ཕྱག་རྒྱ་བཞི་གཏན་ལ་དབབ་པ།
ཀླུ་སྒྲུབ་སྙིང་པོ།
རྒྱ་གར་སྐད་དུ། རྩ་ཏུརྨུ་དྲཱ་ནིཤྩཱ་ཡ། བོད་སྐད་དུ། ཕྱག་རྒྱ་བཞི་གཏན་ལ་དབབ་པ། བཅོམ་ལྡན་འདས་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །རྣམ་དག་ཡེ་ཤེས་དེ་བདག་ཉིད། །རྡོ་རྗེ་སེམས་དཔའ་ཕྱག་བྱས་ནས། །ཕྱག་རྒྱ་དགོད་པ་མདོར་བསྡུས་པ། །བདག་ཉིད་གོ་བྱའི་དོན་དུ་བྲི། །འདི་ན་ཕྱག་རྒྱ་དགོད་པ་ལ་ཡིད་རྣམ་པར་འཁྲུལ་ཅིང་རྨོངས་པས་སྲིད་པའི་རྒྱ་མཚོར་སྡུག་བསྔལ་ཞིང་འཁྱམས་པ་དེ་དག་གིས་བདེ་བླག་ཏུ་ཕྱག་རྒྱ་བཞིའི་དོན་ཁོང་དུ་ཆུད་པར་བྱ་བའི་ཕྱིར་རྒྱུད་ཀྱི་རྗེས་སུ་འབྲངས་ནས། །བདེ་བ་ཆེན་པོའི་སྒྲུབ་པའི་ཐབས་རབ་ཏུ་བསྒྲུབ་པར་བྱའོ། །ཕྱག་རྒྱ་བཞི་ཞེས་བྱ་བ་ནི་ལས་ཀྱི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱའོ། །དེ་ལ་ལས་ཀྱི་ཕྱག་རྒྱ་བརྟག་པར་བྱ་སྟེ། ལས་ཀྱི་ལུས་དང༌། ངག་དང་ཡིད་ཀྱི་བསམ་པ་སྟེ་གཙོ་བོའོ། །ཕྱག་རྒྱ་ནི་བརྟགས་པའི་རང་བཞིན་ནོ། །ལས་ཀྱི་ཕྱག་རྒྱ་དེ་ལས་སྐད་ཅིག་མའི་དབྱེ་བས་ཕྱེ་བས་དགའ་བ་དག་སྐྱེ་བར་འགྱུར་རོ། །སྐད་ཅིག་ཤེས་པའི་དེ་ཡི་ཤེས། །ཨེ་ཝཾ་ལ་ནི་རབ་ཏུ་གནས། །དགའ་བ་བཞི་ནི་དགའ་བ་དང༌། མཆོག་ཏུ་དགའ་བ་དང༌། ལྷན་ཅིག་སྐྱེས་པའི་དགའ་བ་དང༌། དགའ་བྲལ་ལོ། །གཞན་དུ་ན།
མཆོག་དང་དགའ་བྲལ་དག་གི་དབུས། །མཚོན་བྱར་བརྟགས་པས་བསྟན་པར་བྱ། །ཞེས་གསུངས་པ་དེ་འཐད་པར་མི་འགྱུར་རོ། །སྐད་ཅིག་མ་བཞི་ནི་རྣམ་པ་སྣ་ཚོགས་པ་དང༌། རྣམ་པར་སྨིན་པ་དང༌། མཚན་ཉིད་བྲལ་བ་དང༌། རྣམ་པར་ཉེད་པའོ། །མཚན་ཉིད་དང་བྲལ་བ་དབུས་སུ་བསྟན་པ་ནི་དབང་ལས་ཤེས་པར་བྱའོ། །དབང་བཙན་ཐབས་ཀྱི་སྦྱོར་བ་ནི་མཚན་ཉིད་དང་བྲལ་བ་དང༌། ལྷན་ཅིག་སྐྱེས་པ་ཐ་མར་གནས་པར་རྟོགས་སོ། །བཅོམ་ལྡན་འདས་ཀྱིས་དབང་བཙན་ཐབས་ཀྱི་སྦྱོར་བས་བསྟན་ཏོ། །དེ་ཐམས་ཅད་ནི་ལྷན་ཅིག་སྐྱེས་པ་སྟེ། ལྷན་ཅིག་སྐྱེས་པའི་གྲིབ་མའི་རྗེས་སུ་བྱེད་པ་ལ་ལྷན་ཅིག་སྐྱེས་པ་ཞེས་བྱའོ། །ལྷན་ཅིག་སྐྱེས་པའི་གྲིབ་མ་ནི་ལྷན་ཅིག་སྐྱེས་པའི་རྒྱུ་མཐུན་པའི་ཡེ་ཤེས་ཁོང་དུ་ཆུད་པར་བྱེད་པས། ཤེས་རབ་ཡེ་ཤེས་ནི་ལྷན་ཅིག་སྐྱེས་པའོ། །དེའི་ཕྱིར་ངེས་པར་ཤེས་རབ་ཡེ་ཤེས་ལས། །ལྷན་ཅིག་སྐྱེས་པ་འབྱུང་བ་མ་ཡིན་ཏེ། གང་གི་ཕྱིར་ལྷན་ཅིག་སྐྱེས་པ་ཞེས་བྱ་བའི་རང་བཞིན་ནི་ཆོས་ཐམས་ཅད་མ་བཅོས་པའི་རང་གི་མཚན་ཉིད་ཅེས་བྱ་བའི་བར་དུའོ། །དེའི་ཕྱིར་ལས་ཀྱི་ཕྱག་རྒྱ་ལ་བརྟེན་ནས་རྒྱུ་མཐུན་འབྲས་བུ་ཐོབ་པར་བྱེད་དོ། །རྒྱུ་མཐུན་པ་ནི་རྒྱུ་དང་འདྲ་བར་འབྱུང་བས་ན་རྒྱུ་མཐུན་པ་སྟེ། ཇི་ལྟར་མེ་ལོང་དང་བཞིན་ལ་བརྟེན་ནས་བྱད་བཞིན་གྱི་གཟུགས་བརྙན་འབྱུང་བ་ནི་གཞན་ཉིད་མ་ཡིན་ཏེ། སྔོན་དུ་གྲུབ་པ་མ་ཡིན་ལ་ད་ལྟར་ཡང་གྲུབ་པ་མ་ཡིན་པའི་ཕྱིར་རོ། །དེ་ནི་ངེས་པར་གཞན་གྱི་གཟུགས་བརྙན་རྒྱུ་མཐུན་ཙམ་མཐོང་བ་ལ་འོན་ཀྱང་འཇིག་རྟེན་པ་རྣམས་རང་བཞིན་མཐོང་ཞེས་འཁྲུལ་པས་དགའ་བར་འགྱུར་རོ། །དེ་བཞིན་སློབ་དཔོན་བློ་གྲོས་དམན་པ་རྣམས་ཀྱང༌། ཤེས་རབ་ཡེ་ཤེས་བསྒྲུབས་ན་ལྷན་ཅིག་སྐྱེས་པའི་རང་བཞིན་ཉམས་སུ་མྱོང་ཞེས་བརྗོད་ཅིང་དགའ་བ་སྐྱེ་བར་འགྱུར་རོ། །དེ་ལ་དགའ་ཞིང་མགུ་པས་ནི་ཆོས་ཀྱི་ཕྱག་རྒྱའི་གཏམ་ཡང་མི་ཤེས་སོ། །ཆོས་ཀྱི་ཕྱག་རྒྱ་མ་ཤེས་པས་ལས་ཀྱི་ཕྱག་རྒྱ་བཅོས་མ་འབའ་ཞིག་ལས་ལྷན་ཅིག་སྐྱེས་པའི་རང་བཞིན་བཅོས་མ་མ་ཡིན་པ་ཇི་ལྟར་འགྱུར་ཞིང་སྐྱེ་བར་འགྱུར། རིགས་མཐུན་པའི་རྒྱུ་ལས་རིགས་མཐུན་
པའི་འབྲས་བུ་སྐྱེ་བར་འགྱུར་གྱི། །རིགས་མི་མཐུན་པ་ལས་ནི་མ་ཡིན་ནོ། །ཇི་ལྟར་སཱ་ལུའི་ས་བོན་ལས་སཱ་ལུའི་མྱུ་གུ་སྐྱེ་བར་འགྱུར་གྱི། དྲུག་ཅུ་པ་ལས་མ་ཡིན་ནོ། །དེ་བཞིན་དུ་མ་བཅོས་པའི་ཆོས་ཀྱི་ཕྱག་རྒྱའི་རང་བཞིན་ལས་མ་བཅོས་པའི་ལྷན་ཅིག་སྐྱེས་པ་ལ་འབྱུང་ངོ། །དེའི་ཕྱིར་ཆོས་ཀྱི་ཕྱག་རྒྱའི་རྒྱུ་ཉིད་ལ་དབྱེར་མེད་པར་སྤྱོད་པས་ཕྱག་རྒྱ་ཆེན་པོའི་རྒྱུར་འགྱུར་རོ། །དེ་ལྟར་ན་གང་གི་ཕྱིར་བཅོམ་ལྡན་འདས་ཀྱིས་གསུངས་པ། ཨེ་ཡི་ཆ་བྱད་བཟང་པོ་ལ། །དབུས་སུ་ཝཾ་གིས་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་པ་ནི་སངས་རྒྱས་ཀྱི་གྲིབ་མའི་རྗེས་སུ་བྱེད་པའི་ཕྱིར་རོ། །ཟ་མ་ཏོག་ནི་གནས་སམ་གཞིའོ། །དེའི་ཕྱིར་ལས་ཀྱི་ཕྱག་རྒྱ་ཡན་ལག་ཅན་ལས་དགའ་བ་ཡིད་དུ་འོང་བ་ནི་རིན་ཆེན་འབྱུང་གནས་དང་མཚོ་སྐྱེས་ཀྱིས་ཏེ། དེ་ནི་རྡོ་རྗེ་དང་པདྨ་བསྲུབ་ཅིང་བསྲུབས་པའི་ཡང་དག་པའི་སྦྱོར་བས། ཀུན་རྫོབ་བྱང་སེམས་ཨ་བ་དྷཱུ་ཏཱི་ནས་ཇི་སྲིད་ནོར་བུའི་ནང་དུ་སོང་བ་དེ་ནི་དེའི་སྐད་ཅིག་མ་ཞེས་བྱ་བ་སྟེ། དེ་ལྷན་ཅིག་སྐྱེས་པ་ཞེས་བྱ་བའི་ཡེ་ཤེས། །སྐད་ཅིག་ཙམ་སྐྱེ་བར་འགྱུར་གྱི། དེ་ལྷན་ཅིག་སྐྱེས་པ་ནི་མ་ཡིན་ཏི། རྒྱུ་མི་མཐུན་པའོ། །དེའི་རང་བཞིན་ཤེས་རབ་ཡེ་ཤེས་ཀྱི་དགའ་བ་གསུམ་དང༌། སྐད་ཅིག་མ་བཞི་དང་ལྡན་པའོ། །དབང་བཙན་ཐབས་ཀྱི་སྦྱོར་བ་ལས་ནི་ལས་ཀྱི་ཕྱག་རྒྱའི་རྒྱུ་མཐུན་པའི་འབྲས་བུར་གསུངས་སོ། །ལས་ཀྱི་ཕྱག་རྒྱའི་དབང་ངེས་བར་བསྟན་པ་སྟེ་དང་པའོ།། །།ཨོཾ་ཆོས་ཀྱི་ཕྱག་རྒྱ་ནི་ཆོས་ཀྱི་དབྱིངས་ཀྱི་རང་བཞིན་ཏེ། སྤྲོས་པ་དང་བྲལ་བ་རྣམ་པར་མི་རྟོག་པ་མ་བཅོས་པ། སྐྱེ་བ་དང་བྲལ་བ། སྙིང་རྗེའི་རང་བཞིན་མཆོག་ཏུ་དགའ་བས་གཅིག་ཏུ་མཛེས་པའི་ཐབས་སུ་འགྱུར་པ། རྒྱུན་གྱིས་རྟག་པ་ལྷན་ཅིག་སྐྱེས་པའི་རང་བཞིན་གྱི་ཤེས་རབ་དང་ལྷན་ཅིག་སྐྱེས་པ་ལས་འབྱུང་བ། དབྱེར་མེད་པ་གང་ཡིན་པ་དེ་ནི་ཆོས་ཀྱི་ཕྱག་རྒྱར་རིག་པར་བྱའོ། །གཞན་ཡང་དེའི་མཚན་ཉིད་ནི་དཔེར་ན་མུན་པས་ཀུན་དུ་འཁྲུགས་པ་ལ། ཉི་མའི་འོད་ཟེར་དང་འདྲ་བར་བླ་མའི་མན་ངག་ཉིད་ཀྱིས་མི་ཤེས་པའི་མུན་པས་ཀུན་ནས་འཁྲུགས་པའི་འཁྲུལ་པ་རྩྭ་རྡུལ་ཙམ་
གྱི་ཟུག་རྡུ་རྣམ་པར་སྤངས་ནས་རྟོགས་པའོ། །ས་དང་ཆུ་དང་མེ་དང་རླུང་སྟེ་ཁམས་བཞིའི་ནུས་པས་བཅིངས་པའི་འཇིག་རྟེན་གསུམ་པོ་མ་ལུས་པ་གཅིག་གི་རང་བཞིན་དབའ་རླབས་མེད་པའི་སྟོང་པ་ཉིད་དང་སྙིང་རྗེ་དབྱེར་མེད་པ་ཤེས་པར་བྱའོ། །བཅོམ་ལྡན་འདས་ཀྱིས་ཀྱང་གསུངས་བ། མཛེས་མ་ཤེས་རབ་རང་བཞིན་ལ། །རོ་མ་ཐབས་ཀྱིས་ཡང་དག་གནས། །སྡིག་སྤངས་མ་ནི་དབུས་ཉིད་དུ། །གཟུང་དང་འཛིན་པ་རྣམ་པར་སྤངས། །དེ་ལྟར་རབ་ཏུ་འབད་པས་ཀྱང༌། །དེ་བཞིན་ཉིད་ཀྱི་རྣམ་པ་ཉེ་བའི་རྒྱུར་གྱུར་པ་དེ་ནི་ལམ་དུ་ཤེས་པར་བྱའོ། །ལམ་དུ་ཤེས་པས་གུས་པས་རྒྱུན་མི་འཆད་པ་ནི་ལམ་མོ། །འགོག་པ་ནི་ལྷན་ཅིག་སྐྱེས་པའི་རང་བཞིན་མངོན་དུ་བྱེད་པར་གྱུར་པའོ། །དེ་བཞིན་དུ་གསུངས་པ། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་ཅུང་ཟད་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ནས་རྣམ་པར་གྲོལ། མཛེས་མ་རོ་མ་དག་གི་དབུས་སུ་གནས་པ་ནི་སྡིག་སྤངས་མའོ། །དེ་ཉིད་ལ་ལྷག་པར་མོས་པས་ལྷན་ཅིག་སྐྱེས་པའི་རང་བཞིན་གྱི་དོན་གོ་འཕང་མ་ལུས་པར་སེམས་རྩེ་གཅིག་པ་དང༌། བླ་མ་དམ་པའི་མན་ངག་གིས་རྟོགས་པར་འགྱུར་རོ། །ཆོས་ཀྱི་ཕྱག་རྒྱ་ནི་ཕྱག་རྒྱ་ཆེན་པོ་དབྱེར་མེད་པའི་རྒྱུར་གྱུར་པའོ། །ཆོས་ཀྱི་ཕྱག་རྒྱ་རྣམ་པར་སྨིན་པའི་འབྲས་བུར་ངེས་པར་བསྟན་པ་སྟེ་གཉིས་པའོ།། །།ཨཱཿཕྱག་རྒྱ་ཆེན་པོ་ཞེས་བྱ་བ་ནི་ཕྱག་རྒྱ་ཡང་ཡིན་ལ་ཆེན་པོ་ཡང་ཡིན་པས་ཕྱག་རྒྱ་ཆེན་པོ་སྟེ། རང་བཞིན་མེད་པ་ཉིད་ཤེས་བྱ་ལ་སོགས་པའི་སྒྲིབ་པ་སྤངས་པ། སྟོན་ཀའི་ཉི་མ་ཕྱེད་ཀྱི་ནམ་མཁའ་ལྟར་དྲི་མ་མེད་པ། ཕུན་སུམ་ཚོགས་པ་མཐའ་དག་གི་གཞིར་གྱུར་པ། འཁོར་བ་དང་མྱ་ངན་གྱི་མཐའ་ལས་འདས་པ་གཅིག་པའི་རང་བཞིན། དམིགས་པ་མེད་པ་སྙིང་རྗེའི་ལུས་བདེ་པ་ཆེན་པོའི་རང་བཞིན་ནོ། །དེ་བཞིན་དུ་ཡིད་ལ་བྱེད་པ་མེད་པའི་ཆོས་དགེ་བའོ། །ཡིད་ལ་བྱེད་པའི་ཆོས་མི་དགེ་པའི་ཞེས་གསུངས་པ་དང༌། ཀུན་དུ་རྟོགས་པས་མ་བརྟགས་པ། །རབ་ཏུ་མི་གནས་པ་ཡི་ཡིད། །དྲན་པ་མེད་ཅིང་ཡིད་བྱེད་མིན། །དམིགས་པ་མེད་ལ་ཕྱག་འཚལ་
འདུད། ཅེས་བྱ་བ་གང་ཡིན་པ་དེ་ཕྱག་རྒྱ་ཆེན་པོ་ཡིན་པར་རིག་པར་བྱའོ། །དེའི་ཕྱིར་ཕྱག་རྒྱ་ཆེན་པོ་བསམ་གྱིས་མི་ཁྱབ་པའི་རང་བཞིན་ལས། དམ་ཚིག་གི་ཕྱག་རྒྱ་མཆོག་གི་འབྲས་བུ་སྐྱེ་བར་འགྱུར་རོ། །ཕྱག་རྒྱ་ཆེན་པོ་དྲི་མ་མེད་པའི་འབྲས་བུ་ངེས་པར་བསྟན་པ་སྟེ་གསུམ་པའོ།། །།ཧཱུཾ་དམ་ཚིག་གི་ཕྱག་རྒྱ་ཞེས་བྱ་བ་ནི་ ལོངས་སྤྱོད་རྫོགས་པ 
་དང་སྤྲུལ་པའི་སྐུའི་རྣམ་པའི་རང་བཞིན་དང་པོའི་ངོ་བོ་ཉིད་སེམས་ཅན་གྱི་དོན་གྱི་ཕྱིར་རྡོ་རྗེ་འཛིན་པ་ཧེ་རུ་ཀའི་རྣམ་པར་སྤྲོས་པ། དེ་ནི་དམ་ཚིག་གི་ཕྱག་རྒྱར་འདོད་དོ། །དམ་ཚིག་གི་ཕྱག་རྒྱ་བླངས་ཏེ་ཞེས་བྱ་བ་ནི་འཁོར་ལོའི་རྣམ་པ་ཡེ་ཤེས་ལྔའི་ཆོ་ག་ཡོངས་སུ་བརྟག་པ་ནི་མེ་ལོང་ལྟ་བུ་དང་མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་ནན་ཏན་དང༌། ཆོས་ཀྱི་དབྱིངས་ཤིན་ཏུ་རྣམ་པར་དག་པ་རྣམས་དང༌། སྦྱོར་བ་དང་པོ་དང༌། དཀྱིལ་འཁོར་རྒྱལ་མཆོག་དང༌། ལས་རྒྱལ་མཆོག་དང༌། ཐིག་ལེའི་རྣལ་འབྱོར་དང༌། ཕྲ་མོའི་རྣལ་འབྱོར་གྱིས་དམ་ཚིག་གི་ཕྱག་རྒྱའི་འཁོར་ལོ་བསྒོམ་པའི་སློབ་དཔོན་དེས་ནི་བསོད་ནམས་བྱས་པར་འགྱུར་རོ། །དེས་ཀྱང་ཆོས་ཀྱི་ཕྱག་རྒྱའི་འབྲས་བུ་ཐོབ་པར་མི་འགྱུར་ཏེ། ངེས་པའི་དོན་གྱི་རྒྱུ་ལས་ངེས་པའི་འབྲས་བུ་དེ་ཉིད་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ །དེའི་ཕྱིར་བརྟན་པ་དང་གཡོ་བའི་དངོས་པོ་གང་བྱིས་པས་ཀུན་དུ་བརྟགས་པ་དེ་དག་ལྷན་ཅིག་སྐྱེས་པའི་རོས་ཕུག་ན་དེ་བྱང་ཆུབ་ཀྱི་གསེར་དུ་འགྱུར་རོ། །འདིས་ནི་འཇིག་རྟེན་གསུམ་གྱི་འཁོར་ལོ་ཡང་དག་པར་བསྒོམས་པར་འགྱུར་ཏེ། དེ་སྐད་དུ། སྔགས་བཟླས་མེད་ཅིང་དཀའ་ཐུབ་མེད་དེ་སྦྱིན་སྲེག་མེད། །དཀྱིལ་འཁོར་མེད་དེ་དཀྱིལ་འཁོར་བ་ཡང་ཡོད་མ་ཡིན། །དེ་ནི་སྔགས་བཟླས་དེ་ནི་དཀའ་ཐུབ་སྦྱིན་སྲེག་དེའོ། །དེ་ནི་དཀྱིལ་འཁོར་ཡིན་ཏེ་དཀྱིལ་འཁོར་པ་ཡང་དེའོ། །མདོར་བསྡུས་ན་ནི་སེམས་སུ་འདུས་པའི་ཚུལ་ཅན་ནོ་ཞེས་བཅོམ་ལྡན་འདས་ཀྱིས་གསུངས་པའོ། །མདོར་བསྡུས་པ་ནི་ཆོས་ཐམས་ཅད་གཅིག་གི་རྣམ་པ་སྟེ་གང་ཞེ་ན་བདེ་བ་ཆེན་པོའི་རང་བཞིན་ནོ། །སེམས་ནི་བྱང་ཆུབ་ཀྱི་སེམས་སོ། །འདུས་པའི་ཚུལ་ནི་ཆོས་ཀྱི་ཕྱག་རྒྱ་དང༌། །ཕྱག་རྒྱ་ཆེན་པོའི་དབང་
གིས་ནི། །ཡེ་ཤེས་གང་ཡིན་པ་དེ་ཉིད་འདུས་པའི་ཚུལ་མངོན་པར་བརྗོད་དོ། །དམ་ཚིག་གི་ཕྱག་རྒྱ་སྐྱེས་བུ་བྱེད་པའི་འབྲས་བུ་ངེས་པར་བསྟན་པ་སྟེ་བཞི་པའོ། །ཕྱག་རྒྱ་བཞི་གཏན་ལ་དབབ་པ་སློབ་དཔོན་ཆེན་པོ་ཀླུ་སྒྲུབ་སྙིང་པོས་མཛད་པ་རྫོགས་སོ།། །།བླ་མ་དྷི་རི་ཤྲཱི་ཛྙཱ་ནའི་ཞབས་དང༌། བོད་ཀྱི་ལོ་ཙཱ་བ་རྨ་བན་ཆོས་འབར་གྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།