དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་རྣལ་འབྱོར་གྲུབ་པའི་རྒྱུད་ཅེས་བྱ་བ་ཐེག་པ་ཆེན་པོའི་མདོ།
རྒྱ་གར་སྐད་དུ། །སརྦ་ཏ་ཐཱ་ག་ཏ་ཙིཏྟ་གུ་ཧྱ་ཛྙཱ་ན་ཨརྠ་གརྦྦ་ཀྲོ་དྷ་བཛྲ་ཀུ་ལ་ཏནྟྲ་པིཎྜཱ་རྠ་བི་དྱཱ་ཡོ་ག་སིདྡྷ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། དེ་བཞིན་གཤེགས་པ་ཐམས་ཅད་ཀྱི་ཐུགས་གསང་བའི་ཡེ་ཤེས་དོན་གྱི་སྙིང་པོ་ཁྲོ་བོ་རྡོ་རྗེའི་རིགས་ཀུན་འདུས་རིག་པའི་མདོ་རྣལ་འབྱོར་གྲུབ་པའི་རྒྱུད་ཅེས་བྱ་བ་ཐེག་པ་ཆེན་པོའི་མདོ། བཅོམ་ལྡན་འདས་དཔལ་སྒྲོལ་བྱེད་ཐུགས་རྗེའི་རྒྱལ་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། དེ་བཞིན་གཤེགས་པ་ཐམས་ཅད་ཀྱི་བཅོམ་ལྡན་འདས་དཔལ་ཀུན་དུ་བཟང་པོ་རྡོ་རྗེ་ས་ང་ཧེ་རུ་ཀ་གསང་བ་མཆོག་གི་བདག་པོ་བྱིན་གྱིས་བརླབས་ཀྱི་དབང་ཕྱུག །མི་ཟད་མཛོད་ཀྱི་བཀོད་པ། ཆེ་བའི་དོན་ལ་དམ་པའི་སྤྱོད་པས་བསྐྱོད་པ་དེ། རྨད་དུ་བྱུང་བའི་དོན་འདི་ཉིད་བཤད་པའི་གནས་གསང་བའི་ཡང་གསང་བ་ཀུན་གཞི་ཆོས་ཀྱི་དབྱིངས་ཀྱི་ཕོ་བྲང་ཐིག་ལེ་བདལ་བའི་ཀློང་། ཡེ་འབྱམ་རྨད་དུ་གྲགས་པའི་གཞལ་ཡས་རྒྱ་ཕྱོགས་
སུ་ཡོངས་སུ་མ་ཆད་པ། ཆོས་ཉིད་ཀྱི་ནམ་མཁའ་ལས་ཆོ་འཕྲུལ་གྱི་སྤྲིན་ཀུན་དུ་འཐིབས་པ་བྱང་ཆུབ་ཀྱི་ཆར་མངོན་པར་འབབ་པ། ཉོན་མོངས་པའི་གདུང་བ་བངས་པར་གྱུར་པ། ཡེ་ཤེས་ཀྱི་མྱུ་གུ་མངོན་པར་བསྐྱེད་པ། མཐའ་དང་དབུས་མེད་པ། རྩེ་མོ་ཀུན་དུ་རྒྱ་མཉམ་པ། རིན་པོ་ཆེའི་རྒྱལ་པོས་རྣམ་པར་བརྒྱན་པ། མུ་ཏིག་གི་ལྕང་ལོ་དང་། ཆུན་འཕྱང་དང་། ལྡ་ལྡིས་མཛེས་པ། ཉི་མ་ཆེན་པོས་གསལ་བཏབ་པ། ཟླ་བ་ཆེན་པོས་ཕྲ་བཀོད་པ། སྐར་མ་དང་ཤིན་ཏུ་སྐར་མ་དག་གིས་གཟེར་སྤྲས་པ། རྡོ་རྗེ་རིན་པོ་ཆེའི་འོད་སྣང་བས་ཀུན་དུ་མདངས་ཕྱུང་བའི་མཁའ་ལ། རླུང་ནག་གི་ཕུང་པོ་རྒྱ་ཡོངས་སུ་མ་ཆད་པར་མཉམ་པ། ཁྲག་གི་ཕུང་པོ་དབའ་ཀློང་དུ་འཁྲུག་པ། རྒྱ་ཕྱོགས་སུ་ཡོངས་སུ་མ་ཆད་པ། མ་ཏང་གི་གནས་དང་། པྲིས་མ་འབུར་འཕང་བར་ཆགས་པ། རུས་པ་ཕུང་པོ་རྒྱ་ཀུན་དུ་མཉམ་པའི་གཞི་ལ་འབར་བའི་གཞལ་ཡས་ཁང་འོད་ཟེར་ཀུན་དུ་འཕྲོ་བ། ག་བུ་ཅུང་བརྩེགས་པའི་རྩིག་པ་ལ། གནམ་ལྕགས་ཀྱི་གཟེར་ཏ་ལེ་བར་བཏབ་པ། རྩིབས་ཀུན་དུ་ཉི་མ་དང་ཟླ་བ་རངས་པ་དང་མ་རངས་པར་འཕྱོ་བ། ཉ་ཆེན་པོའི་ཀ་གདུང་ལ་ཉ་ཕྲན་དྲལ་དྲབ་གཏམས་པ། ཟླ་བའི་ཀ་རྟེན་དང་། ཉི་མའི་ཀ་ལོ་དང་། སྦྲུལ་ཆུན་གྱི་ཀ་རྒྱན་ལ་སོགས་པ། ཧཱུྃ་གི་ཐོག་དང་། མེའི་ཆར་མངོན་པར་འབབ་པ། ཆོས་ཉིད་ཀྱི་བླ་རེས་རྣམ་པར་བརྒྱན་པ། ཡེ་ཤེས་ཀྱི་ལྡ་ལྡིས་མངོན་པར་བྲེས་པ། རྡོ་རྗེའི་རྒྱན་དང་འཕན་གྱིས་བཀླུབས་པ། སྦྲུལ་ནག་གི་ཟར་ཚགས་དང་། སྤྲིན་ནག་གི་གྲིབ་སོ་ལྟ་བུས་གཞོལ་བའི་བར་བར་ཐམས་ཅད་
ན་རིན་པོ་ཆེ་དང་། མུ་ཏིག་དང་། མེ་ཏོག་གིས་མཛེས་པ། འཁོར་བའི་མཎྜ་ལ་ཡོ་བཀྲམ་ལ་བམ་རིལ་ཆེ་ཆུང་དང་། ཁོག་སྐམ་སྟོད་སྨད་དང་། ཡན་ལག་རིང་ཐུང་དང་། དབང་པོའི་ཕྲེང་བ་དང་། རྡོ་རྗེས་ཀུན་དུ་སྤྲས་པ། སྒོ་དགུས་ཀུན་དུ་གསལ་བར་གྱུར་པའི་གནས་ན་རྡོ་རྗེ་རྒྱལ་ཚབ་ཅེས་བྱ་བའི་ཞེ་སྡང་རྡོ་རྗེ་དང་། རྡོ་རྗེ་གོ་ཕུར་ཞེས་བྱ་བའི་ང་རྒྱལ་རིན་ཆེན་དང་། རྡོ་རྗེ་གིང་ཞེས་བྱ་བའི་འདོད་ཆགས་པདྨོ་དང་། རྡོ་རྗེ་ཀརྨ་ཞེས་བྱ་བའི་ཕྲག་དོག་སྣ་ཚོགས་དང་། རྡོ་རྗེ་བྱ་རོག་ཅེས་བྱ་བའི་དྲོད་ཀྱི་རྟགས་འཛིན་དང་། རྡོ་རྗེ་དུས་མཚམས་ཞེས་བྱ་བའི་མཐུན་འཇུག་གི་བཀའ་སྡོད་དང་། རྡོ་རྗེ་སྤུན་ཐམས་ཅད་དང་། རྡོ་རྗེ་མིང་ཐམས་ཅད་དང་། རྡོ་རྗེ་རིག་འཛིན་ཐམས་ཅད་དང་། རྡོ་རྗེ་ལུས་ཐམས་ཅད་དང་། རྡོ་རྗེ་རྣལ་འབྱོར་ཐམས་ཅད་དང་། རྡོ་རྗེ་ངག་ཐམས་ཅད་དང་། རྡོ་རྗེ་ལས་ཐམས་ཅད་དང་། རྡོ་རྗེ་ཡིད་ཐམས་ཅད་དང་། རྡོ་རྗེ་མ་ཐམས་ཅད་དང་། རྡོ་རྗེ་གིང་ཐམས་ཅད་དང་། རྡོ་རྗེ་མཁའ་འགྲོ་ཐམས་ཅད་དང་། རྡོ་རྗེ་ཤུགས་ཀྱིས་འགྲོ་ བ་ཐམས་ཅད་དང་། རྡོ་རྗེ་ཕྲ་མེན་མ་ཐམས་ཅད་དང་། རྡོ་རྗེ་ཀུན་ཏུ་འབར 
་མ་ཐམས་ཅད་དང་། རྡོ་རྗེ་གནོད་སྦྱིན་ཐམས་ཅད་དང་། རྡོ་རྗེ་སྲིན་མོ་ཐམས་ཅད་དང་། རྡོ་རྗེ་སླས་དང་། བྱི་མོ་དང་། བྲན་མོ་ལ་སོགས་པ་བུད་མེད་ཐམས་ཅད་དང་། རྡོ་རྗེ་མངག་པ་ལ་སོགས་པའི་རྡོ་རྗེ་ཁྲོ་བོ་ཐམས་ཅད་འདུ་བར་གྱུར་པ། རྡོ་རྗེ་རིགས་ཀྱི་སངས་རྒྱས་ཐམས་ཅད་དང་། འགྱིང་བག་གི་ཚུལ་གྱིས་བསྙེངས་པ་མི་མངའ་བར་རྡོ་རྗེའི་གདན་ལ་འཁོར་མང་པོ་དང་ཐབས་ཅིག་ཏུ་བཞུགས་པ་ནི་འདི་ལྟ་སྟེ། ཆོ་འཕྲུལ་ཆེན་པོ་ནམ་མཁའི་དབང་ཕྱུག་ཅེས་བྱ་བའི་སངས་རྒྱས་དང་། ཆོ་འཕྲུལ་ཆེན་པོ་རྣམ་གྲོལ་སྦྱིན་པ་ཞེས་བྱ་བའི་སངས་རྒྱས་དང་། ཆོ་འཕྲུལ་ཆེན་པོ་རྣམ་གྲོལ་སྒྲོགས་པ་ཞེས་བྱ་བའི་སངས་རྒྱས་དང་། ཆོ་འཕྲུལ་ཆེན་པོ་ཐམས་ཅད་གྲུབ་པ་ཞེས་བྱ་བའི་སངས་རྒྱས་དང་། ནམ་མཁའི་བུ་མོ་དབང་མོ་ཞེས་བྱ་བའི་རྣལ་འབྱོར་མ་ཆེན་མོ་དང་། ནམ་མཁའི་བུ་མོ་དགའ་སྡུད་མ་ཞེས་བྱ་བའི་རྣལ་འབྱོར་མ་ཆེན་མོ་དང་། ནམ་མཁའི་བུ་མོ་རྣམ་པར་
གདུང་མ་ཞེས་བྱ་བའི་རྣལ་འབྱོར་མ་ཆེན་མོ་དང་། ནམ་མཁའི་བུ་མོ་སྒྲོལ་མ་ཞེས་བྱ་བའི་རྣལ་འབྱོར་མ་ཆེན་མོ་ལ་སོགས་ཏེ། ཤིན་ཏུ་གསང་བ་ཆེན་པོའི་འཁོར་དང་། གཞན་ཡང་དམ་ཚིག་ཆེན་པོའི་འཁོར་འདི་ལྟ་སྟེ། དམ་ཚིག་ཆེན་པོ་རྡོ་རྗེའི་སྙིང་པོ་ཞེས་བྱ་བའི་སངས་རྒྱས་དང་། དམ་ཚིག་ཆེན་པོ་ནོར་བུའི་སྙིང་པོ་ཞེས་བྱ་བའི་སངས་རྒྱས་དང་། དམ་ཚིག་ཆེན་པོ་པདྨའི་སྙིང་པོ་ཞེས་བྱ་བའི་སངས་རྒྱས་དང་། དམ་ཚིག་ཆེན་པོ་བཀོད་པའི་སྙིང་པོ་ཞེས་བྱ་བའི་སངས་རྒྱས་དང་། དམ་ཚིག་ཆེན་མོ་རྡོ་རྗེ་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། དམ་ཚིག་ཆེན་མོ་ནོར་བུའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། དམ་ཚིག་ཆེན་མོ་པདྨའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། དམ་ཚིག་ཆེན་མོ་རྒྱན་གྱི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་ལ་སོགས་ཏེ། ཤིན་ཏུ་མི་འདའ་བ་ཆེན་པོའི་འཁོར་དང་། གཞན་ཡང་ཚད་མེད་པའི་འཁོར་འདི་ལྟ་སྟེ། གསང་བ་ཆེན་པོ་བྱམས་པའི་སྙིང་པོ་ཞེས་བྱ་བའི་སངས་རྒྱས་དང་། གསང་བ་ཆེན་པོ་སྙིང་རྗེའི་སྙིང་པོ་ཞེས་བྱ་བའི་སངས་རྒྱས་དང་། གསང་བ་ཆེན་པོ་དགའ་བའི་སྙིང་པོ་ཞེས་བྱ་བའི་སངས་རྒྱས་དང་། གསང་བ་ཆེན་པོ་བཏང་སྙོམས་ཀྱི་སྙིང་པོ་ཞེས་བྱ་བའི་སངས་རྒྱས་དང་། གསང་བ་ཆེན་པོ་བདེ་བའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། གསང་བ་ཆེན་མོ་འཇོམས་བྱེད་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། གསང་བ་ཆེན་མོ་དགའ་བའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། གསང་བ་ཆེན་མོ་ཁྱབ་པའི་དབང་ཕྱུག་མ་ཞེས་བྱ་བའི་རྣལ་འབྱོར་མ་ཆེན་མོ་དང་། ཤིན་ཏུ་ཚད་མེད་པའི་འཁོར་དང་། གཞན་ཡང་རོལ་པ་ཆེན་པོའི་འཁོར་འདི་ལྟ་སྟེ། རོལ་པ་ཆེན་པོའི་སངས་རྒྱས་ཡཀྵ་ཧེ་རུ་ཀ་ཞེས་བྱ་བ་དང་། རོལ་པ་ཆེན་པོའི་སངས་རྒྱས་རཀྵ་ཧེ་རུ་ཀ་ཞེས་བྱ་བ་དང་། རོལ་པ་ཆེན་པོའི་སངས་རྒྱས་བྷིག་ཤ་ཧེ་རུ་ཀ་ཞེས་བྱ་བ་དང་།
རོལ་པ་ཆེན་པོའི་སངས་རྒྱས་བི་ཤྭ་ཧེ་རུ་ཀ་ཞེས་བྱ་བ་དང་། རོལ་པ་ཆེན་མོའི་རྣལ་འབྱོར་མ་ཡཀྵ་ཤོ་རི་ཀ་ཞེས་བྱ་བ་དང་། རོལ་པ་ཆེན་མོའི་རྣལ་འབྱོར་མ་རཀྵ་ཤོ་རི་ཀ་ཞེས་བྱ་བ་དང་། རོལ་པ་ཆེན་མོའི་རྣལ་འབྱོར་མ་བྷིག་ཤ་ཤོ་རི་ཀ་ཞེས་བྱ་བ་དང་། རོལ་པ་ཆེན་མོའི་རྣལ་འབྱོར་མ་བི་ཤྭ་ཤོ་རི་ཀ་ཞེས་བྱ་བ་དང་། ཤིན་ཏུ་རོལ་པ་ཆེན་པོའི་འཁོར་དང་། གཞན་ཡང་འཇིགས་བྱེད་ཆེན་པོའི་འཁོར་འདི་ལྟ་སྟེ། འཇིགས་བྱེད་ཆེན་པོའི་སངས་རྒྱས་ཏེ་ཤ་ཧེ་རུ་ཀ་ཞེས་བྱ་བ་དང་། འཇིགས་བྱེད་ཆེན་པོའི་སངས་རྒྱས་ཀེ་ཤ་ཧེ་རུ་ཀ་ཞེས་བྱ་བ་དང་། འཇིགས་བྱེད་ཆེན་པོའི་སངས་རྒྱས་པ་ཤ་ཧེ་རུ་ཀ་ཞེས་བྱ་བ་དང་། འཇིགས་བྱེད་ཆེན་པོའི་སངས་རྒྱས་བི་ཤྭ་ཧེ་རུ་ཀ་ཞེས་བྱ་བ་དང་། འཇིགས་བྱེད་ཆེན་མོའི་རྣལ་འབྱོར་མ་ཏེ་ཤ་ཤོ་རི་ཀ་ཞེས་བྱ་བ་དང་། འཇིགས་བྱེད་ཆེན་མོའི་རྣལ་འབྱོར་མ་ཀེ་ཤ་ཤོ་རི་ཀ་ཞེས་བྱ་བ་དང་། འཇིགས་བྱེད་ཆེན་མོའི་རྣལ་འབྱོར་མ་པེ་ཤྭ་ཤོ་རི་ཀ་ཞེས་བྱ་བ་དང་། འཇིགས་བྱེད་ཆེན་མོའི་རྣལ་འབྱོར་མ་བི་ཤྭ་ཤོ་རི་ཀ་ཞེས་བྱ་བ་ལ་སོགས་པ་ཤིན་ཏུ་འཇིགས་བྱེད་ཆེན་པོའི་འཁོར་དང་། གཞན་ཡང་འཇོམས་བྱེད་ཆེན་པོའི་འཁོར་འདི་ལྟ་སྟེ། འཇོམས་བྱེད་ཆེན་པོའི་སངས་རྒྱས་ཏྲག་ཤ་ཧེ་རུ་ཀ་ཞེས་བྱ་བ་དང་། འཇོམས་བྱེད་ཆེན་པོའི་སངས་རྒྱས་ཧྲི་ཤ་ཧེ་རུ་ཀ་ཞེས་བྱ་བ་དང་། འཇོམས་བྱེད་ཆེན་པོའི་སངས་རྒྱས་ཀ་ཤ་ཧེ་རུ་ཀ་ཞེས་བྱ་བ་དང་། འཇོམས་བྱེད་ཆེན་པོའི་སངས་རྒྱས་བག་ཤ་ཧེ་རུ་ཀ་ཞེས་བྱ་བ་དང་། འཇོམས་བྱེད་ཆེན་མོའི་རྣལ་འབྱོར་མ་ཏྲག་ཤ་ཤོ་རི་ཀ་ཞེས་བྱ་བ་དང་། འཇོམས་བྱེད་ཆེན་མོའི་རྣལ་འབྱོར་མ་ཏྲི་ཤ་ཤོ་རི་ཀ་ཞེས་བྱ་བ་དང་། འཇོམས་བྱེད་ཆེན་མོའི་རྣལ་འབྱོར་མ་ཀ་ཤ་ཤོ་རི་ཀ་ཞེས་བྱ་བ་དང་། འཇོམས་བྱེད་ཆེན་མོའི་རྣལ་འབྱོར་མ་བག་ཤ་ཤོ་རི་ཀ་ལ་སོགས་ཏེ། ཤིན་ཏུ་འཇོམས་བྱེད་ཆེན་པོའི་འཁོར་དང་། གཞན་ཡང་ཟ་བྱེད་ཆེན་པོའི་འཁོར་འདི་ལྟ་སྟེ། ཟ་བྱེད་ཆེན་པོའི་སངས་རྒྱས་རུ་ཏི་ཧེ་རུ་ཀ་ཞེས་བྱ་བ་དང་།
ཟ་བྱེད་ཆེན་པོའི་སངས་རྒྱས་རག་ཏི་ཧེ་རུ་ཀ་ཞེས་བྱ་བ་དང་། ཟ་བྱེད་ཆེན་པོའི་སངས་རྒྱས་ཁ་ཧི་ཧེ་རུ་ཀ་ཞེས་བྱ་བ་དང་། ཟ་བྱེད་ཆེན་པོའི་སངས་རྒྱས་ས་ཧ་ཧེ་རུ་ཀ་ཞེས་བྱ་བ་དང་། ཟ་བྱེད་ཆེན་མོའི་རྣལ་འབྱོར་མ་རུ་ཏི་ཤོ་རི་ཀ་ཞེས་བྱ་བ་དང་། ཟ་བྱེད་ཆེན་མོའི་རྣལ་འབྱོར་མ་ཏག་ཏི་ཤོ་རི་ཀ་ཞེས་བྱ་བ་དང་། ཟ་བྱེད་ཆེན་མོའི་རྣལ་འབྱོར་མ་ཁ་ཧི་ཤོ་རི་ཀ་ཞེས་བྱ་བ་དང་། ཟ་བྱེད་ཆེན་མོའི་རྣལ་འབྱོར་མ་ས་ཧ་ཤོ་རི་ཀ་ཞེས་བྱ་བ་ལ་སོགས་པ་རྣལ་འབྱོར་མའི་འཁོར་རབ་ཏུ་མང་ཞིང་བསམ་གྱིས་མི་ཁྱབ་པའི་ཧེ་རུ་ཀ་མཐའ་ཡས་པ་ཤ་སྟག་རྣམས་དང་། གཞན་ཡང་གསང་བའི་བུ་མོའི་འཁོར་འདི་ལྟ་སྟེ། གསང་བའི་བུ་མོ་དཀར་མོ་ཞེས་བྱ་བ་དང་། གསང་བའི་བུ་མོ་རྐུན་མོ་ཞེས་བྱ་བ་དང་། གསང་བའི་བུ་མོ་རྨོངས་མོ་ཞེས་བྱ་བ་དང་། གསང་བའི་བུ་མོ་རོ་ལངས་མ་ཞེས་བྱ་བ་དང་། གསང་བའི་བུ་མོ་ལྦོས་མོ་ཞེས་བྱ་བ་དང་། གསང་བའི་བུ་མོ་གཏུམ་མོ་ཞེས་བྱ་བ་དང་། གསང་བའི་བུ་མོ་སྨེ་ཤ་ཅན་ཞེས་བྱ་བ་དང་། གསང་བའི་བུ་མོ་མ་ཚོགས་མ་ཞེས་བྱ་བ་ལ་སོགས་པ་ཤིན་ཏུ་གསང་བའི་བུ་མོའི་འཁོར་བསམ་གྱིས་མི་ཁྱབ་པ་དང་། གཞན་ཡང་དགའ་བའི་བུ་མོའི་འཁོར་འདི་ལྟ་སྟེ། དགའ་བའི་བུ་མོ་སེང་གདོང་མ་ཞེས་བྱ་བ་དང་། དགའ་བའི་བུ་མོ་བྱ་རྒོད་གདོང་མ་ཞེས་བྱ་བ་དང་། དགའ་བའི་བུ་མོ་སྟག་གདོང་མ་ཞེས་བྱ་བ་དང་། དགའ་བའི་བུ་མོ་ཝ་གདོང་མ་ཞེས་བྱ་བ་དང་། དགའ་བའི་བུ་མོ་ཁྱི་གདོང་མ་ཞེས་བྱ་བ་དང་། དགའ་བའི་བུ་མོ་དུར་བྱ་གདོང་མ་ཞེས་བྱ་བ་དང་། དགའ་བའི་བུ་མོ་ཁྭ་གདོང་མ་ཞེས་བྱ་བ་དང་། དགའ་བའི་བུ་མོ་མུན་གདོང་མ་ཞེས་བྱ་བ་ལ་སོགས་པ་ཤིན་ཏུ་དགའ་བའི་བུ་མོའི་འཁོར་བསམ་གྱིས་མི་ཁྱབ་པ་དང་། གཞན་ཡང་ཤིན་ཏུ་གུས་པའི་བུ་མོའི་འཁོར་འདི་ལྟ་སྟེ། ཤིན་ཏུ་གུས་པའི་བུ་མོ་རྟ་གདོང་མ་ཞེས་བྱ་བ་དང་། ཤིན་ཏུ་གུས་པའི་བུ་མོ་ཕག་གདོང་མ་ཞེས་བྱ་བ་དང་། ཤིན་ཏུ་གུས་པའི་བུ་མོ་སྤྲེའུ་གདོང་མ་ཞེས་བྱ་བ
དང་། ཤིན་ཏུ་གུས་པའི་བུ་མོ་ཐལ་བྱེད་མ་ལ་སོགས་པ་ཤིན་ཏུ་གུས་པའི་བུ་མོའི་འཁོར་དང་། གཞན་ཡང་ཤིན་ཏུ་གསོད་པ་ཆེན་པོའི་སྲས་ཀྱི་འཁོར་ལ་འདི་ལྟ་སྟེ། ཤིན་ཏུ་གསོད་པ་ཆེན་པོ་དཔལ་སྟག་གི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་གཡག་གི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་ཤ་བའི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་གཟིག་གི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་རྟའི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་སྤྱང་ཀིའི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་སེངྒེའི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་དོམ་གྱི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་ཕག་གི་མགྲིན་ཞེས་བྱ་བ་དང་། ཤིན་ཏུ་གསོད་པ་ཆེན་པོ་དཔལ་དྲེད་མོའི་མགྲིན་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་གསོད་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་དུར་ཁྲོད་ཅེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་གཏུན་ཁུང་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་གཏུམ་མོ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་མདའ་སྙེམས་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་སྒྲ་འབྱིན་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་ཟ་བྱེད་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་འདྲེན་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོ་རྡོ་རྗེ་སྤོར་མ་ཞེས་བྱ་བ་དང་། ཤིན་ཏུ་གསོད་མ་ཆེན་མོའི་འཁོར་རབ་ཏུ་མང་པོ་རྣམས་དང་། དེ་དག་ལ་སོགས་ཏེ་རྡུལ་ཕྲ་རབ་སྙེད་དང་ཐབས་ཅིག་གོ། །ཡུམ་རྡོ་རྗེ་ཀུན་དུ་བཟང་མོ་ས་ང་ཤོ་རི་ཀས་ཀྱང་ཉིད་ཀྱི་སྐུ་ལ་རྣམ་པར་འཁྲིལ་ཏེ། མདུན་གྱིས་བལྟས་ནས་ཐབས་ཅིག་གོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་ཆོས་ཐམས་ཅད་དགོངས་པ་མཉམ་པ་ཉིད་ལ་ཤར་བར་མཁྱེན་ནས་སྐུ་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་སྙོམས་པར་ཞུགས་སོ། །གསུང་མཉམ་པ་
ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་ཞུགས་སོ། །ཐུགས་མཉམ་པ་ཉིད་མི་དམིགས་པ་ཞེས་བྱ་བའི་ངང་ལ་རྣམ་པར་བཞུགས་ཏེ། འཇུག་པའམ། ལྡོག་པའམ། རྣམ་པར་ལྡོག་པ་མི་དམིགས་སོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་དབྱིངས་ཀྱི་ངང་ལ་མི་གཡོ་བར་བརྣལ་བཞིན་དུ་ཡུམ་རྡོ་རྗེ་ཀུན་དུ་བཟང་མོས་སྟོང་པ་ཉིད་ཀྱི་གླུ་འདི་བླངས་ཏེ་རྣམ་པར་བསྐུལ་ཏོ། །ཡོད་མེད་སྟོང་པ་ཤིན་ཏུ་རྣལ་འབྱོར་མཐུས། །ནམ་མཁའ་བཞིན་ལས་དམ་ཚིག་ཉེ་བར་གཤེགས། །ཡེ་ཤེས་རྒྱ་མཚོ་རྣམ་པར་གྲོལ་བའི་ཀློང་། །མི་གནས་མི་དམིགས་ནམ་མཁའི་དབྱིངས་ནས་བཞེངས། །ཞེས་བསྐུལ་ནས། བཅོམ་ལྡན་འདས་གསང་བ་མཆོག་གི་བདག་པོ་དེས་ཆོས་ཐམས་ཅད་བྱང་ཆུབ་སེམས་ལ་ཤར་པར་མཁྱེན་ནས་སྟོང་པ་ཉིད་ཀྱི་ངང་ལས་རྡོ་རྗེའི་སྐུ་མངོན་དུ་ཕྱུང་སྟེ། དཔེར་ན་ནམ་མཁའ་དང་བ་ལས་ཟླ་བ་དྲི་མ་མེད་པར་ཤར་བ་ལྟ་བུའོ། །དེ་ནས་ཡུམ་ས་ང་ཤོ་རི་ཀ་ལ་གཟིགས་ཏེ། འཛུམ་པ་རྣམ་པར་མཛད་དོ། །དཔེར་ན་ཉི་མ་སྟོང་ལས་འོད་ཀྱི་ཟེར་བཀྱེ་བ་ལྟ་བུའོ། །དེ་ནས་འོད་ཀྱི་ཟེར་དེ་དག་ལས་བྱང་ཆུབ་ཀྱི་སྤྲིན་མངོན་པར་འཁྲིགས་ཏེ། རོལ་པའི་ཆར་མངོན་པར་ཕབ་པས་རོལ་པ་སྣ་ཚོགས་ཀྱི་འབྲུག་དང་། རོལ་པ་སྣ་ཚོགས་ཀྱི་གློག་དང་། རོལ་པ་སྣ་ཚོགས་ཀྱི་མཆོད་པ་དང་རོལ་པ་སྣ་ཚོགས་ཀྱི་གླུ་དང་། རོལ་པ་སྣ་ཚོགས་ཀྱི་གར་དང་། རོལ་པ་སྣ་ཚོགས་ཀྱི་རྔ་དང་། དུང་དང་ཀེར་ཀོར་དང་གླིང་བུ་དང་རོལ་པ་སྣ་ཚོགས་ཀྱི་རྒྱན་དང་། རོལ་པ་སྣ་ཚོགས་ཀྱི་སྒེག་པ་དང་སྟེག་པ་དང་། འཁྱུད་པ་དང་སྟེང་བ་དང་། སྦྱོར་བ་དང་བསྟིམ་པ་དང་མཉེས་པ་དང་། རོལ་པ་སྣ་ཚོགས་ཀྱིས་གསོལ་བ་དང་མྱང་བ་དང་། འཆའ་བ་དང་བདེ་བ་དང་། སྤྲོ་བ་དང་། འཇོ་བ་དང་། འཇུག་པ་དང་།རོལ་པ་སྣ་ཚོགས་ཀྱི་དགའ་བ་ཆེན་པོ་ལ་འཇུག་པ་རྣམ་པར་མཛད་དོ། །དེ་ནས་ཡུམ་ཀུན་དུ་བཟང་མོ་དེས་སྤྱན་ཟིམ་བག་གིས་རྣམ་པར་འདུད་
པའི་ཚུལ་དུ་བཅོམ་ལྡན་འདས་གསང་བ་མཆོག་གི་བདག་པོ་ལ་རྣམ་པར་བལྟས་ཏེ། རྣལ་འབྱོར་སྦྱོར་བའི་ཕྱག་ལུས་ཀུན་དུ་ས་ལ་བརྡབས་ནས་རོལ་པ་ཆེན་པོའི་གླུ་འདིས་གསོལ་བ་བཏབ་བོ། །ཚོགས་ཆེན་གཉིས་རྫོགས་ཐུགས་དམ་དབྱིངས་ཀྱི་ལྷ། །ལོངས་སྤྱོད་རྫོགས་མཛད་རོལ་པ་ཆེན་པོའི་སྐུ། །རྡོ་རྗེ་སེམས་དཔའ་སྐལ་བཟང་དཔལ་ཁྱོད་བདག །ཐབས་ཀྱི་རོལ་པས་བདེ་ཆེན་དབྱིངས་ནས་བཞེངས། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་གླུ་དེས་བསྐུལ་བར་ཐུགས་སུ་ཆུད་ནས། བདེ་བ་ཆེན་པོའི་ངང་དེ་ལས་ཆོ་འཕྲུལ་ཆེན་པོར་རྣམ་པར་བཞེངས་ཏེ། རྣམ་པར་འགྱིང་བ་དང་། རྣམ་པར་བརྗིད་པ་དང་། གར་གྱི་ཕྱག་རྒྱ་ཆེན་པོ་དང་། རྣམ་པར་བཤད་པ་སྣ་ཚོགས་དང་། ཞབས་ཀྱི་བརྐྱང་བསྐུམ་དང་། སྐུའི་འགྱུར་བག་དང་། སྨིན་རིས་ཀྱི་འབྲི་ཀུ་ཏ་བསྒྱུར་བ་དང་། སྤྲུལ་པའི་འོད་ཟེར་གྱིས་ནམ་མཁའ་ཐམས་ཅད་ཀུན་དུ་ཁྱབ་པར་མཛད་དོ། །དེ་ནས་ཐམས་ཅད་དང་ཐམས་ཅད་ལ་མཚན་མ་དང་། རྣམ་པ་དང་། ཡོད་པ་དང་། མེད་པ་ཐམས་ཅད་ལ་གསང་བ་མཆོག་གི་བདག་པོ་དེས་ཀུན་ལ་ཁྱབ་པར་མཛད་དེ། དེ་དག་གི་རང་བཞིན་དུ་རྣམ་པར་གནས་སོ། །དེ་ནས་རྡོ་རྗེ་ཀུན་དུ་བཟང་མོ་དེ་ངོ་མཚར་དུ་གྱུར་ཏེ། ཡང་རྣལ་འབྱོར་པའི་ཕྱག་ལུས་ཀུན་དུ་ས་ལ་བརྡབས་ཏེ། ཆོ་འཕྲུལ་འབྱུང་བའི་གླུ་འདིས་གསོལ་བ་བཏབ་བོ། །ཡེ་ཤེས་སྒྱུ་མས་རྣམ་པར་རོལ་པའི་སྐུ། །ཐབས་དང་ཤེས་རབ་ཆེ་ལ་མངའ་བརྙེས་པའི། །འཕགས་རྗེ་སྤྲུལ་པ་མང་པོ་འབྱུང་བའི་གནས། །བདེ་གཤེགས་བདེ་བར་གཤེགས་མཛད་བཞེངས་སུ་གསོལ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་རོལ་བའི་དེ་ཁོ་ན་ཉིད་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་ཅང་མི་གསུང་བར་བཞུགས་སོ། །དེ་ནས་ཡུམ་རྡོ་རྗེ་ཀུན་དུ་བཟང་མོ་དང་། དམ་ཚིག་ཆེན་པོ་རྡོ་རྗེ་སེམས་དཔའ་ལ་སོགས་པ་འཁོར་ཤིན་ཏུ་མང་པོ་རྣམས་ངོ་མཚར་དུ་གྱུར་ཏེ། དེ་དག་ཐམས་ཅད་མགྲིན་གཅིག་ཏུ་རྡོ་རྗེ་རོལ་པ་དེ་
ཁོ་ནའི་གླུ་འདིས་བསྐུལ་ཏེ་གསོལ་བ་བཏབ་བོ། །ཨེ་མའོ། །ཡིད་བཞིན་སྐུ་མཆོག་ནམ་མཁའ་ལྟ་བུ་ལས། །ཁྱབ་པའི་བྱིན་བརླབས་རྡོ་རྗེ་གར་མཛད་ཅིང་། །གཟི་བརྗིད་སྤྲིན་དཔུང་རོལ་པས་བསྒྱིངས་པའི་སྐུ། །ཐོགས་མེད་རྡོ་རྗེ་རོལ་པའི་ཆོ་འཕྲུལ་སྟོན། །ཨེ་མའོ། །ཡིད་བཞིན་གསུང་མཆོག་སྒྲ་བརྙན་ལྟ་བུ་ལས། །སྙན་པའི་བྱིན་བརླབས་རྡོ་རྗེ་བརྗོད་མཛད་ཅིང་། །ཡན་ལག་རྒྱ་མཚོ་མི་ཟད་བཀོད་པའི་གསུང་། །སེངྒེ་སྒྲ་ཡིས་གསང་སྔགས་རྒྱ་མཚོ་སྟོན། །ཨེ་མའོ། །ཡེ་ཤེས་སྙིང་པོ་ཉི་མ་ལྟ་བུ་ལས། །ཡེ་ཤེས་བྱིན་བརླབས་རྡོ་རྗེ་བདེ་མཛད་ཅིང་། །ཐིག་ལེ་སྤྲོས་བྲལ་རྣམ་པར་མི་རྟོག་ཐུགས། །རྣམ་གྲོལ་དེ་ཉིད་ངེས་པའི་ཆོ་འཕྲུལ་སྟོན། །མི་ཤེས་བླུན་རྨོངས་འདམ་བྱིང་འགྲོ་བ་རྣམས། །སྡུག་བསྔལ་རྒྱ་མཚོས་བཅིངས་པ་ཐབས་ཀྱིས་ཁྲོལ། །མ་རིག་མུན་པས་ལྡོངས་པ་དོན་གྱིས་ཕྱེ། །འཁོར་བའི་རྒྱ་མཚོ་རོལ་པའི་གྲུ་ཡིས་སྒྲོལ། །དེ་བཞིན་གཤེགས་པ་ཀུན་གྱི་ཐུགས་ཆེན་པོ། །ཡེ་ཤེས་དོན་གྱི་སྙིང་པོ་མཆོག་དང་ལྡན། །རྣལ་འབྱོར་ཐེག་ཆེན་རྡོ་རྗེ་ཀུན་འདུས་རྒྱུད། །འདུས་པའི་ཚོགས་ལ་རྒྱ་ཆེར་བཤད་དུ་གསོལ། །ཨ་ལ་ལ་ཧོ་ཞེས་ངེས་པར་བཏུད་དེ་གསོལ་བ་བཏབ་བོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་རོལ་པ་དེ་ཁོ་ན་ཉིད་ཀྱི་གླུ་དེས་གསོལ་བ་བཏབ་པ་མཁྱེན་ནས་འཁོར་ཐམས་ཅད་ལ་རྣམ་པར་གཟིགས་ཏེ་འཛུམ་པ་མཛད་དོ། །འཛུམ་པ་མཛད་པས་ཐུགས་རྣམ་པར་དག་པའི་ཀློང་ནས་རིག་པའི་ཉི་མ་བརྗོད་ཀྱིས་མི་ལང་བའི་ཡང་མི་ལང་བའི་འོད་ཟེར་དང་བཅས་པ་འབྱམ་ཀླས་པ་ཁྱབ་པར་ཤར་བར་མཛད་དོ། །འོད་ཟེར་དེ་དག་རེ་རེ་ལས་རྡོ་རྗེ་ཧེ་རུ་ཀ་རབ་ཏུ་མང་བའི་ཚོགས་བཤད་པར་མཛད་དོ། །དེ་དག་རེ་རེ་ལས་ཀྱང་སངས་རྒྱས་འབུམ་ཕྲག་འཁོར་སོ་སོའི་ཞབས་འབྲིང་བཅས་པ་ལྷུན་གྱིས་གྲུབ་པར་མཛད་དོ། །དེ་དག་ལས་རིག་པའི་ཉི་མའི་ཆར་མངོན་པར་ཕབ་པས་མུན་པའི་ཀློང་ཐམས་ཅད་གསལ་བར་མཛད་དོ། །རིག་པའི་ཆོས་ཀྱི་འབྲུག་སྒྲ་
དང་། རིག་པའི་ཆོས་ཀྱི་ཆར་དང་། རིག་པའི་ཆོས་ཀྱི་གླུ་སྣ་ཚོགས་དང་། གར་སྣ་ཚོགས་དང་། རིག་པའི་ཆོས་ཀྱི་མཆོད་པ་སྣ་ཚོགས་བྱུང་སྟེ། འབྱམ་ཀླས་པའི་ནམ་མཁའ་ལ་སྒྲ་སྣ་ཚོགས་ཕན་ཚུན་དང་། ཡན་མན་དང་། སྣྲེལ་ཞི་ལ་སོགས་པ་ཐམས་ཅད་དུ་ཁྱབ་པར་ལིང་ལོང་ཕྱད་པར་བྱུང་ངོ་། །མཆོད་པའི་ཆར་ཡང་མངོན་པར་ཕབ། རྨད་དུ་བྱུང་བའི་སྐུ་བསམ་གྱིས་མི་ཁྱབ་པ་ཡང་ལིང་ལོང་ཕྱད་རྨད་དུ་བྱུང་བའི་ཐུགས་ཀྱང་ལྷང་ངེའོ། །རྨད་དུ་བྱུང་བའི་གསུང་བསམ་གྱིས་མི་ཁྱབ་པ་ཡང་ཨ་ལ་ལ་ཧོ་ཞེས་སྒྲ་སྒྲོགས། སངས་རྒྱས་འབུམ་ཕྲག་ཀྱང་གསུང་དབྱངས་བསམ་གྱིས་མི་ཁྱབ་པའི་སྒྲ་གཅིག་ཏུ། ཨེ་མའོ་རྨད་བྱུང་རོལ་པའི་ཆོས་ཀྱི་དོན་བྱུང་ངོ་ཞེས་སྒྲོགས། འཁོར་འབུམ་ཕྲག་དང་གདུལ་བྱ་སྣ་ཚོགས་སྤྲོ་བའི་ངོ་མཚར་སྐྱེད། རིག་པའི་རྩལ་སྦྱངས་དོན་གྱི་ཆེ་བ་ཕྱུང་། ངམ་ཞིང་ངོ་མཚར་བར་གྱུར་ཏེ་ཐམས་ཅད་ཉེ་བར་གནས་སོ། །དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས་འཁོར་རྣམ་པར་སྦྱོང་བའི་རྡོ་རྗེ་རྒྱན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས། རྡོ་རྗེ་སྔགས་ཀྱི་ཚིག་འདི་གསུངས་སོ། །ཧཱུྃ་ཧཱུྃ་ཧཱུྃ་རྡོ་རྗེ་འདུ་བར་བསྡུས་པ་ཡི། །དམ་ཚིག་ཆེན་པོའི་རིག་འཛིན་རྣམས། །བླ་འོག་རིམ་པ་ཇི་བཞིན་དུ། །རྡོ་རྗེ་གསང་བའི་གྲལ་འཁོད་དེ། །རིགས་མ་ཡིན་པ་རིགས་མིན་འགྱུར། །སྐལ་བ་བཟང་པོའི་དམ་ཚིག་འདི། །སྐལ་བ་ངན་ལ་འབབ་མི་འགྱུར། །དེ་ལས་འདས་ན་དེ་རླག་བྱེད། །ཧཱུྃ་ཀྲོ་དྷ་ཛྭ་ལ་ས་མ་ཡ། རཀྵ་ཛྭ་ལ་ས་མ་ཡ། ཡཀྵ་ཛྭ་ལ་ས་མ་ཡ། ཙིཏྟ་ཛྭ་ལ་ས་མ་ཡ་ཞེས་གསུངས་པ་ཙམ་གྱིས་ཞལ་ལྗགས་ཀྱི་དབང་པོ་འོད་མེ་དཔུང་ཆེན་པོ་ལས་ཁྲོ་བོ་འོད་ཀྱི་ཕྲེང་བ་
འབར་བ ་དང་། སྲིན་པོ་འོད་ཀྱི་ཕྲེང་བ་ འབར་བ ་དང་། གནོད་སྦྱིན་འོད་ཀྱི་ཕྲེང་བ་འཁྲུག་པ་དང་། ཟ་བྱེད་འོད་ཀྱི་ཕྲེང་བ་ འབར་བ ་བརྒྱུད་མར་བྱུང་བས་རུ་ཏྲ་ཅན་དང་། བདུད་དང་། སྲིན་མོ་དང་། གནོད་སྦྱིན་དང་། སྲིན་པོ་དང་། འཇུག་སྲེད་དང་། སྲེད་མེད་དང་། དབང་
ཕྱུག་དང་། སྟོབས་ལྡན་དང་། སྤྲེའུ་དང་། ར་དང་། ལུ་འདེ་དང་། སྦྲང་མ་དང་། བྱ་རོག་དང་། མེ་ཁྱེར་དང་། འཁོར་བ་དང་། ཆུ་དང་། ས་དང་། ནམ་མཁའ་དང་། མེ་དང་། སྒྲ་དང་། བསམ་ངན་ལ་སོགས་པ་བརླག་སྟེ། མི་གནས་པར་གྱུར་ཅིང་རྨད་དུ་བྱུང་བ་ཉིད་དུ་མཛད་དོ། །དེ་ནས་འོད་ཟེར་དེ་དག་མཁའ་ལ་འཁྱིལ་བ་དང་། འཁོར་མང་པོ་དག་ཤིན་ཏུ་སྐྲག་སྟེ་གསོལ་བ་བཏབ་པ། ཨེ་མའོ། ཨེ་མ་བདག་ཅག་བཅོམ་ལྡན་འདས་ཀྱིས་བྱིན་གྱིས་བརླབ་ཏུ་གསོལ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་ཞལ་གྱི་མདངས་ཕྱུང་སྟེ། འོད་ཟེར་དེ་དག་ཡེ་ཤེས་ཀྱི་འོད་ཞི་ཞིང་འཁྱིལ་བ་དང་། མཛེས་ཤིང་བདེ་བ་དང་ལྡན་པས་ཐམས་ཅད་རངས་པར་བྱས་པས་སྣོད་དུ་རུང་བར་རྣམ་པར་སྦྱངས་ནས་འོད་དེ་དག་འོད་ཀྱི་གནས་སུ་ཐིམ་པར་གྱུར་ཏོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་མི་གནས་པའི་ཡེ་ཤེས་ཆེན་པོའི་ཀློང་ནས་ངེས་པར་བཞེངས་ནས་སེངྒེ་རྣམ་པར་རྒྱལ་བའི་སྒྲ་ལྟ་བུས་དོན་གྱི་བཀོད་པ། གསང་བའི་ངེས་པ། རྒྱུད་ཀྱི་འགྲེལ་པ། རྟགས་ཀྱི་རོལ་པ། རྡོ་རྗེ་རྣམ་པར་བསྒྱིངས་པའི་གཞུང་ཆེན་པོ་སྒྲ་འདིས་བཤད་དོ། །ཨ་ཨོ་ཨོཾ། ས་མ་ཡ། ཨ་དྷི། གུ་ཧྱ། པུ་ཏི་ཨ་ཧོ་ཀུ་ལ་མ་ཏོང་བྱིང་ཏ་པ་དྲ་ཨ་མོ་གྷ་ཨཱི་ཤྭར་ས་མ་ཡ་ན། གུ་ཏི་ཨ་ལ་ལ་ཧོ་ཞེས་ཅང་མི་གསུང་ངོ་། །ཀུན་དུ་མི་གསུང་། རབ་ཏུ་མི་གསུང་། གསུངས་པ་མི་འགོག་འགོག་པ་མ་ཡིན། མ་གསུངས་པ་ཉིད་ན་རྒྱ་ཆེར་བཤད་པའི་ངོ་བོར་བཞུགས་སོ། །རྣམ་པར་བཞུགས་ནས་དམ་ཚིག་ཆེན་པོ་རྡོ་རྗེ་སེམས་དཔའ་ལ་ཞལ་གཟིགས་ཏེ། འཛུམ་པས་བསྐུལ་བ་རྣམ་པར་མཛད་དོ། །དེ་ནས་དམ་ཚིག་ཆེན་པོ་རྡོ་རྗེ་སེམས་དཔའ་དེས་བསྐུལ་བར་རྣམ་པར་རིག་ནས་རང་གི་སྟན་ལས་ལངས་ནས། རང་གི་མཚན་མ་གནས་ལྔར་རེག་པར་བྱས་ནས་ལྕེ་པདྨའི་སྟེང་དུ་བཞག་ནས། ལུས་ས་ལ་བརྡབས་པའི་ཕྱག་རྣལ་འབྱོར་གྱི་ལུགས་སུ་བྱས་ནས། སེངྒེའི་
ལྟ་སྟངས་ཀྱིས་བྱས་ནས་སྟོན་པའི་ཞལ་དུ་བལྟས་ཏེ། རྡོ་རྗེ་རྒྱལ་པོ་ཚོགས་བདག་དགོངས་སུ་གསོལ། །ཆོས་ཀྱི་རྒྱལ་པོ་མི་གཡོ་རྒྱལ་ཚུལ་མཛད། །རྒྱལ་མཆོག་རྒྱལ་པོ་ཆོས་ཀྱི་རྒྱལ་པོའི་མཐུས། །འདུས་པའི་ཚོགས་ལ་རྒྱ་ཆེར་བཤད་དུ་གསོལ། །ཨ་ལ་ལ་ཧོ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་རྡོ་རྗེ་ལས་ཀྱི་བཀའ་བ་དེ་བྱིན་གྱིས་བརླབ་པའི་ཕྱིར་རྡོ་རྗེ་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་བཀའ་སྩལ་ཏོ། །བཛྲ་ཀརྨ་ཙཀྲ་སཏྭ་རྃ། ཞེས་གསུངས་ཏེ། རྡོ་རྗེ་རྒྱ་གྲམ་གྱི་འཁོར་ལོ་གཅིག་སེམས་དཔའ་རྡོ་རྗེའི་ལག་ཏུ་བབས་པར་གྱུར་ནས་ལས་ཀྱི་རྡོ་རྗེའི་དབང་ཐོབ་པར་གྱུར་ཏེ། རྣམ་པར་རོལ་པ་ཆེན་པོ་ཤིན་ཏུ་བླ་བཀྱལ་བའི་སྤོབས་པ་ཅན་དུ་གྱུར་ཏོ། །བྱིན་གྱིས་བརླབས་ནས་ཀུན་དུ་མི་གཟོ་བ་རབ་ཏུ་བག་དང་ལྡན་པ་ཆེན་པོར་གྱུར་ཏོ། །དེ་ནས་སེམས་དཔའ་རྡོ་རྗེ་དེས་ལས་ཀྱི་མཚན་མ་དེ་ལག་ཏུ་བླངས་ཏེ། སྟབས་སྣ་ཚོགས་དང་། གར་དང་། གླུ་སྣ་ཚོགས་རྡོ་རྗེ་ཚིག་ཏུ་ལེན་ཅིང་རྡོ་རྗེ་རྒྱ་གྲམ་ལས་ཀྱི་འཁོར་ལོ་དེ་ལན་རྣམ་པ་བཅུ་གཉིས་སུ་བསྐོར་ནས་གྲངས་གཉིས་དང་ལྔ་བསྒྱུར་བས། ཞིང་ཁམས་མཐའ་དག་རྣམ་པར་གཡོས་ཏེ། གཡོས། རབ་ཏུ་གཡོས། ཀུན་དུ་རབ་ཏུ་གཡོས། འགུལ། རབ་ཏུ་འགུལ། ཀུན་དུ་རབ་ཏུ་འགུལ། ལྡེག །རབ་ཏུ་ལྡེག །ཀུན་དུ་རབ་ཏུ་ལྡེག །འཁྲུགས། རབ་ཏུ་འཁྲུགས། ཀུན་དུ་རབ་ཏུ་འཁྲུགས། འུར་རབ་ཏུ་འུར། ཀུན་དུ་རབ་ཏུ་འུར། ཆེམ་རབ་ཏུ་ཆེམ། ཀུན་དུ་རབ་ཏུ་ཆེམ་པར་གྱུར་ཏེ། ཞིང་ཁམས་ཐམས་ཅད་ནི་གསང་བའི་དཀྱིལ་འཁོར་ཤ་སྟག་ཏུ་གྱུར། བཅུད་ཡུལ་ཐམས་ཅད་ནི་ཕྱག་རྒྱ་ཆེན་པོར་གྱུར། རྣམ་པར་རྔམ་པའི་ཚུལ་གྱིས་སྟོན་པའི་མདུན་ལོགས་སུ་སེངྒེ་རྡོ་རྗེས་མཚན་པའི་གདན་ལ་འགྱིང་བག་གི་ཚུལ་གྱིས་རྣམ་པར་གནས་སོ། །དེ་ནས་འདུས་པའི་འཁོར་ཚོགས་ཕལ་མོ་ཆེ་རྣམས་ཀྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
ཨེ་མ་བཅོམ་ལྡན་འདས་སེམས་དཔའ་རྡོ་རྗེ་འདི་ནི་འདི་ལྟར་མཐུ་ཆེ་བ། འདི་ལྟར་བྱིན་རླབས་ཆེ་བ། འདི་ལྟར་རྒྱ་ཆེ་བ། འདི་ལྟར་མཁས་པ། འདི་ལྟར་གསལ་ཞིང་ཟབ་པ་ནི་བཅོམ་ལྡན་འདས་ཀྱི་ཐུགས་ལས་སྐྱེས་པ་ལགས་སོ། །ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་སེམས་དཔའ་རྡོ་རྗེ་འདི་ནི་བྱང་ཆུབ་ཀྱི་སེམས་ཐམས་ཅད་ཀྱི་ཕྱི་མོ། །སྙིང་རྗེ་ཐམས་ཅད་ཀྱི་བདག་པོ། །སངས་རྒྱས་ཐམས་ཅད་ཀྱི་རྗེ་བཙན། །བྱང་ཆུབ་སེམས་དཔའ་རིག་པ་འཛིན་པ་ཐམས་ཅད་ཀྱི་ཡབ། རྣལ་འབྱོར་པ་ཐམས་ཅད་ཀྱི་མེས་ཆེན་པོ། །མྱ་ངན་ལས་འདས་པ་ཐམས་ཅད་ཀྱི་དེད་དཔོན། བདུད་ཐམས་ཅད་ཀྱི་ཡང་བདུད་ཆེན་པོ། །ཆོས་ཐམས་ཅད་ཀྱི་མཛོད། ཡེ་ཤེས་ཐམས་ཅད་ཀྱི་འབྱུང་གནས་ཆེན་པོར་གྱུར་པ་ཡིན་ནོ། །དེ་ཅིའི་ཕྱིར་ཞེ་ན། ཐོག་མ་དང་ཐ་མ་མེད་པ་མཉམ་པའི་དུས། ཕ་མཐའ་ལས་ཀྱང་ཕ་མཐའ། དཔག་ཏུ་མེད་ཅིང་བསམ་དུ་མེད་པ། འབྱམ་ཀླས་པའི་དུས་ནས་བྱ་བ་བྱས་ཤིང་བྱེད་པ་བྱས་པ། མངོན་པར་རྫོགས་པར་སངས་རྒྱས་པ་ཡིན་ཏེ། ཆོས་ཐམས་ཅད་ཀྱི་རང་བཞིན་དུ་སྦྱོར་ཞིང་གནས་པས་ན། རྒྱལ་བ་ཐམས་ཅད་ཀྱི་ཐུགས་ལས་སྐྱེས་ཤིང་ཐམས་ཅད་ཀྱི་ཡབ་ཏུ་གྱུར་པ་ཡིན་ཏེ། དེ་འདྲའོ་ཞེས་བཀའ་སྩལ་བ་ལས་འདུས་པའི་འཁོར་ཐམས་ཅད་ངོ་མཚར་དུ་གྱུར་ཏེ། བཅོམ་ལྡན་འདས་འདིས་ནི་འདི་ལྟར་ངོ་མཚར་ལགས་སོ། །བདེ་བར་གཤེགས་པ་འདི་ངོ་མཚར་ལགས་སོ། །སེམས་དཔའ་རྡོ་རྗེ་དམ་པ་ལ་ལོགས་སུ་བཏུད་དེ་ལུས་ས་ལ་བརྡབས་པའི་ཕྱག་རྣལ་འབྱོར་ལུགས་སུ་བྱས་ཏེ། རྨད་དུ་བྱུང་བའི་མེ་ཏོག་དང་། ཚོགས་ཀྱི་མཆོད་པ་སྣ་ཚོགས་བྱས་ཏེ། འདི་ལྟར་རྨད་བྱུང་ངོ་མཚར་ཁྱོད། །སངས་རྒྱས་ཐུགས་ལས་རྒྱལ་སྐྱེས་པ། །ཅི་ལྟར་ཞིང་འདིར་སྣང་ཞིག་གུ། །རྣལ་འབྱོར་ཡབ་གྱུར་རྒྱལ་བའི་སྲས། །ངོ་མཚར་ཁྱོད་ཀྱིས་སྤྱོད་པས་ན། །བཀའ་ཡི་འཁོར་ལོ་རབ་བསྐོར་བ། །
སྒྲུབ་པའི་ལམ་མཆོག་དམ་པ་དག །ཚིག་གིས་མཚོན་དེ་གསལ་བར་མཛོད། །ཨ་ལ་ལ་ཧོ་ཞེས་གསོལ་བ་བཏབ་བོ། །དེ་ནས་དམ་པ་རྡོ་རྗེས་རྡོ་རྗེ་བསྐོར་ཏེ་བསྒྱུར་ནས་བརྗིད་བག་ཏུ་ཚིག་ཏུ་མཚོན་ཏེ་སྨྲས་པ། ཨོཾ་ཨཱྃཿཧཱུྃ། ཨ་ལ་ལ་ཧོ། རྒྱལ་བའི་སྲས་པོས་ཅང་མི་གསུང་། །མི་གསུང་བས་ནི་རྒྱ་ཆེར་བཤད། །བཤད་དུ་མེད་པའི་ཆོས་འདི་ནི། །རྒྱལ་བ་རྣམས་ཀྱིས་མ་བཤད་དེ། །དེ་ལྟར་སྟོན་པ་རྒྱལ་མཆོག་ཀྱང་། །རྣམ་པར་བརྗོད་པར་མི་བཞེད་དེ། །རྒྱ་ཆེར་བཤད་པར་དགོངས་པའོ། །སྐྱེ་བ་མེད་པའི་ཆོས་རྣམས་ནི། །མ་སྐྱེས་པར་ཡང་སྙིང་པོར་བཞེད། །སྙིང་པོའི་དོན་དུ་གང་གྱུར་པ། །ཚིག་ཏུ་སྨྲ་བ་ལེགས་མ་ཡིན། །སྤྲོས་པ་ཉིད་ན་གོལ་བ་ཞེས། །རྒྱལ་བ་རྣམས་ཀྱིས་ཡང་དག་བཤད། །དེ་བས་རྡོ་རྗེ་རྒྱལ་པོ་ཉིད། །བཀའ་མ་སྩལ་བར་དགོངས་པའོ། །དགོངས་པའི་དོན་རྣམས་གང་འབྱིན་པ། །ཇི་ལྟར་མེ་ལོང་གཟུགས་བརྙན་ལྟར། །དགོངས་དོན་རིག་ལ་སྣང་གྱུར་པ། །མ་སྐྱེས་སྙིང་པོའི་དོན་གྱིས་ན། །ཚིག་ཏུ་སྤྲོ་བར་མ་ཡིན་ནའང་། །མཚན་མ་ཚིག་གི་རྣལ་འབྱོར་པ། །ཚིག་ལ་ཞིབ་ཅིང་དོན་ལ་རྩིང་། །ཚིག་ཕྱིར་བློ་འབྲང་རྩལ་ཞན་རྣམས། །བཀྲི་ཕྱིར་བསམ་པ་རངས་བྱ་བ། །མི་དམིགས་པ་ལས་དམིགས་པ་ཡི། །ཆོ་འཕྲུལ་ཚིག་གིས་མཚོན་པ་ནི། །བདེར་གཤེགས་རྒྱལ་བ་ཀུན་གྱི་ཐུགས། །གསང་བ་དེ་ཉིད་སྙིང་པོའི་དོན། །མཉམ་ཉིད་བྱང་ཆུབ་ཐེག་ཆེན་པོ། །གསལ་བར་བཀོད་དེ་ངེས་བརྗོད་ཀྱིས། །རྒྱ་ཆེན་འདུས་པའི་ཚོགས་རྣམས་ཉོན། །ང་ནི་དུས་གསུམ་བཞུགས་པ་ཡི། །རྒྱལ་བ་ཀུན་གྱི་སྙིང་པོ་སྟེ། །སྟོང་པར་སྦས་པའི་དོན་འདི་ལ། །དཔེས་མཚོན་ཚིག་གི་ལྡེ་མིག་གིས། །མཉམ་ཉིད་རིག་པའི་སྒོ་དབྱེ་བྱས། །སྦས་པའི་དོན་འབྱིན་གསལ་བྱེད་པ། །སཱ་ལུ་ཕུབ་ཁྲོད་སྣང་མེ་བཞིན། །བསལ་བཏེག་སྣང་རྙེད་ས་ལེར་འདུག །ཟབ་མོར་སྤྱོད་པ་ལ་མོས་པས། །གང་ཞིག་དོན་ལ་འདྲིས་པ་ཡི། །གསང་སྔགས་སྤྱོད་པའི་རང་བཞིན་ནི། །མཐུན་པའི་དམིགས་བཅུ་དཔེར་
བཞག་སྟེ། །རྣལ་འབྱོར་ཅན་གྱིས་ཤེས་པར་བྱ། །སྒྱུ་མ་སྨིག་རྒྱུ་རྨི་ལམ་དང་། །གཟུགས་བརྙན་དྲི་ཟ་གྲོང་ཁྱེར་དང་། །བྲག་ཅ་ཆུ་ཟླ་མིག་ཡོར་དང་། །ཆུ་བུར་འཁྲུལ་དང་མགལ་མེར་སྣང་། །སྒྲུབ་དང་གསང་སྔགས་སྤྱོད་པ་དང་། །གྲུབ་པ་དང་ནི་གནས་དག་དང་། །བཟླས་པའི་སྒྲ་དང་ཕྱག་རྒྱར་རྟོག །ཏིང་འཛིན་ལྟ་བ་ཆོ་འཕྲུལ་བརྟག །ཇི་ལྟར་སྒྱུ་མའི་མཚན་ཉིད་ནི། །སྐྱེས་བུ་དག་གི་རྩོལ་བ་དང་། །སྨན་དང་སྔགས་ཀྱི་སྦྱོར་བ་ལས། །དབང་པོ་ཡིད་འཕྲོག་ཅིར་སྣང་ཡང་། །དེ་ལ་འགྲོ་འོང་ག་ལ་ཡོད། །དེ་ལྟར་སྒྲུབ་པའི་མཚན་ཉིད་ཀྱང་། །ཡིག་འབྲུ་རྫས་ཀྱི་སྦྱོར་བ་ལས། །གྲུབ་པར་སྣང་ཡང་རང་བཞིན་མེད། །ཇི་ལྟར་སྨིག་རྒྱུའི་མཚན་ཉིད་ནི། །ཞིང་པའི་དུས་ཀྱི་ཟླ་བ་ལ། །དྲོད་དང་ཉི་མའི་སྦྱོར་བ་ལས། །བྱིས་པ་གདུངས་པའི་རང་བཞིན་གྱིས། །ཆུ་ཡི་འདུ་ཤེས་ཅི་བསྐྱེད་ཀྱང་། །ཚིམ་པའི་རྒྱུད་ནི་ག་ལ་འགྱུར། །གསང་སྔགས་མིང་གི་ཁྱད་པར་ཡང་། །རང་བཞིན་མི་དམིགས་སྟོང་པ་ལ། །མཚན་མའི་ཐ་སྙད་མིང་དུ་བཏགས། །དེ་ཉིད་སྟོང་པས་མིང་མི་དམིགས། །དཔེར་ན་རྨི་ལམ་རང་བཞིན་ནི། །སྐྱེས་བུ་གཉིད་ཀྱི་དབང་གྱུར་ན། །ཐང་ཅིག་སྐད་ཅིག་ཡུད་ཙམ་དང་། །ལོ་ལ་སོགས་པ་དེ་བཞིན་དུ། །བདེ་དང་སྡུག་བསྔལ་དེ་བཞིན་མྱོང་། །སངས་ནས་ཅི་ཡང་མི་དམིགས་ལྟར། །དེ་བཞིན་སྔགས་ཀྱི་སྤྱོད་པ་དག །སྟོང་པ་ཉིད་ཀྱི་རང་བཞིན་ལ། །སྤྱོད་པའི་རྣམ་པ་ཅིར་སྣང་ཡང་། །བརྟགས་ན་དམིགས་པ་ཀུན་དང་བྲལ། །གཟུགས་བརྙན་སྣང་བའི་མཚན་ཉིད་ནི། །དཔེར་ན་གདོང་དང་མེ་ལོང་ལས། །བརྟེན་ནས་བཞིན་གྱི་གཟུགས་བྱུང་ཡང་། །རེད་པར་གྱུར་པ་ག་ལ་ཡོད། །དེ་བཞིན་སྔགས་ཀྱི་དངོས་གྲུབ་ཀྱང་། །སྒྲུབ་དང་ཏིང་འཛིན་ཡོ་བྱད་ལས། །བརྟེན་ནས་དངོས་གྲུབ་ཚུལ་བྱུང་ཡང་། །གསོལ་ཐོབ་དམིགས་པ་ག་ལ་ཡོད། །དྲི་ཟ་གནས་པའི་རང་བཞིན་ནི། །མཁའ་འམ་ཡིད་ཀྱི་མཁའ་ངོས་ལ། །དྲི་ཟའི་གཟུགས་ནི་གར་བྱུང་ཡང་། །གྲོང་
ཁྱེར་དེ་ཡང་དེ་ནས་བྱུང་། །བྱུང་ནས་དེ་ཡང་མི་རྟག་ལྟར། །གསང་སྔགས་གྲུབ་པའི་གནས་དག་ཀྱང་། །ཆོས་སམ་ཡིད་ཀྱི་མཁའ་ངོས་ལ། །རྣལ་འབྱོར་གསང་བདག་གར་བསྐྱེད་པར། །དེ་ཉིད་གནས་པའི་གཞལ་མེད་ཁང་། །བྱུང་ཡང་དེ་ལ་གནས་མི་འགྱུར། །བྲག་ཅ་གྲག་པའི་མཚན་མ་ནི། །དཔེར་ན་ངོས་ལ་སྒྲས་རྐྱེན་པས། །ཅི་བཞིན་སྒྲ་ལྟར་བྲག་ཅ་འབྱུང་། །བྱུང་ཡང་སྒྲར་ཐོས་དམིགས་པ་མེད། །དེ་བཞིན་སྔགས་ཚིག་བཟླས་པའི་སྒྲ། །དཔེར་ན་མེད་ལས་ཡོད་བརྟགས་པའི། །མཚན་མ་ལ་བརྟེན་སྟོང་བའི་སྒྲ། །བརྗོད་པ་ཙམ་དུ་བསྟན་པར་ཟད། །ཇི་ལྟར་ཆུ་ཡི་ཟླ་བ་ནི། །སྒྲིབ་མེད་མཁའ་ལས་ཟླ་ཤར་བ། །གཟུགས་བརྙན་དང་བའི་ཆུ་ནང་སྣང་། །སྣང་ཡང་གཟུང་བའི་རྟོག་མེད་པ། །དེ་བཞིན་གཟུགས་སྣང་ཕྱག་རྒྱ་ཡང་། །སེམས་ཀྱི་མཁའ་ལས་སྐུར་གསལ་བ། །ཕྱག་རྒྱ་རིག་འཛིན་ངོ་ལ་སྣང་། །དེ་ལྟར་སྣང་ཡང་འཛིན་རྟོག་བྲལ། །ཇི་ལྟར་ཆར་གྱི་རྒྱུན་བཞིན་དུ། །ཆུ་ལས་ཆུ་བུར་རྣམ་པར་འབྱུང་། །དེ་ཡང་གཅིག་གི་རྣམ་པ་ལས། །མང་པོའི་རྣམ་གྲངས་དུ་མ་འབྱུང་། །སྡུད་ཅིང་ཕྱིར་ཡང་དུམ་བུར་འཆད། །དེ་བཞིན་རྣལ་འབྱོར་སྒྲུབ་པ་ཡི། །ཏིང་འཛིན་རྣམ་པ་མང་པོར་འདོད། །འཁྲུལ་པ་སྣང་བའི་རང་བཞིན་ནི། །སྤྲོས་བྲལ་དངོས་པོ་སྟོང་པ་ལས། །སྲོག་དང་ཤེད་ཅན་བྱེད་པ་པོ། །སེམས་ཅན་པ་ལ་སོགས་པར་སྣང་། །མིག་ནད་ངོ་ལ་རྫས་ལྟར་སྣང་། །འཁྲུལ་པ་ཁོ་ན་སྣང་བར་ཟད། །དེ་བཞིན་སྔགས་ཀྱི་ལྟ་བ་ཡང་། །ཆོ་འཕྲུལ་མང་པོ་ཅིར་འཕྲུལ་བ། །སྣང་བ་མེད་པའི་རང་བཞིན་ལ། །འཁྲུལ་པ་སྣ་ཚོགས་སྣང་བར་ཟད། །རྣལ་འབྱོར་ཅན་གྱིས་དེ་ལྟར་ལྟ། །ཇི་ལྟར་མགལ་མེའི་རང་བཞིན་ནི། །གང་དག་ལག་ན་མགལ་མེ་ཐོགས། །བསྐོར་ན་འཁོར་ལོའི་རྒྱུན་ལྟར་སྣང་། །དེ་ལ་འཁོར་ལོའི་རང་བཞིན་མེད། །དེ་བཞིན་སྔགས་ཀྱི་ཆོ་འཕྲུལ་ཡང་། །མི་མཉམ་མཉམ་པའི་རང་བཞིན་ལས། །ཇི་ལྟར་དམིགས་པའི་དོན་འབྱུང་སྟེ། །ཆོ་འཕྲུལ་སྣ་ཚོགས་རྒྱུན་མི་འཆད། །དེ་ཕྱིར་མཚན་མའི་
ཆོས་ཐམས་ཅད། །མཚན་མེད་ངང་དུ་གཅིག་པས་ན། །རྟོག་པའི་བག་ཆགས་ཅི་འབྱུང་ཡང་། །ཆོས་ཀུན་དབྱིངས་སུ་གཅིག་པའི་ཕྱིར། །རྟོག་འཇུག་སྤྲོས་པའི་མཚན་མ་ཀུན། །མ་བྱུང་མ་སྐྱེས་དབྱིངས་ཉིད་ལ། །གཡོས་པ་མེད་ཅིང་ཆོ་འཕྲུལ་འབྱུང་། །ཡོན་ཏན་སྣ་ཚོགས་ཆེར་འབྱུང་བའི། །གཏེར་གྱི་དབྱིག་འདི་གང་མཐོང་བ། །སངས་རྒྱས་ཀུན་གྱི་ཡོན་ཏན་ཡང་། །སྐད་ཅིག་གཅིག་ལ་དེ་ལ་འདུས། །དེ་བས་ཡིད་བཞིན་རིན་ཆེན་འདི། །ལྡོག་པ་མེད་པས་དང་དུ་བླང་། །དོན་དམ་ཡང་དག་གཏེར་གྱི་མཆོག །རྣལ་འབྱོར་ཀུན་གྱི་ནོར་མཆོག་སྟེ། །གང་རྟོགས་དེ་འཐོབ་གཅིག་པུ་ཉིད། །འབྲེལ་མེད་གཞན་གྱིས་ཐོབ་པར་དཀའ། །བདག་མེད་གཉིས་བྲལ་བདེ་ཆེན་ཀློང་། །སངས་རྒྱས་ཀུན་གྱི་བདེ་བ་ཆེ། །ཡེ་ནས་ལྷུན་གྲུབ་འདུས་མ་བྱས། །ཐིག་ལེ་ཆོས་ཉིད་ཡེ་འབྱམ་པས། །ཀུན་ཁྱབ་བདལ་བས་སྙིང་པོར་འདུས། །མི་དམིགས་སྤྲོས་བྲལ་བྱང་ཆུབ་སེམས། །ཟབ་མོར་སྣང་བའི་ངེས་དོན་འདི། །མཁའ་ལ་མདུད་འདྲར་གཏིང་དཔག་དཀའ། །རྣལ་འབྱོར་དམིགས་ལྡན་བློ་ཆུང་ཞིང་། །གང་ཞིག་རྩལ་ཞན་དེ་རྟོག་པ། །གཡོར་མོའི་ཚུལ་དུ་བདག་བརྟག་པ། །བརྟགས་ཀྱང་རྟོགས་པར་མི་འགྱུར་རོ། །དཔེར་ན་ཉི་མའི་སྙིང་པོ་ལ། །མིག་གི་དབང་པོས་རབ་བརྟགས་ན། །དེ་བརྟགས་དོན་དེ་མི་རྟོགས་ཀྱི། །འོད་ཀྱི་ཟེར་གྱིས་མིག་རྫིར་འགྱུར། །དེ་འདྲར་བྱིས་པའི་རང་བཞིན་གྱིས། །ཟབ་མོའི་དོན་ལ་ཅིར་བརྟགས་ཀྱང་། །ཡང་དག་དོན་དེ་མི་མཐོང་གི། །བློ་ཞན་བྱིས་པ་ག་ཆད་བརྒྱལ། །བརྟག་ཏུ་མེད་པའི་ཆོས་རྣམས་ནི། །རྟོག་པ་ཅན་གྱིས་མི་རྟོགས་ཏེ། །གང་ཞིག་དེ་དོན་མི་རྟོགས་ཕྱིར། །གཡང་སར་ལྟུང་བ་ཅི་ཆ་ཡོད། །གདོད་ནས་མ་ཐོས་ཤིན་ཏུ་དགེ། །བསམ་དང་བྲལ་བས་དེ་བཞིན་གཞག །མི་བརྟགས་བཞག་པའི་ཆོས་འདི་གང་། །བྱིས་པ་རྣམས་ལ་ངས་མ་བསྟན། །བསྟན་ཀྱང་གོ་བར་མི་འགྱུར་ཏེ། །བསྟན་
དུ་མེད་ཅིང་གོ་བར་དཀའ། །ཚིག་གིས་བརྗོད་པ་ཀུན་དང་བྲལ། །འདི་ཞེས་བསྟན་དུ་ག་ལ་ཡོད། །མེད་པས་བསྟན་པའི་དམིགས་མི་ཕྱེད། །མི་དམིགས་ཆོས་ལ་བློ་སྦྱངས་ཤིང་། །ཡིད་ཀྱི་མེ་ལོང་གསལ་བྱས་ན། །ནམ་མཁའ་དག་ལ་རབ་བརྟགས་ན། །སྣང་བ་མེད་པའི་རང་བཞིན་ནི། །ནམ་མཁའ་ལྟ་བུར་དེ་ཉིད་འགྱུར། །ཆོས་ཉིད་ནམ་མཁའ་ལྟ་བུ་སྟེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་གང་མིང་རྗོད་བྱེད་པ། །བརྗོད་པ་དེ་ཉིད་དངོས་པོ་སྟེ། །དངོས་པོ་དེ་ཡི་མིང་བརྗོད་ཀྱང་། །ནམ་མཁའ་དེ་ལ་འགག་མི་འགྱུར། །དེ་བཞིན་མི་རྟོག་རྗོད་བྱེད་པ། །བརྗོད་པ་དེ་ཉིད་རྣམ་རྟོག་སྟེ། །རྣམ་རྟོག་དེ་ཡི་མིང་བརྗོད་ཀྱང་། །མི་རྟོག་དེ་ལ་འགག་མི་འགྱུར། །དེ་འདྲར་སེམས་ཀྱང་དེ་ལྟར་བལྟ། །སེམས་ཉིད་གཞན་དུ་མ་གྲུབ་སྟེ། །དེ་བཞིན་ཆོས་ཀྱང་གྲུབ་མ་ཡིན། །སེམས་དང་ཆོས་ཉིད་གཉིས་མེད་དེ། །སེམས་ཉིད་གང་ཡིན་ཆོས་ཉིད་དེ། །ཆོས་ཉིད་ཀྱང་ནི་དེ་བཞིན་ནོ། །ཆོས་སེམས་གཉིས་མེད་ལྡན་གྱུར་པ། །བླ་མེད་བྱང་ཆུབ་ཆེན་པོར་བཤད། །སེམས་ནི་ནམ་མཁའ་ལྟ་བུ་སྟེ། །རྣམ་པར་རྟོག་བྲལ་གང་མི་རྟོགས། །དེ་བཞིན་ས་གཞི་ཆེན་པོ་ལྟར། །བླ་མེད་བྱང་ཆུབ་མྱུ་གུ་སྐྱེད། །མེ་ཡི་རང་བཞིན་ལྟར་སྣང་བས། །རྨོངས་པའི་བུད་ཤིང་སྲེག་པར་བྱེད། །རླུང་གི་རང་བཞིན་ཡིན་པས་ན། །མི་ཤེས་པ་ཡི་རྡུལ་ཀུན་སེལ། །ཆུ་ཡི་རང་བཞིན་ཡིན་པས་ན། །ཉོན་མོངས་གདུང་བ་ཀུན་སིམ་བྱེད། །སྨན་གྱི་རང་བཞིན་ཡིན་པས་ན། །འཁོར་བའི་གཅོང་རྙིང་རྣམ་པར་འབྱིན། །དེ་ལྟར་རྩི་ཡི་རང་བཞིན་པས། །འཚོ་བ་རྣམས་ཀྱི་གསོས་སུ་འབབ། །དེ་བཞིན་རྣོ་དབལ་རང་བཞིན་པས། །སྡུག་བསྔལ་རྒྱ་མཚོ་རྣམ་པར་གཅོད། །ཉི་མ་ལྟ་བུར་སྣང་བ་ཡིས། །མུན་ཁང་སྣང་སྟོན་སེལ་བར་བྱེད། །རི་རབ་ལྟ་བུའི་རང་བཞིན་པས། །བརྟན་པོ་མི་འགྱུར་གཡོ་བ་མེད། །རྒྱ་མཚོ་ལྟ་བུའི་རང་བཞིན་པས། །མི་གཡོ་བ་ལ་བྱིན་བརླབས་ཆེ། །སེམས་ནི་འདི་ལྟར་ཆོ་འཕྲུལ་བས། །དེ་ཕྱིར་འཁོར་དང་མྱ་ངན་
འདས། །གཉིས་སུ་སྣང་བ་མ་ཡིན་ཏེ། །སེམས་ཀྱི་རང་བཞིན་བཟང་ངན་ལས། །གཉིས་ཀྱི་འདུ་ཤེས་ཕྱེ་སྟེ་བསྟན། །སེམས་ལས་ཡང་དག་ཡེ་ཤེས་འབྱུང་། །དེ་བཞིན་བདེ་དང་སྡུག་བསྔལ་འབྱུང་། །ཆོས་དང་སངས་རྒྱས་ཡེ་ཤེས་འབྱུང་། །དགེ་འདུན་ཡང་ནི་དེ་བཞིན་ནོ། །འདི་ལས་ཕ་རོལ་ཕྱིན་ཚོགས་དང་། །བྱང་ཆུབ་དང་ནི་པདྨོ་འབྱུང་། །འདི་ལས་རྡོ་རྗེ་སེམས་དཔའ་དང་། །དྲི་མེད་རིན་ཆེན་དཔའ་སྦྱིན་འབྱུང་། །དེ་བཞིན་རྡོ་རྗེ་དཔག་མེད་དང་། །སྣ་ཚོགས་རྒྱལ་བ་འདི་ལས་འབྱུང་། །འདི་ལས་ཕྱག་རྒྱ་སྣ་ཚོགས་དང་། །རིག་པའི་སྙིང་པོ་ཐམས་ཅད་འབྱུང་། །འདི་ལས་འདོད་ཆགས་ཞེ་སྡང་དང་། །སྡུག་བསྔལ་ང་རྒྱལ་ཕྲག་དོག་འབྱུང་། །གཏི་མུག་དག་ཀྱང་དེ་བཞིན་ཏེ། །འདི་ལས་ཁམས་གསུམ་ཐམས་ཅད་དང་། །སྐྱེས་པ་བུད་མེད་མ་ནིང་འབྱུང་། །འདི་ལས་འདོད་དང་འདོད་གཟིར་དང་། །ཉོན་མོངས་གདུང་འདོད་ཆགས་པ་འབྱུང་། །རི་དང་སྐྱེ་བོ་དེ་བཞིན་དུ། །ནམ་མཁའ་དང་ནི་རླུང་དག་དང་། །སྲེག་པའི་མེ་ནི་རབ་ཏུ་འབྱུང་། །འདི་ལས་ས་དང་ཆུ་དང་ནི། །རྡོ་དང་ས་བོན་མྱུ་གུ་འབྱུང་། །དེ་བཞིན་གློག་དང་སྐར་མ་དང་། །ཉི་མ་ཟླ་བ་སྤྲིན་རྣམས་འབྱུང་། །དེ་བཞིན་སྤྱོད་དང་མི་སྤྱོད་ཀུན། །ཐམས་ཅད་ཐམས་ཅད་འབྱུང་བར་འགྱུར། །དཔེར་ན་ནམ་མཁའི་རང་བཞིན་ལས། །སྤྲིན་དང་ན་བུན་ཁུག་རླངས་དང་། །ཟླ་བ་ཉི་མ་སྐར་ཚོགས་དག །སྣང་ཡང་ནམ་མཁའ་བཞིན་དུ་གནས། །དེ་བཞིན་སེམས་ཀྱི་ནམ་མཁའ་ལས། །མཚན་མའི་ཆོ་འཕྲུལ་ཅི་བྱུང་ཡང་། །ཆོས་ཉིད་ནམ་མཁའ་བཞིན་གནས་པར། །རྣལ་འབྱོར་ཅན་གྱིས་བལྟ་བར་བྱ། །དེ་ལྟ་བུ་ཡི་སེམས་ཉིད་ནི། །རྟོགས་དང་མ་རྟོགས་རང་བཞིན་ལ། །ལྟ་བའི་ཁྱད་པར་སོ་སོར་བལྟ། །རྟོག་པ་ཅན་གྱི་ངོ་ག་ལ། །རྟོག་པ་འཁྲུལ་པའི་ངོ་བོར་སྣང་། །ཀུན་དུ་ཉེར་འཇོག་ལམ་ཚོར་ལ། །ཀུན་དུ་རྡུལ་གྱི་ཕུང་པོར་སྣང་། །ཚོགས་སྤྱོད་སྙིང་རྗེ་ཉེར་འཇོག་ལ། །ཐམས་ཅད་སྒྱུ་མའི་རང་བཞིན་ལྟར། །དེ་ཉིད་མཉམ་པར་ཤེས་གནས་ན། །
ནམ་མཁའི་རང་བཞིན་མཐོང་བར་གནས། །ཡེ་ཤེས་རང་སྣང་ནམ་མཁའ་ལ། །ནམ་མཁའ་ཉིད་དུ་སྣང་བར་ཟད། །བརྗོད་བྲལ་མཐོང་མེད་དམིགས་དང་བྲལ། །མཐོང་བ་མེད་པའི་དོན་འདི་ནི། །སྔོན་གྱི་རྒྱལ་བ་རྣམས་ཀྱིས་བཤད། །བདེ་གཤེགས་སྙིང་པོ་བྱང་ཆུབ་ལ། །དགོངས་པ་འདི་ལས་གང་མི་མངའ། །ལྟ་བ་དེ་དང་ལྡན་བཞིན་དུ། །དམ་ཚིག་ནམ་མཁའ་ལྟ་བུ་ལ། །བསྲུང་དང་མི་བསྲུང་ཕྱོགས་དང་བྲལ། །འདིའོ་ཞེས་ནི་བསྲུང་དུ་མེད། །བསྲུང་བའི་རྣམ་གྲངས་ཇི་སྙེད་ཅིག །དུས་གསུམ་རྒྱལ་བས་གསུངས་མོད་ཀྱང་། །བསྲུང་བའི་མདོ་ནི་གཅིག་ཏུ་འདུས། །ནམ་མཁའ་ལྟ་བུའི་རྣལ་འབྱོར་བས། །ནམ་མཁའ་འདྲ་བའི་དམ་ཚིག་བསྲུང་། །དེ་ཡང་བསྲུང་དུ་མེད་ན་བདེ། །གཞན་པ་ཐེག་པ་ཆུང་བ་རྣམས། །བསྲུང་བའི་མཚམས་དག་བསྲུངས་ནས་ནི། །སྐྱོན་ཡོན་ཆོས་ལ་བླང་དོར་བྱེད། །བསྲུང་དང་བྲལ་བའི་ཆོས་རྣམས་ནི། །བསྲུང་དུ་མེད་པས་དེ་བཞིན་གཞག །དེ་བཞིན་པ་ཡི་དམ་ཚིག་ལ། །ཇི་བཞིན་པ་ཡི་བློ་གཞག་སྟེ། །བརྗེད་པ་མེད་པའི་སེམས་ཉིད་ཀྱིས། །བསྲུང་བ་མེད་པའི་ངང་དུ་བསྡམ། །བསྲུང་མེད་ནམ་མཁའི་དམ་ཚིག་འདི། །ཇི་ལྟར་གྲགས་པའི་རང་བཞིན་ལ། །སྡོམ་དང་ཚུལ་ཁྲིམས་སོ་སོར་སྣང་། །བྱིས་པ་རྣམས་ནི་ཐ་ཚིག་སྡོམ། །བདེན་གཉིས་རྒྱུ་ལ་སྟོན་པར་གྲགས། །བླ་མེད་མཆོག་ལ་དམ་ཚིག་སྤྱོད། །གཅིག་གི་དོན་ལས་མ་གཡོས་ཀྱང་། །འདུལ་དབང་ངོ་ལ་སོ་སོར་གྲགས། །ཁོ་ན་ཉིད་ལྡན་དམ་ཚིག་མཆོག །དེ་དང་གང་ལྡན་དམ་པ་སྟེ། །དེ་ལས་འདས་ན་འཚིག་པར་འགྱུར། །དེ་ཕྱིར་དམ་ཚིག་ཆེན་པོ་ནི། །ནམ་མཁའ་འདྲ་བར་དཔའ་བོས་བཤད། །རྒྱལ་བ་དཔའ་བོ་ཐམས་ཅད་ལ། །དམ་ཚིག་འདི་ལས་ཡོང་མི་མངའ། །སྤྱོད་པ་དག་གི་ཁྱད་པར་ཡང་། །ཆོས་ཉིད་བྱ་བཙལ་ཀུན་བྲལ་ལ། །བསྒྲུབ་དང་སྒྲུབ་པའི་དམིགས་པ་མེད། །འཁྲུལ་པ་གཅོད་པའི་སྐྱེ་བོ་དག །དམིགས་མེད་བྱང་ཆུབ་བདེ་ཆེན་ལ། །སྡུག་བསྔལ་རྩོལ་སེམས་
བཅུག་པས་ནོར། །བྱ་བ་མེད་པའི་ཆོས་ཉིད་ལ། །ཉོན་མོངས་བྱ་མེད་སྤྱད་པས་འཁྲུལ། །རང་བྱུང་ལྷུན་གྲུབ་གནས་བཞིན་དུ། །བྱིས་པའི་སྤྱོད་པས་ཅི་བཙལ་དགོས། །གང་ཞིག་འདོད་དེ་ཅི་ཞིག་སྒྲུབ། །ཅི་སྤྱད་ཅི་བསྒྲུབས་ཅི་བཙལ་ཡང་། །སྡུག་བསྔལ་ཉིད་དེ་བྱང་ཆུབ་མེད། །དམྱལ་བ་སངས་རྒྱས་ཆེན་པོ་ལ། །སྡུག་བསྔལ་བྱང་ཆུབ་ལམ་ཉིད་དེ། །ཉན་ཐོས་རང་རྒྱལ་ས་གཉིས་དང་། །ཐེག་པའི་ཁྱད་པར་ཅི་བསྟན་པ། །བྱེད་རྩོལ་བཅས་པ་ཐམས་ཅད་འཁྲུལ། །བླ་མེད་བྱང་ཆུབ་གེགས་སུ་ཆེ། །གང་ཞིག་བཙལ་མེད་བདེ་ཆེན་དོན། །སེམས་ཀྱི་ཀློང་འདིས་མ་མཐོང་ན། །སྒྲུབ་དང་རྩོལ་བ་ཅི་སྤྱད་ཀྱང་། །བྱིས་པ་དོན་མེད་གྱི་ན་འཁྱམ། །བཙལ་དུ་མེད་པའི་རང་བཞིན་ལ། །རྩོལ་བའི་སྤྱོད་པས་ཅི་ཞིག་བྱ། །འཛིན་པ་མེད་པའི་ཆོས་ཉིད་ལ། །ཚིག་འཛིན་ནོར་བའི་རྩོལ་བྱར་མེད། །བགྲོད་དུ་མེད་པའི་ཆོས་ཉིད་ལ། །བགྲོད་པའི་དཀྱིལ་འཁོར་མིང་དང་བྲལ། །བསམ་དུ་མེད་པའི་ཆོས་ཉིད་ལ། །རྟོག་སེམས་བསམ་པའི་དམིགས་དང་བྲལ། །བཙལ་མེད་པ་ཡི་ཆོས་ཉིད་ལ། །བཙལ་མེད་ཡེ་ནས་ལྷུན་གྱིས་གྲུབ། །མཐའ་དབུས་མེད་པས་བདལ་བ་ཆེ། །ཕྱི་ནང་མེད་པས་ཡེ་གསལ་ཁྱབ། །སྐྱོན་ཡོན་མེད་པར་ལྷུན་གྱིས་རྫོགས། །བསྒྲུབ་དུ་མེད་པས་བཙལ་སེམས་བྲལ། །གཟུང་དུ་མེད་པས་དམིགས་དང་བྲལ། །ཐམས་ཅད་མཁྱེན་པས་བྱིན་བརླབས་ཆེ། །གདོད་ནས་བྱང་ཆུབ་སྙིང་པོར་གནས། །སྤྱོད་པའི་ཁྱད་པར་འདི་ལྟ་བུ། །དེས་ན་གཅིག་ལས་མེད་བཞིན་དུ། །སྤྱོད་མཐུན་རྩོལ་བའི་རང་བཞིན་ལ། །རྣམ་རྟོག་སྤྱོད་པ་སོ་སོར་སྣང་། །འཁྲུལ་བ་ཐམས་ཅད་འཁོར་བར་སྤྱོད། །རྒྱུ་འབྲས་མི་སླུ་བདེན་དོན་སྤྱོད། །མི་དམིགས་པ་ལ་ནམ་མཁར་སྤྱོད། །དེ་ལྟར་སྤྱོད་པ་ཀུན་སྤྱོད་ཀྱང་། །དམ་པའི་དོན་དེ་སྤྱོད་མཆོག་ཉིད། །དམ་པར་གྱུར་པ་ཐམས་ཅད་ལ། །དམ་པའི་སྤྱོད་པ་དེ་ལས་མེད། །སྐྱེས་བུ་མཆོག་གིས་དེ་སྐད་བཤད། །ཐེ་ཚོམ་མེད་པར་ཤེས་པར་གྱིས། །མ་བཅོས་
བྱང་ཆུབ་དེ་བཞིན་ཉིད། །བསྒོམ་དུ་མེད་པའི་ཆོས་ཉིད་ལ། །བསྒོམ་པ་དམིགས་སུ་མེད་པ་སྟེ། །ཏིང་འཛིན་ཞེས་ནི་གདགས་སུ་མེད། །བསྒོམས་ཀྱང་རྙེད་པ་མ་ཡིན་ལ། །དེ་བཞིན་མ་བསྒོམས་སྟོར་བ་མེད། །བསྒོམ་ཆོས་སྣ་ཚོགས་ཅིར་སྣང་ཡང་། །བསྒོམས་ནས་དེ་ཡི་ངང་མི་གནས། །དེ་བས་བྱིས་པའི་སྤྱོད་ཡུལ་ཡིན། །དཔེར་ན་བྱིས་པའི་རང་བཞིན་གྱིས། །ས་ལ་སོགས་པ་གཟུགས་སྣ་ཚོགས། །མཛེས་པར་བྱས་ནས་སྐད་ཅིག་མཐོང་། །མཐོང་བ་ཉིད་ན་མ་གྲུབ་སྟེ། །སྐད་ཅིག་ཁོ་ནས་ཞིག་གྱུར་ནས། །ས་ལ་སོགས་པའི་རྡུལ་དུ་སྣང་། །དེ་བཞིན་རྣལ་འབྱོར་བྱིས་པ་ཡིས། །གཟུགས་ལ་སོགས་པ་སྣ་ཚོགས་བསྒོམ། །སེམས་ཀྱི་བྱེ་བྲག་སྐད་ཅིག་ལ། །ཡིད་ཀྱི་རྒྱུ་བ་སྣ་ཚོགས་འབྱུང་། །བྱུང་བ་བཞིན་དུ་དེ་མ་གྲུབ། །སེམས་ཀྱི་སྐད་ཅིག་དྲན་པ་ལ། །ཡིད་ཀྱི་དམིགས་པ་རྒྱུན་ཆད་ནས། །བྱུང་ཚོར་ཆད་པའི་མཐའ་སྤངས་ཏེ། །ཆོས་རྣམས་ནམ་མཁའ་ལྟ་བུར་ནི། །བརྗོད་མེད་རྒྱུན་མི་འཆད་པར་དམིགས། །དེ་དོན་ཕྱིན་ཅི་མ་ལོག་པར། །བརྗེད་མེད་ཏིང་འཛིན་སྒོམ་པའི་མཆོག །ཅི་ཕྱིར་ཆོས་ཀྱི་དབྱིངས་ཉིད་ནི། །ནམ་མཁའ་ལྟ་བུར་འདུས་མ་བྱས། །བསམ་དུ་མེད་པས་ནམ་མཁའ་འདྲ། །བརྗོད་དུ་མེད་པས་གཟུགས་དང་བྲལ། །ཀུན་གཞི་ཀུན་དུ་ནམ་མཁའ་ལ། །ཡིད་ནི་མཁའ་ལ་ཉི་ཤར་འདྲ། །རྣམ་ཤེས་ཉོན་མོངས་སྤྲིན་གྱིས་ཁེབས། །འདུ་བྱེད་རླུང་གིས་ཀུན་བསྐྱོད་དེ། །གསལ་དང་བྱུང་འཇུག་སངས་དང་འགག །རྣམ་ཤེས་མཚན་མའི་རྟོག་པ་ཡིས། །ཀུན་གཞི་ནམ་མཁའ་མཐོང་མི་སྟེར། །ཀུན་གཞི་མཐོང་ཉིད་ཆོས་སྐུ་སྟེ། །འདི་དོན་ནམ་མཁའ་མ་བརྗེད་པ། །ཏིང་འཛིན་ཆེན་པོ་རྒྱུན་མི་འཆད། །གང་ཞིག་འདི་དོན་ཡིད་འཆང་བ། །གཟུགས་ཀྱི་དངོས་པོ་ཅིར་སྣང་ཡང་། །སེམས་ནི་ཡེ་ནས་མྱ་ངན་འདས། །བདེ་ཆེན་སངས་རྒྱས་ཐམས་ཅད་ལ། །དགོངས་པ་འདི་ལས་ཡོང་མི་མངའ། །སྣང་བ་མེད་པའི་ནམ་མཁའ་འདི། །ཏིང་འཛིན་ཆེན་པོར་གནས་བཞིན་
དུ། །འདི་ལས་གླགས་ཏེ་ཅི་ཞིག་ཚོལ། །རྒྱལ་བས་བཙལ་ཀྱང་ཡོང་མི་རྙེད། །འདི་ལས་གཞན་དུ་གང་ཚོལ་བ། །བཙལ་བ་ཉིད་ན་ཚི་ཆད་འགྱུར། །གཞན་ནམ་དམན་པའི་སྒོ་རྣམས་ནི། །ཏིང་འཛིན་མེད་པའི་ཆོས་ཉིད་ལ། །འཛིན་པའི་ཏིང་འཛིན་བཅུག་པས་ནོར། །དེ་དག་ལ་ནི་གང་སྤྱོད་རྣམས། །ཐེན་ཚེར་མིག་ནི་ནམ་མཁའ་ལ། །ཕྲ་རབ་ཐེན་ཐག་འཛུད་པ་ལྟར། །བྱིས་པ་ལས་གང་བྱེད་པ་དེ། །ཤེད་ཅན་དག་གིས་བྱར་མི་རུང་། །ཤེད་ཅན་སྤྱོད་པའི་ནམ་མཁའ་དེ། །ཐེན་ཚེར་ནམ་མཁར་ཤོང་མི་འགྱུར། །དེ་བས་གཞན་ལ་བསྟན་པ་མིན། །བསྟན་ན་བྱིས་པ་ག་ཆད་འགྱུར། །ཆོས་ཉིད་ནམ་མཁའ་ལྟ་བུའི་དངོས། །གསལ་བར་འོད་སྟོང་ཉི་མས་འགྲུབ། །བྱིན་བརླབས་འོད་ཀྱི་ཟེར་ཕྲེང་ཙམ། །སྒྱུ་མ་ལྟར་སྣང་མཚན་མར་ཐོབ། །མི་གཡོ་མཚན་མེད་རང་བཞིན་དངོས། །སྐྱེ་མེད་སེམས་ཀྱིས་མ་མཐོང་བ། །བྱིས་པ་འདྲིད་པའི་རྩེད་མོར་སྣང་། །དངོས་གྲུབ་ཆེན་པོའི་སེམས་ཉིད་དེ། །ཡིད་བཞིན་འབྱུང་བ་རིན་པོ་ཆེ། །ཇི་ལྟར་དམིགས་ཤིང་བསྒྱུར་བར་འགྱུར། །གྲུབ་པའི་དོན་ཆེན་ཐམས་ཅད་རྫོགས། །སེམས་ཀྱིས་སེམས་ཀྱི་ཚུལ་མཐོང་ན། །དངོས་གྲུབ་ཅེས་དེ་དག་ལས་འོང་། །གང་གིས་སྩོལ་ཏེ་སུ་ཡིས་བླང་། །སྩལ་དང་སྩོལ་བར་བྱེད་མི་དམིགས། །དཔེར་ན་ཆུ་དང་མེ་ལོང་དང་། །མཁའ་དང་རལ་གྲི་ཤེལ་ལ་སོགས། །གསལ་བར་བྱེད་པའི་རང་བཞིན་ལ། །རྙོག་མེད་ལ་སོགས་བལྟས་གསལ་བ། །ཆུ་ལ་སོགས་པའི་རང་བཞིན་ཡིན། །དེ་ལ་ངོ་མཚར་ཆེ་མི་འབྱུང་། །སེམས་ཀྱི་ཆུ་གསལ་ནམ་མཁའ་ལ། །ཉོན་མོངས་སྤྲིན་གྱིས་རྙོག་མེད་ན། །དངོས་གྲུབ་ཉི་ཟླ་སྐར་ཚོགས་བཀྲམ། །སྒྲིབ་མེད་བྱིན་བརླབས་ངང་གིས་འཆར། །ཀུན་གཞི་ནམ་མཁའི་སྙིང་པོ་དེ། །ཉོན་མོངས་སྤྲིན་གྱིས་གཏིང་སྤུངས་པ། །ཤེས་རབ་རླུང་གིས་མ་གཏོར་བར། །ག་ཞ་མཁན་གྱི་སྤྱོ་འདྲི་ཡིས། །སྒྲིབ་བསལ་ཆོས་ཉིད་གསལ་འདོད་པ། །ཇི་ལྟར་ཆུས་གཤེར་བྱིས་པ་དག །ཉི་མ་སྤྲིན་ལྡན་གྲིབ་མ་ཡིས། །
ཤིན་ཏུ་བསྒྲིབས་པར་གྱུར་པ་ན། །སྤྲིན་ཆེན་འདུས་པའི་ཕུང་པོ་ལ། །ཁ་ཡི་དབུགས་ཀྱིས་བུས་བྱས་ན། །སྤྲིན་བསལ་ཉི་འོད་གསལ་འདོད་འདྲ། །དེ་ཕྱིར་རྣལ་འབྱོར་དབང་ཕྱུག་གིས། །སེམས་ཉིད་དོན་ལ་རྣམ་བརྟགས་ཏེ། །ཀུན་གཞི་རྩ་བ་ཤེས་པར་བྱ། །སེམས་ཉིད་དེ་ལ་བལྟས་གསལ་བ། །རྩ་བ་དང་ནི་གང་ལྡན་པ། །དུས་དང་ཚིགས་དང་ལོར་གྱུར་ཡང་། །ཡལ་ག་ལོ་འདབ་འབྲས་བུར་བསྐྲུན། །རྩ་བའི་ས་བོན་མེད་མི་འགྱུར། །ཅི་ལྟར་སྦྱོར་བའི་རྣལ་འབྱོར་རྣམས། །ནན་གྱིས་མཚན་པའི་དངོས་གྲུབ་དག །བྱིས་པའི་སེམས་ཀྱིས་བླང་འདོད་ན། །དེ་ཡང་མཚན་མས་དེ་རངས་འགྱུར། །དཔེར་ན་མེ་ཡི་རང་བཞིན་དག །ས་དང་ནགས་ཚལ་སྲེག་བྱེད་པ། །རྒྱུ་རྣམས་ཚོགས་པའི་བདེན་པ་ལས། །མེད་ལས་ཡོད་པའི་བདེན་པར་སྣང་། །དེ་ལྟར་མཚན་མའི་རྣལ་འབྱོར་ཡང་། །མཚན་མའི་ཆོ་འཕྲུལ་ཐོབ་འདོད་པ། །མཚན་མའི་རྒྱུ་རྣམས་ཚོགས་པ་ལས། །མཚན་མ་རངས་པའི་མཚན་མར་སྣང་། །ཤིན་ཏུ་སྐར་མ་རྒྱལ་རྣམས་ལ། །བྱང་ཆུབ་སྤྱོད་པ་ཆེར་སྤྱོད་པའི། །དམ་པའི་དོན་ལ་ཆེར་དམིགས་པས། །གསང་མཆོག་རིག་པའི་དངོས་གྲུབ་མྱུར། །མཚན་མར་མི་རྟོག་རང་བཞིན་གྱིས། །ཟབ་མོའི་དོན་ཆེན་གོ་བ་ནི། །ངེས་པའི་དོན་གྱིས་ཐག་གཅད་དེ། །མཉམ་པའི་དོན་ལ་ཡིད་ཆེས་བྱ། །ཇི་ལྟར་མཁའ་ལ་ཚིག་ཙམ་དུ། །ངང་དུ་བརྗོད་པས་རྗོད་བྱེད་ཀྱི། །བརྗོད་པའི་ཐ་སྙད་དང་བྲལ་བས། །ཇི་ལྟར་འཁྲིགས་ཀྱི་སྨིག་རྒྱུ་དག །སྣང་བ་ཉིད་ན་མེད་པ་ལྟར། །ཆོས་སོ་ཅོག་གི་རང་བཞིན་གསལ། །གསལ་བ་ཉིད་ན་དེ་མི་དམིགས། །ཐབས་ཆེན་གཏིང་ཟབ་ཤེས་རབ་ལམ། །སྤྲོས་བྲལ་མཚན་མའི་འཕྲང་ལས་འདས། །གཏོས་ཆེས་ཡངས་པས་ལམ་གཉིས་བྲལ། །དབུས་མཐའ་མི་དམིགས་མཉམ་པའི་ལམ། །གཅིག་ཏུ་མཉམ་པར་ཆུད་ནས་ནི། །ཡུལ་མེད་ཚོལ་བའི་སེམས་བྲལ་དེ། །བླང་དོར་གཉིས་ཀྱི་མཐའ་སྤངས་ནས། །གནས་པ་མེད་པའི་ཚུལ་གྱིས་གནས། །ཆོས་ཉིད་དབྱིངས་སུ་རོ་གཅིག་ཕྱིར། །
ཤེས་དང་ཤེས་བྱ་གཉིས་མེད་དེ། །ཡེ་ནས་ཤེས་ཉིད་ཆོས་ཤེས་ན། །ཆོས་ཉིད་གཞན་ནས་བཙལ་ཅི་དགོས། །དཔེར་ན་སྒྱུ་མའི་བདེ་སྡུག་ཀྱང་། །བསལ་ནས་གཉི་ག་མི་དམིགས་ལྟར། །འཁོར་བ་འགྱུར་བའི་བདེ་སྡུག་ཀྱང་། །མཉམ་པར་རང་བཞིན་དོན་གྱིས་མཉམ། །ཇི་ལྟར་དུས་རྣམས་ཐམས་ཅད་དག །མཉམ་པ་ཉིད་དུ་རྟོགས་ནས་ནི། །སྒྲོས་ཚིག་རྗེས་སུ་མ་འབྲངས་ན། །མཉམ་འགྱུར་དུས་རྣམས་ག་ལ་དམིགས། །མཁའ་ལ་ངང་གིས་གཟུགས་མེད་ཕྱིར། །དམིགས་སུ་ཟིན་པར་མི་འགྱུར་བཞིན། །སེམས་ཀྱིས་མ་སྐྱེས་དོན་མི་དཔོགས། །སྐྱོན་དང་ཡོན་ཏན་གཉིས་འབྱེད་པ། །རྟོགས་ནས་གཉིས་ཀྱི་དོན་སྤངས་ཏེ། །རང་བཞིན་མཉམ་པར་དོན་བཞག་ན། །བསྒོམ་ཞེས་མིང་དུ་བརྗོད་པར་ཟད། །གཉིས་སུ་ལྟ་བ་མ་སྐྱེས་ཕྱིར། །གཉིས་ཀྱི་འདུ་ཤེས་ཅི་བྱུང་ཡང་། །རང་བྱུང་ཞི་བ་མ་བཀག་ཆོས། །ཡེ་ནས་མ་བཅོས་དོན་གྱིས་གསལ། །མ་སྐྱེས་རྣམ་དག་བྱང་ཆུབ་སེམས། །མི་གནས་ཡེ་ཤེས་ཐུགས་དང་མཉམ། །རིག་དང་མ་རིག་ཁྱད་པར་ལས། །འཁོར་འདས་རྟེན་དང་འབྲེལ་བར་སྣང་། །རྣམ་རྟོག་མེད་ཕྱིར་ཞི་བ་མེད། །འཛིན་པར་མ་ཡིན་སྤྲོས་བྲལ་མིན། །དྲང་བའི་དོན་བསྟན་མ་གཏོགས་པར། །དོན་ལ་ཚིག་གིས་བརྗོད་དུ་མེད། །སྣང་ཡང་མེད་པའི་རང་བཞིན་ལ། །ཤེས་བློ་ཡོད་པའི་སེམས་མི་འབྱུང་། །མཉམ་ཉིད་སྟོང་པའི་དོན་འདི་ལ། །དོན་ལྡན་སྟོང་པའི་སྒྲོ་མི་འདོགས། །མ་བཅོས་རང་བཞིན་ཞི་བ་ཡི། །མཚན་མའི་རྟོག་བྲལ་ཤེས་ལྡན་པས། །མེད་དོ་ཙམ་དུའང་མི་དམིགས་ན། །བྱུང་ཚོར་འཛིན་པར་ག་ལ་འགྱུར། །ཐམས་ཅད་མི་གནས་བྱང་ཆུབ་པས། །བཙལ་ནས་གྲུབ་པ་མ་ཡིན་ཡང་། །སྒྱུ་མ་སངས་ནས་འཁྲུལ་བྲལ་བཞིན། །སྤྲོས་བྲལ་ཡེ་ཤེས་སྙིང་པོར་གནས། །འཁོར་བར་རྟོགས་པ་དུག་ཡིན་ཏེ། །འཁོར་བའི་སྡུག་བསྔལ་མི་ཤེས་ན། །དུག་འཐུངས་བདེ་བ་ག་ལས་འོང་། །སྦྱར་ལེགས་དུག་
ཉིད་སྨན་དུ་འགྱུར། །འཁོར་བའི་ལས་རྣམས་དེ་ལྟར་སྣང་། །འཁྲུལ་སྣང་དུག་གཟེར་བཟོད་དཀའ་ལྟར། །མ་རིག་འཁོར་བའི་སྡུག་བསྔལ་སྣང་། །རྨི་ལམ་སྒྱུ་འཕྲུལ་མི་ཟད་པས། །ཤིན་ཏུ་ཉམ་ཐག་གདུངས་པའི་ཚེ། །འཆི་བདག་བདུད་ཀྱིས་ཟིན་འདྲ་ལ། །མགོན་བཙུན་གཞན་གྱིས་མི་ཕན་ཏེ། །བདུད་སེལ་རྩི་དང་འདྲ་བར་ནི། །ཡང་དག་ལམ་མཆོག་རྟོགས་པར་བྱ། །དུག་ནད་སྨྱོ་སངས་འབྱང་བ་ལ། །སྐད་ཅིག་མ་ལ་མི་བཟོད་ཅིང་། །སྨན་དང་སྨན་པའི་རྩོལ་བསྒྲུབས་པ། །སངས་ནས་དེ་དག་མི་དམིགས་ལྟར། །འཁོར་བ་མི་དམིགས་འཁྲུལ་པ་ལ། །རྨི་ལམ་ནད་སེལ་རྩོལ་སྒྲུབ་ལྟར། །སྒྲུབ་དང་ཏིང་འཛིན་རྩོལ་བྱེད་ཀྱང་། །འཁོར་བ་སྟོང་རྟོགས་ཉིད་བྱང་ཆུབ། །སྒྱུ་མ་རྒྱུ་འབྲས་མི་སླུ་བཞིན། །བླུན་རྨོངས་ངོ་ལ་དེ་ལྟར་སྣང་། །མཉམ་ཉིད་རིག་པའི་རྩལ་ཅན་དག །འཁོར་བ་འཁྲུལ་པའི་ཚིག་ཙམ་དུ། །མ་ནོར་ལམ་རིག་བློ་ལ་གསལ། །དེ་ལ་རྩོལ་ཐོབ་རློམ་སེམས་མེད། །སེམས་ཉིད་དོན་དང་མ་མཉམ་ན། །ཚིག་གིས་མཉམ་པས་དོན་མི་དཔོགས། །འཁྲུལ་འཁོར་མཉམ་ལས་མ་གཡོས་ཀྱང་། །ལོག་རྟོགས་སྒྱུ་མའི་ཚུལ་ཙམ་སྣང་། །སེམས་ཉིད་ཡེ་སངས་རྒྱས་རིག་ནས། །རིག་པའི་དོན་ལ་བརྩོན་སྦྱོར་ཞིང་། །རང་འབྱུང་ཡོན་ཏན་རྩལ་སྡུད་པ། །འཁྲུལ་པར་འབྲེལ་བ་ག་ལ་ཡིན། །བྱང་ཆུབ་སེམས་ལྡན་བསམ་རྫོགས་ན། །ཡེ་ཤེས་མཆོག་ལྡན་མཉམ་ཉིད་སྐུ། །ཏིང་འཛིན་མཆོག་ལྡན་བླ་མའི་དབང་། །དགེ་བསགས་མཆོག་ལྡན་ལུས་སྤྱོད་པའི། །བསོད་ནམས་མཆོག་ལྡན་གཟུགས་ཀྱི་སྐུ། །རྣམ་སྨིན་ཚུལ་གྱིས་འགྲུབ་མི་ལྟ། །བཙལ་ནས་ཐོབ་པར་མི་བྱེད་དེ། །རྒྱུ་ཡི་དུས་ཉིད་འབྲས་བུའི་མཆོག །དཔྱོད་པའི་སེམས་ཉིད་ཏིང་འཛིན་ནི། །སེམས་ཅན་དུས་ན་དོན་ལ་སྤྱོད། །ལྷུན་གྲུབ་ས་ལ་བགྲོད་མི་བྱེད། །འཁོར་བའི་ས་ཤེས་བདེ་ལྡན་གནས། །མི་གནས་འཁོར་བའི་སྡུག་བསྔལ་ཡང་། །བྱང་ཆུབ་འཁོར་བའི་ལམ་དང་འབྲེལ། །སྒྱུ་མའི་མཚན་ཉིད་མ་བཀག་ཚུལ། །རང་བྱུང་རྟོག་བྲལ་གཅིག་
ཏུ་མཉམ། །མཉམ་པ་ཉིད་ཀྱི་དོན་བཙན་པར། །ཆོས་ཉིད་ལ་ཡང་ཆོས་ཉིད་གསལ། །མཉམ་པས་མཉམ་ཞེས་ཚིག་བརྗོད་ཀྱང་། །མཉམ་པའི་དོན་དང་མཐུན་མི་འགྱུར། །བྱང་ཆུབ་དེ་ཡང་མི་དམིགས་ཏེ། །མི་གནས་ཞེས་ནི་གང་བརྗོད་ཅིང་། །གནས་དང་དམིགས་པའི་གནས་འཛིན་པ། །གཟུང་འཛིན་ཞེས་ནི་དེ་ལ་བྱ། །སྒྱུ་འདྲར་བྱང་ཆུབ་སེམས་མེད་ན། །དངོས་བྲལ་ཡུལ་མེད་སྟོང་པ་དག །མཁའ་ལ་རང་བཞིན་མི་གནས་ཞེས། །བསྟན་པ་དེ་ནི་ཡོད་མ་ཡིན། །བསམ་གཏན་ལུས་ནི་གཙོར་བྱེད་དང་། །གནས་དེ་ལུས་ཀྱི་ཕྱག་རྒྱ་ཀུན། །མཚན་མར་མངོན་པར་ཞེན་ལས་བྱུང་། །མཚན་མེད་སེམས་ལ་བྱ་བཙལ་མེད། །སྨིག་རྒྱུ་བཞིན་དུ་ལུས་རེད་ན། །གནས་དང་ཕྱག་རྒྱར་དམིགས་པ་མེད། །བྱེད་སྤྱོད་ཆེད་དུ་སྟོན་བྱེད་ཅིང་། །བྱ་མེད་བྱ་བའི་དམིགས་པའང་མེད། །དེ་ཉིད་མ་སྐྱེས་གཞི་མེད་པས། །གནས་བདེར་ལུས་བཅོས་ཁ་ན་མེད། །ཞེན་པར་འཆོས་ལམ་སྤྱོད་བྱེད་པ། །དེ་ཉིད་གཟུང་འཛིན་རྣམ་རྟོག་སྟེ། །བསམ་གཏན་ལུས་དབེན་དབེན་མ་ཡིན། །མཁའ་ལ་སེམས་དབེན་དབེན་པའི་མཆོག །སེམས་ཉིད་དབེན་པའི་གནས་ཡིན་ཏེ། །འདི་ནི་རྣལ་འབྱོར་སྤྱོད་མཆོག་གནས། །བླ་གབ་རི་ཕུག་གཞལ་མེད་མིན། །སེམས་ཉིད་དཔག་ཡས་གཞལ་མེད་མཆོག །འདི་ནི་རྨད་བྱུང་ནོར་བུའི་གཞལ། །ཕྱི་དང་ནང་མེད་ཀུན་དུ་ནང་། །འདུ་བར་འདུས་པ་ཚོགས་མ་ཡིན། །སེམས་ལ་ཡེ་ཤེས་ཚོགས་འདུས་མཆོག །ཆོས་ཀུན་འདུས་པས་ལུས་པ་མེད། །དཔག་མེད་རྒྱལ་བ་མཉེས་པའི་ཚོགས། །ཀུན་རྫོབ་འབྱོར་པ་ཡོ་བྱད་མིན། །སེམས་ཉིད་འབྱོར་པ་རྫས་དང་ལྡན། །ལྷག་པའི་རྫས་མཆོག་འདི་ཤེས་ན། །བསྒྲུབ་འགྲུབ་འདི་ལ་ཐེ་ཚོམ་མེད། །སྒོམ་པར་བྱེད་པ་སྒོམ་པ་མིན། །བསམ་བྱ་དམིགས་སུ་མེད་པ་སྟེ། །འདི་ལྟར་སེམས་ཀྱི་གསང་སྒོམ་པ། །དོན་ལ་སེམས་སྒོམ་ཏིང་འཛིན་མཆོག །བསྲུང་ཞེས་བསྲུང་བར་བྱ་མི་དམིགས། །སྟོང་པར་སྦས་པའི་སེམས་ཉིད་དེ། །མཚན་
མར་འདས་ནས་ཚིག་ཤེས་ན། །བསྲུང་བའི་གསང་བ་དམ་པའོ། །ཚིག་ཏུ་མཉམ་བརྗོད་མཉམ་མི་དམིགས། །སེམས་ཉིད་རང་དག་མཉམ་པ་ལས། །མཉམ་པའི་དོན་ཉིད་ལྷག་པར་མེད། །འདི་དོན་མཉམ་ཤེས་མཉམ་པའི་དོན། །བརྟུལ་ཞུགས་སྤྱོད་པ་སྤྱོད་མིན་ཏེ། །སེམས་ལ་སེམས་གཞོལ་རོལ་སྤྱོད་པ། །ཐབས་ཆེ་ཡངས་པ་སྤྱོད་པའི་མཆོག །བྱང་ཆུབ་དོན་གྱི་ཕྱི་མོ་རུ། །སེམས་ཀྱི་ཕྱི་མོར་ཡེ་གནས་པས། །གསོལ་ཐོབ་མཚན་མའི་མིང་མི་དམིགས། །དངོས་གྲུབ་ཆེན་པོ་རྒྱུན་མི་འཆད། །དེ་ལྟར་སེམས་ཀྱིས་སེམས་མཐོང་ན། །ཡེ་ཤེས་ཀྱིས་ནི་ཆོས་ཉིད་མཐོང་། །དུས་ཀུན་དུ་ནི་སྐྱེ་འགག་མེད། །སྔོན་མ་མཐོང་བའི་དོན་མཐོང་འགྱུར། །དེ་ཡང་དངོས་པོ་ཅང་མི་མཐོང་། །ཐམས་ཅད་རང་བཞིན་མེད་པ་ཞིག །བློ་ལ་འགྱུས་པ་ཁོ་ནར་ཟད། །དེ་ལྟ་བུ་ཡི་དོན་མཐོང་ན། །མཚན་མར་མཐོང་བ་ཅི་ཡང་མེད། །སྒྱུ་མ་ཙམ་དུ་ཚུལ་ཤེས་ནས། །ནམ་མཁའ་མཉམ་པའི་དོན་སྣང་འགྱུར། །ཁ་ཅིག་དག་ནི་དེ་དོན་ལ། །མཐོང་བ་ཅི་ཡང་མེད་འགྱུར་ན། །སྣང་བ་ཞེས་ནི་ཅི་ཕྱིར་གདགས། །མེད་པའི་དོན་དང་འགལ་འགྱུར་ཞེས། །ཐེ་ཚོམ་ཟ་འགྱུར་དེ་དག་ལ། །མཐོང་བ་མེད་པའི་དོན་དེ་ཉིད། །ཡིད་ཀྱི་ངོ་ལ་སྣང་འགྱུར་ན། །སྣང་ཞེས་དེ་ཕྱིར་བརྗོད་པར་བྱ། །དེ་བས་འཁྲུལ་པ་མ་ཟད་པར། །ནམ་མཁའ་མཐོང་བ་མེད་པ་དེ། །དེ་ཉིད་ཡིད་ལ་སྣང་འགྱུར་ཡང་། །གཟུགས་ལ་སྣང་བར་འགྱུར་བ་མིན། །སེམས་ཉིད་བདེན་པར་མ་མཐོང་ན། །ཡིད་ལ་མཚན་མེད་དོན་གསལ་དང་། །མཚན་མ་འཁྲུལ་པར་རྒྱུ་བ་གཉིས། །འདྲེན་མར་རྒྱུ་བྱེད་འབྲལ་འགྱུར་མིན། །དེ་ཉིད་བདེན་པར་མཐོང་འགྱུར་ན། །དེ་ནས་དེ་མ་ཐག་ཏུ་ཡང་། །ཡིད་ཀྱི་རྒྱུ་བ་རྒྱུན་ཆད་ནས། །སྔར་འཁྲུལ་མཚན་མའི་ཆོས་བྲལ་ཏེ། །དེས་ནི་བདེན་པ་མཐོང་བ་ཡིན། །དེ་བས་འདུས་པ་ཆེན་པོའི་ཚོགས། །སེམས་ནི་ཡང་དག་ལམ་ཉིད་དེ། །མཁའ་ལ་བྱ་ལམ་རྗེས་མེད་བཞིན། །གོལ་མེད་ལམ་ཞེས་འདྲེན་པས་བཤད། །དེ་ལྟར་བཤད་པའི་ལམ་དེ་ཡང་། །
ཀུན་གྱིས་རྟོགས་པར་བྱ་བའི་ཕྱིར། །ཚིག་ཏུ་མཚོན་ཏེ་བཤད་མོད་ཀྱང་། །དམིགས་མེད་ཚིག་གི་ཡུལ་བྲལ་བ། །དེ་ཡི་རང་བཞིན་དེ་ཡིན་ན། །རང་བཞིན་གཞི་ལས་མཚན་མར་གཡོས། །དེ་ལ་མིང་མེད་མིང་བཏགས་རྒྱུས། །ཡིན་དང་མ་ཡིན་ཐེ་ཚོམ་སྐྱེས། །དེ་ལས་རྩོད་པའི་གཞིར་གྱུར་ཏེ། །དེ་བསལ་དོན་ཕྱིར་མཚན་མ་ཡི། །ཚིག་གི་ཚོགས་ཀྱི་རྣམ་གྲངས་ལས། །སྒོ་མོ་དཔག་ཏུ་མེད་པར་བཤད། །དེ་ཡིས་ངེས་དོན་རྗེས་བཅད་པ། །ཐུགས་ཀྱི་ཀློང་ནས་བཏོན་པ་ཡི། །ཚིག་གི་སྒྲོན་མས་དོན་བཙལ་བ། །ལམ་ཉིད་ཇི་ལྟར་ཡིན་ཞེ་ན། །དྲན་བྱུང་རྗེས་སུ་འབྲེངས་ན་ནི། །འཁོར་བའི་གནས་སུ་འཁོར་བར་འགྱུར། །དྲན་འབྱུང་གཡོ་བ་ཅི་བཀག་པ། །དེ་དག་འགོག་པ་ཉིད་དུ་འགྱུར། །དྲན་བྱུང་མེད་པར་བླུན་པ་ནི། །མུ་སྟེགས་ཅན་ལམ་མུན་པར་འགྱུར། །འདི་ཞེས་སེམས་སུ་གཅིག་བཟུང་ན། །མཚན་མ་རྟོག་པའི་རི་བོ་ཡིན། །སྔ་ཕྱི་མེད་ཅེས་ཕྱང་བཅད་ན། །མེད་དེ་ཆད་པའི་མུ་ཅན་ཡིན། །གཞི་ཡི་དོན་ལས་ཡུད་ཙམ་ཞིག །ཅིར་གཡོས་སྐྱེ་འགག་བྱུང་བ་དེ། །རྣམ་གྲངས་ལམ་དེ་འཕེལ་འགྱུར་གྱི། །ལམ་གྱི་ཆོས་ཉིད་ག་ལ་འགྱུར། །དཔེར་ན་འགྲོ་གང་བྱིས་པ་དག །གྲིབ་མ་སྤངས་ནས་རྣམ་དག་ཚོལ། །རང་ལས་བྱུང་བའི་རང་བཞིན་གྱིས། །བཙལ་ན་གྲིབ་མེད་དག་མི་རྙེད། །དོན་ཉིད་ཡེ་ནས་གནས་བཞིན་དུ། །སེམས་ཉིད་སྡུག་བསྔལ་སྣ་ཚོགས་ཀྱིས། །ཤ་ཐང་བར་ནི་དོན་ཚོལ་བ། །དོན་མེད་བདུད་ཀྱི་ལས་ཡིན་ནོ། །དོན་ལ་ཚིག་ཏུ་བརྗོད་པ་ནི། །ནམ་མཁའ་དག་ལ་རྩོད་པ་འདྲ། །ཚིག་ཏུ་སྨན་དང་དཔྱད་བཤད་ཀྱང་། །ནད་པའི་ཚོགས་ལ་མི་ཕན་ནོ། །སེམས་ཉིད་དོན་དུ་མ་ཤེས་ན། །ཚིག་ཏུ་དོན་བརྗོད་དོན་མི་རྟོགས། །འཁོར་བ་སྤངས་ནས་འདས་ཚོལ་བ། །གཟུགས་བཏང་ནས་ནི་གྲིབ་ཚོལ་འདྲ། །ལམ་ཉིད་ཇི་ལྟར་ཡིན་ཞེ་ན། །མ་རིག་ཡེ་ཤེས་ཐ་དད་མིན། །མ་རྟོགས་རྟོགས་པ་ལམ་དུ་གཅིག །སེམས་འདི་སྣ་ཚོགས་པར་སྣང་བས། །སྣ་ཚོགས་སེམས་སུ་གཅིག་པ་ཡིན། །
དཔེར་ན་གསེར་དུ་གཅིག་པ་ལས། །དབྱིབས་དང་གཟུགས་ནི་ཐ་དད་པར། །བྱིས་པས་སོ་སོའི་མིང་དུ་གྲགས། །གྲགས་ཀྱང་གསེར་གྱི་ངོ་བོར་གཅིག །དེ་བཞིན་སེམས་ཀྱི་རང་བཞིན་ལ། །འཁྲུལ་དང་མ་འཁྲུལ་ཁྱད་པར་གྱིས། །ཇི་ལྟར་བལྟས་དགུ་དེར་སྣང་ཡང་། །སྣང་ཡང་སེམས་ལས་གཞན་མི་དམིགས། །སྒྲོན་མར་འབར་བའི་རིན་ཆེན་ནི། །གལ་ཏེ་ངན་ཁུང་སྦས་གྱུར་ཀྱང་། །དེ་ཉིད་ཡོན་ཏན་རང་སྣང་བས། །འོད་ནི་མཁའ་ལ་གསལ་བར་འགྱུར། །དེ་བཞིན་སེམས་ཉིད་རིན་ཆེན་སྒྲོན། །ལུས་ངག་འཁོར་བར་བྱིང་གྱུར་ཀྱང་། །རང་བྱུང་རང་ཞི་རབ་སྣང་བས། །ཤེས་རབ་ཆོས་ཉིད་མཁའ་ལ་གསལ། །སེམས་ཉིད་ནམ་མཁའ་འདྲར་མཚུངས་ཏེ། །ཀུན་ཁྱབ་སྟོང་གསལ་སྣ་ཚོགས་འབྱུང་། །བྱུང་ཚོར་གཡོ་འགོག་ཐམས་ཅད་ཀྱང་། །རང་བཞིན་གྱིས་འབྱུང་ངང་གིས་ཞི། །མདོར་ན་ཇི་ལྟར་བརྟགས་བསམས་བཞིན། །འགྱུར་བས་ཐམས་ཅད་ངོ་བོར་སྣང་། །མ་བཅོས་གཡོ་བ་མེད་ཉིད་ལ། །སྣ་ཚོགས་རྒྱུ་འབྱུང་མི་སྐྱོན་ཞིང་། །ཆོ་འཕྲུལ་མི་འགག་ཉམ་ང་མེད། །ཅི་བཞིན་ནམ་མཁའི་རང་བཞིན་ལ། །བློ་བཞག་མ་གཡེངས་ཁོ་ནར་ཟད། །དེ་ནི་སྐྱེས་མཆོག་དོན་པོ་ཆེ། །དེ་སེམས་དུས་གསུམ་ཐམས་ཅད་ཀྱི། །སངས་རྒྱས་འབྱུང་བའི་ངོ་བོ་ཡིན། །དེ་ལྟའི་དོན་ལ་རིང་ཞིག་ནས། །ཤེས་ཤིང་འདྲིས་པར་གྱུར་པ་ན། །ངེས་དོན་མཐོང་བའི་ཉམས་དྲོད་ནི། །དོན་དང་མཇལ་བའི་རྟགས་ཆེན་ཡང་། །མན་ངག་ལུང་གིས་བརྒྱད་འཆར་ཏེ། །ངེས་པར་དོན་གསུམ་མྱོང་བར་འགྱུར། །དེ་དག་ཐོག་ཏུ་ཕེབས་པ་ཡི། །དྲོད་ཆེན་རྟགས་སུ་བསྟན་པ་ཡིན། །དེ་ཡི་ཞར་ལས་བྱུང་བའི་དྲོད། །འཁོར་བའི་ཆོས་ལ་སྙིང་རྗེ་ཡི། །བྱང་ཆུབ་སེམས་ཀྱང་སྐྱེ་བར་འགྱུར། །མཚན་མ་རྟོག་པའི་ཆོས་རྣམས་ལ། །ཡིད་མི་ཆེས་པའི་འདུ་ཤེས་སྐྱེ། །ཆོས་རྣམས་འདི་ལྟར་ཡིན་པ་ལས། །འདི་ལྟར་འཁྲུལ་པ་ངོ་མཚར་ཆེ། །ཡ་མཚན་དཔྱོད་པའི་འདུ་ཤེས་འབྱུང་། །འདི་དོན་མ་ཤེས་འགྲོ་བ་རྣམས། །
རྩོལ་སྒྲུབ་དཀའ་བའི་ཐབས་ཆེན་གྱིས། །ཡང་དག་དོན་ཚོལ་ལམ་རེ་རིང་། །བསགས་པའི་འབྲས་བུ་ཡོད་འགྱུར་ཡང་། །དོན་དེ་མཐོང་བར་ཡོང་མི་ནུས། །དེ་འདྲའི་འདུ་ཤེས་འབྱུང་བར་འགྱུར། །དེ་ལྟར་ཤེས་པའི་ཉམས་དྲོད་ནི། །སྐལ་དང་ལྡན་པའི་སྐྱེས་བུ་གང་། །རྒྱུད་འགྲོས་ཚིག་གིས་མ་བཀྲོལ་བར། །སེམས་ལས་ཆོས་བྱུང་འབུམ་ཕྲག་ཡས། །སྨྲ་བའི་སྒོ་མོར་ཐམས་ཅད་གསལ། །དོན་ལ་ངེས་པའི་གཏན་ཚིགས་དག །ཚིག་ཏུ་མཚོན་ཏེ་འབྱིན་པར་ནུས། །དེ་ནི་ཆོས་སྐུ་མཉམ་ཉིད་དང་། །དབྱེར་མེད་གཉིས་སུ་མེད་པ་ཡིན། །རྟེན་པའི་གསུང་ཐུགས་སྐུ་བརྙན་དང་། །དེ་ནི་མཚུངས་པ་ཡོད་མིན་ནོ། །ཞི་ལུས་མཐར་འགོག་སྐྱོན་གཉིས་དང་། །དེ་ནི་མཚུངས་པ་ཡོད་མ་ཡིན། །ས་ལ་སློབ་པའི་སེམས་དཔའ་དང་། །དེ་ཡང་མི་མཚུངས་རྒྱལ་བས་གསུངས། །རིག་འཛིན་དྲང་སྲོང་དོན་དཔྱོད་དང་། །ལུས་འདྲ་སེམས་ནི་ཡོང་མི་མཚུངས། །དེ་ཕྱིར་རྣམ་དག་ལམ་ཆེན་ནི། །སེམས་ཀྱི་གསང་འདི་ཡིན་པས་ན། །སྐལ་ལྡན་འདུས་པ་ཆེན་པོའི་ཚོགས། །ལམ་འདི་ཤེས་པར་བྱ་བ་ལས། །བཙལ་བར་བྱ་བའི་རྒྱུ་མེད་དེ། །ལམ་འདི་ཤེས་པ་དེ་ཉིད་ཀྱིས། །དཀའ་བའི་རྩོལ་སྒྲུབ་མ་བྱས་པར། །ཐམས་ཅད་ཐམས་ཅད་གྲུབ་པར་འགྱུར། །འདུས་པ་ཆེན་པོའི་ཚོགས་དེ་བས་ན་སེམས་འདི་ནི་ལམ་ཞེས་བྱའོ། །འཁོར་བ་ཞེས་བྱའོ། །སེམས་ཅན་ཞེས་བྱའོ། །གྲུ་ཞེས་བྱའོ། །བགྲོད་པ་ཞེས་བྱའོ། །བྱང་ཆུབ་ཅེས་བྱའོ། །སེམས་ཞེས་བྱའོ། །ཤེས་རབ་ཅེས་བྱའོ། །ཏིང་ངེ་འཛིན་ཅེས་བྱའོ། །གནས་ཞེས་བྱའོ། །རབ་ཅེས་བྱའོ། །མཆོག་ཅེས་བྱའོ། །ཕུལ་ཞེས་བྱའོ། །བླ་ན་མེད་པ་ཞེས་བྱའོ། །ཟབ་པ་ཞེས་བྱའོ། །གསང་བ་ཞེས་བྱའོ། །གཏིང་དཔག་དཀའ་བ་ཞེས་བྱའོ། །ཆོས་ཞེས་བྱའོ། །བྱང་ཆུབ་སེམས་དཔའ་ཞེས་བྱའོ། །སངས་རྒྱས་ཞེས་བྱའོ། །དེ་ཅིའི་ཕྱིར་ཞེ་ན། འཇུག་པའི་ཕྱིར་ནི་ལམ་མོ། །འཁྲུལ་པའི་ཕྱིར་ནི་འཁོར་བའོ། །མ་ཤེས་པའི་ཕྱིར་ནི་སེམས་ཅན་ནོ། །སྒྲོལ་བའི་
ཕྱིར་ནི་གྲུའོ། །བསྐྱོད་པའི་ཕྱིར་ནི་བགྲོད་པའོ། །བདེ་བའི་ཕྱིར་ནི་བྱང་ཆུབ་བོ། །དྲན་པ་ངེས་པའི་ཕྱིར་ནི་སེམས་སོ། །མཁས་པའི་ཕྱིར་ནི་ཤེས་རབ་བོ། །གསལ་བའི་ཕྱིར་ནི་ཏིང་ངེ་འཛིན་ཏོ། །ཕྱིན་པའི་ཕྱིར་ནི་གནས་སོ། །ཟླ་མེད་པའི་ཕྱིར་ནི་རབ་བོ། །ངོ་མཚར་བའི་ཕྱིར་ནི་མཆོག་གོ། །འཕགས་པའི་ཕྱིར་ནི་ཕུལ་ལོ། །དབང་བྱེད་པ་མེད་པའི་ཕྱིར་ནི་བླ་ན་མེད་པའོ། །གཏིང་རིང་བའི་ཕྱིར་ནི་ཟབ་པའོ། །གབ་པའི་ཕྱིར་ནི་གསང་བའོ། །ཕྲ་བའི་ཕྱིར་ནི་གཏིང་དཔག་དཀའ་བའོ། །ཀུན་འབྱུང་བའི་ཕྱིར་ནི་ཆོས་སོ། །ས་ནོན་པའི་ཕྱིར་ནི་བྱང་ཆུབ་སེམས་དཔའོ། །མཐར་ཕྱིན་པའི་ཕྱིར་ནི་སངས་རྒྱས་ཏེ། །སེམས་དཔའ་ཆེན་པོ་དེའི་ཕྱིར་ན་རྣལ་འབྱོར་གྱི་ལམ་འདི་ཤེས་པར་བྱ་སྟེ། །ལམ་འདི་ནི་ཆོས་ཐམས་ཅད་ཀྱི་གཞིའོ། །སངས་རྒྱས་ཐམས་ཅད་ཀྱི་ཡུམ་མོ། །དེ་ཅིའི་ཕྱིར་ཞེ་ན། ཆོས་ཐམས་ཅད་འདི་ལས་འབྱུང་བའི་ཕྱིར་ན་གཞིའོ། །མཐར་ཕྱིན་པའི་སངས་རྒྱས་ཀྱི་ལམ་འདི་ནས་གཤེགས་པར་གྱུར་ཏོ། །ད་ལྟར་སྟོང་པ་ཉིད་ཀྱང་ལམ་འདི་ནས་གཤེགས་པ་སྟེ། །དེའི་ཕྱིར་ལམ་འདི་ཤེས་པར་བྱའོ། །དེ་ལྟར་ན་དེའི་ཕྱིར་ལམ་འདི་ནི་དེ་བཞིན་གཤེགས་པ་ཐམས་ཅད་ཀྱི་ཡབ་ཅེས་ཀྱང་བྱའོ། །དེ་བཞིན་དུ་ཡུམ་ཞེས་ཀྱང་བྱ་བ་དང་། སྲས་ཞེས་བྱ་བ་དང་། བདག་པོ་ཞེས་བྱ་བ་དང་། གདུང་ཞེས་བྱ་བ་དང་། སྲོག་ཅེས་བྱ་བ་དང་། ནོར་ཞེས་བྱ་བ་དང་། བྲན་ཞེས་བྱ་བ་དང་། སྐུ་ཞེས་བྱ་བ་དང་། གསུང་ཞེས་བྱ་བ་དང་། ཐུགས་ཞེས་བྱ་བ་དང་། ཡོན་ཏན་ཞེས་བྱ་བ་དང་། ཕྲིན་ལས་ཆེན་པོ་ཞེས་བྱ་བའོ། །དེ་ཅིའི་ཕྱིར་ཞེ་ན། ཐབས་ཆེན་པོ་དང་། ཤེས་རབ་ཆེན་པོ་དང་། བྱང་ཆུབ་ཆེན་པོ་དང་། དབང་ཆེན་པོ་དང་། དེ་བཞིན་ཉིད་དང་། འདའ་བར་དཀའ་བ་དང་། ཆོས་ཉིད་ལ་ཟད་མི་ཤེས་པ་དང་། སྙིང་རྗེ་ཆེན་པོ་དང་། རྣམ་པར་བརྗིད་པ་དང་། སྣ་ཚོགས་སུ་སྟོན་པ་དང་། ཐམས་ཅད་དུ་མཁྱེན་པ་དང་། ཅིར་ཡང་འབྱུང་བ་དང་། མཛད་པ་སྣ་ཚོགས་པའི་ཕྱིར་དེ་དག་ནི་དེ་ལྟར་ཡིན་པར་ཤེས་པར་བྱའོ། །དེའི་
ཕྱིར་ཡང་ལམ་འདི་ཡོངས་སུ་ཤེས་པར་བྱའོ། །དེ་བཞིན་དུ་འདོད་པ་ཆེན་པོ་ཞེས་ཀྱང་བྱའོ། །འཚོ་བ་ཆེན་པོ་ཞེས་བྱ་བ་དང་། ལོངས་སྤྱོད་ཆེན་པོ་ཞེས་བྱ་བ་དང་། ཡོ་བྱད་ཆེན་པོ་ཞེས་བྱ་བ་དང་། རྒྱུ་ཞེས་བྱ་བ་དང་། རྐྱེན་ཞེས་བྱ་བ་དང་། འབྲས་བུ་ཞེས་བྱ་བ་དང་། སྤྱོད་པ་ཞེས་བྱ་བ་དང་། ཆོ་འཕྲུལ་ཞེས་བྱ་བ་དང་། ཕྱག་རྒྱ་ཞེས་བྱ་བ་དང་། བསྙེན་པ་ཞེས་བྱ་བ་དང་། ཉེ་བའི་བསྙེན་པ་ཞེས་བྱ་བ་དང་། སྒྲུབ་པ་ཞེས་བྱ་བ་དང་། སྒྲུབ་པ་ཆེན་པོ་ཞེས་བྱ་བ་དང་། ཚོགས་ཆེན་པོ་ཞེས་བྱ་བ་དང་། ཀུན་དུ་རྫོགས་པ་ཞེས་བྱའོ། །དེ་ཅིའི་ཕྱིར་ཞེ་ན། ཡུལ་ལ་འདོད་པ་སྣ་ཚོགས་པ་དང་། དམིགས་པས་འཚོ་བ་དང་། འཇོལ་ཉོག་ཏུ་སྤྱོད་པ་དང་། དགོས་པ་སྒྲུབ་པ་དང་། འབྲས་བུར་བྱེད་པ་དང་། ཀུན་དུ་ལོག་པ་དང་། དོན་གྲུབ་པ་དང་། སྨིན་པར་བསགས་པ་དང་། རང་བཞིན་དུ་གྱུར་པ་དང་། བྱ་བ་བྱེད་པ་དང་། སྣ་ཚོགས་སུ་འབྱུང་བ་དང་། མཚན་མར་བསྟན་པ་དང་། རྣམ་པར་འདུད་པ་དང་། ཤིན་ཏུ་མཛད་པ་དང་། འདོད་པ་བྱེད་པ་དང་། ལྷག་པར་འདོད་པ་དང་། ཀུན་དུ་འབྱོར་པ་དང་། ལྷུན་གྱིས་གྲུབ་པའི་ཕྱིར་ཡོངས་སུ་ཤེས་པར་བྱའོ། །གཞན་ཡང་འདུས་པ་ཆེན་པོའི་ཚོགས་འདི་ལ་ནི་ཐམས་ཅད་ཡོད་དེ། ཆོས་ཐམས་ཅད་ནི་རྣལ་འབྱོར་རྣམ་པ་གསུམ་དུ་འདུས་པར་ཤེས་པར་བྱའོ། །གསུམ་གང་ཞེ་ན། རྒྱུའི་རྣལ་འབྱོར་དང་། རྐྱེན་གྱི་རྣལ་འབྱོར་དང་། འབྲས་བུའི་རྣལ་འབྱོར་རྣམ་པ་གསུམ་ཡང་འདི་ཉིད་ཡིན་ཞིང་འདི་ལས་འབྱུང་བར་ཤེས་པར་བྱ་སྟེ། དེ་ཡང་ཇི་ལྟར་ཞེ་ན། རྒྱུ་ནི་འཁྲུལ་པ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །དེ་བཞིན་དུ་མཚན་མ་གཉིས་དང་། རྟོག་པ་གསུམ་དང་། ལོག་པ་བཞི་དང་། ཉོན་མོངས་པ་ལྔ་དང་། ཕུང་པོ་ལྔ་དང་། དབང་པོ་ལྔ་དང་། རྒྱུ་དྲུག་དང་། རྐྱེན་བཅུ་གཉིས་དང་། སྐྱེ་བ་བཅུ་གཉིས་དང་། རང་བཞིན་བཅྭ་བརྒྱད་དང་། སྤྱོད་པ་བཅུ་གཅིག་དང་། སྨིན་པ་བཞི་དང་། ལམ་ལྔ་དང་། གནས་དྲུག་དང་། མུ་གསུམ་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །
དེ་ཅིའི་ཕྱིར་ཞེ་ན། འདོད་པའི་འབྲས་བུའི་གཞིར་གྱུར་པའི་ཕྱིར་ཏེ། ལམ་དེ་ཉིད་མ་རིག་པའི་ཕྱིར་འཁྲུལ་པ་ཞེས་བྱའོ། །ཡུལ་དང་གཉིས་སུ་གྱུར་པའི་ཕྱིར་ན་མཚན་མ་ཞེས་བྱའོ། །དུས་གསུམ་དངོས་པོར་རྟོག་པའི་ཕྱིར་རྟོག་པ་ཞེས་བྱའོ། །ངེས་པ་ལས་ལོག་པའི་ཕྱིར་དོན་ལས་གོལ་བ་དང་། མཉམ་པ་ལས་གོལ་བ་དང་ཕྱོགས་ལས་གོལ་བ་དང་གཞི་ལས་གོལ་བའི་ཕྱིར་ལོག་པ་ཞེས་བྱའོ། །རྒྱུ་འབྲས་ཀུན་ནས་ཉོན་མོངས་པའི་ཕྱིར་མུན་པས་འཐིབས་པ་དང་། སྲེད་པས་གདུངས་པ་དང་། སྡོང་པོས་ནོན་པ་དང་། མི་ཕྱེད་པས་འཐས་པ་དང་། ཀུན་ནས་འཁྲུགས་པའི་ཕྱིར་ཉོན་མོངས་པ་ཞེས་བྱའོ། །ཀུན་ནས་འདུས་པའི་ཕྱིར་རྒྱུ་འདུས་པ་དང་། རྐྱེན་དུ་ཚོར་བ་དང་། མཚན་མར་ཤེས་པ་དང་། ཐམས་ཅད་ནས་བྱེད་པ་དང་། རྣམ་པར་རིག་པའི་ཕྱིར་ཕུང་པོ་ཞེས་བྱའོ། །སྒོར་གསལ་ཞིང་ཡུལ་ལ་དབང་བྱེད་པའི་ཕྱིར་མཐོང་བར་དབང་བ་དང་། ཐོས་པར་དབང་བ་དང་། ཚོར་བར་དབང་བ་དང་། མྱོང་བར་དབང་བ་དང་། རེག་པར་དབང་བའི་ཕྱིར་དབང་པོ་ཞེས་བྱའོ། །འབྲས་བུར་བྱེད་པའི་ཕྱིར་འཛིན་པར་དབང་བ་དང་། མཉེན་པར་བྱེད་པ་དང་། ཆགས་པར་བྱེད་པ་དང་། གཡོ་བར་འབུད་པ་དང་། སྐྱེད་པར་གསལ་བ་དང་། དུས་སུ་རེད་པའི་ཕྱིར་རྒྱུ་ཞེས་བྱའོ། །རྐྱེན་དུ་འབྲེལ་པའི་ཕྱིར་ས་བོན་དང་། རྩ་བ་དང་། མྱུ་གུ་དང་། ལྡུམ་བུ་དང་། ཡལ་ག་དང་། སྡོང་པོ་དང་། འདབ་མ་དང་། མེ་ཏོག་དང་། འབྲས་བུ་དང་། སྙིང་པོ་དང་། སྐམས་པའི་ཕྱིར་རྐྱེན་ཞེས་བྱའོ། །མཚན་མ་སྐྱེ་བའི་ཕྱིར་མཐོང་བ་སྐྱེ་བ་དང་། སྣང་བ་དང་། ཐོས་པ་དང་། སྒྲ་བརྙན་དང་། ཚོར་བ་དང་། དྲི་དང་། མྱང་བ་དང་། རོ་དང་། རེག་པ་དང་། ཤེས་པ་དང་། ཆོས་སྐྱེ་བའི་ཕྱིར་སྐྱེ་བ་ཞེས་བྱའོ། །མཚན་མའི་ཆོས་ཉིད་ཅན་གྱི་ཕྱིར། །མཐོང་བའི་ཆོས་ཉིད་དང་། སྣང་བའི་ཆོས་དང་། ལྷང་ངེ་བའི་ཆོས་དང་། ཐོས་པའི་ཆོས་དང་། གྲགས་པའི་ཆོས་དང་། གསལ་བའི་ཆོས་དང་། ཚོར་བའི་ཆོས་དང་། དྲིའི་ཆོས་དང་། ཚིམ་པའི་ཆོས་དང་། མྱང་བའི་ཆོས་དང་། རོའི་ཆོས་དང་།
བྲོ་བའི་ཆོས་དང་། རེག་པའི་ཆོས་དང་། རེག་བྱའི་ཆོས་དང་། ངེས་པའི་ཆོས་དང་། ཤེས་པའི་ཆོས་དང་།ཆོས་ཀྱི་ཆོས་དང་། རྟོགས་པའི་ཆོས་ཉིད་འཛིན་པའི་ཕྱིར་ཆོས་ཉིད་ཅེས་བྱའོ། །མཚན་མར་སྤྱོད་པའི་ཕྱིར་འདུ་ཤེས་སྒྱུར་བའི་སྤྱོད་པ་དང་། དབང་དུ་སྤྱོད་པའི་སྤྱོད་པ་དང་། རྣམ་པར་གཡོ་བའི་སྤྱོད་པ་དང་། སྒྲོས་སུ་འདོགས་པའི་སྤྱོད་པ་དང་། ཟླ་ལས་གལ་བའི་སྤྱོད་པ་དང་། ཀུན་དུ་འཚིག་པའི་སྤྱོད་པ་དང་། བླ་བཀྱལ་འཚལ་བའི་སྤྱོད་པ་དང་། ཆགས་པ་འཛིན་པའི་སྤྱོད་པ་དང་། ཀུན་དུ་བདུད་ཀྱི་སྤྱོད་པ་དང་། ཕྱིན་ཅི་ལོག་པའི་སྤྱོད་པ་དང་། གཉིས་ལ་རྟེན་པར་སྤྱོད་པའི་ཕྱིར་སྤྱོད་པ་ཞེས་བྱའོ། །འབྲས་བུར་སྨིན་པའི་ཕྱིར་རྫོགས་པར་སྨིན་པ་དང་། རིམ་པར་སྨིན་པ་དང་། གློ་བུར་དུ་སྨིན་པ་དང་། བསྒྱུར་ཏེ་སྨིན་པའི་ཕྱིར་སྨིན་པ་ཞེས་བྱའོ། །བགྲོད་པར་བྱེད་པའི་ཕྱིར་གདུང་བའི་ལམ་དང་། འགོག་པའི་ལམ་དང་། མུན་པའི་ལམ་དང་། འདམ་གྱི་ལམ་དང་། ཡང་བའི་ཕྱིར་ལམ་ཞེས་བྱའོ། །བརྟེན་པར་བྱེད་པའི་ཕྱིར་བཟོད་ལྡན་གྱི་གནས་དང་། ཡིད་ལྡན་གྱི་གནས་དང་། མཉམ་ལྡན་གྱི་གནས་དང་། འདོད་ལྡན་གྱི་གནས་དང་། རྩོད་ལྡན་གྱི་གནས་དང་། དགའ་ལྡན་ལ་གནས་པའི་ཕྱིར་གནས་ཞེས་བྱའོ། །བདེ་བའི་མུ་ལ་བཟུང་བའི་ཕྱིར་ངོ་བོ་ཉིད་ཀྱི་མུ་དང་། བྱེད་པ་དང་དབང་ཕྱུག་གི་མུ་བཟུང་བའི་ཕྱིར་མུ་ཞེས་བྱའོ། །འདུས་པ་ཆེན་པོའི་ཚོགས་རྐྱེན་གྱི་རྣལ་འབྱོར་ནི་འདི་ལྟ་སྟེ། ཤེས་པ་གཅིག་ཤེས་ཏེ་ཆུབ་པར་འདོད་པས་ཀྱང་། ལམ་འདི་ཤེས་པར་བྱའོ། །དེ་བཞིན་དུ་དོན་གཉིས་དང་། ཚུལ་གསུམ་དང་། ཐབས་བཞི་དང་། ཆོས་ལྔ་དང་། རིགས་དྲུག་དང་། མཛད་པ་ཆེན་པོ་བཅུ་གཉིས་དང་། ཆོ་འཕྲུལ་ཆེན་པོ་བཅུ་གཉིས་དང་། ཡེ་ཤེས་བཅྭ་བརྒྱད་དང་། སའི་ཁྱད་པར་བཅུ་གཅིག་དང་། སྐུ་བཞི་དང་། ལམ་ལྔ་དང་། འབྲས་བུ་ཆེན་པོ་དྲུག་དང་། བྱང་ཆུབ་ཆེན་པོ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཉིད་ཤེས་པར་བྱའོ། །དེ་ཅིའི་ཕྱིར་ཞེ་ན། རང་རྐྱེན་
ཙམ་དུ་སྤྱོད་ཅིང་འབྲས་བུའི་རྐྱེན་དུ་འགྱུར་བའི་ཕྱིར་ཏེ། ལམ་དེ་ཉིད་མ་ནོར་པར་ཤེས་པའི་ཕྱིར་དེ་ཤེས་པ་གཅིག་ཤེས་བྱའོ། །བདེན་པ་གཉིས་སུ་སྣང་བའི་ཕྱིར་དོན་གཉིས་པ་ཞེས་བྱའོ། །མཚན་ཉིད་གསུམ་གྱིས་སྦྱོར་བའི་ཕྱིར་ཀུན་བརྟགས་མཐུན་པ་ལ་ཡོད་པའི་ཚུལ་དང་། གཞན་དབང་མི་མཐུན་པ་ལ་མེད་པའི་ཚུལ་དང་། རྗེས་སུ་དཔག་པ་གཉི་ག་མ་ཡིན་པའི་ཕྱིར་ཚུལ་ཞེས་བྱའོ། །མཁས་པས་ཟིན་པའི་ཕྱིར་ཁད་ཀྱིས་འཇུག་པའི་ཐབས་དང་། རྐྱེན་ལ་སྦྱོར་བའི་ཐབས་དང་། མངོན་པར་འཇུག་པའི་ཐབས་དང་། ཐམས་ཅད་རྫོགས་པའི་ཕྱིར་ཐབས་ཞེས་བྱའོ། །རང་བཞིན་ལ་གནས་པའི་ཕྱིར་རྒྱུའི་ཆོས་དང་། ལམ་གྱི་ཆོས་དང་། རྟོགས་པའི་ཆོས་དང་། འབྲས་བུའི་ཆོས་ལ་གནས་པའི་ཕྱིར་ཆོས་ཞེས་བྱའོ། །ཕྱིས་འབྱུང་བར་ཤེས་པའི་ཕྱིར་རྒྱུའི་དྲན་པ་དང་། འབྲས་བུའི་དྲན་པ་དང་། སྒྲའི་དྲན་པ་དང་། སྦྱོར་བའི་དྲན་པ་དང་། གནས་ཀྱི་དྲན་པ་དང་། མངོན་སུམ་པའི་དྲན་པ་དང་། རིག་པའི་ཕྱིར་རིག་པ་དྲུག་ཅེས་བྱའོ། །གཞན་གྱི་དོན་དུ་མཛད་ཅིང་འགྲོ་བའི་དོན་ལ་འཇུག་པའི་ཕྱིར་ངོ་བོའི་ཚུལ་དང་། བལྟམས་པའི་ཚུལ་དང་། རོལ་པའི་ཚུལ་དང་། མངའ་དབང་ཆེན་པོའི་ཚུལ་དང་། ཐར་པར་གྱུར་པའི་ཚུལ་དང་། དཀའ་ཐུབ་ཆེན་པོའི་ཚུལ་དང་། སངས་རྒྱས་པ་དང་བདུད་བཏུལ་བ་དང་འཁོར་ལོ་བསྐོར་བ་དང་། བདུད་བཏུལ་བའི་ཚུལ་དང་། ཆོ་འཕྲུལ་སྟོན་པའི་ཚུལ་དང་། མྱ་ངན་ལས་འདས་པའི་ཚུལ་གྱི་ཕྱིར་མཛད་པ་ཆེན་པོ་ཞེས་བྱའོ། །སྣ་ཚོགས་སུ་འཕྲུལ་པའི་ཕྱིར། ཏིང་ངེ་འཛིན་གྱི་ཆོ་འཕྲུལ་དང་། སྣང་བའི་ཆོ་འཕྲུལ་དང་། རྫུ་འཕྲུལ་གྱི་ཆོ་འཕྲུལ་དང་། ཀུན་རྗོད་པའི་ཆོ་འཕྲུལ་དང་། རྗེས་སུ་བསྟན་པའི་ཆོ་འཕྲུལ་དང་། བསམ་གཏན་གྱི་ཆོ་འཕྲུལ་དང་། བྱིན་བརླབས་ཀྱི་ཆོ་འཕྲུལ་དང་། སྐྱེ་བའི་ཆོ་འཕྲུལ་དང་། སྟོབས་ཀྱི་ཆོ་འཕྲུལ་དང་། ཡོན་ཏན་གྱི་ཆོ་འཕྲུལ་དང་། འབྲས་བུའི་ཆོ་འཕྲུལ་དང་། དེའི་ཕྱིར་ཆོ་འཕྲུལ་ཞེས་བྱའོ། །ཕྱི་ནང་གི་ཆོས་ཐམས་ཅད་ཤེས་པའི་ཕྱིར་ནང་
གི་ཆོས་ཐམས་ཅད་ཤེས་པ་དང་། ཕྱིའི་ཆོས་ཐམས་ཅད་ཤེས་པའི་ཡེ་ཤེས་དང་། ཕྱི་ནང་གི་ཆོས་ཐམས་ཅད་ཤེས་པའི་ཡེ་ཤེས་དང་། སྟོང་པའི་ཆོས་ཐམས་ཅད་ཤེས་པའི་ཡེ་ཤེས་དང་། དོན་དམ་པའི་ཆོས་ཉིད་ཤེས་པའི་ཡེ་ཤེས་དང་། འདུས་བྱས་ཀྱི་ཆོས་ཐམས་ཅད་ཤེས་པའི་ཡེ་ཤེས་དང་། མཐའ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང་། དུས་གསུམ་གྱི་ཆོས་ཐམས་ཅད་ཤེས་པའི་ཡེ་ཤེས་དང་། བླང་དོར་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང་། རང་བཞིན་གྱི་ཆོས་ཐམས་ཅད་ཤེས་པའི་ཡེ་ཤེས་དང་། ཆོས་ཅན་གྱི་ཆོས་ཐམས་ཅད་ཤེས་པའི་ཡེ་ཤེས་དང་། མཚན་ཉིད་འཛིན་པའི་ཆོས་ཐམས་ཅད་ཤེས་པའི་ཡེ་ཤེས་དང་། དམིགས་པ་མེད་པའི་ཆོས་ཐམས་ཅད་ཤེས་པའི་ཡེ་ཤེས་དང་། མཚན་མར་མི་རྟོག་པའི་ཆོས་ཐམས་ཅད་ཤེས་པའི་ཡེ་ཤེས་དང་། ངོ་བོ་ཉིད་ཀྱི་ཆོས་ཐམས་ཅད་ཤེས་པའི་ཡེ་ཤེས་དང་། དངོས་པོ་མི་དམིགས་པའི་ཆོས་ཐམས་ཅད་ཤེས་པའི་ཡེ་ཤེས་དང་། བརྟེན་ཏེ་གནས་པའི་ཕྱིར་མི་གོས་པའི་རིག་པ་དང་། མི་ཉམས་པར་རིག་པ་དང་། མི་སྒྲིབ་པར་རིག་པ་དང་། རྫོགས་པར་རིག་པ་དང་། མ་གཡོས་པར་རིག་པ་དང་། མཉམ་པ་ཉིད་དུ་རིག་པ་དང་། གཉིས་སུ་མེད་པར་རིག་པ་དང་། ཡོངས་སུ་དག་པར་རིག་པ་དང་། ཀུན་དུ་ལེགས་པར་རིག་པ་དང་། དེ་མ་ཐག་པར་རིག་པ་དང་། རྫོགས་པར་ཆུབ་པའི་རིག་པ་ལ་བརྟེན་པའི་ཕྱིར་ས་ཞེས་བྱའོ། །ཀུན་དུ་བརྗོད་ཅིང་ངོ་བོ་ཉིད་དུ་གནས་པའི་ཕྱིར་ངོ་བོ་ཉིད་དང་། ཆོས་ཉིད་དང་། རྫོགས་ལོངས་སྤྱོད་པ་དང་། འདྲེན་པར་སྤྲུལ་པའི་ཕྱིར་སྐུ་ཞེས་བྱའོ། །བགྲོད་ཅིང་འཇུག་པའི་ཕྱིར་ཚོགས་དང་། སྦྱོར་བ་དང་། མཐོང་བ་དང་། བསྒོམ་པ་དང་། མཐའ་ཟད་དུ་ཕྱིན་པའི་ཕྱིར་ལམ་ཞེས་བྱའོ། །རྒྱུ་ལ་དོན་ཡོད་པའི་ཕྱིར་གཅིག་ཏུ་རྫོགས་པ་དང་། ཐམས་ཅད་དུ་མཁྱེན་པ་དང་། ཡོངས་སུ་ཁྱབ་པ་དང་། ཚོགས་སུ་འབྱུང་བ་དང་། ཀུན་དུ་དབང་བ་དང་། དགོས་པ་ཚང་
བའི་ཕྱིར་འབྲས་བུ་ཞེས་བྱའོ། །མངོན་པར་རྫོགས་པའི་ཕྱིར་བྱང་ཆུབ་ཆེན་པོ་ཞེས་བྱའོ། །འདུས་པ་ཆེན་པོའི་ཚོགས་འབྲས་བུའི་རྣལ་འབྱོར་ནི་འདི་ལྟ་སྟེ། མ་ནོར་བ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཤེས་པར་བྱའོ། །དེ་བཞིན་དུ་ངེས་པ་གཉིས་དང་། ཡོན་ཏན་གསུམ་དང་། དགོངས་པ་བཞི་དང་། ཆེན་པོ་ལྔ་དང་། ཚོགས་པ་དྲུག་དང་། འབྱུང་ཚུལ་བཅུ་གཉིས་དང་། ཏིང་ངེ་འཛིན་བཅུ་གཉིས་དང་། ཡེ་ཤེས་ཆེན་པོ་བཅྭ་བརྒྱད་དང་། རྣལ་འབྱོར་ཆེན་པོ་བཅུ་གཅིག་དང་། སྒྲུབ་པ་ཆེན་པོ་བཞི་དང་། སྦྱོར་བ་ལྔ་དང་། དངོས་གྲུབ་ཆེན་པོ་དྲུག་དང་། རྫོགས་པ་ཆེན་པོ་གཅིག་ཤེས་ཏེ་ཆུབ་པར་འདོད་པས་ཀྱང་ལམ་འདི་ཤེས་པར་བྱའོ། །དེ་ཅིའི་ཕྱིར་ཞེ་ན། རྒྱུ་ཉིད་འབྲས་བུར་གྲུབ་པའི་ཕྱིར་གཏན་ལ་ཕེབས་པས་མ་ནོར་བ་ཞེས་བྱའོ། །ཐེ་ཚོམ་མི་ཟ་བའི་ཕྱིར་ཐབས་ཀྱིས་ངེས་པ་དང་། ཤེས་རབ་ཀྱིས་ངེས་པས་ངེས་པ་ཞེས་བྱའོ། །འདོད་པ་འབྱུང་བའི་ཕྱིར་ཡང་ཡོངས་སུ་ཁྱབ་པ་དང་། རླབས་སུ་ཆེ་བའི་ཡོན་ཏན་དང་། རྩིས་ལས་འདས་པའི་ཕྱིར་ཡོན་ཏན་ཞེས་བྱའོ། །ཐབས་ཀྱིས་ལྡེམ་པོར་དགོངས་པའི་ཕྱིར་མཉམ་པ་ཉིད་ལ་དགོངས་པ་དང་། མཚན་ཉིད་ཀྱི་ཕྱིར་དུས་གཞན་ལ་དགོངས་པ་དང་། གཉེན་པོའི་ཕྱིར་གྲངས་གཞན་ལ་དགོངས་པ་དང་། བསྒྱུར་བའི་ཕྱིར་དོན་གཞན་ལ་དགོངས་པས་ན་དགོངས་པ་ཞེས་བྱའོ། །ལྷག་པར་འཕགས་པའི་ཕྱིར་མངོན་པ་དང་། བདག་ཉིད་ཆེན་པོ་དང་། དེ་ཡིན་པ་དང་། ཐམས་ཅད་དུ་ཆེ་བ་དང་། ཀུན་དུ་རྫོགས་པའི་ཕྱིར་ཆེན་པོ་ཞེས་བྱའོ། །ཀུན་ནས་ཚང་བའི་ཕྱིར། མཉམ་པ་ཆེན་པོ་དང་། འབྱོར་པ་ཆེན་པོ་དང་། འདུས་པ་ཆེན་པོ་དང་། རིག་པ་ཆེན་པོ་དང་། དབང་ཆེན་པོ་དང་། འདྲེས་པ་ཆེན་པོའི་ཕྱིར་ཚོགས་ཞེས་བྱའོ། །གཞན་གྱི་དོན་དུ་འབྱུང་ཞིང་འགྲོ་བའི་ཚུལ་དང་མཐུན་པའི་ཕྱིར་གནས་སུ་བསྐྱོད་པ་དང་། མཉམ་པར་གྱུར་པ་དང་། མཛེས་པར་གཤེགས་པ་དང་། སྤྲོ་བར་སྤྱོད་པ་དང་། གསང་བར་སྦྱོར་བ་དང་། མཚན་མ་བཅོམ་པ་དང་། མཛད་པ་མེད་
པ་དང་། སེངྒེའི་གསུང་སྒྲ་དང་། ངེས་པར་རྫོགས་པ་དང་། ཚོམ་ངམ་ཆེན་པོ་སྤྲུལ་པ་མཛད་པ་དང་། ཡོངས་སུ་དག་པའི་ཕྱིར་འབྱུང་ཚུལ་ཆེན་པོ་ཞེས་བྱའོ། །གསལ་ཞིང་མི་གཏོང་བའི་ཕྱིར་སེམས་ཀྱི་སྤྱོད་པ་སྟེ།རྣམ་དག་དབྱིངས་ཀྱི་ཏིང་ངེ་འཛིན་དང་། སྣང་གསལ་ཡེལ་འཕྱོའི་ཏིང་ངེ་འཛིན་དང་། མི་ཟད་མཛོད་ཀྱི་ཏིང་ངེ་འཛིན་དང་། མངོན་པར་རྟོགས་པའི་ཏིང་ངེ་འཛིན་དང་། ཐམས་ཅད་རྫོགས་པའི་ཏིང་ངེ་འཛིན་དང་། འབྱུང་ཆེན་སྤྲུལ་པའི་ཏིང་ངེ་འཛིན་དང་། དབང་སྒྱུར་ཐབས་ཀྱི་ཏིང་ངེ་འཛིན་དང་། རྩེ་གཅིག་འཕྲོས་པའི་ཏིང་ངེ་འཛིན་དང་། ཚོགས་ཆེན་རྫོགས་པའི་ཏིང་ངེ་འཛིན་དང་། རིན་ཆེན་མྱུ་གུའི་ཏིང་ངེ་འཛིན་དང་། དུག་འཇོམས་སྨན་གྱི་ཏིང་ངེ་འཛིན་དང་། བྱ་བ་བྱེད་པའི་ཏིང་ངེ་འཛིན་གྱི་ཕྱིར་ཏིང་ངེ་འཛིན་ཅེས་བྱའོ། །སྟོང་པ་ཉིད་ཀྱི་ཡེ་ཤེས་དང་། རྒྱུའི་ཡེ་ཤེས་དང་། ཐམས་ཅད་འབྱུང་བའི་ཡེ་ཤེས་དང་། ཡི་གེའི་ཡེ་ཤེས་དང་། ཕྱག་རྒྱའི་ཡེ་ཤེས་དང་། སྤྲུལ་པའི་ཡེ་ཤེས་དང་། ཅིར་ཡང་མཛད་པའི་ཡེ་ཤེས་དང་། མེ་ལོང་ལྟ་བུའི་ཡེ་ཤེས་དང་། ནམ་མཁའ་ལྟ་བུའི་ཡེ་ཤེས་དང་། སྒྱུ་མ་ལྟ་བུའི་ཡེ་ཤེས་དང་། རིན་པོ་ཆེ་ལྟ་བུའི་ཡེ་ཤེས་དང་། ཉི་མ་ལྟ་བུའི་ཡེ་ཤེས་དང་། སྣང་སྟོང་གསལ་བའི་ཡེ་ཤེས་དང་། མཉམ་པ་ཉིད་ཀྱི་ཡེ་ཤེས་དང་། སོ་སོར་རྟོག་པའི་ཡེ་ཤེས་དང་། བྱ་བ་ནན་ཏན་གྱི་ཡེ་ཤེས་དང་། ཆོས་ཀྱི་དབྱིངས་ཀྱི་ཡེ་ཤེས་སུ་གསལ་བའི་ཕྱིར་ཡེ་ཤེས་ཆེན་པོ་ཞེས་བྱའོ། །འདུན་པ་སེམས་པའི་རྣལ་འབྱོར་དང་། བཀའ་སྡོད་ལས་ཀྱི་རྣལ་འབྱོར་དང་། རིགས་ཆེན་འབྱེད་པའི་རྣལ་འབྱོར་དང་། རྟགས་ཀྱི་རྣལ་འབྱོར་དང་། གསང་སྒོ་ལུང་གི་རྣལ་འབྱོར་དང་། སྤྱོད་པ་རྒྱུན་གྱི་རྣལ་འབྱོར་དང་། མཚན་མ་རྟགས་ཀྱི་རྣལ་འབྱོར་དང་། ལུང་ཆེན་ཐོབ་པའི་རྣལ་འབྱོར་དང་། རིག་པ་འཛིན་པའི་རྣལ་འབྱོར་དང་། རྩལ་ཆེན་སྦྱོང་བའི་རྣལ་འབྱོར་དང་། ཡོངས་སུ་རྫོགས་པའི་རྣལ་འབྱོར་དང་། ལྷུན་གྱིས་གྲུབ་པའི་རྣལ་འབྱོར་དུ་གནས་པའི་ཕྱིར་རྣལ་འབྱོར་ཞེས་བྱའོ། །མཉམ་
པ་ཉིད་དུ་གྲུབ་པ་དང་། བདེ་བ་ཆེན་པོར་གྲུབ་པ་དང་། ཡོངས་སུ་རྫོགས་པར་གྲུབ་པ་དང་། ཐམས་ཅད་ལྷུན་གྱིས་གྲུབ་པའི་ཕྱིར་གྲུབ་པ་ཆེན་པོ་ཞེས་བྱའོ། །རྒྱུ་དང་འབྲས་བུར་སྦྱོར་བ་དང་། ཐབས་དང་ཤེས་རབ་ཏུ་སྦྱོར་བ་དང་། དབྱིངས་དང་ཡེ་ཤེས་སུ་སྦྱོར་བ་དང་། སེམས་དང་ཆོས་སུ་སྦྱོར་བ་དང་།ལས་དང་ཐུགས་རྗེར་སྦྱོར་བས་སྦྱོར་བ་ཆེན་པོ་ཞེས་བྱའོ། །སྲིད་པ་རྒྱ་མཚོ་དབྱིངས་སུ་ཚིམ་པར་གྲུབ་པ་དང་། འཁོར་བ་རྒྱ་མཚོ་བདག་གིར་གྲུབ་པར་གྱུར་པ་དང་། བདག་ཉིད་ཆེན་པོ་ལྷུན་གྱིས་གྲུབ་པར་གྱུར་པ་དང་། དམིགས་པ་གང་ཡིན་པ་དེ་བཞིན་གྲུབ་པར་གྱུར་པ་དང་། ཆོ་འཕྲུལ་རྫུ་འཕྲུལ་ཐོགས་པ་མེད་པར་གྲུབ་པ་དང་། དོན་དམ་བཅུད་ཀྱིས་རྣམ་ཤེས་རྒྱས་པར་གྲུབ་པའི་ཕྱིར་དངོས་གྲུབ་ཆེན་པོ་ཞེས་བྱའོ། །རྣམ་གྲངས་ཐམས་ཅད་བྱང་ཆུབ་ཀྱི་སེམས་བདེ་བ་ཆེན་པོར་རྫོགས་པར་གྲུབ་པའི་ཕྱིར་རྫོགས་པ་ཆེན་པོ་གཅིག་ཅེས་བྱའོ། །གཞན་ཡང་འདུས་པ་ཆེན་པོའི་ཚོགས་སའི་ཁྱད་པར་ཆེན་པོ་བཅུ་གཅིག་ནོན་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ་གང་ཞེ་ན། འགྱུར་དབང་མ་ངེས་པའི་ས་དང་། བརྟེན་པ་གཞིའི་ས་དང་། གལ་ཆེན་སྦྱོར་བའི་ས་དང་། མི་ལྡོག་གནས་པའི་ས་དང་། བསླབ་པ་རྒྱུན་གྱི་ས་དང་། ཆོ་འཕྲུལ་སྤྲུལ་པའི་ས་དང་། བསྟེན་པས་ཁྱད་པར་དུ་འགྲོ་བའི་ས་དང་། དམིགས་པས་འབྲས་བུ་སྐྱེ་བའི་ས་དང་། གནས་པས་མི་འགྱུར་བའི་ས་དང་། བདལ་བ་ཆོས་ཉིད་ཀྱིས་དང་། རྫོགས་པ་སྤྱིར་ཆིབ་ཀྱིས་ས་སྟེ། ས་འདི་དག་ནོན་པར་འདོད་པས་ཀྱང་ལམ་འདི་ལ་བསླབ་པར་བྱའོ། །གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ། རྣལ་འབྱོར་བསླབ་པའི་མཐའ་བཅུ་ཆིབ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། གང་ཞེ་ན་གཞི་དམ་ཚིག་འདིས་བཟུང་བར་བསླབ་པ་དང་། རྒྱུད་ཐོས་པས་དགྲོལ་བར་བསླབ་པ་དང་། ཕུལ་དུ་མཁས་པར་དབྱུང་བར་བསླབ་པ་དང་། སྒོ་ཀུན་ནས་སྡུད་པར་བསླབ་པ་དང་། རིམ་པ་དབང་གིས་བགྲོད་པར་བསླབ་པ་དང་། ལ་སྤྱོད་པས་དོར་བར་བསླབ་པ་དང་། ཐག་ལྟ་
བས་གཅད་པར་བསླབ་པ་དང་། ཉམས་སུ་ཏིང་ངེ་འཛིན་གྱིས་བླང་བར་བསླབ་པ་དང་། དོན་མན་ངག་གིས་བསྒྲུབ་པར་བསླབ་པ་དང་། མདོ་གཅིག་ཏུ་བསྡུ་བར་བསླབ་པའོ། །འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། ཡོན་ཏན་གྱི་ཆེ་བ་སྦོམ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། གང་ཞེ་ན། ཆེ་བ་ཉི་ཤུ་དང་།རོལ་པ་ཉི་ཤུ་དང་། ཆོ་འཕྲུལ་ཉི་ཤུ་དང་། རྡོམ་པ་ཉི་ཤུ་དང་། བརྗིད་པ་ཆེན་པོ་ཉི་ཤུ་དང་། ཏོག་ཆེན་པོའི་ནོར་བུའོ། །གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ། རྨད་དུ་བྱུང་བའི་མཐུ་ཆེན་པོ་ཉི་ཤུ་ཐོབ་པར་འདོད་པས་ཀྱང་ལམ་འདི་ལ་བསླབ་པར་བྱ་སྟེ། དེ་ཡང་གང་ཞེ་ན། འཇིག་རྟེན་ཆེན་པོ་དྲུག་འཕང་བར་འདོད་པ་དང་། ཆུའི་ཕུང་པོ་ཆེན་པོ་རྔུབས་ཏེ་བསྐམ་པར་འདོད་པ་དང་། རླུང་གི་བསྐལ་པ་བཅིང་བར་འདོད་པ་དང་། ཉི་མའི་དཀྱིལ་འཁོར་འབུམ་དགྱེ་བར་འདོད་པ་དང་། བསྲེག་པའི་བསྐལ་པ་ཆེན་པོ་གསུམ་གཞིལ་བར་འདོད་པ་དང་། ནམ་མཁའ་ཐམས་ཅད་བ་སྤུ་གཅིག་གིས་དགང་བར་འདོད་པ་དང་། བ་སྤུ་གཅིག་ལས་སངས་རྒྱས་བྱེ་བ་དགྱེ་བར་འདོད་པ་དང་། སངས་རྒྱས་བྱེ་བ་པ་སྤུ་གཅིག་གི་ནང་དུ་ཤོང་བར་འདོད་པ་དང་། འཁོར་བ་ཐམས་ཅད་བ་སྤུ་གཅིག་ཏུ་རྔུབ་པར་འདོད་པ་དང་། བ་སྤུ་གཅིག་གིས་འཁོར་བ་ཐམས་ཅད་ལ་ཁྱབ་པར་འདོད་པ་དང་། བསྐལ་པའི་འཁོར་ལོ་ཆེན་པོ་རིང་དུ་བསྲུབ་པར་འདོད་པ་དང་། ཐུང་དུ་བསྲུབ་པར་འདོད་པ་དང་། དུས་ཀྱི་འཁོར་ལོ་ཆེན་པོ་མཉམ་པར་བསྐོར་བར་འདོད་པ་དང་། འཁྲུག་པར་བསྐོར་བར་འདོད་པ་དང་། ལས་ཀྱི་འཁོར་ལོ་ཆེན་པོ་རྒྱུན་དུ་བསྐོར་བར་འདོད་པ་དང་། རྒྱུན་གཅད་པར་འདོད་པ་དང་། སྲིད་པའི་འཁོར་ལོ་བཟློག་པར་འདོད་པ་དང་། ལུགས་སུ་བསྐོར་བར་འདོད་པ་དང་། སྡུག་བསྔལ་གྱི་འཁོར་ལོ་ཆེན་པོ་རྒྱུན་གཅད་པར་འདོད་པ་དང་། དམྱལ་བའི་འཁོར་ལོ་ཆེན་པོ་དོང་སྤྲུགས་པར་འདོད་པས་ཀྱང་ལམ་འདི་ལ་བསླབ་པར་བྱའོ། །འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། རྣལ་འབྱོར་རྟོག་པའི་རི་བོ་བརྒྱད་ཅུ་རྩ་གཅིག་གཞིལ་བར་འདོད་པས་
ཀྱང་ལམ་འདི་ལ་བསླབ་པར་བྱ་སྟེ། དངོས་གཞིའི་རྟོག་པ་དགུ་དང་། མཚན་མའི་རྟོག་པ་དགུ་དང་། རྟགས་ཀྱི་རྟོག་པ་དགུ་དང་། རྐྱེན་གྱི་རྟོག་པ་དགུ་དང་། ལས་ཀྱི་རྟོག་པ་དགུ་དང་། སྤྱོད་པའི་རྟོག་པ་དགུ་དང་། བསྐྱོད་པའི་རྟོག་པ་དགུ་དང་། ཞེན་པའི་རྟོག་པ་དགུ་དང་། མངོན་པར་རྟོག་པ་དགུའོ། །འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། ལྟུང་བའི་སྒོ་དགུ་ཤེས་པས་ཀྱང་ལམ་འདི་ལ་བསླབ་པར་བྱ་སྟེ། དེ་ཡང་གང་ཞེ་ན། བདུད་ཆེན་པོའི་རིས་སུ་ལྟུང་བའི་སྒོ་དང་། མུ་སྟེགས་ཀྱི་ཁམས་སུ་ལྟུང་བའི་སྒོ་དང་། སྲིན་པོའི་ཁམས་སུ་ལྟུང་བའི་སྒོ་དང་། གནོད་སྦྱིན་གྱི་རིས་སུ་ལྟུང་བའི་སྒོ་དང་། རུ་དྲ་ཆེན་པོར་ལྟུང་བའི་སྒོ་དང་། བགེགས་ཆེན་པོར་ལྟུང་བའི་སྒོ་དང་། ལྷ་ཆེན་པོའི་རིས་སུ་ལྟུང་བའི་སྒོ་དང་། ཤོག་མ་གཅན་ཆེན་གྱི་རིས་སུ་ལྟུང་བའི་སྒོ་དང་། དམྱལ་བ་ཆེན་པོར་ལྟུང་བའི་སྒོའོ། །འདུས་པ་ཆེན་པོའི་ཚོགས་གཞན་ཡང་འདི་ལྟ་སྟེ། ལམ་འདི་ཤེས་པར་འདོད་ན་སངས་རྒྱས་ཀྱི་ཆོས་ཤེས་པར་བྱའོ། །ཅི་ལྟ་ཅི་ལྟར་སངས་རྒྱས་ཀྱི་ཆོས་རྣམས་ནི་རྟག་པར་ཡང་བལྟའོ། །ཆད་པར་ཡང་ལྟའོ། །སྐྱེ་བར་སྣང་ངོ་། །དམིགས་པར་ཡོད་དོ། །སངས་རྒྱས་ཀྱི་ཆོས་འདི་ནི་འདོད་ཆགས་དང་བཅས་པའོ། །ཞེ་སྡང་དང་བཅས་པའོ། །གཏི་མུག་དང་བཅས་པའོ། །ང་རྒྱལ་དང་བཅས་པའོ། །ཕྲག་དོག་དང་བཅས་པའོ། །མཚམས་མེད་པ་ལྔ་དང་བཅས་པའོ། །དེ་དང་ཉེ་བ་ལྔ་དང་བཅས་པའོ། །ལྕི་བ་བཞི་དང་བཅས་པའོ། ལོག་པ་བརྒྱད་དང་ཡང་བཅས་པའོ། །གཞན་ཡང་འདུས་པ་ཆེན་པོའི་ཚོགས་འདི་ལྟ་སྟེ། སྲོག་གཅོད་པ་དང་བཅས་པའོ། །མ་བྱིན་པར་ལེན་པ་དང་བཅས་པའོ། །འདོད་པས་ལོག་པར་གཡེམ་པ་དང་བཅས་པའོ། །བརྫུན་དང་བཅས་པའོ། །ཕྲ་མ་དང་བཅས་པའོ། །ངག་རྩུབ་མོ་དང་བཅས་པའོ། །ཚིག་ཁྱལ་པ་དང་བཅས་པའོ། །བརྣབ་སེམས་དང་བཅས་པའོ། །གནོད་སེམས་དང་བཅས་པའོ། །ལོག་པར་ལྟ་བ་དང་བཅས་པའོ། །འདུས་པ་ཆེན་པོའི་ཚོགས་དེ་བས་ན། སངས་རྒྱས་ཀྱི་ཆོས་དེ་རྣམས་ལ་སྤྱོད་པར་འདོད་པས་
ལམ་འདི་ལ་བསླབ་པར་བྱའོ། །ཤེས་པར་བྱའོ། །གོམས་པར་བྱའོ། །ཀློང་དུ་གྱུར་པར་གྱིས་ཤིག་ཅེས་སེམས་དཔའ་རྡོ་རྗེ་དམ་པས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་རང་བཞིན་གྱི་ལེའུ་སྟེ་དང་པོའོ།། །།དེ་ནས་འཁོར་དེར་འདུས་པར་གྱུར་པའི་འདུས་པ་ཕལ་མོ་ཆེའི་ཚོགས་ཀྱིས་རྨད་བྱུང་གི་ཕྱག་རྣལ་འབྱོར་ལུགས་སུ་བྱས་ནས། སེམས་དཔའ་རྡོ་རྗེ་དམ་པ་ལ་འདི་སྐད་ཅེས་གསོལ་ཏོ། །སེམས་དཔའ་ཆེན་པོ་སྨྲ་བའི་སེངྒེ་ཁྱོད་ལ་བདག་ཅག་ཤིན་ཏུ་ཞུ་བར་སྤོབས་ན་གནང་བའི་སྐབས་དབྱེ་བར་གསོལ། དེ་སྐད་ཅེས་གསོལ་པ་དང་། སྨྲ་བའི་སེངྒེ་དེས་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་ཚོགས་ཇི་ལྟར་ཞུ་བའི་དོན་གནང་གིས་ཀུན་དུ་སྤོབས་པ་སྐྱེད་ལ་ཞུ་བའི་དོན་གསོལ་ཅིག །དེ་སྐད་ཅེས་བཀའ་སྩལ་པ་དང་། འདུས་པ་ཆེན་པོའི་ཚོགས་ཀྱིས་ཨ་ལ་ལ་ཧོ་ཞེས་གསོལ་ཏོ། །སྨྲ་བའི་སེངྒེ་ཆེན་པོ་ཁྱོད་ཀྱིས་རྒྱ་ཆེར་བཤད་པའི་རྣལ་འབྱོར་རང་བཞིན་ཆེན་པོའི་དོན་གྱི་རྗེས་སུ་བདག་ཅག་འཇུག་པར་འཚལ་ན། འདི་ལ་འཇུག་པའི་སྒོ་དུ་མཆིས། ཐབས་ཇི་ལྟར་ལགས། ལམ་གང་ལྟར་བདེ། སེམས་དཔའ་ཆེན་པོ་འདིའི་དོན་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང་། སྨྲ་བའི་སེངྒེས་བཀའ་སྩལ་པ། གྲོགས་པོ་དག་ལེགས་སོ་ཤིན་ཏུ་ལེགས་སོ། །ངེས་པར་ལེགས་སོ། །ཁྱེད་ཀྱིས་ཞུས་པའི་དོན་འདི་རྣམས་ངོ་མཚར་ཆེ་སྟེ། ཆོས་ཐམས་ཅད་ལ་འཇུག་པའི་སྒོ་གསལ་ཞིང་རྒྱ་ཆེ་བར་བྱེད་དེ། རྣ་ལྷོགས་ལ་གུས་པར་ཉོན་ཅིག་གསལ་བར་བཤད་པར་བྱའོ། །དེ་ནས་འཁོར་གྱི་ནང་དུ་སེངྒེའི་གསུང་སྒྲ་ཡིས་ཆོས་རྣམས་ཀྱི་སྒོ་འབྱེད་པ་འདི་གསལ་བར་བཤད་པར་བྱའོ། །སངས་རྒྱས་ཆོས་ཀྱི་སྒོ་མོ་འདི། །གྲངས་མང་བསམ་གྱིས་མི་ཁྱབ་ཀྱང་། །མདོ་རུ་བསྡུས་ན་གསུམ་དུ་གསལ། །རྩོལ་བས་འཇུག་པའི་སྒོ་མོ་དང་། །གྲུབ་པ་ཐབས་ཀྱི་སྒོ་མོ་དང་། །མཐར་ཕྱིན་འབྲས་བུའི་སྒོ་མོའོ། །དང་པོ་ལ་ཡང་གསུམ་ཡོད་དེ། །མཚན་ཉིད་ཐབས་ཀྱི་སྒོ་མོ་དང་། །ཐུབ་པ་རིགས་ཀྱི་འཇུག་སྒོ་དང་། །གྲུབ་པ་ལུང་གི་
གསང་སྒོའོ། །དེ་དག་སྒོ་མོ་རེ་རེ་ལའང་། །གསུམ་གསུམ་ཡོད་པར་འདྲེན་པས་བཤད། །གཉིས་པའི་སྒོ་ལའང་གསུམ་ཡོད་དེ། །ཤེས་རབ་རྟོགས་པའི་སྒོ་མོ་དང་། །ཏིང་འཛིན་གོམས་པའི་སྒོ་མོ་དང་། །སྨོན་ལམ་གྲུབ་པའི་སྒོ་མོར་གསལ། །ཐ་མ་མཐར་ཕྱིན་སྒོ་མོ་ལ། །རྣམ་ཐར་གསུམ་གྱི་སྒོ་ཞེས་བཤད། །འཇུག་པའི་ལམ་ལའང་འདི་ལྟ་སྟེ། །དམ་པ་གསུམ་དུ་གསལ་བར་བཤད། །འདྲེན་པ་ཆེན་པོའི་སྡེ་སྣོད་དང་། །ཐུབ་པ་ཆེན་པོའི་འཇུག་སྒོ་དང་། །དམ་པ་ཆེན་པོའི་མཛོད་གསུམ་མོ། །འཇུག་པའི་ཐབས་ཀྱང་འདི་ལྟ་སྟེ། །ཐབས་ལས་ཐབས་བྱུང་ཐབས་གསུམ་སྟེ། །དོན་དང་ཡི་གེ་ཏིང་འཛིན་གྱིས། །རྗེས་སུ་གང་གིས་བརྟག་བྱས་ན། །འཇུག་པའི་ཐབས་ཀྱི་དམ་པའོ། །དོན་གྱི་རྗེས་སུ་འཇུག་པ་ཡང་། །དོན་ནི་ཆོས་ཉིད་སྙིང་པོ་ལ། །རྗེས་སུ་འཇུག་པའི་སེམས་ཡིན་ཏེ། །སེམས་ཉིད་ཆོས་ལ་སྦྱོར་བའི་སྐབས། །རྣམ་པ་བཅུ་ཞེས་འདྲེན་པས་བཤད། །བཅུ་ཉིད་གང་དང་གང་ཞེ་ན། །འདུན་པ་སྐྱེ་བའི་གནས་སྐབས་དང་། །རྩོལ་པ་སྦྱོར་བའི་གནས་སྐབས་དང་། །བསླབ་ལ་འཇུག་པའི་གནས་སྐབས་དང་། །འདུ་ཤེས་འགྱུར་བའི་གནས་སྐབས་དང་། །སྦྱོར་ཆེན་ལ་འཇུག་གནས་སྐབས་དང་། །རོ་ཉིད་ཚོར་བའི་གནས་སྐབས་དང་། །ཡུལ་ལ་འཇུག་པའི་གནས་སྐབས་དང་། །རྟོག་ཆེན་ཉིད་ལ་ཕེབས་སྐབས་དང་། །དེ་ཉིད་གདེང་དུ་གྱུར་པའི་སྐབས། །ལས་སུ་རུང་བའི་སྐབས་དང་བཅུ། །བཅུ་པོ་དེ་དག་རེ་རེ་ཡི། །སྐབས་སུ་སེམས་དང་ཆོས་ཕྲད་པས། །རིག་པ་བྱང་ཆུབ་སེམས་རེ་འབྱུང་། །བྱང་ཆུབ་སེམས་ནི་གང་ཞེ་ན། །འདི་ཡི་གྲངས་ཀྱང་རྣམ་པ་བཅུ། །གཡོ་བ་བྱང་ཆུབ་སེམས་ཉིད་དང་། །དེ་བཞིན་སྨོན་པ་བྱང་ཆུབ་སེམས། །ལྡང་བ་བྱང་ཆུབ་ཆེན་པོའི་སེམས། །དེ་བཞིན་སྦྱོར་བ་བྱང་ཆུབ་སེམས། །འཇུག་པའི་སེམས་དང་དགེ་བའི་སེམས། །མི་འགྱུར་བ་དང་རིག་པ་དང་། །གནས་པ་དང་ནི་རྫོགས་པའོ། །བྱང་ཆུབ་སེམས་ཞེས་གྲགས་པས་ན། །སེམས་བཅུ་དག་ཏུ་རྒྱལ་བས་བཤད། །བྱང་ཆུབ་སེམས་
ཀྱི་རང་བཞིན་དེ། །སྐབས་བཅུ་དག་ཏུ་སྦྱོར་བས་ན། །གཟུགས་བརྙན་ཆོས་ཉིད་ངོ་ལ་སྣང་། །གཟུགས་བརྙན་རང་བཞིན་ཅི་ལྟར་སྣང་། །ཕྲ་མོ་ཙམ་གྱི་སྐར་མ་དང་། །དེ་བཞིན་སྐར་མ་ཐ་མལ་པ། །སྐར་མ་ཆེན་པོ་དག་དང་ནི། །ཟླ་བ་ཚེས་གཅིག་རྣམ་པ་དང་། །གཉིས་དང་གསུམ་དང་བཞི་དང་ལྔ། །བརྒྱད་དང་བཅུ་དྲུག་རྣམ་པ་ཡི། །གཟུགས་བརྙན་དག་ཏུ་སྣང་བ་སྟེ། །དངོས་པོར་སྣང་བ་ཅང་མ་ཡིན། །ཆུ་ཟླ་ལྟ་བུར་གཟུང་དུ་མེད། །སེམས་ཀྱི་གཟུགས་བརྙན་སྣང་བ་དང་། །ཆོས་ཉིད་གསལ་བའི་ཉི་མ་གཉིས། །ཡུལ་དང་དབང་པོའི་ཚུལ་ལྟ་བུར། །དབྱིངས་དང་ཡེ་ཤེས་རང་བཞིན་གསལ། །འདི་ནི་རྣལ་འབྱོར་སྦྱོར་བའི་ལམ། །བགྲོད་པར་བྱེད་པའི་ཐབས་ཆེན་ཡིན། །ལམ་འདི་གོམས་པར་བསླབ་བྱ་ན། །རྣལ་འབྱོར་བསླབ་པར་བྱ་བའི་མཐའ། །གནས་བཅུ་དག་ཀྱང་འདི་ལྟ་སྟེ། །ཇི་ལྟར་ས་གཞི་གཤིན་པ་ལ། །བརྟེན་ནས་ས་བོན་བཏབ་པ་ལས། །འབྲས་བུར་སྨིན་པར་གྱུར་པ་ཡིས། །འཚོ་བར་བྱེད་པའི་སྲོག་འཛིན་ལྟར། །ཆོས་ཉིད་ཀུན་གྱི་གཞིར་གྱུར་པའི། །དམ་ཚིག་འདི་ལ་བརྟེན་ནས་ནི། །དངོས་གྲུབ་ལོ་ཏོག་སྨིན་པ་ཡིས། །དགེ་བའི་སྲོག་འཛིན་དམ་པའོ། །བསླབ་པ་འདི་ཡི་དམ་ཚིག་སྟེ། །བསླབ་པ་ཀུན་གྱི་གཞི་འཛིན་དུ། །གོམས་པར་བྱ་བ་རབ་ཏུ་གཅེས། །ཇི་ལྟར་ཅང་ཤེས་གྱི་ལིང་ངག །སྡོམ་བྱེད་སྒྲོག་གིས་བཅིངས་གྱུར་པ། །བཀྲོལ་བྱས་བདེ་བླག་བྱང་འགྱུར་ན། །ཅི་ལ་འཁོགས་མེད་འགྲོ་བ་ལྟར། །སེམས་ཀྱི་ཅང་ཤེས་དབང་པོ་འདི། །མི་ཤེས་བཅིངས་པས་བཅིངས་གྱུར་པ། །རྣམ་གྲོལ་ཐོས་པའི་སྒོ་མོ་ཡིས། །ཤེས་རྒྱུད་ཀུན་གྲོལ་ཐོགས་མེད་འགྲོ། །འདི་ནི་མི་ཤེས་རྒྱུད་འགྲོལ་བའི། །བཅིང་བར་བྱ་བ་འགྲོ་བ་སྟེ། །རྒྱུད་ནས་དགྲོལ་བའི་བསླབ་པ་རུ། །གོམས་པར་བྱ་བ་རབ་ཏུ་གཅེས། །ཇི་ལྟར་རི་མཐོན་རྩེ་མོ་ལ། །སྒྱིད་མི་ལུག་པར་བརྩོན་འཛེགས་ན། །མཐོ་སར་ཕྱིན་ཅིང་རྩེ་ནོན་པས། །ཡུལ་ཁམས་རྟོགས་ཤིང་ལམ་ལ་མཁས། །དེ་བཞིན་ཤེས་རབ་མཐོན་རི་ལ། །སྒྱིད་མི་ལུག་པར་མཉན་
བསམས་ན། །ཀུན་གྱི་ཕུལ་དུ་ཤེས་རབ་ཕྱིན། །མཁས་པའི་ཡེ་ཤེས་ཚད་མེད་དོ། །དོན་ལ་མཁས་པར་བྱ་བ་དེ། །ཕུལ་དུ་དབྱུང་བའི་བསླབ་པ་སྟེ། །ཤེས་རབ་ཆེན་པོ་འདི་དག་ལ། །གོམས་པར་བྱ་བ་རབ་ཏུ་གཅེས། །དཔེར་ན་བུང་བ་ཁུང་ཚོལ་བ། །ཀུན་དུ་འཇུག་ཅིང་བྱུང་ནས་ནི། །རང་གི་འཛུལ་ཁུང་གང་ཡིན་པར། །ངེས་པར་འཇུག་ཅིང་གནས་པ་ལྟར། །རྣལ་འབྱོར་དོན་གྱི་རྗེས་ཚོལ་བ། །སྤྱོད་སྒོ་ཅི་ཡོད་བསྟུན་ཏེ་བསྡུ། །ལྟ་སྒོར་འཇུག་ཅིང་བརྟགས་བསྡུར་ན། །མ་ནོར་ངེས་པའི་དབུ་མ་ལ། །ཆོས་ཉིད་དོན་གྱི་རྗེས་གཅད་ཕྱིར། །སྒོ་མོ་ཀུན་ནས་བསྡུར་བ་ཡི། །བསླབ་པར་བྱ་བའི་མཐའ་ཡིན་ཏེ། །གོམས་པར་བྱ་བ་རབ་ཏུ་གཅེས། །ཇི་ལྟར་རྒྱལ་རིགས་རྒྱུད་བྱུང་བ། །མང་པོའི་དབང་པོར་དཔོན་བསྟབས་ཏེ། །འཁོར་ལོ་ལ་སོགས་རིན་ཆེན་གྱིས། །ཀུན་ལ་དབང་སྒྱུར་ཐོབ་པ་ལྟར། །དེ་བཞིན་རྣལ་འབྱོར་རྒྱུད་བྱུང་བ། །ཆོས་ཀྱི་དབང་པོར་དཔོན་བསྟབས་ཏེ། །ཕྱག་རྒྱ་ལ་སོགས་རྟགས་ཆེན་གྱིས། །རིམ་པར་ཀུན་གྱི་ཐོག་མར་འགྲོ། །འདི་ནི་དབང་གི་ཁྱབ་པར་ཏེ། །ས་ལ་རིམ་པར་འབྱུང་བ་ཡི། །རྩལ་གྱིས་བགྲོད་ཅིང་བསླབ་པའི་མཐའ། །གོམས་པར་བྱ་བ་རབ་ཏུ་གཅེས། །ཇི་ལྟར་གླང་པོ་ཆུར་འཇུག་པ། །ཚམ་ཚོམ་ཆགས་ཐོགས་ཡོང་མེད་པར། །དགའ་བའི་ལོངས་སྤྱོད་བྲོད་ཚུལ་གྱིས། །མི་ལྡོག་ཕ་རོལ་ཕྱིན་པ་ལྟར། །རྣལ་འབྱོར་ངེས་པར་སྤྱོད་པའི་བློ། །བརྟུལ་ཞུགས་རྒྱ་མཚོའི་ཆུར་འཇུག་པ། །རྩལ་ཆེན་སྦྱོང་བའི་བྲོད་ཚུལ་གྱིས། །ཆགས་ཐོགས་མེད་པར་དོར་བའོ། །བསླབ་པར་བྱ་བའི་མཐའ་ཡིན་ནོ། །སྤྱོད་པའི་བསླབ་པ་དམ་པ་ནི། །གོམས་པར་བྱ་བ་རབ་ཏུ་གཅེས། །ཇི་ལྟར་ཁྱུང་ཆེན་མཁའ་ལྡིང་བ། །གཤོག་པའི་རྩལ་གྱིས་ནམ་འཕང་གཅོད། །ངམ་གྲོག་ཆུ་ཀླུང་མཐའ་ཡས་ཀྱང་། །གཤོག་རླབས་འོག་ཏུ་ཀུན་ཆུད་ལྟར། །རྣལ་འབྱོར་མཉམ་ཉིད་མཁར་ལྡིང་བ། །ཐེག་པའི་སྤྱོད་སྒོ་མཐའ་ཡས་ཀྱང་། །མཉམ་པ་ཆེན་པོའི་དོན་གྱིས་ནི། །ལྟ་འཕང་རླབས་ཀྱིས་ཐག་གཅད་པའོ། །འདི་ནི་རེ་དང་དོགས་པ་ཡི། །ཐེ་
ཚོམ་གཅོད་པའི་ལྟ་བ་སྟེ། །དོན་ལ་སེམས་ཀྱིས་བལྟ་བ་སྟེ། །བསླབ་པ་འདི་དག་གོམས་པ་གཅེས། །དཔེར་ན་རྒྱ་མཚོར་ནོར་ལེན་མི། །སྦྲུལ་དང་ཆུ་སྲིན་སྦྲང་མ་ལས། །སོགས་པ་གདུག་པའི་སྡུག་བསྔལ་ཀུན། །དཀའ་བ་ཉམས་སུ་བླངས་ནས་འགྲུབ། །དེ་བཞིན་རྣལ་འབྱོར་བདེ་ཚོལ་བ། །རྣམ་རྟོག་བྱིང་རྨུགས་ཕྱར་གཡེང་དགྲ། །གཞོམ་པར་དཀའ་བའི་ལས་འདི་དག །ཉམས་སུ་བླངས་ན་བདེ་ཐོབ་རྙེད། །འདི་ནི་ཏིང་འཛིན་དམ་པ་ཡི། །ཉམས་སུ་བླངས་པའི་བསླབ་པ་སྟེ། །སེམས་ཀྱི་གོམས་པར་བྱ་བའི་ལས། །འདྲིས་པར་བྱ་བ་རབ་ཏུ་གཅེས། །ཇི་ལྟར་མུན་པ་དུག་དང་རྫས། །སྨན་སྣང་གསེར་དུ་བསྒྱུར་བས་ན། །འགྱུར་རྩི་མན་ངག་མེད་པའི་མིས། །དཀའ་བའི་ལས་ཆེན་སྣ་ཚོགས་པས། །སྡུག་བསྔལ་སྤྱད་ཀྱང་མི་འགྲུབ་སྟེ། །སུ་ཞིག་མན་ངག་ལྡན་པའི་མིས། །ཚེགས་མེད་གྱི་ནའི་ཚུལ་གྱིས་ན། །བསྒྱུར་བས་སྨན་སྣང་གསེར་འགྱུར་ལྟར། །རྣལ་འབྱོར་ཆེན་པོའི་དོན་སྒྲུབ་པ། །ཀུན་གཞི་གནས་འགྱུར་མན་ངག་དང་། །གང་དག་མི་ལྡན་པས་ཀྱང་ནི། །དཀའ་བ་སྤྱད་ཀྱང་འགྲུབ་པ་མིན། །སེམས་ཀྱི་གསང་འདི་སུས་མཐོང་བ། །དེ་དག་མན་ངག་ལྡན་པ་སྟེ། །འདོད་པའི་དོན་མཆོག་གང་ཡིན་པ། །དེ་དག་ཚེགས་མེད་གྱི་ནས་འགྲུབ། །དོན་རྣམས་སྒྲུབ་པར་གང་བྱེད་པ། །མན་ངག་ཅན་གྱིས་འགྲུབ་པའི་ཕྱིར། །དོན་རྣམས་འགྲུབ་པར་འགྱུར་བ་ཡི། །བསླབ་པ་འདི་དག་རབ་ཏུ་གཅེས། །དཔེར་ན་ཀུན་དུ་རྒྱུ་བའི་མི། །འདོད་པའི་ཡུལ་དུ་འགྲོ་བྱེད་ན། །ཡུལ་གྱི་རྣམ་པ་མཐའ་ཡས་ཀྱང་། །བགྲོད་པའི་ལམ་གནས་གཅིག་ལས་མེད། །དེ་བཞིན་བསམ་གྱིས་མི་ཁྱབ་པའི། །བརྒྱད་ཁྲི་བཞི་སྟོང་ཆོས་བསྟན་ཀྱང་། །བཀྲི་ཞིང་དྲང་བའི་ཚིག་ཡིན་ཏེ། །བསམ་པའི་ཡུལ་ནི་གཅིག་པའོ། །དོན་རྣམས་གཅིག་ཏུ་སྡུད་པ་ཡི། །བསླབ་པར་བྱ་བ་དམ་པ་སྟེ། །ངེས་པར་གཅིག་ལས་མེད་པའི་ཕྱིར། །འདི་དག་གོམས་པར་བྱ་བ་ཡིན། །བསླབ་པ་འདི་ལ་གོམས་གྱུར་ན། །ལོབས་
པའི་ཡོན་ཏན་མཐའ་ཡས་ཏེ། །ལོབས་པས་ལམ་ལ་མཁས་པར་འགྱུར། །སྔགས་ཀྱི་ཡོན་ཏན་ཆེན་པོ་ཡང་། །རྨད་དུ་བྱུང་བ་ཐོབ་པར་འགྱུར། །གསང་སྔགས་ཆེན་པོའི་ཁྱད་པར་ནི། །ཐམས་ཅད་ཐམས་ཅད་བྱའོ་ཅོག །བྱིན་གྱི་རླབས་ཀྱི་སྤྱོད་པའམ། །དབང་སྒྱུར་ཐབས་ཀྱི་སྤྱོད་པ་སྟེ། །དཔེར་ན་ནམ་མཁའ་རྒྱ་མཚོ་འམ། །ཇི་ལྟར་མེ་དཔུང་རྒྱལ་པོ་འདྲ། །དེ་ཡང་དེ་ཡུལ་ཆེ་ཆུང་གི། །ཁྱད་པར་ཉིད་ཀྱིས་བརླབས་པ་ཡིན། །རྒྱལ་པོ་དེ་ཡང་ཁྱད་པར་གྱིས། །དབང་སྒྱུར་བྱ་བའི་ཁམས་རྣམས་ལ། །ཆེ་ཆུང་རིམ་པ་ཡོད་པ་ཡིན། །རྣལ་འབྱོར་སྔགས་ཚུལ་དེ་ལྟར་སྣང་། །ཐབས་ཆེན་སྤྱོད་ལ་འཇུག་པ་ཡང་། །བབ་ཆོད་ཐད་དུ་འཇུག་པ་སྟེ། །དཔེར་ན་གླང་ཆེན་ཆུར་འཇུག་པ། །རབ་དང་གླང་ཆེན་བབ་མི་བབ། །དེ་ཡང་རྩལ་སྒྱིད་དྲག་ཞན་གྱིས། །ལ་ལ་ཐད་དུ་གཅོད་པ་ལ། །ལ་ལ་བསེགས་སུ་འགྲོ་བ་ཡིན། །ལ་ལ་ཆུང་ཞིག་བཤད་ཐབས་འགྲོ། །དེ་ལྟར་རྣལ་འབྱོར་རྒྱུ་ཉིད་ན། །འབྲས་བུའི་དོན་ལ་བབ་ཆོད་ཀྱང་། །རྩལ་འཕང་མཐོ་དམན་ཁྱད་པར་གྱིས། །ཇི་ལྟར་ནུས་ཚད་དེར་སྣང་ཕྱིར། །ས་དང་གནས་སྐབས་ཡེ་ཤེས་དང་། །སྒྲིབ་དང་གོལ་ས་རྟོག་པ་དང་། །སྤྱོད་དང་དམ་ཚིག་ཏིང་འཛིན་དང་། །དུས་དང་དངོས་གྲུབ་མཐར་ཕྱིན་དང་། །ལྟ་བའི་ཁྱད་པར་གནས་གྱུར་རྣམས། །ཐམས་ཅད་གཅིག་ལས་མེད་ན་ཡང་། །གྲངས་དང་དབྱེ་བའི་བྱེ་བྲག་རྣམས། །སྣོད་ཀྱི་རྩལ་དང་སྦྱར་ནས་ནི། །ཆོས་རྣམས་ཀུན་གཞིར་གཅིག་པ་ལ། །ཀུན་གཞི་གནས་འགྱུར་རྣམ་པ་ལྔས། །བྱེ་བྲག་ལམ་གྱི་ཆོས་སུ་སྣང་། །གཞི་ཉིད་རྒྱུ་ཡི་ཀུན་གཞི་དང་། །སྦྱོར་བ་འདུན་པའི་ཀུན་གཞི་དང་། །སྣང་བ་དོན་གྱི་ཀུན་གཞི་དང་། །འགྱུར་བ་མེད་པའི་ཀུན་གཞི་དང་། །བཙལ་མེད་གནས་པའི་ཀུན་གཞི་ལྔ། །སྐབས་ལྔ་དག་ཏུ་གནས་འགྱུར་བས། །ས་ཡི་ཁྱད་པར་བགྲོད་པ་ཡིན། །དེ་ཡང་གཉིས་ཀྱི་ཆོས་འདི་དག །ཀུན་ཀྱང་ཡོངས་ཀྱིས་རྣལ་འབྱོར་དང་། །འགྲོ་དོན་གསུམ་གྱིས་འགྲོ་བ་སྟེ། །དགེ་དོན་དང་ནི་སྒྲུབ་པ་པོ། །རིག་འཛིན་ཞེས་
ནི་རྫོགས་པ་ཡིན། །དེས་ན་རྩལ་གྱི་ཁྱད་པར་གྱིས། །དང་པོ་ལས་ཀྱི་རྣལ་འབྱོར་ལ། །སོགས་པའི་རྣལ་འབྱོར་ཆུང་ངུ་རྣམས། །རང་རང་རྩ་བ་བོར་ནས་ནི། །རྩལ་ཆེན་རྫོགས་པའི་རྣལ་འབྱོར་ལ། །སོགས་པའི་རྣལ་འབྱོར་ཆེན་པོའི་ཚུལ། །སྤྱོད་པར་བྱེད་དང་དོན་འདོད་པ། །སྦལ་བུས་མཁའ་ལྡིང་ལས་སྤྱད་ཀྱང་། །བཙལ་བའི་ཡུལ་ནི་ཆད་པ་ཡིན། །ནོར་བུ་ལས་ཀྱིས་འཕང་དམས་པ། །རང་སྐལ་འཚོ་བའི་ཆེད་བོར་ནས། །རྒྱལ་པོ་ཐབས་ཀྱིས་འཕང་མཐོ་བའི། །ལོངས་སྤྱོད་ཆེ་ལ་དམིགས་བཅས་ཀྱང་། །དེ་དག་མི་འཐོབ་འཚོ་བྲལ་བཞིན། །སྐལ་ལྡན་ཅན་གྱི་དོན་འདི་དག །སྐལ་ཞན་དག་གིས་འགྲུབ་པར་དཀའོ། །སྣ་ཚོགས་གཏེར་གྱི་ཁང་པ་དག །རྒྱལ་པོའི་མཛོད་དུ་གྱུར་པས་ན། །སྤྱོད་སྒོ་འཇུག་པ་ཐམས་ཅད་ཀྱང་། །དཀའ་ཐུབ་ཕྱི་ནང་ཁྱད་པར་གྱིས། །རིན་ཆེན་སྣ་དགུའི་རིམ་པ་དག །སོ་སོའི་ལས་ཐབས་མཐོ་དམན་གྱིས། །ཡུལ་དེ་གཅིག་ལས་མེད་ན་ཡང་། །ཡིག་ཚང་སྒོ་དགུ་སོ་སོར་སྤྱོད། །རྒྱལ་པོར་གྱུར་ན་དེ་ཀུན་ལ། །དབང་སྒྱུར་བྱེད་པའི་བདག་པོ་ཡིན། །མི་གནས་ཆོས་ཀྱི་དབྱིངས་ཉིད་དག །བལྟ་བའི་ཡུལ་དུ་གྱུར་པ་ན། །རིག་པ་རྩལ་གྱི་ཁྱད་པར་གྱིས། །བལྟ་ཡུལ་གཅིག་ལས་མེད་ན་ཡང་། །སོ་སོ་འཇུག་སྒོ་ཀུན་ནས་སྤྱོད། །དབྱིངས་ཀྱི་རང་བཞིན་གཅིག་པ་ལ། །རྩལ་འཕང་མཐོ་དམན་ཁྱད་པར་གྱིས། །སྐས་ཀྱི་གདང་བུ་རྩི་བ་ལྟར། །ས་དང་ཐེག་པའི་ཁྱད་པར་དུ། །མཐོ་དམན་རིམ་པར་སྣང་བ་ཡིན། །མཉམ་པར་གྱུར་པའི་གཞི་གཅིག་ལ། །མཐུན་དང་མི་མཐུན་དོན་གྱིས་ནི། །དཔེར་ན་ཁང་པ་སྒོ་མངས་བཞིན། །ས་དང་ཐེག་པ་སོ་སོའི་སྒོ། །མི་མཐུན་སོ་སོར་སྣང་བ་ཡིན། །སོ་སོའི་ཐེག་པའི་སྒོ་རྣམས་ལ། །འཇུག་པ་ལ་སོགས་མ་སྦྱངས་ཀྱང་། །ཀུན་གྱི་རྩ་བ་འདིར་བཅད་པས། །གཅིག་སྟེ་ཐ་དད་ཡོངས་ཀྱིས་མེད། །དེ་ནི་རི་དང་ལྷུན་པོའམ། །ཀུན་དུ་རྒྱུ་དང་གཞོན་ནུ་ལྟར། །མཐོང་ཐོས་སྟོན་པའི་ཁྱད་པར་ནི། །དོན་གྱིས་དེ་ལྟར་ཡོད་པ་ཡིན། །དེས་
ན་ཆོས་རྣམས་ཐམས་ཅད་ཀྱི། །རྩ་བའི་སེམས་འདི་ཡིན་པས་ན། །ནམ་མཁའ་ལྟ་བུའི་དཔེས་མཚོན་ཏེ། །ཀུན་གྱི་རྩ་བ་ཤེས་པར་བྱ། །འདི་ལྟར་ཤེས་པའི་རྣལ་འབྱོར་བ། །ལམ་གྱི་ཐབས་ལ་མཁས་པ་སྟེ། །ལམ་སྟོར་ལམ་བཙལ་ལམ་རྙེད་པས། །ཉེ་ལམ་བདེ་རྙེདགྲུབ་པའོ། །རྙེད་པའི་ལམ་ཉིད་གང་ཞེ་ན། །རྣལ་འབྱོར་སྤྱོད་པའི་ས་ཡིན་ཏེ། །ས་བཅུ་རིམ་གྱིས་བགྲོད་པའི་ཕྱིར། །ས་ཡི་ཁྱད་པར་བཤད་པར་བྱ། །འདི་ཡི་གནས་འཛིན་སྤྱོད་པའི་ས། །རྣམ་པ་བཅུ་ཕྲག་གཅིག་གིས་རྫོགས། །འགྱུར་དབང་མ་ངེས་ས་འདི་ལ། །བཅོས་མ་ཕྲ་མེན་སྤྱོད་པ་དང་། །ཚུལ་རྟགས་འཛིན་དང་མོས་པ་དང་། །དགེ་ལ་འདུན་པའི་རྣལ་འབྱོར་ལྔ། །འཇུག་ལྡོག་ལྟུང་དང་བཅས་པ་ཡིས། །ཀུན་དུ་འཁོར་ཞིང་མ་ངེས་པའོ། །འདུན་པ་སེམས་པའི་རྣལ་འབྱོར་བ། །གནས་ཤིང་སྤྱོད་པའི་ས་ཞེས་བྱ། །བསྟེན་པ་གཞི་ཡི་ས་འདི་ལ། །དང་པོ་ལས་ཅན་རྣལ་འབྱོར་དང་། །བསླབ་པ་སྦྱོང་དང་ངེས་པ་ལ། །དག་དང་མ་དག་གིས་སྤྱོད་པའོ། །བཀའ་སྡོད་ལས་ཀྱི་དང་པོ་པ། །གནས་ཤིང་སྤྱོད་པའི་ས་ཞེས་བཤད། །གལ་ཆེན་སྤྱོད་པའི་ས་འདི་ལ། །གནས་ཤིང་སྤྱོད་པའི་ས་ཡིན་ཏེ། །རིགས་ཆེན་འབྱེད་པའི་རྣལ་འབྱོར་ཉིད། །དགེ་དང་མི་དགེའི་ལས་རྣམས་ཀུན། །གཅོད་སྦྱོང་སྦྱོར་བའི་ཚུལ་ཉིད་ཀྱིས། །ལེགས་ཉེས་སྟོབས་ཆེན་བྱེད་པའོ། །བསླབ་པ་རྒྱུན་གྱིས་འདི་ལ། །གཡོ་དང་ཐོབ་དང་བརྟན་པའི་དྲོད། །དེ་བཞིན་རྟགས་ཆེན་གཡོ་བ་དང་། །ཐོབ་པ་ཉིད་དང་བརྟན་པ་ཡི། །རྣལ་འབྱོར་རྣམ་པ་དྲུག་པོ་དག །བསླབ་པའི་གནས་བཅུ་མཐར་འབྱིན་ཅིང་། །ཇི་ལྟར་ཟླ་བ་ཡར་གསལ་བཞིན། །བསླབ་པའི་ཡེ་ཤེས་འཕེལ་འགྱུར་ཏེ། །དོན་ལ་མི་སྐྲག་ངོ་མཚར་སྐྱེ། །དཔྱོད་སེམས་འཇུག་པའི་ཤེས་པ་དེས། །ངན་སོང་མི་ལྡོག་དགོན་པར་འཇུག །བར་ཆད་དག་ཀྱང་དེ་ལ་བྱུང་། །གསང་སྒོ་ལུང་གི་རྣལ་འབྱོར་དང་། །སྤྱོད་པ་རྒྱུན་གྱི་རྣལ་འབྱོར་དང་། །མཚན་མ་རྟགས་ཀྱི་རྣལ་འབྱོར་གསུམ། །
གནས་ཤིང་སྤྱོད་པའི་ས་ཞེས་བཤད། །བསོད་ནམས་གཏེར་གྱི་ས་འདི་ལ། །སྤྱོད་པ་རྒྱུན་གྱི་རྣལ་འབྱོར་ཉིད། །མོས་པ་དག་ཅིང་འདུན་པའི་གནས། །རྩལ་ཅན་བློ་ཡི་བསྟི་གནས་ས། །བསླབ་པའི་མཐའ་བཅུ་སྤྱིར་ཆིབ་པའོ། །བསྟེན་པས་ཁྱད་པར་འགྲོ་འདི་ལ། །དབུགས་ཆེན་ཕྱིན་པའི་རྣལ་འབྱོར་དང་། །རིགས་ཆེན་འཛིན་དང་མཉམ་རྫོགས་ཆེ། །ངེས་པར་སྤྱོད་དང་རྩལ་ཆེན་སྦྱོང་། །ཡུལ་ལ་འཇུག་དང་རིག་པར་སྦྱོར། །བདུན་ཉིད་རྫོགས་པར་འགྲོ་བ་སྟེ། །བསླབ་པའི་རྒྱུ་འབྲས་འདི་བཅུ་ལ། །གོམས་པར་བྱེད་པའི་ཚུལ་དུ་སྦྱོར། །ངལ་བསོ་བ་ལ་ཐམས་ཅད་མཐོང་། །མི་ལྡོག་ས་ལ་གོམས་བྱར་མེད། །འདི་དག་སྦྱོར་བ་གཞི་གཅིག་ཀྱང་། །སོ་སོ་ཐུན་མོང་མ་ཡིན་པའི། །སྒྲིབ་ལས་ཞེས་རྩི་བྱེད་ཅིང་། །ཡེ་ཤེས་རེ་རེ་འཆར་བའོ། །དེས་ན་བསླབ་པའི་མཐའ་གཅིག་ལ། །མི་ལྡོག་ལ་སོགས་རྫོགས་ཆེན་རྣམས། །མཉམ་པ་ལ་བཞག་རེ་རེ་ལ། །ཡེ་ཤེས་རེ་རེ་འཆར་བ་སྟེ། །ཐ་མ་རང་བྱུང་ཉིད་ཀྱིས་རྫོགས། །མཐར་ཕྱིན་པ་དང་ཐོབ་པ་དང་། །མི་ལྡོག་རྣམས་ལ་རིམ་པ་བཞིན། །རྨི་ལམ་དག་དང་སྒྲ་བརྙན་དང་། །མངོན་སུམ་ངེས་པ་ཅི་རིགས་པར། །རྣལ་འབྱོར་རྡོ་རྗེ་གྲལ་སྐོ་བ། །རྡོ་རྗེ་རྡོ་རྗེ་ཆེ་གེ་མོ། །ཞེས་ནི་ཉིད་དང་ས་ཁམས་དང་། །ཞིང་ཁམས་ཀུན་དུ་བསྒྲགས་བྱས་ནས། །རྣལ་འབྱོར་ལུང་རབ་སྟོན་པའོ། །དམིགས་པའི་འབྲས་བུ་སྐྱེ་འདི་ལ། །གྲུབ་པའི་རྣལ་འབྱོར་རྣལ་འབྱོར་ཆེ། །ངེས་པར་འབྱུང་བའི་རྣལ་འབྱོར་གསུམ། །རྒྱལ་བའི་ཐུགས་ལས་རྒྱལ་སྐྱེས་ཤིང་། །རྒྱལ་བའི་སྲས་པོ་གདུང་འཚོབ་པ། །ཁྱད་པར་རྩལ་འཕང་ཀུན་རྫོགས་ཤིང་། །ཏིང་ངེ་འཛིན་གྱི་སྦྱོར་བའོ། །གནས་པས་མི་འགྱུར་ས་འདི་ལ། །ཚོགས་ཆེན་འདུས་དང་རྩལ་ཆེན་རྫོགས། །གསུམ་དུ་རྫོགས་པར་ཤེས་བྱ་སྟེ། །ཕྱག་རྒྱ་ཆེན་པོ་སྒྱུ་མ་ཡིན། །འཁོར་ལོས་སྒྱུར་བའི་རྒྱལ་ཆེན་པོ། །མཐོང་བའི་གནས་ནས་བཅུ་དྲུག་པ། །རྫོགས་པའི་གནས་ན་ལོངས་པའོ། །བདལ་བ་ཆོས་ཉིད་ས་འདི་ལ། །རོལ་པ་
རྒྱན་གྱི་རྣལ་འབྱོར་དང་། །བདེ་བ་ཆེ་དང་ཐིག་ལེར་རྫོགས། །གསུམ་ཉིད་དུ་ནི་རྫོགས་པ་ལ། །ཡུལ་དོན་ཡེ་ཤེས་དེ་སྦྱར་བ། །ཤེས་པར་བྱས་པས་ཐམས་ཅད་རྫོགས། །སྒྱུ་མའང་སྒྱུ་མ་ཡིན་སྤྱོད་ལ། །རྫོགས་པ་སྤྱིར་ཆིབ་ས་འདི་ནི། །བཅུ་ཡི་ཐ་མ་དང་པོ་ལས། །མཐར་རྫོགས་ཀུན་གྱི་ཐོག་ཡིན་ཏེ། །ཀློང་ཡངས་ནམ་མཁའི་སྙིང་པོ་ལ། །སྤྲིན་མེད་ཉི་མ་འབུམ་གྱིས་བདལ། །ཅིར་སྣང་ཅི་ཡང་མ་ཡིན་པ། །མི་སྐྱེ་མི་འགག་ངོ་བོ་ལ། །ཅི་ལྟར་བལྟས་དགུ་དེར་སྣང་བ། །ཐེག་མཆོག་སྤྱི་རྒྱའི་རླབས་ཀྱིས་བཅད། །དེ་ཡང་ལྟ་བའི་ཁྱད་པར་གྱིས། །བདག་ཉིད་ཆེན་པོའི་རྣལ་འབྱོར་དང་། །ལྷུན་གྱིས་གྲུབ་དང་ཀློང་ཡངས་ཆུབ། །གསུམ་རྫོགས་རང་བྱུང་བདལ་བའོ། །འདི་ནི་རྣལ་འབྱོར་སྤྱོད་པའི་ལམ། །རྣལ་འབྱོར་ཅན་གྱིས་བགྲོད་པར་བྱ། །གཞན་ཡང་འདུས་པའི་རྣལ་འབྱོར་རྣམས། །དོན་གྱི་རྗེས་ནི་ཚོལ་འདོད་ན། །ཚིག་འགའ་ཐོས་པ་ཙམ་གྱིས་ནི། །ཆོག་པའི་འདུ་ཤེས་མ་སྐྱེད་ཅིག །ཁྱེད་ཀུན་རྣལ་འབྱོར་ཡིན་མོད་ཀྱི། །ཡང་དག་དོན་ལ་རྣལ་མི་འབྱོར། །སྤྱོད་པ་འགྱུར་བར་བྱེད་མོད་ཀྱི། །ཡང་དག་དོན་དུ་ཡོང་མ་གྱུར། །ཆགས་སྡང་ལས་ལ་ཞེན་མོད་ཀྱི། །དམ་པའི་དོན་ལ་ཡོང་མ་ཞེན། །ལོངས་སྤྱོད་རྒྱ་ཆེར་བྱེད་མོད་ཀྱི། །ཆོས་ཉིད་དོན་གྱི་རོ་མ་ཚོར། །བདག་མེད་ཕྱོགས་བྲལ་ཟེར་མོད་ཀྱི། །ཉོན་མོངས་ལྔ་དང་ཡོང་མ་བྲལ། །བརྟུལ་ཞུགས་རྟོག་པ་ཆོམས་མོད་ཀྱང་། །གཟུང་འཛིན་རྟོག་པ་ཡོང་མ་ཆོམས། །དེ་བས་འདུས་པའི་རྣལ་འབྱོར་རྣམས། །ཐོས་པ་ཚིག་གི་སྒྲོན་མ་ཡིས། །ཡང་དག་དོན་གྱི་གསེར་བཙལ་ན། །རྟོགས་འདོད་སྤྲེའུ་འདི་བཟུང་ནས་ཀྱང་། །རྐུན་མོ་བྱི་ལ་བཏགས་བྱས་ཏེ། །གསེ་ཁུང་སྐར་ཁུང་ཀུན་དགག་ཅིང་། །ཁང་སྟོང་ཕང་ཕུང་བཤིག་ནས་ནི། །རྒྱལ་པོའི་དཀོར་མཛོད་ཁ་ཕྱེ་ན། །དེ་དག་རྟག་ཏུ་སངས་རྒྱས་ཡིན། །ཡང་དག་དོན་གྱི་ལམ་ཚོལ་ན། །རྟོག་པའི་སྐྱོན་ལྔ་སྤང་བར་བྱ། །རྟོག་པ་རགས་པའི་རི་བོ་དང་། །མཚན་མ་རྒྱུ་བ་ཚོར་བ་དང་། །བྱུང་ཚོར་སྐྱོན་ལྔ་བསལ་བར་བྱ། །
རྟོག་པ་ལ་ཡང་གཉིས་ཡོད་དེ། །རགས་དང་ཕྲ་བར་སྣང་བ་ཡིན། །དེ་བཞིན་མཚན་མ་ཆེ་ཆུང་གཉིས། །རྒྱུ་བ་རིང་པོ་ཐུང་ངུ་གཉིས། །དེ་བཞིན་ཚོར་བ་གསལ་མི་གསལ། །བྱུང་ཚོར་གཉིས་སུ་སྣང་བ་ཡང་། །མྱུར་བ་དང་ནི་བུལ་བའོ། །འདི་ནི་དོན་ལ་སྒྲིབ་པ་ཡི། །རྟོག་པ་ཆེན་པོའི་གེགས་ཆེན་ཡིན། །ཅི་ཕྱིར་དོན་དེ་མི་མཐོང་ཕྱིར། །མུན་པ་དང་ནི་འཁྲིགས་པ་དང་། །ཀུན་དུ་འཐིབས་དང་སྤྲིན་ཕུང་དང་། །ན་བུན་ལྟ་བུར་བསྒྲིབས་པ་ཡིས། །ཡང་དག་མི་གསལ་མཐོང་མི་འགྱུར། །འདི་ཡང་བྱེ་བྲག་གཉིས་གཉིས་ཏེ། །མུན་པ་མུན་ནག་ཆེན་པོ་དང་། །ཀུན་ནས་འཐིབས་པ་ལྟ་བུ་དང་། །ཀུན་དུ་འཁྲིགས་དང་བསྒྲིབས་པ་དང་། །འཐིབས་པ་ཆེན་པོ་ཆུང་ངུ་གཉིས། །སྤྲིན་ཆེན་འཐིབས་དང་འལ་འོལ་དང་། །ན་བུན་གཏམས་དང་བན་བུན་གྱིས། །གནས་ངན་གསུམ་དང་མིའི་གནས་དང་། །འདོད་ཁམས་བཞི་ཡི་ལྷ་གནས་དང་། །གཟུགས་ཀྱི་ཁམས་དང་གཟུགས་མེད་ཁམས། །ཉན་ཐོས་རང་རྒྱལ་གནས་སུ་ལྟུང་། །ལྟུང་བར་འགྱུར་བའི་སྐྱོན་ཆེན་ནི། །མཚན་མའི་གཡེང་བ་རྣམ་དྲུག་ཡིན། །རང་བཞིན་ཡུལ་ལ་གཡེང་བ་དང་། །དེ་བཞིན་ཕྱི་རོལ་གཡེང་བ་དང་། །ནད་དང་མཚན་མའི་གཡེང་བ་དང་། །ཡིད་ལ་བྱེད་དང་གནས་ངན་ལེན། །འདི་དག་རབ་ཏུ་བསལ་བར་བྱ། །བསལ་ནས་དོན་ལ་མཉམ་བཞག་ཆེ། །མཉམ་པའི་དོན་ལ་སྒྲིབ་པའི་སྐྱོན། །རྣམ་པ་ལྔ་འབྱུང་འདི་ལྟ་སྟེ། །བྱུང་ཚོར་དབང་གིས་གཡེང་བ་དང་། །བྱིང་རྨུགས་དབང་གིས་འཐིབས་པ་དང་། །འཛིན་ཆགས་དབང་གིས་འགོག་པ་དང་། །ཐེར་ཟུག་དབང་གིས་རྟོག་པ་དང་། །ཕྱལ་བའི་དབང་གིས་མེད་པ་སྟེ། །འདི་ནི་མཉམ་པའི་སྐྱོན་ཡིན་ནོ། །སྐྱོན་ཆེན་དེ་དག་གླན་པའི་ཆོས། །སེམས་ཀྱི་ལོན་འདི་རྒྱལ་བས་བཤད། །འདུས་པ་ཆེན་པོའི་རྣལ་འབྱོར་བ། །རྣམ་པར་མི་རྟོག་དོན་ཚོལ་ན། །གཅིག་པུ་དབེན་པའི་ས་བཟུང་སྟེ། །ཚད་མ་གསུམ་དང་ལྡན་པའི་བློས། །རྣམ་པར་རྟོག་པའི་རྗེས་གཅད་པ། །ཡོད་མེད་སྔོན་ཐོག་ག་ལས་བྱུང་། །བརྟགས་
བས་རྟོག་པ་ལྟས་ལས་བྱུང་། །རྟོག་པ་སྒྱུ་མར་རབ་ཤེས་ན། །རྟོག་པའི་རི་བོ་ཞི་བར་འགྱུར། །དེས་ནི་གནས་ངན་གསུམ་མི་ལྟུང་། །རྟོག་པ་གང་ལས་བྱུང་ཞེ་ན། །མཚན་མའི་ཆོས་ལས་བྱུང་བ་ཡིན། །མཚན་མ་སྒྱུ་མར་རབ་ཤེས་ན། །མཚན་མའི་ཆོས་རྣམས་ཞི་བར་འགྱུར། །དེས་ནི་འདོད་ཁམས་ཐ་མར་མིན། །མཚན་མ་གང་ལས་བྱུང་ཞེ་ན། །དྲན་པ་རྒྱུ་བ་དག་ལས་བྱུང་། །དྲན་པ་སྐྱོན་དུ་ཤེས་གྱུར་ན། །རྒྱུ་བའི་སྐྱོན་རྣམས་སེལ་བར་བྱེད། །མཐུ་དེས་འདོད་ཁམས་གཉིས་པར་མིན། །རྒྱུ་བ་གང་ལས་བྱུང་ཞེ་ན། །ཚོར་བ་དག་ལས་བྱུང་བ་ཡིན། །དག་ཅིང་སྐྱེ་བར་བྱ་བ་མེད། །ཚོར་བ་སྒྱུ་མར་ཤེས་གྱུར་ན། །སྐྱོན་གྱི་ཚོར་བ་སལ་བར་བྱེད། །འདོད་ཁམས་གསུམ་པར་ལྟུང་མི་འགྱུར། །ཚོར་བ་གང་ལས་བྱུང་ཞེ་ན། །བྱུང་ཚོར་ཕྱི་ནང་དག་ལས་བྱུང་། །དག་ཅིང་སྐྱེ་བར་བྱ་བ་མེད། །དེ་ཉིད་སྐྱོན་དུ་ཤེས་འགྱུར་ན། །དེ་ལྟར་ཤེས་པའི་མཐུ་ཡིས་ནི། །འདོད་ཁམས་བཞི་པར་མི་ལྟུང་ངོ་། །བྱུང་ཚོར་གང་ལས་བྱུང་ཞེ་ན། །སེམས་ཀྱི་ཆོས་ལས་བྱུང་བ་སྟེ། །སེམས་ཉིད་སྒྱུ་མར་རབ་ཤེས་ན། །སེམས་ཀྱི་ཆོས་རྣམས་ཞི་བར་འགྱུར། །ཕུང་པོ་གཟུགས་བརྙན་འདྲ་བ་ལ། །སེམས་ཉིད་སྨིག་རྒྱུ་ལྟ་བུ་ཡིན། །ཡོད་མེད་གཉིས་ཀྱི་མཐའ་ལས་གྲོལ། །དེ་ལྟར་ཤེས་པའི་རྣལ་འབྱོར་པ། །འདོད་ཁམས་ལྔ་པར་ལྟུང་མི་འགྱུར། །སེམས་ཉིད་ཡོད་པའི་དངོས་པོའམ། །མེད་ཅེས་བྱ་བར་མི་ལྟ་བར། །མུ་སྟེགས་ཅན་དུ་ལྟུང་མི་འགྱུར། །བྱིང་རྨུགས་ཅན་དུ་མ་གྱུར་པས། །འདུ་ཤེས་མེད་པར་ལྟུང་མི་འགྱུར། །འདུ་ཤེས་རྗེས་སུ་མ་འབྲངས་པར། །སེམས་ཅན་གནས་སུ་དེ་མི་འཁོར། །ཀུན་གཞིའི་དོན་ལ་གོམས་པས་ནི། །ཉན་ཐོས་གནས་སུ་དེ་མི་ལྟུང་། །སྟོང་ཞིང་ཞི་བར་མི་བྱེད་པས། །རང་རྒྱལ་ལྟ་བར་དེ་མི་ལྟུང་། །རྣམ་དག་སྟོང་པར་མི་བྱེད་པས། །བྱང་ཆུབ་སྤྱོད་པར་ལྟུང་མ་ཡིན། །མཉམ་ཉིད་སྟོང་པའི་དོན་དག་ལ། །སོ་སོ་ཐ་དད་མི་འབྱེད་པས། །ས་ཡི་རིམ་པར་མི་ལྟུང་ཞིང་། །རིམ་གྱིས་སྦྱང་ཞིང་འཕར་
བ་མེད། །ཡང་དག་དོན་གྱི་རང་བཞིན་ནི། །ཅི་ལ་མི་གནས་མི་ལེན་ཅིང་། །ཅི་ཡང་མི་མཐོང་ཐོས་པ་མེད། །ཅིར་ཡང་མི་བྱེད་བྱེད་དང་བྲལ། །ཅི་ཡང་ཐོས་པ་རྡུལ་ཙམ་མེད། །ཅིར་ཡང་སྣང་བ་མེད་པ་དེ། །དེ་ནི་སྣང་བ་དམ་པ་ཡིན། །བསམ་དུ་མེད་པའི་ཆོས་ཉིད་ནི། །བསམ་དུ་མེད་པས་དེ་བཞིན་གཞག །རང་བཞིན་མེད་པའི་ཆོས་ཉིད་ལ། །སེམས་ཀྱི་གྱིན་ད་སྐད་ཅིག་མས། །མི་གཡོ་རྒྱུན་ཏུ་དྲན་པར་བྱ། །དེ་ལྟར་དོན་ལ་མཉམ་བཞག་ན། །རྟགས་ཀྱི་ཚོར་བ་འདི་ལྟར་འབྱུང་། །དྲོད་དང་རྟགས་དང་ཆོ་འཕྲུལ་དང་། །མངོན་ཤེས་དང་ནི་ཡེ་ཤེས་འབྱུང་། །དྲོད་ནི་གཡོ་དང་ཐོབ་པ་དང་། །རྟགས་ནི་བྱུང་དང་བརྟན་པ་དང་། །ཆོ་འཕྲུལ་བྱུང་དང་རྫོགས་པ་དང་། །རིག་པ་ཕྲ་མོ་ཐམས་ཅད་གསལ། །དེས་ནི་དོན་རྣམས་རྫོགས་པ་ཡིན། །དཔེར་ན་མུན་པ་སངས་པ་དང་། །སྣང་བ་བྱུང་དང་ནམ་མཁའ་དང་། །ཀུན་དུ་མཐོང་དང་ཐམས་ཅད་གསལ། །དེ་ལྟར་ཤེས་པའི་མཐུ་ཡིས་ནི། །བག་ཆགས་མུན་པ་ཀུན་བསལ་ཏེ། །ཇི་ལྟར་རླུང་གིས་སྤྲིན་ཕྱགས་ལྟར། །སྐད་ཅིག་ཙམ་གྱི་ཏིང་འཛིན་གྱིས། །སྒྲིབ་པའི་ཕུང་པོ་འཕྱག་པར་འགྱུར། །ཇི་ལྟར་མར་མེས་མུན་བསལ་ན། །མུན་ཉིད་སྣང་བར་འགྱུར་བ་བཞིན། །སྐད་ཅིག་མ་ཡི་དོན་རིག་པས། །སྔོན་ནས་བསགས་པའི་མུན་པ་སེལ། །དེ་ལྟར་རིག་པའི་སྐྱེས་བུ་ནི། །དོན་ལ་རིག་པའི་སྒོ་བྱེ་ཞིང་། །ཆོས་ཀྱི་མིག་དང་དེ་ལྡན་པས། །མཐོང་ཐོས་ཚིག་ལེའུ་ཚིག་བཞིར་བསྡེབས། །ས་པ་ཡིན་པས་དོན་ལ་སྤྱོད། །ཆོས་ཀྱི་མིག་དང་མ་ལྡན་ན། །མུ་མཐའ་ཡས་པའི་ཚིག་རྣམས་ཀྱིས། །དོན་གྱི་ཐ་སྙད་ཅི་བརྗོད་ཀྱང་། །ནོར་མ་ནོར་གྱི་དོན་མི་དཔོགས། །ཚིག་ཕྱིར་བློ་འབྲངས་དམུ་རྒོད་དེ། །བསླབ་པའི་ས་དང་ལམ་པ་ཡིན། །ཚིག་དོན་འབུམ་ཕྲག་ཅི་བརྗོད་ཀྱང་། །གཞན་ལ་སྟོན་པར་མ་བྱེད་ཅིག །བསྟན་ན་རྡོ་རྗེ་བཀའ་རྐུན་དེ། །དམྱལ་བ་རྡོ་རྗེར་དེ་ལྟུང་འགྱུར། །གང་དག་ཚུལ་འཆོས་མཁན་དག་གི། །དོན་ལ་བློ་ཤེད་མ་བྱེ་བར། །
ཚིག་དང་ཡི་གེས་ཁྲིད་ནས་ནི། །མི་ཤེས་བཞིན་དུ་ཆོས་བསྟན་ན། །སེམས་ཅན་ཐམས་ཅད་སྲོག་ཕྲོགས་པས། །མི་ཤེས་ཆོས་སྟོན་དེ་བས་ལྕི། །དེ་བས་མཉམ་པའི་དོན་འདི་ལ། །བསྟུན་ཏེ་ཅིག་ཅར་འཇུག་ཤེས་ན། །བསྒོམ་པའི་ཡུན་ནི་རིང་ཐུང་དང་། །ལས་འཕྲོ་ཡོད་དང་མེད་པ་དང་། །ནམ་གྲུབ་སྙམ་པའི་ཁར་མ་ལུས། །མཉམ་པའི་དོན་ལ་མཉམ་བཞག་ན། །དེ་མ་ཐག་ཏུ་རིག་པ་འཆར། །མཉམ་པའི་དོན་ལས་མ་གཡོས་ན། །གཟུགས་ཁམས་གནས་སུ་དེ་མི་ལྟུང་། །མཉམ་པ་ཉིད་ལ་མ་ཆགས་ན། །གཟུགས་མེད་ཁམས་སུ་ལྟུང་མི་འགྱུར། །མཉམ་ཉིད་མངོན་དུ་གྱུར་པས་ན། །ཉན་ཐོས་གནས་སུ་དེ་མི་ལྟུང་། །ཅི་ཡང་མེད་པའི་དོན་མཐོང་ན། །སངས་རྒྱས་ཞེས་ནི་དེ་ལ་བྱ། །དེས་ནི་ཏིང་འཛིན་ཁྱད་པར་འདི། །རྣལ་འབྱོར་ཅན་གྱིས་འདྲིས་པར་བསྒོམ། །ཐམས་ཅད་མི་རྟོག་སྐྱེ་མེད་ཅིང་། །རྟོག་པའི་མཐའ་སྤངས་ནམ་མཁའི་དབྱིངས། །ཇི་བཞིན་མི་གཡོ་མཉམ་པ་ཉིད། །མཚན་མའི་རྟོག་པ་ཡུལ་ལས་འདས། །ཡུལ་མེད་ནམ་མཁའི་རང་བཞིན་ལས། །སྙིང་རྗེ་ཆེན་པོའི་བྱང་ཆུབ་སེམས། །ཉི་མ་སྟོང་གི་དཀྱིལ་འཁོར་ཤར། །མཚན་མའི་ཆོས་རྣམས་ཀུན་ལ་ཁྱབ། །ཉི་མ་ འབར་བ ་སྙིང་པོ་ལས། །འོད་ཟེར་ཡིག་འབྲུའི་མཆོག་ཏུ་གསལ། །ཐམས་ཅད་འབྱུང་བའི་ཡི་གེ་ཨ། །ཅིར་ཡང་འགྱུར་བའི་རང་བཞིན་ལས། །སྤྲུལ་པའི་ཆོ་འཕྲུལ་ཐམས་ཅད་འབྱུང་། །དེ་ཡང་རྩལ་གྱི་ཁྱད་པར་ལས། །དབུགས་ཀྱི་ཡུལ་དང་ཚོར་བ་དང་། །ཐོས་དང་མཐོང་བ་ལ་སོགས་ཏེ། །སེམས་ཀྱི་ཡུལ་དང་ནམ་མཁའི་དབྱིངས། །ཆོས་ཀྱི་དབྱིངས་ཀྱི་མཐས་ཀླས་པར། །རང་བཞིན་ཡི་གེ་བསྒྱུར་ཡི་གེ། །ཡན་ལག་ཡི་གེ་སོ་སོ་ཡི། །རྩ་བ་ལ་སོགས་གཞི་གཅིག་བཅས། །འཕྲོ་འདུ་ཚད་ཀྱང་ཕྱག་རྒྱ་ཡི། །ཚོམ་བུའི་གྲངས་ཀྱང་དེ་བཞིན་ནོ། །འདི་ནི་དང་པོའི་འཇུག་རིམས་ཏེ། །མཐར་གྱིས་འདྲིས་ཤིང་གོམས་བྱེད་པའོ། །ཡི་གེའི་ཡེ་ཤེས་ལས་སྐྲུན་ཏེ། །དོན་བྱེད་པ་དང་ཕྱག་རྒྱར་སྐྱེད། །རྒྱ་མཚོ་གནོན་དང་ནམ་མཁའི་
སྐས། །རླུང་བཅིང་བ་དང་རྒྱུན་བཟློག་དང་། །བསྲེག་པའི་བསྐལ་བ་གཞིལ་བ་དང་། །ཉི་ཟླ་ཞོན་དང་འཇིག་རྟེན་འཕང་། །ས་ལ་འཛུལ་དང་རི་རབ་འདེགས། །སྟོང་གསུམ་ཡུངས་འབྲུར་འཇུག་ཚུལ་དང་། །གཞིག་དང་སྤར་བ་ལ་སོགས་ཏེ། །བསམ་བྱ་བསམ་གྱིས་མི་ཁྱབ་པ། །གོམས་པ་ལས་སུ་རུང་བ་ཡི། །རྣལ་འབྱོར་རྩལ་ཆེན་སྦྱོང་བར་ཟད། །བཟླས་པ་མཐར་ཕྱིན་གྲུབ་པ་དང་། །བཅིང་བ་ཡོངས་སུ་རྫོགས་པ་དང་། །བསམ་པ་ལས་སུ་རུང་བ་དང་། །དོན་མཐོང་བ་དང་ཚིག་གྲུབ་པ། །བྱ་བ་ཡོངས་སུ་དག་པ་དང་། །དོན་གཅིག་ཡུལ་ལ་སོ་སོར་སྣང་། །དེས་ན་ཏིང་འཛིན་ཁྱད་པར་ཡང་། །དབྱིངས་ཉིད་གཅིག་ལ་སྒོམ་མོད་ཀྱི། །རྣལ་འབྱོར་རྩལ་གྱི་ཁྱད་པར་གྱིས། །བསམ་པའི་ཡུལ་ནི་སྣ་ཚོགས་ཏེ། །དང་པོའི་ས་ལ་གནས་པ་ཡི། །བརྩམ་པ་ལས་ཀྱི་རྣལ་འབྱོར་བ། །འདུན་པ་སེམས་པའི་རྣལ་འབྱོར་ལས། །སོགས་པའི་རྣལ་འབྱོར་རྣམ་དྲུག་པོ། །ཤེས་རབ་རྩལ་གྱི་འཕང་དམས་པས། །ཏིང་འཛིན་རྩལ་ཡང་ཆུང་བ་སྟེ། །དོན་ལ་མཐོང་བར་མི་འགྱུར་ཏེ། །རང་གི་མོས་པའི་ལྷ་སྒོམ་ན། །ལྷ་ཡི་ས་བོན་གང་ཡིན་པ། །ཁ་དོག་ཚོན་གྱིས་ཕྱེ་ནས་ནི། །སྣ་ཡི་དབུགས་ལ་རྒྱུ་བྱས་ཏེ། །དབུགས་ཀྱི་ཡུལ་དུ་གྱུར་ཚད་དུ། །ཟུང་བསྒྲིལ་ཕར་འཕྲོ་གསལ་བ་ལས། །འཕྲོ་འདུའི་གནས་སུ་བསྐྱེད་པར་བྱ། །རང་གི་ཆག་ཚད་དང་སྦྱར་བའི། །སྐུ་ཡི་ཁྱོན་ཡང་དེ་ཙམ་མོ། །གཉིས་པའི་ས་ལ་གནས་པ་ཡི། །བཀའ་སྡོད་ལས་ཀྱི་རྣལ་འབྱོར་ལས། །སོགས་པའི་རྣལ་འབྱོར་རྣམ་བཞི་པོ། །ཏིང་འཛིན་རྩལ་གྱི་ཁྱད་པར་ནི། །ས་བོན་རང་བཞིན་ཡི་གེ་ལ། །འོད་ཟེར་འབར་བར་བཅས་པ་དེ། །དྲི་བྱུང་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བསྐྱེད་པ་ལས། །རང་གི་ཆག་ཚད་གཉིས་བསྒྱུར་བའི། །སྐུ་ཡི་ཁྱོན་ཡང་དེ་ཙམ་མོ། །གསུམ་པའི་ས་ལ་གནས་པ་ཡི། །རྣལ་འབྱོར་ལུང་གི་བཀའ་བསྒོ་ལས། །སོགས་པའི་རྣལ་འབྱོར་རྣམ་གསུམ་པོ། །དམིགས་པའི་ཏིང་འཛིན་འདི་ལྟར་འདོད། །ལྷ་ཡི་ས་བོན་གང་ཡིན་པ། །རང་
བཞིན་ཡི་གེར་བསྒྱུར་བྱས་ཏེ། །འོད་ཟེར་འབར་དང་བཅས་པ་ཡིས། །ཐོས་པའི་ཡུལ་ནི་ཚུན་ཆད་དུ། །འཕྲོ་འདུ་གསལ་བར་བྱས་པ་ལས། །རང་གི་ཆག་ཚད་བཞི་བསྒྱུར་ཙམ། །སྐུ་ཡི་ཁྱོན་ཡང་དེ་ཙམ་མོ། །དེ་བཞིན་རྣལ་འབྱོར་རིམ་པ་བཞིན། །ལྷ་ཡི་ཁྱད་པར་གང་ཡིན་པ། །ཡི་གེའི་རིམ་པ་བཞིན་བྱས་ནས། །འཕྲོ་འདུའི་ཚད་ཀྱང་དེ་བཞིན་ཏེ། །རིམ་པ་བཞིན་དུ་སྦྱར་ནས་ཀྱང་། །འཕྲོ་འདུ་གསལ་བར་གྱུར་པ་དང་། །སེམས་ཀྱི་ལྕོགས་ཚད་ཚུན་ཆད་དུ། །སྐུ་ཡི་ཁྱོན་གྱི་ཁྱད་པར་ཡང་། །ཆོས་ཀྱི་དབྱིངས་ཀྱི་མཐས་ཀླས་པར། །སྐུ་ཡི་ཁྱོན་གྱིས་གང་བར་བསྒོམ། །གཞན་ཡང་འདུས་པའི་རྣལ་འབྱོར་རྣམས། །ཡི་གེའི་རྗེས་སུ་དོན་དཔགས་ན། །ཡི་གེས་དོན་རྣམས་སྟོན་པར་འགྱུར། །ཅི་ཕྱིར་དོན་ཉིད་ཡི་གེར་སྣང་། །དབྱིངས་ལས་ཨ་བྱུང་ཨ་ལས་ནི། །ཡི་གེའི་ཚོགས་བྱུང་སྣ་ཚོགས་འཕྲོས། །ཨ་ནི་རང་བཞིན་ཡི་གེ་སྟེ། །རྟེན་དང་བྲལ་བས་རྒྱུ་རྐྱེན་མེད། །ཀུན་ལ་ཁྱབ་པས་ནམ་མཁའ་འདྲ། །ཨ་ནི་ཆོས་ཉིད་ཆོ་འཕྲུལ་ཏེ། །ཆོས་ཉིད་ཟབ་མོའི་ངང་ལས་ནི། །ཆོ་འཕྲུལ་ཡི་གེ་ཨ་བྱུང་བས། །ཨས་ནི་ཆོས་ཉིད་མཚོན་པར་བྱེད། །ཨ་ལས་ཡིག་འབྲུའི་ཚོགས་འཕྲོས་ཏེ། །ཚིག་ཚོགས་བསྟན་པ་རྒྱ་མཚོར་གྲགས། །ཡི་གེའི་སྒྲ་སྐད་ཀུན་བཟུང་སྟེ། །སྣ་ཚོགས་ཡི་གེའི་སྐད་དུ་བསྒྱུར། །ཡིག་འབྲུ་ཡན་ལག་མང་པོ་རྣམས། །རང་བཞིན་ཨ་ཡི་ངང་དུ་འདུས། །ཐུགས་ཀྱི་ཀློང་ནས་ཨ་བྱུང་བས། །ཨ་ཡི་འོད་ཟེར་འཕྲོ་འདུ་ལས། །མགུར་གྱི་གསང་བར་ཤར་བ་ལས། །གསུང་སྒྲ་ཡི་གེ་ལྔར་འཕྲོས་པ། །ཨ། ཀ་ཁ་ག་གྷ་ང་། དེ་ནས་ཨ་ཡི་འོད་ཟེར་དེ། །ལྗགས་ཀྱི་ཟླ་གམ་པདྨར་འཕྲོས། །ལྗགས་ཀྱི་མཐིལ་དུ་འཁྱིལ་བ་ལས། །འོད་ཟེར་ཡིག་འབྲུ་ལྔར་ཤར་བ། །ཙ་ཚ་ཛ་ཛྷ་ཉ། དེ་ནས་ཨ་ཡི་འོད་ཟེར་དེ། །ལྗགས་ཀྱི་རྩེ་ལ་འཕྲོས་པ་ལས། །འོད་ཟེར་ཡིག་འབྲུ་བཅུར་ཤར་བ། །ཊ་ཋ་ཌ་ཌྷ་ཎ། ཏ་ཐ་ད་དྷ་ན། དེ་ནས་ཨ་ཡི་འོད་ཟེར་དེ། །ཞལ་གྱི་སྒོ་ནས་འཕྲོས་པ་ལས། །ཆོ་འཕྲུལ་ཡི་གེ་ལྔར་
ཤར་བ། །བ་པ་བ་བྷ་མ། །དེ་ནས་ཨ་ཡི་འོད་ཟེར་དེ། །ཕྱི་རོལ་ཡུལ་དུ་འཕྲོས་པ་ལས། །ཆོ་འཕྲུལ་ཡི་གེ་སྣ་ཚོགས་འཕྲོས། །ཡ་ཝ་ར་ལ་ཤ་ཥ་ས་ཧ་ཀྵ། ཨི་ཨཱི་ ཨུ་ཨཱུ ཨེ་ཨཻ་ ཨོ་ཨཽ་ ཨྃ་ཨཿ། ཨ་ལས་ཆོ་འཕྲུལ་འོད་འཕྲོས་པས། །ཡི་གེའི་ཕྲེང་བ་ཚོགས་བྱུང་སྟེ། །ཡི་གེའི་ཡན་ལག་ཡེ་ཤེས་ལ། །སངས་རྒྱས་སྐུ་ཡི་ས་བོན་བྱུང་། །དཔག་ཏུ་མེད་པའི་རྒྱལ་བ་རྣམས། །སྐུ་དང་གསུང་ཐུགས་སྤྲུལ་པའི་ཚོགས། །ཕྱག་རྒྱ་སྣ་ཚོགས་མཛེས་པར་སྣང་། །དེས་ན་ཡི་གེའི་རང་བཞིན་ནི། །རྒྱལ་བའི་སྐུ་ཉིད་ཡིན་པར་བཤད། །ཨ་ནི་ཐུགས་ཀྱི་ས་བོན་ཏེ། །ཀ་ལ་སོགས་པ་དང་པོ་ལྔ། །མགུར་གྱི་གསང་བའི་རང་བཞིན་ཡིན། །གཉིས་པ་ཙ་ལ་སོགས་པ་ལྔ། །ཟླ་གམ་ལྗགས་ཀྱི་རང་བཞིན་ཡིན། །གསུམ་པ་ཊ་ལ་སོགས་པ་བཅུ། །ལྗགས་ཀྱི་རྩེ་མོའི་རང་བཞིན་ཡིན། །བཞི་བ་པ་ལ་སོགས་པ་ལྔ། །ཞལ་གྱི་སྒྲོས་ལས་བྱུང་བར་བཤད། །ལྔ་པ་ཡ་ལ་སོགས་པ་ཡི། །བཅུ་ཚན་གཉིས་ཀྱི་ཡི་གེ་དག །སྐུ་ལས་འཕྲོས་པར་རབ་ཏུ་བཤད། །ཞབས་ཀྱི་འཁོར་ལོའི་འོད་ཟེར་ལས། །སྒྲིབ་པ་སྲེག་པའི་ཡིག་འབྲུ་ཧ། །གསང་བའི་མཁའ་ཡི་འོད་ཟེར་ལས། །ཆོ་འཕྲུལ་འབྱུང་བའི་ཡིག་འབྲུ་ཀྵ། །སྐུ་ཡི་ཁྲུན་ཚད་ལྟེ་བ་ལས། །འདོད་པ་འབྱུང་བའི་ཡིག་འབྲུ་ཧྭ། །ཐུགས་ཀར་འཁྱིལ་པའི་དཔལ་བེའུ་ལས། །མཚན་མ་དག་པའི་ཡིག་འབྲུ་ཤ། །ཕྱག་གི་འཁོར་ལོའི་འོད་ཟེར་ལས། །ཆོ་འཕྲུལ་སྟོན་པའི་ཡིག་འབྲུ་ཤུ། །སྐྱེས་བུ་ཆེན་པོའི་དཔུང་པ་ལས། །རྟོག་པ་འཇོམས་པའི་ཡིག་འབྲུ་ལ། །སྐྱེས་བུ་ཆེན་པོའི་སྟ་ཟུར་ལས། །འདོད་ཆགས་སྲེག་པའི་ཡི་གེར། །སྐྱེས་བུ་ཆེན་པོའི་དཀུ་སྐབས་ལས། །གཏི་མུག་སེལ་བའི་ཡི་གེ་ཝ། །སྐྱེས་བུ་ཆེན་པོའི་བྱིན་པ་ལས། །འཁོར་བ་གནོན་པའི་ཡིག་འབྲུ་ཡ། །སྐྱེས་བུ་ཆེན་པོའི་སྤྱན་གཉིས་ལས། །རང་བཞིན་ཡི་གེ་ཨི་གཉིས་ཤར། །སྐྱེས་བུ་ཆེན་པོའི་སྙན་གཉིས་ལས། །རང་བཞིན་ཡི་གེ་ཨུ་གཉིས་ཤར། །སྐྱེས་བུ་ཆེན་པོའི་ཤངས་གཉིས་ལས། །རང་བཞིན་
ཡི་གེ་ཨེ་གཉིས་ཤར། །སྐྱེས་བུ་ཆེན་པོའི་ཚེམས་གཉིས་ལས། །རང་བཞིན་ཡི་གེ་ཨོ་གཉིས་ཤར། །སྐྱེས་བུ་ཆེན་པོའི་སྤྱི་གཙུག་ནས། །རྒྱལ་བའི་ས་བོན་ཨྃ་དུ་ཤར། །དེས་ན་ཡིག་འབྲུའི་ཡན་ལག་ཀུན། །རྒྱལ་བ་རྒྱ་མཚོའི་སྐུ་གསུང་ཐུགས། །ཨོྃ་ནི་སྐུ་ཡི་རང་བཞིན་ཏེ། །ཨཱཿནི་ཐུགས་ཀྱི་མཚན་ཉིད་དོ། །ཡི་གེའི་ཕྲེང་བ་མང་པོ་ཀུན། །གསུང་བརྗོད་གསུང་གི་རང་བཞིན་ནོ། །ཨཱཿནི་ཆོས་སྐུའི་རང་བཞིན་ཏེ། །ཨྃ་ནི་ལོངས་སྤྱོད་རྫོགས་པའི་སྐུ། །ཡིག་འབྲུ་ འབར་བའི་ཕྲེང་བ ་རྣམས། །སྤྲུལ་པ་འདྲེན་པའི་སྐུ་ཞེས་བཤད། །ཨ་ནི་ཆོས་ཀྱི་དབྱིངས་ཡིན་ཏེ། །ཨོཾ་ནི་རིག་པའི་ཡེ་ཤེས་ཡིན། །ཡིག་འབྲུ་ འབར་བའི་ཕྲེང་བ ་རྣམས། །ཆོས་དང་ཆོས་ཉིད་རང་བཞིན་ཡིན། །ཨ་ནི་བརྗོད་པའི་རྒྱུ་ཡིན་ཏེ། །ཨོྃ་ནི་ཚིག་ཚོགས་འབྱུང་བའི་རྒྱུ། །ཚིག་གི་ཚོགས་ཉིད་ཡི་གེ་ཡིན། །ཡི་གེ་རིང་བའི་ཚིག་གི་མཛོད། །ཡི་གེ་འོད་ཟེར་འབར་འཕྲོས་པས། །ཆོས་དང་ཆོས་མ་ཡིན་པ་རྣམས། །ངག་གི་དབང་པོ་ཁ་ཕྱེ་སྟེ། །དོན་དང་ཚིག་ཏུ་རྒྱས་པར་འགྱུར། །སྒྲ་སྐད་ཀུན་གྱིས་བསྡུས་པའི་ཚོགས། །ཡིག་འབྲུ་ཕྲེང་བའི་ངང་དུ་རྫོགས། །ཚིག་དང་ཡིག་འབྲུ་ཐམས་ཅད་ཀུན། །ཨོྃ་གྱི་རང་བཞིན་ངང་དུ་རྫོགས། །ཨོྃ་གྱི་ཆོ་འཕྲུལ་ཐམས་ཅད་ཀུན། །ཨ་ཡི་རང་བཞིན་དབྱིངས་སུ་ཞི། །ཨ་ནི་ཡིག་འབྲུ་ཀུན་གྱི་གཏེར། །ཨ་ཉིད་ཆོས་ཀྱི་དབྱིངས་སུ་ཐིམ། །དེས་ན་རྒྱལ་བ་སངས་རྒྱས་རྣམས། །སྐུ་དང་གསུང་ཐུགས་རྡོ་རྗེ་དེ། །འདུལ་བའི་དབང་གི་ཁྱད་པར་གྱིས། །ཅིར་ཡང་འགྱུར་ཞིད་ཅིར་ཡང་སྣང་། །ས་དང་ནམ་མཁའ་མེ་དང་རླུང་། །ཆུ་ལ་སོགས་པའི་རྫས་རྣམས་ཀྱིས། །འདུལ་བའི་འགྲོ་བ་དེ་རྣམས་ལ། །ས་དང་ནམ་མཁའ་ལ་སོགས་པའི། །ཆུ་དང་རླུང་གི་ངོ་བོར་སྣང་། །གང་དག་སྐུ་ཡིས་འདུལ་བའི་ཚེ། །སྐུ་དང་གཟུགས་བརྙན་རིང་བསྲེལ་དང་། །རྟེན་ལ་སོགས་པ་ཐ་དད་པར། །འཇིག་རྟེན་ཀུན་དུ་སྟོན་པར་འགྱུར། །གསུང་གིས་འདུལ་བའི་དུས་བྱུང་ན། །དབྱངས་ཀྱི་ཡན་ལག་དྲུག་ཅུ་ལས། །སོགས་པའི་
སྒྲ་སྐད་སྣ་ཚོགས་དང་། །ཡི་གེའི་གཟུགས་སུ་བསྟན་ནས་ནི། །འཁོར་བའི་ཁམས་སུ་སྣང་བར་བྱེད། །ཅིའི་ཕྱིར་ཞེ་ན་ཡི་གེ་ནི། །དེ་བཞིན་གཤེགས་པ་ཉིད་ཡིན་ཏེ། །དེ་བཞིན་གཤེགས་པའི་རང་བཞིན་ཏེ། །ཐུགས་རྗེའི་རང་བཞིན་ཡིན་པས་ན། །ཐབས་ཀྱི་བྱེ་བྲག་སྣ་ཚོགས་ཀྱིས། །ཐམས་ཅད་གྲོལ་བར་མཛད་པའོ། །དེ་བཞིན་ཡི་གེའི་ཚོགས་འདི་ཡང་། །ཡན་ལག་སྦྱོར་སྡུད་སྣ་ཚོགས་ཀྱིས། །ཐམས་ཅད་ཚིག་ཏུ་གོ་བར་བྱེད། །ཡི་གེ་རང་བཞིན་ཡེ་ཤེས་ནི། །སོ་སོའི་དོན་རྣམས་བཤད་པར་བྱ། །ཨ་ནི་མ་སྐྱེས་ཡེ་ཤེས་ཡིན། །རང་བཞིན་ཐམས་ཅད་སྟོང་བར་སྟོན། །ཀ་ནི་བྱ་བའི་ཡེ་ཤེས་ཏེ། །ལམ་གྱིས་ཐམས་ཅད་གྲོལ་བར་སྟོན། །ཁ་ནི་ཁྱབ་པར་བྱེད་པའི་སྒོ། །མི་དམིགས་ཐམས་ཅད་གྲོལ་བར་སྟོན། །ག་ནི་དོན་དུ་གྱུར་པའི་སྒོ། །ཡུལ་མེད་ཐམས་ཅད་གྲོལ་བར་སྟོན། །གྷ་ནི་གནས་པའི་སྒོ་ཡིན་ཏེ། །གཅིག་ཏུ་མ་ངེས་གྲོལ་བར་སྟོན། །ང་ནི་འཛིན་པ་མེད་པའི་སྒོ། །འཛིན་བྲལ་ཐམས་ཅད་གྲོལ་བར་སྟོན། །ཙ་ནི་འགག་པ་མེད་པའི་སྒོ། །ཅིར་ཡང་སྣང་བས་ཐམས་ཅད་གྲོལ། །ཚ་ནི་འདའ་བ་མེད་པའི་སྒོ། །འབྲལ་བ་མེད་པས་ཐམས་ཅད་གྲོལ། །ཛ་ནི་མ་བྱུང་བ་ཡི་སྒོ། །མི་གནས་པས་ནི་ཐམས་ཅད་གྲོལ། །ཛྷ་ནི་རྙོག་མ་བྲལ་བའི་སྒོ། །དྲི་མ་དག་པས་ཐམས་ཅད་གྲོལ། །ཉ་ནི་སྤྱོད་དང་བྲལ་བའི་སྒོ། །བྱ་བ་མེད་པས་ཐམས་ཅད་གྲོལ། །ཊ་ནི་ང་རྒྱལ་མེད་པའི་སྒོ། །རི་བོ་མེད་པས་ཐམས་ཅད་གྲོལ། །ཋ་ནི་སྒྱུ་རྩལ་མེད་པའི་སྒོ། །བྱེད་པ་མེད་པས་ཐམས་ཅད་གྲོལ། །ཌ་ནི་འདྲེས་པ་མེད་པའི་སྒོ། །རྩོད་པ་མེད་པས་ཐམས་ཅད་གྲོལ། །ཌྷ་ནི་སླུ་བ་མེད་པའི་སྒོ། །སྒྱུ་མ་ཐམས་ཅད་གྲོལ་བར་བྱེད། །ཎ་ནི་ཡུལ་དང་བྲལ་བའི་སྒོ། །འཛིན་པ་མེད་པས་ཐམས་ཅད་གྲོལ། །ཏ་ནི་ཐ་སྙད་མེད་པའི་སྒོ། །བརྗོད་པ་མེད་པས་ཐམས་ཅད་གྲོལ། །ཐ་ནི་རྟེན་དང་བྲལ་བའི་སྒོ། །གནས་པ་མེད་པས་ཐམས་ཅད་གྲོལ། །ད་ནི་གཏོང་དང་བྲལ་བའི་སྒོ། །ལེན་པ་མེད་པས་
ཐམས་ཅད་གྲོལ། །དྷ་ནི་རང་བཞིན་མེད་པའི་སྒོ། །མཚན་ཉིད་མེད་པས་ཐམས་ཅད་གྲོལ། །ན་ནི་ཡུལ་དང་བྲལ་བའི་སྒོ། །འཛིན་པ་མེད་པས་ཐམས་ཅད་གྲོལ། །པ་ནི་ངེས་པར་འབྱུང་བའི་སྒོ། །འགག་པ་མེད་པས་ཐམས་ཅད་གྲོལ། །ཕ་ནི་དངོས་པོ་མེད་པའི་སྒོ། །ཅི་ཡང་མེད་པས་ཐམས་ཅད་གྲོལ། །བ་ནི་བརྗོད་པ་མེད་པའི་སྒོ། །བརྗོད་པ་མེད་པས་ཐམས་ཅད་གྲོལ། །བྷ་ནི་རྡུལ་དང་བྲལ་བའི་སྒོ། །རྟོག་པ་མེད་པས་ཐམས་ཅད་གྲོལ། །མ་ནི་ཆགས་པ་མེད་པའི་སྒོ། །རྟག་པ་མེད་པས་ཐམས་ཅད་གྲོལ། །ཡ་ནི་ཆགས་པ་མེད་པའི་སྒོ། །གོས་པ་མེད་པས་ཐམས་ཅད་གྲོལ། །ཝ་ནི་རྒྱུ་རྐྱེན་མེད་པའི་སྒོ། །འབྲས་བུ་མེད་པས་ཐམས་ཅད་གྲོལ། །ར་ནི་རྐྱེན་དང་བྲལ་བའི་སྒོ། །དོར་བ་མེད་པས་ཐམས་ཅད་གྲོལ། །ལ་ནི་བླང་བ་མེད་པའི་སྒོ། །ཡོན་ཏན་མེད་པས་ཐམས་ཅད་གྲོལ། །ཤ་ནི་སྤྲོས་པ་མེད་པའི་སྒོ། །ཞི་བས་ཐམས་ཅད་གྲོལ་བར་བྱེད། །ཥ་ནི་ཁུར་དང་བྲལ་བའི་སྒོ། །ལྕི་བ་མེད་པས་ཐམས་ཅད་གྲོལ། །ས་ནི་ཡང་དག་གསང་བའི་སྒོ། །ངེས་པས་ཐམས་ཅད་གྲོལ་བར་བྱེད། །ཧ་ནི་རྒྱུ་དང་བྲལ་བའི་སྒོ། །རྐྱེན་དང་བྲལ་བས་གྲོལ་བར་བྱེད། །ཨ་ནི་ཁམས་དང་བྲལ་བའི་སྒོ། །མཚན་ཉིད་མེད་པས་གྲོལ་བར་བྱེད། །ཨི་ནི་མཐོང་བ་མེད་པའི་སྒོ། །གཟུགས་དང་བྲལ་བས་ཐམས་ཅད་གྲོལ། །ཨུ་ནི་ཐོས་པ་མེད་པའི་སྒོ། །སྒྲ་དང་བྲལ་བས་ཐམས་ཅད་གྲོལ། །ཨེ་ནི་ཚོར་བ་མེད་པའི་སྒོ། །དྲི་དང་བྲལ་བས་གྲོལ་བར་བྱེད། །ཨོ་ནི་ཚོར་བ་མེད་པའི་སྒོ། །རེག་དང་བྲལ་བས་ཐམས་ཅད་གྲོལ། །ཨྃ་ནི་ཆོ་འཕྲུལ་འབྱུང་བའི་སྒོ། །ཅིར་ཡང་སྣང་བས་ཐམས་ཅད་གྲོལ། །མྱ་ངན་འདས་དང་འཁོར་བའི་ཆོས། །ཡོད་མཐོང་སྣང་གྲགས་ཆོས་ཐམས་ཅད། །ཡི་གེའི་ཚོགས་སུ་མངོན་སངས་རྒྱས། །ཡི་གེར་མ་གྱུར་གང་ཡང་མེད། །ཆོས་ཉིད་སྙིང་པོའི་ཉི་མ་ལ། །འོད་ཟེར་ཡིག་འབྲུའི་ཚོགས་སུ་འབར། །ཆོས་ཉིད་ནམ་མཁའ་ལྟ་བུ་ལ། །ཡིག་འབྲུ་སྣ་ཚོགས་ཕྲ་བཀོད་པ། །དུས་གསུམ་རྒྱལ་བའི་
དཀྱིལ་འཁོར་རྫོགས། །ཉི་མ་འབར་བའི་འོད་ཟེར་ལས། །འོད་ཀྱི་འབར་བའི་རྡོ་རྗེ་འབར། །ཡི་གེ་ཧཱུཾ་གི་འོད་འཕྲོས་པས། །རྡོ་རྗེ་སྙིང་པོའི་ས་བོན་ཞེས། །རྡོ་རྗེ་རིགས་ཀྱི་ཞིང་དུ་གྲགས། །ཉི་མའི་འོད་ཟེར་རིན་ཆེན་ལས། །ཡིག་འབྲུ་འོད་ཀྱི་སྭ་འཕྲོས་པས། །རིན་ཆེན་སྙིང་པོའི་ས་བོན་ཞེས། །རིན་ཆེན་རིགས་ཀྱི་ཞིང་དུ་གྲགས། །ཉི་མ་པདྨོ་འབར་འཕྲོས་པས། །ཆོ་འཕྲུལ་ཡི་གེའི་ཨྃ་དུ་འབར། །པདྨ་རིགས་ཀྱི་ཞིང་དུ་གྲགས། །སྣ་ཚོགས་ཉི་མའི་འོད་འཕྲོས་པས། །ཆོ་འཕྲུལ་ཡི་གེ་ཧར་གསལ་བས། །སྣ་ཚོགས་སྙིང་པོའི་ས་བོན་ཏེ། །ལས་ཀྱི་རིགས་ཀྱི་ཞིང་དུ་གྲགས། །དུས་གསུམ་རྒྱལ་བ་ཐམས་ཅད་ཀྱི། །ཐུགས་ནི་རྡོ་རྗེ་ཡེ་ཤེས་ཡིན། །ཡེ་ཤེས་དམ་པས་སྤྲུལ་པ་ཡི། །རྒྱལ་བ་དཔག་ཏུ་མེད་པ་ལ། །རྡོ་རྗེ་རིགས་ཞེས་བྱ་བར་བཤད། །ཡོན་ཏན་ཡེ་ཤེས་རིན་ཆེན་ཡིན། །རིན་ཆེན་དེ་ལས་སྤྲུལ་པ་ཡི། །རྒྱལ་བ་དཔག་ཏུ་མེད་པ་ལ། །རིན་ཆེན་རིགས་ཞེས་བྱ་བར་བཤད། །གསུང་གི་ཡེ་ཤེས་པདྨ་སྟེ། །པདྨ་ཡེ་ཤེས་ལས་སྤྲུལ་པའི། །རྒྱལ་བ་དཔག་ཏུ་མེད་པ་ལ། །པདྨོ་རིགས་ཀྱི་ཞིང་དུ་གྲགས། །ཕྲིན་ལས་བྱ་བ་སྣ་ཚོགས་ཏེ། །སྣ་ཚོགས་ཡེ་ཤེས་སྤྲུལ་པ་ཡི། །རྒྱལ་བ་དཔག་ཏུ་མེད་པ་ལ། །ལས་ཀྱི་རིགས་ཞེས་བྱ་བར་བཤད། །སྐུ་ནི་མ་བཅོས་དེ་བཞིན་ཉིད། །དེ་བཞིན་ཉིད་ཀྱི་ཡེ་ཤེས་ལ། །སྤྲུལ་པ་རྒྱལ་བ་དཔག་མེད་ལ། །དེ་བཞིན་རིགས་ཞེས་བྱ་བར་བཤད། །དེ་བས་རིགས་ཀྱི་གཏན་ཚིགས་ནི། །མ་བཅོས་སྐུ་ནི་དེ་བཞིན་ཉིད། །མི་འགྱུར་རིགས་ནི་རྡོ་རྗེའི་རིགས། །ཡོན་ཏན་ཀུན་འབྱུང་རིན་ཆེན་རིགས། །ཆགས་མེད་གསུང་གི་པདྨའི་རིགས། །བྱ་བ་བྱེད་པ་ལས་ཀྱི་རིགས། །སྐུ་ཡི་སྤྲུལ་པ་ཐམས་ཅད་ནི། །དེ་བཞིན་རིགས་ཀྱི་གདུང་རྒྱུད་འཛིན། །ཐུགས་ལས་སྤྲུལ་པའི་སངས་རྒྱས་ནི། །རྡོ་རྗེ་རིགས་ཀྱི་གདུང་རྒྱུད་འཛིན། །ཡོན་ཏན་ཡུལ་གྱི་སངས་རྒྱས་རྣམས། །རིན་ཆེན་རིགས་ཀྱི་གདུང་རྒྱུད་འཛིན། །གསུང་ལས་སྤྲུལ་པའི་སངས་རྒྱས་རྣམས། །པདྨ་རིགས་ཀྱི་གདུང་རྒྱུད་འཛིན། །མཛད་པ་སྤྲུལ་
པའི་སངས་རྒྱས་རྣམས། །ཕྲིན་ལས་རིགས་ཀྱི་གདུང་རྒྱུད་འཛིན། །ཅི་ཕྱིར་རིགས་ཞེས་བྱ་ཞེ་ན། །དང་པོ་དེ་ལས་བྱུང་བ་དང་། །བར་དུ་དེ་ཡི་བྱ་བ་བྱེད། །ཐ་མར་དེ་ཡི་རྒྱུད་འཛིན་ཕྱིར། །དེ་ཕྱིར་རིགས་ཞེས་གྲགས་པ་ཡིན། །དཔེར་ན་མེ་དང་ཆུ་དག་དང་། །ནམ་མཁའ་དང་ནི་ས་དག་ལ། །གནས་པའི་སེམས་ཅན་མཐའ་དག་ཀུན། །གནས་རྒྱུན་ཉིད་ཀྱི་མིང་འཛིན་དེ། །མེ་ལ་གནས་པའི་སེམས་ཅན་ལ། །མེ་ཡི་ཡི་དགས་མ་ཞེས་ཟེར། །ཆུ་ལ་གནས་པའི་སེམས་ཅན་ལ། །ཆུ་སྲིན་ཏྭ་ར་ན་ཞེས་ཟེར། །ཅི་ཕྱིར་ལྔ་ཞེས་བྱ་ཞེ་ན། །རྒྱལ་བ་སངས་རྒྱས་ཐམས་ཅད་ལ། །སྐུ་དང་གསུང་ཐུགས་ཡོན་ཏན་དང་། །མཛད་པ་ཕྲིན་ལས་ཉིད་དང་ལྔ། །རིག་པ་ལྔ་དང་ལྔ་ཉིད་དུ། །ཐམས་ཅད་ཀུན་ཏུ་གསལ་བར་སྣང་། །དེས་ན་ལྔ་ཞེས་ངེས་པར་བཤད། །ཅི་ཕྱིར་ཞེ་ན་སངས་རྒྱས་ཀུན། །ལྔ་པོ་དེ་ལས་མ་གཏོགས་པ། །གཞན་ལས་བྱུང་ཞིང་གཞན་ན་མེད། །སངས་རྒྱས་མཚན་གྱི་ཁྱད་པར་ཡང་། །མཚན་མེད་པ་ལས་མཚན་བཏགས་པ། །ཐམས་ཅད་ལྔ་པོ་ཉིད་ལས་བཏགས། །མཚན་གྱི་བྱེ་བྲག་ཐམས་ཅད་ཀུན། །ཐ་སྙད་ཙམ་དུ་གདགས་པར་ཟད། །རིགས་མེད་པ་ལས་རིགས་སྨོས་པ། །འདུལ་བའི་དབང་དུ་ལྔར་སྣང་ཡང་། །དྲང་བའི་དོན་ཏེ་དངོས་གཞི་མེད། །ཅི་ཡང་མེད་ལས་ཅི་སྣང་བ། །མཁའ་ལ་འཇའ་ཚོན་བྱུང་བ་འདྲ། །ཆོས་ཀུན་ནམ་མཁའ་འདྲ་བ་ཞེས། །གསང་བ་མཆོག་གི་བདག་པོས་བཤད། །མཉམ་དང་མི་མཉམ་མཉམ་པ་ཡིན། །སངས་རྒྱས་མེད་ཅིང་སེམས་ཅན་མེད། །འཁོར་བ་མེད་ཅིང་ཆོས་ཉིད་མེད། །དམིགས་པ་མེད་དེ་མི་དམིགས་མེད། །དེ་ལྟར་ཤེས་པ་མཁས་པ་ཡིན། །རིག་དང་མ་རིག་ཚུལ་གཅིག་སྟེ། །དེ་ལྟར་ཤེས་པ་རྒྱལ་བ་ཡིན། །སེམས་ཅན་རང་བཞིན་སངས་རྒྱས་ཉིད། །སངས་རྒྱས་རང་བཞིན་སེམས་ཅན་ཏེ། །སེམས་ཅན་སངས་རྒྱས་གཅིག་པ་ཡིན། །དེ་ལྟར་ཤེས་པ་རྒྱལ་བའི་སྲས། །བྱང་ཆུབ་ཕྱིར་ནི་གང་མ་བརྙེས། །མ་བརྙེས་གང་ཡང་དེ་མ་བརྙེས། །བརྙེས་པ་མེད་པའི་
དོན་མཐོང་ན། །དེ་ནི་བརྙེས་པའི་མཆོག་ཡིན་ནོ། །གཞན་ཡང་འདུས་པའི་རྣལ་འབྱོར་རྣམས། །ལམ་གྱི་ངོ་བོ་ཚོལ་འདོད་ན། །ལམ་གྱི་རྟགས་ཉིད་དཔེས་མཚོན་ཏེ། །ལམ་གྱི་དོན་ལ་གོམས་པར་བྱ། །མི་གནས་མིག་ལྡན་སྒྲོན་མ་ཡིས། །ལམ་གྱི་རྒྱུ་ལ་མཁས་པར་བྱ། །བག་ཆགས་རྟོགས་པའི་མཚན་མ་རྣམས། །སྣ་ཚོགས་དངོས་པོར་སྣང་མོད་ཀྱང་། །ནམ་མཁའ་དག་ལ་སྨིག་རྒྱུ་འདྲ། །དེ་ཡང་གཏན་ཚིགས་ངེས་པ་ཡི། །དཔེ་ཡིས་མཚོན་ཏེ་རྟོགས་བྱ་ན། །མཁའ་ལ་སྤྲིན་ཕུང་འཇའ་ཚོན་དང་། །ཆར་ལ་སོགས་པའི་རྒྱུན་སྣང་ཡང་། །ནམ་མཁའི་ཆོ་འཕྲུལ་གཅིག་ཏུ་ཟད། །རྟག་ཏུ་དེ་ལྟར་སྣང་བ་མིན། །དཔེར་ན་སྒྱུ་མའི་རང་བཞིན་ཡང་། །སླུ་ཞིང་འདྲིད་པ་ཅིར་སྣང་ཡང་། །སྒྱུ་མའི་འཕྲུལ་པ་སྣང་བར་ཟད། །རྟག་ཏུ་དེ་ལྟར་སྣང་བ་མིན། །དཔེར་ན་རྡོ་ཡི་དངོས་པོ་ཡང་། །སྲ་ཞིང་མཁྲེགས་པའི་དངོས་པོ་ཡང་། །བཏགས་སམ་ཕྱེ་མར་བྱས་ནས་ཀྱང་། །རླུང་གི་མཐུ་ཡིས་གཏོར་བྱས་ན། །དེ་ལ་རང་བཞིན་ག་ལ་ཡོད། །དཔེར་ན་མེ་ཡི་རང་བཞིན་དག །ཚང་ཚིང་སྦར་སྦུར་ཀུན་སྲེག་ཅིང་། །འབར་འཕྲོ་སྣང་གསལ་མཆེད་བྱེད་ན། །ཆུ་ཡི་མཐུ་ཡིས་རླག་འགྱུར་ན། །དེ་ལ་རང་བཞིན་ག་ལ་ཡོད། །དཔེར་ན་རྫས་ཀྱི་དངོས་པོ་ཡང་། །མེ་ཡི་མཐུ་ཡིས་སྲེག་འགྱུར་ན། །དེ་ལ་རང་བཞིན་ག་ལ་ཡོད། །ཤེས་པས་ཟིན་པའི་སེམས་ཅན་རྣམས། །གཟུགས་དང་དྲན་པ་སྣ་ཚོགས་ཀྱི། །དབང་པོ་ལ་སོགས་མཛེས་གྱུར་ཀྱང་། །ཕུང་པོ་མི་རྟག་ཤི་འཕོས་ན། །དངོས་པོ་བརྟན་པར་མི་འགྱུར་ཏེ། །གཟུགས་རྣམས་སོ་སོར་ཞིག་ནས་ནི། །རུས་པ་དག་ཀྱང་མི་སྣང་སྟེ། །ཞིག་དང་རུལ་ལ་སོགས་པ་ཡིས། །ཐ་མར་ཅི་ཡང་མི་སྣང་འགྱུར། །རི་བོ་ཆེན་པོ་ལ་སོགས་པ། །དངོས་པོ་བརྟན་གཡོའི་འཇིག་རྟེན་རྣམས། །སྲེག་པའི་བསྐལ་པ་ལ་སོགས་པ། །བསྐལ་པ་གསུམ་གྱིས་བརླག་བྱས་ན། །དེ་ལ་རང་བཞིན་ག་ལ་ཡོད། །དེས་ན་དངོས་པོའི་ཆོས་རྣམས་ཀུན། །དངོས་པོར་བརྟགས་པ་མ་ཡིན་
པས། །ཆོས་རྣམས་རང་བཞིན་མེད་པར་ཤེས། །འདི་ནི་རྣལ་འབྱོར་ལམ་གྱི་མཆོག །འདུས་པའི་ཚོགས་རྣམས་གོམས་པར་གྱིས། །ཞེས་སེམས་དཔའི་རྡོ་རྗེ་སྨྲ་བའི་སེང་གེས་རྣལ་འབྱོར་མཆོག་གི་ལམ་གསུངས་པའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་རྗེས་སུ་འཇུག་པའི་ལེའུ་སྟེ་གཉིས་པའོ།། །།དེ་ནས་སྨྲ་བའི་སེང་གེ་སེམས་དཔའི་རྡོ་རྗེ་དེ་ཆོ་འཕྲུལ་ཆེན་པོ་སྣ་ཚོགས་སྟོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེའི་བྱིན་གྱི་རླབས་ལས་ཞིང་ཁམས་ཐམས་ཅད་གཡོས་པར་གྱུར་ཏེ། དོན་ཡོངས་སུ་རྫོགས་པའི་སྔ་ལྟས་བྱུང་བར་གྱུར་ཏོ། །འཁོར་དེར་འདུས་པར་གྱུར་པ་རྣམས་ལ་ལ་ནི་ཉི་ཟླའི་སྟེང་ན་གནས་ཤིང་ཆོས་ཉིད་ཀྱི་ནམ་མཁའ་ལ་ལྡིང་བར་གྱུར་ཏོ། །ལ་ལ་ནི་རི་རབ་རྒྱང་མར་འཕེན། ལ་ལ་ནི་སྟོང་གསུམ་ཆེན་པོའི་ཁམས་འཕེན་པར་གྱུར་ཏོ། །ལ་ལ་ནི་ཆོས་ཉིད་བདེན་པའི་དོན་མཐོང་བར་གྱུར་ཏོ། །ལ་ལ་ནི་སེང་གེའི་ཁྲི་ལ་འདུག་པར་གྱུར་ཏོ། །དེ་ནས་སེམས་དཔའི་རྡོ་རྗེ་དེ་ཆོ་འཕྲུལ་གྱི་ཏིང་ངེ་འཛིན་དེ་ལས་བཞེངས་ཏེ། འདུས་པ་ཆེན་པོའི་རྣལ་འབྱོར་གྱིས་ཤིན་ཏུ་ངོ་མཚར་ཆེ་བར་གྱུར་ནས། སེམས་དཔའི་རྡོ་རྗེ་དེ་ལ་རྣལ་འབྱོར་གྱི་ཕྱག་ལུས་ཀུན་དུས་ལ་བརྡབས་ནས་འདི་སྐད་ཅེས་གསོལ་ཏོ། །སེམས་དཔའ་ཆེན་པོ་ཆོ་འཕྲུལ་རྒྱ་ཆེར་གདའ་བ་འདི་དོན་ཇི་ལྟ་བུ་ལགས། རྟགས་ཅི་ལྟ་བུ་ལགས། བདག་ཅག་རྣམས་ལ་རྒྱ་ཆེར་བཤད་དུ་གསོལ་ཞེས་ཞུས་པ་ལས། །སྨྲ་བའི་སེང་གེ་ཆེན་པོས་བཀའ་སྩལ་པ། འདུས་པའི་རྣལ་འབྱོར་རྣམས་འདི་དག་ནི་དོན་ཡོངས་སུ་རྫོགས་པའི་ལྟས་ཆེན་པོ་ཡིན་ཏེ། སྔ་ལྟས་ཀྱི་མཚན་མ་འདི་དང་སྦྱར་ན་འདུས་པ་ཆེན་པོ་རྣམས་ས་ནས་སར་ཤིན་ཏུ་འཕར་ཞིང་ཡང་དག་ངེས་པའི་དོན་མཐོང་བའི་སྔ་ལྟས་ཡིན་ནོ་ཞེས་གསུངས་པ་ལས། །རྣལ་འབྱོར་གྱི་ཚོགས་ཀྱིས་གསོལ་པ། སེམས་དཔའ་ཆེན་པོ་ས་ནོན་པའི་སྔ་ལྟས་ནི་ཇི་ལྟ་བུ་ལགས། །དོན་མཐོང་བའི་སྔ་ལྟས་ནི་ཇི་ལྟ་བུ་ལགས། བདག་ཅག་རྣམས་ལ་བཤད་
དུ་གསོལ་ཞེས་ཞུས་པ་ལས་སེམས་དཔའ་རྡོ་རྗེས་བཀའ་སྩལ་པ། །འདུས་པ་ཆེན་པོའི་ཚོགས་ལེགས་སོ། །ཁྱོད་ཀྱིས་ཞུས་པའི་དོན་རྒྱ་ཆེར་བཤད་པར་བྱའོ། །རྣ་བ་ལྷོགས་ལ་གུས་པར་ཉོན་ཅིག །སྒྲུབ་པ་དོན་གྱི་རྣལ་འབྱོར་པ། །རྣལ་འབྱོར་དོན་ལ་སྦྱོར་བའི་ཚེ། །སྤྱད་པའི་ལས་ཀྱི་ཁྱད་པར་གྱིས། །ཁམས་དང་ས་ནི་གར་འགྲོ་བ། །མདོ་དོན་ཚུལ་ལྔས་ལུང་བསྟན་ནོ། །ངེས་པའི་སྔ་ལྟས་བྱུང་བ་ཡི། །འབྲས་བུ་དོན་གྱི་ཁྱད་པར་ཡང་། །ཆོ་འཕྲུལ་སྣ་ཚོགས་སྟོན་པར་ནུས། །དེ་ནས་ཡང་དག་བདེན་པ་འཐོབ། །ངེས་པའི་སྔ་ལྟས་རྣམ་པ་ལྔ། །རྒྱུ་ཡི་དུས་ན་འབྱུང་བ་ནི། །ཚིག་གི་བརྗོད་པ་འདི་ལྟ་སྟེ། །བློ་རྩལ་ལས་ཀྱི་ཁྱད་པར་ཡང་། །སྣང་བ་ལུས་ཀྱི་སྔ་ལྟས་དང་། །ངོ་མཚར་རྫས་རྙེད་ཚུལ་རྟགས་དང་། །མཚན་མ་པྲ་ཡི་རྨི་ལྟས་དང་། །འདུན་པ་མང་པོའི་སྔ་ལྟས་ཀྱིས། །འབྲས་བུ་གང་དང་གང་འགྲུབ་པ། །མཚན་མ་གསལ་བར་རྒྱུད་ལས་འབྱུང་། །དཔེར་ན་མེ་ཡི་སྔ་ལྟས་ནི། །དུ་བའི་མཚན་མ་རྒྱས་པར་འབྱུང་། །དུ་བ་གར་བྱུང་གནས་དེ་ན། །མེ་ཉིད་ཡོད་པར་ངེས་པ་ཡིན། །དེ་བཞིན་ཆུ་ཡི་སྔ་ལྟས་ཀྱང་། །རླངས་དང་སྔབས་དང་སྲོག་ཆགས་འབྱུང་། །དེ་ན་ཆུ་ཉིད་ཡོད་པར་ངེས། །རླུང་གི་ལྟས་ཀྱང་འདི་ལྟ་སྟེ། །སྤྲིན་རྣམས་རྒྱུག་ཅིང་དུམ་བུར་འཆད། །དེས་ན་རླུང་ཆེན་འབྱུང་བར་ངེས། །རྩི་མཚལ་ལོ་མ་གང་བྱུང་བ། །དེ་ན་གསེར་ཁུང་ཡོད་པ་ལྟར། །སྔ་ལྟས་མཚན་མ་འདི་དག་གིས། །འབྲས་བུ་མཐོ་དམན་གར་འགྱུར་བ། །རྒྱུ་ལ་མཁས་པར་བྱས་ནས་ནི། །མཚན་མ་ཅི་བྱུང་དེ་ལ་སྦྱར། །བར་ཆད་མེད་པའི་བརྩོན་འགྲུས་ཀྱིས། །སྲོག་ལ་བབ་ཀྱང་མི་བལྟ་བར། །རྣལ་འབྱོར་ཡུལ་ལ་འཇུག་པ་དང་། །ཏིང་འཛིན་རིག་པའི་རྩལ་སྤྲུགས་ལ། །གཉེན་པོ་ཀུན་བསྟེན་ས་སྦྱངས་ནས། །རྣལ་འབྱོར་ས་ལ་བརྩོན་པར་བྱ། །འདིས་ནི་གདོན་མི་ཟ་བ་དང་། །ལ་ལ་ཐེ་ཚོམ་མི་སྐྱེ་ཞིང་། །མ་ངེས་ལ་ཞུགས་ཐེ་ཚོམ་མེད། །དཔེར་ན་འཇིག་རྟེན་བྱིས་པ་དག །ཡུན་རིངས་མ་ལ་སྐྱོ་བ་ལྟར། །སྔ་ལྟས་
བྱུང་བའི་སྒྲ་ཐོས་ན། །ཤིན་ཏུ་བྲོད་པས་མདུན་བསུ་ལྟར། །ལྟས་ཆེན་བྱུང་བའི་བྲོད་ཚུལ་གྱིས། །ཤིན་ཏུ་བརྩོན་པས་བདེ་ཐོབ་འགྱུར། །དེ་བས་སྔ་ལྟས་མཚན་མ་རྣམས། །ཤེས་ནས་བརྩོན་པར་འབད་པའི་རིགས། །བློ་རྩལ་ལས་ཀྱི་ཁྱད་པར་གྱིས། །ཏིང་འཛིན་དྲོད་ཀྱི་སྔ་ལྟས་འབྱུང་། །ཡང་དག་བདེན་པའི་དོན་བསྟན་ན། །མི་སྐྲག་མི་དང་དགའ་བ་སྐྱེ། །ཡང་དག་དོན་ལ་ངེས་བལྟས་ན། །འཁོར་བའི་ཆོས་ལ་སྐྱོ་བ་སྐྱེ། །ཡང་དག་དོན་ལ་འདྲིས་པ་དང་། །རྣམ་གྲངས་ཆོས་ལ་དད་མི་འགྱུར། །ཡང་དག་དོན་ཉིད་མཐོང་བ་ན། །ཚིག་ལ་དགའ་བ་མི་སྐྱེ་ཞིང་། །དོན་ཉིད་ཉེ་བར་འཛིན་པར་བྱེད། །དོན་མཐོང་བ་དང་ཡེ་ཤེས་སྐྱེ། །ཡེ་ཤེས་སྐྱེས་པར་གྱུར་པ་དང་། །དངོས་པོར་སྣང་བ་ཐམས་ཅད་ཀུན། །སྒྱུ་མ་བཞིན་དུ་ཤེས་པར་འགྱུར། །སྒྱུ་མ་ཙམ་དུ་ཤེས་པ་ལ། །བརྟེན་ནས་ཆོས་ཉིད་དོན་བལྟས་ན། །སྣང་བ་མེད་པའི་དོན་ཉིད་ནི། །སྣང་བ་མེད་པར་མཐོང་བར་འགྱུར། །སྣང་མེད་སྲིད་པ་མཐོང་བའི་ཚེ། །ཆོ་འཕྲུལ་རྒྱུ་བ་ཐམས་ཅད་འབྱུང་། །དེ་ཉིད་བདེན་པའི་སྔ་ལྟས་སོ། །དེ་ནས་ཉི་མའི་འོད་ཟེར་གྱི། །རྡུལ་ཕྲན་འདྲ་བའི་མཚན་མ་འབྱུང་། །དེ་ནི་གཡོ་བའི་སྔ་ལྟས་སོ། །དེ་ནས་སྨིག་རྒྱུ་ལྟ་བུར་འབྱུང་། །དང་པོའི་དྲོད་ཅེས་བྱ་བར་བཤད། །དེ་ནས་མཚོ་ཡི་རླབས་ལྟར་འབྱུང་། །བར་གྱི་དྲོད་ཅེས་བྱ་བར་བཤད། །དེ་ནས་རླུང་ཆེན་ལྟ་བུར་ཡང་། །ཐོགས་པ་མེད་པར་འབྱུང་བར་འགྱུར། །ཐ་མའི་དྲོད་ཅེས་བྱ་བར་བཤད། །དེ་ནས་ཡིག་འབྲུའི་དྲོད་སྤྲོས་པས། །ཆར་ཆེན་འབབ་པ་ལྟ་བུར་འབྱུང་། །དེ་ནི་ཐོབ་པའི་དྲོད་ཅེས་བྱ། །དེ་ནས་མཁའ་ལ་སྤྲིན་ལྡིང་བཞིན། །ཏིང་འཛིན་རྩལ་འཕང་མཐོ་བར་འགྱུར། །དེ་ནི་ཤིན་ཏུ་བརྟན་པའི་དྲོད། །དེ་ནས་ཏ་ལ་གཅིག་ཙམ་དུ། །བདག་གི་ལུས་ནི་དབང་མེད་པར། །མཁའ་ལ་འཕར་ཞིང་འཕགས་པར་རྩོལ། །འདི་ནི་ཤིན་ཏུ་གསལ་བའི་དྲོད། །དེ་ནས་ས་ཆེན་གཡོ་བ་ལྟར། །ཤིན་ཏུ་ཡམ་ཡོམ་མར་མེར་འབྱུང་། །འདི་ནི་དང་པོའི་རྟགས་ཤེས་བྱ། །དེ་ནས་
ཏིང་འཛིན་རྩལ་སྦྱངས་ན། །ཅི་ལྟར་དམིགས་པ་དེར་འགྲུབ་སྟེ། །མེ་ཡི་སྐྱེ་མཆེད་དེར་བསྒོམས་ན། །མེ་ཡི་རང་བཞིན་ཉིད་དུ་འགྱུར། །ཆུ་ཡི་སྐྱེ་མཆེད་དེར་བསྒོམས་ན། །ཆུ་ཡི་སྐྱེ་མཆེད་ཉིད་དུ་འགྱུར། །རླུང་གི་སྐྱེ་མཆེད་དེར་བསྒོམས་ན། །རླུང་གི་སྐྱེ་མཆེད་ཉིད་དུ་འགྱུར། །ཡིག་འབྲུའི་སྐྱེ་མཆེད་དེར་བསྒོམས་ན། །ཡིག་འབྲུ་གང་ལྟར་གསལ་བར་འགྱུར། །དེ་ལྟར་རྫས་ཀྱི་སྐྱེ་མཆེད་དུ། །གང་ལྟར་བསྒོམས་པ་དེ་ལྟར་འགྱུར། །དེ་ནི་རྟགས་ཆེན་ཐོབ་པ་ཡིན། །བློ་ཡི་ཏིང་འཛིན་རྩལ་རྫོགས་ན། །ངག་གི་བདེན་པའི་རྩལ་འགྱུར་སྟེ། །སྲེག་པའི་མེ་ཆེན་མཐོང་བ་ན། །ཞི་པར་གྱུར་ཅིག་བྱས་པ་ཡིས། །དེ་ཉིད་དུ་ནི་ཞི་བར་འགྱུར། །ཆུ་ཀླུང་གནོད་པའི་རྒྱུན་བྱུང་ན། །ཆད་པར་གྱུར་ཅིག་བརྗོད་པ་ཡིས། །དེ་ཉིད་དུ་ནི་ཆད་པར་འགྱུར། །རླུང་ཆེན་གནོད་པའི་རྒྱུན་བྱུང་ན། །ཞི་བར་གྱུར་ཅིག་བརྗོད་པ་ཡིས། །དེ་ཉིད་དུ་ནི་ཆད་པར་འགྱུར། །ནད་པའི་ཚོགས་ནི་མཐོང་བ་ན། །གང་ན་ན་བའི་དམིགས་དེར་ནི། །སེ་གོལ་གཏོགས་པ་ཙམ་གྱིས་ཀྱང་། །ནད་རྣམས་ཞི་བར་གྱུར་ཅེས་བརྗོད། །ནད་ཀྱི་ཚོགས་རྣམས་ཞི་བར་འགྱུར། །དེ་བཞིན་ངག་གིས་བརྗོད་བྱས་པ། །ཐམས་ཅད་མ་ལུས་གྲུབ་པར་འགྱུར། །ངག་གི་བདེན་པའི་རྩལ་རྫོགས་ན། །ལུས་ཀྱི་དྲོད་ལ་རྩལ་འབྱུང་སྟེ། །གཉིད་ཀྱི་རྟོག་པ་ཆོམས་པ་དང་། །ལུས་ཀྱི་བཟོད་པ་ཐོབ་པ་ནི། །འདི་ནི་དང་པོའི་དྲོད་ཡིན་ནོ། །ཁམས་ཀྱི་ཟས་དང་བྲལ་བ་དང་། །མདངས་དང་དབང་པོ་གསལ་འགྱུར་བ། །འདི་ནི་གཉིས་པའི་དྲོད་ཅེས་བྱ། །ཤིང་བལ་ལྟ་བུར་ཡང་བ་དང་། །ཁམས་བདེ་མི་བདེ་མི་འབྱུང་ཞིང་། །ནད་ཀྱི་ཚོགས་དང་བྲལ་འགྱུར་བ། །འདི་ནི་དྲོད་ཆེན་བསྟན་པ་ཡིན། །ཁམས་ཀྱི་ཟས་ལ་མ་བསྟེན་ཡང་། །དབང་པོ་གཟི་མདངས་ཤིན་ཏུ་གསལ། །འདི་ནི་ཏིང་འཛིན་རོ་ཚོར་རྟགས། །གཞན་ཡང་ལུས་ཀྱི་སྔ་ལྟས་ནི། །མཉམ་པའི་སྐྱིལ་ཀྲུང་བཅས་ནས་ནི། །ཁྲུ་གང་ཙམ་དུ་འཕར་བ་དང་། །ཏ་ལ་གང་ཙམ་བར་དུ་འགྲོ། །འདི་ཡང་ལྟས་ཆེན་རྟགས་ཡིན་
ནོ། །གཞན་ཡང་སྣང་བའི་ནམ་མཁའ་ལ། །གོམ་པས་བགྲོད་དེ་འགྲོ་བ་དང་། །ཆུ་ལ་མི་འབྱིང་ས་ལ་འཛུལ། །མེ་ཡིས་མི་འཚིག་རླུང་བཅིང་བ། །འདི་ཡང་སྔ་ལྟས་ཆེན་པོ་ཡིན། །ལུས་ཀྱི་བདེན་པའི་རྩལ་རྫོགས་ན། །མཐུ་ཡི་རྩལ་ཡང་འབྱུང་བ་སྟེ། །མཐུ་ཡི་བྱིན་བརླབས་བསམ་མི་ཁྱབ། །གལ་ཏེ་དགོས་སམ་འདོད་པ་ན། །ས་འམ་རྡོ་འམ་བྱེ་མ་དག །གསེར་དང་དངུལ་ལ་སོགས་པར་སྒྱུར། །སྐམ་ས་དག་ལ་ཆུ་འབྱིན་ཅིང་། །སོལ་བ་དག་ལ་ལྗོན་ཤིང་འབྱུང་། །དེ་ལ་སོགས་པའི་དགོས་པ་རྣམས། །ཇི་ལྟར་འདོད་པ་དེ་ལྟར་འགྲུབ། །སྤྱོད་པའི་མཐུ་དང་རྩལ་རྫོགས་ན། །འབྱོར་པའི་ཡོན་ཏན་རྫོགས་འགྱུར་ཏེ། །ཡིད་དུ་འོང་བའི་ནོར་འབྱུང་ཞིང་། །འདོད་པའི་བསམས་པ་ཐམས་ཅད་འགྲུབ། །རྫས་ཀྱི་མཆོག་ཏུ་གྱུར་པ་ཡི། །ངོ་མཚར་ཅན་ཡང་རྙེད་པར་འགྱུར། །དེ་དག་རུང་བའི་སྔ་ལྟས་སོ། །འགྲོ་གང་འདུ་བའི་སྔ་ལྟས་ཀྱང་། །ཀུན་གྱིས་བཀུར་ཞིང་དགའ་བ་དང་། །ཀུན་གྱི་ཡིད་དུ་འོང་བར་འགྱུར། །ཐམས་ཅད་འདུལ་ཞིང་ཐམས་ཅད་ལ། །དབང་སྒྱུར་བྱེད་པའི་མཆོག་ཏུ་འགྱུར། །དེ་དག་སྔ་ལྟས་ཆེན་པོ་ཡིན། །མཚན་མ་པྲ་ཡི་རྨི་ལྟས་ཀྱང་། །ཤིན་ཏུ་རྒྱ་ཆེར་འབྱུང་བ་སྟེ། །རྣལ་འབྱོར་ཅན་གྱིས་ཤེས་པར་གྱིས། །བག་ཆགས་བྱང་བའི་སྔ་ལྟས་ཀྱང་། །རྟག་པར་གཅེར་བུར་འབྱུང་བ་དང་། །ཁྲུས་ཆེན་རྟག་ཏུ་བྱེད་པ་དང་། །དྲི་མའི་ཚོགས་རྣམས་དག་པ་དང་། །ཆུ་བོ་དག་ལས་རྒལ་བ་དང་། །མཚོ་ཆུ་དག་ལ་རྐྱལ་བ་དང་། །ཆར་གྱི་རྒྱུན་གྱིས་འཁྲུ་བ་དང་། །གཞན་གྱིས་བུམ་པ་གང་བའི་ཆུས། །བདག་གི་ལུས་ལ་ལྡུགས་པ་དང་། །མེ་དཔུང་ཆེན་པོས་སྲེག་པ་དང་། །ཤིན་ཏུ་མཐོན་པོའི་རྩེ་དག་ལས། །རླུང་གིས་ཤིན་ཏུ་གཡེང་ཞིང་འཐོར། །འདི་དག་བག་ཆགས་བྱང་བའི་ལྟས། །འཇིགས་དང་བྲལ་བའི་སྔ་ལྟས་ནི། །གཡུལ་འགྱེད་པ་ལས་སླར་ལོག་དང་། །ནད་ལས་ཐར་ཏེ་སོས་པ་དང་། །བཙོན་ར་དག་ལས་ཐར་བ་དང་། །གཤེད་མའི་ལག་ནས་ཤོར་བ་དང་། །གཅན་
གཟན་ནང་ནས་བྲོས་པ་དང་། །དུག་ནད་དག་ལས་སོས་པ་དང་། །བཅིངས་པ་དག་ལས་གྲོལ་པ་དང་། །ཐག་པ་བཅད་པར་གྱུར་པ་རྣམས། །མཚན་མ་བཟར་པོའི་སྔ་ལྟས་ཡིན། །ས་རྣམས་ཐོབ་པའི་སྔ་ལྟས་ནི། །ཁྲི་རྐང་དག་ལ་འཛེག་པ་དང་། །ཕལ་པའི་སྐས་ལ་འཛེག་པ་དང་། །ལྗོན་ཤིང་དག་ལ་འཛེག་པ་དང་། །གྱེན་དུ་ཤིན་ཏུ་འགྲོ་བ་དང་། །རི་བོའི་རྩེ་ལ་འཛེག་པ་དང་། །རིན་ཆེན་སྐས་ལ་འཛེག་པ་དང་། །མཆོད་རྟེན་དག་ལ་འཛེག་པ་དང་། །ནམ་མཁའི་སྐས་ལ་འཛེག་པ་རྣམས། །འདི་དག་དོན་གྱི་སྔ་ལྟས་ཡིན། །ས་རྣམས་ནོན་པའི་སྔ་ལྟས་ཀྱང་། །ཁྲི་མཐོན་སྟེང་ན་འདུག་པ་དང་། །གླང་པོ་ཆེ་ལ་ཞོན་པ་དང་། །སེང་གེ་དག་ལ་ཞོན་པ་དང་། །ཁྱུང་ཆེན་ལྡིང་ལ་ཞོན་པ་དང་། །མཆོད་རྟེན་ཁ་ལ་ཕྱིན་པ་དང་། །རི་བོའི་རྩེ་ལ་འདུག་པ་དང་། །ནམ་མཁའི་དབྱིངས་ན་འདུག་པ་དང་། །ལུས་ལས་སྤྲིན་ཕུང་འབྱུང་བ་དང་། །ཟླ་བའི་སྟེང་ན་འདུག་པ་དང་། །ཉི་མའི་སྟེང་ན་འདུག་པ་རྣམས། །རྣལ་འབྱོར་ས་ལ་གནས་པའི་རྟགས། །སངས་རྒྱས་སྲས་ཀྱི་སྔ་ལྟས་ནི། །རྒྱལ་པོའི་བཀའ་ལ་བཏགས་པ་དང་། །བཀའ་ཡི་དབང་པོར་བསྐོས་པ་དང་། །གཞན་ལ་དབང་སྒྱུར་བྱེད་པ་དང་། །འཇིག་རྟེན་སྐོས་ལ་འབེབས་པ་དང་། །གཞན་གྱི་སྡེ་པ་དབང་སྡུད་དང་། །གཡུལ་ཆེན་དག་ལས་རྒྱལ་བ་དང་། །བདག་ཉིད་རྒྱལ་པོར་གྱུར་པ་དང་། །མགོ་ལ་མེ་ཏོག་སྐྱེ་བ་རྣམས། །རྒྱལ་བའི་སྲས་སུ་གྱུར་པའི་ལྟས། །ཆོས་ལ་དབང་ཐོབ་སྔ་ལྟས་ནི། །གླེགས་བམ་ཟབ་མོ་རྙེད་པ་དང་། །དེ་བཞིན་འདྲི་བ་མང་པོ་དང་། །དེ་དག་ལ་ནི་དཔྱོད་པ་དང་། །གཞན་ལ་འཆད་ཅིང་སྟོན་པ་དང་། །དོན་ཉིད་གཏན་ལ་འབེབས་པ་དང་། །མེ་ལོང་དག་ལ་ལྟ་བ་དང་། །ཤེལ་གྱི་བུམ་པ་གང་བ་ལ། །ལྟ་ཞིང་བརྟགས་ཏེ་འཐུང་བ་དང་། །རིན་ཆེན་ནོར་བུ་ཐུ་བ་དང་། །འཁོར་ལོ་ལག་ཏུ་བབས་པ་དང་། །ཉི་ཟླ་ལག་པས་ཟིན་པ་དང་། །རི་རབ་ཀླད་ལ་སྐོར་བ་རྣམས། །ཆོས་ལ་དབང་ཐོབ་སྔ་ལྟས་སོ། །བདེན་པ་མཐོང་བའི་སྔ་ལྟས་ཀྱང་། །
སྔོན་མ་མཐོང་གི་ཡུལ་མཐོང་དང་། །སྟོང་གསུམ་རྒྱ་ཆེར་མཐོང་བ་དང་། །གླིང་རྣམས་གཞན་དུ་ཕྱིན་པ་དང་། །རི་རབ་ཁ་ལ་ཕྱིན་པ་དང་། །ནམ་མཁའ་རྒྱ་ཆེར་མཐོང་བ་དང་། །རྒྱ་མཚོའི་གཏིང་དུ་ཕྱིན་པ་དང་། །ལག་ན་སྒྲོན་མེ་ཐོགས་པ་དང་། །ཉི་མའི་སྙིང་པོར་ལྟ་བ་དང་། །སྣང་སྲིད་དཔྱོད་པ་བྱེད་པ་རྣམས། །ཆོས་ལ་དབང་ཐོབ་ལྟས་ཆེན་ཡིན། །ལུང་བསྟན་ཐོབ་པའི་སྔ་ལྟས་ནི། །རོལ་མོའི་སྒྲ་རྣམས་ཐོས་པ་དང་། །འབྲུག་གི་སྒྲ་ནི་གྲག་པ་དང་། །སེང་གེའི་ང་རོ་གྲག་པ་དང་། །ཆོས་ཀྱི་སྒྲ་ཡི་གཏམ་ཐོས་དང་། །གཟུགས་བརྙན་ཞལ་ནི་འཛུམ་པ་དང་། །སངས་རྒྱས་གསུང་ཐོས་སྐུ་མི་མཐོང་། །ལྷ་མོ་གླུ་དབྱངས་སྒྲོགས་པ་དང་། །གཞལ་ཡས་དག་ལ་སྒྲ་འབྱུང་དང་། །གྲོགས་པོ་གྲོགས་པོ་ཞེས་བརྗོད་ཅིང་། །ཆོས་ཀྱི་བགྲོ་བ་བྱེད་པ་རྣམས། །ལུང་བསྟན་འབྱུང་བའི་སྔ་ལྟས་སོ། །དེ་ལ་སོགས་པའི་མཚན་མ་རྣམས། །ལྟས་ཆེན་ཀུན་དུ་སྣང་བ་དང་། །གང་ཟག་ལས་ཀྱི་དང་པོ་རྣམས། །རིག་འཛིན་སོ་སོའི་ས་པ་ནི། །འགྱུར་བའི་སྔ་ལྟས་བཤད་པ་ཡིན། །རྣལ་འབྱོར་ལས་ཀྱི་དང་པོ་ལ། །ལྟས་ཆེན་འདི་དག་གང་བྱུང་ཡང་། །འཁོར་བའི་འདུ་འཛི་ཀུན་བསལ་ནས། །དོན་ལ་རྟོགས་ཤིང་ས་རྣམས་སྦྱོང་། །དེས་ནི་དོན་ལ་རེག་པར་འགྱུར། །དོན་ལ་རིག་པའི་བྱིན་བརླབས་ཀྱིས། །རིག་འཛིན་རྡོ་རྗེར་ལྷུན་གྱིས་གྲུབ། །རིག་འཛིན་ས་ལ་གནས་པ་དང་། །ས་ལ་རྩལ་ཆེན་སྦྱོང་བའི་ཚེ། །རྩལ་གྱི་ཆོ་འཕྲུལ་སྣ་ཚོགས་འབྱུང་། །ཉི་ཟླ་ཞོན་ནས་འགྲོ་བ་དང་། །རི་རབ་རྐེད་ནས་གསོར་བ་དང་། །འཇིག་རྟེན་རྒྱང་མར་འཕང་བ་དང་། །སྲེག་པའི་བསྐལ་པ་གཞིལ་བ་ལ། །སོགས་པའི་ཆོ་འཕྲུལ་ཐམས་ཅད་ཀུན། །ཁྱད་པར་རྩལ་གྱིས་སྟོན་པར་ནུས། །དེ་ལ་སོགས་པའི་རྫུ་འཕྲུལ་རྣམས། །རྫུ་འཕྲུལ་གྱི་ནི་ཆོ་འཕྲུལ་ཡིན། །རྗེས་སུ་བསྟན་པའི་ཆོ་འཕྲུལ་ནི། །འདུལ་བའི་འགྲོ་བ་ཐམས་ཅད་ལ། །སོ་སོའི་སྐད་དང་ཆོས་མཐུན་པར། །འདུལ་བའི་སྒོ་ནི་སྣ་ཚོགས་སུ། །སོ་སོའི་སྐད་དུ་སྟོན་པར་ནུས། །དེ་དག་རྗེས་སུ་
བསྟན་པ་ཡིན། །ཆོས་ཀྱི་སྒོ་རྣམས་སྣང་བ་ཡི། །ངེས་པའི་ཆོ་འཕྲུལ་བསྟན་པ་ནི། །ཏིང་འཛིན་རྩལ་གྱི་ཁྱད་པར་གྱིས། །འཇིག་རྟེན་ཁམས་རྣམས་གཡོས་ནས་ཀྱང་། །ཐམས་ཅད་ངོ་མཚར་སྐྱེ་འགྱུར་ཏེ། །སེམས་ཀྱི་བསམ་པ་རངས་བྱས་ནས། །སོ་སོ་དགའ་བའི་རོ་མྱང་འགྱུར། །ཆོས་རྣམས་སྣང་བའི་ཆོ་འཕྲུལ་ཡིན། །ཀུན་ནས་ཀུན་དུ་བརྗོད་པ་ནི། །གསང་བའི་ཡི་གེའི་ཕྲེང་བ་ལས། །རྫུ་འཕྲུལ་ཆོས་ཀྱི་སྒྲ་སྒྲོགས་པས། །མཐོང་ཡོད་སྣང་གྲགས་ཆོས་རྣམས་ཀུན། །ཀུན་ཀྱང་སྔགས་ཀྱི་སྒྲར་གྲག་པས། །སྔགས་སུ་མ་གྱུར་གང་ཡང་མེད། །དེས་ན་རྩལ་གྱི་ཁྱད་པར་ལས། །སོགས་པའི་ཡོན་ཏན་ཐམས་ཅད་འབྱུང་། །ཞེས་སྨྲ་བའི་སེང་གེ་ཆེན་པོ་སེམས་དཔའི་རྡོ་རྗེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཆོ་འཕྲུལ་བསྟན་པའི་ལེའུ་སྟེ་གསུམ་པའོ།། །།དེ་ནས་སྨྲ་བའི་སེང་གེ་སེམས་དཔའི་རྡོ་རྗེ་དེ་མི་འདའ་བའི་དམ་ཚིག་གསང་བ་མཆོག་གི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང་། འདུས་པའི་རྣལ་འབྱོར་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། །སྨྲ་བའི་སེང་གེ་སེམས་དཔའ་ཆེན་པོ་ཁྱོད་ཉིད་ནི་དམ་ཚིག་ཆེན་པོའི་བདག་ཉིད་དུ་བདག་ཅག་རྣམས་ཀྱིས་མཐོང་ངོ་། །དེ་སྐད་ཅེས་གསོལ་པ་དང་། །སེམས་དཔའ་ཆེན་པོ་དེས་བཀའ་སྩལ་པ། །འདུས་པའི་རྣལ་འབྱོར་རྣམས་ཆོས་ཐམས་ཅད་ཀྱི་སྲོག་ནི་དམ་ཚིག་ཡིན་པར་ཤེས་པར་གྱིས་ཤིག །དེ་ནས་འདུས་པ་ཆེན་པོའི་ཚོགས་ཀྱིས་སེམས་དཔའ་ཆེན་པོ་ལ་འདི་སྐད་ཅེས་གསོལ་ཏོ། །སེམས་དཔའ་ཆེན་པོ་དམ་ཚིག་མཆོག་གི་གསང་བ་རྣམས་བདག་ཅག་རྣམས་ཐོས་པར་འཚལ། །ཐོས་ནས་ཀྱང་རྟོགས་པར་འཚལ། །རྟོགས་ནས་ཀྱང་དེ་ལ་གནས་པར་འཚལ་ན། སེམས་དཔའ་ཆེན་པོ་རྒྱ་ཆེར་བཤད་དུ་གསོལ། །དེ་སྐད་ཅེས་གསོལ་པ་དང་། །སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི་ཚོགས་དམ་ཚིག་རྣམས་འདི་ལྟ་སྟེ།
ཤིན་ཏུ་གསང་བའི་དམ་ཚིག་ནི། །སྣོད་མ་ཡིན་པར་གྱུར་པ་ལས། །ཕྱི་ནང་གསང་བ་གསུམ་དག་ཏུ། །སྦ་བའི་ཐབས་སུ་སྤྱད་ནས་ཀྱང་། །གསང་བའི་ཆོས་རྣམས་གསང་བར་བྱ། །བསྟན་པའི་གནས་མིན་སྣོད་ངན་དག །རྣམ་པ་བཞིས་བསྡུས་བྱེ་བྲག་རྣམས། །མ་འོངས་རྣལ་འབྱོར་བཅུད་ཅན་གྱིས། །ཤེས་ནས་སྤང་བར་བྱ་ཕྱིར་བཤད། །འཇིག་རྟེན་པ་དང་ཐེག་དམན་དང་། །མུ་སྟེགས་ལོག་ལྟའི་ལྟ་ལ་དགའ། །དད་མེད་བློ་ཞན་གཡེང་རྨུགས་ཤིང་། །བསླབ་ཉན་མི་བརྩོན་བྱོལ་སོང་མཚུངས། །དད་ལོག་དམ་ཉམས་དོན་ལས་གོལ། །བྱང་ཆུབ་ཐག་པ་གཏིང་ནས་ཆད། །སེམས་ཀྱི་མྱུ་གུའི་རྩ་ཚིག་པ། །ངན་འགྲོའི་འདམ་དུ་ཁ་སྦུབ་ཡིན། །སྣོད་མེད་ཁ་སྦུབ་དེ་དག་ལ། །གསང་བའི་སྨྲ་བར་བྱ་བ་མིན། །སྨྲས་ན་དེ་ཉིད་ཁ་སྦུབ་འགྱུར། །གསང་བའི་ཚིག་རྣམས་ཁར་སྨྲ་ཡང་། །གབ་པ་གསང་བའི་དོན་མི་ཤེས། །སྐྱོན་ཅན་སྤ་ལོས་སྒྲོགས་རྣམས་ལ། །གསང་བའི་དོན་རྣམས་ལྷག་པར་སྨྲ། །བསྙེན་སྒྲུབ་གསང་བའི་ཚིག་རྣམས་ལ། །སྒྲ་ལ་ཉན་ཀྱང་དོན་མི་གཉེར། །སྙིང་པོའི་དོན་གསང་མི་ཐུབ་པ། །བཅུད་མེད་འཁོར་བར་ཟག་པ་ཡིན། །གསང་དོན་མི་ཐུབ་སྣོད་ངན་ལ། །གསང་བ་སྨྲ་བར་གང་བྱེད་པ། །དེ་དང་སྣོད་མེད་སྣོད་ངན་གཉིས། །འཁོར་བའི་ཁམས་སུ་ཟག་པར་མཉམ། །ལྟ་དང་དམ་ཚིག་སྒྲུབ་པ་ཡི། །དམ་པའི་མཛོད་གསུམ་སྨྲ་ཤེས་ཀྱང་། །གོམས་པའི་མཐུ་མེད་གནས་མ་གྱུར། །ངན་སྒྱུ་ཕྲག་དོག་སེར་སྣས་གདུངས། །བྱ་མེད་ཆོས་ལ་བློ་གཏོད་ཅིང་། །སྤྱོད་རྩིང་དམ་རལ་རྡེང་མེད་པར། །རྣལ་འབྱོར་སྤྱོད་ལ་ལྟ་དམན་ཞེས། །ཟེར་བ་ཕམ་འགྱུར་འཁོར་བར་འཕོ། །སྣོད་ངན་འཁོར་བར་འཕོ་བ་ལ། །གསང་བའི་དོན་རྣམས་སྨྲ་བྱེད་པ། །གསང་བ་ཉམས་པའི་དབང་གིས་ན། །ཉམས་པ་དེ་དང་དེ་འདྲར་འགྱུར། །ཟླ་ངན་ཉམས་སོད་ཅན་ལན་འདྲེན། །ཁ་གསག་ལྕེ་གཉིས་སྒྱུར་བྱེད་ཅིང་། །སེམས་ལ་ཉོན་མོངས་ལྔ་བཅངས་ཏེ། །རྐུ་དང་སྒྱུ་སྤྱོད་བརྫུན་ལ་དགའ། །ཚེ་གཅིག་གྲགས་པ་ཆེད་ཕྱིར་དུ། །གང་ཟག་ཕྱིར་འབྲེང་ཚིག་
འགའ་ལ། །མཉན་ཏེ་བརྗོད་འདོད་ཚུལ་འཆོས་པ། །ལོག་སྨྲ་དུག་ཅན་ཐར་མ་ལྟུང་། །དུག་ཅན་ལྟུང་བའི་སྣོད་དེ་ལ། །གསང་བའི་དམིགས་རྣམས་སྨྲ་བ་ནི། །རྣལ་འབྱོར་ཉམས་པ་ཆེན་པོ་སྟེ། །འཁོར་བའི་ཐ་མར་དེ་ལྟུང་འགྱུར། །འདི་ལྟར་ཕམ་འགྱུར་སྣོད་ངན་ལ། །གསང་བ་གསང་ཆེན་ལ་སོགས་པའི། །དོན་དང་རང་བཞིན་གང་ཡིན་པ། །བསྟན་ཀྱང་ཕམ་ལྟུང་གེགས་སུ་འགྱུར། །དེ་བས་བསྟན་པར་བྱ་བ་མིན། །གལ་ཏེ་བསྟན་པར་གྱུར་ན་ནི། །སྟོན་སྨྲ་ཉན་བྱེད་དེ་དག་རྣམས། །མཐོང་ཡུན་ཕུང་བྱེད་གཉིས་སྐྲག་འགྱུར། །རྣལ་འབྱོར་མཁས་གསལ་དོན་ལྡན་ལ། །རྣལ་འབྱོར་མི་ཤེས་གང་དག་གིས། །དྲེགས་པའི་དབང་གིས་ཕྲག་དོག་གི། །སེམས་ཀྱི་རྣམ་གྲངས་ཅི་སྐྱེད་པ། །དེ་སྙེད་བསྐལ་པའི་གྲངས་མཉམ་པར། །འབྲས་བུ་མི་བཟད་མྱོང་བར་འགྱུར། །གལ་ཏེ་ལས་ཀྱི་འཕྲོ་ལེན་ན། །དེ་སྙེད་བསྐལ་པར་གཟོད་འཇུག་དགོས། །མཁས་གསལ་དོན་ལྡན་གྱིས་ཀྱང་ནི། །གོང་མ་བཞིན་དུ་ངན་བསམས་ན། །དེ་ཡང་གནས་ངན་ལེན་པ་སྟེ། །མཁས་པ་དེ་ལ་སྐྱོ་མི་ནུས། །རྣལ་འབྱོར་དོན་ལྡན་ཚུལ་མཐུན་ལ། །ངན་པའི་ཚིག་གིས་སེམས་དཀྲུགས་ཤིང་། །སྒྲོ་སྐུར་རྐུ་དང་བརླང་བཏབ་ན། །དམྱལ་བ་རྡོ་རྗེར་དེ་ལྟུང་འགྱུར། །ཞར་ལས་བྱུང་བའི་རྣམ་སྨིན་ཡང་། །ཇི་ལྟར་རྒྱུ་མཐུན་དེ་འདྲར་འགྱུར། །སྐལ་བ་དམན་པའི་རྣལ་འབྱོར་པ། །རྩ་ཉམས་སྐྱོན་ཅན་རང་བཞིན་ནི། །ངན་སེམས་ཁྲོ་གཏུམ་ལྡན་པ་དང་། །མི་ཟད་ཕྲ་མེན་ལས་སྤྱོད་བྱེད། །གང་དག་མི་ཤེས་ངང་ཚུལ་ཅན། །བྱིས་པའི་རང་བཞིན་བློ་ཞན་པས། །ཤིན་ཏུ་དམན་པའི་ལྟ་སེམས་ཀྱིས། །ཚུལ་བཅོས་མཁན་ལ་བཀུར་བར་བྱེད། །གང་དག་དམ་ཚིག་ཡོན་ཏན་ལྡན། །བྱམས་ལ་གནས་ཤིང་རྟག་ཏུ་བཟོད། །ཚུལ་ཤིས་དོན་གྱི་གཞུང་རྣམས་སྲོང་། །དེ་དག་ལ་ནི་འདུན་པ་མེད། །དམ་ཚིག་སྤྲེའུ་ལྟར་སྤྱོད་བཞིན་དུ། །བྱང་ཆུབ་སྙིང་པོ་ཐོབ་པ་ཡི། །སངས་རྒྱས་རྣམས་ཀྱང་མི་འབྱུང་ངོ་། །འབྱུང་བར་ཡང་དག་ངས་མ་མཐོང་། །རྒྱལ་བའི་སྲས་
གྱུར་རྣལ་འབྱོར་པ། །ལམ་སྟོན་སྐྱོན་སེལ་མཁས་པ་ལ། །ཁ་ཅིག་དྲེགས་དང་ཕྲག་དོག་གིས། །ཁྲོ་སྤོང་ཐབས་ཀྱིས་སྨོད་པར་བྱེད། །དེ་ནི་འཁོར་བའི་གཏིང་རྡོ་སྟེ། །ནམས་ཀྱང་ཐར་པའི་ཁར་མི་འབྱུང་། །མི་ཤེས་པ་ཡི་རྣལ་འབྱོར་པ། །ཡང་དག་དོན་དང་ལྡན་པའི་མི། །རྗེས་སུ་འགྲོ་བར་མི་བྱེད་ཅིང་། །ལོངས་སྤྱོད་འདུ་འཛི་གང་ལྡན་པའི། །རྗེས་སུ་འགྲོ་ཞིང་དེ་ལ་འདུད། །དེ་ནི་ལོག་པའི་ལམ་པ་ཡིན། །རྣལ་འབྱོར་ལྟང་དང་བྱང་ཆུབ་ཁེ། །འབན་ཐག་ཆད་པར་བློ་མི་འབྱུང་། །ཟང་ཟིང་ནོར་དང་གཡོ་སྤྲུལ་ཁེ། །ཆུང་ཡང་ཅིས་འགྲུབ་སྲོག་དང་སྡོ། །རྣལ་འབྱོར་མཁས་པའི་རང་བཞིན་ཅན། །བུམ་སྣོད་ནང་གི་གསལ་བ་ལྟར། །ཤེས་རབ་མཛོད་ཀྱི་གཏེར་ལྡན་ཡང་། །སྲོག་ཆགས་རྐུན་མོའི་སྡེར་མོ་ལྟར། །ཁོང་ནས་གབ་སྦས་དོན་སྟོན་ལ། །བླུན་པོ་རྣམས་ཀྱིས་ཅིར་མི་མཐོང་། །དཔེར་ན་འདི་འདྲར་ཚུལ་གཅིག་སྟེ། །ལུས་ལ་གཏེར་འཆང་མི་དང་ནི། །བླུན་པོར་གྱུར་པའི་མི་དག་གནས། །འགྲོགས་ཀྱང་གཉིས་མཚུངས་ཁྱད་མེད་འདྲ། །ཏིང་འཛིན་བསྔགས་པ་རྗོད་བྱེད་ཅིང་། །ཏིང་འཛིན་དོན་དུ་གཉེར་བ་མེད། །ཡང་དག་བསྔགས་པ་རྗོད་བྱེད་ཅིང་། །ཡང་དག་དོན་དུ་གཉེར་བ་མེད། །དམ་ཚིག་བསྔགས་པ་རྗོད་བྱེད་ཅིང་། །དམ་ཚིག་དོན་དུ་གཉེར་བ་མེད། །ཇི་ལྟར་འགྲོ་གང་ལ་ལ་དག །ནོར་བུ་རིན་ཆེན་འདི་འདྲ་སྟེ། །འདོད་པའི་ཡོན་ཏན་ཀུན་འབྱུང་ཞེས། །རིན་ཆེན་དག་གི་ཡོན་ཏན་བརྗོད། །དེ་ལ་འགྲོ་གང་གཞན་དག་གིས། །དེ་ལྟར་འདོད་པ་འབྱུང་གྱུར་ན། །དེ་ལྟར་ཅུང་ཟད་ཡོད་དམ་ཞེས། །དྲིས་ཀྱང་མེད་པས་སླར་སྨྲས་པ། །གང་ཞིག་དགོས་པ་སྐོང་བ་ཡི། །ཡོན་ཏན་ཅུང་ཟད་སྨོས་པར་ཟད། །དེ་ཉིད་བདག་ལ་མེད་ཅེས་སྨྲ། །དེ་བཞིན་རྣལ་འབྱོར་མི་བརྩོན་པས། །བསླབ་པར་བྱ་བའི་ཆོས་བྲལ་ལ། །ཆོས་ཉིད་བསྔགས་པ་རྗོད་བྱེད་ཀྱང་། །དེ་དག་ལ་ནི་ཆོས་ཉིད་མེད། །དེ་ལས་སྤྱོད་པའི་ལོག་སྤྱོད་རྣམས། །དམ་ཚིག་ཅན་གྱིས་སྤང་བར་བྱ། །རྣལ་འབྱོར་ཆོས་འཛིན་གང་དག་གིས། །རྣལ་འབྱོར་ཉམས་འགྱུར་ལོག་སྲེད་ཅན། །གསང་བ་འཇིག་
པའི་དགྲར་མཐོང་ནས། །དེ་དག་སྡིག་པ་མཐོང་བ་ལྟར། །སྐྲོད་ཅིང་ཆད་པས་གཅོད་བྱེད་པ། །སྐྱེས་བུ་དེ་ནི་རྒྱལ་བའི་སྲས། །དཔེར་ན་བློན་པོ་གང་དག་གིས། །ཉེས་བྱས་ཁྲིམས་དང་འགལ་འགྱུར་ན། །འགལ་བར་མི་གཏོང་ཁྲིམས་དང་སྦྱོར། །བཀའ་ཡི་ཡོ་སྲོང་བློན་པོ་དེ། །རྒྱལ་པོའི་ཐུགས་འཛིན་དམ་པ་ཞེས། །ཀུན་དུ་རྒྱ་ཆེར་གྲགས་པར་འགྱུར། །ལྡུམ་རར་དུག་གི་སྡོང་སྐྱེས་ན། །བདག་པོས་དུག་ཏུ་ཤེས་མ་ཐག །རྩད་ནས་ཕྱུང་སྟེ་མེད་པར་བྱེད། །ཅི་ཕྱིར་ལྡུམ་ཟས་དེ་དག་ལས། །དུག་འཕེལ་གྱུར་ན་འཆི་ཕྱིར་རོ། །དེ་བཞིན་ཉམས་འགྱུར་དུག་ཅན་དེ། །བརྟུལ་ཞུགས་ཅན་གྱི་རྣལ་འབྱོར་དེས། །གནས་སམ་ལོ་ཡིས་སྤྱུགས་ཏེ་སྤང་། །གང་དག་མི་སྤོང་མགོན་བྱེད་པ། །དེ་དག་གསང་བའི་དམ་སྲི་ཡིན། །དོན་ལ་རྣལ་འབྱོར་གང་ཞིག་གིས། །ཐ་ཚིག་ཟབ་མོར་བཅས་རྣམས་ལས། །བསྲུང་བའི་བསམ་པ་མི་གཡོ་བཞིན། །རྩ་བ་ཡན་ལག་བཅས་རྣམས་ལ། །གལ་ཏེ་མ་ཚོར་ཞིག་གྱུར་ཀྱང་། །རྣམ་སྨིན་ཡོད་ཀྱང་རྩ་མི་ཉམས། །ཇི་ལྟར་གླང་པོ་ཨེ་ནེ་ཡ། །ཤི་ནས་རོ་རུ་གྱུར་མོད་ཀྱང་། །གི་ཝང་རྩིས་ནི་དོན་བྱེད་ལྟར། །རྣལ་འབྱོར་ཉམས་དེ་རོར་གྱུར་ཡང་། །གཞན་གྱིས་བཀུར་པའི་གནས་ཡིན་ཞིང་། །དེ་ཡི་དོན་བྱེད་ནུས་པ་ཡིན། །དེ་ལྟར་མོད་ཀྱང་འདི་ཀུན་རྣམས། །རྨི་ལམ་དུ་ཡང་མཐོང་མི་བྱ། །ཅི་ཕྱིར་འོ་མ་ཉུང་ངུ་ཞིག །རུལ་བས་འོ་མ་ཀུན་རུལ་བཞིན། །རྣལ་འབྱོར་ཉམས་གྱུར་གཅིག་གིས་ནི། །རྣལ་འབྱོར་ཅན་ཀུན་མ་རུང་འགྱུར། །འཁོར་བའི་གཡུལ་རྒྱལ་བྱེད་པ་ཡི། །ལོག་པའི་རྣལ་འབྱོར་ཐམས་ཅད་ཀུན། །དོན་ལ་མཁས་པའི་རྣལ་འབྱོར་པས། །ཐམས་ཅད་བསྒྲིམས་ཏེ་སྤང་བར་བྱ། །གལ་ཏེ་མ་སྤངས་ལོག་སྤྱད་ན། །འཁོར་བའི་གཡུལ་ནི་རྒྱལ་འགྱུར་ཏེ། །བདེན་པའི་བྱིན་བརླབས་མཐུ་ཆུང་འགྱུར། །ཀུན་ཀྱང་དགེ་སྤྱད་དོན་ཆུང་ཞེས། །ཡང་དག་དོན་ལས་ཡིད་བྱུང་ཞིང་། །ལོག་པའི་ཆོས་ལ་སྤྲོ་བར་བྱེད། །ཀུན་ཀྱང་ལོག་པའི་ལས་སྤྱད་པས། །ཡིད་དུ་མི་འོང་སྣ་ཚོགས་འབྱུང་། །དེས་ནི་སྒྲོ་སྐུར་གཉིས་
སུ་འགྱུར། །བཀའ་ཡི་ཆད་པ་གང་ཡིན་པ། །ཡེ་ཤེས་ཅན་ལྟ་རང་བཞིན་གྱིས། །ནམས་ཀྱང་གནོད་པ་ཡོང་མི་མཛད། །དེ་ཡི་འཁོར་ན་གནས་པ་ཡི། །གང་དག་མ་རུངས་མཐུ་ཆེན་རྣམས། །རྣལ་འབྱོར་ལོག་པར་སྤྱོད་རྣམས་ཀྱི། །སྐྱོན་མཐོང་ཙམ་ན་ཆད་པས་གཅོད། །ཐམས་ཅད་ངན་འགྲོར་སྤྱིའུ་ཚུགས་ལྟུང་། །སྒྲུབ་པའི་སྣོད་མཆོག་གཅིག་ཡོད་དེ། །འདི་དང་མི་མཐུན་ཀུན་རྫོགས་པའི། །རྒྱུད་མཉན་དོན་ལྡན་ངང་ཚུལ་བཟང་། །ཅི་ལ་ཆགས་མེད་གཏོང་ལྡན་སེམས། །ཤེས་རབ་རྣམ་གྲོལ་ལྡེ་མིག་གིས། །གཏི་མུག་ཐ་རམ་བློ་ཕྱེ་ནས། །ཆོས་ཀྱི་སྙིང་པོའི་མིག་ལྡན་པས། །རྟག་ཆད་ཕྲད་མཐོང་དབུ་མའི་ཡུལ། །མ་ནོར་ལམ་དུ་འཇུག་ཤེས་པས། །སྡོང་པོ་སྡོང་ཆེན་རབ་དུལ་བའོ། །ཐ་ཚིག་ལུང་ལས་བྱུང་བ་བཞིན། །གཞུང་སྲོང་ཐུབ་པར་བྱེད་པ་དེ། །རྒྱལ་བའི་སྲས་པོ་ཡིན་པས་ན། །དེ་ལ་གསང་སྒོ་དབྱེ་བར་བྱ། །ཇི་ལྟར་དམ་ཚིག་ཐུབ་པ་ལྟར། །དེ་བཞིན་ཡིད་བཞིན་ནོར་བུ་སྟེ། །ཡིད་འོང་འདོད་དང་བདེ་བ་འབྱུང་། །རིགས་འཛིན་རྒྱལ་བ་ཀུན་ཡུམ་མོ། །དེ་བཞིན་དམ་ཚིག་ཐུབ་པ་ལྟར། །གནས་པར་བྱེད་པའི་རྟེན་ཡང་ཡིན། །དམ་ཚིག་ཀུན་གྱི་སྲོག་ཡིན་ཏེ། །དམ་ཚིག་ཀུན་གྱི་ནོར་མཆོག་གོ། །དམ་ཚིག་འདི་ནི་འཇིགས་པའི་སྐྱབས། །དམ་ཚིག་བགྲོད་པ་ལམ་གྱི་མཆོག །དམ་ཚིག་ཆུ་བོ་སྒྲོལ་བའི་གྲུ། །དམ་ཚིག་དངོས་གྲུབ་དམ་པ་ཡིན། །དམ་ཚིག་གྲོགས་ཀྱི་མཆོག་ཡིན་ཏེ། །དམ་ཚིག་ལོང་བའི་མིག་བུ་ཡིན། །ཇི་ལྟར་དམ་ཚིག་ཐུབ་པ་ལྟར། །གཞན་གྱི་སྡེ་པ་འཇོམས་པ་ཡིན། །འཁོར་བའི་གཡུལ་ལས་རྒྱལ་བར་བྱེད། །དེས་ན་དམ་ཚིག་རྒྱུན་བཞིན་བསྲུང་། །མདོར་ན་བདག་གི་སྒོ་གསུམ་པོ། །དག་པ་གསུམ་གྱི་མཐའ་བཟུང་ནས། །ལྷ་དང་གྲོགས་དང་སློབ་དཔོན་དང་། །བདག་ཉིད་དག་པ་མ་ཁྲེལ་བའི། །ཚུལ་གསུམ་མི་གནོད་དམ་བཅས་གསུམ། །ཡོངས་སུ་མཉམས་མདོ་བཞི་པོ། །མཐར་ཕྱིན་རྒྱ་རྟགས་རྣམ་བཞིར་བཅས། །མདོ་དོན་དྲན་པ་ལ་བགྲང་བསྔོ། །བརྟུལ་ཞུགས་སྤྱོད་
པའི་དམ་ཚིག་ནི། །ད་མ་ཚིག་ཀུན་གྱི་ཐོག་མར་འགྲོ། །ཝ་དང་ཅང་ཤེས་གྱི་ལིང་དང་། །བླང་དོར་མིང་བྲལ་ཁྲོ་ཆེན་བདག །ཤིན་ཏུ་གླང་ཆེན་མྱོས་འདྲའི་སེམས། །དཔའ་རྟུལ་སྟག་མཆོག་རྔམ་ཞིང་གཏུམ། །མཁའ་ལྡིང་ཁྱུང་ཆེན་ལྷག་མི་ལྟ། །གཏུམ་ཐུང་དོམ་ཆེན་སྡོང་གཅིག་པ། །ཡིད་ཐུབ་མི་ལྡོག་རྒྱ་མཚོའི་གསེར། །གཏི་མུག་ལྐུགས་པའི་བློ་ཚོལ་ལྡན། །རི་པོ་མི་འགྱུར་བརྟན་པ་ཆེ། །མཁའ་ལྟར་ཡངས་དོག་ཀུན་དང་བྲལ། །གནམ་ལྕགས་ལྕེ་ཡི་དྲག་ཤུལ་ཅན། །ཕྱག་ན་རྡོ་རྗེའི་བརྟུལ་ཞུགས་བདག །ཟོན་བག་ཁུ་འཕྲིག་ཁ་རོག་སེམས། །ངེས་པའི་ང་རྒྱལ་གླང་ཚུལ་ལྡན། །ཟླ་བྲལ་སེང་གེ་རི་དགས་རྒྱལ། །རེ་འཇམ་བྱ་ལྟར་ཆགས་འགྲོགས་བློ། །གཡོ་ལྡན་ལྕག་ཆེན་སྒྱུ་མའི་རྒྱ། །གཙང་སྨེ་མེད་པར་ཀུན་སྤྱོད་ཅིང་། །ཐོགས་མེད་གསོད་སྤྱོད་ཅེ་སྤྱང་ཁྭ། །ཆེ་བའི་ང་རྒྱལ་སྟག་མཆོག་བློ། །ཀུམ་འཛེམ་བློ་ལྡན་ནམ་མཁའ་ལྡིང་། །ས་ཐུབ་བག་ལེན་རྒྱལ་འཁོར་སྐྱོང་། །རྣལ་འབྱོར་བརྟུལ་ཞུགས་ཆེན་པོ་ནི། །བཅུ་གཉིས་དང་ནི་གསུམ་བློར་ལྡན། །གོམས་ནས་ཉམས་སུ་ལེན་བྱེད་པ། །རྣལ་འབྱོར་གསང་བའི་བཀའ་བ་ཡིན། །དལ་བའི་རྒྱུད་ལྡན་ཐ་ཚིག་ཅན། །སྐུ་དང་གསུང་ཐུགས་རྡོ་རྗེ་ཡི། །བསྲུང་དང་བརྗོད་དང་གསང་བ་དང་། །ཡན་ལག་སྤྱད་པའི་དམ་ཚིག་དང་། །ཡིད་འོང་དང་དུ་བླང་བ་དང་། །བརྟུལ་ཞུགས་ཟབ་མོར་སྤྱད་པ་དང་། །རྣལ་འབྱོར་རྣལ་འབྱོར་ཐམས་ཅད་ཀྱི། །མི་འདོར་མི་སྤོང་[སྤྱར]་པ་ཡི། །རིགས་ལྡན་ཤེས་པར་བྱ་བ་དང་། །ཐོབ་ཅིང་གྲུབ་པར་བྱ་བ་ཡིན། །རེ་རེ་ལ་ཡང་ལྔ་ལྔ་སྟེ། །རྩ་བ་དང་ནི་ཡན་ལག་ལས། །བཅུ་གཉིས་དང་ནི་བརྒྱད་ལྡན་པ། །སྤྱད་པར་བྱ་བའི་ནོར་མཆོག་ཡིན། །རྣལ་འབྱོར་བྱང་ཆུབ་སེམས་རྒྱུད་ལ། །ངེས་པར་བརྟགས་ཏེ་སྤྱོད་པའི་བུ། །ཟབ་མོར་རྫོགས་མཆོག་བདེ་བ་ཡི། །བློ་ལ་ངེས་པའི་ལུང་འདི་བསྟན། །འདི་ནི་སྔར་འགྲོ་ཐ་ཚིག་སྟེ། །ཟབ་མོ་སྒྲུབ་པའི་སྔོན་ལོགས་སུ། །རྡོ་རྗེ་ཐ་ཚིག་དྲག་པོའོ། །གཅན་འཕྲང་ལམ་རྣམས་
བསྲུང་བའི་ཕྱིར། །སྤྱི་དང་ཁྱད་པར་དམ་ཚིག་རྣམས། །ངེས་པའི་དོན་གྱིས་བསྲུང་བྱས་ན། །དེ་ནི་དབྱིག་གི་སྣོད་ཆེན་ཡིན། །དེ་ལྟར་སྤྱི་ཡི་སྡོམ་པ་ལ། །གནས་ནས་དུས་ཀྱི་སྐབས་འདི་རུ། །བསྲུང་བྱ་ཐུབ་པར་བྱ་བ་ནི། །མི་ཤིགས་པ་ནི་སེང་གེ་སྟེ། །གཅན་གཟན་རྒྱལ་པོ་ཡིན་པས་སོ། །ཟ་མ་ཏོག་ནི་འདོད་པའི་གཏེར། །དུག་སྤྱོ་བ་ནི་དེར་མི་རིགས། །རིག་ཆེན་མྱུ་གུའི་ལྕུག་ཕྲན་དག །དེ་ནི་བྲེག་པའི་རིགས་མ་ཡིན། །གངས་ཀྱི་ཞུན་ཆུ་ཁོལ་མ་དག །མཁས་པས་བཏུང་བར་བྱ་བ་མིན། །པདྨའི་ཟེའུ་འབྲུ་ཁ་མ་བྱེ། །ཟླ་ཟེར་མ་ཡིན་ཁ་མི་དབྱེ། །མ་བརྟགས་བུག་རྡོལ་ཅན་གྱི་སྣོད། །ཁ་མི་དབྱེ་ཞིང་བཅུད་མི་བླུགས། །དོན་དང་མི་ལྡན་བཅོས་མའི་རྟགས། །བསྲེལ་ཞིང་སྤྱད་པར་བྱ་བ་མིན། །ཤེལ་དཀར་རིན་ཆེན་སྒོ་ང་དག །འདམ་རྫབ་ཁུང་དུ་བསྲུབ་མི་བྱ། །སེང་གེ་དཀར་མོའི་འོ་མ་དག །དུག་ཅན་སྣོད་དུ་བླུགས་པ་མིན། །ཡིད་བཞིན་ནོར་བུ་རིན་པོ་ཆེ། །བསྲེག་པར་བྱ་བ་ཡོད་མ་ཡིན། །ཁྱུང་ཆེན་གཤོག་པ་མཁར་བརྐྱང་བ། །དེ་དག་གཅག་པར་བྱ་བ་མིན། །གནམ་ལྕགས་མེ་ཡི་ངུར་མོ་དག །བརྡབ་པར་བྱ་བ་མ་ཡིན་ནོ། །སྟག་གཟིག་འདྲོལ་བས་ལས་བྱས་པའི། །ལས་ཀྱི་ལྷག་མ་བསྡུ་མི་བྱ། །རྡོ་རྗེ་བྲག་ཆེན་གཏམས་པའི་གཞི། །དེ་དག་གཞིག་པར་བྱ་བ་མིན། །རྡོ་རྗེ་ར་བའི་གོ་ཚགས་ནི། །བསྔམ་བྱ་བྲལ་བར་བྱ་བ་མིན། །བུད་ཤིང་སྲེག་པའི་སྒྲོན་མ་དག །གཡེང་བའི་རླུང་གིས་བསྐྱོད་མི་བྱ། །རྡོ་རྗེ་ཚིག་གི་ཆུ་རྒྱུན་དག །འོལ་ཀར་གཅད་པར་བྱ་བ་མིན། །རྒྱལ་པོ་བཀའ་རྟགས་ཕྱག་རྒྱ་དག །ནམ་ཞར་དབྱི་བར་མི་བྱའོ། །རྡོ་རྗེ་ཕ་ལམ་གཏམས་པའི་མཁར། །རྨང་ནས་བཟློག་པར་མི་བྱའོ། །གཙུག་གི་ནོར་བུ་ འབར་བ ་དག །རྒྱལ་མཚན་རྩེ་ལས་དཔོག་མི་བྱ། །རྣལ་འབྱོར་ལས་ཀྱི་ཁྱད་པར་ཅན། །སྐལ་ཅན་རྣམས་ཀྱི་དམ་ཚིག་སྟེ། །སྐལ་བར་ལྡན་པའི་ནོར་མཆོག་ཡིན། །རྒྱུན་དུ་སྤྱད་པའི་ནོར་མཆོག་ནི། །རྡོ་རྗེ་ལས་ཀྱི་ཐུན་ཚགས་དག །རྡོ་རྗེ་གོ་ཕུར་ཏྲོམ་ཆེན་གྱིས། །སྲོག་ལ་བར་
ཆད་བྱེད་པའི་དགྲ། །ཉོན་མོངས་འཐིབས་པ་དེ་གཞོམ་བྱ། །སྙོམ་ལས་ལེ་ལོའི་དཔུང་བསྐྱེད་པ། །ཐུག་ཐུ་བར་ཆོད་ང་རྒྱལ་གཞི། །དྲེགས་བྱེད་དབང་པོ་མྱོས་པའི་བཅུད། །དཔའ་བྱེད་རྐྱེན་ཡང་བསྡམ་པར་བྱ། །རྡོ་རྗེ་གསང་ཚིག་མ་གཏོགས་པ། །འདྲེས་པ་གང་ཟག་བྱིས་པའི་ཚིག །ཟུར་ཡང་བརྗོད་པར་མི་བྱ་ཞིང་། །ཐམས་ཅད་རྡོ་རྗེ་གསང་བས་བྱའོ། །ཇི་ལྟར་གསོད་པའི་མི་རྣམས་དག །གཤེད་མའི་མིས་ནི་གསོད་པའི་ཚེ། །ཐར་པའི་ཐབས་ལ་བརྩོན་པ་བཞིན། །ལེ་ལོའི་དགྲ་བཅོམ་བརྩོན་པར་འབད། །རྣལ་འབྱོར་སྒྲིབ་པའི་གེགས་བསལ་བ། །དཀའ་ཐུབ་སྡོམ་པའི་མདུད་པ་ཅན། །འདོད་དང་ལོངས་སྤྱོད་མི་མཐུན་དང་། །སྤྱི་མཐུན་ནང་དུ་མི་གཅིག་པ། །ཕྱི་ནང་ཅན་དང་གནོད་བྱེད་དང་། །འདོད་མྱོས་བྱིང་རྨུགས་བརྐམ་པ་དང་། །དད་མེད་རྩ་ཉམས་འཕྱར་གཡེང་ཅན། །མཁས་པས་བསྒྲིམས་ཏེ་སྤང་བར་བྱའོ། །དེ་ནི་རྣལ་འབྱོར་གེགས་ཡིན་ཏེ། །དངོས་གྲུབ་ཆུ་བོ་གཅོད་པར་བྱེད། །རྣལ་འབྱོར་ངེས་པར་སྤྱོད་པ་ལ། །བར་དུ་གཅོད་པའི་བདུད་ལྔ་འབྱུང་། །རྣམ་རྟོག་འཕྲིག་པའི་བདུད་ཉིད་དང་། །དེ་བཞིན་བཏང་སྙོམས་ལེ་ལོའི་བདུད། །ལོངས་སྤྱོད་འདུ་འཛི་གཡེང་བའི་བདུད། །ཚིག་རྩུབ་མཚོན་ཆ་རྣོན་པོའི་བདུད། །ཁྲོ་གཏུམ་ངང་ཐུང་འཁྲུག་པའི་བདུད། །རྣལ་འབྱོར་སྤྱོད་པའི་བདུད་ལྔ་པོ། །ཡང་དག་དོན་ལ་སྒྲིབ་པ་སྟེ། །གཉེན་པོ་བྱང་ཆུབ་སེམས་མཆོག་གིས། །ཞི་བ་ཆེན་པོའི་དང་དུ་བཟློག །རྣལ་འབྱོར་སྤྱོད་པའི་དགྲ་བཞི་པོ། །ཐབས་ལ་མཁས་པས་གདུལ་བར་བྱ། །རྡོ་རྗེ་བརྣག་པ་གསང་འཕེལ་བས། །ངག་གི་དབང་པོ་ཉམས་འགྱུར་ཏེ། །ཁ་ན་མ་ཐོས་ཕོག་པར་འགྱུར། །དེ་དག་བཅས་ཀར་འགྱུར་བའི་དགྲ། །ལྟ་དམན་སྤྱོད་རྩིང་འཆོལ་བ་ཡིས། །བཀའ་ཡི་གཞུང་བོར་ལོག་པར་སྤྱད། །ནོར་བས་བར་ཆད་འབྱུང་བའི་དགྲ། །དམ་གཙོར་སྤྱོད་པའི་ལས་རྣམས་ཡིན། །འདའ་དཀའ་རྡོ་རྗེ་མཆོག་གསུམ་པོ། །བཏང་སྙོམས་ཕྱལ་བར་ཤོར་བ་ནི། །རྩ་བ་རུལ་པའི་ལྗོན་ཤིང་
བཞིན། །བཀའ་ཆད་ཆེན་པོ་འབབ་པའི་གནས། །བརྩམ་པ་ལས་ལ་སྦྱོར་བའི་ཚེ། །འབད་པའི་རྩལ་ཤུགས་ཆུང་བ་ཡིས། །དོན་རྣམས་གྲུབ་པ་མ་ཡིན་ཏེ། །འབྲས་བུར་མི་འགྱུར་འཕྲོག་པའི་དགྲ། །རྣལ་འབྱོར་ཆེན་པོར་སྤྱོད་པ་ལ། །འདོད་པའི་ནོར་མཆོག་འཕྲོག་པའི་དགྲ། །ཐབས་ལ་མཁས་པའི་སྐྱེས་བུ་ཡིས། །སྐྱོན་གྱི་དགྲ་བཞི་སྤང་བར་བྱ། །སྲིད་གསུམ་བསྒྲལ་བའི་ཞིང་འདི་དག །སངས་རྒྱས་ཞིང་དུ་རྟོགས་པ་ནི། །ས་རྣམས་ཅིག་ཅར་སྦྱངས་པ་སྟེ། །ཞིང་རྣམས་དག་པའི་མཆོག་ཡིན་ནོ། །ཁམས་གསུམ་མཆོད་པའི་རྒྱུ་འདི་དག །ཡོ་བྱད་ཆེན་པོའི་མཆོག་ཡིན་ཏེ། །རྒྱལ་བ་ཐམས་ཅད་མཉེས་པའི་རྒྱུ། །རྨད་དུ་བྱུང་བའི་མཆོད་པའོ། །འཁོར་བ་དུར་ཁྲོད་གནས་འདི་དག །བདེ་བ་ཆེན་པོའི་གནས་ཡིན་ཏེ། །མ་ནོར་མ་བཅོས་ཆོས་ཀྱི་དབྱིངས། །བཙལ་མེད་ལྷུན་གྱིས་གྲུབ་པ་ལ། །དུག་ལྔ་རྒྱུ་བའི་རྩ་བ་དག །ཡེ་ཤེས་ལྔ་ཡི་རྩ་བ་སྟེ། །ཀུན་ཤེས་ཀུན་རིག་གསལ་བའོ། །རང་རིག་ཡེ་ཤེས་རང་ལས་བྱུང་། །རྣལ་འབྱོར་ཆོས་མིག་ལྡན་པ་ཡིས། །ངེས་པའི་དོན་དུ་འདི་ལྟར་བལྟའོ། །འདི་ནི་རྒྱུན་གྱི་དམ་ཚིག་སྟེ། །བརྗོད་དུ་མེད་པ་བསྲུང་བའོ། །བསྲུང་བ་ཐུབ་པར་བྱ་བ་ལ། །དམ་ཚིག་རྩལ་གྱི་ཁྱད་པར་ནི། །གང་དག་རིག་པ་འཛིན་པ་ཡི། །བློ་ལ་ངེས་པའི་ལུང་དུ་བསྟན། །འདོད་པས་ཆགས་དང་འཇོམས་པ་དང་། །གཏི་མུག་ང་རྒྱལ་ཕྲག་དོག་རྣམས། །རྣལ་འབྱོར་ཆེན་པོའི་དམ་ཚིག་སྟེ། །དོན་དང་ལྡན་པའི་སྐྱེས་བུས་སྤྱད། །སྦྱོར་དང་སྒྲོལ་བར་བྱེད་པ་དང་། །མ་བྱིན་ལེན་དང་ངག་སྤྲུལ་བྱེད། །རྣལ་འབྱོར་དམ་ཚིག་སྤྱོད་པའི་མཆོག །སྤྱད་པར་བྱ་བའི་ལས་ཡིན་ནོ། །རྒྱལ་བ་སེམས་ཅན་ཐམས་ཅད་དང་། །དངོས་པོར་བརྟགས་པ་ཐམས་ཅད་ཀྱང་། །དོན་གྱི་ངང་དུ་གཅིག་པ་སྟེ། །དེ་ཉིད་སྐུ་གསུང་ཐུགས་ཀྱི་བདག །མཚན་མའི་ཆོས་རྣམས་ཐམས་ཅད་ནི། །མཉམ་པ་ཆེན་པོའི་ངང་དུ་གསལ། །ཐེག་པ་འོག་མའི་ཁྱད་པར་རྣམས། །ཀུན་ཀྱང་རང་རིག་བློ་ལ་གསལ། །ཡོན་ཏན་ཅི་འབྱུང་མི་བརྗོད་ཅིང་། །འོག་མ་རྣམས་ལ་མི་སྨོད་ཅིང་། །ཐམས་ཅད་
མཉམ་པའི་དམ་ཚིག་སྟེ། །འདི་ལྟར་ཤེས་ན་ཚོགས་མཆོག་རྫོགས། །གཟུགས་རྣམས་རྣམ་པར་སྣང་བ་མཛད། །ཚིག་རྣམས་བརྗོད་པ་སྣང་མཐའ་ཡས། །རྣམ་རྟོག་ཀུན་དུ་སེམས་རྡོ་རྗེ། །རིག་དང་ཚོར་བ་རིན་ཆེན་འབྱུང་། །ཡིད་གཡོ་བྱེད་པ་དོན་ཀུན་རྫོགས། །སྟན་འགན་རང་བཞིན་སྤྱོད་པའི་གནས། །ཞིང་བཅུ་དག་དང་ལྡན་པ་ན། །བདེ་བ་ཆེན་པོའི་ལོངས་སྤྱོད་དེ། །ཐོགས་མེད་ཕྲིན་ལས་རྣམ་བཞིར་རྫོགས། །ཕྱི་ཡི་ཡུལ་དང་ནང་གི་སེམས། །ཐམས་ཅད་མཉམ་པ་ཉིད་དུ་གནས། །དེ་ལ་སྒྲིབ་དང་མི་སྒྲིབ་ཅེས། །མཉམ་པའི་རྒྱལ་པོས་ཡོང་མ་གསུངས། །ཐམས་ཅད་མཉམ་ཉིད་དབྱིངས་གྱུར་པས། །ཕུང་པོ་ལྔ་དོན་ཡེ་ཤེས་ལྔ། །སྐུ་གསུང་ཐུགས་ཀྱི་དབང་ཕྱུག་ནི། །ཕྱག་རྒྱ་ཆེན་པོའི་རིག་འཛིན་ཡིན། །ཡུལ་དང་ཡེ་ཤེས་རང་བཞིན་ལས། །གཞན་གྱི་རང་བཞིན་མེད་པས་ན། །མཚན་མའི་རྣམ་པ་ཅིར་སྣང་ཡང་། །དེ་ལ་ཆད་པའི་གནས་མེད་དོ། །དམ་ཚིག་དམ་པ་གང་ཞེ་ན། །རྟོགས་པ་དམ་པ་དམ་ཚིག་སྟེ། །རྟོག་པར་བྱེད་པ་གང་ཡིན་པ། །དེ་ནི་དམ་ཚིག་ཆེན་པོའོ། །ཐམས་ཅད་མཉམ་པའི་ངང་ལ་གནས། །ཏིང་ངེ་འཛིན་གྱི་ཆོ་འཕྲུལ་ལས། །དངོས་སུ་སྤྱོད་པ་ཐམས་ཅད་བྱ། །དེ་ནི་དམ་ཚིག་ཆེན་པོ་ཡིན། །སྣོད་དུ་གྱུར་པ་ཡུམ་གྱི་དབྱིངས། །བཅུད་རྣམས་རྒྱལ་བ་ཡབ་ཀྱི་མཁའ། །འབྱུང་འཇུག་རིག་པས་ལོངས་སྤྱོད་དེ། །འདི་ནི་རྡོ་རྗེ་ཐ་ཚིག་ཡིན། །སྲིད་པའི་སེམས་ཅན་ཐམས་ཅད་དང་། །ཐར་པ་ཆོས་ཀྱི་རྣམ་གྲངས་ཀུན། །སོ་སོར་ཐམས་ཅད་སྣང་བ་སྟེ། །ཀུན་ཀྱང་མཉམ་པའི་ངང་དུ་གསལ། །སྤྱོད་པའི་ལས་དང་རྟོགས་པ་དང་། །མཚན་མར་གྱུར་པ་ཐམས་ཅད་ཀྱང་། །སེམས་ཀྱི་ཕྱི་ནང་སྤྱོད་ཡུལ་དེ། །བརྟགས་ན་ལོངས་སྤྱོད་ཚོགས་སུ་འགྱུར། །མ་སྐྱེས་སྟོང་པ་སྐུ་ཡི་རྒྱ། །རང་བཞིན་སྨོན་མེད་གསུང་གི་དོན། །མཚན་མེད་ཡིད་ལས་འདས་པ་ཐུགས། །རྣམ་གསུམ་བདེ་ཆེན་སངས་རྒྱས་སོ། །མཉམ་པའི་ལྟ་བས་དབང་སྒྱུར་ན། །འཁོར་བ་ཐམས་
ཅད་དབྱིངས་ལ་སྣང་། །ལས་ཀུན་རྫོགས་པའི་མཆོག་ཡིན་ཏེ། །གཞན་དུ་ཕྲིན་ལས་ལུས་པ་མེད། །སྡུག་བསྔལ་བྱང་ཆུབ་ཆེན་པོ་སྟེ། །འཁོར་བ་ཡེ་ནས་མྱ་ངན་འདས། །སྒྲིབ་པ་རྣམ་དག་ཆོས་ཀྱི་དབྱིངས། །ཉོན་མོངས་ཀུན་ཀྱང་བྱང་ཆུབ་དོན། །སྣང་བ་མེད་པའི་དོན་མཐོང་དང་། །ས་དང་ས་ཡི་རིམ་པར་ནི། །འདི་དང་འདི་ཞེས་གཟུང་དུ་མེད། །འདི་ནི་སྣང་མེད་ཐོབ་པའི་གནས། །སྐུ་དང་གསུང་ཐུགས་མི་གཡོ་བའི། །ཇི་བཞིན་ཉིད་ཀྱི་ངང་ལ་གནས། །ཇི་ལྟར་བསྒྱུར་ཡང་ཆོས་ཉིད་པས། །ཆད་པའི་གནས་ཞེས་བརྗོད་དང་བྲལ། །མེད་དང་ཕྱལ་བ་གཅིག་པོ་དང་། །ལྷུན་གྱིས་རྫོགས་པའི་དམ་ཚིག་ཆེ། །འདི་ཞེས་རིས་སུ་ཆད་མེད་པ། །འདི་ནི་བསྲུང་བའི་དམ་ཚིག་གོ། །སྤྱད་དང་སྤྱོད་པར་བྱ་མེད་པས། །སྲིད་དང་མུ་སྟེགས་འཇིག་རྟེན་པའི། །སྤྱོད་པར་སྣང་བ་ཐམས་ཅད་ཀུན། །ལྷུན་གྱིས་གྲུབ་པའི་མཛད་སྤྱོད་དོ། །མ་སྤངས་ལྷུན་གྲུབ་དབྱེར་མེད་པས། །དབྱིངས་ལས་གཞན་ན་ལྟ་ཡུལ་མེད། །འདི་ནི་ལྟ་བའི་དམ་ཚིག་གོ། །ས་ཆུ་མེ་རླུང་སྣོད་བཅུད་བཅས། །ཀུན་ཀྱང་རང་བཞིན་ཆོས་ཉིད་དོ། །ཆོས་ཉིད་དོན་ལ་གཞན་མེད་པ། །རང་འབྱུང་ཡེ་ཤེས་གསལ་བའོ། །ཡིད་བཞིན་ནོར་བུ་རིན་པོ་ཆེ། །མ་བཙལ་རང་ལ་ཡོད་པ་ཡིན། །འདོད་པ་འབྱུང་བའི་ལོངས་སྤྱོད་དེ། །བདེ་ཆེན་ལོངས་སྤྱོད་ཚོགས་ཡིན་ནོ། །ངན་སོང་མཐོ་རིས་ཐམས་ཅད་དང་། །འཕགས་ལམ་འཁོར་བའི་ཆོས་རྣམས་ཀུན། །རང་བཞིན་སོ་སོར་མི་དམིགས་ཏེ། །སངས་རྒྱས་ཀྱི་ནི་རང་བཞིན་ཡིན། །སྤྱོད་དང་གཟུགས་རིགས་ཐམས་ཅད་ཀུན། །ཕྱག་རྒྱ་ཆེན་པོའི་རང་བཞིན་ཏེ། །སྐུ་གསུང་ཐུགས་ཚིག་རྒྱ་ཆེར་སྟོན། །དོན་རིག་ཐུགས་ཀྱི་རང་བཞིན་ནོ། །མ་སྐྱེས་པ་དང་མ་བྱུང་བ། །མི་གནས་པ་ལ་ཆགས་པ་མེད། །དོན་གྱི་ཁྱད་པར་རྟོགས་ཆུད་ན། །ཀུན་དུ་བཟང་པོ་མཆོག་གི་སའོ། །མཚན་དང་དཔེ་བྱད་ཀུན་རྫོགས་ཏེ། །ཐམས་ཅད་སྐུ་གསུང་ཐུགས་ཀྱི་དོན། །བདག་ཉིད་ཆེན་པོར་ཐམས་ཅད་རྫོགས། །
ལྷུན་རྫོགས་བདེ་བ་ཆེན་པོ་ཡི། །ཁྱབ་པ་ཆེན་པོར་ཀུན་བདལ་བས། །སྒྲིབ་པ་ཀུན་བྱང་ཚོགས་ཀུན་རྫོགས། །རྣམ་གྲོལ་བཅིངས་པ་ཀུན་དང་བྲལ། །ལྷུན་གྲུབ་བདེ་བའི་གནས་ཆེན་ཡིན། །ཞེས་སྨྲ་བའི་སེང་གེ་ཆེན་པོས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དམ་ཚིག་གསང་བ་མཆོག་གི་ལེའུ་ཞེས་བྱ་སྟེ་བཞི་པའོ།། །།དེ་ནས་ཡང་སེམས་དཔའི་རྡོ་རྗེ་དེ་ཆོས་ཐམས་ཅད་བརྡས་མཚོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པ་དང་། འདུས་པ་ཆེན་པོའི་འཁོར་རྣམས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་ནི་བདག་ཅག་རྣམས་ཀྱིས་བརྡ་རིག་པ་ཙམ་གྱི་ངོ་བོར་མཐོང་ངོ་། །དེ་ནས་སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་བརྡ་དང་། ཐ་སྙད་དང་། བཏགས་པ་ཙམ་དུ་ཤེས་པར་གྱིས་ཤིག །བཏགས་པའི་ཆོས་ཐམས་ཅད་ནི་ཕྱི་ནང་གང་ན་ཡང་མི་གནས་ཏེ། ཆོས་ཐམས་ཅད་ལ་མིང་གི་གཞི་མེད་ཅིང་བཏགས་པའི་ཐ་སྙད་དང་བྲལ་བ་ཡིན་ནོ། །བརྡ་ཞེས་བྱ་བ་ནི་སྦས་པ་བཏགས་པའི་ཐ་སྙད་ཡིན་ནོ། །སྦས་པའི་ཆོས་རྣམས་གསང་བའི་ཕྱིར། །ཐམས་ཅད་སྦ་ཞིང་བརྒྱུད་པར་བྱ། །འདི་ལྟར་བརྡ་ཡི་སྦྱོར་བ་ལ། །རྣལ་འབྱོར་ཅན་གྱིས་ཤེས་པར་གྱིས། །དེ་ནས་འདུས་པའི་རྣལ་འབྱོར་རྣམས་ཀྱིས་གསོལ་པ། སེམས་དཔའ་ཆེན་པོས་བརྡ་ཡི་ཆོས་རྣམས་རྒྱ་ཆེར་བཤད་དུ་གསོལ། །བདག་ཅག་གིས་ཀྱང་ཆོས་ཐམས་ཅད། །བརྡ་ཡི་དོན་གྱིས་བརྒྱུད་པར་བགྱི། །བརྡ་ཞེས་བགྱི་བ་ཇི་ལྟ་བུ། །སྦས་པའི་ཆོས་ནི་གང་དང་གང་། །མི་བསྟན་གསང་བ་གང་གང་ལགས། །དེ་སྐད་ཅེས་གསོལ་པ་དང་། སྨྲ་བའི་སེང་གེས་བཀའ་སྩལ་པ། ཉོན་ཅིག་འདུས་པ་ཆེན་པོའི་ཚོགས། །བརྡ་ཞེས་བྱ་བ་སྦས་པའི་ཚིག །སྦས་ཏེ་གསང་བའི་ཆོས་རྣམས་ནི། །རྣལ་འབྱོར་ཆེན་པོའི་སྤྱོད་པ་ཡིན། །མི་བསྟན་གཞན་ལ་གསང་བ་ནི། །མུ་སྟེགས་ལ་སོགས་
སྡེ་བ་རྣམས། །རྣལ་འབྱོར་སྤྱོད་ལ་འཕྱ་བ་ལས། །ཤིན་ཏུ་བླན་ཞིང་སྦ་བའི་ཕྱིར། །སྦས་པའི་བརྡ་ཡིས་བསྟན་པར་བྱ། །བརྡ་ཡི་ཡོན་ཏན་ཆེན་པོ་ནི། །གྲངས་ཀྱང་བསམ་གྱིས་མི་ཁྱབ་ན། །མདོར་བསྡུས་རྣམ་པ་བཞི་ཡོད་དེ། །གཞན་གྱི་སྤྱོད་ཡུལ་མ་ཡིན་དང་། །རྣལ་འབྱོར་རིག་པའི་སྤྱོད་ཡུལ་དང་། །སྦས་པས་གྲུབ་ཐག་ཉེ་བ་དང་། །གསང་བའི་དམ་ཚིག་མི་ཉམས་ཤིང་། །བརྡ་ལ་དགའ་བའི་མ་སྲིང་རྣམས། །ཉེ་ཞིང་གདུང་བའི་ཐབས་སུ་འགྱུར། །དེ་བས་སྦས་པའི་བརྡ་རྣམས་ནི། །ཚིག་གིས་མཚོན་ཏེ་བརྗོད་པར་བྱ། །ཨ་ལ་ལ་ཧོཿ། ཨ་ཏི་པུ་ཧོཿ། པྲ་ཏི་བུ་ཧོཿ། མ་ཧཱ་གོ་རུ་སཾ་ཀྲ་མ། གུ་ཡ་དེ་བཱི་ས་མ་ཡ། མ་ཧཱ་ཙནྡྲ། མ་ཧཱ་པུརྴ། གུ་ཡ། བྷ་ག །མ་ཧཱ་བཛྲ། ས་མ་ཡ་ཧོཿ། ས་མ་ཡ་སྟྭྃ། ར་ཧོ་ཡ་ཧཾ། ར་ག་ཡཱ་མི། ས་མ་ཡ་ཛཿ། ལྷན། ཨོྃ་ཨཱྃཿཧཱུྃ། ས་མ་ཡ། ས་མ་ཡ། ཨེ་ཧྱེ་ཧི། ཨེ་ཧྱེ་ཧི། ཧ་ཧེ་ཧ། ཧ་ཧེ་ཧ། མ་ཏྃ་ཁ། མ་ཏྃ་ཁ། ཀ་རུཀྵ། ཀ་རུཀྵ། ཀྵྃ་བ་རི། ཀྵྃ་བ་རི། ར་ཧོ་ཧྃ་ར་ཧོ་ཧྃ། ས་མ་ཡ་ཧི། ཨ་ལ་སྟོཾ། ཨ་ལ་སྟོཾ། ཁ་ཁ་ལེ་ཁ་ལེ། ཤ་ད་པ། ཤ་ད་པ། ཁ་རཾ་ཁཱ་ཧི། ཁ་རཾ་ཁ་ཧི། ཁ་ལེ་བྷྱོ། ཁ་ལེ་ཧ་བྷྱོ། ཁ་ཀ་ཁ་ཁ་ཀ་ཁ། ཁ་ཧྱི་ཧ་ཧེ། རཀྵ་ཁཱ་ཧི་རཀྵ་ཁཱ་ཧི། ཧ་ཧ་ཧེ་རྃ། གུ་ཧྱ། གུ་ཧྱ། ས་མ། ས་མ། མ་ལེ་མུ་ལེ། ཏ་ལེ་དུ་ལེ། མ་ཙ་མེ་ཙ། གུ་ཧྱ་སིཏྟི། པ་ར་མ། པ་ར་མ། ཤི་རི་ཧོཿ། ཤི་རི་ཧོ། མ་མ་ཁ་ཀ་ཏྲྃ། ཨེ་ཨེ་ཨེ་ཨེ། ཧྲིཾི་ཧྲིཾ། བྷྱོ་བྷྱོ། ཁ་ཁ་ལེ་ལེ། ཀརྨ་མ་ཏི་བྷྱོ། རཀྵ་ཀྲ་མ་བྷྱོ། རཀྵ་ཀྲ་མ་བྷྱོ། ཀརྨ་མ་ལེ། ཀརྨ་མ་ལེ། ཀྵུ་ཏི་ཤ་ནེ། ཀྵུ་ཏི་ཤ་ནེ། རཀྵ་ཀརྨ། རཀྵ་ཀརྨ། ཀྲོ་དྷ་ཀྵྃ། ཁཱ་ཧི་བྷྱོ་ཁ་ཧི་བྷྱོ། ཙ་ལེ་ཡྃ། ཙ་ལེ་ཡྃ། པྲ་ཙ་ལེ། པྲ་ཙ་ལེ། གུ་རཱ་ཡྃ། གུ་རཱ་ཡྃ། བི་གུརྟྟི། བི་གུརྟྟི། མ་མོ྅་ཧྃ། མ་མོ྅་ཧྃ། ངག་བརྡ་དམ་ཚིག་གི་ཕྱག་རྒྱའོ། །བྱཱ་གྷྲི་ཙརྨ། བྱཱ་གྷྲི་ཙརྨ། བ་ཡྃ་ཀྵྃ་ག་རི། བ་ཡྃ་ཀྵྃ་ག་རི། བ་བྱཱ་ཛྙོ་བ་བ་ཏི། བ་བྱཱ་ཛྙོ་བ་བ་ཏི། ན་ར་ཧ་ས། ན་ར་ཧ་ས། བནྡྷ་ཀ་པཱ་ལ། བནྡྷ་ཀ་པཱ་ལ། ཙརྨ་ན་ག་ཏྲུྃ། ཙརྨ་ན་ག་ཏྲུྃ། རཱ་
ག་རཀྟ་ཙ་ར་ག་རཀྟ་ཙ། རུ་དྷི་རཱ་མ་ཏ། རུ་དྷི་ར་མ་ཏ། ཀ་རུ་ག་ཙ། ཀ་རུ་ག་ཙ། བ་བྱ་བ་ཏི། བ་བྱ་བ་ཏི། གཾ་གྲོ་ཎ། གཾ་གྲོ་ཎ། ཐརྤ་ཏ། ཐརྤ་ཏ། དཔའ་བྱེད་ཁ། དཔའ་བྱེད་ཁ། ཟླ་བ་རྒྱས་དང་རྫོགས་པ་དང་། ཟླ་བ་དཀར་དང་ཟླ་ཕྲོམ་མཆོག །ཚེ་འཛིན་ཀུན་གྱི་གཙོ་མོ་དང་། །འཇམ་པོ་ཐར་པ་ཆེན་པོ་དང་། །གལ་ཞེས་བྱ་བའི་རོ་མཆོག་དང་། །གཟི་བརྗིད་ཆེན་པོའི་དྲི་ཞིམ་དང་། །བྲན་མོ་དང་ནི་གཡོག་འཆང་མ། །འཇམ་དཔལ་རྣོན་པོའི་ཀ་ཏར་དང་། །མཱ་ཐ་ཡ་མཱ་ཐ་ཡ། པརྤ་ཏི་པརྤ་ཏི། རྭ་ཐ་མ་རྭ་ཐ་མ། ཁ་ཏཾ་ཉ་ཁ་ཏཾ་ཉ། རྭ་ཏི་ཧཱུྃ་རྭ་ཏི་ཧཱུྃ། ཤི་ཉཾ་ཐ། ཤི་ཉཾ་ཐ། ཀ་རཾ་ཐ། ཀ་རཾ་ཐ། ཤཀྟི་ཁ་ཤཀྟི་ཁ། ཡོ་གཙ་རྦཱན་ཡོ་ག་ཙརྦཱན། སྒྲ་བརྡ་དམ་ཚིག་གི་ཕྱག་རྒྱའོ། །ལག་གི་ཕྱག་རྒྱ་ཆེན་པོ་ནི། །གར་ཐབས་གཡས་གཡོན་བསྐོར་ནས་ཀྱང་། །སེ་གོལ་བརྡབས་པ་འདྲེན་པའི་བརྡ། །བསྐོར་ནས་ཐལ་སྦྱར་ཕྱག་རྒྱའི་བརྡ། །ཤིན་ཏུ་བསྐོར་ནས་སྤྱི་བོར་དགྲོལ། །འདི་ནི་མཆོད་པ་བཞེས་པའི་བརྡ། །བསྐོར་ནས་སྙིང་གར་བཅངས་པ་ནི། །ཏིང་འཛིན་རྡོ་རྗེ་བརྟན་པའི་བརྡ། །གར་བསྐོར་ཤིན་ཏུ་གཉིས་བསྟབས་པ། །མཆོད་པ་སྟོབས་པར་བྱེད་པའི་བརྡ། །གར་བསྐོར་དབང་མོའི་སྤྱི་བོར་བཞག །སྦྱོར་པའི་དོན་ལ་འཇུག་པའི་བརྡ། །ཐབས་ཀྱིས་སྤྱི་བོར་བཞག་པ་དང་། །ཤེས་རབ་དབང་མོའི་སྙིང་གར་རོ། །ཐབས་ཀྱིས་གསང་བ་གཡས་བཅུག་ན། །ཤེས་རབ་ཐོས་བྱེད་གསང་བ་ཡིན། །ཐབས་ཀྱིས་ནས་གཡས་བཏེག་ན། །ཤེས་རབ་ནས་གཡོན་བཏེག་པའོ། །ཐབས་ཀྱིས་རྡོ་རྗེ་ཕྱག་རྒྱ་བསྟན། །ཤེས་རབ་པདྨོའི་ཕྱག་རྒྱ་བསྟན། །ཐབས་ཀྱིས་སྨིན་མ་གཡས་བསྐྱོད་ན། །ཤེས་རབ་སྨིན་མ་གཡོན་བཏེག་བྱ། །ཐབས་ཀྱིས་ཕྱག་གཡོན་བརྐྱང་བ་དང་། །ཤེས་རབ་གཡས་ཀྱིས་འཁྱུད་ཚུལ་བསྟན། །ཕྱག་རྒྱ་གར་བསྐོར་ཐལ་བརྡབས་ཤིང་། །དབང་མོ་ལྕེ་ལ་རེག་པ་ནི། །ཚོགས་མཆོད་དུས་ལ་བབ་པའི་བརྡ། །ལག་གཉིས་བསྐོར་ནས་དབང་མོ་འཐོར། །དེ་ནས་དབང་མོ་ལྕེ་ལ་རེག །འཛའ་གད་
འདྲིམ་པའི་བརྡ་ཐབས་སོ། །མ་ཧཱ་གིང་ཆེན་ཀརྨ་དང་། །རྡོ་རྗེ་དྲོད་ཀྱི་རྟགས་འཛིན་ལས། །སོགས་པའི་བརྡ་ཡི་དམ་ཚིག་རྣམས། །རྣལ་འབྱོར་ཅན་གྱིས་སྤྱད་ན་འགྲུབ། །ལུས་བརྡ་དམ་ཚིག་ཕྱག་རྒྱའོ། །ཞེས་སྨྲ་བའི་སེང་གེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་བརྡའི་ལེའུ་སྟེ་ལྔ་པའོ།། །།དེ་ནས་ཡང་སྨྲ་བའི་སེང་གེ་སེམས་དཔའི་རྡོ་རྗེ་དེ་རྣལ་འབྱོར་རོལ་པའི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང་། འདུས་པ་ཆེན་པོའི་ཚོགས་ཀྱིས་གསོལ་པ། སྨྲ་བའི་སེང་གེ་ཆེན་པོ་ཆོས་ཐམས་ཅད་ནི་རྡོ་རྗེ་ཚོགས་ཀྱི་དཀྱིལ་འཁོར་དུ་བདག་ཅག་རྣམས་ཀྱིས་མཐོང་ངོ་ཞེས་གསོལ་པ་དང་། སྨྲ་བའི་སེང་གེས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཡིན་པར་ཤེས་པར་གྱིས་ཤིག །ཅེས་བཀའ་སྩལ་པ་དང་། འདུས་པའི་ཚོགས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་ཀྱི་རང་བཞིན་ནི་རྡོ་རྗེ་ཚོགས་ཀྱི་དཀྱིལ་འཁོར་གྱི་དོན་བདག་ཅག་རྣམས་ལ་རྒྱ་ཆེར་བཤད་དུ་གསོལ། །སེམས་དཔའ་ཆེན་པོས་བཀའ་སྩལ་པ། ཉོན་ཅིག་འདུས་པ་ཆེན་པོའི་ཚོགས། །རྡོ་རྗེ་ཚོགས་ཀྱི་དཀྱིལ་འཁོར་འདི། །རྒྱལ་བ་རྣམས་ཀྱི་ཐུགས་དམ་སྟེ། །རྣལ་འབྱོར་ཀུན་གྱིས་སྤྱད་པའི་ལམ། །ས་མཆོག་བགྲོད་པའི་ལམ་འདི་དག །འདུས་པའི་ཚོགས་ལ་བཤད་པར་བྱ། །བརྩམ་པ་ལས་ཀྱི་དང་པོ་པ། །རྡོ་རྗེ་ཚོགས་ལ་འཇུག་པ་ན། །ཁྱད་པར་རིམ་པ་ཅི་བཞིན་དུ། །ལས་མཆོག་འདི་ཡི་རང་བཞིན་གྱིས། །ཇི་བཞིན་རིམ་པར་སྦྱངས་ནས་ཀྱང་། །ས་རབ་མཆོག་ཏུ་བགྲོད་པ་ལ། །ཐབས་མཆོག་ལྔ་ཡིས་བགྲོད་བྱ་སྟེ། །རྡོ་རྗེ་ཚོགས་དང་བསྙེན་པ་དང་། །ཉེ་བ་དང་ནི་བསྒྲུབ་པ་དང་། །བསྒྲུབ་པ་ཆེན་པོར་སྦྱར་བར་བྱ། །ཇི་ལྟར་གྲངས་དང་དུས་ཆེན་དང་། །མཚན་མ་བྱུང་བར་བཅས་རྣམས་ལས། །གབ་པའི་སྦ་ཐབས་དེ་སྦྱར་ནས། །
སུས་མི་རིག་པའི་ཐབས་ཆེན་བྱ། །དེ་དག་གསང་བའི་བདག་པོ་ཡིན། །གནས་འདིར་འཇུག་པའི་བྱིས་པ་དག །འཇིག་རྟེན་རྡུལ་ལས་དྲངས་ནས་ཀྱང་། །འགྱུར་དབང་མ་ངེས་སར་གཞག་སྟེ། །ཅི་ཕྱིར་དང་པོ་ཡིན་པས་ན། །བྱིས་པ་བློ་ཤེད་མ་བྱེ་བས། །བཟང་ངན་བདེ་སྡུག་མི་ཤེས་ཤིང་། །བསྟན་དང་གསང་བའི་དམིགས་མི་ཕྱེད། །རྣལ་འབྱོར་སྤྱོད་པའི་བཀའ་སྒོ་འདིར། །གསང་སྒོ་མི་དབྱེ་སྐྲག་པར་འགྱུར། །རང་བཞིན་ངང་ཚུལ་མ་རྟོགས་པའི། །སོ་སོའི་སྐྱེ་བོ་བྱིས་པ་ལས། །སྣོད་མེད་སྣོད་བྱས་བདུད་ཉིད་ཀྱིས། །རྣལ་འབྱོར་འཚེ་བའི་སྲོག་གཅོད་ཅིང་། །མ་ངེས་ལྡོག་འཇུག་བཅས་པ་ཡིས། །གསང་འདི་བཅས་དཀར་འགྱུར་ཕྱིར་རོ། །དེས་ན་འདི་ཡི་སྤྱོད་པ་ཡང་། །ཇི་ལྟར་འཚམ་པར་བདེ་ཐབས་སྦྱར། །དེ་ནས་སྨྲ་བའི་སེང་གེ་དེ་ཐབས་ཀྱི་རྡོ་རྗེ་ཚོགས་ཀྱི་ཏིང་ངེ་འཛིན་ལ་སྙོམས་པར་ཞུགས་ཏེ། །རྣལ་འབྱོར་མ་ཆེན་མོ་རྣམས་མི་སྣང་བར་གྱུར་ཏོ། །དེ་ནས་འདུས་པའི་ཚོགས་ཀྱིས་གསོལ་པ། །སྨྲ་བའི་སེང་གེ་ཆེན་པོ་ཆོས་ཐམས་ཅད་ཀྱི་རང་བཞིན་ནི་ཐབས་ཀྱི་ཕྱག་རྒྱའི་རང་བཞིན་དུ་བདག་ཅག་རྣམས་ཀྱིས་མཐོང་ངོ་། །སེམས་དཔས་བཀའ་སྩལ་པ། འདུས་པ་ཆེན་པོའི་ཚོགས་འདི་དག་ནི་བརྒྱུད་དེ་སྦས་པའི་ཚོགས་ཡིན་པར་ཤེས་པར་བྱའོ། །རྡོ་རྗེ་རྣལ་འབྱོར་ཚོགས་ལྡན་ལྷ། །ཐབས་ཆེན་ཕྱག་རྒྱ་སྦས་ཚོགས་ལྔ། །རྡོ་རྗེ་འཛིན་སོགས་བཅུ་དྲུག་དང་། །བཅས་པའི་དཀྱིལ་འཁོར་རྡོ་རྗེ་ཅན། །བྲི་བྱ་ཡང་ན་བསམ་པའམ། །བརྗོད་དམ་བསྔོས་སམ་མཚན་མ་ལ། །འཇིག་རྟེན་དབང་པོའི་ཆོས་ལུགས་ཀྱིས། །མོས་པ་ལ་བསྐྱེད་དྲན་བྱས་ཏེ། །རང་བཞིན་ཡུལ་ནས་ཕབ་ནས་ནི། །ཕྱག་བྱ་ལ་སོགས་མཆོད་པ་ཡིས། །རྡོ་རྗེ་སྨན་དང་རྩིར་སྦྱར་བའི། །ཡོ་བྱད་ཆེན་པོ་ལ་སོགས་པས། །རྡོ་རྗེ་ཐབས་ཀྱི་ཚོགས་ལ་དབུལ། །རྡོ་རྗེ་རྣལ་འབྱོར་གླུ་བླངས་ཏེ། །མཉེས་བྱས་ལས་གྲུབ་གྲངས་རྫོགས་ནས། །མཆོད་དང་དམ་སྐོངས་འདོད་པ་བྱ། །སྣོད་དུ་རུང་བའི་སློབ་མ་དག །དཔའ་མཁྱེན་ལ་སོགས་བྱ་བ་
ཡིས། །འཇུག་ཚུལ་དབང་དང་དངོས་གྲུབ་སྩོལ། །རྡོ་རྗེ་ཐ་ཚིག་རྣམ་ལྔ་ཡིས། །བསླབ་པའི་གཉེར་རྣམས་ཅི་རིགས་པར། །རྩལ་གྱི་རིམ་པར་བྱིན་ནས་ནི། །རྡོ་རྗེ་གལ་ཆེན་མནའ་འདོར་རོ། །དེ་ནས་སྒྲུབ་པ་ཆེ་ཆུང་རྣམས། །ཇི་ལྟར་འདོད་པས་ནན་ཏན་གྱིས། །རྡོ་རྗེ་རྣལ་འབྱོར་བཀར་བྱའོ། །མི་ནུས་ལ་སོགས་མི་གནང་བའི། །དམ་ཚིག་དག་གིས་ནན་ཆགས་བྱ། །རྨོངས་པ་གསང་ཕྱིར་སེམས་བསྐྱེད་དེ། །ངོ་མཚར་ཚིག་གི་འདུ་ཤེས་བསྒྱུར། །ཤེས་ནས་མིག་ལ་ཤེས་བྱའི་ཡུལ། །ཐམས་ཅད་རིམ་གྱིས་བསྟན་པར་བྱ། །དྲོད་ཅན་འཁྱིལ་བའི་བློ་ལྡན་ལ། །རྣལ་འབྱོར་ན་སྤར་མཛོད་སྒོ་དབྱེ། །རྩིང་པོ་འགྲོས་ཀྱིས་དམུ་རྒོད་ལ། །གཅན་འཕྲང་འཁོར་བའི་གཡེང་རྣམས་བསྟན། །རྡོ་རྗེ་ལུང་གི་ཚད་ཅན་ལ། །ཇི་ལྟར་ནུས་པ་དེ་དབང་བསྐུར། །བཙལ་མེད་མི་ནུས་ཡུལ་ཅན་ལ། །ཕན་པ་འབའ་ཞིག་བསྔགས་པ་ཡིན། །གནས་འདིར་ཡོད་དང་མེད་པ་དང་། །འོད་མི་བསུབ་ཅིང་ལྗིད་མི་དབབ། །རྡོ་རྗེ་བློ་ཡི་ཡུལ་ཅན་ལ། །རྩལ་ཆེན་སྦྱོངས་ཞེས་གདམས་པར་བྱ། །རྡོ་རྗེ་འདུས་པའི་དབང་གྲལ་དུ། །རྡོ་རྗེ་དོན་གྱི་ལྟང་ཆེན་བཤེར། །རྩལ་དང་རིམ་པ་ཁྱད་པར་དབྱེ། །སོ་སོ་རིགས་ཀྱི་ཕྱག་རྒྱ་དག །སྤྱི་འམ་ཡང་ན་རེ་རེའོ། །དེ་ནས་སྨྲ་བའི་སེང་གེ་དེ་ཤེས་རབ་གཟུངས་ཀྱི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཏིང་ངེ་འཛིན་དེ་ལས་བཞེངས་པ་དང་། འདུས་པའི་ཚོགས་རྣམས་ཀྱིས་འདི་སྐད་ཅེས་གསོལ་ཏོ། །ཆོས་ཐམས་ཅད་ཀྱི་རང་བཞིན་ནི་ཤེས་རབ་ཚོགས་ཀྱི་དཀྱིལ་འཁོར་དུ་གདའ་བར་བདག་ཅག་རྣམས་ཀྱིས་མཐོང་ངོ་། །དེ་སྐད་ཅེས་གསོལ་པ་དང་། སེམས་དཔའ་ཆེན་པོས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་ཤེས་རབ་ཚོགས་ཀྱི་དཀྱིལ་འཁོར་དུ་སངས་རྒྱས་པར་ཤེས་པར་གྱིས་ཤིག །དེ་ཅིའི་ཕྱིར་ཞེ་ན། ཆོས་ཐམས་ཅད་ཤེས་རབ་ཀྱི་རང་བཞིན་ལས་བྱུང་ཞིང་ཤེས་རབ་ཀྱི་རང་བཞིན་དུ་གསལ་ལོ། །དེ་ནས་འདུས་པའི་ཚོགས་ཀྱིས་གསོལ་པ། སེམས་དཔའ་ཆེན་པོ་ཤེས་རབ་གཟུངས་ཀྱི་རང་བཞིན་
བདག་ཅག་རྣམས་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང་། སེམས་དཔའ་ཆེན་པོས་བཀའ་སྩལ་པ། འདུས་པའི་རྣལ་འབྱོར་ཆེན་པོའི་ཚོགས། །ཤེས་རབ་གཟུངས་ཀྱི་རང་བཞིན་ནི། །རྒྱ་ཆེར་བཤད་ཀྱིས་ཤེས་པར་གྱིས། །ཇི་ལྟར་ཐབས་ཀྱིས་ཚོགས་སྦྱར་ལྟར། །གང་དག་རྣལ་འབྱོར་མར་ལྡན་རྣམས། །རྡོ་རྗེ་འཛིན་མ་ལ་སོགས་པ། །ལྷ་མོའི་ཚོགས་སུ་སྦྱར་ནས་ཀྱང་། །གནས་འདིར་འཇུག་དགའ་ལ་སོགས་པ། །ཐབས་ཀྱི་ཕྱག་རྒྱ་མཚན་མར་སྦས། །རྡོ་རྗེ་མཉམ་པའི་གཟུངས་རྣམས་ལ། །མཉམ་པའི་མཆོད་པས་མཉེས་པར་བྱ། །བྲོ་གར་གླུ་ཚིག་ལ་སོགས་པས། །རིག་འཛིན་རྣལ་འབྱོར་མ་རྣམས་བསྒྲུབ། །ཅེས་བཀའ་སྩལ་ཏོ། །དེ་ནས་ཡང་སེམས་དཔའི་རྡོ་རྗེ་དེ་ཆོས་ཐམས་ཅད་ཐབས་དང་ཤེས་རབ་ཕན་ཚུན་དྲ་བར་འབྲེལ་པའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པ་དང་། འཁོར་རྣམས་ཀྱིས་གསོལ་པ། བཅོམ་ལྡན་འདས་ཆོས་ཐམས་ཅད་ཀྱི་རང་བཞིན་ནི་ཐབས་དང་ཤེས་རབ་ཏུ་འབྲེལ་པའི་རང་བཞིན་ཅན་དུ་བདག་ཅག་རྣམས་ཀྱིས་མཐོང་ངོ་། །ཞེས་གསོལ་ཏོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་རྣལ་འབྱོར་པ་ཆོས་ཐམས་ཅད་ནི་ཐབས་དང་ཤེས་རབ་ཏུ་འབྲེལ་བ་སྟེ། གཉིས་སུ་མེད་པར་ཤེས་པར་གྱིས་ཤིག །དེ་ནས་འདུས་པའི་རྣལ་འབྱོར་པ་རྣམས་ཀྱིས་གསོལ་པ། སེམས་དཔའ་ཆེན་པོ་ཆོས་ཐམས་ཅད་དྲ་བར་འབྲེལ་པའི་དོན་བཤད་དུ་གསོལ། སེམས་དཔའ་ཆེན་པོས་བཀའ་སྩལ་པ། འབྲེལ་བའི་དོན་ནི་འདི་ལྟ་སྟེ། །ཆོས་རྣམས་ཀུན་གྱི་མཚན་ཉིད་ནི། །ཕན་ཚུན་འབྲེལ་བའི་ཚུལ་དུ་སྣང་། །ཆོས་ཀུན་ནམ་མཁའི་མཚན་ཉིད་ལས། །སྤྲུལ་པ་བྱེ་བ་ཅིར་ཡང་སྣང་། །གཉིས་མེད་དྲ་བའི་ཚུལ་དུ་འབྲེལ། །རྣལ་འབྱོར་གསང་བའི་མཆོག་ཡིན་ཏེ། །རྩལ་དང་ལྡན་པ་གསང་སྒོ་བ། །འདི་ལ་གསང་སྒོ་དབྱེ་བར་བྱ། །གསང་འདིར་ཆུད་པའི་བུ་རྣམས་
ལ། །རྡོ་རྗེ་གསང་བའི་བཀའ་འདི་བསྒྲགས། །གསང་བའི་དཀྱིལ་འཁོར་དམ་པ་འདི། །རྡོ་རྗེ་རྒྱལ་པོ་རྒྱལ་མོར་བཅས། །ལྔ་ཉིད་ཟུང་དུ་འཁྲིལ་བ་ནི། །གཡས་ནས་གཡོན་དུ་འཁྲིལ་འཁྱུད་སྦྱོར། །གཡས་ཉིད་བྱང་ཆུབ་རྡོ་རྗེ་དང་། །རང་རང་མཚན་མ་ འབར་བའོ། །གཡོན་གྱི་སྒྲ་སྙན་དྲིལ་བུ་དང་། །རྟགས་ཀྱིས་མཛེས་པར་གསལ་བ ་ལ། །འབྱོ་ཞིང་འདུད་པའི་མདངས་ལྡན་པས། །ཆགས་ཤིང་གཡོ་བའི་ཚུལ་གྱིས་ནི། །སེང་ཆེན་ཁྱུ་མཆོག་ལ་སོགས་པ། །རྫོགས་པའི་ཚུལ་གྱིས་བསྒྱིངས་བཅས་ཏེ། །ཁ་དོག་ལྔ་ཡི་འོད་འབར་བས། །བཅུ་དྲུག་ཆས་ནི་སྒེག་པ་རྣམས། །རིམ་གྱིས་བསྐྱེད་དང་ཅིག་ཅར་བསྐྱེད། །དབང་པོའི་རིམ་པར་སྦྱར་བར་བྱ། །གསང་ཉིད་ཚོགས་ཀྱི་འཁོར་རྣམས་ཀྱང་། །གནས་ནས་གྱུར་པའི་རང་བཞིན་གྱིས། །ཕྱག་རྒྱ་རྒྱལ་པོ་རྒྱལ་མོར་བཅས། །བརྒྱད་གཉིས་ཟུང་སྒྲིལ་འཁྲིལ་འཁྱུད་སྦྱོར། །ས་དང་ནམ་མཁའ་སྤྱན་རྡོ་རྗེ། །བྱམས་དང་རྡོ་རྗེ་ཀུན་བཟང་དཔལ། །ནང་དང་ཕྱི་ཡི་ཡོ་བྱད་ནི། །གཞི་གཉིས་དག་གིས་མཉེས་སྦྱོར་བ། །བསམ་བྱ་ལ་སོགས་དེ་བཞིན་ནོ། །རྡོ་རྗེ་སྒོ་དང་བཅས་པ་ནི། །རྡོ་རྗེ་འཁྲིལ་འཁྱུད་གསང་བའི་ཚོགས། །རྣལ་འབྱོར་ལོངས་སྤྱོད་ཆེ་སྦྱར་བས། །མཉེས་ནས་སྐོངས་ཕྱིར་རིམ་བཞིན་དབུལ། །གསང་བའི་འཇུག་ཚུལ་ལ་སོགས་ཀྱིས། །གསང་བའི་དོན་རྣམས་སྒྲུབ་པར་བྱེད། །ཅེས་བཀའ་སྩལ་ཏོ། །དེ་ནས་བཅོམ་ལྡན་འདས་སེམས་དཔའ་རྡོ་རྗེ་དེ་རྡོ་རྗེ་ཀུན་དུ་འབྲེལ་པའི་དབྱིངས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་བཅོམ་ལྡན་འདས་ལ་འདུས་པའི་འཁོར་གྱིས་འདི་སྐད་ཅེས་གསོལ་ཏོ། །ཆོས་ཐམས་ཅད་ཀྱི་རང་བཞིན་ནི་རྡོ་རྗེ་དྲ་བའི་དབྱིངས་སུ་བདག་ཅག་རྣམས་ཀྱིས་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་དྲ་བའི་དབྱིངས་སུ་ཤེས་པར་གྱིས་ཤིག །ཆོས་ཐམས་ཅད་ནི་ཐུགས་ཀྱི་རིག་པ་ལས་བྱུང་ལ་ཐུགས་ཀྱི་རང་བཞིན་ནི་རྡོ་རྗེ་ཁོ་ན་ཡིན་པའི་ཕྱིར་རོ། །འདུས་པའི་ཚོགས་
ཀྱིས་གསོལ་པ། བཅོམ་ལྡན་འདས་རྡོ་རྗེ་དྲ་བ་ཆེན་པོའི་ཚོགས་བདག་ཅག་རྣམས་ལ་རྒྱ་ཆེར་བཤད་དུ་གསོལ།བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་རྣལ་འབྱོར་པ། །རྡོ་རྗེ་ཆེན་པོ་རིག་པའི་དོན། །དྲ་བ་འབྲེལ་བའི་དབྱིངས་ཉིད་ནི། །ངེས་པར་བཤད་ཀྱིས་རྩེ་གཅིག་ཉོན། །ཐུགས་ཀྱི་གསང་ཆེན་རིག་པ་འདི། །ངེས་པའི་རྡོ་རྗེ་ཡིན་པས་ན། །རྡོ་རྗེ་དབང་ཡུལ་འབྲེལ་པའི་དོན། །ཐམས་ཅད་འབྱུང་བས་དབྱིངས་ཤེས་བྱའོ། །རྡོ་རྗེ་འཛིན་མ་འཛིན་སོགས་བཅས། །འཁྲིལ་མཉམ་པ་ཡང་དེ་བཞིན་ཏེ། །གཟུགས་བརྙན་ཏིང་འཛིན་རང་བཞིན་གནས། །རིམ་པའི་ཚུལ་བཞིན་སྦྱར་བྱས་ནས། །ཇི་ལྟར་འདོད་པ་དེ་ལྟར་རོ། །ཞེས་བཀའ་སྩལ་ཏོ། །དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ་དེ་ཐམས་ཅད་དུས་བཞི་མཉམ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང་། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱིས་ཆོས་ཐམས་ཅད་ནི་དུས་བཞི་མཉམ་པ་ཉིད་དུ་གཅིག་པར་མཐོང་ངོ་ཞེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ནི་དུས་བཞི་མཉམ་པར་རྟོགས་པ་ཡིན་ཏེ། །ཆོས་ཐམས་ཅད་ནི་དུས་བཞིའི་ངང་དུ་རྫོགས་པར་ཤེས་པར་གྱིས་ཤིག །དེ་ཅིའི་ཕྱིར་ཞེ་ན། མཉམ་པ་ཉིད་ཀྱི་ངང་ལ་དུས་སྔ་ཕྱིར་སྣང་བ་མེད་དོ། །དེ་ནས་འདུས་པའི་ཚོགས་རྣམས་ཀྱིས་གསོལ་པ། བཅོམ་ལྡན་འདས་མཉམ་པ་ཆེན་པོའི་དུས་ཉིད་བདག་ཅག་རྣམས་ལ་རྒྱ་ཆེར་བཤད་དུ་གསོལ། དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོ་ཡི་ནི་ཚོགས། །མཉམ་པ་ཉིད་ཀྱི་དུས་རིག་ན། །དུས་ཞེས་བྱ་བའི་མིང་ཡང་མེད། །དུས་བཞི་མཉམ་པར་རབ་ཤེས་ན། །ཆོས་ཉིད་མཉམ་པའི་རང་བཞིན་ནོ། །རྡོ་རྗེ་དུས་ཀྱི་ལྷ་མོའི་ཚོགས། །འདས་དང་ད་ལྟར་བྱུང་བ་དང་། །མི་འབྱུང་བ་ཡི་ཆ་རྣམས་
ལ། །དབང་སྒྱུར་མཉམ་པའི་རྒྱལ་མོ་རྣམས། །འཇིག་དང་སྐྱེ་དང་སྨིན་པ་དང་། །འགག་པར་གྱུར་པ་དེ་དག་དུ། །རྡོ་རྗེ་རྣམ་ཐར་ཚད་མེད་དང་། །སེམས་དང་དེ་བཞིན་མཉམ་པ་ཡི། །ཤེས་རབ་འཁོར་དང་དཔལ་གྱི་དཀྱིལ། །དེ་བཞིན་རིམ་པར་རྡོ་རྗེ་ཡི། །གླུ་གར་ལ་སོགས་ཡོ་བྱད་ཀྱིས། །མཆོད་དང་འཇུག་ཚུལ་གོང་མ་བཞིན། །ཆ་རྣམས་དུས་ལས་མི་འདའ་བར། །ལྷ་ཡི་ཉི་མ་རྣམས་ལའོ། །བདེ་བ་ཆེན་པོ་ལ་སོགས་པ། །ཚོམ་བུའམ་ཡང་ན་ཕྱག་རྒྱ་རྣམས། །སྤྱིར་རམ་རེ་རེར་སྦྱར་བར་བྱ། །འདས་ལ་རྣམ་ཐར་ཚོགས་བསྐུལ་ཏེ། །ད་ལྟར་བྱུང་དང་མི་འབྱུང་ལ། །ཚད་མེད་སེམས་དང་མཉམ་པར་བསྐྲུན། །མཉམ་པའི་རྒྱལ་པོར་དེ་འགྱུར་ཏེ། །བདེ་གཤེགས་དུས་ཀྱི་རྒྱལ་པོར་འགྱུར། །ཞེས་བཀའ་སྩལ་ཏོ། །དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ་དེ་ཉི་ཟླའི་ཚོགས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཡང་ཏིང་ངེ་འཛིན་དེ་ལས་བཞེངས་པར་གྱུར་པ་དང་། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་ཆོས་ཐམས་ཅད་ནི་ཉི་ཟླའི་ཚོགས་སུ་མཐོང་ངོ་། །དེ་སྐད་ཅེས་གསོལ་བ་དང་། བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་ཆོས་ཐམས་ཅད་ཀྱི་རང་བཞིན་ནི་བྱང་ཆུབ་སེམས་དང་སྙིང་རྗེ་ཆེན་པོའི་རང་བཞིན་ཡིན་པར་ཤེས་པར་གྱིས་ཤིག །ཆོས་ཐམས་ཅད་ནི་བྱང་ཆུབ་སེམས་ལས་བྱུང་ཞིང་སྙིང་རྗེའི་རང་བཞིན་ཅན་ཡིན་ནོ། །དེ་ནས་འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་སྙིང་རྗེ་དང་བྱང་ཆུབ་སེམས་ཀྱི་དོན་བདག་ཅག་ལ་བཤད་དུ་གསོལ། །བཅོམ་ལྡན་འདས་ཀྱིས་བཀའ་སྩལ་པ། ཆོས་རྣམས་ཀུན་གྱི་ཡོ་བྱད་ནི། །སྙིང་རྗེ་བྱང་ཆུབ་སེམས་ཡིན་ཏེ། །ཡོ་བྱད་དེ་དང་མ་ལྡན་ན། །དོན་རྣམས་འགྲུབ་པར་མི་འགྱུར་རོ། །རྣལ་འབྱོར་བྱང་ཆུབ་སེམས་རྫོགས་པ། །བཅུ་དྲུག་རྫོགས་པའི་ཟླ་རྒྱས་ཚུལ། །སྙིང་རྗེ་ཡེ་ཤེས་ཤར་བ་ནི། །མཁའ་ལ་ཉི་གསལ་ཤར་བའི་ཚུལ། །དོན་
གཉིས་རྫོགས་པའི་རྣལ་འབྱོར་པ། །རྣལ་འབྱོར་ངེས་པའི་ས་པ་ཡིན། །ངེས་པའི་ས་ལ་བགྲོད་པ་ནི། །རྡོ་རྗེ་དུས་ཀྱི་རྒྱུན་ཚོགས་ཀྱིས། །ཚོགས་ཆེན་རྣམ་གཉིས་བསྐྲུན་པར་བྱ། །སྐར་ཚོགས་དབུས་ན་ཟླ་ཉ་བ། །བཅུ་དྲུག་ཞག་གིས་རྫོགས་པ་བཞིན། །བཅུ་གསུམ་རྩལ་ཆེན་རྫོགས་པའི་ས། །བཅུ་དྲུག་ཚོགས་ཀྱིས་རྫོགས་པས་ནི། །མཛེས་པའི་ཉི་མ་བཅུ་དྲུག་གིས། །ཟླ་དཀྱིལ་འོད་ཀྱི་ཕྱག་རྒྱལ། །མཛེས་པར་སྤྲས་པའི་བདེ་བ་དེ། །བཅུ་དྲུག་ཚོགས་ཀྱིས་བསོད་ནམས་བསྐྲུན། །ཕྱེད་རྫོགས་ཚོགས་འཕེལ་དེ་ཕན་ཆད། །མི་དམིགས་ཆོས་ལ་བློ་སྦྱངས་ཡིན། །ཇེ་ཞི་ཇེ་ཞི་མི་དམིགས་པ། །མཚན་མ་ཤེས་བྱ་བསྲབས་པ་སྟེ། །བསོད་ནམས་ཚོགས་ཀྱང་མི་དམིགས་པ། །མཉམ་པས་སྟོང་པར་གྱུར་པ་ན། །ཐམས་ཅད་ཆོས་སྐུར་རྫོགས་པ་སྟེ། །སྡུག་བསྔལ་བྱང་ཆུབ་གཉིས་མེད་དེ། །འདི་ལ་རྨད་འབྱུང་སེམས་བསྐྱེད་དེ། །ཟླ་བ་དུས་ཀྱིས་མཚན་མ་དང་། །གསང་བ་གཉིས་ཀྱིས་མཆོད་པ་བྱ། །ཕྲ་མོའི་དྲོད་དུ་བྱུང་བ་དང་། །སྨྱུར་ཏེ་རང་ལས་བྱུང་རྣམས་ལ། །རྩ་བ་གཅད་ཕྱིར་ཡོངས་རྫོགས་པས། །ཐེ་ཚོམ་མེད་པར་དང་བླངས་ནས། །དུས་དེ་ཉིད་དུ་ཉི་མ་འཆར། །དུས་འདི་རྒྱུན་གྱི་བར་བཅད་ན། །བསྙེན་པ་དག་གིས་བཟློག་པར་དཀའ། །བར་ཆད་བྱུང་ན་གསོ་ཞིང་བསྐང་། །མཁའ་ལ་ཟླ་གསལ་གྲ་རྒྱས་ན། །ས་ལ་རྣལ་འབྱོར་གྲར་རྒྱས་པས། །བསོད་ནམས་སྤེལ་བ་ཆེན་པོ་དང་། །བསྔོ་བ་ཆེན་པོའི་ལས་རྣམས་བྱ། །དེས་ན་འབྲས་བུ་ཆེན་པོ་ཡང་། །ཉི་ཟླ་ཞོན་ནས་འགྲོ་བ་ཡི། །རིག་འཛིན་ས་ལ་སླེབས་ཕན་ཆད། །དཔལ་ཆེན་བཅུ་དྲུག་ས་ལ་འགྲུབ། །ཅེས་བཀའ་སྩལ་ཏོ། །དེ་ནས་ཡང་སེམས་དཔའི་རྡོ་རྗེ་དེ་རྒྱུན་དུ་གནས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་བཞེངས་པ་དང་། འདུས་པའི་ཚོགས་ཀྱིས་གསོལ་པ། བཅོམ་ལྡན་འདས་ཆོས་ཐམས་ཅད་ནི་ཡི་གེ་རྒྱུན་གྱི་དཀྱིལ་འཁོར་དུ་གནས་པར་མཐོང་ངོ་། །བཅོམ་ལྡན་འདས་ཀྱིས་བཀའ་སྩལ་པ། ཆོས་
ཐམས་ཅད་ནི་རྒྱལ་བའི་དཀྱིལ་འཁོར་གྱི་རང་བཞིན་ཡིན་ལ། །རྒྱལ་བ་ཐམས་ཅད་ནི་ཡི་གེའི་དཀྱིལ་འཁོར་གྱི་རང་བཞིན་དུ་ཤེས་པར་གྱིས་ཤིག །གསོལ་པ། ཡི་གེ་ཕྱག་རྒྱའི་དོན་གང་ལགས་པ་བདག་ཅག་རྣམས་ལ་རྒྱ་ཆེར་བཤད་དུ་གསོལ་ཞེས་ཞུས་པ་ལ། བཅོམ་ལྡན་འདས་ཀྱིས་བཀའ་སྩལ་པ། ཆོས་ཀུན་རྒྱལ་བའི་རང་བཞིན་ཏེ། །རྒྱལ་བ་སྐུ་གསུང་ཐུགས་སུ་གསལ། །སྐུ་གསུང་ཐུགས་དང་ཕྱག་རྒྱ་དག །ཡི་གེའི་ཕྲེང་བ་ཉིད་ལ་རྫོགས། །ཡི་གེ་ཕྱག་རྒྱའི་དཀྱིལ་འཁོར་རྣམས། །རྒྱུན་དུ་བསྒྲུབ་པར་བྱ་བ་ཡིན། །དེས་ནི་རྒྱུན་གྱི་ཏིང་འཛིན་ཐོབ། །རྒྱུན་གྱི་རྒྱུན་དུ་མི་གཅད་པ། །རྡོ་རྗེ་ནམ་དང་ཉི་ཚོད་ལ། །ཡི་གེའི་ཚོགས་བསྐྱེད་ཚོགས་སྦྱར་ལ། །ཕུད་ལྷག་བཅས་སྦྱར་དེ་བཞིན་ནོ། །འདི་ནི་དོན་ལ་ཉེ་བའི་ལམ། །བསོད་ནམས་བསྐྲུན་པར་དེ་མྱུར་རོ། །ཀུན་རྫོགས་ཚོགས་ཀྱི་རྒྱུ་དེས་ནི། །ཡང་དག་ཚོགས་ཆེན་ཅི་འདྲ་བ། །མཆོག་གི་བདེ་བ་དམ་པ་དང་། །དེ་ཉིད་ཆེན་པོར་དེ་ཉིད་འགྱུར། །འཇུག་སྒོ་སྤྱོད་དང་ལྟ་བ་མཐུན། །ཐམས་ཅད་གཅིག་པར་གྱུར་པ་ཡི། །རྒྱུ་དང་རྐྱེན་ལྡན་ཕུན་སུམ་ཚོགས། །མཛའ་འཕྲོད་སྨན་དང་དགྱེས་སྦྱོར་ལྡན། །ལྷ་དང་རིག་འཛིན་རྣལ་འབྱོར་རིལ། །མ་ལུས་ཚོགས་པས་ཆོས་འདི་སྤྱད། །སྐད་ཅིག་ཡུད་དམ་ཐང་ཅིག་གམ། །ཡུད་ཙམ་ཉིན་ཞག་ཟླ་རེ་འམ། །ལྷ་ཡི་ཉི་མ་བཀྲ་ཤིས་ཀྱི། །ཚོགས་ལ་བབ་པའི་དུས་འདི་དག །བྱིན་གྱིས་བརླབས་པའི་དུས་ཆེན་ཡིན། །ཇི་ལྟར་འབྱོར་པའི་ཡོ་བྱད་རྣམས། །ཕྱི་དང་ནང་གི་ཁྱད་པར་གྱིས། །གཙང་མའི་ཁ་ཟས་འབྱུང་པོ་ལ། །རྣམ་རྟོག་རྟོག་བྲལ་རྒྱལ་བ་ལ། །ཇི་ལྟར་འབྱོར་བཞིན་ནན་ཏན་བྱ། །བདག་དང་གཞན་དང་གཉི་ག་དང་། །ཆོས་ཀྱི་དོན་དུ་མི་འགྱུར་བའི། །སྐྱོན་བཞི་པོ་དག་སྤངས་ནས་ནི། །དེ་ལས་བཟློག་པའི་ཚུལ་ལྡན་པས། །རྣལ་འབྱོར་སྙིང་དང་མིག་ལྟ་བུར། །གདུང་བའི་འདུ་ཤེས་ཉེར་བཞག་སྟེ། །ཇི་བཞིན་འདོད་པ་ཉེ་བར་སྦྱར། །ལྷ་རྣམས་ཉེ་བར་བྱ་བ་དང་། །བགེགས་རྣམས་ཞི་བར་བྱ་བ་དང་། །དོན་གྲུབ་ཤི་བ་གསོ་བའི་ཕྱིར། །ལས་འདིར་
སྤྱད་པར་ཤིན་ཏུ་གཅེས། །ཚོགས་འདི་བློ་ཆུང་གསར་ཞུགས་པའི། །མདུན་དུ་བརྗོད་པར་བྱ་མི་རིགས། །རྫས་དང་ཡོ་བྱད་ཐམས་ཅད་ཀྱང་། །ཅིས་འདུལ་དེ་ལྟར་སྟོབས་ཀྱིས་སྦྱར། །དེས་ན་ལས་འདི་ཁྱད་པར་ཡང་། །ཚོགས་ལ་ཚོགས་བསྐྱེད་སྒྲིས་སྦྱངས་ཏེ། །བསྙེན་པ་དག་ལ་གོམས་བྱས་ནས། །བསྒྲུབས་པས་འབྲས་བུ་མཐར་ཕྱིན་པའོ། །ཞེས་བཀའ་སྩལ་ཏོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྣལ་འབྱོར་བདེ་བའི་ཚོགས་ཀྱི་ལེའུ་སྟེ་དྲུག་པའོ།། །།དེ་ནས་ཡང་སྨྲ་བའི་སེང་གེ་སེམས་དཔའི་རྡོ་རྗེ་དེ་འདས་པ་བརྗོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་ཏིང་ངེ་འཛིན་དེ་ལས་བཞེངས་པར་གྱུར་པ་དང་། འདུས་པ་ཆེན་པོའི་ཚོགས་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་སྔགས་ཟབ་མོ་སྤྱོད་པའི་སྐྱོན་དང་ཡོན་ཏན་ཅི་ལགས་པ་བདག་ཅག་གི་རིག་པ་ལ་སྣང་བར་གྱུར་ཏོ། །དེ་ནས་ཡང་བཅོམ་ལྡན་འདས་ཀྱིས་བཀའ་སྩལ་པ། འདུས་པ་ཆེན་པོའི་ཚོགས་གསང་སྔགས་ཆེན་པོའི་དོན་ནི་རབ་ཏུ་སྤྱད་པར་དཀའ་བར་ཤེས་པར་གྱིས་ཤིག །དེ་ཅིའི་ཕྱིར་ཞེ་ན། གསང་སྔགས་ཀྱི་ཚོགས་ནི་ཤིན་ཏུ་མེ་དང་འདྲ་སྟེ། མེ་ནི་རྒྱུན་དུ་བཅངས་ཤིང་སྤྱད་ལེགས་ན་ཇི་ལྟར་འདོད་པ་བཞིན་དུ་རྒྱུན་དུ་སྤྱད་དུ་ཡོད་དོ། །མེ་ཉིད་ཇི་ལྟ་བ་བཞིན་དུ་སྤྱད་ན་མེའི་ཕུང་པོ་ཆེན་པོར་འགྱུར་ཏེ། སྤྱོད་པར་བྱེད་པ་ཉིད་ཀྱང་བསྲེགས། །ཁྱིམ་ནས་ཁྱིམ་ཡང་བསྲེགས། རྫས་ཀྱི་དངོས་པོ་ཐམས་ཅད་ཀྱང་བསྲེགས་པར་འགྱུར་རོ། །དེ་བཞིན་དུ་གསང་སྔགས་འདི་ནི་ཆུ་དང་འདྲ་སྟེ། ཆུ་ཐབས་ཀྱིས་ཟིན་ཅིང་སྤྱད་ལེགས་ན་ཇི་ལྟར་འདོད་པ་བཞིན་དུ་དགའ་བ་དེར་སྤྱད་དུ་ཡོད་དེ། ཆུ་ལ་དགའ་བ་དེར་ཐར་ཆུ་ཆེན་པོ་ལ་འབོགས་པར་ནུས་སོ། །ཆུའི་རང་བཞིན་དང་ཐབས་ལ་མ་གོམས་པས་ནི་སྤྱོད་པར་བྱེད་པ་དེ་གཡེང་ཞིང་འཆི་བར་བྱེད་དོ། །གཞན་ཡང་གསང་སྔགས་ཆེན་པོ་འདི་ནི་གཅན་གཟན་གདུག་པ་ཅན་དང་འདྲ་སྟེ། གཅན་གཟན་གྱིས་སེམས་ཅན་གཞན་གྱི་སྲོག་གཅོད་
པར་བྱེད་པ་ཡང་ཐབས་ལ་མཁས་པས་ཇི་ལྟར་དགའ་བ་བཞིན་དུ་དབང་དུ་འདུའོ། །ཐབས་ཀྱིས་མ་ཟིན་ན་སྲོག་གཅོད་པར་བྱེད་དོ། །གཞན་ཡང་གསང་སྔགས་ཆེན་པོ་འདི་ནི་སྦྲུལ་གྱི་མགོ་ལ་འདུག་པའི་ནོར་བུ་རིན་པོ་ཆེ་དང་འདྲ་སྟེ། སྦྲུལ་གྱི་མགོ་ལ་འདུག་པའི་ནོར་བུ་ཐབས་ཀྱིས་ཡོངས་སུ་ཟིན་ན་ནི་དབང་དུ་འདུ་ཞིང་སྤྱད་དུ་ཡོད་ལ། ཐབས་ཀྱིས་མ་ཟིན་ན་ནི་འཚོ་བའི་སྲོག་དང་འབྲལ་བར་བྱེད་དོ། །དེ་བས་ན་གསང་བ་ཆེན་པོ་འདི་ནི་སྤྱད་པར་དཀའ་བས་སྔོན་གྱི་དུས་ཀྱི་ཚེ་ན་ཡང་སྤྱད་ཉེས་པའི་ལོག་པའི་ལམ་པ་ཅན་མང་པོར་བྱུང་ངོ་། །དོན་དང་ལམ་ལ་མཁས་པའི་སྐྱེས་བུས་ཐབས་ཀྱིས་ཟིན་ཅིང་སྤྱད་ལེགས་ན་མ་ནོར་བའི་ལམ་དུ་ཞུགས་པ་ཡང་མང་པོར་བྱུང་བས་འདུས་པ་ཆེན་པོའི་ཚོགས་སྤྱད་པའི་ཐབས་ལ་ཡོངས་སུ་མཁས་པར་གྱིས་ཤིག །དེ་སྐད་ཅེས་བཀའ་སྩལ་པ་དང་། འདུས་པ་ཆེན་པོའི་ཚོགས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་སྔགས་ལོག་པའི་ལམ་ལས་བྱུང་བ་ནི་གང་གང་ལགས། སྤྱད་ལེགས་པའི་ཐབས་ལས་བྱུང་བ་ནི་གང་གང་ལགས། །བདག་ཅག་ལ་རྒྱ་ཆེར་བཤད་དུ་གསོལ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་འདུས་པ་ཆེན་པོའི་ཚོགས་ལ་བཀའ་སྩལ་པ། འདུས་པ་ཆེན་པོའི་ཚོགས་ཉེས་ལེགས་ཀྱི་རིམ་པ་བཤད་པར་བྱ་ཡིས་ཉོན་ཅིག་ཅེས་བཀའ་སྩལ་པ་དང་། ང་ནི་དྲན་པ་ཐོག་མའི་ཚེ། །གསང་བ་སྤྱོད་པའི་དོན་འདི་དག །ངེས་དོན་ཕལ་ཆེར་ནུབ་པར་གྱུར། །ཚུལ་འདྲ་ཙམ་ཞིག་གནས་པ་ལ། །ཀུན་ཀྱང་ཕལ་ཆེར་སྤྱོད་མོད་ཀྱང་། །དོན་དང་ཕྲད་པ་ངས་མ་མཐོང་། །ཀུན་ཀྱང་ལོག་པའི་ལམ་སྤྱད་དོ། །ལོག་པ་ཅན་ཉིད་གང་ཞེ་ན། །འདི་ལ་མི་གནས་འདི་ཉམས་དང་། །འདི་ལས་ལོག་དང་ལོག་ཚུལ་སྤྱོད། །འདི་ཚུལ་མ་ཡིན་འདིར་མ་ངེས། །གཡོ་སྒྱུས་བདེན་བཅོས་འགལ་བའི་ལམ། །དེ་ཡང་ཇི་ལྟ་བུ་ཞེ་ན། །བསྐལ་པ་ཀུན་བཀོད་བྱ་བའི་ཚེ། །སངས་རྒྱས་མངོན་བྱུང་རྒྱལ་པོ་དེ། །མྱ་ངན་འདས་པར་གྱུར་འོག་ཏུ། །བྱུང་བའི་
རྣལ་འབྱོར་བཟང་རྒྱན་དེ། །མི་ཤེས་བྱིས་པའི་འཁོར་རྣམས་ལ། །ཚུལ་འཆོས་ལོག་པའི་ཚོགས་བསྐྱངས་པས། །ཚོམ་བུ་ལྔ་བརྒྱར་བཅས་པ་ཞིག །དོན་ལས་གོལ་ཞིང་འཁོར་བར་ལོག །དེ་འདྲའི་ཚུལ་དུ་མ་སྤྱོད་ཅིག །རྨད་བྱུང་གསང་བའི་བསྟན་པ་འདི། །རྣལ་འབྱོར་དབང་ཕྱུག་ཚད་མ་རྣམས། །ཕལ་ཆེར་མི་གནས་སྐབས་དག་ཏུ། །མི་ཤེས་ངན་རྟོག་ཅན་རྣམས་ཀྱིས། །དཀྲུགས་འགྱུར་བཀའ་བསླད་གཞུང་བོར་ཏེ། །ནོར་པས་བདག་ཉིད་སུན་འབྱིན་ཅིང་། །བདག་ཡིན་གཞན་འདི་མ་ཡིན་ཞེས། །བདག་བསྟོད་གཞན་ལ་སྨོད་པ་ལོག །དེ་ཡང་ཇི་ལྟ་བུ་ཞེ་ན། །བསྐལ་པ་དེ་ཉིད་དུས་དག་ལ། །རྣལ་འབྱོར་དཔའ་སྦྱིན་བྱ་བ་ཞིག །དོན་ལ་བློ་ཤེད་མ་བྱེ་ཞིང་། །ལམ་གྱི་ཐབས་ལ་མི་མཁས་པས། །ངེས་དོན་བཀའ་ཡི་གཞུང་བོར་ནས། །ཆོས་མ་ཡིན་པའི་ཆོས་སྤྱོད་ཅིང་། །གཞན་དག་ངེས་དོན་སྤྱོད་པ་ལ། །ཁྱོད་ཀྱི་དེ་ནི་དོན་མ་ཡིན། །དོན་མཆོག་བདུད་རྩི་གང་ཡིན་པ། །དེ་ནི་ང་ཡི་ཆོས་འདི་ཡིན། །ཞེས་ནི་བདག་བསྟོད་གཞན་ལ་སྨོད། །འདི་ཡང་སྲིད་པ་ལོག་པའི་ལམ། །དེ་འདྲའི་ཚུལ་དུ་མ་སྤྱོད་ཅིག །སྔར་བྱུང་རྒྱུད་ཀྱི་རྗེས་གནས་པས། །རྡེང་མེད་བཞིན་དུ་དཔོན་བསྟབས་ན། །ཚིག་གཉེར་དྲེགས་པའི་དབང་དེས་ནི། །མི་ཤེས་བཞིན་དུ་རས་གཅོད་པའི། །ཚུལ་འཆོས་སེམས་ཀྱི་གྱ་གྱུ་ཅན། །སྨྱོན་ཐབས་བླུན་པའི་སྡིག་ཅན་ཡིན། །དེ་ཡང་ཇི་ལྟ་བུ་ཞེ་ན། །དགེ་སློང་དྲི་མེད་སྤྱོད་པ་ཞེས། །བྱ་བའི་རྣལ་འབྱོར་ཚུལ་འདྲ་ཞིག །དོན་ལ་མཁས་པའི་རྗེས་སུ་བྱུང་། །ཚོམ་བུ་འབུམ་གྱི་འཁོར་རྣམས་ཀྱིས། །རྒྱུད་ཀྱི་རྗེས་སུ་བྱུང་བ་ཡིས། །དོན་མེད་དགེ་སློང་དེ་ཉིད་ལ། །ཚིག་གི་གཉེར་ཆེན་ལྗིད་ཕབ་པས། །གདུང་འཚོབ་ཅེས་ནི་དཔོན་བསྟབས་ཏེ། །ཆེ་བ་ཆེན་པོའི་དྲེགས་པ་སྐྱེས། །མི་ཤེས་བཞིན་དུ་ཚུལ་བཅོས་ཏེ། །འདྲ་ཚུལ་ལོག་པའི་ཆོས་སྤྱད་པས། །ཚོམ་བུ་འབུམ་དང་བཅས་པ་ཞིག །དྲེགས་པ་ཆེན་པོའི་རུ་དྲར་ལྷུང་། །དེ་འདྲའི་ཚུལ་དུ་མ་སྤྱོད་ཅིག །མཛའ་འདྲིན་བསླང་སྟེར་ཞིང་རྣམས་
དང་། །རྙེད་དང་བཀུར་སྟིས་འཚོ་བའི་འཁོར། །གཞན་གྱི་དབང་དུ་གྱུར་དོགས་ནས། །སྒོ་རིས་རྐྱང་ཚན་སོ་སོར་གཅོད། །འཁོར་འདི་བདག་གིས་སྨིན་བྱ་ཡི། །གདུལ་བར་བྱ་བའི་ཞིང་ཡིན་གྱིས། །གང་དག་འདི་དང་མ་འབྲེལ་ཞེས། །ཉོན་མོངས་ཚིག་གིས་སྒོ་བྱེད་ནོར། །དེ་ཡང་ཇི་ལྟ་བུ་ཞེ་ན། །རྣལ་འབྱོར་ན་ཞི་གནས་པ་ཞེས། །བྱ་བའི་ཚོམ་བུ་ལྔ་བརྒྱ་ཞིག །ཤིན་ཏུ་གསང་སྔགས་སྤྱོད་དོ་ཞེས། །དགོན་པའི་གནས་སུ་འདུག་ནས་ནི། །ཡུལ་ཁམས་ཆེན་པོ་དེ་དག་གིས། །གནས་པར་གྱུར་པའི་མི་རྣམས་ཀུན། །གདུལ་བར་བྱ་བའི་ཞིང་དུ་སྤྱོད། །གཞན་གྱི་སྡེ་པར་གྱུར་པ་ཡི། །དགེ་སློང་དོན་དང་ལྡན་པ་ཞིག །ཡུལ་དེར་ཆེད་དུ་འོངས་ནས་ནི། །རྣལ་འབྱོར་ངེས་པའི་ལམ་མཆོག་གཅིག །རྒྱ་ཆེར་བསྟན་པར་བསམས་པ་ལས། །དགེ་སློང་དགོན་པར་གནས་པ་དེས། །ཉོན་མོངས་ཚིག་གི་བསྒོ་བ་བྱས། །འཁོར་འདི་བདག་གི་ཞིང་ཡིན་གྱིས། །ཁྱོད་ནི་འདི་ལ་མ་གཏོགས་ཞེས། །སྒོ་དང་ཚན་དང་རིས་བཅད་པས། །ཉོན་མོངས་འཁོར་བའི་ལམ་དུ་ལྷུང་། །དེ་འདྲའི་ཚུལ་དུ་མ་སྤྱོད་ཅིག །རྣལ་འབྱོར་ཆེན་པོར་བསྔོས་གྱུར་ལ། །སྣ་འགས་ཅི་རྒྱལ་གསོག་འཇོག་བྱེད། །གཅིག་ཡིད་གཅིག་གིས་འབྱིན་བྱེད་པ། །ནམ་ཞར་ལོངས་སྤྱོད་ཐོབ་པ་མིན། །དེ་ཡང་ཇི་ལྟ་བུ་ཞེ་ན། །རྣལ་འབྱོར་བདེ་ལྡན་ཤེས་པ་ཞེས། །བྱ་བའི་ཚོམ་བུར་བཅས་པ་ཞིག །གསང་བ་རྒྱ་ཆེར་སྤྱོད་པ་ལས། །འཁོར་ན་གནས་པའི་རྣལ་འབྱོར་མ། །བུད་མེད་བཟང་ལྡན་བྱ་བ་ཞིག །ཚོགས་སྦྱོར་གིང་དུ་བསྐོས་པ་ལས། །འབྱོར་པའི་ཡོ་བྱད་དེ་དག་ལ། །སེར་སྣའི་སེམས་ཀྱིས་གསོག་འཇོག་བྱས། །ལས་ཀྱི་རྣམ་སྨིན་དེ་ཡིས་ནི། །ཡི་དགས་ཁྱི་ཡི་ལུས་སུ་སྐྱེས། །དེ་འདྲའི་ཚུལ་དུ་མ་སྤྱོད་ཅིག །གཞན་ཡང་རྣལ་འབྱོར་ཆེན་པོའི་ཚོགས། །ལོག་པར་སྤྱོད་པའི་རྣལ་འབྱོར་ནི། །ལོག་ལྟ་སྤྱི་བརྟོལ་གཏུམ་ཁྲོ་ཆེ། །སྡིག་སྤྱོད་དོན་དང་མི་ལྡན་ཡང་། །བདག་ནི་ཡང་དག་ཡིན་ནོ་ཞེས། །བབ་ཆོལ་བཀའ་རྐུ་སླུ་བྱེད་བསླད། །དེ་ཡང་ཇི་ལྟ་བུ་ཞེ་ན། །ཆོས་སྐྱོང་བ་
ཡི་རྣལ་འབྱོར་པ། །པྲ་མ་དེ་ཞེས་བྱ་བ་ཞིག །དོན་དང་ལམ་ལ་མི་མཁས་པར། །བདག་ནི་མཁན་པོ་ཡིན་ནོ་ཞེས། །ཀུན་ལ་རྒྱ་ཆེར་སྒྲ་བསྒྲགས་ནས། །རྒྱལ་བའི་བཀའ་བརྐུས་འགྲོ་བ་རྣམས། །བསླུས་པར་གྱུར་པའི་རྣམ་སྨིན་གྱིས། །ལོག་པ་ཅན་གྱི་འཇིག་རྟེན་པ། །མུ་སྟེགས་སྤྱོད་པའི་ཁམས་སུ་ལྷུང་། །དེ་འདྲའི་ཚུལ་དུ་མ་སྤྱོད་ཅིག །ཐ་ཚིག་ཉམས་ཤིང་དོན་ལ་རྨུགས། །དྲེགས་པས་དོན་ལ་ཁས་འཆེས་ཕྱིར། །རྡོ་རྗེ་རྒྱལ་དབང་ཐོབ་འདོད་པ། །ཁྲེལ་མེད་སྤྱི་བརྟོལ་མུན་སྤྲུལ་འཆལ། །དེ་ཡང་ཇི་ལྟ་བུ་ཞེ་ན། །རྣལ་འབྱོར་སྔགས་ཀྱི་ཚུལ་སྤྱོད་པ། །པེ་ན་ཡ་ཞེས་བྱ་བ་ཞིག །ཚོམ་བུ་བརྒྱ་དང་བཅས་པ་བྱུང་། །རྩ་བ་ཉམས་ཤིང་དོན་ལ་རྨུགས། །དྲེགས་པ་ཆེན་པོའི་ང་རྒྱལ་གྱིས། །དོན་ལ་མཁས་པའི་ཚུལ་བཅོས་ཕྱིར། །རྡོ་རྗེ་རྒྱལ་པོའི་དབང་མནོས་པས། །རི་བོས་སྲོག་ཆགས་མནན་པ་བཞིན། །ང་རྒྱལ་དྲེགས་པའི་རི་བོ་ཡིས། །འཁོར་བའི་ལས་སྤྱོད་ལས་ངན་པའི། །སྲོག་ཆགས་ཕག་གི་རིགས་སུ་ལྷུང་། །དེ་འདྲའི་ཚུལ་དུ་མ་སྤྱོད་ཅིག །མཉམ་པའི་དོན་ཉིད་མ་རྟོགས་པར། །ཚིག་དུ་མཉམ་ཞེས་རྗོད་བྱེད་ཅིང་། །ཆགས་སྡང་གཉིས་ལ་མངོན་འཆེལ་བ། །རྣལ་འབྱོར་ལས་ཀྱིས་འཁོར་བའི་ལམ། །དེ་ཡང་ཇི་ལྟ་བུ་ཞེ་ན། །དགེ་སློང་བདེ་སྦྱིན་བྱ་བ་ཞིག །ཚོམ་བུ་སྟོང་དང་བཅས་པར་དེ། །རྣལ་འབྱོར་གསང་བའི་ལས་ལ་སྤྱོད། །ལ་ལ་ཆགས་ལ་མངོན་པར་འཆེལ། །ལ་ལས་སྡང་ཆེན་གསོད་པར་སྤྱོད། །ཆགས་སྡང་ལས་ཀྱི་རྣམ་སྨིན་གྱིས། །རཀྵ་སྲིན་པོའི་ཁམས་སུ་ལྷུང་། །དེ་འདྲའི་ཚུལ་དུ་མ་སྤྱོད་ཅིག །གང་དག་རྣལ་འབྱོར་བློ་ཆུང་རྣམས། །རྡོ་རྗེ་གྲལ་ཚོགས་དོན་གླེངས་ན། །དེ་ལ་འཇིགས་ཤིང་སྐྲག་འགྱུར་ཏེ། །སྤ་ཞུམ་མི་དགའ་འབྱོལ་བྱེད་བླུན། །དེ་ཡང་ཇི་ལྟ་བུ་ཞེ་ན། །དགེ་སློང་ལྷས་བྱིན་བྱ་བ་ཞིག །རྣལ་འབྱོར་དང་པོའི་སར་སློབ་ཚེ། །རྣལ་འབྱོར་དོན་ལྡན་མང་པོ་རྣམས། །ཕལ་ཆེར་ཚོགས་པར་གྱུར་པ་
ལ། །ངེས་དོན་གསང་བའི་དོན་གླེངས་ན། །ལྷས་བྱིན་འཁོར་བཅས་དེ་ལས་བྱོལ། །དོན་གླེང་བ་ལ་མི་དགའ་ཞིང་། །ངན་པའི་སེམས་ཀྱིས་ཕྲག་དོག་སྐྱེས། །རང་གི་གནས་སུ་སོང་ནས་ནི། །མཁས་པ་དེ་ལ་མི་སྙན་བརྗོད། །ལས་ཀྱི་རྣམ་སྨིན་དེ་ཡིས་ནི། །བསྐལ་པ་དཔག་ཏུ་མེད་པ་རུ། །ཡང་དག་དོན་ལས་གོལ་བར་འགྱུར། །འཁོར་བ་དོན་མེད་གནས་སུ་འཁྱམས། །དེ་འདྲའི་ཚུལ་དུ་མ་སྤྱོད་ཅིག །རྣལ་འབྱོར་ཉིད་ཀྱིས་རྣལ་འབྱོར་ལ། །ཤིན་ཏུ་གདུག་པའི་དུག་མདས་གཏོང་། །ཐ་ཚིག་བཙན་པོ་རྫོང་ལྟ་བུ། །འཇོམས་བྱེད་རྣལ་འབྱོར་རང་བགེགས་སོ། །དེ་ཡང་ཇི་ལྟ་བུ་ཞེ་ན། །རྣལ་འབྱོར་རྣམ་དག་བློ་གྲོས་ཞེས། །བྱ་བའི་དོན་ལྡན་མཁས་པ་ཞིག །མི་འཇིགས་བློ་གྲོས་ཞེས་བྱ་བའི། །ཐབས་དང་དོན་ལ་མི་མཁས་པ། །སྡེ་པ་མང་པོ་སྐྱོང་བའི་སར། །རྣམ་དག་བློ་གྲོས་འཁོར་བཅས་འོངས། །མཁས་པ་དོན་ལྡན་བཟོད་ཐོབ་ལ། །ངན་སེམས་ཕྱར་ཀའི་སྒྲོ་སྐུར་བཏབ། །ལས་ཀྱི་རྣམ་སྨིན་དེ་ཡིས་ནི། །མི་འཇིགས་བློ་གྲོས་མནར་མེད་ལྷུང་། །དེ་འདྲའི་ཚུལ་དུ་མ་སྤྱོད་ཅིག །ལྟ་བ་དམིགས་བུ་དང་བྲལ་བས། །ཡང་དག་དབུ་མའི་ལམ་མི་གསལ། །སྤྱི་ཡུལ་ཙམ་ལ་ལྟོས་སྤྱོད་པ། །དེ་ནི་རྣལ་འབྱོར་ལོང་བའི་ཚོགས། །དེ་ཡང་ཇི་ལྟ་བུ་ཞེ་ན། །རྒྱལ་པོ་རབ་གསལ་འཛིན་པ་ཞེས། །བྱ་བའི་རྣལ་འབྱོར་ཅན་ཞིག་བྱུང་། །ཤེས་རབ་ལྟ་བའི་མིག་མེད་པར། །རྣལ་འབྱོར་མིང་ཙམ་ཚུལ་བཟུང་ནས། །སྒྲ་ཐོས་ཙམ་གྱི་གཞུང་སྤྱད་པས། །མིག་མེད་འཁོར་བའི་ཁམས་སུ་ལྷུང་། །དེ་འདྲའི་ཚུལ་དུ་མ་སྤྱོད་ཅིག །དེ་ལ་སོགས་པའི་རྣལ་འབྱོར་པས། །ལོག་པའི་ཚོགས་སུ་སྤྱད་པས་ནི། །འཁོར་བ་ལོག་པའི་ཚོགས་སུ་འགྱུར། །དེས་ན་འདུས་པའི་རྣལ་འབྱོར་རྣམས། །ཤིན་ཏུ་གསང་བའི་ཆོས་འདི་རྣམས། །གོལ་ས་ཆེ་བར་རྒྱལ་བས་བཤད། །ཐབས་ལ་མཁས་པའི་སྤྱོད་པ་ཡིས། །དོན་དང་ལྡན་པར་བྱ་བ་གཅེས། །ཐབས་ལ་མཁས་པར་སྤྱད་པ་ཡི། །ལེགས་པའི་ལམ་གྱི་རྣལ་འབྱོར་པ། །
སྔོན་འདས་དུས་ན་བྱུང་བ་ཡི། །རྩལ་ཅན་རྣམས་ཀྱི་དོན་བཤད་པ། །སྐྱེས་བུ་མཆོག་གི་སྤྱོད་པ་འདི། །ཡོན་ཏན་སྒྲ་བསྒྲགས་སུས་ཐོས་པ། །མིང་ཙམ་གྱིས་ཀྱང་དེ་ཐོབ་ཅིང་། །དྲན་པས་ངན་འགྲོ་ལས་སྐྱོབ་ཡིན། །དེ་ཡང་ཇི་ལྟ་བུ་ཞེ་ན། །ཤིན་ཏུ་གསང་བའི་སྤྱོད་པ་འདི། །ལྷ་གནས་གསུམ་དུ་གྲགས་པ་ལས། །ལྷ་ཡི་བུ་ནི་འོད་ལྡན་དེ། །མི་རྟག་འཆི་བའི་དུས་བབ་ནས། །འཆི་ཀའི་སྔ་ལྟས་བྱུང་བའི་ཚེ། །མི་དགའ་བར་ནི་འདུ་ཤེས་གྱུར། །ཕྱི་མའི་འདུ་ཤེས་བསྐྱེད་པ་ལས། །མི་གཙང་ཟས་སུ་ཟ་བ་ཡི། །བླུན་པའི་སྲོག་ཆགས་ལུས་ལེན་པར། །རང་གི་མངོན་པར་ཤེས་པས་མཐོང་། །ཤིན་ཏུ་འཇིགས་པའི་འདུ་ཤེས་ཀྱིས། །སྐྱབས་ཀྱི་ཡུལ་རྣམས་ཡིད་ལ་བྱས། །གཞན་གྱི་དྲན་པ་མི་གསལ་བར། །གསང་བ་ཆེན་པོའི་ཚོགས་ཆེན་གྱིས། །མཚན་ནི་རྣ་བའི་དབང་པོས་ཐོས། །ཐོས་པ་ཡིད་ལ་དྲན་བྱས་པས། །ངན་འགྲོའི་ལམ་ལས་སླར་ལོག་སྟེ། །ཚོགས་ཆེན་སྤྱོད་པའི་སྐལ་ལྡན་པས། །གསང་བ་འཛིན་པའི་གནས་སུ་སྐྱེས། །དེ་བཞིན་ཐོས་པ་དག་པར་སྤྱོད། །རྒྱལ་བ་མཉེས་པའི་ཚོགས་འདི་ལ། །གང་ཞིག་དགའ་ཞིང་འདུན་སྐྱེད་པ། །གཞན་གྱི་བར་ཆད་མི་འབྱུང་བར། །ཇི་ལྟར་མོས་པ་དེ་མྱུར་འཐོབ། །དེ་ཡང་ཇི་ལྟ་བུ་ཞེ་ན། །བྲམ་ཟེའི་བུ་ནི་བྱམས་ལྡན་ཏེ། །གསང་བ་ཆེན་པོའི་ཚོགས་འདི་དག །སྤྱོད་པར་མོས་ནས་ཀུན་དུ་བཙལ། །བཙལ་བས་རྙེད་པར་མ་གྱུར་ཏེ། །ས་ཕྱོགས་ཞིག་ཏུ་འདུག་ནས་ནི། །ཤིན་ཏུ་ངུས་ནས་སྨྲས་པ་ནི། །ཨེ་མའོ་བདག་གི་ལས་རེ་ཕམ། །སྐྱེས་ནས་རྒས་པར་གྱུར་པར་དུ། །ཚོགས་ཆེན་ཟབ་མོའི་དོན་བཙལ་ན། །དོན་དང་མ་ཕྲད་ལས་རེ་ངན། །ད་འོང་ཇི་ལྟར་བཙལ་ན་རྙེད། །བཙལ་བྱས་རྙེད་པར་ཡོང་མི་འགྱུར། །ཐུགས་རྗེས་བདག་ལ་སྐྱབས་སུ་མཆི། །གདུང་བ་སྒྲ་ཆེར་ཕྱུང་བ་ལས། །ནམ་མཁའི་ཁམས་ནས་སྒྲ་ཕྱུང་སྟེ། །སྐལ་དང་ལྡན་པའི་བྲམ་ཟེ་ཁྱོད། །དེ་ལྟར་ཡི་དམ་ལ་བརྟེན་པ། །ཁྱོད་ནི་དོན་གྱི་སྐལ་བ་ཅན། །དུས་གསུམ་རྒྱལ་བ་
ཐམས་ཅད་ཀྱིས། །ཁྱོད་ལ་བྱིན་གྱིས་རློབ་པར་མཛད། །དེ་བས་ལྟ་བ་མ་གཡེལ་བར། །སྒྲིབ་པ་སྦྱང་བའི་ཐབས་དག་ལ། །མཁས་ཤིང་བརྩོན་པར་བྱ་དགོས་ཏེ། །རང་གི་རྩ་རྣམས་བཀྲོས་ནས་ནི། །ཁྲག་ཆེན་དག་གིས་མཆོད་པ་དེ། །འདོད་ཆགས་དག་པ་ཙནྡན་ཆུས། །དམིགས་ནས་རྒྱལ་བ་ཀུན་མཆོད་ནས། །དེ་མ་ཐག་ཏུ་དོན་ཐོབ་འགྱུར། །དེ་སྐད་ལུང་བསྟན་ཐོབ་ནས་ནི། །དགའ་བའི་བསམ་པ་ཆེར་གཡོས་ཏེ། །ལུང་བསྟན་པ་ལྟར་དེ་སྤྱད་པས། །རིག་འཛིན་རྒྱལ་བའི་སྲས་སུ་གྱུར། །དེ་བཞིན་མོས་པ་དག་པར་སྤྱོད། །མཐོང་ལ་སྐལ་ལྡན་འདིར་ཞུགས་པ། །ཐམས་ཅད་དུ་ཡང་དེ་བཞིན་ཏེ། །ཏོག་ནི་རྩེ་མོར་གྱུར་པ་བཞིན། །ཡོངས་ཀྱི་ནུབ་པ་མ་ཡིན་ནོ། །དེ་ཡང་ཇི་ལྟ་བུ་ཞེ་ན། །ལྷ་ཡི་བུ་ཞེས་བྱ་བ་ནི། །དགེ་བའི་རྒྱལ་པོ་བྱ་བ་དེ། །ཚོམ་བུ་འབུམ་དང་བཅས་པ་ཞིག །གསང་བ་རྒྱ་ཆེར་སྤྱད་པ་ལས། །ལྷ་བུ་རིན་ཆེན་འོད་ལྡན་དེ། །ཤིན་ཏུ་དད་པ་ཆེར་གཡོས་ཏེ། །ལྷ་རྫས་ཡོ་བྱད་མང་པོ་དང་། །བཅས་ནས་གསང་བའི་གནས་དེར་ཕྱིན། །དགའ་ཞིང་འདུན་པའི་ཚུལ་གྱིས་ནི། །གུས་པར་གྱུར་ཏེ་དེར་གནས་པས། །ཆོ་འཕྲུལ་ཆེན་པོ་བཞི་ཐོབ་སྟེ། །ལྷ་གནས་ཀུན་དུ་བགྲོད་པ་དང་། །འབྱུང་ཆེན་ལུས་ལས་སྤྲུལ་པ་དང་། །རི་བོ་གདེག་དང་འཕང་བ་དང་། །མི་འཆི་ཚེ་ལ་གནས་པ་ཐོབ། །རྒྱལ་མཚན་རྩེ་མོའི་ཏོག་བཞིན་དུ། །མཐོང་བ་དག་པའི་ཆོས་དེ་ཉིད། །བསྐལ་པར་ནུབ་པར་མ་གྱུར་ཏོ། །དེ་བཞིན་འཇུག་པ་དག་པར་གྱིས། །མཐོང་བས་ཆོས་འདི་ཡོངས་དག་པས། །ཡེ་ཤེས་སྒྲོན་མའི་མིག་རྙེད་ནས། །བླ་མེད་སྙིང་པོ་ཅན་རྣམས་ཀྱིས། །ལམ་རྙེད་ལམ་དུ་ཞུགས་པ་བཞིན། །དེ་ཡང་ཇི་ལྟ་བུ་ཞེ་ན། །བྲམ་ཟེ་ཀུན་རི་བྱ་བ་ཞིག །ཆོས་ཀྱི་མིག་ལྡན་དོན་མཐོང་ནས། །གསང་ཆེན་གཞུང་བཞིན་སྤྱོད་པ་ལ། །བྲམ་ཟེ་ཀཻ་ནི་བྱ་བ་ཞིག །དད་པས་དོན་གྱི་རྗེས་སུ་འབྲེངས། །གསང་ཆེན་འདུས་པའི་ཚོགས་མཐོང་བ། །ཆོས་ཀྱི་མིག་དང་ལྡན་འགྱུར་ཏེ། །དོན་གྱི་སྙིང་པོ་མཐོང་བར་འགྱུར། །ལྷུན་གྲུབ་རྩལ་ཆེན་
རྫོགས་པ་ཡི། །རིག་འཛིན་ཆེན་པོའི་ས་ཉིད་ཐོབ། །དེ་བཞིན་མཐོང་བས་དག་པར་གྱིས། །གཞན་དག་འདིར་ནི་མངོན་སྤྱོད་ལ། །དགའ་བའི་ཡིད་ཀྱིས་ཕྱོགས་བྱེད་པ། །དེ་ནི་དངོས་དང་འདྲ་བ་སྟེ། །འབྲས་བུ་ལ་ཡང་མཐོ་དམན་མེད། །དེ་ཡང་ཇི་ལྟ་བུ་ཞེ་ན། །རྒྱལ་པོ་དབང་ཕྱུག་འོད་ལྡན་ཞེས། །བྱ་བའི་རྣལ་འབྱོར་ཅན་ཞིག་ལ། །ཚོམ་བུ་བཅུ་དང་བཅས་པའི་འཁོར། །རིག་འཛིན་སྤྱོད་པའི་དོན་ལ་ཞུགས། །སྔགས་སྤྱོད་འབྲས་བུ་ཆེར་ཐོབ་སྟེ། །ངོ་མཚར་ཆོ་འཕྲུལ་མང་པོ་དག །ཐོབ་པ་ཀུན་དུ་གྲགས་པར་གྱུར། །དེ་ལ་གཞན་གྱི་སྡེ་པ་ཡི། །བྲམ་ཟེ་དགེ་སློབ་བྱ་བ་ཞིག །ཤིན་ཏུ་དག་པའི་སེམས་བསྐྱེད་ནས། །འཇུག་ཅིང་བསླབ་པར་ཞུགས་པ་ལས། །རྒྱལ་པོས་མ་གནང་གསང་སྒོ་བསྡམས། །བྲམ་ཟེ་དད་པ་མ་ལོག་པར། །འབྱོར་པའི་ཡོ་བྱད་ཅི་ཡོད་རྣམས། །རྒྱལ་པོའི་འཁོར་དུ་ཕུལ་ནས་ཀྱང་། །རྒྱལ་པོ་གནས་པའི་ཡུལ་ཕྱོགས་སུ། །ཡིད་ཀྱིས་ཕྱོགས་ཏེ་སྨོན་ལམ་བཏབ། །རྩེ་གཅིག་པར་ནི་སྨོན་ལམ་བཏབ། །རྗེས་སུ་ཡི་རང་དམ་པར་ནི། །ཡིད་ལ་བྱས་པའི་བསོད་ནམས་ཀྱིས། །སྒྲུབ་བར་བྱེད་པའི་རྒྱལ་པོ་དང་། །སྒྲུབ་དང་མི་ལྡན་བྲམ་ཟེ་གཉིས། །འབྲས་བུ་མཐོ་དམན་མེད་པར་ཐོབ། །འདི་ནི་ཚེགས་མེད་དོན་པོ་ཆེ། །ཐབས་ལ་མཁས་པའི་རིག་འཛིན་ཡིན། །དེ་བཞིན་སྤྱོད་པ་གཞན་དག་ལ། །དགའ་བས་རྗེས་སུ་ཡི་རང་གིས། །དགེ་བ་སྤྱད་དང་མ་སྤྱད་གཉིས། །འབྲས་བུ་མཉམ་པོར་ཐོབ་པར་གྱུར། །བསམ་ཡས་བསམ་གྱིས་མི་ཁྱབ་པ། །རྒྱལ་རྣམས་འདིར་བསླབ་འདིར་མཁྱེན་པས། །སྲིད་གསུམ་འགྲོ་བའི་བཤེས་གཉེན་དུ། །ཀུན་གྱི་བདག་པོར་གྱུར་པ་ཡིན། །དེ་ཡང་ཇི་ལྟ་བུ་ཞེ་ན། །སྔོན་གྱི་བྲམ་ཟེ་གསལ་བྱིན་གྱིས། །གསང་ཆེན་འདི་ཡི་དོན་བསླབས་ནས། །རང་གི་སེམས་ལ་གོམས་བྱས་ན། །སེམས་ཉིད་བདེན་པའི་དོན་མཐོང་སྟེ། །ཆོས་རྣམས་ཀུན་ལ་མཁས་པར་འགྱུར། །ཀུན་གྱི་རྩ་བ་སེམས་ཡིན་པས། །
སེམས་ལས་ཆོས་བྱུང་འབུམ་ཕྲག་ཡས། །ཆོས་ཀྱི་རྒྱལ་པོར་དེར་གྱུར་ནས། །སངས་རྒྱས་སྨྲ་བའི་སེང་གེ་ཞེས། །ཞིང་ཁམས་ཀུན་དུ་གྲགས་པར་འགྱུར། །དེ་བཞིན་བསླབ་པ་དག་པར་གྱིས། །ཚོགས་ཆེན་གཅིག་གི་བསོད་ནམས་ནི། །སྐྱེ་ལ་ཉན་ཐོས་བསམ་ཡས་ལ། །སྦྱིན་པའི་ཚོགས་ཆེན་སྤེལ་བས་ནི། །འབུམ་གྱི་ཆར་ཡང་མི་ཕོད་དོ། །ཅི་ཕྱིར་ཞེ་ན་གཅིག་མཉེས་པས། །རྒྱལ་བ་ཐམས་ཅད་མཉེས་པ་ཡིན། །ནམ་མཁའ་ཁྱབ་པའི་རྒྱལ་བ་དང་། །ཉག་གཅིག་སྣང་བའི་རྒྱལ་བ་གཉིས། །སོ་སོ་མ་ཡིན་ཐ་མི་དད། །སྐུ་དང་གསུང་ཐུགས་གཅིག་ལས་མེད། །འདུལ་བའི་ངོ་གང་ཁྱད་པར་ལས། །བསམ་གྱིས་མི་ཁྱབ་བསྟན་པར་ཟད། །དེ་ན་ཁྱད་པར་དེ་ལྟར་སྣང་། །དེ་ཡང་ཇི་ལྟ་བུ་ཞེ་ན། །ལས་རྣམས་དག་པའི་བྲམ་ཟེ་ནི། །དགེ་ལྡན་གསལ་ལྡན་བྱ་བ་གཉིས། །དགའ་བའི་དད་པ་སོ་སོར་སྐྱེས། །གཅིག་ལ་གཅིག་ནི་ཐ་ཚིག་བྱས། །གཅིག་གིས་ཉན་ཐོས་བསམ་ཡས་ལ། །མཆོད་སྦྱིན་བྱ་བ་རྒྱ་ཆེར་བྱས། །གཅིག་གིས་ཚོགས་མཆོད་རྒྱ་ཆེར་བྱས། །ཚོགས་ལ་སྤྱོད་པའི་གསལ་ལྡན་ནི། །འདི་ཚེ་གཅིག་ལ་མངོན་སངས་རྒྱས། །སྦྱིན་པ་སྤེལ་བའི་དགེ་ལྡན་ནི། །བསྐལ་པ་གྲངས་མེད་གསུམ་གྱིས་གྲུབ། །དེ་བས་གནས་འདིར་སྤྱོད་པ་དག །རྣལ་འབྱོར་གསལ་ལྡན་ཚུལ་བཞིན་སྤྱོད། །འདི་དག་རྟག་ཏུ་སུ་འཆང་བ། །རྡོ་རྗེ་སེམས་དཔའ་ལ་སོགས་པའི། །ཆེ་ཡོན་རྟག་ཏུ་ཅི་འདྲ་བར། །དོན་གྱི་གཟུགས་དང་བཅས་པར་འཐོབ། །དེ་ཡང་ཇི་ལྟ་བུ་ཞེ་ན། །ཁྱིམ་བདག་མེས་སྦྱིན་བྱ་བ་དེ། །ཚོམ་བུ་བརྒྱ་དང་བཅས་པ་ཞིག །རྒྱུན་གྱི་རྟག་པར་འདི་སྤྱད་པས། །སངས་རྒྱས་རྡོ་རྗེ་སེམས་དཔའ་ནི། །འཁོར་དང་བཅས་པ་ཅི་འདྲ་བར། །སྐྱེ་བ་དེ་ཡིས་ངེས་པར་ཐོབ། །སྐུ་དང་གསུང་ཐུགས་རྡོ་རྗེ་ཡི། །དོན་དུ་ངེས་པར་སྒྲུབ་པའི་ཚོགས། །རྟོགས་ནས་སྨྲ་བར་གང་བྱེད་པ། །གོམས་དང་བརྗོད་དང་སྨོས་པ་ཡིས། །ཆོས་ཀྱི་རྒྱལ་པོར་དེ་འགྱུར་ཞིང་། །ཡོན་ཏན་སྤྱི་གཙུག་ཉིད་དུ་འགྱུར། །དེ་ཡང་ཇི་ལྟ་བུ་ཞེ་ན། །དྲང་སྲོང་རྣལ་འབྱོར་ཀལ་ཡ་ནས། །
དྲང་སྲོང་རྣམ་པ་མང་པོ་ལ། །ཚོགས་འདི་ཡོན་ཏན་རྒྱ་ཆེར་བསྒྲགས། །དོན་རྣམས་ངེས་པར་བཤད་པ་ལས། །དྲང་སྲོང་མང་པོས་རིག་འཛིན་ཐོབ། །སྟོན་པར་བྱེད་པའི་ཀལ་ཡ་ན། །གསང་བདག་ཆོས་ཀྱི་རྒྱལ་པོར་གྱུར། །འོན་ཏང་གསང་བའི་དོན་འདི་དག །སྣོད་དང་ལྡན་པའི་འགྲོ་བ་ལ། །བསྟན་ཏམ་བཤད་དམ་བརྗོད་པར་གྱིས། །དེས་ནི་ཡོན་ཏན་ཆེན་པོ་དང་། །ང་ཡི་སྤོབས་པ་འཐོབ་པར་འགྱུར། །དེས་ན་འདུས་པ་ཆེན་པོའི་ཚོགས། །རྒྱལ་བ་ཀུན་གྱི་ཐུགས་དམ་ནི། །རྣལ་འབྱོར་གསང་བའི་ཚོགས་འདི་ཡིན། །རྣལ་འབྱོར་གང་ཞིག་བློ་ལྡན་པས། །སྐད་ཅིག་ཙམ་མམ་ཐང་ཅིག་ལ། །རྒྱལ་བའི་ཚོགས་འདི་རབ་བསྐྲུན་ན། །རྒྱལ་བ་སངས་རྒྱས་ཐམས་ཅད་དང་། །རིག་འཛིན་རྣལ་འབྱོར་མཐའ་དག་དང་། །ཐ་ཚིག་ཟབ་མོ་སྐོངས་ནས་ཀྱང་། །ཆོས་ཀྱི་མིག་ནི་ཐོབ་པར་འགྱུར། །དེས་ནི་ཚོགས་སྤྱད་ཡོན་ཏན་དང་། །ལོག་པར་སྤྱད་པའི་སྐྱོན་རྣམས་ནི། །སྔོན་བྱུང་གླེང་གཞི་བཤད་པ་ཡིན། །ཞེས་སེམས་དཔའི་རྡོ་རྗེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འདས་པ་སྔོན་བྱུང་གི་ལེའུ་ཞེས་བྱ་སྟེ་བདུན་པའོ།། །།དེ་ནས་བཅོམ་ལྡན་འདས་སེམས་དཔའི་རྡོ་རྗེ་དེ་བཅོམ་ལྡན་འདས་གསང་བ་མཆོག་གི་བདག་པོ་དེའི་ཞལ་དུ་ཤིན་ཏུ་རེ་ཞིང་བཀའ་སྡོད་པའི་ཚུལ་གྱིས་ལྟ་ཞིང་ཀུན་དུ་བརྗིད་པར་འཁོར་གྱིས་བསྐུལ་པའི་ས་ལ་སྟ་གོན་དུ་གནས་ཤིང་ཅང་མི་སྨྲ་བར་གྱུར་ཏོ། །དེ་ནས་འཁོར་ཕལ་མོ་ཆེས་རྣམ་པར་བསྐུལ་བར་རིག་ནས་རྣལ་འབྱོར་གྱི་ཕྱག་ལུས་ཀུན་ས་ལ་བརྡབས་ནས་ཨ་ལ་ལ་ཧོ་ཞེས་བྱ་བའི་སྒྲ་ཕྱུང་ནས་མགྲིན་གཅིག་ཏུ་གསོལ་བ་བཏབ་པ། ཨེ་མ་རྡོ་རྗེ་སེམས་ཆེན་པོ། །རང་རིག་མཁྱེན་པའི་ཡེ་ཤེས་འབར། །མགོན་པོ་ཡོན་ཏན་བསམ་ལས་འདས། །རྒྱལ་ཐོབ་ཁྱོད་ལ་ཕྱག་འཚལ་ལོ། །ཨེ་མ་རང་སྣང་དབྱེར་མེད་སྐུ། །རྣམ་དག་བསོད་ནམས་མཚན་གྱིས་བརྒྱན། །དཔེ་བྱད་འབྲུ་བཀོད་བལྟ་མི་ངོམས། །སྐུ་ལྔའི་མཆོག་ལ་ཕྱག་འཚལ་ལོ། །ཨེ་མ་རྣམ་དག་ནམ་མཁའི་དབྱིངས། །གཅིག་གསུང་
སྣ་ཚོགས་སྒྲར་རིག་མཁྱེན། །བསམ་འདས་བརྗོད་མེད་རྡོ་རྗེའི་གསུང་། །གསུང་ལྔའི་མཆོག་ལ་ཕྱག་འཚལ་ལོ། །ཨེ་མ་གསང་བ་ནམ་མཁའི་ཐུགས། །མཉམ་ཉིད་མི་གཡོ་སོ་སོར་གསལ། །ཀུན་རིག་སྙིང་པོ་ཡེ་ཤེས་མཆོག །ཐུགས་ལྔའི་མཆོག་ལ་ཕྱག་འཚལ་ལོ། །ཨེ་མ་མི་མཛད་མཛད་པ་ཆེ། །མ་ཆགས་ཆགས་བྲལ་འདོད་ཆགས་མཛོད། །ཐམས་ཅད་སྒྲོལ་བའི་ལས་ཆེན་པོ། །ཕྲིན་ལས་མཆོག་ལ་ཕྱག་འཚལ་ལོ། །རྒྱལ་ཚབ་ཁྱོད་ལ་གསོལ་བ་ནི། །བྱམས་མགོན་ཐུགས་རྗེའི་བྱིན་བརླབས་ཀྱིས། །སྤྲུལ་པའི་གོ་ཚགས་རུ་མཉམ་སྟེ། །འཁོར་བའི་སྐྱས་ལིངས་ཆེན་པོ་ལ། །སྡུག་བསྔལ་ཤིན་ཏུ་གསད་པའི་ཕྱིར། །ཐམས་ཅད་དུར་ཁྲོད་ཆེན་པོ་རུ། །བྱིན་གྱིས་བརླབས་པའི་ལས་ཆེན་མཛོད། །ཨ་ཧོ་ཞེས་གསོལ་བ་བཏབ་པ་ལས། སེམས་དཔའ་རྡོ་རྗེ་ཆེན་པོ་དེས་རྣལ་འབྱོར་པའི་ཕྱག་བྱས་ནས། བཅོམ་ལྡན་འདས་གསང་བ་མཆོག་གི་བདག་པོ་ལ་ཞུས་པ། ཨ་ལ་ལ་ཧོ་བདེ་བ་ཆེན་པོའི་མཆོག་གསང་བ་ཀུན་གྱི་རྒྱལ་པོ། ཡང་གསང་བླ་ན་མེད་པའི་བདག་ཉིད། འདུས་པ་ཆེན་པོའི་ཚོགས་རྨད་དུ་བྱུང་བའི་ཚིག་ཤིན་ཏུ་རྟུལ་ཕོད་པ་གསོལ་བ་འཚལ་བ་འདི་ཤིན་ཏུ་ངོ་མཚར་ལགས་སོ། །འདི་དག་འདུལ་བའི་དབང་དུ་དགོངས་ཏེ། ཇི་ལྟར་འཚལ་བའི་བསམ་པ་རངས་པར་མཛད་དུ་གསོལ་ཞེས་གསོལ་བ་བཏབ་པ་ལས། བཅོམ་ལྡན་འདས་གསང་བ་མཆོག་གི་བདག་པོ་དེས་ཀུན་དུ་འདུལ་བའི་དུས་མཁྱེན་ནས་བཀའ་གསང་རྨད་དུ་བྱུང་བའི་འཁོར་གྱིས་བསྐོར་བ་དུར་ཁྲོད་རྒྱན་གྱི་རོལ་པ་ལས་རྨད་དུ་བྱུང་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་འཁོར་བྱིན་གྱིས་རློབ་པའི་ཚིག་འདི་གསུངས་སོ། །ཧཱུྃ་ཧེ་ཧེ་ཕཊ། ཧཱུྃ་ཧཱུྃ་བི་ཤྭ་བཛྲ་ཀྲོ་དྷ་ཛྭ་ལ་མཎྜ་ལ་ཨཱ་ར་ལི་ཨ་ལི་ཨུ་ལི་ཏ་པ་ལི་ཏྲྃ་སྟྭྃ། ཁ་ལི་ཧོ། ན་ཤ་སྟྃ་བྷ་ཡ་ཧཱུྃ། བྲུྃ་ཕུ་ཙ་ཁཱ་ཧི་ཕཊ་ཕཊ་ཧ་ལ་ཧཱུྃ་ཞེས་གསུངས་སོ། །འཇིག་རྟེན་དྲུག་གི་ཕྱོགས་བཅུ་མཐའ་ཡས་པ་ཐམས་ཅད་དུར་ཁྲོད་ཀྱི་དཀྱིལ་འཁོར་དུ་གྱུར་
ནས། གཡོས། རབ་ཏུ་གཡོས། ཤིན་ཏུ་རྣམ་པར་འཐོར་རོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེས་སེམས་དཔའ་རྡོ་རྗེའི་སྙིང་པོ་ལ་འཁོར་གཞན་གྱིས་ཡིད་ཚོད་དུ་མི་འགྱུར་བའི་སྐུའི་ཆོས་བསྟན་པ་ནི་སྐུ་ཀུན་དུ་དུར་ཁྲོད་ཀྱི་བདག་པོ་ཆེན་པོར་བསྒྱུར་ནས་དུར་ཁྲོད་ཀྱི་གནས་བརྒྱད་དང་། །ཧེ་རུ་ཀའི་གནས་བཅུ་དང་། །དཔལ་གྱི་ཆས་བརྒྱད་དང་། དུར་ཁྲོད་ཀྱི་རྒྱན་ཆེན་པོ་དགུ་དང་། །དོན་གྱི་རྟགས་ཆེན་པོ་བཅྭ་བརྒྱད་དང་། །དུར་ཁྲོད་ཀྱི་ལོངས་སྤྱོད་སྣ་ཚོགས་པ་བསྟན་པས་ཞལ་འཛུམ་པའི་མདངས་ཀྱིས་གཟིགས་པ་ལས་སེམས་དཔའ་རྡོ་རྗེ་དེས་མཁྱེན་ཏེ། བཀའ་གསང་དབང་ཆེན་འདིས་དོན་དུ་ནི་བཤད། ཚིག་ཏུ་བསྒྲགས་པར་རིག་ནས་འདུས་པའི་ཚོགས་ལ་ཤིན་ཏུ་ལྡེམ་དགོངས་ཀྱི་ཚིག་ཏུ་སྨྲས་པ། བཀའ་གསང་རྨད་བྱུང་ཆེན་པོ་འདི། །སྦས་པས་ཟབ་ཅིང་རྟོགས་དཀའ་བ། །མཚོན་པས་དོན་འབྱིན་མི་ཤེས་པས། །ཉོན་མོངས་རང་དགའ་སྤྱོད་སྙམ་པའི། །ཤིན་ཏུ་བྱིས་པའི་བློ་ཞན་པའི། །ངེས་པའི་ཤེས་རབ་མིག་ལྡོངས་ཏེ། །དོན་གྱི་རྩལ་ཤུགས་ཆུང་བ་ཡིས། །དགའ་བདེའི་ལོངས་སྤྱོད་བསྐྲུན་སྙམ་ནས། །མཚན་མ་རང་དགར་སྤྱད་བསྒྲུབས་ཀྱང་། །རང་བཞིན་འགྲུབ་པར་མི་འགྱུར་ཏེ། །རྒྱུད་ཕུང་འབྲས་བུ་ཚིག་གྱུར་ནས། །མྱུ་གུ་བརླག་སྟེ་ག་ལ་འབྱུང་། །གཏན་ཚིགས་དེ་བས་འདི་དོན་དག །རྩལ་ཞན་དག་ལ་བསྟན་མིན་ཞེས། །གསང་བདག་རྒྱལ་པོ་ཀུན་གསུང་ན། །ཅི་ཁྱོད་རྣམས་ཀྱིས་མི་ཤེས་སམ། །ཞེས་རྣམ་པར་སྨྲས་པ་ལས། །འདུས་པའི་ཚོགས་ཀྱིས་སླར་གསོལ་པ། །ཨེ་མའོ་སེམས་དཔའ་ཆེན་པོ་དེ་ལྟ་བུའི་རྒྱུ་ཚིག་ཆེན་པོ་དག་འཁོར་གྱི་དཀྱིལ་འཁོར་གྱི་ནང་དམ་པ་འདིར་གསུང་ངམ། །འོན་ཏེ་མི་སྤྱོདམ། ཅང་མ་ལགས་གྲང་། ཅི་བླང་དོར་མཛད་དམ། ཨེ་མ་སྣོད་དུ་མ་གྱུར་པ་ནི་གང་མཆིས། ཐམས་ཅད་བྱང་ཆུབ་ཀྱི་སྙིང་པོ་ཅན་ལགས་ན། ཐོང་ཀུན་དུ་རབ་ཏུ་ཐོང་། རྣམ་པར་རབ་ཏུ་གསུངས། འགག་པ་མི་མངའ་མི་འགོག་གསུངས། །ཅི་ཕྱིར་མི་གསུང་ཐོགས་
མེད་སྲས། །རྒྱལ་བའི་སྲས་པོ་དུས་འདི་ལགས། །གསང་བའི་སྙིང་པོ་སྣོད་འདི་ལགས། །བཀའ་གསང་དཀྱིལ་འཁོར་གནས་འདི་ལགས། །གསང་བའི་དུར་ཁྲོད་ཚུལ་འདི་ལགས། །སྙིང་རྗེ་ཞེར་སེམས་ཁྱོད་ལ་འདུད། །གསང་བ་ཡང་གསང་ཁྱོད་ལ་འདུད། །གསང་བ་ཡེ་གསང་ཁྱོད་ལ་འདུད། །དཀྱིལ་འཁོར་རྒྱལ་པོ་ཁྱོད་ལ་འདུད། །འཁོར་ལོ་སྙིང་པོ་ཁྱོད་ལ་འདུད། །གསང་ཆེན་སྙིང་པོ་ཚུལ་ཅི་ལགས། །བཀའ་གསང་དཀྱིལ་འཁོར་ཐབས་ཅི་ལགས། །འབྲས་བུ་བདེ་བའི་དོན་ཅི་ལགས། །མ་འོངས་པ་ཡི་རྣལ་འབྱོར་དག །བསྒྲུབས་ན་དང་ལེན་འཚལ་བ་ཡི། །རིག་པར་འགྱུར་བའི་ཐབས་ཅི་ལགས། །འབྱུང་ཆེན་རྒྱལ་པོས་བཤད་དུ་གསོལ། །ཞེས་གསོལ་བ་བཏབ་པ་ལས། །སེམས་དཔའ་རྡོ་རྗེ་དམ་པ་དེ་ཤིན་ཏུ་བཞད་པ་ཆེན་པོས་རྣམ་པར་བཞད་དེ། །ཨ་ཨ་ཧེ་ཧེའི་གད་རྒྱངས་བསྒྲགས་པས་འཁོར་ཐམས་ཅད་ཀྱང་གད་རྒྱངས་ཀྱི་སྒྲ་ཆེན་པོ་སྒྲོགས་པར་མཛད་དེ། དགྱེས་པའི་འོད་ཟེར་ལས་ཤེས་རབ་ཀྱི་དཔལ་དེ་དགྱེས་པའི་རོལ་མོ་སྣ་ཚོགས་ལིང་ལོང་ཕྱད་པར་བྱུང་ངོ་། །དེ་ནས་སེམས་དཔའི་རྡོ་རྗེ་དམ་པ་དེས་ལུས་ཀུན་བསྲང་སྟེ། དུར་ཁྲོད་ཀྱི་ཆས་སྣ་ཚོགས་བསར་ཞིང་རྟགས་བཅྭ་བརྒྱད་འབར་བར་བྱས་ནས་བརྗིད་པའི་གསུང་གིས་གསང་སྔགས་རྒྱ་མཚོ་དང་། རྣམ་གྲངས་སྣ་ཚོགས་དོན་གྱི་བསྒྲུབ་པ་རྟགས་ཀྱི་རོལ་པ་གསང་བའི་དཀྱིལ་འཁོར་ཆེན་པོ་འདི་དག་བཤད་དོ། །གཅིག་ཏུ་ཡང་དག་ངེས་གྲུབ་པའི། །དོན་ལ་རྟོན་བྱེད་རྣལ་འབྱོར་རྣམས། །ཐོགས་མེད་ཉིད་དུ་འགྲུབ་འདོད་པ། །ཇི་ལྟར་བཙོ་བླག་མཁན་དག་གིས། །རས་དཀར་སྦྱངས་པས་ཚོན་འཇེན་ལྟར། །རྣལ་འབྱོར་ལས་རྣམས་དང་པོར་ནི། །སྐོངས་དང་སྦྱོང་བའི་ལས་རྣམས་གཅེས། །ཟབ་མོར་འཇུག་པའི་སྔོན་ལོགས་ནས། །སེམས་ཉིད་གཏིང་ནས་ཚར་གཅད་ཕྱིར། །ཐེག་པ་དམན་པའི་སྐྱེ་བོ་དང་། །ལྷན་ཅིག་ཅི་ལའང་མི་བརྣལ་ལོ། །དེ་ལས་གྱུར་པའི་ཡོ་བྱད་དག །རུས་སྦལ་མགོ་ལ་འོངས་པ་དག །ཤིན་ཏུ་འཁྲུགས་པའི་སེམས་
ཆེན་གྱིས། །རྒྱ་མཚོས་བཤུགས་ཏེ་སྤང་བར་བྱ། །གལ་ཏེ་གང་ཟག་དབང་གིས་ན། །ཉམས་པའི་ཆད་པ་བྱུང་བ་ན། །མགོན་ཚུན་ཆོས་ཉིད་ཆུ་ཕབ་ནས། །སྐོང་ཟློག་ཆོ་ག་རྒྱ་ཆེར་བྱ། །སྒྲུབ་རྩོམ་སྔོན་ནམ་ཡང་སྔོན་ནམ། །ཞག་གྲངས་དག་གི་སྔོན་ལོགས་ནས། །སྡིག་སྦྱངས་བྱང་ཆུབ་སེམས་བསྐྱེད་དེ། །དགེ་བའི་དོན་ལ་འདུན་པར་བྱ། །སློང་མོ་དང་སློང་ལ་དགའ་བ། །སློང་ལ་འཚོ་བའི་ཚེ་སྤྱོད་རྣམས། །སྡེ་དང་ཚན་དང་གྲར་བྱས་ཏེ། །སྙིང་རྗེ་ལུད་པའི་ཞིང་དུ་བྱ། །སྨན་དང་འབྲུ་དང་རྩི་རྣམས་དང་། །བཅུད་ཀྱི་མཆོག་ཏུ་གྱུར་པ་དག །བཏགས་སམ་ཕྱེ་མར་སྦྱར་ནས་ཀྱང་། །ཀླུང་ངམ་ཆུ་ཀླུང་མཚོ་ཆེན་དུ། །དོར་ཏེ་ཆགས་མེད་སྦྱིན་པར་བྱ། །དགེ་བའི་ཡོན་བདག་དང་བླངས་ཏེ། །ནད་གསོ་ཤེས་སློབ་སྤྱོད་སྒོམ་གྲྭ། །བཙུགས་ཏེ་བསྟི་གནས་མཆོག་བྱ་ཞིང་། །དུས་ཀྱི་འཁོར་ལོའི་མཆོད་ཆེན་བྱ། །གསུང་སྒྲ་རྒྱ་མཚོ་སྒྲོགས་པ་ཡི། །གླེགས་བམ་ཟབ་མོ་ཀུན་བསྟེན་ཏེ། །བརྗོད་དང་བསྙེན་བཀུར་བསྟི་གནས་ཀྱིས། །རྒྱ་ཆེ་ཡངས་བའི་ལས་རྣམས་བྱ། །ཡེ་ཤེས་ཚོགས་རྣམས་རྫོགས་བྱའི་ཕྱིར། །ཤེས་རབ་ཚོགས་ཀྱི་སྦྱིན་མཆོག་དག །བསྟན་ཏམ་གླེགས་བམ་ལ་སོགས་པའི། །བློ་མཆོག་ལྡན་པ་རྣམས་ལ་སྦྱིན། །བསྒོམ་དང་གོམས་པར་བྱ་བ་ཡིས། །ཀུན་གཞི་དག་པར་བྱ་བའི་ཕྱིར། །ཏིང་འཛིན་བྱེ་བ་མང་པོ་ལ། །བློ་མཆོག་ཡིད་ཀྱི་རྩལ་དེ་སྤྱད། །ཆོས་ཀྱི་འཁོར་ལོ་རབ་བསྐོར་ཏེ། །རྒྱུད་སྦྱང་ལྷག་པའི་ཤེས་རབ་བལྟ། །ཤོ་གམ་སྲང་དང་ཤོ་གམ་ལམ། །མི་བདེའི་གནོད་པ་ཀུན་བསལ་ཏེ། །ཚད་མེད་སྙིང་རྗེའི་འཁོར་ལོ་བསྐོར། །སྦྱིན་པའི་འཁོར་ལོ་རྒྱུན་མི་གཅད། །ཆུ་འམ་ས་འམ་ནམ་མཁའ་འམ། །མེ་འམ་དེ་བཞིན་རླུང་རྣམས་ལ། །སྐུ་གདུང་སྤེལ་མཆོད་རིང་བསྲེལ་རྣམས། །བརྩམ་པའི་ལས་ཆེན་འཁོར་ལོར་བྱ། །མཚམས་མེད་ཟློག་པར་བྱེད་པ་ཡི། །ལུས་སེམས་རྒྱུད་ལ་རྡུལ་རླགས་ཏེ། །འཕགས་པའི་སྤྲིན་ཚོགས་ཕོ་བྲང་དུ། །རྡུལ་སྙེད་ལུས་ཀྱིས་
མཆོད་སེམས་བཤགས། །རྒྱལ་མཉེས་ལས་ནི་གྱིས་ཤིག་པ། །ཐབས་ཆེན་སྦྱོར་བའི་ལས་ཆེན་ལས། །རྣམ་བཞི་མེ་ཡི་ལས་མཆོག་བྱ། །དེས་ནི་མཚམས་མེད་ཟློག་པ་ཡིན། །ཐུགས་རྗེ་འབྱུང་བའི་འཁོར་ལོ་དག །གང་ལྟར་གོམས་ལྟར་འབད་རྩོལ་བྱ། །བསྟན་པ་སྐྱོང་བའི་ཚོགས་རྣམས་ལ། །སྦྱིན་མཆོད་སྤེལ་བའི་ལས་རྣམས་བྱ། །དེ་ལ་སོགས་པའི་དགེ་བའི་ཚོགས། །དོན་དུ་མི་འགྱུར་ཀུན་སྤངས་ལ། །ནན་ཏན་ཚོགས་ཀྱི་དཔུང་ཆེན་བསྐྱེད། །འདི་ལྟར་ལས་ཆེན་ལྟང་སོགས་པ། །གཞན་དུ་བསྐྱེད་པ་མ་ཡིན་ཏེ། །རྩེ་གཅིག་དོན་ལྡན་རྣལ་འབྱོར་པ། །རྒྱུད་ལྡན་སྣོད་ལྡན་བྱ་ཕྱིར་དང་། །གལ་ཏེ་རྩལ་ཞན་མ་གྲུབ་ན། །དགེ་བསགས་ལྟང་ཆེན་ཀུན་བསྡོམས་ཏེ། །ལས་ཀྱི་བསགས་པ་དོན་བགྲངས་ཤིང་། །གདུང་བའི་ཤུགས་ཕྱུང་རྩལ་སྤྲུགས་ནས། །ཉི་ཤར་ཆུ་ཀླུང་ཟླ་བརྙན་ལྟར། །རང་བཞིན་ཤུགས་ཀྱིས་འགྲུབ་པར་གཅེས། །དེ་ཕྱིར་ཕྲ་མོ་ཡན་ཆད་ཀྱང་། །བདག་གི་དོན་དུ་འགྱུར་བར་བྱ། །དེ་ལྟར་སྤྱད་པ་སྤྱོད་པ་ཡི། །ཕྲ་མོའི་རྣལ་འབྱོར་བློ་འཕེལ་བ། །ཆུང་ངུ་ཆུང་སོགས་མཐར་ཟད་ནས། །སྐོང་བའི་རྣལ་འབྱོར་འཁོར་ལོ་ཡིས། །ཞིག་དང་རལ་དང་ཆག་འདྲེས་དག །བསྐང་གསོ་གཞུག་པའི་ལས་འདི་བྱ། །ལས་ཆེན་སྐོང་བའི་ཁྱད་པར་གྱིས། །གནས་སུ་བརྟག་པར་ངེས་མེད་དེ། །མི་སྡུག་སྐྱོན་ཅན་བཀྲ་མི་ཤིས། །སྤངས་ཏེ་མེད་པར་གྱུར་པ་ཡི། །ཤིན་ཏུ་སར་པའི་གནས་ཆེན་དག །བསྐང་བའི་གནས་སུ་དེ་འགྱུར་རོ། །དེ་ལྟར་ཡིད་འོང་གནས་བཙལ་ནས། །དྲོད་ལྡན་བླ་མ་སྤྱན་དྲངས་ཏེ། །སྲི་ཞུ་རྒྱལ་ཆོས་སྤྱི་བོར་བཀུར། །དེ་ཡང་དམིགས་ཀྱིས་ཞུ་བ་དག །མཎྜལ་ཁར་གསིལ་ཙམ་དག་ལ། །མེ་ལོང་སྙིང་པོ་ལྟར་བྱས་ཏེ། །གཙང་མའི་རྒྱུ་ལས་རྫས་བྱས་པ། །ཡིད་འོང་རྣམ་ལྔའི་མཆོད་པ་ལ། །རྐྱེན་གྱི་རྣལ་འབྱོར་སྣ་ཚོགས་ཀྱིས། །བརྒྱན་ཏེ་བཀླུབས་པའི་སྤྲིན་ཕུང་རྣམས། །མཉེས་ནས་སྐོངས་ཕྱིར་རྒྱལ་ལ་དབུལ། །ཕྱི་འཁོར་སྐྱོང་བའི་མགོན་པོ་ལ། །འདོད་ཡོན་ལྔ་ལ་སོགས་པ་ཡི། །ཡིད་བཞིན་
ལོངས་སྤྱོད་རྐྱེན་དང་བཅས། །ཡོན་ཏན་ཆ་ལས་སྨོན་བཅོལ་མཆོད། །མཉེས་ནས་སྐོངས་པའི་སྟོངས་སུ་འགྱུར། །ཁམས་གསུམ་སྙིང་རྗེའི་གནས་རྣམས་ལ། །ཡོ་བྱད་སྦྱིན་ཚོགས་ཆེན་པོ་ལས། །འདོད་པའི་བསམ་པ་རངས་བྱས་ན། །མགུ་བས་སྐོངས་པའི་སྟོངས་སུ་འགྱུར། །བགེགས་སུ་གྱུར་པའི་བགེགས་རིས་ཀྱང་། །མཉམ་པའི་དོན་གྱིས་སེམས་མི་དབྱུང་། །དམིགས་ཀྱིས་ཁ་ཟས་སྣ་ཚོགས་ལས། །བགེགས་རྣམས་མགུ་ན་ཐམས་ཅད་ཀྱང་། །མཉམ་པའི་དོན་གྱིས་སྐོངས་པའི་རྒྱུར། །ཅུང་ཟད་ཙམ་དུ་སྣང་བ་ཡིན། །དེ་ལྟར་སྐོངས་པའི་ལས་རྣམས་ཀྱིས། །བསྐང་བར་བྱ་བའི་དམིགས་རྣམས་ནི། །རྣམ་པ་ལྔར་ནི་སྣང་བ་སྟེ། །ཀུན་དུ་ཉམས་པ་ཆེན་པོ་དང་། །རྩ་བ་ཉམས་དང་ཡན་ལག་ཉམས། །དེ་བཞིན་ཟླས་ཉམས་ཞར་ཉམས་ལྔ། །བསྐང་བའི་ཐབས་ཀྱང་ལྔ་ཡོད་དེ། །སྤྱད་པའི་ལས་ཀྱིས་བསྐང་བ་དང་། །རྫས་དང་དོན་དང་ཏིང་འཛིན་དང་། །མན་ངག་གསང་བའི་ཐབས་ཆེན་ནོ། །དེ་དག་ལ་ཡང་ལྔ་ལྔ་སྟེ། །སྤྱོད་པའི་ཚུལ་གྱིས་བསྐང་བ་ལ། །རྣམ་པ་ལྔ་རུ་བཤད་པར་བྱ། །དང་པོ་འབུམ་ལྔ་ཁྲི་གསུམ་སྟེ། །རྩ་ཉམས་ཁྲི་ལྔ་སྟོང་གསུམ་མོ། །ཡན་ལག་ཉམས་པར་གྱུར་པ་ལ། །སྟོང་ལྔ་བརྒྱ་གསུམ་ཐོན་པར་བྱ། །བཟླས་ཉམས་བརྒྱ་ལྔ་བཅུ་གསུམ་མོ། །ཞར་གྱིས་ཉམས་པར་གྱུར་པ་ལ། །བཅུ་ལྔ་གཅིག་གསུམ་དག་གིས་སྐོངས། །རྫས་ཀྱིས་བསྐང་བའི་ཐབས་མཆོག་ནི། །གལ་ཏེ་བསྲུང་བ་འགའ་ཞིག་ལས། །བྱང་ཆུབ་ཐ་ཚིག་རལ་གྱུར་ན། །གཏི་མུག་རིགས་ཀྱི་ཐ་ཚིག་བསྐང་། །དམངས་རིགས་བླ་མ་སྤྱན་དྲངས་ལ། །ཉེས་འགལ་མི་བཅབ་སྟོང་དུ་བཤགས། །གསེར་ལ་སོགས་པའི་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །བྱང་ཆུབ་སེམས་བསྐྱེད་རྒྱུད་སྦྱང་མཉན། །རྡོ་རྗེ་ཐ་ཚིག་རལ་གྱུར་ན། །ཞེ་སྡང་རིགས་ཀྱི་ཐ་ཚིག་བསྐང་། །རྗེའུ་རིགས་བླ་མ་སྤྱན་དྲངས་ཏེ། །ཉེས་བྱས་མི་བཅབ་འབུམ་དུ་བཤགས། །ཤེལ་ལ་སོགས་པའི་རྫས་ཆེན་གྱིས། །ཐ་ཚིག་
གང་བརླག་ནོར་དེས་བླུ། །བསམ་གཏན་ཏིང་འཛིན་བསྒོམ་བརྩོན་བྱ། །རིན་ཆེན་ཐ་ཚིག་ཉམས་གྱུར་ན། །ང་རྒྱལ་རིགས་ཀྱི་ཐ་ཚིག་བསྐང་། །རྒྱལ་རིགས་བླ་མ་སྤྱན་དྲངས་ཏེ། །ཉེས་བྱས་མི་བཅས་བརྒྱད་ཁྲིར་བཤགས། །བཻ་ཌཱུར་ལ་སོགས་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །སྐུ་གདུང་རིང་བསྲེལ་རྣམ་པར་སྤེལ། །པདྨའི་ཐ་ཚིག་རལ་གྱུར་ན། །འདོད་ཆགས་རིགས་ཀྱི་ཐ་ཚིག་བསྐང་། །གདོལ་རིགས་བླ་མ་སྤྱན་དྲངས་ལ། །ཉེས་བྱས་མི་བཅབ་བརྒྱར་བཤགས་བྱ། །བྱི་རུ་ལ་སོགས་རྫས་ཆེན་གྱིས། །ཐ་ཚིག་གང་བརླག་ནོར་དེས་བླུ། །བཤད་བྱ་ཟབ་མོའི་གླེགས་བམ་བརྗོད། །ལས་ཀྱི་ཐ་ཚིག་རལ་གྱུར་ན། །ཕྲག་དོག་རིགས་ཀྱི་ཐ་ཚིག་བསྐང་། །བྲམ་ཟེ་རིགས་བཤེས་སྤྱན་དྲངས་ལ། །ཉེས་བྱས་མི་བཅབ་བཅུ་ལྔར་བཤགས། །ཨིནྡྲ་ལ་སོགས་རྫས་རྣམས་ཀྱིས། །ཐ་ཚིག་གང་བརླག་ནོར་དེས་བླུ། །མཆོད་སྦྱིན་བསོད་ནམས་ལས་ཆེན་བྱ། །དེས་ནི་བསྐང་བའི་ལས་ཆེན་འགྲུབ། །དོན་གྱིས་བསྐང་བའི་ཐབས་མཆོག་ཀྱང་། །རྣམ་ལྔའི་ཚུལ་དུ་བཤད་པར་བྱ། །ཆོས་ཀུན་ནམ་མཁར་བསྒོམས་ནས་ཀྱང་། །བག་ཆགས་བཟང་ངན་ཐམས་ཅད་ཀུན། །ཅི་ཡང་མེད་པར་བློ་ལ་བཞག །དེ་ལ་གོམས་བྱས་ཉེས་པ་མེད། །ཀུན་ལ་མཁས་པའི་བླ་མ་ལ། །རྒྱ་ཆེ་ཡངས་པའི་ཆོས་མཉན་ཏེ། །བསམ་པའི་ལས་རྣམས་རྒྱ་ཆེར་བྱ། །ཡིད་ཀྱིས་དམིགས་པའི་ལས་དག་ན། །རྩ་བ་ཉམས་པ་སྐོང་བར་འགྱུར། །གལ་ཏེ་ཡན་ལག་ཉམས་གྱུར་ན། །ཆོས་ཉིད་ནམ་མཁའི་དོན་སྟོན་པའི། །གླེགས་བམ་ཟབ་མོ་ཀུན་བརྟགས་ཏེ། །དོན་རྣམས་རྒྱ་ཆེར་བརྟག་པར་བྱ། །དེས་ནི་ཡན་ལག་ཉམས་པ་མེད། །བཟླས་ན་ཐ་ཚིག་ཉམས་གྱུར་ན། །བླ་མ་སྐྱེས་བུ་མཁས་པ་ལ། །གཞུང་ཆེན་ཚུགས་པའི་བསྟན་པ་ཞིག །སྟོན་པའི་ཡོན་བདག་གཉེར་བླངས་ཏེ། །བློ་ཡི་རྩལ་ཅན་ཀུན་བསྡུས་ཏེ། །དམ་ཆོས་བདུད་རྩི་བསྟན་པ་བསྒྲགས། །གལ་ཏེ་ཞར་གྱིས་ཉམས་གྱུར་ན། །བསྟན་པའི་གླེགས་བམ་
རྒྱ་ཆེན་རྣམས། །བྲིས་ནས་ཆོས་ཀྱི་སྦྱིན་པར་བྱ། །དེས་ནི་ཞར་ཉམས་སྐོངས་པར་འགྱུར། །ཏིང་འཛིན་རྩལ་གྱི་ཐབས་མཆོག་ནི། །བག་ཆགས་ཅན་གྱི་སྤྱི་གཙུག་ཏུ། །རྩ་དམར་འོད་ནི་མེ་ལོང་ཙམ། །ཤིན་ཏུ་འབར་ཞིང་འཚེར་གསལ་བས། །ཆགས་དང་བཅས་པའི་ཕུང་པོ་བསྲེགས། །རྣམ་གྲོལ་སེམས་ཀྱི་རང་བཞིན་དང་། །འོད་ཀྱི་རང་བཞིན་གཅིག་པ་ལས། །དཀར་དང་དམར་དང་མཐིང་ག་ཡི། །འོད་ཀྱི་ཐིག་ལེ་གསུམ་དུ་འགྱུར། །དཀར་པོར་སྤྲོས་པས་ཁྱབ་པ་ཆེ། །དམར་པོར་སྤྲོས་པས་ཆགས་པ་ཆེ། །མཐིང་ག་ཐུགས་ཀྱི་ས་བོན་ཏེ། །རྣམ་གསུམ་གཅིག་ཏུ་འདུས་པ་ལས། །ངག་ཡིད་གསུམ་གྱི་བག་ཆགས་བསྲེགས། །སྐུ་གསུང་ཐུགས་ཀྱི་དམ་ཚིག་སྐོངས། །དཀར་པོ་རླུང་ཟླའི་དཀྱིལ་འཁོར་ལ། །དམར་པོ་འབུད་པའི་རླུང་བྱུང་བས། །མཚན་མའི་བག་ཆགས་རྣམ་པར་གཏོར། །དམར་པོ་ཆུ་ཟླའི་དཀྱིལ་འཁོར་ལས། །མཐིང་ག་ཡེ་ཤེས་ཆུ་བྱུང་བས། །དངོས་པོའི་ལྗན་ལྗིན་ཐམས་ཅད་བཀྲུས། །དེ་ལྟར་གསལ་བར་གྱུར་པ་དང་། །རྣལ་འབྱོར་ཅན་གྱིས་ཚིག་འདི་བརྗོད། །རྫས་བསྲེག་པ་ལ་མེ་དགོས་ཀྱང་། །བག་ཆགས་ཚིག་ལ་མེ་མི་དགོས། །རིག་པ་ཡེ་ཤེས་མེ་བྱུང་བས། །མཚན་མ་ཡི་ནི་བུད་ཤིང་བསྲེགས། །འཇིག་རྟེན་གཏོར་ལ་རླུང་དགོས་ཀྱང་། །མཚན་མ་གཏོར་ལ་རླུང་མི་དགོས། །རིག་པའི་ཡེ་ཤེས་རླུང་བྱུང་བས། །མཚན་མའི་རྡུལ་ཚོགས་རྣམ་པར་འཕྱག །ལུས་བཀྲུ་བ་ལ་ཆུ་དགོས་ཀྱང་། །སེམས་བཀྲུ་བ་ལ་ཆུ་མི་དགོས། །མཉམ་ཉིད་ཆུ་བོ་ཁྲུས་ཀྱི་རྫིང་། །ཡེ་ཤེས་ཆུ་བོའི་རྒྱུན་བྱུང་བས། །བག་ཆགས་ལྗན་ལྗིན་ཐམས་ཅད་བཀྲུས། །ཨོྃ་ཀྲོ་དྷི་ཤྭ་རི་སརྦ་པཱ་པྃ་ཤོ་དྷ་ཡ་ཨོཾ་ཨཱཿཧཱུྃ། རྃ་ཡྃ་ཁྃ། དེ་སྐད་ཚིག་ཏུ་བརྗོད་པ་ཡིས། །ཉམས་པའི་ཆད་པ་མི་འབྱུང་ངོ་། །གཅིག་ཏུ་བསྐང་བའི་ལས་ཆེན་ཡང་། །རིགས་ཀྱི་རྫས་དང་ཡོ་བྱད་རྣམས། །གནས་སུ་བསགས་ནས་བྱིན་བརླབས་ཏེ། །ཕྱི་ནང་མཚམས་བཅད་བརྟན་བྱས་ནས། །སོ་སོ་རིགས་ཀྱི་དམ་
ཚིག་ལ། །འགལ་བར་གྱུར་པ་གང་དང་གང་། །མཆོད་དང་བཤགས་དང་གནོང་བཀུར་ཏེ། །ཡན་ལག་བརྒྱད་ཀྱི་ཚུལ་བཟུང་ནས། །བསམ་གཏན་གནས་སྦྱངས་རྫས་བསབ་པ། །གཏི་མུག་རིགས་ཀྱི་དམ་ཚིག་ལ། །ཤེས་ནས་རྟོགས་པར་བྱ་རྒྱུ་ལས། །མ་རིག་ལོག་པའི་མཐུ་ཡིས་ན། །ཐ་ཚིག་དྲག་པོ་ཡལ་གྱུར་ན། །ཕོ་བྲང་ནམ་མཁའི་ལིངྒ་ལ། །ཟླ་བའི་དཀྱིལ་འཁོར་དབུས་གནས་པར། །ཨ་ཡི་རང་བཞིན་འོད་གསལ་བར། །གསལ་འཕྲོ་འཁྲུག་པར་གྱུར་པ་ན། །ཕཊ་ཀྱིས་དྲག་ཏུ་བརྡབས་པ་ཡིས། །འོད་འདྲིལ་བསྐལ་པའི་མཁའ་གསལ་བས། །གཏི་མུག་རི་བོའི་མུན་བསལ་ཏེ། །བྱང་ཆུབ་མྱུ་གུ་འབར་བར་འགྱུར། །དེ་ལྟར་གསལ་བར་གྱུར་པ་དང་། །རྣལ་འབྱོར་ཅན་གྱིས་ཚིག་འདི་བརྗོད། །ཨེ་མའོ་བདེར་གཤེགས་ཐ་ཚིག་ལས། །བྱང་ཆུབ་སེམས་བདེ་གསལ་འབར་བ། །དོན་དུ་མི་གཏོང་གཞི་བསྐྱེད་དེ། །སངས་རྒྱས་གདུང་ཆེན་རྒྱུད་སྙམ་ལས། །ཇི་ལྟར་ཟླ་བར་རི་ལྟར། །རྒྱུ་ལས་བྱུང་བའི་རང་བཞིན་ལས། །བྱང་ཆུབ་མྱུ་གུ་ནུབ་མ་ཁད། །གཟུགས་ཀྱི་ཕུང་པོའི་ཞིང་ཁམས་སུ། །བདེ་མཆོག་མཁའ་མཉམ་དབྱིངས་ཆེན་གསལ། །གཉེན་པོས་འཇོམས་པའི་ཐབས་ཆེན་ལས། །བསྐང་ངོ་བསྐལ་བའི་ཐུགས་དམ་བསྐང་། །གསང་བ་དོན་གྱི་རྫས་མཆོག་འདིས། །བྱང་ཆུབ་བསྐལ་པའི་ཐུགས་དམ་རྣམས། །སྐོངས་འགྱུར་བསམ་པའི་དོན་དུ་སྦྱང་། །སརྦ་ཏ་ཐཱ་ག་ཏ་པུ་ཏ་ས་མ་ཡ་ཧོ། །དེ་སྐད་ཚིག་ཏུ་བརྗོད་ནས་ཀྱང་། །སྤྱི་བོ་བརྡའི་ཚུལ་ཕྱག་རྒྱ་སྦྱར། །ཞེ་སྡང་རིགས་ཀྱི་ཐ་ཚིག་ལས། །ཕོ་བྲང་རྣམ་ཤེས་ལིངྒ་ལ། །རྡོ་རྗེ་བུམ་པའི་དབུས་གནས་པར། །ཧཱུྃ་གི་རང་བཞིན་འོད་གསལ་འབར། །གསལ་འཕྲོ་འཁྲུག་པར་གྱུར་པ་ན། །ཕཊ་ཀྱིས་དྲག་ཏུ་བརྡབས་པ་ཡིས། །འོད་འདྲིལ་རྡོ་རྗེའི་ཕ་ལམ་གྱིས། །ཞེ་སྡང་རི་བོ་བརླགས་ནས་ཀྱང་། །ཤེས་རབ་མེ་ལོང་འོད་གསལ་འབར། །དེ་ལྟར་གསལ་བར་གྱུར་པ་ན། །རྣལ་འབྱོར་ཅན་གྱིས་ཚིག་འདི་བརྗོད། །ཨེ་མའོ་རྡོ་རྗེ་ཐ་ཚིག་རྣམས། །སེམས་ཆེན་ཡེ་ཤེས་གསལ་འབར་བ། །ཐུགས་
མཆོག་གདུང་ཆེན་རྒྱུད་སྙམ་ལས། །ཇི་ལྟར་རལ་གྲི་སོ་རྒལ་ལྟར། །དེ་ལས་གྱུར་པའི་རང་བཞིན་ལས། །ཤེས་རབ་མེ་ལོང་ནུབ་མ་ཁད། །རྣམ་ཤེས་ཕུང་པོའི་ཞིང་ཁམས་སུ། །གསལ་འབར་ཡེ་ཤེས་ཐིག་ལེ་འཕྲོ། །གཉེན་པོས་འཇོམས་པའི་ཐབས་ཆེན་གྱིས། །བསྐང་ངོ་བསྐལ་པའི་ཐུགས་དམ་བསྐང་། །གསང་བ་དོན་གྱི་རྫས་མཆོག་འདིས། །ཐུགས་མཆོག་བསྐལ་པའི་ཐུགས་དམ་བསྐང་། །སྐོངས་གྱུར་བསམ་པའི་དོན་དུ་སྦྱང་། །ཨོྃ་སརྦ་ཏ་ཐཱ་ག་ཏ་ས་མ་ཡ་ཧོ། དེ་སྐད་ཚིག་ཏུ་བརྗོད་ནས་ཀྱང་། །སྙིང་གི་བརྡ་ཡི་ཚུལ་ཕྱག་སྦྱར། །ང་རྒྱལ་རིགས་ཀྱི་དམ་ཚིག་ལས། །སྙོམས་ནས་དང་དུ་བླང་རྒྱུ་ལས། །ལོག་པའི་ང་རྒྱལ་དེ་མ་ཆོམས། །ཐ་ཚིག་དྲག་པོ་ཡལ་འགྱུར་ན། །ཕོ་བྲང་སྐྱེ་རྒྱུའི་ལིངྒའི་དཀྱིལ། །རིན་ཆེན་འབར་བའི་དབུས་གནས་པར། །སྭ་ཡི་རང་བཞིན་འོད་གསལ་འབར། །གསལ་འཕྲོ་འཁྲུག་པར་གྱུར་པ་ན། །ཕཊ་ཀྱིས་དྲག་ཏུ་བརྡབས་པ་ལས། །འོད་འདྲིལ་རིན་ཆེན་འཁོར་ལོ་ཡིས། །ང་རྒྱལ་དེའུ་ཆེན་བརླག་འགྱུར་ནས། །བསོད་ནམས་ལྗོན་ཤིང་མེ་ཏོག་འབར། །དེ་ལྟར་གསལ་བར་གྱུར་པ་ན། །རྣལ་འབྱོར་ཅན་གྱིས་ཚིག་འདི་བརྗོད། །ཨེ་མ་རིན་ཆེན་ཐ་ཚིག་ལས། །བསོད་ནམས་ཡོན་ཏན་འོད་འབར་བ། །དོན་དུ་མི་གཏོང་གཞི་བསྐྱེད་དེ། །རྒྱུ་མཆོག་གདུང་ཆེན་རྒྱུད་མཉམ་ལས། །ཇི་ལྟར་མཁའ་ལ་འཁྲིགས་འཐིབས་ལྟར། །རྒྱུ་ལས་གྱུར་པའི་རང་བཞིན་གྱིས། །མེ་ཏོག་འོད་མཛེས་ཡལ་མ་ཁད། །ཚོར་བའི་ཕུང་པོའི་ཞིང་ཁམས་སུ། །ཆེ་བའི་ཡེ་ཤེས་མཉམ་ འབར་བས། །གཉེན་པོས་འཇོམས་པའི་ཐབས་ཆེན་ལས། །བསྐང་ངོ་བསྐལ་པའི་ཐུགས་དམ་བསྐང་། །གསང་བ ་དོན་གྱི་རྫས་མཆོག་འདིས། །སྐུ་མཆོག་བསྐལ་པའི་ཐུགས་དམ་བསྐང་། །སྐོངས་གྱུར་བསམ་པའི་དོན་དུ་སྦྱང་། །ཨོྃ་སརྦ་ཏ་ཐཱ་ག་ཏ་རཏྣ་ས་མ་ཡ་ཧོ། །དེ་སྐད་ཚིག་ཏུ་བརྗོད་ནས་ཀྱང་། །འཕྲལ་བ་བརྡ་ཡི་ཚུལ་ཕྱག་སྦྱར། །འདོད་ཆགས་རིགས་ཀྱི་དམ་ཚིག་ལས། །རྟོགས་ནས་
སྤྱད་པར་བྱ་རྒྱུ་ལས། །འདོད་ལོག་རྒྱ་མཚོ་མ་ངོམས་ཏེ། །ཐ་ཚིག་དྲག་པོ་ཡལ་འགྱུར་ནས། །ཕོ་བྲང་པདྨའི་ལིངྒའི་དཀྱིལ། །པདྨོ་འབར་བའི་དབུས་གནས་པར། །ཨོྃ་གྱི་རང་བཞིན་འོད་གསལ་འབར། །གསལ་འཕྲོ་འཁྲུག་པར་གྱུར་པ་ན། །ཕཊ་ཀྱིས་དྲག་ཏུ་བརྡབས་པ་ལས། །འོད་འདྲིལ་པདྨོའི་མཚོན་ཆ་ལས། །འདོད་ཆགས་རྒྱ་མཚོ་བསྐམས་གྱུར་ནས། །པདྨ་ཆོས་ཀྱི་ཡེ་ཤེས་འབར། །དེ་ལྟར་གསལ་བར་གྱུར་པ་ན། །རྣལ་འབྱོར་ཅན་གྱིས་ཚིག་འདི་བརྗོད། །ཨེ་མའོ་པདྨོའི་ཐ་ཚིག་ལས། །པདྨའི་ཡེ་ཤེས་འོད་འབར་བས། །དོན་དུ་མི་གཏོང་གཞི་བསྐྱེད་དེ། །གསུང་མཆོག་གདུང་ཆེན་རྒྱུད་མཉམ་ནས། །ཇི་ལྟར་པད་སྟོང་ཚེར་མ་ལྟར། །རྒྱུ་ལས་གྱུར་པའི་རང་བཞིན་གྱིས། །པདྨོའི་ཡེ་ཤེས་ནུབ་མ་ཁད། །འདུ་ཤེས་ཕུང་པོའི་ཞིང་ཁམས་སུ། །རྟོགས་པའི་ཆོས་ཉིད་འོད་འཕྲོས་པས། །གཉེན་པོས་འཇོམས་པའི་ཐབས་ཆེན་ལས། །བསྐང་ངོ་བསྐལ་པའི་ཐུགས་དམ་བསྐང་། །གསང་བ་དོན་གྱི་རྫས་མཆོག་འདིས། །གསུང་མཆོག་བསྐལ་པའི་ཐུགས་དམ་རྣམས། །སྐོངས་གྱུར་བསམ་པའི་དོན་དུ་སྦྱང་། །ཨོྃ་སརྦ་ཏ་ཐཱ་ག་ཏ་དྷརྨ་ས་མ་ཡ་ཧོ། །དེ་སྐད་ཚིག་ཏུ་བརྗོད་ནས་ཀྱང་། །ལྕེ་ཡི་བརྡ་ཡི་ཚུལ་ཕྱག་སྦྱར། །ཕྲག་དོག་རིགས་ཀྱི་དམ་ཚིག་ལས། །རྟོགས་ནས་སྤྱད་པར་བྱ་རྒྱུ་ལས། །ཕྲག་དོག་ལོག་བཟུང་དབང་གིས་ན། །ཐ་ཚིག་དྲག་པོ་ཡལ་འགྱུར་བ། །ཕོ་བྲང་གསང་བའི་ལིངྒའི་དཀྱིལ། །རྡོ་རྗེ་རལ་གྲི་དབུས་གནས་པར། །ཧ་ཡི་རང་བཞིན་འོད་གསལ་འབར། །གསལ་འཕྲོ་འཁྲུག་པར་གྱུར་པ་ན། །ཕཊ་ཀྱིས་དྲག་ཏུ་བརྡབས་པ་ལས། །འོད་འདྲིལ་རྡོ་རྗེའི་རལ་གྲི་ཡིས། །ཕྲག་དོག་མཚོན་ཆ་གསིབས་གྱུར་ནས། །རྡོ་རྗེ་རལ་གྲི་ཡེ་ཤེས་འབར། །དེ་ལྟར་གསལ་བར་གྱུར་བ་ན། །རྣལ་འབྱོར་ཅན་གྱིས་ཚིག་འདི་བརྗོད། །ཨེ་མའོ་ཕྲིན་ལས་ཐ་ཚིག་ལས། །རྡོ་རྗེ་རལ་གྲི་འོད་འབར་བས། །དོན་དུ་མི་གཏོང་གཞི་བསྐྱེད་དེ། །ཕྲིན་ལས་གདུང་ཆེན་རྒྱུད་མཉམ་ལས། །ཇི་ལྟར་ཉི་གསལ་སྤྲིན་བསྒྲིབས་ལྟར། །རྒྱུ་ལས་གྱུར་པའི་རང་བཞིན་གྱིས། །རྡོ་རྗེ་འོད་ཆེན་
ནུབ་མ་ཁད། །འདུ་བྱེད་ཕུང་པོའི་ཞིང་ཁམས་སུ། །ཡེ་ཤེས་མཚོན་ཆའི་འོད་འཕྲོས་པས། །གཉེན་པོས་འཇོམས་པའི་ཐབས་ཆེན་ལས། །བསྐང་ངོ་བསྐལ་པའི་ཐུགས་དམ་བསྐང་། །གསང་བ་དོན་གྱི་རྫས་མཆོག་འདིས། །ཕྲིན་ལས་བསྐལ་པའི་ཐུགས་དམ་རྣམས། །སྐོངས་གྱུར་བསམ་པའི་དོན་དུ་སྦྱང་། །ཨོཾ་སརྦ་ཏ་ཐཱ་ག་ཏ་ཀརྨ་ས་མ་ཡ་ཧོ། །དེ་སྐད་ཚིག་ཏུ་བརྗོད་ནས་ཀྱང་། །ལུས་ཀྱི་བརྡ་ཡི་ཚུལ་ཕྱག་སྦྱར། །དེས་ཀྱང་སྐོང་བའི་ལས་ཆེན་འགྲུབ། །མན་ངག་ཐབས་ཀྱི་དོན་མཆོག་ནི། །རྩ་བ་ཡན་ལག་དེ་རྣམས་ལས། །གང་དག་ཉམས་པར་གྱུར་པ་ལ། །མན་ངག་ཐབས་མཆོག་ལྔ་ཡིས་བསྐང་། །ཉམས་པ་ཆེན་པོར་ལྟུང་འགྱུར་ན། །བླ་མར་གྱུར་པའི་སྐྱེས་བུ་དག །རྒྱལ་པོ་དགུ་ཡི་སྤྱན་ལམ་དུ། །སྒྲུབ་པ་ཆེན་པོ་དགུ་བརྩམ་ཞིང་། །མཆོག་ཆེན་དགུ་ཡི་བརྟུལ་ཞུགས་སྤྱད། །རང་གི་གཟུངས་མ་གང་ཡིན་པ། །བླ་མ་དགུ་ལ་གཟུངས་མར་དབུལ། །དེ་བཞིན་རྩ་བ་ཡན་ལག་དང་། །ཟླ་དང་ཞར་ལས་ཉམས་པ་ལ། །སྒྲུབ་པ་དོན་གྱི་ཁྱད་པར་རྣམས། །བདུན་ནམ་ལྔ་འམ་གསུམ་མམ་གཅིག །རིམ་པ་བཞིན་དུ་སྦྱར་བྱས་ན། །དེས་ནི་སྐོངས་པའི་མཆོག་ཏུ་འགྱུར། །བསྐང་བའི་ཡུལ་ཡང་རྣམ་ལྔ་སྟེ། །བདེར་གཤེགས་རྒྱལ་བ་མཐའ་དག་ཀྱང་། །མདོ་རུ་བསྡུ་ན་རྣམ་ལྔ་སྟེ། །གཏི་མུག་ཞེ་སྡང་ང་རྒྱལ་དང་། །འདོད་ཆགས་ཕྲག་དོག་འདི་ལྔ་དག །རྩ་བར་གྱུར་བའི་དོན་གྱིས་ན། །གཞི་ཡང་ཐམས་ཅད་འདིས་བསྒྱུར་བས། །ཉམས་དང་མ་ཉམས་ཐ་ཚིག་དང་། །ལོངས་སྤྱོད་སྤོང་ལེན་ཐམས་ཅད་རྣམས། །འདི་རྒྱུ་ཡིན་པར་རིག་བྱ་སྟེ། །རྒྱུ་ཉིད་རྒྱུར་བཏགས་དབང་གིས་ན། །བསྒྱུར་བས་དུག་འགྱུར་སྨན་ཆེན་ལྟར། །དེ་ཉིད་ཐ་ཚིག་བཙན་པོར་བསྒྱུར། །འདུལ་བའི་དབང་གི་ཁྱད་པར་གྱིས། །དེ་བཞིན་རྡོ་རྗེ་རིན་ཆེན་དང་། །པདྨོར་ལས་ལྔའི་རིགས་སུ་འདུས། །དེ་དག་ཐུགས་དམ་མཆོག་ཉིད་ཀྱང་། །རྣམ་ལྔར་འདུས་པར་བསྟན་པ་ལ། །རྟོགས་ནས་བསྲུང་བསྒྲུབ་དམ་བཅས་པ། །སོ་སོར་འགལ་ཞིང་
ཆག་ཉམས་ན། །སོ་སོ་ཉིད་དུ་བསབ་པར་བྱ། །སྐུ་ཡི་ཆགས་ཉམས་གནས་སུ་གཞུག །གསུང་གི་འགལ་འཁྲུལ་སོ་རུ་བསབ། །ཐུགས་ཀྱི་འགལ་འཁྲུལ་གསོར་མེད་དེ། །རྡོ་རྗེ་སྙིང་པོའི་ཐ་ཚིག་ལ། །བསྐངས་པས་སྐོངས་པར་གྱུར་པ་ཡི། །རྟགས་ཆེན་དག་ཀྱང་འདི་ལྟ་སྟེ། །རྒྱལ་བ་སངས་རྒྱས་རིག་འཛིན་གྱི། །གདུང་ཆེན་དག་ལས་བྱུང་བ་ཡི། །ཤ་རི་རམ་ཞེས་བྱ་བ་དེ། །ཐམས་ཅད་ལྟས་སུ་སྟོན་པར་བྱེད། །ཤེལ་གྱི་ཟ་མ་ཏོག་ནང་དུ། །དག་པར་བཅུག་སྟེ་བཙས་པ་ལས། །ཉམས་པའི་ཆད་པ་བྱུང་བའི་ཚེ། །ཁ་དོག་གནག་ཅིང་འབྲོས་པར་འགྱུར། །ཉམས་པ་སྐོངས་སམ་སོར་ཆུད་ཅིང་། །གལ་ཏེ་དམ་ཚིག་མ་ཉམས་ན། །ཁ་དོག་དཀར་ཞིང་འཚེར་བར་འགྱུར། །ལེགས་པའི་ཡོན་ཏན་འབྱུང་བའི་ཚེ། །གྲངས་མང་རྒྱ་ཆེར་འཕེལ་བར་འགྱུར། །གལ་ཏེ་གནག་གམ་མི་གསལ་ན། །སྨྱུར་ཏེ་བསྒྲིམས་ནས་བསྐོར་བཟློག་བྱ། །འོན་ཏང་ཉམས་པ་མི་ཕོག་ཅིང་། །དེ་དག་སོ་རུ་གསོ་བ་ན། །རྟགས་ཆེན་འདི་ནི་བསྟེན་བྱ་སྟེ། །འདི་དག་ཤིན་ཏུ་བརྟགས་ནས་ནི། །དཀར་ལ་འཚེར་བར་གྱུར་པ་ན། །རྩ་བ་ཡན་ལག་ཉམས་པ་རྣམས། །སྐོངས་ཏེ་སོར་ཆུད་རྟགས་ཡིན་ནོ། །དེས་ན་རྣལ་འབྱོར་ལས་ཀྱི་གཙོར། །སྦྱོང་དང་སྐོང་བའི་ལས་རྣམས་བྱ། །བཅོམ་ལྡན་འདས་སེམས་དཔའི་རྡོ་རྗེས་དེ་སྐད་ཅེས་གསུངས་པ་དང་། འཁོར་དེར་འདུས་པར་གྱུར་པའི་བདུད་ཀྱི་སྡེ་པ་ལས་ལྷའི་རིགས་སུ་གྱུར་པ་སངས་རྒྱས་ཀྱི་འཁོར་འཕགས་པའི་རིགས་འཛིན་པ་ཉོན་མོངས་པ་ལྔའི་བདག་པོ་ལྷ་ཆེན་པོ་ལྔ་ལ་སོགས་པ་བཀའི་སྣོད་དུ་རུང་བར་བྱིན་གྱིས་བརླབས་ཏེ་འཁོད་པ་ལས། འདོད་ཆགས་ཐམས་ཅད་ཀྱི་གཙོ་བོ་རྡོ་རྗེ་བྲམ་ཟེ་ཐོད་པ་ཅན་ཞེས་བྱ་བ་ལ་སོགས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱི་བཀའ་ལྟར་མ་བགྱིས་ན་མ་དད་མ་གུས་འགལ་འཁྲུལ་དུ་གྱུར་པའི་ཚད་པའི་སྐྱེ་གནས་དང་རྣམ་པར་སྨིན་པ་ཇི་ལྟར་འགྱུར། བདག་ཅག་རྣམས་ལ་རྒྱ་ཆེར་
བཤད་དུ་གསོལ་ཞེས་ཞུས་པ་ལས། བཅོམ་ལྡན་འདས་སེམས་དཔའི་རྡོ་རྗེས་བཀའ་སྩལ་པ། འདོད་ཆགས་ཀྱི་བདག་པོ་ལ་སོགས་པ་རྣམས་དམ་ཚིག་ཉམས་པའི་ཆད་པའི་སྐྱེ་གནས་འདྲི་བ་ལེགས་ཀྱིས་ཡིད་ཚིམ་པར་བྱེད་པ་བཤད་ཀྱིས་ཉོན་ཅིག །རྩ་བ་ཡན་ལག་འདི་དག་ལས། །གལ་ཏེ་ཞིག་གམ་ཉམས་གྱུར་ན། །རྣལ་འབྱོར་ལས་ཀྱི་དང་པོ་ལས། །ལུང་གི་གསང་སྒོར་ཞུགས་པའི་ཚེ། །དོན་དང་ལྡན་པའི་བླ་མ་ཡིས། །རྡོ་རྗེ་ཐ་ཚིག་བྱིན་བརླབས་ནས། །ལྕེ་ལ་དམ་ཚིག་ཆུ་བཞག་པ། །དམྱལ་བ་རྡོ་རྗེར་དམོད་བཙུགས་ནས། །ཡི་གེ་ཧཱུྃ་དུ་བྱས་པ་དེ། །སྙིང་གི་དཀྱིལ་དུ་ཐིམ་ནས་ཀྱང་། །ལྕགས་ཀྱི་སྡིག་པ་མགོ་དགུ་པའི། །ཁྲོ་བོ་རཀྵ་ཞེས་བྱ་བའི། །ཁྲག་འཐུང་ཆེན་པོར་གྱུར་ནས་ནི། །སྙིང་ཁྲག་བཞིབས་ཏེ་འཐུངས་ནས་ནི། །སྡུག་བསྔལ་ཆེན་པོར་བསད་ནས་ཀྱང་། །དམྱལ་བ་རྡོ་རྗེར་དེ་ལྟུང་འགྱུར། །གལ་ཏེ་ཐ་ཚིག་མ་ཉམས་ན། །ལྕེ་ལ་བཞག་པ་ཨརྒྷ་སྟེ། །སྙིང་གི་དཀྱིལ་དུ་ཐིམ་ནས་ཀྱང་། །ཡེ་ཤེས་སེམས་དཔའ་ཚོན་གང་བར། །གྱུར་ཏེ་སྒྲིབ་པ་ཀུན་སྦྱངས་ནས། །སངས་རྒྱས་སྲས་སུ་སྐྱེད་པར་བྱེད། །འདོད་ཆགས་དམ་ཚིག་ཉམས་གྱུར་ན། །མངལ་གྱི་གྲོང་ཁྱེར་ཆེན་པོར་འགྲོ། །ཞེ་སྡང་དམ་ཚིག་ཉམས་གྱུར་ན། །རཀྵ་སྲིན་པོའི་རིགས་སུ་འགྲོ། །གཏི་མུག་དམ་ཚིག་ཉམས་གྱུར་ན། །མི་གཙང་ཟས་སུ་ཟ་བ་ཡི། །རྨོངས་པའི་ཕག་ཆེན་ལུས་སུ་ལྟུང་། །ང་རྒྱལ་དམ་ཚིག་ཉམས་གྱུར་ན། །རུས་སྦལ་ནག་པོའི་ལུས་སུ་ལྟུང་། །ཕྲག་དོག་དམ་ཚིག་ཉམས་གྱུར་ན། །ཆུ་སྲིན་མགོ་དགུའི་ལུས་སུ་ལྟུང་། །དམ་ཚིག་ཆེན་པོ་ཀུན་ཉམས་ན། །རུ་དྲ་ནག་པོའི་ལུས་སུ་ལྟུང་། །ལས་ཀྱི་རྐྱེན་དང་མ་ཕྲད་ན། །ཐར་པའི་སྐབས་ནི་མི་སྲིད་དོ། །སེམས་དཔའི་རྡོ་རྗེས་དེ་སྐད་ཅེས་གསུངས་སོ། །ཉོན་མོངས་པ་ལྔའི་བདག་པོ་རིག་འཛིན་རྣམས་ཀྱིས་ཤིན་ཏུ་ཆོ་ངེ་ཆེན་པོ་འབྱིན་ཅིང་དུས་དེར་ཨེ་མའོ་བཅོམ་ལྡན་འདས་བཅོམ་ལྡན་འདས་ཀྱིས་གསུངས་པ་ལྟར་ན་བདག་ལ་ལྟུང་རྒྱུ་མཆིས་ཏེ། །དང་
པོ་བཅོམ་ལྡན་འདས་ཀྱི་བཀའ་ལ་བཏགས་པའི་ཚེ། བཀའ་ལ་མ་དད་མ་གུས་པས་བཀའ་ལ་སྐུར་ཅིང་སྤྱས་ལོང་བཏགས་པ་དང་། སྟོན་པ་དང་གྲོགས་ལ་སྨད་ཅིང་སྤྱས་ལོང་བཏགས་པ་ལ་སོགས་པ་ལྟུང་བའི་རྒྱུ་མང་པོ་བགྱིས་པས། ང་ནི་བདག་ཀྱང་ཆད་པའི་སྐྱེས་གནས་སུ་མཆི་བར་ངེས་ན། །བཅོམ་ལྡན་འདས་ཀྱི་ཐུགས་རྗེ་ཆེན་པོས་བཟུང་སྟེ་བཀའི་འཁོར་དུ་བཀོད་པས་ང་ནི་ཐར་པ་ཐོབ་ལགས་གྲང་། འོན་ཀྱང་འགྱོད་པ་དྲག་པོའི་དབང་གིས་ཡིད་ཀྱི་སྒྲིབ་པ་ནི་བྱང་ཆུབ་སེམས་ཀྱིས་བཤགས། ངག་གི་སྒྲིབ་པ་ནི་ཚིག་ཏུ་འདོན་ཅིང་སྨྲེས་ཏེ་བཤགས། ལུས་ཀྱི་སྒྲིབ་པ་ནི་ལུས་གདན་ཁྲི་ལ་ཕུལ་ཏེ་བཤགས་ན། བཅོམ་ལྡན་འདས་ཀྱི་ཐུགས་རྗེས་གཟུང་འཚལ་ན་གཉེན་པོ་ནི་གང་ལགས། ཐབས་ནི་ཇི་ལྟར་བཤགས། ཡུལ་ནི་གང་ལ་བཤགས། རྒྱུ་ནི་གང་མཆིས་བཅོམ་ལྡན་འདས་ཀྱིས་བཤད་དུ་གསོལ། བདེ་བར་གཤེགས་པ་ཐུགས་རྗེས་བསྐྱབ་ཏུ་གསོལ། བཅོམ་ལྡན་འདས་ཀྱིས་བཀའ་སྩལ་པ། །རིག་འཛིན་ཆེན་པོ་མི་ཐོད་ཅན་རྣམས་ཉོན་ཅིག །ལྟུང་བར་གྱུར་པའི་གནས་རྣམས་ལ་འགྱོད་པར་གྱུར་ནས་ཞུས་པ་ལེགས་སོ། །ལྟུང་བའི་གཉེན་པོ་ནི་གང་ཞེ་ན། ཉེས་བྱས་རྣམས་བཤགས་པར་འདོད་ན་གང་འགྱོད་པ་དྲག་པོ་སྐྱེས་ནས་བ་སྤུ་ནི་གཟིངས་མཆི་མ་འབྱིན་པ་ཡིན་ནོ། །ཐབས་ནི་རྣམ་པ་བཞི་ཡོད་དེ། །གང་ཞེ་ན། ཤེས་རབ་ཆེན་པོའི་རྒྱུད་ཀྱིས་བག་ཆགས་ཐམས་ཅད་རང་བཞིན་མེད་པར་ཤེས་པ་དང་། །ཏིང་ངེ་འཛིན་ཆེན་པོའི་མེས་བག་ཆགས་ཐམས་ཅད་བསྲེགས་ཏེ་མེད་པར་བྱ་བ་དང་། བྱང་ཆུབ་སེམས་ཀྱི་འོད་ཟེར་གྱིས་བག་ཆགས་ཀྱི་མུན་ནག་ཐམས་ཅད་བསལ་ཏེ་དེ་དག་དག་པར་བྱ་བ་དང་། སྤྱོད་པ་རླབས་པོ་ཆེའི་ཆུས་བཀྲུ་བའོ། །དེ་ལ་བཤགས་པར་བྱ་བའི་ཡུལ་ནི་འདི་ལྟ་སྟེ། །སངས་རྒྱས་དང་། རིག་འཛིན་དང་། ལྷ་དང་། བླ་མ་དང་། གླེགས་བམ་དང་། གྲོགས་པོ་དང་། རྟེན་དུ་གྱུར་པ་རྣམས་སོ། །བཤགས་པར་བྱ་བའི་རྒྱུ་ནི་འདི་ལྟ་སྟེ། སྒྲིབ་པ་ཆེ་ཆུང་བཤགས་པའོ། །ཉོན་
མོངས་པ་རགས་པ་མངོན་དུ་རྒྱུ་བ་བཤགས་པ་དང་། བག་ལ་ཉལ་དང་ཤེས་བྱའི་སྒྲིབ་པ་བཤགས་པའོ། །དེའི་ཕྱིར་ལྟུང་བར་གྱུར་པའི་ལས་རྣམས་འགྱོད་པ་དྲག་པོས་བསྟེན་ལ་ཐབས་ལ་མཁས་པས་དཔྱད་དེ། །སྒྲིབ་པ་ཆེ་ཆུང་ཆ་ཤས་ཀྱིས་ཕྱེ་ལ་གུས་པར་བཤགས་པ་གྱིས་ཤིག །དེ་སྐད་ཅེས་བཀའ་སྩལ་པ་དང་། རིག་འཛིན་ཆེན་པོ་མིའི་ཐོད་པ་ཅན་རྣམས་མགུ་ཞིང་རངས་ཏེ་རྣལ་འབྱོར་སྦྱོར་བའི་ཕྱག་བྱས་ནས། །འགྱོད་ཅིང་གདུང་བའི་གླུ་འདི་བླངས་སོ། །ཨོྃ་ཡེ་ཤེས་སྐུ་མཆོག་རང་བཞིན་དཀྱིལ་འཁོར་ནི། །ཟླ་རྒྱས་བཞིན་དུ་སྤྲོས་པ་མི་མངའ་ཡང་། །ཐུགས་རྗེ་ཉི་གསལ་འོད་བཞིན་སྙོམས་མཛད་ལྷ། །བདེར་གཤེགས་བཞུགས་ཤིང་བདག་ལ་དགོངས་སུ་གསོལ། །བརྗོད་མེད་ཤེས་རབ་མི་གཡོ་ཆོས་མཆོག་དབྱིངས། །བདེ་ཆེན་ལོངས་སྤྱོད་རྫོགས་སྐུ་རིགས་ལྔའི་གཙོ། །ཐུགས་རྗེ་ཐབས་མཁས་རྒྱ་ཆེ་རོལ་པ་ཡི། །ཆོ་འཕྲུལ་སྤྲུལ་པའི་ཚོགས་ལ་ཕྱག་འཚལ་ལོ། །དངོས་སུ་འབྱོར་དང་ཡིད་ཀྱིས་སྤྲུལ་པ་ཡི། །ཀུན་དུ་བཟང་པོའི་བླ་མེད་མཆོད་སྤྲིན་གྱིས། །མཁའ་དབྱིངས་རྣམ་དག་རྒྱ་ཆེན་ཡོངས་བཀང་ནས། །ཕྱི་ནང་གསང་བའི་མཆོད་པ་རྒྱ་ཆེར་མཆོད། །ཀུན་དུ་བཟང་མོ་ཡུམ་གྱི་བྷ་ག་ལ། །འདུ་འབྲལ་མེད་པའི་ངང་དུ་རོ་གཅིག་པའི། །གཉིས་མེད་བྱང་ཆུབ་སེམས་ཀྱིས་མཉེས་གྱུར་ཅིག །སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། །ཆོས་ཉིད་རྣམ་དག་རྒྱ་ཆེ་འོད་གསལ་བས། །རྣལ་འབྱོར་ཉིད་དབྱིངས་སྨྲ་བསམ་ལས་འདས་པས། །མཉམ་ཉིད་བྱང་ཆུབ་སེམས་ལ་རྟག་ཏུ་འདུད། །ཀུན་བཟང་རྫོགས་ཆེན་ཡེ་ནས་བདལ་བ་ལ། །ཕྱི་ནང་གསང་བའི་དཀྱིལ་འཁོར་བཀོད་པ་ནི། །སྣང་སྲིད་རྣམ་དག་ཀུན་བཟང་ཡུམ་གྱི་དབྱིངས། །འབྱུང་དང་འབྱུང་འགྱུར་ཡབ་ཡུམ་ལྷུན་རྫོགས་རྣམས། །གསང་ཆེན་རབ་རྫོགས་གཟུངས་ཆེན་བདག་ཉིད་མ། །གཉིས་མེད་ཐིག་ལེ་ཆེན་པོར་འོད་གསལ་བ། །ཅིར་ཡང་སྣང་བས་བདེ་ཆེན་གཡུང་དྲུང་ལྷ། །འདུ་འབྲལ་མེད་པ་
གསང་བའི་དཀྱིལ་འཁོར་ནི། །བདག་ཉིད་ཆེན་པོ་བཅོམ་ལྡན་ཡབ་ཡུམ་དང་། །བྱང་ཆུབ་ལྕམ་དྲལ་ཁྲོ་བོ་ཁྲོ་མོའི་ཚོགས། །རྡོ་རྗེ་ལྷ་མོ་ཚོགས་རྗེ་ཚོགས་ཀྱི་བདག །མ་ལྟར་བྱམས་ཤིང་སྲིང་ལྟར་གདུང་ལ་སོགས། །ཉེས་ལེགས་ལྟང་འཛིན་དམ་ཚིག་རྗེས་གཅོད་མ། །དཔང་གྱུར་རྡོ་རྗེ་དམ་ཅན་དགོངས་སུ་གསོལ། །ཐུགས་རྗེས་གདུང་འཚོབ་རྡོ་རྗེ་ཐོད་པ་ཅན། །བདག་ཅག་དྲེགས་པའི་བདག་པོ་འདིར་ཚོགས་ཀུན། །འགྲོ་བའི་དོན་ཕྱིར་བྱང་ཆུབ་སེམས་བསྐྱེད་དེ། །བླ་མེད་གོ་འཕང་འཐོབ་པར་བྱ་བའི་ཕྱིར། །བསྟན་པ་རྒྱ་མཚོ་སོ་སོའི་འདུལ་ཁྲིམས་དང་། །སྐུ་གསུང་ཐུགས་དང་མཉམ་སྦྱོར་སྡོམ་པའི་མཆོག །འདའ་དཀའ་རྡོ་རྗེ་དམ་ཚིག་གཏན་གྱི་གཉེར། །སྤྱི་དང་ལྷག་པའི་ཁྱད་པར་དམ་ཚིག་རྣམས། །སྔ་ཕྱི་མནོས་ཤིང་གཉེར་དུ་རྨའོ་འཚལ། །དོན་ལས་གོལ་ཞིང་ལྡོག་སེམས་མ་མཆིས་ཀྱང་། །གདོད་བྱ་ལོང་ཡོད་སྙམ་པའི་ལེ་ལོ་དང་། །ཀློང་དུ་གྱུར་པའི་རྩལ་ཤུགས་ཆུང་བ་ཡིས། །ཤེས་བཞིན་མ་ལྡན་དམ་ཚིག་འགལ་འགྱུར་ཏེ། །དང་པོའི་ཐ་ཚིག་བཀའ་ལ་བཏགས་པའི་ཚེ། །བཀའ་ལ་མ་གུས་འགལ་བགྱིས་དཔྱས་ལོང་བཏོགས། །བར་དུ་བསླབ་པའི་གཉེར་ཆེན་ཕོག་པའི་ཚེ། །བསླབ་ལ་མི་བརྩོན་དོན་ལ་གཡེལ་བ་དང་། །ཐ་མ་འདི་ཚེ་འབྲས་བུ་སྒྲུབ་པ་ན། །བཀའ་དང་གཞུང་བཞིན་མ་ལྕོགས་དོན་ལས་འགལ། །ཚོར་དང་མ་ཚོར་སྒྲིབ་པ་ཆེ་ཆུང་རྣམས། །ཤིན་ཏུ་མི་ཤེས་མ་རིག་དབང་གིས་ན། །སྟོན་པའི་བཀའ་དང་དམ་ལས་འགལ་བགྱིས་པ། །དཔའ་བོ་ཐུགས་རྗེས་བདག་ལ་བཟོད་པར་གསོལ། །འཁོར་བ་ཐོག་མ་མེད་པའི་དུས་མཐའ་ནས། །ལས་ཀྱི་དབང་གིས་བདག་ཅག་རིང་དུ་འཁྱམས། །ཉོན་མོངས་ལོག་པར་ལྟ་བའི་དུག་འཐུངས་ཏེ། །སྡུག་བསྔལ་ནད་ཀྱིས་ཤིན་ཏུ་གདུངས་པ་ལ། །བདེ་གཤེགས་ཐུགས་རྗེ་སྨན་པའི་རྒྱལ་པོ་ཡིས། །དམ་ཚིག་བདུད་རྩི་ཐར་པའི་སྨན་སྩལ་བས། །ཉོན་མོངས་འཁྲུལ་པའི་ནད་རྣམས་ཞི་མཛད་ཅིང་། །བླ་མེད་བྱང་ཆུབ་སྙིང་པོར་འཚོ་མཛད་པ། །བྱམས་མགོན་ཐུགས་
རྗེའི་བདག་ལ་སྐྱབས་སུ་མཆི། །ཞེས་དུས་ནས། ཨ་ལ་ལ་ཧོ་ཞེས་བརྗོད་དེ་གཉེན་པོ་དྲག་པོར་བསྟེན་ནས་ལུས་གདན་ཁྲིར་ཕུལ་ཏེ། བྱང་ཆུབ་སེམས་ཀྱིས་རྣམ་པར་འདུད་པའི་དོན་ལ་རྣམ་པར་སྦྱངས་པས་ལུས་གཅེར་བུ་ཟང་མར་ཕྱུང་། །གནོང་བ་དྲག་པོའི་འགྱོད་པ་བྱས་པས་བདེ་བར་གཤེགས་པ་རྣམས་མཉེས་པར་གྱུར་ཏོ། །དེས་སྒྲིབ་པ་བྱང་ཞིང་བསོད་ནམས་ཀྱི་ཚོགས་རྫོགས་པའི་རྟགས་ལུས་གོས་དང་ཕྲལ་ནས་ལྡན་པའི་ཐོད་པ་ཡང་ཟླ་བ་ཚེས་བརྒྱད་པར་གྱུར་ཏོ། །ས་ཐོབ་པའི་རྟགས་སུ་དེ་བཞིན་གཤེགས་པའི་ཞབས་རྟེན་དུ་གནས་པར་གྱུར་ཏོ། །དེ་ནས་སེམས་དཔའི་རྡོ་རྗེ་དེ་དགྱེས་ཏེ་བཀའ་སྩལ་པ། མིའི་ཐོད་པ་ཅན་རྣམས་འགྱོད་པའི་ལས་ཀྱིས་བཤགས་པ་ལེགས་ཏེ། ཉོན་མོངས་པའི་སྒྲིབ་པ་རྣམ་པར་དག་པར་གྱུར་ཏོ། །ད་ནི་ཤེས་བྱའི་སྒྲིབ་པ་དག་ཅིང་ཡེ་ཤེས་ཀྱི་ཚོགས་རྫོགས་པར་བྱ་བའི་ཕྱིར་ཉན་པའི་དབང་པོས་སངས་རྒྱས་ཀྱིས་གསུང་ལ་གསང་སྔགས་ཀྱི་སྒྲ་རྣམས་ཉོན་ཅིག །དེས་ནི་ས་ནས་སར་འཕར་ཞིང་འབྲས་བུ་ཡོངས་སུ་རྫོགས་པར་འགྱུར་རོ། །དེ་སྐད་ཅེས་གསུངས་པས་འཁོར་བསམ་པ་རངས་པར་གྱུར་ཏོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྐོང་བ་ལས་ཀྱི་བསྒྲུབ་ལུགས་ཀྱི་ལེའུ་སྟེ་བརྒྱད་པའོ།། །།དེ་ནས་བཅོམ་ལྡན་འདས་གསང་བ་མཆོག་ཉིད་ཏིང་ངེ་འཛིན་རྒྱས་ཤིང་རྣམ་པར་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སེམས་དཔའ་རྡོ་རྗེའི་སྙིང་པོ་ཡང་ཏིང་ངེ་འཛིན་རྣམ་པར་འཕྲུལ་པ་ཞེས་བྱ་བ་ལ་སྙོམས་པར་ཞུགས་སོ། །འདུས་པའི་འཁོར་རྣམས་ཀྱང་སྣ་ཚོགས་འཕྲུལ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ཅི་ཡང་མེད་པར་མཐོང་ངོ་། །ཆོས་ཐམས་ཅད་ཅི་ཡང་མེད་པར་གསལ་བར་གྱུར་པ་དང་། ཆོས་ཉིད་སྟོང་པའི་ནམ་མཁའ་ལས་བྲག་ཅའི་ཚུལ་དུ་སྒྲ་འདི་བྱུང་ངོ་། །མི་གནས་མི་རྟོག་བསམ་དང་བྲལ། །མ་ཆགས་ཆགས་བྲལ་ཡུལ་
ལས་འདས། །ཅི་ཡང་མི་འབྱུང་ཅིར་མ་ཡིན། །རང་བྱུང་རང་ཞི་བརྗོད་དང་བྲལ། །ཞེས་སྒྲ་བྱུང་བས་སྟོན་པ་ནི་དོན་གྱི་ཆེ་བ་ཕྱུང་། འཁོར་རྣམས་ནི་རྩལ་སྦྱངས། །ཐམས་ཅད་དོན་ལ་ངམ་ཞིང་ཆོས་ཉིད་ཀྱི་ནམ་མཁའ་མཐོང་ངོ་། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཉིད་སྙིང་རྗེ་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་སོ། །དེ་ནས་ཆོས་ཉིད་ཀྱི་ནམ་མཁའ་ལ་སྙིང་རྗེ་བྱང་ཆུབ་སེམས་ཀྱི་གཟུགས་བརྙན་ཉི་མའི་དཀྱིལ་འཁོར་ཞིག་ཤར་བར་གྱུར་ཏོ། །དེ་ནས་འདུས་པ་ཕལ་མོ་ཆེའི་འཁོར་རྣམས་ཡང་དག་པར་རྟོག་པ་འདི་ལྟར་སྐྱེས་ཏེ། ཨེ་མ་ཆོས་ཐམས་ཅད་ཀྱི་རང་བཞིན་འདི་ལྟར་ཡིན་པ་ལས་འདི་ལྟར་མ་ཤེས་པའི་འགྲོ་བ་རྣམས་འཁོར་བའི་རྒྱ་མཚོར་བྱིང་བ་འདི་ཡང་སྙིང་རྗེ་ཞེས་སྙིང་རྗེ་བྱང་ཆུབ་ཀྱི་སེམས་སྐྱེས་པར་གྱུར་ཏོ། །དེ་ནས་ཉི་མའི་སྙིང་པོའི་འོད་ཟེར་ལས་ཆོ་འཕྲུལ་གྱི་སྒྲ་ཕྱུང་ངོ་། །ཡོངས་ལ་ཁྱབ་པའི་ཉི་མའི་འོད། །སྙིང་རྗེ་བྱང་ཆུབ་སེམས་ཡིན་ཏེ། །རྣམ་རྟོག་མུན་པ་སེལ་བར་སྣང་། །ཡིད་བཞིན་རིན་ཆེན་ འབར་བའོ། །ཞེས་སྒྲ་བྱུང་བ ་ལས་ཆོས་ཐམས་ཅད་བྱང་ཆུབ་སེམས་ཀྱི་འོད་ཟེར་དུ་གསལ་བར་གྱུར་ཏོ། །དེ་ནས་ཡང་བཅོམ་ལྡན་འདས་གསང་བའི་མཆོག་གི་བདག་པོ་དེ་ཉིད་ཆོ་འཕྲུལ་འབྱུང་བའི་རྒྱུ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པ་ཕལ་མོ་ཆེའི་འཁོར་རྣམས་ཀྱིས་ཉི་མའི་སྙིང་པོ་ལས་ཆོས་ཐམས་ཅད་ཀྱི་རྒྱུ་ཡི་གེ་ཨ་དཀར་པོ་ཤར་བར་མཐོང་ངོ་། །དེ་ནས་ཨ་ལས་ཆོ་འཕྲུལ་སྒྲ་བྱུང་ངོ་། །ཨ་ནི་ཆགས་མེད་ཡི་གེའི་མཛོད། །ཆོ་འཕྲུལ་རྟོག་པ་ཀུན་གྱི་རྒྱུ། །ཉོན་མོངས་སྐྱོན་བྲལ་ཟླ་བའི་མདོག །ཆོ་འཕྲུལ་སྣ་ཚོགས་འབྱུང་བའི་རྒྱུ། །ཞེས་སྒྲ་བྱུང་བས་འདུས་པའི་ཚོགས་རྣམས་ཀྱིས་ཆོས་ཐམས་ཅད་ཆོ་འཕྲུལ་གྱི་རང་བཞིན་དུ་གནས་པར་མཐོང་ངོ་། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དེ་ཅི་ཡང་མི་མཛད་པ་ཆོ་འཕྲུལ་སྣ་ཚོགས་ཀྱི་རང་བཞིན་དུ་སྣང་བར་གྱུར་ཏོ། །དེ་ནས་ཡུམ་ཆེན་མོ་ནམ་
མཁའི་དབྱིངས་ཕྱུག་མ་ཞེས་བྱ་བ་དེ་ཆོས་ཐམས་ཅད་ནམ་མཁའི་བྷ་གར་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཞུགས་པར་གྱུར་པ་དང་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ནམ་མཁའ་ཁྱབ་པའི་རང་བཞིན་དུ་མཐོང་ངོ་། །དེ་ནས་ཡུམ་གྱི་བྷ་གའི་སྙིང་པོ་ལས་འོད་ཟེར་མཐིང་ག་འཕྲོས་ནས་ཉི་མའི་སྙིང་པོའི་ཨ་ལ་བསྐུལ་བས་ཡི་གེ་ཨེ་མཐིང་ག་འཕྲོས་ཏེ་ལྡིང་ཞིང་གནས་པ་ལས་ཆོ་འཕྲུལ་གྱི་རང་སྒྲ་འདི་བྱུང་ངོ་། །ཨ་ནི་ཨེ་ཡི་རང་བཞིན་ཏེ། །ཨ་ལས་ཨེ་བྱུང་མཁའ་ཁྱབ་བདལ། །མི་འགྱུར་ཐོགས་མེད་བསམ་ལས་འདས། །མཐའ་དང་དབུས་མེད་ཀུན་དུ་བདལ། །ཞེས་སྒྲ་བྱུང་བས། ཐམས་ཅད་ནམ་མཁའི་རང་བཞིན་དུ་ཕྱམ་ཆད་པར་གྱུར་ཏོ། །དེ་ནས་ཡང་ཡུམ་ཆེན་མོ་ལས་ཀྱི་དབྱིངས་ཕྱུག་མས་ཡང་ཞིང་གཡོ་བ་རླུང་གི་དཀྱིལ་འཁོར་ཞེས་བྱ་བ་ལ་སྙོམས་པར་ཞུགས་སོ། །དེས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་རླུང་གི་རང་བཞིན་དུ་གནས་པར་མཐོང་ངོ་། །དེ་ནས་རླུང་དེ་ལས་ཆོ་འཕྲུལ་གྱི་སྒྲ་བྱུང་ངོ་། །ཨ་ཡི་བྱིན་བརླབས་ཡེ་ཤེས་ལས། །རླུང་གི་ཆོ་འཕྲུལ་ཡྃ་དུ་ཤར། །ཐམས་ཅད་འདེགས་པའི་སྟོབས་ལྡན་ཞིང་། །རང་བཞིན་གཡོ་ཞིང་ཐོགས་མེད་འཕྱོ། །ཞེས་སྒྲ་བྱུང་བས་རླུང་གི་དཀྱིལ་འཁོར་དུ་འཁྱིལ་པར་གྱུར་ཏོ། །དེ་ནས་ཡུམ་ཆོས་ཀྱི་དབྱིངས་ཕྱུག་མ་ཞེས་བྱ་ བ་དེས་འབར ་འཕྲོ་མེའི་ཏིང་ངེ་འཛིན་ལ་སྙོམས་པར་ཞུགས་སོ། །འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་མེའི་རང་བཞིན་དུ་གནས་པར་མཐོང་ངོ་། །དེ་ནས་མེའི་འོད་ཟེར་ལ་ཆོ་འཕྲུལ་གྱི་སྒྲ་བྱུང་བ། ཨ་ཡི་བྱིན་བརླབས་ཡེ་ཤེས་ལས། །ཆོ་འཕྲུལ་མེ་ཡི་སྙིང་པོར་ཤར། །འབར་བས་གསལ་བྱེད་ཡེ་ཤེས་འཕྲོ། །དངོས་པོ་ཀུན་ཟད་མེ་ཀློང་འཚུབ། །ཅེས་སྒྲ་བྱུང་བས་མེའི་བསྐལ་པ་འབྱམ་ཀླས་སོ། །དེ་ནས་ཡང་ཡུམ་རིན་ཆེན་དབྱིངས་ཕྱུག་མ་ཞེས་བྱ་བ་དེས་སྡུད་པ་རྒྱ་མཚོའི་ཏིང་ངེ་འཛིན་ལ་སྙོམས་པར་ཞུགས་སོ། །དེས་འདུས་པ་ཕལ་མོ་ཆེའི་འཁོར་གྱི་ཆོས་ཐམས་ཅད་ཆུའི་རང་
བཞིན་དུ་གནས་པར་མཐོང་ངོ་། །དེ་ནས་རླབས་ཀྱི་འོད་ཟེར་ལས་ཆོ་འཕྲུལ་གྱི་སྒྲ་འདི་བྱུང་ངོ་། །རྒྱུ་ཡི་ཡི་གེ་འོད་ཟེར་ལས། །ཆུ་ཡི་སྙིང་པོའི་ཆོ་འཕྲུལ་ཤར། །ནམ་མཁའི་མཐའ་དང་མཉམ་པའོ། །རླུང་མཚོ་ཐམས་ཅད་རྒྱས་པར་གྱུར། །ཞེས་སྒྲ་བྱུང་བས་ཐམས་ཅད་ཡུམ་རིན་ཆེན་དབྱིངས་ཕྱུག་མའི་རང་བཞིན་གྱིས་ཁྱབ་པར་གནས་སོ། །དེ་ནས་ཡུམ་ཆེན་མོ་རྡོ་རྗེ་དབྱིངས་ཕྱུག་མ་ཞེས་བྱ་བས་ཞིང་ཁམས་ཐམས་ཅད་བྱིན་གྱིས་རློབ་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་ས་རྣམས་ཡོངས་སུ་རྫོགས་པའི་རང་བཞིན་དུ་མཐོང་ངོ་། །དེ་ནས་ས་རྡོ་རྗེ་ འབར་བ ་ཞེས་བྱ་བ་ལས་ཆོ་འཕྲུལ་གྱི་སྒྲ་བྱུང་བ། མི་དམིགས་པ་ལས་སྣ་ཚོགས་པར། །སྣང་བའི་ཆོ་འཕྲུལ་འདི་བྱུང་བ། །རྣལ་འབྱོར་ས་བཅུ་རྫོགས་པའི་དོན། །ལྷུན་གྱིས་གྲུབ་པས་བདེ་བ་ཆེ། །ཞེས་སྒྲ་བྱུང་བས་ས་དགུ་འདུལ་བའི་བྱེ་བྲག་ཏུ་ཐུགས་སུ་ཆུད་པར་གྱུར་ཏོ། །དེ་ནས་སེམས་དཔའི་རྡོ་རྗེ་སྙིང་པོ་དེ་རི་བོ་བརྩེགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེས་འདུས་པ་ཕལ་མོ་ཆེའི་འཁོར་གྱིས་ཆོས་ཐམས་ཅད་རྡོ་རྗེ་འབར་བའི་རི་བོར་མཐོང་ངོ་། །དེ་ནས་དེའི་འོད་ལས་ཆོ་འཕྲུལ་གྱི་སྒྲ་འདི་བྱུང་ངོ་། །རྣམ་དག་ཤེས་རབ་མཁའ་ཀློང་ནས། །རྡོ་རྗེ་འབར་བའི་རི་བོ་ཤར། །རྒྱ་ཆེ་གཏིང་ཟབ་ནམ་འཕང་གཅོད། །རྟོག་པའི་རི་བོ་འཇོམས་པར་བྱེད། །ཅེས་སྒྲ་བྱུང་བས་རྡོ་རྗེ་འབར་བའི་རི་བོས་ཉོན་མོངས་པའི་རི་བོ་ཐམས་ཅད་ཟིལ་གྱིས་མནན་ནོ། །དེ་ནས་དབྱིངས་ཕྱུག་མ་ཆེན་མོ་ལྔ། ཤེས་རབ་ཟབ་མོའི་གཞལ་ཡས་ཡུམ་གྱི་མཁའ་ཀློང་རྣམ་དག་ཅེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །བྷ་གའི་སྙིང་པོ་ལས་ཆོ་འཕྲུལ་གྱི་སྒྲ་འདི་བྱུང་ངོ་། །བྷ་ག་གསང་བའི་འོད་ཟེར་ལས། །བདེ་གཤེགས་བཞུགས་པའི་གཞལ་ཡས་ཁང་། །ནམ་མཁའི་མཐའ་ལྟར་དཔག་ཏུ་མེད། །དུས་གསུམ་རྒྱལ་བ་རྒྱ་མཚོའི་དབྱིངས། །ཞེས་སྒྲ་བྱུང་ངོ་། །
བྱུང་བས་ནམ་མཁའ་ཐམས་ཅད་ཕོ་བྲང་གི་གཞལ་ཡས་འབྱམ་ཀླས་པར་གྱུར་ཏོ། །དེ་ནས་བཅོམ་ལྡན་འདས་གསང་བ་མཆོག་དེ་ཉིད་ཆོས་ཐམས་ཅད་སྐུ་ལ་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ནམ་ཕྱག་རྒྱ་ཐམས་ཅད་རྣམ་པར་སྤྲོ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པ་ཕལ་མོ་ཆེའི་འཁོར་རྣམས་ཀྱིས་འཁོར་བ་དང་མྱ་ངན་འདས་པའི་ཆོས་ཐམས་ཅད་བཅོམ་ལྡན་འདས་གསང་བ་མཆོག་གི་བདག་པོའི་ཞབས་ཀྱི་གདན་ཁྲི་ཡན་ཆད་ནས་དབུའི་གཙུག་ཏོར་མན་ཆད་དུ་རྫོགས་པར་མཐོང་ངོ་། །དེ་ནས་ཡང་འཁོར་བ་འདོད་པ་ཁམས་ནི་ཆགས་པ་ཁྲག་གི་རྒྱ་མཚོར་རྫོགས། འཁོར་བ་གཟུགས་ཀྱི་ཁམས་ནི་ཞིང་ཆེན་གྱི་ས་གཞི་བདལ་བ་ལ་རྫོགས་པར་མཐོང་ངོ་། །ཀེང་རུས་ལ་གཟུགས་མེད་པའི་ཁམས་རྫོགས་པར་མཐོང་ངོ་། །རི་རབ་ཀྱི་ཁ་མུ་ཏིག་གི་གཅལ་དང་། །ཨ་སྨ་གར་བའི་འབར་བའི་འོད་འཁྲིགས་པའི་ནོར་བུ་རིན་པོ་ཆེ་འབར་བའི་བྲག་གཏམས་པ་ལ། ཉན་ཐོས་དང་། རང་སངས་རྒྱས་དང་། བྱང་ཆུབ་སེམས་དཔའ་རྣམས་རྫོགས་པར་མཐོང་ངོ་། །ནོར་བུ་རིན་པོ་ཆེའི་སྟེང་ན་རྡོ་རྗེ་རྩེ་གསུམ་དང་རྩེ་ལྔའི་བྲག་གཏམས་པ་ལ་ཀྲི་ཡ་དང་ཨུ་པ་ཡ་དང་ཡོ་ག་རྣམས་རྫོགས་པར་མཐོང་ངོ་། །རྡོ་རྗེ་བྲག་ཆེན་གྱི་སྟེང་ན་པདྨ་དཀར་པོའི་མཎྜལ་ལ་བསྐྱེད་པའི་རྣལ་འབྱོར་པ་ཐམས་ཅད་རྫོགས་པར་མཐོང་ངོ་། །པདྨའི་སྟེང་ན་ཉི་མ་ཉི་ཤུ་རྩ་བཞི་དང་། ཟླ་བ་ཉི་ཤུ་རྩ་བཞི་ཁ་སྦྱོར་དུ་བཀོད་པ་ལ་དབང་ཕྱུག་ཕོ་ཉི་ཤུ་རྩ་བཞི་དང་། མོ་ཉི་ཤུ་རྩ་བཞི་རྫོགས་པར་མཐོང་ངོ་། །དབང་ཕྱུག་ཕོ་མོའི་སྟེང་བྱོལ་སོང་གི་གཙོ་བོ་བརྒྱད་ནི་རིག་འཛིན་ཆེན་པོའི་རྣལ་འབྱོར་ཉོན་མོངས་པ་སྦྱངས་ནས་ཤེས་བྱའི་སྒྲིབ་པ་སྦྱང་བའི་ཕྱིར་དཔའ་བརྟུན་སྟག་དང་། འཇིགས་བྱེད་སེང་གེ་དང་། གདུག་པའི་གཟིག་དང་། གཏུམ་པའི་དོམ་དང་། སྟོབས་ཀྱི་གླང་པོ་དང་། བརྗིད་པའི་མ་ཧེ་དང་། འཛིན་པའི་ཆུ་སྲིན་དང་། ཞེ་སྡང་གི་སྦྲུལ་རྣམས་ལ་རིག་འཛིན་
ཐམས་ཅད་ས་ལ་ཡོངས་སུ་རྫོགས་པར་མཐོང་ངོ་། །གཞལ་ཡས་ཆེན་པོ་ འབར་བ ་ལ་ཡུམ་ཀུན་དུ་བཟང་མོ་རྫོགས་པར་མཐོང་ངོ་། །མེ་དཔུང་ཆེན་པོ་དགུ་ལ་ཡེ་ཤེས་ཀྱི་སྒོ་དགུ་བརྩེགས་སུ་ཡོངས་སུ་འབར་བར་རྫོགས་པར་མཐོང་ངོ་། །ཞབས་བརྒྱད་ལ་གསང་བའི་ཡུམ་བཞི་དང་། སྒོམ་བཞི་རྫོགས་པར་མཐོང་ངོ་། །དུར་ཁྲོད་ཀྱི་རྒྱན་ཆེན་པོ་བཅྭ་བརྒྱད་ནི་མ་མོ་ཆེན་མོ་བཅྭ་བརྒྱད་ཡོངས་སུ་རྫོགས་པར་གསལ་ལོ། །ཕྱག་མཚན་བཞི་བཅུ་རྩ་གཉིས་ནི་ཕྲ་མེན་མ་བཅུ་ད་བྱུག་པ་འཕྱར་བའི་ལག་ན་ཁྱུང་བཅུ་འབར་བའི་ཁ་ནས་མཚོན་ཆ་སྣ་ཚོགས་འཕྲོ་བ། མཁའ་འགྲོ་བརྒྱད་དབྱུག་པར་འཕྱར་བའི་ལག་ན་སེང་གེ་ཁ་གླལ་བ་བརྒྱད་ཀྱི་ཁ་ནས་རལ་གྲི་ འབར་བ ་བརྒྱད་འཕྲོ་བ། ཤུགས་འགྲོ་བརྒྱད་དབྱུག་པར་འཕྱར་བའི་ལག་ན་སྟག་མཆེ་བ་གཙིགས་པ་བརྒྱད་ཀྱི་ཁ་ནས་རྡོ་རྗེ་སྣ་ཚོགས་འཕྲོ་བ། མ་མོ་བརྒྱད་དབྱུག་པར་འཕྱར་བའི་ལག་ན་མི་མགོ་བརྒྱད་རྡོ་རྗེ་ལུ་གུ་རྒྱུད་ཀྱིས་བཏགས་ནས་ཀླད་ལ་བསྐོར་བ། འབར་མ་བརྒྱད་དབྱུག་པར་འཕྱར་བའི་ལག་ན་མེ་དཔུང་ འབར་བ ་བརྒྱད་ལས་ཐུ་ལུམ་འཕྲོ་བ་སྟེ། བཞི་བཅུ་རྩ་གཉིས་སུ་གསལ་ལོ། །ཕྱག་བཞི་བཅུ་རྩ་གཉིས་ནི་ཁྲག་འཐུང་ འབར་བ ་བཞི། གིང་ཕོ་དགུ་མོ་དགུ། ཟ་བྱེད་ཕ་བཅུ་གསོད་བྱེད་མ་བཅུ་སྟེ་བཞི་བཅུ་རྩ་གཉིས་སུ་གསལ་ལོ། །ཞལ་ཉི་ཤུ་རྩ་གཅིག་ནི་སྲིད་པ་ཟ་བྱེད་གསང་བའི་དུར་ཁྲོད་ཉི་ཤུ་རྩ་གཅིག་ཏུ་གསལ་ལོ། །སྤྱན་ འབར་བ ་དྲུག་ཅུ་རྩ་བཞི་ནི་ཧེ་རུ་ཀ་ཡབ་ཡུམ་དྲུག་ཅུ་རྩ་བཞིར་གསལ་ལོ། །དབུ་ཉི་ཤུ་རྩ་གཅིག་ནི་དུས་གསུམ་གྱི་སངས་རྒྱས་ཉི་ཤུ་རྩ་གཅིག་ཏུ་གསལ་ལོ། །གཡས་ཀྱི་དབུ་བདུན་གྱི་སྤྱི་གཙུག་ནས་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་འཁོར་ལོ་འོད་ཟེར་དང་བཅས་པ་རེ་རེ་འབར་བ། དབུས་ཀྱི་དབུ་བདུན་ལས་དབུ་རྒྱན་སངས་རྒྱས་ཀྱི་དབུ་རེ་རེ་བྱུང་བའི་སྐུ་ལ་རིན་པོ་ཆེའི་མཆོད་རྟེན་ འབར་བ ་བདུན་དུ་གསལ་བ། གཡོན་གྱི་དབུ་བདུན་ལས་དབུ་རྒྱན་སངས་རྒྱས་ཀྱི་སྐུ་རེ་རེ་བྱུང་བའི་དབུ་ལ་ནོར་བུ་རིན་པོ་ཆེ་བདུན་དུ་གསལ་བ། འཁོར་ལོ་དང་མཆོད་རྟེན་དང་། རིན་པོ་ཆེ་དེ་དག་གི་ལྟེ་བ་དང་། བུམ་པ་དང་། རྩེ་མོ་ལས་རྒྱལ་
མཚན་ཆེན་པོ་བཅུ་ འབར་བ ་ནི་རྒྱ་བྱེའུ་ལྕགས་ཀྱི་རྒྱལ་མཚན་དང་། གདུལ་བྱ་ཤ་བའི་རྒྱལ་མཚན་དང་། གཅན་གཟན་གཟིག་གི་རྒྱལ་མཚན་དང་། སྤྲུལ་པ་རྡོ་རྗེའི་རྒྱལ་མཚན་དང་། རིན་ཆེན་སྦྲུལ་ནག་གི་རྒྱལ་མཚན་དང་། དཔའ་བོ་སྟག་གི་རྒྱལ་མཚན་དང་། གཟི་མདངས་མིའི་རྒྱལ་མཚན་དང་། དམར་གསལ་ཁྲག་གི་རྒྱལ་མཚན་དང་། རྩལ་ཆེན་སེང་གེའི་རྒྱལ་མཚན་དང་། གཏུམ་ཆེན་དོམ་གྱི་རྒྱལ་མཚན་དང་། རྒྱལ་མཚན་དེ་རྣམས་ཀྱི་རྩེ་མོ་གཅིག་ཏུ་འདུས་ཏེ། གསེར་གྱི་གཙུག་ཏོར་ཏོག་སྟོང་འབར་བའོ། །དེ་ནས་འདུས་པ་ཕལ་མོ་ཆེའི་འཁོར་གྱིས་ཞབས་ཀྱི་གདན་ཁྲི་ཡན་ཆད་ནས་དབུའི་གཙུག་ཏོར་མན་ཆད་དུ་ཡོངས་སུ་རྫོགས་པར་མཐོང་ངོ་། །དབུ་ལས་བྱུང་བའི་སངས་རྒྱས་ཉི་ཤུ་རྩ་གཅིག་དང་། རྒྱལ་མཚན་ཆེན་པོ་བཅུ་ལ་རྫོགས་པའི་རྣལ་འབྱོར་ཡོངས་སུ་རྫོགས་པར་མཐོང་ངོ་། །དབུའི་གཙུག་ཏོར་རྒྱལ་མཚན་གྱི་རྩེ་མོ་ལ་གསེར་གྱི་ཏོག་སྟོང་ནི་རྫོགས་པ་ཆེན་པོའི་རྣལ་འབྱོར་ཉིད་དུ་གསལ་བར་མཐོང་ངོ་། །དེ་ལྟར་མཐོང་ཞིང་གསལ་བར་གྱུར་པ་དང་། །ཆོས་ཐམས་ཅད་སྐུ་ལ་ཡོངས་སུ་རྫོགས་པའི་དོན་ལ་འཁོར་ཐམས་ཅད་ངམ་ཞིང་ངོ་མཚར་སྐྱེས་པར་གྱུར་ཏོ། །རྣལ་འབྱོར་ཆེན་པོ་རྣམས་ཀྱིས་སྐུ་ལ་ཡོངས་སུ་བསྟོད་པ། ཨེ་མའོ་ཆོས་ཀུན་སྐུ་ལ་ཡོངས་སུ་རྫོགས་པས་ཆོས་ཀྱི་སྐུ། །རྡོ་རྗེ་ཆེ་མཆོག་ཕྱག་འཚལ་ཧེ་རུ་ཀ། །ཆོས་ཉིད་མཁའ་ལ་སྐར་ཚོགས་རྒྱས་པའི་སྐུ། །དབྱར་གྱི་ཆར་སྤྲིན་གཏིབས་པ་ལྟ་བུའི་གཟུགས། །ཆུ་རླབས་ལྟ་བུར་བརྗོད་པའི་ཞལ་གདངས་ཤིང་། །ཉི་མ་འབུམ་གྱི་འོད་ཟེར་བདལ་བ་བཞིན། །ཐེག་ཆེན་དགུ་དང་འཁོར་བའི་ཆོས་རྣམས་ཀུན། །ཕྱག་རྒྱ་གཅིག་ཏུ་བཀོད་ནས་རྫོགས་པའི་སྐུ། །སྐུ་གསུམ་ལྷུན་གྲུབ་ཆོས་སྐུ་ཏོག་སྟོང་འབར། །དབུ་སྐྲ་ཁམ་ནག་རལ་པའི་ཅོད་པན་ཅན། །ཀླུ་རྒྱལ་འབུམ་གྱིས་བཀླུབས་ཤིང་མཆོད་ཀུན་འབུལ། །རྡོ་རྗེ་གསུང་གིས་ལྗགས་སྒྲ་བརྡབས་པས་ཀྱང་། །ཧཱུྃ་དང་ཕཊ་ཀྱི་སྒྲ་སྐད་
འཇིགས་པར་སྒྲོགས། །ཐེག་ཆེན་དོན་དམ་གསང་སྔགས་སྒྲོགས་པའི་ཚིག །འབར་བའི་སྨིན་མ་མུན་རུམ་གློག་ལྟར་འགྱུ། །སྤྱན་དམར་བཟློག་པའི་སྡང་མིག་ཉི་ལྟར་འབར། །འབར་བའི་ཤངས་ནས་བསྐལ་པའི་ཚུབ་ནག་འཁྱིལ། །རྡོ་རྗེ་ཐོག་དང་གནམ་ལྕགས་སེར་ཆེན་འབེབས། །རྣོ་དབལ་མཆེ་བ་ཟང་ཡག་གཙིགས་པ་ཡིས། །ཉོན་མོངས་ལོག་ལྟའི་ཚོགས་ལ་ངམ་ཞིང་འཁྲུག །ཐོད་རུས་ཤ་ཁྲག་རྐང་རུས་འབུ་དང་རྣག །ཟ་བྱེད་རྔམ་པའི་ཞལ་དུ་ཆེམ་ཆེམ་གསོལ། །སྦྲུལ་གདུག་ཀོ་རློན་ལ་སོགས་འཇིགས་པའི་རྒྱན། །རྔམ་པའི་སྐུ་ལ་ཤིན་ཏུ་བརྗིད་པར་བརྒྱན། །ཟ་བྱེད་རྔམ་དང་འཇིགས་བྱེད་མང་པོའི་ཚོགས། །འབར་བའི་ཕྱག་མཚན་སྤྲུལ་པའི་ཕོ་ཉ་མཛད། །འཁོར་བ་ཀུན་དང་ཐར་པའི་ཆོས་རྣམས་ཀུན། །དཔའ་བོ་ཆེན་པོའི་གདན་དུ་བརྗིད་རིང་རོལ། །འགྲན་གྱི་ཟླ་མེད་ཆེ་བཙན་གཅིག་པུ་ཉིད། །གསང་མཆོག་འབར་བའི་སྐུ་ལ་ཕྱག་འཚལ་བསྟོད། །དེ་སྐད་ཅེས་བསྟོད་པས་ཆོས་ཐམས་ཅད་སྐུ་ལ་ཡོངས་སུ་རྫོགས་ཤིང་སངས་མ་རྒྱས་པ་མེད་པར་གྱུར་ཏོ། །དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེ་ཉིད་ཕྱག་རྒྱ་ཐམས་ཅད་ཕྱག་རྒྱ་བཀོད་པའི་ཕོ་བྲང་དུ་གྱུར་ཏོ། །སྤྲོ་བ་རྒྱུན་གྱི་ཏིང་ངེ་འཛིན་ཞེས་བྱའོ། །དེ་ནས་བཅོམ་ལྡན་འདས་གསང་བ་མཆོག་གི་བདག་པོ་ཆོས་ཉིད་རྒྱུན་གྱི་ཏིང་ངེ་འཛིན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །ཆོས་ཀྱི་རྒྱུན་གྱི་ཏིང་ངེ་འཛིན་འདི་གསུངས་སོ། །ནམ་མཁའ་དོན་གྱི་གླེགས་བམ་ལ། །སྐར་ཚོགས་རིག་པའི་ཡིག་བྲིས་ཏེ། །འབྱུང་ཆེན་བཞི་ཡི་སྒྲ་བསྒྲགས་པས། །གསང་སྔགས་ཆོས་ཀྱི་རྒྱུན་མི་འཆད། །ཆོས་ཀྱི་རྒྱུན་གྱི་ཏིང་ངེ་འཛིན་ཞེས་བྱ་བ་ཡོངས་སུ་རྫོགས་སོ། །དེ་ནས་ཡང་བཅོམ་ལྡན་འདས་གསང་བ་མཆོག་གི་བདག་པོ་དེས་བདུད་རྩི་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །སྟོང་གསུམ་བྷན་དྷའི་བཟང་ཁོང་དུ། །སྲིད་གསུམ་སེམས་ཅན་དུག་ཆེན་ལས། །
དུས་གསུམ་སངས་རྒྱས་རྩི་སྦྱར་བས། །བདུད་རྩི་དཀྱིལ་འཁོར་ལྷུན་གྱིས་རྫོགས། །ཞེས་གསུངས་སོ། །དེ་ནས་ཡང་བཅོམ་ལྡན་འདས་སེམས་དཔའི་རྡོ་རྗེ་སྙིང་པོ་དེ་མཆོད་པ་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ། །འཁོར་བ་རྒྱ་མཚོའི་ཡོ་བྱད་རྣམས། །མཆོད་པ་རྒྱ་མཚོའི་རྒྱན་ཡིན་ཏེ། །སྲིད་པ་རྒྱ་མཚོ་མཐའ་ཡས་ཀུན། །ཀུན་བཟང་མཆོད་སྤྲིན་མཆོག་ཏུ་རོལ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་བཟླས་བརྗོད་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །འཁོར་བ་ཆོས་ཀྱི་དབྱིངས་ཉིད་ལས། །སེམས་ཅན་སངས་རྒྱས་སྙིང་པོ་ཤར། །སྒྲ་སྐད་བསམ་གྱིས་མི་ཁྱབ་པ། །ཐམས་ཅད་བཟླས་བརྗོད་སྔགས་ཀྱི་ཚིག །ཅེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་སྦྱོར་བ་རྒྱུན་གྱི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །འཁོར་བ་ཤེས་རབ་ཡུམ་ཉིད་ལ། །སྙིང་རྗེ་ཐབས་ཀྱི་རྒྱལ་པོ་ཡིས། །འདུ་འབྲལ་མེད་པར་སྦྱར་བས་ནི། །ཐམས་ཅད་རྒྱལ་བའི་སྲས་སུ་བསྐྱེད། །ཅེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་སྒྲོལ་བ་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །འཁོར་ བ་བསྒྲལ་བའི་ཞིང་འདི་དག །ཡེ་ཤེས་འབར ་བའི་མཚོན་ཆེན་གྱིས། །རང་བཞིན་མེད་པར་བསྒྲལ་ནས་ནི། །མཉམ་ཉིད་ཆོས་སྐུ་ཆེན་པོར་བཏོན། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་སྐུ་གདུང་རྒྱུན་གྱི་ཏིང་ངེ་འཛིན་ཞེས་བྱ་བ་ལ་སྙོམས་པར་ཞུགས་ཏེ། འདི་སྐད་ཅེས་གསུངས་སོ། །འདོད་ཁམས་རྨང་གི་རི་རབ་ལ། །གཟུགས་ཁམས་བང་རིམ་ཁྲི་འཕང་བརྟན། །གཟུགས་མེད་བུམ་རྟེན་བུམ་པར་བཅས། །གདུང་ཆེན་ཆོས་སྐུར་རྒྱུན་དུ་གནས། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །ནམ་མཁའ་མེ་ཆུ་ས་རླུང་རྣམས། །རྨང་གཞི་རི་རབ་
རྟེན་དུ་སྣང་། །བང་རིམ་རི་བདུན་བཅས་པ་རྣམས། །དེ་ཉིད་བང་རིམ་ཁྲི་འཕང་བརྟན། །རི་བོ་བུམ་རྟེན་བུམ་པར་བཅས། །འདི་ཡང་ཆོས་སྐུ་རྒྱུན་མི་ཆད། །སེམས་དཔའི་རྡོ་རྗེ་དེས་ཡང་འདི་སྐད་ཅེས་གསུངས་སོ། །འཛུགས་པའི་ཡན་ལག་བཞི་རྨང་རྟེན། །འཁོར་ལོ་ཚོགས་ཆེན་ཁྲི་འཕང་བརྟན། །ཡན་ལག་དང་པོ་བུམ་རྟེན་བཅས། །ལྕང་ལོ་ཅོད་པན་ཕྲེང་བས་བཀླུབས། །ཞེས་གསུངས་སོ། །དེ་ནས་སེམས་དཔའི་རྡོ་རྗེ་སྙིང་པོ་དེས་ཤི་བ་ཡོངས་སུ་སློང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རོ་ཡི་སྒྲུབ་ལུགས་ཆེན་པོ་ནི། །དུར་ཁྲོད་ཆེན་པོའི་གནས་རྣམས་སུ། །རོ་ཡི་རྫས་རྣམས་བཙལ་ནས་ཀྱང་། །འདོད་པ་བསྒྱུར་བའི་སྔགས་ཀྱིས་གདབ། །རོ་ཡི་སྟེང་དུ་གནས་ནས་ནི། །རོ་ཡི་གཉེན་པོར་བདག་བསམས་ནས། །རོ་སྔགས་རྒྱུན་མི་འཆད་པར་བཟླས། །རོལ་བཀྲག་དང་མདངས་བྱུང་ན། །གྲུབ་པར་འགྱུར་བའི་རྟགས་ཡིན་ཏེ། །རྒྱུན་མི་འཆད་པར་ཏིང་འཛིན་བྱ། །རོ་ནི་འགུལ་བར་གྱུར་པ་དང་། །གསེར་འགྱུར་རྩིས་ནི་བྱུག་པར་བྱ། །རོ་ཡི་ཡན་ལག་ཀུན་བཅིངས་ནས། །སྔགས་ནི་དག་པར་བཟླས་པར་བྱ། །རོ་ཉིད་ལངས་པར་གྱུར་པ་དང་། །རོ་ཡི་ཆོ་འཕྲུལ་སྟོན་པར་བྱེད། །བརྟུལ་ཞུགས་ལྡན་པའི་སྐྱེས་བུ་ཡིས། །དེ་ཚེ་རོ་ཡི་ལྕེ་བཅད་ནས། །རོ་ལ་བརྡབས་ན་གསེར་དུ་འགྱུར། །དེ་བཞིན་ཇི་ལྟར་འདོད་པ་ཡི། །རྐྱེན་གྱིས་བསྒྱུར་ན་དེ་ལྟར་འགྱུར། །ལྕེ་བཅད་རལ་གྲི་མཚོན་ཆ་དེས། །རོ་ཡི་བྷན་དྷ་བཅད་པ་དང་། །ཇི་ལྟར་འདོད་པའི་རྫས་འགྲུབ་སྟེ། །བྷན་དྷ་གོ་རུ་བཟུང་ནས་ནི། །ལྕེ་ཡི་རལ་གྲི་ཐོགས་ནས་ནི། །ལྷ་མིན་གཡུལ་ཡང་བཟློག་པར་འགྱུར། །རོ་ལངས་གྲུབ་པའི་རྐང་མགྱོགས་ནི། །དཔག་པའི་ཚད་ལས་འདས་པ་སྟེ། །སྐྱེས་བུ་རྩལ་དང་ལྡན་པ་བཞིས། །ཕྱོགས་བཞི་དག་ཏུ་ཁ་བལྟས་ནས། །དུས་གཅིག་མདའ་ཡི་རྒྱང་འཕངས་ནས། །མདའ་ནི་ས་ལ་མ་འབབས་པར། །བཞི་ཀ་བར་སྣང་ལས་བླངས་ནས། །སྐད་ཅིག་ཙམ་གྱིས་འཇིག་རྟེན་སྐོར། །སྐྱེས་བུ་ལག་ཚོད་མ་
ཡལ་བར། །དེ་མ་ཐག་ཏུ་གནས་སུ་སླེབས། །རོ་ལ་འདོད་པ་ཀུན་འབྱུང་ཞེས། །དུས་གསུམ་རྒྱལ་བ་རྣམས་ཀྱིས་བཤད། །ཅེས་གསུངས་སོ། །རོ་ལངས་བསྒྲུབ་པའི་ཏིང་ངེ་འཛིན་ཏོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་རྡོ་རྗེ་ནམ་མཁའི་ཐེམ་སྐས་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་རྡོ་རྗེར་བསྒོམས་ནས་ཀྱང་། །ཏིང་འཛིན་རེད་པར་གྱུར་པ་ན། །ཕན་ཚུན་གྱ་གྱུའི་ཐབས་ཚུལ་དུ། །རྡོ་རྗེ་སྐས་ལ་བགྲོད་ནས་ནི། །ནམ་མཁའི་དབྱིངས་སུ་སོང་ནས་ཀྱང་། །སྣང་སྲིད་འཇིག་རྟེན་ཁམས་ལ་བལྟ། །དེས་ནི་སེམས་ཡུལ་ཡངས་པར་འགྱུར། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་རྒྱ་མཚོ་ཆེན་པོ་གནོན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །རྒྱ་མཚོ་རྡོ་རྗེས་གཏམས་པར་ནི། །ཏིང་འཛིན་གསལ་བར་གྱུར་པ་དང་། །རྒྱ་མཚོ་ཆེན་པོར་བགྲོད་ནས་ནི། །རྒྱ་མཚོར་གནས་པའི་སེམས་ཅན་རྣམས། །ཏིང་འཛིན་རྡོ་རྗེས་བསྒྲལ་བར་བྱ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་ཐོགས་མེད་རླུང་ཟླའི་དཀྱིལ་འཁོར་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་དག་གི་ལིངྒ་ལ། །ཟླ་བའི་དཀྱིལ་འཁོར་དབུས་གནས་པར། །བསྒོམ་ཏེ་ཏིང་འཛིན་རྟས་པ་དང་། །ཞིང་ཁམས་ཀུན་དུ་བགྲོད་པར་བྱ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་ཉི་མ་རབ་ཏུ་སྣང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ནམ་མཁའ་དག་གི་ལིངྒ་ལ། །ཉི་མའི་དཀྱིལ་འཁོར་དབུས་གནས་པར། །བསྒོམས་ཏེ་ཏིང་འཛིན་རྟས་པ་དང་། །མུན་པའི་གནས་རྣམས་ཐམས་ཅད་བསལ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་སྲེག་པའི་བསྐལ་པ་གཞིལ་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །རྣལ་འབྱོར་སྡིགས་མཛུབ་རྩེ་མོ་
ལ། །ཟླ་བའི་དཀྱིལ་འཁོར་འོད་གསལ་འབར། །བསྒོམས་ཏེ་ཏིང་འཛིན་རྟས་པ་དང་། །ཆུ་རྒྱུན་བབས་ཏེ་གཞིལ་བར་བྱ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་སྟོང་གི་འཇིག་རྟེན་རྒྱང་མར་འཕེན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ཏེ་འདི་སྐད་ཅེས་གསུངས་སོ། །རྣལ་འབྱོར་ལས་ཀྱི་དཀྱིལ་འཁོར་དུ། །སྟོང་གི་འཇིག་རྟེན་འཁོར་ཡུག་བཅས། །ཤིན་ཏུ་གསལ་བར་བསྒོམས་པ་དང་། །ཏིང་འཛིན་རྩལ་ཅན་རབ་སྦྱང་ཕྱིར། །ནམ་མཁའི་ཁམས་སུ་འཕངས་ནས་ནི། །ས་ནས་ས་རུ་སྤར་བར་བྱ། །དེ་སྐད་ཅེས་གསུངས་སོ། །དེ་ནས་སེམས་དཔའི་རྡོ་རྗེ་དེ་ཉི་མའི་དཀྱིལ་འཁོར་འབུམ་འགྱེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རྣལ་འབྱོར་སྡིགས་པའི་མཛུབ་མོ་ལ། །ཉི་མའི་དཀྱིལ་འཁོར་ འབར་བ ་ལས། །འོད་ཟེར་ འབར་བ ་འབུམ་འཕྲོས་པས། །འོད་ཟེར་དེ་དག་རེ་རེ་ལས། །ཉི་མའི་དཀྱིལ་འཁོར་འབུམ་འཕྲོས་པས། །དེས་ནི་མུན་པ་ཐམས་ཅད་སེལ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེ་འབྱུང་བ་ཆེན་པོ་བསྐལ་པའི་ཆུ་རྒྱུན་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རྣལ་འབྱོར་ལག་པའི་འཁོར་ལོ་ལས། །ཆུ་ཟླའི་སྙིང་པོ་རབ་ཤར་ཏེ། །བདུད་རྩི་ཆུ་བོའི་རྒྱུན་བབ་པས། །སྲེག་པའི་བསྐལ་པའི་མེ་ཆེན་གསོད། །ཅེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་དེ་སྐུའི་ཕྱག་རྒྱ་ འབར་བ ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རིན་ཆེན་འབར་བའི་ལིངྒ་ལ། །སངས་རྒྱས་ཡེ་ཤེས་དཔལ་གྱི་སྐུ། །རིན་ཆེན་འབར་བའི་ངོས་བརྒྱད་ལ། །རིག་པའི་མ་མོ་དཔལ་འབར་བ། །བརྒྱད་དུ་གསལ་བར་གྱུར་པ་དང་། །ཡེ་ཤེས་རྩ་བའི་དཀྱིལ་འཁོར་རྫོགས། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་གསུང་གི་ཕྱག་རྒྱ་ འབར་བ ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །པདྨ་འབར་བའི་
ལིངྒ་ལ། །རིན་ཆེན་འབར་བའི་ཡིག་འབྲུ་བརྒྱད། །ཤིན་ཏུ་འབར་ཞིང་འཕྲོ་འདུ་བ། །གསུང་གི་རྩ་བའི་ཕྱག་རྒྱ་ཡིན། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་དེ་ཐུགས་ཀྱི་ཕྱག་རྒྱ་ འབར་བ ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རྡོ་རྗེ་འབར་བའི་ལིངྒ་ལ། །ཡི་གེ་ཧཱུྃ་གི་འབྲུ་ཡིས་བསྐོར། །མཐའ་མ་རིན་ཆེན་ཡིག་འབྲུ་བརྒྱད། །ཁ་དོག་མཐིང་གས་བསྐོར་བ་ནི། །ཐུགས་ཀྱི་གསང་བའི་ཡེ་ཤེས་ཡིན། །ཞེས་གསུངས་སོ། །དེ་ནས་སེམས་དཔའི་རྡོ་རྗེ་དེས་ཏིང་ངེ་འཛིན་གྱི་མདོ་འདི་གསུངས་སོ། །སེམས་ནི་སྒྱུ་མའི་རང་བཞིན་ཏེ། །ཇི་ལྟར་བརྟགས་པ་དེ་ལྟར་སྣང་། །མདོ་བཞིན་སྣང་བར་མ་གྱུར་ཀྱང་། །སེམས་ཉིད་བརྟགས་པ་དེ་ལྟར་འགྱུར། །གདོས་བཅས་དམིགས་བུས་མི་མཐོང་ཡང་། །མངོན་ཤེས་ཡིད་གཟུགས་ཅན་གྱིས་མཐོང་། །གང་ལྟར་བརྟགས་པར་ཡུན་བརྟགས་ན། །རྟོག་པ་རྟས་པའི་འབྲས་བུ་ནི། །མངོན་སུམ་གསལ་བར་རེད་པར་འགྱུར། །དགེ་དང་མི་དགེའི་བག་ཆགས་དང་། །ཡོད་དང་མེད་པའི་རང་བཞིན་རྣམས། །བག་ཆགས་རྟས་པ་ཁོ་ནར་ཟད། །དེ་བས་ཏིང་འཛིན་སེམས་ཉིད་གཙོ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྒྱུན་གྱི་ཏིང་ངེ་འཛིན་གྱི་ལེའུ་སྟེ་དགུ་པའོ།། །།དེ་ནས་སེམས་དཔའི་རྡོ་རྗེ་སྙིང་པོ་དེས་གསང་སྦྱོར་ཆེན་པོ་སྒྲུབ་པ་འདི་གསུངས་སོ། །འདུས་པ་ཆེན་པོའི་རྣལ་འབྱོར་རྣམས། །ཤིན་ཏུ་གསང་བའི་སྒྲུབ་པ་འདི། །བདེ་གཤེགས་རྒྱལ་བའི་གཤེགས་ཤུལ་ཏེ། །འཇིག་རྟེན་གང་ཟག་ལམ་ཡང་ཡིན། །མ་རྟོགས་པ་དང་ལོག་པར་རྟོགས། །ཕྱོགས་རྟོགས་ཡང་དག་ཉིད་མ་རྟོགས། །ལོག་པའི་ལམ་བཞིན་མཐའ་བསལ་ནས། །བདེ་གཤེགས་རྒྱལ་བའི་ལམ་ལ་འཇུག །དེས་ན་སྒྲུབ་པའི་ལམ་མཆོག་འདི། །འདུས་པའི་ཚོགས་ལ་བཤད་པར་བྱ། །ཤིན་ཏུ་གུས་པས་མཉན་པར་གྱིས། །དེ་ནས་འདུས་པའི་འཁོར་རྣམས་ཀྱིས་
གསང་བ་སྦྱོར་བའི་ཕྱག་བྱས་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་གསང་བའི་དབང་ཕྱུག་ཆེན་པོ་བདག་ཅག་རྣམས་ལ་གསང་བའི་ཡང་གསང་བ། བཀའ་གསང་བ་ཆེན་པོ་ཡེ་ཤེས་རྨད་དུ་བྱུང་བ། སངས་རྒྱས་གཤེགས་པའི་ཤུལ་ཡང་དག་པའི་དོན་བདག་ཅག་རྣམས་ལ་བཤད་དུ་གསོལ། །ཞེས་གསོལ་བ་བཏབ་པ་ལས་སེམས་དཔའི་རྡོ་རྗེ་སྙིང་པོ་དེ། བཙུན་མོའི་ཚོགས་ལ་དགྱེས་པར་འཇུག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །བྷ་ག་གསང་བའི་པདྨ་ནི། །བདེ་གཤེགས་རྒྱལ་བའི་ཕོ་བྲང་སྟེ། །སྔོན་འདས་རྒྱལ་བ་བརྣལ་བའི་དབྱིངས། །ད་ལྟར་བཞུགས་པ་གནས་པའི་རྟེན། །སླད་ཀྱིས་བྱོན་པ་གཤེགས་པའི་ཤུལ། །རྒྱལ་བ་རྣམས་ལ་དེ་ལྟར་སྣང་། །དེ་ལྟར་མ་ཤེས་འཁོར་བའི་ལམ། །རྣལ་འབྱོར་ཅན་གྱིས་ཤེས་པར་གྱིས། །ཡུལ་གྱི་མཆོག་ནི་འདིར་གཟུང་བ། །མཚན་ལྡན་བཀྲ་ཤིས་གསང་བའི་ཡུམ། །སྨིན་དཀྱུས་རིང་ལ་ལག་སོར་ཕྲ། །ཚིགས་མིག་ཟླུམ་ལ་ཕྲ་བར་བཤད། །ཁ་ནས་ཨུཏྤལ་དང་ལྡན་ཞིང་། །ཡིད་འོང་མཚན་ལྡན་རྐེད་སྐབས་ཕྱེད། །སྐྲ་འཇམ་མཐོན་མཐིང་ལྕང་ལོར་འཁྲིལ། །སོ་དཀར་ཚགས་དམ་སྨིན་དཀྱུས་རིང་། །ཟར་མའི་མེ་ཏོག་རྒྱས་འདྲའི་སྤྱན། །དཔྲལ་བའི་དབྱེས་ཆེ་སྐྲ་མཚམས་འཁྱུག །སྣ་བཟང་མདོག་གསལ་པདྨའི་རིགས། །ལུས་དྲང་སྐེ་རིང་སེམས་མའི་ཚུལ། །ནུ་མའི་དཀྱིལ་འཁོར་ཟླ་རྒྱས་འདྲ། །ཤ་དཀར་ཚགས་དམ་འཁྲིལ་བག་ཅན། །ཁོང་དལ་འགྲོ་ན་གོམ་པ་འཇམ། །སྐད་ནི་ངང་པ་གཞོན་ནུ་སྒྲོགས། །ཅི་ཡང་མཛེས་པའི་སྟབས་ཚུལ་ལྡན། །སྐྱེས་བུ་བླ་མས་ཡུམ་དུ་གཟུང་། །གཟུངས་སུ་བྱིན་གྱིས་བརླབས་པ་ནི། །དེ་ཡི་གཟུགས་ཀྱི་ཕུང་པོ་ལ། །བདེ་བར་གཤེགས་པའི་ས་བོན་ལྔ། །འཕྲོ་འདུ་གསལ་བར་གྱུར་པ་དེ། །རྒྱས་བཏབ་བྱིན་བརླབས་དབང་བསྐུར་ནས། །བདེ་གཤེགས་ཡུམ་ལྔའི་སྐུ་མཆོག་གསལ། །རྡོ་རྗེ་ཐབས་ལའང་དེ་བཞིན་
ཏེ། །དེ་ལྟར་གསལ་བར་གྱུར་པ་དང་། །ཡུམ་གྱི་མཁའ་ལ་མེ་རི་བསྒོམ། །གསང་བ་དབུས་ཀྱི་ཟླ་གམ་ལ། །བྱང་ཆུབ་སེམས་ཀྱི་སྤྲོ་བསྡུ་བྱ། །གཟུགས་བརྙན་ཇི་ལྟར་གསལ་བ་བཞིན། །ཆགས་པའི་མཁའ་ལ་དེ་བཞིན་ནོ། །མ་སྐྱེས་པ་དང་མ་འགགས་པ། །རིག་པ་རང་སྣང་མཉམ་པའོ། །མཁའ་དབྱིངས་རྣམ་དག་བདེ་ཆེན་ཀློང་། །མི་གནས་བདེ་བ་ཆེན་པོའི་ལུང་། །རིག་པ་ཐབས་ཀྱི་རང་བཞིན་ལས། །བྱིན་བརླབས་རང་དབང་ངང་གིས་གསལ། །བཞིན་མདོག་དམར་པོ་སོག་ཀ་ལ། །དཔྲལ་བའི་དབྱེས་ཆེ་སྨིན་དཀྱུས་རིང་། །མིག་གི་མདངས་གསལ་དཀྱུས་སུ་རིང་། །དུང་ཆེན་ཐགས་དམ་ཤེལ་མདོག་ཆགས། །བཞིན་གྱི་གཟངས་རིང་ཀོས་ཀོ་ཕྲ། །ལུས་ལ་ཞིམ་པའི་དྲི་ལྡང་ཞིང་། །ཁ་ནས་ག་པུར་ངད་ལྡང་བ། །ནུ་མའི་དཀྱིལ་མཐོ་ནུ་མར་འཁྱིལ། །པདྨ་ཅན་ཞེས་བྱ་བར་གྲགས། །དུང་ཅན་མ་ཞེས་བསྟན་པ་ནི། །དཀར་མོ་ཟླ་བའི་མདངས་སུ་གསལ། །བཞིན་ལུས་དུང་ལྟར་གཡས་སུ་གཡོ། །གཙུག་ཕུད་མཐོན་མཐིང་གཡས་སུ་འཁྱིལ། །སྐད་ཆེ་གདངས་སྙན་ཚིག་ཏུ་གསལ། །བོང་ཆུང་ལུས་ནི་མཛེས་པར་སྣང་། །བུ་མོ་མིག་རིང་ཞེས་བྱ་བ། །ཤེས་རབ་གསལ་ཞིང་འདོད་པ་ཆེ། །གཙོ་བོ་ངེས་པའི་བརྟུལ་ཞུགས་ཅན། །ཟླ་གསང་དཀར་དམར་རླུང་ཀར་ལྕི། །རྣམ་པར་བརྡིག་ཅིང་འཁྱིལ་པས་ནི། །ཀུན་གྱིས་དྲོད་ནི་ཡོང་མི་ལོན། །གསང་བ་སྦས་པའི་ཐབས་ལ་མཁས། །ཕྱི་ནང་རླུང་ཀར་གསེར་ལྟར་ལྕི། །རྟོག་པ་མེད་ཅིང་དོན་ལ་གཞོལ། །བཞིན་ནི་གྲུ་བཞིའི་དབྱིབས་ལྡན་ལ། །མིག་རིང་ཕྲ་བཤད་འཁྱིལ་བག་ཆགས། །དཀར་དམར་མཛེས་པའི་རྒྱན་གྱིས་བརྒྱན། །ལྗོན་པ་དག་གི་རིགས་སྨོས་པ། །སྡོང་པོ་ཡལ་ག་མང་པོའི་དཀྱིལ། །ཤིན་ཏུ་འདབ་རྒྱས་ཡལ་གར་ལེགས། །མཐོན་མཐིང་སྐྲ་ཡི་རང་བཞིན་ནི། །བྱང་ཆུབ་སེམས་འདྲར་ལྕང་ལོར་བཤད། །སྟོད་སྨད་ཀུན་དུ་ཕྲ་ལ་ལེགས། །སྲིད་དུ་རིང་ཞིང་ལྡེམ་བག་ཅན། །ལྕུག་ཕྲན་ཞེས་བྱའི་མཚན་མ་
ནི། །བཅུ་གཉིས་ཉི་ཤུ་རྩ་ལྔ་པ། །རྡོ་རྗེའི་མཚོན་གྱིས་མ་ཕོག་ཅིང་། །མུ་ལ་རཀྟར་ལྡན་པ་ལ། །ཕྲ་ཞིང་བཤད་ལ་གཟངས་སུ་རིང་། །བན་གླང་སེར་མོ་གྲུ་བཞི་ལ། །ཁམ་ལ་མིག་འབུར་སྨིན་ཚོགས་ཆེ། །སྐྲ་ཁམ་མ་ལ་སོ་ཆེ་ཞིང་། །སྣ་རིང་འགྲམ་སླང་རིང་བ་ཡིན། །རི་མོ་ཅན་གྱི་བུད་མེད་ནི། །ནག་མོ་གྲྭ་གསུམ་རྩིད་མགོ་མ། །ཁྲོ་གཉེར་ཅན་ལ་གེལ་བག་ཆགས། །སྡོང་གཅིག་ཡན་ལག་གཏན་མེད་པའོ། །སྐྱེ་བའི་རྒྱུ་མེད་བཀྲ་མི་ཤིས། །མི་རེག་ཡལ་ག་མེས་ཚིག་ཡིན། །སྤྱིར་ནི་དེ་ལྟར་བསྟན་མེད་ཀྱང་། །གང་དག་དད་ལྡན་བརྟུལ་ཞུགས་ཅན། །ཡིད་དུ་འོང་དང་མི་འོང་རྣམས། །དད་པ་ཆགས་ཤིང་ལུས་འབུལ་ན། །ཐུགས་རྗེའི་ཡུལ་བས་ཀུན་སྙོམས་བྱ། །རྣམ་རྟོག་སྤོང་ལེན་གང་བྱེད་པ། །དེ་དག་སྒྲིབ་པ་མུ་མཐའ་ཡས། །རྨད་དུ་གསང་བའི་མཆོད་པ་ལ། །གསང་བའི་ཕྱག་ཚང་གང་བྱེད་པ། །ལས་ཀྱི་སྒྲིབ་པ་ཀུན་བསལ་ཏེ། །མན་ངག་གསང་བའི་དམིགས་བུ་འཐོབ། །དེ་ལྟར་བརྟགས་པའི་ཡུམ་དེ་ལ། །དྲི་སྤོས་ཙནྡན་ལ་སོགས་པས། །ཨ་ག་རུ་དང་སྦྱར་བའི་ཆུ། །ཁྲུས་ཀྱི་ཆོ་གས་དག་པར་བྱ། །དྲི་ཞིམ་ལ་སོགས་སྣ་ཚོགས་ཀྱིས། །ལུས་ལ་བྱུག་པ་སྣ་ཚོགས་བྱ། །དེ་ནས་ནང་གི་ཁྲུས་ཆེན་ཡང་། །ཤིན་ཏུ་དག་པར་བྱ་བ་ནི། །རྫས་ཀྱི་ཆུ་དང་རྫས་སྦྱར་བས། །ནང་གི་རྫས་རྣམས་དག་པར་བྱ། །བུར་ཤིང་སྙིང་པོ་ལ་སོགས་པ། །རོ་ཡི་མཆོག་ཏུ་གྱུར་པ་ཀུན། །རྩི་འམ་བཅུད་དང་སྦྱར་ནས་ཀྱང་། །ནང་གི་རྫས་རྣམས་སྦྱར་བར་བྱ། །རྫས་ཀྱི་ཆོ་ག་རྫོགས་པ་དང་། །བྱང་ཆུབ་མཆོག་ཏུ་སེམས་བསྐྱེད་དེ། །མི་དམིགས་ཆོས་ལ་བློ་སྦྱངས་ཕྱིར། །རྩ་བ་བྱང་ཆུབ་སེམས་ཀྱི་དོན། །རྒྱ་ཆེར་ཤིན་ཏུ་བཤད་པར་བྱ། །ཕུང་པོ་སྒྱུ་མར་སྣང་བས་ན། །སེམས་ལ་རང་བཞིན་མེད་པར་ངེས། །སྣང་སྲིད་ནམ་མཁར་གཅིག་པས་ན། །འཁོར་བ་སྒྱུ་མ་ཡིན་པར་ངེས། །ཀུན་གཞི་ཆོས་ཀྱི་མཛོད་ཡིན་པས། །སངས་རྒྱས་གཞན་ན་མེད་པར་ངེས། །བྱམས་ལ་དང་
མ་ཆགས་པས་ན། །སྡང་ལ་སེམས་མི་འཁྲུག་པར་ངེས། །གནས་ལ་ངེས་པ་མེད་པས་ན། །ས་རྣམས་བགྲོད་པ་མེད་པར་ངེས། །སེམས་ལ་སྐྱེ་ཤི་མེད་པས་ན། །འཕོ་འགྱུར་དག་ལ་ཉམ་མིང་། །དེས་ན་ཐམས་ཅད་སྒྱུ་མར་སྣང་། །སྒྱུ་མ་རང་བཞིན་མེད་ཤེས་པས། །ཐམས་ཅད་ཆོས་ཉིད་སྙིང་པོ་ཡིན། །མཚན་མ་རྟོག་པའི་དྲི་མ་དག །ཆོས་ཉིད་ཆུ་པོ་དེས་བཀྲུས་ན། །འཛིན་པའི་དྲི་མ་དག་པར་འགྱུར། །དེ་ནས་རྒྱན་གྱི་ཆོ་ག་ནི། །རྫས་ཀྱི་ཡོ་བྱད་ཡིན་པས་ན། །རློབ་ཅིང་འཕུར་བའི་ཆས་གོས་དང་། །རིན་ཆེན་ཕྲོག་དང་རྣ་ཆར་བཅས། །འཇོལ་སྒེག་མགུལ་རྒྱན་ལ་སོགས་པ། །དཔུང་རྒྱན་དོ་ཤལ་སེ་མོ་དོ། །ནོར་བུ་རིན་ཆེན་ལ་སོགས་བརྒྱན། །རྐང་གདུབ་ལག་གདུབ་ལ་སོགས་པ། །གསེར་དང་དངུལ་ལ་སོགས་པས་བརྒྱན། །རོལ་མོ་སྒྲ་དབྱངས་སྣ་ཚོགས་པའི། །མཆོད་རྫས་སྣ་ཚོགས་ཐོགས་པར་བྱ། །དེ་ནས་འདྲེན་པའི་ཆོ་ག་ནི། །གསང་བའི་ཚིག་གིས་བསྲེ་བ་ན། །རྡོ་རྗེ་ལྕེ་ཡི་དམ་ཚིག་གིས། །ཚིག་གི་བརྡས་ནི་མཚོན་པར་བྱ། །ས་མ་ཡ་ཧོ་ཞེས་བརྗོད་ན། །ས་མ་ཡ་སྟྭཾ་ཞེས་ཀྱང་བསྲེ། །ར་ག་ཡ་མི་ཞེས་བརྗོད་ན། །ར་ཧོ་ཧྃ་ཞེས་བརྗོད་པར་བྱ། །ཏི་པ་སུ་ཀི་ཞེས་བརྗོད་ན། །གན་དེ་ཙི་ཏ་ཞེས་པས་མཚོན། །ཨ་ཏི་པུ་ཧོ་ཞེས་བརྗོད་ན། །པྲ་ཏི་པུ་ཧོ་ཞེས་པས་མཚོན། །གཡས་ཀྱི་སྨིན་མ་བསྐྱོད་བྱས་ན། །གཡོན་གྱི་སྨིན་མས་མཚོན་པར་བྱ། །ནཱ་ས་གཡས་ཀྱིས་མཚོན་བྱས་ན། །དེ་བཞིན་ནཱ་ས་གཡོན་གྱིས་མཚོན། །གཙུག་ཏོར་གཙུག་ཏུ་མཚོན་བྱས་ན། །དེ་བཞིན་དཔལ་བེའུའི་ལིངྒར་མཚོན། །རྡོ་རྗེ་ལིངྒ་འོད་འཕྲོ་ན། །པདྨ་ཟེ་འབྲུ་འབར་འཕྲོ་འཁྱིལ། །ཞེས་པའི་ཚིག་གི་དོན་རྣམས་བསྲེ། །བསྐུལ་བའི་ཆོ་ག་ཁྱད་པར་ཡང་། །དོན་གྱིས་འདི་ལྟར་བསྐུལ་བར་རིགས། །ཤེས་རབ་ཉི་མའི་འོད་ཟེར་གྱིས། །ཐབས་མཆོག་ཟླ་བའི་འོད་ལ་བསྐུལ། །བསྐུལ་བའི་ཆོ་ག་རྫོགས་པ་དང་། །མཆོད་པའི་ཡོ་བྱད་དབུལ་བར་བྱ། །དེ་ནས་སངས་རྒྱས་ཐམས་ཅད་ཟླ་བའི་དཀྱིལ་འཁོར་གྱི་
ངང་དུ་གསལ་བར་གྱུར་ཏོ། །ཤེས་རབ་ཉི་མའི་དཀྱིལ་འཁོར་གྱི་ངང་དུ་གསལ་བར་གྱུར་ཏོ། །དེ་ནས་ཉི་མའི་ཟེར་གྱིས་འདི་སྐད་ཅེས་བསྐུལ་ཏོ། །མི་གཡོ་མཆོག་གི་རྒྱལ་པོ་དགོངས་སུ་གསོལ། །རྣམ་པར་མི་རྟོག་ཤིན་ཏུ་དྲི་མེད་སྐུ། །འོད་ཟེར་མདངས་ལྡན་ཟླ་བ་རྒྱས་འདྲའི་ཞལ། །དགྱེས་པ་རོལ་པའི་དོན་ལ་བཞེངས་སུ་གསོལ། །དེ་སྐད་ཅེས་བསྐུལ་བ་དང་། ཟླ་བའི་འོད་ཟེར་ལས་འདི་སྐད་ཅེས་བསྐུལ་ཏོ། །ཡིད་འོང་འབྱོར་ལྡན་རྒྱལ་བ་རྒྱ་མཚོའི་དབྱིངས། །ཤེས་རབ་ཟབ་མོ་རྣམ་དག་པདྨའི་མདངས། །སྒྱུ་འཕྲུལ་རབས་ལ་མཁས་པའི་སྤྱོད་མཆོག་མ། །ཡིད་འོང་འབྱོར་ལྡན་ཆོ་འཕྲུལ་སྣ་ཚོགས་བསྟན། །ཞེས་གསུངས་སོ། །དེ་ནས་ཡོ་བྱད་ཀྱི་ཚོགས་ཐམས་ཅད་ཤིན་ཏུ་འབུལ་བ་ཞེས་བྱ་བའི་ཆོ་འཕྲུལ་བྱུང་སྟེ། ཉི་མའི་འོད་ཟེར་ལས་སྒྲ་བྱུང་བ། པདྨའི་ཟེ་འབྲུ་ འབར་བ ་འདི། །འཛུམ་པའི་མདངས་ཀྱིས་འབུལ་ལགས་ན། །དགྱེས་པའི་རྡོ་རྗེ་ཆོ་འཕྲུལ་ལས། །བྱང་ཆུབ་ཆར་སྤྲིན་དབབ་ཏུ་གསོལ། །ཟླ་བའི་འོད་ཟེར་ལས་ཆོ་འཕྲུལ་གྱི་སྒྲ་བྱུང་བ། ཨེ་མ་ཡིད་ཀྱི་དགའ་སྡེ་མོ། །གདུང་བའི་སྙིང་ཕྲེང་ཤེས་རབ་གཟུངས། །པདྨའི་གའུ་འཁྱིལ་པ་ལ། །བདེ་བའི་རྡོ་རྗེ་བྱང་ཆུབ་འབར། །ཞེས་སྒྲ་བྱུང་བས། །ཕྱག་རྒྱ་སྣ་ཚོགས་ཀྱི་ཆོ་འཕྲུལ་འབྱུང་བའི་རྒྱུར་གྱུར་ཏོ། །དེ་ནས་སེམས་དཔའ་རྡོ་རྗེ་དམ་པ་དེས་འཁོར་བ་ཐམས་ཅད་ཐུགས་རྗེས་ཡོངས་སུ་བཟུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས། ཐབས་མཆོག་ཟླ་བ་རྡོ་རྗེ་ཞེས་བྱ་བ་ལས་ཆོ་འཕྲུལ་གྱི་སྒྲ་འདི་བྱུང་ངོ་། །འདོད་པའི་དབང་པོ་ཐམས་ཅད་ནི། །ཆགས་པའི་འགྱིང་བའི་གཙོ་མོ་ཡིན། །ཆགས་པ་རྣམ་པར་སྦྱང་བའི་ཕྱིར། །འདོད་པ་གནས་སུ་དྲང་བར་བྱ། །ཞེས་བྱུང་བས། འཁོར་བ་ཐམས་ཅད་ཐུགས་རྗེ་ཆེན་པོའི་ལྷུང་བཟེད་ཀྱིས་བཟུང་ངོ་། །དེ་ནས་སེམས་དཔའི་རྡོ་རྗེ་དེ་སྒྲིབ་པ་སྲེག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རྡོ་རྗེ་འབར་བའི་ལིངྒ་ལ། །ཨ་ཡི་ཡེ་ཤེས་འོད་འཕྲོས་པས། །ཆགས་པའི་སྒྲིབ་པའི་བུད་ཤིང་རྣམས། །
མེ་ཡི་ཡེ་ཤེས་ཀྱིས་སྦྱངས་སོ། །དེ་ནས་ཡང་སེམས་དཔའི་རྡོ་རྗེ་དེས། བྷ་ག་བྱིན་གྱིས་རློབ་པ་ལ་སྙོམས་པར་ཞུགས་ནས་གསུངས་པ། འཁོར་བར་སྣང་བའི་ཆོས་རྣམས་ཀུན། །བྷ་གའི་སྙིང་པོར་རབ་གསལ་བ། །ཡུམ་གྱི་ལུས་ཀྱི་ཡན་ལག་རྣམས། །ཡུམ་ལྔའི་རང་བཞིན་ཉིད་དུ་གསལ། །ཞེས་གསུངས་སོ། །དེ་ནས་སེམས་དཔའི་རྡོ་རྗེ་སྙིང་པོ་དེས་ཆགས་པ་ཐམས་ཅད་གཅོད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །ཆོས་ཉིད་ནམ་མཁར་རྟོགས་གྱུར་ན། །སྦྱོར་སྒྲོལ་མང་པོ་ཅི་བྱས་ཀྱང་། །ཆགས་སྡང་དྲང་བའི་ཐབས་ཡིན་ཏེ། །རྡུལ་ཆ་ཙམ་ཡང་སྣང་བ་མེད། །ཅེས་གསུངས་སོ། །དེ་ནས་སངས་རྒྱས་ཐམས་ཅད་བཙུན་མོའི་ཚོགས་ཐམས་ཅད་ལ་དགྱེས་པའི་རོལ་པ་ལ་ཞུགས་པར་གྱུར་ཏེ། མི་དམིགས་པའི་བདེ་བ་ལ་ཅི་ཡང་མི་གཡོ་བར་གྱུར་ཏོ། །དེ་ནས་བྱང་ཆུབ་སེམས་ཀྱི་ཆར་ཆེན་པོ་པདྨའི་སྙིང་པོ་རྒྱུན་མི་འཆད་པར་འབབ་པར་གྱུར་ཏོ། །འཁོར་བ་ཐམས་ཅད་ནི་རྒྱལ་བའི་སྲས་པོར་བསྐྱེད། །རྒྱལ་བ་འགོག་པ་ནི་བྱང་ཆུབ་སེམས་ཀྱིས་བརླན་པར་མཛད་ཅིང་སྲིད་པའི་མྱུ་གུ་མངོན་པར་བསྐྱེད། །རྨད་དུ་བྱུང་བའི་མཆོད་པའི་ཡོ་བྱད་ནི་བསམ་གྱིས་མི་ཁྱབ་པའི་ལིང་ལོང་ཕྱད་པར་བྱུང་ངོ་། །རིག་འཛིན་གྱི་སེམས་དཔའ་ཐམས་ཅད་ནི། ཤེས་བྱའི་སྒྲིབ་བ་སྦྱངས་ནས་ཆོས་ཀྱི་སྐུའི་ནང་དུ་བརླན་པར་གྱུར་ཏོ། །དེ་ནས་སེམས་དཔའི་རྡོ་རྗེ་དེས་འགྲོ་བ་ཐམས་ཅད་ལ་དབང་བསྐུར་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དཔག་ཏུ་མེད་པའི་རྒྱལ་བ་རྣམས། །འཁོར་བའི་སེམས་ཅན་རྒྱུ་ལས་བྱུང་། །འཁོར་བའི་སེམས་ཅན་རྒྱུན་ཆད་ན། །སངས་རྒྱས་རྒྱུན་ཡང་འཆད་པར་འགྱུར། །འཁོར་བ་ཆོས་ཉིད་རང་བཞིན་དུ། །ཤེས་ནས་སྨྲ་བར་གང་བྱེད་པ། །རིག་པའི་ཡེ་ཤེས་རང་དབང་དེ། །ཆོས་ཀྱི་རྒྱལ་པོ་རྒྱལ་བའི་སྲས། །ཞེས་གསུངས་སོ། །དེ་ནས་སེམས་དཔའི་རྡོ་རྗེ་དམ་པ་དེས་ཆོས་ཐམས་ཅད་གྲུབ་པ་སྨོན་ལམ་གྱི་སྒོ་ནས་འཇུག་པར་མཁྱེན་ནས་སྨོན་གནས་ཆེན་
པོའི་ལམ་འདི་གསུངས་སོ། །འགྲོ་དྲུག་རྒྱལ་བའི་སྲས་པོ་འདི། །མ་རྟོགས་ལོག་པར་འཁྱམས་པ་རྣམས། །རྒྱལ་བའི་སྲས་སུ་བསྐྱེད་ནས་ནི། །འཁོར་བའི་རྒྱུན་རྣམས་གཅད་པར་བྱ། །ཉི་ཟླའི་ནང་དུ་བཞག་ནས་ནི། །བཅུ་དྲུག་ས་ལ་རྫོགས་པར་འགྱུར། །དེས་ན་རིགས་ལྡན་མཚན་བཟང་ལ། །དོན་དང་ལྡན་པའི་མཁས་པ་ཡིས། །སྦྱོར་བའི་ཡན་ལག་ཀུན་རྫོགས་ནས། །ཡུམ་གྱི་མཁའ་དབྱིངས་ཟླ་གམ་ལ། །གྲུབ་པའི་གཞལ་ཡས་ཁང་དུ་བསྐྱེད། །རྩིབས་བརྒྱད་ཟླ་གམ་དགུར་གསལ་ལ། །བྱང་ཆུབ་སེམས་ལས་ཕྱག་རྒྱའི་ཚོགས། །ལྷ་དགུ་གསལ་བའི་ཡེ་ཤེས་བསྐྱེད། །དེས་ནི་ཐམས་ཅད་རྫོགས་པར་འགྱུར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་གསང་སྦྱོར་སྒྲུབ་པའི་ལེའུ་སྟེ་བཅུ་པའོ།། །།དེ་ནས་སེམས་དཔའི་རྡོ་རྗེ་སྙིང་པོ་དེ་མི་འགྱུར་བ་གཏན་འཕོ་བ་མེད་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །རྣལ་འབྱོར་རིག་འཛིན་གང་ཞིག་རྣམས། །མི་འཕོ་བར་ནི་གནས་འདོད་པ། །ལོ་གཅིག་གམ་ནི་ཟླ་གཅིག་གམ། །དེ་བཞིན་ཞག་གི་རྣམ་གྲངས་ཀྱང་། །བཅྭ་ལྔའམ་ཡང་ན་བདུན་བར་དུ། །ཐོ་རངས་ཐུན་ཐའི་དང་པོའི་ཚེ། །རིག་འཛིན་རྣལ་འབྱོར་སྒྲུབ་པ་པོ། །ཤར་གྱི་ཕྱོགས་སུ་ཁ་བལྟས་ཏེ། །ཤར་ཕྱོགས་ནམ་མཁས་བསྡུས་པ་ཡི། །ལྷ་ཀླུ་གནོད་སྦྱིན་འཇིག་རྟེན་བཅས། །ཐམས་ཅད་ཁོང་དུ་བསྡུས་ནས་ཀྱང་། །དབུགས་དེ་སླར་ལ་མི་དབྱུང་བར། །རང་གི་ཁོང་དུ་བསྟིམ་པར་བྱ། །ཐ་མར་སྣ་ཡི་ནང་དུ་བསྲེ། །དེ་ལྟར་མང་པོར་བསྒྲུབས་པ་དང་། །དཔལ་ཆེ་གཟི་བརྗིད་ཐམས་ཅད་འཐོབ། །ཅེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་སྙིང་པོ་དེས་རྟེན་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །གང་ཞིག་རྟེན་ལ་གནས་འདོད་པ། །མཚན་མ་བཟང་པོའི་གནས་མཆོག་ཏུ། །ཐམས་ཅད་འབྱོར་བར་བྱས་ནས་ནི། །ས་ལས་བྱས་པའི་
སྟེགས་བུ་བཤམས། །དབུས་ཀྱི་པདྨ་འདབ་བརྒྱད་ལ། །ཟླ་གམ་དམར་པོ་སྒོ་བཞིར་ལྡན། །མཐའ་མ་རྡོ་རྗེ་ར་བས་བསྐོར། །དཔལ་ལྡན་ཚེ་ཡི་ཕྱག་རྒྱ་དགོད། །རིན་ཆེན་ལུགས་ཀྱི་བུམ་པ་ལ། །ཚེ་རྫས་རྒྱས་པར་བྱས་ནས་ནི། །མཚན་ལྡན་སྣོད་ཀྱིས་ཁ་དགབ་བྱ། །རྡོ་རྗེ་གཟུངས་ཀྱིས་བཏགས་ནས་ནི། །ཚེ་ཚད་མེད་པར་མངའ་གསོལ་ལ། །དབུས་སུ་དེ་བཞིན་གཞག་པར་བྱ། །རིན་ཆེན་བུམ་པ་བཞི་རྣམས་ལ། །གསང་བའི་བུ་མོ་བཞི་བཀོད་གཞག །ཡ་མཚན་བྱུང་བའི་བུམ་པ་ལ། །རིགས་བཞི་•སངས་རྒྱས་ཡབ་ཡུམ་དང་། །སོ་སོའི་འཁོར་གྱི་སེམས་དཔའ་རྣམས། །ཐབས་དང་ཤེས་རབ་སྡེབས་ནས་ནི། །ཕྱོགས་ཕྱོགས་གནས་སུ་ཚོམ་བུར་བྲི། །སྒོ་བཞིར་སྒོ་མ་བཞི་རྣམས་གཞག །སེམས་ཀྱི་ཕྱག་རྒྱ་ཀུན་བཀོད་ནས། །ཉི་ཟླ་ག་འུར་ཨ་ཡུ་ནི། །འཁྱིལ་འབར་འཚེར་ཞིང་གསལ་བར་བྱ། །ཨ་ཡུ་བྱང་ཆུབ་སེམས་སུ་ཞུ། །རྒྱལ་མཚན་མཆོག་ལྡན་རིན་ཆེན་གཏེར། །དབང་བསྐུར་དཔལ་ལྡན་མཛོད་ལྡན་མ། །གསང་བའི་བུ་མོ་ཚེ་གཏེར་འཛིན། །ཨ་ཡུ་ཡུམ་བཞིའི་ཐུགས་ཀར་འཕྲོས། །དེ་བཞིན་ཚོམ་བུ་རིམ་པར་བརྒྱུད། །རྡོ་རྗེ་ཚེ་མཆོག་ཀུན་བསྡུས་ནས། །དཀར་དམར་འོད་ཀྱིས་བདག་ལ་བསྟིམ། །དེ་ནས་རྡོ་རྗེ་ཚེ་ཕྲེང་བཟླས། །ནུབ་ཕྱོགས་ཚེ་ཡི་དབྱིངས་མཆོག་གི། །པདྨ་དབང་གི་ཞིང་ཁམས་སུ། །བྱམས་ལྡན་ཡེ་ཤེས་ཚེ་དཔག་མེད། །ཐུགས་ཀྱི་དཔལ་བེའུ་ཆེན་པོ་ནི། །གཉིས་གསལ་འོད་ཀྱི་གའུ་ན། །བྱང་ཆུབ་སེམས་ཀྱི་ཨ་ཡུ་འབར། །དམར་གསལ་འབར་བའི་ཚེ་མཆོག་དེ། །རིག་འཛིན་རྣལ་འབྱོར་རྣམས་ལ་འཕྲོ། །འཕྲོས་པ་དགུ་ལུང་དམ་པ་ཡིས། །ཙིཏྟའི་དབུགས་ལ་བཀྲག་ཏུ་བསླན། །ཚེ་ཉམས་རྒྱུ་དྲུག་ཀུན་སྤངས་ནས། །གཟི་བྱིན་སྐྱེ་བའི་རྒྱུ་ལྔ་བསྒོམ། །བྱང་ཆུབ་སེམས་ཀྱི་ཨ་ཡུ་དེ། །སྐྱེ་མེད་དབྱིངས་སུ་སྦས་ནས་ཀྱང་། །ཕྱག་རྒྱའི་ཐ་མར་བདུན་གྱིས་བཤད། །དང་པོ་སྐུ་གསུང་ཐུགས་ཀྱི་རྒྱ། །གཉིས་པ་གནོན་པའི་རྒྱ་གྲམ་འབར། །གསུམ་པ་རྟ་མཆོག་དཔལ་
གྱི་རྒྱ། །བཞི་པ་རིན་ཆེན་དཔལ་བེའུ་སྟེ། །ལྔ་པ་གསེར་གྱི་གུ་ཧྱའོ། །དྲུག་པ་ཟླ་གམ་དམར་པོ་ལ། །བདུན་པ་ཉི་ཟླ་ག་འུར་འབར། །ཚེ་ཡི་ངོ་བོ་རྒྱུད་གསུམ་པོ། །སྲོག་གི་ངོ་བོར་གཞལ་ཡས་ཁང་། །ལེ་བརྒན་ འབར་བའི་དཀྱིལ་འཁོར་དུ། །ཨ་ཡུ་དམར་པོ་འོད་འཕྲོ་བ། །འཆི་བ ་མེད་པའི་སྲོག་བཙུགས་ཏེ། །འགྱུར་བ་མེད་པའི་གཡུང་དྲུང་ཡིན། །ཆོས་ཉིད་དབྱིངས་སུ་ཚེ་སྦས་པས། །དུས་གསུམ་རྒྱལ་བ་དགྲར་ལངས་ཀྱང་། །དེ་ལ་གཟུང་ཞིང་བསྟན་དུ་མེད། །དེ་ནས་ཅི་བདེ་སྤྱད་པར་བྱ། །རྡོ་རྗེ་ཚེ་སྒྲུབ་པའོ། །དེ་ནས་སེམས་དཔའི་རྡོ་རྗེ་དམ་པ་དེ་རྡོ་རྗེ་ཁྲོ་བོ་ཚེ་ཀུན་དུ་འཕྲོག་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་འདི་སྐད་ཅེས་གསུངས་སོ། །གནས་འགྱུར་མཎྜལ་འབར་བྱས་ལ། །ཡེ་ཤེས་ཁྲོ་བོ་ འབར་བ ་ཡི། །ཐུགས་ཀྱི་དཔལ་བེའུའི་འོད་ཟེར་ལས། །དབང་གི་ལྷ་མོ་མང་པོ་འཕྲོས། །ཟ་མ་ཏོག་དང་བཅས་པ་ཡི། །ལྕགས་ཀྱུ་དཀར་དམར་ལག་ན་ཐོགས། །དེ་ཡིས་འགྲོ་དྲུག་ཐམས་ཅད་ཀྱི། །ཚེ་དང་གཟི་བྱིན་ཐམས་ཅད་འཕྲོགས། །ཟ་མ་ཏོག་ཏུ་བསྡུས་ནས་ཀྱང་། །ཚེ་ཡི་རིག་འཛིན་རྣམས་ལ་བསྟིམ། །ཇི་ལྟར་འདོད་པ་གོང་ལྟར་སྦྱར། །རྡོ་རྗེ་གཟི་མདངས་འཕྲོག་པ་ཞེས་བྱ་བའི་མདོའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་ཚེ་བསྒྲུབ་པའི་ལེའུ་ཞེས་བྱ་སྟེ་བཅུ་གཅིག་པའོ།། །།དེ་ནས་སེམས་དཔའི་རྡོ་རྗེ་དམ་པ་དེ་ཚོགས་ཐམས་ཅད་ཡོངས་སུ་རྫོགས་པ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །སྙོམས་པར་ཞུགས་ནས་དུར་ཁྲོད་གསང་བ་མཆོག་གི་དཀྱིལ་འཁོར་ཞེས་བྱ་བ་འདི་རྒྱ་ཆེར་བཤད་དོ། །དཀྱིལ་འཁོར་དཀྱིལ་འཁོར་ཐམས་ཅད་ཀྱི། །རྩ་བའི་དཀྱིལ་འཁོར་དམ་པ་འདི། །འཁོར་བ་ཐམས་ཅད་བསྒྲལ་བའི་ཕྱིར། །རྣལ་འབྱོར་ཅན་ལ་བཤད་པར་བྱ། །ཉོན་ཅིག་འདུས་པ་ཆེན་པོའི་ཚོགས། །སྒྲུབ་པའི་གནས་མཆོག་དམ་པ་དག །སྐྱོན་ཡོན་གཉིས་ཀྱི་བྱེ་བྲག་ལས། །ངེས་པར་བརྟགས་ཏེ་ཤེས་པ་ལས། །བླང་དོར་
གཉིས་སུ་སྦྱར་བར་བྱ། །རི་བོ་ཆེན་པོ་འདུས་པའི་རྩེ། །གངས་དཀར་ཤེལ་གྱི་འདབ་ཆེན་ནི། །སེང་ཕྲུག་འཁྲ་བའི་གནས་ཡིན་ཏེ། །ཐམས་ཅད་ཞི་བར་བྱེད་པའི་གནས། །རྡོ་རྗེ་བྲག་ཆེན་གཏམས་པའི་དཀྱིལ། །དགོན་པ་ཆེན་པོའི་ཕུག་ཆེན་ནི། །གཅན་ཆེན་འཁྲ་བའི་གནས་ཡིན་ཏེ། །མངོན་སྤྱོད་ཆེན་པོ་བསྒྲུབ་པའི་གནས། །དུར་ཁྲོད་ངམ་གྲོག་བཤུང་བའི་གནས། །སུམ་མདོ་གྲོག་གླེ་རྩུབ་པའི་རི། །དུར་གཅན་འཁྲ་བའི་གནས་ཡིན་ཏེ། །ཆགས་པ་བསྒྲུབ་པའི་གནས་ཡིན་ནོ། །ནགས་ཚལ་དྲ་བས་བཏིབས་པའི་ནང་། །ཤིན་ཏུ་བཙན་ཞིང་འཇིགས་པའི་ངོགས། །སྟག་གཟིག་འཁྲ་བའི་གནས་ཡིན་ཏེ། །འདོད་པ་སྒྲུབ་པའི་གནས་སུ་ཤིས། །ཆུ་མདོ་ཆུ་འཇིགས་རྒྱ་མཚོའི་གླིང་། །ཆུ་ཡི་ར་བས་ཀུན་བསྐོར་བ། །ཆུ་གཅན་འཁྲ་བའི་གནས་ཡིན་པས། །བྱ་བ་མེད་པའི་ལས་ལ་བྱའོ། །དེར་ནི་ཡོ་བྱད་ཕུན་སུམ་ཚོགས། །ཅི་འདོད་བལྟས་ཏེ་མ་ཐོགས་པར། །ཁ་ན་མ་ཐོ་བཅས་དང་བྲལ། །འཕྱོར་པས་ནན་ཏན་མཆོག་བསྐྱེད་པ། །ཁམས་ལས་གྱུར་པའི་ནད་ཆེན་རྣམས། །བཅུད་ཀྱི་མཆོག་གིས་བཟློག་བྱའི་ཕྱིར། །རྩི་འམ་བཅུ་དམ་ཐར་པ་རྣམས། །ཉེར་རྫོགས་སུ་ནི་གཞག་པར་བྱ། །འདུས་པའི་ནད་དང་དུས་ཀྱི་ནད། །དུག་ལས་གྱུར་པའི་ནད་རྣམས་ཀྱི། །རྐྱེན་གྱིས་བར་ཆད་འབྱུང་སྲིད་ཕྱིར། །སྨན་དང་མཁས་པས་བཅས་ཏེ་སྦྱར། །ཀ་པཱ་ལ་དང་ལྕང་ལོར་བཅས། །གའུ་ཆུང་ལ་སོགས་པའི་རྫས། །ཕྱག་རྒྱ་ཆེ་དང་ལྡན་བྱས་ལ། །དངོས་གྲུབ་འབྱུང་བའི་རྟེན་དུ་བྱ། །སྒྲུབ་མཆོག་གསང་བའི་རྣལ་འབྱོར་པ། །སྐྱོ་བའི་ཡིད་རྣམས་བསང་ཕྱིར་དང་། །གཏི་མུག་མུན་པ་གཞོམ་པའི་ཕྱིར། །དུང་དང་འཁར་རྔ་རྫ་རྔ་དང་། །ཅང་ཏེའུ་པི་བང་ཀོ་ཀི་ལ། །སྙན་པར་རྫོགས་པའི་རྫས་རྣམས་ཀུན། །སྣ་ཚོགས་འབྱུང་བའི་རོལ་མོ་སྟེ། །ཉེར་རྫོགས་སུ་ནི་འབྱོར་པར་བྱ། །ཤིན་ཏུ་གཏམས་པས་ཚོགས་ཆེན་ནི། །བླ་མ་རྡོ་རྗེ་འཁོར་ལོ་རྒྱལ། །གསང་བ་སྦྱོར་བའི་དུས་ཆེན་དུ། །སྒྲུབ་ཆེན་སྒྲུབ་པའི་རྣལ་
འབྱོར་རྣམས། །སྙིང་རྗེ་བྱམས་དང་དགའ་སྙོམས་དང་། །གདུང་བའི་བྱང་ཆུབ་སེམས་བསྐྱེད་དོ། །དེ་ཡང་ཤེས་དང་ཤེས་བྱ་ཡིས། །རྩལ་ཆེན་ཀུན་དུ་རྫོགས་པ་ནི། །རྡོ་རྗེ་སྙིང་པོ་འབྲུ་མཆོག་དག །ཤིན་ཏུ་གཏམས་པས་ཚོགས་པ་ནི། །བླ་མ་རྡོ་རྗེ་འཁོར་ལོ་རྒྱལ། །ཡོན་ཏན་མཆོག་གི་གཏེར་གྱུར་ཅིང་། །སྲིད་པས་ཞུས་ཀྱང་ཟད་མི་ཤེས། །རྐྱེན་ཐུབ་དབང་ལུང་རྫོགས་པས་གཟུང་། །རྡོ་རྗེ་ཀུན་གྱི་གཟུགས་འཛིན་པ། །ཀུན་སྡུད་ཀུན་འབྱུང་འཁྲུག་མེད་ཅིང་། །ནམ་མཁའི་ཁྱོན་ལྟར་ཀུན་ལ་ཁྱབ། །མ་ལྟར་བྱམས་པའི་ཡུམ་མཆོག་གཟུང་། །རྒྱུད་སྦྱངས་བརྟུལ་ཞུགས་མཆོག་འཆང་ཞིང་། །ཐོགས་མེད་ཐེ་ཚོམ་སོམ་ཉི་བྲལ། །འཛིན་ཆགས་མེད་ཅིང་བླང་དོར་མེད། །བརྟན་ལྡན་གཟུངས་ཐུབ་རྡོ་རྗེ་གིང་། །རྡོ་རྗེ་དྲོད་ཀྱི་དུས་འཛིན་ཅིང་། །ཚིག་གི་འཕེན་སྡུད་སྐབས་སུ་སྦྱོར། །ཡོན་ཏན་རླབས་ཀྱིས་འཕང་བཅད་དེ། །ལེགས་ཉེས་དམིགས་སུ་གལ་འཛུགས་སོ། །རྡོ་རྗེ་ཚིག་གི་གདངས་སྐད་ཅན། །རྡོ་རྗེ་མཐོང་བ་རྣམ་པར་དག །ངག་གི་དབང་ཕྱུག་ཚིག་ལ་མཁས། །ལས་ཀྱི་ཕྲེང་བ་རྫོགས་བྱེད་པའོ། །འདི་ལྟར་སྦྱར་བའི་དུས་ཆེན་ཡང་། །ངེས་པར་བརྟགས་ཏེ་མདོ་གཟུང་བ། །རིག་བྱེད་དག་གི་ཡན་ལག་ལས། །ཤེས་པར་བྱ་སྟེ་ལེགས་སྦྱར་བ། །བཀྲ་ཤིས་ལྷ་ཡི་ཉི་མ་དང་། །འབྱོར་དང་དུས་ཚིགས་བཟང་པོ་རྣམས། །འཇིག་རྟེན་མཚན་མའི་རྟོག་པ་སྟེ། །བརྟགས་ན་བཀྲ་ཤིས་མཚན་མ་འབྱུང་། །དུས་ཆ་བཞི་ཡི་དང་པོ་ནི། །མཆོག་ཉིད་མངོན་སྤྱོད་རོ་ལངས་ཡིན། །དབྱར་ཚེ་སྟོན་སྨན་ཤིས་པ་སྟེ། །ཞི་དང་རྒྱས་པ་དེ་བཞིན་སྦྱར། །དབང་དུ་བསྡུས་པའང་དབང་ཡིན་ཏེ། །བམ་ཆེན་གསང་བའི་དུས་སུ་བཤད། །ནོར་འདོད་རྫུ་འཕྲུལ་ཐམས་ཅད་ཀྱང་། །ཆ་བཞིར་ཁྱབ་པར་སྦྱར་བའོ། །བསྒྲུབ་པ་ཆེན་པོའི་རྫས་མཆོག་དག །གལ་ཏེ་དུས་ལ་བབ་གྱུར་ན། །དུས་འདི་དངོས་གྲུབ་དུས་ཆེན་ཏེ། །དུས་འདི་མཁས་པས་ཡོང་མི་བཅག །རྣལ་འབྱོར་ལས་ཀྱི་དང་པོ་རྣམས། །ཅི་སྟེ་འདོད་པའི་མཚན་མ་དག །ཡིད་འོང་འབྱུང་ཞིང་རྟགས་
རྙེད་པ། །དམ་ཚིག་གཟུངས་འདུ་དུས་ཆེན་ཡིན། །སྦྱངས་པས་རྩལ་གྱི་མཐར་ཕྱིན་ཅིང་། །ཤེས་བློའི་ཡོན་ཏན་ཚོགས་རྒྱས་པ། །འདི་དག་ཚད་ལ་བབ་པ་སྟེ། །དུས་ཀྱི་མཆོག་འདི་ཉེ་བར་བརྟག །འདི་ལྟར་རྒྱུ་བཞི་འབྱོར་པ་ལས། །འབྲས་བུའི་དངོས་པོར་གྲུབ་པ་སྟེ། །གྲུ་དང་མཉན་པ་མཁས་པ་ལ། །བསྟེན་པས་རིན་ཆེན་ལོན་པ་འདྲ། །ཇི་སྲིད་གནས་པའི་རྒྱ་མཚོ་རྣམས། །རང་བཞིན་མེད་པར་ཀུན་གཅིག་པའི། །བདག་མེད་ཕྱོགས་བྲལ་ལྷུན་གྱིས་གྲུབ། །གཅིག་ལས་རྣམ་གྲངས་ངང་གིས་མེད། །ཐ་སྙད་དག་པར་ཡོངས་ཆུད་ན། །ངེས་པའི་དོན་ཆེན་དེ་ཉིད་དེ། །ཐམས་ཅད་དག་པར་འགྱུར་བའོ། །བདག་དང་གཞན་དུ་མི་གཉིས་པས། །བདག་ཉིད་བདག་གི་རང་བཞིན་ཏེ། །སངས་རྒྱས་ཞེས་བྱ་གཞན་ན་མེད། །བདག་ཉིད་ལྷུན་གྲུབ་དབང་ཕྱུག་ཆེ། །གང་འདོད་པ་ཡི་དངོས་པོ་དག །ཇི་ལྟ་བ་བཞིན་གྲུབ་འགྱུར་ཏེ། །རྫ་མཁན་འཕང་ལོ་སྲུབ་པ་ལྟར། །གང་ལྟར་དམིགས་པ་དེ་ལྟར་འགྱུར། །འགྲོ་བའི་ཁམས་སུ་གཟི་ཆེ་ཞིང་། །འབྱུང་ཆེན་ལྔ་ལ་དབང་སྒྱུར་བའི། །ངོ་མཚར་རྩལ་གྱི་ཁྱད་པར་དག །གདོན་མི་ཟ་བར་འབྱུང་བ་ཡིན། །དེ་ལྟར་བརྩོན་པའི་བསྒྲུབ་པ་དག །རྫས་དང་ཡོ་བྱད་ལ་སོགས་ཏེ། །ཤེས་དང་ཡོན་ཏན་ཕུན་སུམ་ཚོགས། །གཞན་དུ་རེག་ལས་མེད་པ་ནི། །ཐམས་ཅད་ཚང་བར་རྫོགས་པས་ན། །ཕུན་སུམ་ཚོགས་ཞེས་དེ་ལ་བྱ། །གསང་ཆེན་བསྒྲུབ་པའི་ལས་འདི་དག །འཁོར་བའི་ལས་དང་མཐུན་སྤྱད་ཅིང་། །ཉོན་མོངས་ལྔ་ལྟར་སྤྱོད་སྣང་ཡང་། །འོད་ཀྱིས་མུན་པ་སྣང་འགྱུར་ལྟར། །སྐྱོན་ནི་ཡོན་ཏན་ཆེན་པོ་ལ། །གཡོ་མཚང་དངོས་གྲུབ་ཆེན་པོར་འགྱུར། །དེ་ལྟར་འཁོར་བའི་རྐ་བཟློག་པས། །མི་གནས་ཡེ་ཤེས་རྒྱ་མཚོར་འཁྱིལ། །གནས་རབ་བརྟག་པའི་གལ་ཆེན་ཡང་། །ནམ་མཁའ་འཁོར་ལོ་རྡོ་རྗེ་དང་། །རིན་ཆེན་ཟུར་བརྒྱད་པདྨའི་དབྱིངས། །རྒྱ་གྲམ་ལ་སོགས་འདྲ་བར་བརྟག །ས་གཞི་ཡང་ནི་དེ་བཞིན་ཏེ། །རི་བོ་བརྩེགས་དང་བཟུར་བ་དང་། །དེ་བཞིན་བསྒྲེང་དང་གཏམས་པའི་
ཚུལ། །འདྲ་བར་མཁས་པས་བརྟག་པར་བྱ། །དེ་ཡང་རིགས་ཀྱི་ཁྱད་པར་ནི། །ལྔ་ལ་སོགས་པ་སོ་སོ་ཡི། །གནས་གནས་དག་ཏུ་རྟོགས་ནས་ནི། །ནོར་བུ་རིན་ཆེན་དེ་བསྒྲུབ་བྱ། །སྐྱོན་གྱི་གནས་དག་སྤང་བ་ནི། །གཤིན་རྗེ་གདུག་པའི་གདུང་རྩེ་དང་། །མ་མོ་རྔམ་པའི་སྤར་ཤད་དང་། །སྲིན་མོ་ངུས་པའི་མཆི་རྗེས་དང་། །གནོད་སྦྱིན་ཁྲོ་བོའི་རྦབ་ཤུལ་དང་། །འབྱུང་པོ་རྐུན་པོ་འཇོལ་ལ་སོགས། །གནས་ཀྱི་སྐྱོན་རྣམས་དགྲ་དང་རྐུན། །མཁས་པས་ངེས་པར་སྤང་བར་བྱ། །ཁ་ན་མ་ཐོར་བཅས་པ་དང་། །ཉམས་པ་ལས་བྱུང་ཉེན་དང་བྲལ། །མ་དག་པ་ཡི་ཡོ་བྱད་རྣམས། །གདུག་ཅན་པང་དུ་འོངས་པ་ལྟར། །ཝ་ཡི་བརྟུལ་ཞུགས་ཆེན་པོ་ཡི། །བསྐལ་པས་བཤུགས་ཏེ་སྤང་བར་བྱ། །དགོན་པ་ཆེན་པོའི་ས་ཕྱོགས་སམ། །བཀྲ་ཤིས་མཚན་མ་འབྱུང་བ་དག །དགའ་བ་སྐྱེ་བར་འགྱུར་བ་ཡི། །ཡིད་འོང་གནས་སུ་འདུག་ནས་ནི། །རྩོད་པ་ཉེ་བར་ཞི་བྱའི་ཕྱིར། །སྙིང་རྗེ་ལྡན་པའི་རྣལ་འབྱོར་གྱིས། །བསྒྲུབ་པ་བརྣག་པ་མཐར་དབྱུང་ཕྱིར། །རྒྱལ་པོ་རྟེན་དང་འཁོར་བཅས་ལ། །བདེན་པས་བསྒོ་བའམ་ཡང་བསླང་བ། །དགོངས་ཤིག་ཐུགས་རྗེ་རྒྱལ་བའི་ལྷ། །ལྷ་ཀླུ་གནོད་སྦྱིན་སྡེ་དཔུང་བཅས། །གངས་རི་རྩེ་དང་རིན་ཆེན་རི། །ཀུན་དགའ་ལྡུམ་ར་སྐྱེད་མོས་ཚལ། །མཚོ་རྫིང་ལུ་མ་འབབ་ཆུའི་གནས། །འཇིག་རྟེན་འཇིག་རྟེན་ཐམས་ཅད་ཀྱི། །གང་དག་བདག་པོར་གྱུར་པ་རྣམས། །རྣལ་འབྱོར་དབང་ཕྱུག་བདག་ཉིད་ཀྱིས། །ས་འདི་ལྷུན་གྱིས་གྲུབ་བྱའི་ཕྱིར། །འཛམ་གླིང་གྲུབ་པའི་ས་སློང་ན། །འཁོར་དང་བཅས་པ་འདིར་འཁོད་ལ། །རིན་ཆེན་གཏེར་གྱི་ས་གཞི་བསླང་། །ཞེས་པས་རིན་ཆེན་སྣ་ཚོགས་ཀྱིས། །ས་ལ་གནས་པས་དེ་མགུ་བྱ། །དེས་ནི་བདག་གིར་དེ་འགྱུར་ཞིང་། །ཉེས་པ་དེ་དང་བྲལ་བ་ཡིན། །བྱང་ཆུབ་སྤྱོད་པ་གཡོ་བ་དང་། །བསོད་ནམས་དགའ་བ་སྐྱེད་པ་ལ། །ཤེས་ལྡན་རྫུ་འཕྲུལ་ཅན་གྱི་བུ། །མ་སྐྲག་ཕྲག་དོག་ཡོང་མ་སྐྱེ། །རྣལ་འབྱོར་མཆོག་གི་སྒྲུབ་པ་པོ། །བདུད་
འདུལ་ཕྱག་རྒྱ་རྫོགས་པའི་ཚེ། །རུ་དྲ་ཚོགས་ཀྱི་རྒོལ་བ་ལ། །སྐྱེས་བུ་ལས་ཀྱི་དོན་བགྲངས་ཏེ། །དོན་གྱི་དབང་པོའི་ཕྱིར་སྦྲན་པ། །རྒྱལ་བ་དབང་ཕྱུག་ཐམས་ཅད་ཀྱིས། །དོན་མཆོག་ཡང་དག་མཛད་པའི་ཚེ། །སྐྱེས་བུ་རྩལ་གྱི་ཁྱད་པར་ལས། །འདི་ཚེ་དཔང་མཁྱེན་དམིགས་འབྱེད་མ། །སྔོན་ཚེ་དཔལ་ཆེན་གར་དབང་གིས། །རུ་དྲ་སྡེ་བཞི་བསྒྲལ་ནས་ནི། །གསང་བ་བསྟན་པའི་རྒྱས་མཛད་ནས། །འགྲོ་དྲུག་ཐུགས་རྗེས་བསྒྲལ་བ་ལྟར། །རྣལ་འབྱོར་ས་ལ་སྦྱོར་ཚེ་འདིར། །ལྷ་མོས་མཁྱེན་པར་མཛད་ནས་ཀྱང་། །བདེ་ཆེན་ས་ལ་བགྲོད་པའི་ཚེ། །རུ་དྲའི་རྒོལ་བ་འབྱུང་བ་འམ། །སྤྱན་ལྡན་ཁྱོད་ཀྱིས་དབང་མཛོད་ཅིག །སྒྲུབ་པའི་ལས་མཆོག་ཁྱད་པར་གྱིས། །བརྩམ་པར་བྱ་བའི་ལས་རྣམས་ཀུན། །མཚན་མས་མཚན་མ་གཞོམ་བའི་ཕྱིར། །རོ་ལྔའི་མཚན་མ་བརྟག་པར་བྱ། །དགེ་བར་གྱུར་ན་དེར་གནས་བྱ། །གལ་ཏེ་ཤིས་པར་མ་གྱུར་ན། །སྐྱེས་བུ་ཐབས་ལ་མཁས་པ་ཡིས། །གནན་ནམ་སྤོ་བའི་ལས་ཀྱིས་སྦྱར། །དེར་ནི་བསོད་ནམས་གཏེར་ལྡན་ཕྱིར། །རིན་ཆེན་ལྔ་ལ་སོགས་པའི་རྫས། །ས་གཞི་གཏེར་ཆེན་རྒྱས་པར་བྱ། །བཀྲ་ཤིས་མཆོག་ཏུ་བསྔགས་པ་ཡིན། །ས་ཞག་སྤོས་ཆེན་རྣམ་ལྔའི་ཁུ། །བསྲེས་པས་ཀུན་དུ་གྲུ་བཞི་ནི། །མཎྜལ་རྒྱས་པའི་དབྱིབས་འདྲ་ལ། །ཏིང་འཛིན་ཕྱག་རྒྱ་སྔགས་ལྡན་པས། །མཚན་མའི་དངོས་པོ་ཀུན་སྦྱངས་ཏེ། །རྒྱལ་བ་བཞུགས་པའི་རྟེན་དུ་བྱ། །རྡོ་རྗེ་བྱིན་བརླབས་འབྱུང་གནས་དང་། །གནས་རྣམས་ཤིན་ཏུ་བརྟན་བྱའི་ཕྱིར། །མཆོག་གི་སྦྱོར་བ་དག་པ་ཡིས། །ས་གཞི་གཟུང་ཞིང་བྱིན་གྱིས་བརླབས། །དེ་དང་དེར་ནི་ས་སྦྱངས་ཏེ། །ཐིག་གིས་ཡུལ་བཅད་སྐབས་དག་ཏུ། །རྒྱལ་བ་བཞུགས་པའི་ཕོ་བྲང་དེར། །རྡོ་རྗེ་དྲག་པོའི་གིང་ཆེན་གྱིས། །ལྕེ་པོག་ནག་པོའི་དུད་པས་བདུག །རྒྱུན་མི་འཆད་དུ་བྱས་ནས་ནི། །ཁྲོ་བོ་དྲག་པོའི་སྔགས་ཟློས་ཤིང་། །རྡོ་རྗེ་ཁྲོ་བོའི་སྟབས་ཀྱིས་བསྐོར། །ཤེས་རབ་ཡུམ་གྱི་འཇོ་
ཚུལ་གྱི། །རྣམ་གཉིས་རྫས་ཀྱི་འདེ་གུ་དག །སྲིན་བལ་ཡེའུ་སྦྱར་བ་ཡིས། །ཀུན་དུ་ཟླ་བའི་ཐིག་ལེ་བྱ། །རྡོ་རྗེ་རྒྱལ་པོ་འཕགས་རྣམས་ཀྱིས། །སོ་སོའི་སྔགས་དང་རྩ་བའི་རྒྱ། །སོ་སོའི་སྟང་སྟབས་སྦྱར་ནས་ཀྱང་། །དེ་དག་གནས་སུ་བྱིན་གྱིས་རློབ། །གསང་བའི་དོན་ལ་ཞུགས་བྱའི་ཕྱིར། །གསང་བའི་ལས་ཀྱི་སྔོན་ལོགས་སུ། །བསྟན་པ་སྐྱོང་བའི་མགོན་པོ་ལ། །སྦྱིན་མཆོད་བསྲུང་བའི་ལས་ཆེན་བཅོལ། །གཞལ་ཡས་གནས་ཀྱི་ཕྱི་རོལ་དུ། །མགོན་པོ་གནས་པའི་རྟེན་གཞི་དག །རིན་ཆེན་འབྲས་སམ་འབྱུང་ཁུངས་སམ། །ཤིང་ངམ་བ་སོ་དེ་དག་ལས། །ལུགས་སམ་ཕྱག་རྒྱའི་གཟུགས་བྱས་ཏེ། །མགོན་པོ་བཞི་རུ་མངའ་གསོལ་ཏེ། །གནས་ཀྱི་སྒོ་སྲུང་སོ་པར་བྱ། །རི་རབ་གླིང་བཞིའི་ཕྱོགས་ཕྱོགས་ནས། །རྡོ་རྗེ་གསང་བདག་དབང་གི་མཐུས། །འཇིག་རྟེན་སྐྱོང་བའི་ཐ་ཚིག་ཅན། །མཐུ་ཆེན་མགོན་པོ་སྡེ་བཞི་རྣམས། །སོ་སོའི་བགེགས་རིས་འདུལ་ལ་མཁས། །ཆོས་སྐྱོང་ལོངས་སྤྱོད་རྫོགས་པའི་སྐུ། །ཕྲིན་ལས་རྣམ་བཞི་མཐར་ཕྱིན་པས། །རིགས་བཞི་ཁ་དོག་སོ་སོར་གསལ། །རང་རྟགས་ལྷ་ཡི་མཚན་མ་ཐོགས། །ཕྱི་འཁོར་སྐྱོང་བའི་རྫུ་འཕྲུལ་ཅན། །བདག་ཅག་རྣལ་འབྱོར་རྩལ་སྦྱོང་གིས། །རང་རང་འཁོར་རྣམས་ཐུབ་པར་མཛོད། །བསྒྲུབ་པའི་རྩལ་འདི་མཐར་དབྱུང་ཞིང་། །རྐྱེན་གྱི་བར་ཆད་བསལ་བ་དང་། །གསང་བའི་མན་ངག་སྤྱད་པའི་ཕྱིར། །འཇུག་སྲིད་དམ་སྲི་གནོན་པར་བྱ། །དུར་ཁྲོད་ཆེན་པོའི་གནས་དག་ཏུ། །རྣལ་འབྱོར་གསང་བའི་གནས་དག་ཏུ། །དངོས་གྲུབ་ཆུ་ལ་རྡུལ་འཇུག་ཅིང་། །ཁྲོ་བོ་ཧཱུྃ་ཆེན་ཀུན་འདུས་ནས། །གསད་ཅིང་གནོན་པའི་ལས་བྱ་སྟེ། །རི་རབ་ཆེན་པོའི་རྨང་དུ་གཏང་། །ཡ་མ་ར་ཛའི་ཟས་སུ་སྦྱིན། །ཆུ་སྲིན་འབར་བའི་ཁ་རུ་བརྫང་། །འཁོར་ལོ་འབར་བའི་ཕྱག་རྒྱས་གནོན། །བདུན་རྒྱུད་རིགས་ནི་བརླག་གྱུར་ནས། །ནམས་ཀྱང་ལྡང་བར་མི་ནུས་ཏེ། །བྱང་ཆུབ་སེམས་ནི་སྐྱེས་ན་བཏང་། །བཛྲ་མུཥྚི་བྃ། །མ་མ་བ་ཤྃ་ཀུ་རུ་ནན། །སུྃ་བྷ་ནི་སུྃ་བྷཱ་
ནཱྃ། །དེ་ལྟར་དྲག་པོའི་སྦྱོར་བ་ཡིས། །སྒོ་ནས་ཕྱི་རོལ་བར་ཁང་དུ། །མཁའ་འདྲའི་ཁུང་བུ་བྱས་ནས་ནི། །དུག་དང་རྩུབ་པའི་ཕྱེ་མ་དང་། །ཁྲག་སྣ་ཚོགས་དང་མི་རོ་ཡིས། །ཤིན་ཏུ་བསུབ་ཅིང་གནོན་པར་བྱ། །དེ་ནས་རྡོ་རྗེ་ནང་དག་ཏུ། །སེང་གེའི་ལྟ་བས་བལྟས་ནས་ནི། །རྡོ་རྗེ་གོམ་པས་ཕྱོགས་ནས་ནི། །ཁྲོ་མིག་འབར་བས་ཕྱིར་བལྟས་ཏེ། །འགྱིང་བག་ཚུལ་དུ་བརྗིད་པ་ཡིས། །འབར་བའི་རྡོ་རྗེ་སྤར་ནས་ནི། །ཕྱི་ནང་རྡུལ་ཆེན་བསལ་བར་བྱ། །ཧཱུྃ་སྟོང་གསུམ་སྟོང་གི་འཇིག་རྟེན་ན། །སྐྱེ་འགྲོ་རྩི་ཤིང་ནགས་ཚལ་དང་། །ཡོད་མཐོང་སྣང་གྲགས་ཇི་སྙེད་པ། །ཀུན་ཀྱང་ འབར་བ ་ཁྲག་འཐུང་སྟེ། །རྔམ་ཆེན་གཏུམ་ཐུང་ཤེ་དག་འབར། །དུར་ཁྲོད་དཀྱིལ་འཁོར་ལྷུན་གྱིས་གྲུབ། །རཀྵ་ཡཀྵ་ཧེ་རུ་ཀ །རཀྟ་ཀྲོ་དྷི་ཛྭ་ལ་ཁ། །ཧ་ལ་ཧ་ལ་ཏིཥྛ་ཕཊ། ཞེས་པས་ཁྲོ་བོ་རོལ་པ་ཡི། །སྟབས་དང་མ་མོའི་རྔམ་ཚུལ་དང་། །ཕྲ་མེན་ལྷགས་པའི་རྔམ་སྟབས་ཀྱིས། །འབར་བའི་དཀྱིལ་འཁོར་བསྐོར་བར་བྱ། །རྡོ་རྗེ་དཀྲིགས་པའི་ཕྲེང་བ་དང་། །ཐོ་བ་ལྕགས་ཀྱུ་ འབར་བ ་དང་། །འཁོར་ལོ་རལ་གྲི་ལ་སོགས་རྫས། །ཀུན་གྱི་ཕྱག་རྒྱ་མཚན་མས་བསྐོར། །དེ་ལས་འབར་བའི་ཕྱག་རྒྱ་དང་། །མིག་ལས་འབར་བའི་མེ་མཆེད་པས། །མེ་འོད་ འབར་བའི་ཕྲེང་བ ་འདིས། །དམིགས་སམ་དངོས་སུ་སྦྱར་ནས་ཀྱང་། །འབར་བ་དྲག་པོའི་ཡི་གེ་ལས། །སྲེག་པའི་དཔལ་ཆེན་གུར་དུ་གཏམས། །ཧཱུྃ་རྃ་རྡོ་རྗེ་མེ་ཡི་རི། །ལྷུན་པོ་འབར་བའི་རྩེ་བརྒྱད་ལ། །འབར་བའི་ལྷ་བརྒྱད་བསྒྱེལ་ནས་ཀྱང་། །དབང་ཆེན་རྡོ་རྗེ་བཀའ་སྡོད་གནས། །ཤིན་ཏུ་མི་བཟད་ འབར་བ ་ཡིས། །གཏུམ་ཆེན་ཧ་ལ་རྔམ་པའི་གཟུགས། །ལྷ་ཆེན་ཁྱབ་འཇུག་ལྤགས་བཤུས་ནས། །ཞིང་ཆེན་གཡང་གཞིའི་ན་བཟའ་བསྣམས། །གཤིན་རྗེ་མ་ཏྲཾ་ འབར་བ ་ཡི། །རོ་དབྱུག་ཆེན་པོ་ཕྱག་ན་འཕྱར། །ཕྲ་མེན་དགུ་ཁྲི་མང་པོ་དག །འབར་བའི་ཚོགས་ནི་གཏིབས་ཐག་བཅད། །གང་ལ་ཅིས་འདུལ་དེར་སྟོན་པ། །ཙིཏྟ་འབར་བའི་མེ་ཕྲེང་གིས། །དོ་ཤལ་མགུར་ཆུ་ཕྲེང་བས་
སྦྲེངས། །བསྐལ་བའི་མེ་དཔུང་འབར་བའི་ཀློང་། །སྲིད་པའི་རྩེ་མོར་འཁྱིལ་ཅིང་འཕྲོ། །ནམ་མཁའི་ཁམས་ཀུན་མེ་དཔུང་གཏིབས། །རྡོ་རྗེ་འཁོར་ལོ་མེ་ལྕེ་འཕྲོ། །དུར་ཁྲོད་དགོན་པའི་ས་ཕྱོགས་དག །མེ་ཡི་རི་བོ་ འབར་བ ་ལ། །མེ་ཡི་ཡི་དགས་མ་དག་ལས། །གང་ཡང་གནས་པར་མི་ཕོད་པ། །སྟེང་གི་མེ་ལྕེ་ འབར་བ ་ནི། །འོག་གི་ཕྱོགས་སུ་འཕྲོ་ཞིང་འཁྲུག །འོག་གི་མེ་ལྕེ་ འབར་བ ་ཡང་། །གྱེལ་དུ་འཁྱིལ་ཞིང་སྟེང་དུ་ཐལ། །མེ་ལྕེ་དགུ་ཕྲེང་ འབར་བ ་དག །འུར་ཆེམ་འཆད་པས་འཐབ་ཅིང་འཁྲུག །དུར་ཁྲོད་མེ་ནི་སྨུག་ཅིང་འབར། །ཞེ་སྡང་འཇོམས་པས་མཐིང་ནག་འཚུབ། །ང་རྒྱལ་སྲེག་པས་སེར་ནག་འཕྲོ། །འདོད་ཆགས་མཉམ་པས་དམར་ནག་འཕྲོ། །ཕྲག་དོག་སྲེག་པས་ལྗང་ནག་འཁྱིལ། །གཏི་མུག་སེལ་བས་སྨུག་ནག་འཁྱིལ། །འབར་ཆེན་ཀློང་གི་འཁོར་ལོས་གཏམས། །ཛྭ་ལ་མཎྜ་ལ་ཧ་ལ་ཧ་ལ་རྃ། །མེའི་རི་ལག་ཆུའི་ཕྱག་རྒྱ་ཡིས། །གནས་སམ་དཀྱིལ་འཁོར་བསྐོར་བར་བྱ། །ཆོས་ཉིད་བདལ་བའི་ནམ་མཁའ་ལ། །ཡེ་ཤེས་ལྔ་ཡི་འབྱུང་ཆེན་བརྩེགས། །ཀུན་གཞི་བདལ་བའི་ནམ་མཁའ་ལ། །བསྐྱེད་མའི་འབྱུང་ཆེན་རྣམ་ལྔ་བརྩེགས། །བྲུྃ་ལས་རིན་ཆེན་འབར་བའི་གཞལ། །མཐའ་དང་དབུས་མེད་ཀུན་དུ་ཁྱབ། །ཏ་ལའི་བསྐྱེད་ཅིང་གསེར་ཅོང་དྲིལ། །ཟླ་གམ་དམར་པོ་དབང་གི་རྒྱ། །བྲུྃ་ཁྃ་ཏྲྃ་ཁ་ལ་ཏི་བྲུྃ། །ཞེས་པས་རྣམ་ལྔའི་བྱུག་པ་ཡིས། །གཏོར་ཞིང་ཀུན་དུ་བྱུག་པར་བྱའོ། །སྒྲུབ་མཆོག་སྐྱོང་བའི་རྣལ་འབྱོར་རྣམས། །རྡོ་རྗེ་ཚིག་གིས་བཏབ་ནས་ནི། །རྒྱལ་སྲས་རིག་འཛིན་བཀའ་འཁོར་ལོ། །འབྲས་བུར་རེད་ཕྱིར་བྱིན་གྱིས་རློབ། །རྡོ་རྗེ་རྒྱལ་དབང་ཆེན་པོ་དེས། །སྒྲིབ་པ་སྲེག་པའི་ཡི་གེ་ནི། །ཕྲེང་བར་བྱས་ཏེ་གནས་སུ་འཕྲོ། །ཉི་མའི་དཀྱིལ་འཁོར་ལ་བཞག་སྟེ། །རིག་འཛིན་ཕོ་མོའི་མཚན་མས་གདབ། །རྣམ་ལྔའི་བྱུག་པས་ཀུན་ལ་གཏོར། །རྟགས་ཀྱི་ཕྱག་རྒྱ་ལག་ཏུ་སྦྱིན། །རྣལ་འབྱོར་ཆེན་པོའི་ལུགས་སུ་སྤྱད། །འཇིག་རྟེན་སྐྱོང་ཚུལ་ཐམས་ཅད་ནི། །སྒྱུ་མ་ཡིན་ཕྱིར་ཤིན་ཏུ་ཡང་། །
འཇིག་རྟེན་འདས་པའི་སྤྱོད་ཚུལ་དག །ཇི་ལྟར་འབྱུང་བ་དེ་ལྟར་སྤྱད། །ཨེ་མ་དུར་ཁྲོད་གསང་བ་ཡི། །རྨད་བྱུང་ཞིང་ཁམས་དགའ་ཚལ་འདིར། །སྐལ་ལྡན་དབང་ཕྱུག་རྒྱལ་བའི་སྲས། །འདུས་པས་ཚོགས་པའི་རིག་འཛིན་རྣམས། །ཨེ་མའོ་དགའ་མཆོག་བདེ་ཆེན་གྲོགས། །དམ་ཚིག་སྲོག་གི་ལུ་གུ་རྒྱུད། །ཐབས་དང་ཤེས་རབ་འབྲེལ་པ་ཡིས། །སྤྲུལ་པའི་གཤོག་སྤྲུགས་གྲྭ་རྒྱས་པས། །ཚོགས་གཉིས་རྩལ་གྱིས་བརླབས་སྤར་ནས། །ཆོས་ཉིད་མཁའ་ལ་ལྡིང་བར་རིགས། །ཨ་ཡྃ་ཛ་ལྃ་ཁྃ་ལྷན། །དེ་རིང་ཕན་ཅད་རྒྱལ་བའི་སྲས། །དབང་ཕྱུག་ཡིན་པས་ཅི་བདེར་སྤྱོད། །རྣལ་འབྱོར་ལོངས་སྤྱོད་བསྐྱེད་པ་དང་། །དུག་རྣམས་བདུད་རྩིར་འགྱུར་བ་ཡི། །མཱྃ་ལས་སྐྱེས་པའི་ཡེ་ཤེས་ཀྱིས། །ཟངས་ཀྱི་དངོས་པོ་འཇུ་འདུལ་བྱ། །དམ་རྫས་ཡོ་བྱད་ལོངས་སྤྱོད་རྣམས། །གོང་ནས་ཆ་གསུམ་སོ་སོ་ནས། །ཤན་མ་འདྲེས་པར་སྟ་གོན་བྱ། །ཕྱི་ཡི་ཆ་ལ་འཇུག་པ་ཡི། །མཆོད་སྦྱིན་སྤེལ་བའི་ཡོ་བྱད་བྱ། །དེ་གཉིས་གཉིས་པའི་ཆ་དག་ལས། །མཇུག་གི་རྒྱལ་ཆོས་ལོངས་སྤྱོད་བྱ། །རྨད་འབྱུང་ནང་གི་ཆ་དག་ནི། །ཐམས་ཅད་གཅིག་ཏུ་བྱས་ནས་ནི། །རས་སམ་ཤིང་ཁྱོན་དག་ཏུ་ནི། །བསྡུས་ཏེ་བསྒྲུབ་པའི་རྫས་ཀྱིས་དགབ། །བྱུག་པ་ཆེན་པོས་དེ་ལ་གཏོར། །ལྕེ་པོག་ནག་པོའི་དུད་པས་བདུག །རྡོ་རྗེ་གར་གྱི་ཕྱག་རྒྱ་དང་། །འབར་བའི་ལྟ་བས་བརྗིད་པར་བྱ། །ཚམ་ངམ་ཆེན་པོའི་སྟབས་ཀྱིས་བསྐོར། །སྣ་ཚོགས་བསུར་གྱི་དྲི་ཆེན་གདོན། །དེ་ནས་རྒྱལ་པོའི་བྱིན་བརླབས་ཀྱིས། །ཡོ་བྱད་དེ་དག་བདུད་རྩི་ལྔ། །དམ་རྫས་ངོ་བོར་བསྡུས་ནས་ནི། །དེ་ལ་འབྲུ་ལྔའི་འཕྲོ་འདུ་ལས། །ཞུ་ནས་ཕྱག་མཚན་རྣམ་ལྔར་འབར། །དག་པའི་བདུད་རྩི་ཆེན་པོར་ཞུ། །ཤེས་རབ་ལྷ་མོ་རིག་འཛིན་མ། །བཞི་འམ་ཡང་ན་རྣམ་པ་བརྒྱད། །རྫས་སམ་ཡོ་བྱད་རང་བཞིན་པས། །ཟས་མཆོག་གར་གྱིས་སྤྱིར་བླངས་ཏེ། །ལོངས་སྤྱོད་སྤེལ་བའི་དབྱངས་འདིས་བསྟན། །བདག་ཅག་རིག་
འཛིན་ཤེས་རབ་མ། །རྒྱལ་སྲས་ལྷ་ཡི་དངོས་གྲུབ་འཛིན། །དགྱེས་པས་ཚིམ་པའི་ལོངས་སྤྱོད་དག །ཇི་ལྟར་ཡིད་བཞིན་ནོར་བུ་འམ། །དཔག་བསམ་ཤིང་ལྗོན་འདོད་འཇོའི་བ། །མ་རྨོས་ལོ་ཏོག་རྒྱས་པ་ལྟར། །རྣལ་འབྱོར་ལོངས་སྤྱོད་ཆེན་པོ་དག །ནམ་མཁའི་ཁམས་སུ་གཏིབས་ནས་ཀྱང་། །རྡོ་རྗེ་དགྱེས་ཚོགས་ཀུན་འདུས་ནས། །སྐལ་ལྡན་རྣམས་ཀྱིས་རབ་སྤྲུལ་ཅིག །རྡོ་རྗེ་གར་གྱི་དབང་སྒྱུར་ནས། །སྒེག་པས་ལྷ་མོ་འཇོ་ཚུལ་དག །འདུད་ཅིང་སྡོད་པའི་ཚུལ་གྱིས་ནི། །རོལ་མོའི་ཚོགས་ཀྱིས་དགའ་བ་སྐྱེད། །ཨོཾ་ཤྲཱི་བཛྲ་ལཱ་སྱཻ་ཧཱུྃ་ཧཱུྃ། བཛྲ་མཱ་ལཻ་ཏྲཱྃ་ཏྲཱཾ། བཛྲ་གཱི་ཏི་ཧྲཱིཿཧྲཱིཿ བཛྲ་ནྲྀ་ཏྱ་ཨཿཨཿ། རྡོ་རྗེ་ཀརྨའི་ཐབས་མཆོག་གིས། །རྡོ་རྗེ་གླུ་འདིས་གཟི་བྱིན་བསྐྱེད། །རྡོ་རྗེ་བདུད་རྩི་ལོངས་སྤྱོད་འདི། །རྩི་མཆོག་བཅུད་ཀྱི་སྙིང་པོ་སྟེ། །གཟི་མདངས་རྒྱས་པར་བྱེད་པའི་མཆོག །བཀྲག་འཛིན་གཟུགས་མཆོག་དྲན་པའི་དཔལ། །རྡོ་རྗེ་ཅན་གྱི་བྱིན་སྟོབས་ཀྱིས། །སྐལ་པ་ཅན་གྱི་ཟས་སུ་བྱ། །སྐལ་མེད་རྣམས་ཀྱི་དུག་ཏུ་འགྱུར། །དཔེར་ན་སྦྲུལ་ལ་འོ་མ་བཞིན། །ས་མ་ཡ་ཛཿ ཀུ་སུ་ཙ་མ་མ། །སྨུག་ཟིལ་ལྷ་མོ་མཉེན་གསལ་མ། །རླན་རྣམས་བདུད་རྩིར་སྒྱུར་བྱེད་མ། །བདུད་རྩི་ཆུ་རྒྱུན་དངོས་གྲུབ་འཛིན། །རང་གཉེར་ལས་སྐལ་ཆུ་རྒྱུན་འབེབས། །ཤིང་ལོ་འདབ་ལས་བདུད་རྩིར་སྒྱུར། །འབྲུ་ཐོག་སྣ་ཚོགས་དངོས་གྲུབ་འཛིན། །རང་གཉེར་ལས་སྐལ་འབྲས་བུར་སྐྱེད། །ལྷ་མོ་སྲ་བརྟན་དབང་སྒྱུར་མ། །ཁུ་བ་བཅུད་ལས་བདུད་རྩིར་འགྱུར། །བདུད་རྩི་ཞུན་ཆེན་དངོས་གྲུབ་འཛིན། །རང་གཉེར་ལས་སྐལ་བརྟན་པར་བྱེད། །རྡོ་རྗེ་ལྷ་མོ་ཤེལ་མདོག་མ། །ཉི་ཟེར་བདུད་རྩིར་སྒྱུར་བྱེད་མ། །གསལ་བ་མདངས་ཀྱི་དངོས་གྲུབ་འཛིན། །རང་གཉེར་ལས་སྐལ་གཟི་བྱིན་སྐྱེད། །ལྷ་མོ་ཁྲོ་གཉེར་སྔོ་བསངས་མ། །དུར་ཁྲོད་རྫས་ལས་བདུད་རྩིར་སྒྱུར། །ཤ་ཆེན་སྣ་ཚོགས་དངོས་གྲུབ་འཛིན། །རང་གཉེར་ལས་སྐལ་བྱིན་འབེབས་མ། །རྩི་ཡི་ལྷ་མོ་བློ་གྲོས་མ། །རྩི་ཐོག་བདུད་རྩིར་སྒྱུར་བྱེད་མ། །རྩི་མཆོག་ཀུན་གྱི་དངོས་གྲུབ་འཛིན། །
རང་གཉེར་ལས་སྐལ་ཚིམ་བྱེད་མ། །སྨན་གྱི་ལྷ་མོ་ནོར་གྱི་རྒྱུན། །དུག་རྣམས་བདུད་རྩིར་སྒྱུར་བྱེད་མ། །བདུད་རྩི་སྨན་གྱི་དངོས་གྲུབ་འཛིན། །རང་གཉེར་ལས་སྐལ་འདི་ཀུན་ཡང་། །རྡོ་རྗེ་གླུ་ཡི་བརྟེན་ནས་ནི། །རྣལ་འབྱོར་ཆེན་པོའི་ཡོ་བྱད་དུ། །རོལ་མོས་དགའ་སྟོན་ལོངས་སྤྱོད་བྱ། །དེ་ནས་ལས་ཀྱི་གནས་སྐབས་འདིར། །ཕྱི་ནང་མཐུན་འཇུག་བཀའ་སྡོད་པའི། །གཤིན་རྗེ་ཆོས་ཀྱི་ཕྱག་རྒྱ་ཡིས། །བྲན་གྱི་བྱ་བར་དབང་བསྡུས་ནས། །ཕྱི་མཚམས་བསྲུང་བར་དབང་བསྐུར་ཏེ། །འབུར་རམ་ལུགས་སམ་རི་མོའམ། །ཅི་འདྲ་བར་ནི་བྱས་ནས་ཀྱང་། །ཕྱི་ཁྱམས་སྒོ་ཡི་ཕྱི་རོལ་དུ། །མ་ཧེ་ཁྲི་ལ་བཞག་ནས་ནི། །མཐུན་པའི་རྫས་ཀྱིས་མགུ་བྱས་ལ། །དེ་ཚེ་འདི་ཡིས་བསྐོར་བར་བྱ། །གསང་ཆེན་ལྷུན་གྲུབ་ཕོ་བྲང་ནས། །ལས་ཀྱི་གཤིན་རྗེའི་ཕོ་བྲང་ནས། །བཅོམ་ལྡན་ཆོས་རྗེས་བཀའ་སྩལ་པ། །དེ་བཞིན་རིག་འཛིན་སྒྲུབ་པ་པོས། །བཀའ་གསང་གཞུང་ཆེན་འདི་སྒྲུབ་ཅིང་། །ཡང་དག་དོན་ལ་ངེས་འཇུག་ན། །འདི་དག་ནོར་བུ་རིན་ཆེན་ཏེ། །འདི་ལ་རྟོད་ཅིང་བར་གཅོད་པ། །ལྷ་སྲིན་སྡེ་བརྒྱད་འབྱུང་པོ་ཀུན། །ཁྱོད་ཀྱི་འཁོར་དང་གཡོག་ཡིན་གྱིས། །རྣམ་པར་སྨིན་པའི་ཆོས་ཤོད་ལ། །གསང་བ་མཆོག་གི་རྣལ་འབྱོར་པས། །བླ་མེད་འབྲས་བུར་མ་གྱུར་ཚེར། །ས་འདི་ཡན་ཆད་མ་གཏང་བར། །དཔལ་ཆེན་མི་ཕམ་བཀའ་མ་འདའ། །བདག་ཅག་ཡེ་ནས་གཉིས་མེད་དེ། །དེ་ཙམ་དོན་གྱི་དབྱིངས་སུ་གཅིག །ཕྱི་རོལ་སྐྱོང་བའི་མུ་རན་ལ། །རྡོ་རྗེ་ཡལ་དམ་ཐུབ་པར་མཛོད། །བཛྲ་ཡ་མ་རཱ་ཛ་ས་མ་ཡ་སྟྭྃ། །ཞེས་པས་གཤིན་རྗེ་མནས་བསྒགས་ཏེ། །གལ་ཏེ་འདས་ན་ཁོ་བདག་འཚིག །བརྩམ་པར་བྱ་བའི་ལས་ཆེན་པོ། །དངོས་གྲུབ་འབྱུང་བར་བྱེད་པའི་རྟེན། །ཕྱག་རྒྱ་ཆེ་དང་གཟུགས་མཆོག་གི། །སྟེགས་བུ་ལེགས་པར་སྦྱངས་ན་འགྲུབ། །མཚོན་པས་ཁྲིད་པར་བྱེད་པ་ཡི། །རྡུལ་ཚོན་འདུས་བྱས་རྒྱུ་རྣམས་ལ། །བརྙན་མའི་དཀྱིལ་འཁོར་བཤད་བགྱི་བ། །སོ་སོར་བརྟགས་ཏེ་བཤད་བགྱི་བ། །བརྟན་ཞིང་ངོས་འཇམ་ཁང་བུ་
ལ། །འབུར་ཁུང་ཁོད་སྙོམས་འཕང་མཐོ་བའི། །ཁ་དོག་ལྔ་ཡི་གཟུགས་བྱས་ནས། །དེས་ནི་མཚན་མའི་དངོས་གྲུབ་སྟེར། །ཤིང་ཤུན་རས་སམ་དུར་ཁྲོད་ཀྱི། །ཞིང་ཆེན་རས་ལ་ཁ་དོག་ལྔས། །ཕྱག་རྒྱ་ འབར་བའི་གཟུགས་བྲིས་ན། །དེ་ཡང་མཚན་མ་འབྱུང་བའི་རྟེན། །རྡོ་དང་ཤེལ་རྡོ་ལ་སོགས་པ། །དུང་ངམ་བ ་སོའི་རྒྱུ་ལས་ནི། །མཁས་པས་འབུར་དུ་བཏོད་བྱས་ནས། །མཚན་མ་འབྱུང་བའི་རྟེན་དུ་འགྱུར། །གསེར་དངུལ་རིན་ཆེན་ལ་སོགས་པ། །ཟངས་ལྕགས་ཁར་བའི་རྒྱུ་དག་ལས། །མཁན་གྱིས་བླུགས་ཏེ་མ་ཉམས་ན། །དེ་ཡང་མཚན་མའི་རྟེན་དུ་འགྱུར། །བླ་ཀྵ་བྱང་ཆུབ་ཤིང་ལ་སོགས། །རྒྱུད་ཤིང་ཡལ་ག་མཉེན་པ་ལས། །ཕྱག་རྒྱའི་གཟུགས་དེ་ལེགས་སྦྱར་ན། །དེ་ཡང་རྟེན་དུ་མཁས་པས་བཤད། །མཉེན་ཅིང་སྦྱིན་པའི་མཆོག་རྣམས་ལ། །བཞིན་དང་འདྲིལ་ཁུགས་ལེགས་སྦྱར་ཏེ། །ཕྱག་རྒྱ་ཆེན་པོའི་གཟུགས་བྱས་ན། །དེ་ཡང་རྟེན་པའི་འོས་སུ་འགྱུར། །དེ་ལ་སོགས་པའི་རྒྱུ་རྣམས་ལ། །ཡི་གེའམ་ཡང་ན་མཚན་རྟགས་སམ། །མིང་ངམ་ཐིག་ལེར་རྫས་ལ་བྲི། །བསྒྲུབས་ན་མཚན་མའི་རྟེན་དུ་འགྱུར། །དེ་ལས་རེ་ཞིག་འདིར་བཤད་པ། །སྟེགས་བུ་ལ་བརྟེན་མཚན་མ་དག །བསྒྲུབ་པའི་དོན་དུ་བརྟག་གཟུང་བ། །བརྩམ་པའི་ཐབས་ནི་འདི་ལྟ་སྟེ། །གོང་དུ་སྨོས་པའི་རྒྱུ་རྣམས་ལ། །སྟེགས་བུ་མཛེས་ཤིང་མཉམ་བྱས་ཏེ། །ཀུན་དུ་གྲུ་བཞི་ཆ་མཉམ་ལ། །བདུད་རྩི་ལྔ་ཡི་སྦྱོར་བ་ཡིས། །མེ་ལོང་ལྟ་བུར་སྙིང་པོར་བྱ། །སྣང་བྱུང་ཡང་དག་བྱིན་བརླབས་ཅན། །ཡེ་ཤེས་རང་བྱུང་གྲུབ་པའི་རྫས། །བཀའ་གསང་རྨད་བྱུང་ཕོ་བྲང་དུ། །དུར་ཁྲོད་རྫས་ལྔས་སྐྱང་ནུལ་བྱ། །རྡོ་རྗེ་སྲད་བུའི་ཐིག་གདབ་པ། །ཆོ་ག་རྣམ་པར་བཤད་བགྱི་བ། །གསང་བའི་ལྕང་ལོ་འཁྲིལ་མངས་དང་། །རྡོ་རྗེ་རྒྱུན་ཐག་ལ་སོགས་པ། །རིང་ཐུང་མཎྜལ་འཁོར་ཁྱུད་ལ། །འཇུར་མདུད་ཅན་དུ་མ་གྱུར་པའི། །སུམ་སྒྲིལ་སྙོམས་པའི་ཚད་ལྡན་ལ། །ཡེ་ཤེས་ལྔ་ཡི་རང་བཞིན་གསལ། །རྒྱུ་
དེ་བྱིན་གྱིས་བརླབ་པའི་ཐབས། །ཐབས་དང་ཤེས་རབ་འབྲེལ་པ་ཡི། །ཡི་གེ་གཉིས་ཀྱི་འཕྲོ་འདུ་ལས། །དཀར་དམར་འོད་ཀྱི་གསེར་ཕྲེང་འཕྲོ། །རྡོ་རྗེ་གསང་བའི་ཐབས་ཀྱིས་ད། །བྱང་ཆུབ་སེམས་འདྲེན་འཁལ་བའི་ཡུམ། །ངེས་པར་བརྟགས་ཏེ་འདིར་བཟུང་བ། །མཚན་ལྡན་བཀྲ་ཤིས་གསང་བའི་ཡུམ། །སྨིན་དཀྱུགས་རིང་ལ་ལག་སོར་ཕྲ། །ཚིགས་མིག་ཟླུམ་ལ་ཕྲ་བར་བཤད། །ཁ་ནས་ཨུཏྤལ་ངད་ལྡང་ཞིང་། །ལུས་ལ་ག་པུར་ཙནྡན་དྲི། །ཡིད་འོང་མཚན་ལྡན་རྐེད་སྐབས་ཕྱེད། །སྐྲ་འཇམ་མཐོན་མཐིང་གཡས་སུ་འཁྱིལ། །སོ་དཀར་ཚགས་དམ་དཀར་དམར་ཕྱེད། །མིག་གི་དཀྱུས་རིང་སྨིན་དཀྱུགས་ལེགས། །ཟར་མའི་མེ་ཏོག་རྒྱས་འདྲའི་སྤྱན། །དཔྲལ་བའི་དབྱེས་ཆེ་སྐྲ་མཚམས་འཁྱུག །སྣ་བཟང་མདོག་གསལ་པདྨའི་རིགས། །ལུས་དྲང་སྐེ་རིང་སེམས་མའི་ཚུལ། །ནུ་མའི་དཀྱིལ་མཐོ་ཟླ་རྒྱས་འདྲ། །ཤ་དཀར་ཚགས་དམ་འཁྲིལ་བག་ཆགས། །ཁོང་དལ་འགྲོ་ན་གོམ་པ་འཇམ། །སྐད་ནི་ངང་པ་གཞོན་ནུ་སྒྲོགས། །ཅིར་ཡང་མཛེས་པའི་སྟབས་ཚུལ་ལྡན། །སྐྱེས་བུ་བླ་མས་ཡུམ་དུ་གཟུང་། །གཟུངས་མར་བྱིན་གྱིས་བརླབ་པ་ནི། །ཡུམ་གྱི་ཕུང་པོ་གནས་ལྔར་ནི། །བདེ་བར་གཤེགས་པའི་ས་བོན་ལྔ། །འཕྲོ་འདུ་གསལ་བར་གྱུར་པ་དང་། །སངས་རྒྱས་བྱིན་བརླབས་དབང་བསྐུར་ནས། །བདེ་གཤེགས་ཡུམ་ལྔའི་སྐུ་མཆོག་གསལ། །རྡོ་རྗེ་ཡབ་ལའང་དེ་བཞིན་ཏེ། །དེ་ལྟར་གསལ་བར་གྱུར་པ་དང་། །ཡུམ་གྱི་མཁའ་ལ་མེ་རི་སྒོམ། །གསང་བ་དབུགས་ཀྱི་ཟླ་གམ་ལ། །བྱང་ཆུབ་སེམས་ཀྱི་འཕྲོ་འདུ་བྱ། །གཟུགས་བརྙན་ཇི་ལྟར་གསལ་བ་བཞིན། །ཡུམ་གྱི་མཁའ་ལ་དེ་བཞིན་ནོ། །དེ་ནས་རྡོ་རྗེ་ཚིག་འདི་ཡིས། །ལུས་ཀྱི་ཡུམ་ལ་ངེས་པར་བསྒོ། །ཤེས་རབ་ལྷ་མོ་གསང་བའི་ཡུམ། །འདོད་དགུར་སྒྱུར་བའི་འཕྲུལ་མོ་ཆེ། །ཆགས་པའི་ཚུལ་གྱིས་ཐབས་ལ་འདུད། །གཡོན་དུ་འཁྲིལ་ཅིང་གཡས་སུ་འཁྱུད། །འཛུམ་པའི་མདངས་ཀྱིས་ཟླ་གམ་སྦྱོར། །གསང་བའི་བྱང་ཆུབ་སེམས་
འདྲེན་པ། །ཁྱོད་ནི་ལྷ་མོ་རྒྱལ་བའི་སྲས། །རང་བཞིན་ཆོས་ཀྱི་མཚན་ལྡན་མ། །རྡོ་རྗེ་ལས་ཀྱི་ཡུམ་ཡིན་གྱིས། །གསང་བའི་ལས་རྣམས་ཀུན་བྱོས་ཤིག །ལག་པ་འཁོར་ལོའི་གཞལ་ཡས་སུ། །ཉི་ཟླ་འབར་བའི་ཚོགས་བཀོད་དེ། །གསང་བའི་བྱང་ཆུབ་དཀར་དམར་འདི། །ཐིག་ལེ་ཡི་གེའི་ངོ་བོར་གདབ། །ལས་ཀྱི་རྡོ་རྗེ་ འབར་བ ་ཡི། །རྡོ་རྗེ་གར་གྱི་ཕྱག་རྒྱ་ཡིས། །བྱང་ཆུབ་སེམས་ཀྱི་ཐིག་འདི་དྲོངས། །རྡོ་རྗེ་གསང་བའི་ལས་འདི་དྲོངས། །རྡོ་རྗེ་གསང་བའི་ལས་འདི་གྱིས། །ཨོྃ་ཙནྡྲ་དྷ་ར་ཧྲཱི་ཞེས་པའི། །གསང་བའི་ཐབས་ཀྱི་སྦྱོར་ བ་ཡིས། །རྫས་མཆོག་འབར ་བའི་ཐིག་ལེ་ཡིས། །གནས་ལྔ་དག་གི་གཞལ་ཡས་སུ། །གསང་བ་ཐབས་ཀྱི་ཐིག་ལེ་བྱ། །སྲད་བུའི་སྦྱོར་བ་དེ་རྫོགས་ནས། །གོལ་སྒྲིབ་རྟག་ཆད་སྐྱོན་བྲལ་བའི། །ཆེ་ཆུང་ཡ་ཡོ་མེད་པ་ཡི། །རྡོ་རྗེ་དབུ་མའི་ཐིག་འདི་དགྱེ། །ཆོས་ཀྱི་དབྱིངས་ཀྱི་གཞལ་ཡས་སུ། །མི་དམིགས་བདལ་བའི་མཎྜལ་ལ། །ཡེ་ཤེས་ལྔ་ཡི་ཐིག་འཕྲོས་པས། །བདེ་ཆེན་རྣམ་ཐར་ཕྱག་རྒྱའི་ཚོགས། །ཀུན་གཞི་ནམ་མཁའི་གཞལ་ཡས་སུ། །ཉོན་མོངས་རྟོག་པའི་མཎྜལ་ལ། །ཏིང་འཛིན་འོད་ཟེར་ཐིག་འཕྲོས་པས། །ཕྱག་རྒྱ་རྡོ་རྗེ་འབར་བའི་ཚོགས། །མཁའ་དབྱིངས་གསང་བའི་གཞལ་ཡས་སུ། །ཟླ་གམ་པདྨའི་མཎྜལ་ལས། །བྱང་ཆུབ་སེམས་ཀྱི་ཐིག་འཕྲོས་པས། །ཡེ་ཤེས་སེམས་དཔའ་གསལ་བའི་ཚོགས། །བཀྲ་ཤིས་དབེན་པའི་གཞལ་ཡས་སུ། །མཚན་མ་རྟེན་གྱི་མཎྜལ་ལ། །རྡོ་རྗེ་སྲད་བུའི་ཐིག་འཕྲོས་པས། །ཆོ་འཕྲུལ་གཟུགས་བརྙན་ཕྱག་རྒྱ་འབར། །སྟོང་གསུམ་གསང་བའི་དཀྱིལ་འཁོར་དུ། །རྨད་བྱུང་རྡོ་རྗེའི་ཐིག་འགྱེད་ན། །གསང་བའི་དམ་ལ་གནས་པ་ཡི། །འབྱུང་པོ་སྐྱེ་བོ་གདོལ་པ་ཅན། །རྡོ་རྗེ་རྩལ་གྱི་ཧཱུྃ་རིང་ལས། །རྡོ་རྗེ་མཚོན་ཆའི་བུ་ཡུག་འཚུབ། །ཕྱོགས་མཚམས་བླ་འོག་ཁྲོ་བོས་གཏམས། །འབར་ བ་གསང་བའི་མཚམས་བཟུང་སྟེ། །ཕྱི་རོལ་སྡེ་པའི་འདྲུལ་རྣམས་གཅད། །རྡོ་རྗེ་མཚོན་ཆ་འབར ་བའི་ཚོགས། །སྲེག་དང་
འཇོམས་པའི་དྲག་ཤུལ་ཅན། །རྡོ་རྗེ་ལྕེ་ཡིས་འདིར་བརྡེག་བྱ། །རྡོ་རྗེ་ཉི་མའི་གཞལ་ཡས་སུ། །རྡོ་རྗེ་དཔལ་བེའུ་འོད་ཀྱི་ཐིག །མེ་ལོང་ཡེ་ཤེས་རང་བཞིན་ཅན། །རྣལ་འབྱོར་ཅན་གྱིས་གདབ་པར་བྱ། །དེ་བཞིན་རིན་ཆེན་ འབར་བའི་གཞལ། །པདྨ་ཟླ་བ ་འཁོར་ལོ་ཡི། །དཔག་མེད་ནམ་མཁའི་གཞལ་ཡས་སུ། །རིགས་ཀྱི་དཔལ་བེའུ་འོད་ཀྱི་ཐིག །ཡེ་ཤེས་བཞི་ཡི་རང་བཞིན་ཅན། །རྣལ་འབྱོར་ཅན་གྱིས་གདབ་པར་བྱ། །རྡོ་རྗེ་མཁའ་ལ་འཁོར་ལོ་བསྐོར། །ཐབས་དང་ཤེས་རབ་ཟུང་ཡ་བཞིས། །སོ་སོའི་ཕྱག་ཏུ་གནས་ནས་ནི། །ནམ་མཁའ་དབུས་ཀྱི་སྙིང་པོ་ལ། །སྲད་བུ་བཞི་ཡི་རྒྱ་གྲམ་བྲེ། །དེ་ནས་རྡོ་རྗེ་བརྟན་པའི་ས། །དབུས་ཀྱི་ཕོ་བྲང་དགུ་པ་ནི། །རྡོ་རྗེ་སྲད་བུའི་ཐིག་ཆེན་གྱིས། །ཕྱག་རྒྱ་བཞུགས་པའི་གནས་རྣམས་ཀུན། །ཆེ་ཆུང་མེད་པར་སྙོམས་པར་བྱ། །འདིར་ནི་རྡོ་རྗེ་མུ་ཁྱུད་བདུན། །འབྱུང་བའི་རིམ་པ་དྲུག་བར་དུ། །འཁོར་ལོ་དྲུག་བརྩེགས་སྙིང་པོར་འབར། །གྲུ་ཆད་རྩིབས་མཆན་མེ་རི་འཕྲོ། །མུ་ཁྱུད་ཚར་གསུམ་འབར་བའི་ཕྲེང་། །བར་ཁྱམས་བཞིས་མཛེས་ཕྱི་ཁྱམས་དང་། །ལྡར་གསལ་སྒོ་དགུ་ཤར་དུ་བརྩེགས། །ཕོ་བྲང་དེ་ཡི་གནས་གནས་སུ། །ཕྱག་རྒྱའི་ཚུལ་རྣམས་འབྱུང་བ་ནི། །མུ་ཁྱུད་མཐའ་ཟད་ཡན་ཆད་དུ། །ཡབ་ཡུམ་དྲུག་ཅུ་རྩ་ཞི་ཡི། །ཆོ་འཕྲུལ་དམ་ཚིག་ཚད་མེད་པ། །རོལ་བ་འཇིགས་བྱེད་འཇིགས་བྱེད་ཆེ། །ཀ་ཙ་ལི་ལ་སོགས་པར་བྲི། །དེ་བཞིན་ཟ་བྱེད་ཡབ་ཡུམ་བཞི། །ལས་ཀྱི་ལྷ་སྟེ་ཧེ་རུ་ཀ། །འཁོར་ལོ་ཐ་མའི་རྩིབས་ལ་དགོད། །གནས་དང་ཡུལ་གྱི་ཕྱག་རྒྱ་དག །གྲུ་ཆད་ཕྱི་དང་ནང་ལ་དགྲམ། །ཧཱུྃ་ཆེན་བཅུ་ཡི་ཡབ་ཡུམ་དག །ཤིན་ཏུ་མཛེས་པར་དང་པོ་ལའོ། །དེ་ཉིད་ལ་ནི་མ་བརྒྱད་དང་། །གིང་ཆེན་བཅྭ་བརྒྱད་རྒྱས་པར་དགོད། །གཉིས་པའི་ཁྱམས་ལ་མཁའ་འགྲོ་བརྒྱད། །ཤུགས་འགྲོ་བརྒྱད་ཀྱང་དེ་བཞིན་ནོ། །གསུམ་པའི་ཁྱམས་ལ་ཕྲ་མེན་བརྒྱད། །དེ་བཞིན་འབར་མ་བརྒྱད་རྣམས་བྲིས། །བཞི་པའི་ཁྱམས་ལ་ཕོར་ཐོགས་བརྒྱད། །
དེ་བཞིན་སྲིན་མོ་གཞོང་ཐོགས་བརྒྱད། །ཀུན་དུ་མཛེས་པར་བྲི་བར་བྱ། །ལྔ་པའི་ཁྱམས་ནི་ཐ་མ་ལ། །རྡོ་རྗེ་སླས་དང་བྲན་མོ་དང་། །ཕོ་ཉ་ལ་སོགས་རྒྱས་པར་དགྲམ། །དེ་ཡང་ཚུལ་དུ་དགོད་པ་ནི། །གོང་མ་དག་ནི་རྒྱུ་རྣམས་ལས། །ཀ་ཙ་ལི་ལ་སོགས་པ་དང་། །ཇི་ལྟར་འབྱོར་པ་དེ་ལྟར་བྲི། །མཆོད་པའི་ཡོ་བྱད་ཐམས་ཅད་དང་། །རྨད་དུ་བྱུང་བའི་རྫས་མཆོག་དང་། །རྡོ་རྗེ་གསང་བའི་རིམ་གྱིས་བཀོད། །རྡོ་རྗེ་གསང་སྒོ་ཕྱེ་ནས་ནི། །ཏིང་འཛིན་དཀྱིལ་འཁོར་ཀུན་རྫོགས་ནས། །རང་བཞིན་ཡུལ་ནས་ཕབ་ནས་ནི། །བསྒྲུབ་པའི་དཀྱིལ་འཁོར་དེར་རྫོགས་བྱ། །འདིར་ཡང་དོན་གྱི་ཁྱད་པར་གྱིས། །རིག་འཛིན་ཆེ་བའི་ས་སྤར་པ། །ཤར་གྱི་གདན་གྱི་ཁྱད་པར་ལ། །རྡོ་རྗེ་སེང་གེས་བཏེག་འཁོར་ལོ། །ཟླ་བ་ཉི་མ་གཡས་གཡོན་གྱི། །ཞབས་རྟེན་ཚུལ་གྱི་མཎྜལ་ནི། །རྡོ་རྗེ་རྒྱལ་པོ་ཡབ་ཡུམ་བཞུགས། །ལྷོ་ཡི་གདན་གྱི་ཁྱད་པར་ལ། །གླང་ཆེན་རྡོ་རྗེས་བཏེགས་འཁོར་ལོ། །པདྨ་གཡས་གཡོན་ཞབས་བརྟེན་ཚུལ། །རྡོ་རྗེ་རྒྱལ་བ་ཡབ་ཡུམ་བཞུགས། །བྱང་གི་གདན་གྱི་ཁྱད་པར་ལ། །པདྨ་རྡོ་རྗེ་བཏེག་རྒྱ་གྲམ། །རྡོ་རྗེ་ཀརྨ་ཡབ་ཡུམ་བཞུགས། །ནུབ་བམ་ཕྱོགས་སམ་མཚམས་གཞན་དུ། །གཞི་རྣམས་གཅིག་ཏུ་གྱུར་པ་ལ། །མཎྜལ་རྒྱུན་མ་ཆད་པ་ལ། །རྡོ་རྗེས་གཏམས་ཤིང་སྦྲེལ་བྱས་ནས། །པདྨ་ཕྱོགས་གཅིག་ཆེར་འབར་བ། ། ཁ་དོག་འབར་བའི་འོད་ཀྱིས་དཀྲིགས། །རྩལ་འཕང་ཆེ་ཆུང་ཁྱད་པར་གྱིས། །སྐལ་དང་ལྡན་ནམ་མི་ལྡན་པའི། །ལ་ལ་དག་ལ་ཟླ་བ་ནི། །རངས་པའི་གདན་གྱི་མཚན་མ་ལ། །དེ་ཡང་རྩལ་འཕང་ཆེ་ཆུང་ལ། །ལ་ལ་རྩེ་གསུམ་རྡོ་རྗེས་མཚན། །ལ་ལ་རྡོ་རྗེ་ཕྱེད་མས་མཚན། །ལ་ལ་མ་རངས་ཟླ་གམ་ཁ། །ནང་དུ་བསྟན་པས་མཚན་པར་བྱའོ། །ལ་ལ་རྩེས་འབིགས་རྣམ་པར་མཚན། །ལ་ལ་པདྨ་བརྩེགས་པས་མཚན། །ལ་ལ་དག་ལ་མཚན་མ་མེད། །ལ་ལས་གདན་དེ་མི་ནོན་ཏེ། །ནར་མ་གང་ཟག་མི་ཡི་རྫས། །སོ་སོའི་བདེ་བའི་ཐབས་སུ་སྦྱར། །ཀུན་དུ་བདེ་བར་སྦྱར་བའི་ཕྱིར། །པི་པར་སྟན་ཞེས་གྲགས་པ་སྟེ། །
ཀུན་དུ་ཁྱབ་པར་ལུས་བདེར་སྦྱར། །རྨད་བྱུང་སྒྲུབ་པའི་དཀྱིལ་འཁོར་དུ། །འཇུག་དང་དངོས་གྲུབ་གསོལ་བ་དང་། །དབང་བསྐུར་བ་ཡི་ལས་རྣམས་བྱ། །འདོད་པར་བྱ་བ་བསྒྲུབ་པ་དང་། །གཏོར་མ་ལ་སོགས་རྫས་ཀྱི་རྣམས། །ཆ་གསུམ་དག་ལ་བགོས་ནས་ཀྱང་། །གཅག་ནི་སྦྱིན་སྲེག་ལས་མཆོག་བྱ། །གཅིག་ལ་རྣལ་འབྱོར་ལོངས་སྤྱོད་གཏེར། །གཅིག་ནི་མཁའ་འགྲོའི་འཁོར་ཚོགས་བསྐྱང་། །གནས་སུ་བཀྲ་ཤིས་ལ་སོགས་ཀྱིས། །སྒྲུབ་པ་རྫོགས་པས་མཐར་དབྱུང་ངོ་། །དུར་ཁྲོད་གསང་མཆོག་དབྱིངས་ཉིད་ལ། །དཀྱིལ་འཁོར་དགུ་བརྩེགས་དཔལ་གྱི་རྒྱ། །ཡེ་ཤེས་དགུ་ཡི་ཁོང་གསེང་གསལ། །མེ་རི་འོད་ཀྱི་ཐིག་ཐག་གཅད། །འཁོར་ལོ་ཚོགས་ཆེན་བསྒྲུབ་པའི་ས། །རྣལ་འབྱོར་རྩལ་མཆོག་ཅན་གྱི་གནས། །སྒྲུབ་པ་རྩ་ཡི་དཀྱིལ་འཁོར་དེ། །དུར་ཁྲོད་གསང་བ་མཆོག་གི་མདོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཚོགས་ཆེན་འདུས་པའི་བསྒྲུབ་ལུགས་ཀྱི་ལེའུ་སྟེ་བཅུ་གཉིས་པའོ།། །།དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་ཚོགས་རིག་འཛིན་ཐམས་ཅད་ངེས་པར་འགྲུབ་པར་འདོད་ན་འདི་ལྟར་རིག་པར་བྱའོ། །དེ་བཞིན་ཐམས་ཅད་ཀུན་རྫོགས་ནས། །རིགས་ཀྱི་ཁྱད་པར་འདི་དག་དབྱེ། །སོ་སོའི་རིགས་སུ་བསྒྲུབ་པར་བྱ། །རྡོ་རྗེ་ཅན་ལ་དཔལ་བེའུ་ནི། །དཀྱིལ་འཁོར་རྡོ་རྗེ་འབར་བའོ། །དེ་བཞིན་རིན་ཆེན་རིན་ཆེན་ཏེ། །པདྨ་དམར་པོ་འོད་ཀྱི་དཀྱིལ། །ལས་ནི་ཀུན་དུ་རྒྱ་གྲམ་འབར། །དེ་བཞིན་རིན་ཆེན་འཁོར་ལོར་འབར། །སོ་སོའི་རིགས་རྣམས་གཙོར་གཞག་སྟེ། །འཁོར་ནི་དེ་བཞིན་མི་འགྱུར་བར། །རྣམ་པར་བཀོད་དེ་ལེགས་སྦྱར་ནས། །བསྙེན་པ་དང་ནི་ཉེ་བསྙེན་པ། །བསྒྲུབ་དང་སྒྲུབ་ཆེན་རྫོགས་པར་བསྒྲུབ། །ཏིང་འཛིན་རྩལ་གྱི་ཁྱད་པར་ནི། །སོ་སོའི་རིགས་ནི་གང་ཡིན་པ། །ཏིང་འཛིན་བྱེ་བྲག་མང་པོ་ལ། །ཡིད་ཀྱི་སྦྱོར་བ་གསལ་བར་བྱ། །དེས་ནི་རིག་འཇིན་གང་འདོད་པ། །གསོལ་བར་ངེས་པར་འགྲུབ་པ་ཡིན། །ཞེས་གསུངས་སོ། །རྒྱུད་ཀྱི་
རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་རིག་འཛིན་བསྒྲུབ་པའི་ལེའུ་སྟེ་བཅུ་གསུམ་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་ཆོས་ཐམས་ཅད་ནི་བླང་དོར་མེད་པར་རིག་པར་བྱའོ། །ཆོས་ཉིད་མཉམ་པའི་རང་བཞིན་ལ། །བཟང་ངན་རྟོག་པའི་ཚིག་དང་བྲལ། །བདག་དང་གཞན་དུ་དབྱེར་མེད་དེ། །གཙང་དང་མི་གཙང་གཉིས་སུ་མེད། །ཅེས་གསུངས་སོ། །དེ་ནས་འཁོར་དེར་འདུས་པར་གྱུར་པའི་རིག་འཛིན་མིའི་ཐོད་པ་ཅན་མང་པོ་དག་རྣམ་པར་བཀོད་པ་རྣལ་འབྱོར་གྱི་གྲལ་ནས་ལངས་ཏེ། །ཨ་ལ་ལ་ཧོ་ཞེས་བྱ་བའི་སྒྲ་ཆེན་པོ་བརྗོད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་བཀའ་སྩལ་པ་ལ་བདག་ཅག་ཤིན་ཏུ་གནས་པར་འཚལ་ན། བདག་ཅག་རྣམས་ཀྱི་དམ་ཚིག་ནི་བཅོམ་ལྡན་འདས་ཀྱིས་མ་གསུངས་སོ་ཞེས་གསོལ་པ་ལས། །བཅོམ་ལྡན་འདས་ཀྱིས་བཀའ་སྩལ་པ། མིའི་ཐོད་པ་ཅན་རྣམས་རང་རང་ཇི་ལྟར་དགའ་བའི་དམ་ཚིག་རྣམས་སྤོབས་པ་སྐྱེད་ལ་ཕུལ་ཅིག་ཅེས་གསུངས་པ་ལས། །འདོད་ཆགས་ཀྱི་རིག་འཛིན་བྲམ་ཟེ་མིའི་ཐོད་པ་ཅན་རྡོ་རྗེ་ཐལ་བའི་དབྱངས་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་དམ་ཚིག་ནི་འདི་ལྟ་སྟེ། །མ་དང་སྲིང་མོ་བུ་མོ་དང་། །རྒྱུ་དང་མི་རྒྱུའི་འཇིག་རྟེན་གྱི། །བུད་མེད་ཐམས་ཅད་ཐམས་ཅད་ལ། །འདོད་པའི་ཆགས་པ་ཅི་སྤྱད་ཀྱང་། །ཡང་དག་རིག་ན་མི་གོས་སོ། །ཞེས་གསོལ་ཏོ། །དེ་ནས་རིག་འཛིན་རཀྵ་མིའི་ཐོད་པ་ཅན་ཞེས་བྱ་བ་དེས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དམ་ཚིག་འདི་ལྟ་སྟེ། །བདག་ནི་གསོད་ལ་དགའ་བ་སྟེ། །སེམས་ཅན་ཐམས་ཅད་བསད་ནས་ཀྱང་། །ཟག་པ་མི་གཙང་སྙིགས་མ་དང་། །མི་ཤ་ལ་སོགས་ཐམས་ཅད་ཀུན། །ཟོས་ན་དམ་ཚིག་མཆོག་ལགས་ཏེ། །མཐུ་དང་གཟི་བྱིན་འཕེལ་བར་འགྱུར། །བདག་གི་དམ་ཚིག་དེ་ལགས་སོ། །ཞེས་གསོལ་ཏོ། །དེ་ནས་ཡང་གནོད་སྦྱིན་རིག་འཛིན་ཡཀྵ་མིའི་ཐོད་པ་
ཅན་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དམ་ཚིག་འདི་ལྟ་སྟེ། མི་ཡི་བདག་པོ་ཐམས་ཅད་ལ། །འདོད་པ་ཐམས་ཅད་འཕྲོག་པ་དང་། །གསེར་ལ་སོགས་པ་བརྐུས་སྤྱད་ཀྱང་། །ཡང་དག་རིག་ན་མི་གོས་ཏེ། །འདོད་པ་གྲུབ་པའི་མཆོག་ཏུ་འགྱུར། །བདག་གི་དམ་ཚིག་དེ་ལགས་སོ། །ཞེས་གསོལ་ཏོ། །དེ་ནས་ཡང་མུ་སྟེགས་རིག་འཛིན་འོད་སྲུང་རལ་པ་ཅན་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དམ་ཚིག་ནི་འདི་ལྟ་སྟེ། མི་ཡི་མགོ་བོ་བཅད་ནས་ཀྱང་། །བཟང་དང་ངན་ནི་བྱེ་བྲག་རྣམས། །རིག་པས་བརྟགས་ཏེ་ཤེས་བྱས་ནས། །བཟང་བའི་རྟགས་ཅན་བསྟེན་བྱ་སྟེ། །དཀར་པོ་ར་རི་ལྕང་ལོ་ཅན། །འདི་དག་རྟག་ཏུ་སུས་འཆང་བ། །འདོད་པ་ཐམས་ཅད་འགྲུབ་པ་སྟེ། །རྒོལ་བ་ཐམས་ཅད་འཇོམས་པར་ནུས། །ཡིད་བཞིན་ནོར་བུ་ཅི་འདྲ་བར། །དེ་ཡི་ཡོན་ཏན་འདི་ལས་འབྱུང་། །བདག་གི་དམ་ཚིག་དེ་ལགས་སོ། །ཞེས་གསོལ་ཏོ། །དེ་ནས་ཡང་བྲམ་ཟེ་ཤ་ལ་དགའ་བ་དང་། །ཤ་ཟ་མོའི་རིག་འཛིན་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་གི་དམ་ཚིག་ནི་འདི་ལྟ་སྟེ། །བ་གླང་ཁྱི་ཤ་རྟ་ཤ་དང་། །མི་ཤ་གླང་ཆེན་ཤ་ལ་སོགས། །ཤ་རྣམས་འདྲ་བར་གཙང་སྨེ་མེད། །ཟོས་ན་ཡོན་ཏན་སྣ་ཚོགས་འགྲུབ། །བདག་གི་དམ་ཚིག་དེ་ལགས་སོ། །ཞེས་གསོལ་ཏོ། །དེ་ནས་ཡང་སྲིན་མོའི་རིག་འཛིན་ཁྲག་འཕྲོག་མ་ཞེས་བྱ་བ་ལ་སོགས་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་གི་དམ་ཚིག་ནི་འདི་ལྟ་སྟེ། སྲོག་ཆགས་སེམས་ཅན་ཐམས་ཅད་ཀྱི། །བསད་པའི་ཁྲག་ནི་དྲོན་མོ་དག །འཐུངས་ན་གཟི་བྱིན་འབར་བར་འགྱུར། །བདག་གི་དམ་ཚིག་དེ་ལགས་སོ། །ཞེས་གསོལ་ཏོ། །ལྷ་མོ་ཀླུ་མོ་རིགས་ངན་མོ་ལ་སོགས་པ་བུད་མེད་ཀྱི་ཚོགས་ཐམས་ཅད་ཀྱིས་འདི་སྐད་ཅེས་གསོལ་ཏོ། །བདག་ཅག་རྣམས་ཀྱི་དམ་ཚིག་འདི་ལྟ་སྟེ། བྲོ་གར་གླུ་ཚིག་ཆེན་པོ་ནི། །ཐམས་ཅད་བསྟེན་པའི་མཆོག་ལགས་ཏེ། །བྲོ་ཡི་འཇོ་ཚུལ་སྟབས་ཆེན་དང་། །
གླུ་ཡི་སྙན་དང་གས་དོན་བསྒྲགས་ནས། །ཡིད་ཀྱི་དབང་པོ་ཐམས་ཅད་འཕྲོག །བསྟེན་པའི་ཐབས་ཀྱིས་འཁྲིག་སྤྱོད་པ། །འདི་ནི་དགའ་བའི་དམ་ཚིག་སྟེ། །བདག་ཅག་རྣམས་ཀྱི་དམ་ཚིག་ལགས། །ཞེས་གསོལ་ཏོ། །དེ་ནས་རིག་འཛིན་དེ་ཀུན་གྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱི་སྤྱིའི་དམ་ཚིག་ནི་འདི་ལྟ་སྟེ། དཀར་ནག་ལས་ནི་ཅི་སྤྱད་ཀྱང་། །རྣམ་པར་སྨིན་པའི་འབྲས་བུ་དང་། །རབ་འབྲིང་ཐ་དད་བྱེ་བྲག་མེད། །དེ་བཞིན་འདི་ལ་བདེ་སྡུག་གམ། །དགེ་དང་མི་དགེའི་རྩོད་པ་མེད། །རྣོན་པོའི་མཚོན་གྱིས་གཅད་དུ་མེད། །ཅི་ཕྱིར་རྣམ་པ་བདུན་སྟོང་པས། །ཐོགས་པ་མེད་པའི་དོན་ཕྱིར་རོ། །སྲོག་ཀྱང་བཅད་ཅིང་གསད་དུ་མེད། །ཅི་ཕྱིར་རྫས་འདི་འཇིགས་པས་སོ། །སྡིག་པ་ཆེན་པོའི་ལས་རྣམས་ཀུན། །བདག་གིས་བྱས་སམ་གཞན་བྱེད་བཅུག །གལ་ཏེ་གང་གཱའི་བྱེ་སྙེད་ཀྱི། །སེམས་ཅན་དེ་ལ་སྦྱིན་བྱིན་དང་། །དེ་བཞིན་གང་གཱའི་བྱེ་སྙེད་ཀྱི། །སེམས་ཅན་ཐམས་ཅད་གསད་པ་གཉིས། །ཡང་དག་རིག་ལ་ཐ་དད་མེད། །ནམ་མཁའ་དག་ལ་རྡུལ་དང་ཆུས། །ཇི་ལྟར་མི་ཆགས་པ་བཞིན་ནོ། །གང་ཞིག་ཁྲེལ་དང་འཛེམ་ལྡན་ན། །དོགས་པའི་རྟོག་པ་དེ་བཟུང་བས། །དམྱལ་བ་ཆེན་པོར་ལྟུང་བར་འགྱུར། །ཆགས་པའི་སྤྱོད་པ་ལ་སོགས་ཀྱིས། །ལུས་རྣམས་གདུང་བར་བྱེད་པ་ཡི། །སེམས་ཅན་དེ་ནི་འདུ་ཤེས་ཆུང་། །ཞེས་གསོལ་ཏོ། །དེ་ནས་བཅོམ་ལྡན་འདས་སེམས་དཔའི་རྡོ་རྗེས་འདི་སྐད་ཅེས་གསུངས་སོ། །ཨེ་མའོ་ཐོད་པ་ཅན་གྱི་ཚོགས། །ཁྱེད་ཀྱིས་སྨྲས་པའི་ཚིག་འདི་རྣམས། །མདུད་པས་བཅིངས་པའི་ཚིག་ཡིན་ཏེ། །ཁུར་དང་བྲལ་བར་མི་འགྱུར་རོ། །ཡང་དག་ཡང་དག་ཅེས་སྨྲ་བ། །ཡང་དག་ཉིད་ཀྱི་མདུད་པ་སྟེ། །མདུད་པའི་བཀྲོལ་བ་མ་བྱས་ན། །ཐ་རམ་ཕྱེད་པར་མི་འགྱུར་རོ། །ཆགས་པའི་ལས་རྣམས་སྦྱོར་བ་དག །ཆགས་པའི་དབང་གིས་དེར་སྦྱོར་ན། །དེ་དག་དེ་ཡི་གྲོང་ཁྱེར་དུ། །གནས་འགྱུར་དེ་ཡི་སེམས་ཅན་ཡིན། །འདུ་ཤེས་སྒྱུར་བའི་ལས་ཆེན་དག །སྡང་བའི་
དབང་གིས་སེམས་ཤོར་ན། །ཤན་པ་གསོད་པའི་རིག་འཛིན་དུ། །ལྟུང་འགྱུར་སྡིག་པའི་རི་བོ་ཡིན། །རྒྱལ་བ་རྣམས་ནི་གཙང་བས་ན། །གང་ཚེ་བདེ་གཤེགས་རྒྱལ་བའི་ཞལ། །མི་གཙང་རྣམ་པ་སྣ་ཚོགས་ཀྱིས། །ཡོངས་སུ་བསྟབས་པར་གྱུར་ན་ཀོ། །དེ་ཚེ་ལས་ཀྱི་རྣམ་སྨིན་གྱིས། །ཐར་མེད་ནད་ཀྱིས་བཟུང་ནས་ནི། །འདམ་དུ་བྱིང་བར་མི་འགྱུར་རམ། །ཤ་དང་ཁྲག་ལ་སོགས་པའི་ཟས། །དཀུ་བའི་རྔད་ཟས་ཆེན་པོ་སྟེ། །གང་གིས་ཟོས་པའི་ལུས་རྣམས་ལ། །འབྱུང་པོ་དྲི་ཟ་ཀུན་འདུས་ནས། །དྲི་མནམ་རོ་དང་བཅུད་རྣམས་འབྱིན། །དེས་ནི་གཟི་མདངས་ཡལ་འགྱུར་ན། །ཅི་ཕྱིར་ཅི་སྟེ་དེ་རྣམས་བཟའ། །སེམས་ཉིད་རིན་ཆེན་ཡོད་བཞིན་དུ། །གཞན་གྱི་རིན་ཆེན་སྤྱོད་བྱེད་པ། །ལོག་པས་ལོག་པ་ལེན་པའི་ཆོས། །འདི་དག་མདུད་པ་དམ་པོ་ཡིན། །དཀར་གནག་ལས་ལ་ཁྱད་མེད་ཅེས། །ཐམས་ཅད་ཁྲ་བོས་སྤྱོད་པ་ནི། །རིགས་མེད་རིགས་ཆད་ལོག་པའི་ལས། །འབྲས་བུ་ལོག་པའི་ཁམས་སུ་འགྱུར། །བདེ་གཤེགས་མཉེས་བྱའི་ལས་རྣམས་ལ། །ཡན་ལག་ཚིག་ཏུ་མ་དག་ན། །ཉེས་བྱས་ལས་ཀྱི་རྒྱུ་དེས་ནི། །གང་གི་དུས་རྣམས་ཐམས་ཅད་དུ། །དབང་པོ་ཡན་ལག་མ་ཚང་ཞིང་། །དྲན་པའི་སྙིང་པོ་ཉམས་པར་འགྱུར། །རིག་པ་འཛིན་པའི་རྣལ་འབྱོར་པས། །བདེར་གཤེགས་རྒྱལ་བ་སྒོམ་ཟློས་པ། །ཆོ་འཕྲུལ་ཁྲོ་ཚུལ་བསྟན་པ་ལྟར། །མཚན་མ་ཉིད་དུ་དེར་གོ་ན། །ལས་ཀྱི་སྲིན་པོའི་རིག་འཛིན་ཡིན། །རྒྱན་དང་ཆ་ལུགས་ཐམས་ཅད་ཀུན། །མཚན་མ་ཉིད་དུ་བརྟགས་གྱུར་ན། །ཅི་ལའང་རྟོག་ཅིང་ཆགས་པ་ཡི། །འཛིན་པའི་ཕུར་པ་ཆེན་པོར་འགྱུར། །ཨ་དང་ཧཱུྃ་ལ་སོགས་པ་ཡི། །རྒྱུ་ཡི་ཡི་གེ་ཐམས་ཅད་ཀུན། །མཚན་མ་ཉིད་དུ་དེར་བརྟགས་ན། །ཙནྡན་སྦྲུལ་གདུག་ལ་སོགས་པར། །ལྟུང་འགྱུར་རྟོག་པའི་གེགས་ཆེན་ཡིན། །ཁྲག་ལ་སོགས་པའི་རྫས་ཆེན་ལྔ། །དེ་ཉིད་དངོས་པོར་དེ་བརྟགས་ན། །འབྱུང་པོ་ཁྲག་གི་དྲི་མནམ་པའི། །ལུས་ལེན་རིགས་ནི་འཛིན་པ་ཡི། །མ་བདུན་རྔམ་པའི་ཆ་ལུགས་སུ། །གང་
ཞིག་རྟོག་པར་དེར་གོ་ན། །སྲིན་མོ་མི་སྡུག་ཤ་ཟ་མོ། །ལངྐའི་ཡུལ་དུ་དེ་དག་འཁོར། །མཚན་མའི་བླ་ཐབས་མགོ་བརྙན་ཅན། །དེར་བཙན་དེར་བཟུང་དམིགས་པས་ནི། །ཤོ་གམ་གནས་ཀྱི་གཅན་ཆེན་རིགས། །འཛིན་ཅིང་གནས་དེར་རྟོག་པར་འགྱུར། །ལས་ཀྱི་དབང་བཙན་བྲན་མོའི་ཚོགས། །དེ་འདྲ་ཉིད་དུ་དེ་བརྟགས་ན། །གནོད་སྦྱིན་ཆེན་མོའི་ཚོགས་སུ་འགྱུར། །གཞན་གྱི་ཚེ་ལ་འཚེ་བ་ཡིན། །དེས་ན་མདུད་པ་ཆེན་པོ་འདི། །ཁུར་དུ་བཤལ་བའི་གདོས་ཡིན་ཏེ། །འཆལ་པས་ལྟ་བའི་མིག་ལོང་སྟེ། །སེམས་ཀྱི་ནོར་བུ་རིན་ཆེན་དེ། །རྟག་ཆད་ཁམས་སུ་སྟོར་བར་འགྱུར། །དེ་ལྟའི་སྐྱོན་ཆེན་སྤང་བར་གྱིས། །དེ་སྐད་ཅེས་བཀའ་སྩལ་པ་ལས་ཐོད་པ་ཅན་གྱི་ཚོགས་རྣམས་རྟོགས་པའི་འདུ་ཤེས་ཀྱིས་ཟིན་ཅིང་རང་རང་གི་སྤྱོད་པ་ལ་སྐྱོ་བ་སྐྱེས་པར་གྱུར་ཏོ། །དེ་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མའོ་བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་ལོག་པའི་དཀའ་ཐུབ་ཏུ་འགྱུར་བ་ལགས་ན། འདི་དག་ཡང་དག་པའི་དཀའ་ཐུབ་ཏུ་གནས་པར་འཚལ་ན། ཆོས་ཐམས་ཅད་ནི་སྒྱུ་མ་ལྟ་བུ་སྟེ། ཅིར་ཡང་འགྱུར་བ་ལགས་སོ། །གསང་སྔགས་ཆེན་པོའི་སྒོ་ནི་བསྐལ་པ་མེ་དཔུང་ལྟ་བུ་སྟེ། བདག་ཅག་རྣམས་ཀྱི་རྟོག་པ་སོ་སོར་ཇི་ལྟར་མོས་པ་ལྟར་བཤད་དུ་གསོལ་ཞེས་ཞུས་པ་ལས། བཅོམ་ལྡན་འདས་ཀྱིས་དགྱེས་པ་ཆེན་པོའི་བཞད་པ་མཛད་ནས། རིགས་ཀྱི་བུ་རྣམས་ནི་དེ་ལྟར་ཞུ་བ་ལེགས་ཀྱིས་ཤིན་ཏུ་ཉོན་ཅིག །ཁྱེད་རྣམས་ཀྱི་སྤྱོད་པ་མི་དགག་པར་ཇི་ལྟར་དགའ་བའི་བསམ་པ་སོ་སོར་རངས་པར་བྱ་སྟེ། འཇིག་རྟེན་མཚན་མའི་སྤྱོད་པ་བསམ་གྱིས་མི་ཁྱབ་པ་རྣམས་གསང་སྔགས་ཀྱི་དཀའ་ཐུབ་ཆེན་པོར་བྱའོ། །རང་རང་གི་སྤྱོད་པ་མ་བཀག་པར་སྒོ་གསུམ་ལྷུག་པར་སྤྱོད་ཅིག །དེ་ནས་སེམས་དཔའི་རྡོ་རྗེས་ཡང་འདི་སྐད་ཅེས་གསུངས་སོ། །ཀྱེ་མའོ་ཐོད་པ་ཅན་གྱི་ཚོགས། །བུད་མེད་བུད་མེད་ཐམས་ཅད་ཀུན། །སྐྱེད་པར་བྱེད་པའི་རྟེན་ཡིན་ཏེ། །འབྲས་བུ་སྨིན་པའི་ཞིང་ཡང་ཡིན། །བསྒྲལ་ཞིང་གདོན་
པའི་གནས་ཡིན་ཏེ། །ཤེས་རབ་དགའ་བའི་ཡུལ་ཡིན་ནོ། །འདི་ལ་སེམས་གསུམ་གནས་པ་སྟེ། །ཡེ་ནས་དག་པ་ཆོས་ཉིད་སེམས། །མཁའ་དང་སྦྱོར་བ་བྱང་ཆུབ་སེམས། །སྙིང་རྗེས་སྒྲོལ་བ་གསུམ་སྦྱར་ཏེ། །ཆོས་ཉིད་གསང་བ་ཉི་ཤར་ཁྱབ། །སྙིང་རྗེས་སྒྲོལ་བ་གསུམ་གྱིས་སྦྱར། །ཏིང་འཛིན་བྱིན་བརླབས་ཡེ་ཤེས་ཀྱིས། །ཆོས་ཉིད་དུར་ཁྲོད་མཁའ་ལ་བསྒྲལ། །བསྒྲལ་བའི་རྒྱུ་མཆོག་མན་ཆད་ནས། །ཤེལ་ཆེན་ཙ་ར་ལ་སོགས་པ། །དེ་ལ་རྒྱུ་དྲུག་ས་བོན་གདབ། །རང་བཞིན་ཡེ་ནས་དེ་གཞོམ་བྱ། །ཁྱད་པར་འདས་པའི་ཡི་གེ་ལྔ། །གནས་བཀོད་འཕྲོས་པས་མཐའ་ཡས་བཀང་། །ཐམས་ཅད་སྟོངས་ཤིང་ཟད་བྱས་ནས། །འདུས་པའི་ཡི་གེ་ལྔ་རུ་གསལ། །དེ་ལས་ཕྱག་མཚན་ཡེ་ཤེས་ལྔ། །མི་གནས་ཡེ་ཤེས་ངང་དུ་ཐིམ། །སྒྲིབ་པའི་ཕུང་པོར་སྨིན་པ་དེ། །རྡོ་རྗེ་རོལ་པའི་རྔམ་ཚོགས་ཀྱིས། །འཇོ་ཚུལ་སྟབས་ཀྱིས་སྦྱར་བར་བྱ། །ཁ་ཊྭཱཾ་ལ་སོགས་སྔགས་བཅས་པས། །བསྒྱེལ་ཏེ་མ་རིག་སྒོ་དབྱེ་བྱ། །རྣམ་ཤེས་དབུགས་ཀྱི་སྒྲོམ་དྲངས་ལ། །རྡོ་རྗེ་རྒྱལ་པོའི་རླུང་སྒྲོམ་དུ། །བསྡུས་ཏེ་རྡོ་རྗེ་དབུགས་ཅན་ལ། །ཧཱུྃ་བྱས་སྒྲིལ་མ་དེ་ལ་བསླན། །གསང་བ་ཐུགས་ཀྱི་དཀྱིལ་འཁོར་དུ། །མཚོན་གང་འོད་དུ་བསྟིམ་པར་བྱ། །ཡུ་ཏི་ཨ་ཧྃ་གིས་སྦར་ཏེ། །གསལ་ན་དེ་དང་མཉམ་དུ་གསལ། །རྡོ་རྗེ་ཚེ་ལ་བསླན་པར་བྱ། །རྡོ་རྗེ་རླུང་གིས་དབུགས་སྦར་ཏེ། །ཐུགས་ལས་རླུང་སྒྲོམ་ལམ་དུ་སྦར། །ནམ་མཁའ་ཆོས་ཀྱི་གཞལ་ཡས་སུ། །ཉི་མའི་སྟེང་ན་ཧཱུྃ་དུ་གསལ། །ཡེ་ཤེས་སེམས་དཔའ་ཚོན་གང་བ། །ཉི་ཟླ་གའུའི་བར་ན་གསལ། །ཨ་ཡང་ཕཊ་ཀྱིས་བསྐྱོད་འཕངས་པས། །རྡོ་རྗེ་སེམས་དཔའི་ཐུགས་ཀར་འཕྲོས། །ཡེ་ཤེས་སེམས་དཔར་གསལ་བ་ལ། །དངོས་པོར་སྣང་བ་འཛིན་དང་བྲལ། །གཡོ་འགུལ་འཕར་འཕྲིག་མ་ཆད་པར། །རྡོ་རྗེ་མིང་གི་དབང་བསྐུར་ཏེ། །རིགས་ཀྱི་ལྷ་དང་སྙིང་པོ་སྦྱིན། །རྡོ་རྗེ་གདུང་བའི་གླུ་བླངས་ཏེ། །མན་ངག་གནས་ཀྱི་སྨོན་ལམ་གདབ། །བཞི་ཚལ་དག་ཏུ་བྱས་ནས་ནི། །སྨན་གྱིས་བཏབ་སྟེ་ཕུང་པོར་
བཙལ། །འཁོར་བའི་ཕུང་པོ་དེ་བསྡུས་ལ། །རྡོ་རྗེ་སྟབས་དང་གླུ་ཡིས་སྦྱང་། །གནས་གནས་དག་ཏུ་བསྔོ་བར་བྱ། །ཕུང་པོ་མཆོད་པའི་རྫས་སུ་བསྟིམ། །རྡོ་རྗེ་བྲ་ཡི་ལས་རྣམས་གདབ། །དེས་ནི་མཉེས་དང་སྐོངས་པ་དང་། །རྡོ་རྗེ་ལས་རྣམས་འགྲུབ་པ་ཡིན། །རྣལ་འབྱོར་ལས་ཀྱི་དབང་ཕྱུག་ཆེ། །མཐོ་གཙང་ཤེས་རབ་གངས་རུམ་ནས། །རིག་པའི་སྡེར་མོ་སྦར་ཤད་ཅན། །ང་རྒྱལ་དྲེགས་པའི་གླང་པོ་འཇོམས། །རྣལ་འབྱོར་རྩལ་རྒྱས་སེང་ཕྲུག་རྣམས། །རྡོ་རྗེ་རྩལ་ཆེན་འདི་སྦྱངས་པས། །རྣལ་འབྱོར་ལྷ་མཆོག་གཤེགས་པའི་རྟེན། །དངོས་གྲུབ་འབྱུང་བའི་རིན་པོ་ཆེ། །མཐུ་སྟོབས་སྐྱེ་བའི་ཐབས་ཆེན་པོ། །བྱིན་བརླབས་ཕེབས་པའི་དབང་མཆོག་འདིས། །རྒྱལ་བའི་དངོས་གྲུབ་མན་ཆད་ནས། །མཁའ་འགྲོའི་ཆོ་འཕྲུལ་ཐམས་ཅད་དང་། །དྲེགས་པ་མ་རུངས་སྡེ་པ་རྣམས། །ཐམས་ཅད་དབང་དུ་འགྱུར་ངེས་ན། །འབྱུང་པོ་གཞན་ལྟ་སྨོས་ཅི་དགོས། །འཁོར་བའི་སྐམ་གླིང་ཆེན་པོ་ལ། །རིས་དྲུག་འཁོར་བའི་སེམས་ཅན་རྣམས། །རྒྱུད་དྲུག་འདས་པའི་རྣམ་ཤེས་སྲོག །དུས་གསུམ་མཚོན་གྱིས་བསད་པས་ན། །རྟག་ཆད་མཐར་ཤིའི་རོ་གླིང་ནས། །གཏི་མུག་བམ་ཆེན་རོ་བླངས་ནས། །བདུད་རྩི་སྨན་ཆེན་ཡེ་ཤེས་ཀྱིས། །རྟག་ཆད་མཐའ་ལས་རོ་བླངས་ཤིང་། །བྱང་ཆུབ་སེམས་སུ་གསལ་བའི་ཕྱིར། །རོ་ཡི་རྫས་རྣམས་བཙལ་བར་བྱ། །ཁྲོ་ཚོགས་རྔམ་པར་བདག་བྱས་ཏེ། །རྡོ་རྗེ་འབར་བའི་མིག་ནང་ནས། །མཐིང་ནག་ཧཱུྃ་གི་སེང་ཆེན་ནི། །འཁོར་བའི་རོ་གླིང་ཁམས་སུ་སྤྲོ། །བསྒྲལ་བའི་དུར་ཁྲོད་མཐའ་དག་ཀུན། །ཡེ་ཤེས་རོལ་བའི་ཞིང་དུ་བལྟ། །ཁྲོ་བོ་གྱད་ཀྱི་འདོར་ཐབས་ཀྱིས། །ཚམ་ངམ་ཆེན་པོའི་རྔམ་ཚུལ་གྱིས། །དཔའ་བོ་རྡོ་རྗེའི་འཛུར་འགྲོས་སྦྱར། །ཐབས་ཆེན་བཅྭ་བརྒྱད་སྟབས་ཀྱིས་སྦྱར། འཇོ་ཚུལ་ཐབས་ཀྱི་འགྲོ་སྟབས་ཀྱིས། །འཛེམ་ཚུལ་ལྟ་ཞིང་རྣམ་པར་རྩེན། །སྒྲ་སྐད་སྒྱུར་ཞིང་ཧེ་ཧེས་སྒྲོགས། །འཐབ་ཅིང་རྩོད་པས་རྣམ་པར་རྔམ། །འབྲི་ཚུགས་ལྟ་ཞིང་འདྲོག་ཚུལ་སྤྱོད། །གཡས་སུ་ལྟ་ཞིང་གཡོན་དུ་འགྱུར། །ཡིད་མ་ཆེས་ཏེ་ཕྱིར་ཡང་བལྟ། །
སྡང་མིག་ལོགས་ཀྱི་ཁྱབ་པར་བལྟ། །རྡོ་རྗེ་འགྲོས་སུ་རྒྱུག་ཅིང་འགྲོ། །ཧ་ཧ་རུ་ལུའི་རྔམ་སྒྲ་སྒྲོགས། །སོ་སོའི་བརྡ་སྐད་འབྱིན་བྱེད་ཅིང་། །རྟོད་པའི་ཚུལ་གྱིས་མཆོང་ཞིང་རྒྱུག །ཡིད་བཞིན་གཏེར་ཆེན་ཁ་ཕྱེ་ནས། །འདོད་འབྱུང་རིན་ཆེན་ཕུང་པོ་དེ། །འཁོར་བའི་རྣམ་སྨིན་དཔྱིས་ཕྱུང་ནས། །རྣམ་གསུམ་དུག་ཆེན་གཏན་སྤྲུགས་ནས། །ཐུགས་རྗེ་རྔམ་པའི་ཁ་ལོང་ཁ། །རྡོ་རྗེ་འབར་བའི་ཚོགས་ཆེན་གྱིས། །དངོས་གྲུབ་ལོ་ཏོག་ཕྲལ་ནས་ཀྱང་། །རྡོ་རྗེ་བཞིན་ཕྱོགས་མ་ནོར་བར། །ཤེལ་ཕུར་གཉིས་ཀྱིས་གསང་གནས་བཟུང་། །ངེས་པར་གཤིན་པའི་གཞི་མ་ལ། །ཅུང་ཞིག་བརྟོད་དེ་ཉེ་འཁོར་བསྒྱུར། །བཞིན་ཕྱོགས་གང་ལྟས་ལེགས་ཉེས་བརྟག །ཕྱི་ཡི་བཟང་ངན་དེ་ཉིད་ནི། །ནང་དུ་ངེས་པར་གསལ་བ་ཡིན། །ཉེས་པའི་མཚན་བྱུང་མཁས་པས་མནན། །གལ་ཏེ་དྲི་བས་གླེང་སློང་ན། །དེ་ཡི་ཐེ་ཚོམ་གསལ་བ་དག །དངོས་པོར་སྤྱོད་ལ་ཞུགས་རྣམས་ཀྱིས། །མཚན་མར་རྟོག་པ་འདི་དག་རྣམས། །འཇིགས་བྱེད་བཀའ་ལ་བཏགས་པ་ཡི། །འདོད་ཆགས་བདག་པོ་ང་ལ་གསོལ། །ཇི་སྐད་སྨྲས་པ་དེ་བཤད་ཀྱིས། །མཚན་མའི་རྫས་རྣམས་རྟོགས་པར་གྱིས། །འཇིག་རྟེན་མགོན་ཁྱོད་བདག་ལ་གསོན། །བདག་ཅག་སྤྱོད་པ་གསོལ་བར་བགྱི། །སྣོད་ཀྱི་མཚན་ཉིད་བཟང་ངན་གྱིས། །ཉེས་དང་ལེགས་པ་འདི་ལས་བྱུང་། །སྐྱོན་གྱི་མཚན་མ་བདུན་པ་སྟེ། །ཁ་སྦུབ་པ་དང་གདན་ལས་བསྐྱོད། །རྒྱུད་མི་འཕེལ་དང་མཚམས་སུ་གས། །བར་ཆད་འབྱུང་དང་བགེགས་ལྡང་བ། །མཚན་མ་ངན་པ་འབྱུང་བའོ། །འདི་དག་མཁས་པས་ཡོང་མི་འཆང་། །ལེགས་པའི་རྒྱུ་ནི་བཅུ་གཅིག་སྟེ། །གསུམ་གྱི་དངོས་གྲུབ་ཐོབ་པ་དང་། །རིག་འཛིན་ལམ་འགྲོ་ནམ་མཁར་འཕུར། །ཁམས་གསུམ་དབང་བསྡུ་རྡོ་རྗེ་སྤྱན། །ཕ་རོལ་གཡུལ་ཟློག་ཟིལ་གྱིས་གནོན། །མཐུ་དང་བྱིན་བརླབས་ཚེ་འཕེལ་དང་། །མཚན་མ་གསལ་པོ་འབྱུང་བ་དང་། །སློབ་མ་ཆུ་ཡི་རྒྱུད་འཕེལ་བ། །དམིགས་པའི་བསམ་པ་འགྲུབ་པ་དང་། །
ཕྱི་མར་སངས་རྒྱས་མྱུར་བ་དང་། །དངོས་གྲུབ་རྣམ་གསུམ་ཐོབ་པ་སྟེ། །སྨོན་ལམ་བཞིན་དུ་འགྲུབ་པའོ། །དེ་ཡང་བྱེ་བྲག་འདི་ལྟ་སྟེ། །ཕྱེད་དུ་འགྱུར་ན་ཐོབ་ཐང་ཡིན། །སུམ་ཆ་ཙམ་ལ་བཏང་སྙོམས་སོ། །དེ་ཡང་སོ་སོའི་མཚན་རྟགས་སུ། །བརྟག་ཅིང་མིང་དུ་བརྗོད་བྱ་བ། །དཀར་པོ་སྤྲོས་མེད་ཆོས་ཀྱི་སྐུ། །ལྕང་ལོ་ཀུན་རྫོགས་ལོངས་སྤྱོད་ལྡན། །མ་འོངས་སྤྲུལ་པ་མཛད་པའི་རྒྱུན། །འདས་དང་ད་ལྟར་མ་འོངས་པའི། །རྣལ་འབྱོར་ས་ལ་འགྲོ་བའི་རིགས། །བདེར་གཤེགས་དུས་གསུམ་འབྱུང་བའི་རྟགས། །རིན་ཆེན་གཏེར་གྱི་གའུ་འདི། །ཐབས་ཀྱི་རྒྱལ་པོ་དཔལ་གྱི་དཀོར། །ཕོ་བྲང་རྟགས་ལྡན་སྣོད་བཅུད་རྫོགས། །འཕྲུལ་ཞལ་ཡིད་བཞིན་འདོད་ཞོའི་བ། །རྐང་མེད་མཁའ་ལ་འགྲོ་བའི་མཆོག །ངོ་མཚར་ཐོག་ཐོག་རྐན་སྒྲ་ཅན། །རྨད་འབྱུང་གསང་བའི་རང་སྒྲ་དག །རིག་འཛིན་རྩལ་ཅན་ཀུན་ལ་སྒྲོགས། །ང་ནི་སྐྱེས་མཆོག་རྩལ་ཅན་གྱི། །རྨད་བྱུང་བསྒྲུབ་པའི་རྫས་ཡིན་པས། །སུ་ཞིག་དངོས་གྲུབ་གང་འདོད་པ། །ཐེ་ཚོམ་མེད་པར་དུས་འདིར་ལོང་། །གང་དག་བཀའ་ལྟར་མི་བྱེད་ཅིང་། །སུ་ཞིག་དམ་ལ་མི་གནས་པ། །ང་ཡི་གཟུགས་མཐོང་ཙམ་གྱིས་འཚིག །སྒྲ་ཐོས་ཙམ་གྱིས་བརླག་པར་འགྱུར། །ཞེས་པའི་སྒྲ་བྱུང་ཆོ་འཕྲུལ་ནི། །རྒྱལ་བའི་གཞལ་ཡས་ཀུན་ལས་སྒྲོགས། །འདི་དག་དོན་དང་ལྡན་པར་སྤྱོད། །འདི་ལྟར་གྲགས་པ་ངེས་དོན་ནི། །རྣལ་འབྱོར་ཅན་གྱིས་ཤེས་བྱ་བ། །ཐམས་ཅད་དཔལ་ལྡན་ལྕང་ལོ་ཅན། །ལ་ལ་བཀྲ་ཤིས་མཚན་ལྡན་ཏེ། །དེ་བཞིན་པཾ་ཙ་ཀུ་ལ་ཡིན། །ལ་ལ་དཔྱད་ཀྱི་ན་ཤ་ཡིན། །དེ་བཞིན་མི་འགྱུར་སྲ་མཁྲེགས་ཡིན། །མ་ཧཱ་ཀེ་ས་དཔལ་དང་ལྡན། །ཡེ་ཤེས་ལྔ་ལྡན་ཞེས་ནི་བྱ། །ཨཱ་ཡུཿཕ་ལ་ཚེ་ཡི་མཆོག །ལ་ལ་མེ་ལེ་དེ་བྱི་བརྟན། །ལ་ལ་དེ་བཞིན་ཁ་སྭ་ཁ། །ཁ་ཧུ་པ་ཡི་དཔལ་དང་ལྡན། །བཀྲ་ཤིས་དོན་འབྱུང་དེ་ལྟའོ། །བདེར་གཤེགས་མཚན་ལྡན་རྫོགས་པ་ཡིན། །གཙུག་ཕུད་དགེ་གཙུག་དཔལ་དང་ལྡན། །ཛྙཱ་ན་མུརྟྟི་དེ་བཞིན་ནོ། །ལ་ལ་ཛྙཱ་ན་ཁུ་ཎྜལི། །དེ་
བཞིན་ཁྲོ་པོ་ཀུ་ཎྜལི། །ཨེ་ཀ་ཛ་ཊི་མཚན་ལྡན་པ། །ཨ་བི་མུ་ཀ་རྫོགས་པའོ། །འདོད་པ་བརྟན་ལྡན་བདེ་བ་སྐྱེ། །གཉིས་མེད་དོན་ལྡན་ཐོབ་པའོ། །པུ་ཏྲ་མང་འཕེལ་ལྕུག་ཕྲན་རྒྱས། །རྡོ་རྗེ་བསེ་ཕོར་མཚན་རྫོགས་ནས། །ཤེལ་ཕོར་གསང་བའི་དོན་འབྱུང་བ། །སྐུ་གསུང་ལྷུན་གྲུབ་ཀ་པཱ་ལ། །ཐམས་ཅད་རེ་བ་ཡིད་བཞིན་སྐོར། །དེ་བཞིན་ཡོན་ཏན་རྫོགས་ཀུན་རྫོགས། །བཀྲ་ཤིས་མཚན་ནི་ཀུན་ལྡན་པ། །དེ་བཞིན་མི་འགྱུར་གཡུང་དྲུང་བརྟན། །མི་ཤིགས་མཛོད་ཡིན་ཀུན་འབྱུང་བའོ། །ཆོ་འཕྲུལ་རྟགས་འབྱིན་དམ་པ་འབྱུང་། །སྲིད་པ་ཡོངས་སྒྲོལ་ལས་ཀྱི་མཆོག །ཁམས་གསུམ་དབང་སྡུད་ཁྱད་པར་ལྡན། །དྲུག་གསུམ་གཏན་སྤྲུགས་ལས་མཆོག་ཅན། །མཚན་མའི་སྤྲོས་བྲལ་ངེས་པའི་དོན། །རིགས་དྲུག་མདོག་དྲུག་དབྱིབས་དྲུག་དང་། །ཡོན་ཏན་སྐྱོན་རྣམས་སྦྱར་བར་བྱ། །མང་དང་ཉུང་བའི་གསང་བ་ནི། །བཅས་དཀར་འཕེལ་དང་མགོ་མི་འབྱུང་། །རྗེས་འདྲ་ལ་སོགས་སྐྱོན་རྣམས་སྤང་། །དུག་གསུམ་སྟོངས་མཛད་རྒྱལ་བའི་བཀའ། །སྐུ་གསུམ་སྨིན་པའི་གཡུང་དྲུང་རྟགས། །སྦ་ཐབས་གསང་བའི་མན་ངག་འདི། །སྐལ་ལྡན་རྣལ་འབྱོར་རྣམས་ཀྱི་སྟེ། །སྐལ་མེད་ཀུན་གྱི་རྟོག་པའི་བདུད། །མིང་ཙམ་འཛིན་ལ་ག་ལ་བརྟེན། །མཁས་པས་བརྟག་ཅིང་བཟང་པོ་བརྟེན། །དངོས་གྲུབ་འབྱུང་བའི་དུས་ཆེན་ཡང་། །གཅིག་དང་གསུམ་ནི་རབ་ཏུ་བཤད། །དེ་བཞིན་ལྔ་བདུན་འབྲིང་དུ་གྲགས། །དགུ་ནི་དངོས་གྲུབ་ཐ་མ་སྟེ། །བཅུ་གཅིག་ཕན་ཆད་ཡལ་བར་བཤད། །དེ་བས་རྣལ་འབྱོར་རྩལ་ཅན་གྱིས། །ངེས་པར་བརྩོན་ཏེ་བརྟག་པར་རིགས། །འདོད་ཆགས་བདག་པོས་དེ་སྐད་བཤད། །མཚན་མ་ཡིན་ཕྱིར་དེར་ངེས་པ། །མཚན་མ་ཅན་དང་མཐུན་བྱའི་ཕྱིར། །ཐབས་ཀྱིས་དེ་དང་མཐུན་སྤྱོད་ལ། །ཡང་དག་དོན་ལ་ཁ་ལོ་སྒྱུར། །དེ་དག་རྣམ་པར་སྦྱང་བ་དང་། །འགྲོ་དྲུག་ཤིན་ཏུ་གཡེང་བ་ཅན། །ཡིད་རྣམས་དྲངས་ཏེ་བརྟེན་བྱས་ནས། །ཐབས་ཀྱི་དོན་ལ་སྦྱར་བའི་ཚིག །རྒྱུ་
དྲུག་འདུས་པའི་ས་གཞི་ལ། །གླུ་བྲོ་གར་གྱི་རོལ་པ་ཡིས། །སྲིད་གསུམ་ཟིལ་གནོན་དབང་སྡུད་པ། །འཇིག་རྟེན་མཐུན་འཇུག་སྤྱད་པར་བྱ། །དཔེར་ན་འཇིག་རྟེན་ཁམས་དག་ན། །འགྲོ་བས་འགྲོ་བ་འདུལ་བྱེད་པ། །དེ་དགའི་ལས་ལ་དེ་ཞུགས་ཏེ། །དེ་དང་བསམ་པ་མཐུན་སྦྱད་པས། །དེ་དང་འདྲིས་ནས་དེ་དགའ་བྱས། །དེ་ནས་དེ་ཡི་དྲོད་ལོན་ནས། །དེ་ཡི་འདུ་ཤེས་སྒྱུར་བའི་ཚིག །དེ་སྔ་བདག་གི་གྲོགས་ཁྱོད་ཀྱི། །ལས་ལ་ཞུགས་པ་ཤིན་ཏུ་ནོར། །འདིར་ཉེས་ལས་ཀྱི་བསགས་པ་བགྲང་། །ཉེས་ཀྱང་བདག་གིས་ཁྱོད་དགར་བྱས། །ད་ནི་བདག་དགའི་ལས་འདི་ལ། །གྲོགས་ཁྱོད་ཤིན་ཏུ་འཇུག་དགོས་སོ། །བྱས་པས་དེ་ཡི་སྔ་སེམས་དེ། །ཟིན་པས་གཅིག་གི་ཕྱི་སེམས་ཀྱང་། །འཛིན་ཅིང་དེ་དགའི་ལས་ལ་འཇུག །སྤྱོད་པའི་ལས་ཀྱང་འདི་ལྟ་སྟེ། །རྒྱུ་དྲུག་འདུས་པའི་ཕུང་པོ་ལ། །ངན་སོང་གནས་འཇོམས་རྡོ་རྗེའི་རྟགས། །ཡེ་ཤེས་ཐབས་ཀྱིས་སྙན་པའི་གླུ། །རྨད་འབྱུང་གསང་ཆེན་སྒྲོགས་པའི་ཚིག །ཉོན་མོངས་ལྔ་ཡི་ས་གཞི་ལ། །ཡི་གེ་ཡེ་ཤེས་ལྔ་གསལ་བས། །འབར་བ་ཁྲག་འཐུང་སྤྲིན་ཕུང་བཞིན། །ཁྱུ་མཆོག་ལྔ་ཡི་སྟབས་ཀྱིས་རོལ། །སེང་གེ་ང་རོ་རྔམ་པའི་གླུ། །རྡོ་རྗེ་དོན་རབ་སྒྲོགས་པའི་ཚིག །རྨད་བྱུང་རོལ་པའི་དོན་བྱུང་བ། །ཨེ་མ་ངོ་མཚར་ཡ་མཚན་ཆེ། །དགྱེས་པས་རོལ་བའི་བྱིན་བརླབས་ལས། །རྒྱུད་དྲུག་རྩད་གཅོད་ངོ་མཚར་ཆེ། །མཉམ་པ་ཆེན་པོའི་ནམ་མཁའ་ལས། །ཡེ་ཤེས་ འབར་བའི་མེ་བྱུང་བས། །འཁོར་བ ་ཁྲག་གི་རྒྱ་མཚོ་སྐམས། །སྡུག་བསྔལ་དབྱིངས་སུ་ཟད་མཛད་དོ། །མི་གནས་ཀློང་ནས་ཆོ་འཕྲུལ་བ། །གཏུམ་རྔམ་འཁྲུག་པའི་ངོ་བོར་འབར། །ཁྲག་འཐུང་འབར་བའི་སྤྲིན་འཕྲོས་པས། །སྲིད་གསུམ་ཁྲག་མཚོ་རྔོ་ནས་སྐམས། །དཔའ་བོ་ཚམ་ངམ་གྱད་ཀྱི་སྟབས། །སྲིན་པོ་མ་ཏྲཾ་ཁྲོས་པའི་གླུ། །ཐེག་ཆེན་རྨད་བྱུང་གསང་བའི་ཚིག །ཆགས་པའི་རྟོད་ཕུར་གཏིང་ནས་ཕྱུང་། །མཁའ་བཞི་དབྱིངས་ཀྱི་བདེ་ཀློང་ནས། །ཚོམ་བུ་འབུམ་གྱི་ཆོ་འཕྲུལ་འཕྲོས། །དགྱེས་མཆོག་
རོལ་པའི་ཕྲིན་ལས་ལས། །ལ་ལ་ཤེས་རབ་ཐབས་ལ་རོལ། །ལ་ལ་ཐུགས་རྗེ་ལས་ལ་རོལ། །ལ་ལ་གདུལ་བྱའི་ཡུལ་ལ་རོལ། །ལ་ལ་ཡེ་ཤེས་དབྱིངས་ལ་རོལ། །ཐབས་ཀྱི་རྒྱལ་པོ་རྟོགས་པའི་དབང་། །ཆེ་བ་ལུང་གི་ཁྱད་པར་ལས། །རྒྱལ་བ་ཀུན་དང་མཉམ་པར་སྦྱོར། །རྡོ་རྗེ་པདྨ་རོལ་པའི་སྟབས། །ཆགས་མེད་མཁའ་ལ་གསལ་བའི་ཚིག །དུག་གསུམ་ཟིལ་གྱིས་གནོན་པའི་གླུ། །འཇིག་རྟེན་རིམ་གྱིས་སྦྱང་བའི་ཕྱིར། །འཇིག་རྟེན་ཁམས་སུ་རོལ་པ་བྱུང་། །འཇིག་རྟེན་དྲུག་གི་སྙིང་ལ་རོལ། །བདག་པོ་གཙོ་བོ་ཟིལ་མནན་ནས། །འཁོར་ནི་སྙན་པའི་ཚིག་གིས་བསྟེན། །འཁོར་བའི་ལམ་ལྔ་རྒྱུད་བཅད་ནས། །རྣམ་ཐར་ནམ་མཁའི་ངང་དུ་བསླན། །གར་མཆོག་གློག་ལྟར་འགྱུ་ བ་ཡིན། །རྨད་བྱུང་གསང་བའི་དཀྱིལ་འཁོར་ནས། །ཡི་གེ་འབར ་བའི་ཆོ་འཕྲུལ་འཕྲོས། །འཕྲོ་འདུ་སྐར་ལྟར་འཁྲུག་པ་ལས། །ཁམས་གསུམ་བུད་ཤིང་ཐལ་བར་རླགས། །རྡོ་རྗེ་བུ་ཡུག་སྐར་མདའི་སྟབས། །རྡོ་རྗེ་འབྲུག་ཆེན་ལྡིར་བའི་གླུ། །དོན་གྲུབ་རྡོ་རྗེ་གསང་བའི་ཚིག །གདུག་པའི་དབུང་རྣམས་རྣམ་པར་འཇོམས། །རྡོ་རྗེ་སྤྲུལ་པའི་དཀྱིལ་འཁོར་བས། །ཐབས་ཀྱི་བྱང་ཆུབ་སེམས་སྤྲིན་སྤྲོས། །དབང་སྡུད་ཆགས་པའི་ཁྱད་པར་ལས། །འཇིག་རྟེན་བུ་མོ་དྲུག་དང་རོལ། །སེང་གེ་རྣམ་པར་རོལ་པའི་སྟབས། །རྡོ་རྗེ་ཁྱུད་སྐད་འགྱུར་བའི་གླུ། །ཆགས་པ་རྩད་ནས་གཅོད་པའི་ཚིག །རྡོ་རྗེ་རོལ་པའི་དོན་ཆེན་པོ། །འཁོར་ལོ་འབར་བའི་དཀྱིལ་འཁོར་ནས། །མཚོན་ཆ་འབར་བའི་ཡིག་འབྲུ་འཕྲོས། །རྒྱུ་དྲུག་ངོ་བོ་རྩད་ནས་གཅོད། །དུག་ལྔའི་ཕུང་པོ་རྣམ་པར་སྤྲོས། །ཡེ་ཤེས་རྣོ་དབལ་མཚོན་ཆེན་པོ། །ཆོས་ཉིད་བདལ་བའི་ཀློང་ནས་འཕྲོ། །ཐབས་མཆོག་དབྱིག་གི་རྩལ་ཤུགས་ལས། །འབར་བའི་མཚོན་ཆ་ཆར་ལྟར་འབབ། །ཡི་གེ་ཡེ་ཤེས་མཚོན་ཆའི་ཆར། །རྡོ་རྗེ་ལྕེ་ཡི་ཤུགས་ཀྱིས་དབབ། །རིན་ཆེན་གཏེར་གྱི་ལོངས་སྤྱོད་རྣམས། །རྟོག་པའི་རི་བོ་གཞོམ་པ་དང་། །དུག་གསུམ་ཕུང་པོ་གཞིག་པའི་ཕྱིར། །འཁོར་ལོ་ལྕགས་ཀྱུ་
ལ་སོགས་པ། །རྟེན་དང་གསང་ཆེན་ཏིལ་མཆོག་དང་། །དངས་མ་ལ་སོགས་སྒོ་ཀུན་རྣམས། །སོ་སོའི་ཆ་རུ་ཕྱེ་ནས་ནི། །ཐུགས་རྗེས་ཉོན་མོངས་སྦྱོང་བ་ཡི། །སོ་སོ་གཉེར་གྱི་རང་སྐལ་དུ། །ཕྱག་རྒྱ་སོ་སོའི་སྐབས་སུ་གདང་། །དེ་ལྟར་རྫོགས་པར་གྱུར་པ་དང་། །མཎྜལ་ཀུན་གྱི་ཚད་འདྲ་ལ། །དབུས་སུ་ཐིག་བཞི་ལེ་ཚེ་དགུ། །མཐའ་སྐོར་འཁོར་ལོའི་རྩིབས་བརྒྱད་བྱ། །དེ་ལ་སྒོ་བཞི་སྒོ་ཁྱུད་བཅས། །མཐའ་ཟད་བསྐལ་པའི་མེ་རི་བྲི། །དབུས་སུ་དཀར་དམར་ཁ་སྤྲོད་བྲི། །ཕྱོགས་མཚམས་བརྒྱད་དུ་ཁྃ་བརྒྱད་བྲི། །འཁོར་ལོའི་བར་མཚམས་མུ་ཁྱུད་ལ། །ནང་དུ་བལྟས་པའི་ཁྃ་བརྒྱད་གསལ། །རྩི་བསལ་ནང་དུ་ལྟ་བ་བརྒྱད། །མུ་ཁྱུད་བརྒྱད་ལ་ཕྱིར་ལྟ་བརྒྱད། །གྲུ་ཆད་བཞི་ལ་ནང་དུ་ལྟ། །ཐིག་ལེ་རྣམ་བཞི་བྲི་བར་བྱ། །ཕྱི་རིམ་བར་ཁྱམས་དེ་དག་ལ། །ཐིག་ལེ་ཉི་ཤུ་རྩ་བརྒྱད་ནི། །ཕྱི་རུ་ལྟ་བ་བྲི་པར་བྱ། །བསྐལ་བ་ཆེན་པོའི་མེ་ཁྱམས་ལ། །ཐིག་ལེ་ཕྱིར་ལྟ་བཅུ་གསལ་བྲི། །དེ་ལ་ཕྱག་རྒྱ་རིམ་པར་དགོད། །མཎྜལ་སྒོ་རུ་བམ་ཆེན་གཅིག །གླུ་བྲོ་གར་གྱིས་རྣམ་སྦྱངས་ཏེ། །དབུས་སུ་བཞག་སྟེ་ཤར་དུ་བསྟན། །དེ་ཡི་ཕུང་པོ་གཞལ་ཡས་ཁང་། །བྷུྃ་ལས་བསྐྱེད་དེ་གསལ་བར་བྱ། །དེ་རུ་ཕྱག་རྒྱའི་ཚོགས་ཆེན་བསྒོམ། །རྫས་ཀྱི་གནས་རྣམས་སོ་སོ་ལ། །རིགས་ཀྱི་ལྷ་རྣམས་རིམ་པར་དགོད། །དེ་ནས་རྡོ་རྗེ་བསྙེན་པ་བྱ། །བྱིན་ཕེབས་རྟགས་ལུང་མགུ་པ་ན། །བམ་དེ་བྱང་ཤར་མཚམས་སུ་བསྒྲལ། །རྫས་རྣམས་སོ་སོར་བསྔོས་ནས་ཀྱང་། །ཕྱག་རྒྱ་བཞུགས་པའི་གནས་རྣམས་སུ། །མ་ནོར་བར་ཡང་དགོད་དེ་སྦྱར། །དཔལ་དང་ལྡན་པའི་སྣོད་དགུ་ལ། །རྨད་དུ་བྱུང་བ་དགུ་བཀོད་དེ། །འབར་བ་ཆེན་པོའི་གནས་གནས་སུ། །བརྗིད་པའི་ཚུལ་དུ་གསལ་བར་བསྒོམ། །ཕྱག་རྒྱ་གཞན་ཡང་རྫོགས་པར་དགོད། །ཡེ་ཤེས་རྫོགས་པའི་དཀྱིལ་འཁོར་དུ། །དབང་ཆེན་ཟླ་གམ་སྐར་ཚོགས་བཀྲམ། །རྡོ་རྗེ་མི་ཕྱེད་དགུར་ འབར་བ། །ཆེ་བ ་དགུ་ཡི་ཁྱད་པར་ལས། །དཔལ་ཆེན་དགུ་ནི་སྐུ་ལ་རྫོགས། །ཡུམ་ཆེན་དགུ་ནི་དབྱིངས་ལ་རོལ། །དཔལ་
བེའུ་དགུ་ནི་ཐུགས་ལ་འབར། །འབྱུང་ཆེན་དགུ་ནི་ཀློང་དུ་འཁྱིལ། །ཁུ་བྱུག་དགུ་ནི་རང་སྐད་རྫོགས། །བྷན་དྷ་དགུ་ནི་དཔལ་དང་ལྡན། །ཟླ་གམ་དགུ་ནི་ཡུམ་གྱི་དབྱིངས། །ཐིག་ལེ་དགུ་ནི་བྱང་ཆུབ་སེམས། །ཉི་ཟླ་དགུ་ནི་འོད་འཕྲོ་འབར། །དེ་ལྟར་དགུ་དགུར་གསལ་བ་ཡི། །དགུ་ཀློང་བྷ་ག་གཅིག་གི་དང་། །དགུ་བཀག་གཅིག་ཕྱེ་ཐིག་ལེའི་དོན། །ཐམས་ཅད་འབྱོར་པ་རྒྱས་བྱས་ལ། །བམ་དགུ་ཕན་ཅད་སྨན་དུ་སྦྱར། །རྫས་ཀྱི་དངོས་གྲུབ་བླངས་ཏེ་སྤྱད། །ཅེས་བཅོམ་ལྡན་འདས་སེམས་དཔའི་རྡོ་རྗེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྨད་བྱུང་རྫས་ཀྱི་ལེའུ་སྟེ་བཅུ་བཞི་པའོ།། །།དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་ཆོས་ཐམས་ཅད་ནི་མངོན་སུམ་དུ་ཤེས་ཤིང་རིག་པར་བྱའོ། །མངོན་སུམ་གང་ཞེ་ན། དྲན་པ་མངོན་དུ་བཞག་པས་ཡུལ་ལ་མི་གནས་པའི་ཆོས་ཐམས་ཅད་དང་། ཕྱིས་འབྱུང་བའི་ཆོས་ཐམས་ཅད་དང་། །སྔོན་དུ་བྱུང་བའི་ཆོས་ཐམས་ཅད་མངོན་སུམ་མར་རིག་པའོ། །དེ་ཅིའི་ཕྱིར་ཞེ་ན། མངོན་སུམ་མར་ཤེས་པ་ནི་ཡེ་ཤེས་ཆེན་པོའི་རྒྱུ་ཡིན་པའི་ཕྱིར་རོ། །དེ་ཡང་ཇི་ལྟ་ཞེ་ན། ཆོས་ཐམས་ཅད་སྒྱུ་མའི་རང་བཞིན་དུ་དྲན་པ་མངོན་དུ་བཞག་ན་མངོན་དུ་གྱུར་པའི་ཆོས་ཉིད་ཕྱིན་ཅི་མ་ལོག་པར་ཤེས་པ་ཡིན་ནོ། །ཆོས་ཉིད་ཕྱིན་ཅི་མ་ལོག་པར་མངོན་དུ་གྱུར་ན་མི་གནས་པའི་ཡེ་ཤེས་ཆེན་པོ་ཉིད་དེ་ཡིན་ནོ། །དེ་བས་ན་མངོན་པར་ཤེས་པ་རྣམས་དྲན་པ་མངོན་སུམ་མར་ཡིད་ལ་བྱོས་ཤིག་དེ་སྐད་ཅེས་གསུངས་པ་དང་། མངོན་ཤེས་རིག་པའི་དྲང་སྲོང་ཆེན་པོ་རྣམས་ཀྱིས་འདི་སྐད་ཅེས་གསོལ་ཏོ། །བཅོམ་ལྡན་འདས་མངོན་པར་ཤེས་པ་ནི་བདག་ཅག་རྣམས་ཀྱི་དམ་ཚིག་ལགས་སོ། །བཅོམ་ལྡན་འདས་ཀྱིས་བདག་ཅག་རྣམས་ཀྱི་དམ་ཚིག་བཤད་དུ་གསོལ་ཞེས་ཞུས་པ་ལས། །བཅོམ་ལྡན་འདས་ཀྱིས་བཀའ་སྩལ་པ། རིག་འཛིན་ཆེན་པོ་རྣམས་ཡེ་ཤེས་ཆེན་པོའི་རྒྱུ་མངོན་པར་ཤེས་པ་ནི་རྣམ་པ་
ལྔར་རིག་པར་བྱའོ། །མིག་གི་དབང་པོ་ཐམས་ཅད་ལས། །ཞིབ་ཏུ་བཏགས་པའི་ཕྱེ་མར་བྱ། །བཅུད་ཀྱི་སྙིང་པོར་སྦྱར་བྱས་ནས། །མཐོང་བའི་སྙིང་པོ་འབུམ་བཟླས་ན། །ཐམས་ཅད་མ་ལུས་མཐོང་བར་འགྱུར། །འདི་ནི་མིག་གི་མངོན་ཤེས་སོ། །རྡོ་རྗེ་ལྕེ་ཡིས་བརྗོད་པའི་ཚིག །དུས་སམ་རྒྱུན་དུ་བརྗོད་པར་བྱའོ། །བཛྲ་ཙཀྵུ་གརྦྷ་བིདྱཱ་ཧཱུྃ། །རྣ་བའི་དབང་པོ་ཐམས་ཅད་ཀྱང་། །བཏགས་སམ་ཕྱེ་མར་བྱས་ནས་ནི། །བཅུད་ཀྱི་སྙིང་པོར་སྦྱར་བྱས་ཏེ། །ཐོས་པའི་སྙིང་པོ་འབུམ་བཟླས་ན། །སྒྲ་ཡི་བྱེ་བྲག་ཐམས་ཅད་ཐོས། །འདི་ནི་རྣ་བའི་མངོན་ཤེས་སོ། །རྡོ་རྗེ་ཚིག་ཏུ་བརྟག་པ་ནི། །བཛྲ་གརྦྷ་སྟམ་སི་ཧོ། །སྣ་ཡི་དབང་པོ་ཐམས་ཅད་ཀུན། །བསྐམས་སམ་ཕྱེ་མར་བྱས་ནས་ནི། །བཅུད་ཀྱི་སྙིང་པོར་སྦྱར་བྱས་ཏེ། །དྲི་སྣ་ཚོགས་དང་བསྲེས་པ་ལས། །ཚོར་བའི་སྙིང་པོ་འབུམ་བཟླས་ན། །སྣ་ཡི་མངོན་ཤེས་ཐོབ་པར་འགྱུར། །རྡོ་རྗེ་ཚིག་ཏུ་གཟུང་བ་ནི། །བཛྲ་ན་མ་སི་ཏྃ་ཧཱུྃ། །ལྕེ་ཡི་དབང་པོ་ཐམས་ཅད་ཀུན། །བསྐམས་སམ་ཕྱེ་མར་བྱས་ནས་ནི། །བཅུད་ཀྱི་སྙིང་པོར་སྦྱར་བྱས་ཏེ། །རོ་ཡི་མཆོག་ལ་སོགས་པ་ལས། །རོ་ཡི་སྙིང་པོ་འབུམ་བཟླས་ཏེ། །སྨྲ་བྱེད་ལྕེ་ཡི་དཀྱིལ་འཁོར་ནི། །སྟེགས་བུ་ཁྲུ་གང་གྲུ་བཞི་ལ། །དབུས་སུ་གསང་བའི་རྡོ་རྗེ་བྲི། །མཐའ་མ་ལྕེ་ཡི་པདྨས་བསྐོར། །ལྕེ་ལ་ཚིག་གི་འོད་ཟེར་འཕྲོ། །སྨྲ་བའི་བསྒྲུབ་པས་འདི་རྫོགས་ན། །སྨྲ་བའི་དབང་པོ་ཁ་དབྱེ་ཞིང་། །རོ་རྣམས་ཐམས་ཅད་ཤེས་པར་འགྱུར། །འདི་ནི་ལྕེ་ཡི་མངོན་ཤེས་ཡིན། །རྡོ་རྗེ་ཚིག་ཏུ་བརྟག་པ་ནི། །བཛྲ་པཱ་ཤ་སིཏྱཱ་ཧཱུྃ། །སྙིང་གི་དབང་པོ་ཐམས་ཅད་ཀུན། །བསྐམས་སམ་ཕྱེ་མར་བྱས་ནས་ཀྱང་། །སྙིང་པོ་མཆོག་དང་སྦྱར་བྱས་ཞིང་། །དྲན་པའི་སྙིང་པོ་འབུམ་བཟླས་ཤིང་། །དཔལ་བེའུ་ཙིཏྟའི་དཀྱིལ་འཁོར་ནས། །དྲན་པའི་རྟེན་གྱིས་ཡོངས་བསྐོར་ཏེ། །སྙིང་གི་དཀྱིལ་འཁོར་རྫོགས་པ་དང་། །དབང་པོ་ཐམས་ཅད་གསལ་བ་དང་། །ཐམས་ཅད་མ་ལུས་ཤེས་པར་འགྱུར། །གཞན་གྱི་སེམས་ནི་ཤེས་པའི་མཆོག །བཛྲ་ཙིཏྟ་སི་དྱཱ་ཧཱུྃ། །ལུས་ཀྱི་དབང་པོ་
ཐམས་ཅད་ཀུན། །བཏགས་སམ་ཕྱེ་མར་བྱས་ནས་ནི། །སྲ་མཁྲེགས་བཅུ་དང་སྦྱར་བྱས་ཏེ། །རེག་བྱའི་སྙིང་པོ་འབུམ་བཟླས་ན། །ལུས་ཀྱི་མངོན་ཤེས་ཐོབ་པར་འགྱུར། །མངོན་ཤེས་འདི་དག་ཀུན་རྫོགས་ན། །མི་གནས་ཡེ་ཤེས་ཆེན་པོའི་རྒྱུ། །པྲ་མོའང་ནན་ཏན་མཆོག་ཏུ་བྱའོ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མངོན་ཤེས་རིག་པའི་བསྒྲུབ་ལུགས་ཀྱི་ལེའུ་ཞེས་བྱ་སྟེ་བཅྭ་ལྔ་པའོ།། །།དེ་ནས་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་མཆོག་ཆེན་པོའི་བསྒྲུབ་ལུགས་ནི་འདི་ལྟར་རིག་པར་བྱའོ། །དོན་ལ་བརྩོན་པའི་རྣལ་འབྱོར་པས། །ལས་ཀྱི་སྟེགས་བུ་ཆག་ཕྱེད་པ། །མེ་རིས་བསྐོར་ཏེ་འབར་བར་བྱ། །དཀྱིལ་འཁོར་དེ་ཡི་མཎྜལ་ནི། །སུམ་བརྩེགས་བྱས་པའི་དབུས་ཟླ་གམ། །བརྒྱད་ཀྱིས་མཛེས་པར་བྱ་བའོ། །ཕྱི་མཐའ་ཐོད་པའི་ཕྲེང་བས་བསྐོར། །དེ་མཐའ་མེ་དཔུང་འབར་བས་བསྐོར། །དེ་ཡི་ཕྱི་མཐའ་དམར་ཆེན་རྒྱས། །ཟླ་གམ་དབུས་སུ་དཔལ་ཆེན་འབར། །ཟླ་གམ་བརྒྱད་ལ་གནས་བདག་བརྒྱད། །མཐིང་ནག་ཡ་ཐ་མེ་རིར་འབར། །དེ་འོག་ཐོད་པ་ཚར་གསུམ་དང་། །སྒོ་ཁྱམས་དུར་ཁྲོད་རྫས་ཀྱིས་བསྐོར། །སྒོ་བརྩེགས་སྒོ་ཁྱུད་ཐ་མ་བྲན། །ཐམས་ཅད་གང་ཡིན་དེ་ལྟར་སྦྱར། །ཕུན་སུམ་ཚོགས་པར་གྱུར་པ་ན། །རྣམ་བཞི་ལས་ཀྱི་མཎྜལ་བརྩམ། །འཇིགས་བྱེད་བསྐལ་པའི་དཀྱིལ་འཁོར་དུ། །ཟ་བྱེད་ འབར་བའི་ཕྱག་རྒྱ་ཡིས། །ཐར་པ་ཙ་ར་བསྒྲལ་བའི་ཕྱིར། །དྲོད་ལྡན་མན་ངག་འཆང་བ ་དེས། །མཆོག་གི་བྱིན་བརླབས་གཞག་པར་བྱ། །དག་པ་གསུམ་གྱིས་གཞུང་བསྲང་ནས། །གནས་མཆོག་དབེན་པའི་རི་བོ་རྩེ། །རྣ་ཉན་ཕྲ་གསག་ཅན་དང་བྲལ། །འདུ་འཛི་འགྲོ་འོང་ཆད་པ་དག །གསང་ཆེན་སྤྱོད་པའི་གནས་སུ་ཤིས། །རྣམ་བཞི་ལས་ཀྱི་རྟགས་ཉུང་ནའང་། །གཅིག་གཉིས་ལྡན་ན་འབྲིང་དུ་བཤད། །བསྒྲུབ་པའི་རྒྱལ་པོ་གདེང་ལྡན་པ། །ཤིན་ཏུ་བརྗིད་ཅིང་སྲན་ཚུགས་
པ། །ཁུ་འཕྲིག་རྟོག་བྲལ་བརྟུལ་ཞུགས་ཅན། །ལས་ཀྱི་ཕྲེང་བ་ལྷག་ཆད་མེད། །དྲི་ཞིམ་དག་པའི་སྨན་དག་གིས། །ཕྱི་བཀྲུ་ཤི་ནེ་ད་ཧུ་ལས། །ནང་ཡང་དག་པ་ཆེན་པོར་བྱ། །ཚད་མར་སྦྱར་བའི་བཀའ་དང་ནི། །ལྡན་ནས་དུས་བཏབ་ཤིན་ཏུ་བརྩམ། །དེ་ཡང་བརྟག་པའི་གལ་ཆེན་ནི། །བཀྲ་ཤིས་མཛེས་དང་ལྡན་འགྱུར་བ། །བོང་ཚོད་ལོ་ནི་དར་ལ་བབ། །རིགས་ལྔའི་མཚན་དང་ལྡན་པ་ལ། །བསྒྲལ་བའི་རྫས་སུ་རུང་བ་དག །ཡིད་འོང་འབྱོར་ལྡན་བཙལ་ནས་ནི། །བསྒྲུབ་པའི་རྫས་སུ་བྱ་བ་དེ། །དེ་འདྲའི་མཚན་རྟགས་ཡོད་པ་ནི། །ས་སྦྱངས་ས་ལ་སླེབས་པའོ། །བསྒྲུབ་པའི་རྒྱུ་མཆོག་དེ་དག་ནི། །འདའ་ཧུ་མན་འདས་དབང་པོ་བསྒྱུར། །རྡོ་རྗེ་པྲ་མཁན་ཕབ་ནས་ནི། །སྣང་སྲིད་ཐམས་ཅད་དྲི་བའམ། །ལེགས་ཉེས་ཐམས་ཅད་དྲི་བར་བྱ། །དབང་པོ་སྒོ་ལྔའི་དཀྱིལ་འཁོར་དུ། །བདུད་རྩི་རྣམ་ལྔའི་ཐིག་ལེ་གདབ། །རྣམ་ཤེས་འབྱུང་བའི་སྒོ་ལྔ་རུ། །སོ་སོ་འབྱུང་བའི་རྫས་རྣམས་གདབ། །སོ་སོ་རིགས་ཀྱི་ཕྱག་རྒྱས་གདབ། །ཕྱག་རྒྱ་བཀོད་དེ་ཉོན་མོངས་བསྒྲལ། །བསྒྲལ་སྦྱར་ཐམས་ཅད་སྦྱངས་ནས་ནི། །མཆོད་དང་མཉེས་དང་དམ་སྐོངས་དང་། །དངོས་གྲུབ་རྣམ་གསུམ་གང་ཐོབ་བླང་། །ཐོབ་ནས་ཐམས་ཅད་ཅི་བདེར་སྤྱད། །ཅེས་གསུངས་སོ། །དེ་ནས་སེམས་དཔའི་རྡོ་རྗེས་ཡང་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་བར་དུ་གཅོད་པ་ཐམས་ཅད་བཟློག་པའི་བསྒྲུབ་པ་ཆེན་པོ་ནི་འདི་ལྟར་རིག་པར་བྱའོ། །གོང་མ་བཞིན་དུ་ལས་བརྩམས་ནས། །ཐར་པའི་རྒྱུ་མཆོག་དེ་དག་ནི། །རུས་པ་རྡོ་རྗེ་ཐལ་བར་བསྒྲུབ། །རུས་པའི་ཚོགས་ནི་ཐམས་ཅད་ཀུན། །བསྲེགས་དང་ལྕེ་པོག་ནག་པོར་སྦྱར། །ཁྱབ་འཇུག་གའུ་ཁ་སྦྱར་དུ། །བཅུག་སྟེ་འཇོམས་པའི་ཕྱག་རྒྱ་དང་། །དྲག་པོ་སྔགས་ཀྱིས་བསྒྲུབ་བྱས་ནས། །གྲུབ་ན་རྣལ་འབྱོར་དོན་ལྡན་གྱི། །བར་ཆད་ཟློག་པའི་གཉེན་པོར་སྦྱར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་ཐལ་ཆེན་གྱི་སྒྲུབ་ཐབས་ཀྱི་ལེའུ་སྟེ་བཅུ་དྲུག་པའོ།། །།དེ་ནས་
ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་བྲ་ཐམས་ཅད་ནི་འདི་ལྟར་རིག་པར་བྱའོ། །མཎྜལ་གྲུ་བཞི་པ་གཅིག་ལ། །ཟླ་གམ་སྒོ་གཅིག་རྡོ་རྗེས་བསྐོར། །མཐའ་ཁྱུད་སྒོ་བཞི་ལྡན་པར་བྲི། །རྒྱུ་མཆོག་དབང་པོ་ཕྱེད་ལྡན་ཤིས། །ཕྱི་ཡི་ཁྲུས་རྣམས་བྱས་ནས་ནི། །ཤར་དུ་ཁ་བསྟན་དབུས་སུ་གཞག །ལྕེ་ལ་གཟུངས་ཐག་སྣ་ལྔས་གདགས། །རྣལ་འབྱོར་རྣམས་ཀྱིས་བསྐོར་བར་བྱ། །ཕྱག་རྒྱ་རྫས་དང་བཅས་པར་དགྲམ། །དེ་ཡི་ཁོང་དུ་གཞལ་ཡས་བསྐྱེད། །རིམ་པར་བརྩེགས་པའི་དཀྱིལ་འཁོར་ནི། །འབར་བའི་འབྱུང་ཆེན་ འབར་བ ་ལྔ། །དོན་གྱི་ལྷ་མོ་ལྔ་རུ་གསལ། །ཀུན་གཞི་ཀུན་དུ་བཟང་མོར་གསལ། །དེ་ཡི་ཐུགས་ཀྱི་ཁོང་ཐག་ཏུ། །ཐིག་ལེ་ཟླ་བ་ཉ་རྒྱས་ལ། །ཡེ་ཤེས་སེམས་དཔའ་ཚོན་གང་བ། །ཐུགས་ཀར་ནོར་བུ་རིན་ཆེན་འབར། །དབུས་སུ་ཉི་མའི་གའུ་ལ། །དཔལ་བེའུ་ཡུངས་འབྲུའི་བུམ་པ་ལ། །ཧཱུྃ་དམར་ཏིལ་འབྲུར་གནས་པ་ནི། །བདེ་ཆེན་བྱང་ཆུབ་སེམས་ཞེས་བྱ། །རྡོ་རྗེ་གསང་ཐག་རྒྱུན་མི་གཅད། །རྡོ་རྗེ་ཁ་པྲ་གདབ་པར་བྱ། །དེ་ནས་མཚན་མ་བྱུང་གྱུར་ན། །དངོས་གྲུབ་བླངས་ཏེ་དེ་བསྒྲལ་ལ། །བསྐམས་ཏེ་བདུད་རྩི་རྩ་བར་བྱ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མཆོག་ཕྲན་ཐབས་ཀྱིས་བསྒྲུབ་ལུགས་ཀྱི་ལེའུ་སྟེ་བཅུ་བདུན་པའོ།། །།དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་ཆོས་ཐམས་ཅད་ནི་སྒྱུ་མའི་རང་བཞིན་དུ་ཤེས་པར་བྱའོ། །དེ་ཅིའི་ཕྱིར་ཞེ་ན། །སྒྱུ་མ་ནི་དངོས་པོར་སྣང་ཡང་རང་བཞིན་མེད་པ་ཡིན་ཏེ། རང་བཞིན་མེད་པའི་དོན་ནི་ཆོས་ཉིད་རྡོ་རྗེ་ཡིན་ནོ། །དེ་བས་ན་སྒྱུ་མའི་ཆོས་ཐམས་ཅད་ཁོང་དུ་ཆུད་པར་བྱའོ། །དེ་ནས་འཁོར་དེར་འདུས་པར་གྱུར་པའི་ལྷ་མ་ཡིན་གྱི་ཚོགས་བདག་སྒྱུ་མ་མཁན་ཞེས་བྱ་བས་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་རྣམས་ཀྱི་དམ་ཚིག་ནི་སྒྱུ་མའི་ཆོ་འཕྲུལ་ལ་གནས་ཤིང་སྒྱུ་མ་ཆེད་དུ་བགྱིད་ལགས་
ཀྱིས་བདག་ཅག་རྣམས་ཀྱི་དོན་ཆེད་དུ་སྒྱུ་མའི་ཆོས་ཐམས་ཅད་བཤད་དུ་གསོལ་ཞེས་གསོལ་བ་ལས། །བཅོམ་ལྡན་འདས་ཀྱིས་བཀའ་སྩལ་པ། ཚོགས་བདག་ཆེན་པོ་སྒྱུ་མའི་ཆོ་འཕྲུལ་ནི་འདི་ལྟར་རིག་པར་བྱའོ། །ཆོས་རྣམས་ཐམས་ཅད་སྒྱུ་མར་སྣང་། །སྒྱུ་མའི་རང་བཞིན་སྟོང་པ་སྟེ། །སྟོང་པའི་དོན་རྣམས་གང་ཡིན་པ། །མི་འགྱུར་མི་ཤིགས་རྡོ་རྗེའི་དོན། །སྟོང་པ་ཉིད་ལ་སྒྱུ་མ་ཡི། །ཆོ་འཕྲུལ་བྱེ་བ་མང་པོ་འབྱུང་། །དེ་བཞིན་སྒྱུ་མའི་ཆོ་འཕྲུལ་ཡང་། །གྱིན་ད་ཙམ་གྱི་རྒྱུ་རྐྱེན་ལས། །ཆོ་འཕྲུལ་གཟུགས་ནི་ཐ་དད་སྣང་། །སྣང་ཡང་དངོས་པོར་མ་གྲུབ་སྟེ། །འགྱུར་འཇིགས་མེད་པས་རྡོ་རྗེའི་དོན། །ཀུན་རྫོབ་སྒྱུ་མའི་མཚན་ཉིད་ཀྱང་། །རྡེའུ་དང་ཤིང་བུའི་རྒྱུ་དག་ལས། །སྨན་དང་སྔགས་ཀྱིས་རྐྱེན་སྦྱར་ནས། །འབྲས་བུ་སྒྱུ་མའི་ཆོ་འཕྲུལ་འབྱུང་། །སྒྱུ་མའི་གསང་ཚིག་སྦྱོར་བ་ནི། །སྒྱུ་མའི་བདག་པོས་འདི་སྐད་བཤད། །རྒྱུ་ལ་འདོད་པའི་གཟུགས་བྱས་ལ། །ཤེའུ་རེའུ་སྨན་གྱིས་བཏབ་ནས་ནི། །གསང་སྔགས་འདི་ཡི་སྦྱོར་བ་བྱ། །ཤེའུ་རེའུ་ཨི་ན་ཡ། །ཨ་མོ་ཁ་ཨ་གུསྶ་གུས། །ཆག་ཤིང་དག་གིས་བརྡབས་བྱས་ན། །ཇི་ལྟར་འདོད་པ་སྣ་ཚོགས་བྱ། །བསྡུ་བར་འདོད་ན་སླར་བཟློག་བྱ། །དེས་ན་སྒྱུ་མའི་གཡེང་བ་ཅན། །དྲང་བའི་ཐབས་ཀྱིས་བཀྲི་བར་བྱ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྒྱུ་མ་རྡོ་རྗེའི་བསྒྲུབ་ལུགས་ཀྱི་ལེའུ་སྟེ་བཅྭ་བརྒྱད་པའོ།། །།དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་ཆོས་ཐམས་ཅད་ལ་དབང་སྒྱུར་བར་འདོད་ན་འདི་ལྟར་རིག་པར་བྱའོ། །ཕུན་སུམ་ཚོགས་པ་ཀུན་ལྡན་ནས། །སྟེགས་བུ་ཀུན་དུ་གྲུ་བཞི་ལ། །མུ་ཁྱུད་གཅིག་ཏུ་བསྐོར་ནས་ནི། །ཟླ་བ་ཁམ་པའི་དབྱིབས་སུ་སུ་སྦྱར། །སྒོ་བཞི་གྲུ་ཆད་བཞིར་ལྡན་བྱ། །དབྱིབས་ཀྱིས་ཐིག་ལེ་ཟླུམ་པོ་ལ། །རྡོ་རྗེ་དང་ནི་ཉི་མས་བསྐོར། །དབུས་སུ་བྷན་དྷ་དཔལ་ལྡན་ལ། །དཔལ་ཆེན་ཡབ་ཡུམ་སྦྱར་ལ་གཞག །ཚལ་བུ་བརྒྱད་ལ་གནས་བརྒྱད་
སྦྱར། །ལྟེ་བ་བསྐོར་ཏེ་རིམ་པར་གཞག །ཐིག་ལེ་ཤར་གྱི་སྒོ་གང་དུ། །རྡོ་རྗེ་རྣལ་འབྱོར་གསང་མིང་དང་། །དངོས་གྲུབ་གསོལ་བྱ་བྲིས་ལ་གཞག །མཆོད་པའི་ཁྱམས་སུ་གྱུར་པ་ལ། །བསྒྲུབ་པའི་རྫས་དང་མཆོད་པ་རྣམས། །རིམ་པ་བཞིན་དུ་མཛེས་པར་དགྲམ། །རྡོ་རྗེ་རྣལ་འབྱོར་དེ་དག་རྣམས། །རྡོ་རྗེ་ལྷགས་པའི་རྟགས་ཀྱིས་མཚན། །ཏིང་འཛིན་དཀྱིལ་འཁོར་རྫོགས་བྱས་ནས། །སྤྱན་དྲངས་མཆོད་པ་ཀུན་བསོགས་ཏེ། །འཇུག་དང་དངོས་གྲུབ་གསོལ་བ་དང་། །དབང་བསྐུར་ལས་རྣམས་ཀུན་རྫོགས་ནས། །རྨད་དུ་བྱུང་བའི་གཏོར་མ་དག །ཆ་གསུམ་དང་པོ་སྦྱིན་སྲེག་བྱ། །བར་མ་མི་ཟད་གཏེར་དུ་སྦ། །བྱང་ཆུབ་སེམས་ཀྱི་ཆུ་བོ་དང་། །ཆོས་ཉིད་ནམ་མཁའི་དབྱིངས་ཆེན་དང་། །བྷ་ག་ཡུམ་གྱི་ས་གཞི་ལ། །ཤིན་ཏུ་སྦ་བའི་ཚུལ་དུ་སྦྱར། །ཆ་གཅིག་གཞལ་ཡས་ཤར་སྒོ་ནས། །བཅུ་གསུམ་བཅལ་བར་སྟེགས་བུ་བྱ། །དེར་ནི་གནས་བདུན་གཙོ་རྣམས་ཀྱང་། །དེ་བཞིན་བཅུ་གསུམ་ལན་རེ་ལ། །གནས་ཀྱི་མགྲོན་ནི་མ་སྲིང་རྣམས། །བདུན་ཅུ་བར་དུ་ཀུན་རྫོགས་བྱ། །ཐ་མར་མཎྜལ་ཟླ་གམ་ལ། །ནུས་ན་མཁའ་འགྲོ་ནམ་མཁའི་ཧོམ། །རྫོགས་བྱ་མ་ལུས་དེ་མགུ་བྱ། །ལྷག་མར་གྱུར་པ་ཀུན་རྫོགས་བྱ། །སྙིགས་མར་གྱུར་པ་ཐམས་ཅད་ཀྱང་། །སྦ་འམ་བསྲེག་གམ་ཆུ་ཀླུང་འདོར། །རྡོ་རྗེ་གནས་ཆེན་དེ་བསྲུངས་ཏེ། །གནས་ནི་སྦ་ཕྱིར་སུ་དག་གསང་། །མི་རིགས་ཕྱིར་ན་མཚན་མ་དག །རང་རང་གནས་སུ་སླེབས་པར་བྱ། །གང་དག་འདུ་ཚེའང་དེ་བཞིན་ནོ། །འདི་ནི་ཐིག་ལེ་གཅིག་པ་ཡི། །བསྒྲུབ་ལུགས་ཡིན་པར་རྒྱལ་བས་བཤད། །འདི་དག་སྒྲུབ་པའི་སྐྱེས་བུ་ནི། །ཟླ་བའི་འཁོར་ལོ་ལ་གནས་ནས། །ཉི་མའི་འཁོར་ལོ་ཐོགས་ནས་ནི། །ཡང་དག་ཆོས་ཀྱི་དབྱིངས་ཉིད་ལ། །དབང་སྒྱུར་བྱེད་པའི་རྒྱལ་པོར་འགྱུར། །ཞེས་གསུངས་སོ། །ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །འདི་ཡང་རིམ་གྱིས་གོང་མ་ལྟར། །ཐམས་ཅད་ཚུལ་བཞིན་སྦྱར་བྱས་ནས། །ཕྱིར་ཀུན་
དུ་གྲུ་བཞི་ལ། །ཐིག་ལེ་ཟླ་བ་གཅིག་ཏུ་བྱ། །དེ་ལ་སྲད་བུ་བཞི་བསྣོལ་བས། །ལེའུ་ཚེ་དགུ་རུ་གྱུར་པར་བྱ། །ཕྱི་རོལ་མུ་ཁྱུད་ཐོད་པས་བསྐོར། །གྲུ་བཞི་གྲུ་ཆད་རབ་མཛེས་བརྒྱན། །དེ་ཡི་མཐའ་ཟད་ཁྱམས་གཅིག་ལ། །སྒོ་གདོང་སྒྲུབ་པ་པོ་ལ་ལྟ། །དབུས་སུ་ཐིག་ལེ་དཀར་དམར་ལ། །ཁ་སྦྱོར་བར་དག་རྡོ་རྗེས་འབྲེལ། །དེར་ནི་དཔལ་ཆེན་ཡབ་ཡུམ་བཞུགས། །ཕྱི་མཚམས་ལེའུ་ཚེ་དེ་བརྒྱད་ལ། །ཟླ་གམ་བརྐྱང་བ་བརྒྱད་བྱས་ཏེ། །ཡེ་ཤེས་གནས་ཀྱི་མ་བརྒྱད་དགོད། །ཕྱི་རོལ་སྒོ་གཅིག་ཁྱམས་དེ་ལ། །བསྒྲུབ་པའི་རྫས་ཀྱིས་མཛེས་པར་དགྲམ། །བསམ་བྱ་བསྒྲུབ་པ་ལ་སོགས་ཀུན། །ཐམས་ཅད་དེ་བཞིན་འདིར་སྦྱར་བྱ། །འདི་ལྟར་གྲུབ་པའི་སྐྱེས་བུ་གང་། །ཆོས་ཀྱི་རྒྱལ་པོར་གྱུར་པ་སྟེ། །ཐམས་ཅད་ཀུན་ལ་དབང་སྒྱུར་བའི། །སྐྱེས་བུ་ཆེན་པོར་དེ་འགྱུར་རོ། །ཞེས་གསུངས་སོ། །དེ་ནས་ཡང་སེམས་དཔའི་རྡོ་རྗེ་དེས་ཆོ་འཕྲུལ་ཐམས་ཅད་ལ་དབང་སྒྱུར་བ་ཞེས་བྱ་བ་འདི་གསུངས་སོ། །འདུས་པ་ཆེན་པོའི་རྣལ་འབྱོར་པ། །འདི་ཡང་ཐམས་ཅད་དེ་འདྲར་སྦྱར། །ཀུན་དུ་གྲུ་བཞིར་ལྡན་འགྱུར་བ། །འཁོར་ལོ་རྩིབས་བརྒྱད་དག་ཏུ་བྱ། །གྲུ་ཆད་བཞི་ཡི་ཕྱི་རོལ་དུ། །སྒོ་བཞི་དག་དང་ལྡན་པར་བྱ། །ཕྱི་ཁྱམས་དམར་ནག་མེ་རི་ཀློང་། །ཤིན་ཏུ་བརྗིད་ཅིང་འཇིགས་པར་བྲི། །ཐིག་ལེ་དབུས་ཀྱི་སྙིང་པོ་ལ། །ཟླ་གམ་ འབར་བས་མཚན་པར་བྱ། །རྩིབས་མཆོག་བརྒྱད་ལ་ཟླ་གམ་ནི། །ནང་དུ་ལྟ་བ ་དེ་བརྒྱད་བྲི། །རྩིབས་མཆན་བརྒྱད་ལའང་དེ་བཞིན་ཏེ། །རྡོ་རྗེ་སྒོ་མོ་བཞི་རྣམས་ཏེ། །ཕྱག་རྒྱ་རིམ་པར་བཀྲམ་བྱས་ནས། །བསྒྲུབ་པའི་ལས་རྣམས་ཀུན་རྫོགས་བྱའོ། །དེ་ལྟར་གྲུབ་པའི་རྣལ་འབྱོར་པ། །འཇིག་རྟེན་པ་དང་འཇིག་རྟེན་ལས། །འདས་པའི་ཆོ་འཕྲུལ་ཐམས་ཅད་ལ། །དབང་སྒྱུར་བྱེད་པའི་རྒྱལ་པོར་འགྱུར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ཐིག་ལེ་སྒྲུབ་པའི་ལེའུ་ཞེས་བྱ་སྟེ་བཅུ་དགུ་པའོ།། །།དེ་ནས་སེམས་དཔའི་རྡོ་རྗེ་དེས་འདི་སྐད་ཅེས་
གསུངས་སོ། །འདུས་པ་ཆེན་པོའི་རྣལ་འབྱོར་རྣམས་དྲེགས་པ་ཅན་གྱི་ཚོགས་ཐམས་ཅད་ལ་དབང་སྒྱུར་བར་འདོད་ན་འདི་ལྟར་རིག་པར་བྱའོ། །འདི་ནི་བྱས་ལ་སོགས་པའི་ལས། །འདི་ལྟར་འབྱོར་དང་ཕུན་སུམ་ཚོགས། །ཐབས་ལ་མཁས་དང་ཡོ་བྱད་དང་། །ཇི་ལྟར་རིག་པར་འདིར་བསྡུ་བྱ། །དེ་ནས་མཎྜལ་འདྲ་ཅིག་ལ། །དུར་ཁྲོད་མགོ་མ་ཡང་དུ་བྱ། །ཟུར་བཞི་མཎྜལ་བཞི་བྱས་ལ། །བཞི་ལས་དེ་བཞིས་ཆག་རེས་བསྟོད། །དེ་ཉིད་མ་ཏང་གཟུགས་སུ་བྱ། །སྙིང་ག་མན་ཆད་དབུས་སུ་བསྣོལ། །དཀྱིལ་འཁོར་ཆེན་པོའི་འོག་ཏུ་གཞུག །འཁོར་ལོ་འབར་བའི་ཐིག་བཏབ་སྟེ། །དཔལ་ཆེན་ལྔ་ཡི་ཕྱག་རྒྱ་བྱ། །ཁྱམས་གཉིས་དག་གིས་མཛེས་པ་ལ། །གནས་དང་ཡུལ་གྱི་ཕྱག་རྒྱ་དགོད། །སྒོ་བཞིར་རྡོ་རྗེ་སྒོ་བ་བཞི། །ཡན་ལག་སྤྲུལ་པའི་མགོ་བརྙན་གནས། །ཕྱི་ཁྱམས་རྡོ་རྗེ་མེ་རིར་བྱ། །དེ་ཡི་ཕྱི་རོལ་ཕྲེང་ཆེན་གཏམས། །སྐམ་དང་ར་རི་རློན་པས་བསྐོར། །དེ་ཡི་ཕྱི་རོལ་མེ་བུར་འཚུབ། །བསྐལ་པའི་བུ་ཡུག་བྲི་བར་བྱ། །རྡོ་རྗེ་སྒོ་ཁྱུད་སྒོ་ཁང་དུ། །གུ་གུ་ཐུལ་དང་ཟ་ར་ཚགས། །ཞིང་དང་སྦྲུལ་གྱི་ཆུན་པོ་བྲི། །དེ་ནས་བནྡ་དཔལ་ལྡན་ལ། །རྡོ་རྗེ་དཔལ་གྱི་ཡི་གེ་དག །བྲིས་ལ་ཁ་སྦྱར་སྦུབ་སྟེ་གཞག །གའུ་ཆུང་ལ་རལ་པ་ཅན། །བརྒྱད་བྲིས་འབྱུང་བའི་གནས་སུ་གཞག །ལས་བྱེད་བརྒྱད་དམ་བཅུ་གཉིས་ལ། །ལས་བྱེད་བཅུ་གཉིས་བྲིས་ལ་འགོད། །ཐར་པ་གནས་ཀྱི་དཀྱིལ་འཁོར་དུ། །གདོལ་པ་འབྱུང་པོ་ང་རྒྱལ་ཅན། །ཆགས་སྡང་རྣམས་ཀྱིས་བསླད་པའི་རྒྱུ། །དེ་ཡི་དུག་གསུམ་བཤིག་པའི་ཕྱིར། །དོན་གྱི་བསྒྲུབ་པ་ཆེན་པོ་བཤད། །རུ་དྲ་ལྔ་ཡི་ཚོགས་ཆེན་ཏེ། །ཏིང་འཛིན་ཡེ་ཤེས་ལྔས་བཅོམ་ནས། །རྡོ་རྗེ་དྲོད་ཀྱིས་རྣམ་པར་སྦྱར། །མདོ་ཡི་ས་ལ་སྟབས་གཅིག་ཏུའོ། །བགེགས་ཀྱི་བགེགས་ཏེ་བགེགས་ཆེན་པོ། །དུག་ལྔ་རྟོག་པ་ཉིད་ལས་སྐྱེས། །ཕྱེད་དང་གསུམ་གྱི་དུར་ཁྲོད་ན། །གཞི་རྩ་ངག་དང་ལུས་སེམས་སོ། །བརྗིད་ལྡན་དཔལ་ཆེན་དུར་ཁྲོད་བདག །བདག་
རྟོག་རྟོག་འཇོམས་ཏིང་འཛིན་གྱིས། །སྲིད་གསུམ་རུ་དྲ་དུར་ཁྲོད་དུ། །ཚོགས་བདག་ཆེན་པོ་དེ་བརྒྱད་བྱ། །མ་རིག་མུན་ཁང་སྒོ་ཕྱེད་ནས། །གླང་ཆེན་སྨྱོན་པ་དེ་བཟུང་ནས། །གཟུང་འཛིན་དམ་པོའི་རྟོད་ཐག་བཅད། །དུག་གསུམ་རྣམ་རྟོག་རྟོད་ཕུར་དབྱུང་། །ངན་སོང་འདམ་ནས་དྲངས་ནས་ནི། །ཉོན་མོངས་དཔུང་རྒོད་དེ་བཏུལ་ནས། །ཡེ་ཤེས་ཐབས་ཀྱིས་རྣམ་སྦྱངས་ཏེ། །ནམ་མཁའི་ཀློང་དུ་དམིགས་མེད་པར། །བདེ་ཆེན་མཆོད་པའི་ཚོགས་ཆེན་དག །རོ་མཆོག་ལྔ་དང་མཉམ་སྦྱར་བས། །ཆོས་ཀྱི་ལོངས་སྤྱོད་རྒྱས་པར་སྦྱར། །མཉམ་ཉིད་བདེ་བའི་སྙིང་རྗེ་ཡིས། །དྲེགས་པ་ཆེན་པོ་གཞོམ་པ་དང་། །འཁོར་བའི་དྲ་ བ་གཅད་པའི་ཕྱིར། །ཁྲོ་ཚོགས་འབར ་བའི་སྤྲིན་འཕྲོས་པས། །གཏུམ་ཐུང་རྔམ་པ་མགྱོགས་པའི་ཚོགས། །ཕྱག་བརྙན་ཆར་ཆེན་ཕབ་ནས་ནི། །འཁོར་བའི་ཐ་བ་སྤངས་ནས་ནི། །བདེ་བ་ཆེན་པོའི་ཞིང་བཟློག་སྟེ། །བྱང་ཆུབ་མྱུ་གུ་བསྐྱེད་ནས་ནི། །བྱང་ཆུབ་སེམས་དཔའི་ལོ་ཏོག་བསྐྱེད། །དུར་ཁྲོད་ཆེན་པོའི་བཞིན་ཕྱོགས་ནི། །མགོ་ནི་ལྷོ་ནུབ་མཚམས་སུ་བཏིང་། །རྐང་པ་བྱང་ཤར་མཚམས་སུ་བཏིང་། །ང་ནི་དུར་ཁྲོད་དབང་ཕྱུག་ཆེ། །སངས་རྒྱས་སྐུ་སྟེ་ཡེ་ཤེས་ཡིན། །ཐུགས་རྗེ་རྣོན་པོའི་དམག་ཚོགས་ལ། །ཡེ་ཤེས་རྣོན་པོའི་མཚོན་ཆ་ཡིས། །ལོག་རྟོག་འཁོར་བའི་རྒྱུན་བཅད་དོ། །གྲུ་བཞི་ཁ་བཞིར་རྡོ་རྗེ་ཡི། །དབྱིབས་འདྲའི་ཐབ་ནི་བརྩིགས་ནས་ཀྱང་། །སྙིང་གར་འཁོར་ལོའི་ཐབ་ཏུ་བྱ། །རིགས་ཀྱི་ཡམ་ཤིང་ལྔ་བརྩིགས་ཏེ། །ཧོམ་ལྔ་འབྲེལ་པའི་ལས་ཆེན་བརྩིགས། །ཐབས་ཆེན་ལྔ་ཡི་ཧོམ་ཁུང་དུ། །འཁོར་བའི་སྡུག་བསྔལ་ཡམ་ཤིང་ལ། །ཡེ་ཤེས་ཆེན་པོའི་མེ་ཀློང་དུ། །ཉོན་མོངས་ལྔ་ཡི་བསྲེགས་སྦྱངས་རྫོགས། །བྱ་བར་སྦྱོར་བ་མཐའ་དག་ཀུན། །ཇི་ལྟར་འབྱོར་ཅིང་འཚམ་པར་འོས། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་དྲེགས་པ་ཅན་གནོན་པ་ཞེས་བྱ་བའི་ལེའུ་སྟེ་ཉི་ཤུ་པའོ།། །།
དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་ཚོགས་འཁོར་བའི་རྒྱ་མཚོ་ཟད་པར་བྱེད་པའི་ཞལ་གྱི་དཀྱིལ་འཁོར་ཞེས་བྱ་བ་བསྒྲུབ་པའི་དོན་ནི་འདི་ལྟར་རིག་པར་བྱའོ། །འདི་ཡང་དེ་འདྲར་ཀུན་སྦྱར་ནས། །འཁོར་ཁང་ཅན་གྱི་གཞལ་ཡས་སུ། །ཁྲུ་གང་གྲུ་བཞིའི་ཚད་དེ་ལ། །བཞི་ནི་འཁོར་ཁང་ཁྱམས་དེ་དག །ཕྱོགས་བཞི་དག་ཏུ་བརྩམ་པར་བྱ། །དྲི་ཞིམ་ཙནྡན་འདེ་གུ་བཏང་། །དྲི་སྤོས་ཚོམ་བུ་རིན་ཆེན་ཕྲོག །སྦྱིན་མཆོད་རྒྱས་པར་དེ་བཤམ་བྱ། །ལྷ་ཡི་དགེ་བསྙེན་རྣམ་པ་བཞི། །ཕྱོགས་མཚམས་བསྲུང་བའི་ལས་རྣམས་བསྒོ། །ཁྱམས་ཀྱི་ནང་རིམ་ཕྱོགས་མཚམས་སུ། །ཆག་ཕྱེད་པ་ཡི་སྟེགས་བུ་བཅུ། །བསྐལ་པའི་མེ་དཔུང་འབར་བྲིས་ལ། །སྣ་ཚོགས་རྒྱུ་ལས་བྱས་པ་ཡི། །མཐུན་པའི་གཟུགས་བཅུ་དབང་བསྐུར་ཏེ། །ཁྲོ་བོ་གར་གྱི་ནང་མཚམས་གཅད། །དེ་ནས་མ་ཏྲཾ་གནོན་པར་བྱ། །དྲེགས་པ་རུ་དྲ་སྡིག་ཅན་འདི། །ནམས་ཀྱང་བསྒྲལ་བའི་ཞིང་ཡིན་ཏེ། །ཛཿཧཱུྃ་བྃ་ཧོཿ མ་ཧཱ་ཤྲཱི་ཧེ་རུ་ཀ་མ་ཏྲཾ་རུ་དྲ་ཧ་ཧ་ཕྲ་བེ་ཤ་ཕཊ། ཁ་ཊྭཱཾ་ཕྱག་རྒྱས་བསྒྱེལ་ནས་ནི། །མ་རིག་མུན་པའི་སྒོ་ཕྱེ་ནས། །རྣམ་ཤེས་ཨ་རུ་བྱིན་བརླབས་ཏེ། །གསང་ཆེན་ཐུགས་ཀྱི་ཀློང་དུ་བསྟིམ། །སྦུབས་ནི་གཞལ་ཡས་འབར་བར་བྱ། །སྟེགས་བུ་མ་ཏྲཾ་གཟུགས་འདྲ་ལ། །འགྱེལ་ཐབས་བཞིན་ཕྱོགས་ཅི་འདྲར་བྱ། །ཁ་དོག་སྔོ་སྐྱ་གན་རྐྱལ་ཐབས། །ཆེ་ཆུང་ཚད་མེད་གནས་ཀྱིས་སྦྱར། །དེ་ཡི་སྙིང་གར་བང་རིམ་གསུམ། །དང་པོར་དམར་པོ་གྲུ་བཞི་བརྩིགས། །གཉིས་པ་མཐིང་ནག་གྲུ་གསུམ་བྱ། །གསུམ་པ་སྨུག་ནག་ཟླ་གམ་བྱ། །ཡན་ལག་བཞི་དང་མགོ་མཚན་དྲུག །གསང་སྒོ་གཉིས་ཏེ་བརྒྱད་དག་ལ། །སྟེགས་བུ་ཆག་ཕྱེད་གྲུ་བཞི་བརྒྱད། །དེ་ཡི་མཐའ་རིམ་ཡོངས་ཟད་དུ། །ཟླ་གམ་གསལ་བའི་མཎྜལ་བྱ། །དེ་དག་མེ་ཀློང་འབར་བར་བསྐོར། །ཡ་ཐོག་ཟླ་གམ་སྟེང་དག་ཏུ། །དཔལ་དང་ལྡན་པའི་ལྷ་མཆོག་བཞུགས། །མཐིང་ནག་གྲུ་
གསུམ་མེ་དཔུང་བྲི། །གྲུ་བཞིའི་དམར་པོ་བང་རིམ་ལ། །རིགས་བཞི་ལྷ་མཆོག་དཔལ་ལྡན་གཞག །ཡན་ལག་མགོ་མཚན་གཡས་གཡོན་བརྒྱད། །དབང་ཕྱུག་གནས་ཀྱི་བདག་མོ་བརྒྱད། །བྲི་བྱ་ཡང་ན་མཚན་མ་གཞག །ཚིགས་ཆེན་བརྒྱད་ལ་ཡུལ་བདག་བརྒྱད། །ཇི་ལྟར་འོས་པ་དེ་ལྟར་བྱའོ། །སྒོ་བཞིར་གསང་བ་སྒོམ་ར་གཞག །མཐའ་ཟད་ཡོངས་ཀྱི་ཟླ་གམ་ལ། །བུད་མེད་ཉི་ཤུ་རྩ་བརྒྱད་གཞག །མིང་ངམ་མཚན་མ་རྟེན་ཏེ་གཞག །དེ་ཡི་ཁ་ལ་ཐབ་ཏུ་བརྩིགས། །པདྨ་དཔལ་བེའུ་དབྱིངས་འདྲ་ཐབ། །མཁས་པས་ཡམ་ཤིང་བརྩམ་པར་བྱ། །བྱ་བའི་བྱ་བ་ཐམས་ཅད་ཀུན། །གོང་དུ་སྦྱོར་བ་དེ་ལྟར་སྦྱོར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འཁོར་བ་ཐམས་ཅད་སྒྲོལ་བ་བསྒྲུབ་པ་ཞེས་བྱ་བའི་ལེའུ་སྟེ་ཉི་ཤུ་རྩ་གཅིག་པའོ།། །།དེ་ནས་ཡང་སེམས་དཔའི་རྡོ་རྗེ་དེས་དུག་གསུམ་ཐུགས་སུ་དབང་སྒྱུར་བ་ཞེས་བྱ་བའི་མདོ་འདི་གསུངས་སོ། །འདུས་པ་ཆེན་པོའི་རྣལ་འབྱོར་པ། །དུག་གསུམ་དབང་དུ་བསྒྱུར་བ་ཡང་། །འདི་ལྟར་ཁོང་དུ་ཆུད་པར་བྱ། །དུག་གསུམ་རང་བཞིན་གང་ཡིན་པ། །སྐུ་གསུམ་ཉིད་ཀྱི་ངོ་བོ་སྟེ། །གཞན་ནས་བཙལ་བ་ཅི་ཡང་མེད། །དེ་ལྟར་ཤེས་པར་འགྱུར་བ་དང་། །ཀུན་རྫོབ་ཚུལ་དུ་འདི་ལྟར་བསྒྱུར། །ཐམས་ཅད་གོང་མ་བཞིན་སྦྱར་ལ། །སྟེགས་བུ་འདོམ་གང་པ་ཞིག་ལ། །ཕྱིར་དམར་པོ་རྒྱས་པར་བྱ། །དེ་ནས་མཐིང་ནག་གྲུ་གསུམ་བརྩིགས། །དེ་ནས་དམར་ནག་ཟླ་གམ་བྱ། །ཟླ་གམ་དབུས་སུ་དཔལ་ཆེན་འབར། །དབང་ཕྱུག་གནས་བརྒྱད་ཟླ་གམ་མཐའ། །བང་རིམ་བར་ལ་དུར་ཁྲོད་འབར། །ཐ་མར་དམར་པོ་གྲུ་བཞི་ལ། །སྒོ་བཞི་སྒོ་སྲུང་བཅས་པར་བྱ། །དེ་ཡི་མཐའ་མ་མེ་རིས་བསྐོར། །ཁྲོ་བཅུ་འབར་བའི་རྟགས་རྣམས་དགོད། །བསྒྲུབ་དང་འཇུག་དང་དབང་བསྐུར་རྣམས། །གོང་མ་བཞིན་དུ་སྦྱིན་པར་བྱ། །དེས་ནི་ཐམས་ཅད་རྫོགས་པ་ཡིན། །དུག་གསུམ་ཐམས་ཅད་ཟིལ་གྱིས་གནོན། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་
མདོ་ལས་དུག་གསུམ་དབང་བསྒྱུར་བ་ཞེས་བྱ་བའི་བསྒྲུབ་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་སེམས་དཔའི་རྡོ་རྗེ་དམ་པ་དེས་བུད་མེད་ཐམས་ཅད་ལ་དབང་སྒྱུར་བ་ཞེས་བྱ་བའི་དཀྱིལ་འཁོར་ཆེན་པོ་འདི་གསུངས་སོ། །འདུས་པ་ཆེན་པོའི་ཚོགས་ཆགས་པ་ཐམས་ཅད་དབང་དུ་འདུ་བར་འདོད་ན་འདི་ལྟར་རིག་པར་བྱའོ། །བུད་མེད་ཆགས་པའི་རང་བཞིན་ཏེ། །ཆགས་པ་ཁྲག་གི་རྒྱ་མཚོ་ཡིན། །ལས་ཀྱིས་འཁོར་བའི་སེམས་ཅན་རྣམས། །ཆགས་པ་ཁྲག་གི་རྒྱ་མཚོར་བྱིང་། །ཆགས་ལས་རྣམ་གྲོལ་འགོག་པ་སྟེ། །ཆགས་པ་དེ་ཉིད་ཁྲག་ཅེས་བྱ། །ཁྲག་གི་རྒྱ་མཚོ་བསྐམ་པའི་ཕྱིར། །བུད་མེད་ཁྲག་གི་རྒྱ་མཚོ་རྣམས། །འཚོ་བ་བདུད་རྩིའི་རྒྱ་མཚོ་བསྒྱུར། །དེ་ལྟར་ཤེས་པར་གྱུར་པ་དང་། །ཀུན་རྫོབ་ཚུལ་དུ་འདི་ལྟར་སྦྱར། །ལས་ཀྱི་བརྩམས་པ་ཕུན་སུམ་ཚོགས། །རིམ་པ་བཞིན་དུ་བརྩམས་ནས་ཀྱང་། །མཎྜལ་འདོམ་གང་གྲུ་བཞི་ལ། །འཁོར་ལོ་བཞི་ཡི་ཐིག་ཏུ་གདབ། །མུ་ཁྱུད་ཕྱི་རིམ་གྲུ་ཆད་བཞི། །དེ་ནས་སྒོ་ཁྱམས་དམར་པོར་བྱ། །ཀུན་གྱི་ཕྱི་རིམ་ལག་ཆུ་ཧྭའི། །མེ་རི་འབར་བས་གཏིབ་ཐག་གཅད། །དབུས་སུ་ཤར་ལྟ་ཟླ་གམ་བྲི། །བྷན་དྷ་དཔལ་ལྡན་ཡབ་ཡུམ་དགོད། །འཁོར་ལོ་བཞི་ལ་རིགས་བཞིར་ལྡན། །བར་ཁྱམས་གཉིས་ལ་གནས་ཡུལ་རྣམས། །ཟླ་གམ་ཐིག་ལེར་ལྡན་པར་བྱ། །སྒོ་ཁྱམས་སྒོ་བཞི་ཟླ་གམ་བཅས། །ཕྱི་ཁྱམས་ལག་ཆུ་ཧྭ་ཡི་མེ། །མེ་ཡི་ཁྲོ་བོ་ཐིག་ལེར་བཅས། །དུར་ཁྲོད་རྒྱན་གྱིས་ཀུན་བརྒྱན་བྱ། །ཏིང་འཛིན་རྫོགས་དང་དངོས་བསྒྲུབ་དད། །འཇུག་པ་དབང་བསྐུར་དངོས་གྲུབ་རྣམས། །གནས་བསྲུང་ལ་སོགས་རྫོགས་པར་བྱ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་འཁོར་ལོ་དབང་སྒྱུར་གྱི་སྒྲུབ་ལུགས་ཀྱི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་སེམས་དཔའི་རྡོ་རྗེ་དམ་པ་དེས་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་ཚོགས་ཆོས་ཐམས་ཅད་ནི་བདུད་རྩི་སྨན་གྱི་རང་བཞིན་དུ་ཤེས་པར་བྱའོ། །དེ་ཅིའི་
ཕྱིར་ཞེ་ན། འདི་ལྟར་སྣང་བའི་ཆོས་ཐམས་ཅད་ཀྱི་དོན་རྟོགས་ན་ནི་འཚོ་བ་ཆོས་ཉིད་ཀྱི་རྩི་ཡིན། །མ་རྟོགས་ན་ནི་འཆི་བ་འཁོར་བའི་དུག་ཡིན། །དེ་བས་ན་ཆོས་འདི་དག་ཐམས་ཅད་བདུད་རྩིའི་རང་བཞིན་དུ་ཤེས་པར་བྱའོ། །དེ་ལྟར་ཤེས་ནས་ཀུན་རྫོབ་ཏུ་འདི་ལྟར་བསྒྲུབ་པར་བྱའོ། །ཇི་བཞིན་འབྱུང་ལྡན་བདེ་སྤྱར་ནས། །མ་ཏྲཾ་ཁོག་པའི་སྙིང་ག་རུ། །འདོམ་གང་ཚད་དང་མཐུན་པ་ལ། །རྩིབས་བརྒྱད་འབར་བའི་འཁོར་ལོར་གདབ། །མེ་ཡི་འོད་ཀྱིས་བསྐོར་བར་བྱ། །རྡོ་རྗེ་ར་བས་བསྐོར་ བ་ཡི། །མཐའ་མ་སྒོ་ཁྱུད་འབར ་བར་བྱ། །དབུས་སུ་རིན་ཆེན་ཟུར་བརྒྱད་བྱ། །དེར་ནི་ཕྱག་རྒྱ་ འབར་བ ་དགོད། །ལང་ཀ་བསྒྲལ་བའི་གནས་མཆོག་འདིར། །རལ་པ་ཅན་གྱི་ཚོགས་འདུས་ཏེ། །རཀྵ་འཇོམས་པའི་མཐུ་ཆེན་ཀུན། །སྲིད་པ་གསུམ་རིལ་འདིར་སྒྲོལ་བའོ། །དུས་བཞི་མཆོད་པའི་དམ་རྫས་ཀྱིས། །དེ་དག་ཇི་ལྟར་རིགས་པར་མཆོད། །དུས་བཞི་བཅུད་སྨིན་སྙིང་པོ་ཡིས། །དངོས་གྲུབ་ཆེན་པོའི་རྫས་སུ་བྱ། །ཕྱོགས་བཞི་དབུས་ཀྱི་རྫས་ཆེན་རྣམས། །རྨད་དུ་བྱུང་བའི་རལ་པ་ཅན། །འབྱུང་བ་ལྔ་ལ་དབང་སྒྱུར་མཛད། །འབྱུང་བ་ལྔ་ཡི་ཆོ་འཕྲུལ་སྒྲུབ། །དབྱར་ཆུ་སྟོན་མེ་དགུན་ས་སྟེ། །དཔྱིད་རླུང་ནམ་མཁའ་གསང་བར་སྦྱར། །ཆོ་འཕྲུལ་དེ་ལ་དབང་ཐོབ་ནས། །དེ་དག་རལ་པ་ཅན་དུ་བསྒྲུབ། །ཏིང་འཛིན་རྣམ་པ་ལྔ་གསལ་བས། །འབྱུང་ལྔ་ལས་བྱུང་ཤ་རིགས་ལྔ། །ཁྱི་ཤ་བ་ལང་རྟ་ཤ་དང་། །བྱ་དང་རི་དགས་སྣ་ཚོགས་ནི། །རྫུའཕྲུལ་ཤུགས་སུ་སྒྲུབ་པའི་རྫས། །སྒྲུབ་པའི་རྫས་ཆེན་འབྱུང་ཆེན་ལྔ། །འཇིག་རྟེན་ཀུན་ལ་དབང་སྒྱུར་བའི། །དེ་ལྟར་རྫས་རྣམས་འབྱོར་པ་དང་། །ཏིང་འཛིན་བསྒོམ་དང་བསྒྲུབ་པ་དང་། །ཐམས་ཅད་གོང་དང་མཐུན་སྦྱར་ནས། །འཇུག་དང་དངོས་གྲུབ་དབང་ཆེན་རྣམས། །ཅི་རིགས་པར་ནི་བདེ་བར་སྦྱར། །ཞེས་གསུངས་སོ། །བདུད་རྩི་རང་བྱུང་དཀྱིལ་འཁོར་ཞེས་བྱ་བའི་མདོ་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །གཞན་ཡང་བདུད་རྩི་ཆེན་པོ་ནི། །གོང་
མ་བཞིན་དུ་ལེགས་སྦྱར་ནས། །མཎྜ་ལ་ཚད་དང་མཐུན་པ་ལ། །པདྨ་དམར་པོ་འོད་ཀྱི་མཁའ། །ཕྱི་རིམ་ཟླ་གམ་དམར་པོ་བཞི། །རྡོ་རྗེ་འབར་བས་མཛེས་པར་བསྐོར། །མེ་ལྕེ་ འབར་བའི་ཕྲེང་བ ་ནི། །ཟླ་གམ་མཐའ་ཟད་བྲི་བར་བྱ། །རིན་ཆེན་གེ་སར་ཕྲེང་བས་ནི། །པདྨའི་ལྕེ་ལ་བསྐོར་བར་བྱ། །སྒོ་བཞི་རིན་ཆེན་འབར་བས་བྱ། །ཕྱག་རྒྱ་ འབར་བའི་ལྷ་བཀོད་ན། །དབུས་སུ་གསེར་ཕོར་སུལ་མེད་ལ། །དུང་ཆེན་འཁོར་བ ་ཅན་གྱིས་སྦྱར། །ཤར་དུ་ཤེལ་ཕོར་སུལ་འགྲེང་ལ། །རིན་ཆེན་མཛོད་སྤུ་གསལ་བས་སྦྱར། །ལྷོ་རུ་རིན་ཆེན་སུལ་མང་ལ། །རིན་ཆེན་ལོ་འདབ་རྒྱས་པས་སྦྱར། །ནུབ་ཏུ་རྒྱ་ཕོར་ཟླ་གམ་ལ། །བཞིན་མཚམས་རིན་ཆེན་འབུར་གཉིས་སྦྱར། །བྱང་དུ་བསེ་ཕོར་རྒྱ་གྲམ་ལ། །གཙུག་ཏོར་རིན་ཆེན་འབུར་བཞི་རྒྱས། །རྩ་བ་ལྔ་ནི་ཕྱོགས་ཕྱོགས་སྦྱར། །སྒོ་ལྔའི་གཙོ་བོ་རིགས་སུ་སྦྱར། །དབུས་ནས་ཤར་ལྷོ་ནུབ་བྱང་དུ། །ཀ་ཀོ་ལ་དང་དུ་རུ་སྐ། །ཛ་ཏི་ཕ་ལ་ཁ་དྲི་ཞིམ། །ལྕེ་བོག་དཀར་ཞེས་རིམ་པར་སྦྱར། །དེ་བཞིན་གོང་གི་རིམ་པ་བཞིན། །ཨ་རུ་ར་དང་ག་པུར་དང་། །གུར་གུམ་པདྨ་ལི་ག་དུར། །དེ་ན་རཱ་ས་ཡཱ་ན་རྣམས། །ཐམས་ཅད་རིགས་དང་ཁ་དོག་དང་། །ལས་དང་མཐུན་པར་སྦྱར་བར་བྱ། །ས་བོན་ལྔ་ནི་རིམ་པར་སྦྱར། །དཔལ་དང་ལྡན་པའི་སྣོད་ནང་དུ། །ཡབ་ཡུམ་སྙིང་པོ་རིམ་བཞིན་བྱ། །དབུས་དང་པདྨ་ལྕེ་ལ་དགོད། །གནས་ཡུལ་ལ་སོགས་མཛེས་པར་གཞག །དུར་ཁྲོད་རྫས་དང་བཀྲ་ཤིས་རྫས། །འབྱོར་བའི་ཡོ་བྱད་ཐམས་ཅད་བཤམས། །དེ་ནས་བྱིན་ཕབ་དངོས་གྲུབ་གསོལ། །ཐམས་ཅད་རྣམ་པར་སྦྱར་བར་བྱ། །དམ་པ་དེ་ཉིད་གསང་ཆེན་གྱི། །རིགས་བརྒྱ་རིགས་ལྔ་རིགས་གཅིག་གིས། །ཐམས་ཅད་སྦྱང་བའི་མཆོག་ཏུ་བྱ། །དེ་ནས་ཁྲོལ་བུ་སྦྱང་བ་ན། །བསལ་བསྔོ་བསྡུ་དང་དབྱེ་བ་དང་། །ཁྲུས་བྱ་བ་དང་བཤགས་པ་དེང་། །ཡོན་ཏན་བརྗོད་དང་བྱིན་དབབ་བྱ། །དེ་ནས་སྐད་ཅིག་ཐང་ཅིག་གམ། །ཞག་གཅིག་དག་གིས་སྦྱར་བར་བྱ། །རྟགས་དག་བྱུང་ན་དེར་
འབྱོངས་པའོ། །ཕྱེ་མའི་མཆོག་ཏུ་སྦྱར་བ་ནི། །སྣོད་ཀྱི་སྨན་རྣམས་ཤེས་རབ་མས། །བསྡུས་ཏེ་བཏགས་པའི་ཆོ་ག་ཡང་། །ཡུམ་གྱིས་བཟུང་ཞིང་ཡབ་ཀྱིས་བཏགས། །རིག་འཛིན་རྩལ་ཅན་དབབ་ཅིང་དྲང་། །སོ་སོ་ལས་ཀྱི་སྔགས་བརྗོད་ཅིང་། །གཏན་གཏུན་ཐབས་དང་ཤེས་རབ་སྟེ། །སྨན་ཉིད་བྱང་ཆུབ་སེམས་སུ་སྦྱར། །རྡོ་རྗེ་གླུ་འདི་ལྷ་མོས་བླང་། །ཀུན་དུ་བཟང་མོའི་གཞལ་ཡས་སུ། །ཐབས་དང་ཤེས་རབ་ལྡན་པ་ལས། །འཁོར་བ་བདུད་རྩི་སྨན་དུ་སྦྱར། །ཡེ་ཤེས་ལྔ་རུ་གསལ་བ་ལས། །འབྲས་བུ་སྐུ་གསུམ་ཐུགས་སུ་རྫོགས། །འཆི་མེད་བདུད་རྩིས་གཅོང་རྙིང་སྦྱང་། །མཚན་མ་བརྟག་ཕྱིར་བཅལ་ནས་ནི། །རྡོ་རྗེ་དཔལ་ལྡན་ཁ་སྦྱོར་བླུགས། །ཁ་དོག་རིགས་ལྔའི་རས་ཀྱིས་དཀྲི། །རྡོ་རྗེ་དབང་གི་རྒྱ་ཡིས་གདབ། །རྡོ་རྗེ་སྔགས་ཀྱི་གཟུངས་ཀྱིས་གདགས། །དཔལ་ཆེན་སྐུ་ལྔར་མངའ་གསོལ་ཏེ། །ཡེ་ཤེས་ལྔ་ཡི་དབང་བསྐུར་བྱ། །མཎྜལ་དག་ཏུ་དགོད་པར་བྱ། །ཀུན་གྱིས་བསྐོར་ཞིང་དངོས་གྲུབ་དབབ། །རྩི་དང་སྨན་གྱི་བདག་པོ་དང་། །རྟགས་ལྡན་རིག་འཛིན་ཕྲ་མོ་དག །རོལ་མོ་ཆ་བྱད་མང་པོས་བསྟེན། །བསྒྲུབ་པ་འབྲུ་མཆོག་གཏམས་པས་དགང་། །བཀྲ་ཤིས་གོས་ཀྱིས་རྒྱས་པར་བཀླུབས། །གཟུངས་ཐག་གཉེར་ཅན་རིགས་སུ་དབུལ། །ཏིང་འཛིན་མེ་ཡིས་རྣམ་པར་སྦྱང་། །རྟགས་ཆེན་ལྔ་ནི་གང་བྱུང་ཡང་། །སྨྱུར་ཏེ་དངོས་གྲུབ་བླང་བར་བྱའོ། །བདུད་རྩི་སྒྲ་ལས་དྲངས་ནས་ནི། །དཔལ་ལྡན་པདྨ་ལྡན་པ་རུ། །ཐམས་ཅད་བདུད་རྩིར་ས་མ་ཡ། །མཁའ་ཀློང་ཡངས་པར་བདེ་ཆེན་རྫོགས། །རང་ཉིད་བདུད་རྩིའི་དཀྱིལ་འཁོར་རྫོགས། །གཞན་ནས་བསྒྲུབ་བ་ཅི་ཡང་མེད། །འཇུག་པ་ལ་སོགས་ཐམས་ཅད་ཀྱང་། །ཚུལ་བཞིན་དུ་ནི་རྒྱས་པར་བྱ། །ཞེས་གསུངས་སོ། །བདུད་རྩི་ཕྱེ་མའི་བསྒྲུབ་པ་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །ཐམས་ཅད་དེ་འདྲར་སྦྱར་ནས་ཀྱང་། །མཎྜལ་འཁོར་ལོ་རྩིབས་བརྒྱད་པ། །ཕྱག་རྒྱའི་ལྷ་རྣམས་རྫོགས་བྱས་ནས། །
སྨན་སྦྱང་བཏགས་བཙགས་བཅལ་ནས་ཀྱང་། །སྦྲང་ཆང་འོ་མས་གོང་བུར་བྱ། །བསེ་ཕོར་མཚན་ལྡན་ནང་དུ་གཞག །ལེགས་པར་ཁ་སྦྱར་རས་ཀྱིས་དཀྲི། །གོང་མ་བཞིན་དུ་ཀུན་སྦྱར་ནས། །དངོས་གྲུབ་མཆོག་རྣམས་བདག་གིས་བྱ། །ཞེས་གསུངས་སོ། །བདུད་རྩི་རི་ལུའི་ཆོ་ག་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །སྐྱོ་མའི་ཆོ་ག་འདི་ལྟ་སྟེ། །ཐམས་ཅད་གོང་མ་བཞིན་སྦྱར་ནས། །མཚན་མ་གསལ་པོ་འབྱུང་བ་དང་། །ཕྱེ་མ་ཆུ་ཚགས་ནང་ནས་དབྱུང་། །ཕྱེ་མའི་མཆོག་ཏུ་གྱུར་པ་དང་། །ཕྱེ་མའི་རྒྱལ་མོ་དེ་དག་ནི། །བསེ་ཕོར་ཁ་སྦྱར་ནང་དུ་བླུགས། །རྒྱས་བཏབ་བྱིན་བརླབས་དབང་བསྐུར་ནས། །བཟླས་བརྗོད་འཕྲོ་འདུ་རྒྱུན་མི་ཆད། །སྦྲང་ཆང་རྒྱ་ཆང་བུ་རམ་ཆང་། །རྒུན་ཆང་འོ་མ་ལ་སོགས་པ། །བཅུད་ཀྱི་ཁུ་བ་ཐམས་ཅད་སྦྱར། །རིན་ཆེན་གའུ་མཚན་ལྡན་དུ། །བླུགས་ཏེ་ཁ་སྦྱར་རྒྱས་བཏབ་ནས། །འཕྲོ་འདུ་བཟླས་བརྗོད་གོང་མ་བཞིན། །བྱས་ཏེ་མཚན་མ་བྱུང་བ་དང་། །དངོས་གྲུབ་ཆེན་པོ་བླང་བར་བྱ། །ཕྱེ་མའི་བསྒྲུབ་རྫས་དེ་དག་ནི། །ཆ་ལྔ་དག་ཏུ་བགོས་ནས་ཀྱང་། །རྣལ་འབྱོར་སོ་སོའི་ཆ་རྣམས་ལས། །ཅི་རན་ཙམ་གྱིས་ཆ་གཅིག་དང་། །སྦྱར་ཆང་ཆ་ལྔར་བགོས་པ་ལས། །རྣལ་འབྱོར་སོ་སོའི་ཆ་རྣམས་ལས། །སྦྱར་ཏེ་དངོས་གྲུབ་རྟེན་དུ་བྱ། །ཟླ་བ་གཅིག་ཏུ་ཟོས་པས་ནི། །བ་སྤུ་རངས་ཤིང་གཉེར་མ་རངས། །ཟླ་བ་གཉིས་སུ་ཟོས་བྱས་ན། །གཟི་མདངས་ཐམས་ཅད་ འབར་བར་འགྱུར། །ཟླ་བ ་གསུམ་གྱི་ཕན་ཡོན་གྱིས། །ནད་ཀྱི་བསྐལ་པ་དག་ལས་ཐར། །ཟླ་བཞི་ཕན་ཆད་གང་ཟག་གིས། །ཟས་དང་མ་འདྲེས་བརྩོན་བསྒྲུབས་ན། །གཞན་གྱི་ནད་རྣམས་འཇོམས་པར་ནུས། །དྲུག་དང་བདུན་དང་བརྒྱད་རྣམས་ལ། །བདུད་རྩི་བཅུད་ཀྱིས་འཚོ་བར་འགྱུར། །དགུ་དང་བཅུ་ལ་ཟག་པ་ཟད། །བཅུ་གཅིག་རིག་འཛིན་ནམ་མཁར་འཕུར། །ཞེས་གསུངས་སོ། །བདུད་རྩི་སྐྱོ་མའི་བསྒྲུབ་པ་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་
རྣལ་འབྱོར་པ། །རྡོ་རྗེ་རིག་འཛིན་རྩལ་ལྔའི་ཟས། །ལྡེ་གུའི་ཆོ་ག་ཆེན་པོ་ནི། །འདི་ལྟར་ཁོང་དུ་ཆུད་པར་བྱ། །སྦྲང་རྩི་བུ་རམ་རྒུན་འབྲུམ་རྣམས། །ལོ་ཡི་འཚོ་བར་སྦྱར་ནས་ཀྱང་། །ཁ་དོག་མཚན་ལྡན་དམར་པོའི་བ། །ལོ་ཡི་འཚོ་བར་གཟུང་ཞིང་བསྲེལ། །སྨན་གྱི་རྒྱལ་པོ་རམ་ཉེ་བས། །རྒྱུན་དུ་གསོས་པའི་འོ་མ་དེ། །རིག་འཛིན་ཟས་ཀྱི་མཆོག་ཏུ་འགྱུར། །བདུད་རྩི་རྒྱལ་མོ་རམ་ཉེ་བ། །ཕྱེ་མའི་མཆོག་ཏུ་བྱས་ནས་ཀྱང་། །ལོ་ཡི་འཚོ་བའི་སྦྱར་བྱས་ཏེ། །སུས་མི་མཐོང་བའི་ས་ཕྱོགས་སུ། །བསྒྲུབ་རྫས་དེ་དག་བཀྲམ་ནས་ཀྱང་། །བདུད་རྩི་བསྒྲུབ་པ་དེ་བཞིན་བྱ། །དུས་བབ་པ་ཡི་ཚོད་རྣམས་ལ། །བསྒྲུབ་རྫས་དེ་དག་ཐམས་ཅད་ཀྱང་། །བ་ཡི་འོ་མས་ལྡེ་གུར་བྱ། །ཆ་རེས་བསྐྱེད་ཅིང་བཟའ་བར་བྱ། །ཟོས་པའི་ཡོན་ཏན་བསམ་མི་ཁྱབ། །ཟག་པ་ཟད་ནས་ནམ་མཁར་འགྲོ། །ཞེས་གསུངས་སོ། །བདུད་རྩི་ལྡེ་གུའི་བསྒྲུབ་པ་རྣམ་པར་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །འདི་ཡང་གོང་མ་ལྟར་བྱས་ཏེ། །དེ་དང་མི་མཐུན་བསྒྲུབ་རྫས་རྣམས། །བདུད་རྩིར་འགྱུར་བའི་སྨན་རྣམས་ཀུན། །ཐམས་ཅད་ཐམས་ཅད་བསྡུ་བར་བྱ། །ཏིལ་ཆེན་ལ་སོགས་ཞུན་གྱི་མཆོག །ཐམས་ཅད་བསྡུས་ཤིང་སྦྱར་བྱས་ནས། །གནས་ཀྱང་གོང་མ་བཞིན་བཙལ་ཏེ། །བདུད་རྩི་བཀྲམ་ནས་བསྒྲུབ་པར་བྱ། །འཕྲོ་འདུ་བཟླས་བརྗོད་རྒྱུན་མི་གཅད། །གྲུབ་པའི་རྫས་སུ་གྱུར་པ་དང་། །སྨན་རྣམས་ཕྱེ་མར་བཏག་པར་བྱ། །དེ་དག་ཕྱེ་མར་གྱུར་པ་དང་། །ཞུན་ཆེན་དག་དང་སྦྱར་བར་བྱ། །སྦྱོར་བའི་ཆོ་ག་རྫོགས་པ་དང་། །དངོས་གྲུབ་མཆོག་ནི་བླང་བར་བྱ། །གཞན་ནམ་གཞན་གྱི་སྡེ་པ་དང་། །ལོ་ཡིས་བཤུགས་ཏེ་འཕྲད་མི་བྱ། །འཚོ་བ་བདུད་རྩི་ཞུན་གྱིས་སྦྱར། །བདུད་རྩི་གྲུབ་པའི་རྟགས་ཆེན་ནི། །བ་སྤུ་ལངས་དང་གཟི་མདངས་འབར། །ཁམ་གྱི་ཟས་བྲལ་བདེ་བར་འཚོ། །ཤེས་རབ་གསལ་ཞིང་ཐོགས་པ་མེད། །ཟག་པ་ཟད་ནས་ནམ་མཁར་འགྲོ། །
ཞེས་གསུངས་སོ། །བདུད་རྩི་ཞུན་ཆེན་གྱི་བསྒྲུབ་པ་བཤད་པའོ། །དེ་ནས་ཡང་སེམས་དཔའི་རྡོ་རྗེ་དེས་འདི་སྐད་ཅེས་གསུངས་སོ། །འདུས་པ་ཆེན་པོའི་རྣལ་འབྱོར་པ། །རློན་པའི་རྫས་ལ་སྨན་བསྒྲུབ་ན། །ཐམས་ཅད་གོང་མ་བཞིན་སྦྱར་ནས། །མཎྜལ་ཐིག་[ལ]་ལྔ་པ་ལ། །བཀྲ་ཤིས་དཔལ་ལྡན་ལྔ་བཞག་ནས། །གཙོ་བོ་ལྔ་དང་འབྲས་བུ་ལྔ། །རློན་པར་བཀོད་ནས་ཡི་གེས་སྦྱང་། །ཏིང་འཛིན་བཟླས་པའི་མེ་སྦར་བས། །དང་པོ་རོ་འབྱུང་སྐམས་པ་དང་། །དེ་ནས་བཏག་བཙག་གོང་མ་བཞིན། །སྦྱར་ནས་རིགས་ཀྱི་བསྙེན་པས་སྦྱང་། །དེས་ནི་མཚན་མ་བྱུང་བ་དང་། །དེ་བཞིན་གོང་ལྟར་ཅི་བདེར་སྤྱད། །ཅེས་གསུངས་སོ། །བདུད་རྩི་རློན་སྦྱོར་གྱི་བསྒྲུབ་པ་བཤད་པའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས། བདུད་རྩི་སྨན་གྱི་བསྒྲུབ་པའི་ལེའུ་སྟེ་ཉི་ཤུ་རྩ་བཞི་པའོ།། །།དེ་ནས་སེམས་དཔའི་རྡོ་རྗེ་ཆེན་པོ་དེས། སྒྲུབ་པ་ཐམས་ཅད་ཀྱི་སྙིང་པོ་གསང་ཆེན་ཐུགས་ཀྱི་སྒྲུབ་པ་ཞེས་བྱ་བ་འདི་བཤད་དོ། །འདུས་པ་ཆེན་པོའི་རྣལ་འབྱོར་པ་ཐམས་ཅད་ནི་དབྱིངས་སུ་ཤེས་པར་བྱ་སྟེ། འཁོར་བའི་ཆོས་ཐམས་ཅད་ནི་དབྱིངས་སུ་འདུས་ལ། མྱ་ངན་ལས་འདས་པའི་ཆོས་ཐམས་ཅད་ནི་ཡེ་ཤེས་སུ་འདུས་སོ། །དེ་གཉིས་སུ་མེད་པ་ནི་ཆོས་ཉིད་བྱང་ཆུབ་སེམས་ཀྱི་བདེ་བ་ཆེན་པོར་འདུས་པར་ཤེས་པར་གྱིས་ཤིག །དེ་བས་ན་ཆོས་ཐམས་ཅད་ནི་ཐུགས་ཡེ་ཤེས་ཀྱི་རང་བཞིན་དུ་འདུས་ཏེ་གཉིས་སུ་མེད་དོ། །དེ་ལྟར་ན་ཀུན་རྫོབ་ཏུ་འདི་ལྟར་རིག་པར་བྱ་སྟེ་གཉིས་སུ་མེད་པའི་དོན་ལ་འཇུག་པར་བྱའོ། །འདུས་པ་ཆེན་པོའི་རྣལ་འབྱོར་པ། །དམ་པའི་དོན་གྱི་ཆོས་རྣམས་ཀུན། །ཐམས་ཅད་རང་གི་སེམས་ལ་རྫོགས། །ཀུན་རྫོབ་ཆོས་རྣམས་གང་ཡིན་པ། །ལུས་དང་ངག་ལ་རྫོགས་པར་བཤད། །དེས་ན་ཆོས་འདི་ཐམས་ཅད་ཀྱང་། །རྩ་བ་རང་ལ་རྫོགས་པ་སྟེ། །འདི་དག་བསྒྲུབ་པའི་ཐབས་མཆོག་ཀྱང་། །རྣམ་པར་རྟོག་པའི་རྡུལ་བསལ་ནས། །བསྒྲུབ་པའི་རྒྱལ་
པོ་ཡབ་ཡུམ་གཉིས། །དོན་ལ་མཁས་པར་བྱས་ནས་ནི། །སོ་སོའི་ཐུགས་ལ་ཐིག་ལེ་དག །ཟླ་གམ་དཀར་དམར་གདབ་པར་བྱ། །དེ་ཡི་རྫས་མཆོག་ཆེན་པོ་ཡང་། །ཐབས་ཀྱི་ག་པུར་ཆེན་པོ་དང་། །ཤེས་རབ་གསང་བའི་ཙནྡན་གཉིས། །དཀར་དམར་ཟླ་གམ་ཆེན་པོར་བྱ། །ཡབ་ཀྱི་ཐུགས་ཀར་དཀར་པོ་ལ། །ཐིག་ལེ་ཁ་ནི་མར་ལྟ་བའོ། །ཡུམ་གྱི་ཐུགས་ཀར་དམར་པོ་ལ། །ཐིག་ལེ་ཁ་ནི་ཡར་ལྟ་བའོ། །ཡབ་ཀྱི་ཐིག་ལེའི་དབུས་སུ་ནི། །དཔལ་བེའུ་དབུས་སུ་ཉི་མ་བྲི། །དབུས་སུ་ཨོཾ་གསལ་ནང་དུ་ཧཱུྃ། །ཡུམ་གྱི་ཐིག་ལེའི་དབུས་སུ་ནི། །པདྨ་དབུས་སུ་ཟླ་བ་བྲི། །དབུས་སུ་ཨ་གསལ་ནང་དུ་ཧཱུྃ། །དེ་ལྟར་གསལ་བར་གྱུར་པ་ན། །ཀུན་དུ་བཟང་པོ་ཡབ་ཡུམ་དུ། །གཉིས་སུ་མེད་པར་བསྒྱུར་བར་བྱ། །ཏིང་འཛིན་གསལ་བར་གྱུར་པ་དང་། །རང་ལས་བྱུང་བའི་བདུད་རྩི་ཡིས། །གསང་བ་གཉིས་ཀྱི་མཆོད་པ་བྱ། །རང་ལས་བྱུང་བའི་དངོས་གྲུབ་དག །རང་ཉིད་ས་ནི་བསྟིམ་པར་བྱ། །འདི་ལྟར་སྒྲུབ་པ་གཙོར་བྱེད་ན། །བདུད་རྩིའི་ཡོ་བྱད་ཐམས་ཅད་དང་། །བཅུད་ཀྱི་མཆོག་ཏུ་གྱུར་པ་རྣམས། །ལོ་ཡི་འཚོ་བར་སྦྱར་ནས་ཀྱང་། །བསྙེན་སྒྲུབ་ཡན་ལག་རྣམ་བཞི་ལས། །བསྙེན་པ་དག་གི་དུས་སུ་ནི། །གང་ཟག་མི་ཡི་ཟས་ལ་བརྟེན། །དེ་ཡང་ལོ་ཡི་སྐད་ཅིག་གམ། །གཉིས་དང་གསུམ་གྱི་བར་དུ་སྦྱར། །ལོ་ཡི་སྐད་ཅིག་བར་དུ་ནི། །བདུད་རྩི་ཡོ་བྱད་རྣམས་ལ་བརྟེན། །དེ་ནས་ལོ་ཡི་སྐད་ཅིག་ནི། །གཅིག་གམ་གཉིས་ཀྱི་བར་དག་ཏུ། །རང་ལས་བྱུང་བའི་རྫས་རྣམ་ལྔས། །འཕགས་པ་མཆོད་ཅིང་རང་གིས་བཟའ། །དེས་ནི་དྲོད་ལ་གནས་པར་འགྱུར། །དྲོད་ཐོབ་གྱུར་པ་ཕན་ཆད་ནི། །ལོ་ཡི་སྐད་ཅིག་ཐང་ཅིག་གིས། །ཏིང་འཛིན་ཟས་ཀྱི་རོ་རྙེད་ནས། །ཁམ་གྱི་ཟས་དང་བྲལ་བར་འགྱུར། །དྲོད་ཆེན་རྣམ་གསུམ་རྫོགས་ནས་ནི། །རྟགས་ཆེན་དག་ནི་ཐོབ་པར་འགྱུར། །རྟགས་ཀྱི་ཆོ་འཕྲུལ་འབྱུང་བ་ནི། །རིན་ཆེན་ཕུང་པོ་འདོད་པ་ན། །ས་རྡོ་ལ་སོགས་བྱས་ན་འགྲུབ། །ཆུ་དང་མཁའ་ལ་འགྲོ་འདོད་ན། །བརྩམས་པས་མི་འབྱིང་ཐོགས་མེད་
འགྲོ། །མེ་ཡི་ཕུང་པོ་འཇིལ་འདོད་ན། །སྡིགས་པའི་མཛུབ་མོ་ཕྱར་ནས་ཀྱང་། །བདེན་པའི་བསྒོ་བ་བྱས་པས་འགྲུབ། །དེ་ལ་སོགས་པ་ཐམས་ཅད་ནུས། །རྟགས་ཐོབ་ཕན་ཆད་སངས་རྒྱས་ཡིན། །ཞེས་གསུངས་སོ། །གསང་ཆེན་ཐུགས་ཀྱི་སྒྲུབ་པ་བཤད་པའོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་རྒྱུད་ལས་བཀའ་གསང་འཁོར་ལོའི་བསྒྲུབ་པའི་ལེའུ་སྟེ་ཉི་ཤུ་རྩ་ལྔ་པའོ།། །།དེ་ནས་བཅོམ་ལྡན་འདས་སེམས་དཔའི་རྡོ་རྗེ་དེ་རྡོ་རྗེ་མེ་ཀློང་ འབར་བ ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །དེ་ནས་འདུས་པའི་ཚོགས་ཐམས་ཅད་ཀྱིས་ཆོས་ཐམས་ཅད་མེའི་རང་བཞིན་དུ་སྣང་བར་མཐོང་ངོ་། །དེ་ནས་འཁོར་རྣམས་ཀྱིས་ཤིན་ཏུ་བསྟོད་པ། །ཨེ་མའོ་སེམས་དཔའ་ཆེ་བ་ཆེ། །ཏིང་འཛིན་ཆེན་པོ་སྣང་བ་ཆེ། །ཆོ་འཕྲུལ་ཆེན་པོ་སྣ་ཚོགས་ཆེ། །ཐབས་མཆོག་ཁྱོད་ལ་ཕྱག་འཚལ་ལོ། །ཆོས་ཀུན་མེ་ཀློང་བཞིན་དུ་སྣང་། །མེ་ཉིད་ཡེ་ཤེས་གསལ་བའི་ཀློང་། །འབར་འཕྲོ་གསལ་བར་གྱུར་པས་ནི། །མུན་བསལ་དངོས་པོ་ཐམས་ཅད་བསྲེགས། །བདེ་ཆེན་དབྱིངས་སུ་ཀུན་རྫོགས་པར། །དཔའ་བོ་ཁྱོད་ཀྱིས་མཛད་པ་ལགས། །ཐུགས་རྗེ་ཆེན་པོ་ཨ་ལ་ལ། །དོན་གྲུབ་ཆེན་པོ་ཨ་ལ་ལ། །སྒེག་པ་ཆེན་པོ་ཨ་ལ་ལ། །འཇིགས་བྱེད་ཆེན་པོ་ཨ་ལ་ལ། །དགྱེས་པ་ཆེན་པོ་ཨ་ལ་ལ། །དྲེགས་པ་ཆེན་པོ་ཨ་ལ་ལ། །དཔའ་བོ་ཁྱོད་ཀྱི་བྱིན་བརླབས་ཀྱིས། །བདག་ཅག་རྣམས་ལ་བཤད་པ་ཤོད། །མེ་ཡི་རང་བཞིན་ཆེན་པོ་དག །བདག་ཅག་རྣམས་ལ་བཤད་པར་གསོལ། །ཞེས་གསོལ་བ་བཏབ་པ་ལས། །སེམས་དཔའི་རྡོ་རྗེས་དགྱེས་ཏེ་འདི་སྐད་ཅེས་བཀའ་སྩལ་ཏོ། །འདུས་པ་ཆེན་པོའི་རྣལ་འབྱོར་པ། །རྡོ་རྗེ་མེ་ཡི་རང་བཞིན་དག །བཤད་ཀྱིས་ཁྱེད་རྣམས་གུས་པར་ཉོན། །རྡོ་རྗེ་མེ་ཡི་ལས་མཆོག་འདིས། །རྣལ་འབྱོར་ཐབས་སུ་བདེ་སྦྱར་བས། །རྒྱལ་བ་ཀུན་མཉེས་ཀུན་བསྲེག་སྐོངས། །དོན་གྲུབ་ལས་ཀྱི་མཆོག་ཏུ་བཤད། །སྐྱེ་མེད་རྣམ་དག་ཧོམ་ཁུང་དུ། །ཆོས་ཅན་སྐྱེ་བའི་ཡམ་ཤིང་ལ། །སྤྲོས་མེད་བྱང་
ཆུབ་ཡེ་ཤེས་མེས། །མཚན་མའི་བག་ཆགས་བསྲེགས་སྦྱངས་ཐིམ། །རྣམ་དག་བྷ་གའི་ཧོམ་ཁུང་དུ། །ཆགས་པའི་ཡམ་ཤིང་སྤུངས་པ་ལ། །བདེ་ཆེན་བྱང་ཆུབ་མེ་སྦར་ཏེ། །འཁོར་བའི་དངོས་པོ་བསྲེགས་སྦྱངས་ཐིམ། །དཔལ་ཆེན་ཞལ་གྱི་ཧོམ་ཁུང་དུ། །ཉོན་མོངས་ལྔ་ཡི་ཡམ་ཤིང་ལ། །ཡེ་ཤེས་ལྔ་ཡི་མེ་སྦར་ཏེ། །གཟུང་འཛིན་རྫས་རྣམས་བསྲེགས་སྦྱངས་ཐིམ། །སྣང་སྲིད་ནམ་མཁའི་ཧོམ་ཁུང་དུ། །འབྱུང་བ་བཞི་ཡི་ཡམ་ཤིང་ལ། །ཕྱག་རྒྱའི་ཚོགས་ཀྱི་མེ་སྦར་ཏེ། །སྣང་སྲིད་དངོས་པོ་བསྲེགས་སྦྱངས་ཐིམ། །ལས་བཞི་སོ་སོའི་ཁྱད་པར་གྱིས། །ཕྱོགས་དང་ཁ་དོག་དབྱིབས་དང་རྫས། །ཇི་ལྟར་ཡིན་པ་དེ་ལྟར་སྦྱར། །ཤར་ལྷོ་ནུབ་བྱང་དཀར་སེར་དམར། །མཐིང་ག་ནག་པོ་ཐལ་མདོག་སྦྱར། །ཟླུམ་པོ་པདྨ་ལེའུ་ཙེ་ཞི། །འཁོར་ལོ་གྲུ་བཞི་ཟུར་བརྒྱད་རྒྱས། །ཟླ་གམ་གྲུ་ཆད་གཞུ་དབྱིབས་དབང་། །གྲུ་གསུམ་བྷ་ག་ཁ་མངོན་སྦྱོར། །སུམ་བརྩེགས་མདངས་དང་རི་མོར་མཛེས། །ལས་ཀྱི་ཡམ་ཤིང་རྫས་ཀྱིས་རྒྱས། །ཡེ་ཤེས་རྡོ་རྗེའི་ལས་རྒྱུད་ལྡན། །བླ་མ་གསུམ་གྱིས་ཐབས་མཆོག་སྦྱར། །དག་པའི་མཐའ་འཛིན་ཉེས་མཆོག་འཛིན། །རྡོ་རྗེ་གསང་བའི་གླུ་བྲོ་གར། །མཆོད་པ་གསང་བ་དུས་ཚིགས་སྦྱོར། །རྡོ་རྗེ་ལམ་གྱི་སྨོན་ལམ་སྦྱར། །གསང་བ་ལས་ཀྱི་རྒྱུད་ལྡན་པས། །བཤར་གདབ་ཞི་བའི་ལྷ་རྒྱུད་དང་། །རྒྱས་དང་དབང་བཤར་རྒྱུད་བཤར་བས། །ལྷ་དང་སྔགས་དང་ཕྱག་རྒྱ་དང་། །དེ་བཞིན་རྒྱུད་དང་འབྱོར་པར་བྱ། །རིགས་ཀྱི་ལྷ་རྒྱུད་ལྔ་རྣམས་ནི། །སོ་སོའི་རིགས་སུ་བཤར་བཏབ་སྟེ། །ཀློང་ཡངས་འཁྱིལ་བའི་ཧོམ་ཁུང་དུ། །དམ་རྫས་བདུད་རྩི་ འབར་བ ་ཡིས། །སྦྱང་དང་ཐོབ་ཕྱིར་བསྲེག་བྱར་འོས། །བསྲེག་རྫས་སྐྱེ་བའི་ཆོས་ཡིན་ཏེ། །སྐྱེ་བར་སྣང་བའི་ཆོས་ཐམས་ཅད། །འདིར་ནི་དངོས་པོ་བཞིན་སྣང་སྟེ། །ཆོས་ཅན་རྐྱེན་དང་འབྱུང་ནས་དང་། །རང་བཞིན་ཉིད་ལས་ཆོ་འཕྲུལ་ནི། །སྐྱེ་བ་ཉིད་དུ་འདོད་པ་ཡིན། །འདི་ནི་སྐྱེ་བའི་ཆོས་ཅན་ཏེ། །རང་བྱུང་སྲེག་རྫས་རང་ཞིར་ཐིམ། །ཉོན་མོངས་ལྔ་ཡི་དམ་རྫས་དག །ཡེ་ཤེས་ལྔ་ཡི་ཀློང་དུ་
དབུལ། །ལུང་བོ་ལྔ་ཡི་དམ་རྫས་རྣམས། །ཐབས་མཆོག་ཡབ་ལྔའི་སྐུ་ལ་བསྟིམ། །འབྱུང་ལྔས་བསྡུས་པའི་བསྲེག་རྫས་རྣམས། །ཤེས་རབ་ཡུམ་ལྔའི་ཀློང་དུ་བསྟབས། །རྣམ་ཤེས་བརྒྱད་ཀྱི་བསྲེག་རྫས་རྣམས། །ཡེ་ཤེས་གནས་ཀྱི་མ་བརྒྱད་དོ། །ཡུལ་གྱི་གཡེང་བ་རྣམ་པ་བརྒྱད། །དམིགས་མེད་དབྱིངས་ཀྱི་བྱེ་བྲག་བརྒྱད། །སྐྱེ་བཞི་ལས་ཀྱི་བསྲེག་རྫས་རྣམས། །རྣམ་ཐར་སྒོ་བཞིའི་ཀློང་དུ་ཐིམ། །ཐབས་མཆོག་ལ་སོགས་རྒྱ་མཚོའི་ཚོགས། །སོ་སོའི་ཡོན་ཏན་ཐམས་ཅད་དག །རྡོ་རྗེ་གླུ་ཡིས་བརྗོད་ནས་ཀྱང་། །དེ་དག་མཉེས་པའི་མཆོད་པ་བརྩམ། །མཆོད་པ་ཐམས་ཅད་རྫོགས་པ་དང་། །སྒྲིབ་བྱང་མ་བྱང་དོན་ཆེན་རྣམས། །གྲུབ་དང་མ་གྲུབ་དོན་རྣམས་ནི། །མེ་ལ་མཁས་པས་བརྟག་པར་བྱ། །མེ་སྒྲ་གཉིས་དང་ཁ་དོག་གཉིས། །འབར་ཚུལ་གཉིས་དང་དབྱིབས་རྣམ་དྲུག །དེ་དག་ཡོངས་སུ་ཤེས་པར་བྱ། །གལ་ཏེ་མཚན་མ་མི་སྡུག་ན། །བཀྲ་མི་ཤིས་པའི་རྟགས་ཡིན་པས། །བསྲེག་སྦྱང་ཆེན་པོ་རྒྱས་པར་བྱ། །དེ་ནས་འདོད་པའི་རྟགས་བྱུང་ན། །མེ་ལ་འདོད་པའི་དངོས་གྲུབ་རྣམས། །རྣམ་གསུམ་གང་ལྟར་གྲུབ་པ་བླང་། །རོ་ཡི་རྫས་རྣམས་བསྲེག་སྦྱངས་ནས། །རོ་ལ་སྔགས་ཀྱིས་བཏབ་ནས་ཀྱང་། །ཤིན་ཏུ་དྲི་ཞིམ་སྣ་ཚོགས་ཀྱིས། །རོ་ལ་བྱུག་ཅིང་བཀྲུ་བར་བྱ། །བདུད་རྩི་ཞུན་ཆེན་ཁུ་བ་ཡིས། །རས་ལ་བྱུགས་པས་རོ་དཀྲིས་ཏེ། །རོ་ཡི་གནས་རྣམས་གང་ཡིན་པར། །སྔགས་ཀྱི་སྦྱོར་བ་ཀུན་བཀོད་ནས། །ཕྱག་རྒྱའི་མཚན་མས་གདབ་པར་བྱ། །རྒྱལ་བའི་དཀྱིལ་འཁོར་གང་དག་ནི། །གཞུང་ཡིན་པ་ཡི་ཕྱག་རྒྱ་རྣམས། །དུ་འབྱུང་བ་དང་མཉམ་པ་ཡི། །སྡོང་བུའི་གྲངས་ཀྱང་དེ་ལྟར་བྱ། །སྡོང་བུ་རེ་ལ་ལྷ་རྣམས་ཀྱི། །མ་ནོར་རྩ་བའི་སྙིང་པོ་དག །རས་ཆེན་དག་ལ་བྲིས་ཏེ་གདགས། །རོ་ཡི་སྦྱོར་བ་རྫོགས་པ་དང་། །རོ་ཡི་ཕྱི་ཤུན་ཐམས་ཅད་ལ། །འཁོར་བའི་བག་ཆགས་ཀུན་བཀོད་དེ། །རས་སམ་ཤིང་ཤུན་ཤོག་ཤོག་ལ། །འཁོར་བའི་ས་བོན་ཐམས་ཅད་དགོད། །ཉོན་མོངས་ལྔ་དང་དུག་གསུམ་བཅས། །སྐྱེ་བའི་ལམ་ལ་རྒྱུད་དྲུག་རྣམས། །མིང་ངམ་
གཟུགས་སུ་བྱས་ནས་ནི། །གནས་གནས་དག་ཏུ་དགོད་པར་བྱ། །ཁམས་དང་སྐྱེ་མཆེད་ཕུང་པོ་ལྔ། །གཟུང་འཛིན་མིང་དུ་བཅས་པ་རྣམས། །བརྡ་ཡི་ཚུལ་དུ་བྲིས་ནས་ནི། །རོ་རྣམས་ཁྱད་པར་དགོད་པར་བྱ། །དེ་ནས་རོ་ཡི་ཕུང་པོ་དེ། །རྟེན་ནམ་གླེགས་སམ་སྟེགས་བུ་ཡི། །སྟེང་དུ་མཁས་པས་གཞག་པར་བྱ། །ཐབ་ཀྱི་ཆོ་ག་བརྩམ་པ་ནི། །མཎྜལ་འཁོར་ཁྱུད་ཙམ་ཞིག་ལ། །དཀྱིལ་འཁོར་གང་དང་གང་ཡིན་པའི། །ཕྱག་རྒྱ་བཞུགས་པའི་ཕོ་བྲང་དག །ཐིག་གིས་ཡུལ་གཅད་སོ་སོར་བྱ། །དེ་ཡི་སྟེང་དུ་ཤིང་བརྩིགས་པ། །དབྱིབས་ནི་གྲུ་བཞི་གཏམས་པ་ལ། །ཟུར་བཞི་ཀ་བ་བཞིས་བརྟན་བྱ། །སུམ་བརྩེགས་ཡང་ཐོག་བར་ཁང་བཅས། །མཐའ་མ་ཤིང་གིས་བརྫང་བར་བྱ། །བར་ཁང་དག་གི་གླེགས་མ་ལ། །རོ་ཡི་བཞིན་ཕྱོགས་ཤར་དུ་བསྟན། །རོ་ཡི་སྟེང་གི་ཁང་པ་ལ། །རས་སམ་ཤོག་ཤོག་ལ་བྲིས་པའི། །ཕྱག་རྒྱའི་དཀྱིལ་འཁོར་གསལ་བར་དགོད། །རོ་ཁང་གློ་སྐར་བཞི་ཕྱེ་ལ། །ཐུགས་རྗེ་གཟུངས་ཐག་བཞིས་བཏགས་ནས། །ཕྱོགས་བཞི་བླ་མ་བཞི་ལ་དབུལ། །ཤིང་གི་ཆོ་ག་རྫོགས་པ་དང་། །ཤིང་གི་ཕྱི་མཐའ་སྟེགས་བུ་ལ། །ཕྱག་རྒྱའི་ལྷ་རྣམས་རིམ་པར་དགོད། །སྟེགས་བུ་རྫོགས་པར་གྱུར་པ་དང་། །རྡོ་རྗེ་ལས་ཀྱི་སྐོས་གདབ་པ། །རྡོ་རྗེ་རྒྱལ་པོ་བླ་མ་ལ། །འཁོར་བ་བསྲེག་པའི་མངའ་གསོལ་ཏེ། །ཏིང་འཛིན་ཡེ་ཤེས་རྩེ་གཅིག་པས། །མེ་ཡི་འདུ་འཕྲོ་རྒྱུན་དུ་བྱ། །རྡོ་རྗེ་ལས་ཀྱི་ཀརྨ་ལ། །ལས་རྣམས་རྫོགས་པའི་མངའ་གསོལ་ཏེ། །ལས་ཀྱི་ཕྲེང་བ་རྫོགས་པར་བྱ། །རྡོ་རྗེ་ཆེན་པོའི་བླ་མ་ཞིག །རོ་ཡི་ཉེས་པའི་མཐའ་བཟུང་ནས། །ལས་ཀྱི་བསགས་པ་བགྲང་ཞིང་བཤགས། །རྡོ་རྗེ་སྐབས་སྦྱོར་བླ་མ་ཡིས། །བདུད་རྩི་སྐབས་ཀྱི་མཆོད་པ་སྦྲེང་། །རྡོ་རྗེ་བྲོ་གར་གླུ་ཚིག་གིས། །སྐབས་ཀྱི་གླུ་གར་མཆོད་པ་དག །རོལ་མོས་དྲངས་ཏེ་དབུལ་བར་བྱ། །རྡོ་རྗེ་གནས་ཀྱི་སྨོན་ལམ་ནི། །སྐབས་དང་ལས་ཀྱི་མཇུག་ཏུ་གདབ། །རྡོ་རྗེ་ལས་ཀྱི་ལྟང་འཛིན་པས། །རྩ་བརྒྱད་ལས་ཀྱིས་གྲངས་བཟུང་སྟེ། །དཀར་བྱང་བླ་མའི་ཕྱག་
ཏུ་དབུལ། །རོ་ཡི་ལས་ངན་ལྟང་འཛིན་པས། །གྲངས་མེད་གྲངས་སུ་བཟུང་ནས་ནི། །མཚན་མ་ནག་པོའི་བྱང་བུ་དག །ཡེ་ཤེས་མེ་ཡི་ཀློང་དུ་བསྲེག །མེ་ཡིས་སྦྱོར་བའི་ཆོ་ག་བྱ། །མེ་ཡི་ལྷ་ནི་གང་ཡིན་པ། །མེ་ཡི་སངས་རྒྱས་སྣང་མཐའ་ཡས། །མེ་ཡི་ལྷ་མོ་གོས་དཀར་མ། །རྒྱལ་བ་ཀུན་གྱི་འོད་མཆོག་སྟེ། །འབྱུང་བ་མེ་ལ་དབང་སྒྱུར་ཞིང་། །ཐམས་ཅད་ཀུན་གྱི་དྲོད་བདག་ཡིན། །སྲིད་གསུམ་སྲེག་པར་ཞལ་གྱིས་འཆེས། །འཁོར་བའི་སྲེག་པའི་ཕྲིན་ལས་ལ། །ཐུགས་དམ་དབང་གིས་ཡོང་མི་འདའ། །མེ་ཡི་ཆོ་ག་ཐམས་ཅད་ནི། །ཡུམ་ཆེན་དཀར་མོ་ཉིད་ལ་བསྒོ། །དེ་ནས་ཆོ་ག་ཀུན་རྫོགས་ནས། །རོ་ཡི་སྒྲིབ་པ་བྱང་མ་བྱང་། །མེ་ཡི་དངོས་གྲུབ་ཐོབ་མི་ཐོབ། །མེ་ལས་མཁས་པས་གོང་བཞིན་བརྟག །མཚན་མ་མི་སྡུག་བྱུང་བ་ན། །བསྲེག་སྦྱང་ཆོ་ག་རྒྱ་ཆེར་བྱ། །གལ་ཏེ་མགུ་ན་དངོས་གྲུབ་ཐོབ། །རོ་ཡི་ཐལ་བ་ཆེན་པོ་ལ། །བཏགས་ནས་ཐལ་བའི་བདུད་རྩིར་བསྒྲུབ། །དེས་ནི་བསོད་ནམས་ཆེན་པོ་ནི། །དཔག་ཏུ་མེད་པ་ཐོབ་པར་འགྱུར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་མེའི་ཆོ་ག་བསྒྲུབ་པའི་ལེའུ་སྟེ་ཉི་ཤུ་རྩ་དྲུག་པའོ།། །།དེ་ནས་སེམས་དཔའི་རྡོ་རྗེ་དམ་པ་དེས་དཀྱིལ་འཁོར་ཐམས་ཅད་བྱིན་གྱིས་རློབ་པ་ཞེས་བྱ་བའི་རྡོ་རྗེ་སྔགས་ཀྱི་ཚིག་འདི་གསུངས་སོ། །སརྦ་ཏ་ཐཱ་ག་ཏ་མ་ཧཱ་ཤྲཱི་ཧེ་རུ་ཀ་བཛྲ་ཙཎྜ། སརྦ་དུཥྚཱཾ་སྃ་ཤྲཱི་ཧཾ་རུ་ཀཱཾ་ཏ་ཀ་ཧ་ན་བ་ཙ་ཧཱུྃ་ཧཱུྃ། ས་ས་ས་ས་ས་མ་ཡ་ས་ནུ་ནེ། ས་ནོ་རྦ་ར། བཛྲ་གརྦྷ། རཏྣ་གརྦྷ།པདྨ་གརྦྷ། ཀརྨ་གརྦྷ། མཻ་ཏྲི་གརྦྷ། ཀཱ་རུ་ཎ་གརྦྷ། ལོ་ཀ་གརྦྷ། བི་དུ་མ་གརྦྷ། ཡཀྵ། རཱ་ཀྵ་ས། བི་ཤྭ། ཏེ་ཤྭ། ཀེ་ཤྭ། བ་ཤྭ། བི་ཤྭ། ཏྲ་ཀྴྭ། ཧྲི་ཤྭ། ཀ་ཤྭ། པཀྴ། རུ་ཏི། རཀྟི། ཁཱ་ཧི། ས་ཧ། ས་ས་ས་ས་ས་ས་ས། ས་ས་ས་ས་ས་ས་ས། ས་ས་ས་ས་ས་ས་ས། ས་ས་ས་ས་ས་ས་ས། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། རྦ་རྦ་རྦ་རྦ་རྦ་རྦ་རྦ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ཐཱ་ཐཱ་ཐཱ་ཐཱ་ཐཱ་ཐཱ་ཐཱ། ག་ག་ག་ག་ག་ག་ག། ག་ག་ག་ག་ག་ག་ག། ག་ག་ག་ག་ག་ག་ག། ག་ག་ག་ག་ག་ག་ག། ཏ་ཏ་ཏ་
ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། ཏ་ཏ་ཏ་ཏ་ཏ་ཏ་ཏ། མ་མ་མ་མ་མ་མ་མ། མ་མ་མ་མ་མ་མ་མ། མ་མ་མ་མ་མ་མ་མ། མ་མ་མ་མ་མ་མ་མ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཧཱ་ཧཱ་ཧཱ་ཧཱ་ཧཱ་ཧཱ་ཧཱ། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། ཧེ་ཧེ་ཧེ་ཧེ་ཧེ་ཧེ་ཧེ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། རུ་རུ་རུ་རུ་རུ་རུ་རུ། ཀ་ཀ་ཀ་ཀ་ཀ་ཀ་ཀ། ཀ་ཀ་ཀ་ཀ་ཀ་ཀ་ཀ། ཀ་ཀ་ཀ་ཀ་ཀ་ཀ་ཀ། ཀ་ཀ་ཀ་ཀ་ཀ་ཀ་ཀ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། ཤྭ་ཤྭ་ཤྭ་ཤྭ་ཤྭ་ཤྭ་ཤྭ། རི་རི་རི་རི་རི་རི་རི། རི་རི་རི་རི་རི་རི་རི། རི་རི་རི་རི་རི་རི་རི། རི་རི་རི་རི་རི་རི་རི། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། ཁ་ཁ་ཁ་ཁ་ཁ་ཁ་ཁ། མུྃ་མུྃ་མུྃ་མུྃ་མུྃ་མུྃ་མུྃ། མུྃ་མུྃ་མུྃ་མུྃ་མུྃ་མུྃ་མུྃ། མུྃ་མུྃ་མུྃ་མུྃ་མུྃ་མུྃ་མུྃ། མུྃ་མུྃ་མུྃ་མུྃ་མུྃ་མུྃ་མུྃ། བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། གཽ་རཱི། ཙཽ་རཱི། བྲ་མོ་ཧཱ། བེ་ཏཱ་ལཱི། གྷ་སྨ་རཱི། པུཀྐ་སཱི། སྨ་ཤཱ་ནཱི། ཙཎྜ་ལཱི། ཧ་ཧ་ཧ་ཧ་ཧ་ཧ་ཧ་ཧ། སིདྷ། བྱཱ་གྷྲྀ། སྲིཾ་ག་ལ། ཤྭ་ན། ཀྲྀཌྷ། ཀཱངྐ། ཁ་ག །ཨཱུ་ལུ། མུ་མུ་མུ་མུ་མུ་མུ་མུ་མུ། ཁ་ཁ་ཁ་ཁ་ཁ་ཁ་ཁ་ཁ། ཧེ་ཧེ་ཧེ་ཧེ་ཧེ་ཧེ་ཧེ་ཧེ། བ་བ་བ་བ། ཛྲ་ཛྲ་ཛྲ་ཛྲ། ཕཊ་ཕཊ་ཕཊ་ཕཊ། ཛཿཧཱུྃ་བྃ་ཧོཿ། ཨཱརྱ་ཏེ་ཙ་ཏེ་ད་ཛཿ། པཱ་ཤྃ་ཧཱུྃ། ལོ་ཀ་བྃ། བྷསྨི་ཡ་ཏི་ཧོཿ། བ་བ་བ་བ་བ་བ་བ་བ་བ་བ།ཛྲ་ཛྲ་ཛྲ་ཛྲ་ཛྲ། ཛྲ་ཛྲ་ཛྲ་ཛྲ་ཛྲ། ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ། དྷ་དྷ་དྷ་དྷ་དྷ་དྷ་དྷ་དྷ་དྷ་དྷ། ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ། མཎ་མཎ་མཎ་མཎ་མཎ། ཌ་ཌ་ཌ་ཌ་ཌ། ལ་ལ་ལ་ལ་ལ། ཨེ་གརྦྷ། ཡྃ་ཀརྨ། ར་རཀྟ། བྃ་སྣིགྦྷ། རྃ་ཛྭ་ལ། ཀེྃ་རུ་དྷིཿ། བྷྲཱུྃ་ཛྙཱ་ན། པྃ་བདྡྷ། ཧ་ཀ་པཱ་ལ། ཛྙཱ་ན་པར་རྃ། བུདྡྷ་ཀཱ་ཡ། མ་ཧཱ་ཝ་ཀ། བཛྲ་ཙིཏྟ། ཛཿཧཱུྃ་བྃ་ཧོཿ ཨེ་ཧྱེ་ཧི། རུ་ལུ་རུ་ལུ་ཧཱུྃ་བྷྱོ་ཛཿཛཿ བཛྲ་ས་མ་ཡ་མུ་དྲ་ཧཱུྃ་ཨཱཿ བཛྲ་ཤྲཱི་ཧེ་རུ་ཀ། ཏིཥྛ་ས་མ་ཡ་ལྷན། མ་ཧཱ་ཤྲཱི་ཧེ་རུ་ཀ་ཧ་ཧ་ཧ་མ། ས་མ་ཡ་ཧོཿཕཊ། བཛྲ་ཨཱར་ལི་ཕཊ། ཨ་ཏི་པུ་ཧོཿ། པྲ་ཏི་པུ་ཧོཿ། ཨི་དྷྃ་པུཥྤ་དྷུ་པ། བ་ལི། ཏི་ཛ་ཧོཿ། ཁ་རྃ་ཁ་ཧི། མ་ཧ་རཀྟ། རུ་དྷི་
སྣིགྡྷ། པཉྩ་ཨ་མྲྀ་ཏ། ཙིཏྟ། བཱ་སུ་ཏ། གོ་རོ་ཙ་ན། ཌཱ་ཀི་ནཱ། ཡོ་གི་ནི། མ་ཧཱ་ཙིཏྟ། ཁ་རྃ་ཁཱ་ཧི། ཁ་ཁ་ལེ། ཤ་ཏ་པ་ཁཱ་ཧི། ཨ་ལ་ལ་ཧོ། ས་མ་ཡ་ཧོཿ ཨི་ད་ན་དེ་ནཱ་ར་ཀཱ་ན། ཨུ་ཙི་ར་ས་མ་ཡ་ཕཊ། བཛྲ་ས་མ་ཡ་ཨ་བེ་ཤ་ཨཱཿཨཱཿ། ཞེས་གསུངས་པས་ལས་ཀྱི་འབར་བའི་ཆོ་ག་ཞེས་ཐམས་ཅད་ཤིན་ཏུ་འབར་ཞིང་རྒྱས་པར་གྱུར་ཏོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་གསང་སྔགས་ཀྱི་ལེའུ་སྟེ་ཉི་ཤུ་རྩ་བདུན་པའོ།། །།དེ་ནས་ཡང་སེམས་དཔའི་རྡོ་རྗེ་དེས་སྒྱུར་ བ་ཕྱག་རྒྱའི་ལེའུ་འདི་རྒྱ་ཆེར་གསུངས་སོ། །རྣལ་འབྱོར་མཆོག་གི་ལག་གཉིས་ལ། །ཉི་ཟླ་འབར ་བའི་ལིངྒར་ནི། །ཨ་དང་པདྨ་གཉིས་གསལ་ཏེ། །ཐབས་དང་ཤེས་རབ་གཉིས་མེད་སྦྱར། །མཉམ་པའི་ཚུལ་གྱིས་གནས་པ་ལ། །མེ་ཡི་སྟེང་དུ་ཨ་ཉིད་གཞག །བྱ་བ་ཐམས་ཅད་བྲལ་བའི་རྒྱ། །ཨ་དང་མ་ཡི་འབྲུ་བཅུ་རྣམས། །འཕྲོ་འདུ་བྱ་ཞིང་ཀུན་དུ་བསྒྱུར། །གཡས་སུ་འཁྱིལ་ཅིང་གཡོན་དུ་འཁྱུད། །འདི་ནི་ཆོ་འཕྲུལ་འབྱུང་བའི་རྒྱ། །ཨ་དང་མ་ཡི་འབྲུ་རྣམས་བཅུ། །སོ་སོར་བཅངས་ཏེ་མྱུ་གུར་བྱ། །ཤིན་ཏུ་བསྟོད་དེ་ཀུན་དུ་བསྒྱུར། །འདི་ནི་སྙིང་པོར་གྱུར་པའི་རྒྱུ། །མ་ཡིས་སྦྱིན་པ་གཏོང་ཚུལ་ལ། །ཨ་ཡིས་ཐམས་ཅད་སྐྱོབ་བྱེད་པ། །འདི་ནི་ཚད་མེད་ཆེན་པོའོ། །ཀུན་ལ་སྙོམས་པའི་ཕྱག་རྒྱ་ཡིན། །མ་ཉིད་ཁྲག་འཕྲོག་པ་ཡི་སྣོད། །ཨ་ཉིད་སོ་ཕྲེང་མཆེ་བར་སྦྱར། །འདི་ནི་ཐམས་ཅད་རོལ་པ་ཡི། །འཇིགས་ཚུལ་སྟོན་པའི་ཕྱག་རྒྱ་ཡིན། །ཨ་དང་མ་གཉིས་གཏིང་སྦྱར་ཏེ། །སོ་ཕྲེང་མཆེ་བའི་ཚུལ་གྱིས་ནི། །ཤིན་ཏུ་ཁ་གླལ་བ་ཡི་ཚུལ། །འདི་ནི་འཇིགས་བྱེད་ཆེན་པོའི་རྒྱ། །མ་ཡིས་བཟུང་སྟེ་འཐེན་ནས་ནི། །ཨ་ཡིས་གདེངས་ཤིང་འཇོམས་བྱེད་པ། །འཇོམས་བྱེད་ཆེན་པོའི་ཕྱག་རྒྱ་ཡིན། །མ་དང་ཨ་ཡིས་མགོ་མཇུག་ནས། །བཟུང་བའི་ཚུལ་དུ་བྱས་ནས་ནི། །ཁ་ཡིས་འདྲང་ཅིང་འཐེན་བྱེད་པ། །ཟ་བྱེད་ཆེན་པོའི་ཕྱག་རྒྱ་ཡིན། །ཨ་དང་མ་ཡི་ཤེས་རབ་ལས། །གཡས་གཡོན་ཚུལ་གྱིས་བསྒྱུར་བྱས་ཏེ། །སོ་སོ་ཇི་ལྟར་ཡིན་ཐབས་སྦྱར། །གནས་དང་ཡུལ་གྱི་གཏན་ཚིགས་སུ། །བསྒྱུར་བ་གར་གྱི་ཕྱག་རྒྱར་བཤད། །དབའ་བོ་གདན་
ལ་བཞེངས་ནས་ནི། །ཕྱོགས་མཚམས་ཀུན་དུ་བལྟས་བྱས་ནས། །ཤིན་ཏུ་འགྱིང་ཞིང་བརྗིད་པར་བྱེད། །ཨ་དང་མ་ཡི་འབྲུ་རྣམས་ནི། །སོ་སོར་བརྡབས་ནས་དཀུར་བརྟེན་བྱ། །འགྱིང་བའི་ཚུལ་གྱིས་སྤྱད་བྱས་ནས། །སྟག་གི་སྟབས་ཀྱིས་ཀུན་དུ་བསྐོར། །དེ་ནས་རྨུན་བྱ་སྟབས་ཀྱིས་ནི། །གོང་མ་བཞིན་དུ་བསྐོར་བར་བྱ། །དེ་བཞིན་རུས་སྦལ་གཟིག་དང་སྟག །སྤྱང་ཀི་སེང་གེ་དོམ་སྟབས་དང་། །ཕག་ཆེན་དྲེད་ཀྱི་སྟབས་ཀྱིས་ནི། །ཐམས་ཅད་ཐམས་ཅད་བསྐོར་བར་བྱ། །དེ་བཞིན་འདབ་ཆགས་ཐམས་ཅད་ཀྱིས། །འཇོ་ཚུལ་སྟབས་རྣམས་རྫོགས་བྱས་ནས། །དཀྱིལ་འཁོར་ཐམས་ཅད་རྫོགས་པར་འགྱུར། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་སྒྱུར་བ་ཕྱག་རྒྱའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་སེམས་དཔའི་རྡོ་རྗེ་དེས་མཆོད་པ་དམ་པ་གསང་བའི་ལེའུ་འདི་གསུངས་སོ། །ཧཱུྃ་འབྱུང་བ་ཆེན་པོ་ནམ་མཁའ་ནི། །འབྱུང་བ་ཆེན་པོ་ལྔ་ཡི་མཛོད། །ནམ་མཁའ་ལས་ནི་འདོད་པ་འབྱུང་། །འདོད་པའི་མཆོད་པ་འབྱུང་གྱུར་ཅིག །ཟླ་རྒྱས་ལ་སོགས་སྙིང་པོ་མཆོག །མཾ་ས་ལ་སོགས་རྣམ་ལྔའི་རྫས། །མེ་ཏོག་ལ་སོགས་ཙནྡན་ཕྲེང་། །སྣ་ཚོགས་མཆོད་པ་འབྱུང་གྱུར་ཅིག །མི་མོ་རྣམས་ཀྱི་རེག་བྱ་མཆོག །འཁྲིལ་འཁྱུད་སྒྱུར་བའི་གཟུངས་ཆེན་མ། །དབང་པོ་སྦྱོར་བའི་དགྱེས་མཆོད་དེ། །བདེ་བའི་མཆོད་པས་ཚིམ་གྱུར་ཅིག །རྡོ་རྗེ་རོལ་པས་ཚོགས་མཆོག་འདི། །མཆོད་སྤྲིན་ཀུན་དུ་རྒྱས་གྱུར་ཅིག །དུག་གསུམ་བརྩིགས་པའི་རི་བོ་འདི། །སྐུ་གསུང་ཐུགས་ཀྱི་ཀློང་དུ་བསྟབས། །དུག་ལྔ་རོལ་པའི་ཚོགས་མཆོག་འདི། །ཡེ་ཤེས་ལྔ་ཡི་ནང་དུ་ཐིམ། །གཟུང་འཛིན་རྟོག་པའི་མཚན་མ་འདི། །དབྱིངས་དང་ཡེ་ཤེས་ཀློང་དུ་ཐིམ། །འཁོར་བ་མཚན་མའི་ཆོས་ཅན་འདི། །ཆོས་ཉིད་དབྱིངས་ཀྱི་ངང་དུ་ཐིམ། །ཕུང་པོ་ཚོགས་ཀྱི་ཡན་ལག་འདི། །རྣམ་གྲོལ་ཕུང་པོ་ལྔ་རུ་ཐིམ། །འབྱུང་ཆེན་རྒྱུ་ཡི་མཚན་མ་འདི། །མཁའ་ཀློང་ འབར་བ ་ལྔ་རུ་ཐིམ། །རོལ་པ་ཆེན་པོ་མཆོད་སྦྱིན་ལ། །རྒྱལ་བ་རྒྱ་མཚོའི་ཚོགས་རྣམས་རོལ། །བླ་མེད་སྟན་འགན་མཆོད་པ་འདི། །སྔོན་ཆད་རྒྱལ་བས་བགྲོད་པའི་ལམ། །དུག་གསུམ་གཏིང་
ནས་གསོད་པའི་ཐབས། །སྔོན་གྱི་ཐུགས་དམ་བཞིན་དུ་བཞེས། །འཆི་མེད་བདུད་རྩི་གཡུང་དྲུང་ཆུ། །རོ་ཡི་ཁམས་རྣམས་སློང་བར་བྱེད། །དུག་གི་ཕུང་པོ་འཇོམས་བྱེད་པ། །རྩི་མཆོག་སྨན་གྱི་མཆོད་པར་བཞེས། །ཞེས་མཆོད་པའི་ཚོགས་རྣམས་ལིང་ལོང་ཕྱད་པར་བྱུང་བས་རྒྱལ་བ་རྒྱ་མཚོ་ཚོགས་ལོངས་སྤྱོད་དེས་མཉེས་པར་གྱུར་ཏོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་མཆོད་པ་དམ་པ་གསང་བའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་སེམས་དཔའི་རྡོ་རྗེ་དེས་རྡོ་རྗེ་གླུའི་ལེའུ་འདི་གསུངས་སོ། །འདིར་ནི་རྡོ་རྗེ་རྣལ་འབྱོར་རྣམས། །བསྙེན་པར་སྣང་བའི་དབང་ཐོབ་ནས། །བསྒོམ་དབྱངས་ཡི་གེ་འབྲུ་བརྒྱད་སྤྲོ། །ཡི་གེ་གླུ་ཡི་རྒྱན་ཡིན་ཏེ། །གླུ་ཡི་ཡི་གེ་བཅུ་དྲུག་ལས། །ཡི་གེ་ཡན་ལག་བསྒྱུར་བསྡེབས་ནས། །གླུ་ཡི་བྱེ་བྲག་བསམ་མི་ཁྱབ། །དང་པོར་གླུ་ཡི་དོན་བྱུང་བ། །ཨོཾ་གྱིས་གླུ་རྣམས་རབ་ཏུ་འདྲེན། །ཨོྃ་ཡང་ཨ་ཡི་ཆོ་འཕྲུལ་ཏེ། །ཨ་ནི་ཆོས་ཀྱི་ཡི་གེ་ཡིན། །ཨ་ལས་ཨོྃ་བྱུང་རྒྱལ་བའི་ཐུགས། །རྒྱལ་བ་ཆོས་ཀྱི་དབྱིངས་ལས་བྱུང་། །ཨ་ལས་ཨཾ་བྱུང་གསུང་གི་མཆོག །གསུང་ལས་གླུ་ཡི་ཡན་ལག་འབྱུང་། །དབྱངས་ཀྱི་ཡན་ལག་དྲུག་ཅུར་གྲགས། །གླུ་ཡི་ཡོན་ཏན་བསམ་མི་ཁྱབ། །སྔོན་གྱི་རྒྱལ་བ་གླུ་ཡིས་གྲུབ། །རིག་འཛིན་རྡོ་རྗེ་གླུ་ཡིས་འདྲེན། །རྣལ་འབྱོར་དབང་ཕྱུག་གླུ་ཡིས་འགྲུབ། །བསྟན་པ་རྒྱ་མཚོ་གླུ་ཡིས་སྤེལ། །སྲིད་པའི་བུ་མོ་གླུ་ཡིས་བསྟེན། །བདུད་དང་སྲིན་པོ་གླུ་ཡིས་འདུལ། །དངོས་གྲུབ་རྒྱ་མཚོ་གླུ་ཡིས་འབེབས། །ཆོས་ཉིད་དབྱིངས་ཀྱི་ཀློང་དཀྱིལ་ནས། །དཔལ་བེའུ་ཉི་མ་དགུ་ཤར་བས། །རྣམ་ཐར་སྒོ་བཞི་རབ་གསལ་ཡང་། །མ་རིག་མུན་གནག་འཐིབས་པ་ཡིས། །བསྒྲིབས་པར་རིག་པའི་སྒོ་མོ་བྱེ། །འཁོར་བའི་མུན་གནག་ཀློང་རུམ་ན། །བྱང་ཆུབ་སེམས་ཀྱི་ཟླ་ཤར་བས། །མུན་བསལ་རྣམ་ཐར་སྒོ་བཞིར་སྣང་། །རིན་ཆེན་ འབར་བའི་ཉི་མ་རྣམས། །དཔལ་ཆེན་ཐུགས་ནས་འོད་ཤར་བས། །བག་ཆགས་སྤྲིན་མཐོང་བྱེ་བ ་རུ། །རྣལ་འབྱོར་ཐུགས་ཀར་ཟེར་བབ་པས། །མུན་བསལ་རིག་པའི་སྒོ་ཕྱེ་སྟེ། །རྣལ་འབྱོར་དོན་ལ་འཇུག་པར་བྱ། །རིག་པ་ཐུགས་ཀྱི་དཀྱིལ་
འཁོར་ནས། །རུ་ལུའི་འོད་ཟེར་སྒོ་ཕྱེ་བས། །སྤྲོས་པས་ཆོ་འཕྲུལ་སྣ་ཚོགས་འབྱུང་། །སྲིད་པ་གསུམ་གྱི་བྱེ་བྲག་བྱེད། །འཁོར་བའི་རྒྱ་མཚོ་གཏིང་ནས་སྐེམས། །ཉོན་མོངས་རྒྱུ་དྲུག་གནས་ནས་སྒྲོལ། །དུག་གསུམ་རྩ་བ་རྩད་ནས་གཅོད། །བདུད་དང་སྲིན་པོ་གདུག་པ་འདུལ། །བྱིན་བརླབས་དངོས་གྲུབ་ཆར་ལྟར་འབེབས། །ཇི་ལྟར་དབང་པོའི་སྒོ་ཕྱེ་ནས། །འཛུམ་མདངས་གསལ་བར་འབྱུང་བ་ལྟར། །དཔལ་བེའུ་ཐུགས་ཀྱི་སྒོ་ཕྱེ་བས། །རུ་ལུའི་འོད་ཟེར་ཡིག་འབྲུ་ཤར། །མཐིང་ནག་སེར་ནག་དམར་ནག་ལྗང་། །སྨུག་ནག་འབར་བའི་ཡིག་འབྲུ་རྣམས། །ཡི་གེ་རིགས་ཀྱི་ཕྲེང་པར་དྲང་། །རྒྱངས་ཀྱིས་བསྐུལ་དང་དཀར་གྱིས་དབབ། །བསྟེན་ཀོས་ཉེ་བར་གྱུར་པ་ལ། །འཇིམ་གོས་མངོན་སུམ་གསལ་བར་བྱ། །འབིར་ཀྭས་གཉིས་སུ་མེད་པ་ལ། །འདྲེན་ཀོས་ཡི་གེའི་ཕྲེང་བ་དྲང་། །དེ་ཉིད་ལ་ནི་གླུ་དྲུག་སྟེ། །ཤ་ཏ་པ་དང་གར་ཏ་བ། །ཅང་ཀ་དེའུ་དང་བང་ཀ་དེའུ། །བྲེང་ངེ་བ་དང་དུང་ངེ་བ། །གླུ་ཡི་ཡན་ལག་སུམ་བརྒྱས་ནི། །རྒྱལ་བ་མཉེས་པའི་མཆོག་ཏུ་འགྱུར། །གླུ་ཡི་རྒྱལ་པོ་འདི་དྲུག་གིས། །དོན་དྲུག་ཡོངས་སུ་རྫོགས་པར་འགྱུར། །ཤ་ཏ་པ་ཡི་གླུ་བླངས་པས། །གདུག་བྱེད་ཐམས་ཅད་སྤ་ཡང་ཀོང་། །གར་ཏ་པ་ཡི་གླུ་བླངས་པས། །གནོད་བྱེད་ཐམས་ཅད་རྡུལ་དུ་རློག །ཅང་ཀ་དེའུ་ཡི་གླུ་བླངས་པས། །འབར་བའི་དཀྱིལ་འཁོར་མེ་ལྟར་མཆོད། །བང་ཀ་དེའུ་ཡི་གླུ་བླངས་པས། །དྲག་པོ་གཏུམ་པོ་ལྷན་ནེར་འགྱུར། །བྲེང་ངེ་བ་ཡི་གླུ་བླངས་པས། །སྤྲུལ་པའི་ཆོ་འཕྲུལ་ཐམས་ཅད་འགྱེད། །དུང་ངེ་བ་ཡི་གླུ་བླངས་པས། །སྲིད་པའི་བུ་མོ་དབང་དུ་སྡུད། །ཡི་གེ་འབྲུ་དགུའི་རང་བཞིན་ལ། །ཕྱག་རྒྱའི་དཀྱིལ་འཁོར་ཐམས་ཅད་རྫོགས། །དེ་བཞིན་འཁོར་ལོ་མུ་ཁྱུད་བཅས། །ཁྱམས་དང་སྒོ་ཁྱུད་གསལ་བའོ། །སྲིད་པ་མཐོང་ཡོད་སྣང་གྲགས་ཀྱང་། །ཐམས་ཅད་སྔགས་ཀྱི་ཚིག་ཏུ་རྫོགས། །ཡི་གེ་རྒྱལ་བ་ཀུན་དང་འབྲེལ། །འཁོར་ལོའི་ས་ལ་ཉེ་བའོ། །ཡི་གེས་དམིགས་པ་ཐམས་ཅད་འགྲུབ། །ཆགས་མེད་ལྷུན་གྲུབ་དོན་པོ་ཆེ། །རྣམ་བཞི་ལས་ཀྱི་ཁྱད་པར་ཡང་། །བྱ་བ་
མེད་པར་དོན་དུ་འགྱུར། །ཡི་གེ་གསང་བའི་འཕྲོ་འདུ་ཡིས། །རྒྱལ་བ་དཔའ་བོ་ཐམས་ཅད་མཉེས། །དེ་ཀུན་ཡི་གེས་རྣམ་སྤྲུལ་ཡང་། །རང་བཞིན་དངོས་མེད་ཆོས་ཀྱི་དབྱིངས། །ཡིག་འབྲུ་འབར་བའི་ཆོ་འཕྲུལ་ལས། །དམ་པའི་ངོ་མཚར་སྣ་ཚོགས་འབྱུང་། །དེ་བཞིན་སྒྲིབ་པའི་བུད་ཤིང་བསྲེག །གཏི་མུག་མུན་སེལ་ཡེ་ཤེས་འབར། །རིག་པའི་ཉི་མ་གསལ་བར་འབེབས། །བདག་ཉིད་དཔལ་ཆེན་འབར་བའི་ཐུགས། །ཙིཏྟ་དཔལ་བེའུ་ཟུར་བརྒྱད་འབར། །རིན་ཆེན་ཡི་གེ་འབྲུ་བརྒྱད་གསལ། །དཔལ་ཆེན་རིན་ཆེན་འབར་བའི་ཐུགས། །དཔལ་བེའུ་སྨུག་པོ་ཟུར་བརྒྱད་ལས། །གསེར་གྱི་ཉི་མ་དགུ་ཤར་བ། །འོད་ཟེར་རུ་ལུ་ཡིག་འབྲུ་བརྒྱད། །རྡོ་རྗེ་འབར་བའི་རླུང་སྒྲོམ་དུ། །ཤིན་ཏུ་འབར་འཕྲོ་འཁྲུག་བྱས་ཏེ། །སྤྲོས་པས་རྣལ་འབྱོར་དབང་ཕྱུག་གི། །ན་ས་གཡས་སུ་དྲང་བར་བྱ། །གོ་རོ་ཙ་ནའི་གཞལ་ཡས་སུ། །སེན་ཟླུམ་ཙམ་གྱི་རྒྱ་ཁྱོན་ལ། །གསེར་གྱི་ཉི་མ་གའུ་དགུ། །ཤར་བའི་དཀྱིལ་ན་ཡིག་འབྲུ་དགུ། །གསལ་བས་འོད་ཀྱི་གཞལ་ཡས་ཁང་། །དངོས་པོའི་བག་ཆགས་ཀུན་བསྲེགས་ཏེ། །སེམས་ནི་གསེར་ཆུ་ཞུན་མ་བཞིན། །ལྟེམ་ལ་འཚེར་ཞིང་འོད་འབར་བ། །རྩལ་ལས་གྱུར་པའི་ཟླ་དཀྱིལ་འཁོར། །ཉི་མའི་སྟེང་ན་དཔལ་བེའུ་འབར། །དེ་ལ་རུ་ལུ་འཕྲོ་ཞིང་འདུ། །དཔལ་བེའུ་ཙིཏྟའི་དཀྱིལ་འཁོར་འདི། །ཡིག་འབྲུ་འབར་བའི་གའུར་གསལ། །པདྨ་ འབར་བའི་གའུ་འདི། །ཡི་གེ་ཕྲེང་བ ་འཁྱིལ་བའི་གནས། །དཔེར་ན་མེ་ཏོག་ འབར་བ ་ལས། །བཅུད་ལེན་བུང་བས་བཅུད་བླངས་ཏེ། །རྩི་ཡི་བུར་བུ་སོག་པ་ལྟར། །དཔལ་བེའུ་ཐུགས་ཀྱི་དཀྱིལ་འཁོར་ནས། །རིན་ཆེན་འོད་ཀྱི་མེ་ཏོག་འབར། །རུ་ལུའི་ཡིག་འབྲུ་བཅུད་ཀྱིས་རྒྱས། །རྣལ་འབྱོར་སེམས་ལས་བྱས་པ་ཡི། །བཅུད་འབྱིན་བུང་བ་མང་པོ་འཕྲོ། །ཕར་ལྡིང་ཡི་གེའི་བཅུད་ཕྱུང་ནས། །ཚུར་ལྡིང་སེམས་ཀྱི་གའུར་བསྟིམ། །དང་པོ་ཤེལ་གྱི་ཁ་དོག་ལ། །ཤིན་ཏུ་གསལ་ཞིང་འཚེར་ འབར་བ། །གནས་དགུ་དག་ཏུ་ཟླ་བ ་ཡི། །ཐིག་ལེ་དཀྱིལ་གྱི་དཔལ་བེའུ་ལ། །འབྲུ་བཀོད་གསལ་
བར་གྱུར་པ་དང་། །ཤེལ་གྱི་བུང་བ་མང་པོ་དག །ཁྱུང་ཆེན་ལྡིང་བའི་བོང་ཚོད་ཙམ། །ཕར་ལྡིང་བཅུད་ཕྱུང་ཚུར་གསིབས་པས། །ཡིག་འབྲུ་ཡེ་ཤེས་མེ་འབར་བས། །བག་ཆགས་བུད་ཤིང་ཕུང་པོ་བསྲེགས། །ཕར་སྤྲོས་ཐུགས་རྗེས་ས་ལ་བསྐུལ། །ཇི་ལྟར་ཉི་ཟེར་ཚ་ཚ་ལྟར། །རྒྱུན་མི་འཆད་པར་རྩེ་གཅིག་འབར། །བར་དུ་བྱི་རུའི་ཁ་དོག་ལ། །གོང་མ་བཞིན་དུ་བཀོད་གསལ་ལ། །བྱི་རུ་བུང་བ་མང་པོ་དང་། །གོང་མ་བཞིན་དུ་འཕུར་ལྡིང་བས། །བཅུད་ཕྱུང་བསྟིམ་ཞིང་སླར་ལ་འཕྲོ། །ཇི་ལྟར་མེ་མགལ་འཁོར་ཚུལ་དུ། །དཔལ་བེའུ་སྨུག་པོའི་ཀློང་དུ་བསྟིམ། །ཀུན་གྱི་ཐ་མར་བསྡུ་བ་ནི། །བཀོད་པའི་གོང་མ་ཐམས་ཅད་ཀུན། །མཐིང་ནག་ འབར་བ ་བསྒྱུར་ནས་ནི། །ཁྱུང་ཆེན་གཟན་ལ་འཇུམས་ཚོད་ཙམ། །ཧཱུཾ་སྒྲ་འབྱིན་ཅིང་ཕན་ཚུན་ལྡིང་། །རུ་ལུ་བཅུད་འབྱིན་དངོས་གྲུབ་རློབ། །དྲན་པའི་དཀྱིལ་ནས་ཛ་ཕྱུང་སྟེ། །ལྕགས་ཀྱུ་ འབར་བ ་གའུར་བཅས། །དཔལ་བེའུའི་དཀྱིལ་ན་སྤུངས་པ་ཡིས། །རུ་ལུ་རིན་ཆེན་ཕུང་པོ་དག །བསྡུས་ཤིང་དྲངས་ཏེ་གནས་སུ་བསྟིམ། །འབབ་པའི་ཤུགས་སམ་བྱིན་བརླབས་ནི། །མཚོ་ལ་སེར་ཆེན་འདྲིལ་ལྟར་རོ། །འདི་ལྟར་ཡི་གེར་སྦྱར་བའི་ཚེ། །རྣལ་འབྱོར་ཉག་གཅིག་མ་ཡིན་གྱི། །ལྷ་མཆོག་དབྱིངས་ན་བཞུགས་པ་ཡང་། །ཆོས་ཉིད་དང་དུ་མི་དམིགས་ཀྱང་། །རྣལ་འབྱོར་མཆོག་གི་བསྐུལ་བའི་ཚེ། །ཐུགས་རྗེ་ཆགས་པའི་མདངས་ཕྱུང་ནས། །སྲོག་རྩོལ་དྲན་རིག་གསུང་གསུང་ལྟར། །མགུར་ཆུ་ཡན་ལག་འགུལ་འགུལ་ལྟར། །རྡོ་རྗེ་ཡི་གེར་འབྲུ་འབར་ལྟར། །གུག་སྐྱེད་ཀླད་ཀོར་ཚེག་པར་ཕྱིན། །ར་རི་ཁལ་ཁོལ་སྒྲིབ་མེད་པ། །ཡེ་ཤེས་དོན་ལ་མཁྱེན་རིག་རྒྱས། །དེ་ལྟ་མོད་ཀྱང་འདུལ་དབང་གིས། །རྒྱལ་བ་སྐུལ་བའི་ས་ལ་གཞེས། །རྣལ་འབྱོར་གསོ་བའི་ཆོ་ག་བྱེད། །ལྷ་དང་གཅིག་ཏུ་བྱ་བའི་ཕྱིར། །བཟླས་བརྗོད་གྲངས་དང་བསྙེན་པ་དང་། །སྦྱོར་བས་དོན་ལ་ཉེ་བར་འགྱུར། །འདི་ལྟར་སྟོར་བའི་དུས་དག་ན། །བྱིན་བརླབས་ཕེབས་སམ་ཉེ་བ་ཡི། །རྟགས་སམ་དྲོད་དམ་མཚན་མ་ནི། །རྣལ་འབྱོར་ཉིད་དང་བསྒྲུབ་རྫས་
དང་། །ཡོད་མཐོང་སྒྲ་ཐོས་ཀུན་ལ་འབྱུང་། །ལུས་ཀྱི་དྲོད་དང་རྨི་ལམ་དང་། །སེམས་ཀྱི་རྟགས་སུ་གསལ་བ་དང་། །དབུགས་དག་ལ་ཡང་ངེས་པར་འབྱུང་། །ཤིང་བལ་ལྟ་བུར་ཡང་བ་དང་། །མི་བདེའི་གནོད་པ་བྲལ་བ་ཡིན། །རེག་ལ་ཏིང་འཛིན་གསལ་བ་དག །རྨི་ལམ་དུ་ཡང་མྱོས་པར་འགྱུར། །དང་ཞིང་དགའ་ལ་མགུ་བ་སྐྱེ། །གདུང་བའི་བྱང་ཆུབ་སེམས་སྐྱེས་ཤིང་། །ངོ་མཚར་སྐྱེས་པ་དེ་ཉིད་དོ། །འགྱུར་བའི་དབུགས་ལ་དབང་ཐོབ་སྟེ། །དགག་དང་དབྱུང་བ་ཇི་ལྟ་བའོ། །རྫས་ནི་ འབར་དང་འཕར་བ ་དང་། །དྲི་དང་འོད་འབྱུང་རོ་མཆོག་སྐྱེ། །མི་ཟད་མང་དུ་འཕེལ་བ་དང་། །མངར་འཇམ་དང་ཞིང་རོ་མཆོག་རྙེད། །ལྟོ་ལ་མི་གནོད་མགྲིན་ལ་མིན། །ཟོས་ན་བཞིན་འགྱུར་ལུས་རྟས་འགྱུར། །སིལ་སྙན་ཡིད་འོང་སྒྲ་སྙན་གཟུགས། །དྲི་ཞིམ་འབྱུང་བ་དེ་ལྟའོ། །རྡོ་རྗེ་པྲ་རྣམས་བཟང་བ་ན། །རྟགས་དང་མཚན་མ་ཕེབས་པ་སྟེ། །སྨྱུར་ཏེ་དངོས་གྲུབ་བླང་བར་བྱའོ། །བེད་དང་གའུའི་ཕྱག་རྒྱ་དང་། །རྡོ་རྗེ་བུམ་པའི་འཕྲོ་འདུ་ཡིས། །དངོས་གྲུབ་ཡུམ་གྱི་མཁའ་ལ་དབབ། །ཡབ་ཡུམ་སྦྱོར་བའི་ལྷག་སེམས་དག །མ་ཕེབས་པ་ཡི་བར་དུ་དག །ཤེས་རབ་གསལ་བའི་ལྷ་མོ་བཞིས། །ཧ་སྟ་མེ་ལོང་བྷན་དྷ་དང་། །ཞིང་ཆེན་ཕྲེང་བ་ལ་སོགས་དང་། །ཁ་དོག་ལྔ་ཡི་དར་གཡབ་ཀྱིས། །གཡབ་ཅིང་རིག་འཛིན་མང་པོ་འབོད། །རོལ་མོ་ཆ་བྱད་མང་པོ་དག །རྡོ་རྗེ་གར་དང་སྙན་པའི་གླུ། །སྲིད་པའི་མ་མོ་ཀུན་རྟེན་ཅིང་། །བྱིན་བརླབས་ཆེན་པོ་དབབ་པར་བྱ། །ཕེབས་མ་དག་ཏུ་དངོས་གྲུབ་བསྟིམ། །འདི་ནི་རྡོ་རྗེ་གླུ་འཁོར་ལོ། །ཡེ་ཤེས་རྒྱན་གྱི་ལས་ཡིན་ནོ། །ཞེས་སེམས་དཔའི་རྡོ་རྗེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་གླུའི་ལེའུ་ཞེས་བྱ་སྟེ་སུམ་ཅུ་པའོ།། །།དེ་ནས་ཡང་སེམས་དཔའི་རྡོ་རྗེ་དེས་རྡོ་རྗེ་རྣལ་འབྱོར་འཇུག་པ་ཞེས་བྱ་བའི་ལེའུ་འདི་གསུངས་སོ། །འདུས་པ་ཆེན་པོའི་རྣལ་འབྱོར་བ། །གསང་བའི་དཀྱིལ་
འཁོར་དམ་པ་འདིར། །གང་དག་འཇུག་པར་བྱེད་པ་ཡི། །རྣལ་འབྱོར་རིགས་ཀྱི་བུ་རྣམས་ཀུན། །སྣོད་དུ་གྱུར་པ་ཀུན་བསྡུས་ནས། །བྱང་ཆུབ་མཆོག་གི་སེམས་བསྐྱེད་དེ། །ཚིག་འདི་བརྗོད་དེ་གནས་པར་བྱ། །ཨེ་མ་བདེ་མཆོག་དགའ་ཚལ་འདིར། །བདག་ཅག་ཀུན་དུ་འཇུག་པར་འཚལ། །དགའ་བ་བྱང་ཆུབ་སེམས་བསྐྱེད་ནས། །གསང་བའི་དོན་འདི་སྤྱད་པར་བགྱི། །དེ་སྐད་གསོལ་ཏེ་ཞུས་པ་དང་། །གསང་བ་མཆོག་གི་བདག་པོ་ཡིས། །རྒྱུད་སྦྱང་རྒྱུད་དྲུག་ལས་སྒོ་གཅད། །རིག་པ་འཛིན་པའི་རྣལ་འབྱོར་ཀུན། །དཀྱིལ་འཁོར་ཆེན་པོ་གསལ་བཏོན་ཏེ། །ཕྱག་རྒྱ་དབང་དང་བཅས་པ་ཡི། །འཁོར་བའི་རྒྱུད་རྣམས་སྦྱང་བར་བྱ། །འཇུག་པ་དེ་ཡི་གནས་ལྔ་རུ། །རྒྱུད་དྲུག་ས་བོན་བསྐྱེད་ནས་ཀྱང་། །ཧཱུྃ་ལྔ་དག་གིས་གནན་པར་བྱ། །བཅུག་པ་དེ་ཡི་སྤྱི་བོར་ནི། །བ་ཡི་ཡེ་ཤེས་ལ་བསྐྲུན་པ། །པདྨ་ཁ་བཞི་ལྟེ་བ་ལ། །མི་དང་ལྷ་ཡི་ས་བོན་དགོད། །ཤར་ལྷོ་ནུབ་དང་བྱང་དག་ཏུ། །ལྷ་མིན་དུད་འགྲོ་ཡི་དགས་དང་། །དམྱལ་བ་རྣམས་ཀྱི་ས་བོན་གདབ། །ཧཱུྃ་གི་ལམ་སྒོ་གཅད་པར་བྱ། །ལག་གཉིས་མཐེའུ་ཆུང་མཐེ་བོས་མནན། །སོར་མོ་གསུམ་སྦྱར་དཔྲལ་པར་བསྣོལ། །ལྷ་དང་ལྷ་མིན་གནས་དག་ཏུ། །མི་གཏོང་བཟློག་པའི་ཕྱག་རྒྱ་ཡིན། །ལག་གཉིས་བསྣོལ་ནས་མཆན་ཁུང་བསྡམ། །མི་ཡི་ཁམས་ནས་བཟློག་པའི་རྒྱ། །ཁུ་ཚུར་བཅངས་ཏེ་འབྲུ་བསྒྲེང་ནས། །གཡོན་གྱི་སྟེང་དུ་མནན་པ་འདི། །བྱོལ་སོང་གནས་ནས་བཟློག་པའི་རྒྱ། །ཐལ་མོ་མཉམ་སྦྱར་གུང་རྩེ་སྤྲད། །གུང་མོ་རྒྱབ་ཏུ་སྲིན་ལག་བསྣོལ། །མགུལ་ནས་མཛུབ་མོས་འཁྱུད་པ་ནི། །ཡི་དགས་ཁམས་ལས་བཟློག་པའི་རྒྱ། །གཡོན་ཐོག་གཡས་ཀྱི་རྒྱབ་སྦྱར་ཏེ། །སྲིན་ལག་གུང་མཛུབ་གཅིག་ནས་གཅིག །འཁྱུད་པ་དམྱལ་བའི་སྒོ་གཅོད་རྒྱ། །ལག་གི་ཕྱག་རྒྱ་བཅས་ནས་ནི། །ངག་གི་རྡོ་རྗེ་རྒྱ་བརྗོད་པ། །ཀྱེ་མ་རུ་དྲ་ཀྲོ་དྷ་ཀྱི་ཧཱུྃ། །ཧྲི་ས་མ་པ་ཙ་ཧཱུྃ། །ཧྲིས་པ་ཛ་ཧཱུྃ། །འདི་ལྟར་གསལ་
བར་གྱུར་བ་དང་། །སྒྲིབ་པ་དག་པར་བྱ་བའི་ཕྱིར། །རྣལ་འབྱོར་སྦྱོར་བའི་ཕྱག་རྒྱ་སྟེ། །རྡོ་རྗེ་རྣལ་འབྱོར་མཆོག་གི་ལྷ། །འགྲོ་དྲུག་འདྲེན་པའི་དཔལ་མཛད་པ། །རྡོ་རྗེ་ཅན་ལ་ཕྱག་འཚལ་ལོ། །བྱམས་མགོན་ཁྱོད་ལ་སྐྱབས་སུ་མཆིའོ། །དེ་སྐད་གསོལ་བ་བཏབ་པ་དང་། །རྣལ་འབྱོར་ཆེན་པོའི་ཞབས་ཉིད་ལ། །འཇུག་པ་དེ་ཡི་སྤྱི་བོས་གཏུགས། །སངས་རྒྱས་བདེ་མཆོག་ཐམས་ཅད་ཀྱི། །རྡོ་རྗེ་གསུང་མཆོག་གསུམ་ལས་བྱུང་། །སྲིད་པ་གསུམ་གྱིས་ཕྱག་བྱས་པ། །དབང་བསྐུར་གནང་བ་ཆེན་པོ་སྦྱིན། །ཨ་ཏི་ཧོ་སྟ་ཧྲྀ་ད་ཁྃ། །དེ་ནས་སྣོད་དུ་གྱུར་པ་དང་། །གསང་བའི་མིག་ནི་དབྱེ་བར་བྱ། །མེ་ཏོག་ཕོག་པའི་ལྷ་ཡང་སྦྱིན། །དེ་ནས་དམ་ཚིག་ཆེན་པོ་བསྒྲགས། །རྒྱལ་བ་ཀུན་དང་མཉམ་སྦྱོར་བའི། །དམ་ཚིག་འདི་ལས་གང་འདས་པ། །རྒྱལ་ བ་ཐམས་ཅད་བསླུས་པ་ཡིན། །ཁྲག་འཐུང་ཁ་འབར ་མ་ཡི་ཚོགས། །ཁྲོས་ནས་སྙིང་ཁྲག་ཐོགས་པས་འཐུང་། །བཛྲ་ས་མ་ཡ་ཨི་ད་ན་ཐེ་ན་ར་ཀན། །བ་ར་ཧྲྀ་ད་ཡ་ན་མ་བ་སྟི་ནཱ་ན། །ས་མ་ཡ་རཀྵ་སིདྡྷི་བདྱི་བཛྲ་ཨ་མྲྀ་ཏོ་ད་ཀྃ། །རྡོ་རྗེ་ཐ་ཚིག་ཆུ་བླུད་ནས། །རྡོ་རྗེ་གལ་ཆེན་མནའ་དོར་རོ། །རྡོ་རྗེ་དམ་ཚིག་སྡོམ་པ་རྣམས། །ཐམས་ཅད་ཐམས་ཅད་དབོག་པར་བྱ། །སློབ་པའི་གཉེར་ཡང་དབོག་པར་བྱ། །ཀྱེ་རིག་འཛིན་རྡོ་རྗེ་བུ་མཆོག་ཁྱེད། །རྣལ་འབྱོར་རྒྱལ་བའི་སྲས་ཀྱིས་ཡིན། །གཞན་ཡང་གསང་བ་མ་སྨྲ་ཤིག །གལ་ཏེ་སྨྲས་ན་དམྱལ་བར་འཚིག །ཁྱོད་ནི་རྡོ་རྗེ་ཆེ་གེ་མོ། །རྒྱལ་བའི་སྲས་པོ་གདུང་རྒྱུད་འཛིན། །གསང་བ་མཆོག་གི་མིང་སྦྱིན་གྱིས། །ཞིང་ཁམས་ཀུན་དུ་བདེ་བར་སྤྱོད། །དེས་ནི་སངས་རྒྱས་ཞིང་དུ་སྐྱེ། །ཞེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་རྣལ་འབྱོར་འཇུག་པའི་ལེའུ་ཞེས་བྱ་སྟེ་སུམ་ཅུ་རྩ་གཅིག་པའོ།། །།དེ་ནས་ཡང་སེམས་དཔའི་རྡོ་རྗེས་ཡོངས་སུ་རྫོགས་པ་
དབང་གི་ལེའུ་འདི་གསུངས་སོ། །འདུས་པ་ཆེན་པོའི་རྣལ་འབྱོར་བ། །སྲིད་པ་གསུམ་གྱིས་ཕྱག་བྱས་པས། །བླ་མའི་ས་ལ་གནས་པ་ནི། །གསང་མཆོག་སུམ་ཅུ་རྩ་དྲུག་ཡིན། །ཕྱི་ཡི་དབང་དང་ནང་གི་དབང་། །བསྒྲུབ་པའི་དབང་དང་གསང་བའི་དབང་། །བཅུ་དང་བཅུ་གཅིག་བཅུ་གསུམ་དང་། །རྣམ་པ་གཉིས་ཀྱིས་རྫོགས་པར་འགྱུར། །དེ་ལ་དང་པོ་སྦྱིན་པའི་དབང་འདི་ཡིན་ཏེ། །ཨོྃ་ཧཱུྃ་ས་ཧྲཱིཿཧ། །ཀུན་གྱིས་འདའ་བར་དཀའ་བ་ཡི། །ཚིག་བཙན་ཡུལ་ལ་དབང་སྒྱུར་བ། །རྒྱལ་པོ་བཀའ་རྟགས་ཕྱག་རྒྱའི་དབང་། །སྐུ་ལྔ་ཡོངས་སུ་རྫོགས་པར་འགྱུར། །རིགས་རྣམས་སོ་སོའི་རྒྱུད་འཛིན་ཅིང་། །རྟགས་ཀྱི་མཚན་མ་ཆེན་པོ་ནི། །སྦྱོར་བ་ཆེན་པོའི་ཕྱག་མཚན་ཏེ། །དམ་ཚིག་ཕྱག་རྒྱ་རྫོགས་པར་འགྱུར། །ཤེས་རབ་གཟུངས་ཀྱི་གསང་མཆོག་ནི། །དོན་དང་ལྡན་པར་གྱུར་པ་ཡི། །མཐའ་གཉིས་དག་ཏུ་མི་གཏོང་བའི། །གཟུངས་མའི་རྒྱལ་མོ་ཆེན་མོ་ཡིན། །གཉིས་མེད་ཡོངས་སུ་རྫོགས་པ་ན། །ཐམས་ཅད་བདེ་བ་ཆེན་པོའི་ངང་། །བྱང་ཆུབ་སེམས་དང་དོན་དུ་འབྲེལ། །ཤེས་རབ་ཆེན་པོ་རྫོགས་པའི་དབང་། །བཀྲ་ཤིས་ཆེན་པོ་བུམ་པ་ནི། །བདེ་གཤེགས་བཞུགས་པའི་ཕོ་བྲང་སྟེ། །དཀྱིལ་འཁོར་རྫོགས་པར་གྱུར་པ་ཡི། །དབང་ཆེན་དེ་ལ་སྦྱིན་པར་བྱ། །གསང་བའི་བསྟན་པ་རྒྱས་ནས་ནི། །ཡུན་རིང་གནས་པར་འགྱུར་བ་ཡི། །བཀྲ་ཤིས་རྫས་ཀྱི་དབང་མཆོག་ཀྱང་། །གནང་བ་ཆེན་པོ་སྦྱིན་པར་བྱ། །དོན་རྣམས་གྲུབ་པར་འགྱུར་བ་ཡི། །འདོད་དགུར་རེ་སྐོང་རིན་པོ་ཆེ། །རྒྱལ་སྲིད་རིན་ཆེན་སྣ་བདུན་གྱིས། །རྒྱལ་པོ་མཆོག་ཏུ་དབང་བསྐུར་རོ། །རིན་ཆེན་པདྨ་སེང་གེའི་ཁྲི། །བླ་མར་གྱུར་པའི་གདན་མཆོག་དེ། །ཁྱད་པར་ཆེན་པོར་གྱུར་པའི་དབང་། །ཁྲི་ཆེན་དག་ལ་གཞག་པར་བྱ། །ཅོད་པན་
མེ་ཏོག་ཕྲེང་ལ་སོགས། །དབང་མཆོག་བརྗིད་པའི་རྒྱན་གྱིས་བཀླུབས། །དབུ་རྒྱན་དོ་ཤལ་སེ་མོ་དོ། །དཔུང་རྒྱན་རྐང་གདུབ་ལག་གདུབ་རྣམས། །དབང་ཐོབ་རྒྱལ་པོས་དེ་ལ་སྦྱིན། །དབང་ཐོབ་མཛེས་པས་བརྗིད་པའི་རྒྱལ་པོ་དེ། །དབང་ཕྱུག་ཡིན་པས་དེ་ལ་ཀུན་ཕྱག་འཚལ། །རྡོ་རྗེ་དབང་ཕྱུག་རྒྱལ་པོའོ་ཞེས་པར་ནི། །ཀུན་གྱིས་སྒྲ་ཆེན་བོད་ཅིང་བསྒྲགས་པ་བྱ། །གསེར་གྱི་འཁོར་ལོ་རྩིབས་ཁྱུད་ལྡན་པ་ཞིག །རྒྱལ་པོ་དེ་ཡི་ལག་ཏུ་བསྐུར་ནས་ནི། །འཇིག་རྟེན་ཀུན་ལ་ཁ་ལོ་སྒྱུར་བ་ཡི། །དབང་མཆོག་རྒྱལ་པོ་འདི་ཡང་སྦྱིན་པར་བྱ། །ཕྱི་འཁོར་སྐྱོང་བའི་རྒྱལ་པོར་གྱུར་ཕན་ཆད། །བླ་མེད་མཆོག་གི་རྟགས་དང་ལྡན་འགྱུར་བས། །གསང་སྒོ་ཕྱེ་ནས་ནང་དུ་གཞུག་པར་བྱ། །ཤིན་ཏུ་གསང་བའི་རྫས་དང་ལྡན་གྱུར་ནས། །གསང་སྒོ་གང་ལས་འདོད་པའི་དོན་རྣམས་ཞུ། །གནང་ཆེན་པོ་ཡི་རྟགས་སུ་བྱིན་གྱིས་བརླབས། །གསང་བའི་དོན་ལ་ཉན་ཅིང་སློབ་པའི་དབང་། །དབང་ཐོབ་སྐལ་ཅན་དེ་ལ་སྦྱིན་པར་བྱ། །བདུད་རྩི་ཆུ་འདིས་རྣ་བའི་གསང་སྒོ་དབྱེ། །སརྦ་ཏ་ཐཱ་ག་ཏ་སྟ་མ་ཏི་ཧོ། །གླེགས་བམ་ཟབ་མོ་ལ་སོགས་ཐམས་ཅད་རྣམས། །རིགས་ཀྱི་བུ་མཆོག་དེ་ལ་སྦྱིན་པར་བྱ། །དེས་ནི་འགྲོ་བའི་དོན་བྱེད་ནུས་པས་ན། །ལས་རྣམས་རྒྱ་མཚོ་ཐམས་ཅད་སྒྲུབ་པའི་རྟགས། །རྡོ་རྗེ་རྒྱ་གྲམ་ལ་སོགས་རྣམ་བཞིའི་རྫས། །བུ་མཆོག་དེ་ལ་ཐབས་ཀྱིས་སྦྱིན་པར་བྱ། །གཞན་གྱི་རེ་འདོད་སྐོང་བའི་བུ་མཆོག་དེ། །རྒྱལ་པོ་རྒྱལ་རིགས་རྒྱུད་དུ་བྱུང་བ་བཞིན། །རྒྱལ་ཚབ་ཆོས་ཀྱི་རྒྱུད་དུ་བྱུང་བས་ན། །ཏནྟྲ་ལ་སོགས་དམ་པའི་མཛོད་གསུམ་སྦྱིན། །དེས་ནི་སློབ་མའི་ཚོགས་ཀུན་སྐྱོང་ནུས་ཕྱིར། །བསྟན་པ་སྒྲོགས་པའི་ས་ལ་གནས་བྱའི་ཕྱིར། །རྡོ་རྗེ་རྒྱལ་པོ་དཔལ་གྱི་དབང་མཆོག་འདི། །ཐེག་ཆེན་དགུ་ཡི་རྟགས་དང་ཆས་ཏེ་
སྦྱིན། །དེ་ནི་བླ་མེད་རྒྱལ་པོར་འགྱུར་བས་ན། །ས་རྣམས་ནོན་པའི་རྟགས་མཆོག་གདན་ཁྲིའི་དབང་། །ལྷ་ཆེན་ལ་སོགས་ཞིང་ཆེན་ཉི་ཟླར་བཅས། །ཁྱུ་མཆོག་སེང་གེ་མ་ཧེ་གཟིག་དང་སྟག །གཏུམ་པའི་དོམ་གྱིས་སྤར་ཏེ་སྦྱིན་པར་བྱ། །རྒྱལ་པོ་ཡིན་པའི་རྟགས་ནི་རྣམ་པ་བདུན། །སྐྱེ་ལ་དབང་སྒྱུར་རྒྱལ་པོ་མཉེས་པའི་གཟུངས། །ཕ་རོལ་དཔུང་འཇོམས་སྲིད་ཐུབ་འཛིན་པ་དང་། །བདག་གཞན་དོན་སྒྲུབ་རྫུ་འཕྲུལ་རྐང་པར་ལྡན། །དགོས་འདོད་ཡིད་བཞིན་སྐོང་བའི་རིན་པོ་ཆེ། །རྒྱལ་པོ་དེ་ལ་ཐབས་ཀྱིས་སྦྱིན་པར་བྱ། །དེ་ནི་རྒྱལ་བའི་མཆོག་སྲས་ཡིན་པས་ན། །ཕྱག་རྒྱ་ཆེན་པོའི་དབང་མཆོག་སྦྱིན་པར་བྱ། །རས་སམ་འབུར་རམ་ལུགས་སུ་བླུགས་པ་ཡི། །ཕྱག་རྒྱའི་གཟུགས་བརྙན་དེ་ཡི་སྤྱི་བོར་གཞག །ཡེ་ཤེས་ཆེན་པོའི་དོན་དང་དེ་ལྡན་པས། །ཡེ་ཤེས་ལྔ་ཡི་རྟགས་མཆོག་ཕྱག་རྒྱ་ཡིས། །གནས་ལྔར་གཏུགས་ཏེ་ཐུགས་ཀྱི་དབང་མཆོག་སྦྱིན། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃམ་ཧཱ་ཨཱ་དརྴ་ཛྙ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོཾ་མ་ཧཱ་ས་མ་ཏཱ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་མ་ཧཱ་པྲ་ཏྱ་བེཀྵ་ཎ་ཛྙཱ་ན་བཛྲ་སྭ་བྷཱ་བ་ཨཱཏྨཀོ྅ཧྃ། ཨོྃ་མ་ཧཱ་ཀྲྀ་ཏྱཱ་ནུཥྛ་ན་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། །སྐུ་དང་གསུང་ཐུགས་རྡོ་རྗེ་ཡི། །རྣལ་འབྱོར་བདེ་མཆོག་དེ་ཡིན་པས། །སྐུ་གསུང་ཐུགས་ཀྱི་གསང་མཆོག་འདི། །རྡོ་རྗེ་ཅན་ལ་སྦྱིན་པར་བྱ། །ཨོྃ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭཱ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་ཝཱ་ཀ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་ཙིཏྟ་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་ཛྙཱ་ན་བཛྲ་སྭ་བྷཱ་བ་ཨཱཏྨ་ཀོ྅ཧྃ། ཨོྃ་སརྦ་ཏ་ཐཱ་ག་ཏ་པཱུ་ཛ་བཛྲ་སྭ་བྷཱ་བ་ཨཱཏྨ་ཀོ྅ཧྃ། དབང་མཆོག་ཐོབ་པའི་བུ་མཆོག་དེ། །དོན་རྣམས་གྲུབ་པར་བཀྲ་ཤིས་ཕྱིར། །བདུད་འདུལ་བཀྲ་ཤིས་རྫས་མཆོག་རྣམས། །རྟགས་
ཀྱིས་བརྒྱན་ཏེ་སྦྱིན་པར་བྱ། །དོན་རྣམས་གྲུབ་པའི་བུ་མཆོག་དེ། །རྡོ་རྗེ་དབང་མཆོག་ཐོབ་པ་ན། །ཞིང་ཁམས་ཀུན་དུ་གྲགས་པ་ཡི། །རྩལ་གྱི་ཐིག་ལེ་རྡོ་རྗེ་སྦྱིན། །ནང་དུ་འཇུག་པའི་དབང་ཐོབ་ནས། །དེ་དག་ཀུན་ལ་སྤྱོད་སྒྲུབ་པའི། །དབང་མཆོག་དམ་པ་སྦྱིན་པར་བྱ། །སྐྱེ་མེད་ཆོས་ཀྱི་དབྱིངས་ཉིད་ལ། །སེམས་ཀྱིས་དབང་བསྐུར་ཐོབ་པ་ཡི། །ཤེས་རབ་ཆེན་པོ་རིག་པའི་དབང་། །སེམས་ལོན་དོན་གྱི་གཏན་ཚིགས་སྦྱིན། །བྱ་བའི་མཚན་མ་ཀུན་བྲལ་ཞིང་། །བཙལ་མེད་གནས་པའི་བྱང་ཆུབ་སེམས། །སྙིང་རྗེ་ཆེན་པོ་བདེ་མཆོག་གིས། །ཁམས་གསུམ་ཀུན་ལ་དབང་སྒྱུར་སྦྱིན། །སྲིད་གསུམ་འགྲོ་བའི་དོན་རྣམས་ཀུན། །ཐམས་ཅད་རྫོགས་པར་ནུས་པ་ཡི། །རྟགས་ཀྱི་དབང་མཆོག་དམ་པ་ནི། །ཐོང་གཤོལ་ འབར་བ ་སྦྱིན་པར་བྱེད། །དུག་གསུམ་གཏིང་ནས་སྤྲུགས་པ་ཡི། །རྟགས་ཆེན་གའུ་རྣམ་པ་གསུམ། །དམར་ཆེན་དག་གིས་བཀང་ནས་ཀྱང་། །དབང་ཆེན་ཐོབ་དེའི་ལག་ཏུ་སྦྱིན། །སྲིད་གསུམ་སྒྲོལ་བར་བྱ་བ་ཡི། །དབང་མཆོག་ཆེན་པོ་སྦྱིན་པའི་ཕྱིར། །ཀ་ཏར་ལ་སོགས་མཚོན་ཆ་རྣམས། །དབང་ཐོབ་དེ་ཡི་ལག་ཏུ་སྦྱིན། །འཁོར་བའི་ཆོས་ལ་ཅིར་སྤྱད་ཀྱང་། །སྐྱོན་གྱིས་གོས་པར་མི་འགྱུར་བའི། །རྟགས་ཀྱི་ཕྱག་རྒྱ་ཆེན་པོ་ནི། །རྣམ་དག་རྫས་ཀྱི་པདྨ་སྦྱིན། །ལས་རྣམས་རྫོགས་པར་གྱུར་པ་ཡི། །དབང་མཆོག་ཐོབ་པའི་རྟགས་ཆེན་ནི། །སྟི་རའི་དབྱུག་པ་ཆེན་པོ་དག །དབང་ཐོབ་དེ་ཡི་ལག་ཏུ་སྦྱིན། །ཡུམ་དང་གཉིས་མེད་འཁྲིལ་བ་ཡི། །ཆོས་ཉིད་དོན་དང་གཉིས་མེད་རྟགས། །སྦྲུལ་ནག་འཁྲིལ་བའི་ཆུན་པོ་འདི། །དབང་ཐོབ་དེ་ཡི་ལག་ཏུ་སྦྱིན། །གསང་བ་སྦྱོར་བའི་ཤེས་རབ་མ། །དྲི་མེད་རྣམ་དག་ལྟ་མོ་ཞིག །མཚན་ལྡན་ཤིན་ཏུ་བརྒྱན་བྱས་ལ། །དབང་ཐོབ་དེ་ལ་སྦྱིན་པར་བྱ། །དབང་ཐོབ་རྒྱལ་པོ་ཆེན་པོ་དེ། །ཀུན་གྱི་བདག་པོ་ཡིན་པས་ན། །རོལ་མོ་དྲི་དང་ཞལ་ཟས་དང་། །འདོད་ཡོན་ལྔ་ལ་སོགས་
པ་དང་། །ཉེ་བའི་ལོངས་སྤྱོད་རྒྱན་རྣམས་ཀུན། །ཐམས་ཅད་ཐམས་ཅད་སྦྱིན་པར་བྱ། །སྒྲུབ་པའི་རྒྱལ་པོ་དེ་ལ་ནི། །སྒྲུབ་པའི་ལས་ལ་དབང་ཐོབ་ཕྱིར། །རྡོ་རྗེ་སེམས་དཔའ་ལ་སོགས་པ། །རྒྱལ་བ་ཐམས་ཅད་བསྒྲུབ་པ་དང་། །རྡོ་རྗེ་ཚེ་དང་སྨན་ལ་སོགས། །སྒྲུབ་པ་མ་ལུས་སྒྲུབས་ཤིག་ཅེས། །བསྒྲུབ་རྫས་ཐམས་ཅད་སྦྱིན་པར་བྱ། །རྒྱལ་བ་སངས་རྒྱས་ཐམས་ཅད་དང་། །དབང་ཐོབ་དེ་གཉིས་གཅིག་པའི་ཕྱིར། །རིག་འཛིན་རྡོ་རྗེ་རྩལ་གྱི་དབང་། །རྡོ་རྗེ་མིང་ནི་སྦྱིན་པར་བྱ། །བསྒྲུབ་པའི་དབང་དང་རྫས་མཆོག་དང་། །གསང་བའི་བདག་པོ་ཡིན་པས་ན། །གསང་བའི་དབང་མཆོག་སྦྱིན་པར་བྱ། །དགའ་བ་བྱང་ཆུབ་སེམས་ཆེན་པོ། །ཀུན་དུ་ཚིམ་པར་བྱེད་པ་ཡི། །དཀར་དམར་ལྷག་པའི་བྱང་ཆུབ་སེམས། །དབང་ཐོབ་དེ་ཡི་ལྕེ་ལ་གཞག །བཙལ་མེད་བྱང་ཆུབ་སེམས་ཆེན་པོ། །ཤེས་རབ་ཆེན་པོའི་རྩལ་གྱིས་ནི། །ཆོས་སྐུ་སྒྱུ་མར་དབང་སྒྱུར་ནས། །རྩལ་ཆེན་རྫོགས་པའི་དབང་ཡིན་པས། །རྫས་དང་ཚིག་དང་གང་ཟག་དང་། །ཀུན་རྫོབ་དབང་དེ་མ་ཐོབ་ཀྱང་། །ཆོས་ལ་སེམས་ཀྱི་དབང་ཐོབ་ན། །རྒྱལ་བའི་རིག་འཛིན་ཐམས་ཅད་དང་། །སྲིད་གསུམ་དབང་ཅན་ཐམས་ཅད་ཀུན། །དེ་ལ་དབང་ཐོབ་བསྐུར་བར་འགྱུར། །དབང་གི་ཚད་ནི་འདི་ལྟ་སྟེ། །དད་ལྡན་སྲི་ཞུར་ལྡན་པ་ལ། །གསང་བ་ཉན་པའི་དབང་ཆེན་བསྐུར། །རྣམ་བཞི་ལས་ཀྱི་དོན་ཚང་ན། །ལས་རྣམས་བྱེད་པའི་དབང་ཐོབ་བོ། །ལྟ་བའི་དམིགས་བུས་ཆོས་མཐོང་ན། །རྒྱལ་ཐེབ་འཆད་པའི་དབང་ཐོབ་བོ། །རྐྱེན་ཐུབ་ཚད་མ་གསུམ་ལྡན་ན། །བླ་མ་རྡོ་རྗེ་སློབ་དཔོན་དབང་། །དམ་པ་མཛོད་གསུམ་ཐམས་ཅད་ལ། །ཕྱོགས་མེད་པར་ནི་འཆད་ཤེས་ནས། །རབ་འབྱམ་རྒྱལ་པོའི་དབང་འཐོབ་བོ། །དད་མེད་བློ་ཞན་རྫོབ་པ་ཆེ། །ཚུལ་འཆོས་མཁན་ལ་རས་གཅོད་བྱེད། །དེ་ནི་དབང་གིས་འཚིག་པར་བཤད། །གསང་མེད་བརྗེད་ངས་དབང་མི་འཆགས། །དད་མེད་གཡེལ་རྨུགས་
དབང་མི་འགོས། །སྣོད་མེད་བཅུད་བྲལ་ཀུན་སྟོངས་པ། །དེས་ནི་དབང་ཐོབ་མ་ཡིན་ནོ། །སྣོད་ལྡན་བཅུད་རྫོགས་དབང་ཐོབ་ན། །དབང་མཆོག་ཐོབ་པའི་རྒྱུ་ཞེས་བཤད། །ཅེས་གསུངས་སོ། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་རྡོ་རྗེ་དབང་གི་ལེའུ་ཞེས་བྱ་སྟེ་སུམ་ཅུ་རྩ་གཉིས་པའོ།། །།དེ་ནས་བཅོམ་ལྡན་འདས་གསང་བ་མཆོག་གི་བདག་པོ་དང་། སེམས་དཔའི་རྡོ་རྗེ་དམ་པ་རྒྱུད་ཀྱི་རྒྱལ་པོ་ཆེན་པོ་ཀུན་འདུས་རིག་པའི་མདོ་དང་བཅས་པ་ཆོས་ཐམས་ཅད་ཀྱི་མེ་ལོང་ཡིན་པར་རིག་ནས། འདུས་པ་ཕལ་མོ་ཆེའི་འཁོར་རྣམས་ཀྱིས་ཤིན་ཏུ་ངམ་ཞིང་ངོ་མཚར་སྐྱེས་ནས། བསྟོད་པ་ཤིན་ཏུ་དགའ་བ་ཆེན་པོའི་གླུ་འདི་གསུངས་སོ། །ཨེ་མ་ཧོཿ། ཉེས་བཅོམ་ལེགས་ལྡན་མཚན་ཞི་མཐའ་ལས་འདས། །དཔག་མེད་བྱམས་སྙོམས་དོན་གྱིས་བདག་གཞན་དཔལ། །དོན་དམ་གསང་སྦས་ནམ་མཁའི་དཀྱིལ་དུ་འཁྱིལ། །རྡོ་རྗེ་ཆེ་མཆོག་དབང་ཕྱུག་ཀུན་གྱི་བདག །འཛིན་པ་མི་རྟོག་ཤ་རུས་ཁྲག་ལ་རོལ། །ཐུགས་ཀྱི་གདུང་ཐག་འཁོར་བའི་མཐའ་ལ་རྗེ། །ཡུལ་མེད་མ་སྐྱེས་མཚན་མའི་གཡུལ་ལས་རྒྱལ། །བདེ་མཆོག་རྒྱལ་པོ་ཁྱོད་ལ་ཕྱག་འཚལ་བསྟོད། །ཤེས་རབ་ཆེན་པོ་ནམ་མཁའི་ཉི་མར་གསལ། །བྱང་ཆུབ་སེམས་ཀྱི་འོད་ཟེར་དབྱིངས་སུ་འཆར། །དཔའ་བརྟུལ་མྱུར་བའི་ཤུགས་ཀྱིས་འགྲོ་དྲུག་སྒྲོལ། །རྟོག་འཇོམས་ཡེ་ཤེས་རྡོ་རྗེ་ཆོ་འཕྲུལ་འཕྲོ། །དམ་པའི་དོན་གསུངས་གཉིས་མེད་སྟོན་པའི་སྐུ། །སྨྲ་བའི་སེང་གེ་ཁྱོད་ལ་ཕྱག་འཚལ་ལོ། །རིན་ཆེན་གཏེར་ལྡན་འདོད་དགུར་ཀུན་སྐོང་ཞིང་། །ལུང་དང་རིགས་པ་གཏན་ཚིགས་ཀུན་གྱི་མཛོད། །བརྡ་ཅན་ཡང་དག་ལེན་པའི་མེ་ལོང་གསལ། །རྡོ་རྗེ་ཀུན་འདུས་འཇིགས་བྱེད་རྒྱལ་པོའི་རྒྱུད། །ཆོས་ཀྱི་མེ་ལོང་འདི་ལ་བདག་ཅག་འདུད། །རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་ལས་ངོ་མཚར་བསྟོད་པའི་ལེའུ་སྟེ་སུམ་ཅུ་རྩ་གསུམ་པའོ།། །།རྒྱུད་ཀྱི་རྒྱལ་པོ་ཆེན་པོ་རྡོ་རྗེ་བཀོད་པ་ཀུན་འདུས་རིག་པའི་མདོ་རྫོགས་སྷོ།། །།