དཔལ་གསང་བ་འདུས་པའི་དཀྱིལ་འཁོར་གྱི་ཆོ་གའི་འགྲེལ་པ།
རིན་ཆེན་འབྱུང་གནས་ཞི་བ།
རྒྱ་གར་སྐད་དུ། ཤྲཱི་ས་མཱ་ཛ་མཎྜལ་བི་དྷིཿཊཱི་ཀཱ། བོད་སྐད་དུ། དཔལ་གསང་བ་འདུས་པའི་དཀྱིལ་འཁོར་གྱི་ཆོ་གའི་འགྲེལ་པ། བཅོམ་ལྡན་འདས་གསུང་གི་དབང་ཕྱུག་ལ་ཕྱག་འཚལ་ལོ། །དཔལ་ལྡན་གསང་བ་འདུས་པ་ཡི། །དཀྱིལ་འཁོར་ཆོ་ག་ལེགས་པ་གང༌། །བཞི་བརྒྱ་ལྔ་བཅུ་པ་ཡི་ཚད། །དེ་ནི་བདག་གིས་རྣམ་པར་དབྱེ། །འདི་ན་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་མ་ལུས་པ་ཉིད་མཐོང་བ་དང༌། བསྟན་པ་དང༌། ཐོས་པ་དང༌། བསམས་པ་དང༌། བསྒོམས་པ་དེ་ལྟ་བུའི་བདག་ཉིད་ཅན་གྱིས་འགྲོ་བ་ཐམས་ཅད་ཀྱི་དོན་རྣམ་པ་ཐམས་ཅད་དུ་རྟག་ཏུ་རྫོགས་པར་ནུས་པ་མངོན་སུམ་དུ་བྱས་པའི་ཕྱིར། བདག་དང་གཞན་གྱི་དོན་ཤིན་ཏུ་མང་པོ་གྲུབ་པ་སྔོན་དུ་འགྲོ་བར་འགྱུར་རོ་ཞེས་བྱ་བ་འདི་ནི་སྤྱིར་གྲགས་པར་ཟད་དོ། །དེ་བས་ན་དཔལ་འཇམ་པའི་རྡོ་རྗེ་འབྱུང་བའི་དཀྱིལ་འཁོར་འདིའི་བརྗོད་པར་བྱ་བ་བཤད་པ་ཉིད་ཀྱིས་ན་དོན་ཤིན་ཏུ་མང་པོ་འགྲུབ་པ་སྔོན་དུ་འགྲོ་བ་ཅན་གྱིས་དེའི་གོ་འཕང་ཐོབ་པ་ནི་གཞུང་འདིའི་བརྗོད་པར་བྱ་བའི་དགོས་པ་ཡིན་ནོ་ཞེས་ཁྱད་པར་ཁོང་དུ་ཆུད་པར་བྱའི་གཞན་དུ་ནི་མ་ཡིན་ནོ། །རྗོད་པར་བྱེད་པའི་དགོས་པ་ནི་ངེས་པར་བརྗོད་དགོས་ཏེ། གཞན་དུ་དེ་མེད་པར་དོགས་པས་བྱ་རོག་གི་སོ་རྟོག་པ་ལ་སོགས་པ་དང་འདྲ་བར་གཞུང་འདི་བླང་བར་བྱ་བ་མ་ཡིན་པར་འགྱུར་རོ། །དེ་ཡང་ཇི་སྐད་བཤད་པའི་དགོས་པ་དོན་དུ་གཉེར་བ་རྣམས་དེ་ལས་གཞན་པའི་དཀྱིལ་འཁོར་གྱི་ཆོ་ག་ལས་བཀར་ཏེ། འདི་ཉིད་ལ་འཇུག་པར་འདོད་པ་ཡིན་ནོ། །དེའི་ཕྱིར་འདིའི་བརྗོད་པ་དང་དགོས་པ་དག་ཀྱང་ཅི་ནས་ཀྱང་གཞན་དག་དང་ཐུན་མོང་མ་ཡིན་པར་རྟོགས་པར་འགྱུར་བ་དེ་ལྟ་བུ་བརྗོད་དགོས་སོ། །ཚིགས་སུ་བཅད་པ་གཅིག་གིས་སོ་སོར་གཙོ་བོར་གྱུར་པའི་དགོས་པ་གཉིས་སུ་བརྗོད་པར་ནུས་པ་མ་ཡིན་ཏེ། ངག་གཅིག་པ་ཉིད་དང་འགལ་བའི་ཕྱིར་རོ། །དེ་ཡང་། དོན་གཅིག་པ་ནི་ཚིག་ཅེས་བཤད། །ཅེས་ཇི་སྐད་བཤད་པ་ལྟ་བུའོ། །གཅིག་ནི་གཙོ་བོར་གྱུར་པ་ཡིན་ལ། ཅིག་ཤོས་ནི་གཙོ་བོ་མ་ཡིན་པར་གྱུར་པ་ཡིན་པ་དེ་བས་ན་གཙོ་བོ་བསྟན་པར་གྱུར་པ་ཡིན་ཏེ། དེའི་ཕྱིར་དོན་གཅིག་པ་ཉིད་ཡིན་ནོ། །དེ་ཡང་གང་སྒྲ་ཡིས་མཆོག་ཏུ་སྦྱོར་བ་དེ་ནི་སྒྲའི་དོན་ཡིན་ནོ་ཞེས་ཇི་སྐད་བཤད་པ་ལྟ་བུ་
སྟེ། དེ་བས་ན་བརྗོད་པ་དང་བརྗོད་པར་བྱ་བ་དག་གི་དགོས་པ་གཉིས་ལས་གཅིག་ཁྱད་པར་དུ་གྱུར་པས་ཅིག་ཤོས་ཀྱང་བསྟན་པའི་ཕྱིར། ཤེས་བྱ་སོགས་སྒྲིབ་ལས་ངེས་གྲོལ། །ཞེས་པ་ལ་སོགས་སྨོས་ཏེ། སྒྲིབ་པ་ནི་བགེགས་དང་བར་དུ་གཅོད་པ་ཞེས་བྱ་བའི་ཐ་ཚིག་གོ །འདིར་ཡང་ཤེས་བྱའི་སྒྲས་ནི་ཉེ་བར་བརྟགས་པས་ཤེས་བྱ་ཡུལ་དུ་གྱུར་པའི་ཡེ་ཤེས་ཡིན་པར་བཤད་དེ། དཔེར་ན་སྟོང་པ་ཉིད་ཡུལ་དུ་གྱུར་པའི་ཏིང་ངེ་འཛིན་ལ་སྟོང་པ་ཞེས་བཤད་པ་དང་འདྲའོ། །སོགས་པའི་སྒྲས་ནི་ཉོན་མོངས་པ་གཟུང་ངོ༌། །ཤེས་བྱ་ལ་སོགས་པ་ཡང་ཡིན་ལ་སྒྲིབ་པ་ཡང་ཡིན་པས་ན། ཤེས་བྱ་ལ་སོགས་སྒྲིབ་པ་སྟེ། ཉོན་མོངས་པའི་སྒྲིབ་པ་དང༌། ཤེས་བྱའི་སྒྲིབ་པ་ཞེས་བྱ་བའི་ཐ་ཚིག་གོ །དེ་ལ་ཉོན་མོངས་པའི་སྒྲིབ་པ་ནི་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པའོ། །ཉོན་མོངས་པ་ཡང་ཡིན་ལ་སྒྲིབ་པ་ཡང་ཡིན་པས་ཉོན་མོངས་པའི་སྒྲིབ་པ་སྟེ། ཁྱིམ་དུ་འཇུག་པ་ལ་སྒོ་གླེགས་དང་འདྲ་བར་དེ་ཐར་པ་ཐོབ་པ་ལ་གེགས་སུ་གྱུར་པ་ཡིན་ནོ། །ཇི་ལྟར་ན་དེའི་གེགས་སུ་གྱུར་པ་ཡིན་ཞེ་ན། དེ་ཡོད་པར་གྱུར་ན་དེ་མི་འབྱུང་བའི་ཕྱིར་རོ། །ཤེས་བྱའི་སྒྲིབ་པ་ཞེས་པ་ལ། དེ་ལ་ཤེས་བྱ་ནི་ཆོས་ཀྱི་དབྱིངས་ཀུན་དུ་འགྲོ་བ་ལ་སོགས་པ་རྣམ་པ་བཅུའོ། །ཤེས་བྱ་དེ་ལ་ཡེ་ཤེས་སྐྱེ་བའི་གེགས་སུ་གྱུར་པ་ཉོན་མོངས་པ་ཅན་མ་ཡིན་པའི་མི་ཤེས་པ་ནི་ཤེས་བྱའི་སྒྲིབ་པ་ཡིན་ནོ། །གང་གོ་རིམས་བཞིན་དུ་རེ་རེ་ནས་སྤངས་ནས་བྱང་ཆུབ་སེམས་དཔའ་ས་བཅུ་རིམ་གྱིས་ཐོབ་པར་འགྱུར་རོ། །དེ་ལྟར་ན་རེ་ཞིག་སྒྲིབ་པ་ནི་རྣམ་པ་གཉིས་ཡིན་ནོ། །ཡང་ན་རྒྱུད་འདིར་སྒྲིབ་པ་ནི་རྣམ་པ་བཞི་སྟེ། ཤེས་བྱའི་སྒྲིབ་པ་དང༌། ཉོན་མོངས་པའི་སྒྲིབ་པ་དང༌། སྙོམས་པར་འཇུག་པའི་སྒྲིབ་པ་དང༌། ལས་ཀྱི་སྒྲིབ་པའོ། །དེ་ཡང་། དེས་ན་ཤེས་བྱ་མཐར་བྱེད་གྱུར། །ཅེས་བྱ་བ་དང༌། དེ་བཞིན་ཉོན་མོངས་མཐར་བྱེད་གྱུར། །ཅེས་བྱ་བ་དང༌། དེ་བཞིན་སྙོམས་འཇུག་མཐར་བྱེད་གྱུར། ཅེས་བྱ་བ་དང༌། ཉོན་མོངས་ལས་ཀྱི་སྒྲིབ་དག་ན། །ལས་རྣམས་ཐམས་ཅད་རྣམ་དག་འགྱུར། །ལས་རྣམས་ཐམས་ཅད་རྣམ་དག་པས། །ལས་སྐྱེས་འབྲས་བུ་རྣམ་པར་དག །ཅེས་
ཇི་སྐད་བསྟན་པ་ལྟ་བུ་སྟེ། །སྒྲིབ་པ་བཞི་པོ་འདི་དག་ནི་འོག་ནས་སྒོ་སྲུང་གི་རྣམ་པར་དག་པ་ལས་འཆད་པར་འགྱུར་བ་ཡིན་ནོ། །མ་ལུས་པ་ལས་གྲོལ་བས་ན། །ངེས་པར་གྲོལ་བ་སྟེ། ཤེས་བྱ་ལ་སོགས་པའི་སྒྲིབ་པ་རྣམས་ལས་ངེས་པར་གྲོལ་བས་ན། ཤེས་བྱ་སོགས་སྒྲིབ་ལས་ངེས་གྲོལ།། ཞེས་བྱ་སྟེ། དེ་རྣམས་བག་ཆགས་དང་བཅས་པ་སྤངས་པའི་ཕྱིར་རོ། །དེ་ཉིད་ཀྱིས་ནི་བག་ཆགས་དང་བཅས་པ་ངེས་པར་སྤངས་པས་ས་བཅུ་གཅིག་པ་སངས་རྒྱས་ཀྱི་ས་ཀུན་དུ་འོད་བརྙེས་པ་ཡིན་ནོ། །མེ་ལོང་ཡང་ཡིན་ལ་ཡེ་ཤེས་ཀྱང་ཡིན་པ་སྣ་མེ་ལོང་ཡེ་ཤེས་ཏེ། མེ་ལོང་ལྟ་བུའི་ཡེ་ཤེས་ཞེས་བྱ་བའི་དོན་ཏོ། །ཡེ་ཤེས་སྨོས་པ་ནི་མེ་ལོང་ཉིད་ལས་དགར་བའི་དོན་ཡིན་ནོ། །སོགས་པའི་སྒྲས་ནི་མཉམ་པ་ཉིད་ཀྱི་ཡེ་ཤེས་ལ་སོགས་པ་གཟུང་ངོ༌། །མེ་ལོང་ལྟ་བུའི་ཡེ་ཤེས་དང་ཡང་དག་པར་ལྡན་པ་ནི་བཅས་པ་ཞེས་བྱ་བའི་ཐ་ཚིག་གོ །འདིར་ཚིག་རྐང་དང་པོས་ནི་བཅོམ་ལྡན་འདས་ཀྱི་སྤངས་པ་ཕུན་སུམ་ཚོགས་པ་བཤད་ལ། གཉིས་པས་ནི་ཡེ་ཤེས་ཕུན་སུམ་ཚོགས་པ་བཤད་དོ། །གཞན་དག་ནི་གཞུང་མདས་ཀྱིས་དོགས་ནས་མ་སྨྲས་སོ། །འཁོར་ལོ་ཞེས་བྱ་བ་ནི་དཀྱིལ་འཁོར་རོ། །མཆོག་ཅེས་བྱ་བ་ནི་དམ་པ་དང་བཀྲ་ཤིས་པར་གྱུར་པའོ། །གསང་བ་ཡང་ཡིན་ལ་འཁོར་ལོ་མཆོག་ཀྱང་ཡིན་པས་ན་གསང་བའི་འཁོར་ལོ་མཆོག་སྟེ། དེ་ཡང་འཇམ་དཔལ་གྱི་འཁོར་ལོ་མཆོག་གོ །འཕགས་པ་འཇམ་དཔལ་གྱི་འཁོར་ལོ་ལ་མཆོག་ཏུ་མ་གྱུར་ཅིང་ཤིས་པ་མ་ཡིན་པ་དག་ཡོད་པ་མ་ཡིན་ལ། དེ་བས་ན་མཆོག་ཅེས་སྨོས་པའི་དོན་གྱི་ཤུགས་ཀྱིས་སྟོན་མོད་ཀྱི། གསང་བ་འདུས་པའི་དཀྱིལ་འཁོར་ནི་ཐམས་ཅད་ཀྱི་མཆོག་ཏུ་གྱུར་པར་སྟོན་ཏོ། །གསང་བ་ནི་སྣོད་མ་ཡིན་པ་རྣམས་ལ་སྦ་བར་བྱ་བ་ཡིན་པའམ། ཐུགས་ཀྱི་གསང་བའི་བདག་ཉིད་ཅན་ཡིན་པའི་ཕྱིར་རོ། །དེ་ཡང་བཅོམ་ལྡན་འདས་འདི་ནི་རྒྱུད་འདིར་ཐུགས་ཀྱི་རིགས་ལས་བྱུང་བ་ཡིན་ནོ། །ཡང་ན་གསང་བ་ནི་སྐུ་དང་གསུང་དང་ཐུགས་ཀྱི་བདག་ཉིད་ཅན་ཡིན་ནོ། །མཆོག་ནི་དམ་པ་དང་སངས་རྒྱས་དང་བྱང་ཆུབ་སེམས་དཔའ་རྣམས་ཏེ་དེ་རྣམས་ཀྱི་འཁོར་
ལོ་ཡིན་པས་གསང་བའི་འཁོར་ལོ་མཆོག་གོ །དེ་ཡང་གསང་བ་འདུས་པ་ཞེས་བྱ་བའི་དོན་ཏེ། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བསྟན་པ་ཡིན། །སངས་རྒྱས་ཐམས་ཅད་ཅེས་བྱ་བ། །ཚོགས་པ་འདུས་པ་ཡིན་པར་བཤད། །ཅེས་ཇི་སྐད་བཤད་པ་ལྟ་བུའོ། །འདིར་ནི་རྗེས་ཐམས་ཅད་ནི་གླང་པོའི་རྗེས་སུ་འདུས་པའི་ཚུལ་གྱིས་བྲི་བའི་དཀྱིལ་འཁོར་གཙོ་བོར་བསྟན་ཏེ། བསམ་པར་བྱ་བའི་དཀྱིལ་འཁོར་དེ་དེའི་ཡན་ལག་ཉིད་དུ་བསྟན་པའི་ཕྱིར་རོ། །དེ་བཤད་ཅེས་བྱ་བ་ནི། དེ་བརྗོད་པར་བྱའོ་ཞེས་བསྟན་པ་སྟེ་འདི་དག་གིས་བརྗོད་པར་བྱ་བའི་དགོས་པ་བཤད་པ་ཡིན་ནོ། །བརྗོད་པར་བྱ་བའི་ཁྱད་པར་བསྟན་པ་ཉིད་ཀྱི་བརྗོད་པར་བྱ་བའི་དགོས་པ་ཁྱད་པར་དུ་རྟོགས་པར་འགྱུར་རོ། །དེ་ལྟར་སྔར་བཤད་པའི་ཕྱིར་རོ། །བདག་དྲན་ཕྱིར་ཞེས་བྱ་བ་ནི་རྒྱུ་མཚན་གྱི་བདུན་པ་སྟེ། བདག་ཉིད་དྲན་པར་བྱ་བའི་རྒྱུར། །ཞེས་བྱ་བའི་ཐ་ཚིག་གོ །འདིས་ནི་བརྗོད་པའི་དགོས་པ་སྟོན་པར་བྱེད་དོ། །དེ་ཡང་སངས་རྒྱས་ཀྱི་ཡེ་ཤེས་ཀྱི་ཞལ་སྔ་ནས་ཁྱད་པར་མཉེས་པས་རྗེས་སུ་བརྩེ་བའི་ཁྱད་པར་གྱིས་གང་བདག་གིས་རྙེད་པར་དཀའ་བའི་གནས་སྟོན་པར་མཛད་པ་དེ་ནི་གཞན་དག་གིས་གཞན་དག་ལས་ཡོངས་སུ་ཤེས་པ་རྙེད་པར་དཀའ་བ་ཇི་ལྟ་བ་དེ་བཞིན་དུ་བདག་གིས་ཀྱང་དྲན་པ་གཞན་དག་ལས་རྙེད་པར་དཀའ་བ་ཡིན་ནོ། །དེ་བས་ན་དེའི་དོན་ཉིད་དུ་འདི་བཤད་པར་བྱའོ་ཞེས་བྱ་བའི་ཚིག་གིས་ནི་གནས་དེ་ཡང་ཡང་དག་པར་བསྟན་པར་བྱའོ་ཞེས་བྱ་བ་ཡིན་པར་མངོན་ནོ། །དེའི་ཕྱིར་གནས་དེ་ཉིད་ཀྱི་ཁྱད་པར་དུ་གྱུར་པའི་དཀྱིལ་འཁོར་སྟོན་པ་ཡིན་པས། དཀྱིལ་འཁོར་གྱི་ཆོ་ག་གཞན་དང༌། ཐུན་མོང་དུ་གྱུར་པ་ནི་དཀྱིལ་འཁོར་གྱི་ཆོ་ག་འདིའི་བརྗོད་པའི་དགོས་པ་ཡིན་ནོ་ཞེས་བསྟན་པར་གྱུར་པ་ཡིན་ནོ། །བདག་ཉིད་དྲན་པའི་སྒོ་འདི་ཉིད་ཀྱིས་དེའི་ཁྱད་པར་གཞན་གྱི་ཡོངས་སུ་ཤེས་པ་ཉིད་བརྗོད་པའི་དགོས་པ་བཤད་པ་ཡིན་པ་བལྟ་བར་བྱ་སྟེ། གཞན་དུ་ན་ཚིག་ལ་འབྲས་བུ་མེད་པར་འགྱུར་རོ། །བརྗོད་པའི་དགོས་པ་སྨྲས་པས་བརྗོད་པར་བྱ་བ་ལ་སོགས་པ་སྨྲས་པ་ཡིན་ཏེ། དེའི་སྒོ་ཉིད་
ནས་འདིར་བཤད་པ་ཡིན་ནོ། །རྗོད་པར་བྱེད་པ་དང་དགོས་པ་སྨྲ་ན། དེ་གཉིས་ཐབས་དང་ཐབས་ལས་བྱུང་བའི་མཚན་ཉིད་ཅན་ཡིན་པས་འབྲེལ་བ་ཡང་དོན་གྱི་ཤུགས་ཀྱིས་སྨྲས་པ་ཡིན་ནོ། །དཀྱིལ་འཁོར་བྲི་བ་ལ་སོགས་བ་ནི་སྒྲུབ་པ་པོས་བྱ་བ་ཡིན་ལ་དེ་བས་ན་སྒྲུབ་པ་པོའི་ཡོན་ཏན་བསྟན་པའི་ཕྱིར། དཔལ་ལྡན་འདུས་པའི་གཞུང་དམ་པ། །ཞེས་བྱ་བ་ལ་སོགས་པ་སྨོས་ཏེ། དཔལ་དང་ལྡན་པ་འདུས་པའི་གཞུང་ལུགས་བསྔགས་པར་གྱུར་པའི་དམ་པ་གང་ཡིན་པ་དེས་གང་ཞིག་དབང་བསྐུར་ཞེས་བྱ་བར་སྦྱར་རོ། །རིམ་པ་གང་གིས་དབང་བསྐུར་ཞེ་ན། འཁོར་ལོའི་མན་ངག་རིམ་པ་འདིས། །ཞེས་བྱ་བ་སྨོས་ཏེ། འདིས་ཞེས་བྱ་བ་ནི་འོག་ནས་བཤད་པའོ། །འཁོར་ལོ་ནི་དཀྱིལ་འཁོར་རོ། །མན་ངག་ནི་བླ་མ་གཅིག་ནས་གཅིག་ཏུ་བརྒྱུད་པར་གྱུར་པའོ། །རིམ་པ་ཞེས་བྱ་བ་ནི་རིམ་པ་འདི་ཉིད་ཀྱིས་ཏེ། རིམ་པ་གཞན་དག་གིས་ནི་མ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་དབང་བསྐུར་ཞེ་ན། ཆུ་ཐོག་རྗེས་གནང་ཐ་མ་ཡིས། །ཞེས་བྱ་བ་སྨོས་ཏེ། དབང་བསྐུར་བ་གང་ལ་ཆུ་ཐོག་མར་གྱུར་ཅིང་རྗེས་སུ་གནང་བ་ཐ་མར་གྱུར་པ་གང་ཡིན་པ་དེ་ནི། ཆུ་ཐོག་རྗེས་གནང་ཐ་མ་ཡིས། །ཞེས་བྱ་བ་སྟེ། གཉིས་པོ་འདི་དག་ནི་བྱ་བའི་ཁྱད་པར་རོ། །དབང་བསྐུར་བ་ནི་ཁྲུས་བྱ་བ་སྟེ། དེ་ཡང་ལུས་ཀྱི་ཕྱིའི་དྲི་མ་འཁྲུ་བའོ། །ཆུ་དང་ཅོད་པན་ལ་སོགས་པ་ཆོ་ག་རྣམ་པ་བཅུ་གཉིས་དང་ལྡན་པའི་སྔགས་པས་ཡང་དངོས་པོར་གྱུར་པའི་སྒྲིབ་པའི་དྲི་མ་རྣམས་འཁྲུད་པར་བྱེད་པས་དེ་དང་ཆོས་མཐུན་པའི་ཕྱིར་དབང་བསྐུར་བ་ཞེས་བྱའོ། །དེ་ཡང་རྣམ་པ་གསུམ་སྟེ། རིག་པའི་དབང་བསྐུར་བ་དང༌། སློབ་དཔོན་དུ་དབང་བསྐུར་བ་དང༌། དབང་བསྐུར་བའི་མཆོག་གོ །དེ་དག་ཀྱང་ལྔ་དང༌། གཅིག་དང༌། གཉིས་དང༌། རིམ་བཞིན་དུ་སྦྱར་རོ། །འདིར་ཚིགས་སུ་བཅད་བ་ནི། ཆུ་དང་ཅོད་པན་རྡོ་རྗེ་བདག་པོ་དང༌། །མིང་དུ་བཏགས་དང་བུམ་པ་ཞེས་བྱ་དང༌། །གསང་བ་དང་ནི་ཤེས་རབ་ཡེ་ཤེས་ཏེ། །དབང་བསྐུར་རྣམ་པ་གསུམ་དུ་ཤེས་པར་བྱ། །ཞེས་བྱ་བ་དང༌། རིག་དང་སློབ་དཔོན་མཆོག་ཅེས་བཏགས། །ལྔ་པ་ལ་ནི་བརྟུལ་ཞུགས་འདོད།།
ལུང་བསྟན་རྗེས་གནང་དབུགས་དབྱུང་བ། །དྲུག་པའམ་ཡང་ན་བརྒྱད་པར་བྱ། །ཞེས་བྱའོ། །འདི་དག་གིས་ནི་མདོར་བསྡུས་པའི་ཡོན་ཏན་གཅིག་བཤད་པ་ཡིན་ཏེ། འདི་ལྟ་སྟེ་དབང་བསྐུར་བ་ཡང་དག་པར་ཐོབ་པ་ཞེས་བྱ་བའོ། །རྒྱས་པར་ནི་བཅུ་གཉིས་སོ། །དེ་ཡང་འདི་ལྟ་སྟེ། ཆུའི་ཐོབ་པ་དང༌། དེ་བཞིན་དུ་འོག་མ་རྣམས་ལ་ཡང་ཤེས་པར་བྱའོ། །དེ་ནས་བླ་མ་ཞེས་བྱ་བ་ནས་རྣལ་འབྱོར་དེ་ཉིད་ཤེས་ཞེས་བྱ་བའི་བར་གྱིས་ཡོན་ཏན་གཉིས་པ་བཤད་པ་ཡིན་ནོ། །དེ་ནས་ཞེས་བྱ་བ་ནི་སློབ་དཔོན་དུ་དབང་བསྐུར་བའི་འོག་ཏུ་བླ་མ་ལས་དེ་ཁོ་ན་ཉིད་ཐོབ་ཅིང་དཀྱིལ་འཁོར་གྱི་དེ་ཁོ་ན་ཉིད་དང༌། ལྷའི་དེ་ཁོ་ན་ཉིད་དང༌། སློབ་དཔོན་གྱི་ལས་དང་བཅས་པ་ཐོབ་པར་གྱུར་ནས་ཞེས་བྱ་བའི་ཐ་ཚིག་གོ །འདིར་དེ་ནས་ཞེས་བྱ་བ་འདིས་ནི་དབང་མ་བསྐུར་བ་ལ་དེ་ཁོ་ན་ཉིད་བཤད་པ་བཀག་པ་ཡིན་ནོ། །བླ་མ་ཞེས་བྱ་བ་འདིས་ཀྱང་སློབ་མ་མ་ཡིན་པ་ལའོ། །དེ་ཡང་། རང་གི་སློབ་མ་བདག་ཉིད་ཆེ། །བརྟུལ་ཞུགས་བཟང་ཞིང་དབང་བསྐུར་ལ། །བྱང་ཆུབ་སེམས་དཔའ་རྣམས་ཀྱིས་ནི། །བསྟན་པ་ཡོངས་སུ་གྲོལ་བ་ཡིན། །ཞེས་གསུངས་པ་ཡིན་ནོ། །གཞན་དག་ན་རེ་དེ་ནས་བླ་མ་ཞེས་བྱ་བ་འདི་གཉིས་ནི་གཞི་མཉམ་པ་ཡིན་ཏེ། གང་ཁོ་ན་ལས་ཐོག་མར་ཆུ་དང་ཐ་མར་རྗེས་སུ་གནང་བ་ཅན་གྱི་དབང་བསྐུར་བའི་བླ་མ་དེ་ཁོ་ན་ཉིད་ལས་སོ། །དེ་ལྟར་དེ་ཁོ་ཉིད་ཐོབ་པར་གྱུར་པའི་རྗེས་ལ་གསང་བའི་འཁོར་ལོ་འདིར་གསང་བ་དང་ཤེས་རབ་ཀྱི་དབང་བསྐུར་བ་དག་གིས་གསང་བ་ཤེས་པ་དང་། རྣལ་འབྱོར་གྱི་དེ་ཁོ་ན་ཉིད་ཤེས་པ་གང་ཡིན་པ་ཞེས་པ་དང་སྦྱར་རོ། །གསང་བ་འདུས་པ་འདིར་གསང་བའི་དཀྱིལ་འཁོར་བྲིས་པའམ། བསྒོམས་པར་གང་གསང་བ་དང་ཤེས་རབ་གཉིས་ཀྱི་དབང་བསྐུར་བ་དེ་གཉིས་ཀྱི་གསང་བ་ཤེས་པ་དང༌། རྣལ་འབྱོར་གྱི་དེ་ཁོ་ན་ཉིད་ཤེས་པའོ། །ཇི་ལྟར་ན་དེ་གཉིས་ཀྱི་གསང་བ་ཤེས་ཤེ་ན། དེ་གཉིས་ཀྱི་རྗེས་ཐོགས་ལ། དབང་བསྐུར་འདི་ནི་ཇི་ལྟ་བར། །ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་གྱིས་གསང་བ་བཤད་པའི་ཕྱིར་རོ། །ཇི་ལྟར་ན་དེ་གཉིས་ཀྱིས་རྣལ་འབྱོར་གྱི་དེ་ཁོ་ན་ཉིད་ཤེས་ཤེ་ན།
དེ་ཉིད་ཀྱི་ཚེ་དེ་ལ་རིམ་པ་ཇི་ལྟ་བ་བཞིན་དུ་ལུས་ཀྱི་ཤེས་པས་མངོན་སུམ་དུ་བྱ་བ་དག་གིས་མངོན་སུམ་དུ་བྱེད་པའི་ཕྱིར་རོ། །དེ་ཡང་རྣལ་འབྱོར་ནི་ཤེས་རབ་དང་ཐབས་ཀྱི་སྙོམས་པར་འཇུག་པ་ཡིན་ལ། དེའི་དེ་ཁོ་ན་ཉིད་ནི་དོན་དམ་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཟག་པ་མེད་ཅིང་རྟག་པའི་བདེ་བ་བླ་ན་མེད་པའི་རང་བཞིན་བཅོམ་ལྡན་འདས་ཐར་པ་ཆེན་པོ་ཡིན་ལ། དེ་ཡང་དེ་གཉིས་ཁོ་ནས་ཡང་དག་པར་སྟོན་པ་ཡིན་གྱི་གཞན་གྱི་ཚེ་མ་ཡིན་ནོ། །གོ་རིམས་འདི་ནི་འོག་ནས། མི་ལྡོག་དབང་བསྐུར་བྱིན་ནས་ནི། །འཁོར་ལོའི་དེ་ཉིད་བསྟན་པར་བྱ། །འཁོར་ལོའི་དེ་ཉིད་ལེགས་བསྟན་ནས། །ལྷ་ཡི་དེ་ཉིད་བསྟན་པར་བྱ། །དཀྱིལ་འཁོར་ལྷ་ཡི་དེ་ཉིད་དང༌། །སློབ་དཔོན་གྱི་ནི་ལས་རྣམས་དག །ལེགས་བཤད་གསང་དང་ཤེས་རབ་ཀྱི། །དབང་བསྐུར་དེ་ཉིད་བཤད་པར་བྱ། །ཞེས་བཤད་པ་ཡིན་ནོ། །ཐེག་གསུམ་དགོངས་པའི་དེ་ཉིད་ཤེས། །ཞེས་བྱ་བ་ནི་ཉན་ཐོས་ཀྱི་ཐེག་པ་དང༌། ཕ་རོལ་ཏུ་ཕྱིན་པའི་ཐེག་པ་དང༌། གསང་སྔགས་ཀྱི་ཐེག་པའོ། །འདི་རྣམས་ལས་མ་གྲགས་པའི་ཚིག་འགའ་ཞིག་གིས་སྟོན་པའི་དགོངས་པའི་དོན་གང་ཡིན་པ་དེ་ནི་དགོངས་པ་ཞེས་བྱ་ལ། དེའི་དེ་ཁོ་ན་ཉིད་དེ་རྟོགས་པས་ན། དགོངས་པའི་དེ་ཉིད་ཤེས་ཞེས་བྱ་བ་སྟེ། དེ་ཡང་འདི་ལྟར་ཐེག་པ་གཉིས་པོ་དག་ལས། ཕ་དང་མ་ནི་གསད་བྱ་ཞིང༌། །བྲམ་ཟེ་གཙང་སྦྲ་ཅན་གཉིས་དང༌། །རྒྱལ་པོ་ཡུལ་འཁོར་བཅས་བཅོམ་ན། །མི་དེ་ཡོངས་སུ་དག་པར་བཤད། །ཅེས་གསུངས་པ་ལྟ་བུའོ། །འདིར་དགོངས་པའི་དེ་ཁོ་ན་ཉིད་ནི་མ་ནི་སྲིད་པའོ། །ཕ་ནི་ལས་ཀྱི་སྲིད་པའོ། །རྒྱལ་པོ་ནི་ཟག་པ་དང་བཅས་པའི་སེམས་སོ། །བྲམ་ཟེ་གཉིས་ནི་ལྟ་བ་མཆོག་ཏུ་འཛིན་པ་དང་ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །ཡུལ་ནི་དབང་པོའི་ཚོགས་རྣམས་སོ། །འཁོར་ནི་ཡུལ་རྣམས་སོ། །གཞན་ཡང་ཕ་རོལ་ཏུ་ཕྱིན་པའི་ཐེག་པ་ལས། འདི་ནི་བྱང་ཆུབ་སེམས་དཔས་སྲོག་གཅད་པར་བྱའོ། །མ་བྱིན་པར་བླང་བར་བྱའོ་ཞེས་བྱ་བ་ནས། ལོག་པར་ལྟ་བར་གྱུར་པར་བྱའོ་ཞེས་གསུངས་པ་ཡོད་ལ། འདིར་དགོངས་པའི་དེ་ཁོ་ན་ཉིད་ནི་སྲོག་ནི་འཚོ་བ་དང་སེམས་ཅན་ཞེས་པའི་དོན་
ཏོ། །དེ་བཅད་པ་ནི་འཁོར་བར་ལྷུང་བར་གྱུར་པ་ལས་ཤིན་ཏུ་བ་ཏོན་ཞིང་འཁོར་བ་ལས་བསྒྲལ་བར་བྱ་བ་ནི་སྲོག་གཅོད་པའོ། །མ་བྱིན་པར་ལེན་པ་ནི་སྙིང་རྗེས་སེམས་ཅན་རྣམས་མ་བྱིན་པ་ཉིད་དུ་སོ་སོར་བླངས་ཤིང་ཡོངས་སུ་བཟུང་ནས་དོན་བྱེད་པའོ། །བྱིས་པའི་སྐྱེ་བོ་རྣམས་ཀྱིས་ཡོངས་སུ་བཟུང་བའི་དངོས་པོ་ཇི་སྙེད་པ་ཐམས་ཅད་ལོག་པ་ཉིད་དུ་མཐོང་བ་ནི་ལོག་པར་ལྟ་བའོ། །དེ་བཞིན་དུ་གཞན་དག་ལ་ཡང་ཐེག་པ་གཉིས་སུ་གསུངས་པའི་དགོངས་པ་རྣམས་ཀྱི་དེ་ཁོ་ན་ཉིད་ཀྱང་ཤེས་པར་བྱའོ། །དེ་བཞིན་དུ་གསང་སྔགས་ཀྱི་ཐེག་པ་ལས་ཀྱང་། ཁྱོད་ཀྱིས་སྲོག་ཆགས་གསད་པར་བྱ། །ཞེས་བྱ་བ་ལ་སོགས་པ་གསུངས་པ་ཡིན་ཏེ་དེ་ནི་བླ་མའི་ཞལ་ལ་སོགས་པ་ལས་ཤེས་པར་བྱའོ། །རྒྱུད་འདི་ལས་དགོངས་པའི་དེ་ཁོ་ན་ཉིད་མང་པོ་གསུངས་པ་གང་ཡིན་པ་དེ་རྣམས་ནི་ལེའུ་བཅོ་བརྒྱད་པ་ལས་ལེགས་པར་བཤད་པ་ཡིན་ལ། ལྷག་མ་རྒྱུད་གཞན་དང༌། ཐེག་པ་གཞན་དག་ལས་གསུངས་པ་རྣམས་ནི། རིགས་པའི་གཏན་ཚིགས་འཐད་པས་སམ། ཕུལ་དུ་བྱུང་བའི་མན་ངག་ལས་ཅི་རིགས་པར་ཤེས་པར་བྱས་ལ། དགོངས་པ་རྣམས་ཀྱི་དེ་ཁོ་ན་ཉིད་ངེས་པ་ཁོ་ནར་ཤེས་པར་བྱ་དགོངས་སོ། །གཞན་དུ་ན་དེ་ཁོ་ན་ཉིད་ལ་ཐེ་ཚོམ་ཟ་བའམ། ལོག་པར་འཛིན་པར་འགྱུར་རོ། །འདིར་གསང་སྔགས་ཀྱི་ཐེག་པ་ནི་དཀྱུས་མ་ཉིད་ཡིན་ལ་ཐེག་བ་གཉིས་པོ་སྨོས་པ་ནི་དཔེར་བྱ་བའམ། ཐོས་པ་མང་བར་བྱ་བའི་ཕྱིར་རོ། །རིག་པ་ལ་སོགས་པ་ནི་འོག་ནས་འཆད་དོ། །ཏིང་ངེ་འཛིན་གསུམ་ནི་དང་པོའི་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་པོའི་མཆོག་གོ །ཐུན་མོང་གི་དངོས་གྲུབ་ནི་མི་སྣང་བ་ལ་སོགས་པའི་དངོས་གྲུབ་པོ། །ཅིག་ཤོས་ནི་དངོས་གྲུབ་ཀྱི་མཆོག་སྟེ། ཕྱག་རྒྱ་ཆེན་པོའི་དངོས་གྲུབ་ལ་སོགས་པ་གང་ཡིན་པའོ། །རྒྱུད་གཞུང་གི་ནི་རྣམ་དབྱེ་ཤེས། །ཞེས་བྱ་བ་ནི་རྒྱུད་འདི་ཉིད་ཀྱིའམ། རྒྱུད་ཐམས་ཅད་ཀྱིའོ། །དམ་ཚིག་དང་སྡོམ་པ་ནི་འོག་ནས་འཆད་དོ། །ཤེས་རབ་རྣལ་འབྱོར་ལ་རབ་བརྩོན། །ཞེས་བྱ་བ་ལ་ཤེས་རབ་གཙོ་བོར་གྱུར་པའི་རྣལ་འབྱོར་ནི་ཤེས་རབ་
རྣལ་འབྱོར་ཏེ། དེ་ལ་རབ་ཏུ་བརྩོན་པ་ནི་ཤིན་ཏུ་གོམས་པར་སློབ་པ་ཉིད་དོ། །སྔགས་ནི་གྲགས་པར་ཟད་དོ། །རྒྱུད་ནི་ཕྱིར་ཟློག་པའི་འཁོར་ལོ་ལ་སོགས་པའོ། །དེ་རྣམས་ཀྱི་སྦྱོར་བ་ལ་མཁས་པ་ནི་ཞི་བ་ལ་སོགས་པའི་ལས་རྣམས་ལ་བྱང་བའོ། །དེ་ལྟ་བུའི་ཡོན་ཏན་དང་ལྡན་པ་ནི་སེམས་ཅན་གྱི་དོན་བསྒྲུབ་པར་འོས་པ་ཡིན་ཏེ། སེམས་ཅན་རྣམས་ཀྱི་དོན་ནི་ཕན་པ་སྟེ། ཕྱག་རྒྱ་ཆེན་པོའི་དངོས་གྲུབ་དང༌། དཀྱིལ་འཁོར་དུ་འཇུག་པ་ལ་སོགས་པ་ཐམས་ཅད་དོ། །འོས་པ་ཞེས་བྱ་བ་ནི་འཚམ་པ་སྟེ་དབང་དུ་བྱས་པ་ཞེས་བྱ་བའི་དོན་ཏོ། །ཅིའི་ཕྱིར་ཡོན་ཏན་འདི་དག་ཙམ་ཉིད་ཀྱིས་འོས་པ་ཉིད་ཡིན་པར་བཤད། ཡོན་ཏན་གཞན་རྣམས་གཞན་དག་ལས་ཇི་སྙེད་ཅིག་འབྱུང་སྟེ། བརྟན་ཞིང་དུལ་ལ་བློ་གྲོས་ལྡན། །བཟོད་ཅིང་དྲང་ལ་གཡོ་སྒྱུ་མེད། །ཅེས་བྱ་བ་ལ་སོགས་པ་གསུངས་པ་ཡོད་ལ་དེ་རྣམས་འདིར་མ་སྨོས་སོ་ཞེ་ན། དེའི་ཕྱིར་གཏོང་ལྡན་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་གཏོང་བ་ལ་སོགས་པའི་ཡོན་ཏན་དང་ལྡན་དུ་ཟིན་ཀྱང་གོང་དུ་བཤད་པའི་ཡོན་ཏན་གྱིས་བསྟོད་ན་འོས་པ་ཉིད་མ་ཡིན་ཏེ། ཅིའི་ཕྱིར་ཞེ་ན། སྔར་བཤད་པའི་ཡོན་ཏན་རྣམས་ཡོད་པར་གྱུར་ན། གཏོང་བ་ལ་སོགས་པའི་ཡོན་ཏན་ངེས་པར་འབྱུང་བར་འགྱུར་བ་ཡིན་ནོ། །དེ་བས་ན་སྔར་བཤད་པའི་ཁོ་ནས་འོས་པ་ཉིད་ཡིན་པར་བརྗོད་དོ། །དེ་ཡང་འདིར་མི་ནུས་པ་ཡང་ཉམས་སུ་བླང་དགོས་པར་ཐལ་བར་འགྱུར་བའི་ཕྱིར་རོ། །སེང་གེ་ཟླ་བ་ལ་སོགས་པ་དང་འདྲ་བར་གཏོང་བ་ལ་སོགས་པ་ཡོད་པ་འཆད་པར་འདོད་པ་ནི་མ་ཡིན་ལ། གལ་ཏེ་རྗེས་སུ་མཐུན་པའི་གཏོང་བ་ལ་སོགས་པ་དང་མི་ལྡན་ན་ནི། དབང་བསྐུར་བ་ལ་སོགས་པ་ཇི་ལྟར་ཐོབ། །འདི་དག་གིས་ནི་དཀྱིལ་འཁོར་བྲི་བ་ལ་སོགས་པ་བྱེད་པར་འོས་པ་བཤད་པ་ཡིན་ནོ། །དཀྱིལ་འཁོར་བྲི་བ་ན་ཡང་སྔོན་དུ་བྱ་བ་གང་ཡིན་པ་དེ་བསྟན་པར་བྱ་བའི་ཕྱིར། བརྩེར་ལྡན་ཞེས་བྱ་བ་ལ་སོགས་པ་སྨོས་ཏེ། སེམས་ཅན་ཐམས་ཅད་ལ་སྙིང་རྗེ་བསྒོམ་པ་དང༌། དམ་ཚིག་དང༌། སྡོམ་པ་དང་ལྡན་པའི་བརྟུལ་ཞུགས་ཡོད་པ་དང༌། གསང་སྔགས་ཟློས་པ་དང་ལྡན་པ་དང༌། སྔགས་ཀྱི་ཚུལ་ལ་ཐེ་ཚོམ་
མེད་པའི་ཕྱིར་དད་པ་དང་ལྡན་པ་དང༌། ཆོས་ཐམས་ཅད་ལ་བདག་མེད་པ་དང༌། སངས་རྒྱས་ཀྱི་ཆེ་བའི་བདག་ཉིད་ལ་ལྷག་པར་མོས་པས་ཟབ་མོའི་དེ་ཁོ་ན་ཉིད་ཤེས་པ་དང༌། རང་གི་འཁོར་ལོ་འཇམ་པའི་རྡོ་རྗེའི་དཀྱིལ་འཁོར་ལ་དེའི་ཚུལ་གྱིས་གནས་པར་གྱུར་པས་སྔོན་དུ་བསྙེན་པ་བྱས་ནས། དེའི་རྗེས་ལ་དེའི་དཀྱིལ་འཁོར་བྲི་བར་བྱའོ་ཞེས་བྱ་བའི་དོན་ཏོ། །སྔོན་དུ་བསྙེན་པ་དེ་ཉིད་རྒྱས་པར་ནི། ཡིད་དང་རྗེས་མཐུན་གནས་ལ་ལར། །ཞེས་བྱ་བ་ནས། ཅི་རིགས་པར་ནི་བཟླས་བྱས་ནས། །རང་བདག་ལ་སོགས་བཀའ་ཐོབ་པའམ། །འགོག་པའི་འཁོར་ལ་གོམས་པ་ཡིས། །རང་སེམས་དག་ནས་བྲི་བར་བྱ། །ཞེས་བྱ་བའི་བར་འདིས་བཤད་པ་ཡིན་ནོ། །ཡིད་དང་རྗེས་སུ་མཐུན་པ་ནི་ཡིད་དུ་འོང་བའོ། །བྱུག་པ་ནི་བསྐུ་བའོ། །རྣམ་ཐར་སྒོ་ཞེས་པ་ནི་སྟོང་པ་ཉིད་དང་མཚན་མ་མེད་པ་དང༌། སྨོན་པ་མེད་པ་སྟེ་རྣམ་པར་ཐར་པའི་སྒོ་གསུམ་མོ། །འདི་རྣམས་ཀྱིས་ལེགས་པར་དག་པ་ནི་ཡང་དག་པར་དག་པ་སྟེ། སྐུ་དང་གསུང་དང་ཐུགས་ཡོངས་སུ་དག་པའི་ཡེ་ཤེས་ཡང་དག་པ་ཇི་ལྟ་བའི་མཚན་ཉིད་དོ། །དེ་ཡང་མདོར་བསྡུ་ན་ཡེ་ཤེས་ཀྱི་ཚོགས་སོ། །དེའི་ཕྱིར་ཞེས་པ་དེའི་དོན་དུ་སྙིང་གར་གནས་པའི་ཟླ་བར་ཡི་གེ་མཾ་འོད་ཟེར་གྱི་ཕྲེང་བ་འབར་བ་དང་ལྡན་པ་བསམས་ནས། དེའི་འོག་ཏུ་བསོད་ནམས་ཀྱི་ཚོགས་ཀྱི་དོན་སྡིག་པ་བཤགས་པ་ལ་སོགས་པ་བྱའོ། །རྣམ་པར་ཐར་པའི་སྒོ་དག་པར་བྱ་བའི་ཕྱིར་ཡི་གེ་མཾ་བསམས་ནས་ཞེས་བྱ་བ་འདི་ཅིའི་ཕྱིར་སྨྲས་ཤེ་ན། ས་བོན་གྱི་ཡི་གེ་ནི་སྐུ་གསུམ་གྱིས་ཡི་གེ་ཡོངས་སུ་དག་པར་སྟོན་པར་བྱེད་པ་ཡིན་གྱི། གཞན་དུ་ན་དེ་ཁོ་ན་ཉིད་གསུམ་རོ་གཅིག་པའི་གསང་བའི་ཚུལ་ཅན་གྱི་སྔགས་ཀྱི་ལྷ་རྣམས་ཀྱི་ས་བོན་དུ་མི་འགྱུར་རོ། །དེ་ལ་གསལ་བྱེད་ཀྱིས་ནི་སྟོང་པ་ཉིད་དུ་སྟོན་ཏོ། །དབྱངས་ཀྱི་ཡི་གེས་ནི་མཚན་མ་མེད་པར་རོ། །ཐིག་ལེས་ནི་སྨོན་པ་མེད་པར་རོ། །ངེས་པའི་ཚིག་གི་ཚུལ་ནི་རྒྱུད་གཞན་དག་དང་ཐེག་པ་གཞན་དང༌། གཟུངས་ཀྱི་སྒོའི་རྗེས་སུ་འབྲངས་ནས་ཤེས་པར་བྱའོ། །ཨོཾ་གྱི་དེ་ཁོ་ན་ཉིད་གསུམ་སྟོན་ཏེ། ཨ་དང་ཨུ་དང་ཐིག་ལེས་སོ། །ཡི་གེ་ཨཱི་
ནི་ཐུང་དུ་དང་རིང་པོ་དང་ཚེག་དྲག་གིས་སོ། །ཡང་ན་ཡི་གེ་ཨཱ་དང་ཚེག་དྲག་གཉིས་ཀྱི་སྟེ། ཤེས་རབ་དང་ཐབས་ཀྱི་བདག་ཉིད་ཅན་དུ་མདོར་བསྡུས་པ་ཉིད་ཀྱིས་ཡི་གེ་གཅིག་པའི་སྔགས་ཀྱིས་དེ་ཁོ་ན་ཉིད་གསུམ་རོ་གཅིག་པའི་ཚུལ་གྱིས་རང་ཉིད་དབྱེར་མི་ཕྱེད་པས་བྱ་བ་གཅིག་པ་ཉིད་སྟོན་པར་བྱེད་པ་ཡིན་ནོ། །རྒྱུད་ཀྱི་རྒྱལ་པོ་འདིར་སྒོ་མང་པོ་ནས་དེ་ཁོ་ན་ཉིད་གསུམ་རོ་གཅིག་པའི་གསང་བའི་ཚུལ་ཅན་གྱི་ས་བོན་གྱི་དོན་ཡིན་པར་བཅོམ་ལྡན་འདས་ཉིད་ཀྱིས་གསུངས་པ་ཡིན་ནོ། །དེ་བས་ན་དགེ་བ་འདོད་པ་རྣམས་ཀྱིས་དོན་དམ་པར་འདི་ལ་མཆོག་ཏུ་ལྷག་པར་མོས་པ་ཉིད་དུ་བྱའོ། །དོན་དེ་ཉིད་ཀྱི་ཕྱིར་འདི་བསྟན་པར་མི་བྱ་བ་ཡིན་ན་ཡང་ཁོ་བོས་གསལ་བར་ཕྱེ་བ་ཡིན་ནོ། །གཞན་ཡང་ཅི་ཞིག་བྱས་ཏེ་སྡིག་པ་བཤགས་པ་ལ་སོགས་པ་བྱ་ཞེ་ན། ཕྱོགས་བཅུར་ཞེས་བྱ་བ་ལ་སོགས་པ་སྨོས་ཏེ། ཕྱོགས་བཅུ་པོ་རྣམས་སུ་དུས་གསུམ་པོར་བྱུང་བའི་སངས་རྒྱས་བཅོམ་ལྡན་འདས་གང་ཡིན་པ་དེ་རྣམས་ཀྱི་མདུན་དུ་གནས་པར་མོས་པའི་སྟོབས་ཀྱིས་བསམས་ལ། སྙིང་པོ་མཾ་གྱི་འོད་ཟེར་ལས་བྱུང་བའི་གཟུགས་རྡོ་རྗེ་ལ་སོགས་པ་དང༌། མེ་ཏོག་ལ་སོགས་པས་སངས་རྒྱས་བཅོམ་ལྡན་འདས་དེ་དག་ཉིད་ལ་གུས་པས་མཆོད་པར་བྱའོ་ཞེས་བྱ་བའི་དོན་ཏོ། །བདག་ཉིད་ཀྱི་སྡིག་པ་གཞན་དག་ལ་མཐོལ་བ་ནི་སྡིག་པ་བཤགས་པ་སྟེ། དེ་བསྟན་པའི་ཕྱིར་རང་གི་ཞེས་པ་ལ་སོགས་པ་སྨོས་ཏེ། བདག་རང་ཉིད་ཀྱི་ཉོན་མོངས་པ་ཅན་གྱི་ལོག་པའི་རྟོག་པ་བདག་དང་བདག་གི་རྣམ་པ་ཅན་དེ་ཙམ་ལས་འདོད་ཆགས་དང་ཞེ་སྡང་དང་གཏི་མུག་གི་བར་ཆད་ལས་བྱུང་བའི་ཉེས་བྱས་དེ་བཅོམ་ལྡན་འདས་ལ་འཆགས་པར་བགྱིད་དོ་ཞེས་བྱ་བར་སྦྱར་རོ། །ལོག་རྟོག་ཙམ་གྱི་སྒྲ་ནི་སྡིག་པའི་རྒྱུ་ཆུང་བ་ཉིད་དང༌། རང་གི་སྒྲས་ནི་རང་ལ་རག་ལས་པ་ཉིད་དུ་སྟོན་པས་སྡིག་པ་ནི་ཉམ་ཆུང་བའི་ཕྱིར་ཡོངས་སུ་སྤང་བར་ནུས་པ་ཡིན་ནོ་ཞེས་སྟོན་ཏོ། །ཡང་ན་ཙམ་གྱི་སྒྲ་ནི་ཁྱབ་པའི་ཚིག་ཡིན་ཏེ། ལོག་པར་རྟོགས་པ་ཐམས་ཅད་ལས་བྱུང་བའི་ཉེས་བྱས་རྣམས་བཤད་པར་བགྱིའོ་ཞེས་བྱ་བར་སྦྱར་ཏེ། འདིར་ཁྱབ་པའི་དབང་དུ་བྱས་པའི་ཕྱོགས་འདི་ནི་ལེགས་པ་ཡིན་ནོ། །དེ་ཡང༌།
མ་ལུས་ཀུན་རྟོག་གིས་བསགས་སྡིག་པ་རྣམས། །ཞེས་ཇི་སྐད་བཤད་པ་ལྟ་བུའོ། །ཕྱོགས་འདི་ལ་ནི་རང་གི་སྒྲ་དང༌། བྱས་པའི་སྒྲ་ལ་དོན་གྱི་ཁྱད་པར་ལྷག་པར་ཡོད་པ་མ་ཡིན་ཏེ། རྟོག་པ་ཙམ་ལས་བྱུང་བ་ཞེས་བྱ་བ་ནི་རྒྱུ་ལ་ཁྱབ་པའོ། །དུས་གསུམ་ཞེས་བྱ་བ་ནི་དུས་ལ་ཁྱབ་པའོ། །དེ་བས་ན་རྒྱུ་ཐམས་ཅད་ལས་བྱུང་བ་དང༌། དུས་ཐམས་ཅད་པའི་ཉེས་བྱས་རྣམས་བཤགས་པར་གྱུར་པ་ཡིན་ནོ། །བྱས་པ་ཞེས་བྱ་བ་ནི་སྡུག་བསྔལ་གྱི་རྒྱུར་གྱུར་པའི་ལས་བྱས་པ་དང༌། བྱེད་པ་དང་བྱེད་པར་འགྱུར་བའོ། །ཡང་ན་བྱས་པའི་སྡིག་པ་ཉིད་འཆགས་པ་ཡིན་ལ། དུས་གསུམ་ཞེས་བྱ་བ་ནི་ལུས་ཀྱི་དང་ངག་གི་དང་ཡིད་ཀྱིའོ། །ལན་གསུམ་ཞེས་བྱ་བ་ནི་དུས་གསུམ་དུ་བྱས་ཏེའོ། །རྨི་ལམ་རྨི་ལམ་ལ་སོགས་བཞིན། །ཞེས་བྱ་བ་ནི་ཇི་ལྟར་རྨི་ལམ་དུ་ལ་ལ་ཞིག་རྨི་ལམ་དང་སྒྱུ་མ་དང་སྨིག་རྒྱུ་དང༌། དྲི་ཟའི་གྲོང་ཁྱེར་སྟོན་པར་བྱེད་པ་དང་འདྲ་བར་སྡིག་པ་ཡང་དེ་བཞིན་དུ་བཤགས་པར་བྱའོ་ཞེས་བྱ་བའི་ཐ་ཚིག་གོ །དེ་ཡང་རྨི་ལམ་དུ་རྨི་ལམ་ལ་སོགས་པ་སྟོན་པ་ན། གང་ཟག་གང་གིས་གང་ལ་གང་ཞིག་སྟོན་པའི་བསྟན་པར་བྱ་བ་དེ་དག་ཐམས་ཅད་ནི་དངོས་པོ་མེད་པ་ཡིན་ཏེ། རྨི་ལམ་ནི་བརྫུན་པ་ཡིན་པའི་ཕྱིར་རོ། །དེ་བཞིན་དུ་བདག་གི་སངས་རྒྱས་དང༌། བདག་དང་ཉེས་བྱས་དང་དེ་བཤགས་པ་དམིགས་སུ་མེད་པར་ལྷག་པར་མོས་པས་བཤགས་པར་བགྱིའོ་ཞེས་བྱ་བའི་ཐ་ཚིག་གོ །གཞན་གྱི་བསོད་ནམས་ལ་དང་ཅིང་དང་པོ་སྔོན་དུ་འགྲོ་བའི་དགའ་བ་ནི་རྗེས་སུ་ཡི་རང་བ་ཡིན་ལ། བདག་ཉིད་ཀྱི་བསོད་ནམས་རང་བཞིན་གྱིས་བྱང་ཆུབ་ཏུ་བསྔོ་ཞིང་བདག་གིས་བསོད་ནམས་ཀྱི་འབྲས་བུ་འདི་ལྟ་བུར་གྱུར་ཅིག་ཅེས་བྱ་བ་གང་ཡིན་པ་དེ་ནི་བསོད་ནམས་བསྔོ་བ་སྟེ། གཉིས་པོ་དེ་དག་བསྟན་པའི་ཕྱིར་རྫོགས་སངས་ཞེས་བྱ་བ་ལ་སོགས་པ་སྨོས་ཏེ། རྫོགས་སངས་རྒྱས་ཞེས་བྱ་བ་ནི་ཡང་དག་པར་རྫོགས་པའི་སངས་རྒྱས་རྣམས་སོ། །སྲས་མཆོག་ཅེས་བྱ་བ་ནི་རྒྱལ་བའི་སྲས་ཏེ། བྱང་ཆུབ་སེམས་དཔའ་ཞེས་བྱ་བའི་དོན་ཏོ། འཕགས་རྣམས་ཞེས་བྱ་བ་ནི་ཉན་ཐོས་དང་རང་སངས་རྒྱས་རྣམས་ཀྱིའོ། །གཞན་གྱི་ཞེས་བྱ་བ་ནི་སོ་སོའི་སྐྱེ་བོ་རྣམས་ཀྱིའོ། །
དགེ་བ་དམ་པ་ཞེས་བྱ་བ་ནི་མ་འདྲེས་པའི་བསོད་ནམས་ཞེས་བྱའི་དོན་ཏེ། དེ་ཐམས་ཅད་ལས་རྗེས་སུ་ཡི་རང་བར་བྱས་ནས་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བགྱིའོ། །བསོད་ནམས་དེ་དག་ལ་དང་པོར་རྗེས་སུ་ཡི་རང་ནས་དེའི་རྗེས་ལ་རང་གི་བསོད་ནམས་ཡོངས་སུ་བསྔོ་བ་ནི་རྗེས་སུ་ཞེས་བྱ་བའི་སྒྲའི་དོན་ཡིན་ནོ། །ཡང་ན་རྗེས་སུ་ཞེས་བྱ་བའི་སྒྲའི་དོན་ནི་ལྷན་ཅིག་ཅེས་བྱ་བའི་དོན་ཡིན་པས་དགེ་བ་ཞེས་བྱ་བ་དང་སྦྱར་རོ། །རྗེས་སུ་ཡི་རང་བ་ནི་དོན་གྱི་དཀྱུས་མ་ཡིན་ནོ། །དེའི་དོན་ནི་འདི་ཡིན་ཏེ། རྗེས་སུ་ཡི་རང་བ་དང་ལྷན་ཅིག་སྐྱེས་པའི་བསོད་ནམས་ཡོངས་སུ་བསྔོ་བར་བགྱིའོ་ཞེས་བྱ་བའི་ཐ་ཚིག་གོ །དམ་པའི་ཆོས་ཡུན་རིང་དུ་སྟོན་པར་མཛད་པའི་ཕྱིར་སངས་རྒྱས་རྣམས་ལ་ཡུན་རིང་དུ་བཞུགས་པར་གསོལ་བ་འདེབས་པ་ནི་བསྐུལ་བ་ཡིན་ནོ། །དེ་རྣམ་པ་གཞན་དག་གིས་བསྟན་པར་བྱ་བའི་ཕྱིར། ཀུན་འདོད་ཅེས་བྱ་བ་ལ་སོགས་པ་སྨོས་ཏེ། བདག་བསྐུལ་བར་བགྱིད་དོ། །ཅི་ཞིག་བསྐུལ་ཞེ་ན། སངས་རྒྱས་ཐམས་ཅད་ཀྱིས་ཆོས་བསྟན་པ་འཇིག་རྟེན་ཀུན་ལ་སྣང་ཞིང་བློའི་ཡུལ་དུ་གྱུར་ཅིག་པའོ། །ཅི་ལྟ་བུ་ཞེ་ན། སྡིག་པ་མེད་པ་སྟེ་ཁ་ན་མ་ཐོ་བ་མེད་ཅིང་ཉེས་པ་དང་བྲལ་བ་དེའི་བསམ་པ་ཐམས་ཅད་ནི་ཀུན་འདོད་དེ། འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་ཡིད་ལ་རེ་བ་ཐམས་ཅད་ལ་དབུགས་འབྱིན་སྩོལ་བར་མཛད་པ་སྟེ། ཡིད་བརྟན་དུ་མི་རུང་བའི་དོན་ལ་ཡིད་རྟོན་པར་གྱུར་པ་ནི་དབུགས་དབྱུང་བའོ། །ཇི་ལྟ་བུ་ཞེ་ན། སངས་རྒྱས་ཀུན་གྱི་བསྟན་པ་ནམ་མཁའི་མཐའ་དང་མཉམ་པ་སྟེ། ནམ་མཁའ་ལྟ་བུར་རྒྱུན་མི་འཆད་པར་རྟག་ཏུ་གནས་པ་གང་ཡིན་པ་ལ་གནས་པ་དེ་ནི་ནམ་མཁའི་མཐའ་དང་མཉམ་པའོ། །གལ་ཏེ་དེ་རྣམས་ཀྱི་ཆོས་ཀྱི་སྐུས་སྐྱེ་བ་དང་འགག་པ་མེད་པ་དང༌། ལོངས་སྤྱོད་རྫོགས་པའི་སྐུས་འགག་པ་མེད་པ་དང༌། སྤྲུལ་པའི་སྐུས་ནམ་མཁའ་ཇི་སྲིད་གནས་ཀྱི་བར་དུ། འཇིག་རྟེན་གྱི་ཁམས་དེ་དང་དེ་རྣམས་སུ་བལྟམས་པ་དང༌། བྱང་ཆུབ་པ་དང་ཆོས་ཀྱི་འཁོར་ལོ་བསྐོར་བ་དང༌། ཡོངས་སུ་མྱ་ངན་ལས་འདས་པ་བསྐལ་པ་ཇི་ལྟ་བ་བཞིན་དུ་སྟོན་པར་མཛད་པས་འདིས་ནི་བཞུགས་
པར་གསོལ་བ་གདབ་པར་ཡང་མི་དགོས་ལ། ཆོས་སྟོན་པར་བསྐུལ་བ་ཡང་མི་དགོས་ཏེ་གྲུབ་པ་ཉིད་ཡིན་ནོ་ཞེ་ན། དེ་ལྟ་མོད་ཀྱི་སྟོན་པར་སྣང་བ་ཉིད་དུ་བསྐུལ་བ་ཡིན་ཏེ། སྣོད་མ་ཡིན་པ་རྣམས་ལ་དེ་མེད་པའི་ཕྱིར་རོ། །སྤྲུལ་པའི་སྐུ་ཡང་སོ་སོར་སྣང་བར་གསོལ་བ་འདེབས་པ་ཉིད་ཡིན་ཏེ། དེ་ཡང་སྐུས་སྟོན་པར་མཛད་པའི་བདག་ཉིད་ཅན་ཡིན་པའི་ཕྱིར་དང༌། བསྟན་པ་ཞེས་སྤྱིར་སྨོས་པ་ཡིན་པའི་ཕྱིར་རོ། །འདིར་ཚིགས་སུ་བཅད་པ་ནི། སངས་རྒྱས་མྱ་ངན་མི་འདའ་སྟེ། །ཆོས་ཀྱང་ནུབ་པར་མི་འགྱུར་རོ། །གཉི་གའང་སྣོད་ཀྱི་ཉེས་པ་ཡིས། །ཆུ་ཡི་ཟླ་བ་ལྟར་མི་སྣང༌། །རྨོངས་སྡིག་མི་དགེའི་བཤེས་གཉེན་ལ། །ཐུབ་པའི་ཟླ་བ་མི་སྣང་སྟེ། །མུན་དང་ཐག་རིང་བསྒྲིབས་པར་གནས། །ཆུ་སྣོད་ལ་ནི་ཟླ་བར་མཚུངས། །ཞེས་བཤད་པ་ཡིན་ནོ། །འགྲོ་བ་སྐྱབས་མེད་པ་རྣམས་ཀྱི་སྐྱབས་ནི་གསུམ་སྟེ། སངས་རྒྱས་དང་ཆོས་དང་དགེ་འདུན་ནོ། །དེ་རྣམས་ལ་བདག་གིས་སྐྱབས་ཉིད་དུ་ཤིན་ཏུ་ཁས་ལེན་པ་ལས་མི་འདའ་བའི་དམ་བཅའ་བ་ནི་སྐྱབས་སུ་འགྲོ་བའོ། །དེ་ལ་གསུམ་ལ་སྐྱབས་སུ་འགྲོ་བ་ནི་ཚིགས་སུ་བཅད་པ་གསུམ་གྱིས་སྟོན་ཏེ་གང་ཉོན་མོངས་པ་ཅན་གྱིས་རྣམ་པར་རྟོག་པ་སྤངས་པས། ཀུན་དུ་རྟོག་པ་མ་ལུས་པ་ཐམས་ཅད་དག་པར་གྱུར་པ་དང་གང་ཡང་གཟུང་བ་དང་འཛིན་པའི་རྣམ་པར་རྟོག་པ་སྤངས་པས་སོ་སོ་རང་གིས་རིག་པའི་བདག་ཉིད་ཀྱི་དགའ་བ་ཐུགས་སུ་ཆུད་པར་གྱུར་པ་དང༌། གང་ཆོས་སྟོན་པ་ལ་སོགས་པའི་སྒོ་ནས་སེམས་ཅན་རྣམས་ལ་རང་གི་དོན་གང་གཞན་གྱི་དོན་གྱི་འབྲས་བུ་ཕུན་སུམ་ཚོགས་པ་སྩོལ་བར་མཛད་པའི་རྫོགས་པའི་སངས་རྒྱས་དེ་ལ་སྐྱབས་སུ་མཆིའོ་ཞེས་པའོ། །ཆོས་ནི་རྣམ་པ་གསུམ་སྟེ། ལུང་དང༌། རྟོགས་པ་དང༌། ཆོས་ཀྱི་དབྱིངས་སོ། །དེ་ལ་ལུང་ནི་གསུང་རབ་ཡན་ལག་དགུའོ། །རྟོགས་པ་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་དང༌། ཉོན་མོངས་པ་དང་ཤེས་བྱའི་སྒྲིབ་པ་སྤངས་པའོ། །ཆོས་ཀྱི་དབྱིངས་ཀྱང་གང་ཡིན་ཞེ་ན། དེ་བཞིན་ཉིད་དང་ཡང་དག་པའི་མཐའ་དང་དོན་དམ་པའོ། །སེམས་དཔའི་མཆོག་ནི་སངས་རྒྱས་དང་བྱང་ཆུབ་སེམས་དཔའ་རྣམས་
སོ། །དེ་རྣམས་ཀྱི་དམ་པའི་ཆོས་མ་ལུས་པའོ། །དམ་པ་ནི་སངས་རྒྱས་དང་བྱང་ཆུབ་སེམས་དཔའ་དང༌། ཉན་ཐོས་དང་རང་སངས་རྒྱས་རྣམས་ཏེ། དེ་རྣམས་ཀྱི་ཕུན་སུམ་ཚོགས་པ་གང་ཡིན་པ་དེའི་གནས་ནི་རྒྱུའོ། །བསམ་གྱིས་མི་ཁྱབ་པ་ནི་རྟོག་པའི་ཡུལ་ལས་འདས་པའི་ཕྱིར་རོ། །དེ་ནི་ཕུན་སུམ་ཚོགས་བའི་གནས་ཀྱང་ཡིན་ལ། བསམ་གྱིས་མི་ཁྱབ་པ་ཡང་ཡིན་པས་ན། ཕུན་སུམ་ཚོགས་གནས་བསམ་ཡས་ཞེས་བྱ་སྟེ། དེ་གང་ཡིན་ཞེ་ན་ཆོས་ཀྱི་དབྱིངས་སོ། །ཇི་ལྟར་ན་འདི་ཕུན་སུམ་ཚོགས་པ་དེའི་རྒྱུ་ཡིན་ཞེ་ན། ཆོས་ཀྱི་དབྱིངས་ལ་དམིགས་པ་ཉིད་ཀྱི་ལམ་གྱིས་དེ་རྣམས་རྟོགས་པར་འགྱུར་བའི་ཕྱིར་རོ། །དེ་བས་ན་ཆོས་ཐམས་ཅད་ཀྱི་རྒྱུ་ཡིན་པས་ཆོས་ཀྱི་དབྱིངས་ཞེས་བཤད་དེ། དབྱིངས་ཀྱི་སྒྲ་ནི་རྒྱུའི་རྣམ་གྲངས་ཡིན་པའི་ཕྱིར་ཆོས་ཀྱི་དབྱིངས་ཏེ། དེ་ཡང་སྟོང་པ་ཉིད་ཡིན་ལ། གང་གིས་སྟོང་པ་ཉིད་ཡིན་ཞེ་ན། བདག་དང་བདག་གི་དང༌། གཟུང་བ་དང་འཛིན་བས་སོ། །སུའི་སྟོང་པ་ཉིད་ཡིན་ཞེ་ན། རྣམ་པར་ཤེས་པའི་ཚོགས་ཅན་གྱི་དངོས་པོ་ཐམས་ཅད་ཀྱི་ཞེས་བྱ་བའི་དོན་ཏོ། །ཆོས་ཀྱི་དབྱིངས་དེ་ཡང་དབྱེ་བ་མཐའ་ཡས་པས་ཕན་ཚུན་ཕྱེ་བའི་ཆོས་ཐམས་ཅད་རོ་གཅིག་པ་ཡིན་ཏེ། འདི་ལྟ་སྟེ་སྟོང་པ་ཉིད་དུ་རོ་གཅིག་པའོ། །དེ་ཉིད་ཀྱིས་ན་དེ་ལྟ་བུར་ལྟ་བའི་འཇིག་རྟེན་ལས་འདས་པའི་ཡེ་ཤེས་རྣམ་པར་མི་རྟོག་པའི་སྤྱོད་ཡུལ་ཡིན་གྱི་འཇིག་རྟེན་པའི་ནི་མ་ཡིན་ནོ། །འཇིག་རྟེན་པ་རྣམས་དང་བྱིས་པའི་བྱང་ཆུབ་སེམས་དཔའ་རྣམས་ཀྱི་རྣམ་པར་ཤེས་པ་ནི་མོས་པ་ཙམ་ཡིན་གྱི་མངོན་སུམ་དུ་མཐོང་བ་མ་ཡིན་ནོ། །དེ་ལྟར་ན་དེ་ཁོ་ན་ཉིད་ལ་ཕ་རོལ་ཏུ་ཕྱིན་པའི་ཚུལ་དང་ཁྱད་པར་ཅི་ཞིག་ཡོད་ཅེ་ན། ཆོས་ཉིད་ཀྱི་སྐུ་ལ་ནི་ཁྱད་པར་མེད་ཀྱི་ཆོས་ཀྱི་སྐུ་ལ་ནི་མང་དུ་ཡོད་དེ། དེ་ཡང་ཁྱད་པར་ཅན་གྱི་སྔགས་དང༌། མཚན་མ་དང༌། ལུས་དང༌། རྣལ་འབྱོར་དང་ཡོངས་སུ་གཡོ་བ་དང༌། དགའ་བའི་ཚུལ་རྣམས་ཡིན་ནོ། །ཚོགས་ནི་བྱང་ཆུབ་སེམས་དཔའི་དགེ་འདུན་ནོ། །ཡང་དག་པར་རྫོགས་པའི་བྱང་ཆུབ་ལས་ལོག་པ་ནི་སླར་ལྡོག་པ་སྟེ། ཉན་ཐོས་ཀྱི་བྱང་ཆུབ་ཏུ་ལྟུང་བའོ། །དེ་མེད་པས་ན་མི་ལྡོག་པ་སྟེ། དེ་ཉིད་ཀྱིས་ན་
དབུགས་འབྱིན་ཐོབ་གྱུར་པ་ཞེས་བྱའོ། །དེ་ཡང་རྣམ་པ་གཉིས་ཏེ། རྒྱུ་མཐུན་ལ་སོགས་པའི་འབྲས་བུ་འཐོབ་པ་དང༌། གསང་བའི་དབང་བསྐུར་བ་ཐོབ་པ་སྟེ། གཉི་ག་ཡང་མི་ལྡོག་བ་ཉིད་ཐོབ་པ་ཡིན་ནོ། །འདིར་མི་ལྡོག་པ་སྨོས་པ་ནི་ཉན་ཐོས་ལ་སོགས་པ་དགར་བ་ཡིན་ནོ། །ཕ་རོལ་ཏུ་ཕྱིན་པའི་སྒོ་ལ་སྤྱོད་པའི་བྱང་ཆུབ་སེམས་དཔའ་རྣམས་ནི། རྒྱུ་མཐུན་པ་ལ་སོགས་པ་སྨོས་པས་བསྡུའོ། །དེ་ཡང་བྱང་ཆུབ་སེམས་དཔའ་རྣམས་ཀྱི་སྔོན་གྱི་སྐྱེ་བ་སྔ་མ་རྣམས་སུ་དགེ་བ་རྣམས་ལ་གོམས་པར་བསླབས་པས་ཚེ་འདིར་དེའི་སྣོད་དུ་གྱུར་པ་གང་ཡིན་པ་དེ་ནི་དེ་རྣམས་ཀྱི་རྣམ་པར་སྨིན་པའི་འབྲས་བུའོ། །དེ་རྣམས་ཀྱི་འདིར་བྱས་པ་སྟོབས་ཅན་དུ་གྱུར་པ་གང་ཡིན་པ་དེ་ནི་བདག་པོའི་འབྲས་བུའོ། །དེ་རྣམས་ཉིད་ལ་ལྷག་པར་སྲེད་པ་གང་ཡིན་པ་དེ་ནི་རྒྱུ་མཐུན་པའི་འབྲས་བུའོ། །འདིར་བསླབ་པ་རྣམས་མངོན་པར་འཕེལ་བར་གྱུར་པ་གང་ཡིན་པ་དེ་ནི་སྐྱེས་བུ་བྱེད་པའི་འབྲས་བུའོ། །དེའི་སྒྲིབ་པའི་དྲི་མ་རྣམས་དང་བྲལ་བའི་འབྲས་བུའོ། །དེ་ཡང་དབུས་དང་མཐའ་རྣམ་པར་འབྱེད་པ་ལས། སྣོད་གྱུར་རྣམ་པར་སྨིན་བརྗོད་དང༌། དེ་ཡི་དབང་གིས་སྟོབས་དང་ནི། །འདོད་དང་འཕེལ་དང་རྣམ་དག་སྟེ། །འབྲས་བུ་དེ་དག་གོ་རིམས་བཞིན། །ཞེས་ཇི་སྐད་བཤད་པ་ལྟ་བུའོ། །འདི་ནི་བདག་པོའི་འབྲས་བུ་མ་གཏོགས་པ་འབྲས་བུ་བཞི་པོ་ནི་རིགས་མཐུན་པའི་འབྲས་བུ་བགྲང་བའི་ལོངས་སྤྱོད་ཆེན་པོ་ཉིད་ལ་སོགས་པ་ནི་མ་ཡིན་ནོ། །ལམ་ལ་གནས་པ་བསྟན་པའི་ཕྱིར་ཐུབ་དབང་ཞེས་བྱ་བ་སྨོས་ཏེ། ཐུབ་པའི་དབང་པོའི་སྲས་ནི་བྱང་ཆུབ་སེམས་དཔའ་རྣམས་ཏེ། དེ་རྣམས་ཀྱི་ལམ་ལ་གནས་པར་བགྱིའོ་ཞེས་པའོ། །ད་ནི་ཞེས་བྱ་བ་ནི་སྐྱབས་སུ་སོང་བའི་རྗེས་ཐོགས་ལའོ། །ལམ་ཇི་ལྟ་བུ་ཞེ་ན། སྤྱོད་པ་ཐོག་མཐའ་མེད་རྟོགས་བྱེད། ཅེས་བྱ་བ་སྟེ། བྱང་ཆུབ་སེམས་དཔའ་རྣམས་ཀྱི་བདག་དང་གཞན་གྱི་དོན་ཕུན་སུམ་ཚོགས་པའི་ཐབས་ཀྱི་སྤྱོད་པ་གང་ཅི་ཡང་རུང་བ་ལ་ལྷག་པར་སྤྱོད་པ་ནི་སྤྱོད་པ་སྟེ། མདོར་ན་ཕ་རོལ་ཏུ་ཕྱིན་པ་བཅུ་འམ། དྲུག་གམ། ཚོགས་གཉིས་སོ། །ཐོག་མ་ནི་གདོད་མའོ། །ཐ་མ་ནི་ཐ་མའོ། །དེ་དང་བྲལ་བས་ན་ཐོག་མཐའ་མེད་
པ་སྟེ། འཁོར་བ་ཐོག་མ་དང་ཐ་མ་མེད་པའོ། །དེ་རྟོགས་པར་བྱེད་པ་ནི་ཁོང་དུ་ཆུད་པ་སྟེ། ལམ་གང་འཁོར་བ་ཡོངས་སུ་ཤེས་པ་ཉིད་ཀྱིས་བྱང་ཆུབ་ཀྱི་སྤྱོད་པ་ཡོངས་སུ་རྫོགས་པ་དེ་ནི། སྤྱོད་པ་ཐོག་མཐའ་མེད་རྟོགས་བྱེད། །ཅེས་བྱའོ། །གལ་ཏེ་དེ་ལམ་ཡིན་ན་ལམ་གྱི་བྱ་བ་ནི་འཆི་ངོ་བ་ལས་གྲོལ་བར་བྱེད་པ་ཡིན་པས་འཆིང་བ་དང་ཐར་པ་ཅི་ཞིག་ཡིན་ཞེ་ན། ཆོས་ཐམས་ཅད་ལ་དེ་ཁོ་ན་ཉིད་མ་བསྟན་པ་དང༌། དེ་ཁོ་ན་ཉིད་མ་ཡིན་པ་བསྟན་པ་དེ་ནི་འཆིང་བ་ཡིན་ལ། ཆོས་ཐམས་ཅད་ལ་དེ་ཁོ་ན་ཉིད་མ་བསྟན་པ་དང༌། དེ་ཁོ་ན་ཉིད་མ་ཡིན་པ་བསྟན་པ་གཉིས་ལས་གོ་བཟློག་པའི་མཚན་ཉིད་ཙམ་ཟག་པ་དང་བཅས་པའི་སེམས་ཀྱི་རྒྱུད་ཀྱི་མཚན་ཉིད་གནས་ཡོངས་སུ་གྱུར་པ་གང་ཡིན་པ་དེ་ནི་བྱང་ཆུབ་སེམས་དཔའི་ཐར་པ་ཡིན་ཏེ། སྒྲིབ་པ་ཐམས་ཅད་སྤངས་པས་ཅི་དགར་སྤྱོད་པ་ཉིད་ཐོབ་པའི་ཕྱིར་རོ། །དེ་ལས་གཞན་པ་དག་ནི་དེ་མ་ཐོབ་པས་བཅིངས་པའི་གནས་སྐབས་ཡིན་ནོ། །དེ་ཡང་བཅིངས་པ་ནི་ཤིན་ཏུ་ཕྱིན་ཅི་ལོག་ཏུ་གྱུར་པའོ། །དེ་ཡང་ཐེག་པ་བསྡུས་པ་ལས། བྱིས་པ་རྣམས་ལ་ཡང་དག་བསྒྲིབས། །ཡང་དག་མ་ཡིན་ཀུན་དུ་སྣང༌། །དེ་བསལ་ཡང་དག་ཐམས་ཅད་དུ། །བྱང་ཆུབ་སེམས་དཔའ་རྣམས་ལ་སྣང་། །དོན་མེད་པ་དང་དོན་ཡོད་པ། །མི་སྣང་སྣང་བར་ཤེས་བྱ་བར། །གནས་ནི་གཞན་དུ་གྱུར་པ་དེ། །འདོད་དགུར་རྒྱུ་ཕྱིར་ཐར་པ་ཡིན། །འཁོར་བ་དང་ནི་མྱ་ངན་འདས། །མཚུངས་པར་ཤེས་པ་རྣམས་སྐྱེ་བ། །དེ་ཚེ་དེ་ཕྱིར་དེ་ལ་ནི། །འཁོར་ཉིད་མྱ་ངན་འདས་པར་འགྱུར། །དོར་བ་མ་ཡིན་མི་དོར་མིན། །འཁོར་ཉིད་མྱ་ངན་འདས་ཡིན་པས། །ཐོབ་པ་མ་ཡིན་མ་ཐོབ་མིན། །མྱ་ངན་འདས་པར་འགྱུར་བས་ན། །ཞེས་ཇི་སྐད་བསྟན་པ་ལྟ་བུ་དང༌། །རིགས་པ་དྲུག་ཅུ་པ་ལས་ཀྱང༌། །འཁོར་བ་དང་ནི་མྱ་ངན་འདས། །འདི་གཉིས་ཡོད་པ་མ་ཡིན་ཏེ། །འཁོར་བ་ཡོངས་སུ་ཤེས་པ་ནི། །མྱ་ངན་འདས་ཞེས་བརྗོད་པ་ཡིན། །ཞེས་བཤད་དེ། ཚིག་ལེའུར་བྱས་པ་འདི་དག་གིས་ནི་སྲིད་པ་ཡོངས་སུ་ཤེས་པའི་མཚན་ཉིད་ནི། སངས་རྒྱས་ཀྱི་ཡོངས་སུ་མྱ་ངན་ལས་འདས་པ་ཡིན་པར་བཤད་པས་དེ་ཕུང་པོ་བཞི་འགོག་པའི་
མཚན་ཉིད་ཅན་ཡིན་པར་གཞན་དག་འདོད་པའི་གཞུང་བཀག་པ་ཡིན་ནོ། །ཇི་ལྟར་གནས་པར་བྱ་ཞེ་ན། །ཀུན་སངས་རྒྱས་བདག་བློ་མཆོག་གིས། །ཞེས་བྱ་བ་སྨོས་ཏེ། དངོས་པོ་ཐམས་ཅད་ལ་སངས་རྒྱས་ཀྱི་བདག་ཉིད་ཡིན་པའི་བློ་མཆོག་སྟེ། དེ་ཁོ་ན་ཉིད་ཀྱི་བློས་དེ་ཁོ་ན་ཉིད་དུ་འདི་རྣམས་ནི་བདག་ཉིད་ཡིན་ལ། ཆོས་འདི་དག་ཐམས་ཅད་ཀྱང་སངས་རྒྱས་ཡིན་ནོ་ཞེས་ཤེས་པའི་ཕྱིར་རོ། །ཇི་ལྟར་བདག་ཉིད་ཡིན་ཞེ་ན། སེམས་ལས་ལོགས་ན་ཕྱིའི་དོན་མེད་པའི་ཕྱིར་སེམས་ཅན་རྣམས་ནི་སེམས་ཀྱི་རྒྱུན་གྱི་མཚན་ཉིད་ཅན་ཡིན་ལ་སེམས་ཀྱི་རྒྱུན་ནི་ཆོས་ཀྱི་སྐུས་ཐ་མི་དད་པ་ཡིན་ནོ། །ཇི་ལྟར་ན་འདི་དག་སངས་རྒྱས་ཡིན་ཞེ་ན། སངས་རྒྱས་རྣམས་ཀྱི་སངས་རྒྱས་ཀྱི་ཆོས་ཀྱི་རང་བཞིན་ཡིན་པའི་ཕྱིར་དང༌། དེ་ཡང་སངས་རྒྱས་ཀྱི་ཆོས་ནི་སེམས་ཡོངས་སུ་དག་པའི་མཚན་ཉིད་ཅན་ཡིན་པའི་ཕྱིར་དང༌། སེམས་ཅན་ཐམས་ཅད་ནི་ཆོས་ཉིད་ཀྱི་སྐུས་རང་བཞིན་གྱིས་ཡོངས་སུ་དག་པ་ཡིན་པའི་ཕྱིར་རོ། །དེ་ཡང་ཆོས་ཉིད་ཀྱི་སྐུ་ནི་བྱང་ཆུབ་སེམས་དཔའི་ལམ་ལ་ཆོས་ཀྱི་དབྱིངས་གཙོ་བོ་ཡིན་ལ། ཆོས་ཀྱི་དབྱིངས་ནི་གང་དུ་ཡང་དབྱེ་བ་ཡོད་པ་མ་ཡིན་ཏེ། སྟོང་པ་ཉིད་དུ་རོ་གཅིག་པ་ཉིད་དོ་ཞེས་བཤད་པ་ཡིན་པས། ཀུན་སངས་རྒྱས་བདག་བློ་མཆོག་གིས། །ཞེས་བྱ་བ་གང་ཡིན་པ་འདི་ཁྱད་བར་ཅན་གྱི་སྔགས་དང་ཕྱག་རྒྱའི་རྣམ་པས་དགའ་བ་མེད་པར་ཡང་འགྱུར་ཞིང་བདེ་བ་ཆེན་པོ་དང་མཐུ་ཆེན་པོ་ཉིད་ཡིན་ནོ་ཞེས་བྱ་བ་ནི་རྒྱུད་ཀྱི་དོན་ཡིན་ནོ། །དེ་ཉིད་ཀྱི་ཕྱིར་སྨྲས་པ་ནི། དེ་བས་ཞེས་བྱ་བ་ཡིན་ཏེ། འོག་ནས་བཤད་པའི་ལྷ་རྣམས་ཀྱི་འཁོར་ལོ་ལ་སོགས་པའི་རིམ་པས་ཞེས་བྱ་བའི་དོན་ཏོ། །འདིར་ཡང་ལམ་འདི་ལ་སྤྱོད་པ་ཞེས་བྱ་བ་སྨོས་པས་ཡོངས་སུ་རྫོགས་པ་ཉིད་དུ་སྟོན་ཏོ། །ཐོག་མཐའ་མེད་ཅེས་པ་སྨོས་པ་ནི་མདོར་བསྡུས་པ་ཉིད་དུ་སྟོན་ཏོ། །ཀུན་སངས་རྒྱས་བདག་བློ་མཆོག་གིས། །ཞེས་པ་འདིས་ནི་རང་བཞིན་སྟོན་ཏོ། །དེ་ཡང་དེ་ཁོ་ན་ཉིད་དུ་ན་བདག་ཉིད་ཀྱི་དངོས་པོ་ཤིན་ཏུ་རྣམ་པར་དག་པའི་ས་དང་ཕ་རོལ་ཏུ་ཕྱིན་པའི་རང་བཞིན་ཅན་དུ་བསྒོམས་པ་དེའི་སྟོབས་ཀྱིས་སངས་རྒྱས་ཐམས་ཅད་ཀྱི་ཕ་རོལ་ཏུ་
ཕྱིན་པ་ལ་སོགས་པས་བདག་ཉིད་ཀྱི་ཕ་རོལ་ཏུ་ཕྱིན་པ་ལ་སོགས་པ་སེམས་ཀྱི་སྐད་ཅིག་མ་ཐམས་ཅད་ལས་ཡོངས་སུ་རྫོགས་པར་བྱེད་པ་དང༌། བདག་དང་གཞན་ལ་མཆོད་པས་ཀྱང་སངས་རྒྱས་ཐམས་ཅད་ལ་མཆོད་པར་འགྱུར་བ་དང༌། དངོས་པོ་དམན་པ་རྣམས་ཀྱིས་ཀྱང་ཕུལ་དུ་བྱུང་བའི་མཆོད་པ་བྱེད་པས་བྱང་ཆུབ་རྙེད་པར་སླ་བ་ཡིན་པས། འདི་ནི་བྱང་ཆུབ་ཀྱི་ལམ་གྱི་རང་བཞིན་དུ་གྱུར་པ་ཡིན་ནོ། །དེ་བས་ཞེས་བྱ་བ་འདིས་ནི་ཤིན་ཏུ་མྱུར་བ་ཁོ་ནར་བྱང་ཆུབ་འཐོབ་པར་བྱེད་པའི་ཁྱད་པར་བསྟན་པ་ཡིན་ཏེ། རྣལ་འབྱོར་དག་ནི་འདི་ཉིད་ཀྱིས། །མྱུར་དུ་སངས་རྒྱས་ཉིད་འཐོབ་འགྱུར། །ཞེས་ཇི་སྐད་བཤད་པ་ལྟ་བུའོ། །བྱ་བ་ལ་མངོན་པར་འདོད་པ་ནི་འདུན་པའོ། །འདུན་པ་དང་བཅས་པའི་སེམས་ནི་སྨོན་ལམ་སྟེ། ཀྱེ་མ་ངས་ནི་འདི་ལྟར་བྱའོ། །ཀྱེ་མ་ང་ནི་འདི་ལྟར་གྱུར་ཅིག་ཅེས་བྱའོ། །དེ་ལྟ་ཡིན་པས་གང་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ཟད་པར་བྱ་བའི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་མངོན་པར་འདོད་པའི་ཡིད་ཀྱི་ལས་གང་ཡིན་པ་དེ་ནི་བྱང་ཆུབ་ཏུ་སྨོན་པའོ། །དེ་ནི་སེམས་བསྐྱེད་པ་སྟེ་དེ་ཉིད་ནི་བྱང་ཆུབ་ཀྱི་སེམས་སོ། །དེ་ཉིད་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དང༌། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཆོས་རྣམས་ཀྱི་ས་བོན་དུ་གྱུར་པ་ཡང་ཡིན་ནོ། །སེམས་དེ་ནི་འདི་ལྟར་བསྐྱེད་པར་བྱ་སྟེ། ཀྱེ་མའོ་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་ཟད་པར་བྱ་བའི་ཕྱིར་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་པར་བྱའོ་སྙམ་པའོ། །དེ་ཉིད་རྣམ་པ་གཞན་དག་གིས་བསྟན་པའི་ཕྱིར་སྒྲིབ་པ་ཐམས་ཅད་ཅེས་བྱ་བ་སྨོས་ཏེ། བྱང་ཆུབ་ཏུ་སེམས་བསྐྱེད་དོ་ཞེས་བྱ་བར་སྦྱར་ཏེ། བླ་ན་མེད་པའི་བྱང་ཆུབ་ཐོབ་པར་འདུན་པར་ཡིད་གཞོལ་བར་བྱའོ་ཞེས་བྱ་བའི་དོན་ཏོ། །ཅིའི་ཕྱིར་སྨོན་པར་བྱེད་ཅེ་ན། འཁྲུལ་པ་ཞེས་བྱ་བ་སྟེ། འཁྲུལ་ཅིང་ནོར་པར་གྱུར་པའི་སེམས་ཅན་ཐམས་ཅད་ཀྱི་ལྟ་བ་རབ་ཏུ་རྟོགས་པར་བྱ་བའི་ཕྱིར་ཏེ། དེ་ཁོ་ན་ཉིད་ཀྱི་ཡེ་ཤེས་རྫོགས་པར་བྱ་བའི་དོན་དུའོ། །ཡང་འཁྲུལ་པའི་ལྟ་བ་ཅན་གྱི་སེམས་ཅན་ཐམས་
ཅད་རབ་ཏུ་རྟོགས་པར་བྱ་བའི་ཕྱིར་རོ། །གཉིས་ཀས་ཀྱང་དེ་ཁོ་ན་ཉིད་ཤེས་པར་གྱུར་ན་ཐར་པ་ཐོབ་པ་དང༌། སྡུག་བསྔལ་ཐམས་ཅད་ཟད་པའི་རྒྱུར་འགྱུར་རོ་ཞེས་བྱ་བའི་དོན་ཏོ། །ཇི་ལྟར་ན་རྣམ་པ་ཐམས་ཅད་དུ་དེ་ལྟར་འགྱུར་བར་སྨོན་ཅེ་ན། བདག་ཉིད་ཀྱི་རྣམ་པ་ཀུན་གྱིས་སེམས་བསྐྱེད་པར་བྱའོ་ཞེས་བྱ་བའི་ཐ་ཚིག་གོ །ཡང་ཇི་ལྟ་བུ་ཞེ་ན། དེ་ལ་ཤིན་ཏུ་བསླབས་པར་གྱུར་པས་རྣམ་པར་དག་པའི་མཐར་ཐུག་པ་ཐོབ་པ་ན་ཉོན་མོངས་པ་དང༌། ཤེས་བྱའི་སྒྲིབ་པ་ཐམས་ཅད་ཡང་དག་པར་སེལ་བར་བྱེད་པ་དང༌། ཡེ་ཤེས་ཀྱི་བདུད་རྩི་མཐའ་ཡས་པའི་གནས་དང་གཞིར་གྱུར་པ་ཡིན་ནོ། །དེ་ལ་ཡེ་ཤེས་ནི་མེ་ལོང་ལྟ་བུའི་ཡེ་ཤེས་ལ་སོགས་པའོ། །དེ་ཡང་མཐའ་ཡས་བ་སྟེ། དབྱེ་བ་མཐའ་ཡས་པ་ཉིད་དང༌། ཡུལ་མཐའ་ཡས་པ་ཉིད་དམ་མི་ཟད་པ་ཉིད་ཡིན་པའི་ཕྱིར་རོ། །དེ་ནི་བདུད་རྩི་ཡང་ཡིན་ཏེ། བདུད་རྩི་དང་ཆོས་མཐུན་པའི་ཕྱིར་རོ། །ཆོས་མཐུན་པ་དེ་ཡང་ལྷན་ཅིག་སྐྱེས་པ་དང༌། ཁ་ན་མ་ཐོ་བ་མེད་པ་དང༌། མཆོག་ཏུ་མི་ཟད་པའི་བདེ་བ་ལ་རབ་ཏུ་སྦྱོར་བ་ཉིད་ཀྱིས་ཚིམ་པར་བྱེད་པའི་ཕྱིར་རོ། །བྱང་ཆུབ་ཀྱི་སེམས་ནི་རྣམ་པ་གཉིས་ཏེ་བརྡར་བཏགས་པ་དང་དོན་དམ་པའོ། །དེ་ལ་བརྡར་བཏགས་པ་ནི་སྔར་བཤད་པ་ཉིད་དོ། །དོན་དམ་པ་བཤད་པར་བྱ་སྟེ། དེ་ལ་བྱང་ཆུབ་ནི་སྨོན་ལམ་གྱི་ཤུག་ས་ལས་བྱུང་བ་སྤྲོས་པ་མེད་པ་རྣམ་པར་མི་རྟོག་པའི་ཡེ་ཤེས་སོ། །དེ་ཡང་ཆོས་ཐམས་ཅད་བདག་མེད་པ་ལ་དམིགས་པ་སྟེ། ཆོས་རྣམས་ཀྱི་བརྗོད་དུ་མེད་པ་དང༌། གཟུང་བ་དང་འཛིན་པས་སྟོང་པ་གང་ཡིན་པ་དེ་མངོན་སུམ་དུ་བྱེད་པའི་ཕྱིར་རོ། །མཚན་མ་མེད་པ་ཡང་ཡིན་ཏེ་སྤྲོས་པའི་མཚན་མ་ཐམས་ཅད་ཀྱི་ཉེ་བར་འཛིན་པ་དང་བྲལ་བའི་ཕྱིར་རོ། །དེ་ཡང་ཐེག་པ་ཆེན་པོ་བསྡུས་པ་ལས། བྱང་ཆུབ་སེམས་དཔའ་རྣམས་ཀྱིས་ཤེས། །རྣམ་རྟོག་མེད་པའི་དམིགས་པ་ནི། །ཆོས་རྣམས་བརྗོད་དུ་མེད་པ་ཉིད། །བདག་མེད་དེ་བཞིན་ཉིད་ཀྱང་དེ། །བྱང་ཆུབ་སེམས་དཔའ་རྣམས་ཀྱིས་ཤེས། །རྣམ་པར་མི་རྟོག་རྣམ་པ་ནི། །ཤེས་བྱ་དམིགས་པ་དེ་ཉིད་ལ། །མཚན་མ་མེད་པ་གང་ཡིན་པའོ། །ཞེས་ཇི་སྐད་བཤད་པ་ལྟ་བུའོ། །
བྱང་ཆུབ་ཀྱི་སེམས་འདི་ཡང་ཇི་སྲིད་སྟོང་པ་ཉིད་ལ་ལྷག་པར་མོས་བར་བྱེད་ཀྱི་མངོན་སུམ་དུ་མི་བྱེད་པ་དེ་སྲིད་ཀྱི་བར་དུ་ནི་བརྡར་བཏགས་པ་ཉིད་ཡིན་ལ། ཡང་གང་གི་ཚེ་མངོན་སུམ་དུ་བྱེད་པ་དེའི་ཚེ་ནི་དོན་དམ་པ་ཡིན་པར་ཤེས་པར་བྱའོ། །སློབ་དཔོན་སངས་རྒྱས་ཡེ་ཤེས་ཀྱི་ཞལ་སྔ་ནས་ཀྱིས་ཀྱང༌། །ངོ་བོ་ཉིད་དང་བྲལ་ཕྱིར་སྟོང་པ་སྟེ། །དེ་བཞིན་རྒྱུ་དང་བྲལ་བས་མཚན་མ་མེད། །རྟོག་པ་རྣམས་དང་བྲལ་བས་དངོས་པོ་ནི། །མ་ལུས་སྨོན་པ་ལས་ནི་དེས་གྲོལ་བའོ། །ཞེས་བཤད་པ་ཡིན་ནོ། །དེའི་དགོས་པ་ཡང་འདི་ཡིན་ཏེ། །རྒྱུད་འདི་རྣམ་པར་ཐར་པའི་སྒོ་གསུམ་གྱི་དེ་ཁོ་ན་ཉིད་གསུམ་སྟོན་པ་ནི་ཆོས་ཐམས་ཅད་ཀྱི་བདག་མེད་པའི་ཡེ་ཤེས་ཁྱད་པར་ཅན་ཡིན་ནོ་ཞེས་པ་སྟེ། ལེའུ་གཉིས་པ་ལས། སྐུ་དང་གསུང་དང་ཐུགས་ཀྱི་མཆོག །དེ་བཞིན་གཤེགས་པ་ཀུན་གྱི་གསང༌། །བླ་ན་མེད་པའི་བྱང་ཆུབ་སེམས། །བཅོམ་ལྡན་སྙིང་བོས་བཤད་དུ་གསོལ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་པོས་དེ་བཞིན་གཤེགས་པ་ཐམས་ཅད་ཀྱིས་གསོལ་པ་བཏབ་པར་མཁྱེན་ཅིང༌། བྱང་ཆུབ་སེམས་དཔའ་ཐམས་ཅད་ཀྱི་སེམས་ཀྱི་ཡོངས་སུ་རྟོག་པ་ཡང་ཐུགས་ཀྱིས་མཁྱེན་ནས་བྱང་ཆུབ་སེམས་དཔའ་དེ་དག་ལ་འདི་སྐད་ཅེས་བཀའ་སྩལ་ཏོ། །ཁྱོད་ཀྱི་སེམས་ལུས་ལྟ་བུ་དང༌། ལུས་སེམས་ལྟ་བུ་དང༌། སེམས་ཚིག་ཏུ་བརྗོད་པ་ལྟ་བུར་སྐྱེད་ཅིག་དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་གིས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ནམ་མཁའ་ལྟ་བུར་སྦྱངས་ནས། ཆེད་དུ་བརྗོད་པ་འདིས་ཆེད་དུ་བརྗོད་དོ། །ཨེ་མའོ་ཀུན་དུ་བཟང་པོ་ཡི། སྐུ་དང་གསུང་ཐུགས་རྡོ་རྗེ་ཅན། །སྐྱེ་བ་མེད་པའི་ཚུལ་གྱིས་སུ། །སྐྱེ་བ་འདི་ནི་རབ་ཏུ་བསྒྲགས། །ཞེས་ཇི་སྐད་བཤད་པ་ལྟ་བུ་སྟེ། །བྱང་ཆུབ་ཀྱི་སེམས་བསྐྱེད་པ་འདི་ནི་སེམས་བསྐྱེད་པ་ཀུན་དུ་བཟང་པོ་ཡང་ཡིན་ཏེ། དེ་བས་ན་ཀུན་དུ་བཟང་པོ་སྨོས་པ་དང༌། སྐྱེད་པ་ཡིན་ལ་རང་བཞིན་འདིས་ནི་བཅོམ་ལྡན་འདས་དེ་བཞིན་གཤེགས་པ་ཐམས་ཅད་བསྡུས་པ་ནི་རྡོ་རྗེ་སེམས་
དཔའ་ཡིན་ནོ། །ལེའུ་བཅུ་པ་ལས། རྡོ་རྗེ་གསུམ་པོ་མཁའ་འདྲ་བའི། །བྱང་ཆུབ་འདི་ཡིས་ཐོབ་པར་འགྱུར། །བྱང་ཆུབ་སེམས་ནི་རྒྱལ་རྒྱ་མཚོ། །རྡོ་རྗེ་སེམས་དཔའ་ཚེ་དེས་འཐོབ། །ཅེས་ཇི་སྐད་བཤད་པ་ལྟ་བུའོ། །འདི་དག་ཐམས་ཅད་ལ་དགོངས་ནས། །བྱང་ཆུབ་སེམས་དང་ཞེས་བྱ་བ་ལ་སོགས་པ་སྨོས་པ་ཡིན་ནོ། །རྒྱུ་ལ་མ་ཆགས་པ་ནི་རྒྱུ་མི་དམིགས་སོ། །འབྲས་བུ་ལ་མ་ཆགས་པ་ནི་འབྲས་བུ་མི་དམིགས་པ་སྟེ། །ཆོས་ཐམས་ཅད་གཟུང་བ་དང་འཛིན་པའི་རང་བཞིན་གྱིས་སྟོང་པ་ཉིད་ཡིན་པའི་ཕྱིར་དང༌། སེམས་ཙམ་གྱི་ངོ་བོ་ཉིད་ཡིན་པའི་ཕྱིར། སོ་སོ་རང་གིས་རིག་བའི་བདག་ཉིད་ཅན་ཡིན་ལ། བྱང་ཆུབ་ཀྱི་སེམས་གང་ལ་ཆོས་ཐམས་ཅད་སོ་སོ་རང་གི་རིག་པ་ཉིད་དུ་སྣང་བ་དེ་ནི་སོ་སོ་རང་རིག་ཆོས་ཏེ། དེའི་ངོ་བོ་ཉིད་ཡིན་པའི་ཕྱིར་རོ། །དེ་ལྟར་ན་འབྲས་བུ་དང་རྒྱུ་དང་ངོ་བོ་ཉིད་ཉེ་བར་མི་དམིགས་པ་ནི་རྣམ་པར་ཐར་པའི་སྒོ་གསུམ་ཡིན་ཏེ། དེར་རོ་གཅིག་པ་ནི་བྱང་ཆུབ་ཀྱི་སེམས་སྟོན་པ་ཡིན་ནོ། །ཇི་ལྟར་ན་རྒྱུ་དང་འབྲས་བུ་ཉེ་བར་མི་དམིགས་པ་ཡིན་ཞེ་ན། གང་གིས་ངོ་བོ་ཉིད་ཀྱི་སྟོང་པ་ཡིན་པའི་ངོ་བོ་དེས། དེ་རྣམས་ལ་རྒྱུ་དང་འབྲས་བུ་ཉིད་དུ་ཡོད་པར་མི་རིགས་པའི་ཕྱིར་རོ། །བྱང་ཆུབ་ཀྱི་སེམས་འདི་བསྐྱེད་ནས་སྔགས་ཀྱིས་བརྟན་པར་བྱ་བ་ཡིན་ནོ། །དེ་བས་ན་འདིའི་སྔགས་གསུངས་པ་བསྟན་པའི་ཕྱིར། སྟོང་པའི་ཡེ་ཤེས་བདག་ཅན་བདག །ཅེས་བྱ་བ་སྨོས་པ་ཡིན་ནོ། །སྔགས་དེ་ཉིད་ནི་ཨོཾ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཨོཾ་ཞེས་བྱ་བ་ནི་གླེང་སློང་བའོ། །ཆོས་ཐམས་ཅད་ཀྱི་རང་བཞིན་དང་རྒྱུ་དང་འབྲས་བུ་དང་བྲལ་བ་ནི། ཤཱུནྱ་ཏཱ་སྟེ་སྟོང་པ་ཉིད་དོ། །དེའི་ཡེ་ཤེས་ནི་ཤཱུ་ནྱ་ཏཱ་ཛྙཱ་ན་སྟེ་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པར་རོ་གཅིག་བའི་སེམས་ཞེས་བྱ་བའི་དོན་ཏོ། །དེ་ཉིད་ནི་བཛྲ་སྟེ་མི་མཐུན་པའི་ཕྱོགས་རྣམས་ཀྱིས་མི་ཤིགས་པའི་ཕྱིར་དང༌། དེ་འཇོམས་པའི་ཕྱིར་དང་འཇིག་པ་མེད་པའི་ཕྱིར་རྡོ་རྗེ་ཞེས་བྱའོ། །དེ་ཡང་རྣམ་པར་དག་པའི་མཐར་ཐུག་པར་ཕྱིན་པ་ཡིན་པའི་ཕྱིར་དེ་ཉིད་དང་པོར་སྭ་བྷཱ་བ་སྟེ། རང་ལ་ཡོད་ཅིང་གནས་པའོ། །དེ་ཡང་དེ་
བཞིན་ཉིད་ཀྱི་སྐུས་རང་བཞིན་གྱིས་རྣམ་པར་དག་པའི་སེམས་ནི་གློ་བུར་བའི་སྒྲིབ་པ་དང་བྲལ་བའི་རང་བཞིན་དུ་གནས་པ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་རང་བཞིན་གྱིས་རྣམ་པར་དག་པ་ཉིད་ཡིན་པས་བདེན་པའི་བདག་ཉིད་ཀྱི་རང་གི་ངོ་བོ་ནི་ཨཱཏྨ་ཀོ་སྟེ། དེ་ལྟ་བུ་གང་ཡིན་པ་དེ་ནི་བདག་ཡིན་པས་ཨ་ཧཾ་སྟེ། དེ་ནི་སྟོང་པ་ཉིད་ཀྱི་ཡེ་ཤེས་ཀྱི་རྡོ་རྗེའི་རང་བཞིན་གྱི་བདག་ཉིད་ཅན་ནི་བདག་གོ །དེའི་ཕྱིར་བྱང་ཆུབ་ཀྱི་སེམས་འདི་སྟོང་པ་ཉིད་ཀྱི་ཡེ་ཤེས་ཀྱི་སྒྲས་རང་གི་མཚན་ཉིད་ལ་ལྷག་པར་མོས་པ་ཡིན་ལ་རྡོ་རྗེའི་སྒྲས་ནི་རང་གི་མཐར་ཐུག་པའི་རྣམ་པར་དག་པའོ། །རང་བཞིན་གྱི་སྒྲས་ནི་མཐར་ཐུག་པའི་རྣམ་པར་དག་པའི་དུས་སུ་ཡང་ལྷག་པ་མེད་པར་རོ། །བདག་ཉིད་ཅན་དང་བདག་གི་སྒྲ་གཉིས་ཀྱིས་ནི་དེ་བདག་ཉིད་ལ་རང་བཞིན་གྱིས་གྲུབ་པ་ཉིད་ཡིན་པ་ཉིད་དུ་ལྷག་པར་མོས་པ་སྟེ། ཇི་ལྟར་ཆོས་ཀྱི་དབྱིངས་ཐོག་མ་དང་ཐ་མ་མེད་པ་ཡིན་པ་ལྟར་བྱང་ཆུབ་ཀྱི་སེམས་ཀྱང་དེ་དང་འདྲ་སྟེ། དེ་ཁོ་ན་ཉིད་ལ་དམིགས་པ་ཉིད་ཀྱིས་དེ་གཙོ་ཆེར་དེ་བཞིན་ཉིད་ཀྱི་རང་བཞིན་ཅན་ཡིན་པའི་ཕྱིར་རོ། །བྱིན་གྱིས་བརླབ་པའི་སྔགས་གཞན་དག་ལ་ཡང་བཛྲ་སྭ་བྷཱ་བ་ཨཱཏྨ་ཀོ྅ཧཾ་ཞེས་བྱ་བའི་སྒྲའི་དོན་ཡང་དེ་བཞིན་དུ་ཤེས་པར་བྱའོ། །བླ་ན་མེད་པའི་བྱང་ཆུབ་དེ་བསྲུང་བར་བྱ་བའི་ཕྱིར་འཁོར་ལོ་བསྒོམ་པར་བྱ་བ་ཡིན་པས་དེ་བསྟན་པ་ནི། ཧཱུཾ་མཛད་ཡང་ན་ཞེས་བྱ་བ་ལ་སོགས་པ་སྨོས་ཏེ། ཧཱུཾ་མཛད་ཅེས་བྱ་བ་ནི་རྡོ་རྗེ་ཧཱུཾ་མཛད་དོ། །གཙུག་ཏོར་ནི་རྒྱལ་བའི་གཙུག་ཏོར་ལ་སོགས་པའོ། །རྣམ་པར་སྣང་མཛད་ལ་སོགས་ཉིད། །ཅེས་བྱ་བ་ནི་འཁོར་ལོས་སྒྱུར་བ་དྲུག་པོ་རྣམས་ལས་གང་ཡང་རུང་བའོ། །ཁྲོ་བོའི་འཁོར་ལོར་གནས་ཞེས་བྱ་བ་ནི་གཤིན་རྗེ་གཤེད་ལ་སོགས་པའི་ཁྲོ་བོ་བཅུ་པོ་རྩིབས་ལ་གནས་པའི་འཁོར་ལོ་རྩིབས་བཅུ་པ་སེར་པོའི་ལྟེ་བ་ལ་མན་ངག་ཇི་ལྟ་བ་བཞིན་དུ་གནས་པའོ། །གནས་རྣམ་པར་དག་པར་བྱ་བའི་ཕྱིར་རང་གི་སྙིང་གར་ཉི་མའི་དཀྱིལ་འཁོར་ལ་ཡི་གེ་ཧཱུཾ་ལས་བྱུང་བའི་རྡོ་རྗེ་སྔོན་པོ་ཁ་གྱེས་པ་བསམས་ལ། དེའི་ལྟེ་བར་ཆུད་པའི་ཧཱུཾ་ལས་རྡོ་རྗེ་ཕྲ་མོ་རྣམས་སྤྲོས་ལ། རྡོ་རྗེ་རྣམས་གཅིག་ཏུ་འདུས་པ་ལས་ཕྱོགས་བཅུར་རྡོ་རྗེའི་ར་བ་
སྟེང་དུ་རྡོ་རྗེའི་དྲ་བ། འོག་ཏུ་རྡོ་རྗེའི་རང་བཞིན་ཅན་གྱི་ས་གཞི་བསམས་ལ། དེའི་དབུས་སུ་ཆོས་འབྱུང་བསྒོམ་པར་བྱ་བ་ཡིན་པས། དེ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་སྨོས་ཏེ། ཆོས་ཀྱི་དབྱིངས་ཞེས་བྱ་བ་ནི་ཆོས་འབྱུང་གི་ཕྱག་རྒྱའི་གཟུགས་ཟུར་གསུམ་པ་སྟེ་གྲུ་གསུམ་དུ་གནས་པའོ། །ཕྱོགས་ཀྱི་འཁོར་ལོ་ནི་ཕྱོགས་ཀྱི་ཚོགས་སོ། །འོད་ནི་འོད་ཟེར་རོ། །མཁའ་ནང་འོག་པད་རྡོ་རྗེ་གནས། །ཞེས་བྱ་བ་ནི་ནམ་མཁའི་ནང་གི་འོག་ལོགས་སུ་སྣ་ཚོགས་པདྨ་ལ་རྡོ་རྗེ་གནས་ཤིང་རྡོ་རྗེ་དང་ལྡན་པའོ། །གནས་ད་ནི་འདི་ཐོབ་པ་ཡིན་ཏེ་ཐོབ་པ་ནི་ལྡན་པའོ། །དེར་ཞེས་བྱ་བ་ནི་ཆོས་འབྱུང་བའི་དབུས་སུ་གཞལ་ཡས་ཁང་རབ་ཏུ་བསམ་པར་བྱའོ་ཞེས་བྱ་བ་སྦྱར་རོ། །ཚིག་ལྷག་མ་རྣམས་ནི་གཞལ་ཡས་ཁང་གི་ཁྱད་པར་སྟོན་པ་ཡིན་ནོ། །དེ་ཡང་ཡི་གེ་བྷྲཱུཾ་ལས་འཁོར་ལོ་དེ་ལས་བྱུང་ཞིང་སྐྱེས་པའི་རིག་པ་ཞེས་བྱ་བ་ལྷ་མོ་དང་རྣམ་པར་སྣང་མཛད་ལས་སངས་རྒྱས་ཀྱི་ཚོགས་སྤྲོས་པས་ནམ་མཁའ་ཁྱབ་པ་ཟུར་བཞི་པ་ཞེས་བྱ་བ་ནི་འོག་ནས་སྒོ་བཞི་པ་ལ་སོགས་པ་དང་ལྡན་པར་བཤད་པས་ཟུར་བཞི་དང་ལྡན་པའོ། །སྣ་ཚོགས་ཞེས་བྱ་བ་སོགས་པ་ལ་ཟླ་བ་བཅུ་གཉིས་དང་ཉི་མ་བདུན་གྱིས་ལེགས་པར་མནན་པའི་སྣ་ཚོགས་པདྨ་བཅུ་དགུ་ཡོད་པའི་ལྷའི་གདན་དེ་གནས་གང་ན་ཡོད་པ་དེ་ཕྱོགས་ཀྱི་ཆ་ཁ་དོག་གི་ཆས་སྤྲས་པས་རྣམ་པར་བརྒྱན་ཞིང་ཕྱེ་བའོ། །རྒྱུའི་རྡོ་རྗེ་སེམས་དཔའ་བསྐྱེད་པའི་རིམ་པ་བསྟན་པའི་ཕྱིར། དབྱངས་ཡིག་ཅེས་བྱ་བ་ལ་སོགས་པ་སྨོས་ཏེ། དེ་ལྟར་དགེ་བའི་ཆོས་ཉེ་བར་བསགས་པའི་སེམས་གང་ཡིན་པ་དེ་ཉིད་དབུས་ན་གནས་པའི་ཟླ་བའི་གདན་ལ་ཡེ་ཤེས་ཟླ་བ་ཞེས་པ། ཡེ་ཤེས་ཀྱི་རང་བཞིན་ཅན་གྱི་ཟླ་བ་རྒྱས་པ་རྣམ་པར་བསྒོམ་མོ། །ཇི་ལྟ་བུ་ཞེ་ན། དབྱངས་ཡིག་མཚན་དང་ཡང་དག་ལྡན། །ཀ་སོགས་དཔེ་བྱད་འོད་ཟེར་ཅན། །ཞེས་པ་སྟེ། དབྱངས་ཀྱི་ཡི་གེ་བཅུ་དྲུག་སྟེ། དེ་ཉིད་ཉིས་འགྱུར་དུ་བྱས་པ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱི་ས་བོན་ཡིན་པས་ན་མཚན་ཞེས་བྱ་ལ། དེ་དང་ཡང་དག་པར་ལྡན་པ་ནི་དེ་ལས་བསྐྱེད་པའོ། །ཀ་ལ་སོགས་པ་ནི་སུམ་
ཅུ་རྩ་བཞི་སྟེ། དེ་རྣམས་ལ་ཌ་ཌྷ་ད་དྷ་ཡ་ལ་ཞེས་བྱ་བ་རྩོལ་བ་ཆུང་ངུར་བརྗོད་པ་དང་བཅས་པ་བཅུག་ནས་བཞི་བཅུར་བྱས་ལ། དེ་ཉིད་ཉིས་འགྱུར་དུ་བྱས་པ་ནི་དཔེ་བྱད་བརྒྱད་ཅུའི་ས་བོན་ཡིན་པའི་ཕྱིར་དཔེ་བྱད་དེ། ཀ་སོགས་དཔེ་བྱད་དོ། །དེ་ཡོངས་སུ་གྱུར་པའི་འོད་ཟེར་གང་ཡིན་པ་དེ་ནི། ཀ་སོགས་དཔེ་བྱད་འོད་ཟེར་ཅན། །ཞེས་བྱའོ། །འདི་ལྟར་དགོངས་ཏེ་ཀུན་དུ་བཟང་པོའི་སྒྲུབ་ཐབས་ལས། བཅུ་དྲུག་ཆ་དང་ཚོགས་ལས་བྱུང་བ་ཡིས། །ཞེས་འབྱུང་བ་འདི་ནི་དབྱངས་ཀྱི་ཡི་གེ་བཅུ་དྲུག་གི་ཆ་དང་ལྡན་པ་ཞེས་བྱ་བའི་དོན་ཏོ། །འོད་ཟེར་དཔག་ཏུ་མེད་པའི་ཚོགས་ལྡན་པ། །དབུས་མའི་གདན་ལ་ཆོ་ག་བཞིན་དུ་བསམ། །ཞེས་བྱ་བ་དེ་ཡང༌། ཀ་སོགས་དཔེ་བྱད་འོད་ཟེར་ཅན་ཞེས་བྱ་བའི་དོན་དོ། །ལ་ལ་ནི་དབྱངས་ཀྱི་ཡི་གེ་དང་གསལ་བྱེད་ཀྱི་ཡི་གེ་གཉིས་འགྱུར་དུ་བྱ་བ་དང༌། གཞུག་པར་བྱ་བ་མི་འདོད་དོ། །གཞན་དག་ནི་དབྱངས་ཀྱི་ཡི་གེ་ལས་ཟླ་བ་གཅིག །གསལ་བྱེད་ལས་གཉིས་པ་བྱེད་པར་འདོད་ལ། དེ་ལས་གཞན་པ་དག་ནི་དེ་གཉིས་གཅིག་ཏུ་གྱུར་པར་འདོད་དོ། །དེར་ཞེས་བྱ་བ་ནི་ཡེ་ཤེས་ཀྱི་ཟླ་བ་ལ་རྡོ་རྗེ་བསྒོམ་པར་བྱའོ། །དེ་ཡང་དང་པོའི་སྙིང་པོ་ཞེས་པ་ནི་དབལ་མཆོག་དང་པོའི་ཡི་གེ་ཧཱུཾ་ལས་བྱུང་བའོ། །སྤྲུལ་པས་འགྲོ་བའི་ངོན་བྱས་ནས། །ཞེས་བྱ་བ་ནི། རྡོ་རྗེ་དེའི་ནང་ན་གནས་པའི་ཡི་གེ་ཧཱུཾ་གི་འོད་ཟེར་ལས་རྒྱལ་བ་ལྟ་བུའི་སྤྲུལ་པ་རྣམས་འབྱུང་བས། འགྲོ་བ་སེམས་ཅན་ཐམས་ཅད་ཀྱི་དོན་བྱང་ཆུབ་ཀྱི་སེམས་བསྐྱེད་པ་ལ་སོགས་པ་ནས། བྱང་ཆུབ་པའི་བར་དུ་བྱེད་པའི་སྔགས་གང་ཡིན་པ་དེ་ལ་དེ་སྐད་ཅེས་བྱའོ། །དེའི་རྗེས་ཐོགས་ལ། བདག་ཉིད་དེ་ཡི་ང་རྒྱལ་ལྡན། །ཞེས་བྱ་བ་དང་ཨོཾ་བཛྲ་ཨཱཏྨ་ཀོ྅ཧཾ་ཞེས་བྱ་བ་དེ་ལྟ་བུའི་ང་རྒྱལ་དང་ལྡན་པར་བྱས་ནས། ཀུན་དུ་བཟང་པོར་བདག་ཉིད་བསྒོམ་པར་བྱའོ་ཞེས་བྱ་བར་སྦྱར་རོ། །ཆིག་ལྷག་མ་ནི་བཅོམ་ལྡན་འདས་ཀྱི་ཁྱད་པར་རོ། །དེ་ཡང་སྐུ་ཐམས་ཅད་ཤེལ་ལྟ་བུའི་མདོག་ཅན་ཞལ་དང་པོ་ཟླ་བ་ལྟར་དཀར་བ། ཞལ་གཡས་པ་སྔོ་བ། ཞལ་ཅིག་ཤོས་ཏེ་གཡོན་པ་དམར་བ། རྣམ་པ་ཀུན་མཆོག་ཅེས་པ་མཚན་དང་དཔེ་བྱད་ལ་སོགས་པ་རྒྱ་ཆེ་བ་དང༌། ཡོན་ཏན་ཞེས་བྱ་
བ་ནི་མངོན་པར་ཤེས་པ་ལ་སོགས་པའོ། །མཆོག་ནི་ཐམས་ཅད་ཀྱི་མཆོག་ཏུ་གྱུར་པའོ། །རྡོ་རྗེ་དང་པདྨ་དམར་པོ་རིན་པོ་ཆེ་ནི་ཆ་དགུ་པ་ལྗང་གུ། དཔལ་དང་ལྡན་པའི་འགྲོ་བའི་ཕུན་སུམ་ཚོགས་པ་གང་ཡིན་པ་དེ་རྣམས་ཀྱི་གནས་ཏེ་རྒྱུར་གྱུར་པའོ། །འོད་ཟེར་གྱི་ཚོགས་ནམ་མཁའ་ཁྱབ་པར་མངའ་བ་གང་ཡིན་པ་འདི་དག་ནི་ཤིན་ཏུ་རྣམ་པར་དག་པའི་ཐབས་དང་ཤེས་རབ་སྟེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡབ་དང་ཡུམ་དུ་གྱུར་པ་ཡིན་ལ། དེའི་རྒྱུ་མཐུན་པ་ལས་བྱུང་བ་ཀུན་དུ་བཟང་པོ་ཞེས་བྱ་བ་དང༌། རྡོ་རྗེ་འཆད་པ་ཞེས་བྱ་བར་བཤད་པ་ཐུན་མོང་དུ་གྱུར་པ་ཐོབ་པའོ། །དེ་ཡང་དཔལ་མཆོག་དང་པོ་ལ་སོགས་པ་ལས། ཡུམ་ནི་ཤེས་རབ་ཕ་རོལ་ཕྱིན། །ཡབ་ནི་ཐབས་ལ་མཁས་པ་ཉིད། །གདུལ་དོན་རྡོ་རྗེ་སེམས་དཔའ་དང༌། །རིགས་ཀྱང་འབྱུང་བར་གྱུར་པ་ཡིན། །ཞེས་ཇི་སྐད་བཤད་པ་ལྟ་བུའོ། །འདི་ཉིད་ལས་ཀྱང༌། དེ་ནས་བརྩམས་ཏེ་སེམས་ཅན་ཐམས་ཅད་ཀུན་དུ་བཟང་པོ་ཀུན་དུ་བཟང་པོ་ཞེས་བྱ་བར་གྱུར་ཏོ་ཞེས་བྱ་བ་ལ་སོགས་པ་གསུངས་པ་དང༌། རྡོ་རྗེ་འཛིན་མཆོག་གང་ཡིན་པའི། །དབུས་སུ་གཟུགས་ནི་ལེགས་བྲིས་པ། །དེ་ཡི་དཀྱིལ་འཁོར་གནས་སུ་འགྱུར། །སྐུ་གསུང་ཐུགས་ཀྱི་གསང་ལས་བྱུང༌། །ཞེས་ཇི་སྐད་གསུངས་པ་ལྟ་བུའོ། །དེ་བས་ན་རྒྱུ་མཐུན་པ་དེ་ལས་མངོན་པར་བྱུང་བའི་དཀྱིལ་འཁོར་གྱི་བདག་པོ་བསྐྱེད་པའི་རིམ་པ་འཆད་པར་འདོད་པས་ཞིང་ཡོངས་སུ་དག་པར་བསྡུས་པ་ཉིད་ཀྱིས་སྣོད་ཀྱི་འཇིག་རྟེན་ཡོངས་སུ་དག་པ་སྔར་བྱས་པ་ཉིད་ཡིན་པའི་ཕྱིར་རྗེས་ཐོགས་ལ་བྱ་བའི་སེམས་ཅན་གྱི་འཇིག་རྟེན་ཡོངས་སུ་དག་པར་བཤད་པ་ནི། དེ་ནས་འདོད་ཆགས་ཞེས་བྱ་བ་ལ་སོགས་པ་ཡིན་ཏེ། དེ་ནས་ཞེས་བྱ་བ་ནི་དེའི་རྗེས་ཐོགས་ལའོ། །འདོད་ཆགས་ཆེན་པོ་ཞེས་བྱ་བ་ནི་ཐབས་དང་ཤེས་རབ་གཉིས་སུ་མེད་པའི་སྦྱོར་བ་མཆོག་གིས་དོན་དམ་པ་རྣམ་པར་སྤྱོད་པ་ལ་མངོན་པར་དགའ་བའོ། །སྣོད་ཅེས་བྱ་བ་ནི་མངོན་པར་བྱང་ཆུབ་པར་བྱ་བའི་སྣོད་གདུལ་བར་འོས་བའི་འཇིག་རྟེན་རྣམས་སོ། །དགའ་བའི་སྒྲ་ཞེས་པ་ནི་འདོད་ཆགས་ཆེན་པོ་དེ་ཉིད་དེ་དེ་ལས་བྱུང་བའི་སྒྲས་སྤྲོས་པའི་ཚུལ་གྱིས་ཕྱོགས་
བཅུར་ཁྱབ་པས་སོ། །དེ་ནི་ཞེས་བྱ་བ་ནི་རྒྱལ་བའི་ཚོགས་དེ་རྣམས་ཉིད་རིག་པ་རྣམ་པ་བཞི་དང༌། ཡུལ་རྣམ་པ་ལྔའི་ཚུལ་ཏེ་རིག་པ་རྣམ་པ་དགུ་རུ་ཕྱུང་ནས་ལྷ་མོ་དགུ་པོ་དེ་དག་ཉིད་རང་གི་རིག་པའི་ནང་དུ་གཞུག་པར་བྱའོ། །པདྨ་ནི་འདབ་མ་བརྒྱད་པ་དམར་བ་གྲུ་གསུམ་གྱི་ནང་དུ་ཆུད་བའོ། །ལྟེ་བ་ནི་ཟེའུ་འབྲུའོ། །མུ་ཏིག་གི་འབྲས་བུ་རྔུལ་མེད་པ་ལྟ་བུ་སྒོ་ཆད་དང་ཤིན་ཏུ་ལྡན་པའོ། །རབ་ཏུ་དགའ་བ་ལས་བྱུང་བ་ནི་ཡེ་ཤེས་ཀྱི་ཟླ་བ་སྟེ། དེའི་རང་བཞིན་ཅན་གྱི་དཀྱིལ་འཁོར་ཐར་པའི་གྲོང་ཁྱེར་གྱི་རང་བཞིན་ཅན་གྱི་གཞལ་ཡས་ཁང་སྤྲུལ་ནས་འདིར་ཞེས་པ་དཀྱིལ་འཁོར་དེར་རོ། །སངས་རྒྱས་ཉིད་པ་ཤེས་གཉེན་གྱི་མཆོག་ཡིན་ལ། དེ་ནོར་བུའི་ཆའི་ནང་ནས་ཞུ་བའི་ཚུལ་གྱིས་ཕྱུང་ནས་སོ། །མི་ལྡོག་ཕྱིར་ཞེས་པ་ནི་ཕྱིར་མི་ལྡོག་པ་ཉིད་ཀྱི་ཕྱིར་རོ། །དེ་བས་ན་དབང་བསྐུར་བས་དབུགས་འབྱིན་པའི་འགྲོ་བ་མཐོང་ནས་སེམས་ཅན་ཐམས་ཅད་ལ་ས་བོན་གྱིས་དབྱུང་བར་བྱའོ་ཞེས་བྱ་བར་སྦྱར་རོ། །སེམས་ཅན་ཐམས་ཅད་ཅེས་བྱ་བ་ནི་སའི་སྙིང་པོ་ལ་སོགས་པ་ནས་རྣམ་པར་སྣང་མཛད་ལ་སོགས་པའི་མཐར་ཐུག་པའོ། །ཇི་ལྟ་བུ་ཞེ་ན། འགྲོ་བ་སེམས་བདག་དངོས་ལས་བྱུང༌། །ཞེས་བྱ་བ་སྟེ། སེམས་ནི་བྱང་ཆུབ་ཀྱི་སེམས་སོ། །བདག་ནི་རང་གི་ངོ་བའོ། །དངོས་ནི་ཐོབ་པ་སྟེ། འགྲོ་བ་རྣམས་བྱང་ཆུབ་ཀྱི་སེམས་ཀྱིས་དབང་བསྐུར་བ་ནི་བྱང་ཆུབ་ཀྱི་སེམས་ཀྱི་ཚུལ་ཐོབ་པར་གྱུར་པ་སྟེ། འགྲོ་བ་རྣམས་སེམས་ཅན་གྱི་བདག་ཉིད་ཐོབ་པའོ། །དེ་ལས་བྱུང་བ་ནི་དེ་ཡོངས་སུ་གྱུར་པ་ལས་སོ། །ཇི་ལྟ་བུའི་ས་བོན་གྱི་ཞེ་ན། མིག་སོགས་རང་གི་ངོ་བོར་བྱུང༌། །ཞེས་བྱ་བ་སྟེ། དེ་རྣམས་ཀྱི་དེ་ཁོ་ན་ཉིད་ལས་བྱུང་ཞིང་དེ་ཁོ་ན་ཉིད་སྟོན་པར་བྱེད་པ་ལས་ཞེས་བྱ་བའི་དོན་ཏོ། །ཡང་ན་བྱང་ཆུབ་ཀྱི་སེམས་ཀྱི་ངོ་བོ་ལས་བྱུང་བ་སྟེ། དེའི་རྒྱུ་མཐུན་པ་ཞེས་བྱ་བའི་དོན་ཏོ། །ཡང་དག་དབྱུང་ཞེས་པ་ནི་རང་གི་ཕྱོགས་དང་གནས་ལ་སོགས་པར་བློས་གཏང་བར་བྱ་ཞེས་བྱ་བའི་དོན་ཏོ། །སྤྱིར་བཤད་ནས་ཁྱད་པར་སྨྲས་པ་ནི་སའི་སྙིང་པོ་ཞེས་བྱ་བ་ལ་སོགས་པ་དྲུག་ཡིན་ཏེ། ངོ་བོར་བྱུང་ཞེས་བྱ་བ་ནི་མིག་ལ་སོགས་བའི་རང་བཞིན་ནི་རང་གི་ངོ་བོ་སྟེ་རང་བཞིན་ནི་གནས་སྐབས་སོ། །དེ་ཡང་གློ་
བུར་བའི་སྒྲིབ་པ་ཐམས་ཅད་དང་བྲལ་བས་ཞེས་བྱ་བའི་དོན་ཏོ། །དེ་ལས་སྐྱེས་པས་ན་དེ་ལས་བྱུང་བ་ཡིན་ཏེ། དེའི་རང་བཞིན་ཞེས་བྱ་བའི་ཐ་ཚིག་གོ །ཕྱི་ནང་བདག་ཉིད་ངོ་བོར་བྱུང༌། །ཞེས་བྱ་བ་ནི་ལུས་དང་ཅིག་ཤོས་ཀྱི་གཟུགས་ལ་སོགས་པ་དྲུག་པོ་རྣམ་པར་དག་པ་ལས་བྱུང་ཞེས་བྱ་བའི་དོན་ཏོ། །ཕྱི་རོལ་དུ་གནས་པ་ཞེས་བྱ་བ་ནི་མིག་ལ་སོགས་པ་དྲུག་ལས་ཕྱི་རོལ་ཞེས་བྱ་བའི་དོན་ཏོ། །འགྲོ་ཆོས་བདག་ཉིད་དེ་ཉིད་སྐྱེས། །ཞེས་བྱ་བ་ནི་འགྲོ་བ་རྣམས་ཀྱི་ཆོས་ནི་ཤེས་རབ་གང་ཡིན་པའོ། །དེ་རྣམས་ཀྱི་བདག་ཉིད་ནི་རང་བཞིན་ནོ། །དེའི་དེ་ཁོ་ན་ཉིད་ནི་དེ་ཙམ་ཉིད་དེ་དག་པའི་མཐར་ཐུག་པ་ཞེས་བྱ་བའི་ཐ་ཚིག་གོ །དེ་ལས་སྐྱེས་ཞེས་བྱ་བ་ནི་དེའི་རང་བཞིན་ཞེས་བྱ་བའི་དོན་ཏོ། །ཕུང་པོ་རྣམས་ཀྱི་ངོ་བོ་ནི་ཤིན་ཏུ་རྣམ་པར་དག་པའི་དེ་ཁོ་ན་ཉིད་དོ། །ཆོས་རྣམས་ཐམས་ཅད་ཅེས་བྱ་བ་ནི་ཕུང་པོས་ཐམས་ཅད་བསྡུས་པའི་ཕྱིར་རོ། །ཡང་ན་དེ་ལྟར་ཆོས་ཐམས་ཅད་ཡང་དག་པར་དབྱུང་བར་བྱའོ་ཞེས་སྤྱིར་ཉེ་བར་བསྡུ་བ་ཡིན་ནོ།། །།ད་ནི་དཀྱིལ་འཁོར་གྱི་བདག་པོ་བསྐྱེད་པའི་རིམ་པ་བསྟན་པའི་ཕྱིར་ཨོཾ་ཞེས་བྱ་བ་ལ་སོགས་པ་སྨོས་ཏེ། དེ་ནས་ཞེས་བྱ་བ་ནི་སེམས་ཅན་བྱུང་བའི་རྗེས་ཐོགས་ལ་རྣལ་འབྱོར་པས་རང་གི་སེམས་ཡི་གེ་གསུམ་གྱི་རང་བཞིན་ཡི་གེ་ཧོཿདྨར་པོ་གཉིས་དང་སྤེལ་བ་མདུན་གྱི་ནམ་མཁའ་ལ་བསམས་ལ། དྲི་ཟ་ཉེ་བར་འཁོར་གྱི་ཚུལ་དུ་བཅོམ་ལྡན་འདས་ཀྱི་ཞལ་ནས་ཞུགས་ཏེ་ལྷ་མོའི་ཆུ་སྐྱེས་ལ་གནས་པ་རྒྱུ་མཐུན་པ་ཆུང་དུ་དག་པར་བྱ་བའི་ཕྱིར་བསྒོམ་པར་བྱའོ་ཞེས་སྦྱར་རོ། །དེ་ནས་ཀྱང་སྤེལ་བའི་སེམས་དེ་ཤེས་རབ་ཀྱི་འདོད་ཆགས་ཀྱི་མེ་འབར་བས་ཞུ་བར་བསམ་པར་བྱའོ། །དེ་ནས་མར་གྱི་བུམ་པ་བཞུས་པ་ལྟ་བུར་སྐུ་དེ་གཉིས་ཀས་ཡང་ཕྲལ་དུ་ཞུ་བར་བྱས་པས་ན། སྐུ་གཉིས་དག་ནི་ཞུ་བར་བྱས། །ཞེས་བསམ་པར་བྱ་བ་ཡིན་ནོ། །དེ་ནས་བཅོམ་ལྡན་འདས་འདི་དབུས་མའི་ཟླ་བའི་གདན་ལ་སྟོན་ཀའི་ཟླ་བ་ཞུ་བ་ལྟ་བུར་གྱུར་ཅིང་ནམ་མཁའ་དང་མཉམ་པ་ཉིད་དུ་གྱུར་པ་མཆོག་ཏུ་ཞི་བ་སྤྲོས་པ་མེད་པ་རྣམ་པར་མི་རྟོག་པའི་ཏིང་ངེ་འཛིན་ལ་སྙོམས་པར་ཞུགས་པས་གནས་པར་གྱུར་པ་ན། །ཏིང་ངེ་འཛིན་དེ་
ལས་བླང་བར་བྱ་བའི་ཕྱིར་བྱམས་པ་ལ་སོགས་པའི་ངོ་བོར་གྱུར་པའི་དགེ་བའི་བཤེས་གཉེན་དང་འདྲ་བ་མཱ་མ་ཀཱི་ལ་སོགས་པ་བཞིས་གླུས་ཡང་དག་པར་སྐུལ་བར་བྱེད་པར་བསམ་པར་བྱའོ། །བཤེས་གཉེན་གྱི་དམ་པ་ལྟར་སྣང་བས་ན་བཤེས་མཆོག་ལྟར་སྣང་ངོ༌། །མཚམས་རྣམས་དགར་བས་ན་ཕྱོགས་ཀྱི་ལྷ་མོ་རྣམས་ལ་ཕྱོགས་ལྷ་མོ་ཞེས་བྱའོ། །བཤེས་མཆོག་ལྟར་སྣང་བ་ཡང་ཡིན་ལ་ཕྱོགས་ཀྱི་ལྷ་མོ་ཡང་ཡིན་པས་ན་དེ་སྐད་ཅེས་བྱའོ། །ཡང་ན་བཤེས་གཉེན་གྱི་མཆོག་སངས་རྒྱས་རྣམས་སྣང་ཞིང་མངོན་པའི་ཕྱོགས་གང་ཡིན་པ་དེ་རྣམས་སུ་ལྷ་མོ་རྣམས་གནས་པས་ན་དེ་སྐད་ཅེས་བྱའོ། །བསྐུལ་བ་དེ་ཉིད་ཀྱི་ཚིགས་སུ་བཅད་པ་བཞི་ནི། སེམས་ཅན་ཁམས་ན་ཞེས་བྱ་བ་ལ་སོགས་པ་སྨོས་པ་ཡིན་ནོ། །ཐུགས་ལ་སོགས་པའི་རྡོ་རྗེ་རྣམ་པར་དག་པའི་ཐུགས་མཐར་ཐུག་པ་ནི་སྔ་མ་བཞིན་ཏེ། ཀྱེ་རྡོ་རྗེའི་ཐུགས་བདག་ལ་བསྐྱབ་ཏུ་གསོལ་ཞེས་བྱ་བར་སྦྱར་རོ། །སེམས་ཅན་ཁམས་ན་ཞེས་བྱ་བ་ནི་བཅུད་ཀྱི་འཇིག་རྟེན་གྱི་རྒྱུ་དང་རྐྱེན་རྣམས་ཏེ། ཁམས་ཀྱི་དོན་ནི་རྒྱུའི་དོན་ཡིན་ནོ། །གནས་ཀྱི་དབང་ཕྱུག་ཅེས་བྱ་བ་ནི་སྣོད་ཀྱི་འཇིག་རྟེན་གྱི་བདག་པོའི་རྐྱེན་ནོ། །གང་གིས་བསྐྱབ་ཅེ་ན། དགའ་བ་དང་ཡིད་དུ་འོང་བ་དང་། དོན་ཆེ་བ་གང་ཡིན་པ་དེ་ལ་དེ་སྐད་ཅེས་བྱའོ། །དེ་རྣམས་ཀྱང་ཡིན་ལ་འདོད་པ་ཡང་ཡིན་པའི་གཟུགས་རྡོ་རྗེ་ལ་སོགས་པ་ལ་དེ་སྐད་ཅེས་བྱ་སྟེ་བྱམས་པ་ཆེན་པོའོ། །སེམས་ཅན་ཡབ་ཅེས་བྱ་བ་ནི་འཕགས་པའི་གང་ཟག་ཐམས་ཅད་བསྐྱེད་པའི་ཕྱིར་རོ། །བདག་ལ་ཞེས་བྱ་བ་ནི་བྱམས་པ་ཆེན་པོ་ལ་དགྱེས་པར་མཛད་དུ་གསོལ་ཞེས་བྱ་བ་རོལ་བར་མཛོད་ཅིག་ཅེས་བྱ་བའོ། །གཉེན་མཆོག་ཅེས་བྱ་བ་ནི་མཆོག་ཆེན་པོ་སངས་རྒྱས་རྣམས་ཀྱི་གཉེན་རྡོ་རྗེ་སེམས་དཔའོ། །མགོན་པོ་གལ་ཏེ་དེ་རིང་བདག་ནི་གསོན་པར་མཆིས་བཞེད་ན། །ཞེས་པ་ནི་མ་བཞེངས་ན་ནི་སེམས་ཅན་གྱི་དོན་བྱ་བ་མེད་པས་ཁྱད་ཀྱི་བྱམས་པ་བདག་ཉེ་བར་བཅོམ་པར་འགྱུར་རོ་ཞེས་བྱ་བའི་ཐ་ཚིག་གོ །རྡོ་རྗེའི་སྐུ་ཁྱོད་ཅེས་བྱ་བ་ལ་སོགས་པ་ལ་ཀྱེ་རྡོ་རྗེའི་སྐུ་ཁྱོད་ཆགས་པས་བདག་ལ་དགྱེས་པར་མཛད་དུ་གསོལ་ཞེས་བྱ་བར་སྦྱར་ཏེ། འདིར་ཆགས་པ་ནི་སྐྱབས་མེད་པའི་འགྲོ་བ་རྣམས་ལ་མཉེས་
གཤིན་པའོ། །དེ་ཉིད་ནི་འདོད་ཆགས་དམ་ཚིག་སྟེ། ལྷན་ཅིག་སྤྱོད་པའི་ཐུགས་རྗེ་ཆེན་པོ་ཞེས་བྱ་བའི་ཐ་ཚིག་གོ །བཀའ་ཡི་འཁོར་ལོ་སེམས་ཅན་ཀུན་ལ་ཕན། །ཞེས་བྱ་བ་ནི་ཆོས་ཀྱི་འཁོར་ལོ་གང་ཡིན་པ་དེ་ཁྱོད་ཡིན་པས་དེ་སྐད་ཅེས་བྱའོ། །སངས་རྒྱས་ཞེས་བྱ་བའི་སྒྲའི་དོན་ནི་བྱང་ཆུབ་བོ། །དེ་ནི་དེ་ཁོ་ན་ཉིད་ཡིན་པས་མཆོག་དོན་ཏེ། སངས་རྒྱས་དང་བྱང་ཆུབ་ནི་ཐ་མི་དད་པ་ཡིན་པའི་ཕྱིར་རོ། །དེ་ཡང༌། ཤེས་རབ་ཕ་རོལ་ཕྱིན་ཡེ་ཤེས། །གཉིས་མེད་དེ་ནི་དེ་བཞིན་གཤེགས། །ཞེས་ཇི་སྐད་བཤད་བ་ལྟ་བུའོ། །རྗེས་སུ་ཕན་སྟོན་པ་ཞེས་བྱ་བ་ནི་ཐེག་པ་གསུམ་སྟོན་པར་མཛད་པའོ། །ལྷག་མ་ནི་སྔ་མའི་རྗེས་སུ་འབྲངས་ནས་ཤེས་པར་བྱའོ། །ཁྱོད་ནི་ཞེས་བྱ་བ་ལ་སོགས་པ་ལ། ཀྱེ་རྡོ་རྗེ་གསུང་འཇིག་རྟེན་མ་ལུས་པ་ཀུན་ལ་ཕན་ཞིང་ཁ་ན་མ་ཐོ་བ་མེད་པའི་དོན་གྱི་རྗེས་སུ་ཐུགས་བརྩེ་བར་མཛད་པ་སྟེ། འཇིག་རྟེན་དེ་དག་གིས་དགོངས་ཤིང་ཕན་པའི་དོན་མཛད་པ་ལ་རྟག་ཏུ་ཡང་དག་པར་འཇུག་པ་ལ་བརྩོན་པར་མཛད་པ་དང༌། རབ་དགའི་སྤྱོད་པ་སྟེ་དེ་ཁོ་ན་ཉིད་རྣམ་པར་སྤྱོད་པའི་སྤྱོད་པ་མངའ་བ་དང༌། འདི་ལས་ཐམས་ཅད་བཟང་བར་འགྱུར་བས་ན་ཀུན་དུ་བཟང་པོ་སྟེ་བཟང་པོ་ཐམས་ཅད་ཀྱི་རྩ་བ་ནི་ཆོས་ཡིན་པའི་ཕྱིར་རོ། །བདག་ལ་དགྱེས་པར་མཛོད་ཅེས་བྱ་བ་ནི་དགའ་བ་ཆེན་པོའོ། །ལྷག་མ་རྣམས་ནི་སྔ་མ་བཞིན་ནོ། །ཁྱོད་ནི་རྡོ་རྗེ་འདོད་པ་ཞེས་བྱ་བ་ལ་སོགས་པ་ལ། འདོད་ཆགས་དང༌། ཞེ་སྡང་དང༌། གཏི་མུག་གི་རྗེས་སུ་འགྲོ་བའི་སེམས་ཉིད་ནི་འདོད་པ་སྟེ། ཀྱེ་རྡོ་རྗེ་འདོད་པ་སྣ་ཚོགས་བར་སྣང་བས་ན་དམ་ཚིག་གོ །ཡེ་ཤེས་རྣམས་ཀྱི་དམ་པར་གྱུར་པས་མཆོག་གོ །ཡང་ན་དམ་ཚིག་ནི་ཡང་དག་པར་ཁོང་དུ་ཆུད་པའོ། །དེ་རྣམས་ཀྱི་མཆོག་ཏུ་གྱུར་པས་ན་དམ་ཚིག་མཆོག་གོ །སངས་རྒྱས་ཀྱི་ཞིང་ཐམས་ཅད་དུ་བཞུད་ཅིང་བྱོན་པའི་ཚུལ་གྱིས་འགྲོ་བའི་དོན་མཛད་པས་འདི་ལ་དོན་ཆེན་པོ་འབྱུང་བར་འགྱུར་བས་ན་ཕན་དོན་ཆེའོ། །བདེ་བར་གཤེགས་པའི་གདུང་གི་ཐིག་ལེར་གྱུར་པས་གདུང་མཆོག་གོ །འདོད་ཆགས་དང་ཞེ་སྡང་དང་གཏི་མུག་རོ་གཅིག་བ་ཉིད་ཀྱིས་རྗེས་སུ་ཐུགས་བརྩེ་བར་མཛད་པས་ན་མཉམ་ཉིད་རྗེས་
བརྩེའོ། །དགའ་བ་གསུམ་བསྡུས་པར་གྱུར་པས་ན་རིན་ཆེན་མང་པོའོ། །ཡོན་ཏན་དེ་དང་ལྡན་པས་ན་ཡོན་ཏན་གཏེར་གྱུར་ཅེས་བྱའོ། །བདག་ལ་དགྱེས་པར་མཛོད་ཅེས་བྱ་བ་ནི་བཏང་སྙོམས་ཆེན་པོ་བདག་ལ་དགྱེས་པར་མཛོད་ཅིག་ཅེས་པའོ། །ལྷག་མ་ནི་སྔ་མ་བཞིན་ནོ། །སློང་བར་བྱེད་པ་ནི་ཚིགས་སུ་བཅད་པ་དེ་རྣམས་ཉིད་དོ། །སླར་ཡང་ཞེས་པ་ནི་ཕྱིས་དངོས་པོ་རྣམས་སྒྱུ་མ་ལྟ་བུར་ཡང་དག་པར་རིག་པ་གང་ཡིན་པ་དེས་རང་གི་སྔགས་ཀྱི་དོན་ཡི་གེ་མཾ་དུ་གྱུར་པ་སྟེ། ཞུ་བ་ཡོངས་སུ་གྱུར་པ་ལས་མི་གྱི་གཟུགས་སུ་གྱུར་ནས་མཾ་དེས་འགྲོ་བ་ཐམས་ཅད་སྒྱུ་མ་ལྟ་བུ་ཉིད་དུ་བསམ་པར་བྱའོ་ཞེས་བྱ་བའི་ཐ་ཚིག་གོ །ཞལ་མཆོག་ཅེས་བྱ་བ་ལ་སོགས་པ་ལ་རང་གི་ས་བོན་ཡི་གེ་མཾ་དེ་ཉིད་ལས་བྱུང་བའི་མཚན་མ་མཾ་གྱིས་མཚན་པའི་རལ་གྲི་གང་ཡིན་པ་དེ་ལས་བྱུང་ཞིང་སྐྱེས་པའི་འཇམ་པའི་རྡོ་རྗེ་རང་ཉིད་གྱུར་ཏོ་ཞེས་བྱ་བར་སྦྱར་རོ། །དེ་ཡང་ཞལ་གྱི་མཆོག་སྟེ། རྩ་བའི་ཞལ་ནི་གུར་ཀུམ་བཟང་པོའི་མདོག་ཅན། ཞལ་གཡས་བ་སྔོ་བ། གཡོན་པ་དཀར་བ། རྒྱན་དང་ཆ་ལུགས་བྱིས་པ་གཞོན་ནུ་ལྟ་བུ་དང༌། ཤེས་རབ་ཀྱི་དགའ་བ་གང་ཡིན་པ་དེས་གཅིག་ཏུ་དེ་གཉིས་པ་མེད་པ་དང༌། རབ་ཏུ་མཛེས་པ་སྟེ་མཆོག་ཏུ་བདེ་བ་འཕེལ་བ་ཉིད་ཀྱི་སྐུའི་ཡན་ལག་ཐམས་ཅད་ཡིད་དུ་འོང་བ་ཞེས་བྱ་བའི་དོན་ཏོ། །གཞན་ཡང་རང་སྣང་བའི་ཤེས་རབ་ཀྱི་མ་མཆུ་ཞལ་གྱིས་འཛིན་པར་མཛད་པ། ཕྱག་གཡས་གཉིས་ན་རལ་གྲི་དང་མདའ་བསྣམས་པ། ཕྱག་གཡོན་གཉིས་ན་ཨུཏྤལ་སྔོན་པོ་དང་གཞུ་བསྣམས་པའོ། །དོན་རྫོགས་པ་ཞེས་བྱ་བ་ནི་སངས་རྒྱས་ལ་སོགས་པའི་ཚུལ་དུ་བསྐྱེད་པས་སོ། །དེ་ལྟར་འཇམ་པའི་རྡོ་རྗེའི་བདག་ཉིད་ཅན་གྱི་ངོ་བོ་ཉིད་རྟོགས་པའི་རྣམ་པར་བྱང་བ་ལ་སྲིད་པ་དང་ཞི་བ་ལས་མངོན་པར་ཞེན་པ་སྤང་བའི་ཕྱིར་སྟོང་པ་ཉིད་ལ་སོ་སོར་བརྟག་པར་བྱ་བ་ཡིན་པས་དེའི་ཕྱིར་སྲིད་པ་ཞེས་བྱ་བ་ལ་སོགས་པ་སྨོས་ཏེ། སྲིད་པ་ནི་འཁོར་བའོ། །ཞི་བ་ནི་མྱ་ངན་ལས་འདས་པའོ། །ཆགས་པ་ནི་མངོན་པར་འདོད་པའོ། །དེ་ཡང་སྲིད་པ་ལ་ཆགས་པས་ནི་སྲིད་པ་ཉིད་མཐའ་ཡས་པར་འགྱུར་ལ། ཞི་བ་ལ་ཆགས་ཤིང་ཤིན་ཏུ་དགའ་བ་གང་ཡིན་པ་བྱང་ཆུབ་སེམས་དཔའ་དེས་ནི་འབྱོར་པ་ཉམས་པ་ཐོབ་པར་འགྱུར་ཏེ། ཐེག་
པ་དམན་པར་ལྟུང་བའི་ཕྱིར་རོ། །དེ་བས་ན་སྲིད་པ་དང་ཞི་བ་གཉི་ག་སྒྱུ་མ་ལྟ་བུ་ཉིད་དུ་སོ་སོར་བརྟགས་པས་བསྙེན་པ་ཡང་དག་པར་བྱས་པ་སྟེ། བསྙེན་པའི་ཡན་ལག་མཐར་ཕྱིན་པར་བྱས་པའི་རྣལ་འབྱོར་པ་ནི་ཆགས་པ་གཉིས་དང་བྲལ་བར་ཆོས་ཀྱི་དབྱིངས་ཀྱི་བདག་ཉིད་ཅན་དུ་གྱུར་ཏེ། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རང་བཞིན་ཅན་ཡིན་པས་འཁོར་བ་དང་མྱ་ངན་ལས་འདས་པ་གཉིས་ལ་མི་གནས་པར་འགྱུར་རོ་ཞེས་བྱ་བའི་ཐ་ཚིག་གོ །བྱིན་གྱིས་བརླབ་པའི་སྔགས་ནི་ཨོཾ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཆོས་ཀྱི་དབྱིངས་ཀྱི་རང་བཞིན་ནི་ངོ་བོ་ཉིད་ཀྱིས་གནས་པ་སྟེ། གློ་བུར་བའི་སྒྲིབ་པ་ཐམས་ཅད་དང་བྲལ་བའི་ཕྱིར་རོ། །དེ་ནི་མྱ་ངན་ལས་འདས་པ་ཡིན་ཏེ། དེའི་བདག་ཉིད་ཅན་ནི་བདག་གོ །དེ་ལྟར་འདི་ནི་བདག་མྱ་ངན་ལས་འདས་པར་ཡང་མཐོང་ལ། དེ་ན་སྐྱེ་བ་དང་འགག་པར་ཡང་མི་མཐོང་ངོ༌། །འདི་དག་གི་བར་གྱིས་ནི་བསྙེན་པའི་ཡན་ལག་ཆུང་དུ་དང་རྒྱུ་མཐུན་པའི་འབྲས་བུ་ཆུང་ངུ་བསྟན་པ་ཡིན་ནོ། །དེ་ཡང་། བསྙེན་པའི་ཏིང་འཛིན་ཡང་དག་སྦྱོར། །བྱང་ཆུབ་དམ་པ་བསྒོམ་པར་བྱ། །ཞེས་ཇི་སྐད་གསུངས་པ་ལྟ་བུའོ། །ཞི་བར་བསྒྲུབ་པའི་ཡན་ལག་ཆུང་དུ་དང་རྣམ་པར་སྨིན་པ་ཆུང་ངུ་བཤད་པའི་ཕྱིར། བཤེས་གཉེན་དམ་པ་ཞེས་བྱ་བ་ལ་སོགས་པ་སྨོས་ཏེ། བཤེས་གཉེན་དམ་པ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་བདག་ཉིད་ཅན་གྱི་རང་གི་ངོ་བོ་ཉིད་ཤིན་ཏུ་རྣམ་པར་དག་པའི་རྒྱུ་མཐུན་པ་དེ་ཡོངས་སུ་གྱུར་པ་ལས་འཇམ་པའི་རྡོ་རྗེའི་སྐུ་ཐོབ་པས་བཤེས་གཉེན་དམ་པས་རྣལ་འབྱོར་པའི་བསྙེན་པའི་ཡན་ལག་ལ་རྒྱུ་མཐུན་པ་བྱས་པ་ཡིན་ལ། དེ་ནི་ཡང་དེའི་རྣམ་པར་སྨིན་པས་མངོན་པར་ཤེས་བ་དྲུག་ཉིད་ཐོབ་པར་གྱུར་པ་ཡིན་ནོ། །དེ་བས་ན་མིག་ལ་སོགས་པ་དྲུག་པོ་བྱིན་གྱིས་བརླབས་པ་དེ་ནི་ཉེ་བར་བསྒྲུབ་པའི་ཡན་ལག་ཡིན་པར་འདོད་དེ། ཉེ་བར་བསྒྲུབ་པ་གྲུབ་མཆོག་ལ། །རྡོ་རྗེ་སྐྱེ་མཆེད་རྣམ་པར་དཔྱད། །ཅེས་ཇི་སྐད་གསུངས་པ་ལྟ་བུའོ། །ཇི་ལྟར་བྱིན་གྱིས་བརླབ་ཅེ་ན། །ཡི་གེ་ཀྵིཾ་ལ་སོགས་པ་རང་གི་ས་བོན་ལས་བྱུང་བའི་སའི་སྙིང་པོ་དང༌། ཕྱག་ན་རྡོ་རྗེ་དང༌། ནམ་མཁའི་སྙིང་པོ་
དང་། འཇིག་རྟེན་དབང་ཕྱུག་དང༌། སྒྲིབ་པ་རྣམ་པར་སེལ་བ་དང༌། ཀུན་དུ་བཟང་པོའི་སྐུ་མདོག་དང་ཞལ་དང༌། ཕྱག་མཚན་འཁོར་ལོས་སྒྱུར་བ་དྲུག་དང་འདྲ་བ་ཟླ་བའི་གདན་དང་ཟླ་བའི་འོད་མངའ་བ། རིན་པོ་ཆེའི་ཅོད་ཕན་ཅན་གྱིས་མིག་ལ་སོགས་པ་ཡང་དག་པར་དགང་བར་བྱའོ། །སྒྲུབ་པའི་ཡན་ལག་ཆུང་དུ་དང་སྐྱེས་བུ་བྱེད་པའི་འབྲས་བུ་ཆུང་དུ་འཆད་པར་འདོད་པས། སྐྱེས་བུ་བྱེད་པ་ཞེས་བྱ་བ་ལ་སོགས་པ་སྨོས་ཏེ། དེའི་རྗེས་ཐོགས་ལ་སྐྱེས་བུ་བྱེད་པའི་འབྲས་བུ་གཟུང་བར་བྱའོ་ཞེས་བྱ་བའི་ཐ་ཚིག་གོ །སྐྱེས་བུ་བྱེད་པ་དེ་ཡང་གང་ཞིག་ཡིན་ཞེ་ན། ཆོས་ཞེས་བྱ་བ་ལ་སོགས་པ་སྨོས་ཏེ། སྐུ་གསུམ་གྱིས་བསྡུས་པའི་འགྲོ་བའི་དོན་ཉིད་ནི་སྐྱེས་བུའི་ཞེས་བྱ་བའི་དོན་ཏོ། །གང་ལས་འགྲོ་བའི་དོན་དུ་འགྱུར་བ་དེའི་དངོས་པོ་ཉིད་ཡིན་པས་ན་འགྲོ་བའི་དོན་ཉིད་དེ་འགྲོ་བའི་དོན་རྫོགས་པར་ནུས་པ་ཞེས་བྱ་བའི་ཐ་ཚིག་གོ །དེ་བས་ན་གསང་བ་གསུམ་བྱིན་གྱིས་བརླབས་པ་ཙམ་ནི་སྒྲུབ་པའི་ཡན་ལག་ཏུ་འགྱུར་རོ། །དེ་ཡང་སྒྲུབ་པ་བསྐུལ་བ་ཡིན་པར་བཤད། སྔགས་ཀྱི་བདག་པོ་བསྒོམ་པའོ། །ཞེས་ཇི་སྐད་གསུངས་པ་ལྟ་བུའོ། །ཇི་ལྟར་བྱིན་གྱིས་བརླབ་ཅེ་ན། །རང་སྙིང་ཞེས་བྱ་བ་ལ་སོགས་པ་སྨོས་ཏེ། རང་གི་སྙིང་གའི་ཟླ་བ་ལ་ཧཱུཾ་ལས་བྱུང་བའི་རྡོ་རྗེའི་དབུས་ན་བཞུགས་པའི་ཐུགས་ཀྱི་གསང་བ་ཕྱག་ན་རྡོ་རྗེ་དང་འདྲ་བ་དང༌། རང་གི་ལྐོག་མའི་ཟླ་བ་ལ་ཡི་གེ་ཨཱཿལས་བྱུང་བའི་པདྨའི་དབུས་ན་བཞུགས་པའི་གསུང་གི་གསང་བ་འཇིག་རྟེན་དབང་ཕྱུག་དང་འདྲ་བ་དང་རང་གི་སྤྱི་བོའི་ཟླ་བར་ཨོམ་ལས་བྱུང་བའི་འཁོར་ལོའི་དབུས་ན་སྐུའི་གསང་བའི་སའི་སྙིང་པོ་དང་འདྲ་བར་བསམ་པར་བྱའོ། །ཐུགས་རྡོ་རྗེ་ལ་སོགས་པ་དེ་རྣམས་ཀྱི་ཐུགས་ཀའི་ཟླ་བའི་མཚན་མ་ལ་གནས་པའི་ས་བོན་གྱི་ཤེས་རབ་ཀྱི་ཡན་ལག་འདུས་པ་ལས་བྱུང་བའི་འོད་ཟེར་གང་ཡིན་པ་དེ་རྣམས་ལས་གཟུགས་རྡོ་རྗེ་ལ་སོགས་པ་ལྟ་བུའི་འོད་གང་ཡིན་པ་དེ་རྣམས་ཀྱིས་སངས་རྒྱས་མ་ལུས་པ་ཡང་དག་པར་མཆོད་པའོ། །ཇི་ལྟ་བུ་ཞེ་ན། ཕྱོགས་ཀུན་ཏེ་ཕྱོགས་ཐམས་ཅད་དང༌། དུས་གསུམ་ཁྱབ་པ་གང་ཡིན་པ་དེ་ཉིད་དང༌། གཞན་གྱི་དོན་ཕུན་སུམ་ཚོགས་པ་རྫོགས་པར་མཛད་པའི་སངས་རྒྱས་དེ་
རྣམས་ཀྱི་ཐུགས་ཀ་དང༌། ལྐོག་མ་དང་དབུ་ལ་བཞུགས་པའི་ཐུགས་རྡོ་རྗེ་ལ་སོགས་པ་རྫོགས་པའི་སངས་རྒྱས་གང་ཡིན་པ་དེ་ནི་ཐམས་ཅད་ལ། རང་གི་ཐུགས་རྡོ་རྗེ་ལ་སོགས་པ་བྱིན་གྱིས་བརླབས་པའི་དོན་དུ་ཚིགས་སུ་བཅད་པ་གཉིས་གཉིས་ཀྱིས་བསྐུལ་བར་བྱ་ཞིང་སྔགས་རེ་རེས་བྱིན་གྱིས་བརླབས་པས་བརྟན་པར་བྱའོ། །བསོད་ནམས་དང་ཡེ་ཤེས་ཕུན་སུམ་ཚོགས་པ་ནི་དཔལ་ཏེ་དེ་དང་ལྡན་པ་ནི་དཔལ་ལྡན་ནོ། །ཐུགས་ཉིད་རྡོ་རྗེ་སྟེ་དེའི་བདག་ཉིད་ཀྱིས་འཛིན་པར་མཛད་པས་ན་རྡོ་རྗེ་ཐུགས་འཆང་བའོ། །སྐུ་དང་གསུང་དང་ཐུགས་རྡོ་རྗེ་མི་ཕྱེད་ཅིང་རོ་གཅིག་པའི་དེ་ཁོ་ན་ཉིད་གང་ཡིན་པ་དེས་སྐྱེད་ཅིང་སྤྲུལ་པའི་ཕྱིར། རྡོ་རྗེ་མི་ཕྱེད་གསུམ་བསྒོམས་པས། །ཞེས་བྱའོ། །བྱིན་གྱིས་བརླབ་པ་ནི་ལྷག་པའི་ནུས་པ་བསྐྱེད་པ་སྟེ། དེ་ཉིད་ཕུན་སུམ་ཚོགས་པའི་ཁྱད་པར་དུ་གྱུར་པས་གནས་སོ། །རྡོ་རྗེ་ཐུགས་ཀྱི་ཞེས་བྱ་བ་ནི་བདག་གི་ཐུགས་རྡོ་རྗེ་ལའོ། །ཚིགས་སུ་བཅད་པ་འོག་མ་དག་གི་དོན་ལ་ཡང་འདི་བཞིན་དུ་རྗེས་སུ་འབྲང་བར་བྱའོ། །ཚིགས་སུ་བཅད་པ་འདི་དག་ནི་ཡན་ལག་བཞི་དང་འབྲེལ་བས་ལེའུ་བཅུ་གཉིས་པ་ལས་གསུངས་པའོ། །དེ་བས་ན་འདི་དག་ཉིད་ཀྱིས་བསྒྲུབ་པའི་ཡན་ལག་ལ་བྱིན་གྱིས་བརླབ་པར་རིགས་པ་ཡིན་ནོ། །གཞན་དག་ནི་ལེའུ་བདུན་པ་ལས་སྐུ་དང་གསུང་དང་ཐུགས་དང་སེམས་ཅན་ལ་སོགས་པ་རྗེས་སུ་དྲན་པར་གསུངས་པའི་ཚིགས་སུ་བཅད་པ་རྣམས་ཀྱིས་བྱིན་གྱིས་རློབ་པར་འདོད་པས་དེ་སུན་དབྱུང་བའི་ཕྱིར། རྗེས་སུ་དྲན་པ་བཅུ་དྲུག་ཅེས་བྱ་བ་སྨོས་ཏེ། རྗེས་སུ་དྲན་པ་བཅུ་དྲུག་གི་ཕྱོགས་གཅིག་ཏུ་གྱུར་པ་ནི་ཐུགས་ལ་སོགས་པ་བྱིན་གྱིས་རློབ་པ་ཡིན་ལ། ཐུགས་ལ་སོགས་པ་དེ་དག་ཉིད་ཕྲ་མོའི་རྣལ་འབྱོར་ལ་སོགས་པས་དག་པར་གྱུར་ན་རྣལ་འབྱོར་པ་དེ་བྱེད་པ་ཡིན་ནོ་ཞེས་བཅོམ་ལྡན་འདས་ཀྱིས་གསུངས་པ་ཡིན་ཏེ། ལེའུ་བཅོ་བརྒྱད་པ་ལས། བརྟན་གྱུར་རྡོ་རྗེའི་ལམ་ནས་ནི། །ནམ་མཁའི་དབྱིངས་སུ་སྤྲོ་བར་བྱ། །རྗེས་སུ་དྲན་པ་གང་བསྒོམ་པ། །དེ་དང་ལྡན་ན་ཡང་དག་སྤྲོ། །ཞེས་ཇི་སྐད་གསུངས་པ་ལྟ་བུའོ། །དེ་ནི་ཞེས་པ་དེ་བས་ནའམ་དེ་ཡང་སྟེ་བྱིན་གྱིས་བརླབ་པ་འདིར་བླ་མ་རྣམས་སམ་ཁོ་བོ་ཅག་གིས་
མ་བཤད་དེ། གནས་སྐབས་མ་ཡིན་པར་སྨྲས་པར་ཐལ་བར་འགྱུར་བའི་ཕྱིར་རོ། །སྒྲུབ་པ་ཆེན་པོའི་ཡན་ལག་ཆུང་དུ་དང་དབང་གི་འབྲས་བུའི་ཡན་ལག་ཆུང་དུ་བསྟན་པའི་ཕྱིར། སྒྱུ་མའི་ཞེས་བྱ་བ་ལ་སོགས་པ་སྨོས་ཏེ། སྒྲུབ་པའི་ཡན་ལག་གི་ལྷག་མར་གྱུར་པ་གསང་བ་གསུམ་མཚན་ཉིད་མེད་པ་ཉིད་དེ། དངོས་པོ་མེད་པ་ཉིད་ཡིན་པས་སྒྱུ་མ་ལྟ་བུར་བལྟའོ། །ཇི་ལྟར་བལྟ་ཞེ་ན། སྒྱུ་མའི་ཤེས་རབ་ཡན་ལག་འདུས། །ཞེས་བྱ་བ་སྨོས་ཏེ། སྒྱུ་མའི་རང་བཞིན་ཅན་གྱི་ཤེས་རབ་དེའི་ཡན་ལག་འདུས་པ་ཉིད་དོ། །དེ་བས་ན། དབང་འབྲས་ཆུང་དུ་རྣམ་དག་ཕྱིར། །སྒྲུབ་པ་ཆེན་པོ་ཡིན་པར་འདོད། །ཅེས་སྨོས་པ་ཡིན་ནོ། །དེ་ཉིད་ནི་ཡེ་ཤེས་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཐུགས་ཀར་གནས་པའི་ཐུགས་རྡོ་རྗེའི་སྟེང་གི་གནས་སུ་ཡེ་ཤེས་སེམས་དཔའ་འཇམ་པའི་རྡོ་རྗེའི་སྐུ་འདྲ་བར་བསམས་ལ། དེའི་སྙིང་པོའི་འོད་ཀྱིས་ཞེས་པ་ཐུགས་ཀའི་ཟླ་བར་གནས་པའི་རལ་གྲིའི་མཾ་གྱི་འོད་ཟེར་རྣམས་ཀྱིས་ཕྱོགས་བཅུ་ན་བཞུགས་པའི་སངས་རྒྱས་རྣམས་ཡང་དག་པར་བསྐུལ་ལ། སངས་རྒྱས་ཀྱི་འོད་ཟེར་ལས་བྱུང་བའི་སྤྱན་ལ་སོགས་པའི་རིག་མ་རྣམས་ཕྱག་གཉིས་ཀྱིས་བདུད་རྩིའི་ཆུ་སྟེ། བྱང་ཆུབ་ཀྱི་སེམས་ཞུ་བར་གྱུར་པས་ཡོངས་སུ་གང་བའི་རིན་པོ་ཆེའི་རང་བཞིན་ཅན་གྱི་བུམ་པ་ཕྱག་གཉིས་ན་བསྣམས་པས་དང་ཞིང་མི་བསྐྱོད་པ་ལྟ་བུའི་རྣམ་པས་ཡང་དག་པར་དབང་བསྐུར་བར་གྱུར་པ་དང༌། རིགས་ཀྱི་དབང་པོ་ཅོད་པན་གྱི་དམ་པར་གྱུར་པའི་དཔལ་དང་ལྡན་པ་གཙོ་བོར་གྱུར་པ་སྟེ། དབང་བསྐུར་བའི་ཆུ་ཡོངས་སུ་གྱུར་པ་ལས་རང་གི་རིགས་ཀྱི་བདག་པོ་མི་བསྐྱོད་པ་ཅོད་པན་གྱི་དམ་པ་རིན་པོ་ཆེའི་ཅོད་པན་ལ་མངའ་བས་དེ་ལ་དེ་སྐད་ཅེས་བྱ་སྟེ། གཙོ་བོ་ཞེས་པ་ཆོས་ཀྱི་རྒྱལ་པོར་དབང་བསྐུར་བའི་ཕྱིར་རོ། །དེ་ཉིད་ཀྱིས་ན་དཔལ་ལྡན་ནོ། །དེ་ཡང་། སྒྲུབ་པ་ཆེན་པོའི་དུས་སུ་ནི། །གཙོ་བོ་སངས་རྒྱས་བདག་པོའི་སྐུ། །འདི་ནི་རྡོ་རྗེ་ཅན་ཀུན་དང༌། །རྣལ་འབྱོར་མཆོག་གི་གསང་བ་ཆེ། །ཞེས་ཇི་སྐད་གསུངས་པ་ལྟ་བུ་སྟེ། ཡེ་ཤེས་སེམས་དཔའ་དང་ལྡན་པའི་རང་གི་ལྷའི་སྐུའི་ཅོད་པན་དུ་རིགས་ཀྱི་བདག་པོའི་སྐུ་བསམས་ནས་འགྲུབ་པར་འགྱུར་རོ་
ཞེས་བྱ་བའི་དོན་ཏོ། །བསྙེན་པ་ལ་སོགས་པའི་ཡན་ལག་བར་མ་དང༌། རྒྱུ་མཐུན་པ་ལ་སོགས་པའི་འབྲས་བུ་བར་མ་ཚིགས་སུ་བཅད་པ་ཕྱེད་ཀྱིས་བསྟན་པ་ནི། དེ་བཞིན་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྔར་གྱི་བཞིན་དུ་ཟླ་བའི་གདན་ལ་ཡེ་ཤེས་ཀྱི་ཟླ་བ་དང༌། དཔལ་མཆོག་དང་པོའི་རྡོ་རྗེ་དང༌། རྡོ་རྗེ་སེམས་དཔའ་དྲི་ཟ་ཉེ་བར་འཁོར་འཇུག་པ་ལ་སོགས་པའི་རིམ་པས་མམ་ལས་བྱུང་བའི་རང་སྣང་བའི་རིམ་པ་བསམས་ལ། དེ་ལ་མིག་ལ་སོགས་པ་སྦྱང་བ་དང༌། སྐུ་གསུང་ཐུགས་བྱིན་གྱིས་བརླབ་པ་དང༌། དབང་བསྐུར་བ་ཡང་སྔ་མ་བཞིན་དུ་བྱའོ་ཞེས་བྱ་བའི་དོན་ཏོ། །བསྙེན་པའི་ཡན་ལག་ཆེན་པོ་དང་རྒྱུ་མཐུན་བའི་འབྲས་བུ་ཆེན་པོར་བཤད་པའི་ཕྱིར། སྤྱི་བོའི་ལྟེ་བ་ཞེས་བྱ་བ་ལ་སོགས་པ་སྨོས་ཏེ། དང་པོ་སྤྱི་བོ་ནས་བྲལ་དང་རྐང་པའི་མཐར་ཐུག་པའི་བར་དུ་སྙིང་པོས་ཞེས་བྱ་བ་ས་བོན་རྣམས་ཀྱིས་སོ། །དེ་ཡང་ཆ་རྣམ་པ་ལྔ་ལས་ས་བོན་ལྔ་པོ་རིགས་ལྔའི་བདག་ཉིད་ཅན་རྣམས་ཀྱིས་ཕྲ་རབ་སོ་སོར་དགང་བར་བྱའོ་ཞེས་བྱ་བའི་ཐ་ཚིག་གོ །ཧཱུཾ་ཨ་ཆུ་སྐྱེས་འདབ་བརྒྱད་པ། ཞེས་བྱ་བ་ནི་ཧཱུཾ་ལས་པདྨ་དམར་པོ་ཨ་ཡིས་དེའི་ལྟེ་བ་མུ་ཏིག་གི་འབྲས་བུ་དང་མདོག་མཐུན་པ་སྐྱེད་པར་བྱེད་པས་སོ། །ཡང་དག་སྦྱངས་ཞེས་བྱ་བ་ནི་དེ་ལྟར་ཡང་དག་པར་རྣམ་པར་སྦྱངས་པ་དེས་རྗེས་སུ་མཉེས་པར་བྱའོ་ཞེས་བྱ་བར་སྦྱར་རོ། །ཧཱུཾ་གིས་ནི་རྡོ་རྗེ་མཆོག་བསྐྱེད་པར་བྱ་ལ། ཨོཾ་ལས་ནི་ནོར་བུར་སྤྲུལ་ལ། ནོར་བུ་གཉིས་ཀྱི་བར་དུ་ཡི་གེ་ཕཊ་དང་ལྡན་པར་བྱའོ་ཞེས་ཀྱང་བལྟ་བར་བྱའོ། །དེ་ཡང་ལེའུ་བདུན་པ་ལས། ཡི་གེ་ཧཱུཾ་དང་ཨོཾ་དག་དང༌། །ཕཊ་ཀྱང་རབ་ཏུ་བསྒོམ་པར་བྱ། །འོད་ཟེར་རྣམ་ལྔས་ཁྱབ་པ་ཡིས། །པདྨ་རྡོ་རྗེ་བསྒོམ་པར་བྱ། །ཞེས་ཇི་སྐད་གསུངས་པ་ལྟ་བུའོ། །གཞུག་ཅེས་བྱ་བ་ནི་ཁར་ཆུད་པར་བྱའོ། །སེམས་མཆོག་ཅེས་བྱ་བ་ནི་བྱང་ཆུབ་ཀྱི་སེམས་སོ། །རྡོ་རྗེའི་པད་མཐར་གནས་ཞེས་བྱ་བ་ནི་དང་པོར་རྡོ་རྗེའི་ནོར་བུར་རོ། །ཕྱི་ནས་ནི་ཆུ་སྐྱེས་ཀྱི་ནོར་བུར་རོ་།རྒྱལ་བའི་འཁོར་ལོར་ཞེས་བྱ་བ་ནི་ཕྱིའི་འཁོར་ལོ་དང་འདྲ་བར་རོ། །དེ་ལྟ་མོད་ཀྱི་གཙོ་བོ་ནི་མི་བསྐྱོད་པ་ཡིན་ནོ། །རང་གི་ས་བོན་ནི་ཡི་གེ་མཾ་ངོ༌། །བརྟན་པར་བྱས་པ་ནི་སེམས་ཀྱིས་སོ། །འགྲོ་བའི་མི་ཤེས་
དག་བྱའི་ཕྱིར། །ཞེས་བྱ་བ་ནི་འཁོར་ལོས་རང་གི་ཡེ་ཤེས་དང་ཆ་འདྲ་བར་བྱས་པས་སོ། །ཁྱད་པར་གྱིས་བཤད་པ་ལ་འཁོར་ལོའི་བདག་པོ་ནི་མི་བསྐྱོད་པའོ། །དེ་ཡང་སྐུ་མདོག་ནོར་བུ་ཨིནྡྲ་ནཱི་ལའི་མདོག་ཅན་ནོ། །དེ་ཉིད་ཀྱིས་ན་ཞལ་དང་པོ་སྔོ་བ། ཞལ་གཡས་པ་དཀར་བ། གཡོན་པ་དམར་བ། དཔལ་མཆོག་དང་པོའི་ཕྱག་དང་འདྲ་བར་རྡོ་རྗེ་དང༌། རལ་གྲི་དང༌། ནོར་བུ་དང༌། པདྨ་བསྣམས་པར་ལྡན་པ་ཡིན་པ་ལས་འདིའི་རྡོ་རྗེ་ནི་སྔོ་ཞིང་ཁ་ཅུང་ཟད་ཀྱིས་པའོ། །མི་བསྐྱོད་པ་ནི་ཟད་པ་ཤེས་པའི་རང་བཞིན་ཡིན་པར་བཤད་པས་ཀུན་ནས་ཉོན་མོངས་པའི་ཕྱོགས་ཐམས་རྩ་བ་ནས་འབྱིན་པ་ནི་འདིར་ཞེ་སྡང་ཆེན་པོའོ། །དེ་ཉིད་ནི་དོན་ཏོ། །དེ་ལྟར་ཞེ་སྡང་དང་ལྡན་པའི་འཇིག་རྟེན་འཕྲིན་ལས་འདི་ཉིད་ཀྱིས་འདུལ་བའི་ཕྱིར་བཛྲ་དྷྲྀཀ་ཅེས་བྱ་བས་ཡང་དག་པར་བསྐུལ་ལ། སྤྲོས་པའི་ཚུལ་གྱིས་ཏིལ་གྱི་གང་བུ་བཞིན་དུ་ཕྱོགས་བཅུའི་འཇིག་རྟེན་གྱི་ཁམས་གང་བར་ཡིད་ཀྱིས་ཕྱུང་ལ་བྱ་བ་བྱས་ནས་གོང་བུའི་ཚུལ་གྱིས་བསྡུས་ཏེ་མི་བསྐྱོད་པ་གཅིག་ཏུ་བྱས་ལ་བདག་ཉིད་འཇམ་པའི་རྡོ་རྗེར་གྱུར་པ་ལ་གཞུག་པར་བྱའོ། །དངོས་པོ་ཀུན་གྱིས་ཞེས་བྱ་བ་ནི་ཐབས་དང་ཤེས་རབ་དང་སྐུ་དང་གསུང་ལ་སོགས་པའི་ནང་དུ་ཆུང་པར་བསྒོམ་པར་བྱ་བའོ། །རྣམ་པར་སྣང་མཛད་ཀྱི་དབང་དུ་བྱས་ནས་བཤད་པ་ནི་ཛིན་ཛིཀ་གིས་ཞེས་བྱ་བ་ལ་སོགས་པ་ཡིན་ཏེ། ཇི་ན་ཛིཀ་གིས་ཞེས་བྱ་བའི་སྔགས་འདིས་ཡང་དག་པར་བསྐུལ་ལ་སྤྲོས་ཏེ་བསྡུས་ལ་དེ་བཞིན་དུ་ཞེས་མི་བསྐྱོད་པ་དང་འདྲ་བར་རོ། །དང་པོ་འདྲ་ཞེས་བྱ་བ་ནི་སྐུ་དང་ཞལ་དང་སྐུ་མདོག་དཔལ་མཆོག་དང་པོ་དང་འདྲ་བའོ། །མེ་ལོང་ལྟ་བུའི་ཡེ་ཤེས་ནི་ཤེས་བྱ་ཐམས་ཅད་ལ་ཐོགས་པ་མེད་པའི་ཕྱིར་དང༌། དེའི་རྣམ་པ་མ་ཡིན་པའི་ཕྱིར་གཏི་མུག་ཆེན་པོའོ། །དཔལ་མཆོག་དང་པོའི་ཕྱག་དང་འདྲའོ་ཞེས་བྱ་བའི་དབང་དུ་བྱས་པ་དེ་དགག་པའི་ཕྱིར་འཁོར་ལོ་བཟང་སོགས་ལྡན་ཞེས་བྱ་བ་སྨོས་སོ། །དེའི་དོན་ནི་འདི་ཡིན་ཏེ་རྩ་བའི་ཕྱག་ན་ནི་འཁོར་ལོ་བསྣམས་ལ་ལྷག་མ་རྣམས་ནི་དཔལ་མཆོག་དང་པོ་དང་འདྲ་བའོ། །དེ་བཞིན་དུ་འདིའི་འོག་མ་རྣམས་ལ་ཡང་ཤེས་པར་བྱའོ། །རིན་ཆེན་དབང་ནི་རིན་ཆེན་འབྱུང་ལྡན་ནོ། །མཉམ་ཉིད་བརྩོན་འགྲུས་ཅན་ཞེས་བྱ་
བ་ལ། མཉམ་ཉིད་ནི་མཉམ་པ་ཉིད་ཀྱི་ཡེ་ཤེས་ཏེ། སེམས་ཅན་ཐམས་ཅད་ལ་མཉམ་པ་ཁོ་ནར་བརྩོན་པའི་ཕྲིན་ལས་ཀྱིས་འཇིག་རྟེན་རྣམས་ལ་འཇུག་པར་མཛད་པས་ན་མཉམ་ཉིད་བརྩོན་འགྲུས་ཅན་ཞེས་བྱའོ། །གཞོན་ནུའི་ཞལ་འདྲ་ཞེས་བྱ་བ་ནི་གཡས་སྔོ་ལ་གཡོན་དཀར་བའོ། །ལྷོ་ཕྱོགས་སུ་ཞེས་བྱ་བ་ནི་ལྷོ་ཕྱོགས་ཀྱི་གདན་ལའོ། །རིན་ཆེན་འབྱུང་ལྡན་ལ་སོགས་པའི་ཕྱག་ན་གོ་རིམས་ཇི་བཞིན་དུ་རིན་པོ་ཆེ་དང་པདྨ་དང་རལ་གྲིའོ། །གོ་བརྗེ་བའི་གནས་སུ་ནི་མཚན་མ་འཁོར་ལོ་ཡིན་ནོ། །དེ་ཡང་མཉམ་པ་ཉིད་ཀྱི་ཡེ་ཤེས་ལ་སོགས་པའི་རྩ་བ་ནི་མེ་ལོང་ལྟ་བུའི་ཡེ་ཤེས་ཡིན་པས་མེ་ལོང་ལྟ་བུའི་མཚན་མ་སྤྱིར་གྲུབ་པ་ཡིན་ནོ། །མེ་ལོང་ལྟ་བུ་ལ་སོགས་པའི་རྩ་བ་ཆོས་ཀྱི་དབྱིངས་མ་ཡིན་ནམ་ཞེ་ན། དེ་ནི་དེ་ལྟར་ཡིན་ཏེ། དེ་ཉིད་ཀྱི་ཕྱིར་མཚན་མ་གཅིག་པོ་དེའི་བདག་ཉིད་ཅན་རྩ་བའི་ཕྱག་གཉིས་ཀྱིས་འཁྱུད་པ་ཐམས་ཅད་ལ་ཡོད་པ་ཡིན་ནོ། །གསུང་དབང་པོ་ནི་འོད་དཔག་ཏུ་མེད་པའོ། །ཤེས་བྱ་ཐམས་ཅད་ལ་ཐོགས་པ་མེད་པ་སོ་སོར་རྟོག་པའི་ཡེ་ཤེས་ནི་འདོད་ཆགས་ཆེན་པོའོ། །པདྨ་རཱ་ག་ནི་རིན་པོ་ཆེ་སྟེ། དེ་དང་འདྲ་བའི་མཚན་མ་ཕྱག་མཚན་དང་པོ་ན་མངའ་བ་གང་ཡིན་པ་དེ་ནི། པདྨ་རཱ་གའི་མདོག་པད་སོགས། །ཞེས་བྱའོ། །ནུབ་ཕྱོགས་སུ་ཞེས་བྱ་བ་ནི་ནུབ་ཕྱོགས་ཀྱི་གདན་ལའོ། །དོན་ཡོད་དབང་ཞེས་བྱ་བ་ནི་དོན་ཡོད་པར་གྲུབ་པའོ། །གཏུམ་པོ་ཆེན་པོ་ནི་ཤིན་ཏུ་དྲག་པོའི་ཕྲག་དོག་སྟེ་བྱ་བསྒྲུབ་པའི་ཡེ་ཤེས་སོ། །ཇི་ལྟར་ན་དེ་ཕྲག་དོག་ཡིན་ཞེ་ན། འགྲོ་བས་ན་ཕྲག་དོག་སྟེ། སངས་རྒྱས་ཀྱི་ཞིང་ཐམས་ཅད་དུ་སེམས་ཅན་གྱི་དོན་བྱ་བའི་ཕྱིར་སྤྲུལ་པ་རྣམས་གཅིག་པར་འགྱེད་པའི་ཕྱིར་རོ། །བཻ་ཌཱུཪྻར་སྣང་ཞེས་བྱ་བ་ནི་མརྒད་ཀྱི་མདོག་ཅན་ནོ། །བྱང་དུ་ཞེས་བྱ་བ་ནི་བྱང་ཕྱོགས་ཀྱི་གདན་ལའོ། །ཀུན་ཀྱང་ཞེས་བྱ་བ་ནི་གང་འདི་དེ་བཞིན་གཤེགས་པ་ཐམས་ཅད་དོ། །པདྨ་ཉི་དཀྱིལ་ཞེས་བྱ་བ་ནི་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་ལའོ། །རྣམ་པར་སྣང་མཛད་ཀྱི་ནི་ཟླ་དཀྱིལ་ཞེས་སྔར་བཤད་པ་ཡིན་ནོ། །སེམས་ཅན་ཐམས་ཅད་ལ་སྡུག་བསྔལ་བསལ་བར་འདོད་པ་ནི་སྙིང་རྗེའོ། །བསོད་ནམས་ཐམས་ཅད་བྱང་ཆུབ་ཆེན་པོར་ཡོངས་སུ་
བསྔོ་བ་ནི་ཐབས་ཀྱི་ཕ་རོལ་ཏུ་ཕྱིན་པའོ། །དེ་གཉིས་ཀྱིས་ནི་འགྲོ་བའི་དོན་རྩོལ་བའོ། །སྐུ་དང་དབང་ནི་རྣམ་པར་སྣང་མཛད་དོ། །དེ་བས་ཉེ་བར་བསྡུས་པ་ནི་བྱམས་པའོ། །སྐྱེ་བ་ཐམས་ཅད་དུ་རྟག་ཏུ་བྱང་ཆུབ་ཀྱི་སྤྱོད་པ་དང་ཀུན་དུ་མཐུན་པར་སྨོན་པར་བྱེད་པ་ནི་སྨོན་ལམ་གྱི་ཕ་རོལ་ཏུ་ཕྱིན་པའོ། གཉིས་པོ་དེ་དག་ནི་འདོད་པར་བྱ་བ་ཡིན་པས་འདོད་པའོ། །ཐུགས་ཀྱི་དབང་པོ་ནི་མི་བསྐྱོད་པའོ། །བདེ་བ་དང་མི་འབྲལ་བར་དགའ་བའི་བསམ་པ་ནི་དགའ་བའོ། །སྐྱེ་བ་ཐམས་ཅད་དུ་རྟག་ཏུ་བྱང་ཆུབ་ཀྱི་སྤྱོད་པ་དང་རྗེས་སུ་མཐུན་པར་འབད་པའི་སྟོབས་དང༌། བསླབ་པའི་སྟོབས་ནི་སྟོབས་ཀྱི་ཕ་རོལ་ཏུ་ཕྱིན་པའོ། །ཏིང་ངེ་འཛིན་ནི་སེམས་བརྟན་པའོ། །དོན་ནི་ནོར་རོ། །དག་པ་ནི་ཁ་ན་མ་ཐོ་བ་མེད་ཅིང་འབྲས་བུ་བརྟན་པའོ། །དེ་ལྟ་བུའི་བསམ་པ་དང་ལྡན་པས་ན་བསམ་པའི་དོན་དག་ཅེས་བྱ་སྟེ། མཛོད་ཆེན་པོ་དང་ལྡན་པ་ཞེས་གསུངས་པའི་ཕྱིར་རོ། །ཕན་པས་བསྡུས་པའི་བསམ་པ་ནི་བཏང་སྙོམས་སོ། །ཆོས་ཐམས་ཅད་དགོངས་པ་ཇི་ལྟ་བ་བཞིན་དུ་ཡོངས་སུ་ཤེས་པ་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་སྟེ། དེ་གཉིས་འགྲུབ་པར་བྱེད་པའོ། །ལྷག་མ་ནི་ལྷག་མར་གྱུར་པ་སྟེ། རལ་གྲི་ལ་སོགས་པའོ། །རང་བདག་ལྟ་བུར་ཞེས་བྱ་བ་ནི་རྣམ་པར་སྣང་མཛད་དང༌། མི་བསྐྱོད་པ་དང༌། གསུང་གི་དབང་པོ་དང༌། དོན་ཡོད་པར་གྲུབ་པ་དང་འདྲ་བའོ། །བསྟན་པ་ནི་བཤད་པའོ། །གཟུགས་སོགས་པ་ཞེས་བྱ་བ་ནི་གཟུགས་དང༌། སྒྲ་དང༌། དྲི་དང༌། རོ་དང༌། རེག་དང༌། ཆོས་ཀྱི་དབྱིངས་ཀྱི་རྡོ་རྗེའོ། །མེ་ལོང་སོགས་རྣམས་ཞེས་བྱ་བ་ནི་མེ་ལོང་དང༌། པི་ཝང་དང༌། དྲིའི་དུང་ཆོས་དང༌། རོའི་སྣོད་དང༌། གོས་སྣ་ཚོགས་དང༌། ཆོས་འབྱུང་བ་ནི་རྩ་བའི་ཕྱག་མཚན་ནོ། །སྐུ་སོགས་ཞེས་བྱ་བ་ནི་སྐུ་མདོག་དང༌། ཞལ་དང་ཕྱག་མཚན་གཞན་ནི་རྣམ་པར་སྣང་མཛད་ལ་སོགས་པ་འཁོར་ལོས་སྒྱུར་བ་དྲུག་པོ་དང་འདྲ་བའོ། །དེ་ཉིད་གསུམ་གྱིས་ཞེས་བྱ་བ་ནི་ཨོཾ་ཨཱཿཧཱུཾ་ཞེས་བྱ་བ་འདིས་ཡང་དག་པར་བསྐུལ་ལ་གདོན་པར་བྱའོ་ཞེས་བྱ་བའི་དོན་ཏོ། །དྲུག་པོ་འདི་དག་ནི་གོ་རིམས་བཞིན་དུ་སྦྱིན་པ་ལ་སོགས་པ་ཕ་རོལ་ཏུ་ཕྱིན་པ་དྲུག་གི་ངོ་བོ་ཉིད་ཡིན་ནོ་ཞེས་དཀྱིལ་འཁོར་གྱི་དེ་ཁོ་ན་ཉིད་འོག་ནས་འཆད་པ་ལས་བསྟན་ཏོ། །ལྷ་མོ་བཅུ་པོ་འདི་དག་ཀྱང་ཟླ་བའི་གདན་དང་རིན་པོ་ཆེའི་ཅོད་
པན་ཅན་རང་གི་ཐབས་ལ་འཁྱུད་པའོ། །ཡམས་འཇོམས་ཞེས་བྱ་བ་ནི་སྤྱིའི་ཉེ་བར་འཚེ་བ་འཇོམས་པ་སྟེ། ཕུང་པོའི་བདུད་དང༌། ཤེས་བྱའི་སྒྲིབ་པ་འཇོམས་པའི་ཕྱིར་རོ། །ཁྲོ་བོའི་སྐྱིལ་མོས་གནས་ཞེས་བྱ་བའི་ཚིག་ནི་ཁྲོ་བོ་ཐམས་ཅད་ཀྱི་སྤྱིའི་ཡིན་ཏེ། གཡོན་བརྐྱང་བས་ཞེས་བྱ་བའི་དོན་ཏོ། །རབ་འབར་ཞེས་བྱ་བ་ནི་དྲག་པོའི་ལྟ་བས་སོ། །སྲེད་འཇོམས་ཞེས་བྱ་བ་ནི་སྲིད་པའི་སྲེད་པ་འཇོམས་པ་སྟེ། འདིས་ཉོན་མོངས་པའི་སྒྲིབ་པ་ཅན་གྱི་ཉོན་མོངས་པའི་བདུད་དང༌། བདག་ཏུ་ལྟ་བ་འཇོམས་པའི་ཕྱིར་རོ། །འདོད་འཇོམས་ཞེས་བྱ་བ་ནི་མྱ་ངན་ལས་འདས་པར་སྲེད་པ་འཇོམས་པ་སྟེ། མི་གནས་པའི་མྱ་ངན་ལས་འདས་པ་ལ་དགྱེས་པའི་ཕྱིར་རོ། །དྲག་པོའི་ཧཱུཾ་གིས་མགུར་གྱི་ཕྱོགས་འགེངས་པས་ན་གཏུམ་ཞིང་སྒྲ་ཟབ་ཅེས་བྱའོ། །བྱ་བ་ལྷ་ཡི་བདུད་དག་ཉིད། །ཅེས་བྱ་བ་ནི་ལས་ཀྱི་སྒྲིབ་པ་དང་ལྷའི་བུའི་བདུད་བཅོམ་པའི་ཕྱིར་རོ། །དེ་ཉིད་ཀྱི་ཕྱིར་བགེགས་ཀྱི་མཆོག་འཇོམས་པའོ། །འདི་རྣམས་ཞེས་བྱ་བ་ནི་ཁྲོ་བོ་བཞི་པོ་འདི་དག་སྨིན་མ་གཉིས་འདེགས་པའོ། །ཡང་འདི་དག་དབུ་སྐྲ་གྱེན་དུ་འབར་བ་དང༌། སྨ་ར་དང༌། སྨིན་མ་དང༌། སྤྱན་དག་དམར་སེར་དུ་འདུག་པ་ཡིན་པས་ན། སྨིན་འདེགས་དབུ་སྐྲ་གྱེན་དུ་འབར། །སྨ་ར་སྨིན་མ་སྤྱན་དམར་སེར། །ཞེས་བྱའོ། །ཞལ་གདངས་ཞེས་བྱ་བ་ནི་ཞལ་རྣམ་པར་ཕྱེ་བའོ། །ཡང་འདི་རྣམས་ཀྱི་རྩ་བའི་ཕྱག་མཚན་ནི་ཐོ་བ་དང༌། དབྱིག་པ་དང༌། པདྨ་དང༌། རྡོ་རྗེ་ཁ་གྱེན་དུ་གྱེས་པའོ། །ལྷག་མ་ནི་རལ་གྲི་ལ་སོགས་པའོ། །ཡང་འདི་རྣམས་ཁྲོས་པའི་སྤྲུལ་གདུག་པས་སྐུ་ལ་བརྒྱན་པ་དང༌། ཡན་ལག་འདུས་ཞེས་བྱ་བ་འཁྱུད་པས་གནས་པ་ཡིན་ནོ། །དཀྱིལ་འཁོར་བ་ཐམས་ཅད་ནི་བདག་པོ་ལ་མངོན་པར་ཕྱོགས་པའོ། །ཀུན་ནས་ཞེས་བྱ་བ་ནི་རང་རང་གི་གནས་སུའོ། །རང་གི་དངོས་པོ་ཡིས་ཞེས་བྱ་བ་ནི་རང་རང་གི་ཚུལ་གྱིས་སོ། །སྙིང་པོའི་ས་བོན་གྱི་འོད་ཉིད་ལྕགས་ཀྱུ་ཡིན་ཏེ། འགུགས་པར་བྱེད་པའི་ཕྱིར་རོ། །དེས་འཇམ་པའི་རྡོ་རྗེ་ཡེ་ཤེས་ཀྱི་དཀྱིལ་འཁོར་གྱི་ཚུལ་ཀུན་ནས་བསྡུས་ཤིང་སྤྱན་དྲངས་ལ། སངས་རྒྱས་མདུན་ན་བཞུགས་པ་མཐོང་བ་དང་འདྲ་བར་བསམས་ཏེ། དེ་དང་ལྷན་ཅིག་འོངས་པའི་བགེགས་གཤིན་རྗེ་གཤེད་
ལ་སོགས་པས་ཀུན་དུ་བསྐྲད་ལ། ཡང་སླར་དེ་དག་མི་འཇུག་པར་བྱ་བའི་ཕྱིར་དེ་རྣམས་ཉིད་ཀྱིས་དཀྱིལ་འཁོར་མངོན་པར་བསྲུངས་ཏེ། དེ་རྣམས་ལ་ཟླ་བ་ལ་སོགས་པ་དང༌། མེ་ཏོག་ལ་སོགས་པ་དང་ཡང་ལྡན་པའི་མཆོད་ཡོན་འཇམ་པའི་རྡོ་རྗེའི་སྔགས་བཟླས་པ་ཕུལ་ལ། ཡེ་ཤེས་ཀྱི་འཁོར་ལོ་དེ་རང་གི་འཁོར་ལོ་ལ་གཞུག་ཅིང་ནང་དུ་ཆུད་པར་བསམ་མོ་ཞེས་སྦྱར་རོ། །གཞན་ཡང་ཇི་ལྟ་བུ་ཞེ་ན། སའི་སྙིང་པོ་ལ་སོགས་པ་དང་སྐུ་རྡོ་རྗེ་ལ་སོགས་པས་མིག་དང་སྐུ་ལ་སོགས་པ་བྱིན་གྱིས་བརླབ་པར་བྱའོ། །སྔོན་བཞིན་ཞེས་བྱ་བ་ནི་ནུ་མའི་བར་དུ་ཡེ་ཤེས་སེམས་དཔའ་རྣམ་པར་བསམས་ལ། རང་གི་ཡེ་ཤེས་སེམས་དཔའ་སྙིང་པོའི་ས་བོན་གྱི་འོད་ཟེར་གྱིས་ཕྱོགས་བཅུའི་དེ་བཞིན་གཤེགས་པ་རྣམས་བསྐུལ་ལ་དེའི་སྙིང་པོའི་འོད་ཟེར་ལས་བྱུང་བའི་རིག་པའི་ཚོགས་རྣམས་རིན་པོ་ཆེའི་བུམ་པའི་ཆུ་བླུགས་པས་དེ་རྣམས་ལ་དབང་བསྐུར་བར་བསམ་པར་བྱའོ། །འདི་དག་གིས་ཅིར་འགྱུར་ཞེ་ན། རྒྱུ་མཐུན་པ་ལ་སོགས་ཞེས་བྱ་བ་ལ་སོགས་པ་སྨོས་ཏེ། རྒྱུ་མཐུན་པ་དང་རྣམ་པར་སྨིན་པ་ལ་སོགས་པའི་འབྲས་བུ་ཆེན་པོ་དང༌། བསྙེན་པ་དང༌། ཉེ་བར་སྒྲུབ་པ་ལ་སོགས་པའི་ཡན་ལག་ཆེན་པོ་ཉིད་དུ་འགྱུར་རོ་ཞེས་བྱ་བའི་ཐ་ཚིག་གོ །དེ་ལ། སྙིང་ཟླའི་རལ་གྲིའི་སྙིང་པོའི་འོད། །ཅེས་བྱ་བ་ནས་བརྩམས་ཏེ། །འཁོར་ལོ་ལ་གཞུག་ཅེས་བྱ་བའི་བར་གྱིས་ནི་བསྙེན་པའི་ཡན་ལག་ཆེན་པོ་དང༌། རྒྱུ་མཐུན་པའི་འབྲས་བུ་ཆེན་པོ་བསྟན་པ་ཡིན་ནོ། །ཅིག་ཤོས་གཉིས་གཉིས་ནི་དཀྱིལ་འཁོར་བའི་མིག་ལ་སོགས་པ་བྱིན་གྱིས་བརླབ་པ་དང༌། སྐུ་ལ་སོགས་པ་བྱིན་གྱིས་བརླབ་པ་དང་དབང་བསྐུར་བ་ལས་སོ། །དབང་བསྐུར་བ་ཡོངས་སུ་གྱུར་པས་ཅོད་པན་དུ་འཁོར་ལོས་སྒྱུར་བས་བྱིན་གྱིས་བརླབ་པའི་ཕྱིར་དབང་བསྐུར་བའི་མཐར་ཐུག་པ་ཡིན་ལ། དེར་གང་གི་ཅོད་པན་དུ་གང་ཞིག་བཞུགས་པ་དེ་བསྟན་པའི་ཕྱིར་སངས་རྒྱས་ཞེས་བྱ་བ་ལ་སོགས་པ་སྨོས་ཏེ། སྒོ་བ་རྣམས་ཞེས་བྱ་བ་ནི་སྒོ་སྲུང་སྟེ་དེས་དབང་བསྐུར་རོ་ཞེས་སྦྱར་རོ། །མི་བསྐྱོད་པའི་ཅོད་པན་ལ་ནི་རྡོ་རྗེ་སེམས་དཔའོ། །དེའི་ཅོད་པན་ལ་ནི་མི་བསྐྱོད་པའོ། །ཞེས་བཤད་དོ། །དེ་ལྟར་དབང་བསྐུར་ཞེས་བྱ་བ་ནི་ཚུལ་དེ་ལྟར་དབང་བསྐུར་བར་གྱུར་ནས། གཞུག་ཅེས་བྱ་བ་ནི་རང་གི་ཁ་ནས་བཅུག་སྟེ་ཞུ་བར་གྱུར་པ་དང༌། ཞུ་
བ་དེ་ཉིད་ལས་ཤེས་རབ་ཀྱི་བ་སྤུའི་བུ་གར་གནས་པའི་གཟུགས་རྡོ་རྗེ་ལ་སོགས་པའི་རང་བཞིན་ཅན་གྱི་འོད་ཟེར་གཞལ་ཡས་ཁང་གི་འོད་ལས་འདས་ནས་ཞེས་བྱ་བ་ནི་འདིར་ཕྱིའི་གཟུགས་ལ་སོགས་པ་ཞེས་བྱ་བ་ནི་ལྷག་མའོ། །མཆོད་དང་མཆོད་པའི་བདག་ཅན་གྱུར། །ཞེས་བྱ་བས་ནི་ང་རྒྱལ་བཤད་པ་ཡིན་ནོ། །ཆོས་རྣམས་ཀུན་ཞེས་བྱ་བ་ནི་དངོས་པོ་ཐམས་ཅད་ཀྱིས་སོ། །བསྟོད་ཅེས་བྱ་བ་ནི་བསྟོད་པ་བྱེད་དུ་གཞུག་པའོ། །རང་གི་བདག་ཉིད་རྫོགས་སངས་སྐུས། །ཞེས་བྱ་བ་ལ་རང་གི་ཞེས་བྱ་བ་ནི་བདག་པོའིའོ། །བདག་ཉིད་སྐུས་ཞེས་བྱ་བ་ནི་དེ་ཁོ་ན་ཉིད་ཀྱི་སྐུས་ཏེ། རང་གི་བདག་ཉིད་ཀྱི་གཟུགས་རྫོགས་པའི་སངས་རྒྱས་ཀྱི་སྐུར་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་ཡང་དེ་བཞིན་ཉིད་དང་སེམས་ཙམ་ཉིད་གང་ཡིན་པ་དེ་ནི་ཆོས་ཐམས་ཅད་ཀྱི་སྤྱིའི་མཚན་ཉིད་ཡིན་ལ། དེ་ཡང་དཀྱིལ་འཁོར་གྱི་བདག་པོ་ཉིད་ཡིན་ཏེ། དེ་བས་ན་ཐམས་ཅད་ནི་བདག་ཉིད་ཡིན་ནོ་ཞེས་བྱ་བ་དང་སེམས་ཙམ་ཉིད་ཡིན་ནོ་ཞེས་བྱ་བ་དང༌། ཐམས་ཅད་རྡོར་ཇེ་འཆང་བ་ཉིད་ཡིན་ནོ་ཞེས་བྱ་བའམ། འཇམ་པའི་རྡོ་རྗེ་ཉིད་ཡིན་ནོ་ཞེས་བྱ་བའི་ཚུལ་དེས་ཆོས་ཐམས་ཅད་ལན་ཅིག་གིས་མཐོང་བར་ནུས་པ་ཡིན་ནོ། །དེའི་ཕྱིར་རང་གི་བདག་ཉིད་སྐུས།། ཞེས་བྱ་བ་འདི་ཙམ་ཞིག་སྨོས་པར་རིགས་ཀྱི། རང་གི་བདག་ཉིད་རྫོགས་སངས་རྒྱས། །ཞེས་བྱ་བ་འདི་ནི་མི་རིགས་སོ། །དེ་ཡང་སངས་རྒྱས་རྣམས་ནི་ཁྱད་པར་གྱི་མཚན་ཉིད་ཅན་ཡིན་ལ། དེ་ཡང་ལྔ་པོ་ཡིན་ན་དེ་རྣམས་ཀྱི་མཐའ་ཡས་བའི་ཆོས་རྣམས་རྣམ་པར་ཕྱེ་བར་མཐོང་བར་ཇི་ལྟར་ནུས་ཤེ་ན། དེའི་ཕྱིར། ཡེ་ཤེས་ལྔ་དང་ཕྱག་རྒྱ་དང༌། །རིགས་བརྒྱ་ལྔ་དང་གསུམ་གྱིས་སོ། །ཞེས་བྱ་བ་སྨོས་ཏེ། འདི་ནི་ཆོས་ཐམས་ཅད་ནི་སེམས་ཙམ་ཡིན་ལ། སེམས་ཅན་རྣམས་ནི་སེམས་ཀྱི་རྒྱུན་གྱི་མཚན་ཉིད་ཅན་ཡིན་ཞིང༌། སེམས་ཅན་ཡང་དེ་བཞིན་གཤེགས་པའི་སྙིང་པོ་ཅན་ཡིན་པས་དེ་བཞིན་གཤེགས་པའི་ཆོས་ཐམས་ཅད་བསྡུས་པ་ནི་མེ་ལོང་ལྟ་བུ་ལ་སོགས་པ་ཡེ་ཤེས་ལྔ་པོ་ཐོག་མ་དང་ཐ་མ་མེད་པ་ཡིན་ལ། དེ་ཡང་ཆོས་ཉིད་ཀྱི་སྐུས་རང་བཞིན་གྱིས་ཡོངས་སུ་དག་པ་ཉིད་ཡིན་པས་ན་གློ་བུར་བའི་སྒྲིབ་པའི་དྲི་མ་ཙམ་རྣམ་པར་དག་པར་གྱུར་ནས་
རང་རང་གི་ངོ་བོར་གནས་པར་གྱུར་པ་ན་ཡེ་ཤེས་ལྔ་ཞེས་བྱ་བ་དང༌། སངས་རྒྱས་ཀྱི་བྱང་ཆུབ་ཅེས་བྱ་བ་འཐོབ་པར་འགྱུར་རོ། །དེ་ལྟར་ན་སྔར་ནི་ས་བོན་ཞེས་བྱ་བ་ཉིད་ཡིན་ནོ། །དེ་བས་ན་བྱང་ཆུབ་སེམས་དཔའི་ས་བོན་དུ་གྱུར་པས་རིགས་དང་རྒུད་ཅེས་ཀྱང་བཤད་དོ། །ཕྱག་རྒྱ་ཞེས་བྱ་བ་ནི་ཕྱག་རྒྱའི་དབྱེ་བས། རིགས་བརྒྱ་དང༌། རིགས་ལྔ་དང༌། རིགས་གསུམ་དུ་བཤད་དོ། །དེའི་དོན་ནི་འདི་ཡིན་ཏེ། ཆོས་རྣམས་མཐའ་ཡས་པ་ཡིན་མོད་ཀྱི། འོན་ཀྱང་ཕྱག་རྒྱ་བརྒྱ་འམ། ཕྱག་རྒྱ་ལྔ་འམ་ཕྱག་རྒྱ་གསུམ་གྱིས་ཉེ་བར་མཚོན་པ་ཉིད་ཀྱིས་ཕྱག་རྒྱ་ཉི་ཤུས་རྒྱས་བཏབ་པས་ཁྱད་པར་གྱི་མཚན་ཉིད་ཅན་གྱི་སངས་རྒྱས་རྣམས་ཀྱི་རང་བཞིན་མཐོང་བར་ནུས་པ་ཡིན་ནོ། །ཇི་ལྟར་ན་རིགས་གསུམ་ཡིན་ཞེ་ན། ང་རྒྱལ་དང་ཕྲག་དོག་གཉིས་ནི་ཤེས་རབ་ཀྱི་རང་བཞིན་འདོད་ཆགས་ཀྱི་རིགས་ཀྱི་ནང་དུ་འདུས་པ་ཡིན་པའི་ཕྱིར་རོ། །ཇི་ལྟར་ན་རིགས་བརྒྱར་འགྱུར་ཞེ་ན། ཕུང་པོ་དང་སྐྱེ་མཆེད་དང་ཁམས་ཀྱི་ཕྱག་རྒྱ་རྣམས་རེ་རེ་ཞིང་ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་དང༌། སྣ་ཚོགས་པའི་ཚུལ་གྱི་དབྱེ་བ་རྣམ་པ་ལྔ་ལྔར་ཕྱེ་བས་སོ། །ཇི་ལྟར་ཕྱག་རྒྱ་ཉི་ཤུ་ཡིན་ཞེ་ན་ལེའུ་བཅོ་བརྒྱད་པ་ལས། ཕུང་པོ་སྐྱེ་མཆེད་ཁམས་རྣམས་ནི། །ཕྱག་རྒྱ་ཡིས་ནི་རྒྱས་གདབ་པོ། །ཞེས་བྱ་བ་དང༌། ཡང༌། གང་ཞིག་གཟུགས་དང་ཚོར་དང་འདུ་ཤེས་འདུ་བྱེད་དང༌། །རྣམ་པར་ཤེས་དང་སྐྱེ་མཆེད་དྲུག་ངད་དབང་པོ་དྲུག །ས་ཆུ་མེ་དང་རླུང་དང་ནམ་མཁའ་ཐམས་ཅད་ནི། །བྱང་ཆུབ་སེམས་འདྲ་རྒྱ་ཆེན་དེ་ལ་ཕྱག་འཚལ་ལོ། །ཞེས་ཇི་སྐད་བཤད་པ་ལྟ་བུའོ། །གླེང་གཞི་ལས་ཀྱང༌། ཕྱག་རྒྱ་འདི་དག་ཁོ་ན་ཙམ་བཤད་དེ། །བྱང་ཆུབ་སེམས་དཔའ་དམ་ཚིག་རྡོ་རྗེ་དང༌། ཞེས་པ་ནས་བརྩམས་ཏེ། དེ་བཞིན་གཤེགས་པ་རྡོ་རྗེ་གདོན་མི་ཟ། །ཞེས་བྱ་བའི་བར་དུ་གསུངས་པ་དང༌། ལེའུ་བཅུ་བདུན་པ་ལས་ཀྱང༌། །ཕུང་པོ་ལྔ་ནི་མདོར་བསྡུ་ན། །སངས་རྒྱས་ལྔར་ནི་རབ་ཏུ་གྲགས། །རྡོ་རྗེ་སྐྱེ་མཆེད་ཉིད་དག་ཀྱང༌། །བྱང་ཆུབ་སེམས་དཔའི་དཀྱིལ་འཁོར་རོ་།ས་ནི་སྤྱན་ཞེས་བྱ་བར་བཤད། །ཆུ་ཡི་ཁམས་ནི་མཱ་མ་ཀཱི། །མེ་ཡི་ཁམས་ནི་གོས་དཀར་མོ། །སྒྲོལ་མ་རླུང་དུ་རབ་ཏུ་གྲགས། །མཁའ་དབྱིངས་དམ་ཚིག་དེ་
ཉིད་ནི། །རྡོ་རྗེ་འཛིན་པ་ཉིད་དུ་དྲན། །གཟུགས་ཚོར་ལ་སོགས་སྔགས་པ་ཡིས། །ལྷ་ཉིད་དུ་ནི་རྣམ་པར་བསྒོམ། །ཞེས་ཇི་སྐད་བཤད་པ་ལྟ་བུའོ། །དེ་བས་ན་ཆོས་ཇི་སྙེད་པ་དེ་རྣམས་ནི་རིགས་ལྔའི་དབྱེ་བ་ཉིད་ཡིན་པས་རིགས་བརྒྱའོ། །ལ་ལ་ན་རེ་བརྒྱའི་སྒྲ་ནི་ཉེ་བར་མཚོན་པ་ཙམ་ཡིན་པའི་ཕྱིར་སངས་རྒྱས་ལྔ་པོ་ནི་དབྱེ་བ་སྣ་ཚོགས་པའི་རང་བཞིན་ཅན་གྱི་ཆོས་ཐམས་ཅད་ཡིན་པས་ན་དེ་ལྟ་བུའི་ཚུལ་དེ་ཉིད་ལ་བྱས་ནས་དེ་རྣམས་ཀྱི་ཞེས་བརྗོད་པར་བྱའོ། །ཡང་ན་དཀྱིལ་འཁོར་གྱི་བདག་པོ་ནི་བསྟོད་པར་བྱ་བ་ཉིད་ཡིན་ལ། དཀྱིལ་འཁོར་པ་རྣམས་ནི་སྟོད་པར་བྱེད་པར་རིགས་པ་ཡིན་ན། ཆོས་རྣམས་ཀུན་གྱི་འཁོར་ལོར་བསྟོད། །ཅེས་བྱ་བ་ཅིའི་ཕྱིར་བརྗོད་ཅེ་ན། དེའི་ཕྱིར། རང་གི་བདག་ཉིད་རྫོགས་སངས་སྐུ། །ཞེས་བྱ་བ་སྨོས་ཏེ། རྫོགས་སངས་སྐུས་ཞེས་བྱ་བ་གཙོ་བོར་བསྟན་པས་དཀྱིལ་འཁོར་པ་ཐམས་ཅད་གཟུང་ངོ་། །རང་གི་བདག་ཉིད་ཅེས་བྱ་བ་ནི་བདག་པོའི་བདག་ཉིད་དེ་དཀྱིལ་འཁོར་བ་དང་དཀྱིལ་འཁོར་གྱི་བདག་པོའི་སྐུ་འདི་ཡིན་པས་དེ་སྐད་ཅེས་བྱའོ། །དེ་ཡང་དཀྱིལ་འཁོར་གྱི་བདག་པོ་ནི་ཆོས་ཐམས་ཅད་ཀྱི་སྤྱིའི་མཚན་ཉིད་ཡིན་ལ། དཀྱིལ་འཁོར་བ་ནི་ཁྱད་པར་གྱི་མཚན་ཉིད་ཡིན་ནོ།། དེ་བས་ན་བདག་པོ་བསྟོད་པས་དཀྱིལ་འཁོར་པ་ཡང་བསྟོད་པ་ཡིན་ཏེ། དབྱེ་བ་མེད་པའི་ཕྱིར་རོ། །དཀྱིལ་འཁོར་པ་ཐམས་ཅད་ཀྱི་བསྟོད་པར་གྱུར་པས་ན་ཆོས་ཐམས་ཅད་ཀྱི་བསྟོད་པར་གྱུར་པ་ཡིན་ནོ། །མི་བསྐྱོད་པ་ལ་སོགས་པའི་མཚན་སྨོས་པ་ཉིད་ཀྱིས་བསྟོད་པ་ནི་འདི་རྣམས་ཁོ་ན་ཡིན་གྱི། དཀྱིལ་འཁོར་གྱི་བདག་པོའི་ཡང་མ་ཡིན་ལ་དཀྱིལ་འཁོར་པ་རྣམས་ཀྱི་ཡང་མ་ཡིན་ནོ་ཞེ་ན། ཡེ་ཤེས་ལྔ་དང་ཞེས་བྱ་བ་ལ་སོགས་པ་སྨོས་ཏེ། རྡོ་རྗེ་སེམས་དཔའི་རང་བཞིན་ཡེ་ཤེས་ལྔ་པོ་ཉིད་ཕྱག་རྒྱའི་དབྱེ་བས་རིགས་བརྒྱ་དང༌། རིགས་ལྔ་དང༌། རིགས་གསུམ་དུ་འགྱུར་བ་ཡིན་ལ་རྡོ་རྗེ་སེམས་དཔའི་བདག་ཉིད་ནི་དཀྱིལ་འཁོར་གྱི་བདག་པོ་ཡིན་ནོ་ཞེས་བྱ་བ་འདི་ནི་གྲགས་པ་ཉིད་ཡིན་ནོ། །དེ་བས་ན་རིགས་ལྔའི་བདག་ཉིད་དང་རྡོ་རྗེ་འཆང་བའི་བདག་ཉིད་ཡིན་པ་ཉིད་ཀྱི་ཕྱིར་བསྟོད་པ་འདི་ནི་དཀྱིལ་འཁོར་གྱི་བདག་པོའི་བསྟོད་པ་ཡིན་ལ། དེའི་ཡིན་པ་
དང་དཀྱིལ་འཁོར་བའི་ཡང་ཡིན་ཏེ་དབྱེ་བ་མེད་པའི་ཕྱིར་རོ། །དེ་བས་ན་མི་རིགས་པ་མེད་དོ། །མི་བསྐྱོད་རྡོ་རྗེ་ཞེས་བྱ་བ་ལ་སོགས་པ་འདི་ལེའུ་བཅུ་བདུན་པ་ལས་གསོལ་བ་འདེབས་པར་གསུངས་པ་ཡིན་མོད་ཀྱི། འོན་ཀྱང་ཕྱག་འཚལ་བ་དང་ལྡན་པ་དང༌། དེ་བཞིན་དུ་ལྔ་པོ་འདི་དག་གཙོ་ཆེར་བསྟོད་པའི་ཚིག་ཡིན་པའི་ཕྱིར་ཏེ། དེ་ཡང་ཚིགས་སུ་བཅད་པ་དྲུག་པ་ལས། སངས་རྒྱས་ཀུན་གྱི་བསྐུལ་བ་ཡི། །བསྟོད་ཚིག་བཞི་པ་འདི་རྣམས་ཀྱིས། །རྡོ་རྗེ་ལོངས་སྤྱོད་བསྟོད་ན་ནི། །དེ་ཡང་སངས་རྒྱས་འདྲ་བར་འགྱུར། །ཞེས་གསུངས་པའི་ཕྱིར་རོ། །དེ་ལ་རྣམ་པར་སྣང་མཛད་ལ་སོགས་པའི་ཚིག་ཁྱད་པར་དང་བཅས་པ་རྣམས་ཀྱིས་རྣམ་པར་སྣང་མཛད་ལ་སོགས་པའི་ཚུལ་གྱི་ཚིགས་བཅད་རེ་རེས་བདག་པོ་ནི་མེ་ལོངས་ལྟ་བུ་ལ་སོགས་པའི་ཡེ་ཤེས་ཀྱི་བདག་ཉིད་ཅན་ཡིན་པར་སྟོན་ལ། རྡོ་རྗེ་སེམས་དཔའི་སྒྲས་ནི་རྡོ་རྗེ་འཆང་བ་སངས་རྒྱས་ལྔའི་བདག་ཉིད་ཅན་དང༌། ཡེ་ཤེས་ལྔའི་སྙིང་པོའི་དེ་རང་བཞིན་ཅན་ཡིན་པར་ཅིག་ཅར་སྟོན་ཏོ། །མི་བསྐྱོད་རྡོ་རྗེ་ཞེས་བྱ་བ་ནི་རྡོ་རྗེ་ཉིད་དེ་ཡེ་ཤེས་ཀྱི་སྙིང་པོ་ཅན་ཡིན་པའི་ཕྱིར་རོ། །ཡེ་ཤེས་ཆེ་ཞེས་བྱ་བ་ནི་ཆེ་བ་ཉིད་དེ། ཀུན་ནས་ཉོན་མོངས་པ་ཐམས་ཅད་རྩ་བ་ནས་བཏོན་པའི་ཕྱིར་རོ། །རྡོ་རྗེ་དབྱིངས་ཞེས་པ་ནི་སངས་རྒྱས་རྣམས་ཀྱི་རྒྱུ་སྟེ། སངས་རྒྱས་རྣམས་ནི་ཐུགས་ཀྱི་སྐྱེ་གནས་ལས་འཁྲུངས་པའི་ཕྱིར་རོ། །གང་གི་ཕྱིར་ཡེ་ཤེས་ཆེན་པོའི་ཡིན་བདེ་ཉིད་ཀྱི་ཕྱིར་མཁས་པ་ཆེན་པོ་སྟེ། ཡེ་ཤེས་དང་ཤེས་པ་པོ་ཁྱད་པར་མེད་པའི་ཕྱིར་རོ། །སྐུ་དང་གསུང་དང་ཐུགས་ཀྱི་དཀྱིལ་འཁོར་རྣམས་ཐུགས་ཀྱིས་བསྡུས་པ་ཡིན་པས་ན་དཀྱིལ་འཁོར་མཆོག་གསུམ་མོ། །སྐུ་དང་གསུང་དང་ཐུགས་ཀྱི་རྡོ་རྗེ་ནི་ཐུགས་ཀྱི་ལ་རག་ལས་པས་ན་རྡོ་རྗེ་གསུམ་མོ། །རྡོ་རྗེ་དབྱངས་ལ་ཞེས་བྱ་བ་ནི་གསང་བ་གསུངས་ཤིག་ཅེས་བྱ་བའི་དོན་ཏོ། །ཕྱག་འཚལ་ལོ་ཞེས་བྱ་བ་ནི་རབ་ཏུ་འདུད་པའོ། །སྒྲིབ་པ་རྣམས་ཤིན་ཏུ་སྤངས་པས་ན་དག་པ་ཆེ་ཞེས་བྱའོ། །འཚེ་བ་རྣམས་ཤིན་ཏུ་ཉེ་བར་ཞི་བའོ། །འགྲོ་བའི་དོན་དུ་ནམ་མཁའ་ཇི་སྲིད་ཀྱི་བར་དུ་བཞུགས་པས་ནི་དགའ་བ་ཆེན་པོའོ། །དེ་ཡང་ཆོས་ཉིད་ཀྱི་སྐུ་རང་བཞིན་གྱིས་གྲུབ་པ་ཡིན་
པས་ན་རང་བཞིན་གྱིས་འོད་གསལ་བའོ། །མཆོག་དུ་གྱུར་བ་དེ་བཞིན་གཤེགས་པ་རྣམས་ཀྱི་མཆོག་ཡིན་པས་ན་མཆོག་གི་མཆོག་སྟེ། མཉམ་པ་ཉིད་ཀྱི་ཡེ་ཤེས་ལ་སོགས་པ་ནི་མེ་ལོང་ལྟ་བུའི་ཡེ་ཤེས་ལ་བརྟེན་པ་ཡིན་པའི་ཕྱིར་རོ། །སྟོན་པ་ཞེས་པ་ནི་སྟོན་པར་མཛོད་ཅིག་པའོ། །རིན་ཆེན་རྒྱལ་པོ་ཞེས་བྱ་བ་ནི་འཁོར་ལོས་སྒྱུར་བ་ཉིད་ཡིན་པས་རྒྱལ་པོའོ། །རབ་ཏུ་ཟབ་ཅེས་བྱ་བ་ནི་སངས་རྒྱས་དང་སངས་རྒྱས་མ་ཡིན་པ་དང༌། སེམས་ཅན་ཐམས་ཅད་བདག་དང་མཉམ་པར་མཁྱེན་པའི་ཕྱིར་རོ། །རྡོ་རྗེ་ནམ་མཁའ་ཞེས་བྱང་ནི་མཚན་མ་མེད་པའི་རྣམ་པ་ཅན་ཡིན་པའི་ཕྱིར་དང༌། །སྙིང་པོ་ཅན་ཉིད་ཡིན་པའི་ཕྱིར་རོ། །དྲི་མེད་མཁའ་ཞེས་བྱ་བ་ནི་སྒྲིབ་པའི་དྲི་མ་ཐམས་ཅད་དང་བྲལ་བས་ནམ་མཁའ་དང་འདྲ་བའི་ཕྱིར་རོ། །རང་བཞིན་དག་པ་ཞེས་བྱ་བ་ནི་དྲི་མ་རྣམས་ནི་དེའི་རང་བཞིན་མ་ཡིན་པའི་ཕྱིར་རོ། །གོས་པ་མེད་ཅེས་བྱ་བ་ནི་རང་བཞིན་གྱིས་རྣམ་པར་དག་པ་ལ་གློ་བུར་བའི་དྲི་མ་རྣམས་ཀྱིས་ཀྱང་དེ་ལ་གནོད་པར་མི་ནུས་པའི་ཕྱིར་རོ། །རྡོ་རྗེ་སྐུ་ལ་ཞེས་བྱ་བ་ནི་རྡོ་རྗེ་སྐུའི་གསང་བ་གསུངས་ཤིག་པའོ། །ཆོས་ཐམས་ཅད་ཀྱི་དབང་ཕྱུག་ཏུ་གྱུར་པས་ན་རྒྱལ་པོ་ཆེའོ། །བརྗོད་དུ་མེད་པས་ན་མི་རྟོག་པའོ། །དེ་ཉིད་ཀྱིས་ན་མཚན་མ་ཐམས་ཅད་རོ་གཅིག་པའི་ཕྱིར། ནམ་མཁའ་རྡོ་རྗེ་འཛིན་ཞེས་བྱ་བ་སྟེ། རྡོ་རྗེ་ཉིང་ནི་རྡོ་རྗེ་འཛིན་པའོ། །ཆོས་ཐམས་ཅད་ཀྱི་དོན་དམ་པའི་དེ་ཁོ་ན་ཉིད་ལ་རྣམ་པར་དཔྱོད་པ་གང་ཡིན་པ་དེ་ནི་འདོད་ཆགས་ཀྱི་ཕ་རོལ་ཏུ་ཕྱིན་པ་སྟེ་དེ་བརྙེས་པའོ། །རྡོ་རྗེ་གསུང་ཞེས་བྱ་བ་ནི་གསང་བ་གསུངས་ཤིག་པའོ། །རྣམ་པ་ཐམས་ཅད་ཀུན་ནས་ཐུགས་སུ་ཆུད་པས་ན་རྫོགས་སངས་རྒྱས་སོ། །བསམ་པ་ཡང་ཡིན་ལ། ཐམས་ཅད་ཀྱང་ཡིན་པས་བསམ་པ་ཐམས་ཅད་དམ་ཐམས་ཅད་ཀྱི་བསམ་པ་ནི་བསམ་པ་ཐམས་ཅད་དེ། དེ་ཡོངས་སུ་རྫོགས་པར་མཛད་པའོ། །རང་བཞིན་གྱིས་ཡོངས་སུ་དག་པའི་རང་བཞིན་ཅན་གྱི་དངོས་པོ་རྣམས་ཀྱི་ཡོངས་སུ་གྱུར་པའི་ཡེ་ཤེས་གང་ཡིན་པ་དེ་ནི་རང་བཞིན་ཅན་ཡིན་པས་ན། རང་བཞིན་དག་པ་ཉིད་ལས་བྱུང༌། །ཞེས་བྱའོ། །ཟླ་བ་ཉི་མ་ཞེས་བྱ་བ་ལ་ཟླ་བ་
ལ་སོགས་པ་ལྔ་པོ་རླུང་དང་མེའི་དཀྱིལ་འཁོར་ལ་བརྟེན་པའི་པདྨའི་སྣོད་ལ་གནས་པ་ཨོཾ་གྱིས་བྱིན་གྱིས་བརླབས་པ་རྡོ་རྗེ་དང་ཡང་དག་པར་ལྡན་པ་འབར་བ་དང་དེ་སྲེག་པ་དང་སྣང་བ་དབྱེད་པས་ཤེལ་ལྟར་དང་བའི་ཡེ་ཤེས་ཀྱི་བདུད་རྩིར་གྱུར་པ་འོད་ཟེར་གྱིས་ཕྱོགས་བཅུ་ནས་བཀུག་པའི་བདུད་རྩི་དང་རོ་གཅིག་ཏུ་གྱུར་པ་དང་ཡི་གེ་གསུམ་གྱིས་བྱིན་གྱིས་བརླབས་པར་བསམས་ལ། དེས་སིང་གའི་ཟླ་བར་ཆུད་པའི་མ་ལུས་པའི་འཁོར་ལོ་ཚིམ་པར་བྱའོ། །དེ་ཡང་ཧཱུཾ་བཀོད་པའི་རྡོ་རྗེ་མཆོག་དང་ལྡན་པའི་ལྕེ་དང་ལྡན་པས་བྱའོ་ཞེས་བྱ་བའི་དོན་ཏོ། །སེམས་བརྟན་པར་གནས་པར་བྱ་བའི་ཕྱིར། ཐིག་ལེའི་རྣལ་འབྱོར་བརྟན་པ་ནི་སྙིང་བོའི་འོད་ཀྱི་ཞེས་བྱ་བ་ལ་སོགས་པ་སྨོས་པ་ཡིན་ཏེ། མགོན་པོས་ཞེས་བྱ་བ་ནི་སངས་རྒྱས་རྣམས་ཀྱིས་སོ། །རང་གི་ལོག་རྟོག་ཅེས་བྱ་བ་ནི་ཉོན་མོངས་པ་དང་ཤེས་བྱའི་སྒྲིབ་པས་བསྡུས་པ་སྤངས་པས་སོ། །དེ་ཅམ་གྱིས་ནི་སངས་རྒྱས་ཀྱི་བདག་ཉིད་ཙམ་དུ་བྱས་ལ། ཡེ་ཤེས་སེམས་དཔའི་ཐུགས་ཀའི་མཚན་མའི་ལྟེ་བར་ཆུད་པའི་ཟླ་བ་ལ་གནས་པའི་སྙིང་པོ་ཞེས་པ་ས་བོན་གང་ཡིན་པ་དང༌། འགྲོ་བ་སངས་རྒྱས་སུ་བྱས་པ་དང་གཅིག་ཏུ་གྱུར་པ་དང༌། དེའི་ཐིག་ལེ་གང་ཡིན་པ་དང༌། བདག་ཉིད་ཀྱི་ཡིད་གཉིས་སུ་མེད་པར་གྱུར་པ་ཤིན་ཏུ་སྣང་བ་དང་བཅས་པར་བསམས་ལ། །དེའི་འོད་ཟེར་གྱི་ཕྲེང་བས་མཚན་མའི་ནང་དང་ཕྱི་སྣང་བར་བྱས་པའི་རིམ་གྱིས་ཡེ་ཤེས་སེམས་དཔའ་སྣང་བར་བྱའོ། །དེ་ནས་ཡེ་ཤེས་སེམས་དཔའི་གནས་མཚན་མའོ། །དེ་ནས་སྐུ་དང་གསུང་དང་ཐུགས་རྡོ་རྗེ་གནས་དང་བཅས་པ་དང༌། དེའི་ནང་གི་གནས་མཚན་མའོ། །དེ་ལྟར་སླར་ལོག་སྟེ་དེ་ཡང་རང་རང་གི་གནས་ཉིད་འདུག་སྟེ་ཡེ་ཤེས་ཀྱི་བདུད་རྩི་འབབ་པར་བསམ་པར་བྱའོ། །དེའི་འོག་ཏུ་ནང་གི་ལུས་ཐམས་ཅད་སྣང་བར་བྱས་ནས་བ་སྤུའི་བུ་ག་རེ་རེ་ལས་བྱུང་བའི་འོད་ཟེར་གྱི་ཚོགས་ཀྱིས་འགྲོ་བ་རྣམས་ཀུན་ནས་སྣང་བར་བྱས་ལ་འགྲོ་བ་དེ་རྣམས་ཉིད་ཀྱི་དོན་ཏེ་བསམ་པ་རྣམས་རབ་ཏུ་རྫོགས་པར་བྱའོ། །སེམས་གནས་པར་བྱ་བ་ཉིད་ཀྱི་དོན་དུ་རྣལ་འབྱོར་གཞན་དག་བཤད་པ་ནི། ཡང་ན་ཞེས་བྱ་བ་ལ་སོགས་པ་སྨོས་ཏེ། རྟགས་
ཕྲ་མོ་ནི་འཇམ་པའི་རྡོ་རྗེའི་རལ་གྲི་ནས་འབྲས་ཙམ་མོ། །ཐུབ་པའི་འཁོར་ལོ་རང་རང་གི་རིག་པ་ཞེས་བྱ་བ་ལ། དེའི་དབུས་སུ་ཞེས་བྱ་བ་ནི་ལྷག་མའོ། །བརྟན་པའི་མཚན་མ་ཞེས་བྱ་བ་ནི་སེམས་བརྟན་པའི་རྟགས་སྨིག་རྒྱུ་ལ་སོགས་པའི་རྣམ་པའོ། །མཚན་མ་ཞེས་བྱ་བ་ནི་མཚན་མ་དང་ཞེས་བྱ་བར་བལྟ་བར་བྱའོ། །བསམ་གཏན་གྱིས་དུབ་ན་བཟླས་བརྗོད་བྱ་བ་ཡིན་པས་དེའི་ཕྱིར་སྐུ་གསུང་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྔགས་ཞེས་བྱ་བ་ནི་ཡེ་ཤེས་སེམས་པའི་ས་བོན་ནོ། ཡེ་ཤེས་ལྔའི་འོད་ཟེར་ཅན་ཞེས་བྱ་བ་ནི་སངས་རྒྱས་ལྔའི་འོད་ཟེར་ཅན་དུ་སྤྲོས་པ་སྟེ་བསྒོམ་པར་བྱའོ་ཞེས་བྱ་བ་ནི་ལྷག་མའོ། །དེ་ཡང་། འོད་ཟེར་ལྔ་ཡི་ཁྱད་པར་གྱིས། །སྤྲོས་ན་བྱང་ཆུབ་ཐོབ་པར་འགྱུར། །ཞེས་ཇི་སྐད་གསུངས་པ་ལྟ་བུའོ། །སྐུ་དང་གསུང་དང་ཐུགས་ཉིད་ནི་རྡོ་རྗེ་མཆོག་ཡིན་ལ། དེ་བས་ན་རྡོ་རྗེ་གསུམ་པོ་དེ་དག་ཉིད་གཅིག་ཅར་རམ་རིམ་གྱིས་སྤྲོ་བར་བྱའོ། །དེ་ཡང་གོ་རིམས་ཇི་ལྟ་བ་བཞིན་དུ་རྡོ་རྗེ་གསུམ་པོ་རེ་རེ་འམ་གསུམ་གསུམ་དུ་ཞེས་བྱ་བའི་དོན་ཏེ། སྔགས་རྣམས་ཐམས་ཅད་སྤྲོ་བ་ནི། །བྱེ་བྲག་རྣམ་པར་གཉིས་སུ་བསྒྲགས། །སྐུ་གསུམ་རྡོ་རྗེའི་བྱེ་བྲག་གིས། །སྤྲོ་བ་དང་ནི་བསྡུ་བ་བྱ། །ཞེས་ཇི་སྐད་གསུངས་པ་ལྟ་བུའོ། །འདོད་པའི་གསང་སྔགས་བཟླས་བརྗོད་བྱའོ་ཞེས་བྱ་བ་ནི་ལྷག་མའོ། །གནས་པ་བརྟན་པར་གྱུར་བ་དང་བཅས་པ་ཉིད་སྤྲོ་བ་ནི་བཟླས་པའི་ཆོ་ག་ལ་བསྔགས་པ་ཡིན་ནོ། །དེའི་ཕྱིར་རྡོ་རྗེ་ཞེས་བྱ་བ་སྨོས་ཏེ། རྡོ་རྗེ་ནི་རླུང་གི་དཀྱིལ་འཁོར་རོ། །གསལ་བ་ནི་ཆུའི་དཀྱིལ་འཁོར་རོ། །ཆོས་ནི་མེའི་དཀྱིལ་འཁོར་རོ། །འཁོར་ལོ་ཞེས་བྱ་བ་ནི་དབང་ཆེན་གྱི་དཀྱིལ་འཁོར་ཏེ། དེ་ཞེས་བྱ་བ་ནི་སྒྲ་གཙོ་བོ་ལ་སྙེགས་པའི་ཕྱིར་རོ། །བཞི་པོ་འདི་དག་ནི་སྐུ་གསུང་ཐུགས་རྡོ་རྗེར་གཏོགས་པའི་གནས་ཡིན་ཏེ། སྐུ་དང་གསུང་དང་ཐུགས་དང་ཡེ་ཤེས་སེམས་དཔའི་ཕྱིའི་གནས་སུ་བསྒོམ་པར་བྱའོ་ཞེས་བྱ་བ་ནི་ལྷག་མའོ། །དེ་ནི་ཞེས་བྱ་བ་ནི་སྐུ་དང་གསུང་དང་ཐུགས་རྡོ་རྗེའི་གནས་སུ་བསྒོམ་པས་བརྟན་པར་བྱས་ལ། སྔར་བཤད་པའི་རྡོ་རྗེ་གསུམ་གྱི་ཚོགས་སྤྲོ་ཞིང་བཟླས་བརྗོད་བྱའོ། །སྔགས་བཟླས་པའི་དུས་
ནི་སྤྲོ་བ་ཡིན་ལ་བརྗོད་པའི་མཐར་ནི་བསྡུ་བ་ཡིན་པས་དེའི་ཕྱིར་བརྗོད་ཅིང་ཞེས་བྱ་བ་ལ་སོགས་པ་སྨོས་ཏེ། དེ་ལྟར་སྤྲོ་བ་དང་བརྟན་པར་བྱ་བ་ཉིད་ཀྱི་སྔགས་བརྗོད་ལ་སྐུའི་རྡོ་རྗེ་ལ་སོགས་པ་སྤྲོས་པས་ནམ་མཁའ་ཁྱབ་པར་བྱས་ནས། རང་གི་འོད་ཀྱིས་ཞེས་བྱ་བ་ཡེ་ཤེས་སེམས་དཔའི་ས་བོན་གྱི་འོད་ཟེར་སྤྲོས་ལ། སྔོན་བཞིན་ཞེས་བྱ་བ་ཡེ་ཤེས་ཀྱི་དཀྱིལ་འཁོར་མཆོད་པར་བཤད་པའི་རིམ་གྱིས་རིག་པའི་ཚོགས་གཟུགས་རྡོ་རྗེ་ལ་སོགས་པའི་ཆོས་རྣམས་བཟང་ཞིང་བསྔགས་པའི་མཆོད་པའི་མཆོག་སྣ་ཚོགས་སྦྲུལ་པར་བྱེད་པར་འོས་པ་ཡིན་པས་ན་སྣ་ཚོགས་མཆོད་མཆོག་འོས་ཞེས་བྱའོ། །སྲོག་ལས་ཞེས་པ་ནི་སྲོག་ཐོབ་པ་སྟེ། དབུགས་འབྱིན་པའི་རླུང་དང་ལྷན་ཅིག་ཅེས་བྱ་བའི་དོན་ཏོ། །རིག་པ་ནི་མཆོད་པའི་ལྷ་མོ་རྣམས་སོ། །སྒེག་པས་ཞེས་བྱ་བས་ནི་ཆགས་པས་སོ། །ཡོངས་སུ་འཁྱུད་པ་ཞེས་བྱ་བས་ནི་ཀུན་ནས་འཁྱུད་པའོ། །ཡེ་ཤེས་སངས་རྒྱས་ཚོགས་ཞེས་བྱ་བ་ནི་སྤྲོས་ཏེ་མཆོད་ནས་བདེ་བར་གྱུར་པ་དེ་རྣམས་ཉིད་རང་གི་ཞེས་བྱ་བར་རང་རང་གི་ས་བོན་ནམ་ཡེ་ཤེས་སེམས་དཔའི་ས་བོན་དུ་གཞུག་ཅིང་ནང་དུ་ཆུད་པར་བྱའོ། །མཐར་ཞེས་བྱ་བ་ནི་བརྗོད་པའི་མཐའ་མར་ཇི་སྲིད་བརྗོད་པ་གཉིས་པ་མ་བྱས་པས་དེ་སྲིད་ཉིད་དུ་ཞེས་བྱ་བའི་དོན་ཏོ། །རྩོལ་བས་ཞེས་བྱ་བ་ནི་རྩོལ་བ་ཐོབ་པ་སྟེ། རྔུབ་པའི་དབུགས་དང་ལྷན་ཅིག་ཅེས་བྱ་བའི་དོན་ཏོ། །སྔགས་ཀྱི་ཚད་དང་རྗེས་སུ་མཐུན་པས་གཅིག་གམ་གཉིས་སམ་སྔགས་མང་པོ་བརྗོད་པར་བྱས་ནས་གང་གི་ཚེ་མི་སྐྱོ་བའི་དོན་དུ་ཅུང་ཟད་དབུགས་རིང་དུ་འབྱིན་པ་དེ་ནི་སྲོག་གཅིག་ཡིན་ཏེ། དེས་ཡོངས་སུ་བསྡུས་པ་ནི་བརྗོད་པའི་དུས་དང་སྤྲོ་བའི་དུས་ཡིན་ནོ། །དེ་ལྟར་བཟླས་ན་སེམས་རྣམ་པར་གཡེང་བར་མི་འགྱུར་རོ། །ལ་ལ་ནི་ཁྱད་པར་དུ་བསམ་གཏན་གྱིས་དུབ་པ་ན་བྱ་བ་ཡིན་ནོ་ཞེས་ཟེར་རོ། །གཞན་དག་ནི་སྔགས་རེ་རེ་བཟླས་པ་ནས་སྤྲོ་བའི་དུས་ཡིན་ལ། དེའི་མཐར་ནི་བསྡུ་བའི་དུས་ཡིན་ནོ་ཞེས་ཟེར་རོ། །ཐིག་ལེ་ཕྲ་མོ་ཞེས་བྱ་བ་ལ་སོགས་པ་ལ། །སྔར་གྱི་རྣལ་འབྱོར་བསྙེན་པ་ལ་སོགས་པའི་དབྱེ་བ་དང༌། རྒྱུ་མཐུན་པ་ལ་སོགས་པའི་འབྲས་བུ་ཆུང་ངུ་དང༌། བར་མ་དང་ཆེན་པོས་ཕྱེ་བས་བསྒོམ་པར་
བྱ་བ་ཡིན་པ་ཇི་ལྟ་བར་ཐིག་ལེ་དང་ཕྲ་མོ་དང་གསང་བ་གསུམ་ལས་སྐྱེས་ཤིང་བྱུང་བའི་རྣལ་འབྱོར་འདི་རྣམས་ལ་ཡང་དེ་བཞིན་དུ་བསྒོམ་པར་བྱའོ། །དེ་དག་ཀྱང་རྣལ་འབྱོར་གསུམ་པོ་འདི་རྣམས་ལྷག་པར་མོས་པ་གཙོ་བོར་གྱུར་པ་ཡིན་གྱི། མཐོང་བ་གཙོ་བོ་ནི་མ་ཡིན་ཏེ། དུས་ཅུང་ཟད་དམ་ཆུང་བའི་ཕྱིར་རོ། །དེ་བས་ན་ལྷག་བར་མོས་པ་ཞེས་སྨོས་པ་ཡིན་ནོ། །དུབ་པར་གྱུར་ན་མཆོད་པ་སྔོན་དུ་འགྲོ་བས་ངལ་བོས་བ་ཡིན་པས་རེ་ཞིག་དེར་མཆོད་པར་བྱ་བ་བསྟན་པའི་ཕྱིར་རང་སྙིང་ཞེས་བྱ་བ་ལ་སོགས་པ་སྨོས་ཏེ། རང་གི་སྙིང་སྟེ་རང་གི་སེམས་ཀྱི་དེ་ཁོན་དཀྱིལ་འཁོར་ལ་སོགས་པའི་རང་བཞིན་གང་ཡིན་པ་དེ་ལ་བརྟགས་པས་སེམས་ཀྱི་འཇུག་པ་ཞུམ་པར་གྱུར་ཏེ་དུབ་པར་གྱུར་ན་ཞེས་བྱ་བའི་ཐ་ཚིག་གོ །སྤྱན་ལ་སོགས་པའི་ཚོགས་བཞིས་གླུ་སྙན་ཅིང་ཡིད་དུ་འོང་བས་སེམས་ཅན་ཁམས་ན་ཞེས་བྱ་བ་ལ་སོགས་པ་དེས་བདག་ཉིད་གསོལ་བ་གདབ་ཅིང་གསོད་པར་བྱས་ལ་དཀྱིལ་འཁོར་གྱི་བདག་པོ་དང་བཅས་པ་སྔ་མ་བཞིན་དུ་མཆོད་པར་བྱའོ། །ཚིམ་པར་བྱ་བའི་ཆོ་ག་ནི་སྤྱི་བོར་ཞེས་བྱ་བ་ལ་སོགས་པ་སྨོས་པ་ཡིན་ཏེ། མགོ་བོའི་སྟེང་མཐོ་གང་ཙམ་གྱིས་དཔགས་པར་བསྒོམས་པའི་ཟླ་བའི་དཀྱིལ་འཁོར་དེར་ཨོཾ་གྱི་རླན་ཅན་ཞེས་བྱ་བ་བསིལ་བར་བྱས་ལ། དམ་པའི་སེམས་ཞེས་བྱ་བ་བྱང་ཆུབ་ཀྱི་སེམས་ཆུའི་རྒྱུན་འཛག་པ་སྐུ་ལ་སོགས་པར་ཕབ་ལ་སྐུ་ལ་སོགས་པ་ཚིམ་པར་བྱའོ། །ཆོ་ག་བཞིན་དུ་ཞེས་བྱ་བ་ནི་ཨོཾ་གྱི་འོད་ཟེར་རྣམས་ཀྱིས་ཕྱོགས་བཅུ་ནས་དྲངས་ཏེ་སྲོག་དང་རྩོལ་བས་ཀྱང་ནང་དུ་ཆུད་པར་བྱས་ལ། རྩའི་ཚོགས་ལ་རྒྱུ་བས་སྐུ་ལ་ཁྱབ་པར་བྱའོ། །གཤེགས་སུ་གསོལ་བ་བཤད་པ་ནི། དེ་ལྟར་ཞེས་པ་ལ་སོགས་པ་ཡིན་ཏེ་དེ་ཁོ་ན་ཉིད་གསུམ་གྱི་རང་གི་བདག་ཉིད་ཀྱི་སྔགས་བསྡུས་ཤིང་ནག་དུ་ཆུད་པར་བྱས་ལ་དཀྱིལ་འཁོར་བ་རྣམས་གཤེགས་སུ་གསོལ་ལོ། །ཆགས་མེད་པས་ཞེས་བྱ་བ་ནི་ཆོས་ཐམས་ཅད་དངོས་པོ་མེད་པར་ལྷག་པར་མོས་པར་བྱ་བས་སོ། །དེ་ནས་འགྲོ་བ་མ་ལུས་པ་ལ་ཕན་བར་བྱ་བའི་ཕྱིར་བཟང་པོ་སྤྱོད་པ་ལ་སོགས་པ་སྨོན་ལམ་མངོན་དུ་བྱའོ། །ཁ་གང་དུ་བལྟས་པའི་བདག་ཉིད་ཅན་གྱི་ཏིང་
ངེ་འཛིན་ལས་ལྡང་བ་བཤད་པ་ནི། ཏིང་ངེ་འཛིན་ལས་ཞེས་བྱ་བ་ལ་སོགས་པ་ཡིན་ཏེ། བདག་པོའི་ང་རྒྱལ་ཞེས་བྱ་བ་ནི་འཇམ་པའི་རྡོ་རྗེའི་ང་རྒྱལ་ལོ། །འཇུག་པར་གཏོགས་ཚེ་ཞེས་བྱ་བ་ནི་མིག་ལ་སོགས་པའི་ཤེས་པ་འཇུག་པའི་ཚེ་ནའོ། །རྫོགས་པའི་སངས་རྒྱས་ཀྱིས་སྤྲུལ་པའི་གཟུགས་རྡོ་རྗེ་ལ་སོགས་པ་ཉིད་དུ་ཡུལ་རྣམས་ལྷག་པར་མོས་པར་བྱས་པ་ནི་རྫོགས་སངས་རྒྱས་ཡུལ་ཞེས་བྱ་སྟེ། དེས་བདག་ཉིད་ཡང་དག་པར་མཆོད་པར་གྱུར་བར་ལྷག་པར་མོས་པར་བྱའོ། །ཕྱི་རོལ་གྱི་བྱ་བ་རྣམས་ལ་མཉམ་པར་མ་བཞག་པའི་རྣལ་འབྱོར་བྱ་བ་དེ་བཤད་པ་ནི། འཇམ་དཔལ་ཞེས་བྱ་བ་ལ་སོགས་པ་སྨོས་པ་ཡིན་ཏེ། འཇམ་དཔལ་རྡོ་རྗེའི་ཀུན་བདག་ཉིད། །ཅེས་བྱ་བ་ནི་ཇི་སྐད་དུ་བཤད་པའི་དཀྱིལ་འཁོར་དང༌། དཀྱིལ་འཁོར་གྱི་བདག་པོའི་ངོ་བོ་ཉིད་འདི་དག་ཐམས་ཅད་ནི་འཇམ་པའི་རྡོ་རྗེའི་རང་བཞིན་ཡིན་པས་ན་དེ་སྐད་ཅེས་བྱ་ལ། དེ་ལྟ་བུའི་ང་རྒྱལ་དང་ལྡན་པར་བྱ་སྟེ། དེ་ལྟ་བུར་གྱུར་པས་བྱ་བ་ཐམས་ཅད་རྫོགས་པར་བྱའོ་ཞེས་བྱ་བའི་ཐ་ཚིག་གོ །ཡང་ཇི་ལྟ་བུར་གྱུར་པས་ཤེན། །ཡུལ་དེ་གཟུགས་ལ་སོགས་པ་ཡང་དེ་ལྟར་བསྒོམ་ཞིང་ལྷག་པར་མོས་པར་བྱའོ། །ཇི་ལྟར་བསྒོམ་ཞེ་ན། །ངོ་བོ་ཉིད་ཀྱི་ཡུལ་ཞེས་བྱ་བ་སྟེ། ཡེ་ཤེས་ཀྱི་སོ་སོར་སྣང་བའི་མཚན་ཉིད་ཅན་གྱི་ཡུལ་ལོ། །དེ་བཞིན་དུ་དེ་ནི་རྗེས་སུ་འགྲོ་བ་ཡང་ཡིན་ཏེ། དེ་དང་ལྡན་པས་ན་དེ་སྐད་ཅེས་བྱའོ། །དེ་བཞིན་དུ་རིགས་པ་ཉིད་ནི་ཕྱིར་དོན་དང་བྲལ་བའི་ཕྱིར་རོ། །ཡང་ཇི་བུ་ཞེ་ན། །རང་རང་དག་པར་རྣམ་པར་གནས། །ཞེས་པ་སྟེ། རང་རང་གི་མཚན་ཉིད་དག་པ་ནི་རྣམ་པར་སྣང་མཛད་ལ་སོག་པའི་ངོ་བོ་ཉིད་དུ་ཇི་ལྟ་བ་བཞིན་དུ་གནས་པའོ། །ཡང་ཇི་ལྟ་བུ་ཞེ་ན། །རང་རིག་ཅེས་བྱ་བ་སྟེ། རྣམ་པར་མི་རྟོག་པའི་ཡེ་ཤེས་མཆོག་གིས་རྟོགས་པའི་ཆོས་གང་ཡིན་པ་དེའི་ངོ་བོ་ཉིད་དང༌། དེ་བཞིན་ཉིད་ཅེས་བྱ་བ་སྤྱིའི་མཚན་ཉིད་ཀྱིས་གནས་པའོ། །ཇི་ལྟར་ཡང་དག་པར་གནས་ཤེ་ན། རྡོ་རྗེ་འཆང་གི་ངོ་བོས་སོ། །དེ་ཉིད་ཀྱིས་ན་འཇམ་པའི་རྡོ་རྗེའི་རང་བཞིན་ཡིན་ནོ། །རྟག་པ་ལ་སོགས་པར་ཡང་དག་པར་བརྟགས་པ་འབའ་ཞིག་ཏུ་མ་ཟད་ཀྱི། རང་ཉིད་ཀྱིས་ཐ་མལ་པའི་རྣམ་པར་
རྟོག་པ་ཡང་སྤངས་པར་གྱུར་པ་ཡིན་ལ་དེ་ཉིད་ཀྱི་ཕྱིར་མ་འདྲེས་པ་ཉིད་དང་བརྟན་པ་ཉིད་ཀྱི་ཕྱིར་དག་པའོ། །སེམས་དཔའ་ནི་དེ་ཁོ་ན་ཉིད་རྟོགས་པར་གྱུར་པ་ཡིན་པས་དེ་དང་ཡང་དག་པར་ལྡན་པ་སྟེ། འཇིགས་པ་ཐམས་ཅད་རྣམ་སྤངས་པ། །ཞེས་བྱ་བའི་དོན་ཏོ། །དེ་ཡང་གང་ཅི་བྱེད་པ་དེ་ཐམས་ཅད་ནི་ཐམས་ཅད་ཅེས་བྱའོ་ཞེས་བཤད་པའི་ཕྱིར་རོ། །དེ་ལྟར་ན་ནི་གལ་ཏེ་མི་དགེ་བ་གང་ཅུང་ཟད་བྱས་པ་ལ་ཡང་ཉེས་པ་མེད་པར་གྱུར་ན་དེ་ནི་མི་རིགས་ཏེ། བྱང་ཆུབ་སེམས་དཔའ་ནི་རང་ཉིད་ཀྱི་ཚུལ་ཁྲིམས་ཀྱི་མགོ་གཅོད་པར་བྱེད་པ་མི་འཐད་པ་ཡིན་ནོ་ཞེ་ན། དེ་ཉིད་ཀྱི་ཕྱིར་བརྟག་ཅིང་ཞེས་བྱ་བ་ལ་སོགས་པ་སྨོས་ཏེ། སྔར་བཤད་པའི་རིམ་པ་དེ་ཉིད་ཀྱིས་བྱ་བ་རྫོགས་པར་བྱས་པ་ནི་མཆོག་ཡིན་པས་བདག་ཉིད་འཁོར་ལོ་མཆོག་ཏུ་ལྷག་པར་མོས་པར་བྱས་པས་མཆོག་མཐའ་ཡས་པའི་རྣམ་པར་འགྱུར་རོ། །ཚད་མེད་པ་ནི་རེ་རེའི་རྣམ་པ་ཡང་མཐའ་ཡས་ཤིང་ཚད་མེད་པ་ཡིན་ལ་རྟག་ཏུ་ཞེས་བྱ་བ་ནི་སྐད་ཅིག་རེ་རེ་ཞིང་རྟག་ཏུ་དེ་ལྟར་ལྷག་པར་མོས་པའི་ཕྱིར་རོ། །རྣལ་འབྱོར་པ་མཆོག་ཅེས་བྱ་བ་ནི་རྟག་ཏུ་མོས་པ་བརྟན་པ་གང་ཡིན་པའི་མཆོད་པ་དེ་ནི་མཆོག་ཏུ་མཐའ་ཡས་བའི་དགེ་བ་ཡིན་པས་དེ་ལ་མི་དགེ་བའི་རྣམ་པ་དྲི་མ་ཙམ་ཡང་གལ་ཡོད་ཅེས་བྱ་བར་དགོངས་སོ། །དེ་ལྟར་ཡིན་པ་ན་མི་དགེ་བ་ཡང་དགེ་བར་འགྱུར་བའི་བསམ་པ་དང་ལྡན་པའི་ཚུལ་འདི་ཅི་དགར་བྱ་བར་རུང་བ་ཡིན་ནམ་ཞེ་ན། མ་ཡིན་ཏེ་དོན་ཇི་ལྟ་བ་བཞིན་ཡོངས་སུ་མི་ཤེས་པས་ནི་མ་ཡིན་ནོ། །དེ་ཡང་འདིར་མི་དགེ་བའམ་ལུང་དུ་མ་བསྟན་པ་གང་ཅི་ཡང་རུང་བ་དེ་རིགས་པས་བྱར་རུང་བར་འགྱུར་ཏེ། ལན་འགའ་མི་ནུས་པའམ་མི་དགེ་བ་ཡོད་པ་དེ་ཐམས་ཅད་དུ་རྣལ་འབྱོར་འདི་ནི་ལམ་ཐམས་ཅད་ཡོངས་སུ་སྦྱོང་བ་ཡིན་ནོ། །དེ་ལྟར་ན་རིམ་གྱིས་མི་དགེ་བ་ཐམས་ཅད་ཡང་དག་པར་སྤང་བར་བྱའོ་ཞེས་པ་ནི་འདིར་འདིའི་དོན་ཡིན་གྱི་འདིས་བྱ་བ་དང་བྱ་བ་མ་ཡིན་པ་ཐམས་ཅད་བྱའོ་ཞེས་བྱ་བའི་དོན་ནི་མ་ཡིན་ཏེ། སྲོག་གཅོད་པ་ལ་སོགས་པ་ནི་བག་མེད་པར་འབད་པས་བྱེད་ལ་བདག་ཉིད་ནི་གཡང་སར་ལྟུང་བ་ལ་སོགས་པས་འཇིགས་པར་མི་བྱེད་པ་དང༌། འདོད་ཆགས་དང་ཞེ་སྡང་དང་གཏི་མུག་
ཀུན་དུ་འཕེལ་བར་བྱེད་པས་ན་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་ཡོངས་སུ་དག་པར་མི་འགྱུར་བས་དེ་རྣམས་ཀྱིས་བྱང་ཆུབ་ག་ལ་ཐོབ། །དེ་ནས་དེ་ནི་རང་གི་ལོག་རྟོག་རྣམས་སྤངས་པ་ཞེས་བྱ་བ་འདིས་བཀག་པ་ཡིན་ནོ། །ཟླས་ལ་བྱ་བའི་ཁྱད་པར་བསྟན་པ་ནི་རང་སྙིང་ཞེས་བྱ་བ་ལ་སོགས་པ་སྨོས་ཏེ། །རང་འཁོར་གཙོ་བོ་ཞེས་བྱ་བ་ནི་རང་གི་འཁོར་ལོ་དང་བཅས་པའི་བདག་པོའོ། །རང་གིས་བོན་ཞེས་བྱ་བ་ནི་ཡི་གེ་མཾ་ངོ༌། །དམིགས་ཤིང་ཞེས་བྱ་བ་ནི་བསམ་པའོ། །རང་སྙིང་དེ་ཉིད་ཀྱིས་ཞེས་བྱ་བ་ནི་རང་གི་ཟས། །བྷྲཱུཾ་ཨཱཾ་ཛྲྀའཾ་ཁཾ་ཧཱུཾ་ཞེས་བྱ་བའི་ཡི་གེ་སངས་རྒྱས་ཐམས་ཅད་ཀྱི་རང་བཞིན་ཅན་གྱི་ཡེ་ཤེས་ཀྱི་བདུད་རྩིར་བྱ་སྟེ། དངོས་པོ་ཐམས་ཅད་ཀྱི་ཆོས་ཉིད་གང་ཡིན་པ་ཡེ་ཤེས་ལྔའི་བདུད་རྩི་སྙིང་པོའི་རང་བཞིན་ཅན་ཨོཾ་གྱི་འོད་ཟེར་གྱིས་ཕྱོགས་བཅུ་ནས་བཀུག་ལ། །དེ་དང་རོ་གཅིག་པར་གྱུར་པས་དག་པ་དེས་རང་གི་བདག་པོའི་འཁོར་ལོ་ཚིམ་པར་བྱ་ཞིང་མཉེས་པར་བྱའོ། །ཟས་ཀྱི་ཆོ་ག་འདི་ལྟ་བུ་གང་ཡིན་པ་འདི་ནི་ཕྱི་རོལ་གྱི་སྦྱིན་སྲེག་གི་ཆོ་ག་ཡིན་པར་ཤེས་པར་བྱའོ། །དེ་ཡང་རང་གི་སྙིང་གའི་མེ་ཐབ་ཀྱི་ལྷ་རྣམས་ཕྱི་རོལ་གྱི་ཚུལ་གྱིས་ཚིམ་པར་བྱེད་དེ། ཇི་ལྟར་ཕྱི་རོལ་གྱི་མེ་ཐབ་ཏུ་མར་ལ་སོགས་པས་བྱེད་པ་དང་འདྲ་ལ། ཡིད་ཀྱི་སྦྱིན་སྲེག་ནི་སེམས་ཙམ་ཡིན་པས་ཕྱི་རོལ་ལ་ལྟོས་པ་མེད་པར་ཤེས་པར་བྱའོ། །བླ་ན་མེད་པའི་སྦྱིན་སྲེག་ནི་ཡེ་ཤེས་ཀྱི་མེས་བུང་པོ་ལ་སོགས་པའི་ཕུད་ཤིང་ཉིད་སྲེག་པར་བྱེད་པས་བླ་ན་མེད་པའོ། །དེ་ལྟར་རོའི་ལོངས་སྤྱོད་ལ་བྱ་བ་བཤད་ནས། །གཟུགས་ལ་སོགས་པ་ལོངས་སྤྱོད་རྣམས་ལ་ཡང་བསྒྲེ་བར་བྱ་བ་བཤད་པ་ནི་དེ་ལྟར་ཞེས་བྱ་བ་ལ་སོགས་པ་མོས་པ་ཡིན་ཏེ། དེ་ལར་ཞེས་བྱ་བ་སྔར་བཤད་པའི་རིམ་པས་རང་ལྷ་ཞེས་བྱ་བ་ནི་རང་གི་འདོད་པའི་ལྷ་སྟེ། དེའི་བདག་ཉིད་ཙན་གྱི་ངོ་བོ་ཉིད་ལས་བྱུང་ཉིད་དང་གཞན་ཏེ། རང་གི་ལྷའི་བདག་ཉིད་ཀྱི་རང་བཞིན་ལས་བྱུང་བས་འདོད་པའི་ཡོན་ཏན་ལས་མཆོད་པར་བྱའོ། །སངས་རྒྱས་བཞེད་པ་ཡིན་ཞེས་བཤད་པ་འདི་ནི་འདི་སྐད་སྟོན་ཏེ། ཇི་ལྟ་བུའི་དམ་ཚིག་གི་སྤྱོད་པ་འདི་ནི་སྔགས་པ་འདི་རྣམས་ལ་སངས་རྒྱས་ཐམས་ཅད་ཀྱིས་གནང་ཞིང་དགྱེས་པ་
ཡིན་ཏེ། དེ་ཡང་གཞུང་ལས། དཀའ་ཐུབ་སྡོམ་པ་མི་ཟད་པ། །བསྟེན་ཀྱང་འགྲུབ་པར་མི་འགྱུར་གྱི། །འདོད་པའི་ལོངས་སྤྱོད་ཐམས་ཅད་ལ། །བསྟེན་ན་མྱུར་དུ་འགྲུབ་བར་འགྱུར། །ཞེས་ཇི་སྐད་གསུངས་པ་ལྟ་བུའོ། །དེ་ཡང་གང་གི་ཕྱིར་སེམས་བདེ་བར་གྱུར་ན་མཉམ་པར་འཇོག་པར་འགྱུར་རོ། །མཉམ་པར་གཞག་པའི་སེམས་ཀྱིས་ཡང་དག་པ་ཇི་ལྟ་བ་བཞིན་དུ་ཤེས་པའི་མཚན་ཉིད་ནི་བྱང་ཆུབ་ཡིན་ལ། སྡུག་བསྔལ་བ་ནི་ཏིང་ངེ་འཛིན་དང་བྱང་ཆུབ་གཉི་ག་མ་ཡིན་ཏེ། དེས་ན་འདིས་གསང་སྔགས་ལ་བརྙས་ཤིང་སྐུར་པས་རིང་པོ་མི་ཐོགས་པར་འཆི་བར་འགྱུར་ལ། ཤི་ནས་ཀྱང་དམྱལ་བར་ལྟུང་ངོ༌། །དེ་ཡང་། ལུས་ངག་སེམས་ནི་བདེར་གནས་ན། །བྱང་ཆུབ་ཐོབ་པ་དེས་མཐོང་འགྱུར། །གཞན་དུ་དུས་མིན་འཆི་བ་དང༌། །དམྱལ་བར་ངེས་པར་འཚེད་པར་འགྱུར། །ཞེས་ཇི་སྐད་གསུངས་པ་ལྟ་བུའོ། །དེ་བས་ན་ཁ་ན་མ་ཐོ་བ་མེད་ཅིང་རྙེད་སླ་བའི་ཡུལ་དེ་སྔགས་པ་རྣམས་ཀྱིས་ཆོ་ག་བཞིན་དུ་ལོངས་སྤྱོད་པར་བྱའོ། །ལོངས་སྤྱོད་རྣམ་པར་དག་པ་བཤད་ནས། ལུས་རྣམ་པར་དག་པ་བསྟན་པའི་ཕྱིར། ལས་སོགས་ལས་གང་ཞེས་བྱ་བ་ལ་སོགས་པ་སྨོས་དེ། ལུས་ལ་སོགས་པས་བསྒྲུབས་པའི་ལས་ལ་ཉེ་བར་གདགས་པས་ལུས་སོགས་ཞེས་བྱ་སྟེ། ལུས་ལ་སོགས་པའི་ལས་གང་ཡིན་པ་དེ་དང་དེ་ཐམས་ཅད་ཀྱིས་སངས་རྒྱས་ལ་མཆོད་པ་ཉིད་དུ་བྱ་བ་དང༌། རྗེས་སུ་མཐུན་པའི་འགྲོ་བའི་དོན་གང་ཡིན་བ་དེ་རྣམས་ཀྱང་བྱའོ་ཞེས་བྱ་བར་སྦྱར་རོ། །ཇི་ལྟར་ན་དེ་ལྟར་བྱེད་ནུས་ཤེ་ན། དེའི་ཕྱིར། རྟག་ཏུ་མཉམ་པར་གཞག་པར་བྱ། །ཞེས་བྱ་བ་སྨོས་ཏེ། ལས་ཐམས་ཅད་ལ་ཅི་རིགས་པར་མཆོད་པར་བྱ་བ་དང༌། མཆོད་པའི་བདག་ཉིད་ཅན་གྱི་ལྟར་ཡིད་ལ་བྱ་བ་དང༌། འགྲོ་བའི་དོན་ཡིད་ལ་བྱ་བ་དེ་མཉམ་པར་འཇོག་པ་ཉིད་ཀྱིས་བྱའོ། །རྗེས་སུ་མཐུན་པ་ཞེས་བྱ་བ་ནི་སྤྱོད་ཡུལ་ཡོངས་སུ་དག་པའི་མདོའི་རྗེས་སུ་འབྲངས་ནས་ཤེས་པར་བྱ་སྟེ། གྲོང་ཁྱེར་དུ་འཇུག་པ་ན་སེམས་ཅད་ཐམས་ཅད་ཐར་པའི་གྲོང་ཁྱེར་དུ་འཇུག་པར་བྱའོ་ཞེས་ཡིད་ལ་བྱའོ། །ཕྱིར་འབྱུང་བ་ནི་སེམས་ཅན་ཐམས་ཅད་འཁོར་བ་ལས་གདོན་པར་བྱའོ་ཞེས་བྱ་བ་ལ་སོགས་པའོ། །རང་གི་ལྷའི་ང་རྒྱལ་ཙམ་གྱིས་ཀྱང་ལས་རྣམ་པར་དག་པར་བཤད་པ་
ནི། ལུས་ངག་ཅེས་བྱ་བ་ལ་སོགས་པ་སྨོས་པ་ཡིན་ཏེ། ལུས་ཀྱི་ལས་དང་ངག་གི་ལས་གང་ཅི་ཡོད་པ་དེ་འཇམ་པའི་རྡོ་རྗེ་ལ་སོགས་པའི་ང་རྒྱལ་གྱིས་ཆེ་བ་ཉིད་དུ་བྱས་པ་ཡིན་པས་དེ་གོ་རིམས་བཞིན་དུ་ཕྱག་རྒྱ་དང་སྔགས་ཀྱི་རང་བཞིན་ཅན་ནོ། །དེ་བས་ན་ལས་དེ་དང་དེ་བྱས་ཤིང་བསྒྲུབས་པ་དེ་དག་ཙམ་ཉིད་ཀྱི་སངས་རྒྱས་ཐམས་ཅད་ལ་མཆོད་པར་བྱའོ། །དེ་ལྟར་ན་ཕྱག་རྒྱ་བཅིངས་པ་ཙམ་དང་སྔགས་བརྗོད་པ་ཙམ་གྱིས་ཀྱང་སངས་རྒྱས་ཐམས་ཅད་ལ་མཆོད་པ་བྱས་པར་འགྱུར་རོ། །དེ་ལྟར་ན་མི་དགེ་བའི་ལས་དམན་པ་དག་དེ་ལྟ་བུའི་ཚུལ་གྱིས་བྱས་པ་དག་ཇི་ལྟར་དགེ་བ་ཡིན་ཏེ། དེ་ནི་གཞན་དག་གི་མི་དགེ་བ་ཡིན་ནོ་ཞེན། དེ་ནི་མ་ཡིན་ཏེ། བསམ་པའི་ཁྱད་པར་གྱིས་ན་ལས་དམན་པ་ཉིད་དུ་མ་གྲུབ་པ་ཡིན་ཏེ། གང་གི་ཕྱིར་འདི་ནི་དངོས་པོ་གཅིག་ལ་ཡང་བསམ་པ་ཐ་དད་པ་ཡིན་ལ། དབྱེ་བ་དེས་རྒྱུ་ཚོགས་པའི་དབྱེ་བ་ལས་ལས་ཀྱི་དབྱེ་བར་འགྱུར་བས་དེའི་ཕྱིར་དེ་བཤད་པ་ནི་དངོས་པོ་གཅིག་ལ་ཡང་ཞེས་བྱ་བ་ལ་སོགས་པ་སྨོས་ཏེ། དངོས་པོ་གཅིག་ལ་ཡང་ཀུན་དུ་རྟོག་པའི་དབང་གིས་རྣམ་པ་སྣ་ཚོགས་པར་སྣང་བར་འགྱུར་ཏེ། ཅི་རིགས་པར་གྲོལ་བ་དང༌། སྡུག་བསྔལ་བ་དང༌། བདེ་བ་སྐྱེད་པར་བྱེད་པའི་ལས་ཀྱི་ཁྱད་པར་མ་ལུས་པ་འབྱུང་བར་འགྱུར་རོ། །དེ་ཡང་འདི་ལྟར་སེམས་དང་བས་ཀུན་ནས་བསླང་པ་དང༌། ཐར་པའི་དོན་དུ་ཡོངས་སུ་བསྡོས་པའི་སངས་རྒྱས་ལ་ཕྱག་འཚལ་བ་ནི་གྲོལ་ཞིང་ཐར་པའི་དོན་དུ་འགྱུར་ལ་དེ་བདེ་བའི་དོན་དུ་ཡོངས་སུ་བསྡོས་ན་ནི་བདེ་བའི་དོན་དུ་འགྱུར་རོ། །འཚེ་བའི་བསམ་པ་ལས་བྱུང་བ་འམ་སེམས་ཅན་རྣམས་ལ་གནོད་པའི་དོན་དུ་ཡོངས་སུ་བསྡོས་པ་ནི་སྡུག་བསྔལ་གྱི་རྒྱུར་འགྱུར་རོ། །དེ་བས་ཞེས་པ་གང་གི་ཕྱིར་དེ་ལྟར་ཡིན་བ་དེས་ན་ལུས་ལ་སོགས་པའི་ལས་དགེ་བ་དང་མི་དགེ་བ་གང་ཡིན་པ་དེ་ནི་ཀུན་དུ་རྟོག་པའི་དབྱེ་བ་ལས་འགྱུར་རོ། །དེ་བས་ན་མི་བདེན་པའི་ཀུན་དུ་རྟོག་པ་ཐམས་ཅད་ལས་ངེས་པར་གྲོལ་ཞིང་སྤངས་པའི་ཡེ་ཤེས་ནི་ཇི་སྐད་བཤད་པའི་སངས་རྒྱས་ཐམས་ཅད་ལ་མཆོད་པ་དང༌། སེམས་ཅན་ཐམས་ཅད་ཀྱི་དོན་ཡིད་ལ་བྱེད་པ་ལ་རྟོག་སྟེ་ཞེས་པ་མི་དགེ་བའི་དོགས་པ་ཅི་ཞིག་ཡོད་དེ་མེད་པ་ཉིད་དུ་རིགས་སོ་ཞེས་བྱ་བའི་
ཐ་ཚིག་གོ །དེ་ལྟར་ན་ཐམས་ཅད་བྱ་བ་ཡིན་བས་མི་དགེ་བ་ཡང་བྱར་རུང་བར་སེམས་པ་ནི་ཐལ་ཆེས་པས་སྔར་བཀག་པ་ཉིད་ཡིན་ནོ། །དམ་ཚིག་ལས་འདས་པར་གྱུར་པ་ལ་དམ་ཚིག་ཉམས་པ་ལ་བསླང་བར་བྱ་བའི་ཕྱིར་དོན་ཡོད་རྡོ་རྗེ་དཀྱིལ་འཁོར་གྱི་བདག་པོར་གྱུར་པས་སྙིང་གའི་སྣ་ཚོགས་རྡོ་རྗེ་ལ་ཡི་གེ་ཁཾ་བསམས་ནས། ཐམས་ཅད་དག་པ་ཞེས་བྱ་བ་ཆོས་ཐམས་ཅད་རང་བཞིན་གྱིས་ཡོངས་སུ་དག་པར་ཡིད་ལ་སེམས་ཤིང་སྔར་བྱས་པ་ལྟར་བདག་ཉིད་དབང་བསྐུར་བར་བྱའོ། །སྦྱིན་དང་བཅས་པའི་ཞེས་བྱ་བ་ནི་ཡོན་ཏན་དང་བཅས་པའོ། །བྱ་ཞེས་བྱ་བ་ནི་དབུལ་བའོ། །རང་གི་འཁོར་ལོ་ཞེས་བྱ་བ་ནི་འཇམ་པའི་རྡོ་རྗེའི་དཀྱིལ་འཁོར་རོ། །ཐུན་མཚམས་སུ་ཡང་ཞེས་བྱ་བ་ནི་ཉི་མ་གུང་དང༌། ཉི་མའི་མཐའ་དང༌། མཚན་ཕྱེད་ལ་ཡོངས་སུ་རྫོགས་པའི་དཀྱིལ་འཁོར་ཡུད་ཙམ་གྱིས་མངོན་དུ་བྱས་ལ། མཆོད་པ་དང་བསྟོད་པ་ལ་སོགས་པ་ཡང་སྔ་མ་བཞིན་བྱས་ནས། གཉིད་ལྡོག་པའི་དུས་སུ་ཉལ་བར་བྱའོ། །ཤེས་རབ་ནི་དེ་ཁོ་ན་ཉིད་ལ་དམིགས་པའོ། །སྙིང་རྗེ་ནི་འགྲོ་བ་ལ་ཕན་པའི་བསམ་པ་སྟེ། དེ་གཉིས་དང་ལྡན་པ་དང་ཐབས་དང་ཤེས་རབ་ཀྱི་ཕྱག་རྒྱ་དང་ཡང་ལྡན་པའོ། །འདིར་གནས་སྐབས་ཀྱི་དབྱེ་བས་རྣལ་འབྱོར་པ་ནི་རྣམ་པ་བཞི་སྟེ། ལས་དང་པོ་པ་དང་ཡེ་ཤེས་ལ་ཅུང་ཟད་དབང་བ་དང༌། ཡེ་ཤེས་ལ་དབང་ཐོབ་པ་དང༌། ཡང་དག་པར་ཡེ་ཤེས་ལ་དབང་བའོ། །འདི་རྣམས་གང་གི་བྱ་བ་གང་ཡིན་བ་དེ་གོ་རིམས་ཇི་ལྟ་བ་བཞིན་དུ་ཚིགས་སུ་བཅད་པ་བཞི་སྟོན་ཏོ། །ལྡང་ཚེ་ནི་གཉིད་སད་པ་ནའོ། །ལྷ་མོའི་གླུ་ནི། སེམས་ཅན་ཁམས་ན་གནས་ཀྱི་དབང་ཕྱུག་ཅེས་བྱ་བ་ལ་སོགས་པའོ། །ལེགས་ཟློས་དང་པོ་ལས་ཅན་ཡིན། །ཞེས་བྱ་བ་ནི་ལས་དང་པོ་པས་ཆོ་ག་མ་ལུས་པར་ཡང་དག་པར་བཟླ་བར་བྱ་བ་སྟེ། ཏིང་ངེ་འཛིན་གསུམ་རྒྱ་ཆེར་མངོན་དུ་བྱས་ལ་བཟླས་བརྗོད་བྱའོ་ཞེས་པའི་དོན་ཏོ། །གང་རགས་པའི་སྐུའི་དཀྱིལ་འཁོར་ནི་ཡུད་ཙམ་གྱིས་མ་ངོན་དུ་བྱེད་པར་ནུས་ལ། ཕྲ་བའི་སའི་སྙིང་པོ་ལ་སོགས་པ་དང༌། སྐུ་རྡོ་རྗེ་ལ་སོགས་པ་མངོན་དུ་བྱེད་པར་མི་ནུས་པས། སྔགས་ཀྱི་ཚུལ་ཁྲིམས་དང་བརྟུལ་ཞུགས་དང་ཡང་ལྡན་པ་དག་ནི་དེའི་མཐུ་ཐོབ་པས། དེ་ནི་ཡེ་ཤེས་ལ་ཅུང་ཟད་དབང་
བཞེས་བྱ་སྟེ། དེ་ནི་ཐུན་མཚམས་ཐམས་ཅད་ལ་ཡུད་ཙམ་གྱིས་དཀྱིལ་འཁོར་མངོན་དུ་བྱས་ལ། དེ་ལ་མིག་ལ་སོགས་པ་དང་སྐུལ་སོགས་པ་བྱིན་གྱིས་བརླབ་པ་བྱས་ཏེ། རྗེས་སུ་མཉེས་པར་བྱ་བ་དང༌། མཆོད་པ་དང༌། བསྟོད་པ་དང༌། བདུད་རྩི་མྱང་བ་སྔོན་དུ་འགྲོ་བ་དང༌། བག་ཡོད་པས་བཟླས་པ་བྱའོ། །གང་རྣམ་པ་ཐམས་ཅད་དུ་རབ་ཏུ་རྫོགས་པར་སྤྲོ་བ་དང་སྡུད་པར་བྱེད་པའི་སྦྱོར་བས་དཀྱིལ་འཁོར་ཡུད་ཙམ་གྱིས་མངོན་དུ་བྱེད་པར་ནུས་པ་དེ་ནི་ཡེ་ཤེས་ལ་དབང་ཐོབ་པ་ཞེས་བྱ་སྟེ། འདི་ཡང་ཡེ་ཤེས་བབས་པ་ཐོབ་པ་ཉིད་ལས་འགྱུར་གྱིས། མ་ཐོབ་བ་ལས་ནི་མ་ཡིན་ཏེ། དེ་ཉིད་ཀྱིས་ན་ཅུང་ཟད་ཅེས་སྨོས་པ་ཡིན་ནོ། རྣལ་འབྱོར་པ་དེས་ནི་འབྲས་བུའི་མཐར་ཐུག་པར་བགྲོད་པར་བྱ་བའི་ཕྱིར་རྣལ་འབྱོར་དེ་ཉིད་ཉིན་དང་མཚན་དུ་བྱའོ། །རང་གི་དོན་གྱི་མཐར་ཐུག་པར་སོན་པའི་རྣལ་འབྱོར་པ་ནི་ཡེ་ཤེས་ལ་ཡང་དག་པར་དབང་ཐོབ་པ་ཡིན་ལ། དེ་ནི་བསམ་གཏན་ཙམ་གྱིས་འགྲོ་བའི་དོན་བྱེད་པར་འོས་པ་ཡིན་ནོ། །གང་གིས་བྱེད་ཅེ་ན། འཇིག་རྟེན་གྱི་ཁམས་ཐམས་ཅད་ཀྱི་ཕྲ་རབ་ཀྱི་ནང་དུ་ཆུད་པའི་སྐུ་དང་གསུང་དང་ཐུགས་ཀྱི་དཀྱིལ་འཁོར། གཟུགས་བརྙན་དང་ཉིད་གཟུགས་ཀྱིས་ནི། །ཞེས་བྱ་བ་སྤྲུལ་པའི་རང་གི་གཟུགས་ཞེས་བྱ་བའི་དོན་ཏོ། །དེ་ལྟར་སྔོན་དུ་བསྙེན་པ་བྱས་པའི་རྣལ་འབྱོར་པ་ཉིད་ཀྱིས་དཀྱིལ་འཁོར་བྲི་བར་བྱས་ལ། དེ་ཡང་འདོད་པའི་དངོས་གྲུབ་ཐ་མལ་པའམ། མཆོག་ཐོབ་པའི་མཚན་མ་རྨི་ལམ་ལ་སོགས་པའམ། སེམས་གནས་པའི་མཚན་མ་རྒྱུད་ལས་གསུངས་པ་ལན་གཅིག་མ་ཡིན་པ་ལན་མང་དུ་འམ་དུ་མ་ཐོབ་པ་ནི། དེ་ཁོ་ན་ཉིད་གསུམ་གྱིས་མཆོད་པ་ཆོ་ག་བཞིན་དུ་བྱས་ལ། དཀྱིལ་འཁོར་གྱི་དབུས་སུ་འདུག་པའམ། སྒོའི་དབུས་སུ་འདུག་པར་ལྷག་པར་མོས་པ་བྱས་ལ་སྔ་མ་བཞིན་དུ་ཡན་ལག་བཞི་རྫོགས་པར་བྱ་བ་དང༌། དེ་ཁོ་ན་ཉིད་གསུམ་གྱིས་བྱིན་གྱིས་བརླབ་པའི་རིམ་པས་དངོས་གྲུབ་སྩོལ་བར་མཛད་པའི་སྐྱོབ་པ་རྣམས་ལ་མཆོད་པར་བྱའོ་ཞེས་བྱ་བའི་དོན་ཏོ། །བཤད་ཟིན་པའི་དོན་ཉིད་ལྷག་མ་དང་བཅས་པར་སྨོས་པ་ནི། རང་དམ་ཞེས་བྱ་བ་ལ་སོགས་པ་སྨོས་པ་ཡིན་ཏེ། རང་དམ་ཞེས་བྱ་བ་ནི་དངོས་གྲུབ་སྒྲུབ་པ་དོན་དུ་གཉེར་བའོ། གཞན་
གྱིས་གསོལ་བ་བཏབ་པ་ཞེས་བྱ་བ་ནི་དབང་བསྐུར་བ་དོན་དུ་གཉེར་བའི་སློབ་མས་སོ། །གཞན་དོན་འབད་པར་བྱེད་པས་ཀྱང༌། །ཞེས་བྱ་བ་ནི་སེམས་ཅན་གྱི་དོན་ཆེན་པོ་མཐོང་ཞིང་བསྐུལ་ན་བྲི་བར་བྱའོ། །དེ་ཡང་གང་གི་ཚེ་ཤེས་ཤེ་ན། སློབ་མས་ལན་གཉིས་ལན་གསུམ་དུ་གསོལ་པ་བཏབ་པར་གྱུར་ཅིང༌། གལ་ཏེ་ཡོ་བྱད་ཚོགས་པར་གྱུར་ན་ཡང་དེའི་ཚེ་ལྟེ་བར་བཀོད་པའི་ཉི་མའི་དཀྱིལ་འཁོར་ལ་གནས་པའི་ཧཱུཾ་གི་འོད་ཟེར་རྣམས་ཀྱིས་སྙིང་གར་གནས་པའི་ཀཾ་ལས་བྱུང་བའི་སྡིག་པ་མདོག་གནག་པ་ཤ་ཟ་དང་འདྲ་བར་མི་སྡུག་པ་སྣ་རྩེར་བྱུང་བ་དང༌། ཡི་གེ་ཧཱུཾ་དེ་ཡང་སྙིང་གར་ཕྱིན་པ་ན་རྡོ་རྗེ་གནོད་སྦྱིན་གྱི་གཟུགས་གཡོན་བརྐྱང་བས་གནས་པ། མཆེ་བ་གཙིགས་པ། ལྟོ་བ་འཕྱང་བ། མདོག་གནག་པ། གཡོན་པའི་སྡིགས་མཛུབ་མ་ཆ་བ་ལྟར་བསྒྲེང་བ། ཕྱག་གཡས་པ་མཆེ་བ་དང་བཅས་པ་འཕྱར་བ། ཁྲོ་བོའི་གཟུགས་སུ་བྱས་པ་ཕྱུང་སྟེ། ཨོཾ་བཛྲ་ཡཀྵ་ཀྲོ་དྷ་ཁཱ་ད་ཁཱ་ད་པཱ་པཾ་ནི་ཨ་སྱ་ཧཱུཾ་ཕཊ་ཅེས་བྱ་བས་དེའི་སྡིག་པ་ཤིན་ཏུ་གསོལ་དུ་བཅུག་ལ། ཡང་སློབ་མ་དེ་ཡི་གེ་སཾ་ལས་ཀུན་དུ་བཟང་པོའི་གཟུགས་སུ་བསམས་ནས། དེའི་སེམས་ཀྱིས་བགེགས་བདུད་རྩི་ཐབ་སྦྱོར་གྱི་ཕུར་བུས་བཏབ་ལ། ཕུར་བུའི་འོད་ཟེར་ཤིན་ཏུ་དྲག་ཅིང་འཇིགས་སུ་རུང་བས་གདུག་པ་ཐམས་ཅད་ཤིན་ཏུ་བསྲེགས་ནས། དེ་བསྲུང་བའི་དོན་རུ་སློབ་མའི་སྙིང་གར་ཨ་ལས་བྱུང་བའི་ཟླ་བའི་དཀྱིལ་འཁོར་ལ་དབྱངས་ཀྱི་ཡི་གེ་ཐ་མ་ལས་བྱུང་བའི་སྣ་ཚོགས་རྡོ་རྗེ་གནས་པར་བསམ་པར་བྱའོ། །འཁོར་ལོ་ལ་གནས་ཚུལ་བཞིན་བཟླས།། ཞེས་བྱ་བས་ནི་སྔོན་དུ་བསྙེན་པ་བྱ་བ་སྟོན་ཏེ། བཟླས་ཞེས་བྱ་བ་སྨོས་པ་དེར་གང་གི་སྔགས་ཇི་སྲིད་ཀྱི་བར་དུ་བཟླ་བ་བཤད་པ་ནི། འཁོར་ལོ་ཅན་སྔགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། འཁོར་ལོ་ཅན་ཞེས་བྱ་བ་ནི་ཐུགས་ཀྱི་གཙོ་བོ་འམ། གསུང་གི་གཙོ་བོ་འམ། སྐུའི་གཙོ་བོའིའོ། རང་གི་དཀྱིལ་འཁོར་ལ་ནི་རང་གི་ལྷ་འཇམ་པའི་རྡོ་རྗེ་ལ་སོགས་པའིའོ། །བཀས་གནང་ཞེས་བྱ་བ་ནི་བཀས་ཐོབ་པར་གྱུར་པ་སྟེ། དེ་ནི་བཟླས་པའི་མཚན་ཉིད་ཡིན་ནོ། །སྔགས་བཟླ་བར་བྱ་བ་ཡིན་ལ། དེ་བས་ན་སྔགས་བཏུ་བ་བཤད་པ་ནི། འབྱིན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། བཛྲ་དྷྲྀཀ་
ཅེས་བྱ་བ་ལ་སོགས་པའི་འབྱིན་པའི་སྔགས་གང་ཡིན་བ་དེ་དང་སྤེལ་བྱའོ། །སྙིང་པོའི་ས་བོན་ནི་ཡི་གེ་ཧཱུཾ་ལ་སོགས་པ་གང་ཡིན་པ་དེ་དང་སྤེལ་བར་བྱ་བ་སྟེ། དེ་གཞན་དག་དང་ཞེས་བྱ་བའི་དོན་ཏོ། །མིང་སྟེ་མཚན་གྱི་ཡི་གེ་དང་པོ་ཀླད་ཀོར་དང་ཅས་པ་དང་ཡང་སྤེལ་ཞིང་སྔགས་བཏུ་བར་བྱའོ། །གང་དང་སྦ་ལ་ཞེ་ན། དེ་ཉིད་གསུམ་དང་མན་ངག་ཇི་ལྟ་བ་བཞིན་དུ་སྤེལ་ལོ། །ཕྲེང་བའི་སྔགས་ནི་ཇི་སྐད་གསུངས་པ་ཉིད་ཡིན་གྱི་བཏུ་བར་བྱ་བ་མ་ཡིན་ནོ། །གཞན་དག་ཅེས་བྱ་བས་ཇི་སྐད་གསུངས་པའི་ཕྲེང་བའི་སྔགས་རྣམས་ཀྱང་དེ་ཁོ་ན་ཉིད་གསུམ་དང་སྤེལ་ཏེ་བཏུ་བར་བྱའོ་ཞེས་ཁ་ཅིག་འཆད་དོ། །ཁ་ཅིག་ནི་སྙིང་པོ་ཞེས་བྱ་བའི་སྒྲའི་དོན་གྱི་ཤུགས་ཀྱིས་ཕྲེང་བའི་སྔགས་ཀྱང་འཇུག་པ་ཡིན་ནོ་ཞེས་འཆད་དོ། །སྔགས་ཀྱི་སྐབས་ཡིན་པས་ཕྱག་རྒྱ་དང་སྙིང་པོ་དང་རིགས་པ་རྣམས་ཀྱི་རང་བཞིན་ཡང་སྨོས་པ་ནི། སྐུ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཕྱག་རྒྱ་ནི་རྣམ་པ་བཞི་སྟེ། དེ་ལ་སྐུ་དང་གསུངས་དང་ཐུགས་རྡོ་རྗེར་བཤད་ཅེས་བྱ་བ་ནི་ཕྱག་རྒྱའི་གོ་རིམས་ཇི་ལྟ་བ་བཞིན་དུ་ལས་ཀྱི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་དང༌། གསང་བ་གསུམ་གྱི་དབུས་ན་གནས་པ་འམ། དེའི་ངོ་བོ་ཉིད་ཀྱི་ཕྱག་རྒྱ་ནི་དམ་ཚིག་གི་ཕྱག་རྒྱ་སྟེ། དེ་ནི་ཡེ་ཤེས་སེམས་དཔའ་ཡིན་ནོ། །ས་བོན་ཞེས་བྱ་བ་ནི་གཟུགས་ཀྱི་རྒྱུར་གྱུར་པའི་སྔགས་སོ། །ཞི་ལ་སོགས་པ་རབ་བསྐུལ་བས། །ཞེས་བྱ་བ་ནི་ལས་བསྐུལ་བ་དང་སྤེལ་བའི་སྔགས་རྣམས་སོ། །རྣམ་ཀུན་དུ་ཞེས་བྱ་བ་ནི་མཐུ་ཆེ་བ་ཉིད་ཡིན་པའི་ཕྱིར་རྣམ་པ་ཐམས་ཅད་དུ་བཟླ་བར་བྱའོ། །སེམས་དག་པའི་རྒྱུའི་གཙོ་བོ་བཤད་ཟིན་བ་དང༌། མ་བཤད་པ་རྣམ་པ་གསུམ་བསྟན་པའི་ཕྱིར། ཅི་རིགས་པར་ཞེས་བྱ་བ་ལ་སོགས་པ་སྨོས་ཏེ། འགོག་པའི་འཁོར་ལོ་གོམས་པ་ཡིས། །ཞེས་བྱ་བ་ནི་སྔར་ཇི་སྐད་དུ་བཤད་པའི་སྲུང་བའི་འཁོར་ལོ་ཡུན་རིང་དུ་གོམས་པར་བྱ་བས་སོ།། དེ་ལྟར་ན་དེ་དག་ནི་སྔོན་དུ་བསྙེན་པའི་ཆོ་ག་ཡིན་ནོ།། །།ས་སྦྱང་བའི་ཆོ་ག་བསྟན་པར་བྱ་བའི་ཕྱིར། བགེགས་རྣམས་ཞེས་བྱ་བ་ལ་སོགས་པ་སྨོས་ཏེ། དེ་ལ་སློབ་དཔོན་གྱིས་དང་པོ་ཁོ་ནར་ཉིན་ཞག་ཤིས་པ་ལ་འཇམ་པའི་རྡོ་རྗེའི་ཏིང་ངེ་འཛིན་གསུམ་བྱས་ལ། ཤིས་ཤིང་ཉམས་དགའ་བའི་དཀྱིལ་
འཁོར་གྱི་ས་གཞི་དེར་འདུག་སྟེ། གནས་ཀྱི་བདག་པོ་ལ་སོགས་པ་ལ་གཏོར་མ་བྱིན་པ་ལ་སོགས་པས་མཆོད་པ་ལ་སོགས་པ་བསྟབས་ཏེ། རྨི་ལམ་ལ་སོགས་པ་དེ་རྣམས་ལས། །གནང་བ་ཐོབ་པར་ཤེས་པ་དང༌། །སངས་རྒྱས་ལ་སོགས་ལྷག་གནས་བྱ། །ཞེས་བྱ་བ་སངས་རྒྱས་དང་རྡོ་རྗེ་འཆང་བ་ལ་སོགས་པ་ནམ་མཁའི་ངོས་ལ་བཞུགས་པ་ལས་རྗེས་སུ་གནང་བ་ནོད་པར་བྱའོ། །དེ་ནས་སྲུང་བའི་འཁོར་ལོ་ཆོ་ག་བཞིན་དུ་བསྒོམས་པ་འམ། དྲག་པོའི་སྦྱིན་སྲེག་གིས་བགེགས་བསྐྲད་ལ། སྦྱིན་སྲེག་བྱེད་པའི་ཕྱོགས་ལྟར་ན་སློབ་མ་བསྲུང་བའི་ཕྱིར་ཞི་བའི་སྦྱིན་སྲེག་ཀྱང་བྱས་ལ། ས་དེ་ཕུར་བུས་བཏབ་ནས་ལས་ཐམས་ཅད་པའི་ཆུ་འམ་ཡུངས་ཀར་བཅུག་པའི་ཆུ་དང་ཐལ་བ་ལ་དེ་བཟླས་པ་གཏོར་ལ། ས་དེ་ལ་གསོལ་བ་གདབ་ཅེས་བྱ་བ་ནི་སྐྱོབ་པ་སངས་རྒྱས་ཞེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཀྱིས་སའི་ལྷ་མོ་ལ་གསོལ་བ་གདབ་ཅེས་བྱ་བའི་དོན་ཏོ། །དེ་ནས་ཅི་རིགས་པར་མཆོད་ཡོན་དང་གཏོར་མ་བྱིན་ཅིང་མཆོད་དེ་སྦྱིན་སྲེག་གིས་ཀྱང་ཚིམ་པར་བྱས་ལ་སའི་ལྷ་མོ་ཡིད་ཀྱིས་བཏེག་སྟེ་ནམ་མཁར་གཞག་པར་བྱའོ། །དེ་ནས་ས་དེ་བགེགས་མེད་པར་ཤེས་ནས་དངོས་གྲུབ་ཆུང་དུ་དང་བར་མ་དང༌། མཆོག་གི་དབྱེ་བས་བུས་མོ་ནུབ་ཙམ་མམ། རྐེད་པ་ཙམ་མམ། སྙིང་ག་ཙམ་བརྐོས་ཏེ། ཐལ་བ་དང་སོལ་བ་དང༌། སྐྲ་དང་ཕུབ་མ་དང༌། རྡོ་དང་རུས་པ་དང༌། གྱོ་མོ་དང་གསེག་མ་ལ་སོགས་པ་བསལ་ལ། ས་དེ་འམ་དེ་ལས་གཞན་པའི་ས་དག་ཅིང་དྲི་ཞིམ་པ་འམ་ཆུ་དྲི་ཞིམ་པས་བརླན་པས་ཁུང་བུ་བཀང་སྟེ། ཧཱུཾ་ཡོངས་སུ་བཟླས་པའི་དྲི་ཞིམ་པོའི་ཆུས་ཆག་ཆག་བཏབ་ལ་བརྡུངས་ཏེ་ལག་མཐིལ་ལྟར་མཉམ་པར་བྱའོ། །དེ་ལྟར་བྱས་པའི་ཁུང་བུ་གདང་བ་ལ་ཡང་རིམ་པ་འདི་ཡིན་ཏེ། མཆོད་ཡོན་དང་གཏོར་མ་སྦྱིན་པ་ལ་སོགས་པའི་ཆོ་ག་ཉིད་བྱ་བའོ། །ཡང་དེའི་ཚེ་སའི་ལྷ་མོ་ཕབ་ལ་ས་ཕྱོགས་དེ་བྱིན་གྱིས་བརླབས་པར་བསམ་པར་བྱའོ། །འདིར་ཚིགས་སུ་བཅད་པ་ནི། ཟུག་རྡུའི་ཉེས་པ་ཐམས་ཅད་ནི། །གལ་ཏེ་དབྱུང་བར་མི་ནུས་ན། །ལག་པས་བྱ་བ་ཅིང་གསང་སྔགས་བཟླས། །དེ་ཡི་སྦྱང་བ་འང་དེ་ཉིད་ཡིན། །ཁང་ཐོག་དང་ནི་རྡོ་ལེབ་དང༌། །གཙུག་ལག་ཁང་སོགས་ཆུ་འགྲམ་མམ། །སྔར་ནི་
སྦྱང་བ་བྱས་པའི་གནས། །མ་བརྐོས་ཀྱང་ནི་དག་པ་ཡིན། །ཞེས་བྱ་བ་ཡིན་ནོ། །དེར་ནི་བདུད་རྩི་ཐབ་སྦྱོར་གྱིས་བགེགས་བསལ་བ་དེ་བཟླས་པའི་ཡུངས་ཀར་དང༌། ཆུ་དང་ཐལ་བ་གཏོར་ཏེ་ཤར་ཕྱོགས་ནས་བརྩམས་ཏེ། བའི་རྣམ་པ་ལྔ་ལ་དེ་བཟླས་པས་ཉེ་བར་བྱུགས་ལ། སྤོས་ཆུས་བསང་གཏོར་བྱ་བཙམ་འབའ་ཞིག་བྱའོ། །དེ་ནས་དཀྱིལ་འཁོར་གྱི་གནས་དེ་སྒོ་བཞི་པའི་ཁང་པ་བརྩེགས་པའི་ནང་དུ་ཆུད་ལ། ཕྱོགས་བཞི་ནས་སྐར་ཁུང་དྲ་བ་ཅན་དང༌། རྟ་བབས་ཀྱིས་བསྐོར་བ། མེ་ཏོག་གི་ཆུན་འཕྱང་དང༌། དྲིལ་བུ་བཏགས་པའི་བ་དན་བཟང་པོ་སྣ་ཚོགས་པས་ཐམས་ཅད་དུ་ཁྱབ་པ། བླ་རེ་བྲེ་བ་དང་ལས་ཐམས་ཅད་པ་བཟླས་པའི་དྲིས་ཉེ་བར་བྱུགས་པ་དེ་བཟླས་པའི་སྨན་དང་རིན་པོ་ཆེ་དང་འབྲུ་དབུས་སུ་བརྐོས་པའི་ནང་དུ་གཞུག་པར་བྱའོ། །དེ་ལྟ་བུའི་ས་སྦྱང་བ་ཇི་ལྟ་བུས་སྔར་བྱས་པ་དང༌། དེའི་རྗེས་ལ་གང་ཞིག་བྱ་བ་དེ་བསྟན་པའི་ཕྱིར། འཇམ་པའི་རྡོ་རྗེའི་ཞེས་བྱ་བ་ལ་སོགས་པ་སྨོས་ཏེ་འཇམ་པའི་རྡོ་རྗེའི་བདག་ཉིད་ཅན་གྱི་རྣལ་འབྱོར་གསུམ་པོ་དང་ལྡན་ཞིང་མཉམ་པར་བཞག་ནས། དེ་དང་འདྲ་བར་བྱས་པས་སྔོན་དུ་བསྙེན་པ་རྫོགས་པར་བྱས་ལ། གྲོགས་ཤིན་ཏུ་བྱ་བ་དང་མཆོད་པ་སྟེ། དཀྱིལ་འཁོར་གྱི་ཡོ་བྱ་བྱད་ཀྱི་ཚོགས་པ་དང་ཡང་ལྡན་པའི་སློབ་དཔོན་དེས་དཀྱིལ་འཁོར་གྱི་གནས་ཇི་སྐད་དུ་བཤད་པའི་ཆོ་གས་ཡང་དག་པར་སྦྱང་བར་བྱའོ། །དེ་སྦྱངས་ནས་བགེགས་མཐར་བྱེད་པའི་སྦྱོར་བ་འམ། རང་གི་ལྷའི་སྦྱོར་བས་གནས་ལ་བདག་ཉིད་དབང་བསྐུར་ཏེ་གདུག་པ་ཐམས་ཅད་གཞོམ་ཞིང་ཚར་གཅོད་པར་བྱའོ། །དེ་ནས་ཨོཾ་བྷུ་ཁཾ་ཞེས་བྱ་བ་འདིས་ས་ནམ་མཁར་བྱས་ལ། དེ་ནས་ཧཱུཾ་ལཾ་ཧཱུཾ་ཞེས་བྱ་བ་འདིས་རྡོ་རྗེའི་རང་བཞིན་དུ་བྱས་ནས་ཨོཾ་མེ་དི་ནཱི་ཞེས་བྱ་བ་ལ་སོགས་པས་བྱིན་གྱིས་བརླབ་པར་བྱའོ། །འདི་ནི་ས་སྦྱང་བའི་ཆོ་གའོ།། །།ས་ཡོངས་སུ་གཟུང་བའི་ཆོ་ག་བསྟན་པའི་ཕྱིར། སྔར་བཞིན་ཞེས་བྱ་བ་ལ་སོགས་པ་སྨོས་ཏེ། སྲུང་བའི་འཁོར་ལོ་བསྒོམས་པས་བགེགས་གཞོམ་པ་དང་སྦྱོར་བའི་བདག་ཅེས་བྱ་བ་འཇམ་པའི་རྡོ་རྗེའི་ཏིང་ངེ་འཛིན་གསུམ་མངོན་དུ་བྱེད་པ་དེ་ལ་དེ་སྐད་ཅེས་བྱའོ། །ཏིང་ངེ་འཛིན་གསུམ་པ་ནི་ལན་དུ་མར་བསྟན་པ་ཡིན་བས་དེ་རྣམ་པར་གཞག་
པར་བྱ་བའི་ཕྱིར། བསྙེན་སོགས་ཞེས་བྱ་བ་ལ་སོགས་པ་སྨོས་ཏེ། བསྙེན་བ་ཆུང་དུ་ནས་རྗེས་སུ་མཉེས་པར་བྱ་བའི་མཐར་ཐུག་པ་དེ་གང་ཡིན་པ་དེ་ཐམས་ཅད་དང་ལྡན་པ་ནི་དང་པོའི་སྦྱོར་བ་དང་ལྡན་པ་ཡིན་ཏེ། དང་པོའི་སྦྱོར་བ་ཞེས་བྱ་བའི་ཏིང་ངེ་འཛིན་དང་ལྡན་པ་གང་ཡིན་བ་དེ་ཞེས་བྱ་བའི་ཐ་ཚིག་གོ །དེའི་འོག་ཏུ་དང་པོ་རང་གི་དཀྱིལ་འཁོར་རབ་ཏུ་ཕྱུང་བ་ནས་ཐ་མར་བདུད་རྩི་མྱང་བའི་བར་དུ་བྱེད་པའི་རྣལ་འབྱོར་བ་དེ་ནི་འཁོར་ལོའི་རྒྱལ་པོ་མཆོག་གི་སྦྱོར་བའི་བདག་ཉིད་དུ་འགྱུར་ཏེ། འདི་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་དང་ལྡན་པ་ཡིན་ནོ་ཞེས་བྱ་བའི་དོན་ཏོ། །དེའི་འོག་ཏུ་འཁོར་ལོའི་ལས་དཀྱིལ་འཁོར་གྱི་ལས་དཀྱིལ་འཁོར་གྱི་ལྷ་རྣམས་རེ་རེ་ཞིང་ཡང་རྫུ་འཕྲུལ་གྱི་ཆོ་འཕྲུལ་ལ་སོགས་པའི་ཕྲིན་ལས་རྣམ་པ་སྣ་ཚོགས་པ་གང་ཡིན་པ་དེས་ལས་མཆོག་བྱེད་ཅེས་བྱ་བ་ནི་འགྲོ་བའི་དོན་རྣམས་བྱེད་པ་སྟེ། རྣལ་འབྱོར་པ་དེ་ནི་ལས་ཀྱི་རྒྱལ་པོ་མཆོག་གི་སྦྱོར་བའི་བདག་ཉིད་ཅན་དུ་འགྱུར་བས་འདི་ནི་ལས་ཀྱི་རྒྱལ་པོའི་མཆོག་ཅེས་བྱ་བའི་ཏིང་ངེ་འཛིན་ཏེ། ཏིང་ངེ་འཛིན་དེ་ཡོད་པ་ཞེས་བྱ་བའི་ཐ་ཚིག་གོ །ཡིན་ཞེས་བྱ་བ་ནི་ཏིང་ངེ་འཛིན་གསུམ་པོ་དེ་དག་ནི་འདི་ཡིན་ནོ་ཞེས་བྱ་བའི་དོན་ཏོ། །རང་བཞིན་བསྟན་པའི་ཕྱིར། དེ་ལྟའི་ཞེས་བྱ་བ་ལ་སོགས་པ་སྨོས་ཏེ། འདིར་དེ་ལྟར་འཇམ་པའི་རྡོ་རྗེའི་ཏིང་ངེ་འཛིན་གསུམ་ལ་གནས་པའི་སློབ་དཔོན་ནི་སངས་རྒྱས་ཐམས་ཅད་ཀྱི་བདག་ཉིད་ཅན་དང༌། རྡོ་རྗེ་འཆང་གི་བདག་ཉིད་ཅན་ཡིན་ལ། དེའི་དཀྱིལ་འཁོར་གྱི་ས་གཞིའི་དབུས་ན་ལེགས་པར་ངས་པར་གྱུར་ཅིང༌། རྡོ་རྗེ་དང་དྲིལ་བུ་འཛིན་པར་བྱེད་པ་ལའོ། །དཔའོ་ཞེས་བྱ་བ་ནི་སངས་རྒྱས་ཐམས་ཅད་དང༌། རྡོ་རྗེ་འཆང་བ་དང་འཇམ་པའི་རྡོ་རྗེའི་ངོ་བོ་ཉིད་ཀྱི་ང་རྒྱལ་བརྟན་པ་དང་ལྡན་པའོ། །ཡང་ན། བདག་ཉིད་རང་གི་རྡོ་རྗེ་ཅན། །ཕྱག་ན་རྡོ་རྗེའང་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བརྟན་བདག་སྟེ། །བདག་པོ་རྡོ་རྗེ་ཆེན་པོ་བདག །བྱིན་གྱིས་བརླབ་པ་མི་འདོར་རོ། །ཞེས་བྱ་བའི་ཚིགས་སུ་བཅད་པ་གཉིས་ཀྱིས་ང་རྒྱལ་བརྟན་པར་བྱས་པ་ལ། སྐུ་དང་གསུང་དང་ཐུགས་ཀྱི་རང་བཞིན་
ཅན་གྱི་རྣམ་པར་སྣང་མཛད་ལ་སོགས་པའི་སྦྱོར་བ་དང་ལྡན་པ་དེས་ཕྱོགས་བཞིར་གནས་པས། འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གཅིག་ཏུ་གྱུར་པའི་ངོ་བོ་བཅོམ་ལྡན་འདས་རྡོ་རྗེ་འཆང་ནི་དཀྱིལ་འཁོར་ཐམས་ཅད་ཀྱི་དོན་དམ་པ་ཡིན་ལ། དེ་བས་ན་དཀྱིལ་འཁོར་ནི་དེའི་སྐུ་དང་གསུང་དང་ཐུགས་ཀྱི་རང་བཞིན་ཉིད་དུ་ཚིགས་སུ་བཅད་པ་གཅིག་གིས་མདོར་བསྟན་པ་ཡིན་ལ། གསུམ་གྱིས་ནི་བཤད་པ་ཡིན་ཏེ། དཀྱིལ་འཁོར་དེ་བཤད་དུ་གསོལ་ཞེས་པ་བཀའ་སྩོལ་ཅིག །གསུངས་ཤིག །སྟོན་ཅིག་ཅེས་བྱ་བའི་ཐ་ཚིག་གོལ། །ཇི་ལྟ་བུ་ཞེ་ན། དེ་བཞིན་གཤེགས་པ་ཀུན་ཞི་བ། །ཞེས་བྱ་བ་ནི་སྒྲིབ་པ་ཐམས་ཅད་སྤངས་པས་ཤིན་ཏུ་རྣམ་པར་དག་པའི་ཐུགས་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཀུན་གྱི་གནས། །ཞེས་བྱ་བ་ནི་མེ་ལོང་ལྟ་བུའི་ཡེ་ཤེས་ཀྱི་རང་བཞིན་གྱི་སྐུ་ཞེས་བྱ་བའི་ཐ་ཚིག་གོ །ཆོས་ཀུན་བདག་མེད་པ་ཡིན་མཆོག །ཅེས་བྱ་བ་ནི་ཆོས་ཐམས་ཅད་ཀྱི་མཆོག་ནི་བདག་མེད་པ་ཡིན་ཏེ། བདག་མེད་པ་ངེས་པར་སྟོན་པའི་གསུང་ཞེས་བྱ་བའི་ཐ་ཚིག་གོ །དཀྱིལ་འཁོར་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བར་སྦྱར་རོ། །མཚན་རྣམས་ནི་སུམ་ཅུ་རྩ་གཉིས་སོ། །དེའི་འཁོར་ཡིན་བས་དཔེ་བྱད་རྣམས་ཀྱང་བསྡུ་བར་བྱའོ། །དེའི་མི་མཐུན་བའི་ཕྱོགས་ནི་མཚན་མ་ཡིན་བའོ། །ཀུན་དུ་བཟང་པོ་ནི་དེ་བཞིན་གཤེགས་པའོ། །དེ་རྣམས་ཀྱི་སྐུའོ་མཆོག་ནི་སྐུའི་ཚོགས་ཡིན་ཏེ། དཔེར་ན་སྟོབས་ཀྱི་མཆོག་ལ་སྟོབས་ཀྱི་ཚོགས་ཞེས་བྱ་བ་དང་འདྲའོ། །ཞི་བ་ནི་ཤིན་ཏུ་རྣམ་པར་དག་པའོ། །ཆོས་ཀྱི་མཆོག་ནི་ཆོས་ཀྱི་ཚོགས་ཏེ། །དེ་ལས་བྱུང་བ་ནི་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་རྒྱུ་མཐུན་པ་ལས་བྱུང་བ་ཞེས་བྱ་བའི་ཐ་ཚིག་གོ །ཡེ་ཤེས་སྐྱི་སྤྱོད་པ་ནི་བྱང་ཆུབ་ཀྱི་སྤྱོད་པ་སྟེ། དེ་ལ་རྣམ་པར་སྦྱོར་བར་བྱེད་པའོ། །དེ་ཉིད་ཀྱིས་ན་དེའི་ལས་སུ་བྱ་བ་ཤེས་པའི་ཕྱིར་རོ། །སེམས་དཔའ་ཀུན་གྱི་ཞེས་བྱ་བ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིའོ། །སེམས་ཆེན་པོ་ཞེས་བྱ་བ་ནི་བྱང་ཆུབ་ཀྱི་སེམས་སོ། །དག་པ་ནི་སྒྲིབ་པ་ཐམས་
ཅད་སྤངས་པའི་ཕྱིར་རོ། །དེའི་དག་པ་ནི་གཞིག་པར་བྱ་མི་ནུས་པ་ཉིད་དམ། ཉོན་མོངས་པ་གློ་བུར་པ་ཉིད་ཀྱིས་ན་རང་བཞིན་དྲི་མ་མེད་ཅེས་བྱའོ། །ཁ་ལོ་སྒྱུར་ཞེས་བྱ་བ་ནི་གདུལ་བར་དཀའ་བའི་གདུལ་བྱ་འདུལ་བས་ཁ་ལོ་སྒྱུར་བའོ། །དེ་ནས་ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ལའོ། །འཇམ་པའི་རྡོ་རྗེའི་སྦྱོར་བ་ལ་གནས་པར་གྱུར་པ་ཉིད་དང༌། འགྲོ་བ་སེམས་ཅན་གྱི་ཁམས་མ་རིག་པའི་མུན་ནག་གིས་ཁེབས་པ་ལ་བརྟེན་ཅིང་གནས་པར་བལྟས་ནས། ཁྲོས་པས་ཞེས་བྱ་བ་ཁྲོ་བོའི་འགྱུར་བས་སྨིན་མ་བསྡུས་པ་དང༌། མཆེ་བ་གཙིགས་པ་དང་། བསྒྱིངས་པའི་སྤྱོད་པ་ལ་སོགས་པ་དང་ལྡན་པས་ཧཱུཾ་བཛོད་ཏིཥྛ་ཞེས་བྱ་བ་འདིས་སྤྲུལ་པའི་འཁོར་ལོ་ནམ་མཁའ་ལ་ལེགས་པར་བཏེག་པར་བྱའོ། །ཡི་གེ་མ་ཊ་ས་ཉི་ཟླའི་མིག་ཅེས་བྱ་བ་དང༌། རང་མིག་ཅེས་བྱ་བའི་ཚིག་འདི་གཉིས་ཀྱིས་ནི་རྡོ་རྗེ་ལྟ་བ་བཤད་པ་ཡིན་པས། མ་ལས་ནི་མིག་གཡས་པ་ཉི་མར་བྱས་ཤིང༌། ཊ་ལས་ནི་མིག་གཡོན་པ་ཟླ་བར་བྱས་ལ། ཧཱུཾ་གིས་མིག་འབྲས་བསྐལ་བའི་མེ་ལྟ་བུར་བྱས་ཏེ་ལྟ་བ་འདིས་འགྲོ་བ་ཀུན་ལ་བལྟས་པ་ཉིད་ཀྱིས་ཕྱོགས་ཐམས་ཅད་དུ་ཉེ་བར་སྦར་ཞིང་སྣང་བར་བྱས་ལ་དཀྱིལ་འཁོར་གྱི་ས་གཞི་ཡོངས་སུ་བསྐོར་བར་བྱའོ། །ཇི་ལྟར་བསྐོར་བར་བྱ་ཞེ་ན། རྐང་འོག་ཅེས་བྱ་བ་ལ་སོགས་པ་སྨོས་ཏེ། ཡི་གེ་ཨ་ལས་རྐང་པ་གཉིས་ཀྱི་མཐིལ་དུ་སྣ་ཚོགས་རྡོ་རྗེ་འབར་བ་བསམས་ལ། དེ་ལྟ་བུར་གྱུར་པའི་རྐང་པ་གཉིས་ཀྱི་རོལ་པའི་སྟང་སྟབས་གང་ཡིན་པ་དེས་ས་ལ་སྣ་ཚོགས་རྡོ་རྗེ་ཀུན་དུ་འདྲ་བའི་འགྲོས་གང་ལ་ཡོད་པ་དེ་ནི་རྡོ་རྗེའི་འགྲོས་ཀྱི་རོལ་པའོ། །དེའི་གོམ་པ་འཇོག་པ་གང་ཡིན་པ་དེ་ནི་རོལ་བའི་རྡོ་རྗེའི་འགྲོས་ཀྱི་གར་ཏེ་རོལ་པའི་རྡོ་རྗེའི་འགྲོས་ཇི་ལྟར་འབྱུང་བར་འགྱུར་བ་དེ་ལྟར་གར་བྱེད་ཅིང༌། ལུས་ངག་ཅེས་བྱ་བ་ལ་སོགས་པའི་ཚིགས་སུ་བཅད་པ་གཉིས་ཀྱིས་བསྐྲད་པར་བྱའོ། །དེ་ནས་དཀྱིལ་འཁོར་གྱིས་གཞི་དྲིས་བྱུགས་ལ་མེ་ཏོག་དང༌། མར་མེ་ལ་སོགས་པ་དང༌། སྒོ་བཞི་དང་མཚམས་བཞི་ནས་སྤོས་སྣོད་ལས་བདུག་པ་གཏུལ་བ་དང༌། གར་དང་གླུ་ལ་སོགས་པས་ཡང་དག་པར་མཆོད་ལ། ལག་པས་རེག་ཅིང་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་
དང་། ཡི་གེ་བརྒྱ་པ་ལན་བདུན་བཟླས་ལ་དེ་ཉིད་དུ་མཉམ་པར་གཞག་བཞིན་དུ་ཉལ་བར་བྱའོ། །དེ་ལྟར་ན་འདི་ནི་ས་ཡོངས་སུ་གཟུང་བའི་ཆོ་གའོ། །ཉིན་ཞག་གཉིས་ལ་ནི་ལྷག་པར་གནས་པར་བྱ་བ་ཡིན་པས་དེ་བསྟན་ཕྱིར། ས་ནི་ཞེས་བྱ་བ་ལ་སོགས་པ་སྨོས་ཏེ། ནང་པར་གྱི་དུས་ཉིད་དུ་བདག་པོའི་སྦྱོར་བ་བྱས་པ་སློབ་དཔོན་གྱིས་བགེགས་མཐར་བྱེད་ཉིད་ལྟེ་བ་མན་ཆད་རྡོ་རྗེ་རྩེ་གཅིག་པ་འདྲ་བ། སྐུ་སྟོད་རང་གི་རྣམ་པ་འདྲ་ཞིང་རང་གི་མཚན་མ་བསྣམས་པའི་ཕུར་བུ་བློས་བསམས་ལ་དེ་ཉིད་གཡོན་པའི་ཁུ་ཚུར་གྱིས་བཟུང་སྟེ། གཡས་པའི་རྡོ་རྗེ་འབར་བའི་ཐོ་བས་བརྡུང་ཞིང་། ཨོཾ་གྷ་གྷ་ཞེས་བྱ་བའི་སྔགས་བརྗོད་ཅིང་དཀྱིལ་འཁོར་གྱི་སའི་དབུས་སུ་བརྒྱ་བྱིན་འཁོར་དང་བཅས་པ་ལ་སོགས་པ་ཕྱོགས་བཅུའི་བགེགས་ཀྱི་ཚོགས་རྣམས་ཕུར་བུས་བཏབ་སྟེ་གཞོམ་པར་བྱས། དེ་ནས་ས་ཤིན་ཏུ་བགེགས་དང་བྲལ་བ་དང༌། རྡོ་རྗེ་འབར་བའི་རང་བཞིན་ཅན་དུ་གྱུར་པས་འབར་བའི་འོད་ཟེར་རྣོན་པོ་རྣམས་ཀྱིས་ཁྱབ་པའི་འོད་ཟེར་འདི་ལ་ཡོད་པས་དེ་སྐད་ཅེས་བྱའོ། །དེ་ལྟར་བསམས་ནས་ཕྱི་རོལ་དུ་གོ་རིམས་ཇི་ལྟ་བ་བཞིན་དུ་ཡི་གེ་བཾ་ལས་རྡོ་རྗེ་འབར་བའི་དྲ་བ། ཡི་གེ་ཧཱུཾ་ལས་རྡོ་རྗེ་འབར་བའི་རབ། །ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་ཟུར་བཞི་པ་སེར་པོས་ཕྱོགས་བཅིང་བ་དང༌། རཾ་ལས་བྱུང་བའི་མེའི་དཀྱིལ་འཁོར་གྲུ་གསུམ་པ་དམར་པོས་མཚམས་བཅིང་བར་བསམས་ལ་སའི་ལྷ་མོ་ལྷག་པར་གནས་པར་བྱའོ། །དེ་ཡང་དབུས་སུ་དྲིའི་དཀྱིལ་འཁོར་ལ་སའི་ལྷ་མོ་ཡི་གེ་བཾ་ལས་བྱུང་བ་མདོག་སེར་བ་ལག་ན་བུམ་པ་ཐོགས་པ་ལེགས་པར་མཆོད་ལ། སྐྱོབ་པ་སངས་རྒྱས་ཞེས་བྱ་བ་ལ་སོགས་པ་ལན་གསུམ་བརྗོད་ལ་གཤེགས་སུ་གསོལ་ཏེ་དེ་ཉིད་དུ་ཐིམ་པར་བྱའོ། །ཕྱི་དྲོའི་དུས་སུ་ཁྲུས་བྱས་ཤིང་ལུས་དྲི་ཞིམ་པོ་དང་རྒྱན་གྱིས་བརྒྱན་ཅིང་གོས་དམར་པོ་བཟང་པོ་བགོ་བ་དང༌། མེ་ཏོག་གི་ཕྲེང་བ་བཏགས་ཤིང་ཁ་དྲི་ཞིམ་པར་བྱས་ལ། དང་པོ་ཁོ་ནར་དཀྱིལ་འཁོར་གྱི་ས་གཞི་དྲི་ཞིམ་པོས་བྱུགས་པ་དང༌། མེ་ཏོག་དྲི་ཞིམ་པོ་སྣ་ཚོགས་པ་གཅལ་དུ་བཀྲམ་པ་ཡང་བྱེད་དུ་བཅུག་སྟེ་རང་ཉིད་འཇམ་པའི་རྡོ་རྗེའི་རྣལ་འབྱོར་བྱས་པ་ལྷ་རྣམས་ཀྱི་གནས་སུ་ཟླ་བ་དང་ཉི་
མ་ལ་སོགས་པས་དཀྱིལ་འཁོར་རྣམས་བྱས་ཏེ། དེ་རྣམས་ལ་རང་རང་གི་གདན་ཇི་ལྟ་བ་བཞིན་བསམས་ལ། དེ་རྣམ་མཁའ་ལ་བཞུགས་པའི་འཇམ་པའི་རྡོ་རྗེའི་དཀྱིལ་འཁོར་སྤྱན་དྲངས་ནས་བཞུགས་སུ་གསོལ་ལ། མཚམས་བཅིང་བ་ལ་སོགས་པ་དང༌། མཆོད་པ་ལ་སོགས་པ་ཡང་བྱས་ནས་བུམ་པ་ལྷག་པར་གནས་པར་བྱའོ། །དེ་ཡང༌། མགྲིན་པ་མཆོག་ནི་གོས་ཀྱིས་དཀྲི་།ཞེས་བྱ་བ་ནི་མགྲིན་པ་རིང་བ་ལ་སོགས་པའི་མཚན་ཉིད་དང་ལྡན་པས་མཆོག་ཏུ་གྱུར་པ་དེ་རས་ལ་སོགས་པས་ལེགས་པར་བཅིངས་པ་གང་ཡིན་པ་དེ་ལ་དེ་སྐད་ཅེས་བྱའོ། །དཀྱིལ་འཁོར་པའི་ཞེས་བྱ་བ་ནི་ལྷ་བཅོ་བརྒྱད་པོ་རེ་རེའམ། ཡང་ན་རིགས་ཀྱི་ཡུམ་རྣམས་ཀྱི་བཞི། དེ་བཞིན་གཤེགས་པ་དང་དེའི་རིགས་དང་བཅས་པ་རྣམས་ཀྱི་ལྔ། ལས་ཐམས་ཅད་པའི་བུམ་པ་ནི་བཅུ་པའོ། །གང་གི་བུམ་པ་གང་ཡིན་པ་དེ་ལ་དེའི་སྔགས་ལན་བདུན་བདུན་བཟླ་བ་དང༌། དེའི་མཚན་མ་དེ་ལ་བྲི་བར་བྱའོ། །བུམ་པ་མདོར་བསྡུས་པ་ལ་ཡང་དེ་བཞིན་གཤེགས་པའི་བུམ་པ་རྣམས་ལ་ནི་དེ་བཞིན་གཤེགས་པའི་མཚན་མ་ཉིད་དོ། །ལས་ཐམས་ཅད་པའི་བུམ་པ་ལ་ནི། ཨོཾ་ཨཱཿབིགྷྣཱནྟ་ཀྲྀ་ཏ་ཧཱུཾ་ཞེས་བྱ་བ་འདི་ནི་ལན་བརྒྱ་རྒ་བརྒྱད་བཟླས་པར་བྱའོ། །རྣམ་པར་རྒྱལ་བའི་བུམ་པ་ལ་ནི་གཙོ་བོ་ཡིན་པའི་ཕྱིར་དང༌། བྱ་བ་མང་པོ་ཡོད་པའི་ཕྱིར་ཁྱད་པར་བསྟན་པ་ནི་འབྲུ་སྨན་ཞེས་བྱ་བ་ལ་སོགས་པ་སྨོས་ཏེ། རྒྱལ་ལ་ཞེས་པ་ནི་རྣམ་པར་རྒྱལ་བའི་བུམ་པ་ལ་སྟེ། རྩ་བ་ནག་པོ་ར་རི་མེད་པ། མཆུ་འཕྱང་བ། མགྲིན་པ་རིང་བ། ལྟོ་བ་ཆེ་བ། མགྲིན་པ་མེ་ཏོག་གི་ཕྲེང་བ་དང་བཅས་པའི་གོས་བཟང་པོས་དཀྲིས་པ། ཡལ་ག་ལོ་འབྲས་བཟང་པོ་ཡོད་པས་ཁ་བརྒྱན་པ་ཆོས་འབྱུང་བའི་དབུས་ན་གནས་པའི་བདག་པོའི་མཚན་མས་མཚན་པ་ཡི་གེ་བཾ་ལས་རིན་པོ་ཆེའི་རང་བཞིན་ཅན་དུ་བྱས་པར་བསམས་ལ་འཁོར་ལོའི་གཙོ་བོ་བཟླ་བར་བྱའོ་ཞེས་བྱ་བར་སྦྱར་རོ། །འབྲུ་ལྔ་ནི་ཏིལ་དང་། ནས་སོ་བ་དང༌། མ་ཤ་དང༌། འབྲས་སོ་བ་དང༌། གྲོའོ། །སྨན་ལྔ་ནི་བྲྀ་ཧ་ཏི་དང༌། ཀཎྜ་ཀ་རི་དང༌། ཤ་ཏ་རཀྵ་དང༌། དཎྜོཏྤ་ལ་དང༌། གི་རི་ཀརྞི་དཀར་པོའོ། །རིན་ཆེན་ལྔ་ནི་མུ་ཏིག་དང༌། གསེར་དང༌། དངུལ་དང༌། བྱི་རུ་དང༌། མུ་མེན་ནོ། །དྲི་བཟངས་ཆུ་ནི་སྤོས་ཆུ་ཅུང་ཟད་དོ། །
འཁོར་ལོ་ནི་འཇམ་པའི་རྡོ་རྗེའི་བསམ་གཏན་གྱི་དཀྱིལ་འཁོར་རོ། །འདི་རྣམས་ཀྱི་ཚོགས་བསྡུས་པར་གྱུར་པ་གང་ཡིན་པར་མེ་ཏོག་གི་ཕྲེང་བ་བཏགས་པའི་རྡོ་རྗེ་སྟེང་དུ་བཞག་པ་གང་ཡིན་པ་ལ་འཁོར་ལོའི་གཙོ་བོ་ཞེས་པ་འཇམ་པའི་རྡོ་རྗེའི་སྔགས་དེའི་ས་བོན་ལས་བཏུས་པ་བཟླ་བར་བྱ་སྟེ། ཁུ་ཚུར་གཡོན་པས་རྡོ་རྗེ་ལ་བཏགས་པའི་ཕྲེང་བ་བཟུང་ལ་སྔགས་བརྒྱ་རྩ་བརྒྱད་མངོན་པར་བཟླ་བར་བྱའོ། །མཆོད་ཡོན་ཞེས་བྱ་བ་ནི་རང་གི་བདག་པོའི་སྔགས་དང༌། ཡི་གེ་ཧཱུཾ་ལན་བདུན་བཟླས་པའི་མཆོད་ཡོན་གྱི་ཆུ་ལས་ཅུང་ཟད་ཅིག་དབུལ་ལོ། །དེར་ཞེས་བྱ་བ་ནི་རྣམ་པར་རྒྱལ་བའི་བུམ་པའི་སྟེང་དུ་དྲི་ལ་སོགས་པའི་རྫས་ལྔ་དང་ལྡན་པའི་པདྨའི་སྣོད་གཞག་པར་བྱའོ་ཞེས་བྱ་བ་ནི་ལྷག་མའོ། །ཉིན་རེ་ཞེས་བྱ་བ་ནི་ཇི་སྲིད་འཁོར་ལོ་དགོད་ཀྱི་བར་དུའོ། །དེ་བཞིན་ཞེས་བྱ་བ་ནི་སྔ་མ་བཞིན་ནོ། །བཟླ་བ་ཞེས་བྱ་བ་ནི་རྣམ་པར་རྒྱལ་བའི་བུམ་པ་ལའོ། །དཀྱིལ་འཁོར་རྫོགས་པའི་ཚེ་བུམ་པ་ཇི་ལྟར་དགོད་པ་དེའི་གནས་སྐབས་ལ་བབ་པ་དེ་སྔར་ཉིད་བཤད་པ་ནི། དེ་ཡང་ཞེས་བྱ་བ་ལ་སོགས་པ་སྨོས་པ་ཡིན་ཏེ། མཚམས་སུ་ཞེས་བྱ་བ་ནི་སྒོའི་དྲང་ཐད་མ་ཡིན་པའི་གནས་སུའོ། །གཡས་སུ་ཞེས་བྱ་བ་ནི་ཕྱི་འམ་ནང་གི་གཡས་ལོགས་སུའོ། །ཆུའི་དབང་བསྐུར་བའི་གནས་སྐབས་མདོར་སྡུས་ཏེ་བཤད་པ་ནི། དེ་ལས་ཞེས་བྱ་བ་ལ་སོགས་པ་ཡིན་ཏེ། དེ་ལས་ཞེས་བྱ་བ་ནི་རྣམ་པར་རྒྱལ་བ་ལ་སོགས་པའི་བུམ་པ་རྣམས་ལས་མདོར་བསྡུས་པས་སོ། །མཆོད་ཡོན་སྣོད་དུ་ཞེས་བྱ་བ་ནི་ཤར་སྒོ་མན་འཇིལ་བཞག་པའི་དུང་ཕོར་ལ་སོགས་པར་རོ། །སློབ་མ་རྣམས་ཀྱིས་ཞེས་བྱ་བ་ནི་ཤུགས་ཀྱིས་གོ་བར་འགྱུར་རོ། །དེ་ལྟར་ན་འདི་ནི་བུམ་པ་ལྷག་པར་གནས་པའི་ཆོ་གའོ།། །།པུས་བཙུགས་ཞེས་བྱ་བ་ནི་ས་ལའོ། །སངས་རྒྱས་འགྲོ་འཁོར་བྱ་དོན་སྩོལ། །ཞེས་བྱ་བ་ལ་འགྲོ་བ་རྣམས་ལ་དཀྱིལ་འཁོར་གྱི་བྱ་བས་དོན་སྩོལ་བར་མཛད་པའོ། །འབྲས་གནས་ཞེས་བྱ་བ་ནི་ས་ཐོབ་པ་རྣམས་སོ། །གཞན་ཞེས་བྱ་བ་ནི་ས་ཐོབ་པ་རྣམས་ལས་གཞན་པ་ལྷ་ལ་སོགས་པའོ། །བྱང་ཆུབ་ལ་བཀོད་པ་ཞེས་བྱ་བ་ནི་བཏུལ་བའོ། །སེམས་ཅན་ཞེས་བྱ་བ་ནི་མི་ལ་སོགས་པའོ། །རྡོ་རྗེའི་སྤྱན་མངའ་བ་ནི་ལྷའི་མིག་དང་ལྡན་པའོ།།
ཡོ་བྱད་ཅེས་བྱ་བ་ནི་ཅི་འབྱོར་བའི་མཆོད་པའོ། །དེ་ཞེས་བྱ་བ་ནི་དེའི་ཕྱིར་རོ། །ཡང་དག་པར་བསྲུངས་ལ་ཞེས་བྱ་བ་ནི་མཚམས་བཅིངས་པ་ལ་སོགས་པས་སོ། །འདི་ནི་ལྷ་ལྷག་པར་གནས་པའི་ཆ་གའོ།། །།དེ་ནས་རང་གི་སློབ་མ་ལྷག་པར་གནས་པར་བྱའོ་ཞེས་བྱ་བར་སྦྱར་རོ། །མེ་ཏོག་ཕྲེང་ཐོགས་ཞེས་བྱ་བ་ནི་མེ་ཏོག་གི་ཕྲེང་བ་སྙིམ་པས་འཛིན་པའོ། །ང་རྒྱལ་མེད་པ་ནི་རློམ་པ་མེད་པའོ། །རིགས་མཐོ་བ་ནི་རིགས་བཟང་པོ་ལས་སྐྱེས་པའོ། །ཡོན་ཏན་དང་ལྡན་བ་ནི་གཏོང་བ་དང་བརྟན་པ་ལ་སོགས་པ་དང་ལྡན་པའོ། །བདེ་བར་གཤེགས་པའི་ཞེས་བྱ་བ་ལ་སོགས་པ་ནི་རིགས་དང་ཡོན་ཏན་དང༌། གཟུགས་དམན་པར་གྱུར་པ་དག་ཀྱང་ལྷག་པར་གནས་པར་བྱ་སྟེ། དེ་ཡང་གལ་ཏེ་གསང་སྔགས་སྒྲུབ་པ་ལ་ཤིན་ཏུ་དོན་དུ་གཉེར་ཞིང་མངོན་པར་བརྩོན་པ་དང་ལྡན་པ་དང༌། སྟོན་པ་གཞན་ལ་མི་བརྟེན་པར་གྱུར་ན་བྱར་རུང་ངོ་ཞེས་བྱ་བའི་ཐ་ཚིག་གོ །ཆོ་ག་ཞེས་བྱ་བ་ནི་འཇུག་པ་ལ་སོགས་པའོ། །འཁོར་བཞི་ཆར་ཡང་ཞེས་བྱ་བ་ནི་དགེ་སློང་དང༌། དགེ་སློང་མ་དང༌། དགེ་བསྙེན་དང་དགེ་བསྙེན་མའོ། །རང་གི་བསླབ་དད་ཤིན་ཏུ་ལྡན། །ཞེས་བྱ་བ་ནི་དེ་ལ་བརྩོན་ཞིང་གུས་པའོ། །ཐེག་ཆེན་ལ་དགའི་བདག་ཉིད་ཅན། ཞེས་བྱ་བ་འདིས་ནི་མི་འགལ་བར་བྱ་བའི་ཕྱིར་འདི་ལ་ནི་ཡིད་ཀྱི་ལས་གཙོ་བོ་ཡིན་པས་སྟོན་ཏོ། །ཡང་ན་འཇུག་པ་ཐམས་ཅད་ལ་ཆོ་ག་ཐམས་ཅད་སེམས་པར་བྱ་དགོས་པ་མ་ཡིན་པས་དེ་ལ་འགལ་བ་ག་ལ་ཡོད། གསང་སྔགས་གྲུབ་དོན་གཉེར་ཞེས་བྱ་བ་ནི་འཇིག་རྟེན་འདི་ཉིད་དུ་མངོན་པར་མཐོ་བ་འདོད་པའོ། །བསོད་ནམས་འདོད་པས་ཞེས་པ་ནི་འཇིག་རྟེན་གཞན་དུ་མངོན་པར་མཐོ་བ་ཐོབ་པའི་དོན་དུའོ། །འཇིག་རྟེན་གཞན་དོན་གཉེར་ཞེས་བྱ་བ་ནི་འཇིག་རྟེན་གཞན་དུ་དེ་བཞིན་གཤེགས་པ་ལ་སོགས་པའི་ཕུན་སུམ་ཚོགས་པ་སྐུ་གསུམ་གྱིས་ཡང་དག་པར་བསྡུས་པ་འཕགས་པ་དང་འཕགས་པ་མ་ཡིན་པའི་འཇིག་རྟེན་ཐམས་ཅད་ལས་གོང་མར་གྱུར་པ་ཉིད་དོ། །དོན་དུ་གཉེར་བའི་སངས་རྒྱས་ཉིད་དོན་དུ་གཉེར་བ་ཞེས་བྱ་བའི་བར་དུའོ། །འཇིག་རྟེན་ཕ་རོལ་ཞེས་བྱ་བ་ནི་ཕྱོགས་གསུམ་བ་གཟུང་ངོ༌། །ཚེ་འདིའི་ཞེས་བྱ་བ་ནི་ཕྱོགས་གོང་མ་གཉིས་པོ་དང་སྦྱར་ཏེ། འདི་ཉིད་
དུ་དམན་པའི་འཇིག་རྟེན་ཉིད་དུ་གྱུར་པས་ན་ཚེ་འདི་པ་ཉིད་དོ། །རིགས་པས་སྒྲུབ་པ་བཤད་པ་ནི། ཚ་འདི་ཞེས་བྱ་བ་ལ་སོགས་པ་ཡིན་ཏེ། རྒྱས་ཞེས་བྱ་བ་ནི་མཐའ་དག་གོ །དེ་སྐད་བརྗོད་ཅེས་བྱ་བ་ནི་ཡིད་གཞུངས་ཞེས་བྱ་བ་ལ་སོགས་པ་ཐམས་ཅད་བསམ་པ་དག་པར་བྱ་བའི་ཕྱིར་བརྗོད་པར་བྱའོ། །སྔོན་བཞིན་ཞེས་བྱ་བ་ནི། རང་རིག་པདྨའི་ལྟེ་བ་རུ། །ཞེས་བྱ་བ་ལ་སོགས་པ་གང་བཤད་པ་དེ་བཞིན་དུའོ། །ཁང་པ་ནི་དཀྱིལ་འཁོར་རོ། །གསོལ་བ་འདེབས་ཞེས་བྱ་བ་ནི་དཀྱིལ་འཁོར་དུ་འཇུག་པར་བྱ་བའི་ཕྱིར་ཚོགས་སུ་བཤད་པ་གཉིས་ཀྱིས་སོ། །དགའ་ཆེན་ཞེས་བྱ་བ་ནི་རྡོ་རྗེ་འཆང་དང་མཉམ་པའི་ཕྱིར་རོ། །ཚུལ་ཞེས་བྱ་བ་ནི་ལམ་མོ། །བརྟེན་པ་ཞེས་བྱ་བ་ནི་མི་ཤིགས་པའོ། །དམ་ཚིག་ཅེས་བྱ་བ་ནི་སྔགས་དང་ཕྱག་རྒྱ་ལ་སོགས་པའོ། །ལན་གསུམ་བརྗོད་ཅེས་བྱ་བ་ནི་ཚིགས་སུ་བཅད་པ་གཉིས་པོ་འདི་དག་ཉིད་དོ། །རབ་གུས་ཞེས་བྱ་བ་ནི་རྫེས་དང་བཅས་པའོ། །མཉེས་གཤིན་པ་ནི་སྙིང་དུ་སྡུག་པ་དང་བཅས་པའོ། །གཙོ་བོ་གཅིག་ལ་ནི་དམིགས་བྱས་ཞེས་བྱ་བ་ནི་དེའི་སྒོ་ནས་ཐམས་ཅད་ལ་སྨྲ་བའོ། །ཆོ་ག་ཞེས་བྱ་བ་ནི་ཐབས་ཆེན་པོའོ། །མཐུ་ཡིས་ཞེས་བྱ་བ་ནི་བཟླས་པ་དང་བསྒོམས་པས་སོ། །ཡེ་ཤེས་མཉམ་མེད་ཅེས་བྱ་བ་ནི་བྱང་ཆུབ་ཆེན་པོའོ། །འདི་གྱིས་ཤིག་ཅེས་བྱ་བ་ནི་གསང་སྔགས་ཀྱི་ཚུལ་ལ་རབ་ཏུ་གཞོལ་བའོ། །བཤགས་སོ་ཞེས་བྱ་བ་ནི་སྡིག་པ་བཤགས་པ་ལ་སོགས་པ་ལན་གསུམ་བརྗོད་དུ་བཅུག་ལ་བྱང་ཆུབ་ཀྱི་སེམས་བསྐྱེད་པར་བྱའོ། །དྲན་དུ་གཞུག་ཅེས་བྱ་བ་ནི་ཚིགས་སུ་བཅད་པ་གཅིག་གིས་ཏེ། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་བཤགས་པར་བགྱི། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་སེམས་བསྐྱེད་ཅེས་བྱ་བ་འདིས་སོ། །བསྲུངས་ནས་ནི་ཞེས་བྱ་བ་ནི་སློབ་མ་ལས་ཐམས་ཅད་པས་བསྲུངས་ལ། དེ་རྣམས་ཉིད་ཀྱི་སྙིང་ག་ལ་སོགས་པའི་རྡོ་རྗེ་ལ་སོགས་པར་ཧཱུཾ་ཨཱཿཨོཾ་ལ་སོགས་པ་བརྗོད་ཅིང༌། སྙིང་ག་ལ་སོགས་པར་སྤོས་ཆུ་དང་རྡོ་རྗེ་ལ་སོགས་པ་དང་ལྡན་པའི་ཁུ་ཚུར་གྱིས་རེག་པར་བྱས་ལ་མདུན་དུ་སྤོས་དང་མར་མེ་བྱིན་ནས་ཨ་ཤྭདྠའམ་ཨུ་དུམ་ཝཱ་རའི་སོ་ཤིང་སོར་བཅུ་གཉིས་པ་དྲང་བ་མ་གས་པ་སྲོག་ཆགས་མེད་པ། རྩེ་མོ་
ལ་མེ་ཏོག་བཏགས་པ་དེ་རྣམས་ཁ་བྱང་དུ་བལྟས་ཏེ་སྙིམ་པར་སྦྱར་བར་སྦྱིན་པར་བྱའོ། །དེས་ཀྱང་དཀྱིལ་འཁོར་འདོམ་གང་གྲུ་བཞི་པ་བྱས་ནས་སློབ་མ་དེ་ཤར་རམ་བྱང་དུ་ཁ་བལྟས་ཏེ་འདུག་པ་ལ་སོ་ཤིང་རྩེ་མོ་ནས་འཆར་བཅུག་ལ་ལྟོས་པ་མེད་པར་མདུན་དུ་དོར་དུ་གཞུག་གོ །སོ་ཤིང་ལྷུང་བའི་རྗེས་སུ་འབྲངས་པས་འདི་རྣམས་ཀྱིས་ཞི་བ་ལ་སོགས་པའི་དངོས་གྲུབ་ཅིར་འགྱུར་བ་ཡང་བསྟན་པར་བྱའོ། །དེ་ལ་བྱང་དང་ཤར་དང་ལྷོ་དང་ནུབ་ཏུ་ལྷུང་བ་ལས་ཞི་བ་དང་རྒྱས་པ་དང་མངོན་སྤྱོད་དང་དབང་འགྲུབ་པ་ཡིན་ལ་སྟེང་དུ་བལྟས་ཏེ་ལྷུང་ན་ནི་རིག་པ་འཛིན་པའི་དངོས་གྲུབ་འགྲུབ་པོ། །འོག་ཏུ་བལྟས་ཏེ་ལྷུང་ན་ནི་ས་འོག་གི་དངོས་གྲུབ་འགྲུབ་བོ། །དཀྱིལ་འཁོར་གྱི་ཕྱི་རོལ་དུ་ལྷུང་བ་ལ་ནི་དངོས་གྲུབ་མེད་དོ། །འཐོར་འཐུང་ཞེས་བྱ་བ་ནི་བདུད་རྩི་ཐབ་སྦྱོར་བཟླས་པའི་ཆུས་སོ། །སྐྱོར་ཆུ་ལན་གསུམ་ཞེས་བྱ་བ་ནི་སྤོས་ཆ་བ་ཀྱི་སྐྱོར་ཆུ་ཨོཾ་ཧྲི་ཞེས་བྱ་བ་ལ་སོགས་པའི་ཕྲེང་བའི་སྔགས་བཟླས་ལ་ལན་གསུམ་བླུད་ནས་ཁང་པའི་ཕྱི་རོལ་དུ་བཞག་ནས་བདུད་རྩི་ཐབ་སྦྱོར་བཟླས་པའི་ཀུ་ཤ་མང་པོ་ནི་སྟན་གྱི་ཕྱིར་སྦྱིན་ལ། དེ་བཞིན་དུ་ཀུ་ཤ་གཅིག་ནི་སྔགས་ཀྱི་ཕྱིར་སྦྱིན་ནོ། །དེ་ནས་བདུད་རྩི་ཐབ་སྦྱོར་བཟླས་པའི་སྐུད་པ་སུམ་སྒྲིལ་མདུད་པ་གསུམ་དང་ལྡན་པས་དེ་རྣམས་ཀྱི་དཔུང་བ་གཡས་པར་རང་ཉིད་ཀྱིས་བཅིངས་ལ་དེ་ཡང་དག་པར་བསྲུང་བར་བྱའོ། །དེ་ནས་གཟེངས་བསྟོད་པའི་ཕྱིར་ཆོས་བཤད་པར་བྱ་བ་ཡིན་པས་དེའི་ཕྱིར་དེ་ནི། འཇིག་རྟེན་དུ་ནི་ཞེས་བྱ་བ་ལ་སོགས་པ་སྨོས་ཏེ། བརྒྱ་ལམ་ཞེས་བྱ་བ་ནི་ལན་འགའ་ཞིག་གོ །དེ་ཡང་འདི་ལྟ་སྟེ་བསྐལ་པ་ཆེན་པོ་འདི་ལ་སངས་རྒྱས་སྟོང་འབྱུང་བར་འགྱུར་ལ། ཡང་ན་མི་འབྱུང་བ་ཡོད་དེ། ལན་འགའ་ནི་བསྐལ་པ་ཆེན་པོ་མང་པོར་ཡང་སངས་རྒྱས་མི་འབྱུང་བ་འགྱུར་བ་ཡང་འདས་ཟིན་པའི་ཕྱིར་རོ། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་དཀོན་པ་སྟེ། །ཞེས་བྱ་བ་ནི། །རྒྱུད་ཀྱི་རྒྱལ་པོ་འདི་ཉིད་ལས། །བཅོམ་ལྡན་འདས་དེ་བཞིན་གཤེགས་པ་ཐམས་ཅད་སྔོན་བྱུང་བ་བརྗོད་ཀྱིས་མི་ལང་པའི་ཡང་བརྗོད་ཀྱིས་མི་ལང་བའི་སངས་རྒྱས་ཀྱི་ཞིང་གི་རྡུལ་ཕྲ་རབ་ཏུ་ཕྲ་བ་དང་མཉམ་པའི་བསྐལ་
པ་ཡང་འདས། གང་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མར་མེ་མཛད་འདས་པ་ནས་ཐུབ་པ་ཆེན་པོ་འོད་སྲུངས་མངོན་པར་སངས་རྒྱས་པའི་བར་གྱིས་ཀྱང་མ་གསུངས་སོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྨོས་ཅི་འཚལ་ཞེས་བྱ་བ་ནི་སྔར་བཤད་པ་ལས་ཁྱད་པར་དུ་འཕགས་པར་སྟོན་ཏེ། སྔགས་ཀྱི་སྤྱོད་པ་ལ་གནས་ནས་སྔགས་ཟློས་ཤིང་གོམས་པར་བསླབས་པས་གོ་འཕང་བླ་ན་མེད་པ་འཐོབ་པར་འགྱུར་བ་དེ་སུ་ཞིག་གི་སྔགས་ཡིན་ཞེ་ན། གྲགས་པ་མཐའ་ཡས་ཞེས་བྱ་བ་སྟེ་སྐྱོབ་པ་རྣམས་ཀྱིའོ། །སྐྱེ་བཞིན་པ་ཞེས་བྱ་བ་ནི་དཀྱིལ་འཁོར་དུ་འཇུག་པས་སོ། །ཐེག་པ་ཆེན་པོ་ནི་སངས་རྒྱས་ཀྱིས་མྱ་ངན་ལས་འདས་པའོ། །ཆེར་འབྱུང་བ་ནི་ཐེག་པ་ཆེན་པོ་རྣམས་འབྱུང་བ་སྟེ། གང་ལས་སངས་རྒྱས་དང་བྱང་ཆུབ་སེམས་དཔའི་ཕུན་སུམ་ཚོགས་པ་འབྱུང་བའོ། །དེ་ལྟ་བུའི་ལམ་དེ་ནི་ཐེག་པ་ཆེན་པོའོ་ཞེས་འབྱུང་བའོ། །དོན་བཤད་བྱས་ནས་ནི་ཞེས་བྱ་བ་ནི་དེ་ལྟར་གཟེངས་བསྟོད་པར་བྱ་བའི་ཕྱིར་ཆོས་བཤད་པ་བྱས་ནས་ཞེས་བྱ་བའི་དོན་ཏོ། །དེ་བཞིན་དུ་བསྲུང་བ་ཡང་བྱའོ་ཞེས་རང་གི་དོན་དང་ཡང་སྦྱར་བར་བྱའོ། །ཉལ་དུ་གཞུག་ཅེས་བྱ་བ་ནི་དཀྱིལ་འཁོར་གྱི་མཐར་རོ། །གང་དག་ཅི་མཐོང་བ་ཞེས་བྱ་བ་ལ་སོགས་པ་བསྒོའོ་ཞེས་བྱ་བ་ནི་ལྷག་མའོ། །བདག་ཉིད་ཀྱང་དེ་བཞིན་དུ་བསམ་གཏན་ལ་མཉམ་པར་གཞག་པའི་བློས་སེང་གེའི་ཉལ་ཐབས་སུ་ཉལ་བར་བྱའོ། །མདོར་བསྡུས་པའི་དོན་གྱི་ངེས་པ་བསྟན་པ་ནི་བསྲུང་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ། བསྲུང་བ་དང་བྱིན་གྱིས་བརླབ་པ་དང༌། བགེགས་གཞོམ་པ་ལ་སོགས་པ་སྔགས་མེད་པར་སྔར་བཤད་པ་དང་ཕྱིས་འཆད་པ་གང་ཅི་ཡང་རུང་བ་དེ་ཐམས་ཅད་ལ། ལས་ཐམས་ཅད་པའི་སྔགས་བཟླའོ་ཞེས་བྱ་བའི་ཐ་ཚིག་གོ །དེ་གང་ཞིག་ཡིན་ཞེ་ན། རིགས་ལྔ་ཞེས་བྱ་བ་ལ་སོགས་པ་སྨོས་ཏེ། རིགས་ལྔ་རྣམས་དང༌། དཀྱིལ་འཁོར་གསུམ་པོ་ལ་ལས་ཐམས་ཅད་བྱེད་པ་ནི་བདུད་རྩི་ཐབ་སྦྱོར་ཡིན་ནོ་ཞེས་པའོ། །འདི་ནི་སློབ་མ་ལྷག་པར་གནས་པའི་ཆོ་གའོ། །ཉིན་ཞག་གསུམ་པ་ལ་ནི་དཀྱིལ་འཁོར་བྲི་བ་བསྟན་པ་ཡིན་པས་རྨི་ལམ་ཞེས་བྱ་བ་ལ་སོགས་པ་སྨོས་
ཏེ། ཉེས་པ་ལ་སོགས་པ་སྟོན་པར་བྱེད་པའི་རྨི་ལམ་གང་ཡིན་པ་དེ་ལ་ཆོས་ཐམས་ཅད་ནི་རྨི་ལམ་ལྟ་བུའོ་ཞེས་ལྷག་པར་མོས་པ་བྱས་ལ་ལེགས་བསྲུངས་ཞེས་བྱ་བ་ནི་ཐམས་ཅད་དོ། །སྣོད་གྱུར་ཞེས་བྱ་བ་ནི་སློབ་དཔོན་ཉིད་དུ་འོས་པ་གང་ཡིན་པ་དེའོ། །སྡོམ་པ་ཞེས་བྱ་བ་ནི་སློབ་དཔོན་གྱིས་སྡོམ་པའོ། །སྡོམ་པ་དེ་ཡང་དགེ་བསྙེན་ལ་སོགས་པའི་སྡོམ་པ་བླངས་ཟིན་པས་སློབ་དཔོན་གྱིས་ཞབས་གཉིས་ལ་བཏུད་དེ་ལག་ན་མེ་ཏོག་ཐོགས་པས་ཕྱག་བྱས་ལ་མེ་ཏོག་གཏོར་ཏེ་སྡིག་པ་བཤགས་པ་ལ་སོགས་པ་བྱས་ལ་གསོལ་བ་བཏབ་ནས་སྡོམ་པ་བླང་བར་བྱའོ། །གསོལ་བ་གདབ་པའི་ཚིགས་སུ་བཅད་པ་ནི་མི་ལྡོག་འཁོར་ལོ་ཞེས་བྱ་བ་ལ་སོགས་པ་སྨོས་པ་ཡིན་ནོ། །གསོལ་བ་བཏབ་པའི་སློབ་དཔོན་གྱིས་རིགས་ཐམས་ཅད་ལ་གསོལ་བ་བཏབ་པས་ཞུ་པར་བྱ་སྟེ། ཆེ་གེ་མོ་ཞེས་བྱ་བ་འདི། །བྱང་ཆུབ་སེམས་ནི་ཡོངས་འཛིན་པ། །གསང་བ་ཡི་ནི་འཁོར་ལོ་འདིར། །དམ་ཚིག་སྡོམ་པ་ལེན་པར་འཚལ། །དེ་ནས་སློབ་དཔོན་གྱིས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། གསང་བ་ཆེན་པོ་རིགས་དག་པའོ། །གསང་བ་ཡོངས་སུ་ལེན་པར་ནི། །བདག་ཉིད་ཆེན་པོ་ཁྱོད་འདོད་དམ། །དེས་ཀྱང་འཚལ་ཞེས་བརྗོད་པར་བྱའོ། །དེ་ནས་སློབ་དཔོན་གྱིས་འདི་སྐད་ཅེས་བརྗོད་པར་བྱ་སྟེ། སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་དག་པའི། །དམ་ཚིག་བརྟན་པར་གྱུར་པའོ། །རྡོ་རྗེ་དྲིལ་བུ་ཕྱག་རྒྱ་དག །བློ་ཆེན་ཁྱོད་ཀྱིས་གཟུང་བར་གྱིས། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བསྒྲགས་སོ། །སློབ་དཔོན་དག་ཀྱང་གཟུང་བར་བྱ། །བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །སྡོམ་པ་དམ་ཚིག་ཡིན་པར་གསུངས། །རིན་ཆེན་རིགས་མཆོག་ཆེན་པོ་ལ། །ཉིན་དང་མཚན་མོ་ལན་གསུམ་དུ། །ཟང་ཟིང་མི་འཇིགས་ཆོས་དང་བྱམས། །སྦྱིན་པ་རྣམ་བཞི་རྟག་ཏུ་སྦྱིན། །ཕྱི་ནང་གསང་བ་ཐེག་པ་གསུམ། །དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་
བར་གྱིས། །མཆོད་པའི་ལས་ཀྱང་ཅི་ནུས་ཀྱིས། །དབྱེ་བ་རྣམ་པ་བཅུ་བཞི་འདི། །ཕས་ཕམ་བར་ནི་རབ་ཏུ་བསྒྲགས། སྤང་ཞིང་དོར་བར་མི་བྱ་སྟེ། །རྩ་བའི་ལྟུང་བ་ཡིན་པར་བཤད། །ཉིན་དང་མཚན་མོ་ལན་གསུམ་དུ། །ཉིན་རེ་ཞིང་ནི་བཟླ་བར་བྱ། །གལ་ཏེ་ཉམས་གྱུར་རྣལ་འབྱོར་པ། །ཁ་ན་མ་ཐོ་ཆེན་པོར་འགྱུར། །སློབ་མས་ཀྱང་ནི་འདི་སྐད་བརྗོད། །སློབ་དཔོན་བདག་ལ་དགོངས་སུ་གསོལ། །གཙོ་བོས་ཇི་སྐད་བཀའ་སྩལ་པ། །དེ་ལྟར་བགྱི་བ་བདག་གིས་བགྱི། །རྣལ་འབྱོར་མཉམ་གཞག་ཅེས་བྱ་བར་ནི་འཇམ་པའི་རྡོ་རྗེའི་ཏིང་ངེ་འཛིན་གསུམ་བྱ་བའོ། །འཁོར་ལོ་མཆོག་ཅེས་བྱ་བ་ནི་ལྷག་པར་གནས་པས་གཞག་པའི་ལྷ་རྣམས་ཀྱི་དཀྱིལ་འཁོར་རོ། །མཁའ་ལ་གཞག་ཅེས་བྱ་བ་ནི་གཤེགས་སུ་གསོལ་བའི་དོན་དུའོ། །དེ་ནས་སྲད་བུ་ལྔ་པོ་དེ་བསྒྲིལ་བར་བྱའོ་ཞེས་བྱ་བར་སྦྱོར་རོ། །སྲད་བུ་ཇི་ལྟ་བུ་ཞེ་ན། རྟག་པ་ཞེས་བྱ་བ་ལ་སོགས་པ་སྨོས་ཏེ། རིམ་པ་ཇི་ལྟ་བ་བཞིན་དུ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་ཏུ་མེད་པ་དང༌། དོན་ཡོད་གྲུབ་པ་དང༌། མི་བསྐྱོད་པའི་ངོ་བོ་ཉིད་ཡིན་ཞིང་དེའི་མདོག་ཏུ་སྣང་བའོ། །དེ་ཇི་ལྟར་ཞེ་ན། དེའི་མདོག་ས་བོན་ལས་བྱུང་བ། །ཞེས་བྱ་བ་ཡིན་ཏེ། གང་གི་ཕྱིར་ཚོན་དྲི་ཞིམ་པོ་དང༌། ཡུངས་ཀར་གྱི་ཕྱེ་མ་དང་བསྲེས་པ་དཀར་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། ནག་པོ་སོ་སོར་བཙོས་པ་ཡིན་པ་དེའི་ཕྱིར་དེའི་མདོག་དང་འདྲ་བ་དང༌། གང་གི་ཕྱིར་བྷྲཱུཾ་ཨཱཾ་ཛྲྀཾ་ཁཾ་ཧཱུཾ་ཞེས་བྱ་བའི་ས་བོན་ལས་ཡོངས་སུ་བསྐྱེད་པ་ཡིན་པས་དེའི་ཕྱིར་དེའི་ངོ་བོ་ཉིད་དོ། །དེ་ཉིད་ཀྱིས་ནི་ཡེ་ཤེས་ལྔ་ལྡན་ཞེས་བྱ་སྟེ། མེ་ལོང་ལྟ་བུ་ལ་སོགས་ཏེ་ཡེ་ཤེས་ལྔའི་རང་བཞིན་ཅན་ནོ། །མེ་ལོང་ལྟ་བུའི་ཡེ་ཤེས་ལ་སོགས་པ་ལྔ་པོ་རེ་རེ་ཞིང་བཞི་པོ་རྗེས་སུ་འབྲང་བས་ན་རྣམ་པ་ཉིད་ཤུ་རྩ་ལྔར་ཕྱེ་བ་ཡིན་ནོ། །ཡང་ན་ཡེ་ཤེས་རེ་རེ་ཞིང་ལྷ་ཉི་ཤུའི་རང་བཞིན་ཅན་གྱི་དཀྱིལ་འཁོར་གྱི་བདག་ཉིད་ཅན་ཡིན་པས། ཉི་ཤུ་ཆེན་ལྔར་རྣམ་ཕྱེ་བས། །ཞེས་བྱ་སྟེ། རྣམ་པ་བརྒྱར་དབྱེའོ་ཞེས་བྱ་བའི་ཐ་ཚིག་གོ །རང་གི་ཕྱོགས་ཀྱིས་དེ་བཞིན་གཤེགས་པ་རྣམས་སྡུས་པར་གྱུར་བའི་དེ་བཞིན་གཤེགས་པ་ལྔ་པོ་དེ་རྣམས་ཀྱི་སྙིང་པོ་ཡེ་གེ་བྷྲཱུཾ་ལ་སོགས་པ་ལས་བྱུང་བའི་ཡེ་ཤེས་ཀྱི་སྲད་བུ་འོད་ཟེར་གྱི་རང་བཞིན་
དུ་བསམས་ལ། ཨོཾ་ཨཱ་ཤཱ་ཤྭ་ཏེ་བཛྲ་སཱུ་ཏྲཾ་མེ་དྲ་ཡཙྪ་མཧཱ་མཎྜལ་སུ་ཏྲཱ་ན་ཡ་ཧཱུཾ་ཞེས་བྱ་བ་འདིས་རྣམ་པར་སྣང་མཛད་ལ་གསོལ་བ་གདབ་པར་བྱའོ། །དེ་བཞིན་དུ་མཚན་བརྗེ་བའི་ཚུལ་གྱིས་རིན་ཆེན་འབྱུང་ལྡན་ལ་སོགས་པ་ལ་གསོལ་བ་གདབ་པར་བྱའོ། །དེ་ནས་འཇམ་པའི་རྡོ་རྗེའི་སྦྱོར་བ་ལ་གནས་པ་ཉིད་དང༌། ཡི་གེ་ཛཿལས་མི་གཉིས་སུ་ཉི་ལམ་དང་ཟླ་བ་སྐྱེད་ལ་འབར་བའི་ལྟ་བ་ཞེས་བྱ་བ་ནི་འབར་བའི་ལྟ་བ་ཉིད་ལྕགས་ཀྱུ་ཡིན་ཏེ། དེས་བཀུག་པའི་ཡེ་ཤེས་ཀྱི་ཐིག་བཅོམ་ལྡན་འདས་རྣམས་ཀྱིས་བརྫངས་པ་ཉིད་དུ་ལྷག་པར་མོས་ལ། རང་གི་ལག་ན་གནས་པའི་སྲད་བུ་རྣམས་ལ་རང་རང་གི་ཁ་དོག་གི་ནང་དུ་ཆུད་པར་བྱས་ལ། རྣལ་འབྱོར་བས་ཞེས་བྱ་བ་འཇམ་པའི་རྡོ་རྗེའི་རྣལ་འབྱོར་ལ་གནས་པར་གྱུར་པས་ཐམས་ཅད་བྱེད་དང་བཅས་ཞེས་བྱ་བ་ནི། བདུད་རྩི་ཐབས་སྦྱོར་གྱི་རྣལ་འབྱོར་ཅན་གྱི་སློབ་མ་དང་ལྷན་ཅིག་བསྒྲིལ་བར་བྱའོ། །ཨ་ཉོ་ཉཱ་ནུ་ག་ཏ་སརྦ་དྷརྨཱ། བ་རས་པ་རཱ་ནུ་ག་ཏ་སརྦ་དྷརྨ། ཨ་ཏྱནྟཱ་ནུ་ག་ཏ་སརྦ་དྷརྨཱ། ཞེས་བརྗོད་ཅིང་ཅི་ནས་ཀྱང་དཀྱིལ་འཁོར་གྱི་ཉིས་འགྱུར་དུ་འགྱུར་བ་དང༌། སྦོམས་སུ་སྒོའི་ཉི་ཤུ་ཆར་འགྱུར་བ་དེ་ལྟ་དེ་ལྟར་བསྒྲིལ་བར་བྱའོ། །དེ་ནས་ཞེས་བྱ་བ་ནི་བསྒྲིལ་བའི་རྗེས་ཐོགས་ལ་སྤྲོས་ཆབ་བདུད་རྩི་ལྔ་དང་བཅས་པ་ལ་སྤངས་ལ་ཡི་གེ་གསུམ་གྱི་ནང་དུ་ཆུང་བར་བྱས་ནས་དྲིས་བྱུགས་ནས་གསེར་གྱི་སྣོད་ཀྱི་ནང་དུ་བཞག་ལ། དྲི་དང་མེ་ཏོག་དང་སྤོས་ཀྱིས་ཀྱང་མཆོད་ནས་ལག་པ་བཀབ་སྟེ་བདུད་རྩི་ཐབ་སྦྱོར་བཟླས་ཏེ་བསྲུང་བ་ཡང་བྱའོ། །དེ་ནས་དཀྱིལ་འཁོར་གྱིས་གཞི་དྲིས་ཉེ་བར་བྱུགས་ལ། མེ་ཏོག་སིལ་མ་གཏོར་ནས་ནམ་མཁའི་ངོས་ལ་གནས་པའི་འཇམ་པའི་རྡོ་རྗེའི་དཀྱིལ་འཁོར་དམིགས་ལ་མཆོད་ཡོན་སྔོན་དུ་འགྲོ་བས་ཡང་དག་པར་མཆོད་དེ། རང་ཡང་དེའི་སྦྱོར་བ་དང་ལྡན་པ་དང༌། སྒྲུབ་པའི་གྲོགས་པོ་ཡང་བདུད་རྩི་ཐབ་སྦྱོར་གྱི་གཟུགས་སུ་བསམས་ལ། མིག་གཡོན་པ་དང་གཡས་པ་གཉིས་སུ་ཛ་ལས་བྱུང་བའི་ཟླ་བ་དང་ཉི་མའི་མདོག་མདངས་སེར་པོར་སྣང་བར་བསམས་ཏེ། སྲད་བུ་དེ་ཡང་ཁུ་ཚུར་གཡོན་པས་བཟུང་ལ་ལྟེ་བར་བཞག་སྟེ། སྲད་བུ་དེའི་རྩེ་མོ་གཅིག་སྒྲུབ་པའི་གྲོགས་པོའི་ལག་ཏུ་ཛྫ་ཛྫ་ཛྫ་ཞེས་བྱ་བས་གཏད་པར་བྱས་ལ། སྒྲུབ་པའི་གྲོགས་པོས་ཀྱང་
རང་ཉིད་ལ་མངོན་དུ་ཕྱོགས་པར་བལྟས་ལ་ཛྫ་ཛྫ་ཛྫ་ཞེས་བྱ་བ་ཛྫ་གསུམ་པོ་ཉིད་ཀྱིས་དེ་བཞིན་དུ་དྲང་བར་བྱའོ། །དཔལ་ལྡན་འཇམ་པའི་རྡོ་རྗེའི་སློབ་དཔོན་ནུབ་དང་ལྷོ་ཕྱོགས་སུ་གནས་ཏེ་ཤར་དང་བྱང་དུ་ཁ་བལྟས་ལ་ནམ་མཁའི་ཐིག་ཅེས་བྱ་བ་ཚངས་པའི་ཐིག་གཉིས་ལྟེ་བའི་ཟད་ཀའི་ནམ་མཁའ་ལ་གདབ་ཅིང་རྡོ་རྗེ་དང་བཅས་པའི་ལག་པ་གཡས་པའི་མཐེ་བོང་དང་གུང་མོ་གཉིས་ཀྱིས་སྲད་བུ་བཟུང་ལ་སེ་གོལ་གྱི་སྒྲ་བྱའོ། །ཐིག་གདབ་པ་ཐམས་ཅད་ལ་ཡང་ཨོཾ་བཛྲས་མ་ཡ་སཱུ་ཏྲ་མཱ་ཏི་ཀྲ་མ་ཧཱུཾ་ཞེས་བརྗོད་ཅིང་ཐིག་གི་སྒྲ་དེས་ཀྱང་ནམ་མཁའ་ཐམས་ཅད་ཁྱབ་པའི་དེ་བཞིན་གཤེགས་པ་རྣམས་ཡང་དག་པར་བསྐུལ་བར་བྱའོ། འདི་ནི་དེའི་བརྡ་ཅན་གྱི་དོན་ཡིན་ཏེ། ཁྱད་ཀྱིས་སེམས་ཅན་གྱི་དོན་མཛད་པའི་ཕྱིར་འདིར་གཤེགས་པའི་དུས་ལགས་སོ། །ཞེས་པའོ། །སྒྲོབ་དཔོན་དང་སྒྲུབ་པའི་གྲོགས་མཆོག་གཉིས་ཐམས་ཅད་དུ་གཡས་ནས་བསྐོར་ཏེ་འགྲོ་བ་དང༌། ཕྱོགས་ཐམས་ཅད་མཉམ་པ་ཉིད་དུ་མོས་པར་བྱ་བ་བཤད་པ་ནི། རང་དང་རྗེས་མཐུན་གཡས་ནས་བསྐོར། །མཁས་པས་ཐིག་གིས་ཐིག་བཏབ་ནས། །ཕྱོགས་ཀུན་མཉམ་པ་ཉིད་དུ་བྱ། །ཞེས་བྱ་བ་ཡིན་ནོ། །དེ་བཞིན་དུ་འོག་ཏུ་ཐིག་གདབ་པོ་ཞེས་བྱ་བ་ནི་ནམ་མཁའི་ཐིག་དང་འདྲ་བར་ས་ལ་ཐིག་གདབ་པ་ལ་ཡང་གཉིས་གས་སྲད་བུ་དེ་ལག་པ་ཕབ་པས་བྱའོ། །དེ་ནས་ཕྱིའི་དཀྱིལ་འཁོར་ཐིག་གདབ་པར་བྱ་བ་ཡིན་པས་དེའི་ཕྱིར། གནོད་སྦྱིན་ཞེས་བྱ་བ་ལ་སོགས་པ་སྨོས་ཏེ། གནོད་སྦྱིན་དང་ཡི་དགས་དང་དབང་པོ་དང་ཀླུ་སྟེ་འདི་དག་གི་ཕྱོགས་སུ་བལྟ་བ་གང་ཡིན་པ་དེ་ལ་དེ་སྐད་ཅེས་བྱ་སྟེ། བྱང་དང་ལྷོ་དང་ཤར་དང་ནུབ་ཏུ་ཁ་བལྟས་ཏེ་ཞེས་བྱ་བའི་ཐ་ཚིག་གོ །མེ་དང་བདེན་བྲལ་ཕྱོགས་གནས་ཏེ། །ཞེས་བྱ་བ་ནི་མེ་ལྷ་དང་བདེན་བྲལ་གྱི་ཕྱོགས་མཚམས་སུ་གནས་ཏེ་ཞེས་བྱ་བའི་དོན་ཏོ། །སློབ་དཔོན་དེ་ལྟར་གནས་པར་གྱུར་ནས་ཤར་དང་ནུབ་པ་དང་བྱང་དང་ལྷོའི་ཕྱོགས་བཞི་པོའི་ཐིག་གདབ་པར་བྱའོ། །དེ་ནས་མེའི་ཕྱོགས་ན་གནས་པ་ཉིད་ཀྱིས་རླུང་གི་མཚམས་སུ་ཐིག་གདབ་པ་དང༌། བདེན་བྲལ་གྱི་ཕྱོགས་ན་གནས་ལ་དབང་ལྡན་གྱི་མཚམས་སུ་ཐིག་གདབ་པའི་སྲད་བུ་བརྐྱང་བས་ཐིག་གདབ་པར་བྱའོ། །དེ་ནས་ཕྱིའི་ཇི་ལྟ་བ་བཞིན་དུ་ནང་དུ་རེའུ་མིག་ཆ་བརྒྱད་པའི་དཀྱིལ་འཁོར་ཤར་དང་ནུབ་དང་བྱང་དང་ལྷོ་ཕྱོགས་སུ་ཐིག་གིས་
གདབ་པར་བྱའོ་ཞེས་བྱ་བར་སྦྱར་རོ། །དེ་ནས་དེ་བཞིན་དུ་སྲད་བུ་ཉིས་རིམ་དུ་བྱས་ནས་དཀྱིལ་འཁོར་གྱི་དབུས་སུ་བཏབ་པའི་ཕུར་བུ་ལ་བཏགས་པ་ཉིད་ཀྱིས་བརྟན་པར་བྱས་ལ། ཕྱིའི་དཀྱིལ་འཁོར་གྱི་ཕྱི་རོལ་དུ་ཟླུམ་པོའི་རྡོ་རྗེའི་ཐིག་གཉིས་ཀྱིས་ཐིག་གདབ་པར་བྱའོ། །ནང་གི་དཀྱིལ་འཁོར་ཡང་དེ་བཞིན་ནོ། །དེ་ཡང་། རྡོ་རྗེའི་ཕྲེང་བས་ཡོངས་བསྐོར་བས། །ཞེས་འོག་ནས་བཤད་པ་དང༌། ཡང་ལྕགས་རི་དག་ཅེས་སྨོས་པ་ནི་འོད་ཀྱི་དཀྱིལ་འཁོར་གྱི་ཐིག་གཉིས་ཞེས་བྱ་བའི་ཐ་ཚིག་སྟེ། འདི་གཉི་ག་ལ་ཡང་དབང་ལྡན་ནས་བརྩམས་ཏེ་ཐིག་གདབ་པར་བྱའོ།། རང་དང་རྗེས་མཐུན་གཡས་ནས་བསྐོར། །ཞེས་བྱ་བ་ནི་སློབ་དཔོན་དང་སློབ་མ་གཉིས་ཀྱི་གོ་རིམས་ཇི་ལྟ་བ་བཞིན་དུ་ལེགས་པར་གཡས་ནས་བསྐོར་ཕྱོགས་སུ་འགྲོ་བར་བྱའོ་ཞེས་བྱ་བའི་ཐ་ཚིག་གོ །ལྟས་ངན་བྱུང་ན་ཞེས་བྱ་བ་ནི་ཚངས་པའི་ཐིག་གདབ་པ་དང་འབྲེལ་བས་སོ། །ན་བར་འགྱུར་ཞེས་བྱ་བ་ནི་བླ་མ་ཉིད་དོ། །ཐིག་བཞི་ཞེས་བྱ་བ་ནི་མཚམས་ཀྱི་ཐིག་གིས་སོ། །རྡོ་རྗེ་རིན་ཆེན་ཞེས་བྱ་བ་ནི་ཟླ་བ་ཕྱེད་པ་ལ་གནས་ཤིང་རྩེ་མོ་ལ་རྡོ་རྗེ་གནས་པའི་རིན་པོ་ཆེས་སོ། །ཀ་བ་འཁོར་ལོ་ལ་སོགས་སྤྲས། །ཞེས་བྱ་བ་ནི་འཁོར་ལོ་དང་རིན་པོ་ཆེ་དང་པདྨ་དང་རལ་གྲིའི་ཀ་བས་སོ། །ཀ་བ་བརྒྱད་དང་ཐིག་བརྒྱད་ཀྱིས་དཀྱིལ་འཁོར་བརྒྱད་པ་ལྟ་བུ་ཡིན་པར་ནི་འདྲ་བ་ཞེས་བྱ་བའི་སྒྲས་སྟོན་ཏོ། །དེ་ནས་ཧི་དང་ཞེས་བྱ་བ་ལ་སོགས་པའི་དོན་ནི་འདི་ཡིན་ཏེ། ཡི་གེ་ཧི་ཞེས་བྱ་བས་མིག་གཡོན་པ་དང་གཡས་པ་གཉིས་ཟླ་བ་དང་ཉི་མར་བསྐྱེད་ལ། ཁྲོ་བོའི་ལྟ་བས་ཀུན་དུ་རྣམ་པར་ལྟ་བ་བཞིན་དུ་སྒོ་རྣམས་དབྱེ་བར་བྱའོ། །སྒོའི་ཕྱེད་ཀྱི་ཚད་ནི་ཁ་ཁྱེར་ལ་སོགས་པ་ཡིན་ནོ། །ཀུན་ནས་ཞེས་བྱ་བ་ནི་ཁ་ཁྱེར་གྱིས་ཕྱིའི་དཀྱིལ་འཁོར་ཀུན་ནས་བསྐོར་བའོ། །དེའི་ཕྱེད་ཅེས་བྱ་བ་ནི་ཁ་ཁྱེར་གྱི་ཕྱེད་དོ། །སུམ་འགྱུར་ཏེ་ཞེས་བྱ་བ་ནི་ཆུར་སུམ་འགྱུར་དུའོ། །དཔངས་སུ་ནི་ཇི་ལྟར་མཛེས་པར་བྱའོ། །གལ་ཏེ་ཐིག་འདེབས་དང་འཚམ་པ། །འགའ་མེད་དེ་ཚེ་རང་ཉིད་ཀྱིས། །ཕུར་བུར་བརྟོད་ནས་གྲོགས་མེད་པར། །ཐིག་ནི་དེ་བཞིན་གདབ་པར་བྱ། །དེ་ལ་འཇམ་པའི་རྡོ་རྗེའི་དཀྱིལ་འཁོར་འདི་ཐུགས་དང་གསུང་དང་སྐུའི་དཀྱིལ་འཁོར་
ལས་གང་ཡིན་ཞེ་ན། ཐུགས་ཀྱི་དཀྱིལ་འཁོར་ཉིད་ཡིན་པར་བསྟན་པའི་ཕྱིར། རྫོགས་སངས་རྒྱས་ཞེས་བྱ་བ་ལ་སོགས་པ་སྨོས་ཏེ། གསུང་དབང་ནི་འཇམ་པའི་དབྱངས་སོ། །དེ་ནི་རྫོགས་པའི་སངས་རྒྱས་རྣམས་ཀྱི་ཡེ་ཤེས་ཀྱི་སྐུ་ཡིན་ནོ་ཞེས་བྱ་བར་གྲགས་ལ། ཡེ་ཤེས་དེ་ཡང་ཆོས་ཀྱི་སྐུ་ཤིན་ཏུ་ཡང་དག་པར་གྱུར་པ་ཡིན་ལ། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་ཀྱི་མཚན་ཉིད་ནི་བཅོམ་ལྡན་འདས་མི་བསྐྱོད་པ་ཡིན་ནོ། །དེ་བས་ན་འདི་ནི་རྡོ་རྗེ་ཞེས་པ་མི་བསྐྱོད་པའི་རིགས་ཡིན་པར་བཤད་དོ། །དེ་བས་ན་འདིའི་དཀྱིལ་འཁོར་ནི་ཐུགས་ཀྱི་དཀྱིལ་འཁོར་ཉིད་ཡིན་ནོ་ཞེས་བྱ་བའི་ཐ་ཚིག་གོ །ཚད་ནི་ཚད་དུ་བྱ་བ་སྟེ་དཀྱིལ་འཁོར་ཁྲུ་ཉི་ཤུ་པ་ཞེས་བྱ་བ་ལ་སོགས་པའོ། །སོགས་པ་ཞེས་བྱ་བའི་སྒྲས་ནི་རིག་མའི་རིགས་དང་ན་ཚོད་དང་ཁ་དོག་ལ་སོགས་པ་སྟེ། འདི་དག་གི་ངེས་པ་རྒྱུད་ལས་གསུངས་པ་ནི་ངེས་པ་ལ་དགའ་བའི་སེམས་ཅན་རྣམས་ཀྱི་བསམ་པ་ལ་བརྟེན་ནས་གསུངས་པ་ཡིན་གྱི་ངོ་བོ་ཉིད་ཀྱིས་ནི་མ་ཡིན་ནོ། །གལ་ཏེ་ངོ་བོ་ཉིད་ཡིན་ན་ཅི་ཉེས་ཤེ་ན། དེའི་ཕྱིར་ཐབས་ཤེས་ཞེས་བྱ་བ་ལ་སོགས་པ་སྨོས་སོ། །དེ་ནི་ཞེས་བྱ་བ་ནི་དཀྱིལ་འཁོར་རོ། །འཁོར་ལོ་དེ་ཞེས་བྱ་བ་ནི་དཀྱིལ་འཁོར་དེ་ཐིག་བཏབ་པ་ཁོ་ནས་ཡེ་ཤེས་ཀྱི་སྲད་བུས་ཡང་གཤེགས་སུ་གསོལ་ལོ་ཞེས་བྱ་བ་ནི་ལྷག་མའོ། །ཚོན་ལ་ཞེས་བྱ་བ་ལ་སོགས་པས་ནི་ཚོན་བྱིན་གྱིས་བརླབ་པ་སྨོས་པ་ཡིན་ཏེ་སྔ་མའི་རིམ་གྱིས་ཞེས་བྱ་བ་ནི་སྲད་བུ་བྱིན་གྱིས་བརླབས་པའི་སྐབས་སུ་སྔར་བཤད་པའི་རིམ་པ་ཇི་སྐད་བཤད་པས་སོ། །ཡེ་ཤེས་སྦར་ཞེས་བྱ་བ་ནི་སངས་རྒྱས་རྣམས་ཀྱི་ཡེ་ཤེས་ཀྱི་འོད་ཟེར་རོ། །འདིར་ཚིགས་སུ་བཅད་པ་ནི། ལྕགས་ལྔའམ་རིན་ཆེན་ལས་བྱུང་བའམ། །ཁམས་བྱུང་འབྲས་ཕྱེ་ལས་བྱས་པའམ། །ཡང་ན་དམར་པོ་སོ་ཕག་བསྲེགས། །ནག་པོ་སོལ་བ་ལས་བྱས་ཚོན། །དཀར་དང་སེར་དང་དེ་བཞིན་དམར། །ལྗང་དང་ནག་པོ་གོ་རིམས་བཞིན། །དེ་ལྟར་ལེགས་བཞག་བྷྲཱུཾ་ཨཱཾ་ཛྲཱྀཾ། །ཁཾ་ཧཱུཾ་ལས་ནི་རབ་བསྐྱེད་པ། །སྔར་བཞིན་འབར་བའི་རྟས་དྲངས་པའི། །སངས་རྒྱས་རྣམས་ཀྱི་ཡེ་ཤེས་འོད། །བསྲེས་ཏེ་ཡེ་ཤེས་ཉིད་བྱས་པ། །སྔར་ཏེ་མངོན་པར་བཟླ་བར་བྱ། །ཞེས་བྱ་བའི། །སྔགས་ནི་ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་
བའོ། །དེ་ནས་དཀྱིལ་འཁོར་གྱི་དབུས་ན་འདུག་པའི་ཕུར་བུ་ཡི་གེ་ཧཱུཾ་གིས་བཏོན་ལ་རང་གི་ལག་ན་གནས་པའི་རྡོ་རྗེར་བློས་བཅུག་ལ། ཕུར་བུའི་ཁུང་བུ་ཚོན་སྣ་ལྔས་བཀང་ལ་མཉམ་པོར་བྱས་ནས་དྲིལ་བུའི་སྒྲ་དང་རྡོ་རྗེའི་གླུ་དག་གིས་མཚན་མ་ངན་པ་བསལ་ལ། འདི་ནི་ཆོས་དབྱིངས་དག་པ་སྟེ། །ཞེས་བྱ་བ་ལ་སོགས་པ་ནས། ཉེས་པ་ཀུན་ལས་རྣམ་གྲོལ་བའོ། །ཞེས་བྱ་བའི་བར་དུ་བདག་ཉིད་ཀྱིས་ལྷག་པར་མོས་པར་བྱའོ་ཞེས་བྱ་བ་ནི་ལྷག་མའོ། །བླ་མ་ཞེས་བྱ་བ་ནི་སློབ་དཔོན་ཏེ་དེས་ནང་དུ་གནས་ནས་དཀར་པོ་ལ་སོགས་པའི་ཚོན་དགྱེ་བར་བྱ་སྟེ། ཐམས་ཅད་ཀྱི་ཕྱི་རོལ་དུ་ནི་དགྱེ་བ་ནས་ཐམས་ཅད་ཀྱི་ནང་དུ་ནི་ནག་པོ་དགྱེ་བར་བྱའོ། །རི་མོ་ཞེས་བྱ་བ་ནི་ཚོན་གྱི་རང་བཞིན་ཅན་ནོ། །དེ་ཉིད་ནི་རྩེ་མོ་ལྟ་བུའོ། །འདི་ནི་ཞེས་བྱ་བ་ནི་ཐུགས་ཀྱི་དཀྱིལ་འཁོར་གྱིའོ། །ས་གཞིའི་ཆ་ཞེས་བྱ་བ་ནི་དཀྱིལ་འཁོར་གྱིའོ། །ནས་གང་གིས་མ་རེག་པར་ཞེས་བྱ་བ་ནི་འོག་གི་ཚད་དེ། སྟེང་དུ་ཇི་ལྟར་མཛེས་པར་བྱའོ། །རྒྱུད་འདི་ལས། དཀྱིལ་འཁོར་དག་ནི་འདྲི་བ་ན། །གལ་ཏེ་རླུང་སོགས་བྱུང་གྱུར་ན། །མཆེ་བའི་ཕྱག་རྒྱ་བཅིངས་ནས་ནི། །གདུག་པའི་དགྲ་ནི་དྲན་པར་བྱ། །ཞེས་གསུངས་པ་དེ་བསྟན་པའི་ཕྱིར། བདུད་རྩི་ཐབ་སྦྱོར་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདིར་མཆེ་བ་ཞེས་བྱ་བ་ནི་ལག་པའི་ཕྱག་རྒྱ་ཡིན་པར་བཤད་ལ། གདུག་པའི་དགྲ་ཞེས་བྱ་བ་ནི་ཕྱག་རྒྱ་ཆེན་པོ་ཡིན་ནོ་ཞེས། འདི་ལྟར་ལ་ལ་དག་རྟོག་པ་ཡོད་པས་དེ་བསལ་བར་བྱ་བའི་ཕྱིར། འདི་ནི་རྒྱ་ཆེན་ཞེས་བྱ་བ་ལ་སོགས་པ་སྨོས་ཏེ། སྒྲའི་བཀོད་པ་འདི་ལ་བཤད་པར་བྱ་བ་གཙོ་བོ་ཡིན་གྱི་གྲགས་པ་གཙོ་བོ་ནི་མ་ཡིན་ནོ་ཞེས་བྱ་བར་དགོངས་སོ། །འདིར་ཟླ་བ་ནི་བཅུ་གཉིས་སོ། །ཉི་མ་ནི་བདུན་ནོ། །བྱ་བ་ལ་སོགས་པ་ཞེས་བྱ་བ་ནི་བྱ་བ་གྲུབ་པའི་ཡེ་ཤེས་ལ་སོགས་པས་སོ། །སྨོན་ལམ་ནི་དོན་དུ་གཉེར་བའོ། །དད་སོགས་ཞེས་བྱ་བ་ནི་སྒོ་རྣམས་སུ་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་ཏོ། །རྣམ་ཀུན་གསལ་བར་ཤེས་བྱས་ལ། །ཞེས་བྱ་བ་ནི་བྲིས་པའི་དཀྱིལ་འཁོར་རྣམ་པ་ཐམས་ཅད་དུ་གསལ་བར་གྱུར་པར་ཤེས་ནས་སོ། །ལྷག་པར་གནས་
པའི་བུམ་པ་གནས་ཇི་ལྟ་བ་བཞིན་དུ་གཞག་པ་དང༌། ཕྱི་རོལ་དུ་བུམ་པ་གང་བ་ཡང་གཞག་པར་བྱའོ། །དེ་ནས། རང་གི་འཁོར་ལོ་བསྒོམ་པར་བྱ། །ཞེས་བྱ་བ་ནི་ནམ་མཁའ་ལ་འཇམ་པའི་རྡོ་རྗེའི་ཡེ་ཤེས་ཀྱི་དཀྱིལ་འཁོར་རོ། །སངས་རྒྱས་རྣམས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་དོ། །དེ་དང་ལྷན་ཅིག་ཅེས་བྱ་བ་ནི་སངས་རྒྱས་རྣམས་དང་ངོ༌། །ཀུན་དུ་བསྐྲད་པ་ནི་བདུད་རྩི་ཐབ་སྦྱོར་གྱིས་སོ། །མངོན་པར་བསྲུང་ཞེས་བྱ་བ་ནི་ཕུར་བུ་དང་ར་བ་ལ་སོགས་པས་སོ། །གནས་བསྲུང་བ་བྱས་ནས་གཤིན་རྗེ་གཤེད་ལ་སོགས་པས་གོ་རིམས་ཇི་ལྟ་བ་བཞིན་དུ་དགུག་པ་ལ་སོགས་པ་བཞི་བྱ་བ་དང༌། མིག་ལ་སོགས་པ་བྱིན་གྱིས་བརླབ་པ་དང༌། སྐུ་ལ་སོགས་པ་བྱིན་གྱིས་བརླབ་པ་དང༌། མཆོད་ཡོན་དབུལ་བ་དང༌། དབང་བསྐུར་བ་དང་མཆོད་པ་ཡང་བྱས་ནས་མི་བསྐྱོད་པ་ནི་ཞེས་བྱ་བ་ལ་སོགས་པས་བསྟོད་དོ། །དེ་ཁོ་ན་ཉིད་ཀྱི་བདུད་རྩིས་ཚིམ་པར་བྱས་ལ་བདེ་བ་ཆེན་པོ་བབས་པར་རྣམ་པར་བསྒོམས་ནས་ཡོངས་སུ་བཟླས་པས་ཀྱང་མཉེས་པར་བྱའོ། །སྔོན་བཞིན་ཞེས་བྱ་བ་ནི་སྔ་མ་བཞིན་དུ་བདུད་རྩི་མྱང་བའི་ཆོ་གས་པདྨའི་སྣོད་དུ་ཡེ་ཤེས་ཀྱི་བདུད་རྩིའི་རང་བཞིན་བསྐྱེད་ལ་དེས་ཕྱོགས་སྐྱོང་མཆོད་པར་བྱའོ། །རང་རང་སྦྱོར་ལ་གནས་ཞེས་བྱ་བ་ནི་འདུས་པའི་ལྷ་ལྟར་ཤེས་རབ་དང་བཅས་པའི་ཆ་ལུགས་འཛིན་པའོ། །གལ་ཏེ་ཚོགས་པ་དང་ལྡན་ན་སྒྲུབ་པའི་གྲོགས་མཆོད་དཀྱིལ་འཁོར་དུ་བཞག་ལ་ཕྱི་རོལ་དུ་ཕྱུང་སྟེ་ཤར་ལ་སོགས་པའི་ཕྱོགས་སུ་དཀྱིལ་འཁོར་བྱ་བའམ་བྱེད་དུ་བཅུག་སྟེ་རང་གི་བདག་པོའི་སྦྱོར་བའམ། ཁྲོ་བོའི་རྣལ་འབྱོར་གྱི་དབང་པོ་ལ་སོགས་པ་གནས་ཇི་ལྟ་བ་ནས་བཀུག་སྟེ་རེ་རེ་ཞིང་དེའི་ཕྱོགས་སུ་བལྟས་པ་ཉིད་དང་དེ་རྣམས་ལ་མཆོད་ཡོན་དང༌། དྲི་དང༌། མེ་ཏོག་དང༌། སྤོས་དང༌། འབྲས་ཆན་དང༌། འབྲས་ཡོས་དང༌། ཏིལ་དང༌། སྣུམ་ཁུར་ལ་སོགས་པའི་གཏོར་མ་མེ་ཏོག་དང༌། ཆུ་དང་བཅས་པ་སྔ་མ་བཞིན་བསྐྱེད་ལ་ལན་གསུམ་གསུམ་ཤིང་རྟའམ། གཞོང་པར་རམ་སྙིམ་པས་གཏོར་རོ། །དེ་ནས་འཐོར་འཐུང་དང་མཆོད་ཡོན་བྱིན་ལ་ལེགས་པར་མཆོད་དེ་སླར་གཏང་བར་བྱའོ། །ལྷག་མ་ནི་མན་ངག་ལས་ཤེས་པར་བྱའོ། །དེ་ལྟར་ཕྱོགས་སྐྱོང་རྣམས་ལ་ཡང་དག་པར་མཆོད་ནས་ཇི་སྙེད་པའི་གོས་དང་རྒྱན་དང་
ལྡན་པས་འཇིག་རྟེན་གསུམ་ལས་རྣམ་པར་རྒྱལ་བའི་ང་རྒྱལ་དང་ལྡན་པར་བྱས་ནས་མེ་ཏོག་སྔོན་པོའི་མེ་ཏོག་གི་ཕྲེང་བ་བླངས་ལ་ཧཱུཾ་བཞི་བའི་སྔགས་ཟློས་ཤིང་རྡོ་རྗེའི་ཤུགས་ཀྱིས་དཀྱིལ་འཁོར་དུ་ཞུགས་ལ། རྡོ་རྗེ་དྲིལ་བུ་དཀྲོལ་ཞིང་བསྐོར་བ་ལན་གསུམ་བྱས་ཏེ། ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར་དཀྱིལ་འཁོར་བལྟས་ལ་ཕྲེང་བ་བཅོམ་ལྡན་འདས་ལ་ཕུལ་ཏེ། ཡང་དེ་གར་བྱ་བའི་ཚུལ་གྱིས་བླངས་ལ་རང་གི་མགོ་ལ་བཅིངས་ནས་ཕྱག་ཀྱང་བྱའོ། །ཡང་ན་མདོར་བསྡུས་པའི་དོན་དུ་ནི་ཕྲེང་བ་མེད་པར་ཞུགས་ལ་བལྟས་ཏེ་ཕྱག་བྱས་ནས་སྦྱིན་སྲེག་དག་གིས་ཞེས་བྱ་བ་རྒྱས་པས་སོ། །མཆོད་ཅེས་བྱ་བ་ནི་དཀྱིལ་འཁོར་ཚིམ་པར་བྱའོ། །མདོར་བསྡུས་པའི་ཕྱིར་ལས་ཐམས་ཅད་པའི་ཐབ་ཁུང་གཅིག་པུ་ཁོ་ན་བཤད་པ་ནི། ཀུན་ནས་ཞེས་བྱ་བ་ལ་སོགས་པ་སྨོས་ཏེ། བར་དུ་སོར་བཞི་དོར་བར་ཁ་ཁྱེར་དེའི་ཚད་ཅེས་བྱ་བ་ནི་དཔངས་དང་རྒྱར་སོར་བཞིའི་ཚད་ལ་པདྨ་ཁ་བྱེ་བ་འདྲ་བས་ཡོངས་སུ་བསྐོར་བ། ཁྲུ་གང་བཞེས་བྱ་བ་རྒྱར་ཁྲུ་གང་གི་ཚད་ལ་ཁྱ་ཕྱེད་བ་ཞེས་བྱ་བ་ནི་ཟབས་སུ་སོར་བཅུ་གཉིས་པའོ། །འཁོར་ལོ་ལྟ་བུ་ཞེས་བྱ་བ་ནི་ཟླུམ་པོའོ། །ལས་ཀུན་བྱེད་པས་བྱ་བའོ་ཞེས་བྱ་བ་ནི་ལྷག་མ་སྟེ། ཐབ་དེའི་དབུས་སུ་ནི་རལ་གྲི་བྲི་ཞིང་དེས་བརྒྱན་པར་བྱའོ་ཞེས་བྱ་བའི་ཐ་ཚིག་གོ །རལ་གྲི་ཇི་ལྟ་བུ་ཞེ་ན། ཆུར་སོར་བརྒྱད་པ་དཔངས་སུ་སོར་གཅིག་པ་འཁོར་ལོ་དང་རིན་པོ་ཆེ་དང་པདྨ་དང་རལ་གྲིའི་དབུས་སུ་ཆུད་པ་མཚན་མ་བཞིའི་ཕྱི་རོལ་དུ་རྡོ་རྗེའི་ཕྲེང་བས་བསྐོར་བའོ། །ཐབ་ཁུང་འདི་ནི་དཀྱིལ་འཁོར་གྱི་བྱང་ཕྱོགས་སུ་བརྐོ་བར་བྱའོ། །མེ་ཐབ་ཀྱི་ས་ལས་ཁྲུ་གང་ཙམ་དང་བཅས་པར་དྲི་སེར་པོས་བྱུགས་ལ་མེ་ཏོག་སྣ་ཚོགས་པའི་ཆལ་པ་ཡང་དགྲམ་པར་བྱའོ། །ཤར་དུ་ཁ་བལྟས་ཏེ་ཞེས་བྱ་བ་ནི་ཚང་བར་བྱེད་པས་ན་ཤར་དེ་རྫོགས་པར་བྱེད་ཅེས་བྱ་བའི་ཐ་ཚིག་གོ །ཁ་ཞེས་བྱ་བའི་སྒྲ་ནི་གཙོ་བོའི་དོན་ཏེ་རྫོགས་པར་བྱ་བ་གཙོ་བོར་གྱུར་པས་གནས་པར་བྱའོ་ཞེས་བྱ་བའི་དོན་ཏོ། །འདི་སྐད་སྟོན་ཏེ། ཁ་བྱང་དུ་བལྟས་ཏེ་ཡིད་དགའ་བ་དང༌། སེར་བ་དང་སྣ་ཚོགས་པའི་དྲི་དང་ཕྲེང་བ་དང་གོས་དང་རྒྱན་དང་ལྡན་པས་སྔ་དྲོར་བསམ་པས་འདུག་པར་བྱའོ། །ཀུན་བྱེད་ཅེས་བྱ་བ་ནི་བདུད་རྩི་ཐབས་སྦྱོར་
རོ། །བཟླས་པས་ཞེས་བྱ་བ་ནི་ལས་ཐམས་ཅད་པའི་ཆུ་ལའོ། །ཀུན་དུ་བསྲུང་ཞེས་བྱ་བ་ནི་བདག་ཉིད་ཀྱིས་ཀུ་ཤའི་ཆུན་པོ་ལག་པ་གཡས་པས་བཟུང་བས་བསང་གཏོར་བྱས་པའི་ཕྱིར་རོ། །དགོད་པ་བཤད་པ་ནི་མཆོད་ཡོན་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདིར་མཆོད་ཡོན་ནི་དུང་ཕོར་ལ་སོགས་པའི་སྣོད་དུ་དྲི་སེར་པོ་ལ་སོགས་པ་དང་སྦྱར་བའི་ཆུ་ཏིལ་དང་ཞོ་དང་བཅས་པ་རང་གི་ལྷའི་སྔགས་ཐ་མ་ཨོཾ་དང་བཅས་པ་ལན་བདུན་བཟླས་པའོ། །སོགས་པའི་སྒྲས་ནི་ལས་ཐམས་ཅད་པའི་ཆུ་ཡང་གཡོན་དུ་གཞག་པའོ། །དེ་ལས་གཞན་ཡོ་བྱད་ཅེས་བྱ་བ་ནི་ཡམ་ཤིང་དང་བུད་ཤིང་དང་ཀུ་ཤ་ལ་སོགས་པའི་སྲེག་རྫས་རྣམས་སོ། །བསངས་ནས་ནི་ཞེས་བྱ་བ་ནི་ལས་ཐམས་ཅད་པའི་ཆུ་ཉིད་ཀྱིས་སོ། །དེ་ནས་མེ་རྒྱུན་བཞག་ལ་སོགས་པའི་ཁྱིམ་ནས་བླངས་ལ་ཐབས་ལས་གཞན་དུ་འོ་མ་ཅན་གྱི་ཤིང་གིས་སྤར་ལ་ཡི་གེ་གསུམ་གྱིས་བསང་ཞེས་པ་ཡི་གེ་གསུམ་ཟློས་ཤིང་དབྱིག་པ་སྐམ་པོ་ལ་སོགས་པས་དེའི་མེ་ལྕེ་ལས་བླང་བར་བྱའོ། །དེ་ནས་ལས་ཐམས་ཅད་པའི་ཀུ་ཤའི་རྩེ་མོས་བླངས་ཏེ་གཡས་ནས་ལན་གསུམ་བསྐོར་བས་བསངས་ལ། ཐབ་ཏུ་ཐབ་ལས་དམའ་བའི་ཚད་ཙམ་གྱིའོ་མ་ཅན་གྱི་ཤིང་སྐམ་པོ་གཤགས་པའི་ཤིང་རྣམས་ལ་རྩྭ་སྐམ་པོ་གཙང་མ་རྣམས་བཅུག་ལ་རླུང་གཡབ་གཡབ་པས་སྤར་ཏེ། ཨོཾ་ཛྭ་ལ་ཛྭ་ལ་ཧཱུཾ་ཞེས་བྱ་བས་སྦར་བར་བྱའོ། །དེ་ནས་མར་གྱིས་ཉེ་བར་སྦར་ལ་ཀུ་ཤ་ཞེས་བྱ་བ་ནི་སར་པ་དྲི་མ་མེད་པ་སྔོ་བ། མ་གས་པ། མ་ཆགས་པའོ། །དགྲམ་ཞེས་བྱ་བ་ནི་ཤིན་ཏུ་དྲིང་པོ་མ་ཡིན་པ་དགྲམ་པར་བྱའོ། །གཡས་ནས་བསྐོར་ཞིང་ཞེས་བྱ་བ་ནི། ཁ་ཁྱེར་ལ་ནི་ཤར་བལྟས་དགྲ་མ། །ལྷོ་དང་ནུབ་ཏུ་བལྟས་པ་དང༌། །དེ་ནས་ཐབ་བྱང་རྩེ་བསྟན་ལ། །ཀུ་ཤ་ཤར་དུ་རྩེ་བསྟན་བཞག །ཅེས་ཇི་སྐད་བཤད་པ་ལྟ་བུའོ། །འདིར་ནི་སྒྲུབ་པ་པོས་གང་དུ་བལྟས་པ་དེ་ཉིད་ཤར་ལ་སོགས་པ་ཡིན་ནོ། །དེ་ནས་རང་གི་ལྷའི་ས་བོན་ལས་ཐབ་བསྐྱེད་ལ་འདིར་ཞེས་བྱ་བ་ཐབ་ཀྱི་མེ་འབར་བའི་དབུས་སུ་མེ་ཞེས་བྱ་བ་མེ་ལྷ་བསམ་པར་བྱའོ། །ཇི་ལྟ་བུ་ཞེ་ན་དང་པོའི་སྙིང་བྱུང་ཞེས་བྱ་བ་ལ་སོགས་པ་སྨོས་ཏེ། དཔལ་མཆོག་དང་པོའི་སྙིང་པོའི་རང་བཞིན་ཅན་གྱི་ཡི་གེ་རཾ་དང་བཅས་པའི་དཀྱིལ་འཁོར་གྲུ་གསུམ་པར་པདྨ་ལ་གནས་པའོ། །ལྷག་མ་ནི་དོན་གོ་
བར་ཟད་དོ། །སེར་ཞིང་ཞེས་བྱ་བ་ནི་གོས་དང་རྒྱན་དང་འོད་ཀྱི་ཕྲེང་བ་སེར་བོ་དང་ལྡན་པ་ཡིད་དགའ་ཞིང་མགུ་བ་ཞེས་བྱ་བར་བལྟ་བར་བྱའོ། །དེ་ནས་རང་གི་ལྷའི་ང་རྒྱལ་དང་ལྡན་པས་མེ་ལྷ་སྤྱན་དྲང་བའི་སྔགས་བརྗོད་པར་བྱའོ། །ཨོཾ་ཨེ་ཧྱེ་ཧི་མ་ཧཱ་བྷཱུ་ཏ་དེ་བ་རྀ་ཥི་དྲི་ཛ་ས་ཏ་མ། གྲྀ་ཧི་ཏཱ་ཧུ་ཏི་མ་ཧཱ་རཾ་ཨསྨིན་སནྣི་ཧི་ཏོ་བྷ་བཱ། ཨོཾ་ཨགྣ་ཡེ་དི་པྱཱ་དི་པྱ་ཨ་བི་sHA་མ་ཧཱ་ཤི་ཡེ་ཧ་བྱ་ཀ་བྱ་བཱ་ཧཱ་ན་ཡ་སྭཱཧཱ། དེ་ནས་འོད་པའི་རྒྱལ་པོའི་སྔགས་དེ་ཁོ་ན་ཉིད་གསུམ་དང་སྤེལ་བས་ཡེ་ཤེས་ཀྱི་མེ་ལྷ་སྤྱན་དྲངས་ལ་ཐབ་ན་གནས་པའི་རང་གི་རྣམ་པ་ལ་གཞུག་པར་བྱའོ། །དེ་ནས་དེ་ལ་ལས་ཐམས་ཅད་པའི་ཆུས་བསང་གཏོར་བྱས་ལ་པདྨའི་གདན་ལ་བཞུགས་སུ་གསོལ་ལོ། །སོགས་པའི་སྒྲས་ནི་མཆོད་ཡོན་དང་ཞབས་བསིལ་དང༌། མཆོད་པ་ལ་སོགས་པ་ཡང་བྱའོ། །དགང་གཟར་བླུགས་གཟར་ཞེས་བྱ་བ་ནི་དགང་གཟར་དང་བླུགས་གཟར་གཉིས་སྐྱེས་བུ་ཚད་དང་ལྡན་བའི་མཐེབ་སོར་ཉི་ཤུ་རྩ་བཞི་ནི་ཁྲུ་སྟེ་འདི་གཉིས་ཀྱི་ཡུ་བ་ཁྲུ་གང་གི་ཚད་དུ་བྱ་བའོ། །འདི་གཉིས་ཀའི་ཡུ་བའི་འོག་ཏུ་ནི་རྡོ་རྗེ་དང་རིན་པོ་ཆེ་སོར་དྲུག་པ་བྱའོ། །དེ་ལྟར་ན་ཡུ་བ་ཁྲུ་གང་རྡོ་རྗེ་དང་རིན་པོ་ཆེ་ནི་འདི་གཉིས་ཀྱི་ཐུན་མོང་གི་མཚན་ཉིད་ཡིན་ནོ། །ཁྱད་པར་གྱི་མཚན་ཉིད་ནི་དེའི་སྟེང་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ལ་རེ་ཞིག་དགང་གཟར་ནི་ཡུ་བའི་སྟེང་དུ་རྒྱར་སོར་བཞི་ཞེས་པ་ཆུ་དང་རྒྱར་སོར་བཞི་ཡོད་པ་ཟབས་སུ་སོར་གཉིས་ཏེ་གྲུ་བཞི་པ་སྟེ་ཉིད་ཀྱི་ཆར་ཆུ་དང་རྒྱར་དེ་ཙམ་གྱིས་དམའ་བར་བགྲོས་པ་དེ་ཉིད་ཀྱི་པདྨའི་འདབ་མར་བྱས་པ། ནང་རྡོ་རྗེ་ཞེས་བྱ་བ་སོར་བཞི་བརྐོས་པ་དེ་ཉིད་ཀྱི་ནང་དུ་དང་པོའི་རྡོ་རྗེ་གནས་པའོ། །མཐར་ཞེས་བྱ་བ་ཐམས་ཅད་ཀྱི་སྟེང་དུ་རྡོ་རྗེ་རྩེ་གསུམ་པ་དང་པོར་བཞི་པ་ཡོད་པ། བར་དུ་ཞེས་བྱ་བ་རྩེ་གསུམ་པ་དང་ཟུར་བཞི་པའི་བར་དུ་པདྨའི་འདབ་མའི་དབྱིབས་འདྲ་བ་ཡོད་པ། གཤེར་རྫས་འཛག་པའི་བུ་ག་མཐེ་བོའི་ཚད་ཙམ་མ་མ། མཐེའུ་ཆུང་གི་ཚད་ཙམ་བལྟ་བར་བྱ་སྟེ། ཡུ་བའི་སྟེང་དུ་འདི་ལྟ་བུ་བྱ་བ་ནི། དགང་གཟར་ཡིན་ནོ། །བླུགས་གཟར་ཇི་ལྟ་བུ་ཞེ་ན། བླུགས་གཟར་སོར་གཉིས་པདྨའི་དབྱིབས། །ཟབས་སུ་སོར་གཅིག་ནང་རྡོ་རྗེ། །ཞེས་བྱ་བ་སྟེ། རྡོ་རྗེ་རྩེ་ལྔ་པ་གནས་པ་
པདྨའི་དབྱིབས་འདྲ་བ་སོར་གཉིས་པའི་ཚད་ཟབས་སུ་སོར་གཅིག་བརྐོས་པའོ། །དེའི་ནང་ན་རྡོ་རྗེ་རྩེ་ལྔ་པ་གནས་བཞེས་བྱ་བའི་ཐ་ཚིག་གོ །དགང་གཟར་དང་བླུགས་གཟར་ནི་མཆོད་སྦྱིན་གྱི་ཤིང་དམ། གསེར་རམ་དངུལ་ལ་སོགས་པ་ལས་བྱས་པའོ། །གལ་ཏེ་དེ་གཉིས་མ་རྙེད་ན་སོར་མོ་ལྔ་བཅེར་བས་ནི་དགང་བླུགས་དབུལ་ལོ། །ཡང་ན་སོར་མོ་གསུམ་བཅེས་བས་དབུལ་ལོ། །ཇི་ལྟར་དགང་ཞིང་སྲེག་བླུགས་དབུལ་ཞེ་ན། དེའི་ཕྱིར་དགང་གཟར་ཞེས་བྱ་བ་ལ་སོགས་པ་སྨོས་ཏེ། དགང་གཟར་དང་བླུགས་གཟར་གྱི་ཁར་རང་གི་ལྷའི་ས་བོན་འོད་ཟེར་རབ་ཏུ་འབར་བ་བསམས་པ་དང༌། མེ་ལྷའི་ཁ་ལ་ཡི་གེ་རཾ་བཀོད་ནས་ལག་པ་གཉིས་པུས་མོའི་བར་དུ་གཞག་སྟེ། བླུགས་གཟར་གྱིས་མར་གྱི་དགང་བླུགས་གསུམ་མེ་ལྷ་ཞལ་ཅུང་ཟད་གདངས་པ་ལ་དབུལ་ལོ། །དེ་ནས་མེ་བགེགས་དང་བཅས་པ་དང༌། བགེགས་མེད་པའི་མཚན་ཉིད་བརྟག་པར་བྱ་སྟེ། ཁ་དོག་དང་དབྱིབས་ལེགས་པར་འབར་ཞིང་སྒྲ་དང་དྲི་ལ་སོགས་པའི་ཡོན་ཏན་གྱིས་ནི་བགེགས་མེད་པ་ཡིན་ལ། དུ་བ་མང་པོ་ལ་སོགས་པས་ནི་བགེགས་དང་བཅས་པ་ཡིན་ནོ། །དེ་ཡང༌། དུ་བ་མང་ཞིང་མེ་ལྕེ་གཏོད་པ་དང༌། །འབར་བར་དཀའ་ཞིང་ཅུང་ཟད་ཅུང་ཟད་འབར། །མེ་ལྕེ་རྣམ་པར་འཆད་ཅིང་གཟི་བརྗིད་མེད། །རྩུབ་ཅིང་གནག་ལ་པ་ལ་ཤ་ཡི་མདོག །མདུང་དང་ཞིབ་མ་ལྟ་བུ་ཉིད་དང་ནི། །དེ་བཞིན་བ་ལང་མགོ་བོ་ལྟ་བུ་དང༌། །མི་རོའི་དྲི་དང་དྲི་མི་ཞིམ་པ་དང༌། །བོང་བུའི་དྲི་དང་དེ་བཞིན་དྲི་ངན་དང༌། །སྦྱིན་སྲེག་བྱེད་པ་འབར་བས་གདུངས་པ་དང༌། །མེ་ལྕི་རྣམ་པར་རྒོད་ཅིང་གཡོ་བར་བཤད། །མེ་ནི་བགེགས་དང་བཅས་པར་ཤེས་བྱས་ལ། །བདུད་རྩི་ཐབ་སྦྱོར་གྱི་ནི་ཆོ་ག་བྱ། །ཞེས་ཇི་སྐད་གསུངས་པ་ལྟ་བུའོ། །དེ་ལྟར་མེ་བགེགས་དང་བཅས་པར་ཤེས་ན་བདུད་རྩི་ཐབ་སྦྱོར་གྱི་སྔགས་ཀྱིས་བསང་ཞིང་རྣམ་པར་སྦྱངས་ལ་ཡང་དག་པར་བསྲུངས་ཏེ། དེ་ཉིད་ཀྱིས་མར་གྱིས་རེག་བླུགས་ལན་བདུན་དུ་དབུལ་བར་བྱའོ། །དེ་ནས་ཡང་བསང་བར་བྱའོ། །དེ་ལྟར་བགེགས་མེད་པའམ་བགེགས་དང་བྲལ་བར་བྱས་བའི་མེ་དེ་ལ་དགང་བླུགས་གཅིག་གམ་གསུམ་མམ་བདུན་དགང་གཟར་མར་གྱིས་བཀང་བ་བླུགས་གཟར་དང་བཅས་པས་ཨོཾ་ཨེ་ཧྱེ་ཧི་ཞེས་
བྱ་བ་ལ་སོགས་པའི་སྔགས་ཀྱིས་སྦྱིན་པར་བྱ་ཞེས་བྱ་བ་ནི་སྦྱིན་སྲེག་དབུལ་བར་བྱའོ། །དཔལ་ཡོན་ཅན་ལ་ཞེས་བྱ་བ་ནི་ནོར་སྒྲུབ་པ་ལ་ཤེས་པ་སྟེ། རྒྱལ་པར་བྱེད་པ་དང་ལྡན་པ་ཞེས་བྱ་བའི་བར་དུའོ། །དེ་ཉིད་ཀྱིས་ན་པ་ལ་ཤ་དང༌། ཨུ་དུམྺཱ་ར་དང༌། ཨ་མྲ་དང༌། ཀ་དམྦ་དང༌། ཀྵྨརྫྱ་དང༌། པླཀྴ་དང༌། ཨ་ཤྭདྠ་དང༌། ཤ་མི་དང༌། ནྱ་གྲོ་དྷ་ལ་སོགས་པའོ་མ་ཅན་གྱིས་ཤིང་ལས་བྱུང་བ་འང་མ་དང་བཅས་པ་རླན་དང་བཅས་པ་མཉམ་པོར་བཅད་པ། དབུས་ཀྱི་ཆ་ལས་བྱུང་བ། ལོ་མ་གཉིས་དང་བཅས་པ་སྦོམས་ཆང་པའི་ཚད་ཙམ་ཆུར་ཁྲུ་གང་ཙམ་འོ་མ་དང་ཞོ་དང་མར་ལ་བཏགས་པ། རྩེ་མོ་གཉིས་དྲི་སེར་པོ་ལ་བཏགས་པ་མཐེ་བོང་དང་སྲིན་ལག་གིས་བཟུང་སྟེ་རྩེ་གཅིག་པས་དབུལ་བར་བྱའོ། །རྙིངས་པ་དང་ལོ་མ་མེད་པ་དང༌། སུལ་ཅན་དང༌། ཁོང་སྟོང་དང༌། ཁོང་སྟོང་དང༌། ཆག་པ་དང༌། ཤུན་ལྤགས་མེད་པ་དང༌། རིང་བ་དང༌། ཐུང་བ་དང༌། ཡོ་བ་དང༌། རྩེ་མོ་གཉིས་སུ་གས་པ་དང༌། ཕྲ་བ་དང༌། སྦོམ་པོ་དང༌། འབུ་ཡོད་པ་དང༌། འབུས་ཟོས་པ་དང༌། བཅས་པ་རྣམས་ནི་ཡོངས་སུ་སྤང་བར་བྱའོ་ཞེས་བྱ་བའི་དོན་ཏོ། །ཡམ་ཤིང་མེ་ལ་ཞེས་བྱ་བ་ནི་ཡམ་ཤིང་གིས་སྦར་བའི་མེའོ། །མ་གྲུགས་ཞེས་བྱ་བ་ནི་འབྲས་སོ་བ་མ་གྲུགས་པའོ། །ཆོ་གའི་རིམ་པ་ཡིན་ཞེས་བྱ་བ་ནི་རིམ་པ་འདི་དག་ཉིད་ཀྱིས་སོ། །དེ་ལ་དགང་བླུགས་ཀྱི་ཆོ་ག་བཞིན་དུ་མདོར་བསྟན་པའི་རིམ་པ་ཡིན་པས་གང་འདི་ཞུ་བའི་རྫས་དེ་ནི་མེ་ལྷའི་ཞལ་དུ་དབུལ་བར་བྱའོ། །ཡམ་ཤིང་དང་ཀུ་ཤུ་ལ་སོགས་པ་ནི་འོད་ཀྱི་དཀྱིལ་འཁོར་དུའོ། །བཟའ་བ་དང་འཐོར་འཐུང་ལ་སོགས་པ་ནི་ཕྱག་ཏུའོ། །དྲི་ནི་ཐུགས་ཀར་རོ། །མེ་ཏོག་ནི་དབུ་ལའོ། །བདུག་སྤོས་ནི་འོད་ལའོ། །ཞབས་བསིལ་ནི་ཞབས་ལའོ། །མར་མེ་དང་མཆོད་ཡོན་ནི་མདུན་དུའོ། །དེ་ལ་མཆོད་ཡོན་གྱི་ཆུ་ནི་སྣོད་གཞན་དུ་དབུལ་བར་བྱའོ། །དེ་ནས་མེ་ལ་འཐོར་འཐུང་དང་བསང་གཏོར་དབུལ་ལོ། །དེ་ནས་ཐུན་མོང་བའི་ལྷ་རྣམས་ལ་སྤྱིར་སྦྱིན་སྲེག་བྱ་བའི་ཆོ་ག་དེ་ཉིད་ཡེ་ཤེས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་བཞིན་ཉིད་ཀྱི་ཡེ་ཤེས་ཀྱི་དམ་ཚིག་དེ་ཉིད་མེ་ལྷ་ཡིན་པར་བལྟས་ལ། དེའི་ཐུགས་ཀའི་ཟླ་བར་ཡི་གེ་མཾ་ལས་བྱུང་བའི་བདག་པོ་
དཀྱིལ་འཁོར་དང་བཅས་པ་བསམས་ལ། ཡེ་ཤེས་དཀྱིལ་འཁོར་སྤྱན་དྲངས་ཏེ་མཆོད་ཡོན་དང་མཆོད་པ་ལ་སོགས་པ་སྔོན་དུ་འགྲོ་བས་སྦྱིན་སྲེག་བྱའོ། །དེ་ཡང་རྫས་རེ་རེ་ལས་སྲེག་བླུགས་གཅིག་གམ། གསུམ་མམ། བདུན་ནམ། ཉི་ཤུ་རྩ་གཅིག་གམ། བརྒྱ་རྩ་བརྒྱད་དམ། སྟོང་དབུལ་བར་བྱའོ། །རྒྱས་པའི་དབང་དུ་བྱས་པ་ཡིན་ན་ཡང་དེའི་ཞར་ལ་ལས་ཐམས་ཅད་ལ་སྔགས་ཀྱིས་བསྐུལ་བའི་ཕྱིར་སྦྱོར་བ་བསྟན་པ་ནི། རྒྱས་དང་ཞེས་བྱ་ལ་སོགས་པ་སྨོས་པ་ཡིན་ཏེ། རྒྱས་པ་ལ་སོགས་པའི་ལས་བདུན་པོ་ལ་གོ་རིམས་བཞིན་དུ་ཨོཾ་ལ་སོགས་པའི་སྔགས་བདུན་ཐ་མར་སྦྱར་བ་ཡིན་ལ། འང་ཞེས་བྱ་བའི་སྒྲས་ནི་བསྐུལ་བའི་མཐར་བྱ་བ་དང༌། བསྐུལ་བའང་བྱ་ཞེས་བྱ་བ་བསྐུལ་བ་དེ་ཡང་སྔགས་ཀྱི་མཐར་གཞུག་པ་སྟེ། སྔགས་ཀྱི་གོང་དུ་ཡི་གེ་ཨོཾ་ལ་སོགས་པ་དེ་ནས་བསྐུལ་བ། དེ་ནས་ཡང་ཨོཾ་ལ་སོགས་པ་གཞུག་གོ་ཞེས་བྱ་བའི་དོན་ཏོ། །དེ་ལྟར་ཆོ་ག་འདིས་ཐུགས་ཀའི་ཟླ་བ་ལ་བཞུགས་པའི་དཀྱིལ་འཁོར་གྱི་འཁོར་ལོ་སྔ་མ་བཞིན་དུ་རྡོ་རྗེ་གནས་པའི་ལྗགས་ལ་ཟླ་བ་ལ་སོགས་པའི་རྫས་གཤེར་བ་དང༌། དེ་ལ་སོགས་པ་མར་ལ་སོགས་པ་ཚིམ་པར་བྱེད་པ་རྣམས་ཀྱིས་ཡང་དག་པར་ཚིམ་པར་བྱའོ། །རང་གི་བདག་པོ་ལ་སྲེག་བླུགས་ཕུལ་བ་ཉིད་ཀྱིས་ལྷ་ཐམས་ཅད་ལ་སྦྱིན་སྲེག་ཕུལ་བར་འགྱུར་བའི་མདོར་བསྡུས་པའི་དོན་བཤད་པ་ནི། སྙིང་ག་ཞེས་བྱ་བ་ལ་སོགས་པ་སྨོས་པ་ཡིན་ཏེ། རང་གི་བདག་པོ་ཞེས་བྱ་བ་ནི་འཇམ་པའི་རྡོ་རྗེ་ཉིད་དོ། །སྙིང་གའི་སེམས་དཔའ་ཞེས་བྱ་བ་ནི་དེའི་ཡེ་ཤེས་སེམས་དཔའ་ལ་མངོན་སུམ་དུ་སྲེག་བླུགས་ཕུལ་བས། ཚིམ་པར་བྱས་པས་ནི་ལྷ་ཐམས་ཅད་ཡེ་ཤེས་སེམས་དཔའ་དང་བཅས་པ་ཚིམ་པར་གྱུར་བར་བསམ་པར་བྱའོ། །བསམ་བ་དེ་ཡང་སྲེག་བླུགས་ཐམས་ཅད་ཀྱི་ལྗགས་ལ་བསྟབས་པར་མོས་པ་ཡིན་པའི་ཕྱིར་རོ། །ཡང་ན་ལྷ་ཐམས་ཅད་ཀྱི་ལྗགས་དང་དེའི་ལྗགས་ཐ་མི་དད་པར་ལྷག་པར་མོས་པས་སོ། །དེ་ནས་དེའི་རིགས་ཀྱི་སྙིང་པོ་ལན་གསུམ་མམ་བདུན་གྱི་བར་གྱི་དགང་བླུགས་ཀྱིས་གཟི་བརྗིད་བསྐྱེད་པར་བྱའོ། །མཐར་ཡང་དགང་བླུགས་ཕུལ་ལ་བསང་གཏོར་དང༌། འཐོར་འཐུང་དང་མཆོད་ཡོན་ཕུལ་ནས་ཡང་དག་པར་མཆོད་དེ་ལེགས་པར་བསྟོད་ལ་ལྷ་རྣམས་
ཀྱི་འཁོར་ལོ་གཤེགས་སུ་གསོལ་བར་བྱའོ། །དེ་ནས་སྲེག་རྫས་ཀྱི་ལྷག་མ་མེ་ལྷ་ལ་ཕུལ་ལ་མེ་ལྷ་དེ་ཡང་དེ་བཞིན་དུ་གཤེགས་སུ་གསོལ་ལོ། །འཁོར་ལོ་ཞེས་བྱ་བ་ནི་བྲིས་པའི་དཀྱིལ་འཁོར་རོ། །ཡང་དག་འཇུག་ཅེས་བྱ་བ་ནི་འཇུག་པར་བྱའོ། །དེ་ནས་ལྷ་རྣམས་ཀྱི་འཁོར་ལོ་མངོན་སུམ་བཞིན་དུ་བསམས་ལ་ཆོ་ག་སྔ་མས་ཡང་དག་པར་མཆོད་དོ་ཕྱིར་དབྱུང་བར་བྱའོ། །དེ་ནས་རིགས་ཀྱི་བདག་པོ་བླ་མ་ཉིད་དུ་བྱས་ལ་འོག་ནས་བཤད་པའི་སློབ་མ་འཇུག་པའི་ཆོ་གས་བདག་ཉིད་དང་པོར་དཀྱིལ་འཁོར་དུ་ཞུགས་ལ། བདག་ཉིད་དབང་བསྐུར་བའི་ཆོ་ག་རིགས་ཀྱི་བདག་པོར་རྫོགས་པར་མཛད་པ་དང༌། དེ་ཉིད་ལས་སློབ་དཔོན་གྱི་ལས་ཐམས་ཅད་ཀྱི་རྗེས་སུ་གནང་བ་མནོས་ལ། དཀྱིལ་འཁོར་དུ་སློབ་མ་གཞུག་པར་བྱ་བའི་ཕྱིར་དེ་ཁོ་ན་ཉིད་དང༌། བདེན་པ་དགོངས་པར་བྱ་བ་ཉིད་ཀྱིས་བཅོམ་ལྡན་འདས་མཉེས་པར་བྱ་བའི་ཚིགས་སུ་བཅད་པས་གསོལ་བ་གདབ་པར་བྱའོ། །དེ་ལ་དེ་ཁོ་ན་ཉིད་ནི་ཐར་པའི་གོ་འཕང་གི་མཆོག་གོ །བདེན་བ་ནི་དངོས་པོ་ཐམས་ཅད་ཀྱི་རང་བཞིན་ནོ། །དེ་ལ་དེ་ཁོ་ན་ཉིད་ཇི་ལྟ་བུ་ཡིན་ཞེ་ན། འདོད་ཆགས་ཆེ་ལས་བྱུང་དེ་ཉིད། །ཅེས་བྱ་བ་སྨོས་ཏེ། འདོད་ཆགས་ཆེན་པོ་ལས་བྱུང་བ་ནི་ཟག་པ་མེད་པའི་བདེ་བ་ཆེན་པོ་སྟེ་རྡོ་རྗེ་འཆང་གི་རང་བཞིན་ནི་དེ་ཁོ་ན་ཉིད་ཡིན་ནོ་ཞེས་བྱ་བའི་ཐ་ཚིག་གོ །བདེན་པ་ཇི་ལྟ་བུ་ཞེ་ན། འཁོར་ལོའང་གཟུགས་བརྙན་ལྟ་བུ་ཞེས་བྱ་བ་སྨོས་ཏེ། ཆོས་ཐམས་ཅད་གཟུགས་བརྙན་དང་འདྲ་བའི་བདག་ཉིད་ཅན་གཉིས་སུ་མེད་པའི་ཡེ་ཤེས་ཀྱི་སྐུ་དང་ལྡན་པའི་དཀྱིལ་འཁོར་གྱི་འཁོར་ལོ་ནི་བདེན་བ་ཡིན་ནོ་ཞེས་པའི་ཐ་ཚིག་གོ །དེ་ལ། ནམ་མཁའ་སྐྱེ་བའི་མཚན་ལྡན་ཕྱིར། །ཞེས་བྱ་བ་ལ་སོགས་པ་ཚིགས་སུ་བཅད་པ་ལྔས་ནི་དམ་ཚིག་གསུམ་གྱི་གླུས་མཆོད་པ་ཡིན་ནོ། །དེ་ནས། སེམས་ཅན་ཀུན་གྱི་ཡིད་ཁྱབ་ཅིང༌། །ཞེས་བྱ་བ་གཅིག་གིས་ནི་དེ་ཁོ་ན་ཉིད་གདགས་པར་བྱའོ། །དེ་ནས་ཚིགས་སུ་བཅད་པ་གསུམ་གྱིས་ནི་བདེན་པ་བསྒྲགས་པའོ། །དེ་ལ་དམ་ཚིག་གསུམ་གྱི་གླུས་དམ་ཚིག་གསུམ་པོ་རྡོ་རྗེ་འཆང་བའི་དེ་ཁོ་ན་ཉིད་གང་ཡིན་བ་དེ་ནི་འདིའི་ཆོས་ཡིན་ལ།
དེའི་དམ་ཚིག་གང་ཡིན་བ་དེ་འདིའི་དམ་ཚིག་ཡིན་བས་དཀྱིལ་འཁོར་གྱི་བདག་པོ་ཐམས་ཅད་ཀྱང་རྡོ་རྗེ་འཆང་བའི་རང་བཞིན་ཅན་ཡིན་ནོ། །དེ་བས་ན་དེའི་དེ་ཁོ་ན་ཉིད་ལ་སོགས་པ་གང་ཡིན་པ་དེ་འཇམ་པའི་རྡོ་རྗེ་ལ་སོགས་པའི་ཡང་ཡིན་བར་འགྱུར་རོ། །དེ་ལ་ཚིགས་སུ་བཅད་པ་གསུམ་གྱིས་ནི་དེ་ཁོ་ན་ཉིད་གསུམ་གྱི་གླུ་སྟོན་ཏོ། །དེ་ལ་དེ་ཁོ་ན་ཉིད་གསུམ་ནི་རང་བཞིན་གྱི་དེ་ཁོ་ན་ཉིད་དང༌། འབྱོར་པའི་དེ་ཁོ་ན་ཉིད་དང་རྣམ་པར་དག་པའི་དེ་ཁོ་ན་ཉིད་དོ། །དེ་ལ་རང་བཞིན་གྱི་དེ་ཁོ་ན་ཉིད་ཀྱི་དབང་དུ་མཛད་ནས་ཚིགས་སུ་བཅད་པ་ནི་ནམ་མཁའ་སྐྱེ་བའི་ཞེས་བྱ་བ་ལ་སོགས་པ་ཡིན་ཏེ། དེ་ཁོ་ན་ཉིད་གཙོ་བོར་གྱུར་ཅིང་དེ་ཁོ་ན་ཉིད་དུ་རོ་གཅིག་པ་སྤྲོས་པ་མེད་པ་རྣམ་པར་མི་རྟོག་པའི་ཡེ་ཤེས་བྱང་ཆུབ་ཀྱི་སེམས་ནི་འདིའི་རང་བཞིན་ཡིན་ལ། དེ་ཉིད་ནི་རྡོ་རྗེ་ཆེན་པོ་སྟི་མི་ཕྱེད་པའི་ཕྱིར་རོ། །དེས་ན་སེམས་དཔའ་རྡོ་རྗེ་ཆེ་རང་བཞིན། །ཞེས་བྱའོ། །རྡོ་རྗེ་སེམས་དཔའ་བདག་གྲུ་བ་མཛོད། །ཅེས་བྱ་བ་ནི་རང་བདག་ཉིད་དུ་མཛོད་ཅིག་ཅེས་བྱ་བའོ། །སེམས་ལ་ནི་སྐྱེ་བ་ཡོད་པ་ཡིན་ལ་སྐྱེ་བ་དང་ལྡན་པ་ནི་འཇིག་པར་འགྱུར་བ་ཡིན་མོད་ཀྱི་འོན་ཀྱང་བཅོམ་ལྡན་འདས་གང་ཡིན་པ་དེ་ནི་ཐོག་མ་དང་ཐ་མ་མེད་པ་ཡིན་ལ། དེ་ལྟར་ན་འདི་ནི་བྱང་ཆུབ་ཀྱི་སེམས་ཀྱི་རང་བཞིན་ཡིན་ནོ། །བྱང་ཆུབ་ཀྱི་སེམས་དེ་ཡང་གང་ཡིན་ཞེ་ན་གང་འདི་བྱང་ཆུབ་སེམས་དཔའ་རྣམས་ཀྱི་ཐོག་མ་དང་ཐ་མ་མེད་པའི་སེམས་ཀྱི་རྒྱུན་སྟོང་པ་ཉིད་དུ་རོ་གཅིག་པས་ནམ་མཁའ་དང་འདྲ་བས་རང་བཞིན་གྱིས་དག་པ་བྱང་ཆུབ་སེམས་དཔའ་ཐམས་ཅད་ཀྱི་ཐུན་མོང་དུ་གྱུར་པའི་དེ་བཞིན་ཉིད་ཀྱི་སྐུའི་ས་རྣམས་ལ་གློ་བུར་བའི་སྒྲིབ་བ་རིམ་གྱིས་རྣམ་པར་དག་པའི་མཐར་ཐུག་པར་རྟོགས་པར་འགྱུར་བ་ཡིན་བས་དེ་སྐུ་དེས་བྱང་ཆུབ་ཀྱི་སེམས་ཞེས་བྱ་བར་བཤད་དོ། །དེས་ན་བྱང་ཆུབ་ཀྱི་སེམས་ཀྱི་རང་བཞིན་ཅན་གྱིས་བཅོམ་ལྡན་འདས་དེ་ལ་ཐོག་མ་དང་ཐ་མ་ག་ལ་མངའ། གང་ཡང་འདི་སྒྲིབ་པ་དང་བྲལ་བར་གྱུར་ན་གསལ་བར་འགྱུར་བས་འདིའི་སྐྱེ་བར་ཉེ་བར་གདགས་སུ་རུང་སྟེ། དཔེར་ན་ནམ་མཁའ་རྩིག་པ་ལ་སོགས་པ་གསལ་བར་སྣང་བ་དང་འདྲ་བའོ། །དེའི་ཕྱིར། ནམ་མཁའ་སྐྱེ་བའི་མཚན་ལྡན་ཕྱིར། །ཞེས་སྨོས་པའི་དཔེ་འདི་ལ་ཡོད་པས་ནམ་མཁའ་སྐྱེ་བའི་མཚན་ལྡན་ཏེ་དེའི་ངོ་བོ་
ཉིད་ནི་དེ་ཉིད་དེ་དེའི་ཕྱིར་ཐོག་མ་ཐ་མ་མེད་པའོ། །མཆོག་ནི་གཙོ་བོའོ། །འབྱོར་པའི་དེ་ཁོ་ན་ཉིད་ཀྱི་དབང་དུ་བྱས་པའི་ཚིགས་སུ་བཅད་པ་ནི་ཀུན་མཆོག་ཅེས་བྱ་བ་ལ་སོགས་པ་ཡིན་ཏེ། དངོས་གྲུབ་ཐམས་ཅད་ཀྱི་མཆོག་ནི་དངོས་གྲུབ་ཆེན་པོ་སྟེ་ཡང་དག་པར་རྫོགས་པའི་བྱང་ཆུབ་བོ། །དེས་ན་དབང་ཕྱུག་ཆེན་པོ་སྟེ། སྟོབས་བཅུ་མི་འཇིགས་པ་ལ་སོགས་པའི་ཆོས་ཐམས་ཅད་ལ་དབང་བའི་མཆོག་ཏུ་གྱུར་པའོ། །དེས་ན་ལྷག་པའི་ལྷ་ཡིན་ཏེ། འཇིག་རྟེན་པ་ཐམས་ཅད་ལས་ལྷག་པའི་ལྷ་ཉིད་དོ། །ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་བརྙེས་པས་ན་རྡོ་རྗེ་འཛིན་པ་ཀུན་ཏེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཕུན་སུམ་ཚོགས་པ་དེ་ལ་རག་ལས་པའི་ཕྱིར་རྒྱལ་པོའོ། །དེའི་འབྱོར་པ་དེ་ཡང་རྟག་ཏུ་མི་འགྱུར་བ་ཡིན་བས་ན་མི་འགྱུར་མཆོག་གོ །རྣམ་པར་དག་པའི་དེ་ཁོ་ན་ཉིད་ཀྱི་དབང་དུ་མཛད་ནས་གསུངས་པ་ནི་ཉེས་པ་མི་མངའ་ཞེས་བྱ་བ་ལ་སོགས་པ་ཡིན་ཏེ། བག་ཆགས་དང་བཅས་པའི་སྒྲིབ་པ་ཐམས་ཅད་སྤངས་པས་ན་ཉེས་པ་མི་མངའ་བའོ། །དེ་ལྟར་ན་ཡང་གནས་པ་དང༌། ཕྲིན་ལས་དང༌། འདོད་ཆགས་དང༌། དགའ་བ་དང་ལྡན་པ་ཡིན་ནོ་ཞེས་བྱ་བ་ནི་རྟག་པ་ལ་སོགས་པའི་ཚིག་གི་དོན་ཡིན་ནོ། །དེ་ཡང་སྐུ་གསུམ་གྱིས་ནམ་མཁའ་ཇི་སྲིད་ཀྱི་བར་དུ་བཞུགས་པས་ན་རྟག་པའོ། །དངོས་གྲུབ་ཐམས་ཅད་བརྙེས་པའི་འདོད་ཆགས་ཀྱིས་སེམས་ཅན་ཐམས་ཅད་ལ་རྗེས་སུ་དགའ་བར་མཛད་པས་ན། འདོད་ཆགས་ཀུན་གྱི་རྗེས་ཆགས་པ། །ཞེས་བྱའོ། །དེ་ཉིད་ཀྱིས་ན་དམིགས་སུ་མེད་པའི་ཐུགས་རྗེ་ཆེན་པོའི་འདོད་ཆགས་མངའ་བས་ན་འདོད་ཆགས་ཆེན་པོའོ། །མཚན་མ་མེད་པའི་ཆོས་ཀྱི་དགའ་བས་དགྱེས་པས་ན་དགའ་བ་ཆེ་ཞེས་བྱའོ། །དེ་ཉིད་ཀྱིས་ཞེས་བྱ་བ་ནི་ཚིགས་སུ་བཅད་པ་གསུམ་གྱིས་བཤད་པའོ། །ཆོས་ཉིད་ཀྱི་གླུ་ནི་ཤིན་ཏུ་དག་པ་ཞེས་བྱ་བ་ལ་སོགས་པ་ཚིགས་སུ་བཅད་པ་གཅིག་གིས་སྟོན་ཏེ། འདི་ལ་ཆོས་ཉིད་ཀྱི་སྐུ་ཐར་བ་ཆེན་པོའི་རང་བཞིན་ཅན་ནི་ཆོས་ཡིན་ལ། དེ་ནི་ཚིགས་སུ་བཅད་པ་འདིས་སྟོན་ཏེ། གློ་བུར་བའི་སྒྲིབ་པ་བག་ཆགས་དང་བཅས་པ་ཐམས་ཅད་སྤངས་པའི་ཕྱིར་རམ། སླར་མི་ལྡོག་པའི་དག་པ་མངའ་བས་ན་ཤིན་ཏུ་དག་
པའོ། །ཆོས་ཐམས་ཅད་ཀྱི་མཆོག་ནི་མྱ་ངན་ལས་འདས་པ་ཡིན་ལ། མྱ་ངན་ལས་འདས་པ་ཐམས་ཅད་ཀྱི་མཆོག་ནི་སངས་རྒྱས་ཀྱི་མྱ་ངན་ལས་འདས་པ་ཡིན་ཏེ། དེའི་རང་བཞིན་ནི་བཅོམ་ལྡན་འདས་ཡིན་པས་དེའི་ཕྱིར་ཀུན་གྱི་མཆོག་གོ །ཆོས་ཀྱི་དབྱིངས་ནི་རང་བཞིན་གྱིས་རྣམ་པར་དག་པ་ཡིན་པས་ན་གདོད་ནས་གྲོལ་བའོ། །ཆོས་རྣམས་ཀྱི་ཆོས་ཉིད་ཇི་ལྟར་གནས་པ་དེ་ལྟར་ཐུགས་སུ་ཆུད་ཅིང་གཤེགས་པས་ན་དེ་བཞིན་གཤེགས་པའོ། །ཀུན་ནི་མ་ལུས་པའོ། །བཟང་པོ་ནི་དགེ་བ་སྟེ། སྐལ་བ་དང་ལྡན་པ་རྣམས་འདི་ལས་བྱུང་བས་ན་ཀུན་དུ་བཟང་པོའོ། །ཆོས་ཀྱི་དབྱིངས་ནི་ཆོས་ཐམས་ཅད་ཀྱི་ཆོས་ཀྱི་མཚན་ཉིད་ཡིན་བས་ན་ཀུན་བདག་ཉིད་དོ། །བྱང་ཆུབ་ཀྱི་བདག་ཉིད་ཅན་གྱི་སེམས་དཔའ་ནི་བྱང་ཆུབ་སེམས་དཔའོ། །དམ་ཚིག་ནི་ཕྱག་རྒྱ་སྟེ་དེའི་གླུ་ནི་དངོས་གྲུབ་ཆེན་པོ་ཞེས་བྱ་བ་ལ་སོགས་པའི་ཚིགས་སུ་བཅད་པས་སྟོན་ཏེ། དངོས་གྲུབ་ཆེན་པོ་ཀུན་གྱི་མཆོག །ཅེས་བྱ་བ་ནི་བཤད་ཟིན་ཏོ། །དབང་ཕྱུག་ཆེན་པོ་ཡང་བཤད་ཟིན་ཏོ། །དེའི་ཕྱག་རྒྱ་ནི་དེའི་རྒྱུ་མཐུན་པ་ནི་ཡིད་ཀྱི་རང་བཞིན་ཅན་གྱི་བརྡའོ། །དེ་བཞིན་གཤེགས་པ་ཐམས་ཅད་ཀྱི་མཐུས་རང་ཉིད་བྱིན་གྱིས་བརླབས་ཤིང་མཆོད་པའི་རྡོ་རྗེ་སེམས་དཔའི་སྐུ་དང་གསུང་དང་ཐུགས་ཀྱི་རྡོ་རྗེའི་ངོ་བོའི་ཕྱག་རྒྱ་དེས་བཅོམ་ལྡན་འདས་ཡུམ་རྡོ་རྗེ་བསྙེམས་མའི་ཕྱག་རྒྱའི་བདག་པོ་སྟེ་གཙོ་བོར་གྱུར་པ་བདག་ལ་གྲུབ་པར་མཛོད་ཅིག་པའོ། །ཇི་ལྟར་ན་འདི་ནི་བདག་པོ་ཡིན་ཞེ་ན། རྡོ་རྗེ་ཆེར་བསྟོད་པ་ཞེས་བྱ་བ་སྟེ་དང་པོའི་རྡོ་རྗེ་བསྟོད་ཅིང་ཕྱག་གཡས་པས་གསོར་བའི་ཕྱིར་རོ། །འདི་ནི་ཉེ་བར་མཚོན་པ་ཙམ་སྟེ། དེ་ལ་སོགས་པའི་ཕྱག་རྒྱ་ཆེན་པོའི་དངོས་གྲུབ་བདག་ལ་སྩོལ་ཅིག་ཅེས་བྱ་བའི་ཐ་ཚིག་གོ །དེ་ལྟར་དམ་ཚིག་གསུམ་གྱི་གླུའི་མཆོད་པ་བཤད་ནས་དེ་ཁོ་ན་ཉིད་བསྒྲགས་པ་ནི། སེམས་ཅན་ཀུན་གྱི་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྒྲིབ་པ་གཉིས་རྣམ་པར་དག་པ་དེ་བཞིན་ཉིད་གཙོ་བོར་གྱུར་པའི་ཡེ་ཤེས་ནི་བྱང་ཆུབ་ཀྱི་སེམས་ཡིན་ལ། དེ་ཉིད་ནི་ཤིན་ཏུ་རྣམ་པར་དག་པའི་སངས་རྒྱས་ཀྱི་བྱང་ཆུབ་རྣམ་པར་ཐར་པའི་གནས་སོ། །དེ་ནི་བཅོམ་ལྡན་འདས་རྡོ་རྗེ་འཆང་ཡིན་ལ། དེ་ཉིད་ནི་འདིར་འདོད་པའི་སྒྲར་གསུངས་ཏེ་ཆེན་པོ་རྣམས་ཀྱི་འདོད་པར་བྱ་བ་ཡིན་པའི་ཕྱིར་རོ། །
འདོད་པ་དེ་ཡང་སེམས་ཅན་ཀུན་གྱི་ཞེས་བྱ་བ་སངས་རྒྱས་དང་བྱང་ཆུབ་སེམས་དཔའ་ནས་སོ་སོའི་སྐྱེ་བོའི་བར་གྱི་ཡིད་ལ་ཁྱབ་པ་ཡིན་ནོ། །བདེ་བ་རབ་ཏུ་སྩོལ་བས་ཕ་དང་འདྲའོ། །དེ་ལ་སངས་རྒྱས་རྣམས་ལ་ནི་རྣམ་པར་དག་པའི་ཚུལ་གྱིས་ཐུགས་ཁྱབ་པའོ། །བྱང་ཆུབ་སེམས་དཔའ་རྣམས་ལ་ནི་རང་གིས་རྣམས་ཀྱི་སྒྲིབ་པ་རྣམ་པར་དག་པའི་ཚུལ་གྱིས་སོ། །དེ་རྣམས་ལ་བདེ་བ་རབ་ཏུ་སྩོལ་བར་མཛད་པ་ཡང་ཡིན་ཏེ། རྣམ་པར་དག་པའི་བདེ་བ་སྐྱེད་པར་མཛད་པའི་ཕྱིར་རོ། །དེ་ཡང་རྣམ་པར་མི་རྟོག་པ་ལ་འཇུག་པའི་གཟུངས་ལས། དམ་ཆོས་འདི་ལ་རྒྱལ་བའི་སྲས། །རྣམ་པར་མི་རྟོག་བསམས་གྱུར་ན། །རྣམ་རྟོག་འགྲོང་དཀའ་རྣམ་སྤངས་ཏེ། །རིམ་གྱིས་མི་རྟོག་འཐོབ་པར་འགྱུར། །དེ་བས་རབ་ཞི་མི་གཡོ་མཆོག །དབང་བྱེད་མཉམ་ལ་མི་གནས་པ། །རྣམ་པར་མི་རྟོག་བདེ་བ་ནི། །བྱང་ཆུབ་སེམས་དཔས་ཐོབ་པར་འགྱུར། །ཞེས་ཇི་སྐད་གསུངས་པ་ལྟ་བུའོ། །ལ་ལ་ལས་ནི་སྙིང་ལ་བཞུགས་ཞེས་ཟེར་ཏེ། དེ་ཡང་བདེ་བ་རབ་ཏུ་སྩོལ་བ་ཉིད་ཀྱིས་སྡུག་པ་ཡིན་བས་སྙིང་ལ་གནས་ཞེས་བྱའོ། །བཅོམ་ལྡན་འདས་འདོད་པ་དེ་ནི་དེ་རྣམས་ཀྱི་ཡབ་ཏུ་གྱུར་པ་ཡང་ཡིན་ཏེ། དེ་རྣམས་རྣམ་པར་དག་པའི་ཡེ་ཤེས་ཀྱི་སྐུ་དེ་ཉིད་ལས་འཁྲུངས་པའི་ཕྱིར་རོ། །སངས་རྒྱས་དང་བྱང་ཆུབ་སེམས་དཔའ་ཇི་ལྟ་བ་དེ་བཞིན་དུ་སོ་སོའི་སྐྱེ་བོ་རྣམས་ཀྱི་ཡང་ཡིན་ཏེ། སེམས་ཀྱི་བདེ་བ་དང་ལུས་ཀྱི་བདེ་བ་དེ་ཉིད་ཀྱི་རང་བཞིན་གྱིས་རྣམ་པར་དག་པ་ཉིད་ཀྱི་དབང་དུ་བྱས་པའི་ཕྱིར་རོ། །དེ་བས་ན་བཅོམ་ལྡན་འདས་འདི་ནི་འདོད་པའི་མཆོག་དང༌། དམ་ཚིག་གི་མཆོག་ཀྱང་ཡིན་ཏེ། དམ་ཚིག་རྣམས་ཀྱི་མཆོག་ནི་ཡང་དག་པའི་ཡེ་ཤེས་ཡིན་ལ། དེ་གང་ལ་མངའ་བའི་སངས་རྒྱས་དང་བྱང་ཆུབ་སེམས་དཔའ་དེ་རྣམས་ཀྱི་མཆོག་སྟེ་གཙོ་བོའོ། །ཡང་ན་ཡིད་ལ་ཕྲ་བའི་ཚུལ་གྱིས་ཏིལ་ལ་ཏིལ་མར་གྱི་ཚུལ་དུ་ཁྱབ་པའོ། །བདེ་བ་ནི་འཇིག་རྟེན་ལས་འདས་པ་སྟེ། དེ་རབ་ཏུ་སྩལ་བ་དང༌། སྙིང་ལ་བཞུགས་ཞེས་བྱ་བ་ལ་སྙིང་ནི་ཡིད་ཀྱི་རྩ་བའི་གནས་སོ། །ཡབ་ནི་དག་པ་དང་མ་དག་པའི་སྐུས་སྐྱེད་པར་མཛད་པའོ། །དམ་ཚིག་མཆོག་ཅེས་བྱ་བ་ལ་མཆོག་ནི་ཡིད་ཀྱི་གཟུགས་དག་པ་ཉིད་དེ། དེས་ཕུལ་དུ་བྱུང་བའོ། །བདེན་
པ་བསྒྲགས་པ་གསུངས་པ་ནི། བདེན་པ་གང་གིས་ཞེས་བྱ་བ་ལ་སོགས་པ་ཡིན་ཏེ། ཡེ་ཤེས་མཆོག་ནི་གཉིས་སུ་མེད་པའི་ཡེ་ཤེས་ཏེ། གཉིས་སུ་དབྱེར་མེད་པས་སོ། །དེ་ཡང་གཉིས་སུ་ཉེ་བར་མི་དམིགས་པ་ནི་ཤེས་རབ་ཡིན་ལ། གཉིས་སུ་མེད་པ་ལ་དམིགས་པ་ནི་ཐབས་ཡིན་ཏེ། དངོས་མེད་གང་ཞིག་ཤེས་རབ་སྟེ། །ཐབས་ནི་དངོས་པོའི་མཚན་ཉིད་དོ། །ཞེས་ཇི་སྐད་གསུངས་པ་ལ་སོགས་པ་ལྟ་བུའོ། །བྱང་ཆུབ་ཀྱི་སེམས་ཀྱི་བདག་ཉིད་ཅན་འདི་ཡང་དཀྱིལ་འཁོར་གྱི་བདག་པོའི་བདག་ཉིད་ཅན་ཡིན་ནོ། །དེ་བས་ན་དཀྱིལ་འཁོར་ལ་ནི་དེའི་རང་བཞིན་རྗེས་སུ་འགྲོ་བ་ཉིད་ཡིན་པར་སྟོན་ཏོ། །བདེན་བ་ནི་ཕྱིན་ཅི་མ་ལོག་པའོ། །འདོད་པ་ནི་ཡིད་ལ་མངོན་པར་བསམས་པའོ། །ཆོས་རྣམས་ཞེས་བྱ་བ་ནི་རྣམ་པར་སྣང་མཛད་ལ་སོགས་པ་ནས་བདུད་རྩི་ཐབ་སྦྱོར་གྱི་བར་གྱི་དཀྱིལ་འཁོར་པ་རྣམས་སོ། །གཟུགས་བརྙན་ལྟ་བུ་སྟེ་ཞེས་བྱ་བ་ནི་སེམས་ཙམ་གྱི་རང་བཞིན་ཅན་ཡིན་པའི་ཕྱིར་རོ། །དག་པ་ནི་ཉོན་མོངས་པའི་སྒྲིབ་པ་རྣམ་པར་དག་པའི་ཕྱིར་རོ། །གསལ་བ་ནི་ཤེས་བྱའི་སྒྲིབ་པ་རྣམ་པར་དག་པའི་ཕྱིར་རོ། །རྙོག་པ་མེད་པ་ནི་སྙོམས་པར་འཇུག་པའི་སྒྲིབ་པ་རྣམ་པར་དག་པའི་ཕྱིར་རོ། །གཟུང་དུ་མེད་པ་ནི་སོ་སོ་རང་གི་རིག་པ་ཉིད་ཀྱིས་ན་ཤེས་པ་གཞན་གྱིས་གཟུང་དུ་མེད་པའི་ཕྱིར་རོ། །བརྗོད་དུ་མེད་པ་ནི་སྒྲ་དང་རྣམ་པར་རྟོག་པ་རྣམས་ཀྱི་ཡུལ་མ་ཡིན་པའི་ཕྱིར་རོ། །འདི་རྣམས་ཀྱི་རྒྱུ་ནི་ཆོས་ཀྱི་དབྱིངས་སོ། །དེ་ལས་ནི་ཐོས་པ་དང་བསམས་པ་དང་བསྒོམས་པ་ལ་སོགས་པས་སོ། །འདི་གཉིས་ལས་ཀུན་དུ་འབྱུང་བ་འདི་ཡིན་པས་ན་དེ་སྐད་ཅེས་བྱའོ། །དེ་བཞིན་ཉིད་དང་དེ་ཁོ་ན་ཉིད་ཅེས་བྱ་བ་ནི་ཡང་དག་པའི་ཡེ་ཤེས་ཏེ། དེ་གཉི་གའི་སྒྲིབ་པ་ཐམས་ཅད་རྣམ་པར་དག་པ་ནི་དེ་བཞིན་ཉིད་དང་དེ་ཁོ་ན་ཉིད་ཅེས་བྱ་བ་སྟེ། དེ་ནི་དེ་བཞིན་གཤེགས་པ་ཐམས་ཅད་ཀྱི་དབྱེར་མི་ཕྱེད་པའི་ཆོས་ཀྱི་སྐུ་ཡིན་ནོ། །དེ་ཡང་བཅོམ་ལྡན་འདས་རྡོ་རྗེ་འཆང་བ་ཡིན་ལ་དེ་ཉིད་ནི་དཀྱིལ་འཁོར་གྱི་བདག་པོ་ཐམས་ཅད་ཡིན་པས་ན་དེ་ལས་ངེས་པར་སྐྱེས་པ་སྟེ། དེའི་རྒྱུ་མཐུན་པ་ཞེས་བྱ་བའི་ཐ་ཚིག་གོ །དེ་བས་ན་རྣམ་པར་སྣང་མཛད་ལ་སོགས་པ་འདི་དག་ནི་དེ་བཞིན་གཤེགས་པ་ཐམས་ཅད་དང་འབྲེལ་བ་མེ་ལོང་ལྟ་བུའི་ཡེ་ཤེས་
ལ་སོགས་པ་བསྡུས་པར་གྱུར་པ་ཡིན་ནོ། །མེ་ལོང་ལྟ་བུའི་ཡེ་ཤེས་ལ་སོགས་པ་མཉམ་པ་ཉིད་ཀྱི་རྒྱས་བཏབ་པ་ལ་ཡང་དག་པར་བརྟེན་ནས་དེ་ལས་གཞན་པ་ཟག་པ་དང་བཅས་པ་དང༌། ཟག་པ་མེད་པའི་ཆོས་རྣམས་ཀྱང་ཕུང་པོ་དང་སྐྱེ་མཆེད་དང་ཁམས་འདི་དག་ཉིད་ཀྱིས་རྒྱས་བཏབ་པ་ཡིན་ནོ། །དེ་བས་ན་འདི་རྣམས་ལས་དེ་དག་ཀྱང་ཐ་མི་དད་པར་བསྒོམ་པར་བྱ་སྟེ། རང་བཞིན་གྱིས་རྣམ་པར་དག་པའི་ཆོས་ཉིད་དང་རྒྱས་བཏབ་པ་ཚད་མར་བྱས་པ་ཡིན་པའི་ཕྱིར་རོ། །གཟུགས་བརྙན་ཞེས་བྱ་བ་ནི་ཇི་ལྟར་བྲིས་པའོ། །གསལ་བར་ཞེས་བྱ་བ་ནི་གང་གི་གཟུགས་བརྙན་གང་ཡིན་བ་དེའི་གཟུགས་སུ་ལྟོས་ཤིག་པའོ། །དྲི་མ་མེད་ཅེས་བྱ་བ་ནི་བདེན་པའི་བྱིན་གྱི་རླབས་དང༌། བཅོམ་ལྡན་འདས་ཀྱི་བྱིན་གྱི་རླབས་ཀྱིས་སྡིག་པ་ངེས་པར་བསལ་བས་སོ། །དེ་ལྟར་བཅོམ་ལྡན་འདས་ལ་གསོལ་བ་བཏབ་ནས་གཞུག་པར་འོས་པའི་སློབ་མ་གཞུག་པར་བྱའོ། །དེ་ཡང་རེ་ཞིག་རྣམ་པ་གཉིས་ཏེ། ལ་ལ་ནི་སྤྱིའི་སྡོམ་པའོ། །ལ་ལ་ནི་སློབ་དཔོན་གྱི་སྡོམ་པའོ། །དེ་ལ་སྡོམ་པ་གང་སློབ་དཔོན་མི་བྱེད་ཀྱང་སྦྱིན་པ་དེ་ནི་སྤྱིའི་ཡིན་ཏེ། སྐྱབས་སུ་འགྲོ་བ་དང༌། བྱང་ཆུབ་ཏུ་སེམས་བསྐྱེད་པ་ཙམ་གྱི་མཚན་ཉིད་ཅན་སྔར་བཤད་པ་ཡིན་ནོ། །དེ་ལ་སློབ་དཔོན་ཉིད་དུ་བྱེད་པར་སྦྱིན་པ་གང་ཡིན་པ་དེ་ནི་སློབ་དཔོན་གྱི་སྡོམ་པ་སྟེ། རིགས་ལྔས་ཡང་དག་པར་བསྡུས་པའོ། །དེ་ཡང་སློབ་དཔོན་དོན་དུ་གཉེར་བ་ལ་འཛིན་དུ་གཞུག་སྟེ། དེ་ནི་སྡོམ་པ་ཞེས་བྱ་བ་འདིས་སྔ་མ་སྟོན་པ་ཡིན་ཏེ། རང་གི་ངོ་བོ་ཡང་ཁོ་བོས་བཤད་ཟིན་ཏོ། །དེ་ལ་སྤྱིའི་སྡོམ་པས་ཇི་ལྟར་འཇུག་པ་དེ་ནི་སློབ་མ་སྤྱིའི་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ཡང་སློབ་མ་ཁྲུས་བྱས་ལ་དྲི་ལ་སོགས་པས་བརྒྱན་ཅིང་མེ་ཏོག་གི་ཕྲེང་བ་བཏགས་ལ་ཁ་དྲི་ཞིམ་པར་བྱས་ཏེ་སྟོད་གཡོགས་དང་སྨད་གཡོགས་དམར་པོ་དང་གཙུག་ཏོར་དང་གདོང་གཡོགས་དམར་པོ་བཅིངས་ལ་སྔོན་བཞིན་ཞེས་བྱ་བ་འཇམ་པའི་རྡོ་རྗེ་ལ་སོགས་པ་རང་གི་འདོད་པའི་ལྷའི་སྐུར་བསམས་ལ། སྐུ་སོགས་འོད་གསལ་བྱ་ཞེས་བྱ་བ་མིག་དང་སྐུ་ལ་སོགས་པ་བྱིན་གྱིས་བརླབས་པར་བསམས་ལ་ཡོལ་བས་བར་དུ་བཅད་དེ་བསང་གཏོར་བྱས་པ་ལ་སྡུག་པ་ཁྱོད་སུ་ཡིན་ཞེས་དྲི་བར་བྱའོ། །སློབ་མས་ཀྱང་སྡུག་པ་
བདག་ནི་སྐལ་བ་བཟང་པོའོ་ཞེས་བརྗོད་པར་བྱའོ། །དེ་ནས་ཡང་སློབ་མས་ཀྱང་བླ་མ་ལ་ཡོན་ཕུལ་བ་དང༌། སྤོས་ལ་སོགས་པས་ཡང་དག་པས་མཆོད་ལ་ལག་པ་གཉིས་ཀྱིས་མེ་ཏོག་གི་ཕྲེང་བ་འཛིན་དུ་བཅུ་གནས་དེ་བཞིན་དུ་ཤར་སྒོར་ཡི་གེ་ཧཱུཾ་གིས་གཞག་པར་བྱའོ། །དེ་ནས་འདི་ཨོཾ་སརྦ་ཡོ་ག་ཙིཏྟོ་དབཱ་ད་ཡཱ་མི་ཞེས་བྱ་བའི་སྔགས་འདིས་རྣལ་འབྱོར་གྱི་སེམས་བསྐྱེད་ལ། སུ་ར་ཏེ་ས་མ་ཡ་སྟྭཾ་ཧོ་སིདྡྷི་བཛྲ་ཡ་ཐཱ་སུ་ཁཾ་ཞེས་བྱ་བའི་སྙིང་པོ་འདིས་སྙིང་གར་རྡོ་རྗེ་གཞག་པར་བྱའོ། །དེ་ནས་དེ་ལ་དེང་ཁྱོད་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཀྱི་ཞེས་བྱ་བ་ལ་སོགས་པ་ནས་དད་པ་དང་མི་ལྡན་པ་རྣམས་ལ་ཡང་མ་ཡིན་ནོ་ཞེས་བྱ་བའི་བར་དུ་བརྗོད་པར་བྱའོ། །དེ་ནས་ཨོཾ་ཨཱཿ་ཡ་མཱནྟ་ཀྲྀཏ་ཧཱུཾ་ཞེས་བྱ་བའི་གཤིན་རྗེ་གཤེད་ཀྱི་སྔགས་འདི་དང་སོགས་པའི་སྒྲས་འདོད་པའི་རྒྱལ་པོའི་སྔགས་སམ། ཧཱུཾ་མཛད་ཀྱི་སྔགས་ཀྱིས་སློབ་མ་བཀུག་ལ་ཨ་ཁཾ་བཱི་ར་ཧཱུཾ་ཞེས་བྱ་བའི་ཡི་གེ་ལྔས་བཅུག་ལ་འོག་ནས་འབྱུང་བའི་ཆོ་ག་རྣམས་བྱའོ། །སློབ་དཔོན་གྱི་སྡོམ་པ་ལ་ནི་སློབ་མ་གཞུག་པའི་ཆོ་ག་ཁྱད་པར་ཡོད་ལ་དེ་ལས་ཅུང་ཟད་ནི་ཕྱིར་མི་ལྡོག་པའི་དབང་བསྐུར་བ་ལས་འཆད་དོ། །ཅུང་ཟད་ནི་འདི་ཉིད་དུ་དེ་ནས་ཡང་ཞེས་བྱ་བས་སྟོན་ཏེ། དེ་ནས་ཞེས་བྱ་བ་ནི་འཇུག་པའི་རྗེས་ཐོགས་ལའོ། །ཡང་ཞེས་བྱ་བ་ནི་སྡུད་པའི་དོན་ཏོ། །འདི་སྐད་བརྗོད་ཅེས་བྱ་བ་ནི་དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ཞེས་བྱ་བ་ནས་དམ་ཚིག་ཉམས་པར་གྱུར་ཏ་རེ་ཞེས་བྱ་བའི་བར་དུའོ། །ཡང་ཞེས་བྱ་བའི་སྒྲ་ནི་དེ་རྣམས་ལ་བརྗོད་པར་བྱ་ཞིང་ཇི་སྐད་བཤད་པའི་ཆོ་ག་རྣམས་བྱའོ། །དེའི་སྙིང་གར་ཞེས་བྱ་བ་ལ་སོགས་པས་སྤྱི་དང་སློབ་དཔོན་གྱི་སྡོམ་པ་དང་ལྡན་པའི་ཐུན་མོང་གི་ཆོ་ག་བཤད་པ་ཡིན་ནོ། །གལ་ཏེ་ཚུལ་འདི་སྨྲས་ན་ནི། །ཞེས་བྱ་བ་ནི་ཅི་སྟེ་སྨྲས་པར་གྱུར་ནའོ། །དམྱལ་བ་ཞེས་བྱ་བ་ནི་ཆུ་བོ་རབ་མེད་དུ་གྱུར་པའོ། །དངོས་གྲུབ་ཅེས་བྱ་བ་ནི་ཁྱེད་ཉིད་ཀྱིས་ཞེས་བྱ་བ་དང་སྦྱར་རོ། །རྡོ་རྗེ་བདུད་རྩིའི་ཆུ་ཞེས་བྱ་བ་ནི་ཚེར་གཅོད་པ་ན་རྡོ་རྗེའོ། །ཕན་འདོགས་པས་ན་བདུད་རྩིའོ། །དབབ་པའི་ཆོ་ག་བཤད་པ་ནི། དེ་ནས་སློབ་མ་ཞེས་བྱ་བ་ལ་སོགས་པ་ཡིན་ཏེ། དེ་ནས་སློབ་
མ་བརྗོད་དུ་གཞུག་པ་ནི་འདི་ཡིན་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་བྱ་བའོ། །དེ་སྐད་སྨྲར་བཅུག་ནས་དེའི་སྙིང་གར་ཡི་གེ་ལཾ་ལས་བྱུང་བའི་དབང་ཆེན་གྱི་དཀྱིལ་འཁོར་ལ་མཚམས་བཞིར་རྡོ་རྗེ་སེར་པོས་མཚན་པར་ཧཱུཾ་བསྒོམ་པར་བྱའོ། །ལྐོག་མར་ནི་བཾ་ལས་བྱུང་བའི་ཆུའི་དཀྱིལ་འཁོར་དཀར་པོ་ཟླུམ་པོ་བུམ་པས་མཚན་པ་བསམ་པར་བྱའོ། །སྤྱི་བོར་ཡཾ་ལས་བྱུང་བའི་རླུང་གི་དཀྱིལ་འཁོར་སྔོན་པོ་གཞུའི་དབྱིབས་ཅན་བ་དན་གྱིས་མཚན་པ་བསྒོམ་པར་བྱའོ། །ཆུ་དང་རླུང་གི་དཀྱིལ་འཁོར་དེ་གཉིས་ལ་ཡི་གེ་ཧཱ་དང་ཨཱཿ་རིམ་བཞིན་བསྒོམ་པར་བྱའོ། །རྐང་པ་གཉིས་ཀྱི་འོག་ཏུ་ནི་ཡི་གེ་ཛྷཻཾ་རབ་འབར་བ་ཞེས་བྱ་བ་ཀུན་ནས་འོད་འབར་བ་བསྒོམ་པར་བྱའོ། །ཛྷཻཾ་དེ་ཡང་རླུང་གི་དཀྱིལ་འཁོར་ལ་གནས་པའི་རཾ་ལས་འབྱུང་བའི་མེའི་དཀྱིལ་འཁོར་འོག་གཞིར་གྱུར་པས་སྦར་ལ། དེ་ནས་སློབ་མ་ལ་དབབ་པར་བྱའོ། །ཨཱ་བེ་ཤ་ཡ་ཞེས་བྱ་བ་ལ་སོགས་པའི་སྔགས་ཇི་སྲིད་དུ་བབས་པར་མ་གྱུར་པ་དེ་སྲིད་དུ་བསྒྱིངས་པ་དང་བཅས་པས་བརྗོད་པར་བྱའོ། །སློབ་མ་ལ་བབས་པར་གྱུར་པར་ཤེས་པ་དང་དེ་འདོད་ཆགས་རྡོ་རྗེའི་སྐུར་བསམས་ལ། དེའི་ལྕེ་ལ་ཡི་གེ་ཨ་དམར་པོ་བསམས་ཏེ་བྷྲཱུཾ་ཧི་བཛྲ་ཞེས་བརྗོད་ན་དགེ་བའམ་མི་དགེ་བ་སྟོན་ཏོ། །དེ་ནས་ཁྱོད་ཀྱི་མིག་ལམ་ན་ཇི་ལྟ་བུ་སྣང་ཞེས་དྲིས་ལ། དཀར་པོ་དང་སེར་པོ་དང་དམར་པོ་དང་ནག་པོའི་འོད་ཀྱི་དཀྱིལ་འཁོར་སྣང་བ་ལས་དེ་བཞིན་ཞི་བ་ལ་སོགས་པའི་དངོས་གྲུབ་ཀྱི་སྐལ་བ་དང་ལྡན་པར་ཤེས་པར་བྱའོ། །དེ་ནས་བབས་པ་དེ་བརྟན་པར་བྱ་བའི་ཕྱིར་ཏེ་ཏི་ཥྛ་བཛྲ་ཞེས་བརྗོད་དོ། །དེ་ནས་ཧཱུཾ་གིས་མེ་ཏོག་གི་ཕྲེང་བ་དོར་ཞིང་པྲ་ཏཱིཙྪ་བཛྲ་ཧོ་ཞེས་བརྗོད་དོ། །དེ་ནས་དེ་མགོ་ལ་བཅིང་ཞིང་པྲ་ཏི་གྲྀཧྞ་ཞེས་བྱ་བ་ལ་སོགས་པ་བརྗོད་པར་བྱའོ། །སློབ་མ་གང་དག་གིས་ལྷ་དེ་སྔར་བླངས་པའམ་མ་བླངས་པ་སྟེ་བསྟེན་པའམ་མ་བསྟེན་པ་དེ་མེ་ཏོག་གི་ཕྲེང་བ་དོར་བ་ལས་ལྷ་གང་གི་མཚན་མ་གང་ཡིན་པའམ་མཚན་མ་དང་ཉེ་བ་གང་ཡིན་བར་བབས་པའི་ལྷ་དེའི་སྦྱོར་བ་དག་དེ་གཉིས་ལ་སྦྱིན་པར་བྱ་སྟེ། དེ་ནི་འདི་གཉིས་ལ་འགྲུབ་པར་འགྱུར་རོ། །དད་ཀྱང་ཞེས་བྱ་བ་
ནི་ཡང་ན་འདི་གཉིས་ལྷ་གང་ལ་ལྷག་པར་དད་ཅིང་མོས་པའོ། །ཡང་ན་སྐལ་བ་ཅན་ཉིད་ཅེས་བྱ་བས་ནི་གང་གི་ལྷའི་རིགས་གང་ཡིན་པ་འདི་གཉིས་ཀྱི་ཉེ་བར་སྤྱོད་པ་ལས་ཤེས་པར་བྱའོ། །དེ་བཞིན་དུ་བབས་པར་གྱུར་པའི་སློབ་མའི་མིག་གཉིས་ལ་འབར་བ་དང་བཅས་པའི་ཨོཾ་བསམས་ལ། རྡོ་རྗེ་སེམས་དཔའ་དེང་ཁྱོད་ཀྱི། །ཞེས་བྱ་བའི་ཚིགས་སུ་བཅད་པས་གདོང་གཡོགས་བཀྲོལ་ཏེ། ཧེ་བཛྲ་པཱ་ཤྱ་ཞེས་བརྗོད་ལ། དཀྱིལ་འཁོར་གྱི་བདག་པོ་ནས་བརྩམས་ཏེ་བདུད་རྩི་ཐབ་སྦྱོར་གྱི་དཀྱིལ་འཁོར་བསྟན་པར་བྱའོ། །མིག་ནི་ཐམས་ཅད་ཀྱི་ཞེས་བྱ་བ་ནི་ཐམས་ཅད་མཐོང་བའི་ཕྱིར་རོ། །རྡོ་རྗེའི་མིག་ཅེས་བྱ་བ་ནི་གཟུགས་ཅན་ཐམས་ཅད་ལ་ཐོགས་པ་མེད་པའི་མིག་གོ །བླ་ན་མེད་ཅེས་བྱ་བ་ནི་སངས་རྒྱས་རྣམས་ཀྱི་ཅི་འདྲ་བའོ། །འབྱེད་མཛད་དེ་ཞེས་བྱ་བ་ནི་སྒྲིབ་བ་རྣམས་བསལ་བས་སོ། །ཆུ་ལ་སོགས་པ་ལྔས་དབང་བསྐུར་བ་ནི་རིག་བའི་དབང་བསྐུར་བ་ཡིན་ལ། དེ་ནི་བཛྲ་ཞེས་བྱ་བ་ལ་སོགས་པ་སྨོས་པ་ཡིན་ཏེ། བརྗོད་དེ་ཞེས་བྱ་བ་ནི་ཚིག་ཏུ་བརྗོད་པའོ། །ཆུས་ཞེས་བྱ་བ་ནི་དང་པོར་རྣམ་པར་རྒྱལ་བའི་བུམ་པའི་ཆུས་སོ། །དེ་ནས་ལྷ་མོ་བཞིའི་བུམ་པས་སོ། །དེ་ནས་དཀྱིལ་འཁོར་བའི་བུམ་པ་རྣམས་ཀྱིས་ཏེ། དེ་རྣམས་ཉིད་ཀྱི་རང་རང་གི་སྔགས་བརྗོད་ཅིང་མངོན་བར་དབང་བསྐུར་བར་བྱའོ། །སྔོན་བཞིན་ཞེས་བྱ་བ་ནི་དང་པོའི་སྦྱོར་བ་དང་འདྲ་བར་རིག་པའི་ཚོགས་ཕྱག་ན་བུམ་པ་རྣམས་ཀྱིས་སོ། །ཅོད་པན་ཞེས་བྱ་བ་ནི་དར་དབྱངས་དང་བཅས་པའི་ཅོད་པན་གྱིས་སོ། །རང་གི་བདག་པོ་ནི་མི་བསྐྱོད་པ་ལ་སོགས་པའོ། །རྡོ་རྗེ་དེ་ཞེས་བྱ་བ་ནི་རང་གི་ལྷའི་མཚན་མའོ། །ཡང་ན་རྡོ་རྗེ་དེ་ཞེས་བྱ་བ་ནི་དཔལ་མཆོག་དང་པོའི་རྡོ་རྗེ་སྟེ། བཅོམ་ལྡན་འདས་དེ་ནི་སངས་རྒྱས་ཐམས་ཅད་གཅིག་ཏུ་བསྡུས་པ་ཡིན་པའི་ཕྱིར་རོ། །དེ་ཉིད་ཀྱི་ཕྱིར། འདི་ནི་སངས་རྒྱས་ཐམས་ཅད་དེ། །ཞེས་གསུངས་པའི་ཕྱིར་རོ། །རབ་གྲུབ་ཕྱིར་ཞེས་བྱ་བ་ནི་སངས་རྒྱས་ཉིད་ལ་སོགས་པའོ། །རྡོ་རྗེ་དྲིལ་བུས་ཞེས་བྱ་བ་ནི་ལག་པ་གཉིས་ཀྱིས་བཟུང་བས་སོ། །རང་གི་བདག་པོས་ཞེས་བྱ་བ་ནི་བདག་པོས་དབང་བསྐུར་བར་བྱ་བའོ། །སྤྱི་བོར་མིང་གི་ཞེས་བྱ་བ་ནི་མགོ་བོར་རྡོ་རྗེ་དང་དྲིལ་བུ་བཞག་པས་སོ། །དེ་བཞིན་
དུ་གཞན་ཡང་མིང་གེ་དབང་བསྐུར་བ་ནི། ཀྱེ་ཆེ་གེ་མོ་རྡོ་རྗེ་ཞེས་བྱ་བས་མིང་གི་དབང་བསྐུར་བ་སྟེ། ཀྱེ་དཔལ་འཇམ་པའི་རྡོ་རྗེ་ཞེས་བྱ་བའི་རྣམ་པས་སོ། །འདིར་མིང་གི་དབང་བསྐུར་བ་འདི་ནི་འཁོར་ལོས་སྒྱུར་བའི་མཚན་ལས་དྲངས་ནས་སྦྱིན་ནོ། །འཁོར་ལོས་སྒྱུར་བ་ཡང་གང་ཡིན་ཞེ་ན། སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་འཁོར་ལོའི་བདག་པོར་གྱུར་པས་དབང་བསྐུར་བ་ཉིད་དེ། དེའི་མཚན་གྱིས་དབང་བསྐུར་བར་འདོད་དོ། །འདི་ནི་བྱང་ཆུབ་སེམས་དཔའ་ཉིད་ཡིན་བས་དེ་གཉི་ག་ཡང་མི་རིགས་སོ་ཞེས་འགའ་ཞིག་སོམ་ཉི་སྐྱེ་བར་འགྱུར་བས་དེ་བསལ་བའི་ཕྱིར་བདག་པོ་ཞེས་བྱ་བ་སྨོས་ཏེ། སོ་སོར་སྣང་བ་གང་ཅི་ཡང་རུང་དེ་ནི་རང་ཉིད་ཀྱི་དངོས་པོ་ཐམས་ཅད་ཡིན་ཏེ། ཐམས་ཅད་ཀྱང་སེམས་ཀྱི་འབྱོར་པ་ཡིན་ནོ་ཞེས་བྱ་བའི་ཐ་ཚིག་གོ །གཙོ་ཆེར་ཞེས་བྱ་བ་ནི་སྒྲོ་བཏགས་པ་མ་ཡིན་པ་སྟེ། དོན་དམ་པ་ཉིད་དུ་ན་རང་ཉིད་ནི་དངོས་པོ་ཐམས་ཅད་ཡིན་ནོ་ཞེས་བྱ་བའི་དོན་ཏོ། །དེ་ཅིའི་ཕྱིར་ཞེ་ན། སེམས་གང་ཡིན་པ་དེ་ཉིད་ནི་བདག་ཡིན་ལ། ཤེས་པ་དེ་ཉིད་ནི་སེམས་ཡིན་ལ། ཤེས་པ་ལས་ལོགས་ཤིག་ན་སྣང་བ་ཅི་ཡང་མེད་དོ་ཞེས་བྱ་བའི་ཚུལ་གྱིས་སོ། །དེ་བས་ན་དེ་ཉིད་ནི་འཇམ་པའི་རྡོ་རྗེའོ། །རང་ཞེས་བྱ་བ་ནི་མངོན་སུམ་གྱིས་ཡིན་གྱི་ཉེ་བར་གདགས་པས་ནི་མ་ཡིན་ནོ། །དེ་ཅིའི་ཕྱིར་ཞེ་ན། འཕགས་པ་འཇམ་དཔལ་ནི་ཡེ་ཤེས་ཀྱི་སྐུ་ཡིན་པའི་ཕྱིར་རོ། །དེ་བས་ན་སེམས་ཀྱི་འབྱོར་པ་འདི་ཐམས་ཅད་ནི་འཁོར་ལོ་ཡིན་ལ། སེམས་ནི་འཁོར་ལོས་སྒྱུར་བ་ཡིན་ཏེ། དེ་ཡང་བཅོམ་ལྡན་འདས་འཇམ་དཔལ་ཉིད་ཡིན་ནོ་ཞེས་བྱ་བ་ནི་རིགས་པ་ཡིན་ནོ། །མགོན་པོ་འཇམ་དཔལ་ནི་སངས་རྒྱས་རྣམས་ཀྱི་ཡེ་ཤེས་ཀྱི་ཚོགས་ཀྱང་མ་ཡིན་ལ། སེམས་ཅན་ཐམས་ཅད་ཀྱི་ཡང་མ་ཡིན་ནོ། །དེ་བས་འཇམ་པའི་རྡོ་རྗེའི་མཚན་གྱིས་སེམས་ཅན་རྣམས་ལ་དབང་བསྐུར་བ་ནི་དེ་ཁོ་ན་ཉིད་མ་ཡིན་ནོ་ཞེ་ན། དེའི་ཕྱིར་ཆོས་རྣམས་ཞེས་བྱ་བ་ལ་སོགས་པ་སྨོས་ཏེ། སངས་རྒྱས་རྣམས་ཀྱི་ཆོས་གང་ཡིན་པ་དང༌། དེ་ལས་གཞན་པ་གང་ཡིན་པ་དེ་ཐམས་ཅད་ནི་དེ་བཞིན་ཉིད་ཀྱི་ཚུལ་རང་བཞིན་གྱིས་རྣམ་པར་དག་པ་ཡིན་ནོ། །རྣམ་པར་དག་པའི་ཆོས་གང་ཡིན་པ་དེ་ཉིད་ནི། སངས་རྒྱས་
རྣམས་ཀྱི་ཡེ་ཤེས་ཀྱི་སྐུ་ཡིན་ནོ། །དེ་བས་ན་སློབ་མ་ཡང་སེམས་ཀྱི་འབྱོར་པ་ནི་སངས་རྒྱས་དང་བྱང་ཆུབ་སེམས་དཔའི་འཁོར་ལོ་ཡིན་ལ། དེའི་སེམས་ནི་འཇམ་པའི་རྡོ་རྗེའི་ཞེས་བྱ་བའི་འཁོར་ལོས་སྒྱུར་བ་ཡིན་པས་མཚན་དང་དབང་བསྐུར་བ་གཉིས་ཀ་ཡང་མི་རིགས་པ་མ་ཡིན་ནོ། །རང་ཉིད་ཅེས་བྱ་བ་ལ་སོགས་པ་ལ་དཀྱིལ་འཁོར་གྱི་བདག་པོ་ཉིད་དུ་གྱུར་པ་ཡིན་པས་རང་ཉིད་ཀྱི་མཚན་གྱི་དང་པོར་དཔལ་གྱི་སྒྲ་དང་སྦྱར་བར་བྱ་སྟེ། དཔེར་ན་དཔལ་འཇམ་དཔལ་འབྱུང་བའི་དཀྱིལ་འཁོར་ཞེས་བྱ་བ་དང༌། དཔལ་རྡོ་རྗེ་སེམས་དཔའ་འབྱུང་བའི་དཀྱིལ་འཁོར་ཞེས་བྱ་བ་ལྟ་བུའོ། །མིང་གི་དབང་བསྐུར་བ་ལ་ནི་ཁྱད་པར་ཡོད་པས་དེ་བཤད་པ་ནི་ཀུན་ལ་ཞེས་བྱ་བ་ལ་སོགས་པ་ཡིན་ཏེ། འང་ཞེས་བྱ་བའི་སྒྲས་ནི་དེ་ཁོ་ན་ཉིད་ཀྱི་ཁྱད་པར་སྟོན་ཏེ། མིང་གི་དབང་བསྐུར་བ་ལ་ལྷ་ཐམས་ཅད་ཀྱི་ཁྱད་པར་ཉིད་ལ། དཔལ་གྱི་སྒྲ་དང་སྦྱར་ནས། དེའི་གོང་དུ་ཡང་ཀྱེའི་སྒྲ་དང་སྦྱར་ནས་རྡོ་རྗེའི་སྒྲ་དང་མཐའ་མར་སྦྱར་ཏེ་བརྗོད་པར་བྱའོ། །འདི་ག་ལས་ཤེས་ཤེ་ན། བདག་པོ་ཐམས་ཅད་ལས་ཞེས་བྱ་བ་སྟེ། འཁོར་ལོའི་བདག་པོ་ཉིད་ལས་ཞེས་བྱ་བའི་ཐ་ཚིག་གོ །གནས་སྐབས་འདི་ལ་ཐམས་ཅད་བདག་པོར་གྱུར་པ་ཡོད་པ་མ་ཡིན་མདོ་ཀྱི། རང་རང་གི་དཀྱིལ་འཁོར་ལ་ནི་ཡོད་པ་ཉིད་ཡིན་ནོ། །དེ་བས་ན་ཐམས་ཅད་ཀྱང་དཀྱིལ་འཁོར་འདིར་རང་གི་མིང་དང་དཔལ་རྡོ་རྗེ་དང་ཀྱེ་ཞེས་བྱ་བའི་སྒྲ་དང་སྦྱར་ནས་དབང་བསྐུར་བ་སྦྱིན་པར་བྱ་སྟེ། ཀྱེ་དཔལ་འཇམ་པའི་རྡོ་རྗེ། ཀྱེ་དཔལ་སེམས་དཔའི་རྡོ་རྗེ། ཀྱེ་དཔལ་རབ་ཏུ་དགའ་བའི་མྱུ་གུའི་རྡོ་རྗེ་ཞེས་བྱ་བ་ལ་སོགས་པས་ཅི་རིགས་པར་བྱའོ་ཞེས་བྱ་བའི་ཐ་ཚིག་གོ །དེ་ལྟར་བཤད་པའི་དབང་བསྐུར་བ་རྣམས་ཀྱི་དེ་ཁོ་ན་ཉིད་བཤད་པ་ནི། ཆུའི་ཁམས་ཞེས་བྱ་བ་ལ་སོགས་པ་ཡིན་ཏེ། ཆུའི་ཁམས་དག་པའི་དེ་ཁོ་ན་ཉིད་ནི་མི་བསྐྱོད་པ་ཞེས་བྱ་བ་ཆོས་ཀྱི་དབྱིངས་ཤིན་ཏུ་རྣམ་པར་དག་པའི་ཡེ་ཤེས་སམ། ཟད་པ་ཤེས་པའོ། །བདག་པོ་བྱ་བ་སྒྲུབ་ཅེས་བྱ་བ་ནི་སྒྲུབ་པའི་ཡེ་ཤེས་ཡིན་ནོ་ཞེས་བྱ་བའི་ཐ་ཚིག་གོ །དོན་སྩོལ་བ་ཞེས་བྱ་བ་ནི་དོན་སྩོལ་ཞིང་ཉེ་བར་སྟོན་པས་ན་དོན་སྩོལ་བ་སྟེ། དོན་སྩོལ་བ་ནི་དོན་སྟེར་བ་ཉིད་ཡིན་བར་སྤྲེལ་ཏེ་བསྟན་པས་མིང་གི་དབང་བསྐུར་
བ་ནི་མེ་ལོང་ལྟ་བུའི་ཡེ་ཤེས་ཀྱི་བདག་ཉིད་ཅན་ནོ་ཞེས་བྱ་བའི་ཐ་ཚིག་གོ །ཡེ་ཤེས་ཞེས་བྱ་བ་ལ་སོགས་པ་ལ་དེ་ལྟར་ཡེ་ཤེས་ལྔ་པོ་གང་ཡིན་པ་དེ་ནི་རིག་པ་ཡིན་ལ། དེ་བས་ན་ཆུ་ལ་སོགས་པའི་དབང་བསྐུར་བ་ལྔ་ལ་ནི་རིག་པའི་དབང་བསྐུར་བ་ཞེས་བཤད་དོ། །འདིར་ཞེས་བྱ་བ་ནི་རིག་པའི་དབང་བསྐུར་བ་བྱིན་པ་ལའོ། །རྡོ་རྗེ་ཞེས་བྱ་བ་ནི་རྡོ་རྗེ་བརྟུལ་ཞུགས་སྦྱིན་པར་བྱ་བ་ཡིན་ཏེ། རིག་པའི་དབང་བསྐུར་བ་ལས་ནི་ཐུན་མོང་གི་བྱང་ཆུབ་ཀྱི་ངེས་པ་འཐོབ་ཀྱི། ཁྱད་པར་གྱི་ཡང་དག་པར་རྫོགས་པའི་བྱང་ཆུབ་ནི་མ་ཡིན་ནོ། །དེ་བས་ན་རིང་ཞིག་ན་ཡང་དག་པར་རྫོགས་པའི་བྱང་ཆུབ་ངེས་པར་ཐོབ་པར་བྱ་བའི་ཕྱིར་བརྟུལ་ཞུགས་སྦྱིན་པ་འབའ་ཞིག་ཙམ་རིག་པའི་དབང་བསྐུར་བ་ལ་བྱ་བར་རིགས་ཀྱི། ལུང་བསྟན་པ་དང་དབུགས་དབྱུང་བ་གཉིས་ནི་མ་ཡིན་ཏེ། དེ་གཉིས་ནི་ཕྱིར་མི་ལྡོག་པའི་ས་དང་འབྲེལ་བའི་ཕྱིར་རོ། །ཡང་གང་ཞིག་ལ་རིག་པའི་དབང་བསྐུར་བ་འབའ་ཞིག་ཙམ་སྦྱིན་ཞེ་ན། སློབ་དཔོན་དུ་དབང་བསྐུར་བ་དོན་དུ་མི་གཉེར་བའམ། དེ་དོན་དུ་གཉེར་བ་སྤྱིའི་སྡོམ་པ་ཉི་ཚེ་ཙམ་ལེན་པར་བྱེད་ཀྱི། སློབ་དཔོན་གྱི་སྡོམ་པ་ནི་མ་ཡིན་པ་དག་ལའོ། །ཁམས་ཞེས་བྱ་བ་ནི་རྡོ་རྗེ་འཆང་བའིའོ། །རིགས་ཞེས་བྱ་བ་ནི་རང་བཞིན་ནོ། །དེ་ཡང་གང་ཡིན་ཞེ་ན། རྡོ་རྗེ་ཆེན་པོའི་དབང་བསྐུར་བའོ། །དེ་ནི་དབང་བ་སྟེ་དེ་ལ་དབང་བ་ཉིད་ནི་དེ་མི་ལྡོག་པ་ཉིད་ཅེས་བྱ་བའི་དོན་ཏོ། །དེ་ཉིད་ཀྱིས་ན་རྡོ་རྗེ་ཆེན་པོར་དབང་བསྐུར་བ་ནི་མི་ལྡོག་པར་དབང་བསྐུར་བ་ཞེས་བྱ་བ་དང༌། སློབ་དཔོན་གྱི་དབང་བསྐུར་བ་ཞེས་བཤད་དོ། །དེའི་ཕྱིར་འདིར་ཕྱིར་མི་ལྡོག་པའི་དབང་བསྐུར་བར་གྱུར་ན་བརྟུལ་ཞུགས་དང་ལུང་བསྟན་པ་དང༌། དབུགས་དབྱུང་བ་གསུམ་ཆར་བྱ་བ་ཡིན་ཏེ། ལུང་བསྟན་པ་དང་དབུགས་དབྱུང་བ་གཉིས་ཀྱང་ཐོབ་པའི་ཕྱིར་རོ། །རིག་པའི་དབང་བསྐུར་བ་ལ་ཡང་མིང་འདི་ཡིན་ཞེས་བྱ་བ་ནི་ལན་འགའ་ནི་རིག་པའི་དབང་བསྐུར་བ་འབའ་ཞིག་ཙམ་ལའང་བརྟུལ་ཞུགས་དང་ལུང་བསྟན་པ་དང༌། དབུགས་དབྱུང་བ་འདི་སྣོད་ཀྱི་ཁྱད་པར་བལྟས་ནས་སྦྱིན་པར་བྱ་བ་ཉིད་ཡིན་ནོ། །མིང་ཞེས་བྱ་བ་ནི་མིང་གི་དོན་དུ་ཐ་སྙད་བཏགས་
པ་ཞེས་བྱ་བའི་ཐ་ཚིག་གོ །ཐ་སྙད་དུ་བཏགས་པ་ཡང་ང་ནི་ལུང་བསྟན་ཏོ། །ངས་ནི་དབུགས་དབྱུང་བ་ཐོབ་པོ་ཞེས་ལྷག་པར་མོས་པའི་སྟོབས་ཀྱིས་རིང་ཞིག་ན་བྱང་ཆུབ་ཆེན་པོར་ངེས་པར་འཐོབ་པར་བྱ་བའི་དོན་དུ་བརྟུལ་ཞུགས་བྱིན་པ་དང་འདྲ་བ་ཡིན་ནོ། །རིག་པའི་དབང་བསྐུར་བའི་རྗེས་ཐོགས་ལ་རྡོ་རྗེ་བརྟུལ་ཞུགས་སྦྱིན་བར་བྱའོ་ཞེས་གསུངས་པ་དེ་ནི་འདི་དེ་ཞེས་བྱ་བ་ལ་སོགས་པ་སྨོས་པ་ཡིན་ཏེ། རྡོ་རྗེ་བརྟུལ་ཞུགས་སྦྱིན་པའི་ཚིགས་སུ་བཅད་པ་ཉིད་དང༌། ཨོཾ་ཞེས་བྱ་བ་ལ་སོགས་པ་བརྟུལ་ཞུགས་འཛིན་དུ་གཞུག་པའི་སྔགས་དང༌། བརྟུལ་ཞུགས་དང་འབྲེལ་པའི་དམ་ཚིག་གསུམ་སྦྱིན་བར་བྱ་བ་ཡིན་ཏེ། དཔལ་མཆོག་དང་པོ་ལས་ཀྱང༌། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་གསུངས་པ་ཡིན་ནོ། །འདིར་དྲིལ་བུའི་ཚིག་ཀྱང་དེ་ཉིད་གཟུང་ལ་ཞེས་བྱ་བ་དང་སྦྱར་རོ། །འདི་ཉིད་བཤད་པ་ནི། རྡོ་རྗེ་བརྟུལ་ཞུགས་ཞེས་པ་ལ་སོགས་པ་སྨོས་པ་ཡིན་ཏེ། ཀུན་ཞེས་བྱ་བ་ནི་སྤྱིའི་སྡོམ་པ་དང༌། གཉི་གའི་སྡོམ་པའོ། །རྡོ་རྗེ་དེ་ཉིད་ཀྱིས་འཛིན་དུ་གཞུག་གོ་ཞེས་བྱ་བར་སྦྱར་རོ། །རྡོ་རྗེའི་དེ་ཁོ་ན་ཉིད་ནི་ཐོག་མཐའ་མེད་པའི་ཞེས་བྱ་བ་ལ་སོགས་པའི་ཚིགས་སུ་བཅད་པས་སོ། །བདག་པོ་ཞེས་བྱ་བ་ནི་འགྲོ་བ་ཐམས་ཅད་ཀྱི་བདག་པོའོ། །ལྷག་མ་རྣམས་ནི་སྔར་བཤད་ཟིན་ཏོ། །འདི་དེ་ཞེས་བྱ་བ་ལ་སོགས་པ་ནི་དྲིལ་བུའི་དེ་ཁོ་ན་ཉིད་ཀྱི་ཚིགས་སུ་བཅད་པ་ཡིན་ཏེ། ཇི་ལྟར་དེ་བཞིན་གཤེགས་པ་རྣམས་ཀྱི་བྱང་ཆུབ་ཆེན་པོའི་ངོ་བོ་ཉིད་ཀྱི་ཤེས་རབ་ནི་སྟོང་པ་ཉིད་ལ་དམིགས་པ་ཡིན་ལ། དེ་ནི་དེ་སྟོན་པར་བྱེད་པའི་སྒྲ་སྐད་སྣ་ཚོགས་ལྷུན་གྱིས་གྲུབ་པར་འཇུག་པས་རྫོགས་པར་བྱེད་པ་ཡིན་ཏེ། དྲིལ་བུ་དེ་ཡང་དེ་དང་འདྲའོ། །དེ་བས་ན་འདི་ནི་ཕྱག་རྒྱའི་གཟུགས་ཀྱིས་དེ་ཉིད་ཤེས་རབ་ཡིན་པར་རྒྱལ་བ་རྣམས་ཀྱིས་བཤད་པས་དེ་ཉིད་ནི་བྱང་ཆུབ་ཡིན་པར་བཞེད་དོ། །སྲིད་པ་ཞེས་བྱ་བ་ལ་སོགས་པས་ནི་ཆོས་ཀྱི་ཚིགས་སུ་བཅད་པར་གསུངས་པ་ཡིན་ཏེ། སྲིད་པ་ནི་འཁོར་བར་སྐྱེ་བའི་རྒྱུན་ནོ། །དེ་ནི་ངོ་བོ་ཉིད་ཀྱིས་ཡོངས་སུ་དག་པའི་ཚུལ་གྱིས་དེ་ཁོ་ན་ཉིད་ཅེས་བྱ་བས་ཡོངས་སུ་
དག་པ་ཉིད་ཡིན་ནོ། །འོན་ཀྱང་རང་གིས་ཀུན་དུ་བརྟགས་པའི་མཚན་ཉིད་གཟུང་བ་དང་འཛིན་པའི་བདག་ཉིད་ཅན་གྱི་དངོས་པོ་གང་ཡིན་ལ་མངོན་པར་ཞེན་པ་གཞན་གྱི་དབང་གིས་བསྡུས་པ་དེས་འགལ་བའི་སྲིད་པར་བྱས་པ་སྟེ། གནོད་པ་མེད་པ་ལས་གནོད་པ་ཅན་དུ་བྱས་སོ་ཞེས་བྱ་བའི་ཐ་ཚིག་གོ །ཡང་དེ་ཉིད་སེམས་དཔའ་མཆོག་ཅེས་བྱ་བ་ནི་བྱང་ཆུབ་སེམས་དཔའ་རྣམས་ཀྱིས་ནི་སྲིད་པའི་མཆོག་མཛད་པ་ཡིན་ཏེ། མི་གནས་པའི་མྱ་ངན་ལས་འདས་པར་མཛད་དོ། །ཇི་ལྟ་བུས་མཛད་ཅེ་ན། རང་བཞིན་དག་པས་ཞེས་བྱ་བས་ཏེ། རང་བཞིན་དེ་ལ་མི་བདེན་པའི་མངོན་པར་ཞེན་པ་དེ་དག་ཅིང་ཟད་པ་གང་ཡིན་པ་དེ་ལ་དེ་སྐད་ཅེས་བྱའོ། །དམ་ཚིག་སྦྱིན་པ་ཚིགས་སུ་བཅད་པ་གསུམ་གྱིས་བཤད་པ་ནི། བསྙེན་སོགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདི་ནི་འདི་རྣམས་ཀྱི་བསྡུས་པའི་དོན་ཡིན་ཏེ། བསྙེན་པ་དང་ཉེ་བར་སྒྲུབ་པ་ལ་སོགས་པར་བཤད་པའི་སྙིང་པོས་ཕྱག་རྒྱ་ཆེན་པོར་བྱིན་གྱིས་བརླབས་ལ། གཟུགས་ལ་སོགས་པའི་འདོད་པ་དམ་ཚིག་ཏུ་གྱུར་པས་གསང་སྔགས་ཞེས་བྱ་བར་རང་གི་འདོད་པའི་ལྷ་བཟླ་ཞེས་པ་སྐད་ཅིག་མ་རེ་རེར་མཆོད་པར་བྱའོ། །མ་ཚང་བ་མེད་ཅེས་བྱ་བ་ནི་མཆོད་པའི་ཡན་ལག་མ་ཚང་བ་མེད་པར་གྱུར་པས་སོ། །རང་གི་རིག་པ་ཞེས་བྱ་བའི་ཚིགས་སུ་བཅད་པས་ནི་མཆོད་པའི་ཡན་ལག་སྟོན་པ་ཡིན་ཏེ། དམ་ཚིག་དེས་མཆོད་པར་བྱའོ་ཞེས་བྱ་བར་སྦྱར་རོ། །དེ་ཡང་གཟུགས་ལ་སོགས་པ་རང་རིག་པ་ཙམ་ཉིད་ཀྱིས་དེ་ཁོ་ན་ཉིད་ངེས་པར་བཅད་པ་དང༌། ཕྱོགས་དང་དུས་རྣམས་ཁྱབ་པ་ཉིད་ཀྱིས་མཆོག་ཏུ་ཆེ་བ་སྟེ་མཆོད་པའི་ཡན་ལག་གཉིས་སོ། །འཁོར་ལོའི་བདག་པོའི་ཚུལ་དུ་བདག་ཉིད་ཡིད་ལ་བྱེད་པ་ནི་གསུམ་པའོ། །དེ་གཉི་ག་མཆོད་པར་ལྷག་པར་མོས་པ་ནི་ཡན་ལག་བཞི་པ་སྟེ། འདི་དག་ནི་ངེས་པར་བྱ་དགོས་པ་ཡིན་ནོ། །དེ་ཡང་ལུས་དང་ཡིད་གདུང་བར་བྱེད་པའི་སྡོམ་པ་རྣམས་ལ་བརྟེན་པར་གྱུར་ན་དངོས་གྲུབ་དམན་པ་ཡང་འགྲུབ་པར་མི་འགྱུར་ཏེ། འདི་ལྟ་སྟེ་མི་སྣང་བ་དང་མངོན་པར་ཤེས་པ་དང་རིག་པ་འཛིན་པ་དང༌། སྐུ་དང་གསུང་དང་ཐུགས་ཀྱི་དངོས་གྲུབ་
རྣམས་ཀྱང་མི་འགྲུབ་པོ། །དེ་བས་ན་སྔགས་ཀྱི་སྤྱོད་པ་ཉིད་ནི་སྤྱོད་པ་ཐམས་ཅད་ཀྱི་མཆོག་ཡིན་ནོ། །དེ་ལ་སྤྱོད་པར་མཛད་པའི་སངས་རྒྱས་དང་བྱང་ཆུབ་སེམས་དཔའ་རྣམས་འདོད་པ་ཐམས་ཅད་ཉེ་བར་བསྟེན་པ་ཉིད་ཀྱིས་ཆོས་ཀྱི་ཡི་གེ་བརྙེས་པ་ཡིན་ཏེ། ཆོས་ཀྱི་སྐུའི་བདག་ཉིད་ཅན་གྱི་ཐར་པ་བརྙེས་པ་ཡིན་ནོ། །མཆོག་ནི་ཉན་ཐོས་ལ་སོགས་པའི་ཐར་པ་ལས་ཁྱད་པར་དུ་འཕགས་པ་ཡིན་ནོ། །བྱང་ཆུབ་མི་འདོད་པ་རྣམས་ལ་ཇི་ལྟར་བྱང་ཆུབ་བར་འགྱུར་བ་འམ། བྱང་ཆུབ་འདོད་པ་ཇི་ལྟར་ན་དམན་པ་འགྲུབ་པར་འགྱུར་ཞེ་ན་མ་ཡིན་ཏེ། ཡེ་ཤེས་དོན་གཉེར་ཞེས་པ་བྱང་ཆུབ་དོན་དུ་གཉེར་བས་འདོད་ཆགས་ཅན་ཞེས་བྱ་བ་རྣམ་པར་དག་པའི་ཤེས་རབ་དང་ལྡན་པའི་འཁོར་ལོ་ཅན་གྱི་སྦྱོར་བས་འདོད་པ་བསྟེན་ཞིང་ཐམས་ཅད་བསྒྲུབ་པ་ཉིད་དུ་བྱ་སྟེ། བྱང་ཆུབ་བམ་དངོས་གྲུབ་དམན་པ་དག་ཀྱང་བསྒྲུབ་པར་བྱའོ། །དེ་ཉིད་ཚིགས་སུ་བཅད་པས་བཤད་པ་ནི་གང་གཞན་ཞེས་བྱ་བ་ལ་སོགས་པ་སྨོས་པ་ཡིན་ཏེ། སྐུ་དང་གསུང་དང་ཐུགས་བསྒོམས་པ་ཇི་སྐད་བཤད་པའི་མཉེས་པར་བྱ་བ་རྣམས་ཀྱིས་སོ། །གང་བཤད་པ་ཞེས་བྱ་བ་ནི་བཤད་ཟིན་ཞེས་བྱ་བའི་དོན་སྟོན་ཏོ། །དེ་ལྟར་རིག་པའི་དབང་བསྐུར་བའི་སློབ་མ་ལ་འདུས་པའི་ཕྱག་རྒྱ་དང་བཅས་པའི་སྔགས་རང་ཉིད་ཀྱིས་བརྒྱ་རྩ་བརྒྱད་བཟླས་ལ་སྦྱིན་ཞིང༌། བཅོམ་ལྡན་འདི་ལ་སྩལ་ལགས་གྱིས། །འདི་ལ་འགོ་བར་མཛད་དུ་གསོལ། །ཞེས་བརྗོད་དོ། །སློབ་མས་ཀྱང༌། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་བརྗོད་དོ། །དེ་ནས་དེ་དཀྱིལ་འཁོར་དུ་ཟློས་སུ་བཅུག་ལ་རང་གི་ལྷའི་ཕྱག་རྒྱ་བསླབས་ནས་འདི་སྐད་ཅེས་བརྗོད་པར་བྱ་སྟེ། ཁྱེད་ཀྱིས་སྔགས་དང་ཕྱག་རྒྱ་ལ་མི་མཁས་པ་དང༌། དཀྱིལ་འཁོར་མ་མཐོང་བ་ལ་བརྗོད་པར་མི་བྱ་སྟེ། རྒྱུ་དེས་ཁྱེད་དང་དེ་ཉིད་དམྱལ་བར་འགྲོ་བར་གྱུར་ཏ་རེ་ཞེས་པའོ། །རིག་པའི་དབང་བསྐུར་བ་ལ་སློབ་དཔོན་གྱི་དབང་བསྐུར་བ་སྦྱིན་པར་བྱ་བ་ཡིན་པས་རེ་ཞིག་དེ་བརྟན་པ་ནི་སློབ་མ་ཞེས་བྱ་བ་ལ་སོགས་པ་ཡིན་ཏེ། སྡོམ་པ་ནི་འདིར་སློབ་དཔོན་གྱི་སྡོམ་པའོ། །བྱང་ཆུབ་རྡོ་རྗེ་ནི་རྡོ་རྗེ་འཆང་ཆེན་པོའོ། །མཆོད་པ་
ཆེན་པོ་འམ་མཐུ་ཆེན་བོ་འདི་ལ་ཡང་མངའ་བས་ན་མཆོད་ཆེན་ནོ། །ནམ་མཁའ་རྡོ་རྗེ་ནི་རྡོ་རྗེ་འཆང་བ་སྟེ། དེ་བཞིན་ཉིད་དུ་རོ་གཅིག་པ་ཉིད་ཀྱིས་བྱང་ཆུབ་ནི་ནམ་མཁའ་དང་མཉམ་པ་ཉིད་ཡིན་པའི་ཕྱིར་འདིར་ནི་དེའི་རང་བཞིན་ཉིད་དུ་སྟོན་ཅིང་དེའི་མཛད་པ་ལ་སྤྱོད་པས་བླ་མ་ཉིད་ལ་ནམ་མཁའ་རྡོ་རྗེ་ཞེས་བརྗོད་དོ། །འཇུག་སྒོར་ཞེས་བྱ་བ་འཇུག་པར་བྱེད་པའི་སྒོར་བསྟན་པ་གཞག་པ་གང་ཡིན་པ་དེར་གནས་པར་བྱ་སྟེ། དེ་ཡང་དེར་པདྨ་འདབ་མ་བརྒྱད་པ་སྣ་ཚོགས་པདྨར་བྱས་པ་དེར་རང་གི་ལྷའི་སྦྱོར་བ་ཞེས་བྱ་བས་དེར་འདུག་སྟེ། རང་གི་གང་འདོད་པའི་ལྷའི་སྦྱོར་བ་བྱའོ་ཞེས་བྱ་བའི་ཐ་ཚིག་གོ །སྔ་མ་བཞིན་དུ་རིག་དབང་བསྐུར། །ཞེས་བྱ་བ་ནི་སྟན་དེ་ཉིད་ལ་ཆོ་ག་སྔ་མས་རིག་པའི་དབང་བསྐུར་བ་ཐོབ་པའོ། །དེ་ལྟ་བུར་གྱུར་པའི་སློབ་མ་ལ་སངས་རྒྱས་ཀྱི་འཁོར་ལོས་དབང་བསྐུར་བར་བྱའོ། །རང་སྙིང་བྱུང་ཞེས་བྱ་བ་ནི་སློབ་དཔོན་གྱི་སྙིང་གའི་སྔགས་ཀྱི་འོད་ཟེར་གྱི་སྒོ་ལས་བྱུང་བ་རྣམས་ཀྱིས་སོ། །རོལ་མོ་དྲི་ལ་སོགས་ཞེས་བྱ་བའི་སྒྲས་ནི་གདུགས་དང་རྒྱལ་མཚན་དང་བ་དན་ལ་སོགས་པ་དང༌། ཡེ་ཤེས་ཀྱི་ཆུས་ཡོངས་སུ་གང་བའི་རིན་པོ་ཆེའི་བུམ་པ་ཡང་བསྡུའོ། །འདིས་ཞེས་བྱ་བ་ནི་འོག་ནས་བཤད་པས་སོ། །སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་གསང་བ་གང་ཡིན་པ་དེ་ཉིད་རྡོ་རྗེ་འཆང་ཆེན་པོའི་གནས་ཡིན་ལ། དེ་ལས་བྱུང་བའི་རྒྱུ་མཐུན་པའི་ཚུལ་གྱིས་སོ། །དེ་ཉིད་ཀྱིས་ནི་རྡོ་རྗེ་ཆེན་པོའོ། །འདི་ཉིད་ནི་རྡོ་རྗེ་ཆེན་པོའི་དབང་བསྐུར་བ་དང༌། ཕྱིར་མི་ལྡོག་པར་དབང་བསྐུར་བ་དང༌། སློབ་དཔོན་དུ་དབང་བསྐུར་བར་བྱ་བ་ཡིན་ནོ་ཞེས་བྱ་བར་བཤད་དོ། །གང་ལ་དབང་བསྐུར་བ་འདི་བྱིན་པ་དེ་ལ་གསང་བ་དང༌། ཤེས་རབ་ཀྱི་དབང་བསྐུར་བར་བྱ་བ་ཡིན་ནོ། །ཡང་སློབ་དཔོན་གྱི་དབང་བསྐུར་བ་དེ་ཉིད་ཀྱི་རྗེས་ཐོགས་ལ་མིག་ཐུར་གྱིས་བྱུག་པའི་ཆོ་ག་ལ་སོགས་པ་ཐམས་ཅད་ཀྱང་བྱ་བ་ཡིན་ལ་ཁྱད་པར་ནི་འདི་དག་ཙམ་ཡིན་ཏེ། དེ་ལ། མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཞེས་བྱ་བ་ལ་སོགས་པ་ཚིགས་སུ་བཅད་པ་ལྔས་རྗེས་སུ་གནང་བའི་དབང་འབའ་ཞིག་ཙམ་
སྦྱིན་གྱི། ངོ་བོ་ཉིད་ཀྱིས་སེམས་ཅན་རྣམས་ཞེས་བྱ་བ་ལ་སོགས་པ་ཚིགས་སུ་བཅད་པ་དྲུག་གིས་ཀྱང་མི་བྱའོ། །སྙིང་ལ་འབབ་པར་བྱ་བ་ཡང་ཚིགས་སུ་བཅད་པ་དང་པོ་ཉིད་ཀྱིས་བྱའི་གཉིས་པས་ཀྱང་མི་བྱའོ། །དེ་ནས་དཀྱིལ་འཁོར་གྱི་དེ་ཁོ་ན་ཉིད་དང༌། ལྷ་རྣམས་ཀྱི་དེ་ཁོ་ན་ཉིད་དང༌། སློབ་དཔོན་གྱི་ལས་རྣམས་འདི་ལ་བསྟན་པར་བྱའོ། །དེ་ཐམས་ཅད་བཤད་པ་ནི། མི་མཉམ་མེད་པས་ཟུར་བཞི་པ་ཞེས་བྱ་བ་ལ་སོགས་པ་དཔལ་མཆོག་དང་པོ་ལས་འབྱུང་བ་ཡིན་ནོ། །འདིའི་དོན་ནི་དཀྱིལ་འཁོར་དེ་ནི་མི་མཉམ་པ་མེད་པའི་རྒྱུས་ནི་ཟུར་བཞི་པ་ཡིན་ཏེ། མི་མཉམ་པ་མེད་པའི་རྣམ་པར་དག་པ་ཞེས་བྱ་བའི་དོན་ཏོ། །དེ་ཡང་ཟུར་བཞི་པ་ཉིད་ཀྱི་དེ་ཁོ་ན་ཉིད་མི་མཉམ་པ་མེད་པ་ཡིན་ནོ་ཞེས་བྱ་བའི་བར་དུའོ། །མི་མཉམ་པ་མེད་པའི་བཤད་པ་ནི། སངས་རྒྱས་སངས་རྒྱས་མིན་མཉམ་ཉིད། །ཅེས་སྨོས་པ་ཡིན་ཏེ། དེ་བཞིན་ཉིད་ཀྱི་རང་བཞིན་གྱི་སངས་རྒྱས་དང་སངས་རྒྱས་མ་ཡིན་པ་མཉམ་པ་ཉིད་ཀྱིས་ནི་མི་མཉམ་པ་མེད་ཅེས་བྱ་བ་བའི་ཐ་ཚིག་གོ །དཔལ་མཆོག་དང་པོ་ལས་ནི། དྲན་ནས་དབང་པོ་སྒོ་བཞི་ཡིན། །ཞེས་འབྱུང་ལ། འདི་ཉིད་རྒྱ་ཆེར་བཤད་པ་ནི་ལུས་ཚོར་ཞེས་བྱ་བ་ལ་སོགས་པ་སྨོས་པ་ཡིན་ཏེ། འདི་སྙམ་དུ་དགོངས་ཏེ། དྲན་ནས་དབང་པོ་ཞེས་བྱ་བ་ལ་དྲན་པའི་སྒྲས་ནི་དྲན་པ་ལ་སོགས་པ་སྡེ་ཚན་ལྔ་སྡུད་དེ། ཉེ་བར་མཚོན་པ་ཙམ་ཡིན་པའི་ཕྱིར་རོ། །དེ་ནི་འདི་ལྟ་སྟེ་དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་དང༌། སྟོབས་ལྔའོ། །སྟོབས་ཀྱི་སྒྲ་ནི་གོ་རིམས་ཇི་ལྟ་བ་བཞིན་དུ་ཡུལ་ཅན་གྱི་སྡེ་ཚན་ལྔ་པོ་དད་པ་ལ་སོགས་པ་ལྔ་བསྡུའོ། །དེ་ལ་སྡེ་ཚན་གསུམ་པོ་དང་དབང་པོ་གསུམ་གྱིས་ནི་གོ་རིམས་བཞིན་དུ་སྒོ་གསུམ་ཡིན་ལ། དབང་པོ་གཉིས་དང་སྡེ་ཚན་གཉིས་ཀྱིས་ནི་བྱང་གི་སྒོ་ཡིན་ལ། བྱང་ཆུབ་ཕྱིར་འདོད་དོ་ཞེས་བྱ་བ་ནི་སྒོ་ཐམས་ཅད་ལ་སྦྱར་བར་བྱ་སྟེ། བྱང་ཆུབ་པའི་ཕྱིར་འདོད་པ་ནི་བྱང་ཆུབ་པའི་དོན་དུ་དགའ་བ་ཡིན་ལ། བྱང་ཆུབ་པའི་ཕྱིར་ཡོངས་སུ་གྱུར་པས་སྒོ་ཞེས་བྱ་བའི་ཐ་ཚིག་གོ །ལུས་དང་ཚོར་བ་དང་སེམས་དང་ཆོས་རྣམས་ཀྱི་གཅིག་པ་ཉིད་དང་དུ་མ་ཉིད་ལ་སོགས་པ་དང་བྲལ་བ་ཉིད་ཀྱི་རང་བཞིན་
མེད་པའི་ཡེ་ཤེས་གང་ཡིན་པ་དེ་ནི་དྲན་ཞེས་བྱ་བ་ལུས་ལ་སོགས་པའི་དྲན་པ་ཡིན་ཞིང་དྲན་པའི་རྒྱུར་གྱུར་བས་ན་དྲན་པ་ཞེས་བྱ་བ་སྟེ་ལུས་དྲན་པ་ཉེ་བར་གཞག་པ་དང༌། ཚོར་བ་དྲན་པ་ཉེ་བར་གཞག་པ་དང་སེམས་དྲན་པ་ཉེ་བར་གཞག་པ་དང༌། ཆོས་དྲན་པ་ཉེ་བར་གཞག་པ་ཞེས་བྱ་བའི་ཐ་ཚིག་གོ །དྲན་པ་ཉེ་བར་གཞག་པ་འདི་དག་ནི་ཤེས་རབ་ཀྱི་རང་བཞིན་ཡིན་ཞིང་དྲན་པའི་རྒྱུ་ཡིན་ནོ་ཞེས་བྱ་བའི་དོན་ཏོ། །དྲན་པ་རྣམ་པ་འདི་བཞིའི་ངོ་བོ་གང་ཡིན་པ་འདི་དང༌། གང་འདི་དང་པོར་དད་པ་དེ་གཉིས་ཀའི་དེ་ཁོ་ན་ཉིད་ནི་ཤར་གྱི་སྒོ་ཡིན་ཏེ། ལྔ་བོ་འདི་དག་ནི་ཤར་སྒོའི་དེ་ཁོ་ན་ཉིད་ཡིན་ནོ་ཞེས་བྱ་བའི་ཐ་ཚིག་གོ །བརྩོན་འགྲུས་རྣམ་པ་བཞི་པོ་གང་ཡིན་པ་དང༌། དེའི་ཡང་གོང་གི་བརྩོན་འགྲུས་གང་ཡིན་པ་སྟེ། ལྔ་པོ་འདི་དག་ནི་ལྷོའི་སྒོར་ཞེས་པ་ལྷོ་ཕྱོགས་ཀྱི་སྒོ་ཡིན་ནོ་ཞེས་བྱ་བའི་ཐ་ཚིག་གོ །ཇི་ལྟར་ན་རྣམ་པ་བཞི་ཡིན་ཞེ་ན། དེ་ནས་ཞེས་བྱ་བ་ཆོས་དྲན་པ་ཉེ་བར་གཞག་པས་ཕྱིན་ཅི་ལོག་གི་བདག་ཉིད་ཅན་གྱི་ཀུན་ནས་ཉོན་མོངས་པའི་ཆོས་རྣམས་དང༌། ཕྱིན་ཅི་མ་ལོག་པའི་བདག་ཉིད་ཅན་གྱི་རྣམ་པར་བྱང་བའི་ཆོས་རྣམས་ཡོངས་སུ་ཤེས་པའི་འོག་ཏུ་བྱུང་ཞིང་སྐྱེས་པའི་ཕྱིན་ཅི་ལོག་རྣམས་སྤངས་པར་བྱ་བའི་ཕྱིར་ནི་བརྩོན་འགྲུས་གཅིག་ཡིན་ནོ། །འབྱུང་བར་འགྱུར་བ་སྟེ་མ་སྐྱེས་པའི་ཕྱིན་ཅི་ལོག་རྣམས་མི་བསྐྱེད་པར་བྱ་བའི་ཕྱིར་ནི་གཉིས་པ་ཡིན་ནོ། །ཀྱང་ཞེས་བྱ་བ་ནི་འདི་གཉིས་ཀྱི་རྗེས་ལ་མ་སྐྱེས་ཤིང་མ་བྱུང་བའི་ཡང་དག་པ་སྟེ། ཕྱིན་ཅི་ལོག་གི་གཉེན་པོ་བསྐྱེད་པའི་ཕྱིར་ནི་གསུམ་པའོ། །སྐྱེས་པའི་ཡང་དག་པར་གནས་པར་བྱ་བའི་ཕྱིར་ནི་བརྩོན་འགྲུས་བཞི་པ་ཡིན་ནོ། །བརྩོན་འགྲུས་བཞི་པོ་འདི་དག་ནི་ཡང་དག་པར་སྤོང་བ་ཞེས་བཤད་དོ། །དམིགས་པ་འདིས་ནང་གི་སེམས་ཀྱི་ཡང་དག་པར་འཇོག་པས་ཡང་དག་པར་སྤོང་བ་ཞེས་བྱའོ། །འདུན་དང་སྤྲོ་དང་གནས་དང་བློ། །ཞེས་བྱ་བ་ནི་འདུན་པའི་ཏིང་ངེ་འཛིན་དང༌། བརྩོན་འགྲུས་ཀྱི་ཏིང་ངེ་འཛིན་དང༌། སེམས་ཀྱི་ཏིང་ངེ་འཛིན་དང༌། དཔྱོད་པའི་ཏིང་ངེ་འཛིན་ཞེས་བྱ་བའི་ཐ་ཚིག་གོ །ཡང་དག་པར་སྤོང་བས་སེམས་ནང་དུ་འཇོག་པའི་ཏིང་ངེ་འཛིན་ལ་གུས་པར་བྱ་བའི་སྦྱོར་
བའི་སྟོབས་ལས་བྱུང་བ་གང་ཡིན་པ་དེ་ནི་འདུན་པའི་ཏིང་ངེ་འཛིན་ཏོ། །རྟག་ཏུ་སྦྱར་བའི་སྟོབས་ལས་སྐྱེས་པ་གང་ཡིན་པ་དེ་ནི་བརྩོན་འགྲུས་ཀྱི་ཏིང་ངེ་འཛིན་ཏོ། །སྔ་མའི་ཏིང་ངེ་འཛིན་གྱིས་ཐོབ་ནས་སེམས་ལ་སེམས་འཇོག་པ་དེ་ཉིད་ལས་སྐྱེས་པ་གང་ཡིན་པ་དེ་ནི་སེམས་ཀྱི་ཏིང་ངེ་འཛིན་ཏོ། །དམིགས་པ་ལ་རབ་ཏུ་རྣམ་པར་དཔྱོད་པ་ནི་སྐྱེ་བ་གང་ཡིན་པ་དེ་ནི་དཔྱོད་པའི་ཏིང་ངེ་འཛིན་ཏོ། །ཏིང་ངེ་འཛིན་བཞི་པོ་འདི་དག་ལས་སུ་རུང་བ་ཐོབ་པ་ལ་རྫུ་འཕྲུལ་གྱི་རྐང་པར་འགྱུར་ཏེ། མངོན་པར་ཤེས་པ་ལ་སོགས་པའི་སྦྱོར་བ་རྣམས་ཀྱི་རྐང་པ་སྟེ། གནས་དང་རྒྱུ་ཞེས་བྱ་བའི་ཐ་ཚིག་གོ །རྫུ་འཕྲུལ་གྱི་རྐང་པ་བཞི་པོ་འདི་དག་དང༌། འདིའི་ཡང་གོང་གི་དྲན་པ་གང་ཡིན་པ་སྟེ་ལྔ་པོ་འདི་ནི་ནུབ་ཀྱི་སྒོ་ཡིན་ནོ། །དད་དང་བརྩོན་འགྲུས་ཞེས་བྱ་བ་ལ་སོགས་པ་ལ་དེ་ལྟར་རྫུ་འཕྲུལ་གྱི་རྐང་པ་རྣམས་ཀྱི་སེམས་ལས་སུ་རུང་བར་གྱུར་པ་གང་ཡིན་པའི་དད་པ་དང༌། བརྩོན་འགྲུས་དང་དྲན་པ་དང༌། ཏིང་ངེ་འཛིན་དང་ཤེས་རབ་དེ་ནི་དབང་པོ་ཡིན་ཏེ། ཐར་པའི་ཆ་དང་མཐུན་པའི་དགེ་བའི་རྩ་བ་རྣམས་ལ་དབང་བྱེད་པའི་ཕྱིར་དབང་སྒྱུར་བས་ན་དབང་པོ་ཞེས་བྱ་བ་ཡིན་ནོ། །དེ་དག་ཉིད་ཀྱིས་མི་མཐུན་པའི་ཕྱོགས་མ་དད་པ་དང༌། ལེ་ལོ་དང་དྲན་པ་ཉམས་པ་དང་རྣམ་པར་གཡེང་བ་དང༌། ཤེས་བཞིན་མ་ཡིན་པ་བསྲབས་པ་ཉིད་དུ་གྱུར་པས་གལ་ཏེ་མ་གཡེངས་པར་གྱུར་པ་དེའི་ཚེ་སྟོབས་ཅན་ཉིད་ཡིན་པས་སྟོབས་སུ་འགྱུར་རོ། །དེ་ལ་དད་པ་ནི་མངོན་པར་ཡིད་ཆེས་པའོ། །བརྩོན་འགྲུས་ནི་མངོན་པར་སྤྲོ་བའོ། །དྲན་པ་ནི་དམིགས་པ་མ་བརྗོད་པའོ། །ཏིང་ངེ་འཛིན་ནི་སེམས་རྩེ་གཅིག་པའོ། །ཤེས་རབ་ནི་ཆོས་རྣམ་པར་འབྱེད་པའོ། །དབང་པོ་རྣམས་དང་སྟོབས་རྣམས་ནི་དབང་པོ་དང་སྟོབས་ཀྱང་ཡིན་ལ་མཉམ་པ་མེད་པ་ཡང་ཡིན་པས་ན་དབང་སྟོབས་མཉམ་མེད་ཅེས་བྱ་སྟེ། དབང་པོ་དང་སྟོབས་རྣམས་ཀྱིས་མཉམ་པ་མེད་པ་ནི་འཇིག་རྟེན་ལས་འདས་པའི་ལམ་གྱི་སྦྱོར་བར་གྱུར་པའི་ཕྱིར་རོ། །བཅུ་པོ་དེ་དག་དང་དབང་པོ་ཡུལ་དུ་བྱེད་པའི་སྔར་གྱི་ཏིང་ངེ་འཛིན་གང་ཡིན་པ་དང༌། ཡང་ཞེས་བྱ་བའི་སྒྲས་སྟོབས་ཡུལ་དུ་བྱེད་པའི་ཤེས་རབ་གང་ཡིན་པ་སྟེ། ཆོས་བཅུ་
གཉིས་པོ་གང་ཡིན་པ་དེ་དག་ནི་བྱང་གི་སྒོ་ཡིན་ཏེ། བྱང་གི་སྒོའི་དེ་ཁོ་ན་ཉིད་ཅེས་བྱ་བའི་ཐ་ཚིག་གོ །དེ་ལྟར་ཞེས་བྱ་བ་ནི་ལུས་ཚོར་ཞེས་བྱ་བ་ལ་སོགས་པ་ཇི་སྐད་བཤད་པའི་རྣམ་པ་འདིས་དྲན་ནས་དབང་པོ་སྒོ་བཞི་ཡིན་ཞེས་བྱ་བ་ཡིན་ཏེ། དཀྱིལ་འཁོར་དེའིའོ། །དང་པོ་ལ་སོགས་བསམ་གཏན་བཞི། །ཞེས་བྱ་བ་ལ། དེ་ལ་གང་གིས་འདོད་པའི་ཁམས་ཀྱི་འདོད་ཆགས་དང་བྲལ་བ་དེ་ནི་བསམ་གཏན་དང་པོའོ། །གང་གིས་བསམ་གཏན་དང་པོའི་ཆགས་པ་དང་བྲལ་བ་དེ་ནི་གཉིས་པའོ། །གང་གིས་གཉིས་པ་ལས་འདས་པ་དེ་ནི་གསུམ་པའོ། །གང་གིས་གསུམ་པ་ལས་འདས་པ་དེ་ནི་བསམ་གཏན་བཞི་པའོ། །དེ་ལ་དང་པོ་དང་གསུམ་པ་ནི་ཡན་ལག་ལྔ་པའོ། །གཉིས་པ་དང་བཞི་པ་ནི་ཡན་ལག་བཞི་པའོ། །དང་པོ་ལ་ནི་རྟོག་པ་དང་དཔྱོད་པ་ནི་གཉེན་པོའི་ཡན་ལག་སྟེ། དེ་གཉིས་ཀྱིས་མི་མཐུན་པའི་ཕྱོགས་སུ་གྱུར་པ་འདོད་ཆགས་དང་གནོད་སེམས་དང༌། རྣམ་པར་འཚེ་བའི་རྣམ་པར་རྟོག་པ་སྤོང་བར་བྱེད་པ་ཡིན་པའི་ཕྱིར་རོ། །དགའ་བ་དང་བདེ་བ་ནི་ཕན་ཡོན་གྱི་ཡན་ལག་སྟེ། མི་མཐུན་པའི་ཕྱོགས་སྤངས་པས་དེས་དབེན་པ་ལས་བྱུང་བའི་དགའ་བ་དང་བདེ་བ་ཐོབ་པའི་ཕྱིར་རོ། །སེམས་རྩེ་གཅིག་པ་ཉིད་ནི་དེ་གཉིས་ཀའི་རྟེན་གྱི་ཡན་ལག་སྟེ། ཏིང་ངེ་འཛིན་ལ་ཡང་དག་པར་བརྟེན་པའི་སྟོབས་ཀྱིས་གཉེན་པོ་དང༌། ཕན་ཡོན་གྱི་ཡན་ལག་ལ་རབ་ཏུ་འཇུག་པའི་ཕྱིར་རོ། །གཉིས་པ་ལ་ནང་གི་བདག་ཉིད་ཡང་དག་པར་དང་བ་ནི་གཉེན་པོའི་ཡན་ལག་ཡིན་ཏེ། དེས་རྟོག་པ་དང་དཔྱོད་པ་སྤོང་བའི་ཕྱིར་རོ། །དགའ་བ་དང་བདེ་བ་དང་སེམས་རྩེ་གཅིག་པ་སྟེ། ཡན་ལག་གི་གཉེན་པོ་ནི་སྔ་མ་དང་འདྲའོ། །གསུམ་པ་ལ་ནི་བཏང་སྙོམས་དང༌། དྲན་པ་དང་ཤེས་བཞིན་ནི་གཉེན་པོའི་ཡན་ལག་སྟེ། དེ་རྣམས་ཀྱིས་དགའ་བ་སྤོང་བའི་ཕྱིར་རོ། །བདེ་བ་ནི་ཕན་ཡོན་གྱི་ཡན་ལག་གོ །སེམས་རྩེ་གཅིག་པ་ཉིད་ནི་ཡན་ལག་གཅིག་སྟེ་སྔ་མ་བཞིན་ནོ། །བཞི་པ་ལ་ནི་བཏང་སྙོམས་ཡོངས་སུ་དག་པ་དང༌། དྲན་པ་ཡོངས་སུ་དག་པ་ནི་གཉེན་པོའི་ཡན་ལག་སྟེ། དེ་གཉིས་ཀྱིས་བདེ་བ་སྤོང་བར་བྱེད་པའི་ཕྱིར་རོ། །སྡུག་བསྔལ་ཡང་མ་
ཡིན་བདེ་བ་ཡང་མ་ཡིན་པ་ནི་ཕན་ཡོན་གྱི་ཡན་ལག་གོ །སེམས་རྩེ་གཅིག་པ་ནི་སྔ་མ་བཞིན་ནོ། །དཔའ་བར་འགྲོ་དང་ཞེས་པ་ནི་དཔའ་བར་འགྲོ་བ་དང༌། ནམ་མཁའ་མཛོད་དང༌། དྲི་མ་མེད་པ་དང༌། སེང་གེ་རྣམ་པར་རོལ་པ་སྟེ་ཏིང་ངེ་འཛིན་བཞི་པོས་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་ཏིང་ངེ་འཛིན་མཐའ་ཡས་པ་སྡུད་པར་བྱེད་པ་ཡིན་ནོ། །དེ་དག་ཀྱང་སྤྲོས་པ་མེད་པ་དང༌། རྣམ་པར་རྟོག་པ་མེད་པ་ཉིད་ཀྱིས་རོ་གཅིག་པ་ཉིད་ཡིན་པ་ཡང་བྱ་བའི་དབྱེ་བས་རྣམ་པར་ཕྱེ་བ་ཡིན་ནོ། །དེ་ཡང་གང་གིས་སྐྱོ་བ་མེད་པར་ཏིང་ངེ་འཛིན་ཐམས་ཅད་ལ་སྙོམས་པར་འཇུག་པ་དེ་ནི་དཔའ་བར་འགྲོ་བའི་ཏིང་ངེ་འཛིན་ཏོ། །གང་གིས་དེ་རྣམས་དྲི་མ་མེད་པར་བྱེད་པ་དེ་ནི་དྲི་མ་མེད་པའོ། །གང་གིས་དེའི་འབྲས་བུ་མངོན་པར་ཤེས་པ་ལ་སོགས་པས་སེང་གེ་ལྟར་རྣམ་པར་རྩེ་བར་བྱེད་པ་ནི་སེང་གེ་རྣམ་པར་རོལ་པའོ། །གང་གིས་འདིས་སངས་རྒྱས་ཀྱི་ཞིང་ཐམས་ཅད་དུ་ཁྱབ་པའི་ཆོས་དང་ཟང་ཟིང་ལ་སོགས་པའི་སྦྱིན་པ་ལ་སོགས་པ་རྣམས་ལ་ནམ་མཁའ་ལྟ་བུའི་མཛོད་མངའ་བ་དེ་ནི་ནམ་མཁའ་མཛོད་དོ། །དེ་ལ་བྱང་ཆུབ་སེམས་དཔའ་རྣམས་ཀྱི་བསམ་གཏན་བཞིས་བསྡུས་པ་གང་ཡིན་པ་དང༌། སངས་རྒྱས་རྣམས་ཀྱི་གང་ཡིན་པ་དེ་ནི་བསམ་གཏན་བཞི་པོ་ཉིད་ཀྱིས་སོ། །དེ་དག་གི་རྣམ་པར་དག་པ་ནི་ཁ་ཁྱེར་རྣམ་པ་བཞི་ཡིན་ནོ། །ལག་ན་ཞེས་བྱ་བ་ལ་སོགས་པ་ནི་ལྷ་བཤོས་ལ་སོགས་པའི་མཆོད་པ་ལག་ན་ཐོགས་པ་དང་གཡེན་སྤྱོ་ཞེས་བྱ་བ་ནི་གར་ལ་སོགས་པས་སོ། །དེ་རྣམས་ནི་ཚིག་ལ་སོགས་པའི་གཟུངས་ཀྱི་རང་བཞིན་ཅན་གྱི་ལྷའི་བུ་མོའི་ཚོགས་མང་པོའི་དཀྱིལ་འཁོར་གང་ལ་ཡོད་པ་དེ་ལ་དེ་སྐད་ཅེས་བྱའོ། །ལྷའི་བུ་མོའི་ཚོགས་ལ་གཟུངས་ཞེས་བྱ་བ་སྟེ། དེའི་རང་བཞིན་ཡིན་པའི་ཕྱིར་རོ། །ཚིག་ལ་སོགས་པའི་ཞེས་བྱ་བ་ནི་ཆོས་ལ་སོགས་པ་གཟུངས་བཞི་པོས་ནི་གཟུངས་ཐམས་ཅད་བསྡུས་པར་གྱུར་པའོ། །དེ་ལ་བཟོད་པ་འཛིན་པར་བྱེད་པས་ན་བཟོད་པའི་གཟུངས་སོ། །སྔགས་ཀྱི་གཟུངས་དང༌། ཆོས་ཀྱི་གཟུངས་དང༌། དོན་གྱི་གཟུངས་ཀྱང་དེ་བཞིན་ནོ། །དེ་དག་གི་རྣམ་པར་དག་པ་ནི་ཤར་ལ་སོགས་པའི་སྒོ་རྣམས་དང་ཉེ་བའི་མཆོད་པའི་
ལྷ་མོ་དང་རིམ་བཞིན་དུ་སྦྱར་རོ། །འདིར་ཡང་རབ་ཏུ་དགའ་བའི་ས་ཐོབ་པ་ནི་བར་ཆད་མེད་པའི་རྒྱུར་གྱུར་བའི་ཤེས་རབ་ལ་ནི་བཟོད་པ་ཞེས་བྱ་བར་བཤད་དེ། དོན་དམ་པའི་ཆོས་རྣམས་ལ་བཟོད་པའི་ཕྱིར་རོ། །བཟོད་པ་དེ་རིང་པོར་མི་ཐོགས་པར་སྐྱེད་པར་བྱེད་པའི་ཤེས་རབ་ནི་བཟོད་པའི་གཟུངས་ཞེས་བྱ་སྟེ། བཟོད་པ་འཛིན་པར་བྱེད་པའི་ཕྱིར་རོ། །དེ་ཡང་གང་ཞེ་ན། གང་སྔགས་ལ་དམིགས་པའི་ཏིང་ངེ་འཛིན་ལ་གནས་པའི་རྣལ་འབྱོར་པའི་སྔགས་ཀྱི་དོན་ལ་དཔྱོད་པའི་སྒོ་ནས་ཆོས་ཐམས་ཅད་བརྗོད་དུ་མེད་པའི་རང་བཞིན་ནམ་སྐྱེ་བ་མེད་པའི་སྟོང་པ་ཉིད་ཀྱི་རྣམ་པར་སོ་སོར་རྟོགས་པར་གྱུར་པའི་ངེས་པ་དང་སྣང་བའི་རང་བཞིན་དགའ་པ་དང་མགུ་བ་རྒྱ་ཆེན་པོ་དང་བཅས་པར་བསྐྱེད་པར་འགྱུར་བ་ཡིན་པར་ཤེས་པར་བྱའོ། །གང་གི་ཏིང་ངེ་འཛིན་དུ་གྱུར་པའི་སྟོབས་ཀྱིས་དེ་འདྲ་བའི་སྔགས་གསུངས་པ་དང༌། གང་མཆོག་ཏུ་གྲུབ་པར་གྱུར་པ་དེ་སྔགས་ཀྱི་གཟུངས་ཏེ་སྔགས་འཛིན་པའི་ཕྱིར་རོ། །གང་གི་དྲན་པ་དང༌། ཤེས་རབ་གཉིས་ཀྱི་སྟོབས་ཀྱིས་དེ་བཞིན་གཤེགས་པས་གསུངས་པའི་ཆོས་མཐའ་ཡས་པ་དུས་མཐར་ཐུག་པ་མེད་པ་ཆོས་ཐོས་པ་ཙམ་གྱིས་ཡང་དག་པར་འཛིན་པའི་དྲན་པ་དང་ཤེས་རབ་གཉིས་ནི་ཆོས་ཀྱི་གཟུངས་སོ། །གང་དག་གི་སྟོབས་ཀྱིས་ཆོས་དེ་རྣམས་ཉིད་ཀྱི་དོན་དེ་བཞིན་དུ་འཛིན་པར་བྱེད་པའི་དྲན་པ་དང་ཤེས་རབ་ནི་དོན་གྱི་གཟུངས་སོ། །གང་གི་ཕྱིར་འགྲོ་བ་རྣམས་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་དེའི་ཕྱིར་སྣ་ཚོགས་ཀྱི་རྒྱན་དང་ལྡན་པ་ཡིན་ཏེ། དེའི་རྣམ་པར་དག་པ་ཞེས་བྱ་བའི་ཐ་ཚིག་གོ །འདུལ་བར་མཛད་པའི་དེ་བཞིན་གཤེགས་པ་རྣམས་ཀྱིས་སྤྱོད་ཅིང་སྟོན་པར་མཛད་པའི་དམ་པའི་ཆོས་གང་ཡིན་པ་དེའི་ཡན་ལག་ནི་རྣམ་པ་དགུའོ། །དེ་རྣམས་ཀྱི་སྒྲ་ཀུན་དུ་འགྲོ་བ་འདི་ལ་ཡོད་པས་དེ་སྐད་ཅེས་བྱའོ། །གང་གི་ཕྱིར་དེ་ལྟ་ཡིན་པས་ན་ཁ་དོག་སྣ་ཚོགས་པ་རླུང་གིས་བསྐྱོད་པའི་རྩེ་མོར་དྲིལ་བུ་བཏགས་པས་སྒྲ་སྒྲོགས་པ་དང༌། ཡེ་ཤེས་ནི་མདའ་སྟེ། མི་མཐུན་པའི་ཕྱོགས་འཇོམས་པས་དེ་དང་ཆོས་མཐུན་པའི་ཕྱིར་ཡེ་ཤེས་མངའ་ཞེས་བྱ་བ་སྟེ། འཇིག་རྟེན་དང་འཇིག་རྟེན་ལས་འདས་པའི་བསྒོམ་པའི་
ལམ་ཞེས་བྱ་བའི་དོན་ཏོ། །མེ་ལོང་ལྟ་བུ་ལ་སོགས་པ་ཡེ་ཤེས་ལྔ་ནི་མེ་ལོང་སྟེ། ཉེ་བར་མཚོན་པ་ཙམ་ཡིན་པའི་ཕྱིར་རོ། །བྱང་ཆུབ་ཀྱི་ཡན་ལག་ནི་བདུན་ཏེ། དེ་ཡང་མཐོང་བའི་ལམ་ཡིན་ནོ། །ཕྱོགས་ཀུན་དུ་འོད་རབ་ཏུ་གསལ་བ་ནི་གསུམ་སྟེ། བྱང་ཆུབ་ཀྱི་སེམས་དང་ཤེས་རབ་དང༌། ཡེ་ཤེས་ཆེན་པོ་དང༌། སྒྲིབ་པ་ཐམས་ཅད་ལས་གྲོལ་བའི་དེ་བཞིན་གཤེགས་པའི་ལམ་གྱི་ཡེ་ཤེས་སོ། །གསུམ་པོ་དེ་དག་གིས་དེ་ཁོ་ན་ཉིད་དུ་གྱུར་པས་དྲ་བ་ལ་སོགས་པའི་འབར་བ་ཡིན་ཏེ། དྲ་བའི་དེ་ཁོ་ན་ཉིད་ནི་འཇིག་རྟེན་ལས་ལས་འདས་པའི་བསྒོམ་པའི་ལམ་སྟེ། ཉོན་མོངས་པ་རྩ་བ་ནས་འབྱིན་པའི་ཕྱིར་རོ། །དྲ་བ་ཕྱེད་པ་ནི་འཇིག་རྟེན་པའི་བསྒོམ་པའི་ལམ་སྟེ་ཉོན་མོངས་པ་རྣམས་པར་སེལ་བའི་ཕྱིར་རོ། །ཉི་མ་ནི་ཤེས་རབ་དང་ཡེ་ཤེས་སོ། །ཟླ་བ་ནི་བྱང་ཆུབ་ཀྱི་སེམས་སོ། །རྔ་ཡབ་ནི་དེ་བཞིན་གཤེགས་པའི་ལམ་གྱི་ཡེ་ཤེས་ཏེ། རྒྱལ་པོའི་མཚན་མ་ཡིན་པའི་ཕྱིར་དང༌། ཕྲ་བ་ཉིད་ཀྱི་ཕྱིར་རོ། །མེ་ཏོག་གི་ཕྲེང་བ་ནི་བྱང་ཆུབ་ཀྱི་ཡན་ལག་གོ །མེ་ལོང་ནི་མེ་ལོང་ལྟ་བུའི་ཡེ་ཤེས་ལ་སོགས་པ་ཡིན་ནོ། །དྲ་བ་ལ་སོགས་པའི་དེ་ཁོ་ན་ཉིད་སྟོང་པར་བྱེད་པ་ནི་དཔལ་ཐམས་ཅད་གསང་བ་ལས། ཉོན་མོངས་ཐམས་ཅད་དེས་གཅོད་པ། །ཉོན་མོངས་འཕྲོག་པས་དྲ་བ་སྟེ། །ཡང་དག་གཅོད་ཅིང་སྤོང་བ་ཉིད། །སེལ་བའི་སྤོང་བ་ལ་གནས་པ། །ཚོགས་གཉིས་ཀྱི་ནི་སྦྱོར་བ་ཉིད། །ཉོན་མོངས་པ་ཡི་ཕྱེད་འཕྲོག་པ། །དྲ་བ་ཕྱེད་ཅེས་བྱ་བར་བཤད། །རང་བཞིན་འོད་གསལ་གང་ཡིན་དེ། །བྱང་ཆུབ་སེམས་ནི་བླ་མེད་ཡིན། །སེམས་ནི་དོན་ཀུན་སྐྱེད་བྱེད་པ། །ཟླ་བའི་དཀྱིལ་འཁོར་ཡིན་པར་བཤད། །ཤེས་རབ་ཡེ་ཤེས་རང་བཞིན་དག །རྡོ་རྗེ་ལྟ་བུའི་ཏིང་འཛིན་སྐྱེས། །ཐར་པའི་སྣང་བ་གཟི་བརྗིད་ཆེ། །ཉི་མའི་དཀྱིལ་འཁོར་ཡིན་པར་བཤད། །ལྟ་བ་ལྔ་ཡི་མེ་ཏོག་ཡིན། །ཡེ་ཤེས་ལྔ་ཡི་ཉེ་སྦྱོར་ཉིད། །སངས་རྒྱས་ལྔ་ཞེས་ཡང་དག་བཤད། །ནམ་མཁའ་བཞིན་དུ་བདག་མེད་པའི། །རྣམ་ཤེས་ཡེ་ཤེས་དམ་པ་ཡིན། །ཡེ་ཤེས་དེ་ཡི་རྒྱན་བཤད་པ། །ཆགས་པའི་སེམས་ཞེས་བྱ་བར་བཤད། །སྒྲིབ་པ་གཉིས་དང་རྣམ་
བྲལ་བ། །ཏིང་འཛིན་ཡེ་ཤེས་སུ་བརྟགས་པ། །ལམ་གྱི་ཡེ་ཤེས་ཁྱད་པར་གྱིས། །རྔ་ཡབ་ཉིད་དུ་རྣམ་པར་བརྗོད། །བྱང་ཆུབ་ཡན་ལག་བདུན་པོ་ནི། །མེ་ཏོག་ཕྲེང་སྤྲས་དེ་བཞིན་དུ། །ཞེས་ཇི་སྐད་གསུངས་པ་ལྟ་བུའོ། །དཔལ་མཆོག་དང་པོ་ལས་ཀྱང༌། ཡེ་ཤེས་མེ་ལོང་རྟག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང༌། །དྲ་བ་མེ་ལོང་རྟག་མེ་ཏོག །མེ་ཏོག་ཕྲེང་བའི་རྒྱན་གྱིས་བསྐོར། །ཞེས་འབྱུང་སྟེ། དེ་ཡང་དོན་འདི་ཉིད་ཡིན་པར་ཤེས་པར་བྱའོ། །དེ་ཡང་དྲ་བའི་སྒྲས་ནི་དྲ་བ་ཕྱེད་པ་ཡང་བསྡུའོ། །རྟག་ཏུ་དང་མེ་ཏོག་ཅེས་བྱ་བའི་སྒྲ་གཉིས་ཀྱིས་ནི་བྱང་ཆུབ་ཀྱི་སེམས་ལ་སོགས་པ་གསུམ་དང་ཡང་དག་པར་ཆོས་མཐུན་པའི་ཕྱིར་བྱང་ཆུབ་ཀྱི་སེམས་དང་ཟླ་བ་ལ་སོགས་པ་གསུམ་གྱི་དོན་ཡིན་ནོ། །དེ་བཞིན་དུ་ཀུན་དུ་བཟང་པོའི་སྒྲུབ་ཐབས་ལས་ཀྱང༌། སྣ་ཚོགས་རྒྱན་རྣམས་རྟག་དྲི་མེད། །ཅེས་བྱ་བའི་སྒྲ་གཉིས་ཀྱིས་སྟོན་པར་ཤེས་པར་བྱའོ། །དེ་ལ་འཇིག་རྟེན་པའི་བསྒོམ་པའི་ལམ་གང་ཞེ་ན། ཇི་སྐད་བཤད་པའི་བསམ་གཏན་བཞི་དང༌། འོག་ནས་འཆད་པའི་སྙོམས་པར་འཇུག་པ་བཞི་པོ་ནམ་མཁའ་ཡས་སྐྱེད་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང་། ཅི་ཡང་མེད་པའི་སྐྱེ་མཆེད་དང༌། །ཡོད་མིན་མེད་མིན་སྐྱེ་མཆེད་དང༌། །བསམ་གཏན་དང་གཟུགས་མེད་པའི་སྙོམས་པར་འཇུག་པ་འདི་དག་ནི་ས་འོག་མའི་སྐྱོན་རགས་པ་ལ་སོགས་པར་མཐོང་ཞིང་གང་གིས་དེའི་ཆགས་པ་དང་བྲལ་བར་བྱེད་པ་དང༌། ས་གོང་མའི་ཡོན་ཏན་ཞི་བ་ལ་སོགས་པར་མཐོང་བ་གང་གིས་དེ་ཐོབ་པར་བྱེད་པའོ། །འཇིག་རྟེན་ལས་འདས་པའི་བསྒོམ་པའི་ལམ་གང་ཞེ་ན། འཕགས་པའི་ལམ་ཡན་ལག་བརྒྱད་དེ། ཡང་དག་པའི་ལྟ་བ་དང༌། ཡང་དག་པའི་རྟོག་པ་དང༌། ཡང་དག་པའི་ངག་དང༌། ཡང་དག་པའི་ལས་ཀྱི་མཐའ་དང་། ཡང་དག་པའི་འཚོ་བ་དང༌། ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཏོ། །འདི་ལ་ཡང་དག་པའི་ལྟ་བ་ནི་ལུས་ཡིན་ལ། ལྷག་མ་རྣམས་ནི་འཁོར་ཡིན་ནོ། །དེ་ལ་བདེན་པ་རྣམས་ནི་ཡོངས་སུ་གཅོད་པར་བྱེད་པར་མཐོང་བ་
ནི་ཡང་དག་པར་ལྟ་བའོ། །ཇི་ལྟར་རྟོགས་པ་བཞིན་དུ་རྣམ་པར་འཇོག་པ་དང༌། སྟོན་པ་ནི་གོ་རིམས་བཞིན་དུ་ཡང་དག་པའི་རྟོག་པ་དང༌། ཡང་དག་པའི་དག་ཡིན་ནོ། །ཚུལ་ཁྲིམས་རྣམ་པར་དག་པ་ནི་ཡང་དག་པའི་ལས་ཀྱི་མཐའ་ཡིན་ནོ། །ཆོས་གོས་ལ་སོགས་པ་ཆོས་ཀྱིས་ཚོལ་བ་ནི་ཡང་དག་པའི་འཚོ་བ་ཡིན་ནོ། །བརྩོན་འགྲུས་གང་དང༌། དྲན་བ་གང་དང༌། ཏིང་ངེ་འཛིན་གང་གིས་འདོད་པའི་འདོད་ཆགས་ལ་སོགས་པ་ཉོན་མོངས་པའི་སྒྲིབ་པ་དང༌། ཁྲོ་བ་ལ་སོགས་པ་ཉེ་བའི་ཉོན་མོངས་པའི་སྒྲིབ་པ་དང༌། མངོན་པར་ཤེས་པ་ལ་སོགས་པ་ཡོན་ཏན་གྱི་སྒྲིབ་པ་མ་ལུས་པར་རབ་ཏུ་སྤོང་བར་བྱེད་པ་དེ་ནི་གོ་རིམས་བཞིན་དུ་ཡང་དག་པའི་རྩོལ་བ་དང༌། ཡང་དག་པའི་དྲན་པ་དང༌། ཡང་དག་པའི་ཏིང་ངེ་འཛིན་ཡིན་ནོ། །མེ་ལོང་ལྟ་བུའི་ཡེ་ཤེས་ལ་སོགས་པ་གང་ཞེ་ན། མེ་ལོང་ལྟ་བུའི་ཡེ་ཤེས་དང༌། མཉམ་པ་ཉིད་ཀྱི་ཡེ་ཤེས་དང༌། སོ་སོར་རྟོག་པའི་ཡེ་ཤེས་དང༌། བྱ་བ་གྲུབ་པའི་ཡེ་ཤེས་དང༌། ཆོས་ཀྱི་དབྱིངས་རྣམ་པར་དག་པའི་ཡེ་ཤེས་སོ། །དེ་ལ་ཤེས་བྱ་ཐམས་ཅད་ལ་རྟག་ཏུ་འཇུག་ཅིང་རྟག་པ་དང་རྣམ་པ་མེད་པའི་ཡེ་ཤེས་ཀྱི་དཀྱིལ་འཁོར་མཉམ་པ་ཉིད་ཀྱི་ཡེ་ཤེས་ལ་སོགས་པའི་རབ་ཏུ་དབྱེ་བའི་རྒྱུ་གདུལ་བྱའི་སྐྱེ་བོ་ཐམས་ཅད་ལ་ཡེ་ཤེས་ཀྱི་གཟུགས་བརྙན་གྱི་མེ་ལོང་གང་ཡིན་པ་དེ་ནི་མེ་ལོང་ལྟ་བུའི་ཡེ་ཤེས་སོ། །སེམས་ཅན་ཐམས་ཅད་ལ་ཤིན་ཏུ་རྣམ་པར་དག་པའི་བདག་ཉིད་དང༌། མཉམ་པ་ཉིད་ཀྱི་ཡེ་ཤེས་བྱམས་པ་ཆེན་པོ་དང་སྙིང་རྗེ་ཆེན་པོ་དང༌། ཡང་དག་པར་ལྡན་པ་གང་ཡིན་པ་དེ་ནི་མཉམ་པ་ཉིད་ཀྱི་ཡེ་ཤེས་སོ། །ཤེས་བྱ་ཐམས་ཅད་ལ་རྟག་ཏུ་ཐོགས་པ་མེད་པ་དང༌། ཏིང་ངེ་འཛིན་དང་གཟུངས་ཐམས་ཅད་ཀྱི་རྒྱུར་གྱུར་པ་དང༌། འབྱོར་པ་ཐམས་ཅད་ངེས་པར་སྟོན་པ་དང༌། ཆོས་ཀྱི་ཆར་ཆེན་པོ་རབ་ཏུ་འབེབས་པར་བྱེད་པའི་ཡེ་ཤེས་གང་ཡིན་པ་དེ་ནི་སོ་སོར་རྟོག་པའི་ཡེ་ཤེས་སོ། །སྤྲུལ་པ་སྣ་ཚོགས་པ་དང༌། མཐའ་ཡས་པ་དང༌། བསམ་གྱིས་མི་ཁྱབ་པ་རྣམས་ཀྱིས་ཕྱོགས་ཐམས་ཅད་དུ་སེམས་ཅན་ཐམས་ཅད་ཀྱི་དོན་མཛད་པའི་ཡེ་ཤེས་གང་ཡིན་པ་དེ་ནི་བྱ་བ་གྲུབ་པའི་ཡེ་ཤེས་སོ།།
སངས་རྒྱས་མ་ལུས་པ་རྣམས་ཀྱིས་ཆོས་ཀྱི་དབྱིངས་ཤིན་ཏུ་རྣམ་པར་དག་པ་དང་དེར་རོ་གཅིག་པའི་ཡེ་ཤེས་གང་ཡིན་པ་དེ་ནི་ཆོས་ཀྱི་དབྱིངས་རྣམ་པར་དག་པའི་ཡེ་ཤེས་སོ། །བྱང་ཆུབ་ཀྱི་ཡན་ལག་གང་ཞེ་ན། འདིར་བྱང་ཆུབ་ནི་མཐོང་བའི་ལམ་སྟེ། དེ་ཁོ་ཉིད་དང་པོར་རྟོགས་པ་ཡིན་པའི་ཕྱིར་རོ། །དེའི་ཡན་ལག་ཡིན་པས་ན་བྱང་ཆུབ་ཀྱི་ཡན་ལག་གོ །དེ་ཡང་བདུན་ཏེ། དྲན་པ་ཡང་དག་བྱང་ཆུབ་ཀྱི་ཡན་ལག་དང༌། ཆོས་རྣམ་པར་འབྱེད་པ་ཡང་དག་བྱང་ཆུབ་ཀྱི་ཡན་ལག་དང༌། བརྩོན་འགྲུས་ཡང་དག་བྱང་ཆུབ་ཀྱི་ཡན་ལག་དང༌། དགའ་བ་ཡང་དག་བྱང་ཆུབ་ཀྱི་ཡན་ལག་དང༌། ཤིན་ཏུ་སྦྱངས་པ་ཡང་དག་བྱང་ཆུབ་ཀྱི་ཡན་ལག་དང༌། ཏིང་ངེ་འཛིན་ཡང་དག་བྱང་ཆུབ་ཀྱི་ཡན་ལག་དང༌། བཏང་སྙོམས་ཡང་དག་བྱང་ཆུབ་ཀྱི་ཡན་ལག་གོ །འདིའི་ཡང་མཐོང་བའི་ལམ་གྱི་ཆོས་རྣམ་པར་འབྱེད་པ་ནི་ལུས་ཡིན་ལ། ལྷག་མ་རྣམས་ནི་འཁོར་ཡིན་ནོ། །དེ་ཡང་ཆོས་རྣམས་ལ་དྲན་པ་ཉེ་བར་འཇོག་པས་ཆོས་རྣམ་པར་འབྱེད་པ་ནི་བདེན་པ་མཐོང་བའི་བདག་ཉིད་ཅན་ཐོབ་པ་ཡིན་ནོ། །དེ་ཡང་བརྩོན་འགྲུས་ཀྱིས་ནི་མ་ལུས་པར་ཐོབ་ལ། །དེ་སྐྱེས་པས་ཀྱང་དགའ་བ་འཐོབ་པ་དང༌། ཤིན་ཏུ་སྦྱངས་པས་ཏིང་ངེ་འཛིན་ལ་གནས་པ་རྣམས་ནི་ཀུན་ནས་ཉོན་མོངས་པར་མི་འགྱུར་ལ། དེས་ཉོན་མོངས་པའི་ས་བོན་གྱི་བདག་ཉིད་ཅན་གྱི་གནས་ངན་ལེན་བསལ་བས་དེ་ཉོན་མོངས་པ་མེད་པ་ནི་བཏང་སྙོམས་ཞེས་བྱ་བར་བཤད་དེ། དེ་བས་ན་བྱང་ཆུབ་ཀྱི་ཡན་ལག་བདུན་དུ་འགྱུར་བ་ཡིན་ནོ། །དེའི་ཞེས་བྱ་བ་ནི་དཀྱིལ་འཁོར་གྲུ་བཞི་པའོ། །འཁོར་ལོ་ཞེས་བྱ་བ་ནི་དཀྱིལ་འཁོར་རོ། །གང་གིས་ནི་དེར་དཀྱིལ་འཁོར་བརྒྱད་པ་ལྟ་བུར་བྱས་པ་ཡིན་ཞེ་ན། འཁོར་ལོ་ལ་སོགས་པ་ཀ་བ་ཞེས་བྱ་བ་སྨོས་ཏེ། འཁོར་ལོའི་ཀ་བ་གཉིས་དང་རིན་པོ་ཆེའི་ཀ་བ་གཉིས་དང༌། པདྨའི་ཀ་བ་གཉིས་དང༌། རལ་གྲིའི་ཀ་བ་གཉིས་སོ། །ཇི་ལྟ་བུ་ཞེ་ན། རྣམ་པར་ཐར་པ་བརྒྱད་དེ་ཁོ་ན་ཉིད་དུ་སྦྱངས་པས་སོ། །རྣམ་པར་ཐར་པ་བརྒྱད་གང་ཞེ་ན། གཟུགས་ཅན་གཟུགས་
རྣམས་ལ་བལྟ་བ་འདི་ནི་རྣམ་པར་ཐར་པ་དང་པོའོ། །ནང་གཟུགས་མེད་པར་གྱུར་པས་ཕྱི་རོལ་གྱི་གཟུགས་རྣམས་ལ་ལྟ་བ་འདི་ནི་རྣམ་པར་ཐར་པ་གཉིས་པའོ། །སྡུག་པའི་རྣམ་པར་ལྟ་བ་འདི་ནི་རྣམ་པར་ཐར་པ་གསུམ་པོའོ། །ནམ་མཁའ་མཐའ་ཡས་སྐྱེ་མཆེད་ཀྱི་རྣམ་པར་ཐར་པ་དང༌། རྣམ་ཤེས་མཐའ་ཡས་སྐྱེ་མཆེད་ཀྱི་རྣམ་པར་ཐར་པ་དང༌། ཅི་ཡང་མེད་པའི་སྐྱེ་མཆེད་ཀྱི་རྣམ་པར་ཐར་པ་དང༌། ཡོད་མིན་མེད་མིན་གྱི་སྐྱེ་མཆེད་ཀྱི་རྣམ་པར་ཐར་པ་དང༌། འདུ་ཤེས་དང་ཚོར་བ་འགོག་པའི་རྣམ་པར་ཐར་པའོ། །དེ་ལ་གཟུགས་ཅན་ཞེས་བྱ་བ་ནི་མཐོང་བ་པོའི་བདག་ཉིད་ནི་གཟུགས་ཅན་ཞེས་བྱའོ། །གཟུགས་ཞེས་བྱ་བ་ནི་བལྟ་བར་བྱ་བ་སྟེ། གཟུགས་ཆུང་དུའམ་ཆེན་པོ་འམ་ཁ་དོག་ངན་པའམ། བཟང་པོའམ། ལྷ་དང་མིའི་ཅི་འདོད་པར་མཐོང་བ་ཞེས་བྱ་བ་ལྷག་པར་མོས་པའི་མཐོང་པས་སྤྲུལ་པའི་སྒྲིབ་པ་མེད་པ་ནས་མོས་པའི་བར་དུའོ། །ནང་གི་གཟུགས་སུ་འདུ་ཤེས་པ་ཞེས་བྱ་བ་ནི་མཐོང་བ་པོ་བདག་ཉིད་ལ་གཟུགས་ཅན་དུ་འདུ་ཤེས་འཇོག་པའོ། ལྷག་མ་ནི་སྔ་མ་དང་འདྲ་བའོ། །དེ་ཡང་ཇི་ལྟ་བ་བཞིན་དུ་སྡུག་པ་དང་མི་སྡུག་པའི་གཟུགས་ཀྱི་མཚན་མ་སྤྲུལ་པ་རྣམས་ལ་དེ་བཞིན་ཉིད་ལ་དམིགས་པའི་སྒོ་ནས་སྡུག་པར་རོ་གཅིག་པར་ལྷག་པར་མོས་ནས་བསྒོམ་ཞིང་སྙོམས་པར་འཇུག་སྟེ། སྡུག་པའི་གཟུགས་རྣམས་ལ་གོམས་པ་དང༌། མི་སྡུག་པ་རྣམས་ལ་མི་མཐུན་པ་ཉིད་དུ་བྱ་བ་དེ་ནི་སྡུག་པའི་རྣམ་པར་ཐར་པའོ། །དེ་ཐམས་ཅད་དུ་གཟུགས་ཀྱི་འདུ་ཤེས་ལས་ཡང་དག་པར་འདས་པས་ནམ་མཁའི་འདུ་ཤེས་ཐམས་ཅད་དུ་ཉེ་བར་འཕེལ་བས་ནམ་མཁར་ལྷག་པར་མོས་ནས་སྒོམ་ཞིང་སྙོམས་པར་འཇུག་པ་དེ་ནི་ནམ་མཁའ་མཐའ་ཡས་སྐྱེ་མཆེད་དོ། །དེ་ལ་དབང་ཐོབ་པར་གྱུར་པ་ཉིད་ནི་རྣམ་པར་ཐར་པ་སྟེ། དེའི་སྒྲིབ་པ་རྣམས་ལས་རྣམ་པར་ཐར་པ་ཡིན་པའི་ཕྱིར་རོ། །རྣམ་པར་ཐར་པ་འོག་མའི་དོན་རྣམས་ལ་ཡང་དེ་བཞིན་དུ་སྦྱར་རོ། །དེ་ནས་ནམ་མཁའི་འདུ་ཤེས་ལས་ཀྱང་ཡང་དག་པར་འདས་ནས་རྣམ་པར་ཤེས་པ་གང་གིས་སྔར་ནམ་མཁར་མོས་པར་བྱེད་པའི་
རྣམ་པར་ཤེས་པ་དེ་ཉིད་མཐའ་ཡས་པར་ལྷག་པར་མོས་ཤིང་རྣམ་པར་ཤེས་པ་ནི་མཐའ་ཡས་སོ་ཞེས་བསྒོམ་ཞིང་སྙོམས་པར་འཇུག་པ་དེ་ནི་རྣམ་ཤེས་མཐའ་ཡས་སྐྱེ་མཆེད་དོ། །དེ་རྣམ་པར་ཤེས་པ་ལས་གཞན་དུ་དམིགས་པ་ཚོལ་བ་ནི་གཟུགས་ཅན་དང་གཟུགས་ཅན་མ་ཡིན་པ་ཅི་ཡང་མ་རྙེད་པ་ན་དེ་ཅི་ཡང་མེད་དོ་ཞེས་ཅི་ཡང་མེད་པར་ལྷག་པར་མོས་ཞིང་སྒོམ་པ་ལ་སྙོམས་པར་འཇུག་པ་དེ་ཡང་ཅི་ཡང་མེད་པའི་སྐྱེ་མཆེད་དོ། །དེ་རྒྱ་ཆེ་བ་ལ་སོགས་པ་ཉིད་ཀྱིས་ཉེས་པ་མཐོང་ནས་ཅི་ཡང་མེད་པའི་འདུ་ཤེས་ལས་ལྡོག་སྟེ། དེ་ཅུང་ཟད་མེད་པའི་འདུ་ཤེས་ལས་ནི་སྔ་མ་ཉིད་དུ་ལོག་པ་ཡིན་ལ། ད་ལྟར་ནི་ཅི་ཡང་མེད་པའི་འདུ་ཤེས་ལས་ཀྱང་ལོག་པ་ཡིན་ནོ། །དེ་བས་ན་འདི་ནི་འདུ་ཤེས་མེད་མིན་ཏེ། གང་ཡང་ཕྲ་ཞིང་མཚན་མ་མེད་པའི་འདུ་ཤེས་གཞན་དག་འཇུག་པ་ཉིད་ཡིན་ནོ། །དེ་བས་ན་འདི་ལ་འདུ་ཤེས་མེད་འདུ་ཤེས་མེད་མིན་སྐྱེ་མཆེད་ཅེས་བྱའོ། །འདུ་ཤེས་མེད་འདུ་ཤེས་མེད་མིན་སྐྱེ་མཆེད་དེ་ཉིད་ལ་བརྟེན་ནས་ཉོན་མོངས་པ་ཅན་གྱི་ཡིད་དང་འཇུག་པའི་རྣམ་པར་ཤེས་པས་བསྡུས་པའི་སེམས་དང་སེམས་ལས་བྱུང་བ་རྣམས་འགོག་པ་དེ་ནི་འདུ་ཤེས་དང་ཚོར་བ་འགོག་པའོ། །འདིར་རྣམ་པར་ཐར་པ་གཉིས་ནི་ཅི་འདོད་པར་སྤྲུལ་པའི་ཕྱིར་རོ། །རྣམ་པར་ཐར་པ་གསུམ་པ་ནི་སྤྲུལ་པས་ཀུན་ནས་ཉོན་མོངས་པ་མེད་པའི་ཕྱིར་རོ། །ལྷག་མ་བཞི་པོ་ནི་ཞི་བར་གནས་པ་ལ་དབང་དུ་གྱུར་པའོ། །གཅིག་ནི་མཆོག་ཏུ་ཞི་བར་གནས་པ་ལ་དབང་བ་ཉིད་ཀྱི་ཕྱིར་རོ། །བརྒྱད་པོ་འདི་དག་ནི་འཕགས་པའི་རྣམ་པར་ཐར་པ་སྟེ། འདིས་འཕགས་པ་རྣམས་གནས་པའི་ཕྱིར་རོ། །དེ་བས་ན་གནས་པའི་བདེ་བས་སྟེན་པར་བྱེད་པས་ཀ་བ་ནི་རྣམ་པར་ཐར་པ་ཡིན་ནོ། །ཕྱོགས་ཀུན་ནས་ཞེས་བྱ་བ་ལ་སོགས་པ་ལ་ཕྱོགས་ཐམས་ཅད་ན་དུས་གསུམ་དུ་བཞུགས་པའི་ཡང་དག་པར་རྫོགས་པའི་སངས་རྒྱས་རྣམས་རྡོ་རྗེ་ཐེག་པ་རབ་ཏུ་སྟོན་པའི་དེ་ཁོ་ན་ཉིད་ནི་རྡོ་རྗེའི་ཐིག་གིས་ཀུན་ནས་ཡོངས་སུ་ཟླུམ་པོར་བསྐོར་བ་ཡིན་ནོ། །དེ་ཁོ་ན་ཉིད་འདི་དག་ནི་དཔལ་མཆོག་དང་པོ་ལས་བླངས་པ་ཡིན་ལ། དེ་ཁོ་ན་ཉིད་ལྷག་མ་ནི་དཔལ་
རྡོ་རྗེ་རྩེ་མོ་ལ་སོགས་པ་ལས་བླངས་སོ། །ཚོན་ནི་ཞེས་བྱ་བ་ནི་ཚོན་སྣ་ལྔ་པོ་ཉིད་རྫོགས་པའི་སངས་རྒྱས་ལྔ་ཡིན་ནོ། །ཅིའི་ཕྱིར་ཞེ་ན། སངས་རྒྱས་ཀྱི་ཡེ་ཤེས་རྣམས་ཀྱིས་སེམས་ཅན་གྱི་ཤེས་པ་རྣམས་ཆགས་ཤིང་སྒྱུར་བར་མཛད་པས་ན་ཚོན་ནོ། །ཡུལ་དང་དབང་པོ་ལ་སོགས་པའི་མཚན་ཉིད་དང་བྲལ་བས་རྣམ་པར་དག་པའི་སྟོང་པ་ཉིད་གང་ཡིན་པའི་སྟོང་པ་ཉིད་དེས་ཆོས་ཐམས་ཅད་ཤེས་པའི་ཡེ་ཤེས་དེ་ཉིད་ནི་བདུད་རྩིའོ། །དེ་ནི་སངས་རྒྱས་ཐམས་ཅད་ཀྱི་རང་བཞིན་དུ་རྡོ་རྗེ་ཅན་གྱིས་གསོལ་ཞིང་འཐུངས་པ་ཡིན་ཏེ། དེ་ནི་བུམ་པའི་དེ་ཁོ་ན་ཉིད་ཡིན་ནོ། །ཚོགས་རྣམས་པ་གཉིས་ཡོངས་སུ་རྫོགས་པའི་རྒྱུ་མཐུན་པ་ལས་བྱུང་བའི་ཐུགས་རྗེས་བརླན་ཞིང་ཁུ་བ་ཡོད་པ་གང་ཡིན་པ་དེ་ནི་བུམ་པ་གང་བའི་དེ་ཁོ་ན་ཉིད་ཡིན་ནོ། །མེ་ཏོག་ལ་སོགས་པའི་དེ་ཁོ་ན་ཉིད་ནི་གོ་རིམས་བཞིན་དུ་དེ་བཞིན་གཤེགས་པའི་བྱང་ཆུབ་ཀྱི་ཡན་ལག་ལ་སོགས་པའི་ཚོགས་ཡིན་ནོ། །བསྔགས་ཤིང་ཤིས་པའི་ཡིད་ཚིམ་པ་ནི་ཡིད་རབ་ཏུ་ཚིམ་པའོ། །ཆོས་ཀྱི་ཟས་ནི་ཆོས་ཀྱི་རོ་ལ་དགའ་བའོ། །བདག་ཉིད་ཁ་ན་མ་ཐོ་བས་འཇིགས་པ་ནི་ངོ་ཚ་བའོ། །གཞན་ཞིག་ལ་བརྟེན་ཏེ་ངོ་ཚ་བ་ནི་ཁྲེལ་ཡོད་པའོ། །དེ་གཉིས་ནི་གོས་ཏེ་བླ་རེ་དང༌། གོས་ཀྱི་ཕྲེང་བ་ལ་སོགས་པའི་དེ་ཁོ་ན་ཉིད་ཡིན་ནོ། །རྣམ་པར་མི་རྟོག་པའི་བདེ་བ་ཆེན་པོ་རྣམ་པར་འཕེལ་བ་དེ་ནི་གླུ་ལ་སོགས་པའི་དེ་ཁོ་ན་ཉིད་ཡིན་ནོ། །གྲོང་ཁྱེར་གྱི་དེ་ཁོ་ན་ཉིད་ནི་ཐར་པའི་གྲོང་ཁྱེར་ཡིན་ནོ། །དཀྱིལ་འཁོར་གྱི་དེ་ཁོ་ན་ཉིད་ནི་སྙིང་པོ་བསྡུས་པ་ཡིན་ཏེ། ཆོས་ཀྱི་དབྱིངས་ཤིན་ཏུ་རྣམ་པར་དག་པའི་སྙིང་པོའི་དཀྱིལ་འཁོར་ཏེ། དེ་ལེན་ཅིང་འཛིན་པར་བྱེད་པས་ནི་དཀྱིལ་འཁོར་རོ། །དཀྱིལ་འཁོར་གྱི་དེ་ཁོ་ན་ཉིད་ཀྱི་བརྗོད་པའི་རྗེས་ཐོགས་ལ་ལྷའི་དེ་ཁོ་ན་ཉིད་བཤད་པར་བྱ་བ་ཡིན་པས་འཁོར་ལོའི་དེ་ཁོ་ན་ཉིད་ཅེས་བྱ་བ་ལ་སོགས་པ་སྨོས་ཏེ། སྟོན་པར་བྱེད་ཅེས་བྱ་བ་ནི་བཤད་པར་བྱ་བའོ། །དེ་ཡང་རྟེན་གྱི་དཀྱིལ་འཁོར་གྱི་དེ་ཁོ་ན་ཉིད་རྣམ་པ་ཐམས་ཅད་ཡོངས་སུ་དག་པ་ནི་བྱང་ཆུབ་ཡིན་ལ། བྱང་ཆུབ་དེ་ལ་སེམས་གང་རྣམ་
པ་ཐམས་ཅད་དུ་ཡོངས་སུ་དག་པ་དེ་ནི་རྟེན་པ་པོའི་དཀྱིལ་འཁོར་ཡིན་ནོ། །སྐུ་སོགས་འཛིན་པའི་རྣལ་འབྱོར་སེམས། །ཞེས་བྱ་བ་ནི་སྐུ་དང་གསུང་དང་ཐུགས་ཀྱི་གསང་བ་རྣམས་ལ་རྣལ་འབྱོར་ཏེ། སངས་རྒྱས་རྣམས་ཀྱི་འདུས་པའི་སེམས་གང་ཡིན་པ་དེའི་བདག་ཉིད་དུ་མཐོང་བའི་རྣལ་འབྱོར་པའི་སེམས་དེ་ཉིད་ནི་ཡང་དག་པར་ན་རྟེན་པ་པོའི་དཀྱིལ་འཁོར་ཡིན་ནོ། །དེ་ཅིའི་ཕྱིར་ཞེ་ན། གང་གི་ཕྱིར་སེམས་ཉིད་ནི་དད་པ་ལ་སོགས་པ་དབང་པོ་བཞི་རྣམ་པར་དག་པས་སྒོ་སྲུང་བཞིའི་རང་བཞིན་ཡིན་ལ། དེ་ཡང་ཤེས་རབ་ཀྱི་དབང་པོ་རྣམ་པར་དག་པས་ཤིན་ཏུ་དྲི་མ་མེད་པའོ། །སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དྲུག་གི་ཕྱི་རོལ་དག་ཅིང་དྲི་མ་མེད་པ་དེའི་བདག་ཉིད་དུ་གྱུར་པ་གང་ཡིན་པ་དེ་ནི་གཟུགས་རྡོ་རྗེ་ལ་སོགས་པའི་རང་བཞིན་ཡིན་ཏེ། གང་གི་ཕྱིར་ཕ་རོལ་ཏུ་ཕྱིན་པ་དྲུག་པོ་ནི་དེ་རྣམས་ཀྱི་དེ་ཁོ་ན་ཉིད་ཡིན་ནོ། །ས་ནི་སའི་ཁམས་སོ། །ཐབས་ནི་ཐབས་ཀྱི་ཕ་རོལ་ཏུ་ཕྱིན་པའོ། །སོགས་པའི་སྒྲས་ནི་ཆུ་དང་མེ་དང་རླུང་གི་ཁམས་དང༌། སྨོན་ལམ་དང༌། སྟོབས་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་རྣམས་བསྡུའོ། །མཚན་མ་མེད་པ་ནི་དགའ་བ་བཞི་པོའོ། །འདི་རྣམས་ཀྱི་ངོ་བོ་ཉིད་ནི་དེ་ཁོ་ན་སྟེ་སེམས་ཡིན་ལ། དེ་ནི་དེའི་རང་བཞིན་ཅན་ཡིན་ནོ་ཞེས་བྱ་བའི་ཐ་ཚིག་གོ །དེ་ཡང་གང་གི་ཕྱིར་དེ་རྣམས་ལྷ་མོ་བཞིའི་རང་བཞིན་ཡིན་བ་དེའི་ཕྱིར་དེ་ཉིད་དེ་ཁོ་ན་ཉིད་ཡིན་ནོ། །ས་ལ་སོགས་པ་ཇི་ལྟར་ན་དེ་ཁོ་ན་ཉིད་ཡིན་ཞེས་རྟོག་ན། །དེ་བཞིན་ཉིད་ཀྱི་ངོ་བོ་ཉིད་ཀྱིས་སོ་ཞེས་ཁོ་བོ་སྨྲ་སྟེ། ལོངས་སྤྱོད་རྫོགས་པའི་སྐུས་ཡང་དག་པར་བསྡུས་པའི་ཕྱིར་དང་ནང་གི་ས་ལ་སོགས་པ་གང་གི་ཡིན་པ་དེ་རྣམས་ཀྱང་དེ་ཁོ་ཉིད་ཡིན་ཏེ། ཤིན་ཏུ་རྣམ་པར་དག་པའི་ཡེ་ཤེས་ཀྱི་བདག་ཉིད་ཅན་ཡིན་པའི་ཕྱིར་ཉེས་པ་མེད་དོ། །སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་གང་ཞེ་ན། བྱང་ཆུབ་སེམས་དཔའི་ཆོས་ཉིད་ལ་གནས་པ་བྱང་ཆུབ་ཀྱི་སེམས་ལ་བརྟེན་ཏེ། སྙིང་རྗེ་སྔོན་དུ་འགྲོ་བའི་སེམས་ཀྱིས་བདོག་པ་ཐམས་ཅད་ཡོངས་སུ་གཏོང་བའི་ལུས་དང་ངག་དང་ཡིད་ཀྱི་ལས་རྣམས་དང༌། དེ་བཞིན་དུ་སྔོམ་པ་ཐམས་
ཅད་ཡང་དག་པར་བླངས་ཏེ་སྲུང་བ་དང༌། དེ་བཞིན་དུ་གནོད་པའི་སྡུག་བསྔལ་ཐམས་ཅད་ལ་བཟོད་པར་གནས་པ་དང༌། དེ་བཞིན་དུ་དགེ་བའི་ཆོས་ཐམས་ཅད་ཡང་དག་པར་བསྡུ་བ་ལ་སྤྲོ་བའི་ལུས་དང་ངག་དང་ཡིད་ཀྱི་ལས་རྣམས་ཏེ་དེ་དག་ནི་གོ་རིམས་བཞིན་དུ་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡིན་ནོ། །དེ་བཞིན་དུ་ལུས་དང་ངག་དང་ཡིད་ཀྱི་ལས་རྣམས་ལ་རྣམ་པ་ཐམས་ཅད་དུ་དབང་དུ་གྱུར་པས་སེམས་རྣམ་པ་ཐམས་ཅད་དུ་ཡང་དག་པར་གནས་པ་དང་གང་དེ་བཞིན་དུ་རྣམ་པ་ཐམས་ཅད་དུ་ཆོས་རྣམ་པར་འབྱེད་པ་སྟེ། དེ་དག་ནི་བསམ་གཏན་དང་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །འདིར་ཡང་ཆོས་ཉིད་ནི་རིགས་སོ། །བྱང་ཆུབ་ཀྱི་སེམས་ནི་སྨོན་པའོ། །བདོག་པ་ནི་གང་ཅི་ཡོད་པའོ། །སྡོམ་པ་ནི་མི་དགེ་བ་ལས་ལྡོག་པའོ། །གནོད་པ་ཐམས་ཅད་བཟོད་པ་ནི་བསྟེན་ནུས་པའོ། །སྡུག་བསྔལ་ཐམས་ཅད་ལ་བཏང་སྙོམས་སུ་འཇོག་པ་ནི་གནོད་པའོ། །དབང་ཐོབ་པ་ནི་བདག་པོར་གྱུར་པའོ། །གནས་པ་ནི་མཉམ་པར་འཇོག་པའོ། །རྣམ་པར་འབྱེད་པ་ནི་ངེས་པར་དཔྱོད་པའོ། །ཐབས་ལ་སོགས་པའི་ཕ་རོལ་ཏུ་ཕྱིན་པ་གང་ཞེ་ན། གང་ཕ་རོལ་ཏུ་ཕྱིན་པ་དེ་རྣམས་ཉིད་བྱང་ཆུབ་ཆེན་པོར་ཡོངས་སུ་བསྔོ་བ་དང༌། གང་དེ་རྣམས་ཉིད་སྐྱེ་བ་ཐམས་ཅད་དུ་ཡང་དག་པར་སྤྱད་པར་བྱ་བའི་ཕྱིར་སྐྱེ་བ་ལ་སོགས་པ་ཁྱད་པར་ཅན་དུ་སྨོན་ཅིང་དོན་དུ་གཉེར་བ་དང༌། གང་དེ་རྣམས་ཉིད་སྐྱེ་བ་ཐམས་ཅད་དུ་རྒྱུན་དུ་བྱ་བའི་ཕྱིར་འབད་པ་ལས་བྱུང་བའི་ནུས་པའི་ཤེས་རབ་ཀྱི་སྟོབས་ཞེས་བྱ་བ་དང༌། སྔོན་གོམས་པ་ལས་བྱུང་བའི་བསྒོམ་པའི་སྟོབས་ཞེས་བྱ་བ་དག་དང༌། གང་དེ་རྣམས་ཉིད་བསྟན་པར་བྱ་བའི་ཕྱིར་འབད་པ་ཆེན་པོས་དགོངས་པ་ཅན་གྱི་དོན་ཐམས་ཅད་ཡང་དག་པར་ཤེས་པའོ། །དེ་དག་ནི་གོ་རིམས་ཇི་ལྟ་བ་བཞིན་དུ་ཐབས་དང་སྨོན་ལམ་དང་སྟོབས་དང་ཡེ་ཤེས་ཀྱི་ཕ་རོལ་ཏུ་ཕྱིན་པ་ཡིན་ནོ། །མཚན་མ་མེད་པ་ལ་དགའ་བ་རྣམས་གང་ཞེ་ན། གང་ཐེག་པ་ཆེན་པོ་ལ་དམིགས་པས་དེ་བཞིན་ཉིད་དུ་རོ་གཅིག་པ་ལ་དགའ་བའོ། །སོ་སོའི་སྐྱེ་བོ་རྣམས་ཀྱི་ཤེས་པ་ལྔ་པོ་ནི་ཐེག་
པ་ཆེན་པོ་ལས་དོན་གྱི་ཤེས་པ་དང༌། སེམས་ཅན་གྱི་ཤེས་པ་དང༌། བདག་གི་ཤེས་པ་དང༌། རྣམ་པར་རྟོག་པའི་ཤེས་པ་དང༌། འཇུག་པའི་ཤེས་པའོ། །འདི་དག་ཀྱང་གོ་རིམས་བཞིན་དུ་གཟུགས་དང༌། སྒྲ་དང༌། དྲི་དང༌། རོ་དང་རེག་བྱ་སྟེ་ཡུལ་གྱི་བདག་ཉིད་ཅན་གྱི་ ཀུན་གཞི་རྣམ་པར་ཤེས 
་པ་དང༌། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་ཀྱི་དབང་པོའི་བདག་ཉིད་ཅན་གྱི་
ཀུན་གཞི་རྣམ་པར་ཤེས ་པ་དང༌། ང་དང་བདག་གི་རྣམ་པ་ཅན་གྱི་ཉོན་མོངས་པ་ཅན་གྱི་ཡིད་དང༌། ཡིད་ཀྱི་རྣམ་པར་ཤེས་པ་དང་མིག་ལ་སོགས་པའི་རྣམ་པར་ཤེས་པ་དང༌། རིམ་པ་བཞིན་དུ་སྦྱར་རོ། །དེ་རྣམས་ཀྱི་བདག་པོ་ནི་དེས་ཡང་དག་པར་བསྡུས་པའི་སྒྲིབ་པ་རྣམས་དང་བྲལ་པའོ། །རྒྱུ་དེས་ན་སེམས་དེ་ཉིད་ནི་གོ་རིམས་ཇི་ལྟ་བ་བཞིན་དུ་མེ་ལོང་ལྟ་བུ་དང་མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་གྲུབ་པའི་ཡེ་ཤེས་དང༌། ཟད་པ་དང་མི་སྐྱེ་བའི་ཡེ་ཤེས་ཀྱི་རང་བཞིན་དང༌། རྣམ་པར་སྣང་མཛད་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་པར་གྲུབ་པ་དང༌། མི་བསྐྱོད་པའི་རང་བཞིན་ཅན་ཡིན་ཏེ། མེ་ལོང་ལྟ་བུ་ལ་སོགས་པའི་ཡེ་ཤེས་ནི་དོན་ལ་སོགས་པའི་ཤེས་པ་དག་པའི་མཚན་ཉིད་ཅན་ཡིན་པའི་ཕྱིར་དང༌། རྣམ་པར་སྣང་མཛད་ལ་སོགས་པའི་དེ་ཁོ་ན་ཉིད་ཀྱི་རང་བཞིན་ཅན་ཡིན་པའི་ཕྱིར་རོ། །ཟད་པ་དང་མི་སྐྱེ་བའི་ཡེ་ཤེས་ཀྱི་རང་བཞིན་ཅན་ཡིན་པའི་ཕྱིར་དཀྱིལ་འཁོར་གྱི་བདག་པོའི་ངོ་བོ་ཉིད་དུ་རབ་ཏུ་གསལ་བར་སྣང་བ་ཡིན་ནོ། །འདིར་ཡང་ངའི་སྐྱེ་བ་ཟད་དོ་ཞེས་བྱ་བ་ལ་སོགས་པ་བྱ་བ་བྱས་པ་ཉིད་ཀྱི་ཡེ་ཤེས་ནི་ཟད་པའི་ཡེ་ཤེས་སོ། །ངས་འདི་ལས་སྲིད་པ་གཞན་མི་ཤེས་སོ་ཞེས་བྱ་བ་ལ་སོགས་པ་བྱ་བ་གཞན་མེད་པའི་ཤེས་པ་ནི་མི་སྐྱེ་བ་ཤེས་པའོ། །ཡང་ལྷའི་དེ་ཁོ་ན་ཉིད་གཞན་དག་ཀྱང་བསྟན་པའི་ཕྱིར། གཟུགས་སོགས་ཞེས་བྱ་བ་ལ་སོགས་པ་སྨོས་ཏེ། སེམས་ཉིད་གཟུགས་ལ་སོགས་པའི་འཁྲུལ་པ་རྣམ་པར་དག་ཅིང་དེ་ལས་ངེས་པར་གྲོལ་བ་ཉིད་ཀྱིས་རབ་ཏུ་བསྒོམས་ཤིང་དེའི་མཚན་ཉིད་དང་ལྡན་པའི་གཟུགས་ཀྱི་ཕུང་པོ་ལ་སོགས་པ་གང་ཡིན་པ་དེ་ནི་
ལྷ་རྣམས་ཀྱི་དེ་ཁོ་ན་ཉིད་ཡིན་གྱི། ཡོངས་སུ་བརྟགས་པའི་ཕུང་པོ་ལ་སོགས་པའམ། ཟག་པ་དང་བཅས་པ་ལ་སོགས་པ་ནི་ལྷའི་དེ་ཁོ་ན་ཉིད་མ་ཡིན་ནོ། །རྣམ་པར་དག་པ་དེ་ཡང་སེམས་ལས་ཐ་མི་དད་པ་ཡིན་ལ། དེ་བས་ན་སེམས་དེ་ཉིད་ནི་ཕུང་པོ་ལ་སོགས་པ་ལྷའི་བདག་ཉིད་ཅན་ཡིན་ནོ། །དེ་ལ་སངས་རྒྱས་རྣམས་ཀྱི་དེ་ཁོ་ན་ཉིད་ནི་ཕུང་པོ་ལྔ་སྟེ། གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པའོ། །བྱང་ཆུབ་སེམས་དཔའ་རྣམས་ཀྱི་དེ་ཁོ་ན་ཉིད་ནི་སྐྱེ་མཆེད་བཅུ་གཉིས་ཏེ། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་དང༌། གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་རྣམས་སོ། །སྤྱན་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་དང༌། རྡོ་རྗེ་འཆང་བའི་དེ་ཁོ་ན་ཉིད་ནི་ས་དང་ཆུ་དང་མེ་དང་རླུང་དང་ནམ་མཁའོ། །ཡང་ལྷའི་དེ་ཁོ་ན་ཉིད་གཞན་དག་བསྟན་པ་ནི། སེར་སྣ་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཕ་རོལ་ཏུ་ཕྱིན་པ་ནི་ཇི་སྐད་དུ་བཤད་པའི་ཕྱི་རོལ་ཏུ་ཕྱིན་པ་བཅུའོ། །ས་ནི་བཅུ་གཅིག་གོ །ཤིན་ཏུ་གནས་པ་ནི་དེ་རྣམས་ལ་སེམས་དེའི་བདག་ཉིད་ཀྱིས་རབ་ཏུ་བརྟན་པར་གནས་པའོ། །དེ་ཅིའི་ཕྱིར་ཞེ་ན། སེར་སྣ་ལ་སོགས་གནས་གྱུར་པས། །ཞེས་བྱ་སྨོས་པ་ཡིན་ཏེ། གནས་གྱུར་པ་དེ་ཡང་སེམས་ལས་ལོགས་ཤིག་ན་མེད་པའི་མཚན་ཉིད་ཅན་གྱི་ས་དང་ཕ་རོལ་ཏུ་ཕྱིན་པ་རྣམས་ནི་ལྷ་རྣམས་ཀྱི་དེ་ཁོ་ན་ཉིད་དུ་གྱུར་པ་ཡིན་ནོ། །དེ་ལ་ལྷ་མོ་བཅུའི་དེ་ཁོ་ན་ཉིད་ནི་ཕ་རོལ་ཏུ་ཕྱིན་པ་བཅུའོ། །རབ་ཏུ་དགའ་བ་དང་དྲི་མ་མེད་པ་སྟེ། ས་གཉིས་ནི་གཤིན་རྗེ་གཤེད་ཀྱིའོ། །དེ་ནས་ས་གསུམ་ནི་སྒོ་སྲུང་ལྷག་མ་གསུམ་གྱིའོ། །དེ་ནས་ས་ལྔ་ནི་དེ་བཞིན་གཤེགས་པ་ལྔའིའོ། །ཀུན་དུ་འོད་ནི་དཀྱིལ་འཁོར་གྱི་བདག་པོའིའོ། །ས་རྣམས་ཀྱང་གང་ཞེ་ན། རབ་ཏུ་དགའ་བ་དང༌། དྲི་མ་མེད་པ་དང༌། འོད་བྱེད་པ་དང༌། འོད་འཕྲོ་བ་དང༌། སྦྱང་དཀའ་བ་དང༌། མངོན་དུ་གྱུར་པ་དང༌། རིང་དུ་སོང་བ་དང༌། མི་གཡོ་བ་དང༌། ལེགས་པའི་བློ་གྲོས་དང༌། ཆོས་ཀྱི་སྤྲིན་དང༌། ཀུན་དུ་འོད་དོ། །དེ་ལ་ཀུན་དུ་འགྲོ་བའི་ཆོས་ཀྱི་དབྱིངས་རབ་ཏུ་རྟོགས་པས་རབ་ཏུ་དགའ་བར་གྱུར་པའི་བྱང་ཆུབ་སེམས་དཔའ་ལྷག་པའི་བསམ་པ་དག་པས་གནས་
པ་ནི་རབ་ཏུ་དགའ་བའོ། །ལྷག་པའི་བསམ་པ་རྣམ་པར་དག་པའི་རྒྱུས་རང་བཞིན་གྱིས་དག་པའི་ཚུལ་ཁྲིམས་དང༌། ཡང་དག་པར་ལྡན་པར་གནས་པ་ནི་དྲི་མ་མེད་པའོ། །ཚུལ་ཁྲིམས་འཆལ་པའི་དྲི་མ་དང་བྲལ་བས་ཚུལ་ཁྲིམས་རྣམ་པར་དག་པའི་རྒྱུས་འཇིག་རྟེན་པའི་བསམ་གཏན་དང་ཏིང་ངེ་འཛིན་ལ་སྙོམས་པར་ཞུགས་པའི་སྣང་བས་གནས་པ་ནི་འོད་བྱེད་པའོ། །ཏིང་ངེ་འཛིན་དེ་ཉིད་ལ་བརྟེན་ཏེ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་རྣམ་པར་དཔྱོད་པའི་འོད་དང་ཡང་དག་པར་ལྡན་པས་གནས་པ་ནི་འོད་འཕྲོ་བའོ། །རྣམ་པར་འབྱེད་པ་དེ་ཉིད་ལ་བརྟེན་ནས་སྡུག་བསྔལ་དང༌། ཀུན་འབྱུང་བ་དང༌། འགོག་པ་དང༌། ལམ་གྱི་བདེན་པ་རྣམ་པར་འབྱེད་པ་ནི་སྦྱང་དཀའ་བ་སྟེ། དཀའ་བས་རྒྱལ་ཞིང་བསླབ་པའི་ཕྱིར་རོ། །དེ་ལ་བརྟེན་ནས་རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་རྣམ་པར་འབྱེད་པས་གནས་པ་ནི་མངོན་དུ་གྱུར་པ་སྟེ། ཐོགས་པ་མེད་པའི་ཡེ་ཤེས་མངོན་དུ་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པས་གནས་པ་དེར་མངོན་སུམ་དུ་གྱུར་པའི་ཕྱིར་རོ། །བྱང་ཆུབ་ཀྱི་ཕྱོགས་ལ་སོགས་པ་རབ་ཏུ་རྣམ་པར་འབྱེད་པ་ལ་དབང་ཐོབ་པས་འབད་པ་རྒྱུན་མི་འཆད་པར་འཇུག་པས་མཚན་མ་མེད་པ་ལ་གནས་པ་ནི་རིང་དུ་སོང་བ་སྟེ། སྦྱོར་པའི་སྤྱོད་པའི་མཐར་ཐུག་པར་སོང་བའི་ཕྱིར་རོ། །དེ་ལ་བརྟེན་ནས་རང་གི་ངང་གིས་རྒྱུན་མི་འཆད་པར་འཇུག་པས་མཚན་མ་མེད་པ་ལ་གནས་པ་ནི་མི་གཡོ་བ་སྟེ། དེར་སེམས་ཀྱི་མཚན་མ་མེད་པ་ལ་གཡོ་བ་མེད་པ་ཡིན་པའི་ཕྱིར་རོ། །གཡོ་བ་མེད་པའི་ཤེས་རབ་དང་ཏིང་ངེ་འཛིན་ལ་བརྟེན་ནས་ཆོས་དང་དོན་དང་ངེས་པའི་ཚིག་དང་སྤོབས་པ་སོ་སོ་ཡང་དག་པར་རིག་པ་རྣམ་པར་དག་པ་ལ་གནས་པ་ནི་ལེགས་པའི་བློ་གྲོས་ཏེ། སོ་སོ་ཡང་དག་པར་རིག་པའི་བློ་དེར་ལེགས་པར་གྱུར་པའི་ཕྱིར་རོ། །ཆར་འབེབས་པ་ནི་སྤྲིན་ཏེ། དབང་སྐུར་བའམ་ཆར་འབེབས་པའོ།། དེ་ཡང་གང་ལ་གནས་ན་བྱང་ཆུབ་ཆེན་པོར་ཆོས་ཀྱི་དབང་བསྐུར་བ་ཐོབ་པ་དང༌། སངས་རྒྱས་རྣམས་ཀྱི་ཆོས་ཀྱི་ཆར་ཤིན་ཏུ་རྒྱ་ཆེན་པོ་བདག་ཉིད་ཀྱང་ལེན་ཅིང༌། སེམས་ཅན་རྣམས་ལ་ཡང་སྟེར་བར་བྱེད་པ་ནི་ཆོས་ཀྱི་སྤྲིན་ནོ། །གང་ལ་གནས་ན་སྒྲིབ་པའི་བག་ཆགས་ཐམས་ཅད་ཡང་དག་པར་
བཅོམ་པ་དང༌། སངས་རྒྱས་ཀྱི་ཆོས་ཐམས་ཅད་ཀྱི་རྣམ་པར་དག་པའི་མཐར་ཐུག་པ་ནི་ཀུན་དུ་འོད་དོ། །སེར་སྣ་ལ་སོགས་པ་གང་ཞེ་ན། སེར་སྣ་ནི་སྦྱིན་པའི་མི་མཐུན་པའི་ཕྱོགས་སུ་གྱུར་པའི་སེམས་ལས་བྱུང་བའི་ཆོས་སོ། །ཚུལ་ཁྲིམས་འཆལ་པ་ནི་ཚུལ་ཁྲིམས་གྱི་མི་མཐུན་པའི་ཕྱོགས་སོ། །མི་བཟོད་པ་ནི་བཟོད་པའི་མི་མཐུན་པའི་ཕྱོགས་ཏེ། ཁྲོ་བ་དང༌། སྡུག་བསྔལ་བ་དང༌། འཇིགས་པ་ཉིད་དོ། །དེ་བཞིན་དུ་བརྩོན་འགྲུས་ལ་སོགས་པའི་མི་མཐུན་པར་གྱུར་པ་ནི་ལེ་ལོ་ལ་སོགས་པ་ཡིན་པར་ཤེས་པར་བྱའོ། །གཞན་ཡང་ལྷའི་དེ་ཁོ་ན་ཉིད་བསྟན་པའི་ཕྱིར། རང་གི་མི་མཐུན་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པའི་སྟོབས་བཅུ་པོ་དོན་བཅུ་པོ་ལ་ནུས་པ་ཐོགས་པ་མེད་པ་མཁྱེན་པའི་མཚན་ཉིད་ཅན་ནི་ལྷ་མོ་བཅུ་པོའི་དེ་ཁོ་ན་ཉིད་ཡིན་ནོ། །མི་འཇིགས་པ་བཞིའི་བདག་ཉིད་ནི་གོ་རིམས་བཞིན་དུ་ཡེ་ཤེས་དང༌། སྤངས་པ་དང༌། མི་མཐུན་པའི་ཕྱོགས་སྟོན་པ་དང༌། གཉེན་པོའི་ཕྱོགས་སྟོན་པ་ལ་བསྙེངས་པ་མི་མངའ་བར་སོ་སོར་མཁྱེན་པའོ། །མི་འཇིགས་པ་བཞི་པོ་དེ་དག་ནི་སྒོ་སྲུང་རྣམས་ཀྱི་དེ་ཁོ་ན་ཉིད་ཡིན་ནོ། །ཡོངས་སུ་དག་པ་བཞི་པོ་དང༌། བག་ཆགས་ཡང་དག་པར་བཅོམ་པ་དང༌། རྣམ་པ་ཐམས་ཅད་ཀྱི་མཆོག་མཁྱེན་པ་ནི་དཀྱིལ་འཁོར་གྱི་བདག་པོའི་དེ་ཁོ་ན་ཉིད་དོ། །སངས་རྒྱས་ཀྱི་ཆོས་ལྷག་མ་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་སྟེ། ཡན་ལག་འགའ་ཡིས་ཁྱད་པར་དུ་གྱུར་པ་རྣམས་ཀྱི་དེ་ཁོ་ན་ཉིད་ཡིན་ནོ། །དེ་ལ་སྟོབས་ལ་སོགས་པའི་མི་མཐུན་པའི་ཕྱོགས་ལས་དབེན་པའི་སེམས་ཉིད་ནི་སྟོབས་ལ་སོགས་པ་ཡིན་ནོ། །དེ་བས་ན། སྟོབས་སོགས་ཚང་ཞིང་དྲི་མ་མེད། །ཅེས་བྱ་སྟེ། སྟོབས་ལ་སོགས་པ་ལུས་པ་མེད་པ་དྲི་མ་མེད་པའི་ཆོས་ཀྱི་རང་བཞིན་ནོ། །དེ་ཉིད་ཀྱི་ཕྱིར་ལྷ་རྣམས་ཀྱི་བདག་ཉིད་ཅན་ཡང་ཡིན་ནོ། །གཞན་ཡང་ཐུན་མོང་དུ་གྱུར་པའི་ལྷ་རྣམས་ཀྱི་དེ་ཁོ་ན་ཉིད་བསྟན་པའི་ཕྱིར། རྣམ་པར་མི་རྟོག་ཅེས་བྱ་བ་ལ་སོགས་པ་སྨོས་ཏེ། གང་གི་ཕྱིར་འདི་ནི་ལྷ་ཐམས་ཅད་ནི་ཤེས་རབ་དང་ཐབས་ཀྱི་བདག་ཉིད་ཅན་ཡིན་ནོ། །དེ་ལ་ཤེས་རབ་ཀྱི་དེ་ཁོ་ན་ཉིད་ནི་ཟབ་པ་སྟེ། དེ་ཡང་རྣམ་པར་མི་རྟོག་པ་ཉིད་
ཡིན་པའི་ཕྱིར་རོ། །ཐབས་ཀྱི་དེ་ཁོ་ན་ཉིད་ནི་རྒྱ་ཆེ་བ་སྟེ། དེ་ཡང་རང་དང་གཞན་གྱི་དོན་ཕུན་སུམ་ཚོགས་པ་ལ་དབང་བྱེད་པའི་ཕྱིར་རོ། །རྣམ་པར་མི་རྟོག་པ་ཉིད་དང་དབང་བྱེད་པ་དེ་ཡང་སེམས་ཉིད་ཀྱི་རྣམ་པར་དག་པ་ཡིན་ནོ། །དེ་བས་ན་དེའི་བདག་ཉིད་ཅན་གྱི་སེམས་ནི་ལྷ་ཐམས་ཅད་ཀྱི་བདག་ཉིད་ཅན་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་ཇི་སྐད་དུ་བཤད་པའི་ཚུལ་གྱིས་སེམས་ཀྱི་ཆོས་རྣམས་ཉིད་ལྷ་རྣམས་ཡིན་ན་སེམས་ཀྱི་ཆོས་ཐ་དད་པ་ལ་སོགས་པ་དེ་ཡང་ཅི་སེམས་ལས་ཐ་དད་པ་ཡིན་ནམ་ཐ་མི་དད་པ་ཡིན། ཐ་མི་དད་པ་ཡིན་ན་དེའི་བདག་ཉིད་ཅན་གྱིས་སེམས་གཅིག་ཡིན་ནམ་དུ་མ་ཡིན་ཞེ་ན། དེའི་ཕྱིར། སོ་སོ་རང་རིག་ཆོས་ཡིན་ཕྱིར། །དབྱེ་ཡོད་དབྱེ་མེད་སོགས་མི་གནས། །ཞེས་བྱ་བ་སྨོས་ཏེ། རང་རིག་པའི་དད་པ་ལ་སོགས་པའི་ཆོས་རྣམས་གང་ཡིན་པ་དེ་ལ་དེ་སྐད་ཅེས་བྱའོ། །དེའི་ངོ་བོ་ཉིད་ནི་དེ་ཉིད་དོ། །དེ་ཡང་རིག་ཅིང་ཚོར་བཞིན་པའི་ཆོས་ཐམས་ཅད་ནི་སེམས་ལས་ལོགས་ཤིག་ན་མེད་དེ། སེམས་དང་ཡང་དག་པར་རིག་པ་གཉིས་ནི་ནམ་མཁའ་གསལ་བའི་མཚན་ཉིད་ཅན་ཡིན་པའི་ཕྱིར་རོ། །དབྱེ་བ་མེད་པ་ཡང་མ་ཡིན་ཏེ། སེམས་གཅིག་ལས་དེ་རྣམས་ཐ་མི་དད་ན་གཅིག་བུ་ཉིད་དུ་ཐལ་བར་འགྱུར་བའི་ཕྱིར་རོ། །དེ་ལྟ་ན་ནི་སེམས་ཉིད་གཅིག་པ་དང༌། དུ་མར་འགྱུར་རོ་ཞེ་ན་མ་ཡིན་ཏེ། ཐ་མི་དད་པར་ཡང་དག་པར་རིག་པའི་ཕྱིར་རོ། །དུ་མ་ཡིན་ན་ནི་སྐྱེས་བུ་དུ་མའི་སེམས་དང་འདྲ་བར་སོ་སོར་རིག་པར་འགྱུར་བ་ཡིན་ནོ། །དེ་ལྟ་ན་ནི་སེམས་གཅིག་པུ་འདི་ཉིད་རྣམ་པར་དུ་མ་ཡིན་ནོ་ཞེ་ན་མ་ཡིན་ཏེ། སེམས་གཅིག་ལས་ཐ་མི་དད་པའི་རྣམ་པ་རྣམས་དུ་མ་ཉིད་ཡིན་པར་འགལ་བའི་ཕྱིར་རོ། །གཅིག་པ་དང་དུ་མར་འགྱུར་རོ་ཞེ་ན། ཐ་དད་པའི་ཕྱོགས་ནི་སྔར་སུན་ཕྱུང་བ་ཉིད་ཡིན་པའི་ཕྱིར་རོ། །དེ་བས་ན་གང་གི་ཕྱིར་འདི་དག་ཐམས་ཅད་ནི་སོ་སོ་རང་གིས་རིག་པ་ཡིན་ཞིང་སེམས་འདི་ཉིད་ཀྱིས་ཡང་དག་པར་རིག་པ་ཡིན་ནོ། །དེའི་ཕྱིར་སེམས་ཁོ་ན་ལས་དབྱེ་བ་ཡོད་པ་ཡང་མ་ཡིན། དབྱེ་བ་མེད་པ་ཡང་མ་ཡིན་པར་རྣམ་པར་གནས་སོ། །ཆོས་འདི་དག་དང་ལྡན་པ་ཉིད་ནི་གཅིག་ཉིད་དུ་ཡང་མ་ཡིན་ལ་དུ་མ་ཉིད་དུ་ཡང་གནས་པ་མ་ཡིན་ནོ། །དེས་ན་འདི་ལྟར་དབྱེ་བ་ཡོད་པ་དང་དབྱེ་བ་མེད་
པའི་བདག་ཉིད་ཅན་ནམ། གཅིག་པ་ཉིད་དང་དུ་མ་ཉིད་དུ་འགྱུར་བའི་གཉིས་མེད་པས་སེམས་དེ་ནི་གཉིས་སུ་མེད་པ་ཉིད་ཡིན་ལ། གཉིས་སུ་མེད་པའི་ཕྱིར་སྤྲོས་པ་མེད་པ་ཡིན་ནོ། །གལ་ཏེ་དེ་ལྟར་སེམས་སྤྲོས་པ་མེད་པ་ལ་ཅིའི་ཕྱིར་སྤྲོས་པར་བྱས་ཤེ་ན་དེའི་ཕྱིར་དེ་ལྟར་ཞེས་བྱ་བ་ལ་སོགས་པ་སྨོས་ཏེ། དེ་ལྟར་ཞེས་བྱ་བ་ནི་ལྷ་རྣམས་ཀྱི་སྒོ་དང༌། དེ་ཁོ་ན་ཉིད་ཀྱི་སྒོ་ནས་སྤྲོས་པར་བྱས་པའི་སེམས་ཀྱི་འབྲས་བུར་གྱུར་པ་ནི་ཕ་རོལ་ཏུ་ཕྱིན་པ་ལ་སོགས་པ་སངས་རྒྱས་ཀྱི་ཆོས་རྣམས་སུ་འགྱུར་ཞིང་སྣང་བ་ཐོབ་པར་འགྱུར་བ་ཡིན་གྱི། གཞན་དུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་སེམས་ཙམ་དུ་བསྒོམས་ན་རྣམ་ཤེས་མཐའ་ཡས་སྐྱེ་མཆེད་དང་འདྲ་བར་འཇིག་རྟེན་པའི་ཏིང་ངེ་འཛིན་ཙམ་ཐོབ་པར་འགྱུར་ལ། འོན་ཏེ་སྟོང་པ་ཉིད་ཁྱད་པར་དུ་བསྒོམས་ན་ནི་དེ་ཡང་ཡོངས་སུ་མྱ་ངན་ལས་འདས་པ་ཙམ་དུ་འགྱུར་ཏེ། སངས་རྒྱས་ཀྱི་ཆོས་རྣམས་སྦྱང་བའི་ལས་རྫོགས་པར་བྱེད་པའི་ཕྱིར་རོ། །ཡང་ན་ལྷའི་བདག་ཉིད་ཅན་འབའ་ཞིག་ཙམ་བསྒོམས་ན་དེ་ལྟ་ན་ནི་དེ་ཙམ་གྱིས་འཚང་རྒྱ་བ་ཉིད་དུ་མི་འགྱུར་ཏེ། ལས་རྫོགས་པ་མཚང་བའི་ཕྱིར་རོ། །ཡང་ན་ལྷ་རྣམས་ཀྱི་དེ་ཁོ་ན་ཉིད་བསྒོམ་གྱི་ལྷ་རྣམས་མ་ཡིན་ན་ནི་དེ་ལྟ་ན་ཡང་བསྐལ་པ་གྲངས་མེད་པ་མང་པོས་སངས་རྒྱས་ཉིད་ཐོབ་པར་འགྱུར་གྱི་མྱུར་དུ་ནི་མ་ཡིན་ནོ། །དེ་བས་ན་གཉི་ག་བསྒོམ་པ་ནི་ཤིན་ཏུ་ཡིད་དུ་འོང་བ་ཡིན་པའི་ཕྱིར་དང༌། བྱིན་གྱི་རླབ་ཀྱི་ཁྱད་པར་གྱིས་མཆོག་ཏུ་མྱུར་བར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་འཐོབ་པར་འགྱུར་རོ། །ཐིག་ལེ་དང་ཕྲ་མོའི་རྣལ་འབྱོར་པ་གཉིས་ཀྱང་ཤིན་ཏུ་བསླབས་པའི་ལྷག་པར་མོས་པ་ཉིད་ཀྱིས་དེ་ཁོ་ན་ཉིད་བསྒོམ་པར་བྱ་བ་ཡིན་པས་དང་པོར་ནི་མ་ཡིན་གྱི་བསྒོམས་པའི་རྗེས་ལ་རང་བཞིན་བརྟན་པར་བྱ་བ་ཡིན་པས་དེ་ལ་ནི་མ་ཚང་བ་ཅི་ཡང་མེད་ལ་ལས་ཀྱི་རྒྱལ་པོའི་མཆོག་གི་ཕྱོགས་གཅིག་ཡིན་པ་དང་དེ་གཉི་ག་ཡང་སེམས་ལ་དབང་ཐོབ་པར་བྱ་བའི་ཕྱིར་ཡིན་གྱི། རང་རྒྱུད་དུ་བྱང་ཆུབ་སྒྲུབ་པ་མ་ཡིན་བས་དེ་ལྟ་ན་ཡང་ཉེས་པ་མེད་དོ་ཞེས་བྱ་བའི་ཐ་ཚིག་གོ །ལྷའི་དེ་ཁོ་ན་ཉིད་བཤད་པའི་རྗེས་ཐོགས་ལ་སློབ་དཔོན་གྱི་ལས་བཤད་པར་བྱ་བ་ཡིན་པས་དེ་ནི། དེ་ནས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་
ནས་རྣལ་འབྱོར་དམ་ཚིག་མཆོག །ཅེས་བྱ་བ་ནས། དེ་རང་ཉིད་ཅེས་བྱ་བའི་བར་གྱིས་སྟོན་ཏོ། །འདིར་སློབ་དཔོན་གྱི་ལས་ནི་གཉིས་ཏེ། དངོས་གྲུབ་གསོལ་བ་འདེབས་པ་ལ་སོགས་པའི་ཆོ་ག་ནི་ཚིགས་སུ་བཅད་པ་ལྔས་སྟོན་ཏོ། །རབ་ཏུ་གནས་པའི་ཆོ་ག་ནི་ཚིགས་སུ་བཅད་པ་གསུམ་གྱིས་སྟོན་ཏོ། །འདིར་རྣལ་འབྱོར་ཞེས་བྱ་བ་ནི་ལུས་ཀྱི་ཡང་དག་པར་སྦྱོར་བ་ཞེས་བཤད་དོ། །ཡོན་ཏན་ནི་དད་པ་དང་དུལ་བ་ལ་སོགས་པ་དང༌། ལས་དང་རྗེས་སུ་མཐུན་པའོ། །ཁ་ཕྱེ་ལ་ཞེས་བྱ་བ་ནི་དབང་པོ་གཉིས་ཡང་དག་པར་སྦྱོར་བ་སྟེ། རྗེས་བསྒྲུབ་བྱ་ཞེས་འོག་མ་དང་སྦྱར་བར་བྱའོ། །བརྟག་ཅེས་བྱ་བ་ནི་སྤྲུལ་པའི་དཀྱིལ་འཁོར་དུའོ། །དེའི་རྗེས་ལ་ནི་གསོལ་བ་གདབ་པར་བྱའོ། །སྐྱེས་བུའི་མཐར་ཐུག་པས་དབང་བསྐུར་ཞེས་བྱ་བ་ནི་སློབ་དཔོན་དུ་དབང་བསྐུར་བའི་བར་གྱིས་དབང་བསྐུར་རོ་ཞེས་བྱ་བའི་ཐ་ཚིག་གོ ། བཤད་གང་ཞེས་བྱ་བ་ནི་སྔར་ཇི་ལྟར་བཤད་པ་དེ་བཞིན་ནོ་ཞེས་བྱ་བའི་དོན་ཏོ། །དེ་ཡང་ཡི་གེ་གསུམ་ལ་སོགས་པའི་སྔགས་ཀྱིས་མངོན་པར་བཟླ་བར་བྱ་བ་དང༌། ཕྱིའི་ཁྲུས་ཀྱང་བྱེད་དུ་གཞུག་གོ །རང་ཉིད་ཅེས་བྱ་བ་ནི་སྐུ་གཟུགས་ལ་སོགས་པ་དེ་དག་ཉིད་དོ། །འཁོར་ལོས་སྒྱུར་འདྲ་ཞེས་བྱ་བ་ནི། འཁོར་ལོས་སྒྱུར་བ་ལྟ་བུ་ཞེས་བྱ་བའི་ཐ་ཚིག་གོ །ཡང་ན་འཁོར་ལོས་སྒྱུར་བའི་ཆ་ལུགས་དང་ལྡན་པར་གྱུར་པས་ཞེས་བྱ་བའི་དོན་ཏོ། །འདི་སྐད་སྟོན་ཏེ་དཀྱིལ་འཁོར་གྱི་ས་ལས་ཕྱི་རོལ་དུ་འདོམ་གང་བའི་གྲུ་བཞི་པ་ལ་དཔངས་སུ་ཁྲུད་ཡོད་པ་ཉེས་པ་ཐམས་ཅད་དང་བྲལ་བ་བཀྲ་ཤིས་པ་རྣམས་ཀྱིས་ཉེ་བར་མཛེས་པར་བྱས་པའི་ཁྲུས་སའི་སྟེགས་བུ་བྱེད་དུ་བཅུག་ལ། དེའི་དབུས་སུ་གནས་པའི་ཁྲི་ལ་བཞུགས་པའི་ལྷ་ལ་དང་པོར་སྦྱང་བ་བྱས་ལ། བའི་རྣམ་ལྔས་བྱུགས་ཏེ་རྒྱལ་བའི་བཀྲ་ཤིས་པའི་ཚིགས་སུ་བཅད་པས་བསྟོད་ཅིང་རོལ་མོ་དང་གླུ་དབྱངས་སྣ་ཚོགས་དང་ལྡན་པ་དང༌། རྒྱལ་པོ་དབང་བསྐུར་བའི་ཚུལ་དུ་གདུགས་དཀར་པོ་ལ་སོགས་པ་བཟུང་ལ། དྲི་ཞིམ་པོ་དང་སྦྱར་བའི་ཆུ་དང༌། རྣམ་པར་རྒྱལ་བ་ལ་སོགས་པའི་བུམ་པས་ཁྲུས་བྱེད་དུ་གཞུག་གོ །དེ་ལ། གླེགས་བམ་རས་
རིས་འབག་ལ་སོགས། །ལྷ་ལ་ཆོ་ག་ཤེས་པ་ཡིས། །མེ་ལོང་དག་གིས་ཁྲུས་བྱ་སྟེ། །ལུགས་མ་སོགས་གཞན་དངོས་སུའོ། །དེ་ནས་གོས་འཇམ་པོས་སྐུ་ཕྱིས་ལ་ཐུགས་ཀ་དང༌། དབུ་དང༌། མགུལ་དང༌། ཕྱག་གི་རྩེ་མོ་རྣམས་སུ་བྱུགས་ལ་ཡང་དག་པར་མཆོད་དེ། སྐུ་གཟུགས་ལ་སོགས་པའི་ཐུགས་ཀའི་ཟླ་བ་ལ་འདུས་པའི་དཀྱིལ་འཁོར་བསྐྱེད་ལ། ཡེ་ཤེས་ཀྱི་དཀྱིལ་འཁོར་གཞུག་པ་ལ་སོགས་པའི་ཆོ་ག་བྱས་ནས་སྐྱེས་བུའི་དབང་བསྐུར་བའི་མཐར་ཐུག་པས་དབང་བསྐུར་བར་བྱའོ། །འདུས་པའི་ལྷའི་གཟུགས་སུ་ངོས་མ་ཟིན་པ་རྣམས་ལ་ནི་རྡོ་རྗེ་འཆང་བའི་སྐུས་སོ། །མར་མེ་མཛད་ལ་སོགས་པ་དང༌། གཙུག་ལག་ཁང་དང་མཆོད་རྟེན་ལ་སོགས་པ་ལ་ནི་རྣམ་པར་སྣང་མཛད་ཀྱི་སྐུས་སོ། །གླེགས་བམ་ལ་སོགས་པ་ནི་འོད་དཔག་ཏུ་མེད་པ་བསམས་ལ་ཁྲུས་དང་དབང་བསྐུར་བ་ལ་སོགས་པ་བྱའོ། །སྦྱིན་སྲེག་གི་མཐར་ནི་གསེར་གྱི་ཐུར་མས་སྤྱན་ཕྱེ་ལ་ལྷ་ལ་བཤོས་གསོལ་བའི་ཕྱིར་མེ་ལྷ་གཤེགས་སུ་གསོལ་ཟིན་པའི་ཐབ་ཏུ་མར་གྱི་ལྷག་མ་དང་འོ་མ་དང༌། ང་རྒྱལ་དང་བཅས་པའི་ཚུལ་གྱིས་སྔགས་ཟློས་ཤིང༌། བཤོས་སུ་བྱ་བའི་གཡོས་བྱའོ། །ད་ནི་གསང་བ་དང་ཤེས་རབ་ཀྱི་དབང་བསྐུར་བ་བརྗོད་པར་བྱའོ། །དེར་སློབ་མ་སྤྲོ་བ་བསྐྱེད་པ་དང་དབང་བསྐུར་བའི་ཁྱད་པར་ནི་ཤེས་རབ་ཐབས་ཀྱི་ཞེས་བྱ་བ་ལ་སོགས་པ་ཚིགས་སུ་བཅད་པ་ཕྱེད་དང་གཉིས་ཀྱིས་སྟོན་ཏོ། །མཆོག་ནི་དམ་པ་སྟེ་དེ་ཁོ་ན་ཉིད་མངོན་སུམ་དུ་རྟོགས་པར་བྱེད་པའི་ཕྱིར་རོ། །གཉིས་ནི་རྒྱུ་མཐུན་པའི་འབྲས་བུའོ། །གསུམ་ནི་རྣམ་པར་སྨིན་པའི་འབྲས་བུའོ། །གཉིས་ནི་དབང་གི་འབྲས་བུ་སྟེ། ལུས་ཀྱི་མངོན་སུམ་དུ་བྱས་པ་དང་ཡེ་ཤེས་མངོན་སུམ་དུ་བྱས་པས་སྒྲིབ་པ་ཐམས་ཅད་སྤངས་པའི་ཕྱིར་རོ། །དེ་ནས་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གྱིས་ནི་གསང་བའི་དབང་བསྐུར་བ་སྟོན་ཏོ། །བདེ་བ་དམ་པ་ནི་ཐུབ་པའི་དབང་པོའི་རྫས་ཏེ། དབབ་བར་བྱའོ་ཞེས་བྱ་བར་སྦྱར་རོ། །བརྟན་པའི་བློ་གྲོས་ནི་ཡེ་ཤེས་ལ་ཐེ་ཚོམ་མེད་པར་གྱུར་པས་སོ། །སྣ་ཚོགས་བཞིན་ཏེ་སྣ་ཚོགས་གྱུར། །ཅེས་བྱ་བ་ནི་རྡོ་རྗེ་འཆང་བ་དང་འདྲ་བར་སངས་རྒྱས་ཐམས་ཅད་ཀྱི་རང་བཞིན་ནོ། །འདི་
ཞེས་བྱ་བ་ནི་ལུས་ཀྱི་མངོན་དུ་བྱས་པའོ། །གཟུངས་འདི་ཞེས་བྱ་བ་ལ་སོགས་པ་ཚིགས་སུ་བཅད་པ་གཉིས་ཀྱིས་ནི་ཤེས་རབ་དང་ཡེ་ཤེས་ཀྱི་དབང་བསྐུར་བ་བསྟན་པ་ཡིན་ནོ། །བརྟགས་ཞེས་བྱ་བ་ནི་ཉེ་བར་མཚོན་པར་བྱའོ། །འདི་ཞེས་བྱ་བ་ལ་སོགས་པའི་ཚིགས་སུ་བཅད་པ་ནི་སློབ་དཔོན་གྱིས་བརྗོད་པར་བྱ་བའོ། །ནོར་ལྡན་ཁོངས་སུ་ཞེས་བྱ་བ་ནི་མཚན་ཉིད་ཀྱི་ཁྱད་པར་བཤད་པའོ། །བལྟ་ཞེས་བྱ་བ་ནི་མཚན་པར་བྱ་བའོ། །འདི་ནི་ཡེ་ཤེས་མངོན་སུམ་དུ་བྱེད་པའོ། །དཀྱིལ་འཁོར་ཞེས་བྱ་བ་ལ་སོགས་པ་ཚིགས་སུ་བཅད་པས་ནི་གསང་བ་བཤད་པའི་དུས་སུའོ། །དབང་བསྐུར་འདི་ནི་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་གྱིས་ནི་གསང་བ་བཤད་པ་བསྟན་ཏོ། །འདུས་པའི་གཞུང་གིས་ཤེས་རབ་དང་ཡེ་ཤེས་ཀྱི་མཐར་ཐུག་པས་གང་དབང་བསྐུར་བའི་རྒྱུ་དེས་ཇི་ལྟར་རྡོ་རྗེ་འཆང་བ་ལ་སོགས་པ་དངོས་གྲུབ་ཀྱི་མཆོག་ཐོབ་པར་འགྱུར་བ་དེ་ལྟར། བྱང་ཆུབ་སྤྱོད་མཆོག་དེ་བཞིན་དུ། །དགེ་བའི་ཚུལ་ནི་གཞན་གསུངས་པས། །ཞེས་བྱ་བ་སྟེ། བྱང་ཆུབ་ཀྱི་སྤྱོད་པ་ནི་ཕ་རོལ་ཏུ་ཕྱིན་པའི་སྤྱོད་པའོ། །སོགས་པའི་སྒྲས་ནི་བྱ་བའི་རྒྱུད་ལ་སོགས་པའི་སྔགས་ཀྱི་སྤྱོད་པའོ། །གཞན་ཞེས་བྱ་བ་ནི་རྒྱུད་ཀྱི་ནང་དུ་གཏོགས་པའི་དབང་བསྐུར་བ་གཞན་དག་གིས་སོ། །གང་བཤད་པ་ཞེས་བྱ་བ་ནི་བཅོམ་ལྡན་འདས་ཀྱིས་དཔལ་མཆོག་དང་པོ་ལས་སོ། །དཔལ་གསང་བ་འདུས་པ་ལས་ཚིགས་སུ་བཅད་པའི་དོན་གཞན་དུ་བསྒྱུར་བའོ། །དེ་ལ། ཇི་ལྟར་འདི་ཡིས་དངོས་གྲུབ་མཆོག །ཅེས་བྱ་བ་ནི་རྐང་པ་བཞི་པ་ཡིན་པ་ལ་གཞུང་རྩོམ་པར་མཛད་བས་འདིར་ཡོངས་སུ་བསྒྱུར་བ་ཡིན་ཏེ། དོན་ཡོངས་སུ་བསྒྱུར་བ་ཉིད་ཀྱིས་གསལ་བར་བྱ་བའི་ཕྱིར་རོ། །དམ་ཚིག་ལྔ་ནི་བཟའ་བར་བྱ་བའོ། །ལྷག་མ་རྣམས་ནི་བསྲུང་བར་བྱ་བའོ། །དེ་ནས་ཞེས་བྱ་བ་ལ་སོགས་པས་ནི་ལུང་བསྟན་པ་བཤད་པ་ཡིན་ནོ། །གཟེངས་བསྟོད་པ་ཞེས་བྱ་བ་ནི་ཕྱག་རྒྱས་སོ། །གཡོན་པ་ཞེས་བྱ་བ་ལ་སོགས་པའི་ཚིགས་སུ་བཅད་པ་ཕྱེད་ནི་འདིའི་མཚན་ཉིད་ཡིན་ནོ། །གཡོན་པ་ཞེས་བྱ་བ་ནི་གཡོན་པས་སོ། །ཨོཾ་ཞེས་བྱ་བ་ལ་སོགས་པ་ནས་སྭཱའི་བར་ནི་སྔགས་ཡིན་
ནོ། །སྲིད་པའི་ངན་འགྲོ་ལས་ཞེས་བྱ་བ་ནི་སྲིད་པའི་ནང་དུ་ཆུད་པས་སོ། །མཐའ་ནི་འཆིང་བ་སྟེ་འཆིང་བ་ལས་འདས་པ་ནི་སྲིད་པའི་མཐའ་སྟེ། མི་གནས་པའི་མྱ་ངན་ལས་འདས་པའོ། །འདི་ཡིས་ཞེས་བྱ་བ་ནི་གཟེངས་བསྟོད་པའི་ཕྱག་རྒྱས་སོ། །སྔགས་པ་ཞེས་བྱ་བ་ཇི་སྐད་བཤད་པའི་སྔགས་དང་ལྡན་པའོ། །འགྲོ་བ་ཀུན་གྱི་བདག་ཅེས་བྱ་བ་ནི་རྡོ་རྗེ་འཆང་བའི་རང་བཞིན་ཅན་གྱི་སློབ་དཔོན་གང་ཡིན་པ་བྱང་ཆུབ་ཏུ་ལུང་བསྟན་པ་ན། དེ་ལ་ཕྱག་རྒྱ་དང༌། སྔགས་དང༌། རྡོ་རྗེ་འཛིན་པའི་མཐུ་འདི་དག་གིས་བདེ་བར་གཤེགས་པ་ཐམས་ཅད་དང༌། འཕགས་པ་རྣམས་ཀྱིས་ཀྱང་གསུང་གཅིག་ཏུ་ལུང་སྟོན་པར་མཛད་དོ་ཞེས་བཅོམ་ལྡན་འདས་ཀྱིས་དཔལ་མཆོག་དང་པོ་ལས་གསུངས་པ་ཡིན་ནོ། །དེ་ནས་རྗེས་སུ་གནང་བའི་དབང་བསྐུར་བར་བྱ་སྟེ། དེ་ལ་དང་པོར་བདག་པོའི་སྦྱོར་བ་དང་ལྡན་པས་གསེར་གྱི་ཐུར་མ་ལ་བཟླས་པ་བྱས་པ་ཐོགས་ཏེ། མདུན་དུ་གནས་ནས་འདི་སྐད་ཅེས་བྱ་བ་བརྗོད་པར་བྱའོ། །ཇི་ལྟར་མིག་མཁན་རྒྱལ་པོ་ཡིས། འཇིག་རྟེན་རབ་རིབ་བསལ་བ་ལྟར། །བུ་ཁྱོད་ཀྱི་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཨོཾ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿསློབ་མའི་མིག་གཉིས་སུ་ཡི་གེ་པྲཾ་བསམས་ལ་མིག་ཐུར་གྱིས་བྱུག་གོ །དེ་ནས་མེ་ལོང་བསྟན་ལ་ཆོས་ཀྱི་མཚན་ཉིད་བསྟན་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། །དག་ཅིང་གསལ་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཀུན་དུ་བྱུང༌། །ངོ་བོ་ཉིད་མེད་གནས་མེད་པར། །དེ་ལྟར་ཆོས་འདི་ཤེས་ནས་སུ། །སེམས་ཅན་དོན་ནི་མཉམ་མེད་བྱོས། །འོན་ཀྱང་སངས་རྒྱས་སྲས་སུ་སྐྱེ། །དེ་ནས་དབྱངས་ཀྱི་ཡི་གེ་ཐ་མ་ལས་བྱུང་བའི་དྲིལ་བུ་དཀྲོལ་ལ་བྱིན་ནས་ཐམས་ཅད་ནམ་མཁའི་མཚན་ཉིད་དེ། ནམ་མཁའ་ལ་ཡང་མཚན་ཉིད་མེད། །ནམ་མཁའ་དང་ནི་མཉམ་སྦྱོར་བས། །ཀུན་མཆོག་མཉམ་པ་ཉིད་དུ་གསལ། །དེ་ནས་ཡི་གེ་ཆོས་གཞུ་བྱིན་ལ་འདི་སྐད་དུ་དེ་བཞིན་གཤེགས་པ་ཐམས་ཅད་མཉེས་པར་གྱིས་ཤིག །ཅེས་བརྗོད་ལ་ཕྱོགས་བཞིར་མདའ་གཞུ་དགང་དུ་གཞུག་པ་དང༌། སྟེང་དང་འོག་ཏུ་ཡང་རེ་རེ་འཕེན་དུ་གཞུག་གོ །དེ་ནས་བཛྲ་སཏྭ་ཞེས་བྱ་བ་འདིས་མེ་ལོང་བླངས་ལ་འདི་སྐད་
ཅེས་བརྗོད་པར་བྱ་སྟེ། རྡོ་རྗེ་སེམས་དཔའ་མེ་ལོང་ལྟར། །དག་ཅིང་གསལ་ལ་དྲི་མ་མེད། །སངས་རྒྱས་ཀུན་བདག་རང་ཉིད་ནི། །བུ་ཁྱོད་ཀྱི་ནི་སྙིང་ལ་གནས། །གང་འདི་དེ་བཞིན་གཤེགས་པ་ཐམས་ཅད་ཀྱི་བདག་པོ་བྱང་ཆུབ་ཀྱི་སེམས་ནི་འདི་ཡིན་པར་ཤེས་པར་གྱིས་ཤིག །དེ་ནས་ཨོཾ་བཛྲ་ཧི་ཏུ་མཾ་ཞེས་བྱ་བས་འཁོར་ལོ་རྐང་པ་གཉིས་ཀྱི་བར་དུ་བཞག །ཨོཾ་བཛྲ་བྷ་ཥ་རཾ་ཞེས་བྱ་བས་དུང་ལག་པ་གཡས་སུ་སྦྱིན། །དབྱངས་ཀྱི་ཡི་གེ་དང་པོས་གླེགས་བམ་དང་དབྱངས་ཀྱི་ཡི་གེ་ཐ་མས་དྲིལ་བུ་གཡོན་དུ་བྱིན་ལ་འདི་སྐད་ཅེས་བརྗོད་དོ། །དེང་ནས་བརྩམས་ཏེ་སེམས་བསྐྱེད་པ། །ཙམ་གྱིས་ཆོས་ཀྱི་འཁོར་ལོ་བསྐོར། །དི་རིང་ཕན་ཆད་འཇིག་རྟེན་ལ། །སྐྱོབ་པ་རྣམས་ཀྱིས་འཁོར་ལོ་བསྐོར། །ཆོས་ཀྱི་དུང་ནི་བླ་མེད་པས། །ཀུན་དུ་མ་ལུས་གང་བར་གྱིས། །སོ་མ་ཉི་ཡིད་གཉིས་མི་བྱ་ཞིང༌། །དོགས་པ་མེད་པའི་སེམས་ཀྱིས་སུ། །གསང་སྔགས་སྤྱོད་པའི་ཚུལ་གྱི་མཆོག །འཇིག་རྟེན་འདི་ལ་རབ་ཏུ་སྒྲོགས། །དེ་ལྟར་བྱས་ན་སངས་རྒྱས་ལ། །ཕན་ཐོགས་དྲིན་དུ་གཟོ་ཞེས་བྱ། །རྡོ་རྗེ་འཛིན་པ་དེ་ཀུན་ཀྱང༌། །ཀུན་དུ་ཁྱེད་ལ་སྲུང་བར་བྱེད། །ཡང་རང་རང་གི་འཁོར་ལོས་སྒྱུར་བའི་སངས་རྒྱས་ཀྱི་སྦྱོར་བ་དང་ཇི་ལྟ་བ་བཞིན་དུ་ལྡན་པར་བྱས་ལ། །མདོར་ན་འཇིག་རྟེན་ཐམས་ཅད་དུ། །སེམས་ཅན་ཀུན་ལ་ཕན་པའི་ཕྱིར། །ཇི་ལྟར་འདུལ་བ་སྣ་ཚོགས་པའི། །ཆོས་ཀྱི་འཁོར་ལོ་བསྐོར་བར་གྱིས། །ཞེས་བྱ་བ་དང༌། དེ་བཞིན་དུ་རྡོ་རྗེ་དང༌། རལ་གྲི་དང་པདྨ་དང༌། ནོར་བུའི་འཁོར་ལོ་བསྐོར་བར་གྱིས། །ཞེས་བྱ་བས་རྗེས་སུ་གནང་བ་སྦྱིན་པར་བྱའོ། །ཚིགས་སུ་བཅད་པ་ལྔ་པོ་འདིས་ནི་སྐྱེས་བུའི་མཐར་དབང་བསྐུར་བ་སྦྱིན་པར་བྱའོ། །ལྷག་པའི་རྗེས་སུ་གནང་བ་ནི་ངོ་བོ་ཉིད་ཀྱིས་ཞེས་བྱ་བ་ལ་སོགས་པའི་ཚིགས་སུ་བཅད་པ་དྲུག་གིས་བསྟན་པ་ཡིན་ནོ། །དུལ་བར་བྱས་པ་ནི་འདུལ་བའོ། །གཙང་བས་ཞེས་བྱ་བ་ནི་ཇི་སྐད་དུ་བཤད་པའི་ཆོ་ག་རྣམས་ཀྱིས་རྣམ་པར་དག་པའོ། །ཐུན་མོང་ཅིག་ཤོས་ཞེས་བྱ་བ་ནི་ཐུན་མོང་དང་མཆོག་ཅེས་བྱ་བའི་ཐ་ཚིག་གོ །མི་སྣང་ཞེས་བྱ་བ་ནི་མི་སྣང་བའི་དངོས་གྲུབ་སྟེ། དེ་གྲུབ་ན་སྟོང་སྤྱི་ཕུད་ཀྱི་འཇིག་རྟེན་གྱི་ཁམས་ཀྱི་བདག་པོར་འགྱུར་རོ། །མངོན་པར་ཤེས་པ་གྲུབ་ན་ནི་སྟོང་གཉིས་པ་བར་མའི་འཇིག་རྟེན་གྱི་ཁམས་ཀྱི་བདག་པོར་འགྱུར་
རོ། །རིག་པ་འཛིན་པའི་དངོས་གྲུབ་གྲུབ་ན་སྟོང་གསུམ་པའི་འཇིག་རྟེན་གྱི་ཁམས་མཉམ་དུ་འཇིག་པ་དང་མཉམ་དུ་འཆགས་པ་ལ་དབང་བའོ། །འདི་དག་ནི་ཐུན་མོང་གི་དངོས་གྲུབ་ཡིན་ནོ། །མཆོག་ནི། རྡོ་རྗེ་ཅན་ནི་འགྲོ་ཀུན་བདག །ཅེས་སྨོས་པ་ཡིན་ཏེ། ཕྱག་རྒྱ་ཆེན་པོ་གྲུབ་ན་ནི་ཕྱོགས་བཅུའི་འཇིག་རྟེན་གྱི་ཁམས་མཉམ་དུ་འཇིག་པ་དང་མཉམ་དུ་འཆགས་པ་ཐམས་ཅད་ཀྱི་བདག་པོར་འགྱུར་རོ། །ཞི་དང་རྒྱས་སོགས་ཞེས་བྱ་བ་ནི་ལས་ཀྱི་ཚོགས་ཀྱི་དངོས་གྲུབ་བོ། །གཞན་པ་ཞེས་བྱ་བ་ནི་གཏེར་ལ་སོགས་པ་སྟེ། འདི་ནི་ནོར་གྱི་དངོས་གྲུབ་པོ། །འཁོར་ལོ་རྗེས་མཉེས་སྦྱོར་བ་ཡིས། །ཞེས་བྱ་བའི་བརྡ་མཚོན་པར་བྱེད་པའི་ཚིགས་སུ་བཅད་པ་ནི་རྡོ་རྗེའི་བདག་པོ་ཞེས་བྱ་བ་ལ་སོགས་པ་ཡིན་ནོ། །དེ་བས་ཞེས་བྱ་བ་ལ་སོགས་པ་ནི་ཉེ་བར་སྡུད་པའི་ཚིགས་སུ་བཅད་པའོ། །དེ་ནས་བསངས་ཏེ་སློབ་མ་ཡི། །སྙིང་ག་ཉེ་བར་བྱུགས་ནས་ནི། །ཀུན་བྱེད་རིག་པ་བཟླས་པར་བྱ། །སྲུང་སྐུད་ལག་བ་གཡས་པར་གདགས། །དེ་ནས་བླ་མ་བདག་ཉིད་ཀྱིས། །དེ་ཡི་སྤྱི་བོར་གདུགས་ཀྱང་གཟུང༌། །ཐལ་མོ་སྦྱར་བ་བྱས་ནས་ནི། །དཀྱིལ་འཁོར་ལེགས་པར་བསྐོར་དུ་གཞུག །གདུགས་དང་བཅས་པས་སྒོ་ཕྱོགས་སུ། །སྤྱི་བོ་བཏུད་དེ་ཕྱག་འཚལ་གཞུག །སློབ་མ་འདི་ནི་ཕུལ་བ་ལགས། །གསང་སྔགས་རྒྱུད་ནི་འཛིན་པར་འགྱུར། །བླ་མས་དེ་སྐད་སྨྲས་ནས་སུ། །གདུགས་བཞག་ནས་ནི་སློབ་མ་དེ། །ལག་པས་ལེགས་པར་བླང་བར་བྱའོ། །དེ་ནས་འདི་སྐད་བསྒོ་བར་བྱ། །ད་ནི་དཀྱིལ་འཁོར་སློབ་དཔོན་གྱུར། །གསང་སྔགས་རྒྱུད་ཀྱང་འཛིན་པར་འགྱུར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀུན་གྱིས་བཀུར་བར་འགྱུར། །སེམས་ཅན་རྣམས་ལ་བརྩེ་བའི་ཕྱིར། །ཁྱོད་ཀྱིས་དཀྱིལ་འཁོར་ཆོ་ག་བཞིན། །ནན་ཏན་བསྐྱེད་དེ་བྲི་བར་བྱ། །སྒྲུབ་པ་པོ་ཡང་རྒྱུད་ལ་སྦྱོར། །དེ་ནས་གསང་སྔགས་རང་ཉིད་ཀྱིས་བརྒྱ་རྩ་བརྒྱད་བཟླས་ལ། བཅོམ་ལྡན་འདི་ལ་སྩལ་ལགས་ཀྱིས། །འདི་ལ་འགོ་བར་མཛད་དུ་གསོལ། །ཞེས་བྱ་བས་སྦྱིན་བར་བྱའོ། །སློབ་མས་ཀྱང༌། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་འགོ་བར་མཛད་དུ་གསོལ། །ཞེས་བྱ་བ་འདིས་བླངས་ལ་བཟླ་བར་བྱའོ། །དེ་ནས་རང་གི་ལྷའི་ཕྱག་རྒྱ་བཞི་བསླབས་ལ་ཁྱེད་ཀྱིས་འདི་
ཕྱག་རྒྱ་ལ་མི་མཁས་པ་དང༌། གཞན་སུ་ཡང་རུང་བལ་སྔགས་སམ་ཕྱག་རྒྱ་གཅིག་ཙམ་ཡང་བསྟན་པར་མི་བྱའོ། །དེ་ཅིའི་ཕྱིར་ཞེ་ན། འདི་ལྟར་སེམས་ཅན་དེ་དཀྱིལ་འཁོར་མ་མཐོང་བར་སྔགས་དང་ཕྱག་རྒྱ་ལ་སྦྱོར་བས་འབྲས་བུ་མ་ཐོབ་པ་དང་ཐེ་ཚོམ་དུ་འགྱུར་བས་དུས་མ་ཡིན་པར་འཆི་བའི་དུས་བྱས་ནས་སེམས་ཅན་དམྱལ་བར་ལྟུང་བར་འགྱུར་རོ། །རྒྱུ་དེས་ན་ཁྱོད་ཀྱང་ངན་འགྲོར་འགྲོ་བར་འགྱུར་རོ། །ཇི་བཞིན་ཞུགས་པ་ཞེས་བྱ་བ་ལ་སོགས་པས་ནི་དབུགས་དབྱུང་བ་བཤད་པ་ཡིན་ཏེ། དེ་ནས་ཞེས་བྱ་བ་ནི་རྗེས་སུ་གནང་བ་བྱིན་བའི་རྗེས་ཐོགས་ལའོ། །འདིས་ཀྱང་ཞེས་བྱ་བ་ནི་འོག་ནས་བཤད་པ་དཔལ་མཆོག་དང་པོ་ལས་བཤད་པ་ནི། ཚིགས་སུ་བཅད་པར་གཏོགས་པར་འགྱུར། །ཞེས་བྱ་བའི་བར་གྱིས་སོ། །ཕན་ཡོན་ནི་འབྲས་བུར་གྱུར་པའི་ཡོན་ཏན་ནོ། །དེ་ནས་ཞེས་བྱ་བ་དབུགས་འབྱིན་པ་ནི་ཕྱིར་མི་ལྡོག་པ་ཐོབ་པའི་ཕྱིར་རོ། །བརྟན་པར་བྱ་བའི་དོན་དུ་ནི་སྐུ་དང༌། གསུང་དང་ཐུགས་ཀྱི་དམ་ཚིག་གསུམ་ཡིན་ནོ། །འདི་ཞེས་བྱ་བ་ལ་སོགས་པ་ཚིགས་སུ་བཅད་པ་རྣམས་ཀྱིས་གང་དུ་དབུགས་དབྱུང་བ་དེ་ནི་དམ་ཚིག་གསུམ་མོ། །མཆོག་ཅེས་བྱ་བ་ནི་ཡོན་ཏན་གྱིས་སོ། །གསང་བ་དམ་པ་ནི་ཤིན་ཏུ་གསང་བར་བྱ་བ་ཡིན་པའི་ཕྱིར་རོ། །མཐོང་བ་ཞེས་བྱ་བ་ནི་མིག་གིས་སོ། །ཞུགས་གྱུར་པར་ཞེས་བྱ་བ་ནི་ཕྱི་དང་གསང་བའི་ཞུགས་པས་སོ། །དེས་གྲོལ་བ་ནི་དེ་མི་བྱེད་པར་ངེས་པས་སོ། །ལེགས་པར་གནས་པ་ནི་བདེ་འགྲོའི་བདེ་བར་ངེས་པས་སོ། །འཆི་བ་ནི་ལྟུང་བའོ། །མི་ཚུགས་པ་དང་མི་གསོད་པ་ནི་བདུད་རྣམས་ཀྱིས་ཏེ། དེ་ལྟར་ནི་མི་གནས་པའི་མྱ་ངན་ལས་འདས་པ་ཐོབ་པའི་ཕྱིར་རོ། །ད་ནི་ཇི་ལྟར་ན་དེ་རྣམས་འགག་པར་འགྱུར་བ་དང༌། ཇི་ལྟར་སྲིད་པ་བསྟན་པའི་ཕྱིར། སྲིད་པ་ཞེས་བྱ་བ་ལ་སོགས་པ་སྨོས་ཏེ། ཆོས་ཀྱི་སྐུ་ཐོབ་པས་མཐའ་མེད་པའི་སྲིད་པ་ཉིད་ཡོངས་སུ་དག་པར་གྱུར་པ་ནི་སྡུག་བསྔལ་ལས་ལྡོག་པ་ཡིན་གྱི། ཉན་ཐོས་ལྟར་རྣམ་པ་ཐམས་ཅད་དུ་ལྡོག་པ་ནི་མ་ཡིན་ནོ། །སྟོན་པ་ནི་ཆོས་གསུང་བར་མཛད་པའོ། །མཆོག་ནི་དེ་བཞིན་གཤེགས་པའོ། །གྱུར་པ་ནི་སོང་བ་སྟེ། ལོངས་སྤྱོད་རྫོགས་པའི་སྐུ་ཐོབ་པས་ཐ་མ་མེད་པའི་སྲིད་པ་འགྲུབ་པ་ཡིན་གྱི་སོ་སོའི་སྐྱེ་བོ་ལྟར་ཐ་མར་གྱུར་པ་ནི་མ་ཡིན་ནོ། །དམ་ཚིག་
ནི་འདའ་བར་བྱ་བ་མ་ཡིན་པའི་ཕྱིར་རོ། །སྡོམ་པ་ནི་བྱ་བ་དང་མི་བྱ་བའི་ངེས་པའོ། །གྲུབ་པ་ནི་དོན་ཡོད་པའི་ཕྱིར་རོ། །འདི་ཞེས་བྱ་བ་ནི་འོག་ནས་བཤད་པའོ། །མཐུན་པར་ཞེས་བྱ་བ་ནི་གསུང་གཅིག་ཏུ་བཀའ་སྩལ་པའོ། །དམ་པ་རྟག་པ་ཞེས་བྱ་བ་ནི་གཞན་དུ་འགྱུར་བ་མེད་པའི་ཕྱིར་རོ། །རྡོ་རྗེ་གང་ཡིན་པ་ཞེས་བྱ་བ་ནི་གང་རྡོ་རྗེར་གྲགས་པ་ཞེས་བྱ་བའི་ཐ་ཚིག་གོ །བསྐྱེད་པ་ཙམ་ནི་བྱང་ཆུབ་ཏུ་སྨོན་པ་ལས་ས་མ་འཇུག་པ་ལས་ཏེ་སྙིང་གའི་ཟླ་བར་རྡོ་རྗེའི་རྣམ་པའོ། །སངས་རྒྱས་ཉིད་དུ་ཞེས་བྱ་བ་ནི་བྱང་ཆུབ་ཏུ་ངེས་པ་ཉིད་དོ་ཞེས་བྱ་བའི་ཐ་ཚིག་གོ །མི་སྤང་ཞིང་ཞེས་བྱ་བ་ནི་ནམ་མཁའི་སྙིང་པོའི་མོད་ལས་ཇི་སྐད་དུ་གང་ཡང་བྱང་ཆུབ་སེམས་དཔས་ཉན་ཐོས་ཀྱི་ཐེག་པ་བཤད་པའམ། རང་སངས་རྒྱས་ཀྱི་ཐེག་པ་བཤད་པའམ། ཐེག་པ་ཆེན་པོའི་ཆོས་བཤད་པ་སྤོང་ཞིང་འགོག་ཏུ་འཇུག་པ་འདི་ནི་རྩ་བའི་ལྟུང་བ་གཉིས་པོ་ཞེས་གསུངས་པ་ལྟ་བུའོ། །དེ་ཡང་བསྟན་པ་ནི་ཆོས་ཐམས་ཅད་ནི་ཆོས་ཀྱི་དབྱིངས་རྣམ་པར་དག་པའི་རྒྱུ་མཐུན་པ་ཡིན་པས་འགྲོ་བའི་སྐྱབས་སུ་གྱུར་པ་ཡིན་པའི་ཕྱིར་སྤང་བར་མི་བྱ་སྟེ། དེ་ལ་སྐྱབས་སུ་སོང་བ་ཉིད་ཡོངས་སུ་སྤང་བར་མི་བྱ་བ་ཡིན་པའི་ཕྱིར་རོ། །མི་ཤེས་པ་ཞེས་བྱ་བ་ལ་སོགས་པ་ལ། གལ་ཏེ་དམ་པའི་ཆོས་ཡི་གེའམ་དོན་ལ་ཉན་པའི་སྐལ་བ་མེད་པའམ། སྐལ་བ་དང་མི་ལྡན་པར་གྱུར་པས་ཐེ་ཚོམ་མམ་ཕྱིན་ཅི་ལོག་ཏུ་གྱུར་པ་དེའི་ཚེ། དེ་ལ་ཡི་གེའི་དོན་བསྟན་པར་མི་བྱའོ། །བདག་ཉིད་ཅེས་བྱ་བ་ནི་རང་ཉིད་གཟིར་བར་མི་བྱའོ། །བདག་ཉིད་ཡོངས་སུ་སྤངས་ནས་སུ། །ཞེས་བྱ་བ་ནི་རྣལ་འབྱོར་གྱི་སེམས་ཡོངས་སུ་བོར་ནས་ཏེ། ཅི་ནས་ཀྱང་རྣལ་འབྱོར་དང་མི་མཐུན་པར་གྱུར་པས་གཟིར་བར་མི་བྱའོ་ཞེས་བྱ་བའི་ཐ་ཚིག་གོ །གཞན་ཡང་བདག་ཉིད་འདི་ནི། ཅི་བདེ་བར་ནི་བདེ་བར་བཟུང༌། །ཞེས་བྱ་སྟེ། ཅི་ནུས་ཀྱང་འདི་བདེ་བར་འགྱུར་བ་དེ་ལྟར་གཞག་པར་བྱའོ། །བདེ་བ་ནི་དཀའ་བ་མེད་པ་སྟེ། ཡོངས་སུ་ཚོལ་བའི་སྡུག་བསྔལ་དང༌། ཉེས་པར་སྤྱོད་པ་ལ་སོགས་པའི་སྡུག་བསྔལ་མི་བྱའོ་ཞེས་བྱ་བའི་ཐ་ཚིག་གོ །ཡང་ཅིའི་ཕྱིར་ཞེ་ན། འདི་ནི་ངེས་པར་ཕྱིས་འབྱུང་བར་འགྱུར་བར་རྫོགས་པའི་སངས་རྒྱས་ཡིན་ནོ། །རྡོ་རྗེ་ཞེས་བྱ་བ་ལ་སོགས་པ་ལ་དེ་ཁོ་ན་ཉིད་
བསྒོམས་པས་བྱང་ཆུབ་པར་འགྱུར་ན་ཅི་དེ་རྡོ་རྗེ་ལ་སོགས་པས་སམ་སྙན་པས་དེ་དོར་བར་མི་བྱ་བའོ། །སྨད་པར་མི་བྱ་སྟེ་ཞེས་བྱ་བ་ནི་བླ་མ་ཚུལ་ཁྲིམས་འཆལ་པ་ལ་སོགས་པར་མངོན་ན་ཡང་མ་གུས་པར་མི་བྱའོ། །སངས་རྒྱས་ཀུན་དང་འདྲ་ཞེས་བྱ་བ་ནི། དེ་ཡང་འདིར་བརྩོན་འགྲུས་དང་རྩོལ་བ་དང་ལྡན་བ་ལ་ཚེ་འདི་ཉིད་ལ་བྱང་ཆུབ་སྟེར་བར་བྱེད་པ་ཡིན་ལ། བརྩོན་པ་མེད་པས་བྱང་ཆུབ་པར་མ་གྱུར་པ་ནི་སློབ་མ་ཉིད་ཀྱི་ཉེས་པ་ཉིད་དོ། །དགེ་བ་རབ་ཏུ་མི་སྤྱོམས་པ། །ཞེས་བྱ་བ་ནི་དགེ་བ་ཆེན་པོའི་སྒྱུ་མའི་གཟུགས་ཀྱིས་གཡོགས་ཏེ་གནས་པའོ། །གལ་ཏེ་བརྙས་པར་གྱུར་ན་ཉེས་པ་དེ་སླར་གསོ་བའི་ཐབས་བཤད་པ་ནི། བླ་མ་ཞེས་བྱ་བ་ལ་སོགས་པ་བཤད་པ་ཡིན་ཏེ། ཁྱོད་ཀྱིས་ཞེས་པ་ནི་ཁྱེད་རྣམས་ཀྱིས་སོ། །ཕྱིར་ཞིང་ཞེས་བྱ་བ་ནི་སླར་ཡང་ངོ༌། །རང་གི་དམ་ཚིག་ཅེས་བྱ་བ་ནི་རང་གི་ལྷའི་རྣལ་འབྱོར་རོ། །རྟག་ཏུ་ཞེས་བྱ་བ་ནི་མི་ཟད་བའི་དགེ་བ་སྟེ། དེ་ཡང་གང་གི་ཕྱིར་སྡོམ་པ་འདི་ལ་ལེགས་པར་གནས་ཤིང་ཡང་དག་པར་མི་གཡོ་བར་གྱུར་ནའོ། །དམ་ཚིག་ཅེས་བྱ་ལ་སོགས་པ་ནི་གསང་སྔགས་ཀྱི་ལྷ་རྣམས་དང་མཚུངས་པར་འགྱུར་རོ་ཞེས་བྱ་བའི་དོན་ཏོ། །ཁམས་གསུམ་པའི་རྒྱལ་པོ་ཆེན་པོར་གྱུར་པ་རྒྱལ་པོའི་བདག་པོ་སྟེ་རྒྱལ་པོ་ཐམས་ཅད་ཀྱི་མཆོག་ཏུ་གྱུར་པའོ། །བརྟན་པ་ནི་རྒྱལ་སྲིད་དེ་ཉིད་དང་བཅས་པས་རྟག་པ་ཉིད་ཡིན་པའི་ཕྱིར་རོ། །གང་གི་ཕྱིར་དེ་ལྟར་ཡིན་པའི་རྒྱུ་དེས་ན་བླ་མ་དང་སངས་རྒྱས་ལ་སོགས་པ་ལ་ཡིད་ནི། རབ་ཏུ་དང་ཞིང་དད་པ་རྡོ་རྗེ་ལྟར་མི་ཕྱེད་པ་ཉིད་དུ་གྱིས་ཤིག་པའོ། །རང་གི་དམ་ཚིག་ནི་རང་གི་ལྷའོ། །བདེ་བ་ཆུང་ལ་སྡུག་བསྔལ་ཆེ་བའི་འཇིག་རྟེན་དུ་ཁྱེད་སྐྱེས་པར་གྱུར་ཀྱང་ངེས་པར་རྡོ་རྗེ་འཛིན་པ་དང་འདྲ་བར་མི་ཟད་ཅིང་གོད་པ་མེད་པ་དཔེ་མེད་ཅིང་ཁ་ན་མ་ཐོ་བ་མེད་པའི་བདེ་བ་དང་བཅས་པ་ཐོབ་པར་གྱུར་ཏོ། །དེ་ནས་སྦྱིན་བླུགས་གསུམ་མམ་བདུན་ནམ་གཅིག་ཕུལ་ལ་ཞི་བར་བྱའོ་ཞེས་བྱ་བར་སྦྱར་རོ། །དེ་ནས་རྒྱལ་པོ་དང་ས་བདག་དང་དགེ་འདུན་ལ་སོགས་པ་དང་ཕྱོགས་སྐྱོང་རྣམས་དང༌། བདག་ཉིད་ཞི་བར་བྱ་བའི་ཕྱིར་སྦྱིན་བླུགས་སོ་སོར་ཕུལ་ལ་སློབ་མ་
རྣམས་ལས་ཡོན་བླང་བར་བྱའོ། །དེ་ལ་སེམས་ཅན་ཀུན་གྱི་དོན་གྱི་ཕྱིར་ཐོས་པ་དང་བསམས་པ་ལ་སོགས་པ་བྱ་བ་རྣམས་དང༌། གླང་པོ་ཆེ་ལ་སོགས་པ་སྟེར་བར་བྱ་བའི་ཕྱིར་རེ་རེ་ཞིང་བླང་བར་བྱ་སྟེ། སོ་སོར་བླང་བར་བྱའོ་ཞེས་པའི་ཐ་ཚིག་གོ །ཡང་ན་རང་གི་དངོས་གྲུབ་བསྒྲུབ་པའི་ཕྱིར་གྲོགས་པོ་ཉིད་བྱེད་པར་བསྐུལ་ལོ། །དེ་ནས་དེ་རྣམས་ཀྱིས་བྱིན་པ་ལེགས་པར་བླངས་ལ་ཡོན་སྟེར་བར་བྱེད་པ་དེ་རྣམས་བཟའ་བ་དང་སྤྱོད་ལམ་ཐམས་ཅད་ཀྱིས་མགུ་བར་བྱས་ལ། དེ་རྣམས་དང་བདག་དང་གཞན་དག་གིས་ཀྱང་གར་མཁན་རྣམས་ཀྱི་གར་དང༌། རོལ་མོ་དང༌། བསྟོད་པ་དང་། བཟླས་བརྗོད་ལ་སོགས་པའི་ཆོ་གས་མཚན་ཐོག་ཐག་མི་ཉལ་བར་དཀྱིལ་འཁོར་མཆོད་པར་བྱ་བའོ། །མུཿའི་མཐའ་ཅན་གྱི་ཞེས་བྱ་བ་ལ་སོགས་པ་ལ་ཇི་ལྟར་བསམས་པའི་དམ་ཚིག་གི་དཀྱིལ་འཁོར་དང༌། ཡེ་ཤེས་ཀྱི་དཀྱིལ་འཁོར་ཨོཾ་ཨཱཿཧཱུཾ་མུཿཞེས་བྱ་བའི་སྔགས་དང༌། བསམ་གཏན་གྱིས་གཤེགས་སུ་གསོལ་ལ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ནཱཾ་ཨཱ་དྱ་ནུཏྤནྣ་ཏྭཱཏ་སྭཱཧཱ་ཞེས་བྱ་བ་འདི་དང་རྡོ་རྗེ་དང་བཅས་པའི་ལག་པ་གཡས་པས་ལེགས་པར་དབྱི་ཞིང་བསྡུ་བར་བྱའོ། །སློང་ལ་ཞེས་བྱ་བ་ནི་བསྲུང་བའི་དོན་དུ་སློང་བའོ། །ཆུ་བོ་ཆེན་པོ་ནི་གཙང་པོ་དང་རྒྱ་མཚོ་ཆེན་པོ་ལ་སོགས་པའོ། །ཡེ་ཤེས་དབབ་པ་ལེགས་ཐོབ་པ། །ཞེས་བྱ་བ་ནི་ཡེ་ཤེས་ཅུང་ཟད་བབས་པ་ཞེས་བྱ་བའི་དོན་ཏོ། །བཤད་དེ་ཞེས་བྱ་བ་ནི་བཅོམ་ལྡན་འདས་ཀྱིས་སོ། །ཡང་དག་མཆོད་ཅེས་བྱ་བ་ནི་སྔར་བཤད་པའི་ཆོ་གས་སོ། །རྣམ་སྣང་མཛད་དང་སྤྱན་ཞེས་བྱ་བ་ལ་དབབ་པར་བྱའོ་ཞེས་བྱ་བ་ནི་ལྷག་མའོ། །གཡོ་བ་ནི་གཟེངས་མཐོ་བར་གྱུར་པའོ། །ཡོངས་སུ་ཤེས་པ་ནི་མ་འོངས་པ་ལ་སོགས་པ་དབང་པོ་ལས་འདས་པ་རྣམས་སོ། །སྨྲ་བ་ནི་མ་བསླབས་པའི་སྔགས་སྨྲ་བའོ། །རྗེས་གནང་བྱས་ཞེས་བྱ་བ་ནི་རྗེས་སུ་གནང་བའི་སྟོབས་ཀྱིས་སོ། །རྣལ་འབྱོར་པ་གསུམ་ཆར་གྱིས་ཀྱང་ཞེས་བྱ་བ་ནི་ལས་དང་པོ་པ་ལ་སོགས་ལ་གསུམ་ཆར་གྱིས་ཀྱང་ངོ༌། །ཆོ་ག་ནི་སྔོན་བཞིན་ཞེས་བྱ་བ་ནི་ཇི་ལྟར་ཐུགས་ཀྱི་གསང་བ་དག་པར་བྱ་བའི་ཕྱིར་ནི་ཐུགས་ཀྱི་རྡོ་རྗེ་དཀྱིལ་འཁོར་གྱི་བདག་པོར་བཤད་དོ། །དེ་བཞིན་དུ་གསུང་གི་གསང་བ་
དག་པར་བྱ་བའི་ཕྱིར་ནི་གསུང་གི་རྡོ་རྗེའོ། །གནས་དེར་མི་བསྐྱོད་མཚན་མ་ཡིན། །ཞེས་བྱ་བ་ནི་བདག་པོའི་གནས་སུའོ། །གསུང་ཞེས་བྱ་བས་ནི་རིན་ཆེན་འབྱུང་ལྡན་དང༌། དོན་ཡོད་གྲུབ་པ་ཡང་བསྡུའོ། སྐུའི་གསང་བ་དག་པར་བྱ་བའི་ཕྱིར་ནི་སྐུའི་རྡོ་རྗེ་བདག་པོ་ཡིན་ནོ། །དེའི་གནས་སུ་མི་བསྐྱོད་པའི་མཚན་མ་གཞག་གོ །འདིར་ཡང་དཀྱིལ་འཁོར་སྤྲུལ་པ་ལ་སོགས་པའི་ཆོ་ག་ཐམས་ཅད་རྣལ་འབྱོར་པ་གསུམ་ཆར་གྱི་ཡང་ཡིད་གཙོ་བོ་ཉིད་ཡིན་ཏེ། ལས་ཐམས་ཅད་ལ་ཡིད་ཀྱི་བྱ་བ་གཙོ་བོ་ཉིད་ཡིན་པས་གང་གི་ཕྱིར་འདི་དང་བྲལ་ན་ནི་འགྲུབ་པར་མི་འགྱུར་རོ། །ཡེ་ཤེས་ཀྱི་སྒྲ་ནི་རེ་རེ་ཞིང་སྦྱར་བར་བྱ་སྟེ་ཡེ་ཤེས་ལས་དང་པོ་པ་དང༌། ཡེ་ཤེས་ལ་ཅུང་ཟད་ཅིག་དབང་བ་དང༌། ཡེ་ཤེས་ལ་དབང་ཐོབ་པའོ། །ཡིད་ཀྱི་ཞེས་བྱ་བ་ལ་སོགས་པའི་ཚིགས་སུ་བཅད་པས་ནི་ཡིད་ཀྱི་ཆོ་ག་ངེས་པར་བྱ་དགོས་པར་བསྟན་ནས། རྡོ་རྗེ་སློབ་དཔོན་ཞེས་བྱ་བ་ལ་སོགས་པའི་ཚིགས་སུ་བཅད་པས་ནི་ཁྱད་པར་དུ་འཕགས་པ་ཉིད་དུ་སྟོན་ཏོ། །ཚིག་ཙམ་གྱིས་ཞེས་བྱ་བ་ནི་སྔགས་ཙམ་གྱིས་སོ། །འདི་དག་གིས་ནི་ཡིད་ཀྱི་དཀྱིལ་འཁོར་དུ་དབང་བསྐུར་བ་ཡང་སྟོན་པ་ཉིད་ཡིན་ཏེ། སློབ་མ་ཞེས་སྨོས་པའི་ཕྱིར་རོ། །དེར་སློབ་དཔོན་གྱིས་དཀྱིལ་འཁོར་བསྐྱེད་ལ་དེའི་འོག་ཏུ་སློབ་མས་རྫོགས་པའི་རིམ་པས་ཡུད་ཙམ་གྱིས་བལྟ་བར་བྱའོ། །བྱང་ཆུབ་ཀྱི་སེམས་ཀྱི་རྒྱུའི་གཙོ་བོ་ཡིན་པར་བསྟན་པའི་ཕྱིར། འཇུག་པ་ཙམ་གྱིས་ཞེས་བྱ་བ་ལ་སོགས་པ་སྨོས་ཏེ། འཇུག་པ་ནི་ཚུལ་ཁྲིམས་སོ། །སྤྲོས་ཏེ་སྨྲས་པས་ཞེས་བྱ་བ་ནི་ཕྱི་རོལ་གྱི་སྤྲོས་པ་རྒྱ་ཆེ་བས་སོ། །ཁྱད་པར་དུ་ཞེས་བྱ་བ་ནི་གཙོ་ཆེར་རོ། །སེམས་བསྒྲུབ་སྟེ་ཞེས་བྱ་བ་ནི་རྫོགས་པར་བྱའོ། །ཇི་སྐད་དུ་བཤད་པའི་ཆོ་ག་རྣམས་ཀྱི་འབྲས་བུ་བྱང་ཆུབ་ལ་སོགས་པ་ཡང་སེམས་ཉིད་ཀྱི་རང་བཞིན་ཡིན་ནོ་ཞེས་བསྟན་པའི་ཕྱིར་བྱང་ཆུབ་སེམས་ཞེས་བྱ་བ་ལ་སོགས་པ་སྨོས་ཏེ། འབྲས་བུ་གང་ཞེས་བྱ་བ་ལ་སོགས་པ་ནི་གང་གི་ཕྱིར་འབྲས་བུར་གྱུར་པའི་བྱང་ཆུབ་ཀྱི་སེམས་ཉིད་ནི་སངས་རྒྱས་ཀྱི་ཡེ་ཤེས་ཀྱི་མཆོག་བླ་ན་མེད་པ་ཡིན་ནོ། །རྡོ་རྗེ་སེམས་
དཔའི་རང་བཞིན་ཞེས་བྱ་བ་ནི་རང་གི་ངོ་བོ་སྟེ་དེ་ཉིད་ནི་རྡོ་རྗེ་འཆང་བའི་གོ་འཕང་ཡིན་ནོ་ཞེས་བྱ་བའི་ཐ་ཚིག་གོ །དེའི་ཞེས་བྱ་བ་ནི་དེ་ཉིད་ཀྱི་ཡན་ལག་ནི་སྐུ་གསུམ་ཡིན་ལ། །དེ་བས་ནི་ཡིད་ཀྱི་ཆོ་ག་ཁོ་ན་གཙོ་བོ་ཡིན་ནོ་ཞེས་བྱ་བར་གནས་སོ། །ཐར་པ་མེད་ན་ནི་སྲིད་པ་ཁོ་ནར་འགྱུར་ལ། དེ་ཡང་སྡུག་བསྔལ་གྱི་རང་བཞིན་ཅན་ཡིན་ན་བདེ་བ་ཆེན་པོ་དག་ལ་ཡོད་ཅེས་རྟོག་ན། དེའི་ཕྱིར། ཐ་མལ་ཞེས་བྱ་བ་ལ་སོགས་པ་སྨོས་ཏེ། ཐ་མལ་ནི་དམན་པའོ། །རྣམ་རྟོག་ནི་བརྟགས་པ་སྟེ། ཁམས་གསུམ་པའི་སེམས་དང་སེམས་ལས་བྱུང་བ་རྣམས་སོ། །དེ་ཡང་ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་སྨོས་པའི་ཕྱིར་རོ། །ཀུན་དུ་རྟོག་པ་དེའི་འཇུག་པ་ཉིད་སྲིད་པའི་སྡུག་བསྔལ་ཡིན་གྱི། །དེ་ལས་གཞན་པ་ནི་མེད་དེ། ཁམས་གསུམ་པ་ལས་ལོགས་ཤིག་ན་སྲིད་པ་མེད་པའི་ཕྱིར་རོ། །འདི་ཞེས་བྱ་བ་ནི་སྲིད་པའི་སྡུག་བསྔལ་གྱིའོ། །དེ་ལྟར་ཞེས་བྱ་བ་ནི་ཇི་སྐད་དུ་བཤད་པའི་དཀྱིལ་འཁོར་གྱི་རྣམ་པ་ཅན་གྱི་ཡིད་ཀྱི་མངོན་སུམ་དུ་འགག་པར་བྱེད་དོ། །ཅིའི་ཕྱིར་ཞེ་ན། ཤེས་རབ་ཅེས་བྱ་བ་ལ་སོགས་པ་སྨོས་ཏེ། དངོས་པོ་ཐམས་ཅད་ཀྱི་དུས་གསུམ་གྱི་དུས་དང༌། ཆོས་གང་མཐའ་ཡས་པའི་རྣམ་པ་ཅན་ཕྱོགས་བཅུ་ན་ཁྱབ་པ་གང་ཡིན་པ་དེ་ནི་དེའི་བདག་ཉིད་ཅན་གྱིས་བསྡུས་པས་ཆགས་པ་མེད་ཅིང་དམིགས་སུ་མེད་ལ་གཟུང་བ་དང་འཛིན་པའི་རྟོག་པ་དང་བྲལ་བའི་འཁོར་ལོ་གང་ཡིན་པ་དེ་ནི་སངས་རྒྱས་ཀྱི་ཆོས་ཐམས་ཅད་ཤིན་ཏུ་རྣམ་པར་དག་པའི་རང་བཞིན་ཅན་རྟེན་དང་བརྟེན་པ་པོའི་དཀྱིལ་འཁོར་དེར་སོ་སོར་སྣང་སྟེ། ཡིད་དེའི་རྣམ་པར་སྣང་བ་ནི་རྟོག་པ་དེ་སྣང་བར་མི་འགྱུར་ལ། དེའི་ཕྱིར་འགལ་བ་གྲུབ་པའི་སྣང་བ་དང་མུན་པ་དང་འདྲ་བ་ཡིན་ནོ། །འགལ་བ་འགྲུབ་པས་ན་ཡིད་དེ་ཤིན་ཏུ་བསླབས་པ་ལས་སྲིད་པའི་སྡུག་བསྔལ་དེ་ལྡོག་པར་འགྱུར་རོ། །འདི་གཉིས་ནི་ལན་འགའ་ཞིག་འགལ་བར་འགྱུར་བ་ཡིན་པས་དེའི་ཕྱིར་ངེས་པར་ལྡོག་པར་འགྱུར་བ་མ་ཡིན་པའམ། གལ་ཏེ་རྟག་ཏུ་མི་མཐུན་པ་ཡིན་ན་རྣམ་གྲངས་གཉི་གར་ཡང་གནོད་
པ་དང་གནོད་པར་བྱ་བའི་རང་བཞིན་དུ་འགྱུར་ཏེ། བུམ་པ་དང་སྣམ་བུའི་རྟོག་པ་དང་འདྲའོ་ཞེ་ན། དེའི་ཕྱིར་གང་གིས་ཞེས་བྱ་བ་ལ་སོགས་པ་སྨོས་ཏེ། གང་དག་ལན་འགའ་ཞིག་མི་མཐུན་པར་གྱུར་པ་དེ་ནི་རྟག་ཏུ་ཡང་མི་མཐུན་ཏེ། མུན་པ་དང་སྣང་བ་དང་འདྲའོ། །དེ་བས་ན་ཇི་སྐད་བཤད་པའི་ཡིད་དེ་ཤིན་ཏུ་བསླབས་པའི་མཚན་ཉིད་ཅན་གྱིས་རང་གི་རྒྱུད་ལ་གོམས་པར་བྱས་པ་ཐོབ་ན་རྟོག་པ་ཤིན་ཏུ་ལྡོག་པར་བྱེད་དོ། །གཙང་སྦྲ་ཅན་ཐོད་པ་ཅན་དུ་གྱུར་པའི་གཙང་སྨེ་དང་འདྲ་བར་གཙང་སྨེ་མེད་པར་འགྱུར་བའམ། གསེར་ཞུན་མ་ཡང་དང་ཡང་དུ་བསྲེགས་པས་སྦྱངས་པ་དང་འདྲའོ། །ཅི་སྟེ་ ཀུན་གཞི་རྣམ་པར་ཤེས ་པ་ཉེ་བར་མ་དམིགས་སུ་ཟིན་ཀྱང་གཞིར་གྱུར་པ་ཡིན་པའི་ཕྱིར་སྣང་བ་ཡིན་ནོ། །གཞན་དུ་ན་གཉིད་སྡུག་པོ་ལ་སོགས་པའི་ཚེ་ན་ཡང་དེ་ལྡོག་པར་ཐལ་བར་འགྱུར་རོ། །ཀུན་གཞི་རྣམ་པར་ཤེས་པ་ཉིད་ནི་ཁམས་གསུམ་པའི་བདག་ཉིད་ཅན་ཡིན་ལ། དེ་དང་འབྲེལ་པ་ནི་ཉོན་མོངས་པ་ཅན་གྱི་ཡིད་དང༌། འཇུག་པའི་རྣམ་པར་ཤེས་པའི་ལན་ནོ། །དེས་ན་དུས་གཅིག་ཏུ་ཡང་འགག་པར་མི་འགྱུར་ལ། དེ་གྲུབ་ཏུ་ཟིན་ཀྱང་ཤིན་ཏུ་བསླབས་པ་ལས་སྲིད་པ་འགག་པར་མི་འགྱུར་ཏེ། ནམ་མཁའ་མཐའ་ཡས་སྐྱེ་མཆེད་བསྒོམས་པས་ཀྱང་སྲིད་པ་ལྡོག་པར་ཐལ་བར་འགྱུར་བའི་ཕྱིར་རོ་ཞེ་ན། དེ་ནི་བདེན་མོད་ཀྱི་འོན་ཀྱང་འདི་ནི་གཞན་དུ་བཤད་པ་ཡིན་ཏེ། གང་གི་ཕྱིར་འདིར་ཐ་མལ་པའི་ཀུན་དུ་རྟོག་པ་ཞེས་བྱ་བ་ནི་བདག་དང་བདག་གི་དང་གཟུང་བ་དང་འཛིན་པའི་རྣམ་པ་ཅན་གྱི་ཡིད་ཀྱིས་བརྗོད་པ་ལ་བྱ་བར་བཤད་ན། སྲིད་པའི་བདག་ཉིད་ཅན་གྱི་སྡུག་བསྔལ་ཞེས་བྱ་བར་ཉེ་བར་གདགས་པས་སྲིད་པའི་བདག་ཉིད་ཅན་གྱི་སྡུག་བསྔལ་གྱི་རྒྱུའི་གཙོ་བོ་ཡིན་ནོ་ཞེས་བྱ་བའི་ཐ་ཚིག་གོ །འདི་ཞེས་བྱ་བ་ནི་ཐ་མལ་པའི་རྟོག་པའི་བདག་ཉིད་ཅན་གྱི་སྡུག་བསྔལ་གྱི་རྒྱུའོ། །རྟོག་པ་དེ་སྣང་བར་མི་འགྱུར་ལ་ཞེས་བྱ་བ་ནི་དཀྱིལ་འཁོར་གྱི་རྣམ་པ་ཅན་གྱི་སེམས་ནི་མི་བདེན་པའི་རྣམ་པར་རྟོག་པ་ཐམས་ཅད་བསལ་བ་ལ་འཇུག་པ་ཡིན་
པའི་ཕྱིར་རོ། །དེ་ཡང་ལྷན་ཅིག་མི་སྣང་བ་ཙམ་གྱིས་ནི་མ་ཡིན་ནོ། །དེ་བས་ན་འདི་གཉིས་ནི་ལན་ཅིག་མི་མཐུན་པར་གྲུབ་ན་རྟག་ཏུ་མི་མཐུན་པར་གྲུབ་པ་ཡིན་པས་འདི་ཡང་རིགས་པ་ཡིན་ནོ། །རྟག་ཏུ་དེ་དང་མི་མཐུན་པ་ལ་དམིགས་པའི་རྣམ་པ་ཅན་ཡིན་པའི་ཕྱིར་གོམས་པ་མངོན་དུ་གྱུར་བ་ནི་ཤིན་དུ་ལྡོག་པ་ཉིད་ཡིན་པའི་ཕྱིར་རོ། །དེ་ཡང༌། འཚེ་བ་མེད་དང་ཡང་དག་དོན། །ངོ་བོ་ཉིད་ལ་ཕྱིར་ལྡོག་གིས། །འབད་དུ་ཟིན་ཀྱང་གནོད་མེད་དེ། །བློ་ནི་དེ་ཕྱོགས་འཛིན་ཕྱིར་རོ། །ཞེས་བྱ་བའི་ཚིགས་སུ་བཅད་པས་སོ། །གཉེན་པོ་དང་མི་མཐུན་པ་ལྡོག་པ་དང་འཇུག་པ་ཡོད་པ་མ་ཡིན་ནོ། །ནམ་མཁའ་མཐའ་ཡས་སྐྱེ་མཆེད་ལ་སོགས་པ་ནི་བདག་མེད་པའི་རྣམ་པར་འཇུག་པ་མ་ཡིན་ཏེ། དེ་བདག་ཏུ་ལྟ་བ་ལས་མི་ལྡོག་པའི་ཕྱིར་དེའི་རྒྱུ་ཅན་སྡུག་བསྔལ་ཡང་ལྡོག་པ་མ་ཡིན་ནོ། །དེ་ཡང་འདི་ནི་སྐྱེ་བ་ནས་སྐྱེ་བར་བརྒྱུད་པའི་དགའ་བ་དང་འཆི་བ་ལ་སོགས་པའི་སྡུག་བསྔལ་གྱི་བདེན་པའོ། །དེའི་རྒྱུར་གྱུར་པ་བདག་ཏུ་ལྟ་བ་ལ་སོགས་པ་ནི་ཀུན་འབྱུང་གི་བདེན་པའོ། །དེའི་གཉེན་པོར་གྱུར་པ་དཀྱིལ་འཁོར་གྱི་འཁོར་ལོ་ནི་ལམ་གྱི་བདེན་པའོ། །སྡུག་བསྔལ་འབྱུང་བ་ཤིན་ཏུ་མེད་པར་བྱ་བའི་ཕྱིར་སེམས་ཀྱི་རྒྱུན་གྱི་མཚན་ཉིད་ཅན་གནས་ཡོངས་སུ་གྱུར་པ་ནི་འགོག་པའི་བདེན་པ་སྟེ་འདི་ནི་འདིར་དོན་དམ་པའོ། །ལམ་འདི་ནི་ཐར་པ་འབའ་ཞིག་ཙམ་གྱི་མ་ཡིན་གྱི་གཞན་དུ་ན་སངས་རྒྱས་ཀྱི་བདག་ཉིད་ཆེ་བ་ཡང་ཡིན་ཏེ། སངས་རྒྱས་ཀྱི་ཆོས་ཐམས་ཅད་དང་དེ་ལས་གཞན་པའི་དངོས་པོ་ཐམས་ཅད་ཀྱང་ཆོས་བདག་མེད་པའི་མཉམ་པ་ཉིད་ཀྱི་དཀྱིལ་འཁོར་གྱི་འཁོར་ལོའི་ཚུལ་དུ་ངེས་པར་རྟོགས་པའི་ཕྱིར་རོ། །འདིས་བྱང་ཆུབ་པར་ནི་འགྱུར་ན་དེ་ཡང་བསྐལ་པ་དུ་ཞིག་གིས་འགྱུར་ཞེ་ན། བརྗོད་པར་བྱ་བ་སྟེ། དེའི་ཕྱིར་ཆོས་ཀུན་ཞེས་བྱ་བ་ལ་སོགས་པ་སྨོས་པ་སྟེ། སངས་རྒྱས་ཀྱི་ཆོས་ཐམས་ཅད་ཀྱི་རང་བཞིན་ཅན་གྱི་འཁོར་ལོ་གང་ཡིན་པ་དང༌། འགྲོ་བ་སྟེ་སེམས་ཅན་དང་སྣོད་ཀྱི་འཇིག་རྟེན་དེ་གཉིས་ཀྱི་ཡོངས་སུ་དག་པ་ནི་རྣམ་པ་ཐམས་ཅད་དུ་ཡང་དག་པ་དེ་ལ་འཇུག་པ་མངོན་སུམ་དུ་གྱུར་ཅིང་སྒོམ་པ་ཡོངས་སུ་རྫོགས་པ་ཐོབ་པ་གང་ཡིན་པའོ། །དེ་བས་ན་མངོན་སུམ་གྱི་རྒྱུ་ཉིད་ལས་སྐད་
ཅིག་མ་ཉིད་ཀྱིས་བྱང་ཆུབ་པར་འགྱུར་ཏེ། མངོན་སུམ་གྱི་རྒྱུའི་འབྲས་བུ་ནི་གཞན་གྱིས་བར་མ་བཅད་པའི་ཕྱིར་རོ། །འོན་ཏེ་མངོན་སུམ་དུ་བྱེད་པའི་འཇུག་པ་དེ་བསྐལ་པ་དུས་འགྱུར་ཞེས་བྱ་བ་ནི་དྲིས་པའི་དོན་ཏོ། །དེ་ཡང་ཇི་སྲིད་ནི་སྒོམ་པ་ཡོངས་སུ་རྫོགས་པར་གྱུར་བའི་དུས་དེ་སྲིད་ཀྱིས་འགྱུར་རོ། །དེ་བས་ན་མངོན་དུ་བྱེད་པ་འདི་ལ་བསྐལ་པ་ལ་ལྟོས་པ་ནི་འབྲས་བུ་མེད་དོ། །འབྲས་བུ་མེད་པ་མ་ཡིན་ཏེ། དེ་ཡང་གང་གི་ཕྱིར་རྒྱུ་ནི་འབྲས་བུ་དང་རྗེས་སུ་མཐུན་པར་འགྱུར་བ་ཡིན་པས། དེའི་ཕྱིར་བསྐལ་པ་གྲངས་མེད་པ་གསུམ་གྱིས་བྱང་ཆུབ་ཐོབ་པར་ཕ་རོལ་ཏུ་ཕྱིན་པའི་ཚུལ་ལས་གསུངས་པ་དེ་ནི་ལེགས་པར་བཤད་པ་ཡིན་ལ། གང་ཡང་རྒྱུད་འདི་ལས་སྐད་ཅིག་ཐང་ཅིག་ཡུད་ཙམ་ཉིད་ཀྱིས་སངས་རྒྱས་ཀྱི་བྱང་ཆུབ་རྫོགས་པར་འགྱུར་བར་གསུངས་པ་དེ་ནི་མི་རིགས་སོ། །ཡང་ན་ནི་ཁྱད་པར་ཞིག་བརྗོད་དགོས་སོ་ཞེ་ན། དེའི་ཕྱིར་ཁྱད་པར་བཤད་པ་ནི། རིམ་གྱིས་ཞེས་བྱ་བ་ལ་སོགས་པ་སྨོས་པ་ཡིན་ཏེ། རིམ་གྱིས་སྦྱིན་པ་ལ་སོགས་པ་གང་ཡིན་པ་དེ་ནི་སྦྱིན་པར་བྱ་བ་དང༌། ཚུལ་ཁྲིམས་ལ་སོགས་པ་མི་དམིགས་སུ་ཟིན་ཀྱང་ཟབ་པ་ཉིད་དུ་འགྱུར་གྱི་རྒྱ་ཆེ་བར་ནི་མི་འགྱུར་ཏེ། ཐ་མལ་པ་ཉིད་མ་སྤངས་པའི་ཕྱིར་རོ། །དེ་བས་ན་དེར་དེ་ཙམ་གྱི་དུས་ཉིད་ཀྱི་རྒྱ་ཆེ་བ་ཡོངས་སུ་རྫོགས་པར་འགྱུར་བས་ཕ་རོལ་ཏུ་ཕྱིན་པའི་ཚུལ་ལ་བསྐལ་བ་གྲངས་མེད་པ་གསུམ་གྱིས་ཞེས་དུས་ཀྱི་ཚད་གཟུང་བ་ནི་རིགས་པ་མ་ཡིན་ནོ། །དེ་ལ་ཇི་ལྟར་ན་ཐ་མལ་པ་སྤོང་བར་འགྱུར་ཞེ་ན། དེའི་ཕྱིར་རང་གི་ཞེས་བྱ་བ་ལ་སོགས་པ་སྨོས་ཏེ། འདི་ཙམ་གྱིས་ཞེས་བྱ་བས་ཕྱོགས་དང་དུས་ཡོངས་སུ་བཅད་པ་མེད་པ་གང་ཡིན་པ་དེ་ནི་ཆེན་པོ་ཡིན་པས་རྒྱ་ཆེ་བ་ཡིན་ལ། གང་རང་གི་ཡུལ་དང་དུས་ཀྱི་རྣམ་པ་ངེས་པའི་བདག་ཉིད་ཅན་དེ་ནི་ཆུང་བ་ཉིད་ཡིན་པའི་ཕྱིར་ཐ་མལ་པ་ཞེས་བཤད་དོ། །དེ་ལྟ་བུའི་སྦྱིན་པ་ལ་སོགས་པ་ནི་ལ་ལར་ལན་འགའ་ཞིག་གིས་རྣམ་པ་གང་ཡང་རུང་བས་སྦྱིན་པ་ལ་སོགས་པ་སྒྲིབ་པ་ཡིན་ནོ། །དེ་ལྟར་ན་རྒྱུད་འདི་ཇི་ལྟར་ན་རྒྱ་ཆེ་བ་ཡིན། གང་གིས་སྐད་ཅིག་གིས་བྱང་ཆུབ་པར་འགྱུར་ཞེ་
ན། དེའི་ཕྱིར་འགྲོ་བ་ཞེས་བྱ་བ་ལ་སོགས་པ་སྨོས་ཏེ། དེའི་ཕྱིར་འགྲོ་བ་སེམས་ཅན་ཡང་དག་པར་རྫོགས་པར་བྱང་ཆུབ་པའི་རང་བཞིན་ཅན་གྱི་འཁོར་ལོ་གང་ཡིན་པ་རྒྱུད་འདིར་རྣལ་འབྱོར་པ་ནི་དེའི་བདག་ཉིད་ཅན་ཡིན་པས་དེ་ན་ཚེ་འདི་ཉིད་ལ་ཇི་སྐད་དུ་བཤད་པའི་མངོན་དུ་གྱུར་པ་འཐོབ་པས་བྱང་ཆུབ་མངོན་པར་རྟོགས་པར་འགྱུར་བ་ནི་རིགས་པ་ཡིན་ནོ། །དེ་ཡང་འདིར་ཕྱོགས་བཅུ་དུས་གསུམ་དུ་གཏོགས་པའི་སངས་རྒྱས་དང་བྱང་ཆུབ་སེམས་དཔའ་མ་ལུས་པའི་ཡོན་ཏན་གྱི་འབྱོར་པ་ཐམས་ཅད་དེ་རྣམས་ཉིད་ཀྱི་བླ་ན་མེད་ཅིང་དོན་ཡོད་པའི་དམ་ཚིག་གི་བདག་ཉིད་ཅན་ཉིད་དང༌། བླ་ན་མེད་པའི་མཆོད་པའི་བདག་ཉིད་ཅན་དང༌། བདེ་བ་ཆེན་པོའི་རང་བཞིན་ཅན་དང༌། ཡིད་དུ་འོང་བའི་རྣམ་པ་ཅན་གྱི་དཀྱིལ་འཁོར་གྱི་འཁོར་ལོ་ལྟ་བུར་སྤྲོ་བ་དང་བསྡུ་བ་དང་ལྡན་པས་མདོར་བསྡུས་ཏེ། སེམས་ཅན་ཐམས་ཅད་བདག་ཉིད་ལ་བསྐྱེད་ནས་མཉམ་པར་བཞག་པས་གོམས་པར་བྱེད་ལ། དེ་ལྟ་བུ་ཉིད་ཀྱང་ཀུན་དུ་སྤྱོད་པ་རྣམས་དང༌། བཟླས་པ་ལ་སོགས་པས་རྗེས་སུ་འཇུག་ཅིང་རྟོགས་པར་བྱེད་དོ། །དེ་བས་ན་སྦྱིན་པ་དང་ཚུལ་ཁྲིམས་ལ་སོགས་པ་ཐམས་ཅད་ཀྱང་མཆོག་ཏུ་རྨད་དུ་བྱུང་ཞིང་རྒྱ་ཆེ་བ་ཡིན་ལ། དེ་ཁོ་ན་ཉིད་ཀྱི་རང་བཞིན་ཅན་དུ་ཐམས་ཅད་རྟག་ཏུ་མཐོང་བས་ཟབ་པ་ཡང་འདིར་མཆོག་ཏུ་གྱུར་པ་ཡིན་ཏེ། དམིགས་པ་ཡིད་དུ་འོང་བ་ཡིན་པའི་ཕྱིར་རོ། །དམ་ཚིག་གི་མཐུ་དང་སེམས་ཀྱི་དམིགས་པ་ཡིན་པས་དགའ་བ་མེད་པ་ཡང་ཡིན་ནོ། །དེ་བས་ན་ཚེ་འདི་ཉིད་ལ་སྐད་ཅིག་ཙམ་གྱིས་འདིར་བྱང་ཆུབ་རྟོགས་པར་འགྱུར་རོ་ཞེས་བྱ་བ་ནི་རིགས་པ་ཉིད་ཡིན་ནོ། །འདིས་ཚིགས་སུ་བཅད་པ་ནི། ཡོན་ཏན་ཚོགས་ཀུན་རང་བཞིན་གྱིས་ལེགས་བསླབས། །རྒྱལ་བ་རྣམས་ཀྱི་དམ་ཚིག་གྲོགས་འགྱུར་ཅིང༌། །དེ་བཞིན་ཀུན་སྤྱོད་གཞན་ཡང་བཟླས་ལ་སོགས། །ཐམས་ཅད་སེམས་བྱུང་དེ་ཕྱིར་མྱུར་བྱང་ཆུབ། །ཅེས་འབྱུང་བ་ཡིན་ནོ། །སྦྱིན་པ་ལ་སོགས་པ་ལ་འདི་ལྟ་བུའི་རྒྱ་ཆེ་བ་ནི་ཕ་རོལ་ཏུ་ཕྱིན་པའི་ཚུལ་ལ་ཡང་ཡོད་དེ། ཤེས་རབ་ཀྱི་ཕ་རོལ་ཏུ་ཕྱིན་པ་ཡོངས་སུ་ཟིན་པའི་ཕྱིར་རོ་ཞེས་འགའ་ཞིག་རྟོག་ན། དེའི་ཕྱིར་སྦྱིན་བྱ་
ཞེས་བྱ་བ་ལ་སོགས་པ་སྨོས་ཏེ། སྦྱིན་པར་བྱ་བ་ལ་སོགས་པ་མི་དམིགས་སུ་ཟིན་ཀྱང་སྦྱིན་པ་ལ་སོགས་པ་དེ་དག་ཐ་མལ་པའི་བདག་ཉིད་ཅན་ཡིན་ཏེ། ཡུལ་དང་དུས་ཀྱི་རྣམ་པ་ཡོངས་སུ་གཅོད་པའི་ཕྱིར་བདག་མེད་པས་ཚད་ཅན་འཇོམས་པར་མི་བྱེད་ཀྱི། འཁོར་ལོའི་མཆོག་སྟེ་དམ་པ་ལ་ནི་དེ་ཡོད་པ་མ་ཡིན་ནོ་ཞེས་སྔར་བཤད་པ་ཡིན་ནོ། །དེ་བས་ཞེས་བྱ་བ་ལ་སོགས་པ་ནི་ཉེ་བར་སྡུད་པར་བྱེད་པའི་ཚིགས་སུ་བཅད་པ་ཡིན་ཏེ། ཀུན་དུ་རྟོག་པ་ནི་ཐ་མལ་པའི་བག་ཆགས་ཐམས་ཅད་དོ། །ཀུན་ནས་འཕྲོ་བ་ནི་འགྲོ་བ་ཐམས་ཅད་ཀྱི་དོན་རྣམ་པ་ཐམས་ཅད་དུ་བྱེད་པའི་སངས་རྒྱས་ཀྱི་སྤྲུལ་པས་འགྲོ་བ་ཐམས་ཅད་ཁྱབ་པའི་འོད་གང་ལ་མངའ་བ་དེ་ནི། ཀུན་ནས་འོད་ཟེར་རབ་འཕྲོ་བ། །ཞེས་བྱའོ། །ཀུན་དུ་བཟང་པོ་ཞེས་བྱ་བ་ནི་དགེ་བ་ཐམས་ཅད་ཀྱི་རྒྱུ་དཀྱིལ་འཁོར་གྱི་འཁོར་ལོ་ཅན་ཞེས་བྱ་བའི་ཐ་ཚིག་གོ །བསྒོམས་པ་ཉིད་ཀྱི་ཞེས་བྱ་བ་ནི་བསྒོམ་པ་ལ་མངོན་པར་བརྩེན་པ་རྩོམ་པའི་ཚེ་སྐྱེ་བ་ཉིད་དམ། དེའི་ལོ་གཅིག་ནི་སྐྱེ་བ་ཉིད་དམ། དེའི་ལོ་ཕྱེད་ཉིད་དམ། དེའི་ཉིན་མོ་ཉིད་ལ་སྐལ་བ་ཇི་ལྟ་བར་དལ་འབྱོར་ཐོབ་པ་ན་བྱང་ཆུབ་འཐོབ་པར་འགྱུར་རོ། །འཁོར་ལོ་གསུམ་ཞེས་བྱ་བ་ནི་ལེའུ་བཞི་པ་ལས་བཤད་པའི་ཐུགས་ཀྱི་དཀྱིལ་འཁོར་དང༌། བཅུ་དྲུག་པ་ལས་གསུངས་པའི་ཆོས་ཀྱི་དཀྱིལ་འཁོར་དང་སྐུའི་དཀྱིལ་འཁོར་རོ། །དེ་ནི་སངས་རྒྱས་རྣམས་ཀྱི་སྐུ་གསུམ་དང་གསང་བ་གསུམ་ཡིན་ཏེ། རིམ་པ་བཞིན་དུ་ཐ་མལ་པའི་སྐུ་གསུམ་དག་པ་འཐོབ་པར་བྱེད་པ་ཡིན་ནོ། །དཀྱིལ་འཁོར་གསུམ་ཆར་ཡང་དཀྱིལ་འཁོར་གསུམ་གྱི་བདག་ཉིད་ཅན་ཡིན་མོད་ཀྱི། བདག་པོར་བྱས་པས་ཕྱེ་བ་ཡིན་ནོ། །དེ་ཡང་དེ་བཞིན་གཤེགས་པ་རྣམས་ནི་སྐུའི་དཀྱིལ་འཁོར་རོ། །ལྷ་མོ་རྣམས་ནི་གསུང་གི་དཀྱིལ་འཁོར་རོ། །ཁྲོ་བོ་རྣམས་ནི་ཐུགས་ཀྱི་དཀྱིལ་འཁོར་རོ། །ཅིའི་ཕྱིར་སའི་སྙིང་པོ་ལ་སོགས་པ་དང༌། སྐུའི་རྡོ་རྗེ་ལ་སོགས་པ་ནང་གི་བདག་ཉིད་དུ་འགོད་ཅེ་ན། དེའི་ཕྱིར་ཡེ་ཤེས་ཞེས་བྱ་བ་ལ་སོགས་པ་སྨོས་པ་ཡིན་ཏེ། ཡེ་ཤེས་ལྔ་དང་སྐུ་
གསུམ་ཡང་སྐུ་ཡིན་ལ། དེ་ཡང་འདི་ལྟར་འདི་དག་ཙམ་ཉིད་ནི་མདོར་བསྡུ་ན་ཐམས་ཅད་མཁྱེན་པའི་རྣམ་པ་ཡིན་པས་ན། དེ་གྲུབ་ན་ཐམས་ཅད་འགྲུབ་པ་ཡིན་ནོ། །གང་གི་ཕྱིར་ཞེས་བྱ་བ་ནི་རྒྱུ་གང་གི་ཕྱིར་ཏེ། བདེ་བར་གཤེགས་པ་རྣམས་ཀྱི་ཤེས་རབ་ཀྱི་མཐར་ཐུག་པ་ནི། ཕ་རོལ་ཏུ་ཕྱིན་པ་རྣམས་དང༌། ས་རྣམས་དང༌། གཟུངས་རྣམས་དང༌། དེ་ལས་གཞན་པའི་སངས་རྒྱས་ཀྱི་ཆོས་རྣམས་ནི་བདེ་བ་ཆེན་པོའི་རྣལ་འབྱོར་པ་དེ་ལས་རྗེས་ལ་ཡོངས་སུ་གྲུབ་པ་ཡིན་ཏེ། དེའི་རྗེས་སུ་འབྲང་བ་ཉིད་ཀྱིས་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ཇི་ལྟར་ཕྱི་རོལ་གྱི་དཀྱིལ་འཁོར་རྒྱ་ཆེ་བར་སྒོམ་པར་བྱེད་ཅེ་ན། ཤིན་ཏུ་མྱུར་བ་ཁོ་ནར་ཚོགས་ཉེ་བར་བསགས་པའི་ཕྱིར་རོ། །དཔལ་ལྡན་དེ་ཞེས་བྱ་བ་ནི། ཤེས་རབ་དང་ཐབས་ཀྱི་བདག་ཉིད་ཅན་དེ་ནི། འཕགས་པ་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱི་ཆོས་ཐམས་ཅད་ཀྱི་རང་བཞིན་ཡང་དག་པར་བསྡུས་པར་འགྱུར་བ་ནི། དཀྱིལ་འཁོར་གྱི་བདག་པོ་ལས་སམ། སྐུ་དང་གསུང་དང་ཐུགས་བྱིན་གྱིས་བརླབས་པར་གྱུར་པ་ལས། འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་ཀྱི་ནང་དུ་ཆུད་པའི་འཁོར་ལོ་གསུམ་པོ་ཡིད་གང་ལ་སྤྲོ་བ་དང་བསྡུ་བའི་ཚུལ་གྱིས་ཡོད་པ་དེ་ལ་དེ་སྐད་ཅེས་བྱའོ། །གཞུང་འདི་རྣམ་པར་སྦྱར་བ་ལ་བདག་ཉིད་ཀྱི་རང་བཞིན་ཡོངས་སུ་མ་ཤེས་པ་དེ་བསལ་བར་བྱ་བའི་ཕྱིར། དམ་ཆོས་ཞེས་བྱ་བ་ལ་སོགས་པ་ཚིགས་སུ་བཅད་པ་གསུམ་སྨོས་པ་ཡིན་ཏེ། སྟོན་པའི་དམ་ཆོས་ཀྱི་རོའི་མཆོག་མྱང་ཞིང་རྟོགས་པའི་རོ་ཉམས་སུ་མྱང་བ་དང༌། ཐོས་བ་མང་པོ་གནས་སུ་བྱས་ཤིང་གཞི་ཡོད་པའི་སྐྱེས་བུ་དམ་པ་སློབ་དཔོན་དུ་གྱུར་པའི་སྐྱེ་བོ་དམ་པའི་གཞུང་འདི་བྱེད་པའི་ཚད་མར་གྱུར་པ་ཡིན་གྱི། བདག་ལྟ་བུ་ནི་མ་ཡིན་ནོ། །དེས་ན་སྟེ་དེའི་ཕྱིར་རང་གི་སེམས་ཀྱིས་ཞེས་པ་མང་དུ་ཐོས་པ་དང་རྟོགས་པས་སྟོང་པའི་ཕྱིར། ཇི་ལྟར་སྐྱེས་པའི་སེམས་ཉིད་ཀྱིས་བྱས་པ་འདི་ནན་
ཚངས་ཙམ་ཉིད་ཀྱིས་ཡང་དག་པར་གྲུབ་པ་ནི་མེད་དོ། །ཡང་ན་ཁོ་བོའི་འབད་པ་འདི་ནི་རང་གི་དོན་དུ་བྱས་པ་ཉིད་ཡིན་ཏེ། གང་གི་ཕྱིར། བླ་མ་དམ་པའི་གཞུང་བདག་གིས་གཟུང་བ་གང་ཡིན་པ་དེ་ཉིད་དད་པས་བསལ་བར་བྱས་ཤིང་ཚིག་ཏུ་སྤྲེལ་བ་ཡིན་ཏེ། གང་གི་ཕྱིར། དད་པ་ལ་སོགས་པའི་འཕགས་པའི་ནོར་ནི་བསྟེན་པར་བྱ་བ་ཡིན་ནོ། །དེ་བས་ན་བསྟེན་ཅིང་གོམས་པར་བྱ་བའི་དོན་དུ་བྱས་ཤིང་བསྟེན་པས་སྣོད་དུ་རུང་བར་བྱས་པའི་སྐལ་ལྡན་ནི་སྨད་པར་འོས་པ་མ་ཡིན་ནོ། །ཡང་ན་གང་གི་ཕྱིར། འདིར་བླ་མ་དམ་པའི་གཞུང་ལུགས་ཡིན་པ་དེ་ཉིད་ཀྱིས་ན་བདག་པོས་དམན་པའམ། བདག་དང་མཉམ་པའི་དོན་དུ་གཉེར་བ་རྣམས་ལ་འདི་འབྲས་བུ་དང་བཅས་པ་ཡིན་པ་དང༌། ཤེས་རབ་ལྷག་པ་ཡོད་པས་ཀྱང༌། ཤེས་རབ་དམན་པ་ལས་ཀྱང་ལེགས་པར་བཤད་པ་བླང་བར་བྱའོ་ཞེས་བྱ་བ་ནི་སློབ་དཔོན་རྣམས་ཀྱི་ལུགས་ཡིན་ནོ། །དེ་བས་ན་དོན་དུ་གཉེར་བ་གསུམ་ཆར་ལ་ཡང་འབྲས་བུ་དང་བཅས་པ་ཡིན་ནོ། །དེའི་ཕྱིར་འབད་པ་ཆུང་དུས་མན་ངག་ཆེན་པོ་ཐོབ་པར་བྱེད་པ་ཡིན་ལ། དེས་ན་དེའི་ཕྱིར་གཞན་གྱི་དོན་དུ་འགྱུར་བར་ཡང་མཐོང་བས་དེ་ལྟར་ཞེས་བྱ་བ་གསུངས་ཏེ། འདི་ལྟར་རང་གི་སེམས་ཉིད་ཀྱི་བདག་གིས་ནན་གྱིས་བྱས་སོ་ཞེས་པའོ། །ལྷག་མ་རྣམས་ནི་གོ་སླའོ། །དཀྱིལ་འཁོར་ཆོ་ག་རྒྱས་བཤད་པ། །བྲི་སས་བདག་དགེ་གང་ཐོབ་པ། །དེས་ནི་བླ་མ་དམ་པ་རྣམས། །རྫོགས་སངས་དྲི་མེད་དཔལ་གྱུར་ཅིག །དཔལ་གསང་བ་འདུས་པའི་དཀྱིལ་འཁོར་གྱི་ཆོ་ག་འཇིག་རྟེན་སྣང་བྱེད་ཅེས་བྱ་བ་ཤཱོ་ཀ་བཞི་བརྒྱ་ལྔ་བཅུ་པའི་འགྲེལ་པ། སློབ་དཔོན་ཆེན་པོ་རིན་ཆེན་འབྱུང་གནས་ཞི་བའི་ཞལ་སྔ་ནས་མཛད་པ་རྫོགས་སོ།། །།རྒྱ་གར་གྱི་མཁན་པོ་བཱི་ཪྻ་བྷ་དྲ་དང༌། སྒྲ་བསྒྱུར་གྱི་ལོ་ཙཱ་བ་ཆེན་པོ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།