རྒྱུད་འདེབས་བསྡུས་པ་དཔག་བསམ་ལྷུན་གྲུབ

རྒྱུད་འདེབས་བསྡུས་པ་བྱིན་རླབས་དཔག་བསམ་ལྷུན་གྲུབ་ཞེས་བྱ་བ༔

ན་མོ་གུ་རུ་པདྨ་ཀ་ར་ཡེ༔ ཨེ་མ་ཧོ༔ གདོད་ནས་རྣམ་དག་རང་བྱུང་ཆེན་པོའི་གཞིར༔ ཁྱད་ཆོས་དྲུག་གིས་མངོན་པར་བྱང་ཆུབ་པ༔ ཆེ་མཆོག་ཀུན་ཏུ་བཟང་པོར་གསོལ་བ་འདེབས༔ མ་རིག་མུན་པ་སངས་པར་བྱིན་གྱིས་རློབས༔ རང་བྱུང་ཡེ་ཤེས་ལྷུན་གྲུབ་གཟུགས་ཀྱི་སྐུ༔ ཞི་ཁྲོ་སངས་རྒྱས་རིགས་ཀྱི་ལྷ་ཚོགས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ གཏི་མུག་མུན་པ་སངས་བར་བྱིན་གྱིས་རློབས༔ མེ་ལོང་ཡེ་ཤེས་རང་གསལ་ཐུགས་ཀྱི་སྐུ༔ ཞི་ཁྲོ་རྡོ་རྗེ་རིགས་ཀྱི་ལྷ་ཚོགས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ ཞེ་སྡང་མུནཔ་སངས་བར་བྱིན་གྱིས་རློབས༔ མཉམ་ཉིད་ཡེ་ཤེས་རྣམ་དག་ཡོན་ཏན་སྐུ༔ ཞི་ཁྲོ་རིན་ཆེན་རིགས་ཀྱི་ལྷ་ཚོགས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ ང་རྒྱལ་མུན་པ་སངས་བར་བྱིན་གྱིས་རློབས༔ སོར་རྟོགས་ཡེ་ཤེས་ཆགས་མེད་གསུང་གི་ངང་༔ ཞི་ཁྲོ་པདྨ་རིགས་ཀྱི་ལྷ་ཚོགས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ འདོད་ཆགས་མུན་པ་སངས་བར་བྱིན་གྱིས་རློབས༔ བྱ་གྲུབ་ཡེ་ཤེས་དག་གྲོལ་ཕྲིན་ལས་ངང་༔ ཞི་ཁྲོ་ཀརྨ་རིགས་ཀྱི་ལྷ་ཚོགས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ ཕྲག་དོག་མུན་པ་སངས་བར་བྱིན་གྱིས་རློབས༔ གདུལ་བྱའི་མོས་ངོར་འགྲོ་འདུལ་སྤྲུལ་པའི་སྐུ༔ རྫོགས་ཆེན་གསལ་བའི་སྒྲོན་མ་བཅུ་གཉིས་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ རྟེན་འབྲེལ་མུན་པ་སངས་བར་བྱིན་གྱིས་རློབས༔ ཐུགས་རྗེ་ཆེན་པོའི་མི་ཡི་ཟོལ་དུ་མཛད༔ ཤེས་རབ་ཆེན་པོའི་བརྡ་ཐབས་དོན་དུ་འབྱོར༔ བརྡ་བརྒྱུད་བླ་མ་རྣམས་ལ་གསོལ་བ་འདེབས༔ ཡུལ་འཛིན་མུན་པ་སངས་བར་བྱིན་གྱིས་རློབས༔ སྐྱེ་འཆི་འཇིགས་བྲལ་རྡོ་རྗེ་ལྟ་བུའི་སྐུ༔ སྐུ་གཅིག་མཚན་བརྒྱད་པདྨ་རྒྱལ་པོ་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ ཚོགས་བརྒྱད་མུན་པ་སངས་བར་བྱིན་གྱིས་རློབས༔ སྒྱུ་འཕྲུལ་གཏེར་སྟོན་ཡང་སྟོན་སྣ་ཚོགས་སུ༔ ཡོངས་ཤར་དྲིན་ཅན་རྩ་བའི་བླ་མ་ལ༔ མོས་གུས་གདུང་ཤུགས་དྲག་པོས་གསོལ་བ་འདེབས༔ བརྒྱད་ཁྲི་བཞི་སྟོང་མུན་པ་དབྱིངས་སུ་སངས༔ ཕུང་ཁམས་རྣམ་དག༵་རྒྱལ་བའི་སྐུ་རུ་རྫོག༵ས༔ ལམ་བཞི་མཐར་ཕྱིན་ཡེ་ཤེས་ཆོས་སྐུར་སྨིན༵༔ ཁྱད་ཆོས་དྲུག་ལྡན་གཞོན་དུ་བུམ་པའི་སྐུ༔ འཇའ་ལུས་འཕོ་བ་ཆེན་པོར་སངས་རྒྱས་ཤོག༔ ཅེས་ཀྱང་པདྨ་མ་ཏིའི་ངོར་ཁྲག་འཐུང་ག་གཱ་ཨ་བྷྱེས་བྲིས། ཡི་གེ་འདུ་བྱེད་བྷུདྡྷས་སོ། །
གཏོར་མ་བསྔོ་བའི་སྔ་ཐོག་ཏུ༔ རང་ཉིད་སྤྱན་རས་གཟིགས་དབང་ནི༔ སྐུ་མདོག་དཀར་པོ་ཞལ་གཅིག་པ༔ ཕྱག་བཞི་གཡས་གཡོན་དང་པོ་གཉིས༔ ཐལ་སྦྱར་ནོར་བུའི་དགོས་འདོད་འབྱུང་༔ གཡས་འོག་ཤེལ་གྱི་ཕྲེང་བ་དང་༔ གཡོན་པས་པདྨ་དཀར་པོ་བསྣམས༔ ཐུགས་ཀའི་འོད་ཀྱིས་བགེགས་མགྲོན་བཀུགས༔ བཛྲ་བིགྣཾ་ཤ་ཏྲུཾ་ཛ་ཛ༔ དེ་ནས་གཏོར་མ་བསྔོས་ཏེ༔ བགེགས་ཐམས་ཅད་རང་གནས་སུ་སོང་བར་བསམ་ལ༔ གལ་ཏེ་མི་འགྲོ་བའི་རིགས་བསྐྲད་པའི་ཕྱིར༔ མཚམས་ལྷ་བསྐྱེད་པ་ནི༔ ཨོཾ་བཛྲ་ཀྲོ་ཏ་ཧྱ་གྷྲ་ཝ་ཧཱུྃ་ཕཊ༔ ཧཱུྃ༔ ཐུགས་རྗེ་ཆེན་པོ་ཁྲོས་པའི་སྐུ༔ ༼ ལས་བུམ་མེད་རིགས་ལ་བསངས་ཆུ་སྐད་ཅིག་དྲན་རྫོགས་སུ༔ ཞེས་བསྒྱུར་ལས་བུམ་ལའང་སྤྲོ་ན༔ ལས་བུམ་སྐད་ཅིག་དྲན་རྫོགས་སུ༔ ཞེས་ཁ་བསྒྱུར་མཆན། ༽ བཅོམ་ལྡན་པདྨ་དབང་ཆེན་ནི༔ ཞལ་གསུམ་ཕྱག་དྲུག་ཞབས་བཞི་བསྒྲད༔ གཡས་དཀར་གཡོན་སྔོ་དབུས་དམར་ཞལ༔ གཡས་ཕྱག་དགྲ་སྟྭ་མདུང་ཐུང་དང་༔ རལ་གྲི་བསྣམས་ནས་རྔམ་པར་སྤྱོད༔ གཡོན་གསུམ་བམ་དབྱུག་ཐོད་པ་དང་༔ བསྡིགས་མཛུབ་ཀྱིས་ནི་བགེགས་རྣམས་གཟིར༔ ཞབས་བཞིས་བདུད་བཞི་སྤྱི་ཆིངས་མནན༔ དབུ་གཙུག་རྟ་མགོ་གསུམ་གྱིས་བརྒྱན༔ རྟ་སྐད་ཐེང་གསུམ་འཚེར་བ་ཡིས༔ མྱ་ངན་འདས་པའི་ཆོས་སྒྲ་དང་༔ གཡར་དམ་ཅན་ལ་དངོས་གྲུབ་སྩོལ༔ སྲིད་གསུམ་མ་ལུས་དབང་དུ་སྡུད༔ གཏུམ་ཆེན་ཡུམ་དང་གཉིས་མེད་འཁྲིལ༔ སྐུ་ལ་བསྐལ་བའི་མེ་ཆེན་འབར༔ ཁྲོ་བོའི་ཆ་ལུགས་ཡོངས་སུ་རྫོགས༔ འོད་འཕྲོས་དུར་ཁྲོད་མེ་འབར་ནས༔ སྤྱན་དྲངས་དམ་ཡེ་གཉིས་མེད་གྱུར༔ ཨོཾ་བཛྲ་ཀྲོ་དྷ་ཧྱ་གྷྲ་ཝ་ཧུ་ལུ་ཧུ་ལུ་ཧཱུྃ་ཕཊཿབཛྲ་ས་མ་ཡ་ཛཿཏིཥྛ་བཛྲ་ལྷན༔ ན་མོ་ན་མཿ མ་ཧཱ་པཱུ་ཛ་ཧཱུྃ༔ རོལ་མོ་སྒྲོགས་ལ༔ ཧཱུྃ༔ དབུ་གསུམ་ཐོར་གཙུག་གཅིག་ཏུ་བཅིངས་པས་འཁོར་རྣམས་སྐྲག༔ ཕྱག་དྲུག་ཕྱག་མཚན་ཐ་དད་བསྣམས་པས་དགྲ་བགེགས་འདུལ༔ སྐུ་ལ་ཆས་རྒྱན་གསོལ་ཞིང་མ་མོ་དབང་དུ་བསྡུད༔ ཕ་རོལ་སྟོབས་ཀྱིས་འདུལ་བའི་ཧཱུྃ་སྒྲ་ཅན་ལ་བསྟོད༔ ཞེས་སོ༔ ཡང་བསྡུ་ན༔ ཧྲཱི༔ བཅོམ་ལྡན་རྟ་མགྲིན་དམར་པོ་ནི༔ ཞལ་གཅིག་ཕྱག་གཉིས་སྐུ་མདོག་དམར༔ གཡས་པས་བེ་ཅོན་གཡོན་སྦྲུལ་ཞགས༔ གཟི་ལྡན་གྲི་ཐོད་འཛིན་དང་འཁྲིལ༔ གནས་གསུམ་འོད་འཕྲོས་ཡེ་ཤེས་པ༔ སྤྱན་དྲངས་གཉིས་སུ་མེད་པར་གྱུར༔ ཨརྒྷཾ་༴ ཧཱུྃ༔ རྒྱལ་ཀུན་གསུང་དབང་བཅོམ་ལྡན་འདས༔ རྟ་སྐད་ཐེང་གསུམ་རྣམ་ཐར་ཅན༔ རུ་ཏྲ་ཀུན་འདུལ་ཁྲོས་པའི་རྒྱལ༔ པདྨ་དབང་ལ་ཕྱག་འཚལ་བསྟོད༔ ཞེས་སོ༔ བུམ་བཟླས་ཀྱི་དུས་སུ༔ བདག་གི་ཐུགས་ཀའི་འོད་ཟེར་གྱིས་ལས་ལྷའི་ཐུགས་དམ་བསྐུལ་བས་སྐུ་ལས་བདུད་རྩིའི་རྒྱུན་བབས་པས་བུམ་པ་གང་བར་གྱུར༔ ཨོཾ་བཛྲ་ཀྲོ་ཏ་ཧྱ་གྷྲ་ཝ་ཧུ་ལུ་ཧུ་ལུ་ཧཱུྃ་ཕཊ༔ ཅི་འགྲུབ་མཐར་མཆོད་ཅིང་བསྟོད་ལ༔ ༼ བསང་ཆུ་ཡིན་ན་ལྷ་འོད་དུ་ཞུ་ནས། མཆན་ ༽ བུམ་ལྷ་འོད་དུ་ཞུ་ནས་ཆུ་རྒྱུན་ལ་ཐིམ་པས་མཆོད་རྫས་ཀྱི་མ་དག་པའི་དྲི་མ་འབགས་གཙོག་ཐམས་ཅད་སྦྱངས་ནས་ཡེ་ཤེས་ཀྱི་བདུད་རྩིར་བྱིན་གྱིས་རློབས་པ་དང་༔ གསང་བ་བལྟ་བར་མི་དབང་བ་དང་༔ མཆོད་རྫས་ལ་རྐུ་བ་ཐམས་ཅད་ཀྱིས་མཐོང་ངམ་ཐོས་སམ་དྲན་ནམ་རེག་པ་ཙམ་གྱིས་ལུས་ངག་ཡིད་གསུམ་ཐལ་བའི་རྡུལ་ཕྲན་བཞིན་དུ་བརླག་པའི་ནུས་པ་དང་ལྡན་པར་གྱུར༔ ཞེས་སོ༔ རྣམ་བུམ་ལ༔ སྭ་བྷ་ཝས་སྟོང་བར་སྦྱངས༔ སྟོང་པའི་ངང་ལས་བུམ་པ་གཞལ་ཡས་ཁང་སུམ་རིམ་གྱི་ནང་དུ་བཅོམ་ལྡན་འདས་ཞི་ཁྲོའི་དཀྱིལ་འཁོར་ཐམས་ཅད་སྣང་སྟོང་འཇའ་ཚོན་ལྟ་བུ་མ་འདྲེས་ཡོངས་སུ་རྫོགས་པ་གསལ་བའི་གནས་གསུམ་ལས་འོད་འཕྲོས་པས༔ ཡེ་ཤེས་པ་སྤྱན་དྲངས་ལ་ཐིམ་པར་བསམ༔ སྤྲོ་ན་རྩ་བསྒྲུབ་ཀྱི་དྲངས་བསྟིམ་མཆོད་བསྟོད་ཡན་བྱས་ལ༔ བདག་གི་ཐུགས་ཀའི་འོད་ཟེར་ཨ་ནུ་རཱ་གིའི་བརྡ་བཞིའི་རང་སྒྲས་བསྐུལ་བས་ལྷ་ཚོགས་རྣམས་ཀྱི་སྐུ་དང་༔ ཐབས་ཤེས་ཆགས་ཅན་གྱི་ཚུལ་རྣམས་འཁྲིལ་བའི་སྦྱོར་མཚམས་ནས་བདུད་རྩིའི་རྒྱུན་བབས་པས་བུམ་པ་གང་བར་བསམ་ལ༔ རྩ་སྔགས་བཟླའོ༔ ཡང་བསྡུ་ན༔ ཡེ་ཤེས་པ་སྤྱན་དྲངས་ནས་ཐིམ་པར་བསམ་ལ༔ ཨརྒྷཾ་༴ ནས་རཱུ་པ་སྤརྴེ་༴ སརྦ་པཉྩ་རཀྟ་བྷ་ལིངྟ་མ་ཧཱ་སུ་ཁ་པཱུ་ཛ་ཨ་ཧཱུྃཿ ཧཱུྃ༔ ཆོས་སྐུ་ནམ་མཁའ་ལྟ་བུར་སྤྲོས་པ་མེད༔ ལོངས་སྐུ་ཉི་ཟླ་ལྟ་བུར་རང་འོད་གསལ༔ སྤྲུལ་སྐུ་ཆུ་ཟླ་ལྟ་བུར་འགྲོ་དོན་མཛད༔ ཞི་ཁྲོ་ཡོངས་རྫོགས་ལྷ་ལ་ཕྱག་འཚལ་བསྟོད༔ ཞེས་པའི་མཐར་བསྙེན་ནོ༔ དེ་ནས་སྔར་ལྟར་མཆོད་བསྟོད་ཀྱི་མཐར༔ ལྷ་ཡབ་ཡུམ་རྣམས་དགྱེས་ཆགས་ཞུ་བདེའི་བྱང་ཆུབ་སེམས་སྤྲིན་བདུད་རྩིའི་རང་བཞིན་དཀར་དམར་མཐིང་ གསུམ་གྱི་འོད་ཟེར་འཕྲོ་བ་བདག་ལ་ཐིམ་པས་བདེ་སྟོང་ཟག་མེད་ཀྱི་བྱིན་བརླབས་རྒྱུད ་ལ་འདེབས་པའི་ནུས་ལྡན་དུ་གྱུར༔ དེ་རྗེས་བདག་འཇུག་ནི༔ ཨོཾ༔ སྐྱེ་འཇིག་མེད་པ་རྡོ་རྗེའི་སྐུ་དང་ཡེ་མཉམ་རང་ངོ་སད་གྱུར་ཅིག༔ འགགས་པ་མེད་པ་ཡེ་རླུང་རང་གདངས་ཚངས་དབྱངས་ཡན་ལག་རྫོགས་གྱུར་ཅིག༔ འཁྲུལ་རྟོག་ཉོན་མོངས་ཟག་པ་ཟད་པས་རིགས་གསུམ་མངོན་གྱུར་ཤེས་རབ་ཀྱི༔ འབྲས་བུའི་ཀུན་བཟང་ཁྱོད་དང་གོ་འཕང་མཉམ་ནས་གཞན་སྨིན་དབང་ལྡན་ཤོག༔ ཨོཾ་ཀ་ཡ་ཝཀྐ་ཙིཏྟ་ཨ་བྷི་ཥིཉྩ་ཨ་ཧཱུྃ༔ལྷ་ཚོགས་རྣམས་ཀྱིས་གནང་བ་བྱིན་ནས་དེ་དག་ཀྱང་དབང་བསྐུར་བའི་དགོངས་པ་ལ་ཞུགས་པར་བསམ་མོ༔ ཚུལ་འདི་བརྡ་ལ་གབ་སྦས་མེད་པར་བབས༔ དགོངས་གཏེར་རྒྱུད་ལ་ཤར་བའི་མཇུག་ཐོག་ཏུ༔ མཁའ་འགྲོའི་ཡི་གེའི་ཞལ་ཀྱང་བསྟན་པ་སྟེ༔ བརྡ་ཡིག །པདྨ་མ་ཏི་དེ་ཡིས་གསུང་བསྐུལ་ངོར། །དུས་མཐའི་སྔགས་རྒན་ག་གཱ་ཨ་བྷྱེས་སོ། །མངྒ་ལཾ། རྟོགས་པས་བདག་སྒྲོལ་ཐུགས་རྗེའི་གཞན་གྲོལ་བའི་རྟེན་འབྲེལ་འགྲིགས་སོ། །དགེའོ། །དགེའོ། །