་རོས་ཟིལ་གནོན་ཅིང་། །འཇིགས་བྱེད་བདུད་འདུལ་ཆེན་པོ་ཉིད། །རྒྱལ་བ་རྒྱ་མཚོ་ལ་ཕྱག་འཚལ། །ཆོས་རྣམས་མི་ཟད་མཛོད་ཐོབ་པས། །འགྲོ་བ་ཀུན་ལ་གཏེར་སྦྱིན་མཛད། །དབང་ཕྱུག་བླ་མེད་ཕྱག་རྒྱ་ཆེ། ཅོད་པན་གཙུག་ཏོར་ཕྱག་འཚལ་ལོ། ། འཇིག་རྟེན་དབང་སྒྱུར་ས་གསུམ་པ། །དྲི་མེད་ནོར་བུ་ཆེན་པོ་སྟེ། །མཚུངས་མེད་སྒྱུ་འཕྲུལ་རྒྱལ་པོ་ཆེ། །བྱང་ཆུབ་སྙིང་པོ་ཕྱག་འཚལ་ལོ། །ཞེས་དེ་བཞིན་གཤེགས་པ་ཐམས་ཅད་ཀྱིས། དཔལ་རྡོ་རྗེ་འཆང་ཆེན་པོ་ལ་ཡང་དག་པར་བསྟོད་པའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་སོགས་པ་དང་། བྱང་ཆུབ་སེམས་དཔའ་ནམ་མཁའི་སྙིང་པོ་ལ་སོགས་པ་དཔག་ཏུ་མེད་པ་དགའ་མགུ་ཡི་རངས་ཏེ། ཆོས་ཐམས་ཅད་མཉམ་པ་ཉིད་དུ་རྟོགས་པས་ཅི་ཡང་མི་སྨྲ་བར་གྱུར་ཏོ། །དཔལ་ཡེ་ཤེས་རྡོ་རྗེ་ཀུན་ལས་བསྡུས་པ་ལས་རབ་ཏུ་བྱེད་པ་བཞི་བཅུ་རྩ་གཅིག་པའོ། །སློབ་དཔོན་ཆེན་པོ་ཟླ་བ་གྲགས་པ་ལས་རིམ་པར་བརྒྱུད་པ། དཔལ་ནཱ་རོ་བའི་སློབ་མ་ཁ་ཆེའི་བཎྜིཏ་ཨཱ་ཀ་ར་སིདྡྷི་དང་། ལོ་ཙཱ་བ་དགེ་སློང་ཚུལ་ཁྲིམས་ཀྱིས་ཞུས་ཤིང་གཏན་ལ་ཕབ་པ།