དཔལ་ཚེ་བདག་ནག་པོ་དྲག་སྔགས་མངོན་དུ་ཕྱུང་བའི་རྒྱུད་ཀྱི་རྒྱལ་པོ།
རྒྱ་གར་སྐད་དུ། ཤྲཱི་ཨཱ་ཡུཿཔ་ཏི་ཀཱ་ལ་རུ་དྲ་ཏནྟྲཱ་བྷྱ་བ་ཀྲྀ་ཏ་ཏནྟྲ་རཱ་ཛ། བོད་སྐད་དུ། དཔལ་ཚེ་བདག་ནག་པོ་དྲག་སྔགས་མངོན་དུ་ཕྱུང་བའི་རྒྱུད་ཀྱི་རྒྱལ་པོ། བཅོམ་ལྡན་འདས་དཔལ་ཚེ་བདག་ནག་པོ་ཕྲིན་ལས་ཐམས་ཅད་ཡོངས་སུ་རྫོགས་པ་དེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་ཆོས་ཐམས་ཅད་ལྷུན་གྱིས་རྫོགས་པའི་སྙིང་པོ་ཅན། རྡོ་རྗེ་འཆང་ཆེན་པོའི་རང་བཞིན་དེ། འོག་མིན་ཆོས་ཀྱི་དབྱིངས་ཀྱི་མཁའ་དབྱིངས་རྣམ་པར་དག་པའི་ཀློང་། སེམས་ཉིད་ཀྱི་གནས། རང་བྱུང་མ་བསྒྲིབས་པར་གསལ་བའི་གཞལ་ཡས་ཁང་ན། འཁོར་དུས་གསུམ་གཅིག་པའི་སངས་རྒྱས་དང་། ས་ལ་གནས་པའི་བྱང་ཆུབ་སེམས་དཔའ་རྣམས་དང་། ཉིད་ཀྱི་ངོ་བོ་ལས་སྤྲུལ་པའི་ལམ་ལ་གནས་པའི་རིག་འཛིན་རྣམས་དང་། སྐུའི་ཚོགས་དང་། ཉེ་བར་གནས་པའི་འཁོར་གཤིན་རྗེའི་གཤེད་ཀྱི་དགེ་འདུན་དུ་མ་དང་། ཁྲག་སྐྱུགས་པ་མ་མོའི་ཚོགས་
དང་། ཁམས་གསུམ་པ་ལྷའི་ཚོགས་དང་། འཐོམ་པ་བདུད་ཀྱི་ཚོགས་དང་། ཕུང་བྱེད་མངག་པའི་ཚོགས་དང་། མ་སྐྱེས་ལམ་ལ་ལྟ་བའི་ཚོགས་དང་། འབྱེད་པ་མི་མངའ་བའི་ཐུགས་རྗེ་ཆེན་པོས་ཐབས་ཅིག་ཏུ་བཞུགས་སོ། །དེ་ནས་བཅོམ་ལྡན་འདས་ལ་འཁོར་རྣམས་འདུན་པར་གྱུར་ནས་གསོལ་བ་བཏབ་བོ། །ལྷུན་གྲུབ་གདལ་བའི་ཕོ་བྲང་ནས། །བདེ་ཆེན་མཉམ་པའི་ངང་ཉིད་ལས། །རྡོ་རྗེ་འཆང་བ་རྫོགས་པའི་སྐུ། །སྤྲུལ་པས་འགྲོ་བའི་དོན་མཛོད་ཅིག །ཅེས་གསོལ་ཏོ། །དེ་ནས་བཅོམ་ལྡན་འདས་དཀྱིལ་འཁོར་རྣམས་ཡོངས་སུ་འདུན་པར་གཟིགས་ནས། ཆོས་ཉིད་མི་གཡོ་བ་ལས་བཞེངས་ནས།དབང་དུ་བསྡུ་བའི་ཏིང་ངེ་འཛིན་ལ་ཞུགས་སོ། །འཇིག་རྟེན་གྱི་ཁམས་ཐམས་ཅད་གཡོས་པར་གྱུར་ཏེ། འུར་འུར་རབ་ཏུ་འུར་རོ། །ཆེམ་ཆེར་རབ་ཏུ་ཆེམ་མོ། །འཁོར་ཐམས་ཅད་རབ་ཏུ་བརྒྱལ་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་འཁོར་རྣམས་ལ་གཟིགས་ནས། ཉིད་ཀྱི་རང་བཞིན་འདི་བསྟན་ཏོ། །ཨེ་མ་ཆོས་སྐུ་བྱང་ཆུབ་སེམས་ཀྱི་རང་བཞིན་ལས། །རྒྱུ་རྐྱེན་མེད་པའི་རང་བྱུང་སེམས། །ཐམས་ཅད་འབྱུང་བའི་སྙིང་པོ་ལས། །ཐམས་ཅད་ཐུགས་རྗེའི་ཤུགས་ཀྱིས་སྒྲོལ། །ཞེས་གསུངས་སོ། །དེ་ནས་འཁོར་དེ་རྣམས་རང་གི་རང་བཞིན་མཐོང་ནས།སེམས་ཡོངས་སུ་གྲོལ་བར་གྱུར་ཏེ། བཅོམ་ལྡན་འདས་རྡོ་རྗེ་འཆང་ཆེན་པོ་ལ་འདི་སྐད་ཅེས་གསོལ་ཏོ། །ཨེ་མ་རྡོ་རྗེ་སྙིང་པོ་ཁྱོད། །སྣང་སྟོང་གཉིས་མེད་ཡེ་ཤེས་སྐུས། །སྣ་ཚོགས་སྦྱོར་བ་རྫོགས་པའི་བདག །ཡིན་པར་བདག་ཅག་ཡོངས་མི་རྟོག །རྒྱུ་རྐྱེན་མེད་པར་འབྱུང་མི་འཚལ། །ཞེས་གསོལ་ཏོ། །དེ་ནས་བཅོམ་ལྡན་འདས་ཀྱིས་རྡོ་རྗེ་བརྡར་གསོར་བས། འཇིག་རྟེན་གྱི་ཁམས་རབ་ཏུ་གཡོས་ཏེ། འཁོར་ཐམས་ཅད་སྐྲག་ནས་རང་རང་གི་སྲོག་གི་སྙིང་པོ་མདོངས་གསོལ་དུ་ཕུལ་ལོ། །བཅོམ་ལྡན་འདས་འཇམ་པའི་རྡོ་རྗེ་དེས། སྲོག་གི་སྙིང་པོ་ཐམས་ཅད་སྐྱེ་བ་མེད་པའི་དབྱིངས་ནམ་མཁའ་དྲག་པོའི་འཁོར་དུ་བསྡུས་ཏེ་གཅིག་ཏུ་དྲིལ་ལོ། །ལས་ཐམས་ཅད་སྒྲའི་དང་པོའི་དང་པོ་
ལ་བསྡུས་ཏེ་གཅིག་ཏུ་དྲིལ་ལོ། །དེ་ནས་ཉིད་ཀྱི་རང་བཞིན་ལས་མ་གཡོས་པའི་འཁོར་བཅོམ་ལྡན་འདས་འཇམ་དཔལ་གཞོན་ནུ་དེས། བཅོམ་ལྡན་འདས་ལ་གསོལ་བ་འདི་བཏབ་པོ། །ཀུན་གྱི་རང་བཞིན་ཉིད་ལས་བྱུང་། །སེམས་ཉིད་རྡོ་རྗེ་འཛིན་པ་ཁྱོད། །མི་རྟོག་རང་བཞིན་ཏིང་འཛིན་ལས། །ལྷུན་གྱིས་གྲུབ་པའི་དཀྱིལ་འཁོར་དང་། །ཕྱག་རྒྱ་ཆེན་པོ་རྫོགས་པར་མཛོད། །ཅེས་གསོལ་ཏོ། །དེ་ནས་བཅོམ་ལྡན་འདས་ཀྱིས་བདེ་བར་མཉམ་པའི་ངང་ལས་བཞེངས་ཏེ། སངས་རྒྱས་ཐམས་ཅད་ཀྱིས་བསྐུལ་བར་དགོངས་ནས།ཕྱག་རྒྱ་ཆེན་པོ་རང་བཞིན་ལྷུན་གྱིས་གྲུབ་པའི་དཀྱིལ་འཁོར་འདི་གསུངས་སོ། །རང་བཞིན་ཆོས་སྐུ་མཉམ་ཉིད་ལས། །ལྷུན་གྱིས་གྲུབ་པའི་ཕོ་བྲང་བརྟག །ཡེ་ཤེས་ཆེན་པོའི་གཞལ་ཡས་ཁང་། །ཀུན་འབྱུང་མི་གཡོ་བརྟན་པར་གནས། །གྲུ་བཞི་སྒོ་བཞི་རིན་པོ་ཆེ། །རྟ་བབས་ཏྭ་ར་རྒྱན་རྣམས་ལྡན། །ཀླུ་བརྒྱད་ལྷ་བརྒྱད་ཚངས་པའི་ཞིང་། །རུས་སྦལ་གླང་ཆེན་སྟག་གཟིག་འབྲུག །ཞིང་དང་ཞིང་ཆུང་ཐོད་པ་སྦྲུལ། །གནམ་ལྕགས་ཁྲོ་ཆུ་ཆུ་སྲིན་ཐོག །རྒྱུ་མའི་གླིང་བུ་ཀེང་རུས་བརྒྱན། །ཨེ་ཡི་ཕོ་བྲང་ཐོད་མཁར་བཞི། །ལྕགས་མཁར་བཅུ་གཉིས་བཅུ་དྲུག་ལྡན། །ཁྱམས་དང་གྲུ་ཆད་སྒོ་བཞིར་ལྡན། །རང་བཞིན་ལྷུན་གྱིས་གྲུབ་པར་གནས། །དེ་ལ་གནས་པའི་ཕྱག་རྒྱའི་སྐུ། །རྒྱལ་ཆེན་ས་ཡི་ཕོ་བྲང་དུ། །ཀླུ་འབུམ་གཉན་ཁྲི་ས་བདག་སྟོང་། །ལྟོ་འཕྱེ་ཕྱོགས་སྐྱོང་བཞི་དང་བརྒྱད། །མ་ཧེ་བརྒྱད་དང་ཉི་ཟླའི་གདན། །ནག་པོ་དུག་ཆེན་བསྐྱིལ་བའི་སྐུ། །དབུ་གསུམ་ཕྱག་དྲུག་ཞབས་བཞིར་བགྲད། །གཡས་དཀར་གཡོན་དམར་མཐིང་ནག་དབུས། །ཀླུ་གཉན་ས་བདག་ཞིང་ཆུང་སྦྲུལ། །འཁོར་ལོ་རལ་གྲི་རྡོ་རྗེ་གཡས། །བེ་ཅོན་གཏུན་ཤིང་སྡིགས་མཛུབ་གཡོན། །གླང་ཆེན་ཞིང་སྟོད་སྟག་ལྤགས་སྨད། །དབུ་ལ་རིན་ཆེན་གཞལ་ཡས་ནང་། །རིགས་བཞི་ཀླུ་བརྒྱད་ཐོད་པས་མཛེས། །བདུད་སྲིན་མུ་སྟེགས་རྒྱལ་པོ་བཙན། །མགོ་དང་ཙིཏྟ་དོ་ཤལ་བྱས། །རིན་པོ་ཆེ་དང་ནོར་བུས་མཛེས། །སྙན་ཆ་མགུར་
ཆུ་ཕྱག་ཞབས་སྦྲུལ། །བདུད་མོ་མཐིང་ནག་ཐོད་སྦྲུལ་བརྒྱན། །ཙིཏྟ་བྷན་དྷ་འཁྱུད་དང་སྟོབས། །ཐུགས་ཀར་གསོད་བྱེད་སྨུག་ནག་གཅེར། །རིགས་བཞིའི་རྒྱན་དང་ཐོད་པས་མཛེས། །འཁོར་ལོ་ཙིཏྟ་གཡས་གཡོན་གནས། །ཞིང་དང་སྦྲུལ་དང་ལྷུ་དུམ་འབྲུལ། །ཡ་མའི་ཐུགས་ཀར་བཛྲ་ནི། །ལྗང་ནག་རྡོ་རྗེ་སྙིང་ཕྲེང་བསྣམས། །ཀླུ་བརྒྱའི་གདན་ལ་གཉན་ཁྲི་གསོལ། །རིན་ཆེན་དབུ་རྒྱན་རིགས་བཞིས་མཛེས། །གདུག་པ་འཇོམས་མཛད་དྲེགས་པའི་སྐུ། །དྲེགས་པའི་ཐུགས་ཀར་རུས་སྦལ་གནས། །སྨེ་བ་ཐིག་ལེ་ཁྲག་དང་དུག །མཚོན་ཆའི་སྤུ་ལ་སྡེར་མོ་ལྕགས། །ཙིཏྟ་འོད་ཀྱི་གསང་མཛོད་ན། །ལྷ་སྲིན་མི་ཡི་སྙིང་པོ་འཆང་། །དབུ་ལ་བྱ་ཁྱུང་གདུག་པ་འདུལ། །སྤུ་དང་གཤོག་པ་མཚོན་ཆ་མེ། །མཆུ་དང་སྡེར་མོ་གནམ་ལྕགས་འབར། །ཉི་ཟླ་ཁྲོ་ཆུའི་སྤྱན་དང་ཚེམས། །གདུག་པ་ཟ་ཞིང་ཞེ་སྡང་སྦྲུལ། །ཕྲག་སོར་ཁྱུང་མོ་སྨུག་ནག་གཉིས། །སྤུ་དང་གཤོག་པ་མཚོན་ཆ་མེ། །གདུག་པ་ཟ་ཞིང་དེ་བཞིན་འབྲུལ། །ནུ་མར་སེང་གེ་བརྗིད་པ་གཉིས། །མཚོན་ཆ་སྤུ་གྲི་སྡེར་མོ་དབལ། །འཕྲུལ་གྱི་གཤོག་པ་ཁྲོ་ཆུའི་སོ། །དགྲ་བགེགས་ཟ་ཞིང་ལྷུ་དུམ་འབྲུལ། །སོག་པར་སྟག་ཆེན་རྔམ་པ་གཉིས། །མཆེ་བ་རྩང་ཕུར་སྡེར་མོ་ལྕགས། །གློ་སྙིང་ནང་རོལ་སྙིང་ཁྲག་འཐུང་། །སྟ་ཟུར་ཞེ་སྡང་གདུག་པའི་གཟུགས། །དུག་སྦྲུལ་མེ་འབར་དུག་ཁྲག་ཟགས། །དུག་ལྔ་བརྐམ་ཆགས་བསྲེག་ཅིང་འཇོམས། །གང་དམིགས་རྩ་ཁྲག་ཀླད་ཁྲག་འཐུང་། །དུག་སྦྲུལ་རླངས་པ་དགྲ་ལ་འཕྲོ། །མགུར་དང་ཞབས་ཀྱི་ལོང་བུའི་བར། །ཡེ་ཤེས་ཁྲོ་བོ་ཚོན་གང་བ། །རཾ་ཡཾ་ཀརྨ་ཙཀྲ་འཕྲོ། །སུརྱའི་གདན་ལ་ཕྱི་ནང་སྲུང་། །ཡེ་ཤེས་འཁོར་ལོ་ཉི་མའི་འོད། །ཐམས་ཅད་གློ་སྙིང་ནང་རོལ་ཟ། །ཕྱག་རྒྱ་ཆེན་པོ་བརྟན་པར་བརྗིད། །དབུས་ན་བརྐྱང་བསྐུམ་ཚུལ་དུ་བཞུགས། །ཐུགས་ཀྱི་སྤྲུལ་པ་མངོན་ཕྱུང་བ། །མོན་པ་དུག་ཆེན་དྲེགས་པའི་ལུས། །དབུ་དགུ་ཕྱག་དགུས་ཙིཏྟ་བསྣམས། །
ཕྱག་དགུས་བླ་དང་དོན་སྙིང་ཁྲག །དྲོད་དང་དབང་པོ་ལུས་སྲོག་འབྲལ། །བདུད་བཞི་ཕོ་ཉ་ལས་ལ་བསྐུལ། །ཤ་ཆེན་རཀྟ་ཀེང་རུས་འཆའ། །དབུགས་སྲོག་བཀྲག་མདངས་ཚེ་སྲོག་འཆང་། །ཡུམ་དང་བཅས་པ་ཐོད་མཁར་བཞིར། །ལྷུན་གྱིས་གྲུབ་པའི་ཚུལ་དུ་གནས། །ལྕགས་མཁར་ཕྱོགས་བཞིའི་གཞལ་ཡས་ན། །སྲོག་གཅོད་ཕྱི་ཡི་མོན་པ་གཤེད་པོ་བཞི། །དུག་མདའ་ལྕགས་གཟེར་གནག་ལ་འཚེར། །ཁྱབ་པ་སྤྱི་བཅིངས་སོ་བདར་གནག །ཕོ་བྲང་ཕྱོགས་བཞིར་ལྷུན་གྱིས་གྲུབ། །ལྕགས་མཁར་བརྒྱད་ཀྱི་ཁྱམས་ཁང་ན། །ལས་ཀྱི་སྤྲུལ་པ་གཤེད་པོ་བཞི། །ཡུམ་དང་བཅས་ཏེ་ཚོགས་བརྒྱད་འཇོམས། །སྒོ་མེད་བཅུ་དྲུག་ལྕགས་མཁར་ན། །ཀཾ་ཀ་ཤ་ཟ་དྲེགས་པའི་ཚོགས། །མངག་པ་གཞན་ཚོགས་ལྷུན་གྱིས་གྲུབ། །དྲེགས་པའི་ལས་དང་སྦྱོར་བའི་གྲངས། །བཞི་དང་བཅུ་དྲུག་བཅུ་གཉིས་བརྒྱད། །དེ་བཞིན་ལྔ་དང་བཅུ་དྲུག་བརྒྱད། །སྙིང་པོ་དོན་ལ་བཅུ་གཉིས་གསུམ། །དེ་ཡི་སྙིང་པོ་མཆོག་བསྡུས་ལྔ། །དབང་གི་བརྟུལ་ཞུགས་བགྲོད་དང་ལྔ། །དེ་སྲོག་དམ་ཚིག་གཉིས་དང་གསུམ། །ཆོས་ཉིད་མི་གཡོ་བསམ་གཏན་ལུས། །རྫས་དང་འདོད་པ་བསྐུལ་བའི་རྐྱེན། །སྲོག་དང་ལས་དང་ཨེ་ཀ་ལ། །བསྡུས་ནས་རང་དབང་གཙོ་ལ་ཕུལ། །བྱིན་རླབས་ངར་བཅས་ཐིག་ལེར་བསྡིམ། །སངས་རྒྱས་ཀུན་བདག་དེ་བཞིན་གཤེགས། །རྫོགས་པའི་ཚུལ་དུ་ལྷུན་གྱིས་གྲུབ། །དྲག་སྔགས་མངོན་དུ་ཕྱུང་བའི་རྒྱུད་ལས། ཁྲོ་བོ་གླེང་གཞིའི་ལེའུ་སྟེ་དང་པོའོ།། །།དེ་ནས་བཅོམ་ལྡན་འདས་ཀྱིས་དྲག་སྔགས་འབྱུང་བའི་གླེང་གཞི་འདི་གསུངས་སོ། །རྩ་བ་མི་འགྱུར་བྱང་ཆུབ་སེམས། །གཅིག་ནི་ཀུན་གཞིའི་རང་བཞིན་ཡིན། །ཆོས་ཀྱི་དབྱིངས་ནི་སྐྱེ་མེད་པས། །སངས་རྒྱས་སྐུ་གསུམ་ཡེ་ཤེས་ཐུགས། །སེམས་དང་ལུས་ལ་བག་ཆགས་བརྟས། །སྣང་དང་སྲིད་པའི་ཆོས་རྣམས་ཀུན། །བྱང་ཆུབ་སེམས་དང་དབྱིངས་སུ་འདུས། །མཚན་མར་མི་
གནས་རང་བཞིན་གཅིག །སྤྲོས་མེད་བདེ་ཆེན་དག་པའི་སྐུ། །འགག་མེད་རང་བཞིན་དག་པའི་གསུང་། །མ་བསྒྲིབས་དོན་རྣམས་རྫོགས་པའི་ཐུགས། །སེམས་ལུས་བག་ཆགས་གསལ་བ་དག །བདེ་དང་སྡུག་བསྔལ་གཉིས་ཀར་སྣང་། །དོན་གཅིག་བྱང་ཆུབ་སེམས་ལས་བྱུང་། །འགྲོ་བའི་རྒྱུད་ལ་བག་ཆགས་ལས། །རྒྱུ་རྐྱེན་སྐྱེ་མེད་བག་ཆགས་ལས། །འབྱུང་བ་རྣམ་ཤེས་ཕུང་པོར་འཛིན། །སྣང་སྲིད་མི་རྟོག་རྒྱུ་རྐྱེན་བྲལ། །བདེ་བ་སྐྱེ་མེད་ངང་གིས་སྟོང་། །རྒྱུ་རྐྱེན་འབྲས་བུ་གཅིག་ཏུ་གནས། །ཆོས་སྐུ་མི་གནས་ཡེ་ཤེས་སྐུ། །དོན་གཅིག་རིག་པ་ཡང་དག་འདྲེལ། །འཁོར་འདས་སྣོད་བཅུད་སྟོང་ཞིང་དབེན། །སེམས་ཅན་སངས་རྒྱས་གཉིས་སུ་མེད། །དོན་དམ་ཀུན་རྫོབ་གཉིས་སུ་མེད། །ཐབས་དང་ཤེས་རབ་ཕྱག་རྒྱར་གསལ། །དབྱིངས་ལས་ཡེ་ཤེས་རིག་པ་ཡི། །རང་བཞིན་ལྷུན་གྲུབ་ཕྱག་རྒྱར་གསལ། །རྒྱུད་དྲུག་གནས་པའི་འགྲོ་བ་དང་། །མྱ་ངན་འདས་པའི་སངས་རྒྱས་དོན། །རྒྱུ་འབྲས་དབྱེར་མེད་ཆོས་སྐུར་གསལ། །ཡེ་ཤེས་རོལ་པའི་ཕྱག་རྒྱར་བསྟན། །རང་བྱུང་ཐུགས་ཀྱི་རོལ་པ་ལས། །དྲག་སྔགས་ཡེ་ཤེས་རོལ་པར་ཤར། །ཡེ་ཤེས་བདེ་བའི་ཐིག་ལེ་ལས། །དྲག་སྔགས་ཐུགས་རྗེ་སྤྲུལ་པར་ཤར། །ཆོས་སྐུ་བདེ་བའི་དབྱིངས་ཉིད་ལས། །དྲག་སྔགས་སྤྲུལ་པར་རང་བྱུང་ཤར། །སྐྱེ་མེད་རྣམ་དག་རང་བཞིན་ལས། །དྲག་སྔགས་སྐྱེ་བའི་ཆོ་འཕྲུལ་ཤར། །སྦྱོར་བ་ཀུན་འབྱུང་རྫོགས་པའི་གཞི། །དྲག་སྔགས་མངོན་དུ་ཕྱུང་བའི་རྒྱུད་ལས། དྲག་སྔགས་འབྱུང་བའི་གཞི་བསྟན་པའི་ལེའུ་སྟེ་གཉིས་པའོ།། །།དེ་ནས་ཡང་བཅོམ་ལྡན་འདས་ཀྱིས་ཆོས་སྐུ་སྐྱེ་བ་མེད་པའི་ངང་ལས། སྐྱེ་བའི་ཆོ་འཕྲུལ་དྲག་པོ་མངོན་དུ་ཕྱུང་བའི་རྩ་བའི་སྦྱོར་བ་འདི་གསུངས་སོ། །དྲག་པོ་ཉེ་བར་སྦྱོར་བ་ནི། །དུར་ཁྲོད་གཉན་རིའི་དབེན་གནས་སུ། །འདྲེལ་པ་གསུམ་དང་ལྡན་པ་ཡི། །གྲོགས་དང་དཔའ་བརྟུལ་དམོད་པ་བཅའ། །དེ་ཡི་སྦྱོར་བ་འདི་ལྟ་སྟེ། །ཉེ་བར་གཅིག་ཏུ་
དྲིལ་བསྡེབས་པའི། །ལས་ཀྱི་འཁྲུལ་འཁོར་ཆེན་པོ་ནི། །ཚེ་སྲོག་བདག་པོ་ཡ་མ་དྲེགས། །སྲིད་པའི་ཁྱམས་ཁང་ཙིཏྟ་ལ། །དྭངས་མ་བཞི་དང་སི་ར་བརྒྱད། །རྩ་བྲན་དྲུག་དང་བརྒྱད་གཉིས་ཕྱི། །མདུད་པ་གསུམ་དང་སྲོག་ཤིང་གསུམ། །ལྡན་པའི་ཐིག་ལེ་འོད་ཀྱི་ཚུལ། །ས་ཆུ་མེ་རླུང་ནམ་མཁའ་དབུས། །པ་ཐག་ཚོན་གར་རང་སྒྲའི་འོད། །ཀུན་འདུས་སྙིང་པོ་བཅུ་གཉིས་གནས། །དབུས་ཀྱི་ནམ་མཁའ་སྐྱེ་མེད་ལས། །སྟེང་འོག་དྭངས་མ་བག་ཆགས་ཚུལ། །བརྟེན་པའི་སྦུབས་ན་དགྱེས་དང་བདུད། །དྲོད་ཀྱི་སྦུབས་ན་མ་གཤིན་འབྲུ། །ཆུ་ཡི་སྦུབས་ན་རུས་སྦལ་དྲེགས། །རླུང་གི་སྦུབས་ན་མེ་དང་བསྐྱེད། །ཀུན་གྱི་སྟེང་འོག་རྩ་དང་རླུང་། །ཡེ་ཤེས་ལྔ་ཡི་འོད་དུ་གནས། །མདུད་པ་བཞི་ཡི་འདྲེལ་ཆེན་ལ། །མི་འགྱུར་རྣོ་དབལ་མཚོན་ཆའི་སྔགས། །སྲོག་ལ་གཉིས་དང་དྲེང་ཤག་གཉིས། །ཧུར་ཐུམ་གཉིས་དང་ཧྲི་ཛ་གཉིས། །སྲོག་འཕྲོག་སྟོབས་ཀྱིས་དྲག་སྔགས་གནས། །ཕྱི་རིམ་འདྲེལ་ཆེན་རྩ་བརྒྱད་ལ། །བཤིག་དང་བྱད་འགྲོལ་དུག་མདའ་འབྱིན། །ཞེན་བཟློག་གསང་ལམ་ཟུག་པ་འབྱིན། །ཐམས་ཅད་གཟིར་ཞིང་རང་གཟིར་ནས། །ཡང་ལོགས་བཅུ་གཉིས་རྒྱ་མདུད་ལ། །གདུག་པའི་སྙིང་གཟེར་རྫོགས་པར་གནས། །སི་ར་བཅུ་གཉིས་སྦུབས་དག་ལ། །གབ་པ་སྔགས་ཀྱི་ཕྲེང་བས་གང་། །དེ་བཞིན་ཕྱི་ཡི་བཅུ་དྲུག་ལ། །དབང་སྡུད་སྔགས་ཀྱི་དེ་བཞིན་གང་། །དྭངས་མ་བཞི་ཡི་མཚམས་བཞི་ལ། །སྲོག་བཞི་ལོ་ཐོག་འཇོམས་པ་ཡི། །དྲག་སྔགས་གནམ་ལྕགས་ཐོག་ཆེན་གནས། །རུས་སྦལ་ལྟོ་བའི་གསང་མཛོད་ལ། །ལྷ་སྲིན་མི་ཡི་སྙིང་པོ་སྦ། །འབྲུ་རེ་བསྡུས་ནས་གོང་བུར་གནས། །དེ་ལས་ཡོན་ཏན་དུ་མ་འབྱུང་། །ལས་ཀྱི་འཁྲུལ་འཁོར་གང་བརྩམ་འགྲུབ། །གང་མོས་ལས་ལ་ཉེ་བ་ཡི། །ཉེ་བར་གཅིག་ཏུ་དྲིལ་བསྡེབས་པའི། །ལས་ཀྱི་འཁྲུལ་འཁོར་ཆེན་པོ་ནི། །ཡང་དག་རྩ་བའི་འཁོར་ལོ་སྟེ། །ཞིང་རས་ལ་སོགས་རྒྱུ་བཞི་ལ། །ཐིག་སྐོར་བཞི་དང་ལྡན་པར་བསྐོར། །བར་ཁྱམས་སྤྲུལ་བཅས་རྫོགས་བྱས་ལ། །དབུས་
ལ་སོགས་པའི་ཕྱོགས་བཞི་དང་། །དེ་བཞིན་ཕྱོགས་མཚམས་བརྒྱད་དུ་བརྟག །སྲིད་པའི་ཁྱམས་ཁང་ལྟོ་བ་ན། །རྒྱ་གྲམ་རླུང་རི་སྦག་མར་གནས། །དང་པོ་ཚངས་པའི་ཐིག་གཉིས་དང་། །ཟུར་ཐིག་དེ་བཞིན་ཆ་མཉམ་ལ། །དབུས་སུ་གྲུ་གསུམ་ཟླ་ཁམ་གསུམ། །ཕྱི་རིམ་ཕྱོགས་བཞིར་རྒྱ་གྲམ་རྭ། །དབུས་ཀྱི་སྙིང་པོ་ཕྱོགས་བཞི་ལ། །འཁྲུལ་མིག་ལྕགས་མཁར་གསུམ་གསུམ་གནས། །རྒྱ་གྲམ་མཚམས་བཞིར་ཁྲག་གི་མཚོ། །རླུང་རི་རྩ་བ་འཁྲུལ་འཁོར་ཡིན། །ཡང་ལོགས་ཟླུམ་པོ་མུ་ཁྱུད་ཆུ། །སྐྱོམ་ཞིང་གཡེང་བ་སྡུད་ཅིང་འཐིབས། །ལྟོ་སྦྱོར་ལས་ཀྱི་འཁོར་ལོ་ཡིན། །ཡང་ལོགས་དབུས་མཚམས་ཕྱོགས་བརྒྱད་དུ། །རླུང་རི་རྡོ་རྗེ་རྩེ་མོ་རེ། །སྙིང་པོ་འཁྲུལ་མིག་གཉིས་གཉིས་ལྡན། །ལས་རྣམས་རྫོགས་པའི་སྤུ་གྲི་གནས། །རླུང་རི་གཤེད་ཀྱི་འཁོར་ལོ་ཡིན། །ཟུར་བརྒྱད་མུ་ཁྱུད་འཁྲུལ་འཁོར་བཅས། །གསོད་བྱེད་དྲག་པོ་རྔམ་པ་ཡི། །དྲག་པོ་ལས་ཀྱི་འཁོར་ལོ་ཡིན། །བྱང་ཁྲམ་སྙིང་པོ་སྤུ་གྲི་སྔགས། །རྩ་བ་གཅིག་ཏུ་དྲིལ་བ་ཡིན། །གྲུ་གསུམ་མིང་རུས་ཟླ་ཁམ་ལྷ། །བསྲུང་བ་ཀུན་ལྡན་རྫོགས་པར་བྲི། །རྒྱ་གྲམ་བཞི་ཡི་འཕྲུལ་མིག་ལ། །རྩ་བའི་སྙིང་པོ་དྲག་སྔགས་དགོད། །འཁོར་ཡུག་རྦད་དང་བསད་པའི་སྔགས། །གང་བསྒྲུབ་ལྟོ་སྦྱོར་གནས་མཐུན་དགོད། །ཕྱི་རིམ་རྡོ་རྗེ་རྩེ་བརྒྱད་ལ། །མིང་གི་འབྲུ་གསུམ་དང་པོར་བྲི། །གསོད་ཅིང་གནོན་དང་འཕེན་པ་ཡི། །སྤུ་གྲི་སོ་གསུམ་རྫོགས་པར་དགོད། །མཚོ་གླིང་བར་ཁྱམས་རྭ་དབུས་ལ། །སྡང་དང་གནོད་པ་དེ་བཞིན་བྲི། །མིང་གི་འབྲུ་གཉིས་སྲོག་དང་སྦྱར། །གང་འདོད་མཚམས་སུ་དེ་བཞིན་བླང་། །བྷུར་ནཱ་ག་གདུག་པའི་ཧ་ལའི་མཚོན། །བྷི་ལ་ཁོང་འདུས་ཁོང་དྲེགས་ཅན། །འབར་བ་ཀཱ་ལི་ཡ་མའི་ཀློང་། །ཀྱོ་པཱ་ཀཱཾ་བྷ་གུར་བྷ་ཤ །ཡཾ་རཾ་ཨེ་དུ་ཙམ་དྷི། མཱ་ར་ཡ་ནི་སྦྱོར་བའི་མཆོག །ལྟོ་སྦྱོར་བཅས་ལ་ཐོད་པར་གཞུག །ཞག་བདུན་སྔགས་སྦྱོར་སྒྲོལ་བ་དྲིལ། །རུས་སྦལ་ཕོ་མོའི་འཁྲུལ་འཁོར་བཅའ། །ཐོད་པ་རྒྱ་གྲམ་རུས་སྦལ་ལྟོར། །སྦྱོར་བ་ཀུན་ལྡན་ཀླུ་ལ་གཏད། །སྔགས་ཀྱི་རྩ་བ་དྲིལ་ལ་བརྡེག །ཞག་
གསུམ་ཉིན་གཅིག་ཉིན་ཞག་གཉིས། །གསད་དང་གནན་པ་ཟོར་གྱི་དུས། །རིག་པ་བདེ་བས་ཡ་མའི་ཀློང་། །འཁོར་ལ་རྩ་བའི་སྦྱོར་བ་ཡིན། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་ཡ་ཧྲི་མྱག་ཐུཾ་རིལ་ཤག་ཡ། དགྲ་བོའི་སྲོག་མཱ་ར་ཡ་མྱོག་རྦད། སྲོག་སྟྭམ་བྷ་ཡ་ནན། སྲོག་ལ་ཐུན་བྷྱོ། གསོད་པ་དྲག་པོའི་རྩ་བ་ལས། །ཕྲིན་ལས་སྦྱོར་བའི་རྒྱལ་པོ་ཡིན། །དེ་ནས་བཅོམ་ལྡན་འདས་ཀྱིས་དྲག་པོའི་སྦྱོར་བ་འདི་གསུངས་སོ། །དྲག་པོ་མངོན་དུ་ཕྱུང་བ་ལས། །གསང་ཆེན་སྔགས་ཀྱི་དམོད་པར་དྲིལ། །ཡང་གསང་ཆེན་པོའི་སྦྱོར་བ་ནི། །དུར་ཁྲོད་རས་སམ་ཤིང་རས་ལ། །མུ་ཁྱུད་བདུན་དང་ལྡན་པར་བསྐོར། །དེ་ལ་བྲི་ཞིང་དགོད་པ་ནི། །དབུས་སུ་གྲུ་གསུམ་དྲག་པོ་ལས། །བརྣག་པ་ཕོ་མོའི་མིང་རུས་བྲི། །ཟླ་ཁམ་བསྲུང་བ་དེ་བཞིན་བྲི། །མཚོན་ཆའི་འཁོར་ལོ་རྩིབས་བཞི་ལ། །འདྲེན་པའི་སྟོབས་ཀྱིས་འབྲུ་བཞི་དགོད། །མཚོན་ཆའི་རྒྱལ་པོ་བཅུ་གཉིས་ལ། །ཁྲོ་བོ་སྟོབས་ཀྱི་འབྲུ་གཅིག་དང་། །ཚེ་སྲོག་སྡུད་པའི་སྙིང་པོ་གཅིག །ཁོང་ཁྲག་འདྲེལ་བའི་འབྲུ་ལྔ་ལ། །གསོད་ཅིང་གནོན་པའི་སྤུ་གྲི་བཅུ། །དགོད་པའི་གནས་མཐུན་ལྟོ་སྦྱོར་དགོད། །ཕྱི་རིམ་མུ་ཁྱུད་བཞི་པོ་ལ། །རིགས་བཞི་སྦྲུལ་གྱི་ར་བས་བསྡམ། །ལྔ་པ་ཐོད་པའི་ཕྲེང་བར་གནས། །དྲུག་པ་སྲེག་པའི་མེ་རི་འབར། །དེ་དག་ཚེ་སྲོག་འཆང་བ་ཡི། །རུས་སྦལ་ལྟོ་ན་གནས་པར་བྲི། །སྲིད་གསུམ་ལྟོ་ན་འཆང་ཞིང་གསོད། །ཚེ་སྲོག་བདག་པོའི་ལྟོ་ན་ཡང་། །མི་འགྱུར་བརྟན་པར་ཡེ་གནས་པའོ། །དེ་བཞིན་ལས་ཀྱི་འཁོར་ལོ་བཅའ། །འཁོར་ལོ་ལྟོ་སྦྱོར་ཐོད་པར་བཅའ། །ཐོད་པའི་འོག་མ་མེ་རི་ཨེ། །སྟེང་མ་རུས་སྦལ་རྒྱ་གྲམ་ཨེ། །སྦྱོར་བ་ཀུན་ལྡན་གྲུ་གསུམ་རྩང་། །དྲག་སྔགས་དམོད་པ་ཞག་བདུན་བཟླས། །བཅུ་དྲུག་གམ་ནི་ཚེས་གཅིག་ལ། །གནན་སྔགས་ཐོད་པར་གདུག་པ་གནན། །ཉ་སྟོང་ལས་ཀྱི་དམོད་སྔགས་བསྐུལ། །སྔགས་ཀྱི་དམོད་པ་འདི་ལྟ་སྟེ། །ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་ཧུར་ཐུཾ་མཱ་ར་ཡ་རྦད། དེ་ནས་ཡང་བཅོམ་ལྡན་འདས་ཀྱིས་སྦྱོར་བ་ཐམས་ཅད་གཟིར་བའི་ལས་འདི་གསུངས་སོ། །ཕྲིན་
ལས་ཀུན་གྱི་རྩ་བ་ཡི། །གསང་ཆེན་གཅིག་ཏུ་དྲིལ་བ་འདི། །དྲག་པོ་མངོན་ཕྱུང་སྦྱོར་བའི་བཅུད། །ཀླུ་གཉན་ས་བདག་གདུག་པ་དང་། །མ་མོ་རྒྱལ་པོ་བཙན་ཐེའུ་རང་། །མཛེ་རིམས་དྲག་པོ་ཡམས་ཀྱི་བདག །སྙིང་གཟེར་བདུན་གྱི་འཁོར་ལོས་གཟིར། །སྦྱོར་བ་སྣ་ཚོགས་རྫས་ཀྱིས་བྱུག །སྲིད་པ་རུས་སྦལ་ལྟོ་བར་བྲི། །མུ་ཁྱུད་རིམ་པ་གསུམ་དུ་བསྐོར། །དེ་བཞིན་འཕྲུལ་མིག་བཅུ་གཉིས་ལྡན། །ཐ་མར་འཕྲུལ་མིག་རྩ་སྦུབས་བདུན། །སྟོབས་ཅན་གཟིར་བའི་འཁོར་ལོ་ཡིན། །དེ་ལ་དགོད་པའི་རིམ་པ་ནི། །དབུས་དང་རྩ་སྦུབས་དྲག་པོ་ལ། །ས་དང་ནཱ་གའི་སྙིང་པོ་སྡུ། །གཉིས་པའི་འཁྲུལ་མིག་བཅུ་གཉིས་ལ། །རྩ་བའི་སྙིང་པོ་བཅུ་གཉིས་དགོད། །ཕྱི་ཡི་འཁྲུལ་མིག་རྩ་བདུན་ལ། །སྙིང་གཟེར་བདུན་གྱི་སྤུ་གྲི་དགོད། །མཐིང་ནག་དར་དང་ཐོད་པ་བཅའ། །བསྒོམ་བསྐུལ་དོང་གཞུག་རྩ་བཅས་སྔགས། །དམོད་པའི་ཐུན་དབབ་ཧོམ་ཤིང་བསྲེག །ཟོར་ཐུན་མཐའ་རུ་གནན་གཟིར་བྱ། །རང་ཡང་ཕྱག་རྒྱ་གསལ་བར་བསྒོམ། །དེ་ཡི་གནོད་བྱེད་འཇོམས་ཤིང་གཟིར། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་རག་ཤ་རུ་ཐུཾ། ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་གཟེར་འདྲིད་ཕྱུང་རྦད། ས་ནཱ་ག་སྙིང་གཟེར་སྲོག་ལ་མྱོག་རྦད། ས་ནཱ་ག་སྙིང་གཟེར་དུན་རྦད། ས་ནཱ་ག་སྙིང་གཟེར་ཡཾ་བཟློག་རྦད། ས་ནཱ་ག་སྙིང་གཟེར་ཙིཏྟ་ལ་རྦད། ས་ནཱ་ག་སྙིང་གཟེར་སརྦ་ཨུ་ནན་གཟེར་ཕྱུང་རྦད། ཐལ་འཇམ་གནོད་པར་ཐུན་ཟེར་བརྡེག །གཟིར་བ་སྟོབས་ཀྱི་རྒྱལ་པོ་ཡིན། །དེ་ནས་ཡང་བཅོམ་ལྡན་འདས་ཀྱིས་གདུག་པ་ལྟོ་དཀྲུག་གིས་གཟིར་བ་འདི་གསུངས་སོ། །མན་ངག་དྲག་པོ་སྦྱོར་བ་འདིས། །ཁྱད་པར་མཛེ་རིམས་གསོ་བའོ། །དེ་ཡི་སྦྱོར་བ་འདི་ལྟ་སྟེ། །ཤོག་བུ་གྲུ་བཞི་ཆ་གཉིས་ལ། །ཐིག་སྐོར་རིམ་པ་གསུམ་དུ་བསྐོར། །དབུས་སུ་གྲུ་གསུམ་སྙིང་པོ་མིང་། །ཟླ་གམ་མ་མོ་བཙན་རྒྱལ་པོ། །ཕྱི་རིམ་འཁྲུལ་མིག་བཅུ་གཉིས་ལ། །རྩ་བའི་དྲག་སྔགས་འབྲུ་བཅུ་གཉིས། །ཐ་མ་རྩིབས་ཆེན་བཅུ་དྲུག་ལ། །ལྟོ་དཀྲུག་སྦྱོར་བའི་སྤུ་གྲི་གནས། །རྫས་ཀྱིས་བྱུག་ལ་ཐོད་
པར་བཅའ། །གྲུ་གསུམ་རྩང་བཅས་ཞག་བདུན་བྲབ། །གསལ་གསུམ་ཕྱག་རྒྱ་བསྟན་པས་གནན། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་ཤག་རུ་ཐུཾ། སརྦ་དུ་རཾ་ཨི་ནན་འདྲིད་ཕྱུང་། ཙིཏྟ་སྙིང་གཟེར་ཐུཾ་རིལ་ཤག་རྦད། དེ་ཡིས་ཛྭ་ལ་འཇོམས་པ་ཡིན། དེ་ནས་ཡང་བཅོམ་ལྡན་འདས་ཀྱིས་སྲུང་བ་ཐམས་ཅད་ཀྱི་མཐར་དྲག་པོ་རྗེས་གཅོད་ཀྱི་སྦྱིན་སྲེག་འདི་གསུངས་སོ། །གདུག་པ་གསུམ་ལ་སོགས་པ་གཞོམ་པ་དང་། །བྱད་དགྲོལ་བསྲེག་དང་སྙིང་གཟེར་གདུག་པའི་ལས། །རྒྱུད་ཀྱི་སྙིང་པོ་སྤོགས་པ་མེད་པ་འདི། །བཀྲ་མི་ཤིས་པའི་ས་ལ་མཎྜལ་བྱ། །ཁྲག་དང་དུག་ཆུ་ཚ་བས་ཆག་ཆག་གདབ། །དབུས་སུ་གྲུ་གསུམ་ཁྲུ་གང་ནག་པོར་བྱ། །ཟླ་གམ་གསུམ་གྱི་མཐའ་མ་ཐོད་པས་བསྐོར། །དེ་ཡི་ཕྱི་རིམ་འཁྲུལ་མིག་བཅུ་གཉིས་བྱ། །ལྕགས་མཁར་བར་ན་རྡོ་རྗེ་རྐྱང་པས་གཏམས། །དེ་ཡི་ཕྱི་རིམ་རྩིབས་ཆེན་ཉི་ཤུ་ལ། །གཅོད་པའི་མཚོན་ཆ་རྩེ་མོ་ཕྱི་རུ་བསྟན། །དེ་ཡི་ཕྱི་རིམ་ཐོད་པའི་ཕྲེང་བས་བསྐོར། །ཐ་མ་མེ་རི་རཾ་དང་ལྡན་པར་བྱ། །དེ་བཞིན་ཞིང་རས་རྒྱུ་ལ་གཅོད་པའི་འཁོར་ལོ་བྲི། །གྲུ་གསུམ་ཁ་ཁྱེར་མཛུབ་གང་མཚོན་ཆས་བསྐོར། །དབུས་སུ་གདུག་པའི་གཟུགས་བརྙན་སྣ་ཚོགས་གཞག །གང་གནོད་མིང་དང་སྙིང་པོ་ས་ཆུ་སྦྱར། །ཟླ་ཁམ་གསུམ་ལ་གནོད་པའི་མིང་དང་གཟུགས། །འཁྲུལ་མིག་དྲག་པོ་དམོད་པ་སྔགས་ཀྱི་ལུས། །རྩིབས་ལ་བསྲེག་ཅིང་གཟིར་བའི་སྤུ་གྲི་དགོད། །གཟུགས་བརྙན་སྙིང་གར་ཧོམ་ཤིང་ཟུར་གསུམ་གཟུག །ཞག་ལྔ་ཐུན་བྲབ་དྲག་སྔགས་གཏུམ་པར་བཟླས། །ཞག་གསུམ་བསྲེག་ཅིང་གཟུགས་ལིང་གཏུབས་ལ་བསྟབ། །ཤ་ཆེན་རྟ་ཤ་སྤྱང་ཀི་དར་མིའི་ཤ །དུག་ཆུ་འོ་མ་སྔོ་སྣ་ཆང་དང་ཁྲག །མཆོད་པ་ཕུལ་ལ་ཐུན་གྱིས་བྲབ། །མེ་དབལ་གསད་ལ་གནད་ཀྱི་རྫས་རྣམས་བསྲེག །གང་དམིགས་བདུད་ཅིང་ཕྱིང་པ་གཙང་མས་དགབ། །ཉིན་དང་མཚན་མོ་ལན་གྲངས་བདུན་དུ་བདུག །བུམ་པས་བཀྲུས་ལ་ལྷ་ཡི་སྐུ་རུ་བསྐྱེད། །དྲག་སྔགས་གསལ་ལ་མིས་མ་ཐོས་པར་བཟླས། །བརྣག་པ་ཐོན་ནས་ནམ་མཁའི་འཁོར་ལོ་དང་། །ཐལ་བ་མིང་གཟུགས་མཆོད་རྟེན་གནོད་སར་གནན། །ལྷག་མ་རྗེས་
ཤུལ་གར་གནོད་ཟོར་དུ་བརྡེག །གསང་སྔགས་སྦྱོར་བ་དྲག་པོ་འདི་ལྟ་སྟེ། །ཨེ་ཀ་ཡ་མ་ཀ་དུ་ན་ཛ་རཾ་ར་ཀ་ཤ་རུ་ཐུཾ། ས་ནཱ་ག་དུ་རཾ་ཨུ་ནན་གཟེར་ཕྱུང་རཾ་ཙིཏྟ་སྦུ་ར་ན་རཾ། སྲོག་ལ་མྱོག་ཤཾ་རྦད་རཾ། དེ་དག་སྦྱོར་བའི་མཐའ་སྡུད་ཡིན། དྲག་སྔགས་མངོན་དུ་ཕྱུང་བའི་རྒྱུད་ལས། ཐུན་མོང་གི་སྦྱོར་བའི་ལེའུ་སྟེ་གསུམ་པའོ།། །།དེ་ནས་ཡང་བཅོམ་ལྡན་འདས་ཀྱིས་དྲག་པོ་མངོན་དུ་ཕྱུང་བའི་ཁྱད་པར་གྱི་སྦྱོར་བ་འདི་གསུངས་སོ། །ཕྲིན་ལས་དྲག་པོའི་རྩ་བ་འདི། །རྩ་བ་རྣམ་པ་གཉིས་སུ་གནས། །ཕན་གནོད་ལས་ཀྱི་རིམ་པ་བཞི་རུ་བཀོད། །གསད་པ་མཆོག་དང་ལོ་ཐོག་གཞོམ་པ་གཉིས། །སྙིང་གཟེར་དགུ་དང་ཉི་ཤུ་རྫོགས་པ་ཡི། །གསད་པ་མཆོག་གི་སྦྱོར་བ་འདི་ལྟ་སྟེ། །ཞི་ཁྲོ་གཤིན་རྗེ་པུར་པ་མ་མོ་དང་། །བདུད་དང་མུ་སྟེགས་ཐེ་བྲང་རྒྱལ་པོ་བཙན། །གནོད་སྦྱིན་སྲིན་པོ་ལྷ་མིན་དུད་འགྲོ་སྲི། །ཀླུ་གཉན་ས་བདག་དཀོར་སྲུང་གྲུལ་བུམ་གིང་། །ལས་དང་སྲོག་གི་སྙིང་པོ་བཅུད་དུ་བསྡུས་ནས་དྲིལ། །ཤེས་རབ་རྩལ་དང་བརྟུལ་ཞུགས་ལྡན་པས་སྤྱད། །བློ་ཆུང་རྟོག་པས་རང་ཡང་འཆིང་བར་འགྱུར། །ཉམས་དགའ་རང་སེམས་དབེན་པའི་དུར་ཁྲོད་དུ། །དཔའ་བརྟུལ་དྲག་པོ་སྔགས་ཀྱི་དམོད་པ་བོར། །དེ་ཡི་སྦྱོར་བ་རྒྱས་པ་འདི་ལྟ་སྟེ། །ཤོག་བུ་གྲུ་བཞི་མཐོ་གང་ལ། །ཐིག་སྐོར་རིམ་པ་བཞི་དང་ལྡན་པར་བསྐོར། །དབུས་སུ་གྲུ་གསུམ་བླ་སེམས་མིང་དང་རུས། །ཕྱི་རིམ་གཅོད་པའི་འཁོར་ལོ་རྩིབས་བཅུ་གཉིས། །དེ་ལ་རྩ་བའི་སྙིང་པོ་མེ་རླུང་སྐྱིན་ཐང་གནས། །དེ་ཡི་ཕྱི་རིམ་མུ་ཁྱུད་ཟླུམ་པོ་ལ། །བསྒྲུབ་པ་གཞན་གྱིས་རྦད་དང་གསད་པའི་སྔགས། །ཡང་ལོགས་མཁར་གྱི་འཁྲུལ་མིག་བཅུ་གཉིས་ལ། །རལ་གྲི་རྡོ་རྗེ་རྒྱ་གྲམ་བསྣོལ་མར་གནས། །རལ་གྲི་བསད་པའི་སྤུ་གྲི་རྒྱ་གྲམ་གནོན་པས་མཛེས། །དེ་གཉིས་རུས་སྦལ་ཁྲ་མོའི་ལྟོ་བར་བྲི། །ཁ་སྦྱོར་བཅས་ལ་དུག་དང་ཁྲག་གིས་བྱུག །མཚོན་ཆའི་མཚམས་དང་ཟླ་གམ་གྲུ་གསུམ་ལ། །བརྣག་པའི་མིང་རུས་མཱ་ར་ཡ་རྦད་བྲི། །སྔོ་དམར་དང་བཅས་ཐོད་པའི་ནང་དུ་གཞུག །ཕོ་ཐོད་ནང་དུ་མཱ་ར་ཡ་རྦད་བྲི། །ཐོད་པ་འོག་མར་བརྣག་པའི་མིང་རུས་བྲི། །རྩང་བཅས་གྲུ་གསུམ་ཁ་ཁྱེར་
སུམ་བརྩེགས་གཞུག །ཚེ་བདག་བསྒོམ་ལ་ཡེ་ཤེས་འཁོར་ལོ་བཅའ། །ཞག་བདུན་དྲག་སྔགས་དམོད་པ་རྔམ་ཚིག་ལྡན་པས་བཟླས། །བར་བར་བསྐུལ་གྱིན་བརྣག་པའི་ཡུལ་ལ་རྦད། །གཟིར་ཞིང་བཏབ་ལ་ཐོད་པ་བཅའ། །ཀླུ་གཟིར་གདུག་པའི་གཉན་ལ་གཏད་པར་བྱ། །དྲག་སྔགས་དམོད་པ་རྩ་བའི་སྦྱོར་བ་འདི། །ལྷ་སྲིན་ཀུན་གྱི་མཐུ་དྲིལ་དྲག་པོ་ཡིན། །དྲག་པོ་སྔགས་ཀྱི་དམོད་པ་འདི་ལྟ་སྟེ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་མྱོག་མཱ་ར་ཡ་རྦད། སྲོག་སྟྭཾ་བྷ་ཡ་ནན། སྲོག་ལ་ཐུན་བྷྱོ། འདི་དག་མི་འགྱུར་བསད་པའི་སྦྱོར་བ་ཡིན། དེ་ནས་ཡང་བཅོམ་ལྡན་འདས་ཀྱིས་ལོ་ཐོག་གཞོམ་པའི་སྦྱོར་བ་འདི་གསུངས་སོ། །དུར་ཁྲོད་རས་སམ་ཤོག་བུ་གྲུ་བཞི་ལ། །དབུས་སུ་རུས་སྦལ་ཁོང་སྟོང་དབྱིབས་དང་ཟླུམ་པོར་བྲི། །ཡན་ལག་ལྔ་དང་མཇུག་མ་ལྟོ་བ་ན། །གཅོད་པ་དྲག་པོའི་འཁོར་ལོ་རྩིབས་བཅུ་གཉིས། །འབྱུང་བར་བྲིས་ལ་རྩ་བའི་དྲག་སྔགས་དགོད། །དེ་ཡི་ཕྱི་རིམ་འཁྲུལ་མིག་བཅུ་གཉིས་ལ། །སྲོག་བཞི་གནད་ཀྱི་འབྲུ་དང་ཆུ་དྲིལ་དབབ་པ་དགོད། །སྦལ་པའི་ལྟོ་བའི་དབུས་སུ་ཡུལ་གྱི་མིང་དང་སེར་བ་ཕོབ་ཅེས་བྲི། །དེ་ཡི་འོག་ཏུ་ཡུལ་ལྷ་སེར་སྲུང་གཟིར་ཕོབ་ཡ་ནན་བྲི། །བྱང་ཁོག་སྟོད་ན་གཟའ་ཡི་གཟིར་སྔགས་བྲི། །མཇུག་མར་ཡུལ་ལྷ་དེ་བཞིན་གཟིར་སྔགས་བྲི། །ལྟོ་བ་གཡས་སུ་མ་མོའི་གཟིར་སྔགས་བྲི། །ལྟོ་བ་གཡོན་དུ་ས་བདག་ཀླུ་གཉན་གྱི། །རང་གནད་གཟིར་ལ་དབབ་པའི་དྲག་སྔགས་བྲི། །མཚོན་ཆ་དུག་དང་ཁྲག་གིས་ངར་བླུད་ལ། །སྦལ་པ་ཕོ་མོ་ལྟོ་སྦྱར་ཐོད་པའི་ནང་དུ་གཞུག །དགུན་ཟླ་གསུམ་གྱི་ཉ་སྟོང་ཉིན་ཞག་ཕྲུགས་རེ་བཟླས། །དཔྱིད་ཟླ་གསུམ་ལ་ཞག་གསུམ་ཆུ་དྲིལ་བཟླས། །དབྱར་ཟླ་གསུམ་ལ་རྟེན་གཞིའི་སྦྱོར་བ་བཅའ། །ཐོད་པ་དོང་བུར་ཁྲག་དང་དུག་བླུགས་ལ། །ཉ་དང་སྟོང་དང་ཉིན་ཞག་ལྔ་རུ་བཟླས། །ཐ་ཆུང་སྟོང་ལ་རྟེན་གཞིར་གཞུག །སྐྱ་རིང་སྦོམ་མཐོན་རྒྱ་མདུད་ཁ་འདྲེན་ཚུལ། །གཟིར་ཐབ་དུ་བ་དྲག་པོ་གཟིར་དང་བཞི། །ཚིལ་གསུམ་ཟུན་དང་མནོལ་ཁྲག་དུ་བའི་རྫས། །དུག་ཆུ་སྔོ་སྣ་འོ་མ་དྲག་པོ་ཐོབ། །ནག་གསུམ་ཁྲག་དང་ཉུང་དཀར་ཐབས་ཀྱི་རྫས། །ལྕགས་དང་སེང་ལྡེང་ཕུར་
པ་གཟིར་བའི་རྫས། །དྲག་སྔགས་ལུས་ལ་དབབ་གཟིར་བཞི། །གཟའ་དང་མ་མོ་ཡུལ་གྱི་ལྷ་བཙན་དང་། །ཀླུ་གཉན་ས་བདག་གཟིར་ལ་དབབ་པའོ། །མ་ཕེབས་དྲག་པོའི་སྦྱོར་བ་སྟོབས་ཞན་ན། །རྒྱ་ཚིལ་མནོལ་ཁྲག་ཁྱི་ཁྲག་རི་བོང་ཁྲག །དུག་རྒོད་དྲིལ་ལྕགས་གདབ་པའི་ཕུར་པ་ལ། །དང་པོ་སྔགས་བཟློག་དྲག་ཏུ་སྤོག་པ་བྱ། །དེས་མ་ཕེབས་ན་དྲག་སྔགས་འབྱུང་བ་དཀྲུག །རྫས་ཀུན་བསྲེག་ལ་དུ་བས་ལྷ་འདྲེ་དཀྲུག །རྒྱ་མདུད་དབུས་ཀྱི་རྟ་ལས་ཆུ་མིག་དཀྲུག །གྲི་མོ་ཡུག་མོ་མནོལ་མོའི་དོན་མངལ་ཁྲག །ཚ་ཡི་རྒྱལ་པོ་སྦལ་པའི་གཟུགས་ལ་བརྡེག །དྲག་སྔགས་སྤྱི་དྲིལ་སྒོ་བཞི་སོ་སོར་བརྡེག །སྤོགས་པའི་རྒྱལ་པོ་གསང་བ་དམ་པ་ཡིན། །ལས་ཀྱི་རྒྱལ་པོ་སྤོགས་པ་མཆོག་ཏུ་གསུངས། །དེ་ཡིས་མ་ཕེབས་སྦྱོར་བའི་སྟོབས་ཞན་ན། །རྩེ་གསུམ་ཆུ་གསུམ་མཚལ་གསུམ་ཚ་བ་གསུམ། །མཆེ་བ་ཅན་དང་འདབ་ཆགས་ལྟོས་འགྲོ་གསུམ། །རྟ་གསུམ་གཟེར་གསུམ་སྔགས་གསུམ་སྡེབས་ལ་དབབ། །དྲག་པོ་སྔགས་ཀྱི་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ། མ་ཧཱ་དེ་ཝ་མ་མ་རཀྴ་ས་ནཱ་ས་ནཱ་ག་པྲོཾ་པྲོཾ་ཧྲིལ་ཤར་ཕོབ། མ་མ་ཏྲག་རཀྴ་ཁ་མུ་ཏྲ་གཟིར་ནན་ཧུར་ཁམ་པྲོཾ་ཤར་ཤར་ཕབ་ཧྲིལ་ཕྲོམ། མ་ཧཱ་ཡ་མ་རཱ་ཧུ་ལ་སྲོག་ལ་གཟིར་ནན་པྲོཾ་ཤར་ཧྲིལ་ཕོབ། དེ་ཝ་ཡུན་ན་གཟིར་ཡ་པྲོཾ་ཤར་ཧྲིལ་ཕོབ། ས་ནཱ་ག་སྲོག་ལ་ཧུར་ཐུཾ་གཟིར་ནན་པྲོཾ་ཤར་ཧྲིལ་ཕོབ། ཡ་ཙ་མ་ར་ཁྲག་སྙིང་དུ་ན་ཧེ་མ་ཡ་ཀ་ཡེ། ཕོབ་ཤར་ཧྲིལ་པྲོཾ་པྲོཾ་ག་ནས་ཤར་ག་མ་མ་དེ་བ་ཧ་མ་མ་ས་ར་པྲ་ཕོབ། ཨེ་ཀ་ཡ་མ་རཱ་ཧུ་ལ་མ་ཧཱ་ན་ན་སྲོག་ལ་གཟིར་ཧྲིལ་ཕོབ་ཤར་པྲོཾ། པྲ་མ་ས་ར་ནས་ནཱ་ག་གཟིར་ཐུཾ་ནན། པྲོཾ་ཧུར་ཤར་སྲོག་ཧྲིལ་ཤར་ཕོབ། ཡ་ཙ་ཧེ་དུན་ཏྲག་ཤ་རག་མོ་ཏྲ་མུ་ཁ་མ་ཧུར་ནན་ཁམ་ཤར་པྲོཾ་གཟིར་ཧྲིལ་ཕོབ། ཁྲག་ར་སྙིང་མ་ཡུ་གཟིར་ཡ་དེ་ནན་ཤར་བ་ཧྲིལ་ཤར་ཕོབ། ཨེ་ཀ་ཧེ་དུན་པྲ་མ་སར་ཡ་མ་སྙིང་ཁྲག་ར་མ་ཙ་ཡ། པྲོཾ་ཡ་དེ་བ་མ་རག་ས་ནཱ་ག་རཱ་ཧུ་ལ། སརྦ་ཨུ་ནན་ཡཾ་ཡཾ་པྲོཾ་པྲོཾ་ཤར་ཤར་ཧྲིལ་ནན་གཟིར་ཕོབ་བྷྱོ། གཟིར་ཞིང་མཐུ་དབང་སྟོབས་བསྡུས་ལ། །རྣམ་གྲངས་ལྔ་དང་ལྡན་པའི་ལས། །འདི་དག་སྦྱོར་བ་དམ་པ་སྟེ། །ལོ་ཐོག་འཇོམས་ལ་ཤིས་
པ་ཡིན། །དེ་ནས་ཡང་བཅོམ་ལྡན་འདས་ཀྱིས་གནོད་བྱེད་ཐམས་ཅད་གཞོམ་པའི་ལས་སྙིང་གཟེར་ཉི་ཤུ་རྩ་གཅིག་པའི་སྦྱོར་བ་འདི་གསུངས་སོ། །མཛེ་རིམས་དྲག་པོའི་གདུག་པ་དང་། །མ་མོ་རྒྱལ་པོ་མཛེ་འདྲེ་ཅན། །སྙིང་གཟེར་དྲག་པོའི་སྟོབས་ཀྱིས་གཟིར། །འཁོར་ལོ་དྲག་པོ་བཅའ་བ་ནི། །རྟེན་པ་ཤོག་བུ་གྲུ་བཞི་ལ། །ཆ་གཉིས་དུར་ཁྲོད་སྨེ་བས་བྱུག །རུས་སྦལ་ལྟོ་བར་ཐིག་སྐོར་བཞི། །བསྐོར་ལ་དབུས་སུ་གྲུ་གསུམ་ལ། །ཟླ་ཁམ་སྦྲུལ་གྱི་ར་བས་བསྡམས། །དེ་ཡི་ཕྱི་རིམ་འཁྲུལ་མིག་བཞི། །ཐོད་མཁར་རྡོ་རྗེ་ར་བ་མེ། །ཕྱི་རིམ་གནམ་ལྕགས་འཁྲུལ་མིག་བརྒྱད། །རླུང་རི་རྒྱ་གྲམ་དབུས་ན་བྲི། །ཡང་ལོགས་རྩ་སྦུབས་ཉི་ཤུ་གཅིག །གདུག་པ་སྲེག་བྱེད་ཡེ་ཤེས་མེ། །འོད་ཀྱི་གོང་བུ་གནས་ལ་འཕོ། །དེ་ལ་གནས་ཤིང་དགོད་པ་ནི། །གྲུ་གསུམ་དབུས་ན་ས་ནཱ་ག །གང་གནོད་མིང་དང་བཅས་པ་བྲི། །ཟླ་ཁམ་གསུམ་ལ་སྡང་བའི་མིང་། །ལྕགས་མཁར་བརྒྱད་དང་ཐོད་མཁར་བཞི། །རྩ་བའི་ཡིག་འབྲུ་བཅུ་གཉིས་དགོད། །རྩ་སྦུབས་ཉི་ཤུ་རྩ་གཅིག་ལ། །སྙིང་གཟེར་ཉི་ཤུ་རྩ་གཅིག་དགོད། །དྲག་སྔགས་འཁྲུལ་འཁོར་མེ་དབལ་མཚོན། །འཁོར་ལོ་མཚོན་ཆེན་མེ་དབལ་སྔགས། །དྲག་པོ་སྔགས་རྒོད་གདུག་པའི་མཚོན། །ཐོད་ཆེན་དྲིལ་ཕྲེང་དྲག་པོའི་སྟོབས། །ནམ་མཁའ་རིན་ཆེན་རྒྱ་མཚོ་ལས། །མཚོན་ཆ་ཁ་སྦྱོར་དུག་ཆུ་ངར། །སྔོན་དམར་བཅས་དང་ཕག་མོའི་ལྟོར། །དུག་ཁྲག་བསྐུས་ལ་ཐོད་པར་གཞུག །མི་རྐང་ལྕགས་ཁྲི་ཁ་ལ་བརྡེག །གསལ་གསུམ་དང་ལྡན་སུམ་སྟོང་བསྐུལ། །ཉ་སྟོང་མར་གྱི་ངོ་ལ་སྦྱར། །ཐ་ཆུང་བཞི་ལ་རབ་ཏུ་བརྡེག །ཞག་གསུམ་ཤིན་ཏུ་བརྩོན་པར་བཅའ། །དེ་ཉིད་དོང་བུར་ཐོད་པ་མནན། །མི་ལྡོག་གྱད་དང་དྲེགས་པ་བསྒོམ། །ཐོད་མཁར་སྟེང་དུ་གདུག་པའི་རྩང་། །ཉི་ཤུ་གཅིག་དབུས་མཆོག་ཕུར་བཏབ། །གང་གནོད་གཟུགས་བརྙན་སྙིང་གར་བརྡེག །རྒྱུན་དུ་དྲག་སྔགས་བརྒྱ་བརྒྱས་བསྲུང་། །ཨ་ཤཱ་བི་ལཱིའི་སྦྱོར་ཚུལ་ཅན། །སྙིང་པོ་ངང་དང་ཤུགས་ཀྱིས་གྲངས། །དུག་ལྔ་བརྐམ་ཆགས་རྩ་བ་གཅོད། །ཧ་ལ་ནག་པོ་ཞེན་ཆགས་འདྲེལ། །སྔགས་ཀྱི་རྒྱལ་པོ་ཀུན་འཇོམས་འདི། །དྲག་ལ་
འདྲིལ་ཞིང་སྒྲ་སྤངས་པ། །སྒྲ་ནི་གཏུམ་ཞིང་ལྕེ་བར་གནས། །དྲག་པོ་གཏུམ་ཆེན་དྲེགས་པ་ཡི། །དྲག་སྔགས་མཚོན་ཆ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་རག་ཤ་རུ་ཐུཾ། ས་ནཱ་ག་སྙིང་གཟེར་ཛ།ས་ནཱ་ག་སྙིང་གཟེར་དུག་ཕྱུང་རྦད། ས་ནཱ་ག་སྙིང་གཟེར་རེར་ཙིཏྟ་རྦད། ས་ནཱ་ག་སྙིང་གཟེར་ཐུན་རྦད། ས་ནཱ་ག་སྙིང་གཟེར་དུན་རཾ་རྦད། ས་ནཱ་ག་སྙིང་གཟེར་ཡཾ་རཾ་ཐུན་རྦད། ས་ནཱ་ག་སྙིང་གཟེར་རཾ་ཐུན་རྦད། ས་ནཱ་ག་སྙིང་གཟེར་སྲོག་ལ་རྦད། ས་ནཱ་ག་སྙིང་གཟེར་ཙིཏྟ་མྱོག་རྦད། ས་ནཱ་ག་སྙིང་གཟེར་ཐུན་རིལ། ས་ནཱ་ག་སྙིང་གཟེར་རྩལ་རྦད། ས་ནཱ་ག་སྙིང་གཟེར་ནན་འདྲིད་རྦད།ས་ནཱ་ག་སྙིང་གཟེར་དྲེང་ཤག་རྦད། ས་ནཱ་ག་སྙིང་གཟེར་ཙིཏྟ་ཁས་རྦད། ས་ནཱ་ག་སྙིང་གཟེར་ཁྲག་ཐིབས་རྦད། ས་ནཱ་ག་སྙིང་གཟེར་སྦུར་ནན་རྦད། ས་ནཱ་ག་སྙིང་གཟེར་ཧི་ནན་རྦད། ས་ནཱ་ག་སྙིང་གཟེར་ཨུ་ནན་རྦད། ས་ནཱ་ག་སྙིང་གཟེར་ཨེ་ནན་རྦད། ས་ནཱ་ག་སྙིང་གཟེར་སྲོག་ལ་དུན་དུན་རྦད། ས་ནཱ་ག་སྙིང་གཟེར་སྲོག་ལ་དུན་དུན་ཤག་རྦད། ས་ནཱ་ག་སྙིང་གཟེར་ཙིཏྟ་ཙིཏྟ་རུ་ཐུཾ་ཤག་རྦད། རིགས་བཞི་རྒྱུད་ལ་ཞེན་པ་དང་། །བ་སོ་ཁ་འཁོར་གདུག་པ་ཀུན། །བརྐམ་ཆགས་ལས་ཀྱི་དུག་ཞུགས་ན། །དྲག་པོ་སྔགས་ཀྱིས་འཇོམས་ཤིང་འབྱིན། །གདུག་པ་ལ་སོགས་འཇོམས་པར་བཤད། །དེ་ནས་ཡང་བཅོམ་ལྡན་འདས་ཀྱིས་སྙིང་གཟེར་དགུ་པའི་སྦྱོར་བ་འདི་གསུངས་སོ། །སྙིང་པོ་རྩ་བའི་མན་ངག་བཅུད། །གསང་ཆེན་རྩ་བ་དྲིལ་བའི་ལས། །དྲག་པོ་མངོན་ཕྱུང་སྦྱོར་བའི་བཅུད། །སྙིང་གཟེར་གདུག་པས་ཐམས་ཅད་འཇོམས། །ཤི་ཕྲད་སྔགས་ཀྱི་འཁོར་ལོ་ཡིས། །བདག་སྐྱོབ་གཞན་བསྲུང་གདུག་པ་འཇོམས། །མ་མོ་བདུད་མོ་རྒྱལ་པོ་བཙན། །ཀླུ་གཉན་ས་བདག་ཐེའུ་རང་གྲི། །མ་ལུས་འཇོམས་བྱེད་རྒོད་ཀྱི་སྔགས། །བྷི་ལའི་ཁོང་འདུས་ཁོང་དྲེགས་ཅན། །བྷར་བྷ་ནག་པོ་ཡ་མའི་ཀློང་། །ཁྱད་པར་སྦྱོར་བ་འདི་ལྟ་སྟེ། །དུར་ཁྲོད་རོ་རས་ཞིང་རས་ལ། །མུ་ཁྱུད་ལྔ་ལྡན་རུས་སྦལ་ལྟོར། །དུག་ཁྲག་སྣ་ཚོགས་སྦྱར་ཏེ་བྲི། །གྲུ་གསུམ་འཁྲུལ་མིག་ཐོད་མཁར་བཞིར། །དེ་འོག་ལྕགས་མཁར་བང་རིམ་བརྒྱད། །ཡང་ལོགས་གནས་པའི་རྩ་སྦུབས་དགུ། །ཕྱི་རིམ་རྩིབས་ཆེན་བཅུ་དྲུག་འབོས། །
དྲག་པོ་སྔགས་ཀྱི་འཁྲུལ་འཁོར་བཅའ། །དེ་ལ་དགོད་ཅིང་གནས་པ་ནི། །དབུས་སུ་གདུག་པའི་སྙིང་པོ་མིང་། །ཟླ་ཁམ་མ་མོ་རྒྱལ་པོ་བཙན། །ཐེ་བྲང་གཤིན་རྔོག་སྙིང་པོ་མིང་། །ཐོད་མཁར་འདྲེན་པའི་སྟོབས་ཀྱིས་འབྲུ། །ཕྱི་རིམ་ལྕགས་མཁར་དྲེགས་པ་བརྒྱད། །ཡང་ལོགས་རྩ་སྦུབས་སྙིང་གཟེར་དགུ། །ཕྱི་རིམ་མཚོན་ཆ་ཀུན་འཇོམས་དགོད། །ཁ་སྦྱར་སྦྱོར་བ་ཀུན་ལྡན་དང་། །གསལ་གསུམ་ཞག་བདུན་བྲབ་ཅིང་གཟིར། །བཟློག་ཅིང་འབྱིན་པ་ཤུགས་ཀྱི་མཆོག །གཅོད་ཅིང་འབྱིན་པ་སྤུ་གྲི་མཚོན། །བསྲེག་ཅིང་གཡེང་བས་མེ་ཆུ་རླུང་། །སྡུད་ཅིང་འཆང་བས་ས་ཡི་མཁར། །གཟིར་ཞིང་མནན་པས་ཐོག་ཆེན་ས། །རྩ་བར་བཅས་པ་མཚོན་ལ་མེ། །རྩ་བ་གཅིག་ལ་ཡལ་ག་སྟོང་། །འབར་བ་ནག་པོ་ཞེ་སྡང་མཆོག །སྔགས་ཀྱི་རྒྱལ་པོ་དུག་ངར་བཅས། །འབར་བ་དུག་གི་དུམ་བུར་བསྡུས། །བདུད་ནག་རག་ཤཱ་ཡ་མའི་ཀློང་། །ཨེ་ཀཱ་ཕོ་བྲང་ཐོད་པའི་གནས། །འཁྲུལ་འཁོར་དང་བཅས་རེ་བས་གྲིལ། །ཧོམ་ཁུང་བསྡུས་ལ་སྟོང་སྟོང་བཟླས། །གསལ་བ་ཁྱབ་པར་སྟོབས་ཀྱི་ལྷ། །རྫས་དང་ལྟ་བ་སྦྱོར་བའི་སྡེབས། །འདུན་པ་མཆོག་ལྡན་ཡིན་པ་བརྟག །དབང་བཅས་བགྲོད་པ་གོ་མཚོན་མཆོག །རིགས་ལ་རྒྱུན་དུ་སྟོང་སྟོང་གཟུག །ཉ་སྟོང་སྦྱོར་བ་དྲག་པོ་བརྩམ། །ཐུན་མོང་བསྲུང་བ་སྦྱོར་བ་བརྒྱ། །མངོན་ཞུགས་སྦྱོར་བ་དྲག་པོ་ཉིད། །གསད་པའི་སྦྱོར་བ་སྤུ་གྲི་དང་། །དྲག་པོ་རྩ་བ་བཅུ་གཉིས་བསྡེབ། །དམིགས་པའི་མིང་རུས་ཁམས་སྦྱར་ལ། །གང་གནོད་ཞེན་པ་སྟབས་ལ་གཏད། །མཁའ་འགྲོའི་གཟས་ཁ་དགྲ་ལ་འཕོ། །དྲག་པོ་ཐོག་གཟེར་སྦྱར་བའི་མཆོག །གསེར་གྱི་དགུ་ཐོག་གནམ་ལྕགས་ཐོག །རི་རྒྱལ་སྦལ་ཆེན་སྤུ་གྲི་མེ། །དྲག་སྔགས་སྦྱོར་བ་གཉིས་སུ་བསྟན། །ཨེ་ཀ་ཧེ་དུན་ཡ་མ་རཀྴ་ཀ་དུན་ཛཱ་རཾ།ས་ནཱ་ག་མ་ཏྲག་སྙིང་གཟེར་རྦད། ས་ནཱ་ག་ཙ་ཏྲི་སྙིང་གཟེར་རྦད། ས་ནཱ་ག་དུ་མ་སྙིང་གཟེར་རྦད། ས་ནཱ་ག་ཀྵེ་ཏྲི་སྙིང་གཟེར་རྦད། ས་ནཱ་ག་དུག་ཕྱུང་སྙིང་གཟེར་རྦད། ས་ནཱ་ག་ཁམ་ཤག་སྙིང་གཟེར་རྦད། ས་ནཱ་ག་སྲོག་ཏིག་སྙིང་གཟེར་རྦད། ས་ནཱ་ག་ཐུཾ་རིལ་སྙིང་གཟེར་རྦད། ས་ནཱ་ག་སྙིང་གཟེར་སྦུར་ནན་རྦད། སརྦ་ཨུ་ནན་ཁམ་ཤག་གཟེར་ཐུཾ་མ་ཙིཏྟ་ཕྲེང་
ཤག་སྙིང་གཟེར་སྦུར་ནཱན། ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་སྙིང་གཟེར་རྦད། དགྲ་བོའི་སྲོག་ལ་ཨུ་ནན། ཁཾ་ཤག་གཟེར་ཐུན་ཙིཏྟ་དྲེང་ཤག་སྙིང་གཟེར་སྦུར་ནན། དགྲ་བོའི་སྲོག་ལ་ཐུན་མུགས་ཐིབས་བྷྱོ། སྙིང་གཟེར་དགུ་པའི་མཚོན་ཆ་ཡིས། །དམིགས་པ་གང་ཡིན་མི་འཆོར་གཅོད། །བརྡ་དང་སྙིང་པོ་འཕོ་ཞིང་སྦྱོར། །ཤི་ཕྲད་དྲག་པོས་གཟིར་ཞིང་གནན། །སྦྱོར་བ་གཞན་ཚོགས་ཅི་རིགས་སྦྱར། །དྲག་པོ་མེ་དབལ་གཅོད་པའི་མཚོན། །བརྣག་པའི་ཙིཏྟའམ་སི་ར་ལ། །རང་གཅོད་སྦྱོར་བའི་རྒྱལ་པོ་འདིས། །དོན་གཉིས་མངོན་དུ་བྱེད་པ་ཡིན། །དྲག་སྔགས་མངོན་དུ་ཕྱུང་བའི་རྒྱུད་ལས། ཁྱད་པར་སྦྱོར་བའི་ལེའུ་སྟེ་བཞི་པའོ།། །།དེ་ནས་ཡང་བཅོམ་ལྡན་འདས་ཀྱིས་གསང་བའི་སྦྱོར་བ་འདི་གསུངས་སོ། །དྲག་པོ་གསང་བའི་སྦྱོར་བ་ལས། །རྩ་བ་གཉིས་སུ་ཤེས་པར་བྱ། །གསད་པ་དང་ནི་སྲུང་བའོ། །གསང་བའི་སྦྱོར་བ་རྣམ་པ་གཉིས། །བསམ་གཏན་རང་རྒྱུད་ལྟོ་སྦྱོར་གཉིས། །དེ་བཞིན་གསོ་བ་བཞི་གཉིས་ལྡན། །བཤིག་དང་བྱད་དགྲོལ་ཟུག་པ་དབྱུང་། །ཞེན་པ་བཟློག་དང་གསང་ལམ་དགག །དུག་མདའ་ཁོང་ནས་དབྱུང་བའོ། །གསད་པའི་སྦྱོར་བ་འདི་ལྟ་སྟེ། །ཙིཏྟ་འོད་ཀྱི་ཕོ་བྲང་ནས། །དྭངས་མ་བཞི་དང་སི་ར་བརྒྱད། །མདུད་པ་བཞི་བརྒྱད་སུལ་བཞིར་གནས། །ཙིཏྟ་ཕྱི་ནང་ནང་ཁྲོལ་དང་། །ཕྱི་ཡི་ལྷུ་ཚིགས་སྒོ་དགུ་རུས། །དབང་པོ་སྔགས་ཀྱི་སྤྱོད་ཡུལ་བརྟག །དྭངས་མ་བཞི་ཡི་སྦུབས་དག་ལ། །འབྱུང་བས་བསྐྱེད་པའི་ཡི་གེ་གནས། །མདུད་པ་བཞི་ཡི་འདྲེལ་ཆེན་ལ། །གཅོད་པ་སྤུ་གྲི་རྣོ་དབལ་གནས། །སི་ར་ཕྲ་མོ་བརྒྱད་སྦུབས་ན། །ཁྱད་པར་སྦྱོར་བའི་སྔགས་བརྒྱད་གནས། །མདུད་པ་བརྒྱད་དང་བཅུ་གཉིས་ན། །ཁྲག་དང་བག་ཆགས་ཡི་གེ་གནས། །ནང་ཁྲོལ་ལྔ་དང་སྒོ་དགུ་ན། །ཟོར་ཐུན་སྐྱོང་བའི་སྤུ་གྲི་གནས། །རྩ་བཞི་དྭངས་མའི་མཚམས་བཞི་ན། །སྲོག་བཞི་ལོ་ཐོག་འཇོམས་པ་གནས། །བསྐུལ་གྱིན་གཅོད་པ་རང་
གཅོད་དེ། །མི་འགྱུར་བ་ཡི་སྦྱོར་བ་ཡིན། །དབུགས་ཀྱི་རྟས་བསྐྱོད་ཡུལ་ལ་འཕང་། །བསྲུང་བ་ལ་སོགས་ཀུན་གྲངས་ན། །ཙིཏྟའི་གནས་ན་དྭངས་སྙིགས་འདོན། །དབང་པོ་སྲོག་གི་ཐིག་ལེར་གནས། །རྟེན་ལ་ཐོད་པར་སྙིང་པོ་བསྡུ། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་ནྲྀ་ཛ་ཧུར་ཐུམས་ཤག་རྦད། དགྲ་བོའི་སྲོག་ལ་མཱ་ར་ཡ་ཁཾ་ཤག་ཛ་ཐུཾ་རྦད། དགྲ་བོའི་སྲོག་རཾ་ཡཾ་ཧུར་སྟམ་བྷ་ཡ་ནན།ལས་འདི་མི་འགྱུར་བསྟན་པས་ན། །བསམ་གཏན་ཡེ་ཤེས་འོད་འཕྲོས་པས། །དམན་པ་གདུག་པའི་རྒྱུད་བསྐུལ་ནས། །དམན་པའི་ཡི་གེ་རྩ་སྲོག་གཅོད། །དྭངས་མ་སྡུད་ནས་དབང་པོ་འཕོ། །མནན་པ་ནམ་མཁའི་ཁམས་དང་སྦྱར། །དེ་ནས་བཅོམ་ལྡན་འདས་ཀྱིས་དྲག་པོ་སྟོབས་ཀྱི་སྦྱོར་བ་འདི་གསུངས་སོ། །སྔགས་དང་འཁོར་ལོ་མན་ངག་སྡེབས་པའི་ལས། །དུར་ཁྲོད་རྒྱུ་ལ་སྨེ་བས་ཐང་པ་བྱ། །དབུས་ནས་གྲངས་ལ་ཐིག་སྐོར་ལྔ་རུ་བསྐོར། །ཕྱོགས་བཞི་ཚངས་པའི་ཐིག་བཞི་རྒྱ་གྲམ་གདབ། །དབུས་སུ་གྲུ་གསུམ་འཁྲུལ་མིག་བཞི་དང་མཚམས། །དེ་ཡི་ཕྱི་རིམ་འཁྲུལ་མིག་བཞི་དང་མཚམས། །དེ་ཡི་ཕྱི་རིམ་འཁྲུལ་མིག་བཞི་གཉིས་ལྡན། །ལྕགས་མཁར་བར་ཁྱམས་གཤེད་བཞིའི་ཁང་པ་ཡིན། །དེ་ཡི་ཕྱི་རིམ་མུ་ཁྱུད་ཟླུམ་པོ་ལ། །སྟོབས་དང་ལྡན་པའི་སྦྱོར་བ་འཇོམས་པའི་གནས། །ཡང་ལོགས་ཆུ་ཡི་ཁང་པ་མུ་ཁྱུད་ཟླུམ་པོ་ལ། །ཁྱམས་ཁང་གནས་སུ་བསྒྲུབ་པའི་སྙིང་པོ་རྫོགས། །ཐ་མའི་འཁྲུལ་མིག་དྲག་པོ་བཅུ་གཉིས་ལ། །མཚོན་ཆའི་རྒྱལ་པོ་རླུང་རི་སྐྱིན་ཐང་གནས། །མྱོས་པ་སྟོབས་འདྲེལ་རྣོ་དབལ་ཁ་སྦྱོར་ཡིན། །དེ་ལ་དགོད་ཅིང་གནས་པའི་རིམ་པ་ནི། །དབུས་དང་མཚམས་ཀྱི་གསང་མཛོད་གྲུ་གསུམ་ལྔར། །བླ་སེམས་ཆགས་པའི་སྙིང་པོ་མིང་རུས་བྲི། །ལྕགས་མཁར་བཞི་ལ་འདྲེན་པའི་འབྲུ་བཞི་དགོད། །དེ་ཡི་ཕྱི་རིམ་ལྕགས་མཁར་བརྒྱད་པོ་ལ། །རྩ་བའི་དྲག་སྔགས་འབྲུ་བརྒྱད་གནས་པ་དགོད། །དེ་ཡི་ཕྱི་རིམ་མུ་ཁྱུད་ཟླུམ་པོ་ལ། །ཐམས་ཅད་གཟིར་དང་བཤིག་པའི་སྤུ་གྲི་དགོད། །ཡང་ལོགས་ཁང་པ་མུ་ཁྱུད་ཟླུམ་པོ་ལ། །གང་བསྒྲུབ་
བསྙེན་རྦད་བསད་པའི་སྔགས་རྣམས་དགོད། །ཐ་མ་དྲག་པོ་འཁྲུལ་མིག་ཉི་ཤུ་ལ། །དབུགས་དང་ཐུན་བརྡེག་གསད་དང་མནན་པའོ། །དྲག་པོ་སྐབས་དང་སྦྱར་བའི་སྤུ་གྲི་དྲག་པོ་དགོད། །ཞིང་བཅུ་མ་ལུས་གཏན་ནས་བསྲེག་ཅིང་འཕོ། །འཁྲུལ་མིག་ཉི་ཤུ་རྩ་གཉིས་མཐར། །དྲག་པོ་ཁྱམས་ཁང་མཆོག་གི་གནས། །དེ་ཡིས་ཐམས་ཅད་འཇོམས་ཤིང་འཕོ། །འཁོར་ལོ་ལྟོ་སྡེབས་མེ་དང་རླུང་། །སྤུ་གྲི་མཚོན་ཆེན་གཅོད་དང་འབིགས། །སྲུང་དང་སྐྱོབ་པ་ཀུན་བྱེད་པའོ། །ངར་སྐྱོབ་ལྡན་པའི་འཁོར་ལོ་ལ། །དུག་ཁྲག་ངར་བླུད་ཁ་སྦྱོར་བཅའ། །གའུ་དང་བཅས་དྲག་པོའི་གནས། །འཁྲུལ་འཁོར་དྲག་པོ་གསང་བའི་སྟོབས། །སྟོབས་ཆེན་ཚེ་བདག་ཙིཏྟ་ལ། །སྙིང་པོ་དྭངས་མ་སྒྲ་རུ་གནས། །རྩ་བའི་དྲག་སྔགས་སྐབས་དང་སྦྱར། །ཕྱི་རིམ་གང་བསྒྲུབ་བསྙེན་དང་རྦད། །གསད་པ་ལ་སོགས་སྐབས་ཀྱིས་སྦྱར། །འོད་ཀྱི་གོང་བུར་གསལ་བར་བསྒོམ། །མན་ངག་གསང་བ་ཐུགས་ཀྱི་བསྡེབ། །ཞལ་གྱི་དམོད་པ་བཟླས་པའི་ཚུལ། །ཨེ་ནས་དྲངས་ལ་སྤུ་གྲིར་བསྒྱུར། །གང་བསྒྲུབ་བསྙེན་པ་སྦྱར་ལ་དགུག །སྤྱན་དྲང་ལ་སོགས་གཞུང་དང་སྦྱར། །རྦད་པ་དེ་བཞིན་སྟེང་དུ་བསྡེབ། །དེ་བཞིན་དྲག་པོ་ཐུགས་ཀ་ལ། །སྤུ་གྲི་དང་བཅས་སྔ་མ་བཞིན། །འདོད་པའི་མིང་བཅས་མཚམས་སུ་བསྡེབ། །རྣོ་དབལ་སྤུ་གྲི་ཁ་སྦྱོར་ཡིན། །དམོད་པ་ངག་གི་སྔགས་རྣམས་བསྡེབ། །མནན་པ་ལ་སོགས་གཉན་ས་རུ། །ལས་ཚུལ་གཞན་དང་འདྲ་བར་བརྟག །སྔགས་རྣམས་གང་འདོད་སྐབས་དང་སྦྱར། །མན་ངག་ལྟོ་བསྡེབ་དྲག་པོ་ཡིན། །དེ་ནས་ཡང་བཅོམ་ལྡན་འདས་ཀྱིས་བསྲུང་བ་ཐམས་ཅད་ཀྱི་མཆོག་ཏུ་བཤིག་པའི་སྦྱོར་བ་འདི་གསུངས་སོ། །དྲག་པོ་མངོན་ཕྱུང་སྦྱོར་བའི་མཆོག །གསང་ཆེན་རྩ་བར་ དྲིལ་བའི་ལས། །དམོད་པའི་མཚོན་ཆ་འདི་ལྟ་སྟེ། །དུར་ཁྲོད་ཤིང་རས་ཤོག་བུ 
་ལ། །མུ་ཁྱུད་རིམ་པ་བཞི་དང་ལྡན། །རླུང་རི་ལས་ཀྱི་འཁྲུལ་མིག་ལ། །དབུས་སུ་ལྕགས་མཁར་འཁྲུལ་མིག་བཞི། །མཚམས་བཞིར་རྡོ་རྗེའི་ཀ་བར་ལྡན། །
ཕྱི་རིམ་ལྕགས་མཁར་འཁྲུལ་མིག་བརྒྱད། །ཞིང་གི་ཀ་བས་མཚམས་བརྒྱད་འདེགས། །ཡང་ལོགས་མཚོན་ཆ་རྩིབས་བཅུ་གཉིས། །ལས་ཀྱི་མེ་རི་འབར་བའི་ཚུལ། །མཚོན་ཆ་ཁང་པ་དེ་དག་ལ། །གནས་ཤིང་དགོད་པའི་རིམ་པ་ནི། །དབུས་ནས་བརྣག་པའི་སྙིང་པོ་མིང་། །ཟླ་གམ་དེ་བཞིན་རྫོགས་པར་བྲི། །ལྕགས་མཁར་བཞི་ཡི་ཁང་པ་རུ། །སྲོག་དང་ལས་སྡུད་དགྱེས་དང་བདུད། །འབྲུ་བཞིའི་སྦྱོར་བ་ཀུན་གྱི་མཆོག །ཁོང་འཁྱུད་ལྕགས་མཁར་བརྒྱད་པོ་ལ། །གཤིན་རྗེ་མ་མོའི་སྙིང་པོ་གཉིས། །མཁའ་ལྡིང་དྲེགས་པའི་སྙིང་པོ་གཉིས། །སྲེག་བྱེད་མ་དང་སྡུད་བྱེད་གཉིས། །རུས་སྦལ་ཡ་མའི་སྙིང་པོ་གཉིས། །ལྕགས་མཁར་བང་རིམ་རེ་ལ་དགོད། །མཚོན་ཆའི་ཁང་པ་བཅུ་གཉིས་ལ། །དུག་ལྔའི་སྦྱོར་བ་བཤིག་པ་ཡི། །དྲག་པོ་སྤུ་གྲི་མཚོན་ཆ་དགོད། །མེ་ལ་སྙིང་པོ་སྤོར་བ་དགོད། །འཁྲུལ་འཁོར་མཚོན་ཆ་མེ་དབལ་སྔགས། །སྦྱོར་བའི་རྒྱལ་པོ་ཀུན་འཇོམས་འདི། །མེ་རླུང་ལས་ཀྱི་མཚོན་ཆ་དགོད། །རྫས་རྣམས་བསྐུས་ལ་ཁ་སྦྱར་དྲིལ། །དུར་མར་བཅུག་ལ་རེ་བས་གྲིལ། །རྩང་བཅས་གྲུ་གསུམ་སྐྱེར་བའི་སྟན། །ཞིང་ལྤགས་སྟེང་ནས་དྲག་པོས་གདབ། །ལྷ་བསྒོམ་སྔགས་བཟླས་ཐུན་བྲབ་བརྡེག །དྲག་ཏུ་བསྐུལ་གྱིན་ཡུལ་ལ་རྦད། །བདུན་ནམ་ལྔ་རུ་ཉ་སྟོང་ཙམ། །སྦྱོར་བ་ཐོན་ནས་འཁྲུལ་འཁོར་དྲིལ། །ཚེས་གཅིག་དག་དང་བཅུ་དྲུག་ལ། །སྤོགས་པ་མེད་པ་གནན་པར་བྱ། །ཞི་ཁྲོ་ཕུར་པ་གཤིན་རྗེ་རྣམས། །འཁོར་ལོ་རུས་སྦལ་ཐོད་ཆེན་གཞུག །དཀྱིལ་འཁོར་ཆེན་པོའི་འོག་ཏུ་གནན། །མཁའ་ལྡིང་དྲེགས་པ་ཀླུ་རྒྱལ་རྣམས། །འཁོར་ལོ་ཚེ་བདག་ལྟོ་བར་གཞུག །འབྲོང་ཆེན་ཐོད་པར་རོ་ཁུང་གནན། །མ་མོ་བདུད་མོ་སྲིན་མོ་རྣམས། །འཁྲུལ་འཁོར་ཉན་ཐོས་ཐོད་པར་གཞུག །བཀའ་རྟེན་བྱིན་ཆེན་འོག་ཏུ་གནན། །བདུད་དང་མུ་སྟེགས་མགོན་པོ་རྣམས། །འཁྲུལ་འཁོར་གཡག་རུ་གཡས་པར་གཞུག །རོ་ཁང་སྒོ་སྲུང་འོག་ཏུ་གནན། །རྒྱལ་པོ་དགེ་བསྙེན་དཀོར་སྲུང་རྣམས། །འཁྲུལ་འཁོར་སྤྱང་ཀིའི་ཐོད་པར་གཞུག །ཁྱི་ཚང་ལམ་གྱི་བཞི་མདོར་གནན། །བཙན་
དང་སྲོག་བདག་གྲི་བོ་རྣམས། །ཤ་རུ་སྤྱང་ཐོད་གོང་གསུམ་མནན། །ཀླུ་བདུད་དམ་བདུད་ཕུག་བདག་རྣམས། །བོན་པོའི་ཐོད་པར་ལྷ་ཁང་གནན། །ཐེའུ་རང་ཆགས་འགོང་གཤིན་འགོང་གནན། །གླང་རུར་བཅུག་ལ་ལམ་མདོར་གནན། །ས་བདག་ཀླུ་གཉན་མཛེ་འདྲེ་རྣམས། །འཁོར་ལོ་ཕག་མོའི་ཐོད་པར་གཞུག །ཕག་ཐོད་བཀའ་རྟེན་འོག་ཏུ་གནན། །བོན་པོ་རིགས་གཉིས་འཛིན་པ་རྣམས། །ཁྱི་ཐོད་བཅུག་ལ་ཁྱི་ཚང་གནན། །སྲི་གནོན་ཆུང་ཐོད་ཐེམ་འོག་གནན། །ཏིང་འཛིན་སྦྱོར་བ་བདག་དབང་བསྡུ། །ས་ཡི་སྦྱོར་བ་གནན་པའོ། །དྲག་སྔགས་མེ་རླུང་མཚོན་ཆའོ། །སརྦ་ཤ་ཏྲུཾ་ཧུར་ཐུཾ་ཡཾ་ཤག་ནན་གཟིར་རྦད་བྷྱོ།བར་སྣང་ནམ་མཁའ་མཆོད་རྟེན་རྟེན། །འཁྲུལ་འཁོར་མེ་རླུང་ཀུན་འཇོམས་ཡིན། །དེ་ནས་བཅོམ་ལྡན་འདས་ཀྱིས་བྱད་དགྲོལ་བའི་སྦྱོར་བ་འདི་གསུངས་སོ། །དྲག་པོ་རྣལ་མ་བཙན་ཐབས་དགྲོལ་བའི་ལས། །དྲག་པོ་བྱད་དགྲོལ་ལས་ཀྱི་རིམ་པ་འདི། །དྲག་པོ་ཧོམ་གྱི་འཁོར་ལོ་མཎྜལ་ས་ལ་བྱ། །འབྱུང་བ་རྟེན་གྱི་འཁོར་ལོ་བར་སྣང་རྟེན་ལ་བཅའ། །གཅོད་པ་སྔགས་ཀྱི་འཁོར་ལོ་ཞིང་རས་རྒྱུ་ལ་བཅའ། །མཎྜལ་གྲུ་བཞི་ཁྲག་གིས་འཐས་པར་བྱུག །དབུས་སུ་གྲུ་གསུམ་ཁྲུ་གང་འདོམ་རེ་ལ། །ཁ་ཁྱེར་གསུམ་ལ་རྩང་བཅས་ཟླ་ཁམ་ཐོད་པས་བསྐོར། །དེ་ཡི་ཕྱི་རིམ་འཁོར་ལོ་རྩིབས་བཅུ་གཉིས། །ཐ་མ་ཐོད་ཕྲེང་མེ་རིས་དེ་བཞིན་བསྐོར། །དབུས་ཀྱི་གྲུ་གསུམ་གཟུགས་བརྙན་སྙིང་པོ་རཾ། །ཁ་ཁྱེར་གསུམ་ལ་གཟུགས་དང་མེ་རི་རྩང་། །གང་གནོད་གྲོགས་དང་བཅས་པ་རྫོགས་པར་བྲི། །འཁོར་ལོ་དྲག་སྔགས་བྲིས་ལ་དགོད། །གྲུ་ཆད་བཞི་ལ་དྲག་པོའི་རྫས་རྣམས་དགོད། །ཧོམ་ཤིང་བཙུག་ལ་མཐིང་ནག་དར་གྱིས་དགབ། །དྲག་པོ་བྱད་དགྲོལ་བ་ཡི་འཁོར་ལོ་ཡིན། །འབྱུང་བ་སྟོབས་ཀྱི་འཁོར་ལོ་བཅའ་བ་ནི། །རྒྱ་ཤོག་རྒྱུ་ལ་སྨེ་བའི་རྫས་རྣམས་བསྐུ། །ཐིག་སྐོར་གསུམ་ལྡན་མུ་ཁྱུད་ཟླུམ་པོར་བྱ། །དབུས་སུ་རྒྱ་གྲམ་འཁྲུལ་མིག་བཅུ་གཉིས་ལྡན། །ཡང་ལོགས་བརྒྱད་གཉིས་རྩིབས་དང་
ལྡན། །ཐ་མ་གྲུ་གསུམ་དབྱིབས་ལ་གདུག་པའི་ར་བས་བསྡམ། །དེ་ལ་དགོད་ཅིང་གནས་པའི་རིམ་པ་ནི། །རྒྱ་གྲམ་དབུས་སུ་གནོད་བྱེད་མིང་གཟུགས་རཾ། །རྒྱ་གྲམ་ར་བཞིར་ཡཾ་དང་དེ་བཞིན་མིང་། །འཁྲུལ་མིག་བཅུ་གཉིས་རྩ་བ་དྲག་པོའི་སྔགས། །བཅུ་དྲུག་རྩིབས་ལ་བྱད་འགྲོལ་སྤུ་གྲི་མཚོན། །ཐིག་གཉིས་བར་དུ་མེ་རླུང་ཨ་མུ་ཀ །ཁ་སྦྱོར་བཅས་ལ་བར་སྣང་མཁའ་ལ་བརྡེག །ལྔ་རུ་གཟིར་ལ་མེ་སྦལ་ཐུན་གྱིས་གཟིར། །མྱོས་པས་བྲན་ལ་རྫས་བསྲེག་དམིགས་པ་བསྒྱུར། །གཙང་མས་བཀབ་ལ་སྔགས་ཀྱི་ཐུན་གྱིས་གཟིར། །དྲག་པོ་ཁྱད་པར་བྱད་དགྲོལ་གསང་བའོ། །རྣལ་མ་བཀྲོལ་ན་དུ་བ་ཕྱིང་པ་སྔགས་ཀྱིས་བྲབ། །ཐུན་བྲབ་བསྐུས་ལ་ཆ་ལུགས་རྒྱན་ཅིག་གསལ། །བཙན་ཐབས་དྲག་པོ་ཨེ་ཡི་གའུ་རུ། །དྲག་པོའི་རྫས་བསྲེག་བྲབ་ཅིང་བདུགས་ལ་བསྐུ། །ཕྱག་རྒྱ་བརྟན་པར་བསྐྱེད་ལ་ཀུན་འཇོམས་དྲག་པོ་བརྡེག །ལས་ཀྱི་རྒྱལ་པོ་བྱད་འགྲོལ་སྔགས་ཀྱི་རྒྱ། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་སད་ཀ་ར་ཡ། སརྦ་ཨུ་ནན་གཟེར་ཕྱུང་དུ་རཾ་ཏྲི་ཙ་སྦུར་ནན་སྲོག་ལ་ཧུར་ཡཾ་ཤག །ཡ་མ་ཏ་ར་ཙ་ས་ནཱ་ག་ཀྴི་ཏྲི་སརྦ་དུ་རཾ་ཡཾ་ཐུཾ་ཤག་ཕྱུང་། དེ་ནས་ཡང་བཅོམ་ལྡན་འདས་ཀྱིས་ཟུག་པ་དབྱུང་བའི་སྦྱོར་བ་འདི་གསུངས་སོ། །དུར་ཁྲོད་རས་ལ་འཁོར་ལོ་དྲག་པོ་བྲི། །ཐིག་སྐོར་རིམ་པ་གསུམ་དུ་བསྐོར། །དབུས་སུ་གནོད་བྱེད་མིང་དང་གཟུགས། །འཁྲུལ་མིག་བཅུ་གཉིས་དྲག་པོ་རྩ་བའི་སྔགས། །རྩིབས་ཆེན་བཅུ་གསུམ་སྤུ་གྲི་དྲག་པོ་དགོད། །ངར་བླུད་ཁ་སྦྱོར་ཐོད་པ་དོང་དུ་བཅའ། །དྲག་སྔགས་བརྡེག་པའི་དུས་སུ་གསལ་བ་གསུམ། །གང་དམིགས་ལུས་དང་གནས་ཁང་བསྐོར་ལ་བྲབ། །ཐོད་ཁྲག་ཐུན་ཐིམ་གར་དམིགས་ཟོར་དུ་འཕང་། །མཐའ་རུ་འཁོར་ལོ་སྒྲུབ་ཁང་སྟེང་དུ་བཅའ། །ཐ་ཆུང་མར་ངོར་དྲག་པོ་ལས་དེ་བརྩམ། །རྩ་བའི་སྔགས་དང་གང་འདོད་སྤུ་གྲིར་སྦྱོར། །སྔགས་ཀྱི་རྒྱལ་པོ་གསད་པ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་སད་ཀ་ར་ཡ། སརྦ་དུ་རཾ་དྲི་ཡཾ་འདྲིད་ཕྱུང་སྲོག་ལ་གཟིར་ནན་ཕྱུང་།
ཟུག་པ་མ་ལུས་འབྱིན་པའི་སྦྱོར་བ་ཡིན། །དེ་ནས་ཡང་བཅོམ་ལྡན་འདས་ཀྱིས་ཞེན་པ་བཟློག་པའི་སྦྱོར་བ་འདི་གསུངས་སོ། །དུར་ཁྲོད་རྒྱུ་ལ་འཁྲུལ་འཁོར་བཅའ། །ཐིག་སྐོར་གསུམ་ལྡན་དབུས་གྲུ་གསུམ། །དབུས་སུ་དྲག་སྔགས་གསང་མཛོད་མིང་། །ཕྱི་རིམ་རྩིབས་བཅུ་སྤུ་གྲི་སྦ། །ཕྱི་རིམ་འཁོར་ཡུག་བྷྱོ་དང་མིང་། །ཁ་སྦྱོར་ཐོད་ཆེན་ངར་ལྡན་བཟླས། །ཁྲག་དང་དུག་ཐུན་གང་དམིགས་བཟློག །འཁོར་ལོ་ཐུན་བརྡེག་ལམ་དུ་གཞུག །དབང་པོ་དྲིལ་ཞིང་སྔགས་ཆུས་བསྐུ། །བརྒྱ་ཡིས་རྫོགས་ནས་འཁོར་ལོ་གླང་རུང་གཞུག །ཟུར་ཐུན་མཐའ་རུ་བཀའ་རྟེན་འོག་ཏུ་གནན། །དྲག་པོ་སྔགས་ཀྱི་རིམ་པ་འདི་ལྟ་སྟེ། །ཨེ་ཀ་ཡ་ན་དུན་ཛ་རཾ་སད་ཀ་ར་ཡ། སརྦ་ཤ་ཏྲུཾ་ཨེ་ནན་ཡཾ་འདྲིད་བྷྱོ། མེ་རླུང་སྟོབས་ཀྱི་འཁོར་ལོས་བཟློག་པའོ། །དེ་ནས་ཡང་བཅོམ་ལྡན་འདས་ཀྱིས་གསང་ལམ་དགག་པའི་སྦྱོར་བ་འདི་གསུངས་སོ། །དྲག་པོ་ལས་ཀྱི་སྦྱོར་བ་འདི། །འཁོར་ལོ་མུ་ཁྱུད་བཞི་རུ་བསྐོར། །དབུས་སུ་ཕོ་བྲང་ཟླུམ་པོ་སྙིང་པོ་འབྲུ་དྲུག་དགོད། །ཕྱི་རིམ་འཁྲུལ་མིག་བཅུ་གཉིས་རྩ་བའི་དྲག་སྔགས་དགོད། །ཡང་ལོགས་བཅུ་གཉིས་རྩིབས་ལ་གསང་ལམ་དྲག་སྔགས་དགོད། །རྩིབས་ཆེན་གང་གནོད་མིང་དང་སྦྱར། །འཁོར་ལོ་དྲིལ་ལ་འབྲང་ཆེན་རྭ་རུ་གཞུག །ཁྲི་བརྒྱད་བཟླས་ལ་ལམ་སྲང་ཐེམ་འོག་གནན། །རྒྱུན་དུ་བརྒྱ་བརྒྱ་དུས་དྲུག་ནང་མར་སྤྱད། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཀ་དུན་ཛ་རཾ་ས་ད་ཀ་ར་ཡ། མན་ཏྲ་དུམ་མ་ཧཱ་ར་ག་དུ་རཾ་ཐུཾ་ལི་རྦད།དྲག་པོ་གསང་ལམ་དགག་པ་ཡིན། །དེ་ནས་ཡང་བཅོམ་ལྡན་འདས་ཀྱིས་སྔགས་ཀྱི་དུག་མདའ་ཁོང་ནས་དབྱུང་བ་འདི་གསུངས་སོ། །བཀྲ་མི་ཤིས་པའི་ཐོད་པ་དུར་མ་ལ། །སྤྱི་བོ་ནས་བརྩམས་མུ་ཁྱུད་བཞི་རུ་བསྐོར། །དབུས་སུ་གྲུ་གསུམ་གནོད་བྱེད་ཁྲག་གིས་བྲིས། །དེ་ཡི་ཕྱི་རིམ་འཁོར་ཡུག་གང་གནོད་སྔགས། །ཡང་ལོགས་གདུག་པ་སྦྲུལ་གྱིས་བསྐོར། །ཐ་མ་མེ་རི་ནང་དུ་བསྟན་པ་བྲི། །ཐོད་པ་གླིང་བཞི་པ་ལ་མུ་ཁྱུད་བཞི་རུ་བསྐོར། །དབུས་སུ་དྲེགས་པ་ལྔ་ཡི་སྙིང་པོ་བྲི། །
ཕྱི་རིམ་རྩིབས་བཞི་སྟོབས་ཀྱི་འབྲུ་བཞི་དགོད། །ཡང་ལོགས་རྩིབས་བརྒྱད་རྩ་བའི་དྲག་སྔགས་དགོད། །མཐའ་རྩིབས་བཅུ་དྲུག་མདའ་ཡི་སྤུ་གྲིས་མཛེས། །ཐོད་པ་ཁ་སྦྱར་དུག་སྣ་ཁྲག་སྣས་དགང་། །དྲག་སྔགས་ཁྲི་བདུན་དྲག་པོ་ཐུན་གྱིས་བསྐུལ། །ཕུར་པ་གཉིས་ཀྱིས་གཟུགས་ལ་གཟེར་དུ་དབབ། །སྔགས་ནི་དྲག་ལ་བར་མ་ཆད་པར་བཟླས། །ཐོད་པའི་འཁོར་ལོ་དུག་ཤིང་མེ་ལ་བདུག །མཐའ་རུ་མོན་ཐོད་ཀ་ལི་རཀྟས་དགང་། །གྲི་ཁྲག་དུག་ཆུ་ནམ་གྱི་གུང་ལ་འཕང་། །སྟེང་འོག་སྦྱོར་བ་དཀྱིལ་འཁོར་འོག་ཏུ་གནན། །གདུག་པ་ཐམས་ཅད་ཁོང་ནས་འབྱིན་པའི་སྔགས། །ཨེ་ཀ་ཡ་མ་ཀ་དུན་ཛ་རཾ་སད་ཀ་ར་ཡ། མནྟྲ་གྷུ་ཧྱ་སརྦ་དུཾ་ནན་འདྲིད་ཕྱུང་། དྲག་པོ་ཐོད་པ་མངོན་ཕྱུང་འདིས། །སྲུང་བ་ཀུན་གྱི་རྒྱལ་པོར་བསྔགས་པ་ཡིན། །དེ་ནས་ཡང་བཅོམ་ལྡན་འདས་ཀྱིས་སྲུང་བ་ཐམས་ཅད་བསྟན་པ་འདི་གསུངས་སོ། །དྲག་པོ་སྲུང་བའི་མཐའ་སྡུད་དུ། །ཐམས་ཅད་གཟིར་ཞིང་སྲུང་བ་ཡི། །དྲག་པོ་ལས་ཀྱི་འཁྲུལ་འཁོར་བཅའ། །དུར་ཁྲོད་རྒྱུ་དང་སྦྱོར་བ་དབེན། །མར་གྱི་ངོ་ལ་བྲི་བ་བཅའ། །རང་ཡང་དྲེགས་པའི་སྐུ་རུ་གསལ། །གཞན་ཚོགས་དབང་སྡུད་ལས་ལ་མངག །འཁྲུལ་འཁོར་བང་མིག་ཉི་ཤུ་བརྒྱད། །གསང་མཛོད་མུན་ཁང་དབུས་དང་ལྔ། །མུ་ཁྱུད་འཁོར་ཡུག་བཞི་དང་བཅས། །དབུས་སུ་གྲུ་གསུམ་ལྕགས་མཁར་བཞི། །ཡང་ལོགས་བཞི་གཉིས་བཅུ་དྲུག་མཐའ། །སྲིད་གསུམ་འཆང་བའི་ལྟོ་བར་བཅའ། །ལྕགས་མཁར་རླུང་རི་ཆུན་འཁོར་བཅས། །གསང་མཛོད་མུན་ཁང་མེ་རླུང་འོབས། །མཚོན་ཆ་སྤུ་གྲི་ཐོག་ཆེན་གཟེར། །སྐྱི་འདང་ལས་ཀྱིས་སྡུད་ཅིང་མྱོས། །དེ་ལ་གནས་པའི་རིམ་པ་ནི། །དབུས་ཀྱི་ལྕགས་མཁར་གླིང་བཞི་ལ། །འདྲེན་པ་སྟོབས་ཀྱི་འབྲུ་བཞི་དགོད། །ཕྱི་རིམ་མཚོ་གླིང་ལྕགས་མཁར་བརྒྱད། །དྲག་པོ་རྩ་བའི་འབྲུ་བརྒྱད་དགོད། །ལྕགས་མཁར་བཅུ་དྲུག་དྲེགས་པའི་གནས། །མཚོན་ཆའི་རྒྱལ་པོ་སྤུ་གྲི་དགོད། །ཐམས་ཅད་བསྲེག་ཅིང་སྟོབས་ཀྱིས་གནན། །དྲག་ཏུ་སྦྱོར་བས་
གདུག་རྩུབ་འབྱིན། །སྲོག་དབུགས་སྡུད་ཅིང་དྲག་པོར་གནོན། །རང་ངམ་སྲོག་ནས་གང་དམིགས་འདྲེན། །ནུས་པ་འདྲེལ་ཞིང་སྦྱོར་བ་གཅོད། །དེར་བཞག་སྟོབས་དང་སྤུ་གྲིའི་གནས། །མཚོན་ཆའི་ནུས་པ་སྟོབས་དཔག་མེད། །གསང་མཛོད་ལྔ་ལ་དམིགས་པའི་མིང་། །བསྡུས་ལ་ཁ་སྦྱར་བཞི་ཡིས་བརྡེག །དབེན་གནས་གསུམ་དུ་གཟིར་ཞིང་བསྐུལ། །དྲག་པོ་གནམ་ས་བར་སྣང་སྦྱར། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཡ་མ་ཧེ་རག་ཤ་དུན་སད་ཀ་ར་ཡ། སརྦ་ཨི་ནན་འདྲིད་ཕྱུང་ཙིཏྟ་ཁཾ་ཤག་སྲོག་གཟིར་སྦུར་ནན་རྦད་ཡ། དྲག་པོ་བསྲུང་བ་ཀུན་གྱི་མཆོག །སྦྱོར་བ་ཐམས་ཅད་འདྲིལ་ཞིང་འགྲུབ། །དེ་ནས་ཡང་བཅོམ་ལྡན་འདས་ཀྱིས་ལས་ཐམས་ཅད་ཀྱི་མཐར་རྗེས་གཅོད་ཀྱི་སྦྱིན་བསྲེག་འདི་གསུངས་སོ། །དྲག་པོའི་སྦྱོར་བ་སྲེག་པའི་ལས། །གང་གནོད་ས་ལ་མཎྜལ་ཁྲག་གིས་བྱུག །དབུས་སུ་གྲུ་གསུམ་ཁ་ཁྱེར་གསུམ་དང་ལྡན། །ཕྱི་ནང་ཆག་གང་མཛུབ་གང་དེ་བཞིན་འཕགས། །འཁྲུལ་མིག་བཅུ་གཉིས་རྩིབས་ཆེན་ཉི་ཤུ་གཉིས། །མུ་ཁྱུད་ཟླུམ་པོར་བྷནྡྷ་ལྔ་གཉིས་གཅིག །ཐ་མ་མེ་རི་རཾ་དང་བཅས་པའོ། །དེ་ལ་དགོད་ཅིང་གནས་པའི་རིམ་པ་ནི། །དབུས་སུ་གང་དམིགས་གཟུགས་ལ་ཁྲུ་གང་ཧོམ་ཤིང་གཟུག །ཁ་ཁྱེར་ཟླ་གམ་གཟུགས་བརྙན་མེ་རི་རྩང་། །འཁྲུལ་མིག་བཅུ་གཉིས་དྲག་པོ་རྩ་བའི་སྔགས། །ཡང་ལོགས་མཚོན་ཆ་སྤུ་གྲི་སྲེག་པའི་སྔགས། །མུ་ཁྱུད་བནྡྷར་སྦལ་སྦྲུལ་ཉ་ཡི་ཤ །ཤ་ཆེན་ཚ་བ་དུག་གི་རི་ལུ་བརྒྱ། །བྲུན་གསུམ་ཚིལ་གསུམ་དུག་ཆུ་འོ་མ་ཁྲག །སྔོ་སྣ་ཆང་དང་མར་ནག་བདུག་རྫས་དགོད། །ཞིང་རས་རྒྱུ་ལ་གོང་བཞིན་བྲིས་ལ་བསྐུལ། །བདུན་ནམ་དགུ་རུ་དམོད་སྔགས་བཟླས་ཤིང་བསྐུལ། །ཕོ་ཉས་མཚོན་བརྡེག་དྲག་པོའི་ལས་ལ་བསྟབ། །བསྐུལ་དང་དྲག་སྔགས་བཅུ་ཡིས་བསྲེག་རྫས་བསྟབ་ཅིང་དབུལ། །གང་དམིགས་བདུག་ལ་གཙང་མས་ཁྲུས་བྱས་དགབ། །ཐུན་རྗེས་ཤུལ་དུ་བརྣག་པའི་ཟོར་ཐུན་དབབ། །འཁོར་ལོ་ཐོད་པ་སེང་གེའི་ཁོག་པར་གནན། །
ཕྱག་རྒྱ་ཆེན་པོ་ལུས་དབང་སྲུང་བའི་མཆོག །དྲག་སྔགས་བསྲེག་པའི་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་ཡ་མ་རཀྴ་སད་ཀ་ཡ། ས་ནཱ་ག་དུ་རཾ་ཏྲི་ཙ་དུ་མེ་ཨུ་ནན། གཟེར་ཕྱུང་། སྲོག་ལ་ཧུར། ཙིཏྟ་དྲེང་ཤག་རམ། མྱོག་ཐུམས་རྦད། བག་མེད་སྦྱོར་བ་ཀུན་འཇོམས་ཡིན། །དྲག་སྔགས་ཡན་ལག་དུ་མ་ཀུན། །སྦྱོར་བ་གང་བརྩམས་གཅིག་གིས་འགྲུབ། །སྦྱོར་བ་བསྟུད་ལ་བརྩམ་ན་ཉེ། །ཡེ་ཤེས་ཐིག་ལེ་འོད་དང་སྦྱར། །དྲག་སྔགས་མངོན་དུ་ཕྱུང་བའི་རྒྱུད་ལས། གསང་བའི་སྦྱོར་བ་བསྟན་པའི་ལེའུ་སྟེ་ལྔ་པའོ།། །།དེ་ནས་ཡང་བཅོམ་ལྡན་འདས་ཀྱིས་ཡང་གསང་མཆོག་གི་སྦྱོར་བ་འདི་གསུངས་སོ། །སྦྱོར་བའི་རྩ་བ་རྣམ་པ་གཉིས། །གསད་པ་མཆོག་དང་གསོ་བའི་ལས། །གསད་པའི་ལས་ནི་བཞི་གཉིས་ལྡན། །དེ་བཞིན་གསོ་བ་བཞི་རུ་བཀོད། །ཁྱད་པར་བཅུ་གཉིས་སྦྱོར་བའི་མཆོག །ལས་གསང་ཐབས་གསང་བགྲོད་པ་ཐོབ། །གསད་པ་སྔོན་འགྲོ་འདི་ལྟ་སྟེ། །བྱིན་ཆེན་བདེ་བའི་གནས་མཆོག་ཏུ། །གསང་བ་མཆོག་གི་སྦྱོར་བ་བརྩམས། །བྷི་ལའི་ཁོང་འདུས་ཁོང་དྲེག་ཅན། །ཧ་ལ་ནག་པོ་ཙ་མ་དཱི། །བེ་ག་ཏ་ཡི་འཇིག་རྟེན་ན། །ཡ་མ་རཀྴ་བདེ་བའི་ཀློང་། །སྒྱུ་མའི་ཕུང་པོ་གནས་སྦྱངས་ལ། །རིན་པོ་ཆེ་ཡི་རྒྱལ་སར་འདོན། །ཐུགས་ཀྱི་སྙིང་པོ་གཉིས་མེད་འཕང་། །གཞན་ཚོགས་ལྷར་བསྐྱེད་ཚོགས་ལ་རོལ། །བདག་དབང་བདེ་བ་ཐོབ་ཅིང་བགྲོད། །དེ་ཡི་སྦྱོར་བ་འདི་ལྟ་སྟེ། །འདུལ་ཁྲིམས་ཉམས་པའི་གོས་བླངས་ལ། །རྡོ་ཕྱེ་ལྕགས་ཕྱེ་ཟངས་ཕྱེ་དུག་ཆུ་བསྐུ། །ཆ་གཉིས་བྱས་ལ་ཐིག་གདབ་བརྩམས། །ཟིལ་གནོན་ཕྱག་རྒྱས་དཔང་གཟུག་བརྗིད། །དྲག་སྔགས་དམོད་པ་སྟོང་དང་སྦྱར། །ཐ་ཆུང་བཞི་ཡི་མར་ངོ་ལ། །ཉི་ཤུ་དྲུག་ནས་འཁྲུལ་འཁོར་བཅའ། །དབུས་ནས་ཐིག་སྐོར་བཞི་རུ་བསྐོར། །དབུས་ཀྱི་ཕོ་བྲང་བདེ་གནས་སུ། །སྐུ་ཡི་གཟུགས་བརྙན་བྲིས་ལ་མིང་། །ཟླ་གམ་གསུམ་ལ་སྲུང་བའི་ལྷ། །ཕྱི་རིམ་བཅུ་གཉིས་རྩ་བའི་སྔགས། །ཡང་ལོགས་འཁོར་ཡུག་འབོད་རྦད་གསད། །བྲི་དང་ཕྱི་ནང་གོང་མ་བཞིན། །ཐ་མའི་འཁྲུལ་མིག་བཅུ་དྲུག་ལ། །གསོད་ཅིང་གནོན་པའི་
སྤུ་གྲི་དགོད། །སྲིད་པའི་རུས་སྦལ་ལྟོ་ན་གནས། །དུག་དང་ཁྲག་གིས་ངར་བླུད་ལ། །རྗེ་འམ་ཡུལ་སྲུང་ཐོད་པར་གཞུག །རྩང་བཅས་དོང་དུ་མཐིང་ནག་དགབ། །མི་དམིགས་ངང་ལས་ཡེ་ཤེས་ཀྱི། །རོལ་པའི་ཕྱག་རྒྱ་ཆེན་པོར་འཕོ། །དྲག་ཏུ་བསྐུལ་གྱིན་ཤུགས་ཀྱིས་དྲངས། །མཁའ་ཁྱབ་རྡོ་རྗེའི་སྦྱོར་བ་བསྡེབ། །དམོད་པའི་ལུས་ལ་སྤུ་གྲི་གདགས། །མིང་རུས་མི་སྦྱར་ཁམས་ལ་སྤྱད། །རྒྱ་མདུད་བརྩེགས་པའི་ལྟོ་རུ་གནན། །ཡང་ན་དཀྱིལ་འཁོར་ཆེན་པོ་ཡི། །འོག་ཏུ་བཀའ་ཡི་བྱིན་བསྡུས་ལ། །རིན་པོ་ཆེ་ཡི་ལྟོ་རུ་གནན། །བཤགས་དང་དགེ་བ་རྒྱུན་མི་འཆད། །མཚན་བཟང་དུས་དྲུག་རྒྱུན་མི་གཅད། །འབྱུང་བ་ལྔ་ཡི་མདངས་བསྡུས་ལ། །རིན་པོ་ཆེ་ཡི་རྒྱལ་སར་བརྟན། །རྒྱུ་ཡི་སྙིགས་མའི་སྲོག་བསྡུས་ལ། །དབུས་ཀྱི་འབུབ་གནས་གཟུགས་ལ་དབབ། །ས་དང་མེ་དང་ཆུ་དང་རླུང་། །ནམ་མཁའི་དབྱིངས་ཀྱི་ཁོངས་སུ་གཞུག །དམིགས་པ་དག་པའི་ཚད་མས་གདོན། །རིག་པའི་དྲག་སྔགས་འདི་ལྟ་སྟེ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། གུ་རུ་ནྲྀ་སྲོག་ལ་མྱོག་ཐུམ་རིལ་མཱ་ར་ཡ་རྦད། སྲོག་སྟྭཾ་བྷ་ཡ་གཟིར་ནན། སྲོག་ལ་ཐུཾ་རིལ་ཐུན་མྱོག་བྷྱོ། བགྲོད་པ་མེད་པའི་ཕྱག་རྒྱར་བསྟན། །སེང་གེ་ཁོག་བཤིག་སྦྱོར་བའི་མཆོག །གཞན་ཡང་དྲག་པོའི་སྦྱོར་བ་ནི། །དུར་ཁྲོད་གནས་ནས་དཔའ་བོ་ཡི། །ཞིང་སོགས་རས་དང་རྒྱུ་བླངས་ལ། །སྦྱོར་བ་གསུམ་དང་ལྡན་པར་བྱ། །དེ་ལ་གཅོད་པའི་འཁོར་ལོ་བྲི། །དབུས་ནས་ཐིག་སྐོར་ལྔ་རུ་བསྐོར། །དབུས་དང་འཁྲུལ་མིག་ལྕགས་མཁར་བཞི། །མཚམས་བཞིར་ཞིང་གི་ཀ་བ་བཞི། །ཡང་ལོགས་མིག་བརྒྱད་མཚམས་བརྒྱད་སྤྲུལ། །བཞི་པ་འཁོར་ཡུག་བསྲུང་བའི་གནས། །ཐ་མ་འཁྲུལ་མིག་ཉི་ཤུ་ལ། །གཅོད་ཅིང་གནན་པའི་ཡི་གེ་གནས། །དབུས་དང་ཟླ་ཁམ་བསྒྲུབ་བྱའི་གནས། །བཅུ་གཉིས་འཁྲུལ་མིག་རྩ་བའི་སྔགས། །འཁོར་ཡུག་ནང་དུ་བསྙེན་པའི་སྔགས། །བར་དུ་རྦད་སྔགས་བསད་སྔགས་མཐར། །ཕྱི་རུ་མགོ་བསྟན་བརྒྱ་
བརྒྱ་བསྐུལ། །བསྙེན་པ་ཁྲི་ཡིས་བོས་ལ་གཟིར། །སྔགས་ནི་མེ་དབལ་འཁོར་ལོ་མཚོན། །འཁོར་ལོ་མེ་དབལ་མཚོན་ཆེན་གྱིས། །ཞིང་བཅུ་སྡིག་ཅན་བསྲེག་ཅིང་འཇོམས། །འཁྲུལ་མིག་རྩ་བ་ཉི་ཤུ་གཉིས། །གསང་མཛོད་མུན་ཁང་གནམ་ལྕགས་འབར། །རུས་སྦལ་ལྟོ་ན་མཚོན་ཆ་མེ། །འོད་ཀྱི་གོང་བུས་འཁྲུག་ཅིང་གསོད། །དྲག་པོ་སྔགས་ཀྱི་གཅོད་པའོ། །ཨེ་ཀ་ཧེ་དུན་ཡ་མ་ཙ་ཡ། ནྲྀ་སྲོག་ལ་དུན་རྨུགས་ས་མ་མྱོག་མཱ་ར་ཡ་རྦད། སྲོག་གཟིར་སྟྭཾ་བྷ་ཡ་ནན། སྲོག་ལ་བཾ་རིལ་ཐུན་བྷྱོ། སྔགས་ཀྱི་འོད་དང་འབར་བའི་མེ། །གདུག་པ་རང་གཤེད་རང་ལ་འབེབས། །མཚོན་ཆ་ངར་བླུད་མེ་ལ་བདུག །ཁྲི་བཞིས་སྦྱོར་བས་དྲིལ་ལ་འཕང་། །ཐོན་ནས་སྟག་གི་འཛུམ་པར་གནན། །དྲག་པོ་རྡོ་རྗེ་དམེ་ཐབས་ཡིན། །གཞན་ཡང་གསད་པ་དྲག་པོ་ལས། །ཤོག་གུ་གྲུ་བཞི་མཛུབ་གང་ལ། །སྨེ་བ་ལྔ་ཡིས་ཐང་པ་བྱ། །ནི་རང་སུ་ཡིས་སྐྱ་བཅད་ལ། །ཐིག་སྐོར་མུ་ཁྱུད་རིམ་པ་བཞི། །གྲུ་གསུམ་མིང་རུས་ཟླ་ཁམ་ལྷ། །འཁྲུལ་མིག་བཅུ་གཉིས་རྩ་བའི་སྔགས། །མུ་ཁྱུད་ཟླུམ་པོར་འབོད་རྦད་བསད། །རྩིབས་མཆན་བཅུ་གཉིས་གཅོད་ཅིང་གནོན། །མྱོས་པ་སྟོབས་དང་བྲལ་བ་ཡི། །དྲག་པོ་སྟོབས་ཀྱི་འཁྲུལ་འཁོར་ཡིན། །དོན་ལྡན་སྦྱོར་བ་སྔགས་པ་འཇམས། །རབས་ཆད་ནག་པོའི་ཐོད་པར་གཞུག །མུན་པའི་གླིང་དུ་གནན་པར་བྱ། །དྲག་པོ་མཚོན་ཆ་འདི་ལྟ་སྟེ། །ཨེ་ཀ་ཧེ་མ་ཡ་དུན་ཙ་ཡ་ཁྲག་མ་སྙིང་ར་དགྲ་བོའི་སྲོག་ལ་མཱ་ར་ཡ་རྦད། དགྲ་བོའི་སྲོག་སྟམ་བྷ་ཡ་ནན། དགྲ་བོའི་སྲོག་ལ་ཐུན་རྦད་རྨུག་བྷྱོ། མཚོན་ཆའི་རྒྱལ་པོ་འཁོར་ལོ་ཅན། །གཅོད་པ་ཀཾ་པ་སྤུ་གྲིའི་ཚུལ། །གཟིར་སྟོབས་ལྡན་པས་བསམ་དཔག་དཀའ། །འཇོམས་པའི་སྟག་མོ་ཁ་འཐབ་ཡིན། །གཞན་ཡང་དྲག་པོའི་སྦྱོར་བ་ཉིད། །རྒྱ་ཤོག་གྲུ་བཞི་ཆ་གཉིས་ལ། །སྨེ་བ་ལྔ་དང་ཚ་བ་བསྐུ། །དབུས་ནས་མུ་ཁྱུད་བཞི་རུ་བསྐོར། །རུས་སྦལ་ཁྲ་བོའི་ལྟོ་རུ་བྲི། །དབུས་སུ་འཁྲུལ་མིག་བཅུ་གཉིས་ལ། །མིང་རུས་རྩ་བའི་དྲག་སྔགས་དགོད། །
ཡང་ལོགས་བཅུ་དྲུག་སྤུ་གྲི་དགོད། །ཁ་སྦྱོར་ཐོད་པ་རྩང་བཅས་དང་། །ལྷ་བསྒོམ་སྔགས་བཟླས་དྲག་ཏུ་བསྐུལ། །བདུན་དུ་བརྩམས་ལ་ཐོད་པ་བཅའ། །མུ་ཁྱུད་འབོད་རྦད་གནན་སྔགས་བསྐུལ། །ཁྲི་སྟོང་བརྒྱ་བར་རང་གཤེད་དབབ། །མཐའ་རུ་སྲིན་མོའི་སྒྲོམ་དུ་མནན། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཧེ་ཡ་མ་དུན་ཙ་ཡ་ཁྲག་རཾ་སྙིང་དགྲ་བོའི་སྲོག་ཧུར་ཐུམས་མཱ་ར་ཡ་རྦད། སྲོག་སྟྭཾ་བྷ་ཡ་ནན། སྲོག་ལ་ཐུན་རྦད། རྨུགས་བྷྱོ། དྲག་པོ་སེང་གེའི་འཆི་སྦྱོར་ཡིན། །གཞན་ཡང་གསོད་པ་དྲག་པོའི་ལས། །རིགས་མིན་གཞན་གྱི་སྦྱོར་བ་གཞོམ། །ཕོ་ཉ་གཟིར་ཞིང་སླར་བཟློག་པ། །དྲག་སྔགས་ནུས་པས་གཞན་དབང་སྡུད། །མུ་སྟེགས་ཅན་གྱི་ལུས་སྲོག་འབྲལ། །དྲེད་མོ་རལ་པ་གསིག་པ་ཡི། །ཞབས་མས་འཁོར་ལོའི་རྒྱུ་བྱས་ལ། །ས་དཀར་ཅོང་ཟི་རུས་པ་བསྐུ། །དབུས་ནས་ཐིག་སྐོར་ལྔ་རུ་བསྐོར། །དབུས་སུ་མིང་རུས་ཟླ་ཁམ་ལྷ། །མུ་ཁྱུད་གདུག་པ་འཁྲུལ་མིག་སྔགས། །མཇུག་ནས་བཟློག་ལ་སྤུ་གྲི་སྦྱར། །ཕྱི་རིམ་རྡོ་རྗེ་རྒྱ་གྲམ་ལ། །གཡས་གཡོན་མགོ་ཕྱོགས་མཇུག་མ་ལ། །འཕེན་པ་སྟོབས་ཀྱི་སྔགས་གཞི་དགོད། །རང་སྔགས་མིང་བཅས་བསྐོར་བ་བྲི། །ཕྱི་རིམ་རྩིབས་ཆེན་བཅུ་གཉིས་ལ། །གཅོད་ཅིང་གནོན་པའི་སྤུ་གྲི་དགོད། །ངག་དིག་གླ་གློའི་ཐོད་པར་གཞུག །སྦྱོར་བ་ཀུན་ལྡན་བདག་དབང་སྡུད། །སྔགས་པ་སྟོབས་ཀྱི་འོག་ཏུ་གནན། །དྲག་སྔགས་སྦྱོར་བ་འདི་ལྟ་སྟེ། །ཡ་ཙ་མ་ར་ཁྲག་སྙིང་མ་ཡ་དུན་ཧེ་ཀ་ཨེ་སྲོག་ལ་དུན་རྨུག་རྦད་བྷྱོ། སྲོག་ལ་ཁཾ་ཤིག་བྷྱོ། སྲོག་ལ་དྲེང་ཤིག་བྷྱོ། སྲོག་ལ་ཡ་ཤིག་བྷྱོ། དགྲ་བོའི་སྲོག་ལ་གཟིར་ཁམ་ཧུར་ཐུཾ་ཡཾ་ཤིག་མཱ་ར་ཡ་རྦད། སྲོག་སྟྭམ་བྷ་ཡ་ནན། ཕོ་ཉ་རང་གཤེད་དབབ་པ་ཡིན། །དྲག་པོ་ལས་ཀྱི་སྦྱོར་བ་ཡིན། །གཞན་ཡང་གསང་བའི་རིམ་པ་ནི། །ནི་རང་ལྤགས་ཤུན་ཁྲུ་གང་ལ། །སྦྱོར་བའི་རྒྱལ་པོ་གསུམ་སྦྱོར་ལ། །མདོག་དང་ལྡན་པར་སྐྱ་གཅད་བྱ། །ཞིང་གི་སྲད་བུས་ཐིག་གདབ་བརྩམ། །དབུས་ནས་ཐིག་སྐོར་ལྔ་རུ་བསྐོར། །ཐིག་མདུད་རྒྱ་
གྲམ་འཁྲུལ་མིག་བཞི། །ཕྱོགས་བཞིར་འཁྲུལ་མིག་བཅུ་དྲུག་གཅོད། །མཚམས་བཞིར་གསང་མཛོད་དྲག་པོའི་གནས། །ཡང་ལོགས་མཚོན་ཆ་ཉི་ཤུ་གཅོད། །འཁྲུལ་མིག་བཅུ་གཉིས་རྩ་བའི་སྔགས། །ཕྱི་རིམ་འཁྲུལ་མིག་བཞི་བཅུ་གཉིས། །ལྕགས་མཁར་འཁྲུལ་མིག་བརྒྱ་བཅུ་དྲུག །གསང་མཛོད་མཚམས་བཞི་དབུས་དང་ལྔ། །དབུས་མཚམས་བསྒྲུབ་བྱ་ཚེ་སྲོག་སྡུད། །འཁྲུལ་མིག་བཅུ་དྲུག་སྤུ་གྲི་མཐུན། །ཡང་ལོགས་བཅུ་གཉིས་རྩ་བའི་སྔགས། །འཁྲུལ་མིག་བཞི་བཅུར་གབ་པའི་སྔགས། །གཅོད་ཅིང་འཇོམས་པའི་སྤུ་གྲི་ལྡན། །ལྔ་པ་མཐའ་ཡི་བཞི་བཅུ་ལ། །ཐུན་བཞི་དབང་སྡུད་གསད་པའི་གནས། །དྲག་སྔགས་རྒྱལ་པོ་སྐབས་དང་སྦྱར། །ཁ་སྦྱར་སྔགས་པ་ཙ་ལོའི་མགོར། །རྩང་བཅས་ལྷ་བསྒོམ་དམོད་པ་བཟླས། །ཐོན་ནས་རུ་བཞི་འཁྱིལ་པར་གནན། །དྲག་སྔགས་གནམ་ལྕགས་སྦྱོར་བ་ཡིན། །དེ་ཡང་བཅོམ་ལྡན་འདས་ཀྱིས་རང་གཤེད་རང་ལ་དབབ་པའི་སྦྱོར་བ་འདི་གསུངས་སོ། །ཡང་གསང་འཕྲུལ་གྱི་སྙིང་པོ་མཆོག །བདེ་བ་གནས་ཀྱི་མཆོག་ལྡན་དུ། །འདུས་བྱས་ལ་སོགས་དགེ་སོགས་བརྩམ། །སྔོན་དུ་འགྲོ་བའི་ཆོས་དེ་བཞིན། །ཕྱག་རྒྱ་ཆེན་པོ་བསྟན་པ་ཡིན། །སྙིང་པོ་དང་བཅས་གསལ་བརྟགས་པ། །རྡོ་རྗེ་ཆུ་བོའི་བཀའ་མི་བཅག །རྒྱུ་ལ་ཚ་བས་ཁ་དོག་དབྱུང་། །ཚངས་པའི་ཐིག་གཉིས་རྒྱ་གྲམ་གདབ། །རུ་ཐིག་གཉིས་ཏེ་རེ་མིག་སྐྱོང་། །ཐིག་སྐོར་མུ་ཁྱུད་ལྔ་དང་ལྡན། །དབུས་སུ་རྩ་བའི་འཁྲུལ་མིག་བརྒྱད། །ཕྱོགས་བཞི་འཁྲུལ་མིག་གསུམ་གསུམ་དྲངས། །མཚམས་ཀྱི་གསང་མཛོད་མུན་ཁང་བཞི། །གསུམ་པ་ལས་ཀྱི་རྡོ་རྗེ་ལ། །རྒྱ་གྲམ་སྦྱོར་བ་བཞི་དང་ལྡན། །བཞི་པ་མཚོན་ཆ་བདུན་གཉིས་རྩིབས། །ལྔ་པ་རིགས་བཞི་ར་བས་བསྐོར། །འཁོར་ལོ་དམ་པ་ཀུན་དྲིལ་བའོ། །དེ་ལ་དགོད་པའི་འབྲུ་རྣམས་ནི། །དབུས་སུ་གུ་རུ་ཕྱག་རྒྱའི་སྐུ། །བརྗིད་པའི་ཚུལ་གྱིས་སྐྱིལ་ཀྲུང་བཞུགས། །གཞན་ཡང་སྤྱི་གཙུག་གཅེར་བུ་རིང་། །ཟླ་གམ་མིང་རུས་གསང་མཛོད་བཞི། །
བླ་སེམས་འཆང་བ་གཤེད་ཀྱི་མཛོད། །ཕྱོགས་བཞི་འཁྲུལ་མིག་བཅུ་གཉིས་ལ། །མགོ་ཕྱོགས་མེ་རླུང་ནམ་མཁའི་འབྲུ། །མཇུག་མར་བྱ་ཁྱུང་བདུད་མོ་དྲེགས། །གཡས་སུ་བདུད་དང་གཤིན་རྗེ་ཁྱུང་། །གཡོན་དུ་ལས་བྱེད་མ་མོ་སྲིན། །འབྲུ་གསུམ་སྦྱོར་བ་བཅུ་གཉིས་ལུས། །གཡས་གཡོན་རྣལ་མ་དེ་བཞིན་བཟློག །རྒྱ་གྲམ་བཞི་ཡི་སྙིང་པོ་ལ། །འོག་ཕྱོགས་སྲོག་དབྲོག་ཐམས་ཅད་འགུགས། །མཇུག་མ་ལྷ་དང་ལུས་སྲོག་འབྱེད། །རྭ་གཡས་མཁའ་འགྲོ་གཟན་ལ་འབེབས། །གཡོན་གྱི་རྭ་ལ་གཟིར་བའི་སྔགས། །འབོད་རྦད་གསད་དང་དེ་བཞིན་སྦྱར། །སྒྲུབ་དང་ཐུན་མོང་གོ་རིམ་སྦྱར། །རྩིབས་ལ་ལུས་སྲོག་གཅོད་པ་ཡི། །ཡང་གསང་སྤུ་གྲི་བཅུ་གཉིས་མཆོག །ཐམས་ཅད་སྦྲུལ་གྱི་ར་བས་བསྐོར། །ཁ་སྦྱར་དུར་མ་དོང་དང་ཆང་། །རྟེན་བཞི་ཁྱུ་མཆོག་རྭ་དང་ལྔ། །དང་པོ་སྲོག་དབྲོག་བསྙེན་པས་དགུག །གཉིས་པས་གཟིར་ཞིང་རང་དབང་བསྡུ། །ནུབ་གསུམ་པ་ལ་རྦད་ཅིང་བཟློག །བཞི་པས་རང་གཤེད་བདུད་དུ་དབབ། །ལྔ་པས་རྩ་སྲོག་གཅད་ཅིང་དབྱེ། །གཅིག་གིས་གཟིར་ལ་རྟེན་ཀུན་བཅའ། །ཁྲི་ཡིས་ཀླུ་གཟིར་འཁྱིལ་པར་བརྟག །རྐང་འདོམ་ཕྱོགས་བཞིར་ཐོད་མཁར་གདབ། །དབུས་སུ་ཁྱུ་མཆོག་ཁྲུ་དོར་གནན། །དྲག་སྔགས་ཁྲི་ཚོར་རྔམ་པར་བཟླས། །དྲག་སྔགས་སྦྱར་བ་འདི་ལྟ་སྟེ། །ཨེ་ཀ་ཡ་མ་ཧེ་དུན་སྙིང་ཁྲག་ར་མ་ཙ་ཡ། ཡ་མ་ཏ་རཾ་དུན་དུན་སརྦ་ཙིཏྟ་དྲེང་ཤག་ཀ་དུན་རཀ་ཤག །ཨེ་ཡ་མ་སྲོག་ལ་དུན་དུན་ཛ་ཛ། ཨེ་ཛ་རཾ་ཡ་མ་ཙིཏྟ་དྲེང་ཤག་བྲ་བེ་ཤ་ཡ་སྲོག་ལ་ཐུཾ་རིལ་ཡ་མ་ཙིཏྟ་དགྲ་བོའི་སྲོག་ལ་དུན་རྨུགས་ཐུན་བྷྱོ། སརྦ་ཙིཏྟ་རུ་ཐུཾ་སྦུར་ནན་གཟེར་ཐུཾ་ཏྲིག་ནན། ཁཾ་ཤག་ཐུན་བྷྱོ། དགྲ་བོའི་སྲོག་ལ་དྲེང་དྲེང་། ཙིཏྟ་དུན་རྨུགས་ཡཾ་ཤག་མཱ་ར་ཡ་རྦད། གནན་པ་མི་ཤིགས་སྟྭཾ་བྷའི་མཆོག །རུ་བཞི་རྡོ་རྗེའི་རྒྱ་གྲམ་ཡིན། །དེ་ནས་ཡང་བཅོམ་ལྡན་འདས་ཀྱིས་གསོ་བའི་སྦྱོར་བ་འདི་གསུངས་སོ། །དེ་དག་སྦྱོར་བ་བཞི་ཡིན་གྱི། །དྲག་པོ་ལས་ཀྱི་མཐའ་རྒྱ་རུ། །མཆོད་རྟེན་དཀར་ནག་སྦྱོར་བ་དང་། །བཀའ་རྟེན་བཀའ་ལ་སྲུང་བ་དང་། །
གནོད་བྱེད་མ་ལུས་དབྱེ་བའི་ཕྱིར། །དྲག་པོའི་སྙིང་གཟེར་བཅུ་གཅིག་བསྔགས། །དེ་དག་བརྟན་པར་བྱ་བའི་ཕྱིར། །ཤི་ཕྲད་དྲག་པོ་ཀུན་འཇོམས་བསྔགས། །སྲུང་བ་ཀུན་གྱི་རྒྱལ་པོ་རུ། །ཕྱག་རྒྱ་བསམ་གཏན་མཆོག་ཏུ་གསུངས། །མཐའ་རུ་རྗེས་གཅོད་སྦྱིན་བསྲེག་བྱའོ། །དེ་དག་རྒྱས་པ་འདི་ལྟ་སྟེ། །དུར་ཁྲོད་ས་ལ་སོགས་པ་ལ། །རྫས་བཟློག་ནག་པོའི་བཀའ་རྟེན་བཅའ། །གདན་ཁྲི་གླང་པོ་སྦྲུལ་གྱི་བརྡའ། །བང་རིམ་བཞི་ལ་སྟག་དང་གཟིག །དོམ་དང་སེང་གེ་འདེབས་ཤིང་རྔམ། །བུམ་པ་དྲག་པོ་རྩིབས་བཅུ་གཉིས། །འཁོར་ལོ་མཚོན་ཆ་འབྲུག་གིས་འདེགས། །ཆར་ཁེབས་བྱ་ཁྱུང་གདུག་པ་ཟ། །དྲེགས་པ་ཐམས་ཅད་ཟིལ་གྱིས་གནོན། །དེ་ལ་དགོད་ཅིང་གནས་པ་ནི། །འཁོར་ལོ་ཨེ་སྟེང་རྫོགས་པའི་འབྲུ། །བུམ་པའི་རྩིབས་ལ་རྩ་བའི་སྔགས། །བང་རིམ་དང་པོ་གབ་པ་ཡི། །གསད་པ་བཤིག་པའི་སྔགས་ཀྱིས་མཛེས། །གཉིས་པར་རྒྱན་གྱི་ཡིག་འབྲུས་མཛེས། །གསུམ་པར་མགོ་དགུའི་དྲག་སྔགས་དགོད། །བཞི་པར་དབང་སྡུད་སྔགས་དང་ལྡན། །དམིགས་པའི་སྙིང་པོ་བརྡ་མིང་སྦྱར། །ཁམས་དང་བཅས་ལ་དེ་བཞིན་སྦྱར། །གདན་ཁྲིར་ཐོད་པ་བརྣག་པ་བསྡུ། །ཡང་གསང་གཟིར་དང་སྙིང་གཟིར་དགོད། །སྙིང་པོ་འབྲུ་རེ་མིང་དང་བཅས། །རྒྱ་ཤོག་གྲོ་ག་དུག་ཁྲག་གཞུག །སྐབས་དང་སྦྱར་ལ་ལས་ཀུན་བྱ། །སྟོབས་ཆེན་དྲེགས་པ་དང་པོར་གནན། །བདུད་དང་རྒྱལ་པོ་བར་དུ་གནན། །མི་རིགས་གདན་ཁྲི་ཐོད་པར་གནན། །སྙིང་པོ་འབྲུ་རེ་མིང་སྲོག་ཀུན། །གྲོ་ག་མངལ་ཁྲག་དུག་གིས་བྲིས། །བརྒྱ་བརྒྱ་སྐབས་དང་སྦྱར་ལ་ལས་ཀུན་བརྩམ། །བརྒྱ་བརྒྱ་མཚོན་ཆ་བསྣོལ་མར་བརྡེག །མེ་ཏོག་དང་བཅས་ལྟ་བུར་བརྟག །བསྐོར་ཞིང་བསྲུང་དང་བསད་པའི་ལས་ལ་ཤིས། །གཞན་ཡང་རྫས་ལོག་བཟློག་ཀྱང་དཀར་པོར་བཅའ། །དུར་ཁྲོད་ཕུང་ས་གཡུལ་བཀྱེ་ས། །དུག་ཆུ་མནོལ་ཁྲག་གདུག་པའི་ཤ །ཚ་བ་སྨེ་བ་ལྡན་བྱས་ལ། །ཁྲུ་གང་རུས་སྦལ་ཆུ་སྲིན་འབྲུག །སྦྲུལ་དང་ཕག་མོ་སྡིག་པས་འདེགས། །བུམ་པ་མཚོན་ཆ་དྲུག་གཉིས་རྩིབས། །དྲག་པོ་ནང་དུ་ཨེ་ཡི་
དབྱིངས། །འཁོར་ལོ་བདུན་བརྩེགས་དྲེགས་པས་འདེགས། །ཆར་ཁེབས་གོང་བཞིན་གདུག་པ་ཟ། །དུག་ཆུ་ཐལ་ཆེན་ས་དཀར་གྱིས། །མདོག་དང་ལྡན་བྱས་དྲག་སྔགས་དགོད། །བུམ་པར་ཚེ་བདག་ཡབ་ཡུམ་གསལ། །ཕྱོགས་བཞིར་བླ་འགུགས་མོན་པ་བཞི། །ཁྲི་འཕང་འཆི་བདག་བདུད་ཀྱི་ཚོགས། །གདན་ཁྲིའི་འོག་ཏུ་བརྣག་པ་བསྡུ། །མཎྜལ་དབུས་སུ་ཞག་ལྔ་བཟླས། །བསྐོར་བ་རྣལ་དང་ཕྱིན་ཀ་ལོག །བསྲུང་དང་གསད་པའི་སྐབས་སུ་བྱ། །མཆོད་རྟེན་སྣང་སྟོང་ཡེ་ཤེས་སྐུ། །གསལ་བར་བྱས་ལ་རྟག་ཏུ་བཟུང་། །སྦྱོར་བ་ཀུན་གྱི་མཆོག་ཏུ་གསུངས། །སྔགས་ཀྱི་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ་དགྲ་བོའི་སྲོག་ལ་ཧུར་ཐུཾ་ཛ། ཙ་ཁྲག་སྙིང་ཐུན་རིལ་རྦད། སརྦ་ཙིཏྟ་གཟེར་ཐུམ་ཏྲིག་ནན། དེ་ནས་བཅོམ་ལྡན་འདས་ཀྱིས་གསང་བ་མཆོག་གི་ལས་འདི་གསུངས་སོ། །སྣང་སྟོང་གཉིས་མེད་ཡེ་ཤེས་སྐུ། །རིག་པ་ཐབས་ཀྱིས་འགྲོལ་བའི་མཆོག །ཕྱག་རྒྱ་ཆེན་པོ་སྟོབས་དཔག་མེད། །བདེ་བའི་ལམ་ལ་བགྲོད་པའི་ཕྱིར། །གདུག་བྱེད་ཕག་མོའི་ལྟོ་བ་རུ། །གསང་བ་དྲག་པོའི་མཚོན་ཆ་བཅའ། །ཐིག་སྐོར་བཞི་ལྡན་དབུས་གྲུ་གསུམ། །འཁྲུལ་མིག་བཅུ་གཉིས་ཡང་ལོགས་རྩིབས། །ཐ་མ་གདུག་པའི་ར་བས་བསྐོར། །དེ་ལ་དགོད་པའི་རིམ་པ་ནི། །གྲུ་གསུམ་མིང་རུས་ཟླ་ཁམ་ལྷ། །འཁྲུལ་མིག་སྔགས་དང་སྤུ་གྲི་རྩིབས། །དུག་ཆུ་ཚ་བ་མྱོས་པའི་ཁྲག །ཁ་སྦྱར་ཐོད་པ་དང་རྩར་བཅའ། །ཞག་བདུན་གསད་པ་གཟིར་བ་ཕྱེ། །ཐོད་པ་ལིངྒ་འཁོར་ལོ་ཆས། །ཀླུ་གཟིར་ས་སྲོས་འབྱུང་བ་གཤེད། །ཐོད་མཁར་དང་བཅས་ཕོ་བྲང་གདབ། །བརྒྱ་རྩ་བརྒྱད་དུ་གནན་སྔགས་བཟླས། །ཨེ་ཀ་ཧེ་དུན་ལ་མ་སྙིང་ཁྲག་ར་མ་ཙ་ཡ་དགྲ་བོའི་སྲོག་ལ་ཧུར་ལོང་རྩ་རྦད། དྲེང་ཤག་མྱོག་རྦད། སྟྭཾ་བྷ་ཡ་ནན། ཐུན་རྨུགས་བཾ་རིལ་བྷྱོ། གསད་པ་མཆོག་གི་སྦྱོར་བར་གསུངས། དེ་ནས་ཡང་བཅོམ་ལྡན་འདས་ཀྱིས་ལོ་ཐོག་བསྲུང་བའི་སྦྱོར་བ་འདི་གསུངས་སོ། །ཡུལ་ཁམས་སྣང་བའི་བཅུད་བསྲུང་ན། །སེང་ལྡེང་སོར་བརྒྱད་ཕུར་པ་ལ། །ལྕུམ་
གཞོག་བརྒྱད་ལ་སྔགས་ཚན་རེ། །རྩ་བ་མི་འགྱུར་བཅུ་གཉིས་དགོད། །རྩེ་མོ་ལོགས་གསུམ་སྤུ་གྲི་རེ། །བྲིས་ལ་ཞག་བདུན་དར་གྲིལ་བཟླས། །མཐའ་རུ་ཞག་གསུམ་བཟླས་ལ་གདབ། །ཡུལ་དབུས་ཕྱོགས་བཞིའི་རི་རྩེ་ལ། །མཆོད་རྟེན་རེ་ཡི་ལྟོ་རུ་སྦ། །རྒྱལ་དང་ཕུར་པ་རྟ་པ་ལག །དབྱར་ཟླ་འབྲིང་པོར་དེ་བཞིན་སྦྱར། །སྐུ་རེ་བྱིན་གྱིས་དེ་བཞིན་བརླབ། །སྟོན་ཟླ་ཐ་ཆུང་སྟོན་ལ་བསྡུ། །གདོང་བཟློག་རང་མདའ་རང་ལ་འཕང་། །ལྷ་གསལ་སྔགས་བཟླས་དྲག་ལ་འདྲིལ། །ཨེ་ཀ་ཧེ་དུན་སྙིང་ཁྲག་ར་མ་ཙ་ཡ། སརྦ་ཤ་ཏྲུཾ་སྟྭཾ་བྷ་ཡ་ནཱ་ཤ་ཡ་ཕཊ། ལས་རྣམས་ཀུན་གྱི་མཆོག་བསྡུས་པ། །ཡང་གསང་སྦྱོར་བའི་མཆོག་ཏུ་གསུངས། །གཞན་ཡང་སྲུང་བའི་མཆོག་ཏུ་ནི། །ཀླུ་གཉན་ས་བདག་གདུག་པ་ཡི། །ཡ་ང་བ་ཡི་ནད་དར་ན། །རྒྱ་ཤོག་རྒྱུ་ལས་ལྟོ་སྦྱར་བྲི། །དབུས་ནས་ཐིག་སྐོར་ཡེ་ཤེས་བཞི། །བདུད་བཞི་དུག་རླངས་བཞི་འཇོམས་བསྐོར། །དབུས་སུ་དྲག་པོ་བུབ་གནན་བཞི། །མ་མོ་རྒྱལ་པོ་མཛེ་འདྲེ་ཅན། །རྩེ་ཡི་གསང་མཛོད་གསུམ་ལ་གནས། །ས་དང་ནཱ་ག་དབུས་སུ་བསྡུ། །ཕྱོགས་བཞིར་གསང་བའི་འཁྲུལ་མིག་ནི། །ལྕགས་མཁར་གསུམ་གསུམ་རྒྱ་གྲམ་ལ། །རྩ་བ་དྲག་པོ་ལུས་དང་ལྡན། །མཚམས་ཀྱི་གསང་མཛོད་མུན་ཁང་བཞིར། །གདུག་པ་གསུམ་གྱི་གཟུགས་བྲིས་ལ། །ལུས་སྲོག་དབྲོག་པའི་འབྲུ་དགུ་དགོད། །མུ་ཁྱུད་གསུམ་པར་གདུག་པའི་གཟུགས། །ཐ་མ་ཕྱི་ཡི་མུ་ཁྱུད་ལ། །འཁྲུལ་མིག་རྩ་སྦུབས་བཅུ་གཅིག་གནས། །དམིགས་པས་བཀུག་ཅིང་མཚམས་སུ་གཟིར། །གཉིས་འཇོམས་དྲག་སྔགས་བཅུ་གཅིག་གནས། །རུས་སྦལ་རྩ་ཡི་འཁོར་ལོ་ནི། །ཡོན་ཏན་འཕེལ་འགྲིབ་སྣ་ཚོགས་འབྱུང་། །སྤུ་གྲི་མཚམས་སུ་འདོད་པ་བསྒྱུར། །གཅོད་པ་བཅུ་གཅིག་གསད་ལ་སྦྱར། །དྲག་པོ་ལས་ལ་མངག་པ་ཡིན། །མཁའ་འགྲོ་ཟས་ལ་འཕོ་བའི་ཚུལ། །གདུག་པའི་གནས་སུ་བརྣག་པའི་གཟུགས། །བསྡུས་ལ་མིང་རུས་སྙིང་པོ་ཁམས། །གཅོད་པ་སྤུ་གྲི་མཚམས་སུ་སྦྱར། །དཀྱིལ་འཁོར་དབུས་སུ་རྩང་
བཅས་བརྣག །ཕྱག་རྒྱ་ཟིལ་གནོན་གསལ་བྱས་ལ། །དམོད་པ་ཉིན་མཚན་ཁྲི་ཁྲི་བཟླས། །འཁོར་ལོ་ཐོད་པ་སྔགས་ཀྱིས་བསྐུལ། །ཆ་ལུགས་བཟློག་ལ་མནོལ་ཁྲག་བརྡེག །ཀུན་འཇོམས་བཅུ་གཅིག་ལུས་སྲོག་འབྲལ། །གདུག་རྩུབ་བཅོམ་དང་ཞེན་ཆགས་གཅོད། །ཡིད་ཀྱི་དབང་པོ་འཁྲུལ་པ་ཡི། །བརྐམ་ཆགས་རྒྱུན་གྱི་སྲོག་ཕྲོགས་ནས། །གསང་མཛོད་མུན་ཁང་གཟུགས་ལ་བསྡུ། །མེ་རླུང་སྟོབས་ཀྱིས་འཁྲུག་ཅིང་འཕོ། །རྐྱེན་མེད་སྦྱོར་བའི་སྟོབས་དཔག་མེད། །སྲིད་པའི་ཁྱམས་ཁང་ལྟོ་རུ་འཆང་། །མངག་གནད་མདའ་ཡི་སྦྱོར་བ་ཡིན། །མགོ་གཅིག་དོང་རྩེ་གཉིས་པའི་ཚུལ། །རྒྱུད་གཅིག་དང་བསྒྲིག་སྔགས་ཀྱིས་དབྱེ། །གསང་བའི་ཐོད་པ་འཁོར་ལོ་སྔགས། །སྔགས་ཀྱི་སྦྱོར་བའི་ཚུལ་གྱིས་དབྱེ། །མིང་རུས་ཁམས་སོགས་སྔར་བཞིན་བརྣག །སྤུ་གྲི་དྲག་པོ་གསུམ་དུ་བསྒྱུར། །ཡང་གསང་མཆོག་གི་སྙིང་པོ་བཅུ། །དྲག་པོ་མེ་དབལ་སྟོབས་དཔག་མེད། །སྦྱོར་བ་ཕག་ཐོད་སྟེང་དང་འོག །རྡོ་རྗེ་རྒྱལ་པོ་བཟླས་པ་བྱ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། སྲོག་ལ་དྲེང་ཤག་ཐུམ་རིལ་དུན་དུན་ཛ། ས་ནཱ་ག་སྲོག་ལ་དྲེང་དྲེང་ཛ་ཛ། ཐུཾ་རིལ་ཤག །ས་ནཱ་ག་ཙིཏྟ་ཐུམ་རིལ་ཤག །ས་ནཱ་ག་རྩ་ལ་རྦད་ཐུམ་རིལ་ཤག །ས་ནཱ་ག་དུཾ་ལིང་ཐུཾ་རིལ་ཤག །ས་ནཱ་ག་སྲོག་ལ་ཧུར་ཐུཾ་རིལ་ཤག །ས་ནཱ་ག་ཁཾ་ནན་ཐུམ་རིལ་ཤག །ས་ནཱ་ག་སྙིང་གཟེར་སྦུར་ནན་ཐུཾ་རིལ་ཤག །ས་ནཱ་ག་དུ་མེམ་མ་སྲོག་གཟེར་རྦད་རྦུད་ཐུཾ་རིལ་ཤག །ས་ནཱ་ག་ཙ་ཏྲི་ཤུལ་གཟིར་ནན་ཐུཾ་རིལ་ཤག །རོ་ནི་ཏྲི་ཡང་ཤིག་ནན་གཟེར་ཐུཾ་རིལ་ཤག །སྙིང་པོ་འབྲུ་གསུམ་འབྲུ་དྲུག་བདུན། །འཕོས་པས་ཨ་མུ་ཀ་དང་སྦྱར། །དགུ་དང་བཅུ་གཅིག་བཅུ་དང་གསུམ། །གཟིར་ཞིང་གནན་པ་མཆོག་ལ་སྦྱོར། །སྙིང་གཟེར་བདུན་ལ་རྦད་དང་ནན། །བརྣག་པའི་རྩ་རྒྱུད་ཁམས་ལ་བརྡེག །དགྲ་བོའི་སྲོག་ལ་དྲེང་ཤག་ཐུམ་རིལ་དུན་དུན་ཛ། དགྲ་བོའི་སྲོག་ལ་དྲེང་དྲེང་ཛ་ཛ་ཐུཾ་རིལ་ཤག་རྦད། དགྲ་བོའི་སྲོག་ལ་དུན་དུན་ཤག་རྦད། དགྲ་བོའི་ཙིཏྟ་ཐུཾ་རིལ་ཤག་རྦད། དགྲ་བོའི་རྩ་ལ་ཐུཾ་རིལ་ཤག་
རྦད། དགྲ་བོའི་སྲོག་ལ་ཀ་དུམ་ལིང་ཐུཾ་རིལ་ཤག་རྦད། དགྲ་བོའི་སྲོག་ལ་ཧུར་ཐུམ་རིལ་ཤག་རྦད། དགྲ་བོའི་སྲོག་ལ་ཁཾ་ནན་ཐུཾ་རིལ་ཤག་རྦད། དགྲ་བོའི་སྲོག་ལ་སྙིང་གཟེར་སྦུར་ནན་ཐུཾ་རིལ་ནན། དགྲ་བོའི་སྲོག་གཟིར་ཐུཾ་རིལ་ནན། དགྲ་བོའི་སྲོག་ལ་ཡཾ་ཤིག །ཐུཾ་རིལ་ནན། འདི་དག་སྦྱོར་བ་དམ་པ་སྟེ། །ལུས་ཅན་མཆོག་གི་སྦྱོར་བ་ཡིན། །འོད་ཟེར་སྔགས་ཀྱི་རྟ་ལ་བསྐྱོན། །འཕེན་པ་སྟོབས་ཀྱི་དབུགས་ཀྱིས་འདྲེན། །འདྲིལ་བ་རང་ཤུགས་ཁམས་དང་ལྡན། །སྲོག་གི་ཡི་གེ་རང་ལས་བླངས། །འགུགས་འབྲལ་བཤིག་པ་རང་ཉམས་ལྡན། །སྲོག་དང་རྩ་རྒྱུད་ལམ་བཅས་ཡིན། །གང་སྟོང་གཉིས་དང་ལྕི་ལ་མྱུར། །འདྲེལ་ཆེན་བཞི་དང་འབྱུང་བཞི་སྨིན། །སངས་རྒྱས་ཁམས་དང་བདེ་བར་ལྡན། །རིག་པ་སྟབས་དང་བགྲོད་པར་བཅས། །དེ་མ་ཡིན་ན་རང་འཆིང་བགྲོད། །སྔགས་ཀྱི་ཡོན་ཏན་དཔག་ཏུ་མེད། །རྩ་བ་གཅིག་ལ་དོན་གཉིས་ལྡན། །དྲིལ་དང་བཅས་པ་གཅིག་ཏུ་གནས། །གཏོར་དང་ལས་ཕྲེང་དེ་བཞིན་བསྡེབ། །དབྱེ་བ་བསྡུ་བ་བསྡུས་ཏེ་བརྡེག །ཆེ་བ་གསུམ་འདུས་བསམ་དཔག་དཀའ། །ཨུ་བུ་ན་ཡི་གནས་ཆུད་བཞིན། །ཟིན་པ་འཆོར་བར་མི་བྱེད་འཇོམས། །མཁའ་འགྲོ་གཞན་ཚོགས་ཞེན་ཆགས་ཀུན། །བཟས་ཁ་དགྲ་ལ་སྤོ་ཞིང་བསྒྱུར། །རྣོ་དབལ་མཚོན་ཆ་ཐེབས་ལ་གཟིར། །རང་གནད་རྟོག་པའི་རྒྱུན་ལས་བཟློག །ཐོད་པ་གཟིར་གསུམ་མཐའ་རུ་བཅའ། །སྦྱོར་བ་ཀུན་ལྡན་དེ་ཉིད་གཟིར། །ས་སྲོས་ལམ་དུ་སྟོང་དང་སྦྱོར། །རྡོ་རྗེ་གསང་བའི་ལམ་དུ་དྲོངས། །གང་གནོད་གདུག་པའི་ལག་ཏུ་གཏད། །གསད་པ་མཆོག་གི་སྦྱོར་བ་ཡིན། །གདུག་པ་གསུམ་དང་བྱད་བསྲུང་དང་། །བཙན་དང་རྒྱལ་པོ་མཛེ་འདྲེ་དང་། །བསྡོངས་ནས་དབྱེ་བ་སྔགས་ཀྱིས་བརྡེག །སྔགས་པ་རྒྱལ་བློན་ཡུལ་སྲུང་རྗེ། །ཐོད་པ་ཁམས་དང་སྦྱར་ལ་བསྡེབ། །བསྡེབས་ལ་དྲག་སྔགས་བཅུ་གཅིག་བསྣན། །དྲག་སྔགས་བཅུ་གཅིག་ཡང་གསང་ཡིན། །གཞན་ཡང་སྲུང་བ་བཅུ་གཅིག་ལས། །རྒྱ་ཤོག་གྲུ་བཞི་ཆ་གཉིས་ལ། །དབུས་ནས་མུ་
ཁྱུད་དྲུག་ཏུ་བསྐོར། །དབུས་སུ་གྲུ་གསུམ་ཐོད་པར་བསྐོར། །གཉིས་པར་འཁྲུལ་མིག་བཅུ་གཉིས་ལ། །ཐོད་པའི་ཕྲེང་བས་ཀུན་ལ་བསྐོར། །གསུམ་པར་འཁྲུལ་མིག་ཉི་ཤུ་བྱ། །བཞི་པར་རྩིབས་ཆེན་སུམ་ཅུ་གཉིས། །ཡང་ལོགས་ཕྱི་རིམ་ཐོད་སྦྲུལ་མེ། །དབུས་སུ་གང་དམིགས་གཟུགས་དང་མིང་། །གཉིས་པར་རྩ་བའི་དྲག་སྔགས་དགོད། །གསུམ་པར་ཁྱད་པར་དྲག་པོ་ཡི། །གཟིར་ཞིང་སྲོག་དབྲོག་མྱོས་ཤིང་གནོན། །དྲག་པོ་བཙན་ཐབས་སྤུ་གྲི་དགོད། །བཞི་པ་རྩིབས་ཆེན་སུམ་ཅུ་གཉིས། །ཤི་ཕྲད་གུག་འཕུལ་དྲག་པོ་འབྲུ། །ཡང་གསང་མཆོག་གི་དྲག་སྔགས་དགོད། །རུས་སྦལ་ལྟོ་བར་རྫོགས་པར་བཅའ། །འཁོར་ལོ་རྒྱལ་པོ་གཟུགས་བརྙན་ལ། །བདུད་རྩི་འོ་མ་ཁྲག་གིས་བྱུག །ཁ་སྦྱོར་ཚོན་སྐུད་ཐོད་ནང་གཞུག །ལྟོ་སྦྱར་ཁྲི་ཡིས་ངར་བླུད་ལ། །སྔགས་པའི་སྟེང་འོག་བར་སྣང་བཅའ། །དེ་ཡིས་ཐམས་ཅད་བསྲུང་བ་ཡིན། །ཤི་ཕྲད་སྟོབས་ཀྱི་འཁོར་ལོ་ཡིས། །གསད་དང་བསྲུང་བ་ལས་ཀུན་འགྲུབ། །གསང་བ་དྲེགས་པའི་ལས་བརྩམ་ན། །འཁོར་ལོའི་སྦྱོར་བ་སྔར་བཞིན་ལས། །དབུས་སུ་བརྣག་པའི་མིང་རུས་ཁམས། །སྙིང་པོ་འབྲུ་བདུན་འཕོ་ཞིང་འཕང་། །རྦད་བཞི་སྤུ་གྲི་མིང་རུས་སྦྱར། །ཉི་མ་བཞི་དང་མཚན་མོ་བཞིར། །དྲག་སྔགས་འཁོར་ལོ་བསྐོར་ཞིང་གཅད། །གནོད་སར་གནན་ལ་བཟས་ཁ་འཕོ། །སྲོག་ལ་ཐུན་རྦད་བྷྱོ་ཞེས་འཕང་། །དྲག་སྔགས་སྦྱོར་བ་གཉིས་སུ་བརྡེག །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། ས་ནཱ་ག་ཙིཏྟ་རོ་མྱགས་རྦད། ཁྲག་ལ་མྱོགས་ཏི་ཡ་ཤག་རྦད། སྲོག་ལ་མུགས་ཏི་རྦད། དུག་ཕྱུང་བྲམ་ཤིག་རྦད།ཁམ་ཤག་ཐུམ་རིལ་མྱག་རྦད། ཙ་ཏྲིམ་མ་དབུག་ལ་ཐང་གཟེར་རྦད། ཙ་ལ་ཧུར་ཐུམ་རྦད། སྲོག་ལ་ཐུན་རྦད་བྷྱོ། སྲུང་བའི་རྒྱལ་པོ་ཤི་ཕྲད་ལ། །བགྲོད་པ་གསུམ་གྱི་རྩ་བ་དང་། །བདུན་པ་ལ་སོགས་སྦྱོར་བ་གདམས། །གསད་པའི་སྐབས་སུ་གསལ་བྱས་ལ། །འཁོར་ལོ་ཐོད་པའི་ལིངྒ་མིང་། །ཧོམ་ཁུང་རེ་ཐུམས་ཞབས་འོག་བཅའ། །གསང་སྔགས་མནན་
གཟིར་ཟོར་ཐུན་བརྡེག །མཐའ་རུ་གང་གནོད་དེ་ཉིད་སྦ། །དྲག་སྔགས་སྦྱོར་བ་འདི་ལྟ་སྟེ། །དགྲ་བོའི་ཙིཏྟ་རོ་མྱགས་རྦད་དགྲ་བོའི་སྲོག་ལ་མྱོག་ཏི་ཡ་ཤག་རྦད། སྲོག་ལ་མུགས་ཏི་རྦད།ཁམ་ཤག་ཐུཾ་རི་ལ་མྱག་རྦད། དུག་ཕྱུང་ཁྲམ་ཤིང་རྦད། དབུགས་ལ་ཐང་གཟེར་རྦད། རྩ་ལ་ཧུར་ཐུཾ་རྦད། དྲིལ་དང་གཏོར་བ་ཉིན་དང་མཚན། །རྫོགས་ནས་གཟིར་ཞིང་ལིངྒར་གདབ། །མནན་པ་རྦད་རྦུད་ནན་བཞིར་སྦྱར། །སྟྭཾ་བྷ་ཡ་ནན། ཁ་གསོ་ལས་ཀྱི་ཐུན་བསྐུལ་ནས། །བྲབ་ཅིང་འཕང་བའི་དྲག་སྔགས་བརྡེག །དགྲ་བོའི་སྲོག་ལ་ཐུན་རྦད་བྷྱོ། ནཱ་ག་སུ་ཧཱ་ཙ་མ་རཱི། ཏི་པ་རི་བྱ་སརྦ་ཏི། རཱུ་བ་སྱ་སྭ་སོ་རི་ཀཱ། སུ་མེན་ཏ་ཡི་ཁུ་བ་བཞིན། །ཧ་ལ་ཙ་མ་རི་ཡི་སྟོབས། །འཇོམས་བྱེད་སྟོབས་ཀྱི་འཁོར་ལོ་ཡིན། །གཞན་ཡང་བསྲུང་བ་ཀུན་གྱི་མཆོག །དེ་ཡི་སྦྱོར་བ་འདི་ལྟ་སྟེ། །རིན་ཆེན་བདུད་རྩི་དྲི་དང་ཆུ། །རྫས་དང་བཅས་པའི་སྟེགས་བུ་ལ། །ལྷ་བསྒོམ་སྔགས་བཟླས་རྟག་ཏུ་བཀྲུ། །ཡན་ལག་བུམ་པས་བསྲུང་བའི་མཆོག །ཟིལ་གནོན་ཕྱག་རྒྱའི་སྐུར་གསལ་བྱ། །རྫོགས་པའི་ལྟོ་བའི་སྲོག་བསྡུས་ལ། །དྲག་སྔགས་བརྒྱ་བརྒྱ་རྒྱུན་དུ་བཟླས། །བསམ་གཏན་རྩ་བའི་བསྲུང་བའི་མཆོག །དབུ་ལ་ནམ་མཁའི་འཁོར་ལོའི་སྔགས། །རྩིབས་བཞི་འདྲེན་པའི་སྙིང་པོ་ཨེ། །ཐུགས་ཀར་རིག་པའི་འཁོར་ལོ་སྔགས། །རྩིབས་བཞིའི་དབུས་ན་འབྲུ་ལྔའི་མཆོག །ལྟེ་བ་འབྱུང་བའི་འཁོར་ལོ་སྔགས། །རྩིབས་བཞིར་ཧེ་དུན་ཡ་དང་མ། །གསལ་བས་སྟོང་གསུམ་དབང་དུ་སྡུད། །འཁོར་ལོ་རྒྱུན་གྱི་བསྲུང་བའི་མཆོག །དྲག་པོ་སྔགས་ཀྱི་དམོད་པ་ནི། །སྙིང་པོ་ངང་དང་ཤུགས་ཀྱིས་གྲངས། །རྔམ་ཚིག་དྲག་པོ་གཏུམ་པོའོ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། སྟོབས་ཀྱི་དྲག་སྔགས་རྩ་བ་ལ། །རྣོ་དབལ་མཚོན་ཆ་ཀུན་འཇོམས་སྦྱར། །སརྦ་ཙིཏྟ་རོ་མྱགས་ཁ་ཐམས་སྲོག་གཟིར་བུར་ནན་འདྲིད་ཕྱུང་ཧྲི་ཤག་རྦད། སྦྱོར་བ་ཀུན་གྱི་མཐའ་སྡུད་དུ། །གསང་ཆེན་ལས་ཀྱི་རྩ་བ་འདི། །འཁོར་ལོ་སྦྱིན་བསྲེག་ལྟོ་བསྡེབས་ན། །གཅོད་དང་འབིགས་ལ་སོགས་པའི་ལས། །བསྲུང་དང་བསྐྱབ་པ་ཀུན་བྱེད་ཡིན། །ཐབས་རྣམས་ལྡན་དང་མི་ལྡན་པས། །བྱ་བ་ཀུན་འགྲུབ་བརླག་པར་འགྱུར། །འདི་དག་བདེ་དང་སྨིན་པའི་ལས། །འབིགས་དང་གཅོད་ལ་སོགས་པ་སྟེ། །
བསྲུང་དང་བསྐྱབ་པ་ཀུན་བྱེད་པའོ། །གསང་ཆེན་འཕྲུལ་གྱི་འཁོར་ལོ་འདི། །གདམས་ཤིང་གྲོལ་བའི་རིམ་པ་ནི། །རྒྱུ་ལ་རྫས་ཀྱིས་བྱང་བར་བྱ། །བར་སྣང་འཁོར་ལོས་ལས་ཀུན་བྱེད། །ས་ཡི་འཁོར་ལོས་བསྲེག་ཅིང་འཇོམས། །ཐིག་སྐོར་གསུམ་ལྡན་གྲུ་གསུམ་དབུས། །ཟླ་ཁམ་དམར་པོ་འབྲུག་ནས་བརྣག །ཕྱི་རིམ་རྡོ་རྗེ་རྒྱ་གྲམ་ལ། །སྙིང་པོ་འཁྲུལ་མིག་གསུམ་གསུམ་དྲང་། །རྩ་བའི་དྲག་སྔགས་ཀུན་གྱིས་ལུས། །ཡང་ལོགས་རྡོ་རྗེའི་རྒྱ་བརྒྱད་ལ། །འཁྲུལ་མིག་བཅུ་གཉིས་བཅུ་དྲུག་ལ། །དྲག་པོ་ཐབས་ཀྱི་སྤུ་གྲི་དགོད། །མཚམས་ནས་ཟླ་ཁམ་དབུས་གནས་སུ། །དོན་གཉིས་སྡུད་ལ་མིང་སོགས་བྲི། །རྫས་ལྡན་བར་སྣང་ཁ་སྦྱར་བཅའ། །ལས་ཀྱི་རྒྱལ་པོ་གཅོད་པ་ཡི། །བར་སྣང་མཚོན་ཆའི་འཁོར་ལོ་ཡིན། །ཕུང་ས་གསུམ་གྱི་སྟེགས་བུ་ལ། །ཁྲག་དང་དུག་གི་ཆག་ཆག་གདབ། །བམ་གྱི་སྲད་བུས་ལྔ་རུ་བསྐོར། །དྲག་པོ་འཁོར་ལོ་ཁ་ཁྱེར་གསུམ། །ཕྱི་ནང་ཆག་ཆག་དབུས་མཐོ་གང་། །དཀར་དམར་མཐིང་ནག་ལྡན་པ་ལ། །རྩང་དང་ཐོད་པ་དེ་བཞིན་མེ། །མཐིང་ནག་ལིངྒ་ཧོམ་ཤིང་དབུས། །ཕྱི་རིམ་རྒྱ་གྲམ་ཕུར་པའི་མིང་། །ཡང་ལོགས་རྩིབས་ལ་རྩ་བའི་སྔགས། །རྒྱ་གྲམ་རྩེ་བརྒྱད་སྤུ་གྲི་མིང་། །གདུག་པའི་ཁྲག་དང་དུག་གིས་བྲི། །ཕྱི་རིམ་ཐོད་ཕྲེང་མེ་རིའི་མཐའ། །སྲེག་པ་ས་ཡི་འཁོར་ལོ་ཡང་། །རུས་སྦལ་སྲིད་པའི་ལྟོ་བར་བྲི། །དུག་དང་ཁྲག་གིས་སྨེ་བ་བྱ། །ཤ་སྣ་ཚིལ་སྣ་མར་ཁུ་ཆང་། །དུག་སྣ་རི་ལུ་ལྷ་ཡི་གྲངས། །ཉུང་དཀར་ཉུང་ནག་སྐྱེ་ཚེ་འབྲས། །ཟངས་ཕྱེ་ལྕགས་ཕྱེ་རྡོ་ཕྱེ་ཐུན། །ཕོ་ཉས་གཟུགས་གཏུབ་བསྟབ་པ་བྱ། །དྲག་སྔགས་བཅུ་ཡིས་བསྲེག་རྫས་དབུལ། །རྒྱ་གྲམ་ར་ཡི་འདབ་བརྒྱད་དུ། །བསྲེག་པའི་སྤུ་གྲི་གཟུགས་ལ་དགོད། །དྲག་སྔགས་སྦྱོར་བ་མེ་དང་འདྲ། །ཨེ་ཀ་ཧེ་དུན་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་དུན་རྨུགས་ཛ། ཙིཏྟ་ཧུར་ཐུམས་ཛ་ལ་རཾ། དགྲ་བོའི་སྲོག་ལ་དྲེང་ཤག་རྦད། ནྲྀ་ཏྲི་རཀྴ་རྦད། ཁམ་རཾ་ཛྭ་ལ་རཾ། བསྲུང་དང་གསད་
པའི་ལས་ཀུན་ལ། །ཚུལ་བཞིན་སྦྱར་ན་རྣོ་ལ་མྱུར། །དྲོད་དང་མི་ལྡན་རང་ལ་གཅོད། །བཅུ་གཉིས་རྣལ་མ་རྩ་བ་གཅིག །ཡན་ལག་སྤུ་གྲི་མིང་སྦྱར་ན། །ལས་འགྱང་སྦྱོར་བ་ཤིས་ལ་བདེ། །རིག་པས་བདེ་བའི་ཀློང་ལས་འཕང་། །དེ་མ་ཡིན་ན་རང་འཆིང་རྒྱུ། །དྲག་པོ་རྗེས་གཅོད་འཁོར་ལོ་མེ། །བརྣག་པ་ཀུན་གྱི་རྒྱལ་པོ་ཡིན། །དྲག་སྔགས་མངོན་དུ་ཕྱུང་བའི་རྒྱུད་ལས། ཡང་གསང་མཆོག་གི་ལེའུ་སྟེ་དྲུག་པའོ།། །།དེ་ནས་འཁོར་གྱི་འཇམ་དཔལ་རྡོ་རྗེས་བཅོམ་ལྡན་འདས་ལ་གསོལ་བ་བཏབ་པ། རྡོ་རྗེ་སྙིང་པོ་རང་བྱུང་བ། །དྲག་པོ་སྔགས་ཀྱི་དམོད་པ་ལ། །སྙིང་པོ་དོན་གྱི་ངན་སྔགས་ཀྱིས། །གསད་གསོད་དབབ་གཅད་གཟིར་གནན་གྱི། །རྩ་བར་དྲིལ་བ་ཇི་ལྟར་ལགས། །རྡོ་རྗེ་སྙིང་པོས་རྫོགས་པར་མཛོད། །ཅེས་ཞུས་པས། བཅོམ་ལྡན་འདས་ཀྱིས་དྲག་སྔགས་ཐམས་ཅད་ཀྱི་སྙིང་པོར་དྲིལ་བ། སྲོག་དམར་ལེན་གྱི་སྦྱོར་བ་འདི་གསུངས་སོ། །དེ་ཡི་སྦྱོར་བ་རྒྱས་པ་ནི། །ཐུན་མོང་ཁྱད་པར་གཉིས་སུ་བྱ། །ཐུན་མོང་རིམ་པ་ལྔ་དང་ལྡན། །འབྲུ་བཞི་ཕྱི་ཡི་འཁོར་ལོ་དང་། །ཀུན་འབྱུང་རྩ་བའི་འཁོར་ལོ་དང་། །གབ་པ་ཐུགས་ཀྱི་འཁོར་ལོ་དང་། །ཕག་མོ་ཁོང་ཡན་འཁོར་ལོ་དང་། །ཕུང་བྱེད་སྡིག་པའི་འཁོར་ལོ་དང་། །ཡན་ལག་ལོ་ཐོག་འཇོམས་པ་དང་། །ལྔ་ནི་ཐུན་མོང་སྦྱོར་བ་གསུངས། །དམར་ལེན་སྔགས་ཀྱི་སྙིང་བཏོན་ནས། །སྦྱོར་བ་གསུམ་དུ་དྲིལ་བསྡེབ་དང་། །མཚན་མ་མངོན་ཕྱུང་སྦྱར་བ་ནི། །དམར་ལེན་མར་གྱི་ཞུན་མར་འདྲ། །དེ་ནི་སྟོབས་ཆེན་དྲག་པོ་ཡིན། །འབྲུ་བཞི་ལས་ཀྱི་རིམ་པ་ནི། །དུར་ཁྲོད་དབེན་པའི་བདེ་གནས་སུ། །རང་སེམས་དབེན་པའི་མཚམས་བཅད་ལ། །བརྟུལ་ཞུགས་དམོད་པ་དྲག་པོ་བཟླས། །དུར་ཁྲོད་རྒྱུ་ལ་ཙཀྲ་བཅའ། །མུ་ཁྱུད་བཞི་དང་ལྡན་པར་བསྐོར། །ལྟེ་བར་གྲུ་གསུམ་བསྣོལ་མར་བྲི། །གཉིས་པར་རྡོ་རྗེ་རྒྱ་གྲམ་ལ། །ཨེ་དུན་ཀ་ཡཾ་འབྲུ་བཞི་དགོད། །གསུམ་པ་རྡོ་རྗེ་རྒྱ་གྲམ་ལ། །སྲོག་དང་དྲེང་དྲེང་ནི་སྲོག་གསུམ། །ལ་དང་དུན་དུན་བཞི་པ་སྟེ། །སྲོག་ལ་རྦད་དང་ཁམ་ཤག་དྲུག །རྩ་རྦད་བདུན་
པ་སྲོག་ལ་བརྒྱད། །ཡང་ལོགས་རྒྱ་གྲམ་རྩེ་གསུམ་ལ། །མྱོག་དང་རྦད་དང་ཁྱེར་དང་ཕྱུང་། །མུགས་དང་སྡིང་ཏི་ལི་དང་ཤག །ལོང་དང་རྦད་རྣམས་རྭ་རེར་དགོད། །སྲིད་པ་རུས་སྦལ་ལྟོ་བར་བཅའ། །ཁ་སྦྱར་རྫས་ཀྱི་སྦལ་པར་བཞུག །དེ་ཡང་ཚོན་སྐུད་ཕག་མོའི་ལྟོར། །གཉན་ནམ་མཆོད་རྟེན་ནག་པོ་ལ། །ཉིན་གསུམ་མཚན་གསུམ་གང་བརྩམས་འགྲུབ། །ཁམ་ཤག་རྩ་རྦད།སྲོག་ལ་མྱོག་རྦད། ཁྱེར་ཕྱུང་མུག་ཏི་ལིང་ཤག་ལོང་རྦད། རྩ་བ་ཀུན་འབྱུང་འཁོར་ལོ་ནི། །གསང་ཆེན་རྩ་བར་དྲིལ་བ་སྟེ། །ཡང་གསང་སྦྱོར་བ་དྲུག་གཉིས་ལྔ། །བདེ་དང་སྨིན་པར་བྱེད་པའི་སྔགས། །ཧ་ལ་ནག་པོ་དུག་འཛིན་ལྟར། །སྦྱོར་བ་བཅུ་བདུན་བག་དང་ལྡན། །དོན་གཉིས་མངོན་དུ་སྤྱོད་པ་ཡིས། །བརྡེག་པའི་དྲག་སྔགས་འདི་ལྟ་སྟེ། །བླ་ཆེན་བཞི་དང་སྤྲུལ་པ་བརྒྱད། །ཡང་སྤྲུལ་བཅུ་གཉིས་ཆགས་དང་བཞི། །གང་བྱུང་བསད་པའི་སྔགས་བཞི་བསྡེབ། །རྟགས་མེད་ཀུན་འབྱུང་དོན་གཉིས་དྲུག །དེ་བཞིན་ལོ་ཐོག་གཞོམ་པ་བཞི། །ཆུ་འདྲིལ་ཟོར་འཕང་དུ་བ་གཟིར། །ཆུ་རྒོད་འཁྱགས་པ་རྫོགས་པས་འགྲུབ། །དམར་ལེན་སྔགས་ཀྱི་མཐུ་བསྡུས་ནས། །ལས་ཀྱི་འཁྲུལ་འཁོར་མཚོན་ཆར་བཅས། །སྙིང་པོ་ཀུན་གྱི་མཐུ་དྲིལ་ནས། །འབྲུ་བརྒྱད་དམོད་པའི་ལུས་དང་སྦྱར། །གསང་ཆེན་དམོད་པའི་ལས་བཅུ་ཡི། །རིགས་རྩོལ་ལས་དབང་གནོད་པའི་གདོན། །སྔགས་ཀྱི་བརྡེག་པ་དྲུག་དང་ལྡན། །ལྟ་འཇུག་ཕྱིར་འབྱུང་ཞན་དང་བཞི། །ཀུན་འབྱུང་རྟགས་མེད་ཁོང་ནས་ལྡང་། །གང་རུང་མཚོན་ཆ་དྲུག་སྡེབས་ལ། །བརྗོད་པ་སྐབས་དང་སྦྱར་ལ་སྤྱད། །རྟགས་མེད་ཀུན་འབྱུང་གཅིག་ཏུ་དྲིལ། །ཀུན་གྱི་རྗེས་གཅོད་བསྲེག་ཅིང་གཟིར། །རྒྱལ་བའི་ཐིག་ལེ་མཐུ་དྲིལ་སྔགས། །ཀུན་འཇོམས་སྦྱོར་བའི་རྒྱལ་པོ་ཡིན། །རྩ་བའི་འཁོར་ལོ་རྒྱས་པ་ནི། །གྲུ་བཞི་ཆ་མཉམ་རུས་སྦལ་ལྟོར། །ཡེ་ཤེས་ལྔ་ཡིས་ཐིག་དྲངས་ལ། །མགོ་དང་མཇུག་མར་ཐིག་རྐང་གདབ། །དེ་བཞིན་ལྟོ་གཉིས་སྣ་དྲངས་ལ། །ཐིག་བཞི་རྒྱ་གྲམ་ལེགས་
པར་གདབ། །ཐིག་མདུད་འཁྲུལ་མིག་དྲུག་གཉིས་ལྔ། །ཆ་མཉམ་གྲུ་བཞི་ལེགས་བཏབ་སྟེ། །མུ་ཁྱུད་རིམ་པ་གསུམ་གསུམ་བསྐོར། །དབུས་ཀུན་གྲུ་གསུམ་ཕོ་བྲང་རེ། །བྱང་ཁོག་དབུས་ཀྱི་ཕོ་བྲང་གཉིས། །གཡས་པ་མཚོན་ཆ་རྩིབས་བཅུ་ལ། །གཅོད་པའི་རལ་གྲི་བཅུ་དང་ལྡན། །གཡོན་ལ་རྒྱ་གྲམ་བཅུ་དང་ལྡན། །རལ་གྲི་ཐུན་གཟིར་འབྲུ་བཅུའི་གནས། །རྒྱ་གྲམ་དེ་བཞིན་ཡཾ་ཡི་རྡུབས། །བཅུ་བཅུ་སྟེང་འོག་བསྣོལ་མར་གཅོད། །གཡས་སུ་རྩིབས་ཆེན་བཅུ་བཞི་ལ། །གཟིར་དང་ཙིཏྟ་རྩ་སྦུར་གནས། །གཡོན་ན་རྩིབས་ཆེན་བཅུ་གཅིག་ལ། །ཡཾ་དྲེང་དུན་ཛ་སྲོག་དབྲོག་དགོད། །སྲིད་པའི་ཁྱམས་ཁང་སྟོད་ན་གནས། །དེ་བཞིན་བསྐྱེད་པའི་འཁྲུལ་མིག་བཞི། །འཁོར་ལོ་མུ་ཁྱུད་གསུམ་དང་ལྡན། །རྩིབས་ཆེན་བཅུ་གཉིས་དེ་བཞིན་བཅུ། །བཅོ་ལྔ་རྩིབས་དང་རྩིབས་བདུན་ན། །བླ་ཆེན་སྤྲུལ་པ་ཡང་སྤྲུལ་དང་། །ཆགས་སྡང་འཇོམས་པའི་དྲག་སྔགས་ཏེ། །མཚོན་ཆའི་རྒྱལ་པོ་རེ་ལ་གནས། །རུས་སྦལ་ཁོག་སྨད་ལྟོ་བའི་རྫོང་། །རིན་པོ་ཆེ་ཡི་འཁྲུལ་མིག་བཞི། །རྩིབས་བདུན་རྩིབས་དགུ་དེ་བཞིན་བཅུ། །བཅུ་གཅིག་དང་ལྡན་འཁྲུལ་མིག་ལ། །མི་འཁོར་འཁོར་འཇུག་དོན་པ་ལ། །བརྡེག་པའི་དྲག་སྔགས་ཚར་རེ་གནས། །ལོ་ཐོག་འཇོམས་པའི་འཁོར་ལོ་བཞི། །ཡན་ལག་བཞི་ལ་གནས་པ་ནི། །ལག་གཡས་འཁྲུལ་མིག་དྲག་པོ་བརྒྱད། །རྩ་བའི་དྲག་སྔགས་ཀུན་ལ་གནས། །ཕྱི་རིམ་བཅུ་དྲུག་འཁྲུལ་མིག་ལ། །སྤོགས་པ་གཟིར་བའི་དྲག་སྔགས་གནས། །ལག་གཡོན་འཁྲུལ་མིག་སྔར་བཞིན་ལས། །ཕྱི་རིམ་རྩིབས་དགུ་ཟོར་གྱི་སྔགས། །རྐང་གཡས་བརྒྱད་དང་རྩིབས་དགུ་ལ། །དགུ་ལ་ཐབས་ཀྱི་སྤུ་གྲི་གནས། །རྐང་གཡོན་རྩིབས་ཆེན་བཅོ་བརྒྱད་ཕྱི། །དུ་བའི་སྟོབས་ཀྱིས་དབབ་པའི་སྔགས། །ཡན་ལག་ཆུ་རྒོད་དྲག་པོ་ཡིན། །མགོ་ལ་སྲེག་པའི་འཁོར་ལོ་ནི། །རིམ་པ་གསུམ་ལྡན་དབུས་རིམ་གསུམ། །རྒྱ་གྲམ་བཅུ་གཉིས་རྩིབས་དང་ལྡན། །རྒྱ་གྲམ་རྩ་སྔགས་བཅུ་གཉིས་བསྲེག །ཀུན་གྱི་མཐའ་རུ་འདི་སྦྱར་
བྱ། །ཀུན་འབྱུང་ལས་ཀྱི་འཁོར་ལོ་ལ། །གདུག་པའི་ར་བ་སྲོག་དང་ལྡན། །སྙིང་པོ་བརྡ་མིང་རུས་ཁམས་སྦྱར། །ལས་སྐབས་སྦྱོར་བའི་རིག་པས་གཟུང་། །གང་བྱུང་འཁྲུལ་འཁོར་ལྟོ་ལ་སྦྱར། །གཉིས་གཉིས་ཁ་སྦྱར་ཉེ་བའི་རྒྱུ། །དྲིལ་བའི་མཚོན་ཆ་སྔགས་བླངས་ནས། །སྦྱོར་བ་མཆོག་གི་སྤྱོད་ཡུལ་རབ། །སྔགས་ལ་ངར་བླུད་མེ་ལ་བདུག །ཀུན་ཀྱང་རུས་སྦལ་ལྟོ་བར་བཅའ། །རྟགས་རེ་བླངས་ལ་སྔགས་རེ་གཟུང་། །ཀུན་འབྱུང་རྟགས་མེད་བསྣོལ་མར་བརྡེག །སྔགས་ཀྱི་དབྱེ་བ་འདི་ལྟ་སྟེ། །ཨེ་མྱགས་ཡཱ་རྔུབས་མུགས་ཤག་ཀ་དུན། དགྲ་བོའི་སྲོག་ལ་ཧྲི་ཤག་ཛ། ཙིཏྟ་དྲེང་ཤག་རྦད། དགྲ་བོའི་སྲོག་ལ་ཐུན་རྨུགས་ཛ་ཙིཏྟ་རྦད། དགྲ་བོའི་སྲོག་ལ་ནྲྀ་ཧུར་ཐུམ་ཛ་ཙིཏྟ་དྲེང་དྲེང་ཐུན་ཤག་རྦད། དགྲ་བོའི་སྲོག་ལ་ཐུན་གཟིར་ཤག་རྦད། དགྲ་བོའི་སྲོག་ལ་ཐུན་གཟིར་ཛ་ཙིཏྟ་དྲེང་ཤག་རྦད་རྦད། དགྲ་བོའི་སྲོག་ལ་ཡཾ་ཡཾ་ནི་ཛ་ཙིཏྟ་དྲེང་ཤག་རྦད་ནྲྀ་ཛ་མཱ་ར་ཡ་རྦད། ཧབ་ཏང་ཧབ་ཏང་རོ་མྱགས་ཛ་ཀྲིང་ཀྲིང་ཧི་ནན་ཡལ་ཡལ་ཙིཏྟ་རྦད། ཧ་ལ་ཧ་ལ་ཙ་མ་རི་ཁམ་ཤག་རྦད། ཧ་ལ་ཧ་ལ་ཡཾ་ཡཾ་ཙིཏྟ་དྲེང་དྲེང་དུན་དུན་ཛ། སྲོག་ལ་གཟིར་ནན་མྱོགས་རྩ་ལ་རྦད། ཡཾ་རྡུབས་ཙིཏྟ་ཁཾ་ཤག་རྩ་མྱགས་རྦད། དེ་བཛྲ་དུན་སན་གར་གཟིར་ཐུན་པྲོཾ་པྲོཾ་ཧྲིལ་ཤར་ཤར་ཕོབ། ཧུར་ཡཾ་ཧྲིལ་བྷྱོ་ཁྲོམ་ཤར་ཤར་ཐུན་བྷྱོ། རཾ་ཡཾ་པྲོཾ་ཤར་ཧྲིལ་ཁམ་ཤག་ཁམ་ཕོག །ནཱ་ག་དེ་བ་ཡུན་ན། ས་ཙ་གཟིར་ནན་ཤར་ཤར་ཧུར་ཡི། ཧྲིལ་ཧྲིལ་ཕོབ། ཧུར་ཡཾ་ཁམ་ཤག་རཾ་གཟིར་ཐུན་རྦད། ཙ་མྱགས་ཐུན་རཾ་རྦད། ཀུན་འབྱུང་རྩ་བའི་སྦྱོར་བ་མཆོག །ལས་ཀུན་སོ་སོར་བསྡེབ་པ་ཡིན། །དེ་ནས་ཡང་བཅོམ་ལྡན་འདས་ཀྱིས་གབ་པ་ཐུགས་ཀྱི་འཁོར་ལོ་འདི་གསུངས་སོ། །སྦྱོར་བའི་རྒྱལ་པོ་དམར་ལེན་གྱི། །དྲག་པོ་ཐུགས་ཀྱི་འཁོར་ལོ་འདི། །ནི་རང་གོས་ལ་རྒྱུ་བླངས་ཏེ། །སྦྱོར་བ་ཀུན་ལྡན་བེ་ག་ཏ། །ཁྲུ་བ་ཆགས་པས་སྣག་ཚ་བྱ། །འཁྲུལ་འཁོར་རིམ་པ་བཞི་རུ་བསྐོར། །དྲག་པོ་དབང་སྡུད་ཕྱག་རྒྱའི་མིང་། །རྩ་བའི་
འཁོར་ལོ་ལྕགས་མཁར་བརྒྱད། །ཡེ་ཤེས་ལས་དང་ཙ་ར་བདུད། །མཁའ་ལྡིང་དྲེགས་པ་རུས་སྦལ་ཡུམ། །དྭངས་མ་ཀུན་འབྱུང་སྙིང་པོས་དགང་། །ཡང་ལོགས་མུ་ཁྱུད་བསྙེན་རྦད་གསད། །ཕྱི་རིམ་ཕྱོགས་མཚམས་འཁོར་ལོ་བརྒྱད། །ཡན་ལག་འཁོར་ལོ་བཞི་གཉིས་ལྡན། །མུ་ཁྱུད་གསུམ་གསུམ་དྲག་པོ་དབུས། །ཐ་མ་གདུག་པའི་ར་བས་བསྐོར། །ཡན་ལག་རྩ་བའི་འཁོར་ལོ་བཞི། །བོད་པ་མིང་གི་འབྲུ་བཞིར་ལྡན། །ས་ཁམས་རྒྱ་གྲམ་འབྲུ་བཅུ་གཉིས། །མེ་ཁམས་འབྲུ་བཅུ་གསད་པའི་སྔགས། །ཆུ་ཁམས་དྲུག་གཉིས་སྲོག་དབྲོག་འབྲུ། །རླུང་ཁམས་བཅུ་གཉིས་ཐམས་ཅད་གཟིར། །འདེབས་དང་དྲོད་མཚམས་བཅུ་དྲུག་རྩིབས། །ལོ་ཐོག་འཇོམས་པའི་སྤུ་གྲིས་དགང་། །དེ་བཞིན་གཡེང་དང་བསྐྱེད་པའི་མཚམས། །རྩི་ཐོག་འབྲས་བུ་སྲུན་པས་དགང་། །དྲོད་དང་ཆུ་མཚམས་བཅུ་གསུམ་རྩིབས། །ཐམས་ཅད་སྲེག་པའི་འབྲུ་ཡིས་དགང་། །གཡེང་དང་འདེབས་མཚམས་བཅུ་གཉིས་རྩིབས། །གདུག་པ་གཟིར་བའི་འབྲུ་ཡིས་དགང་། །གང་བསྒྲུབ་འདྲེལ་ལ་ཁ་སྦྱར་བཅའ། །སྲིད་པའི་ཁྱམས་ཁང་ལྟོ་ན་གནས། །དར་ལྡན་ཐོད་པ་དོང་དུ་བཅའ། །གང་བྱེད་སྤུ་གྲི་ཞག་གསུམ་བརྩམ། །ཡན་ལག་སོ་སོ་ཁ་སྦྱར་ལ། །ཐོན་ནས་གདུག་པའི་ཀླུ་ལ་གཏད། །བདེ་བའི་རྒྱལ་པོ་གདུག་པའི་མཚོན། །དམིགས་པའི་རྩ་དང་ཁོང་དུ་འཕང་། །དྲག་སྔགས་དབྱེ་བ་འདི་ལྟ་སྟེ། །ཨེ་མྱགས་ཡ་རྔུབས་མུག་ཤག་ཀ་དུན། དགྲ་བོའི་སྲོག་ལ་ཧུར་ཐུམ་ཙིཏྟ་དྲེང་ཤག་མཱ་ར་ཡ་རྦད། དགྲ་བོའི་སྲོག་ཐུན་གཟིར་ཧུར་ཁམ་དྲེང་ཤག་སྦུར་ནན་སྟྭམ་བྷ་ཡ་ནན། སརྦ་ཨུ་ནན་ཐུཾ་རིལ་སྦུར་ནན་ཤ་ཏྲུཾ་འདྲིད་ནན་ས་ནཱ་ག་ཐུམས་ཧལ་ཧལ་ཡཾ་ཡཾ་སྦུར་ནན་ཧུར་ཐུཾ། རི་ཐུན་རོ་མྱགས་ཙིཏྟ་རཾ་ཁས་ཙ་ཐང་རཀྴ་ཐིབས་རྦད། ཡུལ་འདིར་སེར་བ་ཨེ་ནན་ཀ་པྲོཾ། མ་ཙ་ཧྲིལ་ཧྲིལ་དེ་བ་གཟིར་པྲོཾ། ནཱ་ག་ཤར་ཤར་ཕོབ་སེར་བ་ཤ་ཏྲུཾ་སྟྭཾ་བྷ་ཡ་ནཱ་ཤ་ཡ་ཕཊ། དྲག་པོ་དམར་ལེན་གབ་པ་ཡི། །བརྣག་པ་ཐུགས་ཀྱི་འཁོར་ལོ་ཡིན། །གཞན་ཡང་ཡན་ལག་སྦྱོར་བ་ནི། །རྩ་
བ་གཅིག་ཏུ་དྲིལ་བ་སྟེ། །ཕག་མོའམ་སྡིག་པའི་ལྟོ་བར་བཅའ། །དྲིལ་གཏོར་ཁ་སྦྱོར་ཐོད་པ་གསུམ། །གང་རུང་ཟུང་དུ་འདྲེལ་པས་གཅོད། །སྣང་སྟོང་གཉིས་མེད་ཡེ་ཤེས་སྐུ། །གསལ་གསུམ་དོན་བཞི་ཡང་དག་བཞི། །བདུན་པ་གསུམ་དང་སྡེབས་བཞིར་ལྡན། །མི་གཡོ་རྩལ་མེད་རང་སྣང་ཤུགས། །ཡུལ་དང་འཕྲད་ན་ཤུགས་ཀྱིས་འཆར། །རྟོག་མེད་སྤྱོད་པས་འཆི་མེད་གྲོལ། །ལས་གསུམ་སྦྱོར་བས་རྐྱེན་མེད་བསྡུ། །སྙིང་པོ་དྭངས་སྙིགས་འབྱེད་ཅིང་སྦྱོར། །གཅིག་གིས་མཁའ་ཁྱབ་རྟེན་ལའང་བསྡུ། །འབྲུ་གཉིས་ཚུལ་དུ་སྣང་བའང་འབྱེད། །རྟོགས་པ་རུ་བཟློག་འཁོར་རྒྱུན་གཅོད། །བདེ་ལམ་འཇོག་པ་རྒྱན་ལྡན་པའོ། །རྟེན་པའི་འཁོར་ལོ་འདི་ལྟ་སྟེ། །དུར་ཁྲོད་རས་སམ་ཤོག་བུ་ལ། །གསོད་པའི་རྒྱལ་པོ་གདུག་པ་འཇོམས། །ཕུང་བྱེད་ཕག་མོའི་ལྟོ་བ་རུ། །མུ་ཁྱུད་རིམ་པ་ལྔ་རུ་བསྐོར། །དབུས་དང་ཟླ་གམ་དབང་བདུན་གསོད། །མུན་ཁང་གསང་མཛོད་ཚེ་སྲོག་འཆང་། །ཕྱི་རིམ་རྒྱ་གྲམ་འཁྲུལ་མིག་བརྒྱད། །སྣ་ཚོགས་རྡོ་རྗེ་ར་བརྒྱད་ལྡན། །རྩ་བའི་འཁོར་ལོ་སྙིང་པོ་མཆོག །ཕྱི་རིམ་ལྟོ་སྦྱོར་མུ་ཁྱུད་ཟླུམ། །གང་སྒྲུབ་བསད་པའི་སྔགས་ཀྱིས་གང་། །མེ་དབལ་འཁོར་ལོ་གཤེད་ཀྱི་འབྲུ། །རྣོ་དབལ་མཚོན་ཆ་ལྟོ་སྦྱོར་ཡིན། །ཡང་ལོགས་མཚོན་ཆ་རྩིབས་བཅུ་གཉིས། །དམར་ལེན་སྲོག་གི་སྤུ་གྲིས་དགང་། །རྣོ་དབལ་འཁོར་ལོ་སྟོབས་དཔག་མེད། །གཅོད་ཅིང་འབིགས་པར་ངར་བཅས་ཡིན། །ཐམས་ཅད་གདུག་པའི་ར་བས་བསྡམ། །ཞེ་སྡང་གདུག་པས་ཁོང་ནས་སྐེམ། །མཛེ་ཡམས་དྲག་པོའི་འཁོར་ལོ་ཡིན། །གདུག་པ་ཀུན་གྱི་སྦྱོར་བ་མཆོག །ཕག་མོ་མཚོན་ཆ་སྣ་ཚོགས་སྤུ། །ཀླུ་གཉན་ས་བདག་ཟ་ཡིན་བསྐུལ། །གནམ་ཐོག་མཛེ་རིམས་གྲི་ལྐུགས་གཏོང་། །དམར་ལེན་སྲོག་གི་སྔགས་ཀྱིས་མཛེས། །འཁྲུལ་འཁོར་རྫས་དགུའི་ཐང་པས་བྱུག །ཁམས་དང་སྙིང་པོ་མིང་རུས་རྣམས། །གསང་མཛོད་མུན་ཁང་ལྔ་ལ་བྲི། །ཁྱམས་དང་མུ་རན་གནོད་པའི་གདོན། །
འཁོར་ལོ་ཁ་སྦྱོར་ཐོད་པར་གཞུག །སྟེང་མ་ཕོ་ཡི་ཐོད་པ་ལ། །སྦྲུལ་དང་རྒྱ་གྲམ་མེ་རི་ལྡན། །གནོན་ཅིང་གཟིར་བའི་སྔགས་ཀྱིས་དགང་། །དམར་ལེན་སྔགས་ཀྱི་དམོད་པ་དབབ། །དང་ལ་རྣལ་མས་གཅོད་ཅིང་འཕོ། །ཁ་གསོ་འཁོར་ལོ་ཐོད་པ་དང་། །དྲག་སྔགས་རྣལ་བཟློག་བསྣོལ་མར་བརྡེག །ཐོན་ནས་གནས་ཀྱི་འོག་ཏུ་སྦ། །ཉ་སྟོང་ཐོད་པ་ལིངྒ་དང་། །བརྒྱ་བརྒྱ་མཚོན་ཆ་བསྣོལ་མས་གཅོད། །རྟགས་ཐོན་ཆེར་གནོད་ཀླུ་ལ་གཏད། །རྩ་རྒྱུད་བཅད་པའི་སྦྱོར་བ་ནི། །ཉིན་ཞག་གསུམ་དང་ཕྲུགས་གཅིག་བཟླས། །ཐོན་ནས་འཁོར་ལོ་ཐོད་པ་གཟིར། །དུག་ཤིང་མེ་དང་དུད་པས་བདུག །འཁོར་ལོ་རྐྱང་པ་རྫས་ཀྱིས་གྲིལ། །རྫས་ཀྱི་ཕག་མོའི་ལྟོ་བར་གཞུག །སྦྱོར་བ་ཀུན་ལྡན་ཀླུ་ལ་གཏད། །སྔགས་ཀྱི་རྒྱལ་པོ་ཤུགས་ཀྱིས་གྲངས། །མ་བྱུང་སྦྱོར་བའི་སྟོབས་ཞན་ན། །འཁོར་ལོ་དུག་དང་ཚ་བ་ཁྲག །སྨེ་བ་ལྔ་དང་མནོལ་ཁྲག་བསྐུ། །སྔགས་རྣམས་དུག་དང་མིང་རུས་ཁྲག །དཀྲུག་སྔགས་ལུགས་དང་ལུགས་མིན་བྲི། །རྒྱུ་རྐྱེན་ལིངྒ་དབུས་མཚམས་ལྔ། །ལུས་དང་ཡན་ལག་འབྱུང་བ་དཀྲུག །ལྷ་སྲིན་གནད་ལ་བོར་ཏེ་གསོད། །གདུག་པའི་སྙིང་དང་ཁ་རུ་གཏད། །དྲག་སྔགས་སྦྱོར་བ་འདི་ལྟ་སྟེ། །ཨེ་མྱགས་ཡ་རྔུབས་མུག་ཤག་ཀ་དུན། དགྲ་བོའི་ཙིཏྟ་དྲེང་ཤག་ཛ་སྲོག་ལ་ཧུར་ཐུམས་རྦད། ཐུམས་ཧུར་ལ་སྲོག་ཛ་ཤག་དྲེང་ཏ་ཙི་དགྲ་བོ་རྦད། དགྲ་བོའི་སྲོག་ལ་དྲེང་ཤག་ཧུར་ཐུམས་ཤག་ཛ་ཙིཏྟ་རྦད། སྲོག་ཐུམ་ཧུ་ར་ལ་ཛ་ཤག་དྲེང་ཙིཏྟ་རྦད། ཕག་མོ་ཁང་ཡན་ཉེ་བའི་རྒྱུ། །རྣོ་དབལ་མཚོན་ཆ་རྣལ་མ་ཡིན། །གཞན་ཡང་སྦྱོར་བ་དྲག་པོའི་ལས། །སྔོན་དུ་འགྲོ་བ་སྔར་བཞིན་ལས། །ཁྱད་པར་ལྷ་སྲིན་དཀྲུག་པའི་ལས། །སྡིག་པ་ཆེན་པོའི་ལྟོ་བ་རུ། །མུ་ཁྱུད་རིམ་པ་ལྔ་དང་ལྡན། །དབུས་ལ་སོགས་པ་སྔ་མ་བཞིན། །བཅས་པ་དྲག་སྔགས་དཀྲུག་བཟློག་དགོད། །གསང་མཛོད་ལྔ་ལ་མིང་རུས་ཁམས། །ཟླ་ཁམ་གསུམ་ལ་སྲུང་བའི་ལྷ། །རྒྱ་གྲམ་འབྲུ་བརྒྱད་དྲག་པོའི་སྔགས། །སྙིང་པོ་འབྲུ་བརྒྱད་རྩ་བ་དཀྲུག །འཁོར་ཡུག་
ལྷ་སྲིན་གང་བསྒྲུབ་སྔགས། །མཚོན་ཆའི་རྩེ་མོ་བཅུ་གཉིས་ལ། །དམར་ལེན་སྤུ་གྲི་དཀྲུག་ལ་དགོད། །སྦྲུལ་དང་མུ་རན་གནོད་པའི་མིང་། །ཁ་སྦྱོར་ཞིང་རས་རྒྱུ་ལ་བྲི། །ལྕགས་ཀྱི་སྡིག་པའི་ལྟོ་བར་གཞུག །མགོ་དགུ་ཁ་དགུས་གཅོད་ཅིང་ཟ། །ཤ་ཁྲག་དྲོད་དང་རྩ་ལ་རོལ། །ལག་དགུས་ལེན་བྱེད་ལག་དགུས་གཅོད། །བླ་དང་དབང་པོ་སྲོག་རྩ་སྡུད། །རྐང་པ་དགུ་ཡི་དུར་ཆད་རྐོ། །རྐང་པ་དགུ་ཡིས་གཟིར་ཞིང་གནོན། །ལྕགས་ཀྱི་སྡེར་མོས་ཙིཏྟ་འབྱིན། །དུག་གི་སྨེ་བས་མྱོས་ཤིང་རློམ། །དུག་གི་རླངས་པས་གསོད་ཅིང་བསྲེག །མཆི་མ་ཁྲག་དང་ཁ་ཆུ་དུག །རྔ་མ་མཚོན་ཆའི་ལོ་མ་ཡིས། །གདུག་རྩུབ་རྩ་དང་སྲོག་རྩ་གཅོད། །གསོད་པའི་སྡིག་པ་ལྟོ་སྦྱར་ལ། །ཐོད་པ་ཁ་སྦྱར་ནང་དུ་བཅའ། །མོན་ནམ་རབས་ཆད་ཐོད་ནང་གཞུག །གསུམ་མམ་ཕྲུགས་གཅིག་དྲག་སྔགས་ལས། །དུག་ལྔ་བརྐམ་ཆགས་ཡུལ་ལ་རྦད། །རྒྱལ་བློན་སྟོབས་ཅན་དྭངས་སྙིགས་འབྱེད། །འབྱུང་བ་ལྔ་ཡི་འོག་ཏུ་གནན། །སྟོབས་ཆེན་འབྱུང་བའི་དགྲ་ལ་གཏད། །གདུག་པ་གཟིར་ལ་དགྲ་ཟླ་བསྐོ། །དབང་ཆེན་ཕྱག་རྒྱ་དེ་བཞིན་བརྟག །ཀ་ལ་ཀ་བ་ཕོ་མོ་བྱེད། །སྣ་ཚོགས་རྡོ་རྗེ་གྲུ་གསུམ་སྦྲུལ། །སྙིང་པོ་མིང་བཅས་བརྡ་གསུམ་བསྡུ། །དྲག་སྔགས་དཀྲུག་པ་འདི་ལྟ་སྟེ། །ཡ་རྡུབས་ཨེ་ཤག་དུན་མྱགས་ཀ་མུགས། དགྲ་བོའི་སྲོག་ལ་ཤག་དྲེང་ཛ་ཙིཏྟ་ཐུཾ་ཧུར་རྦད། སྡིག་པ་ལྟོ་སྦྱར་དཀྲུག་པའི་ལས། །ཀུན་གྱི་མཐའ་རུ་སྤོགས་པ་ཡིན། །དེ་དག་ཐུན་མོང་སྦྱོར་བའོ། །དེ་ནས་ཡང་བཅོམ་ལྡན་འདས་ཀྱིས་ཁྱད་པར་གྱི་སྦྱོར་བ་འདི་གསུངས་སོ། །བརྡ་དོན་ཐབས་ཀྱིས་གྲོལ་བའི་ལས། །བ་དང་འོ་མ་ཞོ་དང་མར། །ཞུན་མར་སྣུམ་གྱི་སྙིང་པོའི་ཚུལ། །སྙིང་པོའི་སྦྱོར་བ་གསུམ་དང་ལྡན། །གསད་གསོ་དབབ་པའི་ལས་ཆེན་ཡིན། །གསད་པ་ཁྱད་པར་སྦྱོར་བ་དག །གཡང་མིན་བརྟན་དང་གྲོལ་དབང་དག །སྟོབས་ལྡན་སྦྱོར་བའི་སྙིང་ཕྱུང་འདི། །གང་ཐུན་རྒྱུ་ལ་འཁོར་ལོ་བཅའ། །རྫས་དང་ཐང་པའི་སྦྱོར་བ་ཡིན། །དཔའ་
བརྟུལ་དྲག་པོའི་སྟོབས་ཀྱིས་སྤྱད། །གདུག་བྱེད་ཕག་མོའི་ལྟོ་བ་རུ། །སྲིད་པའི་ཁྱམས་ཁང་སྲོག་སྡུད་བཅའ། །ཁྱམས་ཁང་ལྟོ་ན་བརྣག་པའི་གཟུགས། །སྤྱི་གཙུག་སྙིང་གར་མཚོན་ཆ་བཅའ། །མུ་ཁྱུད་གསུམ་དབུས་མིང་རུས་བྲི། །ཕྱི་རིམ་རྒྱ་གྲམ་རྩ་བའི་སྔགས། །ཡང་ལོགས་བཅུ་གཉིས་སྤུ་གྲི་མཚོན། །རུས་སྦལ་ལྟོ་ཡི་ཕྱོགས་མཚམས་ལས། །རྩིབས་ཆེན་བཅུ་གཉིས་རྩེ་མོ་ན། །གསང་བ་དྲག་པོའི་སྤུ་གྲིར་ལྡན། །ཕག་མོའི་ལྟོ་ནང་རྩིབས་བཅུ་གཉིས། །རྩེ་མོ་ནང་བསྟན་སྤུ་གྲིས་གང་། །འཁྲུལ་མིག་ཁྱམས་ཁང་རུས་སྦལ་དགང་། །གནན་པའི་དྲག་སྔགས་མཚམས་སུ་བརྡེག །བསྐྱོད་པའི་བཅུ་གཉིས་ཡན་ལག་མགོ། །དོན་གཉིས་བསྡུས་ལ་སྦྱོར་བ་བརྩམ། །ཁ་སྦྱར་དུར་མར་བརྣག་པའི་རྟེན། །རྒྱུ་རྟེན་དྲུག་བཅས་ཙོག་པུར་དགབ། །སྙིང་གར་འདེབས་བྱེད་སོར་གསུམ་སར། །བསྒོམ་བསྐུལ་དྲག་སྔགས་བསྣོལ་མར་བརྡེག །སྲིད་པ་གསུམ་གྱི་སྲོག་བསྡུས་ལ། །སྔགས་དང་སྤུ་གྲི་ཐེམས་ལ་བླང་། །ཡ་བག་ཤ་ཡི་སྦྱོར་ཚུལ་ཅན། །རྩ་དང་སྲོག་ཟུངས་གཅོད་ཅིང་བསྲེག །ཧོ་བན་སྲོག་འཛིན་དྭངས་སྙིགས་འབྱེད། །སྲོག་གི་ཐིག་ལེ་བདེ་ལམ་བགྲོད། །ཅིག་ཤོས་ཐོད་པར་སྡུད་ཅིང་གནོན། །འདེབས་སྐྱོད་ཡང་འཕུལ་ཡ་ཡི་ལས། །ཞག་གསུམ་དམར་ལེན་དམོད་པ་བོར། །རྔམ་ཚིག་དྲག་པོས་རང་གཤེད་བསླང་། །ལུས་སྲོག་ཕྲལ་ནས་སྲོག་གཟིར་བསླང་། །ཕུར་པ་ཁྲི་ཡིས་སྙིང་ལ་གཟིར། །ཕུར་པ་བྱིན་ཅན་གཟེར་དུ་གདབ། །གདུག་པ་མྱོས་བརླམས་བརྒྱལ་ཏེ་འགྲོ། །གསུམ་དང་ལྔ་ན་རྫི་ཡལ་སྲུབས། །ཐོད་མཁར་རྟེན་གྱི་རྟེན་འདྲེལ་ལྟ། །བརྣག་པའི་རྒྱུད་ལ་གནོད་ཅིང་འཇོམས། །དབང་ཆེན་དྲེགས་པ་ཕོ་མོ་འཁོལ། །སྲོག་གི་ཐིག་ལེ་ཉིད་དུ་འགྱུར། །ཀི་ཀཾ་ལས་ཀྱི་རིམ་པ་ཡིན། །སྟོང་ཉིད་མ་སྐྱེས་བདེ་བ་འགོད། །བདེ་བའི་ཡེ་ཤེས་ཉིད་དུ་འབར། །ཐིག་ལེ་བདེ་བའི་སྤྲོས་དང་བྲལ། །ཁ་གསོ་མཐུ་རུ་ཟོར་དེ་བསྲེག །དྲག་སྔགས་སྦྱོར་བ་འདི་ལྟ་སྟེ། །ཨེ་མྱགས་ཡ་རྔུབས་མུགས་ཤཀ་ཀ་དུན། རྩ་ལ་མྱོགས་
ཙིཏྟ་ཁས་རྦད། ཁས་ཙིཏྟ་མྱོགས་ལ་རྩ་ཛ་ཤག །དྲེང་ལ་སྲོག་རྦད། སྲོག་སྟྭམ་བྷ་ཡ་ནན། སྲོག་ལ་ཐུན་བྷྱོ། བདེ་བྱེད་ཚངས་པའི་གནས་སུ་དབབ། །དམར་ལེན་སྙིང་ཕྱུང་སྦྱོར་བ་ཡིན། །དེ་ནས་བཅོམ་ལྡན་འདས་ཀྱིས་ལོ་ཐོག་གཞོམ་པའི་སྦྱོར་བ་འདི་གསུངས་སོ། །ཐམས་ཅད་སྐུ་གསུང་ཐུགས་བདག་ཉིད། །ཡེ་ཤེས་རིག་པའི་ཕྱག་རྒྱར་གསལ། །ཚེ་གནས་དབང་པོ་ལོ་ཐོག་འཇོམས། །ལས་ཀྱི་བརྣག་པ་སྣང་སྣང་མིན། །རིམ་པ་གསུམ་ལྡན་ཕག་མོའི་ལྟོར། །དབུས་ཡུལ་རྒྱ་གྲམ་རྩ་བ་ཟླུམ། །རྩིབས་ཆེན་བརྒྱད་གཉིས་སྦྱོར་བ་བཞི། །ཁ་སྦྱོར་ཡུལ་སྲུང་ལ་སོགས་རྟེན། །ཐོད་ཆེན་ཕག་ཐོད་སྤྱང་ཀི་རྫས། །བདུན་འབུམ་ཉི་ཁྲི་འབུམ་གཅིག་བརྟག །རྩང་དང་སྐྱེར་ཕུར་གཏའ་ལ་གཟེར། །ཟོར་ཐབ་དུ་བ་སྤོགས་དང་རྣལ། །ཁྲག་སྣ་དགུ་དང་སྨེ་རྫས་དགུ། །ཁྲག་དུག་ཞོ་དང་སེང་ལྡེང་ལྕགས། །གཟུགས་བརྙན་དཀར་ནག་ཀླུ་གནས་སར། །མོན་ཐོད་ནང་དུ་དར་གྱིས་གྲིལ། །འབུམ་གཅིག་བཅུ་པར་རྟེན་ལ་བསྡིམ། །དབྱར་དཔྱིད་ཐ་ཆུང་ར་བ་ཉ། །སྟོན་ཟླ་གསུམ་ལ་ཧ་གསུམ་བརྒྱད། །བཞི་དང་བཅུ་གཅིག་ཉི་ཤུ་དགུ། །གང་རུང་ལོ་ཐོག་འབྲས་བུ་སྡུད། །དྲག་སྔགས་སྦྱོར་བ་འདི་ལྟ་སྟེ། །པྲོཾ་པྲོཾ་ཤར་ཤར་ཧྲིལ་ནཱ་ག་སྙིང་གཟེར་རྦུད། རཾ་ཐུཾ་ཡཾ་ཤིག་ཧྲིལ་བྷྱོ། པྲོཾ་ཤར་ཧྲིལ་བྷྱོ། པྲོཾ་ཤར་རཾ་ཐུན་བྷྱོ། ནཱ་ག་སྙིང་གཟེར་སྡུད། ཡཾ་ཤིག་ཐུཾ་ཤར། དྲག་སྔགས་སྦྱོར་བ་རྒྱལ་པོ་ཡིས། །སྨན་དང་རྩི་ཐོག་འཇོམས་པའོ། །ཐམས་ཅད་ཟུངས་ཐུབ་སྙིང་པོ་མཆོག །བྱིན་རླབས་དྲག་པོ་ཀུན་འདུལ་གསང་། །བདེ་བ་ཉམས་ཀྱི་ལྷུན་གྲུབ་གསལ། །ཐམས་ཅད་ཟིལ་གནོན་སྔགས་དང་ཡུལ། །སྙིང་པོ་སྲོག་དང་བརྡའ་མིང་སྦྱར། །གཟིར་ཞིང་མྱོས་བྱེད་དབང་པོ་འཆལ། །ཡི་གེ་གནད་ཀྱི་སྲོག་འཕྲོག་ལ། །ལས་དང་སྦྱོར་བ་རྒྱུན་གཅད་བསྡིམ། །རྟེན་གྱི་མཆོག་ལ་གནས་སུ་དབབ། །ཕག་མོའི་ལྟོ་བར་རྒྱ་གྲམ་ཨེ། །ཉི་ཤུ་གཉིས་རྩིབས་གདུག་པར་ལྡན། །གྲུ་གསུམ་གང་གནོད་གཟུགས་དང་མིང་། །རྒྱ་གྲམ་དེ་བཞིན་རྩ་བའི་སྔགས། །
མཚམས་དང་གསང་མཛོད་རྩ་སྦུབས་མིང་། །ཉི་ཤུ་གཉིས་ལ་སྤུ་གྲི་སྦ། །ལྟོ་སྦྱར་དུག་ཁྲག་ཕག་ཐོད་བརྣག །ཞག་གསུམ་སྔགས་བཟླས་བསྲེག་ལ་གནན། །གང་གནོད་མིང་དང་སྙིང་པོ་བསྡེབ། །གཟིར་ལ་སྲོག་དབྲོག་སྦྱོར་བ་གཅད། །སྤྱི་སྲོག་འབྲུ་གསུམ་གནད་ཀྱིས་དབྲོག །སྒོ་དགུའི་བརྡ་མིང་སྟོབས་ཀྱིས་གཟིར། །ཀུན་གྱི་མཐའ་རུ་གྲུ་གསུམ་གྱི། །ལས་དང་སྦྱོར་བ་རང་གཤེད་གཅོད། །ཨེ་མྱགས་ཡ་རྔུབས་མུགས་ཤག་ཀ་དུན། སརྦ་ཙིཏྟ་གཟིར་ཐུཾ་ཨུ་ནན། ཀཾ་ཤག་སྙིང་གཟེར་འདྲིད་ཕྱུང་ཏྲིག་ནན་རཾ་ཤག་རྦད། སྔགས་ཀྱི་ཡན་ལག་སྤུ་གྲི་ཡིས། །རྣོ་མྱུར་བཅས་ཏེ་འཇོམས་པར་བྱེད། །བགྲོད་པ་སྟོབས་ཀྱིས་དབང་མེད་ན། །རང་ཡང་འཆིང་བའི་ལས་སུ་འགྱུར། །ཐམས་ཅད་འཇོམས་པར་གདོན་མི་ཟ། །དེ་ནས་ཡང་བཅོམ་ལྡན་འདས་ཀྱིས་དམར་ལེན་ལས་ཀྱི་ཁ་གསོ་ཐུན་གྱི་སྦྱོར་བ་འདི་གསུངས་སོ། །ལས་རྣམས་ཀུན་གྱི་མཆོག་བསྡུས་པ། །རྩ་བ་གཅིག་ཏུ་དྲིལ་བ་ཡིན། །ལས་ཀྱི་གནད་དང་བསྐྱོད་པའི་ཐབས། །བར་མཚམས་སྦྱོར་བ་ཀུན་དང་ལྡན། །རི་ནག་དུར་ཁྲོད་སྨེ་གྲི་མནོལ། །གཡུལ་བཀྱེའི་ས་ཆུ་ཁྲག་བླངས་ལ། །སྟེགས་བུ་ཆག་ཆག་ཟོར་ཐུན་བཅའ། །རི་ཤོ་གྲོ་ག་མནོལ་ཁྲག་མིང་། །ཞིང་རས་རུས་ཆེན་ཞབས་མ་ལ། །དུག་དང་ཚ་བ་བརྣག་པའི་རྟེན། །བཅས་ལ་ཐོད་ཆེན་འཐོམ་ནག་དོང་། །དྲུག་ལས་སྦྱོར་བ་སོར་བཅུ་གཉིས། །ཙོག་པུ་སྤྱི་ཚུགས་བརྣག་པའི་བརྡ། །སྐྱེ་ཚེར་རེ་བ་མཐིང་ནག་སྐྲ། །གསལ་གསུམ་མཆོག་གི་ཐུགས་སྔགས་བསྐོར། །རང་ཉིད་ཆེ་བའི་དོན་དང་བརྡེག །དྲག་ལ་འདྲིལ་བ་བར་མི་བཅད། །དང་པོ་དགུ་ལིང་བཞི་བསྐོར་བྱ། །གུང་སྲོད་ཐོ་རངས་དྲག་ཏུ་བསྐོར། །དགུ་ཐོག་ལྕབ་ཆེན་གཟེར་འདེབས་ཚུལ། །རྣལ་མས་ལུས་ཀྱི་དབང་པོ་བཤིག །བཟློག་སྟེ་ཆེར་དྲིལ་ཐུན་བཞིར་བརྣག །ཤ་རུས་ཁྲག་ཆུ་འཇོམས་ཤིང་སྐེམས། །དཀྲུགས་ཏེ་ཐུན་སྔགས་དྲག་བཞིར་བརྡེག །རྩ་སྲོག་དབུགས་རྒྱུན་གཅོད་ཅིང་འཕོ། །མ་ཡེངས་གདེངས་གསུམ་ཕྱེ་གསུམ་བྲུན། །དགུ་སྐོར་ཐུན་གྱིས་བརྡེག་ཐུན་
ལྡན། །དབང་པོ་རྣམ་ཤེས་ཁམས་དང་རྟེན། །འཕོ་བ་གསུམ་གྱི་བརྡའ་ཕན་ཡིན། །བསྐོར་ཕྱོགས་གཡས་གཡོན་དབུས་མཐར་སྦྱར། །མཐའ་རུ་གདོན་གསུམ་གང་རུང་བརྣག །གདུག་པ་མེ་དང་མེ་ཐོད་ཀླུ། །ཟོར་ཐུན་ལས་གཉིས་བསྡེབས་ལ་བརྩམ། །དེ་ཡི་འཕོ་ཚུལ་གཉིས་དང་ལྡན། །མ་ཡེངས་བརྟེན་དང་གྲོལ་བས་འཕང་། །ར་ནག་ཆད་པ་སེང་གེ་ཁ། །གང་ཡང་དོགས་པ་མེད་པར་འཇོམས། །དེ་ནས་བཅོམ་ལྡན་འདས་ཀྱིས་ཐུན་སྔགས་དྲག་པོ་འདི་གསུངས་སོ། །ཨེ་མྱགས་དགྲ་བོའི་སྲོག་ལ་བམ་རིལ་ཁ་ཐུན་ཡཾ་རྦད། ཡ་རྔུབས་སྲོག་ལ་ཧྲིལ་མྱགས་ཐུན་ཤག་རྦད། མུགས་ཤག་སྲོག་ལ་གཟེར་ཐུཾ་རམ་ཐུན་རྦད། ཀ་ཐུན་སྲོག་ལ་མཱ་ར་ཡ་ཐུན་རྦད། དུས་ཚོད་ཉིན་གཉིས་དེ་བཞིན་མཚན། །བརྡེག་པ་དང་པོའི་ལས་དེའོ། །དུན་ཀ་ཤག་མུགས་རྔུབས་ཡ་མྱགས་ཨེ། དགྲ་བོའི་སྲོག་ལ་ཧུར་ཐུཾ་ཛ། རྩ་སྲོག་དབུགས་ལ་རཾ་ཐུན་རྦད། །དེ་བཞིན་བཞི་རུ་བྲ་བསྐོར་བསྡེབ། །འཇོམས་པ་དྲག་པོའི་དབུས་དེ་བཞིན། །ཨེ་རྔུབས་ཙིཏྟ་ཧུར་ཐུཾ་རྦད། མྱག་མུགས་ཙིཏྟ་དྲེང་ཤག་རྦད། ཡ་ཤག་ཙིཏྟ་རག་ཐིབས་རྦད། ཀ་དུན་ཙིཏྟ་རྔུབས་ཤག་རྦད། དེ་བཞིན་བཞི་བསྐོར་སྔགས་ཀྱི་སྒོ། །དྲུག་གིས་ལས་ཀྱི་གནད་དུ་འབེབས། །བསྐུལ་བ་བཞི་སྐོར་བླ་སྔགས་བཞི། །ཟླ་གཅིག་དུས་བཞི་རྟག་ཏུ་བྱ། །ཀུན་འཇོམས་དྲག་པོ་མེ་དང་འདྲ། །དུག་ཁྲག་གཉིས་ལྡན་བདེ་བའི་ཉམས། །རྟེན་གཅིག་ཤེས་པ་དྭངས་སྙིགས་འབྱེད། །དང་པོར་ཡུལ་ལྡན་དམིགས་པ་བརྟག །བགྲོད་པའི་སྟོབས་ཀྱི་གདེངས་གསུམ་ལྡན། །དཔའ་བརྟུལ་སྟོབས་ལྡན་དམོད་པ་བརྩམ། །རང་ཉམས་ཤུགས་ལྡན་གང་བརྩམ་སྨིན། །ཡེ་ཤེས་ཉོན་མོངས་བདེ་དང་སྨིན། །རང་འཆིངས་ཐབས་གྲོལ་ལྡན་དང་མིན། །བདེན་པ་གཉིས་འཛིན་དོན་མེད་ཡལ། །བདེ་བའི་རྒྱལ་པོ་རང་ལས་ཤར། །མ་བཅོས་བཅོས་མེད་བཅོས་དང་བྲལ། །ཨེ་ཡི་ཡེ་ཤེས་ལས་བྱུང་བ། །ཆོས་སྐུ་ནམ་མཁའ་ལས་དྲག་རྫོགས། །ཀ་ཡི་
ཡེ་ཤེས་ལས་བྱུང་བ། །ལས་དང་སྦྱོར་བ་སྨིན་ཅིང་རྫོགས། །ཡ་ཡི་ཡེ་ཤེས་ལས་བྱུང་བ། །ཕུལ་ཞིང་བསྐྱོད་དེ་སྲོག་དབུགས་རྫོགས། །མྱགས་ཀྱི་ཡེ་ཤེས་ལས་བྱུང་བ། །སྲོག་སྡུད་ལས་སྨིན་ཐར་བར་རྫོགས། །རྔུབས་ཀྱི་ཡེ་ཤེས་ལས་བྱུང་བ། །བསྲེག་སྐྱེམས་ཁྲག་རྒྱས་འབྲས་བུ་རྫོགས། །མུགས་ཀྱི་ཡེ་ཤེས་ལས་བྱུང་བ། །དོན་གསུམ་མ་ཡེངས་ཆེ་གཞི་རྫོགས། །ཤག་གི་ཡེ་ཤེས་ལས་བྱུང་བ། །འབྲལ་བ་གསུམ་དང་ཐར་པ་རྫོགས། །དུན་གྱི་ཡེ་ཤེས་ལས་བྱུང་བ། །འཆི་བདག་རང་བདུད་སྣང་གསལ་རྫོགས། །འདྲེལ་ཆེན་བཞི་ནི་བགྲོད་པ་སྟེ། །ཡི་གེ་སྔགས་ཀྱི་གསང་ཚིག་ཉིད། །ཆེ་བ་བཞི་ཡི་གྲངས་དོན་ཡིན། །རྩོལ་བྲལ་རང་ཉམས་ཤུགས་ཀྱིས་སྤྱད། །དྲག་ལ་འདྲིལ་ཞིང་ཆེ་བའི་སྟོབས། །ཡིན་པར་རྟོག་མེད་རང་ཤུགས་ལྡན། །དེ་ནས་བཅོམ་ལྡན་འདས་ཀྱིས་བླ་རྐུན་ཕོ་ཉ་བླ་ལ་མངག་པ་འདི་གསུངས་སོ། །ཐུགས་ཀྱི་སྤྲུལ་པ་མངོན་བྱུང་བ། །ཤར་གྱི་ཕྱོགས་ནས་བླ་འགུགས་པ། །དུང་གི་མོན་པ་སེང་གེའི་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོའི་བླ་ནས་འཇོམས། །སྙིང་དགུས་དགྲ་བོ་ཡིད་ལ་འཛིན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །ཀ་ལི་དུན་ཏིང་ཙིཏྟ་རོ་མྱག་སྲོག་ལ་ཐུཾ་རི་ལི་ལི་བྷྱོ། ལྷོ་ཡི་ཕྱོགས་ནས་བླ་འགུགས་པ། །ལྕགས་ཀྱི་མོན་པ་སྟག་གི་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོའི་བླ་ནས་འཇོམས། །སྙིང་དགུས་དགྲ་བོ་ཡིད་ལ་འཛིན། །ཕྱག་དགུས་ཙིཏྟ་ཁོང་ནས་འཛིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །ཧ་ལ་ཧ་ལ་དུན་ཏིང་རོ་མྱགས་སྲོག་ལ་ཐུཾ་རི་ལི་ལི་བྷྱོ། ནུབ་ཀྱི་ཕྱོགས་ནས་བླ་འགུགས་པ། །བསེ་ཡི་མོན་པ་དྲེད་ཀྱི་མགོ། །དབུ་
དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་གསུམ་བླ་ལ་རྒྱུག །སྤྱན་དགུས་དགྲ་བོའི་བླ་ནས་འཇོམས། །སྙིང་དགུས་དགྲ་བོ་ཡིད་ལ་འཛིན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །རཀྴ་ཧུ་ཏི་དུན་ཏིང་རོ་མྱགས་དགྲ་བོ་སྲོག་ལ་ཐུཾ་རི་ལི་ལི་བྷྱོ། བྱང་གི་ཕྱོགས་ནས་བླ་འགུགས་པ། །གསེར་གྱི་མུན་པ་ཁྱུང་ཆེན་མགོ། །དབུ་དགུ་སྤྱན་དགུ་ཞལ་དགུ་གདངས། །ཕྱག་དགུ་ཞབས་དགུ་ཙིཏྟ་དགུ། །ཞབས་དགུས་སྟོང་ཁམས་བླ་ལ་རྒྱུག །སྤྱན་དགུས་དགྲ་བོའི་བླ་ནས་འཇོམས། །སྙིང་དགུས་དགྲ་བོ་ཡིད་ལ་འཛིན། །ཕྱག་དགུས་ཙིཏྟ་ཁོང་ནས་འབྱིན། །ཞལ་དགུས་ཁ་མངར་མེད་པར་གསོལ། །ལྗགས་དགུས་ཁྲག་ལ་མྱོས་ཤིང་འཐུང་། །དགྲ་བོ་བླ་དང་ཕྲོལ་ལ་ཤོག །ཀརྨ་བྷ་ཏི་དུན་ཏིང་རོ་མྱགས་སྲོག་ལ་ཐུཾ་རི་ལི་ལི་བྷྱོ། དྲག་པོ་མཐའ་སྡུད་སྐྱོད་ཅིང་འདྲིལ། །ཕོ་བྲང་ཐིག་ལེ་བདེ་ལ་བཞག །ཡོན་ཏན་ལྷུན་གྲུབ་རིན་པོ་ཆེ། །རྩ་བ་གཅིག་ལ་ཡན་ལག་འབྱུང་། །སྦྱོར་བ་དུ་མ་ལས་ཀྱི་གནད། །དམར་ལེན་སྔགས་ཀྱི་མཐུ་དྲིལ་ནས། །འཁོར་ལོ་མཚོན་ཆའི་རྒྱལ་པོའོ། །དྲག་སྔགས་མངོན་དུ་ཕྱུང་བའི་རྒྱུད་ལས། དམར་ལེན་སྙིང་པོ་དོན་གྱི་མན་ངག་གི་ལེའུ་སྟེ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་ཡོན་ཏན་ཐོབ་པར་བྱ་བའི་རིམ་པ་འདི་གསུངས་སོ། །ཚེ་སྲོག་བདག་པོའི་དོན་དག་ནི། །རྣམ་གྲངས་ལྔ་དང་ལྡན་པའོ། །དབྱེ་བ་ངོ་བོ་ཡོན་ཏན་དང་། །ལས་དང་འབྲས་བུ་ངེས་པར་བཤད། །དབྱེ་བ་དག་པ་རྣམ་པ་ལྔ། །རང་བཞིན་ལྷུན་གྲུབ་ཚེ་བདག་དང་། །ཡེ་ཤེས་ལྷུན་གྲུབ་ཟིལ་གནོན་དང་། །ཕྱག་རྒྱ་གཅིག་པའི་ཚེ་བདག་དང་། །ཐུགས་ལས་འཁྲུངས་པའི་ཚེ་བདག་དང་། །ལས་ལས་གྲུབ་པའི་ཚེ་བདག་གོ། །ཡོན་ཏན་རིན་པོ་ཆེ་ལྟ་བུ། །ཀུན་འབྱུང་འཕེལ་འགྲིབ་མེད་པར་གནས། །ལྷུན་གྲུབ་ཚེ་བདག་དྭངས་མ་ལྔ། །རྒྱུ་རྐྱེན་འཕྲོ་འདུ་རྩོལ་དང་བྲལ། །ཕྱག་རྒྱ་
ཆེན་པོར་ལྷུན་གྲུབ་པའོ། །ཟིལ་གྱིས་གནོན་པའི་ཚེ་བདག་ནི། །སྣང་སྲིད་ཡེ་ཤེས་རྟོག་ལས་འདས། །རྟོག་བཅས་འཁྲུལ་པ་རུ་བཟློག་ཕྱིར། །རིན་ཆེན་གཞལ་ཡས་ལྷུན་གྲུབ་ན། །སྟོབས་ཀྱི་གདན་ལ་དེ་བཞིན་གྲུབ། །རང་བཞིན་གསལ་བའི་ངང་ཉིད་ལས། །ཡེ་ཤེས་ལྷུན་གྱིས་གྲུབ་པའི་སྐུ། །ལྷུན་པོ་རི་རབ་བརྟན་ལྟར་བརྗིད། །སྲིད་གསུམ་སྦྱོར་བ་ཟིལ་གྱིས་གནོན། །བདུད་མོ་ཁ་འབར་གསོད་བྱེད་མས། །མྱོས་བྱེད་ཁྲག་སྐྱུགས་མ་མོའི་ཚོགས། །མ་ལུས་ཟིལ་གྱིས་གནོན་ཅིང་འཇོམས། །གསོད་བྱེད་བཀའ་ཡིས་བྱིན་བརླབས་གནོན། །དྲེགས་པས་གཉན་དང་ས་བདག་ཕོ་མོ་གནོན། །བྱ་ཁྱུང་ཀླུ་བདུད་ཀླུ་སྲིན་གནོན། །ཁྱུང་མོས་ས་བདག་ས་སྲིན་གནོན། །སེང་གེས་རྒྱལ་བློན་སྟོབས་ཆེན་གནོན། །སྟག་གིས་དུད་འགྲོ་གདུག་པ་གནོན། །ཞེ་སྡང་གདུག་པའི་སྦྲུལ་ནག་གིས། །སྔགས་དང་དམད་པ་རིགས་བཞིའི་ཀླུ། །ཚ་བའི་ནད་དབལ་ཟིལ་གྱིས་གནོན། །སྲིད་པའི་ཁྱམས་ཁང་རུས་སྦལ་གྱིས། །སྲོག་དབུགས་བཀྲག་མདངས་ཚེ་སྲོག་འཆང་། །རང་བཞིན་ཆོས་སྐུ་སྐྱེ་མེད་ལས། །སྐྱེ་བའི་ཆོ་འཕྲུལ་ལྷུན་གྲུབ་སྐུས། །སྐྱེ་བ་ལས་ཀྱི་འཁྲུལ་པ་ཡི། །བརྐམ་ཆགས་སྐྱེ་མེད་ངང་དུ་གྲོལ། །དྭངས་མའི་ཐིག་ལེ་བཅུད་ལ་བསྡུ། །སྣང་སྲིད་བདེ་འགྲོ་མ་ལུས་ཀྱི། །ཚེ་སྲོག་ཡི་གེ་གཉིས་བསྡུས་འཆང་། །ཕྱག་རྒྱ་གཅིག་པའི་ཚེ་བདག་གི། །གདན་ལས་ཡབ་ཡུམ་བྱ་ཁྱུང་དྲེགས། །རྒྱན་གྱི་སྔགས་དང་གབ་པའི་སྔགས། །ལུས་སྲུང་དྲག་པོས་འཇོམས་པ་ཡི། །སྤྲུལ་པའི་ཚེ་བདག་ནག་པོ་ནི། །ཟིལ་གནོན་ཐུགས་ཀྱི་སྤྲུལ་པ་སྟེ། །དབུ་དགུ་གནད་དགུ་མི་ནད་འཇོམས་བདུད་ཡིན། །ཐེག་པ་དགུ་ཡི་དོན་ལྡན་ནས། །འབྲས་བུ་རིགས་ལྔ་ཡེ་ཤེས་བཞི། །སྤྲུལ་པ་སྣ་ཚོགས་བསམ་དཔག་དཀའ། །ལས་ཀྱི་ཚེ་བདག་ནག་པོ་ནི། །འབྱུང་བ་རྟེན་གཞིའི་རྔམ་གྱི་འོག་ཤེད་ན། །མི་དགེ་བཅུ་ཡི་ལས་དབང་ལས། །ཡི་དྭགས་རྒྱལ་པོ་འཆི་བདག་སྐུ། །ཤ་ཟ་ཀེཾ་ཀེཾ་འཁོར་དང་བཅས། །དབང་སྡུད་སྔགས་ཀྱི་ལས་ཀུན་བྱེད། །ལས་ཀྱི་རྣམ་
གྲངས་འདི་ལྟ་སྟེ། །རྩ་བ་བཞི་དང་ཡན་ལག་བཅས། །ལྷུན་གྲུབ་ཚེ་བདག་ནག་པོའི་ལས། །རྩ་བ་གཉིས་དང་ཡན་ལག་བཅུ། །ཁྱད་པར་བརྒྱ་དང་བཅུ་དྲུག་ཡོད། །སྙིང་པོ་མན་ངག་རྩ་བ་གཉིས། །ཡན་ལག་ཕྲལ་ན་ཉི་ཤུ་དགུ། །ཟིལ་གནོན་ཕྱག་རྒྱ་ཆེན་པོ་ལས། །ལྟས་ལོག་ལུས་ཀྱི་གོ་ཆ་སྲུང་། །ཕྱག་རྒྱ་གཅིག་པའི་ཚེ་བདག་ལ། །རྩ་བ་གསུམ་ལ་ཡན་ལག་ལྔ། །སྤྲུལ་པའི་ཚེ་བདག་མགོ་དགུའི་ལས། །སྦྱོར་བ་བཅུ་དྲུག་ཨ་ཀྲོའི་མཐར། །ལས་ཀྱི་ཚེ་བདག་ནག་པོའི་ལས། །སྦྱོར་བའི་རྣམ་གྲངས་བརྒྱ་ཕྲག་གཅིག །དྲུག་ཅུ་རྩ་གཅིག་བྱེད་པར་གསུངས། །ཚེ་བདག་ནག་པོའི་ངོ་བོ་འདི་ལྟ་སྟེ། །ཐམས་ཅད་ཆོས་སྐུར་ངོ་བོ་གཅིག །ཡེ་ཤེས་ལྷུན་གྲུབ་ཆེན་པོའི་སྐུ། །སྣ་ཚོགས་སྦྱོར་བ་སྤྲུལ་པའི་སྐུ། །རོལ་པ་གསུམ་གྱི་ངང་དུ་རྫོགས། །འབྲས་བུའི་གནས་ཚུལ་འདི་ལྟ་སྟེ། །ཆོས་ཉིད་འགྱུར་མེད་རང་བཞིན་ལས། །རང་བྱུང་ཡེ་ཤེས་ཕྱག་རྒྱར་འབར། །ཐམས་ཅད་སྣང་སྟོང་ཡེ་ཤེས་སྐུ། །དབྱིངས་དང་ཡེ་ཤེས་གཉིས་སུ་མེད། །སྣ་ཚོགས་ངོས་གཟུང་མེད་པའི་སྐུ། །སྣང་སྟོང་མ་འགགས་བདེ་ཆེན་ཉིད། །འཁོར་འདས་གཉིས་མེད་བརྡལ་བའི་ཀློང་། །རྟོག་དཔྱོད་ཕྲིན་ལས་རྩོལ་ལས་འདས། །ཏིང་འཛིན་འདུ་འཕྲོ་རྐྱེན་ལས་འདས། །བགྲོད་ཐོབ་རྩོལ་མེད་ལྷུན་གྱིས་གྲུབ། །མི་ཟད་རྒྱན་གྱི་འཁོར་ལོར་རྫོགས། །ཐེག་པ་ཀུན་གྱིས་བགྲོད་པའི་མཆོག །སྒྱུ་མ་ལྷུན་གྲུབ་ཡུལ་ལ་རོལ། །ཡེ་ཤེས་ལྷུན་གྲུབ་རྟོག་བརྗོད་འདས། །རང་རིག་རང་གསལ་རང་བྱུང་སྐུ། །སྣ་ཚོགས་སྣང་ལ་ངོས་གཟུང་མེད། །དྲག་སྔགས་མངོན་དུ་ཕྱུང་བའི་རྒྱུད་ལས། ཚེ་བདག་གི་རྣམ་གྲངས་ཀྱི་ལེའུ་སྟེ་བརྒྱད་པའོ།། །།གཞན་ཡང་བགྲོད་པའི་རིམ་པ་ནི། །སེམས་ཉིད་དབེན་པའི་བདེ་གནས་སུ། །རང་ཉམས་བརྟན་པའི་མཚམས་བཅད་ལ། །མཎྜལ་ཆེན་པོ་བྱ་བར་བརྩམ། །སྔོན་དུ་འགྲོ་བའི་ལས་རྫོགས་ནས། །དུར་ཁྲོད་དཔའ་མོ་རྒྱུ་བླངས་ལ། །ཐུགས་ཀྱི་སྤྲུལ་པ་མཁའ་ཁྱབ་སྤྲོ། །གུག་རྒྱལ་དྲི་ཡིས་ཁྲུས་བྱས་ལ། །མཎྜལ་དབུས་སུ་བརྟན་པར་བཞག །
བསམ་གཏན་བུམ་པས་སུམ་ཡར་སྦྱར། །དངོས་གྲུབ་གང་འདོད་དྲག་སྔགས་གདགས། །གཞན་ཚོགས་གཏོར་མ་བརྒྱད་ཅུ་སྤྱད། །སྐུར་བསྒོམ་དྲག་སྔགས་སྐུ་ཡི་སྔགས། །རྟགས་དང་སྦྱར་ལ་ལྟོ་སྦྱར་བཟླས། །བམ་གྱི་ཙིཏྟའི་ཕོ་བྲང་དུ། །ཚེ་བདག་འཁོར་དང་བཅས་པ་བརྟག །ཕུང་པོ་འབྱུང་བ་རྣམ་ཤེས་ལ། །ཡ་མའི་དཀྱིལ་འཁོར་རྫོགས་པར་བརྟག །སྐབས་དང་སྦྱོར་ལ་རྩོལ་བ་བརྩམ། །ཚོགས་དང་སྦྱོར་མཆོད་བ་ལིཾ་ཏས། །ཕྱི་རྒྱུད་མཆོད་སོགས་རྒྱུན་མི་གཅད། །རང་སེམས་ཤུགས་ལྡན་རྟགས་ཐོབ་ན། །སློབ་མ་ཚེ་བདག་སྐུ་བསྒོམ་ལ། །ཡོལ་བས་བཅད་ལ་ཁྲུས་དང་སྦྱར། །ཕྱག་རྒྱ་བཀྲ་ཤིས་གཟུངས་མ་བརྟག །སྔགས་སྐྱེས་རྒྱལ་རིགས་བྲམ་ཟེའི་རིགས། །ལང་ཚོ་མཚན་ལྡན་ཁྲུས་བྱས་ལ། །གསོ་བྱེད་གཟུངས་མས་གཡོན་ནས་འཁྱུད། །བྷ་ག་གསང་བའི་ཕོ་བྲང་དུ། །ལྷུན་གྲུབ་དཀྱིལ་འཁོར་རྫོགས་པར་བརྟག །རྡོ་རྗེར་བཅས་པའི་ཕྱག་རྒྱ་ཡིས། །གསང་བའི་ལྷ་ལ་གསོལ་བ་གདབ། །བྱིན་བརླབས་བརྟུལ་ཞུགས་འཇུག་པ་བརྩམ། །ཁྲུས་དང་མེ་ཏོག་འཇུག་པ་ཡིས། །བདེ་ཆེན་སྐུ་དང་བམ་དཀྱིལ་འཁོར། །གསང་བ་ལྷུན་གྲུབ་མཁའ་ལ་འཇུག །བརྟུལ་ཞུགས་སྔོན་འགྲོའི་རིམ་པ་བདུན། །བུམ་པ་སེམས་ཕྲེང་སྨེ་བ་བླང་། །རྒྱན་ཆ་ཕྱག་མཚན་དྲག་པོའི་དབང་། །གཏོར་མ་རཀྟ་བདུད་རྩི་བསྟབ། །ལུང་བསྟན་གཟེངས་བསྟོད་དབུགས་དབྱུང་བྱ། །གསང་མཚན་བརྟན་པ་མི་ཟློག་སྦྱིན། །དམ་ཚིག་ཆོས་བཤད་གདམས་པ་བྱ། །བཀའ་བསྒོ་མནའ་ཆུ་གསང་བ་བསྒྲག །ལྷར་བསྐྱེད་བུ་ལ་ཚོགས་ཀྱིས་རོལ། །དེ་ཡི་རིམ་པ་འདི་ལྟ་སྟེ། །སློབ་མ་གཞུག་ཕྱིར་གསོལ་བ་གདབ། །ལྷུན་གྲུབ་རང་བཞིན་གནས་པའི་ཕོ་བྲང་ནས། །ཡེ་ཤེས་རྒྱ་མཚོ་ལྷུན་གྱིས་གྲུབ་པའི་ལྷ། །མ་ལུས་མཉམ་པའི་རྒྱལ་པོ་དགོངས་སུ་གསོལ། །སློབ་མ་མཚན་ལྡན་ཡུམ་གྱི་དཀྱིལ་འཁོར་དུ། །བརྟུལ་ཞུགས་དྲག་པོའི་སྟོབས་ཀྱིས་གཞུག་ཏུ་གསོལ། །བདེ་ཆེན་མཉམ་པའི་ཕོ་བྲང་གསང་བ་རུ། །རིག་པའི་བརྟུལ་ཞུགས་སྟོབས་ཀྱིས་གཞུག་ཏུ་གསོལ། །སློབ་མ་མཉམ་པའི་དོན་དང་བགྲོད་པ་འདོད་པ་ཡིས། །མེ་ཏོག་རིན་ཆེན་འདོད་པས་མཛེས་བྱས་ལ། །
དཀྱིལ་འཁོར་དང་བཅས་བདག་ཅག་མཉམ་པ་ཡི། །རྡོ་རྗེ་རྒྱལ་པོ་དག་ལ་གསོལ་བ་གདབ། །སྟོན་པའི་སྒྲོན་མ་བཅོམ་ལྡན་འདས། །ལྷ་དང་སློབ་དཔོན་དགོངས་སུ་གསོལ། །དྲེགས་པ་སྟོབས་ཀྱིས་ཚུལ་བསྟན་པ། །འགྱུར་མེད་བདེ་ཆེན་ཕོ་བྲང་ནས། །དྲེགས་པའི་ལྷ་ཚོགས་དགོངས་སུ་གསོལ། །བྷ་ག་གསང་བའི་དཀྱིལ་འཁོར་ནས། །མཉམ་པའི་རྒྱལ་པོ་དགོངས་སུ་གསོལ། །དམ་ཚིག་དཀའ་ཐུབ་སྡོམ་པའི་མཆོག །རིག་པའི་རྒྱལ་པོ་བདག་ལ་དགོངས། །གསང་བའི་སྒྲོན་མ་བདག་ལ་དགོངས། །ཡེ་ཤེས་རོལ་པ་བདག་ལ་སྩོལ། །མེ་ཏོག་རིན་ཆེན་དབྱིག་བསྡུས་ལ། །བདེ་ཆེན་ཕྱི་ཡི་འཇུག་པ་བརྩམ། །ཕུང་པོ་ལྷུན་གྲུབ་ཚེ་བདག་རྟེན། །བམ་ཆེན་མཉམ་པའི་དཀྱིལ་འཁོར་དུ། །འཇུག་པ་ནང་གི་ལྷ་ངོ་བསྟན། །བྷ་ག་གསང་བའི་ཕོ་བྲང་དུ། །མེ་ཏོག་དོར་ལ་ལྷ་ངོ་བསྟན། །གདོང་གཡོགས་དང་ལྡན་སྤྲོ་བ་བསྐྱེད། །བཀྲ་ཤིས་མཚན་ལྡན་གསང་བའི་ཕོ་བྲང་ན། །གཉིས་མེད་སངས་རྒྱས་ཀུན་དང་མཉམ་སྦྱར་བའི། །བྱང་ཆུབ་སེམས་ཉིད་མི་འགྱུར་བདེ་བའི་མཆོག །ཕོ་བྲང་ལྷུན་གྱིས་གྲུབ་པར་བཞུགས་པ་དང་། །སྨེ་བ་ལྔ་དང་བདུད་རྩི་སྦྱོར་བའི་སེམས། །བཀྲ་ཤིས་མཚན་ལྡན་བྷནྡྷར་བརྟུལ་ཞུགས་སྦྱིན། །མི་འགྱུར་བརྟན་པའི་སྐུ་དང་ཡེ་ཤེས་བགྲོད། །གསང་བ་གཟུངས་མ་སྤྲོ་བ་བསྐྱེད་ལ་བླང་། །ཧོ། བདེ་ཆེན་གསང་བའི་ཕོ་བྲང་དུ། །ཐབས་ཆེན་གསང་བའི་བདེ་ཕབ་ལ། །དབུ་མའི་རྩ་རྒྱུད་ས་བོན་བསྲེག །བྷ་ག་གསང་བའི་ཆོས་སྐུར་བསྐྱིལ། །རྩ་ལམ་འོད་འཕྲོས་ལོངས་སྤྱོད་སྐུ། །མཉམ་པར་གནས་པ་བྱང་ཆུབ་སྐུ། །སྤྲོས་བྲལ་ཀུན་ཁྱབ་སྤྲུལ་པའི་སྐུ། །བརྟན་པ་ཐོབ་པ་རྡོ་རྗེའི་སྐུ། །ཡབ་ཡུམ་མཉེས་པས་མཉེས་པར་བྱ། །སྦྱོར་བ་དག་པའི་བྱིན་རླབས་ལས། །རྩ་བརྒྱུད་བདེ་བའི་ཐིག་ལེར་བསྐྱིལ། །བྱང་ཆུབ་ཤུགས་དང་སྨེ་བ་བསྲེ། །བཀྲ་ཤིས་མཚན་ལྡན་བུམ་པར་བསྐྱིལ། །བརྟུལ་ཞུགས་རབ་འབྱམས་དབང་བསྐུར་བྱ། །ཧོཿ། རིག་པའི་སྟོབས་ལྡན་སྦྱོར་བའི་གནས། །འཁྲུལ་པའི་བག་ཆགས་སྤྲིན་ལྟ་བུ། །ཡེ་ཤེས་རོལ་པའི་སྒྲོན་མེས་བསལ། །མཉམ་
པའི་རྒྱལ་པོ་བརྟུལ་ཞུགས་ལོངས། །ཨེ་ཀ་ཡ་མ་པྲ་ཏཱིཙྪ་ཧོཿ། མཚན་ལྡན་བཀྲ་ཤིས་ཕོ་བྲང་དུ། །དྲག་པོ་སྟོབས་ཀྱི་ལྷ་ངོ་བསྟན། །བཀྲ་ཤིས་བུམ་པས་དབང་བསྐུར་བྱ། །ཧོཿ། ཡེ་ཤེས་ལྷུན་གྲུབ་བུམ་པ་ཡིས། །བརྟུལ་ཞུགས་དག་པའི་དབང་བསྐུར་བས། །འཁོར་བ་རྣམ་དག་ཆོས་སྐུར་གསལ། །རང་བྱུང་ཡེ་ཤེས་དབང་ཐོབ་ཤོག །ཨེ་ཀ་ཡ་མ་གྷུ་ཧྱ་བྷ་ག་བོ་དྷི་ཙིཏྟ་ཧོཿ། འབྲས་བུ་ཁྲག་འཐུང་ཡེ་ཤེས་ལྔར། །རྫོགས་པའི་ཕྱག་རྒྱ་ལྷུན་གྲུབ་པའོ། །རྒྱན་ཆ་སྟོབས་ཀྱི་དབང་སྦྱིན་བྱ། །གླང་ཆེན་སྟག་གླང་ཞིང་ལྤགས་སྦྲུལ། །ཐོད་པ་སྙིང་ཕྲེང་ཀེང་རུས་བརྒྱན། །མེ་རི་དུར་ཁྲོད་དབང་བསྐུར་བས། །དྲེགས་པའི་མཐུ་སྟོབས་དབང་ཐོབ་ཤོག །ཨེ་ཀ་ཡ་མ་ཧ་སྡི་མ་ཧཱ་ནཱ་ག་ཀ་པཱ་ལ་ཙིཏྟ་ཛྭ་ལ་ནི་རི་ཧོཿ། ཧོཿ། འཁོར་བ་འདྲལ་བྱེད་འཁོར་ལོ་དང་། །ཉོན་མོངས་གཅོད་པའི་རལ་གྲི་དང་། །ཆོས་ཉིད་མཚོན་པའི་རྡོ་རྗེ་ཡིས། །སྐུ་གསུམ་མཉམ་པའི་དབང་ཐོབ་ཤོག །ཨེ་ཀ་ཡ་མ་ཙཀྲ་ཁཌྒ་བཛྲ་ཧོཿ། བེ་ཅོན་དུག་ལྔ་ཟིལ་གྱིས་གནོན་པ་དང་། །གདུག་འཇོམས་བྱེད་པའི་གཏུན་ཤིང་དང་། །ལོག་རྟོག་བརྐམ་ཆགས་འཇོམས་པའི་སྡིགས་མཛུབ་ཀྱིས། །རིག་པ་སྟོབས་ཀྱི་སྒོ་གསུམ་དབང་ཐོབ་ཤོག །ཨེ་ཀ་ཡ་མ་ཙིཏྟ་ཧུ་ཏི་ས་ར་ལ་ཧོཿ། བརྟུལ་ཞུགས་སྤྱོད་པའི་རོ་ལ་མཉམ་པར་རོལ་པ་ནི། །ཧོཿ། པདྨ་རྡོ་རྗེ་མཉམ་སྦྱར་ནས། །པདྨ་རཀྟ་བྱང་ཆུབ་སེམས། །བམ་ཆེན་སྨེ་བའི་དོན་དང་སྦྱར། །བརྟུལ་ཞུགས་རོལ་པའི་དབང་བསྐུར་བས། །མི་ཟད་རྒྱན་གྱིས་དབང་ཐོབ་ཤོག །ཨེ་ཀ་ཡ་མ་ཨ་དྷི་པ་ཏ་སིདྡྷི་ཧོཿ། ལོངས་སྤྱོད་དག་པའི་དབང་བསྐུར་བྱ། །འཆི་མེད་རང་བྱུང་ར་སཱ་ཡན། །བཀྲ་ཤིས་མཚན་ལྡན་ལྷག་པའི་རྫས། །འཕེལ་འགྲིབ་མེད་པའི་དབང་བསྐུར་བས། །རིགས་ལྔ་ཡེ་ཤེས་ལྔ་ཡི་དབང་ཐོབ་ཤོག །ཨེ་ཀ་ཡ་མ་སརྦ་པཉྩ། ཨ་མྲྀ་ཏ་ཛྙཱ་ན་ཤུཌྜྷ་ཧོཿ། བཀྲ་ཤིས་དངོས་གྲུབ་གའུ་རུ། །མི་འགྱུར་བརྟན་པའི་ཚེ་བསྐྱིལ་ནས། །རང་རྟགས་ཚེ་ཡི་དབང་བསྐུར་བས། །འཆི་མེད་མི་འགྱུར་བརྟན་པའི་དབང་ཐོབ་ཤོག །ཨེ་ཀ་ཡ་མ་ཨཱ་ཡུ འདི་བར་ནས་ཡི་གེ་ཆད་ཡོད་པ་རྣམས་ལ་དཔྱད་དགོས། ཨོཾ་ན་སིདྡྷི་ཧོཿ། སྣོད་ཀྱི་འཇིག་རྟེན་གཏོར་སྣོད་དུ། །བཅུད་ཀྱི་འཇིག་རྟེན་གཏོར་མར་གསལ། །འབྱུང་
བ་སྣ་ལྔ་གཏོར་མའི་རྒྱུ། །ལྷུན་གྲུབ་ཀུན་འབྱུང་གཏོར་མའི་རྒྱན། །འཛིན་ཆགས་མེད་པའི་སྟོབས་ཀྱིས་རོལ། །ཨེ་ཀ་ཡ་མ་མ་ཧཱ་བ་ལིཾ་ཏ་པཱུ་ཛ་ཧོཿ། སྣོད་མེད་བརྟུལ་ཞུགས་ཞན་པ་ལ། །སྤེལ་ཞིང་སྨྲས་ན་ཁྲོ་བོ་དང་། །གཏུམ་པོ་གནོད་སྦྱིན་མཁའ་འགྲོ་དབང་ཆེན་གྱིས། །ལུས་འདྲལ་ཁོང་གཤག་ཙིཏྟ་ཁྲག་ཏུ་འཐུང་། །རྡོ་རྗེ་འཆང་ཆེན་དྲེགས་པ་ང་ཡིན་པས། །བཀའ་ཡི་ཟུར་ཡང་བཅག་པར་བྱ་བ་མིན། །བསྒོ་བ་བྱོས་ཤིག་དམ་ཚིག་སྲོག་ལྟར་སྲུངས། །གལ་ཏེ་འདས་ན་རྡོ་རྗེ་དམྱལ་བར་ལྟུང་། །འདི་ནི་རྡོ་རྗེ་དམྱལ་བའི་ཆུ། །ཚུལ་འདི་བསྲུངས་ན་དངོས་གྲུབ་འཐོབ། །ཉམས་ན་མནར་མེད་དམྱལ་བར་ལྟུང་། །རྡོ་རྗེའི་ཆུ་འདི་ཁྱོད་ཀྱིས་ལོངས། །བཛྲོ་ད་ཀ་ཨི་དམ་ཧོཿ། འདོད་པའི་ཚོགས་ལ་རོལ་པའོ། །དྲག་སྔགས་མངོན་དུ་ཕྱུང་བའི་རྒྱུད་ལས། བམ་ཆེན་གསང་བའི་དབང་གི་ལེའུ་སྟེ་དགུ་པའོ།། །།གཞན་ཡང་གདུག་པའི་ནད་ཞུགས་ན། །མཚན་ཉིད་རྟག་པས་ལས་རྣམས་སྨིན། །དེ་ཡི་རིམ་པ་འདི་ལྟ་སྟེ། །རྒྱལ་རིགས་མགོ་ནས་རུས་ནད་བསྐྱེད། །རྗེའུ་རིགས་ལག་གཡས་ཚ་བ་སྐེམ། །བྲམ་ཟེ་ལག་གཡོན་ཁྲག་ཆུ་སྐེམ། །དམངས་རིགས་རྐང་གཡས་ཞ་གྲུམ་གཡོ། །རྡོལ་བ་རྐང་གཡོན་རྣག་ལ་འཇུག །བ་སུ་རྩ་ལ་ཕོལ་འབྲས་གཡོ། །སྨན་དང་འཕྱེ་བོ་རླུང་སྒོར་འཇུག །མཛེ་རླུང་ཁྲག་བསྐྱེད་ཚ་གྲང་འཁྲུག །རྐང་གཅིག་བུ་ག་ཁ་གཉིས་འཇུག །གཞོགས་སྐེམ་སུབ་པ་ནད་ཀྱི་རྒྱུ། །གེལ་བ་སོ་དང་སེན་ལ་འཇུག །ལྕི་འཐིབས་གཟེར་ནད་གླང་པོ་གཏང་། །འཐོམས་པ་ཚིགས་མགོ་ཞ་འབྲུམ་སྐེམ། །མགོ་མང་ཁ་ཟས་རོ་ལ་འཇུག །ལྕེ་ཡང་དང་པོ་རོ་དང་བྲལ། །གདུག་པ་ཆེན་པོ་སྙིང་ལ་འཇུག །སྨྱོ་འབོག་འཆོལ་མཛེ་སྡུག་བསྔལ་མྱོང་། །ས་ཡམས་རྗེན་ཤུན་དྲི་ལ་འཇུག །ནང་རོལ་ལྔ་ལ་མཛེས་ཡམས་བསྐྱེད། །ལྟོ་འཕྱེ་རྩ་བཞི་སྦུབས་ལ་འཇུག །བད་ཀན་ཁྲག་རླུང་མཁྲིས་ནད་བསྐྱེད། །སྐྱོ་དུབ་འཆལ་གཡེང་འཆལ་དང་འཐིབས། །ཤ་རུས་གཡེངས་པའི་རྟགས་ལྔ་འབྱུང་། །ཀླུ་བདུད་ཀླུ་སྲིན་སྒང་དང་འཐིབ། །གླང་ཐབས་གྲུམ་དང་ཕོ་སྲིན་ནད། །
མ་མོས་རིམས་དལ་སྨྱོ་ནད་གཏོང་། །རྒྱལ་པོས་སྨྱོ་འབོག་འཆལ་དང་བསྡང་། །བཙན་གྱི་གཟེར་ནད་གྲི་དང་བསྡང་། །ཐེ་བྲང་གློ་བུར་ཧུར་ཐུམ་གཏང་། །འཛིན་པ་རྟགས་ནི་བཞི་དང་ལྡན། །ཡིད་ཀྱི་དུག་ཅན་ཁོང་ནས་ལྡོང་། །དམར་ལེན་མཆོག་གི་སྔགས་ཀྱིས་གདོན། །རེག་པའི་དུག་ནི་རྩོལ་བས་འཛིན། །ཤི་ཕྲད་ཕྱག་རྒྱ་ཉིན་མཚན་གདོན། །མཐོང་བའི་དུག་ནི་མཛེ་ཤུས་འཛིན། །མགོ་དགུ་སྔགས་ཀྱི་ལྟོ་སྦྱོར་ཤིས། །ཁ་རླངས་དུག་ནི་ཤ་བཀྲས་འཛིན། །གཞན་ཡང་གདོན་པའི་སྦྱོར་བ་ནི། །སྔགས་དང་འཁོར་ལོ་སྲེག་པའི་ལས། །འཇུག་པའི་རྗེས་གཅོད་སྔགས་ཀྱིས་གདོན། །མགོ་ལ་སོགས་པ་གདུག་པ་ལས། །དྲིལ་གཏོར་འཁོར་ལོ་ལྟོ་སྦྱར་བསྡེབ། །སྦྱོར་བའི་རྒྱལ་པོ་གསུམ་གྱིས་གདོན། །མགོ་ལ་ཤི་ཕྲད་ཉིན་མཚན་དང་། །ལྟོ་སྡེབས་གཏོར་བའི་སྦྱོར་བས་གདོན། །ལག་གཡས་ཞུགས་ལ་སྙིང་གཟེར་དགུ། །དེ་བཞིན་གཡོན་ལ་ཉི་ཤུ་གཅིག །རྐང་པ་གཡས་ལ་གདུག་པས་གདོན། །གཡོན་ལ་ལྟོ་བཀྲུག་སྦྱོར་བས་གདོན། །བུ་ག་དགུ་ལ་བཅུ་གཅིག་པས། །རྩ་བྲན་ཞུགས་ལ་འབྲུ་བརྒྱད་ཤིས། །དབུགས་དང་རྫི་ལ་བཅུ་གཅིག་གཏོར། །རྗེན་ཤུན་ཞུགས་ན་གཉིས་གཉིས་བསྡེབ། །དྲོད་ལ་ཞུགས་ན་ལྔ་ཚོ་བསྡེབ། །རླུང་ལ་ཞུགས་ན་གཉིས་པོར་ཏྲི། །རྩ་ལམ་བཅུ་གཅིག་གཙོར་བླང་ཡང་། །ས་མེ་ཙ་ལ་སུམ་སྡེབས་དཀྲུག །རྩ་བཞི་གདུག་པས་འབྱུང་བའི་ནད། །དཀྲུགས་ནས་ཕྱག་རྒྱ་ཆེན་པོས་གདོན། །ཚིག་མགོ་བདུན་ལ་དགུ་བདུན་བསྡེབ། །ཁ་ཟས་ཞུགས་ལ་ཤི་འཕྲད་བསྡེབ། །ཙིཏྟར་ཞུགས་ལ་བཅུ་གཅིག་དཀྲུག །ཀླུ་བདུད་ཀླུ་སྲིན་བདུན་པ་དཀྲུག །དུ་མེ་འབྲུ་དགུའི་སྦྱོར་བ་བསྡེབ། །མ་མོ་ལ་སོགས་རིམས་དལ་གཅོད། །ཙིཏྟ་འབྲུ་དགུའི་སྦྱོར་བ་ཡིས། །སྨྱོ་འབོག་ལ་སོགས་འཇོམས་པའི་མཆོག །ཛ་ཡཾ་འབྲུ་དགུ་དཀྲུགས་བསྡེབས་པས། །གཟེར་དང་དྲི་ཡི་སྦྱོར་བ་འཇོམས། །རོ་ནྲྀ་བཅུ་ཡི་འབྲུ་བསྡེབས་པས། །གློ་བུར་ནད་དང་མཛེ་ཡམས་འཇོམས། །མཆོག་ཏུ་སྙིང་པོ་མཎྜ་ལ། །དམར་ལེན་སྔགས་ཀྱི་སྙིང་པོ་ཟུང་། །ཀུན་འཇོམས་རྟགས་རྣམས་མེད་པའོ། །དྲག་སྔགས་མངོན་དུ་ཕྱུང་བའི་རྒྱུད་ལས།
ནད་ཀྱི་མཚན་ཉིད་བསྟན་པའི་ལེའུ་སྟེ་བཅུ་པའོ།། །།དེ་ནས་ཡང་བཅོམ་ལྡན་འདས་ཀྱིས་ཆོས་ཉིད་གཏན་ལ་ཕབ་པ་འདི་གསུངས་སོ། །མ་བཅོས་ཆོས་སྐུ་ཡེ་བརྡལ་ནི། །གདོད་ནས་གནས་པས་ལྷུག་པ་ཡིན། །བགྲེས་རྒུད་མེད་པས་གཉུག་མ་ཡིན། །ཕྱོགས་རིས་མེད་པས་ཀུན་ལ་ཁྱབ། །མཐའ་དབུས་མེད་པས་བརྡལ་བ་ཡིན། །རང་རྒྱུད་མེད་པས་འགྱུར་བ་མེད། །མི་ཕྱེད་མི་ཤིགས་རྡོ་རྗེའི་སྐུ། །སྲིད་གསུམ་ཁམས་གསུམ་འཁོར་བ་ཡང་། །མིང་ཙམ་བཏགས་པས་སྒྱུ་མ་སྟེ། །རང་བཞིན་མེད་པས་ཉམས་པ་མེད། །ཇི་ལྟར་བཏགས་པའི་ཆོས་རྣམས་ཀུན། །འགྲོ་བའི་སྡུག་བསྔལ་བྱང་ཆུབ་སེམས། །སེམས་དང་ཆོས་ཉིད་གཉིས་མེད་པས། །རྟག་པ་ཆེན་པོ་བདེ་བའི་སྐུ། །ཁྱུང་ཆེན་ནམ་མཁར་ལྡིང་བ་བཞིན། །ཆོས་སྐུར་སངས་རྒྱས་སྔར་སངས་རྒྱས། །བདེ་བའི་ཡེ་ཤེས་རང་ལ་ཤར། །སྒྱུ་མ་ལྷུན་གྲུབ་ཡུལ་ལ་རོལ། །དྲག་སྔགས་མངོན་དུ་ཕྱུང་བའི་རྒྱུད་ལས། ཆོས་ཉིད་གཏན་ལ་དབབ་པའི་ལེའུ་སྟེ་བཅུ་གཅིག་པའོ།། །།དེ་ནས་ཡང་འཁོར་གྱི་འཇམ་པའི་རྡོ་རྗེ་དེས། བཅོམ་ལྡན་འདས་ལ་གསོལ་བ་བཏབ་པ། དྲག་སྔགས་རྩ་བ་ཇི་ལྟར་གནས། །དཀའ་ཐུབ་སྡོམ་པ་ཇི་ལྟར་གསུངས། །སྦྱོར་བའི་རྒྱལ་པོ་ཇི་ལྟར་བསྡེབ། །དྲག་པོའི་སྔགས་རྒོད་ཇི་ལྟར་ལགས། །རྡོ་རྗེ་སྙིང་པོས་རྒྱས་པར་མཛོད། །ཅེས་གསོལ་ཏོ། །བཅོམ་ལྡན་འདས་རྡོ་རྗེ་འཆང་གིས། རྒྱལ་བ་ཀུན་གྱི་དགོངས་པ་བསྡུས་ནས་བཀོད་དོ། །དྲག་པོ་སྔགས་ཀྱི་རྩ་བ་ནི། །རིམ་པ་བདུན་དང་ལྡན་པ་ཡིན། །འདུན་པ་གསུམ་དང་ལྟ་བ་གཞི། །ཡིན་པ་གསུམ་དང་གབ་བསྡེབ་གསུམ། །གསང་ལུགས་གསུམ་དང་གནན་ལུགས་གསུམ། །འཆར་ལུགས་གསུམ་དང་འཕོ་བ་གསུམ། །གསལ་བ་གསུམ་གྱིས་དོན་ཆེན་འགྲུབ། །གླང་ཆེན་གུངས་སོ་ལྟོལ་པོ་གཟུང་། །བདེ་བ་མཆོག་དང་ཐུགས་རྗེའི་གཟུངས། །གཙང་སྨེ་མེད་བླང་ཟིལ་གནོན་སྒྲོལ། །ཡི་གེ་ལྷ་དང་མཚོན་ཆ་ལས། །ལུས་དང་ཡན་ལག་བསྲུང་གསང་བསྡེབ། །རྟེན་ཅན་རྟེན་མེད་སྦྱོར་བའི་ཚུལ། །ནམ་
མཁའ་བར་སྣང་ས་གཞིར་གནས། །ཐུགས་རྗེ་ཆོས་དང་ཡེ་ཤེས་ཆོས། །ཡུལ་དང་འཕྲད་ན་འཆོར་བའི་ཚུལ། །ལྷ་དང་འཁོར་ལོ་གཟས་པ་པོ། །ལྷ་དང་སྔགས་དང་ཡུལ་དང་དམིགས། །དེ་ཡིས་དྲག་སྔགས་རྩ་བ་འདུས། །དྲག་སྔགས་མངོན་དུ་ཕྱུང་བའི་རྒྱུད་ལས། དྲག་སྔགས་རྩ་བའི་ལེའུ་སྟེ་བཅུ་གཉིས་པའོ།། །།གཞན་ཡང་དཀའ་ཐུབ་སྡོམ་པ་ནི། །དཔའ་བརྟུལ་སྔགས་ཀྱི་དམོད་པ་ལ། །གཙང་སྨེ་ལེ་ལོ་གཡེང་བ་མིན། །གསང་ཐུབ་ཤེས་རབ་སྤྱོད་པ་ཅན། །དཔའ་བརྟུལ་སྟོབས་དང་ཉམས་ལྡན་པ། །སྦྱོར་བའི་ཁྱད་པར་དཀའ་ཐུབ་བསྲུང་། །གདུག་པ་གསུམ་གྱི་སྦྱོར་བ་ལ། །ཚ་གསུམ་བཅུད་དང་རོལ་དེ་བཞིན། །དྲི་མ་ཆ་ཆུང་ཟིལ་པ་ལ། །བརྟག་པ་གསུམ་གྱི་སྦྱོར་བས་བླང་། །ཡོན་ཏན་དཀའ་ཐུབ་ཀུན་དང་ལྡན། །ཕྱག་རྒྱ་བསྟན་པའི་སྐུར་གསལ་བྱ། །རང་ལུས་དམིགས་པ་གཞན་མི་བསྟན། །འབུམ་ཚོ་དྲག་སྔགས་རྒྱུན་མི་གཅད། །ཉ་སྟོང་དྲག་པོའི་སྦྱོར་བ་བརྩམ། །དཀའ་ཐུབ་དྲག་པོའི་སྦྱོར་བ་ཡིན། །བསྲུང་བའི་དམ་ཚིག་སྔགས་ཀྱི་སྲོག །བཅུ་གཉིས་གཅིག་གིས་དྲང་དོན་ཅན། །ཀུན་གྱིས་དང་དུ་བླང་བ་ནི། །རྡོ་རྗེ་རྨང་གི་རི་མི་བཤིག །མངོན་ཕྱུང་དོགས་མེད་བརྟུལ་ཞུགས་སྤྱད། །འཁོར་ལོ་སྲོག་མཐར་གནན་པ་ཟོར། །གཟིར་སོགས་དབབ་པ་ཡན་ལག་ཡིན། །དམ་ཚིག་གཟུངས་ལ་རྟག་ཏུ་འཇུག །གཅན་གཟན་རྒྱལ་པོ་གསད་པ་མིན། །ཟ་མ་ཏོག་ཏུ་དུག་མི་བླུག །རིན་ཆེན་ལྷ་བྲག་བསྲེག་མི་བྱ། །གངས་ཀྱི་ཞུན་ཆུ་བཏུང་བ་མིན། །བདུད་རྩི་སྣོད་ངན་ནང་མི་བླུག །མི་ཤིས་སྣོད་དུ་མདངས་མི་དབབ། །སྣོད་ངན་སེང་གེའི་ཞོ་མི་བླུག །ཡིད་བཞིན་ནོར་བུ་བསྲེག་མི་བྱ། །གནམ་ལྕགས་ཨུར་མོ་ནང་མི་འཐབ། །སྟག་གཟིག་རོལ་པའི་ལྷག་མི་བསྡུ། །རྡོ་རྗེས་གཏམས་པའི་བྲག་མི་བཤིག །རྡོ་རྗེའི་ར་བའི་རྨང་མི་བྲལ། །མུན་པ་སེལ་བའི་སྒྲོན་མི་གསད། །རྡོ་རྗེ་ཆུ་བོའི་རྐ་མི་གཅད། །རྒྱལ་པོའི་ཕྱག་རྒྱའི་རྟགས་མི་དབྱེ། །རྡོ་རྗེའི་རྫོང་གི་མཁར་མི་བཤིག །རིན་ཆེན་རྒྱལ་མཚན་རྩེ་མི་དབོག །ཐུན་མོང་སྔགས་ཀྱི་དམ་ཚིག་ཡིན། །ལྷག་པའི་དམ་ཚིག་རྣམ་པ་གསུམ། །
བགྲོད་པ་བརྟུལ་ཞུགས་བལྟ་བའོ། །དྲག་སྔགས་མངོན་དུ་ཕྱུང་བའི་རྒྱུད་ལས། དཀའ་ཐུབ་དམ་ཚིག་གི་ལེའུ་སྟེ་བཅུ་གསུམ་པའོ།། །།དེ་ནས་ཡང་བཅོམ་ལྡན་འདས་ཀྱིས་གབ་པ་མངོན་དུ་ཕྱུང་བའི་སྦྱོར་བ་འདི་གསུངས་སོ། །དེ་ཡི་ལས་རིམ་འདི་ལྟ་སྟེ། །རྩ་བ་རྣམ་པ་གསུམ་དུ་བསྲུང་། །གསད་དང་གསོ་དང་ལོ་ཐོག་གཞོམ། །གསད་པའི་ལས་ནི་ལྔ་དང་ལྡན། །མཚོན་ཆ་བསྣོལ་མ་གཉན་བསྲེག་གཉིས། །ལྟོ་ཤལ་ལོག་ཐེན་ཐུན་དང་ལྔ། །དྲག་པོ་བསད་པའི་སྐབས་སུ་སྦྱར། །སངས་རྒྱས་ཐུགས་ཀྱི་བཅུད་བསྡུས་པས། །གབ་པ་མངོན་ཕྱུང་སྦྱོར་བའི་མཆོག །རང་སེམས་དབེན་པའི་དུར་ཁྲོད་དུ། །དཔའ་བརྟུལ་སྔགས་ཀྱི་དམོད་པ་བོར། །ཤོག་བུ་གྲུ་བཞི་མཐོ་གང་ལ། །ཐིག་སྐོར་གསུམ་ལྡན་ཟླ་གསུམ་མཐོང་། །བླ་སེམས་མིང་རུས་ལྷ་རྣམས་བྲི། །ཕྱི་རིམ་འཁྲུལ་མིག་ལྕགས་མཁར་བཅུ། །རྩ་བའི་སྙིང་པོ་མེ་རླུང་སྐྱི་འདང་གནས། །དེ་ཡི་ཕྱི་རིམ་འཁྲུལ་མིག་བཅུ་གཉིས་ལ། །རལ་གྲི་རྒྱ་གྲམ་བསྣོལ་མར་གནས། །རལ་གྲི་གསད་པའི་སྤུ་གྲི་ལ། །རྒྱ་གྲམ་གནོན་པའི་སྤུ་གྲིས་མཛེས། །དེ་ཉིད་རུས་སྦལ་ཁྲོ་བོའི་ལྟོ་བར་བྲི། །ཆ་གཉིས་བྱས་ལ་དུག་དང་ཁྲག་གིས་བྱུག །སྔོན་དམར་དང་བཅས་ཐོད་པའི་དོང་དུ་བརྣག །ཕོ་ཐོད་དམོད་པ་མོ་ཐོད་མིང་རུས་བརྣག །ཚེ་བདག་བསྒོམས་ལ་ཡེ་ཤེས་འཁོར་ལོ་བཅའ། །ཞག་བདུན་དྲག་སྔགས་དམོད་པ་རྔམ་ཚིག་ལྡན་པར་བཟླས། །དྲག་ཏུ་བསྐུལ་གྱིན་བརྣག་པའི་ཡུལ་ལ་མངག །དྲག་སྔགས་དམོད་པས་གསད་ལ་གཟིར་ཞིང་ཐོད་པ་བཅའ། །འཁོར་ལོ་ཐོད་པ་གདུག་པའི་གཉན་ལ་གཏད། །སྦྱོར་བ་གཞན་ཚོགས་དྲག་པོའི་སྐབས་དང་སྦྱོར། །དྲག་པོ་སྔགས་ཀྱི་སྦྱོར་བ་འདི་ལྟ་སྟེ། །ཨེ་ཀ་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་མུགས་ཏི་ཤག་རྦད། དགྲ་བོའི་སྲོག་ལ་སྟཾ་བྷ་ཡ་ནན། གཞན་ཡང་གབ་སྦས་གསད་པའི་སྦྱོར་བ་ནི། །འཁོར་ལོ་མུ་ཁྱུད་རིམ་པ་གསུམ་དུ་བསྐོར། །གྲུ་གསུམ་མིང་རུས་ཟླ་ཁམ་སྲུང་བའི་ལྷ། །འཁོར་ལོ་རྩིབས་བདུན་མུ་ཁྱུད་ཕྱི་རུ་བྱ། །མཚོན་ཆས་
གཅོད་པའི་རྩེ་མོ་ལ། །མིང་བཅས་སྤུ་གྲི་བདུན་པ་དགོད། །ཐ་མའི་རྩིབས་ཆེན་དགུ་པ་ལ། །འདྲེན་པ་སྟོབས་ཀྱི་འབྲུ་བཞི་དང་། །ཁོང་ཁྲག་འདྲེལ་བའི་འབྲུ་ལྔ་དགོད། །མཚོན་ཆའི་བར་དུ་མིང་རུས་བྲིས། །འཁོར་ལོ་ཐོད་པ་ཁ་སྦྱར་གཞུག །ཐོད་པ་སྟེང་མ་མུ་ཁྱུད་བཞི་རུ་བསྐོར། །དབུས་སུ་རྒྱ་གྲམ་ལྟེ་བར་ཨོཾ་དང་ལྡན། །ར་ལ་ཡ་མ་འབྲུ་བཞི་བསྣོལ་མར་བྲི། །མུ་ཁྱུད་གཉིས་པར་རིགས་བཞི་ཀླུ་བརྒྱད་བསྣོལ། །མུ་ཁྱུད་གསུམ་པ་སྦྲུལ་ནག་བརྒྱད་ཀྱིས་བསྡམས། །སྦྲུལ་གྱི་གསེབ་ཏུ་གནན་པའི་སྔགས་ཀྱིས་དགང་། །མུ་ཁྱུད་ཐ་མ་མེ་རི་སྙིང་པོ་རཾ། །ཐོད་པའི་ཁ་ཁྱེར་ཕྱི་རུ་ནན་གྱིས་བསྐོར། །ཐོད་པ་འོག་མ་མུ་ཁྱུད་ཟླུམ་པོ་གསུམ། །དབུས་སུ་གྲུ་གསུམ་རྩེ་མོར་རཾ་གསུམ་ལྡན། །ནྲྀ་དང་མིང་རུས་ཟླ་གམ་རྫོགས་པར་བྲི། །མུ་ཁྱུད་གཉིས་པར་སྦྲུལ་བརྒྱད་སྐེ་བསྣོལ་བསྡམ། །སྦྲུལ་གྱི་གསེབ་ཏུ་མིང་རུས་མེ་རི་རཾ། །ཐོད་པའི་བར་དུ་གཅོད་པའི་འཁོར་ལོ་གཞུག །ཞག་གྲངས་ཉི་ཤུ་བདུན་དུ་བྱ། །གདུག་པའི་གཉན་སར་ཁྲུ་དོ་བརྐོས་ལ་གནན། །གདུག་པའི་དྲག་སྔགས་འདི་ལྟ་སྟེ། །ཨེ་ཀ་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་མུག་ཏི་ཤག་རྦད། དགྲ་བོའི་སྲོག་སྟམ་བྷ་ཡ་ནན། གཞན་ཡང་གབ་སྦས་གསང་བའི་སྦྱོར་བ་ནི། །འཁོར་ལོ་མུ་ཁྱུད་རིམ་པ་གསུམ་དུ་བསྐོར། །རུས་སྦལ་གཟུགས་གཉིས་ལྟོ་བ་སྟོང་པར་ནི། །རུས་སྦལ་ལྟོ་བར་བརྣག་པའི་མིང་རུས་བྲི། །དེ་ཡི་ཕྱི་རུ་གནོན་པའི་གདོན་རྣམས་བྲི། །དུག་དང་ཁྲག་དང་ཚ་བའི་རྫས་ཀྱིས་བྱུག །སྦལ་བ་ལྟོ་སྦྱར་ཕྱི་རུ་དྲག་པོའི་སྔགས་ཀྱིས་བསྐོར། །ཐོད་པ་སྟེང་མར་ནཱ་ག་སྟཾ་བྷ་ནན་བྲི། །ཐོད་པ་འོག་མར་ནཱ་ག་རཾ་ཡཾ་ནྲྀ་ཛ་རྦད་ཅེས་བྲི། མཐིང་ནག་དྲིལ་ལ་རྩང་བཅས་དོང་དུ་གཞུག །གོང་ལྟར་སྔགས་བཟླས་མཐའ་རུ་གཉན་སར་གནན། །འབུམ་ཕྲག་བརྒྱད་དང་ཁྲི་ཚོ་བརྒྱད་ཅུ་དབྱེ། །ལུ་མ་འཁྱིལ་པའི་དབུས་སུ་ནམ་གྱི་གུང་ལ་གནན། །ལྷ་སྲིན་ཀུན་གྱི་ཕོ་བྲང་བཏབ་པར་བསམ། །དྲག་སྔགས་དམོད་པ་སྦྱོར་བ་གསུམ་དང་ལྡན། །ཨེ་ཀ་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་མཱ་ར་ཡ་རྦད། ཡ་མ་
སྙིང་ཁྲག་ར་མ་ཙ་ཨེ། དགྲ་བོའི་སྲོག་ལ་ནཱ་ག་དུཥྚཱན་སྟྭཾ་བྷ་ཡ་ནན། དགྲ་བོའི་སྲོག་ལ་གཟིར་ཡཾ་བྷྱོ། གཞན་ཡང་གནན་པ་དྲག་པོའི་མཐའ་སྡུད་དུ། །གཞན་གྱི་ཐོད་པ་སྟོབས་ཅན་རྙེད་པ་ན། །རང་གི་སྦྱོར་བ་ཕྱིས་ལ་ཞག་གསུམ་ཐོད་པ་གཟིར། །ཁྲི་ཚོ་བསྐུལ་གྱིན་རྔམ་ཚིག་དྲག་ཏུ་བཟླས། །ཐོད་པ་གདུག་ལ་དམིགས་པའི་མིང་རུས་བྲི། །གཞན་གྱི་སྙིང་པོ་ཚངས་པའི་རྩ་ལ་བྲི། །མིང་བྱང་ཕྱི་རུ་ཕས་ཀྱི་བསྙེན་དང་གསད་པ་བྲི། །ཐ་མ་ཡང་དག་དྲག་པོ་གསང་བ་བྲི། །ཐོད་པ་ཁ་ཁྱེར་རཾ་ཡཾ་བཾ་གྱིས་བསྐོར། །ཐོད་པ་སྟེང་མའི་དབུས་སུ་མ་དང་ནྲྀ། །དེ་ཡི་ཕྱི་རུ་བསྙེན་བསྒྲུབ་གསད་པས་བསྐོར། །ཉིན་མཚན་མཚམས་སུ་བརྒྱ་བརྒྱ་དྲག་ཏུ་བསྐུལ། །ཐ་མ་ཡང་དག་དྲག་སྔགས་རྫོགས་པར་བྲི། །ཐོད་པའི་ཕྱི་ནང་དུག་དང་ཁྲག་གིས་བྱུག །བསྒྲུབ་སྔགས་བརྒྱ་བརྒྱ་དྲག་སྔགས་ཁྲི་ཚོ་རེ། །ཉིན་ཞག་བཅུ་རུ་ཡུལ་ལ་བསྐུལ་གྱིན་རྦད། །མི་རྒྱུས་སྐྲ་ཤད་བཅིངས་ལ་དང་པོའི་གནས་སུ་གནན། །གསད་པ་རྣམས་གནན་ལ་འབྲུ་བཞི་ཡང་། །ཁྲི་ཚོ་དྲུག་ཏུ་དྲག་པོའི་སྔགས་ཀྱིས་གཟིར། །ཨེ་ཀ་ཡ་མ་སྙིང་ཁྲག་ར་མ་ཙ་ཡ། དགྲ་བོའི་སྲོག་ལ་ཁྲམ་ཤིང་རྦད། ཨེ་ཀ་ཡ་མ་མ་ར། དགྲ་བོའི་སྲོག་སྟྭམ་བྷ་ཡ་ནན། ཐུན་ཐུན་མུགས་རཾ་བྷྱོ། དྲག་སྔགས་དུག་མདའ་ཐུན་གྱི་སྦྱོར་བ་ནི། །གང་ལ་སྦྱོར་དང་མངོན་སུམ་འཇོམས་ཤིང་འཕོ། །དེ་ཡང་རྟེན་གྱི་ཐོད་པ་གླིང་མངས་སུ། །ཐུན་ཁྲག་སྣ་ཚོགས་ཐོད་པ་མིང་རུས་བཅའ། །ཕྱེ་གསུམ་ཐུན་གསུམ་ཁྲག་གསུམ་བརྡེག་པའི་རྫས། །སྐྱེར་ཚེར་རྟེན་ལ་ཐོད་པ་དར་གྱིས་དགབ། །གསལ་བ་ཞག་དགུ་དམོད་པ་དབབ། །བརྒྱ་བརྒྱ་བཟླས་ཤིང་ཐུན་ཁྲག་དག་ལ་བསྡིམ། །དྲག་སྔགས་བསྐུལ་བས་དུག་མདའ་ཁོང་དུ་སྐྱེལ། །རྩ་གཅོད་ཁོང་ཁྲག་སྐམ་ནས་ཤེས་པ་འཕོ། །སྔགས་ཀྱི་གྲངས་ལས་ཚད་ཀྱི་སྦྱོར་བ་མིན། །དྲག་ཏུ་བསྐུལ་གྱིན་ཐོད་ཁྲག་ཟོར་དུ་འཕང་། །ཐོད་པའི་པྲ་ངན་དྲག་པོ་སྔགས་ཀྱིས་བཟློག །ལུས་བསྐྱོད་རྔམ་ཚིག་སྒྲ་དང་བཅས་པས་བྱ། །དྲེགས་པས་བསྐྱོད་ཅིང་རྔམ་པས་ཡུལ་ལ་འཕྲོ། །དྲག་པོ་སྔགས་ཀྱི་སྦྱོར་
བ་འདི་ལྟ་སྟེ། །ཨེ་ཀ་ཡ་མ་སྲོག་ལ་ཛ་མུགས་ཐུན་རྦད་བྷྱོ། རྩ་ཁྲག་རྩ་ལ་དྲེང་ཤག་ཐུན་རྦད་བྷྱོ། ར་མ་སྙིང་རྩ་ཧུར་ཡཾ་ཐུན་རྦད་བྷྱོ། རྩ་ཁྲག་ཁྲམ་ཤིག་ཐུན་རྦད་བྷྱོ། གསད་པ་གསུམ་སྦྲེལ་དྲག་པོ་སྔགས། །གཉིས་སྦྲེལ་མཐའ་གསུམ་སྦྱོར་བ་མིན། །རིག་པས་བརྟག་ལ་སྡེབས་ཀྱི་སྦྱོར་བ་བླང་། །རིག་པ་གསུམ་དང་ལྡན་པ་ལྔ་རུ་བྱ། །གསང་བ་ལས་ཀྱི་རིམ་པ་བསྡེབ་དང་སྦྱར། །སྦྱོར་བ་གབ་པའི་སྙིང་པོ་གསད་པ་ཡིན། །དྲག་སྔགས་མངོན་དུ་ཕྱུང་བའི་རྒྱུད་ལས། སྦྱོར་བ་དྲག་པོའི་ལེའུ་སྟེ་བཅུ་བཞི་པའོ།། །།གཞན་ཡང་ལོ་ཐོག་གཞོམ་པའི་སྦྱོར་བ་འདི་ལྟ་སྟེ། །དུར་ཁྲོད་རས་སམ་ཤོག་གུ་གྲུ་བཞི་ལ། །དབུས་སུ་རུས་སྦལ་ལྟོ་བ་སྟོང་པར་བྲི། །འཁོར་ལོ་རྩིབས་ཆེན་བཅུ་གཉིས་དག་དང་ལྡན། །འདྲེན་པའི་འབྲུ་བཞི་འབྱུང་བའི་འབྲུ་ལྔ་པ། །དབབ་པའི་སྔགས་བཞི་ཆུ་དྲིལ་ཟོར་ཐོག་གཟར། །གཏའ་མ་ཐོད་པ་འདྲ་གཉིས་གཅིག་དང་གསུམ། །ཁྲག་ལྔ་སོ་ལྔ་འབྲུ་གསུམ་ཐལ། །རྟེན་གཉིས་འབྲུ་གསུམ་ཚིལ་གསུམ་དང་། །བླ་གནས་ཡུལ་རྟེན་འདུག་པ་ཐོད་པའི་རྟེན། །སྦྱོར་བ་གཞོམ་ཕྱིར་ཁྲག་དང་དུག་གིས་གདབ། །དགུ་བདུན་ལྔ་རུ་ཐ་ཆུང་གསུམ་དང་སྦྱར། །ཁྲི་བརྒྱད་གང་དམིགས་ཁྲི་ཡིས་ལམ་དུ་གཞུག །དམིགས་པ་གསུམ་གྱིས་གནས་ཡུལ་རྟེན་ལ་སྦྱར། །ཆུ་རྒོད་འཁྱགས་པ་རི་རུ་རྡེབ་ནས་འཇོམས། །དྲག་སྔགས་སྦྱོར་བ་བཞི་རུ་བསྡེབ། །ཨེ་ཀ་ཡ་མ་པྲ་མ་སྲུར་ཡ་བམ། པྲོཾ་པྲོཾ་ཧྲིལ་ཧྲིལ་ཉིད་འདྲིལ་པྲོཾ། ཧྲིལ་ཤར་ཤར་ཡཾ་ཡཾ་འུབ་ཧྲིལ་བྷྱོ། པྲོཾ་ཤར་ཤར་བྷི་ཏ་རཀྴ་ཤར་ཤར་རཾ་ཐུན་ཡཾ་ཤར་ཕོབ། ནཱ་ག་གཟིར་ནན་དྲིལ་ཕོབ། དེབ་ཡུ་ནན་གཟིར་ཕོབ། མ་མ་རཀྴ་གཟིར་ཕོབ། སི་སི་ཡ་མ་ཙ་ཤུ་ལ་གཟིར་ནན་ཧྲིལ་ཤར་ཕོབ། འབྲས་བུ་རྩི་ཐོག་སྐྱེ་ཤིང་འཇོམས། །ལུས་དང་ཡན་ལག་འདོད་པར་སྦྱར། །དྲག་སྔགས་མངོན་དུ་ཕྱུང་བའི་རྒྱུད་ལས། ལོ་ཐོག་འཇོམས་པའི་ལེའུ་སྟེ་བཅོ་ལྔ་པའོ།། །།གཞན་ཡང་སྲུང་བའི་སྦྱོར་བ་ནི། །རིམ་པ་བརྒྱད་དང་ལྡན་པར་བྱ། །བཤིག་པ་འཁོར་ལོ་གཟུགས་དང་བརྡ། །
དེ་བཞིན་གདུག་པ་གཟིར་བ་གསུམ། །ཁ་བཅིང་རང་གཟིར་སྦྱོར་བ་མཆོག །དྲག་པོ་སྔགས་ཀྱི་སྦྱོར་བ་ཁྱད་པར་གྱིས། །གཞན་གྱི་སྦྱོར་བ་བཤིག་ཅིང་གནོན་བྱེད་གཟིར་བའི་ལས། །རྒྱ་ཤོག་དག་ལ་གང་གནོད་གཟུགས་དེ་བྲི། །སྙིང་གར་སྙིང་པོ་ཐ་མ་སྔགས་ཀྱིས་བསྐོར། །གའུ་སོ་སོར་བཅུག་ལ་གྲུ་གསུམ་རྩང་བཅས་བརྣག །མཐིང་ནག་དུར་ཁྲོད་དར་རམ་རེ་བས་གཏུམས། །ཞག་གསུམ་བྲབས་ལ་མཐའ་རུ་བཀའ་རྟེན་གནན། །གཟུགས་ལ་བཤིག་པའི་སྦྱོར་བ་དང་པོ་ཡིན། །དུར་ཁྲོད་རས་ལ་སྙིང་པོ་བརྡ་མིང་བྲི། །སྔགས་ཀྱིས་བསྐོར་ལ་དུག་ཆུ་ཚ་བ་བསྐུ། །ལ་ཆའི་གའུར་སྦལ་པའི་ལྟོ་བར་བཅའ། །ཞག་གསུམ་ཐུན་བཞིར་བརྒྱ་དང་བཅུ་རུ་བྲབ། །ཐོན་ནས་དུ་བས་བདུགས་ལ་སེང་གེའི་ཁོག་པར་གནན། །བརྡ་ལ་གཤིག་པའི་སྦྱོར་བ་གཉིས་པའོ། །དུར་ཁྲོད་རས་ལ་ཐིག་སྐོར་གསུམ་དུ་བྱ། །དབུས་སུ་གྲུ་གསུམ་མིང་བཅས་འཁྲུལ་མིག་དུག་ལྔའི་སྔགས། །ཡང་ལོགས་རྩིབས་བཅུར་བཤིག་པའི་སྤུ་གྲི་དགོད། །རུས་སྦལ་ལྟོ་བར་དུག་ཁྲག་ཚ་བ་བསྐུ། །ཁ་སྦྱར་གོང་བཞིན་ཐོད་པ་དོང་དུ་གཞུག །ལྷ་བསྒོམ་སྔགས་བཟླས་ཡུལ་ལ་དྲག་ཏུ་རྦད། །དྲག་པོ་སྔགས་ཀྱི་སྦྱོར་བ་གཅིག་གིས་བྱ། །ཨེ་ཀ་ཡ་མ་གྷས་མ་ཛ་ནིར་ཡ། སརྦ་ཤ་ཏྲུཾ་སྟཾ་བྷ་ཡ་ནན་འབྲིད་རྦད། འཁོར་ལོས་བཤིག་པའི་སྦྱོར་བ་གསུམ་པའོ། །གཞན་ཡང་ཀླུ་གཉན་ས་བདག་གདུག་པའི་ནད་དར་ན། །རྒྱ་ཤོག་དག་ལ་གཟུགས་བྲི་ནཱ་ག་སྔགས་ཀྱིས་བསྐོར། །ནད་ཁྲག་དུག་ཁྲག་ཚ་བས་ཞིང་རས་གྲིལ། །ཐོད་པ་དོང་དུ་མནོལ་ཁྲག་ཞག་བདུན་བྲབ། །ཉ་སྟོང་ལྷ་བསྒོམ་གཟིར་སྔགས་མཐའ་རུ་གནན། །ས་དང་ནཱ་ག་སུ་ཡི་མཐའ་རུ་བྲི། །བརྡ་དང་མིང་སྤེལ་སྙིང་གཟེར་སྔགས་ཀྱིས་བསྐོར། །གོང་བཞིན་སྦྱོར་བ་ཕག་ཐོད་ཆུ་མཆོག་གནན། །དུར་མཆད་བཀའ་རྟེན་གནོད་པའི་ས་རུ་གནན། །གཞན་ཡང་གདུག་པ་གཟིར་བའི་འཁོར་ལོ་ནི། །དུར་ཁྲོད་རས་དང་ཤོག་བུ་གྲུ་བཞི་ལ། །ཐིག་སྐོར་རིམ་གསུམ་དབུས་སུ་ས་ནཱ་ག །འཁྲུལ་མིག་བཞི་གཉིས་ཏེ་བྷ་རྩ་བའི་སྔགས། །
རྩིབས་བརྒྱད་སྤུ་གྲིས་གདུག་པའི་ཞེན་ཆགས་གཅོད། །རུས་སྦལ་ལ་སོགས་ཁྲི་བརྒྱད་མནོལ་ཁྲག་བྲབ། །ཐོན་ནས་གཟིར་ཞིང་མཐའ་རུ་གནན་པ་བྱ། །ཧེ་བྷ་ཡ་མ་ཐི་པ་ར་ཡ། ས་ནཱ་ག་སྙིང་གཟེར་སྲོག་ལ་མྱོག་རྦད། ས་ནཱ་ག་སྙིང་སྦུར་ནན་ནན། གཞན་ཡང་གནོད་བྱེད་ཁ་བཅིང་བ། །སྦྱོར་བ་གཞན་མིང་སྔགས་ཀྱིས་བྱ། །སརྦ་ཙིཏྟ་གཟིར་ཐུཾ་བིགྷྣཱཾ་ནན། གཞན་ཡང་སྟོབས་ཀྱིས་བདག་པོ་ནང་གཟིར་ན། །རྒྱ་ཤོག་གཟུགས་བྱས་ལྟོ་བར་འཁོར་ལོ་བཅའ། །ཐིག་སྐོར་གསུམ་ལྡན་དབུས་སུ་ཡ་དང་ཀ །འཁྲུལ་མིག་བཅུ་ལ་གཤིག་པའི་སྤུ་གྲི་དགོད། །མཐའ་མའི་བཅུ་གཉིས་རྩིབས་ལ་རང་གཟིར་རྩ་བའི་སྔགས། །དུག་ཁྲག་བྲབ་ལ་རྟེན་གྱི་ཕུར་པས་བསྡིག །རང་ཉིད་ཟིལ་ནོན་དམིགས་པ་གཅེར་བུར་བརྟག །སྔགས་བཟླས་དམ་བདར་ཐུན་བྲད་ཁྲག་གིས་བྲབ། །དྲག་པོ་ཐོན་ནས་ཞག་གསུམ་གཅིག་ན་ཕྱེའོ། །སྔགས་ཀྱི་སྦྱོར་བ་འདི་ལྟ་སྟེ། ཨེ་ཀ་ཡ་མ་གྷ་ཛ་ནི་ར་ཡ། ཨེ་ཡ་ཧུར་ཐུཾ་ཤ་ཏྲུཾ་འདྲིད་ཁང་ཤག་ཡ་རི། རང་གི་ལུས་བསྲུང་གཞན་གྱི་སྦྱོར་བ་དབྲལ། །མཆོག་ཏུ་གསང་བ་རང་གཟིར་མེད་པའི་གནས། །དྲག་སྔགས་མངོན་དུ་ཕྱུང་བའི་རྒྱུད་ལས། བསྲུང་བ་ཁྱད་པར་གྱི་ལེའུ་སྟེ་བཅུ་དྲུག་པའོ།། །།དེ་ནས་ཡང་བཅོམ་ལྡན་འདས་ཀྱིས་དྲག་སྔགས་དབང་སྡུད་ཀྱི་སྦྱོར་བ་འདི་གསུངས་སོ། །སྲིད་པ་ལས་ཀྱི་མཐའ་སྡུད་དུ། །དབང་སྡུད་ལས་ཀྱི་འཁོར་ལོ་བརྟག །ལས་ཀྱི་ཚེ་བདག་ལྟོ་བ་ན། །སྲིད་པ་སྔགས་ཀྱི་འཁོར་ལོ་གནས། །དེ་ཡི་རིམ་པ་འདི་ལྟ་སྟེ། །སྲིད་པའི་འཁོར་ལོ་མུ་ཁྱུད་ལྔ། །ལྟོ་བ་ཆོས་ཀྱི་ཕོ་བྲང་ཧཱུཾ། །དེ་ཡི་ཕྱི་རིམ་འཁྲུལ་མིག་ནི། །གསད་པ་དྲག་པོའི་སྔགས་ཀྱིས་དགང་། །གཉིས་པ་འཁྲུལ་མིག་རྩ་སྦུབ་བརྒྱད། །གནས་པ་སེར་བའི་སྔགས་ཀྱིས་དགང་། །དེ་ཡི་ཕྱི་མིག་བཅུ་གཉིས་ལ། །ཡན་ལག་སྦྱོར་བའི་དྲག་སྔགས་ཏེ། །གཤིན་རྗེ་མ་མོ་བདུད་དང་རྒྱལ། །ཞི་ཁྲོ་སྲི་ཅན་གཟིར་བའི་སྔགས། །སྙིང་གཟེར་གདུག་པ་གཟིར་བའི་སྔགས། །ཕོ་མོ་མ་ནིང་འཕོ་བའི་སྔགས། །བཅུ་གཉིས་ལས་ཀྱི་སྐབས་ཀྱི་གནས། །འཁྲུལ་མིག་བཞི་ལ་བརྡ་ཡིས་གང་། །ཀུན་འབྱུང་
རྩ་བའི་འཁོར་ལོ་ཡིན། །ལས་ཀྱི་ཡན་ལག་ཕྲལ་ལ་སྟེ། །ཐུན་གྱིས་གཟུགས་ལ་བརྡེག་པ་ཡིན། །མནན་པ་ལ་སོགས་གོང་བཞིན་སྦྱར། །ཨ་ཀྲོའི་མཐའ་རུ་ཤིས་པར་གསུངས། །སྐབས་དང་སྦྱར་ལ་ཐུན་མོང་སྤྱད། །གཡེང་མིན་བདེ་བའི་ཉམས་ཀྱིས་བརྟགས། །གདེང་དང་ལྡན་ན་མཆོག་ཏུ་བསྔགས། །སྔགས་ཀྱི་དབྱེ་བ་འདི་ལྟ་སྟེ། །ཧེ་ཀ་ཧེ་ཏུན་རཀྴ་རྦད། ཡམ་ཧེ་སད་རཀྴ་རྦད། ཁ་རཀ་ཙ་ཐུར་རཀྴ་རྦད། གྷུ་ས་སྨ་ཛ་ནི་རཀྴ་རྦད། ཐར་ཀང་སད་ཀ་ར་ཡ་དགྲ་བོའི་སྲོག་མཱ་ར་ཡ་རྦད། ཡ་མ་ཨེ་ཀ་ར་ཛ་འདྲི་མ་ནན། མ་ཧཱ་སང་ཙ་རུ་ར་ནན། པྲ་མ་ས་ར་ནཱ་ག་ཐི་ས་ར་ནན། ནྲི་ཏི་རཱ་ཙ་མཱ་ར་ཡ་རྦད་ནན། ཨེ་ཀ་ཧེ་ཀ་ཨེ་མ་ཀེ་ཡ་མ་ཧེ་སང་པྲ་མ་ཁྲག་ལ་པྲོཾ་པྲོཾ་ཧྲིལ་ཤར་ཤར་དྲག་ཏུ་པྲོཾ་པྲོཾ་ཤར་ཤར་ཧྲིལ་བྷྱོ། པྲོཾ་ཤར་ཤར་ཀ་མ་ད་རི་ཧྲིལ་པྲོཾ། ས་ནཱ་ག་ཙིཏྟ་རོ་མྱག་པྲོཾ་པྲོཾ་ཤར་ཤར་ཏྲ་ག་ཏུ་ཧྲིལ་སྙིང་གཟེར་ཁམ་ཤག་ཕོབ། ཨེ་ཀ་ཧེ་ཀ་འདྲི་མེ་ཧེ་ཀཾ་ཏྲཾ་ཡཾ་ཧེ་ཀཾ་བྷིས་མ་སྨ་ཛར་ཀུས་མ་ཛ་ནི། ཛ་རང་སད་ཀར་ཡ་ཧཱུཾ་ཕཊ། ཨེ་ཀ་ཡ་མ་ཧེ་ཀ་འདྲི་མ་ཡ་རག་མོ་རཀྴེ་མ་བྷྱོ། ཨེ་ཀ་ཡ་མ་ཧེ་ཀ་འདྲི་མ་ཡ་སརྦ་ཙིཏྟ་གཟེར་ཐུཾ་བིགྷྣཱཾ། ཨེ་ཀ་ཡ་མ་ཧེ་སང་སད་ཀར་ཡ་ཛ་རཾ་རྦད་སརྦ་ཤ་ཏྲུཾ་ནན་གཟིར་ཐུན་བྷྱོ། ཨེ་ཀ་ཡ་མ་དུན་བྷྱོ་ཀ་དུ་ཛ་རཾ་ཡ་མ་ཤ་ཏྲུཾ་སད་ཀ་ར་ཡ་ཐུན། གཟེར་རྦད་བྷྱོ། ཨེ་ཀ་ཡ་མ་ཀ་དུན་ཛ་རཾ་སད་ཀར་ཤ་ཏྲུཾ་ན་གཟིར་ཐུན་རྦད། ད་རཾ་ཤ་ཏྲུཾ་སད་ཀ་ར་ཡ་རྦད། ཡ་མ་ཧེ་སང་བྲ་མ་ཁྲག་ཙ་ཏྲི་ཤ་ཏྲུཾ་རཾ་ཐུན་གཟིར་རྦད། ཧེ་སང་ཡ་མ་སད་ཀར་ཡ། ས་ནཱ་ག་ཤ་ཏྲུཾ་སྙིང་གཟེར་ཧཱུཾ་རྦད། ཡ་མ་ཀ་དུན་ཛ་རཾ་སད་ཀ་ར་ཡ། བྷ་ཏི་ཡ་ཤ་ཏྲུཾ་ན་ཁཾ་ནན་ཐུན་གཟིར་རྦད། ཡ་མ་རཀྴ་ཐུན་རྦད། ཨེ་ཀ་ཧེ་ཀ་ཡ་མ་ནཱ་ག་སྙིང་གཟེར་ཐུན། རྩ་བ་འདྲིམ་ཐི་བ་ར་ནཱ་ག་ཐུན་གཟིར་རྦད། ཨེ་ཀ་ཧེ་ཀ་ནཱ་ག་སྦུར་ནན། ཨརྱ་ག་རུ་ན་ནཱ་ག་མཱ་ར་ཡ་ནན། ཧེ་བཾ་ཐི་བར་ནཱ་ག་སྦུར་ནན། སྟྭམ་བྷ་ཡ་ནན། ཨེ་ཀ་ཡ་མ་དུ་མ་ཐི་པ་ར་ནཱ་ག་ཐུན་གཟིར་རྦད་འདྲི་མ་དུན་ཛ། ཧེ་སཾ་ཡ་མ་དུན་ཡ་མ་ནྲྀ་སརྦ་ཤོ་ན་ཡ་ནན། དེ་དག་ལས་ཀྱི་སྦྱོར་བ་ཀུན། །དོན་ལྡན་ཐབས་ཀྱི་རྒྱལ་པོས་བྱ། །དབང་སྡུད་སྔགས་
ཀྱི་སྦྱོར་བ་ཀུན། །སྐུ་ཡི་བསྙེན་མ་མཐའ་རུ་སྦྱར། །དྲག་པོར་སྦྱོར་ན་རང་ལ་ཉེན། །རིག་པའི་སྟོབས་ཀྱི་ཕྱག་རྒྱས་འཕང་། །ལས་རྣམས་རྩ་བར་དྲིལ་བ་ཡིན། །དྲག་སྔགས་བརྒྱད་གཉིས་གཅིག་གིས་རྫོགས། །དྲག་སྔགས་མངོན་དུ་ཕྱུང་བའི་རྒྱུད་ལས། དབང་སྡུད་རྩ་བའི་ལེའུ་སྟེ་བཅུ་བདུན་པའོ།། །།དེ་ནས་ཡང་བཅོམ་ལྡན་འདས་ཀྱིས་ངེས་པའི་དོན་འདི་གསུངས་སོ། །སྦྱོར་བ་མི་ཤེས་སྦྱོར་བྱེད་པ། །གཉིས་སུ་མེད་པའི་སྦྱོར་བ་མ་ཤེས་ན། །བཏགས་ལ་དོན་གྱི་ངོ་བོར་འཛིན་པ་ཡིས། །མངལ་གྱི་གྲོང་ཁྱེར་བརྒྱུད་པའི་བདུད་ཀྱིས་ཟིན། །ཐབས་ལམ་གསང་བའི་དོན་དང་ལྡན་གྱུར་ན། །སྣང་སྲིད་ཆགས་པའི་སྤྱོད་པས་མེ་འབར་ཀྱང་། །གཉིས་མེད་ཕྱག་རྒྱར་གྲོལ་བའི་འབྲས་བུར་བགྲོད། །སྒྲོལ་བ་མི་ཤེས་སྒྲོལ་བྱེད་པ། །སྐྱེ་ཤི་མེད་པའི་གདེང་དང་མི་ལྡན་ན། །རྩོལ་བས་སྒྲོལ་བ་མུ་སྟེགས་འཁྲུལ་པ་སྟེ། །ལས་ཀྱི་སྲིན་པོས་བཅིངས་པའི་བདུད་ཀྱིས་ཟིན། །བྱར་མེད་རྫོགས་པས་སྲོག་ཀྱང་གཅད་དུ་མེད། །ཡེ་ཤེས་ཆེན་པོའི་ཕྱག་རྒྱར་རང་གྲོལ་ན། །ཁམས་གསུམ་སེམས་ཅན་དུས་གཅིག་སྲོག་བཅད་ཀྱང་། །ཆོས་སྐུ་བདེ་བ་ཆེན་པོ་བགྲོད་པ་མེད་པར་རྟོགས། །སྤྱད་དུ་མེད་པའི་ཕྲིན་ལས་མ་ཤར་ན། །དཔེ་ལ་མཚོན་བྱེད་ལུས་མེད་སྤྱོད་པ་ནི། །ལས་ཀྱི་རྣམ་སྨིན་དམྱལ་བའི་བཙོན་རར་ཚུད། །རྩོལ་བ་བྱས་པས་རྟག་པའི་བདུད་ཀྱིས་གཟིར། །སྤྱད་དུ་མེད་པའི་ཕྲིན་ལས་སྤྱོད་ཤེས་ན། །ལྷ་སྲིན་ཀུན་གྱི་མིང་དང་མཚང་སྨོས་ནས། །ལས་ལ་མངགས་ནས་ཕོ་ཉར་ཀུན་རྦད་ཀྱང་། །བླང་དོར་མེད་པས་རོལ་པའི་སྤྱོད་པར་དག །བསྙེན་བསྒྲུབ་རྩོལ་མེད་སྔགས་དོན་མ་ཤེས་ན། །ཕྱི་ནང་རྟགས་ལ་བརྟེན་ནས་སྒྲུབ་བྱེད་པ། །མི་ཤེས་སྲོག་ལ་རྩོལ་བས་རང་བདུད་རང་ལ་འཁོར། །མནར་མེད་དམྱལ་བའི་གནས་ལ་ཐེ་ཚོམ་མེད། །བསྙེན་བསྒྲུབ་རྩོལ་མེད་སྔགས་ཀྱི་དོན་ཤེས་ན། །སྲིད་གསུམ་མཁའ་འགྲོ་འདུས་པའི་སྲོག་དྭངས་མ། །ལྷ་སྲིན་ཀུན་གྱི་སྲོག་སྙིང་དྲིལ་བའི་མཆོག །དྲག་པོ་ཨེ་དང་ཡན་ལག་སྦྱོར་བ་ནི། །རྡོ་རྗེའི་བཟླས་པས་ཡེ་ཤེས་རོལ་
པར་ཤར། །གང་མཐོང་ཅི་སྤྱད་ལྷུན་གྲུབ་མཐའ་གཉིས་གྲོལ། །ནམ་མཁའ་རིན་ཆེན་ལྷུན་པོ་རྒྱ་མཚོ་ལྟར། །དོན་གཉིས་སྨིན་པ་ཡོན་ཏན་ལྷུན་གྱིས་གྲུབ། །མ་བཅིངས་གྲོལ་མེད་བགྲོད་པའི་འབྲས་བུར་སྨིན། །སྣང་སྲིད་འཁྲུལ་པ་དུག་ལྔའི་སྨག་རུམ་དུ། །སངས་རྒྱས་བཀའ་ཡི་དྲག་སྔགས་ཡེ་ཤེས་ཉི་མ་ཤར། །སྔགས་ཀྱི་གོ་མཚོན་དྲག་སྔགས་མེ་རླུང་འདི། །ཡེ་ཤེས་གཉིས་མེད་རང་ལས་ཆོས་སྐུར་གསལ། །དྲག་སྔགས་མངོན་དུ་ཕྱུང་བའི་རྒྱུད་ལས། རྩོལ་བ་དང་བྲལ་བའི་ལེའུ་སྟེ་བཅོ་བརྒྱད་པའོ།། །།དེ་ནས་ཡང་བཅོམ་ལྡན་འདས་ཀྱིས་མགོ་དགུ་པའི་སྦྱོར་བ་འདི་གསུངས་སོ། །རྣམ་གྲངས་སྦྱོར་བ་བཞི་རུ་བཀོད། །རྣལ་མའི་འཁོར་ལོ་སྤོགས་པ་གཉིས། །ལོ་ཏོག་གཞོམ་དང་བསྲུང་བའོ། །རྣལ་མའི་སྦྱོར་བ་འདི་ལྟ་སྟེ། །དུར་ཁྲོད་གདུག་པའི་བདེ་གནས་སུ། །དུར་ཁྲོད་རས་ལ་འཁོར་ལོ་བྲི། །སྨེ་བ་ལྔ་དང་ཚ་བ་བསྐུ། །དབུས་ནས་ཐིག་སྐོར་བཞི་རུ་བསྐོར། །གྲུ་གསུམ་ཟླ་ཁམ་ལྕགས་མཁར་བཞི། །མཚམས་བཞི་རྡོ་རྗེའི་ཀ་བས་འདེག །ཐོད་པའི་ར་བ་བརྒྱད་གཉིས་ལྡན། །ཕྱི་རིམ་ལྕགས་མཁར་བཅུ་དྲུག་ལ། །མཚམས་སུ་རིན་ཆེན་ཀ་བ་དེ་བཞིན་ས་རིའི་མཚམས། །དེ་ཡི་ཕྱི་རིམ་སྦྲུལ་གདུག་ཆུན་པོས་བསྐོར། །སྲིད་པ་རུས་སྦལ་ཁྲ་བོའི་ལྟེ་ན་གནས། །དེ་དག་དགོད་ཅིང་གནས་པའི་རིམ་པ་ནི། །དབུས་སུ་བརྣག་པའི་མིང་རུས་བྲི། །ཟླ་ཁམ་གསུམ་ལ་ཕ་མེས་དུར་དུ་སོང་བ་ཡི། །དེ་བཞིན་བརྣག་པར་བྱ་བའི་སྣག་ཚ་ཁྲག་གིས་བྲི། །ཟླ་ཁམ་གཅིག་ལ་སྲུང་བའི་ལྷ་རྣམས་བྲི། །འཁྲུལ་མིག་བཞི་ལ་སྤུ་གྲི་ཚན་བཞི་དགོད། །དེ་ཡི་ཕྱི་རིམ་འཁྲུལ་མིག་བཅུ་དྲུག་ལ། །དྲག་པོ་དབང་སྡུད་ལས་ཀྱི་རྒྱལ་པོ་གཉིས། །ཁྲོ་བོ་རྔམ་པའི་སྒྲ་དང་བདུད་ཀྱི་སྙིང་པོ་གཉིས། །གཤིན་རྗེ་ཉིད་དང་མ་མོའི་སྙིང་པོ་གཉིས། །ཆགས་བྱེད་མ་དང་སྲིན་པོའི་སྙིང་པོ་གཉིས། །ཤན་པ་བཙན་དང་དམུ་ཡི་སྙིང་པོ་གཉིས། །ཤན་པ་ལས་མཁན་སྒྲོལ་བྱེད་སྙིང་པོ་གཉིས། །དྲེགས་པ་ཅན་དང་ནམ་མཁའི་སྙིང་པོ་གཉིས། །སྲོག་བདག་ཕོ་མོ་གསོད་པའི་སྙིང་པོ་གཉིས། །རང་རང་ལྕགས་མཁར་
འབར་བའི་གནས་དེ་ནས། །དྲག་ཏུ་བསྐུལ་གྱིས་ཤན་པ་དག་ལ་རྦད། །འཁོར་ལོ་མཚོན་ཆེན་དྲག་སྔགས་མེ་དབལ་དྲུག །འཁྲུལ་འཁོར་མེ་རླུང་སྤུ་གྲི་ཐོག་ཆེན་འདིས། །ལུས་བཤིག་རྩ་གཅད་ཁྲག་དང་བག་ཆགས་སྐེམས། །ཤེས་པ་རྟེན་དང་དབང་པོ་ཡུལ་ལས་འབྱེད། །རྟེན་གཅིག་ལུས་ལ་ཤེས་པ་ཀུན་བསྡུས་ཐིམ། །ཁ་སྦྱོར་འཁོར་ལོ་ཐོད་པ་ག་བུར་གཞུག །ཉིན་མཚན་དྲིལ་གཏོར་མིང་བཅས་སྤུ་གྲི་སྦྱར། །ཐོད་པའི་གསེབ་ཏུ་ཐུན་གྱི་སྤུ་གྲི་དགོད། །རི་རྒྱལ་རྦབ་དང་གསེར་གྱི་དགུ་ཐོག་ལྟར། །སྦྲུལ་གྱི་གསེབ་ཏུ་གནན་པའི་སྤུ་གྲི་དགོད། །གསེར་གྱི་ས་གཞི་རི་རབ་བརྟན་ལྟར་བཟླས། །གྲུ་གསུམ་ནང་དུ་བརྣག་པའི་རྟེན་རྣམས་བཞག །མཐིང་ནག་ཁ་བཅད་གསད་པའི་སྦྱོར་བ་བརྩམ། །བརྒྱད་དམ་བཅུ་གཉིས་དྲིལ་གཏོར་དྲག་སྔགས་བཟླས། །སྦྱོར་བ་ཐོན་ནས་ཐོད་པ་གཟིར་ཞིང་བཅའ། །རི་རབ་ཕོ་བྲང་གདུག་པའི་ཀླུ་ལ་གཏད། །ཉ་སྟོང་ཁ་གསོ་ཐོད་ཁྲག་དུག་བཟའ་འཕང་། །དྲག་པོ་སྔགས་ཀྱི་དམོད་པ་འདི་ལྟ་སྟེ། །ཨེ་ཀ་ཧེ་དུན་ཡ་མ་རག་ཤ་མ་ཛ་མུན་ཏྲི། ཤམ་ཙང་ཀྲིང་ཤུ་སྙིང་། དགྲ་བོའི་སྲོག་ལ་ནྲྀ་ཤ་ཏྲུཾ་མཱ་ར་ཡ་རྦད། སྲོག་སྟྭཾ་བྷ་ཡ་ནན། སྲོག་ལ་ནྲྀ་ཤག་རྦད་ཡཾ་ཐུན་བྷྱོ། མེ་རླུང་སྦྱོར་བ་ལས་ཀྱི་མཆོག །རྣལ་མས་གསད་པའི་སྦྱོར་བ་ཡིན། །དྲག་སྔགས་མངོན་དུ་ཕྱུང་བའི་རྒྱུད་ལས། རྩ་བའི་སྦྱོར་བའི་ལེའུ་སྟེ་བཅུ་དགུ་པའོ།། །།གཞན་ཡང་གསད་པའི་སྦྱོར་བ་ནི། །མ་གྲུབ་སྤོགས་ན་ལྟོ་དཀྲུག་བཅའ། །རས་ལ་ཐིག་སྐོར་བཞི་རུ་བསྐོར། །གྲུ་གསུམ་ཟླ་ཁམ་མིང་རུས་ལྷ། །འཁྲུལ་མིག་བཅུ་དྲུག་རྩ་བའི་སྔགས། །ཡང་ལེགས་བཅུ་དྲུག་སྤུ་གྲི་མཚོན། །ཐ་མ་སྦྲུལ་བཞིའི་ར་བས་བསྐོར། །གཅོད་ཅིང་གནོན་པའི་འཁོར་ལོ་ཡིན། །བླ་སེམས་འཆང་བ་དྲག་པོའི་གནས། །གདུག་པ་སྲེག་བྱེད་ལས་ཀྱི་མེ། །
ལུས་སེམས་རྟེན་འདྲེལ་འགུག་པའི་རླུང་། །སྲོག་དབུགས་འཆད་པ་གཤེད་གསང་མཛོད། །རྩ་གཅོད་དབུགས་བྲལ་མཚོན་ཆེན་དུག །སྲོག་དང་ལས་སྡུད་ཟེ་ཡི་ལྕགས། །དབང་པོ་གནོན་པ་རི་བོའི་རྦབ། །ལས་སྦྱངས་ཤེས་སྨིན་ཕྱག་རྒྱ་བརྟན། །གདུག་པའི་མཚོན་ཆ་ངར་བླུད་ལ། །དྲག་སྔགས་ལྟོ་དཀྲུག་ཁྲི་བརྒྱད་གཉིས། །མཚན་མོ་བསྐུལ་གྱིན་དྲིལ་བའི་སྔགས། །ཐོན་ནས་ཐོད་མཁར་གདུག་པས་གདབ། །ཐུན་ཁྲག་དུག་གཟེར་ཁ་གསོ་བསྐྱེད། །ཤེས་པའི་ཁྱད་པར་གསུམ་ལྡན་འཕང་། །དབང་པོ་རྣོ་མྱུར་གསལ་འཕྲོ་སྡུད། །གདེང་གསུམ་སྔགས་སྐོང་རྒྱས་པར་བགྲོད། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་རག་ཤ་ཡ་མ་ཙ་ཛ་ཤུ་ཏྲི་ཤཾ་མུག་ཏྲི་སྙིང་། དགྲ་བོའི་སྲོག་ལ་ཡོངས་ཐུམས་ཤིག་རྦད། སྟྭཾ་བ་ཡ་གཟིར་ནན། སྲོག་ཁྱེར་ཡམ་ཤིག་ཧྲི་ཐུམས་མྱོག་ཐུན་བྷྱོ། གཞན་ཡང་ལས་ཀྱི་རིམ་པ་ནི། །སྤྲུལ་པས་ལོ་ཐོག་གཞོམ་པ་ལས། །དུར་ཁྲོད་རས་སམ་ཤོག་བུ་ལ། །ཐིག་སྐོར་རིམ་པ་གསུམ་དུ་བསྐོར། །དབུས་སུ་གྲུ་གསུམ་ཡུལ་གྱི་མིང་། །ཟླ་གམ་སྦྱོར་བ་གཞོམ་པ་བྲི། །ཕྱི་རིམ་འཁྲུལ་མིག་བཅུ་དྲུག་ལ། །རྩ་བའི་དྲག་སྔགས་རྣལ་མ་བཀོད། །ཐ་མ་རྩིབ་ཆེན་ཉི་ཤུ་ལ། །དབབ་པའི་སྤུ་གྲི་དྲག་པོ་དགོད། །རུས་སྦལ་ལྟོ་བར་སྦྱོར་བ་བསྡུ། །ཁ་སྦྱོར་ཐོད་པ་ཞབས་མས་གྲིལ། །ཁྲག་སྣ་དུག་སྣ་སྔོ་ན་བརྡེབ། །སྤྲུལ་པའི་བསྒོམ་གྱིན་བསྐུལ་ལ་བཟླས། །སྦྱོར་བ་ཐོན་ནས་གཏའ་མ་གཞུག །དྲག་སྔགས་སྟོང་དུ་རྒྱུན་མི་བཅད། །སྟོན་ཟླ་གསུམ་དུ་དབབ་པ་བརྩམ། །ཟོར་དང་དུ་བ་ཐབ་དང་གཟིར། །ཁྲག་དང་དུག་རྫས་སྔོ་སྣ་དུག །ལྕགས་ཕུར་དྲག་སྔགས་ཁྲི་བཞིར་ལྡན། །
གདུག་པའི་རྟེན་དང་གཟུགས་ལ་བརྡེག །དྲེགས་པ་ཀུན་གྱི་མཐུ་དྲིལ་བའི། །སྔགས་ཀྱི་རྒྱལ་པོ་འདི་ལྟ་སྟེ། །ཨེ་ཀ་ཧེ་དུན་ཡཾ་ཡཾ་ཤཾ་ཛྭ་མུན་ཏྲི་ཤམ་རཾ་ཀྲིང་ཤུ་སྙིང་པྲོཾས་པྲོཾས་ཤར་ཤར་ནཱ་ག་ཧུར་ནན་པྲོཾ་པྲོཾ་ཤར་ཤར་ཧྲིལ་ཧྲིལ་དྲག་ཏུ་ཕོབ་པྲོཾ་ནཱ་ག་ཛ་ཡཾ་སྙིང་གཟིར་ཙི་ཏ་ནན་པྲོཾ། ཤར་ཤར་ཧྲིལ་བྷྱོ། ལོ་ཐོག་གཞོམ་པ་དྲག་པོའི་ལས། །ཐོད་པ་སྟོབས་དང་ལྡན་པའོ། །གཞན་ཡང་སྤྲུལ་པའི་ཚེ་བདག་གིས། །གསུང་བཞིན་གཟིར་བ་འདི་ལྟ་སྟེ། །ཐམས་ཅད་གཅིག་ཏུ་
དྲིལ་བའི་ལས། །ཤོག་བུ ་གྲུ་བཞི་ཆ་མཉམ་ལ། །འཁྲུལ་འཁོར་རིམ་པ་གསུམ་དུ་བསྐོར། །སྲིད་པའི་རུས་སྦལ་ལྟོ་བར་བྲི། །དབུས་སུ་གྲུ་གསུམ་གང་གནོད་བྲི། །འཁྲུལ་མིག་བཅུ་དྲུག་རྩ་བའི་སྔགས། །ཡང་ལོགས་བཅུ་བཞི་སྤུ་གྲི་རྩིབས། །ལས་ནི་སྣ་ཚོགས་རྩ་བ་གཅིག །ཟླ་ཁམ་མེ་ཏོག་བསྲུང་བའི་འབྲུ། །བཅུ་བཞི་བཀོད་ལ་སྐབས་དང་སྦྱར། །ཁྲག་དང་དུག་ཆུ་ཚ་བ་བསྐུ། །ཐོད་པ་དང་བཅས་སྦྱོར་བ་བརྩམ། །ཞག་བདུན་སྔགས་བཟླས་དྲག་ཏུ་བསྐུལ། །ལྟ་བསྒོམ་བཀའ་རྟེན་འོག་ཏུ་གནན། །སྔགས་ཀྱི་རྩ་བ་གཉིས་སུ་བྱ། །བཅུ་དྲུག་བཅུ་གཉིས་རྣོ་དང་ཤིས། །རིག་པ་སྟོབས་དང་བརྡ་ཡིས་སྦྱར། །དྲག་སྔགས་སྦྱོར་བ་འདི་ལྟ་སྟེ། །ཨེ་ཀ་ཧེ་དུན་ཡཾ་མཾ་ར་ཤཾ་ཛ་མུན་དྲི་ཤཾ་རཾ་ཀྲིང་ཤུ། སརྦ་དུ་རཾ་ཨུ་ནན་གཟེར་ཕྱུང་སྦུར་ནན་སྲོག་ལ་མྱོགས་རྦད། དྲག་སྔགས་མངོན་དུ་ཕྱུང་བའི་རྒྱུད་ལས། ཡན་ལག་གི་སྦྱོར་བའི་ལེའུ་སྟེ་ཉི་ཤུ་པའོ།། །།དེ་ནས་ཡང་བཅོམ་ལྡན་འདས་ཀྱིས་དྲག་སྔགས་ཡོངས་སུ་སྨིན་པའི་དོན་འདི་གསུངས་སོ། །ཨེ་མ་ཆོས་སྐུ་བྱང་ཆུབ་སེམས། །སྐྱེ་འགག་མེད་པའི་ངོ་བོར་གནས། །མ་
བཅོས་བདེ་ཆེན་ལྷུན་གྱིས་གྲུབ། །ཡེ་ཤེས་ཐིག་ལེ་ངང་ལ་རྫོགས། །ཐབས་ཀྱི་རྒྱལ་པོ་རྡོ་རྗེ་ཡིས། །གསང་བ་ཡོངས་སུ་རྫོགས་པ་ཡི། །དྲག་པོ་སྔགས་ཀྱི་དམོད་པ་གདམས། །ཀུན་ཏུ་བགྲོད་པ་གསུམ་གྱིས་སྦྱང་། །བདེ་བའི་ལམ་ཅན་གཞན་ལས་མིན། །ཡེ་ཤེས་རིག་པ་སྣང་བར་སྤྱད། །རྒྱུད་ཀྱི་རྒྱལ་པོ་མངོན་ཕྱུང་འདི། །མ་འོངས་དམ་ལྡན་སྲུང་བྱེད་ན། །ང་ཡང་དམ་ལས་མི་གཡེལ་བསྲུང་། །འཆི་བདག་དྲེགས་པ་སྟོབས་ཅན་ཀུན། །དམ་ཚིག་བཀའ་ཡི་འཁོར་ལོ་སྲུངས། །ཨེ་མ་ཧོ་རིག་པའི་བཀའ་རྒྱུད་འདི། །བདེ་བའི་ལམ་ཅན་དག་པ་དང་། །མ་བསྒྲིབས་ལམ་ལ་གནས་པ་དང་། །འཆི་བདག་ཚོགས་ཀྱི་དགེ་འདུན་ཀུན། །རིག་པའི་ལམ་ལ་ཞུགས་པ་དང་། །འཆི་བདག་དྲེགས་པ་མྱོས་པ་དང་། །འཐོམས་པའི་ཚོགས་དང་ཁྲག་སྐྱུགས་ཚོགས། །ཕུང་བྱེད་མངག་པ་གདུག་པའི་ཚོགས། །འཁོར་ན་གནས་པའི་དམ་ཅན་ཀུན། །སངས་རྒྱས་བཀའ་ཡི་རྒྱུད་འདི་ཟུང་། །གཉིས་མེད་བགྲོད་པའི་ས་ལ་གནས། །རྡོ་རྗེ་གཏུམ་པོ་རྡོ་རྗེའི་ཚོགས། །རྡོ་རྗེ་ཁྲོ་བོ་རྡོ་རྗེ་ཁྲག་འཐུང་དང་། །རྡོ་རྗེ་གནོད་སྦྱིན་སྲིན་པོ་དང་། །རྡོ་རྗེ་མཁའ་འགྲོའི་ཚོགས་རྣམས་ཀྱང་། །དམ་ལ་གནས་ཤིང་མ་གཡེལ་སྲུངས། །སངས་རྒྱས་བཀའ་ཡི་ཡོན་ཏན་བརྗོད་མི་ལང་། །ཆེ་བའི་ཡོན་ཏན་གསུམ་དང་གཅིག་ཏུ་ལྡན། །ཁྲོ་བོའི་སྙིང་པོ་དྲེགས་པ་མ་མོ་དྲག་པོ་དང་། །བཅུ་དང་སུམ་སྒྲིལ་རིན་ཆེན་ཕྲེང་བ་ལྟར། །དམ་པར་སྦྱར་ལ་གཉེན་པོ་གཅིག་ཏུ་བསྒྲུབ། །དབང་སྡུད་ཕྱག་རྒྱ་ཆེན་པོ་རང་བཞིན་གཟིར། །ནམ་མཁའ་རིན་ཆེན་རྒྱ་མཚོ་མེ་དང་འདྲ། །དྲེགས་པ་སྟོབས་ཆེན་ཕྱག་རྒྱ་བརྟན་བྱས་ལ། །སྙིང་པོ་བཅུ་གཉིས་རྩ་བ་གཅིག་ཏུ་དྲིལ། །ཡན་ལག་གང་འདོད་སྤུ་གྲི་ཐེམས། །གང་རུང་སྦྱར་ན་རིན་ཆེན་སྙིང་པོ་འབྲུ། །བསྟན་པ་གསུམ་ལྡན་བདེ་བ་གཅིག་གི་ངང་། །
སྙིང་པོ་བཅུ་གཉིས་མི་འགྱུར་ཐིག་ལེ་ལ། །བསྲུང་བའི་རྒྱལ་པོ་དམར་ལེན་མཚོན་དང་སྦྱར། །གཟིར་བའི་སྙིང་པོ་གང་ཡིན་མཚམས་སུ་འཕོ། །རྣམ་ཤེས་འཕྲོག་པ་འབྲུ་གཅིག་སྙིང་ལ་བསྡུ། །མཚོན་དཔག་དཀའ་ན་སྐྱེ་མེད་ནམ་མཁའ་དབྲོག །ཤེས་ལ་རྒྱང་རིང་སྦྱོར་བའི་ཚད་དང་ལྡན། །འབྲུ་བརྒྱད་རྩ་བ་གང་དམིགས་སྤུ་གྲིར་ལྡན། །འདོད་པའི་དོན་བཞི་སྙིང་པོ་གཅད་ནས་དབྲོག །ཉེས་ལ་གནོད་བྱེད་མཚོན་ཆ་རང་གཅོད་དེ། །མན་ངག་ལྡན་པས་བདེ་བར་སྤྱད་ན་རྣོ། །རང་སེམས་སྟོབས་ལྡན་ཡེ་ཤེས་རིག་པའི་རྩལ། །འཆིང་མེད་གྲོལ་བར་ཐར་པའི་ལམ་མཆོག་འབྲས། །དེ་མེད་རང་འཆིང་མནར་མེད་ས་ལ་རིངས། །ཐབས་མེད་སྤྱོད་བྲལ་གདེང་མེད་བགྲོད་མ་ཐོབ། །རྩ་བ་རེ་དང་ཡན་ལག་བརྡའ་མི་སྦྱོར། །སུན་འབྱིན་གྲོལ་མེད་འཆིང་བའི་གནས་ལས་བགྲོད། །བློ་ཡེངས་ཆེ་བའི་ཡོན་ཏན་བསམ་མི་ལང་། །གྲོལ་བའི་ཕྱག་རྒྱ་ཡང་དག་འཕགས་ལམ་ལྡན། །འདི་དེ་བདེ་དང་སྨིན་པར་བྱེད་པའི་མཆོག །གུ་ཧྱ་ཙིཏྟ་སོ་མ་ཧ། ཡཾ་བཾ་རཾ་ལཾ་ཙཱ་དྷ་རཱི། ནཱ་ག་དེ་ཝ་རཀྴ་མ། ཡ་མ་ཀ་ཡི་བདེ་བའི་ཀློང་། །ཨ་དང་ཁྱབ་ཧོ་པུ་ཤུ་ཏ། །ཡེ་ཤེས་རིག་པའི་ཀློང་དུ་བརྡལ། །འདི་དག་བདེ་བའི་ལམ་ཅན་དེ། །སྨིན་ཅིང་བགྲོད་པའི་ཐབས་མཆོག་རྒྱལ། །ཨ་ཡི་ཡེ་ཤེས་ལས་བྱུང་བ། །སྐྱེ་མེད་རྣམ་དག་ཆོས་སྐུར་གསལ། །ཨེ་ཡི་ཡེ་ཤེས་ལས་བྱུང་བ། །དྲག་པོ་སྲེག་བྱེད་ནམ་མཁར་གསལ། །སངས་རྒྱས་སྐྱེ་བའི་ཆོ་འཕྲུལ་ལོ། །བདེ་བའི་ལམ་ཅན་སྙིང་པོ་ཀུན་ལས་འདས། །ནོར་བུ་གསེར་ལྡན་རིན་ཆེན་རྒྱལ་ས་ཐོབ། །བཀའ་ཡི་བདེན་པ་བདེ་བའི་ངང་ལ་བཞག །ཅེས་བཅོམ་ལྡན་འདས་ཀྱིས་གསུངས་པ་ལ། འཁོར་རྣམས་རྗེས་སུ་ཡི་རང་སྟེ་མངོན་པར་བསྟོད་དོ། །འཁོར་དེ་དག་གིས་བདེན་པ་མཐོང་བར་གྱུར་ཏོ། །དྲག་སྔགས་མངོན་དུ་ཕྱུང་བའི་རྒྱུད་ལས། རྒྱུད་ཡོངས་སུ་གཏད་པའི་ལེའུ་སྟེ་ཉི་ཤུ་གཅིག་པའོ།། །།དཔལ་གཤིན་རྗེའི་རྒྱུད་ཁྲི་དྲུག་སྟོང་པ་ནས། དྲག་པོ་རྣོ་དབལ་མཚོན་ཆའི་སྐབས་བཏོན་པའོ། །སྙིང་པོ་མན་ངག་གི་རྒྱུད་རྫོགས་སོ།། །།