རབ་ཏུ་གནས་པའི་དགོས་པ་སོགས་བཤད་པ།
རྒྱ་གར་སྐད་དུ། །བིཥ་ད་པ་ད་སཾ་གྲ་ཧོ་ནཱ་མ་པྲ་ཏིཥྛཱ་བི་དྷི། བོད་སྐད་དུ། །རྒྱ་ཆེ་བའི་ཚིག་བསྡུས་པ་ཞེས་བྱ་བ་རབ་ཏུ་གནས་པའི་ཚོ་ག །དཔལ་འཇམ་པའི་རྡོ་རྗེ་ལ་ཕྱག་འཚལ་ལོ། །དབང་པོའི་མཚོན་གྱིས་རྣམ་པ་མཚུངས། །མཆོག་ཏུ་དགའ་བས་མཛེས་པ་ཡི། །ཤེས་རབ་ཟབ་མོ་དང་ལྡན་པ། །འཇམ་པའི་རྡོ་རྗེ་འཁོར་ལོར་བཅས། །བཏུད་ནས་ཀཱ་ཙར་མངོན་བརྗོད་པས། །སྣ་ཚོགས་སློབ་དཔོན་བཞེད་རིག་ཅིང༌། །སྣ་ཚོགས་རྒྱུད་ཀྱི་རྗེས་འབྲངས་ནས། །རྒྱས་ཤིང་སལ་བས་འཇིགས་རྣམས་ལ། །ཉུང་ཞིང་གསལ་བའི་རྗེས་འབྲངས་པ། དེ་ལ་ཤེས་རབ་ལྡན་པ་དག །བདེ་བླག་འཇུག་པར་བྱ་བའི་ཕྱིར། །རབ་གནས་ཆོ་ག་བརྗོད་པར་བྱ། །སྐུ་གཟུགས་རབ་གནས་མ་བྱས་ལ། །མཆོད་དང་ཕྱག་འཚལ་གསོལ་བ་ནི། །སྔགས་ཀྱིས་དམན་པའི་སྦྱིན་སྲེག་གི །ཐལ་བ་ འབྲས་མེད་ཇི་བཞིན་ནོ། །རབ་ཏུ་མི 
་གནས་ཆོས་རྣམས་ལ། །འདིར་ནི་གང་དུ་རབ་གནས་ནི། །འཇིག་རྟེན་རྗེས་འཇུག་ལ་བསྟན་ནས། །རྒྱལ་བ་རྣམས་ཀྱིས་རབ་གནས་གསུངས། །གང་དུ་སྐུ་གཟུགས་གྲུབ་ནས་ནི། །ཡུན་རིང་གནས་ཤིང་མ་མཆོད་པ། །ཇི་
སྲིད་མཆོད་པའི་འོས་མ་གྱུར། །དེར་ནི་ལེགས་པ་མ་ཡིན་འབྱུང༌། །རྟག་ཏུ་ཆོ་ག་མ་ཚང་པའི། །རབ་གནས་བྱ་བ་སྨད་པ་ཉིད། །ཚེ་འདིར་སྡུག་བསྔལ་ཆེ་འབྱུང་ཞིང༌། །འཇིག་རྟེན་ཕ་རོལ་འཇིགས་པ་ཆེ། །དེ་ཕྱིར་དངོས་གྲུབ་འདོད་པ་ཡིས། །བདག་ཉིད་ནུས་པས་འཆད་འགྱུར་གྱི། །ཆོ་གའི་བྱ་བའི་རིམ་པ་ཡིས། །རབ་ཏུ་འབད་དེ་བྱ་བ་ཉིད། །ཟླ་བ་དྲུག་དང་གཟའ་བཞི་དང༌། །ཚེས་ནི་བདུན་དུ་བསྟན་པ་ཉིད། །རབ་གནས་ལས་ལ་ངེས་བསྟན་པ། །རྒྱུད་སྐར་རྣམས་ནི་བཅུ་བཞིའོ། །དགུན་ཐ་དཔྱིད་ར་དཔྱིད་ཐ་དང༌། །དབྱར་ཟླ་ར་འབྲིང་དགུན་ཟླར། །གཟའ་ནི་ཕུར་བུ་ལྷག་པ་དང༌། །པ་སངས་བཞི་པ་ཟླ་པའོ། །ཚེས་ནི་ལྔ་དང་བདུན་ཉིད་དང༌། །དེ་བཞིན་གཉིས་དང་བཅུ་པ་དང༌། །གསུམ་པ་དང་ནི་ཟླ་བ་ཉ། །བཅུ་གསུམ་རྣམས་ཏེ་བདུན་པོ་བཟང༌། །རྒྱལ་དང་མེ་བཞི་ལྷ་མཚམས་དང༌། །སྣར་མ་དང་ནི་གྲོ་བཞིན་མགོ །སྨད་དང་སྣྲོན་དང་སྣུབས་དང་ལག །ཁྲུམས་དང་དེ་བཞིན་ཆུ་སྟོང་དོ། །སྐར་མ་སླད་ལ་རབ་གནས་བྱ། །དེར་ནི་ཤེས་རབ་འཕེལ་བར་འགྱུར། །ནམ་ཡང་ཡིད་ལ་གནས་པ་ཡི། །དངོས་གྲུབ་ཏུ་ནི་མེ་བཞིས་འགྱུར། །ལུང་རྣམས་ཡོངས་སུ་ཤེས་པ་ནི། སྣུབས་དང་གྲོ་བཞིན་གྱིས་ཡིན་ནོ། །ལག་ལ་སྐལ་བ་བཟང་པོར་འགྱུར། །སྣར་མ་ཡིས་ནི་ནོར་འབྱུང་འགྱུར། །རི་དགས་མགོ་ཡིས་ཞི་བར་བསྟན། །ཆུ་སྟོད་ཀྱིས་ནི་བུ་རྣམས་འཚོ། །ཁྲུམས་ཀྱིས་ཡང་དག་འཕེལ་བར་བཤད། །རྒྱལ་གྱིས་རྟག་ཏུ་རྒྱལ་བའོ། །སྣྲོན་ལ་དགེ་དང་སྐལ་བ་བཟང༌།། ལྷ་མཚམས་ཀྱིས་ནི་མཆོག་རབ་སྟེར། །ཡང་དག་སྐར་མ་དང་མཐུན་པས། །ཇི་སྐད་བཤད་པ་ཐམས་ཅད་བྱང༌། །གསུམ་པ་བདུན་པ་དྲུག་པ་དང༌། །བཅུད་དང་བཅུ་གཅིག་ཟླ་བ་རྣམས། །དང་པོ་ལྔ་པ་གསུམ་པ་དང༌། །ཐ་མ་ཡང་ནི་རྣམ་པར་སྤང༌། །དགུ་དང་བརྒྱད་དང་བཅུ་གཉིས་གཉིས། །བཞི་དང་ལྔ་དང་བཪྵཾ་ཉིད། །རྣམ་པ་གཞན་དུ་བྱེད་པ་ལ། །བཟློག་པའི་འབྲས་བུ་འབྱུང་པར་འགྱུར། །སེམས་ཅན་དམན་པའི་དབང་མཛད་ནས། །ཟླ་བ་ལ་སོགས་བཟང་པ་འདིའོ། །མཆོག་གི་དབང་དུ་མཛད་ནས་ནི། །ངེས་པ་ཉིད་ནི་རིགས་མ་ཡིན། །དེ་ལྟར་ཡང། །དབྱར་ནི་དངོས་
གྲུབ་གནས་སུ་འགྱུར། །སྟོན་ཀ་རྣལ་འབྱོར་སྤྱིན་པ་ཉིད། །དགུན་སྟོད་སངས་རྒྱས་ཡེ་ཤེས་སྟེར། །དགུན་སྨད་འབྱོར་པ་ཀུན་སྦྱིན་བྱེད། །དཔྱིད་ནི་ཕུན་སུམ་ཚོགས་རབ་སྟེར། །སོས་ཀ་རྒྱལ་དང་ཞིབ་པ་སྟེར། །དུས་རྣམས་ཀུན་དུ་སངས་རྒྱས་ནི། །རབ་ཏུ་གནས་ལ་བཞུགས་པར་འདོད།། དེ་བཞིན་དུ་མཁའ་འགྲོ་མ་རྡོ་རྗེ་གུར་དུ་ཡང༌། །རྟག་ཏུ་གཙུག་ཏོར་བཅིང་པར་བྱ། །རྟག་ཏུ་སྦྱིན་སྲེག་དགང་བར་བྱ། །རྟག་ཏུ་དཀྱིལ་འཁོར་བྲི་བར་བྱ། །རྟག་ཏུ་སངས་རྒྱས་རབ་གནས་བྱ། །གྲུབ་པར་གྱུར་པ་དེའི་མོད་ལ། །རབ་ཏུ་གནས་བ་མཆོག་ཏུ་འགྱུར། །མི་བདག་དབང་ཕྱུག་འཁོར་ལོས་སྒྱུར། །ཐོབ་པ་འདི་ལ་ཐེ་ཚོམ་མེད། །འདི་ལ་གཟའ་དང་རྒྱུ་སྐར་མེད། །བགེགས་དང་ལོག་འདྲེན་དགག་ཀྱང་མེད། །གང་ཞིག་ཡིད་ལ་ཅི་འདོད་པ། །སྐྱེ་ཤིང་སྐྱེ་བར་གྲུབ་པར་འགྱུར། །བསྲུང་དང་དབང་བསྐུར་གཏོར་མ་བཟླས་དང་དབྱེ་བ་དང༌། །ཕྱིར་བཟློག་པ་དང་དཀྱིལ་འཁོར་དང་ནི་སྒྲུབ་ཐབས་དང༌། །བཙན་ཐགས་སྦྱོར་པ་དང་ནི་གཤེགས་སུ་གསོལ་བ་རྣམས། །སངས་རྒྱས་རྣམས་ཀྱིས་དེ་ཉིད་བཅུ་ཞེས་རབ་ཏུ་གསུངས། །སློབ་དཔོན་དེ་ཉིད་འདི་དག་རིག །དཀྱིལ་འཁོར་འཁོར་ལོའི་རྣལ་འབྱོར་ལྡན། །སྔགས་དང་ཕྱག་རྒྱའི་ཆོ་ག་ཤེས། །རབ་ཏུ་གནས་པ་བྱ་བར་འོས། །དེ་ནས་ཁྲུས་དང་གཙང་སྒྲའི་བདག །རབ་ཏུ་གནས་པ་བྱེད་བརྩོན་པའི། །སློབ་མས་མཎྜལ་མེ་ཏོག་བཅས། །ཐལ་མོས་བླ་མར་གསོལ་བ་གདབ། །བདག་ནི་གཞན་རྣམས་ཐམས་ཅད་ཀུན། །རབ་ཏུ་བསྒྲལ་བར་འདོད་བ་ཡིས། །བགྱིས་པ་དང་ནི་བྲིས་པ་ཡི། །སྐུ་གཟུགས་རས་རིས་གླེགས་པ་མ་དག །ཇི་ལྟར་ནུས་དང་རྗེས་མཐུན་པས། །འདི་དག་རབ་གནས་བགྱི་བར་འཚལ། །དགྱེས་པའི་ཐུགས་ནི་ཀུན་བསྐྱེད་ནས། །བདག་གི་རབ་གནས་མཛད་དུ་གསོལ། །དེ་ལྟར་དོན་དུ་གཉེར་ནས་ནི། །ཤེས་རབ་ཕ་རོལ་ཕྱིན་ལེགས་པ་ལྟས།། བདག་གིས་དད་པས་ཤེས་རབ་ཀྱི། །ཕ་རོལ་ཕྱིན་པ་འབུམ་པ་བྲིས། །གང་ཡང་དགེ་ལ་རབ་འབད་པས། །སྲུང་བ་ལྔ་ལ་སོགས་པ་བྲིས། །འབུམ་བུ་གླེང་པའི་ཆོ་ག་བཞིན། །རས་རིས་འབད་པས་བྲིས་བྱས་ཤིང༌། །རྒྱལ་པའི་བཞུགས་གནས་མཆོག་གྱུར་པ། །གཙུག་ལག་ཁང་ནི་
ཡོངས་རྫོགས་བགྱིས། །རྒྱལ་པའི་སྐུ་གདུང་དག་གི་ནི། །མཆོད་རྟེན་བདག་གིས་ལེགས་པར་བསྒྲུབས། །སངས་རྒྱས་གནས་ཀྱི་ཚུལ་དུ་ནི། །དྲི་ཡི་གཙང་ཁང་འབད་པས་བགྱིས། །ཁྲོན་པ་ཀུན་དགའ་ར་བ་དང༌། །བྱུག་པའི་སྐུ་གཟུགས་ལ་སོགས་དང༌། །སངས་རྒྱས་ཀྱིས་ནི་མང་གསུངས་པའི། །ལུགས་མ་སོགས་ལ་རབ་ཏུ་འབད། །སེམས་ཅན་རྣམས་ནི་ཚིམ་བྱེད་པའི། །རྫིང་བུ་ཡིད་དུ་འོད་བ་བགྱིས། །སེམས་ཅན་ཐམས་ནི་བདེ་བྱེད་པའི། །ཛཾ་བྷཱ་ལི་ནི་ཡོངས་རྫོགས་བགྱིས། །དར་བའི་བློ་དན་སློབ་མ་ཡི། །དང་པོར་གུས་པས་ལན་གསུམ་གསོལ། །སློབ་མ་དག་པར་ཤེས་ནས་ནི། །སྟེགས་བུ་ཡང་དག་བརྩམ་བར་བྱ། །གྲུབ་བཞི་པ་ལ་ཁྲུ་བཞི་པ། །དཔངས་ཀྱི་ཚད་ནི་ཁྲུ་གཉིས་པ། །ཆུ་ཤིང་ཀ་བ་སོགས་ལྡན་པ། །ཉམས་དགའ་ཆོ་ག་བཞིན་བྱས་ནས། །དེར་ནི་སྟན་འཇམ་བདེ་བ་ལ། །བློ་བཟང་རྡོ་རྗེ་དྲིལ་བུ་འཛིན། །གཙུག་ཏོར་བཅིངས་ཤིང་ལུས་ཆས་བཟང༌། །ཆོ་ག་བཞིན་དུ་གཏོར་མ་སྦྱིན། །དབང་པོ་རྡོ་རྗེ་ཅན་ནི་འབྱུང་པོའི་ཚོགས་དང་བཅས། །གཏོར་མ་ཕུལ་ཏུ་བྱུང་པ་འདི་བཞེས་ཤིག །མེ་དང་གཤིན་རྗེ་བདེན་བྲལ་འབྱུང་པོའི་བག །ཆུ་བདག་རླུང་དང་ནོར་གྱི་བདག་པོ་དང༌། །དབང་ལྡན་ལྷ་སྟེ་འབྱུང་པོའི་བདག་པོ་དང༌། །སྟེང་གི་ཉི་ཟླ་ཚངས་པ་ཆེན་པོ་དང༌། །ལྷ་རྣམས་ཀུན་དང་གང་དག་ས་སྟེང་གླུ། །རི་ཡི་ལྷ་དང་གཙང་པའི་ཚོགས་བཅས་ལ། །སོ་སོ་སོ་སོར་ཕུལ་པ་འདི་བཞེས་ལ། །རང་རང་ཕྱོགས་སུ་ལེགས་པར་བཞུགས་ནས་ཀྱང༌། །རང་གི་བུ་སྨད་མཛའ་བཤེས་གཉེན་འདུན་བཅས། །ནང་མི་དམག་དང་དཔུང་བཅས་ཐབས་ཅིག་ཏུ། །གཏོར་མ་མེ་ཏོག་བདུག་པ་ཕུལ་བ་འདི། །དགྱེས་པར་གསོལ་ཞིང་བསྣམས་ཏེ་བཞེས་ནས་ཀྱང༌། །བདག་གི་ལས་འདི་འབྲས་བུ་མཆིས་པར་མཛོད། །