འཇིག་རྟེན་མཆོད་བསྟོད་སྒྲུབ་པ་རྩ་བའི་རྒྱུད་ཅེས་བྱ་བ།
རྒྱ་གར་སྐད་དུ། ལོ་ཀ་སྟོ་ཏྲ་པཱུ་ཛ་ཏནྟྲ་ནཱ་མ་ནོ་པི་ཀ་སནྟ་ཀཾ།བོད་སྐད་དུ། འཇིག་རྟེན་མཆོད་བསྟོད་སྒྲུབ་པ་རྩ་བའི་རྒྱུད་ཅེས་བྱ་བ། བཅོམ་ལྡན་འདས་རྡོ་རྗེ་འཛིན་པ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་ཉིད་གསང་བ་ཆེན་པོ་རྡོ་རྗེ་འཛིན་པ། དུས་གསུམ་གྱི་སངས་རྒྱས་མ་ལུས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་ཕྲིན་ལས་མ་ལུས་པ་ཡང་དག་པར་བསྒྲུབ་པར་མཛད་པ། མཐུ་དང་། སྟོབས་དང་། མི་འཇིགས་པ་དང་། དབང་ཕྱུག་དང་། གཟུགས་ཀྱིས་འཇིགས་པར་བྱེད་པ། གཏུམ་པོ་དང་། དྲག་ཤུལ་ཅན་དང་། དྲེགས་པ་ཅན་དང་། སྟོབས་ཅན་དང་། བཟོད་པར་དཀའ་བ་དག་མྱུར་དུ་འདུལ་བར་བྱེད་པ། བདེ་བར་གཤེགས་པ་ཐམས་ཅད་ཀྱི་ཐུགས་ཀྱི་སྙིང་པོ་དེ་ཁོ་ན་ཉིད་ལས་ཕྱུང་བ། བྱང་ཆུབ་སེམས་དཔའ་སེམས་དཔའ་ཆེན་པོ་
གཙོ་བོ་ས་ཆེན་པོ་མཐར་ཕྱིན་པ་ལ་རབ་ཏུ་ཞུགས་པ། འདོད་པའི་ཁམས་དང་གཟུགས་ཀྱི་ཁམས་སུ་གཏོགས་པའི་དབང་ཕྱུག་ལྷའི་རིགས་རྣམས་ཀྱི་བདག་པོ་ཆེན་པོ་ལྕང་ལོ་ཅན་གྱི་གནས་དང་རི་རབ་ཀྱི་གནས་ཀྱི་གནོད་སྦྱིན་རྣམས་ཀྱི་དེད་དཔོན་ཆེན་པོ་དེ། འོག་མིན་གྱི་གནས་ལྷའི་རྒྱལ་པོའི་ཁང་བཟངས་ན་བཞུགས་ཏེ། དུས་གསུམ་དུ་རྣམ་པར་བཞུགས་པའི་སངས་རྒྱས་རྣམས་ཀྱི་སྐུ་གསུང་ཐུགས་ཀྱི་རྣམ་པར་འཕྲུལ་པའི་འོད་ཟེར་སྣ་ཚོགས་བཀྱེ་ནས་ཚིག་འདི་སྐད་དུ་བསྐུལ་ཏེ། ཀྱེ་ཀྱེ་གསང་བདག་རྡོ་རྗེ་འཛིན། །ཁྱོད་ནི་སངས་རྒྱས་ཐམས་ཅད་ཀྱིས། །བསྟན་པ་དམ་པ་བསྲུང་བ་ཡི། །མཐུ་སྟོབས་བདག་པོར་དབང་བསྐུར་ཏེ། །དམ་ཚིག་ཆེན་པོ་དེ་གཟིགས་ལ། །སྐུ་གསུང་ཐུགས་ཀྱི་གསང་བ་ལས། །འཇིགས་བྱེད་འཇིགས་པར་བྱེད་པ་ཡི། །སྐུ་མཆོག་དྲག་པོའི་གསུང་དང་བཅས། །གཏུམ་པོའི་ཐུགས་ཀྱིས་ཤུགས་ཕྱུང་ལ། །གདུལ་དཀའ་མ་ལུས་འདུལ་བའི་ཕྱིར། །སྤྲུལ་པ་སྔ་འཕྲུལ་ཕྲིན་ལས་ཀྱིས། །སྔོན་གྱི་ཐུགས་དམ་རོལ་པར་མཛོད། །ཅེས་བསྐུལ་མ་ཐག་ཏུ་
བཅོམ་ལྡན་འདས་དེ་སངས་རྒྱས་ཀྱི་ཕྲིན་ལས་མཛད་པའི་དུས་ལ་བབ་པར་མཁྱེན་ནས། ཉིད་ཀྱི་སྐུ་གསུང་ཐུགས་ཞི་བ་ཆོས་ཉིད་དེ་བཞིན་ལས་མ་གཡོས་ཀྱང་གདུལ་བར་བྱ་བའི་ཡུལ་དྲག་ཤུལ་ཅན་རྣམས་ལ་གཟིགས་ནས། ཕྱོགས་བཅུ་ནམ་མཁའི་མཐའ་དང་མཉམ་པའི་འཇིག་རྟེན་གྱི་ཁམས་མ་ལུས་པ་ཐམས་ཅད་དུ་སྐུའི་རྣམ་པར་འཕྲུལ་པ་བསམ་གྱིས་མི་ཁྱབ་པ་ཁྲོ་བོ་ཆེན་པོའི་གཟུགས་འདི་ལྟ་སྟེ། སྐུ་མདོག་མཐིང་ནག་ཞལ་དགུ་པ་ལ། གཡས་ཀྱི་ཞལ་ནི་ཁམ་ནག་གཙིགས་པ། གཡོན་གྱི་ཞལ་ནི་སྨུག་ནག་བསྡུས་པ། དབུས་ཀྱི་ཞལ་ནི་མཐིང་ནག་ཁྲོ་ཞིང་རྔམ་པ། ཕྱག་གཡས་ཀྱི་རྡོ་རྗེ་འབར་བས་གཡོན་གྱི་ཐོད་ཁྲག་དཀྲུག་ཅིང་གསོལ་པ། གཡས་འོག་མ་བརྒྱད་ན་ལྷ་ཆེན་པོ་བསྒྲལ་བའི་མགོ་གཅད་དེ་བསྣམས་ལ། གཡོན་གྱི་འོག་མ་བརྒྱད་ན་ཀླུ་ཆེན་པོ་བརྒྱད་ཀྱི་མགོ་བསྣམས་པ། དེ་དག་ཀྱང་གཡང་གཞི་དང་བཅས་པ། གཡས་ཀྱི་སྤྱན་དགུ་གྱེན་ལ་བཟློག་པ། གཡོན་གྱི་སྤྱན་དགུ་འཕྲེད་ལ་གཟིགས་པ། དབུས་ཀྱི་སྤྱན་དགུ་ཐུར་ལ་སྡང་མིག་མཛད་པ། ཁྲོ་གཉེར་དྲག་པོ་དཔྲལ་བར་བསྡུས་པ། ཤངས་ནས་སྲིད་པའི་རླུང་དྲག་པོ་འཚུབ་པ། ཞལ་ནས་བསྐལ་པའི་མེ་འབར་བ། མཆེ་བ་དམར་པོ་བར་སྣང་ཁམས་སུ་གཙིགས་པ། སྨ་ར་ཨག་ཚོམ་སྤྲིན་བཞིན་དུ་གཏིབ་པ། དབུ་སྐྲ་རལ་པ་ཁམ་ནག་སྲིད་པའི་རྩེ་མོར་འབར་ཞིང་འཁྱིལ་པ། སྙན་ནས་གདུག་པའི་སྒྲ་ཆེན་པོ་འབྱིན་པ། སྦྲུལ་གྱི་ཆུན་པོས་ཡན་ལག་དཀྲིས་པ། བདུད་དང་ཏྲ་བསྒྲལ་བ་དང་གླང་པོ་ཆེའི་པགས་པ་ན་བཟར་གསོལ་པ། སྟག་གི་པགས་པས་སྐུ་སྨད་དཀྲིས་པ། ཁྲག་དང་ཞག་གི་ཐིག་ལེ་དང་རི་མོས་བརྒྱན་པ། ཐལ་ཆེན་གྱིས་ལུས་ལ་བྱུགས་པ། ཐོད་པ་སྐམ་པོ་དང་རློན་པ་དང་། ཤ་ཁྲག་ར་རི་ཅན་གྱིས་ཕྲེང་བར་བྱས་ནས་བརྒྱན་པ། ཞབས་བརྒྱད་ཀྱིས་ཚངས་པ་དང་ཁྱབ་འཇུག་དང་དབང་ཕྱུག་ཆེན་པོ་དང་། བརྒྱ་བྱིན་ཆུང་མ་དང་བཅས་པ་དག་མནན་པ། ཡུམ་ཆེན་མོ་
རབ་ཏུ་གཏུམ་མོ་འཇིགས་བྱེད་མ་རང་གི་སྐུ་དང་མཚུངས་པ་ཞིག་དང་མཉམ་པར་སྦྱོར་བ། གྲངས་མེད་ཅིང་བརྗོད་ཀྱིས་མི་ལང་བ་བྱེ་བ་ཏིལ་གྱི་གང་བུ་བཞིན་དུ་གྱུར་པ་ཐམས་ཅད་ཀྱང་། ཨོཾ་བཛྲ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཕཊ། ཅེས་བྱ་བའི་གསུང་སྒྲ་དྲག་པོ་འབྱིན་པ། དེ་དག་རེ་རེ་ལས་ཀྱང་སྤྲུལ་པ་དང་སྤྲུལ་པའི་ཡང་སྤྲུལ་བསམ་གྱིས་མི་ཁྱབ་པ་རབ་ཏུ་སྣང་བར་མཛད་པ། འཇིག་རྟེན་གྱི་ཁམས་ཀྱི་དྲེགས་པ་ཅན་ལྷའི་ཚོགས་དང་། བདུད་དང་། གཤིན་རྗེ་དང་། སྲིན་པོ་དང་། གནོད་སྦྱིན་དང་། གཟའ་བདུད་དང་། ཀླུ་དང་། རྒྱལ་པོ་དང་། གིང་དང་། མ་མོ་ཆེན་མོ་རྣམས་དང་། མཁའ་འགྲོའི་ཚོགས་དང་། རུ་ཏྲ་དང་། མུ་སྟེགས་དང་། སྲོག་གི་བདག་པོ་དང་། ནོར་གྱི་བདག་པོ་དང་། ཚེའི་བདག་པོ་དང་། སྔགས་ཀྱི་བདག་པོ་དང་། སྲིད་པའི་བདག་པོ་དང་། གཞན་ཡང་འཇིག་རྟེན་གྱི་ཁམས་ཐམས་ཅད་དང་། དུར་ཁྲོད་ཆེན་པོ་དང་། ཡུལ་ཆེན་པོ་དང་། འཛམ་བུའི་གླིང་གི་མཐའ་འཁོབ་ཀྱི་ས་དང་། རིའི་རྒྱལ་པོ་དང་། རི་ཕྲ་མོ་དང་། རྒྱ་མཚོ་དང་། ཆུ་བྲན་དང་། ཡོངས་སུ་འདུ་བའི་ཤིང་དང་། ནགས་ཚལ་ཆེན་པོ་དང་། གནས་ཕྲ་མོ་བསམ་གྱིས་མི་ཁྱབ་པ་དག་ན་གནས་པའི་འཇིག་རྟེན་གྱི་དྲེགས་པ་ཅན་ཕོ་དང་མོའི་རྣམ་པར་འདུག་པ་དང་། གཙོ་བོ་དང་འཁོར་དང་ཁྱད་པར་རྒྱུ་བ་དང་། བྲན་དང་གཡོག་གི་ཚོགས་དང་བཅས་པ་དག་གིས། རང་རང་གི་གནས་ནས་མྱུར་བ་དངང་ཞིང་སྐྲག་ལ་འཇིགས་པ་དང་ཡ་ང་བའི་སེམས་དང་། དུལ་བའི་སེམས་ཀྱིས་འཐོན་ཏེ། བཅོམ་ལྡན་འདས་དེའི་སྤྱན་སྔར་རླུང་དྲག་པོའི་ཤུགས་ཀྱིས་རབ་ཏུ་བསྐྱོད་པའི་ཤིང་བལ་གྱི་འདབ་མ་བཞིན་དུ་རང་དབང་མེད་པར་ལྷགས་པར་གྱུར་ཏེ། ཕྱོགས་བཅུའི་འཇིག་རྟེན་གྱི་ཁམས་མ་ལུས་པ་དང་། ཁྱད་པར་དུ་མི་མཇེད་ཀྱི་འཇིག་རྟེན་གྱི་ཁམས་ན་གླིང་བཞི་དང་། རྒྱ་མཚོ་ཆེན་པོ་དང་། རོལ་པའི་ཆུ་ཀླུའི་གནས་དང་བཅས་པ། རི་རབ་ཆེན་པོ་དང་། རི་བདུན་གྱི་གནོད་སྦྱིན་གྱི་ཚོགས་དང་། ལྷའི་གནས་འདོད་
པའི་ཁམས་དང་། གཟུགས་ཀྱི་ཁམས་དང་། གཟུགས་མེད་པའི་ཁམས་དང་བཅས་པ་དང་། དམྱལ་བ་དང་། ཡི་དྭགས་དང་། བྱོལ་སོང་གི་སྐྱེ་གནས་ན་གནས་པ་དང་། འཛམ་བུའི་གླིང་གི་སའི་ཆ་ན་གནས་པའི་དྲེགས་པ་ཅན་རྣམས་སོ་སོ་ནས་རང་རང་གི་མདུན་ན་དྲག་པོ་ཆེན་པོའི་སྐུ་གཟི་བྱིན་དཔག་ཏུ་མེད་པ། གཞན་དག་གིས་ཉེ་བའི་ཐུགས་མི་ཐུབ་པ་རེ་རེ་འདུག་པ་མཐོང་སྟེ། དེ་དག་ཐམས་ཅད་ཐ་དད་དུ་རང་རང་གི་སྡེ་དཔོན་ཆེན་པོ་རྣམས་ལ་སྐྱབས་སུ་འགྲོ་བར་བྱེད་དོ། །སྡེ་དཔོན་ཆེན་པོ་རྣམས་ནི་འཇིགས་བྱེད་ཆེན་པོའི་སྐུ་གསང་བ་པའི་བདག་པོ་དེ་ལ་རང་གི་འཁོར་དང་བཅས་ཏེ་སྐྱབས་སུ་འགྲོ་བར་བྱེད་དེ། ཐམས་ཅད་ཀྱི་རང་རང་གི་གཟུགས་དང་ལོངས་སྤྱོད་དང་འཁོར་དང་། རྒྱན་དང་བཞོན་པ་དང་གནས་དང་ཉེ་བར་བདེ་བར་སྤྱོད་པ་ཕྲིན་ལས་ཁྱད་པར་མ་ལུས་པར་བསྟན་ཅིང་། མིང་གི་སྙིང་པོ་རྣམས་མངོན་དུ་ཕྱུང་སྟེ་སྨྲས་སོ། །མ་ཧཱ་དེ་བ་ཨེ་ཛཿ། ཨུ་མ་དེ་བ་ཨེ་ཛཿ། དྷུ་དྲ་མ་དུ་ཕྲག་ཛཿ། དུནྟི་མ་དུ་ཛཿ། ཞེས་འཇིག་རྟེན་གྱི་དབང་ཕྱུག་ཆེན་པོ་ཡབ་ཡུམ་བདུད་ཕོ་མོ་དང་བཅས་པ་རྣམས་ཀྱིས་རང་རང་གི་མིང་ཕུལ་བའོ། །དེ་ནས་གཤིན་རྗེའི་དེད་དཔོན་རང་གི་ཚོགས་དང་བཅས་པས་རང་རང་གི་མིང་དང་སྲོག་དང་བཅས་པ་ཕུལ་བ། ཧྲཱྀཿཥྚྀ་ཀྲྀཥྞ་ཡ་མ་པྲེ་ཏ་ཛཿ། མ་མ་ཡ་མུནྟྲི་བྷི་ཏྲི་ཛཿཞེས་ཕུལ་ལོ། །དེ་ནས་སྲིན་པོའི་སྡེ་དཔོན་རང་གི་འཁོར་དང་བཅས་པའི་མིང་གི་སྙིང་པོ། རཀྵ་ར་ཤ་ར་མ་ཏི་རཀྵ་མ་ཤུ་ཏི་ཛཿཞེས་ཕུལ་ལོ། །དེ་ནས་གནོད་སྦྱིན་གྱི་སྡེ་དཔོན་རང་གི་འཁོར་དང་བཅས་པའི་མིང་དང་སྲོག་གི་སྙིང་པོ་ཡཀྵ་ཀུ་བེ་རཀྵ་ཏ་མེ་ཡཀྵྀ་མ་ཤ་ཛཿཞེས་ཕུལ་ལོ། །དེ་ནས་འཇིག་རྟེན་གྱི་གནོད་སྦྱིན་ལྷའི་སྡེ་དཔོན་ཁ་བ་ཅན་གྱི་དབང་པོས་རང་གི་མིང་ཕུལ་བ། གྃ་བྷ་བྷ་ཏྲ་དྷི་བ་ཏ་རུ་ཏི་ཛཿཞེས་ཕུལ་ལོ། །དེ་ནས་འཇིག་རྟེན་གྱི་རྒྱལ་ཕྲན་གྱི་དེད་དཔོན་ལྷའི་ཐེ་བཅུ་གསུམ་གྱི་བདག་པོས་མིང་ཕུལ་བ། གྃ་ཏ་པ་ཤ་ལི་བ་ར་ཏྲི་སཾ་ཀ་ར་ཤ་ཛཿཞེས་ཕུལ་ལོ། །དེ་ནས་སྤྱི་བདུད་ཀྱི་སྡེ་དཔོན་རང་
གི་འཁོར་དང་བཅས་པས་མིང་གི་སྙིང་པོ་སྨྲས་པ། དུསྤྲ་ཤྃ་ཛ་ཨ་ཀ་རུ་ཀྃ་ཙ་ཛཿཞེས་ཕུལ་ལོ། །དེ་ནས་ཡེ་ཤེས་དང་ལས་ལས་གྲུབ་པའི་དང་དམ་ཚིག་གི་ཚོགས་ཀྱི་བདག་མོ་སྲིད་པ་དབང་སྡུད་མ་དང་། རལ་པ་གཅིག་མ་དང་། མཁའ་འགྲོ་མའི་ཚོགས་ཀུན་གྱིས་རང་རང་གི་མིང་གི་སྙིང་པོ་ཕུལ་བ། མ་མ་ཏྲག་མུ་ཏྲ་ར་ཙ་ཨེ་ཀ་ཛ་ཊི་རུ་རུ་རོ་ཏིཥྚ་བྷཏྟོ་རེ་ཏུ་མ་ཏི་ཁ་མུནྟྲ་པ་ཙ་ལ་མེ་ཤ་ཛཿཞེས་ཕུལ་ལོ། །དེ་ནས་འཇིག་རྟེན་གྱི་ལྷ་བཙན་པོ་དང་། རུ་ཏྲའི་རིགས་ཀྱི་དེད་དཔོན་ཆེན་པོ་རྣམས་ཀྱིས་རང་རང་གི་མིང་གི་སྙིང་པོ། དེ་བ་ཨ་བྷི་ཤུ་ཏྲི་རུ་ཏྲ་ནི་ཛི་ཧྃ་ཤྃ་ཏྲི་ཛཿཞེས་ཕུལ་ལོ། །དེ་ནས་འཇིག་རྟེན་གྱི་བགེགས་ཀྱི་རྒྱལ་པོ་དང་། མུ་སྟེགས་བྱེད་པ་དང་། བདུད་དམུ་བའི་ཚོགས་ཀྱིས་རང་རང་གི་མིང་གི་སྙིང་པོ། བི་ནཱ་ཡ་ཀ་ཏིརྠི་ཏ་ཀ་དུ་མུན་མུན་པཿཛཿཞེས་ཕུལ་ལོ། །དེ་ནས་འཇིག་རྟེན་གྱི་སྲོག་གི་བདག་པོ་དང་། གནོད་སྦྱིན་ཀླུའི་བདག་པོ་རྡོ་རྗེ་ཅན་དང་། བླའི་རྒྱལ་པོ་ཆེན་པོ་དང་། ལྷའི་དབང་ཕྱུག་ནག་པོ་ཆེན་པོའི་ཚོགས་ཀྱི་སྡེ་དཔོན་ཆེན་པོ་རྣམས་ཀྱིས་རང་རང་གི་མིང་གི་སྙིང་པོ། གིངྈ་ར་ཏྲི་པ་ལེ་རཱ་ཛ་བཛྲ་བུ་རུ་ལུ་ཛ་བཛྲ་ལ་རུ་ཏྲི་ཛ་མ་ཧཱ་ཀཱ་ལ་ཡཀྵྀ་ཛཿཞེས་ཕུལ་ལོ། །དེ་ནས་འཇིག་རྟེན་གྱི་ཀླུ་དང་གཟའ་སྐར་གྱི་སྡེ་དཔོན་ཆེན་པོ་རྣམས་ཀྱིས་རང་རང་གི་མིང་གི་སྲོག་གི་སྙིང་པོ་ཕྱུང་བ་ནཱ་ག་ཙི་ཏ་ཧུ་ཡ་ནཱ་ག་མེ་ཀྵེ་ཏྲ་ཧུ་ལ་གྷུ་ཧེ་པ་ཤ་མི་ཀེ་ཧཱུྃ་ཛཿཞེས་ཕུལ་ལོ། །གཞན་ཡང་འཇིག་རྟེན་གྱི་ཁམས་ཀྱི་དྲེགས་པའི་དབང་ཕྱུག་མ་རུངས་པའི་འཁོར་དང་བཅས་པ་དག་གིས་རང་རང་གི་ལུས་དང་སྲོག་དང་བཅས་པ། ཨེ་ཨ་ནྲི་ཛཿས་མ་ཡ་སྲོག་དྲེང་དྲེང་ཛཿཛཿཞེས་ཕུལ་ལོ། །དེ་ནས་བཅོམ་ལྡན་འདས་ཀྱིས་དྲེགས་པ་ཅན་འཁོར་དང་བཅས་པ་དེ་དག་དབུགས་ཕྱུང་ནས་མི་འཇིགས་པ་བྱིན་ཏེ་འདི་སྐད་དུ། ཀྱེ་མ་འཇིག་རྟེན་དྲེགས་པའི་ཚོགས། །ཁྱེད་རྣམས་ང་ལ་མ་འཇིགས་ཤིག །ང་ནི་སངས་རྒྱས་ཐམས་ཅད་ཀྱི། །སྐུ་གསུང་ཐུགས་ཀྱི་ཕྲིན་ལས་བདག །ཆོས་ཉིད་ཞི་བ་ཆེན་པོ་ཡི། །ཐུགས་རྗེ་དང་ནི་ཡེ་ཤེས་ཀྱིས། །དུས་གསུམ་འདུས་
བྱས་འདུས་མ་བྱས། །སྐད་ཅིག་ཉིད་ལ་མངོན་དུ་གསལ། །མ་འོངས་སེམས་ཅན་དོན་གྱི་ཕྱིར། །སྣ་ཚོགས་ལུས་ཀྱི་གསང་བ་སྟོན། །དྲེགས་པའི་སྡེ་དཔོན་ཁྱེད་རྣམས་ཀྱང་། །ཐོག་མ་མེད་ནས་ད་ལྟའི་བར། །ཉོན་མོངས་འཁྲུལ་པའི་དབང་གྱུར་ཏེ། །གནས་ངན་ལེན་གྱི་བག་ཆགས་ཀྱིས། །ལུས་ངག་ཡིད་ཀྱིས་མི་དགེར་སྤྱོད། །འཁོར་བའི་སྡུག་བསྔལ་རྒྱུན་མི་འཆད། །ན་རག་ཆེན་པོར་ལྷུང་ནས་ནི། །ཐར་པའི་དུས་མེད་འབྱུང་སྲིད་ཀྱིས། །དེ་བས་ད་ལྟའི་དུས་མཆོག་འདིར། །ང་དང་སངས་རྒྱས་ཐམས་ཅད་ཀྱིས། །སྐུ་གསུང་ཐུགས་དང་ཡོན་ཏན་དང་། །མཛད་པའི་ཕྲིན་ལས་རབ་སོན་ལ། །བསྒོ་བའི་གསུང་བཞིན་ཉན་པར་གྱིས། །ལས་དང་སྲིད་པ་དོན་ཡོད་ལ། །མི་དགེའི་བག་ཆགས་དོར་བར་གྱིས། །བསླབ་པའི་གཞི་བཟུང་སེམས་བསྐྱེད་ལ། །མཐུ་སྟོབས་ནུས་པ་དྲག་ཤུལ་དག །སངས་རྒྱས་བསྟན་པའི་རྗེས་སུ་སྤྱོད། །རིག་འཛིན་རྣམས་ཀྱི་བཀའ་བཞིན་སྐྱོངས། །ཁྱེད་ཅག་རྒྱལ་པོ་རྗེ་དཔོན་དང་། །བྲན་གཡོན་ཚུལ་དུ་ལུས་བརྟེན་པ། །དངོས་གྲུབ་གསོལ་ཞིང་ཕྲིན་ལས་སྒྲུབས། །གལ་ཏེ་དེ་ལྟར་མི་བྱེད་ཅིང་། །གསང་བའི་ཚིག་ལས་འགལ་བྱེད་ན། །ཁྱེད་ཀྱི་ལུས་སེམས་སྲོག་གི་རྒྱུད། །ད་ལྟ་ཉིད་དུ་མ་རུངས་འགྱུར། །ཞེས་བཀའ་སྩལ་ནས་དམ་པའི་ཐ་ཚིག་ལ་བཀོད་ནས་བཞག་གོ། །འཇིག་རྟེན་པའི་སྡེ་དཔོན་གྱི་ཚོགས་རབ་ཏུ་འདུལ་བ་གླེང་གཞིའི་ལེའུ་སྟེ་དང་པོའོ།། །།དེ་ནས་འདོད་པའི་ཁམས་ཀྱི་ལྷའི་དབང་ཕྱུག་ཆེན་པོ་ཡབ་ཡུམ་ལ་སོགས་པའི་དྲེགས་པ་ཅན་གྱི་འཁོར་རབ་ཏུ་འདུས་པ་དེ་དག་གིས། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་གསང་བའི་བདག་པོ་ཆེན་པོ་ལ་འདི་སྐད་ཅེས་གསོལ་ཏོ། །ཀྱེ་མ་བཅོམ་ལྡན་གསང་བའི་བདག །འཇིག་རྟེན་གནས་པའི་དྲག་ཤུལ་ཅན། །འདོད་ཆགས་ཞེ་སྡང་སྲེད་ལེན་གྱིས། །གང་གིས་མཆོད་ཅིང་བརྟེན་བྱས་ནས། །བདག་ཅག་རྣམས་ནི་དགའ་མགུ་རངས། །ཁྱོད་
ཀྱི་བཀའ་ལུང་རྗེས་བཞིན་དུ། །བརྟུལ་ཞུགས་འཛིན་པ་དེ་དག་ལ། །ཕྲིན་ལས་སྤྱོད་པའི་གྲོགས་བྱའི་ཕྱིར། །བདག་ཅག་སོ་སོའི་གནས་དང་དུས། །རང་གི་སྡེ་དང་འཁོར་གཡོག་དཔུང་། །མཐུན་པའི་ལས་དང་ལོངས་སྤྱོད་དང་། །ཆ་ལུགས་རིགས་དང་བསམ་པ་དང་། །ཁམས་དང་བྱེད་པའི་ཚུལ་དག་དང་། །དམ་ཚིག་སྦྱོར་བའི་ཁྱད་པར་དག །བདག་ཅག་རྣམས་དང་མ་འོངས་པའི། །རིག་པའི་ཚུལ་འཛིན་དོན་ཕྱིར་རུ། །མ་ལུས་རྒྱས་པར་བཤད་དུ་གསོལ། །ཞེས་གསོལ་པས། དེ་ནས་བཅོམ་ལྡན་འདས་ཀྱིས་འཇིག་རྟེན་གྱི་དྲེགས་པ་ཅན་དག་གི་གཙོ་བོ་དབང་ཕྱུག་ཆེན་པོ་ལ་སོགས་པ་རྣམས། སོ་སོའི་ལས་དང་གཅིག་ཏུ་སྦས་པ་དང་། ཐ་དད་དུ་སྦྱར་བ་དང་། ངེས་པ་དང་། མ་ངེས་པ་དང་། རིམ་པ་དང་འཆོལ་བ་དང་། ཕྱི་དང་ནང་དང་། གསང་བ་དང་། སྦས་པ་དང་། འཚོགས་པ་དང་། འཐོར་བ་དང་། མཐུན་པའི་རྫས་དང་། སྙིང་པོ་དང་། མག་པ་དང་། གཉེར་གཏད་པ་དང་། སྐུལ་བ་དང་། རྦད་པ་དང་། བཟློག་པ་དང་། ཚར་གཅད་པ་དང་། གཟིར་བ་དང་། སྤོགས་པ་དང་། ལས་སྣ་ཚོགས་པ་དག་གི་སྒོ་ནས། རོལ་པ་ཆེན་པོའི་གསང་བ་སྐུ་གསུང་ཐུགས་ཀྱི་རྡོ་རྗེ་དམ་ཚིག་ཆེན་པོ་ལས་ཕྱུང་སྟེ་བཀའ་སྩལ་ཏོ། །ཉོན་ཅིག་འཇིག་རྟེན་དྲེགས་པའི་ཚོགས། །ཕྱི་མའི་ཚེ་ན་སྙིགས་མའི་དུས། །དགེ་སྦྱོང་ཆེན་པོའི་བསྟན་པ་འདི། །སོ་སོའི་སྐྱེ་བོ་རྣམས་ལ་སྣང་། །ཉན་ཐོས་རང་རྒྱལ་རྣམས་ཀྱི་ཚུལ། །རྡོ་རྗེ་འཆང་བ་རྣམས་ཀྱི་སྐུ། །རྒྱུད་དག་ས་ལམ་རྫོགས་ལ་གསལ། །སྤྲོས་མེད་ཆོས་སྐུ་འདུ་འབྲལ་མེད། །ཏིང་ངེ་འཛིན་ལ་སྦྱངས་པས་འགྲུབ། །བསམ་པ་ཚེ་སྔ་སྨོན་པ་ཡིས། །རིགས་དྲུག་སོ་སོའི་བདག་པོར་སྣང་། །ལས་ཀྱི་དྲེགས་པས་ཁྱེད་རྣམས་ནི། །འཇིགས་ཤིང་འཇིགས་པར་བྱེད་པ་ཡིས། །གཏུམ་ཞིང་དཔའ་ལ་ཆེས་དཔའ་བས། །གདུལ་ཞིང་དྲག་པར་ནུས་པ་ལས། །ཞི་བས་འདུལ་བར་མི་འགྱུར་ཏེ། །རིག་པ་འཛིན་པའི་སྐྱེས་བུ་ནི། །སྟོབས་ལྡན་དྲེགས་ཚོགས་ཀུན་འདུལ་བ། །ཁམས་གསུམ་སྤྱི་ལ་དབང་
སྒྱུར་བྱེད། །ང་དང་གཉིས་མེད་སྦྱོར་བ་ཡིས། །ལས་ཀྱི་བྱ་བ་རང་རྫོགས་པས། །དུར་ཁྲོད་ཆེན་པོ་རབ་འཇིགས་པས། །བྱིན་གྱིས་བརླབས་པའི་དབེན་ས་རུ། །སྒྲིབ་བྱང་བསོད་ནམས་བསགས་པས་དང་། །བར་ཆོད་བདུད་བཟློག་ལས་ལ་འབད། །མཐུན་རྫས་ས་ལ་ཕོ་བྲང་བཞེངས། །དམ་ཚིག་དྲག་པོའི་རྫས་ཀྱིས་བྲན། །ཐོད་མཁར་བང་མཛོད་ལྡན་པ་འམ། །ཨེ་ཁྲམ་གྲངས་དང་སྦྱར་བར་བྱ། །དྲེགས་པའི་ལུས་ངག་ཡིད་གནས་བརྟེན། །ངས་བཤད་ཚུལ་དང་མཐུན་པར་དགོད། །ཕྱི་རོལ་སྒོ་སོགས་རྒྱན་འཇིགས་ལྡན། །དུར་ཁྲོད་ཆེན་པོ་སྔོན་དུ་ཕྱུང་། །ཙ་ར་མ་ཧེ་ཆུ་གླང་དང་། །སེང་གེ་གླང་ཆེན་རྟ་ནག་དང་། །བྱ་ཁྱི་ལུག་ནག་རྔ་མོ་དང་། །སྟག་དང་བྱ་རྒོད་ཁྱི་ཕག་གནག །བདུད་བྱ་ཆུ་སྲིན་ཉ་རུས་སྦལ། །རྒོད་དཀར་རྒོད་གནག་རྟ་དཀར་དམར། །སོ་བྱ་དྲེའུ་བ་གླང་རྣམས། །རྒྱལ་མཚན་ཤ་ཁྲག་སྙིང་དང་བཅས། །སོ་སོའི་མཐུན་པའི་གནས་སུ་བཤམ། །འབྲུ་བཟང་བཤོས་དང་དམ་ཚིག་རྫས། །བདུད་རྩི་ཤ་ཁྲག་སྙིང་སྦྱར་བ། །རིན་ཆེན་བཅུད་ཀྱིས་སྦྲེང་བ་ནི། །གྲངས་མཉམ་ཡང་ན་ཕྱོགས་བཞིར་བཞག །གདུགས་དང་བ་དན་བླ་རེས་དང་། །ལྡ་ལྡི་དྲ་བ་ཟ་ར་ཚགས། །འདི་ལ་ཤིས་ཤིང་མཐུན་པས་ཏེ། །སྟག་གཟིག་དོམ་དྲེད་འཕར་སྤྱང་དང་། །ཀཱངྈ་དུར་བྱ་བྱ་རྒོད་ཁྲ། །མི་རྟ་བལ་གླང་ཀེ་ལེ་ཡི། །ཤ་རྒྱུས་པགས་པ་མགོ་ཡིས་བྱ། །མདའ་གཞུ་མདུང་དང་ཁ་ཊྭཱཾ་ག །རལ་གྲི་ཆུ་གྲི་སྤུ་གྲི་དང་། །ཏྲི་ཤཱུལ་ཕུར་པ་སོ་མངས་དང་། །མཚོན་ཆ་དྲག་པོས་བསྐོར་ཞིང་གཏམས། །མཛེས་དང་མི་མཛེས་སྙན་མི་སྙན། །དྲི་ང་བ་དང་གདང་བ་དང་། །ཁ་མངར་ཚ་སྐྱུར་རྩུབ་པ་དང་། །ཚ་གྲང་འཇམ་རྩུབ་དྲོ་དང་བསིལ། །གཟུགས་སྒྲ་དྲི་རོ་རེག་རྣམས་ཀྱིས། །ཇི་ལྟར་འདོད་པ་བཞིན་དུ་གཏང་། །དེ་ནས་རྡོ་རྗེ་འཛིན་པ་དེས། །ཕྱི་ནང་གསང་བའི་བསྲུང་བ་ཡིས། །གནོད་ཅིང་འཚེ་བ་ཚར་གཅད་དེ། །བསོད་ནམས་ཚོགས་ཀྱིས་རང་རྒྱུད་སྦྱང་། །གཞན་ཕན་བྱང་ཆུབ་སེམས་ཀྱིས་བསྒྲུབ། །ཆོས་རྣམས་གནས་ལུགས་བཞིན་
དུ་སྒོམ། །མ་མཐོང་བ་ལ་སྙིང་རྗེ་བསྐྱེད། །ངོ་བོ་སྐྱེད་རྒྱུ་ཧཱུྃ་དུ་སྒོམ། །དེ་ལས་གནོད་ཀྱི་གཞི་མོ་ལྔ། །ཡེ་ཤེས་འབྱུང་བ་ལྔ་རུ་བསམ། །སྟེང་དུ་རིན་ཆེན་རི་རབ་ཀྱི། །དབུས་སུ་དུར་ཁྲོད་གཞལ་མེད་ཁང་། །ཐོད་མཁར་ཨེ་ཏྲཾ་སུམ་ཅུ་པ། །གཟུགས་བརྙན་བཞིན་དུ་ཏིང་འཛིན་བསྐྱེད། །དབུས་སུ་ཉི་ཟླ་པདྨ་དང་། །རོ་བཞི་བསྣོལ་བའི་སྟེང་ཉིད་དུ། །རྡོ་རྗེ་འཆང་བའི་སྐུ་གསུང་ཐུགས། །ང་ཉིད་ཀུན་ལ་སྣང་བཞིན་བསམ། །ཡུམ་ཆེན་ཁམས་གསུམ་སྤྱི་འདུལ་མ། །གཙོ་དང་གཉིས་མེད་སྦྱོར་བ་ལས། །ཐབས་དང་ཤེས་རབ་འོད་ཟེར་ལས། །ཨེ་དགུའི་རྣམ་པ་ས་བོན་ཚུལ། །འཕྲོ་འདུས་གྲི་གུག་ཁ་ཊྭཱཾ་གསལ། །དེ་ཉིད་གསལ་བའི་རྒྱུད་སྦྱངས་པས། །འདོད་ཁམས་དབང་ཕྱུག་གཙོ་བོ་ཆེ། །ལྷ་མོ་ཡུམ་དང་བཅས་པར་གྱུར། །སེང་གེ་གླང་ཆེན་ཞབས་ཀྱིས་གནོན། །ཞལ་གཅིག་ཕྱག་གཉིས་མཐིང་ནག་རྔམ། །ན་བཟའ་ལྗང་ནག་བཀླུབས་བེར་གསོལ། །གཙོ་ཆེན་གྲི་གུག་ཙིཏྟ་བསྣམས། །ཡུམ་གྱིས་ཁ་ཊྭཱཾ་ཐོད་ཁྲག་བཟུང་། །ཡབ་ཡུམ་གཉིས་མེད་ཐུགས་ཀ་ནས། །ཡ་མ། དུནྟི། རཀྵ། ཡཀྵ་ལས། ཕྱོགས་བཞིར་བདུད་དང་གཤིན་རྗེ་དང་། །སྲིན་པོ་གནོད་སྦྱིན་སྡེ་དཔོན་དང་། །ཡབ་ཡུམ་བཅས་པ་གསལ་བར་སྤྲོ། །གྲ་ཧེ་ནཱ་ག །སྟེང་འོག་ཏུ་ནི་བདུད་ཀླུ་གཟའི། །སྡེ་དཔོན་ཡབ་ཡུམ་སྤྲོ་ཞིང་བསྐྱེད། །དེ་བ། ཏྲི་ཛ། དུ་ཏྲི། གང་བཟང་ལྷ་དང་རྣམ་རྒྱལ་དང་། །སྤྱི་བདུད་སྡེ་དཔོན་ཤར་དུ་བསྐྱེད། །མ་མྃ། ཛ་ཏི། དྷ་ཀི་ལས། མ་ཆེན་སྲིད་པའི་རྒྱལ་མོ་དང་། །རལ་གཅིག་མ་དང་མགྱོགས་བྱེད་མ། །མོ་ཚོགས་སྡེ་དཔོན་ལྷོ་ཕྱོགས་སུའོ། །རུ་ཏྲ། ཨ་བྷི། ཧྃ་ཤྃ་ལས། ལྷ་སྦྱིན་བཙན་དམར་རིལ་བཙན་གྱི། །སྡེ་དཔོན་ནུབ་ཀྱི་ཕྱོགས་སུ་བསྐྱེད། །བི་ཏྲ། ཏི་ཐི། རྨུ་དུ་ལས། བགེགས་དང་མུ་སྟེགས་དམུ་བདུད་ཀྱི། །སྡེ་དཔོན་བྱང་གི་ཕྱོགས་སུ་བསྐྱེད། །ཏྲི་ཡྃ། ར་ཏྲི་ས་ཏྲི་ན་ཏྲི་ལས། སྲིད་པའི་སྲོག་གི་བདག་པོ་དང་། །གནོད་སྦྱིན་ཀླུ་ཚ་བདུད་རྒྱལ་པོ། །སྐུ་ལྷ་གསང་བ་རྡོ་རྗེ་ལེགས། །ནག་པོ་ཆེན་པོ་ཆོས་སྲུང་རྗེ། །ཤར་ལྷོ་ནུབ་བྱང་སྒོ་བཞིར་བསྐྱེད། །ཕྱི་རོལ་ཁྱམས་སུ་དྲེགས་པ་ཅན། །སོ་སོའི་གཡོག་འཁོར་མང་པོ་དག །བཀའ་ཉན་གསུང་སྡོད་ཚུལ་དུ་བསྐྱེད། །
རང་རང་སྔགས་ཀྱིས་བསྟན་པར་བྱ། །དབང་པོའི་ཚུལ་དུ་གསལ་བ་དང་། །འཇིག་རྟེན་རང་རྒྱུད་སོ་སོ་ཡི། །གནས་ནས་འོད་ཀྱིས་བཀྱེ་བ་དང་། །གསང་བའི་སྙིང་པོས་མྱུར་དུ་བོད། །ཏིང་ངེ་འཛིན་གྱི་ཚུལ་འདྲ་བ། །རང་གི་གཟུགས་བརྙན་ལུས་ལ་བསྡིམ། །རང་རྒྱུད་པ་དང་གཟུགས་བརྙན་འདྲེས། །ཨོཾ་ཨཱཿཧཱུྃ། ཨོཾ་བཛྲ་ཙཎྜ་སརྦ་དུཥྚཱནྟ་ཀ་ཧ་ན་ད་ཧ་པ་ཙ་ཧཱུྃ་ཕཊ། སྐུ་གསུང་ཐུགས་ལྡན་བྱིན་བརླབ་ཅིང་། །རྡོ་རྗེ་འཆང་བས་དབང་བསྐུར་བྱ། །དུར་ཁྲོད་གནས་ཀྱི་སྒོ་བཞི་ནས། །བཀའ་ཉན་ལས་བྱེད་སྡེ་བརྒྱད་ཀྱིས། །ལུས་ངག་གུས་པས་ཕྱག་འཚལ་ཞིང་། །ཕྱི་ནང་གསང་བའི་འདོད་ཡོན་ཚོགས། །འཚེ་ཞིང་གདུག་པའི་བསམ་པ་ཅན། །གཟུགས་ཅན་གཟུགས་མེད་བཅས་པ་ཡིས། །དྲེགས་པའི་ཚོགས་ལ་མཉེས་པར་དབུལ། །སྐུ་ཡི་ཆ་ལུགས་སོ་སོ་ཡི། །དོན་རྟགས་མཐུན་པའི་ཚིག་གིས་བསྟོད། །སྐུ་གསུང་ཐུགས་ཀྱི་ཡོན་ཏན་དང་། །ཕྲིན་ལས་སྨོས་ཏེ་ཐུགས་དམ་སྐུལ། །རྡོ་རྗེ་འཛིན་པའི་སྐུ་གསུང་ཐུགས། །གསལ་བརྟན་ཚད་དང་ལྡན་པ་ཡིས། །ནམ་མཁའི་ཁམས་ཀུན་མཐས་ཁྱབ་ཀུན། །རང་གི་ཡུལ་གསུམ་གསལ་བར་དམིགས། །དྲེགས་པའི་སྡེ་དཔོན་རེ་རེའི་དྲུང་། །རྡུལ་སྙེད་འདུལ་བྱེད་གཉེན་པོ་གནས། །ཕལ་པ་རེ་རེའི་གནས་དྲུང་དུ། །སྡེ་དཔོན་ཆེན་པོ་དེ་བཞིན་བསམ། །བཀའ་ཉན་གསུང་སྡོད་གཡོ་མི་ནུས། །ཅུང་ཙམ་འདའ་བར་མི་སྤྱོད་ཅིང་། །རང་གི་འདོད་པ་མི་སྤོབས་ལ། །སྐད་ཅིག་ཙམ་ལ་དོན་སྒྲུབ་དམིགས། །དེ་ཉིད་ཀྱིས་ནི་གཙོ་ཆེན་གྱིས། །བསྙེན་ཅིང་བསྒྲུབ་པ་ཚད་རྟགས་ལྡན། །ཡོངས་སུ་རྫོགས་པར་གྱུར་ནས་ནི། །དྲེགས་པའི་སྡེ་དཔོན་ཚོགས་རྣམས་ཀྱི། །སོ་སོའི་གཟུགས་བརྙན་གསལ་བཏབ་སྟེ། །རང་གི་མིང་གི་སྙིང་པོ་དང་། །གཅོད་འཕྲོག་ཡི་གེ་སྤོས་ཏེ་བཟླས། །དུས་ཚད་གྲངས་དང་མཚན་མ་ཡིས། །ཚད་བཟུང་མ་ནོར་གྲུབ་པ་ ཡིས། །རྟགས་ལ་ཕབ་སྟེ་ལས་ལ་སྦྱར། །ང་ཉིད་རྗེས་སུ་སྒྲུབ་བྱེད་པས། །དྲེགས་པ་མྱུར་དུ་དབང་དུ་སྡུད། །ཞེས་བཀའ་སྩལ་ཏོ། །འཇིག་རྟེན་པའི་དེད་དཔོན་གྱི་ཚོགས་ཉེ་བར་སྒྲུབ་པའི་རྩ་བའི་ལས་ཀྱི་གཉེར་གཏད་པའི་ལེའུ་སྟེ་གཉིས་པའོ།། །།དེ་ནས་རབ་ཏུ་
བཤད་བྱ་བ། །འདི་དག་ཀུན་ལ་ངས་བཤད་པའི། །སྡེ་དཔོན་ཆེན་པོ་རང་གནས་ནས། །བོད་དང་གཞུག་དང་མཉེས་པ་དང་། །བསྟོད་དང་ཐུགས་དམ་བསྐུལ་བ་དག །ཚིག་བརྗོད་འདི་ཡིས་བསྟན་པར་བྱ། །ཐུགས་རྗེ་རྣམ་དག་དབྱིངས་ཀྱི་དཀྱིལ་འཁོར་ནས། །ཆོས་སྐུ་སྟོང་ཉིད་དབྱིངས་ལས་མ་གཡོས་ཀྱང་། །འཇིག་རྟེན་དྲེགས་པའི་ཚོགས་རྣམས་འདུལ་བའི་ཕྱིར། །ཁྲོ་ཆེན་དཔའ་གཏུམ་འཇིགས་བྱེད་སྐུར་བསྟན་པ། །ཐུགས་དམ་དགྱེས་བསྐུལ་གསང་བའི་ཡུམ་དང་བཅས། །མ་རྟོགས་ཤུགས་ཀྱིས་འདུལ་ཕྱིར་གཤེགས་སུ་གསོལ། །དྲེགས་པའི་དབང་ཕྱུག་འཇིག་རྟེན་ལྷ་ཡི་གཙོ། །འདོད་པའི་ལྷ་མོ་བདེ་ཆེན་འབྱུང་གནས་མ། །འཁོར་ཚོགས་དྲག་ཤུལ་མཐུ་སྟོབས་དཔུང་གི་བདག །ཁྲོ་གཏུམ་གདུག་པའི་རྩལ་འཆང་དཔལ་དང་ལྡན། །རྡོ་རྗེ་འཆང་གི་བཀའ་བཞིན་རྗེས་སུ་སྒྲུབ། །དམ་ཚིག་རྗེས་དགོངས་གནས་འདིར་གཤེགས་སུ་གསོལ། །བཛྲ་སརྦ་དུཥྚནྟ་ཨ་ཏན་ཡ་ཨེ་ཛ་བྷྱོ། ཨ་གཙྪ་ས་མ་ཡ་ཧྲིང་ཧྲིང་། དུར་ཁྲོད་གསང་བ་མཆོག་གི་དཀྱིལ་འཁོར་འདིར། །ལྷ་ཆེན་ཉི་ཟླ་པདྨའི་གདན་སྟེངས་སུ། །བཅོམ་ལྡན་ཁྲོ་རྒྱལ་རྔམ་བརྗིད་འབར་བའི་སྐུ། །ཡབ་ཡུམ་དགྱེས་པར་རོལ་ཅིང་བཞུགས་སུ་གསོལ། །སྣང་སྲིད་དྲེགས་པ་མ་ལུས་དེད་དཔོན་གཙོ། །འདོད་ཁམས་བདག་པོ་དགྱེས་མཛད་ཡུམ་དང་བཅས། །ལྷ་སྲིན་ཚོགས་ཀྱི་གཙོ་ཆེན་འཁོར་དང་བཅས། །ཕྲིན་ལས་མཐུན་པའི་གདན་ལ་བཞུགས་སུ་གསོལ། །བཛྲ་སརྦ་དུཥྚན་ཨ་ཏ་ན་ཡ་ཨ་ཛ་བྷྱོ། ས་མ་ཡ་སྡི་ཏ་བཛྲ་ཧཱུྃ་ཛཿ། དུས་གསུམ་སངས་རྒྱས་ཐུགས་ཀྱི་སྙིང་པོ་མཆོག །ཆོས་ཀྱི་སྐུ་ལས་གཟུགས་སྐུ་འགྲོ་དོན་སྤྲུལ། །ཆེ་བཙན་འགྲན་ཟླ་མེད་པ་ཁྲོ་བོའི་རྗེ། །དབང་སྡུད་ཡུམ་དང་བཅས་ལ་ཕྱག་འཚལ་བསྟོད། །ཕྱོགས་བཅུའི་རྒྱལ་བ་མ་ལུས་སྲས་དང་བཅས། །དམ་བཅས་བསྟན་པའི་ཚུལ་བསྲུང་འཇིག་རྟེན་མགོན། །ཞིང་བཅུ་སྒྲོལ་མཛད་ཕྲིན་ལས་དྲག་ཤུལ་ཅན། །སྡེ་དཔོན་སུམ་ཅུའི་ཚོགས་ལ་ཕྱག་འཚལ་ལོ། །བཛྲ་སརྦ་དུཥྚན་ཨ་ཏ་ན་ཡ་ཨེ་ཛ་བྷྱོ། ན་མ་ཨཱ་ར་ལི་ཧོཿ། དཔལ་ཆེན་
དྲེགས་པ་ཀུན་འདུལ་ཡབ་ཡུམ་ལ། །སྐུ་གསུང་ཐུགས་མཉེས་མཆོད་པ་འབུལ་བ་ནི། །གདུགས་དང་རྒྱལ་མཚན་བ་དན་བླ་རེ་དང་། །ཕྲེང་བ་ཕྱེ་མ་ལྡ་ལྡི་ཟ་ར་ཚགས། །བདུག་སྤོས་མེ་ཏོག་མར་མེ་ཆབ་བསིལ་དང་། །གཟུགས་མཛེས་སྒྲ་སྙན་དྲི་ཞིམ་རོ་བྲོ་དང་། །རེག་འཇམ་འདོད་ཡོན་མ་ལུས་ཇི་སྙེད་པའི། །འཕགས་པའི་ཐུན་མོང་མཆོད་ཚོགས་བཞེས་སུ་གསོལ། །ཁྱད་པར་གསང་བའི་མཆོད་པ་འབུལ་བ་ནི། །དུས་གསུམ་གནས་སུ་སྦྱངས་པའི་ཤ་རུས་ཁྲག །དུག་ལྔ་སྨན་དུ་གྲུབ་པའི་དམ་ཚིག་རྫས། །སྟོབས་མཆོག་ནུས་པ་བ་ལིང་མཆོད་པ་དངོས། །ཐུགས་རྗེས་མཐུན་པའི་ངང་གིས་བཞེས་སུ་གསོལ། །དཔལ་ཆེན་ཡབ་ཡུམ་བཀའ་བཞིན་རྗེས་སྒྲུབ་པའི། །དབང་ཕྱུག་ཆེན་པོ་ཡབ་ཡུམ་མངའ་བདག་རྗེ། །འཇིག་རྟེན་འདས་ཀྱང་འཁོར་བའི་ཆ་ལུགས་འཛིན། །བཀའ་ཡི་བསྟན་སྲུང་སྡེ་དཔོན་སུམ་ཅུ་ལ། །འདོད་པའི་ཡོན་ཏན་མཆོད་ཅིང་སྦྱིན་པ་ནི། །དཀར་དམར་སེར་ལྗང་ལ་སོགས་མདོག །ཟླུམ་པོ་གྲུ་བཞི་ལ་སོགས་དབྱིབས། །ཆེ་ཆུང་སྦོམ་ཕྲ་རིང་ཐུང་ཚད། །མཛེས་དང་མི་མཛེས་སྡུག་མི་སྡུག །འབྱུང་བ་རྟེན་འདྲེལ་རོལ་མོའི་སྒྲ། །གླུ་ཚིག་བསྟོད་དབྱངས་སྙན་པའི་ཚིག །སྤོས་སྨན་བདུད་རྩི་མེ་ཏོག་དྲི། །བསྲེག་སུངས་བྃ་སུངས་དྲི་དང་ངད། །ཁ་མངར་ཚ་སྐྱུར་བསྐ་བ་དང་། །ལན་ཚྭ་སྤོད་དང་བྱེ་སྐྱུ་དང་། །འཇམ་རྩུབ་བསིལ་ཡང་ཚ་དང་བྲོ། །སོ་སོའི་ཡོན་ཏན་ཚོགས་དང་བཅས། །འདོད་དགུར་འབུལ་གྱིས་བཞེས་སུ་གསོལ། །བདུད་རྩི་ལྔ་དང་ཤ་ལྔ་དང་། །དོན་སྙིང་ལྔ་དང་འབྱུང་བ་ལྔ། །དབང་པོ་ལྔ་དང་ཡུལ་ལྔ་དང་། །ཕུང་པོ་ལྔ་དང་ནང་གྲོལ་ལྔ། །འཚེ་ཞིང་གསོད་དང་བར་དུ་གཅོད། །གདུག་པར་སེམས་ཤིང་ལོག་པར་ལྟ། །མི་མཐུན་ཕྱོགས་ལྔར་བཅས་པ་རྣམས། །སོ་སོར་འབུལ་གྱིས་བཞེས་སུ་གསོལ། །བཛྲ་སརྦ་དུཥྚན་ཨ་ཏ་ན་ཡ་ཨེ་ཙ་ཛ་བྷྱོ། མ་ཧཱ་བ་ལིནྟ། ཨ་མྲྀ་ཏ། སུ་ཀ་ཏ། མཱྃ་ས། རཀྟ། བི་བ་ཏ། བཱ་སུ་ཏ། ལ་མ་ཏ། ཨི་དྃ་གྲྀཧྞནྟུ་ས་མ་དུ། ཁ་ཁ། ཁཱ་ཧི་ཁཱ་ཧི། བཅོམ་ལྡན་དཔལ་ཆེན་དྲེགས་པ་ཀུན་འདུལ་དང་། །ཡུམ་ཆེན་ཁམས་གསུམ་སྤྱི་འདུལ་
འཁོར་བཅས་ཀྱི། །སྐུ་མདོག་འགྱུར་མེད་མེ་ལོང་གཟུགས་བརྙན་བཞིན། །གསལ་ཞིང་རྟོག་མེད་སྣང་བ་མ་འགགས་པ། །སྐུ་ལྔ་ལྷུན་གྲུབ་རྫོགས་པའི་དངོས་གྲུབ་གསོལ། །གསུང་མཆོག་འགག་མེད་བྲག་ཆ་སྒྲ་བརྙན་བཞིན། །སྙན་དང་མི་སྙན་གྲག་སྟོང་ཚངས་པའི་གསུང་། །གསུང་དབྱངས་ནམ་མཁའི་མཐས་ཁྱབ་དངོས་གྲུབ་གསོལ། །ཐུགས་མཆོག་སྤྲོས་བྲལ་བསམ་འདས་ཆོས་ཀྱི་དབྱིངས། །མི་རྟོག་བདེ་ཆེན་ཐབས་དང་ཤེས་རབ་དང་། །རྩོལ་མེད་མི་གཡོ་མཆོག་གི་དངོས་གྲུབ་གསོལ། །ཡོན་ཏན་བརྗོད་ཀྱིས་མི་ལང་སྣ་ཚོགས་ཡོད། །འདས་དང་མ་འདས་མཆོག་དང་ཐུན་མོང་གི། །གྲུབ་པ་བརྒྱད་དང་མཐར་ཐུག་དངོས་གྲུབ་གསོལ། །འཇིགས་པ་བརྒྱད་སོགས་ཞི་དང་འབྱོར་པ་རྒྱས། །ལོག་ལྟ་མོས་པའི་ཚུལ་གྱིས་དབང་དུ་སྡུད། །མངོན་སྤྱོད་དགྲ་བགེགས་འདུལ་བའི་དངོས་གྲུབ་གསོལ། །བཛྲ་སརྦ་དུཥྚན་ཨ་ཏ་ན་ཡ་ཨེ་ཛ་ཀཱ་ཡ་སིདྡྷི། བཱ་ཀ་སིདྡྷི། ཙིཏྟ་སིདྡྷི། གུ་ཎ་སིདྡྷི། ཀརྨྨ་སིདྡྷི། ཧཱུྃ་ཧཱུྃ་ཧཱུྃ། བཅོམ་ལྡན་དཔལ་ཆེན་དྲེགས་པ་ཀུན་འདུལ་ནི། །དབུ་དགུ་ཕྱག་ནི་བཅྭ་བརྒྱད་དེ། །སྐུ་མདོག་མཐིང་ནག་ཁྲོ་ཞིང་རྔམ། །གཡས་ཀྱི་ཞལ་གསུམ་སྨུག་ནག་བགྲད། །གཡོན་གྱི་ཞལ་གསུམ་ཁམ་ནག་གཙིགས། །དབུ་སྐྲ་རལ་པ་མེ་དཔུང་འབར། །སྤྱན་དགུ་སྡང་མིག་བཟློག་ཅིང་བགྲད། །ཤངས་ནས་སྲིད་པའི་རླུང་ནག་འཐོར། །སྙན་ནས་སྟོང་གསུམ་འབྲུག་སྒྲ་འདིར། །སྨ་ར་ཨག་ཚོམ་མེ་ལྟར་འབར། །མཆེ་གཙིགས་སྲིད་གསུམ་རྩ་བ་གཅོད། །ཕྱག་དགུ་གཡས་གཡོན་དང་པོ་ཡིས། །རྡོ་རྗེ་ཐོད་ཁྲག་དཀྲུག་ཅིང་གསོལ། །གཡས་ཀྱི་ཕྱག་བརྒྱད་འོག་མ་ན། །དྲེགས་པའི་ལྷ་བརྒྱད་བསྒྲལ་བ་ཡི། །གཡང་གཞི་མགོ་བོར་བཅས་ཏེ་བསྣམས། །གཡོན་གྱི་ཕྱག་བརྒྱད་འོག་མ་ན། །ཀླུ་ཆེན་བརྒྱད་ཀྱི་བྷན་དྷ་རུ། །དྲེགས་པའི་སྙིང་ཁྲག་བཀང་ནས་གསོལ། །དཔའ་བོའི་ཆས་བརྒྱད་སྐུ་ལ་རྫོགས། །ཞབས་བརྒྱད་བརྐྱང་བསྐུམ་དོར་སྟབས་ཀྱིས། །ཁམས་གསུམ་བདག་པོ་སྡེ་བཞི་མནན། །ཡུམ་ཆེན་ཁམས་གསུམ་སྤྱི་འདུལ་མ། །ཞལ་
གཅིག་ཕྱག་གཉིས་མཐིང་ནག་སྐུ། །རྡོ་རྗེ་འཕྱར་ཞིང་ཐོད་ཁྲག་སྟོབས། །གཉིས་མེད་ཐུགས་ཀྱི་ཕྲིན་ལས་ཀྱིས། །འཇིག་རྟེན་དྲེགས་པ་བྲན་དུ་འཁོལ། །ལྷ་སྲིན་སྡེ་བརྒྱད་ལས་ལ་འགྱེད། །དགྲ་བགེགས་གདུག་པ་རྩད་ནས་གཅོད། །ཁྲོ་རྒྱལ་གཙོ་ལ་ཕྱག་འཚལ་བསྟོད། །དཔལ་གྱི་བཀའ་བཞིན་ལས་མཛད་པའི། །ལྷ་ཆེན་དབང་ཕྱུག་ཆེན་པོ་ནི། །ཞལ་གཅིག་ཕྱག་གཉིས་སྐུ་མདོག་མཐིང་། །ཕྱག་གཡས་གྲི་གུག་ཙིཏྟ་གཡོན། །ལྷ་མོ་ཨུ་མ་དེ་བ་ནི། །སྐུ་མདོག་མཐིང་ནག་གཙོ་ལ་འདུད། །ཕྱག་གཡས་རྩེ་གསུམ་ཐོད་ཁྲག་གཡོན། །སེང་གེ་གླང་ཆེན་གདན་ལ་བཞུགས། །སྡེ་དཔོན་དྲེགས་པ་ཀུན་གྱི་གཙོ། །ཡབ་ཡུམ་སྐུ་ལ་ཕྱག་འཚལ་བསྟོད། །བདུད་ཀྱི་རྒྱལ་པོའི་སྡེ་དཔོན་ནི། །ཁྲམ་ཤིང་གཡས་ལ་དགྲ་སྟྭ་གཡོན། །བདུད་རྟ་ནག་པོའི་ཁྲི་ལ་བཞུགས། །སྦྱོར་ཡུམ་བདུད་མོ་རེ་མ་ཏི། །ཁྲམ་བམ་གཡས་ལ་ནད་རྐྱལ་གཡོན། །བོང་བུ་གྭ་དམར་གདན་ལ་བཞུགས། །གཤིན་རྗེའི་སྡེ་དཔོན་ཆེན་པོ་ནི། །བེ་ཅོན་གཡས་ལ་ཐོད་དབྱུག་གཡོན། །སྦྱོར་ཡུམ་གཤིན་རྗེ་ཟ་བྱེད་མོ། །ཕྱག་གཉིས་སྲིད་པའི་འཁོར་ལོ་བསྐོར། །ཡབ་ཡུམ་མ་ཧེ་ཆུ་གླང་གནོན། །སྲིན་པོའི་སྡེ་དཔོན་གློག་ཕྲེང་ཅན། །ཕྱག་གཉིས་ཐོག་སེར་འདྲིལ་ཞིང་འཕེན། །སྲིན་མོ་སྦལ་མགོ་ཁྲག་མིག་མ། །ཕྱག་གཡས་ཕུར་པ་ཁྲག་ཕོར་གཡོན། །ཡབ་ཡུམ་འབྲུག་དང་རྔ་མོ་གནོན། །གནོད་སྦྱིན་སྡེ་དཔོན་མེ་དབལ་ནི། །ཕྱག་གཡས་རིན་ཆེན་གཡོན་རལ་གྲི། །སྦྱོར་ཡུམ་གནོད་སྦྱིན་ནག་མོ་ནི། །ཕྱག་གཡས་སྤུ་གྲི་གཡོན་སྤྱང་མོ། །སྟག་སེང་ཕག་མོ་ཞབས་ཀྱིས་མནན། །གཟའ་བདུད་དེད་དཔོན་ཆེན་པོ་ནི། །ཕྱག་གཡས་མདའ་གཞུ་གཡོན་སྦྲུལ་ཞགས། །སྐུ་སྨད་སྦྲུལ་འཁྲིལ་འབྲུག་ཆེན་གནོན། །སྦྱོར་ཡུམ་ཐོག་གི་བུ་ཡུག་ཅན། །གཡས་གཡོན་ཕྱག་གིས་ཐོག་སེར་འབེབས། །ཀླུ་རྒྱལ་དེད་དཔོན་ཆེན་པོ་ནི། །ཕྱག་གཡས་སྦྲུལ་ཞགས་གཡོན་ནད་རྐྱལ། །སྦྱོར་ཡུམ་ཀླུ་མོ་ནག་མོ་ནི། །སྦྲུལ་མགོ་ཕྱག་མཚན་ཡབ་ཀྱི་ཚུལ། །ཡབ་ཡུམ་ཆུ་སྲིན་རུས་སྦལ་གནོན། །ཕྱོགས་བཞི་སྟེང་འོག་གནས་བཞུགས་པའི། །
དྲེགས་པའི་དེད་དཔོན་འདི་དག་ནི། །ཀུན་ཀྱང་སྐུ་མདོག་མཐིང་ནག་ལ། །ཁྲོས་པའི་ཆ་བྱད་འཇིགས་ཚུལ་ཅན། །དུར་ཁྲོད་གཡང་གཞིའི་ཆས་ཀྱིས་བརྒྱན། །རང་གི་ཚོགས་འདུས་ཕྲིན་ལས་མཛད། །ཡབ་ཡུམ་བཅས་ལ་ཕྱག་འཚལ་བསྟོད། །གནོད་སྦྱིན་ལྷ་ཡི་རྒྱལ་པོ་ནི། །ཤེལ་གྲི་བ་དན་དཀར་པོ་འཛིན། །རྒོད་དཀར་རུ་བཟངས་ཞབས་ཀྱིས་མནན། །གནམ་རྒྱལ་ཆེན་པོ་དེད་དཔོན་ནི། །ཕྱག་གཡས་ལྡན་དཀར་གཡོན་ཤེལ་གྲི། །རྟ་དཀར་རྔོག་དམར་ཞབས་ཀྱིས་མནན། །སྤྱི་བདུད་རྒྱལ་པོ་གུ་རུམ་རྩེ། །ཕྱག་གཡས་བ་དན་གཡོན་ཤེལ་གྲི། །ཞབས་གཉིས་རྡོ་རྟ་གྲོ་བོ་གནོན། །དཀར་པོའི་དེད་དཔོན་ཆེན་པོ་གསུམ། །ཤར་ཕྱོགས་གནས་ལ་ཕྱག་འཚལ་བསྟོད། །སྲིད་པའི་མ་མོ་དེད་དཔོན་མོ། །འཁོར་ལོ་གཡས་ལ་མེ་ལོང་གཡོན། །ཞབས་གཉིས་འབྲུག་མོ་མགོ་དགུ་གནོན། །སྔགས་ཀྱི་སྲུང་མ་ཆེན་མོ་ནི། །ཙིཏྟ་གཡས་ལ་སྤྱང་མོ་གཡོན། །དྲེ་རྟ་ནག་མོ་ཞབས་ཀྱིས་གནོན། །མཁའ་འགྲོ་ནག་མོ་མགྱོགས་བྱེད་མ། །རྒྱུ་ཞགས་གཡས་ལ་མཚོན་གྲུག་གཡོན། །སོ་བྱ་ནག་མོ་ཞབས་ཀྱིས་གནོན། །ནག་མོའི་དེད་དཔོན་མ་མོ་གསུམ། །ལྷོ་ཕྱོགས་གནས་ལ་ཕྱག་འཚལ་བསྟོད། །རྡོ་རྗེ་བདུད་འདུལ་ནག་པོ་ནི། །གཡས་གཡོན་ཕྱག་གིས་ཐུན་ཁྲག་འཕེན། །བྲག་བཙན་སྲོག་ཟན་དམར་པོ་ནི། །མདའ་གཞུ་འཕེན་ཞིང་དར་དམར་འཕྱར། །ཆེ་བཙན་འགོང་རྒྱལ་ཆེན་པོ་ནི། །ཤང་ལང་དང་ནི་ཞགས་པ་འཛིན། །དམར་པོའི་དེད་དཔོན་རྒྱལ་པོ་གསུམ། །ཀུན་ཀྱང་རྟ་དམར་ཞབས་ཀྱིས་གནོན། །ནུབ་ཕྱོགས་སྐྱོང་ལ་ཕྱག་འཚལ་བསྟོད། །བི་ནཱ་ཡ་ཀ་བགེགས་ཀྱི་རྒྱལ། །ཕྱག་གཡས་ཁ་ཊྭཱཾ་གཡོན་ཐོད་ཁྲག །ཕྱི་རོལ་སྐྱོང་བའི་མུ་སྟེགས་གཙོ། །ཏྲི་ཤཱུལ་གཡས་ལ་ཐོད་ཁྲག་གཡོན། །དམུ་བདུད་ཆེན་པོ་ཕྲག་མེད་ནི། །མདའ་གཞུ་དང་ནི་ཤང་ལང་འཛིན། །ནག་པོའི་ཚོགས་ཀྱི་དེད་དཔོན་གསུམ། །བདུད་རྟ་ནག་པོ་ཞབས་ཀྱིས་གནོན། །བྱང་ཕྱོགས་གནས་ལ་ཕྱག་འཚལ་བསྟོད། །ཚངས་པའི་རྒྱལ་པོ་སྲོག་གི་
བདག །སྤུ་གྲི་གཡས་ལ་ཉི་ཞགས་གཡོན། །སེང་གེ་དཀར་པོ་ཞབས་ཀྱིས་གནོན། །བདུད་ཀྱི་རྒྱལ་པོ་ནོར་གྱི་བདག །བདུད་ཞགས་གཡས་ལ་སྤུ་གྲི་གཡོན། །བན་གླང་སྣ་རིངས་ཞབས་ཀྱིས་གནོན། །སྐུ་ལྷའི་རྒྱལ་པོ་ཡུལ་གྱི་བདག །ཕྱག་གཡས་རྡོ་རྗེ་གཡོན་བ་དན། །ར་དཀར་གནམ་རུ་ཞབས་ཀྱིས་གནོན། །ནག་པོ་ཆེན་པོ་ཚོགས་ཀྱི་བདག །ཕྱག་གཡས་བེ་ཅོན་གཡོན་ཐོད་ཁྲག །རྟ་ནག་མགྱོགས་པ་ཞབས་ཀྱིས་གནོན། །ཕྱོགས་ཀྱི་སྡེ་དཔོན་ཆེན་པོ་བཞི། །སྐུ་མདོག་དཀར་སེར་དམར་ནག་མཛེས། །སྒོ་བཞིར་གནས་ལ་ཕྱག་འཚལ་བསྟོད། །སྡེ་དཔོན་དྲེགས་པ་འདི་དག་ནི། །ཁྲོ་ཞིང་གཏུམ་པའི་ཚུལ་འཆང་ཞིང་། །ན་བཟའ་གཡང་གཞི་འཇིགས་པའི་ཆས། །སྣ་ཚོགས་མཛེས་པའི་རྒྱན་དང་ལྡན། །རང་གི་འཁོར་གཡོག་ཚོགས་ཀྱིས་བསྐོར། །སྤྲུལ་པའི་ཆོ་འཕྲུལ་བསམ་མི་ཁྱབ། །མཆོད་བསྟོད་ཆེན་པོས་ཁྱེད་བསྒྲུབས་ན། །སོ་སོའི་ཚོགས་འདུལ་ཕྲིན་ལས་མཛོད། །ཞེས་བརྗོད་ཏིང་འཛིན་ལྡན་པ་ཡིས། །དྲེགས་པའི་དེད་དཔོན་མཆོད་ཅིང་བསྟོད། །འདི་ལྟར་སྤྱོད་པའི་རྣལ་འབྱོར་གྱིས། །འཇིག་རྟེན་གཙོ་བདག་གཞུང་བཞིན་བསྒྲུབ། །རྡོ་རྗེ་འཛིན་དང་གཉིས་སུ་མེད། །ཞེས་བཀའ་སྩལ་ཏོ། །འཇིག་རྟེན་གྱི་དེད་དཔོན་ཉེ་བར་བསྒྲུབ་པ་རྡོ་རྗེའི་དམ་ཚིག་མཆོད་བསྟོད་ཀྱི་ལེའུ་སྟེ་གསུམ་པའོ།། །།དེ་ནས་རབ་ཏུ་བཤད་བྱ་བ། །འཇིག་རྟེན་དྲེགས་པ་དབང་སྡུད་ཅིང་། །ཚར་གཅད་ལས་ལ་སྐོལ་བའི་ཕྱིར། །བྱིན་བརླབས་གནས་པའི་དབང་བསྐུར་བཤད། །གསང་ཞིང་དབེན་པའི་གནས་དག་ཏུ། །སྔར་བཤད་ལས་ཀྱི་ཕོ་བྲང་བཤམ། །ཡོ་བྱད་རྫས་ཀྱི་ཁྱད་པར་འཕགས། །མ་ལུས་པར་ནི་གཟུང་བར་བྱ། །རྡོ་རྗེ་འཆང་བ་རྗེས་འབྲང་བཅས། །མཚན་ཉིད་ལྡན་པ་མངོན་སུམ་སྦྱར། །དུས་ཀྱི་གྲངས་དང་མཚན་མའི་རྟགས། །བསྙེན་པའི་ལུང་བཞིན་བརྩོན་པར་འབད། །གཟུགས་བརྙན་བདག་པོ་སློབ་མ་རྣམས། །ཁྱད་པར་གནས་པའི་སྟ་གོན་བྱ། །བྲིས་དང་རྐོས་པ་ལ་སོགས་པའི། །སྡེ་དཔོན་རྣམས་ཀྱི་གཟུགས་བརྙན་དང་། །ཕུར་པ་གྲངས་དང་མཉམ་པར་དགྲམ། །གཞན་ཡང་བུམ་
པ་མཆོད་གཏོར་དང་། །དུག་གཏོར་ཐུན་གཏོར་ཐུན་རྫས་དང་། །ཤ་ཁྲག་བཤོས་ཆང་བཟའ་བཏུང་སོགས། །རྒྱལ་མཚན་བ་དན་མདའ་དང་གཞུ། །དཔའ་བའི་ཆས་དང་རོལ་མོའི་སྒྲ། །རབ་ཏུ་བརྡར་ཞིང་མཛེས་པར་བཤམ། །རྡོ་རྗེ་འཛིན་པས་ཏིང་འཛིན་གསལ། །ལས་ཀྱི་རྒྱལ་པོས་མཆོད་བསྟོད་བྱ། །རྒྱུ་དང་མདངས་ཀྱིས་ཐུགས་དམ་བསྐང་། །བཤགས་དྲལ་གཅུགས་སྦྱང་དབབ་པ་བྱ། །མོས་ཤིང་སྤྲོས་བདག་དང་བ་ཡིས། །བདུད་འདུལ་གཙོ་ལ་སྐྱབས་སུ་འགྲོ། །བསྟན་པ་བསྲུང་བར་སེམས་བསྐྱེད་དེ། །བླ་མ་སངས་རྒྱས་རྡོ་རྗེ་འཛིན། །ཧེ་རུ་ཀ་དང་གཉིས་མེད་ལ། །གདུག་བྱེད་ལོག་ལྟ་འདུལ་ནུས་པའི། །མཐུ་དབང་ཆེན་པོའི་གཞུང་འཚལ་གྱིས། །བརྩེ་བའི་ཐུགས་ཀྱིས་དགོངས་ནས་ནི། །དཀྱིལ་འཁོར་དམ་པར་གཞུག་ཏུ་གསོལ། །ཉོན་ཅིག་སྐལ་ལྡན་རིགས་ཀྱི་བུ། །དུས་གསུམ་སངས་རྒྱས་སྐུ་གསུང་ཐུགས། །གནས་པའི་བསྟན་པ་བསྲུང་བའི་ཕྱིར། །སྤྲོ་བས་འཇུག་པ་ཁྱོད་ལགས་ཀྱིས། །མངོན་སྤྱོད་བརྟུལ་ཞུགས་དམ་པ་ཡིས། །དམ་ཚིག་ཆེན་པོའི་སར་འདུག་ཤོག །མགོན་པོ་ཧེ་རུ་ཀ་དཔལ་རྗེ། །འདུལ་བའི་འཁོར་ཚོགས་བཅས་པ་ཡི། །དྲག་ཤུལ་སྤྱོད་པའི་ཕོ་བྲང་དུ། །མཛེས་པའི་མེ་ཏོག་བདག་དབུལ་གྱིས། །རྡོ་རྗེ་དམ་ཚིག་འདི་བཞེས་ལ། །དྲེགས་པ་འདུལ་ནུས་དངོས་གྲུབ་གསོལ། །པྲ་ཏི་གྲྀཧྞ་པུཥྤ་ཧཱུྃ། དཔལ་ལྡན་རྡོ་རྗེ་འཆང་བ་ཡི། ། རྗེས་འཇུག་རིགས་ཀྱི་བུ་ཁྱོད་ནི། །ཐོག་མ་མེད་ནས་ད་ལྟའི་བར། །བསྟན་པ་བསྲུང་བའི་སྐལ་ལྡན་ཏེ། །སྡེ་དཔོན་དབང་ཆེན་དཀྱིལ་འཁོར་འདིར། །བསྟན་ལ་རབ་དགའི་སེམས་ཀྱིས་ལྟོས། །བཛྲ་ཡ་ས་མ་ཡ་མ་དྷ་ལ་ཙག་ཤུ་བྲ་བེ་ཤ་ཡ་ཕཊ། རྡོ་རྗེ་བདུད་རྩི་དམ་ཚིག་ཆུ། །འདི་ལས་དུས་གསུམ་འདའ་མི་བྱ། །གྲུབ་པའི་འབྲས་བུ་གཉིས་ཡིན་ཏེ། །ཚུལ་བཞིན་མི་འདའ་བྲོས་དོར་ཅིག །མ་ཧཱ་ས་མ་ཡ་ཨི་དནྟི་ནཱ་ར་ཀཱན་ཥཱ་བ་མི་ལྃ། རྡོ་རྗེ་འཛིན་པ་བཀའ་དྲིན་ཆེ། །ཐུགས་རྗེས་རྟག་ཏུ་བྱིན་བརླབ་ཕྱིར། །འདི་ནས་རྫོགས་སངས་རྒྱས་ཀྱི་བར། །མཐུ་སྟོབས་དངོས་གྲུབ་སྩལ་དུ་གསོལ། །བཛྲ་ས་མ་ཡ་ཙིཏྟ་སིདྡྷི་སིདྡྷི་ཧཱུྃ། ཐོག་མའི་སངས་རྒྱས་སྲས་བཅས་ཀྱི། །རྗེས་སུ་བསྒྲུབ་པ་བདག་
ཡིན་གྱིས། །འཇིག་རྟེན་འདས་དང་མ་འདས་པའི། །ལྷ་དང་དྲེགས་པ་མཐུ་སྟོབས་ཅན། །གཙོ་དང་འཁོར་དུ་བཅས་རྣམས་ཀྱིས། །སྐུ་གསུང་ཐུགས་ཀྱི་དམ་ཚིག་དགོངས། །རྡོ་རྗེ་སློབ་མ་རིག་འཛིན་ལ། །དབང་བསྐུར་དངོས་གྲུབ་རྩོལ་མཛད་པ། །ནུས་ཆེན་རྟགས་མཚན་བསྟན་དུ་གསོལ། །རྡོ་རྗེ་འཛིན་པ་དཔལ་ལྡན་གྱིས། །ཁྲི་སྟན་ཆེན་པོའི་སྟེང་འདུག་ལ། །སྣོད་ལྡན་སློབ་མ་མདུན་བཞག་སྟེ། །དཀྱིལ་འཁོར་གནས་པའི་བུམ་པ་ཡིས། །སྐུ་གསུང་ཐུགས་སུ་དབང་བསྐུར་བྱ། །གཉེན་པོ་གཙོ་དང་གདུལ་བྱའི་ཡུལ། །དྲེགས་ཆེན་ཡབ་ཡུམ་འཁོར་བཅས་ཀྱི། །མཛེས་པའི་སྐུ་གཟུགས་སྐུ་ཡི་དབང་། །སོ་སོའི་ཚིག་བསྟོད་སྙིང་པོ་དང་། །སྨོན་ལམ་བཅས་པ་གསུང་གིའོ། །རང་རྒྱུད་གནས་དག་དོན་རྟགས་ཀྱིས། །ཆོས་སྐུར་དབང་བསྐུར་ཐུགས་ཀྱིའོ། །རིགས་སྦྱངས་སྟོབས་ལ་ངང་གིས་གསལ། །ཕུར་པ་དྲག་ཤུལ་རྫས་ཀྱི་དབང་། །མཆོད་གཏོར་བཤོས་ཆ་སྐུ་གསུང་ཐུགས། །མ་ལུས་མཉེས་པར་བྱེད་པས་ཏེ། །ཡོ་བྱད་ཚོགས་ཀྱི་ལོངས་སྤྱོད་སྤེལ། །རྒྱལ་མཚན་བ་དན་སྒྲ་དང་བཅས། །དུས་རྣམས་ཀུན་དུ་མངའ་ཐང་རྒྱས། །ཤ་ཁྲག་དུག་གཏོར་ཐུན་རྫས་རྣམས། །དྲེགས་པའི་དེད་དཔོན་དབང་སྡུད་ཅིང་། །ཕོ་ཉ་ཕྲིན་ལས་བསྐུལ་མཛད་དེ། །མངོན་སྤྱོད་གདུག་པ་ཚར་གཅད་དབང་། །འདི་དག་ཀྱང་ནི་གཟུགས་བརྙན་སྒྲ། །དོན་ངོ་ཤེས་པས་དབང་བསྐུར་ཏེ། །ཆོས་ཀུན་སྤྱི་དང་དྲེགས་པ་ཡི། །སྡེ་དཔོན་སོ་སོའི་དམ་ཚིག་རྩལ། །ཐུགས་རྗེ་དང་ནི་རྟོགས་པ་ཡིས། །རང་བཞིན་དོན་གྱིས་སྒྲོལ་བྱེད་པའི། །དཔག་མེད་དོན་ཆེན་འདིར་འདུས་ཏེ། །ཐ་དད་མི་གནས་ཅིག་ཡིན་ནོ། །གཟུང་དང་འཛིན་པའི་བདག་ཉིད་ཀྱིས། །ཕྱི་ནང་འཁོར་བཅས་སོ་སོར་སྣང་། །མ་ལུས་དབང་བསྡུ་ཟིལ་མནན་ཕྱིར། །སོ་སོའི་སྙིང་པོ་ཚད་ཀྱིས་བསྡིམ། །ང་རྒྱལ་བརྟན་པོ་མདུན་དུ་སྐྱེས། །དོན་སྙིང་ཤ་རུས་ཁྲག་སོགས་བཟའ། །དུག་གསུམ་ཚར་གཅད་དབྱིངས་ནས་དབྱུང་། །གཟུགས་བརྙན་བསྡིམས་ལ་རབ་ཏུ་གསལ། །དབང་བསྡུ་ལས་བཅོལ་འདུལ་བའི་ཕྱིར། །ཞབས་འོག་མནན་ཏེ་བྲན་བཞིན་བསྒོ། །དམ་ཚིག་རྫས་མཆོད་སྔར་བཞིན་གསོ། །དམ་ཚིག་དབབ་
ཅིང་བསྟོད་སྐུལ་བཅོལ། །འཇིག་རྟེན་ལྷ་སྲིན་ཁྱེད་རྣམས་ཀྱང་། །ང་དང་སངས་རྒྱས་ཐམས་ཅད་ཀྱིས། །ཞལ་མཐོང་ལུང་བསྟན་མཆོག་སྩལ་བ། །སྲིད་པའི་ས་བོན་ཕྲ་མོ་ཡིས། །ད་རུང་འཇིག་རྟེན་ལས་ལ་སྤྱོད། །རང་རྒྱུད་རྩུབ་མོས་ཕན་གནོད་སྦྱོར། །ད་ནི་བཀའ་ཡི་དམ་ཚིག་བཟུང་། །མ་འོངས་དུས་ན་བསྒྲུབ་བྱ་དང་། །སྒྲུབ་པར་བྱེད་པ་དེ་དག་དང་། །མཉམ་པར་ཀུན་ལ་དབང་སྒྱུར་ཏེ། །ཆོས་ཉིད་རིག་པའི་རྒྱལ་པོ་རྫོགས། །ཐེག་མཆོག་མ་འདྲེས་ཅིར་ཡང་སྟོན། །མ་ལུས་མྱུར་དུ་རྫོགས་བྱའི་ཕྱིར། །རྒྱལ་ཚབ་སྤྱི་བོར་བཞག་གནས་པ། །ཀུན་དུ་བཟང་པོ་ཉིད་ཐོབ་འགྱུར། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོ་ཉེ་བར་བསྒྲུབ་པའི་རྡོ་རྗེ་དམ་ཚིག་ཆེན་པོའི་དཀྱིལ་འཁོར་དུ་དབང་བསྐུར་བའི་ལེའུ་སྟེ་བཞི་པའོ།། །།དེ་ནས་རབ་ཏུ་བཤད་བྱ་བ། །དྲེགས་པའི་འཁོར་ཚོགས་མཉེས་བྱའི་ཕྱིར། །མཐུན་རྫས་གཟུགས་ཀྱིས་བསྐང་བ་ནི། །རི་བོའི་རྩེ་འམ་ཆུ་བོའི་མདོ། །འཇིག་རྟེན་དབང་ཕྱུག་འདུ་གནས་སུ། །སྐལ་མེད་ཡུལ་ལ་མཆོད་སྦྱིན་གནས། །ཐོད་མཁར་རེའུ་མིག་དགུ་སོགས་སམ། །ཡང་ན་གླིང་བཞི་རི་རབ་བརྩིག །འབྲུ་དང་ཤ་ཁྲག་སྣ་ཚོགས་པ། །རིན་ཆེན་སྤོས་སྨན་མེ་ཏོག་སྩལ། །དྲེགས་པ་བདག་པོ་སོ་སོ་ཡི། །གཟུགས་བརྙན་རང་གི་འཁོར་དང་བཅས། །སྐུ་མདོག་ཕྱག་མཚན་ཡོངས་རྫོགས་ཤིང་། །རང་གི་གདན་ཁྲི་བཞོན་པར་བཅིབས། །རི་རབ་ཐོད་མཁར་ཡང་སྟེངས་སུ། །ལྷ་ཆེན་ཡབ་ཡུམ་འཁོར་བཅས་བཞུགས། །བང་རིམ་རེའུ་མིག་དང་པོ་གསུམ། །བདུད་དང་གཤིན་རྗེ་སྲིན་པོ་དང་། །གནོད་སྦྱིན་གཟའ་དང་ཀླུ་རྣམས་ཀྱི། །སྡེ་དཔོན་ཡབ་ཡུམ་འཁོར་བཅས་དགོད། །གཉིས་པོ་ལ་ནི་དཀར་པོ་དང་། །ནག་པོ་དམར་པོ་ནག་པོའོ། །སྡེ་དཔོན་བཅུ་གཉིས་གནས་སུ་བྱ། །གསུམ་པའི་ཕྱོགས་བཞིར་སྒོ་སྲུང་བཞི། །འཁོར་བཅས་རང་གི་གནས་སུ་དགོད། །ཐ་མ་གསུམ་མམ་བཞི་པ་ལ། །ཕྱི་ནང་གསང་བ་སྦས་པ་ལ། །གསང་བའི་གཏེར་དང་དྲག་པོ་སྔགས། །ལས་བྱེད་བཏགས་ཆགས་ལྷ་མ་སྲིན། །སྡེ་བརྒྱད་གཟུགས་བརྙན་གནས་སུ་དགོད། །གཙོ་ཆེན་
སུམ་ཅུའི་མཐུན་རྫས་ནི། །རང་གི་གདན་ནམ་བཞོན་པ་ཡི། །སྲོག་ཆགས་གཟུགས་ནི་ལྔ་འམ་བཅུ། །བརྒྱ་འམ་སྟོང་ངམ་གྲུབ་ཚད་བྱ། །སྐྱེས་པ་བུད་མེད་གླང་ཆེན་རྟ། །བན་གླང་ར་ལུག་བྱ་ར་ཁྱི། །ལོངས་སྤྱོད་སྐོང་རྫས་སྔར་བཞིན་ནོ། །སྡེ་བརྒྱད་ཕལ་པ་ཀུན་ལ་ནི། །ཤེས་ལྡན་མི་དང་བྱོལ་སོང་སྟེ། །འདབ་ཆགས་གཅན་གཟན་རི་དྭགས་དང་། །ས་ཆུར་གནས་དང་དུད་འགྲོ་ཚོགས། །མཐོང་ཐོས་དྲན་པ་རྣམས་ཀྱི་གཟུགས། །ཇི་ལྟར་ནུས་པའི་གྲངས་ཀྱིས་བསྐོར། །འདི་དག་བསྐང་བའི་ཡོ་བྱད་ནི། །འགྲོ་བའི་གླུད་དུ་འབུལ་བ་ནི། །རིན་ཆེན་ངར་མི་རྒྱན་ལྡན་དང་། །ནམ་མཁའ་སེམས་ཀྱི་གཟུགས་བརྙན་དང་། །སྐུ་གསུང་ཐུགས་ལྡན་རྒྱང་བུ་དང་། །ཤིང་གླུད་ཡུལ་མཁར་མཚོན་པ་དང་། །སྐྱེས་པ་བུད་མེད་ཆ་བྱད་དང་། །རྒྱལ་མཚན་བ་དན་རུ་མཚོན་རྣམས། །དྲེགས་པ་སོ་སོའི་སྐུ་མདོག་དང་། །མཐུན་པ་གྲངས་མཉམ་གནས་སུ་དགོད། །མཆོད་གཏོར་བཤོས་ཆ་མར་མེ་དང་། །གླིང་ཚད་ཆུང་ངུ་དེ་བཞིན་ནོ། །བཟློག་བསད་དྲག་པོ་ཟོར་གྱི་རྫས། །སྦྱིན་པའི་ས་ལ་ཟོར་ཕོར་དུ། །གྲུ་གསུམ་མཉམ་བྱས་དུག་ཁྲག་དང་། །ཐུན་རྫས་སྣ་ཚོགས་སྩལ་བ་དང་། །གདུག་པའི་ཤིང་གི་རྩང་ཕུར་དང་། །བྷན་དྷ་དུག་ཐུན་གཏོར་མར་བཅས། །བཞི་བརྒྱད་བཅུ་དྲུག་སུམ་ཅུ་གཉིས། །ཅི་རིགས་སྦྱར་ཏེ་མཛེས་པར་དགོད། །སྟེང་དུ་ཞིང་ལྤགས་གཡང་གཞི་འམ། །དར་ནག་ཚོན་སྐུད་གདུགས་ཀྱིས་དབུབ། །ཐ་མར་རས་བཟང་ཡོལ་བས་དྲེ། །དེ་ནས་རྡོ་རྗེ་འཛིན་པ་ཡིས། །གཙོ་ཆེན་བསྐྱེད་ཅིང་རྫོགས་པ་དང་། །དྲེགས་པ་མཆོད་བསྟོད་མཉེས་བྱས་ནས། །གཟུགས་བརྙན་མཐུན་རྫས་སྔོ་བ་ནི། །རྣལ་འབྱོར་ཏིང་འཛིན་ང་རྒྱལ་བསར། །བདུད་རྩི་མཆོད་སྐྱེམས་རཀྟ་སྦྲེང་། །ཤ་ཆེན་སྤོས་ཀྱི་དྲི་བསུང་འབུལ། །རྔ་ཆེན་གླིང་བུ་རོལ་མོ་སྒྲ་ཆེན་བསྒྲགས། །མདའ་ཆེན་བ་དན་ནག་པོས་གཡབ། །ཧཱུཾ་ང་ནི་དཔལ་ཆེན་ཧེ་རུ་ཀ །གདུལ་དཀའ་མ་ལུས་འདུལ་བར་བྱེད། །འཇིག་རྟེན་དྲེགས་པ་ཟས་སུ་ཟ། །ཁམས་གསུམ་སྲིད་གསུམ་ང་ཡི་དབང་། །སྣང་སྲིད་འཁོར་འདས་ང་ཡི་བྲན། །ང་ཡི་བཀའ་བཞིན་འདིར་འདུས་ཤིག །ཉོན་མོངས་
དབང་གིས་དྲེགས་པ་ཡི། །ལྷ་བདུད་གཤིན་རྗེ་སྲིན་པོ་དང་། །གནོད་སྦྱིན་གཟའ་ཀླུ་རྒྱལ་པོ་དང་། །གིང་དང་མ་མོ་ལྷ་བཙན་དང་། །རང་གི་སྡེ་དང་གཡོག་ཏུ་བཅས། །དམ་ཚིག་དབང་གིས་གནས་འདིར་བཞུགས། །མཐུན་པའི་རྫས་ཀྱིས་ཐུགས་དམ་སྐོངས། །རི་རབ་ཆེན་པོའི་ཡང་སྟེངས་ནས། །ལྷ་ཆེན་དབང་ཕྱུག་ཆེན་པོ་བཞེངས། །བཙུན་མོ་ཨུ་མ་དེ་བ་བཞེངས། །ན་བཟའ་དར་ནག་བེར་ཆེན་གསོལ། །ཆིབས་སུ་སེང་གེ་གླང་ཆེན་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །གཡས་ན་ཕོ་རྒྱུད་ཕོ་ཉར་འགྱེད། །གཡོན་ན་ཕོ་རྒྱུད་ལས་ལ་འཁོལ། །འཁོར་དུ་འཇིག་རྟེན་དྲེགས་པས་བསྐོར། །དམ་ཚིག་དབང་གིས་གནས་འདིར་བཞུགས། །མཐུན་པའི་རྫས་ཀྱིས་ཐུགས་དམ་བསྐང་། །རྩལ་གྱི་རྒྱལ་པོ་སེང་གེ་དང་། །སྟོབས་ཀྱི་རྒྱལ་པོ་གླང་ཆེན་དང་། །ཤེས་ལྡན་མི་དང་ཅང་ཤེས་རྟ། །ཐེག་ཆེན་གླང་དང་འདོད་འཇོའི་བ། །རིན་ཆེན་ལུག་དང་ གཙང 
་ལྡན་དང་། །ཐོས་གསང་ཁྱི་དང་མཁའ་ལྡིང་བྱ། །ཁྱེད་ཀྱིས་བཞེས་པའི་དཀོར་དུ་འབུལ། །རིན་ཆེན་རྒྱན་ལྡན་ངར་མི་དང་། །སེམས་ཀྱི་གཟུགས་བརྙན་ནམ་མཁའ་དང་། །སྐུ་གསུང་ཐུགས་ལྡན་རྒྱང་བུ་དང་། །ཤིང་རིས་ཡུལ་མཁར་མཚོན་པ་དང་། །ཕོ་གླུད་མདའ་དང་མོ་གླུད་འཕང་། །རྒྱལ་མཚན་བ་དན་རུ་མཚོན་རྣམས། །ཉིད་ཀྱི་སྐུ་མདོག་དང་མཐུན་པའི། །རྣལ་འབྱོར་རྣམས་ཀྱི་གླུད་དུ་འབུལ། །དམ་རྫས་སྦྱར་བའི་མཆོད་གཏོར་དང་། །མཐུན་རྫས་ལྡན་པའི་བཤོས་ཆ་དང་། །སྣང་གསལ་འོད་ལྡན་མར་མེ་དང་། །རྒྱན་ལྡན་མཛེས་པའི་གླིང་ཚད་དང་། །མཛེས་པའི་གཟུགས་དང་སྙན་པའི་སྒྲ། །ཞིམ་པའི་དྲི་དང་བདའ་བའི་རོ། །ཁྱེད་ཀྱི་ཐུགས་དམ་བསྐང་ཕྱིར་འབུལ། །ལྷ་ཆེན་ཡབ་ཡུམ་འཁོར་དང་བཅས། །སྔོན་གྱི་དམ་ཚིག་རྗེས་དགོངས་ཏེ། །མདོས་གླུད་མཐུན་རྫས་བཞེད་པའི་དཀོར། །སྣ་ཚོགས་སྦྱར་བ་འདི་བཞེས་ལ། །སངས་རྒྱས་བསྟན་པ་ཁྱེད་ཀྱིས་སྲུངས། །དཀོན་མཆོག་དབུ་འཕང་ཁྱོད་ཀྱིས་བསྟོད། །རྣལ་འབྱོར་སྐུ་དགྲ་ཁྱེད་ཀྱིས་སྒྲོལ། །སྒྲུབ་པ་པོ་ལ་བར་གཅོད་པའི། །སྟོང་ཕྲག་བརྒྱད་ཅུའི་བགེགས་རིགས་རྣམས། །བཞི་བརྒྱ་
རྩ་བཞིའི་ནད་རྣམས་དང་། །གློ་བུར་གནོད་པ་བརྒྱད་ཅུ་གཅིག །ཡེ་འདྲོག་སུམ་བརྒྱ་དྲུག་ཅུའི་ཚོགས། །དུས་མིན་འཆི་བ་རྣམ་བརྒྱད་དང་། །གཤིས་ངན་འགུམ་པ་བཅྭ་ལྔ་དང་། །གཟུགས་ཅན་དགྲ་དང་གཟུགས་མེད་བགེགས། །རྨི་ལམ་ངན་དང་མཚན་ལྟས་ངན་པ་རྣམས། །ཞི་དང་བསལ་ཞིང་བཟློག་པ་དང་། །གདུལ་དང་ཚར་བཅད་ལས་མཛོད་ཅིག །རི་རབ་ཆེན་པོའི་ཤར་ཕྱོགས་ནས། །སྲིད་པའི་རྒྱལ་པོ་སྐོས་རྗེ་ནི། །བདུད་རྣམས་ཀུན་གྱི་སྡེ་དཔོན་བཞེངས། །ན་བཟའ་མཐིང་ནག་བེར་ཆེན་གསོལ། །རལ་པ་ནག་པོ་མུན་ལྟར་གཏིབས། །སྤྱན་མིག་ཉི་ཟླ་འཁྱིལ་པ་འདྲ། །རྣོ་དབལ་མཆེ་བ་ཟླ་ཚེས་གཙིགས། །སྨ་ར་ཁམ་ནག་སྲིད་རྩེར་འབར། །ཆིབས་སུ་བདུད་རྟ་ནག་པོ་བཅིབས། །ཁྱོད་ཀྱི་ཆོ་འཕྲུལ་སྟོན་པ་ནི། །ཁྲམ་ཐོགས་བདུད་སྡེ་གཡས་ནས་རོལ། །ཤོད་ཐོགས་རྩིས་པ་གཡོན་ནས་འགྱེད། །སྣང་སྲིད་ཕོ་བདུད་ཁྱོད་ཀྱི་འཁོར། །དམ་ཚིག་དབང་གིས་གནས་འདིར་བཞུགས། །མཐུན་པའི་རྫས་ཀྱིས་ཐུགས་དམ་བསྐང་། །ཤུགས་ལྡན་རྟ་ནག་ལ་སོགས་པ། །ཁྱེད་ཀྱིས་བཞེད་པའི་དཀོར་དུ་འབུལ། །རིན་ཆེན་ངར་མི་ལ་སོགས་པ། །རྣལ་འབྱོར་རྣམས་ཀྱི་གླུད་དུ་འབུལ། །དམ་རྫས་མཆོད་གཏོར་ལ་སོགས་པ། །ཁྱེད་ཀྱི་ཐུགས་དམ་སྐང་ཕྱིར་འབུལ། །སྲིད་པའི་བདུད་རྗེ་འཁོར་བཅས་ཀྱིས། །སྔོན་གྱི་དམ་ཚིག་རྗེས་དགོངས་ལ། །ཇི་ལྟར་བཅོལ་བའི་ལས་མཛོད་ཅིག །བདུད་མོ་ཆེན་མོ་རེ་མ་ཏི། །མ་བདུད་ཀུན་གྱི་སྡེ་དཔོན་བཞེངས། །དཔལ་ལྡན་ནག་མོ་འཇིགས་གཟུགས་ཅན། །ནག་མོ་ཤ་ཟློག་བདུད་ཀྱི་མ། །སྐུ་ལ་མཐིང་ནག་བེར་ཆེན་གསོལ། །ཆིབས་སུ་བོང་བུ་གྭ་དམར་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །མ་བདུད་འབུམ་ཕྲག་ཕོ་ཉར་འགྱེད། །ནག་མོ་སྟོང་སྡེ་ལས་ལ་འཛུད། །སྣང་སྲིད་བདུད་མོ་ཁྱོད་ཀྱི་འཁོར། །དམ་ཚིག་དབང་གིས་གནས་འདིར་བཞུགས། །ཅང་ཤེས་བོང་བུ་ལ་སོགས་པ། །མཐུན་པའི་རྫས་ཀྱིས་ཐུགས་དམ་བསྐང་། །སྲིད་པའི་བདུད་མོ་འཁོར་བཅས་ཀྱིས། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོའི་ལྷོ་
ཕྱོགས་ནས། །གཤིན་རྗེ་ཡ་མ་རཱ་ཛ་སྟེ། །གཤིན་རྗེའི་ཚོགས་ཀྱི་སྡེ་དཔོན་བཞེངས། །སྐུ་མདོག་ནག་པོ་རལ་པ་ཅན། །གདུག་པའི་ཐོད་སྦྲུལ་གཡང་གཞིས་བརྒྱན། །གཅན་གཟན་གདུག་པའི་པགས་པས་དཀྲིས། །ཤ་ཟའི་མགོ་གཅད་ཐོད་དུ་བཅིངས། །ཞལ་བགྲད་མཆེ་བ་རབ་ཏུ་གཙིགས། །མ་ཧེ་ནག་པོ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །གཤིན་རྗེ་ཕོ་མོ་ཕོ་ཉར་འགྱེད། །འཆི་བདག་གཤིན་རྗེ་བཙུན་མོ་སྟེ། །གསོད་བྱེད་མོན་མོའི་ཚུལ་འཛིན་ཅིང་། །གཤིན་རྗེ་མོ་ཡི་སྡེ་དཔོན་བཞེངས། །ཟ་བྱེད་དུར་ཁྲོད་ཆས་ཀྱིས་བརྒྱན། །གཡང་གཞི་ནག་མོ་སྐུ་ལ་གསོལ། །ཆུ་གླང་ནག་པོ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ཡི་དྭགས་ཕོ་མོ་ལས་ལ་འཛུད། །སྣང་སྲིད་གཤིན་རྗེ་ཁྱོད་ཀྱི་འཁོར། །དམ་ཚིག་དབང་གིས་གནས་འདིར་བཞུགས། །མ་ཧེ་ཆུ་གླང་ལ་སོགས་པ། །མཐུན་པའི་རྫས་ཀྱིས་ཐུགས་དམ་བསྐང་། །གཤིན་རྗེ་ཕོ་མོ་འཁོར་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོའི་ནུབ་ཕྱོགས་ནས། །སྲིན་པོ་ནག་པོ་གློག་ཕྲེང་ཅན། །སྲིན་པོའི་ཚོགས་ཀྱི་སྡེ་དཔོན་བཞེངས། །སྐུ་མདོག་མཐིང་ནག་འབར་བ་ལ། །གློག་དང་འོད་ཀྱི་ཕྲེང་བས་བརྒྱན། །འབྲུག་ཆེན་འུར་བ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །སྲིན་པོ་འབུམ་ཕྲག་ཕོ་ཉར་འགྱེད། །སྲིན་མོ་གསོད་བྱེད་ལས་ལ་འཛུད། །གཅན་གཟན་གདུག་པ་ཕྱི་ནས་རོལ། །འཁོར་དུ་སྣང་སྲིད་སྲིན་པོས་བསྐོར། །སྲིན་མོ་སྦལ་མགོ་ཁྲག་མིག་མ། །སྲིན་མོ་རྣམས་ཀྱི་སྡེ་དཔོན་བཞེངས། །སྐུ་མདོག་དམར་ནག་འཇིགས་སུ་རུང་། །ལུས་ལ་ཁྲག་གི་ལྭ་ནག་གསོལ། །རུས་སྦལ་དཀར་པོའི་ཐོར་ཚུགས་ཅན། །ཆིབས་སུ་རྔ་མོ་གདོང་དྲུག་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །སྲིན་མོ་ཁ་འབར་ཕོ་ཉར་འགྱེད། །གདོང་སྲིན་ནག་མོ་ལས་ལ་འཛུད། །སྣང་སྲིད་སྲིན་མོ་འཁོར་དང་བཅས། །སྲོག་གཅོད་སྲིན་པོ་ཡབ་ཡུམ་འཁོར། །དམ་ཚིག་དབང་གིས་གནས་འདིར་བཞུགས། །འབྲུག་སྔོན་རྔ་
མོ་ལ་སོགས་པ། །མཐུན་པའི་རྫས་ཀྱིས་ཐུགས་དམ་བསྐང་། །སྲིན་པོ་ཕོ་མོའི་འཁོར་གྱིས་བསྐོར། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོའི་བྱང་ཕྱོགས་ནས། །གནོད་སྦྱིན་ཡཀྵ་མེ་དབལ་ཅན། །གནོད་སྦྱིན་ཀུན་གྱི་སྡེ་དཔོན་བཞེངས། །སྐུ་མདོག་མཐིང་སྔོན་འབར་བ་ལ། །མེ་དཔུང་ཚུབ་མ་ན་བཟར་གསོལ། །སྟག་སེང་རྔམ་པ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །གཡས་ན་མེ་དབལ་འབར་བ་ལ། །གཡོན་ན་དུད་འཐུལ་ཕྱུ་རུ་རུ། །གནོད་སྦྱིན་སྟོང་སྡེ་ཕོ་ཉར་འགྱེད། །ཞུབ་ཆས་འབུམ་སྡེ་ལས་ལ་འཛུད། །འཇིག་རྟེན་གནོད་སྦྱིན་འཁོར་གྱིས་བསྐོར། །གནོད་སྦྱིན་ཆེན་མོ་བློ་མོན་མ། །གནོད་སྦྱིན་བུ་མོ་གདུག་པ་ཅན། །ནག་མོ་རྡོ་རྗེ་ལྕགས་མཆུ་མ། །སྙན་ཆ་རིན་ཆེན་ནེའུ་ལེས་བརྒྱན། །སྐུ་ལ་བ་ཏི་ནག་པོ་གསོལ། །ཆིབས་སུ་ལྕགས་ཀྱི་ཕག་མོ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ནོར་འཛིན་མོ་ནི་ཕོ་ཉར་འགྱེད། །བློ་མོན་ནག་མོ་ལས་ལ་འཛུད། །གནོད་སྦྱིན་མོ་ནི་འབུམ་སྡེས་བསྐོར། །ཤན་པ་གནོད་སྦྱིན་ཡབ་ཡུམ་འཁོར། །དམ་ཚིག་དབང་གིས་གནས་འདིར་བཞུགས། །སྟག་སེང་ཕག་མོ་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །གནོད་སྦྱིན་ཕོ་མོ་འཁོར་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོའི་སྟེང་ཕྱོགས་སུ། །གཟའ་བདུད་ཆེན་པོ་མི་བཟད་པ། །རོག་ཏི་ཁྱབ་འཇུག་རཱ་ཧུ་ལ། །གཟའ་བདུད་སྡེ་དཔོན་ཆེན་པོ་བཞེངས། །མགོ་དགུ་སྨད་སྦྲུལ་མགོ་མངས་ལུས། །ཆིབས་སུ་འབྲུག་ཆེན་གློག་འགྱུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །འབྲུག་སྒྲ་སྟོང་གསུམ་ལྡི་རི་རི། །ནམ་མཁའ་གློག་འོད་ཁྱུགས་སེ་ཁྱུགས། །གཟའ་བྲན་རྒྱུ་སྐར་ཕོ་ཉར་འགྱེད། །ཐོག་སེར་ཀི་ཀང་དྲག་ཏུ་འབེབས། །གཟའ་བདུད་སྟོང་གི་འཁོར་གྱིས་བསྐོར། །གནམ་སྨན་ཐོག་གི་བུ་ཡུག་མ། །གདོང་མོ་རྣམས་ཀྱི་སྡེ་དཔོན་བཞེངས། །སྐུ་མདོག་དམར་སྐྱ་མཛེས་པ་ལ། །ན་བཟའ་གུ་ཟུ་མཛེས་པ་གསོལ། །འབྲུག་སྒྲ་གློག་
གིས་འོད་ལ་ཞོན། །ཁྱོད་ཀྱི་ཆོ་འཕྲུལ་བསྟན་པ་ནི། །གཟའ་ཆེན་ཉི་ཟླ་ཀླད་ལ་བསྐོར། །རྒྱུ་སྐར་ཚོགས་ནི་ཞལ་ལ་འཆར། །ལྷ་སྨན་འབུམ་ནི་ཕོ་ཉར་འགྱེད། །གདོང་ཟོར་མ་མོ་ལས་ལ་འཛུད། །ཟོར་གདོང་སྲིན་མོའི་འཁོར་གྱིས་བསྐོར། །གཟའ་གདོང་གནམ་སྨན་ཡབ་ཡུམ་འཁོར། །དམ་ཚིག་དབང་གིས་གནས་འདིར་བཞུགས། །འབྲུག་ཆེན་འུར་བ་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །གཟའ་བདུད་གདོང་མོ་སྨན་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོའི་འོག་ཕྱོགས་ནས། །ཀླུ་བདུད་ནག་མོ་མགོ་དགུ་པོ། །ཀླུ་རྣམས་ཀུན་གྱི་སྡེ་དཔོན་ཡིན། །སྐུ་སྟོད་དུད་ཁ་ནག་པོ་ལ། །ཚ་བའི་འབུ་སྲིན་ཉི་ལི་ལི། །སྐུ་སྨད་དུག་སྦྲུལ་ནག་པོ་ལ། །གྲང་བའི་སྦལ་ལྕོང་ཁྲ་ལ་ལ། །ཆིབས་སུ་ཆུ་སྲིན་མགོ་དགུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ཀླུ་རྒྱལ་སྟོང་ནི་ཕོ་ཉར་འགྱེད། །ཀླུ་བྲན་འབུམ་ནི་ལས་ལ་འཛུད། །ཀླུ་བདུད་གདུག་པའི་འཁོར་གྱིས་བསྐོར། །ཀླུ་མོ་ཡཀྵ་ནག་མོ་ནི། །ཀླུ་བདུད་མ་མོའི་སྡེ་དཔོན་བཞེངས། །སྐུ་མདོག་དུད་ཁ་འཇིགས་བག་ཅན། །སྦྲུལ་ནག་གཤིབས་པའི་རལ་པ་ལས། །མཛེ་དང་ཤུ་བའི་ཚ་ཚ་འཕྲོ། །སྦྲུལ་གྱི་ཐུལ་པ་ན་བཟར་གསོལ། །སྦལ་སྦྲུལ་ཉེའུ་ཐ་ར་ར། །རུས་སྦལ་ནག་པོ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ཀླུ་རིགས་ལྔ་ཡི་སྤྲུལ་པ་འགྱེད། །ས་བདག་གདུག་པའི་ཕོ་ཉ་གཏོང་། །སྣང་སྲིད་ཀླུ་མོའི་འཁོར་དང་བཅས། །གདུག་པ་ཀླུ་བདུད་ཡབ་ཡུམ་འཁོར། །དམ་ཚིག་དབང་གིས་གནས་འདིར་བཞུགས། །ཆུ་སྲིན་རུས་སྦལ་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །ཀླུ་བདུད་ཕོ་མོ་ཡབ་ཡུམ་འཁོར། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོ་མཛེས་པ་ཡི། །བང་རིམ་གཉིས་པའི་ཤར་ཕྱོགས་ལ། །གནོད་སྦྱིན་རྒྱལ་པོ་གང་བ་བཟང་། །སྲིད་པ་ལྷ་ཡི་སྡེ་དཔོན་བཞེངས། །མདོག་དཀར་རལ་ཀ་འབར་བ་གསོལ། །གནམ་རུ་དཀར་པོ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །གནོད་སྦྱིན་སྟོང་ནི་ཕོ་ཉར་འགྱེད། །
ལྷ་དམག་འབུམ་སྡེ་ལས་ལ་འཛུད། །བ་དན་ཅན་ནི་གཡས་ནས་རོལ། །གོ་མཚོན་ཅན་ནི་གཡོན་ནས་རོལ། །གནོད་སྦྱིན་ལྷ་ཡི་འཁོར་དང་བཅས། །སྐྱེས་བུ་གནམ་རྒྱལ་ཆེན་པོ་ནི། །རྒྱལ་ཕྲན་ཀུན་གྱི་སྡེ་དཔོན་བཞེངས། །ན་བཟའ་དར་ཟབ་བེར་ཆེན་གསོལ། །རྟ་དཀར་རྔོག་དམར་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །རྒྱལ་བྲན་སྟོང་སྡེ་ཕོ་ཉར་འགྱེད། །གྲོང་རྒྱུ་ཕྲ་མོ་ལས་ལ་འཛུད། །ཐེ་རྒྱལ་ཕྲ་མོའི་འཁོར་དང་བཅས། །སྤྱི་བདུད་རྒྱལ་པོ་གུ་རུམ་རྩེ། །མི་མ་ལྷ་ཡི་སྡེ་དཔོན་བཞེངས། །སྐུ་སྟོད་རྒྱ་ཆེའི་སླག་པ་གསོལ། །འབུམ་བྱེ་སྨད་ཀྱི་ཤམ་ཐབས་ཅན། །དབུ་ལ་ཤེལ་རྨོག་དཀར་པོ་གསོལ། །ཆིབས་སུ་རྡོ་རྟ་གྲོ་བོ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །སྲིད་པའི་ཁྱུང་ཆེན་ཀླད་ན་ལྡིང་། །སྟག་སེང་ཚང་མ་ཕྱི་ནས་རོལ། །སྡེ་དཔོན་མཆེད་ལྔ་ཕོ་ཉར་འགྱེད། །མ་སངས་སྤུན་དགུ་ལས་ལ་འཛུད། །ལྷ་མ་སྲིན་གྱི་འཁོར་དང་བཅས། །སྐྱེས་བུ་དཀར་པོ་སྡེ་གསུམ་ཡང་། །དམ་ཚིག་དབང་གིས་གནས་འདིར་བཞུགས། །གནམ་རུ་རྟ་དཀར་གྲོ་བོ་ཆིབས། །མཐུན་པའི་རྫས་ཀྱིས་ཐུགས་དམ་བསྐང་། །དཀར་པོ་སྡེ་གསུམ་འཁོར་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །བང་རིམ་གཉིས་པའི་ལྷོ་ཕྱོགས་ནས། །མ་ཆེན་སྲིད་པའི་རྒྱལ་མོ་ནི། །སྣང་སྲིད་མ་མོའི་སྡེ་དཔོན་བཞེངས། །ན་བཟའ་དར་ནག་གུ་ཟུ་གསོལ། །ཆིབས་སུ་འབྲུག་མོ་ཡིད་མགྱོགས་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །ཚོགས་ཀྱི་རྗེ་མོ་ཕོ་ཉར་འགྱེད། །སྨན་མོ་ལྔ་བཅུ་རྩ་བརྒྱད་འཁོར། །སྣང་སྲིད་མ་མོའི་ཚོགས་ཀྱིས་བསྐོར། །ཨེ་ཀ་ཛ་ཊི་རལ་གཅིག་མ། །བཀའ་ཡི་སྲུང་མའི་སྡེ་དཔོན་ནི། །སྐུ་ལ་ན་བཟའ་མཐིང་ནག་གསོལ། །ཆིབས་སུ་དྲེ་རྟ་ནག་མོ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །སྲིན་མོ་ནག་མོ་ཕོ་ཉར་འགྱེད། །བལ་མོ་ནག་མོ་ལས་ལ་འཁོལ། །མ་མོ་ནག་མོ་སྣ་ཚོགས་སྤྲུལ། །སྨུག་ནག་འབུམ་གྱི་འཁོར་དང་བཅས། །དཔལ་ལྡན་ནག་མོ་མགྱོགས་བྱེད་མ། །མཁའ་འགྲོ་ཚོགས་ཀྱི་སྡེ་
དཔོན་བཞེངས། །ན་བཟའ་མཐིང་ནག་གུ་ཟུ་གསོལ། །ཆིབས་སུ་སོ་བྱ་རོག་པོ་ཞོན། །ཁྱོད་ཀྱི་ཆོ་འཕྲུལ་སྟོན་པ་ནི། །རིགས་ཀྱི་མཁའ་འགྲོ་ཕོ་ཉར་འགྱེད། །སྣ་ཚོགས་མཁའ་འགྲོ་ལས་ལ་འཛུད། །སྣང་སྲིད་མཁའ་འགྲོའི་འཁོར་གྱིས་བསྐོར། །དཔལ་ལྡན་ནག་མོ་སྡེ་གསུམ་ཡང་། །དམ་ཚིག་དབང་གིས་གནས་འདིར་བཞུགས། །འབྲུག་དང་དྲེ་རྟ་སོ་བྱ་སོགས། །མཐུན་པའི་རྫས་ཀྱིས་ཐུགས་དམ་བསྐང་། །ནག་མོ་སྡེ་གསུམ་འཁོར་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །བང་རིམ་གཉིས་པའི་ནུབ་ཕྱོགས་ནས། །སྐྱེས་བུ་རྡོ་རྗེ་བདུད་འདུལ་ནི། །གནོད་སྦྱིན་རུ་ཏྲའི་སྡེ་དཔོན་བཞེངས། །ན་བཟའ་མཐིང་ནག་བེར་ཆེན་གསོལ། །རལ་པ་ནག་པོ་མུན་ལྟར་གཏིབས། །ཆིབས་སུ་རྟ་དྲེ་ནག་པོ་ཆིབས། །ཞིང་ལྤགས་གྱོན་པ་ཕོ་ཉར་འགྱེད། །རལ་ཆས་བགོས་པ་ལས་ལ་འཛུད། །སྣང་སྲིད་རུ་ཏྲའི་འཁོར་གྱིས་བསྐོར། །བཙན་རྒྱལ་སྲོག་ཟན་དམར་པོ་ནི། །སྲིད་པའི་བཙན་གྱི་སྡེ་དཔོན་བཞེངས། །སྐུ་ལ་དར་དཀར་རས་དམར་གསོལ། །ཆིབས་སུ་རྟ་དམར་གློག་འགྱུ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །དབུ་ལ་བསེ་རྨོག་དམར་པོ་གསོལ། །བཙན་པོ་ཁ་བཞི་ཕོ་ཉར་འགྱེད། །མགྱོགས་པ་སྡེ་བརྒྱད་ལས་ལ་འཛུད། །སྣང་སྲིད་དྲེགས་པའི་བཙན་གྱིས་བསྐོར། །སྐྱེས་བུ་ཡམ་ཤུད་དམར་པོ་ནི། །བཙན་འགོང་རྣམས་ཀྱི་སྡེ་དཔོན་བཞེངས། །སྐུ་ལ་ཟབ་དམར་བེར་ཆེན་གསོལ། །ཆིབས་སུ་རྟ་དམར་ཡིད་མགྱོགས་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །གཡས་སུ་བྲོ་བརྡུང་ཆི་ལི་ལི། །གཡོན་ན་སྤྱུགས་གླུ་ཀྱུ་རུ་རུ། །རྟ་ཞོན་སྟོང་ནི་ཕྱི་ན་འདྲེང། །སྲིད་པའི་བཙན་འགོང་འཁོར་དང་བཅས། །སྐྱེས་མཆོག་དམར་པོ་སྡེ་གསུམ་ནི། །དམ་ཚིག་དབང་གིས་གནས་འདིར་བཞུགས། །དྲེ་ནག་རྟ་དམར་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །དམར་པོ་སྡེ་གསུམ་འཁོར་དང་བཅས། །ཇི་ལྟར་བཅོལ་
བའི་ཕྲིན་ལས་མཛོད། །བང་རིམ་བཞི་པའི་བྱང་ཕྱོགས་ནས། །བི་ནཱ་ཡ་ཀ་བགེགས་ཀྱི་རྒྱལ། །ལོག་འདྲེན་ཀུན་གྱི་སྡེ་དཔོན་བཞེངས། །ན་བཟའ་མཐིང་ནག་བེར་ཆེན་གསོལ། །ཆིབས་སུ་རྟ་ནག་མགྱོགས་པ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །རྒྱལ་ཆེན་བཞི་ནི་ཕོ་ཉར་འགྱེད། །ཕྱོགས་སྐྱོང་ཚོགས་ནི་ལས་ལ་འཛུད། །སྣང་སྲིད་བགེགས་ཀྱི་ཚོགས་ཀྱིས་བསྐོར། །དབང་ཕྱུག་གུ་ལང་ནག་པོ་ནི། །མུ་སྟེགས་ཚོགས་ཀྱི་སྡེ་དཔོན་བཞེངས། །ན་བཟའ་མཐིང་ནག་བེར་ཆེན་གསོལ། །ཆིབས་སུ་སྟག་སེང་མ་ཧེ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ས་གཞི་ཀུན་ནི་དམག་གིས་འགེངས། །བར་སྣང་མཚོན་དང་དར་གྱིས་བཀང་། །ནམ་མཁའ་གློག་དང་འོད་ཀྱིས་འགེངས། །གཅན་གཟན་འདབ་ཆགས་རྒྱུག་ཅིང་ལྡིང་། །མུ་སྟེགས་ནག་པོའི་འཁོར་གྱིས་སྐོར། །དམུ་བདུད་ནག་མོ་བཀྲག་མེད་ནི། །དམུ་བདུད་ཚོགས་ཀྱི་སྡེ་དཔོན་བཞེངས། །ན་བཟའ་མཐིང་ནག་བེར་ཆེན་གསོལ། །ཆིབས་སུ་དམུ་རྟ་ནག་པོ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །དམུ་བདུད་འབུམ་ཕྲག་ཕོ་ཉར་འགྱེད། །དམུ་བྲན་སྟོང་སྡེ་ལས་ལ་འཛུད། །སྣང་སྲིད་དམུ་ཡི་འཁོར་གྱིས་བསྐོར། །སྐྱེས་མཆོག་ནག་པོ་སྡེ་གསུམ་ཡང་། །དམ་ཚིག་དབང་གིས་གནས་འདིར་བཞུགས། །སྟག་སེང་མ་ཧེ་རྟ་ལ་སོགས། །མཐུན་པའི་རྫས་ཀྱིས་ཐུགས་དམ་བསྐང་། །ཕྱི་རོལ་ནག་པོའི་ཚོགས་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །རི་རབ་ཆེན་པོ་མཛེས་པ་ཡི། །བང་རིམ་གསུམ་པའི་ཤར་ཕྱོགས་ལ། །ཚངས་པ་དཀར་པོ་སྲོག་གི་བདག །ལྷ་ཆེན་གིང་གི་སྡེ་དཔོན་བཞེངས། །སྲིད་པ་གསུམ་གྱི་མྱུར་མགྱོགས་པར། །སྐུ་ལ་བྱ་རྒོད་ཐུལ་པ་གསོལ། །ཆིབས་སུ་སེང་གེ་དཀར་པོ་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །གིང་ཆེན་བཅྭ་བརྒྱད་ཕོ་ཉར་འགྱེད། །གིང་བདུད་ཕོ་མོ་ལས་ལ་འགྱེད། །མི་རྟ་ར་ལུག་བྱ་དང་ཁྱི། །སྟག་དང་བྱ་རྒོད་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །བང་
རིམ་གསུམ་པའི་ལྷོ་ཕྱོགས་ལ། །གནོད་སྦྱིན་རྒྱལ་པོ་ནོར་གྱི་བདག །སྐུ་ལ་དོམ་གྱི་སླག་པ་གསོལ། །ཆིབས་སུ་བ་གླང་སྣ་རིངས་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །སྐྱེས་པ་བརྒྱ་དང་བུད་མེད་བརྒྱ། །ཉན་ཐོས་སྟོང་དང་སྔགས་པ་སྟོང་། །འབག་སེང་མོན་བུ་བསམ་མི་ཁྱབ། །སྟག་སེང་བལ་གླང་སྤྲ་དང་སྤྲེ། །མཐུན་པའི་རྫས་ཀྱིས་ཐུགས་དམ་བསྐང་། །བང་རིམ་གསུམ་པའི་ནུབ་ཕྱོགས་ལ། །རྡོ་རྗེ་མཛེས་པ་ཞེས་བྱ་བ། །འཇིག་རྟེན་ལྷ་ཡི་སྡེ་དཔོན་ཡིན། །མ་ཐར་ཤེལ་གྱི་ན་བཟའ་གསོལ། །ཀུན་ཀྱང་ཤེལ་གྱི་ན་བཟའ་གསོལ། །ར་དཀར་གནམ་རུ་ཆིབས་སུ་ཆིབས། །ཁྱོད་ཀྱི་ཆོ་འཕྲུལ་སྟོན་པ་ནི། །འཛིན་གིང་བཞི་བཅུ་ཕོ་ཉར་འགྱེད། །རང་གི་འཁོར་སྡེ་ལས་ལ་འཛུད། །ཙ་ར་བྱ་ཁྱི་ལ་སོགས་པའི། །མཐུན་པའི་རྫས་ཀྱིས་ཐུགས་དམ་བསྐང་། །བང་རིམ་གསུམ་པའི་བྱང་ཕྱོགས་ལ། །ལྷ་ཆེན་ནག་པོ་ཆེན་པོ་སྟེ། །བསྟན་པ་བསྲུང་བའི་སྡེ་དཔོན་བཞེངས། །ན་བཟའ་ལྗང་ནག་བེར་ནག་གསོལ། །ཆིབས་སུ་བདུད་རྟ་བྲ་ནག་ཆིབས། །ཁྱོད་ཀྱི་ཆོ་འཕྲུལ་བསྟན་པ་ནི། །ལྷ་དམག་ཕྱོགས་ཀྱི་དབུགས་འབྱིན་ཅིང་། །ལྷ་མིན་གཡུལ་ངོ་རབ་ཏུ་བཟློག །ཕྱོགས་སྐྱོང་དཔལ་མགོན་ལས་ལ་འཛུད། །མི་རྟ་ར་ལུག་བྱ་དང་ཁྱི། །ནག་པོའི་ཚོགས་ཀྱི་ཐུགས་དམ་བསྐང་། །དྲེགས་པའི་བཀའ་ཉན་སྒོ་སྲུང་བཞི། །རང་གི་བཀའ་ཉན་འཁོར་དང་བཅས། །དམ་ཚིག་དབང་གིས་གནས་འདིར་བཞུགས། །མཐུན་པའི་རྫས་ཀྱིས་ཐུགས་དམ་བསྐང་། །དབང་ཆེན་སྡེ་བཞི་འཁོར་དང་བཅས། །ཇི་ལྟར་བཅོལ་བའི་ཕྲིན་ལས་མཛོད། །བང་རིམ་ཐ་མའི་ཕྱོགས་བཞི་ན། །ཕྱི་ཡི་ལྷ་སྲིན་སྡེ་བརྒྱད་དང་། །ནང་གི་ལྷ་སྲིན་སྡེ་བརྒྱད་དང་། །སྦས་པའི་ལྷ་སྲིན་སྡེ་བརྒྱད་དང་། །གསང་བའི་ལྷ་སྲིན་སྡེ་བརྒྱད་དང་། །ཡང་གསང་གཏེར་གྱི་ལྷ་སྲིན་དང་། །དྲག་པོ་སྔགས་ཀྱི་ལྷ་སྲིན་དང་། །ལས་བྱེད་མྱུར་མགྱོགས་ལྷ་སྲིན་དང་། །བརྟགས་ཤིང་ཆགས་པའི་ལྷ་སྲིན་དང་། །སྡེ་བརྒྱད་འཁོར་དང་བཅས་པ་ལ། །
ཁྱེད་ཀྱི་ཐུགས་དམ་བསྐང་བ་ནི། །ཤེས་ལྡན་མི་དང་ཅང་ཤེས་རྟ། །ཐེག་ཆེན་གླང་དང་འདོད་འཇོའི་བ། །རིན་ཆེན་ལུག་དང་
གཙང ་ལྡན་ར། །ཐོས་གསང་ཁྱི་དང་མཁའ་ལྡིང་བྱ། །ཁྱེད་ཀྱི་བཞེད་པའི་དཀོར་དུ་འབུལ། །རིན་ཆེན་རྒྱན་ལྡན་ངར་མི་དང་། །སེམས་ཀྱི་གཟུགས་ལྡན་ངར་མི་དང་། །སྐུ་གསུང་ཐུགས་ལྡན་རྒྱང་བུ་དང་། །ཤིང་གླུད་ཡུལ་མཁར་མཚོན་པ་དང་། །ཕོ་གླུད་མདའ་དང་མོ་གླུད་འཕང་། །རྒྱལ་མཚན་བ་དན་རོལ་མོ་རྣམས། །ཉིད་ཀྱི་སྐུ་མདོག་དང་མཐུན་པ། །རྣལ་འབྱོར་རྣམས་ཀྱི་གླུད་དུ་འབུལ། །དམ་རྫས་སྦྱར་བའི་མཆོད་གཏོར་དང་། །མཐུན་རྫས་ལྡན་པའི་བཤོས་ཆ་དང་། །སྣང་གསལ་འོད་ལྡན་མར་མེ་དང་། །རྒྱན་ལྡན་མཛེས་པའི་གླིང་ཚད་དང་། །མཛེས་པའི་གཟུགས་དང་སྙན་པའི་སྒྲ། །ཞིམ་པའི་དྲི་དང་བདའ་བའི་རོ། །ཁྱེད་ཀྱི་ཐུགས་དམ་བསྐང་ཕྱིར་འབུལ། །འཇིག་རྟེན་དྲེགས་པ་འཁོར་དང་བཅས། །སྔོན་གྱི་དམ་ཚིག་རྗེས་དགོངས་ཏེ། །མདོས་གླུད་མཐུན་རྫས་བཞེས་པའི་དཀོར། །སྣ་ཚོགས་སྦྱར་བ་འདི་བཞེས་ལ། །སངས་རྒྱས་བསྟན་པ་ཁྱེད་ཀྱིས་སྲུངས། །དཀོན་མཆོག་དབུ་འཕང་ཁྱེད་ཀྱིས་སྟོད། །རྣལ་འབྱོར་སྐུ་དགྲ་ཁྱེད་ཀྱིས་སྒྲོལ། །སྒྲུབ་པ་པོ་ལ་བར་གཅོད་པའི། །སྟོང་ཕྲག་བརྒྱད་ཅུའི་བགེགས་རིགས་དང་། །བཞི་བརྒྱ་རྩ་བཞིའི་ནད་རྣམས་དང་། །གློ་བུར་གནོད་པ་བརྒྱད་ཅུ་གཅིག །ཡེ་འདྲོག་སུམ་བརྒྱ་དྲུག་ཅུའི་ཚོགས། །དུས་མིན་འཆི་བ་རྣམ་བརྒྱད་དང་། །གཤིས་ངན་འགུམ་པ་བརྒྱད་ཅུ་གཅིག །གཟུགས་ཅན་དགྲ་དང་གཟུགས་མེད་བགེགས། །རྨི་ལམ་མཚན་ལྟས་ངན་པ་རྣམས། །ཞི་དང་བསལ་ཞིང་བཟློག་པ་དང་། །གདུལ་དང་ཚར་གཅད་ལས་མཛོད་ཅིག །ཞེས་བརྗོད་རང་གི་མཐུན་རྫས་བསྟབས། །བསྐང་བཟློག་གསད་དང་གསོ་ལ་སོགས། །ཇི་ལྟར་འདོད་པའི་ཕྲིན་ལས་བཅོལ། །གང་ལ་དམིགས་པ་དེ་བཞིན་འགྲུབ། །ཅེས་བཀའ་སྩལ་ཏོ། །འཇིག་རྟེན་གྱི་དྲེགས་པ་ཅན་གྱི་སྡེ་དཔོན་འཁོར་དང་བཅས་པ་རྣམས་མཆོད་བསྟོད་རྒྱ་ཆེན་པོའི་སྒོ་ནས་ཉེ་བར་བསྒྲུབ་པའི་ལེའུ་སྟེ་ལྔ་པའོ།། །།དེ་ནས་རབ་
ཏུ་བཤད་བྱ་བ། །དྲེགས་པའི་འཁོར་ཚོགས་འདི་རྣམས་ཀུན། །ངོ་བོ་རང་རིག་བྱང་ཆུབ་སེམས། །མ་སྐྱེས་དབྱིངས་ལས་གཡོས་པ་མེད། །འཇིག་རྟེན་གནས་དང་མཐུན་འཇུག་ཅིང་། །མཆོད་དང་བསྟོད་པས་མཉེས་འགྱུར་བས། །འཇིག་རྟེན་མཆོད་བསྟོད་ཞེས་སུ་བརྗོད། །ཕྱི་ནང་གསང་བའི་བྱེ་བྲག་སྟེ། །སྣང་དང་སྲིད་པའི་དཀྱིལ་འཁོར་ཀུན། །གསང་བའི་བདག་པོ་དེ་ཉིད་དང་། །གནས་སྐབས་མཆོད་བསྟོད་ཕྱི་ཡིན་ནོ། །དག་པའི་ཏིང་ངེ་འཛིན་ལས་བྱུང་། །རང་གི་སྣང་བ་འདུས་པའི་ཚོགས། །དབང་པོའི་ཡུལ་གྱི་ལོངས་སྤྱོད་དང་། །གཙང་སྦྲའི་རྟོག་པ་སྦྱང་བའི་རྫས། །འདོད་ཆགས་བཞི་དང་འབྲུ་བཅུད་རྩི། །གཉིས་མེད་ཕ་རོལ་སྣང་བྱེད་པ། །རང་གི་ངང་དུ་མཉེས་བྱེད་ཅིང་། །སོ་སོའི་མཚན་དང་དཔེ་བྱད་དག །ངེས་པར་བསྟན་པ་ནང་གིའོ། །སེམས་དང་སེམས་ལ་བསྟར་བའི་ཚོགས། །ཐམས་ཅད་ཡེ་ནས་དཀྱིལ་འཁོར་ཆེ། །མ་བཅོས་རང་བཞིན་ལྷུན་གྱིས་གྲུབ། །ལུང་ནས་མ་ལུས་འདུས་པ་ལས། །ཆོས་གཞན་མེད་དེ་ཡུལ་ཉིད་དང་། །ཡུལ་དུ་འཛིན་པ་སྣང་བའི་བདག །གཉིས་མེད་རྟོགས་ཤིང་ཁོང་དུ་ཆུད། །མཆོད་བསྟོད་རབ་ཏུ་གསང་བ་ཡི། །ལུས་ལས་སྤྲུལ་ཞིང་བསྒྲུབས་པས་སྐུ། །འབྲུ་བཅུ་སྒྲ་ཡི་འཁོར་ལོ་གསུང་། །རང་གྲོལ་སྙིང་པོ་མ་བཅོས་ཐུགས། །ལྷ་ཀླུ་གནོད་སྦྱིན་བཙན་དང་བདུད། །སྲིན་པོ་གཟའ་དང་མོ་རིགས་རྣམས། །དྲེགས་ཤིང་གདུག་པ་ཁྲོ་ཞིང་གཏུམ། །མྱུར་མགྱོགས་རྨུགས་ཤིང་འཐིབས་པ་དང་། །དྲེགས་དང་བཅིངས་པ་སོ་སོའི་སྡེ། །རི་རབ་བཤོས་ གཙང ་རྒྱན་དང་བཅས། །འབྲུ་ལུག་སྙིང་རྩེ་ཙ་རུའི་དབྱིབས། །དཀར་དམར་བཅུད་ལྡན་དམིགས་ཀྱིས་མཆོད། །ཕ་དང་རྒྱལ་པོ་གྲོགས་དང་ལྷ། །མ་དང་རྗེ་ཁོལ་བྲན་ལྟ་བུ། །བརྟེན་པ་རང་གི་ཚུལ་ཡིན་ནོ། །ཆེ་བཙན་དབང་གི་དངོས་གྲུབ་དང་། །ལོངས་སྤྱོད་འཕེལ་ཞིང་མངག་པར་བླང་། །རྒྱུད་འཇམ་སྐྱབས་ཆེ་བཀའ་ཉན་ཞིང་། །དྲག་རྩལ་ལྡན་ཞིང་སླར་མི་ལྡོག །ཤིན་ཏུ་ཉེ་བ་ཡོན་ཏན་ཏེ། །རང་ལ་རྩུབ་ཅིང་འཚེ་བ་དང་། །ལོངས་སྤྱོད་མི་འབྱོར་མི་འཕྲོད་དང་། །བློ་བུར་ནད་ཀྱིས་གཟིར་
བྱེད་ཅིང་། །སླར་ལྡོག་བཀྲ་ཤིས་ཉམས་པ་དང་། །བསྒོ་བ་མི་ཉན་དོན་མེད་ཅིང་། །རང་རྒྱུད་རྩུབ་ཅིང་ཁེངས་པ་དང་། །རིགས་རྒྱུད་མ་སྨིན་ཀུན་གྱིས་བརྙས། །བསམ་དོན་མི་གྲུབ་མངའ་ཐང་ཉམས། །རྒྱུད་དོན་སྦས་པ་མ་ཤེས་སྐྱོན། །ཁྲིམས་ཀྱི་བདག་པོ་ལྟ་བུའི་ལྷ། །གནད་ཀྱིས་བཅིང་ཞིང་བསྒྲུབ་པར་བྱ། །དབང་ཆེན་ཕ་དང་མཚུངས་པའི་བདུད། །མཚུངས་མེད་གྲོགས་དང་འདྲ་བའི་བཙན། །གནོད་སྦྱིན་ཁྲིམས་ཀྱི་གཙོ་ལྟ་བུ། །སྲིན་པོ་སྲོག་ལ་རྒོལ་བའི་གཤེད། །གཟའ་རྒོད་ལག་ཡན་གཞོན་ལྟ་བུ། །སྡོང་བུ་དུག་སྦྲུལ་ལྟ་བུའི་ཀླུ། །མོ་རྒྱུད་དབང་ཆེན་རྗེ་དཔོན་མ། །མཚུངས་ལྡན་དེ་ཡི་གཉེན་པོས་བསྒྲུབ། །ཁུགས་སུ་མ་བཅུག་བསྒོ་མི་ཉན། །སེ་ལོང་གནད་མེད་བདུད་དུ་འགྱུར། །བཅུད་ཕུར་མ་ཐེབས་སླར་ལ་ལྡོག །རང་གི་རབ་རོལ་མ་བཞར་གཡེལ། །ལྟོ་བ་མ་དཀྲུགས་ལས་མི་མྱུར། །ལོག་ནོན་མ་ལྡན་བདག་ཉིད་སྟོབ། །དབང་དུ་མ་འདུས་བསྒོ་མི་ཉན། །གནད་ཀྱི་མན་ངག་བརྒྱད་ཀྱིས་ནི། །མཆོད་བསྟོད་བསྒྲུབ་སྟེ་ཕྲིན་ལས་བཅོལ། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོ་རྣམས་ཀྱི་ཟབ་པའི་མཆོད་བསྟོད་གནད་ཀྱི་ལེའུ་སྟེ་དྲུག་པའོ།། །།དེ་ནས་གཞན་ཡང་རབ་བཤད་བྱ། །འཇིག་རྟེན་དྲེགས་པའི་སྡེ་དཔོན་རྣམས། །དྲག་པོའི་ལས་ལ་སྦྱར་བ་ནི། །དུར་ཁྲོད་གདུག་པའི་གནས་དག་ཏུ། །རྩ་བའི་བསྙེན་པ་སྔོན་སོང་ནས། །སོ་སོའི་མཐུན་པའི་རྫས་བསར་ཏེ། །དྲག་པོའི་ལས་ཀྱི་ཁང་པ་ནི། །ཨེ་དབྱིབས་སུམ་ཅུ་ལྡན་པར་བཤམ། །ཕྱི་ནང་གསང་བ་སྐུ་གསུང་ཐུགས། །གནས་བྱིན་བརླབ་དང་བསྐང་དང་མཆོད། །སྤྱི་དང་སོ་སོར་བསྔགས་པ་དག །རབ་ཏུ་བདེ་བར་འདོད་པས་དམིགས། །གཟུགས་སྒྲ་བསམ་པའི་ནུས་པ་ཡིས། །ལུས་དང་ལུས་ཀྱི་འཕྲུལ་འཁོར་དང་། །སྲོག་དང་སྲོག་གི་གཉེན་པོ་ཡིས། །སེམས་དང་སེམས་ཀྱི་ངོ་བོ་ལས། །ཕྱི་ནང་ཀུན་དུ་བསྔགས་པ་སྟེ། །འཕྲོ་འདུ་འོད་ཀྱིས་དྲང་ཞིང་དགུག །རང་གཞན་དམིགས་པ་དེ་ལ་སྡིམ། །ཤ་ལུས་ཁྲག་སོགས་མ་ལུས་བཟས། །དྲེགས་
པའི་སྡེ་དཔོན་སྐུ་གསུང་ཐུགས། །མ་ལུས་མཉེས་པ་འདི་ཡིས་བྱ། །གང་ལ་དམིགས་པ་ཚད་ཀྱིས་སྒྲོལ། །ཏིང་ངེ་འཛིན་གྱི་བརྟུལ་ཞུགས་ཀྱིས། །བུལ་དང་མྱུར་བ་བློ་ཡི་སྟོབས། །འདི་ལ་ཐེ་ཚོམ་མི་བྱ་སྟེ། །རྡོ་རྗེ་འཆང་ཆེན་གསང་བའི་བཀའ། །གལ་ཏེ་འབར་བས་མངོན་སྤྱོད་ཅིང་། །མྱུར་དུ་འཕོ་བར་བྱ་བ་ནི། །རྣོ་དབལ་ཚ་རྩུབ་དྲི་ང་བའི། །ཡམ་ཤིང་གདུག་པས་དབྱིབས་ལྡན་བརྩིག །གདོལ་པ་རིགས་ངན་ཤན་པ་དང་། །གཡུང་མོ་གྲོགས་བྲལ་ཁྱིམ་གྱི་མེས། །སྤར་ཞིང་དུག་ཁྲག་མངར་བ་ལ། །གཟུགས་བརྙན་རྫོགས་པར་ལོངས་སྤྱོད་པའི། །སླར་ཡང་དམིགས་ཏེ་ལྷག་མ་དབུལ། །གཙོ་དང་འཁོར་གྱི་རབ་ཕྱེ་བའི། །དྲག་པོའི་ཚིག་གིས་རབ་ཏུ་བགྲང་། །དྲེགས་པའི་བདག་པོ་སོ་སོ་ཡི། །ཆེ་བརྗོད་གནད་དང་བཅས་པ་ཡིས། །སྟབ་ཅིང་སྦྱིན་པ་རིམ་བཞིན་བྱ། །དྲང་སྲོང་ཕྲིན་ལས་རྫོགས་པར་བསྐུལ། །ཐལ་ཆེན་དང་ནི་དྲག་པོའི་རྫས། །རྨེ་ཁྲག་གསུམ་དང་གསོད་བྱེད་གསུམ། །མཚོན་བྲལ་རིན་ཆེན་གསུམ་གྱི་དབྱིག །རང་བྱུང་བཀྲ་ཤིས་བཟློག་པའི་རྫས། །ནང་དུ་འདུ་འཕྲོར་སྦྱར་བ་ནི། །སྒྲ་ཚིག་ཏིང་ངེ་འཛིན་ལྡན་པས། །སྟོབས་ཆེན་འཁོར་ལོས་དབབ་ཅིང་འཕང་། །དྲེགས་པ་འཁོར་བཅས་ལས་སུ་དམིགས། །གཞན་ཡང་མཆོད་རྫས་གཟུགས་བརྙན་བྱས། །རབ་ཏུ་བསྟན་པའི་དམིགས་པས་བསྡིམ། །འགྱུ་གནས་ས་དང་ཆུ་ཕུག་དང་། །སྲ་གཤེར་འཐབ་དང་ཕུར་ཤུལ་དང་། །རྒྱ་མཚོའི་དབུས་དང་ལམ་པོ་ཆེ། །མཚོན་གྱིས་བརྡེགས་དང་རླུང་གིས་བསྐྱལ། །བག་མེད་ལྷུང་ཞིང་མེ་ཆུས་འཇོམས། །ལུགས་ནས་བྱུང་བའི་རྟེན་འདྲེལ་ཏེ། །བརྣག་པའི་ཡིད་ཀྱིས་འཛིན་ཕུར་གདབ། །གདུག་བྱེད་འཁོར་དང་ཟས་སུ་གཏད། །ཇི་སྲིད་འཁོར་བ་མ་སྟོངས་པར། །ཐར་པར་མི་འགྱུར་ལས་ཀྱི་གིང་། །བྱམས་དང་སྙིང་རྗེའི་སེམས་མ་རྟོགས། །འདི་ལྟར་མངོན་པར་སྤྱད་པ་ཡིས། །བསྟན་ལ་རབ་སྡང་ཕྱིར་གྱུར་པའི། །རྗེས་འབྲང་ལོག་པར་ལྟ་བ་རྣམས། །ཚར་གཅོད་སྒྲོལ་ཞིང་འདུལ་བ་ཡི། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོའི་ཕྲིན་
ལས་དྲག་པོའི་ལས་ལ་སྦྱར་བའི་ལེའུ་སྟེ་བདུན་པའོ།། །།དེ་ནས་གཞན་ཡང་བཤད་པ་ནི། །འཇིག་རྟེན་དྲེགས་པ་རང་གི་གནད། །གསང་བའི་སྙིང་པོ་དྲག་ཤུལ་གཟུངས། །ཀུན་བསྡུས་དྲིལ་དང་ཕྱེ་མས་མནན། །བཛྲ་སརྦ་དུཥྚཱན། ཨེ་ཀ་པ་ར་ཨསྟ་ན་ཡ། མ་ཧེ་ཤྭ་ར་དེ་བ་དེ་བི། དུ་ཕྲག་དུན་ཏིང་མ་ཡ། པྲེ་ཏ་བི་ཀྲྀསྟ་ན་རཀྵ་རཀྵོ་ཡཀྵ་ཀྵྀ་ཏ། བིཥྚི་པ་ཏྲ་ཨ་སེ་ལ་ཛ་ནཱ་ག་གུ་ལིང་ཤ་ཛཿ། ཙ་དུ་ཏྲི་ཙ་ར་ཙ་ལ་མ་དུ་ཏྲི། མ་མ་རུ་ལུ་མནྟྲ་རཱ་ཛ་དུ་མ་ཏི། མ་ཀཱ་ལ་རུ་ཏྲ་ཏཱིཀྵྞ་ཏིཪྠི་ཀ་ཐ། ཨ་བྷི་ཤུ་ཏྲི་པ་ཤ་ལི་ཧྃ་ཤྃ་ཏྲི་ཛཿ། རཱ་ཛ་གིངྈ་ར། ས་དུ་ཏྲི་ནཱ་ཐ་ཀཱ་ལ་ཨཱ་གཙྪ། ཧྲིང་ཧྲིང་ཛཿ། བོད་པའི་སྔགས་སོ། །བཛྲ་སརྦ་དུཥྚཱན་ཨེ་ཀ་པ་ར་སརྦ་པཉྩ་ཨ་མྲྀ་ཏ་ཨ་གཙྪ། བ་ལིནྟ་གྲྀཧྞ་ཨི་མྃ་ཏ་གྲྀཧྞནྟུ་མ་ཧཱ་ག་ཎ་པཱུ་ཛ་ཁ་ཁ་ཁཱ་ཧི་ཁཱ་ཧི། འདི་དག་སྦྱར་བས་མཆོད་པར་འགྱུར། །སརྦ་ཨཱ་ཡུ་མི་ཏྲ་སིདྡྷི་པུ་ཏྲ་བརྟ་ནི་སིདྡྷི་པུ་ཏྲ་བ་ཧུ་བྷ་དྲ་བཱ་སུ་དྷ་ར་རཏྣ་རཏྣ་པུཥྚིཾ་སིདྡྷི། མ་ཧཱ་ཛྙཱ་ན་སརྦ་དྷརྨ་གརྦྷ་ཀཱ་ཡ་བཱཀྩིཏྟ་སིདྡྷི་སིདྡྷི། ཕ་ལ་སིདྡྷི་མ་ཧཱ་སིདྡྷི་ཨ་བེ་ཤ་ཡ་ཨ། ཧ་ཧ་ཧི་ཧོཿ རབ་ཏུ་སྦྱར་བས་དངོས་གྲུབ་བླང་། །སརྦ་ཤ་ཏྲུྃ་ཡཀྵ་རྦད་རྦད་བྷྱོ་བྷྱོ། འདི་ཡིས་རབ་ཏུ་རྦད་པར་བྱ། །ནྲྀ་ཧུར་ས་ཛཿཛཿཤ་ཏྲུྃ་ཙིཏྟ་མཱ་ར་ཡ་རྦད། རཱུ་པ་ཡ་ཀནྡ་རྦུད་རྦུད་ཕཊ་ཕཊ་མཱ་ར་མཱ་ར་ས་ས། ཧ་ན་ཧ་ན། ད་ཧ་ད་ཧ། པ་ཙ་པ་ཙ། ཏིཥྠ་ཏིཥྠ། ཐུན་རྦད་ཐུན་རྦད། འདི་ཡིས་དམིགས་པ་རབ་ཏུ་གསད། །མ་མཱ་ར་ཡ་ཕྲི་པྲེ་ཏ་ཀ་ཧྲིང་ཧྲིང་། ཏྲི་ཤ་ཕ་ལི་རཱུ་པ་ཡ། བིནྡྷ་བིནྡྷ། ཧུ་ལུ་ཧུ་ལུ། རྦད་ནཱན་ལྃ་ནཱན། ཨོཾ་ནཱན་ཧཱུྃ་ནཱན། སྟཾ་བྷ་ཡ་སྟཾ་བྷ་ཡ་ནཱན་ཞེས་པ་ཡིས་ནི་མནན་པར་བྱ། སརྦ་མཱ་ར་ཏ་ཀ་རྃ་རྃ། ཛྭ་ལ་རྃ་ཛྭ་ལ་རྃ། སྥོ་ཊ་ཡ་སྥོ་ཊ་ཡ། ཧོ་ཧ་ཡ་ཧོ་ཧ་ཡ། རྃ་ཙ་ཡ་རྃ་ཀུ་ཡ་ཞེས་པས་མ་ལུས་བསྲེག་པར་བྱ། མཱ་ར་ཤ་ཏྲུྃ་ཐུན་བྷྱོ་ཐུམ་རིལ་བྷྱོ་ན་ཧེ་ཐུན། ཨཱ་བེ་ཤ་ཡ་བྷྱོ། དམིགས་པ་འདི་ཡིས་འཕང་བར་བྱའོ། །བཛྲ་ཨུཙྪ་ཊ་ཡ་ཕཊ་ཨ་གྲི་སརྦ་བྷྱོ་བཟློག །ས་མ་ཡ་རྦད་ས་མྱགས་བཟློག །ཕ་རོལ་ནུས་པ་འདི་ཡིས་བཟློག །མ་ཧཱ་བྷ་རི་ཤ་ཡ། ཨ་བྷེ་ཤ་ཡེ་པྲ་ཙ་ཡ། བེ་ཙ་ཡ་བེ་ཙ་ཡ་ཞི་བས་ལུགས་དབྱུང་ཆུ་
དབབ་པའོ། །ནཱ་ག་གྲ་ཧེ་པི་ཙ་ཡ་སྭཾ ་སྭཾ ་ཧྲིལ་ཧྲིལ། ཤར་ཤར། རྃ་ན་ཙག་ནེ་སྭཾ ་ཧྲིལ་ཤར་ཤར་ཕོབ་ཕོབ། དྲག་པོས་བཟློག་ཅིང་བསྟབ་པའོ། །མ་ཧཱ་ཤཱནྟིཾ་པུཥྚིཾ་ཝ་ཤྱཾ་ཀུ་རུ་མཱ་ར་ཡ་ཛ་ཡ་ཀརྨ་མ་ལི་ཨ་མུ་ཀི་སིདྡྷི་སུ་སིདྡྷི་ཀ་ར་སྭ་སྡི་སྭཱ་ཧཱ། ཕྲིན་ལས་ཐམས་ཅད་རབ་སྒྲུབ་པའི། །མཐུན་པའི་རྫས་དང་ཏིང་འཛིན་གྱིས། །ལས་ཀྱི་ཁྱད་པར་སོ་སོར་དབྱེ། །གནས་སྒྱུར་དང་ནི་གྲུབ་པའི་མཐའ། །སྙིང་རྗེ་བྱམས་པས་རབ་ སྐུལ་ཞིང་། །ཀུན་དུ་ཁྱབ་པའི་མཆོད་སྦྱིན་བྱ། །ཞི་དང་རྒྱས་དང་དབང་དུ་བྱ། །དྲག་པོས་བསྒྲལ་ཞིང་ཚར་གཅོད་པའི། །ལས་ཀུན་རང་གཞན་དོན་དུ་སྤྱད། །འཇིག་རྟེན་གནས་ཤིང་སྲོག་དང་སྙིང་། །ཡི་གེ་གསལ་བར་རང་འབྱུང་གནས། །མངོན་དུ་རྒྱུ་བ་ཐུགས་ཀ་སྟེ། །རིང་ཐུང་ཕོ་མོ་ཁྲག་དང་དུས། །ཆགས་སྡང་སྙིང་སྲོག་སྙིང་རྗེ་གཙེར། །རྡོ་རྗེ་པདྨ་རླུང་དང་གནས། །ཐབས་དང་ཤེས་རབ་ཆོས་ཅན་དང་། །ཆོས་ཉིད་ལས་དང་འབྲས་བུ་ཡིས། །མི་འཚང་གནད་འཚང་བོང་དང་དྲང་། །གྲོགས་དང་ལྡན་པས་ལས་ལ་སྦྱར། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོ་རྣམས་ཀྱི་ལས་སྣ་ཚོགས་ཀྱི་རྩ་བའི་སྙིང་པོ་གནད་ཀྱི་ལེའུ་སྟེ་བརྒྱད་པའོ།། །།དེ་ནས་ཡང་དག་བཤད་བྱ་བ། །འཇིག་རྟེན་དྲེགས་པའི་གཙོ་ཆེན་རྣམས། །ཚུལ་བཞིན་རབ་ཏུ་བསྒྲུབ་པ་ཡིས། །གྲུབ་ཅིང་ཉེ་བའི་རྟགས་རྣམས་ནི། །ཉམས་དང་རྦད་རྟགས་རྨི་ལམ་རྟགས། །འདི་ལ་སོ་སོར་འབྱུང་འགྱུར་ཏེ། །དགའ་ཞིང་མདངས་ལྡན་སྟོབས་རྙེད་དང་། །བདེ་དང་རྟོགས་པ་སྤྲོ་བསྐྱེད་ཅིང་། །མངོན་རྒྱུ་ཡིད་ཀྱིས་གདེང་ཐོབ་ཀྱིས། །ཉམ་ང་བག་ཚ་དོགས་མེད་ཅིང་། །ནུས་ལྡན་ཕྲིན་ལས་མཐར་ཕྱིན་རྟོགས། །འདི་དག་ལ་སོགས་རིམ་པར་འབྱུང་། །ལུས་འཇམ་དབུགས་ཀྱིས་མི་གནོད་ཅིང་། །ཡང་ཞིང་བརྟན་ལ་ཁྱད་པར་དགའ། །ནད་དང་གདོན་གྱིས་བརྫི་མི་ནུས། །འབྱུང་བའི་ནུས་པས་མི་སྐྱོད་ཅིང་། །ཁ་དོག་དང་ལྡན་སྡུག་ཅིང་མཛེས། །འདི་ལ་སོགས་པ་ལུས་འབྱུང་གདའ། །
ཇི་ལྟར་བསྒོ་བ་གཞན་གྱིས་འཛིན། །རང་དང་སངས་རྒྱས་རྣམས་ཀྱིས་གསུངས། །མཐུན་པའི་ཚུལ་གྱིས་མི་དོར་ལ། །སྙན་དང་མི་སྙན་ཅི་བརྗོད་རྣམས། །ཚངས་པ་ཡི་དབྱངས་བཞིན་དུ་འོང་། །གྲག་ཐོས་ཙམ་གྱིས་དབང་དུ་བྱེད། །ཚུལ་མཛེས་འཇུག་པ་ངག་གི་བརྡ། །གང་ལ་བརྩམས་པ་དེ་འགྲུབ་ཅིང་། །མ་ཞུམ་མི་སྤོར་མི་འདོར་བས། །དབང་དང་ལྡན་ཞིང་མི་གཡོ་ལ། །གསང་བའི་མཐུ་སྟོབས་རབ་ཏུ་ཐོབ། །ཡིད་ཀྱི་ཡུལ་དུ་བརྡ་འབྱུང་བའི། །སྔ་ཕྱི་དེ་མ་ཐག་པའོ། །བག་ཆགས་མ་ཡིན་རྨི་ལམ་ནི། །རྒྱལ་པོ་མཁན་པོ་སློབ་དཔོན་དང་། །ཆེ་བཙན་རིགས་ལྡན་རྒྱན་བཅས་ལྡན། །གཅན་གཟན་འདབ་ཆགས་དུད་འགྲོ་དང་། །སྐྱེས་པ་བུད་མེད་བུས་པ་སོགས། །རང་གི་གནས་སུ་ལྷགས་པ་ནི། །ཉེ་བར་འགྲུབ་པའི་རྟགས་ཡིན་ནོ། །བྲན་འབངས་མངག་པའི་ཚུལ་འཆང་ཞིང་། །བཀའ་བསྒོ་ལས་བྱེད་ཉན་པ་རྟགས། །རིང་བའི་གནས་ནས་གླུ་ལེན་ཅིང་། །རྒྱང་མིག་བལྟ་བ་གཡེལ་བའི་རྟགས། །རང་ལ་ཆད་པའི་ལས་རྩོམ་ཞིང་། །ཉེས་ལན་འདེད་པ་བཟློག་པའི་རྟགས། །ཟས་སྐོམ་འདོད་ཅིང་འཁྲིག་ལན་བསྙག །རང་ཉིད་གནོང་འགྱོད་མ་སྐོངས་རྟགས། །འཛོམ་ཞིང་ངུད་མོས་འདེབས་བྱེད་པ། །མ་དག་ལུས་སྣང་ཉམས་པའི་རྟགས། །རང་གི་བསྒོ་བ་མི་ཉན་ཞིང་། །སླར་ཞིང་ཚུལ་ལ་འཁོལ་འདོད་པ། །གཉེན་པོས་དབང་དུ་མ་གྱུར་རྟགས། །མཚོན་ཆ་བརྡུང་ཞིང་ཚད་མ་ལྡན། །ནུས་མེད་བྱ་བ་མི་འགྲུབ་པས། །སྔགས་ཀྱི་ནུས་པ་མ་གྲུབ་རྟགས། །གཞན་འདོད་རང་ལ་མེད་པ་དང་། །རང་གི་ཡོད་པ་འདོད་མེད་རྣམས། །མཆོད་བསྐང་ཐུན་རྫས་མ་ཚང་རྟགས། །ཤ་རུས་ཁྲག་སོགས་ལོངས་སྤྱོད་ཅིང་། །ངོ་མཐོན་རབ་ཏུ་ཆེ་བ་ན། །ལས་བྱས་འགྲུབ་པའི་རྟགས་ཡིན་ནོ། །ཕ་རོལ་དམག་ཚོགས་མ་བྱུང་ཞིང་། །སྒོ་མེད་ཁང་པར་བདག་ཞུགས་ལ། །ངན་སྔགས་གཞན་གྱིས་བཟློག་པའི་རྟགས། །བྱེ་བྲག་སྡེ་བརྒྱད་སོ་སོ་ནི། །མི་དང་དུད་འགྲོ་
འདབ་ཆགས་སོགས། །ཕོ་ཚོགས་ནག་པོ་བདུད་ཀྱི་རྟགས། །མོ་ཚོགས་རྒྱན་བཟང་མ་མོ་སྟེ། །ཆེ་བཙན་འབག་སེང་གཙུག་ལག་ཁང་། །བུས་པ་སྤྲ་སྤྲེ་རྒྱལ་པོའི་རྟགས། །མི་རྟ་ཁྲ་སྤྱང་རི་དྭགས་ནི། །བྲག་བཙན་རི་བཙན་རྟགས་ཡིན་ནོ། །ཆུ་གནས་དུད་འགྲོ་ཀླུ་ཡི་རྟགས། །མ་ཧེ་ར་ལུག་མིག་མངས་དང་། །མུན་པ་བུ་ཡུག་གཟའ་ཡི་རྟགས། །སྐྱེས་པ་ཆས་བཟང་འབྱོར་པ་ཅན། །རི་མཚོ་ལ་གནས་གནོད་སྦྱིན་རྟགས། །ཉ་པ་ཤན་པ་བྱ་བ་དང་། །དམག་གི་གོ་མཚོན་སྲིན་པོའི་རྟགས། །འདི་དག་སྔར་བཤད་བཟང་ངན་སྦྱར། །བྱེ་བྲག་སྒྲུབ་པའི་རྟགས་སུ་འགྱུར། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོ་བསྒྲུབ་པའི་རྟགས་ཀྱི་ལེའུ་སྟེ་དགུ་པའོ།། །།དེ་ནས་གཞན་ཡང་རབ་བཤད་པ། །དྲེགས་པ་ཅན་གྱི་ཁྱད་པར་རྫས། །མཛེས་པའི་གཟུགས་བརྙན་སྐུ་ཡི་རྟེན། །མིང་ནས་བོད་པ་གསུང་གི་རྟེན། །ཕྱག་མཚན་དམ་པ་ཐུགས་ཀྱི་རྟེན། །ལུག་གཡག་དཀར་པོ་སྦལ་སྦྲུལ་ཉ། །གླང་རྟ་སྔོན་པོ་རིན་པོ་ཆེ། །གཡུལ་བཤམས་མྱུར་བསྒྲལ་བྱ་གཅན་དང་། །རྣེལ་བུ་ཤེལ་ནག་བྱ་ནག་དང་། །རྟ་ལུག་ཁྱི་དང་རྒོད་གནག་དང་། །ར་ཕག་བྱ་ཁྱི་དཀར་པོ་དང་། །ཀླ་ཀློ་ར་རོག་དོམ་ཁྱི་གནག །སྦྲུལ་ནག་བྱ་རྒོད་ར་སྐྱེས་དང་། །རྟ་ར་བྱ་ཁྱི་དམར་པོ་ཡི། །སྙིང་ཁྲག་མགོ་དང་རྒྱལ་མཚན་ནི། །ལྷ་ཀླུ་གནོད་སྦྱིན་སྲིན་པོ་དང་། །མ་མོ་བདུད་དང་རྒྱལ་པོ་གིང་། །གཤིན་རྗེ་གཟའ་དང་བཙན་རྣམས་ཀྱི། །རིམ་བཞིན་སོ་སོ་བརྟེན་པའི་རྫས། །རབ་ཏུ་གསང་བའི་ཉིད་ཡིན་ནོ། །ཨེ་ལྡན་གདུག་བཅས་རྒྱུད་མེད་ཀྱི། །ཐོད་པ་མཚོན་ཆ་ཕུར་པ་དག །དུག་ཁྲག་རིན་ཆེན་དྲག་པོའི་འབྲུ། །ཀུན་ཚོགས་རབ་ཏུ་གསད་པའི་རྫས། །ཀླུ་བཟུང་སྣོད་ནི་ཤ་ཁྲག་བཅས། །རུ་བཟངས་རིགས་མེད་མྱུར་སོང་ཆུ། །མྱུ་གུ་སྣ་ཚོགས་དྲི་ལྡན་རྫས། །ཆུ་དྲག་དབའ་རབས་དུད་པའི་རྫས་ཡིན་ནོ། །མཆོད་རྟེན་རི་རབ་རྒྱ་གྲམ་བཅས། །རྨེ་རྫས་
རིགས་ངན་མགོ་བོ་གསུམ། །དམིགས་པའི་འབབ་རྫས་པདྨ་ནི། །སླར་ལ་བཟློག་པའི་རྫས་ཡིན་ནོ། །ནད་གདུག་བྃ་རིལ་མགོ་རྐང་རྣམས། །རབ་ཏུ་མནན་པའི་རྫས་ཡིན་ནོ། །དུག་ཁྲག་ཚོགས་དང་མཚན་མ་ངན། །དམིགས་པའི་རྟེན་ལ་འཕང་བའི་རྫས། །ངན་པའི་ས་ཡི་རྟེན་ཁང་དང་། །གདུག་ཅིང་རབ་ཏུ་ཚ་བའི་ཤིང་། །འབྲུ་ནག་དུག་ཁྲག་བསྲེས་པའི་རྫས། །གཞན་ཡང་དབང་ཅན་དྲེགས་པའི་འཁོར། །སོ་སོའི་རིགས་དང་སྡེར་བཅས་པའི། །མཐུན་དང་མི་མཐུན་ གཙང ་དང་སྨེ། །བསྔགས་པའི་ཀུན་རྫས་ཤེས་པར་འགྱུར། །མ་འོངས་དུས་ན་རྡོ་རྗེ་འཆང་། །རང་གི་རིག་འཛིན་བྱང་ཆུབ་སེམས། །བརྟུལ་ཞུགས་ཅན་གྱིས་འགྲུབ་པ་ཡིས། །དབུས་དང་མཐའ་འཁོབ་ཡུལ་རྣམས་དང་། །སངས་རྒྱས་ཞིང་གི་འཇིག་རྟེན་ཁམས། །ཀུན་ནས་སྡེ་དཔོན་གཡོག་བཅས་པའི། །ཡིད་དང་དངོས་པོའི་ལུས་ཅན་རྣམས། །ཁམས་དང་རིགས་པ་བསམ་པ་དང་། །སྐྱེད་པ་བརྟེན་གནས་ཡོ་བྱད་དང་། །མ་ལུས་རྫོགས་པར་རབ་ཏུ་རྟོགས། །ཤེས་ལྡན་མིག་ཅན་རྣམས་ལ་སྟོན། །དེ་ཚེ་དྲེགས་པའི་གཙོ་ཆེན་རྣམས། །ད་ལྟ་ང་ཡིས་གདམས་པ་ཡིན། །ཡང་དག་དོན་ལ་མ་འདའ་ཅིག །ཁྱེད་རྣམས་ཀྱང་ནི་དུས་ནམ་ཞིག །ལས་ཀྱི་གནས་ངན་ལེན་སྤངས་ཏེ། །བྱང་ཆུབ་ས་ལ་མྱུར་འགྲོ་ཡིས། །དེ་བས་བཀའ་ཡི་དམ་མནོས་ལ། །ཇི་ལྟར་དམིགས་པ་བཞིན་སྒྲུབས་ཤིག །གསང་ཆེན་ང་ཡི་བསྟན་པའི་ཚུལ། །ཕྱི་རོལ་ཕྱོགས་ལ་སོགས་པ་ཡིས། །ཉམས་ཤིང་སྨས་པར་མི་འགྱུར་བས། །རྒྱས་ ཤིང་བསྟན་པར་ཁྱོད་ཀྱིས་བྱོས། །ཞེས་བཀའ་སྩལ་ཏོ། །འཇིག་རྟེན་གྱི་སྡེ་དཔོན་ཆེན་པོའི་རྟེན་རྫས་དང་ལས་ཀྱི་གཉེར་བསྒོ་བའི་ལེའུ་སྟེ་བཅུ་པའོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་བདག་ཉིད་གསང་བ་ཆེན་པོའི་སྐུའི་རྣམ་པར་རོལ་པ་ཆེན་པོ་དེ་དག་ཉིད་ཀྱི་སྐུ་ལ་།། །། རབ་ཏུ་བསྡུས་པ་མཛད་དེ། དགྱེས་པའི་གསུང་གིས་འདི་སྐད་ཅེས་བཀའ་སྩལ་ཏེ། ཀྱེ་མ་འདུས་པའི་འཁོར་ཚོགས་རྣམས། །བདུད་དང་གཤིན་རྗེ་ལ་སོགས་པའི། །འཇིག་རྟེན་དབང་ཆེན་གཙོ་ཆེན་རྣམས། །མཐར་ཐུག་མྱ་ངན་འདས་ནས་ཀྱང་། །དུས་གསུམ་སངས་རྒྱས་ཐམས་ཅད་ཀྱི། །བསྟན་པའི་ཐ་ཚིག་སྒྲུབ་པ་དང་། །རྣལ་འབྱོར་ལམ་གྱི་གྲོགས་མཛད་ཕྱིར། །དྲག་པོའི་སྐུ་གསུང་ཐུགས་ཉིད་དང་། །ཡོན་ཏན་ཕྲིན་ལས་སྣ་ཚོགས་སྟོན། །ཕྱི་མའི་དུས་ན་རིག་པ་འཛིན། །སྐྱེས་བུ་བརྩོན་ལྡན་རྣམས་ཀྱིས་ནི། །གཉིས་སུ་འཛིན་པར་ཡོང་མི་བྱ། །ཡུལ་སྣང་ཕྱི་ནང་མ་ལུས་ཀུན། །རང་རིག་སེམས་ཀྱི་རྒྱལ་པོར་བསྒྲུབ། །དེ་ནི་མ་བཅོས་ཡུལ་མི་བྲལ། །མ་ཆད་མ་ལྷུང་བདག་པོ་མེད། །གཉིས་མེད་མཉམ་ཉིད་ལྷུན་གྱིས་གྲུབ། །ངེས་འགྱུར་སྤང་བླང་རྩོལ་སེམས་བྲལ། །མ་ལུས་རྩ་བ་སྙིང་གི་སྲོག །དེ་ཉིད་ཤེས་བྱ་རབ་ཏུ་བླང་། །དབང་གི་རྒྱལ་པོ་འཆར་བར་འགྱུར། །གལ་ཏེ་ང་དང་དྲེགས་པ་ཅན། །སོ་སོ་རང་རྒྱུད་ལྡན་པ་ཡིས། །གཉིས་འཛིན་ཡིད་ཀྱིས་རྟོག་དཔྱོད་ཅིང་། །མཚན་མར་རབ་ཏུ་སྒོམ་བྱེད་པ། །རྐང་མེད་ཁམས་གསུམ་བགྲོད་འདོད་ཅིང་། །མིག་མེད་སྟོང་གསུམ་བལྟ་དང་མཚུངས། །བདུད་བཞི་དགའ་བ་སྐྱེད་པར་བྱེད། །དེ་བས་རིགས་མཆོག་མ་རྣམས་ཀྱིས། །གསང་བདག་ང་ཉིད་ཤེས་པར་གྱིས། །ཞེས་བཀའ་སྩལ་ནས། ཉིད་ཀྱི་སྐུ་གསུང་ཐུགས་ཀྱི་དཀྱིལ་འཁོར་ཆེན་པོ་ཆོས་ཉིད་དེ་བཞིན་ཉིད་སྤྲོས་དང་བྲལ་བའི་དབྱིངས་སུ་ཐིམ་པར་མཛད་དོ། །འཇིག་རྟེན་གྱི་སྡེ་དཔོན་ཆེན་པོ་འཁོར་དང་བཅས་པ་ཆོས་སྐུ་མཐར་ཐུག་ཏུ་སྒྲུབ་པར་གདམས་པའི་ལེའུ་སྟེ་བཅུ་གཅིག་པའོ།། །།དྲེགས་པ་ཅན་གྱི་སྡེ་དཔོན་འཇིག་རྟེན་མཆོད་བསྟོད་སྒྲུབ་པ་རྩ་བའི་རྒྱུད་ཅེས་བྱ་བ་རྫོགས་སོ།། །།