འཕགས་པ་སྟོབས་པོ་ཆེ་ཞེས་བྱ་བ་ཐེག་པ་ཆེན་པོའི་མདོ།
རྒྱ་གར་སྐད་དུ། ཨཱརྱ་མ་ཧཱ་བ་ལ་ནཱ་མ་མ་ཧཱ་ཡཱ་ནྭ་སཱུ་ཏྲ། བོད་སྐད་དུ། འཕགས་པ་སྟོབས་པོ་ཆེ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རི་བཏང་བཟུང་ཆེན་པོ་ན་ཆོས་སྟོན་ཏེ། དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ་བཀུར་ནས་མངོན་པར་དགའ་བར་བྱས་པ་ཡང་དེ་ཉིད་དུ་འདུག་པར་གྱུར་ཏོ། །དེ་ནས་སངས་རྒྱས་བཅོམ་ལྡན་འདས་ཀྱི་ཕྱག་གིས་
སེམས་ཅན་རྣམས་དབུགས་འབྱིན་ཅིང་ཤར་ཕྱོགས་ན་མེ་ལྕེ་ཀུན་དུ་འབར་བའི་ཕྲེང་བའི་པདྨའི་གདན་ལ་བཞུགས་སོ། །བཅོམ་ལྡན་འདས་ཀྱི་གཡས་ལོགས་ན་སྟོབས་པོ་ཆེ་ལག་པ་བཞི་པ། ལག་པ་གཅིག་ན་ནི་རྔ་ཡབ་ཐོགས་ལག་པ་གཅིག་གིས་ནི་ཕྱག་འཚལ། གཡས་པ་ན་ནི་བེ་ཅོན་ཐོགས། གཡོན་པ་ན་ནི་ཞགས་པ་ཐོགས་པ། སྐྲ་ཁམ་པ་གྱེན་དུ་བརྫེས་པ། མིག་དམར་བའོ། །དེའི་འོག་ན་ནི་བཅོམ་ལྡན་འདས་རྡོ་རྗེ་འཛིན་འཁོར་དང་བཅས་པའོ། །གཡས་ན་ནི་རིག་སྔགས་ཀྱི་རྒྱལ་པོ་གནོད་མཛེས་སོ། །གཡོན་ན་ནི་བདུད་རྩི་ཐབ་སྦྱོར་རོ། །དེ་ནས་སྙིང་པོ་རྣམས་ནི་ཟླ་བ་ཁམ་པ་ལྟ་བུར་གཞག་གོ། །སྙིང་པོ་ནི་ཀི་ལི་ཀི་ལ་དང་། འགྲོ་ལྡིང་བའི་གཟུངས་དང་ལུས་དམར་པོ་དང་། རྡོ་རྗེ་རྣམ་པར་འཇོམས་པ་དང་། རྡོ་རྗེ་རྒྱ་ཆེན་ཏེ། སྙིང་པོའི་མཆོག་གོ། །རིག་སྔགས་ཀྱི་རྒྱལ་པོ་དྲག་པོ་ཆེན་པོ་དང་ཉེ་བ་ན་ནི་འཕགས་པ་མཱ་མ་ཀཱིའོ། །འཕགས་པ་བདུད་རྩི་ཐབ་སྦྱོར་གྱི་འོག་ན་ནི་རྡོ་རྗེའི་ལྕགས་ཀྱུ་དང་། རྡོ་རྗེ་ལུ་གུ་རྒྱུད་དོ། །སྒོའི་ནང་ལོགས་སུ་ནི་ཁྲོ་བོ་རྡོ་རྗེའི་ཐོ་བ་དང་། རྡོ་རྗེའི་བེ་ཅོན་གཉིས་མངོན་དུ་ཕྱོགས་པར་གཞག་གོ། །གཡོན་ལོགས་སུ་ནི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་འཁོར་དང་བཅས་པའོ། །བཅོམ་ལྡན་འདས་ཀྱི་གཡས་ལོགས་སུ་ནི་གོས་དཀར་མོའོ། །དེའི་འོག་ཏུ་ནི་སྒྲོལ་མ་དང་ཁྲོ་གཉེར་ཅན་ནོ། །གཡོན་དུ་ནི་རིག་སྔགས་ཀྱི་རྒྱལ་པོ་རྟ་མགྲིན་དང་། དེ་དག་ལ་སོགས་པ་བྱང་ཆུབ་སེམས་དཔའ་སེམས་དཔའ་ཆེན་པོ་བརྒྱ་ཕྲག་སྟོང་དང་ངོ་། །དེ་བཞིན་དུ་ཤར་ཕྱོགས་སུ་ནི་ཟླ་བ་དང་། ཉི་མ་དང་། ཡུལ་འཁོར་སྲུང་དང་དབང་པོའོ། །མེའི་ཕྱོགས་ན་ནི་མེའི་དྲང་སྲོང་ཆེན་པོ་རྣམས་ཀྱིས་བསྐོར་བའོ། །ལྷོ་ཕྱོགས་སུ་ནི་གཤིན་རྗེ་དང་ཁྱབ་འཇུག་གོ། །བདེན་བྲལ་གྱི་ཕྱོགས་སུ་ནི་སྲིན་པོའི་བདག་པོ་མ་མོ་རྣམས་ཀྱིས་བསྐོར་བའོ། །ནུབ་ཕྱོགས་སུ་ནི་ཀླུའི་བདག་པོ་ཀླུ་ལ་སོགས་པས་བསྐོར་བའོ། །རླུང་གི་ཕྱོགས་སུ་ནི་རླུང་ལྷ་འཁོར་དང་བཅས་པའོ། །བྱང་ཕྱོགས་སུ་ནི་ལུས་ངན་པོ་འཁོར་དང་བཅས་པའོ། །
དབང་བདག་གི་ཕྱོགས་སུ་ནི་དབང་བདག་ཚོགས་ཀྱིས་བསྐོར་བའོ། །ལྷའི་དབང་པོ་བརྒྱ་བྱིན་དང་། ཁྱབ་འཇུག་དང་། ཚངས་བ་ཆེན་པོ་དང་། དེ་ལ་སོགས་པ་གནས་གཙང་མའི་རིས་ཀྱི་ལྷའི་བུ་ཚད་མེད་གྲངས་མེད་དཔག་ཏུ་མེད་པ་དག་དང་ངོ་། །སངས་རྒྱས་བཅོམ་ལྡན་འདས་འཁོར་དང་བཅས་ཏེ་སྔ་མ་བཞིན་ནོ། །དེ་ནས་བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ་མདོ་སྡེ་འདི་སྒྲུབ་པ་པོ་འདི་ལ་གསང་སྔགས་ཀྱི་གཞི་འདི་རྒྱ་ཆེར་ཡང་དག་པར་བཤད་པར་བྱའོ། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོྃ་ཀི་ལི་ཀི་ལ་བཛྲ། ཀི་ལི་ཀི་ལ་ལ་(སྭཱ་ཧཱ)། སྤྱི་གཙུག་ལ་སྭཱ་ཧཱ། དཔྲལ་བ་ལ་སྭཱ་ཧཱ། མིག་ལ་སྭཱ་ཧཱ། དྲག་ཤུལ་ཅན་ལ་སྭཱ་ཧཱ། ཤིན་ཏུ་དྲག་ཤུལ་ཅན་ལ་སྭཱ་ཧཱ། རྡོ་རྗེ་ཞགས་པ་ལ་སྭཱ་ཧཱ། ལུས་དམར་པོ་ལ་སྭཱ་ཧཱ། ལག་ན་རྡོ་རྗེ་ལ་སྭཱ་ཧཱ། ལག་ན་ཞགས་པ་ལ་སྭཱ་ཧཱ། ལག་ན་རལ་གྲི་ལ་སྭཱ་ཧཱ། ལག་ན་དགྲ་སྟ་ལ་སྭཱ་ཧཱ། གཞུ་འཛིན་ལ་སྭཱ་ཧཱ། གཏུན་ཤིང་འཛིན་ལ་སྭཱ་ཧཱ། ལག་ན་འཁོར་ལོ་ལ་སྭཱ་ཧཱ། ལག་ན་མདུང་རྩེ་གསུམ་པ་ལ་སྭཱ་ཧཱ། སྙིང་པོ་ལ་སྭཱ་ཧཱ། ཉེ་བའི་སྙིང་པོ་ལ་སྭཱ་ཧཱ། དྲག་པོ་ཀི་ལི་ཀི་ལ་ལ་སྭཱ་ཧཱ། བྱིས་པ་ཀི་ལི་ཀི་ལ་ལ་སྭཱ་ཧཱ། དམར་པོ་ཀི་ལི་ཀི་ལ་ལ་སྭཱ་ཧཱ། སྟོབས་པོ་ཆེ་ལ་སྭཱ་ཧཱ། རལ་པ་ཅན་ལ་སྭཱ་ཧཱ། གསུས་འཕྱང་པོ་ལ་སྭཱ་ཧཱ། ཁྲོ་བོ་ཆོལ་པ་ལ་སྭཱ་ཧཱ། གཤིན་རྗེ་ལ་སྭཱ་ཧཱ། སྲིན་པོ་ལ་སྭཱ་ཧཱ། སྲིན་པོ་ཡ་མུ་ན་ལ་སྭཱ་ཧཱ། དྲག་པོ་ཆེན་པོ་ལ་སྭཱ་ཧཱ། སྤྲིན་ལ་སྭཱ་ཧཱ། རི་འཛིན་ལ་སྭཱ་ཧཱ། རི་བཏང་བཟུང་འཛིན་ལ་སྭཱ་ཧཱ། རྡོ་རྗེ་བེ་ཅོན་ལ་སྭཱ་ཧཱ། འཇིགས་བྱེད་ཆེན་པོ་ལ་སྭཱ་ཧཱ། ལུས་འཇིགས་བྱེད་ལ་སྭཱ་ཧཱ། སྡིགས་བྱེད་ལ་སྭཱ་ཧཱ། རྡོ་རྗེའི་ལུ་གུ་རྒྱུད་ལ་སྭཱ་ཧཱ། རྡོ་རྗེའི་གཏན་པ་ལ་སྭཱ་ཧཱ། རྡོ་རྗེའི་ལུས་ལ་སྭཱ་ཧཱ། འགྲོ་ལྡིང་བ་ལ་སྭཱ་ཧཱ། བདུད་རྩི་ལ་སྭཱ་ཧཱ། དཀའ་ཐུབ་འཛིན་ལ་སྭཱ་ཧཱ། ལྕགས་ཀྱུ་ལ་སྭཱ་ཧཱ། དོན་ཡོད་པ་ལ་སྭཱ་ཧཱ། གཙུག་ཏོར་རྒྱལ་པོ་ལ་སྭཱ་ཧཱ། མདོག་དཀར་ལ་སྭཱ་ཧཱ། སྡོ་བསངས་མདོག་ལ་སྭཱ་ཧཱ། འཕྱང་པོ་ལ་སྭཱ་ཧཱ། གླང་པོ་ཆེ་ལ་སྭཱ་ཧཱ།
བ་ལང་འཕེལ་གྱི་ལག་ལ་སྭཱ་ཧཱ། བདུད་ཀྱི་རྣམ་པར་འཕྲུལ་པ་ལ་སྭཱ་ཧཱ། སྦྲུལ་གྱི་སྐ་རགས་ཅན་ལ་སྭཱ་ཧཱ། རྡོ་རྗེའི་ཕུར་པ་ལ་སྭཱ་ཧཱ། ལག་པ་གཉིས་ཀ་ལ་སྭཱ་ཧཱ། ཨཱ་རྡོ་རྗེ་ལ་སྭཱ་ཧཱ། འབར་བའི་འོད་བྱེད་ལ་སྭཱ་ཧཱ། བློ་གྲོས་བརྟན་པའི་རྡོ་རྗེ་ལ་སྭཱ་ཧཱ། མྱུ་གུ་ལ་སྭཱ་ཧཱ། འོད་བྱེད་པ་ལ་སྭཱ་ཧཱ། རྡོ་རྗེས་རྣམ་པར་འཇོམས་པ་ལ་སྭཱ་ཧཱ། རྡོ་རྗེའི་དྲ་བ་ལ་སྭཱ་ཧཱ། རྡོ་རྗེ་འཇིགས་བྱེད་ལ་སྭཱ་ཧཱ། རྡོ་རྗེ་ཁུ་ཚུར་ལ་སྭཱ་ཧཱ། སྤྲིན་རྣམ་པར་འཐོར་བ་ལ་སྭཱ་ཧཱ། ཆར་བ་རྟོན་ལ་སྭཱ་ཧཱ། རྡོ་རྗེའི་ལྕགས་ཀྱུ་ལ་སྭཱ་ཧཱ། རྡོ་རྗེའི་སྙིང་པོ་ལ་སྭཱ་ཧཱ། རྡོ་རྗེའི་ཉེ་བའི་སྙིང་པོ་ལ་སྭཱ་ཧཱ། མཐེ་བོའི་རྒྱལ་པོ་ལ་སྭཱ་ཧཱ། བེ་ཅོན་རྒྱལ་པོ་ལ་སྭཱ་ཧཱ། གོ་ཆའི་རྒྱལ་པོ་ལ་སྭཱ་ཧཱ། ཨོྃ་ངྷྲིྃ ཨོཾ། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོྃ་ཧུ་ལུ་ཧུ་ལུ། ཏིཥྛ་ཏིཥྛ། བནྡྷ་བནྡྷ། ཧ་ན་ཧ་ན། ཨ་མྲྀ་ཏེ་ཧཱུྃ་ཕཊ་སྭཱ་ཧཱ། ཨོྃ་ཨ་མྲྀ་ཏེ་ཧཱུྃ་ཕཊ་སྭཱ་ཧཱ། ཡུལ་འཁོར་སྲུང་ལ་སྭཱ་ཧཱ། མིག་མི་བཟང་ལ་སྭཱ་ཧཱ། འཕགས་སྐྱེས་པོ་ལ་སྭཱ་ཧཱ། ལུས་ངན་པོ་ལ་སྭཱ་ཧཱ། དབང་པོ་ལ་སྭཱ་ཧཱ། མེ་ལ་སྭཱ་ཧཱ། དྲང་སྲོང་ཆེན་པོ་ཐམས་ཅད་ལ་སྭཱ་ཧཱ། ཉི་མ་ལ་སྭཱ་ཧཱ། ཟླ་བ་ལ་སྭཱ་ཧཱ། གཤིན་རྗེ་ལ་སྭཱ་ཧཱ། ཁྱབ་འཇུག་ལ་སྭཱ་ཧཱ། སྲིན་པོའི་བདག་པོ་ལ་སྭཱ་ཧཱ། ཀླུའི་བདག་པོ་ལ་སྭཱ་ཧཱ། རླུང་ལ་སྭཱ་ཧཱ། དབང་བདག་ལ་སྭཱ་ཧཱ། དབང་བདག་གི་ཆུང་མ་ལ་སྭཱ་ཧཱ། བརྒྱ་བྱིན་ལ་སྭཱ་ཧཱ། ནོར་ལྷའི་བུ་ལ་སྭཱ་ཧཱ། རྡོ་རྗེ་ཆེན་པོ་ལ་སྭཱ་ཧཱ། ཚངས་པ་ཆེན་པོ་ལ་སྭཱ་ཧཱ། ས་ལ་སྭཱ་ཧཱ། དབྱངས་ཅན་ལ་སྭཱ་ཧཱ། ལྷ་མོ་དཔལ་ལ་སྭཱ་ཧཱ། ལྷ་མོ་དཀའ་ཐུབ་ཟློག་ལ་སྭཱ་ཧཱ། རིག་སྔགས་ཆེན་པོ་སྟོབས་པོ་ཆེའི་རིག་སྔགས་ཀྱི་རྒྱལ་པོ་འདིའི་དཀྱིལ་འཁོར་གྱི་གནས་སུ་འཆང་ཞིང་ཡིད་ལ་བྱེད་ན་སྲུང་བ་དང་། སྐྱོབ་པ་དང་། སྦེད་པ་བྱེད་པར་འགྱུར་རོ། །ལས་ཐམས་ཅད་ཀྱང་འགྲུབ་པར་འགྱུར་རོ། །སངས་རྒྱས་དང་། ཆོས་དང་། དགེ་འདུན་དང་། རང་སངས་རྒྱས་དང་། འཕགས་པ་ཉན་ཐོས་ཀྱི་དགེ་འདུན་ཐམས་ཅད་ལ་ཕྱག་འཚལ་ལོ། །གནས་བརྟན་བློ་གྲོས་ཆེན་པོ་ཤ་ར་དྭ་ཏིའི་བུ་ལ་ཕྱག་འཚལ་ལོ། །བྱམས་པ་ལ་སོགས་པའི་
བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །ཡང་དག་པར་སོང་བ་རྣམས་ལ་ཕྱག་འཚལ་ལོ། །ཡང་དག་པར་ཞུགས་པ་རྣམས་ལ་ཕྱག་འཚལ་ལོ། །རྡོ་རྗེ་འཛིན་འཁོར་དང་བཅས་པ་ལ་ཕྱག་འཚལ་ལོ། །ཏདྱ་ཐཱ། མུ་ནེ་མུ་ནེ། མ་ཧཱ་མུ་ནེ། ཀི་ལི་ཀི་ལ། མ་ཧཱ་ཀི་ལི་ཀི་ལ་དྷི་ཀེ། ཀ་ཊ་ཀ་ཊ་ཀ་ཊ། མ་ཧཱ་ཀ་ཊ། ཤ་མ་ཤ་མ་ཤ་མ། མ་ཧཱ་ཤ་མ། ཤཱ་ཏྲི་ཤཱ་ཏྲི་ཤཱ་ཏྲི། ཤཱནྟ་ཤཱནྟ་ཤཱནྟ། དནྟ་དནྟ་དནྟ། དྷཱི་ར་དྷཱི་ར་དྷཱི་ར། མ་ཧཱ་མེ་གྷཱ། དུ་ར་དུ་ར། ཧ་རི་ཧ་རི་ཧ་རི། ཀུཊྚི་ཀུཊྚི་ཀུ་ཊྚི། ཚིནྡ་ཚིནྡ་ཚིནྡ། བྷིནྡྷ་བྷིནྡྷ་བྷིནྡྷ། སརྦ་དུ་ཥྚཱ་ན། གུ་མུ་གུ་མུ་གུ་མུ། ཧ་ར་ཧ་ར་ཧ་ར། པྲཱ་ཎཱན། ད་མ་ནི་དམ་ནི། ཊ་ཊ་ཊ། ཋ་ཋ་ཋ། ཌཱ་ཌཱ་ཌཱ་ཌཱ་ཌཱ་ཌཱ། ཙ་ཙ་ཙ་ཙ་ཙ་ཙ། པ་ཙ་པ་ཙ་པ་ཙ། ད་ཧ་ད་ཧ་ད་ཧ། ཧཱུྃ་ཧཱུྃ་ཧཱུྃ། ཧེ་ཧེ་ཧེ། ཕཊ་ཕཊ་ཕཊ། ཤ་བ་རི་ཤ་བ་རི་ཤ་བ་རི། མཱ་ཏྃ་གི། །ཙཎྜཱ་ལི། ཧུ་ཧུ་ཧུ། ཛུ་ཧུ་ཛུ་ཧུ་ཛུ་ཧུ། ཧ་ཏཱ་པྲ་ཏྱརྠི་ན། ཙི་ལི་ཙི་ལི་ཙི་ལི། ཕཊ་ཕཊ་ཕཊ། ཏིཥྛ་ཏིཥྛ་ཏིཥྛ། ཏིཥྛ་ཐི་ཏིཥྛ་ཐི་ཏིཥྛ་ཐི། མཱ་ཏི་ཀྲ་མ་ཐ། མ་ཏྃ་གི། ཧཱུྃ་ཧཱུྃ་ཧཱུྃ། ཧེ་ཧེ་ཧེ། གལ་ཏེ་མི་འདུག་ན་ལག་པ་དང་། རྐང་པ་དང་། ཁ་དང་། མིད་པ་དང་། མིག་དང་། སྙིང་དང་ངག་ཐམས་ཅད་བཅིང་ངོ་། །དབྲོག་གོ། །ཛྭ་ལ་ཛྭ་ལ་ཛྭ་ལ། དུནྡྷུ་དུནྡྷུ་དུནྡྷུ། བནྡྷུ་བནྡྷུ་བནྡྷུ། ནཱི་ལ་ནཱི་ལ་ནཱི་ལཱང་ག་བཛྲ་དྷཱ་ར། སྟོབས་པོ་ཆེ་ཞེས་བྱ་བའི་སྙིང་པོ་དྲན་པར་གྱིས་ཤིག །ཀོ་ཊི་ཀོ་ཊི་ཀོ་ཊི་ནི། སརྦ་བྷཱུ་ཏཱ་ནི། བཛྲ་མཱ་ལི་བཛྲ་དྷཱ་ར། བཛྲ་ཨ་ཊྚ་ཧཱ་ས། ཙརྟུ་ན་རྟུ། མརྟུ། ཀུ་རུ་ཀུ་རུ། ཧུ་རུ་ཧུ་རུ་ཧུ་རུ། སེམས་ཅན་ཆེན་པོ་དྲན་པར་གྱིས་ཤིག །ཧཱུྃ་ཧཱུྃ་ཧཱུྃ། ཧེ་ཧེ་ཧེ། ཕཊ་ཕཊ་ཕཊ། ཙཎྜ་ཙཎྜ་ཙཎྜ།མ་ཧཱ་ཙཎྜ། ཧུ་རྟུ་ཧུ་རྟུ་ཧུ་རྟུ། མུ་རུ་མུ་རུ་མུ་རུ། གྲྀཧྣ་གྲྀཧྣ་གྲྀ་ཧྣ། བཛྲ་པཱ་ཎི་ཧ་ན་ཧ་ན། མ་མ་སརྦ་ཤ་ཏྲཱུ་ཎཱན། མཱུརྟི་ནི་ཏཱ་ཌ་ཡ་ཕཊ། ཀུ་རུ་ཀུ་རུ་ཀུ་རུ། ལག་ན་རྡོ་རྗེའི་ལས་དང་འགལ་བར་མ་བྱེད་ཅིག །དམ་ཚིག་ལས་འགལ་བར་བྱས་ན་དམ་ཚིག་དྲལ་བ་དང་། དེ་བཞིན་གཤེགས་པ་ལ་ཡང་བསླུས་པར་འགྱུར་རོ། །གསང་སྔགས་ཀྱི་གཞི་ནི་འདི་རྣམས་ཡིན་ནོ། །ཙུ་ཙུ་ཙུ། ཧ་ར་ཧ་ར་ཧ་ར། ཕུཊུ་ཕུཊུ་ཕུཊུ། ཏ་པ་ནི་ཏ་པ་ནི་ཏ་པ་ནི། པ་ཙ་ནི་པ་ཙ་ནི་པ་ཙ་ནི།
ལག་ན་རྡོ་རྗེའི་སྙིང་པོ་དེ་བཞིན་གཤེགས་པས་བྱིན་གྱིས་བརླབས་པ་དྲན་པར་གྱིས་ཤིག །ཙི་ལི་ཙི་ལི་ཙི་ལི། ཕུ་ལུ་ཕུ་ལུ་ཕུ་ལུ། ཕུ་ཕུ་ཕུ། བཅོམ་ལྡན་འདས་གལ་ཏེ་བདག་སྙིང་པོ་འདི་དང་འགལ་བར་བགྱིས་ན་དེ་བཞིན་གཤེགས་པས་རབ་ཏུ་གསུངས་པའི་མཚམས་མེད་པ་ལྔ་དང་ལྡན་པར་གྱུར་ཅིག །དར་ཕུ། ཙར་ཕུ། ནར་ཕུ། རྡོ་རྗེ་འཛིན་འཁོར་དང་བཅས་པ་ལ་ཕྱག་འཚལ་ལོ། །བདག་ལ་གསང་སྔགས་ཀྱི་གཞི་འདི་རྣམས་གྲུབ་པར་གྱུར་ཅིག་སྭཱ་ཧཱ། རྡོ་རྗེ་འཛིན་གཟི་བརྗིད་ཆེན་པོ་ལ་ཕྱག་འཚལ་ལོ་སྭཱ་ཧཱ། ཨོྃ། ཧཱུྃ་ཧཱུྃ། ཕཊ་ཕཊ་སྭཱ་ཧཱ། དེ་ནས་དེའི་ཚེ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པའི་འོད་ཟེར་ཀུན་དུ་འབར་བའི་སྣང་བས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ལས་འདས་ནས་བདུད་ཀྱི་ཁྱིམ་ཐམས་ཅད་ཀུན་དུ་འབར། རབ་ཏུ་འབར། ཀུན་དུ་རབ་ཏུ་མཆེད་ཅིང་འབར་ཏེ་མེ་ལྕེ་གཅིག་ཏུ་གྱུར་པར་ཀུན་དུ་སྣང་ངོ་། །དེ་ལྟར་གྱུར་པ་དང་། བདུད་སྡིག་ཅན་རལ་གྲི་དང་། འཁོར་ལོ་དང་། གཞུ་དང་། མདའ་ལ་སོགས་པ་དང་། མཚོན་ཆ་རྣམས་ལག་ན་ཐོགས་ཏེ་བགེགས་ཀྱི་རྣམ་པར་འཕྲུལ་པ་དུ་མ་བྱེད་དོ། །དེ་ནས་སྐད་ཅིག་དེ་ཉིད་ལ་བདུད་སྡིག་ཅན་བདུད་ཀྱི་རིས་ཀྱི་ལྷའི་བུ་ཐམས་ཅད་དང་ལྷན་ཅིག་ཏུ་བདུད་ཀྱི་རྣམ་པར་འཕྲུལ་པ་ཆེན་པོས་བཅོམ་ལྡན་འདས་ག་ལ་བ་དེར་སོང་ངོ་། །དེ་ནས་དེ་ལྟར་གྱུར་པ་དང་། ཁྲོ་བོ་ཆོལ་བ། མདོག་དམར་བ། སྦྲང་རྩི་ལྟར་མིག་དམར་སེར་པོ། མཆེ་བ་གཙིགས་པ། མི་བཟད་པ། སྐྲ་ཁམ་པ་གྱེན་དུ་བརྫེས་པ། ལག་པ་གཡས་པ་ན་བེ་ཅོན་ཐོགས་པ། ལག་པ་གཡོན་པ་ན་རྡོ་རྗེ་ཐོགས་པ་སྦྲུལ་གྱིས་བརྒྱན་པ། སྟག་ལྤགས་ཀྱི་ཤམ་ཐབས་བགོས་པ། ཤཪ་ཕྱོགས་སུ་འཇིག་རྟེན་གྱི་ཁམས་གང་གཱའི་ཀླུང་ཉི་ཤུ་རྩ་གཅིག་གི་བྱེ་མ་སྙེད་འདས་ཤིང་། དེ་བཞིན་དུ་ལྷོ་དང་། ནུབ་དང་། བྱང་གི་ཕྱོགས་སུ་ཡང་ཀུན་དུ་སྣང་ངོ་། །དེ་ནས་བདུད་སྡིག་ཅན་དང་། བགེགས་བྱེ་བ་ཁྲག་ཁྲིག་སྟོང་ཕྲག་བརྒྱ་ཁྲོ་བོ་ཆོལ་པས་འདར་བར་གྱུར་ཏོ། །བདུད་སྡིག་ཅན་ནི་མྱོས་ཤིང་
གཟིར་ཏེ་འཕངས་ནས་སྲོག་ལ་མི་ལྟ་བ་དང་། གསང་བ་པའི་བདག་པོ་ལག་ན་རྡོ་རྗེས་ཞགས་པའི་བཅིང་བ་ལྔས་བཅིངས་སོ། །དེ་ལྟར་གྱུར་པ་དང་། དེའི་ཚེ་འཐབ་བྲལ་དང་། དགའ་ལྡན་དང་། འཕྲུལ་དགའ་དང་། གཞན་འཕྲུལ་དབང་བྱེད་ཀྱི་ལྷ་རྣམས་ཀྱིས་སྤོས་དང་། མེ་ཏོག་དང་། རྒྱལ་མཚན་དང་། བ་དན་སྣ་ཚོགས་ལ་སོགས་པས་བཅོམ་ལྡན་འདས་ལ་ཅི་ནུས་ཀྱིས་མཆོད་ནས་ཕྱོགས་གཅིག་ཏུ་འཁོད་དོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེ་སངས་རྒྱས་ཐམས་ཅད་ཀྱིས་བསྟོད་ཅིང་བསྔགས་ཏེ་མངོན་པར་དགའ་བར་བྱས་ནས་བཅོམ་ལྡན་འདས་ཀྱིས་རྗེས་སུ་ཐུགས་རངས་པ་མཛད་པས་སེམས་ཅན་ཐམས་ཅད་ཀྱི་དོན་དང་། ལྷ་དང་། མི་རྣམས་ལ་ཕན་པ་དང་། བདེ་བའི་ཕྱིར་རིག་སྔགས་མཆོག་གི་རྒྱུད་ཆེན་པོའི་ནང་ནས་དོན་འདོད་པ་ཐམས་ཅད་སྦྱིན་པ་ཞེས་བྱ་བ་སྟོབས་དཔག་ཏུ་མེད་པས་ཕ་རོལ་གནོན་པ་སྟོབས་པོ་ཆེའི་སྟོབས་ཆེན་པོའི་རིག་སྔགས་ཀྱི་རྒྱལ་པོ་ཞེས་བྱ་བའི་གསང་སྔགས་ཀྱི་གཞི་འདི་དག་སྨྲས་སོ། །གང་ལ་ལ་ཞིག་འཛིན་ཏམ། འཆང་ངམ། ཀློག་གམ། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་ཏམ། བསྟི་སྟང་དུ་བྱེད་དམ། བླ་མར་བྱེད་དམ། རིམ་གྲོར་བྱེད་དམ། མཆོད་པ་བྱེད་ན་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །ཕ་རོལ་གྱིས་བྱས་པའི་གསང་སྔགས་ཐམས་ཅད་བཤིག་པ་དང་། བཅོམ་པ་དང་། བསྒྱེལ་བར་ཡང་འགྱུར་རོ། །དེ་ལྟར་བཅོམ་ལྡན་འདས་རྡོ་རྗེ་འཛིན་གྱིས་རིག་སྔགས་མཆོག་གི་རྒྱུད་ཆེན་པོའི་ནང་ནས་འབྱུང་བ་སྨྲས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེ་བཅོམ་ལྡན་འདས་ཀྱིས་རྗེས་སུ་ཐུགས་རངས་པ་མཛད་པས་དོན་འདོད་པ་ཐམས་ཅད་སྦྱིན་པ་ཞེས་བྱ་བ་སྟོབས་དཔག་ཏུ་མེད་པས་ཕ་རོལ་གནོན་པ་སྟོབས་པོ་ཆེའི་གསང་སྔགས་ཀྱི་གཞི་འདི་སྨྲས་པ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ན་ད་ཧ་པ་ཙ་བི་དྷྭནྶཡ། ཛཊི་ལམ་པོ་བྷ་ར། ཨུ་ཙྪུཥྨ་ཀྲོ་དྷ་ཧཱུྃ་ཕཊ་སྭཱ་ཧཱ། དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་
རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གིས་ཆོས་ཀྱི་རྣམ་གྲངས་འདི་ཐོས་ནས་འཛིན་ཏམ། འཆང་ངམ། ཀློག་གམ། གཞན་དག་ལ་ཡང་རྒྱ་ཆེར་རབ་ཏུ་སྟོན་ཏམ། རིམ་གྲོར་བགྱིད་དམ། མཆོད་པར་བགྱིད་ན་དཀྱིལ་འཁོར་ཐམས་ཅད་དུ་དབང་བསྐུར་བར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེས་ཡང་གསོལ་པ། སྟོབས་པོ་ཆེའི་སྙིང་པོ་འཛིན་པ་ལ་ནི་གནོད་སྦྱིན་ནམ། གནོད་སྦྱིན་གྱི་བུའམ། སྲིན་པོའམ། སྲིན་པོའི་བུའམ། གྲུལ་བུམ་མམ། གྲུལ་བུམ་གྱི་བུའམ། ནམ་མཁའ་ལྡིང་ངམ། ནམ་མཁའ་ལྡིང་གི་བུའམ། ཀླུའམ། ཀླུའི་བུའམ། དྲི་ཟའམ། དྲི་ཟའི་བུའམ། ཤ་ཟའམ། ཤ་ཟའི་བུའམ། སྨྱོ་བྱེད་དམ། སྨྱོ་བྱེད་ཀྱི་བུའམ། མཁའ་འགྲོ་མའམ། མཁའ་འགྲོ་མའི་བུའམ། སྒྲུབ་པའམ། སྦྲུལ་འཛིན་བཅས་ལ་སོགས་པ་དང་། བརྗེད་བྱེད་དམ། ལུས་སྲུལ་པོའམ། རོ་ལངས་ལ་སོགས་པ་དང་། གཅོད་པའི་གདོན་ཐམས་ཅད་དང་། བརྗེད་བྱེད་ལ་སོགས་པས་མི་ཚུགས་པར་འགྱུར་རོ། །དེ་ནས་བཅོམ་ལྡན་འདས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་ལེགས་སོ་ལེགས་སོ། །སྟོང་པ་ཉིད་དོ། །དོན་དམ་པ་སྟོང་པ་ཉིད་དོ། །ཕྱི་མའི་མཐའ་སྟོང་པ་ཉིད་དོ། །སྟོང་པ་ཉིད་སྟོང་པ་ཉིད་དོ། །ཆེན་པོ་སྟོང་པ་ཉིད་དོ། །དེ་བཞིན་ཉིད་སྟོང་པ་ཉིད་དོ། །དེ་ནས་བཅོམ་ལྡན་འདས་ལ་གསང་བ་པའི་བདག་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །གང་མདོ་སྡེ་འདི་རབ་ཏུ་སྟོན་པ་དེ་མཆོད་པར་བགྱི་བ་དང་། ཕྱག་བགྱི་བ་དང་། རིམ་གྲོར་བགྱི་བ་དང་། བསྐོར་པར་བགྱི་བའི་འོས་སུ་འགྱུར་བ་ལགས་སོ། །དེ་ནས་བཅོམ་ལྡན་འདས་ལག་ན་རྡོ་རྗེ་སྟོབས་དཔག་ཏུ་མེད་པས་ཕ་རོལ་གནོན་པ་སྟོབས་པོ་ཆེའི་གསང་སྔགས་ཀྱི་གཞི་སྨྲས་པ། ཨོྃ་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ལག་ན་མདུང་རྩེ་གསུམ་ཐོགས་པ་དྲག་ཤུལ་ཅན་ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ། ཨོྃ་ཛྱོ་ཏིརྣཱ་ད། ཧཱུྃ་ཧཱུྃ་ཧཱུྃ། ཨོྃ་ཨོྃ་ཨོྃ། ཕཊ་ཕཊ་ཕཊ། སྟོབས་པོ་ཆེ་ལ་སྭཱ་ཧཱ། ཨོྃ་རྡོ་རྗེ་ཁྲོ་བོ་སྟོབས་པོ་ཆེ་ཧ་ན་ད་ཧ།
བ་ཅམ་ཐ། བི་ཀི་ར། བི་དྷྭནྶ་ཡ། ཛ་ཊི་ལ་ལཾ་བོ་ད་ར་ཨུ་ཙྪུཥྨ་ཀྲོ་དྷ་ཧཱུྃ་ཕཊ། ཨོྃ་ཛྭ་ལ་ཛྭ་ལ། སརྦ་དུཥྚ་ན། སྟམྦྷ་ཡ། སྟམྦྷ་ཡ། དུ་རཱ་ཙ་རཱ་ན་དུཥྚ་ན་ནི་བཱ་ར་ཡ། བདག་ལ་སྲུངས་ཤིག་སྲུངས་ཤིག་སྭཱ་ཧཱ། ཨོྃ་ཨ་ནནྟ་བི་ཛ་ཡ། མ་ཧཱ་ཙ་ཎྜི་ཧཱུྃ་ཕཊ་སྭཱ་ཧཱ། ཨོྃ་དྷྲི་ཀ་ཧཱུྃ་ཕཊ། ཨོྃ་ཤི་རི་ཤི་རོ། མཱ་ལི་ནི། སི་ནི་སི་ནི། ཤི་ཤི་ནི་ཤི་ཤི་ནི། ཨོྃ་སརྦ་ཨཱཏྨ་ཛ། མ་ཧཱ་ཏེ་ཛོ། བཛྲ་ཨ་ཤ་ནི་བཛྲ་པཱ་ཤ །ཨ་ནུ་པྲ་བི་ཤ་སརྦ་དུཥྚན། སྟམྦྷ་ཡ་སྟམྦྷ་ཡ་ཧཱུྃ་ཕཊ། ཨོྃ་ཧཱུྃ་བནྡྷ་བནྡྷ་ཧཱུྃ། ཨོྃ་ཨ་ནནྟ་བི་ཛ་ཡ། མ་ཧཱ་ཙཎྜི་ཧཱུྃ་ཕཊ། ཨོྃ་ཕཊ་ཕཊ་ཕཊ། བཛྲ་ཀྲོ་དྷ་ཧཱུྃ་ཕཊ། ཨོྃ་བཛྲ་ཀརྟ་རི། ཀ་ར་ཀ་ར། ཚིནྡྷ་ཚིནྡྷ། ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་དྷ་ཀ་དྷ་ཀ་ཛྭ་ལ་ཛྭ་ལ་ཧཱུྃ་ཕཊ། ཨོྃ་བི་པུར་རཀྵ་བཛྲ་པཉྩ་ར་ཧཱུྃ་ཕཊ། ཨོྃ་ཀི་ལི་ཀི་ལ་བཛྲ་བཛྲིར་བྷཱུར་བནྡྷ་བནྡྷ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་ཨཱ་ཀརྵ་ཡ། ཨཱ་ཀརྵ་ཡ། ཨཱ་ཀརྵ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་ད་ར་ད་ར། དྷཱ་ར་ཡ་དྷཱ་ར་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ན་ཧ་ན། ད་ཧ་ད་ཧ། ད་ར་ད་ར། དཱ་ར་ཡ་དཱ་ར་ཡ། པ་ཊ་ཡ་པ་ཊ་ཡ། མོ་ཊ་ཡ་མོ་ཊ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་པ་ཡ་ཏ་ཌ་ཏ་ཌ། ཏཱ་ཌ་ཡ་ཏཱ་ཌ་ཡ་ཧཱུྃ་ཕཊ། ཨོྃ་བཛྲ་ཀྲོ་དྷ་མ་ཧཱ་བ་ལ་ཛྭ་ལ་ཛྭ་ལ། བྲ་ཛྭ་ལ་བྲ་ཛྭ་ལ། དཱི་བྱ་དཱི་བྱ། དཱི་པ་ཡ་དཱི་པ་ཡ་ཧཱུྃ་ཕཊ། ཨོྃ་ཙུ་རུ་ཙུ་རུ། ཨུ་ཙྪུཥྨ་ཀྲོ་དྷ་ཤི་ཁ། ཧ་ར་ཧ་ར་ཧཱུྃ་ཕཊ། དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཨོྃ་བཛྲ་ཀྲོ་དྷ་མ་ཧཱ་བ་ལ་ཙཎྜ་ཧ་ན། ད་ཧ་པ་ཙ། མ་ཐ། བི་ཀ་རི། བི་དྷྭནྶ་ཡ། བཅོམ་ལྡན་འདས་ཚུར་གཤེགས་ཚུར་གཤེགས། ཧ་ན་ཧ་ན། ཧ་ར་ཧ་ར། ད་ཧ་ད་ཧ། པ་ཙ་པ་ཙ། བི་དྷྭནྶ་ཡ། བིདྷྭནྶ་ཡ། ལྷ་དང་ལྷ་མ་ཡིན་གྱི་དབང་པོས་མཆོད་པ། ཐམས་ཅད་ཀྱི་བདག་ཉིད་ལས་སྐྱེས་པ་གཟི་བརྗིད་ཆེན་པོ། སུ་རུ་སུ་རུ། མུ་རུ་མུ་རུ། ཀུ་རུ་ཀུ་རུ།གྷུ་རུ་གྷུ་རུ། ཀུརྦ་ཀུརྦ། མ་ཧཱ་ཀུརྦ། བི་ཀུརྦ། ཀུ་ནཊྚི་ཀུ་ནཊྚི། ན་ཊི་ན་ཊི། ཤི་ནི་ཤི་ནི། ཁི་ནི་ཁི་ནི། ཁ་ཁ་ཁཱ་ཧི་ཁཱ་ཧི། ཁུ་རུ་ཁུ་རུ། ཏུ་ཊུ་ཏུ་ཊ། ཏྲཊྚ་ཏྲ་ཊྚ། ཏུ་རུ་ཏུ་རུ། འབྱུང་པོའི་བདག་པོ། ཀླུའི་
བདག་པོ། ལྷ་མ་ཡིན་གྱི་གྲོང་ཁྱེར་རྣམ་པར་འཇོམས་པར་བྱེད་པ་ཁྲོ་བོ་ཆོལ་པ་སྟོབས་པོ་ཆེ། དྷ་མ་དྷ་མ། ཀ་ར་ཀ་ར། ཀུ་རུ་ཀུ་རུ། སུ་རུ་སུ་རུ་ཧཱུྃ་ཕཊ། ཧ་ན་ཧ་ན་ཧཱུྃ་ཕཊ། ད་ཧ་ད་ཧ་ཧཱུྃ་ཕཊ། པ་ཙ་པ་ཙ་ཧཱུྃ་ཕཊ། ཧྲཱི། ཧཱུྃ་ཧཱུྃ་ཧཱུྃ། ཕཊ་ཕཊ་ཕཊ་སྭཱ་ཧཱ། ཨོྃ་ཙུ་ལུ་ཙུ་ལུ་རུ་སྭཱ་ཧཱ། ཨོྃ་བཛྲ་ཀྲོ་དྷ་མ་ཧཱ་བ་ལ་སརྦ་དུཥྚན་སྟམྦྷ་ཡ་སྟམྦྷ་ཡ། མོ་ཧ་ཡ་མོ་ཧ་ཡ་ཧཱུྃ་ཕཊ། ཨོྃ་ཧ་ཧ། ས་ར་ས་ར། བི་ས་ར་བི་ས་ར། གྷཱ་ཏ་ཡགྷཱ་ཏ་ཡ། ཨོྃ་བི་ས་ར། སནྟྲ་ཡ་ཧཱུྃ། ཨོྃ་བཛྲ་ཀྲོ་དྷ་མ་ཧཱ་བ་ལ་ཧ་ར་ཧ་ར། ཁ་ཁ་ཁཱ་ཧི་ཁཱ་ཧི། ནཱ་ཤ་ཡ་ནཱ་ཤ་ཡ་ཧཱུྃ་ཕཊ། ཧཱུྃ་ཧཱུྃ། མཱ་མ་མཱ་མ་ཕཊ། ཨོྃ་བཛྲ་ཀྲོ་དྷ་ནི་བདག་ལ་སྲུངས་ཤིག་སྲུངས་ཤིག་སྭཱ་ཧཱ། ཨོྃ་མ་ཧཱ་བ་ལ་བཛྲ་དྷ་ར། ཀ་ར་ཀ་ར། བྷནྡྷ་བྷནྡྷ་ཧཱུྃ་ཕཊ། ཨོྃ་ཛྭ་ལ་གྲ་ས། ཨུ་ཙྪུཥྨ་ས་ག་ར་ཧཱུྃ། རྡོ་རྗེའི་ཕོ་ཉ་མོ་དྲུག་ཅུ་རྩ་བཞི་པོ་དེ་དག་ཀྱང་བསྲུང་བ་དང་། བསྐྱབ་པ་དང་། སྦེད་པ་བྱེད་པར་འགྱུར་རོ། །ལག་ན་རྡོ་རྗེས་སྨྲས་པ། གང་གཟུངས་འདི་འཆང་བ་ནི་དགེ་བར་འགྱུར། དུག་གནོན་པར་འགྱུར་ཤི་བ་སོས་པར་བྱེད་པར་འགྱུར། དགྲ་རྣམས་ཀྱིས་མི་ཚུགས་པར་འགྱུར། བུ་མང་བར་འགྱུར་རོ། །ས་ཕྱོགས་ཀྱང་གསལ་བར་འགྱུར་རོ། །གསང་སྔགས་ཐམས་ཅད་ཀྱང་གྲུབ་པར་འགྱུར་རོ། །ལས་ཐམས་ཅད་ཀྱང་ནུས་པར་འགྱུར་རོ། །གདུག་པས་ཟིན་པ་རྣམས་ལ་སྐྱོར་ཆུས་འཚོ་བར་འགྱུར་རོ། །དུག་ཐམས་ཅད་ཀྱང་དུག་མ་ཡིན་པར་བྱེད་པར་འགྱུར་རོ། །མངལ་ན་གནས་པའི་ཁྱེའུ་དང་བུ་མོ་ཡང་བདེ་བར་བཙས་པར་འགྱུར་རོ། །མདོ་སྡེ་འདི་ཞག་གསུམ་བཅངས་ན་རྒྱས་པར་འགྱུར་རོ། །ཞག་བདུན་བཅངས་ན་ཞི་བ་ཆེན་པོར་འགྱུར་རོ། །དེ་ནས་འབྱུང་པོའི་བདག་པོ་དབང་བདག་རིག་སྔགས་འཆང་བྱེ་བ་ཕྲག་དུ་མས་བསྐོར་བ་འཁོར་གྱི་དཀྱིལ་འཁོར་དེ་ནས་ལངས་ཏེ། བྱང་ཆུབ་སེམས་དཔའ་སེམས་དཔའ་ཆེན་པོ་གསང་བ་པའི་བདག་པོ་ལག་ན་རྡོ་རྗེའི་རྐང་པ་ལ་མགོ་བོས་ཕྱག་འཚལ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །སྟོབས་པོ་ཆེའི་བསྟན་པ་ཐོགས་པ་མེད་པ། སྟོབས་དཔག་ཏུ་མེད་པས་ཕ་རོལ་གནོན་པ་ལག་
ན་རྡོ་རྗེ་དགའ་བ། ལྷ་དང་། ལྷ་མ་ཡིན་དང་། ཚངས་པ་དང་། དབང་པོས་ཕྱག་བྱས་པ། གནོད་སྦྱིན་དང་། སྲིན་པོ་དང་། རོ་ལངས་དང་། སྲུལ་པོ་དང་། ལུས་སྲུལ་པོ་འཇིགས་པར་བྱེད་པ། སྨྱོ་བྱེད་དང་། སྐྲོད་པ་དང་། གསོད་པ་དང་། སྐེམ་བྱེད་དང་། སྒོ་གླེགས་དང་། འཁྲུལ་འཁོར་དང་། གཏན་པ་དང་། རྡོ་རྗེས་རྣམ་པར་འཇོམས་པ། ལས་ཐམས་ཅད་བྱེད་པ། དཀྱིལ་འཁོར་གསང་བ་དང་བཅས་པ་བྱང་ཆུབ་སེམས་དཔའ་སེམས་དཔའ་ཆེན་པོས་བཤད་དུ་གསོལ། དེ་ནས་ཐམས་ཅད་དང་ལྡན་པའི་འཁོར་གྱིས་འབྱུང་པོའི་བདག་པོ་དབང་བདག་ལ་ལེགས་སོ་ལེགས་སོ་ཞེས་བྱ་བ་བྱིན་ནོ། །དེ་ནས་བཅོམ་ལྡན་འདས་ཀྱིས་རྡོ་རྗེ་སྤར་ཏེ་རྡོ་རྗེ་ལ་བཞུགས་པའི་ཚུལ་གྱིས་བཞུགས་ནས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་རྣམ་པར་གཟིགས་ཏེ། རྡོ་རྗེ་མི་བཟད་པ་ཁྲོ་བོ་ཆེན་པོ་བདུད་ཀྱི་དཀྱིལ་འཁོར་ཐམས་ཅད་རྣམ་པར་འཇོམས་པར་བྱེད་པ་ཞེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ལ་ཆེར་སྙིང་རྗེ་བ་ཞེས་བྱ་བའི་ཏིང་ངེ་འཛིན་དང་། འོད་ཟེར་འབར་ཞིང་སྣང་བ་ཞེས་བྱ་བའི་ཏིང་ངེ་འཛིན་དང་། ཆོས་ཐམས་ཅད་ཀྱི་དགའ་བ་ཀུན་དུ་སྟོན་པ་ཞེས་བྱ་བའི་ཏིང་ངེ་འཛིན་དང་། བདུད་ཐམས་ཅད་ཀྱི་ཡུལ་འཇོམས་ཞེས་བྱ་བའི་ཏིང་ངེ་འཛིན་དང་། ཕྱག་རྒྱའི་མཚན་ཉིད་ཅེས་བྱ་བའི་ཏིང་ངེ་འཛིན་དང་། སེམས་ཅན་ཐམས་ཅད་ཀྱི་ཡུལ་ཞེས་བྱ་བའི་ཏིང་ངེ་འཛིན་དང་། མི་གཡོ་བ་ཞེས་བྱ་བའི་ཏིང་ངེ་འཛིན་དང་། ཆོས་ཀྱི་སྐུ་ཞེས་བྱ་བའི་ཏིང་ངེ་འཛིན་དང་། ཆོས་ཀྱི་སྒོ་ཞེས་བྱ་བའི་ཏིང་ངེ་འཛིན་དང་། སྟོབས་པོ་ཆེ་ཞེས་བྱ་བའི་ཏིང་ངེ་འཛིན་ཏོ། །དེ་ནས་བཅོམ་ལྡན་འདས་ལག་ན་རྡོ་རྗེ་སྡོམ་བག་ཅན་དུ་རྡོ་རྗེ་སྤར་ཏེ། དེ་ནས་རྡོ་རྗེ་པདྨ་ལ་གནས་པའི་ཚུལ་གྱིས་གནས་ནས་ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་ལ་རྣམ་པར་བལྟས་ཏེ། རྡོ་རྗེ་མི་བཟད་པའི་ཁྲོ་བོ་ཆོལ་པ་ལུས་སྦྲུལ་གྱི་སྐ་རགས་ཀྱིས་བརྒྱན་པ་དགའ་བར་བྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་མ་ཐག་ཏུ་ཁྲོ་བོ་ཆོལ་པས་བགེགས་བྱེ་བ་བརྒྱ་སྟོང་ཕྲག་དུ་མ་འདར་ཏེ་
གཟིར་བ་བདག་ཉིད་ཀྱིས་མཐོང་ངོ་། །དེ་དག་ཚིག་ནས་སྨྲེ་ཞིང་སྲོག་བཏང་སྟེ་སྲེག་པའི་བསྐལ་པ་སྙམ་དུ་སེམས་ཤིང་ཉམ་ཐག་པའི་སྐད་ཀྱིས་ངུས་ཏེ། བྱང་ཆུབ་སེམས་དཔའ་ལག་ན་རྡོ་རྗེའི་གན་དུ་སོང་ནས་བཅོམ་ལྡན་འདས་ཡོངས་སུ་བསྐྱབ་ཏུ་གསོལ། བྱང་ཆུབ་སེམས་དཔའ་ཡོངས་སུ་བསྐྱབ་ཏུ་གསོལ། བཅོམ་ལྡན་འདས་བདག་ཅག་ནི་བཅོམ་ལྡན་འདས་ཀྱི་ཁྲོ་བོ་ཆོལ་པས་གཟིར་ཅིང་མྱོས་ཏེ་ཕོངས་ནས་སྲོག་ལ་མི་ལྟའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་ཆེན་པོ་ལག་ན་རྡོ་རྗེ་ཏིང་ངེ་འཛིན་དེ་ལས་ལངས་ཏེ་བདུད་ཀྱི་དཀྱིལ་འཁོར་ཐམས་ཅད་ལ་སྨྲས་པ། ཀྱེ་མའོ་ཁྲོ་བོ་ཆེན་པོ་འདི་ནི་རྫུ་འཕྲུལ་ཆེ་བའོ་མཐུ་ཆེ་བའོ། །དེ་དག་གིས་འདི་སྐད་ཅེས་སྨྲས་སོ། །བཅོམ་ལྡན་འདས་དེ་དེ་བཞིན་ཏེ། ཀྱེ་མའོ་ཁྲོ་བོ་ཆེན་པོ་འདི་ནི་རྫུ་འཕྲུལ་ཆེ་བའོ་མཐུ་ཆེ་བའོ། །དེ་ནས་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་སེང་གེའི་ལྟ་སྟངས་ཀྱིས་བལྟས་ནས་འབྱུང་པོའི་བདག་པོ་དབང་ལྡན་ལ་ཁྲོ་བོ་ཆོལ་པའི་དཀྱིལ་འཁོར་གསང་བ་དང་བཅས་པ་སྨྲས་པ། ཨོྃ་བཛྲ་ཀྲོདྷ་མ་ཧཱ་བ་ལ་ཧ་ན་ད་ཧ། པ་ཙ། བིདྷྭ་ནྶ་ཡ། ཛ་ཊི་ལམ་བོ་དྷ་ར་ཨུ་ཙྪུཥྨ་ཀྲོ་དྷ་ཧཱུྃ་ཕཊ། ཨ་ཨཱཾ། མ་ཧཱྃ་སྭཱ་ཧཱ། གྲོགས་པོ་དག་གང་ལ་ལ་ཞིག་ཁྲོ་བོ་སྟོབས་པོ་ཆེ་འདིའི་དཀྱིལ་འཁོར་དུ་ཞུགས་ན་དེའི་ལས་ཐམས་ཅད་གྲུབ་པར་འགྱུར་རོ། །དུས་མ་ཡིན་པར་འཆི་བས་འཆི་བའི་དུས་བྱེད་པར་མི་འགྱུར་རོ། །དེའི་ལུས་ལ་དྲག་པོའི་ལས་དང་ནད་ཐམས་ཅད་ཀྱིས་མི་ཚུགས་པར་འགྱུར་རོ། །དེ་ལ་མི་དང་བགེགས་དང་། ལོག་འདྲེན་གྱིས་གླགས་མི་རྙེད་པར་འགྱུར་རོ། །སྐྱེ་བོ་ཐམས་ཅད་དགའ་བར་འགྱུར་རོ། །དགྲ་ཐམས་ཅད་མེད་པར་འགྱུར་རོ། །འདིར་ཞུགས་ན་གསང་སྔགས་ཐམས་ཅད་འགྲུབ་པར་འགྱུར་རོ། །ཁྲོ་བོ་ཐམས་ཅད་ཀྱི་ཆོ་ག་ཡང་ལྷུན་གྱིས་གྲུབ་པ་ཉིད་དུ་འགྲུབ་པར་འགྱུར་རོ། །འདིར་དབང་བསྐུར་ན་བཀྲ་མི་ཤིས་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །དཔལ་གྱིས་བྱིན་གྱིས་བརླབས་པར་འགྱུར་རོ། །དེ་ནས་ཁྲོ་བོ་ཆེན་པོ་ལ་ལན་ཁྲིས་སྔར་སྤྱད་པ་བྱས་ཏེ། ཁྲོ་བོ་ཆེན་པོའི་
དཀྱིལ་འཁོར་བྱེད་པ་བྱས་པ་གཟོ་བ། རྒྱུད་ཤེས་པ། གསོ་སྦྱོང་གི་ཡན་ལག་བརྒྱད་དང་ལྡན་པ། གསུམ 
་ལ་སྐྱབས་སུ་སོང་བ། བྱང་ཆུབ་ཀྱི་སེམས་དང་ལྡན་པ། བྱམས་པའི་སེམས་དང་ལྡན་པ། སྙིང་རྗེ་ཅན་དུ་གྱུར་པ། དཀྱིལ་འཁོར་མཐོང་བ། དབང་བསྐུར་བ། བླ་མ་རྣམས་ཀྱིས་ལུང་བྱིན་པ། ཆོ་ག་གང་བདུད་ཐམས་ཅད་དང་སྡང་བའི་སེམས་རྣམ་པར་འཇིག་པར་བྱེད་པ། རིག་སྔགས་ཀྱི་རྒྱལ་པོ་སྟོབས་པོ་ཆེ་ཞེས་བྱ་བ་འདི་འཆང་བ་དང་། ཀློག་པ་དེ་བདུད་དང་དགྲ་ཐམས་ཅད་ཀྱིས་མི་ཚུགས་པར་འགྱུར་རོ། །གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། སུལ་པོ་དང་། མཁའ་འགྲོ་མ་དང་། བརྗེད་བྱེད་དང་། སྒྲུབ་པ་དང་། སྦྲུལ་འཛིན་བཅས་ལ་སོགས་པ་ཐམས་ཅད་དང་། འཇིགས་པ་ཐམས་ཅད་ལས་ཐར་བར་འགྱུར་རོ། །དུས་མ་ཡིན་པར་འཆི་བ་ཐམས་ཅད་ལས་ཐར་བར་འགྱུར་རོ། །གསད་པ་དང་། བཅིང་བ་ཐམས་ཅད་ལས་ཐར་བར་འགྱུར་རོ། །གཅད་པ་ཐམས་ཅད་ལས་ཐར་བར་འགྱུར་རོ། །རྨུགས་བྱེད་དང་། རེངས་བྱེད་དང་། རྨོངས་བྱེད་ལ་སོགས་པའི་འཇིགས་པ་ཐམས་ཅད་ལས་ཐར་བར་འགྱུར་རོ། །ཀླུའི་འཇིགས་པ་ཐམས་ཅད་ལས་ཐར་བར་འགྱུར་རོ། །བཀྲ་མི་ཤིས་པ་ཐམས་ཅད་ལས་ཐར་བར་འགྱུར་རོ། །སེམས་ཅན་དབུལ་པོ་གང་ལ་ལ་ཞིག་ཆོས་ཀྱི་རྣམ་གྲངས་འདི་དུས་གསུམ་དུ་འཆང་ངམ། ཀློག་གམ། ཡིད་ལ་བྱེད་དམ། རྗེས་སུ་དྲན་པར་བྱེད་ན། དབུལ་པའི་སྡུག་བསྔལ་ཐམས་ཅད་ལས་ཐར་བར་འགྱུར་རོ། །ལོ་ཉེས་བྱུང་བའི་ཚེ་སྟོབས་པོ་ཆེ་ལན་བདུན་བཀླགས་ན་སྤྲིན་ཆེན་པོ་ལས་ཆར་འབབ་པོ། །གལ་ཏེ་ཆར་མི་འབབ་ན་སྤྲིན་གྱི་ལྷ་རྣམས་ཀྱི་སྲོག་སྐམ་པར་འགྱུར་རོ། །ཀླུའི་རྒྱལ་པོ་ནག་པོ་དང་། ཀླུའི་རྒྱལ་པོ་འཁོར་ལོ་དང་། ཀླུའི་རྒྱལ་པོ་མཐའ་ཡས་ལ་སོགས་པ་ཀླུའི་རྒྱལ་པོ་རྣམས་ཀྱིས་སྤྲིན་ཆེན་པོ་ལས་ཆར་འབེབས་སོ། །གལ་ཏེ་མི་འབེབས་ན་སྲོག་སྐམ་པར་འགྱུར་རོ། །གོང་དུ་སྨས་པའི་ཆོ་ག་བཞིན་དུ་ཕྱོགས་ཀྱི་ཆའམ། ཀླུང་གི་ངོས་སམ། རྒྱ་མཚོའི་འགྲམ་མམ། མཚོ་འགྲམ་མམ། མཆོད་རྟེན་
གྱི་གནས་སུ་བྱང་ཆུབ་སེམས་དཔའ་ལག་ན་རྡོ་རྗེ་ལ་མཆོད་པ་ཆེན་པོ་བྱས་ཏེ། ཙནྡན་དཀར་པོ་དང་། ཀ་ར་བཱི་རའི་མེ་ཏོག་དང་། པདྨ་དམར་པོ་དང་། ཨ་ཏི་མུ་ཀ་ཏ་ཀའི་མེ་ཏོག་དང་། ཙམ་པ་ཀའི་མེ་ཏོག་དང་། རྒྱལ་མཚན་དང་། བ་དན་དམར་པོ་ལ་སོགས་པ་དང་། བུམ་པ་སྤོས་ཆུས་བཀང་བ་ལ་སོགས་པས་མཆོད་པ་བྱས་ནས་གང་མདོ་སྡེ་འདི་འཆང་བ་དང་། ཀློག་པ་དེ་གཡུལ་དེ་ཐམས་ཅད་དུ་ཞུགས་ཀྱང་ཕ་རོལ་གྱིས་མི་ཚུགས་པར་འགྱུར་རོ། །སེམས་ཅན་ཐམས་ཅད་དགའ་བར་འགྱུར་རོ། །བཀྲ་མི་ཤིས་པ་ཐམས་ཅད་ལས་རྣམ་པར་གྲོལ་བར་འགྱུར་རོ། །སྟོབས་པོ་ཆེ་རྒྱལ་མཚན་གྱི་རྩེ་མོ་ལ་བཏགས་ཏེ་གཡུལ་ངོར་སོང་ན་ཕ་རོལ་གྱིས་མི་ཚུགས་པར་འགྱུར་རོ། །གསང་སྔགས་གྲོ་ག་ལ་བྲིས་ཏེ་སྤྱི་བོར་བཏགས་ན་གཡུལ་ངོར་མཚོན་ཆ་རྣམས་མེ་ཏོག་བཞིན་དུ་ལྟུང་བར་འགྱུར་རོ། །དེ་ནས་བདུད་དེས་བཅོམ་ལྡན་འདས་ལ་ལན་གསུམ་བསྐོར་བ་བྱས་ཏེ་ཕྱོགས་གཅིག་ཏུ་འདུག་ནས་སྟོབས་པོ་ཆེ་ཞེས་བགྱི་བ་ཅི་ལགས་ཞེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། སྟོབས་པོ་ཆེ་ཞེས་བྱ་བ་ནི་དེ་བཞིན་གཤེགས་པའོ། །སྟོབས་པོ་ཆེ་ཞེས་བྱ་བ་ནི་ཆོས་སོ། །སྟོབས་པོ་ཆེ་ཞེས་བྱ་བ་ནི་ཆོས་ཀྱི་ཕུང་པོའོ། །སྟོབས་པོ་ཆེ་ཞེས་བྱ་བ་ནི་ཆོས་ཀྱི་ཚུལ་ལོ། །སྟོབས་པོ་ཆེ་ཞེས་བྱ་བ་ནི་ཐེག་པ་ཆེན་པོའོ། །སྟོབས་པོ་ཆེ་ཞེས་བྱ་བ་ནི་ལག་ན་རྡོ་རྗེའོ། །དེ་ནས་བདུད་སྡིག་ཅན་གྱིས་སྨྲས་པ། གསང་བ་པའི་བདག་པོ་ལག་ན་རྡོ་རྗེ་ལེགས་སོ་ལེགས་སོ། །སྐྱབས་སུ་མཆིའོ། །སངས་རྒྱས་དང་། ཆོས་དང་། དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་ལེགས་སོ་ལེགས་སོ། །དགེ་བསྙེན་གྱི་ཡན་ལག་གཟུང་བར་བགྱིའོ། །བདེ་དང་ཐར་དང་མཐོ་རིས་དང་། །མཁས་པ་དག་དང་སེམས་ཅན་ནི། །དམ་པ་ཀུན་དང་ཕན་པའི་ཕྱིར། །སྟོབས་པོ་ཆེ་ནི་གཟུང་བར་བགྱི། །དེ་ནས་བདུད་སྡིག་ཅན་ཆོས་ལ་དགའ་ཞིང་ཡིད་བདེ་བ་དང་རངས་བར་གཟིགས་ནས་བཅོམ་ལྡན་འདས་ཀྱིས་འདི་སྐད་ཅེས་བཀའ་སྩལ་ཏོ། །རིག་སྔགས་ཀྱི་རྒྱལ་
པོ་སྟོབས་པོ་ཆེའི་མདོ་སྡེ་འདི་ནི་སེམས་ཅན་དམྱལ་བ་དང་དུད་འགྲོ་དང་། ཡི་དགས་དང་། གཤིན་རྗེའི་འཇིག་རྟེན་གྱི་སྡུག་བསྔལ་ལས་ཐར་བར་བྱེད་པའོ། །དེ་བསྐལ་པ་སྟོང་ཕྲག་ཉི་ཤུར་ལྷའི་རྒྱལ་པོ་བྱེད་པར་འགྱུར་རོ། །བསྐལ་པ་མཐའ་ཡས་པར་གླིང་བཞི་ལ་དབང་བའི་འཁོར་ལོས་སྒྱུར་བར་འགྱུར་རོ། །བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་འཇོག་པར་བྱེད་དོ། །རིག་སྔགས་ཀྱི་རྒྱལ་པོ་སྟོབས་པོ་ཆེའི་སྙིང་པོ་འདི་ནི་གཙང་སྦྲ་ཅན་ནམ། གཙང་སྦྲ་མེད་པའམ། སྨྱུང་བ་བྱས་པའམ། སྨྱུང་བ་མ་བྱས་པའམ། འཁྲིག་པའི་ཆོས་ལ་སྟེན་པ་ལ་ཡང་འགྲུབ་པར་བྱེད་པའོ། །དེ་ལ་བར་ཆད་དུ་མི་འགྱུར་རོ། །དེ་ནས་རབ་འབྱོར་འཁོར་དེ་ཉིད་ན་འདུག་པར་གྱུར་པས་བཅོམ་ལྡན་འདས་རིག་སྔགས་ཀྱི་རྒྱལ་པོ་སྟོབས་པོ་ཆེ་ཇི་ལྟར་གཟུང་བར་བགྱི། དམ་པ་ཅི་ཞིག་སྩོལ་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལ་དྲི་བ་དྲིས་ཤིག །རབ་འབྱོར་གྱིས་སྨྲས་པ། ལག་ན་རྡོ་རྗེ་རིག་སྔགས་ཀྱི་རྒྱལ་པོ་སྟོབས་པོ་ཆེ་ཇི་ལྟར་གཟུང་བར་བགྱི། དམ་པ་ནི་ཅི་ཞིག་སྦྱིན་པར་བྱེད། ལག་ན་རྡོ་རྗེས་སྨྲས་པ། འབྲུ་སྦྱིན་པར་བྱེད་དོ། །གོས་སྦྱིན་པར་བྱེད་དོ། །དངུལ་སྦྱིན་པར་བྱེད་དོ། །གསེར་སྦྱིན་པར་བྱེད་དོ། །བ་ལང་སྦྱིན་པར་བྱེད་དོ། །དམ་པ་གང་འདོད་པའི་དམ་པ་དེ་སྦྱིན་པར་བྱེད་དོ། །རབ་འབྱོར་གྱིས་སྨྲས་པ། སྤྱིའི་འབྲས་བུ་ཞེས་བྱ་བའམ། ལག་ན་རྡོ་རྗེས་སྨྲས་པ། རབ་འབྱོར་དེ་དེ་བཞིན་ཏེ། སེམས་ཅན་ཉོན་མོངས་བས་བསྒྲིབས་པ་རྣམས་ནི་འབྲས་བུའི་དུས་སུ་གནས་སོ། །འབྲས་བུའི་དུས་ཀྱིས་ཡོན་ཏན་གྱི་དོན་དུ་གནས་སོ། །ཡོན་ཏན་གྱི་དོན་གྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ལམ་ལ་འཇོག་པར་བྱེད་དོ། །རབ་འབྱོར་གྱིས་སྨྲས་པ། ལག་ན་རྡོ་རྗེ་ལེགས་སོ་ལེགས། །གསང་བའི་མཚན་ཉིད་ལྡན་པ་སྟེ། །སྟོབས་པོ་ཆེ་ནི་ཤེས་རབ་ལྡན། །གསང་བའི་མཚན་ཉིད་ཕུན་སུམ་ཚོགས། །སྤྱི་ནས་དབང་བསྐུར་ཡིད་ཀྱང་གཞུངས། །མཚན་དང་ཡང་དག་ལྡན་པ་སྟེ། །སྦྱིན་དང་ཚུལ་ཁྲིམས་ཤེས་རབ་ཆེ། །རྫུ་འཕྲུལ་ཆེ་ཞིང་སྟོབས་ཀྱང་ཆེ། །དབང་ཆེར་གྲགས་
ཤིང་བསོད་ནམས་ཆེ། །ཡོན་ཏན་རྩེ་མོ་སྟོབས་པོ་ཆེ། །མདོ་སྡེ་འདི་ལ་དབང་བསྐུར་ཕྱིར། །སངས་རྒྱས་བརྒྱད་སྟོང་དེར་གཤེགས་སོ། །བྱང་ཆུབ་སེམས་དཔའ་ལག་ན་རྡོ་རྗེས་མདོ་སྡེ་འདི་ཉིད་ཀྱིས་མི་འཇིགས་པའི་ལག་པ་སྤྱི་བོར་བཞག་སྟེ།དགེ་བར་བྱེད་པར་འགྱུར་རོ། །གང་གིས་གསང་སྔགས་འདི་སའམ། རིའམ། ཀླུང་གི་ངོགས་སམ། རྒྱ་མཚོའི་དྲུང་དུ་བཅངས་ན་འཇིགས་པ་ཐམས་ཅད་ཀྱིས་འཇིགས་པ་མེད་པར་འགྱུར་རོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །སུ་མདོ་སྡེ་འདི་འཆང་ངམ། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་དེ་བྲོ་ནད་མ་མཆིས་པར་ལོ་བརྒྱར་འཚོ་བར་འགྱུར་རོ། །ལག་ན་རྡོ་རྗེས་ཡང་གསོལ་པ། ཆོས་ཀྱི་རྣམ་གྲངས་འདིའི་མིང་ཅི་ལགས། འདི་ཇི་ལྟར་བཟུང་བར་བགྱི། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འདི་ནི་དེ་བཞིན་གཤེགས་པའི་སྤྲུལ་པ་ཞེས་བྱ་བར་ཟུང་ཤིག །ཆོས་ཀྱི་ཉི་མ་ཞེས་བྱ་བར་ཡང་ཟུང་ཤིག །ཆོས་ཀྱི་ཟླ་བ་ཞེས་བྱ་བར་ཡང་ཟུང་ཤིག །དོན་ཐམས་ཅད་གྲུབ་པ་ཞེས་བྱ་བར་ཡང་ཟུང་ཤིག །དེ་བཞིན་གཤེགས་པ་ཐམས་ཅད་ཀྱི་ཆོས་ཀྱི་སྤྲིན་ཅེས་བྱ་བར་ཡང་ཟུང་ཤིག །སྡིག་པ་ཐམས་ཅད་འབྱང་བར་བྱེད་པའི་གཟུངས་སྔགས་ཞེས་བྱ་བར་ཡང་ཟུང་ཤིག །རིག་སྔགས་འཆང་ཐམས་ཅད་འགྲུབ་པའི་རྒྱལ་པོ་ཞེས་བྱ་བར་ཡང་ཟུང་ཤིག །ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བར་ཡང་ཟུང་ཤིག །ཆོས་ཀྱི་དབྱིངས་དེ་བཞིན་གཤེགས་པ་ཐམས་ཅད་ཀྱི་སྔོན་དུ་འགྲོ་བ་ཞེས་བྱ་བར་ཡང་ཟུང་ཤིག །རིག་སྔགས་ཀྱི་རྒྱལ་པོ་སྟོབས་པོ་ཆེ་ཞེས་བྱ་བར་ཡང་ཟུང་ཤིག །གསང་བ་པའི་བདག་པོ་ལག་ན་རྡོ་རྗེ་སུ་མདོ་སྡེ་འདི་འཛིན་པ་དང་། འཆང་བ་དང་། ཀློག་པ་དང་། ཡི་གེར་འདྲིར་འཇུག་པ་དང་། བསྟི་སྟང་དུ་བྱེད་པ་དང་། བླ་མར་བྱེད་པ་དང་། རིམ་གྲོར་བྱེད་པ་དང་། མཆོད་པ་བྱེད་པ་དེས་འདས་པ་དང་། མ་འོངས་པ་དང་། ད་ལྟར་བྱུང་བའི་སངས་རྒྱས་དང་། བྱང་ཆུབ་སེམས་དཔའ་རྣམས་ལ་མཆོད་པ་བྱས་པར་འགྱུར་རོ། །འདས་པ་དང་།
མ་འོངས་པ་དང་། ད་ལྟར་བྱུང་བ་རྣམས་ཀྱི་མཆོད་རྟེན་སྐུ་གདུང་དང་བཅས་པ་རྣམས་ལ་མཆོད་པ་བྱས་པར་འགྱུར་རོ། །ལག་ན་རྡོ་རྗེས་གསོལ་བ། བཅོམ་ལྡན་འདས་ལེགས་སོ་ལེགས་སོ། །ཤིན་ཏུ་ཟབ་པའི་ཆོས་བསྟན་པ་དང་། ཆོ་འཕྲུལ་གྱི་ཡོན་ཏན་གྱི་རྒྱན་གྱི་ཆོས་བསྟན་པ་གཟུང་བར་བགྱིའོ། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་རིགས་ཀྱི་བུའམ་རིགས་ཀྱི་བུ་མོ་གང་མདོ་སྡེ་འདི་འཆང་བ་དེ་ལ་སྡང་བའི་སེམས་ཅན་རྣམས་ཆུ་འགྲམ་གྱི་ཤིང་ལྟ་བུར་མ་རུང་བར་འགྱུར་རོ། །སྤོས་དང་། མེ་ཏོག་དང་། བདུག་པ་དང་། རྒྱལ་མཚན་དང་། བ་དན་སྣ་ཚོགས་ལ་སོགས་པས་མཆོད་པ་བྱས་ན་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །དེ་ལ་བར་ཆད་འབྱུང་བར་མི་འགྱུར་རོ། །མདོ་སྡེ་འདི་གནས་གང་ཡང་རུང་བ་ན་འཆང་ན་ལྷ་དང་། མིར་བཅས་པས་མཆོད་པ་བྱེད་པར་འགྱུར་རོ། །རིག་སྔགས་ཀྱི་རྒྱལ་པོ་སྟོབས་པོ་ཆེ་བགེགས་དང་ལོག་འདྲེན་ཐམས་ཅད་འཆིང་བ་ཡིད་ལ་བྱེད་ན་སངས་རྒྱས་བརྒྱད་སྟོང་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་དང་དྲང་སྲོང་ཆེན་པོ་རྣམས་དང་། ལྷ་དང་། ཀླུ་དང་། དྲི་ཟར་བཅས་པ་རྣམས་དགྱེས་དགའོ། །སྟོབས་པོ་ཆེའི་གཟུངས་སྔགས་འདི་ལ་དགྱེས་པའི་དུས་ཀྱི་ཚེ་དེ་བཞིན་གཤེགས་པ་ཤཱཀྱ་ཐུབ་པས་འདི་སྐད་ཅེས་བཀའ་སྩལ་ཏོ། །གསང་བ་པའི་བདག་པོ་ལག་ན་རྡོ་རྗེ་སུ་མདོ་སྡེ་འདི་ལ་གུས་པར་མི་བྱེད་པ་དེ་དག་སེམས་ཅན་དམྱལ་བ་ཆེན་པོ་བརྒྱད་པོ་དག་ཏུ་སྐྱེ་བར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེ་སུ་མདོ་སྡེ་འདི་ལ་གུས་པར་བྱེད་པ་དང་། རིམ་གྲོར་བྱེད་པ་དང་། མཆོད་པ་བྱེད་པ་དེ་བསོད་ནམས་ཀྱི་ཕུང་པོ་དཔག་ཏུ་མེད་པ་དང་ལྡན་པར་འགྱུར་རོ། །ཡི་གེ་འདྲི་འམ། ཚིག་མཉན་ན་ཕྱིར་མི་ལྡོག་པའི་བྱང་ཆུབ་ཀྱི་ལམ་འཐོབ་པར་འགྱུར་རོ། །ལག་ན་རྡོ་རྗེས་གསོལ་པ། ཐུབ་པའི་ཆོས་བསམ་གྱིས་མི་ཁྱབ་པ་ཤིན་ཏུ་ཟབ་པ། བསམ་གྱིས་མི་ཁྱབ་པ་ལ་སེམས་ཅན་རྣམས་ཀྱི་ནང་ནས་གང་ལོག་པར་སེམས་པ་དེ་མྱོས་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ་སེམས་ཅན་རྣམས་ཀྱི་
དོན་གྱི་ཕྱིར་མདོ་སྡེ་འདི་བཤད་པར་བྱའོ། །སེམས་ཅན་ཐམས་ཅད་ཀྱི་སྒྲིབ་པ་བསལ་བ་དང་། ཞི་བར་བྱ་བ་དང་། རྒྱས་པར་བྱ་བ་དང་། དབང་བསྐུར་བ་དང་། བཀྲ་མི་ཤིས་པ་ཐམས་ཅད་ལས་ཐར་བར་བྱ་བ་དང་། དཔལ་གྱིས་བྱིན་གྱིས་བརླབ་པར་བྱ་བ་དང་། སྡིག་པ་ཐམས་ཅད་བྱང་བར་བྱ་བ་དང་། སེམས་ཅན་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་པར་བྱ་བའི་ཕྱིར་བཤད་པར་བྱའོ། །དེའི་ཕྱིར་དེ་བཞིན་གཤེགས་པ་བརྒྱ་སྟོང་དོང་བར་མཛད་ནས་དེ་བཞིན་གཤེགས་པ་ཤཱཀྱ་ཐུབ་པ་ལ་ལན་གསུམ་བསྐོར་བ་མཛད་དེ་ཐལ་མོ་སྦྱར་ནས་ལེགས་པར་རབ་ཏུ་བཤད་པ་ལེགས་སོ་ལེགས་སོ་ཞེས་མངོན་པར་དགྱེས་པ་མཛད་དོ། །དེ་ནས་དེ་བཞིན་གཤེགས་པ་ཤཱཀྱ་ཐུབ་པས་སངས་རྒྱས་དེ་དག་ལ་སླར་གསུངས་པ། བཅོམ་ལྡན་འདས་དག་ལེགས་པར་རབ་ཏུ་གསུངས་པ་ལེགས་སོ་ལེགས་སོ། །བཅོམ་ལྡན་འདས་ཀྱིས་བཀའ་སྩལ་པ། །སྟོབས་པོ་ཆེ་གསང་བའི་ཆོས་བསྟན་པ་འདིའི་མཐུས་བྱང་ཆུབ་སེམས་དཔའ་ལག་ན་རྡོ་རྗེས་སྡང་བའི་བགེགས་དང་ལོག་འདྲེན་ཐམས་ཅད་ཀྱི་སྙིང་འདར་ཞིང་འགུལ་བར་མཐོང་ངོ་། །དཀོན་མཆོག་གསུམ་ལ་ཕྱག་འཚལ་ལོ། །གནོད་སྦྱིན་གྱི་སྡེ་དཔོན་ཆེན་པོ་ལག་ན་རྡོ་རྗེ་དྲག་པོ་ལ་ཕྱག་འཚལ་ལོ། །ཏདྱ་ཐཱ། ཨོྃ་ཧ་ན་ཧ་ན་བཛྲ། ད་ཧ་ད་ཧ་བཛྲ། པ་ཙ་པ་ཙ་བཛྲ། མ་ཐ་མ་ཐ་བཛྲ། ཛྭ་ལ་པྲ་ཛྭ་ལ། སུ་རུ་སུ་རུ། མུ་རུ་མུ་རུ། ཀ་ཊང་ཀ་ཡེ། ཛ་ཡེ་བི་ཛ་ཡེ། ཨ་ཇི་ཏེ། ཨ་པ་རཱ་ཛི་ཏེ། མཱ་ར་སེ་ནྱ་པྲ་མརྡ་ནཱ་ཡེ་སྭཱ་ཧཱ། བཅོམ་ལྡན་འདས་ཀྱིས་བཀའ་སྩལ་པ། གསང་བ་པའི་བདག་པོ་ལག་ན་རྡོ་རྗེ་བགེགས་དང་ལོག་འདྲེན་ཐམས་ཅད་སྡིགས་ཤིག་སྡིགས་ཤིག །ཆིངས་ཤིག་ཆིངས་ཤིག །རྣམ་པར་ཆིངས་ཤིག །མ་གྲུབ་པ་རྣམས་གྲུབ་པར་གྱིས་ཤིག །གྲུབ་པ་རྣམས་དུལ་བར་གྱིས་ཤིག །དུལ་བ་རྣམས་ཆུད་མི་ཟ་བར་གྱིས་ཤིག །སངས་རྒྱས་དང་བྱང་ཆུབ་སེམས་དཔའ་ཐམས་ཅད་འབབ་པར་གྱིས་ཤིག །ལྷ་དང་ཀླུ་ཐམས་ཅད་ཚུར་ཤོག་ཚུར་ཤོག །ངས་སྟོབས་པོ་ཆེ་ཁྲོ་བོའི་མཐུས་དགེ་བར་བྱའོ། །དེ་ནས་འཇམ་དཔལ་གཞོན་ནུར་གྱུར་པ་སྟན་ལས་ལངས་ཏེ་
བླ་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདུ་བྱེད་ཐམས་ཅད་ཀྱི་མི་རྟག་པའི་མཚན་ཉིད་ཇི་ལྟ་བུ་ལགས། བཅོམ་ལྡན་འདས་ཀྱིས་བཀའ་སྩལ་པ། བྱང་ཆུབ་སེམས་དཔའ་འཇམ་དཔལ་གཞོན་ནུར་གྱུར་པ་ཉོན་ཅིག །འདུ་བྱེད་ཐམས་ཅད་ནི་དྲི་ཟའི་གྲོང་ཁྱེར་དང་འདྲའོ། །འདུ་བྱེད་ཐམས་ཅད་ནི་གློག་དང་། སྤྲིན་དང་འདྲའོ། །འདུ་བྱེད་ཐམས་ཅད་ནི་ཁྱིམ་དང་དབུ་བ་དང་འདྲའོ། །འདུ་བྱེད་ཐམས་ཅད་ནི་མར་མེ་དང་འདྲའོ། །འདུ་བྱེད་ཐམས་ཅད་ནི་ཆུ་བུར་དང་འདྲའོ། །འདུ་བྱེད་ཐམས་ཅད་ནི་ཆུ་ཤིང་དང་འདྲའོ། །འདུ་བྱེད་ཐམས་ཅད་ནི་རི་མོའི་རྣམ་པ་དང་འདྲའོ། །འདུ་བྱེད་ཐམས་ཅད་ནི་མེ་ཏོག་དང་འདྲའོ། །འདུ་བྱེད་ཐམས་ཅད་ནི་རྨི་ལམ་དང་འདྲའོ། །འདུ་བྱེད་འདི་དག་ནི་བདེ་བ་དང་སྡུག་བསྔལ་གྱི་འཁོར་ལོ་དང་འདྲའོ། །འདུ་བྱེད་འདི་དག་ནི་བདེ་བ་དང་སྡུག་བསྔལ་གྱི་ཀླུང་དང་འདྲའོ། །འཁྲུག་པར་འགྱུར་བས་རྒྱ་མཚོ་དང་འདྲའོ། །སྐར་མ་དང་འདྲའོ། །སེམས་ཅན་རྣམས་ནི་འདུ་བྱེད་འདི་དག་སྐྱེ་བར་མི་སེམས། མི་མཐོང་། མི་ཤེས། མི་མཇལ་གྱི། དེ་བཞིན་གཤེགས་པ་ཉིད་ཀྱིས་གཟིགས་སོ། །དེ་བཞིན་གཤེགས་པ་ཉིད་ཀྱིས་མཇལ་ལོ། །དེ་བཞིན་གཤེགས་པ་ཉིད་ཀྱིས་མཁྱེན་ཏོ། །འདུ་བྱེད་ཐམས་ཅད་སྟོང་པ་ཉིད་དུ་མཚན་ཉིད་གཅིག་པར་མཁྱེན་ཏོ། །དོན་དམ་པ་སྟོང་པ་ཉིད་ཀྱི་མཚན་ཉིད་དུ་མཁྱེན་ཏོ། །མཐའ་ལས་འདས་པ་སྟོང་པ་ཉིད་ཀྱི་མཚན་ཉིད་དུ་མཁྱེན་ཏོ། །སྟོང་པ་ཉིད་སྟོང་པ་ཉིད་ཀྱི་མཚན་ཉིད་དུ་མཁྱེན་ཏོ། །ཆེན་པོ་སྟོང་པ་ཉིད་ཀྱི་མཚན་ཉིད་དུ་མཁྱེན་ཏོ། །དེ་བཞིན་ཉིད་སྟོང་པ་ཉིད་ཀྱི་མཚན་ཉིད་དུ་མཁྱེན་ཏོ། །འཇམ་དཔལ་གཞོན་ནུར་གྱུར་པ་མཚན་ཉིད་འདི་ཉིད་མཐོང་ཞིང་། མཚན་ཉིད་འདི་ཉིད་ཤེས་ཏེ་སྤྱོད་པའི་བྱང་ཆུབ་སེམས་དཔའ་རྣམས་ནི་སྦྱིན་པའི་ཕ་རོལ་དུ་ཕྱིན་པ་ལ་སྤྱོད་དོ། །དེ་བཞིན་དུ་ཚུལ་ཁྲིམས་དང་། བཟོད་པ་དང་།
བརྩོན་འགྲུས་དང་། བསམ་གཏན་དང་། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་དོ། །མཚན་ཉིད་འདི་ཉིད་ཤེས་པ་ནི་བྱང་ཆུབ་སེམས་དཔའ་ཞེས་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། འདི་སྐད་ཅེས་གསོལ་ཏོ། །བཅོམ་ལྡན་འདས་མདོ་སྡེ་འདི་མཚན་ཉིད་གང་གིས་ན་ཇི་ལྟར་དེ་བཞིན་གཤེགས་པའི་སྤྲུལ་པ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། འཕགས་པ་སྤྱན་རས་གཟིགས་དབང་ཕྱུག་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་དེ་བཞིན་གཤེགས་པའི་ལས་རྣམས་མདོ་སྡེ་འདིས་བྱེད་པར་འགྱུར་ཏེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་བ་ཞེས་བྱའོ། །མདོ་སྡེ་འདི་ཡོངས་སུ་ནུབ་པའི་དུས་ཀྱི་ཚེ་དེ་བཞིན་གཤེགས་པའི་བསྟན་པ་ཡོངས་སུ་ནུབ་པར་འགྱུར་ཏེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །མདོ་སྡེ་འདི་འཚོ་ཞིང་སྡོད་ན་དེ་བཞིན་གཤེགས་པའི་བསྟན་པ་ཡང་འཚོ་ཞིང་སྡོད་དེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །དེ་བཞིན་གཤེགས་པ་ཐམས་ཅད་ཀྱང་མདོ་སྡེ་འདི་ལ་ཕྱག་འཚལ་ཏེ། མཚན་ཉིད་དེས་ན་དེ་བཞིན་གཤེགས་པའི་སྤྲུལ་པ་ཞེས་བྱའོ། །དེ་ནས་འཕགས་པ་སྤྱན་རས་གཟིགས་དབང་ཕྱུག་བཅོམ་ལྡན་འདས་ལ་རྗེས་སུ་ཡི་རངས་ནས་བཀའ་ལུང་བཞིན་དུ་བགྱི་ཞིང་སུ་མདོ་སྡེ་འདི་འཆང་བའི་གན་དུ་མཆིའོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། མདོ་སྡེ་འདི་ཉིད་ཀྱི་མཐུས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་དང་ལྷ་ཐམས་ཅད་ཀྱང་འོང་ངོ་། །ལྷ་ཐམས་ཅད་ཀྱིས་ཀྱང་འདི་སྐད་ཅེས་གསོལ་ཏོ། །ལེགས་སོ་ལེགས་སོ་བདག་ཅག་ཀྱང་དམ་པ་སྩོལ་བར་མངོན་པར་དགའ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་དམ་པ་འདི་ཉིད་སྩོལ་བར་མཛད་པར་འགྱུར་རོ། །བཅོམ་ལྡན་འདས་ཀྱིས་བཀའ་སྩལ་
པ། གསང་བ་པའི་བདག་པོ་ལག་ན་རྡོ་རྗེ་སྟོབས་པོ་ཆེའི་གསང་བའི་སྙིང་པོ་ནི་སེམས་ཅན་ཐམས་ཅད་ལ་བདེ་བ་ཐམས་ཅད་སྦྱིན་པར་བྱེད་པའོ། །དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ལག་ན་རྡོ་རྗེས་འདི་སྐད་ཅེས་གསོལ་ཏོ། །བཅོམ་ལྡན་འདས་མཚན་ཉིད་གང་གིས་ན་མདོ་སྡེ་འདི་ཆོས་ཀྱི་དབྱིངས་སྔོན་དུ་འགྲོ་བ་ཞེས་བགྱི། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་དེ་བཞིན་གཤེགས་པ་ཐམས་ཅད་བྱུང་ནས་ཞག་སུམ་ཅུ་རྩ་གཉིས་ལོན་པའི་ཉིན་མོ་རི་བཏང་བཟུང་ཆེན་པོར་མདོ་སྡེ་འདི་ཉིད་ཀྱིས་ཆོས་བསྟན་ཏེ། མཚན་ཉིད་དེས་ན་ཆོས་ཀྱི་དབྱིངས་སྔོན་དུ་འགྲོ་བ་ཞེས་བྱའོ། །མདོ་སྡེ་འདི་ཉིད་ཀྱི་མཐུས་སངས་རྒྱས་དང་། བྱང་ཆུབ་སེམས་དཔའ་ཐམས་ཅད་སེམས་དང་པོ་བསྐྱེད་པ་ལ་གནས་ཏེ་མཚན་ཉིད་དེས་ན་ཆོས་ཀྱི་དབྱིངས་སྔོན་དུ་འགྲོ་བ་ཞེས་བྱའོ། །མདོ་སྡེ་འདི་ཉིད་ཀྱི་མཐུས་ལྷའི་བུ་གྲངས་མེད་དཔག་ཏུ་མེད་པ་དག་རྒྱུན་དུ་ཞུགས་པར་གྱུར་ཏོ། །རིགས་ཀྱི་བུ་སུ་མདོ་སྡེ་འདི་འཆང་བ་དང་། ཀློག་པ་ལ་དེ་བཞིན་གཤེགས་པ་ཐམས་ཅད་སྲས་སུ་འདུ་ཤེས་སྐྱེད་དོ། །འཁོར་བ་དེ་ཉིད་དུ་འཆི་བའི་དུས་བྱས་ནས་མྱ་ངན་ལས་འདས་པའི་ལམ་ལ་འཇོག་པར་བྱེད་དོ། །ལག་ན་རྡོ་རྗེས་གསོལ་པ། སངས་རྒྱས་འཁོར་བ་བགྲོད་དཀར་སེམས་ཅན་གྱི། །སྲིད་པའི་ཕུར་པ་འབྱིན་ཅིང་ཤེས་རབ་ཀྱིས། །སྲིད་ཕུར་སེམས་ཀླུང་འཇོམས་ཤིང་ཐུབ་པ་ཡི། །ཆོས་བསྟན་པས་ནི་སྡིག་འཇོམས་ལེགས་ཆོས་སྤྱོད། །བཅོམ་ལྡན་འདས་ཀྱིས་བཀའ་སྩལ་པ། ལག་ན་རྡོ་རྗེ་ལེགས་པར་རབ་ཏུ་བཤད་པ་ལེགས་སོ་ལེགས་སོ། །ལག་ན་རྡོ་རྗེས་གསོལ་པ། སུ་མདོ་སྡེ་འདི་འཆང་བ་དང་། ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པས་བསོད་ནམས་ཀྱི་ཕུང་པོ་ཅི་ཞིག་ཐོབ་པར་འགྱུར། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་སུ་མདོ་སྡེ་འདི་འཆང་བ་དང་ཀློག་པ་དང་། གཞན་དག་ལ་ཡང་རྒྱ་ཆེར་ཡང་དག་པར་རབ་ཏུ་སྟོན་པ་ངས་ནི་ཏིང་ངེ་འཛིན་བྱེ་བ་ཐོབ་པར་འགྱུར་རོ། །སངས་རྒྱས་དང་བྱང་ཆུབ་
སེམས་དཔའ་འཁོར་དང་བཅས་པ་བྱེ་བ་མཐོང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་མཐོང་ནས་བསམ་པ་རྒྱ་ཆེན་པོས་བསྟི་སྟང་བྱེད་པར་འགྱུར་རོ། །བླ་མར་བྱེད་པར་འགྱུར་རོ། །རིམ་གྲོར་བྱེད་པར་འགྱུར་རོ། །མཆོད་པར་བྱེད་པར་འགྱུར་རོ། །ཆོས་གོས་དང་བསོད་སྙོམས་དང་། མལ་ཆ་དང་ན་བའི་གསོས་སྨན་དང་། ཡོ་བྱད་རྣམས་ཀྱང་འབུལ་ལོ། །བྱང་ཆུབ་སེམས་དཔའ་རྣམས་ལ་ཡང་བདེ་བར་སྦྱར་བ་སྒྲུབ་བོ། །དགེ་འདུན་གྱི་ཚོགས་ལ་ཡང་རིམ་གྲོ་བྱེད་པར་འགྱུར་རོ། །དགེ་བའི་རྩ་བ་དེ་དག་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོ་བར་བྱེད་དོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ལ་ཡང་བསྙེན་བཀུར་བྱེད་པར་འགྱུར་རོ། །དེ་དག་གི་ཆོས་བསྟན་པ་ལ་ཡང་བསྟི་སྟང་དུ་བྱས་ཏེ་ཉན་ཏོ། །ལེན་ཏོ་འཛིན་ཏོ་ཀློག་གོ། །བྱང་ཆུབ་སེམས་དཔའ་ལག་ན་རྡོ་རྗེ་ཇི་ལྟ་བ་དང་མཚུངས་པར་སྟོབས་ཀྱིས་ཕ་རོལ་གནོན་པར་འགྱུར་རོ། །སྟོབས་པོ་ཆེ་ཕ་རོལ་གནོན་པ་ཁྲོ་བོ་དེའི་མཐུས་བདག་དང་སེམས་ཅན་ཐམས་ཅད་སྭ་སྟི་སྭ་སྟི། སིད་དྷི་སིད་དྷི་སྭཱ་ཧཱ། བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། འཕགས་པ་བྱམས་པ་དང་འཇམ་དཔལ་དང་འཕགས་པ་སྤྱན་རས་གཟིགས་དབང་ཕྱུག་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་ཐམས་ཅད་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྡོ་རྗེའི་སྙིང་པོ་ལ་སོགས་པ་ཕྱོགས་བཅུའི་འཇིག་རྟེན་གྱི་ཁམས་ནས་འདུས་པ་དེ་དག་ཐམས་ཅད་དང་། ལྷ་དང་ཀླུ་དང་གནོད་སྦྱིན་དང་། སྲིན་པོ་དང་དྲི་ཟ་དང་། ལྷ་མ་ཡིན་དང་ནམ་མཁའ་ལྡིང་དང་། མིའམ་ཅི་དང་ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དེ་དག་ཐམས་ཅད་དང་། ཐམས་ཅད་དང་ལྡན་པའི་འཁོར་དེ་དང་། ལག་ན་རྡོ་རྗེ་ཡི་རངས་ཏེ་བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་སྟོབས་པོ་ཆེ་ཞེས་བྱ་བ་ཐེག་པ་ཆེན་པོའི་མདོ་རྫོགས་སྷོ།། །།རྒྱ་གར་གྱི་མཁན་པོ་ཤཱི་ལེནྡྲ་བོ་དྷི་དང་། ཞུ་ཆེན་གྱི་ལོ་ཙྪ་བ་བནྡེ་ཡེ་ཤེས་སྡེ་ལ་སོགས་པས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།