རྨི་ལམ་འོད་གསལ་འདྲེས་པའི་དག་སྣང་རིན་པོ་ཆེའི་སྒྲོམ་བུ།

རྨི་ལམ་འོད་གསལ་འདྲེས་པའི་དག་སྣང་རིན་པོ་ཆེའི་སྒྲོམ་བུ་ཞེས་བྱ་བ་བཞུགས་སོ། །

ཐོག་མའི་སངས་རྒྱས་ཀུན་ཏུ་བཟང་པོ་ཉིད༔ དྲུག་པ་རྡོ་རྗེ་འཆང་གི་སྐུར་བཞེངས་ནས༔ གསང་ཆེན་རྨད་དུ་བྱུང་བའི་འཁོར་ལོ་བསྐོར༔ གདུལ་བྱ་སྨིན་གྲོལ་མཛད་ལ་ཕྱག་འཚལ་ལོ༔ མཐའ་དྲུག་ཚུལ་བཞིའི་བཅིངས་པའི་རྒྱུད་དོན་ཉིད༔ རྟོག་གེ་ངན་པས་ནམ་ཡང་མི་དཔོག་ཕྱིར༔ མངོན་སུམ་འཕགས་བློ་མངའ་བ་ཨོ་རྒྱན་གྱི༔ བཀའ་ལུང་ཇི་ལྟར་ཐོབ་བཞིན་འདི་ན་སྤྲོ༔ ཞེས་པས་མདུན་བསུས་ཏེ་འདིར་ཁྲོ་བོ་ཞེས་པ་ཤིང་མོ་གླང་གི་ལོ་ལ་ཧོར་ཟླ་བརྒྱད་པའི་ཚེས་བཅུའི་ནུབ་མོ་ཨོ་རྒྱན་གྱི་མཁན་པོ་པདྨ་རྡོ་རྗེ་ཞེས་བྱ་བ་ཡིན་ཟེར་བའི་རྣལ་འབྱོར་པ་རུས་རྒྱན་ཅན་ཤིན་ཏུ་ཞི་བའི་ཉམས་ཀྱིས་སྒེག་པ་དམར་གསལ་ཕྱག་གཉིས་གྲི་ཐོད་འཛིན་ཅིང་གར་སྟབས་ལིང་ལིང་བསྒྱུར་བ་ཞིག་གིས་དཔེ་ཆུང་ཐོགས་པའི་མཁའ་འགྲོ་ཞིག་ལ་དེ་འདི་ལ་སྟོན་ཟེར་བས་དངུལ་གྱི་ཤོག་བུ་ལ་སུ་ཝརྞའི་རི་མོ་བཀྲ་བ་ཞིག་ཟུར་སྟོན་བྱས་ནས་ངས་འདོན་ཉོན་གསུངས་ཏེ༔ དེང་སང་ཆོས་ལ་འཐེན་རྩོད་བྱེད་ནའང་༔ ཐམས་ཅད་རང་རང་སོ་སོར་བདེན་དོན་འགྲུབ༔ ཕྱོགས་ལྷུང་གདོན་གྱིས་ཟིན་གང་ངན་འགྲོའི་རྒྱུ༔ འོན་ཀྱང་རྒྱུད་ཀྱི་དགོངས་པ་བབས་སོ་གཅིག༔ ཞེས་པའི་བརྡའ་ཡིག་ལ་ཁོང་སྙིང་དམར་འབྱིན་ནི༔ ད་ལམ་སྤྱིར་ས་དགེ་རྙིང་གསུམ་བཀའ་འབྲུག་དྭགས་ གསུམ་ཀུན་ཀྱང་རང་རང་གི་གྲུབ་མཐའི་རྒྱུད ་དོན་རེ་ལ་འགྲེལ་ཚུལ་མི་འདྲ་བ་མཐའ་དྲུག་ཚུལ་བཞིའི་ཁྱད་ཀྱི་ཕྱོགས་སུ་འཐེན་ཁྱེར་དང་༔ ཁྱད་པར་དུ་གསང་སྔགས་རྙིང་མའི་ལྟ་བ་མ་ཡིན་དགག་གི་སྟོང་ཉིད་དུ་གནས་པ་དྲི་མེད་འོད་ཟེར་དང་གཏེར་བདག་ཡབ་སྲས་ནས་རྩལ་དུ་བཏོན་པ་ལ་གཞན་ཟེར་གྱིས་དྲིངས་སུ་འཇོག་པ་འགའི་སྒྲོ་སྐུར་འདེབས་ཤིང་ཆོས་ལ་བརྟེན་ནས་ལས་ངན་གསོགས་དུ་མཆི་སྟེ༔ དེ་ཡང་མཐར་ཐུག་གི་དགོངས་པ་ལས་མ་འཛུར་བའི་གནམ་ཐིག་གམ་གཟེར་བུ་ནི་རིན་པོ་ཆེའི་སྒྲོམ་བུ་འདིའི་ནང་རྫོངས་སུ་བཅུག་པ་རྡོ་རྗེ་འཆང་གི་ཐུགས་ཐིག་གསང་འགྲེལ་ཞིག་གོ༔

འདི་ལ་ཐོག་མར་གཞི་ལམ་འབྲས་བུ་གསུམ་གྱི་ངེས་པས་མ་ཡིན་དགག་གི་སྟོང་ཉིད་དུ་ཤེས་འཇུག་མངོན་དུ་གྱུར་གསུམ་དང་༔ དེ་ལ་དགོངས་ནས་བླ་མའི་མན་ངག་གིས་གབ་པ་མངོན་དུ་བྱུང་བ་ཡིན་ཚུལ་དང་༔ དེ་ལ་དམོད་པའི་ཉེས་པ༔ ཡང་དག་པར་རྟོགས་པ་དེའི་ཕན་ཡོན་བཤད་པ་དང་དྲུག་ལས༔ དང་པོ་ལ་རྒྱུད་ལུང་མན་ངག་ལ་མ་བརྟེན་པར་རྟོག་གེ་ཚད་མ་མིན་པར་བཤད་༼ པ་དཔྱད ༽༔ ཡིད་ཆེས་ཁུང་བཙུན་འཁྲུལ་དྲི་མེད་པའི་ལུང་རང་སོའི་དགོངས་པ་བཤད་པ་དང་གཉིས་ལས༔

དང་པོ་ནི༔ སྤྱིར་རྟོག་གེའི་ཚུལ་རོལ་མཐོང་བའི་རྗེས་དཔག་གིས་ཆོས་ཉིད་སྤྱོད་ཡུལ་ཡང་དག་པའི་གཞལ་བར་བྱ་བྱེད་དུ་མི་འགྱུར་བར་མ་ཟད་ས་བཅུ་པའི་བྱང་སེམས་ཀྱིས་མཚན་མོའི་གཟུགས་ལྟ་བུ་ལས་མི་མཐོང་བར་བཤད་པའི་ཕྱིར་ན༔ དབུ་མ་གཞན་སྟོང་ལ་ཆོས་ལོག་ཡིན་པར་སྡང་ཤུགས་ཀྱིས་བལྟས་ཏེ་མ་ཡིན་དགག་གི་སྟོང་ཉིད་ཀྱང་གཙོག་པར་འཛིན་པ་དག་གིས་སྔོན་དུ་རང་རང་གི་རྒྱུད་སྡེ་ལ་མི་གནོད་པའི་ཚིག་དོན་གྱི་མཐའ་བཞག་ཏུ་ཡོད་པ་ཞིག་ནི་ངེས་པར་གལ་ཆེ་སྟེ༔ འདི་ལ་དགོངས་ཏེ་ཀུན་མཁྱེན་གྱིས༔ ཆོས་ཉིད་དེ་རྣམ་གཅོད་དུ་མཐོང་གི་ཡོངས་གཅོད་ཀྱི་མི་མཐོང་ཟེར་བ་ནི་དོན་རང་ཐོག་ཏུ་མྱོང་བ་མེད་པའི་ཚིག་གོ་གསུངས་པའང་ཐུགས་ཤུན་ཏུའང་མད་དོ༔ ཁ་ཅིག་ཡོངས་གཅོད་ཀྱི་མངོན་སུམ་པས་ཡུལ་རང་མཚན་ཡིན་ཕྱིར་ན་ཆོས་ཉིད་ལ་མཚན་མ་ཡོད་དོ་པའང་༔ རྣམ་གཅོད་ཀྱི་སྤྱི་མཚན་ལ་སྐྱོན་རྣམ་ཤེས་ལྐོག་ཏུ་གྱུར་ནས༔ འཕགས་པའི་གཉིས་སྣང་མེད་པའི་བློ་ལ་གོ་ཕྱིའི་དཔྱད་རྒྱ་དགོས་པ་དང་༔ མངོན་སུམ་གྱི་ཆོས་ཉིད་མཐོང་བ་སངས་རྒྱས་ལའང་མེད་པ་དང་༔ ཡང་སོ་སྐྱེས་ཀྱིས་དོན་སྤྱི་འཕགས་པས་མངོན་སུམ་མཐོང་བས་སྤྱི་རང་གི་མཚན་མ་ཞལ་གྱི་མཉམ་བཞེས་མཛད་པའི་ལྷ་མཇལ་བཟང་པོའི་སྒོ་འཕར་དབྱེ་བའི་དཀའ་དྲིན་གང་ཞིག་གིས་འཁོར༔ ཕོ་རོག་ལྟ་བུར་དོགས་པ་ཆེ་བའི་རྟོག་གེའི་གཞལ་ཡང་གསང་སྔགས་ཀྱི་ཆོས་ལ་ཅུང་ཟད་ཀྱང་མི་དཔོག་པར་མཐར་གང་ལའང་ཡིད་མི་ཆེས་ནས་དངོས་གྲུབ་ཀྱི་བགོ་སྐལ་མེད་པ་ཞིག་བྱེད་ངེས་པས་ན༔ འཇམ་དཔལ་སྒྱུ་འཕྲུལ་དྲྭ་བའི་བཤད་རྒྱུད་ལས༔ ལུང་མ་གཏོགས་པའི་རྟོག་གེ་ཡི༔ ཆོས་རྣམས་རྣམ་པར་དག་མ་ཡིན༔ དྲང་སྲོང་རྣམས་ཀྱི་ཤེས་པ་ཡང་༔ དེ་ཡི་ལུང་ནི་སྔོན་གཏོང་ན༔ ལོང་བས་རྐང་པས་ཚོད་དཔག་བཞིན༔ ཉམ་ངའི་གཡང་སར་རྒྱུག་བྱེད་ལྟར༔ རྗེས་སུ་དཔག་པ་གཙོར་བྱེད་གང་༔ རྣམ་པར་ལྟུང་བ་དཀའ་མ་ཡིན༔ ཞེས་དང་། གཤེད་དམར་གྱི་རྒྱུད་ལས༔ རྟོག་ཅིང་དཔྱོད་པའི་རྟོག་གེ་བ༔ དེ་ལ་སྦྱོར་བའི་དངོས་གྲུབ་རིང་༔ ཞེས་དང་༔ དགོངས་འདུས་ལས༔ གསང་སྔགས་རྡོ་རྗེ་ནམ་མཁའ་ཆེ༔ ཚིག་གི་སྤྱོད་ཡུལ་མ་ཡིན་པས༔ བརྗོད་པས་རྟོགས་པར་མི་ནུས་ཏེ༔ བདག་གི་བསྒྲོ་བར་རབ་ཏུ་དཀའ༔ དཔེའམ་ཚད་མ་གཏན་ཚིག་དང་༔ རྗེས་སུ་དཔག་པའི་ཤེས་རབ་ཀྱིས༔ རྟོགས་པར་ནུས་པ་མ་ཡིན་ནོ༔ དམུས་ལོང་མཁའ་ལ་མཐོ་འཇལ་འདྲ༔ ཞེས་དང་༔ ཀྲི་ཡ་བསམ་གཏན་གྱི་རྒྱུད་ལས༔ གསང་སྔགས་རྒྱ་མཚོ་ཆེན་པོ་ནི༔ དཔེའམ་ཚད་མའམ་གཏན་ཚིག་གམ༔ རྗེས་སུ་དཔག་པའི་ཤེས་རབ་ཀྱིས༔ དབྱེ་བར་ནུས་པ་མ་ཡིན་ནོ༔ ཞེས་གསུངས་པ་ལྟར༔ འཕགས་པ་ལྷའི༔ མ་འོངས་ཕྱི་མའི་དུས་ཀྱི་ཚེ༔ ལུང་ཟབ་མན་ངག་མི་བརྟེན་པར༔ འཐད་གྲུབ་རིགས་གཉིས་གཙོར་བྱེད་པ༔ རང་རང་གྲུབ་མཐའ་ཚད་མར་འཛིན༔ མཐར་ཐུག་ལྟ་བ་ཟབ་མོ་ལ༔ མི་མོས་སླར་ཡང་སུན་འབྱིན་རྒོལ༔ དེ་ནི་རང་ཕུང་གཞན་ཡང་བརླག༔ ཞེས་གསུངས་སོ༔ རྒྱུ་མཚན་དེས་ན་རྟོག་གེ་ལ་འཆེལ་འཆེལ་ཆེས་བས་ རྒྱུད་སྡེ་མཐའ་དག་ལས༔ ཕྱི་ནང་གཞན་གསུམ ་ཡེ་ཤེས་སུ་སྦྱོར་བྱེད་དུ༔ ཇི་ལྟར་ཕྱི་རོལ་དེ་བཞིན་ནང་༔ ཞེས་པ་ལ་སོགས་པ་ཀུན་ཀྱང་གསང་བ་བའི་བདག་དང་ཁྱད་མེད་པའི་དོགས་པ་སོགས་ལྡང་ཉེ་ཞིང་མཐར་ཆོས་སྤང་གི་ལས་ཀྱི་འབྲས་བུས་འོ་བརྒྱལ་ཆེན་པོ་མྱོང་བར་མངོན་ནོ༔ དེས་ན་མ་ཡིན་དགག་ལས་བཟུང་སྟེ་མཐར་ཐུག་གི་དགོངས་པ་བཙལ་བར་བྱ་བ་རྣམས་རྟོག་གེ་པའི་ཐེ་ཚོམ་གྱི་དྲྭ་བར་གཟུད་པར་མི་བྱ་སྟེ༔ སྔོན་མུ་སྟེགས་པའི་དྲང་སྲོང་འགའི་ཀྱང་འདང་ལོག་གི་ལྟ་ངན་འདི་རྙེད་བྱུང་པ་དང་༔ ཆོས་ཀྱི་མིག་རྡུལ་མེད་མ་ཐོབ་པས་མ་རྟོགས་ལོག་རྟོགས་ཕྱོགས་རྟོགས་སྲིད་པའི་ཕྱིར་ན༔ རྒྱལ་བ་རང་གིས་གང་བཞག་པའི་གཞུང་དཀྲུགས་པར་མི་བྱ་བ་ཁོ་ནར་མགོན་པོ་བྱམས་པས༔ གང་ཕྱིར་རྒྱལ་ལས་ཆེས་མཁས་འགའ་ཡང་འཇིག་རྟེན་འདི་ན་ཡོད་མིན་ཏེ༔ མ་ལུས་དེ་ཉིད་མཆོག་ནི་ཚུལ་བཞིན་ཀུན་མཁྱེན་གྱིས་མཁྱེན་གཞན་གྱིས་མིན༔ དེ་ཕྱིར་དྲང་སྲོང་རང་ཉིད་ཀྱིས་བཞག་མདོ་སྡེ་གང་ཡིན་དེ་མི་དཀྲུགས༔ ཐུབ་ཚུལ་བཤིགས་ཕྱིར་དམ་ཆོས་ལ་ནི་གནོད་པ་བྱེད་པར་འགྱུར༔ ཞེས་སོ༔

གཉིས་པ་ཡིད་ཆེས་ཁུང་བཙུན་འཁྲུལ་དྲི་མེད་པའི་ལུང་རང་སོའི་དགོངས་པ་བཤད་པ་ལ༔ ཡིད་ཆེས་པའི་གནས་ཡིན་པ་དང་༔ དེ་ལས་ཇི་ལྟར་བསྟན་པ་འཆད་པ་ལས༔

དང་པོ་ནི༔ སྤྱིར་སངས་རྒྱས་ནི་རྫུན་གྱི་རྒྱུ་བཞི་དང་བྲལ་བ་ཡིན་པའི་ཕྱིར་ཡང་བདེན་པར་གསུངས་པ་དང་༔ ཆོས་ཐམས་ཅད་ཆགས་ཐོགས་མེད་པར་མི་མཁྱེན་པའི་རྒྱུ་ཉོན་ཤེས་ཀྱི་སྒྲིབ་པ་དང་བྲལ་བ་དང་༔ སངས་རྒྱས་ཐེག་པ་དམན་པས་མི་འཁྲིད་པ་ལ་སོགས་ཤིན་ཏུ་བདེན་པར་གསུངས་པའི་ཕྱིར༔ གཙུག་ན་རིན་ཆེན་གྱི་མདོ་ལས༔ ལུང་ནི་ངེས་འབྱེད་ཚིག་ཡིན་ཏེ༔ ཉེས་པ་མེད་པ་རྫུན་གྱི་ཚིག༔ སྨྲ་བར་མི་འགྱུར་རྒྱུ་མེད་ཕྱིར༔ ངེས་འབྱེད་ལུང་དུ་ཤེས་པར་བྱ༔ ཞེས་དང་ཏིང་འཛིན་རྒྱལ་པོ་ལས༔ ནམ་མཁའི་ཁམས་ནི་རྣམ་པ་གཞན་གྱུར་ཀྱང་༔ ཁྱོད་ནི་མི་བདེན་པ་ཡི་ཚིག་མི་གསུངས༔ ཞེས་སོ༔ དེས་ན་ལུང་མི་ཤེས་པར་སྨྲས་པའི་རིགས་པ་འདིའི་བདག་གཞན་ཐམས་ཅད་ཆུད་ཟོས་པར་འགྱུར་ཏེ༔ རྒྱན་སྟུག་པོ་བཀོད་པར༔ ཡིད་ཆེས་ལུང་དང་མི་ལྡན་པའི༔ ཆོས་གང་སྟོན་པར་བྱེད་པ་ནི༔ རྣམ་པར་རྟོག་པའི་བདག་ཉིད་དེ༔ བདག་ཀྱང་ཆུད་ཟོས་གཞན་ཆུད་ཟོས༔ ཞེས་དང་༔ ངེས་བརྗོད་བླ་མའི་རྒྱུད་ལས༔ རྟག་ཏུ་ལུང་ནི་མི་སྤངས་ཤིང་༔ ཞེས་པ་ལྟར་དྲང་སྲོང་ཆེན་པོ་ཉིད་ཀྱི་བཀའི་དབྱིངས་གཞལ་པའི་སྒོ་ནས་རང་སོའི་ཐད་ཀ་ཐད་ཀའི་ཚིག་དོན་ལ་བརྟགས་དཔྱད་གོམས་འདྲེས་ཀྱི་སྒོ་ནས་བཀའ་ལུང་ཚད་མ་བཞིན་རིགས་པ་ཚད་མ་སྨྲ་བའང་དངོས་པོ་སྟོབས་ཞུགས་སུ་འགྱུར་བས་ལུང་གི་དག་བྱེད་རིགས་པ་ཞེས་བྱ་ཡི༔ གཞན་དུ་དེ་སྐད་མིན་ནོ༔

གཉིས་པ་དེ་ལས་ཇི་ལྟར་བསྟན་པ་འཆད་པ་ལ༔ ལྟ་བའི་རྣམ་གྲངས་སྤྱིར་བཤད༔ སྔགས་ཀྱི་ལྟ་བ་བྱེ་བྲག་དུ་བཤད༔ དེ་ རྒྱུད་ལས་ཇི་ལྟར་གསུངས་ཚུལ་བཤད་པ་དང་གསུམ ་ལས༔ དང་པོ་ནི༔ དེ་ཡང་སྤྱིར་ལྟ་བ་ཞེས་བྱ་བ༔ ཐེག་པའི་ཐོག་ནས་དབྱེ་ན་རིམ་པ་དགུ་དང་༔ སེམས་ཀློང་མན་ངག་གི་སྡེའི་ལྟ་བ་སོ་སོ༔ ཐ་སྙད་ཀྱི་སྒོ་ནས་དབྱེ་ན༔ རྒྱུ་འབྲས་ཡིད་ཆེས་པ་འཇིག་རྟེན་པའི་ལྟ་བ་ཡང་དག༔ བདེན་བཞིའི་སྟོང་བདག་མེད་མ་གཏོགས་༼ རྟོགས་དཔྱད། ༽གཞན་ཇི་བཞིན་ངེས་པས་ལྟ་བ་དང་༔ བླ་མ་ལ་སངས་རྒྱས་དངོས་སུ་ལྟ་བ་སོགས་མང་ངོ་༔ དོན་དམ་གྱི་ངོས་ནས་རྣམ་གྲངས་དང་རྣམ་གྲངས་མ་ཡིན་པར་མཐོང་བའི་ལྟ་བ༔ མཉམ་བཞག་ནམ་མཁའ་ལྟ་བུའི༔ རྗེས་ཐོབ་སྒྱུ་མ་ལྟ་བུའི་ལྟ་བ་ལ་སོགས་པ་ཤིན་ཏུ་མང་བས་རྒྱ་ཆུང་ཆུང་ཞིག་མིན་པའི་ཕྱིར་མེད་དགག་ཞིག་ཁོ་ན་མ་གཏོགས་ལྟ་བར་མི་རུང་སྙམ་པ་ནི་ཤིན་ཏུ་གླེན་པའི་སྟབས་འབའ་ཞིག་གོ༔

གཉིས་པ་སྔགས་ཀྱི་ལྟ་བ་བྱེ་བྲག་ཏུ་བཤད་ན༔ མཚན་ཉིད་པས་ཐེག་པ་དབུ་མ་ཆེན་པོའི་ལྟ་བ་སྟོང་ཉིད་མེད་དགག་ཙམ་ལས་མ་བསྟན་པས་དེ་ལ་ཐུགས་ཀྱི་ཞེན་པ་ཆེ་བ་རྣམས་ཀྱི་གསང་སྔགས་ཀྱང་དེ་དང་འདྲ་དགོས་ཟེར་བ་ནི༔ ལྷག་པའི་བདེན་པ་དབྱེར་མེད་ཀྱི་ཚིག་ཙམ་ཡང་མ་གོ་བ་ཡིན་གྱི་གཞན་དུ་གང་ལས་ལྷག་ན་མཚན་ཉིད་པའི་ལྟ་བ་ལས༔ གང་ལྷག་ན་སྔགས་ཀྱི་ལྟ་བ༔ གང་གིས་ན་མི་འགྱུར་བདེ་ཆེན་གྱི་རང་གདངས་ཀུན་རྫོབ་དག་པ་ཆེན་པོ་སྐུ་དང་ཡེ་ཤེས་ཀྱི་དཀྱིལ་འཁོར་དང་ཟུང་དུ་འཇུག་པའི་མཉམ་པ་ཆེན་པོ་སྟོང་ཉིད་ཉི་ཤུའི་རང་བཞིན་ལ་རྣམ་པ་ཀུན་གྱི་མཆོག་ལྡན་པས་དོན་མཐོང་གིས་ཁྱད་པར་གྱི་འཕགས་པ་སྟེ༔ གཞི་དེ་དགག་བྱ་འཁོར་བའི་ཆོས་སམ་སྣང་ཞེན་རང་སོ་བ་འདི་ཉིད་མ་ཡིན་པར་དགག་པ་ཙམ་གྱི་ཤུགས་ལས་ཆོས་གཞན་འཕེན་པའི་སྟེང་དུ་དེའི་མཚན་ཉིད་ཀྱི་འདྲ་ཆོས་མཐུན་པར་སྦྱོར་བ་ཉིད་ལས་དཔེར་ན་དུང་གི་སེར་པོ་མེད་པར་དགག༔ དཀར་པོ་ཡིན་པར་བཤད༔ འོན་ཀྱང་སེར་པོར་སྣང་དུས་ཀྱང་རྣམ་པ་མ་དོར་ཙམ་པའི་དབྱིབས་སོགས་མཚུངས་ཆོས་ཡོད་པར་སྨྲས་པ་ལྟ་བུའོ༔ དེ་ལྟར་བདེ་ཆེན་དང་སྟོང་པ་ཉིད་ཟུང་འཇུག་གི་བདག་ཉིད་ཆེན་པོའི་ཡེ་ཤེས་ཆོས་སྐུ་རང་རིག་པས་མངོན་སུམ་དུ་མཐོང་བ་ནི་སྔགས་ཀྱི་ལྟ་བ་ཡིན་གྱི༔ སྤྲོས་བྲལ་མེད་རྐྱང་ཙམ་ཞིག་མིན་པར་ཤེས་དགོས༔ འོན་ཀྱང་མི་སྟོང་བ་ཞིག་གི་རྟགས་དངོས་ཀྱང་མེད་པས་དག་མཉམ་ཟུང་འཇུག་གོ༔ དེ་ཟུང་འཇུག་ཡིན་པའི་གནད་ཀྱིས་དག་ཆེན་མ་རྟོགས་ན་མཉམ་པ་ཉིད་ཀྱང་ཕྱོགས་གཅིག་གི་སྟོང་ཆད་ལ་ལྟུང་དུ་ཉེ་བའི་ཕྱིར༔ དག་ཆོས་འདིའང་དག་མཉམ་གཉིས་ཀའི་ཡིན་པར་གོར་མ་ཆགས་པ་ལས་ཡ་ཆར་བལྟ་བའང་སྔགས་ཀྱི་ཚུལ་དུ་མི་འགྲོ་ལ༔ མཐའ་དཔྱོད་མཐར་ཐུག་ཇི་སྙེད་པ་གཟིགས་པའི་ཡེ་ཤེས་དང་༔ དོན་དཔྱོད་ཇི་ལྟ་བ་ཟུང་འཇུག་གི་མཐོང་བ་གནས་སྣང་མཐུན་པའི་ཡུལ་ཅན་ལ་དོན་དམ་པར་གསུངས་པའི་གནས་ཡོངས་སུ་གྱུར་པའི་ཚད་མ་དང་རྗེས་སུ་མཐུན་གྱི་གོ་མྱོང་རྟོགས་གསུམ་ནི་རྡོ་རྗེའི་ཐེག་པའི་ལྟ་བའི་ཚུལ་ཡིན་པས་མེད་དགག་རྐྱང་བར་བཞག་ཏུ་མེད་པའོ༔ ཤེས་བྱ་གཞི་ལྷག་པའི་བདེན་གཉིས་ཟུང་འཇུག་སྟེ་ཤེས་བྱེད་ཀྱི་མིག་ལྟ་བ་ཡིན་པའི་གནད་ཀྱི་ཀུན་རྫོབ་ལྟ་བས་དམིགས་ཡུལ་དུ་གྲུབ་ལ༔ དེའི་མ་ཡིན་དགག་གིས་སྟོང་ཉིད་དུ་ཡང་འགྱུར་ཏེ་ཐ་སྙད་རྣམ་དག་སྟོན་པའི་ཕྱིར་རོ༔

 གསུམ་པ་དེ་རྒྱུད ་ལས་ཇི་ལྟར་གསུངས་པའི་ཚུལ་ལ༔ སྤྱི་དང་བྱེ་བྲག་གཉིས་ལས༔ དང་པོ་ལ་སྣང་སྲིད་གཞིར་བཞེངས་ཀྱི་བསྐྱེད་པའི་རིམ་པའི་སྒྲུབ་གཞི་ལྟར་བཤད༔ སྒྱུ་མ་ལུས་དཀྱིལ་གྱི་རིམ་པ་གཉིས་པས་སྒྲུབ་གཞིར་བཤད༔ དེ་དག་ཀུན་གྱི་འཆར་གཞི་གཉུག་མའི་མི་ཤིགས་པའི་ཐིག་ལེ་བཤད་པ་དང་ གསུམ་ལས༔ དང་པོ་ནི༔ ཕ་རྒྱུད ་གསང་བ་འདུས་པ་ལ་སོགས་པ་གཙོ་བོར་གྱུར་པའི་རྒྱུད་སྡེ་སྤྱི་ཁྱབ་ནས༔ ཕུང་པོ་ལྔ་རིགས་ལྔ༔ འབྱུང་བ་ལྔ་ཡུམ་ལྔ༔ རྡོ་རྗེའི་སྐྱེ་མཆེད་ཀྱི་ཁམས་བྱང་ཆུབ་སེམས་དཔའ་ཡབ་ཡུམ་ལ་སོགས་པར་གནས་ཚུལ་གཞི་འབྲས་དབྱེར་མེད་ཆེན་པོ་ཉིད་དུ་གསུངས་པ་སྟེ༔ རྒྱུད་གསང་འདུས་ལས༔ མདོར་ན་ཕུང་པོ་ལྔ་རྣམས་ནི༔ སངས་རྒྱས་ལྔར་ནི་རབ་ཏུ་གྲགས༔ རྡོ་རྗེའི་སྐྱེ་མཆེད་ཉིད་དག་ཀྱང་༔ བྱང་ཆུབ་སེམས་དཔའི་དཀྱིལ་འཁོར་མཆོག༔ ས་ནི་སྤྱན་ཞེས་བྱ་བ་ཡིན༔ ཆུ་ཡི་ཁམས་ནི་མ་མ་ཀཱི༔ དཀར་དང་སྒྲོལ་མ་ཞེས་བྱ་བ༔ མེ་དང་རླུང་དུ་རབ་ཏུ་གྲགས༔ མཁའ་དབྱིངས་རྡོ་རྗེའི་དམ་ཚིག་ནི༔ རྡོ་རྗེ་འཛིན་པའི་དེ་ཉིད་དོ༔ ཞེས་དང་༔ མདོར་ན་ཕུང་པོ་རྒྱལ་བ་ལྔ༔ དེ་བཞིན་གཤེགས་པ་ཐམས་ཅད་ཡིན༔ ཞེས་དང་༔གསང་སྙིང་ལས༔ རྡོ་རྗེ་ཕུང་པོའི་ཡན་ལག་ནི༔ རྫོགས་པའི་སངས་རྒྱས་ལྔ་རུ་གྲགས༔ སྐྱེ་མཆེད་ཁམས་རྣམས་མང་པོ་ཀུན༔ བྱང་ཆུབ་སེམས་དཔའི་དཀྱིལ་འཁོར་ཉིད༔ ས་ཆུ་སྤྱན་དང་མཱ་མ་ཀི༔ མེ་རུལ་གོས་དཀར་སྒྲོལ་མ་སྟེ༔ ནམ་མཁའ་དབྱིངས་ཀྱི་དབང་ཕྱུག་མ༔ སྲིད་ གསུམ་ཡེ་ནས་སངས་རྒྱས་ཞིང་༔ ཞེས་དང་༔ འཁོར་ལོ་སྡོམ་པའི་ངེས་བརྗོད་བླ་མའི་རྒྱུད ་ལས༔ གཟུགས་ནི་རྣམ་པར་སྣང་མཛད་ཡིན༔ ཚོར་བ་རྡོ་རྗེ་ཉི་མ་ཡིན༔ འདུས་ཤེས་པདྨ་གར་དབང་ཡིན༔ འདུ་བྱེད་རྡོ་རྗེ་རྒྱལ་པོ་སྟེ༔ རྣམ་ཤེས་རྡོ་རྗེ་སེམས་དཔའ་ཡིན༔ བདེ་གཤེགས་ཀུན་ཉིད་ཧེ་རུ་ཀ༔ མིག་ནི་གཏི་མུག་རྡོ་རྗེའི་ཡིན༔ རྣ་བ་ཞེ་སྡང་རྡོ་རྗེའི་ཡིན༔ སྣ་ནི་སེར་སྣ་རྡོ་རྗེའི་ཡིན༔ ལྕེ་ནི་འདོད་ཆགས་རྡོ་རྗེའི་ཡིན༔ ལུས་ནི་ཕྲག་དོག་རྡོ་རྗེའི་ཡིན༔ སྐྱེ་མཆེད་དབང་ཕྱུག་རྡོ་རྗེའོ༔ ཞེས་དང་༔ སྡོམ་པ་འབྱུང་བ་ལས༔ ཉི་ཤུ་རྩ་བཞིའི་ལྷ་རྣམས་ཀྱི༔ ལུས་ནི་སྡུག་ཅིང་འཛིན་པ་སྟེ༔ ལུས་ནི་དབང་པོའི་རང་བཞིན་ཅན༔ འདི་དེ་སངས་རྒྱས་ཀུན་གྱི་དངོས༔ ཞེས་དང་༔ ཀློང་གསལ་ལས༔ ལུས་ཀྱི་ཁྱབ་ཚད་སེམས་ཅན་ལ༔ ཕུང་པོ་ལྔ་ནི་རིགས་ལྔའི་དངོས༔ ཞེས་འཁོར་བའི་ཆོས་རྣམ་པ་ཉི་ཤུ་པོ་ཡེ་ནས་མངོན་པར་སངས་རྒྱས་པའི་དཀྱིལ་འཁོར་ཕྱག་རྒྱའི་དོན་དུ་གནས་པ་ནི་སྒྲུབ་གཞི་ལ༔ བསྐྱེད་རིམ་ནི་སྒྲུབ་བྱེད་དོ༔

གཉིས་པ༔ མ་རྒྱུད་སངས་རྒྱས་ཐོད་པ་དང་རྡོ་རྗེ་བདུད་རྩི་ལ་སོགས་པ་སྤྱི་དང་༔ བྱེ་བྲག་ལུང་ཆེན་ནང་གི་མདོ་བདུན་སོགས་ཨ་ནུའི་བཀོལ་རྒྱུད་ཀྱི་གཙོའི་སྤྱི་འགང་འཁོར་ལོ་སྡོམ་ཆེན་གྱིས་ཁྲོལ་ན༔ དེའི་རྩ་བཤད་དག་དང་གཞན་ཡང་སྒྱུ་མ་ལུས་ཀྱི་དཀྱིལ་འཁོར་ལ་གནས་ཡུལ་ཡོངས་སུ་རྫོགས་པའི་བཀོད་པ༔ རྩ་ཁམས་རྣལ་འབྱོར་མ་དང་༔ ཐིག་ལེ་དཔའ་བོ་རྒྱ་མཚོའི་ གྲོང་ཁྱེར་བསམ་གྱིས་མི་ཁྱབ་པ་རྫོགས་ཚུལ་གསུངས་ཏེ༔ རྡོ་རྗེ་མཁའ་འགྲོའི་རྒྱུད་ལས༔ རང་གི་ལུས་ལ་སངས་རྒྱས་བཞུགས༔ ཧེ་རུ་ཀ་ལ་སོགས་པའི་ལྷ༔ རྩ་གཟུགས་མཛེས་པར་ཡང་དག་བྱུང་༔ གཞན་དུ་གང་ན་སངས་རྒྱས་མེད༔ ལུས་ལས་གཞན་དུ་སངས་རྒྱས་ཉིད༔ མི་ཤེས་པ་ཡི་སྒྲིབ་པར་འདོད༔ ཞེས་དང་༔ རྡོ་རྗེ་མཁའ་འགྲོ་ལས༔ རང་གི་ལུས་ལ་སངས་རྒྱས་བཞུགས༔ ལུས་འདི་སངས་རྒྱས་རང་བཞིན་སྐུ༔ ཆ་ཤས་བྱང་ཆུབ་ཡན་ལག་ལ༔ དེ་ཡི་བ་སྤུ་དགྲ་བཅོམ་པ༔ ཞེས་དང་༔ སྡོམ་འབྱུང་ལས༔ ཉི་ཤུ་རྩ་བཞིའི་ལྷ་རྣམས་ཀྱི༔ ལུས་ནི་སྡུག་ཅིང་འཛིན་པ་སྟེ༔ ལུས་ནི་སངས་རྒྱས་རང་བཞིན་ཅན༔ འདི་དེ་སངས་རྒྱས་ཀུན་དང་མཚུངས༔ ཞེས་དང་༔ ནམ་མཁའ་དང་མཉམ་པའི་རྒྱུད་ལས༔ ཧེ་རུ་ཀ་ནི་ཕུང་པོ་ཉིད༔ ཕུང་པོ་ཡང་ནི་ཧེ་རུ་ཀ༔ ཁམས་ནི་རྡོ་རྗེ་དཔའ་བོ་སྟེ༔ རྡོ་རྗེ་དཔའ་མོ་ཁམས་ཉིད་དོ༔ སྐྱེ་མཆེད་ཡང་ནི་དེ་བཞིན་ཏེ༔ ལྷ་ཡི་ངོ་བོར་ཤེས་པར་བྱ༔ ཞེས་གསུངས་པའི་དག་གཞི་དང་དག་ཆོས་རྟེན་དང་བརྟེན་པའི་ཁྱད་པར་སོ་སོ་བ་མེད་པར་དགག་པའི་རྣམ་སྤྱིའམ༔ ཆོས་དབྱིངས་ཀུན་ནས་འགྲོ་བ་ཙམ་ལ་ཡོད་པ་མ་ཡིན་ལ༔ དེ་འཁོར་བའི་སྡུག་བསྔལ་རང་མཚན་ནས་ཀྱང་མིན་པའི་ཕྱིར་མ་ཡིན་དགག་གི་སྟོང་ཉིད་དང་༔ གཞན་གྱི་སྟོང་བ་ཞེས་སུ་བརྡ་དག་འབྱོར་བའོ༔ ཕྱི་མ་ནི་ལྷན་སྐྱེས་ཡེ་གསལ་གྱི་དཀྱིལ་འཁོར་དུ་གྲུབ་པ་དང་༔ དེ་ཉིད་སྒྲིབ་བྱེད་དྲོད་གཤེར་སྐྱེས་སྦྱོང་གི་ལུགས་སྔ་མ་རང་བཞིན་གཞིར་རྫོགས་གི་༼ ཀྱི་ ༽དཀྱིལ་འཁོར་གྱི་ཁྱད་པར་ཡོད་དོ༔

གསུམ་པ་དེ་ཀུན་གྱི་འཆར་གཞི་གཉུག་མ་མི་ཤིགས་པའི་ཐིག་ལེ་བཤད་པ་ནི༔ ཤིན་ཏུ་ཕྲ་བ་མི་ཤིགས་པའི་ཐིག་ལེ་ཞེས་བྱ་བ་སེམས་ཅན་ཐམས་ཅད་ཀྱི་རྒྱུད་ལ་ཀུན་ཁྱབ་ཏུ་བཞུགས་པ་ཡིན་ཏེ༔ དེ་ལའང་རྩ་མི་ཤིགས་པའི་ཐིག་ལེ༔ རླུང་མི་ཤིགས་པའི་ཐིག་ལེ༔ ཁམས་མི་ཤིགས་པའི་ཐིག་ལེ་གསུམ་འདུ་འབྲལ་མེད་པར་གནས་པ་ཕྱི་ནང་གསང་གསུམ་དུ་འབྲེལ་བའི་རྩ་སྤྲུལ་སྐུ༔ རླུང་ལོངས་སྐུ༔ ཐིག་ལེ་ཆོས་སྐུའི་དགོངས་གཞི་མཐར་ཐུག་ཕྲ་བའི་སྒོ་གསུམ་ཞེས་ཀྱང་བྱ༔ ཡང་གཞན་རླུང་མི་ཤིགས་པའི་ཐིག་ལེ༔ ཁམས་དཀར་པོ་མི་ཤིགས་པའི་ཐིག་ལེ༔ དམར་པོ་མི་ཤིགས་པའི་ཐིག་ལེ༔ སེམས་མི་ཤིགས་པའི་ཐིག་ལེ༔ ཆོས་ཉིད་མི་ཤིགས་པའི་ཐིག་ལེ་ལྔར་གསུངས་པའང་གོང་མ་གསུམ་པོ་ལ་འདུ་སྟེ་དེ་དག་ཐམས་ཅད་ཀྱི་ངོ་བོ་འོད་གསལ་གྱི་སེམས་སམ་ཡེ་ཤེས་ཡེ་རླུང་དང་འདུ་འབྲལ་མེད་པའི་རྩལ་ལས་གཞན་ཐམས་ཅད་ཤར་བའི་ཕྱིར༔ ངོ་ཤེས་ཤིང་རྟོགས་གོམས་ཀྱི་རྩལ་ཡོན་ཏན་དུ་ཤར་བའི་སངས་རྒྱས་ཀྱི་སྐུ་གསུམ་ཐུགས་བསམ་ཡས་ལྷུན་གྱིས་གྲུབ་པ་དང་༔ མ་རྟོགས་པས་འཁོར་བའི་ཁམས་གསུམ་སྒོ་གསུམ་སོགས་ཀྱི་འཁྲུལ་གཞི་བྱེད་ལ༔ དེ་ཀུན་གྱི་གནས་ལུགས་ཆོ༵ས་ཉིད༵་སྤྲོས༵་བྲལ༵་ཐིག༵་ལེ༵་ཆེན་པོར་ལྷུན་གྱིས་གྲུབ་པའི་ཕྱིར་རོ༔ འདིར་གཞན་དང་མི་འདྲ་བའི་རྩ་མི་ཤིགས་པའི་ཐིག་ལེ་ནི་རྫོགས་ཆེན་ནས་གསུངས་པའི་འོད་གསལ་གྱི་རྩ་སྟོང་བ་རང་གྲོལ་ལ་སོགས་ཡིན་ཏེ༔ དགོངས་གཞིར་འདུས་པའི་གཉུག་མའི་སྐུ་རྡོ་རྗེའི་ངོ་བོ་ཅན༔ དེ་ལ་གསང་ཐིག་གི་དངས་མའི་རྩ་དར་དཀར་གྱི་སྐུད་པ་འདྲ་བ་ཟེར༔ གསང་འདུས་ལས་རྩ་རླུང་དབྱེར་མེད་ལས་བཟུང་སྟེ་འོད་ཟེར་ལྔ་བའི་རླུང་སྐུ་རྡོ་རྗེའི་སྒྲུབ་གཞི༔ དེའི་རང་གདངས་གསུངས་རྡོ་རྗེའི་སྒྲུབ་གཞི༔ ཐུགས་རྡོ་རྗེའི་སྒྲུབ་གཞི་སེམས་རྣམ་པར་དག་པ་ཕྲ་བ་གསུམ་དུ་གསུངས་ལ༔ རྩ་འདི་དཀར་ཆས་བསྐྱེད་པའི་རྩ་མི་ཤིགས་པའི་རླུང་དམར་ཆའི་ཡེ་ཤེས་སམ་སེམས་ལས་ཐིག་ལེ་མི་ཤིགས་པ་སྟེ་ཀུན་གྱི་གཞི་འམ་རྩ་བར་གྱུར་བས་ཏེ༔ དེ་དག་རྡོ་རྗེ་གསུམ་གྱི་སྒྲུབ་གཞི་རང་ལ་གནས་པ་ཞེས་བྱ་བ་ཡིན་ཅིང་༔ དེ་ལྟ་ནའང་བསྡུ་ན་སེམས་ཆོས་སྐུ༔ རླུང་ཁམས་གཟུགས་སྐུའི་སྒྲུབ་གཞིར་ལྡན་པའི་སེམས་ལས་ཡེ་ཤེས་ཉེར་ལྔ་ལ་སོགས་པ་དང་དཀར་དམར་ལས་ཡབ་ཡུམ་ཐབས་ཤེས་འདུ་འབྲལ་མེད་པའི་ལྷ་ཞི་ཁྲོ་རིགས་བརྒྱ་དང་༔ རླུང་ལས་གསུང་ལྔའི་རྣམ་པ་ཐམས་ཅད་པ་འཆར་བའི་ཕྱིར་མི་ཤིགས་པའི་ཐིག་ལེ་སྙིང་ལ་གནས་པར་རྒྱུད་སྡེ་ཀུན་ནས་གསུངས་པའི་བསྒྲུབ་གཞི་ཤེས་བྱའི་རྒྱུད་དེ་ཚུལ་བཞིན་ངེས་པར་ལྟ་བ་ཡིན་པའི་ཕྱིར༔ མེད་པར་དགག་པའི་སྒྲུབ་གཞི་རྐྱང་བས་དེ་དག་བཞག་པར་མི་རུང་ལ༔ རགས་པའི་འདི་དག་མ་ཡིན་ཅིང་༔ དེ་དག་ལ་ལོག་སྣང་ཐག་སྦྲུལ་གྱི་རྣམ་པ་ལྟ་བུའི་བརྟགས་སྣང་རང་གའི་སྟོང་པའི་ཕྱིར་གཞན་སྟོང་ཙམ་གྱི་ཆོས་སུ་ཡང་མི་འགལ་བར་འབྲེལ་བ་དང་བཅས་པ་སྟེ༔ མངོན་བརྗོད་བླ་མ་ལས༔ རྟག་ཏུ་སྙིང་ལ་གནས་པ་ཡི༔ ཐིག་ལེ་གཅིག་ལ་འགྱུར་བ་མེད༔ ཞེས་དང་༔ རྡོ་རྗེ་ཕྲེང་བ་ལས༔ སྙིང་གི་པདྨའི་སྦུབས་མཁའ་ལ༔ ཡེ་ཤེས་རྡོ་རྗེ་རྟག་པར་བཞུགས༔ གཙོ་བོ་ཆེན་པོ་མི་བསྐྱོད་པའི༔ འཇིག་རྟེན་ཁམས་ནི་དེ་ཡིན་ནོ༔ ཞེས་དང་༔ ལྷ་མོ་བཞིའི་ཞུས་པ་ལས༔ ཕྱེད་ཚད་ཙམ་གྱི་ཕྲ་མོས་མཆོག༔ ཡིད་ཀྱི་དངོས་པོ་ཐིག་ལེའི་གཟུགས༔ རྟག་ཏུ་སྙིང་གི་དབུས་གནས་པ༔ འོད་ཟེར་ཆེན་པོ་འབར་བ་ཅན༔ ཞེས་དང་༔ བསྡུས་རྒྱུད་ལས༔ མཁའ་ཁྱབ་མཁའ་ཡི་རྡོ་རྗེ་ཅན་ནི་ཡུལ་དང་རྣམ་བྲལ་ལུས་ཀྱི་དབུས་དག་དུ་ཡང་དེ་བཞིན་ནོ༔ ཞེས་དང་༔ རྡོ་རྗེ་སྙིང་པོའི་རྒྱན་གྱི་རྒྱུད་ལས༔ སྙིང་གི་དབུས་ན་མི་ཤིགས་པ༔ གསལ་ཞིང་མར་མེ་དག་དང་མཚུངས༔ མི་འགྱུར་མཆོག་ཏུ་ཕྲ་བ་སྟེ༔ ཨ་ནི་གཙོ་བོ་དམ་པའོ༔ ཞེས་སོ༔ དེས་ན་ཤིན་ཕྲའི་སེམས་ནི་སངས་རྒྱས༔ དེའི་བཞོན་པ་ཆོས༔ རྩ་དག་པ་དགེ་འདུན་གྱི་བསྒྲུབ་གཞིར་གནས་པའི་ཕྱིར་འདི་ལྟ་བུའི་ཐིག་ལེ་ཆེན་པོའི་འོད་གསལ་པའི་ལམ་སྣང་དུས་ཀྱི་འཁོར་ལོའི་སྟོང་གཟུགས་སོགས་ཡིན་པའི་ཕྱིར༔ རང་སྣང་ལོངས་སྐུའི་ཡོན་ཏན་ལྔ་ལྡན་གྱི་ཀུན་ཏུ་བཟང་བོ་གཞིའི་ཐིག་ལེ་ཞེས་བྱའོ༔ བསྐྱེད་རྫོགས་རྒྱུ་འོད་མཐར་ཐུག་པ་ཡང་དྭངས་མ་ལྔ་དང་ཡེ་ཤེས་ཆེན་པོ་འདུ་འབྲལ་མེད་པའི་ཐིག་ལེ་ཆེན་པོ་དེ་ཉིད་དོ༔

དོན་གཉིས་པ་བྱེ་བྲག་ཏུ་བཤད་པ་ལ༔ བཤད་པ་དངོས་དང་༔ དེ་ལ་ཐེ་ཚོམ་བསལ་བ་གཉིས་ཀྱི་དང་པོ་ནི༔ གསང་སྔགས་རྙིང་མ་བའི་སྒོས་རྒྱུད་ཁྱད་པར་བ་གསང་བ་སྙིང་པོའི་དབུར་འདྲེན་པའི་གཉིས་སུ་མེད་པའི་རྒྱུད་ཀྱཻ་ཡི་རྡོ་རྗེ་དུས་ཀྱི་འཁོར་ལོ་གཉིས་མེད་རྣམ་རྒྱལ་སོགས་ནས་བདག་ཉིད་ཆེན་པོ་རང་བྱུང་གི་ཡེ་ཤེས་ཆེན་པོའི་ཐིག་ལེ་དང་༔ ལྷན་སྐྱེས་ཀྱི་ཆོས་གསུམ་འདུ་འབྲལ་མེད་པའི་བདེ་ཆེན་དང་སུམ་བརྩེགས་ཀྱི་ཡེ་ཤེས་ཆེན་པོ་དང་བཅས་པར་གསུངས་པའི་ཕྱི་མ་དེ་ཉིད་ཀྱི་རྒྱན་དུ་བཀོད་པ་དེ་དང་༔ མདོ་བདུན་དུ་དབྱིངས་ཡེ་ངོ་མཉམ་པའི་སྲས་བདེ་ཆེན་བྱང་ཆུབ་སེམས་ཀྱི་དཀྱིལ་འཁོར་དུ་གཏན་ལ་ཕབས་པ་དང་༔ རྫོགས་ཆེན་གྱི་རྒྱུད་ལས༔ མཐའ་དཔྱོད་མཐར་ཐུག་གི་རྙེད་དོན་བྱང་ཆུབ་ཀྱི་སེམས་ལ་སྐུ་གསུང་ཐུགས་འབྲས་ཆོས་ཉེར་ལྔ་ཡོངས་སུ་རྫོགས་པར་ཤེས་པས་ཆོས་ཅན་ལྟ་བ་དོན་དཔྱོད་མཐར་ཐུག་གི་སྟོང་ཉིད་ཉི་ཤུའི་རང་བཞིན་ཅན་དང་མེད་པའི་རང་བཞིན་བཅུའི་ཚུལ་ཤེས་མཐོང་གི་ཆོས་ཉིད་ལྟ་བ༔ དེ་གཉིས་ཟུང་འཇུག་མཐའ་བྲལ་རྩོལ་བསྒྲུབ་ཀྱི་ཁ་ན་མེད་ཅིང་སྐྱོན་ཐམས་ཅད་ལས་འདས་པའི་ཕྱལ་བ་རང་བྱུང་གི་ཡེ་ཤེས་བདེན་གཅིག་སྲིད་ཞི་ཀུན་གྱི་སྲོག་དང་ཁྱབ་བདག་ཆེན་པོར་ཡེ་ཡོད་དང་པོའི་སངས་རྒྱས་སུ་གནས་པར་གསུངས་ཏེ༔ དུས་འཁོར་ལས༔ སངས་རྒྱས་ཤེས་རབ་གང་དུའང་གནས་པ་མ་ཡིན་ཞེས་པའི་ཚིག་ནི་སངས་རྒྱས་པ་རྣམས་སྟོན་པར་གྱུར་གང་གི༔ འགྱུར་མེད་དང་བྲལ་མི་རྣམས་ཀྱིས་ནི་སྟོང་པ་ཉིད་དེ་བཟུང་ནས་སྟོང་པར་ལྟ་བྱེད་པ༔ དེའི་གཙོ་བོའི་གང་ཞིག་འཕོ་མེད་ལྷན་སྐྱེས་ལུས་ཀྱི་བདེ་བ་དག་ནི་སྔགས་ཀྱི་ཁྱད་ཆོས་ཐེག་པར་བསྟན་པའོ༔ ཞེས་བདེ་ཆེན་ཡེ་ཤེས་སུ་ངོས་འཛིན་མཛད་པ་དང་༔ སེམས་ཅན་ཀུན་གྱི་སྙིང་གི་ནང་ན་གནས་པ་ནི་ཡེ་ཤེས་སོ༔ ཞེས་དང་རྣལ་འབྱོར་མའི་རྒྱུད་ཀུན་ཏུ་སྤྱོད་པ་ལས༔ འགྲོ་བ་འདི་ཀུན་སངས་རྒྱས་ལྔའི་བདག་ཉིད༔ གར་མཁན་དང་འདྲ་རི་མོ་བཟང་ལྟར་སྣང་༔ གང་དུ་བདེ་ཆེན་ཡེ་ཤེས་གཅིག་པུ་ཉིད༔ གཅིག་པུའི་ཚུལ་གྱི་དུ་མའི་གར་མཛད་དོ༔ ཅེས་དང་ཡེ་ཤེས་གྲུབ་པ་ལས༔ སེམས་ཀྱི་དམ་པ་འོད་གསལ་བ༔ ཀུན་ཏུ་དང་པོའི་སངས་རྒྱས་ཏེ༔ སུས་ཀྱང་མ་བྱས་རང་བྱུང་བ༔ ཡེ་ཉིད་ནས་ནི་གནས་པའོ༔ ཞེས་དང་༔ སྡོམ་འབྱུང་ལས༔ སངས་རྒྱས་དེ་བཞིན་ཆོས་དགེ་འདུན༔ གཅིག་ཀྱང་ གསུམ་དུ་སྣང་བའོ༔ ཞེས་སོགས་དང་༔ རྡོ་རྗེ་རྩེ་མོའི་རྒྱུད ་ལས༔ ཐོག་མ་མེད་བྱུང་ཆོས་སྙིང་པོ༔ གློ་བུར་དྲི་མའི་ཉོན་མོངས་གྱུར༔ ང་ནི་ཁོ་ན་ཆོས་ཆེན་པོ༔ ང་ནི་ཆོས་ཀྱི་སྙིང་པོར་བཤད༔ དེ་བས་ང་ནི་རྒྱལ་པོ་ཆེ༔ དག་པ་དེ་བཞིན་གཤེགས་སྙིང་པོ༔ སེམས་དཔའ་སྙིང་པོ་ཞེས་བྱར་བཤད༔ ང་ནི་དེ་བཞིན་གཤེགས་སྙིང་པོ༔ སེམས་ཅན་ཐམས་ཅད་བདག་དང་མཚུངས༔ ཞེས་དང་༔ བརྟགས་གཉིས་ལས༔ འདིར་ནི་ཡེ་ཤེས་ཆེན་པོ་ཉིད༔ ཐམས་ཅད་ལུས་ལ་རྣམ་པར་གནས༔ གཉིས་དང་གཉིས་སུ་མེད་པའི་ཚུལ༔ དངོས་དང་དངོས་མེད་བདག་ཉིད་ཆེ༔ བརྟན་དང་གཡོ་བ་ཁྱབ་ནས་གནས༔ སྒྱུ་མའི་གཟུགས་ཅན་དག་ཏུའོ༔ ཞེས་དང་༔ དེ་ཉིད་སྲོག་ཆགས་རྣམས་ཀྱི་སྲོག༔ དེ་ཉིད་ཡེ་ཤེས་དམ་པ་ཉིད༔ དེ་ཉིད་འགྲོ་བའི་བདག་ཉིད་དེ༔ དེ་ཉིད་ཐམས་ཅད་ཁྱབ་པ་པོ༔ ཐམས་ཅད་ལུས་ལ་རྣམ་པར་གནས༔ དངོས་དང་དངོས་མེད་དེ་ལས་བྱུང་༔ ཞེས་དང་མངོན་བརྗོད་བླ་མ་ལས༔ དེ་ནི་སྲོག་ཆགས་རྣམས་ཀྱི་སྲོག༔ དེ་ཉིད་མི་འགྱུར་དམ་པ་ཡིན༔ དེ་ཉིད་ཐམས་ཅད་ཁྱབ་བྱེད་དེ༔ ལུས་ཅན་ཀུན་ལ་རྣམ་པར་གནས༔ དེ་ཉིད་སངས་རྒྱས་ཡེ་ཤེས་ཏེ༔ ཧེ་རུ་ཀ་དཔལ་ཡིན་པར་བཤད༔ ཅེས་སོ༔ དེས་ན་དེ་དག་གི་འཁོར་བའི་སྡུག་ཀུན་མེད་པར་དགག་ནས་གློ་བུར་གྱི་དྲི་མ་ཡིན་ཞེས་ངོས་བཟུང་༔ དགག་བྱ་བཀག་ཤུལ་ཆོས་གཞན་འཕེན་པ་ཙམ་དུ་མ་ཟད་སྐུ་དང་ཡེ་ཤེས་ཀྱི་གནས་ལུགས་ངོས་བཟུང་༔ ཁྱད་པར་བདག་ཉིད་ཆེན་པོ་རང་བྱུང་གི་ཡེ་ཤེས་སྙིང་ལ་གནས་སོ་ཞེས་གསུངས་པ་འདི་འདྲ་མེད་པར་དགག་ལ་ཐ་སྙད་སྦྱོར་དོད་དང་ཆོས་ཐམས་ཅད་ལ་སྤྱི་ཁྱབ་གཅིག་པ་སྙིང་ལ་གནས་པའི་དོན་ཀྱང་མ་འབྲེལ་བ་དང་༔ གསང་སྙིང་ལས༔ རྒྱུ་གཅིག་པ་དང་ཡིག་འབྲུའི་ཚུལ༔ བྱིན་གྱིས་བརླབས་དང་མངོན་སུམ་པ༔ རབ་ཏུ་རྟོག་པ་རྣམ་བཞི་ཡི༔ ཐམས་ཅད་མངོན་རྫོགས་རྒྱལ་པོ་ཆེ༔ ཞེས་དང་༔ དེའི་ རྒྱུད་གཞན་ལས་ཀྱང་རང་རིག་མངོན་སུམ་དམིགས་བྲལ་བ༔ རང་གསལ་གསུམ ་བྲལ་མི་བསྒུལ་བ༔ ཞེས་སོགས་རྒྱས་པར་བསམ་གྱིས་མི་ཁྱབ་པ་དང་༔ རྔམས་གློག་ལས༔ ཐབས་ཡབ་དང་༔ ཤེས་རབ་ཡུམ་དང་༔ གཉིས་སུ་མེད་པའི་སྲས་བདེ་ཆེན་བྱང་ཆུབ་སེམས་ཐིག་ལེ་དང་གསུམ་མོ་ཞེས་དང་༔ དགོངས་འདུས་ལས༔ ཀུན་ཏུ་བཟང་པོའི་ཡེ་ཤེས་འདི༔ སུས་ཀྱང་མ་བྱས་རང་བྱུང་སྟེ༔ ཐམས་ཅད་འབྱུང་བའི་རྩ་བས་ན༔ རང་ལས་བྱུང་བའི་དཀྱིལ་འཁོར་རྫོགས༔ ཞེས་དང་༔ ཀུན་འདུས་རིག་པ་ལས༔ རང་བྱུང་རིག་པའི་སེམས་ཉིད་ཀྱི༔ རང་གི་སྙིང་པོ་འོད་གསལ་བ༔ ཀུན་གྱི་སྙིང་པོ་དེ་ཉིད་པས༔ ཅེས་ཀྱང་མི་བསྒྲིབ་ནམ་མཁའ་ཆེ༔ ཞེས་དང་ཁུ་བྱུག་རོལ་བ་ལས༔ རྟོག་མེད་རང་རིག་བྱང་ཆུབ་སེམས༔ སངས་རྒྱས་སེམས་ཅན་གཉིས་ཀྱི་དབྱིངས༔ རིག་དང་མ་རིག་གཉིས་ཁོ་ན༔ དག་དང་མ་དག་གཉིས་སུ་སྣང་༔ ཞེས་སོ༔ ཁྱད་པར་རྫོགས་ཆེན་གྱི་ངོ་བོ་རང་བཞིན་ཐུགས་རྗེ་སུམ་བརྩེགས་ཀྱི་ཡེ་ཤེས་སུ་ངང་དངས་རང་བཞིན་བདག་ཉིད་ཀ་དག་ལྷུན་གྲུབ་བརྒྱད་ལྡན་གྱི་གཞི་ངོས་བཟུང་མཛད་པ་ཉིད་ཡེ་ཡོད་ལྷུན་གྲུབ་ཀྱི་གཞི་ཞེས་བྱ་སྟེ༔ གསུམ་དང་བརྒྱད་ཀྱི་གཞི་ཅི་སྟེ་མེད་དགག་ལ་འཐད་པར་དཔྱད་དོ༔ རིག་པ་རང་ཤར་ལས༔ གོང་དུ་བཤད་པའི་རྒྱུད་ཆེན་པོ༔ རང་རིག་ཐབས་ཆེན་སྦྱོར་བ་ནི༔ གཅིག་ལས་དུ་མར་སྣང་བའོ༔ དུ་མ་རྟོགས་ན་གཅིག་གི་ངང་རིག་པའི་ཆོས་ཉིད་དབྱེ་བ་ནི༔ གཅིག་ལ་ཐམས་ཅད་རྫོགས་པའོ༔ ཉོན་མོངས་སྟོང་ཕྲག་བརྒྱད་ཅུའང་༔ གཅིག་མ་ཤེས་པས་བྱུང་བའོ༔ གཅིག་ནི་ངོ་བོ་སྟོང་པ་ལ༔ རང་བཞིན་གསལ་ཆ་མ་འགགས་པའོ༔ ཞེས་དང་༔ ངོ་བོ་རང་བཞིན་ཐུགས་རྗེ་གསུམ༔ ཆོས་ཀྱི་སྐུ་ཡི་མཚན་ཉིད་ཡིན༔ ཞེས་པས་མདོར་བསྡུས་ནས༔ བསམ་དང་བྲལ་བའི་རིག་པ་ཆོས་ཀྱི་སྐུ༔ ཆོས་ཀྱི་སྐུ་ཡི་ཕོ་བྲང་འགྱུར་མེད་ནི༔ རང་རང་ཙིཏྟའི་དཀྱིལ་ན་ཕོ་བྲང་འགྱུར་མེད་བཏབ༔ སྙིང་པོ་གསུམ་དང་ལྡན་པའི་ཆོས་ཀྱི་སྐུ༔ ཡེ་ཤེས་དོན་རྟོགས་ས་ལམ་བསྒྲོད་དུ་མེད༔ བརྗོད་དང་བྲལ་བའི་རིག་པ་ཆོས་ཀྱི་སྐུ༔ ཀུན་ལ་གནས་ཏེ་ཀུན་གྱིས་རྟོགས་པ་མེད༔ ཡིད་མེད་སེམས་མེད་མ་རིག་འཁྲུལ་བ་མེད༔ ཞེས་གཞན་སྟོང་དང་ཕྱོགས་མཐུན་པར་གསུངས༔ དེ་ཡང་ལུས་ལ་སྣང་ལུགས་ནི༔ རིག་པ་ཆོས་སྐུའི་ངོ་བོ་ཡིན༔ དེ་ལས་སྣང་བ་མ་འགགས་པ༔ ལོངས་སྤྱོད་རྫོགས་སྐུར་ཡང་དག་འདོད༔ དེ་ཕྱིར་སྐུ་གསུམ་ལུས་ལ་རྫོགས་༔ ཞེས་སོ༔

གཉིས་པ་དེའི་ཐེ་ཚོམ་བསལ་བ་ནི༔ ཁྲེགས་ཆོད་ཐོད་རྒལ་གཉིས་ལས༔ ཁྲེགས་ཆོད་ཀྱི་དབང་དུ་ངོ་རང་ཐོག་དུ་སྤྲད་པ་ཞེས་པ་ལས་སྤྱི་ཐོག་ཏུ་སྤྲད་པ་ཞེས་མ་བྱུང་བ་དང་༔ གལ་ཏེ་ཆོས་སྤྱི་ཁྱབ་ཞིག་གི་ཐོག་ཏུ་རང་ཐོག་ཏུ་སྤྲད་རྒྱུ་མི་འཐད་ན་ཅི་ཡིན༔ དེ་ལ་འདི་སྙམ་དུ༔ ཁ་ནང་དུ་བསྐོར་ནས་ཆོས་ཀུན་སེམས་སུ་རྟོགས༔ སེམས་སྟོང་ཉིད་སྤྲོས་བྲལ་དུ་རྟོགས་པ་དེ་ཉིད་རྫོགས་ཆེན་གྱི་ལྟ་བས་མཐོང་པ་ཡིན་ནོ་བ་ཞིག་འབྱུང་སྟེ༔ དེ་ལ་བཤད་ན་མདོ་ལས༔ དྲན་པ་ཉེར་བཞག་བཞིའི་སེམས་དྲན་ཉེར་དེའི་ཅི་ཉེས་ནས་ལྟ་བ་རྫོགས་ཆེན་དུ་མ་སོང་བ་དང་༔ རྣམ་རིག་པས་ཀྱང་སྣང་བ་སེམས་དུ་འདོད་པ་དག་ཡར་ལྡན་གྱི་དབུ་མ་པས་རྟོགས་པ་ཡོད་པ་དག་ལ་གཞལ་བར་གྱིས་ཤིག༔ ཁྱད་པར་དུ་ཡང་༔ གནས་པ་ངོ་བོ༔ འཕྲོ་བ་རྩལ༔ སེམས་རིག་དོན་གྱི་ཁྱད་འབྱེད་ལ་སོགས་པ་ཇི་ལྟར་ཆོས་ཉིད་ཀུན་ཏུ་འགྲོ་བ་དེ་ལ་འཐད་ཀྱང་དཔྱད་པར་རིགས་ལ༔ དེ་བཞིན་དུ་མེད་པར་དགག་པའི་རྣམ་གྲངས་པའི་སྟོང་ཉིད་ཙམ་ལའང་ཀླན་ནོ༔ དེས་ན་རང་རིག་ལྷུན་གྲུབ་ཆེན་པོ་ནི་ལྟ་བའི་ངོ་བོ་ཉིད་དུ་བཟུང་ནས༔ གནད་ཀྱི་ངོ་སྤྲོད་དྲུག་དང་དེ་ལ་མ་ལྟོས་པའི་ངོ་སྤྲོད་པ་བདུན་མཛད་པ་དང་༔ གཟེབ་བཅུ་བཅད་དེ༔ ང་རང་བྱུང་གི་ཡེ་ཤེས་བྱང་ཆུབ་སེམས་ཀྱི་ངེས་ཚིག་སོགས་བཤད་པ་དང་༔ ཡང་དམ་ཚིག་བཞི་ལས་ལྷུན་གྲུབ་དང་གཅིག་པར་བཤད་དེ༔ དེ་ལྟ་ན་གཞན་སྟོང་དུ་གསུངས་པ༔ མུ་ཏིག་ཕྲེང་བ་ལས༔ གཅིག་གྲོལ་ཡིན་པས་དུ་མ་སྟོངས༔ ཞེས་དང་༔ ལྟ་བས་དཔག་ཚུལ་ལས་བཟུང་སྟེ་རྩལ་རྫོགས་གི་༔ ༼ ཀྱི་དཔྱད། ༽དཀྱིལ་འཁོར་གཅིག་ལ་དོན་བརྗོད་པ༔ གསང་སྔགས་གཅིག་ལ་འཁྱེར་སོ་དགུ༔ དེ་ཡང་རྣམ་པ་ཙམ་དུ་སྟེ༔ རིམ་པ་དགུ་ཡི་ངོ་བོ་ཡི༔ རང་བྱུང་ཡེ་ཤེས་དོན་མ་རྟོགས༔ ཞེས་དང་༔ ཀློང་དྲུག་ལས༔ མ་བཙལ་བཞག་པའི་མན་ངག་གིས༔ ཡེ་ཡོད་དང་པོའི་སངས་རྒྱས་རྙེད༔ ཅེས་དང་༔ཐིག་ལེ་ཀུན་གསལ་ལས༔ ཤེས་པ་དང་རིག་མཐུན་པའི་རང་བཞིན་གསལ་བའི་ཡེ་ཤེས༔ སྟོང་བ་ཡིན་པས་ནམ་མཁའ་སོགས་དང་རིགས་མཐུན་པར་བཞག་སྟེ་ངོ་བོ་སྟོང་པ་ཉིད་དུ་བཤད་དེ་སེལ་གཞིའམ་གཞན་གྱི་སྟོང་གཞིར་བཟུང་ནས༔ དེ་ལ་སྟོང་པའི་ཆོས་བསལ་བ་སྟེ༔ དེ་ལྟར་ན་མ་ཡིན་དགག་གི་མ་ཟད༔ གཞན་སྟོང་ལ་ཉེར་མཛད་ནས༔ གསལ་གཉིས་ཀྱི་རྒྱུད་ལས༔ རིག་པ་འདུག་པས་བེམ་པོ་སེལ༔ སྟོང་པར་འདུག་པས་དངོས་པོ་སེལ༔ གཉིས་མེད་ཡིན་པས་གཉིས་སྣང་སེལ༔ རང་བྱུང་ཡིན་པས་རྒྱུ་རྐྱེན་སེལ༔ དག་པ་ཡིན་པས་དྲི་མ་སེལ༔ མེད་པས་ཡོད་པའི་ཆད་མཐའ་སེལ༔ ཡོད་པས་མེད་པའི་རྟག་མཐའ་སེལ༔ ལྷུན་གྲུབ་ཡིན་པས་རྟག་མཐའ་སེལ༔ ཀྱཻ༔ རྡོ་རྗེ་འཛིན་པ་ཉོན་ཅིག༔ ཡང་དག་པ་དོན་གྱི་གཞིའི་ཕྱི་མོ་ནི༔ རང་དང་རིགས་མཐུན་པ་ལས་ཀྱང་ལོག་སྟེ༔ རིག་པ་ཙམ་དུ་མཐུན་པའི་ཚོགས་བརྒྱད་ལས་གྲོལ་བའོ༔ ཞེས་སེལ་གཞིའང་གྲོལ་གཞིར་མཛད་པའོ༔ རང་ཤར་ཆེན་པོའི་རྒྱུད་ལས༔ སངས་རྒྱས་སེམས་ཅན་སྣང་བ་ཀུན༔ གཅིག་ཤེས་ནང་དུ་ཤེས་པར་བྱ༔ ཐམས་ཅད་ངོ་བོ་ཤེས་གྱུར་ན༔ ཡེ་ཤེས་དག་པའི་སྣང་བའོ༔ ཞེས་དང་༔ སྟོང་པ་ཉིད་ལ་མི་གནས་ན༔ རང་གི་བདེ་ཆེན་ས་ལ་གནས༔ སངས་རྒྱས་ཀུན་གྱི་རྗེ་བཙུན་ནི༔ རང་གི་རིག་པར་ཤེས་པར་བྱ༔ རང་སྣང་ཐབས་ཀྱི་རྒྱལ་པོ་འདི༔ ཀུན་ལ་ཡོད་དེ་རྟོགས་པ་མེད༔ ཞེས་དང་༔ མཐའ་ལ་ཐུག་པ་མེད་པའི་ཡེ་ཤེས་རང་ལ་ཡོད་པའོ༔ ཞེས་དང་༔ ཕྱག་རྡོར་དོན་བརྗོད་ལས༔ གསང་བ་རིག་པའི་སྒྲོན་མེ་ཉིད༔ ཀུན་ལ་ཡོད་དེ་རྟོགས་པ་མེད༔ བདག་གི་དོན་བརྗོད་དེ་བཞིན་ནོ༔ ཞེས་སོ༔ དེས་ན་སྐྱེ་བ་མེད་པ་ཙམ་རྟོགས་པས་རྫོགས་པ་ཆེན་པོའི་བདེན་པ་མཐོང་བར་མི་འགྱུར་ཏེ༔ འོ་ན་གང་ཞེ་ན་རང་རིག་བྱང་ཆུབ་ཀྱི་སེམས་ཆོས་ཀྱི་སྐུའི་དཀྱིལ་འཁོར་ཡང་དག་པར་ཤེས་པ་ལ་ཟེར་བས༔ རང་གྲོལ་ལས༔ སྐྱེ་མེད་རྟོགས་པའི་རྣལ་འབྱོར་ནི༔ ཡེ་ཤེས་མཐོང་བ་མ་ཡིན་ནོ༔ བདེན་པ་མཐོང་བའི་གང་ཟག་ནི༔ ཡང་དག་དཀྱིལ་འཁོར་ཤེས་པའོ༔ རིག་པ་ཤེས་པའི་གང་ཟག་ནི༔ ཡང་དག་དཀྱིལ་འཁོར་ཆེན་པོའོ༔ རྡོ་རྗེ་སེམས་དཔའི་ཆོས་ཉིད་འདི༔ མཐོང་བ་མཆོག་ཏུ་གྱུར་བ་ལས༔ གཞན་གྱིས་མཐོང་བ་ཡོད་རེ་ཀན༔ ཞེས་སྟོན་པས་བྲོ་ཐོན་ནོ༔ ཞེས་དང་༔ རྒྱུད་ལས༔ རྫོགས་ཆེན་ཨ་ཏི་ཡོ་ག་ལ༔ ལྟ་བར་འཛིན་པའི་ཆོས་ཉིད་མེད༔ ཅི་ཕྱིར་སྒྲོན་མ་ཡོད་པའི་ཕྱིར༔ གལ་ཏེ་ལྟ་བ་ཡོད་གྱུར་ན༔ རིག་པའི་སྒྲོན་མ་མེད་པར་འགྱུར༔ ཞེས་དང་༔ སེམས་དང་ཡེ་ཤེས་ཕྱེད་ནས་ཡེ་ཤེས་ལ་གཞི་ལམ་འབྲས་བུའི་སྲོག་བཟུང་བའི་ཕྱིར་ཡང་མེད་དགགས་སུ་མ་གསུང་བར་མངོན་ནོ༔ དེའི་ཕྱིར་རང་ཤར་ལས༔ གང་དག་སེམས་ལས་དོན་ཚོལ་བ༔ རིག་པའི་རྒྱལ་པོ་སྤང་བར་འགྱུར༔ ཞེས་གསུངས་པ༔ ཨེ་མ་ཧོ་རིན་ཆེན་བྱང་ཆུབ་སེམས༔ ཀུན་ལ་ཡོད་དེ་ཀུན་གྱིས་མཐོང་བ་མེད༔ ཅེས་སོ༔ ཐུན་མོང་རྒྱུད་གསང་འདུས་ལས༔ རིན་ཆེན་སེམས་ལས་ཕྱིར་གྱུར་པའི༔ སངས་རྒྱས་མེད་ཅིང་སེམས་ཅན་མེད༔ ཞེས་དང་༔ ཡེ་ཤེས་གྲུབ་པ་ལས༔ སེམས་ཀྱི་དམ་པ་འོད་གསལ་བ༔ ཀུན་ཏུ་དང་པོའི་སངས་རྒྱས་ཏེ༔ སུས་ཀྱང་མ་བྱས་རང་བྱུང་བ༔ ཡེ་ཉིད་ནས་ནི་གནས་པའོ༔ ཞེས་ཡོད་དང་ཡིན་པའི་ངེས་ཚིག་འབའ་ཞིག་གིས་རྒྱན་པ་དང་༔ རྒྱུ་ལས་མ་བྱུང་བའི་འབྲས་བུ༔ སེམས་ལས་མ་བྱུང་བའི་སངས་རྒྱས་དག་གི་ཇི་འདྲ་ཞིག་སྟོན་བསམ་པས་མ་ཡིན་དགག་ལས་བྱོལ་ཐབས་མེད་དོ༔

གཉིས་པ་ཐོད་རྒལ་གཙོ་བོར་གྱུར་བའི་གཞི་ནི་ཐལ་འགྱུར་དང་༔ དུར་ཁྲོད་ཕུང་པོ་འབར་བའི་རྒྱུད༔ ཀློང་ཆེན་རབ་འབྱམས༔ ཀློང་གསལ་གསལ་གཉིས་དག་གི༔ གཞི་དང་༔ འཁྲུལ་ཚུལ༔ ཁྱབ་ཚུལ༔ གནས༔ ཡུལ་ལམ༔ སྒོ༔ ལམ་ལ་སོགས་པ་སོ་སོར་སེམས་དང་ཡེ་ཤེས་ལ་གསུངས་ནས༔ ངོ་བོ་སྐུར་བཞུགས༔ རང་བཞིན་འོད་དུ༔ ཐུགས་རྗེ་ཡེ་ཤེས་དང་འོད་ཀྱི་ཐིག་ལེར་བཞུགས་པར་བཤད་པ་དང༔ སྔར་མི་ཤིགས་པ་གསུམ་བཤད་པ་དང་དོན་གྱི་དབྱིངས་གཅིག་པ་སྟེ༔ དེས་ན་དེ་ངོ་སྤྲད་ཕྱིར༔ སྐུ་ནང་གསལ་བུམ་སྐུ་ལྟུ་བུ༔ འོད་བར་གསལ་བུམ་པའི་མར་མེ་ལྟ་བུ༔ ཐིག་ལེ་དང་ཡེ་ཤེས་ཕྱི་གསལ་ཁ་རྒྱན་ལས་གདངས་ཕྱི་ཤར་ལྟར་གནས་པ༔ དགོངས་ཀློང་ལྔ་དང་འབྲས་ཆོས་མཐའ་དག་གི་ངོ་བོ་ཅན་ཏེ་སྤྲོས་བྲལ་གྱིས་སངས་རྒྱས་མཛུབ་བཙུག་གི་ཚུལ་དུ༔ དབང་པོ་རྣོ་རྟུལ་མེད་པ་སོགས་ཁྱད་ཆོས་དྲུག་ལྡན་འོད་དང་ཡེ་ཤེས་ཀྱི་ངོ་སྤྲོད་ལ་སོགས༔ དཔེ་དོན་རྟགས་ གསུམ་གྱི་སྒོ་ནས་ཉི་ཤུ་རྩ་གཅིག་གི་ཐབས་ངོ་སྤྲོད་སྤྲས་པའི་རྒྱུད ་ལས་བཤད་པ་དང་༔ མུ་ཏིག་ཕྲེང་བ་ལས་མཚོན་བྱ་མཚོན་བྱེད༔ དོན་ཐབས་གཞི་སྙིང་པོའི་བཅུད་མེ་ཏོག་རང་བཞིན་གྱི་རྒྱུད་གསུངས་པ་ཐམས་ཅད་མེད་དགག་ལ་ཇི་ལྟར་རུང་བ་མེད་བཞིན་དུ་སྡང་ཞུགས་ཀྱི་དབང་གིས་རྟག་པར་ལྟ་བའི་ཕྱོགས་སུ་བརླན་པ་ནི་རང་གི་ཕ་ཆོས་དང་འགལ་བས་ཚེ་འདི་དང་ཕྱི་མར་སྡུག་བསྔལ་གླགས་མེད་པའི་རྒྱུར་རིག་པའི་ཉམ་ཉེས་ལས་བཟུང་ཕྱིར་བཤད་པ་འདི་ནི་མཆོག་ཏུ་གྱུར་པའོ༔ ཡང་མདོ་སྒྱུ་སེམས་ གསུམ་ལས་གཞན་མ་ཡིན་པའི་དེ་ཁོ་ན་ཉིད་གསུངས་པ་དང་༔ སངས་རྒྱས་རང་ཆས་པའི་རྒྱུད ་དང་༔ སྙིང་གི་དགོངས་པ་རྒྱལ་བའི་བཀའ་ཞེས་བྱ་བ་དང་༔ བུ་ རྒྱུད་དང་༔ ཚིག་གསུམ ་པ༔ བང་མཛོད་འཕྲུལ་ལྡེ་སོགས་ལས༔ སངས་རྒྱས་ཆོས་ཀྱི་སྐུ་ཡེ་ཤེས་སུམ་བརྩེགས་སུ་ཞི་བའི་ལྷ་ཚོགས་སྙིང་ན་བཞུགས་པ་དང་༔ ལོངས་སྤྱོད་རྫོགས་པའི་སྐུ་ཁྲོ་བོ་གླད་༼ ཀླད་དཔྱད། ༽པ་ན༔ ཐུགས་རྗེ་སྤྲུལ་བའི་སྐུ་གཞུངས་བ་ན༔ ཐིག་ལེ་རང་བྱུང་གི་སྐུ་རྩ་ཐམས་ཅད་ན༔ ཡེ་ཤེས་ཟང་ཐལ་གྱི་སྐུ་བྱད་ཀྱི་དཀྱིལ་ན་བཞུགས་ཚུལ་གསུངས་པ་ཀུན་ཀྱང་མེད་པར་དགག་པ་མིན་པའི་ཕྱིར་ལས་དེ་ལ་རྣམ་པར་དབྱེ་བ་དེ་ཚོ་ག་ལ་རུང་༔ འདི་ལྟ་བུའི་དཔང་ལུང་ནི་སྒྲོན་མ་གསལ་རྒྱན་དང་༔ ཨུ་པ་དེ་ཤ་དག་གིས་གསལ་བས་མ་སྤྲོས་སོ༔

མདོར་བསྡུས་ན༔ རང་ཤར་ལས༔ ཡང་དག་སངས་རྒྱས་དགོངས་པ་ནི༔ སེམས་ཅན་ཀུན་གྱི་རང་རྒྱུད་ལ༔ སྐུ་དང་ཡེ་ཤེས་ཚུལ་དུ་གནས༔ དེ་ཡང་ཙིཏྟའི་དཀྱིལ་འཁོར་ན༔ ཉུང་འབྲུའམ་ནི་ཏིལ་འབྲུ་ཙམ༔ མ་བསྐྱེད་རྫོགས་པའི་ཚུལ་དུ་གནས༔ ཞེས་དང་༔ གཞན་ཡང་ཕྲ་བཀོད་ལས༔ རིན་ཆེན་ཟུར་བརྒྱད་གཞལ་ཡས་དང་༔ འགྱུ་བྱེད་རྩ་ཡི་གཞལ་ཡས་དང་༔ ལྟ་བྱེད་མིག་གི་གཞལ་ཡས་དང་༔ དུང་ཁང་བྷནྡྷའི་གཞལ་ཡས་དང་༔ གཞལ་ཡས་ཆེན་པོ་དེ་བཞི་ན༔ གསང་སྔགས་ཀུན་གྱི་གསང་ཆེན་གནས༔ དེ་ཡང་ཇི་ལྟར་གནས་ཞེ་ན༔ ལ་ལ་དག་ན་སྐུ་རུ་བཞུགས༔ ལ་ལ་དག་ན་འོད་དུ་བཞུགས༔ གཅིག་ན་འོད་ཟེར་ཚུལ་དུ་གནས༔ ལ་ལ་དག་ན་ཐིག་ལེ་སྟེ༔ ཀུན་ལ་ལུ་གུ་རྒྱུད་དུ་གནས༔ ཞེས་སོགས་མང་ངོ་༔

དོན་གཉིས་པ་ལམ་གྱི་འཇུག་པ་ཡང་༔ གཞི་ལྷག་པའི་ཀུན་རྫོབ་ལ་ལམ་དུ་བྱེད་པའི་བསྐྱེད་རིམ་གྱི་འབྲས་བུ་དང་འདྲ་བ་དངོས་གང་རུང་དང་༔ རྫོགས་རིམ་པའི་ལྷ་སྐུ་དང་༔ སྣང་བཅས་རྩ་རླུང་ཐིག་ལེའི་རྫོགས་རིམ༔ རྫོགས་ཆེན་གྱི་སྐད་ཅིག་དྲན་རྫོགས་སྣང་བཅས་ཐོད་རྒལ་ཆོས་ཉིད་ཀྱི་རིག་གདངས་དངོས་ལམ་དུ་བྱེད་པ་ལ་སོགས་སྒྱུ་ལུས་ཀྱི་ཕྱོགས་ཐམས་ཅད་སྒྲུབ་གཞི་རང་བཞིན་ཀུན་རྫོབ༔ ཕྱག་རྒྱ་ལྷུན་གྲུབ༔ འོད་ཟེར་ལྔ་རླུང་༔ མི་ཤིགས་དཀར་དམར་སོགས་ཀྱི་ཉམས་སུ་ལེན་པ་དང་༔ སྣང་མེད་རྫོགས་རིམ༔ དེ་ཏིང་ནས་བཟུང་བའི་རིག་པ་སྤྱི་བླུགས་དང་༔ མཐོང་བས་རྗེས་འཇོག༔ གསང་ཤེར་གྱི་བདེ་བ་དང་༔ གཉིད་ཀྱི་རྣལ་འབྱོར༔ རྦ་རླབས་ཀྱི་བདེ་སྟོང་སོགས་ལས་བཟུང་པའི་སྟོང་བཞིའི་དྲངས་པའི་སྣང་བཞིའི་ངོ་བོའི་འོད་གསལ་ཉམས་སུ་ལེན་པ་དང་༔ དབང་བཞི་པའི་ཡེ་ཤེས་སམ་ཁྲེགས་ཆོད་ཀྱི་རིག་པ་རྐྱང་འདེད་དག་གི་མཚོན་ནས་འོད་གསལ་གྱི་ཕྱོགས་ཐམས་ཅད་ལྷག་པའི་དོན་དམ་ལམ་བྱེད་ཡིན་ལ༔ སེམས་མི་ཤིགས་པའི་ཐིག་ལེའི་རྣལ་འབྱོར་ཏེ༔ དེའི་ངོ་བོ་ཉིད་གྱི་རྒྱུ་འོད་ཟུང་འཇུག་མངོན་དུ་འགྱུར་རིམ་ལ་དཔག་ནས༔ བསྐྱེད་རྫོགས་ཁྲེགས་ཐོད་ཀྱང་ཟུང་འཇུག་གི་ཉམས་སུ་ལེན་པའོ༔ དེ་ལྟར་སྒྲུབ་གཞིའི་དཀྱིལ་འཁོར་དེ་དག་གི་ངོ་བོར་ཡེ་ནས་ཡོད་པ་ལ༔ ལྷ་ལ་ཐ་མལ་དུ་འཛིན་པའི་རྟོག་སྒྲིབ་བྱུང་ནས་འཁོར་བར་འཁྱམས་པ་ཉིད༔ འདིར་སྣོད་བཅུད་ཕྱི་ནང་ཐམས་ཅད་གཞན་ཡེ་ཤེས་དང་ལྷའི་དཀྱིལ་འཁོར་དུ་བསྒོམ་པ་དང་༔ སྤྱི་བླུག་གི་འཇོག་པ་ན་གཞི་ལམ་མཐུན་པས་སྒྲུབ་པ་དང་དངོས་ལམ་བྱེད་འབྲས་བུ་བྲལ་དག་གི་རྒྱུར་འགྱུར་གྱི༔ གཞན་ནི་གཞི་སྟོང་ཉིད་དུ་ལྟ་བས་གཏན་ལ་ཕབ༔ ལམ་ཞལ་ཕྱག་དང་འོད་ཟེར་ཐིག་ལེའི་ཕྲ་མོ་བསྒོམ་པས་འབྲས་བུ་འདོད་པ་དག༔ ལྟ་བའི་དོན་དེ་བསྒོམ་བྱ་མིན་པས་ཤར་ནུབ་ལྟར་འཛོལ་བའི་ཕྱིར་མི་འཐད་པས་ཀྱང་མ་ཡིན་དགག་གི་སྐུ་དང་ཡེ་ཤེས་བདེན་གཉིས་ཟུང་འཇུག་གི་ཆ་ནས་ལམ་ཉམས་སུ་ལེན་པས་ རྒྱུད་གསུམ ་འབྲེལ་བ་དང་བཅས་པ་འབྱུང་ཞིང་འཐད་པར་མཐོང་བ་སྟེ༔ ཐམས་ཅད་གསང་བ་ལྷ་མོ་བཞིའི་ཞུས་པའི་རྒྱུད་ལས༔ ཕུང་པོ་ལ་སོགས་སངས་རྒྱས་ལྔའི༔ རང་བཞིན་མངོན་ཤེས་བཤད་པ་ཡིན༔ དངོས་ཏེ་ངེས་པར་བསྒོམ་པ་ཡིས༔ རང་སེམས་མཐུ་ཡིས་སངས་རྒྱས་འགྱུར༔ ཞེས་དང་གུར་ལས༔ དེ་ལྟ་བུའི་ལུས་གློ་བུར་གྱི་དྲི་མས་སྦགས་པ་དག་པར་བྱེད་པའི་ཕྱིར་སངས་རྒྱས་ཀྱིས་སྐུའི་རྣམ་པར་བསྒོམ་པར་བགྱིད༔ ཞེས་གསུངས་པ་བཞིན་ནོ༔

དོན་གསུམ་པ་འབྲས་བུ་མངོན་གྱུར་གྱི་མ་ཡིན་དགག་གི་སྟོང་ཉིདམཐར་ཐུག་པའང་སྒྲུབ་གཞི་ཇི་བཞིན་མངོན་དུ་གྱུར་བ་ལས་འབྲས་བུ་འདུས་བྱས་སྨིན་འབྲས་སུ་མི་རུང་རྒྱན་གཉིས་དང་༔ ཆོས་ཉིད་དོན་གསལ་སོགས་ལས་བཤད་གྲུབ་ཀྱི་དོན་དུ་འཁོར་བའི་རྡུལ་ཤེས་ཀྱི་ཆོས་ལས་འདས་པའི་མཁའ་ཡི་རྡོ་རྗེ་ངོ་བོ་མངོན་དུ་གྱུར་པ་ཡིན་ནོ༔

དོན་བཞི་བ་དེ་ལ་དགོངས་ནས་བླ་མའི་མན་ངག་གིས་གབ་པ་མངོན་དུ་བྱུང་སྟེ༔ ཀུན་མཁྱེན་གྱིས་ཡིད་བཞིན་མཛོད་དུ༔ ཡེ་ནས་ཡོད་པས་རང་བཞིན་ལྷུན་གྲུབ་ཞེས༔ དྲི་མས་སྒྲིབ་ཕྱིར་སྙིང་པོའི་ཁམས་དང་ནི༔ གནས་ལུགས་ཡིན་ཕྱིར་དོན་དམ་བདེན་པ་ཞེས༔ མཐའ་གཉིས་གནས་སྤངས་དབུ་མའི་རང་བཞིན་ནོ༔ ཞེས་དང་༔ ཚུལ་འདི་མི་ཤེས་སྟོང་པ་བྱིང་ཆད་པ༔ ཚིག་ཏུ་ཡོད་མེད་མཐའ་བྲལ་ཞེས་བརྗོད་ཀྱང་༔ བྲལ་གཞི་མི་ཤེས་སྲིད་རྩེའི་ལྟ་བ་ཅན༔ བསྟན་པ་འདི་ལ་ཕྱི་རོལ་གྱུར་བ་སྟེ༔ ནམ་མཁའི་ཡིད་ཅན་ཐལ་བས་བྱུགས་པར་རུང་༔ ཞེས་དང་༔ འགྲེལ་བ་ལས༔ འཁོར་བའི་སྣང་བ་འདི་དག་དོན་ལ་མེད་ཀྱང་ད་ལྟ་སྣང་༔ སྐུ་དང་ཡེ་ཤེས་མྱ་ངན་ལས་འདས་པའི་ཆོས་ཡོད་ཀྱང་ད་ལྟ་མི་སྣང་སོགས་གསུངས་པ་ནི༔ དཔེ་དོན་སྙིང་པོའི་བསྟན་པའི་མདོ་བཞིན་རྒྱུད་བླ་མའི་འགྲེལ་བའི་ཚུལ་གྱིས་རྗེས་སུ་གསུངས་པ་དང་༔ རྒྱུད་ལས༔ ཡོད་དང་མེད་པའི་ཆོས་རྣམས་ཀུན༔ ཡོད་པས་ཡེ་ཤེས་དོན་ལ་སྣང་༔ མེད་པས་འཁོར་བའི་ཆོས་ལས་ཐར༔ ཐར་བ་ཉིད་ནས་ཡེ་ཤེས་མཐོང་བའི་དོན༔ དེ་ལས་འདས་ན་རིག་པ་མེད་པར་འགྱུར༔ ཞེས་དང་༔ ཀློང་ཆེན་ཆོས་ཀྱི་རྒྱལ་པོའི༔ སྣང་ན་ཆོས་ཉིད་གདལ་བ་སྣང་༔ སྟོང་ན་ཁམས་གསུམ་འཁོར་བ་སྟོང་༔ ཡོད་ན་སྐུ་དང་ཡེ་ཤེས་ཡོད༔ མེད་ན་ལས་དང་བག་ཆགས་མེད༔ ཅེས་སྔགས་ཀྱི་གཞི་རྒྱུད་སྤྱི་ཁྱབ་ནས་ཀྱང་གསུངས་ལ༔ ཡང་རྫོགས་ཆེན་གྱི་སྐབས་སུ་ཆོས་དབྱིངས་མཛོད་ལེའུ་བཅུ་གཅིག་པ་ལས༔ གང་ལའང་རིག་གེ་རྗེན་ནེ་བའི་ཆ་དེ་ཆོས་སྐུར་ངོ་སྤྲད་དོ་གསུངས་ཤིང་༔ མ་བསྒོམ་པའི་རིག་པ་ཟང་ཐལ་ནི་འདི་ལ་བཟླས་ཏེ༔ དེའི་ངོ་བོ་སྐྱེ་འགགས་གནས་གསུམ་དང་བྲལ་བ༔ སྨྲ་བསམ་བརྗོད་མེད་ཆེན་པོ༔ ཆོས་ཟད་མིང་མེད་ཆེན་པོ༔ དགེ་སྡིག་སྐྱོན་ཡོན་ལས་འདས་པ༔ ཐོག་མའི་ཀ་དག་ཆེན་པོ་ལ་སོགས་པར་ངོས་འཛིན་གྱི༔ སྟོང་ཆད་ནམ་མཁའ་དང་འདྲ་བར་མཚོན་པ་མ་ཡིན་ཞིང་༔ གཞན་དང་ངོ་སྤྲད་ཚུལ་མི་འདྲའོ༔ དབུ་མ་ལ་སོགས་ནས་གང་ཡང་མེད་པའི་ཆོས་ཉིད་ཆོས་སྤྱི་ལ་ཁྱབ་པ་ཞིག་ལ་དམིགས་རྩེ་གཏད་ནས་སྐྱེ་འགགས་མེད་པ་སོགས་སུ་འཇལ་ལ༔ སེམས་ཀློང་ཕལ་ལས་སྣང་ཤེས་ཐམས་ཅད་ཕྱམ་གཅིག་ཡོད་མ་མྱོང་མེད་མ་མྱོང་ལ་སོགས་པར་འཇལ་བས༔ སྤྱི་འབྱམས་གཤིས་ཤོར་གྱི་སྐྱོན་དང་གོལ་ས་ཆེའོ༔ འདི་ལ་ཐབས་གང་གིས་ཀྱང་མཚོན་དུ་ཡོད་ལ༔ ངོ་བོ་ཟང་ཐལ་རྗེན་ལ་བུད་པའི་སྤྲོས་བྲལ་ཉག་གཅིག་དུ་ཁ་འདུམ་སྟེ་སོགས་གསུངས་པ་དང་༔ མུ་ཏིག་ཕྲེང་ཆེན་གྱི་རྒྱུད་ལས༔ ཁྱབ་པ་གཉིས་སུ་གསུངས་པ་རིགས་གཉིས་སུ་བཞག་སྟེ་ངལ་བསོ་ལས་རྒྱས་འགྱུར་སྨིན་འབྲས་ལས་གཞན་བྲལ་འབྲས་སུ་གསུངས་པ་དང་༔ སངས་རྒྱས་དང་གྲུབ་ཐོབ་དགོངས་པའི་ཆུ་བོ་ཡེ་ཤེས་སུ་རོ་གཅིག་པའི་གནད་ལས་གཏེར་བདག་ཡབ་སྲས་ཀྱང་མ་ཡིན་དགག་གི་སྟོང་ཉིད་དུ་གསུངས་པའི་དོན་དེ་དང་གཞན་ཡང་ཡོད་པར་རིག་པར་བྱོས་ཤིག་གོ༔ ལར་དགོངས་མཐུན་གྱི་བཤད་གཞི་ཙམ་བཞག་ནས་དགག་དང་སྟོང་གཉིས་ལ་ཁྱད་མེད་དུ་བཞག་ཀྱང་མི་རུང་བ་ཆེར་མེད་དེ༔ ཤེས་བྱ་ལ་བདེན་གཉིས་ཀྱིས་ཁྱབ་པ་གང་ཞིག་སྣང་སྟོང་གི་ལྡོག་ཆ༔ རྣམ་པར་དག་པ་དབྱིངས་དང་ཡེ་ཤེས་ཀྱི་བཞུགས་ཚུལ་སྔགས་ཀྱི་ལྷག་པའི་ཆོས་སྐུར་བཤད་པའི་གཞི་རྒྱུད་ལ༔ འཇལ་བྱེད་ཀྱི་ཚད་མའང་དོན་གྱི་ངོས་ནས་དཔྱོད་བྱེད་མཐར་ཐུག་ཇི་ལྟར་དང་༔ ཐ་སྙད་རྣམ་དག་གི་ངོས་ནས་དཔྱོད་བྱེད་ཀྱི་ཚད་མ་མཐར་ཐུག་ཇི་སྙེད་པའི་ཡེ་ཤེས་ཏེ༔ ཇི་ལྟའི་གཟིགས་ངོའམ་མཉམ་བཞག་གི་ཐད་ནས་རང་གཞན་ཀུན་གྱིས་སྟོང་བས་མེད་དགག་དང་༔ གཞན་པོ་དེའི་ཡུལ་རྗེས་སུ་ཐོབ་པར་མྱ་ངན་ལས་འདས་པའི་དག་སྣང་སྐུ་དང་ཡེ་ཤེས་སུ་ཤར་བ་ལས་འཁོར་བའི་ཕུང་ཁམས་སྐྱེ་མཆེད་སོགས་ཀྱི་སྟོང་བས་གཞན་སྟོང་ཙམ༔ ཟུང་འཇུག་གི་ཆ་ནས་བློས་མེད་པར་བཞག་པ་ལས་ཀྱང་འདས་པས་སྤྲོས་མཚན་གང་ཡང་མ་ཡིན་པས་རྣམ་གྲངས་མིན་པའི་དོན་དམ་ལ་མ་ཡིན་དགག་གི་བརྡའ་སྦྱར་བ་མ་དག་པའི་ཀུན་རྫོབ་རྣམ་པར་ཆད་པ་དང་༔ དཀོར་བདུན་ཀྱང་ངོ་བོ་ཉིད་མེད་པའི་ལྡོག་ལས་མེད་དགག་སུ་ཤེས་ན་འགལ་བ་མེད་པའི་སྟེང་འབྲེལ་བ་ངོ་མཚར་འདྲེན་ཀྱང་༔ སྒྲ་ཙམ་ལ་རྟོན་པ་ནི་རང་མཚངས་ཐེར་ལ་འབུད་པའི་རྒྱུར་ངེས་སོ༔ སྤྲོས་པ་གང་ཡང་མིན་པས་མ་ཡིན་དགག་དང་༔ གང་ཡང་མེད་པས་མེད་དགག་ཟེར་བ་ཙམ་ལ་ཁྱད་མེད་པས་ཀྱང་འཇའ་དཔལ་བརྩད་ནས་སྤྲང་དབྱུག་བཅག་ཟེར་བ་འདྲའོ༔ དེ་ལྟར་སངས་རྒྱས་ཀྱི་བཀའི་ཕྱོགས་རེ་རེ་ནས་བཤད་དེ་གཞན་དེའི་ནང་བསྡུད་པའི་པཎྜི་ཏའི་འགྲེལ་ཕྱོགས་སོགས་མ་ཤེས་ཤིང་གདོང་གཏད་ཀྱིས་ཚིག་ལ་སྤར་ཟིན་བྱས་ན་མི་བཟང་ངོ་༔ གཡག་ན་རེ་ང་ལ་ར་ཡོད་པས་མི་ལའང་ཡོད་དགོས་ཟེར་བ་དང་འདྲའོ༔ འོན་ཀྱང་མ་ཡིན་དགག་གི་ཤུལ་དུ་ཆོས་གཞན་འཕེན་སྙམ་ཀྱང་མི་འཕེན་ཀྱང་ཆོག་སྟེ༔ དབུ་མའི་ལྟ་བ་ནི་སྤྲོས་པའི་མཚན་མ་གང་ཡང་མ་ཡིན་ནོ༔ ཞེས་པ་དང་༔ མེད་དགག་གི་དབུ་མའི་ལྟ་བ་ནི་སྤྲོས་བྲལ་ལོ༔ ཞེས་པ་ལ་ཁྱད་མེད་ཅིང་༔ འཕེན་ན་སྤྲོས་བྲལ་ཞིག་ཀྱང་ཨེ་འཕེན་བརྗོད་༼ དབུ་མའི་གཏན་ཚིགས་དག་གིས་དཔྱད་ན་རྣམ་སྤྱིའི་སྤྲོས་བྲལ་གོ་བ་དེའང་ཚིག་གི་འཕེན་ཤུགས་ཀྱི་ཡིན་པ་དང་། གཞན་དུ་གཏན་ཚིག་ལ་དགོས་འབྲས་མེད་པའི་གླ་བརྡོལ་འདྲ་ཟེར་མི་སྤོབས་པས་སོ། མཆན། ༽དཀའོ༔ འོན་ཀྱང་འདིར་ནི་བདག་ཉིད་ཆེན་པོ་བྱང་ཆུབ་ཀྱི་སེམས་འཕེན་པས་མ་ཟད་ཟག་མེད་ཆོས་ཁམས་རྫོགས་པའི་ལྡོག་སོ་སོ་བཤད་པའི་ཕྱིར་མ་ཡིན་དགགས་སུ་བཤད་པའོ༔

ལྔ་པ་དེ་ཉིད་མ་རྟོགས་པའི་ཉེས་དམིགས་ནི༔ འབྲས་བུ་སངས་རྒྱས་ཀྱི་གོ་འཕང་ཐོབ་པ་རྒྱུ་ལ་ལྟོས་འཆའ་བའི་ཉེས་པས་རང་ཆས་ལྷུན་གྲུབ་ཏུ་མི་གྲོལ་བ་དང་༔ ལྟ་བསྒོམ་སྤྱོད་གསུམ་མ་འབྲེལ་པ་དང་འབྲས་བུ་རྒྱུ་ལས་བྱུང་བས་འཇིག་པའི་འདུས་བྱས་རྐྱེན་ཁ་ན་ཡོད་པར་བལྟ་བས་རང་གི་རྒྱུད་དང་བླ་མ་ཕ་ཆོས་ལ་ལོག་པར་བལྟ་བས་ཐར་མེད་སྡུག་བསྔལ་གྱིས་གདུང་བ་དག་གོ༔

དྲུག་པ་ཕན་ཡོན་ནི༔ གསངས་སྔགས་ཀྱི་ལྟ་བ་ཚུལ་བཞིན་རྟོགས་པས༔ བསྒོམ་པའི་འཇུག་ངོགས་ཤེས༔ སྒྲུབ་གཞི་རང་ལ་ཡོད་པས་འབྲས་བུ་བདེ་བླག་གིས་ཐོབ༔ འཇུག་པ་དོན་མཐུན་གྱི་ཚིག་གི་སྲ་མི་ཡས༔ སེང་གེའི་སྒྲ་བསྒྲགས་པས་གྲོང་ཁྱེར་ཕྱི་ཕྱག་གིས་ཕུལ༔ ཐུན་མོང་དུ་སེམས་ཅན་ཐམས་ཅད་ལ་སྙིང་པོ་ཡོད་པར་ཤེས་པས་སེམས་ཞུམ་དང་སེམས་ཅན་དམན་བརྙས་སོགས་མི་འབྱུང་བ་དང་༔ སྣང་གྲགས་རིག་པ་ལྷ་སྔགས་ཆོས་ཉིད་དུ་འབྱམས་ཀླས་པས་འབད་རྩོལ་མེད་པར་གྲོལ་བའི་དགོས་པ་ཡོད་དོ༔ འདི་ལྟར་བརྩམས་པ་འདིའི་ཀྱང་ཕ་ཆོས་ལ་སྨྲེ་ངན་གླེང་བ་ཁེག༔ བླ་མ་བརྒྱུད་པ་ལ་ལོག་པར་བལྟ་བ་ཁེག་པ་སོགས་དང་རྒྱུད་ཀྱི་དགོངས་པ་ལོན༔ བྱིན་རླབས་ཀྱི་ཚན་ཁ་མི་ཉམས་པས་མྱུར་དུ་མཆོག་ཐུན་དངོས་གྲུབ་མཐའ་དག་ཐོབ་པའོ༔ དེ་ལྟར་རྒྱུད་ལུང་མན་ངག་སྙིང་པོའི་དོན༔ ཁོང་སྙིང་བསྡེབས་ནས་གབ་པ་མངོན་བྱུང་ཞིང་༔ རོ་ནུས་བསྲེ་སྦྱོར་ཚད་པའི་སྨན་ཆེན་འདིས༔ འགྲོ་ཀུན་ཉེས་བརྒྱའི་གཅོང་ནད་ཞི་གྱུར་ཅིག༔ ཨོ་རྒྱན་མཁན་པོ་པདྨ་ཀ་ར་ང་༔ སྔར་ཞིག་བྱུང་ནས་ད་ལྟ་མེད་པ་མིན༔ དྲི་མེད་ཆོས་སྤྱན་ལྡན་པའི་བྱང་ཆུབ་སྲས༔ གཏེར་རིགས་བྱེ་བ་བཅོ་བརྒྱད་དག་དང་སྤྲོད༔ ད་དུང་སྲིད་འགྲོའི་གནས་ཁམས་མ་སྟོངས་པར༔ རྗེས་སུ་བཟུང་བའི་ཐབས་དང་ཚུལ་གར་མཁྱེན༔ བཞིན་ལས་ཇི་ལྟར་འཚམས་པའི་འཁོར་ལོ་ནི༔ རྒྱལ་ཆེན་བླ་ན་མེད་པ་བསྐོར་བར་འགྱུར༔ རིན་ཆེན་སྒྲོམ་བུ་བསྟན་པའི་སྲོག་ཤིང་མནོག༔ སྲས་གྱུར་དགོངས་པ་བསྟན་པའི་བཙས་ཀྱི་ཚུལ༔ གང་དུ་ལུས་ལ་གཏེར་འཆང་མི་བཞིན་དུ༔ གནས་པའི་ས་ཕྱོགས་དེ་ཡང་དཀར་པོའི་གླིང་༔ ནམ་མཁའ་འཇིགས་མེད་ཁྱོད་ལ་གཏད་དོ་རྒྱ༔ ཕྲིན་ལས་མཐའ་ཡས་འགྲོ་ཁམས་དོང་སྤྲུགས་ཤོག༔ ཨེ་མ་ཧོ་ཡེ་ངོ་མཚར་འཕྲུལ་གྱིས་བྲིས༔ འདི་ཡི་ཀློང་ན་དེ་འདྲ་བརྒྱ་ཕྲག་གནས༔ ས་མ་ཡ༔ རྒྱ་རྒྱ་རྒྱ༔ དགེའོ། །དགེའོ། །དགེའོ། །སརྦ་མངྒལཾ། །