འཕགས་མ་སྒྲོལ་མའི་མེ་ཏོག་ཕྲེང་བ་འཛིན་པའི་བསྟོད་པ།
ཐམས་ཅད་མཁྱེན་པའི་བཤེས་གཉེན།
༄། །རྒྱ་གར་སྐད་དུ། ཨཱཪྻ་ཏཱ་ར་སྲགྡྷ་ར་སྟོ་ཏྲ། བོད་སྐད་དུ། འཕགས་མ་སྒྲོལ་མའི་མེ་ཏོག་ཕྲེང་བ་འཛིན་པའི་བསྟོད་པ། རྗེ་བཙུན་མ་སྒྲོལ་མ་ལ་ཕྱག་འཚལ་ལོ། །སྔར་ཤར་ཉི་མ་སྣང་བ་དམར། །ལྷ་མཆོག་སྤྱི་གཙུག་ནོར་བུ་དམར། །དེ་འབྱར་ཁ་དོག་དེ་ལ་ནི། །ཚོས་སར་གྱིས་ནི་བསྐུས་པ་འདྲ། །འཕགས་མ་ཁྱེད་ཀྱི་ཞབས་གཉིས་ལ། །གུས་པའི་ཐ་ལ་མོ་དབུ་རྒྱན་གྱིས། །དེ་མཛེས་མགོ་ཡིས་ཕྱག་འཚལ་ལོ། །ཉེས་བྱུང་དུས་སུ་བསྐྱབ་བམ། །དེ་ནི་སྒྲོལ་མ་ཁྱེད་ཡིན་ནོ། །བསྟོད་གསར་མེ་ཏོག་ཕྲེང་བ་འདིས། །མཆོད་ལ་བདག་གིས་ཕྱག་འཚལ་ལོ། །རྒལ་མི་ནུས་པའི་སྡུག་བསྔལ་མེ། །དེ་ལ་རྟག་ཏུ་ལུས་ལྷུང་གནས། །སྐལ་བ་མ་ལྡན་འགྲོ་ས་གང༌། །རྨོངས་པ་བདག་གིས་ཇི་ལྟར་བྱ། །དེ་ལྟར་རྟག་ཏུ་སྨྲས་ནས་ནི། །དོན་མེད་བདག་ནི་སྟོབས་ཆུང་སོང༌། །མཁའ་ལ་ཉི་ཟླ་དཔལ་ལྡན་གྲགས། །དེ་ནི་གཞན་གྱི་སྨྲ་བ་ཐོས། །དེ་ཐོས་ལོང་བའི་སྤྱོད་པ་ལྟར། །མཐོང་རྟེན་འདོད་ཀྱང་གཞན་ཁྲིད་མེད། །སྡིག་པ་འཇོམས་མ་ཁྱེད་ལ་ནི། །བདག་ནི་སྐྱབས་མཐོང་འདོད་ལགས་སོ། །སེམས་ཅན་ཐམས་ཅད་སྒྲོལ་བའི་ཕྱིར། །དེ་ལ་སྙིང་རྗེ་མི་མཛད་དམ། །མ་ལུས་པར་ནི་སྙིང་རྗེ་མཛད། །དེ་ཁོངས་བདག་ལྟ་ཡོད་གྱུར་ན། །ཁོང་ལ་སྙིང་རྗེ་མཛད་པ་བཞིན། །བདག་ལ་དེ་བཞིན་མཛད་འཚལ་ལོ། །ནུས་པ་མེད་པས་མི་མཛད་དམ། །ཁྱེད་བཞིན་ནུས་ལ་གཉིས་པ་མེད། །འགྲོ་བ་རྣམས་ཀྱི་སྡིག་མུན་པ། །དེ་འཇོམས་པ་ལ་ཉི་མ་འདྲ། །དེ་ལྟར་ཡིན་ཀྱང་སྡུག་པ་བདག །མི་དགེ་ལས་ནི་མ་ཚིག་པས། །ངན་ལས་བྱས་པས་བདག་ནི་འགྱོད། །སྐལ་ངན་བདག་ལ་སྐལ་བ་མེད། །ཉི་མ་ཤར་ཡང་མུན་པ་གནག །གངྒཱའི་ཆུ་ནི་ཤིན་ཏུ་བསིལ། །དེ་ཕྱིར་འགྲམ་དུ་བསྡད་ཀྱང་ནི། །སྐོམ་ཡང་བཏུད་རྒྱུ་མ་རྙེད་དོ། །རིན་ཆེན་སྣ་ཚོགས་
༄། །ཡོད་པའི་གླིང༌། །ནོར་རྣམས་ཀྱིས་གང་ཁང་པ་ལ། །དེར་འདུག་ཀྱང་ནི་བདག་ཕོངས་པས། །བཅོམ་ལྡན་འདས་མ་ཁྱེད་ལ་ནི། །མགོན་འདོད་ཀྱང་ནི་མགོན་མེད་བདག །འཇིག་རྟེན་ཀུན་གྱི་ཡུམ་གཅིག་མ། །མ་ལ་རྟག་ཏུ་དུས་ནས་ནི། །ནུ་མའི་དོན་དུ་བུ་སློང་ན། །དེ་ལ་མ་ཡང་སྐྱོ་བར་འགྱུར། །མི་རྙེད་ཉིན་རེ་སློང་གྱུར་ན། །ཕ་ཡང་བུ་ལ་ཁྲོ་བར་བྱེད། །འཇིག་རྟེན་གསུམ་གྱིས་བསླངས་ཀྱང་ནི། །ཁྱེད་ཀྱིས་འབྲས་བུ་གང་བར་བྱས། །དཔག་བསམ་ཤིང་གི་ཡལ་ག་མཆོག །དེ་ནི་སྒྲོལ་མ་ཁྱེད་ཡིན་ནོ། །ཐམས་ཅད་ལ་ནི་མ་ལུས་པ། །སྦྱིན་པ་ཁྱོད་ཀྱིས་ཁྱབ་བར་བྱས། །ཉོན་མོངས་ཀུན་གྱི་མེ་དེས་ནི། །བདག་གི་ལུས་འདི་རྟག་ཏུ་ཚིག །ས་འོག་སྡུག་བསྔལ་དེ་ལ་ནི། །བདག་གི་ལུས་འདི་ནུབ་ཙམ་ན། །སེམས་ཅན་རྣམས་ཀྱི་སྡུག་བསྔལ་ནི། །དྲག་པོ་འཕེལ་བར་གྱུར་ཙམ་ན། །ཁྱོད་ཀྱིས་དམ་བཅས་ཞལ་བཞེས་པ། །བདག་གི་སྟེང་དུ་གྲུབ་བར་མཛོད། །རྫོགས་སངས་རྒྱས་པའི་སྨོན་ལམ་ནི། །བདག་གི་སེམས་ལ་ཤར་བའི་དུས། །སྒྲོལ་མ་ཕན་འདོགས་མཛད་པར་ཞུ། །ལག་བསྒྲེང་བསྟོད་པའི་ཚིག་བརྗོད་ཅིང༌། །དོན་དུ་དྲག་པོར་དུས་པ་ཡིས། །གཞན་ལ་ཞུས་ཀྱང་དོན་འགྲུབ་བོ། །ཁྱེད་ལྟ་བུ་ལ་བདག་གིས་ཞུས། །ཀྱེ་མ་སྒྲོལ་མ་ཁྱེད་ཀྱིས་ནི། །བདག་སྤངས་པར་ནི་མི་གཤའོ། །ཁྱོད་ཀྱི་སྤྱན་གྱིས་གཟིགས་ཙམ་ན། །གང་འདོད་ཐམས་ཅད་རྙེད་པར་འགྱུར། །མི་བདེ་མི་བཟོད་སྡུག་བསྔལ་ནི། །ཡང་འབྱུང་ དོགས་ནི་མི་འབྱུང་ངོ༌། །བདག་ནི་སྡིག་ཅན་ཡིན་གྱུར་ན། །དད་པ 
་ཤིན་ཏུ་འཕེལ་ནས་ནི། །ཁྱེད་ལ་དད་པ་སྐྱེ་མི་གཤའ། །མིང་ཐོས་པའམ་དྲན་པ་ཡིས། །ཁྱེད་ཀྱི་སྡིག་པ་དབང་མེད་འཕྲོག །བདག་དོན་ཁྱེད་ཀྱིས་སྤངས་བ་དེ། །བདེན་པར་བདག་ལ་གསུང་བར་ཞུ། །ཁྱེད་ནི་བདེན་པར་གསུང་ལྡན་མ། །སྙིང་རྗེ་ཆེ་བའི་སྨན་པ་ཡིས། །ནད་པ་མ་ཤི་བར་དུ་ནི། །སྨན་གྱིས་ཕན་འདོད་ཆེ་རུ་བྱེད། །སྒྱུ་མ་སེར་སྣ་ང་རྒྱལ་སོགས། །ངན་པ་དེ་རྣམས་ཀྱིས་ཁྱིར་ནས། །རི་མོས་ཁྱེར་བས་དལ་སྐབས་མེད། །གནས་པའི་སྤྱི་ནོར་རྔ་མོ་བཞིན། །སྐད་ཅིག་དལ་བ་མེད་པས་ནི། །སྒྲོལ་མའི་ཞབས་ཀྱི་པདྨལ།
༄། །བདག་གིས་མཆོད་སྐབས་མ་རྙེད་དོ། །དེས་ནི་ཡི་གེ་དུ་ཚིག་འདོན། །དེ་བཏོན་པས་ནི་ཕན་འདོགས་རེ། །དུས་མཐའ་རླུང་གིས་གཡས་སུ་འཁྱིལ། །དེས་ནི་གཙུབས་པའི་ཆུ་རླབས་འབྱུང༌། །གཡོ་ཞིང་འགུལ་བའི་རོལ་པས་འཁྲུག །དེ་རྒྱབ་དཔའ་རླབས་འགྲམ་དུ་ནི། །བརྡབས་པས་སྒྲ་གྲག་སྐད་གདངས་ཅན། །འཇིགས་བྱེད་རྒྱ་མཚོ་དེ་ལས་ནི། །གྲུ་ཆག་ནུབ་པའི་སྐབས་དེ་ལ། །སྙིང་རྗེ་དུ་སྐད་དྲག་པོ་བཏོན། །སྐད་ཅིག་དྲན་མེད་བེམས་པོར་གྱུར། །ལྷ་མོ་ཁྱོད་ལ་བསྟོད་པ་ཡིས། །བདེ་བར་རྒྱ་མཚོ་ཕར་བསྒྲལ་ལོ། །སྤྲིན་ནག་བསྐོར་ཞིང་དུ་བའི་ནང༌། །དེ་ལ་མེ་སྟག་ཅན་གྱི་མེ། །མེ་ལྕེ་ཆེར་འབར་ཁྱིམ་དུ་ནི། །ངལ་ནས་མལ་དུ་ཉལ་བའི་མིས། །ཁྱེད་ལ་རབ་བཏུང་ཐལ་མོ་སྦྱར། །སྐད་ཅིག་གིས་ནི་གློག་བྱུང་ནས། །མྱུར་བར་སྤྲིན་ཆར་གྱིས་ནི་བསྐོར། །སྨྱོ་བྱེད་གླང་ཆེན་འགྲམ་གཉིས་ལ། །འཛག་པའི་ཆུ་ལ་རེག་ནས་ནི། །བུང་བའི་ཕྲེང་བ་བཞིན་དུ་ཐལ། །དེ་རྣམས་ཀྱིས་ནི་ཧཱུཾ་སྒྲ་སྒྲོགས། །སྒྲ་དེ་ཐོས་ནས་ཞེ་སྡང་ལས། །གླང་ཆེན་འཐབ་ཏུ་བྱུང་མནོ་ནས། །ཁྲོས་ནས་མཆེ་བས་མི་བཏག་ནས། །འདོ་ལི་ལ་ནི་བསྡད་པ་བཞིན། །ཁྱེད་དྲན་ཙམ་གྱིས་འཆི་བ་བཟློག །ཕ་རོལ་རྒལ་ནས་རིན་ཆེན་རྙེད། །དེ་སྟེང་མཁར་དུ་བསྡད་དུ་ཕྱིན། །མི་མེད་སྟོང་པ་ནགས་གསེབ་ཏུ། །ཤིན་ཏུ་རྣོ་བའི་མཚོན་རྣམས་ཀྱིས། །བརྒྱབ་ནས་ཡོད་པར་མི་རོའི་མགོ །ཏྲི་ཤཱུ་ལ་ལ་བསད་རོ་མང༌། །དེ་འདྲ་ནགས་གསེབ་ཕྱིན་ཙ་ན། །རལ་གྲི་ཕུབ་དག་བཟུང་ནས་ནི། །མདའ་གཞུ་བཀང་ནས་བྱུང་བ་རྣམས། །ཟུར་མིག་ལྟ་ཞིང་ཁྲོས་ནས་བྱུང༌། །རྒོལ་ནས་བརྡེག་ཏུ་བྱུང་ཙམ་ན། །ཁྱེད་བསམས་སྐྱོ་མེད་སྨྱུ་གུས་བྲིས། །ཁྱེད་མིང་གསལ་པོར་བྲིས་མ་ཐག །དཔལ་ལྡན་ཁྱིམ་དུ་བསྡད་ཕྱིན་ནོ། །རྐང་པའི་སོར་མོ་རབ་རྣོ་པ། །རྡོ་རྗེ་ལྟ་བུས་རབ་ཏུ་བརྐོས། །སྨྱོ་བྱེད་གླང་ཆེན་མགོ་ཁྲག་བྱུང༌། །འཇིགས་བྱེད་སེང་གེ་བྱུང་ཙམ་ན། །ཁྱོད་བོས་བསྟོད་པ་བརྗོད་པ་ཡིས། །བྲེད་ནས་སེང་གེ་ལོག་ནས་ཐལ། །དུ་བ་འཁྱིལ་བ་འཇིགས་པའི་གཟུགས། །འཇིགས་བྱེད་གདེངས་བྱེད་ཤིན་ཏུ་འབར། །རྟག་ཏུ་
༄། །ཕུག་བྱེད་ཁ་གདངས་པ། །ལྕེ་ཆེན་སྟོན་པ་སྦྲུལ་ཁྲོ་བ། །གཤིན་རྗེའི་ཞགས་པས་བཀྱིགས་པའི་མི། །སྡིག་པའི་དབང་གིས་དེ་ལྟར་བྱུང༌། །དེ་དུས་ཁྱེད་ཀྱི་ཡོན་ཏན་བསྒྲགས། །གུས་པས་དད་པར་ཁྱེད་ལ་བྱས། །སྤྲུལ་དེ་ཨུཏྤལ་ཕྲེང་བར་གྱུར། །མེ་ཏོག་མཆོད་པའི་མི་དེས་ཐོབ། །དཔོན་གྱིས་མིག་མཚམས་འགུལ་
དོགས་ཀྱིས། །དེར་བྲེད་དམག་དཔོན་རིམ་པ ་ཡིས། །ཐག་པས་བཀྱིགས་ནས་སྐྲ་ནས་དྲུད། །རྩུབ་མོས་བཀལ་ནས་ཁྲིད་ཙམ་ན། །ཁོལ་པོ་དེ་ནི་ན་ཚ་ཆེ། །ཅ་ཅོ་སྨྲ་བ་གཏོང་འདོད་ནས། །ཉེ་བ་གཉེན་རྣམས་ཀྱིས་ནི་བོར། །ལྟོགས་ནས་སྐོམ་ནས་མཆུ་སྐམས་པ། །སྡུག་བསྔལ་མཐའ་མེད་བྱུང་ཙམ་ན། །གང་གིས་སྒྲོལ་མའི་ཞབས་ལ་སྐྱབས། །སྐད་ཅིག་གིས་ནི་གྲོལ་ནས་ཐར། །སྒྱུ་མ་བྱས་པའི་གཟུགས་མི་ལེགས། །མི་རོའི་རྒྱུ་མ་བུས་པ་དེས། །ཕྲེང་བ་མང་བས་སྐེ་ལ་བཏགས། །སུས་ཀྱང་དགག་ཏུ་མི་ནུས་པ། །དེ་བྱུང་དུས་སུ་ཁྱོད་ཀྱི་སྔགས། །བརྗོད་པ་ཙམ་གྱིས་སྡིག་པ་དག །སྲིན་པོའི་དྲན་པ་མེད་ཙམ་ན། །དེ་རྣམས་ཀྱིས་ནི་སྲུང་བར་བྱེད། །འབྲུག་བྱུང་བ་ཡི་སྤྲིན་གྱི་གཟུགས། །ང་རྒྱལ་འཇིགས་པ་རྩང་པོ་གསུམ། །དེ་ནི་མུན་པ་གནག་པ་ལ། གློག་བཞིན་མཚོན་ཆ་སྣང་བ་ཡིས། །མདའ་ཡི་ཆར་པ་བྱུང་ཙམ་ན། །འཐབ་པའི་དུས་སུ་བསྐོར་ནས་བཀག །ཤིན་ཏུ་སྟོབས་ཆེན་དགྲ་རྣམས་ཀྱིས། །ཁྲོ་ཞིང་བརྡེག་ཏུ་བྱུང་ཙམ་ན། །སྒྲོལ་མ་ཁྱེད་ཀྱིས་སྟོབས་བྱིན་པས། །དཔའ་བོ་གཅིག་གིས་དེ་རྣམས་བཅོམ། །ས་རིས་རྣམས་ནི་རང་དབང་བྱས། །སྡིག་པས་གང་བ་མཛེ་ཕོའི་གཟུགས། །ལུས་པོ་སྐྲངས་ནས་ཁྲག་རྣག་དང༌། །ཆུ་སེར་དེ་རྣམས་འཛག་པ་ནི། །རྩ་ཤ་པགས་པ་ཕུག་པ་ནས། །འབུ་རྣམས་ཀྱིས་ནི་ཟོས་པ་ན། །སྒྲོལ་མ་ཁྱེད་ཀྱི་ཞབས་བརྟེན་ནས། །རྟག་ཏུ་ཁྱེད་ལ་མོས་གུས་བྱས། །མོས་གུས་ད་རང་སྨན་དུ་གྱུར། །གསེར་གྱི་ཁ་དོག་ལུས་གྱུར་ནས། །པདྨ་དཀར་པོ་རྒྱས་པའི་སྤྱན། །དེས་ནི་གཟུགས་བཟང་ལུས་ཐོབ་བོ། །སློབ་དཔོན་རྣམས་ཀྱི་བཀའ་དེ་ལ། །རྣ་བ་སྣོད་དུ་མ་རུང་བས། །ཐོས་པའི་ནོར་ནི་ཕོངས་པར་འགྱུར། །བཤེས་གཉེན་གསེབ་
༄། །ཏུ་ལྐུགས་པ་དེ། །ཁྱོད་ལ་ལོས་གུས་བསྟོད་བགྱིས་པས། །གསུང་ལྡན་སེང་ཁྲི་འཕྲོག་པར་བྱེད། །དེ་འཕྲོགས་པ་ཡང་རྒྱལ་པོའི་མདུན། །རྒྱན་ཆ་སྣ་ཚོགས་བཏགས་ནས་ནི། །གསུང་གི་དབང་ཕྱུག་སེང་ཁྲི་སྡོད། །ས་ལ་ཉལ་བས་རྡུལ་མས་ཁེངས། །ལུས་ཀྱི་ཁ་དོག་དུ་བར་གྱུར། །དུག་པོ་གོས་ཀྱིས་ལུས་མ་ཁྱབ། །རྟག་ཏུ་ཤིག་དང་སྲོ་མ་གསེད། །གཞན་གྱི་མདུན་དུ་ཕོར་གོག་འཛིན། །རྟག་ཏུ་སློང་མོ་བྱེད་པ་དེ། །སྒྲོལ་མ་ཁྱེད་ལ་སྐྱབས་ཙམ་ན། །ངེས་པར་མཛེས་མ་དགོད་ནས་ནི། །རྔ་ཡབ་མཛེས་པས་གཡོབ་པར་བྱེད། །སྟོབས་ཆེན་གླང་པོ་ཆེ་རྣམས་ཀྱིས། །བདག་པོར་གྱུར་ནས་གདུགས་གཅིག་པ། །རས་རིས་ཙམ་གྱིས་རྒྱལ་པོར་གྱུར། །གཞན་གཡོག་ལས་དང་ཡོན་ཏན་དང༌། །ཚོང་དང་ཐབས་ཀྱིས་ནོར་ཚོལ་བ། །ཚེ་སྔ་མ་ཡིས་དགེ་བའི་ནོར། །ཇི་ལྟར་བྱས་ཀྱང་ནོར་མེད་པ། །སུ་ལ་བསླངས་ཀྱང་རྙེད་པ་མེད། །ཀྱེ་མ་ཁྱེད་ལ་བསླངས་ཙམ་ན། །ས་གསེབ་ཏུ་ནི་ནོར་རྙེད་ནས། །མི་དེ་ཕྱུག་པོར་གྱུར་པར་བྱུང༌། །འཚོ་བ་མེད་པས་ངོ་ཚ་ཆེ། །གོས་མེད་པས་ནི་ཆུང་མས་བརྒལ། །ཕོངས་པ་ཡིན་པས་གཉེན་གྱིས་བོར། །སྟེར་དགོས་མནོ་ནས་ཐག་རིངས་སུ། །ཀྱེ་མ་སྒྲོལ་མ་ཁྱེད་ལ་ནི། །རང་གི་སྡུག་བསྔལ་བསྟན་ཙམ་ན། །རྟ་རྣམས་རྨིག་པ་ས་ལ་རྐོ། །དེ་བརྐོས་ས་ཡང་ཁྱིམ་བསྐོར་ནས། །རང་ཡིད་འོང་པ་རྒྱལ་པོའི་ཁབ། །ཁྱིམ་དེར་གཉིད་ནི་ལོག་པ་ལས། །མཛེས་མ་རྣམས་ཀྱིས་ལག་བརྒྱན་གྲགས། །དེས་ནི་གཉིད་ལོག་སད་པ་རྙེད། །ཕྱོགས་བཅུར་གྱུར་པའི་འཁོར་ལོ་ནི། །ཤིན་ཏུ་འོད་ཟེར་ལྡན་པ་དང༌། །མཚན་ཉིད་ལྡན་པའི་བུད་མེད་དང༌། །མཆེ་བ་དྲུག་ཡོད་གླང་པོ་ཆེ། །རྨ་བྱའི་སྐེ་ཡི་ཁ་དོག་ལྡན། །དེ་ལྟར་སྡོ་བ་རྟ་བཟང་དང༌། །རིན་པོ་ཆེ་ནི་ཉི་མའི་འོད། །དྲི་མ་མེད་པའི་གཏེར་གྱིས་བཀང༌། །དམག་གི་དཔའ་བོ་མང་བ་དང༌། །སྒྲོལ་མ་ཁྱེད་ཀྱི་བཀའ་དྲིན་གྱིས། །འཁོར་ལོས་སྒྱུར་བའི་རྒྱལ་པོར་གྱུར། །མ་ལ་ཡ་ཡི་ལྡུམ་ར་རུ། །ནོར་བུ་རིན་པོ་ཆེ་ཡི་རྡོ། །དེ་ལ་ཙནྡན་ལ་སོགས་བསྐུས། །ལྷ་མོ་རྣམས་ཀྱང་འཚོག་ས་བྱས། །འགྲོན་སར་མཆོད་པ་བྱས་པ་
༄། །བཞིན། །ཤིན་ཏུ་ཆགས་ནས་རྩེད་མོ་རྩེས། །སྒྲོལ་མ་ཁྱེད་ཀྱི་རིག་པ་གྲུབ། །རིག་བ་འཛིན་པའི་ལྷ་དབང་པོའི། །རལ་གྲི་འོད་ཟེར་ལྗང་གུས་ནི། །ལག་པ་ཟངས་དེ་ལ་ཕྲོག་པ་དེ། །ཡང་ནས་ཡང་དུ་གསོར་བྱེད་པ། །གཟུགས་བཟང་ལྷ་ནི་ཐོབ་པར་འགྱུར། །མུ་ཏིག་ཕྲེང་བས་མཛེས་པར་བཏགས། །དེ་བཏགས་ནུ་མའི་བར་དུ་བྱུང༌། །རྣ་བར་ཨུཏྤལ་བཏགས་པ་དེ། །མིག་དང་གང་བཟང་འགྲན་པ་འདྲ། །ཐོར་ཚུགས་མནད་ར་བ་བཏགས། །དྲི་ཞིམ་བུང་བས་བོར་མ་ནུས། །རྐེད་པར་གཡེར་ཁ་མཛེས་པར་བཏགས། །ཞབས་གཉིས་ལེགས་པ་དེ་ལ་ནི། །སིལ་སིལ་སྒྲ་དང་གཡེར་ཁ་བཏགས། །སྒྲོལ་མ་ཁྱེད་ལ་བརླབ་ཙམ་ན། །འདོད་པའི་ལྷ་ལ་དགའ་བ་ཙམ། །དེ་ཕྲད་ལྷ་མོ་བསྙེན་བཀུར་བྱེད། །རྫིང་འགྲམ་རིན་པོ་ཆེ་ཡིས་བསྐོར། །གསེར་གྱི་པདྨ་དེ་ལ་ནི། །གེ་སར་རྡོ་རྗེ་ཕ་ལམ་འབར། །པ་ར་ཛའ་གའི་ཤིང་དེ་ནི། །ཅུང་ཟད་བཀུག་པ་དྲི་ཞིམ་དམར། །དེ་ནས་བླ་རེ་བཞིན་དུ་ཁྱབ། །ཏམ་བུ་ར་དང་རྔ་ལ་སོགས། །ལྷ་རྣམས་ཀྱིས་ནི་སྙན་པར་བསྒྲགས། །སྒྲོལ་མ་ཁྱོད་ཀྱི་བཀའ་དྲིན་གྱིས། །ལྷ་ཡི་ལྡུམ་རར་ཡུན་རིངས་རྩེས། །བདེ་བ་ཤིན་ཏུ་ཉམས་སུ་མྱོང༌། །ག་བུར་དང་ནི་ཀ་ཀོ་ལ། །ཨ་ཀ་རུ་དང་སྤོས་དང་དྲི། །དེ་རྣམས་བཏགས་ནས་ཆུར་བསྲེས་པས། །དྲི་ཞིམ་ཆུ་རྣམས་ཀྱིས་ནི་བརྡེག །ལྷ་མོའི་ནུ་མ་གཉིས་ཀྱི་བར། །ལྷ་ཡི་གཙང་པོ་ཆུ་མགྱོགས་དེས། །ཕར་རྡེག་ཚུར་རྡེག་རྩེད་མོ་བྱེད། །ལྷ་མོ་མཛེས་པ་དེ་རྣམས་དང༌། །ཁྱོད་ཀྱི་བཀའ་དྲིན་བསོད་ནམས་ཀྱིས། །ལྷ་ཡུལ་དུ་ནི་རྩེད་མོ་མྱོང༌། །མཐོ་རིས་གནས་པའི་ལྷ་རྣམས་ཀྱིས། །གུས་པས་བཀའ་ནི་སྤྱི་བོས་ལེན། །དེ་ལན་ཕྱག་ནི་བྱས་ནས་སུ། །གླང་པོ་ཆེ་ལ་ཞོན་པ་ལ། །རྒྱན་ཆ་བཏགས་པའི་གླང་རྫི་དེས། །ལག་པ་གཉིས་ལ་གདུ་བུ་བཏགས། །དེས་ནི་འདོ་ལེ་བསྒྱིངས་ཙམ་ན། །བཀག་མི་ནུས་པ་བ་སྤུ་ལྡང༌། །རྡོ་རྗེ་ཕ་ལམ་ལག་རྒྱན་བཏགས། །ཁྱེད་ཀྱི་སྤྱན་གྱིས་གཟིགས་ཙམ་ན། །ལྷ་ཡི་དབང་པོ་བརྒྱ་བྱིན་ཐོབ། །ལྷ་ཡི་རིས་ཀྱིས་སྲུང་བར་བྱེད། །སངས་རྒྱས་བསྟན་བ་དེ་ལ་ནི། །རིན་ཆེན་མེ་ཏོག་སྤྱི་བོར་གནས། །
༄། །ནམ་མཁའ་དཔལ་གྱི་བླ་རེས་ཁྱབ། །ཉི་མ་ཤར་ཀའི་འོད་འདྲ་བ། །དེས་ནི་འཇིག་རྟེན་གསུམ་པོ་བཀང༌། །གཡོན་བསྐུམ་གཡས་བརྐྱང་ཞབས་གཅིག་གིས། །དེ་མནན་བཀུག་པ་ཚངས་པ་དང༌། །དབང་ཕྱུག་ཆེན་པོ་ཁྱབ་འཇུག་གོ །ཁྱེད་ཀྱི་སྐུ་ནི་བསྒོམ་བགྱིས་པས། །སྲིད་པའི་འཇིགས་པ་ཕྱིས་མི་འབྱུང༌། །སྐྱེ་བ་ལེན་པ་ཆད་ནས་ཡོད། །ཁ་ཅིག་གིས་ནི་འདི་ལྟར་མཐོང༌། །ནགས་ཚལ་ཕྱག་གི་མཚོན་ཆས་བཟུང༌། །ཤིན་ཏུ་འཇིགས་པ་སྟོབས་པོ་ཆེ། །ནམ་མཁའ་ཁྱབ་པར་ལག་གདུ་བུ། །དེ་རྣམས་འཇིགས་ཆེ་སྦྲུལ་དུ་མཐོང༌། །ཀྱེ་མའོ་ཁྲོས་ནས་སྐྲག་པར་བྱེད། །དགོད་པའི་སྒྲ་ནི་ཤིན་ཏུ་འཇིགས། །མ་རུངས་པ་ཡི་སྤྱོད་པ་བྱེད། །རོ་ལངས་ཏིང་ཏིང་ཤག་ནི་བརྡུང༌། །འཇིགས་ཆེན་རྩེད་མོ་སྒྲ་ཆེན་བསྒྲགས། །ཁ་ཅིག་གིས་ནི་མཐོང་བ་ལ། །སྒྲོལ་མའི་བ་སྤུ་རེ་རེ་ལས། །འཇིག་རྟེན་པ་དེ་འཚོ་བར་བྱེད། །བདེ་བར་གནས་པའི་ཚངས་པ་དང༌། །ལྷ་ཡི་དབང་པོ་བརྒྱ་བྱིན་དང༌། །དབང་ཕྱུག་ཆེན་པོ་ཀླུ་ལ་སོགས། །ལྷ་དང་མི་དང་གྲུབ་ཐོབ་དང༌། །དྲི་ཟ་གནོད་སྦྱིན་སྦྲུལ་རྣམས་དང༌། །ཕྱོགས་སུ་རྒྱུ་བའི་འཁོར་ལོ་ཡང༌། །ཐ་མེད་བདེ་གཤེགས་ཁྱིམ་དེར་གནས། །ཀྱེ་མ་རབ་ཏུ་རྫུ་འཕྲུལ་ཆེ། །འཇིག་རྟེན་གསུམ་གྱིས་ཕྱག་བྱས་པ། །ཀྱེ་མ་འགུལ་མི་འགུལ་གནས་པ། །སྣ་ཚོགས་ལྷག་མེད་དངོས་པོ་ནི། །ཀྱེ་མ་སྒྲོལ་མ་ཁྱེད་ཡིན་ནོ། །ཁ་ཅིག་གིས་ནི་མཐོང་བ་ལ། །རྒྱ་སྐྱེགས་དང་ནི་སིནྡྷུ་ར། །དཀར་དམར་ཁ་དོག་ཉི་མ་ལྟར། །དཔལ་ལྡན་ཨིནྡྲ་ནཱི་ལ་འདྲ། །ཁ་ཅིག་གིས་ནི་མཐོང་བ་ལ། །འོ་མའི་རྒྱ་མཚོ་དྲུབས་དཀར་འདྲ། །ཁ་ཅིག་གིས་ནི་གསེར་འདྲ་མདོག །ཁྱོད་ཀྱི་གཟུགས་ནི་སྣ་ཚོགས་མཐོང༌། །ཤེལ་དང་འདྲ་བར་གང་འདོད་གཟུགས། །ཡེ་ཤེས་མང་མེ་ཐམས་ཅད་མཁྱེན། །དེས་ནི་ཐམས་ཅད་གསལ་བར་མཐོང༌། །དེ་ཉིད་མཁྱེན་པ་དབང་པོ་གཅིག །ངེས་པར་ཁྱོད་ཀྱི་ཡོན་ཏན་ནི། །གྲངས་ལས་ཐམས་ཅད་མཁྱེན་པས་ཤེས། །ཡང་ན་དེ་ཡི་སྲས་ཀྱིས་མཁྱེན། །བདག་གིས་ཁ་གདངས་བྱས་ནས་ནི། །བྱ་རོག་ཁ་འདྲའི་སྒྲ་དང་ནི། །སྡུག་བསྔལ་ཚད་པས་ཁྱབ་
༄། །ཙམ་ན། །དེ་སྐྱེས་ན་ཚ་བྱུང་ཙམ་ན། །བདག་གིས་ཕོ་རོག་སྨྲ་བཞིན་བཏོན། །གཞན་གྱི་སེམས་ལ་བཞད་གད་རྒྱུ། །བདག་གིས་ཞུས་པའི་དོན་དུ་ནི། །མ་ཞུས་གོང་དུ་ལྷག་པར་མཁྱེན། །ཁྱོད་ཀྱི་མཁྱེན་པ་དེ་ལ་ནི། །བདག་གིས་ཞུས་པ་དོན་མེད་གླེང༌། །འོན་ཀྱང་རང་སེམས་དགའ་བའི་དོན། །ཉེ་བའི་གཉེན་གྱི་མདུན་དུ་ནི། །དུག་དག་སྐྱུགས་པ་སྨྲས་པ་བཞིན། །སྡུག་བསྔལ་དོན་དེ་ཤེས་ཀྱང་ནི། །རང་སྙིང་ཡང་ཞིང་བདེ་བ་བཞིན། །ཕན་འདོགས་དགའ་བ་རྒྱ་མཚོ་ཉིད། །རབ་ཏུ་གསལ་བ་ཟླ་བའི་ཆ། །ཀྱེ་མ་མཛེས་མས་གཟིགས་པར་ཞུ། །གདམས་ངག་ཡེ་ཤེས་གནང་བར་ཞུ། །སྙིང་རྗེ་ཆེན་མོ་ཁྱོད་ཉིད་ཀྱིས། །མུན་ནག་སེམས་ནི་གསལ་བར་མཛོད། །ཁྱེད་ཀྱི་བསྟོད་པའི་ཆུ་དེས་ནི། །བདག་གི་སེམས་ནི་གཙང་བར་བཀྲུས། །ཕན་ནས་བྱུངས་གཅིག་རྙེད་དོ། །བསྟོད་པ་འདིས་ནི་འགྲོ་བའི་དོན། །འབྲས་བུ་ཐོབ་པ་ཡོད་པར་མཐོང༌། །རབ་ཏུ་བསྟོད་པའི་ཡོན་ཏན་ཆ། །བདག་གིས་བསོད་ནམས་བཤད་མི་ཤེས། །བསོད་ནམས་དེ་ཡི་སྟོབས་ཀྱིས་ནི། །འཇིག་རྟེན་པ་ཀུན་དོན་འགྲུབ་ནས། །གྲོལ་བའི་བདེ་བ་མྱོང་བར་ཤོག །སྤྱན་རས་གཟིགས་ཀྱི་ཞབས་ཀྱི་མཐིལ། །དེ་ཡི་མཚན་མ་བཀྲ་ཤིས་ཀྱིས། །དེ་བཀང་ཡོད་པ་དེ་ལ་ནི། །བདེ་གཤེགས་སྲས་ཀྱི་ས་རིས་ཡིན། །བདེ་ནས་བདེ་རུ་འགྲོ་བ་ཀུན། །མྱུར་བར་སོང་ནས་བདེ་བར་ཤོག །མེ་ཏོག་ཕྲེང་བ་འཛིན་པའི་བསྟོད་པ་སློབ་དཔོན་ཐམས་ཅད་མཁྱེན་པའི་བཤེས་གཉེན་གྱིས་མཛད་པ་རྫོགས་སོ།། །། པཎྜི་ཏ་ཟླ་བ་གཞོན་ནུས་རང་འགྱུར་མཛད་པའོ།།