དཔལ་ཁྲག་འཐུང་འདུས་པའི་རྒྱུད་ཅེས་བྱ་བ།
རྒྱ་གར་སྐད་དུ། ཤྲཱི་ཧེ་རུ་ཀ་ས་མཱ་ཛ་ཏནྟྲ་ནཱ་མ། བོད་སྐད་དུ། དཔལ་ཁྲག་འཐུང་འདུས་པའི་རྒྱུད་ཅེས་བྱ་བ། དཔལ་ཁྲག་འཐུང་རྒྱལ་པོ་ལ་ཕྱག་འཚལ་ལོ། །འདི་སྐད་བདག་གིས་ཐོས་པའི་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་རང་བཞིན། སྐུ་དང་གསུང་ཐུགས་རྡོ་རྗེ་བཙུན་མོའི་བྷ་ག་ལ་བདེ་བ་ཆེན་པོའི་དབྱིངས། གསང་བ་མཆོག་གི་གཞལ་ཡས་ཁང་། ཟབ་མོ་འདུས་པའི་བདག་ཉིད། ཉམས་བཞི་སྐྱེད་པའི་གནས། རྩེ་མོ་ཐིག་ལེ་ཆེན་པོས་མངོན་པར་བརྒྱན་པ་ན། དེ་བཞིན་གཤེགས་པ་ཐམས་ཅད་ཀྱི་རང་བཞིན་ཐིག་ལེ་ཆེན་པོ་བྱང་ཆུབ་ཀྱི་སེམས་རྡོ་རྗེ། མ་ལུས་པ་འདུས་པའི་སྙིང་པོ་དེ་བཞིན་གཤེགས་པ་ཐམས་ཅད་ཀྱི་སྙིང་པོས་བྱིན་གྱིས་བརླབས་པ། ཡིད་བཞིན་གྱི་ནོར་བུ་རིན་པོ་ཆེ། ཁམས་གསུམ་གྱི་དབང་བརྙེས་པ། པདྨ་རྣམ་པར་དག་པའི་གསུང་གི་དབྱངས་མངའ་བ། འགྲོ་བ་མ་ལུས་པ་ཕྲིན་ལས་ཀྱིས་འདུལ་བར་མཛད་པ་སྟེ། འདི་ལྟར་ནམ་མཁའི་དབྱིངས་དང་མཉམ་པའི་རྣལ་འབྱོར་གྱི་དབང་ཕྱུག་ཆེན་པོ། བཙུན་མོའི་ཚོགས་དང་བཅས་པ་དང་། ས་བཅུའི་དབང་ཕྱུག་རྒྱལ་བའི་སྲས་སུ་གྱུར་པ། བཙུན་མོའི་ཚོགས་དང་བཅས་པ་དང་། གདུག་པ་འདུལ་ཞིང་ཕྱིན་ཅི་ལོག་ཚར་གཅོད་པར་མཛད་པའི་བིགྷྣཱཾ་ཏ་ཀྲྀཏ་ལ་སོགས་པ་བཙུན་མོའི་ཚོགས་དང་བཅས་པ་དང་། གཞན་ཡང་འཁོར་ཞིང་གི་རྡུལ་སྙེད་དང་བཅས་པར་ཐབས་ཅིག་ཏུ་བཞུགས་སོ། །དེ་ནས་དེ་བཞིན་གཤེགས་པ་དགྱེས་པ་ཆེན་པོ་དེ་ཉིད་ཀྱིས། ཕྱོགས་ཐམས་ཅད་དུ་རྣམ་པར་གཟིགས་ཏེ་ཕྱོགས་བཅུ་དང་སྣོད་བཅུ་དང་ཕྱི་ནང་དང་ཁམས་གསུམ་དང་། ཞིང་ཁམས་དང་ས་དང་ལམ་དུ་བཅས་པ་རྣམ་པར་གཟིགས་སོ། །དེ་ལྟར་ཁྱབ་པ་ཆེན་པོ་དང་། ཆགས་པ་ཆེན་པོ་དང་། མཛེས་པ་ཆེན་པོ་དང་། ཟིལ་གནོན་བརྗིད་པའི་ཚུལ་གྱིས་གཟིགས་པས། མ་ལུས་པའི་ཐིག་ལེ་ཆེན་པོའི་རང་བཞིན་དམིགས་པ་མེད་པར་ཐུགས་སུ་ཆུད་པར་གྱུར་ཏོ། །དགྱེས་པའི་བྱིན་རླབས་ལས། ཐུགས་ཀ་དང་ལྗགས་དང་སྤྱི་བོ་ལས་འོད་སྣ་ཚོགས་བྱུང་སྟེ། ཁྱབ་པ་དང་གསལ་བ་དང་འཇོམས་པ་དང་། ཉམས་བསྐྱེད་པར་གྱུར་ནས། ཕྱོགས་བཅུའི་ཞིང་
ཡོངས་སུ་སྦྱངས་ཏེ། རྒྱལ་བའི་སྲས་སུ་གྱུར་ཏེ། རྒྱལ་བའི་ཞིང་ཁམས་རྡུལ་ཕྲ་མོ་སྙེད་ཀྱི་སངས་རྒྱས་ཀྱི་དཀྱིལ་འཁོར་དང་བཅས་པ་འདུས་པར་གྱུར་ཏེ། དེ་དག་ལ་ཕྱག་འཚལ་ཞིང་འདི་སྐད་ཅེས་བརྗོད་པར་གྱུར་ཏེ། །ཨེ་མའོ་སངས་རྒྱས་ཐམས་ཅད་ནི། །རྒྱ་ཆེན་གདོད་ནས་སྐྱེ་མེད་དེ། །འདུལ་བའི་ཐབས་ཀྱི་ཁྱད་པར་གྱིས། །མཛད་པ་སྣ་ཚོགས་བསྟན་པ་ལེགས། །ཞེས་གསུངས་སོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རླབས་ཀྱིས། སྐུ་གསུང་ཐུགས་རྡོ་རྗེ་བཙུན་མོའི་བྷ་ག་ལ། དུས་གསུམ་དུ་ཉམས་བཞིའི་ཚུལ་གྱིས་དགའ་བར་མཛད་དེ། རྡོ་རྗེ་སྙིང་པོའི་ཚུལ་གྱིས་པདྨའི་སྙིང་པོ་ལ་ཞུགས་པར་གྱུར་ཏོ། །དེ་ནས་དེ་བཞིན་གཤེགས་པ་སྲས་དང་བཅས་པས་འདི་སྐད་ཅེས་གསོལ་ཏོ། །ཨེ་མའོ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་བྱིན་རླབས་ཀྱིས། །བརྟུལ་ཞུགས་གསུམ་ལ་གནས་བྱའི་ཕྱིར། །དབང་བསྐུར་བདག་ལ་གནང་བ་སྩོལ། །ཞེས་གསོལ་པ་ལས། དེ་མ་ཐག་ཏུ་ཞལ་བསྟན་པ་དང་། ཐིག་ལེ་ཆེན་པོ་དང་བདེ་བ་ཆེན་པོ་དང་། ཡེ་ཤེས་བར་ཆད་མེད་པའི་དབང་བསྐུར་ནས། མ་ལུས་པའི་ཐིག་ལེ་ཆེན་པོའི་རང་བཞིན་དུ་གསལ་བར་གྱུར་ཏེ། སྐུ་དང་གསུང་དང་ཐུགས་རྡོ་རྗེའི་རང་བཞིན་དུ་དབྱེར་མེད་པར་གྱུར་ཏོ། །དེ་ནས་ནམ་མཁའི་དབྱིངས་དང་མཉམ་པའི་རྒྱལ་བ་རྒྱ་མཚོ་རྣམས་ཀྱིས་འདི་སྐད་ཅེས་བཀའ་སྩལ་ཏོ། །དམ་ཚིག་གསུམ་ལ་གནས་པ་ཡིས། །བར་ཆད་མེད་པའི་ས་ཕྱོགས་སུ། །བྱང་ཆུབ་མཆོག་ཏུ་སེམས་བསྐྱེད་དེ། །མ་ལུས་དག་པ་གསུམ་བསྒོམས་ནས། །རྒྱལ་བའི་ཕོ་བྲང་དག་པར་བསྒོམ། །རང་བཞིན་ཇི་ལྟ་བཞིན་བསྒོམས་ལ། །རྒྱལ་བ་ཡབ་ཡུམ་སྲས་དང་བཅས། །སྒོ་བར་བཅས་ཏེ་བསམ་པར་བྱ། །དབྱེར་མེད་མཆོད་བཟླས་བརྟན་ཐོབ་ནས། །བརྟུལ་ལུགས་གསུམ་ནི་བརྟག་པར་བྱ། །ཤིན་ཏུ་ཡིད་དགའི་ས་ཕྱོགས་དེར། །ས་ཡི་བྱ་བ་ཀུན་བྱས་ནས། །ཚད་དང་ལྡན་པའི་སྟེགས་བུ་བརྩམ། །ཉི་ཤུ་ལྔ་ལྡན་དག་པ་དེར། །བླ་མ་ཡུམ་དང་ལྡན་པ་ཡིས། །ང་རྒྱལ་གསལ་བར་བྱིན་བརླབས་
ནས། །རས་བལ་གཙང་མ་ཉིས་འགྱུར་ཚང་། །སྦོམ་ཕྲ་སྒོ་ཡི་ཉི་ཤུ་ཆ། །རང་གི་རྟོག་པ་ཇི་བཞིན་པར། །ཐིག་གང་བ་ཆོག་ཇི་བཞིན་བྱ། །དྲི་ཡི་ཐིག་ལེར་མཚན་བཀོད་སྟེ། །ནམ་མཁའི་དཀྱིལ་འཁོར་ཕབ་ཅིང་མཆོད། །བུམ་པ་ལྔ་དང་བཅུ་ཡང་རུང་། །ཡོ་བྱད་ཚང་བར་བྱིན་བརླབས་ལ། །རང་རང་གནས་སུ་འཚམས་པར་གཞག །སྣོད་དང་ལྡན་པའི་སློབ་མ་དག །མོས་པས་ཁྲུས་བྱས་སེམས་བསྐྱེད་དེ། །ལྷག་པར་གནས་པ་ཇི་བཞིན་བྱ། །རིན་ཆེན་ལྔ་དང་འབྲས་ལྔ་དང་། །འབྱུང་ཁུངས་ལྔ་ལྡན་ཁ་དོག་ལ། །རིགས་ལྔའི་བྱིན་རླབས་བསྡུས་ཏེ་བྲི། །ཟླུམ་པོ་ཐིག་བཞི་ལེའུ་ཚེ་དགུ། །སྒོ་བཞི་ལྡན་པའི་ཚུལ་དུ་བྲི། །རྒྱན་དང་བྲོ་བརྡུང་ཕྲེང་བ་དང་། །ཡིད་འོང་ལྷ་ཡི་འབྱོར་པས་བསྐོར། །མ་དག་པ་ནི་མཚམས་གཅད་ཅིང་། །དག་པའི་སྒྲུབ་རྫས་བྱིན་བརླབ་དགོད། །ཏིང་འཛིན་ལྷ་བསྐྱེད་གསལ་བསྒོམས་ལ། །བཟླས་དང་འཕྲོ་འདུ་རྒྱུན་མི་གཅད། །ནུས་པ་ལྡན་པའི་ལྷས་ཐོབ་ནས། །རྣལ་འབྱོར་བདག་ཉིད་འཇུག་པར་བྱ། །དེ་ནས་བླ་མ་མཉེས་བྱས་ལ། །ཆོ་ག་རྒྱས་པར་ཤེས་པ་ཡིས། །གུས་ལྡན་མེ་ཏོག་འཛིན་པ་ཡིས། །སློབ་མ་དམ་ཚིག་ལྡན་པ་དེ། །ཞུགས་ནས་རང་གི་ཡེ་ཤེས་ཕབ། །ཆོ་ག་བཞིན་དུ་ནན་ཏན་བྱ། །དཀྱིལ་འཁོར་བཞི་ལ་རིམ་ཞུགས་ནས། །དབང་བཞི་རིམ་པ་བཞིན་དུ་སྦྱར། །དེ་ནས་གང་ལ་དགའ་བ་ཡི། །བསྒྲུབ་པའི་གནས་ལ་སྦྱིན་པར་བྱ། །རང་རང་རྟོག་པ་ལས་བསྟན་པའི། །ཆོ་གའི་རིམ་པ་ལ་བརྟེན་པས། །བརྩོན་འགྲུས་ཏིང་འཛིན་ལྡན་པ་ཡིས། །ཚེ་འདི་ཉིད་ལ་འགྲུབ་པར་འགྱུར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། གླེང་གཞི་དང་། དཔལ་རྡོ་རྗེ་འཛིན་པའི་ཆོ་གའི་རིམ་པ་བསྟན་པའི་ལེའུ་སྟེ་དང་པོའོ།། །།དེ་ནས་དེ་བཞིན་གཤེགས་པ་མ་ལུས་པ་སྲས་དང་བཅས་པ་རྣམས་ཀྱིས། འདུལ་བའི་སྐྱེ་བོ་གྲངས་མེད་པའི་བསམ་པ་སོ་སོར་གཟིགས་པར་གྱུར་ཏེ། ལ་ལ་ནི་ཞེ་སྡང་ཅན་དུ་སྣང་། ལ་ལ་ནི་འདོད་ཆགས་ཅན་དུ་སྣང་། ལ་ལ་ནི་ང་རྒྱལ་
ཅན་དུ་གནས། ལ་ལ་ནི་གཏི་མུག་ཅན་དུ་གྱུར། ལ་ལ་ནི་ཕྲག་དོག་ཅན་དུ་གྱུར་ཏེ། ཕྱིན་ཅི་ལོག་ཏུ་གྱུར་པས། འཁོར་བའི་དངོས་པོ་ལ་འབྱོལ་ཉོག་ཏུ་སྤྱོད་ཅིང་ཞེན་པས། ལོག་པའི་རི་བོ་མངོན་དུ་བརྟས་པས། སྲིད་པ་གསུམ་གྱི་བདག་པོར་བརྟགས་པར་གྱུར་ཏེ། འཇིག་རྟེན་ཀུན་དབང་དུ་བསྡུས་ནས། རྒྱུ་འབྲས་ལོག་པར་སྨིན་པ་དེ་གཟིགས་ནས། དཀྱིལ་འཁོར་གྱི་འཁོར་ལོས་འདི་སྐད་ཅེས་བསྐུལ་ཏོ། །ཨ་ཧོ། མ་བཅོས་སྤྲོས་མེད་བྱང་ཆུབ་སྙིང་པོ་ནི། །མཁའ་ལྟར་མི་འགྱུར་ཐིག་ལེ་སྟོང་པ་སྟེ། །མ་རྟོགས་བློ་ལ་རྟོག་པའི་ངོ་བོ་སྣང་། །ཐུགས་རྗེས་ཁྲོས་པས་འགྲོ་བ་གདུལ་དུ་གསོལ། །དང་པོ་དམ་བཅས་རྒྱལ་བ་ཐུགས་རྗེ་ཅན། །སྐུ་གསུང་ཐུགས་ལས་སྤྲུལ་པའི་ཆོ་འཕྲུལ་གྱིས། །གདུག་པ་མ་ལུས་བཏུལ་ཞིང་ཚར་བཅད་ནས། །མ་བཅོས་སྙིང་པོའི་ངང་ལ་དགོངས་སུ་གསོལ། །ཞེས་རྣམ་པར་བསྐུལ་བས། བཅོམ་ལྡན་འདས་དགྱེས་པ་ཆེན་པོ་དེས་བསྐུལ་བར་མཁྱེན་ནས་ཧཱུཾ་ཞེས་གསུངས་པས། དཀྱིལ་འཁོར་གྱི་འཁོར་ལོར་བཅས་པ་ཉིད་ཀྱི་སྐུ་ལ་རིམ་པར་འདུས་པར་གྱུར་ཏོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། འདི་ལྟར་དང་པོ་བདག་གི་ས་བོན་བཀོད། །གཉིས་པ་གསུམ་པ་བཞི་བརྗོད་པས། །སྟོང་གསུམ་རིམ་པས་སྒྲ་རུ་གྲགས། །དེ་ལས་ཕྱག་མཚན་གྱུར་པ་སྟེ། །ཐ་མ་སྐུ་རྫོགས་ངེས་པར་བལྟ། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་ཁ་ཊྭཱཾ་རྔེ་ཆུང་གཡས། །དྲིལ་བུ་དུང་དམར་རྒྱུ་ཞགས་གཡོན། །ཡུམ་ཡང་ཡབ་དང་མཐུན་པ་ལ། །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་ཕོར་གཙོ་ལ་སྟོབ། །དུར་ཁྲོས་ཆས་བརྒྱད་གར་དགུ་དང་། །འགྱིངས་ཚུལ་བརྗིད་པའི་ཚུལ་གྱིས་བཞུགས། །རིགས་བཞི་ཡབ་ཡུམ་འཁོར་ཚུལ་ཏེ། །སྦས་པའི་རཀྴ་ཡཀྴ་དང་། །གུ་ཧྱ་ས་ནུ་ཡབ་ཡུམ་རྣམས། །འཁྲིལ་པས་འཁོར་ལོའི་ཚུལ་དུ་བཞུགས། །གསང་བའི་བུ་མོ་ཁྲོ་མོ་བརྒྱད། །ཕྲ་མེན་བརྒྱད་དང་གུས་པ་བཞི། །འབར་མ་བརྒྱད་དང་བཅས་པ་ཡི། །བཀའ་ཉན་ཉི་ཤུ་རྩ་བརྒྱད་ལྡན། །མཁའ་འགྲོའི་ཚོགས་དང་མ་མོ་བདུན། །སྲིང་མོ་བཞི་དང་
གིང་ཆེན་དང་། །ཕོ་ཉ་ཡང་སྤྲུལ་སུམ་བརྒྱ་དང་། །དྲུག་ཅུ་ཉི་ཁྲི་བདུན་སྟོང་ཚོགས། །རྡོ་རྗེ་རིག་འཛིན་ལ་སོགས་པ། །འཁོར་ལོའི་ཚུལ་དུ་ཐབས་ཅིག་བཞུགས། །དེ་ནས་གསང་བདག་རྡོ་རྗེ་འཛིན། །མ་ལུས་གསང་བའི་མཛོད་འཛིན་པ། །དགྱེས་པའི་གར་དང་དབྱངས་དང་བཅས། །གུས་དང་མཛེས་པས་སྤྱན་སྔར་འདུག །བརྟག་པའི་ཆོ་ག་ལེགས་པར་དྲིས། །དཔལ་ཆེན་ཧེ་རུ་ཀ་ཡི་དོན། །རང་བཞིན་ཐབས་དང་འབྲས་བུ་གང་། །ཧེ་ཞེས་བྱ་བ་གང་ཅི་ཞིག །རུ་ཞེས་བྱ་བ་གང་གི་དོན། །ཀ་ཞེས་བསྟན་པའི་དོན་ཅི་ཞིག །བལྟ་བའི་དོན་ནི་ཇི་ལྟ་བུ། །སྤྱོད་པའི་ཁྱད་པར་གང་དག་ལགས། །རྩ་བའི་དཀྱིལ་འཁོར་གང་དག་ལགས། །ཏིང་ངེ་འཛིན་ནི་ཇི་ལྟ་བུ། །དག་པ་གསུམ་ཞེས་ཇི་ལྟ་བུ། །དབང་གི་ཁྱད་པར་ཇི་ལྟར་བསྐུར། །སྤྱོད་དང་ཁྱད་པར་དམ་ཚིག་གང་། །ཐུན་མོང་ཐུན་མོང་མ་ཡིན་པའི། །བསྒྲུབ་པའི་ཁྱད་པར་ཇི་ལྟ་བུ། །ཕྲིན་ལས་རིམ་པ་གང་ཞིག་ལགས། །ཧེ་རུ་ཀ་རུ་བདག་སྦྱོར་བའི། །ལམ་གྱི་རིམ་པ་གང་དག་ལགས། །དཔའ་བོ་ཆེན་པོས་བཤད་དུ་གསོལ། །དཔའ་བོས་བསྐུལ་པ་གསན་ནས་ཀྱང་། །ཆོ་འཕྲུལ་ཆེན་པོ་ཀུན་བསྟན་ནས། །འོད་ཀྱི་དཀྱིལ་འཁོར་འཁྲིགས་པ་ཅན། །བསྐལ་པའི་མེ་ལྟར་འབར་བ་ཡིས། །མ་དག་པ་ནི་མཚམས་བཅད་ནས། །གང་ཟག་དམ་པར་བྱིན་བརླབས་ནས། །གསང་བའི་བསྟན་པ་བསྒྲགས་པར་མཛད། །ཨེ་མ་ཧོ་སངས་རྒྱས་ཐམས་ཅད་ཀྱིས། །དྲི་མེད་ཡེ་ཤེས་ཧེ་རུ་ཀ །ནམ་མཁའི་དཀྱིལ་འཁོར་སྣ་ཚོགས་སྟོན། །རང་བཞིན་ཀུན་གྱི་རང་བཞིན་ཏེ། །ཐབས་ནི་ཕྱི་ནང་སྦས་པ་གསུམ། །འབྲས་བུ་རང་བཞིན་མཐར་ཕྱིན་པས། །ཧེ་ནི་དགྱེས་པ་ཆེན་པོ་ཉིད། །རུ་ནི་ཆགས་པ་བདེ་ཆེན་པོ། །ཀ་ནི་ཕྲིན་ལས་མཛད་པར་ཤར། །བལྟ་བ་མ་བཅོས་ཆོས་ཉིད་མཐོང་། །སྤྱོད་པ་སྒོ་གསུམ་བླང་དོར་མེད། །ལྷ་དང་དངོས་གྲུབ་དབང་ལ་སོགས། །སྙིང་པོ་འབྱུང་བཞི་ལྷུན་རྫོགས་པས། །འབྱུང་བཞི་འཁྱིལ་པའི་དཀྱིལ་འཁོར་ཏེ། །གང་དང་གང་དུ་གསལ་བའི་ཡིད། །མ་
ཡེངས་པ་ཉིད་ཏིང་འཛིན་ཏེ། །དག་པས་དག་པ་གསུམ་དུ་བརྗོད། །གང་གིས་གང་ལ་གང་བསྐུར་པ། །རྒྱུད་དག་ནུས་པ་ཐོབ་ཕྱིར་དབང་། །མ་ལུས་སྒོ་གསུམ་ཁྱབ་པར་དག །བདག་དང་གཞན་ཕྱིར་མི་འགལ་བ། །སྤྱི་དང་ཁྱད་པར་དམ་ཚིག་མཆོག །རིག་འཛིན་ལམ་དང་འབྲས་བུ་དང་། །ཚེ་དང་པྲ་དང་རོ་ལངས་དང་། །རྐང་མགྱོགས་མཁའ་འགྲོ་ལ་སོགས་པ། །བསྒྲུབ་པས་བསྒྲུབ་པ་ཉིད་དུ་བཤད། །ཞི་དང་རྒྱས་དང་དབང་དྲག་ཉིད། །མཛད་པ་ཕྲིན་ལས་ཉིད་དུ་བརྗོད། །དེ་བཞིན་གཤེགས་པའི་ཡེ་ཤེས་ནི། །བསམ་གྱིས་མི་ཁྱབ་རང་བྱུང་སྟེ། །མ་ལུས་རྣམ་དག་བྱང་ཆུབ་སེམས། །ཐིག་ལེ་ཆེན་པོར་དུས་གཅིག་རྫོགས། །ཆོས་ཀུན་རང་སེམས་མེ་ལོང་ལ། །ཀུན་གྱི་གཟུགས་བརྙན་རང་ཤར་བ། །དེ་དག་དེ་ཡི་རང་བཞིན་ཏེ། །མ་ལུས་བདེ་གཤེགས་སྣང་བ་ཉིད། །བྱིན་རླབས་སྣ་ཚོགས་བསམ་ཡས་པ། །རྡོ་རྗེ་འཛིན་ནས་རྩི་ཤིང་སོགས། །རང་རང་ནུས་པ་སྣ་ཚོགས་ཀྱིས། །མ་ལུས་ཀུན་གྱི་བསམ་པ་ལྟར། །དཔག་མེད་ཆེ་བ་སྣ་ཚོགས་སྟོན། །སྟོང་ལ་སྟོང་མིན་ཧེ་རུ་ཀ །བདེ་ཆེན་རྣམ་འཕྲུལ་སྣ་ཚོགས་གཟུགས། །ཞི་ལ་ཞི་དང་ཁྲོ་ལ་ཁྲོ། །ཆགས་ལ་ཆགས་དང་རྨོངས་ལ་རྨོངས། །དྲེགས་ལ་རི་བོ་མཉམ་ལ་མཉམ། །འབྱུང་ལ་འབྱུང་བ་འདོད་ལ་འདོད། །ལེ་ལོ་སེར་སྣ་དེ་བཞིན་ཏེ། །ཐབས་མཁས་འདུལ་བ་སྣ་ཚོགས་པ། །ཇི་ལྟར་འཚམས་པར་རྣམ་པར་གནས། །ཞེས་གསུངས་སོ། །དཔལ་ཧེ་རུ་ཀ་འདུས་པའི་ཏནྟྲ་ལས། གླེང་གཞི་དང་། རྒྱུད་ཀྱི་སྙིང་པོ་འབྱུང་བའི་ལེའུ་སྟེ་གཉིས་པའོ།། །།དེ་ནས་གསང་བའི་བདག་པོ་ཡིས། །མ་ལུས་དྲག་པོས་འདུལ་བའི་ཕྱིར། །ཐབས་མཁས་རོལ་པའི་བརྡའ་ཡིས་ནི། །ཀུན་མཁྱེན་ཁྱོད་ལ་གསོལ་བ་འདེབས། །ཀུན་མཁྱེན་རྒྱལ་པོས་མཉེས་གཟིགས་ནས། །འབར་ཞིང་རྔམ་པའི་མདངས་ཀྱིས་ནི། །འཇིག་རྟེན་ཁམས་ཀུན་སྒྲས་བཀང་ནས། །བསྐལ་པའི་མེ་ལྟར་དྲག་ཅིང་འབར། །ཕྱི་ནང་བགེགས་རྣམས་ཐམས་ཅད་འབྱེར། །ཨོཾ་བ་ཧུ་བེ་དྷ། རོ་ཧུ་ཏི། པཉྩ་
ཏི། ཨ་ཤ་ཥ། ནི་ཤེ་ཥ་བཱ་ད་བིན་ཡ། བིདྱ་ག་ཏ། ཙ་ལེ་པྲ་ཙ་ལེ། གུརྦ་གུརྦ། བི་གུརྦ་སརྦ་བཛྲ་ཤཾ་བ་ལེ། ཙ་ལེ་ཙ་ལེ། ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། འབར་བའི་དཀྱིལ་འཁོར་སྣ་ཚོགས་འབྲོས། །ཆོ་འཕྲུལ་རྣམ་པ་སྣ་ཚོགས་ཀྱིས། །ཕྱི་ནང་སྣོད་བཅུད་བཅས་པ་གང་། །གྲངས་ལས་འདས་པའི་ལྷ་རྣམས་ནི། །རིག་པའི་དཀྱིལ་འཁོར་མཐའ་དབུས་མེད། །ཕྱོགས་བཅུ་དུས་བཞི་ཁྱབ་པར་སྣང་། །དངོས་གྲུབ་ཀུན་གྱི་རྩ་བ་ནི། །བསྙེན་པ་དང་ནི་ལས་སྔགས་ཏེ། །འདི་དག་ཡིད་བཞིན་ནོར་བུ་ལྟར། །མ་ལུས་ད་ལྟར་འགྲུབ་པར་འགྱུར། །བསྙེན་པའི་ཡི་གེ་འབྲུ་བརྒྱད་ལ། །རྩ་བའི་དཀྱིལ་འཁོར་རྫོགས་པས་ན། །ཡན་ལག་མ་ལུས་རང་རྫོགས་པས། །དངོས་གྲུབ་མ་ལུས་རྫོགས་ཏེ་གནས། །གང་དུ་བསྙེན་པ་གསུམ་རྫོགས་ནས། །རབ་འབྲིང་ཐ་མའི་རྟགས་ཐོབ་ན། །བརྒྱུད་པའི་ཡུལ་དང་བྲལ་བས་ན། །ཚེ་འདིར་སངས་རྒྱས་ཉིད་ཐོབ་ན། །དངོས་གྲུབ་གཞན་ལྟ་སྨོས་ཅི་དགོས། །སྒྲུབ་པ་པོ་དང་གཟུངས་མ་དང་། །རྫས་དང་གྲོགས་དག་བཞི་པ་སྟེ། །དག་པའི་རྒྱུད་ལ་སྣང་བ་ནི། །མེ་ལོང་བཞིན་ལ་སྣང་བ་ཡིན། །བསྙེན་པའི་དཀྱིལ་འཁོར་གསལ་བསྒོམས་ཤིང་། །འོད་གསལ་བྱིན་རླབས་གནས་ཐོབ་ནས། །སྦྱོར་བའམ་ཐིག་ལེར་ཐོབ་པས་བཟླས། །ཚེ་འདིར་སངས་རྒྱས་ཉིད་ཐོབ་འགྱུར། །དངོས་གྲུབ་གཞན་ལྟ་སྨོས་ཅི་དགོས། །ཚེ་དང་ལྕོང་ཞི་དམར་སེར་བ། །བཀྲ་ཤིས་དག་པའི་ཞལ་ཟས་ལ། །རྟགས་ཐོབ་བར་དུ་བཟླས་བསྐྱེད་ན། །མི་འཆི་ཚེ་ཡི་དངོས་གྲུབ་འཐོབ། །དྲག་པོའི་སྦྱོར་བ་གསལ་བ་ཡིས། །བདུན་འབུམ་སྔོན་དུ་སོང་བ་ཡིས། །གུ་གུལ་སྦྱར་མ་བསྲེག་བྱ་ཞིང་། །སྟོང་རྩ་བརྒྱད་དུ་བཟླས་བྱས་ན། །གྲོང་དང་ཡུལ་ཕྱོགས་ཐམས་ཅད་དུ། །བགེགས་ནི་མ་ལུས་འབྲོས་པར་འགྱུར། །དཀྱིལ་འཁོར་སྙིང་པོ་ལྡན་བཀོད་ནས། །མུ་ཁྱུད་རྡོ་རྗེ་ར་བ་ལ། །ལས་སྔགས་བཀོད་དེ་བྱིན་བརླབས་ནས། །བདུན་འབུམ་གྲངས་ཚད་ག་བུར་བཅུག །གྲོང་དང་སྒོ་དང་ཞིང་སྲང་དང་། །
རི་རྩེ་ལ་སོགས་གར་བཞག་པ། །སེར་བ་དང་ནི་ནད་དང་གདོན། །མ་ལུས་པ་ནི་ཞི་བར་འགྱུར། །གྲོ་ག་རས་དང་དར་སོགས་ལ། །བྲིས་ཤིང་བྱིན་བརླབ་བསྙེན་རྫོགས་ནས། །ལུས་སམ་གཙུག་ཕུད་མགུལ་བཏགས་ན། །ཚེ་རིང་ནད་མེད་བདེ་བ་དང་། །དགྲ་དང་བགེགས་ཀྱིས་འཚེ་བ་མེད། །ཐལ་ཆེན་མུ་ཟི་ཉུང་དཀར་ལ། །བྱེ་བའམ་བདུན་འབུམ་བཟླས་བྱས་ཏེ། །རྫིང་དང་འབབ་ཆུར་དོར་བྱས་ན། །ལོ་ལེགས་འབྲུ་ནི་འཕེལ་བར་འགྱུར། །གུ་གུལ་ནག་པོས་བྱུགས་པ་ཡི། །ཐང་ཕྲོམ་པ་དང་ཚིལ་ཆེན་ལ། །བཟླས་ཤིང་བསྲེགས་ཏེ་བདུག་གྱུར་ན། །སྨྱོ་བ་མ་ལུས་ཞི་བར་འགྱུར། །ཁྲག་དང་ཉུང་ནག་ཚིལ་ཆེན་ལ། །བདུན་འབུམ་བྱེ་བ་བཟླས་ནས་ནི། །ཆུ་མིག་འགྲམ་དུ་བསྲེག་བྱས་ན། །དམིགས་པ་ནད་ཀྱིས་འཆི་བར་འགྱུར། །ཙནྡན་དཀར་པོ་མར་སར་དང་། །སྤང་སྤོས་གླ་རྩི་སྦྱར་བྱས་ལ། །བཟླས་ཞིང་གཟེར་སར་བསྐུས་བྱུགས་ན། །གཟེར་ནད་མ་ལུས་ཞི་བར་འགྱུར། །བདུད་རྩི་ལྔ་ལ་ལིངྒ་བྱས། །དྲག་པོའི་ཕུར་པ་ལྔ་ཉིད་ལ། །བསྙེན་རྫོགས་ཉི་ཤུ་གཅིག་བཟླས་ནས། །གནས་ལྔར་བཏབ་ན་འཆི་བར་འགྱུར། །དྲག་པོའི་ཧོམ་ཁུང་ནག་པོ་རུ། །མཚན་མར་བཅས་པའི་ལིངྒ་ལ། །བསྙེན་རྫོགས་ཉི་ཤུ་གཅིག་བཟླས་ཏེ། །གནན་ན་གཡོ་བ་མེད་པར་འགྱུར། །འབྲས་ཆང་རྫ་འམ་ཐོད་པ་ལ། །སྔོན་བཞིན་འཁོར་ལོ་སྔགས་བཅས་བྲི། །བྱིན་བརླབས་ཁ་སྦུབ་གར་བཞག་སར། །སེར་བ་ཆེན་པོ་གཅོད་པར་འགྱུར། །ག་བུར་ཤེལ་དང་ཙནྡན་དཀར། །བཟླས་ཤིང་རང་ལ་གང་འཆང་བ། །རིམས་དང་གནོད་པས་མི་ཚུགས་ཤིང་། །ལུས་ཡང་ནད་མེད་བྱེད་པར་འགྱུར། །ཏིལ་དང་ཙནྡན་དཀར་པོ་དང་། །ཞོ་དང་མར་དང་འོ་མ་ལ། །བཟླས་ཤིང་སྦྱིན་བསྲེག་བྱས་ན་ནི། །འདུས་དང་ནད་བགེགས་ཞི་བར་འགྱུར། །གང་དུ་ལས་རྣམས་ཀུན་བྱེད་པ། །དེ་ཉིད་རྟེན་འདྲེལ་ལས་བྱུང་སྟེ། །གང་ལ་གང་བརྟེན་འབྲས་བྱུང་བ། །འདི་ནི་རྟེན་ཅིང་འདྲེལ་འབྱུང་བའི། །ཆོས་ཉིད་རྫས་དང་ཆོ་ག་དང་། །ཐབས་ཀྱིས་རྟེན་ཅིང་འདྲེལ་བ་ནི། །གང་དག་ཅི་དགར་གྲུབ་པ་ནི། །རྒྱལ་
བས་ཀྱང་ནི་བསྔགས་པ་སྟེ། །དག་དང་མ་དག་ཁྱད་པར་དང་། །ལོག་དང་མ་ལོག་ཁྱད་པར་ལས། །བདེ་དང་སྡུག་བསྔལ་སྣ་ཚོགས་འཕྲུལ། །གསང་སྔགས་ཐབས་ཀྱི་བྱིན་རླབས་ཀྱིས། །མེ་ལས་ཆོ་འཕྲུལ་སྣང་བ་སྟེ། །ངོ་བོ་བྱིན་རླབས་ཁྱད་པར་ཅན། །སྣ་ཚོགས་ངོ་བོ་ཉིད་དུ་སྣང་། །དེ་བཞིན་ཆོས་རྣམས་ཐམས་ཅད་ཀྱང་། །ངོ་བོ་ཉིད་ཀྱི་ཁྱད་པར་ཅན། །གང་གི་བྱིན་རླབས་སྣ་ཚོགས་པ། །མཐུན་པ་ཉིད་དུ་དེ་ལྟར་སྣང་། །ཆོས་ཀུན་ངོ་བོ་ཉིད་སྣང་བ། །ཕྱོགས་དང་བྲལ་བའི་བྱང་ཆུབ་སེམས། །གང་དུ་སྣང་ཞིང་སྙིང་པོ་མེད། །མ་ལུས་མཁའ་ལྟར་ཁྱབ་པའི་སེམས། །རྟག་ཏུ་རང་གི་ངོ་བོས་སྟོང་། །མཐའ་དབུས་གཞི་རྩ་ལས་འདས་པ། །ཐབས་ཆེན་གསང་སྔགས་དང་བྲལ་བའི། །ཆེ་བའི་ཆེ་བ་ཟབ་མོ་འདི། །ལུང་དང་རིགས་པ་ལ་སོགས་པའི། །རྟོག་གེའི་སྤྱོད་ཡུལ་ནམས་ཀྱང་མིན། །གདོད་ནས་དབྱེར་མེད་སྙིང་པོ་ལ། །རྟོག་གེའི་རིག་པས་གང་བལྟས་པ། །གསལ་བའི་འོད་ཟེར་སྙིང་པོ་ལ། །དམུས་ལོང་བརྒྱ་ཡིས་བལྟས་པ་ལྟར། །སྙིང་པོའི་དོན་ནི་མི་མཐོང་སྟེ། །རང་ཉིད་ཚི་ཆད་བརླག་པར་འགྱུར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། ཆོ་འཕྲུལ་ཆེན་པོ་བསྟན་པའི་ལེའུ་སྟེ་གསུམ་པའོ།། །།དེ་ནས་གསང་བ་མཆོག་གི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། འབར་བའི་རྒྱལ་པོ་བྱིན་རླབས་བདག །མ་ལུས་སྣང་སྲིད་དཀྱིལ་འཁོར་གནས་པ་ལ། །སྒྲིབ་པ་གསུམ་གྱིས་འབར་བའི་ཞལ་མ་མཐོང་། །དེ་ཕྱིར་འབར་བའི་དཀྱིལ་འཁོར་བཤད་དུ་གསོལ། །ཞེས་གསོལ་པས། དེ་ནས་བཅོམ་ལྡན་འདས་དགྱེས་པ་ཆེན་པོ་ཧེ་རུ་ཀས། བདག་ཉིད་དཀྱིལ་འཁོར་འདི་སྐད་དོ། །བྷྲུཾ་སྟོང་གསུམ་མ་ལུས་གཞལ་ཡས་ཁང་། །འབྱུང་བ་ལྔ་པོ་རིམ་བཞིན་བརྩེགས། །དུར་ཁྲོད་རྒྱན་ཆས་ལྷུན་གྱིས་གྲུབ། །དབང་པོ་ལྔ་ཡི་ཁོང་གསེང་ཅན། །ཉི་ཟླ་པདྨ་རང་བཞིན་གནས། །ཕུང་པོ་ལྔ་དང་འབྱུང་བ་ལྔ། །རྣམ་ཤེས་ཡུལ་དང་ཡན་ལག་དང་། །ཉོན་མོངས་ཡིད་
ཆོས་དེ་བཞིན་ཏེ། །རྒྱུ་བའི་ལམ་དང་མཚན་དག་དང་། །ནང་གྲོལ་འདྲེལ་འདྲེན་ཡང་རྟེན་རྩིབ་མ་དང་། །ཤ་དང་སྐྲ་དང་བ་སྤུ་དང་། །རང་བྱུང་འབར་བའི་དཀྱིལ་འཁོར་ཏེ། །ལྔ་ཕུང་ཕྲ་རགས་འབྱུང་བ་བཞི། །སྦས་པའི་དོན་དུ་ཤེས་པར་བྱ། །འདི་ནི་དུར་ཁྲོད་དཀྱིལ་འཁོར་ཏེ། །ལུས་ཅན་ཀུན་ལ་གནས་པ་ཡིན། །ལུས་ཅན་ཙིཏྟའི་ཕོ་བྲང་ནི། །རྒྱལ་བ་ཀུན་གྱི་རང་བཞིན་ཏེ། །རྟེན་ཅན་ལྔ་ནི་ཕུང་པོ་སྟེ། །རགས་པའི་ཕྲ་བ་སྦས་པར་བརྗོད། །དྭངས་མ་ལྔ་འདུས་ཡུམ་གྱི་གཙོ། །སྙིགས་མ་ལྔ་ནི་གསང་བའི་ཡུམ། །ཐིག་ལེ་གསང་བའི་བུ་མོ་སྟེ། །རྟེན་ཅན་ཕྲ་མེན་ཉིད་དུ་བརྗོད། །གསང་བའི་སྒོ་བཞི་གུས་པ་སྟེ། །སྦས་པའི་ཐབས་ཅན་སྤོར་བྱེད་མ། །རྒྱུ་བའི་ལམ་སྲང་ལས་བྱེད་མ། །བུ་ག་བདུན་དང་ཐིག་ལེ་བཞི། །སྦས་པའི་ཚུལ་དུ་རྫོགས་པར་གནས། །རྒྱུ་བའི་གཡས་གཡོན་རྟེན་ཅན་རྟེན། །རྩ་བཞི་ལ་བརྟེན་སྒྲོལ་མར་ཡང་བར་བཤད། །བདེ་བའི་འཁོར་ལོ་མཁའ་ལ་འགྲོ། །སུམ་ཅུ་རྩ་གཉིས་མཚན་དང་ལྡན། །ལུས་བཅུད་རྩ་ཡི་མདུད་པ་ནི། །སུམ་བརྒྱ་དྲུག་ཅུ་ཁྱབ་གནས་ཏེ། །ཁྱབ་འཛིན་འགུགས་པས་ལས་བྱེད་ཅིང་། །སྐྲ་རྩེ་ཐིག་ལེས་ཁྱབ་བྱེད་ཅིང་། །བ་སྤུའི་བུ་ག་ཐིག་ལེར་ཆགས། །ཡང་སྤྲུལ་འཕྲོ་ཞིང་ཉིད་ལ་སྡུད། །ཐབས་དང་ཤེས་རབ་རང་བཞིན་ལས། །ལྔ་ཕུང་ཆགས་སྡང་ལྔར་སྣང་བ། །རིག་པའི་རྒྱལ་པོ་ལྔ་ཡི་གཟུགས། །གསང་བའི་འབྱུང་བ་དྭངས་སྙིགས་ལས། །ཡུམ་གྱི་རང་བཞིན་ཤེས་པར་བྱ། །ཕུང་པོའི་སྙིགས་མ་ཧེ་རུ་ཀ །བདེ་བའི་རྣམ་ཤེས་ཁྲོ་མོ་སྟེ། །ཡུལ་ཉིད་བདེར་ཆགས་ཕྲ་མེན་ཉིད། །སྦྱོར་བའི་ཕྱག་རྒྱ་འཇུག་པ་ཉིད། །སྦོར་བྱེད་བདེ་བར་འབར་མར་འདོད། །གང་དུ་རྒྱུ་བ་བྲན་མོ་སྟེ། །རྒྱུ་བའི་འཁོར་ལོར་མཁའ་འགྲོ་མ། །རྩ་མདུད་ཀུན་ཁྱབ་ཕོ་ཉ་སྟེ། །ཧཱུཾ་སྤྲོས་སྦྱོར་སྒྲོལ་ཐབས་མཁས་ཉིད། །གསང་བའི་རླུང་དུའང་ཤེས་པར་བྱ། །ཕྱི་དང་ནང་ཆགས་མཁའ་འགྲོ་མ། །སྐྲ་རྩེ་བ་སྤུ་འབུམ་གྱི་ཆ། །ཐབས་དང་ཐིག་ལེར་གང་འཕྲོས་པ། །རྟོག་པ་གང་སྐྱེས་དེར་སྡུད་པ། །ཡང་སྤྲུལ་ཕྱག་རྒྱའི་ཚོགས་སུ་བརྗོད། །ཀུན་གྱི་རང་བཞིན་འདིར་འདུས་ཤིང་། །
རང་བཞིན་གནས་པས་རང་བཞིན་ཡིན། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། རང་བཞིན་གྱི་དཀྱིལ་འཁོར་བསྟན་པའི་ལེའུ་སྟེ་བཞི་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཕྱོགས་བཅུ་དུས་གསུམ་དེ་བཞིན་གཤེགས་པ་ཡི། །སྐུ་གསུང་ཐུགས་ཀྱི་རང་བཞིན་ཧེ་རུ་ཀ །འབར་བའི་རྒྱལ་པོ་མཛེས་པའི་སྐུ་མཆོག་གིས། །ཉིད་ཀྱི་རང་བཞིན་བདག་ལ་བསྟན་དུ་གསོལ། །ཞེས་གསོལ་པ་ལས། བཅོམ་ལྡན་འདས་ཡེ་ཤེས་རྔམ་པའི་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །ཆོས་རྣམས་ཀུན་གྱི་རང་བཞིན་ནི། །མ་བཅོས་བདེ་བ་ཆེན་པོའི་དབྱིངས། །ཐིག་ལེ་ཆེན་པོའི་རང་བཞིན་ལ། །ཆོས་རྣམས་མ་ལུས་རྫོགས་པར་ལྡན། །ཧེ་ནི་ཁྱབ་གདལ་སྟོང་པའི་ངང་། །རུ་ནི་གཉིས་མེད་བདེ་བ་ཆེ། །ཀ་ནི་ཅིར་ཡང་རོལ་པ་ཉིད། །མ་སྐྱེས་པ་དང་སྐྱེ་བ་དང་། །དབྱེར་མེད་ཚིག་གི་རང་བཞིན་ཡིན། །ཧེ་ནི་དགྱེས་པ་ཆེན་པོ་སྟེ། །རུ་ནི་ཆགས་པ་ཆེན་པོ་ཉིད། །ཀ་ནི་ཕྲིན་ལས་ཐོགས་པ་མེད། །འདི་ནི་མི་གནས་མྱ་ངན་འདས། །མཚོན་པ་ཀུན་བྲལ་ཡེ་ཤེས་ནི། །གང་གི་མཚོན་པ་དེ་ཉིད་དེ། །དབང་པོ་མཆོག་གི་རྣལ་འབྱོར་ལ། །མ་ལུས་ཡེ་ཤེས་མཎྜ་ལ། །སྐུ་དང་གསུང་ཐུགས་འབར་བ་ཡི། །མ་ལུས་རྒྱལ་བ་རྒྱ་མཚོའི་དབྱིངས། །ཧེ་ནི་དགྱེས་པ་ཆེན་པོ་སྟེ། །རུ་ནི་ཆགས་པ་ཆེན་པོ་ཉིད། །ཀ་ནི་སྙིང་རྗེས་ཁྱབ་པ་གདལ། །དེ་ཉིད་མཐའ་དབུས་ལས་འདས་པའོ། །ཧེ་ནི་རྒྱུ་དང་བྲལ་བ་སྟེ། །རུ་ནི་མཚན་མའི་གཟུགས་ལ་འདས། །ཀ་ནི་ཆོས་སྐུ་མཚོན་དང་བྲལ། །སྙིང་པོ་རང་བཞིན་གསང་བའི་གསུང་། །ཧེ་ནི་ཆོས་སྐུ་མཚོན་དང་བྲལ། །རུ་ནི་ལོངས་སྤྱོད་ཆེན་པོ་སྟེ། །ཀ་ནི་སྣ་ཚོགས་སྤྲུལ་པའི་སྐུ། །སྐུ་གསུམ་ལྷུན་གྲུབ་རྩོལ་བ་མེད། །ཆོས་ཉིད་སྨོན་ལམ་ཐུགས་རྗེ་ཡིས། །ངང་ཁྲོ་ཤུགས་དང་བཅས་པ་ནི། །ཐུགས་རྗེ་བྱིན་རླབས་བཅས་པ་ཉིད། །བྱམས་དང་སྡང་དང་ཆགས་ཁྲོ་ཉིད། །ཡུལ་དང་བཅས་པ་དེ་བཞིན་འགྱུར། །གང་དུ་གང་ལ་གང་སྣང་བ། །
ལས་དང་ཐུགས་རྗེ་ཐབས་འདྲེལ་བ། །བྱིན་རླབས་ཡེ་ཤེས་ལྷུན་རྫོགས་ནི། །དཔག་བསམ་ནོར་བུ་ལྟ་བུར་གནས། །དཔག་མེད་རིག་པ་ཆོས་ཀྱི་དབྱིངས། །ཡེ་ཤེས་ལྔ་ཡི་ངོ་བོ་ལས། །གདུལ་བྱའི་བློ་ནི་རིམ་པ་བཞིན། །ཁྲག་འཐུང་ལྔ་ཡི་ངོ་བོར་གནས། །སྐུ་ནི་སྣང་བ་ཐམས་ཅད་དེ། །གསུང་ནི་བརྗོད་པ་ཀུན་ཉིད་དེ། །དྲན་རྟོག་ཐུགས་ལ་དབྱེར་མེད་པ། །མ་ལུས་སྐུ་གསུང་ཐུགས་ལ་རྫོགས། །ཀུན་གྱི་རང་བཞིན་དེ་ཉིད་དེ། །རྒྱུ་འབྲས་མཚོན་པ་ཀུན་གྱིས་སྟོང་། །གང་ལ་དེ་ཉིད་རང་སྣང་བ། །ཆུ་ལ་ཆུ་བུར་སྣང་བ་ལྟར། །མ་བཅོས་ཕྱག་རྒྱ་ཆེན་པོར་གནས། །སྣ་ཚོགས་ཕྱག་རྒྱའི་མཚན་ཉིད་དེ། །དེ་ཉིད་ཐབས་མཆོག་མཚོན་པའི་ཚུལ། །སྐལ་ལྡན་རྒྱལ་སྲས་རྣལ་འབྱོར་ལ། །མན་ངག་ཐབས་ཀྱིས་འགྲུབ་པར་འགྱུར། །མ་ལུས་འཇིག་རྟེན་བརྟན་གཡོ་དང་། །འདས་དང་མ་འདས་ཐམས་ཅད་ཀུན། །རང་བཞིན་ཐབས་ཀྱི་རྒྱལ་པོ་སྟེ། །གཞན་ལས་བྱུང་བའི་ཆོས་མ་ཡིན། །དཔལ་ལྡན་ཡེ་ཤེས་ཧེ་རུ་ཀ །ཐབས་ཆེན་མཛད་པ་ཀུན་གྱི་གནས། །གསང་བའི་གསང་བ་ཐུགས་ཀྱི་ཐུགས། །མཁའ་ལ་དྲི་མེད་གསལ་བ་ལྟར། །སྐྱེ་མེད་དབྱིངས་ལས་ཕྱག་རྒྱར་གསལ། །ལས་དང་ཏིང་འཛིན་ཡེ་ཤེས་དང་། །ཡིད་ཀྱི་རྣམ་པར་འཕྲུལ་པ་མཆོག །ཇི་སྲིད་རྣམ་རྟོག་གནས་ཀྱི་བར། །དེ་སྲིད་ཕྱག་རྒྱའི་ཚོགས་མཆོག་སྟེ། །གང་དང་འཚམས་པར་གང་སྣང་བ། །ཕྱག་རྒྱའི་དཀྱིལ་འཁོར་གྲངས་ལས་འདས། །ཀུན་གྱི་གཞི་རྩ་སྙིང་པོ་ཉིད། །ཕྱི་ནང་སྣོད་བཅུད་མ་ལུས་པ། །རྒྱུ་འབྲས་མེད་པའི་རིག་པར་གཅིག །རང་སྣང་བདེ་བའི་ངོ་བོར་གནས། །ཐབས་ཆེན་གསང་བའི་རང་བཞིན་ནི། །ལོག་པར་མཐོང་བའི་སྐྱེ་བོ་ལ། །ཐབས་ཀྱི་ཁྱད་པར་ཅི་བསྟན་ཡང་། །དམུས་ལོང་ཁ་དོག་བསྟན་པ་བཞིན། །མ་ནོར་ཐབས་དང་ལྡན་པ་ཡིས། །སྐལ་ལྡན་དག་པའི་སྐྱེས་བུ་ལ། །མན་ངག་ལེགས་པར་བསྟན་པ་ཡིས། །གསང་བ་འཛིན་པའི་རྒྱལ་པོར་འགྱུར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། ཧེ་རུ་ཀའི་རང་བཞིན་བསྟན་པའི་ལེའུ་སྟེ་ལྔ་པའོ།། །།དེ་ནས་གསང་བའི་བདག་
པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ་རྒྱལ་བ་རྒྱ་མཚོའི་སྐུ་གསུང་ཐུགས། །ཐམས་ཅད་མ་སྐྱེས་ངང་ལ་གཉིས་མེད་ཀྱང་། །དམན་པས་དམ་པའི་བལྟ་བ་རྟོགས་དཀའ་བས། །བདག་ཅག་རྣམས་ལ་རྒྱ་ཆེར་བཤད་དུ་གསོལ། །ཞེས་གསོལ་པ་ལས། བཅོམ་ལྡན་འདས་ཡེ་ཤེས་ཐམས་ཅད་ཀྱི་རྒྱལ་པོ་དེས་འདི་སྐད་ཅེས་གསུངས་སོ། །ཆོས་རྣམས་མ་ལུས་སེམས་ཉིད་རང་བཞིན་ཏེ། །དེ་ཉིད་བརྟག་ཅིང་དཔྱད་པ་ལས་འདས་པས། །ཀུན་གྱི་ཡུལ་ལས་འདས་ཤིང་བརྗོད་དཀའ་བས། །གང་དུ་ཡང་མ་མཐོང་མཚོན་པའི་ཡུལ་ལས་འདས། །རྒྱུ་དང་འབྲས་བུའི་ཆོས་རྣམས་ཇི་སྙེད་པ། །གཞི་རྩ་མེད་པའི་ངང་དུ་རང་བཞིན་འདུས། །དབྱིངས་དང་ཡེ་ཤེས་ཐབས་དང་ཤེས་རབ་ཀྱང་། །དེ་ཉིད་ཆེན་པོའི་ངང་དུ་དབྱེར་མེད་པས། །མ་བཅོས་ཆོས་དབྱིངས་བརྡལ་བ་ཆེན་པོ་ལ། །སྒྲོ་སྐུར་ཡིན་མིན་དཔྱོད་དང་རྟོག་པ་མེད། །དམ་པའི་རང་བཞིན་ཐབས་ཀྱིས་གང་རྟོགས་པ། །ཆོས་རྣམས་ཀུན་གྱི་རང་བཞིན་དུས་གཅིག་རྟོགས། །གཞི་རྩ་ཀུན་འདས་ནམ་མཁའི་རང་བཞིན་ལ། །བླུན་པོས་བལྟས་པས་རང་ཉིད་ཚི་ཆད་ལྟར། །སེམས་ཉིད་མཐའ་དབུས་འདས་པའི་རང་བཞིན་ལ། །མཚན་མས་བལྟས་ཀྱང་ཆོས་དབྱིངས་དོན་མི་མཐོང་། །མ་སྐྱེས་སྟོང་ཆེན་ནམ་མཁའི་རང་བཞིན་ལ། །རྣམ་རྟོག་གྲངས་ལས་འདས་པའི་ཕྱག་རྒྱར་ཤར། །མཁའ་ལ་གཟའ་སྐར་ཆུ་ཡི་ཆུ་བུར་ལྟར། །ཇི་ལྟར་སྣང་ཡང་སྐྱེ་བ་མེད་པར་གཅིག །སྐུ་གསུང་ཐུགས་ཀྱི་མཚན་མ་ཇི་སྙེད་པ། །སེམས་ཅན་མོས་པའི་ཁྱད་པར་སྣང་བ་ཡིན། །ནུས་མཐུ་བྱིན་བརླབས་སོ་སོར་སྣང་བ་ཡང་། །མ་སྐྱེས་སེམས་ཀྱི་ངང་ལས་གཞན་མ་མཐོང་། །དོན་དང་རྟགས་ཀྱི་ལྷ་ཞེས་བརྟགས་པ་ཡང་། །ཐིག་ལེ་ཆེན་པོའི་ངང་ལ་གཉིས་མེད་པས། །སྐུ་མདོག་ཕྱག་མཚན་མཛེས་པར་བརྒྱན་པ་དང་། །མ་ལུས་སྣང་བའི་རིག་པ་སྟོང་པར་གཅིག །སེམས་ཉིད་དངོས་པོ་མཚན་མར་གང་ཤར་ཀྱང་། །སྒྱུ་མ་སྨིག་རྒྱུ་ཆུ་ཟླ་བྲག་ཆ་ལྟར། །སེམས་ཉིད་སྟོང་པའི་གཟུགས་བརྙན་རང་ཤར་བས། །སྒྱུ་མ་རྣམ་བཞི་མ་བཅོས་གཅིག་ཏུ་འདུས། །རྟག་པ་རང་རྒྱུད་ཟད་པའི་སེམས་ཉིད་ནི། །ཇི་ལྟར་སྣང་
ཡང་དེ་ལྟར་མི་གནས་ཏེ། །ཕྱོགས་འདས་སྤྱོད་མེད་མཁའ་ལྟར་དག་པ་ལ། །ཡེ་ཤེས་སྒྱུ་མ་དགག་བསྒྲུབ་ཀུན་དང་བྲལ། །སྒྱུ་མ་བདེ་མཆོག་རང་བཞིན་ཐིག་ལེ་ཆེར། །བརྟག་པ་ཟད་པའི་བདེ་བ་རང་འབྱུང་བས། །བདེ་བས་བདེ་བ་མཚོན་པར་རྟོགས་ཐབས་ཀྱིས། །སྣང་སྲིད་མ་ལུས་བདེ་བ་ཆེན་པོར་མཐོང་། །ཁྲུས་དང་གཙང་སྦྲ་དཀའ་ཐུབ་མི་དགོས་ཏེ། །ཐབས་དང་ཤེས་རབ་སྙིང་རྗེས་གང་བསྟན་པས། །འདོད་ཆགས་བདེ་བ་མཆོག་ཏུ་ངེས་པར་མཐོང་། །མཐོང་དང་མ་མཐོང་རྩོད་པ་ཆད་དུས་ན། །དམ་པའི་དགོངས་པ་ལྷུན་གྱིས་གྲུབ་ངེས་པའོ། །གང་གིས་གང་ལ་ངེས་པའི་དོན་གསལ་ནས། །དམ་པ་ཡིན་པའི་རྟགས་ནི་གསལ་བར་འགྱུར། །ཞེན་པ་ཆུང་དང་ཐ་མལ་ལས་རྒྱུན་ཆད། །གཟུངས་མ་རིགས་ཅན་འདུ་ཞིང་བྱིན་རླབས་ཆེ། །ལས་དང་བསམ་པ་འགྲུབ་ཅིང་བླང་དོར་མེད། །ཏིང་འཛིན་ཆུ་བོའི་རྒྱུན་གྱི་ཀླུང་དུ་འཇུག །བསྔགས་པ་ཐོབ་ཅིང་རྩོད་པའི་འཇིགས་དང་བྲལ། །འདུ་ཤེས་མཚན་མ་འགག་ཅིང་བྱ་བ་ཉུང་། །རང་བཞིན་དལ་ཞིང་འདུ་བྱེད་མཚན་མ་ཕྲ། །གང་ཞིག་དམ་པའི་དོན་དེ་རྟོགས་ཕྱིན་ཆད། །རྒྱལ་བའི་སྲས་པོ་རིག་པ་འཛིན་པ་དེ། །འཁོར་བའི་འཇིགས་བྲལ་མྱ་ངན་འདས་སྨོན་མེད། །གདོད་ནས་དག་པ་ནམ་མཁའི་རང་བཞིན་ལ། །མཐོང་དང་མ་མཐོང་གློ་བུར་རྟོག་པའི་ཆོས། །དམ་པའི་དོན་ལ་མཐོང་ཞིང་གསལ་རྟོགས་ན། །མཐོང་དང་མ་མཐོང་རྩོད་པ་རྣམ་པར་འཆད། །བླུན་པོ་མཁའ་ལ་རྩོད་པ་ཇི་བཞིན་དུ། །བྱིས་པ་མཐའ་ཡི་ཚིག་ལ་རྩོད་པ་བྱེད། །རང་སེམས་གཉིས་མེད་རྩོད་པའི་ཡུལ་ལས་འདས། །མཐའ་དང་དབུས་མེད་ནམ་མཁའ་སྟོང་བའི་ཀློང་། །བདག་དང་གཞན་མེད་རིག་པ་གཅིག་གི་ངང་། །ཕྱི་དང་ནང་མེད་ཆོས་དབྱིངས་བརྡལ་བའི་གནས། །ཆེ་ཆུང་རྒྱུ་འབྲས་མེད་པས་འབྲས་བུའི་ལམ། །མ་བཅོས་དོན་དམ་རྟོགས་པའི་དོན་གསལ་ན། །མཚན་མའི་ཞེན་པས་རྩོལ་བ་བྱ་མི་དགོས། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། བལྟ་བ་དེ་ཁོ་ན་ཉིད་བསྟན་པའི་ལེའུ་སྟེ་དྲུག་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །
ཨེ་མ་ཧོ་དཔལ་ཆེན་ཆེ་མཆོག་ཧེ་རུ་ཀ །ཉི་མ་སྟོང་ལྟར་འབར་བའི་གཟི་བརྗིད་ཅན། །སྐུ་གསུང་ཐུགས་ལ་མོས་པས་གསོལ་འདེབས་ན། །སྤྱོད་པའི་ཁྱད་པར་བདག་ལ་བསྟན་དུ་གསོལ། །ཞེས་གསོལ་པས། དེ་བཞིན་གཤེགས་པ་ཐམས་ཅད་ཀྱི་རང་བཞིན། ཡེ་ཤེས་རྔམ་པའི་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །ཨེ་མ་འདུས་པ་ཆེན་པོའི་ཚོགས། །སྤྱོད་པའི་ཁྱད་པར་ཇི་སྙེད་པ། །རང་རང་ཐབས་ཚུལ་མཐའ་ཡས་པས། །ནམ་མཁའི་ཁམས་ནི་མཐའ་ཡས་པས། །རྣམ་པར་འཕྲུལ་པའི་ཚུལ་གྱིས་བྱེད། །འདུལ་བའི་སྐྱེ་བོ་ཇི་སྙེད་པ། །རང་རང་ཐབས་ནི་སྣ་ཚོགས་ཀྱིས། །སོ་སོའི་གར་ཐབས་སྤྲིན་ཕུང་གིས། །མ་ངེས་འདུལ་བའི་དོན་དུ་སྣང་། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མ་བླང་ངོ་། །གཞན་གྱི་བུད་མེད་སྤྱད་མི་བྱ། །རྫུན་གྱི་ཚིག་ནི་བརྗོད་པ་མིན། །རང་གི་ལྷ་ཡི་རྣལ་འབྱོར་གྱིས། །དཀའ་ཐུབ་དཀའ་བ་བྲལ་བཞིན་དུ། །ཐབས་མཁས་འདོད་པ་བསྟེན་བཞིན་དུ། །བདག་དང་གཞན་དོན་སྤྱད་པར་བྱ། །སྙིང་པོ་བྱང་ཆུབ་བར་དུ་ནི། །དམ་རྫས་ཆེན་པོ་ལྔ་སྤྱད་ཅིང་། །འཇིགས་པ་མེད་པའི་ལོངས་སྤྱོད་བྱ། །ཅིས་ཀྱང་གདུང་བ་མེད་པ་ཡི། །བདེ་བ་ཡིད་འོང་རྟག་ཏུ་བསྟེན། །དམར་ཆེན་པོ་དང་ག་པུར་དང་། །དྲི་ཆེན་མཱཾ་ས་ཆུར་བཅས་པ། །དོགས་པ་མེད་པར་རྟག་བཟའ་ཞིང་། །ཆོས་ཀྱི་འཁོར་ལོ་རྟག་ཏུ་བསྐོར། །ཁྱོད་ཀྱིས་སྲོག་ཆགས་གསད་པར་གྱིས། །མ་བྱིན་པར་ཡང་བླང་བར་བྱ། །གཞན་གྱི་བུད་མེད་སྤྱད་པར་གྱིས། །རྟག་ཏུ་རྫུན་དུ་སྨྲ་བར་བྱ། །འདི་ནི་སངས་རྒྱས་ཐམས་ཅད་ཀྱི། །གསང་བའི་སྤྱོད་པ་བླ་ན་མེད། །བླུན་པོ་གང་ཞིག་སྤོང་བྱེད་པ། །དེ་ལ་མཆོག་གི་དངོས་གྲུབ་མེད། །སེམས་ཉིད་སྦྱངས་ཤིང་དག་བྱའི་ཕྱིར། །མཚན་ལྡན་བུད་མེད་རྟག་ཏུ་བསྟེན། །རང་ལུས་རྒྱུད་ཀྱིས་རྒྱས་བྱས་ལ། །བདེ་བའི་ཐིག་ལེ་རྟག་ཏུ་གཟུང་། །དུས་ཚོད་ཁྱད་པར་ངེས་བཟུང་ལ། །ཚོགས་ཀྱི་འཁོར་ལོ་སྤྱད་པར་བྱ། །གཏོང་དང་འཛིན་དང་འདྲེན་པ་དག །སྐབས་ཀྱི་ཁྱད་པར་ཤེས་བྱ་ཞིང་། །སྤང་ཞིང་དམ་ཚིག་ཉམས་པ་མིན། །གང་གིས་བུད་མེད་བསྟེན་བྱ་ཞིང་། །འདོད་པའི་ཆོ་ག་རྒྱས་པ་ཡིས། །རང་
ཉིད་བརྟན་པར་གནས་པར་བྱ། །དམ་རྫས་བུད་མེད་རྟག་ཏུ་བསྟེན། །ལུས་དང་སེམས་དང་སྣང་བ་དག །རིམ་པར་འཕེལ་བའི་ཚུལ་གྱིས་ནི། །བདེ་བ་ནམ་མཁའི་ཁམས་དང་མཉམ། །རིག་པའི་བརྟུལ་ཞུགས་མ་སྤྱད་ན། །རང་གི་སྐལ་བ་དམན་པ་དང་། །བདེ་བ་དམན་ཞིང་རིགས་ཆད་ནས། །དེ་ལ་དམ་པའི་དངོས་གྲུབ་མེད། །རང་ལུས་སྒོ་གསུམ་མཉམ་སྦྱར་ཞིང་། །འདོད་པའི་ཡོན་ཏན་ལྔ་རྣམས་ལ། །རང་ཉིད་བསྟེན་ཅིང་གཞན་ལ་མཆོད། །དཀའ་ཐུབ་རྨྱུང་བ་མི་བྱ་ཞིང་། །སློང་མོས་འཚོ་བར་བྱ་བ་མིན། །རང་གི་ཡུལ་དང་ལྷན་ཅིག་ཏུ། །ལྷ་ཡི་སྤྱོད་པས་བསྟེན་བྱ་ཞིང་། །དོགས་པ་མེད་པར་རྟག་ཏུ་སྤྱོད། །སྣ་ཚོགས་རིག་པའི་ཏིང་འཛིན་གྱིས། །ཕྱི་ནང་སྣོད་བཅུད་ནམ་མཁའི་ཁམས། །ལྷ་ཡི་སྐུ་གསུང་ཐུགས་ཉིད་ཀྱིས། །ཏིལ་འབྲུ་བཞིན་དུ་གང་བར་གསལ། །གླུ་དང་གར་དང་སྤྱོད་པ་ཀུན། །རྒྱལ་བའི་མཛད་པར་མ་གྱུར་མེད། །འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་གསུམ་གྱི་སྤྱོད་པ་སྟེ། །བླུན་པོ་གང་ཞིག་འདའ་བྱེད་པ། །དངོས་གྲུབ་རྒྱ་ཆེན་གང་ཡང་མེད། །དཔའ་བོ་སྒྱུ་མའི་བརྟགས་རྟག་འབྱིན་མེད་ཀྱང་པ་བཞིན། །མ་ལུས་དེ་ལྟར་ཡོངས་གོམས་ན། །འཇིགས་མེད་བདེ་ཆེན་ས་ཐོབ་ནས། །དཔའ་བོ་ཐོད་པའི་དབུ་རྒྱན་དང་། །སྟག་ལྤགས་ལ་སོགས་གོན་ནས་ནི། །རྡོ་རྗེ་ཁ་ཊྭཱཾ་ཐོགས་ནས་ནི། །རེ་དོགས་མེད་པའི་ས་རུ་འགྲོ། །གལ་ཏེ་འཇིགས་པའི་སེམས་བྱུང་ན། །དམ་ཚིག་ཉམས་ཏེ་དམྱལ་བར་སྐྱེ། །འདི་ལ་བྱ་དང་མི་བྱ་མེད། །རེ་དང་དོགས་པ་ཅུང་ཟད་མེད། །གཙང་སྨེ་རྟོག་དང་མི་རྟོག་མེད། །ཡིན་དང་མ་ཡིན་ཆོས་མེད་དེ། །བསྡམ་དང་གློད་པའི་དཀའ་ཐུབ་མེད། །དམན་དང་དམ་པའི་རིགས་མེད་ཅིང་། །གྲོང་པའི་ཆོས་ནི་རྣམ་པར་སྤང་། །སྔགས་དང་ཕྱག་རྒྱ་བཟླས་འཆིང་མེད། །སྦྱིན་བསྲེག་མཆོད་དང་དཀྱིལ་འཁོར་མེད། །འདོད་པ་བསྟེན་ཅིང་ཆགས་མེད་དེ། །སྐུ་དང་གཞལ་ཡས་ཁ་དོག་མེད། །དེ་ཉིད་དབྱིངས་ལ་མཉམ་སྦྱོར་ཞིང་། །མ་ལུས་དམ་པའི་སྤྱོད་པར་མཛད། །འདི་ནི་སངས་རྒྱས་ཐམས་ཅད་ཀྱི། །སྙིང་པོ་རོལ་པའི་སྤྱོད་པ་སྟེ། །བླུན་པོ་གང་ཞིག་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །གསང་བའི་སྤྱོད་པ་དོར་བ་དང་། །བླ་
མ་རྒྱབ་ཀྱིས་ཕྱོགས་པ་དང་། །དོན་ལ་ངོ་མཚར་ཉམས་མེད་པས། །ཚིག་ལ་ངོ་མཚར་ཆེར་བྱེད་ཅིང་། །དམ་ཚིག་གཏན་ནས་སྤོང་བྱེད་པ། །ཇི་སྲིད་ནམ་མཁའ་གནས་བར་དུ། །རྡོ་རྗེ་དམྱལ་བར་གནས་པ་ཉིད། །འདི་ནི་སངས་རྒྱས་ཐམས་ཅད་ཀྱི། །སྤྱོད་པའི་རླབས་ཆེན་རྨད་བྱུང་བ། །རྣལ་འབྱོར་ཀུན་གྱི་མཛད་པ་སྟེ། །སྤྱོད་པ་འདིར་ནི་བསྟན་པ་ཡིན། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། གསང་བའི་སྤྱོད་པ་བསྟན་པའི་ལེའུ་སྟེ་བདུན་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། རྒྱལ་བ་ཀུན་གྱི་གསུང་གི་བདག །རྒྱལ་བ་ཀུན་གྱི་གསུང་གི་འཁོར་ལོ་ཉིད། །རྡོ་རྗེ་སྔགས་ཀྱི་ཚུལ་དུ་སྤྱོད་ནས་ཀྱང་། །རྡོ་རྗེའི་གསང་སྔགས་ཆེན་པོ་བཤད་དུ་གསོལ། །ཞེས་གསོལ་པ་དང་། བཅོམ་ལྡན་འདས་ཡེ་ཤེས་ཐམས་ཅད་ཀྱི་བདག་པོ་རྔམ་པའི་རྒྱལ་པོ་དེས་གསུང་གི་དཀྱིལ་འཁོར་མངོན་དུ་ཕྱུང་བ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་ནས་གསང་སྔགས་འདི་དག་མངོན་དུ་ཕྱུང་ངོ་། །ཨོཾ་མ་ཧཱ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཨོཾ་ཛྙཱ་ན་ཙིཏྟ་བཛྲ་སྭ་བྷཱ་ཝ་ཨཱདྨ་ཀོ྅ཧཾ། ཧཱུཾ་རཾ་ཨེ་ཡཾ་ར་སུཾ་ཀེཾ། བྷྲཱུཾ་བི་ཤྭ་བི་ཤུད་དྷི་ཀ་པཱ་ལ་བྷྲཱུཾ། མ་ཧཱ་དེ་ཝ་ཏིར་བཾ། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། བུཌྜྷ། བཛྲ། རཏྣ། པདྨ། ཀརྨ། རཀྴ། ཡཀྴ། གུ་ཧྱ། ས་ནུ། ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི་ཤྲཱི། ཧེ་ཧེ་ཧེ་ཧེ་ཧེ་ཧེ་ཧེ་ཧེ་ཧེ། རུ་རུ་རུ་རུ་རུ་རུ་རུ་རུ་རུ། ཀ་ཀ་ཀ་ཀ་ཀ་ཀ་ཀ་ཀ་ཀ །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། བུཌྜྷ། བཛྲ། རཏྣ། པདྨ། ཀརྨ། རཀྴ། ཡཀྴ། གུ་ཧྱ། ས་ནུ། ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ་ཀྲོ། དྷི་དྷི་དྷི་དྷི་དྷི་དྷི་དྷི་དྷི་དྷི། ཤྭ་ཤྭ་ཤྭ་ཤྭ་ཤྭ་ཤྭ་ཤྭ་ཤྭ་ཤྭ། རི་རི་རི་རི་རི་རི་རི་རི་རི། ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ། བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། གཽ་རཱི། ཙཽ་རཱི། པྲ་མོ་། བེ་ཏཱ་ལཱི། བུཀྐ་སཱི། གྷསྨ་རཱི། སྨ་ཤ་ནཱི། ཙཎྜ་ལཱི། ཧ་ཧ་ཧ་ཧ་ཧ་ཧ་ཧ་ཧ། བ་བ་བ་བ་བ་བ་བ་བ། ཛྲ་ཛྲ་ཛྲ་ཛྲ་ཛྲ་ཛྲ་ཛྲ་ཛྲ། སིངྷ། བྱཱ་ཪྠོ ། སྲིཾ་གཱ་ལ། ཤཱ་ན། གྲྀདྡྷྲ། གངྈ། ཀཱ་ཀ །ཨུ་ལཱུ་ཀ །མུ་མུ་མུ་མུ་མུ་མུ་མུ་མུ། ཁ་ཁ་ཁ་ཁ་ཁ་ཁ་ཁ་ཁ། ཧེ་ཧེ་ཧེ་ཧེ་ཧེ་ཧེ་ཧེ་ཧེ། བ་བ་བ་བ། ཛྲ་ཛྲ་ཛྲ་ཛྲ། ཨངྐུ་ཤ །པཱ་ཤ །སྥོ་ཊ། གྷཎྜ།
ཛཿཧཱུཾ་བཾ་ཧོཿ། བཛྲ་ཨ་པྲ་ཏི་ཨཱརྱ་ནི་ཙ་ཏུར་ཤ་ཡ་ཕཊ། འདི་མན་སྔགས་སོར་བཞག །བཛྲ་ཨཱ་བེ་ཤ་ལོ་གི་ནཱི་ཨཱརྱ་ནི་ཙ་ཏུར་ཤ་ཡ་ཕཊ། བཛྲ་མུ་ནི་ཨ་པྲ་ཏི་ཨཱརྱ་ནི་ཨ་པྲ་ཤི་ཀ་ར་ཕཊ། བཛྲ་མུ་ནི་ཨ་མྲྀ་ཏེ་ཨ་མ་ར་ཎི། བ་ཤི་ཀ་ར་ཕཊ། བཛྲ་མ་ནི་ཨ་པྲ་ཏི་ཨཱརྱ་ནི་ཀྲི་པ་ཤི་ཀ་ར་ཕཊ། བཛྲ་མུ་ནི་ཨ་པྲ་ཏི་ཨཱརྱ་ནི་པྲ་ཤི་ཀ་ར་ཕཊ། བཛྲ་མུ་ནི་ཨ་པྲ་ཏི་ཨཱརྱ་ནི་དུ་བ་ཤྲཱི་ཀ་ར་ཕཊ། ཨོཾ་བཛྲ་མུ་ནི་ཨ་པྲ་ཏི་མ་ཏྲི་ཙ་ཏུར་ཏ་ར་ཕཊ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ་བྷྱོ་བྷྱོ། བྷྱོ་བྷྱོ་བྷྱོ་བྷྱོ། མ་ནུ་རཀྵ་སཱི། བྲཧྨ་ཎཱི། རཽ་ཏྲཱི། བེགྒཾ་བེ། ཀཽ་མ་རཱི། ཨིནྡྲ་ནཱི། བཛྲ་པིངྒ་ལཾ། ཨ་མྲྀ་ཏཱ། སཽ་མྱ། དཎྜ་དཾ། རཀྵ་སཱི། བྷཀྵ་སཱི། ར་ཏི་བཛྲ། རུ་དྷི་ར་མཏྟཱ། ཨེ་ཀ་ཙ་རི་ཎཱི། མ་ནོ་ཧ་རཾ། སིདྡྷི་ག །བཱ་ཡ་བེ། མ་ཧཱ་མ་ར་ཎ། ཨ། བ་ར་ཧཱི། ཙ་མུ ངྷྼཱྀ ། སུ་ཏ་ནི། བ་རུ་ཎཱི། བཛྲ་མ་ཙཱ་ཀ་ལཱི། བཛྲ་ཙ་ཀཱ་ལཾ། བཛྲ་ཀུཾ་བྷ་ཀརྣཱ། བཛྲ་ལཾ་བོ་ད་ར། ཨེ་ཨེ་ཨེ་ཨེ་ཨེ་ཨེ་ཨེ་ཨེ། ཨེ་ཨེ་ཨེ་ཨེ་ཨེ་ཨེ་ཨེ་ཨེ། ཨེ་ཨེ་ཨེ་ཨེ་ཨེ་ཨེ་ཨེ་ཨེ། ཨེ་ཨེ་ཨེ་ཨེ་ཨེ་ཨེ་ཨེ་ཨེ་ཨེ། མེ་བཛྲ་ད་རི། ཀྲི་ཏ་བཛྲ་ཙ་ཀྲི། བཛྲ་མ་ཧེ་མ། བཛྲ་ཀུ་མ་བ་ཏི། མ་ཧཱ་བཛྲ་མ་ཤ །བཛྲ་ཀྲ་ཤྲི། བཛྲ་ཨགྣི། བཛྲ་ཨཱརྱ་ནི། བཛྲ་མ་ཧཱ་ཀྲོ་དྷ། བཛྲ་མ་ཧཱ་ཨ་མྲྀ་ཏོ་ད། མ་ཧཱ་སོ་མི། མ་ཧཱ་བཛྲ་ད་རི། མ་ཧཱ་ར་ནི། མ་ཧཱ་པྲ་ཏི་ཀ །བཛྲ་བི་ར་ཀ །བཛྲ་སཽ་མ། མ་ཧཱ་བཛྲ་བི་ར་བི། བཛྲ་ཤ་ནི་ཤ །བཛྲ་ཤ་ནི་ཀ །བཛྲ་ཏི་མ། བཛྲ་ཨ་ན་ཡ། བཛྲ་བེ་ཏ་ཀ །བཛྲ་ཛ་རུ་ལ། བཛྲ་ག་བི་ཏི། བཛྲ་ད་ཤ་དཾ། བཛྲ་ཀ་ལི་པྲ། བཛྲ་རུ་ཏི་མ། བཛྲ་ཀར་ན་ཛ་ཏི། བཛྲ་སརྦ་ཨ་ཧ། བཛྲ་ས་མནྟ། བཛྲ་ས་ནི་ཨ་ཏི། བཛྲ་མ་ཧཱ་ཏ་ལ། བཛྲ་ཌཱ་ཀི་ནཱི། ཨེ་ཨཱ་ར་ལི། ཌཱཀྐི་ནཱི། སུམ་ཅུ་རྩ་གཉིས། མ་མ། མ་མ། མ་མ། མ་མ། མ་མ། མ་མ། མ་མ། དུན་བྷྱོ། དུན་བྷྱོ། དུན་བྷྱོ། དུན་བྷྱོ། དུན་བྷྱོ། དུན་བྷྱོ། དུན་བྷྱོ། མ་མ། མ་མ། མ་མ། མ་མ། དུནྟིཾ་མ་བྷྱོ། དུནྟིཾ་མ་བྷྱོ། དུནྟིཾ་མ་བྷྱོ། དུནྟིཾ་མ་བྷྱོ། ཛཿཛཿཛཿཛཿ། ཛཿཛཿཛཿཛཿ། ཛཿཛཿཛཿཛཿ། ཛཿཛཿཛཿཛཿ། ཛཿཛཿ། ཨ་ཧ་ཨ་ཧ་ཀིངྈ་རག་ཏ་རི་ཤ་ཛ། གིང་བཅོ་བརྒྱད་དོ། །ཛཿཛཿཛཿཛཿཛཿཛཿཛཿཛཿཛཿཛཿ། ཛཿཛཿཛཿཛཿཛཿཛཿཛཿཛཿཛཿཛཿ། ཛཿཛཿ ཛཿཛཿཛཿཛཿཛཿཛཿཛཿཛཿ།
ཛཿཛཿཛཿཛཿཛཿཛཿཛཿཛཿཛཿཛཿ། ཛཿཛཿཛཿཛཿ ཛཿཛཿཛཿཛཿཛཿཛཿ། ཛཿཛཿཛཿཛཿཛཿཛཿཛཿཛཿཛཿཛཿ། ལངྈ་དྲུག་ཅུའོ། །ཛཿདྲུག་ཅུ། ཛཿདྲུག་ཅུ། ཛཿདྲུག་ཅུ། ཛཿདྲུག་ཅུ། ཛཿདྲུག་ཅུ། ཛཿདྲུག་ཅུ། ཨོཾ་བྷ་ན་བྷ་ན་ཨངྐུ་ཤ་ཛ། ཧ་ལ་ཧ་ལ་པཱ་ཤ་ཧཱུཾ། གརྫ་གརྫ་སྥོ་ཊ་སྥོ་ཊ་བཾ། པ་ཙ་པ་ཙ་གྷཎྜ་ཧོཿ། ཀྲོ་དྷ་ཀྲོ་དྷཱི་ཧཱུཾ། མ་མེ་ཤྭ་ར་ཧཱུཾ། ཕོ་ཉ་སུམ་བརྒྱ་དྲུག་ཅུའོ། །བྷྱོ་བདུན་འབུམ་ཉི་ཁྲིའོ། །ཨོཾ་ཨཱཿཧཱུཾ། ཨོཾ་སརྦ་ཏ་ཐཱ་ག་ཏ་ཀཱ་ཡ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་སརྦ་ཏ་ཐཱ་ག་ཏ་ཝཱཀ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་སརྦ་ཏ་ཐ་ག་ཏ་ཙིཏྟ་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་ཨཱཿཧཱུཾ་སྭ་ཧཱ། ཀ་པཱ་ལ་བྷྲཱུཾ། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་ཨཱ་དཪྴ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཏྱ་ས་མ་ཏ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་པྲ་ཏྱ་བེ་ཀྵ་ཎ་ཛྙཱ་ན་བཛྲ་སྭ་བྷཱ་བ་ཨཱདྨ་ཀོ྅ཧཾ། ཨོཾ་མ་ཧཱ་ཀྲྀ་ཏྱ་ནུཥྛཱ་ན་ཛྙཱ་ན་སྭ་བྷཱ་བ་ཨཱདྨ་ཀོ྅ཧཾ། ཧཱུཾ་བཛྲ། པཾ་པདྨ། ཨེ་ཧྱེ་ཧི་བྷ་ག་ཝཱན། མ་ཧཱ་ཀ་རུ་ཎི་ཀ །མ་ཧཱ་ཀྲོ་དྷ་དྲྀ་ཤྱ་ཧོཿ། དྲྀ་ཤྱ་སྟྭཾ། ས་མ་ཡ་ཛཿཧཱུཾ་བཾ་ཧོཿ། པྲ་བེ་ཤ་ཕཊ། ཨཱ་བེ་ཤ་ཡ་ཨ། མ་ཧཱ་ཀྲོ་དྷ་ཨ་ཏི་པུ་ཧོ། པྲ་ཏཱིཙྪ་ཧོ། ཛཿཧཱུཾ་བཾ་ཧོཿ། ཤྲཱི་མ་ཧཱ་ཧེ་རུ་ཀ །མ་ཧཱ་ཀྲོ་དྷ་མ་ཧཱ་ཀྲོ་དྷཱི་ཤྭ་རཱི། ཧཱུཾ་ཧེ་ཧེ་ཕཊ་ཛཿབྷྱོ་ཛ་མ་ཛ། མ་ཧཱ་དྷཱུ་པ་དཱི་པ་པུཥྤ་ནཻ་བིདྱ། རཀྟ། མཱཾ་ས། མ་ཧཱ་ཀེང་ནི་རི་ཏི། བ་སུ་ཏ་གོ་རོ་ཙ་ན་ཁ་ཁ་ཁཱ་ཧི། ཞེས་གསུངས་པས། གང་བར་གྱུར། ཐིམ་པར་གྱུར། འབར་བར་གྱུར། འདྲེས་ཤིང་བྱིན་གྱིས་བརླབས་པར་གྱུར། མཉེས་པར་གྱུར་ཏོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། གསུང་གི་དཀྱིལ་འཁོར་ཆེན་པོ་མངོན་དུ་ཕྱུང་བའི་ལེའུ་སྟེ་བརྒྱད་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། ཕྱོགས་བཅུའི་རྒྱལ་བ་ཀུན་གྱི་སྐུ། །འབར་བའི་གར་དགུས་ཟིལ་གྱིས་གནོན་མཛད་པ། །དཔའ་བོ་འབར་བའི་རྒྱལ་པོའི་ཐུགས་རྗེ་ཡིས། །སྐུ་ཡི་དཀྱིལ་འཁོར་བདག་ལ་བསྟན་དུ་གསོལ། །ཞེས་གསོལ་པ་དང་། བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས་སྐུའི་དཀྱིལ་འཁོར་འདི་བཤད་དོ། །མ་བཅོས་མི་གནས་དམིགས་དང་བྲལ། །
བསམ་དཔྱོད་ཡིད་འཛིན་རྟོག་ལས་འདས། །ཅི་ཡང་འདུ་ཤེས་མི་འཇུག་པ། །དེ་བཞིན་ཉིད་ཀྱི་ཏིང་འཛིན་བསྒོམ། །སྟོང་ཉིད་ཡེ་ཤེས་རང་གསལ་བའི། །ཕྱོགས་མེད་ནམ་མཁའི་རང་བཞིན་ལྟར། །སྙིང་རྗེ་ཆེན་པོས་ཁྱབ་པ་ཡིས། །ཀུན་ཏུ་སྣང་བ་བསྒོམ་པར་བྱ། །གཉིས་མེད་རིག་པར་རང་སྣང་བའི། །མ་ལུས་སྐྱེ་རྒྱུ་ཧཱུཾ་བསྒོམ་བྱ། །དེ་ལས་བྱུང་བའི་རཾ་ཡཾ་ཁཾ། །མ་དག་པ་རྣམས་བསྲེག་སྦྱང་བཀྲུས། །སྟོང་པ་ཉིད་དུ་བསམ་པར་བྱ། །ཨ་ལས་ནམ་མཁའ་ཡངས་པའི་སྟེང་། །རླུང་གི་དཀྱིལ་འཁོར་བསམ་པའི་ལྟེར། །ར་ལས་ཁྲག་གི་རྒྱ་མཚོ་འཁྲུགས། །སུཾ་ལས་ཞིང་ཆེན་ཀེང་རུས་ཉིད། །ཚད་དང་ལྡན་པའི་སྟེང་དུ་བྷྲཱུཾ། །དུར་ཁྲོད་འབར་བའི་གཞལ་ཡས་ཁང་། །རྃ་ལས་བསྐལ་པའི་མེ་དཔུང་དམར་ནག་འཁྲིགས། །ཐིག་བཞི་བཏབ་པས་ལེའུ་ཚེ་དགུ། །གྲུ་ཆད་སྒོ་བཞི་ཁྱམས་བརྒྱད་ལ། །སྣ་ཚོགས་གཞལ་ཡས་གདན་དང་རྒྱན། །རིམ་པ་བཞིན་དུ་འཁྲིགས་པར་བསྒོམ། །དཔལ་ཆེན་བུཌྜྷ་ཧེ་རུ་ཀ །དབུ་དགུ་ཕྱག་ནི་བཅོ་བརྒྱད་དམ། །ཡང་ན་ཞལ་གསུམ་ཕྱག་དྲུག་སྟེ། །ཞལ་གཅིག་ཕྱག་གཉིས་དེ་བཞིན་ཏེ། །རིག་པ་རང་སྣང་མ་ངེས་པས། །སྐུ་མདོག་ཕྱག་མཚན་ཅིར་ཡང་འགྱུར། །དེ་བཞིན་དངོས་མེད་ཕྱག་རྒྱ་དང་། །དེ་ལས་བྱུང་བའི་ཕྱག་མཚན་རྣམས། །ངེས་པ་མེད་པར་དཔའ་བོས་བཤད། །མཁས་པས་ཅི་དགར་བསྒོམས་པས་འགྲུབ། །ཡབ་ཡུམ་གཉིས་མེད་སྦྱོར་བ་ལས། །ཁྲོ་བོ་དེ་བཞིན་བཞུགས་པ་རྣམས། །རིག་པའི་དཀྱིལ་འཁོར་ཕྱོགས་མེད་པས། །ཇི་ལྟར་མོས་པ་བཞིན་དུ་བསྒོམ། །སྨུག་ནག་སེར་ནག་དམར་ནག་དང་། །ལྗང་ནག་སྨུག་སེར་དམར་སེར་དང་། །དམར་ལྗང་དཀར་ལྗང་འཇིགས་པའི་སྐུ། །ཐབས་ནི་རྡོ་རྗེ་རིན་ཆེན་དང་། །པདྨ་རྒྱ་གྲམ་དེ་བཞིན་དུ། །དབྱུག་ཏོ་སྟ་རེ་རལ་གྲི་དང་། །བེ་ཅོན་གཡོན་གྱིས་དྲིལ་བུ་འཛིན། །ཀྲོ་དྷཱི་ཤྭ་རཱི་ཡུམ་རྣམས་ནི། །སྐུ་མདོག་ཡབ་དང་མཐུན་པ་ལ། །གཡས་པ་ཤེས་རབ་ཐབས་ལ་བརྟེན། །གཡོན་པ་བྷནྡྷ་གཙོ་ལ་སྟོབ། །ལེ་ཚེ་དག་ལ་ཤེས་པར་བྱ། །དང་པོར་ཁྲོ་མོ་བརྒྱད་ཀྱི་ཁྱམས། །གཉིས་པ་ཕྲ་མེན་བརྒྱད་བཀོད་དེ། །གསུམ་པ་དེ་བཞིན་འབར་མ་ལ། །སྒོ་མ་བཞི་དང་ལྡན་པར་བསམ། །བཞི་པ་དབང་ཕྱུག་ཉི་
ཤུ་བརྒྱད། །རང་གི་སྒོ་དང་ལྡན་པར་བསམ། །ལྔ་པ་མཁའ་འགྲོའི་བར་ཁྱམས་ཏེ། །ཕྱོགས་བཞིར་བདུན་བདུན་སྒོ་བཞིར་བཅས། །དྲུག་པ་མ་མོ་བདུན་གྱི་ཁྱམས། །སྒོ་ལ་ལས་ཀྱི་སྲིང་བཞི་གནས། །བདུན་པ་གིང་གི་གནས་ཡིན་ཏེ། །ཕྱོགས་བཞིར་གསུམ་གསུམ་སྒོ་བཞིར་བཞི། །ཀིང་ཀ་ར་དང་དབུགས་སྡུད་མ། །བཀའ་སྡོད་མདུན་དང་རྒྱབ་ན་གནས། །བརྒྱད་པ་ཕོ་ཉའི་ཁྱམས་ཡིན་ཏེ། །ཕྱོགས་བཞིར་དྲུག་ཅུ་རིགས་མདོག་ཅན། །སྟེང་འོག་སེར་དང་དམར་བ་ཡི། །དྲུག་ཅུ་ཕྲག་གཉིས་ཤར་ནུབ་ཁྱམས། །ཛཿཧཱུཾ་བཾ་ཧོཿ། སྒོ་བཞིར་གནས། །ཡང་སྤྲུལ་གནས་ལ་ངེས་མེད་དེ། །ནག་མོ་ཁྲ་གཤོག་ཅན་གྱི་ཚོགས། །སྟེང་གི་ནམ་མཁར་འཁོད་པ་ཡིན། །རིག་འཛིན་བྱེ་བ་ས་ཡ་དག །ཕྱི་རོལ་འཁོར་ཡུག་ཆ་ལ་བསམ། །ཕྱི་ནང་ཀུན་ཏུ་འཕྲོ་བྱེད་པའི། །མེ་རིའི་འོད་ནི་གཏིབས་མ་ཐག །དམ་པ་ངེས་པ་སྐྱེ་བའི་ས། །སྐལ་མེད་བསྲེག་ཅིང་འབྲོས་པའི་གནས། །རྡོ་རྗེ་རྣལ་འབྱོར་ཅན་གྱིས་བསྒོམ། །དེ་ནས་དབང་བསྐུར་བྱིན་བརླབས་ལ། །ཡན་ལག་ལྷ་ནི་གསལ་བྱས་ལ། །སྔགས་ཀྱི་ཡན་ལག་ཚང་བར་བསྒོམ། །རྡོ་རྗེ་བསྡུ་བའི་ཕྱག་རྒྱ་ཡིས། །ནམ་མཁའི་ཁམས་གཏུགས་སངས་རྒྱས་ཀུན། །ཏིལ་འབྲུ་བཞིན་དུ་གང་ཁྱབ་པའི། །རྡོ་རྗེ་ཁྲོ་བོའི་གཟུགས་སུ་སད། །ཛཿཧཱུཾ་བཾ་ཧོཿས་སྤྱན་དྲངས་ལ། །བཀུག་དང་བསྡིམ་དང་བསྡམ་བྱས་ཏེ། །དབང་དུ་བྱས་ཏེ་བསྡིམ་པར་བྱ། །གཉིས་མེད་མཉེས་པར་ཕྱག་བྱས་ཏེ། །རང་རང་དགྱེས་པའི་གར་སྟབས་ཀྱིས། །མཉེས་པའི་མཆོད་པ་སྣ་ཚོགས་དབུལ། །ལག་གཉིས་བསྒྱུར་ཅིང་གྱེན་དུ་དགྲོལ། །རང་རང་མཆོད་པའི་ཕྱག་རྒྱ་ཡིས། །དཀྱིལ་འཁོར་འཁོར་ལོ་མཉེས་པར་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། འབར་བའི་སྐུའི་དཀྱིལ་འཁོར་མངོན་དུ་ཕྱུང་བའི་ལེའུ་སྟེ་དགུ་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། དུས་གསུམ་རྒྱལ་བ་ཀུན་གྱི་གསང་བའི་ཐུགས། །རྣམ་གྲོལ་ཡེ་ཤེས་སྐད་ཅིག་ཐུགས་ཆུད་པ། །རྣམ་པར་གྲོལ་བ་དེ་ཉིད་མཚོན་པའི་ཕྱིར། །ཕྱག་རྒྱའི་མཚན་ཉིད་བདག་ལ་བཤད་དུ་གསོལ། །ཞེས་གསོལ་པ་ལས། དཔལ་ཆེན་ཡེ་ཤེས་རྔམ་
པའི་རྒྱལ་པོས་འདི་སྐད་ཅེས་གསུངས་སོ། །དབུས་ཀྱི་གཙོ་བོའི་ཕྱག་རྒྱ་ནི། །གཡས་དཀར་གཡོན་དམར་དབུས་མཐིང་ཞལ། །རྡོ་རྗེ་ཁ་ཊྭཱཾ་རྔེའུ་ཆུང་གཡས། །གཡོན་དྲིལ་དུང་དམར་རྒྱུ་ཞགས་བསྣམས། །དཔལ་ཆེན་ཡེ་ཤེས་ཐབས་ཀྱི་རྒྱ། །ཤེས་རབ་དབྱིངས་ཀྱི་ཕྱག་རྒྱ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །གཡས་པ་ཤེས་རབ་ཐབས་ལ་བརྟེན། །གཡོན་པ་དུང་དམར་གཙོ་ལ་སྟོབ། །ཧེ་རུ་བརྒྱད་ཀྱི་ཕྱག་རྒྱ་ནི། །གཡས་པ་རང་རང་མཚན་མ་སྟེ། །འཕྱར་ཞིང་འགྱིང་བའི་ཚུལ་དུ་གནས། །གཡོན་པ་དྲིལ་བུ་ཡུམ་ལ་འཁྱུད། །ཁྲོ་མོ་ཀྲོ་དྷཱི་ཤྭ་རཱི་རྣམས། །ཀུན་ཀྱང་གཡས་པ་ཐབས་ལ་འཁྱུད། །གཡོན་པ་བྷན་དམར་གཙོ་ལ་སྟོབ། །གནས་དང་ཡུལ་གྱི་ཕྱག་རྒྱ་ནི། །གཽ་རཱི་བྷན་དམར་བྱིས་དབྱུག་སྔོ། །ཙཽ་རཱི་མདའ་གཞུ་འགེངས་མ་སེར། །པྲ་མོ་ཆུ་སྲིན་རྒྱལ་མཚན་དམར། །བེ་ཏཱ་བྱི་ཟ་རྡོ་འཕྱར་གནས། །པུཀྐ་དམར་སེར་བྱིས་རྒྱུ་འདྲེན། །གྷསྨ་དུང་དམར་ཁྲག་འཐུང་ལྗང་། །སྨ་ཤ་མཐིང་ནག་བྱིས་སྙིང་ཟ། །ཙཎྜ་སེར་སྐྱ་མཆོག་ལུས་འབྲལ། །སིངྷ་ཁ་རོ་བསྣོལ་སེར་སེང་། །བྱ་གྷྲ་གནན་ལྟ་བསྣོལ་དམར་སྟག །སྲི་ལ་ནག་མོ་བྱིས་ལྡན་ཝ། །ཤྭ་ན་འདྲལ་ལྟ་མཐིང་ག་སྤྱང་། །གྲྀ་དྷ་གྲི་དམར་རྒྱུ་འདྲེན་རྒོད། །ཀངྈ་ཞིང་ཕྲག་སྣར་མགོ་རིང་། །ཀཱ་ཀ་ཁ་རོ་བན་གྲི་གདག །ཨུ་ལྦུ་མཐིང་ཚོགས་ལྕགས་ཀྱུ་འུག །རྟ་གདོང་སྔོན་མོ་ལྕགས་ཀྱུ་འཛིན། །ཕག་གདོང་ནག་མོ་མཆེ་ཞགས་བསྣམས། །དམར་མོ་ལྕགས་སྒྲོག་ཉི་ཟླ་སྡོམ། །ཐལ་བྱེད་དྲིལ་བུ་སྣ་ཚོགས་མདོག །མ་མོ་རྣམས་ཀྱི་ཕྱག་རྒྱ་ནི། །སྲིན་མོ་སྨུག་ནག་ཐོད་རློན་འཆང་། །ཚངས་མ་དམར་སེར་པདྨ་བསྣམས། །ལྷ་ཆེན་དཀར་ཆེན་ཏྲི་ཤཱུ་ལ། །གཏོགས་འདོད་སྔོན་མོ་འཁོར་ལོ་འཆང་། །གཞོན་ནུ་དམར་མོ་མདུང་ཐུང་འཕེན། །བརྒྱ་བྱིན་དཀར་མོ་ཨིནྟྲ་གདེངས། །རྡོ་རྗེ་སེར་མོ་ཙནྡན་འཐུང་། །བདུད་རྩི་དམར་མོ་པདྨ་བསྣམས། །ཟླ་བ་དཀར་མོ་པུཎྜ་རི། །བེ་ཅོན་ལྗང་ནག་དབྱུག་ཏོ་འཕྱར། །སྲིན་མོ་དམར་མོ་དུང་ཁྲག་འཐུང་། །ཟ་མ་ལྗང་ནག་བ་སུ་འདྲེན། །དགའ་བ་དམར་མོ་ཀ་ཏར་འཕྱར། །སྟོབས་ཆེན་དཀར་མོ་གཤོལ་མདའ་འཛིན། །རྡོ་རྗེ་སེར་མོ་སྤུ་གྲིས་གཅོད། །འདོད་པ་དམར་
མོ་མདའ་གཞུ་འགེངས། །ནོར་སྲུངས་དཀར་མོ་བུམ་པ་འཛིན། །རླུང་ལྷ་སྔོན་མོ་བ་དན་འཕྱར། །གསོད་བྱེད་དཀར་མོ་རལ་གྲི་སོ། །མེ་མོ་དམར་མོ་གསལ་ཤིང་འཛིན། །ཕག་གདོང་ནག་མོ་མཆེ་ཞགས་ཅན། །རྒན་བྱེད་དམར་མོ་ཞིང་ཆུང་ཟ། །སྣ་ཆེན་དཀར་མོ་ཐོད་ཁྲག་འཐུང་། །ཆུ་ལྷ་སྔོན་མོ་སྦྲུལ་ཞགས་འཛིན། །རྡོ་རྗེ་ནག་མོ་ལྕགས་ཀྱུ་འཛིན། །རྡོ་རྗེ་སེར་མོ་ར་མགོ་ཞགས། །རྡོ་རྗེ་དམར་པོ་ལྕགས་སྒྲོག་སྡོམ། །རྡོ་རྗེ་ལྗང་ནག་དྲིལ་འཁྲོལ་དགྱེས། །འབར་མ་རྣམས་ཀྱི་ཕྱག་རྒྱ་ནི། །སྐུ་མདོག་གདུལ་བྱའི་ཚུལ་འདྲ་ཞིང་། །གཡས་པ་རྡོ་རྗེ་འབར་བ་འཛིན། །གཡོན་པ་བྷནྡ་རཀྟ་འཛིན། །མཁའ་འགྲོ་རྣམས་ཀྱི་ཕྱག་རྒྱ་ནི། །རྡོ་རྗེ་གཤོག་པས་ཟིལ་གནོན་ཅིང་། །བྷནྡ་ཁྲག་འཐུང་ཆགས་པ་ཆེ། །འདོད་ཆགས་ཚུལ་གྱིས་འགྲོ་བ་འདུལ། །མ་བདུན་སྲིང་བཞིའི་ཕྱག་རྒྱ་ནི། །འཇོ་སྒེག་མཛེས་མར་ཟིལ་གྱིས་བལྟ། །གཡས་པ་འཁྱུད་ཚུལ་དཀར་འཛིན་བསྟན། །གཡོན་པ་དུང་ཁྲག་འཐུང་བྱེད་པའོ། །གིང་ཆེན་བཅོ་བརྒྱད་ཕྱག་རྒྱ་ནི། །སྔོ་སྐྱ་འཇིགས་པའི་ཚུལ་སྟོན་ཅིང་། །གཡས་པ་གྲི་དང་མཚོན་ཆ་ཐོགས། །གཡོན་པས་འཛིན་ཅིང་གསོད་པར་བྱེད། །ཕོ་ཉ་སུམ་བརྒྱ་དྲུག་ཅུའི་ཚོགས། །དཀར་དང་སྔོ་དང་དམར་ལྗང་གནག །གསེར་དང་བྱུ་རུའི་མདོག་འདྲ་བ། །དྲུག་ཅུ་དྲུག་གིས་རྫོགས་པ་ནི། །ལྕགས་ཀྱུ་ཞགས་པ་ལྕགས་སྒྲོག་དང་། །ཐོ་བ་གཤོག་པ་གཏུན་ཚོགས་འཛིན། །མ་ལུས་ཁྱབ་པའི་ཚུལ་གྱིས་གནས། །རྡོ་རྗེ་ནག་མོ་ཁྲ་གཤོག་ཅན། །འཕུར་ཞིང་འཛུལ་ཏེ་ཀུན་ཏུ་རྒྱུ། །ཕྱོགས་བཅུར་ཁྱབ་པའི་ལས་བྱེད་ཅིང་། །ཉི་ཟླའི་ཚུལ་དུ་མཁའ་ལ་འགྲོ། །ཤ་ཁྲག་ཚིལ་བུ་རྐང་ཟ་ཞིང་། །བརྗིད་པའི་ཚུལ་གྱིས་སྡིགས་བྱེད་ཅིང་། །ལག་ན་མཚོན་ཆ་སྣ་ཚོགས་ཐོགས། །བྱེ་བ་ཕྲག་ནི་བདུན་འབུམ་ཚོགས། །འགུགས་དང་ཆགས་པས་རྨོངས་པ་དང་། །གསོད་དང་སྤོར་དང་ཐལ་བྱེད་པ། །མཛེས་དང་ཆགས་དང་འཐབ་པ་དང་། །སྡང་མིག་གྱེན་དང་མཐུར་ལྟ་ཞིང་། །རྫུ་འཕྲུལ་ཐོགས་མེད་རླུང་ཤུགས་ཅན། །འཇིགས་པའི་གཟུགས་དང་འཇིགས་པའི་སྒྲ། །སྣ་ཚོགས་དེ་བཞིན་དྲི་དང་རོ། །
ནམ་མཁའ་ཁྱབ་པའི་སྟོབས་ཀྱིས་གཏིབས། །རྣལ་འབྱོར་བསྟན་པ་སྲུང་བྱེད་ཅིང་། །གདུག་པ་སྐྲག་སྡང་ཕྲ་བར་བྱེད། །འཛིན་དང་བསྙེག་དང་དགུག་པ་དང་། །དབབ་དང་གསད་པའི་ཕོ་ཉ་ནི། །སྤྲུལ་ཅིང་ལས་རྣམས་བྱེད་པའི་འཁོར། །འབར་འཁྲུག་རྔམ་པའི་ཆ་བྱད་ཅན། །གོམ་པའི་སྟབས་ཀྱིས་གནས་པར་བྱ། །མ་བཅོས་ཆོས་ཀྱི་དབྱིངས་ཉིད་ལས། །རོལ་པའི་ཕྱག་རྒྱ་སྣང་བ་ནི། །རྒྱ་མཚོ་ཆུ་ཡི་ཆུ་བུར་ལྟར། །དང་བའི་སྤྲིན་དང་རོལ་མོ་ལྟར། །དུས་གཅིག་གསལ་བར་བསྒོམ་པར་བྱའོ། །རང་གི་རིག་པ་བསམ་ཡས་པས། །གྲངས་དང་ཕྱག་མཚན་སྐུ་མདོག་དང་། །མ་ངེས་ཕྱག་རྒྱའི་ངོ་བོར་ཤར། །ཇི་ལྟར་སྣང་བའི་སྐུ་ཡི་ཚོགས། །སྒྲ་སྐད་མ་ལུས་གསུང་ཉིད་དེ། །དྲན་རིག་སྣ་ཚོགས་ཐུགས་ཀྱི་ངང་། །མ་བཅོས་དབྱིངས་དང་ཡེ་ཤེས་ལ། །དྲན་པ་རྒྱུན་གྱི་ཆུ་བོ་ལྟར། །མ་ཡེངས་གསལ་བར་བསྒོམས་བྱས་པས། །རྒྱུ་འབྲས་མ་བཙལ་ལྷུན་གྱིས་རྫོགས། །ཧེ་རུ་ཀ་ཡི་བརྟག་པ་ཉིད། །དབང་པོའི་ཁྱད་པར་ཇི་བཞིན་དུ། །རང་གི་ཐབས་ནི་སྣ་ཚོགས་ཀྱིས། །རང་རང་མོས་པ་ཇི་བཞིན་དུ། །བསྒྲུབ་པས་ཅི་དགར་འགྲུབ་པར་འགྱུར། །མཆོག་དང་ཐུན་མོང་ལ་སོགས་པ། །དཀའ་ཐུབ་མེད་པར་ཚེ་འདིས་འགྲུབ། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། ཕྱག་རྒྱ་ཐུགས་ཀྱི་དཀྱིལ་འཁོར་བསྟན་པའི་ལེའུ་སྟེ་བཅུ་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ། སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རྒྱ་ཆེ་བ། །འདུལ་བའི་ཐབས་ཀྱི་མཛད་པ་གང་། །ཆོ་གའི་ཁྱད་པར་བཤད་དུ་གསོལ། །ཞེས་གསོལ་ཏོ། །དེ་ནས་བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོ་དེས། འདི་སྐད་ཅེས་གསུངས་སོ། །རི་བོ་རི་སུལ་ནགས་འདབ་དང་། །ཆུ་གླིང་དུར་ཁྲོད་གངས་འདབ་ཏུ། །སྐྱོན་དང་བྲལ་ཞིང་ཡིད་འོང་བ། །བཀྲ་ཤིས་བར་ཆད་མེད་གནས་སུ། །ས་བདག་ཞིང་སྐྱོང་བཅས་པ་ལ། །དང་པོར་མཆོད་པ་བྱས་ནས་ནི། །གཏོར་མ་མཆོད་པས་ཚིམ་པར་བྱ། །བདག་པོ་རྣམས་
ལས་བླང་བར་བྱ། །ས་ཡི་སྐྱོན་རྣམ་བསལ་བྱས་ཏེ། །ངན་ནམ་བར་ཆད་བྱུང་བ་ན། །སྤོ་འམ་ཡང་ན་སྦྱིན་བསྲེག་བྱ། །ཟངས་སོགས་ཕུར་པ་དབང་གི་ལྷ། །སྔགས་དང་ཏིང་འཛིན་ལྡན་པས་གདབ། །ས་ཡི་བཅུད་རྣམས་བསྡུས་པ་ཡིས། །ས་ཡི་དངོས་གྲུབ་དབང་དུ་འགྱུར། །མ་དག་པ་ནི་དག་བྱས་ལ། །རིན་ཆེན་ས་གཞིར་མོས་ལྡན་པར། །མཎྜལ་ཆ་སྙོམས་ཚད་ལྡན་ལ། །བ་བྱུང་ལྔ་ལྡན་ལེགས་པར་བྱུག །དག་པ་ལྔ་ཡི་དཀྱིལ་འཁོར་ནི། །རིམ་པར་བསྐྱེད་དེ་མཛེས་པར་གནས། །དཀྱིལ་འཁོར་བཀོད་ཅིང་སྤྱན་དྲངས་ལ། །མཆོད་ཅིང་བཟླས་བསྡིམ་བྱིན་ལྡན་པས། །ལེགས་པར་བཟུང་ཞིང་བྱིན་ལྡན་ནས། །ཕྱི་ནང་བར་ཆོད་བསལ་བའི་ཕྱིར། །བསྲུང་བའི་ཆོ་ག་བརྩམ་པར་བྱ། །བདག་ཉིད་ལྷ་ཡི་རྒྱན་ལྡན་པས། །ནམ་མཁའ་ཁྱབ་པའི་རྩིབས་ལྡན་ལ། །ཉི་སྟེང་སུཾ་པས་ལྷ་གནན་ཏོ། །ཐུགས་ལས་ཕྱུང་བའི་ཁྲོ་བཅུ་ལས། །རྡོ་རྗེ་སྡེར་མོས་བཏབ་བསམས་ན། །བར་ཆད་བགེགས་རིགས་མི་གཡོ་འགྱུར། །ལག་པའི་དྲེ་གའི་ཡིག་འབྲུ་ལས། །ཆོ་ག་བཞིན་དུ་བྱིན་བརླབས་ལས། །རྡོ་རྗེ་མཚོན་ཆ་ལྔ་རིམ་བཞིན། །སྤྲོས་པས་མ་ལུས་བསྐྲད་པ་དང་། །འདུས་པས་གཞལ་ཡས་གུར་རིམ་གྱུར། །མ་དང་ཨ་ལས་ཉི་ཟླའི་མིག །འབར་བས་ཕྱོགས་བཅུར་བལྟས་བྱས་ནས། །ཚངས་དང་གུ་ལང་གཏོགས་འདོད་བཅས། །བསྲེག་ཅིང་བཀྲུ་དང་བཙོས་བྱས་པས། །གསོ་དང་དཀྲུག་བྱས་ཀྱང་ཚངས་པའི་འཇིག་རྟེན་བཅས་པ་ཉིད། །བར་ཆད་མེད་ཅིང་ཞི་བར་འགྱུར། །ཕྱོགས་བཞི་མཚམས་བཞི་སྟེང་འོག་བཅུ། །ཀུན་ཀྱང་འབར་བ་ཁྲག་འཐུང་སྟེ། །སྐུ་གསུང་ཐུགས་ཀྱི་སྤྲུལ་པ་ཡིས། །མ་དག་པ་ཉིད་མཚམས་བཅད་ནས། །རྡོ་རྗེ་ཁྲོ་བོའི་གུར་དུ་གྱུར། །དང་པོ་ས་ཡི་ཆོ་ག་སྟེ། །གཉིས་པ་ལ་ནི་སྟ་གོན་གནས། །གསུམ་པ་འཇུག་པའི་ཆོ་ག་བྱ། །འདི་དག་ཆོ་གར་འདུས་པ་ཡིན། །གང་དག་ཏུ་ནི་རང་ཉིད་ཀྱི། །དྲི་དང་ལྡན་པར་ལྷ་ཡི་མཚན། །གྲངས་དང་ལྡན་པར་ངེས་བཀོད་དེ། །ཛཿཧཱུཾ་བཾ་ཧོཿས་བསྡིམ་བྱས་ལ། །ཕྱི་ནང་མཆོད་པས་རྒྱས་མཆོད་དེ། །བསྟོད་དང་བཟླས་པ་རིམ་པ་བཞིན། །དེ་ནས་བྱིན་
བརླབ་མཁྱེན་པར་གསོལ། །དུར་ཁྲོད་རིན་ཆེན་བུམ་པ་ནི། །མཚན་ལྡན་ལྷ་དང་གྲངས་མཉམ་པར། །ཉི་ཤུ་རྩ་ལྔ་གྲངས་མཉམ་པར། །བྱང་ཆུབ་སེམས་སུ་བྱིན་བརླབ་སྟེ། །མཚན་མ་ཐོབ་ནས་མཆོད་བསྟོད་དེ། །བྱིན་གྱིས་བརླབ་ཅིང་གཞག་པར་བྱ། །སྣོད་དང་ལྡན་པའི་སློབ་མ་ལ། །ཚད་དང་ལྡན་པའི་སློབ་དཔོན་གྱིས། །ཁྲུས་བྱས་དགའ་དང་གུས་ལྡན་པས། །སེམས་བསྐྱེད་ཆོས་བཤད་སྡོམ་པ་ཕོག །བགེགས་བསྐྲད་རྨི་ལམ་བརྟག་བྱས་ལ། །ངན་ན་བསྲེག་དང་བསྐྲད་པར་བྱ། །དེ་ནས་དུར་ཁྲོད་རྒྱུས་པ་འམ། །རས་བལ་འཇམ་ལ་སྲད་བུ་ནི། །ཉིས་འགྱུར་འཇུར་མདུད་མེད་པ་ཡིས། །བྱང་ཆུབ་སེམས་སུ་བྱིན་བརླབས་ལ། །དང་པོར་ཚངས་ཐིག་ཟུར་ཐིག་གདབ། །དེ་ནས་དཀྱིལ་འཁོར་རིམ་པ་བཞིན། །སོ་སོར་བགོ་ཞིང་གདབ་པར་བྱ། །དེ་ནས་སྲད་བུ་ཕྱི་མ་ཡིས། །ཡེ་ཤེས་དམ་ཚིག་བྱིན་བརླབ་ཕྱིར། །ཡེ་ཤེས་རྡོ་རྗེ་ལ་ཐིམ་པས། །རྡོ་རྗེ་ཡེ་ཤེས་ཐིག་ཏུ་གྱུར། །རྡོ་རྗེ་ཤུགས་ཀྱི་མི་འགོམ་ཞིང་། །བཀོད་པ་ནམ་མཁར་བཞག་ནས་ནི། །ཡེ་ཤེས་ཕོ་བྲང་མཚོན་པའི་ཕྱིར། །རྡུལ་མཚོན་ཆོ་ག་བརྩམ་པར་བྱ། །དུར་ཁྲོད་ཐལ་བ་དང་བསྲེས་པའི། །རིན་ཆེན་ལྔ་དང་འབྲས་སྦྱར་བའི། །ཁ་དོག་ལྔ་ཡི་ཕྱེ་མ་ལ། །རང་གི་རིགས་ཀྱི་ཆོ་ག་ལྟར། །ཡེ་ཤེས་འབྲུ་ལྔར་བྱིན་བརླབ་ཅིང་། །ཁྲག་འཐུང་ལྔ་ཡིས་དབང་བསྐུར་ལ། །སློབ་དཔོན་འབྱུང་བའི་ཕྱོགས་བྲིས་ཏེ། །ཕྱི་མ་ཞལ་དབང་ཐོབ་པས་བྲིས། །སྔོ་དང་དཀར་དང་སེར་དང་དམར། །ཀུན་གྱི་མཐའ་མར་ལྗང་གུ་སྟེ། །ཕོ་བྲང་སོ་སོར་མཛེས་བྱའི་ཕྱིར། །འདི་ནི་ཚོན་གྱི་རིམ་པར་འདོད། །ཕོ་བྲང་དབུས་ནི་ཟླུམ་པོ་ལ། །གསེར་གྱི་འཁོར་ལོ་རྩིབས་བརྒྱད་འབར། །མུ་ཁྱུད་རིམ་པ་གསུམ་ལྡན་པའི། །ཁྲོ་མོ་ཕྲ་མེན་གནས་པའི་ཁྱམས། །གཉིས་པ་སྒོ་བཞི་སྙིང་པོ་རྫོགས། །འབར་མ་དང་ནི་དབང་ཕྱུག་མའི། །ཁྱམས་དང་སྒོ་མར་བཅས་པ་བྲི། །ཕྱི་རོལ་མཁའ་འགྲོའི་ཁྱམས་ཉིད་ནི། །མཁའ་འགྲོ་རང་གི་འཁོར་བཅས་དགོད། །མ་མོའི་ཁྱམས་ལ་མ་བདུན་ཏེ། །དེ་ཡི་སྒོར་ནི་སྲིང་མོ་བཞི། །དེ་ནས་གིང་ཆེན་བཅོ་བརྒྱད་དེ། །ཕོ་ཉ་སུམ་བརྒྱ་དྲུག་ཅུ་དག །
ཕྱི་རོལ་ཁྱམས་ལ་སྒོ་བཞིར་ནི། །རྡོ་རྗེ་ཐོ་བ་ལུ་གུ་རྒྱུད། །རྡོ་རྗེ་འབར་བ་འབེབས་པ་བཞི། །སྒོ་བཞིར་ཕྱོགས་དང་མཐུན་པར་བྲིས། །རྡོ་རྗེ་ནག་མོ་ཁྲ་གཤོག་ཅན། །སྟེང་འོག་ཀུན་ཏུ་གཏིབས་བྱེད་ཅིང་། །ཕོ་ཉའི་ཚོགས་དང་ལྷན་ཅིག་གནས། །རྡོ་རྗེ་མེ་རི་ལག་ཆ་དང་། །ཕྱི་རོལ་ཁྲོ་བཅུ་ཡབ་ཡུམ་སྟེ། །ཕྲ་མེན་ཉི་ཤུ་ཡང་སྤྲུལ་དག །བྱེ་བ་ཕྲག་ནི་ས་ཡ་འཕྲོ། །དཀྱིལ་འཁོར་རྒྱན་ནི་ཐམས་ཅད་ཀྱང་། །བམ་རིལ་ཁོག་པ་སྟོད་སྨད་དང་། །ཞིང་དང་བཙོས་དང་ལྷུ་དུམ་དང་། །རྐང་དང་ལྷུ་ཚིགས་ཙིཏྟའི་ཏོག །ཐོད་སྐུ་གསུང་དང་ཐུགས་ཀྱི་མཚན། །སོ་སོའི་བྱེ་བྲག་ཀུན་ཏུ་དགྲམ། །བླ་རེ་རྒྱན་ཕྲན་གོས་དང་གདུགས། །ཁ་དོག་བྱེ་བྲག་སོ་སོས་མཛེས། །བཟའ་བཏུང་བཅའ་བའི་ཡོ་བྱད་རྣམས། །མཛེས་ཤིང་ཚིམས་པའི་ཚོགས་ཀྱིས་བསྐོར། །གཞན་ཡང་དུར་ཁྲོད་མཆོད་པ་ལྔ། །རྨད་བྱུང་གཏོར་མ་ཤ་ལྔ་དང་། །བདུད་རྩི་ལྔ་དང་དཔའ་བོར་བཅས། །རཀྟ་སྤྱན་གཟིགས་རོལ་མོའི་སྒྲ། །སོ་སོར་འཚམས་པ་ཉིད་དུ་དགོད། །དེ་ནས་གྲལ་བཞིན་རིམ་བཀོད་དེ། །སྔོན་འགྲོའི་ཆོ་ག་ལེགས་སྤྱད་ནས། །དུར་ཁྲོད་གཞལ་ཡས་བྱིན་བརླབས་ཏེ། །རྫས་དང་སྐུ་གསུང་ཐུགས་བཀོད་ནས། །རང་གི་ང་རྒྱལ་གསལ་བ་ཡིས། །རིམ་བཞིན་དཀྱིལ་འཁོར་བསྐྱེད་པ་ལ། །དབང་བསྐུར་བྱིན་རླབས་ཆོ་ག་བཞིན། །ཛཿཧཱུཾ་བཾ་ཧོཿས་སྤྱན་དྲངས་ལ། །བྱིན་བརླབ་རབ་གནས་རྫོགས་བྱའི་ཕྱིར། །གཞི་དང་འདྲེས་ཏེ་དབྱེར་མེད་བསྒོམ། །བརྟན་པའི་ཕྱག་རྒྱ་བཅིངས་ནས་ནི། །བརྟན་བཞུགས་མཆོད་པའི་ཆོ་ག་བྱ། །རང་གི་བཟླས་པ་མཐར་ཕྱིན་ཅིང་། །འབར་དང་འཛུམ་པ་དྲི་དང་སྒྲ། །ལུང་བསྟན་ངེས་པའི་རྟགས་བྱུང་ན། །བར་ཆད་བགེགས་བསྐྲད་དངོས་གྲུབ་བླང་། །དེ་ནས་དད་ལྡན་སློབ་བུ་ཡིས། །ཁྲུས་བྱས་དྲི་ལྡན་མེ་ཏོག་ཐོགས། །དར་སོགས་དམར་པོས་ངོ་བཀབ་ལ། །གསོལ་གདབ་དམ་དབོག་ལྷ་བསྐྱེད་ཅིང་། །མིག་དབྱེ་ལྷ་བསྟན་ཆོ་ག་དག །ཇི་ལྟར་འཐད་པའི་ཆོ་ག་བྱ། །དེ་ནས་དབང་ཐོབ་བྱ་བའི་ཕྱིར། །རྟ་དང་གླང་པོ་གསེར་དངུལ་དང་། །བུ་དང་ཆུང་མ་བུ་མོ་དང་། །རྒྱལ་སྲིད་རང་ལུས་ལ་སོགས་པ། །བླ་མ་
མཆོད་ཕྱིར་དབུལ་བར་བྱ། །གང་དུ་སྡུག་བསྔལ་མཚོ་བསྒྲལ་ཞིང་། །ཐར་པའི་གྲོང་ཁྱེར་འཐོབ་བྱ་ཞིང་། །དབང་དང་དངོས་གྲུབ་ཐོབ་བྱའི་ཕྱིར། །བླ་མ་ཆེ་ལ་གསོལ་བ་འདེབས། །ཁྱོད་ནི་དམ་པའི་བདག་ཉིད་ལས། །འཇིགས་པ་ཀུན་ལས་བདག་བསྒྲལ་ཞིང་། །ཐར་པའི་ལམ་ལ་དགོད་པ་དང་། །དབང་དང་བྱིན་བརླབས་བདག་འཚལ་བས། །དེ་ཕྱིར་དད་པས་ཁྱོད་བསྟེན་པས། །ཐུགས་རྗེ་ཅན་གྱིས་བྱིན་གྱིས་རློབས། །གནང་བ་ཐོབ་ནས་གུས་ལྡན་པའི། །དབང་རིམ་བཞི་ཉིད་ནོད་པར་བྱ། །མེ་ཏོག་ཆར་དང་སྒྲ་དང་དྲི། །མཐོང་བ་དག་དང་ཤེས་རབ་འཕེལ། །ཚེ་དང་ལོངས་སྤྱོད་འཕེལ་བ་དང་། །གཟུངས་མ་མཁའ་འགྲོ་འདུ་བ་དང་། །བྱིན་རླབས་མངོན་དུ་སྣང་བ་དང་། །བྱིན་རླབས་དབང་ཐོབ་ལམ་རྟགས་ཡིན། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། གཟུགས་བརྙན་གྱི་བྱ་བ་བསྟན་པའི་ལེའུ་སྟེ་བཅུ་གཅིག་པའོ།། །།དེ་ནས་བཅོམ་ལྡན་འདས་དཔལ་དགྱེས་པ་ཆེན་པོ་རྔམ་པའི་རྒྱལ་པོ་ཡེ་ཤེས་ཧེ་རུ་ཀས། དཀྱིལ་འཁོར་ཐམས་ཅད་མཆོད་པའི་སྤྲིན་འབྱུང་བ་ཞེས་བྱ་བ་འདི་སྐུ་དང་གསུང་དང་ཐུགས་ལས་མངོན་དུ་ཕྱུང་བའོ། །ཨོཾ་ཤྲཱི་ཧེ་རུ་ཀ་མ་ཧཱ་ཀྲོ་དྷ་ཧཱུཾ། ཀྲོ་དྷཱི་ཤྭ་རཱི་ས་མ་ཡ་ཧཱུཾ་ཧཱུཾ་ཧཱུཾ། ཨོཾ་བཛྲ་གཽ་རཱི་ཧ་ས་མ་ཡ་ཧཱུཾ། བཛྲ་སིངྷ་མུ་ཁཱི་ཧཱུཾ་ས་མ་ཡ་ཛཿཧཱུཾ། ཨོཾ་བཛྲ་ཨཾ་ཀུ་ཤ་ཛཿཛཿཧཱུཾ། །རྡོ་རྗེ་རྐང་ལག་མཛེས་པའི་གར། །ནམ་མཁའི་རྡུལ་སྙེད་རབ་སྤྲུལ་ཏེ། །འབར་བའི་དཀྱིལ་འཁོར་མཉེས་བྱའི་ཕྱིར། །དཀྱིལ་འཁོར་ལྷ་ལ་ཕྱག་འཚལ་ལོ། །ནམ་མཁའི་མཛོད་ཀྱི་གཏེར་ལྡན་པས། །སྔགས་དང་ཕྱག་རྒྱའི་བྱིན་རླབས་ཀྱིས། །ཇི་ལྟར་འདོད་ཅིང་ཡིད་འོང་བའི། །ཡོ་བྱད་ནམ་མཁའ་ཁྱབ་པར་སྤྲུལ། །མོས་པ་དག་པའི་ཁྱད་པར་བཞིན། །འཁོར་གསུམ་དག་པའི་སྟོབས་ཀྱིས་འབུལ། །རྡོ་རྗེ་ཐལ་མོ་ཁ་ཕྱེ་ཞིང་། །རཀྟ་སྦྲེང་བའི་ཚུལ་གྱིས་ནི། །ཕྱག་ཞབས་ཞལ་བསིལ་དབུལ་བར་བྱ། །ཐུགས་རྗེ་ཆགས་པས་བདག་དོན་གསོལ། །ཨོཾ་ཤྲཱི་ཧེ་རུ་ཀ་མ་ཧཱ་ཀྲོ་དྷཱི་ཤྭ་རཱི། ས་མ་ཡ་ཧ་ཧེ་ཕཊ། རུ་ལུ་རུ་ལུ་མ་ཧཱ་རཀྟ་ཨརྒྷཾ་པྲ་ཏཱིཙྪ་ཧོ་ཁཱ་ཧི། རྡོ་རྗེ་ཁུ་ཚུར་འགྱིངས་བྱས་པས། །མཛེས་པར་བསྒྱུར་བའི་ཚུལ་གྱིས་ནི། །
ཐལ་མོ་གྱེན་དུ་བསྐོར་བྱས་ཏེ། །རྡོ་རྗེ་མེ་ཏོག་ལ་སོགས་པའི། །མཆོད་པ་ལྔ་ཡི་བྱེ་བྲག་གིས། །དཀྱིལ་འཁོར་ཆོ་ག་བཞིན་དུ་མཆོད། །ཨོཾ་ཨཱཿཧཱུཾ། སུ་ར་ཏོ་མ་ཧཱ་རཱ་ག་བ་ན་བེམ། བེ་ནུ་སུ་ར་ཏོ། ཏི་པུ་པ་ར་མུ། སརྦ་ཏ་ཐཱ་ག་ཏ་སིདྡྷི་ཧུ། ས་མ་ཡོ་ཏ་མུཿ། སརྦ་མ་ཧཱ་སུ་ཁ་སིདྡྷི་ཧུ། ཨོཾ་ཨཱ་ཧཱུཾ་ཤྲཱི་བཛྲ་རཱ་ག་དྷཱུ་བེ་དྷཱུ། པུཥ྇་པུ། ཨཱ་ལོ་ཀེ་ཧྲཱྀཿ། གནྡྷེ་གན། རྡོ་རྗེ་ལྷ་མོ་རབ་མཛེས་མ། །སོ་སོའི་ཡོ་བྱད་རབ་ཐོགས་ནས། །ནམ་མཁའ་ཁྱབ་པར་རབ་སྤྲུལ་ཞིང་། །ཡོ་བྱད་རང་ལུས་ཐིམ་པར་མཆོད། །སངས་རྒྱས་ཀུན་གྱི་ར་སཱ་ཡན། །འཆི་བ་མེད་པའི་བདུད་རྩི་ལྔ། །མཐར་ཐུག་མེད་པའི་རྒྱ་མཚོར་སྤྲུལ། །རྒྱལ་བ་རྣམས་ཀྱང་ཚིམས་པར་མཛད། །རྡོ་རྗེ་ཕྱག་རྒྱ་གར་འགྲོལ་ཏེ། །མཐེབ་སྲིན་རྩེ་མོས་བླངས་གཏོར་བས། །རྡུལ་སྙེད་བཞུགས་པའི་རྒྱལ་བ་རྣམས། །དགྱེས་ཤིང་གཟི་བྱིན་ལྡན་པར་འགྱུར། །ཨོཾ་ཤྲཱི་ཧེ་རུ་ཀ་མ་ཧཱ་ཀྲོ་དྷཱི་ཤྭ་རཱི། ཧ་ཧེ་ཕཊ། རུ་ལུ་རུ་ལུ་ཧཱུཾ། མ་ཧཱ་པཉྩ་ཨ་མྲྀ་ཏ་ར་སཱ་ཡ་ན། ཨ་ལ་ལ་ཧོ། རྡོ་རྗེ་དམ་ཚིག་མཆོག་གསུམ་པོ། །བདག་གཞན་བྱིན་རླབས་བླངས་བཀོད་ནས། །ནམ་མཁའ་མཐས་གཏུགས་སྐུ་གསུང་ཐུགས། །བྱིན་རླབས་བརྟན་པ་ཉིད་དུ་འགྱུར། །བཟའ་དང་བཅའ་དང་བཏུང་དང་བགོ། །འདོད་པའི་ཡོན་ཏན་ལྔ་ལྡན་པས། །ནམ་མཁའི་སྤྲིན་ལྟར་གཏིབས་སྤུངས་ནས། །དཀྱིལ་འཁོར་ཉིད་ལ་དཀྱིལ་འཁོར་ཐིམ། །མྱོས་བྱེད་དང་ནི་རུ་དྷ་ར། །ཚེ་དང་ཚིམས་བྱེད་རཀྟ་དང་། །དར་དིར་སྙན་པར་བཅས་པའི་གླུ། །ལྷ་མོ་རྡུལ་སྙེད་མདངས་ལྡན་པས། །མ་ལུས་ཁྱབ་ཅིང་མཉེས་པར་བྱ། །ཞིང་དུ་གྱུར་པ་མ་ལུས་པ། །བྱམས་དང་སྙིང་རྗེས་གཞི་བཟུང་ནས། །ཐབས་ཆེན་ལྡན་པའི་རྣལ་འབྱོར་པས། །ཁམས་གསུམ་མ་ལུས་བསྒྲལ་བར་བྱ། །སྲོག་ཆགས་རླུང་ནི་རང་དྭངས་ཤིང་། །བདེ་བ་ཆེན་པོར་སྨིན་བྱས་ནས། །མ་རུངས་གདུག་པའི་ལྷ་ཆེན་རྣམས། །འགྲོ་བ་ཀུན་ལ་བརྩེ་བ་དང་། །ཁྲོ་བས་ཁྲོ་བ་འདུལ་བའི་ཕྱིར། །རྟོག་པ་ཐུགས་རྗེས་བསྒྲལ་བ་ནི། །བདེ་ཆེན་ས་ལ་དགོད་པར་རིགས། །ཕྱིན་ཆད་འཁོར་བར་མི་ལྡོག་པར། །སྐྱེས་བུ་
ཆེན་པོར་དབང་བསྐུར་ཏེ། །ཐབས་དང་སྙིང་རྗེར་ལྡན་པ་ཡིས། །བདེ་ཆེན་ས་ལ་ཐེ་ཚོམ་མེད། །ཆགས་པས་ཆགས་པ་འདུལ་བ་དང་། །བདེ་བ་ཆེན་པོའི་གར་ཐབས་ཀྱིས། །ནམ་མཁའི་ཁམས་ནི་ཀུན་བཀང་སྟེ། །དཀྱིལ་འཁོར་མཉེས་པར་བྱ་བའི་ཕྱིར། །ལྷ་མོ་ཀླུ་མོ་ལ་སོགས་པའི། །ན་ཚོད་ཡོད་མེད་གང་རུང་ལ། །ཐབས་དང་ཆོ་གའི་ཁྱད་པར་གྱིས། །སྦྱོར་བའི་ལམ་ནི་བརྩམ་པར་བྱ། །ཡེ་ཤེས་ཏིང་འཛིན་ལས་གྲུབ་པའི། །ཁྱད་པར་སྦྱོར་བའི་ཡུམ་དུ་བརྟག །སྦྱོར་བའི་ཆོ་ག་སྣ་ཚོགས་ཀྱིས། །ལྷ་ཡི་འཁོར་ལོ་དགྱེས་པར་མཛད། །ཉི་ཟླ་བྱང་ཆུབ་སེམས་ཀྱི་ཚོགས། །བདེ་བ་ཆེན་པོའི་ཐིག་ལེ་ཉིད། །རྡོ་རྗེ་པདྨའི་སྟོབས་ལས་བྱུང་། །ཞིང་ཁམས་ཕྱི་ནང་མ་ལུས་པ། །བདེ་བའི་མཆོད་པས་གང་བར་འགྱུར། །གང་དུ་དགྱེས་པའི་གནས་གསུམ་ནས། །དགྱེས་པའི་ལྷ་མོ་རྡུལ་ཕྲན་ཚོགས། །རང་གི་ལག་ཆར་བཅས་ཐོགས་ནས། །རྒྱལ་བ་འཁོར་བཅས་མཉེས་པར་འགྱུར། །ཤ་པ་ཏ་ལ་སོགས་པ་ཡི། །བརྡུང་དང་དཀྲོལ་བ་ལ་སོགས་པའི། །རོལ་མོའི་བྱེ་བྲག་མཐའ་ཡས་པའི། །གླུ་དང་ཚིག་ཏུ་བཅས་པ་ཡིས། །མཆོད་ཅིང་བསྟོད་པ་སྣ་ཚོགས་བྱ། །རྡོ་རྗེ་རོལ་མོའི་ཚོགས་མཆོད་ནི། །ཁྱད་པར་གཉིས་དང་ལྔ་ལ་སོགས། །ཚེ་དང་བྲན་མོ་གཡོན་ཅན་མ། །མཱ་ས་དཔའ་བོ་ཟླ་རྒྱས་དང་། །ཟླ་ཕྲོམ་ཚིམས་བྱེད་གཟི་བརྗིད་མཆོག །ཐར་པ་མེ་ཏོག་དྲི་ཞིམ་པ། །ཡིད་འོང་བདེ་སྐྱེད་ཡོ་བྱད་ཚོགས། །དག་ཅིང་བྱིན་བརླབ་མ་ཉམས་པའི། །ཡོ་བྱད་ནམ་མཁའི་མཐས་གཏུགས་པ། །བཤམས་ཤིང་སྤྲུལ་པའི་རྒྱ་མཚོའི་ཚོགས། །མཆོད་པའི་ལྷ་མོས་གང་བྱས་ཏེ། །བདེ་མཆོག་རོ་ཡིས་བརྒྱན་བྱས་ཏེ། །དཀྱིལ་འཁོར་ཚོགས་ལ་མཆོད་པར་དབུལ། །རྡོ་རྗེ་རྐང་པའི་སྟབས་ལྡན་ཞིང་། །ལག་གཉིས་འགྱིང་བཅས་གར་བྱས་ནས། །ཐལ་མོའི་སྙིམ་པ་གྱེན་བཀྲོལ་ནས། །ཚོགས་ཀྱི་མཆོད་པ་དབུལ་བར་བྱ། །གང་གིས་འདི་དག་སྦྱོར་བ་ཡིས། །རྒྱལ་བ་སྲས་བཅས་རྡོ་རྗེ་འཛིན། །རྣལ་འབྱོར་མཁའ་འགྲོ་དང་བཅས་པའི། །
དགྱེས་པའི་ཚུལ་གྱིས་བྱིན་བརླབས་ཤིང་། །མཐུ་དང་རྫུ་འཕྲུལ་ཅི་ཡོད་པས། །རང་གི་འདོད་པ་ཇི་ལྟ་བར། །དགྱེས་པར་དངོས་གྲུབ་བསྩལ་བ་དང་། །དབང་དང་བྱིན་རླབས་ཕུན་སུམ་ཚོགས། །ཀུན་གྱི་བདག་པོ་ཉིད་དུ་འགྱུར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། མཆོད་པའི་དེ་ཁོ་ན་ཉིད་སྐལ་བ་བཟང་པོ་ཞེས་བྱ་བའི་ལེའུ་སྟེ་བཅུ་གཉིས་པའོ།། །།དེ་ནས་ཡང་གསང་བའི་བདག་པོས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཨེ་མ་ཧོ་སངས་རྒྱས་ཐམས་ཅད་ཀྱི། །དམ་པ་དྲི་མ་མེད་པའི་ཐུགས། །མི་འདའི་རང་བཞིན་གང་ལགས་པ། །དམ་པའི་དོན་དུ་བཤད་དུ་གསོལ། །ཞེས་གསོལ་ཏོ། །དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཡེ་ཤེས་རྔམ་པའི་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །སངས་རྒྱས་ཀུན་གྱི་རང་བཞིན་ནི། །འདའ་བ་མེད་པའི་རང་བཞིན་ཏེ། །རྣལ་འབྱོར་རྣམས་ལ་ཕན་གདགས་ཕྱིར། །དམ་ཚིག་ཁྱད་པར་བཤད་པར་བྱ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་ནི། །མི་འདའི་དམ་པ་མཆོག་གྱུར་པ། །འདས་པར་གྱུར་ན་འཚིག་པར་བཤད། །རང་བཞིན་བཟང་དང་དད་པ་དང་། །མོས་ཤིང་དགེ་ལ་བརྩོན་པ་དང་། །འཁོར་བས་འཇིགས་ཤིང་སྙིང་རྗེ་ལྡན། །དེ་ལ་དམ་ཚིག་སྦྱིན་པར་བྱ། །སངས་རྒྱས་ཀུན་གྱི་རང་བཞིན་ཆེ། །བྱང་ཆུབ་སེམས་ཉིད་དག་པ་སྟེ། །མ་ལུས་རང་བཞིན་ཀུན་ཏུ་བཟང་། །དོན་དམ་ཀུན་རྫོབ་དབྱེར་མེད་པ། །མགོན་པོས་གནང་བ་ལ་གནས་ཤིང་། །སྐྱོ་བ་མེད་པར་གནས་པར་བྱ། །གཞན་དུ་བསྐལ་པ་གྲངས་མེད་པར། །དཀའ་བས་སྦྱིན་དང་ཚུལ་ཁྲིམས་དང་། །དཀར་པོའི་དོན་ལ་གང་གནས་ཀྱང་། །ས་བོན་མེད་པའི་འབྲས་བུ་བཞིན། །དེ་ཡང་གཞན་ལས་མ་ཡིན་ཏེ། །བླ་མ་མཆོག་ལས་ཤེས་པར་བྱ། །རྒྱལ་བ་ཀུན་གྱི་སྐུ་གསུང་ཐུགས། །རྒྱུད་ལ་འཇུག་ཅིང་དབང་བསྐུར་དང་། །གསང་བ་སྒྲོགས་ཤིང་འདྲེན་པ་དང་། །ཟབ་མོའི་དོན་གྱི་ལམ་སྟོན་པ། །རྒྱལ་བ་
ཀུན་དང་མཉམ་པའི་ཕྱིར། །ནམ་མཁའི་མཐར་ཐུག་བར་དུ་ནི། །ཞབས་ལ་སྤྱི་བོས་རེག་བྱ་ཞིང་། །ཐུགས་ལས་འགལ་བར་མི་བྱའོ། །འཁོར་བ་ནུབ་པར་བྱེད་པ་དང་། །སངས་རྒྱས་ས་ལ་འཇོག་པ་ཡི། །དམ་པ་དེ་ལས་འགལ་བྱེད་པ། །རྡོ་རྗེ་འཛིན་པ་ཉིད་ཀྱང་འཚིག །དམ་པས་གནང་བའི་གྲོགས་མཆོག་རྣམས། །རྡོ་རྗེ་གསང་བས་གཅིག་བསྡུས་པའི། །སྙིང་པོ་གནང་གནས་པའི་ཡང་བའི་འོད་བཞིན་པས། །ནམ་ཡང་འབྲལ་བ་མ་ཡིན་ཕྱིར། །དམ་པས་དམ་པ་རྫོགས་བར་རུ། །བསྐུར་ཞིང་བརྙས་པར་མི་བྱའོ། །རྡོ་རྗེ་དམ་པ་འདྲལ་བྱེད་པ། །བདག་གཞན་གཉིས་ཀ་འཕུང་བ་དང་། །རྡོ་རྗེ་འཛིན་རྒྱལ་ཁྲོས་གྱུར་ནས། །བདུན་རྒྱུད་ཚུན་ཆད་བརླག་པར་འགྱུར། །དེ་ནས་རིགས་དམན་ལོག་པར་འགྱུར། །དམ་པ་རྣམས་ཀྱིས་སྨད་པ་དང་། །བསྐལ་པ་བརྒྱ་ཕྲག་དུ་མ་རུ། །གསང་བའི་དོན་ལས་འགལ་བར་འགྱུར། །སངས་རྒྱས་སྲས་དང་ཕོ་ཉར་བཅས། །འཁོར་ལོར་མཐོང་དང་ཞུགས་པ་ཡི། །དམ་པའམ་རང་གི་དམ་པ་ནི། །དམ་པས་དམ་པར་བྱིན་བརླབས་པས། །སྐུ་གསུང་ཐུགས་ཀྱི་ངོ་བོ་སྟེ། །སྔགས་དང་ཕྱག་རྒྱས་རྒྱས་བཏབ་ནས། །བར་ཆད་མེད་པར་མི་བསྐྱོད་ཅིང་། །ཐ་མལ་དམན་པའི་ལས་སྤྱོད་པ། །དམ་པ་ཀུན་ལ་བརྙས་པ་སྟེ། །དྲག་ཤུལ་སྤྱོད་པ་ཀུན་བསྡུས་ནས། །དུས་མིན་སྡུག་བསྔལ་འབབ་པ་དང་། །བྱང་ཆུབ་སེམས་དང་བྲལ་བ་ཡིན། །སངས་རྒྱས་ཀུན་གྱི་དེ་ཉིད་ནི། །གསང་བ་དམ་པར་བྱིན་བརླབས་པ། །རེག་པས་སྡུག་བསྔལ་ཞི་བྱེད་པ། །ཐོབ་ནས་གཞན་དུ་བརྗོད་མི་བྱ། །འདི་ནི་སངས་རྒྱས་ཐམས་ཅད་དེ། །དབང་བསྐུར་བཅུད་དང་འདྲེལ་བ་ཡི། །སྐུ་གསུང་ཐུགས་ཀྱི་དེ་ཉིད་དེ། །རིགས་ངན་བྱིས་པའི་ཡུལ་མིན་པས། །གང་ཞིག་དམ་ལས་འདའ་བྱེད་པ། །དམ་པ་རྣམས་ཀྱི་རྒྱུད་གཅོད་ཅིང་། །སྡུག་བསྔལ་གྲོང་ཁྱེར་འཕེལ་བྱེད་པས། །སངས་རྒྱས་ཉིད་ཀྱིས་སྒྲོལ་བྱེད་འགྱུར། །འདི་ནི་དམ་པས་བྱིན་བརླབས་ཤིང་། །དམ་པའི་རྩ་བ་ཡིན་ཕྱིར་ཏེ། །དམ་པར་གྲུབ་པ་
དམ་པ་སྟེ། །དངོས་གྲུབ་འདོད་པས་གནས་པར་བྱ། །གང་ཕྱིར་སངས་རྒྱས་འདོད་པ་ཡིས། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་དམ་ཚིག་ཆེ། །དམ་པར་གྱུར་པ་མི་སྤང་ངོ་། །སངས་རྒྱས་ཀུན་གྱི་རང་བཞིན་ཏེ། །ཡེ་ཤེས་ལྔ་དང་རྒྱལ་བ་ལྔ། །སྐུ་གསུང་ཡོན་ཏན་ཕྲིན་ལས་ཐུགས། །སྤངས་པས་མི་འགྲུབ་འཁོར་བར་འགྱུར། །སྦྱོར་སྒྲོལ་མ་བྱིན་ལེན་པ་དང་། །རྫུན་དང་ངག་བརླང་སྤྱོད་པ་ལྔ། །སངས་རྒྱས་ཀུན་གྱི་སྤྱོད་པའི་ཕྱིར། །འདའ་བར་བྱ་བ་མ་ཡིན་ནོ། །ཤ་ཆེན་དམར་ཆེན་དྲི་དང་བཅས། །བྱང་ཆུབ་སེམས་དང་དག་པའི་ཆུ། །དང་དུ་བླང་བའི་རང་བཞིན་པས། །རྟག་ཏུ་བཟའ་ཞིང་བཏུང་བར་བྱ། །ཤ་ཆེན་ཁྱི་ཤ་མཆོག་ཡིན་ཏེ། །མཆེ་ཅན་མཁའ་ལྡིང་སྟོབས་ལྡན་ཤ །གང་ཞིག་བྱིན་བརླབས་ཟ་བྱེད་པ། །རྒྱལ་བ་རྡོ་རྗེ་འཛིན་དང་མཉམ། །ཕུང་པོ་འབྱུང་བ་ཁ་དོག་དང་། །དབང་པོ་ཡུལ་དུ་བཅས་པའི་ཆོས། །དག་པ་ལྔ་ནི་ཤེས་བྱ་སྟེ། །འཁོར་བས་སངས་རྒྱས་ལྔ་རུ་ཤེས་པར་བྱ། །ཀུན་གྱིས་བསྒྲུབ་པའི་སངས་རྒྱས་ལྔ། །རྡོ་རྗེ་རིན་ཆེན་པདྨ་དང་། །ལས་དང་དེ་བཞིན་གཤེགས་རང་བཞིན། །བདག་ཉིད་ལྷུན་གྱིས་གྲུབ་པར་བྱ། །སྤྱི་དང་ཁྱད་པར་བསྒྲུབ་པ་དང་། །ལྷག་པའི་དམ་ཚིག་ལ་སོགས་པ། །གསང་བ་སྤྱི་དང་ཁྱད་པར་དང་། །རང་རང་བསྒྲུབ་པ་ལས་གསུངས་པ། །ཆོ་ག་བཞིན་དུ་ནན་ཏན་བྱ། །གལ་ཏེ་བཅས་པའི་དམ་ཚིག་ལ། །ཆོ་ག་བཞིན་དུ་མ་བསྒྲུབས་ཤིང་། །དམ་པའི་དོན་ལས་འགལ་བྱེད་པ། །རྒྱ་མཚོ་བསྐམ་དང་རི་བོ་ཟད། །ཇི་སྲིད་ནམ་མཁའ་གནས་བར་དུ། །རྡོ་རྗེ་དམྱལ་བར་གནས་པ་ཉིད། །དམ་པས་དམ་པར་བྱིན་བརླབས་ནས། །གང་ཞིག་དེ་ལས་འགལ་བྱེད་པ། །སངས་རྒྱས་རྡོ་རྗེ་འཛིན་པ་དང་། །མཁའ་འགྲོ་རྣལ་འབྱོར་ལ་སོགས་པ། །མ་ལུས་ཀུན་ལ་བརྙས་པས་ན། །སྡུག་བསྔལ་རྣམ་པ་མང་པོ་ནི། །མཚོན་ཆའི་འཁོར་ལོ་བཞིན་དུ་འཁོར། །གལ་ཏེ་དམ་པའི་ལས་བྱས་ནས། །བསམས་པ་བཞིན་དུ་མི་འགྲུབ་ཅིང་། །ཉམས་པའི་སྔ་རྟགས་ལྟས་བྱུང་ན། །ཉམས་
པ་སྐོང་བའི་ལས་བྱས་ལ། །དམ་པ་རྣམས་ཀྱིས་བཤད་པ་ལྟར། །ཕྱིན་ཆད་གང་ཡང་ཉམས་མི་བྱ། །སྐུ་གསུང་ཐུགས་ཀྱི་དམ་པ་ནི། །གང་གིས་ཚུལ་བཞིན་གནས་པ་དང་། །ཇི་ལྟར་རིགས་པར་གནས་པ་ནི། །གང་གིས་ཇི་ལྟར་བསྒྲུབས་པ་དང་། །ཚེ་འདི་ཉིད་ལ་འགྲུབ་པར་འགྱུར། །མོས་དང་དབང་པོ་ཆེ་བ་ཡིས། །བར་ཆད་མེད་པར་བརྩོན་བྱས་ན། །ལོ་ཕྱེད་བཞི་དང་ཟླ་བ་ཉིད། །བཅོ་བརྒྱད་ཀྱིས་ནི་འགྲུབ་པར་འགྱུར། །དམན་དང་སྐལ་བ་ངན་པ་དང་། །ཤེས་རབ་ཡོ་བྱད་ཞན་པས་ཀྱང་། །ཐབས་ཀྱིས་ཆོ་ག་མ་ཉམས་པར། །དམ་པས་བསྟན་པ་བཞིན་བསྒྲུབས་ན། །ཚེ་འདིས་ཐོབ་པར་ཐེ་ཚོམ་མེད། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། དམ་ཚིག་བསྟན་པའི་ལེའུ་སྟེ་བཅུ་གསུམ་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་ཀུན་གྱི་རང་བཞིན་ཁྱོད། །སངས་རྒྱས་ཀུན་གྱི་སྐུ་གསུང་ཐུགས། །མ་ལུས་སྐྱོབ་པའི་རང་བཞིན་གྱིས། །གཏོར་མའི་ཁྱད་པར་བཤད་དུ་གསོལ། །ཞེས་གསོལ་པ་ལས། བཅོམ་ལྡན་འདས་དེ་བཞིན་གཤེགས་པ་རྔམ་པའི་རྒྱལ་པོས་འདི་སྐད་ཅེས་གསུངས་སོ། །སྣ་ཚོགས་སྣོད་ཀྱི་འཇིག་རྟེན་དུ། །བཅུད་ཀྱི་སེམས་ཅན་གཏོར་མར་སྦྱར། །གདོད་ནས་མ་བཅོས་ཆོས་ཀྱི་དབྱིངས། །ཡོངས་ལ་ཁྱབ་པས་ཕྱོགས་བཅུར་སྣང་། །འདོད་པའི་ཡོན་ཏན་ལྔ་རྣམས་དང་། །རང་བཞིན་གནས་དང་སྤྲུལ་པ་ཡི། །མཆོད་དང་རྒྱལ་རྒྱན་ཡང་ལ་སོགས་པའི་བདག་ཀྱང་བདག །མ་བཟུང་བཏང་བས་ཁྱབ་པ་སྟེ། །ཆོས་ཅན་སྣ་ཚོགས་མཆོག་ཏུ་བཤད། །ཇི་སྙེད་བསམ་ཡས་མ་ལུས་ཐབས། །སྟོང་ཞི་མ་བཅོས་ངང་ལ་སྦྱར། །དེ་ཉིད་ཞི་བར་གནས་རྟོག་པ། །ཆོས་ཉིད་མ་བཅོས་གཏོར་མ་ཡིན། །རིགས་པ་མཐའ་བྲལ་སྣོད་ཆེན་དུ། །སྣ་ཚོགས་རིག་པའི་འདོད་ཡོན་ལྔ། །ནམ་མཁའ་ཁྱབ་པའི་སྟོབས་ཀྱིས་སྤྲུལ། །ཏིང་འཛིན་སྤྲུལ་པའི་གཏོར་མ་ཡིན། །མཚན་མ་རྫས་ཀྱི་ཁྱད་པར་ཡང་། །བཟའ་བཏུང་བྲོ་བའི་མཆོག་
རྣམས་དང་། །ཤ་ལྔ་བདུད་རྩི་ལྔ་ལས་བྱས། །དག་ཅིང་བྱིན་བརླབས་ལྡན་པའོ། །ཕུང་པོ་ཆོས་ཀྱི་དབྱིངས་ཀྱི་ཡིན། །གཏུབ་པས་ཡེ་ཤེས་རོལ་པ་ཡིན། །ཁམ་བུ་ཐུགས་རྗེ་སྤྲུལ་པར་བཤད། །ཆོས་དབྱིངས་མ་བཅོས་དབྱིངས་སུ་བསྡུས། །ཡེ་ཤེས་རོལ་པས་བྱིན་བརླབ་སྣང་། །ཤ་ཁྲག་དམར་གྱིས་མཁའ་འགྲོ་བརྟེན། །ཐུགས་རྗེས་འཕྲུལ་པས་ཕྱོགས་བཅུར་ཁྱབ། །དང་པོར་ཡེ་ཤེས་བདུད་རྩི་སྟེ། །དཀྱིལ་འཁོར་ཇི་བཞིན་སྦྱིན་བསྲེག་བྱ། །བར་མའི་འདོད་ཡོན་ལྔ་ཡི་སྟེ། །རྣལ་འབྱོར་མི་ཟད་གཏེར་དུ་སྦ། །ཡུམ་ལྔའི་མཁའ་ཀློང་གནས་ལ་གཏད། །ཡེ་ཤེས་ལྔ་ཡི་རྒྱ་ཡིས་གདབ། །ཐ་མ་ལྷག་མའི་ཆོ་ག་གང་། །གནས་བདུན་ཡོངས་སུ་རྫོགས་ནས་ནི། །འཁོར་གྱི་མཁའ་འགྲོ་མཆོད་པ་དང་། །ཟ་ལམ་བསྟན་དང་སྦྱིན་བསྲེག་བྱ། །སྣང་སྲིད་སྣོད་བཅུད་མ་ལུས་པ། །རང་བཞིན་འདོད་པའི་ཡོན་ཏན་ལྔ། །ཕྱོགས་མེད་མཉེས་པར་རོལ་པ་ནི། །ཕྱོགས་བྲལ་ཆོས་དབྱིངས་གཏོར་མ་ཡིན། །བདག་ཉིད་དཀྱིལ་འཁོར་གསལ་བསྒོམས་པས། །སྣང་སྲིད་བདེ་བའི་ལོངས་སྤྱོད་ལ། །སྒོ་གསུམ་བར་ཆད་མེད་སྤྱོད་པ། །རྣལ་འབྱོར་སྤྱོད་པ་རེ་དོགས་མེད། །ཐབས་ལྡན་འདི་ལྟར་སུ་ཞིག་ནི། །བསོད་ནམས་ཡེ་ཤེས་རྫོགས་འགྱུར་ཞིང་། །འཁོར་བའི་མཚན་མར་སྣང་བ་དག །སྐུ་གསུམ་ཡེ་ཤེས་ལྔ་འགྲུབ་འགྱུར། །ཤ་ཁྲག་རུས་པ་སྣ་ཚོགས་པ། །བདག་གཞན་དུག་གསུམ་ཟད་པ་དང་། །འཁོར་བ་ཡེ་ཤེས་སྤྱད་པའི་ཕྱིར། །ཐབས་ལྡན་རྣལ་འབྱོར་པས་དབུལ་བྱ། །སྲིད་གསུམ་ཡེ་ནས་བདུད་རྩི་ལྔ། །མ་བཅོས་ལྷུན་གྱིས་རྫོགས་སངས་རྒྱས། །བདག་གིས་རྟོགས་པར་བྱ་བའི་ཕྱིར། །ཤ་ལྔ་བདུད་རྩི་ལྔ་དབུལ་བྱ། །ཐབས་དང་ཤེས་རབ་རང་བཞིན་གྱིས། །གཏོར་མ་ཞེས་ནི་དེ་ལ་བྱ། །སྐུ་གསུང་ཐུགས་ཀྱི་རང་བཞིན་གྱིས། །ཞི་སོགས་ལས་ལ་ཐོགས་མེད་ཅིང་། །རང་རང་འབྱོར་པས་ཚོགས་བསག་ཕྱིར། །དུས་བཞིའི་གཏོར་མ་དབུལ་བར་བྱ། །གང་དུ་གདུག་ཚོགས་ཞི་བ་དང་། །ནོར་དང་འབྲུ་རྣམས་འཕེལ་བ་དང་། །
བཀྲ་ཤིས་འབྱོར་པ་བྱ་བ་དང་། །ཅི་འདོད་དངོས་གྲུབ་བསྒྲུབ་བྱའི་ཕྱིར། །ཚོགས་དང་གཏོར་མའི་ལས་བྱའོ། །དམ་ཚིག་ཉམས་དང་ཆགས་པ་ཡིས། །གནོད་པ་ཕ་རོལ་སྦྱོར་བ་དང་། །ལས་དང་བག་ཆགས་ཆེ་བ་དང་། །བསམ་པ་མི་འགྲུབ་ལྷ་གཡེལ་དང་། །དངོས་གྲུབ་དོན་ལ་ནུས་པ་མེད། །དམ་ཚིག་ཉམས་པའི་རྟགས་བྱུང་ན། །ཚོགས་དང་གཏོར་མ་བཟླས་ཤིང་བྱ། །ལས་རྣམས་མཐའ་ཡས་གང་སྔོན་དུ། །ཚོགས་དང་གཏོར་མའི་སྦྱོར་བ་བྱ། །ཐུན་མོང་ཐུན་མོང་མ་ཡིན་པའི། །ལས་དང་ལམ་ནི་མྱུར་འགྲུབ་ན། །ཚོགས་དང་གཏོར་མ་བཟླས་པར་བྱ། །དེས་ན་གང་ཡིན་ལས་ལ་སྦྱར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། མཆོད་པའི་ཡན་ལག་གི་ལེའུ་སྟེ་བཅུ་བཞི་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །གསང་བའི་དོན་ལ་བདག་འཇུག་ཕྱིར། །དབང་བསྐུར་སྣང་བ་རྨད་བྱུང་བ། །གང་ལགས་རིམ་པ་བདག་ལ་སྩོལ། །ཞེས་གསོལ་པ་ལས། དེ་བཞིན་གཤེགས་པ་དཔལ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་བཀའ་སྩལ་ཏོ། །དབང་བསྐུར་གནང་བ་ཐོབ་འདོད་པས། །སློབ་དཔོན་འདྲེལ་པའི་ཐབས་ལྡན་པ། །སྣོད་དང་ལྡན་པའི་སློབ་མ་ལ། །ཐབས་དང་ལྡན་པའི་དབང་བསྐུར་ཏེ། །ལམ་ལ་གནས་པའི་དབང་ཐོབ་པས། །གང་བསྒྲུབ་དབང་དུ་སྣང་བར་འགྱུར། །ཐབས་ཆེན་རྒྱུད་དང་བྲལ་བ་ཡི། །ཐ་མལ་གྲགས་འཆང་བླ་མ་ཡིས། །བླུན་པོ་གང་བསྒྲལ་འཁོར་བ་ལས། །གཉི་གས་སྡུག་བསྔལ་ཆེན་པོ་འཐོབ། །སྡུག་བསྔལ་དང་ལེན་བདེ་འདོད་པས། །ཅི་ནས་སྐྱོ་བའི་སེམས་བྲལ་བས། །ལས་དང་རྫས་སོགས་མ་ཆགས་པས། །བླ་མ་དག་ལ་བསྙེན་བཀུར་བྱ། །རྡོ་རྗེ་བླ་མ་དེ་བཞིན་གཤེགས། །འགྲོ་བ་ཀུན་ལ་སྙིང་རྗེ་བའི། །ཡིད་བཞིན་ནོར་བུ་ལྟ་བུ་ཉིད། །རྗེས་མཐུན་ཐུགས་རྗེས་ཁྱབ་པར་བྱེད། །སྣ་
ཚོགས་ཆོ་གར་ལྡན་པ་ཡིས། །དད་དང་དམ་ཚིག་ལྡན་པ་ཡིས། །རྟེན་འདྲེལ་སྦྱོར་བ་མྱུར་འགྱུར་བ། །དཔེར་ན་མི་དང་གཙུབ་ཤིང་བཞིན། །དང་པོར་ཐར་པའི་གྲོང་ཁྱེར་དུ། །འཇུག་པའི་ཚུལ་གྱིས་གསོལ་བ་གདབ། །སྔོན་དུ་རུང་བ་བྱས་པ་དང་། །དམ་ཚིག་སྡོམ་པ་ཐོབ་པ་དང་། །བྱིན་རླབས་ཡེ་ཤེས་མྱོང་བ་དང་། །བདག་དང་གཞན་དོན་ལྷུར་ལེན་པ། །འདོད་དང་སྦྱིན་པའི་ཚུལ་དག་གིས། །རིམ་པ་བཞིན་དུ་སྦྱིན་པར་བྱ། །བུམ་པ་དབུ་རྒྱན་ཅོད་པན་དང་། །ཕྲེང་བ་པོ་ཏི་རྒྱ་གྲམ་དང་། །འཁོར་ལོའི་མིང་དང་ཕྱག་རྒྱ་དང་། །ལོངས་སྤྱོད་བཅུ་ཡིས་དབང་སྐུར་བ། །ཐུན་མོང་དབང་དུ་རྒྱལ་བས་གསུངས། །རྡོ་རྗེ་དྲིལ་བུ་དམ་རྫས་དང་། །ཐོད་པ་ཞིང་དང་སྟག་ལྤགས་དང་། །ཀོ་བ་མེ་རི་གཤོག་པ་དང་། །སྦྲུལ་དང་ཟ་བྱེད་ཕྱག་རྒྱ་དང་། །ཡུམ་དང་ཐང་གཤོལ་མདའ་གཞུ་དང་། །རྒྱན་གསུམ་བཅས་པ་ལ་སོགས་པའི། །མཛེས་དང་སྡིག་དང་འབར་བ་དང་། །རོལ་པའི་རྫས་ཀྱིས་དབང་བསྐུར་རོ། །བདག་གཞན་བྱ་བ་ཡོངས་རྫོགས་ཕྱིར། །ཉན་བསྒོམ་ལ་སོགས་འཆད་པ་དང་། །རྡོ་རྗེ་སློབ་དཔོན་དབང་སྦྱིན་ལ། །ཐུན་མོང་ཕྱག་རྒྱའི་ཆོ་ག་བསྟན། །རང་ལ་གནས་པའི་དཀྱིལ་འཁོར་དག །རྣམ་པའི་ཚུལ་ཏེ་མཚོན་ཏེ་བསྟན། །ཕྱོགས་བཅུ་དུས་གསུམ་རྡུལ་སྙེད་ཀྱི། །སངས་རྒྱས་ཞིང་ཁམས་གཞལ་ཡས་པ། །དཀྱིལ་འཁོར་ལྷར་ནི་གྱུར་ནས་ཀྱང་། །རོལ་མོའི་དབྱངས་ཀྱིས་དབང་བསྐུར་མཛད། །གང་དུ་ཐབས་ལྡན་རྣལ་འབྱོར་ལ། །སྣང་སྲིད་ཕྱི་ནང་བཅས་པ་ཀུན། །དབང་གི་རྫས་སུ་གྱུར་ནས་ཀྱང་། །དེ་ཡི་སེམས་ལ་འཇུག་པ་མཛད། །མེ་ཏོག་ཆར་དང་སྒྲ་སྙན་དང་། །དྲི་དང་གླུ་དབྱངས་སྒྲོགས་པ་དང་། །གཟུགས་དང་མངོན་ཤེས་ཉམས་སྐྱེས་དང་། །དེ་བཞིན་སྒྲ་དང་ཡིད་འཕམ་དང་། །བྱིན་རླབས་ཆོ་ག་ཚང་བ་དང་། །བསྙེན་དང་རྫས་རྣམས་ཚང་བ་ལ། །ཐོབ་པའི་རྟགས་རྣམས་འབྱུང་བར་འགྱུར། །གང་ཞིག་དད་མེད་མ་གུས་
དང་། །གྲོགས་དང་བླ་མའི་ཉམས་ལེན་ཅིང་། །གསང་བའི་དོན་ལ་སྨོད་བྱེད་པ། །བར་མའི་སྲིད་པ་མི་འབྱུང་བར། །རྡོ་རྗེ་འབར་བའི་གནས་སུ་སྐྱེ། །དང་པོ་འཇུག་པ་ནས་བཟུང་ནས། །འཇིགས་པ་ལྔ་བྲལ་རིགས་ངེས་པར། །དངོས་དང་འོད་ཀྱི་རྣམ་པ་བཞིན། །འདུ་འབྲལ་མེད་པའི་རྣམ་པར་བྱའོ། །དང་པོ་དཀྱིལ་འཁོར་འཇུག་པ་དང་། །སྣང་བ་ཕྱག་རྒྱར་རྫོགས་པ་ལ། །གཙང་དང་འཇིགས་པ་སྤང་བའི་ཕྱིར། །དམ་རྫས་བྱང་ཆུབ་སེམས་ཀྱིས་བསྐུར། །བཅོ་བརྒྱད་ཉི་ཤུ་ལྔ་ལོན་པ། །མདངས་དང་དབང་པོ་གསལ་བར་འགྱུར། །འཇིགས་དང་གཙང་སྨེ་རྣམ་པར་སྤངས། །ཡིད་འོང་ངག་སྙན་སྐྱོ་བ་མེད། །སྤྱོད་པ་དལ་ཞིང་བཟང་བ་དང་། །ཕྲག་པ་ཆེ་ཞིང་བཀའ་བློ་བདེ། །དད་པས་བྱ་བ་ཅི་ཡང་ནུས། །བདེ་ཆེན་གསང་བའི་སྤྱོད་ལ་དགའ། །གསང་བའི་དོན་མཆོག་བསྒྲུབ་པའི་ཕྱིར། །ཐབས་དང་རྫས་དང་ཏིང་འཛིན་དང་། །སྔགས་ཀྱི་སྦྱོར་བ་ལ་བརྟེན་ཏེ། །ཆོ་ག་བཞི་ཡིས་དབང་དུ་བྱ། །ཐ་མལ་སྤྱོད་པ་སྤངས་བྱས་ཏེ། །ཁྲུས་དང་བྱུག་པ་ཁ་སྤོས་དང་། །གོས་རྒྱན་ཆགས་པ་སྐྱེད་པར་བྱེད། །ཡིད་འོང་སྤྱོད་དང་དབྱངས་ཀྱིས་མཆོད། །འདུ་ཤེས་གསུམ་ལྡན་སྦྱོར་བ་ཡིས། །ལྷར་བསྐྱེད་གསང་གནས་སྐྱེ་མཆེད་དག །ཐ་མལ་ཆགས་པ་སྤང་ཕྱིར་བརླབ། །ཅི་ནས་ཡིད་ནི་མི་སྐྱོ་བར། །རྡོ་རྗེ་ཐབས་ཀྱིས་ནན་ཏན་བྱ། །ཐ་མལ་དམིགས་པ་མི་གནས་ཕྱིར། །དམིགས་པ་གསུམ་ལྡན་ཏིང་འཛིན་སྐྱེས། །ཕྱག་རྒྱ་བཞི་ཡི་རོལ་པ་བྱ། །རྡོ་རྗེ་སློབ་དཔོན་བདེ་ཆེན་པོ། །གཙོ་བོ་འདོད་ཆགས་ཏིང་འཛིན་གྱིས། །སངས་རྒྱས་རྡུལ་སྙེད་བདག་བཞུགས་པར། །གཉི་གས་བརྟེན་པར་གསལ་བར་དུ། །དལ་དང་བསྐྱོད་དང་གཟུང་བ་ཡིས། །གསལ་བའི་ཐིག་ལེ་ནན་ཏན་བྱ། །རྡོ་རྗེ་ཉི་ཟླ་རྡུལ་སྙེད་གྲངས། །ཧེ་རུ་ཀས་ནི་མངོན་གསལ་ན། །ཐབས་དང་ཤེས་རབ་གཉིས་མེད་པས། །རྩེ་ནས་རྩེ་རུ་ཐིམ་པ་ལས། །གནས་ངན་ལེན་པ་ཀུན་སྦྱངས་ནས། །འཁོར་ལོ་འོད་ཀྱིས་གང་བ་ཡི། །རྡོ་རྗེ་ཐིག་ལེ་འོད་དུ་འབར། །བཅུ་གཉིས་བཅུ་
བཞི་ཕྱག་རྒྱ་མོ། །དཀར་དམར་ཕྱེད་ཅིང་དད་པ་ཆེ། །སྙིང་སྟོབས་དང་ནི་ཆགས་པར་ལྡན། །ཤེས་རབ་ཆེ་ཞིང་སྦྱོར་ཐབས་མཁས། །དལ་ཞིང་བཀའ་བློ་བདེ་བ་དང་། །དཀར་འཛིན་ཏ་ལའི་འབྲས་བུ་འདྲ། །རྡོ་རྗེའི་མཚོན་གྱིས་མ་ཕོག་པར། །འདོད་པ་རང་གི་གནས་ན་གནས། །སྔར་བཞིན་ཆོ་གས་སྦྱངས་བྱས་ནས། །ཐ་མལ་བཟློག་དང་ཆགས་པ་བསྐྱེད། །ཟས་དང་སྤྱོད་ལམ་བསྒྱུར་བ་དང་། །ལྷར་བསྐྱེད་དབང་བསྐུར་སྦྱོར་བ་བསླབ། །བྷ་གའི་དཀྱིལ་འཁོར་འཇུག་པ་དང་། །དམ་ཚིག་ལྷ་དབོག་དཀྱིལ་འཁོར་བསྟན། །རྡོ་རྗེ་སློབ་མ་ཆགས་པ་ཅན། །རྒས་དང་བུས་པ་མ་ནིང་མིན། །དབང་པོ་དར་ཞིང་བརྟུལ་ཞུགས་ཅན། །འཛག་མེད་རླུང་གི་དེ་ཉིད་མཁས། །འཁོར་ལོ་ཕོ་བྲང་གསལ་བ་དང་། །ཆགས་པ་བདེ་རྒྱས་རྟགས་བྱུང་ན། །བླ་མས་སློབ་མའི་ལག་བཟུང་ལ། །སྦྱོར་བའི་ཆོ་གས་སྦྱོར་བྱས་ལ། །དགའ་དང་བདེ་དང་ཆགས་པ་དང་། །རེ་དོགས་བཅད་པའི་ཉམས་བརྟག་ཅིང་། །རྡོ་རྗེའི་མིང་དང་གསང་བའི་མིང་། །བདེ་ཆེན་ལྷན་ཅིག་སྐྱེས་པའི་མིང་། །མིང་དང་བྲལ་བའི་ཚུལ་གྱིས་ནི། །རྡོ་རྗེ་དབང་གི་ཆོ་ག་བྱས། །དང་པོར་རིགས་དང་ལྷ་ཉིད་དེ། །གཉིས་པ་གསུམ་པ་ཡི་གེ་ལྔ། །བཞི་པ་དྲན་རྟོག་སྤྱོད་ཡུལ་ཀུན། །བདེ་ཆེན་སྟོང་ཉིད་ངང་དུ་ནུབ། །ཐིག་ལེ་ཉི་ཟླ་གར་བཟུང་བ། །བག་ཆགས་གསུམ་དང་བྲལ་བ་ཡིས། །དུས་གཅིག་ཐིག་ལེས་ཁྱབ་པའི་མཐུས། །བདེ་ཆེན་ལྷན་ཅིག་སྐྱེས་པར་གསལ། །ཆགས་པ་མ་ཡིན་ཆགས་བྲལ་མིན། །དབུ་མ་ཙམ་དུའང་མ་ཡིན་ཏེ། །བག་ཆགས་རྟོག་པ་རྣམ་འཇིག་ཅིང་། །ནམ་མཁའི་ཁམས་དང་མཉམ་པ་ཡི། །ཡིད་ནི་རབ་ཏུ་ཕམ་མཛད་ནས། །བདེ་ཆེན་མི་རྟོག་འོད་དུ་འབར། །སྤྱོད་ཡུལ་འདོད་ཡོན་དྲན་རྟོག་རྣམས། །བདེ་བ་ཆེན་པོའི་ངང་དུ་ནུབ། །མ་ལུས་འོད་གསལ་བདེ་ཆེན་པོ། །ཕྱོགས་འཛིན་ཡིད་ཀྱི་རྟོག་པ་སྤང་། །བདེ་ཆེན་ཡེ་ཤེས་མངོན་དུ་འབར། །ཕྱི་ནང་བཅུ་དྲུག་བཅོ་བརྒྱད་མ། །པདྨའམ་ཨུཏྤལ་ཁ་ཕྱེ་འདྲ། །
ཟླ་བར་ལྡན་ཞིང་ཆ་བྱད་སྒེག །སྐེད་པ་ཕྲ་ལ་ཤ་མདངས་སྲབ། །འདོད་པ་རྒྱས་ལ་སྦྱོར་ཐབས་མཁས། །བརླིང་ཞིང་འཇིགས་མེད་དཔའ་བོ་ལ། །ཆོ་གའི་ཁྱད་པར་ཅི་འཚམས་པར། །རྒྱས་པར་ལེགས་པར་བྱས་ནས་ནི། །ཟས་དང་རླུང་དང་སྤྱོད་ལམ་གྱིས། །བསྙེན་པའི་ཆོ་ག་རྫོགས་ནས་ནི། །རྡོ་རྗེ་ལྷ་མོ་མཉམ་སྦྱར་ནས། །གསུམ་པའི་ཚད་ནས་མཉམ་སྦྱར་ཞིང་། །རང་ལུས་བདེ་བས་མ་རྒྱས་པར། །སྤྱད་དང་བརྟག་དང་འདྲིས་པར་བྱ། །དང་པོར་ལུས་ཀྱི་བདེ་བ་ཡིས། །དེ་ནས་རིག་པའི་བདེ་བ་ཉིད། །ཆུ་བོ་ལྟ་བུར་གནས་པར་བྱ། །དེ་ནས་སྣང་བའི་བདེ་བ་ཡིས། །ཟག་པ་ཟད་ཅིང་བར་ཆད་མེད། །སྡུག་བསྔལ་བདེར་སྨིན་འཆི་བ་མེད། །འདུ་འབྲལ་རླུང་ལ་དབང་ཐོབ་ཅིང་། །བདེ་བ་ཆེན་པོའི་ངོ་བོར་འཇུག །དེ་ནས་བདེ་བ་ཆེན་པོ་ཉིད། །རང་གི་ངོ་བོས་རྟག་ཏུ་སྟོང་། །སྟོང་པའི་ཐིག་ལེ་གཡོ་བ་མེད། །བདེ་ཆེན་ཐིག་ལེ་རྒྱུ་བ་མེད། །བདེ་ཆེན་ནུས་པ་བརྟན་གྱི་བར། །རྟོག་པའི་ཆོ་ག་མ་ཡིན་པས། །ལྷ་མོ་སྟོང་དང་མཉམ་སྦྱར་ཡང་། །ཐབས་དང་རླུང་ལ་བརྟེན་པ་ཡིས། །བྱང་ཆུབ་སེམས་ནི་འཕོ་བ་མེད། །བྱང་ཆུབ་སེམས་སྤངས་རྣམ་པར་རྒྱལ། །ལུས་རྒུད་རྣམ་ཤེས་བྱིང་གྱུར་པས། །གལ་ཏེ་དེ་ལྷའི་རྟགས་བྱུང་ན། །རྨི་ལམ་དུའང་ནན་ཏན་བྱ། །གལ་ཏེ་ཐབས་དང་སྟོབས་བྲལ་ན། །འདུ་བྱེད་སྤངས་ཏེ་ལྕེ་ཡིས་བླང་། །དང་པོར་རྒྱལ་རིགས་བྲམ་ཟེ་མོ། །དེ་ནས་ཡིད་ཀྱི་ལྷ་མོ་སྟེ། །དེ་ནས་ཏིང་འཛིན་མངོན་སྣང་ཡིན། །ཐ་མ་མི་ཤེས་ལྷ་མོ་ལྔ། །ཆགས་དང་མཛེས་པར་རོལ་པ་ཡིས། །ནམ་མཁའི་མཐའ་གཏུགས་སྣང་བ་ཀུན། །བདེ་ཆེན་མི་རྟོག་གཟུགས་སུ་འབར། །དྭངས་སྙིགས་རྒྱུ་རྐྱེན་སྐྱེ་འགག་མེད། །ཇི་སྲིད་ནམ་མཁའི་མཐས་གཏུགས་པར། །བདེ་བ་ཆེན་པོ་འཕེལ་འགྲིབ་མེད། །ཤེས་པ་འདུས་པའི་རིམ་པ་ཡིས། །བདུད་རྩི་ཐིག་ལེར་འཇུག་པ་དང་། །རེ་དོགས་བཅས་པའི་ཡིད་མིན་པས། །འཆི་འཕོའི་དུས་དང་མཚམས་སྦྱར་ཡིན། །དེ་ལ་གང་དུ་ཅི་སྐྱེས་པ། །མ་ལུས་སྒྱུ་མར་སྣང་ན་ནི། །སྒྱུ་མའི་ཡེ་
ཤེས་བདེ་ཆེན་ཏེ། །འདི་དང་བར་མར་དབྱེར་མེད་པས། །སྐྱེ་འཆི་འཕོ་འགྱུར་གནས་དང་བྲལ། །རྒྱལ་བའི་དཀྱིལ་འཁོར་བཀོད་པ་ལ། །མཐོང་དང་མོས་པ་མཆོད་པས་ཀྱང་། །རྡོ་རྗེ་འཛིན་དང་མཉམ་འགྱུར་ནས། །ཚེ་འདིའི་བདེ་བ་ཐོབ་འགྱུར་ན། །བཅུག་ཅིང་དབང་བསྐུར་ཐོབ་པ་དང་། །བསྒོམས་དང་ཉམས་ལ་གནས་པ་དང་། །བརྟན་ཞིང་ཡོངས་སུ་རྫོགས་པ་ཉིད། །དཀའ་ཐུབ་འབད་མེད་བདེ་བ་ཡིས། །ལོ་ཟླ་དུས་ཚོད་བྲལ་བ་ཡི། །ད་ལྟ་ཉིད་དུ་བདེ་མཆོག་འགྲུབ། །དཀའ་དང་འབྲལ་བ་མེད་པ་ནི། །ཐུན་མོང་དངོས་གྲུབ་སྨོས་ཅི་དགོས། །བདེ་ཞིང་ཤེས་རབ་ལྡན་པ་དང་། །མཁས་དང་ལོངས་སྤྱོད་ཀུན་རྫོགས་ཀྱང་། །དབང་བསྐུར་གནང་བ་མ་ཐོབ་པར། །དངོས་གྲུབ་གང་ཡང་མི་འབྱུང་སྟེ། །སྐྱེ་བོ་ཉིད་དུ་འགྱུར་ཕྱིར་རོ། །དེ་བས་གང་ཟག་དམན་པ་དེས། །དབང་དང་མན་ངག་བྲལ་བ་ཡིས། །གསང་བའི་དོན་ལ་ཅི་སྤྱད་ཀྱང་། །བླུན་པོས་རལ་གྲི་བསྐོར་བ་ལྟར། །འདོད་པའི་དོན་དང་བྲལ་ནས་ཀྱང་། །རང་ཉིད་བརླག་ཅིང་འཆི་བར་འགྱུར། །དབང་ནི་ནུས་པ་ཞེས་བཤད་ཅིང་། །ནུས་པ་རིམ་པ་གང་འཕེལ་བ། །ལམ་དང་ཏིང་འཛིན་ཁྱད་པར་ཏེ། །སྤྱོད་པ་དག་ཀྱང་ཤེས་པར་བྱ། །གང་ལ་གང་ནི་ནུས་མེད་ན། །དེ་ལ་དེ་བསྐུར་ནུས་པ་མེད། །དེ་བས་དེ་ཡང་ནུས་མེད་པས། །དབང་ཐོབ་མ་ཡིན་དམན་པ་ཡིན། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། དབང་བསྐུར་བའི་ཆོ་ག་བསྟན་པའི་ལེའུ་སྟེ་བཅོ་ལྔ་པའོ།། །།དེ་ནས་གསང་བའི་བདག་པོ་ཡིས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་རྒྱལ་བ་ཐམས་ཅད་ཀྱི། །སྐུ་གསུང་ཐུགས་ཀྱི་ངོ་བོ་ཉིད། །འབར་བའི་རྒྱལ་པོ་ཧེ་རུ་ཀ །ཡེ་ཤེས་གཙོ་ལ་ཕྱག་འཚལ་ལོ། །འབར་བའི་སྐུ་གསུང་ཐུགས་བསྟན་ཕྱིར། །ཕྱག་རྒྱ་གཅིག་པ་བཤད་དུ་གསོལ། །ཞེས་གསོལ་པ་ལས་བཅོམ་ལྡན་འདས། །ཡེ་ཤེས་རྔམ་པའི་རྒྱལ་པོ་ཡིས། །འདི་སྐད་ཅེས་
ནི་བཀའ་སྩལ་ཏོ། །ཕྱོགས་བཅུའི་རྒྱལ་བའི་ངོ་བོ་ནི། །མ་སྐྱེས་བདེ་ཆེན་ཧེ་རུ་ཀ །གཉིས་མེད་ཐིག་ལེར་འོད་གསལ་བ། །ཕྱག་རྒྱ་གཅིག་པ་ཞེས་བཤད་དོ། །དང་པོར་དུར་ཁྲོད་ཆེན་པོ་ནི། །རབ་དབེན་ཡིད་འཐད་གནས་ཆེན་པོར། །སྣང་དང་མི་སྣང་བདག་པོ་ལ། །བསླང་དང་བྱིན་བརླབ་བགེགས་བཅོམ་ལ། །ཆོ་ག་རྒྱས་པར་བརྩམ་པར་བྱ། །བར་ཆད་ཀུན་བྲལ་བདག་པོའི་སེམས། །ལྷན་ཅིག་བདག་ཉིད་གནས་པར་བྱ། །འཇིགས་དང་རེ་དོགས་རྣམ་པར་སྤང་། །གཙང་དང་དད་ལྡན་དཀའ་ཐུབ་བྲལ། །བརྟུལ་ཞུགས་ཆེ་ཞིང་སྦྱོར་བ་ཡིས། །དབང་དང་དམ་ཚིག་ལྡན་པ་དང་། །ཁུ་འཕྲིགས་ཆུང་ཞིང་བརྟན་པ་དང་། །གདེང་ལྡན་བར་ཆད་བསམ་པ་མེད། །སྙིང་རྗེར་ལྡན་ཞིང་ལེ་ལོ་མེད། །ཏིང་འཛིན་སྔགས་དང་ཆོ་གར་ལྡན། །གང་ཞིག་མི་བསྟན་གང་ཟག་ནི། །གསང་ཆུང་ལེ་ལོ་སེར་སྣ་ཆེ། །སྒྲོ་སྐུར་གྲོགས་པོའི་ཉམས་ལེན་ཅིང་། །ཕྱི་ནང་ཅན་དང་དཀའ་ཐུབ་ཅན། །གཙང་སྦྲ་ཅན་དང་འཛིན་རྟོག་ཅན། །སྒྲོ་སྐུར་ཅན་དང་བརྐམ་ཆགས་ཅན། །འདོད་ཆགས་ཞེ་སྡང་གཏི་མུག་དང་། །ང་རྒྱལ་ཕྲག་དོག་ལྡན་པ་སྤང་། །དུར་ཁྲོད་རྫས་ལ་བརྟེན་པ་ཡི། །མཆོད་པ་ལྔ་དང་བསྒྲུབ་པའི་རྫས། །ཤ་ལྔ་བདུད་རྩི་ལྔ་ལ་སོགས། །བནྡྷ་ཞིང་ཆེན་རྐང་གླིང་དང་། །ནང་དང་གསང་བའི་མཆོད་པ་དང་། །རྨད་དུ་བྱུང་བའི་རྫས་དག་བཤམ། །དུས་ནི་བཀྲ་ཤིས་འབྱོར་པ་དང་། །ཉ་དང་ཚེས་བརྒྱད་ལ་སོགས་ལ། །སྔོན་དུ་བྱ་བ་ཀུན་རྫོགས་ནས། །སྒྲུབ་པའི་བར་ཆད་བསལ་བར་བྱ། །དཀྱིལ་འཁོར་ཚད་དང་ལྡན་པ་ལ། །དུར་ཁྲོད་མཛེས་པའི་རྫས་བྱུགས་ལ། །དམར་ཆེན་ཆག་ཆག་བཏབ་པ་ལ། །སྟ་གོན་བྱ་བ་ཇི་བཞིན་བརྩམ། །དུར་ཁྲོད་རྒྱུས་པ་ཁ་དོག་བསྒྱུར། །ལེགས་པར་འཇུར་མདུད་མེད་པ་ཡིས། །ཡབ་ཡུམ་གཉིས་མེད་ལས་བྱུང་བའི། །བྱིན་བརླབས་ཐིག་ནི་གདབ་པར་བྱ། །དུར་ཁྲོད་ཐལ་བ་ལས་བྱུང་བའི། །ཚོན་ལྔ་ཡེ་ཤེས་ལྔར་ལྡན་པའི། །དུར་ཁྲོད་དཀྱིལ་འཁོར་འཇིགས་པར་ནི། །ལྷ་ཡི་ང་རྒྱལ་ལྡན་པས་བྲི། །
དབུས་སུ་ཟླ་གམ་ཁ་སྤྲོད་བྲི། །བྱང་ཆུབ་སེམས་དང་ཆགས་པའི་མདོག །ཕྱི་རིམ་ཟླ་གམ་དམར་པོ་ལ། །ཐོད་ཕྲེང་སྒོ་གཅིག་ལྡན་པ་བྲི། །ཕྱི་རོལ་དུར་ཁྲོད་རྫས་རྣམས་དང་། །རྨད་དུ་བྱུང་བའི་མཆོད་པས་བརྒྱན། །མེ་མར་དགུ་ཡིས་མཛེས་པར་བརྒྱན། །བཀྲ་ཤིས་ཞལ་བུ་ཁ་སྦྱོར་ལ། །ཡབ་ཡུམ་མཚན་མར་བཅས་པ་གཞག །དངོས་གྲུབ་ཞལ་བུ་རྟེན་དང་བཅས། །བདུད་རྩི་ཤ་ལྔ་དཔའ་བོ་ལྔ། །དངོས་གྲུབ་ཡི་གར་བཅས་པ་དག །རྣལ་འབྱོར་སྐྱེས་བུའི་གཡས་སུ་གཞག །རང་རང་གདན་ལ་འཁོད་ནས་ནི། །སྔོན་འགྲོའི་ཆོ་ག་རྫོགས་ནས་ནི། །ཐུན་མོང་སྤྱོད་པ་རིང་སྤངས་ལ། །སྤྱོད་ཡུལ་སྒྱུར་བའི་ཆོ་ག་བྱ། །དཔའ་བོ་ཆེན་པོའི་རྣལ་འབྱོར་པས། །མ་བཅོས་ཆོས་ཀྱི་དབྱིངས་ཉིད་ལ། །གནས་པ་མེད་པའི་དོན་གྱིས་བསྒོམ། །སྙིང་རྗེ་ཆེན་པོའི་ཏིང་ངེ་འཛིན། །དམིགས་པ་མེད་པའི་གནས་ཐོབ་ནས། །ས་བོན་སྙིང་པོ་འཕྲོ་འདུ་ཡིས། །བསྲེག་སྦྱང་སྟོང་པར་གནས་པ་ལས། །རང་གི་རིག་པ་རང་སྣང་བའི། །ས་བོན་ལས་ནི་འབྱུང་ལྔ་བསྒོམ། །རི་རབ་སྟེང་དུ་གཞལ་ཡས་ཁང་། །དུར་ཁྲོད་འབར་བའི་དཀྱིལ་འཁོར་ནི། །ཟླ་ཁམ་ཐོད་ཕྲེང་སྒོ་གཅིག་བསྒོམ། །ཆོ་ག་རྫོགས་པའི་སྦྱོར་བ་ལས། །འབར་བའི་རྒྱལ་པོ་ཧེ་རུ་ཀ །ཡབ་ཡུམ་ཞལ་སྦྱར་གནས་བཞིན་བསྒོམ། །དབང་དང་བྱིན་རླབས་སྙིང་པོར་བཅས། །དུར་ཁྲོད་རྒྱན་ཆས་ལྡན་པར་བྱ། །ཕྱོགས་བཅུ་དུས་བཞིའི་སངས་རྒྱས་ཀུན། །དུར་ཁྲོད་དཀྱིལ་འཁོར་ཀུན་གྱིས་གྲུབ། །འབར་བའི་དཀྱིལ་འཁོར་རྡུལ་སྙེད་ཀྱང་། །རིག་པའི་རྒྱལ་པོས་གཟུགས་སུ་འགྱུར། །ཕྱག་རྒྱ་བཞི་ཡིས་གཉིས་མེད་པར། །ཐིམ་པར་བྱིན་རླབས་ལྡན་པར་བསམ། །དེ་ནས་ཕྱག་རྒྱ་ཆེར་བྱས་ལ། །ཡབ་ཡུམ་བརྟན་པའི་ཏིང་འཛིན་བསྒོམ། །ཕྱག་འཚལ་བརྟན་བཞུགས་མཆོད་པ་དང་། །བཟླས་པའི་བྱེ་བྲག་སྲོག་ལྡན་པས། །འོད་དང་སྒྲ་དང་དྲི་ལ་སོགས། །མཚན་མ་བརྟན་པོ་བྱུང་བའི་བར། །སྟོང་ཚིགས་མཆོད་དང་བསྟོད་པ་དང་། །
གོམས་པའི་བློ་ནི་འབད་པར་བྱ། །དེ་ནས་དཀྱིལ་འཁོར་ཞལ་བསྒྱུར་ནས། །དང་པོར་བར་ཆད་བཟློག་པ་དང་། །དཀྱིལ་འཁོར་བསྐྱེད་དང་དབབ་བསྡིམ་དང་། །མཆོད་བསྟོད་བཟླས་ཤིང་དངོས་གྲུབ་གསོལ། །སློབ་མ་འཇུག་དང་དབང་བསྐུར་དང་། །སྒྲུབ་པའི་གནང་བ་སྦྱིན་པར་བྱ། །དེ་ནས་ཅི་ལའང་ཐོགས་པ་མེད། །དཀྱིལ་འཁོར་རྒྱས་དང་བསྡུས་པ་དང་། །དཀྱིལ་འཁོར་ཀུན་གྱི་སྙིང་པོའོ། །དངོས་གྲུབ་བཅུད་བསྡུས་འབྲུ་བརྒྱད་དེ། །དེ་ལས་གཞན་པའི་སྙིང་པོ་མེད། །དེ་བས་བཟླས་པའི་སྙིང་པོ་སྦྱིན། །ཨོཾ་རུ་ལུ་རུ་ལུ་ཧཱུཾ་བྷྱོ་ཧཱུཾ། ཨོཾ་ནི་རྒྱལ་བ་ཡབ་ཡུམ་བཅུ། །རུ་ལུ་གོང་མ་ཁྲོ་མོ་བརྒྱད། །རུ་ལུ་འོག་མ་ཕྲ་མེན་བརྒྱད། །ཧཱུཾ་ནི་ཕྱག་རྒྱ་སྒོ་མ་བཞི། །བྷྱོ་ནི་བྲན་མོ་ཉི་ཤུ་བརྒྱད། །ཧཱུཾ་ནི་བྱང་ཆུབ་སེམས་ཀྱི་ངང་། །འབར་བའི་དཀྱིལ་འཁོར་མ་ལུས་པའི། །བཟླས་པའི་མཆོག་ནི་འདི་ལས་མེད། །དང་པོར་འདུན་པས་བག་ཆགས་སྦྱང་། །གཉིས་སུ་དགའ་བས་སྣོད་དུ་རུང་། །གསུམ་པ་དབང་གི་དངོས་གྲུབ་བརླབ། །ཐ་མ་འགྲུབ་པར་དངོས་གྲུབ་བླང་། །གནས་གསུམ་འཕྲོ་འདུ་འོད་ཕྲེང་གིས། །ཕྱི་ནང་བདག་གཞན་བག་ཆགས་སྦྱང་། །མ་ལུས་བདག་ཉིད་སྣོད་དུ་རུང་། །མ་ལུས་སྐུ་གསུང་ཐུགས་ཉིད་ནི། །བདག་གམ་དངོས་གྲུབ་རྫས་ལ་དབབ། །དེ་ཡང་ཕྱག་རྒྱ་བཞི་ཉིད་ཀྱིས། །བདག་གིས་བསྡུས་མཆོད་རོལ་པར་བྱ། །སྐུ་ནི་འཇའ་ཚོན་ཆུ་ཟླ་བཞིན། །གསུང་ནི་སྒྲ་བརྙན་བྲག་ཆ་སྟེ། །ཐུགས་ནི་སྤྲིན་མེད་ནམ་མཁའ་བཞིན། །འདི་ནི་སྤྲོས་བཅས་མན་ངག་ཡིན། །འབར་བའི་རྒྱལ་པོ་ཧེ་རུ་ཀ །ཁམས་གསུམ་རྒྱུ་བ་ཟིལ་གྱིས་གནན། །འདོད་ཆགས་དབང་མོ་མན་ངག་གིས། །བདེ་ཆེན་སྐྱོན་དང་བྲལ་བར་བྱ། །གཉིས་མེད་ཉི་ཟླ་ཁ་སྦྱོར་གྱིས། །ས་གསུམ་སྐུ་གསུམ་དུས་གཅིག་ནོན། །ཡབ་ཡུམ་གཉིས་མེད་རང་བཞིན་གྱིས། །བརྟག་པ་རྣམ་པ་གསུམ་དུ་གསུངས། །དང་པོ་གཉིས་པ་གསུམ་པ་ནི། །ཕོ་མོ་ལྷ་དང་ལྷ་མོར་ནི། །རིག་པ་སྟོང་པའི་རང་བཞིན་གྱིས། །ཡབ་ཡུམ་ཆགས་དང་མཛེས་པ་ཡིས། །
བརྟག་དང་གོམས་པའི་སྟོབས་ལས་བྱུང་། །རིགས་པའི་དཀྱིལ་འཁོར་འོད་འདུས་པས། །ཐིག་ལེ་འོད་ཀྱི་གོང་བུར་གསལ། །དེ་ལས་རང་གི་ལྷར་བསྐྱེད་ཅིང་། །སྤྱན་དྲང་མཆོད་པ་རྒྱུན་དུ་བྱ། །རང་ཉིད་བརྟན་པར་མ་གྱུར་པས། །དགེས་ཤིང་ཐ་མལ་སྤྱོད་པས་མིན། །ཚོགས་ཀྱི་ཡོ་བྱད་འདི་དག་ནི། །དང་པོར་ལྷ་ལ་མཆོད་པ་སྟེ། །བར་པ་རྣལ་འབྱོར་མཉེས་བྱས་ནས། །ཐ་མས་ལྷག་མའི་མཆོད་པ་ཉིད། །དང་པོར་རང་རང་བསྐྱེད་པ་དང་། །གཉིས་པས་གདན་སྟེང་གནས་ནས་དགུག །གསུམ་པ་ཟིལ་མནན་དམ་ཚིག་བསྲེ། །བཞི་པ་རང་སྔགས་རྫས་ཀྱིས་མཆོད། །ལྔ་པ་དམ་བདར་ཕྲིན་ལས་བཅོལ། །དྲུག་པ་ཁ་ཆུས་དབང་དུ་བྲན། །བདུན་པ་དང་པོར་སྦྱིན་བསྲེག་བྱ། །བརྒྱད་པས་གཏེར་སྦ་རྒྱ་ཡིས་གདབ། །ཐ་མ་ཟ་ལམ་བསྟན་ནས་ཀྱང་། །མ་ལུས་ཁྱབ་པའི་ཚུལ་དུ་བསྔོ། །དཀྱིལ་འཁོར་བསྡུ་ཞིང་སྤྱོད་ལམ་བྱའོ། །འགྲོ་ལ་སྦྱིན་གཏང་བླ་མ་ལ། །འཁོར་གསུམ་ཡོངས་དག་མཆོད་པར་འབུལ། །འདི་ལྟར་བསྒྲུབས་ཤིང་བསྒོམས་པས་ན། །ཉི་ཟླ་འོད་ལ་འདུག་ནས་ཀྱང་། །ལུས་ལ་ཆོ་འཕྲུལ་བཞིས་བསྟན་ནས། །སྒྲ་དང་འོད་ཀྱིས་གང་བྱས་ནས། །མ་ལུས་སྤྲོ་བ་བསྐྱེད་བྱས་ནས། །ཡང་དག་བསྒྲུབ་པའི་ཞིང་ཁམས་སུ། །རེ་དོགས་མེད་པར་སངས་རྒྱས་སོ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། དཔལ་ཧེ་རུ་ཀ་ཡབ་ཡུམ་སྒྲུབ་པའི་ལེའུ་སྟེ་བཅུ་དྲུག་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཕྱོགས་བཅུའི་སངས་རྒྱས་ཐམས་ཅད་ཀྱི། །རང་བྱུང་འབར་བའི་རྒྱལ་པོ་ཁྱོད། །དུར་ཁྲོད་འབར་བའི་དཀྱིལ་འཁོར་རྣམས། །བདག་ལ་ལེགས་པར་བཤད་དུ་གསོལ། །དེ་ནས་དེ་བཞིན་གཤེགས་པ་ཐམས་ཅད་ཀྱི་ངོ་བོ་དཔལ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །དུར་ཁྲོད་ཆེན་པོར་རབ་དབེན་པས། །སྐྱེ་བོ་འདུས་དང་རྣམ་
བྲལ་ཞིང་། །སྐྱོན་བྲལ་ཡོན་ཏན་ཀུན་རྫོགས་པའི། །བདག་དབང་བར་ཆད་མེད་པའི་སར། །སྔོན་བྱའི་ཆོ་ག་རྫོགས་པ་དང་། །ས་ནི་དག་པར་གཟུང་བྱ་སྟེ། །དཀྱིལ་འཁོར་ཚད་དང་ལྡན་པར་བྱ། །མཐུ་ཆེན་རྒྱལ་པོ་སྡེ་བཞི་ལ། །བར་ཆད་བསལ་བའི་ལས་བཅོལ་ནས། །ཕྱོགས་བཅུ་ཁྲོ་བོའི་བྱིན་རླབས་ཀྱིས། །ཕྱོགས་སྐྱོང་སོ་སོར་གཟིར་ནས་ཀྱང་། །གནས་ཀྱི་སྲུང་མར་བསྒོ་བ་དང་། །རང་རང་འཁོར་དུ་གཏོགས་པ་རྣམས། །བསྐྲད་ཅིང་བར་ཆད་བསལ་བར་བྱ། །དེ་ནས་ཕྱག་རྒྱ་ཆེན་པོ་ཡིས། །མཎྜལ་ནག་པོ་གྲུ་གསུམ་དུ། །བར་ཆད་དམ་སྲི་གནན་བྱ་སྟེ། །བག་ཡངས་བདེ་བའི་ནན་ཏན་བྱ། །དུར་ཁྲོད་ཆེན་པོའི་བདག་པོ་དག །བསྐྱེད་ཅིང་ཟིལ་གྱིས་གནན་བྱས་ཏེ། །གནས་ཀྱི་སྲུང་མར་བཀོལ་བ་དང་། །དུར་ཁྲོད་གཞལ་ཡས་ཁང་དུ་བརླབ། །དཀྱིལ་འཁོར་དུར་ཁྲོད་ཆེན་པོ་ཡི། །བདུད་རྩི་ལྔ་ཡིས་སྐྱང་ནུལ་བྱ། །དབང་གི་རཀྟ་ཕོ་བྲང་དུ། །དུར་ཁྲོད་ཐིག་སྐུད་གསུམ་བསྒྲིལ་གྱིས། །བྱིན་བརླབ་མཁའ་གསང་སྦྱོར་བ་ཡིས། །བྱང་ཆུབ་སེམས་སུ་བྱིན་གྱིས་བརླབ། །དཔལ་ལྡན་རྔམ་པའི་རྒྱལ་པོ་དང་། །གཟུངས་མ་འདོད་པའི་དབང་མོ་ཡིས། །བྱིན་རླབས་ལྡན་པའི་ཐིག་བཏབ་པས། །ཕོ་བྲང་སོ་སོར་བགོ་བར་བྱ། །དུར་ཁྲོད་བདུད་རྩི་ལྔ་ཡི་ཚོན། །སྔགས་མཆོག་དཀྱིལ་འཁོར་འཇིགས་པ་བྲི། །དཀྱིལ་འཁོར་ཟླ་ཁམ་འདྲ་བ་ལ། །ཐིག་བཞི་བཏབ་པས་ལེ་ཚེ་དགུ། །དབུས་སུ་ཟླ་ཁམ་ཁ་སྤྲོད་ལ། །དཔལ་ཆེན་ཡབ་ཡུམ་བཅས་པ་དགོད། །ཕྱོགས་བཞི་མཚམས་བརྒྱད་ཟླ་ཁམ་བརྒྱད། །ནང་དུ་ཁ་བལྟས་མེ་རི་ཅན། །འཇིགས་པའི་དཀྱིལ་འཁོར་བྲི་བར་བྱ། །དུར་ཁྲོད་ཆེན་པོའི་རྟ་བབས་ཅན། །སྣ་ཚོགས་དུར་ཁྲོད་རྒྱན་བཅས་པ། །རྣལ་འབྱོར་མཉམ་པར་གཞག་པས་བྲི། །གོའུ་རི་མ་སོགས་དཔལ་འབར་མ། །སོ་སོའི་མཚན་མས་དགྲམ་པར་བྱ། །དུར་ཁྲོད་རྒྱན་ཆ་རྫོགས་པར་དགྲམ། །དཔལ་གྱི་སྣང་བ་ཆེན་པོ་དགུ། །དུར་ཁྲོད་རྫས་ལ་བྱས་པ་གཞག །གལ་ཏེ་མི་གསལ་བར་ཆད་ནི། །བགེགས་བསྐྲད་བཤགས་ལ་གྲལ་དུ་དགོད། །གཞན་ཡང་མཆོད་དང་
དངོས་གྲུབ་རྫས། །སོ་སོར་འཚམས་པར་ཅི་རིགས་གཞག །རྣལ་འབྱོར་རྒྱན་ཆས་གྲལ་དུ་འཁོད། །རང་རང་གསལ་བའི་ཏིང་འཛིན་གྱིས། །དུར་ཁྲོད་བགེགས་ནི་ཀུན་བསལ་ནས། །རྒྱལ་རིགས་རྗེའུ་ཡིད་འོང་བའི། །རྨད་བྱུང་བམ་ཆེན་རོ་བླངས་ཏེ། །བཀྲ་ཤིས་རྫས་ཀྱིས་ལུས་བྱུགས་ནས། །དཀྱིལ་འཁོར་ཆེན་པོའི་ཕྱོགས་བཞི་རུ། །རོལ་པའི་བྲོ་ཡིས་སྦྱང་བར་བྱ། །བཀྲ་ཤིས་རྫས་སུ་བྱིན་བརླབས་ནས། །ཕྱག་རྒྱ་ལྔ་ཡིས་སྤྲོས་བྱས་ནས། །དཀྱིལ་འཁོར་སོ་སོར་ཅི་རིགས་པར། །རང་རང་ཕྱག་རྒྱ་བསྐོས་སུ་གདབ། །འདི་དག་ཡང་དག་སྒྲུབ་པའི་རྫས། །མཆོག་དང་ཐུན་མོང་བརྟེན་པའི་གཞི། །དུར་ཁྲོད་ཆེན་པོའི་དཀྱིལ་འཁོར་འདིར། །སྐལ་ལྡན་འདུས་པ་ཀུན་ཚོགས་ནས། །བརྟུལ་ཞུགས་རོལ་པས་སུ་འཇུག་པ། །དངོས་གྲུབ་མཆོག་ལ་སྦྱོར་བར་ངེས། །བརྡ་དང་གནང་བའི་དབང་ཐོབ་ནས། །གཙོ་བོ་ཡབ་ཡུམ་བསྐྱེད་པ་དང་། །བྱིན་རླབས་ཆོ་འཕྲུལ་ཀུན་རྫོགས་ནས། །ཁྲོ་བོ་བརྒྱད་པོ་ཇི་བཞིན་བསྐྱེད། །ཡེ་ཤེས་དམ་ཚིག་ལ་ཐིམ་ནས། །གཟི་བྱིན་བསྐྱེད་དང་བརྟན་པར་བཞུགས། །མཆོད་པ་ཕྱི་ནང་གསང་བ་དང་། །རབ་ཏུ་མཉེས་པར་བསྟོད་པར་བྱ། །གསང་ཆེན་འབར་བའི་ཡིག་འབྲུ་བརྒྱད། །རྩ་བའི་དཀྱིལ་འཁོར་རབ་རྫོགས་པ། །བར་ཆད་མེད་པའི་བརྩོན་འགྲུས་ཀྱིས། །མཚན་མ་ཐོབ་པའི་བར་དུ་བཟླས། །དུས་དྲུག་ཚོགས་ཀྱི་མཆོད་པ་དང་། །དུས་བཞིར་བར་ཆད་བསལ་བ་དང་། །སྟོང་ཚིག་མཆོད་བསྟོད་བཟླས་པ་ནི། །བར་ཆད་མེད་པ་ཆུ་བོ་བཞིན། །གཟུགས་དང་སྒྲ་དང་དྲི་དང་རོ། །རྣལ་འབྱོར་ཡུམ་དང་མཆེད་ལྕམ་ལ། །གསང་བའི་དངོས་གྲུབ་མཚན་ཐོབ་ནས། །རྫས་ལ་བརྟེན་ཏེ་དངོས་གྲུབ་བླང་། །སྔ་མ་ལས་ནི་གནས་བསྒྱུར་ཏེ། །རང་རང་ཆོ་ག་ཇི་བཞིན་སྦྱར། །མཆོད་བསྟོད་ཇི་བཞིན་རབ་རྫོགས་ནས། །དངོས་གྲུབ་བདག་ལ་བསྡུ་བར་བྱ། །དང་པོར་བག་ཆགས་སྦྱངས་བྱས་ཏེ། །གཉིས་པས་རྒྱལ་བའི་སྲས་སུ་བྱ། །གསུམ་པ་
དངོས་གྲུབ་རྫས་ལ་གདབ། །བཞི་པས་དངོས་གྲུབ་བླང་བར་བྱ། །དཀྱིལ་འཁོར་ཆེན་པོར་འཇུག་པ་དང་། །དབང་བསྐུར་ཆོ་གའི་རིམ་པ་བཞིན། །དེ་ནས་དངོས་གྲུབ་རིམ་པས་བླང་། །ལྷག་མའི་ཆོ་ག་རིམ་པ་དང་། །མཚམས་ཀྱི་རིམ་པ་དགྲོལ་བར་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། ཟླ་གམ་དགུ་པའི་སྒྲུབ་ལུགས་ཀྱི་ལེའུ་སྟེ་བཅུ་བདུན་པའོ།། །།དེ་ནས་བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས། དུར་ཁྲོད་ཆེན་པོ་བསྒྲུབ་པའི། དཀྱིལ་འཁོར་ཟླ་གམ་བཅོ་བརྒྱད་པ་འདི་གསུངས་སོ། །འབར་བའི་རྒྱལ་པོ་བསྒྲུབ་འདོད་པས། །རི་བོ་ནགས་འདབས་ཆུ་གླིང་དང་། །དུར་ཁྲོད་གསང་ཕུག་ཉམས་དགའ་བར། །ཕུན་སུམ་ཚོགས་པ་བཞིར་ལྡན་ནས། །རེ་དང་དོགས་པའི་སེམས་སྤངས་ལ། །ཇི་ལྟར་དགའ་བདེ་ལྡན་པས་བསྒྲུབ། །སྔོན་དུ་དབང་རྣམས་ཐོབ་པ་དང་། །དམ་ཚིག་སྙིང་རྗེར་ལྡན་པ་ཡིས། །ངན་པའི་ས་རྣམས་དག་བྱས་ལ། །དུར་ཁྲོད་སར་ནི་བྱིན་གྱིས་བརླབ། །དེ་ནས་ས་གཞི་ཆ་མཉམ་ལ། །རྨད་བྱུང་གསང་བའི་དཀྱིལ་འཁོར་བྱ། །བདུད་རྩི་ལྔ་དང་རཀྟར་བཅས། །དབང་གི་དཀྱིལ་འཁོར་བྱུག་པར་བྱ། །དེ་ནས་དུར་ཁྲོད་སྲད་བུ་ཡིས། །བདུད་རྩི་དང་ནི་ཚོན་བསྲེས་པའི། །བྱིན་བརླབས་ལྡན་པའི་ཐིག་གདབ་ཅིང་། །རང་རང་ཕོ་བྲང་བགོ་བར་བྱ། །དུར་ཁྲོད་འབར་བའི་དཀྱིལ་འཁོར་དུ། །གསང་བའི་དཀྱིལ་འཁོར་ཐིག་འདེབས་ཤིང་། །ཡང་དག་གསང་བའི་དོན་བསྒྲུབ་ཀྱིས། །དཔལ་ཆེན་འཁོར་ཚོགས་གཤེགས་སུ་གསོལ། །དཔལ་ཆེན་འཁོར་ཚོགས་གཤེགས་ནས་ཀྱང་། །དུར་ཁྲོད་རྫས་ལ་བྱིན་བརླབ་ཅིང་། །བདག་ལ་དངོས་གྲུབ་སྩལ་དུ་གསོལ། །འཁོར་ལོ་རྩིབས་བརྒྱད་འབར་བ་ལ། །རྩིབས་མཆན་ཐོད་པའི་མུ་ཁྱུད་ལ། །འཇིགས་ཤིང་གསལ་བའི་མེ་རི་འཕྲོ། །འཇིགས་ཤིང་ཡ་མཚན་སྐྱེ་བའི་གནས། །དབུས་སུ་ཟླ་གམ་དཀར་དམར་གཉིས། །ཁ་སྤྲོད་དཔལ་གྱི་མཚན་མར་གཞག །ཟླ་གམ་ནང་དུ་ཁ་བལྟས་
བརྒྱད། །འཁོར་ལོའི་རྩིབས་ལ་བྲི་བར་བྱ། །རྩིབས་མཆན་ནང་དུ་ཟླ་གམ་བརྒྱད། །ཀུན་ཀྱང་དབང་དང་ཆགས་པའི་ཕྱིར། །ཁ་དོག་དམར་པོ་བྲི་བར་བྱ། །དུར་ཁྲོད་ཀ་བ་གདུང་དག་དང་། །ཐོད་ཕྲེང་སྦྲུལ་དང་ཉི་ཟླས་བརྒྱན། །འབར་བའི་རྒྱན་ཆ་སྣ་ཚོགས་བརྒྱན། །དུར་ཁྲོད་མཆོད་པ་སྣ་ཚོགས་དང་། །ཞལ་བུ་བདུད་རྩི་རཀྟ་དང་། །དཔལ་གྱི་ཞལ་ཟས་ལོངས་སྤྱོད་རྒྱན། །དངོས་གྲུབ་རྟེན་དུ་བཅས་པ་གཞག །དཔལ་གྱི་བན་དྷ་སྙིང་པོ་ཅན། །ཐབས་དང་ཤེས་རབ་ལྡན་པར་དགོད། །རིག་མ་བཅུ་དྲུག་མཚན་མ་ནི། །རིགས་བཟང་ཚུལ་དུ་མཚན་ལྡན་ལ། །གསལ་བའི་རྟགས་གསུམ་བཅངས་པ་འམ། །ཡང་ན་དུར་ཁྲོད་རྫས་སུ་དགོད། །རོལ་མོ་ཧ་སྟའི་གཡབ་མོར་བཅས། །ཇི་བཞིན་པ་ཡི་གནས་སུ་གཞག །གཟི་བརྗིད་མེ་མར་སྣང་བ་དགུ། །ཡེ་ཤེས་དགུ་ཡི་རྟགས་སུ་གཞག །རྡོ་རྗེ་སློབ་དཔོན་འདྲེལ་བཅས་པས། །རང་རང་མཚན་མའི་གྲལ་བཀོད་དེ། །ལྷག་པའི་རྟགས་དང་རྒྱན་ལྡན་པས། །མ་དག་པ་ནི་མཚམས་གཅད་ཅིང་། །དག་པ་ཐམས་ཅད་བྱིན་གྱིས་བརླབ། །གསང་བར་གསང་བའི་དབང་ཐོབ་ནས། །རང་རང་གསང་བའི་ལས་ལ་འཇུག །སྐུ་གསུམ་ས་ལ་གོམས་བྱའི་ཕྱིར། །ཏིང་འཛིན་གསུམ་པོ་ཚུལ་བཞིན་བསྒོམ། །བརྟེན་པ་འབྱུང་བའི་རིམ་སྟེངས་སུ། །བན་དྷ་དབང་པོ་དང་ལྡན་པའི། །རློན་རྩིག་རང་གི་དབྱིབས་བཞིན་དུ། །ཕོ་བྲང་ཉམས་དགའ་གདན་བཅས་བསྒོམ། །ཆོ་ག་གསུམ་གྱིས་སྐུར་བསྐྱེད་ནས། །ཡན་ལག་རྫོགས་པར་ནན་ཏན་བྱ། །འཁོར་གྱི་ལྷ་མོ་བཅུ་དྲུག་ནི། །རང་རང་གདན་དང་ཕྱག་མཚན་དང་། །སྐུ་མདོག་བཞུགས་ཚུལ་མཚན་མ་དག །ཇི་ལྟར་རིགས་པར་སྲས་བསྐྱེད་ལ། །ཡན་ལག་ལྷ་དང་བཅས་པ་དག །རང་རང་གནས་སུ་དགོད་པར་བྱ། །ཡེ་ཤེས་དཀྱིལ་འཁོར་སྤྱན་དྲངས་ཏེ། །དམ་ཚིག་མཆོག་ལ་ཐིམ་པར་བྱ། །དེ་ནས་ཆོ་གའི་གོ་རིམ་དག །མཆོད་བསྟོད་མཉེས་པའི་དོན་དུ་བྱ། །དངོས་གྲུབ་འབྱུང་བའི་སྙིང་པོ་ནི། །
འབྲུ་བརྒྱད་གསང་བའི་དབྱངས་དང་བཅས། །གསལ་བའི་ཚད་དང་ལྡན་པ་ཡིས། །དགའ་དང་བྲོད་པའི་ཚུལ་གྱིས་བཟླས། །སྐུལ་ཚིག་དབྱངས་དང་མཆོད་པ་བྱས། །མཚན་མ་བརྟན་པོ་བྱུང་བ་དང་། །འདོད་པའི་དོན་ནི་མ་རྫོགས་པར། །སྤྱན་དྲངས་གཤེགས་སུ་གསོལ་བ་མིན། །དུར་ཁྲོད་ཆེན་པོའི་དཀྱིལ་འཁོར་འདིར། །གསང་བའི་རྫས་ལ་རྟེན་བཅས་ནས། །དངོས་གྲུབ་མཚན་མ་འདི་བསྒྲུབ་པས། །བདག་ལ་དངོས་གྲུབ་སྩོལ་བ་དང་། །དུར་ཁྲོད་བརྒྱད་ཀྱི་མཁའ་འགྲོ་ཡིས། །དངོས་གྲུབ་རྒྱ་ཆེན་སྩོལ་བ་དང་། །འདོད་པའི་དོན་རྫོགས་དངོས་གྲུབ་མཛོད། །འབྲུ་བརྒྱད་རྩ་བའི་དངོས་གྲུབ་སྩོལ། །བར་ཆད་བསལ་ནས་ཉམས་བརྟག་ལ། །བསྙེན་ནས་བསྒྲུབ་པ་ལས་བསྒྱུར་ཏེ། །ཞིང་ཁམས་རྡུལ་དང་མཉམ་པ་ཡི། །འབར་བའི་བྱིན་རླབས་འོད་བསྡུས་པས། །མ་ལུས་ཁྱབ་པའི་ཆར་ཕབ་པ། །དངོས་གྲུབ་རྫས་ལ་དབབ་པར་བྱ། །དབང་བསྐུར་འཇུག་དང་དམ་ཚིག་དབོག །དངོས་གྲུབ་འདོད་པར་གསོལ་བ་གདབ། །དང་པོར་དཔལ་གྱི་ལོངས་སྤྱོད་དེ། །གཉིས་པ་སློབ་དཔོན་ཉིད་དུ་བཤད། །གསུམ་པ་རྣལ་འབྱོར་ཕོ་མོ་སྟེ། །བླངས་ཏེ་ཐོགས་པ་མེད་པར་སྤྱད། །ལྷག་མའི་ལས་ཀྱི་ཆོ་ག་དག །དང་པོར་སྦྱིན་བསྲེག་ཆོ་ག་བྱ། །བར་མ་མི་ཟད་གཏེར་དུ་སྦ། །ཐ་མ་མཁའ་འགྲོ་ཡོངས་ལ་བཏང་། །ལས་ཀྱི་ལྷག་མ་བསྡུ་བྱས་ལ། །སློབ་དཔོན་མཉེས་པའི་ཆོ་ག་བྱ། །ཐབས་དང་ལྡན་པའི་རྣལ་འབྱོར་གྱིས། །འདི་ལྟར་བར་ཆད་མེད་བསྒྲུབས་ན། །ཆོ་འཕྲུལ་བཞི་དང་ལྡན་པ་ཡིས། །ཡང་དག་བསྒྲུབ་པའི་དངོས་གྲུབ་འཐོབ། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། ཟླ་གམ་བཅོ་བརྒྱད་པ་སྒྲུབ་པའི་ལེའུ་སྟེ་བཅོ་བརྒྱད་པའོ།། །།དེ་ནས་བཅོམ་ལྡན་འདས་རྔམ་པའི་རྒྱལ་པོ་དེས། དུར་ཁྲོད་ཆེན་པོའི་དཀྱིལ་འཁོར་ཟླ་གམ་དྲུག་ཅུ་རྩ་བརྒྱད་པའི་ཆོ་ག་འདི་གསུངས་སོ། །དང་པོར་དབང་ཐོབ་བྱིན་ལྡན་པའི། །ལས་དང་བྱ་བ་མཁས་པ་དང་། །བར་ཆད་འཇིགས་བྲལ་སྒྲུབ་པ་པོས། །རི་རྩེ་དགོན་པ་དུར་ཁྲོད་དང་། །རབ་ཏུ་དབེན་པའི་ས་ཕྱོགས་
སུ། །ས་གཞི་ལེགས་པར་བརྟག་པ་དང་། །བསླང་དང་སྦྱང་དང་བྱིན་བརླབ་པ། །ཆོ་ག་བཞིན་དུ་བྱས་ནས་ནི། །དཀྱིལ་འཁོར་ཚད་དང་ལྡན་པར་བྱ། །དམ་རྫས་བདུད་རྩི་བྱུགས་བྱས་ནས། །དུར་ཁྲོད་སྲད་བུ་ཚད་ལྡན་པས། །དམ་རྫས་རྨད་བྱུང་འབར་བའི་ཚོགས། །བྱིན་རླབས་ལྡན་པས་ཐིག་གདབ་ལ། །ཕོ་བྲང་རྨད་བྱུང་སོ་སོར་བགོ། །ཕོ་བྲང་ཟླུམ་པོ་ལེ་ཚེ་དགུ། །ཐོད་པའི་ར་བས་ཡང་དག་བསྐོར། །ཕྱི་རིམ་འཁོར་ལོ་རྩིབས་བརྒྱད་ལྡན། །རྩིབས་མཆན་ཐོད་པའི་ར་བས་བསྐོར། །འབར་བའི་སྒོ་བཞིས་རྣམ་པར་བརྒྱན། །ཕྱི་རིམ་ཐོད་སྐམ་གཞལ་ཡས་ཁང་། །མ་མོའི་གནས་སུ་ལྡན་པ་དེ། །དེ་ཡི་སྒོ་དང་ལྡན་པར་བྱ། །ཕྱི་རིམ་རྡོ་རྗེ་མེ་རི་ཕྲེང་། །བར་མཚམས་མེད་པར་བསྐོར་བར་བྱ། །དབུས་སུ་ཟླ་གམ་ཞལ་སྦྱོར་ལ། །དཔལ་གྱི་མཚན་མར་བཅས་པ་བྲི། །ཕྱོགས་བཞིར་ཟླ་གམ་ཁ་སྤྲོད་བྲི། །རིགས་བཞི་ཁྲག་འཐུང་ཐུགས་མཚན་དགོད། །ཕྱི་རིམ་འཁོར་ལོ་རྩིབས་བརྒྱད་ལ། །ཟླ་གམ་ནང་དུ་ཁ་བལྟས་བརྒྱད། །མ་མོ་བརྒྱད་ཀྱི་མཚན་མ་གཞག །རྩིབས་མཆན་བརྒྱད་ལ་ཕྱིར་བལྟ་བརྒྱད། །ཕྲ་མེན་བརྒྱད་ཀྱི་མཚན་མར་གཞག །སྒོ་བཞིར་ཕྱིར་བལྟའི་ཟླ་གམ་ལ། །སྒོ་བཞིའི་མཚན་མ་གཞག་པར་བྱ། །ཕྱི་རིམ་ཕྱིར་བལྟ་ཉི་ཤུ་བརྒྱད། །དབང་ཕྱུག་སྒལ་ཚིགས་བཅས་པར་དགོད། །ཕྱི་རིམ་བསྐལ་པའི་མེ་རི་ལ། །ཟླ་གམ་ཕྱིར་བལྟ་བཅུ་པོ་ལ། །ཁྲོ་བོ་བཅུ་ཡི་མཚན་མ་གདབ། །དུར་ཁྲོད་དཀྱིལ་འཁོར་ཆེན་པོ་སྟེ། །འབར་མ་ཆེན་པོ་བཞུགས་པའི་གནས། །མཁའ་འགྲོ་སྤྲིན་ཕུང་འདུ་བའི་རྟེན། །འཇིགས་པའི་རྒྱན་ཆས་གཏིབས་པ་ཡི། །ཕོ་བྲང་ལྷུན་རྫོགས་ཀ་པཱ་ལ། །དབང་པོ་ལྔ་ལྡན་འཕྲུལ་གྱི་རྫས། །ཆོ་འཕྲུལ་སྣ་ཚོགས་བསྒྲུབ་པའི་རྟེན། །ཆོ་འཕྲུལ་མཁའ་ལ་སྦྱོར་བའི་སྐྱོགས། །ཐོད་པ་གསུམ་དུ་སྣང་བ་ནི། །དུས་གསུམ་བཞུགས་པའི་སངས་རྒྱས་རྣམས། །སྐུ་གསུམ་ལྷུན་གྱིས་གྲུབ་པའི་རྟགས། །དུར་ཁྲོད་རྒྱན་ཆས་རྫོགས་པས་དགོད། །རྨད་བྱུང་གཏོར་མ་མཆོད་པར་བཅས། །དངོས་
གྲུབ་རྫས་སུ་བཅས་པར་དགྲམ། །རྡོ་རྗེ་རྣལ་འབྱོར་འདུས་པ་ཡིས། །མ་ལུས་དག་པར་བྱིན་བརླབས་ལ། །རྟགས་དང་རྒྱན་ཆས་མཛེས་པར་བྱ། །དང་པོ་དེ་བཞིན་ཉིད་བསྒོམས་ལ། །དེ་ནས་མཚམས་སྦྱོར་ཏིང་འཛིན་བསྒོམ། །རྒྱུ་ལས་འབྲས་བུར་རང་སྣང་བས། །དབང་ཆེན་འབྱུང་ལྔ་རིམ་པར་བརྩེག །དུར་ཁྲོད་དཀྱིལ་འཁོར་བསྒྲུབ་པར་བྱ། །རང་གི་དབྱིངས་ཀྱི་གདན་སྟེངས་སུ། །རང་རང་ལྷ་ཡི་ཆ་བྱད་བཞིན། །དང་པོར་གཙོ་བོ་བསྐྱེད་པར་བྱ། །དེ་ནས་དེ་ལ་འཁོར་གྱི་ཚོགས། །དྲུག་ཅུ་རྩ་དྲུག་བསྐྱེད་པར་བྱ། །ཡན་ལག་སྙིང་པོ་གསལ་རྫོགས་ནས། །ཡེ་ཤེས་སྤྱན་དྲང་བསྡིམ་བྱས་ལ། །མཆོད་བསྟོད་མཉེས་པའི་ཆོ་ག་བྱ། །ཡེ་ཤེས་སྙིང་པོ་འབྲུ་བརྒྱད་པོ། །ཡེ་ཤེས་བྱིན་རླབས་འོད་ཟེར་ལྟར། །དབང་དང་བྱིན་རླབས་ཐོབ་བྱས་ནས། །དངོས་གྲུབ་རང་གི་གནས་སུ་བསྡིམ། །རྟགས་དང་མཚན་མ་དབང་ཐོབ་ནས། །སྔ་མ་ལས་ནི་ཚུལ་བསྒྱུར་ནས། །རང་གི་ཆོ་ག་རྫོགས་པ་ན། །དངོས་གྲུབ་འདོད་པར་གསོལ་གདབ་ཅིང་། །གསང་བའི་མཆོད་པ་རྫོགས་པ་དང་། །དུར་ཁྲོད་འབར་བའི་དཀྱིལ་འཁོར་དུ། །འདུག་ཅིང་དམ་ཕོག་དབང་བསྐུར་ལ། །དངོས་གྲུབ་རིམ་པ་བླང་བར་བྱ། །ལྷག་མའི་ཆོ་ག་ཇི་སྙེད་པ། །རང་གི་ལས་དང་མཐུན་པར་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། ཟླ་གམ་དྲུག་ཅུ་རྩ་བརྒྱད་པའི་སྒྲུབ་ལུགས་ཏེ་ལེའུ་བཅུ་དགུ་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་གྱིས། །འཁོར་བའི་དུར་ཁྲོད་སྒྲོལ་བའི་བདག །རཱུ་ཏྲ་བསྒྲལ་བའི་ཕུང་པོ་ཉིད། །དཀྱིལ་འཁོར་ཆེན་པོ་མཛད་དུ་གསོལ། །ཞེས་གསོལ་པ་ལས། བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས། འདི་སྐད་ཅེས་གསུངས་སོ། །ཆོས་རྣམས་ཡུལ་སེམས་གཉིས་མེད་ལ། །བདག་དང་བདག་གིར་འཛིན་པ་ཡིས། །རཱུ་ཏྲ་གསུམ་གྱིས་ངོ་བོར་བརྟགས། །དེ་ཉིད་མ་སྐྱེས་རྟོགས་པས་བསྒྲལ། །དུར་ཁྲོད་ཕུག་དང་
མ་མོའི་ཁྱིམ། །ཤེས་དང་བྱིན་བརླབས་བཀྲ་ཤིས་པ། །སྐྱེ་བོ་འདུ་འཛི་མེད་པ་ཡི། །བར་ཆད་མེད་པའི་ས་ཕྱོགས་སུ། །རྩོད་པ་ཞི་དང་བཀྲ་ཤིས་ཕྱིར། །ས་ཡི་ཆོ་ག་ཀུན་བྱས་ལ། །བྱིན་བརླབ་བསྐྲད་པ་རྒྱ་ཆེར་བྱ། །ཕུན་སུམ་ཚོགས་པ་ཀུན་འདུས་པ། །ཚོགས་བསག་གཏོང་དང་སྦྱིན་བྱས་ལ། །བསམ་ངན་བར་ཆད་བསལ་བྱས་ཏེ། །ཕྱི་རོལ་བྱ་བའི་ཆ་རྫོགས་ནས། །བར་གྱི་ཆོ་ག་རིམ་བཞིན་བྱ། །མཎྜལ་ཚད་དང་ལྡན་པ་ལ། །བདུད་རྩི་དམར་གྱིས་བྱུགས་པ་ནི། །གྲུ་བཞི་རྒྱ་དང་བསྙམ་པ་ལ། །དུར་ཁྲོད་བདག་པོ་དྲེགས་པ་ཁྱོད། །སངས་རྒྱས་ཀུན་གྱིས་བྱིན་རླབས་ཀྱིས། །བཀུག་ནས་བསྒྲལ་ཏེ་ཕུང་པོ་ཡིས། །གསང་བའི་དཀྱིལ་འཁོར་ཆེན་པོར་མཛད། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ་མ་ཏྲཾ་རཱུ་ཏྲ་ཧ་ཧ་པྲ་བེ་ཤ་ཕཊ། ཧ་ན་ཧ་ན་ཧཱུྃ་ཕཊ། མ་རིག་མུན་པའི་སྒོ་ཕྱེ་ནས། །རྣམ་ཤེས་ཐུགས་སུ་གསལ་བསྡིམས་ཏེ། །ཁོག་པ་དུར་ཁྲོད་གཞལ་ཡས་ཁང་། །རང་དང་མཐུན་པར་བྱིན་གྱིས་བརླབ། །ཛཿཧཱུཾ་བཾ་ཧོཿ། ཤྲཱི་ཧེ་རུ་ཀ །མ་ཧཱ་མ་ཏྲཾ་ཀ་རུ་ཏྲ་ཧ་ཧ་པྲ་བེ་ཤ་ཕཊ། དེ་སྟེ་ཟླ་གམ་དམར་པོའི་དཀྱིལ། །མ་ཏྲཾ་རཱུ་ཏྲའི་ཁོག་པ་ཉིད། །མགོ་བོ་ལྷོ་ནུབ་མཚམས་སུ་བསྟན། །རྐང་པ་བྱང་ཤར་ཐུག་པ་མེད། །སྙིང་གར་གྲུ་གསུམ་རིམ་གསུམ་ལ། །ཕྱི་རོལ་གྲུ་བཞི་མཁྱིད་གང་བྱ། །སྟེང་དུ་མཐིང་ནག་སོར་བཞིའི་ཚད། །དེ་ཡི་སྟེང་དུ་སོར་བཞིའི་ཚད། །དེ་ཡི་སྟེང་དུ་ཟླ་གམ་དམར། །སོར་གསུམ་ཚད་དུ་ལེགས་པར་བྱ། །རྐང་ལག་བཞི་དང་ལྟེ་གསང་དང་། །མཁལ་མ་གཉིས་ཏེ་གནས་བརྒྱད་དུ། །དཀྱིལ་འཁོར་མཐོ་གང་སོར་བཞི་བརྒྱད། །ཟླ་གམ་ཕྱི་རིམ་མེ་རི་ཀློང་། །བྷན་དྷ་དབང་པོ་ལྔ་ལྡན་ལ། །ཡབ་ཡུམ་སྙིང་པོ་ཡང་དག་གཞག །མཐིང་ནག་གྲུ་གསུམ་བསྐལ་པའི་མེ། །དམར་པོ་ཐ་མ་གྲུ་བཞི་ལ། །བྷནྡྷ་རིགས་བཞི་སྙིང་པོར་བཅས། །ཕྱོགས་བཞིར་རིམ་པར་དགྲམ་པར་བྱ། །ཡན་ལག་བརྒྱད་ཀྱི་དཀྱིལ་འཁོར་ལ། །ཚལ་བུ་ཁྲོ་མོའི་སྙིང་པོ་བརྒྱད། །
ལག་པ་གཡས་གཡོན་རྐང་པ་གཉིས། །མགོ་དང་མཁལ་མ་གཡས་གཡོན་གཉིས། །གསང་བ་གཽ་རི་ནས་བརྩམས་ནས། །གཏུམ་མོ་རབ་ཏུ་དགོད་པར་བྱ། །དཔུང་པ་གཉིས་དང་གུང་མོ་གཉིས། །བརླ་གཉིས་པུས་མོ་གཉིས་དག་ལ། །སེང་གེ་སྟག་དང་བྱ་རྒོད་དང་། །ཀང་ཀ་ཝ་སྤྱང་འུག་པ་དང་། །བྱ་རོག་འཐབ་པའི་ཚུལ་དུ་གནས། །ཤ་ཁྲག་མིག་དང་རྣ་བ་དང་། །རྐང་དང་ཚིལ་བུ་སྲོག་རྩ་དང་། །ཀླད་པ་བརྒྱད་ཀྱི་རྫས་སུ་དགོད། །སྒོ་བཞི་ཡན་ལག་མཚན་མ་སྟེ། །ཕྱི་རིམ་ཟླ་གམ་སྒལ་ཚིགས་གང་། །དབང་ཕྱུག་མ་ཡི་མཚན་མར་དགོད། །དགོས་པའི་ཡོ་བྱད་ཀུན་བཀྲམ་ནས། །བར་ཆད་བསལ་ཞིང་བྱིན་བརླབས་ཏེ། །དག་པ་གསུམ་གྱིས་བྱིན་བརླབས་ནས། །བྷྲཱུཾ་ལས་ཁོག་པ་གཞལ་ཡས་ཁང་། །དུར་ཁྲོད་རྒྱན་དང་ལྡན་པ་ཡི། །དབང་དྲག་གཞལ་ཡས་མེ་འབར་ལ། །ལྷ་དང་བཅས་པ་ཀུན་བསྐྱེད་ལ། །དགུག་དང་བསྡིམ་མཆོད་བཟླས་རྫོགས་ནས། །མཆོད་བསྟོད་དངོས་གྲུབ་གསོལ་བ་གདབ། །དུས་དང་མཚན་མར་བྱུང་བར་དུ། །མཁས་པས་རྟག་ཏུ་བརྩོན་པར་བྱ། །དུར་ཁྲོད་རྫས་ལ་རྟེན་བཅས་ནས། །འཁོར་བ་ཡོངས་སྒྲོལ་དཀྱིལ་འཁོར་དུ། །འཇུག་དང་དམ་ཚིག་ཕོག་པ་ལ། །དུར་ཁྲོད་མཚན་མས་དབང་བསྐུར་ལ། །སྦྱིན་བསྲེག་མཉེས་པའི་ལས་བྱས་ལ། །ལྷག་མས་མཁའ་འགྲོ་མཉེས་བྱས་ལ། །ཆ་གསུམ་རིམ་པས་བགོས་ནས་ནི། །རྫོགས་ནས་ཅི་རིགས་ལས་ལ་དབབ། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། མ་ཏྲང་གནན་པ་སྒྲུབ་པའི་ལེའུ་སྟེ་ཉི་ཤུ་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །གསང་བའི་འཁོར་ལོ་གཏེར་གྱི་བདག །བྱིན་རླབས་རྨད་བྱུང་གསང་བའི་ཐུགས། །དུག་གསུམ་སྐུ་གསུང་ཐུགས་སྦྱོར་བའི། །སྒྲུབ་པའི་ལམ་མཆོག་དམ་པ་དག །བདག་ལ་རྒྱ་ཆེར་བཤད་དུ་གསོལ། །ཞེས་གསུངས་པ་ལས། བཅོམ་ལྡན་འདས་
ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །དད་དང་དམ་ཚིག་དབང་ཐོབ་ཅིང་། །བརྟུལ་ཞུགས་ལྡན་པའི་རྣལ་འབྱོར་པས། །བན་དྷ་དབང་པོ་ལྔ་ལྡན་དང་། །ཚལ་བུ་རང་རང་སྙིང་པོ་ཅན། །རིམ་པ་བཞིན་དུ་དགོད་པར་བྱ། །འཇིགས་པའི་རྫས་དང་སྣང་བའི་མེ། །དངོས་གྲུབ་མཆོད་པའི་རྫས་དག་དགྲམ། །ཡིད་འོང་འདུས་དང་རྣམ་བྲལ་ཞིང་། །རབ་དབེན་བར་ཆད་ཀུན་བྲལ་ལ། །བརྟག་ཅིང་བླང་བཟུང་བསྟན་པ་སྟེ། །བྱིན་གྱིས་བརླབ་པར་བརྩམ་པར་བྱ། །དཀྱིལ་འཁོར་ཐིག་གདབ་བྱིན་བརླབས་ཤིང་། །ཡིད་འོང་མཚན་ལྡན་རིག་མ་ཡིས། །དུར་ཁྲོད་རྨད་བྱུང་གསང་བའི་ཐིག །གསལ་ལ་འདྲུས་པ་མེད་པར་གདབ། །སྟེགས་བུ་གྲུ་བཞི་ཚད་ལྡན་ལ། །རྨད་བྱུང་རྫས་ཀྱིས་གོ་མ་བྱ། །དུར་ཁྲོད་རྫས་ཀྱིས་བྱུག་བྱས་ལ། །དུར་ཁྲོད་ཆེན་པོར་བྱིན་གྱིས་བརླབ། །དུར་ཁྲོད་རྫས་ཀྱི་ཚོན་ལྔ་ཡིས། །ཧེ་རུ་ཀ་ཡི་དོན་མཚོན་ཕྱིར། །ཐོད་པའི་མཚན་མས་གསལ་བྱས་པའི། །དུར་ཁྲོད་དཀྱིལ་འཁོར་འཇིགས་པ་བྲི། །ཐ་མ་ཟླ་གམ་དམར་པོ་ནི། །གྲུ་བཞིའི་སྟེང་དུ་མཛུབ་གང་འཕང་། །དེ་ཡི་སྟེང་མ་གྲུ་གསུམ་ནི། །སོར་བཞིའི་འཕང་དང་ལྡན་པར་བྱ། །དུར་ཁྲོད་སོལ་བས་བྱུག་པར་བྱ། །དང་པོ་དེར་སྟེང་དམར་ནག་ནི། །ཟླ་གམ་འཕང་དུ་སོར་གསུམ་ཚད། །ཚིལ་དང་ཤ་ཁྲག་གསུར་ཆེན་དང་། །རྒྱན་ཆས་གསོལ་ཞིང་གདན་བསྒོམས་ནས། །དམར་དང་བན་དྷའི་བཟེད་ཕོར་དགྲམ། །ཐུན་མོང་བྱ་བ་ཀུན་རྫོགས་ནས། །ཆོས་སྐྱོང་རྒྱལ་པོ་སྡེ་བཞི་ལ། །བར་ཆད་བསལ་བར་མངའ་གསོལ་ཏེ། །ཁྲོ་བོ་མང་པོ་ཕྱོགས་བཅུར་དགྲམ། །འབྱུང་པོ་རཱུ་ཏྲ་ཚར་བཅད་ནས། །རྒྱན་ཆས་གསོལ་ཤིང་གདན་བཀོད་ནས། །བྱིན་བརླབ་བར་ཆད་བསྲུང་བའི་ཕྱིར། །རྡོ་རྗེ་མཚོན་ཆས་གཏིབས་ནས་ནི། །གསང་བའི་བརྡའ་ཡིས་ཀུན་མཚན་ནས། །ཇི་ལྟར་རིགས་པས་ནན་ཏན་བྱ། །གཙོ་བོའི་སྙིང་པོ་ལྡན་པའི་མཚན། །ཡང་རྟོག་ཟླ་གམ་སྟེང་དུ་གསོལ། །ཚལ་བུ་སྙིང་པོར་བཅས་པ་ནི། །
ཐ་མར་རིམ་བཞིན་དགོད་པར་བྱ། །ཐ་མ་དམར་པོ་སྒོ་བཞིར་ལྡན། །སྒོ་བཞིའི་རྗེས་སུ་དགོད་པར་བྱ། །ཕྱི་རོལ་བསྐལ་པའི་མེ་རི་ལ། །ཁྲོ་བོ་བཅུ་ཡི་མཚན་མ་དགོད། །ཞི་བ་ལས་ནི་གནས་བསྒྱུར་ཏེ། །དག་པ་གསུམ་པོ་གོམས་པ་ཡིས། །འབྱུང་བ་ལྔ་ཡི་རིམ་པ་ལས། །དུར་ཁྲོད་འཇིགས་པའི་གཞལ་ཡས་ཁང་། །ཇི་ལྟར་བསྒྱུར་བ་བཞིན་དུ་བསྒོམ། །ལྷ་དགུ་གསལ་ནས་བཞི་དགོད་དེ། །ཧཱུཾ་ལས་ཕོ་མོ་ཚང་བར་བསམ། །མཐའ་ཐུག་མེད་པའི་སངས་རྒྱས་རྣམས། །འཇིགས་བྱེད་ངོ་བོར་བྱོན་ནས་ནི། །དུར་ཁྲོད་འབར་བའི་དཀྱིལ་འཁོར་འདིར། །ཕྱག་རྒྱ་སྔགས་ཀྱིས་བཀུག་བསྡིམས་ཏེ། །བཞུགས་དང་བརྟན་དང་མི་གཡོ་དང་། །ཟིལ་མནན་མཉེས་པའི་ལས་བྱས་ཏེ། །བཟླས་དང་མཆོད་བསྟོད་བསྙེན་པ་དག །མཚན་མ་ཐོབ་ཀྱི་བར་དུ་བྱ། །ཉམས་དང་རྟགས་དང་མངོན་སུམ་དུ། །ཡིད་ཆེས་མཛེས་པའི་རྟགས་ཐོབ་ནས། །བར་གཅོད་ཉེས་པ་ཀུན་བསལ་ཏེ། །དུར་ཁྲོད་གསལ་བའི་དཀྱིལ་འཁོར་དུ། །རྨད་བྱུང་རྫས་ལ་རྟེན་བཅས་ནས། །འཁོར་བའི་དུར་ཁྲོད་གཞོམ་པའི་ཕྱིར། །འཇིགས་བྱེད་འབར་བའི་དཀྱིལ་འཁོར་ལ། །དགའ་དགུ་རང་བའི་བསམ་པ་ཡིས། །རྩེ་གཅིག་བསམ་པས་གསོལ་འདེབས་ནས། །འཁོར་དང་བཅས་པ་གཤེགས་ནས་ཀྱང་། །ཡ་མཚན་རྨད་ཀྱི་དངོས་གྲུབ་སྩོལ། །དད་པས་འཇུག་དང་དབང་བསྐུར་དང་། །བླ་མ་མཉེས་པར་བྱས་ནས་ནི། །འཇིགས་པ་ཀུན་ལས་ཐར་པ་ཡིས། །ལྷག་མའི་ལས་རྣམས་ཀུན་རྫོགས་ནས། །ལས་ཀྱི་མཐའ་རྣམས་བསྡུ་བར་བྱ། །བསྲུང་དང་རྒྱུན་གྱི་ཏིང་འཛིན་དང་། །ཇི་ལྟར་རིགས་པས་ནན་ཏན་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། དུག་གསུམ་སྐུ་གསུང་ཐུགས་སུ་བསྒྲལ་བའི་ལེའུ་སྟེ་ཉི་ཤུ་གཅིག་པའོ།། །།དེ་ནས་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །རང་བྱུང་
བདུད་རྩིའི་ངོ་བོ་ཁྱོད། །མ་ལུས་ནད་སེལ་ཐུགས་རྗེ་ཡི། །བདུད་རྩིའི་ཆོ་ག་བཤད་དུ་གསོལ། །ཞེས་གསོལ་པ་ལས། དེ་ནས་བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས། འདི་སྐད་ཅེས་གསུངས་སོ། །སྣང་སྲིད་མ་ལུས་བདུད་རྩི་ལྔ། །ཐིག་ལེ་རང་བྱུང་བཅོམ་ལྡན་འདས། །མ་བཅོས་ཐབས་ཀྱིས་དེ་བསྒྲུབ་ན། །འཆི་མེད་བདུད་རྩི་རྨད་བྱུང་འགྲུབ། །གཞན་ཡང་མཚན་མས་བསྒྲུབ་བྱ་ན། །གངས་ཕུག་སྨན་ལྗོངས་ནགས་འདབས་སམ། །ཆུ་ཀླུང་རྒྱ་མཚོའི་ན་ཡ་སོགས། །དགོན་པར་བར་ཆད་མེད་པར་རུ། །ཕུན་སུམ་ཚོགས་པ་ཀུན་ལྡན་ནས། །འབྱོར་དང་དུས་ཚིགས་བཟང་པོ་ལ། །བཀྲ་ཤིས་ཀུན་ནས་ཅི་འཚམས་པ། །བདག་གཞན་དོན་ཕྱིར་བསྒྲུབ་པར་བྱ། །ས་བཞི་བརྟག་དང་བསླང་བ་དང་། །སྦྱང་དང་བར་ཆད་བསལ་བྱས་ནས། །རང་གི་དཀྱིལ་འཁོར་ཚད་བཞིན་བརྩིག །བདུད་རྩི་ལྔ་ཡིས་བྱུག་པར་བྱ། །ཕྱི་ནང་བར་གྱི་བགེགས་བསལ་ནས། །བསྐང་གསོ་ཚོགས་རྣམས་བསག་པར་བྱ། །རྡོ་རྗེའི་བྱིན་རླབས་ལས་བྱུང་བ། །སོ་སོར་ཆ་ལས་བྱུང་བ་ལྟར། །རྡོ་རྗེ་དབྱིངས་ཀྱི་དཀྱིལ་འཁོར་ཉིད། །རྡོ་རྗེའི་ཕོ་བྲང་གདབ་པར་བྱ། །དཀྱིལ་འཁོར་ཐིག་བཞི་ལེ་ཙེ་དགུ། །ཁྱམས་དང་སྒོར་བཅས་བྲི་བར་བྱ། །བཞི་བཅུ་རྩ་གཉིས་ཀུན་བཀོད་ལ། །སོ་སོར་རྒྱན་དང་རོལ་མོ་དག །ཕྱོགས་ཆ་ཀུན་ནས་བརྒྱན་པར་བྱ། །དྲི་ཆེན་རྩ་བ་ཡན་ལག་བཅས། །ཇི་སྙེད་དབུས་ཀྱི་བན་དྷ་སྟེ། །བསྐྱེད་དང་བྱིན་བརླབ་འཕྲོ་འདུ་ལས། །རྣམ་པར་སྣང་མཛད་ངོ་བོར་གྱུར། །བྱང་ཆུབ་སེམས་ཀྱི་ངོ་བོ་ནི། །རྩ་བ་ཡན་ལག་མི་སྤྱོད་པ། །འཕྲོ་འདུ་བྱིན་བརླབ་བཅས་པ་ཉིད། །རྡོ་རྗེའི་རིགས་སུ་ལྷུན་གྱིས་གྲུབ། །མཱཾ་ས་རྩ་བ་ཡན་ལག་བཅས། །ལྷོ་ཡི་བན་དྷ་རྒྱ་གྲམ་རུ། །འཕྲོ་འདུ་བྱིན་བརླབ་བཅས་པ་ཡིས། །འབྱུང་ལྡན་ངོ་བོར་ལྷུན་གྱིས་གྲུབ། །རཱ་ག་རཀྟ་ཆགས་པ་དངོས། །རྩ་བ་ཡན་ལག་བཅས་པ་ཉིད། །བྱིན་བརླབ་འཕྲོ་འདུར་བཅས་པ་ཡི། །སྣང་བ་
མཐའ་ཡས་ངོ་བོར་ཞུ། །དྲི་ཆུ་རྩ་བ་ཡན་ལག་བཅས། །བྱང་གི་བྷན་དྷ་རྒྱ་གྲམ་དུ། །འཕྲོ་འདུ་བྱིན་བརླབ་བཅས་པ་ཉིད། །དོན་ཡོད་གྲུབ་པའི་ངོ་བོར་ཞུ། །འདི་དག་སོ་སོར་དགོད་པར་བྱ། །རྒྱན་ཆས་དབང་བཅས་གྲལ་བཀོད་དེ། །དཀྱིལ་འཁོར་གཞལ་ཡས་གདན་དང་བཅས། །སངས་རྒྱས་དཀྱིལ་འཁོར་ཡབ་ཡུམ་གཉིས། །བསྐྱེད་ཅིང་བྱིན་བརླབ་དབང་བསྐུར་བྱ། །གཉིས་མེད་གསལ་བསྡིམ་མཆོད་བྱས་ཏེ། །བྱིན་བརླབ་སྨན་གྱི་ལྷ་མོ་སྦྲན། །བར་གཅོད་བསལ་བ་རྒྱུན་ཏུ་བྱ། །དེ་ནས་འབར་བའི་དཀྱིལ་འཁོར་དུ། །ཇི་བཞིན་འབར་བ་རྒྱན་དང་བཅས། །སྐད་ཅིག་གསལ་བསྐྱེད་སྤྱན་དྲང་བསྡིམ། །ཕྱི་ནང་གསང་བས་མངོན་མཆོད་དེ། །རང་རང་གསལ་བའི་སྲོག་ལྡན་བཟླས། །བར་ཆད་མེད་པར་བརྩོན་པར་བྱ། །འདི་ནི་ ཁྲོལ་བུ 
་བསྒྲུབ་པར་བཤད། །དེ་ནས་གཞན་ཡང་བཤད་པར་བྱ། །ཐིག་དང་ཚོན་སྣ་བྱིན་བརླབས་ལ། །འཁོར་ལོ་རྩིབས་བརྒྱད་དཀྱིལ་འཁོར་བྱ། །སོ་སོ་རྩ་བ་ཡན་ལག་བཅས། །ཕྱེ་མའི་རིགས་ལྔར་ཕྱེ་བཀོད་ལ། །རྫས་དང་ཡོ་བྱད་རྒྱན་རྣམས་དང་། །རིམ་པ་བཞིན་དུ་རྣམ་པར་བཀོད། །མ་བཅོས་ཆོས་དབྱིངས་རང་བཞིན་ལ། །སྙིང་རྗེ་ནམ་མཁའི་རང་བཞིན་ཤར། །རྒྱུ་ལས་རྟེན་བྱས་གཞལ་ཡས་ཁང་། །རིགས་ལྔ་ཡབ་ཡུམ་རྒྱན་དང་བཅས། །བདུད་རྩི་ཉིད་ལ་བསྐྱེད་བྱས་ཏེ། །ཡེ་ཤེས་དབབ་བསྡིམ་མཆོད་བྱས་ནས། །མཚན་མ་ཐོབ་པར་བཟླས་པར་བྱ། །སྟོང་ཚིག་བར་ཆད་བསལ་བ་དང་། །ལྷ་མོ་སྦྲན་དང་བྱིན་རླབས་དབབ། །རོལ་མོ་དང་ནི་གཡབ་མོ་དང་། །དབྱངས་སྙན་བཅས་པར་ལྷ་མོ་རྟེན། །ལྷ་མོ་མཛེས་པའི་བྷ་ག་རུ། །རྡོ་རྗེ་ཐབས་ཀྱི་ཐོ་བ་ཡིས། །རྩ་བ་ཡན་ལག་བཅས་བརྡུང་བ། །ཕྱེ་མ་གནས་ལྔར་བཀོད་པ་སྟེ། །བྱིན་བརླབ་སྔགས་དང་ཕྱག་རྒྱ་དང་། །ཏིང་འཛིན་བདུད་རྩི་ལྔ་རུ་ཞུ། །དེ་ནས་ལེགས་པར་བསྡུ་བར་བྱ། །འདི་ནི་ཕྱེ་མའི་སྒྲུབ་ཐབས་སོ། །དེ་ནས་བུམ་པའི་སྒྲུབ་པ་ནི། །སྔ་མའི་དཀྱིལ་འཁོར་གནས་བསྒྱུར་ཏེ། །དཀྱིལ་འཁོར་པདྨ་འདབ་
བརྒྱད་ལ། །གེ་སར་སྙིང་པོ་བཅས་པ་བྲིས། །ཕྱེ་མ་ཀུན་བསྡུས་བུམ་པར་སྩལ། །ཅོད་པན་རྒྱ་དང་གཟུངས་ཐག་གདགས། །དང་པོར་བཏག་བཙག་གཞལ་བར་བྱ། །ཚད་དང་ལྡན་པའི་བདུད་རྩི་ནི། །བདུད་རྩི་འཁྱིལ་པར་མངའ་གསོལ་ལ། །བྱིན་བརླབས་དབང་བསྐུར་དབུས་སུ་གཞུག །ཏ་ཀྲྀཏ་བརྒྱད་དང་ཧེ་རུ་ཀ །སུམ་རྩེགས་འབར་བའི་དཀྱིལ་འཁོར་བསྐྱེད། །དབང་བསྐུར་བྱིན་བརླབ་གཉིས་མེད་སྡིམ། །མཆོད་བསྟོད་བདུད་རྩིའི་སྲུང་མ་སྦྲན། །རང་རང་བདུད་རྩིའི་བཟླས་པར་བྱ། །རྩེ་གཅིག་ཏིང་འཛིན་བར་ཆད་མེད། །དགུ་པའི་ཕྱག་རྒྱ་གནན་ཞིང་བཟླས། །མཐུན་པའི་རྟགས་ནི་བྱུང་བར་དུ། །མཆོད་བསྟོད་ལས་བཅོལ་སྲུང་མ་བོད། །བར་ཆད་བསལ་བ་རྒྱུན་མི་བཅད། །རྟགས་ཀྱང་རྣམ་པ་བདུན་གྱིས་ཏེ། །འོད་དང་དུ་བ་སྒྲ་དང་དྲི། །ལྷ་མོས་ལུང་བསྟན་འབྱུང་བ་དང་། །མང་དུ་འཕེལ་ན་བསྒྲུབ་རྫས་ཡིན། །རུ་ལུ་གར་གྱི་བྲོ་བརྡུངས་པས། །དངོས་གྲུབ་རང་གི་གཞུང་དང་སྦྱར། །འཇུག་དང་བདུད་རྩིས་དབང་བསྐུར་ཞིང་། །དངོས་གྲུབ་གསོལ་གདབ་ཆོ་ག་བྱ། །རྡོ་རྗེ་བླ་མ་ཡུམ་བཅས་པས། །བྱང་ཆུབ་སེམས་ཀྱི་དབང་བསྐུར་ཏེ། །བསྲུང་དང་བླ་མས་གནང་བྱིན་ལ། །བླ་མ་ལ་ནི་བསྙེན་བཀུར་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། བདུད་རྩི་སྒྲུབ་པའི་ལེའུ་སྟེ་ཉི་ཤུ་རྩ་གཉིས་པའོ།། །།དེ་ནས་ཡང་གསང་བའི་བདག་པོ་དེས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །འཆི་མེད་རྡོ་རྗེ་ཚེ་ཡི་བདག །རྣལ་འབྱོར་བར་ཆད་བསལ་བའི་ཕྱིར། །རྡོ་རྗེ་ཚེ་མཆོག་བཤད་དུ་གསོལ། །ཞེས་གསོལ་པ་ལས། བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །གངས་རིའམ་རི་རྩེ་བྲག་འདབས་སུ། །རྣལ་འབྱོར་བར་ཆད་བསལ་བའི་ཕྱིར། །ཚེ་ཡི་སྒྲུབ་པ་བཤད་པར་བྱ། །མཎྜལ་གྲུ་བཞི་འདོམ་གང་བ། །
བདུད་རྩི་ལྔ་དང་དྲིས་བྱུགས་ལ། །པདྨ་འདབ་བརྒྱད་དམར་པོ་ལ། །རྡོ་རྗེའི་ར་བས་བསྐོར་བར་བྲི། །དབུས་སུ་ཤེལ་གྱི་བུམ་པ་རུ། །དམར་སེར་བ་ཡི་འོ་མ་དང་། །ཅོང་ཞི་དཀར་པོ་རྣམ་གསུམ་དང་། །དཀར་གསུམ་མངར་གསུམ་འཆི་མེད་སྨན། །བྱང་ཆུབ་སེམས་སུ་བཅས་པ་གཞག །རྡོ་རྗེ་བདུད་རྩི་ཞལ་ཟས་དང་། །དབང་གི་མཚན་མ་བཏབ་པ་གཞག །འཕྲུལ་ཞལ་བཏུང་བ་བཅུད་དང་བཅས། །བདུད་རྩི་ལྔ་དང་བཅས་པ་དགོད། །དབུས་སུ་ཚེ་དཔག་མེད་པ་ཡི། །ཐབས་དང་ཤེས་རབ་འཁྲིལ་བར་བསྒོམ། །འཁོར་ནི་ལྷ་མོ་ཚེ་འཛིན་བརྒྱད། །དཀར་མོ་མདངས་གསལ་འོད་འཕྲོ་མ། །དགུག་པ་འཕེལ་མ་རྒྱས་འདེབས་མ། །མཛེས་མ་བྱིན་བྱེད་མ་རྣམས་ཀྱང་། །པདྨ་བརྒྱད་ལ་རིམ་པ་བཞིན། །ཀུན་ཀྱང་སྐུ་མདོག་ཤེལ་མདོག་སྟེ། །ཕྱག་ན་བདུད་རྩིའི་བུམ་པ་བསྣམས། །ཚེ་འཕེལ་ལ་སོགས་བརྩོན་པར་བསྒོམ། །སྤྱན་དྲང་བསྡིམ་མཆོད་བཟླས་པ་དག །བར་ཆད་མེད་པར་བརྩམ་པར་བྱ། །ཨོཾ་ཨཱ་རོ་ལི་ཀ་པཱཾ་རཱ་ག་ར་ཏི། བཛྲ་ཨ་བྷི་ཥིཉྩ་ཧཱུཾ་པྲ་བེ་ཤ་ཡ་ཕཊ། ཨཱ་བེ་ཤ་ཡ་ཕཊ་ཨ། སརྦ་ཏ་ཐཱ་ག་ཏ་ཨ་དྷི་ཏིཥྛ་སྭཱ་ཧཱ། བཛྲ་རཀྵ་ཧཱུཾ་ཧཱུཾ་བྷྲུཾ་བཾ། འཕྲོ་འདུ་འོད་ཀྱིས་བཀུག་བྱས་ནས། །མ་ལུས་བུམ་པའི་བཅུད་ལ་བསྡུ། །དེ་ཡང་རིམ་ནས་རིམ་བསྡུས་ཏེ། །འོད་དཔག་མེད་པའི་ཐུགས་ཀར་བསྡིམ། །དང་པོ་གནས་ནས་དགུག་པ་སྟེ། །དེ་ནས་སྙིང་གར་དྲིལ་བ་སྟེ། །གསུམ་པ་གཟུགས་ལ་བསྡིམ་པར་བྱ། །བཞི་པས་བརྟན་པར་བྱ་བ་སྟེ། །ཐ་མས་བསྲུང་བར་བྱ་བ་ཉིད། །གལ་ཏེ་དབང་དུ་མ་གྱུར་ན། །ཚེ་དཔག་མེད་ཀྱང་ཁྲོ་བོ་སྟེ། །དམར་ནག་ཁྲོས་པ་འཇིགས་ཚུལ་ཅན། །ཐབས་དང་ཤེས་རབ་འདྲེལ་བར་བསྒོམ། །འཁོར་ཡང་ཁྲོ་མོ་བརྒྱད་དུ་སྟེ། །བྱང་ཆུབ་སེམས་ཀྱིས་བཀང་བ་ཡི། །བྷན་དྷ་ཐོགས་པའི་འཕྲོ་འདུ་ཡིས། །མ་ལུས་གང་བར་སྤྲོས་པ་ཡི། །ཚངས་དང་ལྷ་དབང་བརྒྱ་བྱིན་དང་། །རྒྱལ་ཆེན་ཚེ་བདག་ཕྱོགས་སྐྱོང་བཅས། །ཚེ་དང་གཟི་བརྗིད་ཕྲོགས་
ནས་བསྡིམ། །རྫས་རྣམས་དངོས་གྲུབ་བླང་བྱས་ལ། །བདག་ཉིད་སྐུ་གསུང་ཐུགས་ལ་བསྡིམ། །ལས་ཀྱི་ལྷག་མའི་ཆོ་ག་རྣམས། །ཅི་རིགས་སུ་ནི་སྦྱིན་པར་བྱ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། རྡོ་རྗེ་ཚེ་སྒྲུབ་པའི་ལེའུ་སྟེ་ཉི་ཤུ་རྩ་གསུམ་པའོ།། །།དེ་ནས་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །ཕྲིན་ལས་འཇིགས་མཛད་ཧེ་རུ་ཀ །གདུག་པ་འདུལ་ལ་ཕྱག་འཚལ་ལོ། །སྒྲོལ་བའི་ཆོ་ག་བཤད་དུ་གསོལ། །ཞེས་གསོལ་པ་ལས། བཅོམ་ལྡན་འདས་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །རྣལ་འབྱོར་མཆོག་གི་གང་ཟག་གིས། །བར་ཆོད་གདུག་པ་བསལ་བའི་ཕྱིར། །དུར་ཁྲོད་ཕུག་གམ་ཤིང་གཅིག་གམ། །ངམ་གྲོག་ལམ་ཆེན་ཆུ་མདོ་རུ། །ས་ཡི་ཆོ་ག་ལེགས་བྱས་ལ། །དཀྱིལ་འཁོར་བདུད་རྩི་ལྔས་བྱུགས་ལ། །དུར་ཁྲོད་འབར་བའི་ཐིག་བཏབ་ནས། །གྲུ་གསུམ་ཟླ་གམ་གསུམ་ལྡན་ལ། །ཐོད་པའི་ར་བས་ཀུན་ནས་བསྐོར། །ལྕགས་སམ་ཚེར་མ་ཅན་གྱི་ཤིང་། །དྲག་པོའི་ཕུར་བུ་བརྒྱད་ལྡན་པ། །ཟླ་གམ་མདུན་རྒྱབ་གནས་ལ་དགོད། །དུར་ཁྲོད་མཆོད་པ་སྣ་ཚོགས་དགྲམ། །ཕྱི་ནང་བར་ཆད་བསལ་བྱས་ལ། །སྐུ་གསུམ་ལས་བྱུང་གཞལ་ཡས་ཁང་། །རྟེན་གྱི་དབྱིབས་དང་ལྡན་པར་བསྒོམ། །དབུས་སུ་དྲག་པོ་ཧེ་རུ་ཀ །ཐབས་དང་ཤེས་རབ་རྒྱན་ལྡན་བཅས། །དྲག་ཏུ་ཁྲོས་པས་ཕུར་བུ་འཛིན། །ཞབས་བཞི་བགྲད་པ་རྣམ་པར་བསམ། །གནས་བཞི་ལས་བྱུང་ཁྲོ་མོ་བརྒྱད། །དྲག་པོའི་ལས་མཛད་ཕུར་པ་རྣམས། །འགུགས་ཤིང་གསོད་པའི་ལས་མཛད་པ། །བཀའ་ནོད་བསྐོར་བའི་ཚུལ་དུ་བསྒོམ། །ཡེ་ཤེས་སྤྱན་དྲང་མཆོད་གསུམ་སྦྱར། །དྲག་པོའི་བྱིན་བརླབ་བཟླས་པ་སྟེ། །དང་པོར་བསྙེན་པ་འབྲུ་བརྒྱད་བཟླས། །དེ་ནས་ལས་ལ་གཟུད་པའི་སྔགས། །བརྒྱ་
རྩ་བརྒྱད་དམ་ཉི་ཤུ་གཅིག །དེ་ནས་རང་རང་སྔགས་བཟླས་པ། །འོད་དང་སྒྲ་དང་དྲག་པོ་ཡི། །རྟགས་གསུམ་བར་དུ་བཟླས་པར་བྱ། །ཨོཾ་བཛྲ་ཀཱི་ལི་ཀཱི་ལ་ཡ། གཽ་རཱི་དགྲ་བགེགས་མཱ་ར་ཡ་ཕཊ། །ལྷག་མ་དེ་བཞིན་ཤེས་པར་བྱ། །རྟགས་བྱུང་ཁུགས་ནས་གསལ་ལྡན་པས། །གཙོ་བོའི་ཕུར་པ་སྙིང་ལ་བརྡེག །ལྷག་མ་གནས་བརྒྱད་དག་ལ་སྦྱར། །བཅུད་བསྡུས་བག་ཆགས་གསུམ་བསྲེགས་ནས། །འོག་མིན་གནས་སུ་ཕཊ་ཀྱིས་འཕང་། །ཕུང་པོ་མཚོན་ཆས་བསྒྲལ་བྱས་ནས། །བལྟབ་པས་འབར་བའི་འཁོར་ལོ་མཉེས། །དངོས་གྲུབ་བླང་དང་ལས་མཇུག་བསྡུ། །ཅི་རིགས་པར་ནི་ལས་རྣམས་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ལས། དྲག་པོ་སྒྲོལ་བའི་ལེའུ་སྟེ་ཉི་ཤུ་བཞི་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །ཤིན་ཏུ་ཁྲོ་ཞིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །རྨོངས་དང་གསད་དང་གཟིར་བ་ཡི། །ལས་ནི་བདག་ལ་བཤད་དུ་གསོལ། །ཞེས་གསོལ་པས། བཅོམ་ལྡན་འདས་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །དྲག་ཤུལ་ལས་ཀྱིས་འདུལ་བ་དང་། །ཞིང་བཅུ་བདེ་ལ་དགོད་པའི་ཕྱིར། །རྣལ་འབྱོར་དྲོད་ལྡན་སྙིང་བརྩེ་བས། །དབེན་པའི་གནས་སུ་ལས་འདི་བརྩམ། །མཎྜལ་ཚད་དང་ལྡན་པ་ལ། །བདུད་རྩི་དྲི་ཆེན་གྱིས་བྱུགས་ལ། །དབུས་སུ་གྲུ་གསུམ་ཐུར་བྲུས་ལ། །ཁྲག་ཆེན་མི་རོའི་སོལ་བས་བྱུག །ཐ་མ་ཟླ་གམ་ཁྲག་གིས་བྱུག །ཐོད་པའི་ར་བས་ཀུན་ནས་བསྐོར། །དབུས་སུ་ཐོད་པ་ནག་པོ་ལ། །ཁྲག་སྣ་ཚོགས་དང་དུག་སྣ་དང་། །ཉུང་དཀར་ཉུང་ནག་ཁྲག་དང་བཅས། །ཟླ་གམ་མདུན་རྒྱབ་གནས་བརྒྱད་དུ། །ཕྲ་མེན་ཟ་བྱེད་བརྒྱད་པོ་བཞག །དབུས་སུ་འཇིགས་བྱེད་འབར་བ་བསམ། །ཕྲ་མེན་ཚོགས་ཀྱིས་བསྐོར་བར་བསམ། །སྤྱན་དྲང་བསྡིམ་མཆོད་བཟླས་པ་དག །རྟགས་ཐོབ་བར་དུ་
བཟླས་ཤིང་བསམ། །ཨོཾ་སིངྷ་མུ་ཁ་ཧེ་རུ་ལུ་རུ་ལུ་དགྲ་ལ་བྷྱོ། དང་པོ་བསྙེན་པ་འབྲུ་བརྒྱད་སྟེ། །བར་དུ་ལས་ལ་གཟུད་པར་བྱ། །ཐ་མ་ཐུན་གྱི་བསྙེན་པ་བཟླས། །འོད་དང་ཉུང་དཀར་འཚེག་པ་དང་། །ཁོལ་དང་ལུད་པའི་རྟགས་བྱུང་ན། །རྟེན་ནམ་རང་ངམ་ཕྱོགས་སུ་འཕང་། །བསྒྲལ་ནས་ཡང་དག་འགྲུབ་པར་སྦྱར། །དངོས་གྲུབ་བླང་བ་ལ་སོགས་པ། །ཇི་ལྟར་རིག་པར་སྦྱར་བར་བྱ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། དྲག་པོ་ལས་ཀྱིས་ཡན་ལག་བསྟན་པའི་ལེའུ་སྟེ་ཉི་ཤུ་ལྔ་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །སངས་རྒྱས་ཀུན་གྱི་སྐུ་གསུང་ཐུགས། །འབར་བའི་རྒྱལ་པོ་ཧེ་རུ་ཀ །དངོས་གྲུབ་ཀུན་གྱི་སྙིང་པོ་ཉིད། །བདག་ཅག་རྣམས་ལ་བཤད་དུ་གསོལ། །ཞེས་གསོལ་པ་ལས། བཅོམ་ལྡན་འདས་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །རབ་ཏུ་དབེན་པའི་གནས་མཆོག་ཏུ། །སྐྱེ་གནས་དག་པའི་རྣལ་འབྱོར་པས། །དབང་དང་དམ་ཚིག་སྔོན་སོང་བའི། །མཆོག་གི་རྣལ་འབྱོར་བརྩམ་པར་བྱ། །ཆོས་རྣམས་མ་ལུས་ཐམས་ཅད་ལ། །སེམས་ཀྱི་ཐིག་ལེ་ཕྱོགས་ཆ་མེད། །དང་པོ་བར་དང་ཐ་མར་ཡང་། །སྐྱེ་མེད་ཐིག་ལེར་རྒྱུ་བ་སྤང་། །རང་བྱུང་ཡེ་ཤེས་རྒྱུ་མེད་པ། །གསང་བའི་ཐིག་ལེ་སྙིང་པོར་རྫོགས། །ཡུལ་དང་དབང་པོ་རྣམ་ཤེས་རྣམས། །བརྟགས་པས་བྱང་ཆུབ་སེམས་ཉིད་དེ། །མཐོང་དང་བརྗོད་སོགས་ཡུལ་འདས་པའི། །སྟོང་ཉིད་མ་སྐྱེས་ཀློང་ལ་ཐིམ། །དང་པོ་དེ་བཞིན་ཉིད་ཐོབ་ནས། །དེ་ནས་ལྷ་དང་སྙིང་པོ་དང་། །དཀྱིལ་འཁོར་ཕྱག་རྒྱ་འདུ་འཕྲོ་དང་། །མཆོད་དང་བདེ་བ་ལ་སོགས་པ། །ཇི་སྙེད་སྒོ་གསུམ་དྲན་རྟོག་རྣམས། །ནམ་མཁའི་ཆོ་འཕྲུལ་རང་བཞིན་རྣམས། །མཐུན་པར་སྣང་ཞིང་དངོས་པོ་མེད། །གང་ལས་གང་དུ་ཅི་སྤྲུལ་པ། །སེམས་ཀྱི་
དཀྱིལ་འཁོར་རྒྱ་ཁྱོན་མེད། །མཐའ་ཐུག་མེད་པར་རང་སྣང་བ། །རང་གི་སེམས་དེ་དངོས་མེད་གཞི། །སེམས་ཀྱི་དཀྱིལ་འཁོར་དོན་མཐོང་ན། །མ་ལུས་སེམས་ལས་གཞན་མེད་ཅིང་། །མ་སྐྱེས་དངོས་པོ་ཐེ་ཚོམ་ཅན། །ཇི་ལྟར་སྣང་གྲག་ཐམས་ཅད་ཀུན། །བྱང་ཆུབ་སྙིང་པོ་གསལ་བར་སྣང་། །སྤྲོས་མེད་ཆོས་སྐུར་ཀུན་གསལ་ཕྱིར། །དཀྱིལ་འཁོར་སྔགས་དང་ཕྱག་རྒྱ་མེད། །སྦྱིན་བསྲེག་དངོས་གྲུབ་རྫས་མེད་ཅིང་། །རེ་དོགས་འཆི་འཕོ་ཕ་རོལ་མེད། །སངས་རྒྱས་སེམས་ཅན་གཉིས་མེད་ཅིང་། །བླང་དོར་དགེ་སྡིག་ཆ་ལས་འདས། །གཙང་སྨེ་བདེ་སྡུག་ལས་གྲོལ་བས། །ལམ་དང་འབྲས་བུའི་ཁྱད་པར་བྲལ། །གང་ལའང་གནས་པར་མི་བྱེད་པ། །ཐབས་ཆེན་གསང་བའི་ལམ་གནས་པར། །རྟོག་གེ་པ་ཡི་ཡུལ་མིན་ཏེ། །ཡང་དག་གྲུབ་པ་གཅིག་པུ་ཉིད། །སྐྱེ་བ་བརྒྱུད་པའི་སྡུག་བསྔལ་བྲལ། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། སྤྲོས་པ་མེད་པར་བསྟན་པའི་ལེའུ་སྟེ་རྩ་དྲུག་པའོ།། །།དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་ཡེ་ཤེས་རྔམ་པའི་རྒྱལ་པོས། སྒྱུ་མ་ཡེ་ཤེས་ཀྱི་རྣལ་འབྱོར་ཞེས་བྱ་བའི་རྟོག་པ་འདི་གསུངས་སོ། །དཔལ་ལྡན་ཧེ་རུ་ཀ་ཡི་དངོས། །བླ་མ་སངས་རྒྱས་ཀུན་གྱི་དངོས། །ལོངས་སྤྱོད་བུ་དང་ཆུང་མ་དང་། །རྒྱལ་སྲིད་བླ་མ་མཉེས་བྱས་ནས། །ཕུན་སུམ་ཚོགས་པའི་སློབ་མ་ཡིས། །མན་ངག་འདོད་པར་གསོལ་བ་གདབ། །དེ་ནས་ལུང་ལྡན་བླ་མ་དེས། །ཇི་སྲིད་སྣང་སྲིད་ཆོས་རྣམས་ཀུན། །སྒྱུ་མ་འཇའ་ཚོན་ཆུ་ཟླ་དང་། །བྲག་ཆ་སྒྲ་བརྙན་ཆུ་བུར་དང་། །མགལ་མེ་ལྟ་བུར་བདག་གཞན་བརྟག །བདག་གཞན་ཡུལ་སེམས་རབ་རྟོགས་པས། །མ་ལུས་མཁའ་ལ་སྤྲིན་ཕུང་དང་། །དབུ་བ་ལྟ་བུའི་འདུ་ཤེས་འབྱུང་། །གང་ལའང་ཆགས་པ་བྲལ་བ་ནི། །ཡིད་ཆེས་བརྟན་པ་མེད་ཕྱིར་རོ། །བདག་གི་ལུས་ངག་ཡིད་གསུམ་ནི། །ཆུ་ཟླ་བྲག་ཆ་ནམ་མཁར་ནི། །བྱིན་རླབས་དབང་གིས་གསལ་འགྱུར་ན། །མ་ལུས་སྒྱུ་མར་
མངོན་དུ་སྣང་། །རྣལ་འབྱོར་ཐབས་དང་ཤེས་རབ་ནི། །དཔའ་བོ་དཔའ་མོའི་རང་བཞིན་ཏེ། །ལྔ་དང་ལྔ་ལ་རིགས་བསྡུས་པས། །བདེ་བ་སྒྱུ་མའི་རྣལ་འབྱོར་བསྒོམ། །དེ་བཞིན་གཤེགས་པའི་དཀྱིལ་འཁོར་ཚོགས། །ཐབས་ཆེན་གསང་བ་རབ་བཤད་ནི། །སྐྱེ་བ་གཞན་དུ་མི་བརྒྱུད་པའི། །ཚེ་འདི་ཉིད་ལ་དངོས་གྲུབ་འཐོབ། །ཕྱག་རྒྱ་ཆེན་པོའི་རང་བཞིན་ཉིད། །འཁོར་ལོ་མངོན་དུ་སྣང་བ་ཡིས། །སྒོ་གསུམ་སྒྱུ་མའི་རང་བཞིན་ནོ། །རྣལ་འབྱོར་པ་ཡིས་བསྒོམ་པར་བྱ། །རང་བཞིན་གཟུགས་དང་བདེ་ཆེན་དང་། །འདུས་མ་བྱས་པའི་སངས་རྒྱས་རྣམས། །ཐབས་ཆེན་ལ་གནས་རྣལ་འབྱོར་གྱིས། །སྐུ་གསུང་ཐུགས་ནི་གསད་པར་བྱ། །ཇི་སྲིད་འཁོར་དང་མྱ་ངན་འདས། །མ་ལུས་མིང་གི་ཕུང་པོ་སྟེ། །དེ་ལྟར་བརྟག་པའི་དོན་མཐོང་ན། །ཐབས་ཆེན་སྐྱེ་མེད་རྣལ་འབྱོར་མཐོང་། །རྟོག་པའི་བག་ཆགས་ཟད་པ་དང་། །སྒོ་གསུམ་ལས་རྒྱུན་ཆད་པ་དང་། །སྤྱོད་ལམ་སྒྱུ་མར་གསལ་གྱུར་ན། །གནད་ཀྱིས་ཆགས་དང་སྡུག་བསྔལ་བྲལ། །བདུད་ཀྱི་ཚོགས་རྣམས་བར་གཅོད་པའི། །ངོ་བོ་དེ་བཞིན་གཤེགས་པས་བསལ། །འཆི་བའི་རྒྱུ་བཞི་རྣམ་སྤངས་པས། །སྐྱེ་གནས་བརྒྱུད་པའི་སྡུག་བསྔལ་མེད། །མ་ལུས་སྒྱུ་མར་མངོན་སུམ་ལ། །ཆགས་དང་འཇིག་པའི་ཆོས་དང་བྲལ། །ཕུང་པོ་རླུང་དང་སེམས་སུ་བཅས། །ཡིད་ཚིམ་ཟས་སུ་གང་མཐོང་བ། །རྣལ་འབྱོར་ཐབས་ཀྱི་སྤྱོད་པ་ཡི། །བདུད་ཀྱི་འཚེ་བ་སྟོང་པར་ལོག །དང་པོར་བརྟག་པར་ཤེས་པར་བྱ། །ཐ་མར་འཕེན་པའི་སྦྱོར་བ་ཡིས། །དེ་བཞིན་བརྟག་ཅིང་གནས་པ་ལ། །སྣང་བ་རིག་པའི་ཐིག་ལེར་བསྡུས། །རྒྱུ་བ་ནམ་མཁའ་སྟོང་པར་འཆར། །ཤེས་པའི་འོད་གསལ་ཐིག་ལེར་ཐིམ། །ཡུལ་དང་ཤེས་པ་མ་མཐོང་བས། །ཕུང་པོ་ཉིང་མཚམས་སྦྱོར་དང་བྲལ། །མ་བཅོས་འོད་གསལ་ཐིག་ལེ་ལ། །རོལ་པ་རང་སྣང་ཀུན་འཆར་ཡང་། །རྒྱ་མཚོའི་རླབས་ལྟར་འགྲོ་འོང་མེད། །ཅེས་གསུངས་སོ། །དཔལ་
ཧེ་རུ་ཀ་འདུས་པའི་རྒྱུད་ཆེན་པོ་ལས། ཡིད་ཀྱི་གཟུགས་བརྙན་བརྟག་ཅིང་། སྒྱུ་མའི་རྣལ་འབྱོར་བྱ་བའི་ལེའུ་སྟེ་ཉི་ཤུ་བདུན་པའོ།། །།དེ་ནས་ཡང་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཀུན་ཏུ་བཟང་པོ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །དབང་ཕྱུག་གསང་བའི་རྣལ་འབྱོར་པས། །དད་དང་དམ་ཚིག་བརྩེ་ལྡན་ཞིང་། །དབང་ཐོབ་བརྟུལ་ཞུགས་ཆེར་ལྡན་པ། །དངོས་གྲུབ་ཆེན་པོ་ཐོབ་འདོད་པས། །དུར་ཁྲོད་བས་མཐའ་རབ་དབེན་པར། །བདག་ཉིད་བྱ་བ་ཀུན་རྫོགས་ནས། །ཡིད་དང་འཐད་པའི་གཟུངས་མ་བསྟེན། །རིགས་དང་ལྡན་ཞིང་ཡིད་འོང་བ། །འཇམ་ལ་དལ་ཞིང་ན་སོ་གཞོན། །ལུས་ནི་དར་ལ་བབས་པ་དང་། །དད་པ་ཆེ་བ་ཤེས་རབ་རྣོ། །བརྟུལ་ཞུགས་འཛེམ་དང་ཁུ་འཕྲིག་ཆུང་། །སྤྱོད་པ་བརླིང་ཞིང་ཐོགས་རྡུག་མེད། །གསང་ཐུབ་འདོད་ཆགས་ཆེ་བ་དང་། །འཁྱུད་བརྡེག་སྦྱོར་བའི་ལས་ལ་དགའ། །དཀར་ལ་དམར་མདངས་ཆེ་བ་དང་། །ཁ་ཡི་དྲི་ཞིམ་ལུས་རླན་ཆགས། །བྷ་ག་བཟང་དང་བདེ་བ་ཆེ། །འགྲོགས་ཤིང་ཡིད་དགའི་བུད་མེད་ལ། །ཐ་མལ་པ་ལས་བསྒྱུར་བྱས་ཏེ། །གསང་བའི་ཡུམ་དུ་ཐབས་ཀྱིས་སྦྱར། །ངེས་པའི་དྲོད་ཐོབ་གྱུར་པ་ན། །ཁམས་བཞི་རླུང་དང་ཟས་དང་གོས། །མཐུན་པའི་སྤྱོད་པས་བསྟེན་བྱས་ཏེ། །ཐབས་དང་ཤེས་རབ་རང་བཞིན་གྱིས། །མཛེས་དང་ཡིད་འཕྲོག་ཆོ་ག་ཡིས། །བལྟས་དང་བརྟག་དང་འཁྱུད་པ་ཡིས། །བསྣམ་དང་ལྕེ་ཡི་རོ་མྱོང་དང་། །ལུས་ཀྱིས་མྱོང་བ་ཆེ་ཆུང་དང་། །ཟླ་གམ་དབང་པོ་མཐུན་སྦྱར་ནས། །དམ་དུ་འཁྱུད་ཅིང་བཙིར་བྱས་ཏེ། །བདེ་བའི་དཀྱིལ་འཁོར་བསམ་ལས་ཀྱང་བྱས་པས། །ཚད་དང་ལྡན་པར་འཕེལ་བྱས་ཏེ། །བྱང་ཆུབ་སེམས་ནི་འཕོ་མི་བྱ། །གལ་ཏེ་སེམས་ནི་འཕོས་གྱུར་ན། །ལུས་སེམས་ཏིང་འཛིན་རྒུད་པ་དང་། །དམ་ཚིག་དག་ཀྱང་ཉམས་པ་དང་། །མཆོག་གི་དངོས་གྲུབ་ཡལ་བ་དང་། །དགའ་དང་ཆགས་དང་བདེ་བ་དང་། །རྒྱུ་བཅད་པ་ཡི་ཉམས་བཞི་ཡིས། །ཐ་མལ་
གོལ་ས་བཀག་ནས་ཀྱང་། །དངོས་གྲུབ་བདེ་ཆེན་ཞིང་དུ་བལྟ། །གང་དུ་བལྟས་པས་དོན་མཐོང་བ། །ཐ་མལ་པ་དང་དཀྱིལ་འཁོར་དང་། །ཆོས་ཀྱི་དབྱིངས་སུ་གང་མཐོང་བ། །འཁོར་བའི་གྲོང་ཁྱེར་རྣམ་པར་འཇོམས། །གང་གིས་གང་ལ་བལྟས་མཐོང་བ། །སྤྱད་དང་སྤངས་དང་དཀྱིལ་འཁོར་དང་། །བདེ་ཆེན་ཉིད་དང་སྟོང་ཉིད་དུ། །མཐོང་དང་ངེས་འཛིན་འདུ་ཤེས་ཟད། །སྤྱད་དང་འཁྱུད་དང་བགད་པ་དང་། །སྦྱར་དང་གླུ་བླང་བལྟ་བ་དང་། །དམིགས་དང་དྲན་པ་ཙམ་གྱིས་ནི། །བདེ་བ་བསྐྱེད་པའི་ཁྱད་པར་ཡིན། །སྨིན་དང་མཉེས་པ་མ་ཡིན་པ། །ཐིག་ལེ་ཤོར་ན་དམ་ཚིག་ཉམས། །མ་མྱོང་བ་དང་རྒྱུན་ཆད་དང་། །ངེས་པར་གནས་ན་དངོས་གྲུབ་མེད། །དཔལ་དང་ལྡན་པའི་ཧེ་རུ་ཀ །འདོད་པའི་དབང་མོ་སྐྱོན་བྲལ་མ། །ཐ་མལ་པ་དང་བར་ཆད་དང་། །འཕོ་བ་རླུང་གི་འཇིགས་པ་བྲལ། །མཐོང་བའི་བདུད་ནི་རང་ལོག་པས། །གནད་ཀྱི་རྒྱུ་བཞི་གནས་ལས་གྲོལ། །གནས་པའི་སྟོབས་ཟད་རླུང་འགགས་ན། །བརྟག་དང་འཕང་དང་དམིགས་པ་དག །ཐབས་དང་ལྡན་པས་ཕ་རོལ་ཕྱིན། །ཐོག་མ་མཐའ་དབུས་མེད་པ་ཡི། །རླུང་ནི་མ་བཅོས་དེ་བཞིན་ཉིད། །ཆུ་ཡི་ཆུ་བུར་ཇི་བཞིན་དུ། །མ་བཅོས་མཐོང་བས་སྐྱེ་ཤི་བྲལ། །ཕུང་པོ་སྒྱུ་མ་མིང་མེད་ལ། །ཞེན་པས་བརྟགས་པས་འཆི་བ་མཐོང་། །རང་སེམས་ཐོག་མཐའ་དབུས་མེད་པས། །ཕྱི་ནང་བདག་གཞན་མེད་པ་ལ། །འགྲོ་བའི་དངོས་པོ་ཀུན་བྲལ་བས། །སེམས་ལ་སྐྱེ་ཤི་འདུ་འབྲལ་མེད། །མ་བཅོས་རང་བྱུང་ཕྱོགས་བྲལ་བ། །མ་བཅོས་འཛིན་མེད་ཡེ་ཤེས་བཞག །ཡེངས་མེད་འཁྲུལ་པ་རྣམ་པར་གཅད། །ཞེན་པ་མེད་པས་མངོན་སངས་རྒྱས། །རེ་དོགས་མེད་པས་བདུད་བཞི་ཆོམས། །ཧེ་ནི་དགྱེས་པ་ཆེན་པོ་ཉིད། །རུ་ནི་ཐབས་ཆེན་ཆགས་པའི་ཡུམ། །ཀ་ནི་བསྐྱོད་པས་ཕྲིན་ལས་མཆོག །ཀ་ནི་མཛེས་པས་གཉིས་མེད་སྐུ། །རུ་ནི་ཆགས་པའི་གསུང་ཉིད་དེ། །ཧེ་ནི་བདེ་བའི་ཐིག་ལེ་ཉིད། །ཀ་ནི་
འདོད་པའི་དབང་མོ་ཆེ། །རུ་ནི་སྒེག་པ་ཧེ་རུ་ཀ །ཧེ་ནི་ཐིག་ལེ་བདེ་ཆེན་པོ། །ཧེ་ནི་ཡབ་ཡུམ་འཁྲིལ་བ་སྟེ། །རུ་ནི་སྦྱོར་བའི་ཕྱག་རྒྱ་བཞི། །ཀ་ནི་ཐིག་ལེ་འབེབས་པའི་ལས། །ཧེ་ནི་རྒྱུ་རྐྱེན་བྲལ་བ་ལ། །རུ་ནི་ཡབ་ཡུམ་མཛེས་པར་སྣང་། །གཉིས་མེད་ཐིག་ལེ་བདེ་བ་ཆེ། །རང་ལ་གད་མོས་ཚུལ་དུ་སྣང་། །ཀ་ནི་ཡབ་ཡུམ་ཕྱག་རྒྱ་ཆེ། །མ་ནི་བསྐྱེད་པ་ལྷ་ཡི་ཚོགས། །ལ་ནི་སྦྱོར་བའི་དངོས་གྲུབ་མཆོག །ཐབས་དང་ཤེས་རབ་གཉིས་མེད་པའི། །ཉི་ཟླའི་འོད་ཀྱི་གང་བུ་ལ། །བསྐྱོད་པ་རླུང་གི་དབང་བསྐུར་བས། །མ་ལུས་བདེ་བ་ཆེན་པོར་སྣང་། །ལ་ལར་ཆགས་པས་ཆགས་བྲལ་འགྱུར། །ཆགས་པས་ཆགས་པ་འཇོམས་བྱེད་པ། །ཐབས་ཆེན་ལྡན་པའི་སྐྱེས་བུ་ནི། །དུག་གིས་དུག་ནད་སེལ་བའོ། །དངོས་གྲུབ་ཞིང་གྱུར་རྣལ་འབྱོར་པ། །ཉོན་མོངས་བར་ཆོད་བདུད་ལྔ་པོ། །ཐབས་ཆེན་ཐོབ་པའི་རྣལ་འབྱོར་པས། །དེ་ཉིད་དེ་ཡིས་རྣམ་པར་གྲོལ། །དུག་ཉིད་བདུད་རྩིར་གྱུར་པ་ལ། །རིགས་མིན་ཐབས་ཀྱིས་རྣམ་པར་འཇོམས། །དེ་ནི་མ་རྟོགས་ཉོན་མོངས་དུག །ཐབས་ཀྱིས་བདུད་རྩི་འབར་བར་བྱེད། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། བདེ་བ་ཆེན་པོར་བྱིན་གྱིས་རླབས་པའི་ལེའུ་སྟེ་ཉི་ཤུ་རྩ་བརྒྱད་པའོ།། །།དེ་ནས་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་རང་བཞིན་ཁྱོད། །ཡིད་བཞིན་ནོར་བུ་ཆེན་པོ་ལྟར། །འགྲོ་བ་ཀུན་གྱི་བསམ་པ་བསྐང་། །དངོས་གྲུབ་ཀུན་གྱི་གཏེར་དུ་གྱུར། །དངོས་གྲུབ་སྒྲུབ་ཐབས་བཤད་དུ་གསོལ། །ཞེས་གསོལ་པ་ལས། དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །སྒྲུབ་པ་མཆོག་གི་རྣལ་འབྱོར་པ། །དད་དང་དམ་ཚིག་བརྟུལ་ཞུགས་དབང་། །ངེས་པར་ཐོབ་པའི་རྒྱལ་པོ་ཡིས། །འཇིགས་པ་བག་ཚ་ཀུན་སྤངས་ཏེ། །དུར་ཁྲོད་ལ་སོགས་
དབེན་པའི་སར། །རང་གི་ཏིང་འཛིན་ལས་རུང་ནས། །ནམ་མཁའི་དབྱིངས་སུ་ཟླ་བ་བསྒོམ། །རང་ཉིད་སྒྲུབ་པ་ཧཱུཾ་བཅས་བསམ། །དེ་ལས་རྡོ་རྗེ་སེམས་དཔའ་ནི། །ཡབ་ཡུམ་འོད་དང་གཟི་མདངས་བཅས། །ཏིང་འཛིན་རིམ་པར་བསྐྱེད་བྱས་ནས། །ཆོ་འཕྲུལ་མངོན་ཤེས་རིམ་པ་ཡིས། །སངས་རྒྱས་ཞིང་ཁམས་བགྲོད་པར་བྱ། །ནམ་མཁའི་དབྱིངས་སུ་ཟླ་བ་བསྒོམ། །སྭཱ་ལས་རིན་ཆེན་འོད་འབར་བསམ། །རིན་ཆེན་སེམས་དཔའ་ཡབ་ཡུམ་བསྒོམ། །ཏིང་འཛིན་རིམ་པས་བསྐྱེད་ནས་ནི། །སངས་རྒྱས་ཞིང་ཁམས་བགྲོད་པར་བྱ། །ནམ་མཁའི་དབྱིངས་ཀྱི་དཀྱིལ་འཁོར་ན། །གྲུབ་པའི་ཨ་ལས་ཟླ་བ་བསམ། །ངེས་འགྱུར་ཧྲཱྀཿསྙིང་པདྨར་འབར། །པདྨ་སེམས་དཔའ་ཡབ་ཡུམ་བསྒོམ། །ཏིང་འཛིན་ལམ་གྱིས་དྲངས་ནས་ནི། །སངས་རྒྱས་ཞིང་ཁམས་ངེས་བགྲོད་བྱ། །ནམ་མཁའི་དབྱིངས་ཀྱི་དཀྱིལ་འཁོར་ན། །ཨ་ལས་ཟླ་བའི་དཀྱིལ་འཁོར་བསམ། །རྒྱ་གྲམ་ལས་ཀྱི་སེམས་དཔའ་ཉིད། །གྲུབ་པའི་ཏིང་འཛིན་བསྐྱེད་ནས་ནི། །བདག་གཞན་བྱ་བ་བསྒྲུབ་པའི་ཕྱིར། །སངས་རྒྱས་ས་ལ་བགྲོད་པར་བྱ། །རིག་འཛིན་སྒྲུབ་པའི་རྣལ་འབྱོར་པ། །དགོན་པ་དབེན་པའི་ས་ཕྱོགས་སུ། །བཱ་ཡཱ་མཎྜལ་ལྔ་སྟེང་དུ། །བྱིས་པ་ཕོ་མོ་གཙང་མ་ལ། །ཁྲུས་དང་དྲི་ཞིམ་ལྡན་བྱས་ལ། །མ་ཡེངས་རྩེ་གཅིག་བསམས་པས་གང་། །བདག་ཉིད་ཧེ་རུ་ཀར་གསལ་བས། །མ་ནོར་ལྷ་ནི་བརྟེན་བྱས་ལ། །བར་ཆོད་བགེགས་ནི་བསྐྲད་བྱས་ལ། །ཚངས་པ་དང་ནི་བརྒྱ་བྱིན་དང་། །མཐུ་ཆེན་ཕྱོགས་སྐྱོང་འཇིག་རྟེན་སྐྱོང་། །སྔགས་དང་ཕྱག་རྒྱ་ཏིང་འཛིན་གྱིས། །བཀུག་ནས་དེ་ལ་དབབ་པར་བྱ། །བཅིངས་ནས་འདར་ཞིང་འཕར་བ་དང་། །དམ་ཆུ་བླུད་ལ་སྨྲ་རུ་གཞུག །གལ་ཏེ་སྨྲ་བར་མི་བྱེད་ན། །དབང་ཆེན་གསང་བདག་རྒྱལ་པོ་ཡིས། །ཧེ་རུ་ཀ་ཡི་ཏིང་འཛིན་གྱིས། །སྔགས་དང་ཕྱག་རྒྱས་བསྡིག་བྱའོ། །བདུད་རྩི་ལྕེ་ལ་བཞག་ནས་ཀྱང་། །ཁམས་གསུམ་
གཏམ་ནི་སྨྲ་བར་བྱ། །བདག་ཉིད་གསལ་བའི་ལྷ་བསྒོམས་ནས། །སྙིང་གར་ཡི་གེ་འབྲུ་གསུམ་བསམ། །མ་ལུས་གཟི་བྱིན་གསུམ་བསྒོམས་ནས། །འོད་ལུས་ཡི་གེ་ཨ་དཀར་འབར། །དེ་ཉིད་རིམ་པས་འདུས་པ་ལས། །སྟོང་ཉིད་ཨ་ཡི་རི་མོར་ཐིམ། །རྒྱུ་བ་ཆད་ནས་ཟག་པ་བྲལ། །བདེ་ཆེན་འབར་བའི་གཟི་མདངས་ལྡན། །ཉི་ཟླ་ནམ་མཁར་གནས་བར་དུ། །འཆི་བ་མེད་ཅིང་གནས་པར་འགྱུར། །དམ་བཅས་འདོར་དང་བགེགས་དབང་གྱུར། །དགྲ་དབང་གྱུར་དང་མཁའ་འགྲོས་གཙེས། །སྦོད་གཏོང་ཁར་འདུས་དུས་མིན་འགྲོ། །ཚེ་ཉམས་པ་ཡི་རྒྱུ་རུ་བཤད། །གཟི་བྱིན་མེད་དང་ལུས་ཉམས་བྲལ། །མདོག་ཉམས་བྱ་བ་དོར་བ་དང་། །ཡིད་མི་བདེ་ཞིང་ལུས་སྟོབས་ཆུང་། །ཚེ་ཉམས་པ་ཡི་རྟགས་སུ་བཤད། །གང་ཞིག་རོ་ལངས་བསྒྲུབ་འདོད་པས། །རྒྱལ་པོ་རྗེའུ་བྲམ་ཟེའི་རིགས། །ཆོ་རིགས་བཙུན་ཞིང་དར་ལ་བབ། །བཞིན་ལེགས་རྨ་མེད་བཙལ་བྱས་ནས། །ལེགས་པར་བཀྲུས་ཤིང་དྲིས་བྱུགས་ནས། །སྟེགས་བུའི་སྟེང་དུ་གཞག་པར་བྱ། །རྩ་བ་ལས་སྔགས་སྟེང་དུ་ནི། །དྲག་པོ་རོ་ལངས་སྔགས་ཀྱིས་དགུག །ཕྱག་རྒྱ་བཞི་ཡིས་དབབ་པར་བྱ། །སྣུམ་དང་བཀྲག་དང་མནར་བྱུང་ན། །འོག་ཏུ་གཞུམ་ཞིང་དྲག་སྔགས་བཟླས། །འདར་དང་འཕར་དང་སྒྲ་བྱུང་ན། །རྡོ་རྗེ་རོ་ལངས་གྲུབ་པ་སྟེ། །བདུད་རྩིས་དམ་ཕོག་གཏམ་དྲིས་ན། །བདེན་པར་སྨྲ་བར་བྲ་རུ་འགྱུར། །བསླང་ལ་མནའ་བགག་དམ་ཕོག་ལ། །ལས་བཅོལ་རོ་ལངས་རྐང་མགྱོགས་འགྱུར། །ཁ་ནས་ལྕེ་ཧྲཱྀཿབྱུང་སོས་གཅད་དེ། །རོ་ལ་བརྡབས་ན་གསེར་དུ་འགྱུར། །ལྕེ་གཅོད་ཐོད་པ་རལ་གྲི་སྟེ། །མགོ་བཅད་གོ་མཚོན་གཡུལ་བཟློག་སྟེ། །སྡེ་བརྒྱད་དམག་ཀྱང་འཇོམས་འགྱུར་ན། །རྨོངས་པ་མི་ལྟ་སྨོས་ཅི་དགོས། །བདག་ཉིད་ལས་ཀྱི་སེམས་དཔའ་སྟེ། །འོག་ཏུ་ཟླ་བའི་དཀྱིལ་འཁོར་བསམ། །དེ་འོག་རླུང་གི་དཀྱིལ་འཁོར་ཏེ། །དྲག་ཞན་མཐོ་དམན་རྟགས་དང་སྦྱོར། །ཏིང་འཛིན་རླུང་གི་གོམ་པ་ཡིས། །ཕྱོགས་བཅུར་
བསམ་པས་ཕྱིན་པར་འགྱུར། །སྟེང་ཡང་ཆུ་ནང་ཟླ་བ་ཐིམ་པར་བསམ། །དེ་སྟེང་རྡོ་རྗེ་རྒྱ་གྲམ་བསམ། །མངོན་དུ་གསལ་བར་གྱུར་པ་ན། །ཏིང་འཛིན་མ་ཡེངས་སྟོབས་ཀྱིས་བགྲོད། །རྒྱ་མཚོ་འབབ་ཆུ་ལ་སོགས་པར། །ཐོགས་པ་མེད་པར་འགྲོ་བར་འགྱུར། །བདག་ཉིད་རྡོ་རྗེ་སེམས་དཔའ་སྟེ། །ཐུགས་ཀའི་ཧཱུཾ་ནི་གྲངས་མེད་པ། །ནམ་མཁའི་རྡོ་རྗེའི་སྐས་ཀྱིས་གཏམས། །གང་དགའ་ས་ཕྱོགས་བགྲོད་པ་ནི། །སེམས་ཀྱི་སྤྱོད་ཡུལ་ཡངས་པར་འགྱུར། །བདག་ཉིད་གང་རུང་ལྷར་བསྒོམས་ལ། །ཟླ་བའི་དཀྱིལ་འཁོར་སྟེང་གནས་ཏེ། །དེ་འོག་རླུང་གི་དཀྱིལ་འཁོར་བསམ། །རླུང་ལ་རླུང་གིས་བསྐྱོད་བསྒོམས་པས། །གང་ལ་དགའ་བའི་ས་ཕྱོགས་སུ། །མཁའ་ལ་ཐོགས་པ་མེད་པར་འགྲོ། །ཐུགས་རྗེས་འགྲོ་བའི་དོན་བྱེད་ན། །བདག་ཉིད་དྲག་པོའི་ལྷར་གསལ་འབར། །རོལ་པའི་དཀྱིལ་འཁོར་མངོན་བསམ་སྟེ། །བར་ཆོད་བགེགས་ནི་བསལ་བར་བྱ། །རོ་ལ་ངེས་པའི་ཁྲུས་བྱས་ཞིང་། །ཤེས་པ་བསྡིམས་བྱུག་རྒྱན་བཏགས་ལ། །འཁོར་བའི་རྟོག་པ་སྦྱང་བྱས་ལ། །དཀྱིལ་འཁོར་ཉིད་དུ་བསམ་བྱ་ཞིང་། །རང་རང་ལྷ་ཡི་སྙིང་པོ་དག །རས་ཆེན་དག་ལ་བྲིས་ཏེ་གདགས། །ཡང་ན་དེ་ཉིད་མེ་ཡི་ལྷ། །རིགས་དང་མཐུན་པར་གསལ་བསྒོམས་ནས། །རང་གི་མཆོད་པ་གང་རིགས་པས། །དཀྱིལ་འཁོར་ལྷ་ལ་མཆོད་པར་བསམ། །ཡང་ན་རོལ་པའི་དཀྱིལ་འཁོར་གྱི། །ཐུགས་རྗེ་འབྱུང་བའི་དཀྱིལ་འཁོར་ཏེ། །དྲག་ཤུལ་སྒྲོལ་བའི་གིང་ཆེན་དེས། །གདུག་པ་མ་ལུས་བཀུག་བསྡིམས་ནས། །དྲག་པོ་སྟོབས་ཀྱིས་བསྒྲལ་ནས་ནི། །འཁོར་བའི་ས་བོན་བསྲེགས་ནས་ནི། །ཆོ་ག་གསུམ་གྱིས་ལྷ་བསྐྱེད་ནས། །འོག་མིན་སྦྱོར་བའི་ལྷུམས་སུ་འཕང་། །ཡེ་ཤེས་ཚོགས་སུ་བསྔོ་བར་བྱ། །ཕུང་པོ་ལྷག་མ་བསྒྲལ་བ་ནི། །ལྷ་ཡི་ཚོགས་དང་སྦྱར་ནས་ནི། །རྡོ་རྗེ་གསང་བའི་གླུ་བླང་ཞིང་། །བསྲེག་རྫས་མཆོད་པའི་སྐོངས་སུ་འབུལ། །རྡོ་རྗེ་གདུང་
བའི་གླུ་བླང་ཞིང་། །བཀྲ་ཤིས་གནས་ཀྱི་སྨོན་ལམ་གདབ། །མི་དགེ་སྡིག་པའི་བག་ཆགས་དང་། །གདུང་བའི་གླུ་དང་བཅས་ཏེ་བཤགས། །རྡོ་རྗེ་མེ་རིའི་ལྷ་རྣམས་ཀྱང་། །ལེགས་ཉེས་རབ་འབྲིང་ཐ་མ་བརྟག །ངན་ཞིང་བག་ཆགས་མ་བྱེད་ན། །ལན་གསུམ་བསྲེག་པར་བྱས་ན་ནི། །ངན་འགྲོ་ངེས་པར་སྐྱེས་པ་ཡང་། །ཐར་བར་འགྱུར་ཏེ་ཐེ་ཚོམ་མེད། །འདི་དག་རིམ་པར་བརྩམ་པ་ཡང་། །རྣལ་འབྱོར་ལམ་ལ་ཞུགས་པ་དང་། །ཐ་མལ་པ་དག་སྤྱད་པ་དང་། །མ་ཤིས་གདོན་གྱིས་ཉན་པ་ལ། །རིམ་བཞིན་ལས་ནི་བརྩམ་པར་བྱ། །དངོས་གྲུབ་ཡིད་བཞིན་འགྲུབ་འདོད་ན། །བྱམས་དང་སྙིང་རྗེས་གཞི་གཟུང་ནས། །མ་ནོར་སྙིང་པོའི་དོན་རྟོགས་ནས། །ཏིང་འཛིན་སྔགས་དང་ཕྱག་རྒྱར་ལྡན། །དད་དང་བརྩོན་འགྲུས་བརྟུལ་ཞུགས་ཀྱིས། །བར་ཆད་མེད་པར་བསྒྲུབས་པས་ན། །ལོ་དང་ཟླ་བས་འགྲུབ་པར་འགྱུར། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། དངོས་གྲུབ་ཀྱི་རྟོག་པ་བསྟན་པའི་ལེའུ་སྟེ་ཉི་ཤུ་རྩ་དགུ་པའོ།། །།དེ་ནས་ཡང་གསང་བའི་བདག་པོས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །མ་བཙལ་རང་ཤར་ཕྲིན་ལས་བདག །ཐུགས་རྗེ་ཕྲིན་ལས་ལྷུན་གྱིས་གྲུབ། །ཕྲིན་ལས་རིམ་པ་བཤད་དུ་གསོལ། །ཞེས་གསོལ་ཏོ། །དེ་ནས་བཅོམ་ལྡན་འདས་དཔལ་ཀུན་ཏུ་བཟང་པོ་ཡེ་ཤེས་རྔམ་པའི་རྒྱལ་པོ་དེས་འདི་སྐད་ཅེས་བཀའ་སྩལ་ཏོ། །བྱང་ཆུབ་སེམས་ནི་རྡུལ་དང་བྲལ། །ཆེ་བའི་ཡོན་ཏན་མཁའ་དང་མཉམ། །ཅིར་ཡང་སྣང་ཡང་ཉིད་ལ་འདུས། །ཆོས་ཉིད་ངང་ལ་རྣམ་རྟོག་མེད། །གངས་འདབས་དང་ནི་ཆུ་གླིང་དང་། །ནགས་ཚལ་སྨན་ལྗོངས་མེ་ཏོག་ཚལ། །ཕུག་དང་གྲོག་མདོའི་འཇིགས་པ་དང་། །དུར་ཁྲོད་ཤིང་གཅིག་མ་མོའི་ཁྱིམ། །རྣམ་པར་སྣང་མཛད་དཀར་པོ་དང་། །རྡོ་རྗེ་རིན་ཆེན་གསེར་གྱི་མདོག །མཐའ་ཡས་པདྨ་རཱ་ག་སྟེ། །རྡོ་རྗེ་ཡིས་ནི་སྣ་ཚོགས་མདོག །ཨོཾ་ཏྲཱཾ་ཧྲཱྀཿཧཱུཾ་ལས་བྱུང་བའི། །རང་གི་འཁོར་དང་བཅས་པར་བསྒོམ། །ཞི་བ་ལ་ནི་ཟླུམ་པོ་སྟེ། །རྒྱས་པའི་ཐབ་ཁུང་གྲུ་བཞི་པ། །དབང་གི་དཀྱིལ་འཁོར་ཟླ་གམ་ལ། །དྲག་པོའི་ཨེ་སྟེ་མཁའ་འདྲའི་དབྱིབས། །འཁོར་ལོ་རིན་ཆེན་པདྨ་
དང་། །རྡོ་རྗེ་ཡིས་ནི་རྣམ་པར་བརྒྱན། །དཱ་རུ་ཎ་དང་སྟོབས་འབྱིན་དང་། །འདོད་པ་སྐྱེས་དང་ཁྲོ་བར་བཤད། །དད་པ་དང་ནི་དགའ་བ་དང་། །ཆགས་དང་ཁྲོས་པའི་སེམས་སུ་བཤད། །རྒྱལ་པོ་རྗེ་རིགས་སྨད་འཚོང་མ། །ཤན་པའི་མེ་ནི་བླང་བ་དང་། །མཛེས་མ་དང་ནི་ཕྱུག་མོ་དང་། །སྨད་འཚོང་མ་དང་ཡུགས་ས་མོ། །དངུལ་དང་གསེར་དང་ཟངས་མ་དང་། །ལྕགས་ཀྱི་ཕུར་པ་བསྔགས་པ་ཡིན། །སྔགས་ཀྱང་རང་རང་སྔགས་ཉིད་ལ། །ཤཱནྟིཾ་པུཥྚིཾ་ཀུ་རུ་དང་། །བ་ཤཾ་མཱ་ར་ཡ་ཡིས་མཛེས། །ཞོ་དང་འབྲས་དང་ནས་དཀར་དང་། །མར་སར་འོ་མ་བཞི་ལ་སྦྱར། །མར་རྙིང་ཕྲུམ་དང་གྲོ་ཆན་དང་། །ཐུད་དང་དྲི་ཞིམ་ཤིང་རྒྱས་པ། །འབྲུ་མར་སྦྲང་རྩི་ཤ་ཆེན་དང་། །འབྲས་དམར་ཆན་དང་ཙན་དན་དམར། །ཁྲག་དང་ཤ་ཆེན་ཚིལ་ཆེན་དང་། །ཁྲག་གསུམ་དུག་དང་མི་རུས་བཅས། །གསོད་པར་བྱེད་པའི་མཆོག་ཏུ་འགྱུར། །དབྱར་དང་སྟོན་དང་དགུན་དང་དཔྱིད། །སྔ་དྲོ་གུང་དང་དགོངས་ཀ་དང་། །ནམ་གུང་རྣམས་ནི་དུས་ཡིན་ནོ། །ནད་དང་སྡུག་བསྔལ་ཞི་བ་དང་། །ཚེ་དང་ལོངས་སྤྱོད་རྒྱས་པ་དང་། །དགྲ་བགེགས་གཟུངས་མ་དབང་བྱ་དང་། །དགྲ་བགེགས་གདུག་པ་ཚར་གཅོད་དང་། །དགོས་ཆེད་འབྲས་བུར་བཤད་པ་ཡིན། །ཆོས་ཀྱི་འཁོར་ལོ་ནང་གི་གནས། །དབྱིབས་དང་ཁ་དོག་ལ་སོགས་པས། །རང་བཞིན་ལས་དང་ཐབས་བཅས་པ། །ཕྲིན་ལས་བཞི་རུ་གྲུབ་པ་ཡིན། །བྷ་ག་གསང་བའི་ངོ་བོ་ལས། །ཕྲིན་ལས་བཞི་ཡི་རང་བཞིན་གནས། །དབྱིབས་དང་ཁ་དོག་ལས་རྣམས་ཀྱིས། །ཨེ་བཾ་མ་ཡཱ་གྲུབ་པར་གནས། །རླུང་དང་བླ་མའི་བྱིན་རླབས་ཀྱིས། །རྣམ་པར་རྟོག་པའི་རྡུལ་ཞི་ཞིང་། །བདེ་བ་ཆེན་པོ་རྒྱས་པ་དང་། །ལུས་དང་རླུང་དང་སྣང་བ་དང་། །རྣམ་རྟོག་ཕྱི་ནང་སྣོད་བཅུད་རྣམས། །བདེ་བའི་དབང་དུ་གྱུར་པས་ནི། །རྣམ་པར་རྟོག་པའི་གཞི་མེད་པས། །ཕྱིས་མི་འབྱུང་བར་སྔགས་ཀྱིས་གསད། །
ངོ་མཐོན་གསད་པའི་དམ་ཚིག་གིས། །རྡོ་རྗེ་གསད་པའི་རང་བཞིན་ནི། །སངས་རྒྱས་དང་ནི་སེམས་ཅན་དང་། །ཕྱི་ནང་སྣོད་བཅུད་མ་ལུས་པ། །རྡོ་རྗེ་རྟོག་པའི་ཡེ་ཤེས་ཀྱིས། །མ་ལུས་པར་ནི་དུས་གཅིག་བསྒྲལ། །རང་བྱུང་ཐུགས་རྗེའི་ཕྲིན་ལས་ཀྱིས། །གང་ལ་ཇི་ལྟར་འདུལ་བ་དང་། །མ་བཀག་རླབས་ཀྱིས་སྤྱོད་པ་ནི། །སངས་རྒྱས་ཀུན་གྱི་སྤྱོད་པ་སྟེ། །ཐོག་མཐའ་མེད་པའི་རྡོ་རྗེ་སེམས། །དཔལ་ཆེན་ཧེ་རུ་ཀ་ཡི་དངོས། །ཐོག་མཐའ་མེད་པའི་ཕྲིན་ལས་ནི། །ཇི་ལྟར་འཚམས་པ་བཞིན་དུ་སྣང་། །ཞེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། ཕྲིན་ལས་ལྷུན་གྱིས་གྲུབ་པའི་ལེའུ་སྟེ་སུམ་ཅུ་པའོ།། །།དེ་ནས་གསང་བའི་བདག་པོས། འདི་སྐད་ཅེས་གསོལ་ཏོ། །དུས་གསུམ་སངས་རྒྱས་ཐམས་ཅད་ཀྱི། །གསང་བ་གསུམ་ལ་གནས་པའི་བདག །གསང་བ་ཀུན་མཁྱེན་རྒྱལ་པོ་ཡིས། །གསང་སྔགས་ལམ་ནི་བཤད་དུ་གསོལ། །ཞེས་གསོལ་ཏོ། །དེ་ནས་བཅོམ་ལྡན་འདས་དཔལ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །ཨེ་མ་ཧོ་སངས་རྒྱས་ཐམས་ཅད་ཀྱི། །ཐབས་ཆེན་དྲི་མ་མེད་པའི་ལམ། །དཀའ་ཐུབ་དཀའ་སྤྱོད་འབད་པ་མེད། །ཉོན་མོངས་གཟིར་དང་ཞེན་པ་མེད། །འདོད་པ་ལྔ་ལ་སྤྱོད་བྱེད་ཅིང་། །བདེ་བས་བྱང་ཆུབ་འགྲུབ་པར་འགྱུར། །དང་པོ་ཐ་མལ་ཞེན་བསལ་ནས། །བྱིན་བརླབ་དམ་ཚིག་ལྡན་བྱས་ཏེ། །ཕྱི་ནང་ཞེན་པ་ཀུན་བསལ་ནས། །གང་དུ་ཞེན་པ་ཀུན་བརྟགས་ནས། །འདུ་ཤེས་ཡིད་འཛིན་བྲལ་བ་ཡི། །སྟོང་ཉིད་མ་སྐྱེས་རྣལ་འབྱོར་བསྒོམ། །མ་སྐྱེས་པ་ནི་སྣ་ཚོགས་དོན། །དེ་ཉིད་དངོས་པོ་མེད་གནས་པའོ། །སྒྱུ་མ་སྨིག་རྒྱུ་ལྟར་སྣང་བའི། །མ་ལུས་སྒྱུ་མའི་རྣལ་འབྱོར་བསྒོམ། །དངོས་པོ་གསང་བ་གསུམ་གྱི་དངོས། །གདན་སྟེངས་གསལ་བ་དེ་ཉིད་ཀྱིས། །མ་ལུས་ཞེན་པ་གསུམ་དག་ནས། །ཕྲ་མོའམ་ཕྱག་རྒྱ་ཆེན་པོར་བསྒོམ། །དེ་ནས་རིམ་པར་
གསལ་བསྒོམས་ལ། །རྩ་བའི་ལྷ་ནི་ཚང་འགྱུར་ལ། །ཡན་ལག་དགུ་སོགས་ཀུན་ཚང་ནས། །སངས་རྒྱས་དཀྱིལ་འཁོར་གྲངས་མེད་སྣང་། །སྤྱོད་ལམ་ཡེ་ཤེས་ལྷར་གསལ་ནས། །དུར་ཁྲོད་རབ་དབེན་བས་མཐའ་རུ། །དུར་ཁྲོད་རྒྱན་དང་མཆོད་པར་བཅས། །དུར་ཁྲོད་གསང་བའི་རོལ་མོར་བཅས། །རྣལ་འབྱོར་ཕོ་མོ་གྲངས་ལྡན་པས། །མོས་དང་སྤྱོད་པའི་བརྟུལ་ཞུགས་བཅས། །འབར་བ་ལྔ་ཡི་བྲོ་གླུར་བཅས། །ལོ་འམ་ཟླ་བའི་གྲངས་བཞིན་དུ། །ཐབས་དང་ཆོ་གར་ལྡན་སྤྱོད་པས། །ཟག་མེད་ནམ་མཁའི་ལམ་ལ་གནས། །སྐྱེ་འཇིག་མེད་པའི་སྐུར་འགྱུར་ཏེ། །བསྐལ་པ་གྲངས་མེད་ཚེ་ལ་དབང་། །བདེན་པའི་ངེས་མཐོང་འཇིག་པ་མེད། །ཏིང་འཛིན་གྲངས་མེད་དབང་ཐོབ་ནས། །བསྐལ་པ་བྱེ་བ་གྲངས་མེད་དུ། །ཡེངས་མེད་ཡེ་ཤེས་ཕྱག་རྒྱ་ཆེ། །ཧེ་རུ་ཀ་ཡི་རྡུལ་ཕྲན་ནི། །སྟོང་གསུམ་ཁྱབ་པར་གསལ་བ་ལ། །སྤྱོད་ལམ་ལོག་དང་མ་ལོག་མེད། །གོམས་པ་མཐར་ཕྱིན་མཐར་ཐུག་ས། །སངས་རྒྱས་རྫུ་འཕྲུལ་ཆེར་གྲགས་ཤིང་། །མངོན་ཤེས་རྫུ་འཕྲུལ་ཡེ་ཤེས་ལྡན། །ཡོན་ཏན་ལྷུན་གྲུབ་ངོ་མཚར་ཆེ། །རང་བྱུང་ཡེ་ཤེས་འབར་བ་ནི། །གསང་བ་མཐར་ཕྱིན་གསུམ་གྱི་བདག །རང་བྱུང་རྩལ་འཆང་བདུད་འདུལ་ཞིང་། །དཔའ་བོ་བདུད་འདུལ་བདུད་ཀྱི་གཉེན། །སྐད་ཅིག་ཙམ་ལ་ཐོགས་པ་མེད། །དང་པོ་མེད་པས་མ་བྱུང་བ། །ཐོག་མ་ཐ་མ་དངོས་མེད་པའི། །རང་བྱུང་མཐའ་དབུས་མེད་པ་ཡི། །དེ་བཞིན་ཆོས་ཉིད་ཆོས་ཀྱི་སྐུ། །ནམ་མཁའི་མཐའ་ལ་ལོངས་སྤྱོད་པ། །རང་བྱུང་འཁོར་ལོ་འོད་ཀྱིས་བསྐོར། །རོལ་པའི་ལོངས་སྤྱོད་བདེ་དང་ལྡན། །འཁོར་ལོ་སངས་རྒྱས་མངོན་ཐོབ་ནས། །ཆོ་འཕྲུལ་ནམ་མཁའི་མཐར་ཐུག་པ། །སྤྲུལ་པ་འགྲོ་འོང་མེད་པ་ཡིས། །ནམ་མཁའི་སྐར་ཚོགས་བཀྲམ་པ་ལྟར། །འཕེལ་འགྲིབ་ཕྱོགས་ཆར་ཡོངས་ལས་འདས། །རྒྱ་མཚོ་ཆུ་ཡི་རྦ་རླབས་ལྟར། །གྲངས་ལས་འདས་ཀྱང་ཉིད་ལ་
རྫོགས། །ཡེ་ཤེས་ལྷ་མོ་དཔག་མེད་པའི། །ཞལ་ཕྱག་བདེ་བའི་དབང་ཐོབ་པའི། །ཡེ་ཤེས་ནམ་མཁའི་མཐར་ཐུག་པའི། །བདེ་བ་ཆེན་པོ་ཉིད་དུ་གསལ། །ཡེ་ཤེས་ཆེན་པོ་འདོད་ཆགས་སྟེ། །ལྷ་མོ་ཡེ་ཤེས་རོལ་པ་ལས། །བདེ་ཆེན་ནམ་མཁའ་མཐའ་དབུས་མེད། །སངས་རྒྱས་ཀུན་གྱི་རང་བཞིན་ནི། །ཐོག་མ་ཐ་མ་མེད་པ་ཡིས། །ཡེ་ཤེས་རྒྱ་མཚོ་ཚད་དང་བྲལ། །ཆེ་བའི་ཡོན་ཏན་གྲངས་མེད་པ། །རྡུལ་དང་མཉམ་པའི་རང་བཞིན་ཤར། །ཆོས་དང་ལོངས་སྤྱོད་རྫོགས་པའི་སྐུ། །ཐུགས་རྗེའི་སྤྲུལ་སྐུ་ཁྱབ་ཚད་མེད། །གང་དུ་སངས་རྒྱས་རྣམས་ནི་སྐུ་གསུང་ཐུགས། །ཕྱོགས་བཅུ་ནམ་མཁའ་ཁྱབ་པར་གང་གནས་པ། །རང་བྱུང་ཡེ་ཤེས་ཐུགས་རྗེ་ཆགས་དབང་གིས། །ཇི་སྲིད་འཁོར་བའི་བར་དུ་རྒྱུན་མི་འཆད། །སྨོན་ལམ་ཡེ་ཤེས་བར་ཆད་མི་མངའ་བ། །ཇི་སྲིད་འཁོར་བ་རྒྱུན་ཆད་བར་དུ་ནི། །མི་བསྙེལ་ཐུགས་རྗེའི་དབང་གིས་འཁོར་བར་བཞུགས། །ནམ་མཁའི་ནོར་བུ་བསམ་པ་ཡོངས་རྫོགས་ཤིང་། །དཔག་བསམ་ཤིང་ལྟར་འདོད་པ་སྐོང་མཛད་པ། །མ་རིག་མུན་སེལ་འགྲོ་བའི་སྡུག་བསྔལ་སེལ། །ཡེ་ཤེས་རི་བོས་ལྟ་ངན་རྣམ་པར་སེལ། །བདེ་བ་ཆེན་པོ་ལོངས་སྤྱོད་རྫོགས་པའི་སྐུ། །མཚན་དང་དཔེ་བྱད་འོད་འབར་མཛེས་ལྡན་ནི། །ཡེ་ཤེས་ལྷ་མོར་ཞལ་སྦྱོར་དམ་འཁྱུད་ཅིང་། །ལྕེ་འཇིབ་སེན་འདེབས་ཆགས་པའི་གར་སྟབས་ཀྱིས། །ཡེ་ཤེས་ཐིག་ལེའི་ཆར་གྱིས་རབ་རྒྱས་བདེ་བའི་སྐུ། །སྣ་ཚོགས་རྣམ་འཕྲུལ་དགྱེས་པའི་གར་ཐབས་ནི། །དགའ་དང་མཛེས་དང་ཆགས་དང་རོལ་པ་དང་། །འབར་དང་བསྡིགས་དང་འགྲེང་དང་མཉེས་པ་དང་། །སྤྲུལ་པའི་གར་དགུས་འགྱིངས་པ་ཡིས། །འགྲོ་བའི་བསམ་པ་ཡོངས་རྫོགས་ལྷུན་གྱིས་གྲུབ། །ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། རྣལ་འབྱོར་འབྲས་བུའི་ལེའུ་སྟེ་སོ་གཅིག་པའོ།། །།དེ་ནས་ཡང་དེ་བཞིན་གཤེགས་པས་དགོས་པ་ཆེན་པོ་
འདོད་ཆགས་གསང་བའི་ངོ་བོ་ཀུན་ཏུ་བཟང་པོ་ཡེ་ཤེས་རྔམ་པའི་རྒྱལ་པོས་འདི་སྐད་ཅེས་གསུངས་སོ། །དཔལ་ཧེ་རུ་ཀ་འདུས་པའི་རྒྱུད་ཆེན་པོ་འདི་ནི་ཕྱོགས་བཅུ་དུས་བཞིའི་སངས་རྒྱས་མ་ལུས་པའི་སྐུ་དང་གསུང་དང་ཐུགས་རྡོ་རྗེའི་ངོ་བོ་ཡིན་པས། དེ་ལ་གནས་པར་གྱིས་ཤིག །སངས་རྒྱས་ཀུན་གྱི་ངོ་བོ་གཅིག་པར་བསླབ་པར་གྱིས་ཤིག །ཐིག་ལེ་ཆེན་པོ་ཕྱོགས་མེད་པར་བསླབ་པར་གྱིས་ཤིག །དེ་བཞིན་གཤེགས་པ་ཐམས་ཅད་དང་། སེམས་ཅན་ཐམས་ཅད་དང་། ཕྱི་ནང་གི་དངོས་པོ་ཐམས་ཅད་སེམས་ཉིད་དོ། །སེམས་ཉིད་ནི་ཐོག་མ་དང་ཐ་མ་མེད་པའོ། །ངོ་བོ་ཉིད་ལ་གོ་འབྱེད་པའི་སྟོང་པ་བསམ་གྱིས་མི་ཁྱབ་པའི་རང་བཞིན། དཔག་ཏུ་མེད་པའི་ཡེ་ཤེས་ཀྱི་བྱིན་རླབས་ཅན། དུས་གསུམ་འདུས་མ་བྱས་པ་ལ་ཡེངས་པ་མེད་པའི་ཚུལ་དུ་གནས་པར་བྱའོ། །སྟོང་ལས་སྟོང་མིན་ཡེ་ཤེས་ཧེ་རུ་ཀ །མ་བཅོས་ཆོས་ཉིད་འབྱོར་པ་སྣ་ཚོགས་གཟུགས། །གང་ཡང་མ་ཡིན་བདེ་དང་མི་བདེ་མིན། །ཆགས་མིན་བྲལ་མིན་བདེ་མཆོག་རྟོག་པའི་རྒྱུད། །གསང་བདག་ཁྱོད་ཀྱིས་ལེགས་པར་ནན་ཏན་གྱིས། །འདྲི་འཆང་ཀློག་དང་འཛིན་བསམས་ལ། །བདུད་དང་ལོག་འདྲེན་བགེགས་ཀྱིས་མི་ཚུགས་ལ། །བསམ་པ་ཡིད་བཞིན་ནོར་བུ་ལྟ་བུར་འཕེལ། །དུས་མིན་འཆི་དང་ནད་དང་སྡུག་བསྔལ་དང་། །སྐྱེ་རྒས་ན་འཆིའི་རྦ་ཀློང་འཁྲུགས་པ་དང་། །མི་མཐུན་ཕྱོགས་བཞིའི་བདུད་ལས་རྣམ་པར་རྒྱལ། །དད་དང་གུས་དང་མོས་པས་འཆད་པ་དང་། །ཉན་དང་འཛིན་པ་རྡོ་རྗེ་འཛིན་པ་ཡིན། །དེ་བཞིན་བདེ་གཤེགས་རྒྱལ་པོའི་སྲས་པོ་སྟེ། །ཐོགས་མེད་འཁོར་བ་རྒྱ་མཚོ་ཕ་རོལ་ཕྱིན། །མཁའ་འགྲོ་ཤུགས་འགྲོ་རིག་འཛིན་བཀའ་ཉན་རྣམས། །བྲན་བཞིན་བཀའ་ཉན་རྗེས་སུ་འབྲང་བར་བྱེད། །དེ་ཕྱིར་གསང་བའི་བསྟན་པ་བཟུང་བར་གྱིས། །ཞེས་གསུངས་སོ། །དེ་བཞིན་གཤེགས་པ་མ་ལུས་པ་ཐམས་ཅད་དགྱེས་
པར་གྱུར་ཏེ། དཀྱིལ་འཁོར་ཆེན་པོ་མ་ལུས་པ་ཐམས་ཅད་ཉིད་ཀྱི་སྐུ་གསུང་ཐུགས་རྡོ་རྗེ་ལ་ཞུགས་ནས། དུས་གསུམ་གྱི་ཆོས་ཐམས་ཅད་སྐད་ཅིག་མ་གཅིག་ལ་བདེ་བ་ཆེན་པོ་ཉིད། དབྱིངས་ཐོག་མ་དང་ཐ་མ་མེད་པའི་ཐིག་ལེར་ཐིམ་ནས་མི་སྣང་བར་གྱུར་ཏོ། །ཏ་ཐཱ་ག་ཏ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན། དཔལ་ཧེ་རུ་ཀ་འདུས་པའི་རྒྱུད་ཆེན་པོ་ལས། རྒྱུད་གཏད་པའི་ལེའུ་སྟེ་སོ་གཉིས་པ་རྩ་རྒྱུད་རྫོགས་སོ།། །། ཞུས་ཆེན་གྱི་ལོ་ཙཱ་བ་བཻ་རོ་ཙ་ནས་བསྒྱུར་བའོ། །ནམ་མཁའི་སྙིང་པོས་བསྒྱུར་བ་ཡང་ཡོད་དོ།། །།