འཕགས་པ་གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ཐེག་པ་ཆེན་པོའི་མདོ།
རྒྱ་ཡི་སྐད་དུ། ཏཱ་ཤིན་ཀྱིན་ཀྭང་མྱའུ་ཙའི་ཤིན་ཝང་ཀྱིན། བོད་སྐད་དུ། འཕགས་པ་གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ཐེག་པ་ཆེན་པོའི་མདོ། བམ་པོ་དང་པོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་བྱ་རྒོད་སྤུངས་པའི་རི་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཟབ་མོ་སངས་རྒྱས་ཐམས་ཅད་ཀྱི་སྤྱོད་ཡུལ་དེ་བཞིན་གཤེགས་པའི་གནས་ན་དགེ་སློང་ཆེན་པོའི་དགེ་འདུན་ཁྲི་ཕྲག་དགུ་ཁྲི་བརྒྱད་སྟོང་དང་ཐབས་ཅིག་ཏུ་བཞུགས་ཏེ། ཐམས་ཅད་ཀྱང་དགྲ་བཅོམ་པ་ཤ་སྟག །གླང་པོ་ཆེའི་རྒྱལ་པོ་ལྟར་ཤིན་ཏུ་རྣམ་པར་བྱང་བ་ཤ་སྟག །ཟག་པ་ཟད་པ་ཤ་སྟག །ཉོན་མོངས་པ་མེད་པ་ཤ་སྟག །སེམས་ཤིན་ཏུ་རྣམ་པར་གྲོལ་བ་ཤ་སྟག །ཤེས་རབ་ཤིན་ཏུ་རྣམ་པར་གྲོལ་བ་ཤ་སྟག །བྱ་བ་བྱས་པ་ཤ་སྟག །ཁུར་བོར་བ་ཤ་སྟག །བདག་གི་དོན་རབ་ཏུ་རྙེད་པ་ཤ་སྟག །སྲིད་པའི་སྦྱོར་བ་ཡོངས་སུ་ཟད་པ་ཤ་སྟག །དམ་པའི་དབང་མཆོག་ཐོབ་པ་ཤ་སྟག །ཚུལ་ཁྲིམས་རྣམ་པར་དག་པ་ལ་གནས་པ་ཤ་སྟག །ཐབས་དང་ཤེས་རབ་ཏུ་ལྡན་པར་མཁས་པའི་རྒྱན་གྱིས་བརྒྱན་པ་ཤ་སྟག །རྣམ་པར་ཐར་པ་བརྒྱད་དང་ལྡན་པ་ཤ་སྟག །ཕ་རོལ་དུ་ཡོངས་སུ་ཕྱིན་པ་ཤ་སྟག་སྟེ། དེ་དག་གི་མིང་ལ་འདི་ལྟ་སྟེ། ཚེ་དང་ལྡན་པ་ཀུན་ཤེས་ཀཽཎྜི་ནྱ་དང་། ཚེ་དང་ལྡན་པ་རྟ་ཐུལ་དང་། ཚེ་དང་ལྡན་པ་རླངས་པ་དང་། ཚེ་དང་ལྡན་པ་མིང་ཆེན་དང་། ཚེ་དང་ལྡན་པ་བཟང་པོ་དང་། ཚེ་དང་ལྡན་པ་འོད་སྲུང་ཆེན་པོ་དང་། ཚེ་དང་ལྡན་པ་ལྟེང་རྒྱས་འོད་སྲུང་དང་། ཚེ་དང་ལྡན་པ་ག་ཡཱ་འོད་སྲུང་དང་། ཚེ་དང་ལྡན་པ་ཆུ་བོ་འོད་སྲུང་དང་། ཚེ་དང་ལྡན་པ་ཤཱ་རིའི་བུ་དང་། ཚེ་དང་ལྡན་པ་མཽད་གལ་གྱི་བུ་ཆེན་པོ་དང་། དེ་ལ་གཅིག་མ་གཏོགས་པ་དེ་ནི་ཚེ་དང་ལྡན་པ་ཀུན་དགའ་བོ་སྟེ། དེ་ལ་སོགས་ཏེ་ཉན་ཐོས་ཀྱི་དགེ་འདུན་ཆེན་པོ་རྣམས་ཕྱི་དྲོའི་དུས་ན་སོ་སོའི་ཏིང་ངེ་འཛིན་ལས་ལངས་ནས་བཅོམ་ལྡན་འདས་གང་ན་པ་དེར་ལྷགས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས། གཡས་ཕྱོགས་ནས་ལན་
གསུམ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་སྙེད་ཀྱང་དེ་ན་འདུས་པར་གྱུར་ཏེ། ཐམས་ཅད་ཀྱང་ཀླུའི་རྒྱལ་པོ་ཆེན་པོ་ལྟར་གཟི་བརྗིད་ཀྱི་བྱིན་གྱི་མཐུ་ཆེ་བ། ཤིན་དུ་གྲགས་པ་དང་ལྡན་པ། ཅང་ཤེས་དང་ལྡན་པ། སྦྱིན་པ་དང་ཚུལ་ཁྲིམས་ཡོངས་སུ་དག་པ་མཆོད་པ་དང་། རིམ་གྲོ་བྱེད་པ་དང་། ཡོངས་སུ་དག་པ། བསྐལ་པ་གྲངས་མེད་པ་ནས་བཟོད་པ་དང་། བརྩོན་འགྲུས་སུ་ལྡན་པ། བསམ་གཏན་ཐམས་ཅད་ལས་ཡོངས་སུ་འདས་པ། དྲན་པ་མངོན་པར་གཞག་པ། ཤེས་རབ་ཀྱི་སྒོ་ཡོངས་སུ་འབྱེད་པ། རྣལ་འབྱོར་དང་ཐབས་དང་དབང་གིས་རྣམ་པར་རོལ་བ། མངོན་པར་ཤེས་པ་དང་། གཟུངས་དང་ལྡན་པ། སྤོབས་པ་ཡོངས་སུ་མི་ཟད་པ་ཉོན་མོངས་པ་ཐམས་ཅད་ཡོངས་སུ་སྤངས་པ། ཉོན་མོངས་པའི་བཤལ་ཐག་ཡོངས་སུ་གཅོད་པ། རིང་པོ་མི་ཐོགས་པར་ཐམས་ཅད་མཁྱེན་པའི་ཡེ་ཤེས་དང་ལྡན་པར་འགྱུར་བ། བདུད་དང་། བདུད་ཀྱི་དམག་ཡོངས་སུ་འཇོམས་པ། ཆོས་ཀྱི་རྔ་རབ་ཏུ་སྒྲོགས་པ། མུ་སྟེགས་ཐམས་ཅད་ཡོངས་སུ་ཟློག་པས་བསམ་པ་རྣམ་པར་དག་པར་སྦྱོར་བ། དམ་པའི་ཆོས་ཀྱི་འཁོར་ལོ་བསྐོར་བ། ལྷ་དང་མི་ཐམས་ཅད་ཡོངས་སུ་སྒྲོལ་བ། ཕྱོགས་བཅུའི་སངས་རྒྱས་ཀྱི་ཞིང་གི་རྒྱན་ཡོངས་སུ་སྒྲུབ་པ། རྒྱུད་དྲུག་གི་སྐྱེ་བོ་ཡོངས་ལ་ཕན་འདོགས་པ། ཡེ་ཤེས་ཆེན་པོ་ཕུན་སུམ་ཚོགས་པ། བཟོད་པ་ཆེན་པོ་དང་ཡོངས་སུ་ལྡན་པ། བྱམས་པ་ཆེན་པོ་དང་། སྙིང་རྗེ་ཆེན་པོ་དང་ལྡན་པའི་སེམས་ལ་གནས་པ། གཞན་གྱིས་མི་ཐུབ་པའི་སྟོབས་ཆེན་པོ་དང་ལྡན་པ། སངས་རྒྱས་ཀྱི་ཞིང་ཐམས་ཅད་དུ་རྒྱུ་ཞིང་མཆོད་པ་བྱེད་པ། ཡོངས་སུ་མྱ་ངན་ལས་འདའ་བར་མི་འཇུག་པ། མ་འོངས་པའི་བསྐལ་པའི་མཐར་ཡོངས་སུ་མི་ཟད་པའི་ཡི་དམ་གྱི་སྨོན་ལམ་ཆེན་པོ་བསྐྱེད་པ། སངས་རྒྱས་མང་པོ་ལས་ཤིན་དུ་ཟབ་མོའི་རྒྱུ་རྣམ་པར་དག་པ་བསྐྱེད་པ། དུས་གསུམ་གྱི་ཆོས་མ་སྐྱེས་པའི་བཟོད་པ་ཐོབ་པ། ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་ལས་ཡོངས་སུ་འདས་པ། འཇིག་རྟེན་གྱི་དོན་སྦྱོར་བ་ལ་མཁས་པ།
སྟོན་པ་ཆེན་པོས་དགོངས་ཏེ་གསུངས་པའི་ཆོས་ཤིན་དུ་བཀོད་པ་རྒྱ་ཆེར་སྟོན་པ། སྟོང་པའི་མཚན་ཉིད་རྣམ་པར་དག་པའི་ཟབ་མོ་ལ་མཁས་པ། ཐེ་ཚོམ་ཡོངས་སུ་སྤངས་པ་ཤ་སྟག་སྟེ། དེ་དག་གི་མིང་ལ་འདི་ལྟ་སྟེ། བསྒྲིབས་པ་མེད་པའི་ཆོས་ཀྱི་འཁོར་ལོ་བསྐོར་བའི་བྱང་ཆུབ་སེམས་དཔའ་དང་། ཆོས་ཀྱི་འཁོར་ལོ་ཡོངས་སུ་བསྐོར་བར་སེམས་བསྐྱེད་པའི་བྱང་ཆུབ་སེམས་དཔའ་དང་། བརྩོན་འགྲུས་ཡོངས་སུ་ལྡན་པའི་བྱང་ཆུབ་སེམས་དཔའ་དང་། ཡོངས་སུ་མི་སྐྱོ་བའི་བྱང་ཆུབ་སེམས་དཔའ་དང་། བྱམས་པའི་བྱང་ཆུབ་སེམས་དཔའ་དང་། འཇམ་དཔལ་བྱང་ཆུབ་སེམས་དཔའ་དང་། སྤྱན་རས་གཟིགས་བྱང་ཆུབ་སེམས་དཔའ་དང་། གཟུངས་ཀྱི་དབང་པོའི་རྒྱལ་པོ་བྱང་ཆུབ་སེམས་དཔའ་དང་། སྤོབས་པ་ཆེན་པོའི་རྒྱན་གྱི་རྒྱལ་པོ་བྱང་ཆུབ་སེམས་དཔའ་དང་། རི་རབ་མཆོག་གི་རྒྱལ་པོ་བྱང་ཆུབ་སེམས་དཔའ་དང་། རྒྱ་མཚོ་ཆེན་པོ་ཟབ་མོའི་རྒྱལ་པོ་བྱང་ཆུབ་སེམས་དཔའ་དང་། རིན་པོ་ཆེའི་རྒྱལ་མཚན་བྱང་ཆུབ་སེམས་དཔའ་དང་། རིན་པོ་ཆེའི་རྒྱལ་མཚན་ཆེན་པོའི་བྱང་ཆུབ་སེམས་དཔའ་དང་། སའི་སྙིང་པོའི་བྱང་ཆུབ་སེམས་དཔའ་དང་། ནམ་མཁའི་སྙིང་པོའི་བྱང་ཆུབ་སེམས་དཔའ་དང་། རིན་པོ་ཆེའི་ཕྱག་དབང་བྱང་ཆུབ་སེམས་དཔའ་དང་། རྡོ་རྗེའི་ཐལ་མོ་བྱང་ཆུབ་སེམས་དཔའ་དང་། དགའ་བའི་སྟོབས་བྱང་ཆུབ་སེམས་དཔའ་དང་། ཆོས་ཀྱི་སྟོབས་བྱང་ཆུབ་སེམས་དཔའ་དང་། འོད་རྒྱན་ཆེན་པོ་བྱང་ཆུབ་སེམས་དཔའ་དང་། གསེར་གྱི་འོད་རྒྱན་ཆེན་པོ་བྱང་ཆུབ་སེམས་དཔའ་དང་། ཚུལ་ཁྲིམས་རྣམ་པར་དག་པའི་བྱང་ཆུབ་སེམས་དཔའ་དང་། རྟག་ཏུ་ཏིང་ངེ་འཛིན་བྱང་ཆུབ་སེམས་དཔའ་དང་། ཤེས་རབ་རྣམ་པར་དག་པའི་བྱང་ཆུབ་སེམས་དཔའ་དང་། བརྩོན་འགྲུས་དཀའ་ཐུབ་བྱང་ཆུབ་སེམས་དཔའ་དང་། བསམ་པ་ནམ་མཁའ་ཅི་བཞིན་བྱང་ཆུབ་སེམས་དཔའ་དང་། སྨོན་ལམ་ཆེན་པོ་ཡོངས་སུ་མི་གཅོད་པའི་བྱང་ཆུབ་སེམས་དཔའ་དང་། སྨན་གཏོང་བྱང་ཆུབ་སེམས་དཔའ་དང་། ཉོན་མོངས་པའི་ནད་རྣམ་པར་སེལ་བའི་བྱང་ཆུབ་སེམས་དཔའ་དང་། སྨན་གྱི་རྒྱལ་པོ་བྱང་ཆུབ་སེམས་དཔའ་དང་། འཕགས་པར་དགའ་བའི་བྱང་ཆུབ་སེམས་དཔའ་
དང་། གོང་དུ་ལུང་བསྟན་པ་ཐོབ་པའི་བྱང་ཆུབ་སེམས་དཔའ་དང་། སྤྲིན་ཆེན་འོད་གཙང་བྱང་ཆུབ་སེམས་དཔའ་དང་། སྤྲིན་ཆེན་ཆོས་སྐྱོང་བྱང་ཆུབ་སེམས་དཔའ་དང་། སྤྲིན་ཆེན་གྲགས་ཅན་དགའ་བྱང་ཆུབ་སེམས་དཔའ་དང་། སྤྲིན་ཆེན་མཐའ་ཡས་གྲགས་བྱང་ཆུབ་སེམས་དཔའ་དང་། སྤྲིན་ཆེན་སེང་གེ་སྒྲ་བྱང་ཆུབ་སེམས་དཔའ་དང་། སྤྲིན་ཆེན་གླེང་པོ་ཆེའི་རྒྱལ་པོའི་སྒྲ་བྱང་ཆུབ་སེམས་དཔའ་དང་། སྤྲིན་ཆེན་བཀྲ་ཤིས་བྱང་ཆུབ་སེམས་དཔའ་དང་། སྤྲིན་ཆེན་རིན་ཆེན་ཡོན་ཏན་བྱང་ཆུབ་སེམས་དཔའ་དང་། སྤྲིན་ཆེན་ཉི་མའི་སྙིང་པོ་བྱང་ཆུབ་སེམས་དཔའ་དང་། སྤྲིན་ཆེན་ཟླ་བའི་སྙིང་པོ་བྱང་ཆུབ་སེམས་དཔའ་དང་། སྤྲིན་ཆེན་སྐར་མའི་འོད་བྱང་ཆུབ་སེམས་དཔའ་དང་། སྤྲིན་ཆེན་མེ་འོད་བྱང་ཆུབ་སེམས་དཔའ་དང་། སྤྲིན་ཆེན་གློག་འོད་བྱང་ཆུབ་སེམས་དཔའ་དང་། སྤྲིན་ཆེན་འབྲུག་སྒྲ་བྱང་ཆུབ་སེམས་དཔའ་དང་། སྤྲིན་ཆེན་ཤེས་རབ་ཆར་ཡོངས་སུ་སྙོམས་པའི་བྱང་ཆུབ་སེམས་དཔའ་དང་། སྤྲིན་ཆེན་ཆར་གྱི་རྒྱལ་པོ་ཡོངས་སུ་དག་པའི་བྱང་ཆུབ་སེམས་དཔའ་དང་། སྤྲིན་ཆེན་མེ་ཏོག་སྡོང་པོའི་རྒྱལ་པོ་བྱང་ཆུབ་སེམས་དཔའ་དང་། སྤྲིན་ཆེན་པདྨ་སྔོན་པོའི་བསུང་བྱང་ཆུབ་སེམས་དཔའ་དང་། སྤྲིན་རིན་པོ་ཆེའི་ཙནྡན་སྐུ་རྣམ་པར་བསིལ་བ་བྱང་ཆུབ་སེམས་དཔའ་དང་། སྤྲིན་ཆེན་མུན་པ་རྣམ་པར་སེལ་བའི་བྱང་ཆུབ་སེམས་དཔའ་དང་། སྤྲིན་ཆེན་ལྟ་བའི་རབ་རིབ་རྣམ་པར་སེལ་བའི་བྱང་ཆུབ་སེམས་དཔའ་དང་། བྱང་ཆུབ་སེམས་དཔའ་སེམས་དཔའ་ཆེན་པོའི་འཁོར་དེ་དག་ཕྱི་དྲོའི་དུས་ན་སོ་སོའི་ཏིང་ངེ་འཛིན་ལས་ལངས་ནས་བཅོམ་ལྡན་འདས་གང་ན་བ་དེར་ལྷགས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས་གཡས་ཕྱོགས་ནས་ལན་གསུམ་དུ་བསྐོར་བ་བྱས་ཏེ་ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། ལིཙྪ་བཱི་གཞོན་ནུ་འབུམ་ཕྲག་འབུམ་བརྒྱད་སྟོང་ཡང་དེར་འདུས་པར་གྱུར་ཏེ། དེ་དག་གི་མིང་ལ་གཞོན་ནུ་སེང་གེའི་འོད་དང་། གཞོན་ནུ་སེང་གེའི་བློ་གྲོས་དང་། གཞོན་ནུ་ཆོས་བྱིན་དང་། གཞོན་ནུ་དབང་པོ་སྦྱིན་དང་། གཞོན་ནུ་འོད་ཆེན་དང་། གཞོན་ནུ་དཔལ་ཆེན་དང་། གཞོན་ནུ་སངས་རྒྱས་སྐྱབས་དང་། གཞོན་ནུ་ཆོས་
སྐྱབས་དང་།གཞོན་ནུ་དགེ་འདུན་སྐྱབས་དང་། གཞོན་ནུ་རྡོ་རྗེ་སྐྱབས་དང་། གཞོན་ནུ་ནམ་མཁའ་སྐྱབས་དང་། གཞོན་ནུ་ནམ་མཁའ་སྒྲ་སྒྲོགས་དང་། གཞོན་ནུ་རིན་པོ་ཆེའི་སྙིང་པོ་དང་། གཞོན་ནུ་བཀྲ་ཤིས་མཆོག་གི་སྙིང་པོ་དང་། དེ་དག་གཞོན་ནུ་ཐམས་ཅད་ཀྱི་གཙོ་བོར་གྱུར་ནས། བླ་ན་མེད་པའི་བྱང་ཆུབ་ཏུ་གནས་ཏེ་ཐེག་པ་ཆེན་པོའི་དད་པ་སོ་སོར་རྙེད་ནས། ཕྱི་དྲོའི་དུས་ན་བཅོམ་ལྡན་འདས་གང་ན་བ་དེར་ལྷགས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས། གཡས་ཕྱོགས་སུ་ལན་གསུམ་བསྐོར་བ་བྱས་ནས། ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། ལྷའི་སྲས་པོ་བཞི་ཁྲི་ཉིས་སྟོང་ཡང་དེར་འདུས་པར་གྱུར་ཏེ། དེ་དག་གི་མིང་ལ་འདི་ལྟ་སྟེ། ལྷའི་སྲས་པོ་མཐོང་ན་དགའ་བ་དང་། ལྷའི་སྲས་པོ་ཡིད་དགའ་བ་དང་། ལྷའི་སྲས་པོ་ཉི་མའི་འོད་དང་། ལྷའི་སྲས་པོ་ཟླ་བའི་གཙུག་ཏོར་དང་། ལྷའི་སྲས་པོ་ནམ་མཁའི་བློ་གྲོས་རྣམ་པར་དག་པ་དང་། ལྷའི་སྲས་པོ་ཉོན་མོངས་པ་ཡོངས་སུ་སྤངས་པ་དང་། ལྷའི་སྲས་པོ་རྣམ་པར་བཀྲ་ཤིས་དང་། དེ་དག་ཐམས་ཅད་ཀྱང་ལྷའི་སྲས་པོ་རྣམས་ཀྱི་གཙོ་བོར་གྱུར་པ། ཐེག་པ་ཆེན་པོའི་ཆོས་ཡོངས་སུ་སྐྱོང་བའི་ཡི་དམ་ཆེན་པོའི་སྨོན་ལམ་འདེབས་པ། དམ་པའི་ཆོས་ཡོངས་སུ་མི་ནུབ་པར་གདུང་འཚོབ་པ་དེ་དག་ཐམས་ཅད་ཕྱི་དྲོའི་དུས་ན་བཅོམ་ལྡན་འདས་གང་ན་བ་དེར་ལྷགས་ནས་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས་གཡས་ཕྱོགས་སུ་ལན་གསུམ་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། ཀླུའི་རྒྱལ་པོ་ཉི་ཁྲི་བརྒྱད་སྟོང་ཡང་དེར་འདུས་པར་གྱུར་ཏེ། དེ་དག་གི་མིང་ལ་པདྨའི་ཀླུའི་རྒྱལ་པོ་དང་། ཨེ་ལའི་ལོ་མ་ཀླུའི་རྒྱལ་པོ་དང་། སྟོབས་པོ་ཆེ་ཀླུའི་རྒྱལ་པོ་དང་། སྒྲ་བོ་ཆེ་ཀླུའི་རྒྱལ་པོ་དང་། དབའ་རླབས་ཆུང་ངུའི་ཀླུའི་རྒྱལ་པོ་དང་། ཆུའི་རྒྱུ་འཛིན་ཀླུའི་རྒྱལ་པོ་དང་། གསེར་གྱི་བཞིན་ཀླུའི་རྒྱལ་པོ་དང་། ཡིད་བཞིན་ཀླུའི་རྒྱལ་པོ་དང་། དེ་དག་ཐམས་ཅད་ཀྱང་ཀླུའི་རྒྱལ་པོའི་གཙོ་བོར་གྱུར་པ། ཐེག་པ་ཆེན་པོའི་ཆོས་ཡོངས་སུ་སྐྱོང་བར་ཡོངས་སུ་དགའ་བ་དང་།
ཡོངས་སུ་འཛིན་པ་དང་། ལུང་ནོད་པ་དང་། ཤིན་ཏུ་ཟབ་མོའི་བསམ་པ་ལ་མོས་པ་དང་། རྗེས་སུ་ཡི་རངས་པ་དང་། རྣམ་པར་སྐྱོང་ཞིང་འཚོ་བར་བྱེད་དེ། ཕྱི་དྲོའི་དུས་ན་བཅོམ་ལྡན་འདས་གང་ན་བ་དེར་ལྷགས་ཏེ། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས་གཡས་ཕྱོགས་ནས་ལན་གསུམ་དུ་བསྐོར་བ་བྱས་ཏེ། ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། གནོད་སྦྱིན་གྱི་འཁོར་སུམ་ཁྲི་དྲུག་སྟོང་ཡང་དེར་འདུས་པར་གྱུར་ཏོ། །དེ་དག་གི་གཙོ་བོ་ཐོག་མར་ལྷའི་རྒྱལ་པོ་མིག་མི་བཟང་གིས་དྲངས་ནས་ཨ་མྲའི་གནོད་སྦྱིན་དང་། ཨ་མྲ་ཐོགས་པའི་གནོད་སྦྱིན་དང་། པདྨ་འོད་ཀྱི་སྙིང་པོའི་གནོད་སྦྱིན་དང་། པདྨའི་བཞིན་གནོད་སྦྱིན་དང་། ཁྲོ་གཉེར་གནོད་སྦྱིན་དང་། འཇིགས་པ་མངོན་དུ་སྟོན་པའི་གནོད་སྦྱིན་དང་། ས་ཀུན་གཡོ་བའི་གནོད་སྦྱིན་དང་། ཟས་ཀྱི་རིལ་མིང་གནོད་སྦྱིན་དང་། དེ་དག་ཐམས་ཅད་ཀྱང་གནོད་སྦྱིན་གྱི་གཙོ་བོར་གྱུར་པ་ཤ་སྟག་སྟེ། དེ་བཞིན་གཤེགས་པའི་དམ་པའི་ཆོས་ལ་ཤིན་ཏུ་དད་པའི་སེམས་བསྐྱེད་པ། དམ་པའི་ཆོས་ཡོངས་སུ་སྐྱོང་ཞིང་སྲུང་བའི་སེམས་བསྐྱེད་པ་མི་སྐྱོ་བ། ཕྱི་དྲོའི་དུས་ན་བཅོམ་ལྡན་འདས་གང་ན་བ་དེར་ལྷགས་ཏེ། བཅོམ་ལྡན་འདས་ཀྱི་ཞབས་གཉིས་པ་སྤྱི་བོས་ཕྱག་བྱས་ཏེ་གཡས་ཕྱོགས་ནས་ལན་གསུམ་དུ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །གཞན་ཡང་འདི་ལྟ་སྟེ། ནམ་མཁའ་ལྡིང་གི་འཁོར་བཞི་ཁྲི་དགུ་སྟོང་ཡང་དེར་འདུས་པར་གྱུར་ཏེ། ནམ་མཁའ་ལྡིང་གི་རྒྱལ་པོ་སྤོས་ཀྱི་གླང་པོ་ཆེའི་བྱིན་གྱི་མཐུ་དང་ལྡན་པས་གཙོ་བོར་གྱུར་པ་དང་། གཞན་ཡང་འདི་ལྟ་སྟེ། དྲི་ཟའི་འཁོར་དང་། ལྷ་མ་ཡིན་གྱི་འཁོར་དང་། མིའམ་ཅིའི་འཁོར་དང་། གྲུལ་བུམ་དང་། ལྟོ་འཕྱེ་ཆེན་པོའི་འཁོར་དང་། རི་དང་། ནགས་ཚལ་དང་། ཆུ་བོ་དང་། རྒྱ་མཚོ་རྣམས་ཀྱི་ལྷ་དང་། དྲང་སྲོང་དང་། ཡུལ་ཁམས་ཆེན་པོ་ཐམས་ཅད་ཀྱི་རྒྱལ་པོ་དང་། ཕོ་བྲང་འཁོར་དང་། བཙུན་མོ་དང་། སླས་དང་། དད་པ་རྣམ་པར་བསྐྱེད་པའི་བུ་ཕོ་དང་། བུ་མོ་དང་།ལྷ་དང་། མི་ལ་སོགས་པ་ཡོངས་སུ་འདུས་ཤིང་ལྷགས་ནས་ཐམས་
ཅད་ཀྱང་བླ་ན་མེད་པ་ཐེག་པ་ཆེན་པོའི་ཆོས་འདི་ཡོངས་སུ་ཀློག་པ་དང་། འདོན་པ་དང་། འཆང་བ་དང་། འཛིན་པ་དང་། ཡི་གེར་འདྲི་བ་དང་། ཀུན་དུ་སྤེལ་ཞིང་བསྐྱེད་པ་དང་། ཡོངས་སུ་འཚོ་བ་དང་། སྐྱོང་བའི་དམ་ཚིག་བཅས་ཏེ། ཕྱི་དྲོའི་དུས་ན་བཅོམ་ལྡན་འདས་གང་ན་བ་དེར་ལྷགས་ཏེ་བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་བྱས་ནས་གཡས་ཕྱོགས་ནས་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ལྟར་ཉན་ཐོས་དང་། བྱང་ཆུབ་སེམས་དཔའ་དང་། ལྷ་དང་། མི་དང་། ཀླུ་དང་། གནོད་སྦྱིན་ལ་སོགས་པ་ཐམས་ཅད་འདུས་པར་གྱུར་ནས་སོ་སོ་ནས་བསྟི་སྟང་དང་། རིམ་གྲོའི་སེམས་བསྐྱེད་དེ། ཐལ་མོ་སྦྱར་ནས་རབ་ཏུ་འཛུམ་པའི་མིག་གིས་བཅོམ་ལྡན་འདས་ལ་བལྟ་ཞིང་ཅུང་ཟད་ཀྱང་མི་ཡེངས་པར་དམ་པའི་ཆོས་ཤིན་ཏུ་ཐོས་པར་སྨོན་ཏོ། །དེ་ནས་བཅོམ་ལྡན་འདས་ཕྱི་དྲོའི་དུས་ཀྱི་ཚེ་ཏིང་ངེ་འཛིན་ལས་བཞེངས་ནས་འཁོར་གྱི་དཀྱིལ་འཁོར་ལ་གཟིགས་ཏེ་ཚིགས་སུ་བཅད་པ་འདི་དག་གསུངས་སོ། །འཕགས་པ་གསེར་འོད་དམ་པའི་ཆོས། །མདོ་སྡེ་ཀུན་གྱི་རྒྱལ་པོ་འདི། །སངས་རྒྱས་ཀུན་གྱི་སྤྱོད་ཡུལ་ཏེ། །ཤིན་ཏུ་མཉན་ཅིང་ཐོས་པར་དཀའ། །ངས་དེང་དཀྱིལ་འཁོར་ཁྱེད་རྣམས་ལ། །དམ་པའི་མདོ་སྡེ་འདི་བསྟན་པས། །ཕྱོགས་བཞི་སངས་རྒྱས་རྣམས་ཀྱིས་ཀྱང་། །བྱིན་གྱི་རླབས་ཀྱིས་བརླབས་པར་འགྱུར། །ཤར་ཕྱོགས་སངས་རྒྱས་མི་འཁྲུགས་དང་། །ལྷོ་ཕྱོགས་སངས་རྒྱས་དཀོན་མཆོག་དཔལ། །ནུབ་ཕྱོགས་སངས་རྒྱས་སྣང་མཐའ་ཡས། །བྱང་ཕྱོགས་སངས་རྒྱས་རྔ་སྒྲ་སྐྱབས། །ངས་དེང་ཆོས་མཆོག་འདི་བསྟན་པས། །བཀྲ་ཤིས་འཆགས་པའི་དམ་པ་སྟེ། །སྡིག་པ་ཐམས་ཅད་གཞོམ་པའི་ཕྱིར། །སྡིག་པའི་ལས་ཀུན་ཟད་པར་འགྱུར། །སྡུག་བསྔལ་ཐམས་ཅད་འཇོམས་པར་བྱེད། །བདེ་བ་ཐམས་ཅད་སྦྱིན་བྱེད་ཅིང་། །ཡེ་ཤེས་རྩ་བ་ཀུན་མཁྱེན་དང་། །དཔལ་ཀུན་གྱིས་ཀྱང་བརྒྱན་པར་འགྱུར། །སེམས་ཅན་གང་དག་དབང་པོ་ཉམས། །དཔལ་མེད་པས་ནི་གང་ཟིན་ཅིང་། །ལྷ་
རྣམས་ཀྱང་ནི་འཕང་བར་འགྱུར། །གཉེན་སྡུག་ཀུན་ཀྱང་སྡང་བ་དང་། །བུ་སྨད་འཁོར་དང་བྲལ་བ་དང་། །ཕན་ཚུན་དུ་ནི་མི་འཕྲོད་ཅིང་། །ནོར་སྟོར་བས་ནི་རབ་གཙེས་ཏེ། །གཟའ་དང་སྐར་མས་གནོད་བྱས་ཤིང་། །བྱད་སྟེམས་མི་བཟད་ཟིན་པ་དང་། །མྱ་ངན་ཉོན་མོངས་ལས་རྣམས་ཀྱིས། །ཤིན་ཏུ་མི་བཟད་གཟིར་བ་དང་། །རྨི་ལམ་ལྟས་སྡིག་མཐོང་བ་ལས། །མྱ་ངན་རབ་ཏུ་འཁྲུག་པ་རྣམས། །གཙང་མར་ལུས་ཀྱིས་ཁྲུས་གྱིས་ལ། །གོས་གཙང་སར་པ་དེ་བགོས་ནས། །མདོ་སྡེ་དམ་པའི་རྒྱལ་པོ་འདི། །སངས་རྒྱས་ཟབ་མོའི་སྤྱོད་ཡུལ་ཏེ། །ཀློག་འདོན་རབ་ཏུ་འཛིན་པ་ལ། །གུས་པའི་སེམས་ཀྱིས་ཉོན་ཅིག་དང་། །མདོ་སྡེ་འདི་ཡི་བྱིན་བརླབས་ཀྱིས། །རྨི་ངན་ལྟས་སྡིག་འཇོམས་པ་དང་། །སྡུག་བསྔལ་ཐམས་ཅད་བཟློག་པས་ནི། །ཡོངས་སུ་མ་ལུས་ཟད་པར་འགྱུར། །འཇིག་རྟེན་སྐྱོང་བའི་རྒྱལ་པོ་བཞི། །བློན་པོ་དང་ནི་འཁོར་བཅས་དང་། །གནོད་སྦྱིན་བྱེ་བ་མང་པོ་རྣམས། །ཤིན་ཏུ་གུས་པས་རིམ་གྲོ་བསྐྱེད། །སྤོབས་པའི་ལྷ་མོ་ཆེན་མོ་དང་། །ནཻ་ར་ཉྫ་ན་ར་གནས་པའི་ལྷ། །དེ་བཞིན་འཕྲོག་མ་འབྱུང་པོའི་མ། །སྲ་བ་ས་ཡི་ལྷ་མོ་དང་། །ཚངས་པའི་དབང་པོ་བརྒྱ་བྱིན་དང་། །ཀླུ་ཡི་རྒྱལ་པོ་མིའམ་ཅི། །ནམ་མཁའ་ལྡིང་གི་རྒྱལ་པོ་དང་། །ལྷ་མ་ཡིན་གྱི་འཁོར་རྣམས་བཅས། །དེ་ལྟར་མཐུ་ཆེན་དེ་དག་ཀུན། །རང་གི་འཁོར་རྣམས་ཁྲིད་ནས་ནི། །ཉིན་མཚན་རྟག་ཏུ་མི་འབྲལ་བར། །གང་ཟག་དེ་ལ་སྲུང་བར་བྱེད། ། ཟབ་མོ་སངས་རྒྱས་སྤྱོད་ཡུལ་དང་། །སངས་རྒྱས་དགོངས་ཏེ་གསུངས་པའི་བཀའ། །མདོ་སྡེ་གང་ཡིན་ངས་བཤད་པ། །བསྐལ་པ་བྱེ་བར་ཕྲད་དཀའ་བས། །གང་གིས་མདོ་སྡེ་འདི་ཐོས་ནས། །གཞན་ལ་རྒྱ་ཆེར་སྟོན་པ་དང་། །གལ་ཏེ་སེམས་ཀྱིས་ཡི་རངས་དང་། །མཆོད་པ་བཤམས་ནས་མཆོད་བྱེད་ན། །དེ་འདྲའི་གང་ཟག་དེ་དག་ནི། །བསྐལ་པ་ཚད་མེད་སྙེད་དུ་ཡང་། །རྟག་པར་ལྷ་དང་མི་རྣམས་དང་། །ཀླུ་ལ་སོགས་པས་མཆོད་བཀུར་འགྱུར། །འདི་ཡི་བསོད་ནམས་ཚད་མེད་པས། །གང་གཱའི་བྱེ་སྙེད་གྲངས་ལས་འདས། །མདོ་སྡེ་འདི་ནི་གང་
ཀློག་པ། །ཡོན་ཏན་འདི་དག་ཐོབ་པར་འགྱུར། །ཕྱོགས་བཅུའི་བཅོམ་ལྡན་འདས་རྣམས་དང་། །སྤྱོད་ཟབ་བྱང་ཆུབ་སེམས་དཔའ་རྣམས། །མདོ་སྡེ་འཛིན་ལ་ཡོངས་བསྲུངས་ནས། །སྡུག་བསྔལ་བགེགས་དང་བྲལ་བར་མཛད། །མདོ་སྡེ་འདི་ནི་གང་མཆོད་པས། །སྔ་མ་བཞིན་དུ་ལུས་བཀྲུས་ནས། །ཟས་དང་མེ་ཏོག་སྤོས་མཆོད་ཅིང་། །བྱམས་དང་སྙིང་རྗེའི་སེམས་བསྐྱེད་དེ། །མདོ་སྡེ་འདི་ནི་ཉན་འདོད་པས། །སེམས་གཙང་དྲི་མ་མེད་བྱས་ཏེ། །རྟག་པར་དགའ་བའི་སེམས་བསྐྱེད་ན། །ཡོན་ཏན་མང་པོ་སྐྱེ་བར་འགྱུར། །གང་ཞིག་གུས་པའི་སེམས་དག་གིས། །མདོ་སྡེ་འདི་ནི་ཉན་བྱེད་ན། །ལེགས་པར་མི་ཡི་འགྲོར་སྐྱེ་ཞིང་། །སྡུག་བསྔལ་བགེགས་དང་འབྲལ་བར་འགྱུར། །དེ་ནི་དགེ་རྩ་སྨིན་པས་ན། །སངས་རྒྱས་རྣམས་ཀྱིས་བསྔགས་པ་ཡི། །མདོ་སྡེ་འདི་ནི་ཐོས་པ་དང་། །འགྱོད་ཚངས་ཆོས་ནི་ཐོས་པ་ཡིན། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་གླེང་གཞིའི་ལེའུ་སྟེ་དང་པོའོ།། །།དེ་ནས་དེའི་ཚེ་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་ན། བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་ཅེས་བྱ་བ་འདས་པའི་སངས་རྒྱས་བྱེ་བ་ཕྲག་བརྒྱ་སྟོང་ཚད་མེད་པ་རྣམས་ལ་བསྙེན་བཀུར་དང་རིམ་གྲོ་བྱས་ནས་དགེ་བའི་རྩ་བ་བསྐྱེད་པ་ཞིག་ཡོད་དེ། དེའི་ཚེ་བྱང་ཆུབ་སེམས་དཔའ་མཛེས་པའི་ཏོག་ཅེས་བྱ་བ་གཅིག་པུ་དབེན་པར་གནས་པ་དེ་འདི་སྙམ་དུ་རྒྱུ་གང་དང་རྐྱེན་གང་གི་ཕྱིར་དེ་བཞིན་གཤེགས་པ་ཤཱཀྱ་ཐུབ་པ་སྐུ་ཚེ་ཐུང་སྟེ་ལོ་བརྒྱད་ཅུར་གྱུར་སྙམ་མོ། །གཞན་ཡང་འདི་སྙམ་དུ་བཅོམ་ལྡན་འདས་ཀྱིས་ཇི་སྐད་གསུངས་པ་ལྟར་ན་རྒྱུ་དང་རྐྱེན་རྣམ་པ་གཉིས་ཀྱིས་ཚེ་རིང་པོར་འགྱུར་རོ། །ཞེས་གསུངས་ཏེ། གཉིས་གང་ཞེ་ན་སེམས་ཅན་གྱི་སྲོག་མི་གཅོད་པ་དང་། གཞན་དག་ལ་ཡང་བཟའ་བ་དང་བཏུང་བ་ཡོངས་སུ་བཏང་བའོ། །དེ་བཞིན་གཤེགས་པ་ཤཱཀྱ་ཐུབ་པ་ནི་འདས་པའི་བསྐལ་པ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་གྲངས་མེད་པ་སྙེད་དུ་སེམས་ཅན་གྱི་སྲོག་མ་བཅད་ཅིང་དགེ་བ་བཅུའི་ལས་ཀྱིས་ལམ་སྤྱོད་པ་དང་། རྟག་པར་བཟའ་བ་དང་།
བཏུང་བ་དག་བཀྲེས་པའི་སེམས་ཅན་ཐམས་ཅད་ལ་སྦྱིན་པ་བཏང་སྟེ། ཉིད་ཀྱི་ཤ་དང་། ཁྲག་དང་། རུས་པ་དང་། རྐང་ལ་སོགས་པ་ཡང་ཡོངས་སུ་བཏང་ནས་རབ་ཏུ་ཚིམ་པར་མཛད་ན། བཟའ་བ་དང་། བཏུང་བ་གཞན་ལྟ་སྨོས་ཀྱང་ཅི་དགོས་སྙམ་མོ། །བྱང་ཆུབ་སེམས་དཔའ་དེས་བཅོམ་ལྡན་འདས་ལ་དེ་སྙམ་དུ་བསམས་པའི་ཚེ། །བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་དེའི་ཁང་ཁྱིམ་དེ་མ་ཐག་ཏུ་ཡངས་ཤིང་རྒྱ་ཆེ་བ་དང་། བཀོད་པ་དང་ལྡན་ཞིང་ཡོངས་སུ་གཙང་བ་དང་། བཻ་ཌཱུཪྱ་སྔོན་པོ་དང་། རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པས་སངས་རྒྱས་ཀྱི་ཞིང་ཇི་ལྟ་བ་བཞིན་དུ་སྤོས་མཆོག་དམ་པའི་དྲི་ལྷའི་སྤོས་ལས་འདས་པ་དག་འཐུལ་ཞིང་གང་བ་དང་། ཕྱོགས་བཞིན་སེང་གེའི་གདན་ཁྲི་མཆོག་དམ་པ་རིན་པོ་ཆེ་སྣ་བཞི་ལས་མངོན་པར་གྲུབ་པ། ལྷའི་རིན་པོ་ཆེའི་གོས་ཀྱིས་གཡོགས་པ་དང་། གཞན་ཡང་གདན་དེ་ལ་པདྨ་དམ་པ་རིན་པོ་ཆེ་སྣ་ཚོགས་ཀྱིས་བརྒྱན་པ་ཚད་དེ་བཞིན་གཤེགས་པ་དང་མཉམ་པ་དག་རང་གི་ངང་གིས་སྣང་བར་གྱུར་ཏེ། པདྨ་དེ་དག་གི་སྟེང་ན་དེ་བཞིན་གཤེགས་པ་བཞི་པོ་ཤར་ཕྱོགས་ཀྱི་མི་འཁྲུགས་པ་དང་། ལྷོ་ཕྱོགས་ཀྱི་རིན་ཆེན་མཚན་དང་། ནུབ་ཕྱོགས་ཀྱི་ཚེ་དཔག་མེད་དང་། བྱང་ཕྱོགས་ཀྱི་ལྷའི་རྔ་སྒྲ་དབྱངས་བཞུགས་པར་གྱུར་ཏོ། །དེ་བཞིན་གཤེགས་པ་བཞི་པོ་དེ་དག་སོ་སོ་ནས་གདན་དེ་དག་ལ་སྐྱིལ་མོ་ཀྲུང་བཅས་ཏེ་བཞུགས་ནས་འོད་ཟེར་ཆེན་པོ་བཀྱེ་བས་རྒྱལ་པོའི་ཁབ་ཀྱི་གྲོང་ཁྱེར་ཆེན་པོ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་དང་། ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པ་སྙེད་ཀྱི་བར་དུ་ཡང་སྣང་བས་ཀུན་ཏུ་ཁྱབ་པར་མཛད་དེ། ལྷའི་མེ་ཏོག་གི་ཆར་ཡང་མངོན་པར་ཕབ་ལྷའི་རོལ་མོའི་སིལ་སྙན་རྣམས་ཀྱང་དཀྲོལ་བར་གྱུར་ཏེ། དེའི་ཚེ་འཛམ་བུའི་གླིང་འདི་དང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ན། སེམས་ཅན་ཇི་སྙེད་ཡོད་པ་དེ་དག་བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་བདེ་བ་མཆོག་དམ་པ་མྱོང་བར་གྱུར་པས་ཕོངས་པ་ཅི་ཡང་མེད་པར་གྱུར་ཏོ། །ལུས་ཀྱི་ཡན་ལག་
མ་ཚང་བ་དག་ནི་ཚང་བར་གྱུར། ལོང་བ་དག་ནི་མཐོང་བར་གྱུར། འོན་པ་རྣམས་ནི་ཐོས་པར་གྱུར། ལྐུགས་པ་དག་ནི་སྨྲ་བར་གྱུར། གླེན་པ་དག་ནི་ཤེས་རབ་དང་ལྡན་པར་གྱུར། སེམས་འཁྲུགས་པ་དག་ནི་སེམས་ཉིད་ཐོབ་པར་གྱུར། བགོ་བ་མེད་པ་དག་ནི་གོས་དང་ལྡན་པར་གྱུར། རབ་ཏུ་སྨད་ཅིང་བཤུངས་པ་དག་ནི་གཞན་གྱིས་བཀུར་བར་གྱུར། དྲི་མ་དང་བཅས་པ་དག་ནི་ལུས་གཙང་བར་གྱུར་ཏེ། འཇིག་རྟེན་གྱི་ཁམས་འདིར་ཕན་འདོགས་པའི་དངོས་པོ་ངོ་མཚར་རྨད་དུ་ཆེ་བ་སྔོན་མ་བྱུང་བ་རྣམས་ཀྱང་མངོན་དུ་བྱུང་བར་གྱུར་ཏོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་དེ་བཞིན་གཤེགས་པ་བཞི་དང་། ངོ་མཚར་རྨད་དུ་བྱུང་བའི་དངོས་པོ་དེ་དག་མཐོང་བས་དགའ་མགུ་རངས་པར་གྱུར་ནས་ཐལ་མོ་སྦྱར་ཏེ། སེམས་རྩེ་གཅིག་ཏུ་དེ་བཞིན་གཤེགས་པ་རྣམས་ཀྱི་མཚན་ཁྱད་པར་དུ་འཕགས་པ་དག་ལ་རྣམ་པར་བལྟས་ནས། གཞན་ཡང་འདི་སྙམ་དུ་དེ་བཞིན་གཤེགས་པ་ཤཱཀྱ་ཐུབ་པ་ཡོན་ཏན་ཚད་མེད་པ་དང་ལྡན་ཡང་། སྐུ་ཚེའི་ཚད་འབའ་ཞིག་ལ་ཐེ་ཙོམ་གྱི་སེམས་སྐྱེས་པར་གྱུར་ནས། ཅིའི་ཕྱིར་དེ་བཞིན་གཤེགས་པ་ཡོན་ཏན་ཚད་མེད་པ་མངའ་ཡང་སྐུ་ཚེ་ཐུང་སྟེ་ལོ་བརྒྱད་ཅུ་ཁོ་ན་བཞུགས་པར་གྱུར་སྙམ་མོ། །དེ་ནས་བཅོམ་ལྡན་འདས་བཞི་པོ་དེ་དག་གིས་བྱང་ཆུབ་སེམས་དཔའ་མཛེས་པའི་ཏོག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ངེད་ཀྱིས་ནི་བླ་ན་མེད་པའི་ཐམས་ཅད་མཁྱེན་པ་མ་གཏོགས་པར་ལྷ་དང་བཅས་པའི་འཇིག་རྟེན་ན། ཚངས་པ་དང་། བདུད་དང་། དགེ་སྦྱོང་དང་། བྲམ་ཟེ་དང་། མི་དང་མི་མ་ཡིན་པ་གང་གིས་ཀྱང་དེ་བཞིན་གཤེགས་པའི་སྐུ་ཚེའི་ཚད་ཀྱི་མཐའ་ཤེས་ཤིང་དཔག་པར་འགྱུར་བ་ཡང་དག་པར་མ་གཟིགས་སོ། །དེ་བཞིན་གཤེགས་པ་བཞི་པོ་དེ་དག་གིས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་བསྟན་པར་བཞེད་པ་ན། བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་འདོད་པ་དང་གཟུགས་ཀྱི་ཁམས་ཀྱི་ལྷ་རྣམས་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་།
ལྟོ་འཕྱེ་ཆེན་པོ་དང་། བྱང་ཆུབ་སེམས་དཔའ་སེམས་དཔའ་ཆེན་པོ་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་འདུས་ཏེ་ལྷགས་ནས་བྱང་ཆུབ་སེམས་དཔའ་མཛེས་པའི་ཏོག་གི་ཁྱིམ་ཡོངས་སུ་དག་ཅིང་གྱ་ནོམ་པ་དེར་ཞུགས་པར་གྱུར་ཏོ། །དེ་ནས་བཅོམ་ལྡན་འདས་བཞི་པོ་དེ་དག་གིས་འཁོར་མང་པོའི་ནང་དུ་དེ་བཞིན་གཤེགས་པ་ཤཱཀྱ་ཐུབ་པའི་སྐུ་ཚེའི་ཚད་ཇི་སྙེད་པ་དག་བསྟན་པར་བཞེད་པའི་ཕྱིར་ཚིགས་སུ་བཅད་དེ་བཀའ་སྩལ་པ། །རྒྱ་མཚོ་ཐམས་ཅད་ཀུན་གྱི་ཆུ། །ཐིགས་པའི་གྲངས་ནི་ཤེས་རུང་གི །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲང་མི་ནུས། །རི་རབ་ཐམས་ཅད་རྡུལ་བརླགས་ཏེ། །ཡུངས་འབྲུ་བཞིན་དུ་བགྲང་ཤེས་ཀྱང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲང་མི་ནུས། །ས་ཆེན་རྡུལ་ནི་ཐམས་ཅད་ཀུན། །རྡུལ་གྲངས་ཅི་ཡོད་ཤེས་རུང་ཡང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་བགྲང་མི་ནུས། །གལ་ཏེ་ནམ་མཁའི་ཚད་བཅལ་ཏེ། །མཐའ་ཀུན་དཔག་པར་རུང་སྲིད་ཀྱང་། །ཤཱཀྱ་ཐུབ་པའི་སྐུ་ཚེའི་ཚད། །གང་གིས་ཀྱང་ནི་དཔག་མི་ནུས། །མི་ཞིག་བསྐལ་པ་བྱེ་བར་གནས། །མཐས་གཏུགས་རྟག་པར་རྩིས་བགྲངས་ཀྱང་། །བཅོམ་ལྡན་འདས་ཀྱི་སྐུ་ཚེའི་ཚད། །ཡོངས་སུ་ཤེས་པར་མི་འགྱུར་རོ། །སེམས་ཅན་སྲོག་ནི་མ་བཅད་ཅིང་། །བཟའ་བཏུང་སྦྱིན་པ་བཏང་བ་ཡིན། །རྒྱུ་ནི་རྣམ་པ་འདི་གཉིས་ཀྱིས། །སྐུ་ཚེ་རིང་པོ་བརྙེས་པ་ཡིན། །དེ་བས་ཐུབ་པ་ཆེན་པོ་ཡི། ། སྐུ་ཚེའི་ཚད་ནི་ཤེས་པར་དཀའ། །བསྐལ་པའི་མཐའ་ནི་མེད་པ་ལྟར། །སྐུ་ཚེའི་ཚད་ཀྱང་དེ་བཞིན་ནོ། །མཛེས་པའི་ཏོག་ཁྱོད་ཤེས་བྱོས་ལ། །ཐེ་ཙོམ་སོམ་ཉི་མ་བསྐྱེད་ཅིག །རྒྱལ་བའི་སྐུ་ཚེའི་ཚད་མེད་པས། །དེ་ཡི་གྲངས་ནི་ཤེས་མི་ནུས། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས། དེ་བཞིན་གཤེགས་པ་བཞི་པོ་དེ་དག་གིས་བཅོམ་ལྡན་འདས་ཤཱཀྱ་ཐུབ་པའི་སྐུ་ཚེའི་ཚད་དཔག་ཏུ་མེད་པར་བཀའ་སྩལ་པ་ཐོས་པ་དང་། བཅོམ་ལྡན་འདས་དེ་དག་ལ་འདི་སྐད་ཅེས་གསོལ་ཏོ། །ཅིའི་སླད་དུ་དེ་བཞིན་གཤེགས་པ་དེ་ལྟ་བུའི་སྐུ་ཚེ་ཐུང་བར་བསྟན་
པར་མཛད་ལགས། དེ་ནས་བཅོམ་ལྡན་འདས་བཞི་པོ་དེ་དག་གིས་བྱང་ཆུབ་སེམས་དཔའ་མཛེས་པའི་ཏོག་ལ་བཀའ་སྩལ་པ། རིགས་ཀྱི་བུ་བཅོམ་ལྡན་འདས་ཤཱཀྱ་ཐུབ་པ་དེ་སྙིགས་མ་ལྔའི་དུས་སུ་འཇིག་རྟེན་དུ་བྱུང་བ་ན་མི་རྣམས་ཚེ་ལོ་བརྒྱ་པར་གྱུར་ཅིང་རང་བཞིན་དམན་པ་དང་། དགེ་བའི་རྩ་བ་ཕྲ་ཞིང་ཆུང་བ་དང་། མོས་པ་མེད་པར་གྱུར་པས་སེམས་ཅན་དེ་དག་ལས་ཕལ་ཆེར་བདག་ཏུ་ལྟ་བ་དང་། གང་ཟག་ཏུ་ལྟ་བ་དང་། སེམས་ཅན་དང་སྲོག་དང་། གསོ་བ་པོ་དང་། ལོག་པར་ལྟ་བ་དང་། བདག་དང་། བདག་གིར་ལྟ་བ་དང་། རྟག་པ་དང་། ཆད་པར་ལྟ་བ་ལ་སོགས་པ་དང་ལྡན་པས་སེམས་ཅན་མང་པོ་དེ་དག་དང་། མུ་སྟེགས་ཅན་མང་པོ་དེ་དག་ལ་ཕན་གདགས་ཤིང་ཡང་དག་པའི་ཤེས་པ་བསྐྱེད་ནས་མྱུར་དུ་བླ་ན་མེད་པའི་བྱང་ཆུབ་ཡོངས་སུ་རྫོགས་པར་བྱ་བའི་ཕྱིར་དེ་ལྟ་བས་ན་དེ་བཞིན་གཤེགས་པ་ཤཱཀྱ་ཐུབ་པས་དེ་ལྟ་བུའི་སྐུ་ཚེ་ཐུང་བ་བསྟན་པ་ཡིན་ནོ། །རིགས་ཀྱི་བུ་གཞན་ཡང་དེ་བཞིན་གཤེགས་པ་དེས་སེམས་ཅན་རྣམས་ཀྱི་ཡོངས་སུ་མྱ་ངན་ལས་འདའ་བ་མཐོང་བར་གྱུར་ན་ཤིན་ཏུ་མཐོང་བར་དཀའ་བའི་འདུ་ཤེས་དང་། མྱ་ངན་དང་། སྡུག་བསྔལ་བ་ལ་སོགས་པའི་འདུ་ཤེས་བསྐྱེད་ནས་སངས་རྒྱས་བཅོམ་ལྡན་འདས་ཀྱིས་གསུངས་པའི་མདོ་སྡེའི་བསྟན་པ་དག་མྱུར་དུ་ལེན་པ་དང་། འཛིན་པ་དང་། འཆང་བ་དང་། ཀློག་པ་དང་། ཁ་ཏོན་དུ་འདོན་པ་དང་། ཀུན་ཆུབ་པར་བྱས་ནས་གཞན་དག་ལ་ཡང་དག་པར་བསྟན་པ་དང་། སྐུར་པ་འདེབས་པར་མི་འགྱུར་བར་མཛད་པར་བཞེད་པའི་ཕྱིར་དེ་ལྟ་བས་ན་དེ་བཞིན་གཤེགས་པས་དེ་ལྟ་བུའི་སྐུ་ཚེ་ཐུང་བ་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། སེམས་ཅན་དེ་དག་གིས་གལ་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བ་མཐོང་བར་གྱུར་ན་གུས་པས་རིམ་གྲོ་ཡང་མི་བྱེད། ཤིན་ཏུ་ཕྲད་པར་དཀའ་བའི་འདུ་ཤེས་ཀྱང་མི་སྐྱེད་ལ་དེ་བཞིན་གཤེགས་པས་གསུངས་པའི་མདོ་སྡེ་ཟབ་མོ་དག་ཀྱང་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། ཀུན་ཆུབ་པར་བྱས་ནས་གཞན་དག་ལ་སྟོན་པར་ཡང་མི་བྱེད་པས་སོ། །དེ་ཅིའི་ཕྱིར་
ཞེ་ན། འདི་ལྟར་རྟག་པར་སངས་རྒྱས་མཐོང་བས་གུས་པར་མི་བྱེད་པའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་མི་ཞིག་གིས་བདག་གི་ཕ་ལ་ནོར་དང་། རིན་པོ་ཆེ་མང་ཞིང་འཕེལ་བ་དག་མཐོང་བར་གྱུར་ན། ནོར་རྫས་དག་ལ་ངོ་མཚར་དང་། མཐོང་བར་དཀའ་བའི་འདུ་ཤེས་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། ཕའི་ནོར་རྫས་དག་ལ་རྟག་པའི་འདུ་ཤེས་སྐྱེད་པའི་ཕྱིར་རོ། །རིགས་ཀྱི་བུ་སེམས་ཅན་མང་པོ་དེ་དག་ཀྱང་དེ་བཞིན་དུ་གལ་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བ་མཐོང་བར་གྱུར་ན་ངོ་མཚར་དང་མཐོང་བར་དཀའ་བའི་འདུ་ཤེས་སྐྱེ་བར་མི་འགྱུར་རོ། །དེ་ཅིའི་ཕྱིར་ཞེ་ན། རྟག་པར་མཐོང་བའི་ཕྱིར་རོ། །རིགས་ཀྱི་བུ་འདི་ལྟ་སྟེ། དཔེར་ན་མི་ཞིག་ཕ་མ་དབུལ་ཞིང་ནོར་རྫས་ཀྱིས་ཕོངས་པར་གྱུར་པ་ལས་མི་དབུལ་པོ་དེ་རྒྱལ་པོའི་ཕོ་བྲང་ངམ། བློན་པོ་ཆེན་པོའི་ཁྱིམ་དག་ཏུ་ཕྱིན་ཏེ། བང་མཛོད་རིན་པོ་ཆེ་སྣ་ཚོགས་དང་། ནོར་རྫས་ཀྱིས་ཡོངས་སུ་གང་བ་མཐོང་བར་གྱུར་ན། ངོ་མཚར་དང་ཕྲད་པར་དཀའ་བའི་འདུ་ཤེས་བསྐྱེད་ནས་དེའི་ཚེ་མི་དབུལ་པོ་དེ་ནོར་རྫས་ཡོངས་སུ་གཉེར་བའི་ཕྱིར་སྦྱོར་བའི་ཐབས་རྒྱ་ཆེར་བཤམས་ནས་ལེ་ལོ་མི་བྱེད་པར་རབ་ཏུ་བརྩོན་པར་བྱེད་དོ། །དེ་ཅིའི་ཕྱིར་ཞེ་ན། དབུལ་ཕོངས་པ་སྤངས་ཤིང་བདེ་བའི་ལོངས་སྤྱོད་ཉམས་སུ་མྱོང་བར་བྱ་བའི་ཕྱིར་རོ། །རིགས་ཀྱི་བུ་སེམས་ཅན་མང་པོ་དེ་དག་ཀྱང་དེ་བཞིན་དུ་གལ་ཏེ་དེ་བཞིན་གཤེགས་པ་ཡོངས་སུ་མྱ་ངན་ལས་འདའ་བ་མཐོང་བར་གྱུར་ན། མཐོང་བར་དཀའ་བའི་འདུ་ཤེས་ནས་མྱ་ངན་དང་སྡུག་བསྔལ་བ་ལ་སོགས་པའི་འདུ་ཤེས་ཀྱི་བར་དག་ཀྱང་བསྐྱེད་ནས་གཞན་ཡང་འདི་སྙམ་དུ་དེ་བཞིན་གཤེགས་པ་རྣམས་ནི་བསྐལ་པ་གྲངས་མེད་ཚད་མེད་པ་སྙེད་འདས་ནས་གདོད་འཇིག་རྟེན་དུ་འབྱུང་བས། ཨུ་དུམ་བཱ་རའི་མེ་ཏོག་བཞིན་དུ་བརྒྱ་ལ་བརྒྱ་ལམ་ན་ལན་ཅིག་འབྱུང་བར་འགྱུར་རོ། །ཞེས་སེམས་ཅན་མང་པོ་དེ་དག་ངོ་མཚར་གྱིས་བསམ་པ་བསྐྱེད་ནས་ཤིན་ཏུ་མཐོང་བར་དཀའ་བའི་འདུ་ཤེས་སྐྱེད་པར་བྱེད་དེ། གལ་ཏེ་དེ་བཞིན་གཤེགས་པ་མཐོང་བར་གྱུར་ན་ཡང་སེམས་ཀྱིས་གུས་པ་དང་དང་བསྐྱེད་
པར་བྱེད་ལ། ཡང་དག་པའི་ཆོས་བསྟན་པ་ཐོས་པར་གྱུར་ན་ཡང་དག་པའི་བཀའ་ཡིན་ནོ་སྙམ་པའི་འདུ་ཤེས་བསྐྱེད་ནས། མདོ་སྡེ་ཇི་སྙེད་པ་ཐམས་ཅད་ཀྱང་ཡང་དག་པར་འཛིན་ཅིང་སྐུར་པ་འདེབས་པར་མི་བྱེད་དོ། །རིགས་ཀྱི་བུ་རྒྱུ་དང་རྐྱེན་དེས་ན་བཅོམ་ལྡན་འདས་དེ་ཡུན་རིང་དུ་འཇིག་རྟེན་ན་མི་བཞུགས་པར་ཡོངས་སུ་མྱ་ངན་ལས་འདའ་བ་ཡིན་ཏེ། རིགས་ཀྱི་བུ་དེ་བཞིན་གཤེགས་པ་རྣམས་ནི་དེ་ལྟ་བུའི་ཐབས་མཁས་པ་མཁྱེན་ནས་སེམས་ཅན་ཡོངས་སུ་སྨིན་པར་མཛད་པ་ཡིན་ནོ། །དེའི་ཚེ་དེ་བཞིན་གཤེགས་པ་བཞི་པོ་དེ་དག་གིས་དེ་སྐད་ཅེས་བཀའ་སྩལ་ནས་དེ་ཉིད་དུ་མི་སྣང་བར་གྱུར་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་མཛེས་པའི་ཏོག་བྱང་ཆུབ་སེམས་དཔའ་བརྒྱ་སྟོང་ཚད་མེད་པ་སྙེད་དང་། སེམས་ཅན་བྱེ་བ་ཁྲག་ཁྲིག་བརྒྱད་སྟོང་ཚད་མེད་པ་དག་དང་ལྷན་ཅིག་ཏུ་བྱ་རྒོད་ཕུང་པོའི་རི་ག་ལ་བ་དེར་དོང་སྟེ། དེ་བཞིན་གཤེགས་པ་ཤཱཀྱ་ཐུབ་པ་ཐམས་ཅད་མཁྱེན་པའི་སྤྱན་སྔར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་དངོས་པོ་གོང་དུ་བསྟན་པ་དེ་དག་བཅོམ་ལྡན་འདས་ལ་རྒྱས་པར་གསོལ་པ་དང་། དེའི་ཚེ་དེ་བཞིན་གཤེགས་པ་བཞི་པོ་དེ་དག་ཀྱང་བྱ་རྒོད་ཕུང་པོའི་རི་བཅོམ་ལྡན་འདས་ཤཱཀྱ་ཐུབ་པ་གང་ན་བ་དེར་གཤེགས་ཏེ། སོ་སོའི་ཕྱོགས་ཇི་ལྟ་བ་བཞིན་དུ་གདན་ལ་བཞུགས་ནས་ཞབས་འབྲིང་བའི་བྱང་ཆུབ་སེམས་དཔའ་དག་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱེད་བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་དོང་ལ་ངེད་ཀྱི་ཚིག་གིས་ཅུང་ཟད་མི་བསྙུང་ངམ། ཅུང་ཟད་མི་གདུང་ངམ། བཞེངས་ཤིང་བཞུགས་པ་ཡང་ངམ། སྤྱོད་ལམ་ཐམས་ཅད་དུ་བདེ་བར་སྤྱོད་དམ་ཞེས་སྙུན་གསོལ་ཅིག །གཞན་ཡང་འདི་སྐད་དུ་དེ་བཞིན་གཤེགས་པ་ཤཱཀྱ་ཐུབ་པས་སེམས་ཅན་ཐམས་ཅད་ལ་ཕན་གདགས་ཤིང་མུ་གེའི་བགེགས་ཡོངས་སུ་བསལ་ནས་བདེ་བ་ལ་འགོད་པར་བཞེད་པའི་ཕྱིར་དེང་གསེར་འོད་དམ་པའི་མདོ་སྡེ་ཤིན་ཏུ་ཟབ་མོའི་ཆོས་ཀྱི་དོན་བསྟན་པ་
ལེགས་སོ་ལེགས་སོ། །བདག་ཅག་རྣམས་ཀྱང་རྗེས་སུ་ཡི་རང་ངོ་ཞེས་གསོལ་ཅིག །དེ་ནས་ཞབས་འབྲིང་བ་དེ་དག་སོ་སོ་ནས་བཅོམ་ལྡན་འདས་ཤཱཀྱ་ཐུབ་པ་ག་ལ་བ་དེར་དོང་སྟེ། བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ནས། ཕྱོགས་གཅིག་ཏུ་འཁོད་དེ། ཅིག་ཅར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ལྷ་དང་མིའི་སྟོན་པ་དེ་དག་ཚད་མ་མཆིས་པའི་གསུང་གིས་ཅུང་ཟད་མི་བསྙུང་ངམ། ཅུང་ཟད་མི་གདུང་ངམ། བཞེངས་ཤིང་བཞུགས་པ་ཡང་ངམ། སྤྱོད་ལམ་ཐམས་ཅད་དུ་བདེ་བར་སྤྱོད་དམ། ཞེས་སྙུན་གསོལ་ལགས་སོ། །གཞན་ཡང་འདི་སྐད་དུ་དེ་བཞིན་གཤེགས་པ་ཤཱཀྱ་ཐུབ་པས་སེམས་ཅན་ཐམས་ཅད་ལ་ཕན་གདགས་ཤིང་མུ་གེའི་བགེགས་ཡོངས་སུ་བསལ་ནས་བདེ་བ་ལ་འགོད་པར་བཞེད་པའི་ཕྱིར་དེང་གསེར་འོད་དམ་པའི་མདོ་སྡེ་ཤིན་ཏུ་ཟབ་པའི་ཆོས་ཀྱི་དོན་བསྟན་པ་ལེགས་སོ་ལེགས་སོ་ཞེས་གསུངས་སོ། །དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པས་ཞབས་འབྲིང་བའི་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །དེ་བཞིན་གཤེགས་པ་བཞི་པོ་དེ་དག་གིས་སེམས་ཅན་ཐམས་ཅད་ལ་ཕན་པ་དང་བདེ་བར་བཞེད་པའི་ཕྱིར་ང་ལ་ཡང་དག་པའི་ཆོས་བསྟན་པར་བསྐུལ་བ་ལེགས་སོ་ལེགས་སོ། །དེ་ནས་དེའི་ཚེ་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། ང་ནི་རྟག་པར་བྱ་རྒོད་རི་གནས་ནས། ། མདོ་སྡེ་རིན་ཆེན་འདི་ནི་འཆད་པར་མཛད། །སེམས་ཅན་ཡོངས་སུ་སྨིན་པར་མཛད་པའི་ཕྱིར། །ཡོངས་སུ་མྱ་ངན་ལས་འདའ་བསྟན་པ་ཡིན། །སོ་སོའི་སྐྱེ་བོ་ལོག་ལྟ་བསྐྱེད་ནས་ནི། །ངས་བསྟན་དག་ལ་མངོན་པར་ཡིད་མི་ཆེས། །དེ་དག་ཡོངས་སུ་སྨིན་པར་བྱ་བའི་ཕྱིར། ། ཡོངས་སུ་མྱ་ངན་འདའ་བར་བསྟན་པ་ཡིན། །དེ་ནས་འཁོར་འདུས་པ་ཆེན་པོ་དེ་ཉིད་དུ་བྲམ་ཟེ་ཀཽཎྜི་ནྱས་ཆོས་ཀྱི་སློབ་དཔོན་གྱིས་ལུང་བསྟན་པ་ཞེས་བྱ་བ་ཞིག་ཡོད་པ་དེ་བྲམ་ཟེའི་འཁོར་བརྒྱ་སྟོང་ཚད་མེད་པ་དག་དང་ལྷན་ཅིག་ཏུ་བཅོམ་ལྡན་འདས་ལ་མཆོད་པ་བྱས་ནས། བཅོམ་ལྡན་
འདས་ཀྱིས་ཡོངས་སུ་མྱ་ངན་ལས་འདའ་བར་གཤེགས་པ་བཀས་བཤད་པ་ཐོས་པ་དང་མཆི་མ་བླགས་ཏེ་ངུས་ནས་མདུན་དུ་འཕགས་ཏེ་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་དེ་བཞིན་གཤེགས་པ་ཡང་དག་པར་སེམས་ཅན་རྣམས་ལ་བྱམས་པ་དང་། ཐུགས་རྗེ་ཆེན་པོ་མངའ་བ་སྟེ། ཐུགས་བརྩེ་བས་ཕན་འདོགས་ཤིང་བདེ་བ་འཐོབ་པར་མཛད་དེ།ཕ་མ་ལྟ་བུར་གྱུར་པས་གཞན་དེ་དང་མཚུངས་པ་མ་མཆིས་པ་དང་། འཇིག་རྟེན་ཐམས་ཅད་ཀྱི་མགོན་དང་སྐྱབས་མཛད་པས་ཟླ་བ་ཡོངས་སུ་རྒྱས་པ་ལྟར་གསལ་ཞིང་རྣམ་པར་དག་པར་གྱུར་པ་དང་། མཁྱེན་པ་ཆེན་པོས་གསལ་བར་མཛད་པས་གདུགས་དང་པོ་ཤར་བ་ལྟ་བུར་གྱུར་པ་དང་། སེམས་ཅན་རྣམས་ལ་སྙོམས་པར་གཟིགས་པར་མཛད་དེ་སྒྲ་གཅན་ཟིན་ལ་ཅི་ལྟ་བ་བཞིན་དུ་ཐུགས་བརྩེ་བ་ལ་མི་སྙོམས་པ་མི་མངའ་བ་ཞིག་ལགས་ན་བཅོམ་ལྡན་འདས་ཀྱིས་བདག་ལ་སྨོན་ལམ་གཅིག་གནང་བར་མཛད་དུ་གསོལ། དེ་ནས་དེའི་ཚེ་བཅོམ་ལྡན་འདས་ཅང་མི་གསུང་བར་གྱུར་པ་དང་། བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་འཁོར་དེ་ཉིད་དུ་ལིཙྪ་བཱི་གཞོན་ནུ་སེམས་ཅན་ཐམས་ཅད་ཀྱིས་མཐོང་བར་དགའ་བ་ཞེས་བྱ་བ་ཞིག་འདུག་པར་གྱུར་པ་དེས་བྲམ་ཟེ་ཀཽཎྜི་ནྱ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ་ཆེན་པོ་ཁྱོད་དེང་བཅོམ་ལྡན་འདས་ལས་སྨོན་ལམ་ཇི་ལྟ་བུ་ཞིག་ཡོངས་སུ་གཉེར་བར་འདོད་པ་བདག་གིས་ཁྱོད་ལ་སྦྱིན་པར་བྱའོ། །བྲམ་ཟེས་སྨྲས་པ། ཀྱེ་གཞོན་ནུ་བདག་ནི་བླ་ན་མེད་པའི་བཅོམ་ལྡན་འདས་ལ་མཆོད་པ་བྱེད་འདོད་པས། དེང་དེ་བཞིན་གཤེགས་པ་ལས་རིང་བསྲེལ་ཡུངས་འབྲུ་ཙམ་ཞིག་གསོལ་བ་འདེབས་པ་ཡིན་ནོ། །དེ་ཅིའི་ཕྱིར་ཞེ་ན། བདག་གིས་སྔོན་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་སངས་རྒྱས་ཀྱི་རིང་བསྲེལ་དུ་ཡུངས་འབྲུ་ཙམ་ཞིག་ཐོབ་ནས་གུས་པས་རིམ་གྲོ་དང་མཆོད་པ་བྱས་ན་གང་ཟག་དེ་སུམ་ཅུ་རྩ་གསུམ་པའི་ལྷའི་ནང་དུ་སྐྱེས་ནས་ལྷའི་དབང་པོ་བརྒྱ་བྱིན་བྱེད་པར་འགྱུར་རོ་ཞེས་ཐོས་པས་སོ། །དེ་
ནས་གཞོན་ནུ་དེས་བྲམ་ཟེ་དེ་ལ་འདི་སྐད་ཅེས་སྨྲས་སོ། །གལ་ཏེ་སུམ་ཅུ་རྩ་གསུམ་གྱི་ལྷར་སྐྱེས་ནས་རྣམ་པར་སྨིན་པ་མཆོག་ལ་ལོངས་སྤྱོད་པར་འདོད་ན་སེམས་རྩེ་གཅིག་ཏུ་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་མཉན་པར་བྱ་སྟེ། མདོ་སྡེ་འདི་ནི་མདོ་སྡེ་ཐམས་ཅད་ཀྱི་ནང་ན་མཆོག་ཏུ་ཁྱད་པར་དུ་འཕགས་པ་ཡིན་པས་ཤེས་པར་དཀའ་ཞིང་འཇུག་པར་དཀའ་བས་ཉན་ཐོས་དང་རང་སངས་རྒྱས་ཀྱིས་ཀྱང་ཁོང་དུ་ཆུད་པར་མི་ནུས་སོ། །མདོ་སྡེ་འདི་ནི་བསོད་ནམས་ཀྱི་འབྲས་བུ་རྣམ་པར་སྨིན་པ་ཚད་མེད་པ་བསྐྱེད་པ་ནས་བླ་ན་མེད་པའི་བྱང་ཆུབ་ཀྱི་བར་དུ་ཡང་མངོན་པར་འགྲུབ་པར་བྱེད་དེ། དེང་བདག་གིས་ཁྱོད་ལ་དོན་གྱི་དངོས་པོ་མདོ་ཙམ་ཞིག་བསྟན་པ་ཡིན་ནོ། །བྲམ་ཟེས་སྨྲས་པ། གཞོན་ནུ་ལེགས་སོ། །གསེར་འོད་དམ་པ་མདོ་སྡེའི་རྒྱལ་པོ་འདི་ནི་ཤིན་ཏུ་ཟབ་ཅིང་མཆོག་ཏུ་གྱུར་པས་ཤེས་པར་ཡང་དཀའ་ལ་འཇུག་པར་ཡང་དཀའ་བས་ཉན་ཐོས་དང་རང་སངས་རྒྱས་ཀྱིས་ཀྱང་ཁོང་དུ་ཆུད་པར་མི་འགྱུར་ན་བདག་ཅག་མཐའ་འཁོབ་ཀྱི་མི་དམངས་རིགས་ཤེས་པ་ཤིན་ཏུ་ཕྲ་ཞིང་ཆུང་བས་རིག་པར་མི་འགྱུར་བ་ལྟ་ཅི་སྨོས་ཏེ། དེའི་ཕྱིར་དེང་བདག་གིས་བཅོམ་ལྡན་འདས་ཀྱི་རིང་བསྲེལ་ཡུངས་འབྲུ་ཙམ་ཡོངས་སུ་གཉེར་བ་ཡིན་ཏེ། རང་གི་གནས་སུ་ཁྱེར་ནས་རིན་པོ་ཆེའི་ཟ་མ་ཏོག་གི་ནང་དུ་བཅུག་སྟེ་གུས་པས་མཆོད་པ་དང་རིམ་གྲོ་བྱས་ན་ཚེ་འདས་པའི་འོག་ཏུ་བརྒྱ་བྱིན་ལྷའི་དབང་པོ་བྱས་ནས་རྟག་པར་བདེ་བ་མྱོང་བར་འགྱུར་ན་ཁྱོད་ཀྱིས་དེང་ཅིའི་ཕྱིར་བདག་གི་ཆེད་དུ་རིག་པ་དང་ཞབས་སུ་ལྡན་པ་ལ་སྨོན་ལམ་འདི་ཅི་གསོལ་བ་འདེབས་པར་མི་བྱེད། དེ་སྐད་ཅེས་སྨྲས་པ་དང་། དེའི་ཚེ་གཞོན་ནུ་དེས་བྲམ་ཟེ་དེ་ལ་ཚིགས་སུ་བཅད་དེ་འདི་སྐད་ཅེས་སྨྲས་སོ། །གང་གཱའི་འབའ་ཆུ་དྲག་པོ་ལས། །པདྨ་དཀར་པོ་སྐྱེ་འགྱུར་ཞིང་། ། འཇོལ་མོ་དུང་ལྟར་གྱུར་པ་དང་། །བྱ་རོག་དམར་པོར་འགྱུར་བའམ། །གལ་ཏེ་འཛམ་བུའི་ལྗོན་ཤིང་ལས། །ཏ་ལའི་འབྲས་བུ་ཆགས་པ་དང་། །ཁརྫུ་ར་ཡི་ཡལ་ག་ལས། །ཨ་མྲའི་ལོ་མ་སྐྱེ་འགྱུར་བ། །ཡ་མཚན་དངོས་པོ་འདི་དག་ནི། །ཕན་ཚུན་རུང་པར་འགྱུར་སྲིད་
ཀྱི། །བཅོམ་ལྡན་འདས་ཀྱི་རིང་བསྲེལ་ནི། །མཐར་ནི་ནམས་ཀྱང་དམིགས་མི་འགྱུར། །གལ་ཏེ་རུ་སྦལ་སྤུ་ལས་ནི། །གོས་མཆོག་དམ་པ་རབ་བཏགས་ནས། །གྲང་ཚེ་བགོ་བར་རུང་འགྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་སྦྲང་བུའི་རྐང་པ་ལས། །ཁང་པ་རྩེག་མ་བྱས་འགྱུར་ཏེ། །རབ་བརྟན་མི་གཡོ་གྱུར་པ་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་ཆུ་ཡི་ཛ་ལུ་ཀ། །ཁ་ནས་སོ་དཀར་སྐྱེས་གྱུར་ནས། །རིང་ཆེ་མཚོན་ལྟར་རྣོ་གྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་རི་བོང་རྭ་ཐོགས་ནས། ། ཐེམ་སྐས་རབ་གཙང་མངོན་བསྒྲུབས་ཏེ། །མཐོ་རིས་གནས་སུ་འཛེག་རུང་ན། །བཅོམ་ལྡན་རིང་བསྲེལ་བཙལ་བར་བྱ། །བྱི་བས་ཐེམ་སྐས་དེ་འཛེགས་ཏེ། །ལྷ་མ་ཡིན་ལ་བསྡོ་བ་དང་། །ནམ་མཁའི་ཟླ་བ་སྒྲིབ་ནུས་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་སྦྲང་བུ་ར་རོ་ནས། །གྲོང་ཁྱེར་ཀུན་ཏུ་རབ་རྒྱུ་ཞིང་། །ཁང་ཁྱིམ་རྒྱ་ཆེར་བྱས་གྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་བོང་བུའི་མཆུ་ཡི་མདོག །བིམ་པའི་འབྲས་ལྟར་དམར་འགྱུར་ཞིང་། །གླུ་གར་ལ་ནི་མཁས་གྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་བྱ་རོག་འུག་པ་གཉིས། །གནས་གཅིག་ལྷན་ཅིག་རབ་བརྩེ་ཞིང་། །དེ་དག་ཕན་ཚུན་མཛའ་འགྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་པ་ལའི་འདབ་མ་ལས། །གདུགས་དང་བླ་རེ་མངོན་བསྒྲུབས་ཏེ། །ཆར་ཆེན་སྐྱབས་ནི་བྱས་གྱུར་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་གྲུ་ཆེན་ཐམས་ཅད་ལས། །ནོར་དང་རིན་ཆེན་རབ་བཀང་སྟེ། །ཐང་བུ་སྐམ་ལ་འགྲོ་ནུས་ན། །བཅོམ་ལྡན་རིང་བསྲེལ་བཙལ་བར་བྱ། །གལ་ཏེ་སྦྲང་བུ་ལྕགས་ཕྱེ་མཆུས། །སྤོས་ཀྱི་རི་བོ་ཁྱེར་ནས་ནི། །དགའ་མགུར་འཕུར་ཞིང་འགྲོ་གྱུར་ན། །བཅོམ་ལྡན་རིང་བསྲེལ་བཙལ་བར་བྱ། །དེ་ནས་དེའི་ཚེ་བྲམ་ཟེ་ཆོས་ཀྱི་སློབ་དཔོན་གྱིས་ལུང་བསྟན་པས་ཚིགས་སུ་བཅད་པ་འདི་དག་ཐོས་ནས་གཞོན་ནུ་སེམས་ཅན་ཐམས་ཅད་ཀྱིས་མཐོང་བར་དགའ་བ་ལ་ཚིགས་སུ་བཅད་དེ་སྨྲས་པ། ལེགས་
སོ་གཞོན་ནུ་ཆེན་པོ་ཁྱོད། །འཁོར་འདི་ཀུན་གྱི་བཀྲ་ཤིས་ཡིན། །ཐབས་ལ་མཁས་པའི་སེམས་ཀྱིས་ནི། །བླ་མེད་སངས་རྒྱས་ལུང་བསྟན་ཐོབ། །དེ་བཞིན་གཤེགས་པ་གཟིགས་ཆེན་གྱིས། །འཇིག་རྟེན་དག་ནི་སྐྱོབ་མཛད་པས། །ཁྱོད་ཀྱིས་རྩེ་གཅིག་ཉོན་ཅིག་དང་། །དེང་བདག་རིམ་བཞིན་བཤད་པར་བྱ། །སངས་རྒྱས་སྤྱོད་ཡུལ་བསམ་དཀའ་བས། །འཇིག་རྟེན་དག་ན་མཚུངས་པ་མེད། །ཆོས་སྐུ་ངོ་བོ་རྟག་བཞུགས་པས། །རྣལ་འབྱོར་སྒོམ་ལ་ཁྱད་པར་མེད། །སངས་རྒྱས་སྐུ་ཀུན་མཚུངས་པས་ན། །ཆོས་གསུངས་པ་ཡང་དེ་བཞིན་ཏེ། །སངས་རྒྱས་རྣམས་ལ་མཛད་མི་མངའ། །གཟོད་མ་ཉིད་ནས་སྐྱེ་བ་མེད། །བཅོམ་ལྡན་རྡོ་རྗེའི་སྐུ་ཡིན་ཡང་། །ཐབས་ཀྱིས་སྤྲུལ་པའི་སྐུ་སྟོན་པས། །དེ་ཕྱིར་བཅོམ་ལྡན་རིང་བསྲེལ་ནི། །ཡུངས་འབྲུ་ཙམ་ཡང་ཡོད་པ་མིན། །བཅོམ་ལྡན་ཤ་ཁྲག་སྐུ་མིན་ན། །ཇི་ལྟར་རིང་བསྲེལ་ཡོད་པར་འགྱུར། །སེམས་ཅན་རྣམས་ལ་ཕན་གདགས་ཕྱིར། །ཐབས་ཀྱིས་སྐུ་གདུང་གཞག་པ་ཡིན། །ཆོས་སྐུ་ཡང་དག་སངས་རྒྱས་པས། །ཆོས་དབྱིངས་དེ་བཞིན་གཤེགས་པ་ཡིན། །ཡང་དག་སྐུ་ནི་འདི་ཡིན་པས། །དེ་འདྲའི་ཆོས་ནི་གསུངས་པར་མཛད། །དེ་ནས་འཁོར་འདུས་པ་དེ་ཉིད་དུ་ལྷའི་བུ་སུམ་ཁྲི་ཉིས་སྟོང་གིས་དེ་བཞིན་གཤེགས་པའི་སྐུ་ཚེའི་ཚད་ཤིན་ཏུ་རིང་བར་བསྟན་པ་ཐོས་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་ངོ་མཚར་རྨད་དུ་བྱུང་བའི་དགའ་བ་དང་། མགུ་བ་དང་། རངས་པ་ཐོབ་པས་ཐམས་ཅད་མགྲིན་གཅིག་ཏུ་ཚིགས་སུ་བཅད་དེ་སྨྲས་པ། སངས་རྒྱས་མྱ་ངན་མི་འདའ་སྟེ། །ཡང་དག་ཆོས་ཀྱང་ནུབ་མི་འགྱུར། །སེམས་ཅན་རྣམས་ལ་ཕན་གདགས་ཕྱིར། །མྱ་ངན་འདའ་བར་བསྟན་པ་ཡིན། །བཅོམ་ལྡན་བསམ་གྱིས་མི་ཁྱབ་ཅིང་། །སྐུ་མཆོག་ཐ་དད་མཚན་མེད་ཀྱང་། །སེམས་ཅན་རྣམས་ལ་ཕན་གདགས་ཕྱིར། །བཀོད་པ་སྣ་ཚོགས་སྟོན་པར་མཛད། །དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ཀྱི་སྤྱན་སྔར་དེ་བཞིན་
གཤེགས་པ་བཞི་དང་། སྐྱེས་བུ་ཆེན་པོ་དེ་གཉིས་དང་། ལྷའི་བུ་རྣམས་ལས་དེ་བཞིན་གཤེགས་པ་ཤཱཀྱ་ཐུབ་པའི་སྐུ་ཚེའི་ཚད་བསྟན་པ་མངོན་སུམ་དུ་ཐོས་པས་ཡང་འདུག་པའི་སྟན་ལས་ལངས་ཏེ་ཐལ་མོ་སྦྱར་ནས་གུས་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་ཡང་དག་པར་འདི་ལྟར་དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་མི་འདའ་ཞིང་རིང་བསྲེལ་ཡང་མི་མངའ་བ་ཞིག་ལགས་ན་ཅིའི་སླད་དུ་མདོ་སྡེ་ལས་ཡོངས་སུ་མྱ་ངན་ལས་འདའ་བ་དང་། སངས་རྒྱས་ལ་རིང་བསྲེལ་མངའ་བར་གསུངས་ཤིང་། ལྷ་དང་མི་རྣམས་ཀྱིས་རིམ་གྲོ་དང་། བཀུར་སྟི་དང་། མཆོད་པ་བགྱིད་པར་འགྱུར་བའི་ཆེད་དུ་འདས་པའི་སངས་རྒྱས་རྣམས་ཀྱིས་ཀྱང་སྐུ་གདུང་མངའ་བར་བསྟན་ཅིང་འཇིག་རྟེན་ན་བཞུགས་པས་ལྷ་དང་མི་རྣམས་ཀྱིས་མཆོད་ཅིང་རིམ་གྲོ་བགྱིས་ན་བསོད་ནམས་དཔག་ཏུ་མ་མཆིས་པ་ཐོབ་པར་འགྱུར་རོ། །ཞེས་གསུངས་ལ། དེང་ནི་མ་མཆིས་སོ་ཞེས་གསུངས་པས་ཐེ་ཙོམ་དང་སོམ་ཉི་འཚལ་བར་གྱུར་ན། བཅོམ་ལྡན་འདས་བདག་ཅག་ལ་ཐུགས་བརྩེ་བར་དགོངས་ཏེ་རྒྱ་ཆེར་རྣམ་པར་དབྱེ་བར་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཛེས་པའི་ཏོག་དང་། འཁོར་མང་པོ་རྣམས་ལ་བཀའ་སྩལ་པ། ཁྱོད་ཀྱིས་འདི་ལྟར་ཤེས་པར་བྱ་སྟེ། ཡོངས་སུ་མྱ་ངན་ལས་འདའ་ཞིང་རིང་བསྲེལ་ཡོད་དོ། །ཞེས་གསུངས་པ་ནི་དགོངས་པའི་དབང་གིས་གསུངས་པ་ཡིན་པས་འདི་ལྟར་དེའི་དོན་གང་ཡིན་པ་སེམས་རྩེ་གཅིག་ཏུ་ཉོན་ཅིག །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལྟར་ཆོས་རྣམ་པ་བཅུས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱི། དེ་ཁོ་ན་ཉིད་ཀྱི་དོན་གྱི་ཚུལ་གྱིས་མཐར་ཕྱིན་པའི་མྱ་ངན་ལས་འདས་པ་ཆེན་པོ་ཡོད་པར་གསུངས་པ་གང་ཡིན་པ་ཤེས་པར་འགྱུར་བར་རིག་པར་བྱའོ། །བཅུ་གང་ཞེ་ན། དང་པོ་ནི་དེ་བཞིན་གཤེགས་པ་རྣམས་ཉོན་མོངས་པའི་སྒྲིབ་པ་དང་ཤེས་བྱའི་སྒྲིབ་པ་མ་ལུས་པར་སྤངས་ཤིང་ཟད་པར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །
གཉིས་པ་ནི་དེ་བཞིན་གཤེགས་པ་རྣམས་སེམས་ཅན་ངོ་བོ་ཉིད་མེད་པ་དང་ཆོས་ངོ་བོ་ཉིད་མེད་པར་ལེགས་པར་ཐུགས་སུ་ཆུད་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །གསུམ་པ་ནི་ལུས་ཀྱི་གནས་དང་ཆོས་ཀྱི་གནས་ཡོངས་སུ་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བཞི་པ་ནི་སེམས་ཅན་རྣམས་ལ་དོན་མཛད་པའི་རྒྱུ་དང་རྐྱེན་རང་གི་ངང་གིས་ཉེ་བར་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །ལྔ་པ་ནི་དེ་ཁོ་ན་ཉིད་ཀྱི་མཚན་ཉིད་ཐ་དད་པ་མེད་པ་མཉམ་པ་ཉིད་ཀྱིས་ཆོས་ཀྱི་སྐུ་མངོན་སུམ་དུ་བརྙེས་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །དྲུག་པ་ནི་འཁོར་བ་དང་མྱ་ངན་ལས་འདས་པ་ལ་ངོ་བོ་ཉིད་གཉིས་སུ་མེད་པར་ཐུགས་སུ་ཆུད་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བདུན་པ་ནི་ཆོས་ཐམས་ཅད་ཀྱི་རྩ་བ་ཐུགས་སུ་ཆུད་ནས། རྣམ་པར་དག་པ་མངོན་སུམ་དུ་གྱུར་པའི་ཕྱིར། ཡོངས་སུ་མྱ་ངན་ལས་འདས་པ་ཞེས་བྱའོ། །བརྒྱད་པ་ནི་ཆོས་ཐམས་ཅད་ལ་སྐྱེ་བ་མེད་ཅིང་འགག་པ་མེད་པར་རྣལ་འབྱོར་ལེགས་པར་བསྒོམས་པའི་ཕྱིར། ཡོངས་སུ་མྱ་ངན་ལས་འདས་པ་ཞེས་བྱའོ། །དགུ་པ་ནི་དེ་བཞིན་ཉིད་དང་ཆོས་ཀྱི་དབྱིངས་དང་། ཡང་དག་པའི་མཐའ་མཉམ་པ་ཉིད་ཀྱིས་ཡང་དག་པའི་ཡེ་ཤེས་བརྙེས་པའི་ཕྱིར། ཡོངས་སུ་མྱ་ངན་ལས་འདས་པ་ཞེས་བྱའོ། །བཅུ་པ་ནི་ཆོས་རྣམས་ཀྱི་ངོ་བོ་ཉིད་དང་མྱ་ངན་ལས་འདས་པའི་ངོ་བོ་ཉིད་ལ་བྱེ་བྲག་མེད་པ་བརྙེས་པའི་ཕྱིར། ཡོངས་སུ་མྱ་ངན་ལས་འདས་པ་ཞེས་བྱ་སྟེ། རིགས་ཀྱི་བུ་འདི་དག་ནི་ཡོངས་སུ་མྱ་ངན་ལས་འདས་པ་ཡོད་པར་བསྟན་པའི་ཆོས་རྣམ་པ་བཅུ་ཞེས་བྱའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལྟར་ཆོས་རྣམ་པ་བཅུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་དེ་ཁོ་ན་ཉིད་ཀྱི་དོན་གྱི་ཚུལ་གྱིས་མཐར་ཕྱིན་པའི་ཡོངས་སུ་མྱ་ངན་ལས་འདས་པ་ཆེན་པོ་ཡོད་པར་གསུངས་པ་གང་ཡིན་པ་ཤེས་པར་འགྱུར་བར་རིག་པར་བྱའོ། །བཅུ་གང་ཞེ་ན། དང་པོ་ནི་ཉོན་མོངས་པ་ཐམས་
ཅད་ནི་འདོད་པས་གཞི་བྱས་པ་ཡིན་པས་འདོད་པ་ལས་སྐྱེས་པ་ཡིན་ལ་སངས་རྒྱས་བཅོམ་ལྡན་འདས་རྣམས་ནི་འདོད་པ་ཡོངས་སུ་བཅད་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །གཉིས་པ་ནི་དེ་བཞིན་གཤེགས་པ་རྣམས་ཉོན་མོངས་པའི་འདོད་པ་རྣམས་ཡོངས་སུ་བཅད་པས་ཆོས་འགའ་ཡང་ལེན་པར་མི་མཛད་ལ། ལེན་པར་མི་མཛད་པའི་ཕྱིར་གཤེགས་པ་ཡང་མི་མངའ་བྱོན་པ་ཡང་མི་མངའ་ཞིང་ལེན་པ་མི་མངའ་བའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །གསུམ་པ་ནི་འདི་ལྟར་དེ་བཞིན་གཤེགས་པ་ལ་གཤེགས་པ་དང་བྱོན་པ་མི་མངའ་ཞིང་ལེན་པ་མི་མངའ་བ་གང་ཡིན་པ་དེ་ནི་ཆོས་ཀྱི་སྐུ་སྐྱེ་བ་མེད་ཅིང་འགག་པ་མེད་པ་ཡིན་པས་སྐྱེ་བ་དང་འགག་པ་མེད་པར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བཞི་པ་ནི་སྐྱེ་བ་དང་འགག་པ་མེད་པ་གང་ཡིན་པ་དེ་ནི་ཚིག་གིས་བརྗོད་པར་བྱ་བ་མ་ཡིན་ཏེ། ཚིག་གི་ལམ་ཡོངས་སུ་ཆད་པར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །ལྔ་པ་ནི་བདག་དང་གང་ཟག་མེད་ཀྱི་ཆོས་ཙམ་འབའ་ཞིག་སྐྱེ་འགག་ཏུ་གྱུར་པའི་གནས་སུ་གྱུར་པ་བརྙེས་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །དྲུག་པ་ནི་ཉོན་མོངས་པ་དང་། ཉེ་བའི་ཉོན་མོངས་པ་གང་ཡིན་པ་དེ་དག་ཐམས་ཅད་ནི་བློ་བུར་གྱི་རྡུལ་ཡིན་ལ་ཆོས་ཉིད་གང་ཡིན་པ་དེ་ནི་བདག་པོ་ཡིན་ཏེ། འགྲོ་བ་མེད་ཅིང་འོང་བ་མེད་པར་སངས་རྒྱས་རྣམས་ཀྱིས་ཐུགས་སུ་ཆུད་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བདུན་པ་ནི་དེ་བཞིན་ཉིད་གང་ཡིན་པ་དེ་ནི་ཡང་དག་པ་ཡིན་ལ་གཞན་ཐམས་ཅད་ནི་ཡང་དག་པ་མ་ཡིན་པ་ཡིན་པས་ཡང་དག་པའི་ངོ་བོ་ཉིད་གང་ཡིན་པ་དེ་ནི་དེ་བཞིན་ཉིད་ཡིན་ལ། དེ་བཞིན་ཉིད་ཀྱི་ངོ་བོ་ཉིད་གང་ཡིན་པ་དེ་ནི་དེ་བཞིན་གཤེགས་པ་ཡིན་པས་ཡོངས་སུ་མྱ་ངན་ལས་འདས་པ་ཞེས་བྱའོ། །བརྒྱད་པ་ནི་ཡང་དག་པའི་མཐའི་ངོ་བོ་ཉིད་གང་ཡིན་པ་དེ་ལ་ནི་སྤྲོས་པ་མེད་དེ། དེ་བཞིན་གཤེགས་པ་ཉག་གཅིག་གིས་ཡང་དག་པའི་མཐའི་ཆོས་མངོན་སུམ་དུ་གྱུར་ནས། སྤྲོས་པ་གཏན་དུ་བཅད་པས་ན། ཡོངས་སུ་མྱ་ངན་ལས་འདས་པ་ཞེས་བྱའོ། །དགུ་པ་ནི་སྐྱེ་བ་མེད་པ་གང་ཡིན་
པ་དེ་ནི་ཡང་དག་པ་ཡིན་ལ། སྐྱེ་བ་གང་ཡིན་པ་དེ་ནི་མི་བདེན་པ་ཡིན་པས་བྱིས་པ་བླུན་པོ་རྣམས་འཁོར་བར་བྱིང་ཞིང་འདོད་པས་ཁྱེར་བ་ཡིན་ན། དེ་བཞིན་གཤེགས་པའི་སྐུ་ལ་ནི་ཡང་དག་པར་མི་བདེན་པ་མི་མངའ་བས་ཡོངས་སུ་མྱ་ངན་ལས་འདས་པ་ཞེས་བྱའོ། ། བཅུ་པ་ནི་ཡང་དག་པའི་ཆོས་མ་ཡིན་པ་གང་ཡིན་པ་དེ་ནི་རྐྱེན་ལས་བྱུང་བ་ཡིན་ལ་ཡང་དག་པའི་ཆོས་གང་ཡིན་པ་དེ་ནི་རྐྱེན་ལས་བྱུང་བ་མ་ཡིན་ཏེ། དེ་བཞིན་གཤེགས་པའི་ཆོས་ཀྱི་སྐུའི་ངོ་བོ་ཉིད་དང་ཡིན་པ་དེ་ནི་ཡང་དག་པ་ཡིན་པས་ཡོངས་སུ་མྱ་ངན་ལས་འདས་པ་ཞེས་བྱ་སྟེ། རིགས་ཀྱི་བུ་འདི་དག་ནི་ཡོངས་སུ་མྱ་ངན་ལས་འདས་པ་ཡོད་པར་བསྟན་པའི་ཆོས་རྣམས་པ་བཅུ་ཞེས་བྱའོ། །གཞན་ཡང་རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་འདི་ལྟར་ཡང་ཆོས་རྣམ་པ་བཅུས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱི་དེ་ཁོ་ན་ཉིད་ཀྱི་དོན་གྱི་ཚུལ་གྱིས་མཐར་ཕྱིན་པའི་མྱ་ངན་ལས་འདས་པ་ཆེན་པོ་ཡོད་པར་གསུངས་པ་གང་ཡིན་པ་ཤེས་པར་འགྱུར་བར་རིག་པར་བྱའོ། །བཅུ་གང་ཞེ་ན། དང་པོ་ནི་དེ་བཞིན་གཤེགས་པས་སྦྱིན་པ་དང་སྦྱིན་པའི་འབྲས་བུ་ལ་བདག་དང་བདག་གི་བ་མེད་པར་ལེགས་པར་ཐུགས་སུ་ཆུད་པས་སྦྱིན་པ་དང་སྦྱིན་པའི་འབྲས་བུ་དེ་ལ་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །གཉིས་པ་ནི་དེ་བཞིན་གཤེགས་པས་ཚུལ་ཁྲིམས་དང་ཚུལ་ཁྲིམས་ཀྱི་འབྲས་བུ་ལ་བདག་དང་བདག་གི་བ་མེད་པར་ལེགས་པར་ཐུགས་སུ་ཆུད་པས་ཚུལ་ཁྲིམས་དང་ཚུལ་ཁྲིམས་ཀྱི་འབྲས་བུ་དེ་ལ་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །གསུམ་པ་ནི་དེ་བཞིན་གཤེགས་པས་བཟོད་པ་དང་བཟོད་པའི་འབྲས་བུ་ལ་བདག་དང་བདག་གི་བ་མེད་པར་ལེགས་པར་ཐུགས་སུ་ཆུད་པས་བཟོད་པ་དང་བཟོད་པའི་འབྲས་བུ་དེ་ལ། །ལོག་པར་རྟོག་པར་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བཞི་པ་ནི་དེ་བཞིན་གཤེགས་པས་བརྩོན་འགྲུས་དང་། བརྩོན་
འགྲུས་ཀྱི་འབྲས་བུ་ལ་བདག་དང་། བདག་གི་བ་མེད་པར་ལེགས་པར་ཐུགས་སུ་ཆུད་པས་བརྩོན་འགྲུས་དང་བརྩོན་འགྲུས་ཀྱི་འབྲས་བུ་དེ་ལ་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །ལྔ་པ་ནི་དེ་བཞིན་གཤེགས་པས་བསམ་གཏན་དང་བསམ་གཏན་གྱི་འབྲས་བུ་ལ་བདག་དང་བདག་གི་བ་མེད་པར་ལེགས་པར་ཐུགས་སུ་ཆུད་པས་བསམ་གཏན་དང་བསམ་གཏན་གྱི་འབྲས་བུ་དེ་ལ་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། ། དྲུག་པ་ནི་དེ་བཞིན་གཤེགས་པས་ཤེས་རབ་དང་ཤེས་རབ་ཀྱི་འབྲས་བུ་ལ་བདག་དང་བདག་གི་བ་མེད་པར་ལེགས་པར་ཐུགས་སུ་ཆུད་པས་ཤེས་རབ་དང་ཤེས་རབ་ཀྱི་འབྲས་བུ་དེ་ལ་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བདུན་པ་ནི་དེ་བཞིན་གཤེགས་པས་སེམས་ཅན་དང་སེམས་ཅན་མ་ཡིན་པ་ཐམས་ཅད་དང་ཆོས་ཐམས་ཅད་ལ་ངོ་བོ་ཉིད་མེད་པར་ལེགས་པར་ཐུགས་སུ་ཆུད་པས་ལོག་པར་རྟོག་པ་གཏན་དུ་བསལ་ནས་ཞི་བར་གྱུར་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། ། བརྒྱད་པ་ནི་གང་གིས་བདག་ཉིད་ལ་སྲེད་ཅིང་མངོན་པར་ཞེན་པ་དེས་ནི་ཡོངས་སུ་ཚོལ་བར་བྱེད་པ་ལ་ཡོངས་སུ་ཚོལ་བའི་ཕྱིར་ནི་སྡུག་བསྔལ་མང་པོ་མྱོང་པར་འགྱུར་བ་ཡིན་ན། དེ་བཞིན་གཤེགས་པ་རྣམས་ནི་བདག་ཉིད་ལ་སྲེད་པ་སྤངས་པའི་ཕྱིར་ཡོངས་སུ་ཚོལ་བ་གཏན་དུ་བཅད་དེ་ཡོངས་སུ་ཚོལ་བ་མི་མངའ་བའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །དགུ་པ་ནི་འདུས་བྱས་ཀྱི་ཆོས་ཐམས་ཅད་ནི་གྲངས་དང་ཚད་ཡོད་པ་ཡིན་ལ་འདུས་མ་བྱས་ཀྱི་ཆོས་གང་ཡིན་པ་དེ་ནི་གྲངས་དང་ཚད་སྤངས་པ་ཡིན་ཏེ། དེ་བཞིན་གཤེགས་པ་ནི་འདུས་བྱས་ཀྱི་ཆོས་སྤངས་ཤིང་འདུས་མ་བྱས་ཀྱི་ཆོས་མངོན་དུ་མཛད་པས་གྲངས་དང་ཚད་མི་མངའ་བའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱའོ། །བཅུ་པ་ནི་དེ་བཞིན་གཤེགས་པས་སེམས་ཅན་དང་ཆོས་ཀྱི་ངོ་བོ་ཉིད་ཐམས་ཅད་སྟོང་ཞིང་སྟོང་པ་ཉིད་ལས་གུད་ན་སྟོང་པའི་ངོ་བོ་ཉིད་
ཡོད་པ་མ་ཡིན་པ་གང་ཡིན་པ་དེ་ཉིད་ལ་ཡང་དག་པའི་ཆོས་ཀྱི་སྐུ་ཡིན་པར་ཐུགས་སུ་ཆུད་པའི་ཕྱིར་ཡོངས་སུ་མྱ་ངན་ལས་འདས་པ་ཞེས་བྱ་སྟེ། རིགས་ཀྱི་བུ་འདི་དག་ནི་མྱ་ངན་ལས་འདས་པ་ཡོད་པར་བསྟན་པའི་ཆོས་རྣམ་པ་བཅུ་ཞེས་བྱའོ། །གཞན་ཡང་རིགས་ཀྱི་བུ་དེ་བཞིན་གཤེགས་པ་ཡོངས་སུ་མྱ་ངན་ལས་མི་འདའ་བ་གང་ཡིན་པ་དེ་ཡང་ཅི་ངོ་མཚར་རྨད་དུ་བྱུང་བ་མ་ཡིན་ནམ། གཞན་ཡང་ངོ་མཚར་གྱི་ཆོས་རྣམ་པ་བཅུ་དང་ལྡན་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཡིན་ཏེ། བཅུ་གང་ཞེ་ན། འཁོར་བ་ནི་ཉེས་དམིགས་དང་བཅས་པ་ཡིན་ལ། མྱ་ངན་ལས་འདས་པ་ནི་ཉེ་བར་ཞི་བ་ཡིན་ཡང་འཁོར་བ་དང་མྱ་ངན་ལས་འདས་པ་མཉམ་པ་ཉིད་དུ་མཁྱེན་པའི་ཕྱིར་འཁོར་བར་མི་གནས་པར་ཡང་མི་འགྱུར་ལ། མྱ་ངན་ལས་འདས་པ་ལ་གནས་པར་ཡང་མི་མཛད་པས་སེམས་ཅན་རྣམས་ལ་ཡོངས་སུ་སྐྱོ་བ་མི་སྐྱེད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ནི་སེམས་ཅན་རྣམས་ལ་འདི་སྙམ་དུ་བྱིས་པ་སོ་སོའི་སྐྱེ་བོ་འདི་དག་ནི་ཕྱིན་ཅི་ལོག་གི་ལྟ་བ་ལ་སྤྱོད་པས་ཉོན་མོངས་པ་རྣམས་ཀྱིས་དཀྲིས་ཤིང་ཉོན་མོངས་པར་གྱུར་པས་ངས་དེང་རྣམ་པར་ཕྱེ་སྟེ་ཁོང་དུ་ཆུད་པར་བྱས་ནས་རྣམ་པར་ཐར་བར་བྱའོ་སྙམ་དུ་མི་དགོངས་མོད་ཀྱི། འོན་ཀྱང་སྔོན་གྱི་བྱམས་པའི་དགེ་བའི་རྩ་བའི་མཐུས་སེམས་ཅན་དེ་དག་གི་དབང་པོ་དང་། རང་བཞིན་དང་། བསམ་པ་དང་། མོས་པ་ཇི་ལྟ་བ་བཞིན་དུ་རྣམ་པར་རྟོག་པ་མི་སྐྱེད་པར་ཡང་རང་གི་ངང་གིས་ཡོངས་སུ་སྒྲོལ་བར་མཛད་ཅིང་། ཕྱི་མའི་མཐར་ཐུག་པའི་བར་དུ་ཡང་དག་པའི་བསྟན་པ་བཤད་ནས་ཕན་འདོགས་ཤིང་དགའ་བར་མཛད་པ་ལ་མཐར་ཐུག་པ་མེད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་ངས་དེང་གསུང་རབ་ཡན་ལག་བཅུ་གཉིས་བསྟན་ནས་སེམས་ཅན་ལ་ཕན་གདགས་པར་བྱའོ་སྙམ་པའི་དགོངས་པ་མི་མངའ་མོད་ཀྱི། འོན་ཀྱང་སྔོན་གྱི་བྱམས་པའི་དགེ་བའི་མཐུས་ཕྱི་མའི་མཐར་ཐུག་པའི་བར་དུ་སེམས་ཅན་དེ་དག་ལ་རྒྱ་ཆེར་བསྟན་པ་མཛད་པ་ལ་མཐར་ཐུག་པ་མེད་པ་གང་ཡིན་པ་དེ་ནི་དེ་བཞིན་གཤེགས་
པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་ངས་དེང་གྲོང་དང་གྲོང་ཁྱེར་དང་། གྲོང་རྡལ་དེ་དག་ཏུ་སོང་སྟེ་རྒྱལ་པོ་དང་བློན་པོ་དང་བྲམ་ཟེ་དང་། རྒྱལ་རིགས་དང་། དམངས་རིགས་ལ་སོགས་པའི་ཕོ་བྲང་དང་། ཁྱིམ་དག་ཏུ་བསོད་སྙོམས་བསླང་བར་བྱའོ། །སྙམ་པའི་དགོངས་པ་མི་མངའ་མོད་ཀྱི། འོན་ཀྱང་སྔོན་སྐུ་དང་གསུང་དང་ཐུགས་ཀྱི་སྤྱོད་པ་གོམས་པར་གྱུར་པའི་མཐུས་རང་གི་ངང་གིས་དེ་དག་ཏུ་གཤེགས་ནས་ཕན་པའི་དངོས་པོ་མཛད་ཅིང་བསོད་སྙོམས་སློང་བ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པའི་སྐུ་ལ་བཀྲེས་པ་དང་། སྐོམ་པ་དང་། བཤང་གཅི་དང་། ཉམ་ཆུང་བའི་མཚན་མ་ཡང་མི་མངའ་ལ་བསོད་སྙོམས་སློང་བར་མཛད་ཀྱང་བཤོས་གསོལ་བ་མི་མངའ་ཞིང་རྣམ་པར་རྟོག་པ་ཡང་མི་མངའ་མོད་ཀྱི། འོན་ཀྱང་རང་གི་ངང་གིས་སེམས་ཅན་རྣམས་ལ་ཕན་གདགས་པའི་ཕྱིར་བཤོས་གསོལ་བ་མངའ་བའི་མཚན་མ་སྟོན་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་སེམས་ཅན་མང་པོ་འདི་དག་ལ་རབ་དང་། འབྲིང་དང་། ཐ་མ་ཡོད་པ་དེ་དག་གི་དབང་པོ་དང་རང་བཞིན་ཇི་ལྟ་བ་བཞིན་དུ་ཆོས་བསྟན་པར་བྱའོ་སྙམ་པའི་དགོངས་པ་མི་མངའ་མོད་ཀྱི། འོན་ཀྱང་སངས་རྒྱས་བཅོམ་ལྡན་འདས་རྣམ་པར་རྟོག་པ་མི་མངའ་བར་ཡང་དེ་དག་གི་སྣོད་དང་དབང་པོའི་སྐྱོན་ཇི་ལྟ་བ་བཞིན་དུ་ཤིན་ཏུ་འཚམ་པར་དེ་དག་ལ་ཆོས་སྟོན་པར་མཛད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ལ་སེམས་ཅན་འདི་དག་ནི་ང་ལ་བཀུར་སྟི་དང་རིམ་གྲོ་མི་བྱེད་ཅིང་རྟག་པར་ང་ལ་སྨོད་པའི་ཚིག་འབྱིན་པར་བྱེད་པས་དེ་དག་དང་ལྷན་ཅིག་ཏུ་གཏམ་སྨྲ་བར་མི་བྱའོ། །སེམས་ཅན་འདི་དག་ནི་ང་ལ་བཀུར་སྟི་དང་རིམ་གྲོ་བྱེད་ཅིང་རྟག་པར་ངའི་བསྔགས་པ་རྗོད་པར་བྱེད་པས་ངས་དེ་དག་དང་ལྷན་ཅིག་ཏུ་གཏམ་སྨྲ་བར་བྱའོ་སྙམ་པའི་དགོངས་པ་མི་མངའ་མོད་ཀྱི། འོན་ཀྱང་དེ་བཞིན་གཤེགས་པས་བྱམས་པ་དང་ཐུགས་རྗེའི་དགོངས་པ་མཉམ་པ་བསྐྱེད་ནས་གཉིས་སུ་མེད་པར་གྱུར་པ་གང་ཡིན་པ་དེ་ནི་
དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་རྣམས་ལ་བྱམས་སྡང་དང་། ང་རྒྱལ་དང་། འདོད་པ་དང་། སེར་སྣ་དང་། ཉོན་མོངས་པ་རྣམས་མི་མངའ་མོད་ཀྱི། འོན་ཀྱང་དེ་བཞིན་གཤེགས་པ་རྟག་པར་རབ་ཏུ་དབེན་པ་ལ་དགྱེས་ཤིང་འདོད་པ་ཆུང་བ་དང་། འདུ་འཛི་སྤངས་པ་ལ་བསྔགས་པ་བརྗོད་པར་མཛད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ནི་ཆོས་གཅིག་ཙམ་ཡང་མི་མཁྱེན་པའམ། ལེགས་པར་ཐུགས་སུ་མ་ཆུད་པ་མི་མངའ་བས་ཐམས་ཅད་དུ་མེ་ལོང་ལྟ་བུའི་ཡེ་ཤེས་མངོན་སུམ་དུ་གྱུར་ཅིང་རྣམ་པར་མི་རྟོག་པ་མི་མངའ་མོད་ཀྱི། འོན་ཀྱང་དེ་བཞིན་གཤེགས་པས་སེམས་ཅན་དེ་དག་གིས་ལས་ཀྱི་དངོས་པོ་མངོན་པར་འདུ་བྱེད་པ་གཟིགས་ནས་དེ་དག་གི་ཡིད་དང་མཐུན་པར་འཇུག་ཅིང་ཐབས་མཁྱེན་པས་དྲངས་ཏེ་ངེས་པར་འབྱུང་བ་ཐོབ་པར་མཛད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །དེ་བཞིན་གཤེགས་པ་ནི་གལ་ཏེ་སེམས་ཅན་ཁ་ཅིག་ཕྱུག་ཅིང་ལོངས་སྤྱོད་དང་ལྡན་པར་གྱུར་པ་གཟིགས་ན་ཡང་དགྱེས་པ་སྐྱེ་བར་མི་འགྱུར་ལ། དེ་དག་རྒུད་ཅིང་ཕོངས་པར་གྱུར་པ་གཟིགས་ན་ཡང་ཡོངས་སུ་གདུང་བ་སྐྱེ་བར་མི་འགྱུར་མོད་ཀྱི། འོན་ཀྱང་དེ་བཞིན་གཤེགས་པས་སེམས་ཅན་དེ་དག་ཡང་དག་པའི་སྤྱོད་པ་མངོན་པར་བསྒྲུབས་པ་གཟིགས་པར་གྱུར་ནས་ཐོགས་པ་མི་མངའ་བའི་ཐུགས་རྗེ་ཆེན་པོས་རང་གི་ངང་གིས་ཡོངས་སུ་སྐྱོབ་ཅིང་སྡུད་པར་མཛད་པ་དང་། གལ་ཏེ་སེམས་ཅན་དེ་དག་ལོག་པའི་སྤྱོད་པ་མངོན་པར་བསྒྲུབ་པ་གཟིགས་པར་གྱུར་ན་ཐོགས་པ་མི་མངའ་བའི་ཐུགས་རྗེ་ཆེན་པོས་རང་གི་ངང་གིས་ཡོངས་སུ་སྐྱོབ་ཅིང་སྡུད་པར་མཛད་པ་གང་ཡིན་པ་དེ་ནི་དེ་བཞིན་གཤེགས་པའི་མཛད་པ་ཞེས་བྱའོ། །རིགས་ཀྱི་བུ་དེ་ལྟར་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ནི་དེ་ལྟ་བུའི་ཡང་དག་པའི་མཛད་པ་དཔག་ཏུ་མེད་པ་མངའ་བར་སྟོན་པ་ཡིན་པར་རིག་པར་བྱ་ཞིང་། ཁྱེད་ཀྱིས་འདི་དག་ནི་ཡོངས་སུ་མྱ་ངན་ལས་འདས་པའི་ཡང་དག་པའི་མཚན་ཉིད་ཡིན་པར་རིག་
པར་བྱའོ། །རེས་འགའ་ཡོངས་སུ་མྱ་ངན་ལས་འདས་པ་ཡོད་པར་མཐོང་བ་གང་ཡིན་པ་དེ་ཡང་ཐབས་མཁྱེན་པས་བསྟན་པ་ཡིན་ལ་རིང་བསྲེལ་བཞག་ནས་སེམས་ཅན་རྣམས་ཀྱིས་བཀུར་སྟི་དང་རིམ་གྲོ་བྱས་ཏེ་མཆོད་པ་བྱེད་པར་འགྱུར་བ་ཡང་དེ་བཞིན་གཤེགས་པའི་བྱམས་པའི་དགེ་བའི་རྩ་བའི་མཐུ་ལས་གྱུར་པ་ཡིན་པས་གང་གིས་མཆོད་པ་བྱས་པ་དེ་དག་མ་འོངས་པའི་དུས་ན་མི་ཁོམ་པ་བརྒྱད་དང་བྲལ་ཞིང་དེ་བཞིན་གཤེགས་པ་རྣམས་ལ་བསྙེན་བཀུར་བྱེད་པ་དང་། དགེ་བའི་བཤེས་གཉེན་དང་ཕྲད་ནས་དགེ་བའི་སེམས་སྟོར་བར་མི་འགྱུར་བ་དང་། བསོད་ནམས་ཀྱི་རྣམ་པར་སྨིན་པ་དཔག་ཏུ་མེད་པ་དང་ལྡན་ཞིང་མྱུར་དུ་ངེས་པར་བྱུང་ནས་འཁོར་བ་དག་གིས་བླངས་ཤིང་འཆིང་བར་མི་འགྱུར་བས་འདི་ལྟ་བུའི་སྤྱོད་པ་གྱ་ནོམ་པ་གང་ཡིན་པ་དེ་ཁྱོད་ཀྱིས་ནན་ཏན་གྱིས་བསྒྲུབ་པར་བྱ་ཞིང་བག་མེད་པར་མི་བྱའོ། ། དེ་ནས་བྱང་ཆུབ་སེམས་དཔའ་མཛེས་པའི་ཏོག་གིས་བཅོམ་ལྡན་འདས་ལ་མངོན་སུམ་དུ་ཡོངས་སུ་མྱ་ངན་ལས་མི་འདའ་བ་དང་། ཤིན་ཏུ་ཟབ་པའི་མཛད་པ་བཀས་བཤད་པ་ཐོས་ནས་གུས་པས་ཐལ་མོ་སྦྱར་ནས་འདི་སྐད་ཅེས་བདག་ནི་དེང་གདོད་དེ་བཞིན་གཤེགས་པ་སྟོན་པ་ཆེན་པོ་ཡོངས་སུ་མྱ་ངན་ལས་མི་འདའ་བ་དང་། རིང་བསྲེལ་བཞག་པ་ཡང་སེམས་ཅན་རྣམས་ལ་སྨན་པར་བགྱི་བ་ལགས་པར་ཁོང་དུ་ཆུད་པས་ལུས་དང་སེམས་དགའ་མགུ་རངས་ཤིང་ངོ་མཚར་རྨད་དུ་གྱུར་ཏོ་ཞེས་གསོལ་ཏོ། །དེ་བཞིན་གཤེགས་པའི་སྐུ་ཚེའི་ཚད་བསྟན་པའི་ལེའུ་འདི་བསྟན་པ་ན་སེམས་ཅན་ཚད་མེད་གྲངས་མེད་དཔག་ཏུ་མེད་པ་སྙེད་མི་མཉམ་པ་དང་མཉམ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །དེ་བཞིན་གཤེགས་པ་བཞི་པོ་ཡང་དེ་ཉིད་དུ་མི་སྣང་བར་གྱུར་ཏོ། ། བྱང་ཆུབ་སེམས་དཔའ་མཛེས་པའི་ཏོག་ཀྱང་བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་འདུག་པའི་སྟན་ལས་ལངས་ཏེ་སླར་སྔོན་གྱི་གནས་སུ་སོང་ངོ་། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་དེ་བཞིན་གཤེགས་པའི་སྐུ་ཚེའི་ཚད་བསྟན་པའི་
ལེའུ་སྟེ་གཉིས་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་གཉིས་པ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་འཁོར་མང་པོའི་ནང་ནས་འདུག་པའི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། གསེར་དང་རིན་པོ་ཆེའི་མེ་ཏོག་དང་རིན་པོ་ཆེའི་རྒྱལ་མཚན་དང་། བ་དན་དང་། གདུགས་མཆོག་དམ་པས་མཆོད་པ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་དེ་བཞིན་གཤེགས་པ་རྣམས་ཀྱི་ཤིན་ཏུ་ཟབ་པའི་གསང་བ་དག་ལ་ཆོས་བཞིན་དུ་མངོན་པར་བསྒྲུབ་པར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ལེགས་པར་ཉོན་ལ་ཤིན་ཏུ་ཡིད་ལ་ཟུངས་ཤིག་དང་། ངས་ཁྱོད་ལ་རྣམ་པར་ཕྱེ་སྟེ་བསྟན་པར་བྱའོ། །རིགས་ཀྱི་བུ་དེ་བཞིན་གཤེགས་པ་ཐམས་ཅད་ལ་སྐུ་རྣམ་པ་གསུམ་མངའ་སྟེ་གསུམ་གང་ཞེ་ན།སྤྲུལ་པའི་སྐུ་དང་ལོངས་སྤྱོད་རྫོགས་པའི་སྐུ་དང་ཆོས་ཀྱི་སྐུ་གང་ཡིན་པའོ། །འདི་ལྟར་སྐུ་རྣམ་པ་གསུམ་པོ་འདི་དག་གིས་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཕུན་སུམ་ཚོགས་པ་ཡོངས་སུ་སྡུད་བར་བྱེད་དེ། གང་གིས་ཡང་དག་པར་རྟོགས་ཤིང་ཁོང་དུ་ཆུད་པར་གྱུར་ན་མྱུར་དུ་འཁོར་བ་ལས་ངེས་པར་འབྱུང་བར་འགྱུར་རོ། །བྱང་ཆུབ་སེམས་དཔས་ཇི་ལྟར་སྤྲུལ་པའི་སྐུ་ཁོང་དུ་ཆུད་པར་བྱ་ཞེ་ན། རིགས་ཀྱི་བུ་དེ་བཞིན་གཤེགས་པ་ནི་སྔོན་སྤྱོད་པའི་ས་ལ་གནས་པ་ན་སེམས་ཅན་ཐམས་ཅད་ཀྱི་ཆེད་དུ་ཆོས་རྣམ་པ་སྣ་ཚོགས་མངོན་པར་བསྒྲུབས་སོ། །དེ་ལྟར་མངོན་པར་བསྒྲུབས་པ་ཡང་རྣལ་འབྱོར་ཡོངས་སུ་རྫོགས་པའི་བར་དུ་མངོན་པར་བསྒྲུབས་པས་རྣལ་འབྱོར་བསྒོམས་པའི་སྟོབས་ཀྱིས་ནི་མངའ་ཆེན་པོ་བརྙེས་ལ། མངའ་ཆེན་པོ་བརྙེས་པའི་མཐུས་ནི་སེམས་ཅན་གྱི་བསམ་པ་ཇི་ལྟ་བ་དང་སེམས་ཅན་གྱི་སྤྱོད་པ་ཇི་ལྟ་བ་དང་སེམས་ཅན་གྱི་ཁམས་ཇི་ལྟ་བ་བཞིན་དུ་
ཐམས་ཅད་ཐུགས་སུ་ཆུད་པས་དུས་ལ་ཡང་མི་གཞེས་ཤིང་། དུས་དང་གནས་ལས་ཀྱང་ཡོལ་བར་མི་མཛད་པས་དུས་དང་མཐུན་ཞིང་སྤྱོད་པ་དང་མཐུན་པར་རྗེས་སུ་མཐུན་པའི་ཆོས་སྟོན་པ་དང་། སྐུ་རྣམ་པ་སྣ་ཚོགས་སྟོན་པ་གང་ཡིན་པ་དེ་ནི་སྤྲུལ་པའི་སྐུ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔས་ཇི་ལྟར་ལོངས་སྤྱོད་རྫོགས་པའི་སྐུ་ཁོང་དུ་ཆུད་པར་བྱ་ཞེ་ན། འདི་ལྟར་དེ་བཞིན་གཤེགས་པ་རྣམས་བྱང་ཆུབ་སེམས་དཔའ་རྣམས་ཀྱིས་མངོན་པར་རྟོགས་པ་འཐོབ་པར་བྱ་བའི་ཕྱིར་དང་། དོན་དམ་པའི་བདེན་པ་བསྟན་ནས་འཁོར་བ་དང་མྱ་ངན་ལས་འདས་པ་རོ་གཅིག་པ་ཉིད་དུ་ཤེས་པར་བྱ་བའི་ཕྱིར་དང་། འཇིག་ཚོགས་ལ་ལྟ་བ་ཡོངས་སུ་བསལ་ནས་འཇིགས་ཤིང་སྐྲག་པ་དང་རབ་ཏུ་དགའ་བ་བསྐྱེད་པའི་ཕྱིར་དང་། སངས་རྒྱས་ཀྱི་ཆོས་མཐའ་མེད་པའི་གཞི་མཛད་པའི་ཕྱིར་དང་། ཡང་དག་པ་ཇི་ལྟ་བ་བཞིན་དུ་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་དང་། སྔོན་གྱི་སྨོན་ལམ་གྱི་སྟོབས་དང་རྗེས་སུ་མཐུན་པའི་ཕྱིར་སྐུ་གང་གིས་མཚན་སུམ་ཅུ་རྩ་གཉིས་དང་དཔེ་བྱད་བཟང་པོ་བརྒྱད་ཅུ་ཕུན་སུམ་ཚོགས་པ་དང་། དབུ་དང་། རྒྱབ་ཀྱི་འོད་ཡོངས་སུ་རྫོགས་པ་སྟོན་པ་གང་ཡིན་པ་དེ་ནི་ལོངས་སྤྱོད་རྫོགས་པའི་སྐུ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་ལྟར་ཆོས་ཀྱི་སྐུ་ཁོང་དུ་ཆུད་པར་བྱ་ཞེ་ན། ཉོན་མོངས་པའི་སྒྲིབ་པ་ལ་སོགས་པ་ཡོངས་སུ་བསལ་ནས་དགེ་བའི་ཆོས་རྣམས་ཡོངས་སུ་རྫོགས་པར་གྱུར་པའི་ཕྱིར་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ཁོ་ན་དང་ལྡན་པར་གྱུར་པ་གང་ཡིན་པ་དེ་ནི་ཆོས་ཀྱི་སྐུ་ཞེས་བྱའོ། །སྐུ་སྔ་མ་རྣམ་པ་གཉིས་ནི་བཏགས་པ་ཙམ་དུ་ཡོད་པ་ཡིན་ལ་སྐུ་གསུམ་པ་འདི་ནི་ཡང་དག་པར་ཡོད་པ་ཡིན་ཏེ། སྐུ་སྔ་མ་གཉིས་ཀྱི་རྩ་བར་གྱུར་པའི་ཕྱིར་རོ། །དེ་ཅིའི་ཕྱིར་ཞེ་ན། ཆོས་ཀྱི་དེ་བཞིན་ཉིད་དང་། རྣམ་པར་མི་རྟོག་པའི་ཡེ་ཤེས་ལས་མ་གཏོགས་པར་སངས་རྒྱས་ཐམས་ཅད་ལས་གུད་ན་ཆོས་གཞན་མི་མངའ་སྟེ། སངས་རྒྱས་ཐམས་ཅད་ནི་མཁྱེན་པ་ཕུན་སུམ་ཚོགས་པར་གྱུར་ན་ཉོན་མོངས་པ་ཐམས་ཅད་གཏན་དུ་ཉེ་བར་ཞི་ཞིང་
ཟད་ནས་སངས་རྒྱས་ཀྱིས་རྣམ་པར་དག་པ་བརྙེས་པར་འགྱུར་བས། དེའི་ཕྱིར་ཆོས་ཀྱི་དེ་བཞིན་ཉིད་དང་དེ་བཞིན་ཉིད་ཀྱི་ཡེ་ཤེས་ཀྱིས་ནི་སངས་རྒྱས་ཀྱི་ཆོས་ཐམས་ཅད་ཡོངས་སུ་སྡུད་པར་འགྱུར་རོ། །གཞན་ཡང་རིགས་ཀྱི་བུ་སངས་རྒྱས་ཐམས་ཅད་ནི་བདག་དང་གཞན་ལ་ཕན་འདོགས་པའི་མཐར་བྱོན་པ་ཡིན་པས། བདག་ལ་ཕན་འདོགས་པ་ནི་ཆོས་ཀྱི་དེ་བཞིན་ཉིད་དོ། །གཞན་ལ་ཕན་འདོགས་པ་ནི་དེ་བཞིན་ཉིད་ཀྱི་ཡེ་ཤེས་སོ། །བདག་དང་གཞན་ལ་ཕན་འདོགས་པར་མཛད་པ་ལ་མངའ་བརྙེས་ནས་མཛད་པ་མཐའ་ཡས་པ་རྣམ་པ་སྣ་ཚོགས་ཡོངས་སུ་རྫོགས་པར་གྱུར་པའི་ཕྱིར་དེ་ལྟ་བས་ན་སངས་རྒྱས་ཀྱི་ཆོས་ཐམས་ཅད་བྱེ་བྲག་ཐ་དད་པ་རྣམ་པ་སྣ་ཚོགས་ཚད་མེད་ཅིང་མཐའ་མེད་པ་སྙེད་ཡོད་པར་རྣམ་པར་ཕྱེ་བ་ཡིན་ནོ། །རིགས་ཀྱི་བུ་འདི་ལྟ་སྟེ་དཔེར་ན་ཡང་དག་པ་མ་ཡིན་པའི་རྣམ་པར་རྟོག་པ་ལ་བརྟེན་ནས་ཉོན་མོངས་པ་རྣམ་པ་སྣ་ཚོགས་དང་། ལས་ཀྱི་རྒྱུ་རྣམ་པ་སྣ་ཚོགས་དང་། འབྲས་བུ་རྣམ་པར་སྨིན་པ་རྣམ་པ་སྣ་ཚོགས་བསྟན་པ་དེ་བཞིན་དུ་ཆོས་ཀྱི་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས་ཀྱང་སངས་རྒྱས་ཀྱི་ཆོས་རྣམ་པ་སྣ་ཚོགས་དང་། རང་སངས་རྒྱས་ཀྱི་ཆོས་རྣམ་པ་སྣ་ཚོགས་དང་། ཉན་ཐོས་ཀྱི་ཆོས་རྣམ་པ་སྣ་ཚོགས་སྟོན་པར་མཛད་དོ། །ཆོས་ཀྱི་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས་སངས་རྒྱས་ཀྱི་ཆོས་ཐམས་ཅད་ལ་རང་དབང་ཐོབ་ནས་ཕུན་སུམ་ཚོགས་པར་འགྱུར་བས་འདི་ནི་མཆོག་ཏུ་བསམ་གྱིས་མི་ཁྱབ་པ་ཞེས་བྱའོ། །འདི་ལྟ་སྟེ་དཔེར་ན་ནམ་མཁའ་ལ་རི་མོ་བྲིས་ཏེ་རྒྱན་དུ་བྱེད་པ་གང་ཡིན་པ་དེ་ནི་བསམ་གྱིས་མི་ཁྱབ་པ་ཡིན་ནོ། །དེ་བཞིན་དུ་ཆོས་ཀྱི་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་བརྟེན་ནས་སངས་རྒྱས་ཀྱི་ཆོས་ཡོངས་སུ་རྫོགས་པར་བྱེད་པ་ཡང་བསམ་གྱིས་མི་ཁྱབ་པ་ཡིན་ནོ། །རིགས་ཀྱི་བུ་ཇི་ལྟར་ན་ཆོས་ཀྱི་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་གཉིས་ལ་རྣམ་པར་རྟོག་པ་མི་མངའ་བར་ཡང་རང་གི་ངང་གིས་མཛད་པའི་དངོས་པོ་དག་ཕུན་སུམ་ཚོགས་པར་འགྱུར་ཞེ་ན། རིགས་ཀྱི་བུ་
འདི་ལྟ་སྟེ་དཔེར་ན་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པར་སྨོན་ལམ་ལ་མངའ་བརྙེས་པའི་ཕྱིར་མཛད་པའི་དངོས་པོ་རྣམ་པ་སྣ་ཚོགས་པ་ཕུན་སུམ་ཚོགས་པར་འགྱུར་བ་དེ་བཞིན་དུ་ཆོས་ཀྱི་དེ་བཞིན་ཉིད་དང་།དེ་བཞིན་ཉིད་ཀྱི་ཡེ་ཤེས་མཛད་པའི་དངོས་པོ་དེ་དག་ཡོངས་སུ་གྲུབ་པ་ལ་མངའ་བརྙེས་པ་ཡང་དེ་བཞིན་ནོ། །གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་སེམས་མེད་པའི་ཏིང་ངེ་འཛིན་ལ་སྙོམས་པར་འཇུག་ཀྱང་སྔོན་གྱི་སྨོན་ལམ་ལ་བརྟེན་ནས་ཏིང་ངེ་འཛིན་ལས་ལངས་ཏེ་བྱ་བ་མང་པོ་རྣམས་ལ་མངོན་པར་འདུ་བྱེད་དོ། ། དེ་བཞིན་དུ་ཆོས་གཉིས་པོ་དག་ལ་རྣམ་པར་རྟོག་པ་མི་མངའ་བར་ཡང་རང་གི་ངང་གིས་མཛད་པ་དག་ཡོངས་སུ་རྫོགས་པར་འགྱུར་རོ། །རིགས་ཀྱི་བུ་འདི་ལྟ་སྟེ་དཔེར་ན་ཉི་མ་དང་ཟླ་བ་ལ་ཡང་རྣམ་པར་རྟོག་པ་མེད། ཆུ་དང་མེ་ལོང་ལ་ཡང་རྣམ་པར་རྟོག་པ་མེད། འོད་སྣང་བ་ལ་ཡང་རྣམ་པར་རྟོག་པ་མེད་མོད་ཀྱི། འོན་ཀྱང་གསུམ་འདུས་པ་ལས་གཟུགས་བརྙན་འབྱུང་བར་འགྱུར་རོ། །དེ་བཞིན་དུ་ཆོས་ཀྱི་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་ལ་ཡང་རྣམ་པར་རྟོག་པ་མི་མངའ་མོད་ཀྱི། འོན་ཀྱང་སྨོན་ལམ་ལ་མངའ་བརྙེས་པའི་ཕྱིར་སེམས་ཅན་སྐལ་བ་དང་ལྡན་པ་དག་ལ་ལོངས་སྤྱོད་རྫོགས་པ་དང་། སྤྲུལ་པའི་སྐུ་ཉི་ཟླའི་གཟུགས་བརྙན་འདུས་པ་ལས་སྣང་བ་བཞིན་དུ་སྟོན་པར་མཛད་དོ། །གཞན་ཡང་རིགས་ཀྱི་བུ་འདི་ལྟ་སྟེ་དཔེར་ན་ཚད་མེད་དཔག་ཏུ་མེད་པའི་ཆུ་དང་མེ་ལོང་དག་འོད་སྣང་བ་ལ་བརྟེན་པའི་ཕྱིར་ནམ་མཁའ་ལ་གཟུགས་བརྙན་མཚན་མ་ཐ་དད་པ་རྣམ་པ་སྣ་ཚོགས་སྟོན་པར་བྱེད་ཀྱང་ནམ་མཁའ་ནི་མཚན་མ་མེད་པ་ཉིད་དོ། །རིགས་ཀྱི་བུ་དེ་བཞིན་དུ་སློབ་མ་རྣམས་འདུལ་བ་གང་ཡིན་པ་དེ་ནི་ཆོས་ཀྱི་སྐུའི་གཟུགས་བརྙན་ཡིན་ཏེ། སྨོན་ལམ་གྱི་མཐུས་སྐུ་རྣམ་པ་གཉིས་ལས་མཚན་མ་རྣམ་པ་སྣ་ཚོགས་སྣང་ཡང་ཆོས་ཀྱི་སྐུའི་ས་ལ་ནི་ཐ་དད་པའི་མཚན་མ་མི་མངའོ། །རིགས་ཀྱི་བུ་སྐུ་གཉིས་པོ་དེ་དག་ལ་བརྟེན་ནས་ནི་སངས་རྒྱས་ཐམས་ཅད་ཀྱིས་ལྷག་མ་དང་བཅས་པའི་མྱ་ངན་ལས་འདས་པ་བསྟན་ཏོ། །ཆོས་ཀྱི་སྐུ་དེ་ལ་བརྟེན་ནས་ནི་ལྷག་མ་
མེད་པའི་མྱ་ངན་ལས་འདས་པ་བསྟན་ཏོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་མཐར་ཟད་པར་འགྱུར་བའི་ཕྱིར་རོ། །སྐུ་གསུམ་པོ་འདི་དག་ལ་བརྟེན་ནས་ནི་སངས་རྒྱས་ཐམས་ཅད་ཀྱིས་མི་གནས་པའི་མྱ་ངན་ལས་འདས་པ་བསྟན་ཏོ། །སྐུ་གཉིས་ཀྱི་ཕྱིར་ནི་མྱ་ངན་ལས་འདས་པ་ལ་མི་གནས་ཏེ། ཆོས་ཀྱི་སྐུ་ལས་གུད་ན་ཡང་སངས་རྒྱས་གཞན་མེད་པས་སོ། །ཅིའི་ཕྱིར་སྐུ་གཉིས་མྱ་ངན་ལས་འདས་པ་ལ་མི་གནས་ཞེ་ན། སྐུ་གཉིས་པོ་དེ་དག་ནི་བརྟགས་པ་ཙམ་སྟེ། ཡང་དག་པ་མ་ཡིན་པས་སྐད་ཅིག་མར་སྐྱེ་ཞིང་འགག་པ་དང་བཅས་པས་ངེས་པར་མི་གནས་པའི་ཕྱིར་ཡང་དང་ཡང་དུ་འབྱུང་ཞིང་ངེས་པ་མེད་པའི་ཕྱིར་རོ། །ཆོས་ཀྱི་སྐུ་ནི་དེ་ལྟ་མ་ཡིན་པས་དེའི་ཕྱིར་སྐུ་གཉིས་པོ་མྱ་ངན་ལས་འདས་པ་ལ་མི་གནས་སོ། །ཆོས་ཀྱི་སྐུ་ནི་གཉིས་སུ་མེད་པས་དེའི་ཕྱིར་མྱ་ངན་ལས་འདས་པ་ལ་མི་གནས་ཏེ། དེ་ལྟ་བས་ན་སྐུ་གསུམ་པོ་དེ་དག་ལ་བརྟེན་ནས་མི་གནས་པའི་མྱ་ངན་ལས་འདས་པ་བསྟན་པ་ཡིན་ནོ། །རིགས་ཀྱི་བུ་སོ་སོའི་སྐྱེ་བོ་ཐམས་ཅད་ནི་མཚན་ཉིད་གསུམ་དང་ལྡན་པའི་ཕྱིར་འཆིང་བ་དང་བཅས་ཤིང་སྒྲིབ་པ་དང་བཅས་པས་སྐུ་གསུམ་པོ་དག་ཐག་རིང་དུ་སྤོང་ཞིང་སྐུ་གསུམ་པོ་དག་དང་ཉེ་བར་མི་འགྱུར་རོ། །གསུམ་གང་ཞེ་ན། ཀུན་ཏུ་བརྟགས་པའི་མཚན་ཉིད་དང་། གཞན་གྱི་དབང་ལས་བྱུང་བའི་མཚན་ཉིད་དང་ཡོངས་སུ་གྲུབ་པའི་མཚན་ཉིད་དོ། །འདི་ལྟར་མཚན་ཉིད་འདི་དག་ཡོངས་སུ་མ་ཤེས་པའི་ཕྱིར་དང་ཞི་བར་མ་གྱུར་པའི་ཕྱིར་དང་ཡོངས་སུ་མ་དག་པའི་ཕྱིར་ཏེ། དེ་ལྟ་བས་ན་སྐུ་གསུམ་པོ་འདི་དག་དང་ཉེ་བར་མ་གྱུར་པ་ཡིན་ནོ། །འདི་ལྟར་མཚན་ཉིད་གསུམ་པོ་འདི་དག་ཤེས་ཤིང་ཉེ་བར་ཞི་བ་དང་ཡོངས་སུ་དག་པར་གྱུར་པའི་ཕྱིར་དེ་ལྟ་བས་ན་སངས་རྒྱས་བཅོམ་ལྡན་འདས་རྣམས་སྐུ་གསུམ་དང་ལྡན་པར་འགྱུར་བ་ཡིན་ནོ། །རིགས་ཀྱི་བུ་བྱིས་པ་སོ་སོའི་སྐྱེ་བོ་རྣམས་ནི་སེམས་རྣམ་པ་གསུམ་པོ་འདི་དག་མ་སྤངས་པའི་ཕྱིར་སྐུ་གསུམ་པོ་དག་ཐག་རིང་དུ་སྤངས་ནས་ཉེ་བར་མི་འགྱུར་བ་ཡིན་ནོ། །གསུམ་གང་ཞེ་ན། བྱ་བ་སློང་བའི་སེམས་དང་། རྩ་བ་ལ་བརྟེན་པའི་སེམས་དང་། རྩ་
བའི་སེམས་གང་ཡིན་པའོ། །ཐུལ་བར་བྱེད་པའི་ལམ་རྣམས་ལ་བརྟེན་ནས་ནི་བྱ་བ་སློང་བའི་སེམས་ཟད་པར་འགྱུར་རོ། །ཆོས་ཀྱིས་སྤོང་བའི་ལམ་ལ་བརྟེན་ནས་ནི་རྩ་བ་ལ་བརྟེན་པའི་སེམས་ཟད་པར་འགྱུར་རོ། །མཆོག་ཏུ་འགྱུར་བའི་ལམ་ལ་བརྟེན་ནས་ནི། རྩ་བའི་སེམས་ཟད་པར་འགྱུར་རོ། །བྱ་བ་སློང་བའི་སེམས་ཉེ་བར་ཞི་བར་གྱུར་པའི་ཕྱིར་ནི་སྤྲུལ་པའི་སྐུ་སྟོན་པར་འགྱུར་རོ། །རྩ་བ་ལ་བརྟེན་པའི་སེམས་ཉེ་བར་ཞི་བར་གྱུར་པའི་ཕྱིར་ནི་ལོངས་སྤྱོད་རྫོགས་པའི་སྐུ་སྟོན་པར་འགྱུར་རོ། །རྩ་བའི་སེམས་ཉེ་བར་ཞི་བར་གྱུར་པའི་ཕྱིར་ནི་ཆོས་ཀྱི་སྐུ་འཐོབ་པར་འགྱུར་བས་དེའི་ཕྱིར་དེ་བཞིན་གཤེགས་པ་ཐམས་ཅད་སྐུ་གསུམ་དང་ལྡན་པར་གྱུར་པ་ཡིན་ནོ། །རིགས་ཀྱི་བུ་སངས་རྒྱས་ཐམས་ཅད་ནི་སྐུ་དང་པོའི་དབང་གིས་སངས་རྒྱས་རྣམས་དང་མཛད་པ་མཚུངས་པ་དང་། སྐུ་གཉིས་པའི་དབང་གིས་སངས་རྒྱས་རྣམས་དང་དགོངས་པ་མཚུངས་པ་དང་། སྐུ་གསུམ་པའི་དབང་གིས་སངས་རྒྱས་རྣམས་དང་སྐུ་མཚུངས་པར་གྱུར་པ་ཡིན་ནོ། །རིགས་ཀྱི་བུ་སངས་རྒྱས་རྣམས་ཀྱི་སྐུ་དང་པོ་གང་ཡིན་པ་དེ་ནི་སེམས་ཅན་གྱི་མོས་པའི་རྗེས་སུ་རྣམ་པ་མང་པོ་དང་ལྡན་པའི་ཕྱིར་མཚན་ཉིད་སྣ་ཚོགས་སྟོན་པར་མཛད་པས་དེའི་ཕྱིར་མང་པོར་བསྟན་པ་ཡིན་ནོ། །སངས་རྒྱས་ཀྱི་སྐུ་གཉིས་པ་གང་ཡིན་པ་དེ་ནི་སློབ་མ་རྣམས་ཡིད་གཅིག་ཏུ་གྱུར་པའི་ཕྱིར་མཚན་ཉིད་གཅིག་ཁོ་ན་སྟོན་པར་མཛད་པས་དེའི་ཕྱིར་གཅིག་ཏུ་བསྟན་པ་ཡིན་ནོ། །སངས་རྒྱས་ཀྱི་སྐུ་གསུམ་པ་གང་ཡིན་པ་དེ་ནི་མཚན་མ་གཉིས་ཀྱི་རྣམ་པ་ཐམས་ཅད་ཀུན་ཏུ་ཁྱབ་ཅིང་མཚན་ཉིད་དུ་འཛིན་པའི་སྤྱོད་ཡུལ་མ་ཡིན་པས་དེའི་ཕྱིར་གཅིག་པ་ཡང་མ་ཡིན་ཐ་དད་པ་ཡང་མ་ཡིན་པ་ཞེས་བསྟན་ཏོ། །རིགས་ཀྱི་བུ་སྐུ་དང་པོ་གང་ཡིན་པ་དེ་ནི་ལོངས་སྤྱོད་རྫོགས་པའི་སྐུ་ལ་བརྟེན་ནས་རབ་ཏུ་སྣང་བར་འགྱུར་རོ། །སྐུ་གཉིས་པ་གང་ཡིན་པ་དེ་ནི་ཆོས་ཀྱི་སྐུ་ལ་བརྟེན་ནས་རབ་ཏུ་སྣང་བར་འགྱུར་རོ། །ཆོས་ཀྱི་སྐུ་གང་ཡིན་པ་དེ་ནི་ཡང་དག་པར་ཡོད་པ་མ་ཡིན་པས་བརྟེན་པའི་གནས་ཅི་ཡང་མི་མངའོ། །རིགས་ཀྱི་བུ་འདི་ལྟར་ཆོས་གསུམ་པོ་དེ་དག་ནི་རྟག་པའི་དོན་དང་ལྡན་པའི་ཕྱིར་ནི་རྟག་པ་ཞེས་
བྱའོ། །བསྟན་ལ་མི་རྟག་པའི་དོན་དང་ལྡན་པའི་ཕྱིར་ནི་མི་རྟག་པ་ཞེས་བསྟན་ཏེ། སྤྲུལ་པའི་སྐུ་གང་ཡིན་པ་དེ་ནི་རྟག་པར་ཆོས་ཀྱི་འཁོར་ལོ་བསྐོར་ཞིང་དེ་དང་དེ་དག་ཏུ་རྐྱེན་ཇི་ལྟ་བ་བཞིན་དུ་ཐབས་མཁས་པ་སྟོན་པ་ལ་རྒྱུན་འཆད་པ་མེད་པའི་ཕྱིར་དེ་ལྟ་བས་ན་རྟག་པ་ཞེས་བསྟན་ཏོ། །རྩ་བ་མ་ཡིན་པའི་ཕྱིར་དང་ཕུན་སུམ་ཚོགས་པའི་མཛད་པ་ཆེན་པོ་མངོན་དུ་མི་འབྱུང་བའི་ཕྱིར་དེ་ལྟ་བས་ན་མི་རྟག་པ་ཞེས་བསྟན་ཏོ། །ལོངས་སྤྱོད་རྫོགས་པའི་སྐུ་གང་ཡིན་པ་དེ་ནི་ཐོག་མ་མེད་པའི་དུས་ནས་རྒྱུན་འཆད་པ་མེད་པར་སངས་རྒྱས་ཐམས་ཅད་ཀྱི་མ་འདྲེས་པའི་ཆོས་རྣམས་ཡོངས་སུ་སྡུད་ཅིང་འཛིན་པའི་ཕྱིར་དང་། སེམས་ཅན་ཟད་པ་མེད་པ་བཞིན་དུ་མཛད་པ་ལ་ཡང་ཟད་པ་མི་མངའ་བའི་ཕྱིར་རྟག་པ་ཞེས་བསྟན་ཏོ། །རྩ་བ་མ་ཡིན་པའི་ཕྱིར་དང་ཕུན་སུམ་ཚོགས་པའི་མཛད་པ་ཆེན་པོ་མངོན་དུ་མི་འབྱུང་བའི་ཕྱིར་མི་རྟག་པ་ཞེས་བསྟན་ཏོ། །ཆོས་ཀྱི་སྐུ་གང་ཡིན་པ་དེ་ནི་མངོན་པར་འདུ་བྱེད་པའི་ཆོས་ཀྱང་མ་ཡིན་ལ་ཐ་དད་པའི་མཚན་ཉིད་ཀྱང་མི་མངའ་ཞིང་རྩ་བ་ཡིན་པར་གྱུར་པའི་ཕྱིར་དང་། ནམ་མཁའ་དང་མཚུངས་པར་གྱུར་པའི་ཕྱིར་རྟག་པ་ཞེས་བསྟན་ཏོ། །རིགས་ཀྱི་བུ་རྣམ་པར་མི་རྟོག་པའི་ཡེ་ཤེས་ལས་གུད་ན་མཆོག་ཏུ་གྱུར་པའི་ཡེ་ཤེས་མེད་ལ་ཆོས་ཀྱི་དེ་བཞིན་ཉིད་ལས་གུད་ན་ཡང་མཆོག་ཏུ་གྱུར་པའི་སྤྱོད་ཡུལ་མེད་པས་ཆོས་ཀྱི་དེ་བཞིན་ཉིད་གང་ཡིན་པ་དེ་དང་། ཤེས་རབ་ཀྱི་དེ་བཞིན་ཉིད་གང་ཡིན་པ་དེའི་དེ་བཞིན་ཉིད་རྣམ་པ་གཉིས་པོ་གང་ཡིན་པ་དེ་ནི་དེ་བཞིན་ཉིད་གཅིག་པ་ཡང་མ་ཡིན། ཐ་དད་པ་ཡང་མ་ཡིན་ཏེ། དེའི་ཕྱིར་ཆོས་ཀྱི་སྐུ་ནི་ཤེས་རབ་རྣམ་པར་དག་པར་གྱུར་པའི་ཕྱིར་དང་། འགོག་བ་རྣམ་པར་དག་པར་གྱུར་པའི་ཕྱིར་གཉིས་རྣམ་པར་དག་པར་གྱུར་པ་ཡིན་པས་དེས་ན་ཆོས་ཀྱི་སྐུ་ནི་རྣམ་པར་དག་པ་ཕུན་སུམ་ཚོགས་པར་གྱུར་པ་ཡིན་ནོ། །གཞན་ཡང་རིགས་ཀྱི་བུ་སྐུ་གསུམ་པོ་དག་རབ་ཏུ་རྣམ་པར་དབྱེ་ན་ཐ་དད་པ་རྣམ་པ་བཞིར་འགྱུར་ཏེ། སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་ཡང་ཡོད། ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་
པའི་སྐུ་མ་ཡིན་པ་ཡང་ཡོད། སྤྲུལ་པའི་སྐུ་ཡང་ཡིན་ལ་ལོངས་སྤྱོད་རྫོགས་པའི་སྐུ་ཡང་ཡིན་པ་ཡང་ཡོད། སྤྲུལ་པའི་སྐུ་ཡང་མ་ཡིན་ལ་ལོངས་སྤྱོད་རྫོགས་པའི་སྐུ་ཡང་མ་ཡིན་པ་ཡང་ཡོད་དོ། །སྤྲུལ་པའི་སྐུ་ཡིན་ལ་ལོངས་སྤྱོད་རྫོགས་པའི་སྐུ་མ་ཡིན་པ་གང་ཞེ་ན་འདི་ལྟ་སྟེ། དེ་བཞིན་གཤེགས་པ་རྣམས་ཡོངས་སུ་མྱ་ངན་ལས་འདས་པའི་འོག་ཏུ་སྨོན་ལམ་ལ་མངའ་བརྙེས་པའི་ཕྱིར་རྐྱེན་ཇི་ལྟ་བ་བཞིན་དུ་ཕན་འདོགས་པ་གང་ཡིན་པ་དེ་ནི་སྤྲུལ་པའི་སྐུ་ཞེས་བྱའོ། །ལོངས་སྤྱོད་རྫོགས་པའི་སྐུ་ཡིན་ལ་སྤྲུལ་པའི་སྐུ་མ་ཡིན་པ་གང་ཞེ་ན། སའི་མདུན་རོལ་གྱི་སྐུ་གང་ཡིན་པའོ། །སྤྲུལ་པའི་སྐུ་ཡང་ཡིན་ལ་ལོངས་སྤྱོད་རྫོགས་པའི་སྐུ་ཡང་ཡིན་པ་གང་ཞེ་ན། འདི་ལྟ་སྟེ། ལྷག་མ་དང་བཅས་པའི་མྱ་ངན་ལས་འདས་པ་ལ་གནས་པའི་སྐུ་གང་ཡིན་པའོ། །སྤྲུལ་པའི་སྐུ་ཡང་མ་ཡིན་ལ་ལོངས་སྤྱོད་རྫོགས་པའི་སྐུ་ཡང་མ་ཡིན་པ་གང་ཞེ་ན། འདི་ལྟ་སྟེ། ཆོས་ཀྱི་སྐུ་གང་ཡིན་པའོ། །རིགས་ཀྱི་བུ་ཆོས་ཀྱི་སྐུ་གང་ཡིན་པ་དེ་ནི་གཉིས་སུ་མེད་པས་རབ་ཏུ་ཕྱེ་བའི་ཕྱིར་རོ། །གཉིས་སུ་མེད་པ་ཞེས་བྱ་བ་ཡང་གང་ཞེ་ན། ཆོས་ཀྱི་སྐུ་དེ་ལ་མཚན་ཉིད་དང་མཚན་ཉིད་ཀྱི་གནས་ཞེས་བྱ་བ་གཉི་ག་མེད་པས་ཡོད་པ་ཡང་མ་ཡིན་མེད་པ་ཡང་མ་ཡིན། གཅིག་པ་ཡང་མ་ཡིན་ཐ་དད་པ་ཡང་མ་ཡིན། གྲངས་ཀྱང་མ་ཡིན་གྲངས་མ་ཡིན་པ་ཡང་མ་ཡིན། སྣང་བ་ཡང་མ་ཡིན། མུན་པ་ཡང་མ་ཡིན་ཏེ། དེ་ལྟ་བུའི་དེ་བཞིན་ཉིད་ཀྱི་ཡེ་ཤེས་དེས་ནི་མཚན་ཉིད་དང་མཚན་ཉིད་ཀྱི་གནས་ཀྱང་མི་གཟིགས། ཡོད་པ་ཡང་མ་ཡིན་མེད་པ་ཡང་མ་ཡིན་པ་ཡང་མི་གཟིགས། གཅིག་པ་ཡང་མ་ཡིན་ཐ་དད་པ་ཡང་མ་ཡིན་པ་ཡང་མི་གཟིགས། གྲངས་ཀྱང་མ་ཡིན་གྲངས་མ་ཡིན་པ་ཡང་མི་གཟིགས། སྣང་བ་ཡང་མ་ཡིན། མུན་པ་ཡང་མ་ཡིན་པ་ཡང་མི་གཟིགས་པས་དེའི་ཕྱིར་སྤྱོད་ཡུལ་རྣམ་པར་དག་པ་དང་། ཤེས་རབ་རྣམ་པར་དག་པ་ལ་རྣམ་པར་བརྟག་ཏུ་ཡང་མི་རུང་ལ་འདིར་སྤྱོད་པ་ཞེས་བྱ་བ་མེད་ཀྱང་འགོག་པ་དང་ལམ་གྱི་གཞི་བྱེད་པའི་ཕྱིར་ཆོས་ཀྱི་སྐུ་འདི་ལ་དེ་བཞིན་གཤེགས་པའི་མཛད་
པ་རྣམ་པ་སྣ་ཚོགས་སྣང་བར་འགྱུར་བར་རིག་པར་བྱའོ། །རིགས་ཀྱི་བུ་སྐུ་འདིའི་རྒྱུ་དང་། རྐྱེན་དང་། སྤྱོད་ཡུལ་དང་། གནས་དང་། འབྲས་བུ་དང་། རྩ་བ་དཔག་པར་དཀའ་བའི་ཕྱིར་གང་གིས་ཁོང་དུ་ཆུད་པར་གྱུར་ན་སྐུ་དེ་ཉིད་ཐེག་པ་ཆེན་པོའོ། ། དེ་བཞིན་གཤེགས་པའི་རང་བཞིན་ནོ། །དེ་བཞིན་གཤེགས་པའི་སྙིང་པོའོ། །སྐུ་འདི་ཉིད་ལ་བརྟེན་ནས་དང་པོ་བསྐྱེད་པའི་སེམས་ཀྱང་ཐོབ་པར་འགྱུར་རོ། །རྣལ་འབྱོར་སྒོམ་པའི་ས་པའི་སེམས་ཀྱང་རབ་ཏུ་སྣང་བར་འགྱུར་རོ། །ཕྱིར་མི་ལྡོག་པའི་སེམས་ཀྱང་རབ་ཏུ་སྣང་བར་འགྱུར་རོ། །ཚེ་གཅིག་གིས་ཐོགས་པའི་སེམས་དང་། རྡོ་རྗེའི་སེམས་དང་། དེ་བཞིན་གཤེགས་པའི་སེམས་ཀྱང་རབ་ཏུ་སྣང་བར་འགྱུར་རོ། །དེ་བཞིན་གཤེགས་པའི་ཆོས་གྱ་ནོམ་པ་ཚད་མེད་ཅིང་མཐའ་མེད་པ་ཐམས་ཅད་ཀྱང་རབ་ཏུ་སྣང་བར་འགྱུར་རོ། །ཆོས་ཀྱི་སྐུ་འདི་ལ་བརྟེན་ནས་བསམ་གྱིས་མི་ཁྱབ་པའི་ཏིང་ངེ་འཛིན་ཆེན་པོ་རྣམས་ཀྱང་རབ་ཏུ་སྣང་བར་འགྱུར་རོ། །ཆོས་ཀྱི་སྐུ་འདི་ལ་བརྟེན་ནས་ཡེ་ཤེས་ཆེན་པོ་ཐམས་ཅད་རབ་ཏུ་སྣང་བར་འགྱུར་བས་དེའི་ཕྱིར་སྐུ་གཉིས་པོ་འདི་དག་ནི་ཏིང་ངེ་འཛིན་དང་། ཤེས་རབ་ལ་བརྟེན་ནས་མངོན་དུ་སྣང་བར་འགྱུར་རོ། །ཆོས་ཀྱི་སྐུ་འདི་ལྟ་བུ་འདི་ནི་རང་གི་ངོ་བོ་ཉིད་ལ་གནས་པས་རྟག་པ་ཞེས་ཀྱང་བསྟན་ཏོ། །ང་ཞེས་ཀྱང་བསྟན་ཏོ། །ཏིང་ངེ་འཛིན་ཆེན་པོ་ལ་གནས་པའི་ཕྱིར་སྐྱིད་པ་ཞེས་ཀྱང་བསྟན་ཏོ། །ཡེ་ཤེས་ཆེན་པོ་ལ་གནས་པའི་ཕྱིར་ཡོངས་སུ་གཙང་བ་ཞེས་ཀྱང་བསྟན་ཏེ། དེ་ལྟ་བས་ན་དེ་བཞིན་གཤེགས་པ་ནི་རྟག་པར་བཞུགས་པ་དང་། མངའ་དབང་བརྙེས་པ་དང་བདེ་ཞིང་སྐྱིད་པ་དང་། ཡོངས་སུ་གཙང་བར་གྱུར་པ་ཡིན་ནོ། །ཏིང་ངེ་འཛིན་ཆེན་པོ་ལ་བརྟེན་ནས་དཔའ་བར་འགྲོ་བའི་ཏིང་ངེ་འཛིན་ལ་སོགས་པ་ཏིང་ངེ་འཛིན་ཐམས་ཅད་དང་། ཆོས་དྲན་པ་ཆེན་པོ་ལ་སོགས་པ་དྲན་པ་ཉེ་བར་གཞག་པ་ཐམས་ཅད་དང་། བྱམས་པ་ཆེན་པོ་དང་། ཐུགས་རྗེ་ཆེན་པོ་དང་། གཟུངས་ཐམས་ཅད་དང་། མངོན་པར་ཤེས་པ་ཐམས་ཅད་དང་། དབང་ཐམས་ཅད་དང་། ཆོས་མཉམ་པ་
ཐམས་ཅད་ཡང་དག་པར་སྡུད་ཅིང་དེ་ལྟ་བུའི་སངས་རྒྱས་ཀྱི་ཆོས་ཐམས་ཅད་ཀྱང་མངོན་དུ་འབྱུང་བར་འགྱུར་རོ། །ཡེ་ཤེས་ཆེན་པོ་འདི་ལ་བརྟེན་ནས་སྟོབས་བཅུ་དང་། བསྙེངས་པ་མི་མངའ་བ་བཞི་དང་། སོ་སོ་ཡང་དག་པར་རིག་པ་བཞི་དང་། མ་འདྲེས་པའི་ཆོས་བརྒྱ་བརྒྱད་ཅུ་དང་། ངོ་མཚར་རྨད་དུ་བྱུང་བའི་ཆོས་བསམ་གྱིས་མི་ཁྱབ་པ་ཐམས་ཅད་ཀྱང་རབ་ཏུ་སྣང་བར་འགྱུར་རོ། །འདི་ལྟ་སྟེ་དཔེར་ན་ཡིད་བཞིན་གྱི་ནོར་བུ་རིན་པོ་ཆེ་ལ་བརྟེན་ནས་རིན་པོ་ཆེ་ཚད་མེད་ཅིང་མཐའ་མེད་པ་རྣམ་པ་སྣ་ཚོགས་སྣང་བར་འགྱུར་བ་དེ་བཞིན་དུ་ཏིང་ངེ་འཛིན་ཆེན་པོའི་རིན་པོ་ཆེ་དང་། ཤེས་རབ་ཆེན་པོའི་རིན་པོ་ཆེ་ལ་བརྟེན་ནས་ཀྱང་སངས་རྒྱས་ཀྱི་ཆོས་གྱ་ནོམ་པ་ཚད་མེད་ཅིང་མཐའ་མེད་པ་རྣམ་པ་སྣ་ཚོགས་མངོན་དུ་འབྱུང་བར་འགྱུར་རོ། །རིགས་ཀྱི་བུ་དེ་ལྟ་བུའི་ཆོས་ཀྱི་སྐུའི་ཏིང་ངེ་འཛིན་དང་། ཤེས་རབ་གང་ཡིན་པ་དེ་ནི་མཚན་མ་ཐམས་ཅད་ལས་ཡང་དག་པར་འདས་ཤིང་མཚན་མ་ལ་མངོན་པར་ཞེན་པར་མི་འགྱུར་བས་རྣམ་པར་བརྟག་ཏུ་མི་རུང་ལ། རྟག་པ་ཡང་མ་ཡིན་ཆད་པ་ཡང་མ་ཡིན་པས་དབུ་མའི་ལམ་ཞེས་བྱའོ། །རྣམ་པར་རྟོག་པ་མངའ་ཡང་ངོ་བོ་ཉིད་ལ་རྣམ་པར་རྟོག་པ་མི་མངའོ། །གསུམ་དུ་བགྲང་བ་ཡོད་ཀྱང་ངོ་བོ་ཉིད་ལ་གསུམ་དུ་འགྱུར་བ་མེད་པས་འཕེལ་བ་ཡང་མེད། འགྲིབ་པ་ཡང་མེད། རྨི་ལམ་དང་སྒྱུ་མ་ལྟ་བུར་གཟུང་བ་ཡང་མེད། འཛིན་པ་ཡང་མེད་པས་ཆོས་ཀྱི་སྐུའི་དེ་བཞིན་ཉིད་རྣམ་པར་གྲོལ་བའི་གནས་འཆི་བདག་གི་རྒྱལ་པོའི་ཡུལ་ལས་ཡང་དག་པར་འདས་པ་སྐྱེ་ཤིའི་མུན་པ་ལས་མངོན་པར་འཕགས་པ། སེམས་ཅན་ཐམས་ཅད་ཀྱིས་བསྒྲུབ་པར་མི་ནུས་ཤིང་བགྲོད་པར་མི་ནུས་པ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་བཞུགས་པའི་གནས་སུ་གྱུར་པའོ། །རིགས་ཀྱི་བུ་འདི་ལྟ་སྟེ་དཔེར་ན་མི་ཞིག་གསེར་འདོད་པས་དེ་དང་དེ་དག་ཏུ་གསེར་གྱི་རྡོ་ཡོངས་སུ་བཙལ་བ་ལས་གསེར་གྱི་རྡོ་དེ་རྙེད་ནས་ཞིབ་མོར་བཏགས་ཏེ་སྙིང་པོ་གང་ཡིན་པ་བླངས་ནས་སོ་མལ་དུ་བཞུས་བཏུལ་ནས་གསེར་ཡོངས་སུ་དག་པ་རྙེད་པར་གྱུར་ན་ཡིད་བཞིན་དུ་བསྒྱུར་
ཏེ། གདུ་བུ་ལ་སོགས་པ་རྒྱན་གྱི་རྣམ་པ་སྣ་ཚོགས་སུ་བྱས་ནས་སྤྱོད་པ་མང་པོ་དང་ལྡན་པར་གྱུར་ཀྱང་གསེར་གྱི་རང་བཞིན་ལ་ནི་འགྱུར་བ་ཅི་ཡང་མེད་དོ། །གཞན་ཡང་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་རྣམ་པར་གྲོལ་བའི་མཆོག་ཡོངས་སུ་གཉེར་བའམ། འཇིག་རྟེན་པའི་དགེ་བ་མངོན་པར་བསྒྲུབས་པས་དེ་བཞིན་གཤེགས་པའམ་དེའི་སློབ་མའི་འཁོར་མཐོང་ན་ཉེ་བར་བསྙེན་ཏེ། བཅོམ་ལྡན་འདས་ལ་འདི་སྐད་དུ་བཅོམ་ལྡན་འདས་དགེ་བ་ནི་གང་ལགས། མི་དགེ་བ་ནི་གང་ལགས། ཡང་དག་པའི་རྣལ་འབྱོར་བསྒོམས་པས་རྣམ་པར་དག་པའི་སྤྱོད་པ་འཐོབ་པར་འགྱུར་བ་ནི་གང་ལགས། ཞེས་གསོལ་པ་དང་། དེ་བཞིན་གཤེགས་པ་དང་སློབ་མའི་འཁོར་རྣམས་དེས་དེ་སྐད་དུ་ཞུ་བ་གསོལ་བ་གཟིགས་པར་གྱུར་ན་དེའི་ཚེ་འདི་སྙམ་དུ་རིགས་ཀྱི་བུའམ་རིགས་ཀྱི་བུ་མོ་འདི་ནི་རྣམ་པར་དག་པ་ཡོངས་སུ་གཉེར་བའི་ཕྱིར་ཡང་དག་པའི་ཆོས་ཡོངས་སུ་མཉན་པར་འདོད་པ་ཡིན་ནོ། །སྙམ་དུ་དགོངས་ནས་དེ་ལ་རྣམ་པར་ཕྱེ་སྟེ་བསྟན་པ་ཉིད་ཀྱིས་གོ་བར་མཛད་པར་འགྱུར་བས་དེས་ཐོས་ནས་ཀྱང་ཡང་དག་པའི་དྲན་པས་མི་བརྗེད་པར་བཟུང་སྟེ། རྣལ་འབྱོར་བསྒོམ་པར་སེམས་བསྐྱེད་པས་བརྩོན་འགྲུས་ཀྱི་སྟོབས་ཐོབ་ནས་ལེ་ལོའི་སྒྲིབ་པ་ཡོངས་སུ་བསལ་ཏེ་སྒྲིབ་པ་ཐམས་ཅད་ཡོངས་སུ་སྦྱོང་བར་བྱེད་པས་བསླབ་པའི་གནས་རྣམས་ལ་མ་གུས་པ་སྤངས་ནས་རྒོད་པ་དང་འགྱོད་པའི་སེམས་ཉེ་བར་ཞི་བར་བྱས་ཏེ་ས་དང་པོ་ལ་འཇུག་པར་འགྱུར་བས་ས་དང་པོའི་སེམས་ལ་བརྟེན་ནས་སེམས་ཅན་ལ་ཕན་འདོགས་པའི་སྒྲིབ་པ་ཡོངས་སུ་བསལ་ནས་ས་གཉིས་པར་འཇུག་པ་འཐོབ་པར་འགྱུར་རོ། །ས་དེར་ཡང་རྣམ་པར་མི་འཚེ་བའི་སྒྲིབ་པ་ཡོངས་སུ་བསལ་ནས་ས་གསུམ་པར་འཇུག་པར་འགྱུར་རོ། །ས་དེར་ཡང་སེམས་མཉེན་ཞིང་རྣམ་པར་བྱང་བའི་སྒྲིབ་པ་ཡོངས་སུ་བསལ་ནས་ས་བཞི་པར་འཇུག་པར་འགྱུར་རོ། །ས་དེར་ཡང་ཐབས་མཁས་པའི་སྒྲིབ་པ་ཡོངས་སུ་བསལ་ནས་ས་ལྔ་པར་འཇུག་པར་འགྱུར་རོ། །ས་དེར་ཡང་དོན་དམ་པ་དང་། ཀུན་རྫོབ་ཏུ་མཐོང་བའི་སྒྲིབ་པ་ཡོངས་སུ་བསལ་ནས་ས་དྲུག་
པར་འཇུག་པར་འགྱུར་རོ། །ས་དེར་ཡང་མཚན་མ་ལ་མཐོང་བར་སྤྱོད་པའི་སྒྲིབ་པ་ཡོངས་སུ་བསལ་ནས་ས་བདུན་པར་འཇུག་པར་འགྱུར་རོ། །ས་དེར་ཡང་མཚན་མ་ཉེ་བར་ཞི་བར་མི་མཐོང་བའི་སྒྲིབ་པ་ཡོངས་སུ་བསལ་ནས་ས་བརྒྱད་པར་འདུག་པར་འགྱུར་རོ། །ས་དེར་ཡང་སྐྱེ་བའི་མཚན་མར་མི་མཐོང་བའི་སྒྲིབ་པ་ཡོངས་སུ་བསལ་ནས་ས་དགུ་པར་འཇུག་པར་འགྱུར་རོ། །ས་དེར་ཡང་མངོན་པར་ཤེས་པ་དྲུག་གི་སྒྲིབ་པ་ཡང་ཡོངས་སུ་བསལ་ནས་ས་བཅུ་པར་འཇུག་པར་འགྱུར་རོ། །ས་དེར་ཡང་ཤེས་བྱའི་སྒྲིབ་པ་དང་རྩ་བའི་སེམས་ཡོངས་སུ་བསལ་ནས་དེ་བཞིན་གཤེགས་པའི་ས་ལ་འཇུག་པར་འགྱུར་རོ། །དེ་བཞིན་གཤེགས་པའི་ས་ལ་འཇུག་པ་གང་ཡིན་པ་དེ་ནི་རྣམ་པ་གསུམ་ཡོངས་སུ་དག་པར་གྱུར་པའི་ཕྱིར་ཤིན་ཏུ་རྣམ་པར་དག་པ་ཞེས་བྱ་སྟེ། གསུམ་གང་ཞེ་ན། ཉོན་མོངས་པ་རྣམ་པར་དག་པ་དང་། སྡུག་བསྔལ་རྣམ་པར་དག་པ་དང་། མཚན་མ་རྣམ་པར་དག་པ་གང་ཡིན་པའོ། །འདི་ལྟ་སྟེ་དཔེར་ན་གསེར་ཡང་དག་པར་བཞུས་སྦྱངས་བརྡུངས་ཏེ་དྲི་མ་མེད་པར་བྱ་བ་ཡང་གསེར་གྱི་རང་བཞིན་གཟོད་མ་ཉིད་ནས་རྣམ་པར་དག་པ་གསལ་བར་བྱེད་པ་ཡིན་པའི་ཕྱིར་གསེར་གྱི་ངོ་བོ་ཉིད་ཡོངས་སུ་དག་པའི་དབང་གིས་གསེར་མེད་པར་འགྱུར་རོ། །ཞེས་བྱར་མི་རུང་ངོ་། །འདི་ལྟ་སྟེ་དཔེར་ན་ཆུ་རྙོག་མ་ཅན་ཡོངས་སུ་དངས་ཏེ་དྲི་མ་མེད་པར་བྱ་བ་ཡང་ཆུའི་རང་བཞིན་གཟོད་མ་ཉིད་ནས་ཡོངས་སུ་དག་པར་གསལ་བར་བྱེད་པ་ཡིན་པའི་ཕྱིར་ཆུ་མེད་པར་འགྱུར་རོ་ཞེས་བྱར་མི་རུང་བ་དེ་བཞིན་དུ་ཆོས་ཀྱི་སྐུ་ཡང་ཉོན་མོངས་པ་དང་འདྲེས་པར་གྱུར་པས་སྡུག་བསྔལ་བ་དང་ཀུན་འབྱུང་བ་ཡོངས་སུ་བསལ་ནས་བག་ཆགས་ལྷག་མ་མེད་པར་བྱ་བ་ཡང་སངས་རྒྱས་ཀྱི་རང་བཞིན་གཟོད་མ་ཉིད་ནས་རྣམ་པར་དག་པ་གསལ་བར་བྱེད་པ་ཡིན་པའི་ཕྱིར་ངོ་བོ་ཉིད་མེད་པར་འགྱུར་རོ་ཞེས་བྱར་མི་རུང་ངོ་། །འདི་ལྟ་སྟེ་དཔེར་ན་ནམ་མཁའ་ལ་དུ་བ་དང་། སྤྲིན་དང་། རྡུལ་དང་། ཁུག་རྣ་རྣམས་ཀྱིས་བསྒྲིབས་པ་དག་གལ་ཏེ་ཡོངས་སུ་དང་བར་གྱུར་ན་ནམ་མཁའི་ཁམས་ཡོངས་སུ་དག་པར་གྱུར་པས་ནམ་མཁའ་
མེད་པར་འགྱུར་རོ། །ཞེས་བྱར་མི་རུང་བ་དེ་བཞིན་དུ། ཆོས་ཀྱི་སྐུ་ཡང་སྡུག་བསྔལ་མང་པོ་ཐམས་ཅད་ཡོངས་སུ་ཟད་པར་གྱུར་པའི་ཕྱིར་རྣམ་པར་དག་པ་ཞེས་བརྗོད་ཀྱང་ངོ་བོ་ཉིད་མེད་པར་འགྱུར་རོ་ཞེས་བྱར་མི་རུང་ངོ་། །འདི་ལྟ་སྟེ་དཔེར་ན་སྐྱེས་བུ་ཞིག་གཉིད་ལོག་པའི་རྨི་ལམ་ན་ཆུ་ཆེན་པོས་ཁྱེར་བ་ལས་རྐང་ལག་བསྐྱོད་དེ་ལུས་དང་སེམས་ལེ་ལོ་མ་བྱས་པའི་ཕྱིར་ཆུ་བོ་ཐད་ཀར་བཅད་དེ་ཕ་རོལ་གྱི་འགྲམ་དུ་ཕྱིན་པར་མཐོང་བ་ལས་རྨི་ལམ་སད་ནས་ཆུ་བོ་དང་ཚུ་རོལ་དང་ཕ་རོལ་གྱི་འགྲམ་ཐ་དད་པར་འགྱུར་བ་མི་མཐོང་ཡང་སེམས་མེད་དོ་ཞེས་བྱར་མི་རུང་ངོ་། །འདི་ལྟ་སྟེ་དཔེར་ན་འཁོར་བའི་ཡང་དག་པ་མ་ཡིན་པའི་རྣམ་པར་རྟོག་པ་ཡོངས་སུ་ཟད་ནས་བློ་རྣམ་པར་དག་པར་གྱུར་ཀྱང་བློ་མེད་དོ་ཞེས་བྱར་མི་རུང་བ་དེ་བཞིན་དུ་ཆོས་ཀྱི་དབྱིངས་ཀྱང་ཡང་དག་པ་མ་ཡིན་པའི་རྣམ་པར་རྟོག་པ་ཐམས་ཅད་མི་སྐྱེ་བའི་ཕྱིར་རྣམ་པར་དག་པ་ཞེས་བརྗོད་ཀྱང་སངས་རྒྱས་རྣམས་ཀྱི་ཡང་དག་པའི་ངོ་བོ་ཉིད་མེད་ཅེས་བྱར་མི་རུང་ངོ་། །གཞན་ཡང་རིགས་ཀྱི་བུ་ཆོས་ཀྱི་སྐུ་གང་ཡིན་པ་དེ་ཉོན་མོངས་པའི་སྒྲིབ་པ་རྣམ་པར་དག་པར་གྱུར་པས་ནི་ལོངས་སྤྱོད་རྫོགས་པའི་སྐུ་སྟོན་པར་མཛད་དོ། །ལས་ཀྱི་སྒྲིབ་པ་རྣམ་པར་དག་པར་གྱུར་པས་ནི་སྤྲུལ་པའི་སྐུ་སྟོན་པར་མཛད་དོ། །ཤེས་བྱའི་སྒྲིབ་པ་རྣམ་པར་དག་པར་གྱུར་པའི་ཕྱིར་ནི་ཆོས་ཀྱི་སྐུ་སྟོན་པར་མཛད་དོ། །འདི་ལྟ་སྟེ་དཔེར་ན་ནམ་མཁའ་ལ་བརྟེན་ནས་ནི་གློག་འབྱུང་ལ། གློག་ལ་བརྟེན་ནས་ནི་འོད་འབྱུང་བ་དེ་བཞིན་དུ་ཆོས་ཀྱི་སྐུ་ལ་བརྟེན་པའི་ཕྱིར་ནི་ལོངས་སྤྱོད་རྫོགས་པའི་སྐུ་སྟོན་པར་མཛད་དོ། །ལོངས་སྤྱོད་རྫོགས་པའི་སྐུ་ལ་བརྟེན་ནས་ནི་སྤྲུལ་པའི་སྐུ་སྟོན་པར་མཛད་དོ། །རང་བཞིན་ཡོངས་སུ་དག་པར་གྱུར་པའི་ཕྱིར་ནི་ཆོས་ཀྱི་སྐུ་སྟོན་པར་མཛད་དོ། །ཤེས་རབ་རྣམ་པར་དག་པར་གྱུར་པས་ནི་ལོངས་སྤྱོད་རྫོགས་པའི་སྐུ་སྟོན་པར་མཛད་དོ། །ཏིང་ངེ་འཛིན་རྣམ་པར་དག་པར་གྱུར་པས་ནི་སྤྲུལ་པའི་སྐུ་སྟོན་པར་མཛད་དོ། །དེ་གསུམ་རྣམ་པར་དག་པར་གྱུར་པ་གང་ཡིན་པ་དེ་ནི་ཆོས་ཀྱི་དེ་བཞིན་ཉིད་དང་ཐ་མི་དད་དེ། དེ་བཞིན་ཉིད་དང་རོ་གཅིག་པའི་
དེ་བཞིན་ཉིད་དང་། རྣམ་པར་གྲོལ་བའི་དེ་བཞིན་ཉིད་དང་། མཐར་ཐུག་པའི་དེ་བཞིན་ཉིད་གང་ཡིན་པས་དེའི་ཕྱིར་སངས་རྒྱས་རྣམས་ཀྱི་སྐུ་ལ་ཐ་དད་པར་གྱུར་པ་མེད་དོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་འདི་སྐད་དུ་དེ་བཞིན་གཤེགས་པ་ནི་བདག་གི་སྟོན་པ་ཆེན་པོ་ཡིན་ནོ་ཞེས་དེ་ལྟར་ངེས་པར་མངོན་པར་ཡིད་ཆེས་པའི་གང་ཟག་དེས་ནི་ཤིན་ཏུ་དང་བའི་བསམ་པས་དེ་བཞིན་གཤེགས་པའི་སྐུ་ཐ་དད་པ་མི་མངའ་བར་ཁོང་དུ་ཆུད་པར་གྱུར་པར། རིགས་ཀྱི་བུ་དོན་དེའི་ཕྱིར་སྤྱོད་ཡུལ་རྣམས་ལ་ཡང་དག་པ་མ་ཡིན་པའི་ཡིད་ལ་བྱེད་པ་རྣམས་ཡོངས་སུ་བསལ་བར་གྱུར་ན་ཆོས་དེ་དག་ལ་མཚན་ཉིད་གཉིས་མེད་པར་ཁོང་དུ་ཆུད་ཅིང་རྣམ་པར་རྟོག་པ་ཡང་མེད་པར་འགྱུར་རོ། །འཕགས་པའི་རྣལ་འབྱོར་སྒོམ་པ་ལ་དེ་བཞིན་ཉིད་དེ་མཚན་ཉིད་གཉིས་སུ་གྱུར་པ་མེད་ཅིང་ཡང་དག་པར་རྣལ་འབྱོར་སྒོམ་པའི་ཕྱིར་འདི་ལྟར་དེ་བཞིན་དུ་སྒྲིབ་པ་ཐམས་ཅད་ཡོངས་སུ་བསལ་བས་ཉེ་བར་ཞི་བར་འགྱུར་རོ། །དེ་བཞིན་ཉིད་སྒྲིབ་པ་ཐམས་ཅད་ཞི་བར་གྱུར་པས་འདི་ལྟར་དེ་བཞིན་དུ་དེ་བཞིན་ཉིད་དང་། དེ་བཞིན་ཉིད་ཀྱི་ཡེ་ཤེས་མཆོག་ཏུ་རྣམ་པར་དག་པ་ཐོབ་པར་འགྱུར་རོ། །དེ་བཞིན་ཉིད་དང་། ཆོས་ཀྱི་དབྱིངས་དང་། ཡང་དག་པའི་ཡེ་ཤེས་རྣམ་པར་དག་པར་གྱུར་པས་འདི་ལྟར་དེ་བཞིན་དུ་རང་དབང་དུ་ཕུན་སུམ་ཚོགས་པ་ཐམས་ཅད་ཀྱང་ཡོངས་སུ་སྡུད་པར་འགྱུར། སྒྲིབ་པ་ཐམས་ཅད་ཉེ་བར་ཞི་བ་ཡང་ཡོངས་སུ་རྫོགས་པར་འགྱུར་ཏེ། སྒྲིབ་པ་ཐམས་ཅད་རྣམ་པར་དག་པ་ཐོབ་པར་གྱུར་པའི་ཕྱིར་དེ་བཞིན་ཉིད་དང་། ཡང་དག་པའི་ཡེ་ཤེས་དང་། ཡང་དག་པའི་མཚན་ཉིད་ཅེས་བྱའོ། །དེ་ལྟར་མཐོང་བ་གང་ཡིན་པ་དེ་ནི་འཕགས་པའི་ལྟ་བ་ཞེས་བྱ་བས་དེ་ནི་ཡང་དག་པ་ཉིད་དུ་སངས་རྒྱས་མཐོང་བ་ཞེས་བྱའོ། །དེ་ཅིའི་ཕྱིར་ཞེ་ན། ཡང་དག་པ་ཇི་ལྟ་བ་བཞིན་དུ་ཆོས་ཀྱི་དེ་བཞིན་ཉིད་མཐོང་བའི་ཕྱིར་དེ་ལྟ་བས་ན་དེ་བཞིན་གཤེགས་པ་རྣམས་ཀྱིས་དེ་བཞིན་གཤེགས་པ་ཐམས་ཅད་མ་ལུས་པར་གཟིགས་པར་འགྱུར་རོ། །དེ་ཅིའི་ཕྱིར་ཞེ་ན། ཉས་ཐོས་དང་། རང་སངས་རྒྱས་ཁམས་གསུམ་ལས་ངེས་པར་བྱུང་
ནས་ཡང་དག་པའི་སྤྱོད་ཡུལ་ཡོངས་སུ་ཚོལ་བས་ཀྱང་ཁོང་དུ་མི་ཆུད་ཅིང་མཐོང་བར་མི་ནུས་པས་སོ། །དེ་ལྟ་བུའི་འཕགས་པའི་གང་ཟག་དག་གིས་ཀྱང་མི་རིག་ཅིང་མི་མཐོང་བས་སོ་སོའི་སྐྱེ་བོ་ཐམས་ཅད་ཐེ་ཙོམ་དང་སོམ་ཉི་བསྐྱེད་ནས་ཕྱིན་ཅི་ལོག་ཏུ་རྣམ་པར་རྟོག་པར་བྱེད་པས་ཡོངས་སུ་འདའ་བར་མི་འགྱུར་རོ། །འདི་ལྟ་སྟེ་དཔེར་ན་རི་བོང་རྒྱ་མཚོ་ལ་རྐྱལ་བར་བྱེད་ཀྱང་གདོན་མི་ཟ་བར་ཕ་རོལ་དུ་ཕྱིན་པར་མི་འགྱུར་རོ། །དེ་ཅིའི་ཕྱིར་ཞེ་ན། ཉམ་སྟོབས་ཤིན་དུ་ཆུང་བའི་ཕྱིར་རོ། །བྱིས་པ་སོ་སོའི་སྐྱེ་བོ་རྣམས་ཀྱང་དེ་བཞིན་དུ་ཆོས་ཀྱི་དེ་བཞིན་ཉིད་མངོན་པར་མི་རྟོགས་སོ། །དེ་བཞིན་གཤེགས་པ་རྣམས་ནི་རྣམ་པར་རྟོག་པའི་དགོངས་པ་མི་མངའ་བར་ཡང་ཆོས་ཐམས་ཅད་ལ་མངའ་ཆེན་པོ་བརྙེས་ཤིང་ཤེས་རབ་ཤིན་ཏུ་ཟབ་ཅིང་རྣམ་པར་དག་པ་ཕུན་སུམ་ཚོགས་པར་གྱུར་པའི་ཕྱིར་དང་། རང་གི་སྤྱོད་ཡུལ་དུ་གྱུར་ཅིང་གཞན་དང་ཡང་ཐུན་མོང་དུ་མ་གྱུར་པའི་ཕྱིར་དེ་ལྟ་བས་ན་དེ་བཞིན་གཤེགས་པ་རྣམས་བསྐལ་པ་གྲངས་མེད་ཚད་མེད་དཔག་ཏུ་མེད་པ་ནས་ཉིད་ཀྱི་སྐུ་སྲོག་ལ་ཕངས་པ་མི་མངའ་བར་དཀའ་བ་སྤྱོད་པས་དཔེ་ཟླ་མེད་པ་བསམ་གྱིས་མི་ཁྱབ་པ། ཚིག་གི་སྤྱོད་ཡུལ་ལས་ཡང་དག་པར་འདས་པ། རབ་ཏུ་དབེན་པ། འཇིགས་པ་རྣམས་དང་བྲལ་བའི་སྐུ་མཆོག་དམ་པ་འདི་བརྙེས་པ་ཡིན་ནོ། །རིགས་ཀྱི་བུ་དེ་ལྟར་ཆོས་ཀྱི་དེ་བཞིན་ཉིད་རིག་ཅིང་མཐོང་བ་གང་ཡིན་པ་དེ་ནི་སྐྱེ་བ་དང་། རྒ་བ་དང་། འཆི་བ་མེད་པ། ཚེའི་ཚད་ཀྱང་དཔག་ཏུ་མེད། གཉིད་ཀྱང་མེད། བཀྲེས་པ་དང་། སྐོམ་པ་ཡང་མེད་དེ། རྟག་པར་ཏིང་ངེ་འཛིན་ལ་གནས་པའི་སེམས་རྣམ་པར་གཡེང་ཞིང་གཡོ་བ་ཡང་མེད་དོ། །གང་གིས་དེ་བཞིན་གཤེགས་པ་ལ་རྩོད་པའི་བསམ་པ་སྐྱེད་པ་དེས་དེ་བཞིན་གཤེགས་པ་མཐོང་བར་མི་འགྱུར་རོ། ། དེ་བཞིན་གཤེགས་པ་རྣམས་ནི་གང་ཅི་གསུང་ཡང་རུང་སྟེ་ཐམས་ཅད་ལ་ཕན་འདོགས་པར་འགྱུར་བས་གང་གིས་མཉན་ཅིང་ཐོས་པ་དེ་དག་རྣམ་པར་མི་གྲོལ་བ་གང་ཡང་མེད་དོ། །གཅན་གཟན་མ་རུངས་པ་དང་། མི་མ་རུངས་པ་དང་། འདྲེ་སྲིན་མ་རུངས་པ་དག་དང་ཡང་ཕྲད་
པར་མི་འགྱུར་ཏེ། ཆོས་ཐོས་པའི་དབང་གིས་འབྲས་བུ་རྣམ་པར་སྨིན་པ་ཡང་ཟད་པར་མི་འགྱུར་རོ། །དེ་བཞིན་གཤེགས་པ་རྣམས་ལ་ལུང་དུ་མི་བསྟན་པའི་དངོས་པོ་ཡང་མི་མངའ། སྤྱོད་ཡུལ་ཐམས་ཅད་ལ་མཁྱེན་པར་བྱའོ་སྙམ་པའི་དགོངས་པ་ཡང་མི་མངའ། འཁོར་བ་དང་མྱ་ངན་ལས་འདས་པ་ལ་ཐ་དད་པའི་འདུ་ཤེས་ཀྱང་མི་མངའོ། །དེ་བཞིན་གཤེགས་པ་ནི་གང་ཅི་ཡང་རུང་སྟེ་མ་ངེས་པ་མི་མངའོ། །དེ་བཞིན་གཤེགས་པ་རྣམས་ནི་སྤྱོད་ལམ་བཞི་པོ་ཐམས་ཅད་དུ་ཡེ་ཤེས་ཀྱིས་ཡོངས་སུ་མ་བཟུང་བ་མི་མངའོ། །ཆོས་ཐམས་ཅད་ལ་བྱམས་པ་དང་ཐུགས་རྗེས་ཡོངས་སུ་མ་ཟིན་པ་མི་མངའ་བས། སེམས་ཅན་ཐམས་ཅད་ལ་ཕན་པ་དང་བདེ་བའི་ཕན་མི་འདོགས་པ་གང་ཡང་མེད་དོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གསེར་འོད་དམ་པའི་མདོ་སྡེ་འདི་ཐོས་ནས་མངོན་པར་ཡིད་ཆེས་པ་གང་ཡིན་པ་དེ་དག་ནི་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་དང་། ལྷ་མ་ཡིན་གྱི་འགྲོ་བ་དག་ཏུ་ལྟུང་བར་མི་འགྱུར་ཞིང་རྟག་པར་ལྷ་དང་མིའི་ནང་དུ་སྐྱེ་བར་འགྱུར་བས་མ་རབས་དག་ཏུ་སྐྱེ་བར་མི་འགྱུར་ལ། རྟག་པར་དེ་བཞིན་གཤེགས་པ་རྣམས་ལ་བསྙེན་བཀུར་དང་རིམ་གྲོ་བྱས་ནས་ཡང་དག་པའི་ཆོས་མཉན་ཅིང་ལེན་པར་འགྱུར། རྟག་པར་སངས་རྒྱས་ཀྱི་ཞིང་ཡོངས་སུ་དག་པ་རྣམས་སུ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། ཆོས་ཟབ་མོ་འདི་ཐོས་པར་གྱུར་པའི་ཕྱིར་རོ། །རིགས་ཀྱི་བུ་དང་། རིགས་ཀྱི་བུ་མོ་དེ་དག་ནི་དེ་བཞིན་གཤེགས་པས་མཁྱེན་ཅིང་ལུང་བསྟན་པར་འགྱུར་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་རོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ཤིན་ཏུ་ཟབ་པའི་ཆོས་གྱ་ནོམ་པ་འདི་ལན་ཅིག་རྣ་བས་ཐོས་པར་གྱུར་ན་གང་ཟག་དེ་ནི་དེ་བཞིན་གཤེགས་པ་ལ་སྐུར་པ་མི་འདེབས་པ་དང་། ཡང་དག་པའི་ཆོས་ལ་མི་སྨོད་པ་དང་། འཕགས་པའི་ཚོགས་ལ་མི་བརྙས་པ་དང་། སེམས་ཅན་རྣམས་དགེ་བའི་རྩ་བ་མ་བསྐྱེད་པ་ནི་སྐྱེད་པར་བྱེད་ལ། དགེ་བའི་རྩ་བ་བསྐྱེད་པ་ནི་འཕེལ་ཞིང་ཡངས་པ་
དང་། ཡོངས་སུ་སྨིན་པར་བྱེད་པའི་ཕྱིར་འཇིག་རྟེན་གྱི་ཁམས་ཐམས་ཅད་དུ་སེམས་ཅན་ཇི་སྙེད་པ་དེ་དག་ཕ་རོལ་ཏུ་ཕྱིན་པ་དྲུག་པོ་རྣམས་མངོན་པར་སྒྲུབ་པར་བསྐུལ་བར་འགྱུར་བར་རིག་པར་བྱའོ། །དེ་ནས་བྱང་ཆུབ་སེམས་དཔའ་ནམ་མཁའི་སྙིང་པོ་དང་། ཚངས་པ་དང་། བརྒྱ་བྱིན་དང་། རྒྱལ་པོ་ཆེན་པོ་བཞི་དང་། ལྷའི་འཁོར་མང་པོ་རྣམས་འདུག་པའི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ཏེ་གུས་པས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གནས་གང་ཡང་རུང་བདག་ཏུ་འདི་ལྟར་གསེར་འོད་དམ་པའི་མདོ་སྡེ་ཤིན་ཏུ་གྱ་ནོམ་པ་འདི་ཡང་དག་པར་སྟོན་པར་བགྱིད་ན་ཡུལ་དེར་ཕན་ཡོན་རྣམ་པ་བཞི་དང་ལྡན་པར་འགྱུར་ལགས་སོ། །བཞི་གང་ཞེ་ན། དང་པོ་ནི་རྒྱལ་པོའི་དམག་ཚོགས་རྣམས་བཙན་ཞིང་དར་བས་པས་ཀྱི་རྒོལ་བའི་དགྲ་རྣམས་མ་མཆིས་པ་དང་། བྲོ་ནད་དང་བྲལ་ཞིང་ཚེ་རིང་བ་དང་། བཀྲ་ཤིས་དང་ལྡན་ཞིང་བདེ་སྐྱིད་པ་དང་། དམ་པའི་ཆོས་དར་ཞིང་རྒྱས་པར་འགྱུར་བའོ། །གཉིས་པ་ནི་ཕོ་བྲང་ནང་གི་བཙུན་མོ་དང་། སླས་དང་། རྒྱལ་བུ་དང་། བློན་པོ་རྣམས་འདུམ་ཞིང་རྩོད་པ་མ་མཆིས་པ་དང་། གཡོ་སྒྱུ་དང་ཕྲ་མ་སྤངས་པས་རྒྱལ་པོས་གནང་ཞིང་བཀུར་བར་འགྱུར་རོ། །གསུམ་པ་ནི་དགེ་སྦྱོང་དང་། བྲམ་ཟེ་དང་། ཡུལ་གྱི་མི་རྣམས་ཡང་དག་པའི་ཆོས་སྤྱོད་པས་བྲོ་ནད་མ་མཆིས་ཤིང་བདེ་སྐྱིད་པ་དང་། བློ་བུར་དུ་འགུམ་པ་མ་མཆིས་པ་དང་། བསོད་ནམས་མང་པོ་མངོན་པར་སྒྲུབ་པའོ། །བཞི་པ་ནི་དུས་གསུམ་པོ་དག་ཏུ་འབྱུང་བ་ཆེན་པོ་བཞི་པོ་དག་འཕྲོད་ཅིང་རྟག་པར་ལྷ་རྣམས་ཀྱིས་བྱིན་གྱིས་བརླབས་ནས་ཡོངས་སུ་སྲུང་བར་འགྱུར་བ་དང་། བྱམས་པ་དང་སྙིང་རྗེ་མཉམ་པར་གྱུར་བས་གནོད་པ་མི་བགྱིད་ཅིང་རྣམ་པར་འཚེ་བའི་བསམ་པ་མ་མཆིས་པ་དང་། སྐྱེ་བོ་རྣམས་དཀོན་མཆོག་གསུམ་ལ་སྐྱབས་སུ་མཆི་ཞིང་ཐམས་ཅད་ཀྱིས་བྱང་ཆུབ་ཀྱི་སྤྱོད་པ་མངོན་པར་སྒྲུབ་པར་འགྱུར་བ་སྟེ། འདི་དག་ནི་ཕན་ཡོན་རྣམ་པ་བཞི་ཞེས་བགྱི་ལགས་སོ། །བཅོམ་ལྡན་འདས་
བདག་ཅག་ཀྱང་རྟག་པར་མདོ་སྡེ་འདི་རྒྱ་ཆེར་སྤེལ་བའི་སླད་དུ་འདི་ལྟར་མདོ་སྡེ་འདི་ཡོངས་སུ་འཛིན་པའི་གང་ཟག་དེའི་སླད་དུ་རྗེས་སུ་འབྲང་ཞིང་གང་ན་གནས་པའི་གནས་དེར་སྨན་པ་དག་བགྱིད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་ལེགས་སོ། །ལེགས་སོ། ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱི་རབ་ཏུ་བརྩོན་པའི་སེམས་ཀྱི་མདོ་སྡེའི་རྒྱལ་པོ་ཤིན་ཏུ་གྱ་ནོམ་པ་འདི་སྤེལ་བ་ཉིད་ཀྱིས་ཡང་དག་པའི་ཆོས་ཡུན་རིང་དུ་འཇིག་རྟེན་ན་གནས་པར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་སྐུ་གསུམ་རྣམ་པར་འབྱེད་པའི་ལེའུ་སྟེ་གསུམ་པའོ།། །།དེ་ནས་བྱང་ཆུབ་སེམས་དཔའ་མཛེས་པའི་ཏོག་བཅོམ་ལྡན་འདས་ཀྱི་སྤྱན་སྔར་མངོན་སུམ་དུ་ཤིན་ཏུ་གྱ་ནོམ་པའི་ཆོས་ཐོས་པས་དགའ་མགུ་རངས་པར་གྱུར་ཏེ། སེམས་རྩེ་གཅིག་ཏུ་ཡིད་ལ་བསམས་ནས་རང་གི་གནས་སུ་ཕྱིན་པ་དང་། མཚན་མོ་ཉལ་བའི་རྨི་ལམ་ན་གསེར་གྱི་རྔ་བོ་ཆེ་འོད་ཟེར་ཤིན་ཏུ་འབར་བ་ཉི་མའི་དཀྱིལ་འཁོར་དང་མཚུངས་པ་ཞིག་མཐོང་སྟེ། འོད་ཟེར་དེ་ལས་ཕྱོགས་བཅུའི་སངས་རྒྱས་ཚད་མེད་པ་རྣམས་རིན་པོ་ཆེའི་ཤིང་དྲུང་ན་བཻ་ཌཱུཪྱའི་གདན་ལ་བཞུགས་ནས་འཁོར་བརྒྱ་སྟོང་དུ་མས་ཡོངས་སུ་བསྐོར་བ་ལ་ཆོས་འཆད་པ་ཡང་མཐོང་། བྲམ་ཟེ་ཞིག་གིས་གསེར་གྱི་རྔ་བརྡུངས་པ་ལས་སྒྲ་ཆེན་པོ་བྱུང་སྟེ། སྒྲ་དེ་ལས་སྡིག་པ་བཤགས་པའི་ཆོས་ཀྱི་ཚིགས་སུ་བཅད་པ་ཤིན་ཏུ་གྱ་ནོམ་པ་དག་བསྟན་པ་ཡང་མཛེས་པའི་ཏོག་གིས་ཐོས་པས་ཐམས་ཅད་མ་ལུས་པར་ཡིད་ལ་བཟུང་སྟེ་དྲན་པ་རྩེ་གཅིག་ཏུ་གནས་པར་གྱུར་ཏོ། །ནམ་ལངས་པ་དང་འཁོར་བརྒྱ་སྟོང་ཚད་མེད་པ་མང་པོས་ཡོངས་སུ་བསྐོར་ཏེ་མཆོད་པའི་ཡོ་བྱད་རྣམས་ཐོགས་ནས་རྒྱལ་པོའི་ཁབ་ཀྱི་གྲོང་ཁྱེར་ནས་ཕྱིར་བྱུང་སྟེ། བྱ་རྒོད་ཕུང་པོའི་རི་ག་ལ་བ་དེར་དོང་ནས་བཅོམ་ལྡན་འདས་ཀྱི་སྤྱན་སྔར་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་མེ་ཏོག་དང་སྤོས་དག་བཀྲམ་སྟེ། གཡས་ཕྱོགས་སུ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དེ་ཐལ་མོ་སྦྱར་ནས་གུས་པས་
བཅོམ་ལྡན་འདས་ཀྱི་ཞལ་དུ་བལྟས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་གཡར་ལམ་ན་བྲམ་ཟེ་ཞིག་གིས་གསེར་གྱི་རྔ་ཤིན་ཏུ་གྱ་ནོམ་པ་བརྡུངས་པ་ལས་སྒྲ་ཆེན་པོ་བྱུང་སྟེ།སྒྲ་དེ་ལས་སྡིག་པ་བཤགས་པའི་ཆོས་ཀྱི་ཚིགས་སུ་བཅད་པ་ཤིན་ཏུ་གྱ་ནོམ་པ་དག་བསྟན་པ་བདག་གིས་ཐམས་ཅད་ཡོངས་སུ་བཟུང་སྟེ་དྲན་ལགས་ན། བཅོམ་ལྡན་འདས་ཐུགས་རྗེ་ཆེན་པོས་བདག་གིས་བཤད་པར་གནང་བར་མཛད་དུ་གསོལ། དེ་ནས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། །བདག་གིས་མདང་སུམ་གཡར་ལམ་ན། །གསེར་གྱི་རྔ་ནི་ཆེན་པོ་ཞིག །དབྱིབས་ནི་ཤིན་ཏུ་ཁྱད་པར་འཕགས། །ཀུན་ནས་འོད་ཟེར་ཁྱབ་པར་ལྡན། །ཉི་མའི་དཀྱིལ་འཁོར་མཚུངས་པས་ན། །སྣང་བས་ཀུན་ཏུ་ཁྱབ་པར་བགྱིས། །ཕྱོགས་བཅུའི་འཇིག་རྟེན་གང་བར་མཐོང་། །སངས་རྒྱས་མང་པོ་ཐམས་ཅད་ཀུན། །རིན་ཆེན་ལྗོན་ཤིང་དྲུང་དག་ཏུ། །བཻ་ཌཱུཪྱ་ཡི་གདན་བཞུགས་ཏེ། །འཁོར་ནི་བརྒྱ་སྟོང་ཚད་མེད་སྙེད། །གུས་པས་ཡོངས་སུ་བསྐོར་བར་མཐོང་། །དེ་ནས་བྲམ་ཟེ་ཞིག་གིས་ནི། །གསེར་གྱི་རྔ་ཆེན་བརྡུངས་པས་ན། །རྔ་ཆེན་དེ་ཡི་སྒྲ་ལས་ནི། །ཚིགས་བཅད་གྱ་ནོམ་འདི་སྐད་སྨྲས། །གསེར་འོད་རྔ་ལས་གྱ་ནོམ་སྒྲ་བྱུང་བས། །སྟོང་གསུམ་ཆེན་པོའི་འཇིག་རྟེན་ཀུན་ཁྱབ་ནས། །ངན་སོང་གསུམ་གྱི་སྡུག་བསྔལ་མི་བཟད་དང་། །མི་ཡི་སྡུག་བསྔལ་མང་པོ་གང་ཡིན་པ། །གསེར་གྱི་རྔ་སྒྲ་མཐུ་སྟོབས་དབང་གིས་ནི། །ཉོན་མོངས་སྒྲིབ་པ་ཐམས་ཅད་གཏན་ཞི་ནས། །དཔེར་ན་ཐུབ་དབང་བཅོམ་ལྡན་ཇི་བཞིན་དུ། །འཇིགས་པ་བསལ་ནས་བདེ་བ་ཉིད་དུ་ཤོག །བཅོམ་ལྡན་འཁོར་བའི་རྒྱ་མཚོ་ཆེན་པོར་ནི། །སྤྱོད་བསགས་ཐམས་ཅད་མཁྱེན་ནི་བསྒྲུབས་པས་ན། །སེམས་ཅན་བྱང་ཆུབ་ཡན་ལག་ལྡན་མཛད་ནས། །མཐར་ནི་ཡོན་ཏན་རྒྱ་མཚོ་ཕྱོགས་པར་མཛད། །གསེར་འོད་དམ་པའི་རྔ་ཆེན་སྒྲ་འདི་ནི། །ཐོས་པ་ཀུན་ནི་ཚངས་དབྱངས་ཐོབ་པར་ཤོག །བླ་མེད་བྱང་ཆུབ་འབྲས་བུ་
ཐོབ་གྱུར་ནས། །ཆོས་ཀྱི་འཁོར་ལོ་གྱ་ནོམ་རྟག་བསྐོར་ཤོག །ཚེ་ནི་བསྐལ་པ་བསམ་མི་ཁྱབ་གནས་ནས། །ཇི་བཞིན་ཆོས་བཤད་སྐྱེ་དགུ་ཕན་བྱེད་ཤོག །ཉོན་མོངས་སྡུག་བསྔལ་མང་པོ་རྒྱུན་བཅད་ནས། །འདོད་སྡང་གཏི་མུག་ལ་སོགས་ཞི་བར་ཤོག །སེམས་ཅན་གང་ཞིག་ངན་འགྲོ་གནས་གྱུར་ནས། །མེ་ཆེན་རབ་འབར་ལུས་ཀུན་ཁྱབ་པ་དག །རྔ་སྒྲ་དམ་པ་འདི་ནི་ཐོས་གྱུར་ན། །སྡུག་བསྔལ་བྲལ་ནས་སངས་རྒྱས་སྐྱབས་འགྲོར་ཤོག །ཐམས་ཅད་སྔོན་གནས་ཤེས་པ་གྲུབ་གྱུར་ནས། །འདས་པའི་ཚེ་རབས་བརྒྱ་སྟོང་དྲན་པར་ཤོག །ཐུབ་པའི་གཙོ་བོ་ཡང་དག་དྲན་གྱུར་ནས། །དེ་བཞིན་གཤེགས་བསྟན་ཟབ་མོ་ཐོས་པར་ཤོག །གསེར་གྱི་རྔ་དབྱངས་དམ་པ་ཐོས་པའི་དབང། །རྟག་པར་སངས་རྒྱས་རྣམས་ནི་ཉེར་བསྟེན་ནས། །ཐམས་ཅད་སྡིག་པའི་ལས་ནི་ཡོངས་སྤངས་ཏེ། །རྣམ་དག་དགེ་ཕྱོགས་འབའ་ཞིག་སྤྱོད་པར་ཤོག །ལྷ་དང་མི་ཡི་སྲོག་ཆགས་ཐམས་ཅད་ཀུན། །གུས་པའི་སྨོན་ལམ་རྩེ་གཅིག་འདེབས་པ་དག །གསེར་གྱི་རྔ་སྒྲ་དམ་པ་ཐོས་གྱུར་ནས། །བསམ་པ་རྣམས་ནི་ཡོངས་སུ་རྫོགས་པར་འགྱུར། ། སེམས་ཅན་གང་ཞིག་མནར་མེད་ལྷུང་གྱུར་ནས། །དམྱལ་བའི་འབར་མེས་ལུས་ནི་ཉོན་མོངས་ཏེ། །མགོན་སྐྱབས་མེད་ཅིང་འཁོར་བར་གང་གནས་པ། །ཐོས་པར་གྱུར་ན་སྡུག་བསྔལ་ཞི་བར་འགྱུར། །ལྷ་མི་ཡི་དགས་དུད་འགྲོའི་སྐྱེ་གནས་སུ། །སྡུག་བསྔལ་བགེགས་མང་མངོན་དུ་མྱོང་འགྱུར་བ། །གསེར་གྱི་རྔ་དབྱངས་དམ་པ་ཐོས་གྱུར་ན། །སྡུག་བསྔལ་སྤངས་ནས་ཐར་པ་ཐོབ་པར་འགྱུར། །ད་ལྟར་ཕྱོགས་བཅུའི་འཇིག་རྟེན་ན། །རྟག་ཏུ་བཞུགས་པ་རྐང་གཉིས་གཙོ། །ཐུགས་རྗེ་ཆེན་པོ་ཐུགས་ཀྱིས་ནི། །བརྩེ་བས་བདག་ལ་དགོངས་སུ་གསོལ། །སེམས་ཅན་གང་ཞིག་སྐྱབས་མ་མཆིས། །མགོན་ནི་བགྱིད་པ་མ་མཆིས་པ། །དེ་ལྟ་བུ་ཡི་རྣམ་པ་ལ། །སྐྱབས་ཆེན་དག་ནི་བགྱིད་པར་ཤོག །བདག་གིས་སྔོན་ནི་བགྱིས་པའི་སྡིག། །ལས་ངན་ཤིན་ཏུ་
ལྕི་བ་རྣམས། །དེང་བདག་སྟོབས་བཅུའི་སྤྱན་སྔར་ནི། །ཐམས་ཅད་རྩེ་གཅིག་རབ་ཏུ་བཤགས། །བདག་གིས་སངས་རྒྱས་ཡིད་མ་ཆེས། །བླ་མ་གཉེན་བཤེས་མ་གུས་དང་། །དགེ་བ་མང་པོ་མ་སྤྱད་པས། །རྟག་ཏུ་ལས་ངན་བགྱིས་པའམ། ། བདག་གིས་མཐོ་བཙུན་རུས་རིགས་དང་། །ལོངས་སྤྱོད་དག་ནི་སྙེམས་པ་དང་། །དར་ལ་བབ་པས་དྲེགས་གྱུར་ནས། །རྟག་ཏུ་ལས་ངན་བགྱིས་པའམ། །རྟག་ཏུ་ལོག་པའི་བསམ་བསྐྱེད་ནས། །ངག་གིས་ཚིག་ངན་སྨྲས་པ་དང་། །ཁ་ན་མ་ཐོ་མ་མཐོང་ནས། །རྟག་ཏུ་ལས་ངན་བགྱིས་པ་འམ། །རྟག་ཏུ་བྱིས་པའི་བློ་སྤྱད་ནས། །མ་རིག་མུན་པས་སེམས་གཡོགས་དང་། །མི་དགེའི་གྲོགས་པོའི་རྗེས་འབྲངས་ནས། །རྟག་ཏུ་ལས་ངན་བགྱིས་པ་འམ། །རྩེད་མོ་དགའ་བ་རྣམས་ཀྱི་རྒྱུས། །མྱ་ངན་དག་དང་ལྡན་འགྱུར་ཞིང་། །འདོད་ཆགས་ཞེ་སྡང་དཀྲིས་པས་ན། །དེ་སླད་སྡིག་རྣམས་བགྱིས་པ་འམ། །མི་དགེའི་གྲོགས་པོ་བསྟེན་པ་དང་། །ཕྲག་དོག་སེར་སྣ་བསམ་པ་དང་། །དབུལ་ཕོངས་གྱ་གྱུ་སྤྱད་པས་ན། །དེ་སླད་སྡིག་རྣམས་བགྱིས་པ་འམ། །སྡིག་མང་དག་ལ་མི་མོས་ཀྱང་། །འཇིགས་སྐྲག་དག་དང་བཅས་པའམ། །རང་དབང་དག་ནི་མ་མཆིས་པས། །དེ་སླད་སྡིག་རྣམས་བགྱིས་པ་འམ། །རྣམ་པར་གཡེང་བའི་བསམ་པ་དང་། །ཁོང་ཁྲོ་འཁོན་དུ་འཛིན་པ་དང་། །བཀྲེས་སྐོམ་དག་གིས་གདུངས་པའི་རྒྱུས། །དེ་སླད་སྡིག་རྣམས་བགྱིས་པ་འམ། །བཟའ་དང་བཏུང་དང་གོས་དག་དང་། །བུད་མེད་དག་ལ་ཆགས་སྲིད་པའི། །ཉོན་མོངས་མེས་ནི་བསྲེགས་པས་ན། །དེ་སླད་སྡིག་རྣམས་བགྱིས་པ་འམ། །སངས་རྒྱས་ཆོས་དང་དགེ་འདུན་ལ། །གུས་པའི་སེམས་ནི་མ་སྐྱེད་པའི། །འདི་འདྲའི་སྡིག་མང་གང་བགྱིས་པ། །དེང་བདག་ཐམས་ཅད་སོ་སོར་བཤགས། །རང་རྒྱལ་བྱང་ཆུབ་སེམས་དཔའ་ལ། །གུས་པའི་སེམས་ནི་མ་མཆིས་པའི། །འདི་འདྲའི་སྡིག་མང་གང་བགྱིས་པ། །དེང་བདག་ཐམས་ཅད་སོ་སོར་བཤགས། །མི་ཤེས་དམ་ཆོས་སྐུར་པ་དང་། །ཕ་མ་སྲི་ཞུ་མ་
བགྱིས་པའི། །དེ་འདྲའི་སྡིག་མང་གང་བགྱིས་པ། །དེང་བདག་ཐམས་ཅད་སོ་སོར་བཤགས། །གཏི་མུག་དང་ནི་ང་རྒྱལ་དང་། །འདོད་ཆགས་ཞེ་སྡང་མཐུ་ཡིས་ནི། །དེ་འདྲའི་སྡིག་མང་གང་བགྱིས་པ། །དེང་བདག་ཐམས་ཅད་སོ་སོར་བཤགས། །བདག་གིས་ཕྱོགས་བཅུའི་འཇིག་རྟེན་ཁམས། །སངས་རྒྱས་གྲངས་མེད་གང་མཆོད་པ། །སེམས་ཅན་རྣམས་ནི་རབ་དྲངས་ནས། །སྡུག་བསྔལ་བགེགས་རྣམས་བྲལ་བགྱིད་ཤོག །སེམས་ཅན་དག་ནི་ཐམས་ཅད་ཀུན། །ས་བཅུ་ལ་ནི་གནས་གྱུར་ཏེ། །བསོད་ནམས་ཡེ་ཤེས་ཡོངས་རྫོགས་ནས། །མངོན་སངས་སྐྱེ་དགུ་འདྲེན་པར་ཤོག །བདག་གིས་སེམས་ཅན་ཀུན་གྱི་སླད། །བསྐལ་བ་བརྒྱ་སྟོང་དཀའ་སྤྱད་ནས། །ཤེས་རབ་ཆེན་པོའི་སྟོབས་ཀྱིས་ནི། །སྡུག་བསྔལ་རྒྱ་མཚོ་མཐར་བགྱིད་ཤོག །བདག་གིས་སྲོག་ཆགས་ཀུན་གྱི་སླད། །གསེར་འོད་མཆོག་ཏུ་རྣམ་པར་རྒྱལ། །ཟབ་མོའི་མདོ་སྡེ་བཤད་ནས་ནི། །ལས་ངན་རྣམས་ནི་བསལ་བར་ཤོག །གང་ཞིག་བསྐལ་པ་བརྒྱ་སྟོང་དུ། །སྡིག་ལྕི་དག་ནི་བགྱིས་པ་རྣམས། །སྐད་ཅིག་ཙམ་ཞིག་མཐོལ་བཤགས་ན། །སྡིག་པ་མང་པོ་མ་ལུས་བྱང་། །གསེར་འོད་དམ་པ་འདི་བཞིན་དུ། །དེ་ལྟར་བཤགས་པ་བགྱིས་གྱུར་ན། །སྡུག་བསྔལ་ལས་མང་ཐམས་ཅད་ཀུན། །འདི་ཡི་དབང་གིས་མྱུར་དུ་འབྱང་། །ཏིང་འཛིན་མཆོག་ནི་བརྒྱ་སྟོང་དང་། །བསམ་གྱིས་མི་ཁྱབ་གཟུངས་རྣམས་དང་། །དབང་སྟོབས་བྱང་ཆུབ་ལམ་ཡན་ལག །རྟག་ཏུ་སྒོམ་ཡང་སྐྱོ་མི་འགྱུར། །བདག་གིས་རིན་ཆེན་ཕུན་ཚོགས་ནས། །ས་བཅུ་ལ་ནི་ཕྱིན་གྱུར་ནས། །སངས་རྒྱས་ཡོན་ཏན་ཡོངས་རྫོགས་ཏེ། །འཁོར་བར་འབབ་པ་སྒྲོལ་བར་ཤོག ། བདག་གིས་སངས་རྒྱས་མཚོ་ལས་ནི། །ཤིན་ཏུ་ཟབ་མོ་ཡོན་ཏན་མཛོད། །གྱ་ནོམ་ཡེ་ཤེས་བསམ་དཀའ་བ། །ཕུན་སུམ་ཚོགས་པ་ཐོབ་པར་ཤོག །ཕྱོགས་བཅུའི་སངས་རྒྱས་ཐམས་ཅད་ཀུན། །བདག་ལ་སོ་སོར་གཟིགས་དགོངས་ནས། །ཐུགས་རྗེ་ཆེན་པོའི་
ཐུགས་ཀྱིས་ནི། །བདག་གིས་བཤགས་པ་བཞེས་སུ་གསོལ། །བདག་གིས་བསྐལ་པ་མང་པོར་ནི། །ལས་ངན་མང་པོ་བགྱིས་པས་ན། །དེ་ཡི་དབང་གིས་སྡུག་བསྔལ་མྱོང་། །ཐུགས་རྗེས་བྱང་བར་མཛད་པར་སྨོན། །བདག་གིས་ལས་ངན་མང་བགྱིས་པ། །རྟག་ཏུ་མྱ་ངན་འཇིགས་སེམས་སྐྱེས། །སྤྱོད་ལམ་བཞི་པོ་ཀུན་ཏུ་ཡང་། །དགའ་བའི་འདུ་ཤེས་ཡོད་མ་མཆིས། །སངས་རྒྱས་ཐུགས་རྗེ་ཆེན་པོ་ལྡན། །སེམས་ཅན་འཇིགས་པ་སེལ་མཛད་ན། །བདག་གིས་བཤགས་པ་བཞེས་ནས་ནི། །མྱ་ངན་སྡུག་བསྔལ་བྲལ་བར་སྨོན། །བདག་ལ་ཉོན་མོངས་སྒྲིབ་པ་དང་། །རྣམ་སྨིན་ལས་ནི་ཅི་མཆིས་པ། །ཐུགས་རྗེ་ཆེན་པོའི་ཆབ་ཀྱིས་ནི། །རབ་བཀྲུས་བྱང་བར་མཛད་པར་སྨོན། །བདག་གིས་སྔོན་ཆད་སྡིག་པ་དང་། །ད་ལྟར་ལས་ངན་བགྱིས་པ་རྣམས། ། རྩེ་གཅིག་སེམས་ཀྱིས་མནོལ་བཤགས་ན། །ཐམས་ཅད་རབ་ཏུ་བྱང་བར་ཤོག །མ་འོངས་པ་ཡི་ལས་ངན་རྣམས། །བསྡམས་ཏེ་སློང་བར་ཡོང་མི་བགྱིད། །གལ་ཏེ་འགལ་བ་མཆིས་ན་ཡང་། །ནམས་ཀྱང་འཆབ་པར་ཡོང་མི་བགྱིད། །ལུས་གསུམ་ངག་གི་རྣམ་པ་བཞི། །ཡིད་ཀྱི་ལས་ནི་རྣམ་པ་གསུམ། །སེམས་ཅན་རྣམས་ནི་འཆིང་བགྱིད་པས། །ཐོག་མ་མེད་ནས་རྒྱུན་མི་འཆད། །སྤྱོད་པ་འདི་གསུམ་དབང་གིས་ན། །མི་དགེ་ལས་བཅུ་བགྱིས་གྱུར་པས། །དེ་འདྲའི་ནོངས་པ་མང་པོ་རྣམས། །དེ་དག་ཐམས་ཅད་སོ་སོར་བཤགས། །བདག་གིས་ལས་ངན་མང་བགྱིས་པས། །སྡུག་བསྔལ་རྣམ་སྨིན་རང་ཉིད་མྱོང་། །སངས་རྒྱས་རྣམས་ཀྱི་སྤྱན་སྔར་ནི། །བསམ་པ་ཐག་པས་སོ་སོར་བཤགས། །འཛམ་བུའི་གླིང་ནི་འདི་དག་དང་། །འཇིག་རྟེན་ཁམས་ནི་གཞན་དག་ཏུ། །དགེ་བའི་ལས་མང་ཅི་མཆིས་པ། །དེང་བདག་ཐམས་ཅད་ཡི་རང་ངོ་། །མི་དགེ་ལས་བཅུ་རབ་སྤངས་ནས། །དགེ་བཅུ་ལམ་ནི་མངོན་བསྒྲུབས་ཏེ། །ས་བཅུ་དག་ལ་རབ་གནས་ནས། །ཕྱོགས་བཅུའི་སངས་རྒྱས་རྟག་མཐོང་སྨོན། །བདག་གིས་
ལུས་དང་ངག་ཡིད་ཀྱིས། བསོད་ནམས་ཡེ་ཤེས་ལས་བསྒྲུབས་པའི། །དགེ་བའི་རྩ་བ་འདི་ཡི་མཐུས། །བླ་མེད་ཡེ་ཤེས་མྱུར་གྲུབ་ཤོག །དེང་བདག་སྟོབས་བཅུའི་སྤྱན་སྔར་མངོན་སུམ་དུ། །སྡུག་བསྔལ་བགེགས་མང་སྣ་ཚོགས་མཐོལ་ཞིང་བཤགས། །བྱིས་པ་སྲིད་གསུམ་རྨོངས་པའི་བགེགས་དག་དང་། །རྟག་པར་ལས་ངན་ལྕི་བར་བགྱིས་པའི་བགེགས། །བདག་གིས་ལོག་པའི་འདོད་པས་བསགས་པའི་བགེགས། །རྟག་ཏུ་སྲིད་བསྐྱེད་འཁོར་བར་འགྱུར་བའི་བགེགས། །འཇིག་རྟེན་འདི་ལ་མངོན་ཞེན་ཆགས་པའི་བགེགས། ། བྱིས་པ་ཐམས་ཅད་ཀུན་གྱི་ཉོན་མོངས་བགེགས། །སེམས་མྱོས་རྣམ་གཡེང་ཕྱིན་ཅི་ལོག་པའི་བགེགས། །མི་དགེ་གྲོགས་པོ་དག་ལ་བརྟེན་པའི་བགེགས། །འཁོར་བ་དག་ལ་འདོད་ཆགས་ཞེན་པའི་བགེགས། །ཞེ་སྡང་གཏི་མུག་གླེན་པས་སྡིག་བགྱིས་བགེགས། ། མི་ཁོམ་བརྒྱད་སྐྱེ་མི་དགེ་གྲོགས་པོའི་བགེགས། །བསོད་ནམས་ཡོན་ཏན་མ་བསགས་པ་ཡི་བགེགས། །དེང་བདག་རྒྱལ་བ་ཀུན་གྱི་སྤྱན་སྔར་ནི། །སྡིག་པའི་ལས་ངན་མཐའ་ཡས་བགྱིས་པ་བཤགས། །དེང་བདག་བདེ་གཤེགས་ཀུན་ལ་སྐྱབས་སུ་མཆི། ། བླ་མེད་ཡོན་ཏན་མཚོ་ལ་བདག་ཕྱག་འཚལ། །གསེར་གྱི་རི་ལྟར་ཕྱོགས་བཅུ་གསལ་མཛད་པ། །བྱམས་དང་ཐུགས་རྗེས་བདག་ནི་གཟུང་དུ་གསོལ། །སྐུ་ནི་གསེར་མདོག་རྣམ་དག་དྲི་མི་མངའ། །སྤྱན་ནི་རྣམ་དག་བཻ་ཌཱུཪྱ་དང་འདྲ། །དཔལ་དང་གཟི་བརྗིད་གྲགས་དང་ལྡན་པའི་གཙོ། །ཐུགས་རྗེ་ཤེས་རབ་ཉི་མས་མུན་སེལ་བ། །སངས་རྒྱས་ཉི་མའི་འོད་ཀྱིས་ཀུན་གསལ་མཛད། །ཤིན་ཏུ་རྣམ་དག་དྲི་མེད་རྡུལ་དང་བྲལ། །ཐུབ་པའི་ཟླ་བས་གསལ་མཛད་རབ་བསིལ་བ། །སེམས་ཅན་ཉོན་མོངས་གདུང་བ་སེལ་བར་མཛད། །སུམ་ཅུ་རྩ་གཉིས་མཚན་གྱིས་རབ་བརྒྱན་ཅིང་། །དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས། །ཡོན་ཏན་བསམ་དཀའ་མཚུངས་པ་མ་མཆིས་པས། །ཉི་འོད་ལྟ་བུར་འཇིག་རྟེན་གསལ་བར་མཛད། །ཁ་དོག་བཻ་ཌཱུཪྱ་འདྲ་དྲི་མེད་མངའ། །ཟླ་བ་ཉ་
ལྟར་ནམ་མཁའ་དག་ལ་བཞུགས། །ཤེལ་མཆོག་དམ་པའི་དྲ་བས་གསེར་སྐུ་བསྒྲིབས། །འོད་ཟེར་སྣ་ཚོགས་དག་གིས་རབ་ཏུ་བརྒྱན། །འཁོར་བའི་སྡུག་བསྔལ་ཆུ་བོའི་ནང་དུ་ནི། །རྒ་ནད་མྱ་ངན་ཆུ་ཡིས་དེད་པས་ན། །དེ་འདྲའི་སྡུག་བསྔལ་རྒྱ་མཚོ་བཟོད་དཀའ་བ། ། སངས་རྒྱས་ཉི་མའི་འོད་ཀྱིས་གཏན་དུ་བསྐམས། །དེང་བདག་སྟོང་གསུམ་འཇིག་རྟེན་རྨད་བྱུང་གཙོ། །ཐམས་ཅད་མཁྱེན་པ་སྤྱི་བཏུད་ཕྱག་འཚལ་ལོ། །འོད་ཟེར་རབ་གསལ་གསེར་མདོག་འདྲ་བའི་སྐུ། །དཔེ་བྱད་དམ་པ་སྣ་ཚོགས་དག་གིས་བརྒྱན། །ཇི་ལྟར་རྒྱ་མཚོའི་ཆུ་ཚད་ཤེས་དཀའ་ཞིང་། །ས་ཆེན་རྡུལ་ནི་བགྲང་དུ་མ་མཆིས་དང་། །ཇི་ལྟར་རི་རབ་སྲང་གྲངས་གཞལ་དཀའ་ཞིང་། །ནམ་མཁའ་དག་ལ་མུ་མཐའ་མ་མཆིས་ལྟར། །སངས་རྒྱས་རྣམས་ཀྱི་ཡོན་ཏན་དེ་བཞིན་ཏེ། །སེམས་ཅན་ཐམས་ཅད་ཀུན་གྱིས་རིག་མི་འགྱུར། །བསྐལ་པ་ཚད་མེད་སྙེད་དུ་རབ་བསམས་ཀྱང་། །ཡོན་ཏན་རྒྱ་མཚོའི་ཕ་མཐའ་རྟོགས་མི་འགྱུར། །ས་ཆེན་འདི་ཡི་རི་བྲག་ཇི་སྙེད་པ། །རྡུལ་ཕྲན་བཞིན་དུ་གསེས་ཀྱང་བརྩིར་རུང་ཞིང་། །རྒྱ་མཚོའི་ཆབ་ནི་སྤུ་རྩེས་གཞལ་རུང་ཡང་། །སངས་རྒྱས་ཡོན་ཏན་བགྲང་བར་རྔོ་མི་ཐོགས། ། སེམས་ཅན་ཐམས་ཅད་ལྷན་ཅིག་འདུས་ནས་ནི། །བཅོམ་ལྡན་གྲགས་པའི་ཆོས་ནི་ཐམས་ཅད་དང་། །མཚན་བཟང་རྣམ་དག་དཀོན་མཆོག་བསྔགས་བརྗོད་ཀྱང་། །དེ་ཡི་ཕ་མཐའ་དཔག་པར་ཡོངས་མི་འགྱུར། །བདག་གི་དགེ་བའི་ལས་མང་ཅི་མཆིས་པས། །མྱུར་དུ་བླ་ན་མ་མཆིས་གཙོ་གྲུབ་ནས། །ཡང་དག་ཆོས་བཤད་སྐྱེ་དགུ་ཕན་བཏགས་ཏེ། །ཐམས་ཅད་སྡུག་བསྔལ་མང་ལས་ཐར་བགྱིད་ཤོག །བདུད་ཀྱི་དམག་ཚོགས་སྟོབས་ཆེན་རབ་བཏུལ་ནས། །བླ་མེད་དམ་ཆོས་འཁོར་ལོ་བསྐོར་བར་ཤོག །བསྐལ་པ་གྲངས་མེད་བསམ་མི་ཁྱབ་གནས་ནས། །བདུད་རྩིའི་རོ་ཡིས་སེམས་ཅན་ཚིམ་བགྱིད་ཤོག །འདས་པའི་རྒྱལ་བ་རྣམས་ནི་ཇི་ལྟ་བཞིན། །ཕ་རོལ་ཕྱིན་དྲུག་ཡོངས་སུ་རྫོགས་བགྱིད་ཤོག །འདོད་ཆགས་ཞེ་སྡང་གཏི་མུག་ཞི་གྱུར་ནས། །ཉོན་མོངས་བཏུལ་ཏེ་སྡུག་བསྔལ་བསལ་བར་ཤོག །བདག་
གིས་རྟག་ཏུ་ཚེ་རབས་དྲན་གྱུར་ནས། །འདས་པའི་སྐྱེ་བ་བརྒྱ་སྟོང་དྲན་པ་དང་། །རྟག་པར་ཐུབ་པའི་གཙོ་བོ་དྲན་གྱུར་ཏེ། །སངས་རྒྱས་ཟབ་མོའི་ཆོས་ནི་ཐོས་པར་ཤོག །བདག་གི་དགེ་བའི་ལས་ནི་འདི་རྣམས་ཀྱིས། །རྒྱལ་བ་ཚད་མེད་དག་ལ་བསྙེན་བཀུར་ནས། །མི་དགེ་བ་ཡི་རྒྱུ་ཀུན་ཡོངས་སྤངས་ཏེ། །ཡང་དག་དམ་ཆོས་རྟག་ཏུ་སྒྲུབ་པར་ཤོག །འཇིག་རྟེན་ཐམས་ཅད་སེམས་ཅན་ཇི་སྙེད་པ། །སྡུག་བསྔལ་སྤངས་ནས་བདེ་བ་ཐོབ་པར་ཤོག །དབང་པོ་མ་ཚང་ཇི་སྙེད་མཆིས་པ་དག །དེ་དག་ལུས་ཀྱི་མཚན་རྣམས་ཡོངས་རྫོགས་ཤོག །སེམས་ཅན་གང་ཞིག་ནད་ཀྱི་སྡུག་བསྔལ་གྱིས། །ལུས་ནི་ཉམ་ཆུང་སྐྱབས་བགྱིད་མ་མཆིས་པ། །ཐམས་ཅད་ནད་ཀྱི་སྡུག་བསྔལ་ར་བཞི་ནས། །དབང་པོ་ཁ་དོག་མཐུ་ནི་རྒྱས་པར་ཤོག །གང་གིས་རྒྱལ་ཆོས་འགལ་བགྱིས་བསད་ལ་ཐུག །སྡུག་བསྔལ་མང་གཙེས་མྱ་ངན་རབ་སྐྱེས་ནས། ། དེ་ཡིས་སྡུག་བསྔལ་མི་བཟད་མྱོང་བའི་ཚེ། །མགོན་སྐྱབས་དག་ནི་བགྱིད་པ་མ་མཆིས་དང་། །གང་དག་གཞུ་བརྡེག་མཚོན་ཆས་བཅིངས་པ་དང་། །གནོད་བྱེད་ཡོ་བྱད་སྣ་ཚོགས་ལུས་ཉོན་མོངས། །མྱ་ངན་བརྒྱ་སྟོང་ཚད་མེད་མྱོང་བ་ན། །ལུས་སེམས་རབ་གཟེར་བདེ་བ་ཅུང་ཟད་མེད། །དེ་དག་ཐམས་ཅད་བཅིངས་ཤིང་བརྡེགས་པ་དང་། །སྡུག་བསྔལ་ཉོན་མོངས་དག་ལས་ཐར་བར་ཤོག །བསད་ལ་ཐུག་པ་དག་ནི་སྲོག་ཐོབ་ནས། །སྡུག་བསྔལ་མང་པོ་ཐམས་ཅད་གཏན་ཟད་ཤོག །སེམས་ཅན་གང་ཞིག་བཀྲེས་སྐོམ་གདུངས་གྱུར་པ། །རོ་མཆོག་དམ་པ་སྣ་ཚོགས་འཐོབ་པར་ཤོག །ལོང་བས་གཟུགས་མཐོང་འོན་པས་སྒྲ་ཐོས་དང་། །ཐིང་པོས་འགྲོ་ནུས་ལྐུགས་པ་སྨྲ་ནུས་ཤོག །དབུལ་ཕོངས་སེམས་ཅན་རིན་ཆེན་གཏེར་ཐོབ་ནས། །བང་མཛོད་རབ་རྒྱས་རྒུད་པ་མ་མཆིས་ཏེ། །ཐམས་ཅད་བདེ་མཆོག་དམ་པ་རབ་རྙེད་ནས། །སེམས་ཅན་སྡུག་བསྔལ་མྱོང་བ་མ་མཆིས་ཤོག །ལྷ་མི་ཐམས་ཅད་མཐོང་བར་མོས་པ་ཡི། །བྱད་བཞིན་དམ་པ་རབ་མཛེས་ཐོབ་གྱུར་ནས། །བདེ་བ་ཚད་མེད་མངོན་སུམ་མྱོང་གྱུར་ཏེ། །ལོངས་སྤྱོད་འབྱོར་རྒྱས་བསོད་ནམས་ལྡན་པར་ཤོག །སེམས་ཅན་
དེ་དག་རོལ་མོ་བསམས་པ་བཞིན། །སྒྲ་མཆོག་མང་པོ་མངོན་དུ་འབྱུང་བར་ཤོག །ཆུ་འདོད་གསེར་གྱི་མེ་ཏོག་སྟེང་འཕྱོ་བ། །རབ་བསིལ་རྫིང་བུ་མངོན་དུ་སྣང་བར་ཤོག །སེམས་ཅན་དེ་དག་ཇི་ལྟར་བསམས་པ་བཞིན། །བཟའ་བཏུང་གོས་དང་ཁྲི་དང་སྟན་རྣམས་དང་། །གསེར་དངུལ་དང་ནི་རིན་ཆེན་བཻ་ཌཱུཪྱ། །རྒྱན་ཕྲེང་ཐམས་ཅད་ཕུན་སུམ་ཚོགས་པར་ཤོག །སེམས་ཅན་མི་སྙན་ཐོས་པར་མི་འགྱུར་ཞིང་། །ཕན་ཚུན་མི་མཐུན་མཐོང་བར་མ་གྱུར་ཅིག །ལུས་ཀྱི་བྱད་བཞིན་ཐམས་ཅད་རབ་མཛེས་ཤིང་། །སོ་སོར་བྱམས་པའི་སེམས་ཀྱིས་བརྩེ་བགྱིད་ཤོག །འཇིག་རྟེན་བདེ་བའི་ཡོ་བྱད་ལོངས་སྤྱོད་རྣམས། །ཡིད་ལ་བསམས་ཚེ་ཐམས་ཅད་འབྱོར་པར་ཤོག །ནོར་རྣམས་རྙེད་པ་ཕོངས་པ་མ་མཆིས་པར། །བགོ་བཤའ་བགྱིས་ཏེ་སེམས་ཅན་གཏོང་བར་ཤོག །བདུག་སྤོས་ཕྱེ་མ་དང་ནི་བྱུག་སྤོས་དང་། ། མེ་ཏོག་སྣ་ཚོགས་ཁ་དོག་གཅིག་མིན་པ། །ཉིན་རེ་དུས་གསུམ་ཤིང་ལས་ལྷུང་གྱུར་ནས། །ཡིད་བཞིན་ལོངས་སྤྱོད་དགའ་བསྐྱེད་པར་ཤོག །སེམས་ཅན་ཐམས་ཅད་ཕྱོགས་བཅུའི་རྒྱལ་གཙོ་དང་། །ཐེག་གསུམ་རྣམ་དག་གྱ་ནོམ་ཆོས་ཀྱི་སྐུ། །བྱང་ཆུབ་སེམས་དཔའ་དང་ནི་རང་རྒྱལ་དང་། །ཉན་ཐོས་དགེ་འདུན་མཆོད་པ་བགྱིད་པར་ཤོག །རྟག་ཏུ་མ་རབས་དག་ཏུ་མི་སྐྱེ་ཞིང་། །མི་ཁོམ་བརྒྱད་པོ་དག་ཏུ་མི་ལྟུང་དང་། །དལ་འབྱོར་མི་ཡི་གཙོ་བོར་སྐྱེས་གྱུར་ཏེ། །ཕྱོགས་བཅུའི་སངས་རྒྱས་རིམ་གྲོ་བགྱིད་པར་ཤོག །རྟག་པར་ཕྱུག་པོ་དག་གི་ཁྱིམ་སྐྱེས་ཏེ། །ནོར་དང་རིན་ཆེན་བང་མཛོད་རྒྱས་པ་དང་། །བྱེད་བཞིན་གྲགས་པ་དཔེ་ཟླ་མ་མཆིས་ཏེ། །ཚེ་རིང་བསྐལ་པ་གྲངས་མེད་གནས་པར་ཤོག །བུད་མེད་ཐམས་ཅད་ཀུན་ནི་ཕོར་གྱུར་ནས། །དཔའ་ཞིང་སེམས་རྣོ་བློ་གྲོས་ཤིན་ཏུ་ཆེ། །ཐམས་ཅད་བྱང་ཆུབ་སེམས་དཔའི་ལམ་སྤྱད་ནས། །ཕ་རོལ་ཕྱིན་དྲུག་སྒྲུབ་ལ་བརྩོན་པར་ཤོག །རྟག་པར་ཕྱོགས་བཅུའི་སངས་རྒྱས་ཚད་མེད་སྙེད། །རིན་ཆེན་ཤིང་རྒྱལ་དྲུང་དུ་གཤེགས་ནས་ནི། །བཻ་ཌཱུཪྱ་ཡི་གདན་ལ་རབ་བཞུགས་ཏེ། །ཆོས་ཀྱི་འཁོར་ལོ་བསྐོར་བ་མཐོང་བར་
ཤོག །གལ་ཏེ་འདས་པ་དང་ནི་ད་ལྟར་ཚེ། །སྲིད་གསུམ་འཁོར་ནས་ལས་རྣམས་བགྱིས་པས་ན། །ཡིད་དུ་མི་མཆི་ངན་འགྲོ་ཐོབ་གྱུར་པ། །ཐམས་ཅད་མ་ལུས་གཏན་དུ་བྱང་བར་ཤོག །སེམས་ཅན་ཐམས་ཅད་སྲིད་པའི་རྒྱ་མཚོར་ནི། །འཁོར་བའི་ཞགས་པས་དམ་དུ་བཅིངས་པ་ནི། །ཤེས་རབ་རལ་གྲི་དག་གིས་བཅད་བསལ་ཏེ། །སྡུག་བསྔལ་སྤངས་ནས་བྱང་ཆུབ་མྱུར་ཐོབ་ཤོག །སེམས་ཅན་གང་གིས་འཛམ་གླིང་འདི་དག་དང་། །ཡང་ན་འཇིག་རྟེན་གཞན་དག་ཏུ་ཡང་རུང་། །བསོད་ནམས་རྒྱུན་མཆོག་སྣ་ཚོགས་ཅི་བསྒྲུབས་པ། ། དེ་དག་ཐམས་ཅད་ཀུན་ལ་ཡི་རང་ངོ་། །བསོད་ནམས་དངོས་པོ་དག་ལ་ཡི་རང་དང་། །ལུས་དང་ངག་ཡིད་དགེ་བ་མང་བགྱིས་དེས། །ལས་མཆོག་དམ་པ་འདི་དག་རྟག་འཕེལ་ནས། །བླ་མེད་བྱང་ཆུབ་ཆེན་པོ་མྱུར་ཐོབ་སྨོན། །ཕྱག་བགྱིས་སངས་རྒྱས་ཡོན་ཏན་བསྔགས་པ་དང་། །བསམ་པ་དང་ཞིང་རྙོག་པ་མ་མཆིས་པས། །བསྔོ་ཞིང་སྨོན་ལམ་བཏབ་པའི་བསོད་ནམས་དེས། །བསྐལ་པ་དྲུག་ཅུའི་ངན་འགྲོ་འདས་པར་སྨོན། །རིགས་ཀྱི་བུ་དང་རིགས་ཀྱི་བུ་མོ་དང་། །བྲམ་ཟེ་ལ་སོགས་རིགས་མཆོག་དམ་པ་རྣམས། །ཐལ་སྦྱར་རྩེ་གཅིག་སངས་རྒྱས་བསྔགས་བརྗོད་ན། །སྐྱེ་བ་རྟག་པར་ཀུན་དུ་ཚེ་རབས་དྲན། །དབང་པོ་ཚང་ཞིང་ལུས་ནི་ཡོངས་རྫོགས་ཏེ། །ཡོན་ཏན་དམ་པ་ཐམས་ཅད་ཕུན་ཚོགས་འགྱུར། །མ་འོངས་པ་ཡི་སྐྱེ་བ་ཐམས་ཅད་དུ། །རྟག་པར་ལྷ་མི་རྣམས་ཀྱིས་བལྟ་བར་ཤོག ། སངས་རྒྱས་གཅིག་དང་སངས་རྒྱས་བཅུ་དག་ལས། །དགེ་བའི་རྩ་བ་བསྒྲུབས་ནས་ཐོབ་པ་མིན། །སངས་རྒྱས་བརྒྱ་སྟོང་དགེ་རྩ་བསྐྱེད་པས་ན། །འགྱོད་ཚངས་ཆོས་འདི་ཐོས་པར་གྱུར་པ་ཡིན། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་གསོལ་པ་གསན་པ་དང་། བྱང་ཆུབ་སེམས་དཔའ་མཛེས་པའི་ཏོག་ལ་ལེགས་སོ་ལེགས་སོ་ཞེས་བསྔགས་པ་བརྗོད་ནས། །རིགས་ཀྱི་བུ་ཁྱོད་ཀྱིས་ཇི་ལྟར་རྨི་ལམ་དུ་གསེར་གྱི་རྔ་བོ་ཆེ་ལས་བྱུང་བའི་སྒྲས་དེ་བཞིན་གཤེགས་པའི་ཡོན་ཏན་བསྔགས་པ་བརྗོད་པ་དང་། འགྱོད་ཚངས་བྱ་བའི་ཆོས་བསྟན་པ་
མཐོང་བ་གང་ཡིན་པ་དེ་གང་ལ་ལ་ཞིག་གིས་ཐོས་པར་གྱུར་ན་བསོད་ནམས་ཤིན་ཏུ་མང་པོ་འཐོབ་པར་འགྱུར་ཞིང་སེམས་ཅན་ལ་རྒྱ་ཆེར་ཕན་འདོགས་པ་དང་། ཁ་ན་མ་ཐོ་བའི་སྒྲིབ་པ་ཡོངས་སུ་བྱང་བར་འགྱུར་རོ། །ཁྱོད་ཀྱི་ལས་མཆོག་དམ་པ་འདི་དག་ཐམས་ཅད་ནི་འདས་པའི་དུས་སུ་བསྔགས་པ་བརྗོད་ཅིང་སྨོན་ལམ་བཏབ་པའི་སྔོན་གྱི་བག་ཆགས་ཀྱི་རྒྱུ་རྐྱེན་དང་། དེ་བཞིན་གཤེགས་པ་རྣམས་ཀྱིས་བྱིན་གྱིས་བརླབས་པའི་མཐུས་རྒྱུ་རྐྱེན་འདི་དག་ཁྱོད་ལ་བསྟན་པ་ཡིན་པར་རིག་པར་བྱའོ། །དེའི་ཚེ་འཁོར་མང་པོ་རྣམས་དེ་སྐད་ཅེས་བཀའ་སྩལ་པ་ཐོས་ནས་ཐམས་ཅད་རབ་ཏུ་དགའ་ཞིང་མངོན་པར་ཡིད་ཆེས་ནས་བཀའ་བཞིན་དུ་སྤྱོད་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་རྨི་ལམ་ན་འགྱོད་ཚངས་བྱེད་པ་མཐོང་བའི་ལེའུ་སྟེ་བཞི་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་གསུམ་པ།དེ་ནས་བཅོམ་ལྡན་འདས་ཡང་དག་པའི་རྣམ་པར་རྟོག་པ་ལ་བཞུགས་ཏེ་ཤིན་ཏུ་ཟབ་ཅིང་གྱ་ནོམ་པའི་ཏིང་ངེ་འཛིན་ལ་སྙོམས་པར་ཞུགས་པ་དང་། སྐུའི་སྤུའི་བུ་གནས་ཁ་དོག་རྣམ་པ་སྣ་ཚོགས་བརྒྱ་སྟོང་ཚད་མེད་པ་སྙེད་དང་ལྡན་པའི་འོད་ཟེར་ཆེན་པོ་བཀྱེ་བས་ཕྱོགས་བཅུའི་གང་གཱའི་ཀླུང་གི་བྱེ་མ་དག་གི་ཚད་དང་དཔེར་བྱར་མེད་པའི་སངས་རྒྱས་ཀྱི་ཞིང་རྣམས་འོད་ཟེར་གྱིས་རབ་ཏུ་སྣང་བར་གྱུར་ཏོ། །སྙིགས་མ་ལྔའི་འཇིག་རྟེན་དག་ཏུ་འོད་ཟེར་གྱིས་སྣང་བར་བྱས་པས་སེམས་ཅན་གང་དག་མི་དགེ་བ་བཅུའི་ལས་དང་། མཚམས་མེད་པ་ལྔའི་ཁ་ན་མ་ཐོ་བ་དང་། དཀོན་མཆོག་གསུམ་ལ་སྐུར་པ་བཏབ་པ་དང་། བླ་མ་དང་ཉེ་བ་དག་ལ་སྲི་ཞུ་མ་བྱས་པ་དང་། མཁན་པོ་དང་བྲམ་ཟེ་དག་ལ་བརྙས་ཤིང་ང་རྒྱལ་བྱས་པས་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་སུ་ལྟུང་བར་གྱུར་པ་དེ་དག་སོ་སོ་ནས་འོད་ཟེར་གྱི་སྣང་བ་དེ་དག་གི་གནས་སུ་ཕྱིན་པར་གྱུར་པས་སེམས་ཅན་དེ་དག་འོད་ཟེར་དེ་མཐོང་བ་དང་། འོད་ཟེར་གྱི་མཐུས་ཐམས་ཅད་ཀྱིས་བདེ་བ་དང་། ཤིན་ཏུ་སྡུག་ཅིང་མཛེས་པའི་གཟུགས་ཀྱིས་མཚན་
ཕུན་སུམ་ཚོགས་པ་དང་། བསོད་ནམས་དང་ཡེ་ཤེས་ཀྱིས་བརྒྱན་ནས་སངས་རྒྱས་རྣམས་མཐོང་བར་གྱུར་ཏོ། །དེའི་ཚེ་བརྒྱ་བྱིན་དང་། ལྷའི་འཁོར་ཐམས་ཅད་དང་། གང་གཱའི་ལྷ་མོ་དང་། འཁོར་མང་པོ་རྣམས་འོད་ཟེར་རྨད་དུ་བྱུང་བ་མཐོང་བ་དང་། ཐམས་ཅད་བཅོམ་ལྡན་འདས་ཀྱི་སྤྱན་སྔར་ལྷགས་ཏེ་གཡས་ཕྱོགས་སུ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འཁོད་དོ། །དེ་ནས་བརྒྱ་བྱིན་ལྷའི་དབང་པོ་བཅོམ་ལྡན་འདས་ཀྱིས་བྱིན་གྱིས་བརླབས་ཀྱི་མཐུས་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་གཉེར་ཞིང་ཐེག་པ་ཆེན་པོ་མངོན་པར་བསྒྲུབས་པས་ཇི་ལྟར་ཕྱིན་ཅི་ལོག་ཏུ་གྱུར་པའི་སེམས་ཅན་ཐམས་ཅད་ཡོངས་སུ་གཟུང་བར་བགྱིས་ལགས། སྔོན་མངོན་པར་འདུས་བགྱིས་པའི་ལས་ཀྱི་སྒྲིབ་པའི་ཁ་ན་མ་ཐོ་བ་ཇི་ལྟར་བཤགས་ན་ཡོངས་སུ་འབྱང་བར་འགྱུར་ལགས། བཅོམ་ལྡན་འདས་ཀྱིས་བརྒྱ་བྱིན་ལྷའི་དབང་པོ་ལ་བཀའ་སྩལ་པ། རིགས་ཀྱི་བུ་དེང་ཁྱེད་ཀྱིས་ཚད་མེད་དཔག་ཏུ་མེད་པའི་སེམས་ཅན་རྣམས་རྣལ་འབྱོར་བསྒོམ་ནས་རྣམ་པར་དག་པའི་རྣམ་པར་གྲོལ་བའི་བདེ་བ་འཐོབ་པར་བྱ་བ་དང་། འཇིག་རྟེན་ཐམས་ཅད་ལ་སྙིང་བརྩེ་ཞིང་ཕན་པར་འདོད་པ་ལེགས་སོ་ལེགས་སོ། །སེམས་ཅན་གང་ལ་ལ་ཞིག་ལས་ཀྱི་སྒྲིབ་པའི་དབང་གིས་སྡིག་པ་རྣམས་མངོན་པར་འདུས་བྱས་པ་གང་ཡིན་པ་དེས་ནན་ཏན་བརྩོན་འགྲུས་བསྐྱེད་དེ་ཉིན་མཚན་དུས་དྲུག་ཏུ། བླ་གོས་ཕྲག་པ་གཅིག་ཏུ་གཟར་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་གུས་པས་ཐལ་མོ་སྦྱར་ཏེ། སེམས་རྩེ་གཅིག་ཏུ་དྲན་པ་ཉེ་བར་བསྡུས་ནས་ངག་གི་སྒོ་ནས་བདག་ཉིད་ཀྱིས་འདི་སྐད་དུ་ཕྱོགས་བཅུ་ནད་ལྟར་བཞུགས་པའི་སངས་རྒྱས་བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་ནས་དམ་པའི་ཆོས་ཀྱི་འཁོར་
ལོ་ཡོངས་སུ་བསྐོར་བ། ཆོས་ཀྱི་འཁོར་ལོ་འཛིན་ཅིང་གསལ་བར་མཛད་པ། ཆོས་ཀྱི་ཆར་ཆེན་པོ་ཕབ་པ། ཆོས་ཀྱི་རྔ་ཆེན་པོ་བརྡུང་བ། ཆོས་ཀྱི་དུང་ཆེན་པོ་བུས་པ། ཆོས་ཀྱི་རྒྱལ་མཚན་ཆེན་པོ་བཙུགས་པ། ཆོས་ཀྱི་སྒྲོན་མ་ཆེན་པོ་འཛིན་པ། ཐམས་ཅད་སེམས་ཅན་རྣམས་ལ་སྨན་ཅིང་བདེ་བར་མཛད་པའི་སླད་དུ་རྟག་པར་ཆོས་ཀྱི་སྦྱིན་པ་གཏོང་བ། སྐྱེ་དགུ་རྨོངས་པ་རྣམས་དྲངས་ནས་འབྲས་བུ་ཆེན་པོ་ཐོབ་པ་ལ་བཀོད་དེ། རྟག་ཏུ་བདེ་བ་མངོན་སུམ་དུ་མཛད་པར་བཞེད་པ་དེ་ལྟ་བུའི་སངས་རྒྱས་བཅོམ་ལྡན་འདས་རྣམས་ལ་སྐྱབས་སུ་མཆི་སྟེ་མགོ་བོས་ཕྱག་འཚལ་ལོ། །སངས་རྒྱས་བཅོམ་ལྡན་འདས་གང་དག་ཡང་དག་པའི་ཤེས་རབ་དང་། ཡང་དག་པའི་སྤྱན་དང་། ཡང་དག་པའི་མཁྱེན་པ་དང་། ཡང་དག་པའི་མཉམ་པས་སེམས་ཅན་གྱི་དགེ་སྡིག་གི་ལས་མཁྱེན་ཅིང་གཟིགས་པ་ཐམས་ཅད་ལ་ལུས་དང་ངག་དང་ཡིད་ཀྱིས་སེམས་རྩེ་གཅིག་ཏུ་སྤྱི་བོས་བཏུད་དེ་གུས་པར་ཕྱག་འཚལ་ལོ། །བདག་གིས་ཐོག་མ་མ་མཆིས་པའི་དུས་ནས་སྡིག་པའི་རྗེས་སུ་འབྲངས་ཏེ་སེམས་ཅན་རྣམས་དང་ལྷན་ཅིག་ཏུ་ལས་ཀྱི་སྒྲིབ་པ་ཁ་ན་མ་ཐོ་བ་བགྱིས་པ་དང་། འདོད་ཆགས་དང་། ཞེ་སྡང་དང་། གཏི་མུག་གིས་ཀུན་དུ་དཀྲིས་ཤིང་བཅིངས་པས་སངས་རྒྱས་མ་འཚལ་བའི་དུས་དང་། ཆོས་མ་འཚལ་བའི་དུས་དང་། དགེ་འདུན་མ་འཚལ་བའི་དུས་ན་དགེ་སྡིག་མ་འཚལ་བའི་དབང་གིས་ལུས་དང་ངག་དང་ཡིད་ཀྱི་སྒོ་ནས་མཚམས་མ་མཆིས་པ་ངན་སེམས་ཀྱིས་དེ་བཞིན་གཤེགས་པའི་སྐུ་ལ་མཚལ་ཕྱུང་བ་དང་། ཡང་དག་པའི་ཆོས་ལ་སྐུར་པ་བཏབ་པའམ། དགེ་འདུན་མཐུན་པའི་དབྱེན་བགྱིས་པ་དང་། དགྲ་བཅོམ་པ་བཀུམ་པའམ། ཕ་མ་བཀུམ་བའམ། ལུས་ཀྱི་རྣམ་པ་གསུམ་དང་། ངག་གི་རྣམ་པ་བཞི་དང་། ཡིད་ཀྱི་སྤྱོད་པ་རྣམ་པ་གསུམ་གྱི་དབང་གིས་མི་དགེ་བ་བཅུའི་ལས་བདག་ཉིད་ཀྱིས་བགྱིས་པ་དང་། གཞན་བགྱིད་དུ་སྩལ་བ་དང་། གཞན་བགྱིད་པ་ལ་རྗེས་སུ་ཡི་རང་བ་དང་། དགེ་བའི་གང་ཟག་རྣམས་ལ་ནན་གྱིས་སྐུར་པ་
བཏབ་པ་དང་། བྲེ་སྲང་གིས་བསླུས་པ་དང་། ཡང་དག་པ་མ་ལགས་པ་ལ་ཡང་དག་པར་བཟུང་བ་དང་། མི་གཙང་བའི་བཟའ་བ་དང་བཏུང་བ་གཞན་དག་ལ་སྩལ་བ་དང་། འགྲོ་བ་དྲུག་པོ་དེ་དག་ཏུ་མཆིས་པའི་ཕ་མ་ཇི་སྙེད་པ་དག་ལ་ཕན་ཚུན་གནོད་པ་བགྱིས་པ་དང་། མཆོད་རྟེན་གྱི་དཀོར་བརྐུས་པ་དང་། ཕྱོགས་བཞིའི་དགེ་འདུན་གྱི་དཀོར་དང་། མངོན་སུམ་གྱི་དགེ་འདུན་གྱི་དཀོར་རང་དབང་བགྱིས་ཏེ་ཡོངས་སུ་སྤྱད་པ་དང་། བཅོམ་ལྡན་འདས་ཀྱིས་གསུངས་པའི་ཆོས་དང་འདུལ་བ་ལ་བསླབ་པར་མ་མོས་པ་དང་། མཁན་པོ་དང་། བླ་མའི་གདམས་ངག་གི་རྗེས་སུ་མི་འབྲང་བ་དང་། ཉན་ཐོས་དང་། རང་སངས་རྒྱས་དང་། ཐེག་པ་ཆེན་པོའི་སྤྱོད་པ་མངོན་པར་བསྒྲུབས་པ་དག་ལ་སྨད་པར་དགའ་བས་རྣལ་འབྱོར་སྒོམ་པའི་གང་ཟག་རྣམས་སེམས་ལ་འགྱོད་པ་བསྐྱེད་པ་དང་། བདག་པས་ཁྱད་པར་དུ་འཕགས་པ་ཞིག་མཐོང་ན་ཕྲག་དོག་བསྐྱེད་པ་དང་། ཆོས་ཀྱི་སྦྱིན་པ་དང་། ཟང་ཟིང་གི་སྦྱིན་པ་དག་ལ་རྟག་པར་སེར་སྣ་དང་། ཕངས་པའི་སེམས་བསྐྱེད་པ་དང་། མ་རིག་པས་བསྒྲིབས་ཤིང་ལོག་པར་ལྟ་བས་སེམས་རྨོངས་པར་གྱུར་པ་དང་། དགེ་བའི་རྒྱུ་མ་བསྐྱེད་པས་སྡིག་པ་འཕེལ་བར་གྱུར་པ་དང་། དེ་བཞིན་གཤེགས་པ་རྣམས་ལ་སྨོད་པའི་བསམ་པ་བསྐྱེད་པ་དང་། ཆོས་ལ་ཆོས་མ་ལགས་པར་བཤད་པ་དང་། ཆོས་མ་ལགས་པ་ལ་ཆོས་སུ་བཤད་པ་ལ་སོགས་པ་འདི་ལྟ་བུའི་སྡིག་པ་མང་པོ་རྣམས་བཅོམ་ལྡན་འདས་ཡང་དག་པའི་ཤེས་རབ་དང་། ཡང་དག་པའི་སྤྱན་དང་། ཡང་དག་པའི་མཁྱེན་པ་དང་། ཡང་དག་པའི་མཉམ་པས་ཐམས་ཅད་མཁྱེན་ཅིང་ཐམས་ཅད་གཟིགས་པ་དག་ལ་དེང་བདག་སྲོག་ཕྱོགས་ནས་བཅོམ་ལྡན་འདས་རྣམས་ཀྱི་སྤྱན་སྔར་ཐམས་ཅད་མཐོལ་ཞིང་བཤགས་སོ། །ཐམས་ཅད་མངོན་དུ་ཕྱུང་ནས་འཆབ་ཅིང་སྦེད་པར་མི་བགྱིད་དོ། །སྔར་མ་བགྱིས་པའི་ཁ་ན་མ་ཐོ་བ་རྣམས་སླན་ཆད་མི་བགྱིད་དོ། །སྔར་བགྱིས་པའི་ཁ་ན་མ་ཐོ་བ་རྣམས་དེང་ཐམས་ཅད་མཐོལ་ཞིང་བཤགས་སོ། །ངན་
འགྲོ་སེམས་ཅན་དམྱལ་བ་དང་། དུད་འགྲོའི་སྐྱེ་གནས་དང་། ཡི་དགས་ཀྱི་འགྲོ་བ་དང་། ལྷ་མ་ཡིན་གྱི་འཁོར་དང་། མི་ཁོམ་པ་བརྒྱད་པོ་དག་ཏུ་ལྟུང་བར་འགྱུར་བའི་ལས་ཀྱི་སྒྲིབ་པ་ཅི་མཆིས་པ་དང་། བདག་གིས་ཚེ་འདི་ལ་བགྱིས་པའི་ལས་ཀྱི་སྒྲིབ་པ་ཅི་མཆིས་པ་ཐམས་ཅད་ཞུ་བྱང་ནས་སྡིག་པའི་རྣམ་པར་སྨིན་པ་ཅི་མཆིས་པ་མ་འོངས་པ་ན་མི་མྱོང་བར་སྨོན་ཏོ། །ཇི་ལྟར་འདས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱང་ཆུབ་ཀྱི་སྤྱོད་པ་སྤྱད་པ་ན་ལས་ཀྱི་སྒྲིབ་པ་ཅི་མཆིས་པ་མ་ལུས་པར་མཐོལ་ཞིང་བཤགས་པ་དེ་བཞིན་དུ་བདག་གིས་ལས་ཀྱི་སྒྲིབ་པ་ཅི་མཆིས་པ་ཡང་མཐོལ་ཞིང་བཤགས་སོ། །ཐམས་ཅད་མངོན་དུ་ཕྱུང་སྟེ་འཆབ་ཅིང་སྦེད་པར་མི་བགྱིད་དོ། །སྔར་བགྱིས་པའི་སྡིག་པ་རྣམས་ཞུ་བྱང་བར་སྨོན་ཏོ། །མ་འོངས་པའི་སྡིག་པ་རྣམས་ཡང་བགྱིད་པའི་ཐུགས་མི་ཐུབ་བོ། །མ་འོངས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱང་ཆུབ་ཀྱི་སྤྱད་པ་སྤྱོད་པ་ན་ལས་ཀྱི་སྒྲིབ་པ་ཅི་མཆིས་པ་མ་ལུས་པར་མཐོལ་ཞིང་འཆགས་པ་དེ་བཞིན་དུ་བདག་གིས་ལས་ཀྱི་སྒྲིབ་པ་ཡང་མཐོལ་ཞིང་བཤགས་སོ། །ཐམས་ཅད་མངོན་དུ་ཕྱུང་ནས་འཆབ་ཅིང་སྦེད་པར་མི་བགྱིད་དོ། །སྔར་བགྱིས་པའི་སྡིག་པ་རྣམས་ཞུ་བྱང་བར་སྨོན་ཏོ། །མ་འོངས་པའི་སྡིག་པ་རྣམས་ཡང་བགྱིད་པའི་ཐུགས་མི་ཐུབ་བོ། །ད་ལྟར་ཕྱོགས་བཅུའི་འཇིག་རྟེན་ན་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བྱང་ཆུབ་ཀྱི་སྤྱོད་པ་སྤྱད་པ་དག་ལས་ཀྱི་སྒྲིབ་པ་ཅི་མཆིས་པ་མཐོལ་ཞིང་འཆགས་པ་དེ་བཞིན་དུ་བདག་གིས་ལས་ཀྱི་སྒྲིབ་པ་ཡང་མཐོལ་ཞིང་བཤགས་སོ། །ཐམས་ཅད་མངོན་དུ་ཕྱུང་ནས་འཆབ་ཅིང་སྦེད་པར་མི་བགྱིད་དོ། །སྔར་བགྱིས་པའི་སྡིག་པ་རྣམས་ཞུ་བྱང་བར་སྨོན་ཏོ། །མ་འོངས་པའི་སྡིག་པ་རྣམས་ཡང་བགྱིད་པའི་ཐུགས་མི་ཐུབ་པོ་ཞེས་བརྗོད་པར་བྱའོ། །རིགས་ཀྱི་བུ་རྒྱུ་དང་རྐྱེན་དེའི་ཕྱིར་གང་གིས་སྡིག་པ་བྱས་པ་ཞིག་ཡོད་ན། སྐད་ཅིག་ཙམ་དུ་ཡང་འཆབ་ཅིང་སྦར་མི་རུང་ན་ཉིན་གཅིག་གམ། མཚན་གཅིག་ནས་དུས་རིང་པོའི་བར་དུ་ལྟ་སྨོས་
ཀྱང་ཅི་དགོས། གང་ལ་ལ་ཞིག་གིས་སྡིག་པ་བྱས་ནས་རྣམ་པར་དག་པ་ཡོངས་སུ་ཚོལ་བར་འདོད་ཅིང་སེམས་ལ་ངོ་ཚ་བ་དང་བཅས་པས་མ་འོངས་པ་ན་གདོན་མི་ཟ་བར་སྡིག་པའི་རྣམ་པར་སྨིན་པ་ཡོད་དོ་ཞེས་མངོན་པར་ཡིད་ཆེས་ནས་འཇིགས་ཤིང་སྐྲག་པ་ཆེན་པོ་སྐྱེས་པ་དེས་འདི་ལྟར་བཤགས་པར་བྱའོ། །འདི་ལྟ་སྟེ། དཔེར་ན་མི་ལ་ལ་ཞིག་མེས་མགོ་ཐོད་བསྲེགས་སམ། གོས་བསྲེགས་པར་གྱུར་ན་མྱུར་བ་ཁོ་ནར་མེ་གསོད་པར་བྱེད་དེ། གལ་ཏེ་མེ་ཞི་བར་མ་གྱུར་ན་སེམས་ཀྱིས་བདེ་བ་ཐོབ་པར་མི་འགྱུར་རོ། །གང་གིས་སྡིག་པ་བྱས་ན་ཡང་དེ་བཞིན་དུ་མཐོལ་ཞིང་བཤགས་ནས་མྱུར་བ་ཁོ་ནས་ཡོངས་སུ་སྦྱང་བར་བྱའོ། །གང་ལ་ལ་ཞིག་ཕྱུག་པོའི་ཁྱིམ་དུ་སྐྱེས་ནས་ནོར་དང་རིན་པོ་ཆེ་མང་པོ་དང་ལྡན་པར་འདོད་པ་དང་། གཞན་ཡང་སེམས་བསྐྱེད་ནས་ཐེག་པ་ཆེན་པོ་བསྒོམ་པར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །ཆོ་རིགས་བཙུན་པའི་བྲམ་ཟེ་དང་། །རྒྱལ་རིགས་དང་། འཁོར་ལོས་སྒྱུར་བའི་རྒྱལ་པོ་རིན་པོ་ཆེ་སྣ་བདུན་དང་ལྡན་པའི་ཁྱིམ་བདག་ཏུ་སྐྱེ་བར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །རིགས་ཀྱི་བུ་གལ་ཏེ་རྒྱལ་ཆེན་བཞིའི་རིས་ཀྱི་ལྷ་དང་། སུམ་ཅུ་རྩ་གསུམ་པའི་ལྷ་དང་། འཐབ་བྲལ་གྱི་ལྷ་དང་། དགའ་ལྡན་གྱི་ལྷ་དང་། འཕྲུལ་དགའི་ལྷ་དང་། གཞན་འཕྲུལ་དབང་བྱེད་ཀྱི་ལྷར་སྐྱེ་བར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །གལ་ཏེ་ཚངས་རིས་དང་། ཚངས་པའི་མདུན་ན་འདོན་དང་། ཚངས་ཆེན་གྱི་ལྷ་དང་། འོད་ཆུང་དང་། ཚད་མེད་འོད་དང་། འོད་གསལ་གྱི་ལྷ་དང་། དགེ་ཆུང་དང་། ཚད་མེད་དགེ་དང་། དགེ་རྒྱས་ཀྱི་ལྷ་དང་། སྤྲིན་མེད་དང་། བསོད་ནམས་སྐྱེས་དང་། འབྲས་བུ་ཆེ་བ་དང་། མི་ཆེ་བ་དང་། མི་གདུང་བ་དང་། གྱ་ནོམ་སྣང་དང་། ཤིན་ཏུ་མཐོང་དང་། འོག་མིན་(ཀྱི,གྱི)་ལྷར་སྐྱེ་བར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །གལ་ཏེ་རྒྱུན་
དུ་ཞུགས་པའི་འབྲས་བུ་དང་། ལན་ཅིག་ཕྱིར་འོང་བའི་འབྲས་བུ་དང་། ཕྱིར་མི་འོང་བའི་འབྲས་བུ་དང་། དགྲ་བཅོམ་པའི་འབྲས་བུ་ཡོངས་སུ་གཉེར་བར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །གལ་ཏེ་རིག་པ་གསུམ་དང་། མངོན་པར་ཤེས་པ་དྲུག་དང་། ཉན་ཐོས་དང་། རང་སངས་རྒྱས་ཀྱི་རང་དབང་ཐོབ་པའི་བྱང་ཆུབ་ཡོངས་སུ་གཉེར་བ་དང་། མཐར་ཐུག་པའི་སར་ཕྱིན་ནས་ཐམས་ཅད་མཁྱེན་པའི་ཡེ་ཤེས་དང་། ཡོངས་སུ་དག་པའི་ཡེ་ཤེས་དང་། བསམ་གྱིས་མི་ཁྱབ་པའི་ཡེ་ཤེས་དང་། མི་གཡོ་བའི་ཡེ་ཤེས་དང་། ཡང་དག་པར་རྫོགས་པའི་བྱང་ཆུབ་ཐམས་ཅད་མཁྱེན་པ་ཡོངས་སུ་གཉེར་བར་འདོད་ན་ཡང་འགྱོད་ཚངས་བྱས་ནས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་ནི་རྒྱུ་དང་རྐྱེན་ལས་སྐྱེ་བས་དེ་བཞིན་གཤེགས་པས་ཀྱང་ཐ་དད་པའི་མཚན་ཉིད་འགག་པར་འགྱུར་རོ། །ཞེས་གསུངས་ཏེ། རྒྱུ་རྐྱེན་ཐ་དད་པའི་ཕྱིར་འདི་ལྟར་འདས་པའི་ཆོས་རྣམས་འགག་ཅིང་ཟད་པར་འགྱུར་བས་ལས་ཀྱི་སྒྲིབ་པ་ཇི་སྙེད་པ་མ་ལུས་པར་འགྱུར་བ་ཡང་འདུ་བྱེད་ཀྱི་ཆོས་རྣམས་མངོན་དུ་མ་སྐྱེས་པ་གང་ཡིན་པ་དེ་དག་དེང་གདོད་སྐྱེ་བར་འགྱུར་བས་མ་འོངས་པའི་ལས་ཀྱི་སྒྲིབ་པ་ཡང་ལྡང་བར་མི་འགྱུར་རོ། །དེ་ཅིའི་ཕྱིར་ཞེ་ན། རིགས་ཀྱི་བུ་ཆོས་ཐམས་ཅད་སྟོང་ཞིང་དེ་བཞིན་གཤེགས་པས་ཀྱང་བདག་དང་། གང་ཟག་དང་། སེམས་ཅན་དང་། སྲོག་མེད་པ་དང་། སྐྱེ་བ་དང་། འགག་པ་མེད་པ་དང་། འདུ་བྱེད་ཀྱི་ཆོས་ཀྱང་མེད་དོ་ཞེས་གསུངས་པས་སོ། །རིགས་ཀྱི་བུ་ཆོས་ཐམས་ཅད་ནི་ངོ་བོ་ཉིད་ཀྱི་གཞི་ལ་བརྟེན་པས་བརྗོད་དུ་ཡང་མེད་དོ། །དེ་ཅིའི་ཕྱིར་ཞེ་ན། མཚན་མ་ཐམས་ཅད་ལས་ཡང་དག་པར་འདས་པའི་ཕྱིར་རོ། །རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་འདི་ལྟར་ཡང་དག་པའི་དོན་ཤིན་ཏུ་གྱ་ནོམ་པ་ལ་ཞུགས་ནས་མངོན་པར་ཡིད་ཆེས་པས་གུས་པའི་སེམས་སྐྱེས་པར་གྱུར་པ་གང་ཡིན་པ་དེ་ནི་སེམས་ཅན་མེད་ཅིང་ངོ་བོ་ཉིད་ཀྱི་གཞི་ཡོད་པ་ཞེས་བྱ་སྟེ། དོན་དེའི་ཕྱིར་
འགྱོད་ཚངས་ཀྱིས་ལས་ཀྱི་སྒྲིབ་པ་ཡོངས་སུ་སྦྱང་བར་བྱའོ་ཞེས་བསྟན་པ་ཡིན་ནོ། །རིགས་ཀྱི་བུ་གང་གིས་ཆོས་རྣམ་པ་བཞི་དང་ལྡན་པར་གྱུར་ན་ལས་ཀྱི་སྒྲིབ་པ་ཡོངས་སུ་བསལ་ནས་གཏན་དུ་ཡོངས་སུ་བྱང་བར་འགྱུར་རོ། །བཞི་གང་ཞེ་ན། ལོག་པའི་བསམ་པ་མི་སྐྱེ་ཞིང་ཡང་དག་པའི་དྲན་པ་ཕུན་སུམ་ཚོགས་པར་གྱུར་པ་དང་། ཤིན་ཏུ་ཟབ་པའི་དོན་དག་ལ་སྐུར་པ་མི་འདེབས་པ་དང་། སྤྱོད་པ་དང་པོའི་བྱང་ཆུབ་སེམས་དཔའ་དག་ཐམས་ཅད་མཁྱེན་པ་ཡིན་ནོ། །སྙམ་པའི་བསམ་པ་བསྐྱེད་པ་དང་། སེམས་ཅན་རྣམས་ལ་བྱམས་པ་ཚད་མེད་པ་སྐྱེས་པ་སྟེ། འདི་དག་ནི་རྣམ་པ་བཞི་ཞེས་བྱའོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་དེ་བཀའ་སྩལ་པ། རྩེ་གཅིག་སེམས་ཀྱིས་ཐེག་གསུམ་སྲུང་། །ཟབ་མོའི་ཆོས་ལ་སྐུར་མི་འདེབས། །ཐམས་ཅད་མཁྱེན་པའི་འདུ་ཤེས་སྐྱེད། །བྱམས་སེམས་ལས་ཀྱི་སྒྲིབ་པ་སྦྱོང་། །རིགས་ཀྱི་བུ་ཤིན་ཏུ་བསལ་བར་དཀའ་བའི་ལས་ཀྱི་སྒྲིབ་པ་ནི་རྣམ་པ་བཞི་ཡོད་དེ། བཞི་གང་ཞེ་ན། བྱང་ཆུབ་སེམས་དཔའི་སྡོམ་པ་ལས་ཤིན་ཏུ་ལྕི་བའི་ཁ་ན་མ་ཐོ་བ་བྱས་པ་དང་། ཐེག་པ་ཆེན་པོའི་མདོ་སྡེ་ལ་སེམས་ཀྱིས་སྐུར་པ་བཏབ་པ་དང་། རང་གི་དགེ་བའི་རྩ་བ་འཕེལ་བར་མི་བྱེད་པ་དང་། སྲིད་པ་གསུམ་ལ་མངོན་པར་ཞེན་ནས་ངེས་པར་འབྱུང་བའི་སེམས་མེད་པ་གང་ཡིན་པའོ། །གཞན་ཡང་ལས་ཀྱི་སྒྲིབ་པའི་གཉེན་པོར་གྱུར་པ་རྣམ་པ་བཞི་ཡོད་དེ། བཞི་གང་ཞེ་ན། ཕྱོགས་བཅུའི་འཇིག་རྟེན་ན་བཞུགས་པའི་དེ་བཞིན་གཤེགས་པ་ཐམས་ཅད་ལ་བསམ་པ་ཐག་པ་ནས་ཉེ་བར་བསྙེན་ནས་ཁ་ན་མ་ཐོ་བ་ཐམས་ཅད་བཤགས་པར་བྱེད་པ་དང་། སེམས་ཅན་ཐམས་ཅད་ཀྱི་ཆེད་དུ་དེ་བཞིན་གཤེགས་པ་རྣམས་ལ་དམ་པའི་ཆོས་ཟབ་མོ་བཤད་པར་གསོལ་བ་འདེབས་པ་དང་། སེམས་ཅན་ཐམས་ཅད་ཀྱི་བསོད་ནམས་ཇི་སྙེད་པ་དག་ལ་རྗེས་སུ་ཡི་རང་བ་དང་། བསོད་ནམས་ཀྱི་དགེ་བའི་རྩ་བ་ཇི་སྙེད་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་གང་ཡིན་པའོ། །དེ་ནས་བཅོམ་ལྡན་འདས་ལ་བརྒྱ་བྱིན་ལྷའི་དབང་པོས་འདི་སྐད་ཅེས་གསོལ་ཏོ། །
བཅོམ་ལྡན་འདས་འཇིག་རྟེན་ན་སྐྱེས་པ་དང་། བུད་མེད་ཇི་སྙེད་མཆིས་པ་དག་ལས་ཐེག་པ་ཆེན་པོའི་སྤྱོད་པ་སྤྱོད་པར་རྔོ་ཐོགས་པ་ཡང་མཆིས་སྤྱོད་པར་རྔོ་མི་ཐོགས་པ་ཡང་མཆིས་ན་ཇི་ལྟར་སེམས་ཅན་ཐམས་ཅད་ཀྱི་བསོད་ནམས་ཀྱི་དགེ་བའི་རྩ་བ་དག་ལ་རྗེས་སུ་ཡི་རང་བར་བགྱི་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སེམས་ཅན་གང་ལ་ལ་ཞིག་ཐེག་པ་ཆེན་པོ་སྒོམ་པར་མི་ནུས་མོད་ཀྱི། འོན་ཀྱང་ཉིན་མཚན་དུས་དྲུག་ཏུ་བླ་གོས་ཕྲག་པ་གཅིག་ལ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས་གུས་པས་ཐལ་མོ་སྦྱར་ཏེ་སེམས་རྩེ་གཅིག་ཏུ་དྲན་པ་ཉེ་བར་བཞག་ནས་རྗེས་སུ་ཡི་རང་བར་བྱེད་ནས་བསོད་ནམས་ཚད་མེད་པ་སྙེད་འཐོབ་པར་འགྱུར་བས་འདི་སྐད་དུ་ཕྱོགས་བཅུའི་འཇིག་རྟེན་གྱི་ཁམས་ན་སེམས་ཅན་གང་དག་ད་ལྟར་སྦྱིན་པ་དང་། ཚུལ་ཁྲིམས་དང་། སེམས་ཀྱི་ཤེས་རབ་མངོན་པར་སྒྲུབ་པ་ཇི་སྙེད་པ་དེ་དག་ཐམས་ཅད་ལ་དེང་བདག་ཤིན་ཏུ་དང་བས་རྗེས་སུ་ཡི་རང་ངོ་། །ཞེས་བརྗོད་པར་གྱུར་ན་དེ་ལྟར་རྗེས་སུ་ཡི་རང་བའི་བསོད་ནམས་ཀྱི་དབང་གིས་གདོན་མི་ཟ་བར་ཤིན་ཏུ་བཙུན་ཞིང་ཁྱད་པར་དུ་འཕགས་པ་བླ་ན་མེད་པ་མཚུངས་པ་མེད་པ་མཆོག་ཏུ་གྱ་ནོམ་པའི་འབྲས་བུ་ཐོབ་པར་འགྱུར་རོ། །དེ་བཞིན་དུ་འདས་པ་དང་མ་འོངས་པའི་སེམས་ཅན་ཐམས་ཅད་ཀྱི་དགེ་བའི་རྩ་བ་ཇི་སྙེད་པ་ཐམས་ཅད་ལ་ཡང་རྗེས་སུ་ཡི་རང་བར་བྱའོ། །གཞན་ཡང་ད་ལྟར་བྱང་ཆུབ་སེམས་དཔའི་སྤྱོད་པ་དང་པོ་པས་བྱང་ཆུབ་ཏུ་སེམས་བསྐྱེད་པ་ལས་བྱུང་བའི་བསོད་ནམས་ཇི་སྙེད་པ་དག་དང་། བསྐལ་པ་ཆེན་པོ་བརྒྱ་འདས་ནས་བྱང་ཆུབ་སེམས་དཔའི་སྤྱོད་པ་སྤྱད་པ་ལས་བྱུང་བའི་བསོད་ནམས་ཆེན་པོ་གང་ཡིན་པ་དང་། མི་སྐྱེ་བའི་བཟོད་པ་ཐོབ་པ་ནས་ཕྱིར་མི་ལྡོག་པ་དང་། ཚེ་གཅིག་གིས་དབང་བསྐུར་བར་འགྱུར་བའི་བར་དག་ལས་བྱུང་བའི་བསོད་ནམས་ཀྱི་ཕུང་པོ་གང་ཡིན་པ་དེ་དག་ཐམས་ཅད་ལ་ཡང་འདི་ལྟར་བསམ་པ་ཐག་པ་ནས་རྗེས་སུ་ཡི་རང་ཞིང་བསྔགས་པ་བརྗོད་པར་བྱའོ། །དེ་བཞིན་དུ་འདས་པ་དང་། མ་འོངས་པའི་བྱང་ཆུབ་སེམས་དཔའ་ཐམས་ཅད་ཀྱི་བསོད་ནམས་ཇི་སྙེད་པ་དག་ལ་ཡང་རྗེས་སུ་ཡི་རང་ཞིང་བསྔགས་
པ་བརྗོད་པར་བྱའོ། །གཞན་ཡང་ད་ལྟར་ཕྱོགས་བཅུའི་འཇིག་རྟེན་ན་ཡང་དག་པའི་ཐམས་ཅད་མཁྱེན་པ། བྱང་ཆུབ་གྱ་ནོམ་པ་བརྙེས་པའི་སངས་རྒྱས་བཅོམ་ལྡན་འདས་ཐམས་ཅད་སེམས་ཅན་མཐའ་ཡས་པ་རྣམས་ཡོངས་སུ་བཟླ་བའི་ཕྱིར་བླ་ན་མེད་པའི་ཆོས་ཀྱི་འཁོར་ལོ་བསྐོར་བ། ཐོགས་པ་མི་མངའ་བའི་ཆོས་ཀྱི་སྦྱིན་པ་བཏང་བ། ཆོས་ཀྱི་རྔ་བརྡུངས་པ། ཆོས་ཀྱི་དུང་བུས་པ། ཆོས་ཀྱི་རྒྱལ་མཚན་བཙུགས་པ། ཆོས་ཀྱི་ཆར་ཕབ་པ་དག་གིས་ཐུགས་བརྩེ་བས་སེམས་ཅན་ཐམས་ཅད་ལ་བསྐུལ་ཞིང་ཡོངས་སུ་བཏུལ་བས་ཐམས་ཅད་མངོན་པར་ཡིད་ཆེས་པར་གྱུར་ནས་ཆོས་ཀྱི་སྦྱིན་པས་ཚིམ་པར་མཛད་པའི་དབང་གིས་ཟད་མི་ཤེས་པའི་བདེ་བ་ཐོབ་པ་ལ་བཀོད་པ་གང་ཡིན་པ་དང་། གཞན་ཡང་བྱང་ཆུབ་སེམས་དཔའ་དང་ཉན་ཐོས་དང་རང་སངས་རྒྱས་ཀྱིས་བསོད་ནམས་བསགས་པ་ལས་བྱུང་བའི་དགེ་བའི་རྩ་བ་གང་ཡིན་པ་དང་། སེམས་ཅན་གང་གིས་འདི་འདྲ་བའི་བསོད་ནམས་ད་དུང་ཕུན་སུམ་ཚོགས་པར་མ་གྱུར་པ་དག་ཐམས་ཅད་ཕུན་སུམ་ཚོགས་པར་འགྱུར་བ་གང་ཡིན་པ་དེ་དག་ལ་བདག་རྗེས་སུ་ཡི་རང་ངོ་། །དེ་བཞིན་དུ་འདས་པ་དང་། མ་བྱོན་པའི་སངས་རྒྱས་དང་། བྱང་ཆུབ་སེམས་དཔའ་དང་། ཉན་ཐོས་དང་། རང་སངས་རྒྱས་རྣམས་ཀྱི་བསོད་ནམས་ཇི་སྙེད་པ་ཐམས་ཅད་ལ་ཡང་བསམ་པ་ཐག་པ་ནས་རྗེས་སུ་ཡི་རང་ངོ་། །ཞེས་བརྗོད་པར་བྱའོ། །རིགས་ཀྱི་བུ་དེ་ལྟར་ན་རྗེས་སུ་ཡི་རང་བ་གང་ཡིན་པ་དེས་བསོད་ནམས་ཀྱི་ཕུང་པོ་ཚད་མེད་པ་རྙེད་ཐོབ་པར་འགྱུར་རོ། །གང་གཱའི་ཀླུང་གི་བྱེ་མ་སྙེད་དང་མཉམ་པའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་དེ་དག་ཐམས་ཅད་ཉོན་མོངས་པ་སྤངས་ཏེ་དགྲ་བཅོམ་པ་མངོན་པར་གྲུབ་པར་གྱུར་ལ། རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་ནམ་འཚོའི་བར་དུ་རྟག་པར་གོས་དང་། བཟའ་བ་དང་། བཏུང་བ་དང་། མལ་ཆ་དང་། གསོས་སྨན་མཆོག་དམ་པ་རྣམས་ཀྱིས་མཆོད་པ་དང་རིམ་གྲོ་བྱས་པས་འཐོབ་པའི་བསོད་ནམས་གང་ཡིན་པ་དེས་འདི་ལྟར་སྔ་མ་ལྟ་བུར་རྗེས་སུ་ཡི་རང་བའི་བསོད་ནམས་དེ་དང་བསྐྲུན་ན་སྟོང་གི་ཆ་གཅིག་ཙམ་དུ་ཡང་ཉེ་བར་མི་
འགྲོའོ། །དེ་ཅིའི་ཕྱིར་ཞེ་ན། མཆོད་པ་བྱས་པའི་བསོད་ནམས་གང་ཡིན་པ་དེ་ནི་གྲངས་དང་བཅས་ཤིང་ཚད་དང་བཅས་པས་བསོད་ནམས་ཐམས་ཅད་ཡོངས་སུ་སྡུད་པར་མི་འགྱུར་ལ་རྗེས་སུ་ཡི་རང་བའི་བསོད་ནམས་གང་ཡིན་པ་དེ་ལ་ནི་ཚད་མེད་ཅིང་གྲངས་མེད་པས་དུས་གསུམ་གྱི་བསོད་ནམས་ཐམས་ཅད་ཡོངས་སུ་སྡུད་པར་བྱེད་པས་དེའི་ཕྱིར་གང་ལ་ལ་ཞིག་དགེ་བའི་རྩ་བ་ཁྱད་པར་ཅན་འཕེལ་བར་འདོད་པས་འདི་ལྟར་རྗེས་སུ་ཡི་རང་བའི་བསོད་ནམས་མངོན་པར་བསྒྲུབ་པར་བྱའོ། །བུད་མེད་གང་ལ་ལ་ཞིག་བུད་མེད་ཀྱི་ལུས་ཡོངས་སུ་བསྒྱུར་ནས་སྐྱེས་པའི་ལུས་ཡོངས་སུ་འགྲུབ་པར་འདོད་ན་ཡང་རྗེས་སུ་ཡི་རང་བའི་བསོད་ནམས་མངོན་པར་སྒྲུབ་པར་བྱེད་ན་གདོན་མི་ཟ་བར་ཡིད་ལ་བསམས་པ་བཞིན་དུ་ཚེ་འདི་ཉིད་ལ་སྐྱེས་པའི་ལུས་མངོན་པར་འགྲུབ་པར་འགྱུར་རོ། །དེ་ནས་བཅོམ་ལྡན་འདས་ལ་བརྒྱ་བྱིན་ལྷའི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་རྗེས་སུ་ཡི་རང་བའི་བསོད་ནམས་གང་ལགས་པ་དེ་ནི་འཚལ་བར་གྱུར་ན་སླད་མའི་བྱང་ཆུབ་སེམས་དཔའ་ཐམས་ཅད་ཆོས་ཀྱི་འཁོར་ལོ་བསྐོར་བར་འགྱུར་བ་དང་། ད་ལྟར་གྱི་བྱང་ཆུབ་སེམས་དཔའ་རྣམས་ཡང་དག་པའི་རྣལ་འབྱོར་སྒོམ་པར་འགྱུར་བར་བགྱིད་པའི་སླད་དུ་བསྐུལ་བ་དང་། གསོལ་བ་བཏབ་པའི་བསོད་ནམས་གང་ལགས་པ་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ལྷའི་དབང་པོ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བ་གང་ཡིན་པ་དེས་ཉན་ཐོས་དང་། རང་སངས་རྒྱས་དང་། ཐེག་པ་ཆེན་པོའི་ལམ་བསྒོམ་པར་འདོད་ན་ཡང་གང་ཟག་དེས་ཉིན་མཚན་དུས་དྲུག་ཏུ་སྔ་མ་ལྟ་བུའི་སྤྱོད་ལམ་གྱིས་སེམས་རྩེ་གཅིག་དུ་དྲན་པ་ཉེ་བར་གཞག་ནས་འདི་སྐད་དུ་དེང་བདག་ཕྱོགས་བཅུ་ན་སངས་རྒྱས་བཅོམ་ལྡན་འདས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་པར་གྱུར་ཀྱང་བླ་ན་མེད་པའི་ཆོས་ཀྱི་འཁོར་ལོ་ད་དུང་མ་བསྐོར་བ་དང་། རྣམ་པར་སྨིན་པའི་སྐུ་སྤངས་ནས་ཡོངས་སུ་མྱ་ངན་ལས་འདའ་བར་
བཞེད་པ་གང་ལགས་པ་དེ་དག་ཐམས་ཅད་ལ་བདག་བསམ་པ་ཐག་པ་ནས་སྤྱི་བོས་བཏུད་དེ་ཕྱག་བགྱིས་ནས་སེམས་ཅན་ཐམས་ཅད་ཡོངས་སུ་བསྒྲལ་ཞིང་བདེ་བར་བགྱི་བ་དང་། སྔར་གོང་དུ་བསྟན་པ་ལྟར་བས་པ་མ་མཆིས་པའི་བདེ་བ་འཐོབ་པར་བགྱི་བའི་སླད་དུ་ཆོས་ཀྱི་འཁོར་ལོ་ཆེན་པོ་ཡོངས་སུ་བསྐོར་བ་དང་། ཆོས་ཀྱི་ཆར་པ་ཆེན་པོ་དབབ་པ་དང་། ཆོས་ཀྱི་སྒྲོན་མ་ཆེན་མོ་སྦར་བ་དང་། དོན་གྱི་ཚུལ་གསལ་བར་མཛད་པ་དང་། ཐོགས་པ་མི་མངའ་བའི་ཆོས་ཀྱི་སྦྱིན་པ་བཏང་ནས་ཡོངས་སུ་མྱ་ངན་ལས་མི་འདའ་ཞིང་འཇིག་རྟེན་ན་ཡུན་རིང་དུ་བཞུགས་པར་བསྐུལ་ཞིང་གསོལ་བ་འཚལ་ལོ། །དེང་བདག་གིས་བསྐུལ་ཞིང་གསོལ་བ་བཏབ་པའི་བསོད་ནམས་གང་ལགས་པ་འདི་དག་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །ཇི་ལྟར་འདས་པ་དང་། ད་ལྟར་གྱི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་བསྐུལ་བ་དང་། གསོལ་བ་བཏབ་པའི་བསོད་ནམས་དེ་དག་བྱང་ཆུབ་ཏུ་ཡོངས་སུ་བསྔོས་པ་དེ་བཞིན་དུ་བདག་གིས་ཀྱང་བསྐུལ་བ་དང་གསོལ་བ་བཏབ་པའི་བསོད་ནམས་གང་ལགས་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ་ཞེས་བརྗོད་པར་བྱའོ། །རིགས་ཀྱི་བུ་གལ་ཏེ་གང་ལ་ལ་ཞིག་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་ལ་མཆོད་པ་བྱས་པ་བས་གང་ལ་ལ་ཞིག་གིས་དེ་བཞིན་གཤེགས་པ་ལ་ཆོས་ཀྱི་འཁོར་ལོ་ཆེན་པོ་བསྐོར་བར་གསོལ་བ་བཏབ་པས་འཐོབ་པའི་བསོད་ནམས་གང་ཡིན་པ་དེ་སྔ་མ་བས་ཆེས་ཁྱད་པར་དུ་འཕགས་ཏེ། དེ་ཅིའི་ཕྱིར་ཞེ་ན། དེ་ནི་ཟང་ཟིང་གི་སྦྱིན་པ་ཡིན་ལ་འདི་ནི་ཆོས་ཀྱི་སྦྱིན་པ་ཡིན་པས་སོ། །རིགས་ཀྱི་བུ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་བཀང་སྟེ་སྦྱིན་པ་བཏང་བ་ལྟ་རེ་ཞིག་ཞོག་གི གལ་ཏེ་གང་ལ་ལ་ཞིག་གིས་གང་གཱའི་ཀླུང་གི་བྱེ་མ་སྙེད་ཀྱི་སྟོང་ཆེན་པོའི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། སངས་རྒྱས་
ཐམས་ཅད་ལ་མཆོད་པ་བྱས་པ་བས་བསྐུལ་ཞིང་གསོལ་བ་བཏབ་པའི་བསོད་ནམས་གང་ཡིན་པ་དེ་བས་ཀྱང་ཆེས་ཁྱད་པར་དུ་འཕགས་སོ། །ཆོས་ཀྱི་སྦྱིན་པ་ནི་ཁྱད་པར་དུ་འཕགས་པའི་ཕན་ཡོན་རྣམ་པ་ལྔ་དང་ལྡན་ཏེ། ལྔ་གང་ཞེ་ན། དང་པོ་ཆོས་ཀྱི་སྦྱིན་པ་གང་ཡིན་པ་དེ་ནི་བདག་དང་གཞན་ལ་ཕན་འདོགས་པར་བྱེད་ལ། ཟང་ཟིང་གི་སྦྱིན་པ་ནི་དེ་ལྟ་མ་ཡིན་པས་སོ། །གཉིས་པ་ཆོས་ཀྱི་སྦྱིན་པ་གང་ཡིན་པ་དེ་ནི་སེམས་ཅན་ཁམས་གསུམ་ནས་འབྱིན་པར་བྱེད་པ་ཡིན་ལ། ཟང་ཟིང་གི་སྦྱིན་པའི་བསོད་ནམས་གང་ཡིན་པ་དེ་ནི་འདོད་པའི་ཁམས་ལས་མི་འདའ་བས་སོ། །གསུམ་པ་ཆོས་ཀྱི་སྦྱིན་པ་གང་ཡིན་པ་དེ་ནི་ཆོས་ཀྱི་སྐུ་ཡོངས་སུ་དག་པར་བྱེད་པ་ཡིན་ལ། ཟང་ཟིང་གི་སྦྱིན་པས་ནི་གཟུགས་འབའ་ཞིག་འཕེལ་བར་བྱེད་པས་སོ། །བཞི་པ་ཆོས་ཀྱི་སྦྱིན་པ་གང་ཡིན་པ་དེ་ནི་དེར་མཐར་ཐུག་པ་མེད་པ་ཡིན་ལ་ཟང་ཟིང་གི་སྦྱིན་པ་ནི་ཟད་པར་འགྱུར་བས་སོ། །ལྔ་པ་ཆོས་ཀྱི་སྦྱིན་པ་གང་ཡིན་པ་དེ་ནི་མ་རིག་པ་ཡོངས་སུ་གཅོད་པར་བྱེད་ལ། ཟང་ཟིང་གི་སྦྱིན་པ་ནི་འདོད་པའི་སྲིད་པ་ཙམ་ཐུལ་བར་འགྱུར་བས་སོ། །དེ་ལྟ་བས་ན་རིགས་ཀྱི་བུ་བསྐུལ་བ་དང་། གསོལ་བ་བཏབ་པའི་བསོད་ནམས་ནི་ཚད་མེད་དཔག་ཏུ་མེད་པས་དཔེ་བྱར་སླ་བ་མ་ཡིན་ནོ། །ང་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་ཆེན་པོ་ཡོངས་སུ་བསྐོར་བར་བསྐུལ་བས་དགེ་བའི་རྩ་བ་དེའི་དབང་གིས་དེ་ལྟ་བས་ན་དེང་བརྒྱ་བྱིན་དང་། ཚངས་པའི་རྒྱལ་པོ་ལ་སོགས་པས་ང་ལ་ཆོས་ཀྱི་འཁོར་ལོ་ཆེན་པོ་ཡོངས་སུ་བསྐོར་བར་གསོལ་བ་བཏབ་པ་ཡིན་ཏེ། རིགས་ཀྱི་བུ་ཆོས་ཀྱི་འཁོར་ལོ་ཡོངས་སུ་བསྐོར་བར་བསྐུལ་བ་ནི་སེམས་ཅན་རྣམས་ཡོངས་སུ་སྒྲོལ་ཞིང་བདེ་བར་བྱེད་པ་ཡིན་པའི་ཕྱིར་རོ། །ང་སྔོན་བྱང་ཆུབ་ཀྱི་སྤྱད་པ་སྤྱོད་པ་ན་དེ་བཞིན་གཤེགས་པ་རྣམས་འཇིག་རྟེན་ན་ཡུན་རིང་དུ་བཞུགས་ཤིང་ཡོངས་སུ་མྱ་ངན་ལས་མི་འདའ་བར་གསོལ་བ་བཏབ་པས་ན་དགེ་བའི་རྩ་བ་དེ་ལ་བརྟེན་ནས་ངས་སྟོབས་བཅུ་དང་། བསྙེངས་པ་མི་མངའ་བ་བཞི་དང་། སོ་སོ་ཡང་དག་པར་རིག་པ་བཞི་དང་། བྱམས་
པ་ཆེན་པོ་དང་། སྙིང་རྗེ་ཆེན་པོ་དང་། མ་འདྲེས་པའི་ཆོས་གྲངས་མེད་པ་སྙེད་བརྙེས་པར་གྱུར་པ་ཡིན་ཏེ། ང་ལྷག་མ་མེད་པའི་མྱ་ངན་ལས་འདས་པས་ཡོངས་སུ་མྱ་ངན་ལས་འདས་པར་འགྱུར་ཡང་། ངའི་ཡང་དག་པའི་ཆོས་འཇིག་རྟེན་ན་ཡུན་རིང་བར་གནས་པར་འགྱུར་བ་ཡིན་ནོ། །ངའི་ཆོས་ཀྱི་སྐུ་གང་ཡིན་པ་དེ་ནི་རྣམ་པར་དག་ཅིང་དཔེ་ཟླ་མེད་པས་མཚན་མཆོག་དམ་པ་སྣ་ཚོགས་དང་། མཁྱེན་པ་ཚད་མེད་པ་དང་། དབང་ཚད་མེད་པ་དང་། ཡོན་ཏན་བསམ་གྱིས་མི་ཁྱབ་པའི་ཚད་མེད་པ་དང་ལྡན་ཞིང་། སེམས་ཅན་ཐམས་ཅད་ལ་ཕན་འདོགས་པར་མཛད་པས་བསྐལ་པ་བྱེ་བ་བརྒྱ་སྟོང་སྙེད་དུ་བརྗོད་ཀྱང་མཐར་ཐུག་པར་མི་འགྱུར་རོ། །ཆོས་ཀྱི་སྐུས་ནི་ཆོས་ཐམས་ཅད་ཡོངས་སུ་སྡུད་པར་མཛད་ལ་ཆོས་ཐམས་ཅད་ཀྱིས་ནི་ཆོས་ཀྱི་སྐུ་ཡོངས་སུ་སྡུད་པར་མི་བྱེད་དོ། །ཆོས་ཀྱི་སྐུ་རྟག་པར་གནས་ཀྱང་རྟག་པའི་ལྟ་བར་ལྟུང་བར་མི་འགྱུར་རོ། །འགག་པར་འགྱུར་ཡང་ཆད་པའི་ལྟ་བར་འགྱུར་བ་མ་ཡིན་པས་སེམས་ཅན་གྱི་ཐ་དད་པའི་ལྟ་བ་རྣམ་པ་སྣ་ཚོགས་རྣམ་པར་བཤིག་ནས་སེམས་ཅན་གྱི་ཡང་དག་པའི་ལྟ་བ་རྣམ་པ་སྣ་ཚོགས་བསྐྱེད་པར་མཛད་དོ། །སེམས་ཅན་ཐམས་ཅད་ཀྱི་འཆིང་བ་དགྲོལ་བར་མཛད་ཀྱང་དགྲོལ་བར་བྱ་བ་ཅི་ཡང་མི་མངའོ། །སེམས་ཅན་རྣམས་ཀྱི་དགེ་བའི་རྩ་བ་རྣམས་བསྐྱེད་པས་ཡོངས་སུ་མ་སྨིན་པ་གང་ཡིན་པ་དེ་ནི་ཡོངས་སུ་སྨིན་པར་མཛད་ལ། ཡོངས་སུ་སྨིན་པ་གང་ཡིན་པ་དེ་ནི་རྣམ་པར་གྲོལ་བར་མཛད་ཀྱང་མངོན་པར་འདུ་མཛད་པ་ཡང་མི་མངའ། །གཡོ་བ་ཡང་མི་མངའ་བས་འདུ་འཛི་ལས་ཐག་རིང་དུ་གྱུར་པ་རབ་ཏུ་དབེན་ཞིང་མཛད་པ་མི་མངའ་བས་རང་དབང་དུ་གྱུར་ཅིང་བདེ་བར་གྱུར་པ། དུས་གསུམ་ལས་ཡང་དག་པར་འདས་ཀྱང་དུས་གསུམ་སྟོན་པར་མཛད་པ་ཉན་ཐོས་དང་། རང་སངས་རྒྱས་ཀྱི་སྤྱོད་ཡུལ་ལས་ངེས་པར་འབྱུང་བ། བྱང་ཆུབ་སེམས་དཔའ་ཆེན་པོ་རྣམས་ཀྱིས་བསྒྲུབ་པར་བྱ་བ། དེ་བཞིན་གཤེགས་པ་ཐམས་ཅད་དང་སྐུ་ཐ་དད་པར་གྱུར་པ་མེད་པ་ཡིན་ཏེ། འདི་དག་ཐམས་ཅད་ཀྱང་བསྐུལ་ཞིང་གསོལ་བ་
བཏབ་པའི་དགེ་བའི་རྩ་བའི་སྟོབས་ཀྱིས་བརྙེས་པ་ཡིན་པའི་ཕྱིར་འདི་ལྟ་བུའི་ཆོས་ཀྱི་སྐུ་ངས་དེང་བརྙེས་པ་ཡིན་ཏེ། དེ་ལྟ་བས་ན་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བར་འདོད་པས་ཆོས་ཀྱི་རྣམ་གྲངས་འདི་ལས་ཚིག་གཅིག་གམ། ཚིགས་སུ་བཅད་པ་གཅིག་ཙམ་གཞན་དག་ལ་སྟོན་པར་བྱེད་པའི་དགེ་བའི་རྩ་བ་གང་ཡིན་པ་དེ་ཡང་ཚད་མེད་པར་གྱུར་པ་ཡིན་ན། དེ་བཞིན་གཤེགས་པ་རྣམས་ལ་ཆོས་ཀྱི་འཁོར་ལོ་ཆེན་པོ་ཡོངས་སུ་བསྐོར་བར་བསྐུལ་ཞིང་འཇིག་རྟེན་ན་ཡུན་རིང་དུ་བཞུགས་ནས་ཡོངས་སུ་མྱ་ངན་ལས་མི་འདའ་བར་གསོལ་བ་འདེབས་པ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ལ་བརྒྱ་བྱིན་ལྷའི་དབང་པོས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་ཞིང་ཐེག་པ་གསུམ་གྱི་ལམ་བསྒོམ་པར་འཚལ་བས་དགེ་བའི་རྩ་བ་ཅི་མཆིས་པ་ཇི་ལྟར་ཐམས་ཅད་མཁྱེན་པའི་ཡེ་ཤེས་སུ་ཡོངས་སུ་བསྔོ་བར་བགྱི་བ་ལགས། བཅོམ་ལྡན་འདས་ཀྱིས་ལྷའི་དབང་པོ་བརྒྱ་བྱིན་ལ་བཀའ་སྩལ་པ། རིགས་ཀྱི་བུ་སེམས་ཅན་གང་དག་བྱང་ཆུབ་ཡོངས་སུ་གཉེར་ཞིང་ཐེག་པ་གསུམ་གྱི་ལམ་བསྒོམ་པས་དགེ་བའི་རྩ་བ་ཅི་ཡོད་པ་ཡོངས་སུ་བསྔོ་བར་འདོད་པ་དེས་ཉིན་མཚན་དུས་དྲུག་ཏུ་གུས་པས་སེམས་རྩེ་གཅིག་ཏུ་འདི་སྐད་ཅེས། བདག་གིས་ཐོག་མ་མེད་པའི་འཁོར་བ་ནས་དཀོན་མཆོག་གསུམ་པོ་དག་གི་ཐད་དུ་རྣལ་འབྱོར་བསྒོམས་པས་ཡོངས་སུ་རྫོགས་པར་གྱུར་པ་ལས་བྱུང་བའི་དགེ་བའི་རྩ་བ་ཅི་ཡོད་པ་དང་། ཐ་ན་དུད་འགྲོའི་སྐྱེ་གནས་ཀྱི་སྲོག་ཆགས་དག་ལ་ཟན་ཆངས་གཅིག་ཙམ་བྱིན་པ་དང་། དགེ་བའི་ཚིག་གང་གིས་རྩོད་པ་དག་གི་བསྡུམས་བྱས་པ་དང་། དཀོན་མཆོག་གསུམ་ལ་སྐྱབས་སུ་སོང་ནས་བསླབ་པའི་གནས་རྣམས་ཡང་དག་པར་བླངས་པ་དང་། འགྱོད་ཚངས་བྱས་པ་དང་།བསྐུལ་ཞིང་གསོལ་བ་བཏབ་པ་དང་རྗེས་སུ་ཡི་རང་བའི་དགེ་བའི་རྩ་བ་ཇི་སྙེད་པ་དེ་དག་དེང་བདག་གིས་ཐམས་ཅད་གཅིག་ཏུ་
བསྡུས་ཏེ་འགྱོད་ཅིང་ཕངས་པ་མེད་པའི་སེམས་ཀྱིས་སེམས་ཅན་ཐམས་ཅད་ལ་ཡོངས་སུ་བཏང་ངོ་། །རྣམ་པར་གྲོལ་བའི་ཕྱོགས་ཀྱིས་ཡོངས་སུ་བཟུང་བའི་དགེ་བའི་རྩ་བ་གང་ཡིན་པ་དེ་དག་ཀྱང་སངས་རྒྱས་བཅོམ་ལྡན་འདས་ཀྱིས་མཁྱེན་ཅིང་གཟིགས་པ། དཔག་ཏུ་མེད་པ་དང་། ཐོགས་པ་མི་མངའ་བའི་རྣམ་པར་དག་པས་འདི་ལྟར་བསོད་ནམས་ཀྱི་དགེ་བའི་རྩ་བ་ཇི་སྙེད་པ་དག་ཐམས་ཅད་མཚན་མའི་སེམས་ལ་མི་གནས་ཤིང་མཚན་མའི་སེམས་ཀྱང་མི་སྤྱོད་པར་སེམས་ཅན་ཐམས་ཅད་ལ་ཡོངས་སུ་བཏང་བ་དེ་བཞིན་དུ། བདག་གིས་བསོད་ནམས་ལས་བྱུང་བའི་དགེ་བའི་རྩ་བ་ཅི་ཡོད་པ་དེ་དག་ཐམས་ཅད་ཀྱང་སེམས་ཅན་ཐམས་ཅད་ལ་ཡོངས་སུ་གཏོང་སྟེ། ཐམས་ཅད་ཀྱིས་ཡིད་བཞིན་གྱི་ལག་པ་ཐོབ་ནས་ནམ་མཁའ་ལས་རིན་པོ་ཆེ་ཕྱུང་སྟེ་སེམས་ཅན་ཐམས་ཅད་ཀྱི་རེ་བ་ཡོངས་སུ་བསྐང་བར་གྱུར་ཅིག །ལོངས་སྤྱོད་ཟད་མི་ཤེས་པ་དང་། ཤེས་རབ་མཐར་ཐུག་པ་མེད་པ་དང་། དམ་པའི་ཆོས་ཀྱི་སྤོབས་པ་ཐོགས་པ་མེད་པ་ཐོབ་ནས་སེམས་ཅན་ཐམས་ཅད་ཐུན་མོང་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་རྣམ་པ་ཐམས་ཅད་མཁྱེན་པ་ཐོབ་པར་གྱུར་ཅིག །དགེ་བའི་རྩ་བ་འདིའི་རྒྱུས་དགེ་བའི་ཆོས་ཚད་མེད་པ་བསྐྱེད་པ་གང་ཡིན་པ་དེ་དག་ཐམས་ཅད་ཀྱང་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོའོ། །གཞན་ཡང་འདས་པའི་བྱང་ཆུབ་སེམས་དཔའ་ཆེན་པོ་རྣམས་སྤྱད་པ་སྤྱོད་པ་ན་བསོད་ནམས་ཀྱི་དགེ་བའི་རྩ་བ་ཐམས་ཅད་རྣམ་པ་ཐམས་ཅད་མཁྱེན་པར་ཡོངས་སུ་བསྔོས་པ་དང་། ད་ལྟར་དང་། མ་འོངས་པ་དག་གིས་ཇི་ལྟར་ཡོངས་སུ་བསྔོ་བ་དེ་བཞིན་དུ་བདག་གིས་བསོད་ནམས་ཀྱི་དགེ་བའི་རྩ་བ་ཇི་སྙེད་པ་ཐམས་ཅད་ཀྱང་བླ་ན་མེད་པའི་བྱང་ཆུབ་ཏུ་ཡོངས་སུ་བསྔོའོ། ། དགེ་བའི་རྩ་བ་འདི་དག་གི་དབང་གིས་སེམས་ཅན་ཐམས་ཅད་དང་དུས་གཅིག་ཏུ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སངས་རྒྱས་གཞན་དག་ཇི་ལྟ་བ་བཞིན་དུ་བྱང་ཆུབ་ཀྱི་ཤིང་དྲུང་དུ་བྱང་ཆུབ་ཀྱི་སྙིང་པོ་ལ་གནས་ཏེ་བསམ་གྱིས་མི་ཁྱབ་པ་ཐོགས་
པ་མེད་པའི་རྣམ་པར་དག་པ་དང་། ཟད་མི་ཤེས་པའི་ཆོས་ཀྱི་གཟུངས་དང་། དཔའ་བར་འགྲོ་བའི་ཏིང་ངེ་འཛིན་ལ་གནས་ནས་བདུད་སྡིག་ཅན་གྱི་དམག་ཚོགས་ཚད་མེད་པ་དག་ཕམ་པར་བྱས་ཏེ་མཁྱེན་པ་དང་། གཟིགས་པ་མངོན་པར་རྟོགས་ནས་འདི་ལྟར་དེ་དག་ཐམས་ཅད་སྐད་ཅིག་གཅིག་ལ་གསལ་བར་རྟོགས་ཏེ་ནམ་གྱི་ཆ་སྨད་ལ་བདུད་རྩིའི་ཆོས་ཐོབ་ནས་ཟིལ་དངར་གྱི་དོན་མངོན་སུམ་དུ་གྱུར་ཏེ། བདག་དང་སེམས་ཅན་ཐམས་ཅད་སངས་རྒྱས་ཚེ་དཔག་ཏུ་མེད་པ་དང་། སངས་རྒྱས་འཕགས་པའི་འོད་དང་། སངས་རྒྱས་དམ་པའི་འོད་དང་། སངས་རྒྱས་མི་འཁྲུགས་པ་དང་། སངས་རྒྱས་ཡོན་ཏན་ལེགས་པའི་འོད་དང་། སངས་རྒྱས་སེང་གེའི་འོད་དང་། སངས་རྒྱས་འོད་བརྒྱ་པ་དང་། སངས་རྒྱས་དྲན་པའི་འོད་དང་། སངས་རྒྱས་རིན་ཆེན་མཚན་དང་། སངས་རྒྱས་རིན་ཆེན་འབར་དང་། སངས་རྒྱས་འབར་བའི་འོད་དང་། སངས་རྒྱས་རྒྱས་པར་འབར་བའི་འོད་དང་། སངས་རྒྱས་བཀྲ་ཤིས་བླ་མའི་རྒྱལ་པོ་དང་། སངས་རྒྱས་དམ་པའི་སྒྲ་དང་། སངས་རྒྱས་བཀོད་པའི་མཆོག་དང་། སངས་རྒྱས་ཆོས་ཀྱི་རྒྱལ་མཚན་དང་། སངས་རྒྱས་བླ་མ་འཕགས་པའི་སྐུ་དང་། སངས་རྒྱས་མངོན་པར་དགའ་བའི་གཟུགས་སྐུ་དང་། སངས་རྒྱས་འོད་ཟེར་ཀུན་དུ་སྣང་མཛད་དང་། སངས་རྒྱས་ཚངས་པ་རྣམ་དག་རྒྱལ་པོ་དང་། སངས་རྒྱས་བླ་མའི་རང་བཞིན་ལ་སོགས་པ་ཇི་ལྟ་བ་བཞིན་དུ་གྱ་ནོམ་པར་མངོན་པར་རྫོགས་པར་སངས་རྒྱས་ནས་འདི་ལྟར་དེ་བཞིན་གཤེགས་པ་ཡང་དག་པར་མཁྱེན་པ་དེ་དག་འདས་པ་དང་། མ་འོངས་པ་དང་། ད་ལྟར་ལོངས་སྤྱོད་རྫོགས་པ་དང་། སྤྲུལ་པའི་སྐུ་བསྟན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བརྙེས་ནས་བླ་ན་མེད་པའི་ཆོས་ཀྱི་འཁོར་ལོ་ཡོངས་སུ་བསྐོར་ཏེ་སེམས་ཅན་ཡོངས་སུ་བཟླས་པ་བཞིན་དུ་བདག་ཀྱང་དེ་བཞིན་དུ་གྱུར་ཅིག་ཅེས་རྒྱ་ཆེར་གོང་དུ་བསྟན་པ་བཞིན་དུ་བརྗོད་པར་བྱའོ། །རིགས་ཀྱི་བུ་ཤིན་ཏུ་དང་བའི་དད་པ་དང་ལྡན་པའི་སྐྱེས་པའམ་བུད་མེད་གང་ལ་ལ་ཞིག་གསེར་འོད་དམ་པ་མཆོག་ཏུ་
རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལས་ཀྱི་སྒྲིབ་པ་ཡོངས་སུ་སྦྱོང་བའི་ལེའུ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། དྲན་པས་མི་བརྗེད་པར་བྱས་ཏེ་གཞན་དག་ལ་རྒྱ་ཆེར་ཡང་དག་པར་སྟོན་པར་བྱེད་ན་བསོད་ནམས་ཀྱི་ཕུང་པོ་ཚད་མེད་དཔག་ཏུ་མེད་པ་སྙེད་ཐོབ་པར་འགྱུར་རོ། །འདི་ལྟ་སྟེ་དཔེར་ན།སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་ཡོད་པ་ཐམས་ཅད་དུས་གཅིག་ཏུ་མིའི་ལུས་མངོན་པར་གྲུབ་པར་གྱུར་ལ། མིའི་ལུས་ཐོབ་ནས་ཀྱང་ཐམས་ཅད་རང་སངས་རྒྱས་ཀྱི་ལམ་མངོན་པར་གྲུབ་པར་གྱུར་ཏེ། སྐྱེས་པའམ། བུད་མེད་གང་ལ་ལ་ཞིག་གིས་ནམ་འཚོའི་བར་དུ་བཀུར་སྟི་དང་། བླ་མར་བྱས་ཏེ་ཡོ་བྱད་རྣམ་པ་སྣ་བཞི་པོ་དག་གིས་མཆོད་པར་བྱས་ཏེ། རང་སངས་རྒྱས་རེ་རེ་ལ་ཡང་སོ་སོ་ནས་རིའི་རྒྱལ་པོ་རི་རབ་དང་མཉམ་པའི་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། རང་སངས་རྒྱས་དེ་དག་ཡོངས་སུ་མྱ་ངན་ལས་འདས་པའི་འོག་ཏུ་ཡང་རིན་པོ་ཆེ་ལས་མཆོད་རྟེན་བརྩིགས་ནས་མཆོད་པ་བྱས་ཏེ་མཆོད་རྟེན་དེ་དག་ཀྱང་དཔག་ཚད་བཅུ་གཉིས་ཀྱི་ཚད་ཙམ་དུ་མཐོ་ཞིང་མེ་ཏོག་དང་སྤོས་དང་རིན་པོ་ཆེའི་རྒྱལ་མཚན་དང་བ་དན་དང་གདུགས་མང་པོ་དག་གིས་རྟག་པར་མཆོད་པ་བྱས་ན་རིགས་ཀྱི་བུ་འདི་ཇི་སྙམ་དུ་སེམས། གང་ཟག་དེ་དག་གིས་ཐོབ་པའི་བསོད་ནམས་གང་ཡིན་པ་དེ་ནི་ཅི་མང་བ་ཡིན་སྙམ་མམ། ལྷའི་དབང་པོས་གསོལ་པ། བཅོམ་ལྡན་འདས་ཤིན་ཏུ་མང་ལགས་སོ། །རིགས་ཀྱི་བུ་གལ་ཏེ་གང་ལ་ལ་ཞིག་གིས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལས་ཀྱི་སྒྲིབ་པ་ཡོངས་སུ་སྦྱོང་བའི་ལེའུ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། དྲན་པས་མི་བརྗེད་པར་བྱས་ཏེ་གཞན་དག་ལ་རྒྱ་ཆེར་ཡང་དག་པར་སྟོན་པས་འཐོབ་པའི་བསོད་ནམས་གང་ཡིན་པ་དེ་སྔར་བསྟན་པའི་མཆོད་པ་བྱས་པའི་བསོད་ནམས་གང་ཡིན་པ་དེ་དང་བསྒྲུན་ན་བརྒྱའི་ཆར་ཡང་ཉེ་བར་མི་འགྲོ །བརྒྱ་སྟོང་དང་། བྱེ་བའི་ཆར་
ཡང་ཉེ་བར་མི་འགྲོ་བ་ནས། ཚད་དང་དཔེ་དང་རྒྱུའི་བར་དུ་ཡང་ཉེ་བར་མི་འགྲོའོ། །དེ་ཅིའི་ཕྱིར་ཞེ་ན། རིགས་ཀྱི་བུ་དང་། རིགས་ཀྱི་བུ་མོ་དེ་དག་ཡང་དག་པའི་སྤྱོད་པ་ལ་གནས་ནས་ཕྱོགས་བཅུའི་སངས་རྒྱས་བཅོམ་ལྡན་འདས་རྣམས་ལ་བླ་ན་མེད་པའི་ཆོས་ཀྱི་འཁོར་ལོ་ཡོངས་སུ་བསྐོར་བར་གསོལ་བ་འདེབས་པར་བྱེད་ན་སངས་རྒྱས་བཅོམ་ལྡན་འདས་རྣམས་རབ་ཏུ་དགྱེས་ནས་བསྔགས་པ་བརྗོད་པར་འགྱུར་བས་སོ། །རིགས་ཀྱི་བུ་ངས་ཇི་སྐད་བསྟན་པ་བཞིན་དུ་སྦྱིན་པ་ཐམས་ཅད་ཀྱི་ནང་ན་ཆོས་ཀྱི་སྦྱིན་པ་ནི་མཆོག་ཏུ་གྱུར་པ་ཡིན་པས་དེའི་ཕྱིར་རིགས་ཀྱི་བུ་དཀོན་མཆོག་གསུམ་ལ་མཆོད་པ་བྱས་པས་ཀྱང་དཔེ་བྱར་མི་ནུས་སོ། །གསུམ་ལ་སྐྱབས་སུ་འགྲོ་ཞིང་བསླབ་པ་ཐམས་ཅད་བསྲུང་བར་བསྐུལ་ནས་ཉམས་པར་མ་བྱས་པ་དང་། ལས་གསུམ་སྟོངས་པར་མ་གྱུར་པས་ཀྱང་དཔེ་བྱར་མི་ནུས་སོ། །འཇིག་རྟེན་ཐམས་ཅད་ཀྱི་མཐུ་དང་ནུས་པ་དང་མོས་པ་ཇི་ལྟ་བ་བཞིན་དུ་ཐེག་པ་གསུམ་པོ་དག་ཏུ་བྱང་ཆུབ་ཀྱི་སེམས་བསྐྱེད་པར་བསྐུལ་བས་ཀྱང་དཔེ་བྱར་མི་ནུས་སོ། །དུས་གསུམ་གྱི་འཇིག་རྟེན་གྱི་ཁམས་ཐམས་ཅད་ན་སེམས་ཅན་ཇི་སྙེད་ཡོད་པ་ཐམས་ཅད་ཐོགས་པ་མེད་པ་ཐོབ་ནས་བསོད་ནམས་ཚད་མེད་པ་མྱུར་དུ་ཡོངས་སུ་རྫོགས་པར་གྱུར་པས་ཀྱང་དཔེ་བྱར་མི་ནུས་སོ། །དུས་གསུམ་གྱི་ཞིང་དག་ན་ཡོད་པའི་སེམས་ཅན་ཐམས་ཅད་ཐོགས་པ་མེད་པར་བྱང་ཆུབ་གསུམ་པོ་དག་ཐོབ་པར་བྱས་པས་ཀྱང་དཔེ་བྱར་མི་ནུས་སོ། ། དུས་གསུམ་གྱི་ཞིང་དག་ན་ཡོད་པའི་སེམས་ཅན་ཐམས་ཅད་མྱུར་དུ་ངན་འགྲོ་བཞི་པོའི་སྡུག་བསྔལ་ལས་འབྱུང་བར་བསྐུལ་བས་ཀྱང་དཔེ་བྱར་མི་ནུས་སོ། །དུས་གསུམ་གྱི་ཞིང་དག་ན་ཡོད་པའི་སེམས་ཅན་ཐམས་ཅད་མི་དགེ་བའི་ལས་ཀྱི་སྒྲིབ་པ་ཤིན་ཏུ་ལྕི་བ་དག་ཡོངས་སུ་སྦྱང་བར་བསྐུལ་བས་ཀྱང་དཔེ་བྱར་མི་ནུས་སོ། །སྡུག་བསྔལ་ཐམས་ཅད་ལས་ཐར་བར་བྱ་བར་བསྐུལ་བས་ཀྱང་དཔེ་བྱར་མི་ནུས་སོ། །འཇིགས་ཤིང་སྐྲག་པ་དང་སྡུག་བསྔལ་གྱིས་གཟིར་ཅིང་ཉོན་མོངས་པ་ཐམས་ཅད་ལས་གྲོལ་བར་བྱས་པས་ཀྱང་དཔེ་བྱར་མི་ནུས་སོ། །དུས་
གསུམ་གྱི་སངས་རྒྱས་རྣམས་ཀྱི་སྤྱན་སྔར་སེམས་ཅན་ཐམས་ཅད་ཀྱི་བསོད་ནམས་ཇི་སྙེད་པ་དག་ལ་རྗེས་སུ་ཡི་རང་བར་བསྐུལ་ནས་བྱང་ཆུབ་ཀྱི་སྨོན་ལམ་བཏབ་པས་ཀྱང་དཔེ་བྱར་མི་ནུས་སོ། །སྡིག་པའི་སྤྱོད་པ་དང་། གཤེ་ཞིང་སྤྱོ་བའི་ལས་ཡོངས་སུ་བསལ་བར་བསྐུལ་བ་དང་། ཡོན་ཏན་ཐམས་ཅད་ཡོངས་སུ་རྫོགས་པར་སྨོན་པ་དང་། སྐྱེ་བ་ཐམས་ཅད་དུ་དཀོན་མཆོག་གསུམ་པོ་ཐམས་ཅད་ལ་མཆོད་པ་དང་། བླ་མར་བྱ་བ་དང་བསྔགས་པ་བརྗོད་པར་བསྐུལ་བ་དང་། སེམས་ཅན་རྣམས་བསོད་ནམས་ཀྱི་སྤྱོད་པ་ཡོངས་སུ་དག་པ་མངོན་པར་སྒྲུབ་པར་བསྐུལ་ནས་བྱང་ཆུབ་ཡོངས་སུ་རྫོགས་པར་བྱས་པས་ཀྱང་དཔེ་བྱར་མི་ནུས་པས་དེའི་ཕྱིར་འཇིག་རྟེན་གྱི་ཁམས་ཐམས་ཅད་ཀྱི་དུས་གསུམ་གྱི་དཀོན་མཆོག་གསུམ་ལ་བསྐུལ་ཞིང་གསོལ་བ་བཏབ་པ་དང་། ཕ་རོལ་ཏུ་ཕྱིན་པ་དྲུག་ཡོངས་སུ་རྫོགས་པར་བྱ་བར་བསྐུལ་བ་དང་། བླ་ན་མེད་པའི་ཆོས་ཀྱི་འཁོར་ལོ་ཡོངས་སུ་བསྐོར་བར་བསྐུལ་ཞིང་གསོལ་བ་བཏབ་པ་དང་། བསྐལ་པ་ཚད་མེད་པ་སྙེད་དུ་འཇིག་རྟེན་ན་བཞུགས་ནས་ཆོས་མཆོག་དམ་པ་ཟབ་མོ་བཤད་པར་བསྐུལ་ཞིང་གསོལ་བ་བཏབ་པའི་བསོད་ནམས་གང་ཡིན་པ་དེ་ནི་ཤིན་ཏུ་ཟབ་པས་གང་གིས་ཀྱང་དཔེ་བྱར་མི་ནུས་པར་རིག་པར་བྱའོ། །དེ་ནས་བརྒྱ་བྱིན་ལྷའི་དབང་པོ་དང་། གང་གཱའི་ལྷ་མོ་དང་། ཚངས་པའི་རྒྱལ་པོ་དང་། རྒྱལ་ཆེན་རིས་བཞིའི་ལྷ་ཚད་མེད་པ་རྣམས་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ཐོས་པས་ཐམས་ཅད་ཡོངས་སུ་བཟུང་སྟེ་ཀློག་པ་དང་། གཡར་ཏོན་དུ་འདོན་པ་དང་། ཀུན་ཆུབ་པར་བགྱིས་ཏེ། གཞན་དག་ལ་རྒྱ་ཆེར་ཡང་དག་པར་བསྟན་ནས་ཆོས་འདི་ལ་བརྟེན་ཏེ་རབ་ཏུ་གནས་པར་བགྱིད་དོ། །དེ་ཅིའི་སླད་དུ་ཞེ་ན། བཅོམ་ལྡན་འདས་བདག་ཅག་བླ་ན་མ་མཆིས་པ་ཡང་དག་པར་
རྫོགས་པའི་བྱང་ཆུབ་ཡོངས་སུ་གཉེར་བར་འཚལ་བས་དོན་འདི་མཚན་ཉིད་ཁྱད་པར་དུ་འཕགས་པའི་རྗེས་སུ་འབྲངས་ནས་ཆོས་བཞིན་དུ་སྤྱོད་པའི་སླད་དུའོ། །དེ་ནས་ཚངས་པ་དང་། བརྒྱ་བྱིན་ལ་སོགས་པས་ཆོས་བཤད་པའི་གནས་དེ་ཉིད་དུ་མེ་ཏོག་མནྡཱ་ར་བ་རྣམ་པ་སྣ་ཚོགས་ཀྱིས་བཅོམ་ལྡན་འདས་ལ་མངོན་པར་གཏོར་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཀྱིས་ཆེན་པོ་ཐམས་ཅད་རབ་ཏུ་གཡོས་པར་གྱུར་ཏོ། །ལྷའི་རྔ་བོ་ཆེ་དང་། རོལ་མོ་ཐམས་ཅད་ཀྱང་མ་དཀྲོལ་བར་སྒྲ་རང་བྱུང་སྟེ། གསེར་གྱི་ཁ་དོག་གི་འོད་ཟེར་བཀྱེ་བས་འཇིག་རྟེན་གྱི་ཁམས་ཀུན་དུ་ཁྱབ་པར་བཀང་སྟེ་སྒྲ་དབྱངས་དམ་པ་བྱུང་བར་གྱུར་པ་དང་། དེ་ནས་བཅོམ་ལྡན་འདས་ལ་བརྒྱ་བྱིན་ལ་ལྷའི་དབང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་དག་ཐམས་ཅད་ནི་གསེར་འོད་དམ་པའི་མདོ་སྡེའི་བྱིན་གྱིས་བརླབས་ཀྱི་མཐུ་ལགས་པས་བྱམས་པ་དང་ཐུགས་རྗེས་རྣམ་པ་སྣ་ཚོགས་ཀྱིས་ཡོངས་སུ་སྐྱོབ་ཅིང་ཕན་འདོགས་པ་དང་རྣམ་པ་སྣ་ཚོགས་ཀྱིས་བྱང་ཆུབ་སེམས་དཔའི་དགེ་བའི་རྩ་བ་འཕེལ་ཞིང་ལས་ཀྱི་སྒྲིབ་པ་རྣམས་ཡོངས་སུ་སྦྱོང་བར་མཛད་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་བཞིན་ནོ། །དེ་ཅིའི་ཕྱིར་ཞེ་ན། རིགས་ཀྱི་བུ་ངས་མངོན་པར་དྲན་ཏེ་སྔོན་བྱུང་བ་འདས་པའི་བསྐལ་པ་བརྒྱ་སྟོང་ཚད་མེད་པ་སྙེད་འདས་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིན་པོ་ཆེའི་རྒྱལ་པོ་འོད་ཆེན་སྣང་མཛད་ཅེས་བྱ་བ་འཇིག་རྟེན་དུ་བྱུང་སྟེ། བསྐལ་པ་འབུམ་ཕྲག་དྲུག་བརྒྱ་བརྒྱད་ཅུའི་བར་དུ་འཇིག་རྟེན་ན་བཞུགས་སོ། །དེའི་ཚེ་དེ་བཞིན་གཤེགས་པ་རིན་པོ་ཆེའི་རྒྱལ་པོ་འོད་ཆེན་སྣང་མཛད་ཀྱིས་ལྷ་དང་། མི་དང་། བརྒྱ་བྱིན་དང་། ཚངས་པ་དང་། དགེ་སྦྱོང་དང་། བྲམ་ཟེ་དང་། སེམས་ཅན་ཐམས་ཅད་ཡོངས་སུ་མྱ་ངན་ལས་བཟླས་ནས་བདེ་བར་མཛད་པའི་ཕྱིར་འཇིག་རྟེན་དུ་བྱུང་བ་ན། འདུས་པ་དང་པོ་ལ་ཆོས་བསྟན་པས་སྲོག་
ཆགས་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་སྙེད་ཡོངས་སུ་མྱ་ངན་ལས་བཟླས་ནས་ཐམས་ཅད་ཀྱིས་དགྲ་བཅོམ་པའི་འབྲས་བུ་ཐོབ་པས་ཟག་པ་རྣམས་ཟད་ནས་རིག་པ་གསུམ་དང་། མངོན་པར་ཤེས་པ་དྲུག་དང་། ཐོགས་པ་མེད་པའི་རང་དབང་དང་ལྡན་པར་གྱུར་ཏོ། ། འདུས་པ་གཉིས་པའི་ཚེ་ཡང་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་དགུ་བཅུ་ཡོངས་སུ་མྱ་ངན་ལས་བཟླས་ནས་ཐམས་ཅད་ཀྱིས་དགྲ་བཅོམ་པའི་འབྲས་བུ་ཐོབ་ནས་ཟག་པ་རྣམས་ཟད་ནས་རིག་པ་གསུམ་དང་། མངོན་པར་ཤེས་པ་དྲུག་དང་། ཐོགས་པ་མེད་པའི་རང་དབང་དང་ལྡན་པར་གྱུར་ཏོ། །འདུས་པ་གསུམ་པའི་ཚེ་ན་ཡང་སྲོག་ཆགས་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་དགུ་བཅུ་ཡོངས་སུ་མྱ་ངན་ལས་བཟླས་ནས་ཐམས་ཅད་ཀྱིས་དགྲ་བཅོམ་པའི་འབྲས་བུ་ཐོབ་པས་ཞེས་བྱ་བ་ཡང་རྒྱས་པར་གོང་མ་བཞིན་ནོ། །རིགས་ཀྱི་བུ་ང་དེའི་ཚེ་བུད་མེད་ཀྱི་ལུས་སུ་གྱུར་ཏེ། མིང་ནི་བསོད་ནམས་རིན་པོ་ཆེའི་འོད་ཅེས་བྱའོ། །འདུས་པ་གསུམ་པའི་ཚེ་ཡང་བཅོམ་ལྡན་འདས་དེ་ལ་ཉེ་བར་བསྙེན་ནས་གསེར་འོད་དམ་པའི་མདོ་སྡེ་འདི་ཡོངས་སུ་བཟུང་སྟེ་བཀླག་པ་དང་། ཁ་ཏོན་དུ་བཏོན་ནས་གཞན་དག་ལ་རྒྱ་ཆེར་ཡང་དག་པར་བསྟན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བའི་ཕྱིར་དེའི་ཚེ་བཅོམ་ལྡན་འདས་དེས་ང་ལ་བུ་མོ་བསོད་ནམས་རིན་པོ་ཆེའི་འོད་འདི་མ་འོངས་པའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ་འཇིག་རྟེན་མཁྱེན་པ། བླ་ན་མེད་པའི། སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་ཞེས་བྱ་བར་འགྱུར་རོ་ཞེས་ལུང་བསྟན་ཏེ། བུད་མེད་ཀྱི་ལུས་སྤངས་ནས་དེ་ཚུན་ཆད་ངན་འགྲོ་བཞི་ལས་ཡང་དག་པར་འདས་ཏེ། ལྷ་དང་མིའི་ནང་དུ་སྐྱེས་ནས་བདེ་བའི་མཆོག་མྱོང་བར་གྱུར་ཏོ། །ཚེ་རབས་སྟོང་ཕྲག་བཞི་བརྒྱ་བརྒྱད་ཅུའི་བར་དུ་འཁོར་ལོས་སྒྱུར་བའི་རྒྱལ་པོ་བྱས་ཏེ། དེང་ཡང་དག་པར་མངོན་པར་རྫོགས་པར་སངས་
རྒྱས་པའི་བར་དུ་ཡང་གྲགས་པ་འཇིག་རྟེན་གྱི་ཁམས་ཀུན་དུ་གང་ཞིང་རྒྱས་པར་གྱུར་པ་ཡིན་ནོ། །དེ་ནས་དེའི་ཚེ་འཁོར་འདུས་པ་ཆེན་པོ་ཐམས་ཅད་ཀྱིས་དེ་བཞིན་གཤེགས་པ་རིན་པོ་ཆེའི་རྒྱལ་པོ་འོད་ཆེན་སྣང་མཛད་བླ་ན་མེད་པའི་ཆོས་ཀྱི་འཁོར་ལོ་ཡོངས་སུ་བསྐོར་ནས་ཆོས་མཆོག་དམ་པ་བཤད་པ་མཐོང་བར་གྱུར་ཏོ། །རིགས་ཀྱི་བུ་འཇིག་རྟེན་གྱི་ཁམས་མི་མཇེད་འདི་ནས་ཤར་ཕྱོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་བརྒྱ་སྟོང་སྙེད་འདས་པ་ན་འཇིག་རྟེན་གྱི་ཁམས་རིན་པོ་ཆེའི་བཀོད་པ་ཞེས་བྱ་བ་ཡོད་དེ། དེ་བཞིན་གཤེགས་པ་རིན་པོ་ཆེའི་རྒྱལ་པོ་འོད་ཆེན་སྣང་མཛད་ཅེས་བྱ་བ་ད་ལྟར་དེ་ན་བཞུགས་ཏེ། ཡོངས་སུ་མྱ་ངན་ལས་འདས་པས་ཆོས་མཆོག་དམ་པ་བཤད་ནས་སྐྱེ་དགུ་རྣམས་ལ་ཕན་འདོགས་པར་མཛད་པས་ཁྱོད་ཀྱིས་མཐོང་བ་ནི་སངས་རྒྱས་དེ་ཡིན་ནོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་དེ་བཞིན་གཤེགས་པ་རིན་པོ་ཆེའི་རྒྱལ་པོ་འོད་ཆེན་སྣང་མཛད་ཅེས་མཚན་ཐོས་པར་གྱུར་ན། བྱང་ཆུབ་སེམས་དཔའི་ས་ལས་ལྡོག་པར་མི་འགྱུར་ཞིང་། ཡོངས་སུ་མྱ་ངན་ལས་འདས་པ་ཆེན་པོ་ཐོབ་པར་འགྱུར་རོ། །བུད་མེད་གང་ལ་ལ་ཞིག་དེ་བཞིན་གཤེགས་པ་དེའི་མཚན་ཐོས་པར་གྱུར་ན་འཆི་ཀའི་དུས་ཀྱི་ཚེ་དེ་བཞིན་གཤེགས་པ་དེ་དེའི་ཐད་དུ་གཤེགས་པར་འགྱུར་ཏེ། དེ་བཞིན་གཤེགས་པ་མཐོང་བའི་དབང་གིས་ནམས་ཀྱང་བུད་མེད་ཀྱི་ལུས་ལེན་པར་མི་འགྱུར་རོ། །རིགས་ཀྱི་བུ་གསེར་འོད་དམ་པ་ཤིན་ཏུ་གྱ་ནོམ་པའི་མདོ་སྡེ་འདི་ནི་རྣམ་པ་སྣ་ཚོགས་ཀྱིས་ཕན་འདོགས་ཤིང་རྣམ་པ་སྣ་ཚོགས་ཀྱིས་བྱང་ཆུབ་སེམས་དཔའི་དགེ་བའི་རྩ་བ་འཕེལ་བ་དང་། ལས་ཀྱི་སྒྲིབ་པ་རྣམས་ཡོངས་སུ་སྦྱོང་བར་བྱེད་དོ། །རིགས་ཀྱི་བུ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་གང་ན་གནས་པའི་གནས་དེར་གསེར་འོད་དམ་པ་ཤིན་ཏུ་གྱ་ནོམ་པའི་མདོ་སྡེ་འདི་གཞན་དག་ལ་ཡང་དག་པར་སྟོན་པར་བྱེད་ན་ཡུལ་དེ་ནི་བསོད་ནམས་ཀྱི་ཕན་ཡོན་རྣམ་པ་བཞི་ཐོབ་པར་འགྱུར་རོ། །བཞི་གང་ཞེ་ན། ཡུལ་
དེའི་རྒྱལ་པོ་ནད་མེད་ཅིང་བགེགས་རྣམས་དང་བྲལ་བ་དང་། ཚེ་རིང་ཞིང་ཐོགས་པ་མེད་པར་འགྱུར་བ་དང་། ཕས་ཀྱི་རྒོལ་བའི་དགྲ་མེད་ཅིང་དམག་ཚོགས་དཔའ་བར་འགྱུར་བ་དང་། བདེ་བའི་ལོངས་སྤྱོད་རྒྱས་ཤིང་ཡང་དག་པའི་ཆོས་འཕེལ་བར་འགྱུར་བ་གང་ཡིན་པའོ། ། དེ་ཅིའི་ཕྱིར་ཞེ་ན། འདི་ལྟར་མིའི་རྒྱལ་པོ་དེ་ལ་བརྒྱ་བྱིན་དང་། ཚངས་པ་དང་། རྒྱལ་པོ་ཆེན་པོ་བཞི་དང་། གནོད་སྦྱིན་གྱི་འཁོར་རྣམས་ཀྱིས་རྟག་པར་ལྷན་ཅིག་སྲུང་བར་བྱེད་པའི་ཕྱིར་རོ། །དེ་ནས་བཅོམ་ལྡན་འདས་ཀྱིས་ལྷའི་འཁོར་རྣམས་ལ་བཀའ་སྩལ་པ། རིགས་ཀྱི་བུ་དག་དངོས་པོ་འདི་དག་བདེན་ནམ། དེ་ནས་བརྒྱ་བྱིན་དང་། ཚངས་པ་དང་། རྒྱལ་པོ་ཆེན་པོ་བཞི་དང་། གནོད་སྦྱིན་གྱི་འཁོར་རྣམས་ཀྱིས་སྐད་མཐུན་པར་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དེ་དེ་བཞིན་ནོ། །དེ་དེ་བཞིན་ཏེ། ཡུལ་གང་དག་ན་མདོ་སྡེའི་རྒྱལ་པོ་དམ་པ་འདི་ཡང་དག་པར་བཤད་པ་དང་། ཀློག་པ་དང་། ཁ་ཏོན་དུ་འདོན་པར་བགྱིད་ན་ཡུལ་གྱི་བདག་པོ་དེ་དག་ལ་བདག་ཅག་རྒྱལ་པོ་ཆེན་པོ་བཞི་ལ་སོགས་པས་རྟག་པར་མཆིས་ནས་ཡོངས་སུ་སྲུང་བར་བགྱིད་པར་མཆི་བ་དང་། གནས་པ་ན་ཡང་ལྷན་ཅིག་གནས་པར་བགྱིད་དོ། །རྒྱལ་པོ་དེ་ལ་གདོན་བགེགས་དང་རྒོལ་བའི་དགྲ་ཞིག་མཆིས་ན་ཡང་དེ་དག་ཐམས་ཅད་བདག་ཅག་རྒྱལ་པོ་ཆེན་པོ་བཞི་ལ་སོགས་པས་རབ་ཏུ་ཞི་བར་བགྱིད་དོ། །མྱ་ངན་དང་རིམས་ནད་ལ་སོགས་པ་ཡང་བསལ་ཞིང་སོས་པར་བགྱིད་པ་ནས་ཚེ་འཕེལ་བ་དང་། དགེ་བའི་རྟགས་འབྱུང་བ་དང་། སྨོན་པ་རྣམས་བསམས་པ་བཞིན་འགྲུབ་པ་དང་། རྟག་ཏུ་དགའ་བ་བསྐྱེད་པར་བགྱིད་དོ། །བདག་ཅག་གིས་ཡུལ་དེ་ན་དམག་ཚོགས་ཇི་སྙེད་མཆིས་པ་དེ་དག་ཐམས་ཅད་དཔའ་ཞིང་བརྩོན་པར་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དག་ལེགས་སོ་ལེགས་སོ། །ཁྱེད་ཀྱིས་ཇི་སྐད་སྨྲས་པ་དེ་བཞིན་དུ་ཁྱེད་ཀྱིས་མངོན་པར་བསྒྲུབ་པར་བྱའོ། །དེ་ཅིའི་ཕྱིར་ཞེ་ན། ཡུལ་གྱི་བདག་པོ་དེ་དག་ཆོས་བཞིན་དུ་སྤྱོད་པའི་དུས་
ན་འབངས་ཐམས་ཅད་ཀྱང་རྒྱལ་པོའི་རྗེས་སུ་མངོན་པར་སྒྲུབ་ཅིང་ཆོས་བཞིན་དུ་སྤྱོད་པར་བྱེད་པས་ཁྱེད་ལ་སོགས་པ་ཡང་གཟུགས་དང་སྟོབས་དང་ཕན་ཡོན་མཆོག་ཐོབ་པར་འགྱུར་ཞིང་གཞལ་མེད་ཁང་འོད་དང་ལྡན་པ་དང་འཁོར་རྣམས་ཀྱང་བརྩོན་ཞིང་རྒྱས་པར་འགྱུར་བས་སོ། །དེ་ནས་བཅོམ་ལྡན་འདས་ལ་བརྒྱ་བྱིན་དང་། ཚངས་པ་ལ་སོགས་པས་བཅོམ་ལྡན་འདས་དེ་དེ་བཞིན་ནོ་ཞེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ། གནས་གང་དུ་མདོ་སྡེ་དམ་པ་འདི་ཡང་དག་པར་སྟོན་ཅིང་ཀློག་པ་དང་། སྤེལ་བའི་ཡུལ་དེའི་བློན་པོ་ཆེན་པོ་དང་། ནང་བློན་རྣམས་ཕན་ཡོན་རྣམ་པ་བཞི་ཐོབ་པར་འགྱུར་ཏེ། བཞི་གང་ཞེ་ན། དང་པོ་ནི་ཕན་ཚུན་འདུམ་ཞིང་ཉེ་བར་སེམས་པ་དང་། བླ་མར་བྱེད་ཅིང་སྡུག་པར་སེམས་པའོ། །གཉིས་པ་ནི་རྟག་པར་མིའི་རྒྱལ་པོའི་སྙིང་དུ་སྡུག་ཅིང་བཀུར་བ་དང་། དགེ་སྦྱོང་དང་། བྲམ་ཟེ་དང་། ཡུལ་ཆེན་པོ་དང་། ཡུལ་ཆུང་ངུའི་མི་རྣམས་ཀྱིས་བཙུན་པར་བྱེད་པའོ། །གསུམ་པ་ནི་ནོར་ལ་ཡང་དམ་པར་འཛིན་ཅིང་ཆོས་ལ་བཙུན་པར་བྱེད་པ་དང་། འཇིག་རྟེན་པའི་ཁེ་མི་ཚོལ་བས་སྙན་པའི་སྒྲ་ཀུན་དུ་གྲགས་ནས་མང་པོ་ཀུན་གྱིས་བཀུར་བར་འགྱུར་བའོ། །བཞི་པ་ནི་ཚེ་རིང་ཞིང་བདེ་སྐྱིད་པར་འགྱུར་བ་སྟེ་འདི་དག་ནི་ཕན་ཡོན་རྣམ་པ་བཞི་ཞེས་བྱའོ། །གལ་ཏེ་ཡུལ་གྱི་བདག་པོ་གང་ལ་ལ་ཞིག་གིས་མདོ་སྡེ་འདི་ཡང་དག་པར་སྟོན་པར་བྱེད་ན་དགེ་སྦྱོང་དང་། བྲམ་ཟེ་རྣམས ་ཕན་ཡོན་ཁྱད་པར་དུ་འཕགས་པ་རྣམ་པ་བཞི་ཐོབ་པར་འགྱུར་རོ། །བཞི་གང་ཞེ་ན། དང་པོ་ནི་གོས་དང་། བཟའ་བ་དང་། བཏུང་བ་དང་། མལ་ཆ་དང་། ན་བའི་གསོས་སྨན་རྣམས་ཀྱིས་ཕོངས་པ་མེད་པ་གང་ཡིན་པའོ། །གཉིས་པ་ནི་ཐམས་ཅད་སེམས་བདེ་བར་ཡིད་ལ་སེམས་ཤིང་ཀློག་པ་དང་ཁ་ཏོན་འདོན་པར་འགྱུར་བའོ། །གསུམ་པ་ནི་རི་དང་ནགས་ཚལ་དག་ལ་གནས་པ་ན་བདེ་བར་གནས་པ་ཐོབ་པར་འགྱུར་བའོ། །བཞི་པ་ནི་སེམས་ཀྱིས་ཇི་ལྟར་སྨོན་པ་བཞིན་ཐམས་ཅད་ཡོངས་སུ་རྫོགས་པར་འགྱུར་བ་སྟེ། འདི་དག་ནི་ཁྱད་པར་དུ་འཕགས་
པའི་ཕན་ཡོན་རྣམ་པ་བཞི་ཞེས་བྱའོ། །གལ་ཏེ་ཡུལ་ལ་ལར་མདོ་སྡེ་འདི་ཡང་དག་པར་སྟོན་པར་བྱེད་ན་མི་ཐམས་ཅད་དར་ཞིང་སྐྱིད་པ་དང་། རིམས་ནད་རྣམས་མེད་པ་དང་། ཚོང་པ་དང་འགྲོན་པོ་ཕན་ཚུན་འགྲོ་བའི་ནོར་དང་རིན་པོ་ཆེ་མང་དུ་ཐོབ་པ་དང་། བསོད་ནམས་ཁྱད་པར་དུ་འཕགས་པ་ཐོབ་པར་འགྱུར་ཏེ། འདི་དག་ནི་ཡོན་ཏན་གྱི་ཕན་ཡོན་རྣམ་པ་སྣ་ཚོགས་ཞེས་བྱའོ། །དེ་ནས་བཅོམ་ལྡན་འདས་ལ་ཚངས་པ་དང་། བརྒྱ་བྱིན་དང་། རྒྱལ་པོ་ཆེན་པོ་བཞི་དང་། འཁོར་མང་པོ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་ཟབ་མོ་འདི་ལྟ་བུ་མངོན་དུ་གནས་པར་གྱུར་ན་དེ་བཞིན་གཤེགས་པའི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ཡང་འཇིག་རྟེན་ན་གནས་ཤིང་ནུབ་པར་མི་འགྱུར་ལ། ནམ་མདོ་སྡེ་འདི་ལྟ་བུ་ནུབ་པར་གྱུར་པ་ན་ཡང་དག་པའི་ཆོས་ཀྱང་ནུབ་པར་འགྱུར་བར་རིག་པར་བགྱི་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། དེ་ལྟ་བས་ན་ཁྱེད་ཀྱིས་གསེར་འོད་དམ་པའི་མདོ་སྡེ་འདི་ལས་ཚིག་གཅིག་གམ་སྡེ་གཅིག་ཀྱང་རུང་སྟེ། ཐམས་ཅད་སེམས་རྩེ་གཅིག་ཏུ་ཡང་དག་པར་བཀླག་པར་བྱ། ཡང་དག་པར་ཁ་ཏོན་དུ་གདོན་པར་བྱ།ཡང་དག་པར་མཉན་པར་བྱ། ཡང་དག་པར་གཟུང་བར་བྱ། ཡང་དག་པར་ཡིད་ལ་བསམ་པར་བྱ་ཞིང་ཡང་དག་པར་བསྒོམས་ནས། སེམས་ཅན་མང་པོའི་ཆེད་དུ་རྒྱ་ཆེར་ཡང་དག་པར་བསྟན་ཏེ་ཡོངས་སུ་སྤེལ་བར་བྱེད་ན་ཡུན་རིང་པོར་བདེ་བསྐྱེད་ཅིང་བསོད་ནམས་ཀྱི་ཕན་ཡོན་མཐའ་མེད་དོ། །དེ་ནས་འཁོར་མང་པོ་རྣམས་ཀྱིས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་ནས་ཐམས་ཅད་ཕན་ཡོན་ཁྱད་པར་དུ་འཕགས་པ་ཐོབ་པར་གྱུར་པས་རབ་ཏུ་དགའ་ཞིང་མགུ་བས་ཡང་དག་པར་བཟུང་བར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལས་ཀྱི་སྒྲིབ་པ་རྣམ་པར་སྦྱོང་བའི་ལེའུ་སྟེ་ལྔ་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་བཞི་པ།
དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སེང་གེའི་མཚན་ཐོགས་པ་མེད་པའི་འོད་ཟེར་འབར་བ་འཁོར་བྱེ་བ་ཕྲག་ཚད་མེད་པ་སྙེད་དང་ལྷན་ཅིག་ཏུ་སྟོན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་གུས་པའི་ཐལ་མོ་སྦྱར་ནས། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་མེ་ཏོག་དང་སྤོས་དང་རིན་པོ་ཆེའི་རྒྱལ་མཚན་དང་། བ་དན་དང་། གདུགས་རྣམ་པ་སྣ་ཚོགས་ཀྱིས་མཆོད་པ་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་དང་རྐྱེན་དུ་ཞིག་གིས་ནི་བྱང་ཆུབ་ཀྱི་སེམས་འཐོབ་པར་འགྱུར། གང་ནི་བྱང་ཆུབ་ཀྱི་སེམས་ཞེས་བགྱི་ལགས། བཅོམ་ལྡན་འདས་བྱང་ཆུབ་གང་ལགས་པ་དེ་ལ་ནི་ད་ལྟར་གྱི་སེམས་ཀྱང་དམིགས་སུ་མ་མཆིས། མ་འོངས་པའི་སེམས་ཀྱང་དམིགས་སུ་མ་མཆིས། འདས་པའི་སེམས་ཀྱང་དམིགས་སུ་མ་མཆིས་པ་ལགས་སོ། །བྱང་ཆུབ་ལས་གུད་ན་ཡང་བྱང་ཆུབ་ཀྱི་སེམས་དམིགས་སུ་མ་མཆིས་ལགས་སོ། །བྱང་ཆུབ་ཅེས་བགྱི་བ་ནི་ཚིག་གིས་བརྗོད་དུ་མ་མཆིས་པས་སེམས་ཀྱང་གཟུགས་མ་མཆིས་པ། མཚན་མ་མ་མཆིས་པ། དངོས་པོ་དང་ལས་མ་མཆིས་པ། མངོན་པར་འདུ་བགྱི་བ་མ་ལགས་པ། སེམས་ཅན་ཡང་དམིགས་སུ་མ་མཆིས་ཤིང་ཁོང་དུ་ཆུད་པར་ཡང་མི་འགྱུར་ན། བཅོམ་ལྡན་འདས་ཇི་ལྟར་ཆོས་ཟབ་མོ་འདིའི་དོན་གང་ལགས་པ་རིག་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་དེ་བཞིན་ནོ། །དེ་དེ་བཞིན་ཏེ། བྱང་ཆུབ་ཀྱི་དངོས་པོ་དང་། ལས་ནི་ཤིན་ཏུ་གྱ་ནོམ་པས་མངོན་པར་འདུ་བྱ་བར་ཡང་དམིགས་པར་མི་འགྱུར་ལ་བྱང་ཆུབ་ལས་གུད་ན་ཡང་བྱང་ཆུབ་ཀྱི་སེམས་དམིགས་པར་མི་འགྱུར་བས་བྱང་ཆུབ་ཅེས་བྱ་བ་ནི་བརྗོད་དུ་མེད་པ། སེམས་ཀྱང་བརྗོད་དུ་མེད་པ། གཟུགས་དང་མཚན་མ་མེད་པ། དངོས་པོ་དང་ལས་མེད་པ། སེམས་ཅན་ཐམས་ཅད་ཀྱང་དམིགས་སུ་མེད་པའོ། །དེ་ཅིའི་ཕྱིར་ཞེ་ན། བྱང་ཆུབ་དང་སེམས་གཉི་ག་ཡང་དེ་བཞིན་ཉིད་དུ་མཚུངས་པའི་
ཕྱིར་དང་མངོན་དུ་བྱེད་པ་དང་། མངོན་དུ་བྱ་བ་མཉམ་པར་གྱུར་པའི་ཕྱིར་ཏེ། འོན་ཀྱང་ཆོས་རྣམས་ཤེས་པར་བྱ་བ་མེད་པ་ནི་མ་ཡིན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་དེ་ལྟར་ཤེས་པར་བྱ་བ་གང་ཡིན་པ་དེ་ནི་ཆོས་རྣམས་མངོན་པར་རྟོགས་པ་དང་། བྱང་ཆུབ་དང་བྱང་ཆུབ་ཀྱི་སེམས་ལེགས་པར་བཤད་པ་ཞེས་བྱའོ། །བྱང་ཆུབ་ཀྱི་སེམས་གང་ཡིན་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་ཏེ། སེམས་ཀྱང་དེ་བཞིན་ནོ། །སེམས་ཅན་ཡང་དེ་བཞིན་ཏེ། འདི་ལ་མཚན་ཉིད་གཉིས་ཡང་དག་པར་དམིགས་སུ་མེད་དོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ལ་སྐྱེ་བ་མེད་པའི་ཕྱིར་རོ། །བྱང་ཆུབ་ཀྱང་དམིགས་སུ་མེད། བྱང་ཆུབ་ཀྱི་མིང་ཡང་དམིགས་སུ་མེད། སེམས་ཅན་དང་སེམས་ཅན་གྱི་མིང་ཡང་དམིགས་སུ་མེད། ཉན་ཐོས་དང་ཉན་ཐོས་ཀྱི་མིང་ཡང་དམིགས་སུ་མེད། རང་སངས་རྒྱས་དང་རང་སངས་རྒྱས་ཀྱི་མིང་ཡང་དམིགས་སུ་མེད། བྱང་ཆུབ་སེམས་དཔའ་དང་བྱང་ཆུབ་སེམས་དཔའི་མིང་ཡང་དམིགས་སུ་མེད། སངས་རྒྱས་དང་སངས་རྒྱས་ཀྱི་མཚན་ཡང་དམིགས་སུ་མེད། སྤྱོད་པ་དང་སྤྱོད་པ་མ་ཡིན་པ་ཡང་དམིགས་སུ་མེད། སྤྱོད་པ་དང་སྤྱོད་པ་མ་ཡིན་པའི་མིང་ཡང་དམིགས་སུ་མེད་དེ། འདི་ལྟར་དམིགས་སུ་མེད་པའི་ཕྱིར་རབ་ཏུ་དབེན་པའི་ཆོས་ཐམས་ཅད་ལ་རབ་ཏུ་གནས་པ་ཡིན་ཏེ། འདི་ཡང་བསོད་ནམས་ཀྱི་དགེ་བའི་རྩ་བ་ལ་བརྟེན་ནས་སྐྱེ་བར་འགྱུར་བ་ཡིན་ནོ། རིགས་ཀྱི་བུ་འདི་ལྟ་སྟེ་དཔེར་ན། རིན་པོ་ཆེའི་རིའི་རྒྱལ་པོ་རི་རབ་ཐམས་ཅད་ལ་ཕན་འདོགས་པར་བྱེད་པ་དེ་བཞིན་དུ་བྱང་ཆུབ་ཀྱི་སེམས་འདི་ཡང་སེམས་ཅན་ལ་ཕན་འདོགས་པའི་ཕྱིར་འདི་ནི་དང་པོ་སྦྱིན་པའི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། ། རིགས་ཀྱི་བུ་འདི་ལྟ་སྟེ་དཔེར་ན། ས་ཆེན་པོ་བཞིན་དུ་དངོས་པོ་མང་པོ་ཡོངས་སུ་འཛིན་པར་བྱེད་པའི་ཕྱིར་འདི་ནི་གཉིས་པ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། སེང་གེ་གཟི་བྱིན་ཆེན་པོའི་མཐུ་དང་ལྡན་པ་གཅིག་པུ་འགྲོ་བ་ལ་འཇིགས་
པ་མེད་པ་དེ་བཞིན་དུ་སྐྲག་ཅིང་དངང་བ་དང་བྲལ་བར་གྱུར་པའི་ཕྱིར་འདི་ནི་གསུམ་པ་བཟོད་པའི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། རླུང་གི་དཀྱིལ་འཁོར་སྟོབས་པོ་ཆེ་ཤུགས་དྲག་ཅིང་མྱུར་བ་བཞིན་དུ་སེམས་ལ་ནུར་བ་མེད་པའི་ཕྱིར་འདི་ནི་བཞི་པ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། རིན་པོ་ཆེ་སྣ་བདུན་གྱི་གཞལ་མེད་ཁང་རྩེག་མ་ཐེམ་སྐས་བཞི་དང་ལྡན་པ། སྒོ་བཞི་ནས་ཤིན་ཏུ་བསིལ་བའི་རླུང་གིས་བུས་པས་ཤིན་ཏུ་བདེ་བ་མྱོང་བ་བཞིན་དུ་བསམ་གཏན་གྱི་ཆོས་ཀྱི་གཏེར་ཡོངས་སུ་བཙལ་ནས་གང་ཞིག་རྒྱས་པར་བྱེད་པའི་ཕྱིར་འདི་ནི་ལྔ་པ་བསམ་གཏན་གྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། ཉི་མའི་དཀྱིལ་འཁོར་འོད་ཟེར་རྒྱས་པར་གྱུར་པ་དེ་བཞིན་དུ་སེམས་འདིས་ཀྱང་མྱུར་བ་ཁོ་ནར་འཁོར་བའི་མ་རིག་པའི་མུན་ནག་འཇོམས་པར་བྱེད་པའི་ཕྱིར་འདི་ནི་དྲུག་པ་ཤེས་རབ་ཀྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། ཚོང་དཔོན་གྱིས་ཐམས་ཅད་ཀྱི་སེམས་ལ་སྨོན་པ་ཡོངས་སུ་རྫོགས་པར་བྱས་པ་དེ་བཞིན་དུ་སེམས་འདིས་ཀྱང་འཁོར་བའི་ལམ་ཉམ་ང་བ་ལས་ཡོངས་སུ་འདས་ནས་ཡོན་ཏན་གྱི་རིན་པོ་ཆེ་འཐོབ་པར་བྱེད་པའི་ཕྱིར་འདི་ནི་བདུན་པ་ཐབས་མཁས་པའི་ཡེ་ཤེས་ཁྱད་པར་དུ་འཕགས་པའི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། ཟླ་བ་ཡོངས་སུ་དག་ཅིང་ཤིན་ཏུ་རྒྱས་པ་ལ་རབ་རིབ་མེད་པ་བཞིན་དུ་སེམས་འདིས་ཀྱང་སྤྱོད་ཡུལ་ཐམས་ཅད་ལས་རྣམ་པར་དག་པ་ཕུན་སུམ་ཚོགས་པར་བྱེད་པའི་ཕྱིར་འདི་ནི་བརྒྱད་པ་སྨོན་ལམ་གྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། འཁོར་ལོས་སྒྱུར་བའི་རྒྱལ་པོའི་དམག་ལ་དབང་བའི་བློན་པོ་ཆེན་པོ་ཡིད་བཞིན་དུ་དབང་བྱེད་པ་བཞིན་དུ་སེམས་འདིས་ཀྱང་སངས་རྒྱས་ཀྱི་ཞིང་ཡོངས་སུ་དག་པ་ཤིན་ཏུ་བརྒྱན་པ་དང་ཡོན་ཏན་ཚད་མེད་པས་སྐྱེ་དགུ་རྣམས་ལ་རྒྱ་ཆེར་ཕན་འདོགས་པར་བྱེད་པའི་ཕྱིར་འདི་ནི་དགུ་པ་སྟོབས་ཀྱི་ཕ་རོལ་ཏུ་ཕྱིན་པའི་རྒྱུ་ཞེས་བྱའོ། །འདི་ལྟ་སྟེ་དཔེར་ན། ནམ་མཁའ་ལ་འཁོར་ལོས་སྒྱུར་བའི་རྒྱལ་པོ་བཞིན་དུ་སེམས་འདིས་
ཀྱང་སྤྱོད་ཡུལ་ཐམས་ཅད་ལ་ཐོགས་པ་མེད་ཅིང་གནས་ཐམས་ཅད་དུ་རང་དབང་ཐོབ་ནས་དབང་བསྐུར་བའི་སར་ཕྱིན་པར་བྱེད་པའི་ཕྱིར་འདི་ནི་བཅུ་པ་ཡེ་ཤེས་ཀྱི་ཕ་རོལ་ཏུ་ཕྱིན་པའི་རྒྱུ་ཞེས་བྱ་སྟེ། འདི་ལྟ་བུའི་རྒྱུ་བཅུ་ལ་ཁྱེད་ཀྱིས་རབ་ཏུ་བརྩོན་པས་བསླབ་པར་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། དད་པའི་དབང་པོ་དང་། སྙིང་རྗེ་དང་། འདོད་པ་ཡོངས་སུ་ཚོལ་བའི་སེམས་མེད་པ་དང་། སེམས་ཅན་ཐམས་ཅད་ཡོངས་སུ་སྡུད་པ་དང་། ཐམས་ཅད་མཁྱེན་པའི་ཡེ་ཤེས་ཡོངས་སུ་ཚོལ་བ་གང་ཡིན་པ་སྟེ།རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྦྱིན་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། ལས་རྣམ་པ་གསུམ་ཡོངས་སུ་དག་པར་གྱུར་པ་དང་། སེམས་ཅན་ཐམས་ཅད་ཀྱི་ཉོན་མོངས་པའི་རྒྱུ་དང་རྐྱེན་མངོན་པར་འདུ་མི་བྱེད་པ་དང་། ངན་འགྲོའི་སྒོ་རྣམས་གཅོད་ཅིང་བདེ་འགྲོའི་སྒོ་འབྱེད་པ་དང་། ཉན་ཐོས་དང་རང་སངས་རྒྱས་ཀྱིས་ལས་ཡང་དག་པར་འདའ་བ་དང་། བསོད་ནམས་ཐམས་ཅད་ཡོངས་སུ་རྫོགས་པར་བྱེད་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། ། ལྔ་གང་ཞེ་ན། འདོད་ཆགས་དང་། ཞེ་སྡང་གི་ཉོན་མོངས་པ་གདུལ་བར་ནུས་པ་དང་། ལུས་དང་སྲོག་ལ་ཕངས་པ་མེད་པར་བདེ་བ་ཡོངས་སུ་མི་ཚོལ་ཞིང་འདུ་ཤེས་ཉེ་བར་ཞི་བར་བྱེད་པ་དང་། སྔོན་གྱི་ལས་ལ་བསམས་ནས་སྡུག་བསྔལ་དང་ཕྲད་པར་གྱུར་ན་ཡང་དང་དུ་ལེན་
པར་ནུས་པ་དང་། བྱམས་པ་དང་། སྙིང་རྗེའི་བསམ་པ་བསྐྱེད་ནས་སེམས་ཅན་གྱི་དགེ་བའི་རྩ་བ་རྣམས་ཡོངས་སུ་སྨིན་པར་བྱེད་པ་དང་། མི་སྐྱེ་བའི་ཆོས་ཀྱི་བཟོད་པ་ཟབ་མོ་ཐོབ་པར་གྱུར་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། ། ལྔ་གང་ཞེ་ན། ཉོན་མོངས་པ་རྣམས་དང་ལྷན་ཅིག་གནས་པར་མི་མོས་པ་དང་བསོད་ནམས་ཡོངས་སུ་རྫོགས་པར་མ་གྱུར་གྱི་བར་དུ་བདེ་བ་ཉམས་སུ་ལེན་པར་མི་བྱེད་པ་དང་། དཀའ་བ་སྣ་ཚོགས་སྤྱོད་པ་ལ་ཡོངས་སུ་སྐྱོ་བའི་བསམ་པ་མི་སྐྱེ་བ་དང་། བྱམས་པ་དང་སྙིང་རྗེ་ཆེན་པོས་ཡོངས་སུ་བསྡུས་ནས་ཕན་འདོགས་པའི་ཐབས་མཁས་པས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པ་དང་། ཕྱིར་མི་ལྡོག་པའི་ས་ཡོངས་སུ་གཉེར་བར་སྨོན་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། དགེ་བའི་ཆོས་རྣམས་ཡོངས་སུ་བསྡུས་ནས་རྣམ་པར་རྟོག་པར་མི་བྱེད་པའི་ཕྱིར་དང་། རྟག་པར་རྣམ་པར་གྲོལ་བར་སྨོན་ཅིང་མཐའ་གཉིས་ལ་མངོན་པར་ཞེན་པར་མི་བྱེད་པའི་ཕྱིར་དང་། མངོན་པར་ཤེས་པ་ཐོབ་ནས་སེམས་ཅན་རྣམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱེད་པར་སྨོན་པའི་ཕྱིར་དང་། ཆོས་ཀྱི་དབྱིངས་ཡོངས་སུ་སྦྱངས་ནས་སེམས་ཀྱི་དྲི་མ་སེལ་བར་བྱེད་པའི་ཕྱིར་དང་། སེམས་ཅན་གྱི་ཉོན་མོངས་པའི་རྩ་བ་ཡོངས་སུ་གཅོད་པར་བྱེད་པའི་ཕྱིར་ཏེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་བསམ་གཏན་གྱི་ཕ་རོལ་ཏུ་ཕྱིན་པ་ཡོངས་
སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། རྟག་པར་སངས་རྒྱས་དང་བྱང་ཆུབ་སེམས་དཔའ་དང་། གསལ་ཞིང་ཐབས་མཁས་པ་ཐམས་ཅད་ལ་མཆོད་ཅིང་ཉེ་བར་བརྟེན་ནས་ཡོངས་སུ་སྐྱོ་བ་མི་སྐྱེད་ཅིང་རྒྱབ་ཀྱིས་ཕྱོགས་པར་མི་བྱེད་པ་དང་། དེ་བཞིན་གཤེགས་པ་རྣམས་ཀྱིས་ཆོས་ཟབ་མོ་བཤད་པ་དེ་དག་སེམས་ཀྱིས་རྟག་ཏུ་ཐོས་པར་མོས་ཤིང་ཡོངས་སུ་མི་སྐྱོ་བ་དང་། ཆོག་པའི་བསམ་པ་མེད་པ་དང་། དོན་དམ་པ་དང་། ཀུན་རྫོབ་ཀྱི་ཤེས་རབ་དམ་པས་རབ་ཏུ་རྣམ་པར་འབྱེད་པར་མོས་པ་དང་། བསྒོམས་པས་སྤང་བར་བྱ་བའི་ཉོན་མོངས་པ་ཐམས་ཅད་མྱུར་དུ་སྤོང་བ་དང་། འཇིག་རྟེན་པའི་མཁྱུད་དཔྱད་དང་། རིག་པའི་གནས་ལྔའི་ཆོས་ཐམས་ཅད་མངོན་པར་རྟོགས་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་ཐབས་མཁས་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། སེམས་ཅན་ཐམས་ཅད་ཀྱི་མོས་པ་དང་། ཉོན་མོངས་པ་དང་། སེམས་ཀྱི་སྤྱོད་པའི་བྱེ་བྲག་ཐམས་ཅད་རྟོགས་པར་ཁོང་དུ་ཆུད་པ་དང་། ཆོས་ཚད་མེད་པ་རྣམས་ཀྱི་གཉེན་པོའི་སྒོ་ཐམས་ཅད་སེམས་ཀྱིས་གསལ་བར་རྟོགས་པ་དང་། བྱམས་པ་དང་། སྙིང་རྗེ་ཆེན་པོའི་ཏིང་ངེ་འཛིན་ལས་འབྱུང་ཞིང་འཇུག་པ་དག་ལ་རང་དབང་ཐོབ་པ་དང་། ཕ་རོལ་ཏུ་ཕྱིན་པ་རྣམས་བསྒོམས་ནས་ཡོངས་སུ་སྨིན་ཅིང་ཕུན་སུམ་ཚོགས་པར་བྱ་བར་མོས་པ་དང་། སངས་རྒྱས་ཀྱི་ཆོས་ཐམས་ཅད་མ་ལུས་པར་ཡོངས་སུ་བསྡུས་ནས་མངོན་པར་རྟོགས་པར་སྨོན་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཐབས་མཁས་པ་ཡེ་ཤེས་དམ་པའི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་
པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། ཆོས་ཐམས་ཅད་གཟོད་མ་ནས་མི་སྐྱེ་མི་འགོག །ཡོད་པ་མ་ཡིན། མེད་པ་ཡང་མ་ཡིན་པ་དག་ལ་སེམས་བདེ་བར་གནས་པ་དང་། ཆོས་ཐམས་ཅད་ཀྱི་དོན་གྱི་ཚུལ་མཆོག་དམ་པ་དག་ལ་དྲི་མ་དང་བྲལ་ཞིང་རྣམ་པར་དག་པར་སོ་སོར་བརྟགས་ནས་སེམས་བདེ་བར་གནས་པ་དང་། མཚན་མ་ཐམས་ཅད་ལས་ཡང་དག་པར་འདས་པའི་སེམས་ཀྱི་དེ་བཞིན་ཉིད་མངོན་པར་འདུ་བྱ་བ་མེད་པ། སྤྱོད་པ་མེད་པ། ཐ་དད་པ་མ་ཡིན་པ། མི་གཡོ་བ་དག་ལ་སེམས་བདེ་བར་གནས་པ་དང་། སེམས་ཅན་རྣམས་ལ་ཕན་གདགས་པར་འདོད་པའི་ཕྱིར་ཀུན་རྫོབ་ཀྱི་བདེན་པ་དག་ལ་སེམས་བདེ་བར་གནས་པ་དང་། ཞི་གནས་དང་ལྷག་མཐོང་དུས་གཅིག་ཏུ་མཉམ་པར་སྤྱོད་པ་དག་ལ་སེམས་བདེ་བར་གནས་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྨོན་ལམ་གྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས། སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། ཡང་དག་པའི་ཡེ་ཤེས་ཀྱི་སྟོབས་ཀྱིས་སེམས་ཅན་ཐམས་ཅད་ཀྱི་སེམས་ཀྱི་སྤྱོད་པ་དང་ལེགས་ཉེས་རབ་ཏུ་ཤེས་པ་དང་། སེམས་ཅན་ཐམས་ཅད་ཀྱི་ཤིན་ཏུ་ཟབ་ཅིང་གྱ་ནོམ་པའི་ཆོས་ལ་གཟུད་པར་བྱེད་པ་དང་། སེམས་ཅན་ཐམས་ཅད་ཀྱི་འཁོར་བར་འཁོར་བ་དག་གི་ལས་ཀྱི་རྐྱེན་རྣམས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་པ་དང་། སེམས་ཅན་རྣམས་ཀྱི་དབང་པོ་དང་རང་བཞིན་རྣམ་པ་གསུམ་ཡང་དག་པའི་ཡེ་ཤེས་ཀྱི་སྟོབས་ཀྱིས་རྣམ་པར་འབྱེད་ཅིང་ཁོང་དུ་ཆུད་པར་བྱེད་པ་དང་། སེམས་ཅན་རྣམས་ལ་ཚུལ་བཞིན་དུ་ཡང་དག་པར་བསྟན་ནས་དགེ་བའི་རྩ་བ་བསྐྱེད་དེ། ཡོངས་སུ་སྨིན་པར་བྱས་ནས་ཡེ་ཤེས་ཀྱི་སྟོབས་ཀྱིས་ཡོངས་སུ་སྒྲོལ་བ་གང་ཡིན་པ་སྟེ། རིགས་ཀྱི་
བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སྟོབས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ཆོས་རྣམ་པ་ལྔ་ལ་བརྟེན་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་དོ། །ལྔ་གང་ཞེ་ན། ཆོས་རྣམས་ཀྱི་ལེགས་ཉེས་རབ་ཏུ་རྣམ་པར་འབྱེད་པར་བྱེད་པ་དང་། ནག་པོ་དང་། དཀར་པོའི་ཆོས་ཡོངས་སུ་མི་སྤོང་ཞིང་ཡང་དག་པར་སྡུད་པར་བྱེད་པ་དང་། འཁོར་བ་དང་མྱ་ངན་ལས་འདས་པ་དག་ལ་ཡོངས་སུ་མི་སྐྱོ་ཞིང་མངོན་པར་མི་དགའ་བ་དང་། བསོད་ནམས་དང་ཡེ་ཤེས་ཀྱི་སྤྱོད་པ་དང་ལྡན་པས་མཐར་ཐུག་པའི་གནས་སུ་ཕྱིན་པར་གྱུར་པ་དང་། དབང་བསྐུར་བ་མཆོག་ཐོབ་པ་དང་། སངས་རྒྱས་ཀྱི་ཆོས་མ་འདྲེས་པ་ལ་སོགས་པ་དང་། ཐམས་ཅད་མཁྱེན་པའི་ཡེ་ཤེས་ཐོབ་པར་གྱུར་པ་གང་ཡིན་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་པ་ཞེས་བྱའོ། །རིགས་ཀྱི་བུ་ཕ་རོལ་ཏུ་ཕྱིན་པའི་དོན་གང་ཡིན་ཞེ་ན། འདི་ལྟ་སྟེ་ཕན་འདོགས་པ་མཆོག་མངོན་པར་སྒྲུབ་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཤིན་ཏུ་ཟབ་པའི་ཡེ་ཤེས་ཆེན་པོ་ཚད་མེད་པ་ཡོངས་སུ་རྫོགས་པར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །སྤྱོད་པ་དང་སྤྱོད་པ་མ་ཡིན་པའི་ཆོས་དག་ལ་སེམས་ཀྱིས་མངོན་པར་ཞེན་པ་མེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །འཁོར་བའི་ཉེས་དམིགས་དང་། མྱ་ངན་ལས་འདས་པའི་ཡོན་ཏན་ཡང་དག་པར་རིག་ཅིང་ཡང་དག་པར་སོ་སོར་རྟོག་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །གཏི་མུག་དང་ལྡན་པའི་གང་ཟག་དང་། ཤེས་རབ་དང་ལྡན་པའི་གང་ཟག་ཐམས་ཅད་ཡོངས་སུ་སྡུད་པར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཆོས་རིན་པོ་ཆེ་གྱ་ནོམ་པ་རྣམ་པ་སྣ་ཚོགས་རབ་ཏུ་སྟོན་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཐོགས་པ་མེད་པའི་རྣམ་པར་གྲོལ་བ་དང་། ཤེས་རབ་ཡོངས་སུ་རྫོགས་པར་གྱུར་པ་གང་ཡིན་
པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཆོས་ཀྱི་ཁམས་དང་སེམས་ཅན་གྱི་ཁམས་ཡང་དག་པར་རྣམ་པར་ཕྱེ་ནས་ཤེས་པར་གྱུར་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །སྦྱིན་པ་ལ་སོགས་པ་ནས་ཡེ་ཤེས་ཀྱི་བར་དག་ཕྱིར་མི་ལྡོག་པའི་གནས་སུ་ཕྱིན་པར་གྱུར་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །མི་སྐྱེ་བའི་ཆོས་ཀྱི་བཟོད་པ་ཡོངས་སུ་རྫོགས་པར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །སེམས་ཅན་ཐམས་ཅད་ཀྱི་བསོད་ནམས་ཀྱི་དགེ་བའི་རྩ་བ་ཡོངས་སུ་སྨིན་པར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །མངོན་པར་བྱང་ཆུབ་ནས་སངས་རྒྱས་ཀྱི་སྟོབས་བཅུ་དང་། བསྙེངས་པ་མི་མངའ་བ་བཞི་དང་། མ་འདྲེས་པའི་ཆོས་ལ་སོགས་པ་ཡོངས་སུ་རྫོགས་པར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །འཁོར་བ་དང་མྱ་ངན་ལས་འདས་པ་ལ་མཚན་ཉིད་གཉིས་སུ་མེད་པར་རྟོགས་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཐམས་ཅད་ལ་ཕན་འདོགས་ཤིང་ཡོངས་སུ་ཟློས་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །མུ་སྟེགས་ཅན་ཐམས་ཅད་ཉེ་བར་འོངས་ནས་གང་འདྲི་བ་དག་ལ་ལེགས་པར་རྣམ་པར་བཤད་ནས་འདུལ་བར་བྱེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །ཆོས་ཀྱི་འཁོར་ལོ་ཤིན་ཏུ་གྱ་ནོམ་པ་རྣམ་པ་བཅུ་གཉིས་ཡོངས་སུ་བསྐོར་བ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །མངོན་པར་ཞེན་པ་མེད་ཅིང་མཐོང་བ་མེད་པ་དང་། སྐྱོན་དང་འབྲེལ་བ་མེད་པ་གང་ཡིན་པ་དེ་ནི་ཕ་རོལ་ཏུ་ཕྱིན་པའི་དོན་ཏོ། །རིགས་ཀྱི་བུ་བྱང་ཆུབ་སེམས་དཔའི་ས་དང་པོ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཚད་མེད་དཔག་ཏུ་མེད་པ་རྣམས་རིན་པོ་ཆེའི་གཏེར་རྣམ་པ་སྣ་ཚོགས་ཀྱིས་ཀུན་ཏུ་གང་བ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་གཉིས་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ས་གཞི་ལག་མཐིལ་ལྟར་མཉམ་པ་ཁ་དོག་ཤིན་ཏུ་
གྱ་ནོམ་པ་ཚད་མེད་པ་དཔག་ཏུ་མེད་པ་རྣམ་པ་སྣ་ཚོགས་དང་ལྡན་པ་དང་།ཡོངས་སུ་དག་པའི་རིན་པོ་ཆེའི་རྒྱན་གྱི་རྣམ་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་གསུམ་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། བདག་ཉིད་ཀྱི་ལུས་ཤིན་ཏུ་དཔའ་ལ་གོ་ཆས་རབ་ཏུ་བརྒྱན་པས་ཕྱིར་རྒོལ་བ་ཐམས་ཅད་ཕམ་པར་བྱེད་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་བཞི་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། ཕྱོགས་བཞི་ནས་རླུང་གི་དཀྱིལ་འཁོར་གྱིས་མེ་ཏོག་དམ་པ་རྣམ་པ་སྣ་ཚོགས་མངོན་པར་གཏོར་བས་ས་གཞི་ཀུན་དུ་ཁྱབ་པར་བཀྲམ་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་ལྔ་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། རིན་པོ་ཆེའི་ཕྲེང་བ་སྣ་ཚོགས་ཀྱིས་ལུས་ཀུན་ཏུ་ཁྱབ་པར་བརྒྱན་པ་མགོ་མེ་ཏོག་གི་ཅོད་པན་གྱིས་བརྒྱན་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་དྲུག་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། རིན་པོ་ཆེ་སྣ་བདུན་གྱི་མེ་ཏོག་གི་རྫིང་བུ་ཐེམ་སྐས་ཀྱི་ལམ་བཞི་དང་ལྡན་པ། གསེར་གྱི་བྱེ་མ་ཀུན་ཏུ་བདལ་བ། ཡོངས་སུ་དང་ཞིང་དྲི་མ་མེད་པ། ཡོན་ཏན་བརྒྱད་དང་ལྡན་པའི་ཆུས་ཀུན་ཏུ་གང་བ། མེ་ཏོག་ཨུཏྤ་ལ་དང་། ཀུ་མུ་ད་དང་། པུཎྜ་རི་ཀས་ཀུན་ཏུ་བཀྲམ་པ། མེ་ཏོག་གི་རྫིང་བུའི་ནང་ན་རྣམ་པར་རྩེན་པ་དག་ཤིན་ཏུ་བདེ་སྐྱིད་པ་དང་། ཡོངས་སུ་དག་ཅིང་དཔེ་ཟླ་མེད་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་བདུན་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། བྱང་ཆུབ་སེམས་དཔའི་མདུན་དུ་སེམས་ཅན་རྣམས་སེམས་ཅན་དམྱལ་བར་ལྟུང་བར་འགྱུར་བའི་རིགས་པ་དག་འདི་ལྟར་བྱང་ཆུབ་སེམས་དཔའི་མཐུས་ལྟུང་བར་ཡང་མི་འགྱུར་ལ་སྨས་པ་ཡང་མེད། འཇིགས་ཤིང་སྐྲག་པ་ཡང་མེད་པར་
གྱུར་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་བརྒྱད་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། བདག་ཉིད་ཀྱི་ལུས་ཀྱི་གཡས་གཡོན་ན་སེང་གེའི་རྒྱལ་པོས་ཡོངས་སུ་བསྲུངས་པས་གཅན་གཟན་མང་པོ་ཐམས་ཅད་སྐྲག་ཅིང་འཇིགས་པར་གྱུར་པ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་དགུ་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། འཁོར་ལོས་སྒྱུར་བའི་རྒྱལ་པོ་འཁོར་འབུམ་ཕྲག་ཚད་མེད་པས་ཡོངས་སུ་བསྐོར་ནས་མཆོད་པ་བྱེད་པ་དང་། སྤྱི་བོའི་གདུགས་དཀར་པོ་རིན་པོ་ཆེ་སྣ་ཚོགས་ཚད་མེད་པ་དག་གིས་རབ་ཏུ་བརྒྱན་པ་དག་བྱང་ཆུབ་སེམས་དཔས་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའི་ས་བཅུ་པ་ལ་སྔ་རྟགས་ཀྱི་མཚན་མ་སྣང་བ་འདི་ལྟ་སྟེ། དེ་བཞིན་གཤེགས་པའི་སྐུ་གསེར་གྱི་ཁ་དོག་ཀུན་ཏུ་འཕྲོ་བ། འོད་ཟེར་ཡོངས་སུ་དག་པ། ཚད་མེད་པ། ཐམས་ཅད་ཕུན་སུམ་ཚོགས་པར་གྱུར་པ་ལ་ཚངས་པའི་རྒྱལ་པོ་འབུམ་ཕྲག་ཚད་མེད་པ་དག་གིས་ཡོངས་སུ་བསྐོར་ནས་བཀུར་སྟི་དང་མཆོད་པ་བྱས་པས་བླ་ན་མེད་པའི་ཆོས་ཀྱི་འཁོར་ལོ་ཤིན་ཏུ་གྱ་ནོམ་པ་ཡོངས་སུ་བསྐོར་བ་དག་བྱང་ཆུབ་སེམས་དཔའ་ཐམས་ཅད་རབ་ཏུ་མཐོང་བར་འགྱུར་རོ། །རིགས་ཀྱི་བུ་ས་དང་པོ་ལ་ཅིའི་ཕྱིར་རབ་ཏུ་དགའ་བ་ཞེས་བྱ་ཞེ་ན། འདི་ལྟར་ཐོག་མ་ཁོ་ནར་འཇིག་རྟེན་ལས་འདས་པའི་སེམས་སྔོན་མ་ཐོབ་པ་དེང་གདོད་ཐོབ་ནས་སྒྲུབ་པ་ཆེན་པོ་དག་ཇི་ལྟར་སྨོན་པ་བཞིན་དུ་མངོན་པར་གྲུབ་པར་གྱུར་པས་རབ་ཏུ་དགའ་བ་སྐྱེ་བར་འགྱུར་བའི་ཕྱིར་ས་དང་པོ་ནི་རབ་ཏུ་དགའ་བ་ཞེས་བྱའོ། །དྲི་མ་ཤིན་ཏུ་ཕྲ་མོ་དང་འཆལ་པའི་ཚུལ་ཁྲིམས་ཀྱི་ཉེས་པ་ཐམས་ཅད་ཡོངས་སུ་དག་པར་གྱུར་པས་དེའི་ཕྱིར་ས་གཉིས་པ་ནི་དྲི་མ་མེད་པ་ཞེས་བྱའོ། །ཤེས་རབ་དང་ཏིང་ངེ་འཛིན་ཚད་མེད་པའི་འོད་ཟེར་སྣང་བར་བསྒུལ་བར་མི་ནུས་ཤིང་ཐུལ་བར་མི་འགྱུར་བ་དང་། ཐོས་པ་འཛིན་པའི་གཟུངས་རྩ་བར་གྱུར་པས་དེའི་ཕྱིར་ས་གསུམ་པ་ནི་འོད་བྱེད་
པའི་ས་ཞེས་བྱའོ། །ཤེས་རབ་ཀྱི་མེས་ཉོན་མོངས་པ་རྣམས་བསྲེགས་ནས་འོད་ཀྱི་སྣང་བ་འཕེལ་བར་བྱེད་པ་དང་། བྱང་ཆུབ་ཀྱི་ཕྱོགས་སྒོམ་པར་བྱེད་པས་དེའི་ཕྱིར་ས་བཞི་པ་ནི་འོད་འཕྲོ་བའི་ས་ཞེས་བྱའོ། །ཐབས་མཁས་པས་བསྒོམས་པའི་ཡེ་ཤེས་མཆོག་རང་དབང་དུ་གྱུར་པ་ཤིན་ཏུ་འཐོབ་པར་དཀའ་བའི་ཕྱིར་དང་། མཐོང་བ་དང་བསྒོམས་པས་སྤང་བར་བྱ་བའི་ཉོན་མོངས་པ་གདུལ་བར་དཀའ་བ་ཐུལ་བར་གྱུར་པའི་ཕྱིར་ས་ལྔ་པ་ནི་ཤིན་ཏུ་རྒྱལ་བར་དཀའ་བ་ཞེས་བྱའོ། །སྤྱོད་པའི་ཆོས་རྒྱུན་ཆད་པ་མེད་པར་གསལ་བར་མངོན་སུམ་དུ་གྱུར་པ་དང་། མཚན་མ་མེད་པའི་ཡིད་ལ་བྱེད་པ་ཐམས་ཅད་མངོན་སུམ་དུ་གྱུར་པས་དེའི་ཕྱིར་ས་དྲུག་པ་ནི་མངོན་སུམ་དུ་གྱུར་པ་ཞེས་བྱའོ། །ཟག་པ་མེད་པ་ལ་བར་ཆད་མེད་པ་དང་། མཚན་མ་མེད་པ་ཡིད་ལ་བྱེད་པ་དང་། རྣམ་པར་གྲོལ་བའི་ཏིང་ངེ་འཛིན་ཡུན་རིང་པོ་ནས་བསྒོམས་པའི་ཕྱིར་དང་། ས་དེ་རྣམ་པར་དག་ཅིང་ཐོགས་པ་མེད་པར་གྱུར་པའི་ཕྱིར་ས་བདུན་པ་ནི་རིང་དུ་སོང་བ་ཞེས་བྱའོ། །མཚན་མ་མེད་པའི་ཡིད་ལ་བྱེད་པ་བསྒོམས་པས་རང་དབང་དུ་གྱུར་ནས་ཉོན་མོངས་པ་རྣམས་ཀྱིས་བསྒུལ་བར་མི་ནུས་པས་དེའི་ཕྱིར་ས་བརྒྱད་པ་ནི་མི་གཡོ་བ་ཞེས་བྱའོ། ། ཐ་དད་པར་གྱུར་པའི་ཆོས་རྣམ་པ་སྣ་ཚོགས་ཐམས་ཅད་བསྟན་པ་ལ་རང་དབང་ཐོབ་ནས་ཉེས་པ་མེད་ཅིང་འབྲེལ་པ་མེད་པར་ཤེས་རབ་འཕེལ་བར་བྱེད་པ་དང་། དབང་དུ་གྱུར་ཅིང་ཐོགས་པ་མེད་པར་གྱུར་པར་དེའི་ཕྱིར་ས་དགུ་པ་ནི་ལེགས་པའི་བློ་གྲོས་ཞེས་བྱའོ། །ཆོས་ཀྱི་སྐུ་ནམ་མཁའ་དང་འདྲ་བ་དང་། ཤེས་རབ་སྤྲིན་ཆེན་པོ་ལྟ་བུར་གྱུར་ནས་ཐམས་ཅད་ཀུན་ཏུ་ཁྱབ་པར་གཡོགས་པར་བྱེད་པའི་ཕྱིར་དེ་ལྟ་བས་ན་ས་བཅུ་པ་ནི་ཆོས་ཀྱི་སྤྲིན་ཞེས་བྱའོ། །རིགས་ཀྱི་བུ་བདག་དང་ཆོས་ལ་མཚན་མ་ཡོད་པར་མངོན་པར་ཞེན་པའི་མ་རིག་པ་དང་། འཁོར་བའི་ངན་འགྲོ་ལ་སྐྲག་ཅིང་འཇིགས་པའི་མ་རིག་པ་སྟེ།མ་རིག་པ་འདི་གཉིས་ཀྱིས་ནི་ས་དང་པོ་ལ་སྒྲིབ་པར་བྱེད་དོ། །བསླབ་པའི་གནས་ཤིན་ཏུ་ཕྲ་མོ་དག་ལ་ཤེས་བཞིན་མེད་པས་ཉམས་པར་བྱས་པའི་མ་རིག་པ་དང་། ལས་ཀྱི་འདུ་བྱེད་རྣམ་པ་སྣ་ཚོགས་སློང་བར་བྱེད་པའི་མ་རིག་པ་སྟེ།
མ་རིག་པ་འདི་གཉིས་ཀྱིས་ནི་ས་གཉིས་པ་ལ་སྒྲིབ་པར་བྱེད་དོ། །མ་ཐོབ་པ་ཐོབ་པར་འདོད་པ་ལ་སྲེད་ཅིང་མངོན་པར་ཞེན་པའི་མ་རིག་པ་དང་། གཟུངས་ཁྱད་པར་དུ་འཕགས་པ་དག་ལ་སྒྲིབ་པར་བྱེད་པའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་གསུམ་པ་ལ་སྒྲིབ་པར་བྱེད་དོ། །སྙོམས་པར་འཇུག་པའི་རོ་མྱང་བ་ལ་མངོན་པར་དགའ་བའི་མ་རིག་པ་དང་། ཤིན་ཏུ་གྱ་ནོམ་པའི་ཆོས་རྣམ་པར་དག་པ་ལ་སྲེད་ཅིང་མོས་པའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་བཞི་པ་ལ་སྒྲིབ་པར་བྱེད་དོ། །འཁོར་བ་ལ་རྒྱབ་ཀྱིས་ཕྱོགས་པའི་མ་རིག་པ་དང་། མྱ་ངན་ལས་འདས་པ་ལ་མངོན་པར་གཞོལ་བའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་ལྔ་པ་ལ་སྒྲིབ་པར་བྱེད་དོ། །རྣལ་འབྱོར་མངོན་དུ་རྒྱུ་བའི་མ་རིག་པ་དང་། མཚན་མ་རིགས་པ་མངོན་དུ་སྣང་བའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་དྲུག་པ་ལ་སྒྲིབ་པར་བྱེད་དོ། །མཚན་མ་ཤིན་ཏུ་ཕྲ་མོ་རྣམས་ལ་མངོན་སུམ་དུ་སྤྱོད་པའི་མ་རིག་པ་དང་། མཚན་མ་མེད་པའི་ཡིད་ལ་བྱེད་པ་ལ་མངོན་པར་དགའ་བའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་བདུན་པ་ལ་སྒྲིབ་པར་བྱེད་དོ། །མཚན་མ་མེད་པར་སྒོམ་པ་ལ་མངོན་པར་རྩོལ་བའི་མ་རིག་པ་དང་། མཚན་མ་ལ་དབང་ཐོབ་པ་ལ་མངོན་པར་ཞེན་པའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་བརྒྱད་པ་ལ་སྒྲིབ་པར་བྱེད་དོ། །བསྟན་པར་བྱ་བའི་དོན་ཚད་མེད་པ་དང་། མིང་དང་ཚིག་དང་། ཡི་གེ་ཚད་མེད་པ་གཉིས་པོ་འདི་དག་ལ་མི་མཁས་པའི་མ་རིག་པ་དང་། ཚིག་གི་སྤོབས་པ་ཡིད་བཞིན་དུ་མ་གྱུར་པའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་དགུ་པ་ལ་སྒྲིབ་པར་བྱེད་དོ། །རྫུ་འཕྲུལ་ཆེན་པོ་སྟོན་པ་ལ་རང་དབང་མ་ཐོབ་པའི་མ་རིག་པ་དང་། ཤིན་ཏུ་ཕྲ་བའི་གསང་བའི་ལས་ཀྱི་དངོས་པོ་ཁོང་དུ་མ་ཆུད་པའི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་ས་བཅུ་པ་ལ་སྒྲིབ་པར་བྱེད་དོ། །སྤྱོད་ཡུལ་ཐམས་ཅད་ལ་ཤེས་བྱ་ཕྲ་མོས་བསྒྲིབས་པའི་མ་རིག་པ་དང་། ཉོན་མོངས་པ་ཤིན་ཏུ་ཕྲ་བའི་གནས་ངན་ལེན་གྱི་མ་རིག་པ་སྟེ། མ་རིག་པ་འདི་གཉིས་ཀྱིས་ནི་
སངས་རྒྱས་ཀྱི་ས་ལ་སྒྲིབ་པར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་ས་དང་པོ་ལ་སྦྱིན་པའི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་གཉིས་པ་ལ་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་གསུམ་པ་ལ་བཟོད་པའི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་བཞི་པ་ལ་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་ལྔ་པ་ལ་བསམ་གཏན་གྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་དྲུག་པ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་བདུན་པ་ལ་ཐབས་མཁས་པའི་ཡེ་ཤེས་མཆོག་གི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་བརྒྱད་པ་ལ་སྨོན་ལམ་གྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་དགུ་པ་ལ་སྟོབས་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །ས་བཅུ་པ་ལ་ཡེ་ཤེས་ཀྱི་ཕ་རོལ་ཏུ་ཕྱིན་པ་ལ་སྤྱོད་པར་བྱེད་དོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ནི་སེམས་བསྐྱེད་པ་དང་པོས་རིན་ཆེན་མཆོག་གི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་གཉིས་པས་ཡིད་དུ་འོང་བའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་གསུམ་པས་ཤིན་ཏུ་བསྒུལ་བར་དཀའ་བའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་བཞི་པས་ཕྱིར་མི་ལྡོག་པའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་ལྔ་པས་རིན་པོ་ཆེའི་མེ་ཏོག་གི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་དྲུག་པས་ཉི་མའི་དཀྱིལ་འཁོར་འོད་ཟེར་འབར་བའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་བདུན་པས་སྨོན་ལམ་ཐམས་ཅད་ཡིད་བཞིན་དུ་མངོན་པར་གྲུབ་པའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་བརྒྱད་པས་མངོན་སུམ་དུ་གནས་པར་བྱེད་པའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་དགུ་པས་ཡེ་ཤེས་ཀྱི་སྙིང་པོའི་ཏིང་ངེ་འཛིན་ཡོངས་སུ་སྡུད་ཅིང་སྐྱེད་པར་བྱེད་དོ། །སེམས་བསྐྱེད་པ་བཅུ་པས་དཔའ་བར་འགྲོ་བའི་ཏིང་ངེ་འཛིན་ཡོངས་
སུ་སྡུད་ཅིང་སྐྱེད་པར་བྱེད་དོ། །རིགས་ཀྱི་བུ་འདི་དག་ནི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་སེམས་བསྐྱེད་པ་རྣམ་པ་བཅུ་ཞེས་བྱའོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱིས་ས་དང་པོ་ལས་ཐོབ་པའི་གཟུངས་གང་ཡིན་པ་དེ་ནི་ཡོན་ཏན་ལ་གནས་པའི་སྟོབས་ཞེས་བྱའོ། །དེ་ནས་བཅོམ་ལྡན་འདས་ཀྱིས་གཟུངས་སྔགས་བཀའ་སྩལ་པ། ཏདྱ་ཐཱ། པཱུརྞ་མ་ནོར་ཐེ། དོ་ཧོ་དོ་ཧོ། ཡཱ་བཏ་སཱུཪྱ། ཨ་བ་བྷཱ་ས་ཏཱ། ཡཱ་བད་ཙནྡྲེ་། དཽ་དནྟེ། ཏཱ་བད་རཀྵ་མཱན་དཎྜ་པ་རི་ཧཱ་རཾ་ཀུ་རུ་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་གི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་དང་པོའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་པ་ཡིན་ཏེ། གང་ལ་ལ་ཞིག་གིས་གཟུངས་སྔགས་འདི་ཁ་ཏོན་དུ་འདོན་ཅིང་ཡོངས་སུ་འཛིན་པར་བྱེད་ན་འདི་ལྟ་སྟེ། སྟག་དང་། སྤྱང་ཀི་དང་། སེང་གེ་དང་། གཅན་གཟན་མ་རུངས་པའི་རིགས་ཀྱི་རྣམ་པ་དང་། ཡི་དགས་མ་རུངས་པ་དང་། མི་དང་། མི་མ་ཡིན་པ་ལ་སོགས་པས་ཕྱིར་རྒོལ་བ་དང་། གདོན་བགེགས་དང་། སྡུག་བསྔལ་གྱིས་འཚེ་བའི་འཇིགས་པ་ཐམས་ཅད་ལས་ཐར་བར་འགྱུར་ཞིང་སྒྲིབ་པ་ལྔ་ལས་རྣམ་པར་གྲོལ་ནས་ས་དང་པོ་མི་བརྗེད་ཅིང་རྗེས་སུ་དྲན་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ས་གཉིས་པ་ལས་ཐོབ་པའི་གཟུངས་གང་ཡིན་པ་དེ་ནི་ཤིན་ཏུ་བདེ་བའི་གནས་ཞེས་བྱའོ། །ཏདྱ་ཐཱ། ཨུཏྟོ་ལི། ཙི་རི་ཙི་རི། ཨུཏྟོ་རཱ་ཏོ་རཱ་ཎཱ་མ། ཤཱནྟོ།ཤཱནྟོ། ཨུཏྟོ་ལི། ཧུ་ལུ་ཧུ་ལུ་སྭཱ་ཧཱ། རིགས་ཀྱི་བུ་གཟུངས་སྔགས་འདི་ནི་གང་གཱའི་ཀླུང་གཉིས་ཀྱི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་གཉིས་པའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་པ་ཡིན་ཏེ། གང་ལ་ལ་ཞིག་གིས་གཟུངས་སྔགས་འདི་ཁ་ཏོན་དུ་འདོན་ཅིང་ཡོངས་སུ་འཛིན་པར་བྱེད་ན་གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པས་
ཕྱིར་རྒོལ་བ་དང་། གདོན་བགེགས་དང་། སྡུག་བསྔལ་གྱིས་འཚེ་བའི་འཇིགས་པ་ཐམས་ཅད་ལས་ཐར་བར་འགྱུར་ཞིང་སྒྲིབ་པ་ལྔ་ལས་རྣམ་པར་གྲོལ་ནས་ས་གཉིས་པ་མི་བརྗེད་ཅིང་རྗེས་སུ་དྲན་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ས་གསུམ་པ་ལས་ཐོབ་པའི་གཟུངས་གང་ཡིན་པ་དེ་ནི་ཤིན་ཏུ་རྒྱལ་བར་དཀའ་བའི་སྟོབས་ཞེས་བྱའོ། །ཏདྱ་ཐཱ། དནྠི་ཀེ། པནྠི་ཀེ། ཀ་ར་ཐཱ། ཀཽ་ར་ཐི། ཀེ་ཡཱུ་རེ། དནྟེ་ལེ་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་གསུམ་གྱི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་གསུམ་པའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་པ་ཡིན་ཏེ། གང་ལ་ལ་ཞིག་གིས་གཟུངས་སྔགས་འདི་ཁ་ཏོན་དུ་འདོན་ཅིང་ཡོངས་སུ་འཛིན་པར་བྱེད་ན་གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པས་ཕྱིར་རྒོལ་བ་དང་། གདོན་བགེགས་དང་། སྡུག་བསྔལ་གྱིས་འཚེ་བའི་འཇིགས་པ་ལས་ཐར་བར་འགྱུར་ཞིང་སྒྲིབ་པ་ལྔ་ལས་རྣམ་པར་གྲོལ་ནས། ས་གསུམ་པ་མི་བརྗེད་ཅིང་རྗེས་སུ་དྲན་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ས་བཞི་པ་ལས་ཐོབ་པའི་གཟུངས་གང་ཡིན་པ་དེ་ནི་རྒྱ་ཆེར་ཕན་འདོགས་པ་ཞེས་བྱའོ། །ཏདྱ་ཐཱ། ཤི་རི་ཤི་རི། དི་མ་དི་མ་ནི། དྷ་རི་དྷ་རི་ཎི། ཤི་རི་ཤི་རི་ཎི། བི་ཤ་ལཱ། བི་ཤ་ལཱ། བ་ཤ་བ་ཤ་ནི། བནྡྷ་ནི་ཡེ་སྭཱ་ཧཱ།རིགས་ཀྱི་བུ་གཟུངས་འདི་ནི་གང་གཱའི་ཀླུང་བཞིའི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་བཞི་པའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་པ་ཡིན་ཏེ། གང་ལ་ལ་ཞིག་གིས་གཟུངས་སྔགས་འདི་ཁ་ཏོན་དུ་འདོན་ཅིང་ཡོངས་སུ་འཛིན་པར་བྱེད་ན་གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པས་ཕྱིར་རྒོལ་བ་དང་། གདོན་བགེགས་དང་། སྡུག་བསྔལ་གྱིས་འཚེ་བའི་འཇིགས་པ་རྣམས་ལས་ཐར་བར་འགྱུར་ཞིང་སྒྲིབ་པ་ལྔ་ལས་རྣམ་པར་གྲོལ་ནས་ས་བཞི་པ་མི་
བརྗེད་ཅིང་རྗེས་སུ་དྲན་པར་འགྱུར་རོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ས་ལྔ་པ་ལས་འཐོབ་པའི་གཟུངས་གང་ཡིན་པ་དེ་ནི་ཡོན་ཏན་སྣ་ཚོགས་ཀྱིས་རབ་ཏུ་བརྒྱན་པ་ཞེས་བྱའོ། །ཏདྱ་ཐཱ། ཧ་རི་ཧ་རི་ཎི། ཙི་རི་ཙི་རི་ཎི། རིམཱ་ཎི། སཾ་ཀ་རི་མཱ་ཎི། སཱ་མ་བཱ་ས་ནི། ཛམྦྷ་ནི། སྟམྦྷ་ནི། མོ་ཧ་ནི། སྭ་ཡཾ་བྷུཀྐེ་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་ལྔའི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་ལྔ་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་ཞིག་གིས་གཟུངས་སྔགས་འདི་ཁ་ཏོན་དུ་འདོན་ཅིང་འཛིན་པར་བྱེད་ན་འཇིགས་ཤིང་སྐྲག་པ་རྣམས་ལས་ཐར་བ་དང་། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་རྐུན་པོ་དང་། གློ་བུར་གྱི་གནོད་པ་དང་། ཉོན་མོངས་པ་དང་། སྡུག་བསྔལ་རྣམས་དང་། སྒྲིབ་པ་ལྔ་ལས་རྣམ་པར་གྲོལ་ཏེ་ས་ལྔ་པ་མི་བརྗེད་པར་དྲན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ས་དྲུག་པ་ལས། གཟུངས་ཐོབ་པའི་མིང་ཡོངས་སུ་རྒྱས་པའི་ཡེ་ཤེས་ཞེས་བྱའོ། །གཟུངས་ལ། ཏདྱ་ཐཱ། བི་ཏོ་རི། བི་ཏོ་རི། མ་རི་ཎི། ཀ་ལི་ཀ་ལི། བི་དྷོ་ཧནྟེ། ལུ་ལུ་ལུ་ལུ་ཙུ་ལུ་ཙུ་ལུ་ཏོ་ལཱུ་བ་ཏོ་ལཱུ་བ་ཤ་ཤ་ཤཙྪ། པ་རི་ཤ། སྭ་སྟི་སརྦ་སཏྭཱ་ནཱཾ།སིདྡྷྱ་ནཱུ་མ་མ་མནྟྲ། པ་ད་ནི་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་དྲུག་གི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་དྲུག་པའི་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་ཞིག་གིས་གཟུངས་སྔགས་འདི་འདོན་ཅིང་འཛིན་ན་འཇིགས་ཤིང་སྐྲག་པ་ལས་ཐར་བ་དང་། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་། རྐུན་པོ་དང་། བློ་བུར་གྱི་གནོད་པ་དང་། ཉོན་མོངས་པ་དང་། སྡུག་བསྔལ་རྣམས་དང་། སྒྲིབ་པ་ལྔ་
ལས་རྣམ་པར་གྲོལ་ཏེ། ས་དྲུག་པ་མི་བརྗེད་པར་དྲན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་ས་བདུན་པ་ལས་གཟུངས་ཐོབ་པའི་མིང་རྒྱལ་བའི་ཆོས་ཀྱི་སྤྱོད་པ་ཞེས་བྱ་སྟེ། གཟུངས་ལ། ཏདྱ་ཐཱ། ཛ་ཧ་ཛ་ཧ་རུ། ཛ་ཧ་ཛ་ཧ་ཛ་ཧ་རུ། བཻ་ལུ་ཀེ་བཻ་ལུ་ཀེ། ཨ་མྲྀ་ཏག་ཎི། པུ་རུ་ཥ་ཎི། བེ་རུ་ཏེ་ཀེ་པ་རུ་བཏྟ། བི་དྷེ་ཧེ་ཀེ། བིནྡ་བི་ལེ་ནི། ཨ་མྲྀ་ལུ་ཏེ་ཀི། བཻ་ཛུ་ཡུ་བཻ་ཛུ་ཡུ་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་བདུན་གྱི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་བདུན་པའི་བྱང་ཆུབ་སེམས་དཔའ་རྣམས་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་གཟུངས་སྔགས་འདི་འདོན་ཅིང་འཛིན་ན་འཇིགས་ཤིང་སྐྲག་པ་རྣམས་ལས་ཐར་བ་དང་། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་། རྐུན་པོ་དང་། གློ་བུར་གྱི་གནོད་པ་དང་། ཉོན་མོངས་པ་དང་། སྡུག་བསྔལ་གྱི་རྣམ་པ་དང་། སྒྲིབ་པ་ལྔ་ལས་རྣམ་པར་གྲོལ་ཏེ། ས་བདུན་པ་མི་བརྗེད་པར་དྲན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ས་བརྒྱད་པ་ལས་གཟུངས་ཐོབ་པའི་མིང་ནི་མི་ཟད་པའི་མཛོད་ཅེས་བྱ་སྟེ། གཟུངས་ལ། ཏདྱ་ཐཱ། ཤི་རི་ཤི་རི་ཤི་རི་ཎི། མི་ཏེ་མི་ཏེ། ཀ་རི་ཀ་རི། ཧེ་རུ་ཧེ་རུ། ཙུ་རུ་ཙུ་རུ། བནྡྷ་ནི་སྭཱ་ཧཱ། རིགས་ཀྱི་བུ་གཟུངས་འདི་ནི་གང་གཱའི་ཀླུང་བརྒྱད་ཀྱི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་བརྒྱདཔའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་ཞིག་གིས་གཟུངས་སྔགས་འདི་འདོན་ཅིང་འཛིན་ན་འཇིགས་ཤིང་སྐྲག་པ་རྣམས་ལས་ཐར་བ་དང་། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་། རྐུན་པོ་དང་། གློ་བུར་གྱི་གནོད་པ་དང་། ཉོན་མོངས་པ་དང་། སྡུག་བསྔལ་དང་། སྒྲིབ་པ་ལྔ་ལས་རྣམ་པར་གྲོལ་ཏེ་ས་བརྒྱད་པ་མི་བརྗེད་པར་དྲན་ནོ། །རིགས་ཀྱི་བུ་བྱང་ཆུབ་སེམས་
དཔའ་སེམས་དཔའ་ཆེན་པོ་ས་དགུ་པ་ལས་གཟུངས་ཐོབ་པའི་མིང་དཔག་ཏུ་མེད་པའི་སྒོ་ཞེས་བྱ་སྟེ། གཟུངས་ལ། ཏདྱ་ཐཱ། ཧ་རི་ཙནྜལི་ཀེ། ཀུ་ལ་མ་བྷ་དྲི། ཏོ་ར་སི་པ་ཏ་པ་ཏ་སི། ཤི་རི་ཤི་རི་ག་ཤི་རི་ག་པི་ཤི་རི་སྭ་སྭསྟི། སརྦ་ས་ཏྭ་ནཾ་སྭ་ཧ། རིགས་ཀྱི་བུ་གཟུངས་འདི་ནི་གང་གའི་ཀླུང་དགུའི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་དགུ་པའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་ཞིག་གིས་གཟུངས་སྔགས་འདི་འདོན་ཅིང་འཛིན་ན་འཇིགས་ཤིང་སྐྲག་པ་རྣམས་ལས་ཐར་བ་དང་། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་། རྐུན་པོ་དང་། གློ་བུར་གྱི་གནོད་པ་དང་། ཉོན་མོངས་པ་དང་། སྡུག་བསྔལ་བ་དང་། སྒྲིབ་པ་ལྔ་ལས་རྣམ་པར་གྲོལ་ཏེ་ས་དགུ་པ་མི་བརྗེད་པར་དྲན་ནོ། །རིགས་ཀྱི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ས་བཅུ་པ་ལ་གཟུངས་ཐོབ་པའི་མིང་རྡོ་རྗེའི་རི་འཇོམས་པ་ཞེས་བྱ་སྟེ། གཟུངས་ལ། ཏདྱ་ཐཱ། སིདྡྷེ་སུ་སིདྡྷེ། མོ་ཙ་ནི། མོ་ཀྵ་ནི། མུཀྟེ་བི་མུཀྟེ། ཨ་མ་ལེ་བི་མ་ལེ་ད་མ་ལེ། མཱངྒ་ལེ། ཧི་ར་ཎྱ་གརྦྷེ། རཏྣ་གརྦྷེ། ས་མནྟ་བྷ་དྲེ། སརྦ་ཨརྠ་སྭ་དྷ་ནི། མ་ན་སེ། མ་ཧཱ་མ་ན་སེ་ཨད་བྷུ་ཏེ།ཨ་ཏྱད་བྷུ་ཏེ་ཨ་ར་ཛེ། བི་ར་ཛེ་ཨ་ཙ་ཏེ་ཨ་མྲྀ་ཏེ་ཨ་ར་ཛེ་བི་ར་ཛེ་པྲདྨེ་པྲཧྨ་སྭ་རེ་པཱུ་ར་ཎི་པཱུ་ར་ཎི་མ་ནོ་ར་ཐེ་སྭཱ་ཧཱ།རིགས་ཀྱི་བུ་གཟུངས་འདི་ནི་དབང་བསྐུར་བའི་བཀྲ་ཤིས་ཀྱི་ཚིག་སྟེ། འདི་ནི་གང་གཱའི་ཀླུང་བཅུའི་བྱེ་མ་སྙེད་ཀྱི་གྲངས་ལས་འདས་པའི་སངས་རྒྱས་རྣམས་ཀྱིས་ས་བཅུ་པའི་བྱང་ཆུབ་སེམས་དཔའ་ཡོངས་སུ་བསྲུང་བའི་ཕྱིར་གསུངས་ཏེ། གང་ལ་ལ་ཞིག་གིས་གཟུངས་སྔགས་འདི་འདོན་ཅིང་འཛིན་ན་འཇིགས་ཤིང་སྐྲག་པ་ལས་གྲོལ་ཏེ། གཅན་གཟན་མ་རུངས་པ་དང་། ཡི་དགས་མ་རུངས་པ་དང་། མི་དང་མི་མ་ཡིན་པ་ལ་སོགས་པ་དགྲ་དང་། རྐུན་པོ་དང་། གློ་བུར་གྱི་གནོད་པ་དང་། གདུག་ཅིང་གནོད་པ་ཐམས་ཅད་བསལ་ཅིང་ཟད་ནས་སྒྲིབ་པ་ལྔ་ལས་གྲོལ་ཏེ་ས་བཅུ་པ་མི་བརྗེད་པར་དྲན་ནོ། །དེ་ནས་བྱང་ཆུབ་སེམས་དཔའ་སེང་གེའི་མཚན་ཉིད་འོད་
འཕྲོ་བས་སངས་རྒྱས་ཀྱིས་བསམ་གྱིས་མི་ཁྱབ་པའི་གཟུངས་བཤད་པ་འདི་ཐོས་ནས་འདུག་པའི་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་ཐལ་མོ་སྦྱར་ནས་གུས་པར་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ཏེ་ཚིགས་སུ་བཅད་པ་འདིས་སངས་རྒྱས་ལ་བསྟོད་དོ། །དཔེ་མེད་དེ་ལ་གུས་ཕྱག་འཚལ། །ཤིན་ཏུ་ཟབ་པའི་མཚན་ཉིད་ཆོས། །སྐྱེ་བོ་ཡང་དག་ཤེས་སྟོར་བ། །སངས་རྒྱས་ཉག་གཅིག་འདྲེན་ཅིང་སྒྲོལ། །དེ་བཞིན་གཤེགས་པ་ཤེས་རབ་སྤྱན། །ཆོས་ཀྱི་མཚན་ཉིད་གཅིག་མི་གཟིགས། །ཡང་དག་ཆོས་ཀྱི་སྤྱན་གྱིས་ནི། །ཡོངས་སུ་བརྟགས་པ་བསམ་མི་ཁྱབ། །ཆོས་གཅིག་ཀྱང་ནི་སྐྱེ་བ་མེད། །ཆོས་གཅིག་ཀྱང་ནི་འགོག་པ་མེད། །དེ་ལྟར་མཉམ་པར་གཟིགས་པས་ན། །བླ་ན་མེད་པའི་གནས་སུ་སོན། །འཁོར་བ་དག་ཀྱང་མི་འཇིགས་ཏེ། །མྱ་ངན་འདས་ལ་ཡང་མི་གནས། །མཐའ་གཉིས་ལ་ཡང་མི་ཆགས་པས། །དེ་ཕྱིར་མྱ་ངན་འདས་པ་ཐོབ། །དག་དང་མ་དག་ཕྱོགས་ལ་ཡང་། །བཅོམ་ལྡན་འདས་ཀྱིས་རོ་གཅིག་མཁྱེན། །རྣམ་པར་མི་རྟོག་དབྱིངས་ཀྱིས་ནི། ། མཆོག་ཏུ་རྣམ་དག་ཐོབ་པར་འགྱུར། །བཅོམ་ལྡན་འདས་ནི་མཐའ་མེད་སྐུ། །ཡི་གེ་འབྲུ་གཅིག་མ་བཤད་ཀྱང་། །སློབ་མ་མང་པོ་རྣམས་དག་ལ། །ཆོས་ཀྱི་ཆར་གྱིས་རྒྱས་པར་མཛད། །སྐྱེ་བོ་མཚན་མ་སངས་རྒྱས་གཟིགས། །སྣ་ཚོགས་ཐམས་ཅད་ཀུན་ཀྱང་མཁྱེན། །འོན་ཀྱང་སྡུག་བསྔལ་དེ་དག་ལ། །རྟག་པར་འདྲེན་ཅིང་སྐྱོབ་པར་མཛད། །སྐྱིད་སྡུག་རྟག་དང་མི་རྟག་དང་། །བདག་ཡོད་བདག་མེད་ལ་སོགས་པ། །གཅིག་དང་ཐ་དད་མ་ཡིན་ཏེ། །མི་སྐྱེ་འགོག་པའང་མ་ཡིན་ནོ། །དེ་ལ་སོགས་པའི་གཞུང་མང་པོ། །བཤད་པའི་ཕྱིར་ནི་རྣམ་པ་ཡོད། །དཔེ་རུ་ལུང་སྟོང་བྲག་ཅ་འདྲ། །སངས་རྒྱས་ཉག་གཅིག་མངོན་པར་མཁྱེན། །ཆོས་ཀྱི་དབྱིངས་ལ་བྱེ་བྲག་མེད། །དེ་ཕྱིར་ཐེག་པ་ཐ་དད་མེད། །སྐྱེ་བོ་དག་ནི་བསྒྲལ་བའི་ཕྱིར། །བསྟན་པ་རྣམ་པ་གསུམ་ཡང་ཡོད། །
དེ་ནས་ཚངས་པའི་རྒྱལ་པོ་ཆེན་པོ་འདུག་པའི་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་བྱས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། ཐལ་མོ་སྦྱར་ནས་གུས་པར་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་དཀོན་ཞིང་དཔག་ཏུ་མེད་པ་འདི་ཐོག་མ་དང་བར་མ་དང་ཐ་མར་དགེ་གཞུང་དང་ཚིག་འབྲུ་བཟང་པོ་སངས་རྒྱས་ཀྱི་ཆོས་ཐམས་ཅད་གྲུབ་པར་ནུས་པ་འདི་འཛིན་ཅིང་འཆང་བའི་མི་ནི་སངས་རྒྱས་ཐམས་ཅད་ལ་ལན་གློན་པ་ཞེས་བགྱིའོ། །སངས་རྒྱས་ཀྱིས་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་དེ་དེ་བཞིན་ཏེ། དེ་དེ་བཞིན་ནོ། །ཁྱེད་ཀྱིས་སྨྲས་པ་བཞིན་ཏེ། རིགས་ཀྱི་བུ་མདོ་སྡེ་འདི་མཉན་ཅིང་ཐོས་པ་ནི་ཀུན་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་གོ། །དེ་ཅིའི་ཕྱིར་ཞེ་ན། རིགས་ཀྱི་བུ་མདོ་སྡེ་འདིས་ནི་ཕྱིར་མི་ལྡོག་པའི་སའི་བྱང་ཆུབ་སེམས་དཔའ་མཆོག་གི་དགེ་བའི་རྩ་བ་སྨིན་ཅིང་གྲུབ་པར་ནུས་སོ། །འདི་ནི་མཆོག་གི་ཆོས་ཀྱི་ཕྱག་རྒྱའོ། །འདི་ནི་མདོ་སྡེ་ཐམས་ཅད་ཀྱི་རྒྱལ་པོ་སྟེ། མཉན་ཅིང་ཐོས་པ་དང་། འཆང་ཞིང་འཛིན་པ་དང་། ཀློག་ཅིང་འདོན་པར་བྱའོ། །དེ་ཅིའི་ཕྱིར་ཞེ་ན། རིགས་ཀྱི་བུ་སྐྱེ་བོ་རྣམས་དགེ་བའི་རྩ་བ་མ་སྐྱེད་པ། དགེ་བའི་རྩ་བ་མ་སྨིན་པ། སངས་རྒྱས་རྣམས་ལ་མ་བསྙེན་པས་ནི་མཆོག་གི་མདོ་སྡེ་འདི་མཉན་ཅིང་ཐོས་པར་མི་ནུས་སོ། །རིགས་ཀྱི་བུའམ། རིགས་ཀྱི་བུ་མོ་ལ་ལས་ཉན་ཅིང་འཆང་ན་སྡིག་པ་མི་དགེ་བའི་ལས་ཀྱི་སྒྲིབ་པ་ཐམས་ཅད་བྱང་ཞིང་ཟད་ནས་མཆོག་ཏུ་རྣམ་པར་དག་ཅིང་རྟག་པར་སངས་རྒྱས་མཐོང་ནས་སངས་རྒྱས་རྣམས་དང་། དགེ་བའི་བཤེས་གཉེན་མཆོག་ཏུ་སྤྱོད་པའི་མིང་དང་མི་འབྲལ་ཞིང་རྟག་པར་དམ་པའི་ཆོས་ཐོས་ནས་ཕྱིར་མི་ལྡོག་པའི་ས་ལ་གནས་པ་དང་། མཆོག་གི་གཟུངས་ཀྱི་སྒོ་མི་ཟད་མི་འགྲིབ་པར་ཐོབ་པར་འགྱུར་ཏེ། འདི་ལྟ་སྟེ། རྒྱ་མཚོའི་ཕྱག་རྒྱ་མཆོག་གི་ཡོན་ཏན་འབྱུང་བའི་
གཟུངས་མི་ཟད་མི་འགྲིབ་པ་དང་། སེམས་ཅན་ཐམས་ཅད་ཀྱི་ཡིད་དང་། སྤྱོད་པ་དང་། ཚིག་ལ་ཐོགས་པ་མེད་པའི་གཟུངས་མི་ཟད་མི་འགྲིབ་པ་དང་། ཉི་མའི་དཀྱིལ་འཁོར་དྲི་མ་མེད་པ་མཚན་ཉིད་ཀྱི་འོད་ཀྱི་གཟུངས་མི་ཟད་མི་འགྲིབ་པ་དང་། ཟླ་བ་རྒྱས་པའི་མཚན་ཉིད་འོད་ཀྱི་གཟུངས་མི་ཟད་མི་འགྲིབ་པ་དང་། སླད་པ་ཐམས་ཅད་ཐུལ་ནས་ཡོན་ཏན་འཕེལ་བའི་གཟུངས་མི་ཟད་མི་འགྲིབ་པ་དང་། རྡོ་རྗེའི་རི་བསྙིལ་བའི་གཟུངས་མི་ཟད་མི་འགྲིབ་པ་དང་། བཤད་དུ་མི་རུང་བ་རྒྱུ་རྐྱེན་གྱི་སྙིང་པོ་བཤད་མི་ནུས་པ་འཆང་བའི་གཟུངས་མི་ཟད་མི་འགྲིབ་པ་དང་། བདེན་པར་སྨྲ་བའི་ཆོས་ལ་ཐོགས་པ་མེད་པའི་སྒྲའི་གཟུངས་མི་ཟད་མི་འགྲིབ་པ་དང་། ནམ་མཁའ་དྲི་མ་མེད་པའི་སེམས་དང་། སྤྱོད་པའི་ཕྱག་རྒྱའི་གཟུངས་མི་ཟད་མི་འགྲིབ་པ་དང་། མཐའ་མེད་པའི་སངས་རྒྱས་ཀྱི་སྐུ་ཐམས་ཅད་མངོན་དུ་སྣང་བའི་གཟུངས་མི་ཟད་མི་འགྲིབ་པ་དང་། རིགས་ཀྱི་བུ་འདི་ལ་སོགས་ཏེ་མི་ཟད་མི་འགྲིབ་པའི་གཟུངས་ཐམས་ཅད་ཀྱི་ཚད་ཀྱི་སྒོ་གྲུབ་ཅིང་ཐོབ་པའི་ཕྱིར་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱོགས་བཅུའི་སངས་རྒྱས་ཀྱི་ཞིང་ཐམས་ཅད་དུ་སངས་རྒྱས་ཀྱི་སྐུར་སྤྲུལ་ནས་བླ་ན་མེད་པ་དམ་པའི་ཆོས་འཆད་དོ། །ཆོས་ཀྱི་དེ་བཞིན་ཉིད་ནི་མི་གཡོ་མི་གནས་མི་འགྲོ་མི་འོང་བའི་ཕྱིར་རོ། །སྐྱེ་བོ་ཐམས་ཅད་ཀྱི་དགེ་བའི་རྩ་བ་གྲུབ་ཅིང་སྨིན་པར་བྱས་ཀྱང་སྐྱེ་བོ་གཅིག་སྨིན་པར་ཡང་མི་མཐོང་ངོ་། །ཆོས་སྣ་ཚོགས་འཆད་མོད་ཀྱི་ཚིག་འབྲུ་ལ་མི་གཡོ་མི་གནས་མི་འགྲོ་མི་འོང་ངོ་། །སྐྱེ་ཞིང་འགོག་པ་སྟོན་ཀྱང་སྐྱེ་ཤིང་འགོག་པ་མེད་པར་ཁོང་དུ་ཆུད་དོ། །ཅིའི་རྒྱུས་ན་འདུ་བྱེད་ཀྱི་ཆོས་རྣམས་ལ་འགྲོ་བ་དང་འོང་བ་མེད་ཅེ་ན། ཆོས་སོ་ཅོག་གི་ངོ་བོ་ཉིད་ཐ་དད་པ་མེད་པའི་ཕྱིར་རོ། །ཆོས་འདི་འཆད་པའི་ཚེ་བྱང་ཆུབ་སེམས་དཔའ་སེམས་དཔའ་ཆེན་པོ་འབུམ་ཕྲག་སུམ་ཁྲི་མི་སྐྱེ་བའི་ཆོས་ལ་བཟོད་པ་ཐོབ་བོ། །དཔག་ཏུ་མེད་པའི་བྱང་ཆུབ་སེམས་དཔའ་བྱང་ཆུབ་ཀྱི་སེམས་ལས་ཕྱིར་མི་ནུར་བ་ཐོབ་བོ། །དཔག་ཏུ་མེད་མཐའ་མེད་པའི་དགེ་སློང་དང་དགེ་སློང་མ་ཆོས་ལ་
ཆོས་ཀྱི་མིག་གཙང་མ་ཐོབ་བོ། །དཔག་ཏུ་མེད་པའི་སྐྱེ་བོ་བྱང་ཆུབ་ཏུ་སེམས་བསྐྱེད་དོ། །དེ་ནས་བཅོམ་ལྡན་འདས་ཀྱིས་ཚིགས་སུ་བཅད་པ་འདི་གསུངས་སོ། །རྒྱལ་པོའི་ཆོས་ཀྱིས་འཁོར་ཀུན་བཟློག །ཟབ་ཅིང་ཡངས་མཆོག་མཐོང་བར་དཀའ། །སྐྱེ་བོ་དམུས་ལོང་འདོད་པས་ཁེབས། །མི་མཐོང་ཕྱིར་ནི་སྡུག་བསྔལ་ལེན། །དེ་ནས་ཕལ་མང་པོ་ལྷན་ཅིག་ཏུ་འདུག་པ་ལངས་ཏེ་སངས་རྒྱས་ཀྱི་ཞབས་ལ་སྤྱི་བོས་ཕྱག་འཚལ་ནས་སངས་རྒྱས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གནས་གང་ན་གསེར་འོད་དམ་པ་མདོ་སྡེའི་རྒྱལ་པོ་འདི་འཆང་བ་དང་། ཀློག་ཅིང་ཁ་ཏོན་དུ་བགྱིད་པ་དེར་བདག་ཅག་ལ་སོགས་པ་ཕལ་མང་པོ་རྣམས་ཐམས་ཅད་དེར་མཆིས་ཏེ་ཉན་པའི་འཁོར་བགྱིའོ། །ཆོས་འཆད་པའི་མཁན་པོ་དེ་ལ་ཕན་པ་དང་། བདེ་ཞིང་སྐྱིད་པ་དང་། བསྒྲིབས་པ་མེད་པ་དང་། ལུས་དང་ཡིད་བག་ཡངས་སུ་བགྱིའོ། །བདག་ཅག་ལ་སོགས་པས་སེམས་ཐག་པ་ནས་མཆོད་ཅིང་ཡང་ཕལ་མང་པོ་ཉན་པ་དེ་དག་བདེ་ཞིང་སྐྱིད་པར་བགྱིའོ། །ག་ལ་གནས་པའི་ཡུལ་དེ་ན་དགྲ་དང་། འཇིགས་ཤིང་སྐྲག་པ་དང་། གནོད་པ་དང་། མུ་གེ་དང་། ཉོན་མོངས་པ་མ་མཆིས་པར་བགྱིའོ། །ཡུལ་གྱི་མི་དར་ཞིང་རྒྱས་པར་བགྱིའོ། །ཆོས་འདི་བཤད་པའི་གནས་ཀྱི་དཀྱིལ་འཁོར་གྱིས་དེར་ལྷ་དང་། མི་མ་ཡིན་པ་དང་། སྐྱེ་བོ་རྣམས་ཀྱིས་མི་རྫི། མི་འཆག །མི་གཙང་བ་ལ་སོགས་པས་མི་བསྒོའོ། །དེ་ཅིའི་སླད་དུ་ཞེ་ན། ཆོས་འཆད་པའི་གནས་དེ་མཆོད་རྟེན་ཉིད་ལགས་པས་ན་བདུག་པ་དང་། མེ་ཏོག་དང་བ་དན་དང་། གདུགས་ཀྱིས་མཆོད་པར་བགྱིའོ། །བདག་ཅག་ལ་སོགས་པས་རྟག་པར་བསྲུངས་ནས་རྒུད་ཅིང་དམས་པ་ལས་བྲལ་བར་བགྱིའོ། །སངས་རྒྱས་ཀྱིས་ཕལ་མང་པོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་ཁྱེད་ལ་སོགས་པས་མདོ་སྡེ་མཆོག་འདི་ལ་བརྩོན་པར་བསྒོམས་ན་དེ་ནི་དམ་པའི་ཆོས་འཇིག་རྟེན་ན་ཡུན་དུ་བཞུགས་པ་ཞེས་བྱའོ། །གསེར་འོད་དམ་པ་མཆོག་
ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ལས་ཤིན་ཏུ་རྣམ་པར་དག་པའི་གཟུངས་ཀྱི་ལེའུ་སྟེ་དྲུག་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་ལྔ་པ། དེ་ནས་སངས་རྒྱས་ཀྱིས་བྱང་ཆུབ་ཤིང་གི་ལྷ་དགེ་བའི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །ད་ཁྱོད་ཀྱིས་ཤེས་པར་གྱིས་ཤིག །བཟང་པོ་དཔལ་བྱང་ཆུབ་སེམས་དཔའི་མཚན་མོའི་རྨི་ལམ་དུ་གསེར་གྱི་རྔ་ལས་སྒྲ་ཆེན་པོ་བྱུང་སྟེ། སངས་རྒྱས་ཀྱི་ཡོན་ཏན་བསྟོད་པ་དང་། འགྱོད་ཚངས་ཀྱི་ཆོས་མཐོང་བ་དེའི་རྒྱུ་ཁྱེད་ལ་སོགས་པ་ལ་རྒྱ་ཆེར་བཤད་པ་འདི་ཤིན་ཏུ་ལེགས་པར་ཉོན་ལ་ཡིད་ལ་ཟུང་ཤིག་དང་། འདས་པའི་ཚེ་རྒྱལ་པོ་གསེར་ཀླུའི་དབང་པོ་ཞེས་བྱ་བས་རྟག་པར་པདྨོ་ཀ་མ་ལ་ལྟ་བུས་ཕྱོགས་བཅུ་དུས་གསུམ་གྱི་སངས་རྒྱས་རྣམས་ལ་བསྟོད་ཅིང་བསྔགས་སོ། །དེ་ནས་ཕལ་མང་པོ་ལ་བསྟོད་པའི་ཚིགས་སུ་བཅད་པ་འདི་གསུངས་སོ། །གང་རྒྱལ་སྔ་མ་གང་དག་བྱུང་བ་དང་། །ཕྱོགས་བཅུ་དག་ན་གང་དག་བཞུགས་པ་དང་། །རྒྱལ་བ་དེ་དག་རྣམས་ལ་ཕྱག་འཚལ་ལོ། །རྒྱལ་བ་དེ་དག་ཀུན་ལ་བདག་བསྟོད་དོ། །ཐུབ་དབང་ཞི་བ་རབ་ཞི་རྣམ་པར་དག །ཁ་དོག་གསེར་དང་འདྲ་བར་སྣང་བའི་སྐུ། །སངས་རྒྱས་དབྱངས་ནི་དབྱངས་ཀུན་ནང་ན་སྙན། །ཚངས་པའི་སྒྲ་སྐད་ཤིན་ཏུ་བསྒྲགས་པའི་གསུང་། །རྐང་དྲུག་རྨ་བྱ་སྣག་ཚ་འདྲ་བའི་དབུ། །སྔོན་པོ་རབ་བསྐུམས་བྱ་དང་འདྲ་བར་མཛེས། །དུང་དང་ཁ་བ་ལྟ་བུར་དཀར་བའི་ཚེམས། །གསེར་གྱིས་སྤྲས་པ་ལྟ་བུར་རྟག་ཏུ་སྣང་། །སྡོ་ཞིང་ཡངས་ལ་ཤིན་ཏུ་དྲི་མེད་སྤྱན། །མེ་ཏོག་ཨུཏྤལ་སྔོན་པོ་ཁ་འབུས་འདྲ། །ལྗགས་ཀྱི་ཁ་དོག་བཟང་ཡངས་པདྨ་འདྲ། །པདྨ་སྐྱེས་པར་སྣང་བའི་པདྨོ་འདྲ། །སྨིན་མཚམས་དུང་དང་པདྨའི་རྩ་བ་འདྲ། ། གཡས་ཕྱོགས་འཁྱིལ་པ་ཁ་དོག་བཻ་ཌཱུཪྱ། །ཟླ་བ་ཚེས་ཤིང་ཟླ་བ་ཕྲ་བ་འདྲ། །ཐུབ་པ་མགོན་སྐུ་འབར་བ་བུང་བ་འདྲ། །འཇམ་བཟངས་གསེར་གྱི་ཐུར་མ་འདྲ་བ་ཡི། །ཞལ་ལས་འཕགས་ཞིང་ལྷམ་མེར་གྱུར་པའི་ཤངས། །རབ་མཆོག་དམ་པ་འཕགས་པ་རི་ཡི་
མཆོག །རྒྱལ་བ་ཀུན་གྱི་རྟག་ཏུ་འཇམ་པའོ། །བ་སྤུའི་ཁུང་ནས་རེ་རེ་འབྱུང་བ་སྟེ། །སྤུ་བྱུང་བ་ནི་གཡས་ཕྱོགས་སུ་འཁྱིལ་བ། །སྔོན་པོ་ཟླུམ་པོ་ལྟ་བུར་སྐྱེས་པའོ། །སྔོན་པོ་བརྒྱན་པ་རྨ་བྱའི་མགུལ་ལྟར་མཛེས། །སྐྱེས་མ་ཐག་ཏུ་རབ་ཏུ་སྣང་བའི་སྐུ། །ཕྱོགས་བཅུའི་འཇིག་རྟེན་ཐམས་ཅད་གང་བར་འགྱུར། །འཇིག་རྟེན་གསུམ་ན་སྡུག་བསྔལ་ཐམས་ཅད་ཞི། །བདེ་བ་ཀུན་གྱིས་སེམས་ཅན་ངོམས་པར་མཛད། །སེམས་ཅན་དམྱལ་དང་བྱོལ་སོང་འགྲོ་བ་དང་། །ཡི་དགས་ལྷ་གནས་མི་ཡི་འགྲོ་བ་དང་། ། སེམས་ཅན་བདེ་བ་ཀུན་གྱིས་ཚོགས་པར་མཛད། །ངན་སོང་འགྲོ་བ་ཐམས་ཅད་རབ་ཞི་མཛད། །ཁ་དོག་བཟང་པོ་གསེར་དང་འདྲ་བའི་མཛེས། །ཤིན་ཏུ་སྦྱངས་པའི་གསེར་དང་འདྲ་བའི་སྐུ། །བདེ་གཤེགས་ཞལ་ནི་དྲི་མེད་ཟླ་བ་འདྲ། །མཛེས་པར་གྱུར་ཅིང་ཤིན་ཏུ་དྲི་མེད་ཞལ། །ཡན་ལག་གཞོན་པར་གྱུར་ཅིང་འཇམ་པའི་སྐུ། །འགྲོ་ཞིང་གནོན་པའི་སེང་གེའི་མཆོག་དང་འདྲ། །ཕྱག་ཕྱང་དབང་བ་རབ་ཏུ་འཕྱང་བར་གྱུར། །རླུང་གིས་སཱ་ལའི་ལྕུག་མ་བསྐྱོད་པ་བཞིན། །འདོམ་གང་འཁོར་བར་འབར་བའི་འོད་ཟེར་གཏོང་། །ཉི་མ་སྟོང་དང་འདྲ་བར་ཤིན་ཏུ་ལྷན། ། ཐུབ་པའི་དབང་པོ་དྲི་མ་མེད་པའི་སྐུ། །ཐམས་ཅད་མཐའ་ཡས་ཞིང་ཀུན་སྣང་བར་གྱུར། །ཟླ་བ་ལྟ་བུར་སྣང་བྱེད་འདྲ་བར་གྱུར། །ཞིང་རྣམས་མཐའ་ཡས་བརྒྱ་ཕྲག་སྟོང་ཀུན་ཏུ། །དེ་དག་འོད་ནི་ཐམས་ཅད་མེད་པར་གྱུར། །སངས་རྒྱས་ལྷམ་མེར་སྣང་བར་གྱུར་པའི་ཕྱིར། །སངས་རྒྱས་ཉིད་བྱེད་འཇིག་རྟེན་སྒྲོན་མར་གྱུར། །སངས་རྒྱས་ཉིན་མོ་ཉི་མ་བརྒྱ་སྟོང་གིས། །བརྒྱ་ཕྲག་སྟོང་གི་ཞིང་རྣམས་ཀུན་ཏུ་ཡང་། །དེ་བཞིན་གཤེགས་པའི་ཉི་མ་སེམས་ཅན་མཐོང་། །བསོད་ནམས་བརྒྱ་ཕྲག་སྟོང་གིས་བསྒྲུབས་པའི་སྐུ། །ཡོན་ཏན་ཐམས་ཅད་ཀྱིས་ནི་བརྒྱན་པའི་སྐུ། །རྒྱལ་ཕྱག་བལ་གླང་རྒྱལ་པོའི་སྣ་དང་འདྲ། །རབ་འབར་ཤིན་ཏུ་དྲི་མེད་རྐང་ལག་མཆོག །ས་ཡི་སྟེང་གི་རྡུལ་དང་མཉམ་པ་དང་། །སངས་རྒྱས་གང་འདས་རྡུལ་ཕྲན་མཉམ་པ་
དང་། །གང་དག་འབྱུང་བ་རྡུལ་ཕྲན་མཉམ་པ་དང་། །གང་དག་བཞུགས་པ་རྡུལ་ཕྲན་མཉམ་པ་དང་། །རྒྱལ་བ་དེ་དག་རྣམས་ལ་ཕྱག་འཚལ་བ། །ལུས་དང་ངག་དང་ཡིད་ནི་དང་བས་སོ། །མེ་ཏོག་རབ་ཏུ་སྦྱིན་དང་དྲི་རབ་སྦྱིན། །ཁ་དོག་བརྒྱ་ཡང་ཤིན་ཏུ་སེམས་བཟང་གིས། །བདག་གི་ལྕེ་བརྒྱས་སངས་རྒྱས་ཡོན་ཏན་རྣམས། །བསྐལ་པ་སྟོང་དུ་བརྗོད་པར་མི་ནུས་སོ། །རྒྱལ་བ་དག་གི་དགེ་བ་གང་རྫོགས་པ། །སྙིང་པོ་མཆོག་རབ་སྣ་ཚོགས་དུ་མ་དག །རྒྱལ་བ་གཅིག་གི་ཡོན་ཏན་བརྗོད་མི་ནུས། ། ལྕེ་སྟོང་གིས་ཀྱང་ཆུང་ཟད་བཤད་པར་ནི། །རྒྱལ་བ་ཀུན་གྱི་ནུས་པ་ཅི་ཞིག་སྨོན། །ཡོན་ཏན་གཅིག་ལ་རྒྱ་ཆེར་བཤད་པ་ཡང་། །ལྷ་དང་འཇིག་རྟེན་ཐམས་ཅད་རྒྱ་མཚོར་གྱུར། །སྲིད་པའི་ཐོག་མ་མན་ཆད་ཀུན་ཆུ་གང་། །ཚད་གཟུང་བར་ནི་བ་སྤུའི་རྩེ་མོས་ནུས། ། བདེ་བར་གཤེགས་པའི་ཡོན་ཏན་གཅིག་མི་ནུས། །བཤད་པ་མཆོད་པ་བསྟོད་པ་ཐམས་ཅད་ཀྱང་། །ལུས་དང་ངག་ཡིད་དག་ནི་དང་བ་སྟེ། །བདག་གིས་བསོད་ནམས་འབྲས་བུ་མཆོག་གང་བསགས། །དེ་ཡིས་སེམས་ཅན་རྒྱལ་བ་ཐོབ་པར་ཤོག །རྒྱལ་པོས་སངས་རྒྱས་དེ་ལྟར་བསྟོད་ནས་སུ། །རྒྱལ་པོ་སྨོན་ལམ་འདི་ལྟར་འདེབས་པར་བྱེད། །ག་ལ་ག་ལར་བདག་སྐྱེས་གྱུར་པ་ན། །མ་འོངས་པ་ཡི་བསྐལ་པ་མཐའ་མེད་པར། །རྔ་འདི་འདྲ་བའི་རྨི་ལམ་མཐོང་བར་ཤོག །བཤགས་པ་འདི་འདྲ་དེར་ནི་ཐོས་པར་ཤོག །རྒྱལ་བསྟོད་པདྨའི་འབྱུང་གནས་འདི་དང་འདྲ། །སྐྱེ་བ་བརྒྱར་ཡང་དེ་ན་ཐོབ་པར་ཤོག །སངས་རྒྱས་ཡོན་ཏན་མཐའ་ཡས་མཉམ་པ་མེད། །གང་དེ་བསྐལ་པ་སྟོང་དུ་དཀོན་པ་སྟེ། །དེ་དག་རྨི་ལམ་དུ་ཡང་ཐོས་པར་ཤོག །དེ་དག་ཉིན་མོར་གྱུར་ན་བཤད་པར་བྱ། །སྡུག་བསྔལ་རྒྱ་མཚོ་ལས་ནི་སེམས་ཅན་དགྲོལ། །ཕ་རོལ་ཕྱིན་པ་དྲུག་ནི་རྫོགས་པར་བྱ། །བྱང་ཆུབ་བླ་མེད་ཕྱི་ནས་ཐོབ་པར་ཤོག །དགྲ་མེད་ཞིང་ནི་བདག་གིས་ཐོབ་པར་ཤོག །རྔ་རབ་བྱིན་པའི་རྣམ་སྨིན་འབྲས་བུ་དང་། །
རྒྱལ་བ་ཐམས་ཅད་བསྟོད་པའི་རྒྱུ་ཡི་ཕྱིར། །ཤཱཀྱ་ཐུབ་པའི་དབང་པོ་མངོན་མཐོང་ཤོག །བདག་གིས་ལུང་བསྟན་པ་ཡང་དེར་ཐོབ་ཤོག །གང་འདི་བདག་གི་བུ་ཕོ་གཉིས་པོ་དག །གསེར་གྱི་དཔུང་པའི་དབང་དང་གསེར་གྱི་འོད། །ཁྱེའུ་འདི་གཉིས་ཀྱང་དེ་ནས་ཐོབ་པར་ཤོག །བྱང་ཆུབ་བླ་ན་མེད་པའི་ལུང་བསྟན་ཀྱང་། །སེམས་ཅན་གང་དག་སྐྱབས་དང་དཔུང་གཉེན་མེད། །མགོན་མེད་སྡུག་བསྔལ་སོང་བར་གྱུར་པ་དག །མ་འོངས་བསྐལ་པ་ཀུན་ཏུ་དེ་དག་ལ། །མགོན་དང་སྐྱབས་དང་དཔུང་གཉེན་གྱུར་པར་ཤོག །སྡུག་བསྔལ་འབྱུང་བ་ཟད་པར་བྱེད་པ་དང་། །བདེ་བ་ཀུན་གྱི་འབྱུང་གནས་གྱུར་པར་ཤོག །མ་འོངས་བསྐལ་པར་བྱང་ཆུབ་སྤྱད་པ་ནི། །དེ་དག་ཇི་ཙམ་ཐོག་མའི་མཐའ་ཡོད་པར། །གསེར་འོད་དམ་པར་བཤགས་པ་བྱས་པས་ན། །བདག་གི་སྡིག་པའི་རྒྱ་མཚོ་སྐེམས་པར་ཤོག །བདག་གི་རྒྱ་མཚོ་ལས་ནི་བྱང་བར་ཤོག །བདག་གི་བསོད་ནམས་རྒྱ་མཚོ་རྫོགས་པར་ཤོག །བདག་གི་ཡེ་ཤེས་རྒྱ་མཚོ་རྣམ་དག་ཤོག །ཡེ་ཤེས་དྲི་མ་མེད་པའི་འོད་རབ་ཀྱིས། །ཡོན་ཏན་ཀུན་གྱི་རྒྱ་མཚོར་འགྱུར་བར་ཤོག །བྱང་ཆུབ་ཡོན་ཏན་རིན་ཆེན་རྫོགས་པར་ཤོག །གསེར་འོད་བཤགས་པ་བྱས་པའི་སྟོབས་ཀྱིས་སུ། །བདག་གི་བསོད་ནམས་འོད་ནི་ཐོབ་པར་ཤོག །བདག་གི་བྱང་ཆུབ་རྣམ་དག་འདི་ཐོབ་ཤོག །དྲི་མེད་ཡེ་ཤེས་སྣང་བ་དམ་པ་ཡི། །བདག་གི་ལུས་ཀྱི་འོད་ནི་ཐོབ་པར་ཤོག །བསོད་ནམས་འོད་ནི་ལྷམ་མེར་གྱུར་པས་ན། །འཇིག་རྟེན་གསུམ་པོ་ཀུན་གྱི་གཙོ་བོར་ཤོག །བསོད་ནམས་སྟོབས་དང་རྟག་ཏུ་ལྡན་པར་ཤོག །སྡུག་བསྔལ་རྒྱ་མཚོ་ལས་ནི་སྒྲོལ་བ་དང་། ། བདེ་བ་ཐམས་ཅད་རྒྱ་མཚོ་འདྲ་བ་དང་། །མ་འོངས་བསྐལ་པར་བྱང་ཆུབ་སྤྱོད་པར་ཤོག །ཇི་ཙམ་ཐོག་མའི་མཐར་ནི་གྱུར་པ་དང་། །འཇིག་རྟེན་གསུམ་ན་ཞིང་མཆོག་ཅི་འདྲ་བ། །རྒྱལ་བ་ཀུན་གྱི་ཡོན་ཏན་མཐའ་ཡས་ལྡན། །ཡོན་ཏན་མཐའ་ཡས་པ་
ཡི་ཞིང་དེ་འདྲ། །བདག་གིས་མ་འོངས་དུས་ན་ཐོབ་པར་ཤོག །བཟང་དཔལ་ཁྱོད་ཀྱིས་ཤེས་པར་གྱིས། །གསེར་དཔུང་དབང་པོ་ཡུལ་རྒྱལ་པོས། །སྨོན་ལམ་འདི་འདྲ་བསྐྱེད་མྱོང་བ། །དེ་ནི་ཁྱོད་ཀྱི་ལུས་ཉིད་ཡིན། །སྔོན་གྱི་དུས་ན་བུ་གཉིས་ཡོད། ། གསེར་གྱི་དཔུང་དང་གསེར་གྱི་འོད། །དེ་ནི་དངུལ་གཟུགས་དངུལ་འོད་དེ། །ང་ལས་ལུང་བསྟན་ཐོབ་པའོ། །ཕལ་མང་པོས་བཤད་པ་དེ་ཐོས་ནས་ཀུན་གྱིས་བྱང་ཆུབ་ཏུ་སེམས་བསྐྱེད་དེ། ད་ལྟར་དང་མ་འོངས་པའི་དུས་ན་ཡང་འགྱོད་ཚངས་འདི་སྤྱོད་སྨོན་ལམ་བཏབ། གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ལས་པདྨ་ལྟ་བུའི་དཔེས་བསྔགས་པ་བརྗོད་པའི་ལེའུ་སྟེ་བདུན་པའོ།། །།དེ་ནས་བཅོམ་ལྡན་འདས་འཁོར་མང་པོའི་ནང་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རབ་གནས་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་བུ་གསེར་རྒྱལ་བ་ཞེས་བྱ་བའི་གཟུངས་ཡོད་དོ། །རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་འདས་པ་དང་མ་བྱོན་པ་དང་ད་ལྟར་བཞུགས་པའི་སངས་རྒྱས་རྣམས་མངོན་སུམ་དུ་མཐོང་ཞིང་བཀུར་སྟི་དང་མཆོད་པ་བྱེད་པར་འདོད་པས་གཟུངས་འདི་ཡོངས་སུ་གཟུང་བར་བྱའོ། །དེ་ཅིའི་ཕྱིར་ཞེ་ན། གཟུངས་འདི་ནི་འདས་པ་དང་མ་བྱོན་པ་དང་ད་ལྟར་བཞུགས་པའི་སངས་རྒྱས་རྣམས་ཀྱི་ཡུམ་ཡིན་པས་སོ། །དེ་ལྟ་བས་ན་གཟུངས་འདི་ཡོངས་སུ་འཛིན་པར་བྱེད་པ་གང་ཡིན་པ་དེ་ནི་བསོད་ནམས་ཆེན་པོ་དང་ལྡན་ཞིང་འདས་པའི་སངས་རྒྱས་ཚད་མེད་པ་རྣམས་ལས་དགེ་བའི་རྩ་བ་བསྐྱེད་པ་དེང་ཡོངས་སུ་འཛིན་པར་འགྱུར་བ་ཡིན་ནོ། །ཚུལ་ཁྲིམས་ཡོངས་སུ་དག་པ་མི་ཞིག་མི་ཉམས་ཤིང་ཐོགས་པ་མེད་པ་དང་གདོན་མི་ཟ་བར་ཆོས་ཟབ་མོའི་སློར་འཇུག་པར་འགྱུར་བ་རིག་པར་བྱའོ། །བཅོམ་ལྡན་འདས་ཀྱིས་སྔགས་ཀྱི་སྒྲུབ་པའི་ཆོ་ག་བཀའ་སྩལ་པ། སྔར་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ནས་བརྗོད་དེ། སེམས་རྩེ་གཅིག་ཏུ་གུས་པས་ཕྱག་བྱས་ནས། དེའི་འོག་ཏུ་སྔགས་
གདོན་པར་བྱའོ། །ཕྱོགས་བཅུའི་སངས་རྒྱས་ཐམས་ཅད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་ཕྱག་འཚལ་ལོ། །ཉན་ཐོས་དང་རང་སངས་རྒྱས་དང་འཕགས་པ་རྣམས་ལ་ཕྱག་འཚལ་ལོ། །སངས་རྒྱས་ཤཱཀྱ་ཐུབ་པ་ལ་ཕྱག་འཚལ་ལོ། །ཤར་ཕྱོགས་ཀྱི་སངས་རྒྱས་མི་འཁྲུགས་པ་ལ་ཕྱག་འཚལ་ལོ། །ལྷོ་ཕྱོགས་ཀྱི་སངས་རྒྱས་རིན་པོ་ཆེའི་ཏོག་ལ་ཕྱག་འཚལ་ལོ། །ནུབ་ཕྱོགས་ཀྱི་སངས་རྒྱས་ཚེ་དཔག་མེད་ལ་ཕྱག་འཚལ་ལོ། །བྱང་ཕྱོགས་ཀྱི་སངས་རྒྱས་ལྷའི་རྔ་སྒྲའི་རྒྱལ་པོ་ལ་ཕྱག་འཚལ་ལོ། །སྟེང་གི་ཕྱོགས་ཀྱི་སངས་རྒྱས་ཡངས་པའི་ཡོན་ཏན་མང་པོ་ལ་ཕྱག་འཚལ་ལོ། །འོག་གི་ཕྱོགས་ཀྱི་སངས་རྒྱས་ཡོན་ཏན་སྣང་ལ་ཕྱག་འཚལ་ལོ། །སངས་རྒྱས་རིན་ཆེན་སྙིང་པོ་ལ་ཕྱག་འཚལ་ལོ། །སངས་རྒྱས་ཀུན་ཏུ་འོད་ལ་ཕྱག་འཚལ་ལོ། །སངས་རྒྱས་ཀུན་ཏུ་སྣང་ལ་ཕྱག་འཚལ་ལོ། །སངས་རྒྱས་སྤོབས་བརྩེགས་རྒྱལ་པོ་ལ་ཕྱག་འཚལ་ལོ། །སངས་རྒྱས་རྣམ་པར་རྒྱལ་བའི་པདྨ་ལ་ཕྱག་འཚལ་ལོ། །སངས་རྒྱས་མཉམ་པར་གཟིགས་ལ་ཕྱག་འཚལ་ལོ། །སངས་རྒྱས་རིན་ཆེན་གཙུག་ཕུད་ལ་ཕྱག་འཚལ་ལོ། །སངས་རྒྱས་རིན་ཆེན་བླ་མ་ལ་ཕྱག་འཚལ་ལོ། །སངས་རྒྱས་རིན་ཆེན་འོད་ལ་ཕྱག་འཚལ་ལོ། །སངས་རྒྱས་དྲི་མ་མེད་པའི་འོད་ཟེར་ལ་ཕྱག་འཚལ་ལོ། །སངས་རྒྱས་སྤོབས་རབ་དགོངས་ལ་ཕྱག་འཚལ་ལོ། །སངས་རྒྱས་རྣམ་དག་ཟླ་བའི་འོད་ཟེར་མཚན་གྲགས་རྒྱལ་པོ་ལ་ཕྱག་འཚལ་ལོ། །སངས་རྒྱས་མེ་ཏོག་བཀོད་པའི་འོད་ལ་ཕྱག་འཚལ་ལོ། །སངས་རྒྱས་སྣང་བའི་རྒྱལ་པོ་ལ་ཕྱག་འཚལ་ལོ། །སངས་རྒྱས་ལེགས་འོད་དྲི་མེད་གྲགས་པའི་རྒྱལ་པོ་ལ་ཕྱག་འཚལ་ལོ། །སངས་རྒྱས་རྟོག་པ་འཇིགས་མེད་དབང་ཕྱུག་ལ་ཕྱག་འཚལ་ལོ། །སངས་རྒྱས་བསྙེངས་པ་མི་མངའ་བའི་གྲགས་པ་ལ་ཕྱག་འཚལ་ལོ། །སངས་རྒྱས་མཆོག་ཏུ་རྣམ་པར་རྒྱལ་བའི་རྒྱལ་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་
གཟིགས་དབང་ཕྱུག་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་སའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་འཇམ་དཔལ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་བློ་གྲོས་མི་ཟད་པའི་ཡིད་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་མཐུ་ཆེན་པོ་ཐོབ་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པ་ལ་ཕྱག་འཚལ་ལོ། །བྱང་ཆུབ་སེམས་དཔའ་སེམས་དཔའ་ཆེན་པོ་དགེ་བའི་བློ་གྲོས་ལ་ཕྱག་འཚལ་ལོ། །གཟུངས་ལ། ན་མོ་རཏྣ་ཏྲ་ཡཱ་ཡ། ཏཏྱ་ཐཱ། ཀུ་ཊི། ཀུ་ཊི་ནི། ཨི་མི་རི་ཏོ། ཀོ་ཥ་ཎི་ཨི་མི་རི་ཎེ། ཨི་རཱི་སྭཱ་ཧཱ། སངས་རྒྱས་ཀྱིས་དགེ་གནས་བྱང་ཆུབ་སེམས་དཔའ་ལ་འདི་སྐད་ཅེས་བཀའ་སྩལ་ཏོ། །གཟུངས་འདི་དུས་གསུམ་གྱི་སངས་རྒྱས་ཀྱི་ཡུམ་སྟེ། རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་གིས་གཟུངས་འདི་འཆང་ཞིང་འཛིན་ན་བསོད་ནམས་ཀྱི་ཚོགས་དཔག་ཏུ་མེད་མཐའ་མེད་པར་སྐྱེ་བར་འགྱུར་རོ། །གྲངས་མེད་པའི་སངས་རྒྱས་རྣམས་ལ་བཀུར་སྟི་དང་མཆོད་པ་དང་བཙུན་ཞིང་བསྟོད་པ་བྱས་པ་ཡིན་ནོ། །སངས་རྒྱས་དེ་རྣམས་ཀྱིས་ཀྱང་བླ་ན་མེད་པའི་བྱང་ཆུབ་ཏུ་ལུང་བསྟན་ཏོ། །དགེ་གནས་ལ་ལ་གཟུངས་སྔགས་འདི་འཆང་ན་གོས་དང་། ཟས་དང་། ནོར་བུ་དང་། རིན་པོ་ཆེ་དང་། མང་དུ་ཐོས་ཤིང་མཁས་པ་དང་། ནད་མེད་ཅིང་ཚེ་རིང་བ་ཡིད་བཞིན་དུ་འཐོབ་སྟེ། བསོད་ནམས་ཤིན་ཏུ་མང་དུ་འཕེལ་ལོ། །ཇི་ལྟར་སྨོན་ཅིང་སྒྲུབ་པོ་ཅོག་ཀྱང་ཡིད་བཞིན་དུ་མི་འགྲུབ་པ་མེད་དོ། །དགེ་གནས་སྔགས་འདི་འཆང་ཞིང་འཛིན་པ་ནི་བླ་ན་མེད་པའི་བྱང་ཆུབ་མ་གྲུབ་ཀྱི་བར་དུ་རྟག་པར་བྱང་ཆུབ་སེམས་དཔའ་གསེར་མཁར་རི་དང་། བྱང་ཆུབ་སེམས་དཔའ་བྱམས་
པ་དང་། བྱང་ཆུབ་སེམས་དཔའ་རྒྱ་མཚོ་དང་། བྱང་ཆུབ་སེམས་དཔའ་ཀུན་ཏུ་སྤྱན་རས་གཟིགས་ཀྱི་དབང་པོ་དང་། བྱང་ཆུབ་སེམས་དཔའ་འཇམ་དཔལ་དང་། བྱང་ཆུབ་སེམས་དཔའ་མ་ཧཱ་པིང་གལ་ལ་སོགས་པ་དང་ལྷན་ཅིག་གནས་ཏེ། བྱང་ཆུབ་སེམས་དཔའ་དེ་རྣམས་ཀྱིས་སྲུང་བར་བྱེད་དོ། །དགེ་གནས་ཤེས་པར་གྱིས་ཤིག །གཟུངས་སྔགས་འདི་འདོན་པའི་ཚེ་ཆོ་ག་འདི་ལྟར་བྱའོ། །ཐོག་མར་ཁྲི་རྩ་བརྒྱད་ཚང་བར་བཏོན་ནས་བསྙེན་པའི་ཆོ་ག་བྱའོ། །དེ་ནས་ཁང་པ་དབེན་པའི་ནང་དུ་དཀྱིལ་འཁོར་བརྒྱན་ནས་ཚེས་གཅིག་གི་ཉིན་པར་ཁྲུས་བྱས་གོས་སར་པ་གྱོན་བདུག་པ་བསྲེགས་མེ་ཏོག་བཀྲམ་མཆོད་པ་སྣ་ཚོགས་དང་ཁ་ཟས་ཀྱིས་མཆོད་པ་རྣམ་པ་སྣ་ཚོགས་པ་བྱས་ཏེ། དཀྱིལ་འཁོར་གྱི་ནང་དུ་ཞུགས་ནས་ཐོག་མར་སྔར་སྨོས་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཚན་ནས་བརྗོད་དེ། ཤིན་ཏུ་སེམས་ཐག་པ་ནས་སྔོན་གྱི་ཉེས་པ་འགྱོད་ནས་པུས་མོ་གཡས་པ་ས་ལ་བཙུགས་ཏེ་སྔགས་སྟོང་རྩ་བརྒྱད་རྫོགས་པར་འདོན་ཏོ། །ལུས་དྲང་པོར་འདུག་སྟེ་ཅི་ལ་སྨོན་པ་དེ་ལ་བསམ་མོ། །དེ་ནས་ཉི་མ་ཤར་བ་དང་དཀྱིལ་འཁོར་གྱི་ནང་དུ་ཁ་ཟས་གཙང་མ་ཟ་གཅིག་ཏུ་བཟའོ། །ཞག་བཅོ་ལྔ་ལོན་ནས་དཀྱིལ་འཁོར་དེ་ནས་དེ་ཕྱུང་ན་མི་དེ་བསོད་ནམས་དང་གཟི་བརྗིད་བསམ་གྱིས་མི་ཁྱབ་སྟེ། སྨོན་ཅིང་སྒྲུབ་བོ་ཅོག་མི་འགྲུབ་པ་མེད་དོ། །གལ་ཏེ་ཡིད་བཞིན་དུ་མ་གྲུབ་ན་ཡང་དཀྱིལ་འཁོར་དེར་ཞུགས་ནས་ཡིད་བཞིན་དུ་མ་གྲུབ་ཕྱིན་ཅད་རྟག་པར་གདོན་ཅིང་མི་བརྗེད་པར་བྱའོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ལས་གསེར་རྒྱལ་གྱི་གཟུངས་ཀྱི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་ཀྱིས་གཟུངས་སྔགས་དེ་བཀའ་སྩལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་། ལྷ་དང་། མི་དང་། འཁོར་མང་པོ་རྣམས་ལ་ཕན་གདགས་ཤིང་དེ་ཁོ་ན་ཉིད་ཀྱི་དོན་དམ་པ་ཤིན་ཏུ་ཟབ་པ་ཁོང་དུ་ཆུད་པར་མཛད་པར་བཞེད་པའི་ཕྱིར་སྟོང་པ་ཉིད་ཀྱི་རང་བཞིན་ཡང་བསྟན་པའི་ཆེད་དུ་ཚིགས་སུ་བཅད་དེ་
བཀའ་སྩལ་པ། ང་ཡིས་མདོ་སྡེ་ཟབ་མོ་གཞན་དག་ལས། ཡང་དག་སྟོང་ཉིད་དམ་ཆོས་རྒྱས་བཤད་པ། དེང་འདིར་མདོ་སྡེའི་རྒྱལ་པོ་འདི་ལས་ཀྱང་། སྟོང་ཉིད་བསམ་གྱིས་མི་ཁྱབ་མདོ་ཙམ་བཤད། །ཟབ་མོའི་ཆོས་ནི་རྒྱ་ཆེན་མང་པོ་ལ། །སེམས་ཅན་ཤེས་མེད་རིག་པར་མི་ནུས་པས། །དེ་ཕྱིར་ངས་འདིར་མདོ་འདི་བསྟན་པས་ན། །སྟོང་པའི་ཆོས་ནི་རབ་ཏུ་རྟོགས་པར་འགྱུར། །ཐུགས་རྗེ་ཆེན་པོས་སེམས་ཅན་བརྩེ་བའི་ཕྱིར། །ཤིན་ཏུ་ཐབས་མཁས་རྒྱུ་རྐྱེན་མཆོག་དག་གིས། །ངས་དེང་འཁོར་འདུས་ཆེན་པོ་འདི་ནང་དུ། །བསྟན་པས་དེ་དག་སྟོང་དོན་གསལ་རྟོགས་འགྱུར། །ལུས་འདི་གྲོང་སྟོང་འདྲ་བར་ཤེས་བྱས་ཏེ། །རྒྱལ་པོ་དྲུག་གནས་ཕན་ཚུན་ཡོང་མི་ཤེས། །ཡུལ་དྲུག་རྐུན་པོ་ཐ་དད་དབང་གནས་པ། །སོ་སོར་ཕན་ཚུན་མི་ཤེས་དེ་བཞིན་ནོ། །མིག་གི་དབང་པོ་རྟག་པར་གཟུགས་ལ་ལྟ། ། རྣ་བའི་དབང་པོ་སྒྲ་སྙན་རྒྱུན་མི་འཆད། །སྣ་ཡི་དབང་པོས་རྒྱུན་དུ་དྲི་ཡུལ་མ་ནོམ། །ལྕེ་ཡི་དབང་པོས་རྟག་པར་རོ་ཞིམ་མྱོང་། །ལུས་ཀྱི་དབང་པོས་ཡང་འཇམ་རེག་བྱ་ལེན། །ཡིད་ཀྱི་དབང་པོས་ཆོས་རིག་སྐྱོ་མི་ཤེས། །དབང་པོ་འདི་དྲུག་དངོས་པོའི་རྗེས་འབྲང་བས། །སོ་སོ་རང་ཡུལ་དག་པ་རྟོག་པ་བསྐྱེད། །རྣམ་ཤེས་སྒྱུ་སྤྲུལ་འདྲ་བས་ཡང་དག་མིན། །དབང་པོ་གནས་ནས་མི་དབེན་འདོད་པས་ཚོལ། །དཔེར་ན་མི་ཞིག་གྲོང་སྟོང་རྒྱུག་པ་ལྟར། །རྣམ་ཤེས་དྲུག་པོ་དབང་གནས་དེ་བཞིན་ནོ། །སེམས་ནི་ཀུན་ཚོལ་གནས་ཀྱི་རྗེས་སུ་འཇུག །དབང་རྟེན་ཡུལ་དམིགས་དངོས་པོ་རྣམ་རིག་པས། །རྟག་པར་གཟུགས་སྒྲ་དྲི་རོ་རེག་ལ་སྲེད། །ཆོས་ལ་སྤྱོད་པས་སྐད་ཅིག་ཙམ་མི་གནས། །རྐྱེན་ནི་ཇི་བཞིན་དབང་དྲུག་ཀུན་རྒྱུག་པས། །མཁའ་ལ་བྱ་འཕུར་ཐོགས་པ་མེད་པར་འདྲ། །དབང་པོ་རྟེན་བྱེད་དེ་ལ་ལྟོས་ནས་ནི། །ཕྱི་རོལ་ཡུལ་ནི་རྣམ་པར་རིག་པར་ནུས། །ལུས་འདི་ཤེས་མེད་བྱེད་པ་པོ་ཡང་མེད། །རང་བཞིན་མི་བརྟན་རྐྱེན་ལས་ལྟོས་ནས་འགྲུབ། །ཡང་དག་མ་ཡིན་རྣམ་རྟོག་ལས་སྐྱེས་པས། །འཁྲུལ་འཁོར་བཞིན་དུ་ལས་ཀྱི་དབང་གིས་འཇུག །ས་ཆུ་མེ་
རླུང་ལྷན་ཅིག་ལུས་བསྒྲུབས་པས། །རྒྱུ་རྐྱེན་ཇི་བཞིན་ཐ་དད་འབྲས་བུ་ཐོབ། །ལྷན་ཅིག་གནས་ཀྱང་ཕན་ཚུན་གནོད་བྱས་པས། །སྦྲུལ་གདུག་བཞི་པོ་གཟེབ་གཅིག་གནས་པ་འདྲ། །འབྱུང་ཆེན་སྦྲུལ་བཞི་རང་བཞིན་ཐ་དད་པས། །ལྷན་ཅིག་གནས་ཀྱང་མཐོ་དང་དམའ་བ་ཡོད། །སྟེང་འོག་འགྲོ་ཞིང་ལུས་ནི་ཀུན་དུ་ཁྱབ། །འདི་དག་མཐར་ནི་ཟད་པའི་ཆོས་སུ་འགྲོ། །སྦྲུལ་གདུག་རྣམ་པ་བཞི་པོ་འདི་དག་ལས། །ས་ཆུ་སྦྲུལ་གཉིས་ཕལ་ཆེར་ཐུར་དུ་འབྱིང་། །མེ་རླུང་སྦྲུལ་གཉིས་རང་བཞིན་ཡང་བས་ན། །མི་མཐུན་འདི་དབང་ནད་མང་སྐྱེ་བར་འགྱུར། །སེམས་དང་རྣམ་ཤེས་ལུས་འདི་གནས་ནས་ནི། །དགེ་སྡིག་ལས་ནི་སྣ་ཚོགས་བྱེད་པས་ན། །ལྷ་མི་ངན་འགྲོ་གསུམ་དུ་སོང་ནས་ནི། །ལས་སྟོབས་ཇི་བཞིན་ལུས་ནི་ལེན་པར་བྱེད། །ནད་དང་ཕྲད་ནས་ལུས་ནི་ཤི་བའི་འོག །བཤང་གཅི་མི་གཙང་ཐམས་ཅད་ཀུན་ཏུ་གང་། །རུལ་མྱགས་འབུས་གཙེས་བལྟ་བར་ཡོང་མི་མོས། །དུར་ཁྲོད་བོར་ནས་ཤིང་རུལ་འདྲ་བར་འགྱུར། །ཁྱོད་ཀྱི་ཆོས་རྣམས་དེ་ལྟར་བལྟ་བར་བྱོས། །ཅི་ཕྱིར་བདག་དང་སེམས་ཅན་ཡོད་པར་འཛིན། །ཆོས་རྣམས་ཐམས་ཅད་འཛད་པས་མི་རྟག་སྟེ། །ཐམས་ཅད་མ་རིག་རྐྱེན་གྱི་མཐུ་ལས་བྱུང་། །འབྱུང་ཆེན་དེ་དག་ཡང་དག་མིན་པས་ན། །ཡང་དག་ཡོད་མིན་རང་བཞིན་སྐྱེ་མེད་པས། །དེ་ཕྱིར་འབྱུང་ཆེན་ངོ་བོ་སྟོང་པར་བཤད། །འདི་དག་སྟོང་ཞིང་ཡང་དག་མིན་རིག་བྱོས། །མ་རིག་རང་བཞིན་གཟོད་མ་ཉིད་ཀྱིས་མེད། །རྐྱེན་མང་མཐུ་ལྟོས་ཚོགས་ལས་ཡོད་པ་མིན། །དུས་རྣམས་ཀུན་ཏུ་ཡང་དག་བློས་སྟོང་པས། །དེ་ཕྱིར་ང་ཡིས་མ་རིག་ཡིན་པར་བཤད། །འདུ་བྱེད་རྣམ་ཤེས་རྐྱེན་བྱས་མིང་གཟུགས་ཡོད། །སྐྱེ་མཆེད་དྲུག་དང་རེག་ཚོར་རྗེས་སུ་སྐྱེ། །སྲེད་ལེན་སྲིད་སྐྱེ་རྒ་ཤི་བསྐྱེད་པས་ན། །མྱ་ངན་སྨྲེ་སྔགས་འཁྲུག་པ་རྗེས་སུ་འབྲང་། །སྡུག་བསྔལ་སྣ་ཚོགས་ལས་ངན་རྟག་དཀྲིས་གཟེར། །འཁོར་བར་འཁོར་བ་དག་ལ་ཚད་དུས་མེད། །རང་
བཞིན་ཡོད་མིན་ངོ་བོ་ཉིད་སྟོང་ཡང་། །ཚུལ་བཞིན་མ་ཡིན་རྣམ་པར་རྟོག་པ་བསྐྱེད། །ང་ཡིས་ཉོན་མོངས་ཐམས་ཅད་རབ་སྤངས་ནས། །རྟག་པར་ཡང་དག་ཡེ་ཤེས་མངོན་རྒྱུ་བས། །ལྔ་ཕུང་ཁང་ཁྱིམ་ཐམས་ཅད་སྟོང་རྟོགས་ནས། །བྱང་ཆུབ་ཡང་དག་གནས་ནི་བཙལ ་བ་ཡིན། །ང་ཡིས་བདུད་རྩི་གྲོང་ཆེན་སྒོ་ཕྱེ་ནས། །གྱ་ནོམ་བདུད་རྩི་སྣོད་ནི་བསྟན་པ་ཡིན། །ཡང་དག་བདུད་རྩི་རོ་ནི་བརྙེས་ནས་ཀྱང་། །རྟག་པར་བདུད་རྩི་སྐྱེ་དགུ་སྦྱིན་པ་བཏང་། །ངས་ནི་ཆོས་ཀྱི་རྔ་ཆེན་དམ་པ་བརྡུངས། །ངས་ནི་ཆོས་ཀྱི་དུང་ཆེན་མཆོག་ཀྱང་བུས། །ངས་ནི་ཆོས་ཀྱི་སྒྲོན་ཆེན་རབ་ཀྱང་སྦར། །ངས་ནི་ཆོས་ཀྱི་ཆར་ཆེན་དམ་པ་ཕབ། །ཉོན་མོངས་དགྲ་རྣམས་རབ་ཏུ་ཕམ་བྱས་ཏེ། །བླ་མེད་ཆོས་ཀྱི་རྒྱལ་མཚན་ཆེན་པོ་བསྒྲེང་། །འཁོར་བའི་མཚོ་ལས་སྐྱེ་དགུ་རྨོངས་པ་བཟླས། །ང་ཡིས་ངན་འགྲོ་གསུམ་གྱི་སྒོ་ཡང་བཅད། །ཉོན་མོངས་འབར་མེས་སེམས་ཅན་རབ་བསྲེགས་ཏེ། །མགོན་དང་སྐྱབས་བྱེད་མེད་པ་དག་ལ་ནི། །རབ་བསིལ་བདུད་རྩིའི་དེ་དག་ཚིམ་བྱས་ནས། །ལུས་དང་སེམས་ཀྱི་གདུང་བ་ཞི་བར་བྱས། །དེས་ན་ངས་ནི་བསྐལ་པ་ཚད་མེད་སྙེད། ། དེ་བཞིན་གཤེགས་པ་རྣམས་ལ་གུས་མཆོད་བྱས། །ཚུལ་ཁྲིམས་རབ་བསྲུངས་བྱང་ཆུབ་གཞོལ་ནས་ནི། །ཆོས་སྐུ་བདེ་བའི་གནས་སུ་བཙལ་བ་ཡིན། །གཞན་ལ་མིག་དང་རྐང་ལག་རྣ་བ་དང་། །བུ་དང་ཆུང་མ་བྲན་བཏང་ཕངས་པ་མེད། །ནོར་དང་རིན་ཆེན་བདུན་གྱི་རྒྱན་ཕྲེང་དག །སློང་བ་དག་ལ་ཐམས་ཅད་ཡོངས་སུ་བཏང་། །བཟོད་སོགས་ཕ་རོལ་ཕྱིན་པ་ཀུན་བསྒོམས་པས། །ས་བཅུ་ཡོངས་རྫོགས་ཡང་དག་མངོན་སངས་རྒྱས། །དེ་ཕྱིར་ང་ནི་ཐམས་ཅད་མཁྱེན་བརྗོད་ཀྱང་། །སེམས་ཅན་གང་ཡང་གཞལ་བར་ནུས་པ་མེད། ། གལ་ཏེ་སྟོང་གསུམ་སྟོང་ཆེན་འཇིག་རྟེན་ཁམས། །ས་ཆེན་འདི་ལས་སྐྱེས་པའི་དངོས་རྣམས་དང་། །ནགས་ཚལ་ལྗོན་ཤིང་སཱ་ལུ་ཏིལ་རྣམས་དང་། །འོད་མ་ལ་སོགས་ཡལ་ག་ཇི་སྙེད་པ། །འདི་ལ་སོགས་པའི་དངོས་པོ་བཅད་གཏུབས་ཏེ། ཐམས་ཅད་རྡུལ་ཕྲན་ཕྱེ་མར་བྱས་
པ་དག །གང་ནི་བསྡུས་སྤུངས་ཚད་ནི་ཤེས་དཀའ་དང་། །དེ་བཞིན་ནམ་མཁའི་ཁམས་ནི་གང་བ་ཡི། །ཕྱོགས་བཅུའི་ཞིང་རྣམས་དག་ནི་ཐམས་ཅད་ན། །སྟོང་གསུམ་སྟོང་ཆེན་འཇིག་རྟེན་ཇི་སྙེད་པའི། །ས་རྣམས་རྡུལ་གྱི་ཕྱེ་མར་བྱས་གྱུར་ན། ། རྡུལ་གྱི་ཚད་ནི་བགྲང་བར་མི་ནུས་པས། །སེམས་ཅན་ཐམས་ཅད་ཤེས་པ་ཅི་ཡོད་པ། །ཤེས་པ་དེ་ཀུན་མི་གཅིག་རབ་བྱིན་ནས། །འདི་ལྟར་དེ་ཡི་ཤེས་པ་ཚད་མེད་པས། །རྡུལ་ཕྲན་དེ་ཡི་གྲངས་ནི་ཤེས་རུང་ཡང་། །བཅོམ་ལྡན་ཐུབ་པས་སྐད་ཅིག་གང་མཁྱེན་པ། ། ཤེས་ལྡན་དེ་དག་ལྷན་ཅིག་གཞལ་བཅུག་ན། །བསྐལ་པ་བྱེ་བ་མང་པོའི་གྲངས་སྙེད་དུ། །ཆུང་ཟད་ཙམ་ཡང་བརྩི་ཞིང་ཤེས་མི་ནུས། །དེའི་ཚེ་འཁོར་མང་པོ་རྣམས་བཅོམ་ལྡན་འདས་ཀྱིས་སྟོང་པ་ཉིད་ཀྱི་རང་བཞིན་ཟབ་མོ་འདི་ལྟ་བུ་བཀས་བཤད་པ་ཐོས་པ་དང་། སེམས་ཅན་ཚད་མེད་པ་སྙེད་འབྱུང་བ་ཆེན་པོ་བཞི་དང་། ཕུང་པོ་ལྔ་པོ་དག་རང་བཞིན་ཉིད་ཀྱིས་སྟོང་པ་དང་། དབང་པོ་དྲུག་དང་ཡུལ་དྲུག་པོ་དག་ཡང་དག་པ་མ་ཡིན་པས་འཆིང་བ་བསྐྱེད་པར་མངོན་པར་རྟོགས་པར་གྱུར་ནས། འཁོར་བ་ཡོངས་སུ་སྤངས་ཏེ། ངེས་པར་འབྱུང་བ་ཡང་དག་པར་སྒྲུབ་པར་སྨོན་ལམ་བཏབ་ནས་ཤིན་ཏུ་དང་བའི་སེམས་ཀྱིས་རབ་ཏུ་དགའ་བར་གྱུར་པས་ཇི་སྐད་བསྟན་པ་བཞིན་དུ་གུས་པས་སྤྱོད་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེའི་རྒྱལ་པོ་ལས་སྟོང་པ་ཉིད་ཀྱི་རང་བཞིན་བསྟན་པའི་ལེའུ་སྟེ་དགུ་པའོ།། །།དེ་ནས་ལྷའི་བུ་མོ་ཡིད་བཞིན་རིན་ཆེན་འོད་འཕྲོ་འཁོར་མང་པོའི་ནང་དུ་ཆོས་ཟབ་མོ་ཐོས་པས་དགའ་མགུ་རངས་པར་གྱུར་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དོན་གྱི་ཚུལ་ཟབ་མོ་དག་ལ་རྣལ་འབྱོར་བསྒོམས་པའི་ཆོས་གང་ལགས་པ་བཀས་བཤད་དུ་ཅི་གནང་ཞེས་གསོལ་ནས་ཚིགས་སུ་བཅད་དེ་གསོལ་པ། བདག་གིས་འཇིག་
རྟེན་སྣང་མཛད་དང་། །རྐང་གཉིས་གཙོ་བོ་མཆོག་ལ་ནི། །བྱང་ཆུབ་སེམས་དཔའ་ཡང་དག་སྤྱོད། །ཞུ་ན་ཐུགས་རྗེས་གནང་བར་སྨོན། །བཅོམ་ལྡན་རིགས་ཀྱི་ལྷ་མོ་ལ། །གལ་ཏེ་ཐེ་ཙོམ་ཡོད་གྱུར་ན། །ཁྱོད་ཀྱིས་ཡིད་བཞིན་ཞུས་ཤིག་དང་། །རྣམ་ཕྱེ་བསྟན་པ་བྱ་ཞེས་གསུངས། །དེ་ནས་ལྷ་མོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བྱང་ཆུབ་སེམས་དཔའ་ཇི་ལྟ་བུར། །བྱང་ཆུབ་ཡང་དག་སྤྱད་སྤྱོད་ན། །བདག་དང་གཞན་ལ་སྨན་སླད་དུ། །འཁོར་བ་མྱ་ངན་འདས་སྤངས་འགྱུར། །བཅོམ་ལྡན་འདས་ཀྱིས་རིགས་ཀྱི་ལྷ་མོ་ལ་བཀའ་སྩལ་པ། ཆོས་ཀྱི་དབྱིངས་ལ་བརྟེན་ཏེ་བྱང་ཆུབ་ཀྱི་ཆོས་སྤྱད་ནས་མཉམ་པ་ཉིད་ཀྱི་ཆོས་སྤྱོད་པ་བསྒོམ་པར་བྱའོ། །ཇི་ལྟར་ཆོས་ཀྱི་དབྱིངས་ལ་བརྟེན་ཏེ་བྱང་ཆུབ་ཀྱི་ཆོས་ལ་སྤྱད་ནས་མཉམ་པ་ཉིད་ཀྱི་སྤྱོད་པ་བསྒོམ་པར་བྱ་ཞེ་ན། འདི་ལྟར་ཕུང་པོ་ལྔ་པོ་དག་གིས་ཆོས་ཀྱི་དབྱིངས་སྟོན་པར་བྱས་པས་ཆོས་ཀྱི་དབྱིངས་གང་ཡིན་པ་དེ་ཉིད་ཕུང་པོ་ལྔ་ཡིན་ཡང་ཕུང་པོ་ལྔ་ཡང་བརྗོད་དུ་མེད་ལ་ཕུང་པོ་ལྔ་མ་ཡིན་པ་ཡང་བརྗོད་དུ་མེད་དོ། །དེ་ཅིའི་ཕྱིར་ཞེ་ན། གལ་ཏེ་ཆོས་ཀྱི་དབྱིངས་ཕུང་པོ་ལྔ་ཡིན་པར་གྱུར་ན་ནི་ཆད་པའི་ལྟ་བར་འགྱུར་ལ། གལ་ཏེ་ཕུང་པོ་ལྔ་དང་ཐ་དད་པར་གྱུར་ན་ནི་རྟག་པའི་ལྟ་བར་འགྱུར་བས་མཚན་ཉིད་གཉིས་དང་བྲལ་བ། མཐའ་གཉིས་ལ་མངོན་པར་མ་ཆགས་པ། བལྟར་མེད་པ། བལྟ་བར་བྱ་བ་ལས་ཡང་དག་པར་འདས་པ། མིང་མེད་པ། མཚན་མ་མེད་པ་གང་ཡིན་པ་དེ་ནི་ཆོས་ཀྱི་དབྱིངས་བསྟན་པ་ཞེས་བྱའོ། །རིགས་ཀྱི་ལྷ་མོ་ཇི་ལྟར་ཕུང་པོ་ལྔ་པོ་དག་གིས་ཆོས་ཀྱི་དབྱིངས་སྟོན་པར་བྱེད་ཅེ་ན། འདི་ལྟར་ཕུང་པོ་ལྔ་དག་ནི་རྒྱུ་དང་རྐྱེན་ལས་སྐྱེ་བ་མ་ཡིན་ནོ། །དེ་ཅིའི་ཕྱིར་ཞེ་ན། གལ་ཏེ་རྒྱུ་དང་རྐྱེན་ལས་སྐྱེས་པ་ཞིག་ཡིན་པར་གྱུར་ན་སྐྱེས་ཟིན་པའི་ཕྱིར་སྐྱེ་འམ། མ་སྐྱེས་པའི་ཕྱིར་སྐྱེ། གལ་ཏེ་སྐྱེས་ཟིན་པ་ཞིག་ཡིན་ན་ནི་རྒྱུ་དང་རྐྱེན་དགོས་པ་ཅི་ཞིག་ཡོད། གལ་ཏེ་མ་སྐྱེས་པ་ཞིག་སྐྱེ་ན་ནི་ནམས་ཀྱང་སྐྱེ་བ་དམིགས་པར་མི་འགྱུར་རོ། །དེ་ཅིའི་ཕྱིར་ཞེ་ན། མ་སྐྱེས་པའི་ཆོས་གང་ཡིན་པ་དེ་ནི་ཡོད་པ་མ་ཡིན་པ་མིང་མེད་པ་མཚན་མ་མེད་པ་
དགག་པར་བྱ་བ་མ་ཡིན་པ་དཔེར་བྱར་མི་རུང་བ། རྒྱུ་དང་རྐྱེན་གྱིས་བསྐྱེད་པར་བྱ་བ་མ་ཡིན་པའི་ཕྱིར་རོ། །རིགས་ཀྱི་ལྷ་མོ་འདི་ལྟ་སྟེ། དཔེར་ན་རྔའི་སྒྲ་གང་ཡིན་པ་དེ་ནི་ཤིང་ལ་ཡང་བརྟེན། ཀོ་བ་དང་དབྱུག་གུ་དང་ལག་པ་ལ་སོགས་པ་ལ་བརྟེན་པའི་ཕྱིར་སྒྲ་འབྱུང་བར་འགྱུར་ཡང་འདི་ལྟར་རྔའི་སྒྲ་གང་ཡིན་པ་དེ་ནི་འདས་པ་ཡང་སྟོང་། མ་འོངས་པ་ཡང་སྟོང་། ད་ལྟར་བྱུང་བ་ཡང་སྟོང་ངོ་། །དེ་ཅིའི་ཕྱིར་ཞེ་ན། རྔའི་སྒྲ་གང་ཡིན་པ་དེ་ནི་ཤིང་ལས་ཀྱང་མི་འབྱུང་། ཀོ་བ་ལས་ཀྱང་མི་འབྱུང་། དབྱུག་གུ་དང་ལག་པ་ལས་ཀྱང་མི་འབྱུང་། དུས་གསུམ་ལས་ཀྱང་མི་འབྱུང་བས་དེ་ནི་མ་སྐྱེས་པའོ། །མ་སྐྱེས་པ་གང་ཡིན་པ་དེ་ནི་འགག་པར་ཡང་མི་འགྱུར་རོ། །འགག་པར་མི་འགྱུར་བ་གང་ཡིན་པ་དེ་ནི་གང་ནས་ཀྱང་མི་འོང་ངོ་། །གང་ནས་ཀྱང་མ་འོངས་པ་དེ་ནི་གང་དུ་ཡང་འགྲོ་བར་མི་འགྱུར་རོ། ། གང་དུ་ཡང་འགྲོ་བ་མེད་པ་གང་ཡིན་པ་དེ་ནི་རྟག་པར་ཡང་མ་ཡིན། །ཆད་པར་ཡང་མ་ཡིན་ནོ། །རྟག་པར་ཡང་མ་ཡིན་ཆད་པར་ཡང་མ་ཡིན་པ་གང་ཡིན་པ་དེ་ནི་གཅིག་པ་ཡང་མ་ཡིན་ཐ་དད་པ་ཡང་མ་ཡིན་པས་སོ། །དེ་ཅིའི་ཕྱིར་ཞེ་ན། གལ་ཏེ་འདི་གཅིག་པ་ཞིག་ཡིན་ན་ནི་ཆོས་ཀྱི་དབྱིངས་དང་ཐ་མི་དད་པར་འགྱུར་རོ། །གལ་ཏེ་དེ་ལྟ་ཡིན་ན་ནི་སོ་སོའི་སྐྱེ་བོ་རྣམས་ཀྱང་ཡང་དག་པའི་བདེན་པ་མཐོང་ནས་བླ་ན་མེད་པ་ཡང་དག་པའི་བདེན་པ་དང་ལྡན་པའི་མྱ་ངན་ལས་འདས་པ་ཐོབ་པར་འགྱུར་བའི་རིགས་ན། དེ་ལྟ་མ་ཡིན་པས་དེའི་ཕྱིར་གཅིག་པ་ཡང་མ་ཡིན་པར་རིག་པར་བྱའོ། །གལ་ཏེ་ཐ་དད་དོ་ཞེ་ན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་འདུ་བྱེད་ཀྱི་མཚན་ཉིད་ཐམས་ཅད་ཀྱང་མངོན་པར་ཞེན་པ་དང་བཅས་པ་ཡིན་པས་ཉོན་མོངས་པའི་འཆིང་བ་ལས་རྣམ་པར་གྲོལ་བར་མི་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མི་འགྱུར་རོ། །དེ་ཅིའི་ཕྱིར་ཞེ་ན། འཕགས་པའི་གང་ཟག་ཐམས་ཅད་ནི་འདུ་བྱེད་དང་འདུ་བྱེད་མ་ཡིན་པ་དག་ལ་ཡང་དག་པའི་ངོ་བོ་ཉིད་དུ་མཉམ་པར་རྟོགས་པས་དེའི་ཕྱིར་ཐ་དད་པ་ཡང་མ་ཡིན་ཏེ། དེ་ལྟ་
བས་ན་ཕུང་པོ་ལྔ་པོ་དག་ནི་ཡོད་པ་མ་ཡིན། མེད་པ་ཡང་མ་ཡིན། རྒྱུ་དང་རྐྱེན་ལས་མ་སྐྱེས་པ། རྒྱུ་དང་རྐྱེན་མེད་པ་ལས་སྐྱེས་པ་ཡང་མ་ཡིན་པར་རིག་པར་བྱའོ། །འཕགས་པས་ཤེས་པར་བྱ་བ་ཡིན་གྱི་གཞན་གྱི་སྤྱོད་ཡུལ་མ་ཡིན་པའི་ཕྱིར་ཚིག་དང་ཐ་སྙད་ཀྱིས་རིག་པར་མི་འགྱུར་བ། མིང་མེད་པ། མཚན་མ་མེད་པ། རྒྱུ་མེད་པ། རྐྱེན་མེད་པ། དཔེ་མེད་པ། ཐོག་མ་དང་ཐ་མ་མེད་པར་རབ་ཏུ་དབེན་པ། གཟོད་མ་ཉིད་ནས་རང་བཞིན་གྱིས་སྟོང་པ་ཡིན་པས་དེའི་ཕྱིར་ཕུང་པོ་ལྔ་པོ་དག་གིས་ཆོས་ཀྱི་དབྱིངས་སྟོན་པར་ནུས་པ་ཡིན་ནོ། །རིགས་ཀྱི་ལྷ་མོ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཡོངས་སུ་གཉེར་བར་འདོད་པས་དོན་དམ་པ་དང་ཀུན་རྫོབ་ལས་གུད་ན་ཡོངས་སུ་ཚོལ་བར་བྱེད་ན་དེ་ནི་ཤིན་ཏུ་དཔག་ཅིང་བསམ་པར་དཀའ་བ་ཡིན་ཏེ། སོ་སོའི་སྐྱེ་བོ་དང་འཕགས་པའི་སྤྱོད་ཡུལ་གྱི་ངོ་བོ་ཉིད་ནི་གཅིག་པ་ཡང་མ་ཡིན། ཐ་དད་པ་ཡང་མ་ཡིན་པས་ཀུན་རྫོབ་ཀྱང་མི་སྤོང་ལ་དོན་དམ་པ་དང་ཡང་མི་འབྲལ་བར་ཆོས་ཀྱི་དབྱིངས་ལ་བརྟེན་ནས་བྱང་ཆུབ་ཀྱི་སྤྱོད་པ་སྤྱད་པར་བྱའོ། །དེའི་ཚེ་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་དང་། རིགས་ཀྱི་ལྷ་མོ་དགའ་མགུ་རངས་པར་གྱུར་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ་གུས་པས་ཐལ་མོ་སྦྱར་ནས་སེམས་རྩེ་གཅིག་ཏུ་མགོ་བོས་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གོང་དུ་ཇི་སྐད་བཀའ་སྩལ་པའི་བྱང་ཆུབ་ཀྱི་ཡང་དག་པའི་དོན་ལ་སྤྱོད་པ་གང་ལགས་པ་དེ་དག་ལ་དེང་བདག་གིས་བསླབ་པར་བགྱིའོ། །དེ་ནས་མི་མཇེད་ཀྱི་འཇིག་རྟེན་གྱི་ཁམས་ཀྱི་བདག་པོ་ཚངས་པའི་རྒྱལ་པོ་ཆེན་པོས་འཁོར་མང་པོའི་ནང་དུ་ལྷ་མོ་ཡིད་བཞིན་རིན་ཆེན་འོད་འཕྲོ་ལ་འདི་སྐད་ཅེས་སྨྲས་སོ། །བྱང་ཆུབ་ཀྱི་སྤྱོད་པ་འདི་ནི་ཤིན་ཏུ་བསྒྲུབ་པར་དཀའ་བ་ཡིན་ན། དེང་ཁྱེད་ཀྱིས་ཇི་ལྟར་བྱང་ཆུབ་ཀྱི་སྤྱོད་པ་ལ་རང་དབང་ཐོབ་པར་འགྱུར། དེ་ནས་རིགས་ཀྱི་ལྷ་མོས་ཚངས་པའི་རྒྱལ་པོ་ལ་འདི་སྐད་ཅེས་སྨྲས་སོ། །
ཀྱེ་ཚངས་པའི་རྒྱལ་པོ་ཆེན་པོ་བཅོམ་ལྡན་འདས་ཀྱིས་ཇི་སྐད་གསུངས་པ་ལྟར་ན་འདི་ནི་ཡང་དག་པར་ཤིན་ཏུ་ཟབ་པ་ཡིན་པས་སོ་སོའི་སྐྱེ་བོ་ཐམས་ཅད་ཀྱིས་དེའི་དོན་ཤེས་པར་མི་འགྱུར་གྱི་འདི་ནི་འཕགས་པའི་སྤྱོད་ཡུལ་ཡིན་པས་ཤིན་ཏུ་གྱ་ནོམ་ཞིང་ཤེས་པར་དཀའ་བ་ཡིན་ནོ། །གལ་ཏེ་དེང་བདག་གིས་ཆོས་འདི་ལ་བརྟེན་ནས་བདེ་བར་གནས་པར་ཐོབ་པ་བདེན་ཏེ་མི་རྫུན་པར་གྱུར་ན་དུས་ངན་པའི་སྙིགས་མ་ལྔའི་སེམས་ཅན་ཚད་མེད་གྲངས་མེད། མཐའ་མེད་པ་ཐམས་ཅད་གསེར་གྱི་ཁ་དོག་ཏུ་གྱུར་ནས་མཚན་སུམ་ཅུ་རྩ་གཉིས་དང་ལྡན་ཏེ་སྐྱེས་པ་ཡང་མ་ཡིན་བུད་མེད་ཀྱང་མ་ཡིན་པར་གྱུར་ནས་རིན་པོ་ཆེའི་པདྨ་ལ་འདུག་སྟེ་བདེ་བ་ཚད་མེད་པ་མྱོང་བ་དང་། ལྷའི་མེ་ཏོག་དམ་པའི་ཆར་མངོན་པར་འབབ་པ་དང་། ལྷའི་རོལ་མོའི་ཆ་བྱད་རྣམས་མ་དཀྲོལ་བར་རང་སྒྲ་འབྱུང་བ་དང་། མཆོད་པའི་ཡོ་བྱད་ཐམས་ཅད་ཕུན་སུམ་ཚོགས་པར་གྱུར་ཅིག །ཅེས་དེའི་ཚེ་རིགས་ཀྱི་ལྷ་མོས་དེ་སྐད་ཅེས་སྨྲས་མ་ཐག་ཏུ་དུས་ངན་པའི་སྙིགས་མ་ལྔའི་སེམས་ཅན་ཇི་སྙེད་པ་ཐམས་ཅད་གསེར་གྱི་ཁ་དོག་ཏུ་གྱུར་ནས་སྐྱེས་བུ་ཆེན་པོའི་མཚན་དང་ལྡན་ཏེ་སྐྱེས་པ་ཡང་མ་ཡིན་བུད་མེད་ཀྱང་མ་ཡིན་པར་གྱུར་ནས་རིན་པོ་ཆེའི་པདྨ་ལ་འདུག་སྟེ་བདེ་བ་ཚད་མེད་པ་དག་ལ་ལོངས་སྤྱོད་པར་གྱུར་པས་གཞན་འཕྲུལ་དབང་བྱེད་ཀྱི་ལྷའི་གཞལ་མེད་ཁང་ཇི་ལྟ་བ་བཞིན་དུ་ངན་འགྲོ་རྣམས་ཀྱང་མེད་དེ། རིན་པོ་ཆེའི་ལྗོན་ཤིང་ཕྲེད་དུ་དཀྲིས་ཤིང་རིན་པོ་ཆེ་སྣ་བདུན་གྱི་མེ་ཏོག་གིས་འཇིག་རྟེན་གྱི་ཁམས་ཀུན་ཏུ་གང་བར་གྱུར་ཏོ། །གཞན་ཡང་ལྷའི་རིན་པོ་ཆེ་སྣ་བདུན་གྱི་མེ་ཏོག་གི་ཆར་ཡང་མངོན་པར་ཕབ། ལྷའི་རོལ་མོ་རྣམས་ཀྱང་བྱས་ཏེ། རིགས་ཀྱི་ལྷ་མོ་ཡིད་བཞིན་རིན་ཆེན་འོད་འཕྲོ་ཡང་བུད་མེད་ཀྱི་ལུས་ཡོངས་སུ་བསྒྱུར་ནས་ཚངས་པའི་ལྷའི་ལུས་སུ་གྱུར་ཏོ། །དེ་ནས་ཚངས་པའི་རྒྱལ་པོ་ཆེན་པོས་བྱང་ཆུབ་སེམས་དཔའ་ཡིད་བཞིན་རིན་ཆེན་འོད་འཕྲོ་ལ་འདི་སྐད་ཅེས་སྨྲས་སོ། །ཁྱོད་ཇི་ལྟར་བྱང་ཆུབ་ཀྱི་སྤྱད་པ་ཡོངས་སུ་སྤྱོད་པར་བྱེད། སྨྲས་པ། ཀྱེ་ཚངས་པའི་རྒྱལ་པོ་གལ་ཏེ་ཆུའི་ཟླ་བ་བྱང་ཆུབ་ཀྱི་སྤྱད་པ་སྤྱོད་པར་བྱེད་ན་བདག་ཀྱང་བྱང་ཆུབ་ཀྱི་སྤྱད་པ་
སྤྱོད་པར་བྱེད་དོ། །གལ་ཏེ་རྨི་ལམ་བྱང་ཆུབ་ཀྱི་སྤྱད་པ་སྤྱོད་པར་བྱེད་ན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་པར་བྱེད་དོ། །གལ་ཏེ་སྨིག་རྒྱུ་བྱང་ཆུབ་ཀྱི་སྤྱད་པ་སྤྱོད་པར་བྱེད་ན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་པར་བྱེད་དོ། །གལ་ཏེ་ལུང་པའི་བྲག་ཆ་བྱང་ཆུབ་ཀྱི་སྤྱད་པ་སྤྱོད་པར་བྱེད་ན་བདག་ཀྱང་བྱང་ཆུབ་ཀྱི་སྤྱད་པ་སྤྱོད་པར་བྱེད་དོ། །དེ་ནས་ཚངས་པའི་རྒྱལ་པོ་ཆེན་པོས་དེ་སྐད་ཅེས་སྨྲས་པ་ཐོས་པ་དང་། བྱང་ཆུབ་སེམས་དཔའ་དེ་ལ་འདི་སྐད་ཅེས་སྨྲས་སོ། །ཁྱོད་དོན་གང་ལ་བརྟེན་ནས་ཚིག་འདི་སྐད་སྨྲ་བར་བྱེད། སྨྲས་པ། ཀྱེ་ཚངས་པའི་རྒྱལ་པོ་ཆོས་གཅིག་འགའ་ཙམ་ཡང་དེ་ཁོ་ན་ཉིད་ཀྱི་མཚན་ཉིད་མ་ཡིན་པ་མེད་མོད་ཀྱི་འོན་ཀྱང་རྒྱུ་དང་རྐྱེན་གྱི་དབང་གིས་མངོན་པར་གྲུབ་པ་ཡིན་ནོ། །ཚངས་པའི་རྒྱལ་པོས་སྨྲས་པ། གལ་ཏེ་དེ་ལྟ་བུ་ཡིན་པར་གྱུར་ན་འོ་ན་ནི་བྱིས་པ་སོ་སོའི་སྐྱེ་བོ་རྣམས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བའི་རིགས་སོ། །སྨྲས་པ། ཁྱོད་ཅི་ལ་བསམས་ཏེ་འདི་སྐད་དུ་སྨྲ་བར་བྱེད། ཅི་གཏི་མུག་དང་ལྡན་པའི་གང་ཟག་ཀྱང་ཐ་དད། ཤེས་རབ་དང་ལྡན་པའི་གང་ཟག་ཀྱང་ཐ་དད། བྱང་ཆུབ་ཀྱང་ཐ་དད། བྱང་ཆུབ་མ་ཡིན་པ་ཡང་ཐ་དད། རྣམ་པར་གྲོལ་བ་ཡང་ཐ་དད། རྣམ་པར་གྲོལ་བ་མ་ཡིན་པ་ཡང་ཐ་དད་པ་ཞིག་ཡིན་སྙམ་མམ། ཚངས་པའི་རྒྱལ་པོ་འདི་ལྟར་ཆོས་རྣམས་ནི་མཉམ་ཞིང་ཐ་དད་པ་མེད་དེ། ཆོས་ཀྱི་དབྱིངས་འདི་ལ་དེ་བཞིན་ཉིད་ཐ་དད་པར་འགྱུར་བ་མེད་པས་མངོན་པར་ཞེན་པར་བྱ་བའི་བར་ཞེས་བྱ་བ་ཡང་མེད་དེ་འཕེལ་བ་མེད་ཅིང་འགྲིབ་པ་མེད་པར་འགྱུར་བ་ཡིན་ནོ། །ཀྱེ་ཚངས་པའི་རྒྱལ་པོ་འདི་ལྟ་སྟེ་དཔེར་ན་སྒྱུ་མ་མཁན་ནམ། སྒྱུ་མ་མཁན་གྱི་སློབ་མ་སྒྱུ་མ་སྟོན་པ་ལ་ཤིན་ཏུ་མཁས་པ་ཞིག་གིས་ལམ་གྱི་བཞི་མདོར་གསེག་མ་དང་རྩྭ་དང་ཤིང་གི་ལོ་མ་ལ་སོགས་པ་བླངས་ཏེ་ཕུང་པོ་གཅིག་ཏུ་སྤུངས་ནས་སྒྱུ་རྩལ་རྣམས་ཀྱིས་གླང་པོ་ཆེའི་ཚོགས་དང་། རྟའི་ཚོགས་དང་། ཤིང་རྟ་དང་། དམག་ལ་སོགས་པའི་ཚོགས་དང་། རིན་པོ་ཆེ་སྣ་བདུན་གྱི་ཕུང་པོ་དང་། བང་མཛོད་རྣམ་པ་སྣ་ཚོགས་སྐྱེ་བོ་མང་པོ་རྣམས་ཀྱིས་
མཐོང་བར་འགྱུར་བ་མངོན་པར་སྤྲུལ་པར་གྱུར་ན་སེམས་ཅན་གང་དག་གླེན་ཞིང་གཏི་མུག་ཅན་དུ་གྱུར་པ། དཔྱོད་པར་མི་ནུས་པ། སྒྱུ་མའི་རྩ་བ་མི་ཤེས་པ་དག་གིས་མཐོང་ཞིང་ཐོས་པར་གྱུར་ན། འདི་སྙམ་དུ་བདག་གིས་མཐོང་ཞིང་ཐོས་པའི་གླང་པོ་ཆེ་དང་རྟ་ལ་སོགས་པའི་ཚོགས་གང་ཡིན་པ་དེ་དག་ནི་ཡང་དག་པར་ཡོད་པ་ཡིན་གྱི། གཞན་ནི་བརྫུན་པ་ཡིན་ནོ་སྙམ་དུ་སེམས་པས་ཕྱིས་ལེགས་པར་སོ་སོར་རྟོག་ཅིང་སེམས་པ་ཡང་མེད་དོ། །གང་བློ་དང་ལྡན་པ་དག་ནི་དེ་ལྟ་མ་ཡིན་ཏེ། སྒྱུ་མའི་རྩ་བ་རབ་ཏུ་ཤེས་པས་གལ་ཏེ་མཐོང་ངམ་ཐོས་པར་གྱུར་ན་ཡང་འདི་སྙམ་དུ་བདག་གིས་ཇི་ལྟར་མཐོང་བའི་གླང་པོ་ཆེ་དང་། རྟ་ལ་སོགས་པའི་ཚོགས་གང་ཡིན་པ་དེ་དག་ནི་ཡོད་པ་མ་ཡིན་གྱི་སྒྱུ་མའི་དངོས་པོ་མིག་སླུ་བར་བྱེད་པ་ཙམ་ཞིག་ཡོད་པར་ཟད་དེ། མི་བདེན་པས་གླང་པོ་ཆེ་ལ་སོགས་པ་དང་བང་མཛོད་རྣམས་ཡོད་དོ་སྙམ་དུ་མི་སེམས་པས་མིང་ཙམ་ཞིག་ཡོད་པར་ཟད་ཀྱི་ཡང་དག་པར་ནི་ཅི་ཡང་མེད་དོ་སྙམ་དུ་སེམས་པས་བདག་ཉིད་ཀྱིས་ཇི་ལྟར་མཐོང་ཞིང་ཐོས་པ་དེ་དག་ལ་ཡང་ཡང་དག་པ་ཉིད་དུ་འཛིན་པར་ཡང་མི་བྱེད་ལ། ཕྱིས་དཔྱོད་ཅིང་སེམས་པའི་ཚེ་ཡང་ཡང་དག་པ་མ་ཡིན་པར་རབ་ཏུ་ཤེས་པར་འགྱུར་རོ། །དེ་བཞིན་དུ་བློ་དང་ལྡན་པ་དག་གིས་ཀྱང་ཆོས་ཐམས་ཅད་ལ་ཡང་དག་པའི་ངོ་བོ་ཉིད་མེད་པར་རྟོགས་པས་ཀུན་རྫོབ་ཀྱི་རྗེས་སུ་ཇི་ལྟར་མཐོང་བ་དང་། ཇི་ལྟར་ཐོས་པ་བཞིན་དུ་དངོས་པོ་སྟོན་ཅིང་རྗོད་པར་བྱེད་ཀྱི་བདེན་པའི་ཚུལ་ཡིད་ལ་བྱེད་པའི་ཚེ་ནི་དེ་ལྟ་མ་ཡིན་ཏེ། བཏགས་པ་ཙམ་དུ་ཡང་དག་པའི་དོན་རབ་ཏུ་སྟོན་པར་བྱེད་པའི་ཕྱིར་རོ། །ཚངས་པའི་རྒྱལ་པོ་བྱིས་པ་སོ་སོའི་སྐྱེ་བོ་འཇིག་རྟེན་ལས་འདས་པའི་འཕགས་པའི་ཤེས་རབ་ཀྱི་མིག་མ་ཐོབ་པ་དག་ནི་ཆོས་ཐམས་ཅད་ཀྱི་དེ་བཞིན་ཉིད་བརྗོད་དུ་མེད་པ་མི་ཤེས་པའི་ཕྱིར་བྱིས་པ་སོ་སོའི་སྐྱེ་བོ་དག་འདུ་བྱེད་དང་འདུ་བྱེད་མ་ཡིན་པའི་ཆོས་མཐོང་ངམ་ཐོས་པར་གྱུར་ན་འདི་ལྟར་ཡང་དག་པར་ཡོད་པ་ཡིན་ནོ་སྙམ་དུ་བསམས་ནས་མངོན་པར་ཞེན་པ་བསྐྱེད་ནས་དོན་དམ་པར་ཆོས་རྣམས་ཀྱི་དེ་བཞིན་ཉིད་བརྗོད་དུ་མེད་
པ་ཡིན་པར་མི་ཤེས་སོ། །འཕགས་པའི་གང་ཟག་གང་ཡིན་པ་དེ་དག་ནི་འདུ་བྱེད་དང་། འདུ་བྱེད་མ་ཡིན་པའི་ཆོས་མཐོང་ངམ་ཐོས་པར་གྱུར་ན་ཅི་ནུས་ཅི་ལྕོགས་ཀྱིས་ཡང་དག་པར་ཡོད་པ་ཡིན་ནོ་སྙམ་དུ་མངོན་པར་ཞེན་པ་སྐྱེད་པར་མི་བྱེད་པས་ཐམས་ཅད་དུ་ཡང་དག་པའི་འདུ་བྱེད་ཀྱི་ཆོས་དང་ཡང་དག་པའི་འདུ་བྱེད་མ་ཡིན་པའི་ཆོས་མེད་ཀྱི་མི་བདེན་པས་བསམས་པའི་འདུ་བྱེད་དང་། འདུ་བྱེད་མ་ཡིན་པའི་མཚན་ཉིད་གང་ཡིན་པ་དེ་དག་ནི་མིང་ཙམ་ཞིག་ཡོད་པས་ཡང་དག་པའི་ངོ་བོ་ཉིད་ཅི་ཡང་མེད་དོ་སྙམ་དུ་རིག་ཅིང་ཁོང་དུ་ཆུད་པར་གྱུར་ཀྱང་འཕགས་པའི་གང་ཟག་དེ་དག་ཀུན་རྫོབ་ཀྱི་རྗེས་སུ་གཞན་དག་ཡང་དག་པའི་དོན་རྟོགས་པར་བྱ་བར་འདོད་པའི་ཕྱིར་ཡང་དག་པར་སྟོན་པར་བྱེད་པ་ཡིན་ནོ། །དེ་བཞིན་དུ་ཚངས་པའི་རྒྱལ་པོ་འཕགས་པའི་གང་ཟག་དེ་དག་ཀྱང་འཕགས་པའི་ཤེས་པ་དང་མཐོང་བས་ཆོས་རྣམས་ཀྱི་དེ་བཞིན་ཉིད་བརྗོད་དུ་མེད་པར་རྟོགས་པར་གྱུར་ཀྱང་འདུ་བྱེད་དང་། འདུ་བྱེད་མ་ཡིན་པའི་ཆོས་འདི་ལྟར་གཞན་དག་རྟོགས་པར་བྱ་བའི་ཕྱིར་ཀུན་རྫོབ་ཀྱི་མིང་དང་ཐ་སྙད་རྣམ་པ་སྣ་ཚོགས་སྟོན་པར་བྱེད་པ་ཡིན་ནོ། །དེ་ནས་ཚངས་པའི་རྒྱལ་པོ་ཆེན་པོས་བྱང་ཆུབ་སེམས་དཔའ་ཡིད་བཞིན་རིན་ཆེན་འོད་འཕྲོ་ལ་འདི་སྐད་ཅེས་སྨྲས་སོ། །སེམས་ཅན་ཇི་སྙེད་ཅིག་གིས་ཡང་དག་པའི་ཆོས་ཟབ་མོ་འདི་ལྟ་བུ་ཁོང་དུ་ཆུད་པར་འགྱུར། སྨྲས་པ། ཀྱེ་ཚངས་པའི་རྒྱལ་པོ་སྒྱུ་མའི་སྐྱེས་བུ་མང་པོའི་སེམས་དང་སེམས་ལས་བྱུང་བའི་ཆོས་ཀྱིས་ཡང་དག་པའི་ཆོས་ཟབ་མོ་འདི་ལྟ་བུ་ཁོང་དུ་ཆུད་པར་འགྱུར་རོ། །ཚངས་པའི་རྒྱལ་པོས་སྨྲས་པ། སྒྱུ་མས་སྤྲུལ་པའི་སྐྱེས་བུ་གང་ཡིན་པ་དེ་དག་ནི་ངོ་བོ་ཉིད་ཀྱིས་ཡོད་པ་མ་ཡིན་ན། འདི་དག་གི་སེམས་དང་སེམས་ལས་བྱུང་བ་གང་ལས་སྐྱེས་པར་འགྱུར། སྨྲས་པ། གང་གིས་ཆོས་ཀྱི་དབྱིངས་ཡོད་པ་ཡང་མ་ཡིན། མེད་པ་ཡང་མ་ཡིན་པར་ཤེས་པའི་སེམས་ཅན་དེ་དག་གིས་དོན་ཟབ་མོ་འདི་ཤེས་པར་འགྱུར་རོ། །དེ་ནས་བཅོམ་ལྡན་འདས་ལ་ཚངས་པའི་རྒྱལ་པོས་འདི་སྐད་ཅེས་གསོལ་ཏོ། །བཅོམ་ལྡན་
འདས་བྱང་ཆུབ་སེམས་དཔའ་ཡིད་བཞིན་རིན་ཆེན་འོད་འཕྲོ་འདི་ནི་བསམ་གྱིས་མི་ཁྱབ་པས་དོན་ཟབ་མོ་འདི་ལྟ་བུ་མངོན་པར་རྟོགས་པར་འགྱུར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། དེ་དེ་བཞིན་ནོ། །དེ་དེ་བཞིན་ཏེ། ཚངས་པའི་རྒྱལ་པོ་ཁྱོད་ཀྱིས་ཇི་སྐད་སྨྲས་པ་དེ་བཞིན་དུ་ཡིད་བཞིན་རིན་ཆེན་འོད་འཕྲོ་འདིས་བསྟན་ནས་ཁྱེད་མི་སྐྱེ་བའི་ཆོས་ཀྱི་བཟོད་པ་སྒོམ་ཞིང་བསླབ་པར་སེམས་བསྐྱེད་པ་ཡིན་ནོ། །དེ་ནས་ཚངས་པའི་རྒྱལ་པོ་ཆེན་པོ་ཚངས་པའི་འཁོར་མང་པོ་དང་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་གུས་པས་ཐལ་མོ་སྦྱར་ཏེ་བྱང་ཆུབ་སེམས་དཔའ་ཡིད་བཞིན་རིན་ཆེན་འོད་འཕྲོའི་རྐང་པ་ལ་མགོ་བོས་ཕྱག་བྱས་ནས་འདི་སྐད་དུ་ཤིན་ཏུ་དཀོན་ཞིང་ངོ་མཚར་ཆེའོ། །བདག་ཅག་ནི་དེང་སྐྱེས་བུ་ཆེན་པོ་འདི་དང་ཕྲད་པས་ཡང་དག་པའི་ཆོས་ཐོས་པར་གྱུར་ཏོ། །ཞེས་སྨྲས་སོ། ། དེ་ནས་བཅོམ་ལྡན་འདས་ཀྱིས་ཚངས་པའི་རྒྱལ་པོ་ལ་འདི་སྐད་ཅེས་ཡིད་བཞིན་རིན་ཆེན་འོད་འཕྲོ་འདི་ནི་མ་འོངས་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་འདུལ་བའི་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་རིན་ཆེན་འབར་བ་དཔལ་གྱི་སྙིང་པོ་ཞེས་བྱ་བར་འགྱུར་རོ་ཞེས་བཀའ་སྩལ་ཏོ། །ལེའུ་འདི་བསྟན་པ་ན་བྱང་ཆུབ་སེམས་དཔའ་འབུམ་ཕྲག་སུམ་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པ་ཐོབ་པར་གྱུར་ཏོ། །ལྷའི་བུ་འབུམ་ཕྲག་བརྒྱད་སྟོང་དང་། རྒྱལ་པོ་དང་། བློན་པོ་དང་། མི་ཕལ་པ་ཚད་མེད་གྲངས་མེད་པ་སྙེད་ནི་རྡུལ་སྤངས་ཤིང་དྲི་མ་དང་བྲལ་ནས་ཆོས་ཀྱི་མིག་རྣམ་པར་དག་པ་ཐོབ་པར་གྱུར་ཏོ། །དེ་ནས་དེའི་ཚེ་འཁོར་མང་པོ་དེའི་ནང་ནས་དགེ་སློང་འབུམ་ཕྲག་ལྔ་བཅུ་བྱང་ཆུབ་སེམས་དཔའི་སྤྱད་པ་སྤྱོད་པ་ལས་བྱང་ཆུབ་ཀྱི་སེམས་ལས་ཕྱིར་མི་ལྡོག་པ་རྣམས་བྱང་ཆུབ་སེམས་དཔའ་ཡིད་བཞིན་རིན་ཆེན་འོད་འཕྲོས་ཆོས་བསྟན་པ་ཐོས་པས་ཐམས་ཅད་ཤིན་ཏུ་བརྟན་པར་གྱུར་
ནས་བསམ་གྱིས་མི་ཁྱབ་པའི་སྨོན་ལམ་མཆོག་ཡོངས་སུ་རྫོགས་པར་འགྱུར་བས་ཡང་བྱང་ཆུབ་ཏུ་སེམས་བསྐྱེད་ནས། སོ་སོ་ནས་རང་གི་གོས་ཕུད་དེ་བྱང་ཆུབ་སེམས་དཔའ་ལ་མཆོད་པ་བྱས་ནས་མཆོག་ཏུ་བརྩོན་པའི་སེམས་བླ་ན་མེད་པ་བསྐྱེད་དེ། སྨོན་ལམ་འདི་སྐད་དུ་བདག་ཅག་བསོད་ནམས་ཀྱི་དགེ་བའི་རྩ་བ་ཅི་བསགས་པ་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡོངས་སུ་བསྔོའོ། །ཞེས་སྨོན་ལམ་བཏབ་བོ། །ཚངས་པའི་རྒྱལ་པོ་དགེ་སློང་མང་པོ་འདི་དག་ནི་བསོད་ནམས་འདི་ལ་བརྟེན་ནས་ཇི་སྐད་བསྟན་པ་བཞིན་དུ་མངོན་པར་བསྒྲུབས་པས་བསྐལ་པ་ཆེན་པོ་དགུ་བཅུ་འདས་ནས་ཁོང་དུ་ཆུད་ཅིང་གོ་བར་འགྱུར་བས་འཁོར་བ་ལས་ངེས་པར་འབྱང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་དགེ་སློང་མང་པོ་དེ་དག་ལ་ཁྱེད་བསྐལ་པ་གྲངས་མེད་པ་སུམ་ཅུ་འདས་ནས་མངོན་པར་རྫོགས་པར་འཚང་རྒྱ་བར་འགྱུར་ཏེ། བསྐལ་པའི་མིང་ནི་རྒྱལ་བར་དཀའ་བའི་འོད་ཀྱི་རྒྱལ་པོ་ཞེས་བྱའོ། །ཞིང་གི་མིང་ནི་དྲི་མ་མེད་པའི་འོད་ཅེས་བྱ་སྟེ། དུས་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་བས་ཐམས་ཅད་མིང་མཐུན་པར་སྨོན་ལམ་གྱི་བཀོད་པས་བརྒྱན་པའི་རྒྱལ་པོ་ཞེས་བྱ་བར་འགྱུར་ཞིང་མཚན་རྣམ་པ་བཅུ་དང་ལྡན་པར་འགྱུར་རོ་ཞེས་ལུང་བསྟན་ཏོ། །ཚངས་པའི་རྒྱལ་པོ་གསེར་འོད་དམ་པ་ཤིན་ཏུ་གྱ་ནོམ་པའི་མདོ་སྡེ་འདི་གང་གིས་ཡང་དག་པར་མཉན་ནས་ཡོངས་སུ་འཛིན་པར་བྱེད་ན་གཟི་བྱིན་ཆེན་པོའི་སྟོབས་དང་ལྡན་པར་འགྱུར་བས་གང་ལ་ལ་ཞིག་གིས་བསྐལ་པ་ཆེན་པོ་བརྒྱ་སྟོང་དུ་མའི་བར་དུ་ཐབས་དང་མི་ལྡན་པར་ཕ་རོལ་ཏུ་ཕྱིན་པ་དྲུག་ཡོངས་སུ་སྤྱད་པ་ལས་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་གསེར་འོད་དམ་པའི་མདོ་སྡེ་འདི་ཡི་གེར་བྲིས་ནས་ཟླ་བ་ཕྱེད་ཕྱེད་ཅིང་སེམས་རྩེ་གཅིག་ཏུ་ཀློག་གམ། ཁ་ཏོན་དུ་འདོན་པར་བྱེད་ན་འདིའི་བསོད་ནམས་གང་ཡིན་པ་དེ་སྔ་མའི་བསོད་ནམས་དང་བསྐྲུན་ན་བརྒྱའི་ཆར་ཡང་ཉེ་བར་མི་འགྲོ་བ་ནས་བགྲང་བ་དང་དཔེ་དང་རྒྱུའི་བར་དུ་ཡང་ཉེ་བར་
མི་འགྲོའོ། །ཚངས་པའི་རྒྱལ་པོ་དེའི་ཕྱིར་ངས་དེང་ཁྱོད་ཀྱིས་བསླབ་པར་བྱ་ཞིང་དྲན་པ་ཡོངས་སུ་བཟུང་ནས་གཞན་དག་ལ་རྒྱ་ཆེར་བསྟན་པར་བྱའོ་ཞེས་བསྟན་པ་ཡིན་ནོ། །དེ་ཅིའི་ཕྱིར་ཞེ་ན། ངས་སྔོན་བྱང་ཆུབ་སེམས་དཔའི་ལམ་ཡོངས་སུ་སྤྱད་པ་ན་ཇི་ལྟར་དཔའ་བོ་གཡུལ་ངོར་འཇུག་པ་བཞིན་དུ་ལུས་དང་སྲོག་ལ་ཕངས་པ་མེད་པར་འདི་ལྟར་མདོ་སྡེའི་རྒྱལ་པོ་མཆོག་དམ་པ་འདི་ཡོངས་སུ་སྤེལ་ཞིང་ཡང་དག་པར་བཟུང་བཀླགས་ཁ་ཏོན་དུ་བཏོན་ནས་གཞན་དག་ལ་ཡང་དག་པར་བསྟན་ཏེ་ཚངས་པའི་རྒྱལ་པོ་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་གལ་ཏེ་འཇིག་རྟེན་ན་འདུག་པར་གྱུར་ན་རིན་པོ་ཆེ་སྣ་བདུན་ཡང་ནུབ་པར་མི་འགྱུར་ལ། གལ་ཏེ་རྒྱལ་པོ་ཚེ་ཟད་པར་གྱུར་ན་རིན་པོ་ཆེ་སྣ་བདུན་ཡོད་པ་དག་ཀྱང་དེ་ཉིད་དུ་ནུབ་ཅིང་ཟད་པར་འགྱུར་རོ། །ཚངས་པའི་རྒྱལ་པོ་དེ་བཞིན་དུ་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་གལ་ཏེ་འཇིག་རྟེན་ན་གནས་པར་གྱུར་ན་ནི་བླ་ན་མེད་པའི་ཆོས་ཀྱི་རིན་པོ་ཆེ་རྣམས་ཀྱང་ནུབ་པར་མི་འགྱུར་ལ། གལ་ཏེ་མདོ་སྡེ་འདི་མེད་པར་གྱུར་ན་ནི་གནས་དེ་ཉིད་དུ་ནུབ་པར་འགྱུར་རོ། །དེ་ལྟ་བས་ན་མདོ་སྡེའི་རྒྱལ་པོ་འདི་སེམས་རྩེ་གཅིག་ཏུ་མཉན་ནས་ཡོངས་སུ་གཟུང་བར་བྱ། བཀླག་པར་བྱ། ཁ་ཏོན་དུ་གདོན་པར་བྱ། གཞན་དག་ལ་བསྟན་པར་བྱ་ཞིང་ཡི་གེར་འདྲི་བར་བསྐུལ་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་སྤྱད་དེ། ལུས་དང་སྲོག་ལ་ཡང་ཕངས་པ་མེད་པར་རབ་ཏུ་བརྩོན་པར་བྱེད་ན་བསོད་ནམས་ཀྱི་ནང་ན་མཆོག་ཏུ་འགྱུར་བས་ངའི་སློབ་མ་རྣམས་ཀྱིས་དེ་བཞིན་དུ་རབ་ཏུ་བརྩོན་པས་རྣལ་འབྱོར་བསྒོམ་པར་བསླབ་པར་བྱའོ། །དེ་ནས་ཚངས་པའི་རྒྱལ་པོ་ཆེན་པོ་ཚངས་པའི་འཁོར་ཚད་མེད་པ་སྙེད་དང་། བརྒྱ་བྱིན་དང་། རྒྱལ་པོ་ཆེན་པོ་བཞི་དང་། གནོད་སྦྱིན་རྣམས་དང་ལྷན་ཅིག་ཏུ་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་གསེར་འོད་དམ་
པ་མཆོག་ཏུ་རྣམ་པར་རྒྱལ་བའི་མདོ་སྡེ་འདི་དང་། ཆོས་འཆད་པའི་མཁན་པོ་གང་ལགས་པ་དེ་དག་ཡོངས་སུ་བསྲུང་ཞིང་སྤེལ་བར་བགྱིད་ལ། གལ་ཏེ་བགེགས་བགྱིད་པ་ཞིག་མཆིས་ན་ཡང་བདག་ཅག་གིས་ཡོངས་སུ་བསལ་ནས་དགེ་བ་མང་པོ་དང་ལྡན་པ་དང་། ཁ་དོག་དང་། མཐུ་སྟོབས་དང་ལྡན་པ་དང་། སྤོབས་པ་ལ་ཐོགས་པ་མ་མཆིས་པ་དང་། ལུས་དང་སེམས་བག་ཡངས་སུ་འགྱུར་བ་དང་། ཉན་པའི་འཁོར་རྣམས་བདེ་བ་མྱོང་བར་བགྱིད་དོ། །ཡུལ་གང་ན་གནས་པ་དེར་མུ་གེ་དང་། ཕྱིར་རྒོལ་བའི་དགྲ་དང་། མི་མ་ལགས་པ་དག་གིས་འཚེ་ཞིང་གནོད་པ་བགྱིད་པར་གྱུར་ན། བདག་ཅག་ལྷའི་འཁོར་རྣམས་ཀྱིས་ཡོངས་སུ་བསྲུངས་ནས་སྐྱེ་བོ་རྣམས་བདེ་སྐྱིད་ཅིང་ལོངས་སྤྱོད་རྒྱས་པ་དང་། གློ་བུར་གྱི་གནོད་པ་རྣམས་མ་མཆིས་པར་བགྱིད་དེ། འདི་དག་ཐམས་ཅད་ཀྱང་བདག་ཅག་དང་ལྷའི་འཁོར་རྣམས་ཀྱི་མཐུ་ལགས་སོ། །གང་ལ་ལ་ཞིག་གིས་མདོ་སྡེ་འདི་ལ་མཆོད་པ་བགྱིས་ན་བདག་ཅག་ཀྱང་སངས་རྒྱས་ཇི་ལྟ་བ་བཞིན་དུ་ཐ་དད་པ་མ་མཆིས་པའི་བསམ་པས་བཀུར་སྟི་དང་མཆོད་པ་བགྱིད་དོ། །དེ་ནས་བཅོམ་ལྡན་འདས་ཀྱིས་ཚངས་པའི་རྒྱལ་པོ་ཆེན་པོ་དང་། ཚངས་པའི་འཁོར་རྣམས་ནས་རྒྱལ་པོ་ཆེན་པོ་བཞི་དང་། གནོད་སྦྱིན་ལ་སོགས་པའི་བར་དག་ལ་བཀའ་སྩལ་པ་ལེགས་སོ་ལེགས་སོ། །ཁྱེད་ཀྱིས་ཆོས་ཟབ་མོ་གྱ་ནོམ་པ་ཐོས་ནས་མདོ་སྡེའི་རྒྱལ་པོ་མཆོག་དམ་པ་འདི་དང་མདོ་སྡེ་འཛིན་པ་དག་ལ་ཡོངས་སུ་བསྲུངས་ཤིང་ཡོངས་སུ་བསྐྱབས་པས་བསོད་ནམས་ཁྱད་པར་དུ་འཕགས་པ་མཐའ་མེད་པ་སྙེད་ཐོབ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ། །དེ་ནས་དེའི་ཚེ་ཚངས་པའི་རྒྱལ་པོ་ལ་སོགས་པས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་ནས་རབ་ཏུ་དགའ་སྟེ་སྤྱི་བོས་བླངས་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་སྟོང་པ་ཉིད་ལ་བརྟེན་ནས་སྨོན་ལམ་ཡོངས་སུ་རྫོགས་པར་འགྱུར་བའི་ལེའུ་སྟེ་བཅུ་པའོ།། །།
དེ་ནས་ལྷའི་རྒྱལ་པོ་རྣམ་ཐོས་ཀྱི་བུ་དང་། ལྷའི་རྒྱལ་པོ་ཡུལ་འཁོར་སྲུང་དང་། ལྷའི་རྒྱལ་པོ་འཕགས་སྐྱེས་པོ་དང་། ལྷའི་རྒྱལ་པོ་མིག་མི་བཟང་ཅིག་ཆར་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ནི་སངས་རྒྱས་ཐམས་ཅད་ཀྱིས་རྟག་པར་དགོངས་ཤིང་གཟིགས་པ། བྱང་ཆུབ་སེམས་དཔའ་ཐམས་ཅད་ཀྱིས་བཀུར་སྟི་བགྱིས་པ། ལྷ་དང་ཀླུ་ཐམས་ཅད་ཀྱིས་རྟག་པར་མཆོད་པ། ལྷའི་འཁོར་རྣམས་ཀྱིས་རྟག་པར་དགའ་བ་སྐྱེད་པ། འཇིག་རྟེན་སྐྱོང་བ་ཐམས་ཅད་ཀྱིས་རྟག་པར་བསྔགས་པ་བརྗོད་པ། ཉན་ཐོས་དང་རང་སངས་རྒྱས་རྣམས་ཀྱིས་ཡོངས་སུ་བཟུང་བ། ལྷའི་གཞལ་མེད་ཁང་ཐམས་ཅད་གསལ་བར་བགྱིད་པ། སེམས་ཅན་ཐམས་ཅད་ལ་ཁྱད་པར་དུ་འཕགས་པའི་བདེ་བ་སྩོལ་བ། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་ཀྱི་འགྲོ་བ་རྣམས་ཀྱི་སྡུག་བསྔལ་ཉེ་བར་ཞི་བར་བགྱིད་པ། འཇིགས་ཤིང་སྐྲག་པ་ཐམས་ཅད་རབ་ཏུ་སེལ་བ། ཕས་ཀྱི་དགྲ་ཐམས་ཅད་ཕྱིར་ཟློག་པར་བགྱིད་པ། མུ་གེའི་དུས་ངན་པའི་ཚེ་ལོ་ལེགས་པར་བགྱིད་པ། རིམས་ནད་ཀྱི་སྡུག་བསྔལ་ཐམས་ཅད་ཞི་བར་བགྱིད་པ། ལྟས་ངན་པ་ཐམས་ཅད་དང་། སྡུག་བསྔལ་གྱི་གནོད་པ་བརྒྱ་སྟོང་རབ་ཏུ་ཞི་བར་བགྱིད་པ་ལགས་སོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ནི་འདི་ལྟ་བུའི་བདེ་བ་སྩོལ་ཅིང་བདག་ཅག་ལ་ཡང་སྨན་པར་བགྱིད་པ་ལགས་ན། བཅོམ་ལྡན་འདས་ཀྱིས་འཁོར་མང་པོའི་ནང་དུ་རྒྱ་ཆེར་བཀས་བཤད་དུ་གསོལ། བདག་ཅག་རྒྱལ་པོ་ཆེན་པོ་བཞི་འཁོར་དང་བཅས་པས་བླ་ན་མ་མཆིས་པའི་བདུད་རྩིའི་ཆོས་ཀྱི་རོ་འདི་ཐོས་པར་གྱུར་ན་མཐུ་སྟོབས་དང་ལྡན་ཞིང་གཟི་བྱིན་འཕེལ་བ་དང་། བརྩོན་འགྲུས་དང་ལྡན་ཞིང་དཔའ་
བར་འགྱུར་བ་དང་། རྫུ་འཕྲུལ་ཡང་ཆེས་ལྷག་ཅིང་ཁྱད་པར་དུ་འཕགས་པར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་བཞི་ཡང་ཆོས་ཡང་དག་པ་མངོན་པར་སྒྲུབ་ཅིང་རྟག་པར་ཡང་དག་པའི་ཆོས་བསྟན་ནས་ཆོས་ཀྱིས་འཇིན་རྟེན་འདུལ་བར་བགྱིད་པས་བདག་ཅག་གིས་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། གྲུལ་བུམ་དང་། མི་འམ་ཅི་དང་། ལྟོ་འཕྱེ་ཆེན་པོ་དག་དང་། མིའི་རྒྱལ་པོ་རྣམས་ཀྱང་རྟག་པར་ཡང་དག་པའི་ཆོས་ཀྱིས་འཇིག་རྟེན་འདུལ་བ་ལ་དགོད་པར་བགྱིད་པས་སྡིག་པ་རྣམས་འགོག་ཅིང་ཡོངས་སུ་སེལ་བར་བགྱིད་དོ། །མིའི་མདངས་འཕྲོག་པར་བགྱིད་པའི་འདྲེ་སྲིན་བྱམས་པ་དང་སྙིང་རྗེ་མ་མཆིས་པ་ཅི་མཆིས་པ་ཐམས་ཅད་ཀྱང་ཐག་རིང་དུ་མཆི་བར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་བཞི་ཡང་གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། གནོད་སྦྱིན་བརྒྱ་སྟོང་ཚད་མ་མཆིས་པ་སྙེད་དང་བཅས་པས་ལྷའི་མིག་རྣམ་པར་དག་པ་མི་ལས་ཡང་དག་པར་འདས་པས་འཛམ་བུའི་གླིང་འདིར་ལྟ་བར་བགྱིད་ཅིང་ཡོངས་སུ་བསྐྱབ་པ་དང་ཡོངས་སུ་བསྲུང་བར་བགྱིད་དེ། བཅོམ་ལྡན་འདས་རྒྱུ་དང་རྐྱེན་དེས་ན་བདག་ཅག་རྒྱལ་པོ་རྣམས་ཀྱང་འཇིག་རྟེན་སྐྱོང་བ་ཞེས་བགྱི་བ་ལགས་སོ། །གཞན་ཡང་འཛམ་བུའི་གླིང་འདིར་ཡུལ་གྱི་རྒྱལ་པོ་གང་ལ་ལ་ཞིག་ལ་ཕས་ཀྱི་རྒོལ་བའི་དགྲ་རྣམས་རྟག་པར་ཉེ་བར་མཆིས་ཏེ་གནོད་པ་བགྱིས་པར་གྱུར་ཏམ། མུ་གེ་དང་རིམས་ནད་མང་པོས་གནོད་པར་གྱུར་ཏམ། ལྟས་ངན་གྱི་དངོས་པོ་བརྒྱ་སྟོང་ཚད་མ་མཆིས་པ་སྙེད་བྱུང་བར་གྱུར་ན། བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་པོ་དག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ལ་བཀུར་སྟི་དང་མཆོད་པ་བགྱིད་པའི་དགེ་སློང་ཆོས་སྨྲ་བ་གང་ལ་ལ་མདོ་སྡེ་འདི་ལེན་པ་དང་། འཛིན་པ་དང་། ཀློག་ཅིང་ཀུན་ཆུབ་བ་ཞིག་མཆིས་པར་གྱུར་ན་བདག་ཅག་རྒྱལ་པོ་ཆེན་པོ་བཞི་དེའི་ཐད་དུ་མཆིས་ཏེ་གོ་བར་བགྱིས་ནས་དེ་ལ་སྐུལ་ཞིང་གསོལ་བ་འདེབས་པར་བགྱིད་དེ། ཆོས་སྨྲ་བ་དེ་ཡང་བདག་ཅག་གི་རྫུ་འཕྲུལ་གྱིས་གོ་བར་
བགྱིས་པའི་མཐུས་ཡུལ་ཁམས་དེར་མཆིས་ནས་གསེར་འོད་དམ་པ་ཤིན་ཏུ་གྱ་ནོམ་པའི་མདོ་སྡེ་འདི་རྒྱ་ཆེར་ཡང་དག་པར་སྤེལ་བར་བགྱིད་པས་མདོ་སྡེ་འདིའི་མཐུས་གནོད་པ་དང་། ལྟས་ངན་གྱི་དངོས་པོ་བརྒྱ་སྟོང་ཚད་མ་མཆིས་པ་དེ་དག་ཐམས་ཅད་ཉེ་བར་ཞི་ཞིང་ཡོངས་སུ་སེལ་བར་འགྱུར་ལགས་སོ། །བཅོམ་ལྡན་འདས་མིའི་རྒྱལ་པོ་གང་གི་ཡུལ་དུ་མདོ་སྡེ་འདི་ཡོངས་སུ་འཛིན་པའི་དགེ་སློང་ཆོས་སྨྲ་བ་ཡུལ་དེར་མཆིས་པར་གྱུར་ན་མདོ་སྡེ་འདི་ཡང་ཡུལ་དེར་གཤེགས་པར་རིག་པར་བགྱི་ལགས་སོ། །བཅོམ་ལྡན་འདས་དེའི་ཚེ་ཡུལ་དེའི་རྒྱལ་པོ་དེ་ཆོས་སྨྲ་བའི་ཐད་དུ་མཆིས་ནས་དེས་ཆོས་བསྟན་པ་གང་ལགས་པ་མཉན་པར་བགྱིའོ། །ཐོས་ནས་ཀྱང་རབ་ཏུ་དགའ་བས་ཆོས་སྨྲ་བ་དེ་ལ་བཀུར་སྟི་དང་། མཆོད་པ་དང་། རིམ་གྲོ་བགྱིས་ཏེ། ཤིན་ཏུ་དང་བའི་བསམ་པས་ཡོངས་སུ་བསྲུངས་ནས་མྱ་ངན་དང་གནོད་པ་མ་མཆིས་པར་བགྱིས་ཏེ། མདོ་སྡེ་འདི་ཡང་དག་པར་བསྟན་ནས་ཐམས་ཅད་ལ་ཕན་གདགས་པར་བགྱིའོ། །བཅོམ་ལྡན་འདས་རྒྱུ་དང་རྐྱེན་དེས་ན་བདག་ཅག་རྒྱལ་པོ་ཆེན་པོ་བཞི་པོ་ཐམས་ཅད་སེམས་རྩེ་གཅིག་ཏུ་མིའི་རྒྱལ་པོ་དེ་དང་། ཡུལ་གྱི་མི་ཐམས་ཅད་ཡོངས་སུ་བསྲུངས་ནས་གནོད་པ་རྣམས་སྤོང་ཞིང་རྟག་པར་བདེ་བ་ལ་འགོད་པར་བགྱིད་ལགས་སོ། །བཅོམ་ལྡན་འདས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་མདོ་སྡེ་འདི་ཡོངས་སུ་འཛིན་པར་བགྱིད་པ་ཞིག་མཆིས་པར་གྱུར་ན་དེའི་ཚེ་མིའི་རྒྱལ་པོ་དེས་ཅི་དང་ཅི་འཚལ་བ་སྦྱར་ཏེ། མཆོད་པ་བགྱིས་ནས་ཕོངས་པ་མ་མཆིས་པར་བགྱིད་པར་གྱུར་ན་བདག་ཅག་རྒྱལ་པོ་ཆེན་པོ་བཞིས་ཡུལ་གྱི་བདག་པོ་དེ་དང་ཡུལ་གྱི་མི་ཐམས་ཅད་རབ་ཏུ་བདེ་བར་བགྱིད་ཅིང་གནོད་པ་རྣམས་ཐག་རིང་དུ་སྤོང་བར་བགྱིད་དོ། །བཅོམ་ལྡན་འདས་གང་ལ་ལ་ཞིག་མདོ་སྡེ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པར་བགྱིས་པ་ལ་མིའི་རྒྱལ་པོ་དེས་མཆོད་པ་དང་། བཀུར་སྟི་དང་། བླ་མར་བགྱིས་ཏེ་བསྔགས་པ་བརྗོད་པར་བགྱིད་ན་བདག་ཅག་རྒྱལ་པོ་དེ་རྒྱལ་པོ་རྣམས་ཀྱི་ནང་ན་མཆོག་ཏུ་བཙུན་པ་
དང་གུས་པས་བླ་མར་བགྱིས་པས་ཡུལ་གྱི་རྒྱལ་པོ་གཞན་རྣམས་ཀྱིས་ཀྱང་བསྔགས་པ་བརྗོད་པར་འགྱུར་རོ། །འཁོར་མང་པོ་རྣམས་དེ་སྐད་ཅེས་ཐོས་པ་དང་རབ་ཏུ་དགའ་བས་ཡོངས་སུ་འཛིན་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་རྒྱལ་པོ་ཆེན་པོ་བཞིས་ལྷ་དང་མི་རྣམས་ལ་བལྟ་ཞིང་བརྟག་པའི་ལེའུ་སྟེ་བཅུ་གཅིག་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་དྲུག་པ། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་གིས་གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེ་ལ་བཀུར་སྟི་དང་། མཆོད་པ་བྱས་པ་དང་། མདོ་སྡེ་འཛིན་པ་དག་ལ་ཡོངས་སུ་སྐྱོབ་པ་དང་། ཡོངས་སུ་སྲུང་བར་བྱེད་པ་གསན་པ་དང་། ལེགས་སོ་ལེགས་སོ། །ཞེས་བསྔགས་པ་བརྗོད་ནས་རྒྱལ་པོ་ཆེན་པོ་བཞི་པོ་ཁྱེད་ཅག་ནི་འདས་པའི་སངས་རྒྱས་འབུམ་ཕྲག་བརྒྱ་སྟོང་ཚད་མེད་པ་སྙེད་ལ་བཀུར་སྟི་དང་། རིམ་གྲོ་དང་། མཆོད་པ་དང་། བླ་མར་བྱས་ནས་བསྔགས་པ་བརྗོད་དེ་དགེ་བའི་རྩ་བ་བསྐྱེད་པ་དང་། ཡང་དག་པའི་ཆོས་མངོན་པར་བསྒྲུབས་ནས་རྟག་པར་ཡང་དག་པའི་ཆོས་བསྟན་ཏེ། འདི་ལྟར་ཆོས་ཀྱིས་འཇིག་རྟེན་འདུལ་བ་ཡིན་པས་ཁྱེད་ཅག་ཡུན་རིང་པོ་ནས་སེམས་ཅན་རྣམས་ལ་རྟག་པར་ཕན་འདོགས་ཤིང་བྱམས་པ་ཆེན་པོའི་སེམས་བསྐྱེད་ནས་བདེ་བ་སྦྱིན་པར་སྨོན་པའི་རྒྱུ་དང་རྐྱེན་དེས་ན་ཁྱེད་ཅག་ད་ལྟར་རྣམ་པར་སྨིན་པ་མཆོག་ལ་ལོངས་སྤྱོད་པ་ཡིན་ནོ། ། མིའི་རྒྱལ་པོ་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བའི་མདོ་སྡེ་འདི་ལ་བཀུར་སྟི་བྱས་ནས་མཆོད་པ་བྱེད་པ་ཞིག་ཡོད་ན་ཁྱེད་ཀྱིས་ནན་ཏན་བསྐྱེད་དེ་ཡོངས་སུ་བསྲུངས་ནས་བདེ་བ་འཐོབ་པར་བྱའོ། །ཁྱེད་ཅག་རྒྱལ་པོ་ཆེན་པོ་བཞི་དང་། འཁོར་གཞན་རྣམས་དང་། གནོད་སྦྱིན་བརྒྱ་སྟོང་ཚད་མེད་གྲངས་མེད་པ་སྙེད་ཀྱིས་མདོ་སྡེ་འདི་ཡོངས་སུ་སྲུང་བར་བྱེད་ན་དེས་འདས་པ་དང་། མ་འོངས་པ་དང་། ད་ལྟར་བཞུགས་པའི་སངས་རྒྱས་རྣམས་ཀྱི་ཡང་དག་པའི་ཆོས་ཡོངས་སུ་བསྲུང་བར་འགྱུར་བས་ཁྱེད་ཅག་རྒྱལ་པོ་ཆེན་པོ་བཞི་
དང་། ལྷའི་འཁོར་གཞན་རྣམས་དང་། གནོད་སྦྱིན་རྣམས་དང་། ལྷ་མ་ཡིན་དང་འཐབ་པའི་ཚེ་རྟག་ཏུ་རྒྱལ་བའི་ཕན་ཡོན་འཐོབ་པར་འགྱུར་རོ། །ཁྱེད་ཅག་མདོ་སྡེ་འདི་ཡོངས་སུ་བསྲུང་ཞིང་ཡོངས་སུ་འཛིན་པར་བྱེད་ན་མདོ་སྡེ་འདིའི་མཐུས་སྡུག་བསྔལ་མང་པོ་དང་། ཕྱིར་རྒོལ་བའི་དགྲ་དང་། མུ་གེ་དང་། ནད་དང་། རིམས་ནད་ཐམས་ཅད་རབ་ཏུ་ཞི་ཞིང་ཡོངས་སུ་སེལ་བར་བྱེད་པས་དེའི་ཕྱིར་ཁྱེད་ཀྱིས་གལ་ཏེ་འཁོར་བཞི་པོ་དག་མདོ་སྡེའི་རྒྱལ་པོ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་མཐོང་བར་གྱུར་ན་རབ་ཏུ་བརྩོན་པའི་སེམས་ཀྱིས་ཡོངས་སུ་བསྲུངས་ནས་གནོད་པ་བསལ་ཏེ་བདེ་བ་སྦྱིན་པར་བྱའོ། །དེ་ནས་རྒྱལ་པོ་ཆེན་པོ་བཞི་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་སླད་མའི་དུས་ཀྱི་ཚེ་ཡུལ་ལམ། གྲོང་ངམ། གྲོང་ཁྱེར་རམ། རིའམ། ནགས་ཚལ་ལམ། འབྲོག་དགོན་པའི་གནས་གང་ཡང་རུང་བ་དག་ཏུ་ཡོངས་སུ་སྤེལ་ཞིང་གནས་པར་གྱུར་པ་ན། ཡུལ་དེའི་རྒྱལ་པོས་མདོ་སྡེ་འདི་སེམས་རྩེ་གཅིག་ཏུ་མཉན་ནས་ཡོངས་སུ་བཟུང་སྟེ་བསྔགས་པ་བརྗོད་ནས་མཆོད་པར་བགྱིད་པ་དང་། མདོ་སྡེ་འདི་འཛིན་པའི་འཁོར་བཞི་པོ་དག་ལ་ཡོ་བྱད་སྦྱར་ཏེ་མཆོད་པ་བགྱིས་ནས་ཤིན་ཏུ་དང་བའི་སེམས་ཀྱིས་ཡོངས་སུ་བསྲུངས་ཏེ་གནོད་ཅིང་མི་བདེ་བ་དག་ཡོངས་སུ་སྤོང་བར་བགྱིད་ན། རྒྱུ་དང་རྐྱེན་དེས་བདག་ཅག་རྒྱལ་པོ་དེ་དང་མི་མང་པོ་རྣམས་ཡོངས་སུ་བསྲུངས་ནས་བདེ་བ་ལ་བཀོད་དེ། མྱ་ངན་དང་། སྡུག་བསྔལ་རྣམས་ཐག་རིང་དུ་སྤངས་ནས་ཚེ་འཕེལ་བ་དང་། གཟི་བྱིན་ཕུན་སུམ་ཚོགས་པར་བགྱིད་དོ། །བཅོམ་ལྡན་འདས་ཡུལ་གྱི་རྒྱལ་པོ་དེས་འཁོར་བཞི་པོ་དག་མདོ་སྡེ་འདི་ཡོངས་སུ་འཛིན་པ་མཐོང་ནས་གུས་པས་ཡོངས་སུ་བསྲུངས་ཏེ་ཕ་མ་བཞིན་དུ་ཅི་འཚལ་བ་ཐམས་ཅད་སྦྱར་ཏེ་མཆོད་པར་བགྱིད་ན། བདག་ཅག་རྒྱལ་པོ་ཆེན་པོ་བཞིས་རྟག་པར་ཡོངས་སུ་བསྲུངས་
ནས་སེམས་ཅན་མང་པོ་ཀུན་གྱིས་བཀུར་བར་འགྱུར་བར་བགྱིད་པས། དེའི་སླད་དུ་བདག་ཅག་གནོད་སྦྱིན་དང་འདྲེ་སྲིན་ཚད་མ་མཆིས་པ་དང་བཅས་པར་མདོ་སྡེའི་རྒྱལ་པོ་འདི་གང་དུ་སྤེལ་བའི་གནས་དེར་ལུས་སྦས་ནས་ཡོངས་སུ་སྐྱོབ་པ་དང་། ཡོངས་སུ་སྲུང་བ་བགྱིད་པས་བགེགས་རྣམས་དང་བྲལ་བར་འགྱུར་རོ། །མདོ་སྡེ་འདི་ཉན་པའི་གང་ཟག་དང་རྒྱལ་པོ་ལ་སོགས་པ་ལ་ཡང་ཡོངས་སུ་སྲུང་ཞིང་རྗེས་སུ་དྲན་པར་བགྱིད་པས་གནོད་པ་ཡོངས་སུ་བསལ་ནས་བདེ་བ་ལ་འགོད་པ་དང་། ཕྱོགས་གཞན་ནས་མཆིས་པའི་དགྲ་རྣམས་ཀྱང་སླར་ཟློག་པར་བགྱིད་པར་བགྱིད་དོ། ། མིའི་རྒྱལ་པོ་གང་ལ་ལ་ཞིག་མདོ་སྡེ་འདི་ཉན་པའི་ཚེ་ཉེ་འཁོར་ན་གནས་པའི་དགྲ་ཕྱིར་རྒོལ་བ་དམག་རྣམ་པ་བཞི་བཤམས་ཏེ། ཡུལ་དེ་དག་གཞོམ་མོ་སྙམ་དུ་སེམས་པར་གྱུར་ན་ཡང་བཅོམ་ལྡན་འདས་འདི་ལྟར་མདོ་སྡེའི་རྒྱལ་པོ་འདིའི་བྱིན་གྱི་བརླབས་ཀྱི་མཐུས་དེའི་ཚེ་ཉེ་འཁོར་གྱི་དགྲ་དེ་ལ་ཕྱིར་རྒོལ་བའི་དགྲ་ཐ་དད་པ་གཞན་མཆིས་ནས་གཞོམ་པར་བགྱིད་ཅིང་། དེའི་ཡུལ་ཁམས་སུ་ལྟས་ངན་མང་པོ་དང་རིམས་ནད་རྣམས་འབྱུང་བར་འགྱུར་བས་དེའི་ཚེ་རྒྱལ་པོ་དེས་དེ་ལྟ་བུ་མཐོང་བ་དང་། དམག་རྣམ་པ་བཞི་བཤམས་ནས་ཡུལ་དེར་ཆས་ཏེ་གཞོམ་པར་བགྱིད་པ་ན་བདག་ཅག་ཀྱང་དེའི་ཚེ་གནོད་སྦྱིན་དང་འདྲེ་སྲིན་གྱི་འཁོར་ཚད་མ་མཆིས་ཤིང་མཐའ་མ་མཆིས་པ་སྙེད་དང་བཅས་པར་སོ་སོ་ནས་རང་གི་ལུས་སྦས་ཏེ་ཡོངས་སུ་བསྲུངས་ནས་གྲོགས་བགྱིས་པས་དེ་ཉིད་ཀྱིས་ཕྱིར་རྒོལ་བའི་དགྲ་དེ་རང་དུལ་བར་འགྱུར་བས་ཡུལ་ཁམས་དེར་མཆི་བའི་ཐུགས་ཀྱང་མི་ཐུབ་ན། ཕན་ཚུན་དམག་དང་མཚོན་གྱིས་འཐབ་པ་ལྟ་སྨོས་ཀྱང་ཅི་འཚལ་ལགས། དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་བཀའ་སྩལ་པ། རྒྱལ་པོ་ཆེན་པོ་བཞི་པོ་ཁྱེད་ཀྱིས་འདི་ལྟར་མདོ་སྡེ་འདི་ཡོངས་སུ་སྐྱོང་ཞིང་ཡོངས་སུ་སྲུང་བར་བྱེད་པ་ལེགས་སོ་ལེགས་སོ། །ང་སྔོན་འདས་པའི་བསྐལ་པ་བྱེ་བ་ཁྲག་ཁྲིག་བརྒྱ་སྟོང་དུ་མ་འདས་པ་ན་དཀའ་བ་རྣམ་པ་སྣ་ཚོགས་སྤྱད་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ཏེ། ཐམས་ཅད་མཁྱེན་པ་ཉིད་བརྙེས་ནས་ཆོས་འདི་བསྟན་པ་ཡིན་པས་མིའི་རྒྱལ་པོ་གང་ལ་ལ་ཞིག་
མདོ་སྡེ་འདི་ཡོངས་སུ་བཟུང་ནས་བཀུར་སྟི་དང་མཆོད་པ་བྱེད་ན། གནོད་པ་རྣམས་ཉེ་བར་ཞི་ནས་རབ་ཏུ་བདེ་བར་འགྱུར། གྲོང་དང་། གྲོང་ཁྱེར་དང་། གྲོང་རྡལ་རྣམས་ཡོངས་སུ་སྲུང་བར་འགྱུར། ཕྱིར་རྒོལ་བའི་དགྲ་རྣམས་ཟློག་པར་འགྱུར། འཛམ་བུའི་གླིང་དུ་གཏོགས་པའི་རྒྱལ་པོ་ཐམས་ཅད་ལ་གནོད་པ་དང་། འཐབ་པ་དང་། རྩོད་པའི་དངོས་པོ་རྣམས་གཏན་མེད་པར་འགྱུར་རོ། །རྒྱལ་པོ་ཆེན་པོ་བཞི་པོ་དག་འཛམ་བུའི་གླིང་འདི་ན་ཡོད་པའི་གྲོང་དང་། གྲོང་ཁྱེར་དང་། རི་དང་། གྲོང་རྡལ་བརྒྱད་ཁྲི་བཞི་སྟོང་དག་གི་མིའི་རྒྱལ་པོ་བརྒྱད་ཁྲི་བཞི་སྟོང་པོ་རྣམས་ཀྱང་སོ་སོ་ནས་རང་རང་གི་ཡུལ་དུ་ལོངས་སྤྱོད་ཀྱི་བདེ་བ་མྱོང་ཞིང་རང་དབང་དང་ལྡན་པར་འགྱུར། །ནོར་དང་རིན་པོ་ཆེ་དཔལ་འབྱོར་གྱིས་རྒྱས་པ་དག་ལ་ལོངས་སྤྱོད་པར་བྱེད་པས་ཕན་ཚུན་འཕྲོག་པར་མི་བྱེད་ཅིང་སྔོན་གྱི་རྒྱུ་ཇི་ལྟ་བ་བཞིན་དུ་རྣམ་པར་སྨིན་པ་དག་ལ་ལོངས་སྤྱོད་པར་བྱེད་པས། བསམ་པ་ངན་པ་བསྐྱེད་ནས་གཞན་གྱི་ཡུལ་ལ་འདོད་པས་ཡོངས་སུ་ཚོལ་བ་མེད་དེ། ཐམས་ཅད་འདོད་པ་ཆུང་ཞིང་ཕན་འདོགས་པའི་བསམ་པ་སྐྱེ་བར་འགྱུར། འཐབ་པ་དང་། རྩོད་པ་དང་། བཅིང་བ་ལ་སོགས་པའི་སྡུག་བསྔལ་ཡང་མེད་པར་འགྱུར། ཡུལ་དེ་དག་ན་གནས་པའི་མི་རྣམས་ཀྱང་རང་བཞིན་གྱིས་བདེ་བ་མྱོང་བར་འགྱུར། བླ་འོག་མཐུན་ཞིང་ཆུ་དང་འོ་མ་འདྲེས་པ་ལྟ་བུར་སེམས་ཀྱིས་ཕན་ཚུན་སྡུག་ཅིང་བཀུར་བར་འགྱུར། རབ་ཏུ་དགའ་བས་རྣམ་པར་རྩེ་བར་འགྱུར། བྱམས་པ་དང་། སྙིང་རྗེས་ཕན་འདོགས་ཤིང་དགེ་བའི་རྩ་བ་འཕེལ་བར་བྱེད་པས་རྒྱུ་དང་རྐྱེན་དེས་ན་འཛམ་བུའི་གླིང་འདི་རབ་ཏུ་བདེ་ཞིང་ལོ་ལེགས་པ་དང་། མི་རྣམས་རྒྱས་ཤིང་རབ་ཏུ་གང་བར་འགྱུར། ས་ཆེན་པོ་མཐུ་དང་ལྡན་པར་འགྱུར། གྲང་དྲོ་རན་པར་འགྱུར། དུས་ཚིགས་མི་མཐུན་པ་མེད་པར་འགྱུར། ཉི་མ་དང་། ཟླ་བ་དང་། གཟའ་དང་། རྒྱུ་སྐར་རྣམས་ཀྱང་སྔོན་གྱི་གནས་ལས་འཕོ་ཞིང་འགྱུར་བ་མེད་པར་འགྱུར། རླུང་དང་ཆར་པ་ཡང་དུས་བཞིན་དུ་ལྡང་ཞིང་འབབ་པར་འགྱུར། ལྟས་ངན་རྣམས་དང་འབྲལ་བར་འགྱུར། ནོར་དང་རིན་པོ་ཆེ་རྣམས་འབྱོར་
ཅིང་རྒྱས་པར་འགྱུར། སེམས་ལ་སེར་སྣའི་འཇུངས་པ་མེད་ཅིང་རྟག་པར་སྦྱིན་པ་གཏོང་བར་འགྱུར། དགེ་བ་བཅུའི་ལས་ཀྱི་ལམ་དང་ལྡན་པར་འགྱུར། མི་རྣམས་ཚེ་འཕོས་པར་གྱུར་ན་ཡང་ཕལ་ཆེར་མཐོ་རིས་སུ་སྐྱེ་བར་འགྱུར་བས་ལྷའི་འཁོར་རྣམས་རབ་ཏུ་འཕེལ་བར་འགྱུར་བར་རིག་པར་བྱའོ། །རྒྱལ་པོ་ཆེན་པོ་དག་མ་འོངས་པའི་དུས་ན་མིའི་རྒྱལ་པོ་གང་ལ་ལ་ཞིག །མདོ་སྡེ་འདི་མཉན་ཏེ་ཡོངས་སུ་བསྲུངས་ནས་གུས་པས་མཆོད་པ་བྱེད་པ་དང་། མདོ་སྡེ་འཛིན་པའི་འཁོར་བཞི་པོ་དག་ལ་བླ་མར་བྱེད་ཅིང་བསྔགས་པ་བརྗོད་པར་འདོད་པ་དང་། གཞན་ཡང་ཁྱེད་འཁོར་དང་བཅས་པ་དང་། གནོད་སྦྱིན་གྱི་འཁོར་བརྒྱ་སྟོང་ཚད་མེད་པ་སྙེད་ལ་ཕན་པ་དང་། བདེ་བས་ཕན་འདོགས་པར་འདོད་ན་དེའི་ཕྱིར་རྒྱལ་པོ་དེས་རྟག་པར་མདོ་སྡེའི་རྒྱལ་པོ་དམ་པ་འདི་མཉན་ནས་ཡོངས་སུ་གཟུང་བར་བྱས་ཏེ། ཡང་དག་པའི་ཆོས་ཀྱི་ཆུ་བདུད་རྩིའི་རོ་མཆོག་དམ་པ་འདི་ཐོས་པའི་དབང་གིས་ཁྱེད་ལ་སོགས་པའི་ལུས་དང་སེམས་ཀྱི་མཐུ་སྟོབས་འཕེལ་བར་བྱེད་པས་བརྩོན་འགྲུས་དང་ལྡན་ཞིང་དཔའ་བ་དང་། བསོད་ནམས་དང་གཟི་བྱིན་རྣམས་རབ་ཏུ་རྒྱས་པར་འགྱུར་རོ། །མིའི་རྒྱལ་པོ་དེ་དག་གལ་ཏེ་སེམས་རྩེ་གཅིག་ཏུ་མདོ་སྡེ་འདི་མཉན་ནས་ཡོངས་སུ་འཛིན་པར་བྱེད་ན་དེ་ནི་ཡངས་ཤིང་རྒྱ་ཆེ་བ་དང་། ཤིན་ཏུ་དཀོན་པའི་མཆོད་པས་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ང་ལ་མཆོད་པ་བྱེད་པར་འགྱུར་ཏེ། གང་གིས་ང་ལ་མཆོད་པ་བྱས་པ་གང་ཡིན་པ་དེ་ནི་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་མང་པོ་རྣམས་ལ་མཆོད་པ་བྱས་པར་འགྱུར་རོ། །གང་གིས་དུས་གསུམ་གྱི་སངས་རྒྱས་རྣམས་ལ་མཆོད་པ་བྱས་ནས་བསམ་གྱིས་མི་ཁྱབ་པའི་བསོད་ནམས་ཀྱི་ཕུང་པོ་ཚད་མེད་པ་སྙེད་འཐོབ་པར་འགྱུར་བས། རྒྱུ་དང་རྐྱེན་དེས་ན་ཁྱེད་ལ་སོགས་པས་རྒྱལ་པོ་དེ་དང་། བཙུན་མོ་དང་། སླས་དང་། འཁོར་རྣམས་ཡོངས་སུ་བསྲུངས་ནས་གནོད་ཅིང་ཉམ་ང་བ་མེད་པར་བྱས་ཏེ། ཕོ་བྲང་བསྲུང་བའི་ལྷ་རྣམས་ཀྱང་རྟག་ཏུ་བདེ་བའི་ལོངས་སྤྱོད་མྱོང་བ་ལ་འགོད་པར་བྱེད་ན། བསོད་ནམས་བསམ་གྱིས་མི་ཁྱབ་པ་དང་ལྡན་པར་འགྱུར། ཡུལ་དེ་
དག་ན་གནས་པའི་མི་རྣམས་ཀྱང་འདོད་པ་ལྔའི་བདེ་བ་རྣམ་པ་སྣ་ཚོགས་མྱོང་བར་འགྱུར། དངོས་པོ་ངན་པ་ཐམས་ཅད་ཀྱང་རབ་ཏུ་ཞི་བར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་སླད་མའི་དུས་ཀྱི་ཚེ་མིའི་རྒྱལ་པོ་གང་ལ་ལ་ཞིག་འདི་ལྟར་གསེར་འོད་དམ་པའི་མདོ་སྡེ་འདི་ཉན་པར་མོས་པ་དང་། བདག་ཉིད་དང་། བཙུན་མོ་དང་། རྒྱལ་བུ་ནས་ཕོ་བྲང་ནང་གི་སླས་ལ་སོགས་པའི་བར་དག་དང་། གྲོང་ཁྱེར་དང་། གྲོང་རྡལ་དང་། ཕོ་བྲང་ཡོངས་སུ་སྲུང་ཞིང་སྐྱོབ་པ་དང་། བསམ་གྱིས་མི་ཁྱབ་པའི་དགའ་བ་མཆོག་དམ་པ་དང་། རབ་ཏུ་དབེན་པའི་བདེ་བ་འཐོབ་པར་འཚལ་བ་དང་། ཚེ་འདི་ཉིད་ལ་རྒྱལ་ཐབས་བཙུན་ཞིང་མཐོ་བ་དང་། དབང་ཕྱུག་དང་ལྡན་ཞིང་དར་བ་དང་། རྟག་ཏུ་འཕེལ་བར་འཚལ་བ་དང་། གཞན་ཡང་བསམ་གྱིས་མི་ཁྱབ་པའི་བསོད་ནམས་ཀྱི་ཕུང་པོ་ཚད་མ་མཆིས་ཤིང་མཐའ་མ་མཆིས་པ་ཡོངས་སུ་སྡུད་པ་དང་། རང་གི་ཡུལ་དུ་ཕྱིར་རྒོལ་བའི་དགྲ་དང་། མྱ་ངན་དང་། འཁྲུག་པ་དང་། གདོན་བགེགས་ཀྱི་དངོས་པོ་རྣམས་མ་མཆིས་པར་འཚལ་ན། བཅོམ་ལྡན་འདས་འདི་ལྟར་མིའི་རྒྱལ་པོ་དེས་བག་མ་མཆིས་པས་སེམས་གཡེང་བར་མི་བགྱི་ཞིང་ཤིན་ཏུ་གུས་པ་བསྐྱེད་དེ་བསམ་པ་ཐག་པ་ནས་མདོ་སྡེའི་རྒྱལ་པོ་མཆོག་དམ་པ་འདི་མཉན་ཅིང་ཡོངས་སུ་གཟུང་བར་བགྱིའོ། །ཆོས་ཉན་པར་འཚལ་བའི་ཚེ། སྔར་རྒྱལ་པོ་ལ་གཅེས་པའི་ཕོ་བྲང་མཆོག་དམ་པ་རབ་ཏུ་བརྒྱན་ཏེ་གསལ་བའི་ཕྱོགས་སུ་སྤོས་ཆབ་ཀྱིས་ཆག་ཆག་བཏབ་སྟེ། མེ་ཏོག་མཆོག་དམ་པ་སྣ་ཚོགས་མངོན་པར་གཏོར་ནས་སེང་གེའི་ཁྲི་ཆོས་ཀྱི་གདན་ཁྱད་པར་དུ་འཕགས་པ་བཙུགས་ཏེ། རིན་པོ་ཆེ་སྣ་ཚོགས་ཀྱིས་རབ་ཏུ་བརྒྱན་ནས་རིན་པོ་ཆེ་སྣ་ཚོགས་ཀྱི་གདུགས་དང་། རྒྱལ་མཚན་དང་། བ་དན་བསྒྲེང་སྟེ། རིན་ཐང་མ་མཆིས་པའི་སྦོས་བསྲེགས་ནས་རོལ་མོ་རྣམས་བགྱིའོ། །རྒྱལ་པོ་དེས་དེའི་ཚེ་ཡོངས་སུ་དག་པར་ཁྲུས་བགྱིས་ཏེ། སྤོས་ཀྱི་བྱུག་པས་ལུས་བསྐུས་ནས་གོས་སར་པ་གཙང་མ་བགོས་ཏེ། རྒྱན་ཕྲེང་རྣམས་ཀྱིས་བརྒྱན་ནས་
སྟན་དམའ་བ་ལ་མཆིས་ཏེ། མཐོ་བའི་བསམ་པ་མི་བསྐྱེད་པར་དབང་ཕྱུག་གི་ཐབས་ཡོངས་སུ་སྤང་བར་བགྱིའོ། །ང་རྒྱལ་རྣམས་སྤངས་ཏེ་སེམས་རྩེ་གཅིག་ཏུ་དྲན་པ་ཉེ་བར་གཞག་ནས་མདོ་སྡེའི་རྒྱལ་པོ་འདི་མཉན་པར་བགྱིའོ། །ཆོས་སྨྲ་བའི་མཁན་པོ་ལ་སྟོན་པ་ཆེན་པོའི་འདུ་ཤེས་བསྐྱེད་པར་བགྱིའོ། །ཕོ་བྲང་ནང་གི་བཙུན་མོ་དང་། རྒྱལ་བུ་དང་། སླས་དང་། འཁོར་རྣམས་ལ་བྱམས་པ་དང་། བརྩེ་བའི་སེམས་བསྐྱེད་ནས་རབ་ཏུ་དགའ་བས་ཕན་ཚུན་བལྟ་བར་བགྱིའོ། །ཤིན་ཏུ་མཐུན་པའི་མདངས་ཀྱིས་ཚིག་འཇམ་པོར་སྨྲ་བར་བགྱིའོ། །བདག་ཉིད་ཀྱི་ལུས་དང་སེམས་ལ་དགའ་བ་ཆེན་པོས་ཀུན་དུ་ཁྱབ་པར་བགྱིའོ། །དེང་བདག་ནི་ཤིན་ཏུ་བསམ་པར་དཀའ་ཞིང་ཁྱད་པར་དུ་འཕགས་པའི་ཕན་ཡོན་ཆེན་པོ་ཡངས་ཤིང་རྒྱ་ཆེ་བ་འདི་ལྟ་བུ་འཐོབ་པར་འགྱུར་རོ་སྙམ་དུ་བསམས་ནས་མདོ་སྡེའི་རྒྱལ་པོ་དེ་ལ་རབ་ཏུ་མཆོད་པར་བགྱིའོ། །དེ་ལྟར་བསམས་ལགས་ནས་ཆོས་སྨྲ་བའི་མཁན་པོ་དེར་མཆིས་པ་མཐོང་བར་གྱུར་ན་ཤིན་ཏུ་གུས་པས་དཀོན་པའི་འདུ་ཤེས་བསྐྱེད་པར་བགྱིའོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་བཀའ་སྩལ་པ། འདི་ལྟར་ཆོས་སྨྲ་བའི་མཁན་པོ་དེ་མི་བསུ་བར་མི་བྱའི། དེའི་ཚེ་མིའི་རྒྱལ་པོ་དེས་གོས་སར་པ་གཙང་མ་བགོས་ནས་རྒྱན་དང་། ཕྲེང་བ་རྣམ་པ་སྣ་ཚོགས་ཀྱིས་རབ་ཏུ་བརྒྱན་ཏེ། བདག་ཉིད་གདུགས་དཀར་པོ་དང་། སྤོས་དང་། མེ་ཏོག་ཐོགས་ནས་དམག་གི་དཔུང་བཤམས་ཏེ། རོལ་མོ་རྒྱས་པར་བྱས་ནས་རྐང་གིས་གྲོང་ཁྱེར་ནས་ཕྱིར་བྱུང་སྟེ། བཀྲ་ཤིས་ཀྱི་དངོས་པོ་ཐོབ་པར་བྱ་བའི་ཕྱིར་གུས་པའི་འདུ་ཤེས་བསྐྱེད་ནས་ཆོས་སྨྲ་བའི་མཁན་པོ་དེ་བསུ་བར་བྱའོ། །རྒྱལ་པོ་ཆེན་པོ་བཞི་པོ་དག་རྒྱུ་དང་རྐྱེན་གང་གི་ཕྱིར་མིའི་རྒྱལ་པོ་དེས་བདག་ཉིད་ཀྱིས་བཀུར་སྟི་དང་། མཆོད་པ་དེ་ལྟ་བུ་བྱ་དགོས་ཤེ་ན། མིའི་རྒྱལ་པོ་དེ་རྐང་པ་བཏེག་ཅིང་རྐང་པ་བཞག་པ་ན་གོམ་པ་རེ་རེ་ཞིང་སངས་རྒྱས་བཅོམ་ལྡན་འདས་བྱེ་བ་ཁྲག་ཁྲིག་བརྒྱ་སྟོང་པོ་རྣམས་ལ་བཀུར་སྟི་དང་། མཆོད་པ་དང་། རིམ་གྲོ་དང་། བླ་མར་བྱེད་པར་འགྱུར་ཞིང་། གཞན་ཡང་བསྐལ་པའི་གྲངས་དེ་སྙེད་ཀྱི་འཁོར་བའི་སྡུག་བསྔལ་ལས་
ཡང་དག་པར་འདའ་བར་འགྱུར་བས་སོ། །གཞན་ཡང་མ་འོངས་པའི་དུས་ན་བསྐལ་པའི་གྲངས་དེ་སྙེད་དུ་འཁོར་ལོས་སྒྱུར་བའི་རྒྱལ་པོའི་ལོངས་སྤྱོད་མཆོག་ཁྱད་པར་དུ་འཕགས་པ་དག་ལ་ལོངས་སྤྱོད་པར་འགྱུར། གོམ་པ་རེ་རེ་བོར་བའི་དབང་གིས་ཚེ་འདི་ཉིད་ལ་ཡང་བསོད་ནམས་འཕེལ་བས་རང་དབང་དུ་རྒྱལ་པོ་བྱེད་ཅིང་བསམ་གྱིས་མི་ཁྱབ་པའི་རྣམ་པར་སྨིན་པ་དང་ལྡན་པ་དང་། མང་པོ་ཀུན་གྱིས་བཀུར་བར་འགྱུར། བསྐལ་པ་འབུམ་ཕྲག་བརྒྱ་སྟོང་ཚད་མེད་པ་སྙེད་དུ་ལྷ་དང་མིས་ཡོངས་སུ་སྤྱད་པའི་རིན་པོ་ཆེ་སྣ་བདུན་གྱི་གཞལ་མེད་ཁང་དག་ལ་ལོངས་སྤྱོད་པར་འགྱུར། སྐྱེ་བ་ཐམས་ཅད་དུ་རྒྱལ་པོ་བྱེད་པར་འགྱུར། ཚེ་རིང་བར་འགྱུར། ཚིག་གི་སྤོབས་པ་དང་ལྡན་པས་ལྷ་དང་མི་ཀུན་གྱིས་མངོན་པར་ཡིད་ཆེས་པར་འགྱུར། འཇིགས་ཤིང་སྐྲག་པ་མེད་པར་འགྱུར། གྲགས་པ་ཆེན་པོ་དང་ལྡན་ཞིང་མང་པོ་ཀུན་གྱིས་ཡོངས་སུ་བལྟ་བར་འགྱུར། ལྷ་དང་མིའི་ནང་དུ་ཁྱད་པར་དུ་འཕགས་པའི་བདེ་བ་དག་ལ་ལོངས་སྤྱོད་པར་འགྱུར། མཐུ་སྟོབས་ཆེན་པོ་ཐོབ་པར་འགྱུར། གཟི་བྱིན་ཆེན་པོའི་ཡོན་ཏན་དང་ལྡན་པར་འགྱུར། ལུས་ཀྱི་མཚན་མ་གྱ་ནོམ་ཞིང་ཤིན་ཏུ་མཛེས་པས་དཔེ་ཟླ་མེད་པར་འགྱུར། ལྷ་དང་མིའི་སྟོན་པ་མཐོང་བར་འགྱུར། དགེ་བའི་བཤེས་གཉེན་དང་ཕྲད་པར་འགྱུར། བསོད་ནམས་ཀྱི་ཕུང་པོ་ཚད་མེད་པ་མངོན་པར་གྲུབ་ཅིང་ཕུན་སུམ་ཚོགས་པར་འགྱུར་རོ། །རྒྱལ་པོ་ཆེན་པོ་དག་འདི་ལྟར་ཤེས་པར་བྱ་སྟེ། མིའི་རྒྱལ་པོ་དེ་དག་གིས་ཡོན་ཏན་གྱི་ཕན་ཡོན་རྣམ་པ་སྣ་ཚོགས་ཚད་མེད་པ་དེ་ལྟ་བུ་མཐོང་བའི་ཕྱིར་བདག་ཉིད་དཔག་ཚད་གཅིག་ནས་དཔག་ཚད་བརྒྱ་སྟོང་དུ་མའི་བར་དུ་ཆོས་སྨྲ་བའི་མཁན་པོ་བསུ་བར་བྱ་ཞིང་། ཆོས་སྨྲ་བའི་མཁན་པོ་ལ་སངས་རྒྱས་ཀྱི་འདུ་ཤེས་བསྐྱེད་པར་བྱའོ། །སླར་གྲོང་དང་། གྲོང་ཁྱེར་དུ་ཕྱིན་ནས་ཀྱང་དེང་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་བདག་གི་ཕོ་བྲང་དུ་གཤེགས་ནས་བདག་གི་མཆོད་པ་བཞེས་ཏེ་བདག་ལ་ཆོས་སྟོན་པར་མཛད་དོ། །བདག་ཀྱང་ཆོས་ཐོས་པའི་དབང་གིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་བས་
འདི་ཉིད་སངས་རྒྱས་བཅོམ་ལྡན་འདས་བྱེ་བ་ཁྲག་ཁྲིག་བརྒྱ་སྟོང་དུ་མ་དང་ཕྲད་པར་གྱུར་པ་ཡིན་ནོ། །དེང་བདག་གིས་ནི་ཤིན་ཏུ་ཡངས་ཤིང་རྒྱ་ཆེ་བ་མཆོག་ཏུ་ཁྱད་པར་དུ་འཕགས་པའི་བདེ་བའི་ཡོ་བྱད་རྣམ་པ་སྣ་ཚོགས་ཀྱིས་འདས་པ་དང་། མ་བྱོན་པ་དང་། ད་ལྟར་བཞུགས་པའི་སངས་རྒྱས་རྣམས་ལ་མཆོད་ཅིང་རིམ་གྲོ་བྱས་སོ། །དེང་བདག་གིས་ནི་གཤིན་རྗེའི་འཇིག་རྟེན་དང་། སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་ཀྱི་སྡུག་བསྔལ་ཐམས་ཅད་རྩ་བ་ནས་བཏོན་ཏོ། །དེང་འཁོར་ལོས་སྒྱུར་བའི་རྒྱལ་པོ་དང་། བརྒྱ་བྱིན་དང་། ཚངས་པ་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་ཀྱི་དགེ་བའི་རྩ་བ་རབ་ཏུ་བསྐྱེད་དོ། །དེང་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་འཁོར་བའི་སྡུག་བསྔལ་ལས་བཏོན་ནས་མྱ་ངན་ལས་འདས་པའི་བདེ་བ་ལ་བཀོད་དོ། །དེང་ཚད་མེད་མཐའ་མེད་ཅིང་བསམ་གྱིས་མི་ཁྱབ་པའི་བསོད་ནམས་ཀྱི་ཕུང་པོ་རབ་ཏུ་བསགས་སོ། །ཕོ་བྲང་ནང་གི་སླས་དང་སྐྱེ་བོ་མང་པོ་བདེ་བ་ལ་བཀོད་ནས་ཡུལ་རྣམས་རབ་ཏུ་ཞི་བར་བྱས་པས། གནོད་པ་དང་། དུག་གདུག་པ་དང་། མི་མ་རུངས་པ་མེད་ཅིང་ཕྱོགས་གཞན་ནས་འོང་བའི་དགྲ་རྣམས་ཉེ་བར་འོངས་ནས་གནོད་པ་མི་བྱེད་པ་དང་། མྱ་ངན་དང་ནད་རྣམས་མེད་པར་འགྱུར་རོ་སྙམ་དུ་བསམ་པར་བྱའོ། །རྒྱལ་པོ་ཆེན་པོ་དག་འདི་ལྟར་རིག་པར་བྱ་སྟེ། དེའི་ཚེ་མིའི་རྒྱལ་པོ་དེ་དག་གིས་དེ་ལྟར་ཡང་དག་པའི་ཆོས་ལ་བཙུན་པར་བྱས་ཤིང་བླ་མར་བྱས་པ་དང་། མདོ་སྡེ་དམ་པ་འདི་ཡོངས་སུ་འཛིན་པའི་དགེ་སློང་དང་། དགེ་སློང་མ་དང་། ། དགེ་བསྙེན་དང་། དགེ་བསྙེན་མ་དག་ལ་མཆོད་པ་དང་། བཀུར་སྟི་དང་། བླ་མར་བྱས་ཤིང་བསྔགས་པ་བརྗོད་པ་ལས་བྱུང་བའི་དགེ་བའི་རྩ་བ་གང་ཡིན་པ་དེ་དག་དང་། བསོད་ནམས་མཆོག་གང་ཡིན་པ་དེ་དག་ཐོག་མ་ཁོ་ནར་ཁྱེད་འཁོར་དང་བཅས་པ་ལས་ཡོངས་སུ་སྔོ་བར་བྱེད་ན་མིའི་རྒྱལ་པོ་དེ་དག་བསོད་ནམས་ཆེན་པོའི་དགེ་བའི་ལས་ཀྱི་རྒྱུ་དང་། རྐྱེན་དང་ལྡན་པར་འགྱུར་བས་ཚེ་འདི་ཉིད་ལ་དབང་ཆེན་པོ་ཐོབ་ནས་གཟི་བྱིན་ཆེན་པོ་རབ་ཏུ་འཕེལ་བར་འགྱུར། དཔལ་དང་མཚན་མཆོག་རྣམས་ཀྱིས་རབ་ཏུ་བརྒྱན་པར་འགྱུར། ཕྱིར་རྒོལ་བ་ཐམས་ཅད་ཡང་དག་པའི་ཆོས་
ཀྱིས་ཚར་གཅོད་པར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་མིའི་རྒྱལ་པོ་གང་ལ་ལ་ཞིག་དེ་ལྟར་ཡང་དག་པའི་ཆོས་ལ་གུས་པས་བཀུར་སྟི་བགྱིས་ནས་མདོ་སྡེ་འདི་མཉན་པར་བགྱིད་པ་དང་། མདོ་སྡེ་འདི་འཛིན་པའི་འཁོར་བཞི་པོ་དག་ལ་བཀུར་སྟི་དང་། མཆོད་པ་དང་། བླ་མར་བགྱིས་ནས་བསྔགས་པ་བརྗོད་པར་བགྱིད་པ་ན། དེའི་ཚེ་མིའི་རྒྱལ་པོ་དེས་བདག་ཅག་རྣམས་དགའ་བར་བགྱི་བའི་སླད་དུ་ཆོས་ཀྱི་གདན་དང་ཉེ་བའི་ཕྱོགས་གཅིག་ཏུ་སྤོས་ཆབ་ཀྱིས་ཆག་ཆག་བཏབ་སྟེ། མེ་ཏོག་མཆོག་དམ་པ་མང་པོ་མངོན་པར་གཏོར་ནས་རྒྱལ་པོ་ཆེན་པོ་བཞི་མཆིས་པའི་སྟན་ཡང་བཤམས་ཏེ་བཏིང་བར་གྱུར་ན། བདག་ཅག་ཀྱང་རྒྱལ་པོ་དེ་དག་དང་ལྷན་ཅིག་ཡང་དག་པའི་ཆོས་ཉན་པར་བགྱིད་དོ། །རྒྱལ་པོ་དེས་ཀྱང་བདག་ཅག་ལ་ཕན་འདོགས་པའི་དགེ་བའི་རྩ་བ་ཅི་མཆིས་པའི་བསོད་ནམས་ཀྱི་སྐལ་བ་གང་ལགས་པ་བདག་ཅག་ལ་ཡང་ཡོངས་སུ་བསྔོ་བར་བགྱིའོ། །བཅོམ་ལྡན་འདས་དེའི་ཚེ་མིའི་རྒྱལ་པོ་དེས་ཆོས་སྨྲ་བ་ལ་ཆོས་བཤད་པར་གསོལ་བ་བཏབ་ནས་སྟན་ལ་མཆིས་པའི་ཚེ་བདག་ཅག་གི་སླད་དུ་སྤོས་མཆོག་དམ་པ་སྣ་ཚོགས་བསྲེགས་ནས་མདོ་སྡེ་འདི་ལ་མཆོད་པར་བགྱིའོ། །བཅོམ་ལྡན་འདས་དེའི་ཚེ་སྤོས་ཀྱི་བདུག་པ་དེ་དག་སྐད་ཅིག་མ་གཅིག་ལ་ནམ་མཁའ་ལ་མངོན་པར་འཕགས་ནས་བདག་ཅག་རྣམས་ཀྱི་གཞལ་མེད་ཁང་དུ་མཆིས་ཏེ། སྤོས་ཀྱི་གདུགས་སུ་འགྱུར་བས་བདག་ཅག་ལྷའི་འཁོར་རྣམས་ཀྱིས་ཀྱང་སྤོས་ཀྱི་དྲི་མཆོག་དེ་ཚོར་བར་འགྱུར། སྤོས་ཀྱི་དུ་བ་དེ་ཡང་གསེར་གྱི་འོད་དང་ལྡན་པས་བདག་ཅག་གནས་པའི་ཁང་ཁྱིམ་ནས་ཚངས་པའི་གནས་དང་། བརྒྱ་བྱིན་ལྷའི་དབང་པོ་དང་། ལྷ་མོ་སྤོབས་པ་ཆེན་མོ་དང་། ལྷ་མོ་དཔལ་ཆེན་མོ་དང་། སའི་ལྷ་མོ་བརྟན་མ་དང་། སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་རྒྱལ་པོ་དབང་ཕྱུག་ཆེན་པོ་དང་། ལག་ན་རྡོ་རྗེ་གསང་བའི་བདག་པོ་དང་། སྡེ་དཔོན་ཆེན་པོ་རིན་ཆེན་བཟང་དང་། འཕྲོག་མའི་བུ་འཁོར་ལྔ་བརྒྱ་པ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་རྒྱ་མཚོའི་གནས་ཀྱི་བར་ཐམས་ཅད་ཀྱང་
རབ་ཏུ་གསལ་བར་བགྱིད་དོ། །བཅོམ་ལྡན་འདས་འདི་ལྟ་བུ་ལ་སོགས་པའི་འཁོར་རྣམས་ཀྱིས་རང་རང་གི་གཞལ་མེད་ཁང་དུ་སྤོས་ཀྱི་བདུག་པ་དེས་སྐད་ཅིག་ཡུད་ཙམ་ཅིག་ལ་སྤོས་ཀྱི་གདུགས་སུ་གྱུར་པར་ཡང་མཐོང་ལ་སྤོས་ཀྱི་དྲི་ཡང་ཚོར་བར་འགྱུར། འོད་ཟེར་གྱི་ཁ་དོག་གིས་ལྷའི་གཞལ་མེད་ཁང་ཐམས་ཅད་གསལ་བར་བགྱིད་པ་ཡང་མཐོང་བར་འགྱུར་ལགས་སོ། །བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་བཀའ་སྩལ་པ། སྤོས་ཀྱི་འོད་ཟེར་དེས་གཞལ་མེད་ཁང་དེ་དག་འབའ་ཞིག་གསལ་བར་བྱས་ནས་སྤོས་ཀྱི་གདུགས་སུ་གྱུར་ཏེ་འོད་ཟེར་ཆེན་པོ་འགྱེད་པ་མ་ཡིན་ཏེ། མིའི་རྒྱལ་པོ་དེ་དག་ལག་པས་པོག་ཕོར་བཟུང་སྟེ། སྤོས་མཆོག་དམ་པ་བསྲེགས་ནས་མདོ་སྡེ་འདི་ལ་མཆོད་པ་བྱེད་པའི་ཚེ་སྤོས་ཀྱི་དུ་བ་དེ་ཐང་ཅིག་ཡུད་ཙམ་གཅིག་ལ་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་ཡོད་པའི་ཉི་མ་དང་། ཟླ་བ་བྱེ་བ་ཕྲག་བརྒྱ་དང་། རིའི་རྒྱལ་པོ་རི་རབ་བྱེ་བ་ཕྲག་བརྒྱ་དང་། གླིང་བཞི་པ་བྱེ་བ་ཕྲག་བརྒྱ་དང་། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོའི་ཁང་ཁྱིམ་ཐམས་ཅད་གསལ་བར་བྱས་ནས་ནམ་མཁའ་ཀུན་དུ་གང་ཞིང་རྒྱས་པ་དང་། སྤོས་ཀྱི་བདུག་པ་རྣམ་པ་སྣ་ཚོགས་གང་ཡིན་པ་དེ་དག་སྤྲིན་གྱི་གདུགས་སུ་གྱུར་ཏེ། གདུགས་དེ་ཡང་གསེར་གྱི་ཁ་དོག་དང་ལྡན་པས་ལྷའི་ཁང་ཁྱིམ་ཐམས་ཅད་གསལ་བར་བྱེད་དེ། འདི་ལྟར་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་སྤོས་ཀྱི་སྤྲིན་དང་། སྤོས་ཀྱི་གདུགས་རྣམ་པ་སྣ་ཚོགས་ཇི་སྙེད་ཡོད་པ་ཐམས་ཅད་ནི་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོའི་གཟི་བྱིན་གྱི་མཐུ་ལས་གྱུར་པ་ཡིན་ནོ། །མིའི་རྒྱལ་པོ་དེ་དག་ལག་ཏུ་པོག་ཕོར་ཐོགས་ནས་མདོ་སྡེ་འདི་ལ་མཆོད་པར་བྱེད་པའི་ཚེ་སྤོས་ཀྱི་བདུག་པ་རྣམ་པ་སྣ་ཚོགས་གང་ཡིན་པ་དེ་དག་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འབའ་ཞིག་ཏུ་ཁྱབ་པར་འགྱུར་བ་མ་ཡིན་གྱི། སྐད་ཅིག་ཡུད་ཙམ་གཅིག་གིས་ཕྱོགས་བཅུའི་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་དང་མཉམ་པ་བྱེ་བ་ཁྲག་
ཁྲིག་བརྒྱ་སྟོང་ཚད་མེད་མཐའ་མེད་པ་ཀུན་དུ་ཁྱབ་ཅིང་། སངས་རྒྱས་ཀྱི་ཞིང་རྣམས་ཀྱི་ནམ་མཁའ་ཀུན་དུ་སྤོས་ཀྱི་གདུགས་སུ་གྱུར་ནས་ཀུན་དུ་གསལ་བར་བྱེད་པ་ཡང་དེ་བཞིན་ཏེ། དེའི་ཚེ་སངས་རྒྱས་མང་པོ་དེ་དག་སྤོས་གྱ་ནོམ་པའི་དྲི་གང་ཡིན་པ་དེ་དག་ཀྱང་རིག་ཅིང་མཁྱེན། སྤོས་ཀྱི་བླ་རེ་དང་། གསེར་གྱི་ཁ་དོག་དེ་དག་ཀྱང་གཟིགས་ནས་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་བཅོམ་ལྡན་འདས་རྣམས་ཀྱིས་ཆོ་འཕྲུལ་བསྟན་ནས། སངས་རྒྱས་བཅོམ་ལྡན་འདས་མང་པོ་དེ་དག་གིས་མཐུན་པར་གཟིགས་ཤིང་སོ་སོར་བརྟགས་ཏེ། གསུང་མཐུན་པར་ཆོས་སྨྲ་བའི་མཁན་པོ་དེ་ལ་སྐྱེས་བུ་ཆེན་པོ་ཁྱོད་ཀྱིས་ཤིན་ཏུ་ཟབ་པའི་མདོ་སྡེ་གྱ་ནོམ་པ་འདི་རྒྱ་ཆེར་ཡོངས་སུ་སྤེལ་ནས། བསོད་ནམས་ཀྱི་ཕུང་པོ་ཚད་མེད་མཐའ་མེད་ཅིང་བསམ་གྱིས་མི་ཁྱབ་པ་ཡོངས་སུ་རྫོགས་པར་གྱུར་པ་ལེགས་སོ་ལེགས་སོ། ། ཞེས་བསྔགས་པ་བརྗོད་པར་འགྱུར་རོ། །གང་ལ་ལ་ཞིག་མདོ་སྡེ་འདི་ལྟ་བུ་མཉན་ནས་ཐོས་པའི་བསོད་ནམས་གང་ཡིན་པ་དེའི་ཚད་ཀྱང་ཤིན་ཏུ་མང་བ་ཡིན་ན། ཡི་གེར་འདྲི་བ་དང་། ལེན་པ་དང་། འཛིན་པ་དང་། ཀློག་པ་དང་། གཞན་དག་ལ་ཡང་དག་པར་སྟོན་པ་དང་། ཇི་སྐད་བསྟན་པ་བཞིན་དུ་མངོན་པར་སྒྲུབ་པ་ལྟ་སྨོས་ཀྱང་ཅི་དགོས། དེ་ཅིའི་ཕྱིར་ཞེ་ན། རིགས་ཀྱི་བུ་དག་སེམས་ཅན་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ཐོས་པར་གྱུར་པ་གང་ཡིན་པ་དེ་དག་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་ལྡོག་པར་མི་འགྱུར་བས་སོ། །དེའི་ཚེ་ཕྱོགས་བཅུའི་སངས་རྒྱས་ཀྱི་ཞིང་བྱེ་བ་ཁྲག་ཁྲིག་བརྒྱ་སྟོང་ཚད་མེད་གྲངས་མེད་པ་གང་གཱའི་ཀླུང་གི་བྱེ་མ་དང་མཉམ་པའི་སངས་རྒྱས་ཀྱི་ཞིང་དག་ན་བཞུགས་པའི་དེ་བཞིན་གཤེགས་པ་རྣམས་གསུང་གཅིག་ཏུ་ཆོས་ཀྱི་སྟན་ལ་འདུག་པའི་ཆོས་སྨྲ་བའི་མཁན་པོ་དེ་ལ་ལེགས་སོ་ལེགས་སོ། །ཞེས་བསྔགས་པ་འདི་བརྗོད་ནས་རིགས་ཀྱི་བུ་ཁྱོད་མ་འོངས་པའི་དུས་ན། བརྩོན་འགྲུས་ཀྱི་སྟོབས་ཀྱིས་དཀའ་བ་བརྒྱ་སྟོང་ཚད་མེད་པ་སྙེད་མངོན་པར་བསྒྲུབས་ཏེ། ཚོགས་ཡོངས་སུ་རྫོགས་པར་བྱས་ནས་འཕགས་པ་མང་
པོ་ལས་ཡང་དག་པར་འདས་ཏེ། ཁམས་གསུམ་ལས་ངེས་པར་བྱུང་ནས་གཙོ་བོ་མཆོག་ཏུ་གྱུར་ཏེ་བྱང་ཆུབ་ཀྱི་ཤིང་གི་རྒྱལ་པོའི་དྲུང་དུ་འདུག་ནས། ཁྱད་པར་དུ་འཕགས་པ་རྣམས་ཀྱིས་ཡོངས་སུ་བརྒྱན་པར་འགྱུར། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ན་རྐྱེན་དང་ལྡན་པའི་སེམས་ཅན་རྣམས་ཡོངས་སུ་སྐྱོབ་པར་འགྱུར། ཤིན་ཏུ་འཇིགས་སུ་རུང་བའི་བདུད་ཀྱི་དམག་ཚོགས་རྣམས་ཚར་གཅོད་པར་འགྱུར། ཤིན་ཏུ་རྣམ་པར་དག་པའི་ཆོས་རྣམས་དང་། ཤིན་ཏུ་ཟབ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རབ་ཏུ་རྟོགས་པར་འགྱུར་རོ། །རིགས་ཀྱི་བུ་ཁྱོད་རྡོ་རྗེའི་སྟན་ལ་འདུག་ནས་སངས་རྒྱས་རྣམས་ཀྱིས་རབ་ཏུ་བསྔགས་པའི་ཆོས་ཀྱི་འཁོར་ལོ་བླ་ན་མེད་པ། ཤིན་ཏུ་ཟབ་པ་གྱ་ནོམ་པ་རྣམ་པ་བཅུ་གཉིས་ཡོངས་སུ་བསྐོར་བར་འགྱུར། བླ་ན་མེད་པའི་ཆོས་ཀྱི་རྔ་ཆེན་པོ་མཆོག་ཏུ་གྱུར་པ་རབ་ཏུ་རྡུང་བར་འགྱུར། བླ་ན་མེད་པའི་ཆོས་ཀྱི་དུང་ཤིན་ཏུ་གྱ་ནོམ་པ་འབུད་པར་འགྱུར། བླ་ན་མེད་པའི་ཆོས་ཀྱི་རྒྱལ་མཚན་ཁྱད་པར་དུ་འཕགས་པ་སྒྲེང་བར་འགྱུར། བླ་ན་མེད་པའི་ཆོས་ཀྱི་སྒྲོན་མ་ཤིན་ཏུ་གསལ་བར་སྤར་བར་འགྱུར། བླ་ན་མེད་པའི་བདུད་རྩིའི་ཆོས་ཀྱི་ཆར་རབ་ཏུ་འབེབས་པར་འགྱུར། ཉོན་མོངས་པའི་དགྲའི་འཆིང་བ་ཚད་མེད་པ་ཡོངས་སུ་གཅོད་པར་འགྱུར། སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་མཐའ་མེད་ཅིང་འཇིགས་སུ་རུང་བའི་རྒྱ་མཚོ་ལས་ཡོངས་སུ་བཟླས་པར་འགྱུར། མུ་མེད་པའི་སྐྱེ་ཤིའི་འཁོར་བ་ལས་ཐར་བར་འགྱུར། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་དང་ཕྲད་པར་འགྱུར་རོ། །ཞེས་གསུང་བར་འགྱུར་རོ། །དེ་ནས་བཅོམ་ལྡན་འདས་ལ་རྒྱལ་པོ་ཆེན་པོ་བཞི་པོ་དག་གིས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ནི་སླད་མ་དང་། ད་ལྟར་གྱི་ཚེ་ཡོན་ཏན་ཚད་མ་མཆིས་པ་འདི་ལྟ་བུ་ཡོངས་སུ་རྫོགས་པར་བགྱིད་པས་དེའི་སླད་དུ་མིའི་རྒྱལ་པོ་གང་གིས་མདོ་སྡེ་ཤིན་ཏུ་གྱ་ནོམ་པ་འདི་ཐོས་པར་གྱུར་པ་དེ་ནི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་ལས་དགེ་བའི་རྩ་བ་བསྐྱེད་པ་ལགས་པས་
མིའི་རྒྱལ་པོ་དེ་དག་ལ་བདག་ཅག་རྣམས་ཡོངས་སུ་བསྲུང་ཞིང་རྗེས་སུ་དྲན་པར་བགྱིད་དོ། །གཞན་ཡང་བསོད་ནམས་ཀྱི་ཕན་ཡོན་ཚད་མ་མཆིས་པ་སྙེད་མཐོང་བའི་སླད་དུ་བདག་ཅག་རྒྱལ་པོ་ཆེན་པོ་བཞི་དང་། འཁོར་གཞན་རྣམས་དང་། ཡི་དགས་འབུམ་ཕྲག་བརྒྱ་སྟོང་ཚད་མ་མཆིས་པ་སྙེད་རང་རང་གི་གཞལ་མེད་ཁང་རྣམས་སུ་སྤོས་ཀྱི་བདུག་པའི་སྤྲིན་གྱི་གདུགས་དང་། ཆོ་འཕྲུལ་རྣམ་པ་སྣ་ཚོགས་པ་དེ་དག་མཐོང་བ། དེའི་ཚེ་བདག་ཅག་རང་གི་ལུས་མི་སྣང་བར་བགྱིས་ནས་ཆོས་ཉན་པའི་སླད་དུ་རྒྱལ་པོ་དེའི་ཕོ་བྲང་ཡོངས་སུ་གཙང་ཞིང་མཛེས་པར་བརྒྱན་པ་ཆོས་འཆད་པའི་གནས་སུ་མཆི་བར་འཚལ་ལོ། །དེ་བཞིན་དུ་ཚངས་པ་དང་། བརྒྱ་བྱིན་དང་། ལྷ་མོ་སྤོབས་པ་ཆེན་མོ་དང་། དཔལ་གྱི་ལྷ་མོ་ཆེན་མོ་དང་། སའི་ལྷ་མོ་བརྟན་མ་དང་། སྡེ་དཔོན་ཆེན་པོ་ཡང་དག་ཤེས་དང་། གནོད་སྦྱིན་གྱི་སྡེ་དཔོན་ཆེན་པོ་ཉི་ཤུ་རྩ་བརྒྱད་དང་། ལྷའི་བུ་དབང་ཕྱུག་ཆེན་པོ་དང་། ལག་ན་རྡོ་རྗེ་གསང་བའི་བདག་པོ་དང་། སྡེ་དཔོན་ཆེན་པོ་རིན་ཆེན་བཟང་དང་། འཕྲོག་མའི་བུ་འཁོར་ལྔ་བརྒྱ་པ་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་རྒྱ་མཚོ་དང་། ལྷ་དང་གནོད་སྦྱིན་ལ་སོགས་པའི་འཁོར་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་ཀྱང་ཆོས་ཉན་པའི་སླད་དུ་སོ་སོ་ནས་རང་རང་གི་ལུས་མི་སྣང་བར་བགྱིས་ཏེ། མིའི་རྒྱལ་པོ་དེའི་ཕོ་བྲང་ཤིན་ཏུ་ཁྱད་པར་དུ་འཕགས་པ་ཆོས་ཀྱི་གདན་ཤིན་ཏུ་མཛེས་པར་བགྱིས་པ་ཆོས་བཤད་པའི་གནས་སུ་མཆི་བར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དང་། འཁོར་གཞན་རྣམས་དང་། གནོད་སྦྱིན་རྣམས་ཐམས་ཅད་སེམས་རྩེ་གཅིག་ཏུ་མིའི་རྒྱལ་པོ་དེ་དག་དང་ལྷན་ཅིག་ཏུ་དགེ་བའི་བཤེས་གཉེན་བགྱིས་ནས་བླ་ན་མ་མཆིས་པའི་ཆོས་ཀྱི་སྦྱིན་བདག་ཆེན་པོར་འགྱུར་བའི་རྒྱུས་བདུད་རྩིའི་རོས་བདག་ཅག་ཚིམ་པར་གྱུར་པས། དེའི་སླད་དུ་བདག་ཅག་རྒྱལ་པོ་དེ་ལ་ཡོངས་སུ་བསྲུངས་ནས་གནོད་པ་རྣམས་ཡོངས་སུ་བསལ་ཏེ་བདེ་བ་ཐོབ་པར་བགྱིད་དོ། །དེའི་ཕོ་བྲང་དང་། གྲོང་དང་། གྲོང་ཁྱེར་དང་། ཡུལ་རྣམས་སུ་ཡང་སྡིག་པ་དང་ལྟས་
ངན་པ་ཐམས་ཅད་རབ་ཏུ་ཞི་བར་བགྱིད་དོ། །དེ་ནས་རྒྱལ་པོ་ཆེན་པོ་བཞི་ཅིག་ཅར་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མིའི་རྒྱལ་པོ་གང་ལ་ལ་ཞིག་རང་གི་ཡུལ་དུ་མདོ་སྡེ་འདི་བཞུགས་པར་གྱུར་ཀྱང་ཡོངས་སུ་སྤེལ་བར་ཡང་མི་བགྱིད་ལ་སེམས་ཀྱིས་ཀྱང་སྤོང་བར་བགྱིད་ཅིང་ཉན་པར་ཡང་མི་མོས། མཆོད་པར་ཡང་མི་བགྱིད། བླ་མར་ཡང་མི་བགྱིད། བསྔགས་པ་བརྗོད་པར་ཡང་མི་བགྱིད་ལ། འཁོར་བཞི་པོ་དག་མདོ་སྡེ་འཛིན་པ་མཐོང་བར་གྱུར་ན་ཡང་། བླ་མར་མི་བགྱིད་ཅིང་མཆོད་པ་དང་། རིམ་གྲོ་ཡང་མི་བགྱིད་ན་བདག་ཅག་དང་། འཁོར་གཞན་རྣམས་དང་། ལྷ་ཚད་མ་མཆིས་པ་རྣམས་ཀྱང་ཤིན་ཏུ་ཟབ་ཅིང་གྱ་ནོམ་པའི་ཆོས་འདི་ཐོས་པར་མི་འགྱུར་བས་བདུད་རྩིའི་རོ་ལ་རྒྱབ་ཀྱིས་ཕྱོགས་ཤིང་ཡང་དག་པའི་ཆོས་ཀྱི་རྒྱུད་ཀྱང་སྟོར་བར་འགྱུར། གཟི་བྱིན་དང་མཐུ་སྟོབས་ཀྱང་མ་མཆིས་པར་འགྱུར། ངན་འགྲོ་འཕེལ་བར་བགྱིད་ཅིང་ལྷ་དང་མི་རྣམས་ཡོངས་སུ་ཉམས་པར་འགྱུར། འཁོར་བའི་ཆུ་བོར་བྱིང་བར་འགྱུར་ཞིང་། མྱ་ངན་ལས་འདས་པའི་ཤུལ་དང་གོལ་བར་འགྱུར་བས་བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དང་། འཁོར་གཞན་རྣམས་དང་། གནོད་སྦྱིན་ལ་སོགས་པ་དེ་ལྟ་བུའི་དངོས་པོ་མཐོང་བར་གྱུར་ན་ཡུལ་དེ་ཡོངས་སུ་སྤོང་བར་བགྱིད་ལ། ཡོངས་སུ་སྐྱོབ་ཅིང་ཡོངས་སུ་བསྲུང་བའི་སེམས་ཀྱང་མ་མཆིས་པར་འགྱུར་བ་ལགས་སོ། །བདག་ཅག་འབའ་ཞིག་རྒྱལ་པོ་དེ་སྤོང་བར་བགྱིད་པ་མ་ལགས་ཀྱི་ཡུལ་སྐྱོང་བའི་ལྷ་དགེ་བ་ཆེན་པོ་ཚད་མ་མཆིས་པ་རྣམས་ཀྱང་ཡལ་བར་བོར་ནས་མཆི་བར་འགྱུར་ལགས་སོ། །དེ་ལྟར་ཡལ་བར་བོར་བའི་དབང་གིས་ཡུལ་དེར་གནོད་པ་རྣམ་པ་སྣ་ཚོགས་འབྱུང་བར་འགྱུར་ཞིང་རྒྱལ་ཐབས་ཀྱང་སྟོར་བར་འགྱུར། མིའི་ཚོགས་ཐམས་ཅད་ཀྱང་དགེ་བའི་སེམས་ནི་མ་མཆིས་ཀྱི་གཅིག་ལ་གཅིག་འཆིང་བ་དང་། གསོད་པ་དང་། གཤེ་བ་དང་། རྩོད་པ་དང་། ཕན་ཚུན་ཕྲ་མ་དང་། གྱ་གྱུ་བགྱིད་ཅིང་ནོངས་པ་མ་མཆིས་པ་ལ་ཆད་པ་གཅོད་པ་འབའ་ཞིག་སེམས་པས། ནད་དང་། རིམས་ནད་རྣམས་
འབྱུང་བར་འགྱུར། གཟའ་མཇུག་རིངས་ཡང་ནས་ཡང་དུ་འབྱུང་བར་འགྱུར། གདུགས་གཉིས་ཅིག་ཅར་འཆར་བར་འགྱུར། གཟའ་འཇུག་པ་ལ་རྒྱུན་ཆད་པ་མ་མཆིས་པར་འགྱུར། གཞའ་དཀར་ནག་གིས་བཀྲ་ཤིས་པ་མ་ལགས་པའི་མཚན་མ་སྟོན་པར་འགྱུར། སྐར་མདའ་ལྟུང་ཞིང་ས་གཡོ་བར་འགྱུར། ཁྲོན་པའི་ནང་ནས་སྒྲ་འབྱུང་བར་འགྱུར། ཆར་དང་རླུང་དྲག་པོ་དུས་མ་ལགས་པར་འབབ་ཅིང་ལྡང་བར་འགྱུར། རྟག་པར་མུ་གེའི་གནོད་པ་འབྱུང་བར་འགྱུར། འབྲུ་རྣམས་ཡོངས་སུ་སྨིན་པར་མི་འགྱུར། ཕས་ཀྱི་རྒོལ་བའི་དགྲ་མང་པོས་གཙེས་པས་ཡུལ་གྱི་མི་རྣམས་སྡུག་བསྔལ་གྱི་གནོད་པ་མང་པོ་མྱོང་བར་འགྱུར། ཡུལ་གྱི་ས་ཕྱོགས་ཀྱང་ཡིད་དུ་མི་མཆི་ཞིང་མངོན་པར་དགའ་བ་ཅི་ཡང་མ་མཆིས་པར་འགྱུར་ལགས་སོ། །བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དང་། ལྷ་བརྒྱ་སྟོང་ཚད་མ་མཆིས་པ་དང་། སྔོན་ཡུལ་སྐྱོང་བའི་ལྷ་དགེ་བ་ཆེན་པོ་རྣམས་ཀྱིས་ཡོངས་སུ་སྤངས་ནས། མཆི་བའི་ཚེ་ལྟས་ངན་པའི་དངོས་པོ་བརྒྱ་སྟོང་ཚད་མ་མཆིས་པ་དེ་ལྟ་བུ་དག་འབྱུང་བར་འགྱུར་ལགས་སོ། །བཅོམ་ལྡན་འདས་མིའི་རྒྱལ་པོ་གང་ལ་ལ་ཞིག་ཡུལ་སྐྱོང་ཞིང་རྟག་པར་བདེ་བའི་ལོངས་སྤྱོད་མྱོང་བར་འཚལ་བ་དང་། སྐྱེ་བོ་མང་པོ་རྣམས་བདེ་བ་ལ་འགོད་པར་འཚལ་བ་དང་། ཕས་ཀྱི་རྒོལ་བ་ཐམས་ཅད་ཚར་བཀུམ་ནས་རང་གི་ཡུལ་ཁམས་གཏན་དུ་རྒྱས་ཤིང་དར་བར་འཚལ་བ་དང་། ཡང་དག་པའི་བསྟན་པ་འཇིག་རྟེན་དུ་གནས་ནས་སྡུག་བསྔལ་གྱི་གནོད་པ་དང་། སྡིག་པ་མི་དགེ་བའི་ཆོས་རྣམས་ཉེ་བར་ཞི་བར་འགྱུར་བར་འཚལ་ན། བཅོམ་ལྡན་འདས་ཡུལ་གྱི་བདག་པོ་དེ་དག་གིས་གདོན་མི་འཚལ་བར་མདོ་སྡེའི་རྒྱལ་པོ་དམ་པ་འདི་མཉན་ནས་ཡོངས་སུ་གཟུང་བར་བགྱི་ཞིང་མདོ་སྡེ་འདི་ཀློག་པ་དང་། འདོན་པ་དང་། ལེན་པ་དང་། འཛིན་པ་དག་ལ་ཡང་བསྙེན་བཀུར་བ་དང་། རིམ་གྲོ་དང་། མཆོད་པར་བགྱིད་ན། བདག་ཅག་དང་། ཚད་མ་མཆིས་པའི་ལྷའི་འཁོར་གཞན་རྣམས་ཆོས་མཉན་པའི་དགེ་བའི་རྩ་བའི་བྱིན་གྱིས་བརླབས་ཀྱི་མཐུས་བླ་ན་མ་མཆིས་པའི་བདུད་རྩིའི་ཆོས་ཀྱི་རོ་མྱོང་བར་
འགྱུར་བས་བདག་ཅག་འཁོར་དང་བཅས་པ་ལ་སྨན་པར་འགྱུར་ཞིང་ལྷ་གཞན་རྣམས་ཀྱང་སྨན་ཡོན་མཆོག་ཐོབ་པར་འགྱུར་ལགས་སོ། །དེ་ཅིའི་སླད་དུ་ཞེ་ན། འདི་ལྟར་མིའི་རྒྱལ་པོ་དེས་སེམས་རྩེ་གཅིག་ཏུ་མདོ་སྡེ་འདི་མཉན་ནས་ཡོངས་སུ་བཟུང་བའི་སླད་དུའོ། །བཅོམ་ལྡན་འདས་འདི་ལྟར་ཚངས་པ་ཆེན་པོས་ཀྱང་སེམས་ཅན་རྣམས་ལ་རྟག་པར་འཇིག་རྟེན་དང་། འཇིག་རྟེན་ལས་འདས་པའི་བསྟན་བཅོས་ཡང་དག་པར་བསྟན། བརྒྱ་བྱིན་ལྷའི་དབང་པོས་ཀྱང་བསྟན་བཅོས་རྣམ་པ་སྣ་ཚོགས་ཡང་དག་པར་བསྟན། མངོན་པར་ཤེས་པ་ལྔ་དང་ལྡན་པའི་དྲང་སྲོང་རྣམས་ཀྱིས་ཀྱང་བསྟན་བཅོས་མང་པོ་བསྟན་ཏེ། བཅོམ་ལྡན་འདས་ཚངས་པ་དང་། བརྒྱ་བྱིན་དང་། མངོན་པར་ཤེས་པ་ལྔ་དང་ལྡན་པའི་དྲང་སྲོང་གིས་བསྟན་བཅོས་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་བསྟན་མོད་ཀྱི། འོན་ཀྱང་སངས་རྒྱས་བཅོམ་ལྡན་འདས་ཀྱིས་བྱམས་པ་དང་ཐུགས་རྗེས་ཐུགས་བརྩེ་བར་དགོངས་ནས་ལྷ་དང་མིའི་ཚོགས་རྣམས་ཀྱི་ཆེད་དུ་གསེར་འོད་དམ་པའི་མདོ་སྡེ་ཤིན་ཏུ་གྱ་ནོམ་པ་བཀས་བཤད་པ་གང་ལགས་པ་སྔར་བསྟན་པ་དེ་དག་དང་བསྒྲུན་ན། བྱེ་བ་ཁྲག་ཁྲིག་བརྒྱ་སྟོང་འགྱུར་སྙེད་ཀྱིས་ཆེས་ཁྱད་པར་དུ་འཕགས་པས་དཔེར་བགྱིར་ཡང་མ་མཆིས་ལགས་སོ། །དེ་ཅིའི་སླད་དུ་ཞེ་ན། འདིའི་དབང་གིས་འཛམ་བུའི་གླིང་ན་རྒྱལ་པོ་ཇི་སྙེད་མཆིས་པ་དེ་དག་ཡང་དག་པའི་ཆོས་ཀྱིས་འཇིག་རྟེན་བཏུལ་ནས་སེམས་ཅན་ལ་བདེ་བའི་དངོས་པོ་སྩལ་བ་དང་། བདག་དང་འཁོར་རྣམས་ཡོངས་སུ་བསྲུངས་ནས་སྡུག་བསྔལ་གྱི་གནོད་པ་མ་མཆིས་པར་བགྱིད་པ་དང་། གཞན་ཡང་ཕས་ཀྱི་རྒོལ་བས་གནོད་པ་བགྱིད་པ་མ་མཆིས་པ་དང་། སྡིག་པ་མི་དགེ་བ་ཅི་སྙེད་པ་ཐམས་ཅད་ཐག་རིང་དུ་སྤོང་བ་དང་། ཡུལ་གྱི་གདོན་བགེགས་རྣམས་ཡོངས་སུ་བསལ་ནས་ཡང་དག་པའི་ཆོས་ཀྱིས་འདུལ་ཞིང་རྩོད་པ་མ་མཆིས་པར་བགྱིད་པའི་སླད་དུའོ། །དེའི་སླད་དུ་མིའི་རྒྱལ་པོ་རྣམས་སོ་སོ་ནས་རང་གི་ཡུལ་དུ་ཆོས་ཀྱི་སྒྲོན་མ་སྦར་ཏེ་མཐའ་ཡས་པ་རྣམས་གསལ་བར་བགྱིས་ནས་ལྷའི་ཚོགས་དང་རང་རང་གི་འཁོར་རྣམས་ལ་སྨན་པར་བགྱིའོ། །བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་དང་།
ལྷ་དང་། གནོད་སྦྱིན་གྱི་འཁོར་ཚད་མ་མཆིས་པ་དང་། འཛམ་བུའི་གླིང་ན་ལྷ་དང་། ཡི་དགས་ཅི་མཆིས་པ་ཐམས་ཅད་རྒྱུ་དང་རྐྱེན་འདིའི་དབང་གིས་བླ་ན་མ་མཆིས་པའི་བདུད་རྩིའི་ཆོས་ཀྱི་རོ་མྱོང་བར་འགྱུར་ཞིང་གཟི་བྱིན་ཆེན་པོའི་མཐུ་སྟོབས་དང་ལྡན་པ། འོད་ཀྱི་སྣང་བ་ཕུན་སུམ་ཚོགས་པ་དང་། སེམས་ཅན་ཐམས་ཅད་བདེ་བར་འགྱུར་བ་དང་། གཞན་ཡང་སླད་མའི་དུས་ཀྱི་ཚེ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་ཤིང་བསམ་གྱིས་མི་ཁྱབ་པ་སྙེད་དུ་རྟག་པར་ཤིན་ཏུ་བདེ་བའི་ལོངས་སྤྱོད་མྱོང་བ་དང་། གཞན་ཡང་སངས་རྒྱས་ཚད་མ་མཆིས་པ་སྙེད་མཉེས་པར་བགྱིས་ནས་དགེ་བའི་རྩ་བ་བསྐྱེད་དེ། དེ་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བས། འདི་ལྟ་བུའི་སྨན་ཡོན་ཚད་མ་མཆིས་ཤིང་མཐའ་མ་མཆིས་པ་ཐམས་ཅད་ཀྱང་ཐུགས་རྗེ་ཆེན་པོ་ཚངས་པའི་འཁོར་ལས་ཡང་དག་པར་འདས་པ་མཁྱེན་པ་ཆེན་པོ་བརྒྱ་བྱིན་པས་ལྷག་པ། དཀའ་བ་རྣམ་པ་སྣ་ཚོགས་ཡོངས་སུ་སྤྱད་པ་མངོན་པར་ཤེས་པ་ལྔ་དང་ལྡན་པའི་དྲང་སྲོང་ལས་ཁྱད་པར་དུ་འཕགས་པར་གྱུར་པས་བྱེ་བ་ཁྲག་ཁྲིག་བརྒྱ་སྟོང་འགྱུར་སྙེད་ཀྱིས་ཆེས་ལྷག་པར་གྱུར་ཏེ་བརྗོད་དུ་མ་མཆིས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་སེམས་ཅན་རྣམས་ཀྱི་ཆེད་དུ་འདི་ལྟ་བུའི་མདོ་སྡེ་ཤིན་ཏུ་གྱ་ནོམ་པ་ཡང་དག་པར་བཀས་བཤད་ནས་འཛམ་བུའི་གླིང་གི་ཡུལ་གྱི་བདག་པོ་ཐམས་ཅད་དང་། མིའི་ཚོགས་མང་པོ་རྣམས་འཇིག་རྟེན་ན་ཆོས་ཀྱི་ཆོ་ག་དང་ཡུལ་ཡོངས་སུ་སྐྱོང་ཞིང་མི་རྣམས་གདུལ་བ་དང་བསྐུལ་བར་བྱ་བའི་དངོས་པོ་ཇི་སྙེད་པ་དེ་དག་གསལ་བར་ཁོང་དུ་ཆུད་པ་ལས་གྱུར་པ་ལགས་ཏེ། མདོ་སྡེའི་རྒྱལ་པོ་འདིའི་བྱིན་གྱིས་བརླབས་ཀྱི་མཐུས་ཐམས་ཅད་བདེ་བ་ཐོབ་པའི་བསོད་ནམས་ཀྱི་ཕན་ཡོན་འདི་དག་ཐམས་ཅད་ཀྱང་སྟོན་པ་ཆེན་པོ་ཤཱཀྱ་ཐུབ་པས་བྱམས་པ་དང་། ཐུགས་རྗེའི་མཐུས་མདོ་སྡེ་འདི་རྒྱ་ཆེར་ཡང་དག་པར་སྤེལ་བ་ལས་གྱུར་པ་ལགས་པས། བཅོམ་ལྡན་འདས་རྒྱུ་དང་རྐྱེན་དེའི་སླད་དུ་མིའི་རྒྱལ་པོ་རྣམས་ཀྱིས་མདོ་སྡེ་དམ་པ་འདི་
ཡོངས་སུ་བཟུང་སྟེ། མཆོད་པ་དང་། བཀུར་སྟི་དང་། བླ་མར་བགྱིས་ནས་བསྔགས་པ་བརྗོད་པར་བགྱིའོ། །དེ་ཅིའི་སླད་དུ་ཞེ་ན། འདི་ལྟ་བུ་ལ་སོགས་པའི་ཡོན་ཏན་ཁྱད་པར་དུ་འཕགས་པ་བསམ་གྱིས་མི་ཁྱབ་པ་དག་གིས་ཐམས་ཅད་ལ་སྨན་པར་བགྱིས་པས་དེའི་སླད་དུ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ཞེས་བགྱི་བ་ལགས་སོ། །དེ་ནས་བཅོམ་ལྡན་འདས་ཀྱིས་རྒྱལ་པོ་ཆེན་པོ་བཞི་པོ་དག་ལ་ཡང་འདི་སྐད་ཅེས་བཀའ་སྩལ་ཏོ། །ཁྱེད་ཅག་རྒྱལ་པོ་ཆེན་པོ་བཞི་དང་། འཁོར་གཞན་རྣམས་དང་ལྷའི་འཁོར་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་རྣམས་མིའི་རྒྱལ་པོ་དེ་དག་གལ་ཏེ་སེམས་རྩེ་གཅིག་ཏུ་མདོ་སྡེ་འདི་མཉན་ནས་མཆོད་པ་དང་། བཀུར་སྟི་དང་། བླ་མར་བྱས་ཏེ། བསྔགས་པ་བརྗོད་པ་མཐོང་ནས་ཡོངས་སུ་བསྲུངས་ཏེ། གནོད་པ་རྣམས་ཡོངས་སུ་སེལ་བར་བྱེད་ན། ཁྱེད་ཅག་རབ་ཏུ་བདེ་བ་མྱོང་བར་འགྱུར་བར་བྱེད་དོ། །གལ་ཏེ་འཁོར་བཞི་པོ་དག་གིས་མདོ་སྡེའི་རྒྱལ་པོ་འདི་རྒྱ་ཆེར་ཡང་དག་པར་སྤེལ་བར་བྱེད་ན་དེས་ནི་ལྷ་དང་མིའི་ནང་ན་སངས་རྒྱས་ཀྱི་མཛད་པ་རྒྱ་ཆེར་ཡང་དག་པར་བྱས་པ་ཡིན་པས་སེམས་ཅན་ཚད་མེད་པ་སྙེད་ལ་ཕན་བཏགས་པ་ཡིན་ཏེ། འདི་ལྟ་བུའི་གང་ཟག་གང་ཡིན་པ་དེ་ལ་ཁྱེད་ཀྱིས་རྟག་པར་བསྲུང་ཞིང་ཡོངས་སུ་བསྐྱབ་པར་བྱའོ། །འདི་ལྟ་བུའི་འཁོར་བཞི་པོ་དག་རྐྱེན་གཞན་གྱིས་ཕན་ཚུན་གནོད་པ་བྱེད་པ་མེད་པར་བྱོས་ལ། དེ་དག་ལུས་དང་སེམས་རབ་ཏུ་དབེན་ཞིང་བདེ་བས་མདོ་སྡེའི་རྒྱལ་པོ་འདི་ཡང་དག་པར་སྤེལ་ནས་ཕྱི་མའི་མཐའ་ཇི་སྲིད་པའི་བར་དུ་སེམས་ཅན་ཕན་འདོགས་པ་ལ་རྒྱུན་ཆད་པ་མེད་པར་བྱོས་ཤིག །དེ་ནས་ལྷའི་རྒྱལ་པོ་རྣམ་ཐོས་སྟན་ལས་ལངས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཡིད་བཞིན་གྱི་ནོར་བུ་རིན་པོ་ཆེའི་གཟུངས་ཀྱི་ཆོ་ག་མཆིས་ཏེ། སེམས་ཅན་གང་ལ་ལ་ཞིག་ཡོངས་སུ་འཛིན་པར་མོས་ན་ཡོན་ཏན་ཚད་མ་མཆིས་པ་དང་ལྡན་པར་འགྱུར་ཞིང་བདག་གིས་རྟག་པར་བསྲུངས་བས་སེམས་ཅན་དེ་སྡུག་བསྔལ་སྤངས་ནས་བདེ་བ་ཐོབ་པར་འགྱུར། བསོད་ནམས་དང་ཡེ་ཤེས་ཀྱི་ཚོགས་རྣམ་པ་གཉིས་
ཡོངས་སུ་རྫོགས་པར་འགྱུར་ལགས་སོ། །གང་ཞིག་ཡོངས་སུ་འཛིན་པར་འཚལ་བས་སྔར་ལུས་བསྲུང་བའི་སྔགས་འདི་གདོན་པར་བགྱིའོ། །སྔགས་ནི་འདི་ལྟ་སྟེ། ན་མོ་བཻ་ཤྲ་བ་ཎཱ་ཡ།མ་ཧཱ་རཱ་ཛཱ་ཡ། ཏདྱ་ཐཱ། ར་ར་ར་ར། ཀུ་ནོ་ཀུ་ནོ། ། ཁུ་ནོ་ཁུ་ནོ། རུ་ཎོ་རུ་ཎོ། ས་བ་ས་བ། ཀ་ར་ཀ་ར། མ་ཧཱ་བི་ཀ་རཾ། མ་ཧཱ་བི་ཀ་རཾ། མ་ཧཱ་ཀཱ་ལ། མ་ཧཱ་རཱ་ཛ། རཀྵ་རཀྵ་ཏུ། བདག་ཉིད་ཀྱི་མིང་བརྗོད་པར་བྱ། མཱཾ་སརྦ་སཏྭཱ་ནཱཉྩ་སྭཱ་ཧཱ། བཅོམ་ལྡན་འདས་སྔགས་འདི་འདོན་པས་སྐུད་པ་དཀར་པོ་ལ་ལན་བདུན་སྔགས་ཀྱིས་བཏབ་སྟེ་ལན་རེ་མདུད་པ་རེ་རེ་བོར་ནས་དཔུང་པ་ལ་བཅིངས་ན། དེའི་དོན་གདོན་མི་འཚལ་བར་འགྲུབ་པར་འགྱུར་ལགས་སོ། །སྤོས་མང་པོ་འདི་ལྟ་སྟེ། གུ་གུལ་དང་། ཙནྡན་དང་། དུ་རུསྐ་དང་། ཏ་ཀ་རའི་པོག་འདི་རྣམས་ཆ་མཉམ་པར་གཅིག་ཏུ་བསྲེས་ཏེ་སུག་པར་པོག་ཕོར་ཐོགས་ནས་པོག་བསྲེགས་ཏེ་མཆོད་པར་བགྱིའོ། །ཁྲུས་ཡོངས་སུ་དག་པར་བགྱིས་ཏེ། གོས་སར་པ་གཙང་མ་བགོས་ནས་ཁང་པ་དབེན་པར་སྔགས་བཟླས་ཏེ་ལྷའི་རྒྱལ་པོ་རྣམ་ཐོས་བདག་གཡར་དྲང་བར་བགྱི་ལགས་སོ། །སྔགས་ནི་འདི་ལྟ་སྟེ། ན་མོ་བཻ་ཤྲ་བ་ཎཱ་ཡ། མ་ཧཱ་དྷ་ན་དཱ་ཡ། ཙཎྜེ་ཤྭ་རཱ་ཡ། ཨཱ་ཀརྵ། ཨ་པ་ར་ཛི་ཏ། ཙཎྜེ་ཤྭ་ར། པ་ར་མ་ཀཱ་རུ་ཎི་ཀ །སརྦ་སཏྭཱ་ཧི་ཏ་ཙིནྟཱ།བདག་གི་མིང་བརྗོད། མ་མ་དྷ་ན་བརྔྷོ། པ་ར་ཡེ་ཤྭ་ར། སྭ་ཡཾ་ཨཱ་ཀརྵ་ཡ་སྭཱ་ཧཱ། སྔགས་འདི་ལན་བདུན་ཚང་བར་བཟླས་ན་དེའི་རྗེས་ལ་སྔགས་ཀྱི་སྙིང་པོ་གདོན་པར་བགྱིའོ། །སྔགས་འདོན་པའི་ཚེ་སྔར་དཀོན་མཆོག་གསུམ་ལ་གུས་པར་ཕྱག་བགྱིས་ནས་ལྷའི་དབང་པོ་རྣམ་ཐོས་ཀྱི་མིང་ནས་འདོན་པར་བགྱིད་ན། ནོར་རྫས་རྣམས་སྩོལ་ཅིང་སེམས་ཅན་རྣམས་ཅི་དང་ཅི་སྨོན་པ་ཐམས་ཅད་ཡོངས་སུ་རྫོགས་པར་བགྱིས་ནས་བདེ་བ་སྩོལ་བར་བགྱིད་དོ། །དེ་ལྟར་ཕྱག་བགྱིས་ནས་དེའི་རྗེས་ལ་རྒྱལ་པོ་རྣམ་ཐོས་ཀྱི་ཡིད་བཞིན་གྱི་ནོར་བུ་རིན་པོ་ཆེའི་སྔགས་ཀྱི་སྙིང་པོ་འདོན་པར་བགྱིད་ན། ཡིད་བཞིན་གྱི་བདེ་བ་སྩོལ་བར་བགྱིད་དོ། །དེ་ནས་ལྷའི་རྒྱལ་པོ་རྣམ་ཐོས་ཀྱིས་བཅོམ་ལྡན་འདས་ཀྱི་སྤྱན་སྔར་ཡིད་བཞིན་གྱི་ནོར་བུ་རིན་པོ་
ཆེའི་སྔགས་ཀྱི་སྙིང་པོ་སྨྲས་པ། ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་བ་ཎཱ་ཡ། མ་ཧཱ་རཱ་ཛཱ་ཡ། ཏདྱ་ཐཱ། སི་མི་སི་མི། སུ་མུ་སུ་མུ། ཙཎྜ་ཙཎྜ། ཙ་ར་ཙ་ར། ས་ར་ས་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། སནྡྡཱ་ཡ། ཨཱཏྨ་ནཱཾ་ནི་ཏ་ཏྱན་ཨནྟརྡྷཱ་ཏུ་སྭཱ་ཧཱ། ན་མོ་བཻ་ཤྲ་བ་ཎཱ་ཡ་སྭཱ་ཧཱ། དྷ་ན་དཱ་ཡ་སྭཱ་ཧཱ། མ་ནོ་ར་ཐ་པ་རི་པཱུ་ར་ཡ་སྭཱ་ཧཱ། སྔགས་འདོན་པའི་ཚེ་སྔར་ལན་སྟོང་ཚང་བར་བཟླས་ནས། དེའི་རྗེས་ལ་ཁང་པ་གཙང་མ་དག་ཏུ་བ་ལང་གི་ལྕི་བས་དོག་ས་ལ་ཞལ་ཞལ་བགྱིས་ཏེ་དཀྱིལ་འཁོར་ཆུང་ངུ་ཞིག་བགྱིས་ནས་ཟས་ཅི་འབྱོར་བས་སེམས་རྩེ་གཅིག་ཏུ་མཆོད་པར་བགྱིའོ། །རྟག་པར་པོག་སྤོས་དམ་པ་བསྲེགས་ནས་དུད་པ་རྒྱུན་མི་འཆད་པར་བགྱིའོ། །སྔགས་ཀྱི་སྙིང་པོ་སྔ་མ་གདུགས་མཚན་དུ་སེམས་དྲན་པ་ཉེ་བར་གཞག་ནས། བདག་ཉིད་ཀྱིས་ཐོས་པ་ཙམ་དུ་ཟློས་ཤིང་གཞན་གྱིས་རིག་པར་མི་བགྱིད་ན། དེའི་ཚེ་རྣམ་ཐོས་ཀྱི་བུ་ཤ་ནི་ཤི་ཞེས་བགྱི་བ་གཞོན་ནུའི་གཟུགས་ཉེ་བར་བསྟན་ཏེ། དྲུང་དུ་མཆིས་ནས་འདི་སྐད་དུ་ཅིའི་ཕྱིར་བདག་གི་ཕ་འབོད་ཅེས་འདྲི་བར་འགྱུར་བས་ལན་དུ་འདི་སྐད་ཅེས་བདག་དཀོན་མཆོག་གསུམ་མཆོད་པའི་དོན་དུ་ནོར་འཚལ་ན། དེ་བཞིན་དུ་སྩལ་བར་གསོལ་ཞེས་སྨྲ་བར་བགྱིའོ། །དེའི་ཚེ་ཤ་ནི་ཤི་ཚིག་དེ་ཐོས་པ་དང་སླར་ཕའི་ཐད་དུ་མཆིས་ནས་ཕ་ལ་འདི་སྐད་དུ་དེང་དགེ་བ་སྤྱོད་པའི་མི་ཞིག་སེམས་རྩེ་གཅིག་ཏུ་དཀོན་མཆོག་གསུམ་མཆོད་དེ། ནོར་གྱིས་ཕོངས་པའི་སླད་དུ་ཡབ་ལ་གསོལ་བ་འདེབས་སོ་ཞེས་བགྱིས་པ་དང་། ཕས་ཁྱོད་མྱུར་དུ་སོང་ལ་ཉིན་གཅིག་བཞིན་དུ་དེ་ལ་ཀཱརྞཱ་པ་ཎ་བརྒྱ་བརྒྱ་བྱིན་ཅིག་ཅེས་མཆི་བར་འགྱུར་ཏེ་སྔགས་འདོན་པས་དེ་ལྟ་བུའི་མཚན་མ་མཐོང་བར་གྱུར་ན་དོན་འགྲུབ་པར་འགྱུར་བར་རིག་པར་བགྱིས་ནས་གཅིག་པུ་ཁང་པ་གཙང་མའི་ནང་དུ་བདུག་སྤོས་བསྲེགས་ཏེ་མཆིས་ཉལ་བའི་ཁྲིའི་དྲུང་དུ་སྤོས་ཀྱི་སྤྲོག་མ་གཅིག་བཞག་ནས་རྟག་པར་ནམ་ལངས་པའི་ཚེ་སྤྲོག་མའི་ནང་དུ་ནོར་ཅི་ཐོབ་པ་བལྟ་བར་བགྱིའོ། །རྟག་པར་ནོར་ཐོབ་པའི་ཚེ་དེ་ཉིད་ཀྱི་གདུགས་ལ་སྤོས་དང་མེ་ཏོག་དང་། ཞལ་ཟས་ཀྱིས་དཀོན་མཆོག་གསུམ་ལ་མཆོད་ཅིང་དབུལ་ཕོངས་པ་རྣམས་ལ་
སྩལ་ནས་བས་པར་བགྱིའོ། །བསྲིས་ཏེ་གཞག་པར་མི་བགྱིའོ། །སེམས་ཅན་རྣམས་ལ་བྱམས་པ་དང་སྙིང་རྗེའི་བསམ་པ་བསྐྱེད་པར་བགྱི། ཞེ་སྡང་དང་གཡོ་སྒྱུ་དང་། གནོད་སེམས་ཀྱི་བསམ་པ་བསྐྱེད་པར་མི་བགྱིའོ། །གལ་ཏེ་ཞེ་སྡང་སྐྱེས་པར་གྱུར་ན། དངོས་གྲུབ་ཀྱི་མཐུ་སྟོར་བར་འགྱུར་བས་རྟག་པར་སེམས་བསྲུངས་ཏེ་ཞེ་སྡང་བསྐྱེད་པར་མི་བགྱིའོ། །གཞན་ཡང་སྔགས་འཛིན་པས་རྟག་པར་ལྷའི་རྒྱལ་པོ་རྣམ་ཐོས་བདག་དང་། བུ་དང་། བུ་མོ་དང་། འཁོར་རྣམས་རྗེས་སུ་དྲན་པར་བགྱིས་ཏེ་བསྔགས་པ་བརྗོད་ན་རྟག་པར་དགེ་བ་བཅུ་པོ་དག་གིས་བསྟངས་ཏེ། ལྷ་དེ་དག་བསོད་ནམས་ཀྱི་མཐུ་འཕེལ་ཞིང་རྒྱས་པ་དང་། དགེ་བ་མང་པོ་ཀུན་དུ་འཕེལ་ནས་བྱང་ཆུབ་མངོན་པར་རྟོགས་པར་འགྱུར་བར་བགྱིད་ན། ལྷ་མང་པོ་དེ་དག་གིས་དངོས་པོ་དེ་ལྟ་བུ་མཐོང་བ་དང་། ཐམས་ཅད་རབ་ཏུ་དགའ་བས་ལྷན་ཅིག་ཏུ་ཉེ་བར་མཆིས་ཏེ། སྔགས་འདོན་པའི་གང་ཟག་དེ་ལ་ཡོངས་སུ་བསྲུང་བར་བགྱིའོ། །གཞན་ཡང་སྔགས་འཛིན་པ་དེ་ཚེ་རིང་ཞིང་ལོ་ཚད་མ་མཆིས་པ་སྙེད་དུ་གནས་པར་འགྱུར། ངན་སོང་གསུམ་དང་རྟག་ཏུ་བྲལ་ཞིང་རྟག་པར་གནོད་པ་མ་མཆིས་པར་འགྱུར། ཡིད་བཞིན་གྱི་ནོར་བུ་རིན་པོ་ཆེ་དང་གཏེར་རྣམས་འཐོབ་པར་འགྱུར། མངོན་པར་ཤེས་པ་དང་། དབང་ཕྱུག་དང་། སྨོན་པ་ཐམས་ཅད་མངོན་པར་འགྲུབ་པར་འགྱུར། གལ་ཏེ་བློན་ཐབས་འཚལ་ན་ཡང་ཡིད་བཞིན་དུ་འགྲུབ་པར་འགྱུར། གཅན་གཟན་ཐམས་ཅད་ཀྱི་སྐད་ཀྱང་འཚལ་བར་འགྱུར་ལགས་སོ། །བཅོམ་ལྡན་འདས་གལ་ཏེ་སྔགས་འདོན་པའི་ཚེ་བདག་གི་ལུས་མངོན་དུ་སྟོན་པར་མཐོང་བར་འཚལ་ན་ཚེས་བརྒྱད་དམ། བཅྭ་ལྔའི་གདུགས་ལ་རས་དཀར་པོ་ལ་སངས་རྒྱས་ཀྱི་སྐུ་གཟུགས་ཤིག་སྦྱིན་དང་ཚོན་སྣ་ཚོགས་ཀྱིས་བརྒྱན་པ་བྲི་བར་བགྱིའོ། ། སྐུ་གཟུགས་འདྲི་བའི་རི་མོ་མཁན་དེ་ཡང་བསླབ་པའི་གནས་བརྒྱད་ཡང་དག་པར་བླང་བར་བགྱིའོ། །སངས་རྒྱས་ཀྱི་གཡོན་ཕྱོགས་སུ་དཔལ་གྱི་ལྷ་མོའི་གཟུགས་བྲི་བར་བགྱིའོ། །སངས་རྒྱས་ཀྱི་གཡས་ཕྱོགས་སུ་རྒྱལ་པོ་རྣམ་ཐོས་བདག་དང་། བུ་དང་། བུ་མོ་དང་།
འཁོར་རྣམས་ཀྱི་གཟུགས་བྲིས་ནས། མཆིས་པའི་སྟན་ལེགས་པར་བཤམས་ཏེ་མེ་ཏོག་སྣ་ཚོགས་བཀྲམ་ནས་སྤོས་མཆོག་དམ་པ་བསྲེགས་ཏེ་གདུགས་མཚན་རྒྱུན་ཆད་པ་མ་མཆིས་པར་མར་མེ་སྦར་བར་བགྱིའོ། །བཟའ་བ་དང་བཏུང་བ་མཆོག་དམ་པ་སྣ་ཚོགས་ཀྱིས་གུས་པའི་སེམས་བསྐྱེད་དེ་དུས་གསུམ་དུ་མཆོད་པ་བགྱིས་ནས་སྔགས་གདོན་པར་བགྱིའོ། །བརྙས་པའི་སེམས་བསྐྱེད་པར་མི་བགྱིའོ། །བདག་གཡར་འདྲེན་པའི་ཚེ་སྔགས་འདི་གདོན་པར་བགྱིའོ། །ན་མཿཤྲཱི་ཀཎྛཱ་ཡ། བུད་དྷཱ་ཡ། ན་མོ་བཻ་ཤྲ་བ་ཎཱ་ཡ། ཡཀྵ་རཱ་ཛཱ་ཡ། མ་ཧཱ་རཱ་ཛཱ་ཡ། ཨ་ཏི་རཱ་ཛཱ་ཡ། ན་མཿཤྲཱི་མ་ཧཱ་དེ་བི་ཡེ། ཏདྱ་ཐཱ། ཏ་ར་ཏ་ར། ཏུ་རུ་ཏུ་རུ། བ་ར་བ་ར། སུ་ཤུདྡྷོ་སུ་ཤུདྡྷོ། ཧ་ན་ཧ་ན། མ་ཎི་ཀ་ན་ཀ། བཛྲ་བཻ་ཌཱུཪྱ། མུཀྟི་ཀཱ་བཾ་ཀྲྀ་ཏ། ཤ་རཱི་རཱ་ཡ། སརྦ་ས་ཏྭཱ་ནཱཾ་ཧི་ཏ་ཀཱ་མ། བཻ་ཤྲ་བ་ཎ། ཤྲཱི་ཡ་དེ་བཱི་པྲ་བྷཱ་ཡ། ཨེ་ཧི་ཨེ་ཧི། མཱ་བི་ལམྦ། གཱུརྞ་་གཱུརྞ། པ་ར་སྱ། པ་ར་སྱ། ད་དཱ་ཧི་མ་མ་ཨ་མུ་ཀ་ནཱ་མ་སྱ། དརྴ་ན་ཀཱ་མ་སྱ་དརྴ་ནཾ། མ་མ་མ་ན། པྲ་ལ་ཧ་དཱ་ཡ་སྭཱ་ཧཱ། བཅོམ་ལྡན་འདས་བདག་གིས་སྔགས་འདོན་པའི་མི་དེ་དང་། གཞན་ཡང་དེ་ལྟ་བུའི་མཆོད་པ་རྒྱས་པར་བགྱིས་མཐོང་བར་གྱུར་ན་བྱམས་ཤིང་སྡུག་པ་དང་། རབ་ཏུ་དགའ་བའི་སེམས་བསྐྱེད་ནས་བདག་བྱིས་པ་གཞོན་ནུའི་གཟུགས་སམ། རྒན་པོའམ། དགེ་སློང་གི་གཟུགས་སུ་ལུས་བསྒྱུར་ནས་སུག་པ་ན་ཡིད་བཞིན་གྱི་ནོར་བུ་རིན་པོ་ཆེ་དང་གསེར་གྱི་སྣོད་ཐོགས་ཏེ། དཀྱིལ་འཁོར་གྱི་ནང་དུ་ཞུགས་ཏེ་ལུས་ཀྱིས་གུས་པ་བསྟན་ཏེ། སངས་རྒྱས་ཀྱི་མཚན་ནས་བརྗོད་དེ་སྔགས་འདོན་པ་དེ་ལ་ཁྱོད་ཀྱིས་བསམ་པ་བཞིན་དུ་སྨོན་པ་རྣམས་འགྲུབ་པར་བྱའོ་ཞེས་མཆི་བར་འགྱུར་ལགས་སོ། །ནགས་ཚལ་གྱི་ནང་དུ་མི་སྣང་བར་འཚལ་ལམ། རིན་པོ་ཆེ་མངོན་པར་འགྲུབ་པར་བགྱིད་པ་དང་། སྐྱེ་བོ་མང་པོ་ཀུན་གྱི་སྙིང་དུ་སྡུག་ཅིང་བཀུར་བར་འཚལ་ལམ། གསེར་དང་དངུལ་ལ་སོགས་པའི་ནོར་རྣམས་ཡོངས་སུ་གཉེར་བར་འཚལ་ལམ། སྔགས་ཀྱི་དངོས་གྲུབ་འགྲུབ་པར་འཚལ་ལམ། མངོན་པར་ཤེས་པ་དང་། ཚེ་ཤིན་ཏུ་རིང་
བ་དང་། ལོངས་སྤྱོད་མཆོག་དམ་པ་ཡོངས་སུ་གཉེར་བར་འཚལ་ན་ཡང་བསམ་པ་བཞིན་དུ་མི་འགྲུབ་པ་གང་ཡང་མ་མཆིས་པར་འགྱུར་ལགས་སོ། །དེང་བདག་གིས་རེ་ཞིག་དངོས་པོ་འདི་ཙམ་ཞིག་བསྟན་པ་ལགས་ཏེ། གལ་ཏེ་ཡང་གཞན་དག་ཡོངས་སུ་གཉེར་བར་བགྱིད་ན་ཡང་ཐམས་ཅད་ཇི་ལྟར་སྨོན་པ་བཞིན་དུ་མངོན་པར་འགྲུབ་ཅིང་རིན་པོ་ཆེའི་གཏེར་བས་པ་མ་མཆིས་པ་དང་། ཡོན་ཏན་མཐར་ཐུག་པ་མ་མཆིས་པ་ཡང་མངོན་པར་འགྲུབ་པར་འགྱུར་ལགས་སོ། །གལ་ཏེ་ཉི་མ་དང་ཟླ་བ་དོག་ས་ལ་ལྟུང་བར་འགྱུར་ཡང་སྲིད། ས་ཆེན་པོ་རེས་འགའ་གཞན་དུ་འགྱུར་ཡང་སྲིད་ཀྱི་བདག་གི་བདེན་པའི་ཚིག་འདི་ནི་ནམ་ཡང་ཆབ་འཚལ་བར་མི་འགྱུར་བས་རྟག་པར་ཡིད་བཞིན་གྱི་བདེ་བ་འཐོབ་པར་འགྱུར་ལགས་སོ། །བཅོམ་ལྡན་འདས་གང་ལ་ལ་ཞིག་གིས་མདོ་སྡེའི་རྒྱལ་པོ་འདི་ལེན་པ་དང་། ། འཛིན་པ་དང་། ཀློག་པ་དང་། ཁ་དོན་དུ་འདོན་པ་དེས་སྔགས་འདི་འདོན་པར་བགྱིད་ན། ངལ་བ་མ་མཆིས་པར་ཆོ་ག་རྣམས་མྱུར་དུ་འགྲུབ་པར་འགྱུར་ལགས་སོ། །བཅོམ་ལྡན་འདས་དེང་བདག་གིས་དབུལ་ཕོངས་པ་དང་། སྡུག་བསྔལ་གྱི་གནོད་པར་འགྱུར་བའི་སེམས་ཅན་དེ་དག་གི་ཆེད་དུ་སྔགས་འདི་བསྟན་པས་ཕན་ཡོན་ཆེན་པོ་ཐོབ་ནས་ཐམས་ཅད་ཕྱུག་ཅིང་སྐྱིད་པ་དང་རང་དབང་དང་ལྡན་ཞིང་གནོད་པ་མ་མཆིས་པ་འཐོབ་པར་འགྱུར་ལགས་སོ། །བདག་གིས་ནམ་འཚོའི་བར་དུ་གང་ཟག་དེའི་རྗེས་སུ་འབྲངས་ནས་ཡོངས་སུ་བསྲུངས་ཏེ། གནོད་པ་རྣམས་ཡོངས་སུ་སེལ་བར་བགྱིད་དོ། །གཞན་ཡང་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ཡོངས་སུ་བཟུང་ནས་སྤེལ་བར་བགྱིད་པ་དང་། སྔགས་འདོན་པའི་གང་ཟག་དེ་ལ་གོམ་པ་བརྒྱ་ཚུན་ཆད་དུ་འོད་ཀྱིས་ཀུན་དུ་གསལ་བར་བགྱིད་ལགས་སོ། །བདག་གིས་གནོད་སྦྱིན་བརྒྱ་སྟོང་ཇི་སྙེད་མཆིས་པ་ཡང་རྟག་པར་རིམ་གྲོ་བགྱིད་ཅིང་ཇི་ལྟར་མོས་པ་བཞིན་དུ་གཡོག་བགྱིས་པས་ཡིད་བཞིན་དུ་མི་འགྲུབ་པ་གང་ཡང་མ་མཆིས་ལགས་སོ། །བདག་གིས་བདེན་ཚིག་སྨྲ་བ་ལ་མི་མད་པ་མ་མཆིས་པར་ནི་བཅོམ་ལྡན་འདས་ཉག་གཅིག་དབང་དུ་གྱུར་ཅིང་
མཁྱེན་པར་གྱུར་པ་ལགས་སོ། །དེའི་ཚེ་ལྷའི་རྒྱལ་པོ་རྣམ་ཐོས་ཀྱིས་སྔགས་འདི་སྨྲས་པ་དང་། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་སེམས་ཅན་ཐམས་ཅད་ཀྱི་དབུལ་ཕོངས་པའི་སྡུག་བསྔལ་གྱི་དྲ་བ་དྲལ་ནས་བདེ་བ་འཐོབ་པར་བྱ་བ་དང་། མདོ་སྡེ་འདི་འཇིག་རྟེན་དུ་རྒྱ་ཆེར་སྤེལ་བའི་ཕྱིར་རིག་སྔགས་འདི་བཤད་པ་ལེགས་སོ་ལེགས་སོ། །དེ་ནས་རྒྱལ་པོ་ཆེན་པོ་བཞི་པོ་ཅིག་ཅར་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་བཅོམ་ལྡན་འདས་ཀྱི་ཞབས་གཉིས་ལ་མགོ་བོས་ཕྱག་བྱས་ཏེ། པུས་མོ་གཡས་པའི་ལྷ་ང་ས་ལ་བཙུགས་ནས་གུས་པས་ཐལ་མོ་སྦྱར་ཏེ། ཚིགས་སུ་བཅད་པ་གྱ་ནོམ་པ་དག་གིས་བཅོམ་ལྡན་འདས་ཀྱི་ཡོན་ཏན་ལ་མངོན་པར་བསྟོད་པ། བཅོམ་ལྡན་ཞལ་ནི་ཟླ་གཙང་ཉ་འདྲ་ཞིང་། །ཉི་མ་སྟོང་གིས་འོད་ཟེར་བཀྱེ་དང་མཚུངས། །སྤྱན་ནི་དག་ཡངས་པདྨ་སྔོན་པོ་འདྲ། །ཚེམས་དཀར་གཏམས་པ་དཔེར་ན་དུང་དང་མཚུངས། །བཅོམ་ལྡན་ཡོན་ཏན་མཐའ་མེད་རྒྱ་མཚོ་འདྲ། །རིན་ཆེན་གྱ་ནོམ་ཚད་མེད་བདེན་པ་བསགས། །མཁྱེན་པའི་ཡོན་ཏན་ཆབ་ཀྱིས་རྟག་རྒྱས་ཤིང་། །ཏིང་འཛིན་དམ་པ་བརྒྱ་སྟོང་རབ་ཏུ་གང་། །ཞབས་མཐིལ་འཁོར་ལོའི་མཚན་ནི་ཐམས་ཅད་མཛེས། །ལྟེ་བ་མུ་ཁྱུད་རྩིབས་སྟོང་ཀུན་རབ་མཉམ། །ཕྱག་དང་ཞབས་ཀྱི་དྲ་བས་ཀུན་བརྒྱན་པས། །ངང་པའི་རྒྱལ་བཞིན་མཚན་ནི་ཕུན་སུམ་ཚོགས། །བཅོམ་ལྡན་སྐུ་འོད་གསེར་གྱི་རི་བོ་འདྲ། །རྣམ་དག་ཁྱད་འཕགས་དཔེ་ཟླ་ཡོད་མ་མཆིས། །རི་རབ་བཞིན་དུ་ཡོན་ཏན་ཀུན་རྒྱས་པས། །བཅོམ་ལྡན་རི་རྒྱལ་ཁྱོད་ལ་བདག་ཕྱག་འཚལ། །མཚན་དང་དཔེ་བྱད་མཁའ་བཞིན་དཔག་མི་རིག །ཟླ་བ་སྟོང་བས་ལྷག་པར་འོད་ཟེར་བཀྱེ། །སྨིག་རྒྱུ་སྒྱུ་ལྟར་བསམ་གྱིས་མི་ཁྱབ་པས། །ཐུགས་ཞེན་མི་མངའ་ཁྱོད་ལ་བདག་ཕྱག་འཚལ། །དེའི་ཚེ་རྒྱལ་པོ་ཆེན་པོ་བཞི་པོ་དག་གིས་བཅོམ་ལྡན་འདས་ལ་མངོན་པར་བསྟོད་པ་དང་། བཅོམ་ལྡན་འདས་ཀྱིས་ཀྱང་ཚིགས་སུ་བཅད་དེ་བཀའ་སྩལ་པ། གསེར་འོད་དམ་པའི་མདོ་སྡེ་མཆོག་འདི་ནི། །བླ་མེད་སྟོབས་བཅུ་དག་གིས་རབ་ཏུ་
གསུངས། །ཁྱེད་ཅག་རྒྱལ་པོ་བཞི་ཡིས་རབ་བསྲུངས་ལ། །རབ་དགའ་ནུར་བ་མེད་པའི་སེམས་སྐྱེད་ཅིག །མདོ་སྡེའི་རིན་ཆེན་གྱ་ནོམ་ཟབ་མོ་འདི། །སེམས་ཅན་ཐམས་ཅད་བདེ་བ་སྦྱིན་པར་བྱེད། །སེམས་ཅན་དེ་དག་བདེ་བར་གྱུར་པའི་ཕྱིར། །རྟག་ཏུ་འཛམ་གླིང་རབ་ཏུ་སྤེལ་བར་འགྱུར། །སྟོང་ཆེན་འཇིག་རྟེན་ཁམས་ནི་འདི་དག་ཏུ། །སེམས་ཅན་རྣམ་པ་ཐམས་ཅད་ཇི་སྙེད་པ། །ཡི་དགས་དུད་འགྲོ་སེམས་ཅན་དམྱལ་བ་ཡི། །སྡུག་བསྔལ་འགྲོ་བ་དེ་ཀུན་སེལ་བར་བྱེད། །འཛམ་གླིང་འདི་ན་གནས་པའི་རྒྱལ་པོ་དང་། །གཞན་ཡང་སེམས་ཅན་རྣམ་པ་ཐམས་ཅད་ཀུན། །མདོ་སྡེའི་མཐུ་ཡིས་རྟག་ཏུ་རབ་དགའ་ཞིང་། །ནད་མང་སྡུག་བསྔལ་བསལ་བས་ཆོམ་རྐུན་མེད། །ཡུལ་དེར་མདོ་སྡེ་རྒྱ་ཆེར་སྤེལ་བའི་ཕྱིར། །རབ་བདེ་ལོ་ལེགས་མི་མཐུན་གནོད་པ་མེད། །གང་ཞིག་མདོ་སྡེའི་རྒྱལ་པོ་འདི་མཉན་ནས། །ཆོ་རིགས་བཙུན་ཞིང་དོན་ནི་གཉེར་བ་དང་། །ཡུལ་ན་ལོ་ལེགས་རྩོད་པ་མེད་འདོད་ན། །སེམས་ལ་བསམས་བཞིན་ཐམས་ཅད་འགྲུབ་པར་འགྱུར། །ཕ་རོལ་དགྲ་རྣམས་ཕྱིར་ནི་ཟློག་བྱེད་ཅིང་། །རང་གི་ཡུལ་ཁམས་རྟག་ཏུ་བདེ་བར་འགྱུར། །མདོ་སྡེའི་རྒྱལ་པོ་དམ་པ་འདི་ཡི་མཐུས། །སྡུག་བསྔལ་མང་སྤོང་མྱ་ངན་འཇིགས་པ་མེད། །རིན་ཆེན་ཤིང་རྒྱལ་ཁྱིམ་ན་གང་གནས་པ། །བདེ་བའི་ཡོ་བྱད་ཐམས་ཅད་སྐྱེད་པ་ལྟར། །མདོ་སྡེའི་རྒྱལ་པོ་དམ་པའང་དེ་བཞིན་ཏེ། །མི་རྒྱལ་དག་ལ་ཡོན་ཏན་མཆོག་སྦྱིན་བྱེད། །དཔེར་ན་རབ་དང་ཆུ་ནི་གྲང་མོ་ཡིས། །སྐོམ་པའི་གདུང་བ་རྣམས་ནི་སེལ་བ་ལྟར། །མདོ་སྡེའི་རྒྱལ་པོ་དམ་པའང་དེ་བཞིན་ཏེ། །བསོད་ནམས་མོས་པའི་སེམས་ནི་ཡོངས་རྫོགས་བྱེད། །མི་ཞིག་གྱ་ནོམ་རིན་ཆེན་གཟེབ་བདོག་ན། ལོངས་སྤྱོད་སེམས་ལ་བསམས་བཞིན་འབྱོར་པ་ལྟར། ། མདོ་སྡེའི་རྒྱལ་པོ་དམ་པའང་དེ་བཞིན་ཏེ། །བསོད་ནམས་བསམས་བཞིན་འགྲུབ་པས་རྒུད་པ་མེད། །ལྷ་ཡི་བདག་པོ་ཁྱེད་དང་ལྷ་ཚོགས་ཀྱིས། །མདོ་སྡེའི་རྒྱལ་པོ་འདི་ལ་མཆོད་པ་གྱིས། །གལ་ཏེ་བསྟན་བཞིན་མདོ་སྡེ་འཛིན་བྱེད་ན། །ཤེས་རབ་གཟི་བྱིན་ཐམས་ཅད་ཕུན་ཚོགས་
འགྱུར། །ད་ལྟར་ཕྱོགས་བཅུར་བཞུགས་པའི་སངས་རྒྱས་ཀུན། །མདོ་སྡེའི་རྒྱལ་པོ་འདི་ནི་གསུང་དགོངས་པས། །ཀློག་འདོན་འཛིན་པ་དག་ནི་གཟིགས་གྱུར་ན། །ལེགས་སོ་ངོ་མཚར་ཆེ་ཞེས་བསྔགས་པར་འགྱུར། །གང་ཞིག་མདོ་སྡེ་འདི་ནི་ཉན་བྱེད་ན། །ལུས་དང་སེམས་ནི་དགའ་རངས་མགུ་བ་སྐྱེ། །རྟག་པར་གནོད་སྦྱིན་བརྒྱ་ཕྲག་མང་པོ་ཡིས། །གང་དུ་གནས་པ་དེར་ནི་དེ་སྲུང་བྱེད། །འཇིག་རྟེན་ཁམས་འདིའི་ལྷ་ནི་མང་པོ་རྣམས། །དེ་ཡི་གྲངས་ནི་ཚད་མེད་བསམ་མི་ཁྱབ། །ཐམས་ཅད་མདོ་སྡེའི་དབང་པོ་འདི་ཉན་པས། །རབ་དགའ་སྲུང་བྱེད་ནུར་བ་ཅི་ཡང་མེད། །གང་ཞིག་མདོ་སྡེའི་རྒྱལ་པོ་འདི་མཉན་ན། །མཐུ་ཆེ་རབ་དཔའ་རྟག་པར་དབང་དང་ལྡན། །མི་ཡི་འཁོར་མང་ཐམས་ཅད་ཕན་འདོགས་པས། །གནོད་པ་རབ་སྤོང་སྣང་བ་འཕེལ་བར་བྱེད། །དེ་ནས་རྒྱལ་པོ་ཆེན་པོ་བཞི་པོ་དག་གིས་ཚིགས་སུ་བཅད་པ་འདི་དག་ཐོས་ནས། དགའ་མགུ་རངས་པར་གྱུར་པས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གིས་ནི་སྔོན་ཆད་ནམ་ཡང་མདོ་སྡེ་ཟབ་མོ་ཤིན་ཏུ་གྱ་ནོམ་པ་འདི་ལྟ་བུ་མ་ཐོས་སོ་ཞེས་རབ་ཏུ་དགའ་བའི་ཤུགས་ཀྱིས་མཆི་མ་བླགས་ཏེ་ངུས་ནས་ལུས་ཀྱི་ཡན་ལག་འདར་ཞིང་གཡོ་བར་གྱུར་ཏེ། ངོ་མཚར་རྨད་དུ་བྱུང་བའི་དངོས་པོ་བསམ་གྱིས་མི་ཁྱབ་པ་མངོན་དུ་གྱུར་པས་ལྷའི་མེ་ཏོག་མན་དཱ་ར་བ་དང་། མན་དཱ་ར་བ་ཆེན་པོ་དག་གིས་བཅོམ་ལྡན་འདས་ལ་མངོན་པར་གཏོར་ཏེ། ཁྱད་པར་དུ་འཕགས་པའི་མཆོད་པ་བྱས་ནས་ཡང་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྒྱལ་པོ་ཆེན་པོ་བཞི་ལ་སོ་སོ་ནས་གནོད་སྦྱིན་གྱི་འཁོར་ལྔ་བརྒྱ་ལྔ་བརྒྱ་མཆིས་པས་རྟག་པར་གནས་དེ་དང་དེ་དག་ཏུ་མདོ་སྡེ་འདི་དང་། ཆོས་སྨྲ་བ་དེ་དག་ལ་ཡོངས་སུ་བསྲུང་ཞིང་ཡོངས་སུ་སྐྱོབ་པར་བྱེད་པས་ཡེ་ཤེས་ཀྱི་སྣང་བས་ཡོངས་སུ་སྐྱོབ་པར་བགྱིད་དོ། །གལ་ཏེ་མདོ་སྡེ་འདིའི་ཚིག་དང་། དོན་བསྐྱུད་པ་ཞིག་མཆིས་ན་ཡང་བདག་ཅག་གིས་དེ་དག་རྗེས་སུ་དྲན་ཞིང་མི་བསྐྱུད་པར་བགྱི་བའི་སླད་དུ་གཟུངས་ཀྱི་སྒོ་ཤིན་ཏུ་ཁྱད་པར་དུ་
འཕགས་པ་སྩལ་ནས་ཡོངས་སུ་རྫོགས་པར་བགྱིད་དོ། །གཞན་ཡང་མདོ་སྡེའི་རྒྱལ་པོ་མཆོག་དམ་པ་འདི་གང་དུ་གནས་པ་དེར་སེམས་ཅན་རྣམས་ལ་རྒྱ་ཆེར་སྤེལ་ཞིང་མྱུར་དུ་ནུབ་པར་མི་འགྱུར་བར་བགྱིད་ལགས་སོ། །དེའི་ཚེ་བཅོམ་ལྡན་འདས་ཀྱིས་འཁོར་མང་པོའི་ནང་དུ་ཆོས་འདི་བསྟན་པ་ན་སེམས་ཅན་ཚད་མེད་པ་སྙེད་ཤེས་རབ་ཆེན་པོའི་སྤོབས་པ་ཐོབ་ནས་བསོད་ནམས་ཀྱི་ཕུང་པོ་ཚད་མེད་པ་སྙེད་ཡོངས་སུ་བསྡུས་ཏེ་མྱ་ངན་གྱི་གནོད་པ་དང་བྲལ་ནས་རབ་ཏུ་དགའ་བའི་སེམས་ཐོབ་པར་གྱུར་པས་བསྟན་བཅོས་སྣ་ཚོགས་ལ་རབ་ཏུ་མཁས་པ་དང་། ངེས་པར་འབྱུང་བའི་ལམ་ཐོབ་ནས་ཕྱིར་མི་ལྡོག་པར་གྱུར་པས་མྱུར་དུ་བྱང་ཆུབ་མངོན་པར་རྟོགས་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་རྒྱལ་པོ་ཆེན་པོ་བཞི་པོ་དག་གིས་ཡུལ་བསྲུང་བའི་ལེའུ་སྟེ་བཅུ་གཉིས་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་བདུན་པ། དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཆོས་ཀྱི་རྣམ་གྲངས་མངོན་པར་ཞེན་པ་མེད་པའི་གཟུངས་ཞེས་བྱ་བ་ཡོད་དེ། དེ་ནི་བྱང་ཆུབ་སེམས་དཔའ་རྣམས་ཀྱིས་མངོན་པར་བསྒྲུབ་པར་བྱ་བའི་ཆོས། འདས་པའི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བཟུང་བ། བྱང་ཆུབ་སེམས་དཔའ་རྣམས་ཀྱི་མར་གྱུར་པ་ཡིན་ནོ། །ཞེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་གཟུངས་ཞེས་བགྱི་བ་གང་གི་ཚིག་དང་དོན་གང་ཞིག་ལགས། བཅོམ་ལྡན་འདས་གཟུངས་ཞེས་བགྱི་བ་ནི་ཕྱོགས་དང་གནས་མ་ལགས་པ། ཕྱོགས་དང་གནས་མ་ལགས་པ་ཡང་མ་ལགས་སོ་ཞེས་དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཤཱ་རིའི་བུ་ལ་བཀའ་སྩལ་པ། ཤཱ་རིའི་བུ་ཁྱོད་ཐེག་པ་ཆེན་པོ་ལ་ཡང་དག་པར་གཞོལ་ཞིང་། ཐེག་པ་ཆེན་པོ་ལ་མངོན་པར་ཡིད་ཆེས་ནས། ཐེག་པ་ཆེན་པོ་ལ་བླ་མར་བྱས་
པ་ལེགས་སོ་ལེགས་སོ། །ཁྱོད་ཀྱིས་ཇི་སྐད་སྨྲས་པ་བཞིན་དུ་གཟུངས་ཞེས་བྱ་བ་ནི་ཕྱོགས་དང་གནས་ཡོད་པ་ཡང་མ་ཡིན། ཕྱོགས་དང་གནས་མེད་པ་ཡང་མ་ཡིན། ཆོས་ཀྱང་མ་ཡིན། ཆོས་མ་ཡིན་པ་ཡང་མ་ཡིན། འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན། དངོས་པོ་ཡང་མ་ཡིན། དངོས་པོ་མ་ཡིན་པ་ཡང་མ་ཡིན། རྐྱེན་ཡང་མ་ཡིན། རྐྱེན་མ་ཡིན་པ་ཡང་མ་ཡིན། འདུ་བྱེད་ཀྱང་མ་ཡིན། འདུ་བྱེད་མ་ཡིན་པ་ཡང་མ་ཡིན། ཆོས་སྐྱེ་བར་འགྱུར་བ་ཡང་མེད། ཆོས་འགག་པར་འགྱུར་བ་ཡང་མེད་མོད་ཀྱི། འོན་ཀྱང་བྱང་ཆུབ་སེམས་དཔའ་རྣམས་ལ་ཕན་གདགས་པའི་ཕྱིར་དེ་སྐད་དུ་བསྟན་པ་ཡིན་ཏེ་གཟུངས་འདིའི་ཡོན་ཏན་གྱི་ནུས་པ་དང་ཡང་དག་པའི་ལམ་གྱི་ཚུལ་དང་མཐུ་སྟོབས་རྣམ་པར་གཞག་པ་གང་ཡིན་པ་དེ་ནི་སངས་རྒྱས་རྣམས་ཀྱི་ཡོན་ཏན་དང་། སངས་རྒྱས་རྣམས་ཀྱི་ཚུལ་ཁྲིམས་དང་། སངས་རྒྱས་རྣམས་ཀྱི་བསླབ་པ་དང་། སངས་རྒྱས་རྣམས་ཀྱི་གསང་བའི་དགོངས་པ་དང་། སངས་རྒྱས་རྣམས་ཀྱི་སྐྱེ་བའི་འབྱུང་གནས་ཡིན་པའི་ཕྱིར་མངོན་པར་ཞེན་པ་མེད་པའི་གཟུངས་མཆོག་ཏུ་གྱ་ནོམ་པའི་ཆོས་ཀྱི་རྣམ་གྲངས་ཞེས་བྱའོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་བདེ་བར་གཤེགས་པས་བདག་ལ་གཟུངས་འདིའི་ཆོ་ག་གང་ལགས་པ་བཀས་བཤད་དུ་གསོལ། གལ་ཏེ་བྱང་ཆུབ་སེམས་དཔའ་རྣམས་ཀྱིས་འདི་ལ་གནས་པར་གྱུར་ན་བླ་ན་མ་མཆིས་པའི་བྱང་ཆུབ་ལས་ལྡོག་པར་མི་འགྱུར་ཞིང་ཡང་དག་པའི་སྨོན་ལམ་ཡོངས་སུ་རྫོགས་ནས་གནས་མ་མཆིས་པ་དང་། རང་བཞིན་གྱི་སྤོབས་པ་འཐོབ་པར་འགྱུར་བ་དང་། ངོ་མཚར་རྨད་དུ་བྱུང་བའི་དངོས་པོ་ཐོབ་ནས་འཕགས་པའི་ལམ་ལ་གནས་པར་འགྱུར་བ་འདི་དག་ཐམས་ཅད་ཀྱང་གཟུངས་འདི་ཐོབ་པར་འགྱུར་བའི་སླད་དུའོ། །བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ལེགས་སོ་ལེགས་སོ། །དེ་དེ་བཞིན་ནོ། །དེ་དེ་བཞིན་ཏེ། ཁྱོད་ཀྱིས་ཇི་སྐད་སྨྲས་པ་
བཞིན་དུ་བྱང་ཆུབ་སེམས་དཔའ་གང་ལ་ལ་ཞིག་གིས་གཟུངས་འདི་ཐོབ་པར་གྱུར་ན། གང་ཟག་དེ་ནི་སངས་རྒྱས་དང་ཐ་དད་པ་མེད་པར་རིག་པར་བྱའོ། །གང་ལ་ལ་ཞིག་གིས་བྱང་ཆུབ་སེམས་དཔའ་དེ་ལ་མཆོད་ཅིང་བཀུར་སྟི་བྱེད་པ་དང་། བླ་མར་བྱེད་ཅིང་ཡོ་བྱད་སྦྱིན་པར་བྱེད་ན་དེ་ནི་སངས་རྒྱས་རྣམས་ལ་མཆོད་པ་བྱས་པ་ཡིན་པར་རིག་པར་བྱའོ། །ཤཱ་རིའི་བུ་གང་ཟག་གཞན་གང་ལ་ལ་ཞིག་གཟུངས་འདི་ཐོས་ནས་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། མངོན་པར་ཡིད་ཆེས་པར་གྱུར་པ་དེ་ལ་འདི་ལྟར་སངས་རྒྱས་དང་ཐ་དད་པ་མེད་པར་བཀུར་སྟི་བྱས་ནས་མཆོད་ཅིང་རིམ་གྲོ་བྱས་ན་རྒྱུ་དང་རྐྱེན་དེས་བླ་ན་མེད་པའི་འབྲས་བུ་ཐོབ་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གཟུངས་སྔགས་བཀའ་སྩལ་པ། ཏདྱ་ཐཱ། སན་དྷཱ་ར་ཎི། ཨུཏ་དྷཱ་ར་ཎི། སུ་སཾ་པྲ་ཏི་ཥྛི་ཏེ། སུ་ནཱ་མ། སུ་པྲ་ཏིཥྛི་ཏེ། བི་ཛ་ཡ་བ་ལ། སཏྟྱ་པྲ་ཏི་ཛྙཱ། སུ་ཨཱ་རོ་ཧ། ཛྙཱ་ན་པྲ་ཏི། ཨུཏྤཱ་ད་ནི། ཨ་བ་ནཱ་བ་ནི། ཨ་བྷི་ཥིཉྩ་ནི། ཨ་བྷི་བ་ཡ་ཧཱ་ར། ཤུ་བྷ་བ་ཏི། སུ་ནི་ཤྲི་ཏ། བ་ཧུ་གུཾ་བྷ། ཨ་བྷི་བ་དཱ་སྭཱ་ཧཱ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་མངོན་པར་ཞེན་པ་མེད་པའི་གཟུངས་ཀྱི་ཚིག་འདི་ལ་བྱང་ཆུབ་སེམས་དཔའ་གང་ལ་ལ་ཞིག་རབ་ཏུ་གནས་ནས་ཡང་དག་པར་འཛིན་པར་བྱེད་ན། གང་ཟག་དེ་ནི་བསྐལ་པ་གཅིག་གམ། བསྐལ་པ་བརྒྱའམ། བསྐལ་པ་སྟོང་ངམ། བསྐལ་པ་བརྒྱ་སྟོང་གི་བར་དུ་ཡང་དག་པའི་སྨོན་ལམ་བསྐྱེད་པ་མཐར་ཐུག་པ་མེད་ཅིང་རལ་གྲི་དང་། དབྱུག་པ་དང་། དུག་དང་། ཆུ་དང་། མེ་དང་། གཅན་གཟན་མ་རུངས་པ་རྣམས་ཀྱིས་དེའི་ལུས་ལ་གནོད་པར་བྱེད་མི་ནུས་པར་རིག་པར་བྱའོ། །དེ་ཅིའི་ཕྱིར་ཞེ་ན། ཤཱ་རིའི་བུ་མངོན་པར་ཞེན་པ་མེད་པའི་གཟུངས་འདི་ནི་འདས་པའི་སངས་རྒྱས་རྣམས་ཀྱི་ཡུམ་དང་། མ་བྱོན་པའི་སངས་རྒྱས་རྣམས་ཀྱི་ཡུམ་དང་། ད་ལྟར་བཞུགས་པའི་སངས་རྒྱས་རྣམས་ཀྱི་ཡུམ་ཡིན་པས་སོ། །ཤཱ་རིའི་བུ་གང་ལ་ལ་ཞིག་གིས་གྲངས་མེད་པ་བཅུའི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་རིན་
པོ་ཆེ་སྣ་བདུན་གྱིས་ཡོངས་སུ་བཀང་སྟེ་དེ་བཞིན་གཤེགས་པ་ལ་ཕུལ་ནས་བསྐལ་པ་གྲངས་མེད་པའི་བར་དུ་ན་བཟའ་དང་། ཞལ་ཟས་མཆོག་དམ་པ་རྣམ་པ་སྣ་ཚོགས་ཀྱི་མཆོད་པ་བྱས་པ་བས། གང་ལ་ལ་ཞིག་གིས་གཟུངས་འདི་ནི་ཐ་ན་ཚིག་གཅིག་ཙམ་ཡང་དག་པར་བཟུང་བ་ལས་བྱུང་བའི་བསོད་ནམས་གང་ཡིན་པ་དེ་ཆེས་རབ་ཏུ་མང་ངོ་། །དེ་ཅིའི་ཕྱིར་ཞེ་ན། ཤཱ་རིའི་བུ་མངོན་པར་ཞེན་པ་མེད་པའི་གཟུངས་ཤིན་ཏུ་ཟབ་པའི་ཆོས་ཀྱི་རྣམ་གྲངས་འདི་ནི་དེ་བཞིན་གཤེགས་པ་རྣམས་ཀྱི་ཡུམ་ཡིན་པའི་ཕྱིར་རོ། །དེའི་ཚེ་ཚེ་དང་ལྡན་པ་ཤཱ་རིའི་བུ་དང་། འཁོར་མང་པོ་རྣམས་ལ་དེ་སྐད་ཅེས་བཀའ་སྩལ་པ་ཐོས་ནས་ཐམས་ཅད་རབ་ཏུ་དགའ་བར་གྱུར་པས་ཐམས་ཅད་ཀྱིས་ཡོངས་སུ་འཛིན་པར་མོས་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་མངོན་པར་ཞེན་པ་མེད་པའི་གཟུངས་ཀྱི་ལེའུ་སྟེ་བཅུ་གསུམ་པའོ།། །།དེ་ནས་བཅོམ་ལྡན་འདས་ཀྱིས་འཁོར་མང་པོའི་ནང་དུ་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཁྱོད་ཀྱིས་འདི་ལྟར་ཤེས་པར་བྱ་སྟེ། ཡིད་བཞིན་གྱི་ནོར་བུ་རིན་པོ་ཆེ་ཞེས་བྱ་བའི་གཟུངས་གནོད་པ་ཐམས་ཅད་རིང་དུ་སྤོང་བ་འབྲུག་དང་གློག་མ་རུངས་པ་ཐམས་ཅད་འགོག་ཅིང་འཇིལ་བར་བྱེད་པ་ཡོད་དེ། དེ་ནི་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱིས་གསུངས་པ་ཡིན་པས། ངས་ཀྱང་དེང་མདོ་སྡེ་འདི་ལྷ་དང་མི་རྣམས་ལ་ཕན་པ་དང་། འཇིག་རྟེན་ལ་བརྩེ་བ་དང་། ཐམས་ཅད་ཡོངས་སུ་བསྲུངས་ནས་བདེ་བ་འཐོབ་པར་བྱ་བའི་ཕྱིར་འཁོར་མང་པོ་ཁྱེད་ལ་ཡང་དག་པར་བསྟན་པར་བྱའོ། །དེ་ནས་འཁོར་མང་པོ་དང་། ཚེ་དང་ལྡན་པ་ཀུན་དགའ་བོས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་པ་དང་། སོ་སོ་ནས་སེམས་རྩེ་གཅིག་ཏུ་བཅོམ་ལྡན་འདས་ཀྱི་ཞལ་དུ་བལྟས་ནས་རིག་སྔགས་མཉན་པར་གྱུར་ཏོ། །བཅོམ་ལྡན་འདས་ཀྱིས་བཀའ་སྩལ་པ། ཁྱེད་ཅག་ལེགས་པར་ཉོན་ཅིག །འདི་ནས་ཤར་ཕྱོགས་ན་གློག་འོད་སྣང་བའི་རྒྱལ་པོ་ཨ་ག་ཏ་
ཞེས་བྱ་བ་དང་། ལྷོ་ཕྱོགས་ན་གློག་འོད་སྣང་བའི་རྒྱལ་པོ་ཤ་ཏེ་རུ་ཞེས་བྱ་བ་དང་། ནུབ་ཕྱོགས་ན་གློག་འོད་སྣང་བའི་རྒྱལ་པོ་ཙུ་ཏེ་ཀྭང་ཞེས་བྱ་བ་དང་། བྱང་ཕྱོགས་ན་གློག་འོད་སྣང་བའི་རྒྱལ་པོ་སུ་ཏ་མ་ནི་ཞེས་བྱ་བ་སོ་སོ་ན་ཡོད་དེ། རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་གིས་གློག་གི་རྒྱལ་པོ་འདི་དག་གི་མིང་ཐོས་ཤིང་ཕྱོགས་ཤེས་པར་གྱུར་ན། གང་ཟག་དེ་འཇིགས་ཤིང་སྐྲག་པའི་དངོས་པོ་ཐམས་ཅད་དང་བྲལ་བར་འགྱུར་ཞིང་གློ་བུར་གྱི་གནོད་པ་ཐམས་ཅད་རབ་ཏུ་ཞི་བར་འགྱུར་རོ། །གལ་ཏེ་གང་དུ་གནས ་པའི་གནས་དེར་ཕྱོགས་བཞིའི་གློག་གི་རྒྱལ་པོ་འདི་དག་གི་མིང་ཡི་གེར་བྲིས་པར་གྱུར་ན་གང་དུ་གནས་པའི་གནས་དེ་དག་ཏུ་འབྲུག་དང་གློག་གིས་འཇིགས་པ་མེད་ཅིང་གདོན་བགེགས་དང་གནོད་པའི་སྒྲིབ་པ་མེད་པར་འགྱུར། དུས་མ་ཡིན་པར་གློ་བུར་དུ་འཆི་བ་ཐམས་ཅད་ཐག་རིང་དུ་སྤོང་བར་འགྱུར་རོ། །དེ་ནས་བཅོམ་ལྡན་འདས་ཀྱིས་གཟུངས་སྔགས་བཀའ་སྩལ་པ། ཏདྱ་ཐཱ། ནི་མི་ནི་མི་ནི་མིནྡྷ་རི་ཨིན་དྲེ་སྟྲཻ་ལོ་ཀ །ལོ་ཀ་ནི། ཤི་རི་ཤོ་ལ་བ་ཏི། ཧ་རཀྵ་ཧ་རཀྵ། བདག་མིང་འདི་ཞེས་བྱ་བའི་གནས་འདིར་འཇིགས་ཤིང་སྐྲག་པ་ཐམས་ཅད་དང་། སྡུག་བསྔལ་ཐམས་ཅད་ཀྱིས་འཚེ་བ་དང་། འབྲུག་དང་། གློག་དང་། ཐོག་འབབ་པ་དང་། གློ་བུར་དུ་འཆི་བར་འགྱུར་བ་ཇི་སྙེད་པ་ཐམས་ཅད་དང་བྲལ་བར་གྱུར་ཅིག་སྭཱ་ཧཱ། དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྱན་རས་གཟིགས་ཀྱི་དབང་ཕྱུག་འཁོར་མང་པོའི་ནང་དུ་འདུག་པའི་སྟན་ལས་ལངས་ཏེ། བླ་གོས་ཕྲག་པ་གཅིག་ལ་གཟར་ནས་གུས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཀྱང་དེང་ལྷ་དང་མི་རྣམས་ལ་སྨན་པར་བགྱི་བ་དང་། འཇིག་རྟེན་ལ་བརྩེ་བ་དང་། ཐམས་ཅད་ཡོངས་སུ་བསྲུངས་ནས་བདེ་བ་འཐོབ་པར་བགྱི་བ་དང་། མཐུ་ཆེན་པོའི་སྟོབས་དང་ལྡན་ཞིང་སྨོན་པ་རྣམས་ཡིད་བཞིན་དུ་འགྲུབ་པར་བགྱི་བའི་སླད་དུ་བཅོམ་ལྡན་འདས་ཀྱི་སྤྱན་སྔར་ཡིད་བཞིན་གྱི་ནོར་བུ་རིན་པོ་ཆེའི་གཟུངས་གང་
ལགས་པ་མདོ་ཙམ་ཞིག་བསྟན་པར་བགྱིའོ། །དེ་ནས་གཟུངས་སྔགས་སྨྲས་པ། ཏདྱ་ཐཱ། ཀ་ཊེ། བི་ཀ་ཊེ། ནི་ཀ་ཊེ། པྲ་ཏྱརྠི་ཀེ །པྲ་ཏྱ་མི་ཏྲེ། ཤུདྡྷེ་མུཀྟེ། བི་མ་ལེ། པྲ་བྷཱ་སྭ་རེ། ཨཎྜ་རེ། པཎྜ་རེ། ཤྭེ་ཏེ། པཎྜ་ར་བཱ་སི་ནི། ཧ་རི་ཀཎྜ་རི། པིངྒ་ལ། ཨ་ཀྵི་ད་དྷི་མུ་ཁི་རཀྵ་རཀྵ། བདག་མིང་འདི་ཞེས་བགྱི་བའི་གནས་འདིར་འཇིགས་ཤིང་སྐྲག་པ་ཐམས་ཅད་དང་། སྡུག་བསྔལ་གྱིས་འཚེ་བ་ནས་གློ་བུར་དུ་འཆི་བའི་བར་ཐམས་ཅད་བྲལ་བར་གྱུར་ཅིག །བདག་གིས་སྡིག་པའི་དངོས་པོ་ངན་པ་ཐམས་ཅད་མི་མཐོང་ཞིང་རྟག་པར་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གི་ཐུགས་རྗེ་ཆེན་པོའི་བྱིན་གྱིས་བརླབས་ཀྱིས་དགོངས་ཤིང་ཡོངས་སུ་བསྲུང་བར་གྱུར་ཅིག་སྭཱ་ཧཱ། དེ་ནས་བྱང་ཆུབ་སེམས་དཔའ་ལག་ན་རྡོ་རྗེ་གསང་བའི་བདག་པོ་སྟན་ལས་ལངས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ཀྱང་དེང་ལྷ་དང་མི་རྣམས་ལ་སྨན་པ་ཆེར་བགྱི་བ་དང་། འཇིག་རྟེན་ལ་བརྩེ་བ་དང་། ཐམས་ཅད་ཡོངས་སུ་བསྲུངས་ནས་གཟི་བྱིན་ཆེན་པོའི་མཐུ་དང་ལྡན་པ་དང་། སྨོན་པ་རྣམས་ཡིད་བཞིན་དུ་འགྲུབ་པར་བགྱི་བའི་ཆེད་དུ་མི་ཕམ་པ་ཞེས་བགྱི་བའི་གཟུངས་བཤད་པར་བགྱིའོ། །དེ་ནས་གཟུངས་སྔགས་སྨྲས་པ། ཏདྱ་ཐཱ། མུ་ནི་མུ་ནི། མུ་ནི་ན་དྷ་རི། མུ་ནི་མ་ཏི་མ་ཏི། སུ་མ་ཏི། མ་ཧཱ་མ་ཏི། ཧཱ་ཧཱ་ཧཱ་ཧཱ་མ་བྷ་ཡནྟཱི་ཏི་པཱ་པ། བཛྲ་པཱ་ཎི་ཨཱ་ཧ་དྲཱ་བི་ཌ་སྭཱ་ཧཱ། བཅོམ་ལྡན་འདས་བདག་གིས་གཟུངས་སྔགས་འདི་ནི་མི་ཕམ་པར་སྲུང་བ་ཞེས་བགྱི་སྟེ། སྐྱེས་པའམ་བུད་མེད་གང་ལ་ལ་ཞིག་སེམས་རྩེ་གཅིག་ཏུ་ཡང་དག་པར་བཟུང་སྟེ་ཡི་གེར་འདྲི་བ་དང་། ཀློག་པ་དང་། འདོན་པ་དང་། མི་བསྐྱུད་ཅིང་རྗེས་སུ་དྲན་པར་བགྱིད་ན་བདག་གདུགས་མཚན་དུ་དེ་ལ་ཡོངས་སུ་བསྲུང་བར་བགྱིད་པས་འཇིགས་ཤིང་སྐྲག་པ་ཐམས་ཅད་ནས་གློ་བུར་དུ་འཆི་བ་ཐམས་ཅད་ཐག་རིང་དུ་སྤོང་བར་འགྱུར་ལགས་སོ། །དེ་ནས་མི་མཇེད་ཀྱི་འཇིག་རྟེན་གྱི་ཁམས་ཀྱི་བདག་པོ་ཚངས་པ་ཆེན་པོ་སྟན་ལས་ལངས་ཏེ། གུས་པས་ཐལ་མོ་སྦྱར་ནས་བཅོམ་ལྡན་འདས་
ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཡང་ཤིན་ཏུ་གྱ་ནོམ་པའི་ཆོས་ཀྱི་རྣམ་གྲངས་ཀྱི་གཟུངས་ལྷ་དང་མི་རྣམས་ལ་རྒྱ་ཆེར་ཕན་འདོགས་པ། འཇིག་རྟེན་ལ་རབ་ཏུ་འཚེ་བ་ཐམས་ཅད་ཡོངས་སུ་སྲུང་བར་བགྱིད་པ། གཟི་བྱིན་ཆེན་པོའི་མཐུ་དང་ལྡན་པ། སྨོན་པ་རྣམས་ཡིད་བཞིན་དུ་འགྲུབ་པར་བགྱིད་པ་མཆིས་ཏེ། གཟུངས་སྔགས་དེ་བཤད་པར་བགྱིའོ། །ཏདྱ་ཐཱ། ཧི་ལི་མི་ལི། ཙི་ལི་སྭཱ་ཧཱ། བྲཧྨཔཱུ་རེ་སྭཱ་ཧཱ། བྲཧྨ་སྭ་རེ་སྭཱ་ཧཱ། བྲཤྤུ་བྷི་སུ་གརྦྷེ། པུཥྤ་སཾ་སྟ་རེ་སྭཱ་ཧཱ། བཅོམ་ལྡན་འདས་བདག་གི་གཟུངས་འདི་ནི་ཚངས་པའི་ཆད་པས་བཅད་པ་ཞེས་བགྱི་སྟེ་གཟུངས་འདི་འཛིན་པ་དག་ལ་ཡོངས་སུ་བསྲུང་བར་བགྱིད་པས་མྱ་ངན་གྱིས་གནོད་པ་དང་། སྡིག་པའི་ལས་རྣམས་ཐག་རིང་དུ་སྤོང་ཞིང་། གློ་བུར་དུ་འཆི་བའི་བར་ཐམས་ཅད་ཀྱང་ཡོངས་སུ་སྤོང་བར་བགྱིད་དོ། །དེ་ནས་བརྒྱ་བྱིན་ལྷའི་དབང་པོ་སྟན་ལས་ལངས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཡང་བཛྲ་ཤ་ནི་ཞེས་བགྱི་བའི་གཟུངས་རིག་སྔགས་ཆེན་མོ་འཇིགས་ཤིང་སྐྲག་པ་དང་། གདོན་བགེགས་ཐམས་ཅད་རབ་ཏུ་སེལ་བ། གློ་བུར་དུ་འཆི་བའི་བར་ཐམས་ཅད་ཐག་རིང་དུ་སྤོང་བ་སྡུག་བསྔལ་ལས་དྲངས་ནས་བདེ་བ་སྩོལ་བ་ལྷ་དང་མི་རྣམས་ལ་སྨན་པར་བགྱིད་པ་མཆིས་ཏེ་གཟུངས་དེ་བཤད་པར་བགྱིའོ། །ཏདྱ་ཐཱ། ནི་བ་རཱ་ཎི། བནྡྷ་མཱ་དནྟི་མ་ཏི་ཏི་ཏི་ཏི། གཽ་རཱི་གནྡྷ་རི། ཙཎྜ་ལི། མཱ་ཏངྒི་། པུཀྐ་སི། པ་ར་ཎ་ལེ་ཧི་ན་མ་དྷྱ་མ་དྷ་རི་ཎི། མ་ལ་ནི། ད་ལ་མ་ད་དེ། ཙ་དྲཱ་བཱ་ཀྲཱི། ཤ་བ་རི་ཤ་བ་རི་སྭཱ་ཧཱ། དེ་ནས་ལྷའི་རྒྱལ་པོ་རྣམ་ཐོས་དང་། ལྷའི་རྒྱལ་པོ་ཡུལ་འཁོར་སྲུང་དང་། ལྷའི་རྒྱལ་པོ་འཕགས་སྐྱེས་པོ་དང་། ལྷའི་རྒྱལ་པོ་མིག་མི་བཟང་ཅིག་ཅར་སྟན་ལས་ལངས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་ཡང་སེམས་ཅན་ཐམས་ཅད་ལ་མི་འཇིགས་པ་སྦྱིན་པ་ཞེས་བགྱི་བའི་གཟུངས་སྡུག་བསྔལ་གྱིས་ཉོན་མོངས་པ་ལས་རྟག་པར་ཡོངས་སུ་བསྐྱབས་ནས་བདེ་བ་ཐོབ་པར་བགྱིད་
པ་ཚེ་འཕེལ་བར་བགྱིད་ཅིང་ནད་ཀྱི་སྡུག་བསྔལ་མ་མཆིས་པར་བགྱིད་པ་གློ་བུར་དུ་འཆི་བའི་བར་ཐམས་ཅད་ཐག་རིང་དུ་སྤོང་བར་བགྱིད་པ་མཆིས་ཏེ་གཟུངས་སྔགས་དེ་བརྗོད་པར་བགྱིའོ། །ཏདྱ་ཐཱ། པུཥྤེ། སུ་པུཥྤེ། དྷུ་མ་པ་རི་ཧཱ་རེ། ཨཱཪྱ་པྲ་ཤ་སྟེ་ཤཱནྟི། ནིརྨུ་ཀྟེ། མཾ་ག་ལྱ། ཧི་ར་ཎྱ་གརྦྷེ་སྟུ་ཏེ། སྟ་བི་ཏེ་སྭཱ་ཧཱ། དེ་ནས་ཡང་ཀླུའི་རྒྱལ་པོ་ཆེན་པོ་མང་པོ་འདི་ལྟ་སྟེ། ཀླུའི་རྒྱལ་པོ་ནཱ་ག་སི་དང་། ཀླུའི་རྒྱལ་པོ་གློག་འོད་དང་། ཀླུའི་རྒྱལ་པོ་མ་དྲོས་པ་དང་། ཀླུའི་རྒྱལ་པོ་གློག་ལྕེ་དང་། ཀླུའི་རྒྱལ་པོ་གྱ་ནོམ་འོད་ལ་སོགས་པ་སྟན་ལས་ལངས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ལ་ཡང་ཡིད་བཞིན་གྱི་ནོར་བུ་རིན་པོ་ཆེ་ཞེས་བགྱི་བའི་གཟུངས་གློག་མ་རུངས་པ་འགོག་པར་བགྱིད་པ། འཇིགས་ཤིང་སྐྲག་པ་རྣམས་རབ་ཏུ་སེལ་བ། ལྷ་དང་མི་རྣམས་ལ་རྒྱ་ཆེར་ཕན་འདོགས་པ། འཇིག་རྟེན་ལ་སྙིང་བརྩེ་བ་ཐམས་ཅད་ཡོངས་སུ་སྐྱོབ་པ། གཟི་བྱིན་ཆེན་པོའི་མཐུ་དང་ལྡན་པ། སྨོན་པ་རྣམས་ཡིད་བཞིན་དུ་འགྲུབ་པ། གློ་བུར་དུ་འཆི་བའི་བར་ཐམས་ཅད་ཐག་རིང་དུ་སྤོང་བ། དུག་ཐམས་ཅད་རབ་ཏུ་ཞི་བར་བགྱིད་པ། བྱད་སྟེམས་དང་། སྔགས་དང་། བཀྲ་མི་ཤིས་པའི་དངོས་པོ་ཐམས་ཅད་ཡོངས་སུ་སེལ་བར་བགྱིད་པ་མཆིས་ཏེ། བདག་ཅག་གཟུངས་སྔགས་འདི་བཅོམ་ལྡན་འདས་ལ་འབུལ་ན་ཐུགས་རྗེས་ཐུགས་བརྩེ་བར་དགོངས་ཏེ། བདག་ཅག་ཀླུའི་འགྲོ་བ་འདི་དང་བྲལ་ནས་སེར་སྣའི་འདོད་པ་གཏན་དུ་སྤང་བའི་སླད་དུ་བཞེས་སུ་གསོལ། དེ་ཅིའི་ཕྱིར་ཞེ་ན། སེར་སྣའི་འདོད་པ་འདིའི་དབང་གིས་འཁོར་བ་ན་སྡུག་བསྔལ་མང་པོ་མྱོང་བར་འགྱུར་བས། བདག་ཅག་སེར་སྣའི་འདོད་པའི་ས་བོན་ཡོངས་སུ་གཅོད་པར་འཚལ་ལགས་སོ། །དེ་ནས་གཟུངས་སྔགས་སྨྲས་པ། ཏདྱ་ཐཱ། ཨ་ཙ་ལེ། ཨ་མ་རེ། ཨ་མྲྀ་ཏེ། ཨཀྵ་ཡེ། ཨ་བྷི་ཡེ། པུ་ཎྱཻ་པ་ཪྱ་བ་ཏེ། སརྦ་པཱ་པཾ་པྲ་ཤ་མཱ་ནི་ཡེ་སྭཱ་ཧཱ། ཨཱརྻ་པུ་ཎྱ་སོ་བཱ་ཀི་ཡེ་སྭཱ་ཧཱ། བཅོམ་ལྡན་འདས་རིགས་ཀྱི་བུའམ། རིགས་ཀྱི་བུ་མོ་ལ་ལ་ཞིག་རིག་སྔགས་འདི་གཡར་ཁ་ནས་བརྗོད་
པར་བགྱིད་དམ། ཡི་གེར་བྲིས་ཏེ་གླེགས་བམ་དུ་བགྱིས་ནས་འཆང་ཞིང་འཛིན་པར་བགྱིད་དམ། ཀློག་ཅིང་འདོན་པར་བགྱིད་དམ། གུས་པས་མཆོད་པར་བགྱིད་ན། འབྲུག་དང་གློག་དང་ཐོག་མི་འབབ་ཅིང་སྐྲག་པ་དང་འཇིགས་པ་དང་སྡུག་བསྔལ་གྱིས་ཉོན་མོངས་པ་དང་། མྱ་ངན་དང་ནད་དང་གློ་བུར་དུ་འཆི་བའི་བར་ཐམས་ཅད་ཐག་རིང་དུ་སྤོང་བར་འགྱུར། དུག་དང་བྱད་སྟེམས་དང་མི་ལ་གནོད་པ་བགྱིད་པའི་སྟག་དང་། སེང་གེ་དང་། སྤྱང་ཀི་དང་། སྦྲུལ་གདུག་པ་རྣམས་དང་། སྦྲང་མ་དང་། སྦྲང་བུ་མཆུ་རིངས་ལ་སོགས་པས་ཀྱང་གནོད་པ་བགྱིད་པར་མི་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་བཀའ་སྩལ་པ་ལེགས་སོ་ལེགས་སོ། །གཟུངས་སྔགས་འདི་དག་ཐམས་ཅད་མཐུ་ཆེན་པོ་དང་ལྡན་པས་སེམས་ཅན་གྱི་མོས་པ་ཇི་ལྟ་བ་བཞིན་དུ་སེམས་ལ་བསམ་པའི་དངོས་པོ་རྣམས་ཡོངས་སུ་རྫོགས་པར་བྱེད། རྒྱ་ཆེར་ཕན་འདོགས་པར་བྱེད་དོ། །སེམས་རྩེ་གཅིག་ཏུ་མ་བྱས་པ་ནི་མ་གཏོགས་སོ། །ཁྱེད་ཅག་ཐེ་ཙོམ་མ་ཟ་ཤིག །དེ་ནས་འཁོར་མང་པོ་རྣམས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་པ་དང་། རབ་ཏུ་དགའ་བས་མངོན་པར་ཡིད་ཆེས་པར་གྱུར་ནས་བཀའ་ཡང་དག་པར་བཟུང་བར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ཡིད་བཞིན་གྱི་ནོར་བུ་རིན་པོ་ཆེའི་གཟུངས་ཀྱི་ལེའུ་སྟེ་བཅུ་བཞི་པའོ།། །།དེ་ནས་ལྷ་མོ་སྤོབས་པ་ཆེན་མོ་འཁོར་མང་པོའི་ནང་ནས་སྟན་ལས་ལངས་ཏེ་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་སྨྲ་བའི་མཁན་པོ་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ཡང་དག་པར་སྟོན་པར་བགྱིད་ན། བདག་གིས་ཤེས་རབ་འཕེལ་བར་བགྱིས་ནས་རྒྱན་དང་ལྡན་པའི་ཚིག་གིས་སྤོབས་པ་ཕུན་སུམ་ཚོགས་པར་བགྱིད་དོ། །གལ་ཏེ་ཆོས་སྨྲ་བའི་མཁན་པོ་དེ་མདོ་སྡེ་འདིའི་ཚིག་འབྲུ་དང་། ཡི་གེ་དང་། ཚིག་གི་དོན་བསྐྱུད་པ་ཞིག་མཆིས་ན་ཡང་
ཐམས་ཅད་རྗེས་སུ་དྲན་ཞིང་ལེགས་པར་ཁོང་དུ་ཆུད་པར་བགྱིས་ནས་གཟུངས་ཀྱི་ཀུན་འཛིན་ཐོགས་པ་མ་མཆིས་པ་སྩལ་བར་བགྱིའོ། །གཞན་ཡང་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་སེམས་ཅན་གང་དག་སངས་རྒྱས་བརྒྱ་སྟོང་དུ་མ་ལས་དགེ་བའི་རྩ་བ་བསྐྱེད་ནས་ཡོངས་སུ་འཛིན་པར་བགྱིད་པ་དེ་དག་གིས་འཛམ་བུའི་གླིང་འདིར་རྒྱ་ཆེར་སྤེལ་ནས་མྱུར་དུ་ནུབ་པར་མི་འགྱུར་ཞིང་སེམས་ཅན་ཚད་མ་མཆིས་པ་སྙེད་མདོ་སྡེ་འདི་ཐོས་པའི་དབང་གིས་ཐམས་ཅད་ཤིན་ཏུ་མྱུར་བའི་སྤོབས་པ་དང་། བསམ་པ་མ་མཆིས་པའི་ཤེས་རབ་ཆེན་པོ་བསམ་གྱིས་མི་ཁྱབ་པ་ཐོས་ནས་བསྟན་བཅོས་སྣ་ཚོགས་དང་། སྒྱུ་རྩལ་རྣམས་ལ་རབ་ཏུ་མཁས་པ་དང་། འཁོར་བ་ལས་མྱུར་དུ་ངེས་པར་བྱུང་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་བགྱིད་དོ། །ཚེ་འདི་ཉིད་ལ་ཡང་ཚེ་འཕེལ་ཞིང་འཚོ་བའི་ཡོ་བྱད་རྣམས་ཕུན་སུམ་ཚོགས་པར་བགྱིད་དོ། །བཅོམ་ལྡན་འདས་བདག་གིས་མདོ་སྡེ་འཛིན་པའི་ཆོས་ཀྱི་མཁན་པོ་དེ་དག་དང་སེམས་ཅན་གཞན་གང་མདོ་སྡེ་འདི་མཉན་པར་མོས་པ་དེ་དག་གི་ཆེད་དུ་སྨན་ལ་སྔགས་ཀྱིས་བཏབ་ནས་ཁྲུས་བགྱི་བའི་ཆོ་ག་བཤད་པར་འཚལ་ཏེ། དེས་དེ་དག་ལ་གཟའ་མ་རུངས་པ་ལྟས་ངན་སྟོན་པ་ཅི་མཆིས་པ་དང་། དང་པོ་བཙས་པའི་གཟའ་སྐར་དང་། ཕན་ཚུན་མི་མཐུན་པར་གྱུར་པ་དང་། ནད་ཀྱི་སྡུག་བསྔལ་དང་། འཐབ་པ་དང་། རྩོད་པ་དང་། གཡུལ་འགྱེད་པ་དང་། རྨི་ལམ་ངན་པ་དང་། གདོན་བགེགས་དང་། བྱད་སྟེམས་དང་། དུག་དང་། ངན་དུ་བགྱིས་པ་དང་། སྔགས་དང་། རོ་ལངས་དང་། འདི་ལྟ་བུ་ལ་སོགས་པའི་སྡིག་པ་རྣམས་ཀྱི་སྒྲིབ་པ་དང་བགེགས་བགྱིད་པ་ཐམས་ཅད་ཡོངས་སུ་བསལ་ནས་རབ་ཏུ་ཞི་བར་བགྱིད་པས་བློ་དང་ལྡན་པ་རྣམས་ཀྱིས་ཁྲུས་ཀྱི་ཆོ་ག་འདི་ལྟར་བགྱིས་ཏེ། དེས་སྨན་སྤོས་ཀྱི་རོ་དང་ལྡན་པ་སུམ་ཅུ་རྩ་གཉིས་པོ་འདི་ལྟ་སྟེ། ཤུ་དག་གིའུ་ཝང་དང་ནི་སྤྲི་ཀ་སྤོས། །གླ་རྩི་བ་བླ་དག་དང་ཤི་རི་ཤ། །ཨིན་དྲ་ཧསྟ་ཤ་མ་ཀ་ཤ་མི། །ཐང་ཆུ་དང་ནི་ཤིང་ཚ་གླ་སྒང་དང་། ཨ་ག་རུ་དང་
ཙནྡན་ཏ་ཀ་ར། །ས་ལ་ཀི་དང་གུར་ཀུམ་ཧ་ལ་ས། །ན་ཏྲ་སྨིག་བཅུད་སུ་ཀི་མ་ལེ་དང་། །ཐང་ཤིང་པ་ཏྲ་དང་ནི་ཨོན་ཤ་ལ། །ས་ལ་ཀེ་དང་སྤྲ་བ་གུ་གུལ་དང་། །ཡུངས་ཀར་གོ་སྙོད་ནཱ་ག་གེ་སར། །སརྫ་ར་ས་རུ་རྟ་ཆ་མཉམ་བགྱི། །སྐར་མ་རྒྱལ་ལ་གཅིག་ཏུ་བཏགས་ནས་ནི། །སྤོས་ཀྱི་ཕྱེ་མ་དེ་དག་རབ་བླངས་ཏེ། །སྔགས་འདིས་ལན་བརྒྱ་རྩ་བརྒྱད་གདབ་པར་བགྱི། །སྔགས་ནི་འདི་ལྟ་སྟེ། ཏདྱ་ཐཱ། སུ་ཏེ། ཀྲྀ་ཏེ། ཀ་མ་ཏ་ལི། ན་ལེ་ཛ་ན་ཀར་ཏེ། ཧངྐ་ར་ཏེ། ཨིནྡྲ་ཛ་ལི་ནི། ཤཾ་ཀ་ར་དྲི། པ་ཤད་དྲེ། ཨ་བརྟ་ཀ སི་ཀེ་ན་ཀུ་ཏྲ་ཀུ་ཀ། ཁ་ཀེ་བ་བཱིརྱེ། བི་ལ་ཀ་བི་ལ་མ་ཏི། ཤཱི་ལ་མ་ཏི། ཤཱི་ལ་མ་ཏི། སནྡྷི་དྷུ་དྷུ་མ་བ་ཏི། པ་པང་ཀུ། བཉྩི་ལེ། ཤི་རི་ཤ་རི། སངྟྱ་སྠི་ཏི་སྭཱ་ཧཱ། གལ་ཏེ་ཆོས་བཞིན་ཁྲུས་ནི་བགྱིད་འཚལ་ན། །དཀྱིལ་འཁོར་གྲུ་བཞི་ཁྲུ་བརྒྱད་པ་བགྱིས་ནས། །རབ་ཏུ་དབེན་ཞིང་བདེ་བའི་གནས་དག་ཏུ། །དོན་གང་སྒྲུབ་པ་སེམས་ལ་དྲན་པར་བགྱི། །བ་ལང་ལྕི་བས་དཀྱིལ་འཁོར་བྱུགས་ནས་ནི། །སྟེང་དུ་མེ་ཏོག་ཀུན་ཏུ་དགྲམ་པར་བགྱི། །གསེར་དངུལ་སྣོད་ནི་ཤིན་ཏུ་གཙང་མ་དག །རོ་མཆོག་འོ་མ་སྦྲང་རྩིས་དགང་བར་བགྱི། །དཀྱིལ་འཁོར་དེ་ཡི་སྒོ་བཞི་དག་ཏུ་ཡང་། །སྐྱེས་བུ་བཞི་ཞིག་ཆོས་བཞིན་བསྲུང་དུ་སྩལ། གཞོན་ནུ་བཞི་ཞིག་ལུས་ནི་རབ་བརྒྱན་ནས། །སོ་སོར་གྲྭ་རེར་ཆབ་ཀྱི་བུམ་པ་ཐོགས། །དེར་ནི་རྟག་པར་གུ་གུལ་བསྲེགས་ནས་ནི། །དབྱངས་ལྔའི་རོལ་མོ་རྒྱུན་མི་འཆད་པར་བགྱི། །དཀྱིལ་འཁོར་དེ་ཡི་ངོས་བཞི་དག་ཏུ་ཡང་། །བ་དན་གདུགས་དང་ལྡ་ལྡིས་མཛེས་པར་བགྱི། །དཀྱིལ་འཁོར་ནང་དུ་མེ་ལོང་གསལ་བ་དང་། །རལ་གྲི་རྣོན་པོ་མདའ་བཞི་གཞག་པར་བགྱི། །དཀྱིལ་འཁོར་དབུས་སུ་གཞོང་ཁུང་ཆེར་སྩལ་ནས། །འཛེག་པའི་ཤིང་ལེབ་དེ་ཡི་སྟེང་དུ་བཞག །སྔ་མའི་ཕྱི་མ་ཆབ་དང་སྦྱར་ནས་ནི། །དཀྱིལ་འཁོར་དེ་ཡི་ནང་དུ་གཞག་པར་བགྱི། །དེ་ལྟར་བཀྲམ་ཞིང་རྣམ་པར་བཞག་ནས་ནི། །དེ་ནས་སྔགས་བཟླས་དཀྱིལ་འཁོར་མཚམས་བཅད་བགྱི། །མཚམས་བཅད་པ་ཡི་སྔགས་ནི་འདི་ལྟ་སྟེ། །སཱདྱ་ཐེ་དན། ཨ་ཀ་ར་ཀེ །ན་ཡ་ནེ། ཧི་ལེ་
མི་ལེ་གི་ལེ། ཁི་ཁི་ལེ་སྭཱ་ཧཱ། །དེ་ལྟར་མཚམས་ནི་རབ་བཅད་ནས། །དཀྱིལ་འཁོར་ནང་དུ་ཞུགས་ནས་ནི། །ཉི་ཤུ་རྩ་གཅིག་ཆབ་བསྔགས་ཏེ། །ཕྱོགས་བཞི་དག་ཏུ་གཏོར་བར་བགྱི། །དེ་ནས་སྤོས་ཆབ་དག་ལ་ནི། །བརྒྱ་རྩ་བརྒྱད་ཚང་སྔགས་བཏབ་སྟེ། །ངོས་བཞིར་ཡོལ་བས་བསྐོར་ནས་ནི། །དེ་འོག་ལུས་ནི་བཀྲུ་བར་བགྱི། །ཆབ་དང་སྤོས་ཆབ་ལ་གདབ་པའི་སྔགས་ནི་འདི་ལྟ་སྟེ། །ཏདྱ་ཐཱ། ས་ག་ཌེ་བི་ག་ཌེ། བི་ག་ཏ་བ་ཏི་སྭཱ་ཧཱ། ཁྲུས་བགྱིས་ལགས་ནས་ཁྲུས་བགྱིས་པའི་ཆབ་དང་། དཀྱིལ་འཁོར་གྱི་ནང་དུ་མཆོད་པར་བགྱིས་པའི་བཟའ་བ་དང་། བཏུང་བ་ཅི་མཆིས་པ་གཙང་པོའམ། རྫིང་གི་ནང་དུ་དོར་བར་བགྱི་ཞིང་གཞན་ནི་བསྡུ་བར་བགྱིའོ། །དེ་ལྟར་ཁྲུས་བགྱིས་ལགས་ནས་གོས་གཙང་མ་བགོས་ཏེ། དཀྱིལ་འཁོར་ནས་ཕྱིར་བྱུང་ནས་ཁང་པ་གཙང་མའི་ནང་དུ་ཞུགས་ཏེ། སྔགས་མཁན་གྱིས་དེ་དག་ཡི་དམ་རྒྱ་ཆེན་པོ་སླད་དུ་སྩལ་ནས་སྡིག་པ་སྣ་ཚོགས་གཏན་དུ་བཅད་ཅིང་དགེ་བ་སྣ་ཚོགས་རྟག་པར་སྤྱད་ནས་སེམས་ཅན་རྣམས་ལ་སྙིང་རྗེ་ཆེན་པོ་བསྐྱེད་པར་བགྱི་སྟེ། རྒྱུ་དང་རྐྱེན་དེས་ན་ཡིད་བཞིན་གྱི་བསོད་ནམས་ཀྱི་རྣམ་པར་སྨིན་པ་ཚད་མ་མཆིས་པ་སྙེད་ཐོབ་པར་འགྱུར་ལགས་སོ། །ཡང་ཚིགས་སུ་བཅད་དེ་གསོལ་པ། སེམས་ཅན་གང་ཞིག་ནད་ཀྱི་སྡུག་བསྔལ་ཉེན། །སྨན་སྤྱད་སྣ་ཚོགས་གསོས་ཀྱང་མ་སོས་པ། །ཁྲུས་ཀྱི་ཆོ་ག་འདི་བཞིན་ཁྲུས་བགྱིས་ཏེ། །གཞན་ཡང་མདོ་སྡེ་འདི་ནི་ཀློག་བཏོན་ནས། །གདུགས་མཚན་རྟག་པར་སེམས་ནི་མི་གཡེང་བར། །རྩེ་གཅིག་གུས་པས་དང་སེམས་བསྐྱེད་བགྱིད་ནས། །ནད་ཀྱི་སྡུག་བསྔལ་བས་པར་ཞི་བར་འགྱུར། །དབུལ་ཕོངས་ཐར་ནས་ནོར་དང་ལྡན་པར་འགྱུར། །ཕྱོགས་བཞི་ཡི་གཟའ་སྐར་ཉི་ཟླ་ཡི་ལྷ། །མཐུ་ཡིས་རབ་བསྲུངས་ཚེ་ནི་རིང་བར་འགྱུར། །བཀྲ་ཤིས་རབ་བདེ་བསོད་ནམས་ཡོངས་སུ་འཕེལ། །ལྟས་ངན་གནོད་པ་ཐམས་ཅད་སེལ་བར་བགྱིད། །དེའི་འོག་ཏུ་ལུས་བསྲུང་བའི་སྔགས་ལན་ཉི་ཤུ་རྩ་གཅིག་བཟླ་བར་བགྱིའོ། །སྔགས་ནི་འདི་ལྟ་སྟེ། །ཏདྱ་ཐཱ། ས་མེ། བི་ས་མེ་སྭཱ་ཧཱ། ས་ག་ཌེ།བི་ག་ཌེ་སྭཱ་ཧཱ། སཱ་ག་ར་སཾ་བུད་དྷཱ་ཡ་སྭཱ་ཧཱ། སྐན་དྷ་མཱ་ཏཱ་ཡ་སྭཱ་ཧཱ། ནཱི་ལ་ཀཎྛཱ
ཡ་སྭཱ་ཧཱ། ཨ་པ་རཱ་ཛི་ཏ་བིཪྱ་ཡ་སྭཱ་ཧཱ། ཧི་མ་བནྡྷ་སཾ་བྷུ་ཏཱ་ཡ་སྭཱ་ཧཱ། ཨ་ནི་བི་ལ་བཀྟཱ་ཡ་སྭཱ་ཧཱ། ན་མོ་བྷ་ག་བ་ཏེ། བྲཧྨ་ཎེ་སྭཱ་ཧཱ། ན་མཿས་ར་སྭ་ཏྱཻ་མ་ཧཱ་དེ་བི་ཡེ་སྭཱ་ཧཱ། སིདྡྷྱནྟུ་མནྟྲ་པ་དཱ་སྭཱ་ཧཱ། དྷ་ར་ཏོ། བི་ཙི་ཏ། བྲཧྨཱ་ནུ་མ་ནྱ་ཏུ་སྭཱ་ཧཱ། དེ་ནས་ལྷ་མོ་སྤོབས་པ་ཆེན་མོ་ཁྲུས་ཀྱི་ཆོ་ག་དང་། དཀྱིལ་འཁོར་གྱི་སྔགས་བཤད་ནས་བཅོམ་ལྡན་འདས་ཀྱི་ཞབས་ལ་ཕྱག་བྱས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་མདོ་སྡེའི་རྒྱལ་པོ་དམ་པ་འདི་ལེན་པ་དང་། འཛིན་པ་དང་། ཀློག་པ་དང་། ཁ་ཏོན་དུ་འདོན་པ་དང་། ཡི་གེར་བྲིས་ནས་སྤེལ་བ་དང་། ཇི་སྐད་བསྟན་པ་བཞིན་དུ་སྤྱོད་པར་བགྱིད་ན། གྲོང་ཁྱེར་རམ། གྲོང་རྡལ་ལམ། འབྲོག་དགོན་པའམ། རི་འམ། ནགས་ཚལ་ལམ། དགེ་སློང་ངམ། དགེ་སློང་མའི་གནས་གང་ཡང་རུང་བ་དག་ཏུ་གནས་ཀྱང་རུང་སྟེ། བདག་དེའི་ཆེད་དུ་འཁོར་རྣམས་དང་ལྷན་ཅིག་ལྷའི་འཁོར་མོ་བགྱིས་ནས་དེའི་ཐད་དུ་མཆིས་ཏེ། ཡོངས་སུ་སྐྱོབ་པ་དང་བསྲུང་བ་བགྱིས་ནས་ནད་ཀྱི་སྡུག་བསྔལ་དང་། སྐར་མདའ་ལྟུང་བ་དང་། ལྟས་ངན་དང་། རིམས་ནད་དང་། འཐབ་ཅིང་རྩོད་པ་རྣམས་སེལ་བར་བགྱིད། རྒྱལ་པོའི་ཁྲིམས་ཀྱིས་གཟུང་བ་དང་། རྨི་ལམ་ངན་པ་དང་། འདྲེ་སྲིན་མ་རུངས་པས་གནོད་པར་བགྱིད་པ་དང་། བྱད་སྟེམས་ཐམས་ཅད་རབ་ཏུ་ཞི་བར་བགྱིས་ནས། མདོ་སྡེ་འཛིན་པའི་གང་ཟག་དགེ་སློང་ལ་སོགས་པའི་འཁོར་དང་། ཉན་པའི་འཁོར་རྣམས་མྱུར་དུ་འཁོར་བའི་རྒྱ་མཚོ་ཆེན་པོ་ལས་ཡོངས་སུ་བཟླས་ནས་བྱང་ཆུབ་ལས་ལྡོག་པར་མི་འགྱུར་བར་ཕན་འདོགས་པར་བགྱིད་དོ། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་གསོལ་པ་གསན་པ་དང་། ལྷ་མོ་སྤོབས་པ་ཆེན་མོ་ལ། ལྷ་མོ་ཁྱོད་ཀྱིས་སེམས་ཅན་ཚད་མེད་ཅིང་མཐའ་མེད་པ་དག་ལ་ཕན་པ་དང་། བདེ་བར་བྱ་བའི་ཆེད་དུ་རིག་སྔགས་དེ་དག་དང་། སྤོས་ཆུས་ཁྲུས་བྱ་བ་དང་། དཀྱིལ་འཁོར་གྱི་ཆོ་ག་རྣམ་པར་སྨིན་པའི་འབྲས་བུ་བསམ་གྱིས་མི་ཁྱབ་པ་དང་ལྡན་པ་ཡང་དག་པར་བཤད་
པ་ལེགས་སོ་ལེགས་སོ་ཞེས་བསྔགས་པ་བརྗོད་ནས་ཁྱོད་ཀྱིས་མདོ་སྡེའི་རྒྱལ་པོ་མཆོག་དམ་པ་འདི་བསྲུངས་ནས་མྱུར་དུ་ནུབ་པར་མི་འགྱུར་ཞིང་རྟག་པར་རྒྱ་ཆེར་གནས་པར་འགྱུར་བར་བྱོས་ཤིག །དེ་ནས་ལྷ་མོ་སྤོབས་པ་ཆེན་མོས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་རང་གི་སྟན་ལ་འདུག་པར་གྱུར་ཏོ། །དེ་ནས་བྲམ་ཟེ་ཀཽཎྜི་ནྱས་ཆོས་ཀྱི་སློབ་དཔོན་གྱིས་ལུང་བསྟན་པ་བཅོམ་ལྡན་འདས་ཀྱི་བྱིན་གྱིས་བརླབས་ཀྱི་མཐུས་འཁོར་མང་པོའི་མདུན་དུ་ལྷ་མོ་སྤོབས་པ་ཆེན་མོ་ལ་མངོན་པར་བསྟོད་པ། ཤེས་རབ་གསལ་དཔའ་སྤོབས་པའི་ལྷ་མོ་ཁྱོད། །ལྷ་མིའི་མཆོད་པ་དག་གིས་མཆོད་པར་འོས། །གྲགས་པས་འཇིག་རྟེན་ཀུན་དུ་རྒྱས་པས་ན། །སེམས་ཅན་ཐམས་ཅད་རེ་བ་རྫོགས་པར་བྱེད། །རི་རྩེ་མཐོན་པོའི་གནས་མཆོག་དག་ཏུ་ནི། །རྩྭ་བསྡུས་ཁྱིམ་བྱས་དེ་ན་རབ་ཏུ་གནས། །རྒྱུན་དུ་རྩྭ་འཇམ་མདུན་ནས་གོས་བྱས་ཏེ། །རྟག་པར་རྐང་པ་ཡ་གཅིག་བཀུག་སྟེ་འགྲེང་། །ལྷ་འཁོར་མང་པོ་ཐམས་ཅད་འདུས་ནས་ལྷགས། །ཐམས་ཅད་རྩེ་གཅིག་སེམས་ཀྱིས་ཁྱོད་ལ་བསྔགས། །ཤེས་རབ་སྤོབས་པ་ལྡན་པའི་ལྷ་མོ་ཁྱོད། །ཚིག་སྙན་གྱ་ནོམ་ཐམས་ཅད་སྦྱིན་པར་གྱིས། ། དེ་ནས་ལྷ་མོ་སྤོབས་པ་ཆེན་མོ་དེས་གསོལ་བ་བཏབ་པ་མཉན་ནས་གཟུངས་སྔགས་སྨྲས་པ། སཱདྱ་ཐེ་དན། མུ་རེ་ཙི་རེ། ཨ་བ་ཛེ། ཨ་བ་ཛ་བ་ཏིི། ཧིངྒུ་ལེ། མིདྒུ་ལེ། པིངྒ་ལ་བ་ཏི། མུངྒ་ཥེ། མ་རཱི་ཙྱཻ། སྭ་མ་ཏི། ད་ཤ་མ་ཏི། ཨ་གྷྲི་ཏམ་གྷྲི་ཏ་ར་ཙི། ཏ་ར་ཙ་བ་ཏི། ཙི་ཙི་རི། ཤི་རི་མི་རི། མ་ནནྡྷི། ད་མ་ཁི། མ་རཱི་ཙྱཻ། པྲཱ་ན་པྲི་ཡེ། ལོ་ཀ་ཛྱེཥྛེ། ལོ་ཀ་ཤྲེཥྛེ། བི་ར་ཙེ། ལོ་ཀ་པྲི་ཡ། སིདྡྷ་པྲ་ཏེ། བྷཱི་མ་མུ་ཁི། ཤུ་ཙི་ཙ་རི། ཨ་པྲ་ཏི་ཧ་ཏེ། ཨ་པྲ་ཏི་ཧ་ཏ་བུདྡྷི། ནམུ་ཙི། མ་ཧཱ་ན་མུ་ཙི། མ་ཧཱ་ན་མུ་ཙི། མ་ཧཱ་དེ་བྱི། པྲ་ཏི། གྲཱིཧཱ། ན་མ་སྐ་རཱ་ན་བདག་གི་མིང་བརྗོད། མ་མ་བུདྡྷི། དྲ་ཤ་ཧི་བུདྡྷི། ཨ་པྲ་ཏི་ཧ་ཏ། བྷ་ཏུ། སི་བྷ་མེ། བི་ཤུད་ཙི་ཏོ། ཤ་ཤྠ་ཤོ་ལོ་ཀ །མནྟྲ་བི་དྷི་ཀ །ཀ་པི་ཡ་དྷི་ཤོ། ཏདྱ་ཐཱ། མ་ཧཱ་པྲ་བྷཱ་བེ། ཧི་ལི་ཧི་ལི། མི་ལི་མི་ལི། བི་ཙ་རོ། བི་ཙ་ཏོ། བི་བུདྡྷི། བདག་གི་
མིང་བརྗོད། མ་མ་བུདྡྷི། བི་ཤུདྡྷི། བྷ་ག་བད་ཏྱཾ། བེ་བ་ཡཾ། སྤ་ར་ས་ཏྱ། ཀ་ར་དེ། ཀེ་ཡཱུ་རེ། ཀེ་ཡཱུ་ར་མ་ཏི། ཧི་ལི་མི་ལི། ཨ་པ་ཡ་མེ། མ་ཧཱ་དེ་བེ། བུདྡྷ་ས་ཏྱ་ན། དྷརྨ་ས་ཏྱ། སཾ་གྷ་ས་ཏྱེ་ན། ཨིནྡྲ་ས་ཏྱེ་ན། བ་རུ་ཎ་ས་ཏྱེ་ན། ཡེ་ལོ་ཀེ། ས་ཏྱ་ས་ཏྱེ་ན། ཏེ་ཤ་མ་ས་ཏྱེ་ན། སཏྟི་བད་ཙ་ནི་ནི། ཨ་བ་ཧ་ཡ་མི། མ་ཧཱ་དེ་བེ། ཧི་ལི་མི་ལི། ཧི་ལི་མི་ལི། བི་ཙི་ད་ཏོ།བདག་གི་མིང་བརྗོད། མ་མ་བུདྡྷི། ན་མོ་བྷ་བ་ཏི། མ་ཧཱ་དེ་བེ་ས་ར་ས་ཏྱ་སིདྦྷྱནྟུ་མནྟྲ་པ་དཱ་ནི་སྭཱ་ཧཱ། དེ་ནས་ལྷ་མོ་སྤོབས་པ་ཆེན་མོས་གཟུངས་སྔགས་འདི་བསྟན་ནས་བྲམ་ཟེ་དེ་ལ་འདི་སྐད་ཅེས་ཀྱེ་སྐྱེས་བུ་ཆེན་པོ་སེམས་ཅན་རྣམས་ཀྱི་ཆེད་དུ་སྤོབས་པ་གྱ་ནོམ་པ་དང་། རིན་པོ་ཆེ་དང་། རྫུ་འཕྲུལ་དང་། ཤེས་རབ་ཡོངས་སུ་གཉེར་ནས་ཐམས་ཅད་ལ་རྒྱ་ཆེར་ཕན་བཏགས་ཏེ་མྱུར་དུ་བྱང་ཆུབ་མངོན་དུ་བྱེད་པར་འདོད་པ་ལེགས་སོ་ལེགས་སོ། །དེ་ལྟར་ཤེས་པར་བྱས་ནས་ཆོ་ག་འདི་གཟུང་བར་བྱའོ། །ཞེས་སྨྲས་ནས་ཡང་ཚིགས་སུ་བཅད་དེ་སྨྲས་པ། ཐོག་མ་ཁོ་ནར་གཟུངས་འདི་ཁ་ཏོན་དུ། །བྱང་ཞིང་ནོར་བ་མེད་པར་བཀླགས་ནས་ནི། །བྱིན་གྱིས་རློབ་ཅིང་སྨོན་པ་རྫོགས་བྱའི་ཕྱིར། །དཀོན་མཆོག་གསུམ་དང་ལྷ་རྣམས་སྐྱབས་འགྲོ་ཞིང་། །སངས་རྒྱས་ཆོས་དང་བྱང་ཆུབ་སེམས་དཔའ་དང་། །རང་རྒྱལ་ཉན་ཐོས་ཚོགས་ལ་གུས་ཕྱག་བྱས། །དེ་འོག་ཚངས་དང་བརྒྱ་བྱིན་ལྷ་དབང་དང་། །འཇིག་རྟེན་སྐྱོང་དང་རྒྱལ་པོ་ཆེན་པོ་བཞིས། །རྟག་པར་ཚངས་པར་སྤྱོད་པ་ཐམས་ཅད་ལ། །རྩེ་གཅིག་ཡིད་ཀྱིས་གུས་པར་ཕྱག་བྱས་ནས། །དགོན་པ་རབ་ཏུ་དབེན་པའི་གནས་དག་ཏུ། །སྐད་ཆེར་སྔ་མའི་སྔགས་དང་ཆོ་ག་གདོན། །སངས་རྒྱས་སྐུ་གཟུགས་ལྷ་ཀླུའི་མདུན་དག་ཏུ། །ཇི་ཙམ་འབྱོར་བས་མཆོད་པ་བསྒྲུབ་པར་བྱ། །སེམས་ཅན་རྣམ་པ་དེ་དག་ཐམས་ཅད་ལ། །བྱམས་དང་སྙིང་རྗེས་བརྩེ་བའི་སེམས་ཀྱང་བསྐྱེད། །བཅོམ་ལྡན་གསེར་སྐུ་ཤིན་ཏུ་གྱ་ནོམ་མཚན། །གཡེང་བ་མེད་སེམས་རྩེ་གཅིག་དྲན་པར་བྱ། །བཅོམ་ལྡན་ཡང་དག་ཆོས་སྟོན་དགོངས་མཛད་པས། །
དབང་པོ་ཇི་བཞིན་ཏིང་འཛིན་སྒོམ་ལ་འགོད། །དེ་ཡི་ཚིག་གི་དོན་ནི་ལེགས་སོམས་ལ། །སྟོང་པ་ཉིད་བརྟེན་རབ་ཏུ་བསྒོམ་པར་གྱིས། །བཅོམ་ལྡན་སྐུ་གཟུགས་དག་གི་སྤྱན་སྔར་ནི། །རྩེ་གཅིག་ཡང་དག་དྲན་པས་གནས་བྱེད་ན། །གྱ་ནོམ་ཡེ་ཤེས་ཏིང་ངེ་འཛིན་དག་དང་། །གཟུངས་མཆོག་དམ་པ་དག་ཀྱང་འཐོབ་པར་འགྱུར། །བཅོམ་ལྡན་གསེར་ཞལ་ཡང་དག་ཆོས་བསྟན་ནས། །གྱ་ནོམ་དབྱངས་ཀྱིས་ལྷ་མི་འདུལ་བར་མཛད། །ལྗགས་མཚན་རྐྱེན་བཞིན་ངོ་མཚར་རབ་སྟོན་པས། །ཡངས་རིང་སྟོང་གསུམ་འཇིག་རྟེན་ཁྱབ་པར་མཛད། །བཅོམ་ལྡན་གསུང་དབྱངས་གྱ་ནོམ་དེ་འདྲ་བ། །རྩེ་གཅིག་དྲན་ན་སེམས་ལ་འཇིགས་མེད་འཐོབ། །བཅོམ་ལྡན་སྨོན་ལམ་རྒྱ་ཆེན་བཏབ་པའི་དབང་། །ལྗགས་མཚན་བསམ་གྱིས་མི་ཁྱབ་འདི་བརྙེས་ནས། །ཆོས་རྣམས་ཡོད་པ་མ་ཡིན་གསུང་མཛད་པས། །དཔེར་ན་ནམ་མཁའ་ཆགས་པ་མེད་པ་འདྲ། །བཅོམ་ལྡན་གསུང་དབྱངས་དག་དང་ལྗགས་མཚན་རྣམས། །དྲན་པ་ཉེ་གཞག་གཞལ་བྱེད་སྨོན་རྫོགས་འགྱུར། །གལ་ཏེ་ལྷ་མོ་སྤོབས་ཆེན་མཆོད་མཐོང་ངམ། །སློབ་མས་སློབ་དཔོན་རྗེས་སློབ་མཐོང་ནས་ནི། །གསང་བའི་ཆོ་ག་འདི་བླངས་སྒོམ་བྱེད་དམ། །བླ་མར་བྱེད་ན་སེམས་ལ་བསམ་པ་འགྲུབ། །གང་ཞིག་ཡེ་ཤེས་དམ་པ་མཆོག་འདོད་ན། །རྩེ་གཅིག་སེམས་ཀྱིས་ཆོས་འདི་གཟུང་བར་བྱ། །བསོད་ནམས་ཡེ་ཤེས་ཡོན་ཏན་འཕེལ་བྱེད་པས། །ངེས་པར་འགྲུབ་འགྱུར་ཐེ་ཙོམ་ཡོངས་མ་བསྐྱེད། །ནོར་ཚོལ་དག་ནི་ནོར་མང་རྙེད་པར་འགྱུར། །གྲགས་པ་གཉེར་བ་གྲགས་ཆེན་ཐོབ་པར་འགྱུར། །ངེས་འབྱུང་ཚོལ་བ་རྣམ་པར་གྲོལ་འགྱུར་བས། །ངེས་པར་འགྲུབ་འགྱུར་ཐེ་ཙོམ་ཡོངས་མ་བསྐྱེད། །ཡོན་ཏན་ཚད་མེད་མཐའ་ལས་ཇི་སྙེད་པ། ། སེམས་ལ་བསམས་བཞིན་ཡོངས་སུ་སྡུད་པར་བྱེད། །གལ་ཏེ་དེ་ལྟར་ཆོས་བཞིན་སྤྱོད་ནུས་ན། །ངེས་པར་འགྲུབ་འགྱུར་ཐེ་ཙོམ་ཡོངས་མ་བསྐྱེད། །གཙང་མའི་གནས་སུ་གོས་སར་བགོས་ནས་ནི། །དཀྱིལ་འཁོར་ཆེ་ཆུང་ཅི་ཙམ་ནུས་པར་བྱ། །བུམ་པ་གཙང་མ་བཞིར་
ནི་རོ་ཞིམ་བཀང་། །མེ་ཏོག་པོག་སྤོས་ཅི་འབྱོར་མཆོད་པར་བྱ། །ལྡ་ལྡི་བ་དན་དག་དང་གདུགས་བྲེས་ཏེ། །བྱུག་སྤོས་ཕྱེ་མ་ཀུན་དུ་ཁྱབ་བརྒྱན་ནས། །སངས་རྒྱས་ལྷ་མོ་སྤོབས་ཆེན་མཆོད་བྱེད་ན། །ལྷ་ལུས་མཐོང་བར་འདོད་ནའང་སྨོན་བཞིན་འགྲུབ། །ལྷ་མོ་སྤོབས་ཆེན་མདུན་དུ་སྔ་མའི་སྔགས། །ཞག་ནི་ཉི་ཤུ་རྩ་གཅིག་གདོན་པར་བྱ། །གལ་ཏེ་ལྷ་དེ་མཐོང་བར་མ་གྱུར་ན། །རྩེ་གཅིག་སེམས་ཀྱིས་ཞག་དགུ་དྲན་པར་བྱེད། །ནམ་གྱི་ཆ་སྨད་འོན་ཀྱང་མ་མཐོང་ན། །གནས་གཙང་དམ་པ་གཞན་དག་བཙལ་ནས་ནི། །ལྷ་མོ་སྤོབས་ཆེན་གཟུགས་ནི་རབ་བྲིས་ཏེ། །མཆོད་གནས་བཟླས་བརྗོད་སེམས་ཀྱིས་མི་བཏང་ཞིང་། །གཉིད་དང་ལེ་ལོ་སེམས་ནི་མི་བསྐྱེད་ན། །བདག་དང་གཞན་ལ་ཕན་འདོགས་མཐར་ཐུག་མེད། །རྣམ་སྨིན་གང་ཐོབ་སྐྱེ་དགུ་སྨིན་བྱེད་ན། །སྨོན་པ་ཐམས་ཅད་ཡོངས་སུ་རྫོགས་པར་འགྱུར། །གལ་ཏེ་ཡིད་བཞིན་མ་གྲུབ་ཟླ་བ་གསུམ། །ཡང་ན་དྲུག་དང་དགུ་དང་ལོ་གཅིག་པར། །རབ་བརྩོན་གསོལ་འདེབས་སེམས་ནི་མི་གཡོ་ན། །ལྷ་ཡི་མིག་དང་གཞན་སེམས་ཤེས་ཐོབ་འགྱུར། །དེ་ནས་བྲམ་ཟེ་ཀཽཎྜི་ནྱས་དེ་སྐད་ཅེས་བསྟན་པ་ཐོས་པ་དང་། དགའ་མགུ་རངས་ཤིང་ངོ་མཚར་དུ་གྱུར་པས་འཁོར་མང་པོ་རྣམས་འདི་སྐད་ཅེས་ཀྱེ་ཁྱེད་ཅག་ལྷ་དང་མིའི་འཁོར་མང་པོ་ཐམས་ཅད་ཤེས་པར་བྱོས་ལ། སེམས་རྩེ་གཅིག་ཏུ་དེང་བདག་གིས་ཀུན་རྫོབ་ཀྱི་བདེན་པའི་ཆོས་ལ་བརྟེན་ནས་ལྷ་མོ་སྤོབས་པ་མཆོག་དམ་པ་དེ་དག་ལ་བསྔགས་པ་བརྗོད་པ་ཉོན་ཅིག །ཅེས་སྨྲས་ནས་ཚིགས་སུ་བཅད་དེ་སྨྲས་པ། འཇིག་རྟེན་དག་ན་དབང་ཕྱུག་ཐོབ་འགྱུར་བ། །ལྷ་མོ་མཐུ་ཆེན་ཐོབ་ལ་གུས་ཕྱག་འཚལ། །དེང་བདག་གཙོ་མོ་དེ་ལ་བསྔགས་པ་ཡང་། སྔོན་གྱི་དྲང་སྲོང་ཇི་སྐད་བསྟན་པ་བཞིན། །བཀྲ་ཤིས་ཡོངས་རྫོགས་སེམས་ནི་བདེ་བར་གནས། །སེམས་གསལ་ངོ་ཚ་ཁྲེལ་ཡོད་གྲགས་དང་ལྡན། །མ་མ་བྱས་ཏེ་འཇིག་རྟེན་རབ་ཏུ་བསྐྱེད། །རབ་དཔའ་རྟག་པར་བརྩོན་འགྲུས་ཆེན་པོ་སྤྱོད། །ཐབ་མོའི་གཡུལ་དུ་རྟག་པར་རྒྱུན་དུ་རྒྱལ། །རབ་
དུལ་བྱམས་སེམས་བཟོད་པ་གསོལ་བར་བྱེད། །ད་ལྟར་གཤིན་རྗེའི་སྲིང་མོ་ཆེན་མོར་གྱུར། །གོས་སུ་རྟག་པར་དར་ཚོན་སྔོན་པོ་གྱོན། །སྡུག་དང་མི་སྡུག་བྱད་བཞིན་ཀུན་དང་ལྡན། །མིག་ནི་མཐོང་བ་ཐམས་ཅད་རབ་ཏུ་དངང་། །སྤྱོད་མཆོག་དམ་པ་ཚད་མེད་འཇིག་རྟེན་འདས། །ཕྱོགས་ཤིང་མངོན་དང་མི་ཀུན་ཡོངས་སུ་སྡུད། །རེས་འགའ་རི་བྲག་ཟབ་མོ་དག་ན་གནས། །རེས་འགའ་བྲག་ཕུག་གཙང་པོའི་འགྲམ་ན་གནས། །རེས་འགའ་ལྗོན་ཤིང་ནགས་ཚལ་ཆེན་པོར་གནས། །ལྷ་མོ་ཕལ་ཆེར་དེ་དག་ཀུན་དུ་གནས། །རི་དང་ནགས་ཚལ་མི་རྒོད་ཇི་སྙེད་པ། །རྟག་པར་ལྷ་མོ་ལ་ནི་མཆོད་པར་བྱེད། །རྨ་བྱའི་སྒྲོས་ནི་རྒྱལ་མཚན་བ་དན་བྱེད། །དུས་སོ་ཅོག་ཏུ་རྟག་པར་འཇིག་རྟེན་སྐྱོང་། །སྟག་དང་སེང་གེ་སྤྱང་ཀིས་རྒྱུན་དུ་བསྐོར། །གནག་ལུག་བྱ་ལ་སོགས་པས་རྟེན་ཡང་འཆའ། །དྲིལ་ཆེན་བསྒྲགས་ནས་སྒྲ་ནི་ཕྱུང་བས་ན། །བིན་དྷའི་རི་ལ་སྒྲ་ནི་ཀུན་དུ་གྲགས། །རེས་འགའ་རྩེ་གསུམ་ཏྲི་ཤཱུལ་ཐོགས་བྱེད་ཅིང་། །གཡས་གཡོན་རྒྱུན་དུ་ཉི་ཟླ་རུ་མཚོན་འཛིན། །ཟླ་བ་ནག་པོའི་ཚེས་དགུ་བཅུ་གཅིག་ལ། །དེ་ཡི་དུས་སུ་རྟག་པར་མཆོད་པར་བྱ། །རེས་འགའ་བ་སུ་ལྷ་ཆེན་སྲིང་མོར་སྟོན། །གཡུལ་འགྱེད་མཐོང་ན་རྟག་པར་སྙིང་ཡང་བརྩེ། །སེམས་ཅན་ཐམས་ཅད་རྣམ་པར་ལྟ་བ་ལ། །ལྷ་མོ་མཆོག་ཏུ་གྱུར་པས་བདས་པ་མེད། །རེས་འགའ་བ་རྫིའི་བུ་མོ་དགའ་མོར་སྟོན། །ལྷ་དང་འཐབ་ཚེ་རྟག་པར་རྒྱལ་བ་འཐོབ། །འཇིག་རྟེན་དག་ན་ཡུན་རིང་གནས་པར་བྱེད། །རབ་དུལ་བཟོད་དང་ཁྲོ་གཏུམ་སྟོན་པར་བྱེད། །བྲམ་ཟེ་ཆེན་པོ་རིག་པའི་ཆོས་བཞི་དང་། །སྒྱུ་འཕྲུལ་སྔགས་སོགས་ཐམས་ཅད་རབ་ཏུ་རྟོགས། །དྲང་སྲོང་ནང་ན་རང་དབང་དག་དང་ལྡན། །ས་བོན་དང་ནི་ས་ཆེན་བྱེད་པར་ནུས། །ལྷ་མོ་བུ་མོ་ལ་སོགས་འདུས་པའི་ཚེ། །རྒྱ་མཚོའི་རླབས་ལྟར་ངེས་པར་དེར་ཡང་འདུ། །ཀླུ་དང་གནོད་སྦྱིན་མང་པོའི་ཚོགས་ཀུན་གྱི། །གཙོ་བོར་གྱུར་པས་རབ་ཏུ་དུལ་བར་བྱེད། །བུད་མེད་ནང་ན་ཚངས་སྤྱོད་མཆོག་དང་ལྡན། །ཚིག་བྱུང་དཔེར་ན་འཇིག་རྟེན་བདག་པོ་འདྲ། །རྒྱལ་པོའི་གནས་ན་
པདྨ་དག་དང་མཚུངས། །ཆུ་བོའི་འགྲམ་ན་གནས་ཚེ་གྲུ་ཟབ་བཞིན། །བྱད་བཞིན་སྡུག་མཛེས་ཟླ་བ་ཉ་བ་འདྲ། །མང་ཐོས་ཕུན་ཚོགས་གནས་དང་རྟེན་ཡང་བྱེད། །སྤོབས་པ་མཆོག་བྱུང་རི་རྩེ་མཐོན་པོ་འདྲ། །དྲན་པ་ཐམས་ཅད་ཀུན་གྱི་གླིང་ཡང་བྱེད། །ལྷ་མ་ཡིན་ལ་སོགས་ཏེ་ལྷ་ཚོགས་རྣམས། །ཐམས་ཅད་འདི་ཡི་ཡོན་ཏན་བསྔགས་པར་བྱེད། །མིག་སྟོང་བརྒྱ་བྱིན་ལྷ་ཡི་དབང་པོས་ཀྱང་། །གུས་པའི་སེམས་ཀྱིས་ལྟ་ཞིང་རབ་ཏུ་རྟོག །སེམས་ཅན་གང་ཞིག་རེ་ཞིང་ཚོལ་བ་ཡོད། །དེ་དག་ཐམས་ཅད་མྱུར་དུ་འགྲུབ་པར་བྱེད། ། ཡིད་མྱུར་སྤོབས་དང་ཆོས་འཛིན་ལྡན་བྱེད་པས། །ས་ཆེན་སྟེང་ན་མཆོག་ཏུ་གྱུར་པ་ཡིན། །ཕྱོགས་བཅུའི་འཇིག་རྟེན་ཁམས་ནི་འདི་དག་ཏུ། །མར་མེ་ཆེ་ལྟར་རྟག་པར་ཀུན་གསལ་བྱེད། །ཐ་ན་ལྷ་འདྲེ་གཅན་གཟན་དག་ལ་ཡང་། །དེ་དག་བསམས་བཞིན་ཐམས་ཅད་རྫོགས་བྱེད་འགྱུར། །བུད་མེད་རྣམས་ཀྱི་ནང་ན་རི་རྩེ་འདྲ། །སྔོན་གྱི་དྲང་སྲོང་ཇི་བཞིན་ཡུན་རིང་གནས། །ལྷ་མོ་གཞོན་ནུ་ཇི་བཞིན་འདོད་ཆགས་སྤངས། །འཇིག་རྟེན་བདག་པོ་ཇི་བཞིན་བདེན་ཚིག་སྨྲ། །འཇིག་རྟེན་ཀུན་གྱི་ཁྱད་པར་རྒྱན་རྣམས་དང་། །འདོད་ཁམས་ལྷ་ཡི་ཁང་པ་ཀུན་བལྟས་ན། །ལྷ་མོ་འབའ་ཞིག་གཙོ་མོར་གྲགས་པས་ན། །སེམས་ཅན་མཆོག་ཏུ་གྱུར་པ་ཡོངས་མི་སྣང་། །གལ་ཏེ་གཡུལ་འགྱེད་འཇིགས་པའི་གནས་དག་དང་། །མེ་དོང་ལྷུང་བ་བདག་ནི་མཐོང་བར་གྱུར། །ཆུ་བོ་ཉམ་ང་ཆོམ་རྐུན་འཇིགས་པའི་ཚེ། །འཇིགས་པ་དེ་དག་ཐམས་ཅད་སེལ་བར་ནུས། །གལ་ཏེ་རྒྱལ་པོའི་ཁྲིམས་ཀྱིས་བཅིངས་བསྒྲོགས་སམ། །གལ་ཏེ་ཤ་ཆགས་གསོད་པར་བྱེད་པའི་ཚེ། །སེམས་ནི་རྩེ་གཅིག་མི་གཡོ་གནས་གྱུར་ན། །ངེས་པར་མྱ་ངན་སྡུག་བསྔལ་ཀུན་ལས་ཐར། །དགེ་སྡིག་མི་ཀུན་ཡོངས་སུ་སྐྱོབ་པས་ན། ། བྱམས་དང་སྙིང་རྗེའི་བརྩེ་བ་རྟག་མངོན་སྣང་། །དེ་ཕྱིར་བདག་ནི་བསམ་པ་རྩེ་གཅིག་ཏུ། །ལྷ་མོ་ཆེ་ལ་ཕྱག་འཚལ་སྐྱབས་སུ་མཆི། །དེ་ནས་བྲམ་ཟེ་དེས་སྔགས་དང་། བསྔགས་པ་བརྗོད་པའི་ཚིག་གིས་ལྷ་མོ་དེ་ལ་མངོན་པར་བསྟོད་པ། འཇིག་རྟེན་གཙོ་ལ་ཕྱག་འཚལ་
གུས་ཕྱག་འཚལ། །མི་རྣམས་ནང་ན་ཀུན་གྱི་མཆོག་གྱུར་པས། །འཇིག་རྟེན་གསུམ་པོ་ཐམས་ཅད་ཁྱོད་ལ་མཆོད། །བྱད་བཞིན་རབ་མཛེས་ཀུན་གྱིས་བལྟ་བར་མོས། །ཡོན་ཏན་རྣམ་པ་སྣ་ཚོགས་ལུས་རབ་བརྒྱན། །མིག་ཡངས་པདྨ་སྔོན་པོའི་འདབ་མ་འདྲ། །བསོད་ནམས་ཡེ་ཤེས་སྣང་བའི་གྲགས་པས་རྒྱས། །དཔེར་ན་རིན་ཐང་མེད་པའི་ནོར་བུ་མཚུངས། །དེང་བདག་དམ་པ་ཁྱོད་ལ་བསྔགས་པས་ན། །སེམས་ལ་བསམ་པ་ཐམས་ཅད་འགྲུབ་པར་འགྱུར། །ཡང་དག་ཡོན་ཏན་བཀྲ་ཤིས་གྱ་ནོམ་པ། །པདྨ་ལྟ་བུར་ཤིན་ཏུ་རྣམ་པར་དག །ལུས་མདོག་རབ་མཛེས་ཀུན་གྱིས་བལྟ་བར་མོས། །མཚན་མང་ངོ་མཚར་བསམ་གྱིས་ཡང་མི་ཁྱབ། །དྲི་མེད་ཡེ་ཤེས་འོད་ཟེར་རབ་འགྱེད་པས། །དྲན་པས་ཀུན་གྱི་ནང་ན་མཆོག་ཏུ་གྱུར། །ཇི་ལྟར་སེང་གེ་གཅན་གཟན་མཆོག་གྱུར་ལྟར། །རྟག་པར་ལག་པ་བརྒྱད་ཀྱིས་བདག་ཉིད་བརྒྱན། །སོ་སོར་མདའ་གཞུ་རལ་གྲི་སྟ་རེ་དང་། །ཐོ་རིངས་ལྕགས་ཀྱི་འཁོར་ལོ་ཞགས་པ་ཐོགས། །རབ་མཛེས་ལྷ་མོ་ཟླ་བ་ཉ་བ་འདྲ། །ཚིག་ལ་ཐོགས་མེད་དབྱངས་སྙན་འབྱིན་པར་བྱེད། །སེམས་ཅན་གང་ཞིག་སེམས་ལ་སྨོན་ཡོད་ན། །སྐྱེས་བུ་དམ་པས་བསམས་བཞིན་རྫོགས་པར་བྱེད། །བརྒྱ་བྱིན་ལྷ་མང་ཀུན་གྱིས་ཁྱོད་མཆོད་ནས། །ཐམས་ཅད་བསྔགས་བརྗོད་སྐྱབས་སུ་འགྲོ་བར་བྱེད། །བསམ་གྱིས་མི་ཁྱབ་ཡོན་ཏན་སྐྱེད་བྱེད་པས། །དུས་རྣམས་རྟག་ཏུ་གུས་པ་སྐྱེད་པར་བྱེད་སྭཱ་ཧཱ། །གལ་ཏེ་སྤོབས་ཆེན་ལྷ་མོ་གསོལ་འདོད་ན། །བསྔགས་བསྟོད་ཚིག་ནི་འདི་ལས་འབྱུང་བ་བཞིན། །ནད་པར་རྣམ་དག་སེམས་ཀྱིས་རྩེ་གཅིག་གདོན། །བསམ་པའི་དངོས་པོ་ཐམས་ཅད་བསམས་བཞིན་འགྲུབ། །དེ་ནས་བཅོམ་ལྡན་འདས་ཀྱིས་བྲམ་ཟེ་དེ་ལ་ཁྱོད་ཀྱིས་སེམས་ཅན་རྣམས་ལ་ཕན་གདགས་ཤིང་བདེ་བ་སྦྱིན་པའི་ཆེད་དུ། ལྷ་མོ་དེ་ལ་བསྔགས་པ་བརྗོད་པས་བྱིན་གྱིས་རློབ་པར་གསོལ་བ་བཏབ་ནས། བསོད་ནམས་དཔག་ཏུ་མེད་པ་འཐོབ་པར་འགྱུར་བ་ལེགས་སོ་ལེགས་སོ་ཞེས་བཀའ་སྩལ་ཏོ།། །།གསེར་འོད་དམ་པ་མཆོག་ཏུ་རྣམ་པར་
རྒྱལ་བ་མདོ་སྡེའི་རྒྱལ་པོ། །བམ་པོ་བརྒྱད་པ། དེ་ནས་བྲམ་ཟེ་ཀཽཎྜི་ནྱས་གོང་དུ་བསྟན་པ་དེ་ལྟ་བུའི་མངོན་པར་བསྟོད་པའི་ཚིག་དང་། སྔགས་ཀྱི་ཚིག་གིས་ལྷ་མོ་སྤོབས་པ་ཆེན་མོ་ལ་མངོན་པར་བསྟོད་ནས་འཁོར་མང་པོ་རྣམས་ལ་འདི་སྐད་ཅེས་སྨྲས་སོ། ། ཁྱེད་ཅག་ལྷ་མོ་སྤོབས་པ་ཆེན་མོ་ལ་གསོལ་བ་བཏབ་ནས་སྙིང་བརྩེ་བས་བྱིན་གྱིས་བརླབས་ནས་ཚེ་འདི་ཉིད་ལ་ཐོགས་པ་མེད་པའི་སེམས་མྱུར་བ་དང་། ཡེ་ཤེས་ཆེན་པོ་དང་། ཚིག་ལ་ཤིན་ཏུ་མཁས་པ་དང་། ཤེས་པ་རྒྱ་ཆེན་པོ་འཐོབ་པ་དང་། འབེལ་བའི་གཏམ་གྱིས་ཕན་ཚུན་ལན་འདེབས་པ་དང་། ཚིག་འབྲུའི་རྒྱན་ཡིད་བཞིན་དུ་གྲུབ་ནས་ཐོགས་པ་མེད་པར་འདོད་ན་སེམས་རྩེ་གཅིག་ཏུ་གུས་པས་འདི་ལྟར་གསོལ་བ་གདབ་པར་བྱའོ། །སངས་རྒྱས་ལ་ཕྱག་འཚལ་ལོ། །ཆོས་ལ་ཕྱག་འཚལ་ལོ། །དགེ་འདུན་ལ་ཕྱག་འཚལ་ལོ། །བྱང་ཆུབ་སེམས་དཔའི་ཚོགས་དང་། རང་སངས་རྒྱས་དང་། ཉན་ཐོས་དང་། འཕགས་པ་ཐམས་ཅད་དང་། འདས་པ་དང་། མ་བྱོན་པ་དང་། ཕྱོགས་བཅུའི་སངས་རྒྱས་ཡང་དག་པའི་བདེན་ཚིག་མངོན་པར་གྲུབ་པ་དང་། དབང་པོ་ཇི་ལྟ་བ་བཞིན་དུ་ཡང་དག་པའི་བདེན་ཚིག་གསུང་བ། མི་སླུ་བའི་ཚིག་གསུང་བ། བསྐལ་པ་ཆེན་པོ་བྱེ་བ་ཚད་མེད་པ་སྙེད་དུ་རྟག་པར་ཡང་དག་པའི་བདེན་ཚིག་གསུང་ཞིང་། ཡང་དག་པའི་བདེན་ཚིག་དང་ལྡན་པ་ཐམས་ཅད་ལ་རྗེས་སུ་ཡི་རངས་ནས་ཕྱག་འཚལ་ལོ། །མི་བདེན་པའི་ཚིག་མི་གསུང་བའི་ཕྱིར་ཡངས་ཤིང་རིང་བའི་ལྗགས་ཕྱུང་ནས་ཉིད་ཀྱི་ཞལ་དང་། འཛམ་བུའི་གླིང་དང་གླིང་བཞི་པ་དང་སྟོང་དང་སྟོང་གཉིས་པ་དང་། སྟོང་གསུམ་གྱི་འཇིག་རྟེན་གྱི་ཁམས་དང་། ཕྱོགས་བཅུའི་འཇིག་རྟེན་གྱི་ཁམས་བསམ་གྱིས་མི་ཁྱབ་པ་ཐམས་ཅད་ཀུན་ཏུ་ཁྱབ་པར་གཡོགས་ནས་ཉོན་མོངས་པའི་གདུང་བ་ཐམས་ཅད་རབ་ཏུ་སེལ་བར་མཛད་པ་ལ་གུས་པར་ཕྱག་འཚལ་ལོ། །སངས་རྒྱས་ལྗགས་ཀྱི་མཚན་དེ་ལྟ་བུ་དང་ལྡན་པ་ཐམས་ཅད་ལ་གུས་པར་ཕྱག་བྱས་ནས་བདག་མིང་འདི་ཞེས་བྱ་བ་ཤིན་ཏུ་གྱ་ནོམ་པའི་སྤོབས་པ་ཐམས་ཅད་དང་ལྡན་པར་སྨོན་ནས་སེམས་རྩེ་གཅིག་ཏུ་སྲོག་ཕྲོགས་སོ། །
སངས་རྒྱས་རྣམས་ཀྱི་སྤོབས་པ་དམ་པ་དང་། །བྱང་ཆུབ་སེམས་དཔའི་སྤོབས་པ་དམ་པ་དང་། །རང་རྒྱལ་འཕགས་པའི་སྤོབས་པ་དམ་པ་དང་། །ཞུགས་བཞི་འབྲས་བཞིའི་སྤོབས་པ་དམ་པ་དང་། །འཕགས་པའི་བདེན་པའི་ཚིག་གི་སྤོབས་མཆོག་དང་། །དྲང་སྲོང་ལྷ་ཡི་སྤོབས་པ་དམ་པ་དང་། །ཚངས་འཁོར་དྲང་སྲོང་སྤོབས་པ་དམ་པ་དང་། །ལྷ་ཆེན་ཨུ་མའི་སྤོབས་པ་དམ་པ་དང་། །སྐལ་ལྡན་ལྷ་ཡི་སྤོབས་པ་དམ་པ་དང་། །རྒྱལ་པོ་མ་ན་སི་ཡི་སྤོབས་མཆོག་དང་། །ཡིད་བཞིན་ལྷ་མོའི་སྤོབས་པ་དམ་པ་དང་། །རྒྱལ་ཆེན་བཞི་ཡི་སྤོབས་པ་དམ་པ་དང་། །རབ་གནས་ལྷ་ཡི་བུ་ཡི་སྤོབས་མཆོག་དང་། །རྡོ་རྗེ་གསང་བའི་བདག་པོའི་སྤོབས་མཆོག་དང་། །ཁྱབ་འཇུག་ལྷ་ཡི་སྤོབས་པ་དམ་པ་དང་། །ལྷ་མོ་བི་མའི་སྤོབས་པ་དམ་པ་དང་། །བིཥྞུའི་ལྷ་མོའི་སྤོབས་པ་དམ་པ་དང་། ལྷ་མོ་བཟང་མོའི་སྤོབས་པ་དམ་པ་དང་། །ཤི་རི་མ་ཏའི་སྤོབས་པ་དམ་པ་དང་། །ཧ་རི་ཚིག་གི་སྤོབས་པ་དམ་པ་དང་། །མ་དང་མ་ཆེན་སྤོབས་པ་དམ་པ་དང་། །ཧ་རི་ཏ་མའི་སྤོབས་པ་དམ་པ་དང་། །གནོད་སྦྱིན་རྣམས་ཀྱི་སྤོབས་པ་དམ་པ་དང་། །ཕྱོགས་བཅུའི་རྒྱལ་པོའི་སྤོབས་ལ་གུས་ཕྱག་འཚལ། །ལས་མཆོག་ཅི་མངའ་ཐམས་ཅད་བདག་བསྟངས་ནས། །སྤོབས་མཆོག་དམ་པ་མཐའ་མེད་འཐོབ་པར་ཤོག །བསླུ་བ་མེད་ལ་གུས་ཕྱག་འཚལ། །རྣམ་པར་གྲོལ་ལ་གུས་ཕྱག་འཚལ། །འདོད་ཆགས་སྤངས་ལ་གུས་ཕྱག་འཚལ། །འཆིང་སྒྲིབ་སྤངས་ལ་གུས་ཕྱག་འཚལ། །རྣམ་དག་སེམས་ལ་གུས་ཕྱག་འཚལ། །འོད་དང་ལྡན་ལ་གུས་ཕྱག་འཚལ། །བདེན་ཚིག་སྨྲ་ལ་གུས་ཕྱག་འཚལ། །རྡུལ་ཆགས་མེད་ལ་གུས་ཕྱག་འཚལ། །དོན་མཆོག་གནས་ལ་གུས་ཕྱག་འཚལ། །འཁོར་མང་དག་ལ་གུས་ཕྱག་འཚལ། ། སྤོབས་པའི་ལྷ་ལ་གུས་ཕྱག་འཚལ། །བདག་གི་ཚིག་ལ་ཐོགས་མེད་ཤོག །བདག་གིས་སྨོན་ཅིང་གཉེར་བའི་དངོས། །ཐམས་ཅད་མྱུར་དུ་གྲུབ་པར་ཤོག །ནད་མེད་རྟག་ཏུ་རབ་བདེ་ཞིང་། །ཚེ་རིང་ལོ་ནུར་འཐོབ་པར་ཤོག །རིག་སྔགས་ཀུན་ལ་རབ་མཁས་
ཤིང་། །ནན་ཏན་བྱང་ཆུབ་ལམ་བསྒོམས་ནས། །སྐྱེ་དགུ་རྒྱ་ཆེར་ཕན་བཏགས་ཏེ། །བསམ་པ་མྱུར་དུ་གྲུབ་པར་སྨོན། །བདག་གིས་བདེན་ཚིག་སྨྲས་པ་དང་། །བདག་གིས་བསླུ་མེད་སྨྲས་པ་ཡིས། །ལྷ་མོའི་སྤོབས་པ་གང་ཡིན་པ། །བདག་ལ་གྲུབ་པར་མཛད་དུ་གསོལ། །ལྷ་མོ་ཁྱོད་ནི་འདིར་གཤེགས་ཏེ། །ཚིག་ཐོགས་མ་མཆིས་བགྱི་སླད་དུ། །བདག་ལུས་ཁར་ནི་མྱུར་ཞུགས་ནས། །ཡིད་མྱུར་སྤོབས་དང་ལྡན་པར་མཛོད། །བདག་གི་ལྕེ་ཡི་དབང་པོ་ཡིས། །དེ་བཞིན་གཤེགས་པའི་སྤོབས་ཐོབ་ནས། ། ཚིག་དེའི་མཐུ་སྟོབས་དབང་གིས་ནི། །སེམས་ཅན་རྣམས་ནི་འདུལ་བར་ཤོག །བདག་ནི་ཚིག་དག་སྨྲས་པའི་ཚེ། །དོན་ནི་ཇི་བཞིན་གྲུབ་གྱུར་ཅིག །ཐོས་པ་དག་ནི་གུས་བསྐྱེད་ནས། །བྱས་པ་ཆུད་གསོན་མ་གྱུར་ཅིག །བདག་གིས་སྤོབས་པ་གཉེར་བ་ཡི། ། དངོས་པོ་གལ་ཏེ་མ་གྲུབ་ན། །ལྷ་མོའི་བདེན་ཚིག་གང་ཡིན་པ། །ཐམས་ཅད་བརྫུན་པ་ཉིད་དུ་འགྱུར། །གང་གིས་མཚམས་མེད་སྡིག་བྱས་པ། །སངས་རྒྱས་གསུང་གིས་འདུལ་བར་འགྱུར། །དེ་བཞིན་དགྲ་བཅོམ་གང་ཡིན་དང་། །དྲིན་གཟོའི་ཚིག་ནི་ཇི་སྙེད་དང་། ། ཤཱ་རིའི་བུ་དང་མཽད་གལ་བུ། །བཅོམ་ལྡན་འཁོར་མང་མཆོག་གྱུར་པ། །འདི་ལ་སོགས་པའི་བདེན་ཚིག་རྣམས། །ཐམས་ཅད་བདག་ལ་གྲུབ་པར་མཛོད། །དེང་བདག་སངས་རྒྱས་ཉན་ཐོས་འཁོར། །ཐམས་ཅད་འདིར་ནི་སྤྱན་འདྲེན་ན། །ཐམས་ཅད་མྱུར་དུ་འདིར་གཤེགས་ཏེ། །བདག་གི་སྨོན་པ་རྫོགས་མཛད་སྨོན། །ཡང་དག་བདེན་ཚིག་གང་གཉེར་བ། །ཐམས་ཅད་བསླུ་བ་མ་མཆིས་སྨོན། །གོང་དུ་འོག་མིན་ལྷ་མན་ཆད། །གནས་གཙང་རིས་ཀྱི་ལྷ་དག་དང་། །ཚངས་ཆེན་ཚངས་ལྷ་ཉེ་ཕན་དང་། །ཚངས་པའི་རྒྱལ་པོའི་འཁོར་རྣམས་དང་། །སྟོང་གསུམ་འཇིག་རྟེན་ཀུན་ཁྱབ་དང་། །མི་མཇེད་འཇིག་རྟེན་བདག་པོ་དང་། །འཁོར་ནི་མང་པོ་ཐམས་ཅད་ཀུན། །དེང་བདག་ཐམས་ཅད་སྤྱན་འདྲེན་ན། །བྱམས་དང་ཐུགས་རྗེ་རབ་བསྐྱེད་དེ། །ཐམས་ཅད་བརྩེ་བས་གཟུང་དུ་གསོལ། །གཞན་འཕྲུལ་
དབང་བྱེད་ལྷ་རྣམས་དང་། །འཕྲུལ་དགའི་ལྷ་ནི་དེ་དག་དང་། །དགའ་ལྡན་པ་ཡི་ལྷ་ཚོགས་དང་། །བྱམས་པ་མངོན་པར་རྫོགས་འགྱུར་དང་། །འཐབ་བྲལ་བ་ཡི་ལྷ་རྣམས་དང་། །སུམ་ཅུ་རྩ་གསུམ་ལྷ་དག་དང་། །རྒྱལ་ཆེན་རིས་བཞིའི་ལྷ་ཚོགས་དང་། །ལྷ་མང་འཁོར་ནི་ཐམས་ཅད་དང་། །ས་ཆུ་མེ་རླུང་ལྷ་རྣམས་དང་། །རི་རབ་བརྟེན་ནས་གནས་པ་དང་། །མཚོ་བདུན་རི་ཡི་ལྷ་ཚོགས་རྣམས། །འཁོར་ནི་མང་པོར་བཅས་པ་དང་། །ནོར་རྒྱས་དང་ནི་མགོ་ལྔ་དང་། །ཉི་ཟླ་གཟའ་སྐར་ལྷ་དག་དང་། །འདི་ལ་སོགས་པའི་ལྷ་མང་པོ། ། འཇིག་རྟེན་བདེ་བར་བྱེད་པས་ན། །འདི་ལ་སོགས་པའི་ལྷ་མང་པོ། །སྡིག་པའི་ལས་ནི་མི་བྱེད་མོས། །སངས་རྒྱས་གུས་པ་འཕྲོག་མ་དང་། །དེ་ཡི་བུ་སྡུག་ཐ་ཆུངས་དང་། །ལྷ་དང་ཀླུ་དང་གནོད་སྦྱིན་དང་། །དྲི་ཟ་དང་ནི་ལྷ་མ་ཡིན། །མི་འམ་ཅི་ཡི་འཁོར་རྣམས་དང་། ། ལྟོ་འཕྱེ་ཆེན་པོ་ལ་སོགས་པ། །བདག་ནི་བཅོམ་ལྡན་མཐུ་སྟོབས་ཀྱིས། །དེ་དག་ཐམས་ཅད་སྤྱན་འདྲེན་ན། །བྱམས་དང་སྙིང་རྗེའི་སེམས་བསྐྱེད་ནས། །བདག་ལ་ཐོགས་མེད་སྤོབས་པ་སྩོལ། །ལྷ་དང་མི་ཡི་འཁོར་རྣམས་ལས། །གཞན་གྱི་སེམས་ནི་རིག་གྱུར་པ། ། ཐམས་ཅད་བྱིན་གྱིས་བརླབས་ནས་ནི། །བདག་ལ་སྤོབས་པ་དམ་པ་སྩོལ། །ནམ་མཁའི་ཁམས་ནི་མཐར་ཐུག་དང་། །ཆོས་ཀྱི་དབྱིངས་ཀྱིས་ཀླས་པ་ན། །སེམས་ཅན་རྣམ་པ་ཇི་སྙེད་པས། །བདག་ལ་སྤོབས་པ་དམ་པ་སྩོལ། །དེ་ནས་ལྷ་མོ་སྤོབས་པ་ཆེན་མོས་དེ་སྐད་ཅེས་གསོལ་བ་བཏབ་པ་ཐོས་པ་དང་བྲམ་ཟེ་དེ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཆེན་པོ་ལེགས་སོ། །སྐྱེས་པའམ། བུད་མེད་གང་ལ་ལ་ཞིག་སྔགས་དེ་དང་།སྔགས་ཀྱི་མངོན་པར་བསྟོད་པ་དེ་དག་ལ་བརྟེན་ནས་སྔར་གོང་དུ་བསྟན་པ་བཞིན་དུ་ཆོ་ག་ཡང་དག་པར་བླངས་ཏེ། དཀོན་མཆོག་གསུམ་ལ་གུས་པས་སྐྱབས་སུ་འགྲོ་ཞིང་སེམས་རྩེ་གཅིག་ཏུ་དྲན་པ་ཉེ་བར་འཇོག་པར་བྱེད་ན་ཅི་དང་ཅི་བསྒྲུབས་པ་ཐམས་ཅད་ཆུད་ཟ་བར་མི་འགྱུར་རོ། །གཞན་ཡང་གསེར་འོད་དམ་པ་ཤིན་ཏུ་གྱ་ནོམ་པའི་མདོ་སྡེ་འདི་ཡང་དག་པར་བཟུང་སྟེ། ཀློག་ཅིང་འདོན་པར་བྱེད་ན་
སྨོན་པ་ཐམས་ཅད་འབྲས་བུ་དང་ལྡན་པར་འགྱུར་ཞིང་མྱུར་དུ་མངོན་པར་འགྲུབ་པར་འགྱུར་ཏེ། སེམས་རྩེ་གཅིག་ཏུ་མ་བྱས་པ་ནི་མ་གཏོགས་སོ། །དེའི་ཚེ་བྲམ་ཟེ་དེ་ཤིན་ཏུ་དང་བའི་སེམས་ཀྱིས་རབ་ཏུ་དགའ་བར་གྱུར་པས་ཐལ་མོ་སྦྱར་ནས་སྤྱི་བོས་ཡང་དག་པར་བླངས་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་ལྷ་མོ་སྤོབས་པ་ཆེན་མོ་ལ་བཀའ་སྩལ་པ། རིགས་ཀྱི་ལྷ་མོ་ཁྱོད་ཀྱིས་མདོ་སྡེའི་རྒྱལ་པོ་དམ་པ་འདི་རྒྱ་ཆེར་སྤེལ་ནས་མདོ་སྡེ་ཡང་དག་པར་འཛིན་པ་དག་ལ་ཡོངས་སུ་སྐྱོབ་པ་དང་། ཡོངས་སུ་བསྲུང་བ་བྱས་པ་དང་། སེམས་ཅན་ཐམས་ཅད་ལ་ཕན་གདགས་ཤིང་བདེ་བ་ཐོབ་པར་བྱ་བའི་ཆེད་དུ་ཆོས་དེ་ལྟ་བུ་བསྟན་ནས་བསམ་གྱིས་མི་ཁྱབ་པའི་སྤོབས་པ་བྱིན་ཏེ། བསོད་ནམས་ཚད་མེད་པ་ཐོབ་པར་གྱུར་པ་དང་། སེམས་བསྐྱེད་པ་རྣམས་མྱུར་དུ་བྱང་ཆུབ་ལ་གཞོལ་བར་བྱས་པ་ལེགས་སོ་ལེགས་སོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལྷ་མོ་སྤོབས་པ་ཆེན་མོའི་ལེའུ་སྟེ་བཅྭ་ལྔ་པའོ།། །།དེ་ནས་དཔལ་གྱི་ལྷ་མོ་ཆེན་མོ་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་གུས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གལ་ཏེ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ལེན་པ་དང་། འཛིན་པ་དང་། ཀློག་པ་དང་། འདོན་པ་དང་། གཞན་དག་ལ་ཡང་དག་པར་སྟོན་པར་བགྱིད་པ་ཞིག་མཐོང་བར་གྱུར་ན་བདག་གིས་སེམས་རྩེ་གཅིག་ཏུ་གུས་པས་བཀུར་སྟི་དང་མཆོད་པ་བགྱིད་དོ། །ཆོས་སྨྲ་བ་དེ་ལ་འདི་ལྟ་སྟེ། བཟའ་བ་དང་། བཏུང་བ་དང་། གོས་དང་། མལ་ཆ་དང་། གསོས་སྨན་དང་། ཡོ་བྱད་ཅི་འཚལ་བ་ཐམས་ཅད་ཕུན་སུམ་ཚོགས་པར་སྦྱར་ཏེ་བྲེལ་ཅིང་ཕོངས་པ་མ་མཆིས་པར་བགྱིད་དོ། །གདུགས་མཚན་དུ་མདོ་སྡེའི་རྒྱལ་པོ་འདིའི་ཚིག་གི་དོན་ཇི་སྙེད་པ་དག་ལ་སོ་སོར་བརྟགས་ཏེ། ཡིད་ལ་བསམས་ཤིང་ཡོངས་སུ་བཙལ་ནས་བདེ་བར་གནས་པ་དང་། མདོ་སྡེ་འདི་འཛམ་བུའི་
གླིང་དུ་རྒྱ་ཆེར་སྤེལ་བའི་སླད་དུ་སེམས་ཅན་གང་ལ་ལ་དག་སངས་རྒྱས་བརྒྱ་སྟོང་ཚད་མ་མཆིས་པ་སྙེད་ལས་དགེ་བའི་རྩ་བ་བསྐྱེད་པ་དེ་དག་རྟག་ཏུ་ཐོས་པར་འགྱུར་ཞིང་། མྱུར་དུ་ནུབ་པར་མི་འགྱུར་བར་བགྱིད་ན་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་དུ་ལྷ་དང་མིའི་ལོངས་སྤྱོད་མཆོག་རྣམ་པ་སྣ་ཚོགས་མྱོང་བར་འགྱུར་ལགས་སོ། །རྟག་པར་ལོ་ལེགས་ཤིང་མུ་གེའི་རྒུད་པ་གཏན་དུ་སེལ་བར་འགྱུར་བས་སྐྱེ་བོ་རྣམས་གཏན་དུ་བདེ་བ་མྱོང་བར་འགྱུར། སངས་རྒྱས་བཅོམ་ལྡན་འདས་རྣམས་དང་མཇལ་བར་འགྱུར། སླད་མའི་དུས་ཀྱི་ཚེ་མྱུར་དུ་བྱང་ཆུབ་ཆེན་པོའི་འབྲས་བུ་འཐོབ་པར་འགྱུར་བས་ངན་འགྲོ་གསུམ་དང་། འཁོར་བའི་སྡུག་བསྔལ་གྱི་བགེགས་གཏན་དུ་གཅོད་པར་འགྱུར་ལགས་སོ། །བཅོམ་ལྡན་འདས་བདག་མངོན་པར་དྲན་ལགས་ཏེ། འདས་པའི་དུས་ཀྱི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཻ་ཌཱུཪྱ་དང་གསེར་གྱི་རི་བོ་རིན་པོ་ཆེའི་མེ་ཏོག་སྣང་བ་དཔལ་གྱི་ཡོན་ཏན་རྒྱ་མཚོ་ཞེས་བགྱི་བ་མཚན་རྣམ་པ་བཅུ་དང་ལྡན་པ་ཞིག་བྱུང་སྟེ་བདག་དེ་ལས་དགེ་བའི་རྩ་བ་བསྐྲུན་ཏེ། དེ་བཞིན་གཤེགས་པ་དེས་བྱམས་པ་དང་ཐུགས་རྗེའི་བྱིན་གྱིས་བརླབས་ཀྱི་མཐུས་བརྩེ་བར་དགོངས་པར་གྱུར་པའི་སླད་དུ་དེང་བདག་གང་དུ་བསམས་པའི་གནས་དེ་དང་། གང་དུ་བལྟས་པའི་ཕྱོགས་དེ་དང་གང་དུ་མཆིས་པའི་ཡུལ་དེ་དང་དེ་དག་ཏུ་སེམས་ཅན་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་ཤིན་ཏུ་བདེ་བའི་ལོངས་སྤྱོད་མྱོང་ཞིང་གོས་དང་། ། བཟའ་བ་དང་། བཏུང་བ་དང་། འཚོ་བའི་ཡོ་བྱད་དང་། གསེར་དང་། དངུལ་དང་། བཻ་ཌཱུཪྱ་དང་། སྤུག་དང་། རྡོའི་སྙིང་པོ་དང་། བྱི་རུ་དང་། འགྲོན་བུ་དང་། མུ་ཏིག་ལ་སོགས་པ་རིན་པོ་ཆེ་ཅི་འཚལ་བ་ཐམས་ཅད་ཕུན་སུམ་ཚོགས་པར་འགྱུར་བ་ལགས་སོ། ། གང་ལ་ལ་ཞིག་སེམས་རྩེ་གཅིག་ཏུ་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ཀློག་ཅིང་འདོན་པ་དེས་གདུགས་གཅིག་བཞིན་དུ་སྤོས་སྣ་ཚོགས་བསྲེགས་ནས་མེ་ཏོག་དམ་པ་རྣམས་ཀྱིས་བདག་གི་ཆེད་དུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་
རྫོགས་པའི་སངས་རྒྱས་བཻ་ཌཱུཪྱ་དང་། གསེར་གྱི་རི་བོ་རིན་པོ་ཆེའི་མེ་ཏོག་སྣང་བ་དཔལ་གྱི་ཡོན་ཏན་རྒྱ་མཚོ་དེ་ལ་མཆོད་པ་བགྱིའོ། །གཞན་ཡང་གདུགས་གཅིག་བཞིན་དུ་དུས་གསུམ་དུ་བདག་གི་མིང་ནས་བརྗོད་ཅིང་རྗེས་སུ་དྲན་པར་བགྱིས་ནས་ལོགས་ཤིག་ཏུ་སྤོས་དང་། མེ་ཏོག་དང་། ཟས་མཆོག་རྣམས་ཀྱིས་བདག་ལ་མཆོད་ཅིང་རྟག་པར་མདོ་སྡེའི་རྒྱལ་པོ་དམ་པ་འདི་ཉན་པར་བགྱིད་ན་བསོད་ནམས་འདི་ལྟ་བུ་དག་འཐོབ་པར་འགྱུར་ལགས་སོ། །དེ་ནས་ཚིགས་སུ་བཅད་དེ་གསོལ་པ། འདི་ལྟར་མདོ་སྡེ་འདི་ནི་འཛིན་པའི་སླད། ། བདག་དང་འཁོར་རྣམས་གནོད་པ་ཀུན་དང་འབྲལ། །གོས་ཟས་ཅི་འཚལ་ཕོངས་པ་མ་མཆིས་འགྱུར། །གཟི་བྱིན་ལྡན་ཞིང་ཚེ་ཡང་དཔག་པར་དཀའ། །ས་ཡི་རོ་ཡང་རྟག་པར་འཕེལ་བར་འགྱུར། །ལྷ་རྣམས་དུས་བཞིན་ཆར་ནི་རབ་ཏུ་འབེབས། །ལྷ་འཁོར་དེ་དག་རབ་ཏུ་དགའ་བར་འགྱུར། །སྐྱེད་མོས་ཚལ་དང་འབྲུ་ཡི་ལྷ་རྣམས་ཀྱིས། །ནགས་ཚལ་ལྗོན་ཤིང་འབྲས་བུ་རབ་འཕེལ་ཞིང་། །འབྲུ་རྣམས་ཐམས་ཅད་ཡོངས་སུ་སྨིན་པར་བགྱིད། །རིན་ཆེན་ནོར་ཚོལ་བསམ་པ་རྫོགས་འགྱུར་ཞིང་། །ཅི་དང་ཅི་སྨོན་བསམས་བཞིན་འགྲུབ་པར་འགྱུར། ། བཅོམ་ལྡན་འདས་ཀྱིས་དཔལ་གྱི་ལྷ་མོ་ལ་བཀའ་སྩལ་པ། ཁྱོད་ཀྱིས་འདི་ལྟར་སྔོན་གྱི་རྒྱུད་རྗེས་སུ་དྲན་ནས་དྲིན་རྗེས་སུ་བསབ་པའི་ཕྱིར་མཆོད་པ་བྱས་པ་དང་། མཐའ་ཡས་པའི་སེམས་ཅན་རྣམས་ལ་ཕན་གདགས་ཤིང་བདེ་བར་བྱ་བའི་ཆེད་དུ་མདོ་སྡེ་འདི་ཡོངས་སུ་སྤེལ་ནས་ཡོན་ཏན་ཟད་མི་ཤེས་པར་བྱས་པ་ལེགས་སོ་ལེགས་སོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་དཔལ་གྱི་ལྷ་མོ་ཆེན་མོའི་ལེའུ་སྟེ་བཅུ་དྲུག་པའོ།། །།དེ་ནས་བཅོམ་ལྡན་འདས་ལ་དཔལ་གྱི་ལྷ་མོ་ཆེན་མོས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཕྱོགས་ན་ལྷའི་རྒྱལ་པོ་རྣམ་ཐོས་ཀྱི་བུའི་གྲོང་ཁྱེར་ནོར་ལྡན་ཞེས་བགྱི་བ་མཆིས་ཏེ། གྲོང་ཁྱེར་དེ་ལས་མི་རིང་བ་ན་མེ་ཏོག་དམ་པའི་བསོད་ནམས་ཀྱི་འོད་ཅེས་བགྱི་བའི་ཀུན་དགའ་ར་བ་མཆིས་པ་དེ་ན་གཞལ་མེད་ཁང་མཆོག་དམ་པ་རིན་པོ་ཆེ་
སྣ་བདུན་ལས་མངོན་པར་གྲུབ་པ་ཞིག་མཆིས་ཏེ། བཅོམ་ལྡན་འདས་བདག་ནི་རྟག་པར་དེ་ན་གནས་ལགས་པས་གང་ལ་ལ་ཞིག་འབྲུ་རྣམ་པ་ལྔ་གདུགས་གཅིག་བཞིན་དུ་འཕེལ་བ་དང་། བང་མཛོད་རྣམས་རྒྱས་ཤིང་གང་བར་འཚལ་བས་གུས་པས་དང་བའི་སེམས་བསྐྱེད་དེ་ཁང་པ་གཅིག་གཙང་མར་བྱས་ནས་བ་ལང་གི་ལྕི་བས་དོག་ས་ལ་ཞལ་ཞལ་བགྱིས་ཏེ། བདག་གི་གཟུགས་རྒྱན་རྣམ་པ་སྣ་ཚོགས་ཀྱིས་རབ་ཏུ་བརྒྱན་པ་རི་མོར་བྲིས་ནས་ལུས་ལེགས་པར་བཀྲུས་ཏེ། གོས་གཙང་མ་བགོས་ནས་བྱུག་པ་དམ་པས་བྱུགས་ཏེ་ཁང་པ་གཙང་མའི་ནང་དུ་ཞུགས་ཏེ། བདག་གི་ཆེད་དུ་གདུགས་རེ་ཞིང་དུས་གསུམ་དུ་སངས་རྒྱས་དེའི་མཚན་དང་། མདོ་སྡེ་འདིའི་མཚན་ནས་བརྗོད་པར་སེམས་བསྐྱེད་དེ་དེ་བཞིན་གཤེགས་པ་བཻ་ཌཱུཪྱ་དང་གསེར་གྱི་རི་བོ་རིན་པོ་ཆེའི་མེ་ཏོག་སྣང་བ་དཔལ་གྱི་ཡོན་ཏན་རྒྱ་མཚོ་ལ་ཕྱག་འཚལ་ལོ། །ཞེས་བརྗོད་ནས་མེ་ཏོག་དང་སྤོས་རྣམས་ཐོགས་ཏེ། ཞལ་ཟས་བདའ་བ་སྣ་ཚོགས་སེམས་རྩེ་གཅིག་ཏུ་དབུལ་བར་བགྱིའོ། །གཞན་ཡང་སྤོས་དང་མེ་ཏོག་དང་བཟའ་བ་དང་བཏུང་བ་རྣམས་ཀྱིས་བདག་གི་གཟུགས་བརྙན་ལ་མཆོད་པར་བགྱིའོ། །གཞན་ཡང་བཟའ་བ་དང་བཏུང་བ་དག་ཐོགས་ཏེ། ཕྱོགས་གཞན་དུ་གཏོར་ནས་འདྲེ་སྲིན་རྣམས་ལ་སྩལ་བར་བགྱིའོ། །ཡང་དག་པའི་བདེན་ཚིག་གིས་དཔལ་གྱི་ལྷ་མོ་ཆེན་མོ་ལ་གསོལ་བ་བཏབ་ནས་ཅི་དང་ཅི་གཉེར་བའི་སྨོན་ལམ་གདབ་པར་བགྱིའོ། །གལ་ཏེ་ཇི་སྐད་སྨྲས་པ་བཞིན་དུ་བརྫུན་པ་མ་ལགས་ན་གསོལ་བ་བཏབ་པ་དོན་དང་ལྡན་པར་མཛད་དུ་གསོལ་ཞེས་བརྗོད་པར་བགྱིའོ། །དེའི་ཚེ་དཔལ་གྱི་ལྷ་མོས་དངོས་པོ་དེ་རིག་ནས་བརྩེ་བའི་སེམས་སྐྱེ་བར་འགྱུར་བས་དེའི་ཁྱིམ་དུ་ནོར་དང་འབྲུ་རྣམས་རབ་ཏུ་འཕེལ་བར་བགྱིད་དོ། །དེ་ནས་སྔགས་བཟླས་ནས་བདག་གཡར་དྲང་བར་བགྱིས་ཏེ། སྔར་སངས་རྒྱས་ཀྱི་མཚན་དང་བྱང་ཆུབ་སེམས་དཔའི་མིང་ནས་བརྗོད་དེ་སེམས་རྩེ་གཅིག་ཏུ་གུས་པས་ཕྱག་བགྱིའོ། །ཕྱོགས་བཅུ་དུས་གསུམ་གྱི་སངས་རྒྱས་ཐམས་ཅད་ལ་ཕྱག་འཚལ་ལོ། །སངས་རྒྱས་རིན་ཆེན་གཙུག་ཕུད་ལ་ཕྱག་འཚལ་ལོ། །སངས་རྒྱས་དྲི་མ་
མེད་པའི་འོད་ཟེར་རིན་པོ་ཆེའི་ཏོག་ལ་ཕྱག་འཚལ་ལོ། །སངས་རྒྱས་གསེར་ཏོག་འོད་ལ་ཕྱག་འཚལ་ལོ། །སངས་རྒྱས་གསེར་བརྒྱའི་འོད་ཀྱི་སྙིང་པོ་ལ་ཕྱག་འཚལ་ལོ། །སངས་རྒྱས་གསེར་གདུགས་རིན་པོ་ཆེ་བརྩེགས་པ་ལ་ཕྱག་འཚལ་ལོ། ། སངས་རྒྱས་གསེར་གྱི་མེ་ཏོག་འོད་ཟེར་རྒྱལ་མཚན་ལ་ཕྱག་འཚལ་ལོ། །སངས་རྒྱས་སྒྲོན་མ་ཆེན་པོའི་འོད་ལ་ཕྱག་འཚལ་ལོ། །སངས་རྒྱས་རིན་པོ་ཆེ་ཆེན་པོའི་ཏོག་ལ་ཕྱག་འཚལ་ལོ། །ཤར་ཕྱོགས་ཀྱི་སངས་རྒྱས་མི་འཁྲུགས་པ་ལ་ཕྱག་འཚལ་ལོ། །ལྷོ་ཕྱོགས་ཀྱི་སངས་རྒྱས་རིན་ཆེན་ཏོག་ལ་ཕྱག་འཚལ་ལོ། །ནུབ་ཕྱོགས་ཀྱི་སངས་རྒྱས་ཚེ་དཔག་མེད་ལ་ཕྱག་འཚལ་ལོ། །བྱང་ཕྱོགས་ཀྱི་སངས་རྒྱས་ལྷའི་རྔ་སྒྲ་ལ་ཕྱག་འཚལ་ལོ། །བྱང་ཆུབ་སེམས་དཔའ་མཛེས་པའི་ཏོག་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་འོད་ལ་ཕྱག་འཚལ་ལོ། །བྱང་ཆུབ་སེམས་དཔའ་གསེར་མཛོད་ལ་ཕྱག་འཚལ་ལོ། །བྱང་ཆུབ་སེམས་དཔའ་རྟག་ཏུ་བཤུམས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཆོས་འཕགས་ལ་ཕྱག་འཚལ་ལོ། །བྱང་ཆུབ་སེམས་དཔའ་ཤིན་ཏུ་བདེ་བར་གནས་པ་ལ་ཕྱག་འཚལ་ལོ། །དེ་ལྟར་སངས་རྒྱས་དང་བྱང་ཆུབ་སེམས་དཔའ་རྣམས་ལ་གུས་པར་ཕྱག་བགྱིས་ནས་དེའི་རྗེས་ལ་སྔགས་བཟླས་ཏེ། དཔལ་གྱི་ལྷ་མོ་ཆེན་མོ་བདག་གཡར་འདྲེན་པར་བགྱིད་ན་སྔགས་འདིའི་མཐུས་ཡོངས་སུ་གཉེར་བའི་དངོས་པོ་རྣམས་ཐམས་ཅད་མངོན་པར་འགྲུབ་པར་འགྱུར་རོ། །དཔལ་གྱི་ལྷ་མོ་ཆེན་མོ་ལ་ཕྱག་འཚལ་ལོ། །སྔགས་ནི་འདི་ལྟ་སྟེ། སཱདྱ་ཐེ་དན། པྲ་ཏི་པཱུརྞུ་ཙ་རེ། ས་མནྟཱ་དརྴ་ཎེ། མ་ཧཱ་བི་ཧཱ་ར་ག་ཏི། ས་མནྟ། བི་མཱ་ན་ག་ཏི། མ་ཧཱ་ཀཱཪྱ། པྲ་ཏི་པྲཱ་བ་ཎེ། སཏྭཱ་ཨརྠ་ས་མ་ཏཱ་ནུ་པྲ་པཱུ་རེ།ཨ་ཡཱ་ན། དྷརྨ་ཏཱ། མ་ཧཱ་བྷོ་གི་ནི། མ་ཧཱ་མཻ་ཏྲི། ཨུ་པ་སཾ་ཧི་ཏེ། ཧི་ཏཻ་ཥི། ས་གྲྀ་ཧཱི་ཏེ། ས་མཱརྠ་ཨ་ནུ་པཱ་ལི་ནེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་གཟུངས་སྔགས་འདི་འདོན་ཅིང་ཡོངས་སུ་བཟུང་བས་བདག་གཡར་འདྲེན་པར་བགྱིད་ན། བདག་གིས་
གཡར་འདྲེན་པ་ཐོས་ནས་དེའི་ཐད་དུ་མཆིས་ཏེ་སྨོན་པ་རྣམས་འགྲུབ་པར་བགྱིད་དོ། །བཅོམ་ལྡན་འདས་འདི་ནི་དབང་བསྐུར་བའི་ཆོ་གའི་ཚིག །ཏིང་ངེ་འཛིན་མངོན་པར་འགྲུབ་པའི་ཚིག །ཡང་དག་པའི་ཚིག །སླུ་བ་མ་མཆིས་པའི་ཚིག །ཡང་དག་པའི་སྤྱོད་པ་སེམས་ཅན་རྣམས་ཀྱི་ཡང་དག་པའི་དགེ་བའི་རྩ་བ་ལགས་པས། གང་ལ་ལ་ཞིག་སྔགས་འདི་ཡང་དག་པར་འཛིན་ཅིང་ཀློག་པ་དང་། འདོན་པ་དེས་གདུགས་མཚན་བདུན་གྱི་བར་དུ་ཡན་ལག་བརྒྱད་དང་ལྡན་པའི་སྡོམ་པ་ཡང་དག་པར་བླངས་ནས་སྔ་དྲོའི་དུས་ཀྱི་ཚེ་སྔར་སོ་ཤིང་བཅས་ཏེ་དག་པར་བཀྲུས་ནས་སྔ་དྲོའི་དུས་ཀྱི་ཚེ་སྤོས་དང་། མེ་ཏོག་གིས་སངས་རྒྱས་ཐམས་ཅད་ལ་མཆོད་པ་བགྱིས་ཏེ། བདག་ཉིད་ཀྱིས་དངོས་སྡིག་བཤགས་ནས་བདག་དང་སེམས་ཅན་རྣམས་སྨོན་པ་མྱུར་དུ་འགྲུབ་པར་བགྱི་བའི་སླད་དུ་ཡོངས་སུ་བསྔོ་ཞིང་སྨོན་ལམ་གདབ་པར་བགྱིའོ། །ཁང་པ་གཅིག་གཙང་མར་བགྱིས་པའམ། ཡང་ན་དབེན་པའི་གནས་སམ། དགོན་པའི་གནས་ཀྱང་རུང་སྟེ། བ་ལང་གི་ལྕི་བས་དཀྱིལ་འཁོར་བགྱིས་ནས་ཙནྡན་བསྲེགས་ཏེ་མཆོད་པར་བགྱིའོ། །སྟན་མཆོག་གཅིག་བཏིང་སྟེ་བ་དན་དང་གདུགས་ཀྱིས་བརྒྱན་པར་བགྱིའོ། །མེ་ཏོག་དམ་པ་རྣམས་ཀྱིས་དཀྱིལ་འཁོར་གྱི་ནང་བཀྲམ་སྟེ་སེམས་རྩེ་གཅིག་ཏུ་སྔགས་བཟླས་ནས་བདག་དེར་མཆི་བར་རེ་བར་བགྱིའོ། །བདག་དེའི་ཚེ་དེ་ལ་རྗེས་སུ་སེམས་ཤིང་ལྟ་བར་བགྱིད་པས་དེའི་ཁང་པར་ཞུགས་ཏེ་སྟན་ལ་མཆིས་ནས་དེའི་མཆོད་པ་ལེན་པར་བགྱིད་དོ། །དེ་སླན་ཆད་མི་དེས་གཡར་ལམ་ན་བདག་མཐོང་བར་འགྱུར་བས་ཅི་དང་ཅི་སྨོན་པའི་དངོས་པོ་རྣམས་ཡང་དག་པའི་ཚིག་གིས་བསྒོ་ནས་གོ་བར་བགྱིད་དོ། །གྲོང་ངམ། གྲོང་ཁྱེར་རམ། འབྲོག་དགོན་པའམ། དགེ་འདུན་གྱི་གཙུག་ལག་ཁང་ཡང་རུང་སྟེ། ཅི་དང་ཅི་སྨོན་པ་ཐམས་ཅད་ཡོངས་སུ་རྫོགས་པར་བགྱིད་པས་གསེར་དང་། དངུལ་དང་། ནོར་དང་། རིན་པོ་ཆེ་དང་། བ་ལང་དང་། ལུག་དང་། འབྲུ་རྣམས་དང་། བཟའ་བ་དང་། བཏུང་བ་དང་། གོས་རྣམས་ཡིད་བཞིན་དུ་འཐོབ་པར་འགྱུར་ཞིང་། བདེ་བ་
དང་ལོངས་སྤྱོད་མཆོག་ལ་ཡོངས་སུ་ལོངས་སྤྱོད་པར་འགྱུར་ལགས་སོ། །དེ་ལྟར་འབྲས་བུ་རྣམ་པར་སྨིན་པ་མཆོག་དམ་པ་ཐོབ་ནས་ཀྱང་སྐལ་བ་མཆོག་གང་ལགས་པ་དེས་དཀོན་མཆོག་གསུམ་ལ་མཆོད་ཅིང་བདག་ལ་ཡང་སྩལ་བར་བགྱིའོ། །ཆོས་ཀྱི་འདུས་པ་རྒྱ་ཆེར་བཤམས་ནས་བཟའ་བ་དང་བཏུང་བ་རྣམས་སྦྱར་ཏེ། སྤོས་དང་མེ་ཏོག་གཅལ་དུ་བཀྲམ་ནས་མཆོད་པར་བགྱིའོ། །མཆོད་པ་བགྱིས་ནས་མཆོད་པར་བགྱིས་པའི་ཟས་ལྷག་མ་ཅི་མཆིས་པ་བཙོངས་ཏེ། རིན་བླངས་ནས་ཡང་མཆོད་པར་བགྱིད་ན་བདག་ནམ་འཚོའི་བར་དུ་རྟག་ཏུ་དེ་ན་གནས་ནས་གང་ཟག་དེ་ལ་བསྲུང་ཞིང་བསྐྱབ་པ་དང་། ཕོངས་ཤིང་བྲེལ་བ་མ་མཆིས་པ་དང་སྨོན་པ་རྣམས་ཡིད་བཞིན་དུ་འགྲུབ་པར་བགྱིད་དོ། །དུས་དུས་སུ་དབུལ་ཕོངས་པ་རྣམས་ལ་ཡང་སྩལ་བར་བགྱི་ཞིང་བདག་གཅིག་པུའི་ཆེད་དུ་སེར་སྣས་ཕངས་པར་མི་བགྱིའོ། །རྟག་པར་མདོ་སྡེ་འདི་བཀླགས་ནས་རྒྱུན་འཆད་པ་མ་མཆིས་པར་མཆོད་པར་བགྱི་སྟེ། བསོད་ནམས་ཅི་མཆིས་པ་དེ་ཡང་ཐམས་ཅད་ལ་གཏོང་ཞིང་བྱང་ཆུབ་ཏུ་ཡོངས་སུ་བསྔོས་ནས་འཁོར་བ་ལས་ངེས་པར་འབྱུང་ཞིང་མྱུར་དུ་རྣམ་པར་གྲོལ་བ་ཐོབ་པར་འགྱུར་བར་སྨོན་པར་བགྱིའོ། །དེ་ནས་བཅོམ་ལྡན་འདས་ཀྱིས་དཔལ་གྱི་ལྷ་མོ་ལ་ཁྱོད་ཀྱིས་དེ་ལྟར་མདོ་སྡེ་འདི་རྒྱ་ཆེར་སྤེལ་ནས་བདག་དང་གཞན་གཉིས་ཀ་ལ་ཕན་པ་བསམ་གྱིས་མི་ཁྱབ་པ་བྱས་པ་ལེགས་སོ་ལེགས་སོ་ཞེས་བསྔགས་པ་བརྗོད་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་དཔལ་གྱི་ལྷ་མོ་ཆེན་མོས་ནོར་འཕེལ་བར་བྱེད་པའི་ལེའུ་སྟེ་བཅུ་བདུན་པའོ།། །།དེ་ནས་སའི་ལྷ་མོ་བརྟན་མ་འཁོར་མང་པོའི་ནང་ནས་སྟན་ལས་ལངས་ཏེ་གུས་པས་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། ། བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ད་ལྟར་རམ། སླད་མའི་དུས་ཀྱི་ཚེ་གལ་ཏེ་གྲོང་ངམ། གྲོང་ཁྱེར་རམ། གྲོང་རྡལ་ལམ། རྒྱལ་པོའི་ཕོ་བྲང་ངམ། དགོན་པའི་གནས་སམ། རི་འམ། ཕུག་གམ། ནགས་ཚལ་དག་
ན་ཡང་རུང་སྟེ་མདོ་སྡེའི་རྒྱལ་པོ་འདི་སྤེལ་བར་བགྱིད་ན། བཅོམ་ལྡན་འདས་བདག་དེར་མཆིས་ནས་མཆོད་པ་དང་། བཀུར་སྟི་དང་ཡོངས་སུ་བསྲུང་བ་དང་། ཡོངས་སུ་བསྐྱབ་པ་བགྱིས་ཏེ་རྒྱ་ཆེར་སྤེལ་བར་བགྱིད་དོ། །ས་ཕྱོགས་གང་ཡང་རུང་བ་དག་ཏུ་ཆོས་སྨྲ་བའི་མཁན་པོའི་ཆེད་དུ་ཁྲི་མཐོན་པོ་བཙུགས་ཏེ་མདོ་སྡེ་འདི་འཆད་པར་བགྱིད་ན། བདག་རྫུ་འཕྲུལ་གྱི་མཐུས་ལུས་མི་གདའ་བར་བགྱིས་ནས་དེར་མཆིས་ཏེ། དེའི་རྐང་པ་ནས་སྤྱི་བོས་འདེགས་པར་བགྱིད་དོ། །བདག་ཆོས་ཐོས་པར་གྱུར་ནས་ཀྱང་ཤིན་ཏུ་དང་བའི་བསམ་པས་རབ་ཏུ་དགའ་བར་བགྱིད་དོ། །ཆོས་ཀྱི་རོ་ཐོབ་པའི་དབང་གིས་གཟི་བྱིན་འཕེལ་བར་འགྱུར་བས་མགུ་བ་ཚད་མ་མཆིས་པ་ཐོབ་པར་འགྱུར་ཏེ། བདག་ཉིད་དེ་ལྟ་བུའི་ཕན་ཡོན་ཐོབ་པ་ཉིད་ཀྱིས་ས་ཆེན་པོ་འདི་ཡང་དཔག་ཚད་སྟོང་ཕྲག་བརྒྱད་ཅུ་རྡོ་རྗེའི་དཀྱིལ་འཁོར་ལ་ཐུག་པ་ཚུན་ཆད་སའི་བཅུད་ཐམས་ཅད་རབ་ཏུ་འཕེལ་བར་བགྱིད་དོ། །རྒྱ་མཚོ་བཞི་ཚུན་ཆད་ཀྱིས་ཆེན་པོ་ཇི་སྙེད་པ་དེ་དག་སའི་བཅུད་རྒྱས་ཤིང་རབ་ཏུ་གཤིན་པས་སྔོན་བས་ཀྱང་ལྷག་པ་དང་། ཆེས་ཁྱད་པར་དུ་འཕགས་པར་བགྱིད་དོ། །འཛམ་བུའི་གླིང་འདི་ན་ཆུ་བོ་དང་། རྫིང་དང་། རྫིང་བུ་དང་། ལྗོན་ཤིང་དང་། སྨན་དང་། ནགས་ཚལ་དང་། མེ་ཏོག་དང་། འབྲས་བུ་དང་། རྩ་བ་དང་། སྡོང་བུ་དང་། ཡལ་ག་དང་། ལོ་མ་དང་། འབྲུ་རྣམ་པ་སྣ་ཚོགས་ཅི་མཆིས་པ་དེ་དག་ཀྱང་དབྱིབས་མཛེས་ཤིང་ཡིད་དུ་མཆི་བ་དང་། མང་པོ་ཀུན་གྱིས་བལྟ་བར་མོས་པ་དང་། ཁ་དོག་དང་། དྲི་ཕུན་སུམ་ཚོགས་པ་དང་ལོངས་སྤྱོད་དུ་རུང་བར་བགྱིད་དོ། །སེམས་ཅན་གང་གིས་བཟའ་བ་དང་། བཏུང་བ་མཆོག་དེ་ལྟ་བུ་དག་ལ་ལོངས་སྤྱོད་པ་རྣམས་ཀྱང་ཚེ་རིང་ཞིང་ཁ་དོག་དང་སྟོབས་དང་ལྡན་པ་དང་། དབང་པོ་རྣམས་བདེ་ཞིང་གཟི་བྱིན་འཕེལ་བ་དང་། བྲོ་ནད་རྣམས་མ་མཆིས་པ་དང་། སེམས་ཀྱི་ཤེས་རབ་དཔའ་ཞིང་ཅི་ཡང་རྩོལ་རྔོ་ཐོགས་པར་འགྱུར་ལགས་སོ། །གཞན་ཡང་ས་ཆེན་པོ་འདི་ལས་ཇི་ཙམ་དུ་ཡོངས་སུ་སྤྱད་པར་བགྱི་བའི་དངོས་པོ་བརྒྱ་སྟོང་ཇི་སྙེད་པ་ཐམས་ཅད་ཀྱང་ཕུན་སུམ་ཚོགས་པར་བགྱིད་ལགས་སོ། །བཅོམ་
ལྡན་འདས་རྒྱུ་དང་རྐྱེན་དེས་ན་འཛམ་བུའི་གླིང་རྣམས་སུ་རབ་ཏུ་བདེ་ཞིང་ལོ་ལེགས་པ་དང་། མི་རྣམས་དར་ཞིང་རྒྱས་པ་དང་། གནོད་པ་རྣམས་མ་མཆིས་པས་སེམས་ཅན་ཇི་སྙེད་མཆིས་པ་དེ་དག་ཐམས་ཅད་བདེ་བ་མྱོང་བར་འགྱུར་ལགས་སོ། །དེ་ལྟར་ལུས་དང ་སེམས་ཀྱིས་བདེ་བ་མྱོང་བར་གྱུར་ནས་ཀྱང་མདོ་སྡེའི་རྒྱལ་པོ་འདི་ལ་ཤིན་ཏུ་གུས་པ་བསྐྱེད་ནས་གང་དུ་གནས་ཀྱང་རུང་སྟེ། ཐམས་ཅད་ཀྱིས་ཡོངས་སུ་བཟུང་བ་དང་། མཆོད་པ་དང་། བཀུར་སྟི་དང་། བླ་མར་བགྱིས་ཤིང་བསྔགས་པ་བརྗོད་པར་སྨོན་པར་བགྱིའོ། །གཞན་ཡང་ཆོས་འཆད་པའི་མཁན་པོ་ཆེན་པོ་དེ་དག་གང་དུ་ཆོས་འཆད་པའི་གནས་དེར་ཡང་མཆིས་ཏེ། སེམས་ཅན་རྣམས་ཀྱི་ཆེད་དུ་མདོ་སྡེའི་རྒྱལ་པོ་དམ་པ་འདི་འཆད་པར་གསོལ་བ་གདབ་པར་བགྱིའོ། །དེ་ཅིའི་སླད་དུ་ཞེ་ན། བཅོམ་ལྡན་འདས་མདོ་སྡེ་འདི་བཤད་པའི་དབང་གིས་བདག་ཅག་འཁོར་དང་བཅས་པ་ཐམས་ཅད་ལ་སྨན་པར་འགྱུར་ཞིང་འོད་དང་། ཁ་དོག་དང་། མཐུ་སྟོབས་དང་། དཔའ་ཞིང་གཟི་བྱིན་དང་ལྡན་པ་དང་། བྱད་བཞིན་ཤིན་ཏུ་སྡུག་ཅིང་སྔོན་བས་ཆེས་ཁྱད་པར་དུ་འཕགས་པར་འགྱུར་བས་སོ། །བཅོམ་ལྡན་འདས་བདག་སའི་ལྷ་མོ་བརྟན་མ་ཡང་ཆོས་ཀྱི་རོས་ཚིམ་པར་གྱུར་པའི་དབང་གིས་འཛམ་བུའི་གླིང་དཔག་ཚད་བདུན་སྟོང་ཚུན་ཆད་ས་ཐམས་ཅད་བཅུད་དང་ལྡན་པ་དང་། སྔ་མ་བཞིན་དུ་སེམས་ཅན་ཇི་སྙེད་པ་ཐམས་ཅད་ཀྱང་བདེ་བ་མྱོང་བར་བགྱིད་ལགས་སོ། །དེ་ལྟ་བས་ན་བཅོམ་ལྡན་འདས་དེའི་ཚེ་སེམས་ཅན་དེ་དག་གིས་ཀྱང་བདག་གི་དྲིན་བསབ་པའི་སླད་དུ་བདག་ཅག་གདོན་མི་འཚལ་བར་མདོ་སྡེ་འདི་མཉན་ནས་བཀུར་སྟི་དང་། རིམ་གྲོ་དང་། མཆོད་པ་དང་། བླ་མར་བགྱིས་ནས་བསྔགས་པ་བརྗོད་པར་བགྱིའོ་སྙམ་དུ་བསམ་པར་བགྱིའོ། །དེ་ལྟར་བསམས་ནས་ཀྱང་གནས་ནས་བྱུང་སྟེ་གྲོང་དང་། གྲོང་ཁྱེར་དང་། གྲོང་རྡལ་དང་། ཁང་ཁྱིམ་དང་། དགོན་པའི་གནས་གང་དུ་ཆོས་བཤད་པའི་འདུས་པ་དེར་མཆིས་ནས་ཆོས་བཤད་པའི་མཁན་པོ་ལ་སྤྱི་བོས་བཏུད་དེ་ཕྱག་བགྱིས་ནས་མདོ་སྡེ་འདི་མཉན་པར་བགྱིའོ། །མདོ་སྡེ་འདི་མཉན་ནས་ཀྱང་སོ་སོ་ནས་རང་གི་
གནས་སུ་མཆིས་ཏེ་རབ་ཏུ་དགའ་བའི་སེམས་བསྐྱེད་དེ། འདི་སྐད་དུ་བདག་ཅག་དེང་ཤིན་ཏུ་ཟབ་ཅིང་བླ་ན་མ་མཆིས་པའི་ཆོས་གྱ་ནོམ་པ་ཐོས་པས་འདི་ནི་བསོད་ནམས་ཀྱི་ཕུང་པོ་བསམ་གྱིས་མི་ཁྱབ་པ་སྙེད་ཡོངས་སུ་བསྡུས་པར་གྱུར་ཏོ། །མདོ་སྡེའི་མཐུ་སྟོབས་ཀྱི་དབང་གིས་བདག་ཅག་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་ཤིང་མཐའ་མ་མཆིས་པ་སྙེད་ལ་མཆོད་ཅིང་རིམ་གྲོ་བགྱིས་པས་ངན་སོང་གསུམ་གྱི་སྡུག་བསྔལ་མི་བཟད་པ་དང་བྲལ་བར་གྱུར་ཏོ། །མ་འོངས་པའི་ཚེ་རབས་བརྒྱ་སྟོང་གི་བར་དུ་ཡང་རྟག་པར་མཐོ་རིས་དང་མིའི་ནང་དུ་སྐྱེས་ནས་བདེ་བ་མཆོག་མྱོང་བར་འགྱུར་རོ་ཞེས་བརྗོད་པར་འགྱུར་རོ། །དེའི་ཚེ་མི་མང་པོ་དེ་དག་སོ་སོ་ནས་སླར་རང་རང་གི་གནས་སུ་མཆིས་ནས་ཀྱང་སྐྱེ་བོ་མང་པོ་རྣམས་ལ་མདོ་སྡེའི་རྒྱལ་པོ་འདི་ལས་གསུངས་པའི་དཔེ་གཅིག་ཙམ་མམ། ལེའུ་གཅིག་ཙམ་མམ། སྔོན་གྱི་གཏམ་རྒྱུད་གཅིག་ཙམ་མམ། དེ་བཞིན་གཤེགས་པ་གཅིག་གི་མཚན་ཙམ་མམ། བྱང་ཆུབ་སེམས་དཔའ་གཅིག་གི་མིང་ཙམ་མམ། ཚིག་བཞི་པའི་ཚིགས་སུ་བཅད་པ་གཅིག་ཙམ་མམ། ཡང་ཚིག་གཅིག་ཙམ་ཞིག་སེམས་ཅན་རྣམས་ལ་ཡང་དག་པར་སྟོན་པར་བགྱིད་དམ། ཐ་ན་མདོ་སྡེ་འདིའི་མཚན་ཙམ་ཞིག་བརྗོད་པར་བགྱིད་ན། བཅོམ་ལྡན་འདས་སེམས་ཅན་དེ་དག་གང་ན་གནས་པའི་ས་ཕྱོགས་དེ་དག་ཐམས་ཅད་བཅུད་དང་ལྡན་ཞིང་གཞན་བས་ལྷག་པར་འགྱུར་བ་དང་། ས་ཆེན་པོ་ལས་སྐྱེ་བར་འགྱུར་བའི་དངོས་པོ་ཐམས་ཅད་ཀྱང་རྒྱ་ཆེར་རབ་ཏུ་འཕེལ་ཞིང་རབ་ཏུ་རྒྱས་པར་འགྱུར་བས་སེམས་ཅན་རྣམས་ཤིན་ཏུ་བདེ་བའི་ལོངས་སྤྱོད་མྱོང་བར་འགྱུར་རོ། །རིན་པོ་ཆེ་དང་ནོར་མང་བར་འགྱུར། སྦྱིན་པ་ལེགས་པར་གཏོང་བར་འགྱུར། རྟག་པར་སེམས་བརྟན་ཞིང་དཀོན་མཆོག་གསུམ་ལ་ཤིན་ཏུ་མངོན་པར་ཡིད་ཆེས་པར་འགྱུར་ལགས་སོ། ། དེ་སྐད་ཅེས་གསོལ་པ་དང་། དེ་ནས་བཅོམ་ལྡན་འདས་ཀྱིས་སའི་ལྷ་མོ་བརྟན་མ་ལ་འདི་སྐད་ཅེས་བཀའ་སྩལ་ཏོ། །སེམས་ཅན་གང་ལ་ལ་ཞིག་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ལས་ཐ་ན་ཚིག་གཅིག་ཙམ་ཞིག་ཐོས་པར་གྱུར་ན་ཡང་ཚེ་འཕོས་པའི་འོག་
ཏུ་སུམ་ཅུ་རྩ་གསུམ་དང་། ལྷའི་གནས་གཞན་དག་ཏུ་སྐྱེ་བར་འགྱུར་རོ། །སེམས་ཅན་གང་ལ་ལ་ཞིག་མདོ་སྡེའི་རྒྱལ་པོ་འདི་མཆོད་པར་འདོད་པའི་ཕྱིར་ཁང་ཁྱིམ་དག་རབ་ཏུ་བརྒྱན་ནས་བླ་རེ་གཅིག་བྲེ་བར་བྱེད་དམ། བ་དན་གཅིག་ཙམ་དཔྱངས་པར་བྱེད་ན་རྒྱུ་དང་རྐྱེན་དེས་ལྷའི་རིས་དྲུག་པོ་དག་ཏུ་ཇི་ལྟར་བསམས་པ་བཞིན་དུ་སྐྱེ་བར་འགྱུར་བས་རིན་པོ་ཆེ་སྣ་བདུན་གྱི་གཞལ་མེད་ཁང་མཆོག་དམ་པ་དག་ལ་ཡིད་བཞིན་དུ་ལོངས་སྤྱོད་པར་འགྱུར། སོ་སོ་ནས་ལྷའི་བུ་མོ་བདུན་སྟོང་དང་ཕན་ཚུན་ལྷན་ཅིག་རྩེ་ཞིང་ཉིན་མཚན་རྟག་པར་ཁྱད་པར་དུ་འཕགས་པའི་བདེ་བ་བསམ་གྱིས་མི་ཁྱབ་པ་དག་ལ་ལོངས་སྤྱོད་པར་འགྱུར་རོ། །དེ་སྐད་ཅེས་བཀའ་སྩལ་པ་དང་། དེ་ནས་བཅོམ་ལྡན་འདས་ལ་སའི་ལྷ་མོ་བརྟན་མས་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱུ་དང་རྐྱེན་དེས་ན་འཁོར་བཞི་པོ་ལས་གང་ལ་ལ་ཞིག་ཆོས་ཀྱི་སྟན་ལ་མཆིས་ནས་ཆོས་འདི་ཡང་དག་པར་སྟོན་པ་ན། བདག་གདུགས་མཚན་དུ་གང་ཟག་དེ་ལ་ཡོངས་སུ་སྲུང་ཞིང་ཡོངས་སུ་སྐྱོབ་པར་བགྱིད་ན། རང་གི་ལུས་མི་གདའ་བར་བགྱིས་ནས་ཆོས་ཀྱི་སྟན་གྱི་དྲུང་དུ་མཆིས་ཏེ་དེའི་རྐང་པ་ལ་འདེགས་པར་བགྱིད་ལགས་སོ། །བཅོམ་ལྡན་འདས་མདོ་སྡེ་འདི་ལྟ་བུ་འདི་ནི་སེམས་ཅན་དེ་དག་གིས་སངས་རྒྱས་བརྒྱ་སྟོང་དུ་མ་ལས་དགེ་བའི་རྩ་བ་བསྐྲུན་པས་ན་འཛམ་བུའི་གླིང་འདིར་རྒྱ་ཆེར་འཕེལ་ཞིང་ནུབ་པར་མི་འགྱུར་བ་ལགས་སོ། །སེམས་ཅན་གང་གིས་མདོ་སྡེ་འདི་མཉན་པར་བགྱིད་པ་དེ་དག་ནི་སླད་མའི་དུས་ཀྱི་ཚེ་བསྐལ་པ་བྱེ་བ་ཁྲག་ཁྲིག་བརྒྱ་སྟོང་ཚད་མ་མཆིས་པ་སྙེད་ཀྱི་བར་དུ་ལྷ་དང་མིའི་ནང་དུ་རྟག་པར་བདེ་བ་མཆོག་ལ་ལོངས་སྤྱོད་པར་འགྱུར། སངས་རྒྱས་མང་པོ་དང་མཇལ་ནས་མྱུར་དུ་བླ་ན་མེད་པར་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར། ངན་སོང་གསུམ་དང་འཁོར་བའི་སྡུག་བསྔལ་མྱོང་བར་མི་འགྱུར་ལགས་སོ། ། དེ་ནས་བཅོམ་ལྡན་འདས་ལ་སའི་ལྷ་མོ་བརྟན་མས་ཡང་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་སྔགས་ཀྱི་སྙིང་པོ་ལྷ་དང་མི་རྣམས་ལ་ཕན་འདོགས་ཤིང་ཐམས་ཅད་ལ་བདེ་བར་བགྱིད་པ་མཆིས་ཏེ། སྐྱེས་པ་དང་། བུད་མེད་དང་། འཁོར་བཞི་པོ་དག་ལས་གང་ལ་ལ་ཞིག་
བདག་གི་ལུས་ཡང་དག་པ་མངོན་སུམ་དུ་མཐོང་བར་འཚལ་བ་དེས་སེམས་རྩེ་གཅིག་ཏུ་གཟུངས་འདི་ཡོངས་སུ་འཛིན་པར་བགྱིད་ན། ཇི་ལྟར་སྨོན་པ་ཐམས་ཅད་ཡིད་བཞིན་དུ་འགྲུབ་པར་བགྱིད་དོ། །འདི་ལྟ་སྟེ། ནོར་དང་རིན་པོ་ཆེའི་གཏེར་དང་། མངོན་པར་ཤེས་པ་དང་། ཚེ་རིང་བའི་སྨན་དམ་པ་གཉེར་བ་དང་། སེམས་ཅན་གྱི་ནད་མང་པོ་གསོ་བ་དང་། ཕྱིར་རྒོལ་བའི་དགྲ་ཕམ་པར་བགྱི་བ་དང་ཐ་དད་པར་སྨྲ་བ་རྣམས་ཚར་གཅོད་པར་འཚལ་ན་ཁང་པ་གཙང་མར་བགྱིས་ཏེ་དཀྱིལ་འཁོར་བགྱིའོ། །ལུས་བཀྲུས་ཏེ་གོས་སར་པ་གཙང་མ་བགོས་ནས་རྩྭའི་སྟན་གྱི་སྟེང་དུ་མཆིས་ཏེ་རིང་བསྲེལ་དང་སྐུ་གཟུགས་ཀྱི་སྤྱན་སྔར་རམ། ཡང་ན་རིང་བསྲེལ་དང་བཅས་པའི་མཆོད་རྟེན་གྱི་དྲུང་དུ་བདུག་པ་བསྲེགས་ཏེ། མེ་ཏོག་གཏོར་ནས་བཟའ་བ་དང་། བཏུང་བ་དག་གིས་མཆོད་པ་བགྱིས་ཏེ། ཟླ་བ་ཡར་གྱི་ངོ་ཚེས་བརྒྱད་ལ་སྐར་མ་རྒྱལ་རྫོགས་པ་ན་གཡར་འདྲེན་པའི་སྔགས་འདི་བཟླ་བར་བགྱིའོ། །ཏདྱ་ཐཱ། ཙི་ལི་ཙི་ལི། ཙུ་རུ་ཙུ་རུ། ཀུ་རུ་ཀུ་རུ། ཀུ་ཊུ་ཀུ་ཊུ། ཏོ་ཊུ་ཏོ་ཊུ། བ་ཧ་བ་ཧ། བ་རི་ཤ་བ་རི་ཤ་སྭཱ་ཧཱ། བཅོམ་ལྡན་འདས་རིག་སྔགས་འདི་འཁོར་བཞི་པོ་ལས་གང་ལ་ལ་ཞིག་གིས་ལན་བརྒྱ་རྩ་བརྒྱད་བཟླས་ནས་བདག་གཡར་འདྲེན་པར་བགྱིད་ན་བདག་གིས་དེའི་ཆེད་དུ་གཡར་འདྲེན་པ་དེར་མཆི་བར་འགྱུར་ལགས་སོ། །གཞན་ཡང་བཅོམ་ལྡན་འདས་སེམས་ཅན་གང་ལ་ལ་ཞིག་བདག་དངོས་པོ་མངོན་སུམ་དུ་མངོན་པར་མཐོང་ཞིང་ལྷན་ཅིག་གཏམ་བགྱིད་པར་འཚལ་ན་ཡང་སྔ་མ་བཞིན་དུ་ཆོ་ག་བཤམས་ནས་གཟུངས་འདི་བཟླས་པར་བགྱིའོ། །ཏདྱ་ཐཱ། ཨཉྩ་ནི། ཀྱ་ལི་ཀྵ་ནི། ཤི་ཤི་དྷ་རི། ཧ་ཧ་ཧི་ཧི། ཀུ་རུ་བ་རེ་སྭཱ་ཧཱ། བཅོམ་ལྡན་འདས་གང་ལ་ལ་ཞིག་སྔགས་འདི་འདོན་པ་ན་ལན་བརྒྱ་རྩ་བརྒྱད་བཟླས་ནས་སྔགས་སྔ་མ་ཡང་འདོན་པར་བགྱིད་ན་བདག་གདོན་མི་འཚལ་བར་ལུས་མངོན་དུ་བསྟན་ནས་དེས་ཇི་ལྟར་སྨོན་པ་ཐམས་ཅད་ཡོངས་སུ་རྫོགས་པར་བགྱིད་པས་ནམ་ཡང་ཆབ་མི་འཚལ་བར་བགྱིད་དོ། །གལ་ཏེ་སྔགས་འདི་འདོན་པར་འཚལ་ན་སྔར་ལུས་བསྲུང་བའི་སྔགས་འདི་འདོན་པར་བགྱིའོ། །ཏདྱ་ཐཱ། ཤི་རི་ཤི་རི། བཱ་ཤ་ཀ་ཏི། ཏ་ཏི་ཀུཊྚི། པཱུ་ཏ། པཱུ་དེ་རི། པཱུ་དེ་རི།
ཊི་ཊེ་པ་ཊི། ཀུ་ཀུ་ཊི། ཀ་བ་ཙི་ལི་སྭཱ་ཧཱ། བཅོམ་ལྡན་འདས་སྔགས་འདི་འདོན་པའི་ཚེ་ཚོན་སྣ་ལྔའི་སྐུད་པ་བླངས་ནས་སྔགས་ལན་ཉི་ཤུ་རྩ་གཅིག་བཟླས་ཏེ། མདུད་པ་ཉི་ཤུ་རྩ་གཅིག་བགྱིས་ནས། དཔུང་པ་གཡོན་པ་ལ་བཅིངས་ན་སླན་ཆད་ལུས་བསྲུང་བ་བགྱིས་པས་འཇིགས་པ་མ་མཆིས་པར་འགྱུར་རོ། །གང་ལ་ལ་ཞིག་སེམས་རྩེ་གཅིག་ཏུ་སྔགས་འདི་ཟློས་པར་བགྱིད་ན། བསམ་པ་རྣམས་ཡིད་བཞིན་དུ་འགྲུབ་པར་འགྱུར་ཏེ། བདག་ཤོ་བེ་མི་མཆི་སྟེ། བདག་གི་དབང་དུ་སངས་རྒྱས་དང་ཆོས་དང་དགེ་འདུན་དཀོན་མཆོག་གསུམ་བཞུགས་པས་མད་པ་ཉིད་དུ་རབ་ཏུ་མཁྱེན་པར་འགྱུར་ལགས་སོ། །དེ་ནས་བཅོམ་ལྡན་འདས་ཀྱིས་སའི་ལྷ་མོ་བརྟན་མ་ལ་བཀའ་སྩལ་པ། ཁྱོད་ཡང་དག་པའི་བདེན་ཚིག་གི་སྔགས་ཀྱིས་བཏབ་པའི་མདོ་སྡེའི་རྒྱལ་པོ་འདི་དང་།ཆོས་སྨྲ་བ་དག་ལ་ཡོངས་སུ་བསྲུང་བར་བྱས་པ་ལེགས་སོ་ལེགས་སོ། །རྒྱུ་དང་རྐྱེན་འདིས་ཁྱོད་བསོད་ནམས་ཀྱི་རྣམ་པར་སྨིན་པ་ཚད་མེད་པ་སྙེད་འཐོབ་པར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་སའི་ལྷ་མོ་བརྟན་མའི་ལེའུ་སྟེ་བཅྭ་བརྒྱད་པའོ།། །།དེ་ནས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་བྱ་བ་གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་པོ་དག་དང་ལྷན་ཅིག་ཏུ་འཁོར་མང་པོའི་ནང་ནས་སྟན་ལས་ལངས་ཏེ་བླ་གོས་ཕྲག་པ་གཅིག་ལ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་འདི་ད་ལྟར་རམ། སླད་མའི་དུས་ཀྱི་ཚེ་གྲོང་ངམ། གྲོང་ཁྱེར་རམ། གྲོང་རྡལ་ལམ། ལྗོངས་སམ། རིའམ། དགོན་པའམ། ནགས་ཚལ་ལམ། རྒྱལ་པོའི་ཕོ་བྲང་ངམ། དགེ་འདུན་གནས་པའི་གནས་དག་ཏུ་ཡང་རུང་སྟེ། ཡང་དག་པར་བསྟན་ནས་རྒྱ་ཆེར་སྤེལ་བར་བགྱིད་ན། བཅོམ་ལྡན་འདས་བདག་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་གནོད་སྦྱིན་གྱི་སྡེ་དཔོན་ཉི་ཤུ་རྩ་བརྒྱད་དང་ལྷན་ཅིག་ཏུ་དེར་མཆིས་
ནས་སོ་སོ་ནས་རང་གི་ལུས་མི་གདའ་བར་བགྱིས་ཏེ། ཅི་རིགས་པར་ཆོས་སྨྲ་བའི་མཁན་པོ་དེ་དང་། ཆོས་ཉན་པའི་འཁོར་དེ་དག་ཡོངས་སུ་བསྲུངས་ནས་གནོད་པ་རྣམས་སྤངས་ཏེ་རྟག་པར་བདེ་བ་མྱོང་བར་བགྱིད་དོ། །སྐྱེས་པའམ། བུད་མེད་དམ། ཁྱེའུ་འམ། བུ་མོ་གང་ལ་ལ་ཞིག་མདོ་སྡེ་འདི་ལས་ཐ་ན་ཚིག་བཞི་པའི་ཚིགས་སུ་བཅད་པ་གཅིག་ཙམ་ཡང་དག་པར་འཛིན་པར་བགྱིད་དམ། ཚིག་གཅིག་ཙམ་ཡང་དག་པར་འཛིན་པར་བགྱིད་དམ།མདོ་སྡེའི་རྒྱལ་པོ་འདིའི་མཚན་ཙམ་སྨོས་པར་བགྱིད་དམ། མདོ་སྡེ་འདི་ལས་གསུངས་པའི་དེ་བཞིན་གཤེགས་པ་གཅིག་གི་མཚན་ཙམ་མམ། བྱང་ཆུབ་སེམས་དཔའ་གཅིག་གི་མིང་ཙམ་བརྗོད་པར་སེམས་བསྐྱེད་ནས་གུས་པས་རིམ་གྲོ་དང་། མཆོད་པ་བགྱིད་ན་བདག་གིས་ཡོངས་སུ་བསྲུང་ཞིང་བྱིན་གྱིས་བརླབས་ནས་གནོད་པ་མ་མཆིས་པར་བགྱིས་ཏེ་སྡུག་བསྔལ་སྤངས་ནས་བདེ་བ་འཐོབ་པར་འགྱུར་རོ། །བཅོམ་ལྡན་འདས་ཅིའི་སླད་དུ་བདག་གི་མིང་ཡང་དག་ཤེས་ཞེས་བགྱི་བའི་རྒྱུ་དང་རྐྱེན་གང་ལགས་པ་དེ་ནི་བཅོམ་ལྡན་འདས་ཉིད་ཀྱིས་མངོན་སུམ་དུ་མཁྱེན་པ་ལགས་ཏེ། བདག་གིས་ཆོས་རྣམས་རིག་པ་དང་། བདག་གིས་ཆོས་ཐམས་ཅད་ཀྱི་ཇི་སྙེད་པ་དང་། ཆོས་ཐམས་ཅད་ཀྱི་ཇི་ལྟ་བ་དང་། ཆོས་ཐམས་ཅད་ཀྱི་རྣམ་པ་དང་། ངོ་བོ་ཉིད་དང་། བྱེ་བྲག་ཇི་སྙེད་པ་ཐམས་ཅད་གསལ་བར་རྟོགས་པ་ལགས་སོ། །བཅོམ་ལྡན་འདས་འདི་ལྟར་ཆོས་རྣམས་བདག་གིས་ཁོང་དུ་ཆུད་པར་གྱུར་པས་བདག་དཔག་པར་དཀའ་བའི་ཡེ་ཤེས་ཀྱི་སྣང་བ་དང་ལྡན་པ་དང་། བདག་དཔག་པར་དཀའ་བའི་ཡེ་ཤེས་ཀྱི་སྒྲོན་མ་དང་ལྡན་པ་དང་། བདག་དཔག་པར་དཀའ་བའི་ཡེ་ཤེས་ཀྱི་སྤྱོད་པ་དང་ལྡན་པ་དང་། བདག་དཔག་པར་དཀའ་བའི་ཡེ་ཤེས་ཀྱི་ཕུང་པོ་དང་ལྡན་པ་དང་། བདག་དཔག་པར་དཀའ་བའི་ཡེ་ཤེས་ཀྱི་སྤྱོད་ཡུལ་རྣམས་མངོན་པར་རྟོགས་པར་གྱུར་པ་ལགས་སོ། །བཅོམ་ལྡན་འདས་བདག་གིས་འདི་ལྟར་ཆོས་ཐམས་ཅད་ཡང་དག་པར་རིག །ཡང་དག་པར་གསལ་བར་རྟོགས། ཡང་དག་པར་ཁོང་དུ་ཆུད། ཡང་དག་པར་སོ་སོར་རྟོགས་པར་བགྱིད་པས་བཅོམ་ལྡན་འདས་རྒྱུ་དང་རྐྱེན་དེའི་སླད་
དུ་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཞེས་བགྱི་བ་ལགས་ཏེ། དོན་དེའི་སླད་དུ་བདག་གིས་ཆོས་སྨྲ་བའི་མཁན་པོ་དེའི་ཚིག་གི་སྤོབས་པ་གསལ་ཞིང་རྒྱན་དང་ལྡན་པ་དང་། གཟི་བྱིན་དང་མདངས་བ་སྤུའི་བུ་ག་ཀུན་ནས་འཇུག་པ་དང་། ལུས་ཀྱི་མཐུ་སྟོབས་དང་ལྡན་པ་དང་། གཟི་བྱིན་དང་ལྡན་ཞིང་དཔའ་བ་དང་། དཔག་པར་དཀའ་བའི་ཡེ་ཤེས་ཀྱི་སྣང་བ་ཐམས་ཅད་ཕུན་སུམ་ཚོགས་པ་དང་། ཡང་དག་པའི་དྲན་པ་ཐོབ་ནས་སྤ་གོང་བ་མ་མཆིས་པ་དང་། དེའི་ལུས་ལ་ཕན་འདོགས་ཤིང་ཉམས་པ་མ་མཆིས་པ་དང་། དབང་པོ་རྣམས་བདེ་ཞིང་རྟག་པར་དགའ་བ་བསྐྱེད་པར་བགྱིའོ། །རྒྱུ་དང་རྐྱེན་དེའི་སླད་དུ་སེམས་ཅན་གང་དག་སངས་རྒྱས་བརྒྱ་སྟོང་དུ་མ་ལས་དགེ་བའི་རྩ་བ་བསྐྱེད་ནས་བསོད་ནམས་ཀྱི་ལས་མངོན་པར་སྒྲུབ་པ་དག་གི་ཆེད་དུ་འཛམ་བུའི་གླིང་དག་ཏུ་རྒྱ་ཆེར་སྤེལ་ནས་མྱུར་དུ་ནུབ་པར་མི་འགྱུར་བར་བགྱིད་པས་སེམས་ཅན་དེ་དག་གིས་མདོ་སྡེ་འདི་ཐོས་ནས་བསམ་གྱིས་མི་ཁྱབ་པའི་ཡེ་ཤེས་ཀྱི་སྣང་བ་ཆེན་པོ་དང་། བསོད་ནམས་ཀྱི་ཕུང་པོ་ཚད་མ་མཆིས་པ་འཐོབ་པར་འགྱུར་ཞིང་སླད་མའི་དུས་ཀྱི་ཚེ་ཡང་བསྐལ་པ་བྱེ་བ་ཁྲག་ཁྲིག་ཚད་མ་མཆིས་པའི་བར་དུ་བསམ་གྱིས་མི་ཁྱབ་པའི་ལྷ་དང་། མིའི་བདེ་བ་མྱོང་བ་དང་། རྟག་པར་སངས་རྒྱས་མང་པོ་དང་མཇལ་ནས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བས་གཤིན་རྗེའི་འཇིག་རྟེན་དང་། ངན་སོང་གསུམ་གྱི་སྡུག་བསྔལ་ཤིན་ཏུ་མི་བཟད་པ་དག་ཀྱང་མྱོང་བར་མི་འགྱུར་ལགས་སོ། །དེ་ནས་བཅོམ་ལྡན་འདས་ལ་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ལ་གཟུངས་མཆིས་ཏེ། སེམས་ཅན་རྣམས་ལ་སྨན་པར་བགྱི་ཞིང་བརྩེ་བའི་སླད་དུ་དེང་བཅོམ་ལྡན་འདས་ཀྱི་སྤྱན་སྔར་བདག་ཉིད་ཀྱིས་བཤད་པར་བགྱིའོ། ། དེ་ནས་སྔགས་སྨྲས་པ། ན་མོ་བུདྡྷཱ་ཡ། ན་མོ་དྷརྨཱ་ཡ། ན་མཿསྃ་གྷཱ་ཡ། ན་མོ་པྲ་ཧྨཱ་ཡ། ན་མ་ཨིནྡྲཱ་ཡ། ན་མཤྩ་ཏུར་ཎཱཾ་མ་ཧཱ་རཱ་ཛཱ་ནཱཾ། ཏདྱ་ཐཱ། ཧི་ལི་ཧི་ལི། མི་ལི་མི་ལི། གཽ་རི་མ་ཧཱ་གཽ་རི། གནྡྷ་རི། མ་ཧཱ་གནྡྷ་རི། དྲི་མི་ཌི། མ་ཧཱ་དྲི་མི་ཌི། དནྜ་ཁུ་ཁུན་ཏི། ཧ་ཧ་ཧ་ཧ་
ཧ། ཧི་ཧི་ཧི་ཧི་ཧི། ཧུ་ཧུ་ཧུ་ཧུ་ཧུ། ཧ་ལོ་དྷ་མེ། གུདྡྷ་མེ། ཙ་ཙ་ཙ་ཙ། ཙི་ཙི་ཙི་ཙི། ཙུ་ཙུ་ཙུ་ཙུ། ཙཎྜེ་ཤྭ་ར། ཤི་ཁ་ར་ཤི་ཁ་ར།ཨུ་ཏིཥྛ་ཧེ། བྷ་ག་བཱན་སཾ་བིད་ཛྙཱ་ཡ་སྭཱ་ཧཱ། གང་ལ་ལ་ཞིག་རིག་སྔགས་འདི་འཛིན་པར་བགྱིད་ན་བདག་གིས་འཚོ་བའི་ཡོ་བྱད་སྨན་དང་། བཟའ་བ་དང་། བཏུང་བ་དང་། གོས་དང་། མེ་ཏོག་དང་། འབྲས་བུ་དང་། རིན་པོ་ཆེ་ངོ་མཚར་ཆེ་བ་དག་གིས་རིམ་གྲོ་བགྱིད་དོ། །གལ་ཏེ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དང་། གསེར་དང་། དངུལ་དང་། རིན་པོ་ཆེ་དང་། རྒྱན་ཕྲེང་གི་རྣམ་པ་རྣམས་ཡོངས་སུ་གཉེར་བར་བགྱིད་ན་ཡང་བདག་གིས་ཐམས་ཅད་སྦྱར་ནས་ཇི་ལྟར་སྨོན་པ་བཞིན་རྒུད་ཅིང་ཕོངས་པ་མ་མཆིས་པར་བགྱིད་དོ། །རིག་སྔགས་འདི་མཐུ་ཆེན་པོ་དང་ལྡན་པས་སྔགས་འདོན་པའི་ཚེ། བདག་མྱུར་དུ་དེའི་ཐད་དུ་མཆིས་ནས་ཐོགས་པ་མ་མཆིས་པར་ཡིད་བཞིན་དུ་འགྲུབ་པར་བགྱིད་དོ། །སྔགས་འདི་འདོན་པའི་ཚེ་ཆོ་ག་ཅི་རིགས་པར་བགྱིས་ནས་ཐོག་མ་ཁོ་ནར་གནོད་སྦྱིན་ཡང་དག་ཤེས་ཀྱི་གཟུགས་འཕང་དུ་ཆག་བཞི་ལྔ་ཙམ་མཆིས་པ་སུག་པ་ན་དགྲ་སྟ་ཐོགས་པ་རི་མོར་བྲི་བར་བགྱིའོ། །གཟུགས་བརྙན་དེའི་མདུན་དུ་དཀྱིལ་འཁོར་གྲུ་བཞིར་བགྱིས་ནས་བུམ་པ་བཞི་སྦྲང་རྩིའི་ཆབ་བམ། བུ་རམ་གྱི་ཆབ་ཀྱིས་བཀང་སྟེ་བཞག་ནས་བྱུག་སྤོས་དང་། ཕྱེ་མ་དང་། བདུག་སྤོས་དང་། མེ་ཏོག་དང་། ཕྲེང་བ་རྣམས་ཀྱང་བཀྲམ་པར་བགྱིའོ། །གཞན་ཡང་དཀྱིལ་འཁོར་གྱི་མདུན་དུ་ཐབ་གཅིག་བགྱིས་ཏེ། དེའི་ནང་དུ་སོལ་བའི་ཞུགས་སྩལ་ནས་མར་དང་ཡུངས་ཀར་བསྲེགས་ཏེ། སྔ་མའི་སྔགས་དེ་ལན་བརྒྱ་རྩ་བརྒྱད་བཟླས་ནས། སྔགས་ལན་རེ་ཞིང་ལན་ཅིག་བསྲེགས་ན། བདག་གནོད་སྦྱིན་གྱི་སྡེ་དཔོན་ཆེན་པོ་རང་ཉིད་དྲུང་དུ་མཆིས་ནས་ལུས་མངོན་དུ་བསྟན་ཏེ། སྔགས་འདོན་པའི་མི་དེ་ལ་ཁྱོད་ཅི་དང་ཅི་དགོས་པ་དང་། ཡིད་ལ་ཅི་འདོད་པའི་དངོས་པོ་གང་ཡིན་པ་དེ་སྨྲོས་ཤིག་ཅེས་འདྲི་བར་བགྱིད་དོ། །བདག་གིས་ཇི་སྐད་མཆི་བ་བཞིན་ཡོངས་སུ་གཉེར་བའི་དངོས་པོ་རྣམ་པ་ཐམས་ཅད་ཕུན་སུམ་ཚོགས་པར་བགྱིད་དོ། །གལ་ཏེ་གསེར་དང་། དངུལ་དང་། གཏེར་འཚལ་བར་གྱུར་ཏམ། ཡང་ན་ལྷའི་དྲང་སྲོང་
དུ་གྱུར་ནས་ནམ་མཁའ་ལ་མཆི་བར་འཚལ་ལམ། ལྷའི་མིག་གི་མངོན་པར་ཤེས་པ་དང་། གཞན་གྱི་སེམས་འཚལ་བ་དང་། སེམས་ཅན་ཐམས་ཅད་ལ་ཡིད་བཞིན་དུ་རང་དབང་ཐོབ་ནས་ཉོན་མོངས་པ་བཅད་དེ་མྱུར་དུ་རྣམ་པར་གྲོལ་བ་ཐོབ་པ་ལ་དགོད་པར་འཚལ་ན་ཡང་ཐམས་ཅད་ཕུན་སུམ་ཚོགས་པར་བགྱིད་དོ། །དེ་ནས་བཅོམ་ལྡན་འདས་ཀྱིས་གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ལ་བཀའ་སྩལ་པ། ཁྱོད་ཀྱིས་འདི་ལྟར་སེམས་ཅན་ཐམས་ཅད་ལ་ཕན་གདགས་པའི་ཕྱིར་རིག་སྔགས་འདི་བཤད་དེ། ཡང་དག་པའི་ཆོས་ཡོངས་སུ་བསྲུངས་ནས་བསོད་ནམས་ཀྱིས་མཐའ་ཡས་པ་རྣམས་ལ་ཕན་བཏགས་པ་ལེགས་སོ་ལེགས་སོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས། གནོད་སྦྱིན་གྱི་སྡེ་དཔོན་ཆེན་པོ་ཡང་དག་ཤེས་ཀྱི་ལེའུ་སྟེ་བཅུ་དགུ་པའོ།། །།དེ་ནས་སའི་ལྷ་མོ་ཆེན་མོ་བརྟན་མ་ཞེས་བྱ་བ་འཁོར་མང་པོའི་ནང་ནས་སྟན་ལས་ལངས་ཏེ། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ནས་གུས་པས་ཐལ་མོ་སྦྱར་ཏེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ཡུལ་རྣམས་སུ་མིའི་རྒྱལ་པོ་བགྱིད་པ་ལ་གལ་ཏེ་ཡང་དག་པའི་ཆོས་མ་མཆིས་པར་གྱུར་ན། ཡུལ་སྐྱོང་ཞིང་སྐྱེ་བོ་མང་པོ་རྣམས་ཀྱང་གསོ་བའི་རྔོ་མི་ཐོགས་ལ་བདག་ཉིད་ཀྱང་ཡུན་རིང་དུ་ཁྱད་པར་དུ་འཕགས་པའི་རྒྱལ་ཐབས་ལ་གནས་པར་མི་འགྱུར་ན། བཅོམ་ལྡན་འདས་བྱམས་པ་དང་། ཐུགས་རྗེས་ཐུགས་བརྩེ་བར་དགོངས་ཏེ།བདག་ལ་རྒྱལ་པོའི་ཆོས་ལུགས་ཡང་དག་པའི་བསྟན་བཅོས་ཡུལ་སྐྱོང་བར་བགྱིད་པའི་དོན་གང་ལགས་པ་བཀས་བཤད་དུ་གསོལ། །དེས་ན་མིའི་རྒྱལ་པོ་རྣམས་ཆོས་འདི་ཐོས་པའི་དབང་གིས་ཇི་སྐད་བསྟན་པ་བཞིན་དུ་མངོན་པར་སྒྲུབ་ཅིང་ཡང་དག་པར་འཇིག་རྟེན་འདུལ་བ་དང་། ཁྱད་པར་དུ་འཕགས་པའི་རྒྱལ་ཐབས་གཏན་དུ་བདེ་ཞིང་ཞི་བ་དང་། ཡུལ་ན་གནས་པའི་སྐྱེ་བོ་ཐམས་ཅད་ལ་ཡང་སྨན་པར་འགྱུར་ལགས་སོ། །དེ་ནས་བཅོམ་ལྡན་
འདས་ཀྱིས་འཁོར་མང་པོའི་ནང་དུ་སའི་ལྷ་མོ་བརྟན་མ་ལ་བཀའ་སྩལ་པ། ཁྱོད་ལེགས་པར་ཉོན་ཅིག །སྔོན་འདས་པའི་དུས་ཀྱི་ཚེ་རྒྱལ་པོ་སྟོབས་ཀྱི་གཙོ་བོའི་ཏོག་ཅེས་བྱ་བ་བྱུང་ངོ་། །རྒྱལ་པོ་དེའི་བུ་མཛེས་པའི་ཏོག་ཅེས་བྱ་བ་ཞིག་ཡོད་དེ། སྤྱི་བོ་ནས་དབང་བསྐུར་ནས་རིང་པོ་མ་ལོན་པར་དེ་ནས་རྒྱལ་པོ་ཡབ་ཀྱིས་མཛེས་པའི་ཏོག་ལ་འདི་སྐད་ཅེས་སྨྲས་སོ། །རྒྱལ་པོའི་ཆོས་ལུགས་ཡང་དག་པའི་བསྟན་བཅོས་ལྷའི་བདག་པོའི་མན་ངག་ཅེས་བྱ་བ་ཡོད་དེ། ང་སྔོན་སྤྱི་བོ་ནས་དབང་བསྐུར་ནས་ཡུལ་གྱི་བདག་པོ་བྱས་པའི་ཚེ་ངའི་ཡབ་ཤེས་པའི་སྟོབས་ཀྱི་གཙོ་བོའི་ཏོག་ཅེས་བྱ་བས་ང་ལ་རྒྱལ་པོའི་ཆོས་ལུགས་ཡང་དག་པའི་བསྟན་བཅོས་འདི་བསྟན་པས། ངས་བསྟན་བཅོས་འདི་ལ་བརྟེན་ནས་ལོ་ཉི་ཁྲིའི་བར་དུ་ཡུལ་ལེགས་པར་བསྐྱངས་ཏེ། ངས་སྐད་ཅིག་གཅིག་ཙམ་གྱི་བར་དུ་ཡང་ཆོས་མ་ཡིན་པ་སྤྱད་པར་བྱའོ་སྙམ་པའི་བསམ་པ་བྱུང་མ་མྱོང་ངོ་། །དེང་ཁྱོད་ཀྱང་དེ་བཞིན་དུ་ཆོས་མ་ཡིན་པས་ཡུལ་སྐྱོང་བར་མ་བྱེད་ཅིག །ཅིའི་ཕྱིར་རྒྱལ་པོའི་ཆོས་ལུགས་ཡང་དག་པའི་བསྟན་བཅོས་ཞེས་བྱ་ཞེ་ན། ཁྱོད་དེང་ལེགས་པར་ཉོན་ཅིག་དང་ཁྱོད་ལ་བསྟན་པར་བྱའོ། ། དེ་ནས་དེའི་ཚེ་རྒྱལ་པོ་སྟོབས་ཀྱི་གཙོ་བོའི་ཏོག་གིས་རྒྱལ་བུ་དེ་ལ་ཚིགས་སུ་བཅད་པ་གྱ་ནོམ་པ་དག་གིས་ཡང་དག་པར་བསྟན་བཅོས་མངོན་པར་བསྟན་པ། ངས་ནི་སེམས་ཅན་བདེ་བྱ་དང་། །འཇིག་རྟེན་ཐེ་ཙོམ་བཅད་པ་དང་། །ཉེས་དམིགས་མང་པོ་བསལ་བའི་ཕྱིར། ། རྒྱལ་ཁྲིམས་བསྟན་བཅོས་བཤད་པར་བྱ། །ལྷ་ཡི་བདག་པོ་ཐམས་ཅད་དང་། །མི་ཡི་རྒྱལ་པོ་གང་ཡིན་པ། །དགའ་བའི་སེམས་ནི་རབ་སྐྱེད་ལ། །ཐལ་མོ་སྦྱར་ནས་ངས་བཤད་ཉོན། །སྔོན་བྱུང་ལྷ་འཁོར་མང་པོ་རྣམས། །རྡོ་རྗེའི་རི་ལ་འདུས་པ་ན། །རྒྱལ་བཞི་སྟན་ལས་ལངས་ནས་ནི། །ཚངས་ཆེན་ལ་ནི་འདི་སྐད་ཞུས། །ཚངས་བདག་མཆོག་ཏུ་གཙོར་གྱུར་ཅིང་། །ལྷ་ཡི་ནང་ན་དབང་ཕྱུག་ཆེ། །བདག་ཅག་ལ་ནི་བརྩེར་དགོངས་ནས། །ཐེ་ཙོམ་རྣམས་ནི་གཅད་དུ་གསོལ། །ཇི་ལྟར་མི་ཡི་འཇིག་རྟེན་སྐྱེས། །རྒྱལ་
པོ་ཞེས་ནི་བགྱི་བར་འགྱུར། །གཞན་ཡང་རྒྱུ་རྐྱེན་གང་གི་སླད། །ལྷ་ཡི་བུ་ཞེས་བགྱི་བར་འགྱུར། །ཇི་ལྟར་མིར་ནི་སྐྱེས་པ་ལ། །གཅིག་པུ་མི་ཡི་བདག་པོ་འཐོབ། །ཇི་ལྟར་མཐོ་རིས་གནས་དག་ཏུ། །ལྷ་ཡི་རྒྱལ་པོ་བགྱིད་པར་འགྱུར། །དེ་ལྟར་འཇིག་རྟེན་སྐྱོང་དག་གིས། །ཚངས་རྒྱལ་དེ་ལ་ཞུས་པ་དང་། །དེ་ཚེ་ཚངས་པའི་བདག་པོ་ཡིས། །དེ་དག་ལ་ནི་འདི་སྐད་སྨྲས། །འཇིག་རྟེན་སྐྱོང་ཁྱོད་ཤེས་པར་བྱོས། །སེམས་ཅན་ལ་ནི་ཕན་བྱའི་ཕྱིར། །ང་ལ་ཡུལ་སྐྱོང་ཆོས་དྲིས་པས། །ངས་བཤད་ཁྱོད་ཀྱིས་ལེགས་པར་ཉོན། །སྔོན་གྱི་ལས་ཀྱི་མཐུ་ཡིས་ནི། །ལྷར་སྐྱེས་རྒྱལ་པོར་གྱུར་པ་ཡིན། །གལ་ཏེ་མི་ནང་གནས་གྱུར་ནས། །དབང་སྡུད་མི་ཡི་བདག་པོ་བྱེད། །ལྷ་རྣམས་ལྷན་ཅིག་བྱིན་བརླབས་ནས། །དེ་འོག་མ་ཡི་མངལ་དུ་འཇུག །མ་ཡི་མངལ་ན་གནས་པ་ན། །ལྷ་རྣམས་ཀྱིས་ནི་སྲུང་བར་བྱེད། །མི་ཡི་འཇིག་རྟེན་སྐྱེས་གྱུར་ཀྱང་། །གཙོ་མཆོག་གྱུར་ཕྱིར་ལྷ་ཞེས་བྱ། །ལྷ་རྣམས་ཀྱིས་ནི་བསྲུངས་པས་ན། །ལྷ་ཡི་བུ་ཞེས་བརྗོད་པ་ཡིན། །སུམ་ཅུ་རྩ་གསུམ་བདག་པོ་ཡིས། །སྟོབས་བགོས་མི་རྒྱལ་སྟོངས་པར་བྱེད། །ལྷ་ནི་མང་པོ་ཐམས་ཅད་ཀྱིས། །རང་དབང་སྟོབས་ནི་རབ་བསྟངས་ནས། །ཆོས་མིན་ཀུན་ནི་རབ་བསལ་ཏེ། །སྡིག་པའི་ལས་ནི་སྐྱེད་མི་བྱེད། །སེམས་ཅན་དགེ་བ་སྒྲུབ་བསྐུལ་ནས། །མཐོ་རིས་གནས་སུ་སྐྱེ་བར་བྱེད། །མི་དང་ལྷ་མིན་འཁོར་དག་དང་། །དྲི་ཟ་དང་ནི་སྲིན་པོ་དང་། །གདོལ་པ་ལ་སོགས་ཐམས་ཅད་ཀྱིས། །སྟོབས་ཀྱི་ཕྱེད་ནི་སྟོར་བར་བྱེད། །ཕ་མས་སྟོབས་ཕྱེད་བསྟངས་ནས་ནི། །སྡིག་སྤོང་དགེ་བ་སྒྲུབ་ལ་འཛུད། །ལྷ་རྣམས་ལྷན་ཅིག་རབ་བསྲུངས་ནས། །དགེ་སྡིག་རྣམ་སྨིན་སྟོན་པར་བྱེད། །དགེ་སྡིག་ལས་ནི་བྱས་གྱུར་ན། །ད་ལྟར་ཚེ་འདི་ཉིད་ལ་ནི། །ལྷ་རྣམས་ལྷན་ཅིག་རབ་བསྲུངས་ནས། །དགེ་སྡིག་རྣམ་སྨིན་སྟོན་པར་བྱེད། །ཡུལ་མིས་སྡིག་པའི་ལས་བྱས་ལ། །རྒྱལ་སྤངས་ནན་ཏུར་མི་བྱེད་ན། །འདི་ནི་ཡང་དག་རིགས་པ་མིན། །ཆོས་བཞིན་ཆད་པས་གཅད་པར་
བྱ། །གལ་ཏེ་ཉེས་མཐོང་མི་འགོག་ན། །ཆོས་མིན་རབ་ཏུ་འཕེལ་འགྱུར་བས། །རྒྱལ་པོ་དེ་ཡི་ཡུལ་ཁམས་སུ། །གཡོ་སྒྱུ་མང་དུ་འཕེལ་བར་འགྱུར། །རྒྱལ་པོས་ཉེས་བྱེད་མཐོང་བ་ལ། །གལ་ཏེ་ཟློག་པར་མི་བྱེད་ན། །སུམ་ཅུ་རྩ་གསུམ་ལྷ་འཁོར་རྣམས། ། ཐམས་ཅད་ཁོང་ཁྲོའི་སེམས་སྐྱེ་འགྱུར། །རྒྱུ་དེས་རྒྱལ་ཁྲིམས་ཉམས་འགྱུར་ཞིང་། །གཡོ་སྒྱུ་འཇིག་རྟེན་འཕེལ་འགྱུར་བས། །ཕ་རོལ་དགྲ་འཁོར་དག་གིས་ནི། །ཡུལ་དེ་བཅོམ་ནས་འཇིག་པར་བྱེད། །གནས་པའི་ཁྱིམ་དང་ཡོ་བྱད་དང་། ནོར་བསགས་ཐམས་ཅད་སྟོར་བར་འགྱུར། །གཡོ་སྒྱུ་སྣ་ཚོགས་སྐྱེས་པས་ན། །ཕན་ཚུན་གཅིག་ལ་གཅིག་ཀྱང་འཕྲོག །ཡང་དག་ཆོས་ཀྱིས་རྒྱལ་ཐོབ་ཀྱང་། །ཆོས་བཞིན་དུ་ནི་མི་སྤྱོད་པས། །ཡུལ་མི་ཐམས་ཅད་འཐོར་འགྱུར་ཏེ། །གླང་པོས་པདྨའི་རྫིང་བརྫིས་འདྲ། ། རླུང་དྲག་ལྡང་ལ་དུས་ཀྱང་མེད། །མི་འཕྲོད་ཆར་ནི་དུས་མིན་འབབ། །རྒྱུ་སྐར་ལྟས་ངན་མང་པོ་སྟོན། །ཉི་ཟླ་གཅན་ཟིན་འོད་ཀྱང་མེད། །རྒྱལ་པོས་ཡང་དག་ཆོས་སྤངས་པས། །འབྲུ་རྣམས་མེ་ཏོག་འབྲས་བུ་དང་། ལོ་ཏོག་ཐམས་ཅད་མི་སྨིན་ཅིང་། །ཡུལ་ན་མུ་གེ་འབྱུང་བར་འགྱུར། །རྒྱལ་པོས་ཡང་དག་ཆོས་སྤངས་ནས། །སྡིག་ཆོས་མི་ནི་སྟོན་བྱེད་ན། །གཞལ་མེད་ཁང་གནས་ལྷ་རྣམས་ཀྱིས། །མཐོང་ནས་མྱ་ངན་སྐྱེ་བར་འགྱུར། །ལྷ་རྒྱལ་འཁོར་བཅས་དེ་དག་གིས། །འདི་སྐད་དུ་ནི་སྨྲ་བར་འགྱུར། །རྒྱལ་འདིས་ཆོས་མིན་རབ་སྤྱད་ནས། །སྡིག་པའི་གྲོགས་པོ་བསྟེན་པས་ན། །རྒྱལ་སྲིད་ཡུན་རིང་བརྟན་མི་འགྱུར། །ལྷ་རྣམས་ཐམས་ཅད་རབ་མི་དགའ། །དེ་དག་ཁྲོས་པར་གྱུར་པའི་ཕྱིར། །ཡུལ་དེ་འཇིག་པར་འགྱུར་ཞེས་ཟེར། །ཆོས་མིན་མི་ནི་རབ་བརྟེན་པས། ། ཡུལ་ཁམས་འཕེལ་བར་འགྱུར་བས་ན། །འཐབ་རྩོད་གཡོ་སྒྱུ་མང་པོར་འགྱུར། །རིམས་ནད་སྡུག་བསྔལ་མང་པོ་སྐྱེ། །ལྷ་ཡི་བདག་པོ་སྲུང་མི་བྱེད། །ལྷ་གཞན་ཐམས་ཅད་སྤོང་བར་བྱེད། །དེ་ཡི་ཡུལ་ནི་རང་ཞིག་ནས། །རྒྱལ་པོ་སྡུག་བསྔལ་མྱོང་བར་
འགྱུར། །ཕ་མ་ཆུང་མ་བུ་རྣམས་དང་། །ཕུ་ནུ་དང་ནི་སྲིང་མོ་རྣམས། །ཅིག་ཅར་སྡུག་དང་བྲལ་འགྱུར་ཞིང་། །ཐ་མར་བདག་ཀྱང་འཆི་བར་འགྱུར། །ལྟས་ངན་སྐར་མདའ་དག་ཀྱང་ལྟུང་། །ཉི་མ་གཉིས་ནི་ཅིག་ཅར་འཆར། །ཕ་རོལ་དགྲ་ནི་ཉེར་འོངས་པས། །ཡུལ་མི་འཆི་བར་འཁྲུག་ཕྲད་འགྱུར། །ཡུལ་བཀུར་བློན་པོ་ཆེན་པོ་རྣམས། །ཉེས་མེད་གློ་བུར་འཆི་བར་འགྱུར། །གླང་པོ་རྟ་སོགས་གཅེས་པ་རྣམས། །ཐམས་ཅད་འཐོར་ཞིང་སྟོངས་པར་འགྱུར། །ཡུལ་ཡུལ་ཀུན་དུ་དགྲ་ཡོད་པས། །མི་ནི་ཕལ་ཆེར་དུས་མིན་འཆི། །འདྲེ་སྲིན་མང་པོ་ཡུལ་ཞུགས་པས། །རིམས་ནད་ཀུན་དུ་འཕེལ་བར་འགྱུར། །ཡུལ་མི་བློན་པོ་ཆེན་པོ་དང་། །ཉེ་ཕན་མང་པོ་ཐམས་ཅད་ཀྱང་། །སེམས་ནི་གཡོ་སྒྱུ་བཅས་པས་ན། །ཐམས་ཅད་ཆོས་མིན་སྤྱོད་པར་འགྱུར། ། ཆོས་མིན་སྤྱོད་པ་མཐོང་གྱུར་ན། །སྙིང་དུ་སྡུག་ཅིང་བཀུར་བར་བྱེད། །དགེ་ཆོས་སྤྱོད་པའི་མི་དག་ལ། །སྡུག་བསྔལ་ཉོན་མོངས་ཆད་པས་གཅོད། །མ་རུངས་བྱམས་ཤིང་བཀུར་བ་དང་། །དགེ་བ་ཆད་པས་བཅད་པའི་ཕྱིར། །གཟའ་སྐར་རླུང་དང་ཆར་པ་རྣམས། ། ཐམས་ཅད་དུས་སུ་རྒྱུ་མི་འགྱུར། །ཉེས་དམིགས་རྣམ་གསུམ་སྐྱེ་བར་འགྱུར། །ཡང་དག་ཆོས་ནི་ནུབ་འགྱུར་ཞིང་། །སེམས་ཅན་ཁ་དོག་འོད་མི་ལྡན། །ས་ཡི་བཅུད་ནི་ཐུར་དུ་འབབ། །སྡིག་བཀུར་དགེ་ལ་བརྙས་པས་ན། །གཞན་ཡང་ཉེས་དམིགས་རྣམ་གསུམ་འབྱུང་། །དུས་མིན་སད་དང་སེར་བ་འབབ། །མུ་གེའི་སྡུག་བསྔལ་ཀུན་དུ་ཁྱབ། །ལོ་ཏོག་(འདྲས,འབྲས)་བུ་མང་པོ་རྣམས། །ཐམས་ཅད་རོ་ཞིམ་ཉམས་པར་འགྱུར། །དེ་དག་གི་ནི་ཡུལ་ཁམས་ན། །སེམས་ཅན་ཕལ་ཆེར་ན་བར་འགྱུར། །དེ་ཡི་ཡུལ་ན་ལྗོན་ཤིང་རྣམས། །སྔོན་ཆད་འབྲས་བུ་ཞིམ་ཆགས་པ། །དེ་ཡི་དབང་གིས་ཉམས་འགྱུར་བས། །ཁ་རྩུབ་རོ་མཆོག་མེད་པར་འགྱུར། །སྔོན་གྱི་ཀུན་དགའ་ནགས་ཚལ་མཆོག །སྙིང་དུ་སྡུག་ཅིང་རྩེ་བའི་གནས། །ཐམས་ཅད་སྐམས་ཤིང་རྙིངས་འགྱུར་བས། །མཐོང་
བ་ཀུན་གྱིས་མྱ་ངན་སྐྱེ། །སཱ་ལུ་ནས་དང་ལོ་ཏོག་རྣམས། །རོ་ཞིམ་ཁད་ཀྱིས་མེད་གྱུར་པས། །བཟའ་ཚེ་སེམས་ཀྱང་མི་དགའ་ན། །འབྱུང་ཆེན་འཕེལ་བྱེད་ག་ལ་ནུས། །སེམས་ཅན་ཁ་དོག་འོད་ཉམས་ཤིང་། །མཐུ་སྟོབས་ཟད་ཅིང་ཉམས་པར་འགྱུར། །ཁ་ཟས་མང་པོ་ཟོས་ཀྱང་ནི། །འགྲངས་པ་ཉིད་དུ་ཡོང་མི་འགྱུར། །ཡུལ་ཁམས་དེ་ན་ཡོད་པ་ཡི། །སེམས་ཅན་རྣམ་པ་ཇི་སྙེད་པ། །སྟོབས་ཆུང་དཔའ་བཤོར་མེད་པས་ན། །བྱ་བ་དག་ནི་བྱེད་མི་ནུས། །ཡུལ་མི་ཕལ་ཆེར་ནད་ཐེབས་པས། །སྡུག་བསྔལ་སྣ་ཚོགས་ལུས་གཟིར་འགྱུར། །འདྲེ་སྲིན་ཀུན་དུ་ཁྱབ་པས་ན། །ཐམས་ཅད་ཀུན་དུ་སྲིན་པོར་སྐྱེ། །རྒྱལ་པོས་ཆོས་མིན་རབ་སྤྱད་ནས། །མི་དགེའི་གྲོགས་པོ་བསྟེན་པས་ན། །འཇིག་རྟེན་རྣམ་པ་གསུམ་པོ་ཀུན། །དེས་ན་གནོད་པ་སྣ་ཚོགས་མྱོང་། །དེ་འདྲའི་ཉེས་དམིགས་མཐའ་མེད་པ། །ཡུལ་ནས་འབྱུང་བར་འགྱུར་བ་ཡང་། །སྡིག་ཅན་མི་ནི་མཐོང་འགྱུར་ཡང་། །ཡལ་བོར་མ་བསྐྲད་པ་ལས་གྱུར། །ལྷ་རྣམས་ཀུན་གྱིས་བྱིན་བརླབས་ནས། །ཡུལ་གྱི་རྒྱལ་པོ་བྱས་གྱུར་ཀྱང་། །ཡང་དག་དམ་པའི་ཆོས་དག་གིས། །ཡུལ་ཁམས་ཡོངས་སུ་སྲུང་མི་བྱེད། །གང་ཞིག་དགེ་སྤྱོད་སྒྲུབ་བྱེད་ན། །རྟག་ཏུ་མཐོ་རིས་གནས་སུ་སྐྱེ། །གལ་ཏེ་སྡིག་པའི་ལས་བྱས་པ། །ཚེ་འཕོས་ངེས་པར་ངན་འགྲོར་ལྟུང་། །གལ་ཏེ་རྒྱལ་པོས་ཡུལ་མི་རྣམས། །ཐལ་རངས་ཉེས་པ་བྱེད་འཇུག་ན། ། སུམ་ཅུ་རྩ་གསུམ་ལྷ་ཚོགས་རྣམས། །ཐམས་ཅད་རབ་གདུངས་སེམས་སྐྱེ་འགྱུར། །ལྷ་རྣམས་དང་ནི་ཕ་མ་ཡི། །བསྟན་དག་བཞིན་དུ་མི་བྱེད་པ། །འདི་ནི་ཆོས་མིན་མི་ཡིན་པས། །རྒྱལ་པོ་སྲི་ཞུའི་བུ་མ་ཡིན། །གལ་ཏེ་རང་གི་ཡུལ་ཁམས་སུ། །ཆོས་མིན་སྤྱོད་པ་མཐོང་བའི་ཚེ། །ཆོས་བཞིན་ཆད་པས་གཅོད་བྱེད་ཅིང་། །ཡལ་དོར་སེམས་ནི་མི་བསྐྱེད་ན། །དེ་ཕྱིར་ལྷ་ཚོགས་མང་པོ་ཀུན། །རྒྱལ་པོ་དེ་ལ་སྐྱོབ་པར་བྱེད། །བྱང་ཆུབ་སྤྱོད་པ་བསྒྲུབ་པའི་ཕྱིར། །སྡིག་པའི་ཆོས་རྣམས་ཞི་བྱེད་ན། །རྒྱལ་པོ་ཚེ་འདི་ཉིད་ལ་ནི། །
མཐོང་བའི་རྣམ་སྨིན་ངེས་པར་མྱོང་། །དགེ་དང་མི་དགེའི་ལས་དག་ལ། །སྤྱོད་སྤོང་སེམས་ཅན་བསྐུལ་ནས་ནི། །དགེ་སྡིག་རྣམ་སྨིན་བསྟན་པས་ན། །དེ་ཕྱིར་མི་རྒྱལ་ཐོབ་ནས་ཀྱང་། །ལྷ་རྣམས་ལྷན་ཅིག་བྱིན་བརླབས་ནས། །ཐམས་ཅད་ཡི་རང་འགྱུར་བ་ཡིན། །བདག་དང་གཞན་ལ་ཕན་གདགས་ཕྱིར། །ཡང་དག་ཆོས་ཀྱིས་ཡུལ་བསྐྱང་བྱ། །གཡོ་སྒྱུ་བྱེད་པ་མཐོང་གྱུར་ན། །ཆོས་བཞིན་ཆད་པས་གཅད་པར་བྱ། །གལ་ཏེ་རྒྱལ་ཐབས་སྟོར་བ་དང་། །སྲོག་འབབ་རྐྱེན་ཞིག་བྱུང་ན་ཡང་། །ནམས་ཀྱང་སྡིག་ཆོས་མི་སྤྱོད་ཅིང་། །སྡིག་པ་མཐོང་ན་སྤང་བར་བྱ། །གནོད་པའི་ནང་ན་མཆོག་ལྕི་བས། །རྒྱལ་སྲིད་སྟོར་ལས་ལྷག་པ་མེད། །འདི་ཀུན་གཡོ་སྒྱུ་མི་ལས་གྱུར། །དེས་ན་ཆད་པས་གཅད་པར་བྱ། །གཡོ་སྒྱུ་བྱེད་པ་ཡོད་གྱུར་ན། །རྒྱལ་སྲིད་དག་ཀྱང་སྟོར་འགྱུར་ཞིང་། །རྒྱལ་སྲིད་དག་ཀྱང་ཉམས་འགྱུར་བས། །གླང་ཆེན་མེ་ཏོག་ཚལ་ཞུགས་འདྲ། །དེ་ཡིས་མི་རྒྱལ་བྱས་ཀྱང་ནི། །ཆོས་ཀྱིས་ཡུལ་ནི་མ་བསྐྱངས་པས། །ལྷ་དབང་ཐམས་ཅད་མི་དགའ་ཞིང་། །ལྷ་མ་ཡིན་ཡང་དེ་བཞིན་ནོ། །དེ་ལྟ་བས་ན་ཆོས་བཞིན་དུ། །སྡིག་པ་བྱེད་པ་ཆད་པས་གཅད། །དགེ་བས་སེམས་ཅན་གདུལ་བྱ་ཞིང་། །ཆོས་མིན་རྗེས་སུ་འབྲང་མི་བྱ། །ལུས་དང་སྲོག་ནི་སྤང་སླ་ཡི། །མི་དགེ་གྲོགས་རྗེས་འབྲང་མི་བྱ། །ཉེ་བ་དང་ནི་ཉེ་མིན་པ། །ཐམས་ཅད་མཉམ་པ་ཉིད་དུ་བལྟ། །ཡང་དག་ཆོས་ཀྱིས་རྒྱལ་བྱེད་ན། །ཡུལ་མི་མི་དྲང་མེད་པའི་ཕྱིར། །ཆོས་རྒྱལ་གྲགས་དང་ལྡན་འགྱུར་བས། །ཁམས་གསུམ་ཀུན་དུ་གྲགས་པར་འགྱུར། །སུམ་ཅུ་རྩ་གསུམ་ལྷ་ཚོགས་རྣམས། །དགའ་ནས་འདི་སྐད་སྨྲ་བར་འགྱུར། །འཛམ་གླིང་ཆོས་རྒྱལ་གང་ཡིན་པ། ། དེ་ནི་བདག་གི་བུ་ཡིན་ཏེ། །དགེ་བས་སེམས་ཅན་འདུལ་བྱེད་ཅིང་། །ཡང་དག་ཆོས་ཀྱིས་ཡུལ་བསྐྱངས་ནས། །ཡང་དག་ཆོས་སྤྱོད་བསྐུལ་བས་ན། །བདག་ཅག་གནས་སུ་སྐྱེ་འགྱུར་ཟེར། །ལྷ་དང་མི་ཡི་བུ་རྣམས་དང་། །ལྷ་མ་ཡིན་གྱི་འཁོར་རྣམས་ཀྱང་། །
རྒྱལ་པོས་ཡང་དག་ཆོས་འདུལ་རྒྱུས། །རྟག་ཏུ་སེམས་ནི་དགའ་བར་འགྱུར། །ལྷ་ཚོགས་ཐམས་ཅད་རབ་དགའ་ནས། །མི་རྒྱལ་དེ་ལ་སྲུང་བར་བྱེད། །གཟའ་སྐར་རང་གི་ལམ་རྒྱུ་ཞིང་། །ཉི་ཟླ་ཚད་ལས་འདའ་མི་བྱེད། །རླུང་ནི་རྟག་པར་དུས་བཞིན་ལྡང་། །བདུད་རྩིའི་ཆར་ནི་དུས་བཞིན་འབབ། །ལོ་ཏོག་ཐམས་ཅད་སྨིན་ལེགས་པས། །མི་རྣམས་མུ་གེ་མེད་པར་འགྱུར། །ལྷ་ཚོགས་མང་པོ་ཐམས་ཅད་ཀུན། །རང་གི་ཕོ་བྲང་གང་འགྱུར་བས། །དེ་ཕྱིར་མི་རྗེ་ཁྱོད་ཀྱིས་ནི། །ལུས་སྤངས་ཡང་དག་ཆོས་སྤེལ་བྱོས། །རིན་ཆེན་ཆོས་ལ་བཀུར་བྱེད་ན། །དེས་ན་མང་པོ་བདེ་འགྱུར་བས། །རྟག་པར་ཡང་དག་ཆོས་བསྟེན་ནས། །ཡོན་ཏན་བདག་ཉིད་བརྒྱན་པར་བྱ། །འཁོར་རྣམས་རྟག་པར་རབ་དགའ་ཞིང་། །སྡིག་པ་རྣམས་ནི་སྤོང་བར་བྱེད། །ཆོས་ཀྱིས་སེམས་ཅན་འདུལ་བྱེད་པས། །རྒྱུན་དུ་བདེ་བ་འཐོབ་པར་འགྱུར། །མི་རྣམས་དེ་དག་ཐམས་ཅད་ཀུན། །དགེ་བ་བཅུ་ནི་སྤྱོད་བྱེད་ན། །ཡུལ་ཁམས་རྟག་པར་ལོ་ལེགས་ཤིང་། །ཡུལ་ནི་ཞི་བ་ཉིད་དུ་འགྱུར། །རྒྱལ་པོ་ཆོས་ཀྱིས་མི་འདུལ་ཞིང་། །དགེ་བས་སྡིག་སྤྱོད་འདུལ་བྱེད་ན། །སྙན་པའི་གྲགས་པ་འཐོབ་འགྱུར་ཞིང་། །སེམས་ཅན་རྣམས་ནི་བདེ་བར་བྱེད། །དེ་ནས་དེའི་ཚེ་ས་ཆེན་པོ་ལ་གནས་པའི་མིའི་རྒྱལ་པོ་ཐམས་ཅད་དང་འཁོར་མང་པོ་རྣམས་བཅོམ་ལྡན་འདས་ཀྱིས་སྔོན་གྱི་མིའི་རྒྱལ་པོས་ཡུལ་སྐྱོང་བའི་ཆོས་ཀྱི་དོན་བཀས་བཤད་པ་ཐོས་པས་ཐམས་ཅད་ངོ་མཚར་རྨད་དུ་གྱུར་པ་དང་། རབ་ཏུ་དགའ་བ་ཐོབ་པར་གྱུར་པས་ཤིན་ཏུ་དང་བའི་མངོན་པར་ཡིད་ཆེས་པ་དག་གིས་བཀའ་ཡང་དག་པར་བླངས་ཏེ་སྤྱོད་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་རྒྱལ་པོའི་ཆོས་ལུགས་ཡང་དག་པའི་བསྟན་བཅོས་བསྟན་པའི་ལེའུ་སྟེ་ཉི་ཤུ་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་དགུ་པ། དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་རྒྱལ་པོའི་ཆོས་ལུགས་ཡང་དག་པའི་བསྟན་
བཅོས་བཀས་བཤད་ནས་ཡང་འཁོར་མང་པོ་རྣམས་ལ་བཀའ་སྩལ་པ། ཁྱེད་ལ་སོགས་པ་ལེགས་པར་ཉོན་ཅིག་དང་། ངས་དེང་ཁྱོད་ལ་སྔོན་ཆོས་ཡང་དག་པར་སྤྱོད་པའི་རྒྱུ་དང་རྐྱེན་བཤད་པར་བྱའོ། །དེ་ནས་དེའི་ཚེ་ཚིགས་སུ་བཅད་དེ་བཀའ་སྩལ་པ། ངས་སྔོན་འཁོར་ལོས་སྒྱུར་རྒྱལ་བྱས་པ་ན། །ས་ཆེན་འདི་དང་རྒྱ་མཚོར་བཅས་པ་བཏང་། །གླིང་བཞི་རིན་ཆེན་གྱིས་ནི་རབ་བཀང་བ། །ཐམས་ཅད་དེ་བཞིན་གཤེགས་པ་རྣམས་ལ་མཆོད། །ངས་སྔོན་བསྐལ་པ་དག་ནི་ཚད་མེད་སྙེད། །རྣམ་དག་ཡང་དག་ཆོས་སྐུ་གཉེར་བའི་ཕྱིར། །ཕངས་པའི་ནོར་དང་རང་གི་ལུས་སྲོག་ཀྱང་། །སེར་སྣ་མེད་པའི་སེམས་ཀྱིས་ཡོངས་སུ་བཏང་། །གཞན་ཡང་འདས་པའི་བསྐལ་པ་བསམ་དཀའ་ན། །ཡང་དག་མཁྱེན་པ་རིན་ཆེན་གཙུག་ཕུད་བྱུང་། །དེ་བཞིན་གཤེགས་དེ་མྱ་ངན་འདས་པའི་འོག ། རྒྱལ་པོ་ལེགས་སྐྱེས་ཞེས་བྱ་འཇིག་རྟེན་བྱུང་། །འཁོར་ལོས་སྒྱུར་རྒྱལ་བྱས་ནས་གླིང་བཞི་བཏུལ། །རྒྱ་མཚོའི་མཐར་ཐུག་ཚུན་ཆད་སྐྱབས་སུ་དོང་། །གྲོང་ཁྱེར་མིང་ནི་གྱ་ནོམ་སྒྲ་ཞེས་བྱ། །དེ་ཚེ་འཁོར་ལོས་སྒྱུར་རྒྱལ་དེ་ན་གནས། །རྨི་ལམ་སངས་རྒྱས་བསོད་ནམས་ཡེ་ཤེས་ཐོས། །ཆོས་སྨྲ་རིན་ཆེན་བརྩེགས་པ་ཞེས་བྱ་བ། །ཉི་མའི་དཀྱིལ་འཁོར་ལྟར་མཛེས་སྟན་འདུག་ནས། །གསེར་འོད་དམ་པའི་མདོ་སྡེ་འཆད་པའང་མཐོང་། །དེ་ཚེ་རྒྱལ་དེ་རྨི་ལམ་སད་པ་དང་། །རབ་ཏུ་དགའ་བ་སྐྱེས་ནས་ལུས་ཀུན་ཁྱབ། །ནམ་ལངས་རྒྱལ་པོའི་ཕོ་བྲང་ཕྱིར་བྱུང་ནས། །དགེ་སློང་དགེ་འདུན་རྣམས་ཀྱི་ཐད་དུ་སོང་། །འཕགས་པའི་ཚོགས་ལ་གུས་པས་རབ་མཆོད་ནས། །ཚོགས་ཆེན་མང་པོ་དེ་ལ་འདི་སྐད་དྲིས། །ཆོས་སྨྲ་རིན་ཆེན་བརྩེགས་པ་ཞེས་བགྱི་བ། །ཡོན་ཏན་ཕུན་ཚོགས་སེམས་ཅན་འདུལ་མཆིས་སམ། །དེ་ཚེ་ཆོས་སྨྲ་ཆེན་པོ་རིན་ཆེན་བརྩེགས། །གནས་ཁང་གཅིག་པུར་ཡང་དག་གནས་ནས་ནི། །དྲན་པ་ཉེར་གཞག་མདོ་སྡེ་འདི་བཏོན་པས། །དྲང་འདུག་མི་གཡོ་ལུས་དང་སེམས་ཀྱང་བདེ། །དེ་ཚེ་དགེ་སློང་ཞིག་གིས་རྒྱལ་ཁྲིད་ནས། །རིན་
ཆེན་བརྩེགས་པ་དེ་ཡི་གནས་སུ་ཕྱིན། །གནས་ཁང་ནང་དུ་ལུས་ནི་དྲང་བསྲང་སྟེ། །འོད་དང་མཚན་མཆོག་ལུས་ཀུན་ཁྱབ་པར་མཐོང་། །རྒྱལ་པོ་དེ་ལ་འདི་ནི་རིན་ཆེན་བརྩེགས། །མདོ་སྡེའི་རྒྱལ་པོ་མཆོག་གྱུར་འདི་ལྟ་སྟེ། །གསེར་འོད་དམ་པ་ཤིན་ཏུ་གྱ་ནོམ་མཆོག །སངས་རྒྱས་སྤྱོད་ཡུལ་ཟབ་མོ་འཛིན་ཅེས་སྨྲས། །རྒྱལ་པོས་རིན་ཆེན་བརྩེགས་ལ་ཕྱག་བྱས་ནས། །གུས་པས་ཐལ་མོ་སྦྱར་ནས་འདི་སྐད་སྨྲས། །ཟླ་བ་ཉ་ལྟར་ཞལ་མདོག་མཛེས་གྱུར་པ། །གསེར་འོད་དམ་པའི་ཆོས་འདི་བཤད་དུ་གསོལ། །རིན་ཆེན་བརྩེགས་ཀྱིས་རྒྱལ་པོའི་ཚིག་མཉན་ནས། །གསེར་འོད་དམ་པ་འདི་ནི་བཤད་གནང་བས། །སྟོང་གསུམ་འཇིག་རྟེན་ཁམས་འདི་ཀུན་ཁྱབ་པའི། །ལྷ་མི་ཐམས་ཅད་རབ་ཏུ་དགའ་བར་འགྱུར། །རྒྱལ་པོས་ས་ཕྱོགས་ཡངས་ཤིང་གཙང་མའི་གནས། །རིན་ཆེན་གྱ་ནོམ་མཆོག་གིས་རབ་བརྒྱན་ཏེ། །སྤོས་ཆུ་དམ་པ་དག་གིས་ཆག་ཆག་བཏབ། །མེ་ཏོག་སྣ་ཚོགས་དག་ནི་གཅལ་དུ་བཀྲམ། །གནས་མཆོག་དེར་ནི་སྟན་མཐོ་རབ་བཏིང་སྟེ། །བ་དན་བླ་རེ་བྲེས་ནས་མཛེས་པར་བྱས། །ཕྱེ་མ་བྱུག་སྤོས་རྣམ་པ་སྣ་ཚོགས་ཀྱིས། །བདུག་པ་དག་ནི་ཀུན་དུ་ཁྱབ་པར་བྱས། །ལྷ་ཀླུ་ལྷ་མ་ཡིན་དང་མི་འམ་ཅི། །ལྟོ་འཕྱེ་ཆེན་པོ་དང་ནི་གནོད་སྦྱིན་དང་། །ལྷ་རྣམས་མན་དཱ་ར་བའི་ཆར་ཕབ་ནས། །ཐམས་ཅད་ཉེར་འོངས་སྟན་མཆོག་དེ་ལ་མཆོད། །གཞན་ཡང་ལྷ་ནི་འབུམ་ཕྲག་བརྒྱ་སྟོང་རྣམས། །དམ་ཆོས་ཉན་མོས་ཐམས་ཅད་དེར་ནི་འདུས། །ཆོས་སྨྲ་དང་པོ་སྟན་ལས་ལངས་པའི་ཚེ། །ཐམས་ཅད་ལྷ་ཡི་མེ་ཏོག་དག་གིས་མཆོད། །དེ་ཚེ་ཆོས་སྨྲ་ཆེན་པོ་རིན་ཆེན་བརྩེགས། །ཤིན་ཏུ་ལུས་བཀྲུས་གོས་གཙང་རབ་བགོས་ཏེ། །ཚོགས་ཆེན་ཆོས་སྟན་དེ་དྲུང་སོང་ནས་ནི། །ཐལ་སྦྱར་རྩེ་གཅིག་སེམས་ཀྱིས་གུས་ཕྱག་བྱས། །ལྷ་དབང་ལྷ་ཚོགས་ལྷ་ཡི་བུ་མོ་རྣམས། །ཐམས་ཅད་མེ་ཏོག་མན་དཱ་ར་ཡང་གཏོར། །ལྷ་ཡི་རོལ་མོ་བརྒྱ་སྟོང་བསམ་མི་ཁྱབ། །མཁའ་ལ་གནས་ནས་སྒྲ་དབྱངས་སྙན་པར་ཕྱུང་། །དེ་ཚེ་ཆོས་སྨྲ་ཆེན་པོ་རིན་ཆེན་བརྩེགས། །སྟན་ལ་འདུག་སྟེ་སྐྱིལ་མོ་ཀྲུང་བཅས་ནས། །
ཕྱོགས་བཅུའི་ཞིང་ན་བཞུགས་པའི་བྱམས་ཆེན་གཙོ། །བྱེ་བ་བརྒྱ་སྟོང་དེ་དག་ཡིད་ལ་བསམས། །སྡུག་བསྔལ་སེམས་ཅན་ཐམས་ཅད་ཇི་སྙེད་པ། །ཐམས་ཅད་བྱམས་སེམས་མཉམ་པ་ཉེར་གཞག་ནས། །གསོལ་འདེབས་བདག་པོ་རྒྱལ་པོ་ལེགས་པའི་ཕྱིར། ། གསེར་འོད་དམ་པའི་མདོ་སྡེ་རབ་ཏུ་བཤད། །རྒྱལ་པོས་དེ་འདྲའི་ཆོས་ནི་ཐོས་གྱུར་ནས། །ཐལ་སྦྱར་རྩེ་གཅིག་རྗེས་སུ་ཡི་རང་སྨྲས། །ཡ་མཚན་ཆོས་ཐོས་མཆི་མ་བླགས་ཏེ་ངུས། །ལུས་དང་སེམས་ནི་དགའ་ཆེན་ཀུན་ཁྱབ་གྱུར། །དེ་ཚེ་ཡུལ་བདག་རྒྱལ་པོ་ལེགས་སྐྱེས་ཀྱིས། །མདོ་སྡེ་འདི་ནི་མཆོད་པར་འདོད་པའི་ཕྱིར། །ལག་ན་ཡིད་བཞིན་ནོར་བུ་ཐོགས་ནས་ནི། །སེམས་ཅན་ཀུན་ཕྱིར་སྨོན་ལམ་འདི་སྐད་བཏབ། །འཛམ་གླིང་འདི་ནི་ཀུན་དུ་ཁྱབ་པར་ཡང་། །རིན་ཆེན་རྒྱན་ཕྲེང་ཆར་ནི་རབ་ཕབ་ནས། །ནོར་དང་ཡོ་བྱད་རྒུད་ཕོངས་ཇི་སྙེད་པ། །ཐམས་ཅད་ཡིད་བཞིན་བདེ་བ་མྱོང་བར་ཤོག །དེ་ནས་རིན་ཆེན་སྣ་བདུན་ཆར་ཕབ་ནས། །གླིང་བཞི་ཀུན་དུ་ཆོག་ཅིང་ཚིམ་བྱས་པས། །ལུས་ཀྱི་རྒྱན་ཕྲེང་གོས་དང་ཟས་སྐོམ་དང་། །ཅི་དང་ཅི་འདོད་ཕོངས་པ་མེད་པར་གྱུར། །དེ་ཚེ་ཡུལ་བདག་རྒྱལ་པོ་ལེགས་སྐྱེས་ཀྱིས། །གླིང་བཞི་རིན་ཆེན་ཆར་བབ་མཐོང་བ་དང་། །ཐམས་ཅད་སངས་རྒྱས་རིན་ཆེན་གཙུག་ཕུད་ཀྱི། །བསྟན་ལ་ཞུགས་པའི་དགེ་སློང་དགེ་འདུན་མཆོད། །འདས་པའི་རྒྱལ་པོ་ལེགས་སྐྱེས་གང་ཡིན་པ། །ཤཱཀྱ་ཐུབ་པ་ང་ཡིན་ཤེས་པར་བྱོས། །སྔོན་ཡང་ས་ཆེན་མང་པོ་རབ་བཏང་སྟེ། །རིན་ཆེན་དག་གིས་གླིང་བཞི་ཡོངས་སུ་བཀང་། །སྔོན་ཚེ་ཆོས་མཁན་ཆེན་པོ་རིན་ཆེན་བརྩེགས། །ལེགས་སྐྱེས་དེ་ལ་གྱ་ནོམ་ཆོས་བཤད་དེ། །མདོ་སྡེའི་རྒྱལ་པོ་དེ་དག་བཤད་པའི་ཕྱིར། །ཤར་ཕྱོགས་སངས་རྒྱས་མི་འཁྲུགས་གྲུབ་པ་ཡིན། །ངས་ནི་མདོ་སྡེའི་རྒྱལ་པོ་འདི་མཉན་ནས། །ཐལ་སྦྱར་རྩེ་གཅིག་ཡི་རང་བརྗོད་པ་དང་། །རིན་ཆེན་སྣ་བདུན་བཏང་བའི་བསོད་ནམས་ཀྱིས། །རྡོ་རྗེ་སྐུ་མཆོག་འདི་ནི་བརྙེས་པ་ཡིན། །གསེར་འོད་བསོད་ནམས་བརྒྱ་ཡི་མཚན་བརྒྱན་པས། །མཐོང་བ་ཐམས་ཅད་ཀུན་ནི་རབ་དགའ་ཞིང་། །
སེམས་ཅན་ཐམས་ཅད་ཀུན་གྱི་སྙིང་དུ་སྡུག །ལྷ་ཚོགས་མང་པོ་བྱེ་བ་ཀུན་དེ་བཞིན། །འདས་ཚེ་བསྐལ་པ་བྱེ་བ་དགུ་བཅུ་དགུ། །འཁོར་ལོས་སྒྱུར་བའི་རྒྱལ་པོ་དག་ཀྱང་བྱས། །ཡུལ་ཁམས་ཆུང་ངུར་མི་ཡི་རྒྱལ་པོ་བྱས། །གཞན་ཡང་བསྐལ་པ་བརྒྱ་སྟོང་ཚད་མེད་སྙེད། །བརྒྱ་བྱིན་ལྷ་ཡི་དབང་པོ་དག་ཀྱང་བྱས། །ཚངས་པའི་རྒྱལ་པོ་ཆེན་པོ་དག་བྱས་ཏེ། །ཕྱོགས་བཅུའི་བྱམས་ཆེན་གཙོ་ལ་མཆོད་པ་ཡི། །དེ་ཡི་གྲངས་ཚད་ཤིན་ཏུ་མཐར་ཐུག་དཀའ། །ངས་སྔོན་མདོ་ཐོས་རྗེས་སུ་ཡི་རང་དགེ། །བསོད་ནམས་ཕུང་པོ་ཅི་ཡོད་ཚད་ཤེས་དཀའ། །བསོད་ནམས་དེ་དབང་བྱང་ཆུབ་མངོན་རྟོགས་ནས། །ཆོས་སྐུ་ཡང་དག་ཡེ་ཤེས་དམ་པ་བརྙེས། །དེ་ནས་འཁོར་མང་པོ་རྣམས་དེ་སྐད་ཅེས་བཀའ་སྩལ་པ་ཐོས་པས་ངོ་མཚར་རྨད་དུ་གྱུར་ནས་ཐམས་ཅད་ཀྱིས་མདོ་སྡེ་གསེར་འོད་དམ་པ་སྤེལ་ཞིང་རྒྱུན་མི་འཆད་པར་སྤྱད་པར་མོས་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་རྒྱལ་པོ་ལེགས་སྐྱེས་ཀྱི་ལེའུ་སྟེ་ཉི་ཤུ་གཅིག་པའོ།། །།དེ་ནས་བཅོམ་ལྡན་འདས་ཀྱིས་དཔལ་གྱི་ལྷ་མོ་ཆེན་མོ་ལ་འདི་སྐད་ཅེས་བཀའ་སྩལ་ཏོ། །ཤིན་ཏུ་དང་བའི་སེམས་དད་པ་དང་ལྡན་པའི་རིགས་ཀྱི་བུའམ། །རིགས་ཀྱི་བུ་མོ་གང་ལ་ལ་ཞིག་གིས་འདས་པ་དང་། །མ་བྱོན་པ་དང་། ད་ལྟར་བཞུགས་པའི་སངས་རྒྱས་རྣམས་ལ་མཆོད་པའི་ཡོ་བྱད་བསམ་གྱིས་མི་ཁྱབ་པ་དང་། ཡངས་ཤིང་རྒྱ་ཆེ་བ་དག་གིས་མཆོད་པར་བྱེད་པར་འདོད་པ་དང་། དུས་གསུམ་གྱི་སངས་རྒྱས་ཀྱི་སྤྱོད་ཡུལ་ཟབ་མོ་ཤེས་ཤིང་རྟོགས་པར་འདོད་པ་གང་ཡིན་པ་དེས་གདོན་མི་ཟ་བར་སེམས་རྩེ་གཅིག་ཏུ་མདོ་སྡེའི་རྒྱལ་པོ་འདི་གྲོང་ཁྱེར་རམ། གྲོང་རྡལ་ལམ། རི་འམ། ནགས་ཚལ་གང་ཡང་རུང་སྟེ། གནས་དེ་དང་དེ་དག་ཏུ་སེམས་ཅན་རྣམས་ལ་རྒྱ་ཆེར་ཡང་དག་པར་བསྟན་ནས་ཡོངས་སུ་སྤེལ་བར་བྱའོ། །ཆོས་ཉན་པ་གང་ཡིན་པ་དེ་ཡང་རྣམ་པར་གཡེང་བའི་འདུ་ཤེས་སྤངས་ནས་རྣ་བླགས་ཏེ་སེམས་རྩེ་གཅིག་ཏུ་གཞག་པར་བྱའོ། །དེ་ནས་བཅོམ་ལྡན་འདས་ཀྱིས་ལྷ་མོ་དེ་དང་འཁོར་མང་པོ་རྣམས་ལ་ཚིགས་སུ་བཅད་དེ་བཀའ་
སྩལ་པ། གང་ཞིག་སངས་རྒྱས་མང་པོ་ལ། །བསམ་གྱིས་མི་ཁྱབ་མཆོད་པ་དང་། །དེ་བཞིན་གཤེགས་པ་ཐམས་ཅད་ཀྱི། །སྤྱོད་ཡུལ་ཟབ་མོ་ཤེས་འདོད་ན། །གལ་ཏེ་གསེར་འོད་དམ་པ་འདི། །ཡང་དག་ཕྱེ་བཤད་མཐོང་གྱུར་ན། །དེ་ཡི་ཕྱོགས་སུ་ཉེར་སོང་ནས། །དེ་ཡི་དྲུང་དུ་འགྲོ་བར་བྱ། །མདོ་འདི་བསམ་གྱིས་མི་ཁྱབ་པས། །ཡོན་ཏན་མང་པོ་སྤྱོད་བྱེད་ཅིང་། །སྡུག་བསྔལ་རྒྱ་མཚོ་མཐའ་མེད་ལས། །སེམས་ཅན་རྣམས་ནི་ཐར་བར་བྱེད། །ང་ཡི་མདོ་འདི་རྣམ་བལྟས་ན། །ཐོག་མ་བར་དང་ཐ་མར་དགེ། །ཤིན་ཏུ་ཟབ་པས་དཔག་པར་དཀའ། །དཔེ་དག་གིས་ནི་ཟླ་བྱར་མེད། །གང་གཱའི་བྱེ་མ་ས་ཆེན་རྡུལ། །རྒྱ་མཚོའི་ཆུ་དང་ནམ་མཁའ་དང་། །རི་བྲག་ཐམས་ཅད་གང་གིས་ཀྱང་། །ཆ་ཤས་ཙམ་ཡང་དཔེར་བྱར་མེད། །ཆོས་དབྱིངས་ཟབ་མོར་འཇུག་འདོད་ན། །མདོ་འདི་སྔར་ནི་མཉན་པར་བྱ། །ཆོས་ཉིད་མཆོད་རྟེན་གང་ན་བར། །ཟབ་མོ་ཤིན་ཏུ་བདེ་བར་གནས། །མཆོད་རྟེན་འདི་ཡི་ནང་དག་ཏུ། །ཤཱཀྱ་ཐུབ་པ་ང་ཡིས་ནི། །ཡིད་འོང་སྒྲ་དབྱངས་དམ་པ་ཡིས། །མདོ་སྡེ་འདི་བཤད་མཐོང་བར་འགྱུར། །དེས་ན་གྲངས་ཚད་བསམ་དཀའ་བའི། ། བསྐལ་པ་བྱེ་བ་སྙེད་དུ་ནི། །ལྷ་དང་མི་ཡི་ནང་སྐྱེས་ནས། །རྟག་ཏུ་བདེ་བ་མཆོག་མྱོང་འགྱུར། །མདོ་སྡེ་འདི་ནི་མཉན་པ་ཡིས། །བདག་ནི་བསམ་གྱིས་མི་ཁྱབ་པའི། །བསོད་ནམས་ཕུང་པོ་འཐོབ་འགྱུར་ཞེས། །དེ་སྙམ་དུ་ནི་བསམ་པར་བྱ། །གལ་ཏེ་མེ་ཆེན་ཕུང་པོ་དག །དཔག་ཚད་བརྒྱ་ནི་གང་གྱུར་ཀྱང་། །མདོ་སྡེའི་རྒྱལ་པོ་འདི་མཉན་ཕྱིར། །དཀའ་བ་མེད་པར་འགྲོ་བར་བྱ། །དེ་ཡི་གནས་སུ་ཕྱིན་ནས་ནི། །འདི་འདྲའི་མདོ་འདི་ཐོས་གྱུར་ན། །སྡིག་པའི་ལས་རྣམས་འབྱང་འགྱུར་ཞིང་། །རྨི་ལམ་ངན་པ་སེལ་བར་འགྱུར། ། གཟའ་སྐར་མ་རུངས་ལྟས་ངན་དང་། །བྱད་སྟེམས་ལོག་པའི་གདོན་ལ་སོགས། །མདོ་སྡེ་འདི་ནི་ཐོས་པའི་ཚེ། །སྡིག་པ་མང་པོ་སྤོང་བར་བྱེད། །སྟན་མཐོ་མཆོག་ནི་རབ་བརྒྱན་ནས། །རབ་གཙང་པདྨ་འདྲ་བ་ལ། །ཆོས་སྨྲ་སྟེང་དུ་ཕྱིན་ནས་ནི། །ཀླུ་ཆེན་ལྟ་བུར་
འདུག་པར་བྱ། །དེ་ལ་བདེ་བར་འདུག་ནས་ནི། །ཟབ་མོའི་མདོ་འདི་བཤད་པར་བྱ། །ཡི་གེར་བྲིས་ནས་ཀློག་འཛིན་དང་། །དེ་ཡི་དོན་ནི་བཤད་པར་བྱ། །ཆོས་སྨྲ་སྟན་ནི་སྤངས་ནས་ནི། །ཕྱོགས་གཞན་དག་ཏུ་སོང་གྱུར་ཀྱང་། །ཁྲི་སྟན་མཐོན་པོ་དེ་ལས་ནི། ། ཆོ་འཕྲུལ་མཚན་མ་མང་འབྱུང་བ། །རེས་འགའ་ཆོས་སྨྲ་མཁན་པོའི་གཟུགས། །སྟན་མཐོ་སྟེང་ན་འདུག་པར་མཐོང་། །རེས་འགའ་སངས་རྒྱས་བཅོམ་ལྡན་འདས། །བྱང་ཆུབ་སེམས་དཔའ་རྣམས་ཀྱང་མཐོང་། །རེས་འགའ་ཀུན་དུ་བཟང་པོའི་གཟུགས། །རེས་འགའ་འཇམ་དཔལ་ལྟ་བུ་དང་། །རེས་འགའ་བྱམས་པ་གཙོ་བོའི་གཟུགས། །སྟན་མཐོའི་སྟེང་ན་འདུག་པར་མཐོང་། །རེས་འགའ་ཡ་མཚན་མཚན་མ་དང་། །ལྷ་ནི་མང་པོ་རྣམས་ཀྱི་གཟུགས། །ཡུད་ཙམ་དུ་ནི་མཐོང་གྱུར་ཀྱང་། །དེ་མ་ཐག་ཏུ་མི་སྣང་འགྱུར། །བཀྲ་ཤིས་མང་པོ་རྫོགས་བྱེད་པས། །བྱས་པ་ཐམས་ཅད་ཡིད་བཞིན་འགྲུབ། །ཡོན་ཏན་རྣམས་ནི་ཡོངས་རྫོགས་པར། །བཅོམ་ལྡན་འདས་ཀྱིས་དེ་སྐད་གསུངས། །མཆོག་ཏུ་རྣམ་རྒྱལ་གྲགས་དང་ལྡན། །ཉོན་མོངས་མང་པོ་ཞི་བར་བྱེད། །ཕ་རོལ་དགྲ་རྣམས་རབ་ཏུ་སེལ། །གཡུལ་འགྱེད་ཚེ་ན་རྟག་པར་རྒྱལ། །རྨི་ལམ་ངན་པ་ཐམས་ཅད་མེད། །དུག་དང་གནོད་པ་མང་པོ་ཞི། །ལས་གསུམ་སྡིག་པ་ཅི་བྱས་པ། །མདོ་སྡེའི་མཐུ་ཡིས་བྱང་བར་བྱེད། །འཛམ་བུའི་གླིང་ནི་འདི་དག་ཀུན། །གྲགས་པ་ཀུན་དུ་རྒྱས་པར་འགྱུར། ། འཁོན་འཛིན་དགྲ་ནི་ཇི་སྙེད་པ། །ཕན་ཚུན་འཁོན་ནི་གཏོང་བར་འགྱུར། །གལ་ཏེ་དགྲ་ནི་ཕྱིན་གྱུར་ཀྱང་། །མིང་ཐོས་ཙམ་གྱིས་ལྡོག་འགྱུར་བས། །མཚོན་ཆ་གཡོ་བ་མི་ལྟོས་པས། །དགྲ་གཉིས་དགའ་བ་སྐྱེ་བར་འགྱུར། །ཚངས་རྒྱལ་དང་ནི་བརྒྱ་བྱིན་དབང་། །འཇིག་རྟེན་སྐྱོང་དང་རྒྱལ་ཆེན་བཞི། །ལག་ན་རྡོ་རྗེ་གནོད་སྦྱིན་དང་། །སྡེ་དཔོན་ཆེན་པོ་ཡང་དག་ཤེས། །ཀླུ་ཡི་རྒྱལ་པོ་མ་དྲོས་དང་། །ཀླུ་ཡི་རྒྱལ་པོ་རྒྱ་མཚོ་དང་། །མི་འམ་ཅི་དང་རོལ་མོའི་ལྷ། །ལྷ་མོ་ཡིན་དང་གསེར་འདབ་བདག །ལྷ་མོ་སྤོབས་པ་ཆེན་མོ་དང་། །
དཔལ་གྱི་ལྷ་མོ་ཆེན་མོ་དང་། །འདི་ལ་སོགས་པ་ལྷ་ཡི་གཙོ། །སོ་སོར་ལྷ་ཚོགས་ཁྲིད་ནས་ནི། །སངས་རྒྱས་རྣམས་ལ་མཆོད་པར་བྱེད། །དཀོན་མཆོག་ཆོས་ནི་བསམ་མི་ཁྱབ། །རྟག་པར་དགའ་བའི་སེམས་ཀྱིས་ནི། །མདོ་སྡེ་ལ་ནི་བཀུར་སྟི་བྱེད། །འདི་ལ་སོགས་པའི་ལྷ་མང་པོ། །ཐམས་ཅད་ལྷན་ཅིག་འགྲོགས་ནས་ནི། །བསོད་ནམས་སྒྲུབ་པ་རྣམ་བལྟས་ནས། །ལྷན་ཅིག་འདི་སྐད་སྨྲ་བར་བྱེད། །སེམས་ཅན་འདི་དག་རབ་ཏུ་ལྟོས། །བསོད་ནམས་ཡོན་ཏན་ཆེ་ལྡན་ཞིང་། །དགེ་རྩ་བརྩོན་འགྲུས་སྟོབས་ཀྱིས་ནི། །བདག་ཅག་ལྷ་གནས་སྐྱེ་འགྱུར་ཟེར། །མདོ་སྡེ་ཟབ་མོ་མཉན་པའི་ཕྱིར། །གུས་པའི་སེམས་ཀྱིས་དེར་འོངས་ནས། །ཡང་དག་ཆོས་ནི་བཀུར་བའི་ཕྱིར། །ཆོས་ཀྱི་མཆོད་རྟེན་མཆོད་པར་བྱེད། །སེམས་ཅན་ཀུན་ལ་སྙིང་བརྩེ་བས། །ཕན་པ་ཆེན་པོ་བྱེད་པས་ན། །མདོ་སྡེ་ཟབ་མོ་འདི་དག་གི། །ཆོས་ཀྱི་རིན་ཆེན་སྣོད་ཀྱང་བྱེད། །ཆོས་ཀྱི་སྒོ་འདིར་གང་ཞུགས་པ། །ཆོས་ཉིད་ལ་ནི་འཇུག་འགྱུར་བས། །མདོ་སྡེ་གསེར་འོད་དམ་པ་འདི། །རྩེ་གཅིག་སེམས་ཀྱིས་མཉན་པར་བྱ། །སངས་རྒྱས་བརྒྱ་སྟོང་ཚད་མེད་ལ། ། གང་ཟག་དེ་དག་མཆོད་པས་ན། །དགེ་བའི་རྩ་བ་དེ་དབང་གིས། །མདོ་སྡེ་འདི་ནི་ཐོས་པ་ཡིན། །འདི་ལྟར་ལྷ་ཡི་བདག་པོ་དང་། །ལྷ་མོ་སྤོབས་པ་ཆེན་མོ་དང་། །དཔལ་གྱི་ལྷ་མོ་དེ་དང་ནི། །རྒྱལ་ཆེན་རིས་བཞིའི་ལྷ་རྣམས་དང་། །གནོད་སྦྱིན་འཁོར་ནི་གྲངས་མེད་པ། ། དཔའ་ཞིང་རྫུ་འཕྲུལ་ལྡན་པ་རྣམས། །སོ་སོར་ཕྱོགས་བཞི་དག་ནས་ནི། །རྟག་ཏུ་འོངས་ནས་སྐྱོབ་པར་བྱེད། །ཉི་ཟླ་བརྒྱ་བྱིན་ལྷ་དབང་དང་། །རླུང་དང་ཆུ་དང་མེ་ཡི་ལྷ། །ཁྱབ་འཇུག་དང་ནི་ཕྲག་ཆེན་དང་། །གཤིན་རྗེ་སྤོབས་པ་ལྷ་མོ་དང་། །འཇིག་རྟེན་མགོན་པོ་ལ་སོགས་པ། །རབ་དཔལ་གཟི་ལྡན་ཐམས་ཅད་ཀུན། །མདོ་སྡེ་འཛིན་པ་སྲུང་བྱེད་པས། །ཉིན་མཚན་རྟག་པར་ཡོང་མི་འབྲལ། །གནོད་སྦྱིན་རྒྱལ་པོ་སྟོབས་པོ་ཆེ། །མཐུ་ཆེན་དང་ནི་དབང་ཕྱུག་དང་། །གཙོ་བོ་ཡང་དག་ཤེས་ལ་སོགས། །གནོད་སྦྱིན་ཉི་ཤུ་རྩ་བརྒྱད་
དང་། །གཞན་ཡང་གནོད་སྦྱིན་བརྒྱ་སྟོང་རྣམས། །རྫུ་འཕྲུལ་སྟོབས་ཆེན་ལྡན་པ་དག །རྟག་པར་འཇིགས་པའི་གནས་རྣམས་སུ། །ཉེར་འོངས་གང་ཟག་དེ་སྲུང་བྱེད། །ལག་ན་རྡོ་རྗེ་གནོད་སྦྱིན་རྒྱལ། །འཁོར་ནི་ལྔ་བརྒྱ་བཅས་པ་དང་། །བྱང་ཆུབ་སེམས་དཔའ་ཆེན་པོའི་ཚོགས། །རྟག་པར་ཉེར་འོངས་དེ་སྲུང་བྱེད། །རིན་ཆེན་རྒྱལ་པོ་གནོད་སྦྱིན་དབང་། །དེ་བཞིན་རྫོགས་བཟང་རྒྱལ་པོ་དང་། །འབྲོག་གནས་དང་ནི་ཀུ་པེ་ར། །ཟས་སྦྱིན་ཁ་དོག་སེར་པོ་དང་། །འདི་ལ་སོགས་པའི་གནོད་སྦྱིན་རྒྱལ། །སོ་སོར་གཡོག་འཁོར་ལྔ་བརྒྱར་བཅས། །ཐམས་ཅད་ཉེར་འོང་སྲུང་བར་བྱེད། །སྣ་ཚོགས་སྡེ་དང་དྲི་ཟ་དང་། །འདམ་བུ་རྒྱལ་པོ་རྟག་ཏུ་རྒྱལ། །ནོར་བུ་གཙུག་དང་ནེ་གན་དང་། །ཆར་པའི་དབང་པོ་དེ་དག་དང་། །མཆོག་ཏུ་རྒྱལ་བ་ནག་པོ་ཆེ། །སུ་བརྞ་དང་ཀེ་ཤ་དང་། །པཉྩི་ཀ་དང་ར་རྐང་དང་། ། དེ་བཞིན་སྐལ་བ་ཆེན་པོ་དང་། །པྲ་མ་ལི་ཆུང་ཆོས་སྐྱོང་དང་། །སྤྲེའུ་རྣམས་ཀྱི་ནི་རྒྱལ་པོ་དང་། །ཁབ་སྤུ་དང་ནི་ཉི་མའི་གཉེན། །རིན་ཆེན་གཙུག་ཕུད་སྲུང་བར་བྱེད། །པྲ་ནི་ལི་ཆེན་ན་ཀུ་ལ། །བདུན་པ་དང་ནི་འདོད་མཆོག་དང་། །མཐུ་བོ་ཆེ་དང་གངས་རི་དང་། ། བདེ་བའི་རི་ཡང་དེ་བཞིན་ཏེ། །ཐམས་ཅད་རྫུ་འཕྲུལ་ཆེ་ལྡན་ཞིང་། །རབ་དཔའ་མཐུ་སྟོབས་ལྡན་པ་ཡང་། །མདོ་སྡེ་འདི་འཛིན་མཐོང་གྱུར་ན། །ཐམས་ཅད་འོངས་ནས་སྲུང་བར་བྱེད། །མ་དྲོས་ཀླུ་ཡི་རྒྱལ་པོ་དང་། ཀླུ་ཡི་རྒྱལ་པོ་རྒྱ་མཚོ་དང་། བཏང་བཟུང་དང་ནི་ཨེ་ལའི་འདབ། །དགའ་བོ་དང་ནི་ཉེ་དགའ་བོ། །ཀླུ་ནི་བརྒྱ་སྟོང་མང་པོའི་ནང་། །རྫུ་འཕྲུལ་དང་ནི་གཟི་བྱིན་ལྡན། །མདོ་སྡེ་འཛིན་པ་སྲུང་བྱེད་པས། །ཉིན་མཚན་རྟག་པར་ཡོང་མི་འབྲལ། །བ་ལི་དང་ནི་སྒྲ་གཅན་དང་། །ཐགས་ཟངས་རིས་དང་སྡོམ་བ་པ། ། བོང་བུ་དཔུང་དང་ཕྲག་ཆེན་དང་། །དེ་བཞིན་དུ་ནི་རབ་དགའ་དང་། །ལྷ་མིན་རྒྱལ་པོ་གཞན་རྣམས་དང་། །ལྷ་ཡི་ཚོགས་ནི་གྲངས་མེད་པ། །སྟོབས་ཆེན་རབ་ཏུ་དཔའ་བ་རྣམས། །ཐམས་ཅད་འོངས་ནས་དེ་སྲུང་བྱེད། །འཕྲོག་མ་འབྱུང་པོ་རྣམས་ཀྱི་མ། །གནོད་
སྦྱིན་འཁོར་ནི་ལྔ་བརྒྱ་རྣམས། །མི་དེ་གཉིད་ལོག་སད་ཀྱང་རུང་། །རྟག་པར་འོངས་ནས་སྲུང་བར་བྱེད། །མ་རུངས་པ་དང་གདུག་པ་དང་། །གནོད་སྦྱིན་ལག་ན་དབྱུག་ཐོགས་དང་། །དུང་ཆེན་དང་ནི་སོ་བརྩེགས་མ། །སེམས་ཅན་ཀུན་གྱི་མདངས་འཕྲོག་པ། །དེ་འདྲའི་ལྷ་ཚོགས་མང་པོ་རྣམས། །མཐུ་ཆེན་རྫུ་འཕྲུལ་ལྡན་པ་ཀུན། །མདོ་སྡེ་འཛིན་པ་རྟག་བསྲུངས་པས། །ཉིན་མཚན་རྟག་པར་ཡོང་མི་འབྲལ། །གཙོ་མོ་སྤོབས་པ་ཆེན་མོ་དང་། །ལྷ་ཡི་བུ་མོ་ཚད་མེད་དང་། །དཔལ་གྱི་ལྷ་མོ་གཙོ་མོ་དང་། །དེ་ཡི་འཁོར་ནི་མང་པོ་དང་། །ས་ཆེན་འདི་ཡི་ལྷ་མོ་དང་། །ལོ་ཏོག་ཀུན་དགའ་ནགས་ཚལ་ལྷ། །ཤིང་གི་ལྷ་དང་ཆུ་རླུང་ལྷ། །མཆོད་རྟེན་ལྷ་ལ་སོགས་པ་དང་། །དེ་ལ་སོགས་པའི་ལྷ་མང་པོ། །དགའ་ཆེན་སེམས་ནི་རབ་བསྐྱེད་ནས། །མདོ་སྡེ་འདི་ནི་འཛིན་པ་ལ། །ཐམས་ཅད་འོངས་ནས་སྲུང་བར་བྱེད། །མདོ་སྡེ་འཛིན་པ་མཐོང་གྱུར་ན། །ཚེ་དང་ཁ་དོག་སྟོབས་འཕེལ་བྱེད། །གཟི་བྱིན་དང་ནི་ཡོན་ཏན་དང་། །མཚན་མཆོག་གིས་ནི་བརྒྱན་པར་འགྱུར། །གཟའ་སྐར་ལྟས་ངན་སྟོན་པ་དང་། །དེ་ལ་ཉམ་ཐག་བྱུར་བྱུང་དང་། །རྨི་ལམ་ལྟས་ངན་མཐོང་བ་ཡང་། །ཐམས་ཅད་རབ་ཏུ་ཞི་བར་བྱེད། །ས་ཆེན་འདི་ཡི་ལྷ་མོ་ཡང་། །རབ་བརྟན་གཟི་བྱིན་མཐུ་སྟོབས་ལྡན། །མདོ་སྡེ་འདི་ཡི་མཐུ་ཡིས་ནི། །ཆོས་ཀྱི་རོ་ཡིས་རྟག་ཚིམ་པས། །ས་བཅུད་ཐུར་དུ་སོང་བ་ཡང་། །དཔག་ཚད་བརྒྱ་ནི་ཡན་ཆད་དུ། ། ས་བཅུད་གྱེན་དུ་འཕགས་བྱས་ནས། །ས་ཆེན་འདི་ནི་སྣུམ་པར་བྱེད། །ས་ཡི་རྔམས་སུ་དཔག་ཚད་ནི། །འབུམ་ཕྲག་དྲུག་ཅུ་རྩ་བརྒྱད་ནས། །རྡོ་རྗེའི་གཞི་ལ་ཐུག་པའི་བར། །ས་བཅུད་ཐམས་ཅད་གྱེན་དུ་འཕགས། །མདོ་སྡེའི་རྒྱལ་པོ་འདི་ཐོས་དབང་། ། བསོད་ནམས་ཕུང་པོ་ཆེ་ཐོབ་པས། །ལྷ་ཡི་འཁོར་ནི་མང་པོ་རྣམས། །ཐམས་ཅད་ཕན་ཡོན་ཐོབ་པར་འགྱུར། །གཞན་ཡང་ལྷ་ཚོགས་མང་པོ་རྣམས། །མཐུ་སྟོབས་འོད་དང་ལྡན་འགྱུར་ཞིང་། །རབ་དགའ་རྟག་ཏུ་བདེ་བྱེད་པས། །ཉམས་པའི་མཚན་མ་སྤོང་
བར་འགྱུར། །འཛམ་བུའི་གླིང་ནི་འདི་ནང་གི། །ནགས་ཚལ་འབྲས་བུ་ལོ་ཏོག་ལྷ། །མདོ་སྡེ་འདི་ཡི་བྱིན་བརླབས་ཀྱིས། །སེམས་ནི་རྟག་ཏུ་དགའ་ཐོབ་པ། །ལོ་ཏོག་ཐམས་ཅད་ལེགས་འགྱུར་ཞིང་། །ཀུན་དུ་མེ་ཏོག་དམ་པ་དང་། །འབྲུ་རྣམས་ཐམས་ཅད་འཕེལ་འགྱུར་བས། །ས་ཆེན་ཀུན་དུ་རྒྱས་པར་འགྱུར། །འབྲས་བུའི་ལྗོན་ཤིང་མང་པོ་དང་། །ཐམས་ཅད་ལོ་ཏོག་མཆོག་སྐྱེས་ནས། །དྲི་ཞིམ་རྟག་པར་ཀུན་དུ་འཐུལ། །རྩྭ་མང་ལྗོན་ཤིང་རྣམས་ལས་ཀྱང་། །མེ་ཏོག་དམ་པ་སྐྱེ་འགྱུར་ཞིང་། །འབྲས་བུ་ཞིམ་པོ་སྐྱེ་འགྱུར་བས། །ཐམས་ཅད་ཀུན་དུ་གང་བར་འགྱུར། །འཛམ་བུའི་གླིང་ནི་འདི་དག་ཏུ། །ཀླུ་ཡི་བུ་མོ་ཚད་མེད་སྙེད། །རབ་ཏུ་དགའ་བའི་སེམས་བསྐྱེད་ནས། །ཐམས་ཅད་ཀུན་དུ་ཞུགས་ནས་ནི། །མེ་ཏོག་རྣམ་པ་དུ་མ་དང་། །དེ་བཞིན་པདྨ་དཀར་པོ་དང་། ། པདྨ་སྔོན་པོ་དམར་པོ་གཉིས། །བསྐྱེད་ནས་རྫིང་ཀུན་གང་བར་འགྱུར། །མདོ་སྡེ་འདི་ཡི་བྱིན་བརླབས་ཀྱིས། །ནམ་མཁའ་གཙང་ཞིང་སྒྲིབ་པ་མེད། །སྤྲིན་དང་ཁུག་རྣ་ཡོངས་སུ་སེལ། །མུན་ནག་ཐམས་ཅད་སྣང་བར་འགྱུར། །ཉི་མའི་འོད་ཟེར་སྟོང་འགྱེད་པས། །དྲི་མེད་འོད་ནི་རྣམ་པར་དག །མདོ་སྡེའི་རྒྱལ་པོ་འདི་ཡི་མཐུས། །གླིང་བཞི་ཡོངས་བསྐོར་གསལ་བར་བྱེད། །མདོ་སྡེ་འདི་ཡི་བྱིན་བརླབས་ཀྱིས། །ལྷ་ཡི་བུ་རྣམས་བསྟངས་པས་ན། །ཐམས་ཅད་འཛམ་བུའི་གསེར་དག་གིས། །གཞལ་མེད་ཁང་ནི་བྱེད་པར་འགྱུར། ། ཉི་ཟླ་དང་པོ་འཆར་བའི་ཚེ། །གླིང་འདི་མཐོང་ན་རབ་དགའ་བས། །རྟག་པར་སྣང་བ་ཆེན་པོ་ཡིས། །ཐམས་ཅད་ཀུན་དུ་གསལ་བར་བྱེད། །ས་ཆེན་འདི་ལ་ཡོད་པ་ཡི། །པདྨའི་རྫིང་ནི་ཇི་སྙེད་པ། །ཉི་མས་དུས་བཞིན་གསལ་བྱེད་པས། །ཁ་ནི་མི་འབྱེད་གང་ཡང་མེད། །འཛམ་བུའི་གླིང་ནི་འདི་དག་ཏུ། །ལོ་ཏོག་འབྲས་བུ་སྨན་རྣམས་ཀུན། །ཐམས་ཅད་ལེགས་ཤིང་སྨིན་འགྱུར་བས། །ས་ཆེན་ཀུན་དུ་གང་བར་འགྱུར། །མདོ་སྡེ་འདི་ཡི་བྱིན་བརླབས་ཀྱིས། །ཉི་ཟླ་སྣང་བར་བྱེད་པའི་གནས། །རྒྱུ་སྐར་ཚད་ལས་མི་འདའ་
ཞིང་། །རླུང་ཆར་དུས་བཞིན་ལྡང་འབབ་པས། །འཛམ་གླིང་འདི་དག་ཀུན་དུ་ཡང་། །ཡུལ་རྣམས་ལོ་ལེགས་སྐྱིད་པར་འགྱུར། །གང་ན་མདོ་སྡེ་འདི་བཞུགས་པ། །ཕྱོགས་གཞན་དག་ལས་ཁྱད་པར་འཕགས། །གསེར་འོད་དམ་པའི་མདོ་སྡེ་འདི། །གང་དུ་སྤེལ་ཞིང་འདོན་པ་དང་། །རྣམ་ཕྱེ་འཆད་པར་བྱེད་པའི་གནས། །བསོད་ནམས་གོང་མ་ཐོབ་པར་འགྱུར། །དེ་ནས་དཔལ་གྱི་ལྷ་མོ་ཆེན་མོ་དང་། ལྷ་ལ་སོགས་པ་མང་པོ་དེ་དག་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་ནས། ། དེ་ཐམས་ཅད་རབ་དུ་དགའ་བས་མདོ་སྡེའི་རྒྱལ་པོ་འདི་དག་ཡོངས་སུ་འཛིན་པར་བྱེད་པ་དེ་དག་ལ། སེམས་རྩེ་གཅིག་ཏུ་ཡོངས་སུ་བསྲུངས་ནས་མྱ་ངན་གྱི་གནོད་པ་མེད་ཅིང་རྟག་ཏུ་བདེ་བ་ཐོབ་པར་འགྱུར་བས་མོས་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལྷ་དང་གནོད་སྦྱིན་རྣམས་ཀྱིས་ཡོངས་སུ་བསྲུང་ཞིང་འཛིན་པར་བྱེད་པའི་ལེའུ་སྟེ་ཉི་ཤུ་གཉིས་པའོ།། །།དེ་ནས་དེ་བཞིན་གཤེགས་པས་འཁོར་མང་པོའི་ནང་དུ་རྒྱ་ཆེར་ཡང་དག་པར་ཆོས་བཤད་ནས་བྱང་ཆུབ་སེམས་དཔའ་མཛེས་པའི་ཏོག་དང་། དེའི་བུ་གཉིས་པོ་དངུལ་གྱི་ཏོག་དང་། དངུལ་གྱི་འོད་ཅེས་བྱ་བ་གཉིས་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་བཞེད་པར་གྱུར་པ་དང་། དེའི་ཚེ་ལྷའི་བུ་སྟོང་ཕྲག་བཅུ་མཆོག་ཏུ་རྒྱལ་བའི་འོད་ཅེས་བྱ་བ་གཙོ་བོར་གྱུར་པ་དང་ལྷན་ཅིག་ཏུ་སུམ་ཅུ་རྩ་གསུམ་ལྷའི་གནས་ནས་བབས་ཏེ། བཅོམ་ལྡན་འདས་ཀྱི་སྤྱན་སྔར་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་བྱས་ཏེ་ཕྱོགས་གཅིག་ཏུ་འཁོད་ནས་བཅོམ་ལྡན་འདས་ཀྱི་བཀས་བཤད་པའི་ཆོས་ཉན་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཛེས་པའི་ཏོག་ལ་འདི་སྐད་ཅེས་བཀའ་སྩལ་ཏོ། །ཁྱོད་མ་འོངས་པའི་དུས་བསྐལ་པ་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་ཚད་མེད་གྲངས་མེད་པ་སྙེད་འདས་པ་ན་གསེར་འོད་ཅེས་བྱ་བའི་འཇིག་རྟེན་གྱི་ཁམས་སུ་བླ་ན་
མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བས། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་། ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་དང་རིན་པོ་ཆེའི་རི་བོའི་རྒྱལ་པོ་ཞེས་བྱ་བར་གྱུར་ནས་འཇིག་རྟེན་དུ་འབྱུང་བར་འགྱུར་རོ། །དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་བསྟན་པའི་ཆོས་རྣམས་ནུབ་པར་གྱུར་པ་དང་། དེའི་ཚེ་འདིའི་བུ་ཆེན་པོ་དངུལ་གྱི་ཏོག་ཅེས་བྱ་བ་འཇིག་རྟེན་གྱི་ཁམས་དེ་ཉིད་དུ་དེ་བཞིན་གཤེགས་པའི་རྒྱལ་ཚབ་ཏུ་གྱུར་ཏེ། །དེའི་ཚེ་དེའི་མིང་བསྒྱུར་ནས་རྣམ་དག་ཏོག་ཅེས་བྱ་བར་འགྱུར་ཞིང་མངོན་པར་རྫོགས་པར་འཚང་རྒྱ་བར་འགྱུར་བས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ་བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ།སངས་རྒྱས་བཅོམ་ལྡན་འདས་གསེར་ཏོག་འོད་ཅེས་བྱ་བར་འགྱུར་རོ། །དེའི་ཚེ་དེ་བཞིན་གཤེགས་པ་དེ་ཡོངས་སུ་མྱ་ངན་ལས་འདས་པའི་འོག་ཏུ་བསྟན་པའི་ཆོས་རྣམས་ནུབ་པར་གྱུར་པ་དང་། འདིའི་བུ་ཆུང་ངུ་དངུལ་གྱི་འོད་དེ་བཞིན་གཤེགས་པ་དེའི་རྒྱལ་ཚབ་ཏུ་འགྱུར་བས་འཇིག་རྟེན་གྱི་ཁམས་དེ་ཉིད་དུ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་གསེར་འོད་ཅེས་བྱ་བར་འགྱུར་རོ། །ཞེས་ལུང་བསྟན་ཏོ། །དེ་ནས་དེའི་ཚེ་ལྷའི་བུ་སྟོང་ཕྲག་བཅུ་པོ་དེ་དག་གིས་སྐྱེས་བུ་ཆེན་པོ་གསུམ་པོ་དེ་དག་གིས་ལུང་བསྟན་པ་ཡང་ཐོས། འདི་ལྟར་མདོ་སྡེའི་རྒྱལ་པོ་མཆོག་དམ་
པ་འདི་ཡང་ཐོས་པས་སེམས་རབ་ཏུ་དགའ་བ་སྐྱེས་ནས་རྣམ་པར་དག་ཅིང་དྲི་མ་མེད་པར་གྱུར་པས་དཔེར་ན་ནམ་མཁའ་ལྟ་བུར་གྱུར་ཏོ། །དེ་ནས་དེ་བཞིན་གཤེགས་པས་ལྷའི་བུ་སྟོང་ཕྲག་བཅུ་པོ་དེ་དག་དགེ་བའི་རྩ་བ་ཡོངས་སུ་སྨིན་པར་ཐུགས་ཀྱིས་མཁྱེན་པས་བྱང་ཆུབ་ཆེན་པོར་ལུང་བསྟན་ནས། འདི་སྐད་དུ་ལྷའི་བུ་ཁྱེད་ཅག་མ་འོངས་པའི་བསྐལ་པ་བྱེ་བ་ཁྲག་ཁྲིག་འབུམ་ཕྲག་བརྒྱ་སྟོང་ཚད་མེད་གྲངས་མེད་པ་སྙེད་འདས་པ་ན། འཇིག་རྟེན་གྱི་ཁམས་དབང་པོའི་ཏོག་མངོན་པར་འཕགས་པ་ཞེས་བྱ་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། རུས་རིགས་ཀྱང་མཐུན། མིང་ཡང་མཐུན་པར་འགྱུར་བས་ཐམས་ཅད་ཞལ་དང་སྤྱན་རྣམ་པར་དག་ཅིང་། ཨུཏྤ་ལའི་དྲིའི་རི་མོ་ཞེས་བྱ་བ་མཚན་རྣམ་པ་བཅུ་ཕུན་སུམ་ཚོགས་པར་འགྱུར་ཏེ། འདི་ལྟར་རིམ་བཞིན་དུ་སངས་རྒྱས་སྟོང་ཕྲག་བཅུ་འཇིག་རྟེན་དུ་འབྱུང་བར་འགྱུར་རོ་ཞེས་ལུང་བསྟན་ཏོ། །དེ་ནས་བཅོམ་ལྡན་འདས་ལ་བྱང་ཆུབ་ཀྱི་ཤིང་གི་ལྷ་མོས་འདི་སྐད་ཅེས་གསོལ་ཏོ། །བཅོམ་ལྡན་འདས་ལྷའི་བུ་སྟོང་ཕྲག་བཅུ་པོ་འདི་དག་ནི་སུམ་ཅུ་རྩ་གསུམ་ལྷའི་གནས་ནས་ཆོས་མཉན་པའི་སླད་དུ་བཅོམ་ལྡན་འདས་ཀྱི་སྤྱན་སྔར་མཆིས་པ་ལགས་ན། ཅིའི་སླད་དུ་དེ་བཞིན་གཤེགས་པས་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་པར་མཛད་ལགས། བདག་གིས་ནི་ལྷའི་བུ་འདི་དག་ཕ་རོལ་ཏུ་ཕྱིན་པ་དྲུག་ཕུན་སུམ་ཚོགས་པར་བསྒོམས་ནས་དཀའ་བ་སྤྱད་དེ། ལག་པ་དང་། རྐང་པ་དང་། མགོ་དང་། མིག་དང་། རྐང་དང་། ཀླད་རྒྱས་དང་། གཡོག་འཁོར་དང་། བུ་དང་། འཆིས་འབྲང་དང་། གླང་པོ་ཆེ་དང་། རྟ་དང་། ཤིང་རྟ་དང་། བྲན་ཕོ་དང་། བྲན་མོ་དང་། མངག་གཞུག་བགྱིད་པ་དང་། ཁང་ཁྱིམ་དང་། ཀུན་དགའ་ར་བ་དང་། ནགས་ཚལ་དང་། གསེར་དང་། དངུལ་དང་། བཻ་ཌཱུཪྱ་དང་། སྤུག་དང་། རྡོའི་སྙིང་པོ་དང་། བྱི་རུ་དང་། མན་ཤེལ་དང་། དུང་དང་། བཟའ་བ་དང་། བཏུང་བ་དང་། གོས་དང་། མལ་ཆ་དང་། གསོས་སྨན་དག་སྦྱིན་པ་ཡོངས་སུ་
གཏོང་བར་ཡང་མ་ཐོས་ཏེ། བྱང་ཆུབ་སེམས་དཔའ་བརྒྱ་སྟོང་ཚད་མ་མཆིས་པ་གཞན་དག་ནི་མཆོད་པའི་ཡོ་བྱད་མང་པོས་འདས་པའི་སངས་རྒྱས་འབུམ་ཕྲག་ཁྲག་ཁྲིག་བརྒྱ་སྟོང་གྲངས་མ་མཆིས་པ་སྙེད་ལ་མཆོད་པ་བགྱིས་ནས། འདི་ལྟར་བྱང་ཆུབ་སེམས་དཔའ་དེ་དག་སོ་སོ་ནས་བསྐལ་པ་ཚད་མ་མཆིས་ཤིང་མཐའ་མ་མཆིས་པ་སྙེད་ལོན་ནས་གདོད་དེའི་རྗེས་ལ་བྱང་ཆུབ་ཏུ་ལུང་བསྟན་པ་འཐོབ་པར་འགྱུར་བ་ལགས་ན། བཅོམ་ལྡན་འདས་ལྷའི་བུ་འདི་དག་རྒྱུ་རྐྱེན་ནི་གང་། སྤྱོད་པ་མཆོག་ནི་ཇི་ལྟ་བུ་ཞིག་མངོན་པར་བསྒྲུབས། དགེ་བའི་རྩ་བ་ནི་ཇི་ལྟ་བུ་ཞིག་བསྐྲུན་ན་ལྷའི་གནས་དེ་ནས་འདིར་མཆིས་ཏེ། ཡུད་ཙམ་ཞིག་ཆོས་ཐོས་པ་འདི་ཉིད་ཀྱིས་ལུང་བསྟན་པ་ཐོབ་པར་གྱུར་ལགས།བཅོམ་ལྡན་འདས་ཀྱིས་བདག་ལ་བཀས་བཤད་དེ་ཐེ་ཙོམ་གྱི་དྲ་བ་གཅད་དུ་གསོལ། བཅོམ་ལྡན་འདས་ཀྱིས་ཤིང་གི་ལྷ་མོ་ལ་བཀའ་སྩལ་པ། རིགས་ཀྱི་ལྷ་མོ་ཁྱོད་ཀྱིས་ཇི་སྐད་སྨྲས་པ་བཞིན་ཏེ། འདི་དག་ཐམས་ཅད་ནི་དགེ་བའི་རྩ་བ་མཆོག་དམ་པའི་རྒྱུ་དང་རྐྱེན་དང་ནན་ཏན་བརྩོན་འགྲུས་ཀྱིས་དཀའ་བ་བསྒྲུབས་ནས་གདོད་ལུང་བསྟན་པ་ཐོབ་པ་ཡིན་པས་ལྷའི་བུ་མང་པོ་འདི་དག་ལྷའི་གཞལ་མེད་ཁང་མཆོག་དམ་པ་ནས་འདོད་པ་ལྔའི་བདེ་བ་སྤངས་ཏེ། ཆེད་དུ་གསེར་འོད་དམ་པའི་མདོ་སྡེ་འདི་མཉན་དུ་འོངས་པ་ཡིན་པས་ཆོས་ཐོས་པར་གྱུར་ནས་ཀྱང་མདོ་སྡེ་འདི་ལ་སེམས་ཀྱིས་གུས་པ་བསྐྱེད་དེ། བཻ་ཌཱུཪྱ་ཡོངས་སུ་དག་པ་ལྟར་སྐྱོན་གྱི་དྲི་མ་མེད་པར་གྱུར་པ་དང་། གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་གསུམ་པོ་འདི་ལུང་བསྟན་པའི་དངོས་པོ་ཡང་ཐོས་པ་དང་། གཞན་ཡང་འདས་པའི་དུས་ཀྱི་ཚེ་ཡུན་རིང་པོར་ཡང་དག་པའི་སྤྱོད་པ་བསྒྲུབས་ནས་ཡི་དམ་ཆེན་པོ་བླངས་པའི་རྒྱུ་དང་རྐྱེན་དེའི་ཕྱིར། ངས་མ་འོངས་པའི་དུས་ན་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་རོ་ཞེས་ལུང་བསྟན་པ་ཡིན་ནོ། །དེ་དག་ཤིང་གི་ལྷ་མོ་དེས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་ནས། རབ་ཏུ་དགའ་བས་མངོན་པར་ཡིད་ཆེས་པར་གྱུར་ཏོ། །གསེར་འོད་དམ་པ་མཆོག་
ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལུང་བསྟན་པའི་ལེའུ་སྟེ་ཉི་ཤུ་གསུམ་པའོ།། །།བཅོམ་ལྡན་འདས་ཀྱིས་བྱང་ཆུབ་ཀྱི་ཤིང་གི་ལྷ་མོ་ལ་བཀའ་སྩལ་པ། རིགས་ཀྱི་ལྷ་མོ་ལེགས་པར་ཉོན་ལ་ཤིན་ཏུ་ཡིད་ལ་ཟུང་ཤིག་དང་། ལྷའི་བུ་སྟོང་ཕྲག་བཅུ་པོ་འདི་དག་གི་སྔོན་གྱི་སྨོན་ལམ་གྱི་རྒྱུ་དང་རྐྱེན་གང་ཡིན་པ་དེང་ཁྱོད་ལ་བཤད་པར་བྱའོ། །རིགས་ཀྱི་ལྷ་མོ་སྔོན་བྱུང་བ་འདས་པའི་དུས་ཀྱི་བསྐལ་པ་གྲངས་མེད་པ། ཚད་མེད་ཅིང་བསམ་གྱིས་མི་ཁྱབ་པ་དེའི་ཚེ་དེའི་དུས་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཕུད་ཅེས་བྱ་བ་འཇིག་རྟེན་དུ་བྱུང་སྟེ། རིགས་ཀྱི་ལྷ་མོ་དེའི་ཚེ་བཅོམ་ལྡན་འདས་དེ་ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནུབ་པར་གྱུར་ནས་གཟུགས་བརྙན་གྱི་ཆོས་ཀྱི་ཚེ་རྒྱལ་པོ་ལྷའི་དབང་ཕྱུག་གི་འོད་ཅེས་བྱ་བ་ཞིག་ཡོད་དེ། རྟག་པར་ཡང་དག་པའི་ཆོས་ཀྱིས་ཕ་མ་བཞིན་དུ་མི་རྣམས་ལ་རྗེས་སུ་སྟོན་པར་བྱེད་དོ། །རྒྱལ་པོ་དེའི་ཡུལ་ན་ཚོང་དཔོན་ཆུ་འཛིན་ཅེས་བྱ་བ་སྨན་གྱི་རིག་པ་ལ་ཤིན་ཏུ་མཁས་པ། ཤེས་པའི་ཡན་ལག་བརྒྱད་ལེགས་པར་ཁོང་དུ་ཆུད་པ། སེམས་ཅན་གྱི་ནད་ཀྱི་སྡུག་བསྔལ་འབྱུང་བ་ཆེན་པོ་བཞི་མི་མཐུན་པ་ལས་གྱུར་པ་ཐམས་ཅད་ཡོངས་སུ་སྐྱོབ་ཅིང་གསོ་བར་བྱེད་པ་ཞིག་ཡོད་དེ། རིགས་ཀྱི་ལྷ་མོ་དེའི་ཚེ་ཚོང་དཔོན་ཆུ་འཛིན་དེ་ལ་བུ་ཆུ་འབེབས་ཞེས་བྱ་བ་བྱད་བཞིན་སྡུག་ཅིང་མཛེས་པ། མང་པོ་ཀུན་གྱིས་བལྟ་བར་མོས་པ། །རང་བཞིན་གྱིས་སེམས་མྱུར་བ། གཙུག་ལག་རྣམས་ལེགས་པར་རྟོགས་པ། ཡི་གེ་དང་། རི་མོ་དང་། རྩིས་དང་། གྲངས་རྣམས་མངོན་པར་མི་རྟོགས་པ་གང་ཡང་མེད་པ་ཞིག་ཡོད་པར་གྱུར་ཏོ། །དེའི་ཚེ་རྒྱལ་པོ་དེའི་ཡུལ་ཁམས་ན་སེམས་ཅན་བརྒྱ་སྟོང་ཚད་མེད་པ་སྙེད་ནད་ཀྱི་སྡུག་བསྔལ་སྣ་ཚོགས་ཀྱིས་རབ་ཏུ་གཟིར་བར་གྱུར་པས་ཐ་ན་དགའ་བར་གྱུར་པའི་སེམས་ཅུང་ཟད་ཙམ་ཡང་མེད་པར་
གྱུར་ཏོ། །དེ་ནས་ཚོང་དཔོན་གྱི་བུ་ཆུ་འབེབས་སེམས་ཅན་བརྒྱ་སྟོང་ཚད་མེད་པ་དེ་དག་ནད་ཀྱི་སྡུག་བསྔལ་མྱོང་བར་གྱུར་པ་མཐོང་བ་དང་། སྙིང་རྗེ་ཆེན་པོའི་སེམས་བསྐྱེད་ནས་འདི་སྙམ་དུ་སེམས་ཅན་ཚད་མེད་པ་འདི་སྙེད་སྡུག་བསྔལ་མི་བཟད་པས་ཉོན་མོངས་པར་གྱུར་ཏེ། བདག་གི་ཕ་ཚོང་དཔོན་སྨན་དཔྱད་ལ་ཤིན་ཏུ་མཁས་ཤིང་ཤེས་པའི་ཡན་ལག་བརྒྱད་ལེགས་པར་ཁོང་དུ་ཆུད་དེ། འབྱུང་བ་ཆེན་པོ་བཞི་འཕེལ་ཞིང་འགྲིབ་པ་ལས་བྱུང་བའི་ནད་སྣ་ཚོགས་གསོ་བར་ནུས་ཀྱང་རྒས་འཁོགས་པས་ལུས་ཀྱི་ཉམ་ཆུང་ཞིང་དམའ་བ་དང་། འཁར་བ་ལ་བརྟེན་ནས་གདོད་འགྲོ་བས་གྲོང་དང་། གྲོང་ཁྱེར་དང་། གྲོང་རྡལ་རྣམས་སུ་སོང་ནས་ནད་ཀྱི་སྡུག་བསྔལ་རྣམས་ཡོངས་སུ་སྐྱོབ་པར་བྱེད་མི་ནུས་ལ། དེང་སེམས་ཅན་བརྒྱ་སྟོང་ཚད་མེད་པ་སྙེད་ནི་ནད་ཚབས་ཆེན་པོས་ཐེབས་པས་ཡོངས་སུ་སྐྱོབ་པར་ནུས་པ་མེད་ན། དེང་བདག་ཕ་སྨན་པ་ཆེན་པོའི་དྲུང་དུ་སོང་ལ་ནད་གསོ་བའི་སྨན་དཔྱད་གསང་བ་དྲིས་ཏེ། གལ་ཏེ་ཤེས་པར་གྱུར་ན་གྲོང་དང་། གྲོང་ཁྱེར་དང་། གྲོང་རྡལ་དག་ཏུ་སོང་ལ་སེམས་ཅན་རྣམས་ཀྱི་ནད་རྣམ་པ་སྣ་ཚོགས་གསོས་ཏེ་ཡུན་རིང་པོར་བདེ་བ་མྱོང་བར་བྱའོ་སྙམ་མོ། །དེ་ནས་ཚོང་དཔོན་གྱི་བུས་དེ་སྙམ་དུ་བསམས་ནས་ཕའི་ཐད་དུ་སོང་སྟེ། རྐང་པ་ལ་མགོ་བོས་གཏུགས་ནས་ཕྱག་བྱས་ཏེ་གུས་པས་ཐལ་མོ་སྦྱར་ནས་ཕྱོགས་གཅིག་ཏུ་འཁོད་དེ། ཚིགས་སུ་བཅད་པ་འདི་དག་གིས་ཕ་ལ་འདི་སྐད་ཅེས་དྲིས་སོ། །བདག་ནི་སེམས་ཅན་བསྐྱབ་པའི་སླད། །སྨན་དཔྱད་རྣམས་ནི་ཞུ་ལགས་ན། །བྱམས་པའི་ཡབ་ཀྱིས་བརྩེར་དགོངས་ཏེ། །བདག་ལ་བཀས་ནི་བཤད་དུ་གསོལ། །ཇི་ལྟར་ལུས་ནི་འཇིག་པ་ན། །འབྱུང་ཆེན་རྣམས་ནི་འཕེལ་འགྲིབ་འགྱུར། །གཞན་ཡང་དུས་ནི་གང་གི་ཚེ། །ནད་མང་རྣམས་ནི་སྐྱེ་འགྱུར་ལགས། ། ཇི་ལྟར་ཟས་སྐོམ་འཚལ་འགྱུར་ན། །བདེ་བ་དག་ནི་མྱོང་འགྱུར་ཞིང་། །ལུས་ཀྱི་ནང་གི་མེ་ཡི་མཐུ། །ཉམས་ཤིང་གནོད་པར་མི་འགྱུར་ལགས། །སེམས་ཅན་ནད་ནི་བཞི་མཆིས་ཏེ། །རླུང་དང་མཁྲིས་པ་བད་ཀན་དང་། །ཀུན་འདུས་པ་ཡི་ནད་ལགས་ན། །དེ་དག་ཇི་
ལྟར་གསོ་བར་བགྱི། །གང་གི་ཚེ་ནི་རླུང་ནད་ལྡང་། །གང་གི་ཚེ་ནི་མཁྲིས་ནད་སློང་། །གང་གི་ཚེ་ནི་བད་ཀན་གཡོ། །གང་གི་ཚེ་ནི་ཀུན་འདུས་སྐྱེ། །དེ་ནས་ཚོང་དཔོན་གྱི་བུས་གསོལ་བ་བཏབ་པ་ཐོས་པ་དང་། ཚིགས་སུ་བཅད་དེ་སྨྲས་པ། ངས་དེང་དྲང་སྲོང་རྙིང་པ་ཡི། །ནད་གསོ་དཔྱད་ལ་བརྟེན་ནས་ནི། །རིམ་བཞིན་ཁྱོད་ལ་རབ་བསྟན་གྱིས། །ལེགས་པར་ཉོན་ལ་སེམས་ཅན་སྐྱོབ། །ཟླ་བ་གསུམ་ནི་དཔྱིད་ཀྱི་དུས། །ཟླ་བ་གསུམ་ནི་དབྱར་ཞེས་བྱ། །ཟླ་བ་གསུམ་ནི་སྟོན་གྱི་ཕྱོགས། །ཟླ་བ་གསུམ་ནི་དགུན་ཞེས་བྱ། ། འདི་ནི་ལོ་གཅིག་ལས་བརྩམས་པས། །གསུམ་གསུམ་སོ་སོར་བཤད་པར་བྱ། །གཉིས་གཉིས་དུས་ཚིགས་གཅིག་བྱས་ན། །ལོ་གཅིག་དུས་ནི་དྲུག་ཏུ་འགྱུར། །དང་པོ་གཉིས་ནི་མེ་ཏོག་དུས། །གསུམ་དང་བཞི་པ་ཚ་བའི་དུས། །ལྔ་དང་དྲུག་པ་ཆར་པའི་དུས། །བདུན་དང་བརྒྱད་པ་སྟོན་གྱི་དུས། །དགུ་དང་བཅུ་པ་གྲང་བའི་དུས། །ཕྱི་མ་གཉིས་ནི་ཁ་བའི་དུས། །དེ་ལྟར་བྱེ་བྲག་ཤེས་གྱུར་ན། །འགལ་བ་མེད་པར་སྨན་གཏང་བྱ། །དུས་ནི་འདི་དག་རྗེས་མཐུན་པར། །ཟས་སྐོམ་ལེགས་པར་སྦྱོར་བྱེད་ན། །ལྟོར་ནི་མྱུར་དུ་འཇུ་འགྱུར་བས། །ནད་མང་དག་ནི་སྐྱེ་མི་འགྱུར། །དུས་ཚིགས་གལ་ཏེ་ལོག་འགྱུར་ཞིང་། །འབྱུང་ཆེན་བཞི་ནི་འཕོས་གྱུར་ལ། །དེ་ཚེ་གསོས་སྨན་མེད་གྱུར་ན། །ངེས་པར་ནད་ཀྱི་སྡུག་བསྔལ་སྐྱེ། །སྨན་པས་དུས་བཞི་ཤེས་བྱ་ཞིང་། །དུས་ཚིགས་དུག་ཀྱང་ཤེས་པར་བྱ། །ལུས་ཀྱི་ཁམས་བདུན་རིག་བྱས་ནས། །འགལ་བ་མེད་པར་ཟས་སྨན་གཏོང་། །རོ་ཡི་ཁམས་དང་ཁྲག་དང་ཤ། །རུས་དང་རྐང་དང་ཀླད་རྒྱས་སུ། །ནད་ནི་འདི་དག་ཞུགས་པའི་ཚེ། །གསོར་རུང་མི་རུང་ཤེས་པར་བྱ། །ནད་ནི་ཐ་དད་རྣམ་བཞི་ཡོད། །རླུང་དང་མཁྲིས་པ་བད་ཀན་དང་། །ཀུན་འདུས་པ་ཡི་ནད་ཡིན་ཏེ། །གཡོ་བའི་དུས་ནི་ཤེས་པར་བྱ། །དཔྱིད་ཀའི་དུས་སུ་བད་ཀན་གཡོ། །དབྱར་ནི་རླུང་ནད་སྐྱེ་བར་འགྱུར། །སྟོན་གྱི་དུས་སུ་མཁྲིས་པ་རྒྱས། །དགུན་ནི་གསུམ་པོ་ཅིག་ཅར་ལྡང་། །དཔྱིད་ནི་ཚ་རྩུབ་དྲོ་བ་བཟའ། །དབྱར་ནི་སྣུམ་དྲོ་ལན་ཚྭ་སྐྱུར། །སྟོན་
ནི་གྲང་དང་མངར་དང་སྣུམ། །དགུན་ནི་རྩུབ་སྐྱུར་སྣུམ་དང་མངར། །དུས་ནི་བཞི་པོ་འདི་དག་ཏུ། །སྨན་དང་ཟས་སྐོམ་གང་བཟའ་བ། །གལ་ཏེ་དེ་བཞིན་ཟ་བྱེད་ན། །ནད་མང་དག་ནི་སྐྱེ་མི་འགྱུར། །ཟོས་འོག་ན་བ་བད་ཀན་དབང་། །ཞུ་ཚེ་ན་བ་མཁྲིས་ལས་གྱུར། །ཞུ་འོག་ལྡང་བ་རླུང་གི་དབང་། །དུས་དང་སྦྱར་ནས་ནད་ཤེས་བྱ། །ནད་ཀྱི་རྩ་བ་ཤེས་གྱུར་ནས། །ནད་ནི་ཇི་བཞིན་སྨན་གཏང་བྱ། །ནད་དབྱིབས་བྱེ་བྲག་ཐ་དད་ཀྱང་། །སྔར་ནི་རྩ་བ་ཤེས་པར་བྱ། །རླུང་ནད་དག་ལ་སྣུམ་བག་གཏང་། །མཁྲིས་པའི་ནད་ནི་འཁྲུ་ན་བཟང་། །བད་ཀན་ནད་ནི་སྐྱུག་པར་བྱ། །ཀུན་འདུས་ལ་ནི་སྨན་གསུམ་དགོས། །རླུང་མཁྲིས་བད་ཀན་གསུམ་ལྡན་པ། །དེ་ནི་ཀུན་འདུས་པ་ཞེས་བྱ། །ནད་ལྡང་དུས་ནི་ཤེས་གྱུར་ཀྱང་། །རང་བཞིན་དག་ནི་ཤེས་པར་བྱ། །དེ་ལྟར་བརྟགས་ཏེ་ཤེས་གྱུར་ནས། །དུས་བཞིན་དུ་ནི་སྨན་གཏང་བྱ། ། ཟས་སྐོམ་སྨན་ནི་འགལ་མེད་པ། །དེ་ནི་སྨན་པ་མཁས་ཞེས་བྱ། །ཤེས་པའི་ཡན་ལག་བརྒྱད་རིག་ན། །སྨན་དཔྱད་རྣམས་ནི་ཀུན་བ་སྡུད་པས། །འདི་དག་ལ་ནི་གསལ་བྱས་ནས། །སེམས་ཅན་ནད་ནི་གསོ་བར་བྱ། །གཏར་བ་དང་ནི་རྨས་སྣད་དང་། །ལུས་ཀྱི་ནད་དང་འདྲེ་གདོན་དང་། །མ་རུངས་དུག་དང་བྱིས་པ་དང་། །ཚེ་བསྲིང་དང་ནི་མཐུ་སྐྱེད་ཡིན། །སྔར་ནི་དེ་ཡི་ཁ་དོག་དང་། །སྨྲ་ཚིག་རང་བཞིན་རབ་བརྟགས་ནས། །དེ་འོག་རྨི་ལམ་དྲིས་གྱུར་ན། །རླུང་མཁྲིས་བད་ཀན་བྱེ་བྲག་ཤེས། །སྐེམ་རིད་མགོ་ཡི་སྐྲ་ངན་ཅིང་། །སེམས་ཀྱི་རང་བཞིན་མི་བརྟན་ལ། །ཚིག་མང་རྨི་ལམ་འཕུར་མཐོང་བ། །དེ་ནི་རླུང་གི་རང་བཞིན་ཅན། །གཞོན་ནུར་སྐྲ་དཀར་སྐྱེ་བ་དང་། །རྔུལ་ཆེ་གཤེར་བ་མང་བ་དང་། །ཡིད་གཞུངས་རྨི་ལམ་མེ་མཐོང་བ། །དེ་ནི་མཁྲིས་པའི་རང་བཞིན་ཅན། །སེམས་བརྟན་ལུས་ནི་མཉམ་ལ་དྲང་། ། ཞིབ་རྟོག་མགོ་དག་སྣུམ་ཞིང་རླན། །རྨི་ལམ་ཆུ་དང་རྫས་དཀར་མཐོང་། །བད་ཀན་རང་བཞིན་ཤེས་པར་བྱ། །ཀུན་འདུས་རང་བཞིན་ཀུན་ལྡན་པས། །ཁ་ཅིག་གཉིས་དང་གསུམ་དང་ལྡན། །ཕྱོགས་གཅིག་ལྷག་པར་གང་མང་བ། །དེ་ཡི་རང་བཞིན་ཤེས་པར་བྱོས། །རང་
བཞིན་རིག་པར་གྱུར་ནས་ནི། །ནད་བཞིན་སྨན་ནི་གཏང་བར་བྱ། །འཆི་བའི་མཚན་མ་མེད་གྱུར་ན། །མི་དེ་གསོར་རུང་བ་ཞེས་བྱ། །དབང་པོས་ལོག་པར་ཡུལ་འཛིན་ཅིང་། །བླ་མ་སྨན་པ་དག་ལ་བརྙས། །ཉེ་དུ་དག་ལ་ཁོང་ཁྲོ་ན། །འཆི་བའི་མཚན་མར་ཤེས་པར་བྱ། །མིག་ཡོན་ཁ་དོག་དཀར་འགྱུར་ཞིང་། །ལྕེ་གནག་སྣ་ཟུར་ཡོ་བ་དང་། །རྣ་བའི་འཁོར་ལོ་སྔོ་ལས་གྱུར། །མ་མཆུ་ཐུར་འཕྱང་འཆི་བའི་མཚན། །ཨ་རུ་ར་ནི་རྣམ་གཅིག་ལ། །རོ་ནི་རྣམ་པ་དྲུག་ལྡན་ཏེ། །ནད་ནི་ཐམས་ཅད་སེལ་བྱེད་པས། །ཉེས་མེད་སྨན་རྣམས་ཀུན་གྱི་རྒྱལ། །འབྲས་བུ་གསུམ་དང་ཚ་བ་གསུམ། །སྨན་རྣམས་ནང་ན་རྙེད་པར་སླ། །བུ་རམ་སྦྲང་རྩི་འོ་མ་མར། །འདི་དག་ནད་མང་གསོ་བར་ནུས། །དེ་ལས་གཞན་པའི་སྨན་རྣམས་ནི། །ནད་དང་སྦྱར་ཏེ་བསྐྱེད་པར་བྱ། །སྔར་ནི་བརྩེ་བའི་སེམས་བསྐྱེད་ནས། །ནོར་དང་ཁེ་ལ་བལྟ་མི་བྱ། །ངས་ནི་ཁྱོད་ལ་ནད་གསོ་བའི། །གཅེས་པའི་དོན་ནི་བསྟན་པ་ཡིན། །འདི་ཡིས་སེམས་ཅན་གསོ་བྱས་ན། །མཐའ་མེད་འབྲས་བུ་ཐོབ་པར་འགྱུར། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུ་ཆུ་འབེབས་ཕ་ལས་མངོན་སུམ་དུ་ཤེས་པའི་ཡན་ལག་བརྒྱད་ཀྱི་དོན་ཤེས་པ་དང་། འབྱུང་བ་ཆེན་པོ་བཞི་འཕེལ་ཞིང་འགྲིབ་པ་དང་། དུས་ཚིགས་མི་མཐུན་པ་དང་། སྨན་དཔྱད་ཀྱི་ཆོ་ག་ཐོས་པས་ལེགས་པར་ཁོང་དུ་ཆུད་པར་གྱུར་ནས། བདག་ཉིད་ནད་མང་པོ་གསོ་ནུས་པར་རིག་པར་གྱུར་པས་གྲོང་དང་། གྲོང་ཁྱེར་དང་། གྲོང་རྡལ་ཀུན་དུ་ཁྱབ་པར་དེ་དང་དེ་དག་ཏུ་སོང་སྟེ། ནད་ཀྱི་སྡུག་བསྔལ་དང་ལྡན་པའི་སེམས་ཅན་འབུམ་ཕྲག་བརྒྱ་སྟོང་དུ་མ་དེའི་ཐད་དུ་ལྷགས་པ་རྣམས་ལ་ལེགས་པའི་ཚིག་གིས་སྤྲོ་བ་བསྐྱེད་ནས་འདི་སྐད་དུ་ང་ནི་སྨན་པའོ། །ང་ནི་སྨན་པ་སྟེ། སྨན་དཔྱད་ལ་ཤིན་ཏུ་མཁས་པས་དེང་ཁྱེད་ཅག་གི་ནད་མང་པོ་གསོས་ནས་ཐམས་ཅད་སོས་པར་བྱའོ་ཞེས་སྨྲས་སོ། །རིགས་ཀྱི་ལྷ་མོ་དེའི་ཚེ་མི་མང་པོ་རྣམས་ཚོང་དཔོན་གྱི་བུས་ལེགས་པའི་ཚིག་གིས་སྤྲོ་བ་བསྐྱེད་ནས་ནད་གསོ་བར་གནང་བ་ཐོས་པ་དང་། དེ་ནས་སེམས་ཅན་ནད་ཚབས་ཆེན་པོས་བཏབ་པ་བརྒྱ་སྟོང་ཚད་མེད་པ་སྙེད་ཅིག་ཚིག་
དེ་སྐད་སྨྲས་པ་ཐོས་ནས་ལུས་དང་སེམས་དགའ་མགུ་རངས་ཤིང་ངོ་མཚར་རྨད་དུ་བྱུང་བ་ཐོས་པར་གྱུར་པས་རྒྱུ་དང་རྐྱེན་དེས་ནད་ཀྱི་སྡུག་བསྔལ་ཇི་སྙེད་པ་ཐམས་ཅད་སོས་ཤིང་ཞི་བར་གྱུར་པས་ཉམས་སྟོབས་རྟས་ཏེ་སྔ་མཁོ་བཞིན་དུ་སོས་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་གཞན་ཡང་ནད་ཀྱི་སྡུག་བསྔལ་ཤིན་ཏུ་ལྕི་ཞིང་གསོ་བར་དཀའ་བའི་སེམས་ཅན་བརྒྱ་སྟོང་ཚད་མེད་པ་རྣམས་ཀྱང་ལྷན་ཅིག་ཏུ་ཚོང་དཔོན་གྱི་བུའི་ཐད་དུ་ལྷགས་ནས་ནད་གསོ་བར་གསོལ་བ་བཏབ་པ་དང་། དེའི་ཚེ་ཚོང་དཔོན་གྱི་བུས་སྨན་གྱ་ནོམ་པ་དག་བཏང་ནས་ཐམས་ཅད་སོས་པར་གྱུར་ཏེ། རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུ་དེས་ཡུལ་ཁམས་དེ་ཀུན་གྱི་ནད་ཀྱི་སྡུག་བསྔལ་གྱིས་ཉེན་པའི་སེམས་ཅན་བྱེ་བ་ཁྲག་ཁྲིག་བརྒྱ་སྟོང་དུ་མ་སོས་པར་བྱས་སོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ནད་རབ་ཏུ་ཞི་བར་བྱས་པའི་ལེའུ་སྟེ་ཉི་ཤུ་བཞི་པའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་ཀྱི་ཤིང་གི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུ་ཆུ་འབེབ་ཀྱིས་སྔོན་རྒྱལ་པོ་ལྷའི་དབང་ཕྱུག་གི་འོད་ཀྱི་ཡུལ་ཁམས་སུ་སེམས་ཅན་གྱི་ནད་ཀྱི་སྡུག་བསྔལ་ཇི་སྙེད་ཡོད་པ་དག་གསོས་ནས་སྔ་མཁོ་བཞིན་དུ་རྟས་ཏེ་བདེ་བ་མྱོང་བར་གྱུར་བ་དང་། དེའི་ཚེ་སེམས་ཅན་མང་པོ་དེ་དག་ནད་སོས་པར་གྱུར་པའི་ཕྱིར་བསོད་ནམས་ཀྱི་ལས་མང་དུ་བསགས་ནས་སྦྱིན་པ་རྒྱ་ཆེར་བཏང་བ་ལ་བདག་ཉིད་ལོངས་སྤྱོད་པར་གྱུར་པས་ཐམས་ཅད་ལྷན་ཅིག་ཚོང་དཔོན་གྱི་བུའི་ཐད་དུ་དོང་སྟེ། ཐམས་ཅད་གུས་པ་བསྐྱེད་ནས་འདི་སྐད་དུ་ཚོང་དཔོན་ཆེན་པོའི་བུ་བསོད་ནམས་ཀྱི་དངོས་པོ་ཤིན་ཏུ་ལེགས་པར་བསྐྱེད་དེ་བདག་ཅག་ལ་ཕན་བཏགས་ནས་བདེ་བར་འཚོ་བར་བྱས་པ་ལེགས་སོ་ལེགས་སོ། །ཁྱོད་ནི་ཡང་དག་པའི་མཐུ་ཆེན་པོ་དང་ལྡན་པའི་སྨན་པའི་རྒྱལ་པོ་བྱམས་པ་དང་སྙིང་རྗེ་དང་ལྡན་པའི་བྱང་ཆུབ་སེམས་དཔའ་ཡིན་ཏེ། སྨན་དཔྱད་ལ་ཤིན་ཏུ་མཁས་པས་སེམས་ཅན་གྱི་ནད་ཀྱི་སྡུག་བསྔལ་ཚད་མེད་པ་དག་ལེགས་པར་གསོས་སོ། །ཞེས་གྲོང་དང་གྲོང་ཁྱེར་ཀུན་དུ་ཁྱབ་པར་བསྔགས་པ་བརྗོད་
པར་གྱུར་ཏོ། །རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུ་དེའི་ཆུང་མ་ཆུའི་པདྨའི་མཛོད་ཅེས་བྱ་བ་ལ་བུ་གཉིས་ཡོད་དེ། གཅིག་གི་མིང་ནི་ཆུ་རྒྱས་ཞེས་བྱའོ། །གཅིག་གི་མིང་ནི་ཆུའི་མཛོད་ཅེས་བྱའོ། །དེ་ནས་ཆུ་འབེབས་ཀྱིས་བུ་གཉིས་ཁྲིད་ནས་མཐར་གྱིས་གྲོང་དང་། གྲོང་ཁྱེར་དང་། གྲོང་རྡལ་རྒྱུ་ཞིང་དོང་བ་ལས་དགོན་པའི་གནས་ཤིན་ཏུ་ཉམ་ང་བ་ཞིག་འདས་པ་དང་། དེ་ན་འཕར་བ་དང་། སྤྱང་ཀི་དང་། ཝ་དང་། སྤྲ་ཆེན་དང་། བྱ་རྒོད་ལ་སོགས་པ་གཅན་གཟན་གྱི་རྣམ་པ་ཤ་ཁྲག་ཟ་ཞིང་འཐུང་བ་མང་པོ་ཕྱོགས་གཅིག་ཏུ་རྒྱུག་ཅིང་འཕུར་ཏེ་དོང་བ་མཐོང་ངོ་། །དེ་ནས་ཚོང་དཔོན་གྱི་བུ་དེ་འདི་སྙམ་དུ་གཅན་གཟན་འདི་དག་རྒྱུ་དང་རྐྱེན་གང་གི་ཕྱིར་ཕྱོགས་གཅིག་ཏུ་འཕུར་ཞིང་རྒྱུག་པར་གྱུར། བདག་གིས་སྐད་ཅིག་ཕྱི་བཞིན་དུ་བརྟག་གོ་སྙམ་དུ་བསམས་ནས། །ཕྱི་བཞིན་དུ་སོང་བ་ལས་རྫིང་ཆེན་པོ་དགོན་པ་སྐྱེས་ཞེས་བྱ་བ་དེ་ནི་ཆུ་ཟད་ལ་ཐུག་པས་རྫིང་དེའི་ནང་ན་ཉ་མང་པོ་ཡོད་པ་མཐོང་བར་གྱུར་ཏོ། །ཆུ་འབེབས་ཀྱིས་མཐོང་ནས་ཀྱང་སྙིང་རྗེ་ཆེན་པོའི་སེམས་སྐྱེས་པ་དང་། དེའི་ཚེ་ཤིང་གི་ལྷ་ཞིག་གིས་ལུས་ཕྱེད་ཙམ་བསྟན་ནས་འདི་སྐད་དུ་ལེགས་སོ་ལེགས་སོ། །རིགས་ཀྱི་བུ་ཁྱོད་ནི་ཡང་དག་པའི་དོན་དང་ལྡན་པའི་ཕྱིར་ཆུ་འབེབས་ཞེས་བྱ་བས་ཉ་འདི་དག་ལ་སྙིང་བརྩེ་བས་ཆུ་སྦྱིན་པའི་རིགས་སོ། །རྒྱུ་དང་རྐྱེན་རྣམ་པ་གཉིས་དང་ལྡན་པའི་ཕྱིར་ཆུ་འབེབས་ཞེས་བྱ་སྟེ། ཆུ་འབབ་པར་བྱེད་པ་དང་། ཆུ་སྦྱིན་པར་བྱེད་པའོ། །དེང་ཁྱོད་ཀྱིས་མིང་ཇི་ལྟ་བ་བཞིན་དུ་བྱོས་ཤིག །དེ་ནས་ཆུ་འབེབས་ཀྱིས་ཤིང་གི་ལྷ་ལ་སྨྲས་པ། ཉ་འདི་དག་གི་གྲངས་ཇི་ཙམ་ཞིག་ཡོད། ཤིང་གི་ལྷས་སྨྲས་པ། གྲངས་ནི་སྟོང་ཕྲག་བཅུ་ཚང་བ་སྙེད་ཡོད་དོ། །རིགས་ཀྱི་ལྷ་མོ་དེ་ནས་ཚོང་དཔོན་གྱི་བུས་གྲངས་དེ་སྙེད་ཡོད་པར་ཐོས་པ་དང་། ལྷག་པར་སྙིང་རྗེའི་བསམ་པ་སྐྱེས་པར་གྱུར་ཏོ། །དེའི་ཚེ་རྫིང་ཆེན་པོ་དེ་ཡང་ཉི་མས་གདུངས་ནས་ཆུའི་ལྷག་མ་ཆུང་ཟད་ཅིག་ལུས་པར་གྱུར་པས་ཉ་སྟོང་ཕྲག་བཅུ་པོ་དེ་དག་ཀྱང་འཆི་བའི་སྒོར་ཞུགས་ཏེ་ལུས་ཀྱིས་འདྲེ་ལྡོག་བྱས་པ་ན་ཚོང་དཔོན་དེས་མཐོང་བ་དང་། སེམས་ལ་རེ་བ་དང་བཅས་པས་མིག་མི་
འཛུམས་པར་རྗེས་སུ་འབྲང་ཞིང་ལྟ་བར་གྱུར་ཏོ། །དེ་ནས་ཚོང་དཔོན་གྱི་བུས་དངོས་པོ་དེ་མཐོང་ནས་ཕྱོགས་བཞིར་བརྒྱུགས་ཏེ། ཆུ་བཙལ་བར་འདོད་ཀྱང་རྙེད་པར་མ་གྱུར་པས་ཡང་ཕྱོགས་གཅིག་ཏུ་རྣམ་པར་བལྟས་པ་ལས་ལྗོན་ཤིང་ཆེན་པོ་ཞིག་མཐོང་བ་དང་། སྟེང་དུ་འཛེགས་ནས་ཡལ་ག་དང་ལོ་མ་བཅད་དེ་བསིལ་གྲིབ་བྱས་སོ། །གཞན་ཡང་རྫིང་འདིའི་ཆུ་གང་ནས་འོངས་ཞེས་ཡོངས་སུ་བཙལ་བ་ལས་ཆུ་བོ་ཆེན་པོ་ཆུ་སྐྱེས་ཞེས་བྱ་བ་ཞིག་མཐོང་ངོ་། །དེའི་ཚེ་ཆུ་བོ་དེའི་འགྲམ་ན་ཉ་པ་མང་པོ་ཡོད་པས་ཉ་བླང་བའི་ཕྱིར་ཆུ་བོ་དེའི་གོང་དུ་གཡང་ས་ཆེན་པོ་ཡོད་པའི་གནས་སུ་ཆུ་བོ་ནས་འབབ་ཏུ་མི་སྟེར་བས་ཆུ་དྲལ་བའི་གནས་དེ་ཡང་ཤིན་ཏུ་བཅོས་དཀའ་བར་གྱུར་པས་འདི་སྙམ་དུ་གང་བ་འདི་ནི་ཤིན་ཏུ་ཟབ་ཅིང་གཡང་ས་ཆེ་བས་མི་བརྒྱ་སྟོང་གིས་ཟླ་བ་གསུམ་གྱི་བར་དུ་ཡང་གཅོད་པར་མི་ནུས་ན་བདག་གཅིག་པུས་ནུས་པ་ལྟ་སྨོས་ཀྱང་ཅི་དགོས་སྙམ་མོ། །དེ་ནས་ཚོང་དཔོན་གྱི་བུ་མྱུར་དུ་རང་གི་གྲོང་ཁྱེར་དུ་སོང་སྟེ་རྒྱལ་པོ་ཆེན་པོའི་དྲུང་དུ་ཕྱིན་ནས་མགོ་བོས་རྐང་པ་ལ་ཕྱག་བྱས་ཏེ་ཕྱོགས་གཅིག་ཏུ་འཁོད་ནས་གུས་པས་ཐལ་མོ་སྦྱར་ཏེ། འདི་སྐད་དུ་བདག་གིས་རྒྱལ་པོ་ཆེན་པོའི་མངའ་རིས་ན་འབངས་ལ་བྲོ་ནད་སྣ་ཚོགས་ཅི་མཆིས་པ་གསོས་ནས། ཐམས་ཅད་བདེ་བར་བགྱིས་ཏེ། མཐར་གྱིས་ལྗོངས་རྒྱུར་མཆིས་པ་ལས་འབྲོག་དགོན་པ་ཞིག་ཏུ་མཆིས་པ་དང་། རྫིང་དགོན་པ་ཆུ་སྐྱེས་ཞེས་བགྱི་བ་དེའི་ཆབ་བས་སུ་ཉེ་བས་དེ་ན་ཉ་སྟོང་ཕྲག་བཅུ་མཆིས་པ་ཡང་གདུགས་ཀྱིས་སྐམས་པས་རིང་པོ་མི་ཐོགས་པར་འགུམ་པར་འགྱུར་བ་དག་མཐོང་ལགས་ན། རྒྱལ་པོ་ཆེན་པོ་བྱམས་པ་དང་ཐུགས་རྗེས་ཐུགས་བརྩེ་བར་དགོངས་ཏེ་གླང་པོ་ཆེ་ཉི་ཤུ་ཞིག་ཆབ་དགལ་བར་སྐད་ཅིག་སྩལ་དུ་གསོལ། །ཇི་ལྟར་བདག་གིས་ནད་པ་མང་པོ་དག་ལ་སྲོག་སྩལ་བ་དེ་བཞིན་དུ་ཉ་དེ་དག་གི་སྲོག་གི་སྐྱབས་བགྱིད་པ་ལགས་སོ་ཞེས་གསོལ་ཏོ། །དེ་ནས་རྒྱལ་པོ་ཆེན་པོས་ཀྱང་བློན་པོ་ཆེན་པོ་ལ་སྨན་པའི་རྒྱལ་པོ་འདི་ལ་མྱུར་དུ་གླང་པོ་ཆེ་བྱིན་ཅིག་ཅེས་བསྒོའོ། །དེའི་ཚེ་བློན་པོ་ཆེན་པོས་ཀྱང་རྒྱལ་པོའི་བཀའ་ཁྱེར་ནས་ཚོང་དཔོན་གྱི་བུ་ལ་འདི་སྐད་ཅེས་སྨྲས་སོ། །ཀྱེ་སྐྱེས་བུ་ཆེན་པོ་ལེགས་སོ། །ཁྱོད་
བདག་ཉིད་གླང་པོ་ཆེའི་ལྷས་སུ་སོང་སྟེ། ཡིད་ལ་ཇི་ལྟར་འདོད་པ་བཞིན་དུ་གླང་པོ་ཆེ་ཉི་ཤུ་ཞིག་འདམས་ཏེ་ཁྱེར་ལ་སེམས་ཅན་ལ་ཕན་བཏགས་ནས་བདེ་བ་ཐོབ་པར་གྱིས་ཤིག །དེ་ནས་ཆུ་འབེབས་བུ་གཉིས་དང་ལྷན་ཅིག་ཏུ་གླང་པོ་ཆེ་ཉི་ཤུ་ཁྲིད་དེ་ཆང་པའི་ཁྱིམ་ནས་རྐྱལ་པ་མང་པོ་གཡར་ཏེ། ཆུ་དྲལ་བའི་གནས་སུ་ཕྱིན་ནས་རྐྱལ་པ་ཆུས་བཀང་སྟེ་གླང་པོ་ཆེ་ལ་བཀལ་ནས་རྫིང་གི་དྲུང་དུ་ཕྱིན་ཏེ། རྫིང་གི་ནང་དུ་བླུགས་པ་དང་སྔ་མཁོ་བཞིན་དུ་གང་ཞིང་རྒྱས་པར་གྱུར་ཏོ། །རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུས་རྫིང་གི་ངོས་བཞིར་འཁོར་བར་བལྟས་པ་དང་། དེ་ནས་ཉ་མང་པོ་དེ་དག་ཀྱང་ཕྱི་བཞིན་འབྲངས་ནས་འགྲམ་དུ་རྒྱུ་བར་གྱུར་ཏོ། །དེ་ནས་ཚོང་དཔོན་གྱི་བུ་ཡང་འདི་སྙམ་དུ་ཉ་མང་པོ་འདི་དག་ཅིའི་ཕྱིར་བདག་གི་ཕྱི་བཞིན་འབྲང་། གདོན་མི་ཟ་བར་བཀྲེས་པའི་མེས་གདུངས་ནས་བདག་ལ་ཟས་སློང་བ་ཡིན་པས་བདག་གིས་སྦྱིན་པར་བྱའོ་སྙམ་དུ་བསམས་ནས་ཚོང་དཔོན་གྱི་བུ་ཆུ་འབེབས་ཀྱིས་བུ་ལ་འདི་སྐད་ཅེས་སྨྲས་སོ། །ཁྱོད་ཀྱིས་གླང་པོ་ཆེ་མཆོག་ཏུ་སྟོབས་དང་ལྡན་པ་ཞིག་བླངས་ཏེ་མྱུར་དུ་ཁྱིམ་དུ་དེང་ལ་ཡབ་ཚོང་དཔོན་ལ་གསོལ་ཏེ། ཁྱིམ་ན་བཟར་རུང་བའི་དངོས་པོ་ཅི་ཡོད་པ་དང་། ཕ་མ་ཟ་བའི་སྐལ་བ་དང་། བུ་དང་ཆུང་མ་དང་། བྲན་དང་། བྲན་མོའི་སྐལ་བ་ཅི་ཡོད་པ་ཐམས་ཅད་ཀྱང་བསྡུས་ཏེ་ཁྱེར་ལ་ཤོག་ཤིག །དེ་ནས་བུ་གཉིས་ཕའི་བསྟན་པ་མཉན་ནས་གླང་པོ་ཆེ་མཆོག་ལ་ཞོན་ཏེ། རིངས་པར་ཁྱིམ་དུ་སོང་ནས་མེས་པོའི་དྲུང་དུ་ཕྱིན་པ་དང་། དངོས་པོ་གོང་མ་རྒྱས་པར་སྨྲས་ནས་ཁྱིམ་ན་བཟར་རུང་བའི་དངོས་པོ་ཅི་ཡོད་པ་བླངས་ཏེ་གླང་པོ་ཆེ་ལ་བཀལ་ནས་མྱུར་ཞིང་རིངས་པར་ཕ་འདུག་པའི་རྫིང་དྲུང་དུ་ཕྱིན་པ་དང་། དེ་ནས་ཆུ་འབེབས་བུ་འོངས་པ་མཐོང་ནས་ལུས་དང་སེམས་དགའ་མགུ་རངས་པར་གྱུར་ཏེ། ཟས་རྣམས་བླངས་ནས་རྫིང་ཀུན་དུ་ཁྱབ་པར་གཏོར་བ་དང་། ཉ་རྣམས་ཟས་ཐོབ་པ་དང་ཐམས་ཅད་འགྲངས་ཤིང་ཚིམ་པར་གྱུར་ཏོ། །ཡང་འདི་སྙམ་དུ་དེང་བདག་གིས་ཟས་ཡོངས་སུ་བཏང་ནས་ཉ་རྣམས་སྲོག་ཐོབ་པར་གྱུར་པས་མ་འོངས་པའི་དུས་ཀྱི་ཚེ་ཡང་ཆོས་ཀྱི་ཟས་ཡོངས་སུ་བཏང་ནས་སེམས་ཅན་མཐའ་ཡས་
པ་རྣམས་ཚིམ་པར་བྱེད་པར་གྱུར་ཅིག་སྙམ་མོ། །གཞན་ཡང་འདི་སྙམ་དུ་བདག་གིས་སྔོན་དགོན་པའི་ནགས་ཚལ་ན་དགེ་སློང་ཞིག་ཐེག་པ་ཆེན་པོའི་མདོ་སྡེ་ཀློག་པ་ལས་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པའི་ཆོས་ཟབ་མོའི་དོན་གཅེས་པ་སྟོན་པ་ཡང་མཐོང་ཞིང་ཐོས། གཞན་ཡང་མདོ་སྡེ་ལས་སེམས་ཅན་གང་ལ་ལ་ཞིག་འཆི་ཀའི་དུས་ཀྱི་ཚེ་དེ་བཞིན་གཤེགས་པ་རིན་ཆེན་གཙུག་ཕུད་ཀྱི་མཚན་ཐོས་པར་གྱུར་ན་མཐོ་རིས་སུ་སྐྱེ་བར་འགྱུར་རོ་ཞེས་གསུངས་པས། དེང་བདག་གིས་ཉ་སྟོང་ཕྲག་བཅུ་པོ་དེ་དག་ལ་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པའི་ཆོས་ཟབ་མོ་ཡང་བསྟན་ལ་དེ་བཞིན་གཤེགས་པ་རིན་ཆེན་གཙུག་ཕུད་ཀྱི་མཚན་ཡང་བརྗོད་པར་བྱའོ། །འཛམ་བུའི་གླིང་འདི་ན་སེམས་ཅན་རྣམ་པ་གཉིས་ཡོད་དེ། ཐེག་པ་ཆེན་པོ་ལ་ཤིན་ཏུ་མངོན་པར་ཡིད་ཆེས་པ་དང་། ཡིད་མི་ཆེས་ཤིང་སྨོད་པར་བྱེད་པ་སྟེ། དེ་དག་ཀྱང་མངོན་པར་ཡིད་ཆེས་པའི་སེམས་འཕེལ་བར་བྱའོ་སྙམ་མོ། །དེའི་ཚེ་ཚོང་དཔོན་གྱི་བུ་འདི་སྙམ་དུ་བདག་རྫིང་གི་ནང་དུ་ཞུགས་ཏེ་ཉ་མང་པོ་དེ་དག་ལ་ཆོས་ཟབ་མོ་ཤིན་ཏུ་གྱ་ནོམ་པ་བཤད་པར་བྱའོ་སྙམ་དུ་བསམས་ནས་ཆུའི་ནང་དུ་ཞུགས་ཏེ། འདི་སྐད་ཅེས་འདས་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ། བདེ་བར་གཤེགས་པ། འཇིག་རྟེན་མཁྱེན་པ། བླ་ན་མེད་པའི་སྐྱེས་བུ་ཁ་ལོ་སྒྱུར་བ། ལྷ་དང་མི་རྣམས་ཀྱི་སྟོན་པ། སངས་རྒྱས་བཅོམ་ལྡན་འདས་རིན་ཆེན་གཙུག་ཕུད་ལ་ཕྱག་འཚལ་ལོ། །དེ་བཞིན་གཤེགས་པ་འདི་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་འདི་ལྟར་ཐུགས་དམ་བཞེས་ཏེ། ཕྱོགས་བཅུའི་འཇིག་རྟེན་གྱི་ཁམས་ན་སེམས་ཅན་ཇི་སྙེད་པ་གང་དག་འཆི་ཀའི་དུས་ཀྱི་ཚེ་ངའི་མིང་ཐོས་པར་གྱུར་ན་ཤི་འཕོས་པའི་འོག་ཏུ་སུམ་ཅུ་རྩ་གསུམ་གྱི་ལྷར་སྐྱེ་བར་འགྱུར་རོ་ཞེས་བཀའ་སྩལ་ཏོ་ཞེས་བསྒྲགས་སོ། །དེ་ནས་ཆུ་འབེབས་ཀྱིས་རྫིང་གི་ཉ་དེ་དག་ལ་ཆོས་ཟབ་མོ་གྱ་ནོམ་པ་ཡང་འདི་སྐད་དུ་འདི་ཡོད་པའི་ཕྱིར་དེ་ཡོད། འདི་སྐྱེས་པའི་ཕྱིར་དེ་སྐྱེ་བར་འགྱུར་བ་འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད། འདུ་བྱེད་ཀྱི་རྐྱེན་
གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་། མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། འཁྲུག་པ་འབྱུང་སྟེ། སྡུག་བསྔལ་གྱི་ཕུང་པོ་འདི་འབའ་ཞིག་འབྱུང་བར་འགྱུར་རོ། །འདི་འགགས་པའི་ཕྱིར་དེ་འགག་པར་འགྱུར་བ་འདི་ལྟ་སྟེ། མ་རིག་པ་འགགས་པས་འདུ་བྱེད་འགག །འདུ་བྱེད་འགགས་པས་རྣམ་པར་ཤེས་པ་འགག །རྣམ་པར་ཤེས་པ་འགགས་པས་མིང་དང་གཟུགས་འགག །མིང་དང་གཟུགས་འགགས་པས་སྐྱེ་མཆེད་དྲུག་འགག །སྐྱེ་མཆེད་དྲུག་འགགས་པས་རེག་པ་འགག ། རེག་པ་འགགས་པས་ཚོར་བ་འགག །ཚོར་བ་འགགས་པས་སྲེད་པ་འགག །སྲེད་པ་འགགས་པས་ལེན་པ་འགག །ལེན་པ་འགགས་པས་སྲིད་པ་འགག །སྲིད་པ་འགགས་པས་སྐྱེ་བ་འགག །སྐྱེ་བ་འགགས་པས་རྒ་ཤི་འགག །རྒ་ཤི་འགགས་པས་མྱ་ངན་དང་། སྨྲེ་སྔགས་འདོན་པ་དང་། སྡུག་བསྔལ་བ་དང་། འཁྲུག་པ་རྣམས་འགག་པར་འགྱུར་ཏེ། འདི་ལྟར་སྡུག་བསྔལ་གྱི་ཕུང་པོ་འདི་འབའ་ཞིག་འགག་པར་འགྱུར་རོ་ཞེས་བཤད་དོ། །ཆོས་འདི་དག་བཤད་ནས་གཞན་ཡང་རྟེན་ཅིང་འབྲེལ་བར་འབྱུང་བའི་ཡན་ལག་བཅུ་གཉིས་དང་མཚུངས་པར་ལྡན་པའི་གཟུངས་འདི་བསྟན་ཏོ། །ཏདྱ་ཐཱ། བི་ཙ་ནི། བི་ཙ་ནི། བི་ཙ་ནི། སཾཤྩ་ནི། སཾཤྩ་ནི། སཾཤྩ་ནི། བྷི་ཤི་ནི། བྷི་ཤི་ནི། བྷི་ཤི་ནི་སྭཱ་ཧཱ། ཏདྱ་ཐཱ། ན་མི་ནི། ན་མི་ནི། ན་མི་ནི། ཤ་དྷི་ནི། ཤ་དྷི་ནི། ཤ་དྷི་ནི། སྲ་པྲ་ཤི་ནི། སྲ་པྲ་ཤི་ནི། སྲ་པྲ་ཤི་ནི་སྭཱ་ཧཱ། ཏདྱ་ཐཱ། བེ་ཏྲ་ནི། བེ་ཏྲ་ནི། བེ་ཏྲ་ནི། ཏྲི་ཤི་ནི་ནི། ཏྲི་ཤི་ནི་ནི། ཏྲི་ཤི་ནི་ནི། ཨུ་པ་དྷི་ནི། ཨུ་པ་དྷི་ནི། ཨུ་པ་དྷི་ནི་སྭཱ་ཧཱ། ཏདྱ་ཐཱ། བྷ་བི་ནི། བྷ་བི་ནི། བྷ་བི་ནི། ཤ་ཏི་ནི། ཤ་ཏི་ནི། ཤ་ཏི་ནི། ཤ་མ་ནི་ནི། ཤ་མ་ནི་ནི། ཤ་མ་ནི་ནི་སྭཱ་ཧཱ། དེའི་ཚེ་བཅོམ་ལྡན་འདས་
ཀྱིས་འཁོར་མང་པོ་རྣམས་ལ་ཚོང་དཔོན་གྱི་བུའི་སྔོན་གྱི་རྒྱུ་འདི་བསྟན་པ་ན་ལྷ་དང་མིའི་འཁོར་རྣམས་ཀྱིས་ཤིན་ཏུ་ངོ་མཚར་ཆེའོ་ཞེས་བསྔགས་པ་བརྗོད་པར་གྱུར་ཏོ། །དེ་ནས་རྒྱལ་པོ་ཆེན་པོ་བཞི་པོ་དག་སོ་སོ་ནས་གནས་དེ་ཉིད་དུ་མགྲིན་གཅིག་ཏུ་འདི་སྐད་ཅེས་སྨྲས་སོ། །ལེགས་སོ་ཤཱཀྱ་ཐུབ་པའི་གཙོ། །ཡན་ལག་བཅུ་གཉིས་མཚུངས་ལྡན་པ། །དམ་ཆོས་རིག་སྔགས་བཀས་བཤད་ནས། །སྡིག་བསལ་བསོད་ནམས་འཕེལ་བར་མཛད། །བདག་ཅག་ཀྱང་ནི་སྔགས་བརྗོད་ནས། །དམ་པའི་ཆོས་ནི་སྲུང་བར་བགྱིད། །གང་ཞིག་འགལ་བར་བགྱིས་ནས་ནི། །ལེགས་པར་རྗེས་སུ་མི་འབྲང་ན། །ཨརྫ་ཀ་ཡི་ཡལ་ག་བཞིན། །མགོ་ནི་ཚལ་པ་བདུན་དུ་འགས། །བདག་ཅག་བཅོམ་ལྡན་སྤྱན་སྔར་ནི། །རིག་སྔགས་ལན་ཅིག་བརྗོད་པར་བགྱི། །ཏདྱ་ཐཱ། ཧི་རི་མི་གཱ་ཏེ། གནྡྷ་རི། ཙནྡྷ་རི། དྷ་རི་ཛེ་བྷ་རེ། ཤི་ཧི་བྷ་རི། པུ་རེ་པུ་རེ། གུ་གུ་མ་ཏི། ཁི་ར་མ་ཏི། དྷ་དྷི་མུ་ཁི། ལཽ་རུ་བྷ། མུ་རུ་བྷི། ཀུ་ཙ་མུ་རུ་གནྟེ།ཏུ་རུ་ཏུ་རུ་ཏུ་རུ་བཱི་རྱེ། ཨ་དྷི་སིདྡྷི། ད་བ་བྱེ། དྷ་ད་བ་བྱེ། ཨུསྟེ། ཨུ་སྟ་བད་དྷེ། ཨན་ལེ་བད་དྷེ། པ་དུ་མ་བད་དྷེ། ཨ་སུ་མ་བད་དྷེ་སྭཱ་ཧཱ། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་ལྷ་མོ་དེའི་ཚེ་ཚོང་དཔོན་གྱི་བུ་ཆུ་འབེབས་དང་བུ་གཉིས་ཀྱིས་རྫིང་དེའི་ཉ་དག་ལ་ཆུ་དང་ཟས་བྱིན་ནས་ཆོས་བཤད་དེ་སླར་རང་གི་ཁྱིམ་དུ་དོང་ངོ་། །ཚོང་དཔོན་གྱི་བུ་ཆུ་འབེབས་དེ་དུས་གཞན་ཞིག་ན་སྟོན་མོ་ལ་འདུས་ཏེ། སྟོན་མོ་སྣ་ཚོགས་བྱས་ནས་ཆང་གིས་ར་རོ་སྟེ་ཉལ་བ་དང་། དེའི་ཚེ་ཉ་སྟོང་ཕྲག་བཅུ་པོ་དེ་དག་དུས་གཅིག་ཏུ་ཚེ་འདས་ནས་སུམ་ཅུ་རྩ་གསུམ་གྱི་ལྷར་སྐྱེས་པས། དེ་དག་འདི་སྙམ་དུ་བདག་ཅག་དགེ་བའི་ལས་ཀྱི་རྒྱུ་དང་རྐྱེན་གང་གིས་ལྷའི་གནས་འདིར་སྐྱེས་པར་གྱུར་ཅེས་བསམས་ནས་ཕན་ཚུན་གཅིག་ལ་གཅིག་འདི་སྐད་དུ་བདག་ཅག་ནི་སྔོན་འཛམ་བུའི་གླིང་དུ་དུད་འགྲོའི་སྐྱེ་གནས་སུ་ལྷུང་ནས་ཉའི་ལུས་བླངས་པ་ལས། ཚོང་དཔོན་གྱི་བུ་ཆུ་འབེབས་ཀྱིས་བདག་ཅག་ལ་ཆུ་དང་ཟས་བྱིན་ནས། གཞན་ཡང་བདག་ཅག་ལ་རྟེན་ཅིང་འབྲེལ་བར་འབྱུང་བ་ཡན་ལག་བཅུ་གཉིས་པའི་ཆོས་ཟབ་མོ་དང་གཟུངས་ཀྱང་བཤད། དེ་བཞིན་གཤེགས་པ་རིན་ཆེན་གཙུག་ཕུད་ཀྱི་མཚན་ནས་ཀྱང་བརྗོད་པའི་རྒྱུ་
དང་རྐྱེན་དེས་བདག་ཅག་ལྷའི་གནས་འདིར་སྐྱེས་པ་ཡིན་པས། དེའི་ཕྱིར་བདག་ཅག་ཐམས་ཅད་ཚོང་དཔོན་གྱི་བུ་དེའི་ཐད་དུ་དོང་ལ་དྲིན་བསབ་པའི་ཕྱིར་མཆོད་པ་བྱ་བའི་རིགས་སོ་ཞེས་སྨྲས་སོ། །དེ་ནས་ལྷའི་བུ་སྟོང་ཕྲག་བཅུ་པོ་དེ་དག་ལྷའི་གནས་དེ་ནས་མི་སྣང་བར་གྱུར་ཏེ་འཛམ་བུའི་གླིང་དུ་སྨན་པའི་རྒྱལ་པོ་ཆེན་པོའི་ཐད་དུ་ལྷགས་སོ། །དེའི་ཚེ་ཚོང་དཔོན་གྱི་བུ་དེ་ཡང་ཐོག་མཐོན་པོའི་སྟེང་དུ་བདེ་བར་གཉིད་ལོག་པ་ལས་ལྷའི་བུ་སྟོང་ཕྲག་བཅུ་པོ་དེ་དག་གིས་མུ་ཏིག་གི་ཕྲེང་བ་སྟོང་ཕྲག་བཅུ་ནི་མགོ་དྲུང་དུ་བཞག །ཡང་སྟོང་ཕྲག་བཅུ་ནི་རྐང་པའི་དྲུང་དུ་བཞག །ཡང་སྟོང་ཕྲག་བཅུ་ནི་གཡས་ཕྱོགས་སུ་བཞག །ཡང་སྟོང་ཕྲག་བཅུ་ནི་གཡོན་ཕྱོགས་སུ་བཞག་སྟེ། མེ་ཏོག་མནྡཱ་ར་བ་དང་། མནྡཱ་ར་བ་ཆེན་པོའི་ཆར་པུས་ནུབ་ཙམ་དུ་ཕབ་ནས་འོད་ཀྱིས་ཀུན་དུ་སྣང་བར་བྱས་ཏེ། ལྷའི་རོལ་མོ་རྣམ་པ་སྣ་ཚོགས་ལས་སྒྲ་དབྱངས་སྙན་པ་དག་བྱུང་བས་འཛམ་བུའི་གླིང་དུ་གཉིད་ལོག་པ་ཐམས་ཅད་སད་པར་བྱས་སོ། །ཚོང་དཔོན་གྱི་བུ་ཆུ་འབེབས་ཀྱང་གཉིད་ལོག་པ་ལས་སད་པར་གྱུར་པ་དང་། དེ་ནས་ལྷའི་བུ་སྟོང་ཕྲག་བཅུ་པོ་དེ་དག་གིས་མཆོད་པ་བྱས་ནས་ནམ་མཁའ་ལ་འཕུར་ཏེ་དོང་ངོ་། །རྒྱལ་པོ་ལྷའི་དབང་ཕྱུག་གི་འོད་ཀྱི་ཡུལ་ཁམས་སུ་ཡང་གནས་དེ་དང་དེ་དག་ཐམས་ཅད་དུ་ལྷའི་མེ་ཏོག་པདྨ་དམ་པའི་ཆར་མངོན་པར་ཕབ་བོ། །ལྷའི་བུ་མང་པོ་དེ་དག་སྔོན་གྱི་གནས་དགོན་པའི་རྫིང་དྲུང་དུ་དོང་ནས་ལྷའི་མེ་ཏོག་སྣ་ཚོགས་ཀྱི་ཆར་མངོན་པར་ཕབ་སྟེ། དེ་ནས་མི་སྣང་བར་གྱུར་ནས་སླར་ལྷའི་གནས་སུ་དོང་སྟེ། ཡིད་བཞིན་དུ་ཅི་དགའ་བར་འདོད་པ་ལྔའི་བདེ་བ་དག་ལ་ལོངས་སྤྱོད་པར་གྱུར་ཏོ། །རྒྱལ་པོ་ལྷའི་དབང་ཕྱུག་གི་འོད་ཀྱང་ནམ་ལངས་པ་དང་བློན་པོ་ཆེན་པོ་དེ་དག་ལ་མདང་སུམ་རྒྱུ་དང་རྐྱེན་གང་གི་ཕྱིར་ཡ་མཚན་གྱི་མཚན་མ་དེ་ལྟ་བུ་དག་སྣང་ཞིང་འོད་ཟེར་ཆེན་པོ་དག་ཀྱང་བཀྱེ་བར་གྱུར་ཅེས་སྨྲས་སོ། །བློན་པོ་ཆེན་པོས་གསོལ་བ། རྒྱལ་པོ་ཆེན་པོ་མཁྱེན་པར་མཛོད་ཅིག །ལྷའི་ཚོགས་མང་པོ་རྣམས་ཀྱིས་ཚོང་དཔོན་གྱི་བུ་ཆུ་འབེབས་ཀྱི་སྡུམ་པར་མུ་ཏིག་གི་ཕྲེང་བ་སྟོང་ཕྲག་བཞི་བཅུ་དང་། མེ་ཏོག་མནྡཱ་ར་བའི་ཆར་མངོན་པར་ཕབ་པ་པུས་ནུབ་ཙམ་དུ་བགྱིས་ལགས་སོ། །རྒྱལ་པོས་བློན་པོ་ལ་
བསྒོ་བ། ཚོང་དཔོན་གྱི་ཁྱིམ་དུ་སོང་ལ་དེའི་བུ་བོས་ཤིག །བློན་པོ་ཆེན་པོས་བཀའ་མཉན་ནས་དེའི་ཁྱིམ་དུ་སོང་སྟེ། རྒྱལ་པོའི་བཀའ་བཟླས་ནས། ཚོང་དཔོན་གྱི་བུ་བཀུག་གོ། །དེ་ནས་ཚོང་དཔོན་གྱི་བུ་རྒྱལ་པོའི་དྲུང་དུ་ཕྱིན་པ་དང་། མདང་སུམ་རྒྱུ་དང་རྐྱེན་གང་གི་ཕྱིར་ཡ་མཚན་ཆེ་བའི་མཚན་མ་དེ་ལྟ་བུ་དག་བྱུང་བར་གྱུར་ཅེས་དྲིས་སོ། །ཚོང་དཔོན་གྱི་བུས་སྨྲས་པ། བདག་གིས་དཔྱད་པ་ལྟར་ན་གདོན་མི་འཚལ་བར་རྫིང་དེའི་ནང་གི་ཉ་མང་པོ་དེ་དག་མདོ་སྡེ་ལས་གསུངས་པ་བཞིན་དུ་ཚེ་འདས་ནས་སུམ་ཅུ་རྩ་གསུམ་གྱི་ལྷར་སྐྱེས་པས་དེ་དག་དྲིན་ལ་ལན་གླན་པའི་སླད་དུ་ཡ་མཚན་ཆེ་བའི་མཚན་མ་དེ་ལྟ་བུ་བསྟན་སྙམ་བགྱིད་ལགས་སོ། །རྒྱལ་པོས་སྨྲས་པ། ཇི་ལྟར་ཤེས། ཆུ་འབེབས་ཀྱིས་སྨྲས་པ། ལྷས་ཕོ་ཉ་འགའ་ཞིག་དང་། བདག་གི་བུ་གཉིས་རྫིང་དེའི་དྲུང་དུ་བཏང་སྟེ། ཉ་སྟོང་ཕྲག་བཅུ་པོ་དེ་གུམ་མམ་འཚོ་བརྟགས་ན་མད་དམ་མི་མད་མཁྱེན་པར་འགྱུར་ལགས་སོ། །རྒྱལ་པོས་དེ་སྐད་སྨྲས་པ་ཐོས་ནས་ཕོ་ཉ་དང་། དེའི་བུ་གཉིས་རྫིང་དེའི་དྲུང་དུ་བཏང་བ་ལས་རྫིང་གི་ནང་ན་མེ་ཏོག་མནྡཱ་ར་བ་མང་པོ་ཕུང་པོ་ཆེན་པོར་གྱུར་པ་དང་། ཉ་མང་པོ་ཐམས་ཅད་དུས་ལས་འདས་པར་མཐོང་ངོ་། །མཐོང་ནས་ཀྱང་སླར་མྱུར་དུ་ལོག་སྟེ་རྒྱས་པར་རྒྱལ་པོ་ལ་གསོལ་བ་དང་། རྒྱལ་པོ་ཡང་དེ་ལྟར་གྱུར་པ་ཐོས་པས་རབ་ཏུ་དགའ་བར་གྱུར་ནས་སྔོན་ཆད་དེ་ལྟ་བུ་མ་བྱུང་ངོ་ཞེས་བསྔགས་པ་བརྗོད་པར་གྱུར་ཏོ། །དེ་ནས་བཅོམ་ལྡན་འདས་ཀྱིས་བྱང་ཆུབ་ཀྱི་ཤིང་གི་ལྷ་མོ་ལ་འདི་སྐད་ཅེས་བཀའ་སྩལ་ཏོ། །རིགས་ཀྱི་ལྷ་མོ་ཁྱོད་ཀྱིས་འདི་ལྟར་ཤེས་པར་བྱ་སྟེ། སྔོན་བྱུང་བ་ཚོང་དཔོན་གྱི་བུ་ཆུ་འབེབས་ཞེས་བྱ་བ་དེ་ནི་ང་ཉིད་ཡིན་ནོ། །ཚོང་དཔོན་ཆུ་འཛིན་ཅེས་བྱ་བ་དེ་ནི་མཛེས་པའི་ཏོག་ཡིན་ནོ། །དེའི་བུ་གཉིས་ལས་བུ་ཆེན་པོ་ཆུ་རྒྱས་ཞེས་བྱ་བ་དེ་ནི་དངུལ་གྱི་ཏོག་ཅེས་བྱ་བ་འདི་ཉིད་དོ། །དེའི་བུ་ཆུང་ངུ་ཆུའི་མཛོད་ཅེས་བྱ་བ་དེ་ནི་དངུལ་གྱི་འོད་ཅེས་བྱ་བ་འདི་ཉིད་ཡིན་ནོ། །རྒྱལ་པོ་ལྷའི་དབང་ཕྱུག་གི་འོད་ཅེས་བྱ་བ་དེ་ནི་བྱང་ཆུབ་ཀྱི་ཤིང་གི་ལྷ་མོ་ཁྱོད་ཉིད་ཡིན་ནོ། །ཉ་སྟོང་ཕྲག་བཅུ་པོ་དེ་དག་ནི་ལྷའི་བུ་སྟོང་ཕྲག་བཅུ་པོ་འདི་ཉིད་ཡིན་ནོ། །ངས་སྔོན་ཉ་དེ་དག་ལ་ཆུ་དང་ཟས་བྱིན་ཏེ་ཚིམ་པར་བྱས་ནས་རྟེན་
ཅིང་འབྲེལ་བར་འབྱུང་བ་ཡན་ལག་བཅུ་གཉིས་པའི་ཆོས་ཟབ་མོ་དང་མཚུངས་པར་ལྡན་པའི་གཟུངས་འདི་བཤད་པའི་རྒྱུ་དེ་དང་། གཞན་ཡང་དེ་བཞིན་གཤེགས་པ་རིན་ཆེན་གཙུག་ཕུད་དེའི་མཚན་ནས་བརྗོད་དེ་བསྟན་པའི་དགེ་བའི་རྩ་བ་དེའི་རྒྱུས་མཐོ་རིས་སུ་སྐྱེས་པར་གྱུར་པས། དེང་ངའི་ཐད་དུ་འོངས་ནས་རབ་ཏུ་དགའ་བས་ཆོས་མཉན་པས་ངས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་ནས་དེ་དག་གི་མིང་བསྟན་པ་ཡིན་ནོ། །རིགས་ཀྱི་ལྷ་མོ་ཇི་ལྟར་ངས་སྔོན་སྲིད་པ་རྣམས་སུ་འཁོར་བ་ན་འཁོར་བའི་ཚེ་སེམས་ཅན་ཚད་མེད་པ་སྙེད་ལ་རྒྱ་ཆེར་ཕན་བཏགས་ནས་ཐམས་ཅད་རིམ་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པ་དེ་བཞིན་དུ་ཁྱེད་ཅག་ཐམས་ཅད་ཀྱིས་ཀྱང་ནན་ཏན་བརྩོན་འགྲུས་ཀྱིས་ངེས་པར་འབྱུང་བ་ཡོངས་སུ་གཉེར་ནས། བག་མེད་པར་མི་བྱའོ། །དེ་ནས་འཁོར་མང་པོ་རྣམས་དེ་སྐད་ཅེས་བཀའ་སྩལ་པ་ཐོས་པ་དང་། ཐམས་ཅད་ཀྱིས་བྱམས་པ་དང་། སྙིང་རྗེ་ཆེན་པོས་ཐམས་ཅད་ཡོངས་སུ་སྐྱོ་བ་དང་། ནན་ཏན་བརྩོན་འགྲུས་ཀྱི་དཀའ་བ་སྤྱད་ནས། གདོད་བླ་ན་མེད་པའི་བྱང་ཆུབ་རྟོགས་ཤིང་མངོན་དུ་བྱེད་པར་འགྱུར་བར་ཁོང་དུ་ཆུད་པར་གྱུར་པས་ཤིན་ཏུ་དང་བའི་སེམས་ཀྱིས་མངོན་པར་ཡིད་ཆེས་ཤིང་རབ་ཏུ་དགའ་བར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ཚོང་དཔོན་གྱི་བུ་ཆུ་འབེབས་ཀྱི་ལེའུ་སྟེ་ཉི་ཤུ་ལྔ་པའོ།། །།གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ།བམ་པོ་བཅུ་པ་སྟེ་ཐ་མ། དེ་ནས་བཅོམ་ལྡན་འདས་ཀྱིས་འཁོར་མང་པོ་རྣམས་ལ་ལྷའི་བུ་སྟོང་ཕྲག་བཅུ་པོ་དེ་དག་གི་སྔོན་གྱི་རྒྱུ་དང་རྐྱེན་བཀས་བཤད་ནས།ཡང་བྱང་ཆུབ་ཀྱི་ཤིང་གི་ལྷ་མོ་དང་འཁོར་མང་པོ་རྣམས་ལ་བཀའ་སྩལ་པ། ངས་འདས་པའི་དུས་ཀྱི་ཚེ་བྱང་ཆུབ་སེམས་དཔའི་ལམ་སྤྱོད་པ་ན་ཆུ་དང་ཟས་སྦྱིན་པ་བཏང་ནས་ཉ་དེ་དག་གི་སྲོག་ལ་ཕན་བཏགས་པ་འབའ་ཞིག་བྱས་པ་མ་ཡིན་གྱི། ཤིན་ཏུ་ཕངས་པའི་ལུས་ཀྱང་ཡོངས་སུ་བཏང་སྟེ། དེའི་རྒྱུ་དང་རྐྱེན་གང་ཡིན་པ་ལྷན་ཅིག་བལྟ་བར་བྱའོ། །
དེ་ནས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྷའི་གནས་ཀྱི་སྟེང་དང་། ལྷའི་གནས་ཀྱི་འོག་ཐམས་ཅད་ན་མཆོག་ཏུ་རྣམ་པར་རྒྱལ་བ། མཆོག་ཏུ་བཙུན་པ། འོད་ཟེར་བརྒྱ་སྟོང་དུ་མས་ཕྱོགས་བཅུའི་འཇིག་རྟེན་གྱི་ཁམས་གསལ་བར་མཛད་པ། མཁྱེན་པ་ཐམས་ཅད་ཕུན་སུམ་ཚོགས་པར་གྱུར་པ། ཡོན་ཏན་ཡོངས་སུ་རྫོགས་པར་གྱུར་པ་དེས་དགེ་སློང་རྣམས་དང་། འཁོར་མང་པོ་རྣམས་དང་ཐབས་ཅིག་ཏུ་པཉྩ་ལའི་ལྗོངས་སུ་བྱོན་ནས། ནགས་ཚལ་ས་གཞི་ཤིན་ཏུ་མཉམ་ལ་ཚེར་མ་རྣམས་མེད་པ་མེ་ཏོག་མཆོག་དམ་པ་དང་རྩྭ་འཇམ་པོ་དག་གིས་ཀུན་དུ་ཁྱབ་པར་བཀྲམ་པར་གཤེགས་ཏེ། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཁྱོད་ཀྱིས་ཤིང་འདིའི་དྲུང་དུ་ངའི་ཆེད་དུ་སྟན་ཐིང་ཤིག །དེ་ནས་ཚེ་དང་ལྡན་པ་ཀུན་དགའ་བོས་བཀའ་མཉན་ནས་གདན་བཏིང་ངོ་། །བཏིང་ཟིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་གདན་བཤམས་ལགས་ན་འཕགས་པས་དུས་མཁྱེན་པར་མཛད་དུ་གསོལ། དེ་ནས་བཅོམ་ལྡན་འདས་གདན་གྱི་སྟེང་དུ་སྐྱིལ་མོ་ཀྲུང་བཅས་ཏེ་སྐུ་དྲང་པོར་བསྲང་ནས། ཡང་དག་པའི་དྲན་པ་ཉེ་བར་བཞག་སྟེ་བཞུགས་ནས་དགེ་སློང་རྣམས་ལ་བཀའ་སྩལ་པ། ཁྱེད་ཅག་སྔོན་དཀའ་བ་སྤྱད་པའི་བྱང་ཆུབ་སེམས་དཔའི་སྔོན་གྱི་ལུས་ཀྱི་རིང་བསྲེལ་བལྟ་བར་འདོད་དམ། དགེ་སློང་རྣམས་ཀྱིས་གསོལ་བ། བདག་ཅག་མཐོང་བར་མོས་ལགས་སོ། །དེ་ནས་བཅོམ་ལྡན་འདས་བསོད་ནམས་བརྒྱས་རབ་ཏུ་བརྒྱན་པ། མཚན་དང་དཔེ་བྱད་དང་ལྡན་པའི་ཕྱག་གིས་ས་ལ་བསྣུན་པ་དང་། དེའི་ཚེ་ས་ཆེན་པོ་རྣམ་པ་དྲུག་ཏུ་རབ་ཏུ་གཡོས་པར་གྱུར་པས་ས་གས་ཤིང་བྱེ་བར་གྱུར་པ་དང་། རིན་པོ་ཆེ་སྣ་བདུན་གྱི་མཆོད་རྟེན་རིན་པོ་ཆེ་སྣ་ཚོགས་ཀྱི་དྲ་བས་རབ་ཏུ་བརྒྱན་པ་ཞིག་མངོན་པར་འཕགས་ཏེ་བྱུང་བ་འཁོར་མང་པོ་ཀུན་གྱིས་མཐོང་ནས་ངོ་མཚར་ཆེ་བའི་བསམ་པ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་གདན་ལས་བཞེངས་ཏེ། ཕྱག་མཛད་ནས་གཡས་
ཕྱོགས་སུ་བསྐོར་བ་མཛད་དེ་སླར་གདན་ལ་བཞུགས་ནས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཁྱོད་ཀྱིས་མཆོད་རྟེན་འདིའི་སྒོ་ཕྱེ་ཤིག །དེ་ནས་ཚེ་དང་ལྡན་པ་ཀུན་དགའ་བོས་སྒོ་དེ་ཕྱེ་སྟེ། རིན་པོ་ཆེ་སྣ་བདུན་ལས་བྱས་པའི་སྒྲོམ་བུ་རིན་པོ་ཆེ་མཆོག་དམ་པས་བརྒྱན་པ་ཞིག་མཐོང་བ་དང་། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རིན་པོ་ཆེ་སྣ་བདུན་ལས་བགྱིས་པའི་སྒྲོམ་བུ་རིན་པོ་ཆེ་རྣམ་པ་སྣ་ཚོགས་ཀྱིས་རབ་ཏུ་བརྒྱན་པ་ཞིག་གདའ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཁྱོད་ཀྱིས་སྒྲོམ་ཕྱེ་ཤིག་དེ་ནས་ཚེ་དང་ལྡན་པ་ཀུན་དགའ་བོས་བཀའ་མཉན་ནས་ཕྱེ་བ་དང་རིང་བསྲེལ་ཁ་དོག་དུང་དང་མེ་ཏོག་ཀུ་མུ་ད་འདྲ་བ་ཞིག་མཐོང་ནས་བཅོམ་ལྡན་འདས་ལ་གསོལ་བ། སྒྲོམ་གྱི་ནང་ན་རིང་བསྲེལ་ཁ་དོག་དམ་པ་གཞན་ལས་ཁྱད་པར་དུ་འཕགས་པ་ཞིག་གདའ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་ཁྱོད་ཀྱིས་སྐྱེས་བུ་ཆེན་པོའི་རུས་པ་འདིར་ཁྱེར་ཏེ་ཤོག་ཤིག །དེ་ནས་ཚེ་དང་ལྡན་པ་ཀུན་དགའ་བོས་རིང་བསྲེལ་དེ་བླངས་ནས་བཅོམ་ལྡན་འདས་ལ་ཕུལ་ལོ། །བཅོམ་ལྡན་འདས་ཀྱིས་བཞེས་ནས་དགེ་སློང་རྣམས་ལ་ཁྱེད་ཀྱིས་དཀའ་བ་སྤྱད་པའི་བྱང་ཆུབ་སེམས་དཔའ་ལུས་ཀྱི་རིང་བསྲེལ་བཞག་པ་ལ་ལྟོས་ཤིག་ཅེས་བཀའ་སྩལ་ནས་ཚིགས་སུ་བཅད་དེ་བཀའ་སྩལ་པ། བྱང་ཆུབ་སེམས་དཔའ་ཡོན་ཏན་མཆོག་ལྡན་བློ། །རབ་དཔའ་བརྩོན་པས་ཕ་རོལ་ཕྱིན་དྲུག་རྫོགས། །རྟག་སྒོམ་བྱང་ཆུབ་ཕྱིར་ནི་རྒྱུན་འཆད་མེད། །བཏང་སྙོམས་ཆེ་བསྟན་སེམས་ལ་ངལ་བ་མེད། །དགེ་སློང་དག་ཁྱེད་ཅག་ཐམས་ཅད་ཀྱིས་བྱང་ཆུབ་སེམས་དཔའི་སྔོན་གྱི་ལུས་ཀྱི་རིང་བསྲེལ་ལ་གུས་པས་ཕྱག་བྱོས་ཤིག །རིང་བསྲེལ་འདི་ནི་ཚུལ་ཁྲིམས་དང་། ཏིང་ངེ་འཛིན་དང་། ཤེས་རབ་ཀྱི་དྲི་ཚད་མེད་པ་དག་གིས་ཡོངས་སུ་བདུགས་པ། བསོད་ནམས་ཀྱི་ཞིང་མཆོག་དམ་པ་ཡིན་པས་ཤིན་ཏུ་ཕྲད་པར་དཀའོ། །དེ་ནས་དགེ་སློང་རྣམས་དང་། འཁོར་མང་པོ་རྣམས་ཀྱིས་སེམས་རྩེ་གཅིག་ཏུ་གུས་
པས་ཐལ་མོ་སྦྱར་ཏེ་མགོ་བོས་རིང་བསྲེལ་ལ་ཕྱག་བྱས་ནས། སྔོན་ཆད་ནམ་ཡང་དེ་ལྟ་བུ་མ་བྱུང་ངོ་ཞེས་བསྔགས་པ་བརྗོད་པར་གྱུར་ཏོ། །དེ་ནས་ཚེ་དང་ལྡན་པ་ཀུན་དགའ་བོ་མདུན་དུ་འཕགས་ཏེ། བཅོམ་ལྡན་འདས་ཀྱི་ཞབས་ལ་ཕྱག་བྱས་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པ་སྟོན་པ་ཆེན་པོ་ནི་ཐམས་ཅད་ལས་མངོན་པར་འཕགས་པ་ལགས་པས་སེམས་ཅན་ཀུན་གྱིས་བསྙེན་བཀུར་བགྱི་བ་ལགས་ན། རྒྱུ་དང་རྐྱེན་གང་གི་སླད་དུ་ལུས་ཀྱི་རུས་པ་འདི་ལ་ཕྱག་མཛད་ལགས། བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ང་ནི་རུས་པ་འདིའི་རྒྱུས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པར་གྱུར་པས་སྔོན་གྱི་དྲིན་བསབ་པའི་ཕྱིར་དེང་ངས་ཕྱག་བྱས་པ་ཡིན་ནོ། །ཡང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ངས་དེང་ཁྱོད་དང་འཁོར་མང་པོའི་ཐེ་ཙོམ་དང་སོམ་ཉི་བཅད་པའི་ཕྱིར་རིང་བསྲེལ་འདིའི་སྔོན་གྱི་རྒྱུ་དང་རྐྱེན་གང་ཡིན་པ་ཡང་དག་པར་བཤད་ཀྱིས་ཁྱེད་ཅག་ལེགས་པར་ཡིད་ལ་བྱོས་ལ་སེམས་རྩེ་གཅིག་ཏུ་ཉོན་ཅིག །ཚེ་དང་ལྡན་པ་ཀུན་དགའ་བོས་གསོལ་བ། བདག་ཅག་ཤིན་ཏུ་ཐོས་པར་མོས་ལགས་ན་རྣམ་པར་ཕྱེ་སྟེ་བཀས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་སྔོན་བྱུང་བ་འདས་པའི་དུས་ཀྱི་ཚེ་ཡུལ་གཅིག་གི་རྒྱལ་པོ་ཤིང་རྟ་ཆེན་པོ་ཞེས་བྱ་བ་ཤིན་ཏུ་ཕྱུག་ཅིང་ནོར་མང་བ། བང་མཛོད་རྒྱས་པ། དམག་གི་དཔུང་རབ་ཏུ་དཔའ་བ། མང་པོ་ཀུན་གྱིས་བཀུར་ཞིང་ངག་ཉན་པ། རྟག་པར་ཡང་དག་པའི་ཆོས་ཀྱིས་སྐྱེ་བོ་འདུལ་བ། མི་རྣམས་དར་ཞིང་རྒྱས་པ། ཕྱིར་རྒོལ་བའི་དགྲ་མེད་པ་ཞིག་ཡོད་དེ། བཙུན་མོ་དམ་པ་བྱད་བཞིན་ཤིན་ཏུ་སྡུག་ཅིང་མཛེས་པ། མང་པོ་ཀུན་གྱིས་བལྟ་བར་མོས་པའི་བུ་གསུམ་ཡོད་དེ། བུ་ཆེན་པོའི་མིང་ནི་སྒྲ་ཆེན་པོ་ཞེས་བྱའོ། །བུ་འབྲིང་པོའི་མིང་ནི་ལྷ་ཆེན་པོ་ཞེས་བྱའོ། །བུ་ཐ་ཆུངས་ཀྱི་མིང་ནི་སེམས་ཅན་ཆེན་པོ་ཞེས་བྱའོ། །དེའི་ཚེ་རྒྱལ་པོ་ཆེན་པོ་དེ་རྩེ་ཞིང་ལྟད་མོ་བལྟ་བའི་ཕྱིར་རི་
དང་ནགས་ཚལ་ཀུན་དུ་བལྟ་བར་ཆས་པ་དང་། བུ་གསུམ་པོ་དེ་ཡང་ཕྱི་བཞིན་དུ་དོང་ངོ་། །མེ་ཏོག་དང་འབྲས་བུ་བཙལ་བའི་ཕྱིར་ཕ་སྤངས་ཏེ་ཀུན་དུ་འཁྱམ་པ་ལས་འོད་མའི་ཚལ་ཆེན་པོ་ཞིག་ཏུ་ཕྱིན་ཏེ་ངལ་བསོས་སོ། །དེ་ནས་རྒྱལ་བུ་ཆེན་པོས་འདི་སྐད་དུ་དེང་བདག་ནི་སེམས་སྐྲག་ཅིང་འཇིགས་པར་གྱུར་ན། ནགས་ཚལ་འདིར་གཅན་གཟན་མ་རུངས་པ་དག་གིས་བདག་ཅག་གསོད་པར་མི་འགྱུར་རམ་ཞེས་སྨྲས་སོ། །རྒྱལ་བུ་འབྲིང་པོས་ཡང་འདི་སྐད་དུ་བདག་ནི་རང་གི་ལུས་ལ་དང་པོ་ནས་ཕངས་པ་མེད་ན་སྙིང་དུ་སྡུག་པ་འདི་དང་འབྲལ་བའི་སྡུག་བསྔལ་ཞིང་འབྱུང་དུ་དོགས་སོ་ཞེས་སྨྲས་སོ། །རྒྱལ་བུ་ཐ་ཆུངས་ཀྱིས་ཕོ་བོ་གཉིས་ལ་སྨྲས་པ། །འདི་ནི་ལྷ་དང་དྲང་སྲོང་འདུ་བའི་གནས། །བདག་ལ་འཇིགས་དངངས་འབྲལ་བའི་མྱ་ངན་མེད། །ལུས་སེམས་ཀུན་ཁྱབ་དགའ་བ་སྐྱེས་པས་ན། །ཁྱད་པར་འཕགས་པའི་ཡོན་ཏན་འཐོབ་པར་འགྱུར། །དེའི་ཚེ་རྒྱལ་བུ་རྣམས་སོ་སོ་ནས་རང་གི་སེམས་ལ་ཅི་བསམས་པའི་དངོས་པོ་དག་སྨྲས་ནས་མཐར་གྱིས་མདུན་དུ་དོང་བ་ལས་སྟག་མོ་ཞིག་བུ་བདུན་བཙས་ནས་ཞག་བདུན་ལོན་པ་བུ་རྣམས་ཀྱིས་བསྐོར་བ། བཀྲེས་པ་དང་སྐོམ་པ་དག་གིས་རབ་ཏུ་གཟིར་བ། ལུས་རིད་ཅིང་ཉམ་ཆུང་བ་རིང་པོ་མི་ཐོགས་པར་འཆི་བར་འགྱུར་བ་ཞིག་མཐོང་བ་དང་། རྒྱལ་བུ་ཆེན་པོས་འདི་སྐད་དུ་ཀྱེ་མ་སྟག་མོ་འདི་ནི་བུ་བཙས་ནས་ཞག་བདུན་ལོན་ཏེ། བུ་བདུན་གྱིས་ཡོངས་སུ་བསྐོར་བས་ཟས་བཙལ་ཡང་མི་ཁོམ་སྟེ། བཀྲེས་པ་དང་སྐོམ་པ་དག་གིས་རབ་ཏུ་གཟིར་བས་གདོན་མི་ཟ་བར་བུ་རྣམས་ཟ་བར་འགྱུར་རོ་ཞེས་སྨྲས་སོ། །རྒྱལ་བུ་སེམས་ཅན་ཆེན་པོས་སྨྲས་པ། སྟག་འདི་དག་རྟག་པར་ཟས་ཇི་ལྟ་བུ་ཞིག་ཟ། རྒྱལ་བུ་ཆེན་པོས་སྨྲས་པ། སྟག་དང་སེང་གེ་འཕར་སྤྱང་རྣམས། །ཤ་ཁྲག་དྲོན་མོ་འབའ་ཞིག་ཟ། །དེ་ལས་གཞན་པའི་ཟས་སྐོམ་གྱིས། །འདི་ཡི་ཉམ་ཆུང་སེལ་མི་ནུས། །རྒྱལ་བུ་འབྲིང་པོས་དེ་སྐད་སྨྲས་པ་ཐོས་པ་དང་འདི་སྐད་ཅེས་སྨྲས་སོ། །སྟག་མོ་འདི་ནི་རིད་ཅིང་ཉམ་ཆུང་ལ་བཀྲེས་སྐོམ་གྱིས་ཉོན་མོངས་པས་སྲོག་གི་ལྷག་མ་ཆུང་ཟད་ཙམ་ཞིག་ལུས་ན། བདག་ཅག་གིས་ཇི་ལྟར་
འདི་ལྟར་རྙེད་པར་དཀའ་བའི་ཟས་དང་སྐོམ་བཙལ་བར་ནུས། སུ་ཞིག་ནི་འདི་དག་གི་ཆེད་དུ་རང་གི་ལུས་དང་སྲོག་སྤངས་ནས་བཀྲེས་པ་དང་སྐོམ་པའི་སྡུག་བསྔལ་སེལ་བར་བྱེད། རྒྱལ་བུ་ཆེན་པོས་སྨྲས་པ། སྤང་བར་དཀའ་བ་ཐམས་ཅད་ཀྱི་ནང་ན་བདག་གི་ལུས་ལས་ལྷག་པ་གང་ཡང་མེད་དོ། །རྒྱལ་བུ་སེམས་ཅན་ཆེན་པོས་སྨྲས་པ། དེང་བདག་ཅག་ནི་སོ་སོ་ནས་རང་གི་ལུས་ལ་སྲེད་ཅིང་མངོན་པར་ཞེན་པ་དང་། ཤེས་རབ་མེད་པས་གཞན་ལ་ཕན་འདོགས་པར་མི་ནུས་ཀྱི། སྐྱེས་བུ་དམ་པ་དག་ནི་སྙིང་རྗེ་ཆེན་པོའི་སེམས་དང་ལྡན་པས་རྟག་པར་གཞན་ལ་ཕན་གདགས་པའི་ཕྱིར་རང་གི་ལུས་ཁྱད་དུ་བསད་ནས་སེམས་ཅན་རྣམས་ལ་ཕན་འདོགས་པར་བྱེད་དོ། །གཞན་ཡང་འདི་སྙམ་དུ་བདག་གི་ལུས་འདི་ནི་ཚེ་རབས་བརྒྱ་སྟོང་དུ་མའི་བར་དུ་དོན་མེད་པར་རུལ་ཅིང་མྱགས་ཏེ་བོར་བས་ཕན་པ་ཅི་ཡང་བྱས་པ་མེད་ན། ཅིའི་ཕྱིར་དེང་མཆིལ་སྣབས་བཞིན་དུ་ཡོངས་སུ་སྤངས་ནས་བཀྲེས་པ་དག་གིས་ཉེན་པའི་སྡུག་བསྔལ་སེལ་བར་མི་བྱེད་སྙམ་མོ། །དེའི་ཚེ་རྒྱལ་བུ་དེ་དག་ཚིག་དེ་ལྟ་བུ་དག་སྨྲས་ནས་སོ་སོ་ནས་བྱམས་ཤིང་བརྩེ་བའི་སེམས་བསྐྱེད་དེ། སྟག་མོ་ཉམ་ཆུང་བ་དེ་ལ་མིག་མི་གཡེང་བར་བལྟས་ནས་རིང་ཞིག་ཏུ་བསྐོར་ཏེ་ཅིག་ཆར་སྤངས་ནས་དོང་ངོ་། །དེ་ནས་རྒྱལ་བུ་སེམས་ཅན་ཆེན་པོ་འདི་སྙམ་དུ་བདག་གིས་ལུས་དང་སྲོག་བཏང་བའི་དུས་ནི་དེང་ཡིན་ཏེ། དེ་ཅིའི་ཕྱིར་ཞེ་ན། བདག་གིས་ཡུན་རིང་ལུས་འདི་རབ་བཟུང་ཡང་། །མི་གཙང་མནམ་ལ་རྣག་འཛག་ཡིད་མི་འོང་། །ཡོ་བྱད་གོས་ཟས་ཤིང་རྟ་གླང་པོ་རྟ། །ནོར་དང་རིན་ཆེན་རིམ་གྲོ་བྱས་ཀྱང་ནི། །འགྱུར་ཞིང་འཇིག་ཆོས་ངོ་བོ་ཉིད་མི་རྟག །རྟག་ཚོལ་དགང་དཀའ་བསྲུང་བར་རབ་ཏུ་དཀའ། །རྟག་ཏུ་མཆོད་ཅིང་རིམ་གྲོ་བྱས་ཀྱང་ནི། །ནམས་ཀྱང་བདག་འདོར་བྱས་པའི་དྲིན་མི་ཤེས། ། གཞན་ཡང་ལུས་འདི་ནི་མི་བརྟན་པས་བདག་ལ་ཕན་པ་མེད་པ། འཇིགས་སུ་རུང་བས་དགྲ་དང་འདྲ་བ། མི་གཙང་བས་ལུད་དང་མཚུངས་པ་ཡིན་པས། དེང་བདག་གི་ལུས་འདིས་ཡངས་ཤིང་རྒྱ་ཆེ་བའི་ལས་མངོན་པར་བསྒྲུབས་ནས་སྐྱེ་ཤིའི་རྒྱ་མཚོར་གྲུ་གཟིངས་ཆེན་
པོ་བྱས་ཏེ། འཁོར་བ་ཡོངས་སུ་སྤངས་ནས་ངེས་པར་འབྱུང་བ་ཐོབ་པར་བྱའོ་སྙམ་མོ། །གཞན་ཡང་འདི་སྙམ་དུ་གལ་ཏེ་ལུས་འདི་སྤངས་པར་གྱུར་ན་འདི་ཉིད་འབྲས་དང་། ནད་མ་རུངས་པ་ཚད་མེད་པ་དང་། འཇིགས་ཤིང་སྐྲག་པ་བརྒྱ་སྟོང་དུ་མ་སྤངས་པ་ཡིན་ནོ། །ལུས་འདི་ནི་བཤང་གཅི་འབའ་ཞིག་དང་ལྡན་པ། ཆུ་བུར་ལྟ་བུར་མི་བརྟན་པ། སྲིན་བུ་མང་པོ་འདུས་པ། རྩ་རྒྱུས་དང་རུས་པ་ཕན་ཚུན་འབྲེལ་པ། ཤིན་ཏུ་ཡོངས་སུ་སྐྱོ་བར་བྱ་བ། ཉེས་དམིགས་དང་བཅས་པ་ཡིན་པས་དེའི་ཕྱིར་དེང་བདག་གིས་ལུས་ཡོངས་སུ་སྤངས་ནས་བླ་ན་མེད་པ་མཐར་ཕྱིན་པའི་མྱ་ངན་ལས་འདས་པ་ཡོངས་སུ་བཙལ་ཏེ། མྱ་ངན་གྱི་ཉེས་པ་དང་། མི་རྟག་པའི་སྡུག་བསྔལ་དང་། འཁྲུག་པ་གཏན་དུ་སྤངས་ནས་འཁོར་བ་རྒྱུན་བཅད་དེ། ཉེས་པ་རྣམས་སྤངས་ནས་ཏིང་ངེ་འཛིན་དང་། ཤེས་རབ་ཀྱི་སྟོབས་ཀྱིས་ཕུན་སུམ་ཚོགས་པར་བསྒོམས་ནས་བསོད་ནམས་བརྒྱ་སྟོང་མང་པོས་བརྒྱན་པ། ཐམས་ཅད་མཁྱེན་པར་གྱུར་པ། སངས་རྒྱས་མང་པོས་རབ་ཏུ་བསྔགས་པའི་ཆོས་ཀྱི་སྐུ་ཤིན་ཏུ་གྱ་ནོམ་པ་འཐོབ་པར་བྱའོ། །ཐོབ་པར་གྱུར་ནས་ཀྱང་སེམས་ཅན་རྣམས་ལ་ཆོས་ཀྱིས་སྨན་ཚད་མེད་པ་གཏང་བར་བྱའོ་སྙམ་མོ། །དེའི་ཚེ་རྒྱལ་བུ་དེ་ཤིན་ཏུ་བརྟུལ་བའི་དཔའ་སྲན་དང་། སྨོན་ལམ་ཆེན་པོ་བཏབ་ནས་སྙིང་རྗེ་ཆེན་པོའི་བསམ་པས་སེམས་རྟས་ཤིང་འཕེལ་པར་གྱུར་ཀྱང་ཕུ་བོ་གཉིས་སྐྲག་ཅིང་དངངས་པས་བར་ཆད་ཀྱི་བགེགས་བྱས་ནས་སྨོན་པ་མི་འགྲུབ་པར་དོགས་པས། ཕུ་བོ་གཉིས་ལ་གཅེན་གཉིས་སླར་གཤེགས་ཤིག །བདག་ནི་རེ་ཞིག་སླར་མཆིའོ་ཞེས་སྨྲས་སོ། །དེ་ནས་རྒྱལ་བུ་སེམས་ཅན་ཆེན་པོ་སླར་ཚལ་གྱི་ནང་དུ་ཞུགས་ནས་སྟག་མོའི་དྲུང་དུ་ཕྱིན་ཏེ། གོས་ཕུད་ནས་འོད་མའི་སྟེང་དུ་བཞག་སྟེ་སྨོན་ལམ་འདི་སྐད་དུ་བཏབ་བོ། །བདག་ནི་ཆེས་མཁས་སེམས་ཅན་ཀུན་གྱི་ཕྱིར། །བླ་མེད་བྱང་ཆུབ་གནས་ནི་གཉེར་བས་ན། །སྙིང་རྗེ་ཆེན་པོའི་སེམས་བསྐྱེད་གཡོ་བ་མེད། །སྐྱེ་བོས་ཕངས་པའི་ལུས་ནི་གཏོང་བར་བྱེད། །བྱང་ཆུབ་ནད་མེད་གདུང་བ་མེད་པས་ན། །བློ་དང་ལྡན་པ་ཀུན་གྱིས་རབ་ཏུ་མོས། །ཁམས་གསུམ་
སྡུག་བསྔལ་རྒྱ་མཚོའི་སེམས་ཅན་ཀུན། །དེང་བདག་དྲངས་ནས་བདེ་ལ་འགོད་པར་ཤོག །དེ་ནས་རྒྱལ་བུས་ཚིག་དེ་སྐད་སྨྲས་ནས་སྟག་མོ་ལྟོགས་པའི་མདུན་དུ་ལུས་བོར་ཏེ་ཉལ་བ་དང་། བྱང་ཆུབ་སེམས་དཔའ་དེའི་བྱམས་པ་དང་སྙིང་རྗེའི་གཟི་བྱིན་གྱི་མཐུས་སྟག་མོས་ཅི་ཡང་བྱེད་མ་ནུས་སོ། །བྱང་ཆུབ་སེམས་དཔས་དེ་ལྟ་བུ་མཐོང་བ་དང་རི་མཐོན་པོའི་སྟེང་དུ་འཛེགས་ཏེ་ལུས་བོར་ནས་ཡང་འདི་སྙམ་དུ་སྟག་མོ་འདི་ནི་ཉམ་ཆུང་ཞིང་དམའ་བས་བདག་ལ་བཟའ་བར་མི་ནུས་སོ་སྙམ་དུ་བསམས་ནས་ལངས་ཏེ་མཚོན་བཙལ་ན་ཡང་མ་རྙེད་པས་འོད་མ་སྐམ་པོའི་ཚལ་བས་ལྐོག་མར་ཁྲག་ཕྱུང་སྟེ། མཐར་གྱིས་སྟག་མོའི་དྲུང་དུ་ཉེ་བར་བསྙེན་པ་དང་། དེའི་ཚེ་ཇི་ལྟར་རླུང་གིས་ཆུ་བོ་བསྐྱོད་པ་བཞིན་དུ་ས་ཆེན་པོ་ཡང་རྣམ་པ་དྲུག་ཏུ་རབ་ཏུ་གཡོས་པར་གྱུར། ཉི་མ་ཡང་སྒྲ་གཅན་གྱིས་བསྒྲིབས་པ་བཞིན་དུ་འོད་དང་མི་ལྡན་པས་ཕྱོགས་བཅུ་ཀུན་དུ་མུན་ནག་ཏུ་གྱུར་ནས་ལྷ་རྣམས་ཀྱིས་ཀྱང་མེ་ཏོག་དམ་པ་དང་། སྤོས་མཆོག་དམ་པའི་ཕྱེ་མའི་ཆར་ཡང་མངོན་པར་ཕབ་པས་ཚལ་གྱི་ནང་དུ་ཀུན་དུ་ཁྱབ་ཅིང་གང་བར་གྱུར་ཏོ། །དེའི་ཚེ་བར་སྣང་ལ་གནས་པའི་ལྷའི་ཚོགས་མང་པོ་རྣམས་ཀྱིས་དངོས་པོ་དེ་ལྟ་བུ་མཐོང་བ་དང་། རྗེས་སུ་ཡི་རང་བའི་སེམས་བསྐྱེད་ནས་སྔོན་ཆད་ནམ་ཡང་འདི་ལྟ་བུ་མ་བྱུང་ངོ་ཞེས་བསྔགས་པ་བརྗོད་དེ་ཐམས་ཅད་ཀྱིས་སྐྱེས་བུ་ཆེན་པོ་ལེགས་སོ་ལེགས་སོ་ཞེས་བསྔགས་པ་བརྗོད་ནས་ཚིགས་སུ་བཅད་དེ་སྨྲས་པ། སྐྱེས་ཆེན་ཡོངས་སྐྱོབ་སྙིང་རྗེའི་སེམས་བསྐྱེད་ནས། །བུ་གཅིག་བཞིན་དུ་སེམས་ཅན་མཉམ་པར་ལྟ། །རབ་དཔའ་དགའ་ཆེན་སེམས་ལ་འཇུངས་མེད་པས། །ལུས་སྤངས་ཕོངས་སྐྱོབ་བསོད་ནམས་དཔག་པར་དཀའ། །ངེས་པར་རྟག་བདེ་གྱ་ནོམ་གནས་ཕྱིན་ནས། །འཁོར་བའི་འཆིང་བ་མང་པོ་གཏན་དུ་སྤོང་། ། རིང་པོར་མི་ཐོགས་བྱང་ཆུབ་འབྲས་འཐོབ་ནས། །ཉེར་ཞི་བདེ་བ་སྐྱེ་མེད་མངོན་རྟོགས་འགྱུར། །དེའི་ཚེ་སྟག་མོ་ལྟོགས་པ་དེས་བྱང་ཆུབ་སེམས་དཔའི་ལྐོག་མ་ནས་ཁྲག་ཟག་པ་མཐོང་བ་དང་ཁྲག་བལྡགས་ཏེ་ཤ་མ་ལུས་པར་ཟོས་པས་རུས་པ་འབའ་ཞིག་ལུས་པར་བྱས་སོ། །
དེ་ནས་རྒྱལ་བུ་ཆེན་པོས་ས་གཡོས་པ་མཐོང་བ་དང་ནུ་བོ་ལ་སྨྲས་པ། ས་ཆེན་རི་ཀླུངས་ཀུན་ཀྱང་རབ་ཏུ་གཡོས། །ཕྱོགས་ཀུན་མུན་ནག་ཉི་མའི་འོད་མི་ལྡན། །ལྷ་ཡི་མེ་ཏོག་ལྷུང་བས་མཁའ་ཁྱབ་པས། །འདི་ནི་ནུ་བོས་ངེས་པར་ལུས་སྤངས་རྟགས། །རྒྱལ་བུ་འབྲིང་པོས་ཕུ་བོས་དེ་སྐད་སྨྲས་པ་ཐོས་པ་དང་ཚིགས་སུ་བཅད་དེ་སྨྲས་པ། སྟག་མོ་ལུས་ལྟོགས་ཤིན་ཏུ་ཉམ་ཆུང་བ། བཀྲེས་གཟིར་བུ་ཕྲུག་བཟའ་དོགས་མཐོང་ནས་ནི། །སེམས་ཅན་ཆེན་པོ་སྨྲེ་བ་དག་ཐོས་པས། །ནུ་བོས་ལུས་བཏང་དེང་བདག་ཐེ་ཙོམ་འཚལ། །དེ་ནས་རྒྱལ་བུ་གཉིས་མྱ་ངན་དང་། སྡུག་བསྔལ་ཆེན་པོ་སྐྱེས་པས་སྨྲེ་སྔགས་བཏོན་ཏེ་ངུས་ནས་གཉིས་ཀ་ལྷན་ཅིག་ཏུ་སླར་སྟག་མོའི་དྲུང་དུ་ཕྱིན་ཏེ། ནུ་བོའི་གོས་ནི་འོད་མའི་ཡལ་ག་ལ་བཀལ། རུས་པ་དང་། སྐྲ་ནི་ཀུན་དུ་འཐོར། ཁྲག་བབས་པས་ནི་རྫབ་ཏུ་གྱུར་ནས་ས་གཞི་ཀུན་དུ་ཁྱབ་པར་གྱུར་པ་མཐོང་བ་དང་བརྒྱལ་ནས་རང་གི་ལུས་ཀྱང་གཟུང་མ་ནུས་པས་རུས་པའི་དྲུང་དུ་ལུས་བརྡབས་ཏེ། རིང་ཞིག་ལོན་ནས་དྲན་པ་སླར་ཐོབ་པ་དང་། ལངས་ནས་ལག་པ་བཏེག་སྟེ་རབ་ཏུ་ངུས་ནས་སྨྲེ་སྔགས་བཏོན་པ། བདག་ཅག་ནུ་བོ་བྱད་སྡུག་མཛེས། །ཕ་མ་གཉི་ག་ལྷག་པར་བྱམས། །ཅི་ཕྱིར་ལྷན་ཅིག་ཕྱིར་བྱུང་ནས། །ལུས་སྤངས་སླར་ནི་མ་ལོག་གྱུར། །གལ་ཏེ་ཕ་མས་དྲིས་གྱུར་ན། །བདག་ཅག་ལན་ནི་ཇི་སྐད་གདབ། །ལྷན་ཅིག་སྲོག་ནི་བཏང་སླ་ན། །རང་གི་ལུས་ནི་ཅི་ཕྱིར་བཞག ། དེ་ནས་རྒྱལ་བུ་གཉིས་སྨྲེ་སྔགས་བཏོན་ཏེ་ངུས་ནས་ཡིད་ལ་གཅགས་བཞིན་དུ་མཐར་གྱིས་སྤངས་ཏེ་དོང་ངོ་། །དེའི་ཚེ་རྒྱལ་བུ་ཐ་ཆུངས་ཀྱིས་ཁྲིད་པའི་གཡོག་འཁོར་རྣམས་ཕན་ཚུན་གཅིག་ལ་གཅིག་འདི་སྐད་དུ་རྒྱལ་བུ་གང་ན་ཡོད་པ་ལྷན་ཅིག་བཙལ་བའི་རིགས་སོ་ཞེས་སྨྲས་པར་གྱུར་ཏོ། །དེའི་ཚེ་རྒྱལ་པོའི་བཙུན་མོ་དམ་པ་ཡང་ཐོག་མཐོན་པོའི་སྟེང་དུ་ཉལ་བའི་རྨི་ལམ་ན་ལྟས་ངན་གྱི་མཚན་མ་མཐོང་བ་འདི་ལྟ་སྟེ། ནུ་མ་གཉིས་གཞན་གྱིས་བཅད་པ་དང་། སོ་ལྷུང་བ་དང་། ཕུག་རོན་གྱི་ཕྲུ་གུ་གསུམ་ཐོབ་པ་ལས་གཅིག་ནི་ཁྲས་
ཁྱེར། གཉིས་ནི་དངངས་ཤིང་སྐྲག་པར་གྱུར་པ་དག་མཐོང་བར་གྱུར་ཏོ། །ས་གཡོས་པའི་ཚེ་བཙུན་མོ་སད་དེ་སེམས་ལ་མྱ་ངན་ཆེན་པོ་སྐྱེས་ནས་འདི་སྐད་དུ་སྨྲས་སོ། །ཅི་ཕྱིར་དེང་ནི་ས་ཆེན་རབ་ཏུ་གཡོས། །ཆུ་ཀླུང་ནགས་ཚལ་ལྗོན་ཤིང་ཀུན་ཀྱང་འགུལ། །ཉི་མའི་འོད་མེད་གཡོགས་ཤིང་བསྒྲིབས་པ་འདྲ། །མིག་འགུལ་ནུ་གཡོ་སྔོན་ཆད་ཡང་མི་འདྲ། །སྙིང་ལ་མདས་ཕོག་བཞིན་དུ་སྡུག་བསྔལ་གཟིར། །ལུས་ཀུན་རབ་གཡོ་བདེ་བ་ཅི་ཡང་མེད། །བདག་གིས་རྨི་ལམ་ལྟས་ངན་མཐོང་བས་ན། །ངེས་པར་སྔོན་མེད་ལྟས་ངན་དངོས་པོ་ཡོད། །བཙུན་མོའི་ནུ་མ་གཉིས་ལས་ཞོ་ཟགས་པ་དང་འདི་སྙམ་དུ་འདི་ནི་གདོན་མི་ཟ་བར་ལྟས་ངན་ཀྱི་དངོས་པོ་སྟོན་པ་ཡིན་ནོ་སྙམ་མོ། །དེའི་ཚེ་ནང་འཁོར་མ་ཞིག་ཕྱི་རོལ་གྱི་མི་རྣམས་རྒྱལ་བུ་བཙལ་བ་ལས་ད་དུང་མ་རྙེད་དོ་ཞེས་ཟེར་བ་ཐོས་པ་དང་། སེམས་ལ་ཤིན་ཏུ་སྐྲག་ཅིང་འཇིགས་པ་སྐྱེས་པས་ཕོ་བྲང་གི་ནང་དུ་སོང་སྟེ་བཙུན་མོ་ལ་འདི་སྐད་ཅེས་སྨྲས་སོ། །ལྷ་མོ་མཁྱེན་ལགས་སམ་སླད་རོལ་གྱི་མི་རྣམས་ལས་ཀུན་དུ་སོ་སོར་རྒྱལ་བུ་བཙལ་བ་ལས་ད་དུང་མ་རྙེད་ཅེས་མཆི་བ་ཐོས་ལགས་སོ། །དེ་ནས་བཙུན་མོ་དེས་ཚིག་དེ་སྐད་སྨྲས་པ་ཐོས་པ་དང་། མྱ་ངན་ཆེན་པོ་སྐྱེས་པས་སྨྲེ་སྔགས་བཏོན་ཏེ། མིག་མཆི་མས་གང་བཞིན་དུ་རྒྱལ་པོའི་དྲུང་དུ་ཕྱིན་ནས་རྒྱལ་པོ་ལ་འདི་སྐད་ཅེས་གསོལ་ཏོ། །ལྷ་ཆེན་པོ་བདག་གིས་སླད་རོལ་གྱི་མི་རྣམས་ལས་འདི་སྐད་དུ་བདག་གི་བུ་སྡུག་ཐ་ཆུངས་སྟོར་ཅེས་མཆི་བ་ཐོས་ལགས་སོ། །རྒྱལ་པོས་ཚིག་དེ་ཐོས་པ་དང་ཤིན་ཏུ་སྐྲག་པར་གྱུར་པས་བརྣངས་བཞིན་དུ་སྨྲེ་ཚིག་འདི་སྐད་དུ་ཀྱི་ཧུད་སྡུག་བསྔལ་ལོ། །དེང་ངའི་བུ་ཡིད་དུ་འོང་བ་སྟོར་བར་གྱུར་ཏོ་ཞེས་སྨྲས་ནས་མཆི་མ་ཕྱིས་ཏེ། བཙུན་མོ་ལ་སྤྲོ་བ་བསྐྱེད་ནས་འདི་སྐད་དུ་བཞིན་བཟང་མ་ཁྱོད་མྱ་ངན་མ་བྱེད་ཅིག །ངས་དེང་ལྷན་ཅིག་ཕྱིར་བྱུང་སྟེ་བུ་སྡུག་བཙལ་བར་བྱའོ་ཞེས་སྨྲས་ནས། རྒྱལ་པོ་བཙུན་མོ་དང་། སྐྱེ་བོའི་ཚོགས་མང་པོ་དང་ལྷན་ཅིག་ཏུ་གྲོང་ཁྱེར་ནས་ཕྱིར་བྱུང་སྟེ། སོ་སོར་གྱེས་ཏེ་
ཕྱོགས་ཀུན་དུ་བཙལ་བ་ལས་རིང་པོ་མ་ལོན་པར་བློན་པོ་ཆེན་པོ་ཞིག་ཉེ་བར་མདུན་དུ་འོངས་ཏེ་རྒྱལ་པོ་ལ་འདི་སྐད་ཅེས་གསོལ་ཏོ། །ལྷ་རྒྱལ་བུ་མི་བཞུགས་ཞེས་ཐོས་པས་ཐུགས་ངན་མི་མཛད་དུ་གསོལ། རྒྱལ་བུ་ཐ་ཆུངས་ནི་ད་དུང་མི་གདའ་ལགས་སོ། །རྒྱལ་པོས་ཚིག་དེ་ཐོས་པ་དང་སྨྲེ་སྔགས་བཏོན་ནས་འདི་སྐད་དུ་ཀྱི་ཧུད་ངའི་བུ་ཡིད་དུ་འོང་བ་སྟོར་བར་གྱུར་ཏོ་ཞེས་སྨྲས་པར་གྱུར་ཏོ། །དང་པོ་བུ་ཡོད་ཚེ་ན་དགའ་བ་ཆུང་། །ཕྱིས་ནི་བུ་སྟོར་ཚེ་ན་སྡུག་བསྔལ་ཆེ། །གལ་ཏེ་ངའི་བུའི་སྲོག་ནི་སླར་ཐོབ་ན། ། ངའི་ལུས་ཤི་ཡང་སྡུག་བསྔལ་ཅི་ཡང་མེད། །བཙུན་མོས་དེ་སྐད་ཐོས་པ་དང་། །དཔེར་ན་མདས་ཕོག་པ་བཞིན་དུ་མྱ་ངན་གྱིས་ཀུན་དུ་དཀྲིས་པར་གྱུར་པས་སྨྲེ་ཚིག་འདི་སྐད་ཅེས་སྨྲས་སོ། །བདག་གི་བུ་གསུམ་འཁོར་དང་བཅས་པར་ནི། །ནགས་ཚལ་དོང་སྟེ་ལྷན་ཅིག་རྩེ་བ་ལས། །བུ་སྡུག་ཐ་ཆུངས་གཅིག་པུ་མ་འོངས་པས། །ངེས་པར་འབྲལ་བའི་ལྟས་ངན་དངོས་ཡོད་འགྱུར། །དེའི་འོག་ཏུ་ཡང་བློན་པོ་འབྲིང་པོ་རྒྱལ་པོའི་དྲུང་དུ་ཉེ་བར་འོངས་པ་ལ་རྒྱལ་པོས་བློན་པོ་དེ་ལ་བུ་སྡུག་གང་ན་འདུག་ཅེས་སྨྲས་པ་ལས། བློན་པོ་འབྲིང་པོས་དེ་ཡིད་ལ་གཅགས་ཏེ་ངུས་པས་ལྐོག་མ་དང་ལྕེ་ཡང་སྐམས་ནས་ཚིག་འབྱིན་ཅིང་ལན་འདེབས་ཀྱང་མ་ནུས་པ་དང་བཙུན་མོས་འདི་སྐད་ཅེས་དྲིས་སོ། །བུ་ཆུང་ད་ལྟར་གང་ན་མྱུར་དུ་སྨྲོས། །བདག་གི་ལུས་ཀུན་རབ་ཏུ་བསྲེགས་པར་གྱུར། །མྱོས་འཁྲུགས་རྨོངས་པས་ནང་གི་སེམས་ཉིད་སྟོར། ། བདག་གི་བྲང་ནི་དེ་རིང་གས་སྙམ་བྱེད། །དེ་ནས་བློན་པོ་འབྲིང་པོས་རྒྱལ་བུས་ལུས་ཡོངས་སུ་བཏང་བའི་དངོས་པོ་དེ་དག་ཞིབ་ཏུ་རྒྱལ་པོ་ལ་གསོལ་ཏེ་ཤེས་པར་བྱས་པ་དང་། རྒྱལ་པོ་དང་། བཙུན་མོས་གཏམ་དེ་ཐོས་ནས་སྨྲེ་ཞིང་མཆི་མས་བརྣངས་བཞིན་དུ་ལུས་ཡོངས་སུ་བཏང་བའི་ས་ཕྱོགས་སུ་མྱུར་ཞིང་རིངས་པར་དོང་སྟེ། འོད་མའི་ཚལ་བྱང་ཆུབ་སེམས་དཔས་ལུས་བཏང་བའི་གནས་སུ་ཕྱིན་ནས་རུས་པ་རྣམས་ཀུན་དུ་འཐོར་བ་མཐོང་བ་དང་ཅིག་ཅར་ས་ལ་འགྱེལ་ཏེ། ཤི་བ་དང་འདྲ་བར་བརྒྱལ་བར་གྱུར་པས་དཔེར་ན་རླུང་དྲག་པོས་ལྗོན་ཤིང་ཆེན་པོ་བསྒྱེལ་བཞིན་
དུ་སེམས་རྨོངས་ཤིང་དྲན་པ་སྟོར་བས་ཤེས་པ་ཅི་ཡང་མེད་པར་གྱུར་ཏོ། །དེ་ནས་བློན་པོ་ཆེན་པོ་ལ་སོགས་པས་ཆུས་ཀུན་དུ་གཏོར་བ་དང་། རྒྱལ་པོ་དང་བཙུན་མོ་རིང་ཞིག་ལོན་ནས་གདོད་དྲན་པ་ཐོབ་པར་གྱུར་ཏོ། །དེ་ནས་ལག་པ་བཏེག་སྟེ་འདུག་ནས་སྨྲེ་ཚིག་སྨྲས་པ། ཀྱི་ཧུད་བུ་སྡུག་མཛེས་པའི་མཚན་དང་ལྡན། ཅིའི་ཕྱིར་འཆི་བའི་སྡུག་བསྔལ་སྔར་འོངས་གཙེས། གལ་ཏེ་ཁྱོད་ཀྱི་མདུན་དུ་བདག་ཤི་ན། །འདི་འདྲའི་སྡུག་བསྔལ་མཐོང་བར་ག་ལ་འགྱུར། །དེ་ནས་བཙུན་མོ་མྱོས་ཤིང་བརྒྱལ་བ་ཁད་ཀྱིས་ཞི་བར་གྱུར་ནས་ཀྱང་སྐྲ་ལོང་ལོང་པོར་གྱུར་ཏེ་ལག་པ་གཉིས་ཀྱིས་བྲང་བརྡུངས་ནས་ཉ་སྐམས་ལ་འགྲེ་བ་བཞིན་དུ་ས་ལ་འགྲེས་ཏེ། བ་བུ་སྟོར་བ་བཞིན་དུ་ངུས་ནས་སྨྲེ་ཚིག་སྨྲས་པ། བདག་གི་བུ་ནི་སུས་གཏུབས་ན། །རུས་པ་ལྷག་མ་ས་ལ་གཏོར། །བདག་གི་བུ་སྡུག་སྟོར་བས་ན། །མྱ་ངན་སྨྲེ་བ་རང་མི་ཐེག ། ཀྱི་ཧུད་བུ་ནི་སུས་བསད་ན། མྱ་ངན་དངོས་པོ་འདི་འདྲ་མྱོང་། །བདག་སྙིང་རྡོ་ནི་མ་ཡིན་ན། །ཅི་ཡི་ཕྱིར་ན་གས་མ་གྱུར། །བདག་གི་རྨི་ལམ་ནུ་མ་གཉིས། །གཞན་དག་གིས་ནི་བཅད་པ་དང་། །སོ་རྣམས་ལྷུང་བར་མཐོང་བས་ན། །དེང་ནི་སྡུག་བསྔལ་ཆེན་པོ་མྱོང་། །ཕུག་རོན་ཕྲུ་གུ་གསུམ་ལས་ནི། །གཅིག་ནི་ཁྲས་ཁྱེར་མཐོང་བས་ན། །དེང་ནི་བུ་སྡུག་སྟོར་གྱུར་པས། །ལྟས་ངན་སྟོན་ལ་མི་བདེན་མེད། །དེ་ནས་རྒྱལ་བུ་ཆེན་པོ་དེ་བཙུན་མོ་དང་། བུ་གཉིས་དང་བཅས་པར་བརྩེ་བས་གཏུགས་ཏེ་ངུས་ནས་རྒྱན་ཐམས་ཅད་བཀྲོལ་ཏེ་སྐྱེ་བོའི་ཚོགས་མང་པོ་དང་ལྷན་ཅིག་ཏུ་བྱང་ཆུབ་སེམས་དཔའ་བཞག་པའི་ལུས་ཀྱིས་རིང་བསྲེལ་བསྡུས་ཏེ་མཆོད་པ་བྱ་བའི་ཕྱིར་མཆོད་རྟེན་གྱི་ནང་དུ་བཞག་གོ། །ཀུན་དགའ་བོ་ཁྱོད་ཀྱིས་འདི་ཉིད་ནི་བྱང་ཆུབ་སེམས་དཔའ་དེའི་རིང་བསྲེལ་ཡིན་པར་རིག་པར་བྱའོ། །ཡང་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ང་སྔོན་འདོད་ཆགས་དང་། ཞེ་སྡང་དང་། གཏི་མུག་ལ་སོགས་པའི་ཉོན་མོངས་པ་དང་ལྡན་པའི་ཚེ་ན་ཡང་སེམས་ཅན་དམྱལ་བ་དང་། ཡི་དགས་དང་། དུད་འགྲོའི་སྐྱེ་གནས་ལ་སོགས་པའི་འགྲོ་བ་ལྔ་པོ་དག་ཏུ་ཡང་རྐྱེན་ཇི་ལྟ་བ་བཞིན་དུ་ཡོངས་སུ་
བསྐྱབས་ནས་ཕན་བཏགས་ཏེ་ངེས་པར་འབྱུང་བ་ཐོབ་པར་བྱས་ན། །ད་ལྟར་ཉོན་མོངས་པ་ཐམས་ཅད་ཟད་ནས་བག་ཆགས་ཀྱི་ལྷག་མ་མེད་དེ། ལྷ་དང་མིའི་སྟོན་པར་གྱུར་ནས་ཐམས་ཅད་མཁྱེན་པ་དང་ལྡན་པས་སེམས་ཅན་རེ་རེའི་ཕྱིར་ཡང་བསྐལ་པ་མང་པོའི་བར་དུ་སེམས་ཅན་དམྱལ་བ་དང་། གནས་གཞན་དག་ཏུ་གནས་ཏེ། སྡུག་བསྔལ་སྣ་ཚོགས་དང་དུ་བླངས་ནས་སྐྱེ་ཤི་དང་ཉོན་མོངས་པའི་འཁོར་བ་ལས་ངེས་པར་འབྱུང་བ་འཐོབ་པར་བྱེད་པ་ལྟ་སྨོས་ཀྱང་ཅི་དགོས། དེ་ནས་བཅོམ་ལྡན་འདས་ཀྱིས་དོན་དེ་ཉིད་ཡང་བསྟན་པའི་ཕྱིར་ཚིགས་སུ་བཅད་དེ་བཀའ་སྩལ་པ། ང་སྔོན་འདས་པའི་དུས་ཀྱི་ཚེ། །བསྐལ་པ་གྲངས་མེད་ཚད་མེད་སྙེད། །རེས་འགའ་ཡུལ་གྱི་རྒྱལ་པོ་བྱས། །རེས་འགའ་རྒྱལ་བུ་བྱས་པ་ན། །རྟག་པར་སྦྱིན་པ་ཆེར་བཏང་བས། །ཤིན་ཏུ་ཕངས་པའི་ལུས་བཏང་ནས། །འཁོར་བ་ལས་ནི་ངེས་བྱུང་སྟེ། །བྱང་ཆུབ་དམ་པར་ཕྱིན་པར་སྨོན། །སྔོན་བྱུང་ཡུལ་ཆེན་ཞིག་ཏུ་ནི། །ཡུལ་བདག་ཤིང་རྟ་ཆེ་ཞེས་བྱ། །རྒྱལ་བུ་དཔའ་བོ་ཞེས་བྱ་བ། །རྟག་པར་སྦྱིན་གཏོང་སེར་སྣ་མེད། །དེ་ལ་ཕུ་བོ་གཉིས་ཡོད་དེ། །སྒྲ་ཆེན་ལྷ་ཆེན་པོ་ཞེས་བྱ། །གསུམ་པོ་ལྷན་ཅིག་ཕྱིར་བྱུང་སྟེ། །མཐར་གྱིས་རི་དང་ནགས་ཚལ་ཕྱིན། །སྟག་མོ་བཀྲེས་པས་ཉེན་མཐོང་ནས། །འདི་འདྲའི་སེམས་ནི་སྐྱེས་པར་གྱུར། །སྟག་མོ་བཀྲེས་མེས་རབ་བསྲེགས་ཀྱང་། །གཞན་བཟར་རུང་བ་ཅི་ཡང་མེད། །སྐྱེས་ཆེན་དེ་འདྲ་མཐོང་ནས་ནི། །དེ་ཡིས་བུ་ནི་ཟོས་དོགས་ཕྱིར། །ཆགས་མེད་ལུས་ནི་རབ་བཏང་ནས། །བུ་སྐྱབས་སྨས་པ་མེད་པར་བྱས། །ས་ཆེན་དང་ནི་རི་རྣམས་ཀྱང་། །དུས་གཅིག་ཐམས་ཅད་རབ་ཏུ་གཡོས། །ཆུ་ཀླུང་རྒྱ་མཚོ་ཤིན་ཏུ་འཁྲུགས། །རླབས་དྲག་ཆུ་ནི་གྱེན་དུ་འབབ། །གནམ་ས་འོད་ནི་སྟོར་བས་ན། །མུན་ནག་ཅི་ཡང་མཐོང་བ་མེད། །ནགས་ཚལ་དགོན་པའི་གཅན་གཟན་རྣམས། ། འཕུར་རྒྱུག་གནས་ནི་ཡོངས་སུ་སྤངས། །ཕུ་གཉིས་ཅི་ཕྱིར་མ་ལོག་ཅེས། །མྱ་ངན་བརྩེ་བའི་སྡུག་བསྔལ་སྐྱེས། །གཡོག་འཁོར་མང་པོ་རྣམས་དང་ནི། །ནགས་ཚལ་ཀུན་དུ་ཡོངས་སུ་བཙལ། །སྤུན་གཉིས་ལྷན་ཅིག་རབ་འགྲོགས་ཏེ། །རི་གཟར་ནགས་སུ་ཕྱིན་ནས་ནི། །ཕྱོགས་བཞིར་
བལྟས་ཀྱང་ཅི་མ་མཐོང་། །སྟག་མོ་མཐོང་བའི་ནགས་སྟོང་དུ། །མ་དང་བུ་བདུན་བཅས་པར་ནི། །ཐམས་ཅད་ཁྲག་གིས་ཁ་བསྐུས་དང་། །རུས་པ་ལྷག་མ་སྐྲ་རྣམས་ནི། །ས་ལ་ཀུན་དུ་འཐོར་བ་མཐོང་། །གཞན་ཡང་ཁྲག་ནི་ཟགས་པ་རྣམས། །འོད་མའི་ཚལ་ཀུན་སྦགས་པ་དག །ཕུ་བོ་གཉིས་ཀྱིས་མཐོང་ནས་ནི། །སེམས་ལ་འཇིགས་སྐྲག་ཆེན་པོ་སྐྱེས། །གཉི་ག་བརྒྱལ་ནས་ས་ལ་འགྱེལ། །འཁྲུགས་མྱོས་ཅི་ཡང་མི་དྲན་པས། །ས་རྡུལ་དག་གིས་ལུས་ཀུན་གོས། །རྣམ་ཤེས་དྲུག་ནི་དྲན་པ་ཉམས། །རྒྱལ་བུ་གཡོག་ནི་མང་པོ་རྣམས། །ཆོ་ངེ་སེམས་ལ་མྱ་ངན་སྐྱེས། །ཆུས་གཏོར་དྲན་པ་ཐོབ་ནས་ཀྱང་། །ལག་བཏེག་སྐད་ཆེར་ཕྱུང་སྟེ་ངུས། །བྱང་ཆུབ་སེམས་དཔས་ལུས་བཏང་ཚེ། །བྱམས་པའི་མ་ནི་ཕོ་བྲང་ན། །བུད་མེད་ལྔ་བརྒྱ་རྣམས་དང་ནི། །ལྷན་ཅིག་ལོངས་སྤྱོད་མྱོང་བ་ལས། །བཙུན་མོ་དམ་པའི་ནུ་མ་གཉིས། །རང་གི་ནུ་ཞོ་ཟགས་གྱུར་པས། །ལུས་ཀུན་ཁབ་ཀྱིས་ཕུག་པ་བཞིན། །ཤིན་ཏུ་སྡུག་བསྔལ་རབ་མི་བདེ། །བུ་སྟོར་འདུ་ཤེས་སྐྱེས་པས་ན། །མྱ་ངན་ཟུག་རྔུ་སེམས་ལ་ཟུག །རྒྱལ་པོ་ཆེན་པོ་ཤེས་བྱས་ནས། །སྡུག་བསྔལ་དངོས་པོ་དེ་དག་བཤད། །ཆོ་ངེས་སྨེ་བ་མི་བཟོད་པས། །བརྩེ་བའི་སྐད་ཀྱིས་རྒྱལ་པོ་ལ། །རྒྱལ་པོ་ཆེན་པོ་མཁྱེན་པར་མཛོད། །དེང་བདག་སྡུག་བསྔལ་ཆེན་པོ་སྐྱེས། །ནུ་ཞོ་གཉིས་ནི་རང་བྱུང་པས། །བཀག་ཀྱང་བསམ་པ་བཞིན་མ་གྲུབ། །ཁབ་ཀྱིས་ལུས་ཀུན་ཕུག་པ་བཞིན། །མྱ་ངན་བྲང་ནི་གས་ལ་ཐུག། །བདག་གི་གཡར་ལམ་སྔ་ལྟས་ངན། །ངེས་པར་བུ་སྡུག་སྟོར་བར་གྱུར། །ལྷས་ནི་བདག་གི་སྲོག་སྐྱོབས་ལ། །བུ་ནི་གུམ་གསོན་མཁྱེན་པར་མཛོད། །གཡར་ལམ་ཕུག་རོན་གསུམ་མཐོང་བ། །ཆུང་ངུ་དེ་ནི་བུ་སྡུག་ལགས། །ཁྲས་ནི་ཕྲོགས་ཏེ་འཚལ་བས་ནི། །མྱ་ངན་རྫོགས་པར་གསོལ་བར་དཀའ། །དེང་བདག་མྱ་ངན་མཚོར་བྱིང་བས། །འཆི་བར་འགྱུར་བ་རིང་མི་ཐོགས། །བུ་སྲོག་མི་གསོན་བློ་བ་ཆུང་། །མྱུར་བ་ཉིད་དུ་བཙལ་བར་གསོལ། །གཞན་ཡང་སླད་རོལ་མི་རྣམས་ལས། །བུ་ཆུང་མ་རྙེད་ཐོས་པས་ན། །དེང་བདག་སེམས་ནི་རབ་མི་བདེ། །ལྷས་ནི་བདག་ལ་བརྩེ་བར་མཛོད། །བཙུན་མོས་དེ་སྐད་སྨྲས་
ནས་ནི། །ལུས་བཏེག་ས་ལ་རབ་ཏུ་བརྡབས། །རབ་བརྩེ་ན་བས་སེམས་བརྒྱལ་མྱོས། །རབ་རྨོངས་ཤེས་པ་ཅི་ཡང་མེད། །ནང་འཁོར་བུད་མེད་བཙུན་མོ་དེ། །བརྒྱལ་ཏེ་ས་ལ་འགྱེལ་མཐོང་སྟེ། །སྐད་ཆེན་ཕྱུང་སྟེ་རབ་ཏུ་ངུས། །མྱ་ངན་དངངས་སྐྲག་གནས་ཀྱང་སྟོར། །རྒྱལ་པོས་ཚིག་དེ་ཐོས་པས་ན། །མྱ་ངན་རང་ཉིད་གཟུང་མ་ནུས། །བློན་པོ་ཐམས་ཅད་བཀུག་ནས་ནི། །བུ་སྡུག་ཚོལ་བ་ཡོངས་སུ་བཀྱེ། །ཐམས་ཅད་གྲོང་ཁྱེར་ཕྱིར་བྱུང་སྟེ། །དེ་དང་དེ་དག་ཀུན་དུ་བཙལ། །ངུས་ནས་མི་ནི་མང་པོ་ལ། །རྒྱལ་བུ་གང་ན་ཡོད་ཅེས་སྨྲས། །ད་ལྟར་གསོན་ནམ་འོན་ཏེ་ཤི། །གང་དུ་སོང་བ་སུ་ཡིས་ཤེས། །ཇི་ལྟར་བྱས་ན་མཐོང་གྱུར་ནས། །བདག་ཅག་མྱ་ངན་བསལ་བར་འགྱུར། །སྐྱེ་བོ་མང་པོ་ཐམས་ཅད་ཀུན། །རྒྱལ་བུ་དེ་ནི་ཤི་ཟེར་བས། །ཐོས་པ་ཐམས་ཅད་རབ་ཏུ་གདུང་། །སྨྲེ་སྔགས་སྡུག་བསྔལ་བརྗོད་པར་དཀའ། ། དེ་ཚེ་རྒྱལ་པོ་ཤིང་རྟ་ཆེ། །ཆོ་ངེས་སྨྲས་ནས་སྟན་ལས་ལངས། །བཙུན་མོའི་དྲུང་དུ་ཉེར་སོང་སྟེ། །དེ་ཡི་ལུས་ལ་ཆུས་ཀྱང་གཏོར། །བཙུན་མོ་ཆུས་ནི་གཏོར་བས་ན། །རིང་ཞིག་ལོན་ནས་དྲན་པ་ཐོབ། །རབ་སྨྲེས་རྒྱལ་པོ་ལ་ཞུས་པ། །བདག་བུ་ད་ལྟ་གང་ན་མཆིས། །རྒྱལ་པོས་བཙུན་མོ་ལ་བསྒོ་བ། །ངས་ནི་ཕོ་ཉ་མང་བཀྱེ་སྟེ། །ཕྱོགས་བཞིར་རྒྱལ་བུ་ཚོལ་བཅུག་ན། །ད་དུང་གཏམ་སྐྱེས་ཡོང་མ་འོངས། །རྒྱལ་པོས་བཙུན་མོ་ཡང་བསྒོ་བ། །ཁྱོད་ནི་མྱ་ངན་མ་བྱེད་པར། །རེ་ཞིག་རང་ཉིད་བདེ་བར་བྱོས། །ལྷན་ཅིག་ཕྱིར་བྱུང་བཙལ་བར་བྱ། །དེ་ནས་རྒྱལ་པོ་བཙུན་མོར་བཅས། །བཞོན་པ་ཞོན་ནས་མདུན་དུ་ཆས། །སྨྲེ་བའི་སྐད་ཀྱིས་ཆོ་ངེས་བཏབ། །གདུང་སེམས་མེ་ནི་འབར་བ་འདྲ། །ཡ་རབས་མ་རབས་བརྒྱ་སྟོང་རྣམས། །རྒྱལ་པོའི་རྗེས་སུ་གྲོང་ཁྱེར་བྱུང་། །བརྩེ་བའི་ངུ་སྒྲ་མི་འཆད་པར། །སོ་སོར་རྒྱལ་བུ་ཡོངས་སུ་བཙལ། ། རྒྱལ་པོས་བུ་སྡུག་བཙལ་བའི་ཕྱིར། །མིག་གིས་ཕྱོགས་བཞིར་བལྟས་པ་ལས། །སྐྲ་བཤིག་ཁྲག་གིས་ལུས་བསྐུས་ཏེ། །ལུས་ཀུན་རྡུལ་གྱིས་གོས་པ་དང་། །ངུས་ནས་མདུན་བཅད་འོང་བ་ཡི། །མི་ཞིག་ཀྱང་ནི་མཐོང་བར་གྱུར། །རྒྱལ་པོས་ལྟས་ངན་དེ་མཐོང་ནས། །ལྷག་པར་
མྱ་ངན་སྐྱེས་པར་འགྱུར། །རྒྱལ་པོས་ལག་པ་གཉིས་བཏེག་ནས། །བརྩེ་བས་ངུས་ཏེ་བཀུག་མ་ནུས། །ཐོག་མར་བློན་པོ་ཆེན་པོ་ཞིག །རིངས་བརྟབས་རྒྱལ་པོའི་དྲུང་འོངས་ནས། །རྒྱལ་པོ་དེ་ལ་འདི་སྐད་སྨྲས། །ལྷ་ནི་ཐུགས་ངན་མི་མཛད་གསོལ། །ལྷ་ཡི་ཐུགས་བརྩེ་སྲས་བུ་དེ། །ད་དུང་རྙེད་པར་མ་གྱུར་ཀྱང་། །རིང་པོར་མི་ཐོགས་ཕྱིན་པར་མཆི། །ལྷ་ནི་ཐུགས་ངན་མི་མཛད་གསོལ། །རྒྱལ་པོ་ཡང་ནི་སོང་བ་ལས། །བློན་པོ་འབྲིང་པོ་འོངས་པ་མཐོང་། །བློན་པོ་རྒྱལ་པོའི་དྲུང་འོངས་ནས། །ངུས་ཏེ་རྒྱལ་ལ་འདི་སྐད་སྨྲས། །རྒྱལ་བུ་གཉིས་ནི་བཞུགས་པ་ཡང་། །མྱ་ངན་ཞུགས་ཀྱིས་ཡོངས་སུ་གདུངས། །རྒྱལ་བུ་ཐ་ཆུངས་གང་ལགས་པ། །དེ་ནི་མི་རྟག་པ་ཡིས་ཟིན། །བུ་བཙས་སྟག་མོ་ལྟོགས་པ་ཞིག །བུ་འཚལ་སྙམ་པ་གཟིགས་ནས་ནི། །རྒྱལ་བུ་སེམས་ཅན་ཆེན་པོ་ཡིས། །ཐུགས་རྗེ་ཆེན་པོའི་སེམས་བསྐྱེད་དེ། །བླ་མེད་ལམ་ནི་གཉེར་བ་དང་། །མང་པོ་ཐམས་ཅད་བཟླ་བའི་སླད། །བྱང་ཆུབ་མཆོག་ལ་འདུ་ཤེས་བཅིངས། །ཤིན་ཏུ་ཟབ་ཡངས་རྒྱ་མཚོ་བཞིན། །རི་མཐོ་རྩེ་ལ་འཛེགས་ནས་ནི། །སྟག་མོ་ལྟོགས་མདུན་སྐུ་ཡང་བོར། །ཉམ་ཆུང་འཚལ་རྔོ་མ་ཐོགས་ནས། ། འོད་མས་མགུལ་དུ་ཁྲག་ཕྱུང་བས། །རྒྱལ་བུའི་སྐུ་ནི་འཚལ་བས་ན། །སྐུ་གདུང་ལྷག་མ་ཙམ་ཞིག་ལུས། །དེ་ཚེ་རྒྱལ་པོ་བཙུན་མོར་བཅས། །དེ་སྐད་ཐོས་ནས་བརྒྱལ་བར་གྱུར། །སེམས་ནི་མྱ་ངན་མཚོར་བྱིང་སྟེ། །ཉོན་མོངས་མེ་ཡིས་རབ་ཏུ་བསྲེགས། །བློན་པོས་ཙནྡན་ཆུ་དག་གིས། །རྒྱལ་པོ་བཙུན་མོ་གཏོར་བས་ན། །ཅིག་ཆར་ལངས་ནས་རབ་ཏུ་ངུས། །ལག་བཏེགས་བྲང་དག་ལ་ཡང་བརྡུངས། །བློན་པོ་ཆུང་ངུ་འོངས་ནས་ནི། །རྒྱལ་པོ་དེ་ལ་འདི་སྐད་སྨྲས། །བདག་གིས་རྒྱལ་བུ་གཉིས་པོ་ནི། །ཚལ་ན་བརྒྱལ་བར་གྱུར་པ་མཐོང་། ། བདག་གིས་ཆབ་གྲང་གཏོར་བས་ན། །དྲན་པ་ཅུང་ཟད་ཐོབ་པར་གྱུར། །ཕྱོགས་བཞི་དག་ཏུ་གཟིགས་པ་ནི། །རབ་ཏུ་འབར་མེ་ཀུན་ཁྱབ་འདྲ། །སྐད་ཅིག་བཞེངས་ཀྱང་སླར་ཡང་འགྱེལ། །ཆོ་ངེས་བདག་ཉིད་འཛིན་མི་སྤྱོད། །ཕྱག་བཏེག་བརྩེ་བའི་ཚིག་དག་གིས། །གཅུང་གི་ཡ་
མཚན་བསྔགས་པར་མཛད། །རྒྱལ་པོས་དེ་སྐད་ཐོས་ནས་ཀྱང་། །མྱ་ངན་མེ་ཡིས་ལྷག་པར་བཙོས། །བཙུན་མོས་རབ་ཏུ་ངུས་ནས་ནི། །སྐད་ཆེར་ཕྱུང་སྟེ་འདི་སྐད་སྨྲས། །བདག་གི་བུ་སྡུག་ལྷག་པར་བྱམས་པ་དེ། །མི་རྟག་སྲིན་པོ་དག་གིས་མིད་པར་གྱུར། །ད་ལྟར་བུ་གཉིས་ལུས་པར་གྱུར་པ་ཡང་། །མྱ་ངན་མེ་ཡིས་རབ་བསྲེགས་ཉོན་ཡང་མོངས། །བདག་དེང་རི་དྲུང་དག་ཏུ་མྱུར་སོང་ལ། །སྤྲོ་བསྐྱེད་སྲོག་གི་ལྷག་མ་བསྲུང་བར་བྱ། །དེ་ནས་བཞོན་ཞོན་ལམ་དུ་མྱུར་ཞུགས་ནས། །རྩེ་གཅིག་སེམས་ཀྱིས་ལུས་སྤངས་བྲག་དྲུང་སོང་། །བུ་གཉིས་ཡིད་གཅགས་བྲང་བརྡུངས་སྤྱོད་ཚུལ་ཉམས། །འགྲོ་བཞིན་ངུ་བ་དག་དང་ལམ་དུ་ཕྲད། །ཕ་མས་པང་བླངས་མྱ་ངན་སྨྲེ་སྔགས་བཏོན། །ཅིག་ཅར་ལུས་བཏང་རི་དང་ནགས་སུ་དོང་། །བྱང་ཆུབ་སེམས་དཔས་ལུས་སྤངས་ནགས་ཕྱིན་ནས། །ལྷན་ཅིག་འདུས་ནས་རབ་ངུས་སྡུག་བསྔལ་ཆེ། །རྒྱན་ཕྲེང་བཀྲོལ་ཏེ་སྙིང་ཚིམ་ངུས་ནས་ནི། །བྱང་ཆུབ་སེམས་དཔའི་རུས་བུ་ལྷག་མ་བསྡུས། །སྐྱེ་བོ་མང་པོས་ལྷན་ཅིག་མཆོད་པ་བྱས། །རིན་ཆེན་སྣ་བདུན་མཆོད་རྟེན་བརྩིགས་ནས་ནི། །རིང་བསྲེལ་དེ་ནི་སྒྲོམ་གྱི་ནང་དུ་བཞག །མྱ་ངན་བཅས་བཞིན་སླར་ནི་གྲོང་ཁྱེར་དོང་། །ཀུན་དགའ་ལ་ནི་བཀའ་སྩལ་པ། །སྔོན་བྱུང་སེམས་ཅན་ཆེན་པོ་ནི། །ཤཱཀྱ་ཐུབ་པ་ང་ཡིན་པས། །གཞན་ཡིན་སྙམ་དུ་བསམ་མི་བྱ། །རྒྱལ་པོ་ཟས་གཙང་ཡབ་ཡིན་ཏེ། །བཙུན་མོ་ང་ཡུམ་སྒྱུ་འཕྲུལ་ཡིན། །རྒྱལ་བུ་ཆེན་པོ་བྱམས་པ་ཡིན། །རྒྱལ་བུ་འབྲིང་པོ་འཇམ་དཔལ་ཡིན། །སྟག་མོ་སྐྱེ་དགུའི་བདག་མོ་ཡིན། །བུ་ལྔ་དགེ་སློང་ལྔ་པོ་ཡིན། །གཅིག་ནི་མཽད་གལ་ཆེན་པོའི་བུ། །གཅིག་ནི་ཤཱ་རིའི་བུ་ཡིན་ནོ། །ངས་ནི་ཁྱེད་ཅག་ཐམས་ཅད་ལ། །སྔོན་གཞན་ཕན་བཏགས་པ་ཡི་གཏམ། །བྱང་ཆུབ་སེམས་དཔའི་སྤྱོད་པ་བཤད། །སངས་རྒྱས་འགྲུབ་རྒྱུ་འདི་སློབ་བྱོས། །བྱང་ཆུབ་སེམས་དཔས་ལུས་བཏང་ཚེ། །སྨོན་ལམ་རྒྱ་ཆེན་འདི་སྐད་བཏབ། །བདག་ལུས་རུས་པ་ལྷག་མ་ཡིས། །མ་འོངས་སེམས་ཅན་ཕན་འདོགས་ཤོག །འདི་ནི་ལུས་བཏང་གནས་ཡིན་ཏེ། །རིན་ཆེན་སྣ་བདུན་མཆོད་རྟེན་དེ། །ལོ་ནི་ཚད་མེད་བར་དུ་གནས། །དེ་ནས་ས་འོག་བྱིང་བར་གྱུར། །སྔོན་གྱི་སྨོན་ལམ་མཐུ་སྟོབས་ཀྱིས། །
རྐྱེན་ནི་ཇི་བཞིན་སེམས་ཅན་ཟློས། །ལྷ་མི་ཀུན་ལ་ཕན་གདགས་ཕྱིར། །ས་ལས་འཕགས་ཏེ་བྱུང་བ་ཡིན། །དེའི་ཚེ་བཅོམ་ལྡན་འདས་ཀྱིས་སྔོན་གྱི་རྒྱུད་འདི་བསྟན་པ་ན་ལྷ་དང་མིའི་སྐྱེ་བོའི་ཚོགས་ཚད་མེད་གྲངས་མེད་པ་སྙེད་ཡོངས་སུ་གདུང་བ་དང་དགའ་བ་ཆེན་པོ་སྐྱེས་ཏེ། སྔོན་ཆད་ནམ་ཡང་འདི་ལྟ་བུ་མ་བྱུང་ངོ་ཞེས་བསྔགས་པ་བརྗོད་ནས་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་གྱུར་ཏོ། །བྱང་ཆུབ་ཀྱི་ཤིང་གི་ལྷ་མོ་ལ་ཡང་བཀའ་སྩལ་པ། ངས་ནི་དྲིན་ལ་ལན་གླན་པའི་ཕྱིར་གུས་པས་ཕྱག་བྱས་པ་ཡིན་ནོ། །བཅོམ་ལྡན་འདས་ཀྱིས་རྫུ་འཕྲུལ་གྱི་མཐུ་མངོན་པར་བསྡུས་པ་དང་། མཆོད་རྟེན་དེ་ཡང་སླར་སའི་འོག་ཏུ་བྱིང་བར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལུས་ཡོངས་སུ་བཏང་བའི་ལེའུ་སྟེ་ཉི་ཤུ་དྲུག་པའོ།། །།དེའི་ཚེ་དེ་བཞིན་གཤེགས་པ་ཤཱཀྱ་ཐུབ་པས་ཆོས་ཀྱི་རྣམ་གྲངས་འདི་བཀའ་སྩལ་བ་ན། ཕྱོགས་བཅུའི་འཇིག་རྟེན་གྱི་ཁམས་ནས་བྱང་ཆུབ་སེམས་དཔའི་ཚོགས་བྱེ་བ་ཁྲག་ཁྲིག་བརྒྱ་སྟོང་ཚད་མེད་པ་སྙེད་སོ་སོ་ནས་རང་རང་གི་ཞིང་ཁམས་ནས་བྱ་རྒོད་ཕུང་པོའི་རིར་ཕྱིན་ཏེ། བཅོམ་ལྡན་འདས་ཀྱི་སྤྱན་སྔར་ལྷགས་ནས་ཡན་ལག་ལྔ་ས་ལ་གཏུགས་ཏེ། བཅོམ་ལྡན་འདས་ལ་ཕྱག་བྱས་ནས་སེམས་རྩེ་གཅིག་ཏུ་ཐལ་མོ་སྦྱར་ཏེ་མགྲིན་གཅིག་ཏུ་ཚིགས་སུ་བཅད་པ་འདི་དག་གིས་མངོན་པར་བསྟོད་པ། །བཅོམ་ལྡན་སྐུ་མཆོག་གསེར་གྱི་ཁ་དོག་ལྡན། །འོད་ཟེར་ཀུན་གསལ་གསེར་གྱི་རི་བོ་འདྲ། །རྣམ་དག་རབ་མཉམ་པདྨ་དག་དང་མཚུངས། །མཚན་མཆོག་དམ་པ་ཚད་མེད་ཀུན་དུ་བཀོད། །མཚན་ནི་སུམ་ཅུ་རྩ་གཉིས་རབ་བརྒྱན་ཏེ། །དཔེ་བྱད་བཟང་པོ་བརྒྱད་ཅུ་ཡོངས་སུ་རྫོགས། །འོད་ཟེར་རབ་གསལ་དཔེ་ཟླ་ཡོང་མ་མཆིས། །དྲི་བྲལ་དཔེར་ན་རྣམ་དག་ཟླ་ཉ་འདྲ། །གསུང་དབྱངས་རབ་དང་ཤིན་ཏུ་གྱ་ནོམ་པས། །སེང་གེ་བཞིན་དུ་འབྲུག་སྒྲ་སྒྲོགས་པར་མཛད། ། དམ་པ་རྣམ་བརྒྱད་དབང་པོ་མཐུན་མཛད་པས། །ཀ་ལ་པིང་ཀའི་སྒྲ་སྒྲོགས་ཀུན་ལས་འཕགས། །བསོད་ནམས་བརྒྱ་ཡི་མཚན་མཆོག་སྐུ་བརྒྱན་པས། །འོད་ཟེར་ཕུན་ཚོགས་དྲི་མ་ཡོངས་མི་མངའ། །མཁྱེན་བློ་རབ་གསལ་དཔེར་ན་རྒྱ་མཚོ་འདྲ། །ཡོན་ཏན་རྒྱ་ཆེན་ནམ་མཁའ་དག་དང་མཚུངས། །ཡོངས་རྫོགས་
འོད་ཟེར་ཕྱོགས་བཅུའི་འཇིག་རྟེན་བཀང་། །རྐྱེན་ནི་ཇི་བཞིན་སེམས་ཅན་སྒྲོལ་བར་མཛད། །ཉོན་མོངས་སྲེད་པའི་བག་ཆགས་ཀུན་བསལ་བས། །ཆོས་ཀྱི་སྒྲོན་མ་རྟག་པར་རྒྱུན་མི་འཆད། །ཐུགས་བརྩེས་སེམས་ཅན་དག་ལ་ཕན་འདོགས་པས། །ད་ལྟར་སླད་མའི་དུས་ཚེ་བདེ་བ་སྩོལ། །རྟག་པར་དོན་མཆོག་དམ་པ་རབ་བཤད་ནས། །ཡང་དག་རབ་དབེན་མྱ་ངན་འདས་ལ་འགོད། །བཅོམ་ལྡན་བདུད་རྩིའི་ཆོས་མཆོག་རབ་བསྟན་ནས། །བདུད་རྩིའི་གྱ་ནོམ་དོན་ནི་སྩོལ་མཛད་པས། །བདུད་རྩིའི་གྲོང་ཁྱེར་དག་ཏུ་རབ་དྲངས་ནས། །བདུད་རྩི་འདུས་མ་བགྱིས་ཀྱི་བདེ་ལ་འགོད། །རྟག་པར་འཁོར་བའི་རྒྱ་མཚོ་ཆེན་པོ་ནས། །སྡུག་བསྔལ་སེམས་ཅན་ཐམས་ཅད་ཐར་བར་མཛད། །དེ་དག་བདེ་བའི་ཤུལ་དུ་རབ་བཙུད་དེ། །ཡིད་བཞིན་བདེ་བ་བསམ་མི་ཁྱབ་པ་སྩོལ། །བཅོམ་ལྡན་ཡོན་ཏན་རྒྱ་མཚོ་ཟབ་ལ་ཡངས། །དཔེ་ནི་མང་པོ་དག་གིས་རིག་མི་འགྱུར། །རྟག་པར་ཀུན་ལ་ཐུགས་རྗེ་ཆེར་གཟིགས་པས། །ཐབས་མཁྱེན་བརྩོན་འགྲུས་དག་ནི་རྒྱུན་མི་འཆད། །བཅོམ་ལྡན་ཡོན་ཏན་རྒྱ་མཚོ་མཐའ་མ་མཆིས། །བསྐལ་པ་བྱེ་བ་བརྒྱ་སྟོང་བར་དུ་ནི། །ལྷ་མི་ཐམས་ཅད་ལྷན་ཅིག་དཔག་བསམས་ཀྱང་། །ཆ་ཤས་ཙམ་ཡང་རིག་པར་ཡོང་མི་འགྱུར། །བདག་ཅག་སངས་རྒྱས་ཡོན་ཏན་རྒྱ་མཚོ་ལས། །ཐིགས་པ་འགའ་ཞིག་བསྔགས་པ་བརྗོད་པ་ཡི། །བསོད་ནམས་དེ་དག་སྐྱེ་དགུ་ཡོངས་བསྔོས་ནས། །ཐམས་ཅད་བྱང་ཆུབ་འབྲས་བུ་མྱུར་ཐོབ་སྨོན། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མང་པོ་དེ་དག་ལ་བཀའ་སྩལ་པ། ལེགས་སོ་ལེགས་སོ། །ཁྱེད་ཀྱིས་འདི་ལྟར་དེ་བཞིན་གཤེགས་པའི་ཡོན་ཏན་གྱི་བསྔགས་པ་བརྗོད་པ་ཉིད་ཀྱིས་སེམས་ཅན་ལ་ཕན་འདོགས་ཤིང་སངས་རྒྱས་ཀྱི་མཛད་པ་རྒྱ་ཆེར་བྱེད་པར་འགྱུར་བས་སྡིག་པ་རྣམས་ཡོངས་སུ་བྱང་ནས་བསོད་ནམས་ཚད་མེད་པ་སྙེད་སྐྱེ་བར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ཕྱོགས་བཅུའི་བྱང་ཆུབ་སེམས་དཔའ་རྣམས་ཀྱིས་བསྔགས་པ་བརྗོད་པའི་ལེའུ་སྟེ་ཉི་ཤུ་བདུན་པའོ།། །།དེ་ནས་བྱང་ཆུབ་སེམས་དཔའ་མཛེས་
པའི་ཏོག་སྟན་ལས་ལངས་ཏེ་བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་ནས་ཚིགས་སུ་བཅད་པ་འདི་དག་གིས་མངོན་པར་བསྟོད་པ། ཐུབ་པ་བསོད་ནམས་བརྒྱ་ཡི་མཚན་རྫོགས་ཤིང་། །ཡོན་ཏན་ཚད་མ་མཆིས་པས་སྐུ་རབ་བརྒྱན། །རྣམ་དག་རྒྱ་ཆེན་སེམས་ཅན་ལྟ་མོས་པས། །ཉི་མ་སྟོང་བཞིན་འོད་ཀྱིས་སྣང་བར་མཛད། །ཁ་དོག་མཐའ་ཡས་འོད་ནི་རབ་ཏུ་རྒྱས། །རིན་ཆེན་པདྨའི་ཕུང་བཞིན་མཚན་རྣམས་མཛེས། །དཔེར་ན་གདུགས་ཤར་ནམ་མཁའ་སྣང་བགྱིད་བཞིན། །ཁ་དོག་དཀར་གསལ་གསེར་གྱི་མདོག་ཀྱང་གནོན། །གསེར་གྱི་རི་བཞིན་འོད་ཀྱིས་གསལ་མཛད་པས། །ཞིང་ནི་བརྒྱ་སྟོང་མང་པོ་ཀུན་དུ་ཁྱབ། །སེམས་ཅན་སྡུག་བསྔལ་ཚད་མེད་ཞི་མཛད་ནས། །བདེ་བ་དམ་པ་མཐའ་ཡས་སྩལ་བར་མཛད། །མཚན་རྣམས་ཕུན་ཚོགས་རྣམ་དག་རབ་མཛེས་པས། །སེམས་ཅན་ལྟ་མོས་སྐྱོ་བ་ཡོང་མ་མཆིས། །དབུ་སྐྲ་རབ་མཉེན་ཁ་དོག་མཐོན་མཐིང་གནས། །བུང་བ་ནག་པོ་མེ་ཏོག་བསྡུས་པ་འདྲ། །དགྱེས་དང་བཏང་སྙོམས་ཆེན་པོ་དག་པས་བརྒྱན། ། བྱམས་དང་ཐུགས་རྗེ་ཆེན་པོ་ཕུན་སུམ་ཚོགས། །མཚན་དང་དཔེ་བྱད་དམ་པ་རབ་མཛེས་པ། །བྱང་ཆུབ་ཡན་ལག་ཆོས་ལས་གྲུབ་པ་ལགས། །བཅོམ་ལྡན་བསོད་ནམས་ཕན་པ་མང་བཏང་བས། །དེ་དག་རྟག་ཏུ་བདེ་བ་ཆེན་པོ་འཐོབ། །ཡོན་ཏན་རྣམ་པ་སྣ་ཚོགས་རབ་བརྒྱན་པས། །འོད་ཀྱི་ཞིང་ནི་བརྒྱ་སྟོང་སྣང་བར་མཛད། །བཅོམ་ལྡན་འོད་ཟེར་ཤིན་ཏུ་རྫོགས་པས་ན། །དཔེར་ན་གདུགས་ཀྱིས་ནམ་མཁའ་ཀུན་ཁྱབ་འདྲ། །བཅོམ་ལྡན་རི་རབ་བཞིན་དུ་ཡོན་ཏན་ལྡན། །ཕྱོགས་བཅུ་ཀུན་དུ་ཁྱབ་པར་སྟོན་པ་མཛད། ། བཅོམ་ལྡན་གསེར་ཞལ་དམ་པ་རབ་ཏུ་མཛེས། །ཚེམས་དཀར་གཏམས་པ་དུང་གི་ཁ་དོག་འདྲ། །བཅོམ་ལྡན་ཞལ་མཛེས་དཔེ་ཟླ་ཡོང་མ་མཆིས། །སྨིན་མཚམས་བ་སྤུ་རྟག་པར་གཡས་སུ་འཁྱིལ། །འོད་མཉེན་དཀར་གསལ་ཆུ་ཤེལ་དག་དང་མཚུངས། །
དཔེར་ན་ཟླ་ཉ་ནམ་མཁའི་ཁམས་གནས་འདྲ། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་མཛེས་པའི་ཏོག་ལ་བཀའ་སྩལ་པ། །ཁྱོད་ཀྱིས་འདི་ལྟར་དེ་བཞིན་གཤེགས་པའི་ཡོན་ཏན་གྱི་བསྔགས་པ་བརྗོད་པ་ནི་བསམ་གྱིས་མི་ཁྱབ་པ་ཡིན་པས་ཐམས་ཅད་ལ་ཕན་འདོགས་པར་འགྱུར་ཞིང་། གང་དག་ཁོང་དུ་མ་ཆུད་པ་དེ་དག་ཀྱང་རྗེས་སུ་མཐུན་པར་རྣལ་འབྱོར་སྒོམ་པ་ལ་སློབ་པར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་བྱང་ཆུབ་སེམས་དཔའ་མཛེས་པའི་ཏོག་གིས་བསྔགས་པ་བརྗོད་པའི་ལེའུ་སྟེ་ཉི་ཤུ་བརྒྱད་པའོ།། །།དེ་ནས་བྱང་ཆུབ་ཀྱི་ཤིང་གི་ལྷ་མོས་ཀྱང་ཚིགས་སུ་བཅད་པ་དག་གིས་བཅོམ་ལྡན་འདས་ལ་མངོན་པར་བསྟོད་པ། །བཅོམ་ལྡན་རྣམ་དག་བློ་ལ་གུས་ཕྱག་འཚལ། །རྣམ་དག་ཆོས་གཉེར་བློ་ལ་གུས་ཕྱག་འཚལ། །ཡང་དག་ཆོས་གཉེར་བློ་ལ་གུས་ཕྱག་འཚལ། །ཆོས་མིན་སྤོང་བའི་བློ་ལ་གུས་ཕྱག་འཚལ། །རྣམ་རྟོག་མི་མངའ་བློ་ལ་གུས་ཕྱག་འཚལ། །ཀྱེ་མ་ངོ་མཚར་བཅོམ་ལྡན་མཐའ་ཡས་སྤྱོད། །ཀྱེ་མ་མཐོང་དཀའ་ཨུ་དུམ་བཱ་ར་འདྲ། །ཀྱེ་མ་ངོ་མཚར་རྒྱ་མཚོའི་རི་རྒྱལ་འདྲ། །ཀྱེ་མ་ངོ་མཚར་བདེ་གཤེགས་འོད་ཚད་མེད། །ཀྱེ་མ་ངོ་མཚར་ཁ་བསྒྱུར་སྨོན་ལམ་ཆེ། །ཀྱེ་མ་ངོ་མཚར་ཤཱཀ་རིགས་ཉི་མ་འདིས། །འདི་འདྲའི་མདོ་སྡེ་དཀོན་མཆོག་བཀས་བཤད་ནས། །བརྩེ་བས་སྐྱེ་དགུ་རྣམས་ལ་ཕན་འདོགས་མཛད། །ཐུབ་པ་རབ་དབེན་དབང་པོ་མཉམ་འཇོག་པས། །རབ་ཞི་མྱ་ངན་འདས་པའི་གྲོང་ཁྱེར་གཤེགས། །རབ་དབེན་གཟུངས་ཀྱི་སྒོ་ལ་བཞུགས་པས་ན། །རབ་དབེན་སྤྱོད་ཡུལ་ཟབ་མོ་དག་ཀྱང་མཁྱེན། །རྐང་གཉིས་གཙོ་བོ་རབ་དབེན་བཞུགས་པས་ན། །ཉན་ཐོས་སློབ་མ་ལུས་ཀྱང་དེ་བཞིན་སྟོང་། །ཆོས་རྣམས་ཐམས་ཅད་ངོ་བོ་མ་མཆིས་པས། །སེམས་ཅན་ཐམས་ཅད་ཀྱང་ནི་སྟོང་ཞིང་དབེན། །བདག་ནི་རྟག་ཏུ་བཅོམ་ལྡན་དྲན་པར་བགྱིད། །བདག་ནི་རྟག་ཏུ་བཅོམ་ལྡན་
མཐོང་བར་མོས། །བདག་ནི་རྟག་ཏུ་གུས་སེམས་བསྐྱེད་པས་ན། །རྟག་པར་དེ་བཞིན་གཤེགས་པའི་གདུགས་དང་མཇལ། །བདག་ནི་རྟག་ཏུ་བཅོམ་ལྡན་ཕྱག་བགྱིས་ནས། །རྟག་པར་ཞལ་ལྟ་སེམས་ཀྱིས་མི་སྤོང་སྨོན། །རབ་ཏུ་གདུང་སེམས་བར་ཆད་མ་མཆིས་པར། །རྟག་པར་རིམ་གྲོ་བགྱིས་ཀྱང་སྐྱོ་མི་བགྱིད། །བཅོམ་ལྡན་ཐུགས་རྗེའི་ཐུགས་ནི་རབ་བསྐྱེད་ནས། །མདངས་ལྡན་ཞལ་ནི་བདག་གིས་རྟག་མཐོང་མཛོད། །བཅོམ་ལྡན་ཉན་ཐོས་དགེ་འདུན་རྣམ་དག་པས། །རྟག་པར་ལྷ་མི་དག་ནི་བསྒྲལ་བར་སྨོན། །སྐུ་ནི་རང་བཞིན་རྣམ་དག་ནམ་མཁའ་འདྲ། །སྒྱུ་མ་སྨིག་རྒྱུ་ཆབ་ཀྱི་ཟླ་བ་མཚུངས། །བདུད་རྩི་མྱ་ངན་འདས་པའི་ཆོས་བཤད་ནས། །ཡོན་ཏན་ཕུང་པོ་ཐམས་ཅད་སྐྱེད་པར་སྨོན། །བཅོམ་ལྡན་རྣམ་དག་སྤྱོད་ཡུལ་བྱམས་པ་དང་། །ཐུགས་རྗེ་ཡང་དག་སྤྱོད་ཡུལ་བསམ་མི་ཁྱབ། །ཉན་ཐོས་རང་རྒྱལ་གཞལ་བར་མི་འགྱུར་ཞིང་། །དྲང་སྲོང་བྱང་ཆུབ་སེམས་དཔས་དཔོག་མི་འགྱུར། །དེ་བཞིན་གཤེགས་པས་བདག་ལ་ཐུགས་བརྩེ་ནས། །ཐུགས་རྗེ་ཆེན་པོའི་སྐུ་ནི་རྟག་མཐོང་སྨོན། ། ལས་གསུམ་ངལ་མེད་བྱམས་གཙོ་མཆོད་ནས་ནི། །མྱུར་དུ་ངེས་འབྱུང་ཡང་དག་མཐའ་ཕྱོགས་སྨོན། །དེ་ནས་བཅོམ་ལྡན་འདས་ཀྱིས་དེ་སྐད་ཅེས་བསྔགས་པ་བརྗོད་པ་གསན་པ་དང་། །ཚངས་པའི་དབྱངས་ཀྱིས་ཤིང་གི་ལྷ་མོ་ལ་བཀའ་སྩལ་པ། །རིགས་ཀྱི་ལྷ་མོ་ཁྱོད་ཀྱིས་ངའི་ཡང་དག་པའི་མི་བརྫུན་པའི་ཆོས་ཀྱི་སྐུ་རྣམ་པར་དག་པའི་བསྔགས་པ་བརྗོད་ནས་བདག་དང་གཞན་ལ་ཕན་གདག་པའི་ཕྱིར་མཚན་མཆོག་གྱ་ནོམ་པ་ཡང་དག་པར་བསྒྲགས་པ་ལེགས་སོ་ལེགས་སོ། །བསོད་ནམས་འདིས་ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཞིང་སེམས་ཅན་ཐམས་ཅད་མཚུངས་པར་རྣལ་འབྱོར་བསྒོམ་པར་འགྱུར་ལ། གང་གིས་ཐོས་པ་དེ་དག་ཐམས་ཅད་ཀྱང་བླ་ན་མེད་པའི་བདུད་རྩིའི་ཆོས་ཀྱི་སྒོར་འཇུག་པར་འགྱུར་རོ། །
གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་བྱང་ཆུབ་ཀྱི་ཤིང་གི་ལྷ་མོས་བསྔགས་པ་བརྗོད་པའི་ལེའུ་སྟེ་ཉི་ཤུ་དགུ་པའོ།། །།དེ་ནས་ལྷ་མོ་སྤོབས་པ་ཆེན་མོ་སྟན་ལས་ལངས་ཏེ་གུས་པས་ཐལ་མོ་སྦྱར་ནས ་ཡང་དག་པའི་ཚིག་གིས་བཅོམ་ལྡན་འདས་ལ་མངོན་པར་བསྟོད་པ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་སྐུ་ཡང་དག་པར་གསེར་གྱི་ཁ་དོག་དང་ལྡན་པ། མགུར་དུང་གི་དབྱིབས་དང་འདྲ་བ། ཞལ་ཟླ་བ་ཉ་བ་ལྟ་བུ་སྤྱན་པདྨ་སྔོན་པོ་དང་མཚུངས་པ། སྒྲོས་དམར་ཞིང་ བཟང་བ། ཆུ 
་ཤེལ་གྱི་ཁ་དོག་དང་འདྲ་བ། ཤངས་ཀྱི་དབྱིབས་མཐོ་ཞིང་དྲང་བས་གསེར་གྱི་གར་བུ་བཅད་པ་ལྟ་བུར་གྱུར་པ། ཚེམས་དཀར་ཞིང་ཐགས་བཟང་བ་མེ་ཏོག་ཀུ་མུ་ད་དང་མཚུངས་པ། འོད་ཀྱིས་ཀུན་དུ་སྣང་བར་མཛད་པས་ཉི་མ་བརྒྱ་སྟོང་ལྟ་བུར་གྱུར་པ། འོད་ཀྱི་ཁ་དོག་ཀུན་དུ་ཁྱབ་པས་འཛམ་བུའི་གསེར་དང་འདྲ་བ། ཚིག་གསུང་བ་ལ་ནོར་ཞིང་འཁྲུལ་པ་མི་མངའ་བ། རྣམ་པར་ཐར་པའི་སྒོ་གསུམ་ཡང་དག་པར་བསྟན་ནས། བྱང་ཆུབ་རྣམ་པ་གསུམ་གྱི་ལམ་ཡང་དག་པར་འབྱེད་པ། ཐུགས་རྟག་ཏུ་རྣམ་པར་དག་ཅིང་ཐུགས་ཀྱི་མོས་པ་ཡང་དེ་བཞིན་དུ་གྱུར་པ། བཅོམ་ལྡན་འདས་བཞུགས་པའི་གནས་དང་སྤྱོད་ཡུལ་རྣམས་རྟག་པར་རྣམ་པར་དག་པར་གྱུར་པ། སྤྱོད་ལམ་མ་ལགས་པ་སྤངས་པས་གཤེགས་ཤིང་བཞུགས་པ་དག་ལ་འཁྲུལ་པ་མི་མངའ་བ། ལོ་དྲུག་དཀའ་བ་མཛད་ནས་ཆོས་ཀྱི་འཁོར་ལོ་ལན་གསུམ་དུ་བསྐོར་བ། སྡུག་བསྔལ་བའི་སེམས་ཅན་ཡོངས་སུ་བཟླས་ནས་ཕ་རོལ་གྱི་འགྲམ་དུ་ཕྱིན་པར་མཛད་པ། སྐུའི་མཚན་ཡོངས་སུ་རྫོགས་པ་ནྱ་གྲོ་དྷའི་ལྗོན་ཤིང་ལྟ་བུར་གྱུར་པ། ཕ་རོལ་ཏུ་ཕྱིན་པ་དྲུག་ཡོངས་སུ་བསྒོམས་པས་ཕྲིན་ལས་རྣམ་པ་གསུམ་ལ་སྐྱོན་མི་མངའ་བ། ཐམས་ཅད་མཁྱེན་པ་དང་ལྡན་པས་བདག་དང་གཞན་གྱི་དོན་ཕུན་སུམ་ཚོགས་པར་མཛད་པ། གང་
ཅི་གསུང་ཡང་རུང་སྟེ། རྟག་པར་སེམས་ཅན་གྱི་དོན་དུ་འགྱུར་བར་མཛད་པས་དོན་མ་མཆིས་པར་མི་གསུང་བ། ཤཱཀྱའི་རིགས་ཀྱི་ནང་ནས་སེང་གེ་ཆེན་པོར་གྱུར་པས་རབ་ཏུ་བརྟན་ཞིང་དཔའ་བ། རྣམ་པར་ཐར་པ་བརྒྱད་ཕུན་སུམ་ཚོགས་པར་གྱུར་པ་ལ་ཕྱག་འཚལ་ལོ། །དེང་བདག་གི་ཉམས་ཀྱིས་ཇི་ཙམ་ལྕོགས་པའི་རྗེས་སུ་དེ་བཞིན་ཤེགས་པའི་ཡོན་ཏན་གྱི་ཕྱོགས་ལས་ཅུང་ཟད་ཙམ་ཞིག་བསྔགས་པ་བརྗོད་པ་ནི་འདི་ལྟ་སྟེ། དཔེར་ན་སྦྲང་བུས་རྒྱ་མཚོ་ཆེན་པོའི་ཆབ་འཚལ་བ་དང་འདྲ་ཡང་བསོད་ནམས་དེའི་དབང་གིས་སེམས་ཅན་ཐམས་ཅད་འཁོར་བ་གཏན་དུ་སྤངགས་ནས་བླ་ན་མ་མཆིས་པའི་ལམ་མངོན་པར་གྲུབ་པར་སྨོན་ཏོ། །དེ་ནས་བཅོམ་ལྡན་འདས་ཀྱིས་ལྷ་མོ་སྤོབས་པ་ཆེན་མོ་ལ་བཀའ་སྩལ་པ། ཁྱོད་ཀྱིས་ཡུན་རིང་པོ་ནས་བསྒོམས་པས་སྤོབས་པ་ཆེན་པོ་དང་ལྡན་པར་གྱུར་ནས། དེང་ངའི་ཡོན་ཏན་རྒྱ་ཆེར་བསྔགས་པ་བརྗོད་པ་ལེགས་སོ་ལེགས་སོ། །འདིའི་དབང་གིས་ཁྱོད་མྱུར་དུ་བླ་ན་མེད་པའི་ཆོས་ཀྱི་སྒོ་མོ་མངོན་པར་རྟོགས་ནས་མཚན་དང་དཔེ་བྱད་བཟང་པོ་ཕུན་སུམ་ཚོགས་པར་གྱུར་ཏེ། ཐམས་ཅད་ལ་རྒྱ་ཆེར་ཕན་འདོགས་པར་འགྱུར་རོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ལྷ་མོ་སྤོབས་པ་ཆེན་མོས་བསྔགས་པ་བརྗོད་པའི་ལེའུ་སྟེ་སུམ་ཅུ་པའོ།། །།དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ཚད་མེད་པ་སྙེད་རྣམས་དང་། ལྷ་དང་། མི་རྣམས་དང་། འཁོར་མང་པོ་ཐམས་ཅད་ལ་བཀའ་སྩལ་པ། ཁྱེད་ཀྱིས་འདི་ལྟར་རིག་པར་བྱ་སྟེ། ངས་བསྐལ་པ་ཆེན་པོ་ཚད་མེད་གྲངས་མེད་པ་ནས་ནན་ཏན་བརྩོན་འགྲུས་ཀྱིས་དཀའ་བ་སྤྱད་དེ་ཐོབ་པའི་ཆོས་ཤིན་ཏུ་ཟབ་པ་བྱང་ཆུབ་ཀྱི་རྒྱུ་ཡང་དག་པ་གང་ཡིན་པ་དེ་ནི་ཁྱེད་ལ་ཡང་དག་པར་བསྟན་ཟིན་ན། ཁྱེད་ཅག་ལས་སུ་ཞིག་རབ་ཏུ་བརྟུལ་བའི་སེམས་བསྐྱེད་ནས་ང་ཡོངས་སུ་མྱ་ངན་ལས་འདས་པའི་འོག་ཏུ་ཆོས་ཀྱི་རྣམ་གྲངས་འདི་གུས་པས་ཡོངས་སུ་བསྲུངས་ནས་
རྒྱ་ཆེར་ཡང་དག་པར་སྤེལ་ཏེ། ཡང་དག་པའི་ཆོས་འཇིག་རྟེན་ན་ཡུན་རིང་དུ་གནས་པར་བྱེད། དེ་ནས་འཁོར་མང་པོའི་ནང་ནས་བྱང་ཆུབ་སེམས་དཔའ་ཆེན་པོ་བྱེ་བ་ཕྲག་དྲུག་ཅུ་དང་། ལྷའི་འཁོར་ཕལ་མང་པོ་བྱེ་བ་ཕྲག་དྲུག་ཅུས་མགྲིན་གཅིག་ཏུ་འདི་སྐད་ཅེས། བཅོམ་ལྡན་འདས་བདག་ཅག་ཐམས་ཅད་ལ་ཡང་མོས་པའི་སེམས་མཆིས་པས་བཅོམ་ལྡན་འདས་ཀྱིས་བསྐལ་པ་ཆེན་པོ་ཚད་མ་མཆིས་པ་ནས་ནན་ཏན་བརྩོན་འགྲུས་ཀྱིས་དཀའ་བ་མཛད་དེ། བརྙེས་པའི་ཆོས་ཤིན་ཏུ་ཟབ་པ་བྱང་ཆུབ་ཀྱི་རྒྱུ་ཡང་དག་པ་གང་ལགས་པ་དེ་ལ་གུས་པས་ཡོངས་སུ་བསྲུངས་ནས། བཅོམ་ལྡན་འདས་ཡོངས་སུ་མྱ་ངན་ལས་འདས་པའི་སླད་ན་ཡང་ལུས་དང་སྲོག་ལ་ཕངས་པ་མ་མཆིས་པར་ཆོས་ཀྱི་རྣམ་གྲངས་འདི་རྒྱ་ཆེར་སྤེལ་ཏེ། ཡང་དག་པའི་ཆོས་འཇིག་རྟེན་ན་ཡུན་རིང་དུ་གནས་པར་བགྱིད་དོ་ཞེས་གསོལ་ཏོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། བཅོམ་ལྡན་ཡང་དག་བདེན་ཚིག་གསུང་། །ཡང་དག་ཆོས་ལ་རབ་ཏུ་བཞུགས། །ཡང་དག་བདེན་པ་དེ་དབང་གིས། །མདོ་སྡེ་འདི་ནི་སྲུང་འཛིན་བགྱིད། །ཐུགས་རྗེ་ཆེན་པོའི་གོ་མནབས་ནས། །ཐུགས་རྗེ་ཆེ་ལ་རབ་ཏུ་བཞུགས། །བྱམས་དང་ཐུགས་རྗེ་དེ་སྟོབས་ཀྱིས། །མདོ་སྡེ་འདི་ནི་སྲུང་འཛིན་བགྱིད། ། བསོད་ནམས་ཚོགས་ནི་ཡོངས་རྫོགས་ནས། །ཡེ་ཤེས་ཚོགས་ནི་རབ་ཏུ་བསྐྱེད། །ཚོགས་རྣམས་ཡོངས་སུ་རྫོགས་པའི་སླད། །མདོ་སྡེ་འདི་ནི་སྲུང་འཛིན་བགྱིད། །བདུད་རྣམས་ཐམས་ཅད་རབ་བརྟུལ་ཏེ། །ལོག་སྨྲ་ཐམས་ཅད་རྣམ་པར་བཤིག ། ངན་ལྟ་ཐམས་ཅད་བསལ་བའི་སླད། །མདོ་སྡེ་འདི་ནི་སྲུང་འཛིན་བགྱིད། །འཇིག་རྟེན་སྐྱོང་དང་བརྒྱ་བྱིན་དང་། །ཚངས་པ་དང་ནི་ལྷ་མ་ཡིན། །ཀླུ་དང་གནོད་སྦྱིན་ལ་སོགས་པས། །མདོ་སྡེ་འདི་ནི་སྲུང་འཛིན་བགྱིད། །ས་ཡི་སྟེང་
དང་མཁའ་གནས་པ། །ཡུན་རིང་འདིར་ནི་གནས་པ་རྣམས། །བཅོམ་ལྡན་བསྟན་པ་འཛིན་བགྱིད་པ། །མདོ་སྡེ་འདི་ནི་སྲུང་འཛིན་བགྱིད། །ཚངས་པའི་བཞུགས་བཞི་མཚུངས་ལྡན་ཞིང་། །འཕགས་བདེན་བཞི་ཡིས་རབ་བརྒྱན་ནས། །བདུད་བཞི་དག་ནི་ཕམ་མཛད་སླད། །མདོ་སྡེ་འདི་ནི་སྲུང་འཛིན་བགྱིད། །ནམ་མཁའ་ཐོགས་བཅས་འགྱུར་ཡང་སྲིད། །ཐོགས་བཅས་ནམ་མཁར་འགྱུར་སྲིད་ཀྱི། །སངས་རྒྱས་རྣམས་ཀྱིས་བསྲུངས་བཟུང་བ། ། སུས་ཀྱང་བསྒུལ་ཞིང་བསྐྱོད་མི་འགྱུར། །དེ་ནས་རྒྱལ་པོ་ཆེན་པོ་བཞིས་བཅོམ་ལྡན་འདས་ཀྱིས་དམ་པའི་ཆོས་འདི་བསྲུང་བ་བཀས་བཤད་པ་ཐོས་པ་དང་། སོ་སོ་ནས་རྗེས་སུ་ཡི་རང་བའི་སེམས་བསྐྱེད་ནས་ཡང་དག་པའི་ཆོས་ཡོངས་སུ་བསྲུང་བའི་སེམས་ཀྱིས་ཅིག་ཅར་མགྲིན་གཅིག་ཏུ་ཚིགས་སུ་བཅད་དེ་གསོལ་པ། བདག་ཅག་མདོ་སྡེ་འདི་ལ་ནི། །བུ་དང་བུ་མོ་འཁོར་དང་བཅས། །ཐམས་ཅད་རྩེ་གཅིག་རབ་བསྲུངས་ནས། །རྒྱ་ཆེར་ཡང་དག་སྤེལ་བར་བགྱིད། །གང་ཞིག་མདོ་འདི་རབ་བཟུང་ནས། །བྱང་ཆུབ་རྒྱུ་ནི་སྒྲུབ་བགྱིད་ན། །བདག་ཅག་རྟག་པར་ཕྱོགས་བཞི་ནས། །སྲུང་སྐྱོབ་རིམ་གྲོ་དག་ཀྱང་བགྱིད། །དེ་ནས་བརྒྱ་བྱིན་ལྷའི་དབང་པོས་གུས་པས་ཐལ་མོ་སྦྱར་ནས་ཚིགས་སུ་བཅད་པ་གསོལ་པ། སངས་རྒྱས་ཆོས་ནི་ཐུགས་ཆུད་ནས། ། དྲིན་ནི་བསབ་པར་བཞེད་པ་དང་། །བྱང་ཆུབ་སེམས་དཔའ་ཕན་གདགས་སླད། །འཇིག་རྟེན་འདས་ཀྱང་མདོ་སྡེ་གསུངས། །བདག་ཀྱང་སངས་རྒྱས་དེ་དག་ལ། །དྲིན་བསབ་སླད་དུ་རྟག་མཆོད་ནས། །འདི་འདྲའི་མདོ་སྡེ་འདི་དང་ནི། །མདོ་སྡེ་འདི་ལ་སྲུང་བར་བགྱིད། །དེ་ནས་དགའ་ལྡན་པའི་ལྷའི་བུ་རྣམས་ཀྱིས་གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། བཅོམ་ལྡན་གསུངས་པའི་མདོ་སྡེ་འདི། །གང་ཞིག་འཛིན་པར་བགྱིད་པ་ནི། །བྱང་ཆུབ་གནས་སྐབས་གནས་པས་ན། །
དགའ་ལྡན་ལྷར་ནི་རབ་ཏུ་འགྱུར། །བཅོམ་ལྡན་བདག་ཅག་རབ་དགའ་ནས། །ལྷ་ཡི་རྣམ་སྨིན་མཆོག་སྤངས་ནས། །འཛམ་གླིང་དག་ཏུ་གནས་ནས་ནི། །མདོ་སྡེ་འདི་ནི་སྒྲོགས་པར་བགྱིད། །དེ་ནས་མི་མཇེད་ཀྱི་འཇིག་རྟེན་གྱི་ཁམས་ཀྱི་བདག་པོ་ཚངས་པ་ལྷའི་རྒྱལ་པོས། གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། བསམ་གཏན་རྣམས་དང་ཐེག་རྣམས་དང་། །རྣམ་ཐར་ཚད་མེད་ཐམས་ཅད་ཀྱང་། །མདོ་སྡེ་འདི་ལས་བྱུང་བས་ན། །དེ་སླད་མདོ་འདི་རབ་ཏུ་གསུངས། །མདོ་སྡེ་འདི་ནི་སྟོན་པའི་གནས། །ཚངས་པའི་བདེ་བ་བདག་སྤངས་ནས། །མདོ་སྡེ་འདི་ནི་མཉན་པའི་སླད། །རྟག་པར་ཡོངས་སུ་སྲུང་སྐྱོབ་བགྱིད། །དེ་ནས་བདུད་ཀྱི་རྒྱལ་པོའི་བུ་ཚོང་དཔོན་ཞེས་བྱ་བས་ཡང་གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། ཡང་དག་དོན་དང་ལྡན་པའི་མདོ། །བདུད་སྤྱོད་རྗེས་སུ་མི་འབྲང་ཞིང་། །བདུད་ཀྱི་ལས་ངན་སྦྱོང་བགྱིད་པ། །འདི་ནི་གང་ཞིག་འཛིན་བགྱིད་ན། །བདག་ཀྱང་མདོ་སྡེ་འདི་ལ་ནི། །བརྩོན་པ་དག་གིས་རབ་བསྲུངས་ནས། །བརྩོན་འགྲུས་ཆེན་པོའི་སེམས་བསྐྱེད་དེ། །ཀུན་དུ་རྒྱ་ཆེར་སྤེལ་བར་བགྱིད། །དེ་ནས་བདུད་ཀྱི་རྒྱལ་པོས་གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། གང་ཞིག་མདོ་སྡེ་འདི་བཟུང་ནས། །ཉོན་མོངས་རྣམས་ནི་ཕམ་བགྱིད་པ། །དེ་འདྲའི་སེམས་ཅན་དེ་དག་ལ། །སྲུང་སྐྱོབ་བདེ་ལ་འགོད་པར་བགྱིད། །མདོ་སྡེ་འདི་ནི་གང་འཆང་བ། །བདུད་རྣམས་ཀྱིས་ནི་གླགས་མི་རྙེད། །བཅོམ་ལྡན་བྱིན་གྱིས་བརླབས་ཀྱི་མཐུས། །བདག་གིས་དེ་ལ་སྲུང་བར་བགྱིད། །དེ་ནས་ལྷའི་བུ་བཀྲ་ཤིས་དམ་པས་བཅོམ་ལྡན་འདས་ཀྱི་སྤྱན་སྔར་ཚིགས་སུ་བཅད་དེ་གསོལ་པ། སངས་རྒྱས་རྣམས་ཀྱི་བྱང་ཆུབ་མཆོག །མདོ་སྡེ་འདི་ལས་བསྟན་པས་ན། །གང་ཞིག་མདོ་སྡེ་འཛིན་བགྱིད་པ། །དེ་བཞིན་གཤེགས་
ལ་མཆོད་པར་འགྱུར། །བདག་གིས་མདོ་སྡེ་འདི་བཟུང་ནས། །བྱེ་བའི་ལྷ་ལ་རབ་བཤད་ནས། །གུས་པས་ཉན་པར་བགྱིད་པ་དག །བྱང་ཆུབ་གནས་སུ་བསྐུལ་བར་བགྱིད། །དེ་ནས་བྱང་ཆུབ་སེམས་དཔའ་བྱམས་པས་གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། བྱང་ཆུབ་ལ་ནི་རབ་གནས་ནས། །གསོལ་བ་མ་བཏབ་གྲོགས་མཐོང་ན། །ལུས་སྲོག་དག་ཀྱང་རབ་སྤངས་ནས། །མདོ་སྡེ་རྒྱལ་པོ་འདི་སྲུང་བགྱིད། །འདི་འདྲའི་ཆོས་ནི་བདག་ཐོས་ནས། །དགའ་ལྡན་ལྷ་གནས་མཆིས་ནས་ཀྱང་། །བཅོམ་ལྡན་བྱིན་བརླབས་དབང་གིས་ན། །ལྷ་མི་རྒྱ་ཆེན་སྟོན་པར་བགྱིད། །དེ་ནས་གནས་བརྟན་འོད་སྲུང་ཆེན་པོས་གུས་པས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། བཅོམ་ལྡན་ཉན་ཐོས་ཐེག་པར་ནི། །བདག་ནི་ཤེས་རབ་ཆུང་བར་གསུངས། །དེང་བདག་རང་གི་སྟོབས་ཀྱི་མཐུས། །མདོ་སྡེ་འདི་ནི་སྲུང་འཛིན་བགྱིད། །གང་ཞིག་མདོ་འདི་འཛིན་བགྱིད་ན། །བདག་གིས་དེ་ནི་རབ་བསྲུངས་ཏེ། །ཚིག་དང་སྤོབས་པའི་མཐུ་སྩལ་ནས། །རྗེས་འབྲང་རྟག་པར་ལེགས་ཞེས་བརྗོད། །དེ་ནས་ཚེ་དང་ལྡན་པ་ཀུན་དགའ་བོས་ཐལ་མོ་སྦྱར་ནས་ཚིགས་སུ་བཅད་དེ་གསོལ་པ། བདག་གིས་བཅོམ་ལྡན་མངོན་སུམ་དུ། །མདོ་སྡེ་ཚད་མེད་ཐོས་གྱུར་ཀྱང་། །ཆོས་མཆོག་རྒྱལ་པོ་འདི་འདྲ་བ། །ནམ་ཡང་ཐོས་པར་ཡོངས་མ་གྱུར། ། དེང་བདག་མདོ་འདི་བཅོམ་ལྡན་ལས། །མངོན་ཐོས་ཡོངས་སུ་བཟུང་བས་ན། །གང་དག་བྱང་ཆུབ་མོས་པ་ལ། །རྒྱ་ཆེན་རབ་ཏུ་སྤེལ་བར་བགྱིད། །དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་དང་། ལྷ་དང་། མིའི་འཁོར་མང་པོ་དེ་དག་སོ་སོ་ནས་མདོ་སྡེ་འདི་རྒྱ་ཆེར་སྤེལ་ཞིང་རྒྱས་པ་དང་། ཡོངས་སུ་བསྐྱབ་པ་དང་། ཡོངས་སུ་བསྲུང་བར་སེམས་བསྐྱེད་ནས་བྱང་ཆུབ་སེམས་དཔའ་རྣམས་ལ་ཡང་དག་པར་བསྐུལ་ཏེ། སེམས་ཅན་ལ་རྒྱ་ཆེར་ཕན་འདོགས་པ་གཟིགས་པ་དང་། ལེགས་སོ་ལེགས་སོ། །
ཞེས་བསྔགས་པ་བརྗོད་ནས། །ཁྱོད་ཀྱིས་འདི་ལྟར་མདོ་སྡེའི་རྒྱལ་པོ་མཆོག་དམ་པ་འདི། སེམས་རྩེ་གཅིག་ཏུ་རྒྱ་ཆེར་སྤེལ་ནས། ང་ཡོངས་སུ་མྱ་ངན་ལས་འདས་པའི་འོག་ཏུ་ཡང་། །འཐོར་ཞིང་ནུབ་པར་མི་འགྱུར་བར་བྱེད་པ་དེ་ནི། བླ་ན་མེད་པའི་བྱང་ཆུབ་ཀྱི་རྒྱུ་ཡང་དག་པ་ཡིན་པས། བསོད་ནམས་ཇི་སྙེད་ཅིག་འཐོབ་པར་འགྱུར་བ་ནི། བསྐལ་པ་གང་གཱའི་ཀླུང་གི་བྱེ་མ་སྙེད་དུ་བརྗོད་ཀྱང་མཐར་ཐུག་པར་མི་འགྱུར་རོ། །དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མའམ། གཞན་ཡང་རིགས་ཀྱི་བུའམ། རིགས་ཀྱི་བུ་མོ་ལ་སོགས་པ། གང་ལ་ལ་ཞིག་མཆོད་པ་དང་། བཀུར་སྟི་བྱས་ནས། ཡི་གེར་བྲིས་ཏེ། རྒྱ་ཆེར་སྤེལ་བ་དང་། གཞན་དག་ལ་ཡང་དག་པར་སྟོན་པར་བྱེད་པས་ཐོབ་པའི། བསོད་ནམས་གང་ཡིན་པ་དེ་ཡང་དེ་བཞིན་ནོ། །དེ་ལྟ་བས་ན་ཁྱེད་ཀྱིས་ཡང་དག་པའི་བརྩོན་པས་རྣལ་འབྱོར་བསྒོམ་པར་བྱའོ་ཞེས་བཀའ་སྩལ་ཏོ། །དེ་ནས་ཚད་མེད་མཐའ་མེད་པའི་གང་གཱའི་ཀླུང་གི་བྱེ་མ་དང་མཉམ་པའི་འཁོར་མང་པོ་རྣམས་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་པ་ཐོས་པས་ཐམས་ཅད་རབ་ཏུ་དགའ་བར་གྱུར་ནས། ཤིན་ཏུ་དང་བའི་དད་པས་ཡང་དག་པར་བླངས་ནས་བཀའ་བཞིན་དུ་སྤྱོད་པར་གྱུར་ཏོ། །གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ལས་ཡོངས་སུ་གཏད་པའི་ལེའུ་སྟེ་སུམ་ཅུ་གཅིག་པའོ།། །།འཕགས་པ་གསེར་འོད་དམ་པ་མཆོག་ཏུ་རྣམ་པར་རྒྱལ་བ་མདོ་སྡེའི་རྒྱལ་པོ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།ཞུ་ཆེན་གྱི་མཁན་པོ་དང་ལོཙྪ་བ་བཅོམ་ལྡན་འདས་ཀྱི་རིང་ལུགས་པ་བནྡེ་ཆོས་གྲུབ་ཀྱིས་རྒྱའི་དཔེ་ལས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།