མངོན་པར་རྟོགས་པའི་སྙེ་མ།
དགེ་བའི་འབྱུང་གནས་སྦས་པ།
༄། །རྒྱ་གར་སྐད་དུ། ཨ་བྷི་ས་མ་ཡ་མཉྫ་རི། བོད་སྐད་དུ། མངོན་པར་རྟོགས་པའི་སྙེ་མ། དཔལ་རྡོ་རྗེ་ཕག་མོ་ལ་ཕྱག་འཚལ་ལོ། །སྟོང་ཉིད་སྟིང་རྗེའི་བདག་ཉིད་ཅན། །གང་ཞག་འགྲོ་བའི་བསམ་དབྱེ་བས། །སྣ་ཚོགས་སྐུ་ནི་རྣམ་པར་འཛིན། །རྡོ་རྗེ་རྣལ་འབྱོར་མ་ལ་འདུད། །ཡང་དག་བྱང་ཆུབ་བདུད་རྩིས་རབ་བཀྲུས་དབང་གིས་དྲི་མེད་གསལ་མཛད་གང༌། །སྐྱེ་བོ་གདུལ་བྱ་དག་ལ་ཆགས་ཕྱིར་ཞི་སྤང་ཕྱི་རོལ་དམར་པོ་སྟོན། །མི་བཟང་འོད་ཅན་རྡོ་རྗེ་ཐོད་པ་དང་ནི་དྲི་མེད་ཁ་ཊྭཱཾ་བསྣམས། །བཅོམ་ལྡན་རྡོ་རྗེ་རིལ་མ་དེས་ནི་ཁྱེད་ལ་ཕུན་སུམ་ཚོགས་གྱུར་ཅིག །འདིར་བླ་མ་དང་སངས་རྒྱས་དབྱེར་མེད་པའི་དད་པ་དང༌། ལེགས་པར་བླངས་པའི་བྱང་ཆུབ་ཀྱི་སེམས་དང༌། དབང་བསྐུར་བ་ཡང་དག་པར་ཐོབ་པས་སྐྲའི་ཚོགས་བཀྲོལ་ཏེ་ཁ་ལྷོར་ཕྱོགས་པ་དང༌། བདུད་རྩི་ལྔའི་རིལ་བུ་ལ་སོགས་པའི་སྦྱོར་བས་ཁ་ཡོངས་སུ་དག་པའི་རྣལ་འབྱོར་པས་དུར་ཁྲོད་དམ་རི་ལ་སོགས་པའི་ས་ཕྱོགས་འགའ་ཞིག་ལ་སྟན་བདེ་བའམ་ཡང་ན་རོ་དངོས་ཀྱི་སྟན་ལ་འདུག་ལ། ཨོཾ་ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿ། ཀ་ཁ་ག་གྷ་ང༌། ཙ་ཚ་ཛ་ཛྷ་ཉ། ཊ་ཐ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ་ཧུཾ་ཧཱུཾ་ཕཊ་ཅེས་བྱའི་ཨཱ་ལི་དང་ཀཱ་ལིའི་ཕྲེང་བའི་འོད་ཟེར་རྣམ་པ་ལྔ་འཕྲོ་བ་ལན་གསུམ་བརྗོད་པས་ཡོངས་སུ་བསྐོར་ཏེ་གནས་པ་ལས་འཁོར་ལོ་གསུམ་གྱི་ལྷ་ཚོགས་སྤྲོས་པས་བགེགས་ཀྱི་ཚོགས་རྣམས་འཇོམས་པར་བྱེད་པ་བསྒོམ་པར་བྱ་ཞེས་བྱ་བ་ནི་ངག་ཡོངས་སུ་དག་པའོ། །རྣམ་པར་དག་པའི་ཕུང་པོ་ལ་སོགས་པ་ལས་བྱུང་བའི་མཆོད་པ་ལ་སོགས་པ་ནི་བྱང་ཆུབ་མྱུར་བའི་རྒྱུ་ཡིན་པས་ཕུང་པོ་ལ་སོགས་པ་རྣམ་པར་དག་པར་མོས་པར་བྱའོ། །དེ་ལ་གཟུགས་ནས་རྣམ་པར་ཤེས་པའི་བར་དུ་དབུ་བ་དང༌། ཆུ་བུར་དང༌། སྨིག་རྒྱུ་དང༌། ཆུ་ཤིང་དང༌། སྒྱུ་མ་ལྟ་བུ་ཉིད་ཀྱིས་རྣམ་པར་སྣང་མཛད་ལ་སོགས་པ་ཉིད་དུ་ངེས་པར་བྱའོ། །དེ་བཞིན་ཉིད་ལ་མི་བསྐྱོད་པའོ། །ཡང་ན་རྣམ་པར་སྣང་མཛད་ལ་སོགས་པའི་ལྷར་མོས་པ་ཉིད་ཀྱིས་དེ་དག་གི་རྣམ་པར་དག་པའོ། །དེ་ལ་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང་རྣམ་པར་ཤེས་པ་
༄། །རྣམས་ལ་རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འོད་དཔག་མེད་དང༌། དོན་ཡོད་གྲུབ་པ་དང་རྡོ་རྗེ་སེམས་དཔའོ། །གཟུགས་ལ་སོགས་པའི་དེ་ཁོ་ན་ཉིད་ལ་མི་བསྐྱོད་པའོ། །དེ་དག་གི་ཁ་དོག་ཀྱང་དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། དཀར་པོ་དང་ནག་པོར་ཤེས་པར་བྱའོ། །རྣམ་པར་སྣང་མཛད་ནི་ཕྱག་གཡས་ཀྱིས་འཁོར་ལོ་གདེངས་པ། གཡོན་པའི་ཕྱག་དྲིལ་བུ་དང་ལྡན་པས་དཀུར་བརྟེན་པ། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱི་ཕྱག་གཡས་རོལ་པ་དང་བཅས་པས་རིན་པོ་ཆེ་དང༌། པདྨ་དམར་པོ་དང་སྣ་ཚོགས་རྡོ་རྗེ་གདེངས་པ། གཡོན་པའི་ཕྱག་རྣམས་དྲིལ་བུ་དང་བཅས་ཏེ་ཐུགས་ཀར་སོན་པའོ། །རྡོ་རྗེ་སེམས་དཔའི་ཕྱག་གཡས་རོལ་པ་དང་བཅས་པས་ཐུགས་ཀར་རྡོ་རྗེ་བསྣམས་པ། དྲིལ་བུ་དང་བཅས་ཏེ་ཕྱག་གཡོན་པ་དཀུར་བརྟེན་པ། མི་བསྐྱོད་རྡོ་རྗེའི་ཕྱག་གཡས་རྡོ་རྗེ་དང་བཅས་པས་ས་གནོན་པ། ཕྱག་གཡོན་པ་དྲིལ་བུ་དང་བཅས་པས་དཀུར་བརྟེན་པའོ། །མིག་དང༌། རྣ་བ་དང༌། སྣ་དང༌། ཁ་དང༌། རེག་བྱ་རྣམས་ལ་གཏི་མུག་རྡོ་རྗེ་དང༌། ཞེ་སྡང་རྡོ་རྗེ་དང༌། ཕྲག་དོག་རྡོ་རྗེ་དང༌། འདོད་ཆགས་རྡོ་རྗེ་དང༌། སེར་སྣ་རྡོ་རྗེ་རྣམས་མིང་གཞན་ཡང་སའི་སྙིང་པོ་དང༌། ཕྱག་ན་རྡོ་རྗེ་དང༌། ནམ་མཁའི་སྙིང་པོ་དང༌། འཇིག་རྟེན་དབང་ཕྱུག་དང༌། སྒྲིབ་པ་རྣམ་པར་སེལ་བ་ཞེས་པའོ། །ཁ་དོག་ནི་དཀར་པོ་དང༌། ནག་པོ་དང༌། སེར་པོ་དང༌། དམར་པོ་དང༌། ལྗང་གུའོ། །སྐྱེ་མཆེད་ཐམས་ཅད་ལ་དབང་ཕྱུག་རྡོ་རྗེ་དཀར་པོ་སྟེ། མིང་གཞན་ཀུན་དུ་བཟང་པོ་ཞེས་བྱ་བའོ། །གཏི་མུག་རྡོ་རྗེའི་ཕྱག་གཡས་ཀྱིས་འཁོར་ལོ་གདེངས་པ། ཕྱག་གཡོན་དྲིལ་བུ་དང་བཅས་ཏེ་རོལ་པས་ཐུགས་ཀར་སོན་པའོ། །ཞེ་སྡང་རྡོ་རྗེའི་ཕྱག་གཡས་རྡོ་རྗེ་དང་བཅས་པས་ཐུགས་ཀར་སོན་པ། གཡོན་པའི་ཕྱག་དྲིལ་བུ་དང་བཅས་ཏེ་དཀུར་བརྟེན་པའོ། །ཕྲག་དོག་རྡོ་རྗེ་དང༌། འདོད་ཆགས་རྡོ་རྗེ་དང་སེར་སྣ་རྡོ་རྗེ་རྣམས་ནི་རིམ་པ་བཞིན་རིན་པོ་ཆེ་དང༌། པདྨ་དམར་པོ་དང༌། སྣ་ཚོགས་རྡོ་རྗེ་རྣམས་ཕྱག་གཡས་ཀྱིས་རོལ་པ་དང་བཅས་པས་གདེངས་པས་སོ། རོལ་
༄། །པ་དང་བཅས་པའི་ཕྱག་གཡོན་པས་དྲིལ་བུ་ཐུགས་ཀར་སོན་པའོ། །དབང་ཕྱུག་རྡོ་རྗེའི་ཕྱག་གཡས་རྡོ་རྗེ་དང་བཅས་པ་ཐུགས་ཀར་སོན་པ། དྲིལ་བུ་དང་བཅས་པའི་གཡོན་པ་དཀུ་ལ་བརྟེན་པའོ། །དེ་ལ་གཏི་མུག་རྣམ་པར་སེལ་བའི་ཕྱིར་གཏི་མུག་རྡོ་རྗེའོ། །ཞེ་སྡང་རྡོ་རྗེ་ནི་ཞེ་སྡང་ལ་ཞེ་སྡང་བས་སོ། །ཕྲག་དོག་དང༌། འདོད་ཆགས་དང་སེར་སྣ་སེལ་བའི་ཕྱིར་ཕྲག་དོག་རྡོ་རྗེ་ལ་སོགས་པ་གསུམ་མོ། །དབང་ཕྱུག་ཐམས་ཅད་སྟེར་པའི་ཕྱིར་དབང་ཕྱུག་རྡོ་རྗེའོ། །ས་དང་ཆུ་དང་མེ་དང་རླུང་གི་ཁམས་རྣམས་རྣམ་པར་དག་པའི་རང་བཞིན་གྱིས་ལྟུང་བྱེད་མ་དང༌། གསོད་བྱེད་མ་དང༌། འགུགས་བྱེད་མ་དང་གར་གྱི་དབང་ཕྱུག་མ་རྣམས་སེར་པོ་དང༌། ནག་པོ་དང༌། དམར་པོ་དང་ལྗང་གུའི་མདོག་ཅན། གཡས་ཀྱི་ཕྱག་གཉིས་ན་འཁོར་ལོ་དང༌། གྲི་གུག་དང༌། རྡོ་རྗེ་དང༌། གྲི་གུག་དང༌། པདྨ་དང༌། རལ་གྲི་དང་གྲི་གུག་རྣམས་བསྣམས་པ། གཡོན་གྱི་ཕྱག་གཉིས་ཀྱིས་ཐོད་པ་དང་ཁ་ཊྭཱཾ་ག་བསྣམས་པ་རྣམས་ནི་སྤྱན་མ་དང༌། མཱ་མ་ཀཱི་དང༌། གོས་དཀར་མོ་དང་སྒྲོལ་མ་ཞེས་བྱའོ། །ནམ་མཁའི་དབྱིངས་ཀྱི་རང་བཞིན་མ་དུ་བའི་མདོག་ཅན་པདྨའི་དྲ་བ་ཅན་ནི་ཞལ་གསུམ་པ་དུང་ཀ་དང༌། དཀར་པོ་དང༌། དམར་པོའི་ཁ་དོག་ཅན། ཕྱག་དྲུག་པའི་གཡོན་གྱི་གསུམ་གྱིས་ཐོད་པ་དང་ཁ་ཊྭཱཾ་ག་དང་ཞགས་པ་བསྣམས་པ། ཕྱག་གཡས་པས་ལྕགས་ཀྱུ་དང༌། ཚངས་པའི་མགོ་བོ་དང་གྲི་གུག་གིས་བརྒྱན་པ་ཅན་གྱི་ཆོས་ཀྱི་དབྱིངས་ཀྱི་རང་བཞིན་མའོ། །དེ་ལ་ལྟུང་བྱེད་མ་ལ་སོགས་པ་རྣམས་ནི་མིང་དང་རྗེས་སུ་མཐུན་པའི་ལས་རྣམས་རབ་ཏུ་སྒྲུབ་པར་བྱེད་པའོ། །རྣམ་པར་སྣང་མཛད་ལ་སོགས་པ་རྣམས་ནི་གཡས་བརྐྱང་བ་གཡོན་བསྐུམ་པའི་སྟང་སྟབས་ཀྱི་ཚུལ་དུ་བཞུགས་པ། སྤྱན་གསུམ་པ་རལ་བའི་ཐོར་ཚུགས་ཅན་ཕྱག་རྒྱ་ལྔ་དང་ལྡན་པའོ། །ལྷ་མོ་རྣམས་ནི་སྐྲ་གྲོལ་བ་གཅེར་བུ་གཡས་བརྐྱང་བ་གཡོན་བསྐུམ་པའི་སྟང་སྟབས་ཅན། སྤྱན་གསུམ་པ་ཕྱག་རྒྱ་ལྔ་དང་ལྡན་པ་རྣམས་སོ། །དེ་ནས་རང་གི་སྙིང་གའི་བུ་གའི་དབུས་སུ་རཾ་ཡིག་གིས་བོན་ལས་བྱུང་བའི་ཉི་མའི་དཀྱིལ་འཁོར་ལ་གནས་པའི་བཾ་ཡིག་དམར་པོ་བལྟས་ལ་དེའི་འོད་ཟེར་གྱིས་ནང་གི་རྙོག་པ་བསལ་ནས་བ་སྤུའི་བུ་གི་རེ་རེ་ནས་ཕྱིར་
༄། །བྱུང་བས་འཆད་བར་འགྱུར་བའི་བཅོམ་ལྡན་འདས་མའི་དཀྱིལ་འཁོར་གྱི་འཁོར་ལོ་དང་བླ་མ་དང་སངས་རྒྱས་དང་བྱང་ཆུབ་སེམས་དཔའ་རྣམས་མདུན་གྱི་ནམ་མཁའ་ལ་སྤྱན་དྲངས་པར་བསྒོམས་ལ། ཕྱག་བཙལ་ནས་ས་བོན་གྱི་འོད་ཟེར་ལས་བྱུང་བའི་པི་ཝང་མ་ལ་སོགས་པའི་ལྷ་མོ་བཅུ་དྲུག་གིས་མཆོད་པར་བྱའོ། །དེ་ལ་པི་ཝང་མ་དང་གླིང་བུམ་དང་རྫ་རྔ་མ་དང༌། རྫ་རྔ་ཁ་གཅིག་མ་རྣམས་ནི་ཞལ་གཅིག་མ་ཕྱག་བཞི་མའི་སྐུ་མདོག་སྔོན་མོ་དང་སེར་མོ་དང་དམར་པོ་དང་ལྗང་གུ་སྟེ། ཕྱག་དང་པོ་གཉིས་ཀྱིས་རང་རང་གི་སྒྲའི་གནས་བརྡུང་བར་གཞོལ་བའོ། །གཞན་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པའོ། །བཞད་མ་དང་སྒེག་མོ་དང་གླུ་མ་དང་གར་མ་རྣམས་ནི་ཞལ་གཅིག་མ་ཕྱག་བཞི་མའི་སྐུ་མདོག་དམར་མོ་དང་སྔོན་མོ་དང་སེར་མོ་དང་ལྗང་གུ་སྟེ་བཞད་མའི་ཕྱག་དང་པོ་གཉིས་ཀྱིས་བཞད་པའི་སྟང་སྟབས་དང༌། སྒེག་མོ་ནི་ཕྱག་དང་པོ་གཉིས་ཀྱིས་རྡོ་རྗེ་དང་དྲིལ་བུ་དཀུར་བརྟེན་པའོ། །གླུ་མའི་ཕྱག་དང་པོ་གཉིས་ཀྱིས་ཏིང་ཤག་བསྣམས་པ། གར་མའི་ཕྱག་དང་པོ་གཉིས་ཀྱིས་པདྨ་བསྐོར་བའི་ཚུལ་ཅན་ནོ། །འདི་རྣམས་ཀྱི་ཅིག་ཤོས་ཀྱི་ཕྱག་གཉིས་ཀྱིས་ཐོད་པ་དང་ཁ་ཊྭཱཾ་ག་བསྣམས་པའོ། །མེ་ཏོག་མ་དང་བདུག་སྤོས་མ་དང་མར་མེ་མ་དང༌། དྲི་ཆབ་མ་རྣམས་ཀྱི་ཁ་དོག་ནི་དཀར་པོ་དང་དུད་ཀ་དང་མར་མེའི་མེ་ལྕེ་ལྟ་བུ་དང་དམར་མོའོ། །ཕྱག་བཞི་དང༌། ཞལ་གཅིག་མ་སྟེ། གཡས་ཀྱི་ཕྱག་གི་དང་པོ་རྣམས་ཀྱིས་མེ་ཏོག་གི་སྣོད་དང་བདུག་སྤོས་ཀྱི་སྣོད་དང་མར་མེའི་ཀོང་བུ་དང༌། དྲི་ཆབ་ཀྱི་དུང་ཕོར་བསྣམས་པའོ། །ཅིག་ཤོས་ཀྱི་ཕྱག་གསུམ་ལ་ཌ་མ་རུ་དང་ཐོད་པ་དང་ཁ་ཊྭཱཾ་ག་ཡོད་པའོ། །མེ་ལོང་མ་དང་རོ་མ་དང་རེག་མ་དང་ཆོས་མ་རྣམས་ཀྱི་ཁ་དོག་ནི་དཀར་པོ་དང་དམར་པོ་དང་ལྗང་གུ་དང་དཀར་པོ་སྟེ། ཞལ་གཅིག་མ་ཕྱག་བཞིའི་དང་པོས་མེ་ལོང་དང་རོའི་སྣོད་དང་སྣ་ཚོགས་པའི་གོས་དང་ཆོས་འབྱུང་བ་བསྣམས་པའོ། །ཕྱག་གཞན་གསུམ་གྱིས་ཌ་མ་རུ་དང་ཐོད་པ་དང་ཁ་ཊྭཱཾ་ག་བཟུང་བའོ། །དེའི་རྗེས་ལ་འཆད་པར་འགྱུར་བའི་རྐང་བ་བརྒྱད་
༄། །པའི་སྔགས་ཀྱིས་བསྟོད་ནས། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། རྒྱལ་བ་མྱ་ངན་ལས་འདས་པར་བཞེད་པ་ལ་ཡུན་རིང་དུ་བཞུགས་པའི་གསོལ་བ་གདབ་པ་དང༌། ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། རང་གི་བསོད་ནམས་ཡོངས་སུ་བསྔོས་ཏེ། བླ་ན་མེད་པའི་མཆོད་པ་བདུན་བྱས་ནས་དཀོན་མཆོག་གསུམ་ལ་སྐྱབས་སུ་འགྲོ་བ་དང༌། རྒྱལ་བའི་ལམ་བསྟེན་པ་དང༌། བདག་ཉིད་ཀྱི་ལུས་དབུལ་བ་དང༌། སེམས་བསྐྱེད་སྔོན་དུ་འགྲོ་བས་སེམས་ཅན་ཐམས་ཅད་ལ་བུ་གཅིག་པ་ལྟར་དེ་ཁོ་ན་ཉིད་དང་རོ་གཅིག་པའི་བདེ་བ་ཆེན་པོ་ལ་སྦྱོར་བར་འདོད་པས་བྱམས་པའོ། །སྡུག་བསྔལ་ལས་གདོན་པར་འདོད་པའི་རྣམ་པ་ནི་སྙིང་རྗེའོ། །དེ་ལས་སྐྱེས་པའི་དགེ་བའི་རྩ་བ་དང༌། ལོངས་སྤྱོད་དང༌། དབང་ཕྱུག་རྣམས་མི་འབྲལ་བར་འདོད་པའི་རྣམ་པ་ནི་དགའ་བའོ། །ཐམས་ཅད་དུ་ཆགས་སྡང་དང་བྲལ་བས་ཕ་རོལ་ལ་ཕན་པའི་ཆོས་ཉིད་ལ་ཤུགས་ཀྱིས་རབ་ཏུ་ཞུགས་པའི་མཚན་ཉིད་ཀྱིས་བཏང་སྙོམས་བསྒོམས་ཏེ། བསོད་ནམས་ཀྱི་ཚོགས་བསགས་ལ། ཡེ་ཤེས་ཀྱི་ཚོགས་འཕེལ་བར་བྱ་བའི་ཆེད་དུ། ཨོཾ་སྭ་བྷཱ་བ་ཤུདྡྷཿ་སརྦྦ་དྷརྨཱཿ་སྭཱ་བྷཱ་བ་ཤུདྡྷོ྅ཧཾ་ཞེས་བྱ་བ་བརྗོད་ཅིང་དེའི་དོན་དྲན་པ་སྔོན་དུ་འགྲོ་བས་སོ། །དེ་ལ་ཨོཾ་སྭ་བྷཱ་བ་ཤུདྡྷཿ་སརྦྦ་དྷརྨཱཿ་ཞེས་བྱ་བ་ནི་གཟུང་བ་རྣམ་པར་དག་པའོ། །སྭཱ་བྷཱ་བ་ཤུདྡྷོ་྅ཧཾ། ཞེས་པ་ནི་འཛིན་པ་རྣམ་པར་དག་པའོ། །སྒྱུ་མ་མཁན་གྱིས་སྒྱུ་མ་བྱས། །བསྡུས་པར་གྱུར་པ་དེ་ཡི་ཚེ། །ཅུང་ཟད་ལུས་པ་ཡོད་མིན་ལྟར། །ཆོས་རྣམས་ཀྱི་ནི་ཆོས་ཉིད་དོ། །ཞེས་གསུངས་རབ་ལས་སོ། །ཁམས་གསུམ་དང་སྤྱན་དྲངས་པའི་དཀྱིལ་འཁོར་རྣམས་སྣང་བ་ཙམ་གྱི་རང་བཞིན་གྱིས་འོད་གསལ་ལ་གཞུག་གོ །རང་ཉི་མ་ལ་ཉི་མ་བཾ་ལ་བཾ་ཟླ་ཚེས་ལ་ཟླ་ཚེས་ཐིག་ལེ་ལ་ཐིག་ལེ་ནཱ་ད་ལ་དེའི་རྟོག་པ་ཡང༌། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭཱ་བྷཱ་བ་ཨཱཏྨ་ཀོ྅ཧཾ། ཞེས་བརྗོད་ཅིང་དོན་དྲན་པས་སྤང་བར་བྱའོ། །སྟེང་པ་ཉིད་ཀྱི་ཡེ་ཤེས་ཁོ་ནར་དབྱེར་མི་ཕྱེད་པས་རྡོ་རྗེའོ། །དེའི་རང་བཞིན་ནི་བདག་ཉིད་དེའི་རང་བཞིན་ཡིན་ཞེས་བྱ་བའི་དོན་ཏོ། །དེ་ནས་སྔོན་གྱི་
༄། །སྨོན་ལམ་གྱི་སྟོབས་ཀྱིས་སྟོང་བ་ཉིད་ཀྱི་ཏིང་ངེ་འཛིན་ལས་ལངས་ནས། རང་གི་སེམས་ཁོ་ན་བརྩེགས་མར་ཡཾ་རཾ་བཾ་ལཾ་རྣམས་ཡོངས་སུ་གྱུར་པ་ལས་གཞུ་དང་གྲུ་གསུམ་དང་ཟླུམ་པོ་དང་གྲུ་བཞིའི་རྣམ་པ་ཡིས་སྔོན་པོ་དང་དམར་པོ་དང་སེར་པོའི་ཁ་དོག་སྟེ། མཐའ་གཉིས་སུ་གཡོ་བའི་བ་དན་དང༌། འབར་བ་དང༌། བུམ་པ་དང༌། རྡོ་རྗེ་རྩེ་གསུམ་པས་ཟུར་བཞི་མཚན་པའི་རླུང་དང་མེ་དང་ཆུ་དང་སའི་དཀྱིལ་འཁོར་གྱི་རང་བཞིན་དུ་རྣམ་པར་བསམ་མོ། །དེའི་སྟེང་དུ་སུཾ་ཡིག་ལས་ཡང་དག་པར་བྱུང་བའི་གྲུ་བཞི་པ་ལྕོག་བརྒྱད་དང་ལྡན་པ། ཤར་དང་ལྷོ་དང༌། ནུབ་དང་བྱང་གི་ཕྱོགས་རྣམས་ལ་དངུལ་དང་བཻ་ཌཱུ་ཪྻ་དང་ཤེལ་དང་གསེར་གྱི་རང་བཞིན་གྱི་རི་རབ་བསྒོམས་ནས། དེ་ནས་ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀ་ཧྞ་གྲྀ་ཧཱུཾ་ཧཱུཾ་ཕཊ། ཨོཾ་གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་བཱ་ན་བཛྲ་ཧུཾ་ཧཱུཾ་ཕཊ། ཅེས་བྱ་བའི་སྔགས་བཞི་གཡོན་པའི་མཐེ་བོ་དང༌། མཛུབ་མོ་བརྡབས་པ་སྔོན་དུ་འགྲོ་བས་བརྗོད་ལ། ནག་པོ་དང་ལྗང་གུ་དང་དམར་པོ་དང༌། སེར་པོས་ཚངས་པའི་གནས་ནས་སའི་འོག་གི་བར་དུ་ཁྱབ་པའི་འབར་བའི་ལུས་ཆེན་པོར་ཤར་དང་བྱང་དང་ནུབ་དང་ལྷོའི་ཕྱོགས་རྣམས་སུ་སུམྦྷ་ནི་ལ་སོགས་པའི་སྔགས་ཀྱི་འོད་ཟེར་གྱིས་རྒྱ་ཆེ་བ་ཇི་ཙམ་འདོད་པ་དང༌། རྡོ་རྗེའི་གུར་གྲུ་བཞི་པ་ཡང་བསྒོམ་པར་བྱའོ། །ཨོཾ་བཛྲ་པྲཱ་ཀཱ་ར་ཧཱུཾ་བཾ་ཧཱུཾ་ཞེས་བརྗོད་ནས་དགོད་པར་བྱའོ། །དེ་དང་དུས་མཉམ་པ་ཁོ་ནར་ཧཱུཾ་ཡིག་ལས་སྐྱེས་ཤིང་དེས་བྱིན་གྱིས་བརླབས་པའི་སྣ་ཚོགས་རྡོ་རྗེ་ཨོཾ་མེ་དི་ནཱི་བཛྲི་བྷ་བ་བཛྲ་བནྡྷ་ཧཱུཾ་ཞེས་བརྗོད་ནས་ས་བཞི་ས་འོག་གི་བར་དུ་སྣ་ཚོགས་རྡོ་རྗེའི་རང་བཞིན་དུ་བྱིན་གྱིས་བརླབ་པར་བྱའོ། །རྡོ་རྗེ་དེའི་འོད་ཟེར་གྱིས་ཨོཾ་བཛྲ་ཤ་ར་ཛྭ་ལ་ཏྲཾ་སཾ་ཏྲཾ། ཞེས་བརྗོད་ནས་རྡོ་རྗེ་རྩེ་ལྔ་པའི་རྣམ་པ་ཤིན་ཏུ་སྲ་བ་དང༌། སྟེང་དུ་མདའི་དྲ་བའོ། །དེའི་འོག་ཏུ་ཨོཾ་བཛྲ་པ་ཉྫ་ར་ཧཱུཾ་བཾ་ཧཱུཾ་ཞེས་བརྗོད་ནས་རྡོ་རྗེའི་གུར་རོ། །ཨོཾ་བཛྲ་བི་དཱ་ན་ཧཱུཾ་ཁཾ་ཧཱུཾ་ཞེས་བྱ་བ་བརྗོད་པས་གནས་ཇི་ལྟ་བར་རྡོ་རྗེའི་བླ་རེའོ། །ཨོཾ་བཛྲ་ཛྭ་ལ་ཨ་ན་ལཱ་རྐ་ཧཱུཾ་ཧཱུཾ་ཧཱུཾ་ཞེས་བྱ་བ་བརྗོད་ནས་རྡོ་རྗེ་འབར་བ་བསམ་པར་བྱའོ། །དེའི་རྗེས་སུ་སུམྦྷ་ནི་ལ་སོགས་པའི་སྔགས་བཞི་ལས་གྲུབ་པའི་ཁྭ་གདོང་མ་ལ་སོགས་
༄། །པའི་ལྷ་མོ་བཞི་དང༌། དེ་ཉིད་ཀྱི་ཚེ་སྔགས་གཉིས་ཀྱི་འོད་ཟེར་ལས་གྲུབ་པའི་གཤིན་རྗེ་བརྟན་མ་ལ་སོགས་པའི་ལྷ་མོ་བཞིའོ། །འདི་དག་རྣམས་ཞལ་གཅིག་ཕྱག་གཉིས་མ་ལྟེ་བ་མན་ཆད་ཕུར་བུའི་རྣམ་པ་ཅན། ཕྱག་གཡས་པས་རྡོ་རྗེའི་ཐོ་བ་བསྣམས་པ། གཡོན་པའི་ཕྱག་གིས་རང་གི་གཟུགས་ཀྱི་རྣམ་པའི་ཕུར་བུ་བསྣམས་པ། སྤྲོས་པའི་སྦྱོར་བས་ཕྱོགས་བཅུར་སོང་བས་བགེགས་ཀྱི་ཚོགས་བཀུག་ནས་ཧཱུཾ་གི་སྒྲ་རིང་པོ་བརྗོད་པས་གྲུབ་པའི་རྡོ་རྗེའི་ར་བ་དང་ཉེ་བའི་བར་ཕྱོགས་དང་མཚམས་རྣམས་སུ་དོང་གི་ནང་དུ་བཅུག་ལ་ཨོཾ་གྷ་གྷ་གྷཱ་ཏ་ཡ་གྷཱ་ཏ་ཡ། སརྦྦ་དུ་ཥྚཱ་ན་ཕཊ་ཕཊ་ཀཱི་ལ་ཡ་ཀཱི་ལ་ཡ་ས་རྦྦ་པཱ་པཾ་ཕཊ་ཕཊ། ཧཱུཾ་ཧཱུཾ་ཧཱུཾ་བཛྲ་ཀཱི་ལ་ཡ་བཛྲ་དྷ་རོ་ཨཱ་ཛྙཱ་པ་ཡ་ཏི་སརྦྦ་བིགྷྣཱཾ་ཀཱ་ཡ་བཱ་ཀ་ཙིཏྟ་བཛྲ་ཀཱི་ལ་ཡ་ཀཱི་ལ་ཡ་ཧཱུཾ་ཕཊ། ཅེས་བྱ་བ་ཕུར་བུ་གདབ་པའི་སྔགས་སྔོན་དུ་འགྲོ་བས་ཕུར་བུ་གདབ་བོ། །ཨོཾ་བཛྲ་མུ་ཏྒ་ར་བཛྲ་ཀཱི་ལ་ཡ་ཨ་ཀོ་ཊ་ཡ་ཧཱུཾ་ཕཊ་ཅེས་བྱ་བ་བརྡུང་བའི་སྔགས་སྔོན་དུ་འགྲོ་བས་བརྡུང་བར་བྱའོ། །ཕུར་བུ་གདབ་པ་དང་བརྡུང་བ་གཉིས་ཀྱིས་བགེགས་ཀྱི་ཚོགས་བདེ་བ་ཆེན་པོའི་དེ་ཁོ་ན་ཉིད་དུ་རོ་གཅིག་པར་མོས་པར་བྱའོ། །ཡང་བགེགས་ལུས་པ་རྣམས་ཚར་བཅད་ནས་ལྕགས་རིལ་ཐིམ་པ་དང༌། ཆུ་ལ་ཆུ་བརྡབས་པ་ལས་ཐིགས་པ་འབྱུང་བའི་ཚུལ་གྱིས་མཚམས་བཅིང་བའི་དོན་དུ་ཟླུམ་པོའི་རྡོ་རྗེ་དང་པདྨ་དང་འཁོར་ལོའི་རབ་རྣམས་བསམ་པར་བྱའོ། །དེ་ལྟར་བགེགས་ཚར་བཅད་པའི་རྣམ་པར་དག་པས་རྡོ་རྗེའི་ར་བ་ལ་སོགས་པ་རྣམས་མཚམས་མེད་ཅིང་དུམ་བུ་གཅིག་ཏུ་གྱུར་པས་ཐམས་ཅད་དུ་འགྲོ་བ་ལ་བགེགས་མེད་པར་མོས་པར་བྱའོ། །དེ་ནས་རྡོ་རྗེ་ར་བའི་དབུས་སུ་ཆོས་ཀྱི་དབྱིངས་ཀྱི་རང་བཞིན་གྱི་ཆོས་འབྱུང་གི་རྣམ་པ་ཁ་ཡངས་ལ་རྩ་བ་ཕྲ་བ་བསྒོམ་པར་བྱའོ། །དེའི་དབུས་སུ་སྣ་ཚོགས་པདྨ་དང་སྣ་ཚོགས་རྡོ་རྗེ་ལ་གནས་པའི་བྷཱུཾ་ཡིག་ལས་བྱུང་བའི་རྣམ་སྣང་རིག་མ་དང་བཅས་པའི་བདག་ཉིད་ཀྱི་གཞལ་ཡས་ཁང་ངོ༌། །སོ་སོའི་སྐྱེ་བོ་དང་དེ་བཞིན་གཤེགས་པའི་དེ་བཞིན་ཉིད་གཅིག་བ་ཉིད་ཀྱི་མཉམ་པའི་ཕྱིར་གྲུ་བཞིར་མཉམ་པའོ། །དྲན་པ་ཉེ་བར་གཞག་པར་དང་ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་བ་དང་དབང་པོ་རྣམ་པར་དག་
༄། །པས་སྒོ་བཞིའོ། །ལམ་ཡན་ལག་བརྒྱད་རྣམ་པར་དག་པས་ཀ་བ་བརྒྱད་ཀྱིས་མཛེས་པ། དཔའ་བར་འགྲོ་བ་དང་ནམ་མཁའ་མཛོད་དང་དྲི་མ་མེད་པའི་ཕྱག་རྒྱ་དང་སེར་གེ་རྣམ་པར་རོལ་པའི་ཏིང་ངེ་འཛིན་བཞིའི་རྣམ་པར་དག་པས་འདོད་ཡོན་གྱི་སྣམ་བུ་བཞིས་བསྐོར་བའོ། །བསམ་གཏན་བཞི་རྣམ་པར་དག་པས་རྟ་བབས་བཞིས་བརྒྱན་པའོ། །བྱང་ཆུབ་ཀྱི་ཡན་ལག་བདུན་རྣམ་པར་དག་པས་དྲ་བ་དྲ་ཕྱེད་དང་ཉི་ཟླ་དང་བ་དན་དང་མེ་ལོང་དང་རྡ་ཡབ་ཀྱིས་མཛེས་པའོ། །འདིར་བསྡུས་ནས་སངས་རྒྱས་ཀྱི་ཡོན་ཏན་དེ་དང་དེའི་རྣམ་པར་དག་པས་མཚན་ཉིད་དེ་དག་དང་ལྡན་པའོ། །དེའི་ལྟེ་བར་འཇིག་རྟེན་གྱི་ཆོས་བརྒྱད་ཀྱིས་མ་གོས་པའི་རྣམ་པར་དག་པས་པཾ་ཡིག་དམར་པོ་ལས་སྐྱེས་པའི་པདྨ་འདབ་མ་བརྒྱད་པའི་ཟེའུ་འབྲུལ་མ་རིག་པའི་མུན་པ་འཇོམས་པ་རྣམ་པར་དག་པས་ཉི་མའི་དཀྱིལ་འཁོར་ལ་ཉིས་འགྱུར་གྱི་ཨཱ་ལི་ཡོངས་སུ་གྱུར་པ་ལས་མེ་ལོང་ལྟ་བུའི་ཡེ་ཤེས་ཀྱི་རང་བཞིན་གྱི་ཟླ་བའི་དཀྱིལ་འཁོར་དང༌། ཌ་ཌྷ་ད་དྷ་ཡ་ལ་དང་བཅས་པའི་ཀཱ་ལི་ཉིས་འགྱུར་ཡོངས་སུ་གྱུར་པ་ལས་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་གྱི་ཉི་མའི་དཀྱིལ་འཁོར་གཉེས་བརྩེགས་པ་བདེ་བ་ཆེན་པོའི་ཁ་སྦྱོར་གྱི་དབུས་སུ་བཾ་ཡིག་དམར་པོ་ལས་སྐྱེས་པའི་རྡོ་རྗེའི་ལྟེ་བ་ལ་གནས་པའི་ཉི་མ་ལ་གནས་པའི་བཾ་གི་ས་བོན་སོ་སོར་རྟོག་པའི་ཡེ་ཤེས་ཀྱི་རང་བཞིན་ནོ། །དེ་ལས་བྱུང་བའི་འོད་ཟེར་ཕྱོགས་བཅུར་འཕྲོས་པས་བཅོམ་ལྡན་འདས་མའི་རྣམ་པས་སེམས་ཅན་གྱི་དོན་བྱས་ནས་ཡང་དེ་ཉིད་ལ་བསྡུས་ལ་བྱ་བ་གྲུབ་པའི་ཡེ་ཤེས་སོ། །དེ་ཐམས་ཅད་ཡོངས་སུ་གྱུར་པ་ལས་བདག་ཉིད་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་བཅོམ་ལྡན་འདས་མ་རྡོ་རྗེ་ཕག་མོའོ། །ཆགས་པ་ཆེན་པོ་རྣམ་པར་དག་པས་མེ་ཏོག་སེ་འབྲུ་ལྟ་དམར་པོའོ། །བདེན་པ་གཉིས་རྣམ་པར་དག་པས་ཕྱག་གཉིས་པའོ། །གཡས་སྡིགས་མཛུབ་དང་བཅས་ཏེ་གྱེན་དུ་བསྒྲེངས་པས་གདུག་པ་རྣམས་ལ་སྡིགས་པར་བྱེད་ཅིང་ཡེ་ཤེས་ལ་རོ་གཅིག་ཏུ་གྱུར་པ་རྣམ་པར་དག་པས་རྡོ་རྗེ་དམར་པོ་བསྣམས་པའོ། །ཐུར་དུ་རྩེ་གཅིག་པ་གྱེན་དུ་རྩེ་ལྔར་ཡོད་པ་ནག་པོ་ཡུ་བ་དང་བཅས་པ་སྐམ་པོ་དང་རློན་པའི་མགོ་བོ་དང༌། སྣ་
༄། །ཚོགས་རྡོ་རྗེ་དང་གསེར་གྱི་བུམ་པའི་རྩ་བ་ནས་འཐོན་པ། གཡེར་ཁའི་སྒྲ་དང་བཅས་པའི་སྣ་ཚོགས་ཀྱི་བ་དན་དང་ལྡན་པས་མཛེས་པའི་ཐབས་ཀྱི་རང་བཞིན་ཁ་ཊྭཱཾ་ག་དཀར་པོ་དཔུང་བའི་དྲུང་དུ་བརྟེན་པའོ། །བདེ་བ་ཆེན་པོ་དང་སྙིང་རྗེ་ཆེན་པོ་རོ་གཅིག་བའི་རང་བཞིན་རྣམ་པར་དག་པས་ཁྲག་གིས་གང་བའི་ཐོད་པ་བསྣམས་པ། ལོག་པའི་ལྟ་བ་རྣམ་པར་རྟོག་པ་སྤངས་པས་རྣམ་པར་འགྱུར་བའི་ཞལ་གཅིག་པ། བདུད་བཞི་རྣམ་པར་འཇོམས་པས་མཆེ་བ་གཅིགས་ཤིང་འཇིགས་སུ་རུང་བ་ལུས་དང་ངག་དང༌། ཡིད་ཀྱི་རྣམ་པར་དག་པས་སྙིང་རྗེའི་སྤྱན་དམར་པོ་གསུམ་པ་ཅན་གཉིས་སུ་མེད་པ་དེ་ཁོ་ན་ཉིད་ཀྱི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་རྣམ་པར་བསྟན་པའི་རྣམ་པར་དག་པས་སྐྲ་གྲོལ་བ། འཁོར་ལོ་དང་རྣ་རྒྱན་དང༌། མགུལ་རྒྱན་དང༌། ལག་གདུབ་དང༌། ཁ་ཊྭཱཾ་ག་དང༌། སྐེ་རགས་ཏེ་ཕྱག་རྒྱ་ལྔ་དང་ལྡན་པའོ། ཁ་ཅིག་ནི་མགུལ་རྒྱན་དང༌། རྣ་རྒྱན་དང༌། ལག་གདུབ་དང༌། སྤྱི་གཙུག་གི་འཁོར་ལོའི་རྒྱན་དང༌། ཚངས་སྐུད་དང༌། ཐལ་བ་སྟེ་ཕྱག་རྒྱ་དྲུག་ཏུ་རབ་ཏུ་གྲགས་ཞེས་བྱ་སྟེ། དཀྱིལ་འཁོར་གྱི་འདྲེན་པ་མོ་ཉིད་ཡིན་པའི་ཕྱིར་ཕྱག་རྒྱ་དྲུག་གིས་རྒྱས་བཏབ་པའོ་ཞེས་ཟེར་རོ། །ཕྱོགས་ཀྱི་གོས་ཅན་ལང་ཚོ་ལ་བབ་པ་ཉིད་ཀྱིས་གཞོན་ཤ་དང་བཅས་པ། ཨཱ་ལི་དང་ཀཱ་ལིའི་ཡི་གེ་ལྔ་བཅུའི་རང་བཞིན་རྒྱུ་མ་ལ་བརྒྱུས་པའི་མི་མགོ་རློན་པའི་ཕྲེང་བ་ཅན། འགྲོ་བ་ལ་སྟོད་པས་ཁྱབ་པར་མཚོན་པ་ཉིད་ཀྱིས་ཞབས་གཡོན་པ་བསྐུམ་པས་གཡས་མཐོ་ལྔར་བརྐྱང་བའི་སྟང་སྟབས་ཀྱིས་པདྨ་དམར་པོ་འདབ་མ་བརྒྱད་པའི་སྟེང་གི་ཉི་མ་ལ་རྟག་པ་དང་ཆད་པའི་རྟོག་པའི་རང་བཞིན་གྱི་འཇིགས་བྱེད་དང་དུས་མཚན་མ་མནན་པ། ཤིན་ཏུ་རྣམ་པར་དག་པའི་ཡེ་ཤེས་ཀྱི་སྣང་བ་ལྡན་པས་ཉི་མའི་འོད་ཀྱི་དཀྱིལ་འཁོར་ཅན། སྟོང་པ་ཉིད་ཀྱི་རང་བཞིན་གྱི་འགྲོ་བ་མི་དམིགས་པར་མཉམ་པས་གཟི་བརྗིད་ཆེན་པོ་དང་ལྡན་པ་ཟླ་མཚན་དང་ལྡན་པ་ཉིད་ཀྱིས་ཁྲག་འཛག་པ། ཁྲག་གི་ཐོད་པ་འབོ་བཞིན་པ་འཐུང་བ་ལ་ཆགས་པས་ཁྲག་ལ་དགྱེས་པའོ། །རྡོ་རྗེའི་ཕྲེང་བ་གཉིས་ཀྱི་དབུས་ན་དེ་བཞིན་གཤེགས་པ་ལྔའི་རང་བཞིན་གྱི་ཐོད་པའི་དུམ་བུའི་ཅོད་པན་བཅིངས་
༄། །བའོ། །འགྲོ་བའི་དོན་མཛད་པ་ཉིད་ཀྱིས་སྣ་ཚོགས་རྡོ་རྗེས་མཚན་པའི་ཐོར་ཚུགས་ཅན། འཇིག་རྟེན་གྱི་ཁམས་ཐམས་ཅད་བསྡུས་པས་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དང༌། ཉོན་མོངས་པ་ཅན་ གྱི་ཡིད་དང༌། ཀུན་གཞི་རྣམ་པར་ཤེས 
་པ་སྟེ། རྣམ་པར་ཤེས་པ་བརྒྱུད་བདག་མེད་པའི་རང་བཞིན་གྱིས་དུར་ཁྲོད་བརྒྱད་ཀྱི་དབུས་ན་བཞུགས་པར་བསྒོམ་པའོ། །གང་ལཱུ་ཡི་བའི་མངོན་པར་རྟོགས་པ་ལས་རྡོ་རྗེའི་གུར་ལ་སོགས་པ་སྲུང་བའི་ཕྱིར་རྗེས་ཐོབས་སུ་སྟོང་པ་བསྒོམ་པར་གསུངས་པ་གང་ཡིན་བདེ་ནི་དབང་པོ་རབ་ཀྱི་དབང་དུ་བྱས་པ་སྟེ། དེ་ལ་ནི་སྟོང་པ་ཁོ་ན་བསྲུངས་བའི་མཆོག་གོ །འདིར་ནི་སྐྱེ་བོ་ཐམས་ཅད་རྣམ་པར་སྡུད་པའི་ཆེད་དུ་སྟོང་པ་བསྒོམས་པའི་རྗེས་སུ་གྲུར་ལ་སོགས་པའི་སྲུང་བ་དང་ལྡན་པར་བསྟན་ཏེ། དེ་ནི་མངོན་པར་རྟོགས་པ་མང་པོ་ལས་གྲོ་རིམས་འདི་ལྟར་མཐོང་བའི་ཕྱིར་རོ། །ཤར་ལ་སོགས་པའི་འདབ་མ་བཞི་ལ་རིམ་པ་ཇི་ལྟ་བས་གཡོན་སྐོར་གྱིས་མཁའ་འགྲོ་མ་དང༌། ལཱ་མ་དང༌། ཁཎྜ་རོ་ཧཱ་དང༌། གཟུགས་ཅན་མ་རྣམས་སྐུ་མདོག་ནག་པོ་དང༌། ལྗང་གུ་དང༌། དམར་པོ་དང༌། སེར་པོ་རྣམས་སོ། །ཐམས་ཅད་ཀྱང་ཞལ་གཅིག་པ་ཕྱག་བཞི་པའོ། །གཡོན་གྱིས་ཁ་ཊྭཱཾ་ག་དང་ཐོད་པ་བསྣམས་པ། ཌ་མ་རུ་དང༌། གྲི་གུག་གཡས་ཀྱིས་བསྣམས་པ། སྤྱན་གསུམ་པ་ཞལ་མཆེ་བ་གཙིགས་པ་སྐྲ་གྲོལ་བ་གཙེར་བུ་གཡས་བརྐྱང་བ་གཡོན་བསྐུམ་པའི་སྟང་སྟབས་ཅན། ཕྱག་རྒྱ་ལྔ་དང་ལྡན་པ་མགོ་བོ་རློན་པའི་ཕྲེང་བ་དང་ལྡན་པ་རྡོ་རྗེའི་ཕྲེང་བས་དཔྲལ་བར་ནས་མཚན་པ། རྐེད་པ་གཡེར་ཁའི་སྒྲ་དང་བཅས་པ་ལ་སོགས་པས་བརྒྱན་པར་བསམ་མོ། །མེ་ལ་སོགས་པའི་མཚམས་ཀྱི་འདབ་མ་བཞི་ལ་གཡས་སྐོར་གྱིས་བྱང་ཆུབ་ཀྱི་སེམས་དང་ཁྲག་དང་བདུད་རྩི་ལྔ་དང་དངུལ་ཆུ་ལྟར་བདུད་རྩིར་གྱུར་པས་ཡོངས་སུ་གང་བའི་པདྨའི་སྣོད་བཞི་དགོད་དོ། །དེའི་ཕྱི་རོལ་དུ་རྡོ་རྗེ་སྔོན་པོའི་ཕྲེང་བས་བསྐོར་བ་དང་པོ་ཐུགས་ཀྱི་འཁོར་ལོ་སྔོན་པོ་རྩིབས་བརྒྱད་པའི་ཤར་དང༌། བྱང་དང༌། ནུབ་དང་ལྷོའི་རྩིབས་རྣམས་ལ་པུལླཱིའི་ར་མཱ་ལ་ཡང༌། ཛཱ་ལནྡྷ་ར་དང༌། ཨོ་ཌི་ཡ་ན་དང༌། ཨརྦུ་དའི་རང་བཞིན་གྱི་གནས་ལ་རབ་ཏུ་གཏུམ་མོ་དང༌། གཏུམ་
༄། །པའི་མིག་ཅན་མ་དང༌། འོད་ལྡན་མ་དང༌། སྣ་ཆེན་མའོ། །མེའི་མཚམས་དང༌། བདེན་བྲལ་དང༌། རླུང་གི་མཚམས་དང༌། དབང་ལྡན་ལ་གོ་དཱ་བ་རཱི་དང༌། རཱ་མེ་ཤྭ་ར་དང༌། དེ་བཱི་ཀོ་ཊ་དང༌། མཱ་ལ་བའི་བདག་ཉིད་ཀྱི་གནས་དང༌། ཉེ་བའི་གནས་ལ་དཔའ་བོའི་བློ་གྲོས་མ་དང༌། མིའུ་ཐུང་མ་དང༌། ལངྐའི་དབང་ཕྱུག་མ་དང༌། ཤིང་གྲིབ་མའོ། །པདྨའི་ཕྲེང་བ་དམར་པོས་བསྐོར་བའི་གཉིས་པ་གསུང་གི་འཁོར་ལོ་དམར་པོ་རྩིབས་བརྒྱད་པའི་ཤར་དང་བྱང་གི་རྩིབས་གཉིས་ལ་ཀཱ་མ་རཱུ་པ་དང༌། ཨོ་ཏྲའི་ཞིང་གཉིས་ལ་ཨཻ་རཱ་བ་ཏཱི་དང༌། འཇིགས་བྱེད་ཆེན་མོའོ། །ནུབ་དང་ལྷོའི་ཏྲི་ཤ་ཀུ་ནི་དང༌། ཀོ་ས་ལའི་བདག་ཉིད་ཀྱི་ཉེ་བའི་ཞིང་གཉིས་ལ་རླུང་གི་ཤུགས་ཅན་མ་དང་ཆང་འཐུང་མའོ། །མེ་དང་བདེན་བྲལ་གཉིས་ལ་ཀ་ལིངྒ་དང༌། ལཾ་པ་ཀ་སྟེ་ཚནྡོ་ཧ་གཉིས་ལ་ཤྱཱ་མ་དེ་བི་དང་ཤིན་ཏུ་བཟང་མོའོ། །རླུང་དང་དབང་ལྡན་དུ་ཀཱ་ཉྩི་དང་ཧི་མཱ་ལ་ཡ་སྟེ་ཉེ་བའི་ཚ་ནྡོ་ཧ་གཉིས་ལ་རྟ་རྣ་མ་དང་བྱ་གདོང་མའོ། །གསུམ་པ་སྐུའི་འཁོར་ལོ་དཀར་པོའི་རྩིབས་བརྒྱད་པ་འཁོར་ལོའི་ཕྲེང་བ་དཀར་པོས་བསྐོར་ཟཱི་ཤར་དང་བྱང་གི་རྩིབས་ལ་པྲེ་ཏ་པཱི་རི་དང་གྲྀ་ཧ་དེ་བ་ཏ་སྟེ་འདུ་བ་ཅན་གཉིས་ལ། འཁོར་ལོའི་ཤུགས་ཅན་མ་དང༌། དུ་མ་སྐྱེས་མའོ། །ནུབ་དང་ལྷོའི་སཽ་རཱ་ཥྚ་དང༌། སུ་ཝརྞྞ་ཌི་པ་སྟེ་ཉེ་བའི་འདུ་བ་ཅན་ལ། ཆང་འཚོང་མ་དང༌། འཁོར་ལོའི་གོ་ཆ་མའོ། །མེ་དང་བདེན་བྲལ་ལ་ནཱ་ག་ར་དང༌། སིནྡྷུ་སྟི་དུར་ཁྲོད་ལ་ཤིན་ཏུ་དཔའ་མོ་དང༌། སྟོབས་ཆེན་མོ་དང༌། རླུང་དང་ལྡན་དུ་མ་རུ་དང༌། ཀུ་ལ་ཏཱ་སྟེ་ཉེ་བའི་དུར་ཁྲོད་ལ་འཁོར་ལོས་སྒྱུར་མ་དང༌། བརྩོན་འགྲུས་ཆེན་མོའོ། །རབ་ཏུ་གཏུམ་མོ་ལ་སོགས་པའི་ལྷ་མོ་དེ་དག་ཞལ་གཅིག་ཕྱག་གཉིས་པའི་གཡོན་གྱིས་ཁྲག་གིས་བཀང་བའི་ཐོད་པ་དང༌། གཡས་སྡིགས་མཛུབ་དང་བཅས་པས་གདུག་པ་ཅན་ཚར་གཅོད་པའི་གྲི་གུག་པ་བསྣམས་པའོ། འདི་དག་གི་རྒྱན་ལ་སོགས་པའི་ཆ་ལུགས་གཞན་ནི་མཁའ་འགྲོ་མ་སོགས་པ་བཞིན་ནོ། །སྒོར་བཞི་ལ་ཁྭ་གདོང་མ་དང༌། འུག་གདོང་མ་དང་ཁྱི་གདོང་མ་དང༌། ཕག་གདོང་མ་རྣམས་ནི་མཁའ་འགྲོ་མ་ལ་སོགས་པ་བཞིན་ནོ། །འདི་རྣམས་ཀྱི་གདོང་ལ་ནི་མིང་དང་རྗེས་སུ་མཐུན་
༄། །པའོ། །མཚམས་བཞི་ལ་གཤིན་རྗེ་བརྟན་མ་དང༌། གཤིན་རྗེ་ཕོ་ཉ་མ་དང༌། གཤིན་རྗེ་མཆེ་བ་ཅན་མ་དང༌། གཤིན་རྗེ་འཇོམས་མ་སྟེ་མིའི་གདོང་པ་ཅན་ནོ། །གཡས་དང་ཅིག་ཤོས་ཀྱི་ཕྱོགས་ཀྱི་ལྷ་མོ་གཉིས་ཀྱི་སྐུའི་གཡས་དང་ཅིག་ཤོས་ཀྱི་ཕྱེད་ལྟ་བུར་སྐུ་ཕྱེད་པའོ། །བརྒྱད་ཅར་ཡང་རོའི་གདན་ལ་བཞུགས་པ་དང༌། ཆ་ལུགས་ལྷག་མ་རྣམས་མཁའ་འགྲོ་མ་ལ་སོགས་པ་ཁོ་ན་བཞིན་ནོ། །ལྷ་མོ་དེ་རྣམས་ཀྱང་བཅོམ་ལྡན་འདས་མ་གྲུབ་པ་དང་དུས་མཉམ་པ་ཁོ་ནར་སྐད་ཅིག་གིས་རྫོགས་པར་བལྟའོ། །དེ་ནས་གོ་ཆ་གཉིས་བྱས་ནས། །ཡེ་ཤེས་འཁོར་ལོ་བསྒོམ་པར་བྱ། །ཞེས་ལཱུའི་པས་གསུངས་པའི་སྲུང་པའི་གོ་ཆ་བགོ་བར་བྱ་སྟེ། བྷྲཱུཾ། ཧཱུཾ། ཁཾ། ཨཿ་ཧཱུཾ། ཧའི་ཡི་གེ་དག་གིས་སྐྱེ་མཆེད་དག་པར་བྱས་ནས་ཕག་མོ་དང༌། གཤིན་རྗེ་མ་དང༌། རྨོངས་བྱེད་མ་དང༌། བསྐྱོད་བྱེད་མ་དང༌། སྐྲག་བྱེད་མ་དང། གཏུམ་མོ་སྟེ་ལྷ་མོ་དྲུག་གི་སྔགས་ཀྱིས་རང་རང་གི་ལྷའི་ཁ་དོག་དང་མཚུངས་པའི་གོ་ཆ་བགོ་བར་བྱའོ། །ལྟེ་བ་ལ་ཨོཾ་བཾ། སྙིང་གར་ཧཾ་ཡོཾ། ཁ་ལ་ཧྲིཾ་མོཾ། མགོ་བོ་ལ། ཧྲེཾ་ཧྲིཾ། སྤྱི་གཙུག་ལ་ཧཱུཾ་ཧཱུཾ། ཡན་ལག་ཐམས་ཅད་ལ་མཚོན་ཆ་ཕཊ་ཕཊ། ཡང་ན་ལྷ་དང་སྔགས་དེ་དང་དེ་ལས་གྲུབ་པའི་གནས་དེ་དང་དེར་ལྷ་དེ་དག་ཁོ་ན་བསྒོམ་པར་བྱའོ། །དེ་ལ་ཕག་མོ་དམར་མོ་དང༌། སྔོན་མོ་དང༌། ལྗང་གུའི་ཞལ་ཅན། གཡོན་པ་ལ་ཁ་ཊྭཱཾ་ག་དང༌། ཐོད་པ་དང༌། ཞགས་པ་དང༌། གཡས་ཀྱིས་ལྕགས་ཀྱུ་དང༌། གྲི་གུག་དང་ཚངས་པའི་མགོ་བོ་བསྣམས་པ། གཤིན་རྗེ་མ་དང༌། རྨོངས་བྱེད་མ་དང༌། བསྐྱོད་བྱེད་མ་དང༌། སྐྲག་བྱེད་མ་དང༌། གཏུམ་མོ་རྣམས་ཀྱི་ཁ་དོག་ནི་སྔོན་མོ་དང༌། དཀར་མོ་དང༌། སེར་མོ་དང༌། ལྗང་གུ་དང༌། དུད་ཀ་སྟེ། ཕྱག་བཞིའི་གཡོན་གྱིས་ཐོད་པ་དང་བཅས་པའི་ཁ་ཊྭཱཾ་ག་དང༌། དྲིལ་བུ་བཟུང་བ་དང༌། གཡས་ཀྱིས་ཅང་ཏེའུ་དང་གྲི་གུག་བསྣམས་པ། ཐམས་ཅད་ཀྱང་སྐྲ་གྲོལ་བ་གཅེར་བུ་སྤྱན་གསུམ་པ་གཡོན་བསྐུམ་པ་གཡས་བརྐྱང་བའི་སྟང་སྟབས་ཀྱིས་བཞུགས་པར་བལྟའོ། །དེའི་རྗེས་ལ་དཔྲལ་བ་དང༌། མགྲིན་པ་དང༌། སྙིང་གར་ཨོཾ་ཨཱཿ་ཧཱུཾ་གི་ཡི་གེ་དཀར་པོ་དང༌།
༄། །དམར་པོ་དང་སྔོན་པོ་རྣམས་བསྒོམ་པར་བྱའོ། །དེ་ནས་སྙིང་གའི་དབུས་སུ་པདྨ་དམར་པོ་འདབ་མ་བརྒྱད་པ་ལ་གནས་པའི་ཉི་མའི་དཀྱིལ་འཁོར་གྱི་སྟེང་དུ་རྡོ་རྗེ་དམར་པོའི་ལྟེ་བ་ལ་ཉི་མའི་དཀྱིལ་འཁོར་ལ་གནས་པའི་ས་བོན་བཾ་གྱི་འོད་ཟེར་གྱིས་ཕྱོགས་བཅུ་ན་བཞུགས་པའི་དབང་ཕྱུག་གི་དཔའ་མོ་རྣམས་སུ་བསྡུས་པའི་ཡེ་ཤེས་ཀྱི་འཁོར་ལོའི་གཟུགས་ཛཿཞེས་པས་སྤྱན་དྲངས་ལ་པི་ཝང་མ་ལ་སོགས་པའི་ལྷ་མོ་བཅུ་དྲུག་གིས་མཆོད་ཡོན་ལ་སོགས་པ་སྔོན་དུ་འགྲོ་བས་མཆོད་ལ། ཕེཾ་ཡིག་བརྗོད་པ་སྔོན་དུ་འགྲོ་བས་དྲ་བའི་ཕྱག་རྒྱ་བཅིངས་ནས་དཔྲལ་བའི་དབུས་སུ་གཡོན་སྐོར་གྱིས་བསྐོར་ཞིང༌། ཧཱུཾ་ཡིག་གིས་རང་དམ་ཚིག་གི་འཁོར་ལོ་ལ་ཆུ་ལ་ཆུ་ཐིམ་པ་ལྟར་གཞུག་པར་བྱ་སྟེ། པཾ་ཡིག་གིས་བཅིངས་ལ་ཧོཿཡིག་གིས་དགྱེས་པར་བྱའོ། །ཨོཾ་ཡོ་ག་ཤུདྡྷཿསརྦྦ་དྷརྨཱ་ཡོ་ག་ཤུདྡྷོ྅ཧཾ། ཞེས་བརྗོད་ལ། ཡེ་ཤེས་འཁོར་ལོ་དང་དུས་མཉམ་པར་སྤྱན་དྲངས་པའི་རྣམ་པར་རོལ་པའི་རྡོ་རྗེ་མ་རྣམས་ཀྱིས་ཡེ་ཤེས་ཀྱི་བདུད་རྩིས་བཀང་བའི་ཐོད་པ་དང་ཌ་མ་རུ་བསྣམས་པ་ལ། སྙིང་གའི་ས་བོན་ལས་བྱུང་བའི་པི་ཝང་མ་ལ་སོགས་པའི་ལྷ་མོ་རྣམས་ཀྱིས་མཆོད་པར་བྱ་སྟེ། ཇི་ལྟར་བལྟམས་པ་ཙམ་གྱིས་ནི།། དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་བྱའོ། །ཞེས་པས་དེ་རྣམས་ཀྱི་གཡོན་པའི་ཐོད་པ་ཅུང་ཟད་ཡོ་བ་ལས་བྱུང་བའི་ཡེ་ཤེས་ཀྱི་བདུད་རྩིའི་རྒྱུན་གྱིས་བཀྲུས་པས་རང་ཉིད་བདེ་བ་ཆེན་པོའི་རང་བཞིན་དུ་བསམ་མོ། །ཆུ་ལྷག་མ་ལས་གྲུབ་པའི་དེ་བཞིན་གཤེགས་པ་མགོ་བོ་ལ་རྣམ་པར་བསམས་ལ། ཨོཾ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་ཞེས་བྱ་བས་བྱིན་གྱིས་བརླབ་པོ། །དེ་ལ་བཅོམ་ལྡན་འདས་མའི་སྤྱི་བོ་ལ་རིགས་ཀྱི་བདག་པོ་སངས་རྒྱས་རྣམ་པར་སྣང་མཛད་དོ། །མཁའ་འགྲོ་མ་ལ་སོགས་པ་རྣམས་ཀྱི་རིན་ཆེན་འབྱུང་ལྡན་ནོ། །ཐུགས་དང་གསུང་དང་སྐུའི་འཁོར་ལོ་ལ་བཞུགས་པ་རྣམས་ལ་རིམ་པ་ཇི་ལྟ་བར་མི་བསྐྱོད་པ་དང༌། སྣང་བ་མཐའ་ཡས་དང༌། རྟག་པའོ། །དམ་ཚིག་གི་འཁོར་ལོ་ལ་གནས་པ་རྣམས་ཀྱི་ནི་དོན་ཡོད་གྲུབ་པའོ། །དེ་ནས་བདུད་
༄། །རྩི་མྱང་བར་བྱ་སྟེ། ཡཾ་ཡིག་ལས་རླུང་གི་དཀྱིལ་འཁོར། དེའི་སྟེང་དུ་རཾ་ཡིག་ལས་སྐྱེས་པའི་མེའི་དཀྱིལ་འཁོར། དེའི་སྟེང་དུ་ཨཱཿ་ཡིག་དཀར་པོ་ལས་སྐྱེས་པའི་པདྨའི་སྣོད་དཀར་པོ། མགོ་བོ་གསུམ་ལས་བྱས་པའི་སྦྱེད་པོ་གསུམ་ལ་གནས་པ་ལ། ཨོཾ་ཏྲཾ་ཨཾ་ཁཾ་ཧཱུཾ། ལཱཾ། མཱཾ། པཱཾ། ཏཱཾ། བཱཾ། ལས་སྐྱེས་པ་དེས་བྱིན་གྱིས་བརླབས་པའི་བདུད་རྩི་ལྔ་དང་སྒྲོན་མ་ལྔ་རྫོགས་པར་བྱས་ལ། རླུང་གིས་བསྐུལ་བའི་མེ་འབར་བའི་དྲོད་ཀྱིས་ས་བོན་གྱི་ཡི་གེ་ལ་སོགས་པ་ཞུ་བས་ཉི་མ་འཆར་བའི་ཁ་དོག་ལྟ་བུའི་ཁུ་བར་བལྟས་ལ། སྟེང་དུ་མཐོ་གང་པའི་ཚད་ལ་ཧཱུཾ་དཀར་པོ་ལས་སྐྱེས་པའི་ཁ་ཊྭཱཾ་ག་མགོ་ཐུར་ལ་བསྟན་པ་དཀར་པོ་བདུད་རྩིའི་རང་བཞིན་ལ་རློངས་པ་རེག་པས་ཞུ་བ་ནང་དུ་བབ་པས་ཁུ་བ་དེ་དངུལ་ཆུའི་ཁ་དོག་ལྟར་བསིལ་བར་རྣམ་པར་བསམ་མོ། །ཡང་དེའི་སྟེང་དུ་ཡི་གེ་གསུམ་གོང་ནས་གོང་དུ་བལྟས་ནས་དེའི་འོད་ཟེར་གྱིས་ཁམས་གསུམ་ན་གནས་པའི་བདུད་རྩི་ཐམས་ཅད་དང་བཅས་ཏེ། དེ་བཞིན་གཤེགས་པ་མ་ལུས་པའི་ཐུགས་ཀ་ན་གནས་པའི་ཡེ་ཤེས་ཀྱི་བདུད་རྩི་བཀུག་ནས་དེ་ཉིད་ལ་བསྟིམ་པ་དང༌། ཡི་གེ་གསུམ་ཡང་རིམ་པས་ཞུ་བར་གྱུར་ཏེ་ཡང་ཡི་གེ་གསུམ་གྱིས་ཀྱང་བྱིན་གྱིས་བརླབས་པ་དང༌། རང་དང་དཀྱིལ་འཁོར་གྱི་ལྷ་མོ་རྣམས་ཀྱི་ལྗགས་ལ་ཧཱུཾ་དཀར་པོ་ལས་སྐྱེས་པའི་རྡོ་རྗེ་དཀར་པོ་ནས་ཀྱི་ཚད་ཙམ་གྱི་འོད་ཟེར་སྦུ་གུ་ཅན་གྱིས་ཚིམ་པར་བསམ་མོ། །དེ་ནས་འཆད་པར་འགྱུར་བའི་མཆོད་པའི་སྔགས་རྐང་པ་བརྒྱད་པས་བསྟོད་པར་བྱའོ། །གལ་ཏེ་དེ་ཙམ་གྱིས་དཀྱིལ་འཁོར་གྱི་འཁོར་ལོ་ཆེན་པོ་ལ་ཡུན་རིང་པོར་བརྟན་པར་བྱེད་མི་ནུས་ན། དེའི་ཚེ་པདྨའི་ལྟེ་བར་གནས་པ་ཉི་མ་དང༌། ཟླ་བ་ཁ་སྦྱོར་གྱི་དབུས་སུ་ཁཾ་གིས་བོན་ལས་བྱུང་བའི་འོད་ཟེར་རིང་པོ་པདྨའི་སྲད་བུ་ལྟ་བུ་ལ་སེམས་བརྟན་པར་བྱས་པའི་སྒོ་ནས་རྩ་གཉིས་ལ། སྲོག་རླུང་གི་རྒྱུ་བ་ཡོངས་སུ་བྲལ་བས་དབུས་སུ་ཞུགས་ནས་གཏུམ་མོ་འབར་བས་སྤྱི་བོའི་ཟླ་བ་ཞུ་བ་ལས། རིམ་གྱིས་འཁོར་ལོ་ལ་ཁྱབ་པས་དགའ་བ་ལ་སོགས་པ་རྣམས་ཀྱི་དབྱེ་བས་ལྷན་ཅིག་སྐྱེས་པའི་དགའ་བ་ནས་བྱུང་ནས་རྣམ་པར་རྟོག་པ་ཐམས་ཅད་དང་བྲལ་བས་ཅིག་ཅར་དཀྱིལ་འཁོར་གྱི་
༄། །འཁོར་ལོ་སྟོང་པར་བསྡུས་ཏེ་མི་དམིགས་པར་བསམ་མོ། །ཡང་ན་རིམ་གྱིས་ཏེ་དེའི་རིམ་པ་ནི་འདི་ཡིན་ཏེ། འགྲོ་བ་རྣམས་དུར་ཁྲོད་ལའོ། །དུར་ཁྲོད་ཕྱིའི་གཞལ་ཡས་ཁང་ལའོ། །གཞལ་ཡས་ཁང་དམ་ཚིག་གི་འཁོར་ལོ་ལའོ། །ཕྱིའི་འཁོར་ལོ་སྐུའི་འཁོར་ལོ་ལའོ། །སྐུའི་འཁོར་ལོ་གསུང་གི་འཁོར་ལོ་ལའོ། །གསུང་གི་འཁོར་ལོ་ཐུགས་ཀྱི་འཁོར་ལོ་ལའོ། །ཐུགས་ཀྱི་འཁོར་ལོ་ནི་ཕྱོགས་ལ་གནས་པ་མཁའ་འགྲོ་མ་ལ་སོགས་པ་ལའོ། །ཕྱོགས་དང་བྲལ་བ་ལ་གནས་པ་ནི་གཟུགས་ཅན་མ་ལ་སོགས་པ་ལའོ། །མཁའ་འགྲོ་མ་ལ་སོགས་པ་ཡང་བདེ་བ་ཆེན་པོའི་འཁོར་ལོ་ལ་བཞུགས་པའི་བཅོམ་ལྡན་འདས་མའི་གདན་ལའོ། །བཅོམ་ལྡན་འདས་མའི་གདན་ཆུ་སྐྱེས་ནི་ཉི་མ་ལའོ། །ཉི་མ་འཇིགས་བྱེད་ལའོ། །འཇིགས་བྱེད་དུས་མཚན་མ་ལའོ། །དུས་མཚན་མ་ཁ་ཊྭཱཾ་ག་ལའོ། །ཁ་ཊྭཱཾ་ག་བཅོམ་ལྡན་འདས་མ་ལའོ། །བཅོམ་ལྡན་འདས་མ་ལྟེ་བའི་པདྨ་ལའོ། །པདྨ་ཉི་མ་དང་ཟླ་བའི་ཁ་སྦྱོར་ལའོ། །ཁ་སྦྱོར་ནི་བཾ་གི་ཡི་གེ་ལའོ། །བཾ་ཡིག་ཟླ་བ་ཕྱེད་པ་ལའོ། །ཟླ་བ་ཕྱེད་པ་ཐིག་ལེ་ལའོ། །ཐིག་ལེ་ནཱ་ད་ལ་ཐིམ་པར་བསམས་ཏེ། དེ་ཡང་སྐྲའི་རྩེ་མོ་སྟོང་ཕྲག་བརྒྱར་གཤེགས་པའི་གཟུགས་སུ་བལྟ་བར་བྱའོ། །རབ་ཀྱིས་དེ་ཡང་མི་དམིགས་སོ། །དེ་ལྟར་ཡེ་ཤེས་འཁོར་ལོའི་རང་བཞིན་བཅོམ་ལྡན་འདས་མ་ཡང་འོད་གསལ་བའི་རང་བཞིན་ལ་གཞུག་གོ །དེ་ལྟར་ཡང་དང་ཡང་དུ་གཞུག་པ་དང་ལྡང་བར་བྱའོ། །ཇི་ལྟར་མེ་ལོང་དབུགས་ཀྱི་རླུང༌། ཐམས་ཅད་ཐིམ་པར་འགྱུར་བ་བཞིན། །ཡང་དག་མཐའ་རུ་རྣལ་འབྱོར་པས། །ཡང་དང་ཡང་དུ་གཞུག་པར་བྱ། །ཞེས་བྱ་བས་ཡང་དང་ཡང་དུ་གཞུག་པ་དང་ལྡན་པས་བདེན་པ་གཉིས་དབྱེར་མེད་ཅིང་ཟུང་དུ་འཇུག་པའི་ཏིང་ངེ་འཛིན་རྣལ་འབྱོར་པས་མངོན་དུ་བྱེད་དོ། །སྐྱོ་བར་གྱུར་ན་ལྟེ་བའི་མཚོ་སྐྱེས་ལ་གནས་པའི་བཾ་གྱིས་བོན་ལ་སེམས་གཏད་ལ་འཆད་པར་འགྱུར་བའི་སྙིང་པོ་དང་ཉེ་བའི་སྙིང་པོ་གང་ཡང་རུང་བ་ཇི་ལྟར་བརྗོད་པར་འདོད་པ་དང་དུས་མཚུངས་པ་ཉིད་རུ་ས་བོན་གྱི་ནཱ་ད་ལས་ཕྱིར་བྱུང་བའི་རླུང་དང་ལྷན་
༄། །ཅིག་འཁོར་ལོ་རྣམ་པ་ལྔས་སྤྲོས་པས། འགྲོ་བའི་དོན་བྱས་ནས། རླུང་གཉིས་འཇུག་པའི་ཚེ་ཕྲེང་བ་བཀུག་པའི་ཚུལ་དུ་སྔགས་དང་ལྷན་ཅིག་དེ་ཁོ་ན་ཉིད་ལ་གཞུག་པར་བྱའོ། །འཆད་པར་འགྱུར་བའི་ལྷ་མོ་སོ་སོའི་སྔགས་བཟླས་པར་འདོད་ན་ལྷ་མོ་སོ་སོའི་སྔགས་བཟླས་པ་རྫོགས་ནས་སྤྲོ་བ་དང་བསྡུ་བ་སྔར་བཞིན་བྱའོ། །ཡང་དེ་ཁོ་ན་ལས་སྔར་བཞིན་བླངས་ཏེ་ཀུན་འདས་མའི་ལམ་ལས་རང་གི་ཁར་འཐོན་ཏེ་པདྨ་ནས་རང་གི་གནས་སུ་སོང་བས་དེ་བཞིན་དུ་འཁོར་བའི་ཡི་གེའི་ཕྲེང་བ་བསྒོམ་ཞིང་འཆད་པར་འགྱུར་བའི་ཕྲེང་བའི་སྔགས་སམ། སྙིང་པོ་དང་ཉེ་བའི་སྙིང་པོ་གང་ཡང་རུང་བ་བཟླས་པར་བྱའོ། །ཡང་ནས་བོན་དེ་ཉིད་ལ་ཡོངས་སུ་བསྐོར་བའི་སྔགས་ཀྱི་ཕྲེང་བ་མར་མེའི་ཕྲེང་བ་ལྟར་གནས་པ་ལ་བལྟས་ཏེ་ཧ་ཅང་མགྱོགས་པ་དང་བུལ་བ་མ་ཡིན་པས་རྟོག་པ་ངན་པ་ཐམས་ཅད་སྤངས་ཏེ་བཟླས་པ་བྱའོ། །ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། བཅོམ་ལྡན་འདས་མའི་ཐུགས་ཀྱི་སྙིང་པོའོ། །ཨོཾ་བཛྲ་བཻ་རོ་ཙ་ནཱི་ཡེ་སྭཱ་ཧཱ། འདི་ཡང་ཐུགས་ཀྱི་སྙིང་པོའོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོའོ། །སྔགས་འདི་དག་ནི་མཐུ་ཆེན་པོ་དང་ལྡན་པ་ཡིན་ནོ། །ཨོཾ་ན་མོ་བྷ་ག་བ་ཏི་བཛྲ་བཱ་རཱ་ཧི་བཾ་ཧཱུཾ་ཧཱུཾ་ཕཊ། ཨོཾ་ན་མཿ་ཨཱ་ཪྻ་ཨ་པ་རཱ་ཛི་ཏེ་ཏྲཻ་ལོ་ཀྱ་མཱ་ཏེ་མ་ཧཱ་བི་དྱེ་ཤྭ་རི་ཧཱུཾ་ཧཱུཾ་ཕཊ། ཨོཾ་ན་མཿསརྦྦ་བྷཱུ་ཏ་བྷ་ཡ་ཨ་པ་ཧེ་མ་ཧཱ་བཛྲེ་ཧཱུཾ་ཧཱུཾ་ཕཊ། ཨོཾ་ན་མོ་བཛྲཱ་ས་ནེ་ཨ་ཛི་ཏེ་ཨ་པ་རཱ་ཛི་ཏེ་བ་ཤྱཾ་ཀ་རི་ཎེ་ཏྲ་བྷྲཱ་མ་ཎི་ཧུཾ་ཧཱུཾ་ཕཊ། ཨོཾ་ན་མོ་བི་ཥ་ནི་ཤོ་ཥ་ནི་རོ་ཥ་ཎི་ཀྲོ་དྷ་ཀ་རཱ་ལི་ནི་ཧུཾ་ཧཱུཾ་ཕཊ། ཨོཾ་ན་མ་ཤཱ་ས་ནི་མཱ་ར་ཎི་བྲ་བྷེ་ད་ནི་ཨ་བྲ་བྷེ་ད་ནི་ཨ་པ་རཱ་ཛ་ཡེ་ཧུཾ་ཧཱུཾ་ཕཊ། ཨོཾ་ན་མོ་དཡེ་བི་ཛ་ཡེ་ཛ་མྦྷ་ནི་སྟམྦྷ་ནི་མོ་ཧ་ནི་ཧུཾ་ཧཱུཾ་ཕཊ། ཨོཾ་ན་མོ་བཛྲ་བཱ་རཱ་ཧི་མ་ཧཱ་ཡོ་གི་ནཱི་ཀཱ་མེ་ཤྭ་རི་ཁ་གེ་ཧུཾ་ཧཱུཾ་ཕཊ། འདི་ནི་བཅོམ་ལྡན་འདས་མའི་མཆོད་པའི་སྔགས་རྐང་པ་བརྒྱད་པའོ། །དེ་ནས་ཕྲེང་བའི་སྔགས་ནི། ཨོཾ་བཛྲ་བཱ་རཱ་ཧི་པྲོ་ཏཾ་གེ་ཧ་ན་ཧ་ན་པྲཱ་ཎཱཾ། ཀིཾ་ཀི་ནི། ཁིཾ་ཁི་ནི་དྷུ་ན་དྷུ་ན་བཛྲ་ཧ་སྟེ་ཤོ་ཥ་ཡ་ཤོ་ཥ་ཡ་བཛྲ་ཁ་ཊྭཱཾ་ག་ཀ་པཱ་ལ་དྷཱ་རི་ཎི་མ་ཧཱ་པི་ཤི་ཏ་མཱཾ་ས་ཨ་ཤ་ནི་མ་ནུ་ཥ་ཨནྟྲ་པྲཱ་བྲྀ་ཏེ་ས་ནྣི་དྷྱཾ་ན་ར་ཤི་རོ་མཱ་
༄། །ལཱ་གྲཾ་ཐི་ཏ་དྷཱ་རི་ཎི་སུཾ་བྷ་ནི་སུཾ་བྷེ་ཧ་ན་ཧ་ན་པྲཱ་ཎཱ་ན་སརྦ་པཱ་པཾ་སཏྭཱ་ནཱཾ་སརྦ་པ་ཤཱུ་ནཱཾ་མ་ཧཱ་མཱཾ་སཙྪེ་ད་ནི་ཀྲོ་དྷ་མཱུ་ར་ཏི་དཾ་ཥྚཱ་ཀ་རཱ་ལི་ནི་མ་ཧཱ་མུ་དྲེ་ཤྲཱི་ཧེ་རུ་ཀ་དེ་བ་སྱ་ཨ་གྲ་མ་ཧི་ཥི་ས་ཧ་སྲ་ཤི་རེ་ས་ཧ་སྲ་བཱ་ཏ་བེ་ཤ་ཏ་ས་ཧ་སྲཱ་ན་ནེ། ཛྭ་ལི་ཏ་ཏེ་ཛ་སེ་ཛྭ་ལ་མུ་ཁི་པིང་ག་ལ་ལོ་ཙ་ནེ་བཛྲ་ཤ་རཱི་རེ་བཛྲ་ཨཱ་ས་ནེ་མི་ལི་མི་ལི། ཏི་མི་ལི་ཏི་མི་ལི། ཧེ་ཧེ་ཧ་ཧ། ཧཱུཾ་ཧཱུཾ། ཁ་ཁ། དྷུ་དྷུ་རུ་རུ། དྷུ་རུ་དྷུ་རུ། མུ་རུ་མུ་རུ། ཨ་དྭཻ་ཏེ་མ་ཧཱ་ཡོ་གི་ནི་པ་ཐི་ཧ་སིདྡྷེ་དྲཻཾ་དྷཾ་དྲཻཾ་དྷཾ། གྲཾ་གྲཾ། ཧེ་ཧེ་ཧ་ཧ། བྷཱི་མེ་ཧ་ས་ཧ་ས། བཱི་རེ་ཧཱ་ཧཱ་ཧོ་ཧོ། །ཧཱུཾ་ཧཱུཾ་ཏྲཻ་ལོ་ཀྱ་བི་ནཱ་ཤ་ཏ་ས་ཧ་སྲ་ཀོ་ཏི་ཏ་ཐཱ་ག་ཏ་པ་རི་བཱ་རེ་ཧཱུཾ་ཧཱུཾ་ཕཊ་སིཾ་ཧ་རཱུ་པེ་ཁཿ་ག་ཛ་རཱུ་པེ་གཿ་ཏྲཻ་ལོ་ཀྱ་ད་རི་མ་ཧཱ་ས་མུ་དྲ་མེ་ཁ་ལེ་གྲ་ས་གྲ་ས་ཧཱུཾ་ཧཱུཾ་ཕཊ། བཱི་ར་དྭཻ་ཏེ་ཧཱུཾ་ཧཱུཾ། ཧཱ་ཧཱ་མ་ཧཱ་པ་ཤུ་མོ་ཧ་ནི་ཡོ་གཱི་ཤྭ་རི་ཏྭཾ་ཌཱ་ཀི་ནཱི་ལོ་ཀཱ་ནཱཾ་བནྡྷ་ནི་སདྱ་པྲ་ཧྱ་ཡ་ཀཱ་རི་ཎི་ཧཱུཾ་ཧཱུཾ་ཕཊ། བྷཱུ་ཏ་ཏྲཱ་ས་ནི་མ་ཧཱ་བཱི་རེ་པ་ར་མ་སིདྡྷེ་ཡོ་གཱི་ཤྭ་རི་ཕཊ་ཧཱུཾ་ཧཱུཾ་ཕཊ་སྭཱ་ཧཱ། སྔགས་འདི་ནི་ནུས་མཐུ་ཆེན་པོ་སྟེ་བཟླས་པ་ཙམ་གྱིས་འགྲུབ་པར་འགྱུར་རོ། །ཟླ་བ་གཟས་བཟུང་བའམ་ཉི་མ་གཟས་བཟུང་བའི་དུས་སུ་གཟས་མ་ཐོང་པར་བཟླས་པར་བྱ་བ་ནི་ཇི་སྲིད་མ་གྲོལ་གྱི་བར་དུའོ། །དེ་ནས་ཇི་སྲིད་བཟླས་པ་བྱས་པ་དེ་སྲིད་དུ་བུད་མེད་སྟོང་ཕྲག་གཅིག་གིས་རྟེས་སུ་བསྟེན་པར་འགྱུར་རོ། །བསྒོམ་པ་སྔོན་དུ་འགྲོ་བས་ཅིག་ཅར་བརྗོད་པ་ཙམ་གྱིས་འགུགས་པར་འགྱུར་རོ། །ཁྲོ་བའི་སེམས་ཀྱིས་གསོད་པར་བྱེད་དོ། །བསྐྲད་པ་དང་དབྱེ་བ་དང་རེངས་པར་ཡང་བྱེད་དོ། །མེ་ཏོག་ལ་ལན་གཅིག་བཟླས་ནས་ནམ་མཁའ་ལ་གཏོར་ན་ཚངས་པ་ལ་སོགས་པ་གཞན་ལ་སྟོན་པར་ནུས་སོ། །དུར་ཁྲོད་ཀྱི་སོལ་བ་ལ་ལན་གཅིག་བཟླས་ནས་ཁྱིམ་མ་མ་གྲོང་ཁྱེར་ལ་བྲབས་ན་མེ་འབར་བར་མཐོང་བར་འགྱུར་རོ། །རྨ་བྱའི་སྒྲོ་ལ་ལན་གཅིག་བཟླས་ནས་ནམ་མཁའ་ལ་བསྐོར་བས་ཡང་ཞི་བར་འགྱུར་རོ།། གྱོ་མོ་ལ་ལན་གཅིག་བཟླས་པས་སྡེ་ཚན་རྟ་གླང་གྲུ་དམག་བཞིའི་ཡན་ལག་སྟོན་ནོ། །རྨ་བྱའི་མདོངས་བཟློག་ནས་བསྐོར་བས་མི་སྣང་བར་འགྱུར་རོ། །དེ་ལྟ་བུ་ལ་སོགས་པ་འདིའི་ནུས་པའི་བྱེ་བྲག་གཞན་དུ་གསུངས་སོ། །ཨོཾ་ཌཱ་ཀི་ནཱི་ཡེ་ཧཱུཾ་ཧཱུཾ་ཕཊ། མཁའ་འགྲོ་
༄། །མའིའོ། །ཨོཾ་ལཱ་མེ་ཧཱུཾ་ཧཱུཾ་ཕཊ། ལཱ་མ་ཡིའོ། །ཨོཾ་ཁཎྡ་རོ་ཧེ་ཧཱུཾ་ཧཱུཾ་ཕཊ། དུ་མ་སྐྱེས་མའིའོ། །སྔགས་འདི་ནི་ལས་ཐམས་ཅད་ཀྱིའོ། །ཨོཾ་རཱི་པི་ཎཱི་ཡེ་ཧུཾ་ཧཱུཾ་ཕཊ། གཟུགས་ཅན་མའིའོ། །དེ་ནས་རབ་ཏུ་གཏུམ་མོ་ལ་སོགས་པའི་སྔགས་ནི་འདི་ཡིན་ནོ། །ཨོཾ་པྲ་ཙ་ཎྜེ་ཧུཾ་ཧཱུཾ་ཕཊ། ཨོཾ་མ་ཧཱ་ནཱ་སེ་ཧུཾ་ཧཱུཾ་ཕཊ། ཨོཾ་བཱི་ར་མ་ཏཱི་ཡེ་ཧུཾ་ཧཱུཾ་ཕཊ། ཨོཾ་ཁརྦ་རཱི་ཡེ་ཧུཾ་ཧཱུཾ་ཕཊ། ཨོཾ་ལང་ཀེ་ཤྭ་རཱི་ཡེ་ཧུཾ་ཧཱུཾ་ཕཊ། ཨོཾ་དྲུ་མ་ཙྪེ་ཡེ་ཧུཾ་ཧཱུཾ་ཕཊ། ཨོཾ་ཨཻ་རཱ་བ་ཏཱི་ཡེ་ཧུཾ་ཧཱུཾ་ཕཊ། ཨོཾ་མ་ཧཱ་བྷཻ་ར་བི་ཡེ་ཧུཾ་ཧཱུཾ་ཕཊ། ཨོཾ་བཱ་ཡུ་བེ་གེ་ཧུཾ་ཧཱུཾ་ཕཊ། ཨོཾ་སུ་ར་བྷ་ཀྵཱི་ཡེ་ཧུཾ་ཧཱུཾ་ཕཊ། ཨོཾ་ཤྱ་མ་དེ་བཱི་ཡེ་ཧུཾ་ཧཱུཾ་ཕཊ། ཨོཾ་སུ་བྷ་དྲེ་ཧུཾ་ཧཱུཾ་ཕཊ། ཨོཾ་ཧ་ཡ་ཀ་རྞྞེ་ཧུཾ་ཧཱུཾ་ཕཊ། ཨོཾ་ཁ་གཱ་ན་ནེ་ཧུཾ་ཧཱུཾ་ཕཊ། ཨོཾ་ཙཀྲཱ་གེ་ཧུཾ་ཧཱུཾ་ཕཊ། ཨོཾ་ཁ་ཎྜ་རོ་ཧེ་ཧུཾ་ཧཱུཾ་ཕཊ། ཨོཾ་ཤཽཎྜི་ནཱི་ཡེ་ཧུཾ་ཧཱུཾ་ཕཊ། ཨོཾ་ཙཀྲཱ་བ་རྨི་ཎཱི་ཡེ་ཧུཾ་ཧཱུཾ་ཕཊ། ཨོཾ་སུ་བཱི་རེ་ཧུཾ་ཧཱུཾ་ཕཊ། ཨོཾ་མ་ཧཱ་བ་ལི་ཧུཾ་ཧཱུཾ་ཕཊ། ཨོཾ་ཙཀྲཱ་བརྟྟི་ནི་ཡེ་ཧུཾ་ཧཱུཾ་ཕཊ། ཨོཾ་མ་ཧཱ་བཱི་ཪྻེ་ཧུཾ་ཧཱུཾ་ཕཊ། ཨོཾ་ཀ་ཀཱ་སྱེ་ཧུཾ་ཧཱུཾ་ཕཊ། ཨོཾ་ཨུ་ལུ་ཀཱ་སྱེ་ཧུཾ་ཧཱུཾ་ཕཊ། ཨོཾ་ཤྭ་ནཱ་སྱེ་ཧུཾ་ཧཱུཾ་ཕཊ། ཨོཾ་སཱུ་ཀཱ་རཱ་སྐྱེ་ཧུཾ་ཧཱུཾ་ཕཊ། ཨོཾ་ཡ་མ་དཱ་ཌྷཱི་ཡེ་ཧུཾ་ཧཱུཾ་ཕཊ། ཨོཾ་ཡ་མ་དྷཱུ་ཏཱི་ཡེ་ཧུཾ་ཧཱུཾ་ཕཊ། ཨོཾ་ཡ་མ་དམ་ཥྚྭི་ཎཱི་ཡེ་ཧུཾ་ཧཱུཾ་ཕཊ། ཨོཾ་ཡ་མ་མ་ཐཱ་ནི་ཡེ་ཧུཾ་ཧཱུཾ་ཕཊ། འདི་ལྟར་རེ་ཞིག་ལཱུ་ཡི་པའི་མངོན་པར་རྟོགས་པའི་རིམ་པ་རྒྱས་པར་ལྷ་མོ་སུམ་ཅུ་རྩ་བདུན་གྱི་བདག་ཉིད་ཀྱི་བཅོམ་ལྡན་འདས་མའི་དཀྱིལ་འཁོར་ལོ་དེ་ཁོ་ན་ལས་དཀྱིལ་འཁོར་བྱེ་བའི་བྱེ་བྲག་གཞན་བདག་གི་བླ་མས་རྡོ་རྗེ་ཕྲེང་བ་ལས་གསུངས་པ་བྲི་བར་བྱ་བ་ནི་འདྲེན་པ་མོ་ལ་སོགས་པ་ཐམས་ཅད་ཀྱང་ཕྱག་གཉིས་མཁའ་འགྲོ་མ་ལ་སོགས་པ་དང༌། ཁྭ་གདོང་མ་ལ་སོགས་པ་རྣམས་ཀྱང་གཡོན་ན་ཐོད་པ་དང་མཆན་ཁུང་ལ་རྟེན་པའི་ཁ་ཊྭཱཾ་ག་བསྣམས་པ། གཡས་ཀྱིས་ཌ་མ་རུ་བསྣམས་པ། གཞན་ཐམས་ཅད་སྔར་བཞིན་ནོ། །ཡང་ན་བཅོམ་ལྡན་འདས་མ་སྐུ་མདོག་སེར་མོའམ་སྔོན་མོ་མཁའ་འགྲོ་མ་ལ་སོགས་པ་བཞི་ཡང་སེར་མོ། གཡས་ན་ཌ་མ་རུ་བསྣམས་པའོ། །ཐུགས་ཀྱི་འཁོར་ལོའི་རྣལ་འབྱོར་མ་རྣམས་དཀར་མོ། ཕྱག་གཡས་ཀྱིས་རྡོ་རྗེ་དང་བཅས་པའི་སྡིགས་མཛུབ་མཛད་པའོ། །གསུང་གི་འཁོར་
༄། །ལོའི་ནག་མོ་ཕྱག་གཡས་ཀྱིས་རྡོ་རྗེ་དང་བཅས་པའི་སྡིགས་མཛུབ་པོ། །སྐུའི་འཁོར་ལོའི་དམར་མོ་གཡས་པའི་ཕྱག་ན་འཁོར་ལོ་དང་བཅས་པའི་སྡིགས་མཛུབ་བོ། །ཁྭ་གདོང་མ་ལ་སོགས་པ་རྣམས་ཀྱི་གཡས་ཀྱིས་སྡིགས་མཛུབ་དང་བཅས་པས་གྲི་གུག་བསྣམས་པའོ། །ལྷ་མོ་ཐམས་ཅད་ནི་གཡོན་པའི་ཕྱག་གིས་ཐོད་པ་བཟུང་བའོ། །གཤིན་རྗེ་བརྟན་མ་ལ་སོགས་པ་རྣམས་གཡས་ཀྱིས་ཌ་མ་རུ་དང༌། གཡོན་གྱིས་སྡིགས་མཛུབ་དང་བཅས་པའི་མིའི་མགོ་བོ་བསྣམས་པའོ། །མཁའ་འགྲོ་མ་ལ་སོགས་པ་དང༌། ཁྭ་གདོང་མ་ལ་སོགས་པ་རྣམས་ཀྱིས་གཡོན་གྱི་དཔུང་པ་ལ་ཁ་ཊྭཱཾ་ག་བརྟེན་པའོ། །བཅུ་གཉིས་པོ་རྣམས་བརྐྱང་བསྐུམ་གྱི་ཚུལ་གྱིས་གར་མཛད་པའོ། །གཞན་རྣམས་ནི་སྔར་བཞིན་ནོ། །ལྷའི་ང་རྒྱལ་སྤངས་པ་དང༌། རྣམ་པ་ཐམས་ཅད་མཁྱེན་པ་ཉིད་ཐོབ་པར་བསྟན་པའི་ཕྱིར་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་མཁའ་འགྲོ་མ་ལ་སོགས་པའི་རང་བཞིན་དུ་རིག་པར་བྱའོ། །དེ་ལ་གཟུགས་ཀྱི་ཕུང་པོ་ཡོངས་སུ་ཤེས་པ་ལ་རྩོམ་པའི་མཚན་ཉིད་ཀྱི་ཕྱིར་ལུས་དྲན་པ་ཉེ་བར་གཞག་པ་ནི་མཁའ་འགྲོ་མའོ། །ཚོར་བའི་ཕུང་པོ་ཡོངས་སུ་ཤེས་པ་རྩོམ་པའི་མཚན་ཉིད་ཀྱི་ཕྱིར་ཚོར་བ་དྲན་པ་ཉེ་བར་གཞག་པ་ནི་ལཱ་མའོ། །འདུ་ཤེས་དང་འདུ་བྱེད་ཀྱི་ཕུང་པོ་སྒྱུ་མའི་རང་བཞིན་དུ་ངེས་པའི་མཚན་ཉིད་ཀྱི་ཕྱིར་ཆོས་དྲན་པ་ཉེ་བར་གཞག་པ་ནི་དུམ་སྐྱེས་མའོ། །རྣམ་པར་ཤེས་པའི་ཕུང་པོ་རབ་ཏུ་རྣམ་པར་འབྱེད་པའི་མཚན་ཉིད་ཀྱི་ཕྱིར་སེམས་བྲན་པ་ཉེ་བར་གཞག་པ་ནི་གཟུགས་ཅན་མའོ། །ཆོས་ཐོས་པར་འདོད་པ་ལ་ཤིན་ཏུ་འབད་པའི་མཚན་ཉིད་ཀྱི་ཕྱིར་འདུན་པའི་རྫུ་འཕྲུལ་གྱི་རྐང་པ་ནི་རབ་ཏུ་གཏུམ་མོའོ། །བརྩོན་འགྲུས་རྒྱུན་མི་འཆད་པར་གོམས་པ་བརྩོན་འགྲུས་ཀྱི་རྫུ་འཕྲུལ་གྱི་རྐང་པ་ནི་གཏུམ་པའི་མིག་ཅན་མའོ། །ཤིན་ཏུ་རྣམ་པར་དཔྱོད་བ་རྫུ་འཕྲུལ་གྱི་རྐང་པ་ནི་འོད་ལྡན་མའོ། །བྱང་ཆུབ་མངོན་དུ་བྱེད་པ་ལ་ལྷག་པའི་བསམ་པ་ཉིད་ཀྱིས་སེམས་ཀྱི་རྫུ་འཕྲུལ་གྱི་རྐང་པ་ནི་སྣ་ཆེན་མའོ། །བདེན་པ་དང་དཀོན་མཆོག་གསུམ་དང་ལས་དང་འབྲས་བུ་ལ་ཡིད་ཆེས་པ་དང་དེ་ཁོ་ན་ཉིད་དུ་ངེས་པ་ལ་དབང་དུ་ཆུབ་པའི་ཕྱིར་དད་པའི་དབང་པོ་ནི་
༄། །དཔའ་བོའི་བློ་ཅན་མའོ། །ཅི་ནས་ཀྱང་བྱ་བ་དེས་པར་བྱེད་པའི་ཕྱིར་བརྩོན་འགྲུས་ཀྱི་དབང་པོ་ནི་མིའུ་ཐུང་མའོ། །མ་རིག་པའི་གཉེན་པོ་མ་བརྗོད་པ་ལ་དབང་ཐོབ་པའི་ཕྱིར་དྲན་པའི་དབང་པོ་ནི་ལང་ཀའི་དབང་ཕྱུག་མའོ། །སེམས་རྩེ་གཅིག་པ་ཉིད་ལ་དབང་ཐོབ་པའི་ཕྱིར་ཏིང་ངེ་འཛིན་གྱི་དབང་པོ་ནི་ཤིང་གི་གྲིབ་མའོ། །བླང་བྱ་དད་དོར་བྱ་ངེས་པ་ལ་དབང་ཆུབ་པའི་ཕྱིར་ཤེས་རབ་ཀྱི་དབང་པོ་ནི་རབ་ཏུ་བརྟན་མའོ། །དད་པ་ལ་སོགས་པའི་དབང་པོ་རྣམས་ཁོ་ན་མཐར་ཐུག་པར་ཕྱིན་པས་སྟོབས་རྣམས་སོ། །དད་པའི་སྟོབས་ནི་འཇིགས་བྱེད་ཆེན་མོའོ། །བརྩོན་འགྲུས་ཀྱི་སྟོབས་ནི་རླུང་གི་ཤུགས་ཅན་མའོ། །དྲན་པའི་སྟོབས་ནི་ཆང་འཐུང་མའོ། །ཏིང་ངེ་འཛིན་གྱི་སྟོབས་ནི་ཤྱཱ་མ་དེ་བིའོ། །ཤེས་རབ་ཀྱི་སྟོབས་ནི་ཤིན་ཏུ་བཟང་མོའོ། །ཏིང་ངེ་འཛིན་ཁོ་ན་བྱང་ཆུབ་ཀྱི་རྒྱུ་ཡིན་པས་ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་ནི་རྟ་རྣ་མའོ། །ལེ་ལོའི་སྐབས་མི་འབྱེད་པའི་ཕྱིར་བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་ནི་བྱ་གདོང་མའོ། །དགེ་བ་ལ་ཀུན་ནས་ཞེན་པའི་ཕྱིར་དགའ་བ་ཡང་དག་བྱང་ཆུབ་ཀྱི་ཡན་ལག་ནི་འཁོར་ལོའི་ཤུགས་ཅན་མའོ། །ལས་དགེ་བ་ལ་ལས་སུ་རུང་བ་ཉིད་ཀྱིས་ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་ནི་དུམ་སྐྱེས་མའོ། །བདག་མེད་པའི་རང་བཞིན་དུ་ངེས་པས་ཆོས་རབ་ཏུ་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་ནི་ཆང་འཚོང་མའོ། །ཚུལ་ཁྲིམས་བརྗེད་པ་མེད་པ་ཉིད་ཀྱིས་དྲན་པ་ཡང་དག་བྱང་ཆུབ་ཀྱི་ལག་ནི་འཁོར་ལོའི་གོ་ཆ་མའོ། །ཡིད་ལ་མི་བྱེད་པའི་ཏིང་ངེ་འཛིན་གྱི་ཕྱིར་བཏང་སྙོམས་ཡང་དག་བྱང་ཆུབ་ཀྱི་ཡན་ལག་ནི་ཤིན་ཏུ་དཔའ་མོའོ། །ཕྱིན་ཅི་མ་ལོག་པའི་དོན་བསྒྲུབ་པའི་ཕྱིར་ཡང་དག་པའི་ལྟ་བ་ནི་སྟོབས་ཆེན་མའོ། །དམ་པའི་བྱ་བ་བརྩམས་པ་ཡོངས་སུ་མི་གཏོང་བའི་ཕྱིར་ཡང་དག་པའི་རྟོག་པ་ནི་འཁོར་ལོས་སྒྱུར་མའོ། །སེམས་ཅན་མི་སླུ་བའི་ཕྱིར་ཡང་དག་པའི་ངག་ནི་བརྩོན་འགྲུས་ཆེན་མོའོ། །དགེ་བ་བཅུའི་བྱ་བ་ལས་མི་འདའ་བར་བྱེད་པའི་ཕྱིར་ཡང་དག་པའི་ལས་ཀྱི་མཐའ་ནི་ཁྭ་གདོང་མའོ། །སེམས་ཅན་
༄། །ལ་གཡོ་སྒྱུ་མེད་པས་འཚོ་བའི་ཕྱིར་ཡང་དག་པའི་འཚོ་བ་ནི་འུག་གདོང་མའོ། །དགེ་བའི་ཆེད་དུ་བྱ་བའི་ཕྱིར་ཡང་དག་པའི་རྩོལ་བ་ནི་ཁྱི་གདོང་མའོ། །སངས་རྒྱས་ཀྱི་གསུང་གི་དོན་དྲན་པའི་ཕྱིར་ཡང་དག་པའི་དྲན་པ་ནི་ཕག་གདོང་མའོ། །ཡང་དག་པའི་ཏིང་ངེ་འཛིན་ནི་བཅོམ་ལྡན་འདས་མ་རྡོ་རྗེ་ཕག་མོའོ། །དགེ་བའི་ཆོས་མ་སྐྱེས་པ་སྐྱེད་པར་བྱེད་པ་ནི་གཤིན་རྗེ་བརྟན་མའོ། །སྐྱེས་པའི་ཆོས་རྣམས་ཡང་དག་པར་བསྲུང་བ་ནི་གཤིན་རྗེ་ཕོ་ཉ་མའོ། །མི་དགེ་བའི་ཆོས་སྐྱེས་པ་རྣམས་སྤོང་བ་ནི་གཤིན་རྗེ་མཆེ་བ་ཅན་མའོ། །མི་དགེ་བའི་ཆོས་མ་སྐྱེས་པ་རྣམས་མི་བསྐྱེད་པའི་ཕྱིར་ཡང་དག་པར་སྤོང་བ་ནི་གཤིན་རྗེ་འཇོམས་མའོ། །རབ་ཏུ་དགའ་བ་དང་དྲི་མ་མེད་པ་དང༌། འོད་བྱེད་པ་དང༌། འོད་འཕྲོ་བ་ཅན་དང༌། ཤིན་ཏུ་སྦྱངས་དཀའ་བ་དང༌། མངོན་དུ་གྱུར་པ་དང༌། རིང་དུ་སོང་བ་དང༌། མི་གཡོ་བ་དང༌། ལེགས་པའི་བློ་གྲོས་དང། ཆོས་ཀྱི་སྤྲིན་ཞེས་བྱ་བ་ས་བཅུ་རྣམ་པར་དག་པའི་རིམ་པས་གནས་དང་ཉེ་བའི་གནས་ལ་སོགས་པ་སྐུའི་དཀྱིལ་འཁོར་ལྷག་པར་ནང་གི་སྣལ་འབྱོར་པས་བསྒོམ་པར་བྱའོ། །ཉི་ཤུ་རྩ་བཞིའི་དབྱེ་བ་ཡིས། །གནས་སོགས་འདིར་ནི་རྣམ་པར་གནས། །དེ་ཕྱིར་དེ་རུ་འགྲོ་ཉིད་ཀྱིས། །དེ་ཉིད་ཅན་གྱི་སྐྱོ་མི་བྱ། །དེ་ཡི་ཁམས་ནི་འཆད་པར་འགྱུར། །རྣལ་འབྱོར་ཕྱི་རུ་རྒྱུ་བའི་ཕྱིར། །དེ་ཡི་ཕྱི་རོལ་སྤངས་ནས་ནི། །རྣལ་འབྱོར་རོལ་པས་གནས་པར་བྱ། །ཞེས་གསུངས་སོ། །དེ་ལ་པཱུ་ཛཱ་ཨོཾ་ཨ་གོ་རཱ་དེ་མཱ། ཀཱ་ཨོ་ཏྲི་ཀོ་ཀ་ལ་ཀཱ་ཧི་པྲེ་གྲྀ་སཽ་སུ་ན་སི་མ་ཀུ། མགོ་ལ་པུ་ལླཱི་ར་མཱ་ལ་ཡར་རབ་ཏུ་གཏུམ་མོའོ། །ཛཱ་ལན་དྷ་རར་སྤྱི་བོའི་གཙུག་ལ་གཏུམ་པའི་མིག་ཅན་མའོ། །ཨཽ་ཌྱ་ན་གཡས་ཀྱི་རྣ་བར་འོད་ལྡན་མའོ། །ཨར་བུ་ད་ལྟག་པ་ལ་སྣ་ཆེན་མ་སྟེ་གནས་སོ། །གོ་དཱ་བ་རི་རྣ་བ་གཡོན་པ་ལ་དཔའ་པོའི་བློ་ཅན་མའོ། །རཱ་མི་ཤྭ་ར་སྨིན་མཚམས་སུ་མིའུ་ཐུང་མའོ། །དེ་བཱི་ཀོ་ཊ་མིག་གཉིས་པོ་ལ་ལང་ཀའི་དབང་ཕྱུག་མའོ། །མཱ་ལ་བ་དཔུང་པ་གཉིས་ལ་ཤིང་གྲིབ་མ་སྟེ་ཉེ་བའི་གནས་སོ། ^།ཐུགས་ཀྱི་འཁོར་ལོ་སྟེ་ནམ་མཁའ་ལ་སྤྱོད་པའོ། །འདིས་ནི་ས་བླ་ལ་གནས་པ་
༄། །རྣམས་ཡང་དག་པར་བསྡུས་སོ། །ཀཱ་མ་རཱུ་པ་མཆན་ཁུང་གཉིས་ལ་རབ་ཏུ་བརྟན་མའོ། །ཨོ་ཏེ་ནུ་མ་གཉིས་ལ་འཇིགས་བྱེད་ཆེན་མོ་སྟེ་ཞིང་ངོ༌། །ཏྲི་ཤ་ཀུ་ནི་ལྟེ་བ་ལ་རླུང་གི་ཤུགས་ཅན་མའོ། །ཀོ་ས་ལ་སྣ་ལ་ཆང་འཐུང་མ་སྟེ་ཉེ་བའི་ཞིང་ངོ༌། །ཀ་ལིང་ག་ཁ་ལ་ཤྱ་མ་དེ་བིའོ། །ལམ་པཱ་ཀ་མགྲིན་པར་ཤིན་ཏུ་བཟང་མོ་སྟེ་ཚནྡོ་ཧའོ། །ཀཱ་ཉྩི་སྙིང་ག་ལ་རྟ་རྣ་མའོ། །ཧི་མཱ་ལ་མདོམས་ལ་བྱ་གདོང་མ་སྟེ་ཉེ་བའི་ཚནྡོ་ཧའོ། །འདི་དག་གསུང་གི་འཁོར་ལོ་སྟེ་ས་ལ་སྤྱོད་པའོ། །འདིས་ནི་ས་སྟེང་ན་གནས་པ་རྣམས་བསྡུས་སོ། །ཡི་དགས་ཀྱི་གྲོང་ཁྱེར་གསང་བའི་གནས་ལ་འཁོར་ལོའི་ཤུགས་ཅན་མའོ། །གྲྀ་ཧ་དེ་བ་ཏཱ་བཤང་ལམ་དུ་དུམ་སྐྱེས་མ་སྟེ་འདུ་བ་ཅན་ནོ། །སཽ་རཱ་ཥྚ་བརླ་གཉིས་ལ་ཆང་འཚོང་མའོ། །གསེར་གླིང་བྱིན་པ་གཉིས་ལ་འཁོར་ལོའི་གོ་ཆ་མ་སྟེ་ཉེ་པའི་འདུ་བ་ཅན་ནོ། །གྲོང་ཁྱེར་སོར་མོ་རྣམས་ལ་ཤིན་ཏུ་དཔའ་མོའོ། །སིནྡྷུ་བོལ་གོང་གཉིས་ལ་སྟོབས་མོ་ཆེ་སྟེ་དུར་ཁྲོད་དོ། །མ་རུ་མཐེ་བོང་གཉིས་ལ་འཁོར་ལོས་སྒྱུར་མ། ཀུ་ལུ་ཏཱ་པུས་མོ་གཉིས་ལ་བརྩོན་འགྲུས་ཆེན་མོ་སྟེ་ཉེ་བའི་དུར་ཁྲོད་དོ། །སྐུའི་འཁོར་ལོ་སྟེ་ས་འོག་ལ་སྤྱོད་པ་རྣམས་བསྡུས་སོ། །འདིར་ནི་གདམས་ངག་འདི་ཡིན་ཏེ། པཱུཾ་རྫཾ་ཞེས་བྱ་བ་ལ་སོགས་པ་ཐམས་ཅད་ཐིག་ལེ་དང་བཅས་པར་ངེས་པར་བརྟགས་ཏེ། པཱུཾ་ལ་སོགས་པའི་ཡི་གེ་ཡོངས་སུ་གྱུར་པ་ལས་རྩིབས་ཀྱིས་སྟོང་པའི་འཁོར་ལོའི་རྣམ་པས་གནས་ལ་སོགས་པ་རྣམས་སྤྱི་བོ་ལ་སོགས་པར་ཅིག་ཅར་གྱིས་བལྟ་བར་བྱའོ། །གནས་ལ་སོགས་པ་དེ་དག་ཏུ་དེ་དང་དེའི་གནས་ལ་གནས་པའི་རྩ་རྣམས་ལྷ་དེ་དང་དེའི་གཟུགས་སུ་ཡོངས་སུ་གྱུར་པར་རྣམ་པར་གནས་པར་བསྒོམ་པར་བྱའོ། །ཇི་ལྟར་ཕྱི་རོལ་གྱི་ཤིང་ལ་སོགས་པ་རྣམས་ཉེ་བར་གནས་པའི་ཆུས་གསོ་བར་བྱེད་པ་ལྟར་ལུས་ལ་ཡང་རྩ་རྣམས་ཀྱིས་སེན་མོ་ལ་སོགས་པ་གསོ་བར་བྱེད་པས་མཉམ་པ་ཉིད་དོ། །ཕྱི་རོལ་དུ་རྡོ་རྗེའི་གནས་བྱང་ཆུབ་ཆེན་པོ་ནི་གནས་དང་ནཻ་རཉྫ་ནའི་ཆུ་བོའོ། །ལུས་ལ་བདེ་བ་ཆེན་པོའི་འཁོར་ལོ་ནི་རྡོ་རྗེའི་གནས་སོ། །ཨ་ཝདྷཱུ་ཏཱི་ནི་ནཻ་རཉྫ་
༄། །ནའོ། །ཁ་དང་སྣ་བུག་གཡས་དང་གཡོན་དང༌། བཤང་ལམ་ལ་རིམ་གྱིས་བྱ་གདོང་མ་ལ་སོགས་པ་སྒོ་སྐྱོང་མ་རྣམས་སོ། །རྣ་བ་གཡས་གཡོན་གཉིས་ལ་མིག་དང་མིག་ལ་གཤིན་རྗེ་བརྟན་མ་ལ་སོགས་པའོ། །སྙིང་ག་དང་མགྲིན་པ་དང་དཔྲལ་བ་དང་ལྟེ་བའི་པདྨའི་ཟེའུ་འབྲུ་ལ་མཁའ་འགྲོ་མ་ལ་སོགས་པ་བཞིའོ་ཞེས་བྱ་བ་སྐུའི་དཀྱིལ་འཁོར་ཡོངས་སུ་རྫོགས་པར་ཡང་དང་ཡང་དུ་ལྷག་པར་མོས་པ་བརྟན་པར་བྱའོ། །དེ་ནས་གཏོང་མ་དབུལ་བ་ནི་བཟའ་བ་ལ་སོགས་པ་མདུན་དུ་བཞག་པ་ལ་སྔར་བཤད་པའི་རིམ་པས་དག་པར་བྱས་ལ། དྲ་བའི་ཕྱག་རྒྱ་དང་དེའི་སྔགས་གཉིས་ཀྱིས་རྣམ་པ་ཐམས་ཅད་དུ་རྫོགས་པའི་དཀྱིལ་འཁོར་གྱི་འཁོར་ལོ་མདུན་དུ་སྤྱན་དྲངས་ལ་བཞུགས་སུ་གསོལ་ཏེ། མཆོད་ཡོན་ལ་སོགས་པ་སྔོན་དུ་འགྲོ་བས་ཡང་དག་པར་མཆོད་ནས་ལག་པ་གཉིས་ཨཱ་ལི་དང་ཀཱ་ལི་ཡོངས་སུ་གྱུར་པ་ལས་ཟླ་བ་དང་ཉི་མའི་དཀྱིལ་འཁོར་གྱི་རང་བཞིན་གྱི་ནང་དུ་ཧཱུཾ་ཡིག་བལྟས་ལ་ཨོཾ་ཨཱཿ་ནྱོ་ནྱ་ཨ་ནུ་ག་ཏཱཿ་སརྦྦ་དྷ་རྨྨཿ་སྥ་ར་སྥ་ར་ཨ་ནུ་པྲ་བིཥྚ་སརྦྦ་དྷརྨྨཱཿ་ཨ་ཏྱ་ན་ཏ་ཨ་ནུ་པྲ་བིཥྚཿ་སརྦྦ་དྷརྨྨཱཿ་ཧཱུཾ་ཞེས་བྱ་བ་སྔོན་དུ་འགྲོ་བས་ཟླ་བ་དང་ཉི་མ་ལ་གནས་པ་ཧཱུཾ་ཡིག་ཡོངས་སུ་བྱུང་བ་ལས་རྡོ་རྗེའི་ཐལ་མོའི་ལག་མཐིལ་དུ་བདུད་རྩིའི་སྣོད་དེ་གཞག་པའམ་བསྒོམས་ཏེ་འདོད་པའི་དངོས་གྲུབ་ཀྱི་ཆེད་དུ་འདི་བརྗོད་པར་བྱ་སྟེ། ལྷ་མོ་ཚད་མ་དམ་ཚིག་ཚད་མ་དང༌། །དེས་གསུངས་པ་ཡི་ཚིག་ནི་ཚད་མ་མཆོག །བདེན་པ་འདིས་ནི་ལྷ་མོ་དེ་དག་རྣམས། །བདག་ལ་རྗེས་སུ་འཛིན་པའི་རྒྱུར་གྱུར་ཅིག །དེ་ནས་མཆོང་བྱ་དང་མཆོད་བྱེད་མཆོད་པ་རྣམས་དབྱེར་མེད་པར་བལྟས་ལ་བདུད་རྩིའི་སྣོད་དེ་ཕྱོགས་ལ་གཡོན་སྐོར་དུ་ཤར་ཕྱོགས་ནས་བརྩམས་ནས་སོ། །མཚམས་ལ་མེ་མཚམས་ནས་བརྩམས་ནས་གཡས་སུ་བསྐོར་ཞིང༌། ཧཱུཾ་དཀར་པོ་ལས་བྱུང་བའི་རྡོ་རྗེའི་ལྗགས་ཅན་གཙོ་མོ་ལ་སོགས་པ་འཁོར་ལོ་གསུམ་གྱི་ལྷ་རྣམས་ལ་རང་རང་གི་སྔགས་ལན་གཅིག་བརྗོད་པས་བསྐོར་ཞིང་ཨོཾ་ཨཱ་རལླི་ཧོཿ་ཛཿ་ཧཱུཾ་བཾ་ཧོཿ་བཛྲ་ཌཱ་ཀི་ནྱ་ས་མ་ཡ་སྟྭཾ་དྲྀ་ཤྱ་ཧོ། །འདིས་ལན་གཅིག་གམ་གཉིས་སམ་གསུམ་མམ་བཞིའམ་ལྔ་བརྗོད་པས་དབུལ་བར་བྱའོ། །དེ་ལ་ཞལ་བསིལ་
༄། །དང་ཕྱག་ཕྱིས་དང་གོ་ལ་ལ་སོགས་པ་དྲངས་ནས་པི་ཝང་མ་ལ་སོགས་པས་ཡང་དག་པར་མཆོང་ཅིང་བསྟོད་ནས། གསོལ་བ་བཏབ་པར་བྱའོ། །སྲིད་དང་ཞི་ལ་ཆགས་མཉམ་ཀུན་དུ་རྟོག་པའི་རླབས་བཅོམ་ཞིང༌། །ཁྱོད་ནི་དངོས་ཀུན་རང་བཞིན་ཉིང་དུ་མཁའ་བཞིན་གཟིགས་གྱུར་པ། །ལྕི་བའི་ཆུ་ཡིས་རབ་རྒྱས་སྙིང་རྗེའི་ཐུགས་ནི་རྒྱ་མཚོའི་མཆོག །ལྷ་མོ་རྣམས་ཀྱིས་བདག་ལ་ཤིན་ཏུ་བརྩེ་བར་མཛད་དུ་གསོལ། །དེ་ནས་དུར་ཁྲོད་བརྒྱད་ལ་གནས་པའི་ཕྱོགས་སྐྱོང་རྣམས་ལ་སྔར་བཞིན་དུ་བསྐོར་ཞིང༌། ཨོཾ་ཁ་ཁ་ཁཱ་ཧི་ཁཱ་ཧི་སརྦྦ་ཡཀྵ་རཱ་ཀྵ་ས་བྷཱུ་ཏ་ཕྲེ་ཏ་པི་ཤཱ་ཙ་ཨུན་མ་ད་ཨ་པ་སྨཱ་རཌཱ་ཀ་ཌཱ་ཀི་ནྱ་ད་ཡ་ཨི་མཾ་བ་ལིཾ་གྲྀཧྞ་ནྟུ་ས་མ་ཡཾ་རཀྵན་ཏུ་མ་མ་སརྦྦ་སིདྡྷི་པྲ་ཡཙྪན་ཏུ་ཡ་ཐེ་བཾ་ཡ་ཐེཥྚཾ་བྷུ་ཉྫ་ཐ་པི་བ་ཐ་ཛི་གྷྲ་ཐ་མཱ་ཏི་ཀྲ་མ་ཐ་མ་མ་སརྦྦ་ཀཱ་རྟ་ཡ་ས་ཏ་སུ་ཁ་བི་བྲཾ་རྷ་ཡེ་ས་ཧཱ་ཡི་ཀཱ་བྷ་བནྟུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདི་ལན་གཉིས་བརྗོད་པས་དབུལ་བར་བྱའོ། །བདུད་རྩི་དེ་དག་གསོལ་བས་ཕྱོགས་སྐྱོང་རྣམས་བདེ་བ་ཆེན་པོ་ལྡན་པའི་སྐུར་བསྒོམ་པར་བྱའོ། །དེའི་རྗེས་སུ་གོ་ལ་སོགས་པ་ཐུན་མོང་དུ་དབུལ་ལོ། །སྙིང་གའི་ས་བོན་ལས་བྱུང་བའི་པི་ཝང་མ་ལ་སོགས་པས་ཡང་དག་པར་མཆོད་ནས་འདོད་པའི་དངོས་གྲུབ་བླངས་ལ་བརྡའི་ལག་པས་ཡང་དག་པར་བརྡ་བྱས་ལ་ལྷག་ཆད་ཁ་བསྐང་བའི་དོན་དུ་ཡི་གེ་བརྒྱ་པ་དྲིལ་བུ་དཀྲོལ་བ་སྔོན་དུ་འགྲོ་བས་བརྗོད་པར་བྱའོ། །དེ་ནས་ཨོཾ་ཡོ་ག་ཤུདྡྷཿ་སརྦྦ་དྷརྨྨཱ་ཡོ་ག་ཤུདྡྷོ྅ཧཾ་ཞེས་བྱ་བ་བརྗོད་ཅིང་པདྨའི་ཕྱག་རྒྱས་ཡོངས་སུ་མཉེས་པར་བྱས་ནས། ཕྱག་རྒྱ་དེ་ཉེ་བར་སྡུད་པ་ནི་འཁྱུད་པའི་ཕྱག་རྒྱ་སྔོན་དུ་འགྲོ་བའི་ཚུལ་གྱིས་གཡོན་པའི་མཐེ་བོང་དང༌། སྲིན་ལག་བརྡབ་པའི་མཐར་སེ་གོལ་སྔོན་དུ་འགྲོ་བས་ཨོཾ་བཛྲ་མུཿ་ཞེས་བརྗོད་ཅིང་གཤེགས་སུ་གསོལ་བས་འཁོར་ལོ་དེ་བདག་ཉིད་ལ་རྣམ་པ་ཐམས་ཅད་ཀྱིས་གཞུག་པར་བྱའོ། །དེ་ནས་སྨོན་ལམ་གདབ་སྟེ་ལྷའི་ང་རྒྱལ་གྱིས་གནས་པར་བྱའོ། །ཁྲུས་ཀྱི་དུས་སུ་དབང་བསྐུར་བའི་ཆོ་གས་བྱའོ། །བཟའ་བའི་དུས་སུ་རང་གི་ལུས་དཀྱིལ་འཁོར་གྱི་འཁོར་ལོའི་བདག་ཉིད་དུ་ཅིག་ཅར་བསམས་ནས་ཆོ་ག་ཇི་ལྟ་བས་གཏོར་མ་དབུལ་བའམ་ཡང་ན་
༄། །ཡི་གེ་གསུམ་གྱིས་བྱིན་གྱིས་བརླབས་ལའོ། །ཨོཾ་ཁ་ཁ་ཁཱ་ཧི་ཁཱ་ཧི་ཞེས་པའི་སྔགས་ལན་གཅིག་བརྗོད་པས་ཕྱོགས་སྐྱོང་རྣམས་ལ་དབུལ་ལ། ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་སྔོན་དུ་འགྲོ་བས་འབར་བ་ལ་སོགས་པས་དག་པར་བྱས་ལ་ཆོག་བཞིན་དུ་བཟའ་བ་ལ་སོགས་པ་ཨོཾ་ས་མ་ཡ་ཤུདྡྷཿ་སརྦྦ་དྷརྨྨཱཿ་ས་མ་ཡ་ཤུདྡྷོ྅ཧཾ། ཞེས་བྱ་བས་ཆོས་ཐམས་ཅད་མཉམ་པ་ཉིད་ཀྱི་ང་རྒྱལ་གྱིས་ཧཱུཾ་ཡིག་ལས་བྱུང་བའི་ལྗགས་རྡོ་རྗེ་དཀར་པོའི་རང་བཞིན་དུ་བྱས་ནས། ཨོཾ་ཨ་མྲྀ་ཏོ་ད་ཀ་ཧཱུཾ་ཧཱུཾ་ཋ་ཋ་ཏྲཱཾ་ཨཱཿ་ཁཾ་ཧཱུཾ་ཞེས་བྱ་བས་བྱིན་གྱིས་བརླབས་ནས་ལྟེ་བ་ལ་གནས་པའི་བཾ་ཡིག་ཡི་གེ་གསུམ་གྱིས་ཚིམ་པར་བྱའོ། །ཉི་མའི་གུང་གི་ཐུན་ལ་བསམ་གཏན་གྱི་ཁང་བུར་ཞུགས་ནས་ཨོཾ་ཨཱཿ་ཧཱུཾ་ཨོཾ་སརྦྦ་ཡོ་གི་ནཱི་ནཱཾ་ཀཱ་ཡ་བཱ་ཀ་ཙི་ཏྟ་བཛྲ་སྭ་བྷཱ་བ། ཨཱཏྨ་ཀོ྅ཧཾ། ཨོཾ་བཛྲ་ཤུདྡྷཿ་སརྦྦ་དྷརྨྨཱ་བཛྲ་ཤྡྡྷོ྅ཧཾ། ཞེས་བྱ་བའི་སྔགས་གསུམ་བརྗོད་ཅིང༌། ཅིག་ཅར་དཀྱིལ་འཁོར་གྱི་འཁོར་ལོར་ལྷག་པར་མོས་བ་བྱ་སྟེ། ཐམས་ཅད་སྔར་བཞིན་བྱས་ནས། ཅི་བདེ་བར་གནས་པར་བྱའོ། །ནམ་ཕྱེད་ཀྱི་ཐུན་ལ། ཉི་མ་ཕྱེད་ཀྱི་ཐུན་བཞིན་དུ། ཐམས་ཅད་བྱས་ནས། ངག་གི་བྱ་བ་ཐམས་ཅད། ཨཱ་ལི་ཀཱ་ལིའི་རང་བཞིན་དུ་རྟོགས་ནས། མ་ལ་སོགས་པ་ཡི་གེ་ཀྵའི་མཐར་ཧུཾ་ཧཱུཾ་ཕཊ་ཕཊ་ཅེས་བྱ་བ་བརྗོད་ནས། འོད་གསལ་ལ་མངོན་དུ་གྱུར་པར་བྱས་ནས་གཉིད་ལ་ཡང་འོད་གསལ་བུ་མོས་ཤིང་ཉལ་བར་བྱའོ། །ཐུན་ཐམས་ཅད་ཀྱི་མཐར་ཡི་གེ་བརྒྱ་པ་བརྗོད་པར་བྱའོ། །ཐོ་རངས་ཀྱི་ཐུན་ལ་འོད་གསལ་ལས་ལངས། དཀྱིལ་འཁོར་གྱི་འཁོར་ལོར་མོས་པ་བྱས་ཏེ་སྔར་བཤད་པ་ཐམས་ཅད་ཉམས་སུ་བླང་བར་བྱའོ། །ཕྱི་རོལ་གྱི་མཆོད་པའི་ཆོག་བརྗོད་པར་བྱ་སྟེ། འདིར་བཅོམ་ལྡན་འདས་མ་ལ་མཆོད་པར་འདོད་པ་བདག་གིས་ཐོ་རངས་ལངས་པའམ། ཡང་ན་ཇི་ལྟར་འདོད་པ་ལ་རྡོ་རྗེ་རྣམ་པར་སྣང་མཛད་མའི་རྣལ་འབྱོར་དང་ལྡན་པའི་སྔགས་པས་ས་གཞི་གཙང་མ་ལ་ལག་པ་བཞག་སྟེ། ཨོཾ་སུཾ་བྷ་ནི་སུཾ་བྷ་ཞེས་བྱ་བ་ལ་སོགས་པའི་སྔགས་བརྗོད་ནས་བདུད་རྩི་ལྔ་དང་
༄། །དྲི་ཞིམ་པོ་ལ་སོགས་པའི་རི་ལུའམ་གཞན་གང་ཡང་རུང་བའི་རྫས་དང་བསྲེས་པའི་ལྕི་བའི་རིལ་བུས་མཎྜལ་ཟུར་བཞི་པ་བྱུགས་ཏེ། དེའི་དབུས་སུ་ལག་པ་བཞག་ལ་པཱུ་ཛཱ་ཞེས་བྱ་བ་ལ་སོགས་པའི་ཡི་གེ་ཉི་ཤུ་རྩ་བཞི་རྣམས་དང་གནས་དང་ཉེ་བའི་གནས་ལ་སོགས་པ་མིང་བཅུ་པོ་ཡང་དེ་དང་དེའི་སའི་ལྷག་པར་མོས་པ་སྔོན་བུ་འགྲོ་བས་བརྗོད་ཅིང༌། དེ་ནས་མཎྜལ་དེ་ལ་སྐད་ཅིག་མས་འབྱུང་བ་ཆེན་པོ་བཞི་ལ་གནས་པའི་རི་རབ་ཀྱི་སྟེང་དུ་པདྨ་དམར་པོ་ལ་གནས་པའི་ཉི་མ་ལ་བཾ་གི་ཡི་གེ་བལྟའོ། །དེའི་འོད་ཟེར་གྱིས་ཡེ་ཤེས་ཀྱི་འཁོར་ལོ་སྤྱན་དྲངས་ཏེ། དེ་ལ་རབ་ཏུ་ཞུགས་ཤིང་ཡོངས་སུ་གྱུར་པ་ལས། བཅོམ་ལྡན་འདས་མ་འཁོར་དང་བཅས་པ་རྣམ་པ་ཐམས་ཅད་དུ་རྫོགས་པར་བལྟའོ། །དེའི་རྗེས་སུ་རང་གི་སྙིང་གའི་ས་བོན་ལས་འཕྲོས་པའི་པི་ཝང་མ་ལ་སོགས་པའི་ལྷ་མོ་རྣམས་ཀྱིས་ཡང་དག་པར་མཆོད་ཅིང༌། དེ་ལས་སྤྲོས་པའི་རིན་པོ་ཆེ་ལ་སོགས་པ་རྣམ་པ་བདུན་བཤམས་ལ། ཇི་ལྟར་ཆོ་གས་དག་པར་གྱུར་པའི་ལག་པ་གཡོན་པས་མཎྜལ་གྱི་དབུས་སུ་བཅོམ་ལྡན་འདས་མ་ལ་ཡི་གེ་གསུམ་གྱིས་མེ་ཏོག་དབུལ་ལོ། །ཡང་དེ་ཉིད་ལ་བཅོམ་ལྡན་འདས་མའི་སྙིང་པོ་དང་ཉེ་བའི་སྙིང་པོའི་སྔགས་གཉིས་ཀྱིས་དབུལ་ལོ། །དེའི་རྗེས་སུ་མཁའ་འགྲོ་མ་ལ་སོགས་པ་གཤིན་རྗེ་འཇོམས་མ་ལ་ཐུག་གི་བར་དུ་རང་རང་གིས་སྔགས་ཀྱིས་ཕྱོགས་རྣམས་ལ་གཡོན་སྐོར་དང་ཕྱོགས་བྲལ་རྣམས་ལ་གཡས་སྐོར་གྱིས་གནས་ཇི་ལྟ་བར་དཀྱིལ་འཁོར་ལ་མེ་ཏོག་དབུལ་བར་བྱའོ། །དེ་ནས་འཆད་པར་འགྱུར་བའི་ལག་པའི་མཆོད་བའི་རིམ་པས་ལག་པ་ལ་བསྐྱེད་པའི་ལྷ་རྣམས་ལ་གནས་དེ་དང་དེ་དག་གི་སྔགས་ཨོཾ་ཧ་ཞེས་བྱ་བ་ལ་སོགས་པས་མེ་ཏོག་དབུལ་ལོ། །དེ་ནས་ལག་པ་གཡོན་པར་སོན་པའི་མེ་ཏོག་ནི་རྐང་པ་བརྒྱད་པའི་སྔགས་བརྗོད་པ་སྔོན་དུ་འགྲོ་བས་དཀྱིལ་འཁོར་ལ་གཏོར་ཏེ་སྤྱི་བོར་ཐལ་མོ་སྦྱར་བ་སྔོན་དུ་འགྲོ་བ་ལག་པ་ལ་གནས་པའི་ལྷའི་འཁོར་ལོ་བདག་ཉིད་ལ་བསྟིམ་པར་བྱའོ། །དེའི་རྗེས་སུ་སྙིང་པོ་ལ་སོགས་པ་དང་རྐང་པ་བརྒྱད་པའི་སྔགས་ཀྱིས་བསྟོད་པ་
༄། །སྔོན་དུ་འགྲོ་བས་ཇི་ལྟར་བརྗོད་པའི་བསྟོད་པས་ཡང་དག་པར་བསྟོད་དོ། །ཇི་ལྟར་ནུས་པས་སྡིག་པ་བཤགས་པ་ལ་སོགས་པ་དང༌། བསམ་གཏན་དང་སྔགས་བཟླས་པ་དང་སྨོན་ལམ་གདབ་པ་ལ་སོགས་པ་བྱས་ནས་ཡི་གེ་བརྒྱ་པ་བརྗོད་ཅིང༌། །ཨོཾ་ཡོ་ག་ཤུདྡྷཿ་སརྦ་དྷརྨཱ་ཡོ་ག་ཤུདྡྷོ྅ཧཾ་ཞེས་བརྗོད་དེ། སྔགས་དང་བཅས་པའི་པདྨ་བསྐོར་བའི་ཕྱག་རྒྱས་དགྱེས་པར་བྱས་ལ། ཕྱག་རྒྱ་ཉེ་བར་བསྡུས་ནས་འཁྱུད་པའི་ཕྱག་རྒྱ་སྔོན་དུ་འགྲོ་བས་སེ་གོལ་གདབ་པ་དང་བཅས་པའི་ཨོཾ་བཛྲ་མུཿ་ཞེས་བརྗོད་པས་གཤེགས་སུ་གསོལ་ཏེ་འཁོར་ལོ་དེ་དག་བདག་ལ་རབ་ཏུ་གཞུག་གོ །དེ་ནས་མཎྜལ་གྱི་རེ་ཁཱ་དབྱི་བར་བྱའོ་ཞེས་ཤེས་པར་བྱའོ། །ལག་པ་ལ་མཆོད་པའི་ཆོ་ག་བརྗོད་པར་བྱ་སྟེ། ཚོགས་ཀྱི་འཁོར་ལོ་ལ་སོགས་པ་ལ་དཔལ་རྡོ་རྗེ་ཕག་མོའི་རྣལ་འབྱོར་དང་ལྡན་པའི་རྣལ་འབྱོར་པས་ལག་པ་གཡོན་པའི་མཐེ་བོ་དང་མཛུབ་མོ་དང་གུང་མོ་དང་སྲིན་ལག་དང་མཐེའུ་ཆུང་དང་དེ་དག་གི་སེན་མོའི་རྩེ་མོ་རྣམས་ལ་རྡོ་རྗེ་སེམས་དཔའ་དང༌། རྣམ་པར་སྣང་མཛད་དང༌། སྣང་བ་མཐའ་ཡས་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། དོན་ཡོད་གྲུབ་པའི་རང་བཞིན་རིམ་པ་བཞིན་དུ་དཀར་པོ་དང་སེར་པོ་དང་དམར་པོ་དང་ནག་པོ་དང༌། ལྗང་གུའི་ཁ་དོག་རྣམས་ནི། ཨོཾ་ཧ་ན་མཿ་ཧི་སྭཱ་ཧཱ་ཧུ། བཽ་ཥ་ཊ་ཧེ། ཧཱུཾ་ཧཱུཾ་ཧོཿ་ཕཊ་ཧཾ་གི་ཡི་གེ་རྣམས་རྣམ་པར་བསྐྱེད་དོ། །ལག་པའི་མཐིལ་དུ་སྐད་ཅིག་མས་རྫོགས་པར་གྱུར་པའི་པདྨ་དམར་པོ་འདབ་མ་ལྔ་པ་བསམས་ལ། དེའི་ཤར་ལ་སོགས་པའི་འདབ་མ་རྣམས་ལ་གཡོན་སྐོར་གྱིས་རིམ་པ་ཇི་ལྟ་བར་གཤིན་རྗེ་མ་དང་གཏི་མུག་མ་དང༌། ཀུན་བསྐྱོད་མ་དང༌། དྲག་མོ་དང༌། གཏུམ་མོའི་རང་བཞིན་གྱིས་སྔོན་མོ་དང༌། དཀར་མོ་དང༌། སེར་མོ་དང༌། ལྗང་གུ་དང༌། དུ་བའི་མདོག་ཅན་རྣམས་ནི་ཧཾ་ཡོམ་ཧྲིཾ་མོཾ་ཧྲེཾ་ཧྲིཾ་ཧཱུཾ་ཧཱུཾ་ཕཊ་ཕཊ་ཅེས་ས་བོན་གྱི་ཡི་གེ་རྣམས་བལྟའོ། །ཟེའུ་འབྲུ་ལ་རྡོ་རྗེ་ཕག་མོའི་རང་བཞིན་ཁ་དོག་དམར་མོ་ཨོཾ་བཾ་ཞེས་བྱ་བའི་ས་བོན་ནོ། །དེ་དག་དེ་དག་གི་གཟུངས་བརྙན་ནམ་འཁོར་ལོ་གསུམ་ལག་པའི་རྒྱབ་ཏུ་གསལ་བར་བལྟའོ། །དེ་ནས་
༄། །ལག་པར་སོན་པའི་ས་ཆུ་མེ་རླུང་དང་ནམ་མཁའི་ཁམས་ལ་ལྟུང་བྱེད་མ་དང༌། གསོད་བྱེད་མ་དང༌། འགུགས་བྱེད་མ་དང༌། གར་གྱི་དབང་ཕྱུག་མ་དང༌། པདྨའི་དྲ་བ་ཅན་གྱི་རང་བཞིན་དུ་ལྷག་པར་མོས་ཏེ། དེ་ནས་ལག་པར་སོན་པའི་ཡི་གེ་རྣམས་ལ་ཁུ་བའི་རྫས་བྱུགས་ལ་ལག་པའི་མཐིལ་དེར་རྣལ་འབྱོར་མ་ཐམས་ཅད་ཀྱིས་བྱིན་གྱིས་བརླབས་པའི་འཁོར་ལོ་གསུམ་གྱི་རང་བཞིན་དུ་ལྷག་པར་མོས་ཏེ། ཁུ་བ་ལ་སོགས་པའི་རྫས་དེ་ཡི་གེ་གསུམ་གྱི་སྔགས་དང་རྐང་པ་བརྒྱད་པའི་སྔགས་ཀྱིས་དབུལ་བར་བྱའོ། །དེ་ནས་མཆོད་པས་ཡང་དག་པར་མཆོད་ལ་ལྷག་ཆད་ཡོངས་སུ་བསྐང་བར་བྱ་བའི་དོན་དུ་ཡི་གེ་བརྒྱ་བ་བརྗོད་ཅིང་ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་བཏབ་ལ། ཁུ་བའི་རྫས་དེ་རྫས་གཞན་ལ་བླུགས་པའམ་ཡང་ན་གཞན་ཅིག་ཏུ་བླུགས་ནས་ལག་པར་གནས་པའི་རྫས་དེ་གཡོན་པའི་སྲིན་ལག་གིས་བཟུང་ནས་སྙིང་ག་དང་ལྕེ་དང་དཔྲལ་བ་ལ་ཧཱུཾ་ཨཱཿ་ཨོཾ་ཞེས་བརྗོད་པ་སྔོན་དུ་འགྲོ་བས་བྱུགས་ཏེ་ལྷའི་ཚོགས་དེ་རྣམས་བདག་ལ་རབ་ཏུ་ཐིམ་པར་ལྷག་པར་མོས་པ་བྱའོ། །ཆོ་ག་འདི་ནི་ཀུན་དུ་སྤྱོད་པའི་རྒྱུད་ལས་རབ་ཏུ་གྲུབ་པའོ། །ལག་པ་མཆོད་པའི་ཆོ་གའོ། །ཡང་ན་གོང་དུ་བཤད་པའི་ཆོ་གས་དག་པར་གྱུར་པའི་ལག་བ་གཡོན་པའི་སྲིན་ལག་གིས་གནས་དང་ཉེ་བའི་གནས་ལ་སོགས་པའི་མིང་བཅུ་བརྗོད་ཅིང་ཇི་ལྟར་ཆོ་གས་དག་པར་བྱས་པའི་ཆང་གིས་འཁོར་ལོ་ཟུར་གསུམ་ཉིས་བརྩེགས་མངོན་པར་བྲིས་ལ་དེའི་དབུས་སུ་འཁོར་ལོ་ཟླུམ་པོའོ། །དེ་ལ་རང་གི་སྙིང་གའི་ས་བོན་ལས་སྤྲོས་པའམ་དེའི་འོད་ཀྱིས་བཀུག་པའི་རྟེན་དང་བརྟེན་པར་བཅས་པའི་བཅོམ་ལྡན་འདས་མའི་འཁོར་ལོ་རྣམ་པར་བསམས་ལ། དེ་ལ་བདུད་རྩི་རྣམ་པ་ལྔ་ལ་སོགས་པའི་རང་བཞིན་གྱིས་རྫོགས་པར་བྱས་པའི་བཟའ་བ་དང་བཏུང་བ་ལ་སོགས་པ་ནི་ཡི་གེ་གསུམ་མ་མ་རྐང་པ་བརྒྱད་པའི་སྔགས་ཀྱིས་པདྨའི་སྣོད་ལ་སོགས་པའི་བདུད་རྩིར་གྱུར་པའི་མ་ད་ན་མཐེ་བོང་དང་སྲིན་ལག་གཉིས་ཀྱིས་བླངས་ལ་བཅོམ་
༄། །ལྡན་འདས་མ་ལ་རང་གི་སྙིང་པོ་དང་ཉེ་བའི་སྙིང་པོ་གཉིས་ཀྱིས་དབུལ་ལོ། །མཁའ་འགྲོ་མ་ལ་སོགས་པ་གཤིན་རྗེ་འཇོམས་པའི་མཐར་ཐུག་པ་ལ་རང་རང་གིས་སྔགས་ཀྱིས་དེ་དག་ལ་ཚིམ་པར་བྱའོ། །དེ་ནས་མཆོད་པས་ཡང་དག་པར་མཆོད་ལ། ལྷག་པ་དང་ཆད་པ་བསྐང་བའི་ཕྱིར་ཡི་གེ་བརྒྱ་པ་བརྗོད་ནས་ཚོགས་ཀྱི་འཁོར་ལོ་བྱིན་གྱིས་བརླབ་པའི་དོན་དུ་གསོལ་བ་གདབ་སྟེ། ཨོཾ་ཡོ་ག་ཤུདྡྷཿ་སརྦྦ་དྷརྨྨཱ་ཡོ་ག་ཤུདྡྷོ྅ཧཾ་ཞེས་བརྗོད་ཅིང༌། པདྨ་བསྐོར་བའི་ཕྱག་རྒྱས་དགྱེས་པར་བྱས་ལ། དེའི་ཕྱག་རྒྱ་ཉེ་བར་བསྡུ་བས་འཁྱུད་པའི་ཚུལ་སྔོན་དུ་འགྲོ་བས་སྲིན་ལག་གིས་ས་ལ་རེག་ཅིང་ཨོཾ་བཛྲ་མུཿ་ཞེས་བརྗོད་ནས་གཤེགས་སུ་གསོལ་ཏེ་འཁོར་ལོ་དེ་བདག་ལ་ཐིམ་པར་བསམ་མོ། །དེ་ནས་ས་དེ་ལ་གནས་པའི་མ་ད་ན་གཡོན་པའི་སྲིན་ལག་གིས་བླངས་ནས། དེས་སྙིང་ག་དང་ལྕེ་དང་དཔྲལ་བ་ལ་ཧཱུཾ་ཨཱཿ་ཨོཾ་བརྗོད་པ་སྔོན་དུ་འགྲོ་བས་བྱུག་ཅིང་ལག་པ་ལ་སོགས་པའི་ལྷ་རྣམས་ཀྱི་འཁོར་ལོར་བདག་ལ་རབ་ཏུ་ཞུགས་པར་བལྟའོ། །ལག་པས་མཆོད་པའོ། །དེ་ནས་ཧཱུཾ་དཀར་པོ་ཡོངས་སུ་གྱུར་པ་ལས་རྡོ་རྗེའི་ལྕེ་ཅན་གཡས་པའི་དགང་གཟར་དང༌། ཅིག་ཤོས་ཀྱི་བླུགས་གཟར་གྱིས་རང་གི་ལྟེ་བའི་པདྨའི་ཟེའུ་འབྲུ་ལ་གནས་པའི་འབར་བའི་ཕྲེང་བས་འཁྲུགས་པའི་དཀྱིལ་འཁོར་ལ་སྦྱིན་སྲེག་བྱ་ཞེས་ལྷག་པར་ནང་གི་སྦྱིན་སྲེག་གོ །ལྷག་མ་ཨོཾ་ཨཱཿ་ཨུཙྪིཥྚ་བཛྲ་ཨ་དྷི་ཏིཥྛ་ཨི་མཾ་བ་ལིཾ་ཧཱུཾ་སྭཱ་ཧཱ་ཞེས་པས་དབུལ་བར་བྱའོ། །དེ་ནས་ཁམས་གསུམ་གྱི་འཁོར་ལོའི་སྟོང་པ་དང་སྙིང་རྗེའི་གཉིས་སུ་མེད་པའི་ཡེ་ཤེས་ཀྱི་མེ་ལ་མན་ངག་བཞིན་དུ་ཕུང་པོ་ལ་སོགས་པའི་ཤིང་བསྲེགས་པ་ནི་བླ་ན་མེད་པའི་སྦྱིན་སྲེག་གོ །ཞི་བ་དང་རྒྱས་པ་ལ་སོགས་པའི་ཕྱི་རོལ་གྱི་སྦྱིན་སྲེག་གི་ཆོ་གའི་ལས་ཀྱི་རྗེས་སུ་འབྲང་བར་གྱུར་བའི་ཐབ་དང༌། མེ་ཏོག་དང་ཤིང་དང་སྒྲུབ་པའི་ཐབས་ལ་སོགས་པ་རྗེས་སུ་དྲན་པར་བྱའི། འདིར་ཡི་གེ་མངས་པས་འཇིགས་པས་མ་བྲིས་སོ། །དེ་ལྟར་རེ་ཞིག་མཆོད་པ་དང་གཏོར་མའི་ཆོ་
༄། །ག་ལ་སོགས་པ་དང་བཅས་པ། བཅོམ་ལྡན་འདས་མའི་དཀྱིལ་འཁོར་གྱི་འཁོར་ལོ་སྒོམ་པ་རྒྱས་པར་བསྟན་པའོ། །བར་མ་འདོད་པས་ནི་ཕྱོགས་ཀྱི་འདབ་མ་བཞི་ལ་མཁའ་འགྲོ་མ་ལ་སོགས་པ་བཞིའོ། །ཕྱོགས་བྲལ་གྱི་འདབ་མ་རྣམས་ལ་པདྨའི་སྣོད་ལ་གནས་པའི་དམ་ཚིག་གི་རྫས་རྣམས་སོ། །དབུས་སུ་ཇི་ལྟར་བསྟན་པའི་བཅོམ་ལྡན་འདས་མ་ཞེས་བྱ་བ་སྟེ་ལྷ་ལྔའི་བདག་ཉིད་ཀྱི་དཀྱིལ་འཁོར་བསྒོམ་པར་བྱའོ། །གཏོར་མ་དང་མཆོད་པ་ལ་སོགས་པ་ཇི་ལྟར་འབྱོར་བས་ལྔ་པོ་རྣམས་རང་རང་གི་སྔགས་རྣམས་ཀྱིས་བྱའོ། །སྲུང་བའི་འཁོར་ལོ་ལ་སོགས་པ་རྣམས་ཀྱང་སྔར་བཞིན་དུ་བྱའོ། །ཚུལ་གཞན་ཡང་འདི་ནི་ཨོ་ཌྱ་ན་གྱི་གནས་ལས་བྱུང་བའི་རིམ་པས་ནི་ཞབས་གཡོན་སྟེང་དུ་བརྐྱང་བར་གྱུར་པའོ། །སྐྱེད་པར་བྱེད་པའི་ས་བོན་དང་སྙིང་པོ་ལ་སོགས་པའི་སྔགས་རྣམས་དང་འཁོར་གྱི་མཁའ་འགྲོ་མ་ལ་སོགས་པ་ཡང་སྔར་བཤད་པ་བཞིན་ནོ། །བསྡུས་པ་ལ་དགའ་བས་ནི་ཇི་ལྟར་བཤད་པའི་བཅོམ་ལྡན་འདས་མ་གཅིག་པུ་ཉིང་བསྒོམ་པར་བྱའོ། །མཆོད་པ་ལ་སོགས་པ་ཇི་ལྟར་འབྱོར་པས་བཅོམ་ལྡན་འདས་མ་ལ་བྱའོ། །ཚུལ་གཞན་ཡང་གང་ལ་ཡང་འདི་དག་ནི་རང་གི་སྙིང་གར་ཟླ་བ་ལ་གནས་པའི་ཨོཾ་དཀར་པོའི་འོད་ཟེར་རྣམས་ཀྱིས་བཀུག་པའི་སངས་རྒྱས་ལ་སོགས་པ་ལ་མཆོད་ནས་ཇི་སྲིད་སྟོང་པ་ཉིད་ཀྱི་བར་དུ་རྣམ་པར་བསྒོམས་ཏེ། ཟླ་བ་དང་རྡོ་རྗེ་དང་བཾ་གི་ས་བོན་ཡོངས་སུ་གྱུར་པ་ལས་པདྨ་དང་ཟླ་བའི་གདན་ཅན་ཡང་བསྒོམ་པར་བྱའོ། །འོན་ཏེ་བཅོམ་ལྡན་འདས་མ་འདི་ཁོ་ན་རྡོ་རྗེ་རྣམ་པར་སྣང་མཛད་མ་རྡོ་རྗེ་རྣལ་འབྱོར་མ་ཞེས་ཀྱང་ཟེར་རོ། །ལྷག་མ་འདི་སྟེ་གཟུང་དང་གདམས་ངག་ཇི་ལྟ་བར་མན་ངག་གི་རྣམ་པར་དབྱེ་བས་བཞི་སྟེ། འདི་ལྟ་སྟེ་རང་གི་ལྟེ་བའི་དབུས་སུ་གནས་པའི་རཾ་ལས་བྱུང་བའི་མེའི་འཁོར་ལོ་ཟུར་གསུམ་པའི་སྟེང་དུ་པདྨ་དམར་པོ་འདབ་མ་བཞི་པ་ལ་ཡི་གེ་ཧྲཱིཿ་དམར་པོ་བལྟའོ། །དེ་དག་ཡོངས་སུ་གྱུར་པ་ལས་སྐུ་མདོག་དམར་མོ་ཞབས་གཡོན་བསྐུམ་ཞིང་གཡས་
༄། །བརྐྱང་བས་རོའི་གདན་ལ་གནས་པ་དབུ་སྐྲ་དམར་པོ་གྱེན་ལ་བརྫེས་པ། ཕྱག་བཞི་པའི་གཡས་པ་གཉིས་ན་རྡོ་རྗེ་དང་ལྕགས་ཀྱུའོ། །གཡོན་གཉིས་ན་ཁ་ཊྭཱཾ་ག་དང་ཐོད་པ་དང༌། སྡིགས་མཛུབ་དང་ཞགས་པར་བཅས་པ་འཛིན་པ། གསུས་པ་འཕྱང་བ་ཕག་ཞལ་ཅན་གྱི་བཅོམ་ལྡན་འདས་མ་བསྒོམ་པར་བྱའོ། །ཁྱད་པར་གྱི་གཟུགས་ནི་གོང་བཞིན་དུ་སྟེ་དཔལ་རྡོ་རྗེ་ཕག་ཞལ་མའི་རིམ་པའོ། །ཁྱད་པར་ནི་ཨོཾ་ཧཱུཾ་ཧྲིཾ་ཏྲཾ་ཞེས་བྱ་བ་ནི་སྙིང་པོའོ། །ཨོཾ་བཛྲ་བཱ་རཱ་ཧཱི་ཨཱ་བེ་ཤ་ཡ་སརྦྦ་དུ་ཥྚཱཾ་ཧྲཱིཾ་སྭཱ་ཧཱ་ཞེས་པ་ནི་སྙིང་པོའོ། །ལྷ་མོའི་རྣལ་འབྱོར་སྔོན་དུ་འགྲོ་བས་འབུམ་ཕྲག་གཅིག་བཟླས་པས་འགྲུབ་པར་འགྱུར་བ་ལ་ཐེ་ཚོམ་མེད་དོ། །ཨོཾ་ཨཱཿ་ཧྲཱིཾ་ཧཱུཾ་ཧཿ་ཧཿ་སྔགས་འདི་དག་གིས་རས་རིས་ཀྱི་མདུན་དུ་ཤ་ཆེན་གྱི་ཧྱེ་མས་བདུག་སྤོས་དབུལ་ལོ། །ཞག་ཉི་ཤུ་རྩ་གཅིག་གིས་འདོད་པའི་དོན་འགྲུབ་པའོ། །ཨོཾ་ཧྲཱིཾ་ཧཾ་ཧྰཾ་ཧཿ་ཧཿ་ཧཱིཿ་ཧཱིཿ་ཧཱིཿ་ཕེཾ་ཕེཾ་ཞེས་པའི་ཡི་གེ་བཏགས་ནས་བདུད་ཐམས་ཅད་ཀྱི་ལས་རབ་ཏུ་ཞི་བའི་དོན་དུ་ཉེ་བར་སྤྱད་པ་ལྔས་མཚན་མོ་གཏོར་མ་བཏང་ངོ༌། །སྣོད་མ་ཡིན་པ་ལ་ཆོ་ག་འདི་བསྟན་པར་མི་བྱའོ། །དེས་རྡོ་རྗེ་རྣེལ་འབྱོར་མ་རྣམས་ཀྱིས་བྱིན་གྱིས་རློབ་པར་འགྱུར་རོ། །ཨོཾ་ཧྲཱི་གྷཱཾ་ཏ་ཡ་སརྦྦ་དུ་ཥྚཱཾ་ཧཱུཾ་ཕཊ་སྭཱ་ཧཱ་ཞེས་པ་འདིས་དང་པོ་གཏོར་མ་ཕུལ་ནས་རྡོ་རྗེ་ཕག་མོའི་སྒྲུབ་པ་ལ་འབད་པར་བྱའོ། །སྔར་བཤད་པའི་གཏོར་མའི་ཆོ་ག་ལ་སོགས་པ་ཡང་འདིར་བྱ་སྟེ། ཆོ་ག་ལྷག་མ་ཁྱད་པར་འཕགས་པས་སོ། །ཚུལ་གཞན་ཡང་འདིར་སྙིང་གར་པདྨ་དམར་པོ་ལ་ཨཾ་ལས་བྱུང་བའི་ཉི་མ་ལ་གནས་པའི་ཧྲཱི་དཀར་པོས་བྱིན་གྱིས་བརླབས་པའི་རྡོ་རྗེ་དམར་པོ་རྩེ་ལྔ་ཡོངས་སུ་གྱུར་པ་ལས་སྐུ་མདོག་དཀར་མོ་པདྨ་དམར་པོ་དང་ཉི་མ་ལ་གནས་པ་མི་ཤེས་པའི་སྐྱེས་བུའི་སྟེང་དུ་ཞབས་གཡོན་བསྐུམ་གཡས་བརྐྱང་བས་གནས་པའོ། །དེའི་སྙིང་གར་ཉི་མ་ལ་གནས་པའི་ཧྲཱི་དམར་པོའི་ཡི་གེས་བྱིན་གྱིས་བརླབས་པའི་ཉི་མ་ལ་གནས་པའི་རྡོ་རྗེའོ། །སྣ་ཚོགས་པདྨ་དང་ཉི་།མའི་གདན་ལ་གནས་པའི་མི་བསྐྱོད་པས་དབང་བསྐུར་ཏེ། གཞན་
༄། །ཐམས་ཅད་ནི་སྔར་བཞིན་ནོ། །དེའི་རྗེས་སུ་ལྟེ་བར་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་དམར་སྐྱ་ལ་ཧྲཱིཿ་དཀར་པོ་བལྟས་ལ། སྔགས་དེའི་ཕྲེང་བ་དཀར་པོ་ཕྲེང་བའི་རྣམ་པ་བཞིན་དུ་འཁོར་ལོ་བསྐོར་བའི་རྣལ་འབྱོར་གྱི་ཁ་ནས་འཐོན་ཏེ་སངས་རྒྱས་ཀྱི་ཡོན་ཏན་གྱི་ཚོགས་དང་ནོར་བུ་དང་སྔགས་དང་སྨན་དང་ཟླ་བ་དང་སྐར་མ་དང་ཡི་གེའི་བསྟན་བཅོས་ཀྱི་སྒྱུ་རྩལ་ལ་སོགས་པའི་བྱིན་གྱིས་བརླབས་པ་ཁྱེར་ནས་ལྟེ་བའི་བུ་གར་རབ་ཏུ་ཞུགས་པས་རང་དང་གཞན་གྱིས་མི་ཤེས་པའི་མུན་པ་བསྲག་པའི་བདག་ཉིད་ཅན་སྒོམ་ཞིང༌། མྱུར་བ་ལ་སོགས་པའི་ཉེས་པ་དང་བྲལ་བས་སྔགས་བཟླས་སོ། །སྔགས་ནི་ཧྲཱིཾ་ཧྲཱིཾ་ཞེས་པའོ། །གང་གི་ཚེ་ལྡང་བར་འདོད་པར་གྱུར་ན་དེའི་ཚེ་སྔགས་ཀྱི་ཕྲེང་བ་ལྟེ་བ་ལ་གནས་པའི་ཧྲཱིཾ་གི་ཡི་གེ་ལ་རབ་ཏུ་ཐིམ་ནས་མཆོད་པ་ལ་སོགས་པ་བྱས་ལ་ཇི་ལྟར་བདེ་བས་ལྡང་བར་བྱའོ། །ཡང་ན་ཡི་གེ་ཨཱཿ་ཡོངས་སུ་གྱུར་པ་ལས་པདྨའི་འདབ་མ་ལྟ་བུར་གྱུར་པའི་ལྕེ་ལ་ཧྲཱིཿ་དམར་པོ་གསལ་ཞིང་འབར་བ་རྣམ་པར་བསྒོམས་ཏེ། དེ་ལ་སེམས་རྩེ་གཅིག་པས་བརྟན་པར་བྱས་ནས་བརྒྱ་ཕྱེད་ཀྱི་ཕྲེང་བ་ལ་ཐུན་གསུམ་མམ། བཞིར་བཟླས་པར་བྱའོ། །དེ་ལྟར་བཟླས་པ་དང༌། བསྒོམ་པའི་རྣལ་འབྱོར་པས་འབུམ་ཕྲག་བདུན་བཟླས་པས་བསྟན་བཅོས་ཐམས་ཅད་ལ་མཁས་པར་འགྱུར་བ་དང༌། བློ་རྣོ་བར་གྱུར་པས་འཛིན་བཟང་བ་དང༌། ཚོགས་ཀྱི་ཟིལ་གྱིས་མི་ནོན་པ་དང༌། སྙན་ངག་ལ་མཁས་པར་གྱུར་པ་དང༌། རིམས་དང་དུག་དང་མཁའ་འགྲོ་མ་རྣམས་ཀྱིས་གནོད་མི་ནུས་པར་འགྱུར་རོ། །སྔགས་འདི་གྲུབ་པར་གྱུར་ན་སྔགས་འདི་བཟླས་པའི་ཐོད་ལོ་ཀོར་གང་གིས་ལག་ཏུ་གཏད་པ་དེར་རྨོངས་པ་ཡིན་ཡང་ཚིགས་སུ་བཅད་པ་ལ་མཁས་པར་འགྱུར་རོ། །དབང་དུ་བསྡུ་བ་ལ་འདི་ཉིད་དམར་པོའི་རྣམ་པར་བསྒོམས་ཏེ། ཆོ་ག་བཞིན་དུ་བདུད་རྩི་མྱངས་ནས་རང་གི་མིང་གི་ཡི་གེ་དང་པོ་ཡོངས་སུ་གྱུར་པ་ལས་བསྒྲུབ་བྱ་བསྒོམས་ཏེ་སྔགས་ཀྱི་ཕྲེང་བ་ལ་འཕྲོས་
༄། །པའི་འོད་ཟེར་རྣམས་ཀྱིས་བཀུག་ནས་མདུན་དུ་གཞག་པར་བལྟ་སྟེ། དེའི་སེམས་ཡོངས་སུ་གྱུར་པ་ལས་ཟླ་བ་དམར་པོའི་རྣམ་པར་གྱུར་པར་དམིགས་ཏེ། སྔགས་དེའི་ཕྲེང་བ་ལས་འཕྲོས་པའི་ལྷ་མོ་དམར་མོ་ཕྱག་གཡོན་པ་ན་ཧྲཱིཿ་ལས་བྱུང་བའི་ཞགས་པ་དམར་པོ་འཛིན་པ། གཡས་པས་མེ་ཏོག་ཨུཏྤལ་ཁ་མ་བྱེ་བ་ལྟ་བུའི་རྡོ་རྗེ་ལྕགས་ཀྱུ་འཛིན་པ་བསྒྲུབ་བྱའི་མདུན་དུ་གནས་པར་བལྟའོ། །དེ་ནས་ཨོཾ་ཨཱཿ་ཧྲཱིཿ་ཨ་མུ་ཀ་ཙིཏྟཾ་ཨཱ་ཀཪྵ་ཡ་ཧཱུཾ་ཛཿ་ཞེས་བྱ་བས་བསྐུལ་བའི་རྗེས་ལ་ལྷ་མོ་དེས་བསྒྲུབ་བྱའི་ལུས་ཀྱི་ནང་དུ་ཆོ་ག་བཞིན་དུ་ཞུགས་ནས་དེའི་སེམས་ཟླ་བའི་དཀྱིལ་འཁོར་དུ་གནས་པ་དེ་ཞགས་པས་དྲིལ་ནས་ལྕགས་ཀྱུས་བསྐུལ་ཞིང་རང་གི་སྙིང་གར་རབ་ཏུ་ཞུགས་ཏེ་སྔགས་ཀྱི་ཕྲེང་བ་ལ་ཐིམ་པར་བསམ་མོ། །དེ་ནས་བསྒྲུབ་བྱ་དེ་ཐལ་མོ་སྦྱར་བ་དང་གཞན་གྱི་དབང་འབའ་ཞིག་ཏུ་གྱུར་པ་དང༌། སྒྲུབ་པ་པོའི་མངོན་སུམ་དུ་གྱུར་པ་ཅི་ཞིག་བྱ་ཞེས་སྨྲ་བར་བསམ་མོ། །དེ་ལྟར་ཐུན་གསུམ་མ་མཐུན་བཞི་ལ་བསྒོམས་པས་བསྒྲུབ་བྱ་མྱུར་དུ་ངེས་པར་དབང་དུ་འགྱུར་རོ། །ཚུལ་གཞན་ཡང་འདིར་སྣ་ཚོགས་པདྨ་དང་ཉི་མ་ལ་གནས་པའི་ཧཱུཾ་དམར་པོ་ཡོངས་སུ་གྱུར་པ་ལས་ཞབས་གཡོན་བསྐུམ་ཞིང་གཡས་བརྐྱང་བས་རོའི་གདན་ལ་བཞུགས་པ། དབུ་སྐྲ་དམར་ཞིང་འབར་བ་གྱེན་དུ་བརྫེས་བ་ཕྱག་གཉིས་ཀྱིས་གཡས་པས་གྲི་གུག་དང་སྡིགས་མཛུབ་མཛད་པ། གཡོན་པས་ཁྲག་གིས་བཀང་བའི་ཐོད་པ་འཛིན་པ་སྟེ། རྒྱན་ལ་སོགས་པ་ལྷག་མ་ནི་གོང་བཞིན་ནོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ། ཨོཾ་བཛྲ་ཝརྞྞ་ནཱི་ཡེ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། རྩ་བའི་སྔགས་སོ། །ཨོཾ་བཛྲ་ཌཱ་ཀི་ནཱི་ཡེ་ཧྲཱིཾ་ཧཱུཾ་ཕཊ་སྭཱ་ཧཱ། སྙིང་པོའི་སྔགས་སོ། །ཨོཾ་བཛྲ་ཡོ་གི་ནི་ཡེ་ཧཱུཾ་ཕཊ་སྭཱ་ཧཱ། ཉེ་བའི་སྙིང་པོའི་སྔགས་སོ། །ཨོཾ་བཛྲ་ཌཱ་ཀི་ནཱི་ཨི་མཾ་བ་ལིཾ་གྲྀཧྞ་གྲྀཧྞ་ཧ་ཧ་ཧ་ཧ་ཁ་ཁ་ཁ་ཁ་ཨ་ཨ་ཨ་ཨ་མ་མ་སིདྡྷི་མྨེ་པྲ་ཡཙྪ་ཧཱུཾ་ཕཊ་སྭཱ་ཧཱ་ཞེས་བྱ་བའི་སྔགས་འདིས་གོང་བཞིན་དུ་བདུད་རྩིར་གྱུར་པའི་གཏོར་མ་དབུལ་ལོ། །ཁྱད་པར་དུ་ཚེས་བརྒྱད་ལ་སོགས་པའི་དུས་ཀྱི་མཚན་མོ་དུར་ཁྲོད་ལ་སོགས་
༄། །པར་དབུལ་བར་བྱའོ། །ཚུལ་གཞན་ཡང་འདི་ཉིད་ཧཱུཾ་དམར་པོ་ལས་སྐྱེས་པའི་དབུ་སྐྲའི་ཚོགས་གྲོལ་བར་ཡང་མཐོང་ངོ༌། །གཞན་ཡང་རོའི་གདན་མེད་པ་ཡང་ཡོད་དེ་སྔགས་རྣམས་ནི་སྔར་གྱི་དེ་ཉིད་དོ། །ཚུལ་གཞན་ཡང་རང་གི་ལྟེ་བ་ལ་གནས་པའི་པདྨ་དཀར་པོ་དང་ཉི་མ་ལ་གནས་པའི་ཆོས་འབྱུང་སིནྡྷུ་ར་ལྟར་དམར་བའི་དབུས་སུ་ཡི་གེ་ཧྲཱིཿ་སེར་པོ་ལས་བྱུང་བའི་སྐུ་མདོག་སེར་མོ་རང་ཉིད་ཀྱི་གྲི་གུག་གིས་རང་གི་སྐྱེ་བཅད་ནས་མགོ་བོ་ལག་པ་གཡོན་པ་སྟེང་དུ་བརྐྱང་བས་འཛིན་པ། ལག་པ་གཡས་པ་གྲི་གུག་འོག་ཏུ་བརྐྱང་པས་འཛིན་པ། ཞབས་གཡས་པ་བརྐྱང་ཞིང་གཡོན་བསྐུམ་པ། སྐྱེ་ལས་རྩ་ཨ་བ་དྡཱུ་ཏཱིའི་ལམ་ལས་ཁྲག་གི་རྒྱུན་འཐོན་ནས་དེའི་ཁར་ལྷུང་སྟེ། གཞན་ཕ་རོལ་གྱི་རྒྱུན་གཉིས་ནི་ལ་ལ་ནཱ་དང་ར་ས་ནཱ་ལས་འཐོན་ཏེ་ངོས་གཉིས་ཀྱིས་རྣལ་འབྱོར་མ་གཉིས་ཀྱི་ཁར་འཇུག་པ་བསྒོམ་པར་བྱའོ། །དེ་ལ་གཡོན་པའི་ངོས་སུ་རྡོ་རྗེ་རབ་སྔགས་མ་ལྗང་གུ་གཡོན་པས་གྲི་གུག་དང་གཡས་པས་ཐོད་པ་འཛིན་པ། ཞབས་གཡས་བསྐུམ་ཞིང་གཡོན་བརྐྱང་བའོ། །གཡས་ངོས་སུ་རྣམ་པར་སྣང་མཛད་མ་སེར་མོ་གཡས་པས་གྲི་གུག་དང་གཡོན་པས་ཐོད་པ་འཛིན་པ་ཞབས་གཡས་བརྐྱང་ཞིང་གཡོན་བསྐུམ་པའོ། །གཞན་ཐམས་ཅད་ནི་སྔར་བཞིན་ནོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ་བཛྲ་ཝརྞྞ་ནཱི་ཡེ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ་ཞེས་པ་ནི་བཟླས་པའི་སྔགས་སོ། །མཆོད་པའི་རིམ་པ་ནི་མཎྜལ་ཟུར་བཞི་པ་ལས་ཉི་མའི་སྟེང་དུ་ཆོས་འབྱུང་བྲིས་ནས་དེའི་དབུས་སུ་ཡི་གེ་ཧྲཱིཾ་དམ་དེ་ལས་བྱུང་བའི་བཅོམ་ལྡན་འདས་སྔར་བཤད་པའི་གཟུགས་ཅན་མ་ལ་མཆོད་པར་བྱའོ། །དེ་ལ་ཆོས་འབྱུང་གི་ནང་དུ། ཨོཾ་སརྦྦ་བུདྡྷ་ཌཱ་ཀི་ནཱི་ཡེ་ཞེས་བྱ་བ་ལ་སོགས་པའི་སྔགས་ཀྱིས་དང་པོར་མཆོད་དོ། །ཨོཾ་སརྦྦ་བུདྡྷ་ཌཱ་ཀི་ནཱི་ཡེ་ཧཱུཾ་སྭཱ་ཧཱ་ཞེས་བྱ་བ་འདིས་མཆོད་ཡོན་ལ་སོགས་པ་དབུལ་ལོ། །གཡོན་དུ་ནི་ཨོཾ་བཛྲ་ཝརྞྞ་ནཱི་ཡེ་ཧཱུཾ་སྭཱ་ཧཱ་དང༌། གཡས་སུ་ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་སྭཱ་ཧཱ་ཞེས་བྱ་བས་མཆོད་དོ། །དེ་ནས་ཨ་ཌྱ་ན་དང་པུརྞ་གི་རི་དང་ག་མ་རུ་
༄། །པ་དང་ཤྲཱི་ཧ་ཊ་ཊ་དང༌། ཆོས་སྐུ་དང༌། ལོངས་སྐུ་དང༌། སྤྲུལ་སྐུ་དང་བདེ་བ་ཆེན་པོའི་སྐུ་རྣམས་ལ་རེ་རེ་བཞི་པའི་མཐར་ཐུག་གི་མིང་དང་སྤལ་ནས་བཏགས་པ་དང༌། ཨོཾ་གོང་དུ་བཏགས་པ་དང༌། ཐ་མར་སྭཱ་ཧཱ་བཏགས་ལ་མཆོད་དེ་སྔར་བཞིན་དུ་གཤེས་སུ་གསོལ་བར་བྱའོ། །ཚུལ་གཞན་ཡང་འདི་ཉིད་རང་གི་ལུས་ཁམས་གསུམ་རྣམ་པར་དག་པའི་གཞལ་ཡས་ཁང་དུ་ལྷག་པར་མོས་ཏེ། སྐད་ཅིག་མས་ལྟེ་བའི་དཀྱིལ་དུ་ཕྱག་གཉིས་གྲི་གུག་དང་ཐོད་པ་ལྡན་པ་སྐྱིལ་ཀྲུང་ཕྱེད་པའི་གར་གྱི་ཚུལ་གྱིས་གནས་པ་ཛ་བའི་མི་ཏོག་ལྟ་བུ་བསྒོམ་པར་བྱའོ། །དེ་ཡི་གཡས་སུ་ཕག་ཞལ་ཏེ། །གཡོན་དུ་ཁྲོ་མོའི་ཞལ་ཁོ་ན། །བདེན་གཉིས་རྣམ་པར་དག་པ་ཡིས། །ཞལ་གཉིས་སུ་ནི་བརྗོད་པའོ། །དེའི་ཕྱིར་འདི་དག་ལ་སོགས་པ་གྲུབ་ཐོབ་ཀྱི་མན་ངག་ལས་རིམ་པ་དང་རིམ་པས་འབྱུང་བའི་གདུལ་བྱའི་བསམ་པའི་དབྱེ་བས་བཅོམ་ལྡན་འདས་མའི་མན་ངག་གི་བྱེ་བྲག་མཐའ་ཡས་པའི་དབྱེ་བ་རྟོགས་པར་བྱ་སྟེ། ཕྱོགས་གཅིག་ཙམ་འདིར་བསྟན་ཏེ། རིམ་པ་འདི་རྣམས་ལས་རིམ་པ་གཅིག་ཞུས་ནས་དད་པ་ཅན་སྙིང་རྗེ་དང་ལྡན་པ་དང་ཆགས་པ་དང་བྲལ་བ་དམ་ཚིག་ལ་གནས་པ་སོམ་ཉི་མི་ཟ་བས་བསྒོམ་པས་ངེས་པར་བསྒྲུབ་པར་བྱའོ། །གདམས་ངག་ལས་བྱུང་བའི་དུས་ཀྱི་མཆོད་པ་བྲི་བར་བྱ་སྟེ། ཚེས་བཅུ་ལ་གུར་ཀུམ་ལ་སོགས་པས་ཕྱིས་པའི་དྲི་མ་མེད་པའི་སྣོད་ལ་སིནྡྷུ་ར་བཙགས་ནས་དེའི་དབུས་སུ་གསེར་གྱི་སྨྱུ་གུས་ཆོས་འབྱུང་མངོན་པར་བྲིས་ཏེ། དེའི་དབུས་སུ་ཡི་གེ་ཧྲཱིཾ་བྲིའོ། །ཡང་ན་ས་ཚོ་གཉིས་མཎྜལ་ཟུར་བཞི་པ་བྱས་ཏེ་དབུས་སུ་སིནྡྷུ་རས་ཆོས་འབྱུང་བཀོད་ནས་དེ་ལ་ཡི་གེ་བཾ་བྲིས་པ་དེའི་དངོས་སུ་གཡུང་དྲུང་གི་ཕྱག་རྒྱ་བྲིས་པ་ལས། ཆུ་ལས་སྐྱེས་པ་དང་སྐམ་ལས་སྐྱེས་པའི་མེ་ཏོག་གིས་མཆོད་དེ། ཨོ་ཌྱ་ན་ལ་སོགས་པའི་གནས་བཞི་དང་སྐུ་བཞི་གོང་བཞིན་དུ་མཆོད་དོ། །བཟའ་བ་དང་བཏུང་བ་ལ་སོགས་པའི་དམ་ཚིག་གི་རྫས་འབྱོར་བ་བཞིན་དུ་དབུལ་བར་བྱ་ཞིང༌། གཞོན་ནུ་མ་རྣམས་ཀྱང་མཆོད་པར་བྱའོ། །ཆོ་ག་འདི་ནི་གཅེར་བུ་དང་
༄། །སྐྲ་གྲོལ་བ་དང་ལྷོ་ཕྱོགས་སུ་མངོན་པར་བལྟས་ཏེ་ཉེ་བར་འདུག་ནས་ཤིན་ཏུ་གསང་ཞིང་སྦས་པས་བསྒྲུབ་པ་ལ་འབད་པར་བྱའོ། །དེ་མ་ཡིན་ན་དངོས་གྲུབ་ཉམས་པར་འགྱུར་བ་དང༌། ནད་རྣམས་ཀྱང་སོ་སོར་འབྱུང་བར་འགྱུར་རོ། །དེ་ནས་གཏོར་མ་ཕུལ་ནས་མངོན་པར་འདོད་པའི་དངོས་གྲུབ་གསོལ་བ་བཏབ་སྟེ་གཤེགས་སུ་གསོལ་ལོ། །སིནྡྷུ་ར་དང་ལྷ་བཤོས་ལ་སོགས་པ་ནི་གཞོན་ནུ་མ་རྣམས་དང༌། ཡང་ན་བུད་མེད་ཡུགས་ས་མོ་མ་ཡིན་པ་ལ་དབུལ་བར་བྱའོ། །ཡང་ན་ཚེས་བཅུའམ་ཚེས་བརྒྱད་དམ་ཚེས་བཅུ་བཞི་ལ་བུད་མེད་ཀྱིས་འཚོང་བར་བྱེད་པ་གང་ཡང་རུང་བའི་མེ་ཏོག་དང༌། ཤིང་ཏོག་དང་མར་ནག་དང་གོ་ལ་དང་འབྲས་དང་སྔོ་དང་ཞོ་དང་མེ་ཤིང་དང་ཚྭ་དང་སིནྡྷུ་ར་དང་མ་དན་ལ་སོགས་པ་ཅུང་ཟད་ཇི་ལྟར་འབྱོར་པས་མྱོས་ནས་ཅི་ནུས་པའི་གཡོགས་བྱས་ཏེ། སྔར་བཞིན་དུ་སིནྡྷུ་ར་ལས་བྱས་བའི་ཆོས་འབྱུང་ལ་ས་བོན་གྱི་ཡི་གེ་ལ་སོགས་པ་བྲིས་ནས་ཡང་དག་པར་མཆོད་ལ་འདོད་པའི་དངོས་གྲུབ་ལ་གསོལ་བ་གདབ་བཅིང་གཤེགས་སུ་གསོལ་ལོ། །གཞན་ཐམས་ཅད་ནི་སྔར་བཞིན་དུ་བྱའོ། །དེའི་རྨི་ལམ་དུ་རྡོ་རྗེ་རྣལ་འབྱོར་མ་ལུང་སྟོན་པ་ཞེས་བྱ་བའི་མན་ངག་གོ །གཞན་ཡང་ཤིན་ཏུ་དག་པའི་མེ་ལོང་ལ་ཚེས་བརྒྱད་ལ་སིནྡྷུ་ར་བཀྲམ་ནས་དེ་ལ་ཆོས་འབྱུང་གི་ཕྱག་རྒྱ་བྲིས་ཏེ། ཕྱིའི་ཟུར་རྣམས་སུ་བཾ་གི་ས་བོན་རྣམ་པར་བྲིས་ལ་དབུས་སུ་སྔགས་བྲི་བར་བྱའོ། །ཆོས་འབྱུང་གི་ཕྱི་རོལ་གྱི་ངོས་བཞི་ལ་གཡུང་དྲུང་རིས་གཡོན་དུ་འཁོར་བར་བྲིས་ལ། །མེ་ཏོག་ལ་སོགས་སྦས་ཡང་དག་པར་མཆོད་ཅིང་སྔགས་ཇི་ལྟར་ནུས་པ་ཡོངས་སུ་བཟླས་ཏེ་སིནྡྷུ་ར་སྣོད་ཅིག་ཏུ་གཞག་གོ །ཇི་ལྟར་ཇི་སྲིད་ཟླ་བ་དྲུག་གི་བར་དུ་བྱའོ། །དེའི་རྗེས་ལ་བཙན་དུག་ལང་ག་ལི་ལ་སྦུ་གུ་ཅན་གྱི་དབུས་སུ་སིནྡྷུ་ར་བཅུག་ནས་དུར་ཁྲོད་དུ་སྦས་ཏེ་གཏོར་མ་དང་མཆོད་པ་བྱས་ནས་ཇི་ལྟར་འདོད་པའི་ཆེད་དུ་སྔགས་བཟླས་སོ། །དེ་ལྟར་ཉི་མ་རེ་རེ་ཞིང་ཟླ་བ་གཅིག་བྱའོ། །དེ་ནས་སིནྡྷུ་ར་དེས་གཡུང་
༄། །དྲུང་རིས་ཀྱི་མཛོད་སྤུ་ནས་བྱས་ཏེ་བསོད་སྙོམས་ལ་གྲོང་ཁྱེར་དུ་རབ་ཏུ་འཇུག་གོ །དེའི་ཚེ་མཛོད་སྤུ་ནས་དེ་བུད་མེད་གང་ལ་འཕོས་པར་མཐོང་བར་འགྱུར་ན་དེ་ལ་འབད་པས་བསྙེན་བཀུར་བྱའོ། །དེ་ལྟ་བུའི་གྲུབ་ཐོབ་རི་ཁྲོད་པའི་ཞབས་ལས་བྱུང་བའི་ཚུལ་གྱིས་གཡུང་དྲུང་གིས་རྡོ་རྗེ་རྣལ་འབྱོར་མ་མཉེས་པར་བྱེད་པའི་ཆོ་གའོ། །དེ་ལ་རྣལ་འབྱོར་མའི་ཆ་ལུགས་སུ་གནས་པས་མཆོད་པ་དང་སྔགས་བཟླས་པ་དང་བཟའ་བ་ལ་སོགས་པ་ནི་རབ་ཏུ་གསངས་ནས་གཡོན་པས་བྱའོ། །གནས་ལ་སོགས་པ་བལྟ་བའི་ཕྱིར་འགྲོ་བར་འདོད་པས་རྡོ་རྗེ་མཁའ་འགྲོ་མ་ལ་དམིགས་པ་གཏད་ནས་གྲོང་ཁྱེར་ལ་སོགས་པས་གཡོན་སྐོར་དུ་བསྐོར་བར་བྱའོ། །འགྲོ་བ་ལ་ནི་དང་པོ་རྐང་པ་གཡོན་པ་བརྐྱང་ནས་འགྲོ་བར་བྱའོ། །ཇི་ལྟར་བཤམས་པའི་འདོད་ཡོན་རྣམ་པ་ལྔས་རྣམ་པར་སྣང་མཛད་ལ་སོགས་པའི་རྣམ་པར་དག་པས་སོམ་ཉི་མེད་པར་ལོངས་སྤྱོད་དོ། །ལྷ་དང་སྔགས་ཐ་དད་དུ་གཟུང་བར་མི་བྱའོ། །སངས་རྒྱས་དང་བྱང་ཆུབ་སེམས་དཔའ་ལ་སོགས་པ་བཅོམ་ལྡན་འདས་མས་ལྷག་པར་མོས་པས་རྐང་པ་བརྒྱད་པའི་སྔགས་ཀྱིས་མཆོད་ཅིང་ཕྱག་བྱའོ། །སྔགས་དང་ཕྱག་རྒྱ་རང་གི་རྟོག་པས་མི་བྱ་ཞིང་གཤིག་པར་ཡང་མི་བྱའོ། །ཚུལ་ཁྲིམས་དང་ལྡན་པ་དང་ཉེས་པ་མེད་པ་ལ་མངོན་སྤྱོད་ཀྱི་ལས་མི་བྱའོ། །བུད་མེད་རྣམས་ལ་བརྡུང་བ་དང་ཁྲོ་བ་དང་སྨད་པར་མི་བྱའོ། །ཁྱད་པར་དུ་ཕྱག་རྒྱ་དྲུག་འཛིན་པ་རྣམས་ལ་མ་ཡིན་ནོ། །འདི་ལ་སོགས་པ་དམ་ཚིག་གི་རྣམ་པ་རྒྱུད་ཀྱི་རྗེས་སུ་འབྲངས་པས་ཤེས་ནས་བསྲུང་བར་བྱའོ། །འཁྲུལ་འཁོར་ལ་སོགས་པ་ཡང་དེ་ཉིད་ལས་ཤེས་པར་རབ་ཏུ་སྦྱར་བར་བྱ་སྟེ། མངས་པས་འཇིགས་པས་མ་བྲིས་ཏེ་མང་པོ་ལ་དོན་མེད་དོ། །བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །བླ་མ་དཔལ་ལྡན་རྡོ་རྗེ་འཛིན། །བླ་མ་ཉིད་ནི་རྒྱུ་རྐྱེན་འགྱུར། །དེ་ཕྱིར་སངས་རྒྱས་ཐོབ་འདོད་པས། །བླ་མ་དག་ནི་མཉེས་པར་བྱ། །ཞེས་སོ། །སྲིད་པ་དག་པར་གྱུར་པའི་ཡོན་ཏན་མེ་ཏོག་དྲི་བཟང་འདི་ནི་བྱས་པ་ཡིས། །མཁས་པ་བརྒྱ་
༄། །ལམ་ཞི་བའི་འབྲས་བུའི་གོ་འཕང་མྱུར་དུ་སྤྱོད་འདོད་རྟེན་པ་ན། །དེ་ཚེ་མངོན་པར་རྟོགས་པ་དཔག་བསམ་ཤིང་ལས་རབ་བྱུང་རྒྱས་པར་བཅུད་བཟང་བའི། །ཤིན་ཏུ་རོ་ལྡན་སར་པར་གྱུར་པའི་སྙེ་མ་འདི་ནི་ཉེ་བར་བསྟེན་པར་གྱིས། །རྒྱུད་དང་མངོན་རྟོགས་ཐབས་དག་དང༌། །བླ་མའི་ཞལ་ནས་སྒྲུབ་ཐབས་ལས། །བག་ཙམ་བསྡུས་ནས་འཁྲུལ་པ་མེད། །འདི་ནི་ལེགས་པར་བརྩམས་པའོ། །བདག་གིས་འདི་ནི་བྱས་པ་ཡི། །དེ་ལས་བྱུང་བའི་དགེ་བ་དེས། །འགྲོ་ཀུན་རྡོ་རྗེ་མཛེས་མ་ཡི། །གོ་འཕང་མྱུར་དུ་ཐོབ་པར་ཤོག །དཔལ་རྡོ་རྗེ་རྣལ་འབྱོར་མའི་སྒྲུབ་ཐབས་མངོན་པར་རྟོགས་པའི་སྙེ་མ་ཞེས་བྱ་བ་སློབ་དཔོན་ཆེན་པོ་དགེ་བའི་འབྱུང་གནས་སྦས་པས་མཛད་པ་རྫོགས་སོ།། །།རྒྱ་གར་ཕྱོགས་ཀྱི་པཎྜི་ཏ་མཁས་པ་ཆེན་པོ་དཱ་ན་ཤཱི་ལས་སྒྲ་རང་འགྱུར་དུ་བྱས་པའོ།། །།