འཕགས་པ་འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བའི་འགྲེལ་པ།
མུ་ཏི་ཏ་ཀོ་ཥ།
རྒྱ་གར་སྐད་དུ། ཨཱ་ཪྻ་ཏྲཻ་ལོ་ཀྱ་བི་ཛ་ཡ་ནཱ་མ་བྲྀ་ཏྟི། བོད་སྐད་དུ། འཕགས་པ་འཛིན་རྟེན་གསུམ་ལས་རྣམ་པར་རྒྱལ་བ་ཞེས་བྱ་བའི་འགྲེལ་པ། དཔལ་རྡོ་རྗེ་སེམས་དཔའ་ལ་ཕྱག་འཚལ་ལོ། །གསང་སྔགས་ཀྱི་སྒོ་ནས་བྱང་ཆུབ་སེམས་དཔའི་སྤྱད་པ་སྤྱོད་པ་རྣམས་ཀྱིའམ། ཡང་སངས་རྒྱས་བཅོམ་ལྡན་འདས་ཀྱིས་རྣམ་པ་གཉིས་སུ་གསུངས་ཏེ། སེམས་ཅན་རྟོག་པ་མང་བ་རྣམས་ཀྱི་དོན་དུ་བྱ་བའི་རྒྱུད་རྣམས་གསུངས་སོ། །གཅིག་ཁོ་ནང་རྣལ་འབྱོར་གྱིས་བསྒྲུབ་པར་འདོད་པ་རྣམས་ལ་རྣལ་འབྱོར་གྱི་རྒྱུད་རྣམས་བཤད་དོ། །གཉིས་ཀའི་རྒྱུད་དང་གསུམ་མོ་ཞེས་ཀྱང་ཁ་ཅིག་འཆད་དེ། དེ་ཡང་ལྷའི་བྱེ་བྲག་ནི་གཉིས་སུ་ཟད་པས་གཉི་གའི་རྒྱུད་ལོགས་ཤིག་ན་མེད་དོ། །འཇིག་རྟེན་གསུམ་ལས་རྣམ་པར་རྒྱལ་བའི་རྒྱུད་འདི་ནི་རྣལ་འབྱོར་གྱི་རྒྱུད་དུ་གཏོགས་ཏེ་
ལྷའི་མཚན་ཉིད་དང༌། དམ་ཚིག་ལ་སོགས་པ་ཡང་རྣལ་འབྱོར་གྱི་རྒྱུད་དང་མཐུན་པའི་ཕྱིར་རོ། །དེ་ལ་རྣལ་འབྱོར་ཞེས་བྱ་བ་ནི་སེམས་མཉམ་པར་བཞག་པའོ། །དེའི་མཐུས་སྔགས་ཀྱི་སྒོ་ནས་བྱང་ཆུབ་སེམས་དཔའི་དགོས་པ་བསྒྲུབ་པའི་ཕྱིར་སྔགས་དང་ཕྱག་རྒྱ་དང་དཀྱིལ་འཁོར་དང་དབང་སྦྱིན་པ་ལ་སོགས་པ་རྣམ་པ་སྣ་ཚོགས་པ་སྤེལ་ཞིང་རྒྱས་པས་རྣལ་འབྱོར་གྱི་རྒྱུད་ཅེས་བྱའོ། །འཇིག་རྟེན་གསུམ་ལས་རྣམ་པར་རྒྱལ་བའི་རྒྱུད་འདི་བཤད་པ་ཡང་གླེང་གཞིའི་ཚུལ་བསྟན་པ་དང༌། རྒྱུད་ཀྱི་དངོས་པོ་བསྟན་པའོ། །དེ་ལ་གླེང་གཞིའི་ཚུལ་བསྟན་པ་ཡང་རྣམ་པ་གསུམ་སྟེ། སྟོན་པ་ཕུན་སུམ་ཚོགས་པ་དང༌། གནས་ཕུན་སུམ་ཚོགས་པ་དང༌། འཁོར་ཕུན་སུམ་ཚོགས་པའོ། །དེ་ལ་སྟོན་པ་ཕུན་སུམ་ཚོགས་པ་ནི་བཅོམ་ལྡན་འདས་རྣམ་པར་སྣང་མཛད་རྒྱུད་ཀྱི་བདག་པོ་སྟེ། ཕྱག་ན་རྡོ་རྗེ་ལ་སོགས་པ་ཡང་དེའི་བྱིན་གྱི་རླབས་ཀྱིས་བྱང་ཆུབ་སེམས་དཔའི་སྤྱོད་པ་ལ་འཇུག་པའི་ཕྱིར་རོ། །གནས་ཕུན་སུམ་ཚོགས་པ་བསྟན་པའི་ཕྱིར་གསུངས་པ། རི་རབ་རི་ཞེས་བྱ་བ་ལ་སོགས་པའོ། །རི་རབ་རིའི་སྟེང་དུ་ལྷའི་ཁང་པ་བརྩེགས་མ་དེའི་རྩེ་མོའི་ཕྱོགས་རྡོ་རྗེ་ནོར་བུ་རིན་པོ་ཆེ་སྣ་ཚོགས་ཀྱིས་བརྒྱན་པའོ། །འཁོར་ཕུན་སུམ་ཚོགས་པ་བསྟན་པའི་ཕྱིར་གསུངས་པ་བྱང་ཆུབ་སེམས་དཔའ་བྱེ་བ་ཞེས་བྱ་བ་ལ་སོགས་པའོ། །བྱེ་བ་ཕྲག་དུ་མ་ཞེས་བྱ་བ་ནི་རྒྱུད་གཞན་འཆད་པའི་ཚེ་ན་རྟག་ཏུ་བྱེ་བ་ཕྲག་དགུ་བཅུ་རྩ་དགུ་དང་ཐབས་ཅིག་ཏུ་བཞུགས་པས་ན་འདིར་ཡང་དེ་དག་ཐབས་ཅིག་ཏུ་བཞུགས་པར་ཤེས་པར་བྱའོ། །ལྷ་ནི་ལྷ་ཆེན་པོ་དང་ཚངས་པ་དང་གཏོགས་འདོད་ལ་སོགས་པའོ། །ཀླུ་ནི་འཇོག་པོ་ལ་སོགས་པའོ། །གནོད་སྦྱིན་དང་དྲི་ཟ་ལ་སོགས་པ་ནི་ཡི་དགས་ཀྱི་ཁམས་སུ་གཏོགས་པའོ། །བལྟར་རུང་བ་ཞེས་བྱ་བ་ནི་མི་མ་ཡིན་པ་དེ་དག་མིག་གི་རྣམ་པར་ཤེས་པའི་སྤྱོད་ཡུལ་དུ་གྱུར་པའོ། །དེ་ལས་བཟློག་པ་ནི་བལྟར་མི་རུང་བ་སྟེ་གཟུགས་མངོན་དུ་མི་སྟོན་ཅེས་བྱ་བའི་དོན་ཏོ། །དེ་དག་ཀྱང་སངས་རྒྱས་ཀྱིས་བཀའ་སྩལ་པའི་ཆོས་ལ་དད་པ་སྟེ་དེ་དག་དང་ཐབས་ཅིག་ཏུ་བཅོམ་ལྡན་འདས་སྤྱོད་ལམ་བཞིར་འགྲོ་བའི་དོན་མཛད་ཅིང་བཞུགས་ཏེ་དེ་ཡན་ཆད་ནི་གླེང་གཞིའོ། །རྒྱུད་ཀྱི་དངོས་པོ་བསྟན་པའི་ཕྱིར་
གསུངས་པ་དེ་ནས་ཕྱག་ན་རྡོ་རྗེ་བྱང་ཆུབ་སེམས་དཔའ་ཞེས་བྱ་བ་ལ་སོགས་པའོ། །རྡོ་རྗེ་ནི་ཡེ་ཤེས་ཀྱི་མཚན་མ་སྟེ་རྩེ་ལྔ་ནི་ཡེ་ཤེས་བཞི་དང་དེ་དག་གི་ཡུལ་ཆོས་ཀྱི་དབྱིངས་དང་ལྔར་བརྟག་གོ །ཁ་གཉིས་སུ་གྱེས་པ་ནི་ཕྱོགས་བཅུ་ཐམས་ཅད་དུ་ཁྱབ་པའི་དོན་ཏོ། །དེ་ལྟ་བུའི་ཡེ་ཤེས་བྱང་ཆུབ་སེམས་དཔའི་འདིས་ལག་ཏུ་ཐོབ་པ་དང་འདྲ་བར་མངོན་དུ་བྱས་པས་ན་ཕྱག་ན་རྡོ་རྗེ་སྟེ་ཡེ་ཤེས་དང་ལྡན་པ་ཞེས་བྱ་བའི་དོན་ཏོ། །རྒྱུད་འདིར་དངོས་པོ་དེ་ཁོ་ན་ཉིད་བཅུ་དྲུག་གིས་བསྟན་ཏེ་དེ་ཡང་གང་ཞེ་ན། སྙིང་པོའི་དེ་ཁོ་ན་དང༌། ཕྱག་རྒྱའི་དེ་ཁོ་ན་དང༌། སྔགས་ཀྱི་དེ་ཁོ་ན་དང༌། རང་རིག་པའི་དེ་ཁོ་ན་དང༌། དེ་བཞིན་དུ་བྱིན་གྱིས་བརླབ་པ་དང༌། དབང་བསྐུར་བ་དང༌། ཏིང་ངེ་འཛིན་དང༌། མཆོད་པའི་དེ་ཁོ་ན་དང༌། བདག་གི་དེ་ཁོ་ན་དང༌། ལྷའི་དེ་ཁོ་ན་དང༌། དམ་ཚིག་དང་དཀྱིལ་འཁོར་དང་ཤེས་རབ་དང༌། ཐབས་དང་རྒྱུ་དང་འབྲས་བུའི་དེ་ཁོ་ན་རྣམས་སོ། །དེ་ཁོ་ན་ཞེས་བྱ་བ་ནི་དོན་དམ་པ་དང༌། ཀུན་རྫོབ་རྣམ་པ་གཉིས་དེ་ཆོས་ཀྱི་རང་བཞིན་ཕྱིན་ཅི་མ་ལོག་པ་བརྗོད་དུ་མེད་པའི་ངོ་བོ་ནི་དོན་དམ་པའི་དེ་ཁོ་ནའོ། །དེ་ལྟ་མོད་ཀྱི་ཀུན་རྫོབ་ཏུ་འཇིག་རྟེན་གྱི་ཐ་སྙད་དང་སྦྱར་ན། མི་སླུ་བར་དགོས་པ་བསྒྲུབ་པས་ན་དེ་ཁོ་ན་ཞེས་བྱ་སྟེ། བཅུ་དྲུག་པོ་དེ་རྣམས་ཀྱིས་ཇི་ལྟར་རིགས་པར་དོན་གྲུབ་པར་བྱེད་པའི་ཕྱིར་རོ། །འདི་རྣམས་ཀྱང་ཇི་ལྟར་རིགས་པར་སྦྱར་གྱི་རིམ་བཞིན་དུ་སྦྱར་བ་ནི་མ་ཡིན་ནོ། །དེ་ལ་སྙིང་པོ་ནི་རིགས་ལྔ་སོ་སོའི་སྙིང་པོ་ཡི་གེ་འབྲུ་གཅིག་ལ་སོགས་པ་གསུངས་པའོ། །ཕྱག་རྒྱ་ནི་རྣམ་པ་བཞི་སྟེ། ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང་ལས་ཀྱི་ཕྱག་རྒྱ་ལ་སོགས་པའོ། །དེ་ལ་ཕྱག་རྒྱ་ཆེན་པོ་ནི་ལྷ་རྣམས་ཀྱི་ལུས་ཀྱི་ཚུལ་བསྟན་པ་སྟེ། ལུས་ཀྱི་སྒོ་ནས་ལྷའི་ཚུལ་གསལ་བར་བསྒོམ་པའི་རྒྱུར་ཆེ་བས་ན་ཕྱག་རྒྱ་ཆེན་པོ་ཞེས་བྱའོ། །དམ་ཚིག་གི་ཕྱག་རྒྱ་ནི་ལྷ་རྣམས་ཀྱི་སེམས་ཀྱི་ཚུལ་བསྟན་པ་སྟེ། སེམས་ཀྱི་རྣམ་པར་ཐར་པའི་མཚན་མ་ཕྱག་རྒྱར་བསྟན་པས་ལྷ་རྣམས་ཀྱང་དེ་ལས་མི་འདའ་བས་ན་དམ་ཚིག་གི་ཕྱག་རྒྱར་བསྟན་པས་དམ་ཚིག་གི་ཕྱག་རྒྱ་ཞེས་པའོ། །ཆོས་ཀྱི་ཕྱག་རྒྱ་ནི་ལྷ་རྣམས་ཀྱི་ཚིག་གི་ཚུལ་བསྟན་པ་སྟེ། ལྷ་རྣམས་
ཀྱི་ཚིག་དོན་དམ་པའི་ཆོས་ཐམས་ཅད་སྟོན་པའོ། །ལས་ཀྱི་ཕྱག་རྒྱ་ནི་སྤྱོད་པའི་ཚུལ་བསྟན་པ་སྟེ། ཕྱག་རྒྱ་རྡོ་རྗེ་ཁུ་ཚུར་གཉིས་སུ་དྲལ་བ་ལ་སོགས་པའོ། །སྔགས་ནི་ཤེས་པ་དང་སྐྱོབ་པར་ལྡན་པས་ན་སྔགས་ཏེ། དོན་མ་ནོར་བར་ཤེས་པས་ངན་སོང་གསུམ་ལས་སྐྱོབ་པའི་ཕྱིར་རོ། །དེ་ཡང་ལྷའི་སྐུ་གཟུགས་སྐྱེས་པའི་ཆ་ལུགས་འཛིན་པ་རྣམས་ཀྱིས་གསུངས་པའི་ཚིག་རྣམས་སོ། །རིག་པ་ནི་མ་རིག་པའི་མུན་པ་ཐམས་ཅད་སེལ་བའི་ཕྱིར་ལྷ་བུད་མེད་ཀྱི་ཚུལ་དུ་བཞུགས་པའི་ཚེ་གསུངས་པའི་ཚིག་རྣམས་སོ། །བྱིན་གྱིས་བརླབ་པ་ནི་རྣམ་པ་གཉིས་ཏེ་རང་བཞིན་གྱིས་བྱིན་གྱིས་བརླབ་པ་དང༌། མཐུས་བྱིན་གྱིས་བརླབ་པའོ། །བྱིན་གྱིས་བརླབ་པའི་ཆོ་ག་ཡང་བདག་རང་ཕྱག་རྒྱ་ཆེན་པོའི་རྣལ་འབྱོར་ལ་གནས་ཤིང༌། དམ་ཚིག་དང་དབབ་པ་ལ་སོགས་པའི་ཕྱག་རྒྱས་ལྷ་གནས་པར་བྱའོ། །དབང་བསྐུར་བ་ནི་རྣམ་པ་གཉིས་ཏེ་སངས་རྒྱས་བཅོམ་ལྡན་འདས་རྣམས་ལ་ནི་མཆོད་པའི་དོན་དུ་མེ་ཏོག་གི་ཕྲེང་བ་ལ་སོགས་པས་དབང་བསྐུར་བའོ། །བྱང་ཆུབ་སེམས་དཔའ་ལ་སོགས་པ་ནི་སངས་རྒྱས་ལྔའི་དབུ་རྒྱན་གྱིས་དབང་བསྐུར་བ་དང༌། མིང་གིས་དབང་བསྐུར་བ་ལ་སོགས་པའོ། །ཏིང་ངེ་འཛིན་ནི་རྣམ་པར་ཐར་པའི་སྒོ་ཡིད་ལ་བྱེད་པའོ། །མཆོད་པ་ནི་བདག་དང་གཞན་ལ་མཆོད་པ་སྟེ་ཕྱི་ནང་གི་མཆོད་པ་རྣམ་པ་བརྒྱད་ལ་སོགས་པའོ། །བདག་གི་དེ་ཁོ་ན་ནི་བདག་གི་རང་བཞིན་ཕྱིན་ཅི་མ་ལོག་པ་སྟེ། ཆོས་ལ་བདག་མེད་པའི་རང་བཞིན་མི་སྐྱེ་མི་འགོག་པ་སྟོད་པ་ཉིད་དོ། །ལྷའི་དེ་ཁོ་ན་ནི་དོན་དམ་པ་དང་ཀུན་རྫོབ་རྣམ་པ་གཉིས་ཏེ། དོན་དམ་པར་ན་ལྷའི་རང་བཞིན་སྟོང་པ་ཉིད་མི་གཉིས་པའོ། །ཀུན་རྫོབ་ཏུ་ནི་ཡན་ལག་ཐམས་ཅད་ལྡན་པར་སྐྱེས་པ་དང་བུད་མེད་དང༌། ཁྲོ་བོ་དང་ཞི་བ་ལ་སོགས་པའི་གཟུགས་སུ་སྣང་བའོ། །དམ་ཚིག་ནི་སྤྱིར་སྔགས་པ་ཐམས་ཅད་ཀྱིས་བསྲུང་བ་དང༌། རིགས་ཐ་དད་པའི་དམ་ཚིག་ཐ་དད་པར་བསྲུང་བ་རྣམས་སོ། །དཀྱིལ་འཁོར་ནི་རིགས་རེ་རེ་ཞིང་ཡང་དཀྱིལ་འཁོར་བཞི་ལ་སོགས་པ་རེ་རེ་ཡང་བཞི་བཞིར་བཤད་པའོ། །ཤེས་རབ་ནི་ཆོས་རབ་ཏུ་ཤེས་པ་སྟེ་དེ་ཁོ་ན་བཅུ་དྲུག་ལ་སོགས་པའི་མཚན་ཉིད་ལ་
མཁས་པའོ། །ཐབས་ཀྱིས་སེམས་ཅན་ཇི་ལྟ་བུས་འདུལ་བ་དེ་ལྟ་བུའི་གཟུགས་སྟོན་པ་དང༌། དགོས་པ་ཅི་ལྟ་བུས་འགྲུབ་པ་དེ་ལྟ་བུའི་རྒྱུས་སྒྲུབ་པའོ། །རྒྱུ་ཞེས་བྱ་བ་ནི་གཅིག་ཏུ་ན་བྱང་ཆུབ་སེམས་དཔའི་ས་བཅུ་ནི་སངས་རྒྱས་ཀྱི་རྒྱུ་ཡིན་པས་ན་དེའི་མཚན་ཉིད་བཤད་པ་ནི་རྒྱུ་བསྟན་པའོ། །འབྲས་བུ་ནི་སངས་རྒྱས་ཀྱིས་ཏེ་ས་བཅུ་རྣམས་ཀྱི་འབྲས་བུར་གྱུར་པའི་ཕྱིར་རོ། །གཞན་དུ་ན་རྒྱུ་ཞེས་བྱ་བ་ནི་སྔགས་ཀྱི་འབྲས་བུ་འཐོབ་པར་བྱེད་པའི་རྒྱུ་སྟེ། བཟླས་པ་དང་སྒོམ་པ་ལ་སོགས་པ་སྔགས་ཀྱི་འབྲས་བུ་གྲུབ་པ་རབ་འབྲིང་ལ་སོགས་པ་སྒྲུབ་པའོ། །འབྲས་བུ་ནི་བཟླས་པ་དང་བསྒོམས་པ་ལ་སོགས་པའི་འབྲས་བུ་སྟེ་རིག་འཛིན་ལ་སོགས་པ་གྲུབ་པ་རྣམས་དང༌། ཞི་བ་དང་རྒྱས་པ་ལ་སོགས་པ་ལས་ཀྱི་རྣམས་སོ། །དེ་ནས་ལྷ་ཆེན་པོ་ལ་སོགས་པ་གདུལ་ཞིང་དམ་ཚིག་སྩལ་བར་སྐབས་ལ་བབ་པར་མཁྱེན་ནས་ཕྱག་ན་རྡོ་རྗེ་ནམ་མཁའ་ལས་བབས་ཏེ་བཅོམ་ལྡན་འདས་ལ་གསོལ་བ་བཏབ་པོ། །ནམ་མཁའ་ལས་བབས་པ་ནི་དོན་དམ་པར་ཆོས་ཐམས་ཅད་ནམ་མཁའ་ལྟ་བུ་སྟེ་སྟོང་པ་ཉིད་ཀྱི་རང་བཞིན་ལས་ཀུན་རྫོབ་ཀྱི་བདེན་པ་ལ་གནས་ཏེ། སེམས་ཅན་གྱི་དོན་གྱི་ཕྱིར་བྱང་ཆུབ་སེམས་དཔའི་གཟུགས་སུ་འབྱུང་བར་སྟོན་ཏེ། འདིས་ནི་དངོས་པོ་མེད་པའི་ཆོས་ལས་དངོས་པོ་མེད་པའི་ཆོས་འབྱུང་བར་ཤེས་པར་བྱའོ། །གཞན་ཡང་འཁོར་འདུས་པ་ཐམས་ཅད་ཀྱི་ནང་ན་ཕྱག་ན་རྡོ་རྗེ་རྫུ་འཕྲུལ་ཆེན་པོ་དང་ལྡན་པར་ཡང་བསྟན་ཏོ། །བཅོམ་ལྡན་འདས་ལ་ཕྱག་རྒྱ་ཞིང་ལན་གསུམ་བསྐོར་བ་ནི་སྐྱེས་བུ་དམ་པ་ཡ་རབས་ཀྱི་ཚུལ་བསྟན་པ་སྟེ། འཇིག་རྟེན་ན་ཡང་བླ་འོག་གི་རིམ་པ་ནི་ཡ་རབས་རྣམས་ལ་ཡོད་པས་ན་ཡ་རབས་ཀྱི་ཆོས་ཡིན་ཏེ། མ་རབས་མཉམ་པ་བརྒྱ་བོང་བུ་དེད་པ་རྣམས་དང་དུད་འགྲོ་རྣམས་ལ་བླ་འོག་དང་བཙུན་མི་བཙུན་གྱི་རིམ་པ་མེད་དོ། །བཅོམ་ལྡན་འདས་ལྷ་ཆེན་པོ་ལ་སོགས་པ་སེམས་ཅན་མ་རུངས་པ་དེ་དག་དམ་ཚིག་འཛིན་དུ་སྩལ་བར་འཚལ་ཞེས་གསུངས་པ་ལ། དེ་ཁོ་ན་བསྡུས་པའི་རྒྱུད་ཀྱི་ནང་ནས་ལྷ་ཆེན་པོ་ཐབས་སྣ་ཚོགས་ཀྱིས་བཏུལ་བ་ལགས་ན་ཡང་འདིར་ལྷ་ཆེན་པོ་བདུད་
བཏུལ་བའི་ཐབས་བཤམ་པ་ཅི་འཚལ་ཞེས་སྐབས་ཚོལ་བ་བསལ་བའི་ཕྱིར་ཡང་ཞེས་གསུངས་ཏེ། སྔར་ལྷ་ཆེན་པོ་བཏུལ་ཟིན་ནས་ཡང་ལྷ་ཆེན་པོ་ལ་སོགས་པ་འདུལ་ལོ། །དེའི་དོན་ནི་འདི་སྟེ། ལས་ཀྱི་རྣམ་པར་སྨིན་པ་ལས་སྐྱེས་པའི་ལྷ་ཆེན་པོ་སྔ་མ་ནི་དེ་ཁོ་ན་བསྡུས་པའི་རྒྱུད་ལས་འབྱུང་བ་བཞིན་དུ་སྔར་བཏུལ་ལོ། །འདིར་ནི་ཡང་ལས་ཀྱི་རྣམ་པར་སྨིན་པ་ལས་སྐྱེས་པའི་ལྷ་ཆེན་པོ་གཞན་འདུལ་བར་བཞེད་དོ། །དེ་ལྟར་མུ་སྟེགས་ཅན་ལྷ་ཆེན་པོ་རྟག་པར་འདོད་པ་དང་ནི་འགལ་མོད་ཀྱི། འདུས་བྱས་ཐམས་ཅད་མི་རྟག་པར་གྲུབ་པས་ན་ལྷ་ཆེན་པོ་མི་རྟག་པར་གྲུབ་པ་ལ་ཉེས་པ་མེད་དོ། །སེམས་ཅན་མ་རུངས་པ་ཞེས་བྱ་བ་ནི་སྐྱོན་རྣམ་པ་གསུམ་དང་ལྡན་པ་སྟེ། ཁེངས་པའི་ང་རྒྱལ་སྲེལ་བས་གཞན་ཁྱད་དུ་གསོད་པ་དང་ལྟ་བ་ལོགས་པས་འཕགས་པའི་བདེན་པ་ལ་སོགས་པ་དོན་དུ་མི་གཉེར་བ་དང༌། རང་བཞིན་གྱིས་གཏུམ་སྟེ་གཞན་ལ་སྙོགས་ཤིང་འདུད་པ་ཅན་ནོ། །འོག་ནས་འབྱུང་བའི་མ་རུངས་པའང་དོན་དེ་ལྟར་སྦྱར་རོ། །དམ་ཚིག་འཛིན་ཏུ་སྩལ་ཞེས་བྱ་བ་ནི་དཀྱིལ་འཁོར་དུ་བཅུག་ལ་སྔགས་ཀྱི་དམ་ཚིག་ཁས་ལེན་དུ་གཞུག་པའོ། །ཆོས་ཀྱི་རྒྱལ་པོ་ཞེས་བྱ་བ་ནི་ཆོས་ཐམས་ཅད་ལ་མངའ་མཛད་པ་སྟེ། ཆོས་བདག་མེད་པའི་དོན་སྟོད་པ་ཉིད་ལས་ཀྱང་རྣམ་པ་སྣ་ཚོགས་སུ་སྟོན་པའི་ཕྱིར་རོ། །གནོད་སྦྱིན་ཁྱོད་ཤིན་ཏུ་ཁེངས་པ་ཞེས་བྱ་བ་ལ་སོགས་པ་ལ། གནོད་སྦྱིན་ནི་ཉོན་མོངས་པ་ཐམས་ཅད་ཟད་པར་བྱེད་པས་ན་གནོད་སྦྱིན་ཞེས་བྱ་བ་སྟེ། ཡི་དགས་ཀྱི་ཁམས་གནོད་སྦྱིན་མཐུ་བོ་ཆེ་ཐམས་ཅད་ཀྱི་བདག་པོ་མཛད་པས་ན་ཕྱག་ན་རྡོ་རྗེ་ལ་ཡང་གནོད་སྦྱིན་ཞེས་གདགས་སོ། །ཁེངས་པ་ནི་སྲུང་པའོ། །ཤིན་ཏུ་མཐུར་བ་ནི་བསར་བའོ། །དེ་ལྟར་རྩུབ་ཅིང་མི་སྲུན་པས་སེམས་ཅན་ལ་ཇི་ལྟར་ཕན་གདགས་ཞེས་གསུངས་པའོ། །དེའི་ཕྱིར་བཅོམ་ལྡན་འདས་ཞེས་བྱ་བ་ཤིན་ཏུ་ཁེངས་པའི་ཕྱིར་ཞེས་བྱ་བ་ལ་སོགས་པའི་དོན་ཏོ། །འདོད་པའི་བདེ་བ་ཅན་ཞེས་བྱ་བ་ནི་འདོད་པ་རྣམ་པ་ལྔ་དང་ལྡན་པའི་སེམས་ཅན་རྣམས་ཏེ། དབང་དང་ཞི་བ་དང་རྒྱས་པའི་ལས་ཀྱིས་བཏུལ་ཞེས་བྱ་བའི་དོན་ཏོ། །གསང་བ་ལ་སོགས་པས་སྦྱངས་ཏེ་ཞེས་བྱ་བ་བསད་པ་ནི་རང་བཞིན་བསྒྱུར་བ་ལ་བྱའོ། །སྲོག་
གཅོད་པ་ལ་མི་བྱ་སྟེ་སྔ་མའི་རང་བཞིན་མ་རུངས་པ་བསལ་ཏེ་ཕྱི་མའི་རང་བཞིན་ཞི་བར་བསྒྱུར་ཞེས་བྱ་བའི་དོན་ཏོ། །དོན་གྱི་ཕྱིར་དང་ཕན་པའི་ཕྱིར་དང་བདེ་བའི་ཕྱིར་ཞེས་པ་ཚེ་འདི་ལ་དོན་བདེ་བ་དང་ཕྱི་མ་ལ་ཕན་པ་དང་མྱ་ངན་ལས་འདས་པའི་ཕྱིར་ཞེས་རིམ་བཞིན་དུ་སྦྱར་རོ།། ཕྱག་ན་རྡོ་རྗེའི་སྙིང་པོའི་སྔགས་ལ་སྤྱིར་ན་དོན་བཞི་སྟེ་བྱིན་གྱིས་བརླབ་པ་དང༌། རང་བཞིན་བསྟན་པ་དང༌། བསྐུལ་བ་དང་བོད་པའོ། །དེ་ལ་ཨོཾ་ནི་རྒྱུད་ཀྱི་བདག་བོ་རྣམ་པར་སྣང་མཛད་ཀྱི་བྱིན་གྱིས་བརླབས་པར་བསྟན་པ་སྟེ། ཨ་དང་ཨུར་ཕྲང་པས་ན་ཨོཾ། དེ་ལ་ཨ་ནི་ཨ་ནུད་པ་ད་སྟེ་ཆོས་ཐམས་ཅད་མ་སྐྱེས་པའི་དོན་ཏོ། །ཨུ་ནི་ཨུ་པ་དྲ་བ་སྟེ་གནོད་པ་མེད་དེ་འཚེ་བ་མེད་པ་ཞེས་བྱ་བའི་དོན་ཏོ། །ཀླད་ཀོར་ནི་སྟོང་པ་ཉིད་ཀྱི་དོན་དུ་སྟོན་ཏོ། །སུམྦྷ་བ་ནི་ཁྲོ་བའོ། །ནི་སུ་མྦྷ་ནི་ཁྲོ་བ་མེད་པའོ། །ཧཱུཾ་ནི་གསོད་པའོ། །དེས་ནི་རང་བཞིན་བསྟན་ཏེ། ཕྱག་ན་རྡོ་རྗེ་འདོད་པ་དང་ཁྲོ་བོའི་རང་བཞིན་གདུག་པ་ཐམས་ཅད་སེལ་བའོ། །།གྷྲྀ་ཧྞ་གྲྀ་ཧྞ་ནི་མ་རུངས་པ་རྣམས་ཟུང་ཤིག་ཅེས་པའོ། །གྷྲྀ་ཧྞཱ་པ་ཡ་ནི་འཛིན་དུ་ཆུག་ཅིག་པའོ། །ཨཱ་ན་ཡ་ནི་ཁུག་ཅིག་པ་སྟེ་དེ་དག་ནི་བསྐུལ་བའོ། །ཧོ་བྷ་ག་བཱན་བཛྲ་ཞེས་བྱ་བ་ནི་ཀྱེ་བཅོམ་ལྡན་འདས་ཕྱག་ན་རྡོ་རྗེ་ཞེས་བོད་པའི་ཚིག་གོ །ཧཱུཾ་ཕཊ་ཅེས་བྱ་བས་ཀྱང་རང་བཞིན་བསྟན་ཏེ་ཕཊ་ནི་གཏན་འཕོ་བའི་དོན་དུ་བསྙེགས་པའོ། །བཅོམ་ལྡན་འདས་ག་ལ་བ་དེར་ལྷགས་ཏེ་ཞེས་བྱ་བ་ལྷ་ཆེན་པོ་ལ་སོགས་པ་རི་རབ་རྩེ་མོར་འདོང་ནུས་པ་རྣམས་ནི་བཅོམ་ལྡན་འདས་ཀྱི་ཐ་དད་དུ་ལྷགས་སོ། །དེར་འདོང་མི་ཕོད་པ་རྣམས་ཀྱང་གླིང་བཞི་པ་ལ་སོ་སོའི་ཡུལ་ན་འདར་ཡེད་ཡེད་དེ་འཁོད་དོ། །གླིང་བཞི་པའི་འཇིག་རྟེན་གྱི་ཁམས་སུ་ཚོགས་པའི་དཀྱིལ་འཁོར་ཆེན་པོ་ཞེས་བྱ་བ་སྐབས་འདི་དག་ཏུ་དཀྱིལ་འཁོར་ཆེན་པོ་ཞེས་བྱ་བ་ནི་རང་གི་འཁོར་རམ་ཞབས་འབྲིང་ཕལ་པོ་ཆེ་ལ་བྱའོ། །སེམས་ཅན་ཀུན་ལ་ཕན་པའི་ཕྱིར། །སངས་རྒྱས་ཀུན་གྱི་བྱིན་གྱིས་བརླབས། །ཞེས་བྱ་བ་ལ་སོགས་པ་ནི་བཅོམ་ལྡན་འདས་ཀྱི་ཕྱག་ན་རྡོ་རྗེའི་རང་བཞིན་བསྟན་པ་སྟེ་སེམས་ཅན་ལ་ཕན་པའི་ཕྱིར་སངས་རྒྱས་ལྔ་རྣམས་ཀྱིས་ཀྱང་བྱིན་གྱིས་བརླབས་ཤིང་བཏང་པ་ནི་ཀུན་དུ་བཟང་པོ་ཕྱག་ན་
རྡོ་རྗེའོ། །དེའང་འདོད་པ་དང་ཁྲོ་བའི་རང་བཞིན་ཏེ། ཁྲོ་བས་མ་རུངས་པ་རྣམས་འདུལ་ཞིང་འདོད་པས་བདེ་བར་སྦྱོར་བས་རྣམ་པ་ཐམས་ཅད་དུ་མཛེས་པའི་ཕྱིར་ཀུན་དུ་བཟང་པོའོ། །དེ་ཉིད་ཀུན་གྱི་བདག་པོ་སྟེ་ཁམས་གསུམ་གྱི་གཙོའོ་ཞེས་པའི་དོན་ཏོ། །དེ་ཉིད་སངས་རྒྱས་ཐམས་ཅད་ཀྱི་རང་བཞིན་ལས་སྐྱེས་པ་སྟེ་སྲས་ཞེས་བྱའི་དོན་ཏོ། །སྲས་དེ་ཡང་སུ་ཞེ་ན་ཕྱག་ན་རྡོ་རྗེ་གནོད་སྦྱིན་ཆེན་པོའོ། །གནོད་སྦྱིན་ཆེན་པོ་པས་ནི་ལྷ་ཆེན་པོ་ལ་སོགས་པ་མ་རུངས་པ་རྣམས་འཆོས་ཤིང་འདུལ་བ་ལ་དབང་སྟེ། དེ་ལྟ་བུའི་ཡོན་ཏན་དང་ལྡན་པས་ན་ཕྱག་ན་རྡོ་རྗེའི་མཚན་བརྗོད་པ་ཙམ་གྱིས་ཀྱང་མཐར་བླ་ན་མེད་པའི་བྱང་ཆུབ་འཐོབ་པར་འགྱུར་རོ་ཞེས་བཤད་དེ། དགོངས་པ་རྣམ་པ་བཞིའི་ནང་ནས་དུས་ལ་དགོངས་པའི་དོན་དང་སྦྱར་རོ། །ཀྱེ་གནོད་སྦྱིན་ང་ནི་ཐམས་ཅད་ཀྱི་བདག་པོ་བྱེད་པའོ། །འཇོམས་པ་པོ་ཞེས་པ་ཕྱག་ན་རྡོ་རྗེ་ལ་ཀྱེ་གནོད་སྦྱིན་ཞེས་པོས་ནས་ཁམས་གསུམ་ཐམས་ཅད་ཀྱི་བདག་པོ་ཆེན་པོ་ཡང་ང་ཡིན། དངོས་པོ་ཐམས་ཅད་ཀྱི་དང་པོའི་བྱེད་པ་པོ་དང་འཇོམས་ཤིང་མེད་པར་བྱེད་པ་དང༌། སྐྱེ་བོ་ཐམས་ཅད་ཀྱི་བདག་པོ་ཡང་ང་ཡིན། དེ་བཞིན་དུ་ཚངས་པ་དང་གཏོགས་འདོད་ལ་སོགས་པ་ཡང་ང་ཡིན་པས་ན་ཁྱོད་ཀྱི་ངག་ང་མི་ཉན་ཞེས་སོ། །ཁྱོད་ནི་ལུས་སྲུལ་པོ་མིའི་ཤ་ཟ་བ་ཞེས་པ་ལུས་སྲུལ་པོ་ཡི་དགས་ཀྱི་ཁམས་ཏེ། ལྷ་ཆེན་པོ་ཡང་ཡི་དགས་ཀྱི་བདག་པོ་ཡིན་པའི་ཕྱིར་རོ། །མིའི་ཤ་ཟ་བ་ནི་མི་ཐོད་ཀྱི་ནང་དུ་ཁ་ཟད་ཟ་བ་ལ་སོགས་པའི་ཕྱིར་རོ། །ཤ་ཟའི་ལུས་སྲེལ་བ་ནི་མི་ཐོད་དང་མི་རུས་ཀྱིས་བརྒྱན་པ་ལ་སོགས་པ་ཡི་དགས་ཀྱི་ཆ་ལུགས་འཛིན་པའི་ཕྱིར་རོ། །ཚངས་པ་ཞེས་བྱ་བ་ནི་ཐར་པའོ། །གཏོགས་འདོད་ཅེས་བྱ་བ་ནི་མི་འགྱུར་བའོ། །ཚངས་པ་ནི་ཉོན་མོངས་པ་ཐམས་ཅད་ཀྱིས་མ་གོས་པ་སྟེ་མྱ་ངན་ལས་འདས་པའོ། །གཏོགས་འདོད་ནི་དངོས་པོ་ཐམས་ཅད་ཀྱི་ནད་དུ་འཇུག་པ་སྟེ་དངོས་པོ་ཐམས་ཅད་དུ་གཏོགས་པའི་ཚིག་དེ་མི་འགྱུར་བ་སྟེ་ཐམས་ཅད་ཀྱི་བདག་ཉིད་དུ་བཤད་པའི་ཚིག་དེ་ངེས་པ་སྟེ་གཞན་དུ་མི་འགྱུར་བའོ། །དེ་དག་གི་རང་བཞིན་ནི་ང་ཉིད་ཡིན་པས་ན་ཁྱེད་ཐམས་ཅད་གདུལ་བའི་མཐུ་ང་ལ་ཡོད་ངོ་ཞེས་པའི་དོན་ཏོ། །དེ་ནས་ལྷ་ཆེན་པོ་ཁྲོས་ནས་རང་གི་གཟུགས་ཁྲོ་བོའི་མདངས་ཆེན་པོར་བསྟན་ཏོ་ཞེས་
གསུངས་པ། འཇིགས་སུ་རུང་བ་ཆེན་པོའི་གཟུགས། །ཞེས་པ་ལ་སོགས་པ་ཐབས་ཆ་སྣ་ཚོགས་ཀྱིས་སྡིགས་རུ་བྱེད་པར་སྟོན་ཏོ་ཞེས་གསུངས་པ། རྡོ་རྗེ་དང་མདུང་རྩེ་གསུམ་པ། །ཞེས་བྱ་བ་ལ་སོགས་པ་འཁོར་འཇིགས་སུ་རུང་བ་མང་པོ་བསགས་ནས་སྡིགས་རུའི་ཚུལ་བསྟན་ཏེ་ཞེས་གསུངས་པ། མ་རྣམས་ཀྱི་ཚོགས་དང་ཞེས་བྱ་བ་དེ་དག་གིས་རང་གི་རྫུ་འཕྲུལ་དང་མཐུ་སྣ་ཚོགས་པ་བསྟན་པ་རབ་ཏུ་འཐབ་ཅིང་ཤིན་ཏུ་འགྱེད་པ་གླིང་བཞིའི་འཇིག་རྟེན་གྱི་ཁམས་ཞེས་བྱ་བ་དག་གོ །དེ་ནས་ཕྱག་ན་རྡོ་རྗེ་ཁྲོས་པའི་ཚུལ་བསྟན་པ་ཅུང་ཟད་མཆེ་བའི་ཐོག་མ་གཙིགས་པའི་ཞེས་བྱ་བ་དག་གོ །མཆེ་བ་ཅུང་ཟད་ཕྱུངས་ཏེ་གཙིགས་པའི་ཆུའི་རླབས་དང་འདྲ་བའི་ཁྲོ་གཉེར་བྱས་པ་མིག་ཕྱིར་མི་གློན་པའི་རྡོ་རྗེའི་བལྟ་བ་མིག་གཉིས་པ་ཟབ་མོའི་དོན་སྙིང་པོ་ལ་སོགས་རྣམ་པར་གྲོལ་བའི་ཚིག་གིས་ཤིགས་པ་བྱེ་བྲག་ཕྱེད་པ་ལ་སོགས་པའོ། །སྙིང་པོའི་མཆོག་ནི་ཧཱུཾ་ཞེས་བྱ་བ་ཉིད་དེ་ཕྱག་ན་རྡོ་རྗེ་དང་པོའི་སེམས་དཔའི་སྙིང་པོ་ཡིན་པའི་ཕྱིར་རོ། །འཇིག་རྟེན་གསུམ་ལས་རྣམ་པར་རྒྱལ་བ་ཞེས་བྱ་བ་ཁམས་གསུམ་གྱི་བགེགས་དང་གནོད་པར་བྱེད་པ་ཐམས་ཅད་ལས་རྣམ་པ་སྣ་ཚོགས་སུ་རྒྱལ་བས་ན་དེ་སྐད་ཅེས་བྱའོ། །ཧཱུཾ་ཞེས་བྱ་བ་ནི་ཕྱག་ན་རྡོ་རྗེའི་རང་བཞིན་བསྟན་པ་སྟེ་མ་རུངས་པ་དང་ཉོན་མོངས་པ་ཐམས་ཅད་གཏན་འཕོ་བར་བྱེད་པའི་དོན་ཏོ། །ཧཱུཾ་ཞེས་བརྗོད་པས་དབང་ཕྱུག་ཆེན་པོ་ལ་སོགས་པ་བྲེད་དེ་བཅོམ་ལྡན་འདས་ལ་སྐྱབས་སུ་སོང་ངོ༌། །བཅོམ་ལྡན་འདས་ཀྱིས་ཀྱང་ལྷ་རྣམས་སྐྱབས་སུ་གསོལ་བ་ལ་ཅང་མ་གསུང་ན་ནི་སེམས་ཅན་གྱི་དོན་ལ་བཏང་སྙོམས་སུ་མཛད་པས་ཐུགས་རྗེ་དང་མི་ལྡན་པར་འགྱུར། དེ་ལྟར་མ་བྱེད་ཅིག་ཅེས་ཕྱག་ན་རྡོ་རྗེ་ལ་ཟློག་ཏུ་ནི་གདུལ་བར་བྱ་བ་ཐམས་ཅད་མཐར་མི་ཕྱིན་པས་བར་མདོའི་ཚིག་ཏུ་ཁྱོད་རབ་ཏུ་མི་བསྒྲུངས་སོ་ཞེས་གསུངས་སོ། །ཧཱུཾ་ཞེས་བྱ་བས་སྡིགས་པ་མགོ་གླེངས་ནས་སྙིང་པོ་འདིས་ལྷ་ཆེན་པོ་ལ་སོགས་པ་སྨ་ཕབ་སྟེ་བཏུལ་ལོ། །སྙིང་པོའི་དོན་ནི་གོང་དུ་བཤད་པར་འདུས་སོ། །དེ་བས་ན་ཐུལ་ལ་དབུགས་ཕྱུང་ཤིག་ཅེས་ལྷ་ཆེན་པོ་ལ་སོགས་པ་དེ་ལྟར་བཏུལ་བ་ནི་ལེགས་ཀྱིས་དེ་ལྟར་ཐུལ་ལ་ཐལ་བྱུང་དུ་མ་གསད་པར་སླར་གསོས་ཤིག་ཅེས་པའི་དོན་ཏོ། །དེ་དག་གི་དོན་
གྱི་ཕྱིར་རྡོ་རྗེའི་གཟུངས་བཅིང་བ་འདི་གསུངས་སོ། །ལྷ་ཆེན་པོ་ལ་སོགས་པ་དེ་དག་གསོ་བའི་དོན་གྱི་ཕྱིར་ཕྱག་ན་རྡོ་རྗེའི་གཟུངས་སྔགས་ཐམས་ཅད་དུ་ལུས་སྲོག་དང་བྲལ་བ་མི་འགྱུར་བར་འཆིང་བའི་དོན་ཏོ། །ཨོཾ་ནི་རྒྱལ་པོའི་སྙིང་པོའོ། །བཛྲ་དྲཾ་ཌྷོ་མེ་བྷ་བ་ཞེས་བྱ་བ་ནི་བདག་གི་རྡོ་རྗེ་བསྟན་པར་གྱུར་པ་སྟེ། ཡེ་ཤེས་བསྟན་པས་ཐམས་ཅད་སྲུང༌། །ཞེས་པའི་དོན་ཏོ། །རཀྵ་སརྦ་ན་ཞེས་བྱ་བ་ནི་བསྐུལ་བ་སྟེ་ཐམས་ཅད་སྲུང་བའི་དོན་ཏོ། །སྭཱ་ཧཱ་ནི་ལེགས་པར་གསུངས་པ་སྟེ་ཞི་བའི་དོན་དུ་སྦྱར་བའོ། །དེ་ལྟར་གསོས་ནས་སངས་རྒྱས་བཅོམ་ལྡན་འདས་ཀྱིས་ཀྱང་ལྷ་ཆེན་པོ་ལ་སོགས་པ་ལ་ཕྱག་ན་རྡོ་རྗེའི་བཀའ་ཉོན་ཅིག་པར་བསྐུལ་ནས་དེ་དག་གིས་ཀྱང་དེ་ལྟར་ཁས་བླངས་ཏེ་ཡང་ཕྱག་ན་རྡོ་རྗེས་རང་གི་སྙིང་པོ་བསྟན་ཏེ་དེ་དག་དབང་དུ་བྱ་བའི་ཕྱིར། ཧཱུཾ་ཊ་ཀི་ཧོ་འདི་ནི་འདོད་པའི་ཁྲོ་བོའི་རང་བཞིན་དུ་སྟོན་ཏེ། ཧཱུཾ་ནི་གཏན་འཕོ་བར་བྱེད་པའོ། །ཊ་ཀི་ནི་འདོད་པའི་རང་བཞིན་ནོ། །ཧ་ནི་བོད་པའོ། །གྲོགས་པོ་དག་བྱང་ཆུབ་ཀྱི་སེམས་ཀྱིས་མས་ཀྱི་སྡོམ་པ་གཟུང་བར་ཁས་ལོང་ཤིག་ཅེས་པ་བྱང་ཆུབ་ནི་ཉོན་མོངས་པ་ཟད་པའི་ཡེ་ཤེས་དང་མི་སྐྱེ་བའི་ཡེ་ཤེས་སོ། །དེ་ལ་སེམས་ཤིང་འདོད་པ་ནི་བྱང་ཆུབ་ཀྱི་སེམས་སོ། །དེ་ཡང་རྣམ་པ་ལྔ་སྟེ། རྩོམ་པ་དང༌། རྩོལ་བ་དང༌། འཇུག་པ་དང༌། གནས་པ་དང༌། ལྡང་བའོ། །དེ་ལ་རྩོམ་པ་ནི་དང་པོ་ཐོས་པའི་ཤེས་རབ་ལ་གནས་ཏེ་བྱང་ཆུབ་འདོད་པའི་ཕྱིར་བདག་བླ་ན་མེད་པའི་བྱང་ཆུབ་ཏུ་གྱུར་ཅིག །སེམས་ཅན་ཐམས་ཅད་ལ་ཕན་པའི་ཕྱིར་ཞེས་སྨོན་པའོ། །རྩོལ་བ་ནི་མོས་པས་སྤྱོད་པའི་ས་ལ་གནས་པས་ལུང་དང་རིགས་པ་ལ་བརྟེན་ཞིང་བསམ་པའི་ཤེས་རབ་ཀྱིས་ཆོས་དང་གང་ཟག་ལ་བདག་མེད་པར་མོས་པ་སྟེ། སྟོང་པ་ཉིད་དུ་སྩོལ་བ་ཞེས་བྱ་བའི་དོན་ཏོ། །འཇུག་པ་ནི་ཆོས་བདག་མེད་པ་ལ་རང་གིས་མྱོང་བར་འཇུག་པ་སྟེ་བྱང་ཆུབ་སེམས་དཔའི་ས་དང་པོ་ཐོབ་ཅེས་པའི་དོན་ཏོ། །གནས་པ་ནི་ཆོས་ལ་བདག་མེད་པའི་དོན་ཅི་ལྟར་རྟོགས་པ་དེ་ལ་མི་གཡོ་བར་རྩེ་གཅིག་ཏུ་གནས་པའོ། །ལྡང་བ་ནི་སེམས་རྩེ་གཅིག་ཏུ་གནས་པ་ལས་བསོད་ནམས་ཀྱི་ཚོགས་ཆེན་པོ་བསྒྲུབ་པ་དང༌། སེམས་ཅན་གྱི་དོན་མང་པོ་བྱ་བའི་ཕྱིར་དེ་ལས་ལངས་ཏེ་སྤྱོད་པ་རྒྱ་ཆེན་པོ་ལ་འཇུག་པའོ། །དེ་ལྟ་
བུའི་བྱང་ཆུབ་ཀྱི་སེམས་གང་ཡང་རུང་བ་མི་གཏོང་བར་དམ་འཆའ་བ་ནི་བྱང་ཆུབ་ཀྱི་སེམས་ཀྱི་སྡོམ་པའོ། །ཡང་ན་བྱང་ཆུབ་ཀྱི་སེམས་དང་སྡོམ་པ་སོ་སོར་སྦྱར་ཏེ་བྱང་ཆུབ་ཀྱི་སེམས་ནི་གོང་དུ་སྨོས་པ་ལྟ་བུ་སྟེ་དེ་གཟུང་བར་བྱའོ། །སྡོམ་པ་ནི་སྔགས་ཀྱི་སྡོམ་པ་སྟེ་རིགས་བཞིའི་དམ་ཚིག་འོག་ནས་འཆང་བ་རྣམས་སོ། །བྱང་ཆུབ་ཀྱི་སེམས་བརྟན་པར་བྱས་ཞེས་བྱ་བ་ལ་སོགས་པ་ནི་ལྷ་ལ་སོགས་པ་དམ་འཆའ་བར་བཞུག་པའི་དོན་བརྟན་པ་སྟེ། གོང་དུ་སྨོས་པ་ལྟ་བུའི་བྱང་ཆུབ་ཀྱི་སེམས་བརྟན་པ་སྲ་བར་བྱས་པ་ནི་སེམས་ཅན་ཐམས་ཅད་ལ་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཆེན་པོ་སྩོལ་ཏོ། །དེ་བས་ན་བྱང་ཆུབ་ཀྱི་སེམས་འདོད་པའི་རང་བཞིན་དང༌། ཕྱག་ན་རྡོ་རྗེ་བདག་ཉིད་ཆེན་པོ་མཐུ་ཆེན་པོ་ལ་སྨད་པར་མི་བྱ་སྟེ་འདི་སྡོམ་པའི་དོན་གསང་བ་སྟེ། དམ་ཚིག་ཅན་མ་ཡིན་པ་རྣམས་ལ་མི་བསྟན་པའི་ཕྱིར་རོ། །དེ་ནས་དམ་ཚིག་འཛིན་དུ་གཞུག་པའི་སྔགས་གསུངས་སོ། །དེ་ལ་ཨོཾ་ནི་དོན་སྔ་མ་བཞིན་ནོ། །བཛྲ་ས་མ་ཡ་ཨ་བྷི་ཥི་ཉྩ་ཞེས་བྱ་བ་ནི་ཕྱག་ན་རྡོ་རྗེའི་དམ་ཚིག་གི་དབང་བསྐུར་བ་ཞེས་བྱ་བའི་དོན་ཏོ། །མ་བྷི་ར་ག་ཡ་སརྦ་ཀརྨ་ན་ཞེས་བྱ་བ་ནི་དམ་ཚིག་གི་རང་བཞིན་བསྟན་པ་སྟེ་འདོད་པ་ཐམས་ཅད་ལ་མ་སྐྱོ་ཞིག་ཅེས་བྱ་བའི་དོན་ཏོ། །ཧཱུཾ་ཕཊ་ཅེས་བྱ་བ་ནི་གཏན་འཕོ་བ་སྟེ་སྒྲིབ་པ་ཐམས་ཅད་སེལ་བའོ། །འདི་ནི་བདུད་ཀྱིས་སྨྲས་པས་ན་བདག་ཅག་མི་ཉན་ཏོ་ཞེས་གོང་དུ་དམ་ཚིག་སྨོས་པ་ལ་འདོད་པ་ཐམས་ཅད་ལ་མི་སྐྱོ་བར་བྱ་ཞེས་འབྱུང་བ་སྟེ་མི་རིགས་སོ་ཞེས་ལྷ་ཆེན་པོ་ལ་སོགས་པས་སྨྲས་པ་སྟེ། སངས་རྒྱས་ཀྱི་བྱང་ཆུབ་ནི་འདོད་ཆགས་དང་བྲལ་བ་ཉིད་ཀྱིས་འཐོབ་བོ་ཞེས་བཅོམ་ལྡན་འདས་ཀྱིས་བཀའ་སྩལ་པས་ན་འདོད་ཆགས་དང་བྲལ་བ་ནི་རིགས་ཀྱི་དེ་ལས་བཟློག་དེ་མི་རིགས་ཞེས་སྨྲས་སོ། །ཁྱེད་ཅག་གིས་ནི་འདི་ལ་མ་བརྙས་ཤིག་ཅེས་བྱ་བ་ལྷ་ཆེན་པོ་ལ་སོགས་པ་ཁྱེད་ཀྱིས་འདོད་པ་ལ་སྐྱོ་བར་མ་བྱེད་ཅིག་ཅེས་བསྟན་པའི་དོན་འདི་ལ་བརྙས་ཤིང་ལོག་པ་ཡིན་ནོ་ཞེས་དེ་སྙམ་དུ་མ་སེམས་ཤིག །ད་ནི་ཇི་ལྟ་བུར་འདུལ་བ་བཞིན་དུ་བྱེད་པ་སྟེ་ཞེས་པ་སངས་རྒྱས་བཅོམ་ལྡན་འདས་ནི་སེམས་ཅན་ཇི་ལྟ་བུས་འདུལ་བ་དེ་ལྟ་བུའི་ཚུལ་དུ་མཛད་ཅིང་སྟོན་པ་སྟེ། འདོད་ཆགས་ཀྱི་སྤྱོད་པས་འདུལ་བ་ལ་ཡང་
འདོད་ཆགས་ཀྱི་སྤྱོད་པ་སྟོན་ཏེ། ཁྲོ་བས་འདུལ་བའི་སྤྱོད་པ་ལ་ཡང་ཁྲོ་བའི་སྤྱོད་པ་སྟོན་ཏོ། །ཇི་ལྟར་འདུལ་བ་བཞིན་དུ་བསྟན་པ་འདི་ཉིད་ཀྱི་ཐ་མར་ན་འཇིག་རྟེན་གྱི་ཁམས་འདི་སུན་འབྱིན་ཏེ་ཆགས་པའི་དངོས་པོ་མི་རུང་བར་ཡང་རྟོགས་པར་འགྱུར་རོ། །ལྷ་ལ་སོགས་པ་སོ་སོའི་སྐྱེ་བོ་རྣམས་མྱ་ངན་ལས་འདས་པའི་བདེ་བ་ལ་ནི་མི་ཆགས་པར་བྱེད་ཀྱི། ཁམས་གསུམ་ན་འཁོར་བའི་སྡུག་བསྔལ་བ་ལ་ཆགས་པ་འདི་དག་ལ་མྱ་ངན་ལས་འདས་པའི་བདེ་བ་ལ་མི་ཆགས་པར་མ་བྱེད་ཅིག་ཅེས་བཤད་དོ། །དེ་དག་སྦྱང་བའི་ཕྱིར་ཞེས་བྱ་བ་འདོད་ཆགས་ལ་སོགས་པ་སྒྲིབ་པ་དེ་དག་སྦྱང་བའི་ཕྱིར་རོ། །དེ་བཞིན་གཤེགས་པ་ཐམས་ཅད་ཉིད་ཀུན་དུ་བཟང་པོ་སྟེ། ཕྱག་ན་རྡོ་རྗེ་དེ་སངས་རྒྱས་ལྔ་རྣམས་ཀྱི་ཡེ་ཤེས་ཀྱི་རང་བཞིན་ཡིན་པའི་ཕྱིར་རོ། །སངས་རྒྱས་བཅོམ་ལྡན་འདས་ཀྱིས་དེ་ལྟར་རིགས་པའི་གཞུང་བཤད་ནས། དེ་ནས་ཕྱག་ན་རྡོ་རྗེས་ཡང་དམ་ཚིག་འཛིན་དུ་གཞུག་པའི་སྔགས་གོང་མ་བཟླས་ཏེ་གསུངས་སོ། །དེ་ནས་སློབ་མ་དཀྱིལ་འཁོར་དུ་ཞུགས་ནས་ལག་ཏུ་རྡོ་རྗེ་བྱིན་ཏེ། དེའི་སྔགས་བྱིན་ནས་རྡོ་རྗེ་དབང་བསྐུར་བར་བསྟན་པ་དེ་ནས་ཡང་ཕྱག་ན་རྡོ་རྗེ་ལག་ཏུ་རྡོ་རྗེ་བྱིན་ཏེ་ཞེས་བྱ་བ་ལ་སོགས་པའོ། །རྡོ་རྗེ་དབང་བསྐུར་བ་ནི་རྡོ་རྗེའི་རིགས་སུ་ངེས་པར་བཞག་པའི་འདིར རས་ཡང་ན་རྡོ་རྗེ་ནི་ཡེ་ཤེས་ཀྱི་མཚན་མ་སྟེ། ཡེ་ཤེས་ཀྱི་བྱིན་གྱིས་བརླབས་ཞེས་བྱ་བའི་དོན་ཏོ། །དེ་ལ་སྔགས་ཀྱི་དོན་ནི་འདི་ལྟ་སྟེ། ཨོཾ་ནི་རྒྱས་པའི་སྙིང་པོ་སྔ་མ་བཞིན་ནོ། །པ་ནས་ཏྭེའི་བར་དུ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཛིན་པའོ་ཞེས་ཡེ་ཤེས་ཀྱི་མཚན་མ་རྡོ་རྗེ་དབང་བསྐུར་བ་སྟེ་རྡོ་རྗེ་འཛིན་པ་ནི་རྡོ་རྗེའི་རིགས་ཀྱི་སྔགས་པ་ཞེས་བྱ་བའི་དོན་ཏོ། །བཛྲ་པཱ་ཎི་ནི་བོད་པའི་དོན། །ཧྲཱི་ནི་བསྔགས་པ་སྟེ་གཟུགས་སྣ་ཚོགས་ཞེས་པའི་དོན་ཏོ། །ཧ་ནི་བལྟ་བའི་དོན་ཏོ། །གྲངས་བཞི་སྨོས་པ་ནི་རིངས་པའམ་བསྟན་པ་སྟེ་གཟུགས་སྣ་ཚོགས་སུ་བལྟ་ཞེས་པའི་དོན་ཏོ། །དེ་ལྟར་རྡོ་རྗེས་དབང་བསྐུར་ནས་སྔོན་གྱི་བསྙེམས་པ་དང་བལྟ་བ་བཏང་སྟེ་ཕྱག་ན་རྡོ་རྗེའི་དཀྱིལ་འཁོར་དུ་ཞུགས་ནས་རང་བཞིན་ཐམས་ཅད་བརྗེ་བའི་ཕྱིར་མིང་ཡང་བརྗེ་དགོས་ཏེ། དེ་བས་ན་ལྷ་ཆེན་པོ་ལ་སོགས་པ་རྡོ་རྗེ་ལས་དྲངས་པའི་མིང་
བཏགས་སོ་ཞེས་གསུངས་པ། དེ་ནས་རྡོ་རྗེ་མིང་གི་དབང་བསྐུར་བ་བྱིན་པ་ནི་ཞེས་བྱ་བ་ལ་སོགས་པའོ། །མིང་གི་དབང་བསྐུར་བ་ཞེས་བྱ་བ་ནི་མིང་ངེས་པར་བཏགས་ཞེས་བྱ་བའི་དོན་ཏོ། །མིང་ཀུན་གྱི་གླང་ལ་རྡོ་རྗེ་སྨོས་པ་ནི་ཕྱག་ན་རྡོ་རྗེས་བཏུལ་ལ་རྡོ་རྗེའི་རིགས་ཀྱི་དཀྱིལ་འཁོར་དུ་ཞུགས་པའི་ཕྱིར་དང༌། ཡེ་ཤེས་ཀྱི་མཚན་མ་རྡོ་རྗེས་བྱིན་གྱིས་བརླབས་པའི་ཕྱིར་ཀུན་ཀྱང་རྡོ་རྗེ་ལས་དྲངས་སོ། །དབང་ཕྱུག་ཆེན་པོ་ནི་ལྷ་ཆེན་པོ་སྟེ་དེ་ནི་རྡོ་རྗེའི་རིགས་པ་དམ་པར་མིང་བཏགས་ཏེ་འཇིག་རྟེན་གྱི་རིག་པ་རྣམས་ཀྱི་ནང་ན་གཙོ་བོ་ཡིན་པའི་ཕྱིར་རོ། །གཞན་ཡང་མིང་ཁ་ཅིག་ནི་དགའ་མགུར་བཏགས་པར་ཟད་པས་དོན་བཤད་དུ་ཡང་མེད་དོ། །ཁ་ཅིག་ནི་རང་བཞིན་དང་ལས་ཀྱི་སྒོ་ནས་མིང་དུ་བཏགས་པས་བཤད་དུ་ཡོད་པ་རྣམས་ནི་ཅུང་ཟད་བཤད་པར་བྱའོ། །མཐུ་བོ་ཆེ་ནི་གཏོགས་འདོད་ལ་བྱ་སྟེ་སྒྱུ་མ་སྣ་ཚོགས་པ་སྟོན་པས་ན་སྒྱུ་མའོ། །ཚངས་པ་ནི་ཐུབ་པའི་རྡོ་རྗེ་སྟེ་མི་སྨྲ་བའོ། །མི་སྨྲ་བ་ནི་སྙོམས་པར་འཇུག་པའི་ཕྱིར་རོ། །ས་ནང་གཞོན་ནུ་ནི་ལྷ་ཆེན་པོའི་བུའོ། །དབང་པོ་ནི་ལྷ་སྟེ་སུམ་ཅུ་རྩ་གསུམ་གྱི་བདག་པོའོ། །འཐབ་ཆ་ནི་མཚོན་ཆ་ལ་སོགས་པའོ། །འཇིག་རྟེན་གསུམ་གྱི་དབང་པོ་ཞེས་བྱ་བ་ནི་འཇིག་རྟེན་པའི་ལྷའི་ནང་ན་གཙོ་བོ་ཡིན་པའི་ཕྱིར་རོ། །རིག་པའི་རྒྱལ་པོར་དབང་བསྐུར་བ་ནི་ཕྱི་རོལ་གྱི་རིག་པ་རྣམས་ཀྱི་གཙོ་བོར་བསྐོས་པ་སྟེ་རིག་པ་ནི་ཉེ་བར་བསྟན་གྱི། ཕ་རོལ་གྱི་སྔགས་རྣམས་ཀྱི་གཙོ་བོ་ཡིན་ནོ། །ཡང་ན་སྔགས་ཀྱང་མ་རིག་པའི་མུན་པ་སེལ་བའི་མཐུ་ཡོད་པས་རིག་པར་བཤད་དེ་དེའི་གཙོ་བོ་ཞེས་བྱ་བའི་དོན་ཏོ། །བར་སྣང་ནི་ཉི་ཟླ་རྒྱུ་བའི་ཕྱོགས་ཀྱི་ནམ་མཁའོ། །རྡོ་རྗེ་འཁྱིལ་པ་ནི་ཉི་མའོ། །ཟླ་བ་ནི་རྡོ་རྗེ་འོད་དོ། །རྡོ་རྗེ་བེ་ཅོན་ནི་གཟའ་སྤེན་པ་ལ་བྱའོ། །སྐྱེ་བ་ལིང་ནི་མིག་དམར་ལ་བྱའོ། །དེ་རྣམས་ནི་ཕྱི་རོལ་གྱི་ཁྲོ་བོའོ། །མ་རུངས་པ་ཐམས་ཅད་ཐག་འཛུད་པར་དབང་བསྐུར་རོ། །ནམ་མཁའ་ལ་རྒྱུ་བ་ནི་ས་ལ་འཕགས་པའི་ནམ་མཁའ་ལ་རྒྱུ་བ་སྟེ་ཆང་གིས་མྱོས་པ་ལ་སོགས་པ་བཞི་ནི་བགེགས་ཀྱི་གཙོ་བོ་སྟེ། དེ་དག་ནི་ཕྱག་ན་རྡོ་རྗེའི་ཞམ་རིང་བའི་ཚོགས་མང་པོའི་གཙོ་བོར་དབང་བསྐུར་རོ། །ས་པ་ནི་སའི་སྟེང་ན་སྤྱོད་པ་སྟེ་ཕོ་ཉར་བསྐོས་པའོ། །
འོག་ན་གནས་པ་ནི་ས་འོག་ན་གནས་པའི་ལྷ་རྣམས་ཏེ་དེ་དག་ནི་བྲན་དུ་བསྐོས་པའོ། །དེ་དག་ཐམས་ཅད་ཀྱང་སངས་རྒྱས་བཅོམ་ལྡན་འདས་དང་ཕྱག་ན་རྡོ་རྗེའི་འཁོར་ཏེ། དཔེར་ན་འཇིག་རྟེན་གྱི་རྒྱལ་པོ་ལ་ལས་ཀྱི་སྒོ་འདིར་སྨྲས་པ་ཐམས་ཅད་དགོས་པ་དེ་བཞིན་དུ་ཆོས་ཀྱི་རྒྱལ་བ་ཆེན་པོ་རྣམ་པར་སྣང་མཛད་དང༌། ཕྱག་ན་རྡོ་རྗེའི་འཁོར་ཐམས་ཅད་ཀྱང་ཚུལ་དེ་ལྟ་བུར་བལྟའོ། །དེ་ནས་ལྷ་ཆེན་པོ་ལ་སོགས་པ་བཙུན་མོ་རྣམས་ཀྱང་མིང་གི་དབང་བསྐུར་ཏེ། ལས་སོ་སོར་བསྐོས་པ་དེ་ནས་འཇིག་རྟེན་གསུམ་གྱི་བདག་པོ་ལྷ་ཆེན་པོ་ཞེས་བྱ་བ་ལ་སོགས་པའོ། །ཉོན་མོངས་མ་ནི་ལྷ་ཆེན་པོའི་བཙུན་མོ་སྟེ་དེ་བཞིན་དུ་ལྷ་སོ་སོའི་བཙུན་མོར་རིམ་བཞིན་དུ་སྦྱར་རོ། །དེ་བཞིན་དུ་ས་འོག་མ་རྣམས་ཀྱི་བར་དུ་བཙུན་མོའི་རིམ་བཞིན་དུ་བཙུན་མོ་རྣམས་ཀྱང་དེ་དག་གི་བཙུན་མོ་ཡིན་པར་རིག་པར་བྱའོ། །དེ་ནས་ཕྱག་ན་རྡོ་རྗེས་བྱང་ཆུབ་སེམས་དཔའ་ཆེན་པོ་དེ་དག་ཐམས་ཅད་བཙུད་དེ་སངས་རྒྱས་ཀྱི་ཡེ་ཤེས་བསྐྱེད་ནས་རྡོ་རྗེ་དམ་ཚིག་སྦྱིན་པ་ཞེས་བྱ་བ་སློབ་མ་དེ་དག་ཐམས་ཅད་དཀྱིལ་འཁོར་དུ་བཙུད་ནས་སངས་རྒྱས་ཀྱི་ཡེ་ཤེས་མི་གཉིས་པའི་དོན་བསྟན་ཏེ། རྟོག་པ་དང་མོས་པ་ཅི་ལྟར་བསྐྱེད་ནས་སོ་སོ་རང་གི་དམ་ཚིག་གི་སྔགས་བརྗོད་དོ། །དམ་ཚིག་གི་སྔགས་ས་འོག་མའི་ས་ཡན་ཆད་ཀུན་ཀྱང་སྤྱིའི་དོན་དུ་འདྲ་སྟེ། དགུག་པ་དང་མཆོད་པ་དང་བྱིན་གྱིས་བརླབ་པ་ལ་སོགས་པའི་ལས་བྱེད་པའི་ཚེ་དམ་ཚིག་གི་སྔགས་འདི་དག་བརྗོད་པར་བྱའོ། །དེ་ལ་རིག་པའི་རྒྱལ་པོ་ལ་སོགས་པའི་དམ་ཚིག་གི་སྔགས་འདི། ཨོཾ་བ་ལི་ཏོ་ཞེས་བྱ་བ་ལ་སོགས་པའོ། །དེ་ལ་ཨོཾ་གྱི་དོན་ནི་རྒྱས་པའི་སྙིང་པོ་སྟེ་སྔ་མ་བཞིན་ནོ། །བ་ལི་ཏོ་བ་ལེ་ཏ་ཞེས་བྱ་བ་ནི་དེ་དག་གི་རང་བཞིན་བསྟན་པ་སྟེ་གཅུ་ཞིང་བསྒྱུར་བའི་གར་བྱེད་པའོ། །བཛྲ་ཀ་རི་ཤ་དང་ཛྭ། ཞེས་བྱ་བ་ནི་ལས་བསྟན་པ་ཏེ་དགུག་པའོ། །ལྷ་རྣམས་དགུག་པའོ་ཞེས་བྱ་བ་ནི་རིག་པ་དམ་པ་ལ་སོགས་པ་ལྷ་རྣམས་དགུག་པ་ལ་སོགས་པའི་དོན་ཏོ། །བར་སྣང་བའི་སྔགས་ནི་ཧཱུཾ། །ཞེས་བྱ་བ་ལ་སོགས་པའོ། །ཧཱུཾ་ནི་གཏན་འཕོ་བ་སྟེ་གདུག་པ་ཐམས་ཅད་སེལ་བའི་དོན་ཏོ། །བ་ནས་ཡཾ་གི་བར་དུ་རྡོ་རྗེ་མཆོག་གི་དམ་ཚིག་གིས་གཟིར་བ་སྟེ། དམ་ཚིག་
ལས་མི་འདའ་ཞེས་བྱ་བའི་དོན་ཏོ། །ཧཱུཾ་ཞེས་བྱ་བ་ནི་བྱོས་ཤིག་པར་བསྒོམ་པའོ། །ནམ་མཁའ་ལ་རྒྱུ་བའི་སྔགས་ནི་ཨོཾ་ཞེས་བྱ་བ་ལ་སོགས་པའོ། །དེ་ནི་རྡོ་རྗེ་ཕྲེང་བའི་མཆོག་བཅིངས་པའོ་ཞེས་རང་བཞིན་གྱི་དོན་བསྟན་པའོ། །ས་ལ་རྒྱུ་བ་ནི་ལྷ་རྣམས་ཏོ། །ཨོཾ་བཛྲ་བྷནྡྷ་ཧཾ་ཞེས་བྱ་བ་ནི་རྒྱས་པའི་སྙིང་པོ་དང་བཅས་པ་རྡོ་རྗེ་བཅིངས་པ་ལྟོས་ཤིག་ཅེས་པའི་དོན་ཏོ། །ས་འོག་མ་པ་རྣམས་ཀྱི་སྔགས་ནི། ཨོཾ་བཛྲ་པ་ཏ་ལ་ཞེས་བྱ་བ་ལ་སོགས་པ་སྟེ་བཛྲ་པ་ཏ་ལ་ནི་ས་འོག་མ་པ་སྟེ་རང་བཞིན་བསྟན་པའོ། །བཉྫ་དང་ཧཱུཾ་ཕཊ་ཀྱིས་ནི་ལས་བསྟན་པ་སྟེ་མ་རུངས་པའི་ཕྱོགས་གཞོམ་པ་དང༌། གཏན་འཕོ་བར་གྱིས་ཤིག་པའི་ཐ་ཚིག་གོ །རིག་པའི་རྒྱལ་མོ་མན་ཆད་ནས་ས་འོག་མ་ཡན་ཆད་བུད་མེད་ཀྱི་དམ་ཚིག་གི་སྔགས་ནི། ཨོཾ་ཧེ་རུ་ཀ་ལ་སོགས་པའོ། །ཧེ་རུ་ཀ་བཛྲ་ས་མ་ཡ་ཞེས་བྱ་བ་ནི་རང་བཞིན་བསྟན་པ་སྟེ་ཁྲོ་བོ་རྡོ་རྗེ་དམ་ཚིག་ཅེས་བྱ་བའི་དོན་ཏོ། །དེ་ཡན་ཆད་ཀྱིས་ནི་ལས་བསྟན་པ་སྟེ་མ་རུངས་པ་ཐམས་ཅད་ཀྱི་དམ་ཚིག་དང་ཕྱག་རྒྱ་འཇོམས་པར་བྱེད་པ་སྟོན་ཏོ། །དེ་ནས་བཅོམ་ལྡན་འདས་ལ་ཕྱག་ན་རྡོ་རྗེས་བདག་གིས་སེམས་ཅན་འདུལ་བའི་སུག་ལས་བགྱིས་པ་ནི་གོང་དུ་སྨོས་པ་ལྟ་བུ་ནི་གཞན་ཡང་མ་རུངས་པ་མི་སྲུན་པའམ་བྱད་མ་དང་རིམས་དང་ངན་སོང་གི་རྣམས་ཇི་ལྟར་བགྱི་ཞེས་ཞུས་པ། བཅོམ་ལྡན་འདས་བདག་དང་སེམས་ཅན་འདུལ་བ་ནི་ཞེས་པ་ལ་སོགས་པའོ། །དམ་ཚིག་དེ་ཉིད་ལ་ནན་ཏན་བྱེད་དུ་ཆུག་ཅིག་ཅེས་བྱ་བ་ནི་གོང་དུ་འདོད་པ་མི་སྤོང་ངོ་ཞེས་བསྟན་པའི་དམ་ཚིག་དེ་ལ་ནན་ཏན་དུ་བྱེད་དུ་ཆུག་ཅིག །སྤྱིར་ན་དཀྱིལ་འཁོར་ཡང་རྣམ་པ་གཉིས་ཏེ། རང་བཞིན་གྱི་དཀྱིལ་འཁོར་སངས་རྒྱས་དང་བྱང་ཆུབ་སེམས་དཔའ་འཁོར་དང་བཅས་པ་ཇི་ལྟར་བཞུགས་པ་མངོན་དུ་མཐོང་བའི་དཀྱིལ་འཁོར་ནི་གོང་དུ་བཤད་པ་རྣམས་སོ། །ད་ནི་མི་ལ་སོགས་པ་རང་བཞིན་གྱི་དཀྱིལ་འཁོར་གྱི་གཟུགས་བརྙན་ནི་རི་མོར་བྲིས་ཏེ་བསྟན་པར་བྱ་བའི་ཕྱིར་ཕྱག་ན་རྡོ་རྗེས་བཅོམ་ལྡན་འདས་ལ་མི་དེ་དག་ཇི་ལྟར་ནན་ཏན་བགྱི་ཞེས་བྱ་བ་ལ་སོགས་པའོ། །དེ་ལྟར་ལྷ་རྣམས་ཀྱི་ལུས་ཀྱི་གསང་བ་
བསྟན་པ་དཀྱིལ་འཁོར་ཆེན་པོའོ། །ངག་གི་གསང་བ་བསྟན་པའི་དཀྱིལ་འཁོར་ནི་རྡོ་རྗེའི་དཀྱིལ་འཁོར་རོ། །སེམས་ཀྱི་གསང་བ་བསྟན་པ་ནི་དམ་ཚིག་གི་དཀྱིལ་འཁོར་རོ། །སྤྱོད་པ་སྣ་ཚོགས་ཀྱི་གསང་བ་བསྟན་པ་ནི་ལས་ཀྱི་དཀྱིལ་འཁོར་རོ། །དེ་ལྟར་ན་ལྷ་རྣམས་ཀྱི་ལུས་དང་ངག་དང་ཡིད་དང་སྤྱོད་པའི་གསང་བའི་དཀྱིལ་འཁོར་དུ་ཞུགས་པའི་སྔགས་པས་སྔགས་ཀྱི་དོན་རྣམས་བསྒྲུབ་པར་བྱའོ། །དཀྱིལ་འཁོར་གཅིག་གི་ནང་དུ་བཞི་ཆར་འདུས་པར་ཡང་བསྟན་ཏེ། གང་ན་གསོན་པོའི་ལུས་ཡོད་པ་ད་ན་སེམས་དང་ཡི་གེའི་འབྲུའི་ཚིག་རྣམས་ཀྱང་ཡོད་ལ། དེ་དག་གི་སྤྱོད་པ་ལས་ཀྱི་རང་བཞིན་ཡང་ཡོད་པར་འགྱུར་རོ། །དེ་ལྟ་མོད་ཀྱི་གང་གིས་ཤས་ཆེ་བ་གཙོ་བོར་བྱས་པའི་ཕྱིར་ན་དཀྱིལ་འཁོར་བཞིར་ཡང་བརྗོད་དོ། །དཀྱིལ་འཁོར་དུ་རིམ་པར་བཞུགས་པ་ནི་སེམས་ཅན་གྱིས་བལྟ་སླ་བའི་ཕྱིར་སྦོམ་རིམས་སུ་གཟུད་དེ། དང་པོ་ལུས་ཀྱི་གསང་བ་ཁ་དོག་དང་དབྱིབས་སུ་སྣང་བ་ཆུད་སླ་བས་ན་ཐོག་མར་སྨོས་སོ། །དེའི་འོག་ཏུ་ངག་གི་གསང་བ་ཡི་གེའི་འབྲུ་དང་སྒྲར་བརྗོད་པར་དམིགས་པས་སླ་བས་ན་ངག་གི་གསང་བ་སྨོས་སོ། །སེམས་ཀྱི་གསང་བ་རྣམ་པར་ཐར་པའི་སྒོ་མང་པོ་ཆུད་པར་དཀའ་བས་ན་དེའི་འོག་ཏུ་སྨོས་སོ། །དཀྱིལ་འཁོར་དེ་གསུམ་ཆར་དུ་ཞུགས་ནས་སེམས་ཅན་གྱི་དོན་ལ་སོགས་པ་སྤྱོད་པ་སྣ་ཚོགས་ནུས་པར་གྱུར་པས་ན་ལས་ནི་ཐ་མར་བཤད་དོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོར་བཙུད་ནས་ཞེས་བྱ་བ་དེ་བཞིན་གཤེགས་པ་ལྔ་རྣམས་ཀྱི་དཀྱིལ་འཁོར་ཏེ་ལུས་ཀྱི་གསང་བ་བསྟན་པ་ནི་དེ་བཞིན་གཤེགས་པའི་རིགས་ཀྱི་དཀྱིལ་འཁོར་ཡིན་པའི་ཕྱིར་རོ། །རྡོ་རྗེའི་དཀྱིལ་འཁོར་དུ་ཚུད་ཅིག་ཅེས་བྱ་བ་འདིའི་སྐབས་སུ་རྡོ་རྗེ་འདི་དག་གིས་བསང་བ་བྱ་སྟེ། འདིས་དངོས་པོ་ཡོད་པར་ལྟ་བ་ཐམས་ཅད་རིག་པའི་ཚིག་གིས་འཇིག་ཅིང་འཇོམས་པའི་ཕྱིར་ཏེ་པདྨོའི་རིགས་ཆོས་ཀྱི་དཀྱིལ་འཁོར་ཞེས་བྱ་བའི་ཐ་ཚིག་གོ །དམ་ཚིག་གི་དཀྱིལ་འཁོར་དུ་ཚུད་ཅིག་ཅེས་པ་སོ་སོའི་རྣམ་པར་ཐར་པའི་མཚན་མ་ཕྱག་རྒྱར་བཞག་པ་སྟེ་
སེམས་ཀྱི་གསང་བའི་དཀྱིལ་འཁོར་རོ། །དེའང་དཀྱིལ་འཁོར་དེར་ཞུགས་པས་དམ་ཚིག་ཐོབ་པའི་ཕྱིར་རོ། །དམ་ཚིག་གི་དཀྱིལ་འཁོར་ཞེས་བྱ་སྟེ་རིན་པོ་ཆེའི་རིགས་ཀྱི་དཀྱིལ་འཁོར་རོ། །ལས་ཀྱི་དཀྱིལ་འཁོར་དུ་ཚུད་ཅིག་ཅེས་པ། དཀྱིལ་འཁོར་གོང་མ་དག་ཏུ་ཞུགས་ནས་ལས་སྣ་ཚོགས་བསྒྲུབ་པའི་ཕྱིར་ཡང་ལས་ཀྱི་དཀྱིལ་འཁོར་དུ་འཇུག་གོ །དེ་ནས་དཀྱིལ་འཁོར་བཞིའི་མཚན་ཉིད་ཅི་འདྲ་བ་བཅོམ་ལྡན་འདས་ཀྱི་བྱིན་གྱི་རླབས་ཀྱིས་ཕྱག་ན་རྡོ་རྗེས་འཆད་དེ། དང་པོ། དཀྱིལ་འཁོར་ཆེན་པོའི་ཚུལ་བཤད་པ། །སེམས་ཅན་ཀུན་ལ་ཕན་པའི་ཕྱིར། །ཞེས་བྱ་བ་དག་གོ །དཀྱིལ་འཁོར་ཆེན་པོ་ཞེས་བྱ་བ་གྲུབ་པ་རབ་འབྲིང་ཐ་མ་ཐམས་ཅད་སྟེར་བར་བྱེད་པའི་མཆོག་སྟེ། ཅིའི་ཕྱིར་ཞེ་ན། སྔགས་པ་དམ་ཚིག་ཅན་དུ་མ་གྱུར་གྱི་བར་དུ་སྔགས་སྒྲུབ་པའི་ཐབས་མེད་དོ་བཤད་པ་དེ་འང་ཕྱག་ན་རྡོ་རྗེ་རང་གི་མཐུ་འབའ་ཞིག་མ་ཡིན་ཏེ། དཀྱིལ་འཁོར་པའི་སངས་རྒྱས་ལྔ་ཐམས་ཅད་ཀྱི་བྱིན་གྱིས་བརླབས་ཏེ་བཤད་དོ། །ཅིའི་ཕྱིར་བཤད་ཅེ་ན། སེམས་ཅན་ཀུན་ལ་ཕན་པའི་ཕྱིར་རོ། །དེ་ནས་གཞན་ཡང་རབ་བཤད་པ། །ཞེས་བྱ་བའི་དཀྱིལ་འཁོར་ཆེན་པོའི་ཆོ་ག་ཞིབ་ཏུ་བཤད་ཅེས་བྱ་བའི་དོན་ཏོ། །རང་བཞིན་གྱི་དཀྱིལ་འཁོར་བཅོམ་ལྡན་འདས་རྣམ་པར་སྣང་མཛད་དང༌། ཕྱག་ན་རྡོ་རྗེ་ལ་སོགས་པ་རི་རབ་རིའི་རྩེ་མོ་ན་བཞུགས་ཏེ་སེམས་ཅན་གྱི་དོན་མཛད་པ་དེ་བཞིན་དུ་གཟུགས་བརྙན་གྱི་དཀྱིལ་འཁོར་ཡང་རི་རབ་རིའི་ཚུལ་དུ་འདྲ་བར་བསྟན་ཏེ། དབུས་སུ་ཆོས་ཀྱི་འཁོར་ལོ་དང་འདྲ་བར་རྩིབ་མ་ཅན་ཟླུམ་པོར་བྲིས་ཏེ། དེའི་དབུས་ཀྱི་སྙིང་པོ་ལ་བཅོམ་ལྡན་འདས་རྣམ་པར་སྣང་མཛད་སྐུ་མདོག་གསེར་གྱི་མདོག་ཞལ་ཤར་ཕྱོགས་སུ་གཟིགས་པ་ལ་གདན་དུ་ནས་བཏིང་བ་ལ་བཞུགས་པར་བྱའོ། །རྣམ་པར་སྣང་མཛད་ཉིད་ལས་རྣམས་བཞིའི་ནང་ན་རྒྱས་པའི་ཕྲིན་ལས་གཙོར་མཛད་པས་ན། དེ་དང་རྗེས་སུ་མཐུན་པར་རྒྱས་པའི་ཞལ་ཟས་ནས་གདན་དུ་བཏིང་ངོ༌། །བཅོམ་ལྡན་འདས་དེའི་འཁོར་དུ་བྱང་ཆུབ་སེམས་དཔའ་བརྒྱད་བྲི་བ་ནི་འདི་ལྟ་སྟེ། བཅོམ་ལྡན་འདས་ཀྱི་གཡས་ཕྱོགས་སུ་ནི་སྤྱན་རས་གཟིགས་ཀྱི་དབང་པོ་དང༌།
འཇམ་དཔལ་དང༌། སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའོ། །གཡོན་ཕྱོགས་སུ་ནི་རྡོ་རྗེ་ཁུ་ཚུར་དང་བྱམས་པ་དང་ནམ་མཁའ་མཛོད་དོ། །བཅོམ་ལྡན་འདས་ཀྱི་རྒྱབ་ཕྱོགས་སུ་ནི་ནམ་མཁའི་སྙིང་པོའོ། །བཅོམ་ལྡན་འདས་ཀྱི་འོག་གི་སྤྱན་སྔར་ནི་ཕྱག་ན་རྡོ་རྗེ་སྟེ་རྡོ་རྗེ་ཧཱུཾ་ཀ་རའི་གཟུགས་སུ་གཞག་གོ །ད་རྣམས་ཀུན་གྱི་གནས་ཀྱང་འཁོར་ལོའི་རྩི་བ་མ་རེ་རེ་ས་བར་དུ་གཅད་དོ། །དེ་ཟླུམ་པོར་བྱ་བ་ཡང་རས་ཀྱི་སྐུད་པ་དཀར་པོ་སར་པ་རིང་ཆ་མཉམ་པ་ཧ་ཅང་ཕྲ་སྦོམ་དུ་མ་གྱུར་པའི་མཚན་མ་བཀལ་ལེགས་པ་བཟང་པོ་དཀྱིལ་འཁོར་གྱི་དབུས་སུ་སེང་ལྡེང་གི་ཕུར་བུ་བཏབ་ལ་གཉིས་རིམ་དུ་བཏགས་པས་དཀྱིལ་འཁོར་ཟླུམ་པོ་མ་འཁྲུལ་བར་ས་གཅད་དོ། །དེ་ལྟར་དཀྱིལ་འཁོར་གྱི་ལས་བྱེད་པའི་ཚེ། འཇིག་རྟེན་གསུམ་ལས་རྣམ་པར་རྒྱལ་བ་སྟེ་རྡོ་རྗེ་ཧཱུཾ་ཀ་ར་ཉིད་ཀྱི་རྣལ་འབྱོར་དུ་བདག་རང་བྱས་ཏེ། དེའི་སྙིང་པོའི་སྔགས་ཀྱང་ཡིད་ལ་བྱ་ཞིང༌། དེར་སྲུང་བ་དང་བྱིན་གྱིས་བརླབ་པར་བྱའོ། །དབུས་ཀྱི་ཕུར་བུ་ལ་སྲད་བུས་བཏགས་ཏེ་ཆ་བཅུ་དྲུག་ཏུ་བགོ་བ་ནི་ཆ་མཉམ་བཅུ་དྲུག་ཏུ་བགོ་བར་ངེས་པ་མེད་དེ། །སྤྱིར་གྲངས་བཅུ་དྲུག་ཏུ་བགོ་བ་ནི་ནང་གི་འཁོར་ལོ་ལ་གཅིག་གསེར་གྱི་རི་བདུན་དང༌། ཆུ་རིམ་བདུན་ལ་ཆ་བཅུ་བཞི། །གླིང་བཞི་གནས་པའི་སྣམ་བུ་ལ་ཆ་གཅིག་སྟེ་ཆ་བཅུ་དྲུག་ཏུ་བྱའོ། །བཅུ་དྲུག་གི་ཕྱི་རོལ་དུ་རིའི་འཁོར་ཡུག་ཆེན་པོ་ཚོན་སྣ་གསུམ་དང་ལྡན་པས་བྲིས་ཏེ། དེ་ཡི་ཕྱོགས་བཞིར་སྒོ་གདོད་དོ། །ཆོས་ཀྱི་འཁོར་ལོའི་ཚུལ་འདྲ་བ། །ཞེས་བྱ་བ་ནི་ཟླུམ་པོ་རྩིབ་མ་བརྒྱད་དུ་བྱ་སྟེ། རྩིབ་མའི་བར་དུ་བྱང་ཆུབ་སེམས་དཔའ་རེ་རེ་བཞུགས་པར་བྱའོ། །དཀྱིལ་འཁོར་ཐམས་ཅད་སྲད་བུར་བྲེ། །ཞེས་པ་དཀྱིལ་འཁོར་གྱི་ཕྱོགས་ཐམས་ཅད་དུ་སྲད་བུས་མ་འགྲུབ་པར་བྲེ་བའི་དོན་ཏོ། །སེང་ལྡེང་གི་ཕུར་བུ་གཏན་པར་རོ། །ཞེས་པ་ཕུར་བུ་གཞན་གྱིས་མི་བྱ་བར་སེང་ལྡེང་གིས་བྱ་བ་ནི་བགེགས་ཐམས་ཅད་སེང་ལྡེང་གི་ཕུར་བུས་གནན་པ་དང་ཕུར་བུ་དེས་ཐིག་གཏབ་པའི་གཟུངས་སུ་དགོས་ཏེ། གཏན་པ་དང་མི་འཁྲུལ་པར་གདབ་ཅེས་པའི་དོན་ཏོ། །ཐམས་ཅད་དུ་ནི་རིམ་གསུམ་མཆོག །ཅེས་པ་ནི་ཕྱི་རོལ་གྱི་ཁོར་ཁོར་ཡུག་
གིས་ཕྱོགས་ཐམས་ཅད་དུ་བསྐོར་ཏེ། ཚོན་རྩི་མཛེས་པར་རིམ་གསུམ་གྱིས་བྱ་བ་ལ་ཕྱི་རོལ་གྱི་ཐ་མ་ནི་སྔོན་པོས་བསྐོར་ཏེ་ལྕགས་ཀྱི་རི་འདྲ་བར་བརྟག་གོ །ཕུར་བུ་ཡིས་ནི་དེ་བཞིན་ནོ། །ཞེས་བྱ་བ་ཕྱི་རོལ་གྱི་འཁོར་ཡུག་དེ་ཡང་དབུས་ཀྱི་ཕུར་བུ་དེ་ལ་ཐག་བཏགས་ནས། མཉམ་པར་བསྐོར་ཞེས་བྱ་བའི་དོན་ཏོ། །དེ་ཡི་ནང་དུ་བྱ་བ་ནི། །ཞེས་པ་རིའི་ཁོར་ཡུག་དེའི་ནང་གསེར་གྱི་རི་རིམ་བདུན་ཚོན་སེར་པོ་དྲི་ཞིམ་པོས་བྲིའོ། །ཚོན་སྣ་ལྔ་མཆོག་རྣམས་ཀྱིས་སོ། །ཞེས་པ་འཁོར་ལོའི་མུ་ཁྱུད་ལ་སོགས་པའི་རི་མོ་ཚོན་ཕྱེ་མ་སྣ་ལྔས་བྲི་བ་དང༌། རིགས་ལྔའི་ལྷ་རྣམས་ཅི་རིགས་པར་ཁ་དོག་ལྔར་བྱ་བའི་དོན་ཏོ། །རྡོ་རྗེ་ཧཱུཾ་ཞེས་འདུས་པའོ། །ཞེས་པ་བཅོམ་ལྡན་འདས་ཀྱི་སྤྱན་སྔར་ཤར་ཕྱོགས་སུ་ཕྱག་ན་རྡོ་རྗེའི་གཟུགས་ལུགས་མའམ། འཇིམ་པའམ་ཤིང་ལས་བྱས་པའམ་རི་མོར་བྲིས་པ་བཞག་པའོ། །ཕྱག་ན་རྡོ་རྗེ་ཡང་སེམས་ཅན་གྱི་དོན་དུ་གཟུགས་སྣ་ཚོགས་པར་འཕྲུལ་ན་འདིར་ཅི་འདྲ་བ་ཞིག་བ་ཞག་ཅེན་གསུངས་པ། རྡོ་རྗེ་ཧཱུཾ་ཞེས་འདུས་པའོ། །ཕྱག་ན་རྡོ་རྗེའི་རང་བཞིན་རྡོ་རྗེ་ཧཱུཾ་ཀ་རའི་རང་བཞིན་དུ་འདུས་པ་དེ་བཞུགས་པར་བྱས་ཏེ། དེའི་ཆ་ལུགས་ཀྱང་ཕྱག་བཞི་པ་ལ་གཉིས་ནི་ཧཱུཾ་ཀ་རའི་ཕྱག་རྒྱ་བཅིངས་པའོ།། གཉིས་ནི་མདའ་གཞུ་བསྣམས་པའོ། །ཞབས་གཡས་གཡོན་གྱིས་ལྷ་ཆེན་པོ་སྤང་ཤུགས་མནན་པའོ། །འདོད་དྲུག་གཅོད་པའི་ལྷ་རྣམས་དག །འདོད་པའི་ཁམས་ཀྱི་ལྷ་ཆེན་པོ་བཞི་དང་སུམ་ཅུ་རྩ་གསུམ་དང་འཐབ་བྲལ་དང་དགའ་ལྡན་དང་འཕྲུལ་དགའ་དང༌། གཞན་འཕྲུལ་དབང་བྱེད་རྣམས་གསེར་གྱི་རི་བདུན་དང༌། ནང་གི་རི་རབ་བར་འཁོར་ལོའི་ཕྱི་རོལ་རི་རབ་ཀྱི་ཞོལ་ལ་གཞག་པར་བྱ་སྟེ། ཕྱོགས་བཞིར་ནི་མགོན་པོ་འཕགས་སྐྱེས་པོ་དང༌། ངལ་བསོ་བོ་ལ་སོགས་པ་ཅི་རིགས་པར་བཞག་དེའི་བར་དུ་ལྷ་ལྷག་མ་རྣམས་གཞག་གོ །དེ་ནས་དཀྱིལ་འཁོར་བྱིན་ཏེ་ཕྱིར་བྱུང་བ་དང་ནང་དུ་འཇུག་པའི་ཚེ། རི་མོ་དང་ཕྱག་རྒྱ་ལ་སོགས་པ་ལ་རྡོ་རྗེ་ཤུགས་ཀྱི་སྦྱོར་བ་མ་བྱས་པར་འགོངས་ན་དམ་ཚིག་ཉམས་པར་འགྱུར་གྱི་ཡིད་ཀྱིས་རི་མོ་ལ་སོགས་པ་བཏེག་ལ་འོག་ཏུ་འཛུལ་བར་བསམས་ཏེ་རྡོ་རྗེ་ཤུགས་ཀྱི་སྔགས་ཀྱིས་ཤིག །གྲྭའི་རི་མོ་
ལེགས་པར་འདོད། །ཅེས་པ་གླིང་སོ་སོའི་གྲྭ་ཡོད་པ་རྣམས་ཟུར་ཕྱིན་པར་བྱའོ། །གླིང་དེ་དག་གི་ནང་དུ་ཡང་བཅུད་ཀྱི་འཇིག་རྟེན་སོ་སོ་ན་ཇི་ལྟར་གནས་པའི་ཆ་ལུགས་བཞིན་དུ་བསོག་ཅིང་བྲི་བར་བྱའོ། །ཚངས་པ་ལ་སོགས་པ་བཞིའི་རྣམས་ཞེས་པ་གླིང་དེར་ཚངས་པ་དང་ལྷ་ཆེན་པོ་དང་དབང་པོ་དང་རྟོགས་འདོད་རྣམས་བྲིས་ཏེ། ཤར་ཕྱོགས་ཀྱི་གླིང་གི་དབུས་སུ་དབང་པོ་བཙུན་མོ་དང་བཅས་པར་བྲིའོ། །དེ་བཞིན་དུ་འཛམ་བུའི་གླིང་དུ་ལྷ་ཆེན་པོའོ། །ནུབ་ཀྱི་བ་གླང་སྤྱོད་ཀྱི་གླིང་དུ་ཚངས་པ། བྱང་གི་སྒྲ་མི་སྙན་དུ་རྟོགས་འདོད་བཙུན་མོ་དང་བཅས་སུ་བྲིའོ། །ཕྱིའི་རྡོ་རྗེ་རིགས་རྣམས་ཀྱི། །དཀྱིལ་འཁོར་ཡང་དག་བྲི་བར་བྱ། །ཞེས་པ་རི་ཁོར་ཡུག་གི་ནང་ལོགས་གླིང་རྣམས་ཀྱི་བར་དག་ཏུ་སྨོས་པའི་བར་སྣང་ལ་རྒྱུ་བའི་ནམ་མཁའ་ལ་རྒྱུ་བ་དང་ས་པ་དང༌། ས་འོག་པ་ཐམས་ཅད་སྤང་ཤུགས་ཉེ་བར་གཞག་ཅིང་དཀྱིལ་འཁོར་དུ་དགོད་པར་བྱའོ། །སྒོ་སྲུང་བྲི་བར་བྱ་བ་ཡང༌། །ཞེས་པ་རི་ཁོར་ཡུག་གི་ཕྱི་རོལ་སྒོ་བཞི་བཏོད་དེ་ཤར་ཕྱོགས་སུ་ཀྱོ་བ་དང༌། ལྷོ་ཕྱོགས་སུ་ཞགས་པ་དང༌། ནུབ་ཕྱོགས་སུ་ལྕགས་སྒྲོག་བྱང་ཕྱོགས་སུ་དྲིལ་བུའོ། །ཁོར་ཡུག་གི་ཕྱི་རོལ་དུ་སེམས་ཅན་དམྱལ་བ་ལ་སོགས་པའི་གཟུགས་བཞག་གམ། རི་མོར་བྲིའམ་སོ་སོའི་སར་ཐིག་ལེ་བཞག་སྟེ་དེའི་མཚན་མར་བསྔོས་པ་གཞག་པར་བྱའོ། །ཆོས་མིན་ཅན་ནི་བཞག་ཕྱིར་རོ། །ཞེས་པ་ཡི་དགས་དང་ནད་ལ་སོགས་པ་དཀྱིལ་འཁོར་གྱི་ཕྱི་རོལ་འདབ་ཏུ་གཞག་པ་ནི་དཀོན་མཆོག་གསུམ་ལ་གནོད་པ་བྱེད་པ་དང༌། སེམས་ཅན་མང་པོ་ལ་གནོད་པ་བྱེད་པ་རྣམས་བསལ་བའི་ཕྱིར་དེ་རྣམས་མངོན་པར་སྤྱོད་པའི་ལས་བྱེད་པར་བསྒོས་ཏེ་གཞག་གོ །དེ་ཡི་ཕྱི་རོལ་དུ་དགོད་པ། །ཞེས་པ་དཀྱིལ་འཁོར་གྱི་ལྷ་ལ་སོགས་པ་ལ་མཆོད་པའི་བཤོས་དང་མར་མེ་ལ་སོགས་པའི་མཆོད་པའི་ཡོ་བྱད་ཅི་འབྱོར་པ་རྣམས་གཞག་གོ །ཕྱིར་གྲུ་བཞི་པར་བྱ་བ་རྒྱུད་འདི་ལས་མི་འབྱུང་མོད་ཀྱི། དཀྱིལ་འཁོར་སྤྱིའི་ཆོ་ག་བཤད་པ་ལས་འོག་བཞིའི་སྟེགས་བུ་ལ་སོགས་པ་བྱའོ་ཞེས་འབྱུང་བ་དང་སྦྱར་ཏེ་གྲུ་བཞི་པོ་ནི་སྟེགས་བུར་བལྟའོ། །གཞན་ཡང་
ས་སྦྱང་བ་དང་མཚམས་བཅད་པ་དང༌། བསྐྲད་པ་དང༌། སྲུང་བ་དང༌། ལྷ་སྤྱན་དྲང་ཞིང་བྱིན་གྱིས་བརླབ་བ་དང་མཆོད་པ་ལ་སོགས་པ་འདིར་མ་སྨོས་ལ་དཀྱིལ་འཁོར་ལ་སོགས་པའི་ཡོ་བྱད་དུ་དགོས་པ་རྣམས་ནི་དཔལ་དང་པོ་འབྱུང་བ་ལ་སོགས་པ་དཀྱིལ་འཁོར་སྤྱིའི་ཆོ་ག་དང་ཡང་སྦྱར་རོ། །དེ་ལྟར་དཀྱིལ་འཁོར་ཆོ་ག་ཐམས་ཅད་རྫོགས་ནས་རྡོ་རྗེ་སློབ་དཔོན་ཉིད་ཞུགས་ཤིག་པར་བསྟན་པ་དེ་ལ་ཐོག་མ་ཉིད་དུ་ཞེས་བྱ་བ་ལ་སོགས་པའོ། །རྡོ་རྗེ་འཛིན་མའི་ཕྱག་རྒྱ་བཅིངས་ལ་ཞེས་བྱ་བ་རྡོ་རྗེ་དབྱིངས་ཀྱི་བདག་མོའི་ཕྱག་རྒྱ་སྟེ། རྡོ་རྗེ་ཐལ་མོ་སྦྱར་ལ་གུང་མོ་བསྒྲེང་སྟེ་སྤྱི་བོར་བྱས་མཛུབ་མོ་ལུས་སུ་བྱས། མཐེ་བོང་སྐྱིལ་མོ་ཀྲུང་དུ་བྱའོ། །དེའི་ཐོར་ཏོ་ལ་མེ་ཏོག་བཞག་སྟེ་སྔགས་འདི་བརྗོད་དེ་གཏོར་རོ། །སྔགས་ཀྱི་དོན་ནི་ཀྱེ་ཕྱག་ན་རྡོ་རྗེ་བདག་བཞེས་ཤིག །གཟིགས་ཤིག་ཅེས་པ་སྟེ་ཧ་བཞི་སྨོས་པ་ནི་རིངས་པའམ་བཏུད་པར་བསྟན་པའོ། །དཀྱིལ་འཁོར་དུ་ཞུགས་ནས་ཞེས་མི་ཤིགས་ཀྱི་མཚན་མ་བསྐུལ་བའི་ཕྱིར་གསུངས་པ། དེ་ནས་པུས་མོ་གཡས་པའི་ལྷ་ང་ས་ལ་བཙུགས་ནས་ཞེས་བྱ་བ་དག་གོ །དེའི་ཕྱག་རྒྱ་ནི་གཞན་གོང་མ་བཞིན་དུ་མཛུབ་མོ་གཉིས་ཀྱོ་བ་ཏང་གི་ཐབས་སུ་རྩེ་མོ་གུང་མོ་ལ་མི་གཞར་བར་དགུག་སྔགས་ཀྱི་དོན་ནི་ཁྱད་པར་གྱི་རྫུ་འཕྲུལ་མང་པོ་ཟུང་ཤིག་ཁུག་ཅིག་ལྟས་ངན་པ་དང་བྲལ་བར་བྱ་བའི་ཕྱིར་རོ། །དེ་ནས་རྡོ་རྗེའི་དཀྱིལ་འཁོར་འབྱུང་སྟེ། རྡོ་རྗེའི་ཕྲེང་བ་མཉམ་ལྡན་པས། །ཞེས་བྱ་བ་དཀྱིལ་འཁོར་ཆེན་པོའི་སྐབས་སུ་ཆོས་ཀྱི་འཁོར་ལོ་ལྟ་བུར་ཚོན་སྣ་ལྡས་བྱ་ཞེས་འབྱུང་བ་རྡོ་རྗེའི་དཀྱིལ་འཁོར་ལ་རྡོ་རྗེ་རྩེ་གསུམ་པའི་ཕྲེང་བ་ཆེ་ཆུང་མེད་པས་འཁོར་བར་བསྐོར་རོ། །བརྟག་པར་བྱ་ཞེས་བྱ་བ་ནི་དེ་ལྟར་བྱའོ་ཞེས་བྱ་བའི་དོན་ཏོ། །དེར་བདག་གམ་སློབ་མ་འཇུག་པར་བྱ་བ་ནི་དཀྱིལ་འཁོར་ཆེན་པོའི་ཆོ་ག་བཞིན་ནོ། །དཀྱིལ་འཁོར་གྱི་ལས་སྲད་བུ་བྲེ་བ་དང་ཚོན་དགྱེ་བ་ལ་སོགས་པ་ལས་སུ་བྱའོ། །ཆོ་ག་ཡང་གོང་མ་དང་འདྲའོ། །དཀྱིལ་འཁོར་དེར་ཞུགས་ནས་རེ་ཞིག་ལག་པ་གཡས་པས་རྡོ་རྗེ་གསོར་ཞིང༌། འཇིག་རྟེན་གསུམ་ལས་རྣམ་པར་རྒྱལ་བའི་སྙིང་པོ་གོང་དུ་སྨོས་པ་བཟླས་སོ། །དེ་ནས་རྡོ་རྗེ་ཟངས་སམ་གསེར་
དངུལ་ལམ་ལྕགས་ལ་རྒྱས་པའམ་ཞི་བའམ་དབང་ངམ་མངོན་པར་སྤྱོད་པ་ཇི་ལྟར་རིགས་པར་བྱ་སྟེ་ལག་པ་གཉིས་རྡོ་རྗེ་ཁུ་ཚུར་དུ་བྱས་ལ་གཤིབས་པས་རྡོ་རྗེ་དེ་བཟུང་ལ། ཨོཾ་སུམྦྷ་ཞེས་བྱ་བ་ལ་སོགས་པའི་སྔགས་ཀྱི་སྙིང་པོ་གོང་དུ་སྨོས་པ་དེས་རྡོ་རྗེ་འགུལ་གྱི་བར་དུ་བཟླས་སོ། །སྒྲུབ་པ་དེ་ཡང་སྔར་བསྙེན་པ་རྣམ་པ་གསུམ་སྟེ། མཚན་མས་བསྙེན་པ་ནི་བཀའ་ལུང་ཐོབ་པ་དང་འོད་འབྱུང་བ་ལ་སོགས་པའོ། །གྲངས་ཀྱི་བསྙེན་པ་ནི་ཡི་གེའི་འབྲུ་རེ་རེ་ཞིང་འབུམ་བཟླས་ཞེས་བྱ་བ་ལ་སོགས་པའོ། །དུས་ཀྱི་བསྙེན་པ་ནི་ལོའམ་ཟླ་བའམ་ཞག་དུས་ཀྱིས་བསྙེན་པར་བྱ་སྟེ་དེ་གང་ཡང་རུང་བས་སྔར་བསྙེན་པ་བྱས་ནས་གཟོད་སྒྲུབ་པ་ལ་འཇུག་པའོ། །སྔར་མཉེས་པ་དང་སེམས་ལས་སུ་རུང་བར་མ་བྱས་པར་འགྲུབ་པར་མི་འགྱུར་རོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་ཆེན་པོ་གོང་དུ་འབྱུང་བ་བཞིན་དུ་ཐམས་ཅད་ཚང་བར་བྲིས་ནས། ལྷ་རྣམས་ཀྱི་སོ་སོའི་ཕྱག་རྒྱའི་མཚན་མ་གཞག་པར་བྱའོ། །དེ་ནས་དཀྱིལ་འཁོར་དུ་སློབ་དཔོན་དང་སློབ་མ་གཉིས་འཇུག་པ་འདྲ་སྟེ། དང་པོ་རྡོ་རྗེ་འཛིན་མའི་ཕྱག་རྒྱ་གོང་དུ་སྨོས་པ་བཅིངས་ལ་དེ་མེ་ཏོག་བོར་ནས་ཕྱག་རྒྱ་དེ་བཀྲོལ་ཏེ། ལག་པ་གཡས་པར་རྡོ་རྗེ་བཟུང་ལ་གཡོན་པས་དྲིལ་བུ་གསིལ་ལོ། །དེ་ནས་སློབ་མ་ཡང་དེ་བཞིན་དུ་བཅུག་ནས་སློབ་དཔོན་གྱིས་སློབ་མ་ལ་བགོ་བ། དམ་ཚིག་ཐོབ་བ་རྟག་ཏུའོ། །ཞེས་བྱ་བ་ལ་སོགས་པའོ། །ཁྱོད་དཀྱིལ་འཁོར་འདིར་ཞུགས་པས་ན་རྟག་ཏུ་དམ་ཚིག་དང་ལྡན་པ་ཡིན་ནོ། །ཇི་ལྟར་དྲིལ་བུའི་སྒྲ་མི་རྟག་པ་བཞིན་དུ་འདུས་བྱས་དེའི་རང་བཞིན་ཡང་མི་རྟག་པར་བསྟན་ཏོ། །དེ་སྟེ་དམ་ཚིག་ལས་འགལ་བར་བྱས་ན་རྡོ་རྗེ་འབར་བས་ལུས་སྲེག་པར་འགྱུར་རོ། །ཇི་ལྟར་འགལ་ན་དེ་ལྟར་འགྱུར་ཞེ་ན་དེ་སྟེ་རྡོ་རྗེ་འཛིན་དང་ཞེས་བྱ་བ་བདག་གོ །ཕྱག་ན་རྡོ་རྗེ་ལ་དད་ཅིང་མོས་པའི་སེམས་ཁྱོད་ཀྱིས་ཚེ་འདི་ལ་སྤངས་པར་གྱུར་ན་རྡོ་རྗེས་བསྲེག་གོ །དེ་བཞིན་དུ་དཀོན་མཆོག་གསུམ་ལ་སྐྱབས་སུ་གསོལ་བ་སྤངས་པ་དང༌། སྔགས་ཀྱི་བརྟུལ་ཞུགས་དང་དམ་ཚིག་སྤངས་པ་དང་བྱང་ཆུབ་ཀྱི་སེམས་འདོད་པའི་རང་བཞིན་རྣམས་སྤངས་ན་ཉེས་པ་གོང་མ་བཞིན་
དུ་འགྱུར་རོ། །དེ་ནས་དམ་ཚིག་གི་སྔགས་འདིས་བསྔགས་པའི་སྤོས་ཆུ་བླུད་དེ། སྔགས་ཀྱི་དོན་ནི་དམ་ཚིག་ལས་ཉམས་ན་གནོད་པར་གྱུར་ཅེས་པའི་དོན་ཏོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ་ཞེས་བྱ་བ་དཀྱིལ་འཁོར་ཆེན་པོ་བཞིན་དུ་བྲིས་ལ་ལྷའི་སྐུ་རྣམས་ལུགས་སུ་བྱས་པའམ་རི་མོར་བྲིས་པ་གཞག་པར་བྱའོ། །དཀྱིལ་འཁོར་དུ་སློབ་དཔོན་དག་སྔར་ཞུགས་ལ་དེ་ནས་སློབ་མ་བཙུད་དོ། །སློབ་དཔོན་གྱིས་ཇི་ལྟར་རྒྱུད་ལས་འབྱུང་བ་དེ་བཞིན་དུ་ལས་བསླབ་པར་བྱའོ། །སྦྱིན་སྲེག་གི་ལས་སུ་བྱ་བ་འོག་ནས་འབྱུང་བ་རྣམས་འདིར་ནི་ལས་ཀྱི་འབྲས་བུ་དང༌། སྲེག་པའི་དངོས་པོ་མདོ་ཙམ་ཞིག་བསྟན་གྱི་ལྷ་སྤྱན་དྲང་བ་དང༌། མེ་ལྷ་དགུག་པ་དང༌། བགེགས་བསལ་བ་དང༌། ཐབས་ཀྱི་ས་སྦྱང་བ་དང༌། མཆོད་པ་ལ་སོགས་པའི་ཆོ་ག་སྦྱིན་སྲེག་གི་ཡན་ལག་ཏུ་དགོས་ལ་འདིར་མ་བྱུང་བ་རྣམས་ནི་སྤྱིའི་ཆོ་ག་རྒྱུད་གཞན་ལས་འབྱུང་བ་དག་དང་སྦྱར་རོ། །བཅོམ་ལྡན་འདས་ཀྱི་སྤྱན་སྔར་ཐབ་གྲུ་བཞི་བྱས་ལ་ཞེས་བྱ་བ་ཐབ་དེར་ཞི་བ་དང༌། རྒྱས་པ་ཀུན་ཀྱང་བྱར་རུང་བ་སྐད་དུ་བཤད་མོད་ཀྱི་གཙོ་བོར་ནི་ཞི་བའི་ལས་ལ་སྦྱར་བ་སྟེ། བཅོམ་ལྡན་འདས་ཤར་ཕྱོགས་སུ་གཟིགས་པའི་སྤྱན་སྔར་ཐབ་དེ་བྱས་ལ་སྔགས་པ་བྱང་ཕྱོགས་སུ་བལྟས་ཏེ་སྒྲུབ་པོ་གཡོན་པས་བདག་གི་ཕྱག་རྒྱ་བཅིངས་ཏེ་ཞེས་བྱ་བ། ཕྱག་ན་རྡོ་རྗེ་རང་གི་ཕྱག་རྒྱ་རྡོ་རྗེ་ཁུ་ཚུར་བཅིངས་པ་ལ་བྱའོ། །དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་དགུག་པ་ཞེས་བྱ་བ་དཀྱིལ་འཁོར་གྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་རང་གི་གནས་ནས་བསྐྱོད་ནས་འདིར་གཤེགས་སུ་གསོལ་བ་དང༌། གཤེགས་ནས་གང་དུ་བྱིན་གྱིས་བརླབ་པར་འདོད་པ་དེར་གཞུག་པ་དང་བཅུག་ནས་དམ་ཚིག་གིས་མི་འགྱུར་བར་བཅིངས་པ་དང༌། བདག་རང་གི་ལྷར་འདོད་པར་དབང་དུ་བྱ་བའི་ཕྱིར་སྦྱིན་སྲེག་བྱ་བར་བསྟན་པའོ། །སྟོད་གཡོགས་སྦྱར་མ་ལྟར་བགོས་ཏེ། །ཞེས་བྱ་བ་སྟོད་གཡོགས་པའི་ཆོས་གོས་ཆེན་པོ་ཟླུམ་པོར་བགོ་བའི་ཐབས་སུ་ཞུ་ལུབ་ཏུ་གཡོགས་ཏེ་ལག་པ་གཉིས་འོག་ནས་ཕྱུང་བ་ལ་ལས་སུ་བྱའོ། །ཏིང་ངེ་འཛིན་གྱི་བཟླས་པ་ནི་ཡིད་ཀྱིས་བཟླས་
པའོ། །འཁོར་ལོ་ལྟ་བུའི་ཐབ་ནི་འཁོར་ལོ་ལྟ་བུར་ཟླུམ་པོར་བྱས་ལ་ནང་དུ་འཁོར་ལོ་ལྟ་བུའི་མཚན་མ་གཞག་གོ །གཡས་གཡོན་གྱིས་སྲེག་ཅེས་བྱ་བ་ནི་ལག་པ་གཡས་གཡོན་གྱིས་ཀས་བསྣོལ་ཞིང་བསྲེག་གོ །ཕྱག་ན་རྡོ་རྗེ་ཉིད་དགུག་པ་དང་གཞུག་པ་ལ་སོགས་པ་བསྒྲུབ་པའི་ཕྱིར་གསུངས་པ་བཅོམ་ལྡན་འདས་ཀྱི་གཡོན་དུ་རྡོ་རྗེ་ལྟ་བུའི་ཐབ་བྱས་ལ་ཞེས་བྱ་བ་དག་གོ །རྡོ་རྗེ་ལྟ་བུའི་ཐབ་ནི་ཆུ་རིངས་སུ་རྡོ་རྗེ་ལྟ་བུར་བྱས་ལ་ནང་དུ་རྡོ་རྗེའི་མཚན་མ་གཞག་པའོ། །སྟོད་གཡོགས་ཀྱི་ཡན་ལག་ཀུན་བཅིངས་པ་ནི། སྟོད་གཡོགས་ཀྱི་རས་ཀྱིས་ཕྲག་པ་གཡས་གཡོན་གཉིས་ཀ་སེ་རལ་ཁར་བྱས་ཏེ། བྲང་དུ་རྒྱ་གྲམ་ཡོད་པར་བཅིང་ངོ༌། །ཡམ་ཤིང་ཐམས་ཅད་ཀྱིས་ཞེས་བྱ་བ་ནི་ཞི་བ་དང༌། རྒྱས་པ་དང་དབང་དུ་བྱ་བ་ལ་རིགས་པའི་ཡམ་ཤིང་ཐམས་ཅད་ཀྱིས་སོ། །འབར་བའི་ཕྲེང་བ་འཛིངས་པ་ཞེས་བྱ་བ་ནི་མེ་ལྕེ་འཛིངས་པར་འབར་ཞིང་བོད་པ་ལ་བྱའོ། །རོ་ཐམས་ཅད་བསྲེགས་ནས་ཞེས་བྱ་བ་མངར་པོ་དང་སྐྱུར་པོ་དང་ཁ་བ་ལ་སོགས་པའོ། །དེ་ནས་ཡོ་བྱད་བཤད་པར་བྱའོ་ཞེས་བྱ་བ་དཀྱིལ་འཁོར་དེ་དག་ཏུ་ཞུགས་ནས་གྲུབ་པ་སྒྲུབ་པའི་རྒྱུ་རྣམས་བཤད་པར་བྱའོ་ཞེས་བྱ་བའི་ཐ་ཚིག་གོ །དཀྱིལ་འཁོར་གྱི་ཆོག་ཐམས་ཅད་མཐོང་བར་གྱུར་ནས་བསྒྲུབ་པོ་ཞེས་བྱ་བ་གྲུབ་བ་འོག་ནས་འབྱུང་བ་རྣམས་ཀྱི་རྒྱུའི་གཙོ་བོ་ནི་དཀྱིལ་འཁོར་མཐོང་བ་སྟེ། དེར་ཞུགས་ནས་དམ་ཚིག་ཅན་དུ་གྱུར་པས་སྔགས་བསྒྲུབ་པར་རིགས་ཀྱི། དམ་ཚིག་མེད་པ་ནི་སྔགས་བསྒྲུབ་པ་ལ་འཇུག་ཏུ་མི་དབང་ངོ༌། །དམ་ཚིག་སྤངས་པར་གྱུར་པ་ནི། །ཞེས་བྱ་བ་དཀྱིལ་འཁོར་དུ་ཞུགས་ནས་ཀྱང་དམ་ཚིག་མི་སྲུང་བ་སྟེ། སྔགས་ཐམས་ཅད་ཀྱི་སྤྱིའི་དམ་ཚིག་དཔལ་དམ་པ་དང་པོ་ལ་སོགས་པ་ལས་འབྱུང་བ་དང༌། རིགས་བཞི་སོ་སོའི་དམ་ཚིག་ཐ་དད་པ་རྣམས་སྤངས་ཏེ་མ་བསྲུངས་ན་ཕྱག་ན་རྡོ་རྗེ་མི་འགྲུབ་བོ། ཕྱག་ན་རྡོ་རྗེ་ལ་རྣམ་པ་སྣ་ཚོགས་ཀྱིས་མཉེས་པར་བྱ་སྟེ། གྲུབ་པ་རྣམ་པ་གསུམ་དང་ལས་རྣམ་བཞི་བསམས་བཞིན་དུ་འབྱོར་པར་གྱུར་པ་ནི་ཕྱག་ན་རྡོ་རྗེ་འགྲུབ་པའོ། །གསང་བ་ཡང་དག་མི་ཤེས་པས། །ཞེས་བྱ་བ་ཕྱག་ན་
རྡོ་རྗེ་མི་འགྲུབ་ཅེས་གོང་མ་དང་སྦྱར་ཏེ། བཅོམ་ལྡན་འདས་ཕྱག་ན་རྡོ་རྗེའི་ལུས་དང་ངག་དང་ཡིད་ཀྱི་གསང་བའི་དེ་ཁོ་ན་མི་ཤེས་པས་ཕྱག་ན་རྡོ་རྗེ་མི་འགྲུབ་པོ། །གསང་བ་དེ་ཡང་གང་ཞེ་ན་འདོད་པ་མི་སྤང་ངོ་ཞེས་གོང་དུ་སྨོས་པ་སྟེ་འདོད་པ་དེ་ཡང་གང་ལ་བྱ་ཞེ་ན། བཅོམ་ལྡན་འདས་སེམས་དཔའ་འདོད་པའོ་ཞེས་བྱ་བ་ལ་སོགས་པའོ། །གཞན་ཡང་གསང་བ་ནི་ཀུན་གྱིས་ཤེས་པར་བྱ་བ་མ་ཡིན་ཏེ་སྤྱོད་ཡུལ་དུ་མི་འགྱུར་བའོ། །དེ་ཡང་གང་ཞེ་ན་གང་ཟག་དང་ཆོས་ལ་བདག་མེད་པའི་ཡང་དག་པ་མི་ཤེས་པའོ། །གཞན་ཡང་ཡང་དག་པ་ནི་དེ་ཁོ་ན་ཉིད་དེ་རྒྱུད་འདིར་དེ་ཁོ་ན་བཅུ་དྲུག་གི་དོན་སྨོས་པ་དེ་ཉིད་གསང་བ་སྟེ་དེ་མ་ཤེས་པར་མི་འགྲུབ་ཅེས་བྱ་བའི་དོན་ཏོ། །བཅོམ་ལྡན་སེམས་དཔའ་འདོད་པའོ། །ཞེས་གོང་དུ་འདོད་པ་མི་སྤོང་ངོ་ཞེས་བཤད་པ་འདོད་པ་ཉིད་ནི་བཅོམ་ལྡན་འདས་རྡོ་རྗེ་སེམས་དཔའི་རང་བཞིན་འདོད་པའོ། །ཅིའི་ཕྱིར་གཟུགས་ལ་སོགས་པ་འདོད་པ་རྣམས་ལྔས་འདུད་པའི་ཁམས་ཀྱི་སེམས་ཅན་ཐམས་ཅད་བདེ་བའི་རྒྱུ་བྱེད་པ་བཞིན་དུ་རྡོ་རྗེ་སེམས་དཔའི་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རང་བཞིན་ཡང་སེམས་ཅན་ཐམས་ཅད་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཆེན་པོའི་རྒྱུ་ཡིན་པར་འདོད་པ་ལྔ་དང་འདྲ་བའི་ཕྱིར་འདོད་པ་ཞེས་བྱའོ། །འདོད་པ་དེ་ཉིད་ཆགས་པ་ཡང་ཡིན་ཏེ་སེམས་ཅན་སྨིན་པར་བྱ་བ་དང་གྲོལ་བར་བྱ་བ་ལ་ཆགས་པའི་ཕྱིར་འདོད་པ་དེ་ཉིད་རྡོ་རྗེ་ཡང་ཡིན་ཏེ་སྟོང་པ་ཉིད་ལ་དམིགས་པའི་ཡེ་ཤེས་རྡོ་རྗེ་སྟེ། དེ་གཞན་གྱིས་མི་ཤིགས་ཤིང་དངོས་པོ་གཞན་ལ་དེས་འཇིག་པའི་ཕྱིར་རོ། །དེ་ལྟ་བུ་རྟག་ཏུ་ཆགས་པ་ནི་དེ་ལ་སྒོམ་ཞིང་སེམས་དཔའི་དོན་ཏོ། །དེ་བས་ན་དེ་ཁོ་ན་བཅུ་དྲུག་མི་ཤེས་པས་དཀྱིལ་འཁོར་འདིར་བསྒྲུབ་པར་མི་བྱའོ། །དེ་ཁོ་ན་མ་མཐོང་བས་དངོས་པོ་ཅི་ལ་ཐེ་ཚོམ་དུ་འགྱུར་ཏེ་ཐེ་ཚོམ་ཅན་གྱིས་ནི་གྲུབ་བ་མི་འཐོབ་པོ། དེ་ལ་རེ་ཞིག་རས་ལ་སྐུ་གཟུགས་བྲིས་པའི་མདུན་དུ་བསྒྲུབ་པར་བྱ་སྟེ། སྐུ་གཟུགས་བྲི་བའི་ཆོ་ག་གསུངས་པ། བཅོམ་ལྡན་འདས་གསེར་གྱི་ཁ་དོག་རས་ལ་བྲི་ཞེས་བྱ་བ་ལ་སོགས་པའོ། །རས་ཀྱི་ཆོ་ག་འདིར་ཞིབ་ཏུ་མ་
གསུངས་ཀྱང་སྤྱིའི་ཆོ་ག་འབྱུང་བ་དང་སྦྱར་ཏེ་རས་སར་པ་ཁ་ཚར་མ་བཅད་པ་མ་དྲལ་མ་བཙེམས་པ་སྐྲ་དང་སྤུ་ལ་སོགས་པ་སེམས་ཅན་གྱི་ཡན་ལག་ཏུ་གཏོགས་པ་མེད་པ་ལ་རི་མོ་མཁན་གསོ་སྦྱོང་གི་ཁྲིམས་བླངས་པས་བྲིའོ། །སྤྱན་རས་གཟིགས་གཡས་ཀྱི་ཐོག་མར་བྲི་སྟེ་སེམས་ཅན་སྡུག་བསྔལ་ཞིང་ཕོངས་པ་ལ་ཉིན་རེ་ཞིང་དུས་གསུམ་དུ་ཉུལ་ཞིང་གཟིགས་པའི་ཕྱིར་སྤྱན་རས་གཟིགས་སོ། །འཇམ་ཞིང་མཉེན་པའི་ཆ་ལུགས་ཅན་འཇིག་རྟེན་ཐམས་ཅད་ན་དགོས་སུ་བྱ་བའི་དཔལ་དང་ལྡན་པས་ན་འཇམ་དཔལ་ལོ། །འཕགས་པའི་བདེན་པ་བཞིའམ་སྟོང་པ་ཉིད་མ་སྐྱེས་མི་འགགས་པའི་ཆོས་ཀྱི་འཁོར་ལོ་བསྐོར་རོ་སྙམ་པའི་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་མཐུ་དང་ལྡན་པའི་ཕྱིར་དེ་སྐད་བྱའོ། །སངས་རྒྱས་ཐམས་ཅད་ཀྱི་ལུས་དང་ངག་དང་ཡིད་ཀྱི་གསང་བ་གཅིག་ཏུ་བསྡུས་པ་ནི་རྡོ་རྗེ་ཁུ་ཚུར་སྟེ་གསང་བ་གསུམ་གྱི་དོན་དང་ལྡན་པའི་དོན་ཏོ། །སེམས་ཅན་ཐམས་ཅད་ལ་ཕན་པར་དགོངས་པ་ནི་བྱམས་པའོ། །ནམ་མཁའ་ལས་དགོས་པ་ཐམས་ཅད་འབྱིན་པའི་ཏིང་ངེ་འཛིན་ཐོབ་པས་ནམ་མཁའ་མཛོད་དོ། །ནམ་མཁའི་དབྱིངས་སུ་རྫུས་ཏེ་སྐྱེས་པས་ན་ནམ་མཁའི་སྙིང་པོ་སྟེ་སྙིང་པོ་ཞེས་བྱ་བའི་སྒྲ་ནི་འདིར་སྐྱེ་གནས་སུ་བསྟན་ཏོ། །རྡོ་རྗེ་ཧཱུཾ་ཀ་རའི་ཕྱག་རྒྱ་ནི་ལག་པ་གཉིས་རྡོ་རྗེ་ཁུ་ཚུར་དུ་བཅིངས་པ་ལས་ལག་པ་གཉིས་རྒྱབ་སྤྲད་དེ་མཐེའུ་ཆུང་སྦྲེལ་ལ་མཛུབ་མོ་གཉིས་སོ་སོར་བསྒྲེང་སྟེ་སྙིང་གར་གཞག་པའོ། །གཡོན་པས་ནི་མེ་ཏོག་གཞུ་དང་ཞེས་བྱ་བ་ཕྱག་གཡོན་པས་ན་མེ་ཏོག་གིས་བརྒྱན་པའི་གཞུ་དང་མདའ་བསྣམས་པ་སྟེ། བཅོམ་ལྡན་འདས་འདོད་པའི་རང་བཞིན་བས་ན་མེ་ཏོག་དང་ལྡན་པར་བཤད་དེ་ཐབས་དང་ཤེས་རབ་ཏུ་ལྡན་པའི་རྟགས་ཏེ་གཞུ་ནི་ཐབས་སོ། །མདའ་ནི་ཤེས་རབ་བོ། །དེ་ཉིད་ཀྱིས་སེམས་ཅན་ལ་མི་གནོད་པས་ན་མེ་ཏོག་དང་ལྡན་པའོ། །གཞན་དག་འཆད་པ་འདོད་པའི་ལྷའི་ལག་ཆ་མདའ་གཞུ་སྟེ་དེ་བཅངས་པ་ནི་འདོད་པའི་རང་བཞིན་དུ་བསྟན་ཏོ། །ཕྱག་ན་རྡོ་རྗེ་ནི་འདོད་པ་དང་ཁྲོ་བའི་རང་བཞིན་བསྟན་པའི་ཕྱིར་འཛུམ་པ་དང་བཞད་པའོ། །ཁྲོ་བའི་རང་བཞིན་བསྟན་པའི་ཕྱིར་མཆེ་བ་གཙིགས་
པ་དང་ཁྲོ་བར་བཅས་པའོ། །དེ་ནས་རི་མོ་དེའི་སྤྱན་སྔར་བཟླས་ཤིང་སྒྲུབ་པའི་ཆོ་ག་བསྟན་པ། དེ་ནས་ཆོས་ཞག་གཅིག་ནས་བརྩམས་ཏེ་ཞེས་བྱ་བ་ལ་སོགས་པའོ། །བཟླས་པའི་ཚེ་སྤྱན་དྲང་བ་དང༌། བགེགས་བསྐྲད་པ་དང༌། མཆོད་པ་བསང་བ་དང༌། བྱིན་གྱི་ས་བརླབ་པ་དང༌། དབང་བསྐུར་བ་ལ་སོགས་པ་སྟེ་ཕྱག་རྒྱ་ཆེན་པོའི་རྣལ་འབྱོར་དུ་བྱ་བ་ལ་སོགས་པ་བཟླས་པའི་ཆོ་ག་གཞུང་གཞན་ལས་འབྱུང་བ་རིམ་བཞིན་དུ་རྒྱས་པར་བྱས་ཏེ་སྒྲུབ་པ་པོ་ཉིན་རེ་ཞིང་བརྒྱ་སྟོང་བཟླས་པ་ནི་དུས་གཉིས་སམ་དུས་གསུམ་དུ་བཟླས་ཏེ། སྤྱིར་བརྒྱད་སྟོང་གཉིས་འབུམ་བཟླས་པར་བགྱིའོ། །ཟས་གཙང་མ་ཡིད་བཞིན་དུ་ཟོས་ཏེ་ཞེས་བྱ་བ་གཙང་མ་ནི་ཤ་དང་ཆང་དང་སྒོག་བཙོང་ལ་སོགས་པས་སྦགས་པ་བཟའ་བར་མི་རིགས་པས་སྤང་བར་བྱའོ། །ཡིད་བཞིན་དུ་ཟོས་ཞེས་བྱ་བ་ནི་གཙང་མའི་ནང་ན་གང་འདོད་པ་ཟོས་ཞེས་བྱ་བའི་དོན་ཏོ། །བཟླས་པའི་སྔགས་ནི་གོང་དུ་སྨོས་པའི་ཨོཾ་སུམྦྷ་ནི་ཞེས་བྱ་བ་ལ་སོགས་པའོ། །ཕྱི་རོལ་ལས་རྣམས་འགྲུབ་བྱ་བ། །ཞེས་བྱ་བ་ནོར་བཙལ་བ་དང་གདོན་བསྐྲད་པ་ལ་སོགས་པའོ། །ཧཱུཾ་ཞེས་བྱ་བ་གཉིས་ཀྱིས་ནི་ལས་ཐམས་ཅད་འགྲུབ་བར་འགྱུར་རོ་ཞེས་པ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་བྱས་ལ་ཆོ་ག་གོང་མ་བཞིན་དུ་ཟླ་བ་གཉིས་བཟླས་ན་རྒྱས་པ་དང་དབང་དུ་བྱ་བ་ལ་སོགས་པའི་ལས་འགྲུབ་པོ། ཟླ་བ་ལྔས་ནི་ཡིད་བཞིན་དུ་སྣང་བ་དང་མི་སྣང་བར་འགྱུར་བའོ་ཞེས་སྣང་བར་འདོད་ན་ཡང་སྣང་ངོ༌། །ཟླ་བ་བརྒྱད་ཀྱིས་ཞེས་པ་ཆོ་ག་གོང་མ་བཞིན་དུ་ཟླ་བ་བརྒྱད་བཟླས་ན་ལྷ་དང་མི་ལ་སོགས་པར་རང་གི་གནས་ནས་གར་དགོས་པར་དགུག་པ་དང༌། བཀུག་ནས་དཀྱིལ་འཁོར་ལ་སོགས་པ་གར་དགོས་པར་གནས་སུ་བཞུགས་པ་དང་གནས་སུ་བཅུག་ནས་དམ་ཚིག་ལ་སོགས་པས་རང་དབང་དུ་མི་གཏོང་བར་བཅིང་བ་དང་བཅིངས་ནས་བདག་གི་དབང་དུ་འགྱུར་ཏེ་ལས་བྱའོ། །ཆོ་ག་ཀུན་བསྒོའོ། །ཟླ་བ་བཅུ་གཅིག་གིས་ནི་ས་བཅུ་གཅིག་པ་སངས་རྒྱས་ཀྱི་ས་འཐོབ་པོ་ཞེས་པ་ཀུན་དུ་སངས་རྒྱས་པའི་ས་གཟུགས་ཀྱི་སྐུ་འཐོབ་པོ། །ཟླ་བ་བཅུ་གཉིས་ཀྱིས་
ནི་རྡོ་རྗེ་འཛིན་པར་འགྱུར་ཞེས་བྱ་བ་རྡོ་རྗེ་སེམས་དཔའ་ཉིད་སངས་རྒྱས་ཐམས་ཅད་ཀྱི་ཡེ་ཤེས་ཀྱི་རྣམ་པར་སྣང་མཛད་ཆེན་པོའི་ངོ་བོ་ཉིད་ཡིན་པས་ན་ཀུན་དུ་སངས་རྒྱས་པའི་ས་པས་གོང་དུ་བཤད་དོ། །ཡང་གཅིག་ཏུ་སེམས་དཔའ་ཐམས་ཅད་ཀྱི་དང་པོ་ཉིད་རྡོ་རྗེ་སེམས་དཔའ་ཡིན་པས་ཀུན་གྱི་མཆོག་ཏུ་ཡང་བཤད་དོ། །དེ་ནས་སྒྲུབ་པ་གཞན་ཏེ་ཞེས་པ་གོང་དུ་སྨོས་པ་ལྟ་བུའི་རས་ལ་དབུས་སུ་རྡོ་རྗེ་ཧཱུཾ་ཀ་ར་གོང་དུ་སྨོས་པ་ལྟ་བུ་བྲིས་ལ་དེའི་ཐད་ཀོར་དུ་ལྷ་ཆེན་པོ་ལ་སོགས་པ་རིག་པའི་རྒྱལ་པོ་རྣམས་དང་བར་སྣང་ལ་སྤྱོད་པའི་ཉི་མ་ལ་སོགས་པ་དང། ནམ་མཁའ་ལ་སྤྱོད་པ་དང་ས་འོག་མའི་ལྷ་རྣམས་ཀྱིས་བསྐོར་བ་བྲིས་ལ། དེ་ནས་དེའི་སྤྱན་སྔར་བཟླས་པའི་ཆོ་ག་རྫོགས་པར་བྱས་ལ་བདག་རང་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་དུ་གནས་ནས་ཅི་ནུས་པ་གྲངས་མེད་པར་བཟླས་ཏེ་ཟླ་བ་གཅིག་ལོན་ནས་ཚེས་ཉི་ཤུ་དགུའི་མཚན་མོ་མཆོད་པ་ཁྱད་པར་དུ་རྫོགས་པར་བྱས་ནས་བསྒྲུབ་པོ། དེ་ནས་སྒྲུབ་པ་གཞན་འབྱུང་སྟེ། །ཞེས་པ་རས་ལ་བཅོམ་ལྡན་འདས་རྡོ་རྗེ་ཧཱུཾ་ཀ་ར་དེ་བཞིན་དུ་དབུས་སུ་བྲིས་ནས་མཐའ་མ་ཁོར་ཁོར་ཡུག་ཏུ་ལྷ་ཆེན་པོ་ལ་སོགས་པའི་བཙུན་མོ་གསེར་མདངས་ལ་སོགས་པ་ལྷ་མོ་རྣམས་ནས་ཀླུའི་ཆུང་མའི་བར་དུ་ཐམས་ཅད་ཀྱི་གཟུགས་བྲིས་ལ། རང་རང་གི་ཕྱག་རྒྱ་འཁོར་ལོ་དང་རྡོ་རྗེ་ལ་སོགས་པ་ལག་ན་ཐོགས་ཤིང་ཕྱག་རྒྱ་མངོན་དུ་ཕྱུངས་ཏེ་མི་སྡུག་པའི་གཟུགས་བྲིའོ། །འདི་ནི་རྟོག་པ་འདིར་བྲིས་པ་བཞིན་ནོ་ཞེས་པ་འདི་ལྟ་བུའི་འཇིགས་སུ་རུང་བའི་གཟུགས་འདི་ནི་རྟོག་པ་ལས་ཀྱང་འདི་ལྟ་བུའི་འཇིགས་པ་ཡོད་དོ་ཞེས་འབྱུང་བར་སྔ་ནས་ཞེས་པ་ན་འདིས་ནི་མི་འཇིགས་སོ་སྙམ་དུ་བསམ་མོ། །དེ་ནས་ཆོ་ག་གཞན་ཏེ་རས་ལ་བཅོམ་ལྡན་འདས་དེ་བཞིན་དུ་བྲིས་ལ་ཞེས་པ་གོང་དུ་སྨོས་པ་ལྟ་བུ་ལ་བཅོམ་ལྡན་འདས་རྡོ་རྗེ་ཧཱུཾ་ཀ་ར་ཕྱག་བཞི་པ་བྲིས་ཏེ་ཉིན་རེ་ཞིང་བརྒྱ་སྟོང་དུ་བཟླས་ན་ཟླ་བ་བཅུ་གཉིས་ལོན་པའི་ནུབ་མོ་ཐ་མ་ལ་རྡོ་རྗེ་འཛིན་ཉིད་དུ་འགྱུར་བ་འཐོབ་པོ། གཞན་ཡང་བསྒྲུབ་པར་བྱ་བ་ཕྱག་ན་རྡོ་རྗེའི་སྤྱན་སྔར་འབུམ་ཟློས་ཤིག་དེ་ལྟར་བསྙེན་པ་བྱས་ནས་ཞི་བ་དང་རྒྱས་པ་ལ་སོགས་
བ་ཀུན་ཕྱག་ན་རྡོ་རྗེས་མཛད་དེ། །ཅི་འདོད་པར་ཡམ་ཤིང་ཐམས་ཅད་ཀྱིས་ཞེས་བཞི་པ་དང་རྒྱས་པའི་ཡམ་ཤིང་གང་ཡང་རུང་བ་སྔགས་ལ་ཅི་འདོད་པ་ལས་བསྲེག་གོ །དེ་ནས་རྡོ་རྗེ་ཧཱུཾ་ཞེས་བྲིས་ལ་ཞེས་པ་རྡོ་རྗེ་ཧཱུཾ་ཀ་ར་ལས་གོང་མ་བཞིན་དུ་བྲིས་ལ་དེའི་སྤྱན་སྔར་ལོ་གཅིག་གི་བར་དུ་ཅི་ནུས་གྲངས་ངེས་པ་མེད་པར་མང་དུ་ཟློས་ཤིག །དེ་ནས་ནུབ་གཅིག་སྨྱུང་སྟེ་མཚན་ཐལ་བྱུང་བསྒྲུབས་ན་གྲུབ་པ་མཆོག་ལ་སོགས་པ་རྡོ་རྗེ་ཧཱུཾ་ཀ་ར་ཉིད་ཀྱིས་སྩོལ་བར་འགྱུར་རོ། །བཅོམ་ལྡན་འདས་དེ་བཞིན་གཤེགས་པའི་སྤྱན་སྔར་རྡོ་རྗེ་ཧཱུཾ་ཞེས་པའི་ཕྱག་རྒྱ་བཅིངས་ལ་ཞེས་པ་རྣམ་པར་སྣང་མཛད་རི་མོར་བྲིས་པའི་སྤྱན་སྔར་རྡོ་རྗེ་ཧཱུཾ་ཀརའི་ཕྱག་རྒྱ་ཆེན་པོའི་རྣལ་འབྱོར་དུ་བདག་རང་བྱས་ལ། དེ་ཉིད་ཀྱི་ལག་པའི་ཕྱག་རྒྱ་ཡང་བཅིངས་ནས་བཟླས་སོ། །རིག་པས་དབང་བསྐུར་བར་བྱ་བར་འདོད་ན་ཞེས་པ་རིག་པ་ནི་སྔགས་ཀྱི་ལྷ་རྣམས་ལ་བྱའོ། །ཨོཾ་སུམྦྷ་ཞེས་བྱ་བ་ལ་སོགས་པའི་སྙིང་པོ་གོང་དུ་སྨོས་པས་མར་ལ་བསྔགས་ཤིང་གཟུགས་ཀྱི་སྤྱི་པོ་ནས་བླུགས་ཤིང་དབང་བསྐུར་བ་བྱས་ན་དེའི་རྒྱུ་མཐུན་པའི་ལས་ཀྱི་འབྲས་བུ་ཕྱི་ནང་གི་སྔགས་ཀྱི་ལྷ་ཐམས་ཅད་ཀྱི་བདག་པོར་འགྱུར་ཏེ་ཕྱག་ན་རྡོ་རྗེ་དང་འདྲ་བ་འཐོབ་བོ། །ཕྱག་གཉིས་བརྐྱང་སྟེ་རྡོ་རྗེ་འཛིན། །ཞེས་པ་རྡོ་རྗེ་ཧཱུཾ་ཀ་རའི་སྐུ་གཟུགས་ཕྱག་བཞི་པ་གོང་མ་བཞིན་ལས་ཕྱག་གཉིས་ན་རྡོ་རྗེ་རེ་རེ་བསྣམས་ཏེ། ཕྱག་ཐད་ཀར་གྱེན་དུ་བསྒྲེང་བའོ། །དེ་བཞིན་དུ་ཕྱག་བརྐྱང་བ་ཞེས་པ་རྡོ་རྗེ་ཧཱུཾ་ཀ་རའི་ཕྱག་གྱེན་དུ་བརྐྱང་བ་བཞིན་དུ་རྣམ་པར་སྣང་མཛད་ཀྱི་ཕྱག་ཀྱང་གྱེན་དུ་བརྐྱང་ལ་རྡོ་རྗེ་འཛིན་པར་བྱའོ། །གཟུགས་དེ་ཞིགས་ཀྱི་བར་དུ་སྙིང་པོ་གོང་དུ་སྨོས་པ་བཟླས་ཤིང་བཀྲུའོ། །ཡིད་བཞིན་དུ་ཞེས་བྱ་བ་ནི་ནམ་འདོད་པ་ན་མི་སྣང་བར་འགྱུར་ཞེས་བྱ་བའི་ཐ་ཚིག་གོ །གཡས་པར་རྡོ་རྗེ་ཧཱུཾ་ཞེས་པ་རྡོ་རྗེ་ཧཱུཾ་ཀ་རའི་ཕྱག་རྒྱ་རྡོ་རྗེ་ཁུ་ཚུར་བཅིངས་ལ་མཛུབ་མོ་བསྒྲེང་པ་སྙིང་གར་གཞག་པའོ། །ཐམས་ཅད་དུ་འགྲོ་བར་འགྱུར་རོ་ཞེས་བྱ་བ་མཐོ་རིས་དང་ནམ་མཁའ་དང་རྩིག་པ་དང་རི་ལ་སོགས་པར་ཐོགས་པ་མེད་པར་འགྲོའོ། །ཐམས་ཅད་དུ་འགྲོ་བ་གྲུབ་པ་འོག་ནས་འབྱུང་བ་ཀུན་ཀྱང་དོན་དེ་ལྟར་བལྟའོ། །དཀྱིལ་
འཁོར་མཐོང་བར་དུས་གསུམ་དུ་ཁྲུས་བྱས་ཞེས་པ་དཀྱིལ་འཁོར་གོང་དུ་སྨོས་པ་རྣམས་སུ་ཆོ་ག་བཞིན་དུ་ཞུགས་ནས་དམ་ཚིག་ཅན་དུ་གྱུར་པའོ། །རྡོ་རྗེ་འཛིན་མའི་ཕྱག་རྒྱ་ནི་གོང་དུ་སྨོས་པ་ཉིད་དོ། །རྣོ་ལྕགས་ཀྱི་མཚོན་ཆས་དེར་རྡོ་རྗེ་བྲིས་ལ་ཞེས་པ་ལྕི་བའི་དཀྱིལ་འཁོར་དེ་ལ་རྡོ་རྗེ་རྩེ་ལྔ་པ་བྲིའོ། །བཅོམ་ལྡན་འདས་མཐོང་ངོ་ཞེས་པ་ནི་ཕྱག་ན་རྡོ་རྗེ་ཉིད་མངོན་དུ་གཤེགས་ཏེ་མཐོང་བའོ། །རྡོ་རྗེ་རས་སམ་རྩིག་པའམ། །ཞེས་པ་རྡོ་རྗེ་རྩེ་ལྔ་པ་རི་མོར་བྲིས་ལ་དེ་ལ་མཆོད་པ་རྣམ་བ་ལྔ་པོས་ཅི་ནུས་སུ་མཆོད་དོ། །གཟུང་དུ་བདེ་བ་ན་རྡོ་རྗེ་ཁུ་ཚུར་གྱིས་གཟུང་ངོ༌། །གཟུང་དུ་མི་བདེ་ན་ཡང་རྡོ་རྗེ་ཁུ་ཚུར་གྱིས་གཟུང་བ་ལྟ་བུར་རིག་པར་བྱའོ། །བདེ་བ་ཡང་ཡིད་བདེ་བ་ཐམས་ཅད་ཐོབ་པར་འགྱུར་རོ་ཞེས་བྱ་བ་བདེ་བ་ནི་ལུས་ཀྱི་བདེ་བའོ། །ཡིད་བདེ་བ་ནི་སེམས་ཀྱི་བདེ་བའོ། །རྡོ་རྗེ་ཁུ་ཚུར་གྱིས་རལ་གྲི་བཟུང་ལ་ཞེས་པ་ལོ་གཅིག་གི་བར་དུ་དུས་གསུམ་དུ་སྙིང་པོ་གོང་དུ་སྨོས་པ་ཅི་ནུས་པར་བཟླས་ལ་ལོ་གཅིག་ལོན་ནས་མཚན་ཐལ་བྱུང་བཟླས་ཏེ་བསྒྲུབས་ན་རིག་འཛིན་གྱི་རྒྱལ་པོར་འགྱུར་རོ། །རིག་འཛིན་ནི་འདོད་པའི་ཁམས་ཀྱི་ལྷ་ནམ་མཁའ་ལ་རྒྱུ་ཞིང་བདེ་བའི་ལོངས་སྤྱོད་དང་ལྡན་པ་སྟེ། རང་གི་ལས་ཀྱི་རྣམ་པར་སྨིན་པས་དེར་སྐྱེས་པ་དང་འཇིག་རྟེན་དང་འཇིག་རྟེན་ལས་འདས་པའི་སྔགས་གྲུབ་པས་སྐྱེས་པ་སྟེ། དེ་དག་གི་བདག་པོ་ནི་རིག་འཛིན་གྱི་རྒྱལ་པོ་ཡིན་ནོ། །འཁོར་ལོའི་དཀྱིལ་འཁོར་བྲིས་ལ་ཞེས་པ་དཀྱིལ་འཁོར་འཁོར་ལོ་ལྟ་བུར་ཟླུམ་པོར་བྲིས་ཏེ། ཕྱག་ན་རྡོ་རྗེ་དབུས་སུ་བཞུགས་པའི་སྤྱན་སྔར་ལྕགས་ཀྱི་འཁོར་ལོ་ལག་ཏུ་ཐོགས་ནས་མཚན་ཐལ་བྱུང་བསྒྲུབ་བོ། འདི་ཡང་སྔར་བསྙེན་པ་ནི་ཆོ་ག་བཞིན་དུ་བྱས་ནས་གདོང་བསྒྲུབ་པར་བྱའོ། །དེ་ནས་ཀྱོ་བ་ཏང་སྒྲུབ་པར་འདོད་པས་ཞེས་པ་སྔར་བསྙེན་པའི་མཚན་མའམ་གྲངས་སམ་དུས་ཀྱིས་རྫོགས་པར་བྱས་ནས་ཕྱག་ན་རྡོ་རྗེ་རི་མོར་བྲིས་པའི་སྤྱན་སྔར་བསྒྲུབ་བོ། །དེ་ནས་ལྷ་ལ་སོགས་པ་དགུག་པ་འབྱུང་སྟེ་ཞེས་པ་ལྷ་ཆེན་པོ་ལ་སོགས་པ་རིག་པའི་རྒྱལ་པོ་དང་བར་སྣང་ལ་སོགས་པའི་ནམ་མཁའ་ལ་སྤྱོད་པ་གོང་དུ་སྨོས་པ་གང་ཡང་རུང་བའོ།།
དེ་ནས་མ་རྣམས་ཐམས་ཅད་དབང་དུ་བྱ་བར་འདོད་པས་ཞེས་པ་ལྷ་ཆེན་པོ་ལ་སོགས་པའི་ཆུང་མའི་གཟུགས་བྱས་ཏེ་སྙིང་གར་རྡོག་པས་མནན་ལ་བཟླས་སོ། །དེ་ཡང་སྔར་བསྙེན་པ་བྱ་བ་ནི་གོང་མ་བཞིན་ནོ། །ཚོགས་ཀྱི་བདག་པོར་བཅུག་ཅིང་དེ་དག་གིས་མཆོད་དེ་ཞེས་བྱ་བ་ནི་ལྷ་ཆེན་པོའི་འཁོར་ཚོགས་མང་པོའི་བདག་པོར་བཅུག་སྟེ་འཁོར་དེ་དག་གིས་སྔགས་པ་དེ་ལ་མཆོད་པར་བྱེད་དོ། །སྔོན་མ་བྱུང་བའི་དོན་ནི་མི་ལ་མེད་པའི་མཐོ་རིས་ཀྱི་རྫས་ལ་སོགས་པའོ། །འདི་ལྟ་བུའི་རྣལ་འབྱོར་ཡང་གཏེར་ཞེས་བྱ་བའི་ཏིང་ངེ་འཛིན་གྱི་ཁྱད་པར་བསྒོམས་པས་ཁྲོ་བོ་ཞེས་བྱ་བ་ལྷ་ཆེན་པོའི་གནས་སུ་ཡང་དེས་ཁྲིད་ཅིང་སླར་ལྡོག་གོ །དེ་ལ་སུས་ཅུང་ཟད་ཀྱང་བྱེད་དུ་མི་ནུས་སོ་ཞེས་པ་ལྷ་དང་མི་ལ་སོགས་པ་སུས་ཀྱང་གནོད་པ་བྱེད་མི་ནུས་སོ་ཞེས་པའི་དོན་ཏོ། །ཕྱག་ན་རྡོ་རྗེ་ལས་ལྷ་མོའི་ལུས་མཐོང་གི་བར་དུ་སྟེ་ཞེས་པ་ཕྱག་ན་རྡོ་རྗེའི་སྐུ་ལ་ལྷ་མོ་ཤིན་ཏུ་མཛེས་པའི་ལུས་འབྱུང་བ་མཐོང་ངོ༌། །དེ་འབྱུང་བ་མཐོང་ན་ལྷ་མོ་དེ་ལ་གུད་དུ་མ་འགྲོ་མ་འགུལ་ཅིག་ཅེས་བསྒོའོ། །དེ་ལྟར་གྲུབ་པས་ན་བྱ་བ་ཐམས་ཅད་འགྲུབ་པར་འགྱུར་རོ། །དེ་ནས་མཚོ་དབྱངས་མ་དབང་དུ་བྱ་བར་འདོད་ན་ཞེས་པ་མཚོ་དབྱངས་མ་ནི་འཇིག་རྟེན་པའི་ངག་ལ་དབང་ཐོབ་པར་འགྱུར་བའི་ལྷ་སྟེ་དེ་སྒྲུབ་པ་ཡང་རྡོ་རྗེ་ཧཱུཾ་ཀ་ར་རི་མོར་བྲིས་པའི་སྤྱན་སྔར། ཨོཾ་སུམྦྷ་ནི་སུམྦྷ་ཞེས་བྱ་བའི་སྙིང་པོ་གོང་དུ་སྨོས་པའི་ཡི་གེ་དེ་ཕྲེང་བར་བྱས་ལ་འབྲུམ་བུ་རེ་རེ་ཞིང་གཅིག་བཞག་གཅིག་བཀླགས་ཏེ་ཉིན་རེ་ཞིང་དུས་གསུམ་དུ་དུས་གཅིག་ཀྱང་བརྒྱ་སྟོང་བཟླས་སོ།། ཡི་གེ་བསྣོར་ཅིང་བཀླག་པ་ནི་ཚིག་ལ་དབང་ཐོབ་པར་བྱ་བའི་དོན་དུ་སྟེ་མཚོ་དབྱངས་མ་ཚིག་ལ་དབང་དུ་གྱུར་པའི་ལྷ་ཡིན་པའི་ཕྱིར་དེ་དང་རྗེས་སུ་མཐུན་པར་བསྒྲུབ་པོ། སྲོ་ཏ་ཨ་ཛ་ན་བླངས་ལ་འཇོམས་པའི་སྟེང་དུ་བཞག་ནས་ཞེས་པ་སྲོ་ཏ་ཨ་ཛ་ན་ནི་རྡོ་ཁ་དོག་ནག་པོ་མཆོག་ལྷོ་ནི་ཕྱོགས་ཀྱི་ཆུ་ནར་མ་ནར་ཏེའི་ཕུ་ཁྲོན་པའི་ནང་ནས་བླངས་ཏེ། ནར་མ་ནར་ཏེའི་ ཆུ་མ་རྒལ་བཟང 
་ངོ་ཞེས་སློབ་དཔོན་ཁ་ཅིག་གིས་བཤད་དེ་ཞིབ་ཏུ་རབ་ཏུ་གྲུབ་པར་བྱེད་པའི་གཞུང་ལས་འབྱུང་བའི་མཚན་ཉིད་དང་སྦྱར་རོ། །འཇོམས་པ་ནི་ཤེས་རབ་ཀྱིས་སྒྲིབ་པ་ཐམས་ཅད་རབ་ཏུ་འཇོམས་པ་སྟེ། དེའི་
མཚན་མ་ཕྱག་རྒྱ་པདྨོ་ལ་སོགས་པའི་སྟེང་དུ་སྒྲུབ་པའི་རྫས་བཞག་སྟེ་བསྒྲུབ་པོ། བྷ་ག་ཞེས་བྱ་བའི་ཚིག་དེ་འཇིག་རྟེན་པ་ཁ་ཅིག་གིས་མོ་མཚན་ལ་བྱ་བ་སྐད་དུ་ཡང་འདྲེན་མོད་ཀྱི་དེ་ལྟ་མ་ཡིན་ཏེ་དཔལ་དམ་པ་དང་པོའི་རྒྱུད་ལས། བྷ་ག་ཞེས་བྱ་བ་ནི་ཉོན་མོངས་པ་བཅོམ་པ་སྟེ་ལྷའི་རང་གི་རྣམ་པར་གྲོལ་བའི་མཚན་མ་ཕྱག་རྒྱ་ལ་ཞེས་བྱ་བ་འབྱུང་བས་ན་མོ་མཚན་ལ་མི་བྱའོ། །གྲུབ་པ་རྣམ་གསུམ་བྱུང་གི་བར་དུ་བཟླས་སོ་ཞེས་པ་དྲོ་བ་དང་དུད་པ་འབྱུང་བ་དང་འབར་བའོ། །གཅིག་གིས་ཞེས་པ་ནི་དྲོ་བས་སོ། །གཉིས་པས་ཞེས་པ་ནི་དུད་པ་འབྱུང་བས་སོ། །གསུམ་པ་ཞེས་བྱ་བ་ནི་འབར་བ་སྟེ་སྒྲུབ་པོ་དེ་ཡང་སྔར་བསྙེན་པ་ཚུལ་བཞིན་དུ་བྱས་ལ་ནུབ་གཅིག་སྒྲུབ་པའི་མཚན་ཐལ་བྱུང་བཟླས་པའི་ཆོ་ག་དང་སྦྱར་རོ། །གུར་གུམ་ལ་སོགས་པ་འབྱུང་སྟེ། །ཞེས་བྱ་བ་གུར་གུམ་དང་ལྡོང་རོས་དང་བ་བླ་གང་ཡང་རུང་བ་འཇོམས་པ་ཞེས་བྱ་བ་ཤེས་རབ་ཀྱི་མཚན་མ་པདྨོའི་ཕྱག་རྒྱའི་སྟེང་དུ་བཞག་ལ། རྡོ་རྗེ་འཛིན་མའི་ཕྱག་རྒྱ་གོང་དུ་སྨོས་པས་མནན་ཏེ་བསྒྲུབ། དེ་ནས་བཉྫི་ཀ་སྒྲུབ་པ་སྟེ། ཞེས་པ་ས་ལ་བཉྫི་ཀ་གནོད་སྦྱིན་མོའི་གཟུགས་གང་ན་ཡོད་པ་དེར་བསྒྲུབ་པོ། ལག་པ་གཡོན་པས་རང་གི་མཚན་མ་དེ་བཟུང་ལ་ཞེས་པ་གྲོང་བར་གྱི་ཕྱག་དར་ཕུང་པོ་དེ་མེས་བཏང་ལ་ལག་པ་གཡོན་པས་རང་གི་ཡེ་ཤེས་ཀྱི་མཚན་མ་རྡོ་རྗེ་བཟུང་ལ་ནས་སམ་འབྲས་ཀྱི་གཟེགས་མ་བསྲེག་གོ །དེ་ནས་ཅི་བགྱི་བསྒྲུབ་པར་འདོད་པས་ཞེས་པ་གནོད་སྦྱིན་ལ་སོགས་པ་བཀའ་ཐམས་ཅད་ཉན་པའི་གཡོགས་པོར་སྒྲུབ་པའོ།། དེ་ཡང་བསྒྱེལ་ཅིང་སླར་ཡང་འདུག་གོ་ཞེས་པ་ལྷ་མོ་དེ་རང་གི་གནས་སུ་གཡོན་པས་བསྒྱེལ་ཞིང་སླར་ཡང་སྔགས་པའི་བརྟུལ་ཞུགས་བྱ་བར་འདོད་པ་ཞེས་པ་སྔགས་པ་གང་རྩོལ་བ་མང་དུ་བྱ་སྟེ། བསྒྲིབས་ཀྱང་གྲུབ་པ་ཐོབ་པ་དེས་རིག་པའི་བརྟུལ་ཞུགས་བྱས་ན་མྱུར་དུ་འགྲུབ་སྟེ། བརྟུལ་ཞུགས་བཅོ་བརྒྱད་འོག་ནས་འབྱུང་བ་རྣམས་ལས་ཞག་བཅུ་ཞིང་བརྗེས་ཏེ་སྤྱད་དོ། །དེ་ནས་ཉིན་རེ་ཞིང་བཅོ་བརྒྱད་ཀྱི་བར་དུ་ཞེས་པ་སྟེ་དེ་ཡང་གྲུབ་པར་དཀའ་ན་ཉི་མ་བཅོ་བརྒྱད་ཀྱི་བར་དུ་རིག་པའི་བརྟུལ་ཞུགས་བཅོ་བརྒྱད་རྣམས་ཉིན་རེ་ལན་རེ་བསྣོལ་བས་སྔར་
བསྙེན་པའི་སྤྱད་པ་བྱའོ། །ལས་ཐམས་ཅད་འགྲུབ་པར་འགྱུར་བ་ནི་ཞི་བ་དང་རྒྱས་པ་དང་དབང་དང་མངོན་པར་སྤྱད་པ་སྟེ་རྡོ་རྗེ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་དུ་བྱས་ལ་ཧཱུཾ་ཞེས་པའི་སྙིང་པོ་ཡི་གེ་འབྲུ་གཅིག་པ་ཐང་ཅིག་བརྗོད་པས་སོ། །དེ་ལ་རིག་པའི་བཏུལ་ཞུགས་བཅོ་བརྒྱད་ནི་སློང་མོ་ལ་ཟ་བ་དང་ལན་ཅིག་ལས་མི་ཟ་བ་དང༌། འབྲས་བུ་གཅིག་ཟ་བ་དང༌། ཐལ་བ་ཟ་བ་དང༌། ཆུ་འབའ་ཞིག་འཐུང་བ་དང༌། ལྕི་བ་ཟ་བ་དང༌། བའི་གཅིན་འཐུང་བ་དང༌། ཤུན་པ་ཟ་བ་དང༌། འབྲས་བུ་ཟ་བ་དང༌། མེ་ཏོག་ཟ་བ་དང༌། ཐང་བུ་ལ་ཉལ་བ་དང། ཕྱུགས་ཀྱི་རྨིག་རྗེས་སུ་ཉལ་བ་དང༌། རྩ་བ་དང་འོ་མ་འཐུང་བ་དང༌། རླུང་ཟ་བའོ། །མ་སྨྲས་མ་ཉམས་པའི་མི་རོ་བླངས་ལ་ཞེས་པ་མི་རོ་མཚོན་གྱིས་མ་སྨས་པ་ནད་དྲག་པོས་ཡུན་རིང་པོས་ལུས་ཉམས་ཤིང་གཞུང་པར་མ་གྱུར་པ་འཕྲལ་ལ་ཤི་བའི་རོའོ། །དབུགས་བྱུང་གི་བར་དུ་བཟླས་ན་ཞེས་པ་རོ་ཉིད་ལ་མང་དུ་བཟླས་ན་དབུགས་འབྱུང་ངོ༌། །དེ་བཞིན་གཤེགས་པའི་སྐུར་འགྱུར་རོ། །ཞེས་པ་མི་རོ་དེ་ཉིད་དེ་བཞིན་གཤེགས་པའི་སྐུར་འགྱུར་ཏེ་སེམས་དང་ཡང་བཅས་པ་དེ་ཕྲག་པ་ལ་ཁྱེར་ན་འགྲུབ་པོ། འཇིག་རྟེན་གྱི་ཁམས་རབ་འབྱུང་ཞེས་པ་འཇིག་རྟེན་གྱི་ཁམས་དེར་སངས་རྒྱས་དང་བྱང་ཆུབ་སེམས་དཔའ་ལ་སོགས་པ་ཐམས་ཅད་རབ་ཏུ་སྐྱེ་ཞིང་འབྱུང་བའི་ཕྱིར་དེ་ནས་མ་བསྒྲུབས་ཀྱང་དཀྱིལ་འཁོར་མཐོང་བས་ལས་སུ་འགྱུར་བ་ཞེས་བྱ་བ་གོང་དུ་སྨོས་པ་འདྲ་བ་བསྒྲུབ་པའི་ཆོ་ག་མ་བྱས་ཀྱང་དཀྱིལ་འཁོར་དུ་ཆོ་ག་བཞིན་དུ་ཞུགས་ལ་སྔར་བསྙེན་པ་བཟླས་པ་མང་དུ་བྱས་ན་འོག་ནས་འབྱུང་བའི་ལས་རྣམས་འགྲུབ་པར་འགྱུར་རོ། །འདི་ལྟ་སྟེ་ཐང་ཅིག་བརྗོད་པ་ནི་ཞེས་པ་སྔར་བསྙེན་པ་མང་དུ་བྱས་ན་ཕྱག་ན་རྡོ་རྗེའི་ཕྱག་རྒྱ་ཆེན་པོ་ལ་སོགས་པའི་རྣལ་འབྱོར་དུ་བྱས་པས་སྙིང་པོ་གོང་དུ་སྨོས་པ། །ཨོཾ་སུམྦྷ་ནི་ལ་སོགས་པ་ཅིག་བརྗོད་པས་བདག་ལ་སོགས་པ་སྲུང་བར་འགྱུར་རོ། །བསྟན་པར་ལྟ་བས་མཚམས་བཅད་ན། །ཞེས་པ་མཚམས་ཇི་ལྟར་བཅད་པ་བཞིན་དུ་ཁྲོ་བོའི་ལྟ་བ་ཁྲོ་གཉེར་གཙིགས་ལ་ངོམ་ཟུམ་ནག་པོར་བསྡུས་
ཏེ་བལྟ་བའོ། །དབབ་པ་ནི་རེག་པ་དང་མ་རེག་པ་ཞེས་བྱ་བ་རལ་གྲི་ལ་སོགས་པ་ལག་པ་ནས་བཟུང་སྟེའམ་ལག་པས་མ་རེག་པར་མིག་གིས་བལྟ་སྟེ་དེར་དབབ་པར་བྱ་བ་ནི་རང་གི་ལྷའམ་ལྷ་གཞན་ནམ་ཡི་དགས་ལ་སོགས་པ་གང་ཡང་རུང་བར་བསྐུལ་བའི་ཚིག་དང་སྔགས་པས་གང་ལ་དམིགས་བ་དེ་འབབ་པར་འགྱུར་རོ། །འབབ་པ་ཡང་སྔགས་པ་མཐུ་ཆེན་རལ་གྲི་ལ་སོགས་པ་ནམ་མཁའ་ལ་འཕར་ཞིང་སྨྲར་གཞུག་པའི་ཆོ་ག་བྱས་ན་དེ་དག་ཉིད་ལས་ལེགས་ཉེས་ཅིར་འགྱུར་བའི་སྒྲ་ཡང་འབྱུང་ངོ༌། །སྔགས་པ་མཐུ་ཆུང་ན་བབ་པའི་ཆོ་གཡོ་ཞིང་འགུལ་བ་ཙམ་དུ་འགྱུར་རོ། །རལ་གྲི་དང་མེ་ལོང་དང་མཐེ་བོང་དག་ལ་བབས་ན་ཅིར་འགྱུར་བ་གཟུགས་བརྙན་དུ་ཡང་སྣང་བར་འགྱུར་རོ། །དབབ་པའི་ཕྱག་རྒྱ་ནི་འོག་ནས་བསྟན་ཏོ། །ཞི་བར་བྱ་བ་ནི་ཧཱུཾ་ཞེས་པས་སོ། །རྡོ་རྗེ་ཧཱུཾ་ཀ་རའི་རྣལ་འབྱོར་དུ་བྱས་ལ་ཧཱུཾ་ཞེས་པའི་སྙིང་པོ་བརྗོད་དོ། །རྡོ་རྗེ་ཧཱུཾ་ཞེས་པའི་ཕྱག་རྒྱས་ནི་ཞེས་བྱ་བ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་དུ་བྱས་ལ་ཧཱུཾ་ཀ་རའི་ཕྱག་རྒྱ་གོང་དུ་སྨོས་པ་བཅིངས་པས་སེམས་ཅན་གནོད་པར་བྱེད་ཅིང་རྒོལ་བ་ཐམས་ཅད་མནན་ཏེ་འཕུང་བར་བྱེད་དོ། །དཔེར་ན་དགྲ་མདའ་འཕེན་པ་ལ་སྦྱོར་བ་འདི་བྱས་ན་མདའ་གཞུ་འགེངས་བཞིན་དུ་འཕུམས་ཏེ་འདུག་གོ །རྡོ་རྗེ་སྒྲོག་གི་ཕྱག་རྒྱས་ནི། །ཞེས་པ་སྒྲོག་གི་ཕྱག་རྒྱ་བཀྲོལ་བས་ཐར་པར་འགྱུར་ཏེ་ཕྱག་རྒྱ་ནི་འོག་ནས་འཆད། ཧེ་རུ་ཀ་རྡོ་རྗེའི་ཕྱག་རྒྱ་ཡང་འོག་ནས་འཆད། སྐྲ་ལས་བཟུང་སྟེ་བསླང་བས་ཞེས་པ་དུག་ལངས་པའི་མི་སྔགས་པས་རྡོ་རྗེ་བཅིངས་པའི་ཕྱག་རྒྱས་དུག་ལངས་པའི་སྐྲ་ལས་བཟུང་སྟེ་བསླང་ལ་སྔགས་པ་རྡོ་རྗེ་ཧཱུཾ་ཀ་རའི་རྣལ་འབྱོར་ལ་གནས་ཤིང་རྡོ་རྗེ་ཧཱུཾ་ཞེས་པའི་སྙིང་པོ་གོང་དུ་སྨོས་པ་ཨོཾ་སུམྦྷ་ལ་སོགས་པ་ལན་ཅིག་བརྗོད་པས་དུག་རབ་ཏུ་མཆེད་པ་སླར་མནན་པ་དང༌། དུག་བག་ལ་ཉལ་ཞིང་འཁྱིལ་པ་བསླང་བ་དང་དུ་བླངས་པ་ཞི་སྟེ་མེད་པར་བྱ་བ་དང་དུག་གཅིག་ནས་གཅིག་ཏུ་སྤོ་བ་དང༌། དུག་དེ་ཉིད་དུ་གཏན་ནས་ཞི་བར་བྱ་བ་དང༌། དུག་གིས་ཟིན་པ་ལས་སླར་གསོ་བ་ལ་སོགས་པ་ཀུན་བྱེད་དོ། །གཏེར་དབྱུང་བ་ནི་ཞེས་པ་བསྙེན་པ་མང་དུ་བྱས་ནས་གང་ན་གཏེར་ཡོད་པར་གྲགས་པའི་ས་ཕྱོགས་སུ་བུམ་པ་ཆུས་བཀང་སྟེ་རྡོ་རྗེ་ཧཱུཾ་ཞེས་པའི་
མཛུབ་མོས་མནན་ལ་གུ་གུལ་གྱིས་བདུག་སྟེ་ཨོཾ་སུམྦྷ་ལ་སོགས་པའི་སྙིང་པོ་བཟླས་སོ། །རྡོ་རྗེ་ཧཱུཾ་ཞེས་པའི་མཛུབ་མོ་ནི་ལག་པ་གཡས་པ་རྡོ་རྗེ་ཁུ་ཚུར་བཅངས་ལ་མཛུབ་མོ་བསྒྲེང་བའོ། །དེ་སྟེ་གཏེར་ཡོད་ན་ཆུ་ལུད་དེ་ས་ལ་འབེའོ། །དེ་སྟེ་མེད་ན་མི་འབོ་བར་འཁྱིལ་ཞིང་འདུག་གོ། འོག་གི་གནས་སུ་ནི་ཞེས་པ་ལྷ་མ་ཡིན་གྱི་ཕུག་ལ་སོགས་པ་སའི་འོག་གི་གནས་སུ་འགྲོ་ན་རྡོ་རྗེ་ས་འོག་གི་ཕྱག་རྒྱ་བཅིངས་ལ། རྡོ་རྗེ་ཧཱུཾ་ཞེས་པའི་སྙིང་པོ་བཟླས་ཏེ་ཕུག་ཏུ་ཞུགས་ན་བར་དུ་བགེགས་བྱེད་པའི་འཁྲུལ་འཁོར་དང་རང་ཐག་ཐམས་ཅད་བཅོམ་ནས་བགེགས་མེད་པར་འགྱུར་རོ། །ཕྱག་ན་རྡོ་རྗེའི་སྤྱན་སྔར་ཞེས་པས་ནོར་བུ་རིན་པོ་ཆེ་རྡོ་རྗེ་ལ་སོགས་པ་ལ་བྱའོ། །ལོངས་སྤྱོད་དགུག་པ་ནི་སྟོང་ཕྲག་བརྒྱ་བཟླས་པས་སོ་ཞེས་པ་རྣམ་ལྔའི་ལོངས་སྤྱོད་དང་ལྡན་པར་འདོད་ན། དེ་ཉིད་ཀྱི་དོན་དུ་དམིགས་ཏེ་ཨོཾ་སུམྦྷ་ལ་སོགས་བའི་སྙིང་པོ་འབུས་བཟླས་པས་ཁུགས་སོ། །དགུག་པའི་རྡོ་རྗེ་ཀྱོ་བ་ཏང་གི་ཕྱག་རྒྱས་ཞེས་བ་སེམས་ཅན་གང་ཡང་རུང་བའམ། རིང་པོ་ནས་དགུག་པར་བྱས་ན་རྡོ་རྗེ་ཀྱོ་བ་ཏང་གི་ཕྱག་རྒྱ་བཅིངས་ཏེ་གོང་དུ་སྨོས་པའི་སྙིང་པོ་དུས་གསུམ་དུ་ཟླ་བ་བཞིའི་བར་དུ་བཟླས་སོ། །ཕྱག་རྒྱ་ནི་འོག་ནས་འབྱུང་བ་མན་ཆད་ཀྱང་ཕྱག་རྒྱའི་མིང་གིས་སྨོས་སུ་བདེ་བ་རྣམས་འཕྲལ་དུ་སྨོས་སོ། །འཕྲལ་དུ་སྨོས་སུ་མི་བདེ་བ་རྣམས་ནི་ཕྱག་རྒྱའི་མཚན་ཉིད་འོག་ནས་ཅིག་ཅར་དུ་བཤད་ཀྱིས་དེ་ནས་འབྱུང་བར་རིག་པར་གྱིས་ཤིག །ཆུ་མནན་པ་ནི་ཞེས་པ་རྡོ་རྗེ་བཅིང་བའི་ཕྱག་རྒྱ་བྱས་ལ། ཆུ་ལ་རྡོ་རྗེ་བསམ་ཞིང་བཟླས་ན་མི་འབྱིང་བར་འགྲོ་བར་རུང་བར་རོ། །མེ་མནན་པ་ནི་ཚིག་པར་འགྱུར་བའི་མཐུ་མེད་པར་བྱ་བའོ། །ལོ་ཐོག་སྲུང་བ་ནི་རྡོ་རྗེ་ལྟ་བ་སྟེ་ཞེས་པ་རྡོ་རྗེ་ལྟ་བས་མཚམས་བཅད་ཅིང་བསྐྲད་པར་བསམས་ན། སྲིན་བུ་ལ་སོགས་པ་ལོ་ཐོག་ལ་གནོད་པར་བྱེད་པ་རྣམས་དེར་མི་འབྱུང་ཞིང་རྟ་ལ་སོགས་པའི་ཕྱུགས་ཀྱང་དེའི་མཚམས་ལས་མི་འདའོ། །རྡོ་རྗེ་ལྟ་བ་ནི་འོག་ནས་འཆད་དོ། །རྡེག་པ་སྤོང་བ་ནི་ཞེས་བ་ཁུ་ཚུར་དང་དབྱུག་པ་ལ་སོགས་པས་གཞན་ལ་བརྡེག་པར་གཟས་པ་ཁྲོ་བོའི་ལྟ་བས་སྤྲོས་ན་གཞན་ལ་འཕོ་བར་བྱེད་དོ། །གཅན་སྲིན་ཐམས་ཅད་ཅེས་པ་གཅན་
གཟན་ཁྲོ་བོ་དང་སྡིག་སྦྲུལ་གདུག་པ་རྣམས་ཀྱི་སྤྱིའི་མིང་ཅན་སྲིན་ཞེས་བྱའོ། །རྐུན་པོ་ཐམས་ཅད་འཕུམས་པ་ནི། །ཞེས་པ་རྐུན་པོ་ཚོལ་མི་ཕོད་པར་བྱས་པའོ། །དམག་ལས་སྒྲོལ་བ་ནི་ཞེས་པ་རྡོ་རྗེ་འཛིན་མའི་ཕྱག་རྒྱ་བཅིངས་ལ་སྙིང་པོ་གོང་མ་བཟླས་ན་ཐབ་མོའི་ཉེས་པས་ནོངས་ཡོར་མི་འགྱུར་བའོ། །གཞུ་དང་མདའ་དང་ཞེས་པ་ལ་སོགས་པ་རྡོ་རྗེ་ཧཱུཾ་ཀ་རའི་ཕྱག་རྒྱ་དང་ལྡན་པས་མནན་ཏེ་བཟླས་སོ། །དེ་ནས་ཕ་རོལ་གྱི་སེམས་ཤེས་པ་བསྒྲུབ་པར་འདོད་པ་ཞེས་གཞན་གྱི་སེམས་ཤེས་པར་འདོད་ན། རྡོ་རྗེ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་བྱས་ཏེ་སྙིང་པོ་གོང་མ་བརྒྱ་བཟླས་ན་ཕ་རོལ་གྱི་སེམས་ཆགས་སམ་སྡང་བ་ལ་སོགས་པ་གང་ཡིན་པ་ཤེས་པར་འགྱུར་རོ། །སྔོན་གྱི་གནས་ཤེས་པར་བྱ་བ་ནི་ཞེས་པ་ཚེ་སྔ་མ་ཤེས་པར་བྱ་བ་ན་སྙིང་པོ་གོང་དུ་སྨོས་པ་རྟག་ཏུ་བཟླས་ཤིང་སེམས་རྩེ་གཅིག་ཏུ་བྱས་ན་སྔོན་གང་ན་གནས་པ་ཏིང་ངེ་འཛིན་གྱིས་རྟོགས་པར་གྱུར་ཏོ། །ཚིག་བསྒྲུབ་པར་འདོད་པས་ཞེས་པ་བདག་གིས་ཚིག་ཇི་སྐད་སྨྲས་པ་དེ་བཞིན་དུ་འགྱུར་རོ། །ཆོ་འཕྲུལ་སྟོན་པ་ནི་ཞེས་པ་རྡོ་རྗེ་ཧཱུཾ་ཀ་རའི་སྙིང་པོ་རྡོ་རྗེ་ཚིག་གིས་བཟླས་སོ། །སེམས་ཅན་ཐམས་ཅད་པའི་གཟུགས་བརྙན་གྱི་ཚུལ་དུ་སྟོན་ཏོ་ཞེས་པ་རང་གི་ལུས་ཉིད་གཟུགས་གོང་དུ་སྨོས་པ་རྣམས་ཀྱི་གཟུགས་བརྙན་དུ་སྣང་ངོ༌། །རང་གི་གཟུགས་ཅི་དགའ་བར་སྒྱུར་བར་བྱེད་ཅེས་པ་ཧཱུཾ་ཀ་རའི་སྙིང་པོ་གོང་དུ་སྨོས་ལ་རྡོ་རྗེའི་ཚིག་སྒྲ་མེད་ཅིང་སོ་དང་མཆུ་བསྡམས་ལ་ལྕེ་ཅུང་ཟད་འགུལ་བས་འབུམ་བཟླས་ན་དེ་ནས་ནུབ་གཅིག་མཚན་ཐལ་བཟླས་པས་བསྒྲུབ་པོ། མི་སྣང་བར་འདོད་པས་རྡོ་རྗེ་མི་སྣང་བ་ཕྲ་མོ་རྡོ་རྗེ་ཁུ་ཚུར་གྱི་ཆང་པར་བཅུག་སྟེ་བཟུང་ལ་དེ་ནས་མི་སྣང་བར་གྱུར་གྱི་བར་དུ་བཟླས་སོ། །དེ་ནས་ཆང་པ་ན་རྡོ་རྗེ་འདུག་པ་བཀྲོལ་ཏེ་བཏང་ན་སྣང་བར་འགྱུར་རོ། །ཁྲི་ལ་འདུག་ནས་བླངས་ཏེ་ཞེས་པ་སྔོན་བསྙེན་པ་བྱས་ནས་ཤིང་ཁྲིའུ་ལ་འདུག་སྟེ་མཚན་གཅིག་སྒྲུབ་པའི་ཆོ་ག་བཞིན་དུ་བསྒྲུབ་པོ། ཁྲིའུ་ནམ་མཁའ་ལ་འཕར་ན་གྲུབ་པ་ཡིན་ཏེ་དེ་ལ་ཞོན་ནས་མཐོ་རིས་མན་ཆད་ཐམས་ཅད་དུ་འགྲོའོ། །གདོན་གྱིས་འཛིན་དུ་གཞུག་ན་ཞེས་བ་འབྱུང་པོ་ལ་སོགས་པའི་
གདོན་གྱིས་དཀོན་མཆོག་གསུམ་ལ་ངན་དུ་བྱེད་པ་ལ་སོགས་པར་སྦྱར་རོ། །གདོན་གར་བྱེད་དུ་གཞུག་བ་ནི་ཞེས་པ་གདོན་མི་ལ་བབས་པ་གར་བྱེད་དུ་གཞུག་པ་སྟེ་སྙིང་པོ་གོང་དུ་སྨོས་པའི་འཇུག་ཏུ་ཧི་ཞེས་བྱ་བར་བསྐུལ་ལོ། །གདོན་བསྐྱོད་པ་ནི་ཞེས་པ་རྨྱ་ཞིང་ཉལ་བ་དང་འཐེན་པ་ལྟ་བུ་ལས་བསྐུལ་ཞིང་བསྐྱོད་པའོ། །ནོར་དགུག་པ་ནི་རིན་པོ་ཆེ་གཙོ་བོའི་སེམས་ཞེས་པ་ནོར་མང་པོ་ལ་ཕལ་པོ་ཆེ་འདོད་ན་མར་ག་ཏ་དང་པདྨ་རཱ་གས་སྦྱིན་སྲེག་གིས་ཤིག །ཆར་དབབ་པ་ནི་ཞེས་པ་རྡོ་རྗེ་ཧཱུཾ་ཀ་རའི་རྣལ་འབྱོར་བྱས་ལ་སྙིང་པོ་གོང་དུ་སྨོས་པ་སྟོང་བཟླས་ཤིང་ཀླུ་ཐམས་ཅད་ཕྱོགས་བཞི་ནས་འདུས་ཏེ་ཆར་འབེབས་བར་བསམ་མོ། ཆར་གཅད་བ་ནི་ཞེས་པ་གོང་མ་བཞིན་རྣལ་འབྱོར་དུ་བྱས་ལ་སྙིང་པོ་བཟླས་ཏེ་ཆར་དང་སྤྲིན་ཐམས་ཅད་རི་རྒྱུད་དམ་ཚིགས་ཀྱི་ཕ་རོལ་ཏུ་ཕྱོགས་ཏེ་བོར་བར་བསམ་མོ། སེར་བ་གཅད་པ་ནི་ཞེས་པ་རྡོ་རྗེ་ཧཱུཾ་ཀ་རའི་རྣལ་འབྱོར་གོང་མ་བཞིན་དུ་བྱས་ལ་སྙིང་པོ་ཡང་ཟློས་ཤིང་རྡོ་རྗེ་བཅིངས་པའི་ཕྱག་རྒྱས་འཛམ་བུའི་གླིང་གི་ཕ་རོལ་ཏུ་དོར་བར་དམིགས་ཏེ་ཕྱག་རྒྱ་དགྲོལ་ལོ། །གདོན་དགག་པའམ་ཞེས་པ་ཡང་གདོན་མི་བསྙེན་པའོ། །སྤྲིན་དགག་པ་ནི་ཞེས་བ་སྤྲིན་ཆར་མི་ལྟུང་བར་དགག་པའོ། །བསལ་བ་ནི་ཞེས་པ་སྤྲིན་བསལ་ཏེ་སངས་པར་བྱའོ། །རྡོ་རྗེ་དཀྱིལ་འཁོར་གྱི་སྟེང་དུ་བཞག་ནས་ཞེས་པ་གསེར་དངུལ་ལམ་ཟངས་ཀྱི་རྡོ་རྗེ་རྩེ་ལྔ་པ་ཙནྡན་ནམ་ལྕི་བའི་དཀྱིལ་འཁོར་བྱས་པའི་སྟེང་དུ་བཞག་ལ་བསྒྲུབ་པོ། ནམ་མཁའ་ལ་མེ་ཏོག་གི་ཕྲེང་བ་ཆགས་པར་བྱས་པ་ནི་ཞེས་པ་བདག་རང་དབུགས་ཤིན་ཏུ་བསྡམས་ལ་རྡོ་རྗེ་ཁུ་ཚུར་གྱི་ཕྱག་རྒྱས་མེ་ཏོག་ནམ་མཁའ་ལ་གཏོར་ཏེ་རླུང་གི་དཀྱིལ་འཁོར་གྱིས་བརྟན་པར་བསམ་མོ། ཆ་ལུགས་བཞད་པར་བྱ་ན་ཞེས་པས་སངས་རྒྱས་དང་བྱང་ཆུབ་སེམས་དཔའ་དང་འཇིག་རྟེན་པའི་ལྷ་ལ་སོགས་པའི་ཆ་ལུགས་གང་ཡང་རུང་བའོ། །རྡོ་རྗེའི་ཕྱག་རྒྱ་ནི་ཕྱག་ན་རྡོ་རྗེའི་ཕྱག་རྒྱ་གོང་དུ་སྨོས་པ་སྙིང་གར་བཞག་སྟེ་སྔགས་བཟླས་སོ། །ཆ་ལུགས་དེ་ཉིད་གར་བྱེད་པ་དང་སྨྲར་གཞུག་པ་དང་བརྒྱུག་པ་དང་སྨིན་མ་འགུལ་བར་སྦྱར་རོ། །ས་གཡོ་བར་བྱས་ན་རྐང་པ་གཡོན་
པ་བརྡབ་པས་སོ་ཞེས་པ། རྡོ་རྗེ་ཧཱུཾ་ཀ་རའི་རྣལ་འབྱོར་དུ་བྱས་ཏེ་སྙིང་པོ་གོང་དུ་སྨོས་པ་ཟློས་ཤིང་རྐང་པ་གཡོན་པས་ས་ལ་དྲག་ཏུ་བརྡབ་པོ། ཁྱིམ་བསྒུལ་བ་ནི་ཞེས་པ་ཁྱིམ་གྱི་འཁོར་ཉི་ཚེ་བསྒུལ་བར་བྱ་ན་འཁོར་རླུང་གིས་རབ་ཏུ་བསྐྱོད་པར་བསམས་ཏེ་ཕྱག་རྒྱ་བཅིང་ངོ༌། །རྐང་པ་དགུག་ཅེས་པ་སེམས་ཅན་གང་ཡང་རུང་ཀྱོ་བ་ཏང་གིས་རྐང་པ་ནས་བཟུང་སྟེ་དགུག་པར་བྱའོ། །སྤྲིན་མེད་པར་ཆང་དབབ་པ་ནི་ཞེས་པ་ནི་ངོ་མཚར་བསྟན་པར་བྱ་བ་སྟེ། རྡོ་རྗེ་ཧཱུཾ་ཀ་རའི་རྣལ་འབྱོར་བྱས་ལ་ཕྱོགས་བཞི་ནས་སྤྲིན་ཆེན་པོ་རླུང་གིས་བསྐྱོད་ཅིང་ཀླུ་ཆར་འབབ་པར་བསམས་ཏེ་བཟླས་སོ། །ཟླ་བ་དང་ཉི་མ་དབབ་ཅིང་བསྟན་པ་ནི་ཞེས་པ་ཟླ་བ་དང་ཉི་མ་ས་ལ་ལྟུང་བར་ཀུན་ལ་བསྟན་པ་ནི་དེ་བཞིན་དུ་བསམས་ལ་རྡོ་རྗེ་ས་ལ་བརྡབ་པོ། ཉི་མ་དང་ཟླ་བ་མང་པོ་བསྟན་ན་ཞེས་བ་ནམ་མཁའ་ལ་ཉི་ཟླ་མང་པོས་གང་བར་བསྟན་པ་རྡོ་རྗེ་བཞི་ནམ་མཁའ་ལ་གཏོར་རོ། །དམག་རྣམ་བཞི་བསྟན་ན་ཞེས་པ་གླུ་དང་གླང་པོ་དང་རྟ་དང་རྐང་ཐང་པའི་དམག་བཞི་དགྲ་རྣམས་ཀྱིས་མཐོང་བར་བསྟན་པའོ། །མཚན་མོ་ཉིན་པར་བྱ་ན་རྡོ་རྗེ་རྩེ་ལྔ་པ་རབ་ཏུ་འབར་བར་བསམས་ཏེ་གླད་པ་ལ་བསྐོར་རོ། །ཉིན་མོ་མཚན་མོར་བྱ་ན་སྔགས་པ་ཉིད་མིག་བཙུམས་ལ་ཐམས་ཅད་མུན་པར་བསམས་ཏེ་རྡོ་རྗེ་བསྐོར་རོ། །ཐམས་ཅད་ལ་རྡོ་རྗེ་བསྟན་ན་ཞེས་པ་འཁོར་ཐམས་ཅད་ཀྱི་ནམ་མཁའ་ལ་རྡོ་རྗེ་མཐོང་བར་བྱའོ། །རྡོ་རྗེ་ཧཱུཾ་ཀ་རའི་རྟོག་པ་རྫོགས་སོ།། །།དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱིས་ཀྱང་སེམས་ཅན་གྱི་དོན་གྱི་ཕྱིར་སྙིང་པོ་གསུངས་སོ། །དབང་བསྐུར་བར་འགྱུར་བ་ཞེས་བྱ་བ་རྟོག་པ་ཆེན་པོ་བཤད་པའི་སྐབས་འདིར་སེམས་ཅན་ཐམས་ཅད་རྡོ་རྗེ་སློབ་དཔོན་ལ་སོགས་པར་དབང་བསྐུར་བར་འགྱུར་བ་དཀྱིལ་འཁོར་ན་བཞུགས་པའི་དེ་བཞིན་གཤེགས་པ་ཐམས་ཅད་ཀྱི་སྙིང་པོ་གསུངས་སོ། །ཨོཾ་ཞེས་བྱ་བའི་དོན་ནི་སྔར་སྨོས་པ་བཞིན་ནོ། །བཛྲ་ནི་སྟོང་པ་ཉིད་ལ་དམིགས་པའི་ཡེ་ཤེས་སོ།།
དེ་རྟོགས་པ་ནི་བཛྲ་བྲིད་ཅེས་བྱ་བ་སྟེ་དེས་ནི་རང་བཞིན་བསྟན་ཏོ། །སྭཱ་ཧཱ་ནི་ཞི་བའི་དོན་དུ་སྙེགས་ཏེ་བཅོམ་ལྡན་འདས་ཞི་བའི་རང་བཞིན་ཡིན་པའི་ཕྱིར་རོ། །ཕྱག་འཚལ་ཞིང་དབང་བསྐུར་བར་གྱུར་ཏོ་ཞེས་བྱ་བས་གཡོས་པའི་ཚེ་གང་གི་མཐུས་ས་གཡོ་བར་ནུས་པ་དེ་ལ་ཕྱག་འཚལ་ཞིང་དེའི་བཀའ་ཉན་ཏེ་དབང་དུ་གྱུར་ཏོ། །རྡོ་རྗེའི་རིགས་ཀྱི་དཀྱིལ་འཁོར་འདི་བཤད་དོ། །ཞེས་པ་བཛྲ་བྲིད་ཅེས་བྱ་བའི་སྙིང་པོ་འདིའི་དཀྱིལ་འཁོར་བཅོམ་ལྡན་འདས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་བྱིན་གྱིས་བརླབས་ཏེ་ཕྱག་ན་རྡོ་རྗེས་བཤད་དོ། །དཀྱིལ་འཁོར་ཆེན་པོའི་ཚུལ་དུ་ཞེས་པ་གོང་དུ་དཀྱིལ་འཁོར་ཆེན་པོ་བཤད་པ་འདིར་ཡང་སྦྱར་རོ། །དབུས་ན་བཅོམ་ལྡན་འདས་རྣམ་པར་སྣང་མཛད་ཞལ་ཤར་ཕྱོགས་སུ་གཟིགས་ཏེ་བཞུགས་སོ། །དེའི་སྤྱན་སྔར་ཕྱག་ན་རྡོ་རྗེ་ཞི་བའི་ཆ་ལུགས་རྡོ་རྗེ་སེམས་དཔའ་ཙོག་ཙོག་པོར་ཐལ་མོ་སྦྱར་ཏེ་བཞུགས་པར་བྱའོ། །དེ་ནས་དེ་བཞིན་དུ་གཞུག་གོ་ཞེས་པ་དཀྱིལ་འཁོར་གོང་མར་སློབ་དཔོན་ཞུགས་ལ་ཕྱིས་སློབ་མ་གཞུག་པ་དེ་བཞིན་དུ་འདིར་ཡང་གཉི་ག་འཇུག་པར་བྱའོ། །དེ་ལྟར་དཀྱིལ་འཁོར་དུ་ཞུགས་ནས་སློབ་དཔོན་གྱིས་སློབ་མ་ལ་ཁྱོད་ནི་དེང་དེ་བཞིན་གཤེགས་པ་ཉིད་ཡིན་ཏེ་དེའི་གཏན་ཚིགས་ཁྱོད་ཉན་པར་འདོད་ན་ངས་བཤད་དོ་ཞེས་བསྒོ་ཤིག །དེ་ནས་དེ་ཕན་ཆད་དེ་བཞིན་གཤེགས་པར་གྱུར་ཏོ་ཞེས་པ། དེ་བཞིན་གཤེགས་པའི་དཀྱིལ་འཁོར་མཐོང་བས་ན་དགེ་བའི་རྩ་བ་བསྐྱེད་དེ། བསོད་ནམས་དང་ཡེ་ཤེས་ཀྱི་ཚོགས་རྫོགས་པར་བྱས་ནས་བསོད་ནམས་ཆེན་པོས་ཚེ་འདི་ཉིད་ལ་བྱང་ཆུབ་ཐོབ་པར་འགྱུར་རོ། །བསོད་ནམས་ཆུང་བ་ཡང་ཚེ་རབས་གཞན་ལ་འཐོབ་པར་འགྱུར་བ་སྟེ། དེ་བས་ན་དུས་གཞན་ལ་དགོངས་ཏེ་ཁྱོད་དེ་བཞིན་གཤེགས་པ་ཉིད་དོ་ཞེས་གསུངས་སོ། །ཕྱག་རྒྱ་སློབས་ཤིག་ཅེས་བྱ་བ་དེ་ནི་ཕྱག་རྒྱ་ཆེན་པོ་ལ་སོགས་པ་བཞི་རིམ་བཞིན་དུ་བསླབ་བོ། དེ་བཞིན་གཤེགས་པའི་དཀྱིལ་འཁོར་རོ། །ཞེས་པ་དེ་བཞིན་གཤེགས་པས་གསུངས་པའི་དཀྱིལ་
འཁོར་ཡིན་པའི་ཕྱིར་རོ། །དཀྱིལ་འཁོར་དེ་བཞིན་དུ་བྲིས་ནས་བཅུག་ལ་ཞེས་པ་རྡོ་རྗེའི་དཀྱིལ་འཁོར་ཡང་ཇི་ལྟར་གོང་དུ་བྲིས་པ་བཞིན་དུ་བཅུག་ལ་དཀྱིལ་འཁོར་དེ་རྡོ་རྗེར་བསྒྲུབ་པར་བསླབ་པོ། དེར་སྒྲུབ་པ་ཡང་ལག་པ་གཉིས་ཀྱིས་གསེར་དངུལ་ལམ་ཟངས་ཀྱི་རྡོ་རྗེ་རྩེ་ལྔ་པ་དེ་བཟུང་ལ་སྒྲུབ་པ་ནི་གོང་མ་བཞིན་ནོ། །རང་གི་ཕྱག་རྒྱ་བསྒོམ་མོ་ཞེས་པ་དཀྱིལ་འཁོར་གྱི་ལྷ་རྣམས་ཀྱི་རང་གི་རྣམ་པར་གྲོལ་བའི་མཚན་མའི་ཕྱག་རྒྱའི་དོན་གསལ་བར་བསྒོམ་མོ། །ཡང་འདྲི་བ་ན་རྡོ་རྗེ་ཞེས་བྱ་བ་འདི་ཅི་ཡིན། ལན་གླན་པ་སྙིང་པོ་སྒོམ་པ་སྟེ་ཞེས་སོ། །སྙིང་པོ་ནི་སྟོང་པ་ཉིད་ཀྱི་ཡེ་ཤེས་སོ། །རྡོ་རྗེ་སྒོམ་པ་ནི་རྡོ་རྗེ་ཞེས་བྱ་བའི་དོན་ཏེ། བཟླས་པས་ཚེ་འདི་ཉིད་དམ་ཚེ་རབས་གཞན་དུ་སངས་རྒྱས་སུ་འགྲུབ་པར་འགྱུར་རོ། །དམ་ཚིག་གི་དཀྱིལ་འཁོར་བསྟན་པའི་ཕྱིར་སྨྲས་པ་ཐམས་ཅད་དམ་ཚིག་ཆེན་པོའི་ཚུལ་དུ་བྱས་ལ་ཞེས་པ་དམ་ཚིག་གི་དཀྱིལ་འཁོར་ཆོ་ག་ཐམས་ཅད་དམ་ཚིག་གི་དཀྱིལ་འཁོར་ཆེན་པོ་གོང་དུ་སྨོས་པའི་ཚུལ་ཞིན་དུ་བྱས་ལ་སློབ་མ་ལ་དམ་ཚིག་འདི་སྟོན་ཅིག །དང་བརྟན་རྡོ་རྗེ་ཕྱག་རྒྱ་ལ། །ཞེས་པ་དག་གོ །ཕྱག་ན་རྡོ་རྗེ་དང་དེ་བཞིན་གཤེགས་པ་རྣམས་ལ་དད་པ་བརྟན་ཞིང་མི་འགྱུར་བར་བྱའོ། །སེམས་ཅན་ཐམས་ཅད་སྨིན་པ་དང་གྲོལ་བ་ལ་མགུ་ཞིང་ཆགས་པར་བྱའོ། །ལས་ཀྱི་དཀྱིལ་འཁོར་བསྟན་པ་ཡང༌། །དཀྱིལ་འཁོར་དེ་བཞིན་དུ་བྲིས་ལ། །ཞེས་པ་ལས་ཀྱི་དཀྱིལ་འཁོར་ཆོ་ག་གོང་མ་བཞིན་དུ་བྱས་ནས་སློབ་དཔོན་དང་སློབ་མ་ཞུགས་ལ་ཞི་བ་དང་རྒྱས་པ་ལ་སོགས་པའི་ལས་རྣམ་བཞི་བསླབ་པོ། །དེ་ནས་དཀྱིལ་འཁོར་དེ་ཉིད་དུ་ཕྱག་འཚལ་བ་དང་སྡིག་པ་བཤགས་པ་དང་བསོད་ནམས་ཀྱི་རྗེས་སུ་ཡི་རང་བའོ་ཞེས་གསུངས་པ་ལུས་ཐམས་ཅད་ཀྱིས་གཏུགས་ཏེ་ཞེས་བྱ་བ་ལ་སོགས་པའོ། །ལུས་ཐམས་ཅད་ཀྱིས་ཕྱག་བྱ་བ་ནི་ཡན་ལག་ཐམས་ཅད་བརྐྱང་སྟེ་གཏུགས་པའོ། །དེ་བཞིན་གཤེགས་པ་དང་ཕྱག་ན་རྡོ་རྗེ་ལ་བཀུར་སྟེ་དང་མཆོད་པས་མཉེས་པར་བྱ་བའི་ཆོ་ག་ཡང་གསུངས་པ་དེ་ནས་ལངས་ཏེ་པུས་མོ་གཡས་པའི་ལྷ་ང་ས་ལ་
བཙུགས་ཏེ་ཞེས་བྱ་བ་ལ་སོགས་པའོ། །བཛྲ་བྲིད་ཅེས་བྱ་བའི་སྙིང་པོ་སྟོང་པ་ཉིད་ཀྱི་ཡེ་ཤེས་རྟོགས་པའི་རྣམ་པར་གྲོལ་བའི་ཚིག་དེ་གླེངས་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱང་མཉེས་ཤིང་བཀུར་སྟི་བྱས་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དགོངས་པ་ཡོངས་སུ་རྫོགས་པར་འགྱུར་རོ་ཞེས་པའི་སྙིང་པོའི་ཚིག་དེ་ཉིད་བཟླས་པས་མཉེས་པར་འགྱུར་ཞེས་བྱ་བའི་དོན་ཏོ། །དེ་ནས་རྡོ་རྗེའི་རིག་པ་སྒྲུབ་པ་འབྱུང་སྟེ་ཞེས་པའི་སྙིང་པོ་གོང་དུ་སྨོས་པ་བཛྲ་བྲིད་ཅེས་བྱ་བ་དེ་སྒྲུབ་པའི་ཆོ་ག་བཤད་དོ། །དེ་ནས་གསོ་སྦྱིན་ཅན་ཞེས་བྱ་བ་ཁྱིམ་པ་ཞིག་བསྒྲུབས་ན་ཡང་ཞག་གཅིག་ཁྲིམས་བརྒྱད་ནོད་པའི་ཆོ་ག་བྱས་ནས་བཟླས་སོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་རྡོ་རྗེ་ཁུ་ཚུར་གྱི་ཕྱག་རྒྱའོ་གནས་འབྱུང་བ་ལ་བྱའོ། །དེ་ནས་ཆོ་ག་གཞན་ཏེ་ཞེས་བ་རས་ལ་བཅོམ་ལྡན་འདས་རྣམ་པར་སྣང་མཛད་པདྨའི་སྟེང་ན་བཞུགས་པ་བྲིའོ། །དེ་ནས་ཡང་དེའི་སྤྱན་སྔར་ཕྱག་ན་རྡོ་རྗེ་ཞི་བའི་གཟུགས་སུ་བཞུགས་པ་བྲིའོ། །གཡས་སུ་ནི་ཕྱག་ན་རྡོ་རྗེ་ཕྱག་གཡས་པ་ན་རྡོ་རྗེ་གསོར་བ་གཡོན་པ་ན་པདྨོ་ཅན་བྲིའོ། །ཡང་ཆོ་ག་གཞན་ནི་ཞེས་པ་རས་ལ་རྣམ་པར་སྣང་མཛད་ཀྱི་སྐུ་གཟུགས་གཅིག་པུ་བྲིས་ལ་དེའི་སྤྱན་སྔར་ཟླ་བ་དྲུག་གི་བར་དུ་དུས་གསུམ་དུ་བཟླས་ནས། དེ་ནས་ཉིན་མཚན་གསུམ་སྨྱུང་བའི་ཐ་མ་ལ་མཚན་གཅིག་མི་ཉལ་བར་བསྒྲུབས་ན་ཕྱག་ན་རྡོ་རྗེ་ཉིད་ཐོབ་པར་འགྱུར་གྱི་བར་དུ་བཟླས་སོ། །དེ་བཞིན་གཤེགས་པའི་རྟོག་པ་རྫོགས་སོ།། །།དེ་ནས་བཅོམ་ལྡན་འདས་ཕྱག་ན་རྡོ་རྗེ་བྱང་ཆུབ་སེམས་དཔའ་སེམས་དཔའ་ཆེན་པོས་ཡང་འདི་སྐད་ཅེས་གསོལ་ཏོ་ཞེས་པ་གོང་དུ་ལྷ་ཆེན་པོ་ལ་སོགས་པ་གདུལ་བའི་ཕྱིར་སྙིང་པོ་གསུངས་ནས་ཡང་འདིར་སེམས་ཅན་ལ་ཕན་པའི་ཕྱིར་གསུངས་པས་ན་ཡང་གི་སྒྲ་སྨོས་སོ། །དེ་བཞིན་གཤེགས་པ་ཐམས་ཅད་རྡོ་རྗེའི་རི་ལྟར་མི་གཡོ་བ་ཡང་ཞེས་པ་རྡོ་རྗེ་སྲ་བའི་ཕྱིར་དེ་ལས་རིར་གྱུར་པ་སུས་ཀྱང་བསྐྱོད་པར་མི་ནུས་སོ། །དེ་བཞིན་དུ་དེ་བཞིན་གཤེགས་པའི་ཡེ་ཤེས་སྟོང་པ་ཉིད་ལ་དམིགས་
པའི་རྡོ་རྗེ་དེ་ཉིད་གཞན་གྱིས་བསྐྱོད་མི་ནུས་པའི་ཕྱིར་རི་ལྟ་བུར་གྱུར་པ་ཡང་སྙིང་པོ་འདི་བརྗོད་པས་བསྐྱད་པར་འགྱུར་ཏེ། ཏིང་ངེ་འཛིན་ལས་ལྡང་ཞེས་པའི་དོན་ཏོ། །འཇིགས་པ་ཐམས་ཅད་ལས་རྣམ་པར་གྲོལ་བར་འགྱུར་ཞེས་པ་རྒྱལ་པོ་དང་རྐུན་པོ་དང་མེ་དང་ཆུ་དང་གཅན་གཟན་གྱི་འཇིགས་པ་ལས་རྣམ་པར་གྲོལ་བར་འགྱུར་རོ། །གང་གིས་བརྗོད་བ་ཙམ་གྱིས་ཀྱང༌། །ཞེས་པ་སྙིང་པོའི་ཐབས་དང་དོན་དང་ཤེས་རབ་ཏུ་ལྡན་པའི་ཕྱིན་ཅི་མ་ལོག་པར་དམིགས་ནས་སེམས་སྙོམས་པར་ཐུགས་ཀྱིས་བཟླས་ན་མཚམས་མེད་པ་ལྔ་ཐམས་ཅད་འབྱང་བར་འགྱུར་རོ། །དོན་ཐམས་ཅད་འགྲུབ་ཅེས་འདོད་པ་ལྔའི་དོན་ཐམས་ཅད་ཅི་འདོད་པ་འགྲུབ་པོ། དགོས་པ་ཐམས་ཅད་བྱེད་དེ་ཞེས་པ་ཞི་བ་དང་རྒྱས་པ་ལ་སོགས་པའི་དགོས་པ་ཐམས་ཅད་ཕྱག་ན་རྡོ་རྗེས་མཛད་དོ། །ཕྱག་ན་རྡོ་རྗེ་སྔགས་པའི་ཕྱི་བཞིན་དུ་འབྲང་ཞིང་སྤྱན་སྔར་གྱིས་ཀྱང་འཚོའོ། །ངས་ཀྱང་གཟུང་ངོ་ཞེས་ཕྱག་ན་རྡོ་རྗེས་སྙིང་པོའི་ཡོན་ཏན་བརྗོད་པ་དེ་ལྟར་བཅོམ་ལྡན་འདས་ཀྱིས་ཀྱང་ཐུགས་སུ་ཆུད་ཀྱིས་སྙིང་པོ་ལེགས་པར་སྨྲོས་ཤིག་པའི་དོན་ཏོ། །ཉན་ཐོས་དང་རང་སངས་རྒྱས་ཀྱིས་མ་རུང་བར་འགྱུར་རོ་ཞེས་པའི་སྙིང་པོ་དེའི་མཐུས་ཐེག་པ་ཆུང་དུར་སེམས་བསྐྱེད་པ་རྣམས་སླར་ལྡོག་ཅེས་པའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་གྲུབ་པ་དང་རྡོ་རྗེ་སེམས་དཔའ་གྲུབ་པ་ཡང་མ་ཁྲང་པར་གྱུར་ཏོ་ཞེས་པ་དེ་བཞིན་གཤེགས་པ་དང་རྡོ་རྗེ་སེམས་དཔའི་ཕྱག་རྒྱ་ཆེན་པོ་གྲུབ་པ་ཡང་བརྟན་ཞིང་མི་ཉམས་པར་འགྱུར་ཏེ་ཕྱག་ན་རྡོ་རྗེའི་སྙིང་ག་ནས་ཀུན་དུ་འབར་བས་བསྐོར་བ་ཞེས་པ་བཅོམ་ལྡན་འདས་ཕྱག་ན་རྡོ་རྗེ་ལ་འཇིག་རྟེན་ཁམས་ཐམས་ཅད་ཀྱི་བསམ་པ་ཡོངས་སུ་སྦྱང་བའི་ཕྱིར་རང་གི་སྙིང་ག་ནས་འདོད་པའི་ཁྲོ་བོ་འོད་འབར་བས་བསྐོར་བདེ་བཅོམ་ལྡན་འདས་དེ་བཞིན་གཤེགས་པ་ལྔའི་དབུ་རྒྱན་གྱི་ཕྲེང་བ་དང༌། དོ་ཤལ་དང་རྣ་རྒྱན་ལ་སོགས་པས་བརྒྱན་པ་འདོད་པའི་རང་བཞིན་བསྟན་པའི་ཕྱིར་ཁྲོ་བོ་ཕྱག་བཞི་ལ་གཉིས་མེ་ཏོག་གིས་བརྒྱན་པའི་གཞུ་འགེངས་པ་ཕྱག་གཉིས་ནི་རྡོ་རྗེ་ཧཱུཾ་ཀ་རའི་ཕྱག་རྒྱ་སྙིང་
གར་བཅིངས་ལ་རྡོ་རྗེ་འདོད་པ་ཁྲོ་བོ་ཞེས་བྱ་བ་བྱུང་ངོ༌། །འདོད་པའི་ཁྲོ་བོ་ལ་སྦྱངས་པ། །ཞེས་འདོད་པ་ནི་བྱང་ཆུབ་ཀྱི་སེམས་ཏེ་ཤེས་རབ་བོ། །ཁྲོ་བོ་ནི་མ་རུངས་པ་འདུལ་བ་སྟེ་ཐབས་སོ། །དེ་གཉིས་ཀྱིས་སེམས་ཅན་གྱི་བསམ་པ་ཅི་རིགས་པར་ཡོངས་སུ་སྦྱངས་སོ།། ང་ཇི་ལྟ་བ་བཞིན་དུ་ཁྱོད་ཀྱིས་ཀྱང་ཞེས་པ་ཕྱག་ན་རྡོ་རྗེས་རང་གི་སྙིང་ག་ནས་བྱུང་བ་འདོད་པ་ཁྲོ་བོ་ལ་ངས་སེམས་ཅན་གྱི་དོན་བྱས་པ་བཞིན་དུ་ཁྱོད་ཀྱིས་ཀྱང་བྱོས་ཤིག་པར་བཀའ་སྩལ་བའོ། །སྙིང་པོ་འདིས་གང་དཱི་སེམས་ཅན་དེ་དག་ཐམས་ཅད་བརྒྱལ་བ་དང༌། བཅོམ་པ་ཀུན་གསོས་ཤིག་ཅེས་པ་གོང་དུ་ཊ་ཀི་ཧཱུཾ་ཛ་ཞེས་སྨོས་པའི་ཚེ། སེམས་ཅན་མང་བོ་བྲེད་པར་གྱུར་པའི་རྣམས་ཨོཾ་ཊུཾ་ཞེས་བྱ་བའི་སྙིང་པོ་འདིས་སླར་གསོས་ཤིག་པར་བཅོམ་ལྡན་འདས་རྣམ་པར་སྣང་མཛད་ཀྱིས་བཀའ་སྩལ་ཏོ། །སྙིང་པོ་འདིས་གསོ་བ་འབའ་ཞིག་ཀྱང་མ་ཡིན་གྱི་གོ་ཆ་བགོས་པར་ཡང་འགྱུར་ཏེ། འདི་བགོས་ན་རྡོ་རྗེའི་ལུས་ཐོབ་བོ་ཞེས་པར་འགྱུར་རོ་ཞེས་གསུངས་པ། གཞན་ཡང་རྡོ་རྗེའི་ལུས་ཐོབ་པར་གྱིས་ཤིག་ཅེས་སོ། །ཨོཾ་གྱི་དོན་ནི་གོང་དུ་སྨོས་པ་བཞིན་ནོ། །ཊུཾ་ནི་སླར་གསོས་པའི་དོན་ཏོ། །རྡོ་རྗེ་འཁོར་ལོ་དཀྱིལ་འཁོར་ཞེས་རྡོ་རྗེ་འཁོར་ལོ་ནི་དཀྱིལ་འཁོར་གྱི་མིང་སྟེ་རྡོ་རྗེས་བརྒྱན་པའི་དཀྱིལ་འཁོར་ཡིན་པས་ན་རྡོ་རྗེའི་འཁོར་ལོའོ། །རྡོ་རྗེ་འཁོར་ལོ་བརྩེགས་ཆེན་ཏེ། །ཞེས་བྱ་བ་རྡོ་རྗེ་འཁོར་ལོ་ཞེས་བྱ་བའི་དཀྱིལ་འཁོར་རིམ་པ་དུ་མར་བརྩེགས་པ་ཆེན་པོ་དེ་བཤད་པར་བྱའོ། །ཡང་ན་དཀྱིལ་འཁོར་གྱི་ཚུལ་ལྷའི་ལྡིང་ཁང་བརྩེགས་པ་ལྟར་བྲེས་པས་ན་བརྩེགས་ཆེན་ནོ། །བཅུ་དྲུག་ཆ་དང་ལྡན་པར་རོ། །ཞེས་པ་དཀྱིལ་འཁོར་གྱི་བདག་པོ་ཆེན་པོ་དབུས་ན་བཞུགས་པ་ནི་ཆ་བཅུ་དྲུག་དང་ལྡན་པ་སྟེ་དབུས་ཀྱི་དཀྱིལ་འཁོར་གྱི་ལྷ་བརྒྱད་དང༌། ཕྱིའི་དཀྱིལ་འཁོར་གྱི་མཆོད་པ་བཞི་དང་སྒོ་བ་བཞི་སྟེ་ལྷ་བཅུ་དྲུག་རྣམས་རང་རང་གིས་ཐ་དད་པ་ལ་གནས་པས་ན་ཆ་བཅུ་དྲུག་ཏུ་འགྱུར་རོ། །གཞན་དག་འཆད་པ་དབུས་ཀྱི་གཙོ་བོ་དེ་ཆ་བཅུ་དྲུག་དང་ལྡན་པ་ནི་ནང་གི་དཀྱིལ་འཁོར་རེའུ་བརྒྱད་ནི་ནང་གི་རིགས་སུ་གཏོགས་སོ། །དེ་འདྲ་བའི་ཆ་བརྒྱད་ཀྱིས་ནི་ཕྱི་རིམ་གྱི་དཀྱིལ་འཁོར་
བསྐོར་ཏེ། ནང་རིམ་གྱི་རེའུ་ཅི་བྱུང་བའི་ཕྱེད་ཀྱི་ཚད་ཀྱིས་ཕྱི་བསྐོར་ན་ཕྱོགས་བཞི་འཁོར་ཏོ། །གྲྭ་བཞི་ཁ་རྡོར་འདུག་པ་ནང་གི་རེའུ་གཉིས་ལྷག་མ་ཕྱེད་ཕྱེད་དུ་བགོས་ཏེ་གྲར་གླན་ཏོ། །རྡོ་རྗེའི་ར་བ་མཛེས་པར་ཏེ། །ཞེས་པ་དཀྱིལ་འཁོར་ཕྱི་ནང་གཉི་གའི་ར་བ་ནི་རྡོ་རྗེ་རྩེ་གསུམ་པ་ཚོན་སྔོན་པོས་བྲིས་པས་བསྐོར། དེའི་མཐའ་ཚོན་སྣ་གཉིས་གཉིས་བསྣན་ཀ་བ་བརྒྱད་འོག་ནས་འབྱུང་བ་ནི་ཚོན་སྔོན་པོས་ཐ་མལ་བར་བྲིས་ཏེ། རྡོ་རྗེའི་ཕྲེང་བར་མི་བགྱིའོ། །གྲྭ་སྒོའི་ཐོར་ཏོ་དེ་བཞིན་དུ། །ཞེས་པ་གྲ་སྒོ་ཕྱིར་བལྟ་བ་དང༌། སྒོའི་གྲྭའི་རྩེ་མོ་དང་རྟ་བབས་ཀྱི་མཚམས་སུ་རིན་པོ་ཆེ་རྡོ་རྗེས་བརྒྱན་པར་སྤྲོའོ། །ཕྱི་རིམ་གྱི་ངོས་ཕྱིར་བལྟ་བ་ལ་བ་དན་དང༌། མེ་ཏོག་དང་མུ་ཏིག་གི་ཕྲེང་བ་དང་དྲིལ་བུ་ལ་སོགས་པ་རྒྱན་སྣ་ཚོགས་ཀྱིས་ཅི་སྡུག་ཏུ་བརྒྱན་པའོ། །སྙིང་པོ་བཟླས་ཤིང་བྲི་བར་བྱའོ། །ཞེས་པ་དཀྱིལ་འཁོར་གྱི་ཕྱི་ནང་གཉིས་ཀའི་ལས་བྱེད་དོ་ཅོག་ནི་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་བཟླས་ཤིང་བྲི་བར་བྱའོ། །དེ་ཡི་ནང་གི་འཁོར་ལོ་ཡང༌། །ཞེས་པ་ནང་རིམ་གྱི་དཀྱིལ་འཁོར་གྲུ་བཞི་ཀ་བ་བརྒྱད་དང་ལྡན་པ་སྲད་བུས་མཉམ་པར་བྲེའོ། །དཀྱིལ་འཁོར་བརྒྱད་ཀྱི་ཚུལ་དུ་སྟེ། །ཞེས་པ་ནང་གི་དཀྱིལ་འཁོར་ཕྱོགས་བཞི་དང་གྲྭ་བཞིར་ལྷའི་གནས་རེ་རེ་གནས་པའོ། །རྡོ་རྗེ་ཀ་བའི་རྩེ་མོ་རུ། །ཞེས་པ་ཀ་བའི་རྩེ་མོ་དབུས་སུ་འདུས་པའི་མདོར་འོད་འབར་བ་གཞག་གོ །དེ་ཡི་དབུས་སུ་སེམས་དཔའ་ཆེ། །ཞེས་པ་དཀྱིལ་འཁོར་ནང་རིམ་གྱི་དབུས་སུ་བྱང་ཆུབ་སེམས་དཔའ་ཆེན་པོ་ཕྱག་ན་རྡོ་རྗེ་བཞུགས་པར་བྱ་སྟེ། སངས་རྒྱས་ལྔའི་དབུ་རྒྱན་ཅན་ཡིད་ཀྱིས་འཛུམ་པ་ཕྱག་གཉིས་ལ་གཡས་པ་ན་རྡོ་རྗེ་བསྙེམས་པ་འཛིན་པ། གཡོན་པ་ན་དྲིལ་བུ་བསྣམས་པ་ཡང་ཕྱག་གཉིས་ན་མདའ་གཞུ་འགེངས་པ་སྐུ་མདོག་སྔོན་པོ་དེ་ལས་གཞན་པ་ཕྱག་བཞི་པ་ཞེས་པ་ཕྱག་ན་རྡོ་རྗེའི་སྤྱན་སྔར་འདོད་པ་ཁྲོ་བོ་རྡོ་རྗེ་སེམས་དཔའི་སྙིང་པོ་བཞག་སྟེ་སྐུ་མདོག་དམར་པོའོ། །གཉིས་ཀྱིས་རྡོ་རྗེ་ཧཱུཾ་མཛད་པ། །ཞེས་པ་ཕྱག་གཉིས་ཀྱིས་ཧཱུཾ་ཀ་རའི་སྙིང་པོ་ཕྱག་རྒྱ་མཛུབ་མོ་གཉིས་བསྒྲེང་བ་སྙིང་
གར་བཞག་པའོ། །རྡོ་རྗེ་ཡི་ནི་གཡས་ཕྱོགས་སུ། །ཞེས་པ་ཁ་དོག་སྔོན་པོ་ཆུ་སྲིན་གྱི་རྒྱལ་མཚན་མགོ་ཆུ་སྲིན་ཅན་འཛིན་པ་རྒྱལ་མཚན་དེ་ལས་ནོར་བུ་རིན་པོ་ཆེ་འབར་བ་སེམས་དཔའ་ཆེན་པོ་རྡོ་རྗེ་དཔལ་གཞག་གོ །དབུ་ལ་ནི་རྒྱལ་མཚན་ནམ་མཚན་མར་འདྲེན་ཏོ། །རྡོ་རྗེ་གཡོན་དུ་བྲི་བ་ནི། །ཞེས་པ་ཕྱག་ན་རྡོ་རྗེའི་གཡོན་ལོགས་སུ་གཡོན་པ་རྡོ་རྗེ་ཞེས་བྱ་བ་རྡོ་རྗེ་འགྱིང་བ་ཞེས་ཀྱང་བྱ་བ་དེ་བྲི་བ་སྟེ་ཁ་དོག་དམར་པོའམ་སེར་པོར་བྱའོ། །གཡོན་པ་རྡོ་རྗེ་ཞེས་བྱ་བ་ནི་དེའི་མིང་སྟེ་རྡོ་རྗེ་ཁུ་ཚུར་བཅིངས་ལ་ལྟ་ཟུར་གཉིས་སུ་བསྟེན་ཏེ་སྒེག་པའི་ཚུལ་གྱིས་གཡོན་ཕྱོགས་སུ་འདུད་པས་ན་གཡོན་པ་རྡོ་རྗེ་ཞེས་བྱའོ། །དམར་པོ་ཞེས་བྱ་བ་ནི་ཆགས་པའི་རང་བཞིན་དུ་བསྟན་པའམ་ལྷ་ཉིད་ཀྱི་ཁ་དོག་དམར་པོར་བསྟན་པའོ། །གྲྭ་ཡི་དཀྱིལ་འཁོར་གནས་སུ་ནི། །ཞེས་པ་ཕྱག་ན་རྡོ་རྗེ་བདེ་བ་ཆེན་པོའི་དཀྱིལ་འཁོར་ན་བཞུགས་པའི་ཚེ། འདོད་པའི་ལྷ་ལོངས་སྤྱོད་ཀྱིས་བསྙེམས་པ་རྣམས་ཟིལ་གྱིས་མནན་པའི་ཕྱིར་འཁོར་མཆོད་པའི་ལྷ་མོས་ཀྱང་བསྐོར་ཏེ་ནང་གི་དཀྱིལ་འཁོར་གྱི་གྲྭ་བཞིར་དུས་བཞིའི་ལྷ་མོའི་གཟུགས་སུ་གྱུར་ཏེ་ཤར་དང་བྱང་གི་མཚམས་ན་དཔྱིད་ཀྱི་རྡོ་རྗེ་མོ་ཁ་དོག་དམར་པོ་བདུག་པ་འབུལ་བའི་ཚུལ་དུ་བྱའོ། །ཤར་དང་ལྷོའི་མཚམས་ན་རྡོ་རྗེ་སྤྲིན་གྱི་ལྷ་མོ་སྟེ་ཁ་དོག་སྔོན་མོ་མེ་ཏོག་འབུལ་བའི་ཚུལ་དུ་བྱེད་པའོ། །སྟོན་གྱི་རྡོ་རྗེ་ནི་ཁ་དོག་དམར་པོ་མར་མེ་འབུལ་བའི་ཚུལ་དུ་ལྷོ་ནུབ་ཀྱི་གྲྭར་གཞག་གོ།། བྱང་དང་ནུབ་ཀྱི་གྲྭར་ནི་རྡོ་རྗེ་ཁབ་མོ་དགུན་གྱི་ལྷ་མོ་དྲི་འབུལ་བའི་ཁ་དོག་སྔོ་བསངས་སུ་བྱ་སྟེ་གཞག་གོ །འདོད་པའི་གཟུགས་ལ་སོགས་པ་བྲི། །ཞེས་པ་ཕྱིའི་དཀྱིལ་འཁོར་གྱི་གྲྭ་བཞིར་གཟུགས་དང་སྒྲ་དང་དྲི་དང་རོའི་རྣམས་མཆོད་པའི་ལྷ་མོར་གྱུར་ཏེ། ཤར་དང་བྱང་གི་མཚམས་ནས་རིམ་བཞིན་དུ་ཁ་དོག་དཀར་མོ་དང་དམར་མོ་དང་སྔོན་མོ་དང་སྔོ་བསངས་རིམ་བཞིན་དུ་མེ་ལོང་སྟོན་པ་དང་པི་ཝང་ལེན་པ་དང་དྲི་འབུལ་བ་དང་ཟས་ཀྱི་སྣོད་ཐོགས་པའི་ཚུལ་དུ་གཞག་གོ །སྒོ་བཞིར་ཀྱོ་བཏང་དང་ཞགས་པ་དང་ལྕགས་སྒྲོག་དང་དྲིལ་བུ་རྣམས་
བཞག་སྟེ་ཤར་དང་ལྷོ་དང་ནུབ་དང་བྱང་དུ་རིམ་བཞིན་དུ་བྱའོ། །དེ་ལ་ཀྱོ་བ་ཏང་གིས་ནི་སེམས་ཅན་ཐམས་ཅད་དགུག་གོ །ཞགས་པས་ནི་གར་གཞག་པའི་ས་དེར་འཇུག་པར་བྱེད་དོ། །སྒྲོག་གིས་ནི་དེ་ལས་མི་འགྱུར་བར་འཆིང་ངོ༌། །དྲིལ་བུས་མཉེས་པར་བྱེད་དོ། །ཀྱོ་བ་ཏང་གིས་འདོད་པ་དགུག་པས་ན་ཀྱོ་བ་འདོད་པ་ཞེས་བྱའོ། །རྡོ་རྗེ་སྙིང་པ་ཕྱག་རྒྱ་བཅིངས་ལ་ཞེས་པ་སློབ་དཔོན་ཉིད་རྡོ་རྗེ་ཧཱུཾ་ཀ་རའི་སྙིང་པོའི་ཕྱག་རྒྱ་མཛུབ་མོ་གཉིས་བསྒྲེང་བ་བཅིངས་པའོ། །སེམས་ཅན་ཀུན་གྱི་ཡིད་ཁྱབ་ཅིང༌། །ཞེས་པ་སློབ་དཔོན་གྱིས་ཕྱག་ན་རྡོ་རྗེ་ལ་བསྟོད་ཅིང་བདག་རང་གྲུབ་པར་གསོལ་བ་སྟེ། ཕྱག་ན་རྡོ་རྗེ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་ཡེ་ཤེས་ཀྱི་རང་བཞིན་ཡིན་པས་ན་ཐམས་ཅད་ཀྱི་སེམས་ལ་ཁྱབ་པོ། ཐུགས་རྗེ་དང་ལྡན་ལ་མཐུ་མངའ་བས་སེམས་ཅན་ཀུན་ལ་མྱ་ངན་ལས་འདས་པའི་བདེ་བ་སྩོལ་ཏོ།། སེམས་ཅན་ཐམས་ཅད་ལ་བྱམས་ཤིང་ཕན་འདོགས་པ་ཕ་དང་འདྲ་བའི་ཕྱིར་ཕར་གྱུར་པའོ། །རྡོ་རྗེ་སེམས་དཔར་བདག་ངེས་པར་གྱུར་ཅིག་ཅེས་རྡོ་རྗེ་སེམས་དཔའི་རང་བཞིན་དུ་དེང་གྲུབ་པར་གྱུར་ཅིག་ཅེས་སྨོན་ནས་བྱིན་གྱིས་བརླབ་ཅིང་བསྐུལ་བའི་ཕྱིར་སྙིང་པོ་སྨྲས་སོ། །དེ་ནས་དེ་སྐད་སྨྲས་པ་དང་འབབ་པར་འགྱུར་ཏེ་ཞེས་པ་དེ་སྐད་སྨྲས་ནས། ཨ་ལ་སོགས་པའི་སྔགས་ཀྱི་སྦྱོར་བ་བྱས་ན་ལྷ་ཉིད་སྔགས་པ་ལ་འབབ་པར་འགྱུར་ཏེ་བབས་ནས་ཀྱང་སྔགས་པ་ལ་ལ་ནི་ཕྱག་ན་རྡོ་རྗེ་ཉིད་དུ་འགྱུར། ལ་ལ་ནི་འཚང་རྒྱ་བ་ཉིད་འཐོབ་པར་འགྱུར་རོ། །དེ་ནས་སློབ་མ་གཞུག་སྟེ་སྙིང་པོ་ཕྱག་རྒྱ་བཅིངས་ལ་ཞེས་པ་རྡོ་རྗེ་ཧཱུཾ་ཀ་རའི་ཕྱག་རྒྱ་མཛུབ་མོ་གཉིས་བསྒྲེང་སྟེ་དེས་མེ་ཏོག་གི་ཕྲེང་བ་བཟུང་ལ་འཇུག་གོ །དེ་ནས་འདི་ཞེས་སྨྲོས་ཤིག་ཅེས་པ་སློབ་དཔོན་གྱིས་སློབ་མ་ལ་བསྒོའོ། །འདི་ནི་དང་པོའི་སེམས་དཔའ་ཞེས་ཕྱག་ན་རྡོ་རྗེ་འདི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་དང་པོ་སྟེ། ཐམས་ཅད་ཀྱི་ཡེ་ཤེས་ཀྱི་རང་བཞིན་ཡིན་པའི་ཕྱིར་ཏེ་དང་པོ་དེ་ལས་འབྱུང་ཞེས་པའི་དོན་ཏོ། །འདོད་པའི་བདག་པོ་ཞེས་པ་ནི་འདོད་པ་ནི་བྱང་ཆུབ་ཀྱི་སེམས་སོ། །དེ་ལ་དབང་བྱེད་པའི་ཕྱིར་བདག་པོའོ། །གང་
དུ་དབང་བྱེད་ཀྱང་བདག་རང་ཅི་ལའང་མ་རེག་པར་མི་སྤྱོད་པའང་སྲིད་པ་དེ་དེ་བས་ན་འདོད་པའི་དབང་པོ་ཞེས་སྨྲས་ཏེ། འདོད་པ་ལའང་མ་རེག་པར་སྤྱོད་ཅེས་པའི་དོན་ཏོ། །འདིའི་སྙིང་པོ་སྟེ་ཞེས་པ་འདོད་པ་ཁྲོ་བ་ནི་ཕྱག་ན་རྡོ་རྗེའི་སྙིང་པོ་སྟེ་ཐབས་དང་ཤེས་རབ་ཏུ་ལྡན་པའི་གཟུགས་སོ། །རེག་པས་བདེ་བ་སྟེ་ཞེས་བྱ་བ་རྡོ་རྗེ་དགའ་བ་ཞེས་བྱ་བ་དེ་སེམས་ཅན་ཐམས་ཅད་ཀྱི་ལུས་རེག་ནས་དགའ་པར་བྱེད་པའོ། །བདག་ཆེ་བ་ནི་དེའི་རྒྱལ་མཚན་ཏེ་ཞེས་བྱ་བ་ཕྱག་ན་རྡོ་རྗེའི་རྒྱལ་མཚན་ཏེ། བྱང་ཆུབ་སེམས་དཔའ་ལ་སོགས་པ་ཐམས་ཅད་ཀྱི་བྱམས་པ་སྐྱེ་ཞིང་སློང་བར་བྱེད་པ་དང་ཕོངས་པ་ལ་ནོར་སྦྱིན་པའོ། །བདག་ཆེ་བའི་བདུད་དེ་ཞེས་བྱ་བ་ནི་ཕྱག་ན་རྡོ་རྗེ་ཉིད་ཀྱི་ཉོན་མོངས་པ་དང་ཤེས་བྱའི་སྒྲིབ་པ་རབ་ཏུ་གསོད་པའི་ཕྱིར་བདུད་དོ། །གང་གྲྭ་བཞི་པ་འདི་རྣམས་ནི་དུས་ཀྱི་མཆོད་པ་ཞེས་པ་ཕྱི་ནང་གི་ལྷ་མོ་བརྒྱད་ཀྱིས་མཆོད་པས་ནི་མཆོད་པ་ཐམས་ཅད་འདུས་པར་བསྟན་ཏེ། དུས་བཞིན་སྐྱེ་ཞིང་འབྱུང་བའི་གཟུགས་ལ་སོགས་པ་ཐམས་ཅད་འདུས་པར་བསྟན་ཏོ། །མིག་དང་ཆགས་པ་དང་མཛའ་བ་དང་མི་མཛའ་བ་སྟེ་ཞེས་པ་ཀྱོ་བ་ཏང་ལ་སོགས་པའི་རྒྱུད་བསྟན་པ་སྟེ་མིག་གིས་མཐོང་ནས་དགུག་པས་ན་མིག་ནི་ཀྱོ་བ་ཏང་གི་རྒྱུའོ། །ཆགས་པ་ནི་འཇུག་པའི་རྒྱུ་སྟེ་ཆགས་ཤིང་འདོད་པས་ན་འཇུག་གོ །མཛའ་བ་ནི་འཆིང་བའི་རྒྱུ་སྟེ་གང་ལ་ཞེན་པ་དེ་ཉིད་ཀྱིས་འཆིང་བའི་ཕྱིར་རོ། །མི་མཛའ་བ་ནི་ཆགས་པ་མེད་པའི་དོན་ཏོ། །མ་ཆགས་པས་ན་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་བརྗོད་ཅིང་སེམས་དཔའ་ཐམས་ཅད་ཀྱང་མཉེས་པར་བྱེད་དོ། །རྒོལ་བར་མི་འགྱུར་རོ་ཞེས་པ་ཀྱོ་བ་ཏང་ལ་སོགས་པ་སྒོ་བས་བསྒོས་པའི་ཕྱིར་དེའི་མཚམས་ལས་སུ་ཡང་མི་རྒོལ་ལོ། །དེ་ནས་སློབ་དཔོན་གྱིས་སློབ་མ་ལ་ཚིག་བསྟན་པ་འདི་སྐད་སྨྲོས་ཤིག །ཁྱོད་ཀྱིས་ཀྱང་བཅོམ་ལྡན་འདས་འདོད་པ་ཐམས་ཅད་ཀྱི་བདག་པོ་ལ་སྨད་པར་མ་བྱེད་ཅིག་ཅེས་བྱ་བ་ནི་ཕྱག་ན་རྡོ་རྗེ་ལ་མི་སྨད་པར་བསྟན་པ་སྟེ། དེ་ནི་ཉེ་བར་བསྟན་པ་ཙམ་དུ་ཟད་ཀྱི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་
མི་སྨད་ཅེས་བྱ་བའི་དོན་ཏོ། །འདོད་ཆགས་དང་བྲལ་བར་ཡང་མི་ཞེས་བྱ་བ་གོང་དུ་བཤད་པ་དེ་ལ་འགའ་ཞིག་ན་རེ་སངས་རྒྱས་ཀྱི་བསྟན་པ་ལ་འདོད་ཆགས་དང་བྲལ་བ་དམ་པའོ་ཞེས་ཟེར་བ་དེ་ལྟ་བུ་ཞེས་པའི་ལན་དུ་གང་སངས་རྒྱས་ཀྱི་བསྟན་པ་ལ་ཞེས་བྱ་བ་ལ་སོགས་པའོ། །སེམས་ཅན་ཐམས་ཅད་ཉོན་མོངས་པ་ལས་རྣམ་པར་དག་པའི་ཕྱིར། ཉོན་མོངས་པའི་ཆོས་འདོད་པ་རྣམ་པ་ལྔ་ལ་ཆགས་པའི་འདོད་ཆགས་དང་བྲལ་བར་འཆད་ཀྱི་བྱང་ཆུབ་སེམས་དཔའ་ལ་འདོད་ཆགས་དང་བྲལ་བར་མི་འཆད་དོ། །ཅིའི་ཕྱིར་ཞེ་ན། ཕྱི་རོལ་གྱི་མུ་སྟེགས་ཅན་རྣམས་ནི་བྱང་ཆུབ་ཀྱི་སེམས་སེམས་ཅན་སྨིན་པར་བྱ་བ་དང༌། གྲོལ་བར་བྱས་ལ་ཆགས་པ་མེད་པར་ཡང་ཐར་པར་འདོད་དོ། །བདག་གི་ཆུང་མས་ཀྱང་སེམས་ཅན་སྡུད་པར་བྱེད་དེ་ཞེས་པ་ཆུང་མ་ནི་རང་གི་རྣམ་པར་གྲོལ་བའི་མཚན་མ་ཕྱག་རྒྱ་ལ་བྱ་སྟེ། རྣམ་པར་གྲོལ་བའི་མཚན་མ་དེས་སེམས་ཅན་མགུ་བར་བྱེད་དོ། །འདོད་ཆགས་ནི་བྱང་ཆུབ་ཏུ་བསྟན་པའོ་ཞེས་པ་སེམས་ཅན་སྨིན་པ་དང་གྲོལ་བ་ལ་ཆགས་པ་ནི་བྱང་ཆུབ་ཏུ་འགྱུར་བས་བྱང་ཆུབ་ཅེས་བྱའོ། །བཅོམ་ལྡན་འདས་གྲུབ་པས་ན་འདོད་པའི་ཁྲོ་བོ་གྲུབ་པར་འགྱུར་རོ་ཞེས་པའི་སྙིང་པོ་གོང་མ་བསྒྲུབས་པས་ཕྱག་ན་རྡོ་རྗེ་འགྲུབ་བོ། །ཕྱག་ན་རྡོ་རྗེ་གྲུབ་པས་འདོད་པ་ཁྲོ་བོ་ཡང་གྲུབ་སྟེ། ཅིའི་ཕྱིར་ཞེ་ན། འདོད་པ་ཁྲོ་བ་ཞེས་བྱ་བ་སྙིང་པོ་འདི་དག་ཆེ་བ་ཕྱག་ན་རྡོ་རྗེའི་སྙིང་པོ་ཡིན་པའི་ཕྱིར་རོ། །ཕྱག་རྒྱ་ཆེན་པོ་ཤེས་པར་སློབས་ཤིག་ཅེས་པ་དཀྱིལ་འཁོར་དེར་ཞུགས་ནས་ལྷའི་ལུས་ཀྱི་གསང་བ་ཕྱག་རྒྱ་ཆེན་པོའི་རང་བཞིན་ཤེས་པར་སློབས་ཤིག །དེའི་རང་བཞིན་ཡང་ཆོས་ཐམས་ཅད་སེམས་ཙམ་དུ་ལུང་དང་རིགས་པས་བསྒྲུབས་ཏེ་སྟོང་པ་ཉིད་དུ་མོས་པར་བྱའོ། །དེ་ནས་སེམས་ཅན་གྱི་ཐ་སྙད་ལ་ལུས་མེད་པར་མི་འགྲུབ་པས་ན་ལྷའི་ལུས་བསྐྱེད་པའི་ཕྱིར། བྱིན་གྱིས་བརླབ་དང་དབང་དང་ཏིང་ངེ་འཛིན་དང་མཆོད་པ་ལ་སོགས་པ་ཕྱག་རྒྱ་ཆེན་པོའི་ཡན་ལག་ཏུ་གཏོགས་སོ། །ཆོ་ག་ཤེས་པར་སློབས་ཤིག་པའི་
ཐ་ཚིག་གོ །དེ་ནས་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་དང་ཞེས་པ་ཕྱག་ན་རྡོ་རྗེའི་དམ་ཚིག་གི་ཕྱག་རྒྱ་རྡོ་རྗེ་རྩེ་ལྔ་པ་བཅིངས་ལ་བཅོམ་ལྡན་འདས་ཀྱི་རྡོ་རྗེ་སྙིང་པོ་ཊཀྐི་ཧཱུཾ་ཛ་ཞེས་བྱ་བ་བཟླས་ནས་སློབ་མའི་ལག་པ་གཉིས་སུ་རྡོ་རྗེ་སྦྱིན་ནོ། །དེ་ལ་རྡོ་རྗེ་རྩེ་ལྔ་པའི་ཕྱག་རྒྱ་ནི་རྡོ་རྗེ་བཅིངས་པ་ལས་གུང་མོ་གཉིས་ལྟོ་སྦྱར་ལ་རྩེ་མོར་བྱས་ཏེ་མཐེའུ་ཆུང་དང་མཐེ་བོང་བཞི་སོ་སོར་བསྒྲེང་ས་ཏེ་རྩེ་མོ་བཞིར་བྱས་པའོ། །དེ་ནས་ལག་ཏུ་རྡོ་རྗེ་སྦྱིན་པའི་སྔགས་འདི་བཟླས་སོ། །ཨོཾ་ནི་སྔ་མ་བཞིན་ནོ། །བཛྲ་དྷ་ར་ནི་བོད་པ་སྟེ། རྡོ་རྗེ་འཛིན་པ་སྔགས་པ་ཉིད་ལ་བྱའོ། །བཛྲ་བྷྲ་ཏཾ་དྷ་ར་ཡ་སིདྷྱ་ཞེས་བྱ་བ་ནི་རྡོ་རྗེའི་བརྟུལ་ཞུགས་འཛིན་པར་གྲུབ་ཅིག་པའི་དོན་ཏོ། །ཊཀྐི་ཧཱུཾ་ཛ་ནི་སྙིང་པོ་འདིས་བྱིན་གྱིས་རློབས་ཤིག་པའི་དོན་ཏོ། །ལག་ཏུ་རྡོ་རྗེ་སྦྱིན་པ་ཡང་ཕྱག་ན་རྡོ་རྗེའི་བརྟུལ་ཞུགས་སྦྱིན་པའི་དོན་ཏོ། །དེ་ནས་སློབ་མའི་ལག་ཏུ་མེ་ཏོག་ཕྲེང་བ་ཡོད་པ་ཕྱག་ན་རྡོ་རྗེ་ལ་ཕུལ་ནས་མེ་ཏོག་དེ་སློབ་མའི་མགོ་ལ་བཅིང་ངོ༌། །དེ་ནས། རྡོ་རྗེ་མིང་གི་དབང་སྦྱིན་ནོ། །ཞེས་པ་དཀྱིལ་འཁོར་དུ་ཞུགས་ནས་དཀོན་མཆོག་གསུམ་ལ་ཕྱོགས་ཤིང་བསྒྱུར་བའི་ཕྱིར་མིང་ཡང་བརྗོད་དགོས་ཏེ་དེ་བས་ན་སྔགས་འདི་སྨྲས་ཏེ་མིང་གདགས་སོ། །སྔགས་ཀྱི་དོན་ནི་འདོད་པ་ཐམས་ཅད་ཀྱི་དབང་པོར་རྡོ་རྗེའི་དབང་བསྐུར་ཏེ། རྡོ་རྗེའི་མིང་འདི་ཅེས་བྱ་བ་བསྟན་པར་གྱུར་ཅིག་ཅེས་བྱ་བའི་ཐ་ཚིག་གོ །དེ་ནས་དེར་འདུག་སྟེ་ཕྱག་རྒྱ་ཆེན་པོ་བཅིངས་ནས་ཞེས་པ་དཀྱིལ་འཁོར་གྱི་སྒོ་དེར་འདུག་ལ་ཕྱག་ན་རྡོ་རྗེའི་རྣལ་འབྱོར་བྱས་ནས་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་བརྒྱ་སྟོང་བཟླས་སོ། །དེ་ནས་དམ་ཚིག་གི་ཕྱག་རྒྱ་བཅིངས་ལ་ཞེས་པ་ཕྱག་ན་རྡོ་རྗེའི་དམ་ཚིག་གི་ཕྱག་རྒྱ་གོང་དུ་སྨྲས་པའོ། །རྡོ་རྗེའི་སྙིང་པོ་དབང་དུ་འགྱུར། །ཞེས་བྱ་བ་ཕྱག་ན་རྡོ་རྗེའི་སྙིང་པོ་ཊཀྐི་ཧཱུཾ་ཛ་ཞེས་བྱ་བ་ཉིད་དུ་འགྱུར་ཏེ་ཇི་ལྟར་འདོད་པ་ཉིད་དུ་སྙིང་པོ་དེ་སྒྲུབ་ཅེས་པའི་དོན་ཏོ། །ཡང་ཕྱག་ན་རྡོ་རྗེའི་སྙིང་པོ་དབང་དུ་འགྱུར་ཏེ་ཇི་ལྟར་འདོད་པ་བཞིན་དུ་དེས་སྦྱོར་པའོ། །སྙིང་ཤེས་པ་དང་ཞེས་པ་གཞན་གྱི་སེམས་ཤེས་པའོ། །སྙིང་ལ་དབང་བྱེད་པ་ནི་སེམས་དབང་དུ་གྱུར་པའོ། །ཐམས་ཅད་ཀྱི་སྙིང་བརྟན་པར་ཆགས་སོ་ཞེས་པ་ཐམས་ཅད་ཀྱི་སེམས་བདག་ལ་དུས་ཐམས་ཅད་དུ་
ཆགས་ཤིང་བྱམས་པར་འགྱུར་རོ། །སྙིང་ཐམས་ཅད་ལས་ཚིག་ཐོས་པར་འགྱུར་རོ་ཞེས་པ་གཞན་གྱི་ཡིད་ལ་ཅི་བསམས་པ་སྒྲར་གྱུར་ནས་ཐོས་པར་འགྱུར་རོ། །གྱུར་པ་དང་འགྱུར་བ་དང་ཞེས་པ་ལ་འདས་པ་དང་མ་འོངས་པ་དང་ད་ལྟར་གྱི་ཆོས་རྣམས་བདག་གིས་ལུང་བསྟན་ཞིང་སྨྲས་པ་ཐམས་ཅད་བདེན་པར་འགྱུར་རོ། །བདག་གི་སྙིང་ལས་ཀྱང་ཆོ་འཕྲུལ་རྣམ་བཞི་ཞེས་པ་ཡིད་ཀྱིས་བསམས་པ་ཙམ་གྱིས་ཆོ་འཕྲུལ་རྣམ་བཞི་བདག་རང་གིས་ཀྱང་མཐོང་ཞིང་གཞན་ལ་ཡང་བསྟན་ཏོ། །ཆོ་འཕྲུལ་བཞི་ནི་འབར་བ་དང༌། གདུང་བ་དང༌། སྣང་བ་དང་ཆར་འབེབས་པའོ། །དེ་ལ་འབར་བ་ནི་བདག་གི་ལུས་ལ་མེ་འབར་བའོ། །གདུང་བ་ནི་ཀུན་ལ་ཚབས་གདུང་བར་བྱེད་པའོ། །སྣང་བ་ནི་ཕྱོགས་ཀུན་འོད་ཀྱིས་གསལ་བར་བྱེད་པའོ། །ཆར་འབབ་པ་ནི་བསམས་པ་ཙམ་གྱིས་འབབ་པར་འགྱུར་རོ། །དེའི་སྙིང་ལས་རྡོ་རྗེ་འབྱུང་བར་འགྱུར་རོ་ཞེས་པ་བསྒོམས་པའི་མཐུས་སྙིང་གར་རྡོ་རྗེ་རྩེ་ལྔ་པ་གཟུགས་བརྙན་དུ་སྣང་སྟེ་དེ་ཕྱིན་ཆད་གཞན་གྱིས་མི་གསོད་གནོད་པར་བྱར་མི་ཚུགས་མཚོན་གྱིས་མི་ཆོད་སོ་སོར་དབྱེར་མི་ཕྱེད་པའི་ལུས་སུ་འགྱུར་རོ། །དེ་ནས་གསང་བའི་མཆོད་པ་བྱས་ཏེ་ཞེས་པ་དཀྱིལ་འཁོར་གྱི་མཇུག་བསྡུ་བའི་ཚེ་མཆོད་ཅིང་བསྟོད་ནས་སླར་གཤེགས་སུ་གསོལ་བའི་ཆོ་གའོ། །གསང་བ་ནི་དམ་ཚིག་མི་ཤེས་པ་དང་མ་དད་པ་རྣམས་ལ་མི་བསྟན་པ་སྟེ་ཕྱག་ན་རྡོ་རྗེ་ལ་བུད་མེད་ཀྱི་དཀྱིལ་འཁོར་གྱིས་མཆོད་པ་འདོད་ཆགས་ལ་སོགས་པ་ཉོན་མོངས་པ་དང་བྲལ་བ་མ་ཡིན་ནོ་ཞེས་སྐྱོན་འདོགས་པའི་ཕྱིར་ཀུན་ལ་མི་བསྟན་ཏོ། །ཡང་ན་འདོད་པའི་ཁམས་ཀྱི་ལྷ་བསྙེམས་པ་ཅན་རྣམས་ཟིལ་གྱིས་མནན་པའི་ཕྱིར་རང་གི་ཡོན་ཏན་སྣ་ཚོགས་པ་ལྷ་མོའི་གཟུགས་སུ་སྤྲུལ་ནས་མཆོད་པར་བྱེད་པའི་དོན་ཟབ་མོ་འདི་ལྟ་བུ་གཞན་གྱིས་མི་ཤེས་པའི་ཕྱིར་ཡང་གསང་བ་ཞེས་བྱའོ། །རྡོ་རྗེའི་སྙིང་པོས་བསྟོད་པའི་གླུས་བསྟོད་དོ་ཞེས་པ་རྡོ་རྗེ་སྙིང་པོ་ནི་ཕྱག་ན་རྡོ་རྗེ་ཉིད་ལ་བྱ་སྟེ། དེ་ལ་བསྟོད་པའི་ཚིགས་གཟུགས་ལ་སོགས་པ་འོག་ནས་འབྱུང་བའི་ཚིག་ལ་སོགས་པའི་བསྟོད་པ་རྣམས། ཤརྫ་དང་དེ་བ་ཏ་དང༌། གྷནྡྷ་ར་ལ་སོགས་པའི་གླུ་དང་སྦྱར་ཏེ་བསྟོད་དོ། །གསང་བའི་མཆོད་པ་ཐམས་ཅད་མྱུར་དུ་འགྲུབ་པར་འགྱུར་
རོ་ཞེས་པ་གསང་བའི་མཆོད་པ་གོང་དུ་སྨོས་པ་རྣམས་ཀྱིས་ཕྱག་ན་རྡོ་རྗེའམ་བདག་ལ་མཆོད་པར་འགྲུབ་པོ། །དེ་ནས་མཆོད་པ་ཐམས་ཅད་ཀྱིས། །ཞེས་པ་ཕྱི་ནང་གི་ལྷ་མོ་ཐམས་ཅད་ཀྱིས་སོ་སོའི་ཕྱོགས་ཕྱོགས་ནས་དཀྱིལ་འཁོར་དུ་བཞུགས་པའི་ལྷ་ཐམས་ཅད་ལ་མཚུངས་པར་མཆོད་ནས་དེར་འདུས་པའི་སློབ་མ་དང་འཁོར་རྣམས་ལ་ཟས་འདོད་པ་རྣམས་ཀྱང་ཅི་བདོག་པའི་ཁ་ཟས་ཀྱི་རོ་ཐམས་ཅད་ཀྱིས་མགུ་བར་བྱའོ། །ཁ་ཟས་དོན་དུ་མི་གཉེར་བ་རྣམས་ཀྱང་སྤྱད་པ་རྣམ་པ་བཞི་སྟེ། འགྲོ་སྡོད་འདུག་ཉལ་གྱི་ཚུལ་བསྟན་པས་ཡི་རངས་པར་བྱས་ཏེ་སོ་སོར་དགྱེས་པར་བྱའོ། ཁ་ཅིག་འཆད་པ་ནི་དཀྱིལ་འཁོར་གྱི་རྗེས་ལ་སློབ་དཔོན་དང་སློབ་མ་ཐམས་ཅད་འདུས་ཏེ་ལྷ་བཤོས་རྣམས་ལ་ཅི་འདོད་པར་ཟོས་ཏེ་སྙིང་ཚིམ་པར་བྱ་དགོས་ཞེས་ཀྱང་ཟེར་ཏེ། སྔགས་པ་ལྷ་བཤོས་མི་བཟའ་བར་གཞུང་གཞན་དག་ལས་ཀྱང་འབྱུང་ལ་ལྷའི་ཕ་འབབ་བཟའ་བ་ཉིད་ལྷ་མཉེས་པར་བྱའི་རྒྱུར་ཞེས་སྙམ་ཡང་མི་བྱེད་ཀྱིས་བཤད་པ་ནི་སྔ་མ་ལེགས་པ་འདྲ། དེ་ནས་རྡོ་རྗེ་དཀྱིལ་འཁོར་དུ། །ཞེས་པ་རྡོ་རྗེའི་དཀྱིལ་འཁོར་རྡོ་རྗེའི་ཕྲེང་བས་སྦྲེལ་བ་ལ་སོགས་པ་ཆོ་ག་གཞན་ཐམས་ཅད་ནི་གོང་མ་བཞིན་ནོ། །རྡོ་རྗེ་འདོད་པ་ནི་ཁྲོ་བོ་བཅོམ་ལྡན་འདས་ཕྱག་ན་རྡོ་རྗེའོ། །སོགས་པའི་སྒྲས་ནི་ནང་གི་མཆོད་པ་དང་འཁོར་གྱི་རྣམས་བྲིའོ། །ཕྱིའི་མཆོད་པ་དང་སྒོ་བ་རྣམས་ཀྱང་དེ་བཞིན་ནོ། །ཕྱག་རྒྱ་ཅི་བཞིན་ཤེས་པ་ནི། །ཕྱག་རྒྱ་ཆེན་པོ་རྣམས་བྲི་སྟེ། །སྐུ་གཟུགས་སུ་གཞག་ཅེས་པའི་དོན་ཏོ། །བཅུག་ལ་མཆོད་པའི་ལྷའི་རྡོ་རྗེ་གར་དང་མཆོད་པས་ཞེས་པ་དཀྱིལ་འཁོར་དུ་སློབ་དཔོན་དད་སློབ་མ་གཉིས་ཞུགས་ནས་མཆོད་པའི་ལྷ་མོ་གར་དང་ཕྲེང་བ་གླུ་ལ་སོགས་པའི་སྦྱོར་བས་མཆོད་ལ་སྙིམ་བ་ཡང་མེ་ཏོག་གིས་བཀང་སྟེ་གསོལ་ལོ། །དེ་ནས་སློབ་དཔོན་གྱིས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྣལ་འབྱོར་བྱས་ལ་ལག་ཏུ་གསེར་དངུལ་ལམ་ཟངས་ལས་བྱས་པའི་རྡོ་རྗེ་རྩེ་ལྔ་པ་བླངས་ནས་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་འབུམ་བཟླས་སོ། །རྡོ་རྗེ་གླུ་དང་རྡོ་རྗེ་བཟླས་པས་ཞེས་བ་སྔར་དེའི་གླུ་དང་སྦྱར་ཏེ་བརྩམས་ལ། རྡོ་རྗེ་བཟླས་པས་འབུམ་ཚད་བར་བྱའོ། །ནང་པར་རྡོ་རྗེ་འཛིན་ཏམ་ཁྲོ་བོ་ཞེས་པ་རྡོ་རྗེ་
འཛིན་པ་ནི་རྡོ་རྗེ་སེམས་དཔའ་ཞི་བའི་སྐུའོ། །ཁྲོ་བོ་ནི་རྡོ་རྗེ་ཧཱུཾ་ཀ་རའི་སྐུའོ། །དེ་ནས་དམ་ཚིག་གི་དཀྱིལ་འཁོར་ཏེ་ཞེས་པ་ཕྱག་ན་རྡོ་རྗེའི་དཀྱིལ་འཁོར་ཆེན་པོ་གང་དུ་སྨོས་པ་གྲུ་བཞི་པ་ལ་སོགས་པའི་ཚུལ་བཞིན་དུ་ཐིག་བཏབ་སྟེ། དེ་ནས་ནད་རིམ་གྱི་སྟེགས་བུ་གྲུ་བཞི་རི་མོར་བྲིས་ལ། དེའི་དབུས་སུ་བཅོམ་ལྡན་འདས་ཕྱག་ན་རྡོ་རྗེ་ཇི་ལྟར་གོང་དུ་བཤད་པའི་ཚུལ་བཞིན་དུ་བཞུགས་པར་བྱ་སྟེ། དེའི་སྙིང་པོ་འདིས་བྱིན་གྱིས་བརླབ་པོ། །དེ་ལ་ཏེ་ཛེ་བཛྲ་སཏྭ་ནི་བོད་པའི་ཚིག་གོ །སུ་ར་ཏ་སྟཾ་ནི་ཁྱོད་ནི་རབ་ཏུ་དགའ་བའོ་ཞེས་རང་བཞིན་པའོ། །དེའི་སྤྱན་སྔར་རྡོ་རྗེ་གཞུ་འགེངས་པའམ་ཞེས་པ་ཕྱག་ན་རྡོ་རྗེ་ཞལ་ཤར་ཕྱོགས་སུ་གཟིགས་པའི་མདུན་དུ་རྡོ་རྗེ་གཞུ་འགེངས་པ་གཟུགས་ཉིད་དུ་བྲི་བའམ་ཡང་ན་དེའི་ཕྱག་རྒྱ་གཞུ་བྲིའོ། །དེའི་དག་གི་ཕྱག་རྒྱ་ནི་བཛྲ་ཤྲཱི་ཧཱུཾ་ཞེས་པ་སྟེ། ཡེ་ཤེས་ཀྱི་མདའ་གཞུས་ཉོན་མོངས་པ་གསོད་པའི་དོན་ཏོ། །དཀྱིལ་འཁོར་འདི་ནི་རྡོ་རྗེ་གཞུ་འགེངས་པ་དང༌། རྡོ་རྗེ་དགའ་བས་འཁྱུད་པ་ལ་སོགས་པ་བཞི་ཆར་བུད་མེད་ཀྱི་ཚུལ་དུ་བྲིའོ། །གཡས་སུ་རྡོ་རྗེ་དགའ་བས་འཁྱུད་པར་བྱའོ་ཞེས་པ་ཕྱག་ན་རྡོ་རྗེའི་གཡས་ལོགས་སུ་རྡོ་རྗེ་དགའ་བ་ཞེས་བྱ་བའི་ལྷ་མོ་རྡོ་རྗེ་ཁུ་ཚུར་བཅིངས་པས་ཕྱག་ན་རྡོ་རྗེ་ལ་འཁྱུད་པ་ལྟ་བུར་སྟོན་པའོ། །དེའི་དག་གི་ཕྱག་རྒྱ་བཛྲ་ཀཱི་ལི་ཧཱུཾ་ཞེས་པ་སྟེ། ཡེ་ཤེས་ཀྱིས་སེམས་ཅན་གྱི་དོན་དུ་རོལ་ཅིང་གདུག་པ་ཐག་འཛུད་པའི་དོན་ཏོ། །མཛད་པའི་རྡོ་རྗེ་བྲི་ཞེས་པ་སེམས་ཅན་ཐམས་ཅད་ལ་བྱམས་ཤིང་ཆགས་པའི་དོན་སྟོན་པའོ། །དེའི་དག་གི་ཕྱག་རྒྱ་ནི་བཛྲ་གྲྀ་ཧོ་སྟེ་ཀྱེ་རྡོ་རྗེ་གཙོ་བོ་ཞེས་རང་བཞིན་བརྗོད་པའོ། །རྡོ་རྗེ་གཡོན་དུ་སྦྱོར་བར་བྱ། །ཞེས་པ་ནི། རྡོ་རྗེ་ཁུ་ཚུར་གཉིས་སྟ་ཟུར་གཉིས་སུ་བསྟེན་ལ་གཡོན་དུ་འདུད་པར་བྱའོ། །དེའི་དག་གི་ཕྱག་རྒྱའི་དོན་ནི་རྡོ་རྗེ་བསྙེམས་པར་གྱིས་ཤིག་པར་བསྟན་པའོ། །དེ་ནས་གྲྭ་དང་སྒོར་ཡང་རང་གི་ལྷ་མོ་བྲི་ཞེས་པ་དཀྱིལ་འཁོར་གྱི་ནང་གི་གྲྭར་དུས་བཞིའི་ལྷ་མོ་དང༌། གཟུགས་ལ་སོགས་པའི་ལྷ་མོ་རྣམས་བྲི་སྒོ་བཞིར་
ཡང་ཀྱོ་བ་ཏང་ལ་སོགས་པ་བྲིའོ། །དེ་ནས་རྡོ་རྗེ་སློབ་དཔོན་ཉིད་ཤིན་ཏུ་ཆས་ལ་ཞེས་བྱ་བ་བྱང་ཆུབ་ཀྱི་སེམས་བསྐྱེད་ཅིང་ཕྱག་རྒྱ་ཆེན་པོའི་རྣལ་འབྱོར་གྱིས་ཤིན་ཏུ་ཆས་པའོ། །བུད་མེད་ཀྱང་བརྒྱན་ཏེ་ཞེས་པ་བུད་མེད་ནི་སློབ་དཔོན་རང་གི་རྣམ་པར་གྲོལ་བའི་ཕྱག་རྒྱ་ལ་བྱ་སྟེ། དེ་བརྒྱན་པ་ནི་བྱང་ཆུབ་ཀྱི་སེམས་དང་ལྡན་པས་རྡོ་རྗེ་ཁུ་ཚུར་ཡང་བཅིངས་ལ་དཔུང་པ་གཉིས་ཀྱིས་འཁྲུད་པའི་ཚུལ་དུ་བསྟན་ཞིང་དཀྱིལ་འཁོར་དུ་ཞུགས་ལ་སྔགས་བརྗོད་དོ། །ས་མ་ཡ་སྟྭཾ་ནི་ཁྱེད་ཡེ་ཤེས་ཀྱི་རང་བཞིན་ནོ་ཞེས་སྨྲས་སོ། །ཨ་ཧཾ་སུ་ར་ཏ་ཞེས་བྱ་བ་ནི་བདག་ཀྱང་ཤིན་ཏུ་དགའོ་ཞེས་བསྟན་པའོ། །དེ་བས་ན་འདོད་པའི་ཁྲོ་བོའི་རང་བཞིན་ནོ། །དེ་ནས་བརྗོད་པ་ཙམ་གྱིས་ཞེས་པ་སྔགས་དེ་བཀླགས་པ་ཙམ་གྱིས་བཅོམ་ལྡན་འདས་ཕྱག་ན་རྡོ་རྗེ་ཉིད་ཀྱི་སྐུ་སྟོན་པར་མཛད་དེ། ཕྱག་རྒྱ་ཆེན་པོ་ལ་སོགས་པ་ཡང་འགྲུབ་པར་འགྱུར་རོ། །དམ་ཚིག་ཐམས་ཅད་གྲུབ་པ་ཡང་སྩོལ་ཏོ་ཞེས་པ་འདིའི་སྐབས་སུ་དམ་ཚིག་ནི་ཤེས་པ་ལ་བྱ་སྟེ། འཇིག་རྟེན་ལས་འདས་པའི་ཡེ་ཤེས་ལ་སོགས་པ་འཐོབ་བོ། །དེ་ནས་སློབ་མ་ཡང་དེ་བཞིན་དུ་སྙིང་པོའི་རྗེས་སུ་བཅུག་ནས་ཞེས་པ་སྙིང་བོ་རྡོ་རྗེ་ནི་རྡོ་རྗེ་ཧཱུཾ་ཀ་རའི་སྙིང་པོའི་ཕྱག་རྒྱ་མཛུབ་མོ་གཉིས་བསྒྲེང་བའོ། །བདག་ཆེ་ཀུན་གྱི་ཕྱག་རྒྱ་ནི། །ཞེས་པ་སངས་རྒྱས་དང་བྱང་ཆུབ་སེམས་དཔའ་རྣམས་ནི་བདག་ཆེ་བ་སྟེ་ཡོན་ཏན་ཀུན་གྱིས་འཕགས་པའི་ཕྱིར་རོ། །དེའི་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པ་བཞི་རྣམས་ཏེ། བྱང་ཆུབ་ཀྱི་སེམས་འདོད་པའི་རང་བཞིན་དང་མ་རུངས་པ་འདུལ་བ་ཁྲོ་བོའི་རང་བཞིན་ཅན་དུ་འབྱུང་སྟེ་བྱང་ཆུབ་ཀྱི་སེམས་མེད་ན་ཕྱག་རྒྱ་མི་འགྲུབ་པའི་ཕྱིར་རོ། །བསམ་པ་ཞེས་བྱ་བ་ནི་སྐབས་འདིར་ཁྲོ་བོའི་བསམ་པ་ལ་བྱའོ། །སྡིག་མེད་ཅེས་བྱ་བ་ནི་སློབ་མ་ལ་རིམ་གྲོའི་ཚུལ་དུ་བོད་པའོ། །འདོད་དང་བསམ་པ་མ་གཏང་ཞིག །ཅེས་པ་བྱང་ཆུབ་ཀྱི་སེམས་འདོད་པའི་རང་བཞིན་དང་མ་རུངས་པ་འདུལ་བའི་ཐབས་ཁྲོ་བ་མ་བཏང་ཞིག་དེ་སྐད་བསྒོ་ནས་དྲི་ཆུ་ལ་སྔགས་འདི་བཏབ་སྟེ་བླུད་དོ། །སྔགས་ཀྱི་དོན་ནི་སྔགས་བཤད་པའོ། །དངོས་པོ་གཞན་ཐམས་ཅད་ཀྱི་ཕྱིར་ཡང་ཞེས་པ་དམ་ཚིག་མི་བསྙད་པ་འབའ་ཞིག་གི་ཕྱིར་འདིས་བསྔགས་ཏེ་བླུད་པ་ཡིན་གྱི་གཞན་ཡང་མནས་བསྒག་གོ །ཆོ་ག་འདིས་བསྔགས་ཏེ་བླུད་དོ་ཞེས་པ་མནས་
བསྒགས་པ་དེ་དག་ལ་ཡང་ཕྱག་ན་རྡོ་རྗེའི་རྣལ་འབྱོར་དུ་བྱས་པའི་ལག་ནས་བླུད་དོ། །དེ་ནས་ཕྱག་རྒྱ་བཅིང་བ་བསླབ་པོ་ཞེས་པ་ཕྱག་རྒྱ་རྣམ་པ་བཞི་བསླབ་བོ། །དེ་ནས་དེ་བཞིན་དུ་འབྱུང་ངོ་ཞེས་པ་ཅི་ལྟར་གོང་དུ་ཟས་དང་སྤྱོད་པས་ཚིམ་པར་བྱས་ཏེ་གྱེས་སོ་ཞེས་བྱ་བ་བཞིན་དུ་འདིར་ཡང་བྱའོ། །དེ་ནས་ལས་ཀྱི་དཀྱིལ་འཁོར་དེ་བཞིན་དུ་བྲིས་ནས་ཞེས་པ་དཀྱིལ་འཁོར་ཆེན་པོ་བཞིན་དུ་སྲད་བུ་བྲེས་ནས་དཀྱིལ་འཁོར་གྱི་ལྷ་རྣམས་ཆ་ལུགས་སམ་ཕྱག་རྒྱའི་མཚན་མ་གཞག་པར་བྱའོ། །དེར་བཙུད་ནས་ལས་བཞི་བསླབ་པར་བྱའོ་ཞེས་པ་ཞི་བ་དང་རྒྱས་པ་ལ་སོགས་པའི་ལས་རྣམ་བཞི་སློབ་མས་བསླབ་པའམ་བདག་རང་གིས་བྱའོ། །ཡང་ན་ལས་རྣམ་བཞི་ནི་མོད་བཞིན་དུ་འབྱུང་བ་བཞིན་རྣམས་ལ་བྱའོ། །དེ་ལ་དང་པོ་ནི་འདོད་པ་ཐམས་ཅད་སྩོལ་བར་འགྱུར་ཏེ་ཞེས་པ་ལས་དང་པོ་ནི་ཡིད་ལ་བསམས་པའི་འདོད་པ་ཐམས་ཅད་འགྲུབ་པར་འགྱུར་ཏེ། ཕྱག་ན་རྡོ་རྗེའི་ཕྱག་རྒྱ་ཆེན་པོ་བཅིངས་ནས་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་བཟླས་སོ། །དེ་ནས་ཁྲོ་བོའི་ལས་བརླབ་སྟེ། །ཞེས་པ་ལས་གཉིས་པ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་བྱས་ལ་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་བཟླས་ཤིང་སྔར་བསྙེན་པ་བྱས་ལ་སྙིང་པོ་ཐང་ཅིག་བཟླས་པ་དང༌། ཧཱུཾ་ཞེས་བྱ་བའི་སྙིང་པོ་མཛུབ་མོ་བསྒྲེང་སྟེ་ཐང་ཅིག་བསྡིགས་པས་དེ་བཞིན་གཤེགས་པ་ཡང་རང་གི་གནས་ནས་བསྐྱོད་དེ་སྔགས་པའི་དྲུང་དུ་བྱོན་གྱི་བར་དུ་བཟླས་སོ། །དེ་ཕྱིན་ཆད་འགྲོ་བ་སྟེ། སེམས་ཅན་ལ་སོགས་པ་འགུལ་བ་རྣམས་དང༌། གནས་ཏེ་རི་ལ་སོགས་པ་ཐམས་ཅད་ཀྱང་འགྱེལ་བར་ནུས་སོ། །དེ་ནས་ཕྱག་ན་རྡོ་རྗེ་ལས་འབྱུང་སྟེ་ཞེས་པ་ལས་གསུམ་པ་སྟེ། སེམས་ཅན་ཐམས་ཅད་གོང་དུ་སྨོས་པ་ལྟ་བུའི་འདོད་པ་དང་ཁྲོ་བར་འདུལ་བར་འདོད་ན་རྡོ་རྗེ་འཛིན་མའི་ཕྱག་རྒྱ་གོང་དུ་སྨོས་པ་བཅིངས་ལ་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་ཟློས་ཤིང་མེ་ཏོག་ལ་སོགས་པ་མཆོད་པ་ལྔས་མཆོད་པར་བྱ་སྟེ་དེ་ནས་ཕྱག་ན་རྡོ་རྗེའི་སྙིང་པོའི་ཕྱག་རྒྱ་མཛུབ་མོ་གཉིས་བསྒྲེང་བ་སྙིང་གར་བཅིངས་ཏེ་ཊཀྐི་ཧཱུཾ་ཛ་བཟླས་སོ། །དེ་བཞིན་གཤེགས་པ་ཐམས་ཅད་དུ་བྱ་བར་འདོད་ན་
ཞེས་པ་ལས་བཞི་པ་སྟེ་དེ་བཞིན་གཤེགས་པ་ལྔ་ཉིད་གྲུབ་པར་འདོད་ན་ཕྱག་ན་རྡོ་རྗེའི་སྤྱན་སྔར་བྱང་ཆུབ་ཀྱི་སེམས་རྣམ་པ་ལྔ་གོང་དུ་སྨོས་པ་གང་ཡང་རུང་བ་བསྐྱེད་ལ། ཕ་རོལ་ཏུ་ཕྱིན་པ་དྲུག་ཅི་ནུས་པར་སྒོམ་ཞིང་ཊཀྐི་ཧཱུཾ་ཛ་རྟག་ཏུ་བཟླས་ནས་ས་བཅུ་ལ་གནས་ཏེ་སེམས་ཅན་གྱི་དོན་དུ་བྱ་བ་དེ་བཞིན་གཤེགས་པའི་ཕྲིན་ལས་ཐམས་ཅད་མཛད་པའི་བྱང་ཆུབ་སེམས་དཔར་འགྱུར་རོ་དེ་ནས་བསྒྲུབ་པ་འབྱུང་སྟེ་ཞེས་པ་ཕྱག་ན་རྡོ་རྗེའི་དཀྱིལ་འཁོར་བཞི་གོང་དུ་སྨོས་པ་དེ་རྣམས་ཀྱི་སྒྲུབ་པ་བཤད་པར་བྱའོ། །སྒྲུབ་པ་ལ་ཡན་ལག་གི་གཙོ་བོ་སློབ་མ་སྣོད་དུ་རུང་བ་སྟེ་དེ་ལ་བསྟེན་ཅིང་སྒྲུབ་ཏུ་བཅུག་ན་དོན་དུ་འགྱུར་བའི་ཕྱིར་རོ། །དེ་བས་ན་སྣོད་མ་ཡིན་པ་ལ་སྔགས་མི་སྦྱིན་ཞེས་སྨྲས་པ། དཀྱིལ་འཁོར་དུ་ནི་མ་ཞུགས་པ་ལ་ཞེས་བྱ་བ་ལ་སོགས་པའོ། །ཆོ་ག་བཞིན་དུ་དཀྱིལ་འཁོར་དུ་མ་ཞུགས་པ་དང༌། དཀྱིལ་འཁོར་དུ་ཞུགས་ཀྱང་རིགས་བཞིའི་སྤྱིའི་དམ་ཚིག་དང་རིགས་སོ་སོའི་དམ་ཚིག་མི་ཤེས་པ་དང༌། སློབ་དཔོན་རང་གིས་དཀྱིལ་འཁོར་དུ་གཞུག་པ་མ་ཡིན་པ་གཞན་རྣམས་ལ་སྔགས་ཀྱི་སྙིང་པོ་མི་སྦྱིན་ནོ། །མི་ཟད་ཅེས་བྱ་བ་ནི་སྔགས་ཀྱི་སྙིང་པོ་མི་ཟད་པ་སྟེ་བསོད་ནམས་དང་ཡེ་ཤེས་ཟད་མི་ཤེས་པར་འབྱུང་བའི་ཕྱིར་རོ། །འདི་ནི་དཀྱིལ་འཁོར་སྒྲུབ་སྟེ་ཞེས་གོད་བཞིན་འོག་ནས་དཀྱིལ་འཁོར་མཐོང་བར་སྒྲུབ་པ་ཞེས་འབྱུང་བ་ཉིད་ལ་བྱ་སྟེ་གོང་དུ་སྨོས་པའི་དཀྱིལ་འཁོར་གང་ཡང་རུང་བ་མཐོང་ནས་དཀྱིལ་འཁོར་དེ་ཉིད་དུ་ཕྱག་ན་རྡོ་རྗེའི་སྤྱན་སྔར་ཊཀྐི་ཧཱུཾ་ཛ་ཞེས་པ་འབུམ་བཟླས་ནས་ལས་གང་བྱེད་ཀྱང་རུང་སྟེ་ཕྱག་ན་རྡོ་རྗེ་ལ་སྤྱིའི་བསྙེན་པ་བྱས་བར་འགྱུར་ཏེ། འོག་ནས་འབྱུང་བའི་ལས་ཐམས་ཅད་ཀྱང་དང་པོར་བསྙེན་པ་འདི་མི་སྦྱར་མི་རུང་ངོ༌། །འོག་ནས་ཕྱག་ན་རྡོ་རྗེའི་རྟོག་པའི་ལེའུ་ལ་བཟླས་སོ་ཞེས་འབྱུང་བ་ཐམས་ཅད་ནི་ཊཀྐི་ཧཱུཾ་ཛ་ཞེས་བྱ་བའི་སྙིང་པོ་འདི་བཟླས་པ་རིག་པར་བྱའོ། །དེ་ནས་རས་ལ་བྲིས་ཏེ་རས་ཀྱི་དབུས་སུ་བཅོམ་ལྡན་འདས་དེ་བཞིན་གཤེགས་པ་དྲི་ཞེས་པ་རས་གཙང་མ་སྐྲ་དང་བལ་བུ་མེད་པ་ཁ་ཚར་མ་བཅད་པ་སར་པ། མ་མཐུད་པ་ལ་རི་མོ་མཁན་གསོ་སྦྱིན་གྱི་ཡན་ལག་སྡོམ་པ་ཅན་ཚོན་རྩི་སྦྱིན་མེད་པ་གཙང་མས་བྲིས་ཏེ། མན་ཆད་ཀྱང་བསྒྲུབ་པའི་རི་མོ་ཐམས་
ཅད་ནི་ཆོ་ག་བཞིན་དུ་བྱའོ། །དབུས་སུ་རྣམ་པར་སྣང་མཛད་བྲིས་ལ། དེའི་གཡས་སུ་ཕྱག་ན་རྡོ་རྗེ་སྙིང་གནས་སྙིང་པོ་འདོད་པ་དང་ཁྲོ་བོའི་གཟུགས་ཁ་དོག་དམར་པོ་ཕྱག་བཞི་ལ་གཉིས་ན་མདའ་གཞུ་འགེངས་པ། གཉིས་ན་རྡོ་རྗེ་ཧཱུཾ་ཀ་རའི་ཕྱག་རྒྱ་མཛུབ་མོ་གཉིས་བསྒྲེང་སྟེ་བརྒྱང་བསྐུམ་དུ་གནས་པ་བྲིའོ། །གཉིས་ནི་པདྨོའི་ཏིང་ངེ་འཛིན་ཅེས་བྱ་བ་ཕྱག་གཡོན་པས་པདྨོ་བཟུང་ལ་གཡས་པས་དེའི་ལོ་མ་ཁ་འབྱེད་པ་སྟེ། དེའི་དོན་ཇི་ལྟར་པདྨོ་འདམ་གྱིས་མགོས་པ་བཞིན་དུ་ཁམས་གསུམ་གྱི་ཉེས་པས་མ་གོས་པར་བརྟག་པའོ། །མེ་ཏོག་གི་གཞི་ནི་མེ་ཏོག་གིས་བརྒྱན་པའི་གཞི་སྟེ། ཐབས་དང་ཤེས་རབ་ཀྱི་མཚན་མའོ། །སྤྱན་སྔར་དེ་བཞིན་དུ་ཞེས་པ་རྣམ་པར་སྣང་མཛད་ཀྱི་སྤྱན་སྔར་ཕྱག་ན་རྡོ་རྗེ་འདོད་པ་དང་ཁྲོ་བའི་རང་བཞིན་ཏེ་དེ་རྣམས་བྲིའོ། །གྲྭར་མཆོད་པའི་ལྷ་རང་གི་མཆོད་པས་འགྲམ་པ་དང་མགོ་བོར་ཞེས་པ་རས་ཀྱི་གྲྭ་བཞིར་མཆོད་པའི་ལྷ་མོ་གོང་དུ་སྨོས་པའི་དུས་བཞིའི་རྣམས་མེ་ཏོག་ལ་སོགས་པ་རང་གི་མཆོད་པའི་ཐལ་མོས་འགྲམ་པ་དང་མགོ་བོ་ལ་སོགས་པ་སྦྱར་བ་ནི་ཐལ་མོ་གར་ཐབས་སུ་བསྐོར་ཞིང་འགྲམ་པ་གཡས་གཡོན་དང་སྤྱི་བོར་དགྲོལ་ལོ། །དེ་ལྟར་བྲིས་པ་དེའི་སྤྱན་སྔར་ཆོ་ག་བཞིན་དུ་བཟླས་སོ། །བཟླས་པའི་ཚེ་ཕྱག་བྱ་བ་དང༌། སྡིག་པ་བཤགས་པ་དང༌། གསོལ་བ་གདབ་པ་ལ་སོགས་པ་བདག་སྦྱང་བ་དང༌། སྤྱན་དྲང་བ་དང༌། བྱིན་གྱིས་བརླབ་བ་དང༌། དབང་བསྐུར་བ་དང༌། ཏིང་ངེ་འཛིན་དང༌། མཆོད་པ་དང་དགུག་བ་དང༌། གཞུག་པ་ལ་སོགས་པ་སྟེ་ཕྱག་རྒྱ་ཆེན་པོའི་རྣལ་འབྱོར་དུ་བྱ་བའི་ཆོ་ག་དང༌། བསྐྲད་པ་དང༌། མཚམས་བཅད་པ་དང་བསྲུང་བ་ལ་སོགས་པའི་ཆོ་ག་བཟླས་པར་བྱ་སྟེ་འོག་ནས་འབྱུང་བའི་བཟླས་སོ་ཞེས་ཟེར་བ་ཐམས་ཅད་ལ་ཡང་དེ་བཞིན་དུ་སྦྱར་རོ། །དུས་བཞིར་སྟོང་བཟླས་ཤིང་ཞེས་པ་ནང་པར་དང༌། ཉི་མའི་གུང་དང༌། དགོངས་ཀ་དང༌། ནམ་བྱེད་ཀྱི་དུས་རེ་རེ་ཞིང་ཡང་སྟོང་བཟླས་སོ། །དེ་བཞིན་གཤེགས་པ་སྩོལ་བར་འགྱུར། །ཞེས་བ་དེ་བཞིན་གཤེགས་པའི་ཕྱག་རྒྱ་ཆེན་པོ་གྲུབ་པ་བཅོམ་ལྡན་འདས་ཀྱིས་སྩོལ་བར་འགྱུར་རོ། །རས་ལ་བཅོམ་ལྡན་འདས་ཀྱི་དཀྱིལ་འཁོར་གྱི་ཚུལ་བྲིས་ལ་ཞེས་པ་ཕྱག་ན་རྡོ་རྗེ་དབུས་ཀྱི་གཙོ་བོར་བཞུགས་ལ་གོང་དུ་སྨོས་པའི་དཀྱིལ་འཁོར་ཐམས་ཅད་བྲིའོ། །འདོད་པ་ཐམས་ཅད་ཟོས་ལ་
ཞེས་པ་ཤ་དང་ཆང་དང་སྒོག་པ་ལ་སོགས་པ་སྔགས་པས་བཟའ་བར་མི་རིགས་པ་མ་གཏོགས་པ་གཞན་ཅི་དགའ་བར་ཟོས་ནས་བཟླས་སོ། །རས་ལ་བཅོམ་ལྡན་འདས་ཕྱག་ན་རྡོ་རྗེ་དེ་བཞིན་དུ་བྲིས་ལ་ཞེས་པ་ཕྱག་ན་རྡོ་རྗེ་ཉག་གཅིག་ཕྱག་བཞི་ལ་སོགས་པ་ཇི་ལྟར་གོང་དུ་སྨོས་པ་བཞིན་དུ་བྲིའོ། །རས་ལ་བཅོམ་ལྡན་འདས་རྡོ་རྗེ་འདོད་པ་ཁྲོ་བོ་དེ་བཞིན་དུ་བྲིས་ལ་ཞེས་པ་འདོད་པ་ཁྲོ་བོ་ཕྱག་ན་རྡོ་རྗེའི་སྙིང་ག་ནས་བྱུང་བ་གོང་དུ་སྨོས་པ་བཞིན་དུ་བྲིའོ། །རྡོ་རྗེ་སྙིང་པོའི་ཕྱག་རྒྱ་ནི་རྡོ་རྗེ་ཧཱུཾ་ཀ་རའི་ཕྱག་རྒྱ་མཛུབ་མོ་གཉིས་བསྒྲེང་བའོ། །དེས་ཀྱང་ལོངས་སྤྱོད་པར་ནུས་ན། ཞེས་པ་སངས་རྒྱས་ཀྱི་ཞིང་གྲངས་མེད་པ་ནས་བདེ་བ་ཐམས་ཅད་བཀུག་ལ་སྔགས་པ་ལ་བྱིན་ནས་སྔགས་པས་ཀྱང་ལོངས་སྤྱད་པར་ནུས་ན་ལྷའི་བུ་མོ་འཇིག་རྟེན་གྱི་ཁམས་འདི་ནི་གནས་པ་ལྷ་དགུག་ཅིང་སྤྱད་པ་ཅི་དཀའ་ཕྱག་ན་རྡོ་རྗེའི་སྤྱན་སྔར་རྡོ་རྗེ་སྙིང་པོའི་ཕྱག་རྒྱ་བཅིངས་ནས་ཞེས་པ་ཆ་ལུགས་སམ་བྲིས་པའི་སྤྱན་སྔར་ཕྱག་རྒྱ་མཛུབ་མོ་གཉིས་བསྒྲེང་བ་བཅིང་ངོ༌། །རྡོ་རྗེ་བཞག་སྟེ་དེའི་མདུན་དུ་འབུམ་བཟླས་ན་ཞེས་པ་གསེར་དངུལ་ལམ་ཟངས་ཀྱི་རྡོ་རྗེ་མདུན་དུ་བཞག་ནས་བཟླས་སོ། །ཕྱག་རྒྱ་ཆེན་པོ་བཅིངས་ནས་ཞེས་པ་ཕྱག་ན་རྡོ་རྗེའི་ལུས་ཀྱིས་གསང་བའི་རྣལ་འབྱོར་བྱས་ནས་སོ། །དམ་ཚིག་གི་ཕྱག་རྒྱ་བཅིངས་ནས་ཞེས་པ་ཕྱག་ན་རྡོ་རྗེའི་དམ་ཚིག་ཕྱག་རྒྱ་རྡོ་རྗེ་རྩེ་ལྔ་པ་གོང་དུ་སྨོས་པའོ། །ལག་པ་གཉིས་རྡོ་རྗེ་བཅིངས་པ་བསྡམས་ལ་ཞེས་པ་རྡོ་རྗེའི་བཅིང་བ་ནི་ལག་པ་གཉིས་གཡས་པ་གོང་དུ་བྱས་ནས་སོར་མོ་བསྣོལ་ཏེ་ཆང་པ་བསྡམས་པའོ། །དཔལ་མོ་ལ་བལྟས་ཏེ་འབུམ་བཟླས་ན་དབང་དུ་འགྱུར་རོ་ཞེས་པ་དཔལ་མོ་ལ་བུད་མེད་ཀྱི་ཆ་ལུགས་ལག་ན་དཔལ་མོ་ཐོགས་པ་བྲི་བའམ་བྱས་པ་ལ་བལྟས་ཏེ་བཟླས་ན་དེ་ཉིད་དབང་དུ་འགྱུར་ཏེ་ཅི་བསྒོ་བ་བྱེད་དོ། །མཚོ་དབྱངས་མ་ལ་བལྟས་ཏེ་ཞེས་པ་ལྷ་མོ་ས་ར་སྭསྟི་ནི་ངག་ལ་དབང་ཐོབ་པ་སྟེ། དེ་གྲུབ་ན་བདག་གིས་ཇི་སྐད་སྨྲས་པ་སྟེ་ཀུན་ཀྱང་བརྩོན་པར་འགྱུར་ལ། འཇིག་རྟེན་དང་འཇིག་རྟེན་ལས་འདས་པའི་གཙུག་ལག་དང༌། བཟོ་དང་སྨན་ལ་སོགས་པའི་རྣམ་པར་ཤེས་པ་ཐམས་ཅད་ཤེས་པར་འགྱུར་རོ། །
གྲུབ་བྱེད་མ་བཟུང་ནས་ཞེས་པ་གཅེར་བུ་བའི་བུད་མེད་ཀྱི་གཟུགས་ཤིག་ཡོད་པའི་ཆ་ལུགས་ལ་ལག་པས་བཟུང་ནས་བཟླས་སོ། །ས་ལ་བཉྫི་ཀ་ནི་གནོད་སྦྱིན་མ་བུད་མེད་ཀྱི་གཟུགས་སོ། །རི་ལ་འཛེགས་ཏེ་འབུམ་བཟླས་ན་རྩི་ཐམས་ཅད་དབང་དུ་འགྱུར་རོ་ཞེས་པ་རི་ལས་སྐྱེས་པའི་རྩི་ཐམས་ཅད་བདག་གིས་མཐོང་ཞིང་བརྩལ་ན་རྙེད་པར་འགྱུར་རོ། །ཕྱུགས་ཐམས་ཅད་ལ་དབང་དུ་འགྱུར་རོ་ཞེས་པ་འགྱེན་འཕྲ་དང་རྒལ་གཙོ་ལ་སོགས་པ་མི་བྱེད་པའོ། །གནས་ཆེན་པོར་འབུམ་བཟླས་ནས་ཞེས་པ་ཚོང་པ་ཕྱོགས་བཞི་ནས་འདུ་བའི་ཐུན་མོང་གི་གནས་སོ། །གཙུག་ལག་ཁང་དུ་འབུམ་བཟླས་ན་ཞེས་པ་དེ་ན་གནས་པའི་ལྷ་ཀླུ་ལ་སོགས་དང་རབ་ཏུ་འབྱུང་བ་དག་གིས་ནོར་སྟེར་རོ། །ལྷའི་རྟེན་དུ་འབུམ་བཟླས་ན་ཞེས་པ་ལྷ་ཆེན་པོ་ལ་སོགས་པ་འཇིག་རྟེན་པའི་ལྷའོ། །ཅང་མི་ཟེར་བར་འབུམ་བཟླས་ན་ཞེས་པ་སྒྲ་མི་འབྱུང་བར་ཡིད་ཀྱིས་བཟླས་པའོ། །ལྐུགས་པའི་བརྟུལ་ཞུགས་ཀྱིས་ཞེས་པ་མི་སྨྲ་བའི་དཀའ་ཐུབ་ཀྱང་བླངས་ལ་སྔགས་ཡིད་ཀྱིས་བཟླས་སོ། །འཇོམས་པ་ལ་སོར་མོ་བཙུགས་ཏེ་འབུམ་བཟླས་ན་ཞེས་པ་འཇོམས་པ་ནི་སྒྲིབ་པ་ཐམས་ཅད་འཇོམས་པར་བྱེད་པ་སྟེ། རང་གི་རྣམ་པར་གྲོལ་བའི་མཚན་མ་ཕྱག་རྒྱ་ལ་བྱའོ། །ཕྱག་རྒྱ་པདྨོ་ལ་མཛུབ་མོས་བཙུགས་ཏེ་བཟླས་སོ། །འོག་ནས་འབྱུང་བ་ཞེས་བྱ་བ་ཡང་རྣམ་པར་གྲོལ་བའི་ཕྱག་རྒྱ་པདྨོ་ལ་བྱའོ། །འདོད་པའི་བདག་པོ་དང་བྱེད་པ་པོ་དང་ཞེས་པ་གོང་དུ་ཕྱག་ན་རྡོ་རྗེའི་སྤྱན་སྔར་ཕྱག་རྒྱ་ཆེན་པོ་བཅིངས་ལ་དཀྱིལ་འཁོར་ཆེན་པོར་འདུག་ནས་བཟླས་པའི་འབྲས་བུ་སྟེ་འདོད་པ་ནི་བྱང་ཆུབ་ཀྱི་སེམས་སོ། །དེ་ལ་གཙོ་བོར་སྤྱོད་པས་ན་བདག་པོའོ། །ཡང་ན་འདོད་པ་རྣམ་པ་ལྔ་ལ་དབང་བྱེད་པས་ན་བདག་པོར་གྱུར་ཀྱང་ལ་ལ་ལ་བར་ཆད་དུ་བྱུང་བ་སྲིད་དེ། དེ་བས་ན་མི་མཐུན་པའི་ཕྱོགས་མེད་པས་ན་དབང་པོའོ། །བྱེད་པ་པོ་ནི་འཇིག་རྟེན་པ་ལྟར་གྲགས་པ་ཙམ་དུ་བསྟན་པར་ཟད་དེ་དབང་ཕྱུག་ལ་སོགས་པ་བྱེད་པ་པོར་འདོད་པ་བཞིན་དུ་སྔགས་ཀྱི་མཐུས་འདིར་ཡང་བྱེད་པ་པོ་ལ་སོགས་པར་སྣང་ངོ༌། །བྱེད་པ་པོ་ནི་འདོད་པ་ན་འགྲུབ་པའོ། །བསྐྲུན་པ་པོ་ནི་བདག་རང་གིས་མང་དུ་འབྱིན་པའོ། །དེ་ལྟ་བུའི་མཐུ་ཉིད་མི་ཟད་ཅིང་ཉམས་པར་མི་བྱ་སྟེ་མི་ཟད་པ་ནི་བསྟན་པར་མི་འགྱུར་བའོ། །མི་གོད་པ་ནི་ཅུང་ཟད་ཉམས་པར་ཡང་མི་འགྱུར་བའི་དོན་ཏོ། །བདེ་བ་ཐམས་ཅད་ནི་ལུས་
ཀྱི་བདེ་བའོ། །ཡིད་བདེ་བ་ཐམས་ཅད་ནི་སེམས་ཀྱི་བདེ་བའོ། །དེ་ལ་རང་གི་སྙན་པ་དང་ཞེས་བྱ་བ་ནི་སྔགས་པ་དེ་ལ་སེམས་ཅན་ཀུན་གྱིས་དགའ་བར་ལྟའོ། །དེ་དག་ལ་ཡང་འགྲུབ་པར་བྱེད་འདོད་པ་ཞེས་པ་སེམས་ཅན་དེ་དག་ལ་ནམ་མཁའ་ལ་འགྲོ་བ་ལ་སོགས་པ་གྲུབ་པ་ཐམས་ཅད་ཀྱང་སྒྱུ་མ་ལྟ་བུར་སྔགས་ཀྱི་མཐུས་སྟོན་ཏོ། །དེ་བཞིན་གཤེགས་པ་ཐམས་ཅད་ཀྱི་ཆོ་འཕྲུལ་ནི་སྟོད་ནས་མེ་འབར་སྨད་ནས་ཆུ་འབྱུང་བ་ལ་སོགས་པའོ། །དེ་འདྲ་བའི་ཆོ་འཕྲུལ་གཞན་ཡང་རྣམ་པ་དུ་མར་སྟོན་པ་ནི་རྣམ་པར་འཕྲུལ་པའོ། །དཀྱིལ་འཁོར་ཆེན་པོར་འདུག་སྟེ་དམ་ཚིག་གི་ཕྱག་རྒྱ་བཅིངས་ནས་ཞེས་པ་ཕྱག་ན་རྡོ་རྗེའི་རྟོག་པ་འདི་ཉིད་ཀྱི་དཀྱིལ་འཁོར་ཆེན་པོ་བྲིས་ལ་དེར་ཞུགས་ཏེ་ཕྱག་ན་རྡོ་རྗེའི་དམ་ཚིག་གི་ཕྱག་རྒྱ་རྡོ་རྗེ་རྩེ་ལྔ་པ་གོང་དུ་སྨོས་པ་བཅིངས་ནས་ཁྲོ་བོའི་ཚིག་སྒྲ་ཆེན་པོ་ཕྱུག་སྟེ། སྙིང་ཌཀྐི་ཧཱུཾ་ཛ་བཅོམ་ལྡན་འདས་ཕྱག་ན་རྡོ་རྗེ་ལ་བལྟ་ཞིང་སྣགས་ཀྱི་དོན་ཡིད་ལ་བྱ་ཞིང་འབུམ་བཟླས་སོ། །དེ་ནས་རྡོ་རྗེ་ཁྲོ་བོ་ལྟ་བུར་བདག་གི་ལུས་འགྱུར་རོ་ཞེས་བཟླས་པ་དེས་ན་འདོད་པ་ཁྲོ་བོའི་གཟུགས་ཕྱག་ན་རྡོ་རྗེ་ཉིད་དུ་འགྱུར་རོ། །ཧཱུཾ་ཞེས་པས་ཀྱང་དེ་བཞིན་གཤེགས་པ་ཐམས་ཅད་འཛིན་པ་དང་ཞེས་པ་རྡོ་རྗེ་ཧཱུཾ་ཀ་རའི་ཕྱག་རྒྱ་ཆེན་པོའི་རྣལ་འབྱོར་བྱས་ལ་སྙིང་པོ་ཊཀྐི་ཧཱུཾ་ཛ་བཟླས་ན། དེ་བཞིན་གཤེགས་པ་ཐམས་ཅད་ཀྱི་རང་བཞིན་བསོད་ནམས་དང་ཡེ་ཤེས་ཀྱི་ཚོགས་ཐམས་ཅད་ཀྱང་འཛིན་པར་འགྱུར་ཞིང་ཁམས་གསུམ་གྱི་དབང་པོར་འགྱུར་ཏེ། ཕྱག་ན་རྡོ་རྗེ་ཁྲོ་བོའི་གཟུགས་སྤྱན་གསུམ་པ་ཐོབ་པར་འགྱུར་རོ། །ཕྱག་ན་རྡོ་རྗེའི་རྟོག་པའོ། །དེ་ནས་བཅོམ་ལྡན་འདས་ལ་འཕགས་པ་སྤྱན་རས་གཟིགས་དབང་བོ་ཞེས་བྱ་བ་ལ་སོགས་པ་ནི་རྟོག་པ་འདིར་སྤྱན་རས་གཟིགས་དབང་པོས་འགྲོ་བ་ལ་ཕན་པའི་ཕྱིར་རང་གི་སྙིང་པོ་གསུངས་སོ། །གང་གིས་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་མངོན་དུ་འགྱུར་བ་དང་ཞེས་པ་སྔར་བསྙེན་པ་མང་དུ་བྱས་པའི་མཐུ་དང་ལྡན་པས་ནི་བརྗོད་པ་ཙམ་གྱིས་ཀྱང་དེ་བཞིན་གཤེགས་པའི་ཏིང་ངེ་འཛིན་ནམ་མཁའ་མཛོད་དང༌། དཔའ་བར་འགྲོ་བ་ལ་སོགས་པ་སྔོན་དུ་ཁུགས་པར་འགྱུར་རོ། །འཇིགས་པ་ནི་ལྔ་སྟེ་རྒྱལ་པོ་དང་རྐུན་པོ་དང་མེ་དང་ཆུ་དང་གཅན་གཟན་ནོ། །གནམ་དལ་ནི་ལྷ་དང་ཡི་དགས་ལ་སོགས་པས་ནད་མཆེད་པར་བྱས་པའོ། །
འཆིང་བ་ནི་འཇིགས་པ་རྣམ་པ་ལྔ་ལ་གཏོགས་པ་གཞན་གྱིས་གནོད་པར་བྱེད་པའོ། །ནད་ཆེན་པོ་ནི་ཁམས་མ་མཉམ་པ་ལས་གྱུར་པའོ། །སྙིང་པོའི་དོན་ནི་འདི་ལྟ་སྟེ། ཨ་ནི་ཨ་ནུད་པ་ན་སྟེ་མ་སྐྱེས་པའི་དོན་ཏོ། །རོ་ནི་རོ་ག་བ་ག་སྟེ་ནད་ལས་ཐར་བའོ། །ལི་ནི་གོས་པ་མེད་པའོ། །ཀ་ནི་ལས་ཀྱི་འབྲས་བུ་མེད་པའོ། །མདོར་ན་ཆོས་ཐམས་ཅད་མ་སྐྱེས་པའི་ཕྱིར་ནད་དང་གོས་པ་དང་ལས་ཀྱི་འབྲས་བུ་མི་དམིགས་པའོ། །དཀྱིལ་འཁོར་དུ་གྱུར་ཏེ་བཞུགས་སོ་ཞེས་པ་སངས་རྒྱས་ཀྱིས་སྤྱན་རས་གཟིགས་བསྐོར་ཏེ་བཞུགས་པའི་དོན་ཏོ། །དེ་ནས་སྤྱན་རས་གཟིགས་དབང་པོས་རང་གི་དཀྱིལ་འཁོར་བཤད་པ། དེ་ནས་གཞན་ཡང་རབ་བཤད་པ། །ཞེས་བྱ་བ་ལ་སོགས་པའོ། །འདིར་ཡང་དཀྱིལ་འཁོར་འདི་བཤད་པར་བྱ་བའི་ནང་ན་ཆེན་པོ་ཉིད་སྔར་སྨོས་སོ། །དེ་ཡང་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་དང་པོ་ཉིད་དུ་སྨོས་པའི་ཚུལ་གྱིས་ཕྱི་རིམ་གྱི་དཀྱིལ་འཁོར་ཆུ་རིམ་བདུན་དང་རི་རིམ་བདུན་དང་།དེ་དག་ཏུ་ལྷ་ལ་སོགས་པ་གནས་པ་ཡང་དེ་བཞིན་དུ་བྱའོ། །རིམ་གཉིས་པའི་སྒོ་གྲྭར་ཏེ་ཞེས་པ་ཡི་གེ་ནོར་པ་ཞིག་ཏུ་ཡང་དོགས་སོ། །ཡི་གེ་མ་ཆད་པ་ཞིག་དང་ཞུས་ཏེ་བཤད་ན་ལེགས། འདི་ཉིད་ལའང་མི་བཟང་བཞིན་དུ་བཤད་ན་རིམ་གཉིས་པ་ནི་ཕྱི་རིམ་ལ་བྱའོ། །དེའི་སྒོ་ནི་ནང་གི་དཀྱིལ་འཁོར་གྲུ་བཞི་པའི་གྲྭ་ཐད་ཀར་འདོད་པ་སྐད་དུ་བཤད་དེ། དེ་ལྟར་ན་དཀྱིལ་འཁོར་མཛེས་པ་ཙམ་མ་ལགས་དཀྱིལ་འཁོར་བརྒྱད་ཀྱི་ཚུལ་དུ་སྟེ་ཞེས་པ་དང་ནང་རིམ་གྱི་དཀྱིལ་འཁོར་གྲུ་བཞི་པོ་མཚོན་སྣ་ལྔས་བྲིས་ལ། དེའི་དབུས་སུ་ཚོན་དམར་པོས་པདྨ་འདབ་མ་བརྒྱད་པ་བྲིས་ཏེ། འདབ་མ་རེ་རེ་ཞིང་སངས་རྒྱས་བཞུགས་པའི་དཀྱིལ་འཁོར་རེ་རེར་བརྩིའོ། །དབུས་སུ་ཐིག་ནི་བཞི་ཡང་བྲི། །ཞེས་པ་དཀྱིལ་འཁོར་དབུས་སུ་ཐིག་སྐུད་བཞི་རི་མོ་ཕྱོགས་བཞི་དང༌། གྲྭ་བཞི་ནས་ཐིག་བཞི་བཏབ་པས་ཁ་བརྒྱད་དུ་འགྱུར་དེ་ཕྱོགས་བཞི་ནས་ཐིག་གཉིས་གྲྭ་བཞི་ནས་ཐིག་གཉིས་ཀྱིས་བྲིའོ། །འདབ་མ་ཀུན་གྱི་སྟེང་རྣམས་སུ། །སངས་རྒྱས་ཆ་ལུགས་བྲི་བར་བྱ། །ཞེས་པ་སངས་རྒྱས་བརྒྱད་ཀྱི་མཚན་མ་ངེས་པར་གསུངས་པས་ན་གང་བཞུགས་ཀྱང་སླ་བར་བཤད་མོད་ཀྱི། རྣལ་འབྱོར་སྤྱོད་པའི་རྒྱུད་ཀུན་ལ་ཡང་
སངས་རྒྱས་ལྟ་ཐམས་ཅད་དུ་གཏོགས་པས་དེ་ལྔས་བསྐོར་བའི་སྟེང་དུ་ཤཱཀྱ་ཐུབ་པ་ལ་སོགས་པ་གང་འདོད་པ་བྲིས་ཤིག །པདྨ་ཆེ་མཆོག་ཕྱག་རྒྱ་སྟེ། །ཞེས་པ་སྤྱན་རས་གཟིགས་ཀྱི་ལས་ཀྱི་ཕྱག་རྒྱ་པདྨོ་ལག་པ་གཡོན་པར་ཐོགས་པ་གཡས་པས་པདྨོ་ཁ་དབྱེ་བའི་ཚུལ་དུ་བྱས་ཏེ་བཞུགས་པ་དཀྱིལ་འཁོར་གྱི་སྒོར་འདུག་ནས་པདྨོ་ཆུས་མི་གོས་པ་བཞིན་དུ་སྤྱན་རས་གཟིགས་ཀྱང་ཉེས་པས་མི་གོས་སོ། །དེ་བཞིན་དུ་སྐྱེ་འགྲོ་བྱང་ཆུབ་ཀྱི་སེམས་ལ་འདོད་ཆགས་པར་གྱུར་པས་ཀྱང་སྒྲིབ་པ་ཐམས་ཅད་འབྱང་ངོ་ཞེས་པའི་དོན་ཏོ། །ཏིང་ངེ་འཛིན་དུ་བསྒོམས་ཏེ་པདྨོའི་ཀྱོ་བ་ཏང་གི་ཕྱག་རྒྱས་མེ་ཏོག་གམ་པདྨ་ཆེན་པོ་དྲངས་ཏེ་བླངས་ལ་སྤྱན་རས་གཟིགས་དབང་པོ་ལ་སྔར་བཞིན་འབྱུང་བ་བཟླས་ཏེ་དེར་རོ། །དེ་ལ་པདྨོའི་ཀྱོ་བ་ཏང་གི་ཕྱག་རྒྱ་ནི། པདྨོ་ཁ་ཟུམ་པའི་ཐལ་མོ་བྱས་པ་ལས་མཐེའུ་ཆུང་གཉིས་འདབ་མ་གྱེས་པ་ལྟར་དགྱེད་དོ། །མཛུབ་མོ་གཉིས་ཀྱོ་བ་ཏང་ལྟར་བཀུག་སྟེ་གུང་མོའི་ཚིགས་སུ་སྦྱར་རོ། །ཀྱོ་བ་ཏང་གིས་ཀུན་དྲངས་ལ། །ཞེས་པ་ཕྱག་རྒྱ་གོང་མས་དཀྱིལ་འཁོར་དུ་དབུལ་བའི་མེ་ཏོག་བླངས་ལ་ཞེས་པའི་དོན་ཏོ། །མེ་ཏོག་ཅི་འདྲ་བ་ཞེ་ན་པདྨོ་ཆེན་པོ་ཞེས་སོ། །སྤྱན་རས་གཟིགས་དབང་པོའི་དཀྱིལ་འཁོར་དུ་པདྨོས་མཆོད་པའི་རིགས་ཏེ་དེ་བས་ན་པདྨོ་ཞེས་སྨོས་སོ། །པདྨོ་མེད་ན་ཤོག་ཤོག་ལ་སོགས་པ་པདྨོ་ལྟ་བུར་བྱ་བའམ་མེ་ཏོག་གཞན་ལ་པདྨོ་ལྟ་བུར་ཡིད་ཀྱིས་བརྟགས་ཏེ་བྱའོ། །དེ་ལ་ཨོཾ་ནི་སྔ་མ་བཞིན་ནོ། །མ་ཧཱ་པདྨ་ནི་སྤྱན་རས་གཟིགས་ཉིད་ཀྱི་རང་བཞིན་ནོ། །ཧཱུཾ་ནི་ལུས་སུ་བསྒོ་བའོ། །ཛ་ནི་འདྲེན་པའོ། །ཧྲཱི་ནི་གཟུགས་སྣ་ཚོགས་སུ་སྟོན་པའོ། །དེ་ནས་ཕྱག་རྒྱ་དེས་སློབ་མ་གཞུག་གོ་ཞེས་པ་ཕྱག་རྒྱ་པདྨོའི་ཀྱོ་བ་ཏང་གོང་མའོ། །དོན་ཀྱང་བསྟན་པར་བྱའོ་ཞེས་པ་འོག་ནས་འབྱུང་བའི་ཚིགས་བཅད་སངས་རྒྱས་ཐམས་ཅད་ཅེས་པ་ལ་སོགས་པ་དེའི་དོན་བསྟན་པའོ། །དེ་ནས་སྤྱན་རས་གཟིགས་དབང་པོའི་བརྟུལ་ཞུགས་སྦྱིན་པ་ནི་འདིའོ། །དེ་ནས་ལག་པ་གཡོན་པར་ཞེས་བྱ་བ་ལ་སོགས་པའོ། །སངས་རྒྱས་ཐམས་ཅད་པདྨོ་ཆེ། །ཞེས་པ་སངས་རྒྱས་ལྔ་རྣམས་ཀྱི་ཆོས་ཀྱི་སྐུའི་རང་བཞིན་ནི་པདྨོ་ཆེན་པོ་སྟེ་སྤྱན་རས་གཟིགས་དབང་པོ་ཉིད་དོ། །དཀྱིལ་འཁོར་ཆེན་པོ་ནི་བསོད་ནམས་དང་ཡེ་ཤེས་ཀྱི་ཚོགས་འཕེལ་བའི་རྩ་བ་དམ་པ་སྟེ། སྔགས་པས་ནུས་ན་རྟག་ཏུ་རས་རིས་
ལ་ཆོ་ག་བཞིན་བྱོས་ཤིག །མི་ནུས་ན་ཡང་ཡིད་ཀྱིས་དམིགས་ཤིག་ཁྱོད་ནི་དེད་ནས་སྤྱན་རས་གཟིགས་ཞེས་པ་དཀྱིལ་འཁོར་ཆེན་པོ་ཁྱོད་ཀྱིས་མཐོང་བས་ན་སྤྱན་རས་གཟིགས་དང་པོ་ཉིད་དུ་འགྱུར་བའི་རྩ་བ་བསགས་ཏེ། དེ་བས་ན་དུས་གཞན་ལ་དགོངས་ནས་སྤྱན་རས་གཟིགས་ཉིད་ཡིན་ནོ་ཞེས་གསུངས་སོ། །དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོ་ཞེས་པ་དེ་བཞིན་གཤེགས་པས་བསྐོར་བའི་དཀྱིལ་འཁོར་ཡིན་པའི་ཕྱིར་རོ། །དེ་ནས་པདྨོའི་དཀྱིལ་འཁོར་འབྱུང་སྟེ་ཞེས་པ་གོང་མ་དག་ནི་རྡོ་རྗེའི་རིགས་པས་ན་རྡོ་རྗེའི་དཀྱིལ་འཁོར་ཞེས་བཤད། འདི་ནི་པདྨོའི་རིགས་པས་ན་པདྨོའི་དཀྱིལ་འཁོར་ཞེས་བཤད་དོ། །འདིར་ཡང་གཞན་གྱི་དཀྱིལ་འཁོར་ཆེན་པོ་བཞིན་དུ་བྲིས་ལ། དབུས་ཀྱི་སྙིང་པོ་ལ་སྤྱན་རས་གཟིགས་བཞུགས་པའི་སར་སྔགས་པ་ཉིད་འདུག་ནས་དེ་བཞིན་གཤེགས་པའི་ཏིང་ངེ་འཛིན་པདྨོ་ཆུས་མི་ཆགས་པ་ལྟར་ཞེས་པ་གོང་དུ་སྨོས་པའི་དོན་ལ་དམིགས་ཤིང་གཡོན་པས་པདྨོ་གཟུང༌། གཡས་པས་འདབ་མ་ཁ་འབྱེད་པ་ལ་བལྟ་ཞིང་འབུམ་བཟླས་སོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་ཆེན་པོ་བཞིན་དུ་ཐམས་ཅད་བྲིས་ལ་དབུས་སུ་སྤྱན་རས་གཟིགས་དང་མཐའ་མར་སངས་རྒྱས་བཞུགས་པ་རྣམས་ལ་པདྨོ་རེ་རེ་ལ་ཨཱ་རོ་ལྀ་ཀ་རེ་རེས་བསྔགས་ཏེ་པདྨོ་སྟོང་དབུལ་ལོ། །དེའི་དབུས་སུ་པདྨོ་སྟོང་བཞག་སྟེ་ཞེས་པ་དཀྱིལ་འཁོར་ཕྱི་ནང་དུ་གཞག་པར་ཟད་དེ་དབུས་ཞེས་བྱ་བའང་ནང་ཞེས་པའི་དོན་ཏོ། །དབུས་ཀྱི་ཉིད་དུ་སྤྱན་རས་གཟིགས་དངོས་བཞུགས་པར་བྱའོ། །སློབ་མིན་བུ་མིན་མ་ཡིན་ཏེ། །ཞེས་པ་དམ་ཚིག་གསང་བ་རྣམས་སློབ་མ་མ་ཡིན་པ་དང་བུ་མ་ཡིན་པ་ལ་མི་སྟོན་ཞེས་པའི་དོན་ཏོ། །དེ་ལ་སློབ་མ་ནི་གཞན་གྱིས་དཀྱིལ་འཁོར་དུ་ཞུགས་ཀྱང་ཉན་པ་དང་མན་ངག་ལ་སོགས་པ་བདག་ལས་ནོད་པའོ། །བུ་ཞེས་བྱ་བ་ནི་བདག་རང་གི་དཀྱིལ་འཁོར་དུ་གཞུག་པའོ། །སློབ་མ་དང་བུར་གྱུར་པ་ཙམ་གྱིས་ཆོག་སྟེ་ཅི་འདྲ་འང་རུང་ངམ་ཞེ་ན་མ་ཡིན་ཏེ་དམ་ཚིག་ཅན་ཞེས་སོ། །དེ་དག་ཀྱང་དམ་ཚིག་དང་ལྡན་པ་ལ་བསྟན་ཞེས་པའི་དོན་ཏོ། །གསང་བ་དེ་ལ་གང་ཞེ་ན། འདོད་པའི་འདོད་ཆགས་ཐམས་ཅད་ནི། །ཞེས་
བྱ་བ་དག་གོ །བྱང་ཆུབ་ཀྱི་སེམས་བདེ་བ་ཐམས་ཅད་བསྐྱེད་པའི་འདོད་པ་ལ་ཆགས་ཤིང་ཞེས་པ་ནི་སྐྱོན་དུ་མི་འགྱུར་ཏེ་པདྨོ་ཆུས་མི་གོས་པ་བཞིན་ནོ། །དེ་ནས་ལས་ཀྱི་དཀྱིལ་འཁོར་དེ་བཞིན་དུ་བྲིས་ལ་ཞེས་པ་དཀྱིལ་འཁོར་ཆེན་པོ་བཞིན་དུ་བྲིས་ལ་མཆོད་པ་བཞིས་མཆོད་དོ། །བཞི་གང་ཞེ་ན་སངས་རྒྱས་ཐམས་ཅད་ལ་ནི་མཆོད་པ་རྣམ་པ་ལྔ་ལ་སོགས་པ་ཡིད་ཀྱིས་བསམས་པ་བཞིན་དུ་མཆོད་དོ། །ཕྱག་ན་རྡོ་རྗེ་ལ་ནི་གླུ་དང་ལྡན་པའི་ཚིག་གིས་མཆོད་དོ། །སྤྱན་རས་གཟིགས་ལ་ནི་ལུས་ཀྱིས་ཕྱག་བྱ་བ་དང་གར་ལ་སོགས་པས་མཆོད་དོ། །ནམ་མཁའི་སྙིང་པོ་ལ་ནི་དབང་སྦྱིན་པ་དང་ཕ་རོལ་ཏུ་ཕྱིན་པ་ལ་སོགས་པས་མཆོད་དོ། །དེ་ནས་བཅོམ་ལྡན་འདས་སྤྱན་རས་གཟིགས་དབང་པོས་སྒྲུབ་པའི་ཆོ་ག་བཤད་པ་འདི་གསུངས་སོ་ཞེས་པ་རང་གི་སྒྲུབ་པའི་ཆོ་ག་གསུངས་སོ། །རང་གི་ཏིང་ངེ་འཛིན་དུ་ཞུགས་ཤིང་ཞེས་པ་སྤྱན་རས་གཟིགས་རང་གི་ཏིང་ངེ་འཛིན་གྱི་ཚུལ་ཕྱག་གཡོན་པ་པདྨོ་བསྣམས་ཤིང་གཡས་པས་ཁ་འབྱེད་པ་ཁ་དོག་དམར་པོ་མཐར་དེ་བཞིན་གཤེགས་པ་བརྒྱད་ཀྱིས་བསྐོར་བའོ། །རྟག་ཏུ་དག་པའི་ཏིང་ངེ་འཛིན་གྱི་ཞེས་པ་སློབ་པའི་དུས་ཐམས་ཅད་དུ་པདྨོ་ཆུས་མི་ཆགས་པ་ལྟར་སྐྱེ་བོ་ཐམས་ཅད་ཉེས་པས་མི་གོས་པའི་ཏིང་ངེ་འཛིན་བྱས་ལ་ཨཱ་རོ་ལྀ་ཀ་བཟླས་སོ། །སྒྲུབ་པ་པོ་པདྨོའི་དབུས་སུ་བཞུགས་ཏེ་ཞེས་པ་སྒྲུབ་པ་པོའི་ལག་ན་ཡང་ལྷའི་ཚུལ་དུ་པདྨོ་འཛིན་པ་དེའི་དབུས་སུ་སྤྲུལ་པ་བཞུགས་སོ། །སྒྲུབ་པ་པོའི་དབང་བསྐུར་བའི་གནས་ཞེས་པ་དཔྲལ་བར་བཞུགས་ཏེ། གསལ་བར་སྣང་གི་བར་དུ་བཟླས་སོ། །སེམས་ཅན་ཐམས་ཅད་ཀྱང་མཐོང་ནས་ཞེས་པ་དཀྱིལ་འཁོར་གྱི་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་ཀྱང་རང་གི་སྤྱོད་ཡུལ་དུ་འགྱུར་རོ། །འབུམ་བཟླས་ན་སྒྲིབ་པ་ཐམས་ཅད་རྣམ་པར་དག་པར་འགྱུར་རོ་ཞེས་སྒྲུབ་པའི་བར་ཆད་དུ་འགྱུར་བའི་སྒྲིབ་པ་ཕྲན་ཚེགས་འབྱུང་ངོ༌། །ཉིས་འབུམ་བཟླས་ན་སྡིག་པ་ཆེ་ཆུང་ཐམས་ཅད་བྱང་བར་འགྱུར་རོ། །སུ་མ་འབུམ་བཟླས་ན་བྱང་ཆུབ་སེམས་དཔའི་བསོད་ནམས་
ཀྱི་ཚོགས་ཀུན་འཐོབ་པོ། །དེ་ནས་སྒྲུབ་པའི་ཆོ་ག་མ་བྱས་ཀྱང་སྔར་བསྙེན་པའི་ཆོ་ག་མང་དུ་བྱས་ན་ལས་ཕྲན་ཚེགས་རྣམས་འགྲུབ་པར་འགྱུར་རོ་ཞེས་བསྟན་པ། དེ་ནས་མ་བསྒྲུབས་ཀྱང་ཞེས་བྱ་བ་ལ་སོགས་པའོ། །དབབ་པ་ནི་ཙན་དན་གྱི་བདུག་པས་སོ་ཞེས་པ་ལྷ་ལ་སོགས་པ་དབབ་ན། དབབ་པའི་ཕྱག་རྒྱ་བཅིངས་ལ་སྙིང་པོ་གོང་དུ་སྨོས་པའི་མཇུག་ལ་དབབ་པའི་སྙིང་པོ་ཨཱཿསྨོས་ཤིང་ཙནྡན་གྱིས་བདུག་གོ །གདོན་ཐམས་ཅད་ཞི་བར་བྱ་བ་ནི་ཧྲཱིཿ་ཞེས་བྱ་བས་སོ་ཞེས་པ་ཨཱ་རོ་ལྀ་ཀ་གི་མཇུག་ལ་ཧྲཱིཿབྶྣན་ཏེ་བཟླས་སོ། །སེམས་ཅན་ཐམས་ཅད་དབང་དུ་བྱ་བ་ནི་རྡོ་རྗེ་མེ་ཏོག་བཟླས་ཏེ་སྦྱིན་ནོ་ཞེས་པ་སྙིང་པོ་ཉིད་རྡོ་རྗེ་སྟེ་དེས་བཟླས་པའི་མེ་ཏོག་ལག་ཏུ་སྦྱིན་ནོ། །སེམས་ཅན་ཐམས་ཅད་མནན་པ་ནི་ཞེས་པ་གང་དག་གནོད་པར་བྱེད་འདོད་པ་འཁུམས་ཤིང་རྩོལ་མི་ཕོད་པར་བྱ་བ་ནི་འཇིམ་པ་དཀར་པོ་ལ་བསྔགས་ཏེ་དོར་རོ། །བུད་མེད་ཀྱང་དབང་དུ་བྱ་བ་ནི་ཞེས་བྱ་བ་སུ་མ་ན་ཞེས་བྱ་བའི་མེ་ཏོག་ཀུ་རུ་ལ་སྙིང་པོ་གང་མས་བཏབ་སྟེ་སྦྱིན་ནོ། །རྐུན་པོ་མནན་པ་ནི་ཞེས་བྱ་བ་ནི་རྐུན་པོ་འགུམས་པར་བྱའོ། །རི་དགས་དང་བྱ་མནན་པ་ནི་ཞེས་པ་ཞིང་དང་བཟའ་ཤིང་ལ་སོགས་པ་ཟ་བ་རྣམས་འཁུམས་ཤིང་མི་ཟ་བར་བྱའོ། །སྒྱུ་མ་བསྟན་པ་ནི་ཞེས་བྱ་བ་རྨ་བྱའི་མདོངས་ཆད་པ་གང་བཅིངས་པས་སྔགས་ཟློས་ཤིང་ནམ་མཁའ་ལ་བསྐོར་ན་དམག་རྣམ་བཞི་ལ་སོགས་པ་ནམ་མཁའ་ལ་སྟོན་ནུས་སོ། །ཡུགས་ས་མོ་དབང་དུ་བྱ་བ་ནི་ཞེས་པ་འཇིག་རྟེན་དང་འཇིག་རྟེན་ལས་འདས་པའི་འདོད་པ་སྟེ་འཇིག་རྟེན་གྱི་ནི་འདོད་པའི་ཡོན་ཏན་ལྔ་རྣམས་ཏེ། དེ་ལ་དབང་དུ་གྱུར་པ་ནི་ཡིད་བཞིན་དུ་འབྱོར་པའོ། །འཇིག་རྟེན་ལས་འདས་པ་ནི་བྱང་ཆུབ་ཀྱི་སེམས་བདེ་བ་ཐམས་ཅད་ཀྱི་རྒྱུར་གྱུར་པ་སྟེ་དེ་དབང་དུ་གྱུར་པ་ནི་མངོན་དུ་འགྱུར་བའོ། །ཉིན་རེ་བཞིན་དུས་གསུམ་དུ་བཟླས་ན་ཞེས་པ་སྔར་བསྙེན་པ་ཆོག་བཞིན་དུ་རྫོགས་པར་བྱས་ནས་ལྷ་ཉེ་བར་གྱུར་པ་དང་སྒྲུབ་པའི་ཆོ་ག་འདི་བཞིན་དུ་སྦྱར་རོ། །ཉིན་མཚན་དུས་གསུམ་དུ་བཟླས་ཞེས་བྱ་བ་ཉིན་ཡང་དུས་གསུམ་མཚན་ཡང་དུས་གསུམ་དུ་བཟླས་སོ། །སྤྱན་རས་གཟིགས་དབང་པོའི་རྟོག་པ་རྫོགས་སོ།། །།དེ་ནས་
བཅོམ་ལྡན་འདས་ལ་འཕགས་པ་ནམ་མཁའི་སྙིང་པོ་བྱང་ཆུབ་སེམས་དཔའ་ཞེས་པ་དེས་ཀྱང་རང་གི་སྙིང་པོ་གསུངས་སོ། །དེའི་སྔགས་ཀྱི་དོན་ནི་ཏྲཾ་ནི་རིན་པོ་ཆེའི་རིགས་ཀྱི་སྙིང་པོ་སྟེ། ཏ་ནི་སྦྱིན་པའི་ཕ་རོལ་ཏུ་ཕྱིན་པར་སྟོན་ཏོ། །ར་ནི་རྡུལ་དང་བྲལ་བར་སྟོན་ཏོ། །ཐིག་ལེ་ཨ་ནུ་ད་ས་ར་སྟེ་སྟོང་པ་ཉིད་དུ་སྟོན་ཏོ། །བ་བ་ནི་བཅིངས་པ་མེད་པར་སྟོན་ཏོ། །ཊ་ཊ་ནི་ཁེངས་པ་མེད་པར་སྟོན་ཏོ། །ཧ་ཧ་ནི་ནན་གྱིས་མནན་པ་མེད་པར་སྟོན་ཏོ། །དེ་ནས་བརྗོད་པ་ནི་ཞེས་པ་ནམ་མཁའི་སྙིང་པོ་འདི་རིན་པོ་ཆེའི་རིགས་ཡིན་ལ། སྦྱིན་པའི་ཕ་རོལ་ཏུ་ཕྱིན་པ་དམ་ཚིག་ཏུ་ལེན་པས་དེའི་སྙིང་པོ་བརྗོད་པ་ཙམ་གྱིས་དོན་ཐམས་ཅད་ཆར་དུ་འབབ་པོ། །རྣམ་པར་སྣང་མཛད་ཀྱི་སྐུ་ལ་ཡང་དབུ་རྒྱན་དང་དཔུང་རྒྱན་ལ་སོགས་པ་སོ་སོར་ཅི་རིགས་པར་བརྒྱན་ཏེ་བཞུགས་སོ། །རྡོ་རྗེ་དཀྱིལ་འཁོར་ཚུལ་བཞིན་དེ། །ཞེས་པ་ཕྱག་ན་རྡོ་རྗེའི་དཀྱིལ་འཁོར་དང་པོར་སྨོས་པ་དེའི་རྡོ་རྗེའི་དཀྱིལ་འཁོར་གྱི་ཚུལ་བཞིན་དུ་བྲིས་ཏེ་ཕྱི་རིམ་དུ་གསེར་གྱི་རི་དང༌། མཚོ་དང༌། ཁོར་ཡུག་དང་དེ་དག་ཏུ་གནས་པའི་ལྷ་འདྲེ་ལ་སོགས་པ་ཡང་གོང་མ་བཞིན་དུ་བྲིའོ། །རྡོ་རྗེ་རིན་ཆེན་མཉམ་ལྡན་ཞིང༌། །ཞེས་པ་ནི་ནང་གི་དཀྱིལ་འཁོར་གྱི་མཐར་རི་མོ་ནི་རིན་པོ་ཆེ་རྡོ་རྗེ་ཅན་གྱིས་བསྒྲེང་ངོ༌། །ཆ་བརྒྱད་ཤིན་ཏུ་མཉམ་པར་བྱ། །ཞེས་ནང་གི་དཀྱིལ་འཁོར་གྲུ་བཞིའི་མཐའ་དཀྱིལ་འཁོར་གྱི་རེའུ་བརྒྱད་ཀྱིས་བསྐོར་བའི་དབུས་ན་ནམ་མཁའི་སྙིང་པོ་བཞུགས་ཤིང་འཁོར་བྱང་ཆུབ་སེམས་དཔའ་གཞན་གྱིས་བསྐོར་བ་འོག་ནས་འབྱུང་བ་བཞིན་དགོད་དོ། །རིན་ཆེན་ཐམས་ཅད་སྙོམས་ལྡན་པ། །ཞེས་པ་ཀ་བ་ལ་སོགས་པའི་མདོ་མདོར་རིན་པོ་ཆེ་སྣ་ལྔ་པ་ཐམས་ཅད་ཀྱིས་བརྒྱན་པའོ། །དེ་ནས་སློབ་དཔོན་དེར་བཞུགས་ཏེ་རྡོ་རྗེ་རིན་པོ་ཆེའི་ཕྱག་རྒྱ་འོག་ནས་འབྱུང་བ་དབང་བསྐུར་བའི་གནས་དཔྲལ་བར་གཞག་སྟེ། དེ་ནས་བསྐུལ་བའི་ཕྱིར་ཚིགས་བཅད་འདི་ལྷོགས་ཤིག །རེ་བ་ཐམས་ཅད་གྲུབ་པ་ཡི། །ཞེས་བྱ་བ་སྟེ་ཡིད་ལ་བསམ་པ་གྲུབ་པ་ཐམས་ཅད་ཀྱི་ནང་ན་ནམ་མཁའ་གྲུབ་པའི་མཆོག་ཡིན་ཏེ། དེ་ནི་ནམ་མཁའ་ལ་འགྲོ་བ་དང༌། ནམ་མཁའ་ལ་ནོར་ཐམས་ཅད་འགྲུབ་པ་ལ་སོགས་པའོ། །སེམས་དཔའ་ཆེན་པོས་དེ་ཐམས་ཅད་གྲུབ་
པར་གྱུར་ཅིག་པའི་དོན་ཏོ། །སྐྱེས་བུ་ཆེན་པོ་བརྒྱད་གཞག་པར་བྱའོ་ཞེས་པ་དང་པོའི་དཀྱིལ་འཁོར་དུ་བྱང་ཆུབ་སེམས་དཔའ་བརྒྱད་རྣམ་པར་སྣང་མཛད་དང་དགུ་བཞུགས་པ་ལས་རྣམ་པར་སྣང་མཛད་དང་ནམ་མཁའི་སྙིང་པོ་གོ་བརྗེས་ཏེ་བཞུགས་པར་བྱའོ། །སེམས་ཅན་ཀུན་ལ་ཕན་པའི་ཕྱིར། །ཞེས་བྱ་བ་ལ་སོགས་པ་ནི་དམ་ཚིག་གི་དོན་བསྟན་པ་སྟེ། འགྲོ་བ་ཀུན་ལ་ཕན་གདགས་པའི་ཕྱིར་རོ། །སྦྱིན་བ་ལ་སོགས་པས་འགྲོ་བ་ཀུན་ལ་ཕན་གདགས་པའི་ཕྱིར་ད་ལྟར་ཡང་རེ་བ་ཡོངས་སུ་བསྐུང་བ་ལ་སོགས་པ་བྱང་ཆུབ་སེམས་དཔའ་འདི་ཐམས་ཅད་ནི་རེ་བ་ཡོངས་སུ་བསྐང་བ་དེའི་དོན་དུ་གསུངས་སོ། །དེ་ནས་སྙིང་པོ་བྱིན་ལ་ཞེས་པ་སློབ་མ་ལ་སྙིང་པོ་བྱིན་ནས་རིན་པོ་ཆེ་སྣ་ལྔ་བཅུག་པའི་བུམ་པ་ལ་སྔགས་འདི་བཟླས་ཏེ་དབང་བསྐུར་རོ། །དེའི་དོན་ནི་རྡོ་རྗེ་རིན་པོ་ཆེས་ཆོས་ཐམས་ཅད་ཀྱི་བདག་པོར་འགྱུར་བའི་ཕྱིར་དབང་བསྐུར་རོ། །དེ་ནས་རྡོ་རྗེ་རིན་པོ་ཆེའི་དཀྱིལ་འཁོར་འབྱུང་སྟེ་ཞེས་བྱ་བ་ནམ་མཁའ་མཛོད་རིན་པོ་ཆེའི་རིགས་སུ་གཏོགས་པས་ན་རིན་པོ་ཆེའི་དཀྱིལ་འཁོར་ཞེས་བྱ་སྟེ། པདྨོའི་རིགས་ལ་པདྨོའི་དཀྱིལ་འཁོར་ཞེས་བྱ་བ་བཞིན་ནོ། །དེ་ནས་དཀྱིལ་འཁོར་གོང་མ་བཞིན་དུ་བྲིས་ལ་དེའི་དབུས་སུ་རྡོ་རྗེ་དང་ལྡན་པའི་རིན་པོ་ཆེའི་རི་མོ་བྲིའོ། །སྔགས་པའི་ལག་ཏུ་ཡང་ནོར་བུ་རིན་པོ་ཆེ་གང་ཡང་རུང་བ་ཐོགས་ནས་དཀྱིལ་འཁོར་དུ་བྲིས་པའི་རིན་པོ་ཆེ་ལངས་ཀྱི་བར་དུ་བཟླས་སོ། །དེ་ནས་དེ་བཞིན་གཤེགས་པ་བྱོན་ཏེ་སྔགས་པ་ལ་དབང་བསྐུར་ན་ཆོས་ཐམས་ཅད་ལ་དབང་བྱེད་པར་འགྱུར་རོ། །དེ་ནས་དམ་ཚིག་གི་དཀྱིལ་འཁོར་ཏེ་ཞེས་པ་དཀྱིལ་འཁོར་གོང་མ་བཞིན་དུ་བྲིས་ལ་ནམ་མཁའི་སྙིང་པོའི་སྐུ་དཀྱིལ་འཁོར་གྱི་དབུས་སུ་བཞུགས་པའི་སྤྱན་སྔར་ནོར་ཀེ་དྷ་ར་དང༌། པ་ན་ལ་སོགས་པ་བཞག་ནས་དེ་ནས་སློབ་མ་བཅུག་སྟེ་ཀུན་བསྟན་ལ་དམ་ཚིག་བསྒོ་བ། སངས་རྒྱས་ལ་སོགས་སེམས་དཔའ་དག་གཅེས་བྱ་བ་དག་གོ །སངས་རྒྱས་དང་བྱང་ཆུབ་སེམས་དཔའ་དག་ལ་ཉིན་རེ་ཞིང་མཆོད་པ་མི་ཆད་པར་བྱའོ། །གལ་ཏེ་ཆད་ན་ནོར་ཐམས་ཅད་ཡལ་བར་འགྱུར་རོ། །དེ་ན་སམ་ནའི་ཆུས་དབང་བསྐུར་རོ། །མནའི་སྙིང་པོས་བསྔགས་པའི་ཆུ་སྤྱི་བོར་བླུག་གོ །ལས་ཀྱི་དཀྱིལ་འཁོར་བྲིས་ལ་ཞེས་པ་གཞན་ནི་གོང་མ་བཞིན་
དུ་བྲིའོ། །དེའི་དབུས་སུ་རྣམ་པར་སྣང་མཛད་རྒྱན་ཐམས་ཅད་ཀྱིས་བརྒྱན་ཏེ་བཞུགས་ལ་དེར་སློབ་མ་གཞུག་གོ །དེ་ནས་ལས་རྣམ་པ་ལྔ་བསླབ་པ་ནི་དབང་བསྐུར་བ་ལ་སོགས་པའོ། །དབང་བསྐུར་བ་ནི་ཕྲེང་བ་དང་བུམ་པ་ལ་སོགས་པའོ། །ནོར་ནི་གསེར་དངུལ་ལ་སོགས་པའོ། །ཟང་ཟིང་ནི་ནས་དང་འབྲས་བུ་ལ་སོགས་པ་བྱོལ་སོང་འདོད་པ་རྣམས་སོ། །མི་སྣང་བའི་སེམས་ཅན་རྣམས་ཞེས་བྱ་བ་ལྷ་ལ་སོགས་པའོ། །རྡོ་རྗེ་རིན་ཆེན་དབང་བསྐུར་བས་དབང་བསྐུར་བ་བྲིས་ཏེ་ཞེས་པ་རྣམ་པར་སྣང་མཛད་རིན་པོ་ཆེའི་ཕྲེང་བས་དབུ་བརྒྱན་ཞེས་བྱ་བའི་ཐ་ཚིག་གོ །བཅོམ་ལྡན་འདས་ལ་དབང་བསྐུར་བའི་ཕྲེང་བས་ཞེས་པ་ནམ་མཁའི་སྙིང་པོ་ཉིད་རིན་པོ་ཆེའི་ཕྲེང་བ་ཕྱག་གཉིས་ན་ཐོགས་ལ་རྣམ་པར་སྣང་མཛད་ཀྱི་དབུ་ལ་གདགས་པ་ལྟར་བཟོ་བོས་བྲིའོ། །དེ་ནས་མ་བསྒྲུབས་པར་ཡང་ལས་སུ་འགྱུར་བ་ནི་ཞེས་པ་བསྒྲུབ་པའི་ཆོ་ག་མ་བྱས་པར་ཡང་སྔར་བསྙེན་པ་མང་དུ་བྱས་པ་ལས་སུ་རུང་བར་བཤད་པའོ། །འབུམ་བཟླས་ན་དོན་ཐམས་ཅད་ཕུན་སུམ་ཚོགས་པར་འགྱུར་རོ་ཞེས་པ་བསྙེན་པ་དེ་ཙམ་བྱས་པས་ལྷ་མངོན་དུ་འགྱུར་བས་ཞི་བ་ལ་སོགས་པའི་དོན་སྒྲུབ་པ་རྣམས་འགྲུབ་ཅེས་པའི་ཐ་ཚིག་གོ །ཕྱག་ན་རྡོ་རྗེ་དང་སྤྱན་རས་གཟིགས་དབང་པོ་ལ་སོགས་པའི་སྤྱན་སྔར་བསྔགས་པའི་ནི་ནམ་མཁའི་སྙིང་པོའི་སྔགས་བ་བ་ཊ་ཊ་ཞེས་བྱ་བ་དེ་ཉིད་བཟླས་སོ། །ཆོས་ཀྱི་ནོར་དང་གཟུངས་འཐོབ་བོ་ཞེས་པ་རྟོགས་པའི་ཆོས་དང༌། བཤད་པའི་ཆོས་ཀྱི་ལོངས་སྤྱོད་ཐོབ་པའོ། །སྔགས་དང་དོན་དང་གཞུང་དང་ཚིག་གི་གཟུགས་འཐོབ་ཅིང༌། འདོད་པ་རྣམ་པ་ལྔ་ལ་སོགས་པའི་ནོར་ཡང་འཕེལ་བར་བྱེད་དོ། །རྡོ་རྗེའི་འཁོར་ལོ་སྲིན་ལག་གི་སོར་མོས་མནན་ཏེ་ཞེས་པ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་བྱང་ཆུབ་སེམས་དཔའི་སྐུ་གཟུགས་ལའོ། །འཁོར་ལོ་བསྐོར་བར་འགྱུར་ཞེས་པ་ནི་འཁོར་ལོ་བསྐོར་བའི་རྒྱལ་པོར་འགྱུར་རོ། །ནམ་མཁའ་མཛོད་ཀུན་ནས་འཁྱུད་དེ་ཞེས་པ་དེའི་སྐུ་གཟུགས་ལ་ལག་པས་འཁྱུད་དེའོ། །དགའ་ལྡན་གནམ་གྱི་དབང་མཆོག་བྱིན་ནས་ཞེས་པ་དེར་ཕྱིན་ནས་དོན་ཐམས་ཅད་པའི་དབང་བསྐུར་རོ། །ནམ་མཁའི་སྙིང་པོའི་རྟོག་པ་རྫོགས་སོ།། །།དེ་
ནས་རྡོ་རྗེ་ཁུ་ཚུར་གྱི་བྱང་ཆུབ་སེམས་དཔའ་ཞེས་པ་ལྷ་མ་ཡིན་ལ་སོགས་པའི་འཁོར་བཟློག་ཅིང་སྡོད་མི་ཕོད་པས་ཟིལ་གྱིས་གནོན་པའོ། །གྲུབ་པ་ཐམས་ཅད་འགྲུབ་པར་བྱ་སྟེ་ཞེས་པ་གྲུབ་པའི་སྐལ་བ་ཡོད་པ་རྣམས་འགྲུབ་པར་བྱས་ནས་སེམས་ཅན་དེ་དང་པོ་བྱང་ཆུབ་ཏུ་སེམས་བསྐྱེད་པ་ནས་མཐར་སངས་རྒྱས་སུ་རྫོགས་ཀྱི་བར་དུ་སེམས་ཅན་གྱི་དོན་མང་པོར་བྱས་པའོ། །སྔགས་ཀྱི་དོན་ནི་ཨོཾ་ཡང་སྔ་མ་བཞིན་ནོ། །རུ་ཊྱ་རུ་ཊྱ་ནི་འགྱུར་བ་སྟེ། མ་རྫོགས་པའི་རང་བཞིན་དུ་རྫོགས་པར་བྱེད་པ་ལྟ་བུའོ། །ཧཱུཾ་ནི་མངོན་པར་སྤྱད་པ་སྟེ། ཉོན་མོངས་པ་འཇིལ་བའོ། །མ་ཊ་ནི་སྣང་བ་སྟེ་མ་ནི་ཉི་མའི་ས་བོན་ནོ། །ཊ་ནི་ཟླ་བའི་ས་བོན་ཡིན་པའི་ཕྱིར་རོ། །དེ་བཞིན་གཤེགས་པ་ཐམས་ཅད་ལ་ཕྱག་རྒྱས་བཏབ་ནས་ཞེས་པ་བཅོམ་ལྡན་འདས་ཀྱི་ལུས་དང་ངག་དང་ཡིད་གསུམ་གཅིག་ཏུ་བསྡུས་པ་ནི་ཁུ་ཚུར་ཏེ་དེའི་ཕྱག་རྒྱ་བཅིངས་པ་ན་དེ་བཞིན་གཤེགས་པ་ཐམས་ཅད་ཀྱི་རང་བཞིན་བསྡུས་པ་ནི་རྒྱས་བཏབ་ཅེས་པའི་དོན་ཏོ། །རྡོ་རྗེའི་དཀྱིལ་འཁོར་འདྲ་བ་ནི། །ཞེས་པ་དཀྱིལ་འཁོར་དང་པོ་སྨོས་པའི་རྡོ་རྗེའི་དཀྱིལ་འཁོར་བཞིན་དུ་རི་དང་ཆུ་དང་གླིང་དང་སེམས་ཅན་གྱི་གནས་པ་ལ་སོགས་པའང་དེ་བཞིན་དུ་བྲིའོ། །དེའི་ནང་རིམ་གྱི་དབུས་སུ་རྡོ་རྗེ་ཁུ་ཚུར་ཞེས་བྱ་བའི་སེམས་དཔའ་ཆེན་པོའི་གཟུགས་སམ་ཆ་ལུགས་བཞག་གོ །དེའི་ཕྱག་རྒྱ་བསྟན་པ། རྡོ་རྗེ་ཁུ་ཚུར་རྡོ་རྗེ་བཅངས། །ཞེས་པ་དག་གོ །འདིའི་སྐབས་སུ་རྡོ་རྗེ་ཁུ་ཚུར་བཅིངས་པ་ཉིད་རྡོ་རྗེ་ཁུ་ཚུར་གྱི་སྒྲར་བཤད་དེ་དེའི་དབུས་སུ་རྡོ་རྗེ་རྩེ་ལྔ་པ་བཅུག་ལ་མཛུབ་མོ་གཡས་གཡོན་གྱི་ལག་པ་གཞན་པས་དྲག་ཏུ་བཙིར་བའོ། །དེ་ཡི་ཐད་ཀར་ཐམས་ཅད་དུ། །སངས་རྒྱས་སྐུ་ལུས་གཞག་པར་བྱ། །ཞེས་པ་དེའི་ཕྱོགས་བཞིར་མི་བསྐྱོད་པ་ལ་སོགས་པ་བཞི་བཞུགས་པར་བྱའོ། །དེའི་གྲྭ་བཞིར་བྱང་ཆུབ་སེམས་དཔའ་ཕྱག་ན་རྡོ་རྗེ་དང༌། ནམ་མཁའི་སྙིང་པོ་དང༌། སྤྱན་རས་གཟིགས་དང༌། སྣ་ཚོགས་རྡོ་རྗེ་རྣམས་བྲིའོ། །དེ་ནས་དཀྱིལ་འཁོར་དེ་དང་པོར་སློབ་དཔོན་འཇུག་པའི་ཆོ་ག་གསུངས་པ། དེ་ནས་རྡོ་རྗེ་ཁུ་ཚུར་གྱི་དཀྱིལ་འཁོར་དག་ཅེས་པ་དག་གོ །དེ་ལ་སྔགས་ཀྱི་དོན་ཧཱུཾ་ནི་མངོན་པར་སྤྱད་པའི་དོན་ཏོ། །དཀྵི་ནི་ལྷ་ཉིད་སྦྱིན་གནས་སུ་བསྟན་ཏོ། །སྨ་ར་ནི་སྔོན་གྱི་དམ་ཚིག་
དྲན་པར་བྱོས་ཤིག་པར་བསྐུལ་བའོ། །ཕཊ་ནི་མངོན་པར་སྤྱད་པའོ། །དེ་ནས་སྙིང་པོ་འདིས་བདག་གི་སྙིང་གར་དགྲོལ་ལོ་ཞེས་པ་ཁུ་ཚུར་གྱི་ཕྱག་རྒྱ་གོང་དུ་བཅིངས་པ་སྔགས་ཀྱི་མཐུ་དམ་པོར་གྱུར་པ་སྔགས་འདི་བརྗོད་དེ་སླར་དགྲོལ་ལོ། །སྔགས་ཀྱི་དོན་ནི་རྡོ་རྗེ་ཁུ་ཚུར་སླར་གྲོལ་བར་གྱུར་ཅིག་ཅེས་པའི་དོན་ཏོ། །དེ་ནས་རྡོ་རྗེ་སློབ་མ་གཞུག་སྟེ་ཞེས་པ་ཡེ་ཤེས་ཀྱིས་བྱིན་གྱིས་བརླབས་པའི་སློབ་མ་ནི་རྡོ་རྗེ་སློབ་མའོ། །རྡོ་རྗེ་སློབ་དཔོན་ཡང་དེ་དང་འདྲའོ། །རྡོ་རྗེ་ཁུ་ཚུར་དམ་ཚིག་གི་ཕྱག་རྒྱ་རྡོ་རྗེ་དང་བཅས་པ་ནི་གོང་དུ་ལྷའི་ཕྱག་རྒྱ་བཤད་པའི་སྐབས་སུ་སྨོས་པ་དེ་ཉིད་བཅིངས་ལ་མེ་ཏོག་གི་ཕྲེང་བ་ཕྱག་རྒྱ་དེས་བཟུང་ནས་འཇུག་གོ །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱས་བཏབ་པ་ནི་ཞེས་པ་སློབ་མ་ལ་བསྒོ་བ་སྟེ། དཀྱིལ་འཁོར་འདིར་ཞུགས་པས་ན་དེ་བཞིན་གཤེགས་པ་ཐམས་ཅད་ཀྱི་ཆོས་དང་ཡེ་ཤེས་ཀྱི་ཕྱག་རྒྱས་བྱིན་གྱིས་བརླབས་པའོ། །དེ་ལ་ཆོས་ཀྱི་ཕྱག་རྒྱ་ནི་དག་གི་གསང་བའི་རང་བཞིན་ནོ། །རྡོ་རྗེའི་ཕྱག་རྒྱ་ནི་སེམས་ཀྱི་གསང་བའི་རང་བཞིན་ཏེ་ཕྱག་རྒྱ་དེ་གཉིས་གང་འདོད་པ་སློབ་མ་འདོམ་དུ་གཞུག་གོ །སློབ་མ་གཉིས་ཀ་འདོད་ཅེས་ཟེར་ན་དེ་གཉི་གའི་ཕྱག་རྒྱས་བྱིན་གྱིས་བརླབ་པར་བྱ་སྟེ། དེའི་ཆོ་ག་གསུངས་པ་རྡོ་རྗེ་དང༌། དེ་བཞིན་གཤེགས་པའི་ཆ་ལུགས་ཞེས་པ་དག་གོ །ཆ་ལུགས་དེ་ཉིད་དཀྱིལ་འཁོར་ན་བཞུགས་པ་ལས་བླངས་ནས་མེ་ཏོག་གི་ཕྲེང་བ་དང༌། རྡོ་རྗེ་དང་ཅིག་ཅར་དུ་སློབ་མའི་མགོ་ལ་གཞག་གོ །ལུས་དང་ངག་དང་སེམས་རྡོ་རྗེའི་ཞེས་པ་སངས་རྒྱས་དང་བྱང་ཆུབ་སེམས་དཔའི་ལུས་དང་ངག་ཡིད་ཀྱི་གསང་བ་རྡོ་རྗེ་རྣམས་གཅིག་ཏུ་བསྡུས་པ་ནི་རྡོ་རྗེའི་ཁུ་ཚུར་ཞེས་བྱའོ། །དེ་ནས་ཕྱག་རྒྱའི་དཀྱིལ་འཁོར་འབྱུང་སྟེ་ཞེས་པ་རྡོ་རྗེ་ཁུ་ཚུར་ནི་ལས་ཀྱི་རིགས་པས་ན་ཕྱག་རྒྱའི་དཀྱིལ་འཁོར་ཞེས་བཤད་དོ། །དེའི་དབུས་སུ་ཅི་རིགས་པར་ཞེས་པ་རྣམ་པར་སྣང་མཛད་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་པ་བཞུགས་པར་བྱའོ། །དེའི་ཕྱོགས་བཞིའི་ཤར་ཕྱོགས་ནས་བརྩམས་ཏེ་ཟླ་བའི་དཀྱིལ་འཁོར་ལ་རྡོ་རྗེ་དང༌། རིན་པོ་ཆེ་དང་པདྨོ་དང་རྒྱ་གྲམ་བྱང་ཕྱོགས་ཀྱི་བར་དུ་གཞག་གོ །རྡོ་རྗེ་པདྨོའི་དབུས་ཞེས་བྱ་བ་ཟླ་བའི་དཀྱིལ་འཁོར་གྱི་དབུས་སུ་གཞག་སྟེ། རྡོ་རྗེས་བྱིན་གྱིས་བརླབས་པས་
ན་རྡོ་རྗེ་པདྨོ་སྟེ་རྡོ་རྗེ་ཉིད་དེར་བྲི་བ་ནི་མ་ཡིན་ནོ། །གྲྭ་རྣམས་སུ་ཡང་དུས་བཞིའི་ལྷ་མོའི་མཆོད་པ་གོང་དུ་སྨོས་པ་རྣམས་བྲི་སྟེ། དེ་ནས། སློབ་མ་དཀྱིལ་འཁོར་དུ་བཅུག་ལ། །ཕྱག་རྒྱ་རྣམ་བཞི་ཡང་སློབས་ཤིག །སྒྲུབ་པ་གསང་བ་དག་དང་ནི། །ཞེས་པ་ལ་སོགས་པ་དེ་དག་ཀུན་དཀྱིལ་འཁོར་དུ་བྲིས་ནས་སློབ་མ་ལ་ཡང་ཀུན་བརྗོད་ཅིང་སོ་སོའི་ཆོ་ག་བཞིན་དུ་བསྒྲུབ་པར་བྱའོ། །དེ་ལ་སྒྲུབ་པ་ནི་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །གསང་བ་ནི་ལུས་དང་ངག་དང་ཡིད་ཀྱི་གསང་བའོ། །འཁྱུད་པ་ནི་རྡོ་རྗེ་ཁུ་ཚུར་གསང་བ་ཐམས་ཅད་བསྡུས་པའི་རང་བཞིན་ནོ་ཞེས་བྱ་བ་ཉིད་འཁྱུད་པའོ། །བསྐུལ་བ་ནི་སྔོན་གྱི་དམ་ཚིག་དྲན་པར་བྱོས་ཤིག་ཅེས་སྨྲས་པའོ། །དེ་ནས་དམ་ཚིག་གི་དཀྱིལ་འཁོར་འབྱུང་སྟེ་ཞེས་པ་དམ་ཚིག་དཀྱིལ་འཁོར་ཡང་གཞན་ནི་གོང་མ་བཞིན་དུ་བྲིས་ལ། ལྷ་རྣམས་ཀྱི་མཚན་མ་ཕྱག་རྒྱ་རྣམས་དེར་དགོད་དོ། །དེ་སྟེ་དཀྱིལ་འཁོར་མ་མཐོང་ལ་ཞེས་པ་དམ་ཚིག་ཅན་མ་ཡིན་པ་ལ་ཕྱག་རྒྱ་བསྟན་ན་རིགས་བཞི་ཆར་གྱི་ལྷ་རྣམས་བཀའ་འབབ་པར་འགྱུར་རོ་ཞེས་བསྟན་ཏེ། དེ་ལ་དེ་བཞིན་གཤེགས་པའི་རིགས་ནི་རྡོ་རྗེའོ། །དེ་ལྟར་རིམ་བཞིན་དུ་སྦྱར་ཏེ་སྣ་ཚོགས་རྡོ་རྗེའི་བར་དུའོ། །སྣ་ཚོགས་ནི་རྡོ་རྗེ་རྒྱ་གྲམ་ལ་བྱའོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་གོང་མ་བཞིན་དུ་བྲིས་ལ། རྡོ་རྗེ་ཁུ་ཚུར་གྱི་སྤྱན་སྔར་ཕྱག་རྒྱ་བཅིང་བའི་རི་པ་བསླབ་པོ། །དེའི་རིམ་པ་ནི་འདིའོ། །རྡོ་རྗེ་བཅིང་བ་ཀུན་བྱས་ལ། །ཞེས་པ་དམ་ཚིག་གི་ཕྱག་རྒྱ་བཅིང་ངོ༌། །ཆོ་ག་དང་པོ་རྡོ་རྗེ་བཅིང་བ་བྱས་ལ་དེ་ནས་སོར་མོ་ཐམས་ཅད་དྲལ་བར་བྱའོ། །དེ་ནས་རྡོ་རྗེ་འབེབས་པའི་ཕྱག་རྒྱ་བཅིང་ངོ༌། །དེ་ནས་རྡོ་རྗེ་བཅིངས་པ་ལས་ལག་པའི་དམ་ཚིག་གི་ཕྱག་རྒྱ་བཅིངས་པ་ཐམས་ཅད་བྱའོ། །དེ་ལྟ་བུར་མི་ལྡན་ན་ཞེས་ཕྱག་རྒྱའོ། །རིམ་པ་གོང་དུ་སྨོས་པ་བཞིན་དུ་བྱ་བར་མི་ལྡན་ན་བྱང་ཆུབ་ཀྱི་སེམས་ལ་སོགས་པ་འདོད་པའི་མཆོག་སྒྲུབ་པའི་སྔགས་པས་དམ་ཚིག་ཆེན་པོའི་ཡང་དག་པའི་ཡེ་ཤེས་ཀྱི་སྙིང་པོ་ས་མ་ཡ་སྟྭཾ་ཞེས་བྱ་བ་ལ་སོགས་པའི་སྤྱིའི་དམ་ཚིག་གི་སྔགས་ཐང་ཅིག་ཟློས་ལ། དེ་ནས་ཕྱག་རྒྱ་ཐམས་ཅད་ཆིངས་ཤིག །འདོད་པའི་མཆོག་ཐམས་ཅད་སྒྲུབ་པ་ནི་ཞེས་པ་བྱང་ཆུབ་ཀྱི་སེམས་བསྒྲུབ་པ་ནི་ཕྱག་རྒྱ་གོང་དུ་སྨོས་པ་
ལ་སོགས་པ་ཉིད་ལ་རག་ལུས་ཞེས་པའི་དོན་ཏོ། །དེ་ནས་བཅོམ་ལྡན་འདས་རྡོ་རྗེ་ཁུ་ཚུར་གྱི་སྒྲུབ་པ་འབྱུང་སྟེ་ཞེས་པ་དཀྱིལ་འཁོར་གོང་དུ་སྨོས་པ་རྣམས་ཀྱི་སྒྲུབ་པའི་ཆོ་ག་འདིར་བཤད་དེ། འོག་ནས་སྒྲུབ་པ་དང་ལས་འབྱུང་བ་རྣམས་ཀྱི་དང་པོ་སྤྱིའི་བསྙེན་པ་འབུམ་བྱའོ་ཞེས་བསྟན་པ་འོ་མ་འཐུང་ཞིང་རྡོ་རྗེ་ཁུ་ཚུར་གྱིས་ཞེས་བྱ་བ་ལ་སོགས་པའོ། །རྡོ་རྗེ་དབང་བསྐུར་བར་དར་གྱིས་བཅིངས་ལ་ཞེས་པ་རྡོ་རྗེ་ཁུ་ཚུར་གྱི་ནང་དུ་རྡོ་རྗེ་རྩེ་ལྔ་པ་བཅུག་ལ་རྡོ་རྗེ་བཅིངས་བ་བྱས་ནས་དབང་བསྐུར་བའི་གནས་བྲལ་བ་ནས་དར་གྱིས་དཀྲི་བར་བྱའོ། །དེའི་གཡས་གཡོན་ཕྱོགས་བཞིར་དེ་བཞིན་གཤེགས་པ་མི་བསྐྱོད་པ་ལ་སོགས་པ་འཁོར་བྱང་ཆུབ་སེམས་དཔའ་དང་བཅས་པ་བྲིའོ། །དེ་ལ་སངས་རྒྱས་རྣམས་ནི་རྡོ་རྗེ་བཅིངས་པའི་ཕྱག་རྒྱས་བཞུགས་པར་བྱའོ། །དེ་དག་གི་འཁོར་བྱང་ཆུབ་སེམས་དཔའ་རྣམས་ཏིང་ངེ་འཛིན་གྱི་ཚུལ་དུ་བཞུགས་པར་བྱའོ། །དེ་ནས་དེའི་སྤྱན་སྔར་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་བཅིངས་ལ་ཞེས་པ་རྡོ་རྗེ་ཁུ་ཚུར་བཅིངས་པའི་མཚན་ཉིད་གོང་དུ་སྨོས་པ་བཞིན་དུ་བྱའོ། །དེ་ནས་ནམ་ཕྱེད་ནས་བདུད་ཀྱི་ལས་སྣ་ཚོགས་སྣང་བར་འགྱུར་རོ་ཞེས་པ་འཇིགས་པའི་གཟུགས་སྟོན་ཅིང་སྒྲ་འབྱིན་པ་དང༌། མཚོན་སྣ་ཚོགས་ཀྱིས་འདེབས་ཤིང་སྔགས་པ་ལ་རྒོལ་བ་ནི་བདུད་ཀྱི་ལས་སོ། །སྔགས་ཀྱི་དོན་ནི་རྡོ་རྗེ་ཁུ་ཚུར་གྱིས་བདུད་ཐམས་ཅད་ཆོམས་ཤིག་པའི་དོན་ཏོ། །གཞན་གྱི་སྐབས་སུ་ཡང་བགེགས་རྒོལ་བ་རྣམས་ལ་སྔགས་འདི་སྦྱར་རོ། །ལུས་ཀུན་འཇུག་གོ་ཞེས་པ་སངས་རྒྱས་ཀྱི་སྐུ་སྔགས་པའི་ལུས་ལ་འཇུག་པའོ། །གཞོན་ནུ་དམ་ཚིག་གི་ཁུ་ཚུར་གྱིས་རྡོ་རྗེ་དམ་དུ་བཅིངས་ཞེས་པ་དམ་ཚིག་གི་རྡོ་རྗེ་ཁུ་ཚུར་ནི་རྡོ་རྗེ་བཅིངས་པ་ལས་མཐེ་བོང་གཉིས་ནང་དུ་བཅུག་པའོ། །དེའི་ནང་ན་རྡོ་རྗེ་རྩེ་ལྔ་པ་བསྒྲེང་སྟེ་བཅུག་ལ་བསྡམས་པའོ། །སྤྱན་གསུམ་མ་ལག་པ་གཉིས་ཀྱིས་རྡོ་རྗེ་གསལ་ཕུར་ཐོགས་པ་ཞེས་པ་གསལ་ཕུར་ནི་ཤཱུ་ལ་སྟེ་མདུང་རྩེ་དང་བཅས་པའི་མདུང་འདྲ་བ་ལག་པ་གཉིས་ཀས་བཟུང་བའོ། །པདྨོ་དང་མཆོག་སྦྱིན་གྱི་ཕྱག་ཏུ་བྱས་པ་ཞེས་པ་ཕྱག་གཡོན་པ་ན་པདྨོ། །གཡས་པ་མཆོག་སྦྱིན་དེའི་གཡོན་དུ་པདྨོ་ཆེན་པོ་རྡོ་རྗེ་ཞེས་པ་སྤྱན་རས་གཟིགས་ཀྱི་གཡོན་དུ་རྡོ་རྗེ་བཞག་
སྟེ་ཕྱག་གཡོན་པ་ན་པདྨོ་ཐོགས་པའོ། །པདྨོ་ཆེན་པོ་ཞེས་བྱ་བ་ནི་པདྨོའི་རིགས་ཀྱི་བདག་པོ་སྤྱན་རས་གཟིགས་ཀྱི་དབང་པོ་ཉིད་ལ་བྱའོ། །དེའི་རྡོ་རྗེ་ནི་དེའི་ཡེ་ཤེས་ཀྱི་རང་བཞིན་ཏེ་རྡོ་རྗེ་དེ་ཉིད་ལ་བྱའོ། །གཟུགས་ཀྱི་རས་ཀྱིས་དེ་ལ་ཕཊ་ཅེས་བྱ་བ་ཐོབ་ན་ཕཊ་ཅེས་བྱ་བའི་སྒྲ་འབྱུང་ངོ༌། །ཀུན་འཁྱིལ་པས་འཁྱིལ་པའི་སྐྲ་ཞེས་བྱ་བ་གཞོན་ནུ་སྐྲ་ལྕང་ལོ་འཁྱིལ་པ་ལ་བྱའོ། །བསྐྱང་བ་དང་ཆད་པས་གཅད་པ་ཞེས་པ་ཕན་གདགས་པ་དང་གནོད་པར་ནུས་པའོ། །དབྱིབས་རྒུས་པས་བཅོམ་ལྡན་འདས་ལ་ཕྱག་འཚལ་ཞེས་པ་རྡོ་རྗེ་ཁུ་ཚུར་གྱིས་ཕྱག་འཚལ་བའོ། །དུ་རུ་ཀ་ཡི་འབྲུ་མར་གྱིས། །ཞེས་དུ་རུཀ་དང་འབྲུ་མར་སྦྱར་བའི་འབྲུ་མར་གྱིས་སྦགས་པའོ། །སའི་འོག་བརྗོད་ཅེས་པ་སའི་གཏིང་ན་ལྷ་མ་ཡིན་ལ་སོགས་པའི་གནས་ཡོད་པ་བརྗོད་པ་དེར་འགྲོ་བར་འགྲུབ་བོ། །ས་བརྗོད་པ་ཞེས་པ་བྲག་ཕུག་ལ་སོགས་པ་སའི་གཏན་ཉིད་མ་ཡིན་པའི་གསེབ་ན་སྤྱོད་པར་འགྲུབ་པོ། །ཁམས་བརྗོད་ཅེས་བྱ་བ་ནི་གསེར་དངུལ་བྱེད་པར་འགྲུབ་བོ། །འདོད་པའི་གཟུགས་ཞེས་བྱ་བ་ཅི་འདོད་པའི་ལུས་འཐོབ་བོ། །བཅིང་བ་ཐམས་ཅད་དང་མནན་པ་དང་ཞེས་པ་མ་རུངས་པའི་སེམས་ཅན་ཡན་ལག་བཅིང་བ་དང༌། འཁུམས་ཤིང་རྩོལ་མི་ནུས་པར་མནན་པ་དང༌། སྨྲ་མི་ནུས་པར་གཟིར་བ་དང༌། དྲན་པ་མེད་པར་གློང་བར་བྱ་བ་དང་གཉིད་ལོག་པར་ཉལ་བ་དང༌། བཅིངས་པ་ལ་སོགས་པ་ལས་ཐར་པར་བྱེད་ནུས་སོ། །ནམ་མཁའ་ལ་ནོར་དང་གསེར་དང་མུ་ཏིག་དང་ཞེས་པ་ནོར་ནི་དོང་ཙེ་དང༌། གེ་སར་དང༌། འགྲོན་བུ་ལ་སོགས་པ་བཙོང་ཞིང་བསྒྱུར་བའི་ནོར་རྣམས་ལ་བྱའོ། །འཐབ་ཆ་དང་སྟོན་སྐྱོབ་དང། ཞེས་པ་འཐབ་ཆ་ནི་རལ་གྲི་ལ་སོགས་པའོ། །སྟོན་སྐྱོབ་ནི་འཇིག་རྟེན་དང་འཇིག་རྟེན་ལས་འདས་པའི་གཙུག་གོ །སྐྱེས་ཀོར་ནི་གོ་ཆ་ལ་སོགས་པའོ། །གླེགས་བམ་ནི་དམ་པའི་ཆོས་ལ་སོགས་པའི་གླེགས་བམ་མོ། །རྟོག་པ་ནི་སྔགས་ཀྱི་རྟོག་པའོ། །དུས་ཀྱི་འཁོར་ལོ་བསྐོར་བ་དང། ཞེས་པ་དབྱར་དགུན་དུ་བསྒྱུར་བ་ལ་སོགས་པ་དུས་བརྗེའོ། །འཁྲུལ་འཁོར་ཐམས་ཅད་བཅད་པ་དང༌། །ཞེས་པ་འོག་གི་བགེགས་ཐམས་ཅད་གཞོམ་ཞིང་ས་འོག་གི་སྒོ་བཅད་པ་ཐམས་ཅད་འབྱེད་པའོ། །ཐམས་ཅད་ཀྱི་ཕྱག་རྒྱ་བཅག་པ་དང་ཞེས་པ་ཕ་རོལ་རྒོལ་བའི་ཕྱག་རྒྱ་མཐུ་མེད་
པར་བཅག་པ་དང༌། དེའི་ཕྱག་རྒྱ་སོ་སོར་དྲལ་བའོ། །གས་པ་སྦྱར་བ་དང་ཞེས་པ་ནི་དངོས་པོ་གང་ཡང་རུང་བ་གས་སམ་ཆག་པ་སླར་གསོ་ནུས་སོ། །ཐམས་ཅད་སྐྱེད་པ་དང་ཞེས་པ་ནི་ས་བོན་གྱི་ཆོ་ག་སྐྱེད་པར་བྱེད་པའོ། །རྡོ་རྗེ་ཁུ་ཚུར་གྱི་རྟོག་པ་རྫོགས་སོ།། །། དེ་ནས་བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །ཞེས་པ་འཇམ་དཔལ་གྱིས་ཀྱང་འདིར་རང་གི་སྙིང་པོ་གསུངས་པར་བརྩམས་སོ། །ཆོས་ཀྱི་མཛོད་བརྗོད་པར་འགྱུར་རོ་ཞེས་པ་སངས་རྒྱས་ཀྱི་ཆོས་ནི་རྟོག་པ་དང་བརྗོད་པ་གཉིས་ཏེ། རྟོག་པ་ནི་མྱ་ངན་ལས་འདས་པའི་ཆོས་རང་གིས་རིག་པའོ། །བརྗོད་པའི་ཆོས་ནི་གསུང་རབ་སྡེ་བཅུ་གཉིས་ལ་སོགས་པའོ། །གསུང་རབ་ཀྱི་ཆོས་དེ་དག་ནི་དོན་ཡི་གེ་འབྲུ་ལྔ་པའི་སྙིང་པོ་འདིར་འདུས་ཞེས་པའི་དོན་ཏོ། །སྔགས་ཀྱི་དོན་ནི་འོག་ནས་འཆད་དོ། །ཆོས་ཐམས་ཅད་ཀྱི་མཉམ་པ་ཉིད་དང་ཞེས་པ་འདུས་བྱས་དང་འདུས་མ་བྱས་པ་ལ་སོགས་པའི་དེ་ཉིད་ཆོས་བདག་མེད་པའི་སྒོར་མཚུངས་པས་ན་མཉམ་པ་ཉིད་དེ། འདིས་ནི་བརྗོད་པར་བྱ་བ་མཉམ་པ་ཉིད་བསྟན་ཏོ། །བརྗོད་པ་མཉམ་པ་ཉིད་བསྟན་པ་ནི་ཡི་གེ་མཉམ་པ་ཉིད་ཅེས་བརྗོད་དེ། ཡི་གེ་སུམ་ཅུ་རྩ་གཉིས་ཀྱང་རང་བཞིན་མེད་པ་ཉིད་མཚུངས་པ་སྟེ། དོན་དེ་དག་འབྲུ་ལྔ་པའི་སྙིང་པོ་འདིས་བསྟན་ཏོ། །ཤེས་རབ་ཀྱི་ཕ་རོལ་ཏུ་ཕྱིན་པའི་གྲུབ་པ་ཐོབ་པར་འགྱུར་ཏོ་ཞེས་པ་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་སྟོང་པ་ཉིད་རྟོགས་ཞེས་པའི་ཐ་ཚིག་གོ །དེ་ནས་དེའི་དཀྱིལ་འཁོར་འབྱུང་སྟེ་ཞེས་པ་འཇམ་དཔལ་གྱི་དཀྱིལ་འཁོར་ནི་ཕྱག་ན་རྡོ་རྗེའི་དཀྱིལ་འཁོར་དང་པོ་ཉིད་དུ་སྨོས་པ། འཁོར་ལོའི་དཀྱིལ་འཁོར་ཞེས་བྱ་བ་དཀྱིལ་འཁོར་ཆེན་པོའི་ཚུལ་བཞིན་དུ་རི་རབ་ཀྱི་རྩེ་མོར་དཀྱིལ་འཁོར་ཟླུམ་པོའི་འཁོར་ལོ་དང་འདྲ་བ་དང༌། ཕྱི་རོལ་ཆུ་དང་གསེར་གྱི་རི་དང་རི་ཁོར་ཡུག་དང་གླིང་བཞི་པ་ལ་སོགས་པ་ཡང་དེ་བཞིན་དུ་བྲིས་ལ། དེའི་དབུས་སུ་རྣམ་པར་སྣང་མཛད་ཀྱི་སར་ནི་འཇམ་དཔལ་ཉིད་བཞུགས་པར་བྱའོ། །རྣམ་པར་སྣང་མཛད་ནི་འཇམ་དཔལ་གྱི་སྟེང་ནམ་མཁའ་སྙིང་པོའི་སར་བཞུགས་པར་བྱའོ། །ནམ་མཁའི་སྙིང་པོ་ནི་འཇམ་དཔལ་གྱི་སར་བཞུགས་པར་བྱའོ། །འཇམ་དཔལ་ནི་སྐུ་མདོག་དམར་སེར་ཕྱག་གཡས་
པ་ན་རྡོ་རྗེ་རལ་གྲི་ཐོགས། གཡོན་པ་ན་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་བསྣམས་པའི་རི་མོའམ་སྐུ་གཟུགས་གཞག་གོ །རྡོ་རྗེ་རལ་གྲི་ཞེས་བྱ་བ་ནི་ཡེ་ཤེས་སོ། །དེའི་མཚན་མ་རལ་གྲི་ཡིན་པས་ན་རྡོ་རྗེ་རལ་གྲི་ཞེས་བྱའོ། །དེའི་ཐད་ཀར་ཐམས་ཅད་དུ་ཡི་གེ་ཨ་ར་པ་ཙ་ན་ལ་སོགས་པའི་ཕྲེང་བ་བྲི་ཞེས་པ་འཇམ་དཔལ་གྱི་དྲུང་དུ་ཡི་གེ་འབྲུ་ལྔ་པ་ཁ་དོག་དམར་པོ་མགོ་མཉམ་དུ་འཁོར་བར་བསྐོར་རོ། །སོགས་པའི་སྒྲས་ནི་ཡི་གེ་འབྲུ་ལྔའི་དོན་བཤད་པ་འོག་ནས་འཁོར་བར་བྲིའོ། །དེ་ནས་དང་པོ་སློབ་དཔོན་ཉིད་དཀྱིལ་འཁོར་དུ་འཇུག་པའི་ཆོ་ག་བསྟན་པ་དེ་ནས་སློབ་དཔོན་གྱིས་ཞེས་བྱ་བ་ལ་སོགས་པའོ། །དམ་ཚིག་གི་ཕྱག་རྒྱ་ནི་འོག་ནས་འབྱུང་ངོ༌། །ཡི་གེ་འབྲུ་ལྔ་སྤྲོས་པ་མེད་པའི་སྤྱན་སྔར་བརྗོད་དོ་ཞེས་པ་སྤྲོས་པ་མེད་པ་ནི་འཇམ་དཔལ་ལ་བྱ་སྟེ་ཆོས་ཀྱི་སྐུའི་རང་བཞིན་ཡིན་པའི་ཕྱིར་རོ། །དེ་ཕྱིན་ཆད་སློབ་དཔོན་ལ་འཇམ་དཔལ་གྱིས་བྱིན་གྱིས་བརླབས་ཏེ་སྤོབས་པ་ཆེན་པོ་ཡང་ཐོབ། དུས་གསུམ་གྱི་ལེགས་ཉེས་ཅིར་གྱུར་པ་ཡང་ནམ་མཁའ་ལ་ཡི་གེར་བྲིས་ཏེ་སྟོན་ཏོ། །དེ་ནས་སློབ་མ་གཞུག་པའི་ཆོ་ག་གསུངས་པ། དེ་བཞིན་དུ་སློབ་མ་བཅུག་སྟེ་ཞེས་པ་ལ་སོགས་པའོ། །གོང་དུ་སྨོས་པའི་ཆོ་ག་བཞིན་དུ་བྱས་ལ་རྡོ་རྗེ་རལ་གྲི་དམ་ཚིག་གི་ཕྱག་རྒྱ་བཅིངས་ལ་དེ་ནས་མེ་ཏོག་བཟུང་སྟེ་དཀྱིལ་འཁོར་དུ་གཞུག་གོ །དེ་ནས་སློབ་དཔོན་གྱིས་སློབ་མ་ལ་བསྒོ་བ། དེང་ཁྱོད་ཀྱིས་དེ་བཞིན་གཤེགས་པའི་ཆོས་ཞེས་བྱ་བ་ལ་སོགས་པའོ། །དེང་ཁྱོད་ཀྱིས་དཀྱིལ་འཁོར་འདིར་ཞུགས་པས་དེ་བཞིན་གཤེགས་པའི་ཆོས་སྟོང་པ་ཉིད་རྟོགས་པར་འགྱུར་གྱིས་སྙིང་པོ་འོག་ནས་འབྱུང་བ་དམ་ཚིག་ཅན་མ་ཡིན་པ་ལ་སོགས་པ་ལ་མ་སྨྲ་ཤིག །སྨྲས་ན་ཚེ་འདི་ལ་གནོད་པར་འགྱུར་བ་དང་ཚེ་ཕྱི་མ་ལ་དམྱལ་བར་སྐྱེ་བ་གོང་དུ་སྨོས་པ་དང་འདྲའོ། །འདོད་པ་ཐམས་ཅད་འཐོབ་པོ་ཞེས་པ་འབྲུ་ལྔ་པོ་འདི་ལ་བསྒོམས་པས་བྱང་ཆུབ་ཀྱི་སེམས་དང་འཇིག་རྟེན་གྱི་འདོད་པ་ཐམས་ཅད་འཐོབ་པོ། །ཨ་ཞེས་བྱ་བ་ནི་འདོད་པའོ་ཞེས་ཆོས་ཐམས་ཅད་མ་སྐྱེས་པར་བསྟན་ཏེ། གོང་མ་སྐྱེས་བ་དེ་ནི་བྱང་ཆུབ་སྟེ་བདེ་བ་ཐམས་ཅད་འགྲུབ་པའི་རྒྱུ་ཡིན་པའི་ཕྱིར་དེ་ཉིད་འདོད་པའོ། །ར་ཞེས་བྱ་བ་ནི་ཆགས་པའོ་ཞེས་བྱ་བ་སེམས་ཅན་སྨིན་པ་དང་གྲོལ་བར་བྱ་བ་ལ་ཆགས་པའོ། །པ་ཞེས་བྱ་བ་ནི་དོན་དམ་པའོ་ཞེས་
བྱ་བ་གཟུང་བ་དང་འཛིན་པ་དང་བྲལ་བའི་དོན་སྟོང་པ་ཉིད་དུ་སྟོན་པའོ། །ཙ་ཞེས་བྱ་བ་ནི་སྤྱོད་པའོ་ཞེས་བྱ་བ་བྱང་ཆུབ་ཀྱི་སྤྱོད་པ་ཕ་རོལ་ཏུ་ཕྱིན་པ་དྲུག་ལ་སོགས་པའི་དོན་སྟོན་པའོ། །ན་ཞེས་བྱ་བ་ནི་དངོས་པོ་མེད་པའོ་ཞེས་བྱ་བ་ཆོས་ཐམས་ཅད་དངོས་པོ་མེད་པ་སྟེ་ཆོས་དང་གང་ཟག་ལ་བདག་མེད་པའི་ཕྱིར་རོ། །དོན་དེ་ལྔ་བསྡུས་ཏེ་བསྟན་པ་འདོད་ཆགས་དམ་པ་ཞེས་བྱ་བ་དག་གོ །དེ་དག་བསྒྲུབས་ན་བྱང་ཆུབ་ཀྱི་སེམས་དང་འཇིག་རྟེན་པའི་འདོད་པ་ཐམས་ཅད་ཐོབ་པར་འགྱུར་རོ། །འདོད་པ་ཐམས་ཅད་ནི་དེ་བཞིན་གཤེགས་པའི་སྣོད་ཡིན་ཏེ་ཞེས་བ་བྱང་ཆུབ་ཀྱི་སེམས་ས་བཅུའི་རིམ་པ་ཐམས་ཅད་ནི་དེ་བཞིན་གཤེགས་པའི་སྣོད་དམ་རྒྱུ་ཡིན་ཞེས་བྱ་བའི་དོན་ཏོ། །རྡོ་རྗེ་འཛིན་ཀྱང་མྱུར་དུ་འཐོབ་པར་འགྱུར་རོ་ཞེས་པ་འདིའི་སྐབས་སུ་འཇམ་དཔལ་ཉིད་ལ་བྱ་སྟེ། ཡེ་ཤེས་ཀྱི་མཚན་མ་རལ་གྲི་ལ་སོགས་པ་འཛིན་པའི་ཕྱིར་རོ། །དེ་ནས་ཕྱག་རྒྱ་འཛིན་པ་བསླབ་པོ་ཞེས་པ་འཇམ་དཔལ་གྱི་ཕྱག་རྒྱ་ཆེན་པོ་ལ་སོགས་པ་རྣམ་བཞི་བསླབ་བོ། །སྤྲོས་པ་མེད་པའོ་ཞེས་བྱ་བ་ནི་ཆོས་ཀྱི་སྐུའི་རང་བཞིན་ཚིག་དང་དོན་སྣ་ཚོགས་སུ་སྤྲོས་པ་མེད་པའི་དོན་སྟོན་པའི་དཀྱིལ་འཁོར་བས་ན་སྤྲོས་པ་མེད་པའི་དཀྱིལ་འཁོར་ཞེས་བྱའོ། །དེ་ནས་རལ་གྲིའི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་འདིར་རལ་གྲི་སྒྲུབ་པས་ན་རལ་གྲིའི་དཀྱིལ་འཁོར་ཏེ། དང་པོ་ཉིད་དུ་ཕྱག་ན་རྡོ་རྗེའི་དཀྱིལ་འཁོར་ཞེས་སྨོས་པ་དེ་བཞིན་དུ་བྲིའོ། །དེ་ནས་དཀྱིལ་འཁོར་དེའི་དབུས་སུ་བསྒྲུབ་པར་བྱ་བའི་རལ་གྲི་བཞག་སྟེ་མཚན་ཐལ་བྱུང་བཟླས་ཏེ་བསྒྲུབ་པོ། །སླར་བསྙེན་པ་བྱ་བ་ནི་སྐབས་གཞན་དུ་གསུངས་པའི་ཚུལ་བཞིན་བྱའོ། །དམ་ཚིག་གི་དཀྱིལ་འཁོར་ནི་ཞེས་པ་དཀྱིལ་འཁོར་ཆེན་པོའི་ཚུལ་བཞིན་དུ་བྲིས་ལ། དེར་སློབ་དཔོན་དང་སློབ་མ་གཉི་ག་ཆོ་ག་གོང་མ་བཞིན་དུ་ཞུགས་ནས་སློབ་མ་ལ་ཉིན་གཅིག་ཅིང་རྟག་ཏུ་ཚིག་འདི་སྐད་བརྗོད་ཅིག་ཅེས་བསྒོའོ། །དེ་ནས་ལས་ཀྱི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་གོང་མ་བཞིན་བྲིས་ཏེ། དེས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་གཞག་ལ་འདྲི་བ་ལ་སོགས་པ་མཆོད་པ་རྣམ་པ་བཞིའོ། །དེ་ནས་སྒྲུབ་པ་འདོད་པས་དཀྱིལ་འཁོར་ཆེན་པོའི་ཚུལ་དུ་རས་ལ་བྲིས་ནས་ཞེས་པ་དཀྱིལ་འཁོར་ཆེན་
པོའི་ཚུལ་བཞིན་དུ་ཆུ་དང་རི་དང་གླིང་ལ་སོགས་པ་ཐམས་ཅད་བྲིའོ། །དེ་ནས་དེའི་སྤྱན་སྔར་ཨ་ར་པ་ཙ་ན་ཞེས་བྱ་བའི་ཡི་གེའི་ཕྲེང་བ་ལན་ཅིག་བཀླགས་ལ། ཆོས་ཐམས་ཅད་རང་བཞིན་གྱིས་མ་གྲུབ་པའོ་ཞེས་སྐབས་སུ་ཚིག་ཏུ་ཡང་བརྗོད་ཅིང་དེའི་དོན་ཡིད་ལ་བཟླས་ཏེ་ཡི་གེ་འབྲུ་རེ་ཞིང་སྔགས་འབུམ་འབུམ་སྟེ་ལྔ་འབུམ་བཟླས་ན་འགྲུབ་པར་འགྱུར་རོ། །དེ་ནས་མ་བསྒྲུབས་ཀྱང་ལས་སུ་འགྱུར་བ་ནི་ཞེས་པ་སྔོན་དུ་བསྙེན་པ་ཚུལ་བཞིན་དུ་མང་དུ་བྱས་ནས་སྔགས་ཉེ་བར་གྱུར་ན་ནད་ལ་སོགས་པའི་གློ་བུར་གྱི་སྡུག་བསྔལ་རྣམས་ཐམས་ཅད་བྱང་བར་འགྱུར་རོ། །གཉིས་ཀྱིས་སྡིག་པ་ཐམས་ཅད་བྱང་བར་འགྱུར་རོ། །གསུམ་གྱིས་བསམ་གཏན་བཞི་ལ་སོགས་པ་ཐོབ་པར་འགྱུར་རོ། །བཞིས་ཚེ་སྔ་ཕྱི་ལ་སོགས་པ་དྲན་པར་འགྱུར་རོ། །སྐུ་གདུང་དང་བཅས་པའི་མཆོད་རྟེན་ལ་ཡི་གེ་ཕྲེང་བ་གཡས་ཕྱོགས་ནས་ཞེས་བྱ་བ་ནི་ཞལ་ཤར་ཕྱོགས་སུ་གཟིགས་པར་བརྟགས་ལ་དེ་ནས་ཙེ་ཏིའི་གཡས་ཕྱོགས་ནས་བསྐོར་ཏེ། ཨ་ར་པ་ཙ་ནས་མགོ་མཉམ་དུ་བསྐོར་ལ་མགོའི་ཨས་མཇུག་གི་ནའི་དྲུང་དུ་ཕྱིན་གྱིས་བར་དུ་བསྐོར་རོ། །དེ་ནས་ཙེ་ཏི་དེ་ཉིད་སྔགས་པས་བསྐོར་ཞིང་སྔགས་པ་དེ་ཉིད་འབུམ་བཟླས་སོ། །འཇམ་དཔལ་གྱི་རྟོག་པ་རྫོགས་སོ།། །།དེ་ནས་བཅོམ་ལྡན་འདས་ལ་རྡོ་རྗེ་འཁོར་ལོ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་བྱང་ཆུབ་སེམས་དཔས་གསོལ་པའོ། །གང་གི་བརྗོད་པ་ཙམ་གྱིས་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ་ཞེས་ཕྱག་རྒྱ་འོག་ནས་འབྱུང་བ་བཅིངས་ལ་བརྗོད་ན་རྣལ་འབྱོར་གྱི་རྒྱུད་ཀྱི་དཀྱིལ་འཁོར་ཐམས་ཅད་དུ་ཞུགས་པར་འགྱུར་རོ། །སྔགས་ཀྱི་དོན་ཨོཾ་སྔར་བཤད་པའོ། །བཛྲ་ནི་ཡེ་ཤེས་སུ་སྟོན་ཏོ། །ཙཀྲ་ནི་ཆོས་ཀྱི་འཁོར་ལོ་བསྐོར་བར་སྟོན་ཏོ། །སྟོང་པ་ཉིད་ཀྱིས་བྱིན་གྱིས་བརླབས་པའི་ཡེ་ཤེས་ཀྱི་ཆོས་ཀྱི་འཁོར་ལོ་བསྐོར་ཏེ་ཉོན་མོངས་པ་དང་ཤེས་བྱའི་སྒྲིབ་པ་ཧཱུཾ་ཞེས་བརྗོད་པས་འཇོམས་སོ། །དེ་ནས་འདི་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་ཅེས་པ་སངས་རྒྱས་ལྔ་ལ་སོགས་པ་དང་བྱང་ཆུབ་སེམས་དཔའ་རྣམས་དང་སྐྱེ་བོ་གཞན་རྣམས་ཀྱང་དཀྱིལ་འཁོར་དེར་ཞུགས་སོ། །རྡོ་རྗེ་འཁོར་ལོ་བིན་བྲིས་ལ། །ཞེས་པ་དང་པོ་
སྨོས་པའི་འཁོར་ལོ་ཆེན་པོ་བཞིན་དུ་འཁོར་ལོའི་ཚུལ་དུ་བྲིས་ལ་ཆུ་དང་གསེར་གྱི་རི་དང་རི་ཁོར་ཡུག་ལ་སོགས་པ་དེ་བཞིན་དུ་དགོད་དོ། །དེའི་དབུས་སུ་རྡོ་རྗེའི་འཁོར་ལོར་བྱང་ཆུབ་སེམས་དཔའ་འཁོར་ལོ་རྩིབས་བརྒྱད་པ་ཕྱག་ན་བསྣམས་པའམ། འཁོར་ལོའི་ཕྱག་རྒྱ་ཕྱག་བསྣོལ་བའི་འོག་ནས་འབྱུང་བ་བཅིངས་ཏེ་ཁ་དོག་དམར་པོའི་དཀྱིལ་འཁོར་དབུས་སུ་རྡོ་རྗེ་བཞུགས་པར་བྱའོ། །རིགས་ཀྱི་དཀྱིལ་འཁོར་ལ་སོགས་པའི་ཞེས་པ་ཤར་ཕྱོགས་ལ་སོགས་པར་མི་བསྐྱོད་པ་ལ་སོགས་པ་སངས་རྒྱས་བཞི་རང་གི་སྐུ་ཉིད་བྲི་བར་བྱའོ། །དེ་ཡང་སེམས་དཔའ་ཆེན་པོ་རྣམས་ཞེས་ཤར་དང་བྱང་གི་མཚམས་སུ་རྡོ་རྗེ་སེམས་དཔའ། ཤར་ལྷོའི་མཚམས་སུ་ནམ་མཁའི་སྙིང་པོ་དང༌། ལྷོ་ནུབ་ཀྱི་མཚམས་སུ་སྤྱན་རས་གཟིགས། ནུབ་བྱང་གི་མཚམས་སུ་རྡོ་རྗེ་ཁུ་ཚུར་བྲི་བར་བྱའོ། །དེ་ཉིད་མཉམ་པར་བྲི་བར་བྱ། །ཞེས་པ་བྱང་ཆུབ་སེམས་དཔའ་ལ་སོགས་པ་དེ་དག་གཞུང་ལས་འབྱུང་བ་བཞིན་དུ་བྲི་ཞེས་བྱ་བའི་ཐ་ཚིག་གོ །དེ་ནས་སློབ་དཔོན་ཤེས་རབ་དང་ལྡན་པ་བདག་རང་དང་པོ་རྡོ་རྗེ་འཁོར་ལོའི་དམ་ཚིག་གི་ཕྱག་རྒྱ་འོག་ནས་འབྱུང་བ་བཅིངས་ནས་སྙིང་པོ་གོང་དུ་སྨོས་པ་བརྗོད་ལ་དེའི་མཇུག་ལ་ཛཿཧཱུཾ་བཾ་ཧོཿཞེས་བྱ་བ་འདི་བཞི་ཡང་སྨོས་སོ། །ཛཿནི་དགུག་པའོ། །ཧཱུཾ་ནི་གཞུག་པའོ། །བཾ་ནི་བཅིང་བའོ། །ཧོཿ་ནི་དགུག་པར་བྱའོ། །དེ་ནས་བཅོམ་ལྡན་འདས་དགྱེས་ཏེ་ཞེས་པ་དཀྱིལ་འཁོར་དུ་འཇུག་པའི་ཆོ་ག་དེ་ལྟར་བྱས་པས་སྔགས་པ་དམ་ཚིག་ཏུ་འགྱུར་ཏེ་སྔགས་ཀྱི་ཚུལ་དང་མི་འགལ་བས། སངས་རྒྱས་དང་བྱང་ཆུབ་སེམས་དཔའི་ཡང་དགྱེས་ཏེ། ཚུལ་དང་མི་འགལ་བས་ན་གྲུབ་པ་རྣམ་གསུམ་དེས་རྒྱུ་བྱས་པའི་ཕྱིར་འཐོབ་པར་འགྱུར་རོ། །དེ་བཞིན་དུ་སློབ་མ་བཅུག་ནས་དེ་ཉིད་དུ་བསྒྲུབ་པར་བྱའོ་ཞེས་པ་རྡོ་རྗེ་འཁོར་ལོའི་དམ་ཚིག་གི་ཕྱག་རྒྱ་བཅིང་བ་ལ་སོགས་པ་ཇི་ལྟར་སློབ་དཔོན་དཀྱིལ་འཁོར་དུ་འཇུག་པའི་ཆོ་ག་དེ་བཞིན་དུ་བྱས་ལ་སློབ་མ་ཡང་བཅུག་ནས་དཀྱིལ་འཁོར་དེ་ཉིད་དུ་འོག་ནས་འབྱུང་བ་འབུམ་བཟླས་པའི་སྒྲུབ་པ་བྱ་སྟེ། དཀྱིལ་འཁོར་བྲིས་ལ་ཚུལ་བཞིན་དུ་ཞུགས་ཏེ། རྡོ་རྗེ་འཁོར་ལོ་ལ་ཕྱག་རྒྱ་འོག་ནས་འབྱུང་བ་བཅིངས་ལ་བཟླས་སོ། །དཀྱིལ་འཁོར་རྙིང་ན་དུས་སུ་བརྗེའོ། །དེ་ནས་རྡོ་རྗེ་དཀྱིལ་འཁོར་བསྟན་པ་རྡོ་རྗེ་འཁོར་ལོའི་དབུས་སུ་རྡོ་རྗེ་བྲིས་ཏེ་
ཞེས་པ་དཀྱིལ་འཁོར་དང་པོའི་རྡོ་རྗེའི་དཀྱིལ་འཁོར་གྱི་ཚུལ་བཞིན་དུ་ཐམས་ཅད་དུ་བྲིས་ལ་དེའི་དབུས་སུ་རྡོ་རྗེ་རྩེ་ལྔ་པ་བྲིས་ཏེ། དཀྱིལ་འཁོར་ཆེན་པོར་འབུམ་བཟླས་ན་འགྲུབ་པོ་ཞེས་སྨོས་པ་དེ་བཞིན་དུ་འདིར་ཡང་སྔར་བསྙེན་པ་བྱའོ། །འབུམ་བཟླས་པས་ན་རྡོ་རྗེ་འཛིན་གྱི་ཕྱག་རྒྱ་ཆེན་པོར་འགྲུབ་པར་འགྱུར་རོ། །དཀྱིལ་འཁོར་དེ་བཞིན་དུ་བྲིས་ནས་ཞེས་པ་དམ་ཚིག་གི་དཀྱིལ་འཁོར་དང་པོའི་དམ་ཚིག་གི་དཀྱིལ་འཁོར་བཞིན་དུ་བྲིས་ལ་དེར་སོ་སོ་རང་རང་གི་ཕྱག་རྒྱའམ་མཚན་མ་བཞག་སྟེ། དབུས་སུ་ནི་འཁོར་ལོ་བསྐོར་བའི་ཕྱག་རྒྱ་འཁོར་ལོ་རྩིབས་བརྒྱད་པའོ། །དེ་བཞིན་དུ་གཞན་དུ་ཡང་རང་རང་གི་ཕྱག་རྒྱ་གཞག་པར་བྱའོ། །རྡོ་རྗེའི་འཁོར་ལོ་འཇུག་པ་དག །བསྟན་དང་སྒྲུབ་པ་དེ་བཞིན་ཏེ། །ཞེས་པའོ། །ལས་ཀྱི་རྡོ་རྗེའི་འཁོར་ལོ་ནི་དཀྱིལ་འཁོར་ཏེ། ཡེ་ཤེས་ཐོབ་པར་འགྱུར་བའི་རྒྱུ། །ཞེས་བྱ་བའི་དོན་ཏོ། །དཀྱིལ་འཁོར་དེར་དང་པོ་འཇུག་པ་དང་དཀྱིལ་འཁོར་མཐོང་བར་བསྟན་པ་དང༌། དཀྱིལ་འཁོར་མཐོང་ནས་གྲུབ་པ་བསྒྲུབ་པར་བྱས་ན་རྣལ་འབྱོར་གྱི་རྟོག་པ་ཐམས་ཅད་ལས་གྲུབ་པ་འབྱུང་ངོ༌། །ཆོ་ག་གྲུབ་པར་འགྱུར་ཏེ་དེ་བས་ན། རྡོ་རྗེའི་དཀྱིལ་འཁོར་དེ་བྱས་ལ་གྲུབ་པ་རབ་འབྲིང་ལ་སོགས་པ་བསྒྲུབ་པར་བྱའོ། །དེས་འདི་སྐད་བསྟན་པ་ཡིན་ཏེ་རྡོ་རྗེ་འཁོར་ལོ་ཞེས་བྱ་བའི་དཀྱིལ་འཁོར་དུ་འཇུག་པ་ནི་རྟོག་པ་གཞན་ཐམས་ཅད་ལས་འབྱུང་བའི་གྲུབ་པ་ལ་སོགས་པའི་རྒྱུར་འགྱུར་རོ། །དེ་བཞིན་དུ་དཀྱིལ་འཁོར་དེ་མཐོང་བར་བསྟན་པ་དང་དེ་བསྒྲུབ་པར་བྱས་པ་ཡང་ཡོད། རྟོག་པ་གཞན་ལས་འབྱུང་བའི་རྒྱུར་འགྱུར་ཞེས་པའི་དོན་ཏོ། །དཀྱིལ་འཁོར་བྲི་བ་དེ་བཞིན་ཏེ། །ཞེས་པའོ། །ལས་ཀྱི་དཀྱིལ་འཁོར་དང་པོར་བྲི་བའི་ཚུལ་བཞིན་དུ་བྲིས་ནས་དཀྱིལ་འཁོར་དེར་ཞུགས་ཏེ་ཞི་བ་དང་རྒྱས་པ་ལ་སོགས་པའི་ལས་རྣམས་སློབ་དཔོན་དང་སློབ་མ་ཐམས་ཅད་ཀྱིས་བརྩོན་འགྲུས་བརྟན་པར་བྱ་སྟེ་བསྒྲུབ་པར་བྱའོ། །ཅིའི་ཕྱིར་ཞེ་ན་གསུངས་པ། ཕྱག་རྒྱ་ཤེས་པ་རབ་གྲུབ་ཕྱིར། །ཞེས་སོ། །ཞི་བ་དང་རྒྱས་པ་ལ་སོགས་པའི་ལས་བསླབས་པས་བསོད་ནམས་ཀྱི་ཚོགས་ཆེན་པོ་ལ་སོགས་པའི་ཤེས་རབ་ཏུ་འགྲུབ་པར་འགྱུར་ཏེ། དེ་བས་ན་དེའི་ཕྱིར་ལས་རྣམས་བསླབ་པར་བྱའོ། །དཀྱིལ་འཁོར་དུ་ཞུགས་ནས་མ་བསྒྲུབས་ཀྱང་ལས་ཐམས་ཅད་བྱེད་དེ་ཞེས་པ་དཀྱིལ་འཁོར་མཐོང་ནས་སྔར་བསྙེན་པ་མང་དུ་བྱས་
ན་སྒྲུབ་པ་མ་བྱས་ཀྱང་ལས་སུ་རུང་བའོ། །ཅི་འདོད་པའི་ཡོ་བྱད་ཀྱིས་སམ། རྟོག་པ་ལས་བཤད་པས་སྒྲུབས་ཤིག་ཅེས་པ་ལས་སུ་བྱ་བ་རྣམས་ཅི་བྱ་བ་ཡང་རུང་སྟེ་བདག་ཅི་དགའ་བའི་ཡོ་བྱད་ཀྱིས་སྦྱར་རོ། །གཞུང་ལས་འབྱུང་བའི་ཆོ་ག་བཞིན་དུ་བྱས་ཏེ་སྦྱར་བར་བྱའོ།། རྡོ་རྗེ་འཁོར་ལོའི་རྟོག་པའོ། །དེ་ནས་བཅོམ་ལྡན་འདས་ལ་ནམ་མཁའི་མཛོད་བྱང་ཆུབ་སེམས་དཔས་འདི་སྐད་ཅེས་གསོལ་ཏོ། །ཞེས་པ་ནམ་མཁའ་ལས་དགོངས་པ་ཐམས་ཅད་འབྱིན་པས་ནམ་མཁའ་མཛོད་ཅེས་བྱ་སྟེ་དེས་ནི་རང་གི་སྙིང་པོ་གསུངས་སོ། །མཆོད་པ་ཐམས་ཅད་ཀྱི་གནས་སུ་འགྱུར་ཞེས་པ་སྙིང་པོ་འདི་བརྗོད་པས་སུ་བརྗོད་པ་དེ་ཉིད་སེམས་ཅན་ཐམས་ཅད་ཀྱི་མཆོད་གནས་སུ་འགྱུར་བ་དང༌། སྙིང་པོ་འདི་བརྗོད་པས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་རྣམ་པ་སྣ་ཚོགས་པའི་མཆོད་པར་འགྱུར་རོ། །སྔགས་ཀྱི་དོན་ནི་ཨོཾ་ཞེས་བྱ་བ་ནི་སྔར་བཤད་པ་བཞིན་ནོ། །ག་ག་ན་སམྦྷབ་ཞེས་པ་ནི་ནམ་མཁའ་མཛོད་དུ་གྱུར་པས་དེ་ལས་ཐམས་ཅད་འབྱུང་བ་སྟེ། རང་བཞིན་བསྟན་པའོ། །བཛྲ་ཧོ་ཞེས་བྱ་བ་ནི་བོད་པའི་ཚིག་གོ །དེ་ནས་དེའི་དུས་ན་བཅོམ་ལྡན་འདས་ཀྱི་དཀྱིལ་འཁོར་ཐམས་ཅད་ལ་ཞེས་པ་སྔགས་དེ་བཀླགས་པས་ནམ་མཁའ་མཛོད་ཀྱི་དཀྱིལ་འཁོར་དུ་སངས་རྒྱས་དང་བྱང་ཆུབ་སེམས་དཔའ་བཞུགས་པ་ཐམས་ཅད་ལ་མཆོད་པ་སྣ་ཚོགས་ཐམས་ཅད་ནམ་མཁའ་ལས་འབབ་བོ། །རྡོ་རྗེ་འཁོར་ལོ་བཞིན་དུ་བྲི། །ཞེས་པ་རྡོ་རྗེ་འཁོར་ལོའི་དཀྱིལ་འཁོར་དཀྱིལ་འཁོར་མདོ་བཞིན་དུ་གོང་དུ་བཤད་པ་ལྟར་བྲིས་ལ། དབུས་སུ་ནོར་ཆེན་པོ་ཞེས་བྱ་བའི་བྱང་ཆུབ་སེམས་དཔའ་ནམ་མཁའ་མཛོད་བཞུགས་པར་བྱའོ། །ནམ་མཁའི་མཛོད་དུ་གྱུར་པས་ན་ནོར་ཆེན་པོ་ཞེས་བྱའོ། །ཕྱོགས་བཞིར་སངས་རྒྱས་བཞི་བཞུགས་པར་བྱ་སྟེ་ཤར་ཕྱོགས་སུ་མི་བསྐྱོད་པ་བཞུགས་པ་ནས་བྱང་ཕྱོགས་སུ་གདོན་མི་ཟ་བ་བཞུགས་པའི་བར་དུའོ། །རྒྱལ་བ་རྣམས་འཁོར་དང་བཅས་པར་བཞུགས་པའི་རིགས་པས་གྲྭ་བཞིར་བྱང་ཆུབ་སེམས་དཔའ་བཞི་རྣམས་མ་སྨོས་ཀྱང་བཞུགས་པར་བྱ་བ་ནི་ངེས་པ་མེད་དོ། །གཞན་ཕྱི་རིམ་ལ་སོགས་པའི་ཆོ་ག་ནི་དཀྱིལ་འཁོར་གོང་དུ་དང་པོར་སྨོས་པ་བཞིན་དུ་བྱའོ། །དེ་ནས་དེར་དང་པོ་སློབ་དཔོན་འཇུག་པར་བྱ་བའི་ཆོ་ག་བསྟན་པ། དང་པོ་སློབ་དཔོན་འཇུག་
པ་ནི། །ཞེས་མཆོད་པ་མཆོག་གི་ཕྱག་རྒྱ་འོག་ནས་འབྱུང་བ་བཅིངས་ལ་འཇུག་པར་བྱའོ། །རྡོ་རྗེ་ཐམས་ཅད་རབ་ཏུ་བྱ། །ཞེས་དཀྱིལ་འཁོར་དེར་ཞུགས་ནས་ལྷ་སོ་སོའི་རྣམ་པར་གྲོལ་བའི་ཡེ་ཤེས་ཀྱི་མཚན་མ་ཐམས་ཅད་རབ་ཏུ་འཇུག་པར་བྱ་སྟེ། དཔེར་ན་ཀ་ཞེས་བྱ་བ་ནི་ག་ག་ན་སྟེ་ཆོས་ཐམས་ཅད་ནམ་མཁའ་དང་འདྲ་བའི་དོན་ཏོ་ཞེས་བྱ་བ་ལྟ་བུའོ། །དེ་ནས་བཅོམ་ལྡན་འདས་འགྲུབ་སྟེ། །ཞེས་པ་དཀྱིལ་འཁོར་དུ་ཞུགས་ནས་སྔགས་པ་དམ་ཚིག་ཅན་དུ་འགྱུར་ཏེ། ཆོ་ག་དང་ལྡན་པས་ནམ་མཁའ་མཛོད་ཀྱི་ཕྱག་རྒྱ་ཆེན་པོ་ལ་སོགས་འགྲུབ་བོ། །དེ་བཞིན་དུ་སློབ་མ་ཡང་བཅུག་ནས་ཞེས་སློབ་དཔོན་བཞིན་དུ་འཇུག་པའི་དོན་ཏོ། །རྡོ་རྗེ་ཐམས་ཅད་ཀྱི་དམ་ཚིག་གི་སྙིང་པོ་འདི་བརྗོད་ལ་ཞེས་བྱ་བའི་སྙིང་པོ་ནི། རྡོ་རྗེ་ཐམས་ཅད་རབ་ཏུ་བྱ། །ཞེས་བྱ་བ་གོང་དུ་སྨོས་པ་ཁར་བརྗོད་པར་བྱའོ། །དེ་བརྗོད་ནས་ཕྱག་རྒྱ་རྣམ་བཞི་ཡང་སློབས་ཤིག །མཆོད་པ་ཐམས་ཅད་ཅེས་བྱ་བའི་དཀྱིལ་འཁོར་ཞེས་བྱ་བ་ནམ་མཁའ་མཛོད་ཀྱི་བྱིན་གྱི་རླབས་ཀྱིས་ནམ་མཁའ་ལས་མཆོད་པའི་ཆར་ཕབ་པའི་ཕྱིར་རོ། །དེ་ནས་ནམ་མཁའི་དཀྱིལ་འཁོར་ཏེ། །ཞེས་པ་འཕགས་ན་ནམ་མཁའ་མཛོད་ཀྱི་ནམ་མཁའ་ལ་གོང་དུ་སྨོས་པ་ལྟ་བུའོ། །དཀྱིལ་འཁོར་ཡིད་ཀྱིས་བྲིས་ལ་དེར་སློབ་དཔོན་རང་ཡང་ཞུགས་ལ་སློབ་མ་ཡང་གཞུག་པར་ཡིད་ཀྱིས་ཏེ་ཚིག་འདི་དག་བརྗོད་ཅིག །འདི་དག་ཐམས་ཅད་ནམ་མཁའ་ལྟ་བུ་སྟེ་ཞེས་པ་དངོས་པོ་འདི་དག་ཐམས་ཅད་ནི་ནམ་མཁའ་ལྟ་བུར་རང་བཞིན་སྟོང་པ་ཉིད་ལས་རྟེན་ཅིང་འབྲེལ་ཏེ་འབྱུང་བའི་དབང་གིས་གཟུགས་སྣ་ཚོགས་སུ་སྣང་བ་དེ་བཞིན་དུ་ནམ་མཁའ་ལས་མཆོད་པ་ཐམས་ཅད་ཡིད་ལ་བསམས་པའི་སྟོབས་ཀྱིས་ཐམས་ཅད་དུ་འབྱུང་བར་གྱུར་ཅིག །དེ་བཞིན་དུ་གྲུབ་པ་ཐམས་ཅད་འབྱུང་བར་གྱུར་ཅིག་ཅེས་བྱའོ། །དཀྱིལ་འཁོར་བྲིས་ནས་བཙུད་དེ་ཞེས་པ་དམ་ཚིག་གི་དཀྱིལ་འཁོར་དང་པོ་བཞིན་དུ་བྲིས་ལ་དེར་ཞུགས་ཏེ་དམ་ཚིག་འདི་བསྒོ་ཤིག །འབྱུང་བ་ཀུན་ལ་ནམ་མཁའ་ནི་འབྱུང་བ་ཆེན་པོ་ལྔའོ་ཞེས་པ་འབྱུང་བ་ཆེན་པོ་བཞི་ལས་འདོད་པའི་ཡན་ལག་ཐམས་ཅད་འབྱུང་བ་བཞིན་དུ་ནམ་མཁའ་ལས་ཀྱང་སྔགས་ཀྱི་མཐུས་འདོད་པ་ཐམས་ཅད་འབྱུང་བས་ན་ནམ་མཁའ་ལ་ཡང་འབྱུང་བ་ལྔ་པར་བརྟག་ཏོ། །དེ་ལྟར་འདོད་ནམ་མཁའ་ལས་འབྱུང་བས་ན་འདོད་པའི་མཆོད་པ་འཕེལ་ཞིང་མང་
བྲར་གྱུར་པ་འདིས་ཐམས་ཅད་རྟག་ཏུ་མཆོད་པ་གྱིས་ཤིག །མཆོད་པ་བྱ་བའི་ཚིགས་བཅད་གོང་མ་རྟག་ཏུ་ལྷོགས་ཤིག །སློབ་མ་ནམ་མཁའ་ལ་ཡིད་ཀྱིས་དཀྱིལ་འཁོར་འདིར་བཅུག་ལ་ཞེས་པ་དཀྱིལ་འཁོར་གོང་དུ་སྨོས་པའི་ཚུལ་བཞིན་དུ་སློབ་མ་རང་ཡིད་ལ་སེམས་སུ་བཅུག་ལ་དཀྱིལ་འཁོར་དེར་ཡིད་ཀྱིས་མཆོད་པ་རྣམ་པ་སྣ་ཚོགས་པ་སློབས་ཤིག །ནམ་མཁའི་དཀྱིལ་ནས་མཆོད་པ་སྣ་ཚོགས་ཀྱི་ཆར་འབབ་པར་བསམས་ལ། ནམ་མཁའི་མཆོད་པས་དེ་བཞིན་གཤེགས་པ་ཐམས་ཅད་ལ་མཆོད་དོ་ཞེས་ཀྱང་བརྗོད་ཅིང་ཉིན་རེ་དེ་ལྟར་རྟག་ཏུ་བྱས་ལ་བསྙེན་པའི་ལས་རྫོགས་པ་བྱས་ན་དངོས་པོ་གང་བསམས་པ་ཐམས་ཅད་འགྲུབ་པོ། །ནམ་མཁའ་མཛོད་ཀྱི་རྟོག་པའོ། །དེ་ནས་བཅོམ་ལྡན་འདས་ལ་འཕགས་པ་བྱམས་པ་བྱང་ཆུབ་སེམས་དཔས་འདི་སྐད་ཅེས་གསོལ་ཏོ་ཞེས་བྱམས་པས་ཀྱང་རྟོག་པ་འདིར་རང་གི་སྙིང་པོ་གསུངས་སོ། །ཇི་ལྟ་བུ་ཞིག་ཅེ་ན། གསུངས་པ། གང་གིས་བརྗོད་པ་ཙམ་གྱིས་སེམས་ཅན་ཐམས་ཅད་བྱམས་པའི་སེམས་སྐྱེ་བར་འགྱུར་རོ་ཞེས་པ་སྔགས་འདི་བརྗོད་པས་སེམས་ཅན་ཐམས་ཅད་ཀྱང་སེམས་ཅན་ཐམས་ཅད་ལ་བྱམས་པའི་སེམས་སྐྱེ་བར་འགྱུར་རོ། །སྔགས་ཀྱི་དོན་ནི་བྱམས་པ་བརྟན་པར་སེམས་ལ་གནས་པར་གྱིས་ཤིག་ཅེས་པའི་ཐ་ཚིག་གོ །དེ་ནས་དཀྱིལ་འཁོར་འབྱུང་སྟེ་ཞེས་པ་དང་པོར་བཤད་པའི་དཀྱིལ་འཁོར་ཆེན་པོ་བཞིན་དུ་བྲིས་ལ། དེའི་དབུས་སུ་བྱམས་པ་ཇི་ལྟར་གནས་པ་བཞིན་དུ་བྲིའོ། །ཕྱོགས་བཞིར་མི་བསྐྱོད་པ་ལ་སོགས་པ་སངས་རྒྱས་བཞི་ཅི་རིགས་པར་བཞུགས་པར་བྱའོ། །གྲྭ་བཞིར་རྡོ་རྗེ་སེམས་དཔའ་དང་ནམ་མཁའི་སྙིང་པོ་དང་སྤྱན་རས་གཟིགས་དང་རྡོ་རྗེ་ཁུ་ཚུར་རྣམས་བྱང་ཤར་གྱི་གྲྭ་ནས་རིམ་པ་བཞིན་དུ་དགོད་དོ། །ཕྱི་རིམ་གྱི་དཀྱིལ་འཁོར་དུ་ཡང་འཇིག་རྟེན་པའི་ལྷ་ལ་སོགས་པ་གོང་མ་བཞིན་དུ་དགོད་དོ། །དེ་ནས་གོ་ཆ་བརྟན་པའི་ཕྱག་རྒྱ་བཅིངས་ཏེ་ཞུགས་ནས་སྔགས་འདི་ཡང་བརྗོད་དོ། །དེ་ལ་གོ་ཆ་བརྟན་པའི་ཕྱག་རྒྱ་ནི་རྡོ་རྗེ་ཁུ་ཚུར་གཉིས་བཅིངས་ཏེ། མཛུབ་མོ་གཉིས་བསྒྲེང་ལ་དེས་མེ་ཏོག་བཟུང་ལ་དཀྱིལ་འཁོར་དུ་འཇུག་གོ །སྔགས་ཀྱི་དོན་ནི་རྡོ་རྗེ་ལྟར་ཅིས་ཀྱང་མི་ཚུགས་པ་བརྟན་པ་ནོས་ཤིག་ཅེས་བྱ་བའི་ཐ་ཚིག་གོ །དེ་ནས་གོ་ཆས་གོ་བསྐོན་ཏོ་ཞེས་པ་ཨོཾ་ཊུཾ་ཞེས་བྱ་བའི་སྔགས་བརྗོད་ལ། གོ་ཆའི་
ཕྱག་རྒྱ་གོང་དུ་སྨོས་པ་ཉིད་ཀྱིས་ལྟེ་བ་དང་སྙིང་ག་ལ་སོགས་པར་མདུད་པ་བཅིང་ངོ༌། །དེ་ནས་བྱམས་པའི་དཀྱིལ་འཁོར་འབྱུང་སྟེ་ཞེས་པ་རང་གི་རྣམ་པར་གྲོལ་བའི་དཀྱིལ་འཁོར་ཏེ། ཚུལ་གོང་མ་བཞིན་དུ་བྲིས་ལ་སློབ་དཔོན་དང་སློབ་མ་གཉིས་ཀ་བྱམས་པའི་ཏིང་ངེ་འཛིན་མངོན་དུ་བྱས་ལ་ཞུགས་ཤིག །དེ་ནས་སེམས་ཅན་ཐམས་ཅད་ལ་བྱམས་པ་ཚད་མེད་པ་སྒྲུབས་ཤིག །དཀྱིལ་འཁོར་དུ་བཅུག་ལ་འདི་ཞེས་བརྗོད་དོ་ཞེས་པ་དམ་ཚིག་གི་དཀྱིལ་འཁོར་གོང་མ་བཞིན་བྲིས་ལ་དེར་བཅུག་ནས་སེམས་ཅན་ཐམས་ཅད་ལ་བྱམས་པར་བྱོས་ཤིག་ཅེས་བྱ་བའི་དམ་ཚིག་འདི་སྟོན་ཅིག །རངས་སམ་ཡང་ན་ཁྲོས་ཀྱང་རུང༌། །ཞེས་པ་སེམས་ཅན་གང་ཡང་རུང་བས་མགུ་བར་བྱས་ཀྱང་སླ། ཁྲོས་པར་བྱས་ཀྱང་སླ། གང་དང་མཛའ་ཡང་རུང་སྡང་ཡང་རུང་ཐམས་ཅད་ལ་བྱམས་པ་ཆེན་པོ་སྒོམ་པར་གྱིས་ཤིག །ཅིའི་ཕྱིར་ཞེ་ན། འགྲོ་བ་ལས་གལ་ཏེ་རྒྱལ་འདོད་ན་ཞེས་བྱ་བ་ལ་སོགས་པའོ། །འགྲོ་བ་ཐམས་ཅད་ཟིལ་གྱིས་གནོན་པར་འདོད་ན་བྱམས་པ་ཆེན་པོ་བསྒོམ་པར་བྱ་སྟེ། དཔེར་ན་སངས་རྒྱས་བཅོམ་ལྡན་འདས་ཀྱིས་བདུད་རྣམ་བཞི་བཅོམ་པ་ཡང་བྱམས་པ་ཆེན་པོ་བསྒོམས་པས་སོ། །དེ་ནས་དཀྱིལ་འཁོར་དུ་བཙུད་དེ་འདི་བསླབ་པོ་ཞེས་པ་ལས་ཀྱི་དཀྱིལ་འཁོར་གོང་མ་བཞིན་དུ་བྲིས་ལ་དེར་སློབ་མ་བཙུད་ལ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་རྟག་ཏུ་ཕྱག་འཚལ་བར་བསླབ་པོ། །བྱོལ་སོང་ཐམས་ཅད་ལ་མི་འཇིགས་པ་སྦྱིན་ཞིང་བསྐྱབ་པར་བསླབ་བོ། །བྱམས་པ་བསྒོམ་སྟེ་གྲུབ་པ་ཐམས་ཅད་ཅེས་པ་བྱམས་པའི་ཏིང་ངེ་འཛིན་བསྒོམས་ནས་གྲུབ་པ་རྣམ་པ་གསུམ་ཐམས་ཅད་བདག་ཅི་འདོད་པའི་ཚོགས་བསྒྲུབ་པར་བྱའོ། །ཡིད་ཀྱིས་ཅིར་དད་པའི་ཆོ་ག་དང་ཞེས་པ་ཞི་བ་དང༌། རྒྱས་པ་ལ་སོགས་པའི་ལས་རྣམས་བདག་གར་དད་པའི་ཆོ་ག་དང་སྦྱར་ཞིང༌། བྱམས་པའི་ཏིང་ངེ་འཛིན་ཏེ་བསྒྲུབ་བོ། །བྱམས་པའི་རྟོག་པའོ། །དེ་ནས་བཅོམ་ལྡན་འདས་ཀྱི་ཞབས་ལ་རྡོ་རྗེ་རིག་པ་དམ་པ་ལ་སོགས་པས་མགོས་ཕྱག་འཚལ་ཏེ་ཞེས་པ་ཕྱི་རོལ་གྱི་རིག་པའི་རྒྱལ་པོ་དབང་ཕྱུག་ཆེན་པོ་དང༌། མཐུ་བོ་ཆེ་དང༌། ཚངས་པ་དང༌། ས་ནད་གཞོན་ནུ་དང༌། དབང་པོ་རྣམས་ཀྱིས་ཀྱང་རང་གི་སྙིང་པོ་སྨྲས་ཏེ། རིག་པ་དམ་པ་ནི་དབང་ཕྱུག་ཆེན་པོ་ལ་བྱའོ། །མཐུ་བོ་ཆེ་ནི་གཏོགས་འདོད་
བ་སུ་དེ་བ་ཞེས་བྱའོ། །འདིར་ནི་རྡོ་རྗེ་སྒྱུ་མར་བཏགས་སོ། །ཚངས་པ་ནི་ཕས་མཆོད་ཅེས་ཀྱང་བྱ་སྟེ་འདིར་ནི་རྡོ་རྗེ་མི་སྨྲ་བར་བཏགས་སོ། །ས་ནད་གཞོན་ནུ་ནི་ཀ་རྟི་ཀ་སྟེ་ལྷ་ཆེན་པོའི་སྲས་ཏེ་འདིར་ནི་རྡོ་རྗེ་དྲིལ་བུ་ར་བཏགས་སོ། །དབང་པོ་ནི་བརྒྱ་བྱིན་ཏེ་འདིར་ནི་རྡོ་རྗེ་འཐབ་ཆར་བཏགས་སོ། །དེ་ནས་རྡོ་རྗེ་རིག་པ་དམ་པས། རང་གི་སྙིང་པོ་གསུངས་པ། ཨོཾ་ནས་ཤཱུ་ལའི་བར་དུའོ། །རྡོ་རྗེ་སྒྱུ་མས་གསུངས་པ་ཨོཾ་ནས་ཕཊ་ཀྱི་བར་དུའོ། །རྡོ་རྗེ་མི་སྨྲ་བས་གསུངས་པ། ཨོཾ་ནས་སྭའི་བར་དུའོ། །རྡོ་རྗེ་དྲིལ་བུས་གསུངས་པ་ཨོཾ་ནས་ཕཊ་ཀྱི་བར་དུའོ། །རྡོ་རྗེ་འཐབ་ཆས་གསུངས་པ་ཨོཾ་ནས་ཏྲཾ་གི་བར་དུའོ། །དེ་ནས་དེ་དག་གི་དཀྱིལ་འཁོར་འབྱུང་སྟེ་ཞེས་པ་དཀྱིལ་འཁོར་ཇི་ཙམ་ནུས་པ་ཟླུམ་པོར་བྱས་ལ་ཚོན་སྣ་ལྔས་བྲིས་ཏེ། སྒོ་ཤར་ཕྱོགས་སུ་བཏོད་ལ་ཤར་དང་བྱང་གི་གྲྭ་ཨཱི་ཤ་ནའི་གནས་སུ་རྡོ་རྗེ་རིག་པ་དམ་པ་དབང་ཕྱུག་ཆེན་པོ་བྲི་སྟེ། མདོག་དཀར་པོ་ཕྱག་གཡས་པ་ན་གསལ་ཕུར་ཐོགས་པ་སྐྱིལ་མོ་ཀྲུང་ཕྱེད་བཅས་པ། རློང་སྟན་གྱི་སྟེང་ན་གནས་པ་བྲི། དཀྱིལ་འཁོར་གྱི་གྲྭ་བཞི་སྲད་བུའི་དབུས་ཞེས་བྱ་བ་ནི་དཀྱིལ་འཁོར་ཟླུམ་པོའི་བྱང་ཤར་གྱི་གྲྭའི་ནང་ལོགས་ཞེས་བྱ་བའི་དོན་ཏོ། །ཁ་ཅིག་གིས་དབང་བྱུག་ཆེན་པོ་དཀྱིལ་འཁོར་གྱི་དབུས་སུ་བཞག་ལ་ཕྱོགས་བཞིར་ལྷ་གཞན་དག་དགོད་ཅེས་ཀྱང་འཆད་དོ། །དེར་གཞན་ཡང་རིམ་གྱིས་ཐམས་ཅད་བྲིའམ་བཞག་པའམ་ཞེས་པ་ཤར་ཕྱོགས་སུ་རྡོ་རྗེ་འཐབ་ཆ་སྟེ་ཁ་དོག་དཀར་པོ་སྤྱན་གསུམ་པ་ཕྱག་གཡས་པ་ན་རྡོ་རྗེ་རྩེ་གསུམ་པ་གཡོན་པ་པུས་གོང་དུ་བསྟན་པ་སྐྱིལ་མོ་ཀྲུང་རློང་སྟན་ལ་བཞུགས་པ་བྲིའོ། །ལྷོ་ཕྱོགས་སུ་རྡོ་རྗེ་སྒྱུ་མ་བྲི་སྟེ། ཁ་དོག་ལྗང་གུ་ཕྱག་བཞི་པ་གཡས་གཅིག་ན་འཁོར་ལོ་རྩིབས་མ་ཅན་བསྣམས་ལ། གཅིག་ཆོས་འཆད་པའི་ཚུལ་མཛད། གཡོན་པ་ཡ་གཅིག་ན་ག་ད་ཞེས་བྱ་བའི་བེ་ཅོན་བསྣམས་པ་ཡ་གཅིག་བླ་གོང་དུ་བསྟན་པའི་སྐྱིལ་མོ་ཀྲུང་བཅས་ཏེ་རློང་སྟན་ལ་བཞུགས་སོ། །ནུབ་ཕྱོགས་སུ་ཚངས་པ་བྲི་སྟེ་ཁ་དོག་དམར་པོ་དབུ་གསུམ་པ་ཕྱག་བཞི་པ་གཡས་པ་ཡ་གཅིག་ན་སྔགས་སོ། །ཡ་གཅིག་ཆོས་འཆད་པ་གཡོན་པ་ཡ་གཅིག་ན་གླེགས་བམ་ཡ་གཅིག་ན་རིལ་བ་སྤྱི་བླུགས་རློང་སྟན་ལ་སྐྱིལ་མོ་ཀྲུང་དུ་བཞུགས་པར་བྲིའོ། །བྱང་ཕྱོགས་སུ་ས་ནད་གཞོན་ནུ་བྲི་སྟེ་ཁ་དོག་དམར་པོ་ཕྱག་གཡས་ན་དྲིལ་བུ་གཡོན་པ་ཆོས་འཆད་པའི་
ཚུལ་སྐྱིལ་མོ་ཀྲུང་ཕྱེད་པ་རློང་སྟན་ལ་བཞུགས་པ་སྟེ། ཀུན་ཀྱང་རི་མོར་བྲིས་པའམ་ལུགས་མ་ལ་སོགས་པའི་ཆ་ལུགས་བཞག་པའམ་ཆུང་དུ་ནི་ལྷ་སོ་སོར་བསྔོས་ཏེ། མཚན་མའི་ཐིག་ལེ་བཞག་གོ །དེ་ནས་སློབ་དཔོན་གྱིས་གསལ་ཕུར་གསུམ་པའི་ཕྱག་རྒྱ་མཐེ་བོས་མཐེའུ་ཆུད་ཐོར་ཏོ་མནན་ལ་གཞན་བསྒྲེང་པ་གཡས་པས་བཅིངས་ལ། གཡོན་པས་སློབ་མའི་ལག་ནས་བཟུང་སྟེ། སློབ་མའི་ལག་པ་གཡས་པ་ཡང་གསལ་ཕུར་གསུམ་པའི་ཕྱག་རྒྱ་བྱ་སྟེ་གཞུག་གོ །དེ་ནས་ཕྱག་རྒྱ་ཡང་བསླབ་པོ་ཞེས་པ་དཀྱིལ་འཁོར་དུ་ཞུགས་ནས་རིག་པའི་རྒྱལ་པོ་རྣམས་ཀྱི་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་རྣམས་བསླབ་པོ། །དེ་ཕྱིན་ཆད་ཐམས་ཅད་འགྲུབ་ཅིང་ཞེས་པ་དེ་ལྟར་དཀྱིལ་འཁོར་དུ་ཞུགས་ལ་ཕྱག་རྒྱ་བཟླས་ཤིང་སྔར་བསྙེན་པ་མང་དུ་བྱས་པས་གྲུབ་པ་རྣམ་གསུམ་ཐམས་ཅད་འགྲུབ་ལ་འཇིག་རྟེན་ཐམས་ཅད་དུ་རྒྱུ་བའི་རིག་འཛིན་དུ་འགྱུར་རོ། །རིག་པའི་རྒྱལ་པོའི་རྟོག་པའོ། །དེ་ནས། རྡོ་རྗེ་འཁྱིལ་པ་ལ་སོགས་པ། །ཞེས་པ་བར་སྣང་ལ་རྒྱུ་བ་རྣམས་ཀྱིས་རང་གི་སྙིང་པོ་སྨྲས་པའོ། །དེ་ལ་ཉི་མ་སྟེ་རྡོ་རྗེ་འཁྱིལ་བའི་སྙིང་པོ་སྟེ། ཨོཾ་ནས་ཕཊ་ཀྱི་བར་དུའོ། །ཟླ་བ་སྟེ་རྡོ་རྗེ་འོད་ཀྱི་སྙིང་པོ་ཡང་ཨོཾ་མ་ཧཱ་ནས་ཕཊ་ཀྱི་བར་དུའོ། །རྡོ་རྗེ་བེ་ཅོན་གྱི་སྙིང་པོ་ནི་ཨོཾ་ཀི་ལ་ནས་ཕཊ་ཀྱི་བར་དུའོ། །དེ་མན་ཅད་སྐྱ་བླེང་གི་སྙིང་པོའོ། །དེ་ནས་དེ་དག་གི་དཀྱིལ་འཁོར་འབྱུང་སྟེ་ཞེས་པ་ཚོན་སྣ་ལྔ་ལས་དཀྱིལ་འཁོར་གྲུ་བཞི་བྲིས་ལ་དེའི་དབུས་སུ་དཀྱིལ་འཁོར་གྱི་བདག་པོར་ཕྱག་ན་རྡོ་རྗེའི་ཕྱག་རྒྱ་བཞག་གོ །དེའི་ཤར་ཕྱོགས་སུ་རྡོ་རྗེ་འཁྱིལ་པ་ཁ་དོག་དམར་པོ་ལག་པ་གཉིས་ན་པདྨོ་རེ་རེ་ཐོགས་པ། ལྷོ་ན་རྡོ་རྗེ་འོད་དེ་ཁ་དོག་དཀར་པོ་ལག་ན་མེ་ཏོག་ཀུ་མུ་ད་ཐོགས་པ། ནུབ་ཕྱོགས་ན་རྡོ་རྗེ་བེ་ཅོན་ཏེ་ཁ་དོག་སེར་པོ་ལག་པ་གཡས་ན་བགྲང་ཕྲེང་གཡོན་ན་རིལ་བ་སྤྱི་བླུགས་འཛིན་པའོ། །བྱང་ཕྱོགས་ན་རྡོ་རྗེ་སྐྱ་བླེང་སྟེ་ཁ་དོག་དམར་པོ་ལག་པ་གཡས་པ་ན་དབྱུག་པ་ཐོགས་པ་སྟེ་ཁྲོ་བོ་བཞི་ཆར་ཡང་རློང་སྟན་གྱི་སྟེང་ན་སྐྱིལ་མོ་ཀྲུང་ཕྱེད་པར་གནས་སོ། །རྡོ་རྗེ་ཁྲོ་བོའི་རྟོག་པའོ། །དེ་ནས་རྡོ་རྗེ་སྲིན་པོ་ལ་སོགས་པ་ཚོགས་ཀྱི་གཙོ་བོས་ཞེས་པ་ཚོགས་ནི་ལྷ་ཆེན་པོའི་འཁོར་རྣམས་ཏེ། དེའི་གཙོ་བོའམ་དཔོན་པོ་ལྟ་བུར་དབང་བསྐུར་བའོ། །དེ་ལ་རྡོ་རྗེ་སྲིན་པོས་རང་གི་སྙིང་པོ་སྨྲས་པ། ཨོཾ་མཊ་ཞེས་པ་ནས་ཕཊ་ཅེས་བྱ་བའི་བར་དུའོ། །ནག་པོ་ཆེན་པོ་རྡོ་རྗེ་
ཕྲེང་བས་སྨྲས་པ། ཨོཾ་མཱ་ལ་ཞེས་པ་ནས་ཧཱུཾ་ཞེས་པའི་བར་དུའོ། །རྡོ་རྗེ་དབང་གིས་སྨྲས་པ། ཨོཾ་དྷ་ནུ་ཞེས་པ་ནས་སྭཱ་ཧཱ་ཞེས་པའི་བར་དུའོ། །ལྷག་མ་ནི་རྡོ་རྗེ་རྣམ་པར་རྒྱལ་བས་སྨྲས་པའོ། །དེ་ལ་རྡོ་རྗེ་སྲིན་པོ་ནི་སྐབས་འདིར་ནི་མིང་དེ་སྐད་བཏགས་སྔོན་ནི་ཆང་གིས་མྱོས་ཞེས་ཀྱང་བྱ་བ་ལ་ཏྲ་ཞེས་ཀྱང་བྱ་སྟེ་བི་སྣུའི་ཕུ་བོའོ། །དེ་གཉིས་ཀྱི་ཕ་ནི་བྲམ་ཟེ་བ་སུ་དེ་བའོ། །རྡོ་རྗེ་སྲིན་བོ་ནི་ཁ་དོག་དཀར་པོ་ལ་ཕྲག་པ་གཡས་པས་ག་ཤོལ་མདའ་འཁོར་བའོ། །རྡོ་རྗེ་ཕྲེང་བ་ནི་སྔོན་ཆད་བྱེད་ཅེས་བྱ་བ་སྟེ་མ་ཧཱ་ཀཱ་ལ་ཞེས་ཀྱང་བྱའོ། །དེའི་ཁ་དོག་ནི་ནག་པོ་ལག་བཞི་པ་མགོ་གསུམ་པ། ལག་པ་གཡས་པ་གཅིག་ན་གསད་ཕུར་གསུམ་པ། གཅིག་ན་དབྱུག་པ་གཡོན་གཅིག་ན་ཆང་སྣོད་ཀྱི་བུམ་པ་གཅིག་ན་བཟའ་བའི་ལ་ཕུག་ཆང་བུ་ཐོགས་པའོ། །རྡོ་རྗེ་དབང་ནི་སྔོན་རྒྱལ་བ་ཞེས་བྱ་སྟེ་ཀ་མ་དེ་བ་ཞེས་བྱའོ། །དེའི་ཁ་དོག་སེར་པོ་མེ་ཏོག་གི་མདའ་གཞུ་འགེངས་པའོ། །རྡོ་རྗེ་རྣམ་པར་རྒྱལ་བ་ནི་སྔོན་རྒྱལ་བ་སྐྱེད་པ་ཞེས་བྱ་སྟེ། ནནྟ་ཀེ་ཤྭ་ར་ཞེས་ཀྱང་བྱའོ། །དེའི་ཁ་དོག་དཀར་པོ་ལག་ན་པི་ཝང་ཐོགས་ཤིང་བསྒྲེང་བའོ། །གཞུ་ལྟ་བུར་དཀྱིལ་འཁོར་བྲིས་ལ་ཞེས་པ་གཞུ་བཀང་བ་ལྟ་བུའི་དཀྱིལ་འཁོར་བྲིས་ཏེ། དེའི་དབུས་སུ་རྡོ་རྗེ་རྩེ་ལྔ་པ་གཞག་གོ །དེའི་གཡས་སུ་རྡོ་རྗེ་སྲིན་བུ་དང་རྡོ་རྗེ་ཕྲེང་བའོ། །གཡོན་དུ་རྡོ་རྗེ་དབང་དང༌། རྡོ་རྗེ་རྣམ་པར་རྒྱལ་བ་དེ་ཀུན་ཀྱང་ཅི་རིགས་སུ་བརྒྱན་པ་རློང་སྟན་ལ་སྐྱིལ་མོ་ཀྲུང་ཕྱེད་པར་གནས་པར་བྱའོ། །དེ་ནས་དཀྱིལ་འཁོར་དེར་རྡོ་རྗེ་སྲིན་པོའི་ཕྱག་རྒྱ་འོག་ནས་འབྱུང་བ་བཅིངས་ཏེ། སློབ་མ་བཙུད་ལ་ཕྱག་རྒྱ་ཆེན་པོ་ལ་སོགས་པ་བསླབས་ནས་དམ་ཚིག་གི་དོན་འོག་ནས་འབྱུང་བའི་ཆོ་ག་འདི་བསླབ་པར་བྱའོ། །གང་དགེ་བ་དང་དྲིན་གཟོ་བ་ཞེས་པ་སེམས་ཅན་གང་རང་བཞིན་གྱིས་དགེ་བ་དང་ལེགས་པར་བྱས་པ་དྲན་ཞིང་དྲིན་གཟོ་བ་དང༌། སངས་རྒྱས་དང་བྱང་ཆུབ་སེམས་དཔའ་ལ་སོགས་བའི་དཀྱིལ་འཁོར་མཐོང་བ་མ་གཏོགས་པའི་སེམས་ཅན་གཞན་དཀོན་མཆོག་གསུམ་གྱི་རྟེན་འཇིག་པ་དང༌། སེམས་ཅན་མང་པོ་ལ་གནོད་ཅིང་མི་དགེ་བ་རྣམས་གཏན་འཕོ་བར་བྱའོ། །ཚོགས་ཀྱི་གཙོ་བོའི་རྟོག་པའོ། །དེ་ནས་རྡོ་རྗེ་དྲུང་ཤིང་ལ་སོགས་པའི་ཕོ་ཉས་རང་གི་སྙིང་པོ་སྨྲས་པ་ཞེས་པས་པའི་ལྷ་རྣམས་བཅོམ་ལྡན་འདས་ཀྱི་ཕོ་ཉ་མངག་གཞུག་པར་དབང་བསྐུར་བ་རྣམས་ཀྱིས་རང་གི་སྙིང་པོ་སྨྲས་ཏེ། དེ་ལ་རྡོ་རྗེ་དྲུང་ཤིང་གིས་སྨྲས་པ། ཨོཾ་
ལཾ་ག་ལི་ཧཱུཾ་ཞེས་བྱའོ། །རྡོ་རྗེ་རླུང་གིས་སྨྲས་པ་ཨོཾ་མ་ཧཱ་ཧཱུཾ་ཕཊ་ཅེས་སོ། །རྡོ་རྗེ་མེས་སྨྲས་པ། ཨོཾ་བཛྲ་ཛྭ་ལ་སྭཱ་ཧཱ་ཞེས་སོ། །ལྷག་མ་ནི་རྡོ་རྗེ་འཇིགས་པས་སྨྲས་པའོ། །དེ་ལ་རྡོ་རྗེ་དྲུང་ཤིང་ནི་སྡོམ་མཛོད་སྐྱོང་ཞེས་བྱ་བ་སྟེ་དྷ་ན་དྷ་ཞེས་ཀྱང་བྱའོ། །དེའི་ཁ་དོག་ལྗང་སྣར་གནོད་སྦྱིན་གྱི་གཟུགས་རྙིལ་བག་ཅན་ལག་ན་འབྲས་འདྲུ་བའི་གཏུན་ཤིང་ཐོགས་པའོ། །རླུང་ནི་ཁ་དོག་དཀར་པོ་ཡིད་ཀྱིས་སྐེམ་བག་ཅན་སྟོད་གཡོགས་ཡ་བ་སྐོར་དུ་ཕྱར་བའོ། །མེ་ནི་ཁ་དོག་དམར་པོ་བྲམ་ཟེའི་གཟུགས་གསུས་ལྡིར་པོ་ལག་པ་གཡས་ན་བགྲང་ཕྲེང་གཡོན་གུནྡྷེ་ཐོགས་པ་སྐྲ་དམར་པོའོ། །རྡོ་རྗེ་འཇིགས་པ་ནི་སྔོན་ཀུ་བེ་ར་སྟེ། གནོད་སྦྱིན་གྱི་གཟུགས་རྙིལ་བག་ཅན་ཁ་དོག་སེར་པོ་ལག་པ་གཡས་ན་རལ་གྲི་གཡོན་ན་ནེའུ་ལེ་འཛིན་པ་སྟེ་དེ་དག་ཀུན་ཀྱང་རྒྱན་གྱིས་ཅི་རིགས་པར་བརྒྱན་པའོ། །ཤིང་རྟ་དང་འདྲ་བའི་དཀྱིལ་འཁོར་བྲི་སྟེ་ཞེས་པ་ལ་སོག་ཀ་རིང་པོར་བྲིས་ལ་དབུས་སུ་རྡོ་རྗེ་རྩེ་ལྔ་པ་བཞག་སྟེ། མཐའ་བཞིར་ཕོ་ཉ་བཞི་རིམ་བཞིན་བཀོད་ལ་དཀྱིལ་འཁོར་གྱི་སྒོ་ཤར་ཕྱོགས་སུ་བསྟན་ཏེ། འདྲུ་ཤིང་གི་ཕྱག་རྒྱ་འོག་ནས་འབྱུང་བ་བཅིངས་ལ་དེ་ནས་སློབ་མ་ལ་འདི་བསླབ་བོ། །མི་དགེ་བའི་སེམས་ཅན་ཐམས་ཅད་ལ་ཞེས་པ་དཀོན་མཆོག་གསུམ་ལ་གནོད་པ་དང༌། སེམས་ཅན་མང་པོ་ལ་གནོད་པ་ལ་ཐབས་སུ་སྦྱར་བ་འདི་ནི་སློབ་མའི་དམ་ཚིག་གོ །དེ་ནས་ཕྱག་རྒྱ་བཞི་བསླབ་པོ། །ཕོ་ཉའི་ཚོགས་ཀྱི་རྟོག་པའོ། །དེ་ནས་བཅོམ་ལྡན་འདས་ལ་རྡོ་རྗེ་ཀྱོ་བ་ཏང་ལ་སོགས་པ་བྲན་རྣམས་ཀྱིས་ཞེས་པ་འོག་ན་གནས་པའི་ལྷ་བྲན་དུ་དབང་སྐུར་བ་རྣམས་ཀྱིས་ཀྱང་རང་གི་སྙིང་པོ་སྨྲས་ཏེ། དེ་རྡོ་རྗེ་ཀྱོ་བ་ཏང་གིས་སྨྲས་པ། ཨོཾ་བ་ར་ཧ་ཞེས་པ་ནས་ཕཊ་ཀྱི་བར་དུའོ། །རྡོ་རྗེ་ནག་པོས་སྨྲས་པ། ཨོཾ་སརྦ་ནས་ཕཊ་ཀྱི་བར་དུའོ། །རྡོ་རྗེ་རྣམ་འདྲེན་གྱིས་སྨྲས་པ། ཨོཾ་བིག་དེ་ནས་ཕཊ་ཀྱི་བར་དུའོ། །ལྷག་མ་ནི་རྡོ་རྗེ་གླུས་སྨྲས་པའོ། །རྡོ་རྗེ་ཀྱོ་བ་ཏང་ནི་སྔོན་ཕག་ཅེས་བྱ་བ་སྟེ། ན་ར་ཡ་ནས་སྤྲུལ་ཏེ་ཐམས་ཅད་དེས་བསྟན་པ་སྐད་བྱ་བ་ཁ་དོག་ནག་པོ་ཕག་མགོ་གྱེན་དུ་བསྟན་པ་ལག་པ་སྟ་ཟུར་ལ་བརྟེན་པའོ། །རྡོ་རྗེ་ནག་པོ་ནི་སྔོན་གཤིན་རྗེ་ལ་བྱ་སྟེ། ཁ་དོག་ནག་པོ་སྣར་འཇིགས་སུ་རུང་བའི་གཟུགས་ལག་པ་གཉིས་ཀས་དབྱུག་པ་གཟར་བ་མ་ཧེ་ལ་ཞོན་པའོ། །རྡོ་རྗེ་རྣམ་འདྲེན་ནི་སྔོན་སའི་སྤྱི་བོས་ཏེ། ཁ་དོག་དཀར་པོ་གླང་སྣ་ཅན་བ་ལང་གི་མགོ་བོ་ལག་ན་ལ་ཕུག་ཐོགས་པའོ། །རྡོ་རྗེ་གླུ་ནི་བ་རུ་ན་སྟེ། ཁ་དོག་དཀར་པོ་སྤྲུལ་
མགོ་ལྔས་བསྐྱབས་པ་ལ་ལག་པ་གཡོན་པ་ན་ཞགས་པ་ཐོགས་པའོ། །གྲུ་གསུམ་བྲིས་ལ་ཞེས་པ་དབུས་སུ་རྡོ་རྗེ་རྩེ་ལྔ་པ་བཞག་སྟེ། བྲན་རྣམས་ཀྱི་མགོ་མཉམ་དུ་བསྐོར་བའི་དཀྱིལ་འཁོར་དེར་མངོན་པའི་ཕྱག་རྒྱ་འོག་ནས་འབྱུང་བ་བཅིངས་ཏེ། ཞུགས་ལ་གར་གྱི་མཆོད་པས་དཀྱིལ་འཁོར་དེར་མཆོད་དོ། །བྲན་གྱི་རྟོག་པའོ། །དེ་ནས་ཐབས་ཀྱིས་ཀུ་ཅོའི་སྒྲ་བཏོན་ཏེ་ཞེས་པ་ལྷ་ཆེན་པོ་ལ་སོགས་པའི་བཙུན་མོ་རྣམས་ཀྱིས་ཀྱང་དད་ཅིང་སྤྲོ་བའི་ཕྱིར་ཀླག་ཅོར་བཏོན་ཏེ་རང་གི་སྙིང་པོ་ཕུལ་ལོ། །མ་ཞེས་བྱ་བ་ནི་འཇིག་རྟེན་ཐམས་ཅད་ཀྱི་མ་དང་འདྲ་བར་མཆོད་ཅིང་བཀུར་བའི་གནས་པས་ནམ་ཞེས་བྱ་སྟེ། ཐམས་ཅད་ཅེས་བྱ་བའི་སྒྲས་ནི་འོག་མ་ཡན་ཆད་ཀུན་ལ་ཡང་བྱའོ། །བུད་མེད་ཐམས་ཅད་ཀྱང་ཁ་དོག་དང་རྒྱན་ནི་རང་རང་གི་ཁྱིམ་ཐབ་བཞིན་ནོ། །དེ་ནས་རྡོ་རྗེ་རྒྱལ་པོ་དག་གིས་སྨྲས་པ་ཞེས་པ་རྡོ་རྗེ་ཁྲོ་བོ་མེ་ལ་སོགས་པས་རང་གི་སྙིང་པོ་སྨྲས་ཏེ། དེ་ལ་རྡོ་རྗེ་ཁྲོ་བོ་མེའི་དབང་ཕྱུག་གི་བཙུན་མོས་སྨྲས་པ། ཨོཾ་བཛྲ་ཀྲོ་དྷ་ར་ལི་ཧཱུཾ་ཕཊ་ཅེས་སོ། །གཏོགས་འདོད་ཀྱི་བཙུན་མོ་རྡོ་རྗེ་གསེར་མས་སྨྲས་པ། ཨོཾ་ཙཀྲ་ཚིནད་ཧཱུཾ་ཕཊ་ཅེས་སོ། །ཚངས་པའི་བཙུན་མོ་རྡོ་རྗེ་བཞིས་སྨྲས་པ། ཨོཾ་ཤནྟི་ཧི་ཞེས་སོ། །དབང་པོའི་བཙུན་མོ་རྡོ་རྗེ་ཁུ་ཚུར་གྱིས་སྨྲས་པ། ཨོཾ་བཛྲ་ནས་ཕཊ་ཀྱི་བར་དུའོ། །ས་ནད་གཞོན་ནུའི་བཙུན་མོ་རྡོ་རྗེ་གཞོན་ནུས་སྨྲས་པ་ནི་ལྷག་མ་རྣམས་སོ། །དེ་ནས་ས་དེ་དག་གི་དཀྱིལ་འཁོར་གྲུ་བཞི་ཞེས་པ་དཀྱིལ་འཁོར་གྲྭ་བཞི་སྒོ་བཞི་པ་ཐིག་བཞིས་ཆ་དགུར་བགོས་པའི་དབུས་སུ་རྡོ་རྗེ་ཁྲོ་བོ་མེའོ། །སྒོ་ལོགས་ཀྱི་ཆར་རེ་རེར་གསེར་མ་ལ་སོགས་པ་བཞི་བཞག་གོ །གྲྭ་བཞིར་ཕོ་ཉ་མ་བཞག་སྟེ་བཞིའོ་གནས་འབྱུང་བ་དང་སྦྱར་རོ། །དམ་ཚིག་གི་ཆོ་ག་ནི་དེ་བཞིན་ཞེས་པ་དཀྱིལ་འཁོར་དུ་འཇུག་པ་ཆོ་ག་དང༌། དམ་ཚིག་གསུང་བ་ནི་རིག་པའི་རྒྱལ་པོ་བཞིན་ནོ། །རིག་པའི་རྒྱལ་མོ་རྣམས་ཀྱི་རྟོག་པའོ། །དེ་ནས་རྡོ་རྗེ་ཁྲོ་མོ་རྣམས་ཀྱིས་རང་གི་སྙིང་པོ་སྨྲས་ཏེ། བར་སྣང་ལ་རྒྱུ་བ་ཉི་མ་ལ་སོགས་པའི་བཙུན་མོ་རྣམས་ཀྱིས་རང་རང་གི་སྙིང་པོ་སྨྲས་པའོ།། དེ་ལ་ཉི་མའི་བཙུན་མོ་རྡོ་རྗེ་བདུད་རྩི་མས་སྨྲས་པ། ཨོཾ་ཨ་མྲྀ་ཏེ་ཧཱུཾ་ཕཊ་ཅེས་སོ། །ཟླ་བའི་བཙུན་མོ་རྡོ་རྗེ་སྡུག་གུ་མས་སྨྲས་པ། ཨོཾ་ནས་ཕཊ་ཀྱི་བར་དུའོ། །རྡོ་རྗེ་བེ་ཅོན་གྱི་བཙུན་མོ་རྡོ་རྗེ་བེ་ཅོན་མས་སྨྲས་པ། ཨོཾ་དནད་ནས་ཕཊ་ཀྱི་བར་དུའོ། །རྡོ་རྗེ་སྐྱ་བླེང་གི་བཙུན་མོ་རྡོ་རྗེ་སྐེད་ཆིངས་ཞེས་པས་སྨྲས་པ་ལྷག་མ་
རྣམས་སོ། །དཀྱིལ་འཁོར་ཆ་བརྒྱད་པ་བྲི་སྟེ་ཞེས་པ་སྲད་བུབ་ཞིས་དཀྱིལ་འཁོར་གྲུ་བཞི་པའི་ནང་དབུས་སུ་རྡོ་རྗེ་བཞུགས་པ་མ་གཏོགས་པ་རེའུ་བརྒྱད་དུ་བསྒོས་ལ་སྒོ་ལོགས་ཀྱི་ཆ་རྣམས་ཀྱི་ཁྲོ་མོ་རྣམས་རིམ་བཞིན་དུ་དངར་རོ། །གྲྭ་བཞིར་ནི་རྡོ་རྗེ་ཕོ་ཉ་མོ་བཞི་ཆོ་ག་འོག་ནས་འབྱུང་བ་བཞིན་དགོད་དོ། །འཇུག་པ་དང་ཕྱག་རྒྱ་བཅིང་བ་ལ་སོགས་པ་ཁྲོ་བོའི་དཀྱིལ་འཁོར་བཞིན་དུ་བྱའོ། །ཁྲོ་མོ་རྣམས་ཀྱི་རྟོག་པའོ། །དེ་ནས་ཚོགས་མ་མོ་རྣམས་ཀྱིས་སྨྲས་པ་ཞེས་པ་འཁོར་བུད་མེད་རྣམས་ཀྱིས་རང་གི་སྙིང་པོ་སྨྲས་ཏེ། དེ་ལ་རྡོ་རྗེ་སྲིན་པོའི་ཆུང་མ་རྡོ་རྗེ་གསོད་མ་མོས་སྨྲས་པ། ཨོཾ་ནས་ཧཱུཾ་གི་བར་དུའོ། །རྡོ་རྗེ་ཕྲེང་བའི་ཆུང་མ་རྡོ་རྗེ་ཟ་བ་མོས་སྨྲས་པ། ཨོཾ་ནས་ཧོའི་བར་དུའོ། །རྡོ་རྗེ་དབང་གི་ཆུ་རྡོ་རྗེ་སྒོ་བ་མོས་སྨྲས་པ། ཨོཾ་ནས་ཧཱུཾ་གི་བར་དུའོ། །རྡོ་རྗེ་རྣམ་པར་རྒྱལ་བའི་ཆུང་མ་རྡོ་རྗེ་དབང་མོས་སྨྲས་པ་ལྷག་མ་རྣམས་སོ། །སྒོ་བཞི་པ་དབུས་སུ་སེ་རལ་སྲད་བུ་བྱ་སྟེ་ཞེས་པ་དཀྱིལ་འཁོར་ཟླུམ་པོ་ལ་ཐིག་བཞིས་རྒྱ་གྲམ་དུ་བཏབ་སྟེ། དབུས་ཀྱི་རེའུར་བྲམ་ཟེའི་སེ་རལ་ཐག་རིང་པོར་བྲིའམ་དངོས་སུ་གཞག་པར་བྱའོ། །རིམ་པ་བཞི་བྲའོ་ཞེས་བྱ་བ་ནི་ཚོགས་ཀྱི་བདག་མོ་བཞིའི་གནས་རེའུ་བཞིའང་བྲི་བར་བྱའོ། །སེ་རལ་སྲད་བུ་ནི་ཚངས་པའི་མཚན་མ་སྟེ་དཀྱིལ་འཁོར་གྱི་བདག་པོ་ཚངས་པ་ཡིན་པར་བསྟན་ཏོ། །ཡང་ན་དཀྱིལ་འཁོར་གྱི་བདག་པོ་གནོད་སྦྱིན་གྱི་བྱ་བར་སྟོན་པ། གཞན་ཡང་ཕྱི་ཡི་དཀྱིལ་འཁོར་ནི། །ཞེས་བྱ་བ་དག་གོ །དེའི་དབུས་སུ་གནོད་སྦྱིན་གྱི་གདོང་བྲི་ཞེས་པ་དཀྱིལ་འཁོར་གྱི་དབུས་སུ་གནོད་སྦྱིན་འཇིགས་སུ་རུང་བའི་གདོང་བྲིའོ། །ཕྱོགས་བཞིར་ཚོགས་ཀྱི་བདག་མོ་རྣམས་གཞག་གོ །སྒོ་བཞིར་ནི་མངག་གཞུག་མ་འོག་ནས་འབྱུང་བ་རྣམས་བཞག་སྟེ་མངག་གཞུག་མ་དེ་རྣམས་ཀྱི་སྤྱིའི་སྙིང་པོ་ནི་བྷི་ཙི་རི་ཊི་བྷྱོ་བྷྱོ་ཞེས་བྱ་སྟེ་འདིས་དགོད་པར་བྱའོ། །དེ་ལྟར་རིག་པའི་རྒྱལ་མོ་ལ་སོགས་པའི་དཀྱིལ་འཁོར་ཐམས་ཅད་དུ་གྱིས་ཤིག་ཅེས་པ་རྣམས་ཀྱི་དཀྱིལ་འཁོར་གོང་མ་དག་ཏུ་ཡང་སྒོའམ་གྲྭ་གར་རིགས་པར་ཕོ་ཉ་མོ་རྣམས་གཞག་པར་བསྟན་པའོ། །འདིས་ཐང་ཅིག་བཟླས་པས་ཐམས་ཅད་ཁུགས་སོ་ཞེས་པ་མངག་གཞུག་མའི་སྙིང་པོ་གོང་དུ་སྨོས་པ་སྟེ་སེམས་ཅན་གང་དགུག་པ་ཐམས་ཅད་དེས་ཁུགས་སོ། །དེ་ནས་དཀྱིལ་འཁོར་དེ་ཉིད་དུ་འཇུག་པའི་ཆོ་ག་བསྟན་པ། དེ་ནས་གདོང་གཡོགས་ནས་ཞེས་བྱ་བ་དག་གོ །དེ་བཞིན་དུ་ཕྱག་བྱས་
ལ་ལག་པ་གར་བྱེད་ཅིང་སྐྱིལ་མོ་ཀྲུང་བཅས་པས་རྣུར་ཞིང་དཀྱིལ་འཁོར་དུ་ཞུགས་ལ་དེ་ནས་དབབ་པའི་ཕྱག་རྒྱ་བཅིང་བ་ལ་སོགས་པའི་ཆོ་གས་དབབ་པར་བགྱིའོ། །དེ་ནས་དམ་ཚིག་སྦྱིན་པའི་སྔགས་སརྦ་ན་མཱ་ར་ཡ་ཞེས་བྱ་བ་ལ་སོགས་པ་ཟློས་སུ་ཆུག་ཅིག །དེ་ནས་དེ་དེ་བཞིན་དུ་དམ་ཚིག་སྦྱིན་ནོ་ཞེས་པ་གོང་མའི་དམ་ཚིག་གི་སྔགས་ལས་འབྱུང་བ་བཞིན་དུ་སྲུང་དུ་ཆུག་ཅིག་ཅེས་པའི་དོན་ཏོ། །དེ་ནས་གླུ་གར་ལ་སོགས་པའི་དཀྱིལ་འཁོར་གྱི་ལྷ་རྣམས་ལ་མཆོད་ནས་ཡང་དྲིལ་བུའི་ཕྱག་རྒྱ་བཅིངས་ལ་དྲིལ་བུ་དཀྲོལ་ཞིང་སློབ་མ་ལ་དབབ་པར་བྱའོ། །དེ་ནས་སུ་དེ་ལྟར་སྒོམ་པ་ཐམས་ཅད་ཀྱི་འོག་ནས་འབྱུང་བ་རྣམས་འཐོབ་པོ་ཞེས་སློབ་མ་ལ་བསྒོ་ཤིག །རྡོ་རྗེ་ཚོགས་མ་མོའི་རྟོག་པའོ། །དེ་ནས་ཕོ་ཉ་མོ་རྣམས་ཀྱིས་སྨྲས་པ་ཞེས་པ་ས་ལ་རྒྱུ་བའི་མ་རྣམས་ཀྱིས་རང་གི་སྙིང་པོ་སྨྲས་ཏེ། རྡོ་རྗེ་བྲུས་ཤིང་གི་ཆུང་མ་རྡོ་རྗེ་ཕོ་ཉ་མོས་སྨྲས་པ་ཨོཾ་བྷྱོ་ཞེས་སོ། །རྡོ་རྗེ་རླུང་གི་ཆུང་མ་རྡོ་རྗེ་མགྱོགས་མས་སྨྲས་པ། ཨོཾ་ཀི་ལི་ནས་ཏྲེའི་བར་དུའོ། །རྡོ་རྗེ་མེའི་ཆུང་མ་རྡོ་རྗེ་འབར་མས་སྨྲས་པ། ཨོཾ་སུ་ཏ་ནེ་ཐ་ཞེས་སོ། །རྡོ་རྗེ་འཇིགས་མའི་ཆུང་མ་རྡོ་རྗེ་ཐག་ཏུ་མས་སྨྲས་པ། ལྷག་མ་རྣམས་སོ། །དཀྱིལ་འཁོར་གྲྭ་ལྔ་པ་བྲིས་ཏེ་ཞེས་པ་དཀྱིལ་འཁོར་གྲྭ་བཞི་པར་བྱས་པའི་ཕུག་ལོགས་ཀྱི་ངོས་སུ་ཡང་གྲྭ་གཅིག་བཏོད་དོ། །དབུས་ཀྱི་དེའི་དབུས་སུ་རྡོ་རྗེ་རྩེ་ལྔ་པ་གཞག་གོ །གྲྭ་ལྷག་མ་བཞིར་ཕོ་ཉ་མོ་རྣམས་དགོད་དོ། །འཇུག་པ་ལ་སོགས་པའི་ཆོ་ག་ནི་དཀྱིལ་འཁོར་གོང་དུ་སྨོས་པ་བཞིན་དུ་བྱའོ། །ཕོ་ཉ་མའི་རྟོག་པའོ། །དེ་ནས་རྡོ་རྗེ་བྲན་མོས་འདི་སྐད་སྨྲས་སོ་ཞེས་པ་འོག་ན་གནས་པའི་མ་རྣམས་ཀྱིས་རང་གི་སྙིང་པོ་སྨྲས་ཏེ། དེ་ལ་རྡོ་རྗེ་ཀྱོ་བ་ཏང་གི་ཆུང་མ་རྡོ་རྗེ་གདོང་གིས་སྨྲས་པ། ཨོཾ་ནས་ཨ་བེ་ཤ་ཧཱུཾ་ཕཊ་ཀྱི་བར་དུའོ། །རྡོ་རྗེ་ནག་པོའི་ཆུང་མ་རྡོ་རྗེ་ནག་མོས་སྨྲས་པ། ཨོཾ་ཀི་ལི་ནས་ཧཱུཾ་ཕཊ་ཀྱི་བར་དུའོ། །རྡོ་རྗེ་རྣམ་འདྲེན་གྱི་ཆུང་མ་རྡོ་རྗེ་ཉགས་མས་སྨྲས་པ། ཨོཾ་པུ་ཏ་ནེ་ནས་སྭཱ་ཧཱའི་བར་དུའོ། རྡོ་རྗེ་ཀླུའི་ཆུང་མ་རྡོ་རྗེ་ཆུ་སྲིན་མས་སྨྲས་པ། ལྷག་མ་རྣམས་སོ། །བྲན་མོའི་རྟོག་པའོ། །དེ་ནས་བཅོམ་ལྡན་འདས་དེ་བཞིན་གཤེགས་པས་ཕྱག་ན་རྡོ་རྗེ་ལ་འདི་སྐད་ཅེས་གསུངས་སོ་ཞེས་པ་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ཀྱིས་སོ་སོའི་སྙིང་པོ་སྨྲས་ནས་དེ་རྣམས་ཀྱི་དོན་ཞེས་པ་རྣམས་སྔར་
བཤད་པའི་རིག་པ་ལས་མ་གླེངས་པ་རྣམས་ཕྱི་མའི་རྒྱུད་འདིར་ཤོད་ཅིག་ཅེས་རྣམ་པར་སྣང་མཛད་ཀྱིས་ཕྱག་ན་རྡོ་རྗེ་ལ་བསྐུལ་བའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་འཛིན་པ་ཞེས་པ་དེ་བཞིན་གཤེགས་པ་ལྔ་རྣམས་ཀྱི་ལུས་དང་ངག་དང་ཡིད་ཀྱི་གསང་བ་འཛིན་པ་སྟེ་དེ་བཞིན་གཤེགས་པ་རྣམས་ཀྱི་ལུས་ཀྱི་སྤྱོད་པ་སྣ་ཚོགས་དང༌། ངག་གིས་ཆོས་བཤད་པ་སྣ་ཚོགས་དང༌། ཡིད་ཀྱིས་ཆོས་རྟོགས་པ་སྣ་ཚོགས་རྣམས་འོག་མ་པ་རྣམས་ཀྱི་སྤྱོད་ཡུལ་དུ་མི་འགྱུར་བས་ན་གསང་བའོ། །ཡང་གཅིག་ཏུ་ན་དེ་དག་དཀྱིལ་འཁོར་དུ་མ་ཞུགས་པ་རྣམས་ལ་མི་བསྟན་པས་ན་གསང་བ་སྟེ། དེ་དག་ཕྱག་ན་རྡོ་རྗེས་འཛིན་པའི་མཐུ་ཡོད་པའོ། །ཕྱི་མའི་རྒྱུད་ཅེས་བྱ་བ་ནི་སྔར་དོན་བསྟན་པ་འདི་རྣམས་ཕྱིས་གཏན་ལ་འབེབས་ཤིང་འཆད་པའོ། །ཕྱི་མའི་རྒྱུད་དེ་ཡང་ཅི་འདྲ་བ་ཞིག་ཅེ་ན། གང་གི་སེམས་ཅན་ཐམས་ཅད་དམ་པ་གྲུབ་ནས་ཞེས་བྱ་བའོ། །རྒྱུ་གང་གིས་ཕྱག་རྒྱ་ཆེན་པོ་ལ་སོགས་པའི་མཆོག་གྲུབ་ནས་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཐོབ་པར་འགྱུར་བའི་རྒྱུད་དེ་ཤོད་ཅིག་ཅེས་བྱ་བའི་ཐ་ཚིག་གོ །འདི་རྣམས་བརྩོན་འགྲུས་ཀྱིས་འདུལ་ཏེ་ཞེས་པ་འདུལ་བར་བྱ་བའི་སེམས་ཅན་འདི་རྣམས་སློབ་དཔོན་གྱིས་བརྩོན་འགྲུས་ཆེན་པོ་བརྩམས་ནས་འདུལ་བར་འགྱུར་གྱིས་དེ་བས་ན་ཆོས་ཤོད་ཅིག་ཅེས་པའི་དོན་ཏོ། །འདུལ་བྱའི་སེམས་ཅན་ཡང་ཇི་ལྟ་བུ་དག་ཅེ་ན་དད་དང་མི་ལྡན་པ་ཞེས་པ་དག་གོ །དཀོན་མཆོག་གསུམ་ལ་མ་དང་པ་དང་མི་དགེ་བ་བཅུ་ལ་སོགས་པའི་སྡིག་བྱེད་པ་དང༌། ཤེས་བཞིན་དུ་བརྫུན་དུ་སྨྲ་བ་དང༌། ཆོས་ངན་པ་ལ་ཞེན་པའི་ལེ་ལོ་དང༌། བྱང་ཆུབ་སེམས་དཔའི་སྤྱོད་པ་ཡན་ལག་སྦྱིན་པ་ལ་སོགས་པའམ་དཀའ་ཐུབ་བརྟུལ་ཞུགས་དཀའ་བར་སྤྱོད་པ་མི་བཟོད་པ་དང༌། དགེ་བའི་ཕྱོགས་ལ་མི་བརྩོན་པའི་སྙོམ་ལས་ཅན་དང༌། བྱང་ཆུབ་ཀྱི་སེམས་དང་སེམས་ཅན་སྨིན་པར་བྱ་བ་དང་གྲོལ་བར་བྱ་བ་ལ་ཆགས་པ་མེད་པ་དེ་ལྟ་བུའི་འདོད་ཆགས་དང་བྲལ་བས་འདུལ་བའི་སེམས་ཅན་དེ་དག་ལ་དེ་བཞིན་གཤེགས་པའི་མཐུས་བཏང་སྟེ་ཕྱི་མའི་རྒྱུད་ཤོད་ཅིག་ཅེས་བསྟན་པའོ། །རྟག་ཏུ་ཆགས་པ་ཞེས་བྱ་བ་ནི་དུས་ཐམས་ཅད་དུ་འཁོར་བ་ལ་ཞེན་པའོ། །མི་དགོས་པ་ཀུན་བྱེད་ཀྱང་ཞེས་པ་ཁྱིམ་པའི་ཕྱོགས་རང་གི་དོན་ཞིང་རྨེད་ཚོང་བྱེད་པ་ལ་སོགས་པ་དང༌། རབ་ཏུ་བྱུང་བ་ཡང་
འབྲེལ་པ་གཞན་གྱི་དོན་བྱེད་པ་དང་བརྩོན་འགྲུས་ཆུང་བ་དང༌། དཀའ་ཐུབ་དང་བརྟུལ་ཞུགས་དཀའ་བར་བྱེད་པ་མེད་པས་འགྲུབ་པའི་ཐབས་ཤོད་ཅིག་ཅེས་པའོ། །ཕྱོགས་ཕྱོགས་སུ་ཡང་འགྲོ་མི་ནུས་ན་ཞེས་པ་རང་གི་ཡུལ་ལ་སོགས་པ་བཏང་སྟེ། ཡུལ་ཕྱོགས་ཉེ་བ་གུད་དུ་ཡང་འགྲོ་མི་ནུས་ན་སངས་རྒྱས་ཀྱི་ཞིང་གཞན་དུ་སྔགས་སྒྲུབ་པ་འགྲོ་བའམ། རིག་འཛིན་གྱི་གནས་གྲུབ་པའི་ས་བགྲོད་དཀའ་བ་དག་ཏུ་འགྲོ་མི་ནུས་ཞེས་པའི་དོན་ཏོ། །རིག་འཛིན་ནི་འདིའི་སྐབས་སུ་སྔགས་པ་ལ་བྱའོ། །དེ་ནས་ཕྱི་མའི་རྒྱུད་ལ་ཅི་དང་ཅི་བཤད་པའི་རིག་པ་ཕྱག་ན་རྡོ་རྗེས་བཅོམ་ལྡན་འདས་ལ་ཞུས་པ། དེ་བཞིན་གཤེགས་པ་ག་ལས་བྱུང༌། །ཞེས་བྱ་བ་དག་གོ །དེ་ཉིད་དེ་དག་གསང་བ་ཡང༌། །ཐམས་ཅད་བདག་ལ་བཤད་པའི་རིགས། །ཞེས་པ་དེ་ཉིད་ནི་གོང་དུ་སྨོས་པ་དྲིས་པའི་ཚིག་རྣམས་སོ། །དེ་དག་ཀྱང་སྣོད་མ་ཡིན་པས་རིགས་པར་མི་ནུས་པས་ན་གསང་བའོ། །དེ་དག་ཐམས་ཅད་བདག་ལ་བཤད་པར་གསོལ། །ཞེས་པའི་དོན་ཏོ། །དེ་ལྟར་ཕྱག་ན་རྡོ་རྗེས་ཞུས་ནས་དེ་རྣམས་ཀྱི་ལན་ཡང་དེ་བཞིན་གཤེགས་པ་རྣམས་ཀྱིས་ཕྱག་ན་རྡོ་རྗེ་ལ་བྱིན་གྱིས་བརླབས་ནས་ཕྱག་ན་རྡོ་རྗེ་ཉིད་ཀྱིས་དྲིས་པའི་ལན་རྣམས་གསུངས་པ། དེ་ནས་དེ་བཞིན་གཤེགས་པ་འབྱུང་བ་བསྟན་པ་ཞེས་སོ། །སེམས་པ་ནི་སེམས་པ་སྟེ་སེམས་ཞེས་པའི་དོན་ཏོ། །འཁོར་བ་ཐོག་མ་མེད་པའི་ཕྱིར་ན་སེམས་ནི་ཐོག་མ་མེད་པའོ། །བསོད་ནམས་དང་ཡེ་ཤེས་ཀྱི་རྒྱུ་འདྲ་བ་མི་གནས་པའི་མྱ་ངན་ལས་འདས་པའི་སྒོ་ནས་འཁོར་བའི་མཐའི་བར་དུ་རྒྱུན་མི་འཆད་པས་ན་ཐ་མ་མེད་པའོ། །གལ་ཏེ་སེམས་འདི་ཐོག་མ་དང་ཐ་མ་མེད་ན་ཅིའི་ཕྱིར་སྐྱེ་བ་དང་འཇིག་པ་རྣམ་པར་བཞག་ཅེས་པ་ལ་གསུངས་པ། ནམ་མཁའ་སྐྱེ་བའི་མཚན་ཉིད་དོ། །ཞེས་སོ། །ཇི་ལྟར་ཞེ་ན་མདོ་སྡེ་པའི་ཚུལ་ལྟར་ནམ་མཁའ་ནི་རང་བཞིན་མེད་མོད་ཀྱི་འོན་ཀྱང་སྐྱེ་བ་དང་འཇིག་པ་འཇིག་རྟེན་གྱི་ཐ་སྙད་དུ་སྤྱོད་དེ། ཁད་པ་ཆོམ་ལ་ཤིང་ལྗོན་པ་སྙོལ་ཏེ་ནམ་མཁར་བྱོས་ཤིག་ཅེས་བྱ་བ་ལྟ་བུའོ། །གཞན་ཡང་རྩིག་པ་བརྩིགས་ལ་ནམ་མཁའ་མེད་པར་བྱོས་ཞེའམ། འདིར་ཁང་པ་བརྩིགས་ལ་ནམ་མཁའ་ཆོད་ཅིག་ཅེས་བྱ་བ་ལྟ་བུ་སྟེ། ནམ་མཁའ་སྐྱེ་བའི་མཚན་ཉིད་བླ་ཐབས་སུ་བརྗོད་དེ། གཟུགས་ལ་སོགས་པ་སྣང་བའི་དབང་པོ་ཞེས་བརྗོད་དེ། དེ་བཞིན་
དུ་ནམ་མཁའ་སྐྱེ་བའི་མཚན་ཉིད་ནི་སེམས་པ་ཡིན་ཏེ། དེ་ཉིད་ཀུན་དུ་བཟང་པོ་སྟེ་སངས་རྒྱས་ཀྱི་ཞིང་བསམ་གྱིས་མི་ཁྱབ་པ་ལ་སོགས་པ་ཤིན་ཏུ་མཛེས་པ་རྣམས་སེམས་དེ་ཉིད་ལ་སྣང་བའི་ཕྱིར་རོ། །ཀུན་དུ་བཟང་པོ་སྣང་བ་འབའ་ཞིག་མ་ཡིན་ཏེ་ཐམས་ཅད་ཀྱི་བདག་ཉིད་ཀྱང་ཡིན་ཏེ་སེམས་དེ་ཉིད་ཀྱང་ཡིན་ཏེ་སེམས་དེ་ཉིད་སེམས་ཅན་ཐམས་ཅད་ཀྱི་ངོ་བོར་སྣང་བའི་ཕྱིར་རོ། །སེམས་དེ་ཉིད་བྱང་ཆུབ་ཀྱི་སེམས་ཀུན་གྱིས་འདོད་པར་བྱ་བ་ཡིན་པས་འདོད་པའོ། །དེ་ཉིད་འགྲོ་བ་ཀུན་གྱི་བདག་པོ་སྟེ་འཇིག་རྟེན་ཐམས་ཅད་ཀྱི་གཙོ་བོར་གྱུར་པའི་ཕྱིར་རོ། །དེ་ལྟ་བུར་གྱུར་པ་དེ་སུ་ཞེ་ན་སེམས་གང་ཡིན་པ་ཞེའོ། །སེམས་དེ་སུ་ཞེ་ན་སྨྲས་པ་སེམས་ཅན་གྱི་ཞེས་པ་སྟེ། སེམས་ཅན་ཀུན་གྱི་སེམས་གོང་དུ་སྨོས་པ་ལྟ་བུའི་མཚན་ཉིད་དོ་ཞེས་བཤད་པ་ཡིན་ནོ། །ཅིའི་ཕྱིར་ཞེ་ན། བསྟན་པས་སེམས་པ་ཞེས་བྱའོ་ཞེས་བསྟན་ཏོ། །ཅི་རྒྱུ་གཞན་དག་གིས་ཀྱང་བསྟན་པར་འགྱུར་རམ་ཞེ་ན། གཞན་གྱིས་མ་ཡིན་ཏེ་སྙོམས་ཐུབ་པས་ན་ཞེས་སོ། །དེའི་དོན་འདི་ལྟ་སྟེ་གཟུང་བ་དང་འཛིན་པའི་འཁྲུག་པས་བསྐྱོད་མི་ནུས་པས་ན་སེམས་དེ་ཉིད་བརྟན་པའོ། །ཅིའི་ཕྱིར་ཞེ་ན། སེམས་རྩེ་གཅིག་ཏུ་ཐུབ་པས་ན་དངོས་པོ་མ་ནོར་བའི་ཏིང་ངེ་འཛིན་ཏོ། །ཏིང་ངེ་འཛིན་ལས་མི་གཡོ་བ་དེ་ནི་བརྟན་པའོ། །དེ་ལ་གོང་ནས་གོང་དུ་བསྒོམས་པས་ན་ངེས་པར་གྱུར་ཏེ་གཏན་ལ་ཕབ་ཅེས་པའི་དོན་ཏོ། །སེམས་བརྟན་ཞིང་ངེས་པར་གྱུར་པས་སེམས་དེ་ཉིད་རྡོ་རྗེ་ཉིད་དུ་གྱུར་ཏོ། །དེ་ལ་འབའ་ཞིག་ཀླན་ཀ་ཚོལ་བའི་སྐབས་འདི་ལྟ་བུར་འགྱུར་ཞེས་སྨྲས་པ། དེ་ལ་སེམས་གཟུགས་མེད་པ་ལ། །ཞེས་བྱ་བ་དག་གོ །ལན་སྨྲས་པ། ཇི་ལྟར་རྣམ་པར་ཤེས་པ་ལས། །ཞེས་བྱ་བ་དག་གོ །མཚམས་སྦྱོར་བའི་རྣམ་པར་ཤེས་པ་མའི་མངལ་དུ་འཇུག་པའི་ཚེ་ཕའམ་མ་སྡུག་ཅིང་ཆགས་པ་དང༌། མངལ་གྱི་གནས་དེ་ཉིད་བདེ་བའི་ཉམས་སུ་ཚོར་བ་དག་ལ་སེམས་རྩེ་གཅིག་ཏུ་གྱུར་པས་སེམས་གཟུགས་མེད་པ་དེ་ཉིད་ལས་སེམས་ཅན་གཟུགས་དང་ལྡན་པ་སྐྱེའོ། །ཡང་དཔེ་གཞན་བསྟན་པ་ཡང་ཇི་ལྟར་ནམ་མཁའ་ལ་གནས་པའི་ཀླུ་རྣམས་ཞེས་བྱ་བ་དག་གོ །ཀླུའི་སེམས་གཟུགས་མེད་པ་ལས་གློག་དང་གནམ་ལྕགས་གཟུགས་ཅན་འབྱུང་བ་བཞིན་ཞེས་བྱ་བའི་དོན་ཏོ། །དེ་ལྟར་ངེས་པས་ན་རྡོ་རྗེ་ཉིད་དུ་གྱུར་ཞེས་པ་སེམས་བརྟན་པ་ཉིད་དོན་མ་ནོར་བར་ཡང་དང་ཡང་དུ་བསྒོམས་ཏེ་ངེས་པས་ན་རྡོ་རྗེའི་རང་བཞིན་དུ་གྱུར་ཏོ། །དེ་
ལྟར་སེམས་དེ་རྡོ་རྗེ་ཉིད་དུ་གྱུར་པ་སེམས་དཔས་བྱིན་གྱིས་བརླབས་པས་རྡོ་རྗེ་སེམས་དཔར་གྱུར་ཏོ་ཞེས་བརྟན་པ་སེམས་དཔར་བྱིན་གྱིས་བརླབས་སྦྱོར་བས་རྡོ་རྗེ་སེམས་དཔར་ཡང་དུ་གྱུར་ཏོ་ཞེས་སོ། །རྡོ་རྗེ་ཉིད་བརྟན་པའི་བྱིན་གྱི་རླབས་ཀྱིས་ན་རྡོ་རྗེ་སེམས་དཔའ་ཉིད་ཀྱི་སྐུ་གཟུགས་སུ་གྱུར་པར་མོས་པར་བྱ་ཞེས་པའི་དོན་ཏོ། །དེ་ཉིད་རབ་ཏུ་བསྒོམས་ན་བཅོམ་ལྡན་འདས་རྡོ་རྗེ་སེམས་དཔའ་ཉིད་དུ་གྱུར་ཏོ། །དེ་ལ་གོང་དུ་སེམས་དཔའི་བྱིན་གྱི་རླབས་ཀྱི་སྦྱོར་བ་ཞེས་བཤད་པ་དེ་ཉིད་ཇི་ལྟར་སྦྱར་ཞེ་ན་གསུངས་པ། ཐམས་ཅད་བདག་ཉིད་སེམས་དཔའ་ལོ། །ཞེས་བྱ་བ་དག་གོ།། སེམས་དཔའ་ཞེས་བྱ་བ་ནི་སེམས་ཀྱི་རང་བཞིན་ཏེ། དངོས་པོ་ཐམས་ཅད་ཀྱི་བདག་ཉིད་ཡིན་ནོ་ཞེས་བཅོམ་ལྡན་འདས་ཀྱིས་གསུངས་ཏེ་དེ་བས་ན་བདག་གི་རང་བཞིན་ལ་ཡང་སེམས་དཔའ་དེ། གནས་པས་ན་ཇི་ལྟར་རྡོ་རྗེ་སེམས་དཔའི་རང་བཞིན་པ་དེ་ལྟར་བདག་ཀྱང་སེམས་དཔའི་རང་བེ་ཞིན་གྱི་བྱིན་གྱིས་བརླབས་པས་རྡོ་རྗེ་སེམས་དཔའོ་ཞེས་ང་རྒྱལ་བསྐྱེད་ཅིག །ལོ་ཞེས་བྱ་བའི་ཚིག་ནི་གཞན་གྱི་བསམ་པ་སྟོན་པ་སྟེ་བདག་གིས་ནི་རྟོགས་མོད་ཀྱི། བཅོམ་ལྡན་འདས་ཀྱིས་དེ་སྐད་གསུངས་པའི་དོན་ཏོ། །དེ་ཉིད་བཅོམ་ལྡན་འདས་སེམས་དཔའ་སྟེ་ཞེས་པ་ཐམས་ཅད་ཀྱི་བདག་ཉིད་ཀྱི་རང་བཞིན་དེ་ཉིད་བཅོམ་ལྡན་འདས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་རང་བཞིན་ཏེ། དེ་ཉིད་རྡོ་རྗེ་སེམས་དཔའམ་རྒྱལ་བ་སངས་རྒྱས་བཅོམ་ལྡན་འདས་ཉིད་དོ། །རང་སེམས་སོ་སོར་རྟོགས་པས་ན། །སངས་རྒྱས་བྱང་ཆུབ་དེ་ཉིད་དོ། །ཞེས་པ་རང་གི་སེམས་ཕྱིན་ཅི་མ་ལོག་པར་རྟོགས་པ་ན་སངས་རྒྱས་ཀྱི་མཁྱེན་པ་སྟེ་སེམས་དཔའ་དེས་ཀྱང་རང་བཞིན་མ་ནོར་བར་རྟོགས་པའི་ཕྱིར་རོ། །དེ་དག་ནི་དེ་བཞིན་གཤེགས་པ་ག་ལས་བྱུང་བའི་ལན་ནོ། །ཕྱག་ན་རྡོ་རྗེ་ག་ལས་སྐྱེས་པའི་ལན་དེ་ཉིད་ཕྱག་ན་རྡོ་རྗེ་སྟེ་ཞེས་བྱ་བ་དག་གོ །དེ་འབའ་ཞིག་ཀྱང་མ་ཡིན་ཏེ། སྤྱན་རས་གཟིགས་ལ་སོགས་པ་བྱང་ཆུབ་སེམས་དཔའ་གཞན་ཡང་དེ་ཉིད་དོ་ཞེས་བསྟན་པ་འཇིག་རྟེན་དབང་པོ་ཞེས་བྱ་བ་དག་གོ །རིགས་བཞི་རྣམས་ཀྱང་དེ་ཉིད་དོ། །ཞེས་བསྟན་པ། སངས་རྒྱས་རིགས་ཀྱང་དེ་ཉིད་དོ། །ཞེས་བྱ་བ་དག་གོ །ཁམས་གསུམ་ཉིད་ཅེས་པ་ཁམས་གསུམ་རྣམ་པར་ཤེས་པ་ཙམ་ཞེས་གསུངས་པས་འདོད་པ་དང་གཟུགས་དང་གཟུགས་མེད་པའི་ཁམས་
ཀྱང་གུད་ན་མེད་དོ། །ས་པའི་འཇིག་རྟེན་དང༌། བར་སྣང་གི་འཇིག་རྟེན་དང༌། མཐོ་རིས་ཀྱི་འཇིག་རྟེན་ཞེས་བྱ་བ་འང་འདི་ཉིད་དོ། །དེ་ཉིད་མཛེས་བྱས་སྤེལ་བ་པོ། །ཞེས་པ་སེམས་དཔའ་དེ་ཉིད་ལེགས་པར་བྱས་པའི་འབྲས་བུ་མཐོ་རིས་དང༌། འཇིག་རྟེན་ལས་འདས་པའི་ས་དག་འཕེལ་བར་བྱེད་པའོ། །སེམས་ཅན་ཀུན་གྱི་མེས་པོའོ། །ཞེས་པ་སེམས་ཅན་ནི་སངས་རྒྱས་དང་བྱང་ཆུབ་སེམས་དཔའ་ཀུན་ལ་བྱའོ། །དེ་ཀུན་གྱི་དང་པོའི་རྩ་བ་ཡིན་པས་མེས་པོའོ། །དེ་ཉིད་འབྱུང་བའི་གནས་ཡིན་ཏེ། །ཞེས་པ་འབྱུང་བ་ཆེན་པོ་བཞི་རྣམས་ཀྱི་རྒྱུ་ཞེས་པའི་དོན་ཏོ། །འབྱུང་བ་ཆེ་རྣམས་དེ་ཉིད་དོ། །ཞེས་པ་འབྱུང་བ་ཆེན་པོ་བཞི་རྣམས་ཀྱི་རང་བཞིན་ཡང་དེ་ཉིད་དོ། །དེ་ཉིད་སྐྱེ་འགྲོའི་མགོན་པོ་སྟེ། །ཞེས་པ་སེམས་ཅན་ཐམས་ཅད་དེས་སྐྱོང་བའི་ཕྱིར་རོ། །གནས་དང་སྐྱེ་འགྲོ་ཐམས་ཅད་ཅེས་པ་རི་ལ་སོགས་པ་གནས་པའི་དངོས་པོ་དང༌། གཡོ་ཞིང་འགུལ་བའི་དངོས་པོ་ཐམས་ཅད་ཀྱང་དེ་ཉིད་དོ། །དེ་ཡན་ཆད་བྲིས་པ་དང་པོ་གསུམ་གྱི་ལམ་སྟེ་སོ་སོར་ཅི་རིགས་པར་སྦྱར་རོ། །དེ་ཁོ་ན་ཆེན་པོ་ཞེས་བྱ་བའི་བར་དུ་བྱའོ་ཞེས་པ་སེམས་དཔའི་རང་བཞིན་མ་ནོར་བ་ཅེས་པ་བཤད་པའི་ལེའུ་བྱ་བའི་དོན་ཏོ། །སྙིང་པོའི་ཁྱད་པར་ནི་གསང་བ་དང་ཏིང་ངེ་འཛིན་ཞེས་བྱའོ་ཞེས་པ་རང་རང་གི་རྣམ་པར་གྲོལ་བའི་དོན་ཚིག་ཏུ་བརྗོད་པ་རྣམས་ལ་གསང་བ་ཞེས་བྱ་སྟེ། དེའི་དོན་ཀུན་གྱིས་ཤེས་པར་མི་ནུས་པ་དང༌། སྣོད་མ་ཡིན་པ་རྣམས་ལ་མི་བསྟན་པའི་ཕྱིར་རོ། །དེའི་དོན་ཡིད་ལ་འཛིན་པ་ནི་ཏིང་ངེ་འཛིན་ཞེས་བྱའོ། །གཞན་ལ་ཕན་པའི་ཕྱིར་དེ་ཉིད་ཚིག་ཏུ་བརྗོད་པ་དང༌། ཡིད་ལ་བསྒོམས་པ་ནི་སྙིང་པོའི་བརྗོད་པ་སྟེ། དེ་བརྗོད་པས་ཡིད་ལ་བསམས་པའི་དོན་འགྲུབ་པའི་ཕྱིར་སྙིང་པོའོ། །དེ་ནས་ཕྱག་རྒྱའི་ཁྱད་པར་ནི། །ཞེས་པ་ལུས་དང་ངག་དང་སེམས་རྡོ་རྗེའི་རབ་ཏུ་སྦྱོར་བ་ལས་ཕྱག་རྒྱ་རྣམ་བཞི་འབྱུང་བར་བསྒྲགས་སོ། །དེ་ལ་རྡོ་རྗེའི་ལུས་ཞེས་བྱ་བ་ནི་ཡེ་ཤེས་ཀྱིས་བྱིན་གྱིས་བརླབས་པའི་ལུས་གཞན་གྱིས་མི་ཚུགས་ཤིང་གཞན་ལ་འཇིགས་པར་བྱེད་པའོ། །དེ་བཞིན་དུ་ངག་དང་སེམས་ཀྱང་སྦྱར་རོ། །ཅིའི་ཕྱིར་ཕྱག་རྒྱ་ཞེས་བྱ་ཞེ་ན་གསུངས་པ། ཇི་ལྟར་ཕྱག་རྒྱ་མཐོང་བས་ན། །ཞེས་བྱ་བ་དག་གོ །དཔེར་ན་རིགས་པའི་མཐུ་དང་ལྡན་པའི་རྒྱལ་པོའི་ཕྱག་རྒྱ་ནི་གཙོ་བོ་དྲ་མ་རྣམས་ཀྱང་མི་གཅོག་ན་འོག་མ་རྣམས་ལྟ་ཅི་སྨོས། དེ་བཞིན་དུ་དམ་ཚིག་
དང་ལྡན་པའི་ཆོས་ཀྱི་རྒྱལ་པོའི་ཕྱག་རྒྱ་བཅོམ་ལྡན་འདས་ཉིད་ཀྱང་མི་འདའ་ན་གཞན་ལྟ་ཅི་སྨོས། ཕྱག་རྒྱ་ཆེན་པོའི་མཚན་ཉིད་བསྟན་པ། ལུས་དང་ངག་སེམས་རྡོ་རྗེ་ཡིས། །ཞེས་བྱ་བ་དག་གོ །ལྷའི་ལུས་ཀྱི་ཚུལ་མངོན་དུ་དམིགས་ལ་ངག་གི་མཚན་མ་ལྕེ་ལ་རང་གི་ཕྱག་རྒྱ་གཞག་པ་དང༌། སྙིང་གར་ཟླ་བ་དཀྱིལ་འཁོར་ལ་རང་གི་སེམས་ཀྱི་ཕྱག་རྒྱ་གཞག་ལ་རང་གང་ལ་དད་པའི་ལྷ་ཉིད་དུ་ང་རྒྱལ་བསྐྱེད་པ་ནི་ཕྱག་རྒྱ་ཆེན་པོའོ། །ལུས་དང་ངག་སེམས་རྡོ་རྗེ་ཡིས། །ཞེས་པ་དམ་ཚིག་དང་ཆོས་དང་ལས་ཀྱི་ཕྱག་རྒྱ་གསུམ་བཅིང་བ་ན་ཡང་ཕྱག་རྒྱ་ཆེན་པོའི་སྦྱོར་བ་རྫོགས་པར་བྱ་ཞེས་པའི་དོན་དོ། །སོར་བསྣོལ་བརྟན་པ་དམ་ཚིག་སྟེ། །ཞེས་བྱ་བ་དམ་ཚིག་གི་ཕྱག་རྒྱ་ཐམས་ཅད་ནི་སོར་མོ་བསྣོལ་ཏེ་རྡོ་རྗེ་བཅིང་བ་དམ་དུ་བྱས་པ་ལས་འབྱུང་ཞེས་པའི་དོན་ཏོ། །སེམས་ལས་སུ་ནི་ཤེ་པ་ལས། །ཞེས་པ་སེམས་ལས་རང་གི་རྣམ་པར་གྲོལ་བའི་ཤེས་པ་འབྱུང་ངོ༌། །ཤེས་པ་ལས་རྣམ་པར་གྲོལ་བའི་དོན་ཚིག་བརྗོད་པ་འབྱུང་ངོ༌། །ལས་ཀྱི་ཕྱག་རྒྱ་གཉིས་ཕྱེ་བ། །ཞེས་པ་ལས་ཀྱི་ཕྱག་རྒྱ་ཐམས་ཅད་ནི་རྡོ་རྗེ་བཅིངས་པའི་ཁུ་ཚུར་སོ་སོར་ཕྲལ་བ་ལས་འབྱུང་ངོ་ཞེས་པའི་དོན་ཏོ། །དམ་ཚིག་རྩ་བ་དེ་རྣམས་ཏེ། །ཞེས་པ་ཕྱག་རྒྱ་བཞི་པོ་དག་ནི་དམ་ཚིག་ཐམས་ཅད་ཀྱི་རྒྱུ་ཞེས་པའི་ཐ་ཚིག་གོ །རྩ་བ་བཅིངས་པ་མཆོག་གི་རྒྱུ། །ཞེས་པ་དམ་ཚིག་གི་རྩ་བ་ཕྱག་རྒྱ་བཞི་བཅིངས་པ་ནི་སངས་རྒྱས་དང་བྱང་ཆུབ་སེམས་དཔའ་མཆོག་རྣམས་ཀྱི་རྒྱུ་ཡིན་ནོ། །གང་གིས་ཐམས་ཅད་ལུས་བརྟན་པས། །ཞེས་བྱ་བ་ཕྱག་རྒྱ་བཞི་པོ་དེས་ལྷའི་བདག་ཉིད་དུ་བསྒྱུར་བའི་ལུས་ནི་ཤིན་ཏུ་རྫོགས་པ་བརྟན་པར་འགྲུབ་པའི་ཕྱིར་ན་ཕྱག་རྒྱ་ཞེས་བྱའོ། །གང་གིས་ཐམས་ཅད་རྒྱས་བཏབ་པ། །ཞེས་པ་གཙོ་བོ་གང་གིས་དངོས་པོ་གང་རྒྱས་བཏབ་པ་དེ་ནི་ཆུད་མི་ཟ་བར་སྦས་པ་ཡིན་ནོ། །དེ་བཞིན་དུ་ཕྱག་རྒྱ་བཞིས་རྣལ་འབྱོར་བྱས་པའི་སྔགས་པ་ལྷའི་སྐུ་ལུས་ཀྱི་ཕྱག་རྒྱ་འཆང་བས་ན་གཞན་ཟིལ་གྱིས་གནོན་ཅིང་མྱུར་དུ་འགྲུབ་པར་འགྱུར་རོ། །གང་མཐོང་བས་ན་སངས་རྒྱས་དང༌། །ཞེས་པ་ཕྱག་རྒྱ་རྣམ་བཞི་བཅིངས་པ་མཐོང་ན་ལྷས་བྱིན་གྱིས་བརླབས་པའི་མཚན་མ་མཐོང་བས་ལྷ་ཉིད་མཐོང་བར་འགྱུར་རོ། །དམ་ཚིག་ཉམས་པས་གཟིར་བས་ན། །ཞེས་པ་འཕགས་པ་རྣམས་དམ་ཚིག་གིས་བསྐུལ་བས་ན་ཕྱག་རྒྱ་བཅིངས་པའི་དོན་དེ་ལས་མི་འདའ་ཞིང་གྲུབ་པ་ཡང་མྱུ་རྡུ་སྟེར་ཞེས་པའི་དོན་ཏོ། །ཕྱག་རྒྱ་
དེའི་ཁྱད་པར་ནི་དོན་དམ་པའི་ཁོ་ན་ཞེས་པ་དོན་དམ་པའི་མཚན་མ་མི་སླུ་བའི་ཕྱིར་རོ། །དེ་ལ་སྔགས་ཀྱི་ཁྱད་པར་ནི་འདི་ལྟ་སྟེ་ཞེས་པ་སྔགས་ཀྱི་རང་བཞིན་ངག་གི་སྒྲ་ཙམ་སྟེ། སྐྲ་དེས་རྣམ་པར་གྲོལ་བའི་དོན་སྣ་ཚོགས་སུ་སྤྲོས་པ་མེད་པར་སྟོན་པའོ། །དེ་བརྗོད་པས་དོན་འགྲུབ་པར་ཇི་ལྟར་འགྱུར་ཞེ་ན། སངས་རྒྱས་བཀའ་ཡིས་འགྲུབ་པ་དང༌། །ཞེས་བྱ་བ་དག་གོ །སངས་རྒྱས་ཀྱི་བཀའ་ནི་བདེན་པ་དང་དཀའ་ཐུབ་ལ་སོགས་པའི་ཡོན་ཏན་དང་ལྡན་པའི་ཕྱིར། དེ་གསུངས་པའི་ཚིག་གིས་དགོས་པའི་དོན་རྣམས་འགྲུབ་པར་འགྱུར་རོ། །སངས་རྒྱས་ནི་ཉེ་བར་བསྟན་པ་ཡིན་ནོ། །གཞན་ཡང་བདེན་པ་དང་དཀའ་ཐུབ་དུ་ལྡན་པས་སྨྲས་པ་ཀུན་དེ་བཞིན་ནོ། །གྲུབ་པ་དེ་ཡང་ཚིག་སྨྲས་སོ་ཅོག་གིས་འགྲུབ་པ་ཞིག་ཡིན་ནམ་ཞེན་མ་ཡིན་ཏེ། ཆོས་ཀྱི་ཆིག་གིས་སྔགས་པ་སྟེ། །ཞེས་སོ། །སྟོང་པ་ཉིད་དང་མཚན་མ་མེད་པ་ལ་སོགས་པ་རང་རང་གི་རྣམ་པར་གྲོལ་བའི་ཆོས་ཀྱི་ཚིག་སྔགས་པས་འགྲུབ་པར་འགྱུར་ཏེ་དེ་བས་ན་སྔགས་ཞེས་བྱའོ། །མ་རིག་པ་ནི་མེད་པར་བྱེད། །ཅེས་པ་རིག་པས་མ་རིག་པའི་མུན་པ་བསལ་ལ་ཆོས་ཇི་ལྟ་བ་བཞིན་དུ་རིག་པ་ཐོབ་པར་བྱེད་པ་དང༌། རིག་པའི་ཤེས་པ་ཐོབ་པས་ཕྱི་རོལ་གྱི་དོན་གྱི་ཤེས་བྱ་རྣམས་མ་ནོར་བར་རྟོགས་པའི་ཕྱིར་རིག་པའོ། །རབ་ཏུ་བྱ་བ་གཉིས་པའོ་ཞེས་པ་གོང་དུ་དེ་ཁོ་ན་ཆེན་པོ་ཞེས་བྱ་བ་དང་བོར་སྨོས་ནས། དེ་ལ་ལྟོས་ནས་གཉིས་པར་འགྱུར་ཏོ། །དེ་ནས་ཕྱག་རྒྱ་བཅིང་བ་རབ་ཏུ་བྱ་བ་བཤད་དོ་ཞེས་པ་བཅོམ་ལྡན་འདས་བླ་ན་མེད་པའི་ཕྱག་རྒྱ་ཐམས་ཅད་ཀྱི་ཡེ་ཤེས་བྱ་བ་ཕྱག་རྒྱ་ཆེན་པོ་ལ་སོགས་པ་རྣམ་པ་བཞི་མཁྱེན་པའི་ཡེ་ཤེས་དང་ལྡན་པ་ཕྱག་ན་རྡོ་རྗེས་གསུངས་པའི་དོན་སྟོན་ཏོ། །བླ་ན་མེད་ཅེས་བྱ་བ་ནི་ཕྱག་རྒྱ་རྣམ་བཞིར་ཐམས་ཅད་འདུལ་པས་དེའི་གོང་ན་ཕྱག་རྒྱ་གཞན་མེད་ཅེས་པའི་དོན་ཏོ། །དེ་ལ་ཕྱག་རྒྱ་ཆེན་པོ་ནི་དེ་ཉིད་བསྐུལ་བའི་སྙིང་པོས་བཅིང་ངོ་ཞེས་པ་ལྷའི་ལུས་ཀྱི་གསང་བའི་ཕྱག་རྒྱ་བཅིང་བ་ནི་ས་མ་ཡ་སྟྭཾ་ཞེས་བྱ་བའི་སྔགས་འོག་ནས་འབྱུང་བ་བརྗོད་ལ་ཕྱག་རྒྱ་ཆེན་པོའི་རྣལ་འབྱོར་བྱའོ། །དེ་ཉིད་བསྐུལ་ཞེས་བྱ་བ་ནི་ལྷའི་རང་བཞིན་ཉིད་བརྗོད་པ་སྟེ། ཁྱོད་ནི་དམ་ཚིག་གི་རང་བཞིན་ནོ་ཞེས་བསྐུལ་བས་ན་སྔགས་དེ་ཡང་ཕྱག་རྒྱ་བཅིང་པའི་སྣོད་དུ་གྱུར་པ་ཡིན་ནོ། །དམ་ཚིག་དང་ལས་ཀྱི་ཕྱག་རྒྱ་བཅིང་བ་ནི་ཞེས་པ་རྡོ་རྗེ་བཅིང་བ་དང་དྲལ་བ་སྔར་བྱས་ནས་གདོད་དམ་ཚིག་དང་ལས་ཀྱི་ཕྱག་རྒྱ་བཅིང་ཞེས་པའི་དོན་ཏོ། །དམ་ཚིག་ཆེན་
པོ་དང་ཡང་དག་བའི་དེ་ཉིད་བསྐུལ་བའི་སྙིང་པོས་ཞེས་པ་ཕྱག་རྒྱ་ཆེན་པོ་ལ་སོགས་པ་བཅིང་བའི་ཚེ། །དང་པོ་ཉིད་དུ་ས་མ་ཡ་སྟྭཾ་ཞེས་བྱ་བའི་སྔོན་ལོགས་སུ་སམ་ཡ་སྟྭཾ་ཞེས་བྱ་བ་འོག་ནས་འབྱུང་བ་བརྗོད་ལ་གདོད་ཕྱག་རྒྱ་བཅིང་ངོ༌། །དམ་ཚིག་ཆེན་པོ་ཞེས་བྱ་བ་ནི་ལྷ་ཉིད་ཀྱི་རང་བཞིན་བརྗོད་པ་སྟེ་རབ་ཏུ་རྟོགས་པའི་རང་བཞིན་ཡེ་ཤེས་ཆེན་པོ་ཞེས་བྱ་བའི་ཐ་ཚིག་གོ །ས་མ་ཡ་ཧོ། །སུ་ར་ཏ་སྟྭཾ་ཞེས་བྱ་བ་ནི་རང་བཞིན་བརྗོད་པ་སྟེ། ཁྱོད་ནི་བདེ་བ་ཆེན་པོའི་དམ་ཚིག་གི་རང་བཞིན་ནོ། །རྡོ་རྗེ་ཁྲོ་བོས་ཕྱག་རྒྱ་ཐམས་ཅད་རང་གིས་བཅིང་ངམ་གཞན་འཆིང་དུ་གཞུག་ཅེས་པ་དེ་ཁོ་ན་བསྐུལ་བ་དང་རྡོ་རྗེ་བཅིང་བ་དང་དབབ་པ་ལ་སོགས་པ་བྱས་པའི་རྗེས་ལ་རྡོ་རྗེ་ཧཱུཾ་ཀ་རའི་རྣལ་འབྱོར་བྱས་ནས་ཧཱུཾ་ཞེས་པའི་སྙིང་པོ་ལན་ཅིག་བརྗོད་དེ་ཕྱག་རྒྱ་ཆེན་པོ་ལ་སོགས་པ་བཅིང་ངོ༌། །དེས་ནི་བགེགས་ལ་སོགས་པ་ཟིལ་གྱིས་མནན་པར་འགྱུར་རོ། །འདིས་ནི་ཕྱག་རྒྱ་ཐམས་ཅད་དགུག་ཅིང་དབང་དུ་བྱེད་དོ་ཞེས་རྡོ་རྗེ་བཅིང་བ་དང་དྲལ་བ་འདིས་དམ་ཚིག་གི་ལས་ཀྱི་ཕྱག་རྒྱལ་ལ་སོགས་པ་ཀུན་ལས་སུ་རུང་བ་ཞིང་བྱིན་ཅན་དུ་འགྱུར་ཞེས་བའི་དོན་ཏོ། །དེ་ནས་རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིང་ངོ་ཞེས་བྱ་བའི་སྙིང་པོ་འདི་བརྗོད་ནས་དེར་གཞུག་ཅེས་བྱ་བའི་དོན་ཏོ། །དེ་ནས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བ་ནི་ཞེས་པ་ལུས་དང་ངག་དང་སེམས་ཐམས་ཅད་བསྡུས་པའི་དོན་དུ་བསྟན་པའི་ཕྱིར་རོ། །འོན་ཏེ་དེ་ལྟར་བྱས་ན་ཡང་ཞེས་པ་ཕྱག་རྒྱ་བཅིང་བའི་རིམ་པ་གོང་དུ་སྨོས་པ་ལྟར་བྱས་ནས་དང་པོ་ཉིད་དུ་ས་མ་ཡ་སྟྭཾ་ཞེས་བྱ་བ་སྨོས་ལ་དེ་ནས་ཕྱག་རྒྱ་ཐམས་ཅད་རིགས་བཞི་ཆར་གྱི་བཅིང་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་ལུས་དང་ངག་དང་སེམས་ཀྱི་ཕྱག་རྒྱའི་སྙིང་པོའོ་ཞེས་པ་སངས་རྒྱས་ལྔ་ཐམས་ཅད་ཀྱི་ལུས་དང་ངག་དང་སེམས་གཅིག་ཏུ་འདུས་པའི་སྙིང་པོ་ནི་ས་མ་ཡ་སྟྭཾ་ཞེས་བྱ་བ་སྟེ། འབྲས་བུ་མེད་པར་མི་འགྱུར་ཞིང་སངས་རྒྱས་ལ་སོགས་པ་ཡང་དེ་ལས་འགལ་ཞིང་འདའ་འབར་མི་མཛད་པས་ན་སྟོང་བཟླས་པས་ཕྱག་རྒྱ་ཐམས་ཅད་བཅིང་བར་འགྱུར་རོ། །དམ་ཚིག་ཆེན་པོའི་ཕྱག་རྒྱ་ལན་ཅིག་བཟླས་ན་ཞེས་པ་ས་མ་ཡ་ཧོ། །སུ་ར་ཏ་སྟྭཾ་ཞེས་བྱ་བའི་སྙིང་པོ་གོང་དུ་སྨོས་པ་ལན་ཅིག་བཟླས་ན་ཀུན་ལ་འགྲུབ་པར་འགྱུར་ཞེས་བྱ་བའི་ཐ་ཚིག་གོ །དེ་ནས་ཕྱག་རྒྱ་བཅིང་བར་འབྱུང་སྟེ་ཞེས་པ་རྡོ་རྗེ་ཐལ་མོ་ནི་གཡས་པ་གོང་དུ་གཏད་དེ་ཚིག་དང་པོ་བསྣོལ་ལ་སྦྱར་བའོ། །དེ་ཉིད་ལས་སོར་མོ་
དྲུག་ཏུ་གཏུགས་ཏེ་བསྣོལ་ལ་བསྡམས་པ་ནི་རྡོ་རྗེ་བཅིངས་བའོ། །དེ་ཉིད་ལས་ཞེས་པ་རྡོ་རྗེ་བཅིངས་པ་ཉིད་ལས་སོ། །དེ་ཉིད་ལས་མ་ཐེ་བོ་གཉིས་ཞེས་པ་རྡོ་རྗེ་དབབ་བའི་ཕྱག་རྒྱ་ལས་མཛུབ་མོ་གཉིས་མ་བསྣོལ་བར་སོར་མོའི་དྲུང་དུ་བཀུག་ལ་དེའི་བར་དུ་མཐེ་བོང་ནང་དུ་བཀུག་པའི་རྒྱབ་བབ་བར་བྱས་པའོ། །དེ་ཉིད་ཕྲལ་ཏེ་གཉིས་སུ་བྱས་པ་ནི་རྡོ་རྗེ་ཁུ་ཚུར་གྱི་ཕྱག་རྒྱ་སོ་སོར་ཕྲལ་ལ་མཛུབ་མོ་དང་མཐེ་བོང་སྔ་མའི་སོ་ན་བཞག་སྟེ་ཁུ་ཚུར་སོ་སོར་བཅིངས་བ་ནི་ལས་ཀྱི་ཕྱག་རྒྱའོ། །རྡོ་རྗེའི་ཁུ་ཚུར་ཏེ་དེ་ལ་དམ་ཚིག་ཆེན་པོའི་སྙིང་པོའོ། །ས་མ་ཡ་ཧོ། །ས་མ་ཡ་སྟྭཾ་ཞེས་ལན་ཅིག་བརྗོད་ལ། ཡང་ན་རང་གི་སྙིང་གར་ལན་ཅིག་བཅིང་ངོ༌། །ངག་གི་ཕྱག་རྒྱ་ཡང་ཞེས་པ་རང་གི་ལྕེ་ལ་རྡོ་རྗེ་རྩེ་ལྔ་པ་བསམས་ཏེ། བཛྲ་ཛི་ཧོ་ཞེས་ཚིག་ཏུ་ཡང་བརྗོད་ལ་དེ་ནས་ངག་གི་ཕྱག་རྒྱ་གང་ཡིན་པ་བརྗོད་པ་ཉིད་བཅིང་ཞེས་པའོ། །ངག་གི་ཕྱག་རྒྱའི་སྔགས་ཀྱང་རྒྱུད་གཞན་དག་ཏུ་ནི་ཆོས་ཀྱི་དཀྱིལ་འཁོར་དུ་གསུངས་པའི་སྙིང་པོ་ལ་ངག་གི་ཕྱག་རྒྱ་ཞེས་བཤད་མོད་ཀྱིས། རྟོག་པ་འདིར་ནི་ཆོས་ཀྱི་དཀྱིལ་འཁོར་དུ་སྙིང་པོ་ལོགས་ཤིག་ཏུ་མ་གསུངས་པ་རྣམས་ནི་སྙིང་པོ་གཅིག་གསུངས་པ་གང་ཡིན་པ་དེ་ཉིད་ཚིག་ཏུ་བརྗོད་པའི་ཚེ་དེ་ཉིད་ངག་གི་ཕྱག་རྒྱ་ཞེས་བྱའོ། །ལྟ་བའི་ཕྱག་རྒྱ་ནི་རྡོ་རྗེའི་ལྟ་བ་དང་ཁྲོ་བོའི་ལྟ་བ་ལ་སོགས་པའོ་གནས་འབྱུང་བ་རྣམས་ལས་གང་ལ་སྦྱོར་བ་དེ་ཉིད་ཀྱི་ཏིང་ངེ་འཛིན་མངོན་དུ་བྱས་ཏེ། སྦྱར་བ་དཔེར་ན་ཁྲོ་བོའི་ལྟ་བས་གནོད་པར་སྦྱར་ན་རབ་ཏུ་ཁྲོས་པའི་ཏིང་ངེ་འཛིན་མངོན་དུ་བྱ་བ་ལྟ་བུའོ། །སོ་སོའི་ཕྱག་རྒྱ་དང་ཞེས་པ་དེ་དག་གི་ཕྱག་རྒྱ་ཞེས་པ་དེ་དག་གི་ཕྱག་རྒྱ་འོག་ནས་འབྱུང་བ་རྣམས་བཅིང་བའི་ཚེ་ས་མ་ཡ་སྟྭཾ་ཞེས་བྱ་བའི་སྔགས་སྔར་བརྗོད་དོ། །སྙིང་དང་ལུས་གཡོ་ཞེས་བྱ་བ་ལས་ཁ་ཅིག་ལ་སྔགས་པའི་སྙིང་བསྒུལ་བ་ཉིད་ཕྱག་རྒྱར་འགྱུར་བ་ཡོད་དེ་གོམས་ན་འགུལ་དུ་ཡང་བཏུབ་བོ། །དེ་ནས་རྡོ་རྗེ་ཧཱུཾ་ཞེས་བྱ་བའི་ཕྱག་རྒྱ་བཅིངས་བ་འབྱུང་སྟེ་ཞེས་པ་རྡོ་རྗེ་ཁྲོ་བོའི་སོར་མོ་ནི་ལས་ཀྱི་ཕྱག་རྒྱའོ། །རྡོ་རྗེ་ཁྲོ་བོའི་སོར་མོ་གཉིས་ཞེས་བྱ་བ་ཁྲུ་ཚུར་མཛུབ་མོ་བསྒྲེང་བ་གཉིས་གཡས་པ་གོང་དུ་བཏང་སྟེ་བསྣོལ་ལ་མཐེའུ་ཆུང་ཕན་ཚུན་སྦྲེལ་ལ་ཧཱུཾ་ཞེས་པའི་སྙིང་པོ་བརྗོད་ནས་ཕྱག་རྒྱ་བཅིང་སྟེ་འདི་ཡང་ལས་ཀྱི་ཕྱག་རྒྱའོ། །དེ་ཉིས་ལས་མཛུབ་མོ་གཡས་པ་ཀྱོ་བ་ཏང་དུ་བཀུག་ལ་མཛུབ་མོ་གཡོན་པའི་ཆིགས་དང་འོག་ལ་བཅར་ནི་ཀྱོ་བ་ཏང་ངོ༌། །ལག་པའི་ཐིལ་དུ་རྡོ་རྗེ་བཅིང༌། །ཞེས་བྱ་བ་སོར་མོ་ལག་མཐིལ་དུ་བཀུག་སྟེ། རྡོ་རྗེ་བཅིང་བ་བྱས་ལ་
རྡོ་རྗེ་བྱ་བའི་མཐེ་བོས་ཐུམ་པོ་བཅངས་པའི་མཚམས་སུ་གཡོགས་པ་ནི་རྡོ་རྗེ་ཏི་རཱི་ནྟི་རིའི་ཞེས་བྱ་བ་སྟེ། ཧཱུཾ་ཀ་ར་ཉིད་ཀྱི་དམ་ཚིག་གི་ཕྱག་རྒྱའོ། །ཧཱུཾ་ནི་ངག་གི་ཕྱག་རྒྱའོ་ཞེས་པ་ཧཱུཾ་ཀ་རའི་ངག་གི་ཕྱག་རྒྱ་ནི་ཧཱུཾ་ཞེས་བྱ་བ་ཉིད་དོ། །ཡེ་ཤེས་ཀྱི་ཕྱག་རྒྱ་ཆུ་ནི་ཞེས་པ་རབ་ཏུ་ཁྲོས་པའོ། །ཁྲོ་པོའི་རྡོ་རྗེས་ལ་བཅིང་བ་ནི། །ཞེས་པ་རྡོ་རྗེ་བཅིང་བ་བྱས་ལ་བརྐྱང་སྟེས་ལ་རེག་པར་བྱས་པས་བགེགས་དང་གནོད་པར་བྱེད་པ་མི་འབྱུང་སྟེས་བཅིང་བར་འགྱུར་རོ། །དེ་ལ་འདིར་ནི་རྡོ་རྗེ་འདོད་པ་ཁྲོ་བོའི་ཕྱག་རྒྱའོ་ཞེས་པ་ཕྱག་ན་རྡོ་རྗེ་ཉིད་འདོད་པ་ཁྲོ་བོའི་ཏིང་ངེ་འཛིན་ལ་གནས་པའི་ཕྱག་རྒྱ་སྟེ། མཛུབ་མོ་རྡོ་རྗེ་ཞེས་བྱེད་ནི་མཛུབ་མོ་གཉིས་སོ་སོར་བསྒྲེང་བ་སྟེ། འདིས་ནི་སེམས་ཅན་ཐམས་ཅད་ལ་དབང་དུ་བྱེད་དོ། །རྡོ་རྗེའི་དམ་ཚིག་ནི་ཞེས་པ་སྤྱིའི་དམ་ཚིག་ཡིན་པའི་ཕྱག་རྒྱའོ། །ལྷ་ཆེན་པོ་ལ་སོགས་པ་འཇིག་རྟེན་པའི་ལྷ་རྣམས་དགུག་པའི་ཕྱག་རྒྱ་བསྟན་པ། རྡོ་རྗེའི་ཕྱག་རྒྱ་གཉིས་བཅིངས་ལ། །ཞེས་པ་ལག་པ་གཉིས་སུ་ཚུར་མཛུབ་མོ་བསྒྲེང་བ་ལས་མཛུབ་མོ་གཉིས་བཀུག་སྟེ་ཕན་ཚུན་སྦྲེལ་ནས་གཅིག་ལ་གཅིག་དྲིལ་ཞིང་དགྲོལ་ལོ། །ཉི་མ་ལ་སོགས་བར་སྣང་གི་ལྷ་རྣམས་དགུག་པའི་ཕྱག་རྒྱ་ནི། རྡོ་རྗེ་བཅིང་བརྟན་བྱས་ལ། །ཞེས་པ་དག་གོ །རྡོ་རྗེ་བཅིང་པ་ལས་མཛུབ་མོ་གཉིས་སོ་སོར་བཀུགས་ཏེ་མཐེ་བོའི་སེན་མོའི་སྟེང་དུ་བསྣན་ལ་ཐེ་བོར་གཉིས་གཤིབས་པས་གུང་མོ་བཙིར་རོ། །ནམ་མཁའ་ལ་སྤྱོད་པའི་ལྷ་རྣམས་ཀྱི་ཕྱག་རྒྱ་གསུངས་པ། རྡོ་རྗེ་ཁུ་ཚུར་གཉིས་བཅིངས་ལ། །ཞེས་པ་དག་གོ །རྡོ་རྗེ་ཁུ་ཚུར་གཉིས་རྒྱབ་སྦྲས་ལ་མཐེའུ་ཆུང་དང་མཛུབ་མོ་སོ་སོར་སྦྲེལ། གཡོན་པའི་མཐིལ་གྱེན་དུ་བསྟན་ཏེ་བཟློག་པའོ། །ས་པ་རྣམས་ཀྱི་ཕྱག་རྒྱ་བསྟན་པ། རྡོ་རྗེ་བཅིངས་བརྟན་བྱས་ནས། །ཞེས་པ་དག་གོ །རྡོ་རྗེ་བཅིང་བ་བསྡམས་པ་ས་ལ་རེག་པར་བྱས་པ་ནི་ས་པའི་དམ་ཚིག་གི་ཕྱག་རྒྱ་སྟེ་དགུག་དང་གཞུག་པ་ལ་སོགས་པའི་ལས་ཐམས་ཅད་བྱེད་པ་སྟེ་ཕྱག་རྒྱ་འདི་ལ་སུའང་འགལ་པར་མི་བྱེད་ཅེས་པའི་དོན་ཏོ། །ས་འོག་མ་པ་རྣམས་དགུག་པའི་ཕྱག་རྒྱ་བསྟན་པ། མཛུབ་མོ་གཉིས་ནི་བརྟན་པོ་རུ། །ཞེས་པ་དག་གོ །རྡོ་རྗེ་བཅིངས་པ་ལས་མཛུབ་མོ་གཉིས་སྦྲེལ་ཏེ་བསྡམས་ལ་མཐེ་བོང་གཉིས་ཀྱིས་རང་རང་གི་གུང་མོའི་རྩེ་མོ་མནན་པའོ། །ཕྱག་རྒྱ་གོང་མ་རྣམས་རིམ་བཞིན་དུ་སྦྱར་བ་བསྟན་པའོ། །རྡོ་རྗེ་དཀྲི་བ་དང་ཞེས་པ་དག་གོ །
རྡོ་རྗེ་དཀྲི་བ་ནི་ལྷ་དགུག་པའི་ཕྱག་རྒྱ་དཀྲི་བར་བྱས་པ་སྟེ་ཞེས་བྱ་བས་ནི་རིམ་བཞིན་དུ་སྦྱར་རོ། །དཀྱིལ་འཁོར་དྲི་བའི་ཚེ་ནང་དུ་འཇུག་པ་དང༌། ཕྱིར་འབྱུང་བ་དང༌། མཆོད་རྟེན་དང༌། བླ་མའི་གྲིབ་མ་ལ་སོགས་པ་ལ་འགོམ་པར་མི་རིགས་པ་རྣམས་འགོམ་དུ་མི་རུང་ན། ཨོཾ་བཛྲ་བཻ་ག་ཞེས་བྱ་བའི་སྙིང་པོ་བཀླགས་ལ་ཡིད་ཀྱིས་བཏེག་སྟེ་འཛུལ་བར་སོམས་ཤིག་པར་སྨྲས་པ། དེ་ལ་རྡོ་རྗེ་ཤུགས་ཀྱིས་བྱ་བ་དག་གོ །ཡེ་ཤེས་ཀྱི་ཕྱག་རྒྱ་ནི་སེམས་ཀྱི་ཕྱག་རྒྱ་སྟེ། སེམས་ཀྱིས་བསམས་ནས་བསྒྲུབ་པའི་ཕྱིར་རོ། །རྣམ་པར་སྣང་མཛད་ལ་སོགས་པ་སངས་རྒྱས་རྣམས་ལ་ཕྱག་བྱ་བའི་ཕྱག་རྒྱ་བསྟན་པ། དཔུང་པ་གཉིས་རྡོ་རྗེར་བཅིངས་ཏེ། །ཞེས་བྱ་བ་དག་གོ །ཁུ་ཚུར་བཅིངས་ཏེ་ལག་ངར་ཕན་ཚུན་བསྣོལ་ལོ། །ལག་བའི་ཕྱག་རྒྱ་དེ་ཉིད་བཅིངས་ལ་ངང་པའི་འགྲོས་ཀྱིས་དཀྱིལ་འཁོར་བསྐོར་ཞིང་སྤྱི་བོ་གཡོན་དུ་བཏུད་དེ་མིག་གིས་ཕྱག་བྱ་བར་བཏུད་དོ། །གཞན་རྣམས་ལ་ནི་པུས་མོ་བཙུགས་ཏེའོ་ཞེས་བྱ་བ་བྱང་ཆུབ་སེམས་དཔའ་རྣམས་ལ་པུས་མོ་བཙུགས་ཏེ་ཐལ་མོ་སྦྱར་ལ་ཕྱག་བྱའོ། །དེ་ལ་རྡོ་རྗེ་འཛིན་པའི་དམ་ཚིག་གི་ཕྱག་རྒྱ་ཞེས་པ་ལག་པ་གཉིས་གཡས་གཡོན་བསྙམས་ཏེ་རྒྱབ་སྤྲད་ལ་མཐེའུ་ཆུང་དང་མཐེ་བོང་གཉིས་ནང་སྦྲེལ་བ་སྟེ་དེ་ཉིད་ཀྱི་སོར་མོའི་རྩེ་མོས་མེ་ཏོག་བླངས་ལ་སྔགས་འདི་བརྗོད་དེ། སངས་རྒྱས་ལ་ཕུལ་ན་ཐམས་ཅད་མཉེས་པར་འགྱུར་རོ། །རྡོ་རྗེ་ཀྱོབ་ཏང་གི་ཕྱག་རྒྱ་ནི་ཞེས་པ་གོང་མ་བཞིན་དུ་མཛུབ་མོ་རྒྱབ་སྤྲད་པ་ལས་གཡས་པ་བཀུག་ལ་གཡོན་པ་རྩ་བར་བྱས་པའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་རྟོག་པའི་ཕྱག་རྒྱ་ཞེས་པ་དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་བྱ་སྟེ། ཐམས་ཅད་ཀྱི་རང་བཞིན་ཡིན་པའི་ཕྱིར་རོ། །མཐེ་བོང་སྐྱིལ་མོ་ཀྲུང་བཙུགས་ཏེ། །ཞེས་པ་སྐུའི་ཚུལ་དུ་བསྟན་པ་སྟེ་མཐེ་བོང་གཉིས་བསྣོལ་བ་ནི་སྐྱིལ་མོ་ཀྲུང་དུ་བལྟའོ། །མཛུབ་མོ་གཉིས་ཡིད་ཀྱིས་བཀུག་སྟེ་གུད་མོའི་ཚིགས་དང་པོར་སྤྲད་པ་ནི་སྐུ་ལུས་སུ་བརྟག་གོ །གུང་མོ་རྩེ་སྤྲད་པ་ནི་དབུར་བརྟག་གོ ། སྲིན་ལག་དང་མཐེའུ་ཆུང་ཕྱིར་ཕྱར་བ་ནི་འོད་ཀྱི་དཀྱིལ་འཁོར་རོ། །དེ་ནས་བཛྲ་བིད་ཀྱིས་ཡེ་ཤེས་ཀྱི་ཕྱག་རྒྱའོ་ཞེས་པ་སངས་རྒྱས་བཅོམ་ལྡན་འདས་ཀྱིས་སེམས་ཡོངས་སུ་དག་པའི་རང་བཞིན་མཁྱེན་པའི་ཡེ་ཤེས་ཀྱི་ཕྱག་རྒྱ་སྟེ། བཛྲ་བིད་ནི་རྡོ་རྗེ་རེག་པ་སྟེ་རྡོ་རྗེ་ནི་ཡེ་ཤེས་ཀྱི་རང་བཞིན་པས་དེ་རྟོགས་པ་ན་རང་གི་སེམས་
སོར་རྟོགས་པའོ། །ཇི་ལྟར་རྟོགས་ཤེན་གསུངས་བ་སེམས་རྣམ་པར་དག་པར་ཤེས་པར་བྱ་ཞེས་སོ། །ཡང་དག་པར་ན་སེམས་ནི་གསེར་དང་ཤེལ་བཞིན་ཏེ་སྒྲིབ་པ་གང་གིས་ཀྱང་མ་གོས་པར་ཤེས་པར་བྱའོ། །གང་དེ་ལྟར་དག་པ་ལ་གཟུང་བ་དང་འཛིན་པའི་རླུང་གིས་མི་བསྐྱོད་ཅིང་བརྟན་པར་གྱུར་པའི་སེམས་དེ་ནི་སེམས་དཔའ་ཞེས་བྱའོ། །གང་བརྟན་པ་དེ་ལ་སེམས་རྩེ་གཅིག་ཏུ་དམིགས་པས་ཏིང་ངེ་འཛིན་ཏོ། །ཏིང་ངེ་འཛིན་ཡང་དང་ཡང་དུ་བསྒོམས་པས་ཆོས་ཉིད་ཇི་ལྟ་བ་བཞིན་ངེས་པར་གྱུར་པས་ན་སེམས་ཉིད་རྡོ་རྗེར་གྱུར་ཏོ། །རྡོ་རྗེ་ནི་ཡེ་ཤེས་ཀྱི་ཕྱག་རྒྱ་བས་ན་སེམས་ཡོངས་སུ་དག་པ་སྟེ་ཡེ་ཤེས་ཀྱི་རང་བཞིན་ཐོབ་ཅེས་པའོ། །ཡེ་ཤེས་དེ་ལས་ཀྱང་སེམས་ཅན་གྱི་ཡིད་དང་སྦྱར་བའི་ཕྱིར་རྡོ་རྗེ་ཡང་སྣང་བར་གྱུར་ཏོ། །སེམས་དེ་ཡང་སངས་རྒྱས་ཀྱི་རང་བཞིན་ཉིད་དེ། དེ་ཉིད་རྟོགས་པ་སངས་རྒྱས་སོ། །ཞེས་བསྟན་པ། སངས་རྒྱས་ངོ་བོའི་བདག་ཉིད་ཀྱིས། །ཞེས་བྱ་བ་དག་གོ །དེ་ལྟར་སེམས་ཀྱི་ངོ་བོ་ཡང་རྟོགས་ཤིང་བསྒོམས་ལ་སངས་རྒྱས་ཀུན་གྱིས་ཀྱང་བསྟངས་ན་སངས་རྒྱས་སུ་འགྱུར་རོ་ཞེས་གསུངས་པ། སངས་རྒྱས་ཀུན་གྱིས་བྱིན་བརླབས་པས། །ཞེས་བྱ་བ་དག་གོ །དེ་ལྟར་སྒོམ་པའི་ཚེ་ཡང་སྔགས་པས་ཕྱག་རྒྱ་ཆེན་པོའི་རྣལ་འབྱོར་དུ་བྱའོ་ཞེས་གསུངས་པ་ཕྱག་རྒྱ་ཆེན་པོ་བཅིངས་ནས་བྱ་བ་དག་གོ །དེ་ལྟར་སེམས་རབ་ཏུ་རྟོག་པ་ལ་ཞུགས་ནས་དོན་ཐམས་ཅད་གྲུབ་པའི་བྱང་ཆུབ་སེམས་དཔའ་རང་གི་སེམས་ལ་རྟོག་ཅིང་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཏེ་བྱང་ཆུབ་ཐོབ་པར་འགྱུར་རོ་ཞེས་གསུངས་པ། དེ་བཞིན་གཤེགས་པ་ཐམས་ཅད་ཀྱིས། །ཞེས་བྱ་བ་དག་གོ །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་ལས་ཀྱི་ཕྱག་རྒྱའོ་ཞེས་པ་ཁུ་ཚུར་སོ་སོར་བཅིངས་པ་ལས་ཀྱི་ཕྱག་རྒྱར་འགྱུར་ཞེས་པའི་དོན་ཏོ། །དེ་ནས་ཕྱག་ན་རྡོ་རྗེའི་ཕྱག་རྒྱ་ཆེན་པོ་ནི་འདིའོ་ཞེས་པ་བསྙེམས་པ་དང་བཅས་པའི་ཕྱག་རྒྱ་འོག་ནས་འབྱུང་བ་བཞིན་དུ་བཅིངས་པའི་ཕྱག་ན་རྡོ་རྗེ་ཞལ་ཤར་ཕྱོགས་སུ་གཟིགས་པའི་མདུན་ན་རྡོ་རྗེ་ཨ་མྲ་སྟེ་མདའ་གཞུ་ཐོགས་པའི་ལྷ་མོའོ། །གཡས་ཕྱོགས་ན་རྡོ་རྗེ་ཀཱི་ལི་ཀཱི་ལ་སྟེ་དཔུང་པས་འཁྱུད་པར་བྱེད་པའི་ཚུལ་སྟོན་པའོ། །རྒྱབ་ན་ཆུ་སྲིན་གྱི་རྒྱལ་མཚན་ཏེ། ལག་ན་རྒྱལ་མཚན་ཐོགས་པའི་ལྷ་
མོའོ། །གཡོན་ན་རྡོ་རྗེ་བསྙེམས་མ་སྟེ་ལག་པ་སྟ་ཟུར་དུ་བསྟན་ནས་བསྒྱིངས་པའོ། །དེ་ནས་ཉིན་གཅིག་ཅིང་བདག་བྱིན་གྱིས་བརླབས་ནས་ཞེས་པ་ཉིན་གཅིག་ཅིང་དུས་གསུམ་དུ་གྲངས་ཅི་ནུས་པར་སེམས་བདེ་བར་བྱས་ལ། རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྣལ་འབྱོར་བྱས་ལ་རྡོ་རྗེ་དབྱངས་ཀྱིས་བསྟོད་པར་བྱས་ནས་སྔགས་འོག་ནས་འབྱུང་བ་རྣམས་རྡོ་རྗེའི་ཚིག་གིས་བཟླས་སོ། །སྔགས་ཀྱི་དོན་ནི་རྡོ་རྗེ་སེམས་དཔའ་བདེ་བ་ཆེན་པོ་སྟེ་དགུག་པ་དང་གཞུག་པ་དང་དབང་དུ་བྱ་བ་དང༌། མཉེས་པར་བྱ་བ་རབ་ཏུ་དགའ་བྲ་བྱ་བ་ཁྱོད་ཉིད་ངོ་ཞེས་པའི་དོན་ཏོ། །དེ་དག་གི་ཁྱིམ་དུ་གནས་ཏེ་ལྷའི་རྫུ་འཕྲུལ་བྱེད་དོ་ཞེས་པ་དེ་ལྟར་
བཟང་པོར་གྲུབ་པ་སྟེ་རང་གི་གནས་ན་མེ་འབར་བ་དང་ཆུ ་འབབ་པ་ལ་སོགས་པའི་རྫུ་འཕྲུལ་ཡང་བྱེད་དོ། །དེ་བཞིན་གཤེགས་པར་གྱུར་ནས་ཞེས་པ་དེ་བཞིན་གཤེགས་པའི་ཕྱག་རྒྱ་ཆེན་པོ་གྲུབ་ཅེས་པའི་དོན་ཏོ། །སེམས་ཅན་མ་རུངས་པ་རྣམས་གདུལ་བའི་ཕྱིར་རྡོ་རྗེ་ཧཱུཾ་ཞེས་པའི་གཟུགས་སུ་ཡང་བསྟན་ཏོ། །གདུལ་བའི་སེམས་ཅན་དེ་དག་གིས་ཀྱང་རྡོ་རྗེ་ཧཱུཾ་ཞེས་པའི་གཟུགས་སུ་མཐོང་ངོ༌། །ཚེ་ནམ་མཁའ་དང་མཚུངས་པར་འགྱུར་ཞེས་པ་ཚེ་མཐའ་ཡས་པར་འགྱུར་ཞེས་པའི་དོན་ཏོ། །དེ་ནས་རྡོ་རྗེ་འདོད་པའི་ཁྲོ་བོའི་ཕྱག་རྒྱ་བཅིང་བ་ནི་ཞེས་པ་ཕྱག་ན་རྡོ་རྗེའི་སྙིང་གནས་བྱུང་བའི་ཁྲོ་བོ་ཕྱག་བཞི་པ་ཕྱག་རྒྱ་ཆེན་པོའི་ཚུལ་ནི་ཕྱག་གཉིས་ན་མདའ་གཞུ་འགེངས་པའོ། །གཡོན་པ་གཅིག་རྡོ་རྗེ་ཁུ་ཚུར་མཛུབ་མོ་བསྒྲེང་བ་སྙིང་གར་གཞུག་གོ །གཡས་པ་ན་ཡང་ཁྲོ་པོའི་ཁུ་ཚུར་མཛུབ་མོ་བསྒྲེང་བས་བརྒྱད་སྟེ་འཕེན་པ་འདྲ་བར་བྱའོ། །དེ་ནས་དམ་ཚིག་གི་ཕྱག་རྒྱ་བསྟན་པ། རྡོ་རྗེ་ཁུ་ཚུར་གཉིས་བཅིངས་ཏེ། །ཞེས་བྱ་བ་དག་གོ །ལག་པ་གཉིས་རྡོ་རྗེ་ཁུ་ཚུར་གཉིས་བཅིངས་ནས་རྒྱབ་སྦྱར་ཏེ་མཐེའུ་ཆུང་སྦྲེལ་ལ་མཛུབ་མོ་གཉིས་ཀྱོ་བ་ཏང་དུ་བྱས་ཏེ། མཐེ་བོང་གཉིས་ཀྱིས་སོ་སོར་སྲིན་ལག་དང་གུང་མོ་མནན་པའོ། །བཅོམ་ལྡན་འདས་ཕྱག་ན་རྡོ་རྗེ་ལྷ་མོའི་དཀྱིལ་འཁོར་གྱི་དབུས་སུ་བཞུགས་ཤིང་ཞལ་ཤར་ཕྱོགས་སུ་གཟིགས་པའི་ཚེ། གཡས་གཡོན་ན་དགའ་བའི་ལྷ་མོ་བཞུགས་པའི་ལས་ཀྱི་ཕྱག་རྒྱ་བསྟན་པ། རྡོ་རྗེ་ཁུ་ཚུར་གྱིས་འཁྱུད་པའི། །ཞེས་པ་དག་གོ །ལག་པ་གཉིས་རྡོ་རྗེ་ཁུ་ཚུར་བཅིངས་ལ་ལུས་
གཡོན་དུ་གཡོ་བའི་པད་པར་རྡོ་རྗེ་ཁུ་ཚུར་གྱི་ལག་ངར་གྱིས་ཕྱག་ན་རྡོ་རྗེ་ལ་འཁྱུད་པ་འདྲ་བའི་ཚུལ་བསྟན་པའོ། །དེ་ཉིད་ཀྱི་དམ་ཚིག་གི་ཕྱག་རྒྱ་བསྟན་པ། དམ་ཚིག་ཕྱག་རྒྱ་འབྱུང་སྟེ་ཞེས་བྱ་བ་དག་གོ །རྡོ་རྗེ་བཅིང་བ་བྱས་ནས་གཡོན་པའི་མཛུབ་མོ་ཐ་དང་མཐེ་པོའི་རྩེ་མོ་སྦྲང་དེ། ཡང་མིག་ཏུ་བྱས་པའི་མིག་ཏུ་གཡས་པའི་མཐེ་བོང་བཅུག་སྟེ་བསྐྱེད་དོ། །འདིས་བུད་མེད་ཐམས་ཅད་དགའ་བར་བྱེད་དོ་ཞེས་པ་བུད་མེད་ཐམས་ཅད་དབང་དུ་བྱེད་པའི་ཐ་ཚིག་གོ །ཡང་ན་བུད་མེད་ནི་ཕྱག་རྒྱ་རྣམས་ལ་བྱའོ། །འདི་བཅིངས་པས་ཕྱག་རྒྱ་རྣམས་མཉེས་པར་འགྱུར་ཏེ། ཕྱག་རྒྱ་དང་ལྡན་པའི་ལྷ་རྣམས་དགྱེས་པར་འགྱུར་ཞེས་པའི་དོན་ཏོ། །ཕྱག་ན་རྡོ་རྗེའི་རྒྱབ་ན་རྡོ་རྗེ་ཆུ་སྲིན་གྱི་རྒྱལ་མཚན་ལྷ་མོའི་ཕྱག་རྒྱ་བསྟན་པ་རྡོ་རྗེ་ཁུ་ཚུར་གཉིས་ཀྱིས་རྒྱལ་མཚན་འཛིན་པའི་ཚུལ་དུ་བྱའོ་ཞེས་པ་གཡོན་པའི་ཁུ་ཚུར་བསྒྲེང་བ་གཡས་པའི་ཁུ་ཚུར་གྱིས་བཟུང་བ་ལྟར་བྱའོ། །དེ་ཉིད་ཀྱི་དམ་ཚིག་གི་ཕྱག་རྒྱ་གསུངས་པ། དམ་ཚིག་གི་ཕྱག་རྒྱ་འབྱུང་སྟེ་ཞེས་བྱ་བ་དག་གོ །རྡོ་རྗེ་བཅིང་བ་བྱས་ནས་མཛུབ་མོ་གཉིས་རྩེ་སྤྲད་དེ་དགུག་སྲིན་ལག་དང་མཐེའུ་ཆུང་སོ་སོར་སྦྱར་ཏེ་བསྒྲེང་ལ་ཁ་གདངས་པ་ལྟར་བྱ་མཐེ་བོ་གཉིས་ཕྱིར་དགྱེད། ཕྱག་ན་རྡོ་རྗེའི་གཡོན་ཕྱོགས་ན་རྡོ་རྗེ་བསྙེམས་མའི་ལྷ་མོའི་དམ་ཚིག་གི་ཕྱག་རྒྱ་བསྟན་པ་རྡོ་རྗེ་ཁུ་ཚུར་གཉིས་ཀྱིས་སྙེམས་པར་བྱེད་པ་ནི་ཞེས་བྱ་བ་དག་གོ །རྡོ་རྗེ་བཅིང་བ་བྱས་ལ་དེ་ཉིད་ཀྱི་རྩི་བ་ལོགས་གཡས་གཡོན་དུ་བསྐོར་ཞིང་འགྱིང་བར་བྱའོ། །རྡོ་རྗེ་བསྙེམས་མའི་ཚུལ་གྱིས་གར་བྱས་ལ་མཆོད་ན་མེ་ཏོག་ལ་སོགས་པ་ཐམས་ཅད་ཀྱིས་ཀྱང་མཆོད་པར་འགྱུར་རོ་ཞེས་བསྟན་པ། རྡོ་རྗེ་བསྙེམས་པ་མཆོག་དང་བཅས། །ཞེས་བྱ་བ་དག་གོ །མེ་ཏོག་ལ་སོགས་པ་མདོར་བྱ་བ་ནི་མེ་ཏོག་དང་དྲི་དང་བདུག་པ་ལ་སོགས་པའི་མཆོད་པ་ཡང་གར་གྱི་ནང་དུ་འདུས་ཞེས་བྱ་བའི་ཐ་ཚིག་གོ །དེ་ཉིད་འདུས་པ་ལ་སོགས་པ་རྒྱུད་གཞན་ལས་འབྱུང་བའི་མཆོད་པ་དང་ཡང་སྦྱར་རོ་ཞེས་སྨྲས་པ་རྟོག་པ་གཞན་གྱི་གསང་བའི་མཆོད་པ་དང་ཡང་སྦྱར་ཞེས་བྱའོ། །རྡོ་རྗེ་གར་གྱི་ཚུལ་ནི་རྡོ་རྗེ་ཁུ་ཚུར་གཉིས་བསྣོལ་ཏེ་རྟིང་སྦྱར་བ་ལས་བསྐོར་ཏེ་མཐེའུ་ཆུང་རྡོ་རྗེའི་སྐུའི་གསང་བའོ། །ལུས་དང་ངག་སེམས་རྡོ་རྗེ་ཡིས། །ཞེས་པ་རྡོ་རྗེའི་ཡེ་ཤེས་ཀྱི་མཚན་མའོ། །ཡེ་ཤེས་
ཀྱི་ལུས་དང་ངག་དང་སེམས་བྱིན་གྱིས་བརླབས་པས་ན་དེ་སྐད་ཅེས་བྱའོ། །དེ་ལ་ལུས་རྡོ་རྗེར་བྱིན་གྱིས་བརླབ་པ་ནི་ལྷའི་སྐུའི་གསང་བ་སྔོན་དུ་དམིགས་པ་སྟེ་དེ་ཉིད་ཀྱང་སེམས་ཀྱི་རང་བཞིན་རྡོ་རྗེ་ལས་གྱུར་པར་རྟོགས་པའོ། །ཤེས་པ་ཡོངས་སུ་དག་པ་དེ་ལས་རྣམ་པར་གྲོལ་བའི་ཚིག་ཏུ་བརྗོད་པ་དེ་ནི་རྡོ་རྗེས་བྱིན་གྱིས་བརླབ་པའི་དག་གོ །སེམས་ཉིད་ཟླ་བའི་དཀྱིལ་འཁོར་གྱི་གཟུགས་སུ་གྱུར་པ་ལ་སོགས་པའོ། །དེ་ཉིད་རབ་ཏུ་བསྒོམས་པས་ན་སྔགས་པ་ཉིད་ཕྱག་ན་རྡོ་རྗེའི་ཕྱག་རྒྱ་ཆེན་པོའི་རང་བཞིན་དུ་གྱུར་ནས་མཐོ་རིས་དང་ས་འོག་ཡན་ཆད་ཀུན་དུ་འགྲོ་བ་དང་ནམ་མཁའ་ལ་གྱེན་དུ་འཕར་བ་དང༌། བྱང་ཆུབ་ཀྱི་སེམས་འདོད་པ་ཞེས་བྱ་བའམ་འདོད་པ་རྣམ་ལྔ་ཀུན་ལ་དབང་བྱེད་པའི་ཕྱག་ན་རྡོ་རྗེ་དང་མཚུངས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱའོ་ཞེས་པ་རྡོ་རྗེ་བཅིང་བ་བྱ་པ་ལས་མཐེ་བོང་དང་མཐེའུ་ཆུང་གཉིས་རྩེ་མོ་ལྟར་བསྒྲེང་ལ། དེ་གཉིས་ཀྱི་བར་དབུས་སུ་གུང་མོ་གཉིས་སྦྱར་ཏེ་རྡོ་རྗེ་རྩེ་མོ་ལྟར་བྱས་ཏེ་སྤྱིར་ན་རྡོ་རྗེ་རྩེ་ལྔ་པའི་ཚུལ་དུ་བཅིང༌། རྡོ་རྗེ་ཆེན་པོ་བསྒྲེང་བར་བྱ། །ཞེས་པ་རྡོ་རྗེ་རྩེ་ལྔ་པ་ཉིད་རྡོ་རྗེ་ཆེན་པོ་སྟེ་སྙིང་གར་གཞག་ཅེས་པའི་དོན་ཏོ། །རྡོ་རྗེ་སེམས་དཔའི་སྙེམས་ཐུབ་ཀྱིས། །ཞེས་པ་ཕྱག་རྒྱ་དེ་བཅིང་བའི་ཚེ། རྡོ་རྗེ་སེམས་དཔའི་ཕྱག་རྒྱ་ཆེན་པོའི་རྣལ་འབྱོར་བྱ་ཞེས་པའི་དོན་ཏོ། །དེ་ལ་ཡེ་ཤེས་ཀྱི་ཕྱག་རྒྱ་ནི་འདིའོ་ཞེས་པ་ཕྱག་ན་རྡོ་རྗེའི་ཡེ་ཤེས་ཀྱི་རང་བཞིན་བྱང་ཆུབ་ཀྱི་སེམས་ཡོངས་སུ་དག་པ་ཟླ་བའི་དཀྱིལ་འཁོར་དུ་གྱུར་ལ། དེ་ཉིད་ཡང་དང་ཡང་དུ་བསྒོམས་པས་གཞན་གྱིས་མི་ཤིགས་ཤིང་གཞན་ལ་མི་འཇིགས་པས་ན་རྡོ་རྗེའི་རང་བཞིན་དུ་གྱུར་ཏེ། དེ་ལ་ཕྱག་ན་རྡོ་རྗེའི་སྐུར་བསྒོམས་ན་འགྲུབ་པར་འགྱུར་རོ། །གང་དུ། རྡོ་རྗེ་བསྙེམས་པ་ཀུན་བྱེད་པ། །ཞེས་འབྱུང་བ་དེ་ཉིད་ཇི་ལྟར་བྱས་བའི་ཐབས་གསུངས་པ། དེ་ནས་རྡོ་རྗེ་བསྙེམས་པ་བཅིང༌། །ཞེས་བྱ་བ་དག་གོ །བསྙེམས་པ་ནི་འགྱིང་བའི་ཚུལ་དང་བཅས་པ་སྟེ། ཇི་ལྟར་བསྙེམས་ཤེ་ན་རྡོ་རྗེ་གསོར་ཞེས་བྱ་བ་ལ་སོགས་པའོ། །རྡོ་རྗེ་ཁུ་ཚུར་བཅིངས་ལ་ལག་པ་གཡས་པ་རྡོ་རྗེ་གསོར་ཞིང་གྱེན་དུ་འདྲེན་པའི་ཚུལ་དུ་སྙིང་གར་གཞག །གཡོན་པ་མཁལ་ལྟག་དུ་བརྟེན་ནོ། བསྙེམས་ཞེས་འབྱུང་བས་ན་གཡོན་པ་གསལ་བར་མ་བཤད་ཀྱང་མཁལ་ལྟག་ཏུ་བརྟེན་ཏེ་གཞག་པར་རིགས་སོ། །དེ་ལ་བཅོམ་
ལྡན་འདས་ཀྱི་འདོད་པའི་ཕྱག་རྒྱ་བཅིང་བ་འདིའོ་ཞེས་པ་བཅོམ་ལྡན་འདས་ཕྱག་ན་རྡོ་རྗེའོ། །ཀུན་ལ་བསྣུན་ནས་ཆགས་པར་བྱེད། །ཅེས་པ་ནི་ཡེ་ཤེས་ཀྱི་མདས་བསྐུལ་ནས་ཕྱག་ན་རྡོ་རྗེ་བྱང་ཆུབ་ཀྱི་སེམས་ཉིད་ལ་ཆགས་པར་བྱེད་དོ། །དེ་ནས་བཅོམ་ལྡན་འདས་དབང་བསྐུར་བའི་ཕྲེང་བའི་ཕྱག་རྒྱ་བཅིང་པ་ནི་ཞེས་པ་སངས་རྒྱས་ལྔའི་དབུ་རྒྱན་གྱིས་བྱང་ཆུབ་སེམས་དཔའ་རྣམས་ལ་དབང་བསྐུར་བའི་ཕྱག་རྒྱའོ། །དེ་བཞིན་གཤེགས་པའི་སྐུའི་ཕྱག་རྒྱ་ནི་གོང་དུ་སྨོས་པ་མཐེ་བོ་སྐྱིལ་མོ་ཀྲུང་ཞེས་བྱ་བ་ལ་སོགས་པ་ཉིད་དོ། །དེ་ཉིད་གཙུག་ཏོར་དུ་གཞག་པ་ནི་རྣམ་པར་སྣང་མཛད་ཀྱིས་དབང་བསྐུར་བའོ། །དེ་ནས་དབང་བསྐུར་བའི་གནས་འཁྲུལ་བར་གཞག་པ་ནི་མི་བསྐྱོད་པས་དབང་བསྐུར་བའོ། །གུང་མོ་རྡོ་རྗེར་བྱས་ཞེས་པ་ནི་དབུས་ཀྱི་གུང་མོ་རྩེ་སྤྲད་པ་རྡོ་རྗེ་རྩེ་མོ་ལྟར་བསྡམས་ཞེས་པའི་དོན་ཏོ། །གཡས་ཕྱོགས་སུ་རྣ་བའི་གོང་དུ་གཞག་པ་ནི་རིན་པོ་ཆེ་འབྱུང་བའི་དབང་སྦྱིན་པ་སྟེ། སྐུའི་ཕྱག་རྒྱ་གོང་མ་ཉིད་ལས་གུང་མོ་གཉིས་རྩེ་སྤྲད་པའི་ཚིགས་དང་པོ་ནང་དུ་བཀུག་ལ་ནོར་བུ་ལྟ་བུར་བྱའོ། །ལྷག་པར་གུང་མོའི་རྡོ་རྗེའི་པདྨོ་གཞག་ཅེས་པ་སྣང་བ་མཐའ་ཡས་ཀྱི་དབང་སྦྱིན་པ་སྟེ། སྐུའི་ཕྱག་རྒྱ་དེ་ཉིད་ལས་གུང་མོས་པདྨའི་འདབ་མ་ལྟར་ཟླུམ་པོར་བྱའོ། །དེ་ལས་སྤྲོས་ཏེ་ཞེས་པ་རྣ་བ་གཡོན་པའི་གོང་དུ་གཞག་ལ་གདོན་མི་ཟ་བར་འགྲུབ་པའི་དབང་སྦྱིན་པ་སྟེ་སྐུའི་ཕྱག་རྒྱ་གོང་མ་ལས་གཞན་སོ་ན་གཞག་སྟེ། གུང་མོ་ཡང་སོ་སོར་ཕྲལ་ཏེ་ཕྱར་བའོ། །ཕྲེང་བ་བཅིང་པ་ལྷག་པར་མདུད་པ་བྱས་ལ་ཞེས་པ་གནས་ལྔར་ཕྱག་རྒྱ་བཞག་པའི་འོག་ཏུ་ལག་པ་གཉིས་ཀྱིས་དཔྲལ་བ་ནས་གཡས་གཡོན་དུ་དྲངས་ཏེ། ཕྲེང་བ་བཅིངས་པ་ལྟག་པར་མདུད་ལ་དེ་ནས་ལྡན་པ་གཡས་གཡོན་ནས་སོར་མོས་མཐར་གྱིས་བཀྲོལ་ཏེ་ཅོད་པན་དབྱངས་པའི་ཚུལ་དུ་བྱའོ། །དེ་ནས་བཅོམ་ལྡན་འདས་ཐོག་མ་དང་ཐ་མ་མེད་པའི་སེམས་སྤྲུལ་པར་འདོད་པས་ཞེས་པ་རྡོ་རྗེ་སེམས་དཔའ་ཉིད་སྒྲུབ་པར་འདོད་པ་སྟེ། ཐོག་མ་དང་ཐ་མ་མེད་པ་སྔར་བཤད་པར་བྱའོ། ལྷ་མོའི་དཀྱིལ་འཁོར་དུ་ནི་དབུས་ན་རྡོ་རྗེ་སེམས་དཔའ་བཞུགས་པ་ནས་མཐར་གྱིས་མྱུར་དུ་བཀྲོལ་ལ་འགྲམ་པ་གཡས་གཡོན་དང་སྤྱི་བོར་དགྲོལ། བདག་ཆེ་ཀུན་གྱི་མཆོད་པའོ། །ཞེས་པ་སངས་རྒྱས་དང་བྱང་ཆུབ་
སེམས་དཔའ་ཀུན་གྱིའོ། །དངོས་མེད་ཀྱིས་ཀྱང་མྱུར་དུ་འགྲུབ། །ཅེས་གར་གྱི་ཕྱག་རྒྱ་བྱས་བས་མེ་ཏོག་དང་བདུག་པ་མེད་ཀྱང་མཆོད་པ་བྱས་པར་འགྲུབ་པོ། །གོང་དུ་མཆོད་པའི་ལྷ་མོ་གཟུགས་དང་སྒྲ་ལ་སོགས་པ་སྨོས་པ་བསྟན་པ་དེ་ནས་རྡོ་རྗེ་གཟུགས་ལ་སོགས་པའི་ཕྱག་རྒྱ་དག་གོ །རྡོ་རྗེ་བཅིངས་པ་ལས་རྟིང་བ་གཉིས་ཕྱིར་དགྱེད་ལ་སོར་མོ་རྣམས་བསྣོལ་ལ་མིག་སྔར་གཞག་པ་ནི་གཟུགས་ཀྱིའོ། །རྡོ་རྗེ་བཅིངས་པ་ལས་གཡོན་པའི་མཛུབ་མོས་ནི་པི་ཝང་གི་ཤིང་འཛིན་པ་འདྲ་བར་བྱ་གཡས་པའི་མཛུབ་མོ་ནི་བཀུག་སྟེ་པི་ཝང་ལེན་པ་འདྲ་བར་སྦྱར་བ་ནི་སྒྲའོ། །རྡོ་རྗེ་བཅིངས་པ་ལས་གོང་གི་གཟུགས་ཀྱི་ཕྱག་རྒྱ་ལྟ་བུར་བརྐྱང་བའི་ལག་མཐིལ་གྱི་རང་གི་སྙིང་གར་བྱུག་གོ་འདི་ནི་དྲིའོ། །རྡོ་རྗེ་ཐལ་མོ་ལས་རྟིང་པ་བསྐྱེད་དེ་བསྙེམས་པར་བྱས་ལ་ཁར་བཏུང་བའི་ཚུལ་སྟོན་པ་ནི་རོའི་ཕྱག་རྒྱའོ། །རྡོ་རྗེ་ལྕགས་ཀྱུའི་ཕྱག་རྒྱ་བསྟན་པ་རྡོ་རྗེ་ཁུ་ཚུར་གཉིས་བཅངས་ཞེས་བྱ་བ་དག་གོ །ཁུ་ཚུར་གཉིས་རྒྱབ་སྤྲད་ལ་མཐེའུ་ཆུང་གཉིས་ཀྱོ་བ་ཏང་གཅིག་གིས་གཅིག་བཟུང་ལ་མཛུབ་མོ་གཉིས་ལས་གཡས་པ་བཀུག་གཡོན་པ་བསྒྲེང་སྟེ་ཀྱོ་བ་ཏང་དུ་བྱའོ། །ཀྱོ་བ་ཏང་དེས་སོ་སོ་རང་གི་སྔགས་ཀྱི་སྙིང་པོ་ཐམས་ཅད་བཀུག་སྟེ་བྱིན་ཅན་དུ་བྱེད་པ་དང༌། །འཕགས་པའི་ཡེ་ཤེས་དང་གཞན་ཐམས་ཅད་ཀྱང་འགུག་གོ །འདིའི་སྐབས་སུ་དམ་ཚིག་གི་ཡེ་ཤེས་ལ་བྱ་སྟེ་ཐོབ་པར་བྱ་བའི་དངོས་པོ་ཡིན་པའི་ཕྱིར་རོ། །རྡོ་རྗེ་བཅིངས་པ་ལས་མཐེ་བོང་གཉིས་དང་མཛུབ་མོ་གཉིས་སོ་སོར་རྩེ་སྤྲད་དེ་ཞགས་མིག་ཏུ་བྱས་པ་ནི་ཞགས་པའོ། །རྡོ་རྗེ་ཁུ་ཚུར་གཉིས་ལས་མཛུབ་མོ་གཉིས་ནང་སྤྲེལ་བ་ནི་ལྕགས་སྒྲོག་གིའོ། །དེ་ནས་གོ་ཆའི་ཕྱག་རྒྱ་བསྟན་པ་དེ་ནས་གོ་ཆའི་ཕྱག་རྒྱ་འབྱུང་སྟེ་ཞེས་བྱ་བ་དག་གོ །ལག་པ་གཉིས་ཁུ་ཚུར་བཅངས་ལ་མཛུབ་མོ་བསྒྲེང་སྟེ་སྙིང་ག་ལ་སོགས་པར་མདུད་པ་དོར་རོ། །དེ་ནས་འཕགས་པ་སྤྱན་རས་གཟིགས་དབང་པོའི་ཕྱག་རྒྱ་བཅིང་བ་ནི་ཞེས་པ་དེ་ནི་ཕྱག་རྒྱ་པདྨོ་ཟླུམ་པའི་ཐལ་མོ་མཉམ་པར་སྦྱར་བ་ལས་ཁོང་སྟོང་དུ་བྱས་པའོ། །དེ་ནི་པདྨོ་ཆེན་པོ་ཞེས་བྱ་བའི་ཕྱག་རྒྱའོ། །ཡང་སྡིག་པ་སྦྱང་བའི་ཕྱག་རྒྱ་གཞན་སྨྲས་པ། མཐེའུ་ཆུང་མཐེ་བོ་གཉིས་ཀྱིས་དགྱེད་པ་ཞེས་སོ། །གོང་མ་ལས་མཐེའུ་ཆུང་དང་མཐེ་བོ་གཉིས་སོ་སོར་བསྐྱེད་དེ་ཕྲལ་ལ་བསྒྲེང་ངོ༌། །སྡིག་སེལ་
བའི་ཕྱག་རྒྱ་དེ་ཉིད་ལ་མཛུབ་མོ་གཉིས་བསྒྲེང་བ་ལ་སྐྱོབ་ཏང་དུ་བཀུག་པ་སྟེ། འདི་ནི་འཇིག་རྟེན་དང་འཇིག་རྟེན་ལས་འདས་པའི་ལྷ་ལ་སོགས་པ་ཐམས་ཅད་དགུག་གོ །དེ་ནས་པདྨའི་ཁུ་ཚུར་འབྱུང་སྟེ་ཞེས་པ་རྡོ་རྗེ་བཅིང་བ་བྱས་ལ་མཛུབ་མོ་གཉིས་པདྨའི་འདབ་མ་འདྲ་བར་བཀུག་ལ་མཐེ་བོང་གཉིས་གཤིབས་ཏེ་རྩེ་མོ་སྲིན་ལག་ལ་སྦྱར་བའི་སྟེང་དུ་གུང་མོ་གཉིས་ཀྱིས་སོ་སོར་མན་ན། དེ་ཉིད་ལས་ཕྲལ་ནས་གཡོན་པ་པདྨ་འཛིན་པ་འདྲ་བར་བྱས་ལ་གཡས་པས་པདྨའོ་དེ་ཁ་འབྱེད་པའི་ཚུལ་དུ་བསྟན་པ་ནི་ལས་ཀྱི་ཕྱག་རྒྱའོ། །དེ་ནས་པདྨའོ་ངག་གི་ཕྱག་རྒྱ་ནི་ཞེས་པ་ངག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་ནི་རྣམ་གྲངས་ཏེ། སྐབས་ཁ་ཅིག་ཏུ་ཆོས་ཀྱི་ཕྱག་རྒྱ་ཞེས་ཀྱང་འབྱུང་ངོ༌། །རང་གི་རྣམ་པར་གྲོལ་བའི་ཚིག་ཏུ་བརྗོད་པ་ནི་ངག་གི་ཕྱག་རྒྱ་སྟེ། དེ་གཉིས་ལས་སུ་ཡང་འདའ་བར་མི་བྱེད་པའི་ཕྱིར་རོ། །ངག་གི་ཕྱག་རྒྱའམ་ཆོས་ཀྱི་ཕྱག་རྒྱ་འོག་ནས་འབྱུང་བ་རྣམས་ཀྱང་དོན་འདི་བཞིན་དུ་སྦྱར་རོ། །ཧྲཱིཿ་ཞེས་པ་ནི་སྣ་ཚོགས་པ་སྟེ། སེམས་ཅན་གྱི་དོན་སྣ་ཚོགས་མཛད་ཅེས་པའི་དོན་ཏོ། །ཡེ་ཤེས་ཀྱི་ཕྱག་རྒྱ་ནི་པདྨོ་གྱེས་པས་ཞེས་པ་རང་གི་རྣམ་པར་གྲོལ་བའི་དོན་ལ་སེམས་ཀྱིས་གཏན་ལ་ཕབ་པར་དམིགས་པ་ནི་ཡེ་ཤེས་ཀྱི་ཕྱག་རྒྱ་སྟེ། དེ་ལ་སུ་ཡང་མི་འདའ་བའི་ཕྱག་རྒྱའོ་མན་ཆད་ཀྱང་དོན་འདི་བཞིན་སྦྱར་རོ། །པདྨོ་གྱེས་པས་ཞེས་པདྨོ་ཁ་བྱེ་བ་ནི་འདམ་རྫབ་ལ་སོགས་པའི་སྐྱོན་གྱིས་མི་གོས་པ་བཞིན་དུ་སེམས་ཅན་སྨིན་པ་དང་གྲོལ་བ་ལ་ཆགས་པ་ལ་སོགས་པའི་དྲི་མས་གོས་པར་མི་འགྱུར་ཏེ། དེ་ཉིད་དྲི་མ་ཡོངས་སུ་སྦྱོང་བའོ་ཞེས་དེའི་དོན་ཡིད་ལ་བྱེད་པའོ། །དེ་ནས་ནམ་མཁའི་སྙིང་པོའི་ཕྱག་རྒྱ་བཅིང་བ་ནི་ཞེས་པ་དེ་ནི་ནོར་བུའི་ཁུ་ཚུར་བྱས་ལ་དཔྲལ་བ་ནས་ཁུ་ཚུར་གཡས་གཡོན་ནས་དྲངས་ཏེ་ཕྲེང་བ་བཅིང་བ་འདྲ་བར་ལྟག་པར་མདུད་དོ། །ནོར་བུའི་ཁུ་ཚུར་ནི་རྡོ་རྗེ་ཁུ་ཚུར་ནི་རྡོ་རྗེ་ཁུ་ཚུར་གཉིས་ལྟོ་སྦྱར་ལ་མཛུབ་མོ་གཉིས་རྩེ་སྤྲད་ནས་བསྡམས་ཏེ་ནོར་དུ་འདྲ་བར་བྱས་པའོ། །དེ་ནི་རྡོ་རྗེ་རིན་པོ་ཆེའི་ཕྱག་རྒྱ་ནི་ཞེས་པ་ཡེ་ཤེས་ཀྱི་རང་བཞིན་རྡོ་རྗེས་བྱིན་གྱིས་བརླབས་པའི་རིན་པོ་ཆེའོ། །དེ་ཉིད་ལས་ཀུན་མི་འདའ་བའི་ཕྱིར་ཕྱག་རྒྱའོ། །དེ་ཡང་རྡོ་རྗེ་བཅིང་བ་བྱས་ལ་མཛུབ་མོ་བཀུག་པ་དང༌། མཐེ་བོ་གཤིབས་པ་རྣམས་ངོས་སྤྲད་ལ་མཛུབ་མོ་གཉིས་ཀྱི་ཐོར་ཏོ་རྩེ་མོར་བྱས་ལ་དབང་
བསྐུར་བའི་གནས་དཔྲལ་བར་གཏུག་གོ །ཕྱག་རྒྱ་དེ་ཉིད་སྙིམ་པའི་ཁ་སྙིང་གར་གྱེན་དུ་དྲང་པོར་སྦྱར་བ་ནི་ནོར་བུའི་ཁུ་ཚུར་ཏེ། དེས་ནི་ནོར་བུ་ཐམས་ཅད་གཞན་ལས་དགུག་ཅིང་འཕྲོག་པའོ། །ནོར་བུའི་ཁུ་ཚུར་དེ་ཉིད་ལས་མཐེ་བོ་གཤིབས་པ་རྡོ་རྗེར་གྱུར་པས་མཛུབ་མོ་གཉིས་བསྙམས་ཏེ་རྩེ་སྤྲད་པ་མནན་ལ་མཐེ་བོ་གཉིས་རྒྱབ་ཏུ་བསྙེན་པ་ནི་རྡོ་རྗེ་ནོར་བུའོ། །ཏྲཾ་ཞེས་པ་ཏ་ནི་སྦྱིན་པའོ། །ར་ནི་རིན་པོ་ཆེའོ། །ད་ནི་སྟོང་པ་སྟེ་ཆོས་ཀྱི་ཕྱག་རྒྱའོ། །ཆོས་ཐམས་ཅད་ནམ་མཁའ་དང་འདྲ་བར་སྟོང་པར་བསྒོམ་པ་ནི་ཡེ་ཤེས་ཀྱི་ཕྱག་རྒྱའོ། །དེ་ནས་རྡོ་རྗེ་ཁུ་ཚུར་གྱི་ཕྱག་རྒྱ་བཅིང་བ་ཞེས་པ་དེའི་དམ་ཚིག་གི་ཕྱག་རྒྱ་ནི་རྡོ་རྗེ་བཅིངས་པ་ལས་མཐེ་བོ་ནང་དུ་བཅུག་པ་སྟེ་གོང་དུ་སྨོས་པའོ། །བྷཾ་ཞེས་པ་ཆོས་ཐམས་ཅད་ཚིག་གི་ལམ་དང་བྲལ་བར་སྟོན་པའོ། །མཛའ་བ་བཅིང་བ་འདི་ནི་ཞེས་པ་སེམས་ཅན་ལ་བྱམས་པས་འཆིང་བའི་མཆོག་སྟེ་སེམས་ཅན་མིག་ཏོང་ཞེས་བྱ་བའི་དོན་ཏོ། །རྡོ་རྗེ་ཁུ་ཚུར་གྱི་དཀྱིལ་འཁོར་དུ་བཅོམ་ལྡན་འདས་ཀྱི་ལུས་དང་ངག་དང་ཡིད་ཀྱི་དཀྱིལ་འཁོར་ཐམས་ཅད་འདུས་པས་ན་འདིའི་སྐབས་སུ་ཕྱག་རྒྱ་བཞི་པའི་དཀྱིལ་འཁོར་གསུངས་པ་མདུན་དུ་རྡོ་རྗེ་ཆེན་པོའི་ཕྱག་རྒྱའོ་ཞེས་པ་དག་གོ །དབུས་སུ་རྣམ་པར་སྣང་མཛད་བྱང་ཆུབ་མཆོག་གི་ཕྱག་རྒྱར་བཞུགས་པ་དེའི་མདུན་དུ་རྡོ་རྗེ་རྩེ་ལྔ་པ་ནི་མོར་བྲིས་ལ་དེ་བྱིན་གྱིས་བརླབ་པ་ལག་པའི་ཕྱག་རྒྱ་ནི་རྡོ་རྗེ་རྩེ་ལྔ་པ་རྡོ་རྗེ་བཅིངས་པ་ལས་བྱུང་བའོ། །གཡས་སུ་རྡོ་རྗེ་རིན་པོ་ཆེ་རི་མོར་བྲིས་ལ་དེའི་ཕྱག་རྒྱ་ལག་པས་བཅིངས་པ་ནི་རྡོ་རྗེ་རིན་པོ་ཆེ་གོང་དུ་སྨོས་པའོ། །རྒྱབ་ཏུ་པདྨའི་ཕྱག་རྒྱ་རི་མོར་བྲིས་ཏེ་བཞག་ལ་བྱིན་གྱིས་བརླབ་པ་ལག་པའི་ཕྱག་རྒྱ་ནི་རྡོ་རྗེ་བཅིངས་པ་ལས་མཐིལ་ཕྱེ་སྟེ་སྙིང་གར་བཀན་ལ་མཐེ་བོ་གཉིས་དང་མཛུབ་མོ་གཉིས་རྩེ་སྤྲད་དེ་པདྨའི་འདབ་མ་འདྲ་བར་དགུག །རྡོ་རྗེ་སྣ་ཚོགས་ཀྱི་པདྨའི་ཕྱག་རྒྱ་ཞེས་པ་རྡོ་རྗེས་བྱིན་གྱིས་བརླབས་པའི་སྣ་ཚོགས་ཀྱི་པདྨའི་ཕྱག་རྒྱ་སྟེ། སེམས་ཅན་གྱི་དོན་སྣ་ཚོགས་མཛད་པའི་རྟགས་ཞེས་པའི་དོན་ཏོ། །གཡོན་དུ་རྡོ་རྗེ་རྒྱ་གྲམ་གྱི་རི་མོར་བྲིས་ལ་དེ་བྱིན་གྱིས་བརླབ་པའི་ལག་པའི་ཕྱག་རྒྱ་བཅིང་བ་བསྟན་པ། རྡོ་རྗེ་བཅིངས་པའི་མཐེ་བོ་དང༌། །ཞེས་པ་དག་སྟེ། རྡོ་རྗེ་བཅིངས་པ་ལས་མཐིལ་བྱེ་སྟེ་བརྐྱང་ལ་མཐེ་བོ་དང་མཐེའུ་ཆུང་གཉིས་ཀྱང་སོ་སོར་རྩེ་མོ་སྤྲད་དེ་བརྐྱང་ངོ༌། །རྡོ་རྗེ་ཐམས་ཅད་
དོ་ཞེས་པ་ནི་ཕྱོགས་བཞི་ཐམས་ཅད་དུ་རྩེ་མོར་གྱུར་པས་ན་རྡོ་རྗེ་ཐམས་ཅད་ཅེས་བྱ་སྟེ་རྡོ་རྗེ་རྒྱ་གྲམ་ལ་བྱའོ། །རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་ནི་རྡོ་རྗེའི་རིགས་དང༌། རིན་པོ་ཆེའི་རིགས་དང༌། པདྨའི་རིགས་དང༌། ལས་ཀྱི་རིགས་བཞིའི་ཕྱོགས་བཞིར་རིམ་བཞིན་དུ་སོ་སོའི་དམ་ཚིག་གི་ཕྱག་རྒྱ་ཡིན་པར་བལྟའོ། །ཕྱག་རྒྱའི་དཀྱིལ་འཁོར་དུ་བྲི་ཞེས་པ་ཕྱག་རྒྱ་བཞི་པའི་དཀྱིལ་འཁོར་ཕྱོགས་བཞིར་ཕྱག་རྒྱར་མཚན་མ་དགོད་པའོ། །དཀྱིལ་འཁོར་འདིར་དབུས་ན་བཞུགས་པའི་གཙོ་བོ་དངོས་སུ་མ་སྨོས་མོད་ཀྱི། མདུན་དང་གཡས་གཡོན་ལ་སོགས་པ་སྨོས་པས་ན་དོན་གྱིས་དབུས་ཀྱི་གཙོ་བོ་བཞུགས་པར་གོ་བར་བྱ་སྟེ། གལ་ཏེ་དབུས་ན་མི་བཞུགས་ན་སུའི་མདུན་དང་གཡས་གཡོན་ཞེས་བརྟག །དབུས་ན་ཡང་རྒྱུད་ཀྱི་བདག་པོ་ཆེན་པོ་བས་ན་རྣམ་པར་སྣང་མཛད་ཉིད་ཡིན་པར་མངོན་ནོ། །དེ་བས་འཇམ་དཔལ་གྱི་ཕྱག་རྒྱ་བཅིང་བ་ནི་ཞེས་པ་དེ་ནི་ལག་པ་གཡས་པ་རྡོ་རྗེ་ཁུ་ཚུར་ལས་མཛུབ་མོ་བསྒྲེང་བའི་ཚིགས་དང་པོ་བཀུག་ལ་རལ་གྲིའི་ཐབས་སུ་འཛིན་པ་དང༌། གཡོན་པ་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་པའོ། །དེ་ནས་དམ་ཚིག་གི་ཕྱག་རྒྱ་ནི་ཞེས་པ་གཡོན་པ་གླེགས་བམ་འཛིན་པ་འདྲ་བའི་མཐེའུ་ཆུང་གཡས་པའི་རྡོ་རྗེ་ཁུ་ཚུར་གྱིས་རལ་གྲི་འཛིན་པའི་ཐབས་སུ་གཟུང་ངོ༌། །ཨ་ནི་ཆོས་ཀྱི་ཕྱག་རྒྱ་ཞེས་པ་ཨ་ནི་ཆོས་ཐམས་ཅད་མ་སྐྱེས་པའི་དོན་དུ་སྟོང་པའི་ཕྱིར་རོ། །ཆོས་ཐམས་ཅད་ལ་ཡི་གེ་མེད་ཅེས་བྱ་བ་ནི་ཟག་པ་བཅས་པ་དང་ཟག་པ་མེད་པའི་ཆོས་ཐམས་ཅད་སྒྲ་དང་འབྲེལ་བ་མེད་དེ་བརྗོད་དུ་མེད་པའི་ཕྱིར་རོ། །སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་བསྟན་པ། རྡོ་རྗེ་ཁུ་ཚུར་གཉིས་བཅིངས་ཏེ། །ཞེས་པ་དག་པ་དག་གོ །ཁུ་ཚུར་བཅིངས་ལ་མཚེའུ་ཆུང་དང་མཛུབ་མོ་གཉིས་སོ་སོར་སྦྲེལ་ལ་བཀན་ཏེ་སྙིང་གར་གཞག་པ་ནི་ཆོས་ཀྱི་འཁོར་ལོ་བསྐོར་བའི་ཕྱག་རྒྱ་ཞེས་བྱ་སྟེ་འདི་བཅིངས་པས་ན་རྣལ་འབྱོར་བའི་སྤྱོད་པའི་རྒྱུད་དུ་གཏོགས་པའི་དཀྱིལ་འཁོར་ཐམས་ཅད་རྫོགས་པར་འགྱུར་བས་ན་སྒྲུབ་པ་པོ་ཞེས་བྱའོ། །འདི་མཐོང་བས་དཀྱིལ་འཁོར་ཐམས་ཅད་མཐོང་བར་འགྱུར་རོ་ཞེས་པ་རིགས་ཐམས་ཅད་ཀྱི་དམ་ཚིག་སྔགས་དང་བཅས་པའི་ཕྱག་རྒྱ་འདིའི་ནང་དུ་འདུས་
པར་བྱིན་གྱིས་བརླབས་པས་ན་ཕྱག་རྒྱ་མཐོང་བ་ཙམ་གྱིས་དཀྱིལ་འཁོར་དུ་ཞུགས་པར་འགྱུར་རོ། །ཕྱག་རྒྱ་བཅིང་བའི་ཚེ་སྔགས་བརྗོད་པའི་ཐབས་གསུངས་པ། དེ་བཞིན་དབུས་སུ་ཁ་གཞག་སྟེ། །ཞེས་བྱ་བ་དག་གོ །ཇི་ལྟར་གོང་དུ་སྨོས་པ་དེ་བཞིན་དུ་ཕྱག་རྒྱ་བཅིངས་ལ་ཁུ་ཚུར་གཉིས་ཀྱི་བར་དུ་ཁ་གཞག་སྟེ་བཟླས་སོ། །ཧཱུཾ་ཆོས་ཀྱི་ཕྱག་རྒྱའོ་ཞེས་པ་ལས་ཐམས་ཅད་ཀྱི་སྒོ་ཞེས་པའི་དོན་ཏོ། དེ་ནས་ནམ་མཁའ་མཛོད་ཀྱི་ཕྱག་རྒྱ་བཅིང་བ་ནི་ཞེས་པ་ནོར་བུའི་ཕྱག་རྒྱ་གོང་དུ་སྨོས་པ་ལས་མཐེའུ་ཆུང་དང་སྲིན་ལག་རྣམས་བརྐྱང་སྟེ་ཕྱར་བའོ། །འཕགས་པ་བྱམས་པ་སེམས་དཔའ་ཆེན་པོའི་ཕྱག་རྒྱ་བཅིང་བ་ནི་ཞེས་པ་གོ་ཆའི་ཕྱག་རྒྱ་ནི་རྡོ་རྗེ་ཁུ་ཚུར་ལས་མཛུབ་མོ་བསྒྲེང་བ་ལྟེ་བ་དང་སྙིང་ག་ལ་སོགས་པར་མདུད་པ་གོང་དུ་སྨོས་པ་བཞིན་ནོ། །དེ་ནས་རྟོག་པ་ཐམས་ཅད་ཀྱི་སྤྱིའི་ཕྱག་རྒྱ་ཞེས་པ་འབྱུང་སྟེ་ཞེས་པ་རྒྱུད་འདིའི་མགོ་མཇུག་ཏུ་རྟོག་པ་བཤད་པ་ཐམས་ཅད་ཀྱི་ལུས་དང་ངག་ལ་སོགས་པའི་ཕྱག་རྒྱ་འབྱུང་སྟེ། དེ་ལ་སྔགས་མ་སྨོས་པ་རྣམས་ནི་སོ་སོ་རང་གི་སྙིང་པོའམ་ལས་ཐམས་ཅད་བྱེད་པའི་སྔགས་དང་བྱར་རོ། །སྔགས་སྨོས་པ་རྣམས་ནི་སྔགས་དེ་དང་སྦྱར་ཏེ་རིགས་ཐམས་ཅད་ཀྱི་ཡང་ལས་ཐམས་ཅད་དང་སྦྱར་རོ། །དེ་ལ་ལུས་ཀྱི་ཕྱག་རྒྱ་བསྟན་པ་འདི་ལྟ་སྟེ། ལངས་པའམ་འདུག་པའམ་ཞེས་པ་དག་གོ །ཕྱག་ན་རྡོ་རྗེའི་རྣལ་འབྱོར་དང་ལྡན་པ་ལས་སྦྱར་བ་ནི་ལུས་ལངས་པའམ་འདུག་པ་ཐམས་ཅད་ཀྱང་ཕྱག་རྒྱ་ཉིད་དུ་འགྱུར་ཏེ་དེ་དག་ནི་སྤྱིར་བཤད་པའོ། །ལུས་ཀྱི་ཕྱག་རྒྱ་ཁྱད་པར་དུ་གསུངས་པ་ལངས་ལ་གཡོན་པས་རྡོ་རྗེ་ཁུ་ཚུར་བཅངས་ནས་ཞེས་བྱ་བ་དག་གོ །གཡོན་པ་ཁུ་ཚུར་བཅངས་ཏེ་བརྐྱང་ལ་ལག་པ་གཡས་པ་རྡོ་རྗེ་ཁུ་ཚུར་བྱས་པའི་མཛུབ་མོ་ཀྱོ་བ་ཏང་དུ་བཀུག་པས་གཡོན་པའི་ཁུ་ཚུར་གྱི་དྲུང་ནས་གཞུ་འདྲེན་པའི་ཐབས་སུ་དྲངས་ཏེ། འདིས་ནི་འཕགས་པ་དང་མ་འཕགས་པའི་སེམས་ཅན་ཐམས་ཅད་དགུག་གོ །དཔུང་པ་གཉིས་ཀྱིས་རང་གི་སྙིང་གར་འཁྱུད་པ་ནི་གོ་ཆ་སྟེ་ཞེས་པ་རྡོ་རྗེ་ཁུ་ཚུར་བཅིངས་པའི་དཔུང་པ་གཉིས་ཕན་ཚུན་བསྣོལ་ཏེ་བསྡམས་པ་ནི་གོ་ཆ་སྟེ། རྒོལ་བ་ཀུན་གྱིས་མི་ཕྱེད་མི་ཚུགས་མི་ཤིགས་ཞེས་པའི་དོན་ཏོ། །དེ་ནས་ངག་གི་ཕྱག་རྒྱ་བཅིང་བ་ནི་ཞེས་པ་ཨ་ནི་དབབ་པའི་
སྙིང་པོའོ། །ཧཾ་ནི་སྲུང་བའོ། །ཧཱུཾ་ནི་གཏན་འཕོ་བའོ། །དེ་ནས་ལྟ་བའི་ཕྱག་རྒྱ་འབྱུང་བ་ནི་ཞེས་པ་དེ་ལ་རྡོ་རྗེའི་ལྟ་བ་ནི་འཕྲལ་ལ་བཅེར་ཞེས་ལྟ་བ་སྟེ། འཕྲལ་ལ་ཞེས་བྱ་བ་ནི་སྒྲ་གློ་བུར་དུ་ལྟ་བ་ལ་ཡང་བྱའོ། །རིག་རིག་པོར་མགྱོགས་པ་ལ་ཡང་བྱའོ། །འབར་བའི་ལྟ་བ་ནི་གང་ལ་བལྟས་པ། དེ་ནས་བཀུག་སྟེ་འཛུམས་པའོ། །ཁྲོ་བོའི་ལྟ་བ་ནི་སྨིན་མཚམས་སུ་ཁྲོ་གཉེར་བསྡུས་ལ་ཁྲོ་བས་བལྟ་བའོ། །བརྟན་པའི་ལྟ་བ་ནི་གང་ལ་བལྟས་པ་དེ་ལ་ཐ་མལ་པར་མིག་ཚུགས་སུ་བལྟ་བའོ། །དེ་ནས་ལྟ་བ་དེ་བཞིའི་ལས་བསྟན་པ་དེ་ནས་འདི་དག་གི་ལས་ཞེས་བྱ་བ་དག་གོ །དེ་ནས་སྙིང་པོ་སྨྲས་པ། བཛྲ་ཌྲྀཥྚི་ཞེས་བྱ་བ་དག་གོ །དེ་ལ་རྡོ་རྗེ་ལྟ་བའི་སྙིང་པོ་ནི། བཛྲ་ཌྲྀཥྚི་མ་ཊ་ཞེས་པ་སྟེ། རྡོ་རྗེའི་ལྟ་བ་མིག་གཡས་ན་ཉི་མའི་ས་བོན་མེ་འབར་བ་གཞག་གོ །གཡོན་དུ་ཟླ་བའི་ས་བོན་ཊ་འབར་བའོ། །འབར་བའི་ལྟ་བའི་སྙིང་པོ་ནི། ཌྲྀཥྚི་ཨཾ་གུ་ཤ་ཛཿ་ཧྰཾ་ཞེས་པ་སྟེ། འབར་བའི་ལྟ་བ་ཀྱོ་བ་ཏང་གིས་དགུག་ཅིང་ཐག་འཛུད་པ་སྟེ། ཛཿ་ནི་འཇུག་པའོ། །ཧཱུཾ་ནི་མངོན་པར་སྤྱད་པའོ། །ཁྲོ་བོར་བལྟ་བའི་སྙིང་པོ་ནི། ཀྲོ་ཏ་ཌྲྀཥྚི་ཕཊ་ཅེས་པ་སྟེ། ཁྲོ་བོའི་ལྟ་བས་ཐམས་ཅད་ལ་མངོན་པར་སྤྱད་ཅེས་པའི་དོན་ཏོ། །བརྟན་པར་ལྟ་བའི་སྙིང་པོ་ནི། ཌྲྀཌྷ་ཏིཥྛ་ཧུཾ་ཞེས་བྱ་བ་སྟེ། བསྟན་པ་ཐམས་ཅད་སྲུང་ངོ་ཞེས་པའི་དོན་ཏོ། །སོ་སོའི་ཕྱག་རྒྱ་འབྱུང་སྟེ་ཞེས་པ་སོ་སོའི་ལྷའི་རྣལ་འབྱོར་བྱས་ལ་སྔགས་ཀྱི་སྙིང་པོ་ཡིད་ལ་ཟློས་ཤིང་སོ་བའི་ལས་ལ་སྦྱར་རོ། །སོ་འཆའ་བ་ནི་སྒྲ་ཀྲིག་ཀྲིག་བྱེད་པའོ། །མུར་བ་ནི་ཐམས་ཅད་བྱེད་པའོ། །མཆུའི་ཕྱག་རྒྱ་བསྟན་པ། གཡས་ནས་གཅུ་བ་ནི་འགུག་པའོ་ཞེས་པ། གཡས་ནས་གཅུ་བ་ནི་མ་མཆུ་གཡོན་བའི་གྲྭ་སོགས་མནན་ཏེ་གཅུ་བའོ། །མ་མཆུ་སོས་མནན་ཞེས་པ་སོ་གཙིགས་པའོ། །མཆུ་གཉིས་བསྡམས་པ་ནི་ཞེས་པ་ཁ་དམ་དུ་བཙུམས་པའོ། །དེ་ལ་གཡས་ནས་གཅུ་ཞིང་འགུགས་པའི་ལས་བྱེད་པའི་ཚེ། སངས་རྒྱས་ཀྱི་རྣལ་འབྱོར་དུ་བྱའོ་ཞེས་བསྟན་པ། སངས་རྒྱས་རྗེས་སུ་དྲན་པ་དང༌། །ཞེས་སོ། །དེ་བཞིན་དུ་ལྷག་མ་ཡང་རིམ་བཞིན་དུ་སྦྱར་རོ། །རྡོ་རྗེས་སུ་དྲན་ཞེས་བྱ་བ་ནི་ལྷ་གང་ཡང་རུང་བའི་རྣལ་འབྱོར་དུ་བྱས་པའི་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པ་བསམ་མོ། མིག་གི་ཕྱག་
རྒྱ་གསུངས་བ་མིག་གཡས་པ་བསྐྱོད་པས་དབང་དུ་བྱེད་དོ་ཞེས་པ་དག་གོ །རྡོ་རྗེ་ཆགས་པ་ནི་ཐམས་ཅད་བདག་ལ་དགའ་བར་འགྱུར་བའོ། །རྡོ་རྗེ་ལྟ་བ་ལ་སོགས་པ་མིག་གི་ཕྱག་རྒྱ་སྔར་སྨོས་ཟིན་པས་འདི་དང་ཉིས་རིམ་དུ་འགྱུར་བར་དགོས་པ་འབྱུང་བ་རྡོ་རྗེ་ལྟ་བ་ལ་སོགས་པ་ནི་མིག་གི་འབྲས་བུ་ཡུལ་ལ་དམིགས་པ་གཙོ་བོར་བྱས་བའོ། །འདི་ནི་འབྲས་བུ་བཞི་དང་བཅས་པར་བསྒུལ་བ་ཙམ་དུ་ཟད་དེ། ཡུལ་ལ་དམིགས་པ་གཙོ་བོར་མི་བརྩིའོ། །ཐམས་ཅད་ཀྱི་སྙིང་པོ་བཟླས་ཏེ་གྱེན་དུ་བལྟས་ན་ཞེས་པ་ལྷ་གང་ལ་བརྟེན་པ་དེའི་སྙིང་པོ་བཟླས་ལ་ནམ་མཁའ་ལ་བལྟས་ན་དེར་འགྲོ་བར་འགྲུབ་བོ། །ས་ལ་བལྟས་ཏེ་བཟླས་ན་སའི་བདག་པོར་འགྱུར་རོ། །གཡས་སྐོར་བས་ནི་ཞེས་པ་དེ་བཞིན་གཤེགས་པ་ལ་མཆོད་པར་བསམས་ཏེ། དེ་བཞིན་གཤེགས་པ་ལ་མཆོད་པར་བསམས་ཏེ། དེ་བཞིན་གཤེགས་པའི་གཡས་ལོགས་ནས་བསྐོར་ཏེ་བལྟས་ན་མཆོད་པར་འགྱུར་རོ། །དེ་བཞིན་དུ་ཕྱག་ན་རྡོ་རྗེ་ལ་གཡོན་སྐོར་ན་མཆོད་པར་འགྱུར་རོ། །ཐམས་ཅད་ཀྱི་སྙིང་པོ་སྟོང་བཟླས་ན་འགྲུབ་པོ་ཞེས་པ་གོང་དུ་ཕྱག་རྒྱའི་ལས་བཤད་པ་ཐམས་ཅད་ཀྱི་སྙིང་པོ་གོང་གི་སྦྱོར་བ་དེ་སྔར་བསྙེན་པ་སྟོང་བྱས་ནས་ལས་ཀྱང་བྱའོ། །དེ་ནས་ལྷ་ཆེན་པོ་ལ་སོགས་པ་རིག་པའི་རྒྱལ་པོ་མན་ཆད་ས་འོག་ཡན་ཆད་ཀྱི་སྤྱིའི་ཕྱག་རྒྱ་སྨོས་པ་དེ་ལ་འཇིག་རྟེན་པའི་རྡོ་རྗེ་ཁུ་ཚུར་ལས་སྐྱེས་པའི་ཕྱག་རྒྱ་སྟེ་ཞེས་པ་དག་གོ །འཇིག་རྟེན་པའི་ལྷ་དེ་དག་ཐམས་ཅད་ཀྱི་ཕྱག་རྒྱ་རྡོ་རྗེ་ཁུ་ཚུར་སོ་སོར་བཅངས་པ་ལས་འབྱུང་སྟེ། ཁུ་ཚུར་སོ་སོར་བཅངས་པ་དེ་ཉིད་འཇིག་རྟེན་པའི་རྡོ་རྗེ་བཅིངས་པ་ཡིན་པར་བསྟེན་པ་རྡོ་རྗེ་བཅིངས་པ་ནི་ཞེས་བྱ་བ་དག་གོ །ལག་བ་གཉིས་ཁུ་ཚུར་སོ་སོར་བཅངས་ལ་མཐེ་བོང་སྨད་དེ་ནང་དུ་བཅུག་ནས་ཁུ་ཚུར་བཅངས་བ་གཉིས་ཀྱིས་སྲིན་ལག་དང༌། མཐེའུ་ཆུང་གི་བར་ཕན་ཚུན་མནན་པ་སྟེ། གཡོན་པའི་མཐེའུ་ཆུང་དང་སྲིན་ལག་གི་མཚམས་སུ་གཡས་བའི་ཁུ་ཚུར་གྱི་སྲིན་ལ་ལག་གི་རྒྱབ་ཀྱིས་མནན། གྱས་པའི་མཚམས་སུ་ཡང་གཡོན་པའི་མཐེའུ་ཆུང་གི་རྒྱབ་ཀྱིས་མནན་པའོ། །དེ་ཉིད་ཕྱག་རྒྱའི་སྙིང་པོ་འདི་འབུམ་བཟླས་ཏེ་སྒྲུབ་པོ་ཞེས་པ་འཇིག་རྟེན་པའི་ཕྱག་རྒྱ་དེ་ཉིད་བཅིང་ལ་མཆོད་པ་ལ་སོགས་པ་བཟླས་པའི་ཆོག་ག་ཚུལ་བཞིན་དུ་སྔར་བྱས་ནས་སྙིང་པོ་འདི་འབུམ་བཟླས་ན་ཕྱག་རྒྱ་འགྲུབ་པ་
འགྱུར་ཏེ། ཕྱག་རྒྱ་བཅིངས་པ་ཙམ་གྱིས་སུའང་འདའ་བར་མི་བྱེད་དོ། །དེ་ནས་འཇིག་རྟེན་པའི་ལྷ་སོ་སོའི་ཕྱག་རྒྱ་བསྟན་པ། རྡོ་རྗེ་ཁུ་ཚུར་གཉིས་བྱས་ཏེ། །ཞེས་པ་དག་གོ །ཁུ་ཚུར་ཕྱེ་ལ་གཡས་པས་རང་གི་ཕྱག་རྒྱ་གང་ཡིན་པ་འཛིན་པ་སྟེ། ལྷ་ཆེན་པོ་ཡི་ནི་གསལ་ཕུར་གསུམ་པའོ། །ཚངས་པའི་ནི་གུནྡྷེ་དང་བགྲང་ཕྲེང་ངོ༌། །གཏོགས་འདོད་ཀྱི་ནི་འཁོར་ལོའོ། །ས་ནད་གཞོན་ནུའི་ནི་དྲིལ་བུའོ། །དེ་བཞིན་དུ་ལྷག་མ་རྣམས་ཀྱང་རང་གི་ཕྱག་རྒྱ་འཛིན་པར་བརྟག་གོ །རིག་པའི་རྒྱལ་པོ་མན་ཆད་ས་འོག་ཡན་ཆད་སྤྱིའི་ཕྱག་རྒྱ་བསྟན་པ། མ་རྣམས་ཐམས་ཅད་ཀྱི་ཕྱག་རྒྱ་བཅིང་བ་ནི་ཞེས་པ་དག་གོ །གོང་མ་བཞིན་དུ་རྡོ་རྗེ་ཁུ་ཚུར་བཅིངས་ལ་གཡོན་པ་མཛུབ་མོ་བསྒྲེང་བའོ། །མ་རྣམས་ཀྱི་ཕྱག་རྒྱ་དེ་དང་ལྡན་པས་སྒྲུབ་པའི་ཆོ་ག་གསུངས་པ། དུར་ཁྲོད་དམ་ཚོགས་ཀྱི་ནང་འཇུག་པ་ན་ཞེས་བྱ་བ་དག་གོ ། ཚོགས་ཀྱི་ནང་དུ་འཇུག་པ་ནི་འདྲེའི་ཚོང་འདུས་སུ་འདུག་པ་སྟེ། དུར་ཁྲོད་དམ་འདྲེའི་ཚོང་འདུས་སུ་མ་རྣམས་གང་ཡང་རུང་བའི་སྙིང་པོ་ཅིག་ཆོ་ག་བཞིན་དུ་བཟླས་སོ། །བྱད་ཐམས་ཅད་སྡོམ་པ་དང་ཞེས་པ་སརྦ་བུདྡྷ། ས་མ་ཡོ་གི་རྒྱུད་ལས་བྱད་སྡོམ་པའི་ལས་མང་པོ་འབྱུང་བ་དང༌། རྟོག་པ་གཞན་ཐམས་ཅད་ཀྱང་ཞི་བ་དང་རྒྱས་པ་ལ་སོགས་པའི་ལས་འབྱུང་བ་ཀུན་འགྲུབ་བོ། །ཕྱག་རྒྱ་ཐམས་ཅད་འགྲུབ་པར་འགྱུར། །ཞེས་པ། ཕྱག་རྒྱ་བཅིངས་པ་ཙམ་གྱིས་ལས་གང་ལ་སྦྱར་བ་འགྲུབ་བོ། །དེ་ནས་ཁྲོ་བོའི་ཁུ་ཚུར་སྒྲུབ་པའི་སྙིང་པོ་ནི་འདི་ཡིན་ནོ་ཞེས་བྱ་བ་ལ་ལ་སོགས་པ་ཐམས་ཅད་ཀྱི་བདག་པོ་ཁྲོ་བོའི་ཁུ་ཚུར་ཞེས་བྱ་བ་སྒྲུབ་པར་འདོད་ན་ནི་སྙིང་པོ་འདིས་བྱའོ། །དེ་ནས་གསང་བའི་ཕྱག་རྒྱ་ཐམས་ཅད་སྒྲུབ་པའི་རབ་ཏུ་བྱ་བ་བཤད་དོ་ཞེས་པ་སྔགས་ཀྱི་སྣོད་དུ་མ་གྱུར་པ་རྣམས་ལ་མི་བསྟན་པས་གསང་བའོ། །གསང་བ་དེ་ཉིད་ཀུན་གྱིས་མཉན་ཞིང་མི་འདའ་བས་ན་ཕྱག་རྒྱའོ། །དེ་སྒྲུབ་པའི་ལེའུའམ་རིམ་པ་བསྟན་པ་ནི་རབ་ཏུ་བྱ་བ་བཤད་པའོ། །དཀྱིལ་འཁོར་བྲིས་ཏེ་ཞེས་པ་དེ་བཞིན་གཤེགས་པའི་དཀྱིལ་འཁོར་གྱིས་སརྦ་བིད་ཀྱི་རྟོག་པ་གོང་དུ་སྨོས་པ་བཞིན་དུ་བྲིས་ལ་འདི་སྐད་བརྗོད་དོ། །བཅོམ་ལྡན་འདས་ཕྱག་རྒྱ་
སྐྱོང་མ་འདི་ཞེས་པ་ཕྱག་རྒྱ་ནི་སྐུའི་གསང་བ་ལ་སོགས་པ་ཕྱག་རྒྱ་བཞི་རྣམས་སོ། །ཕྱག་རྒྱའོ་ཞེས་སྒྲའི་མཚན་ཉིད་བཤད་པ་ལས། བུད་མེད་ཀྱི་ཁམས་སུ་གཏོགས་པས་ཕྱག་རྒྱ་བཙུན་མོ་ཞེས་བྱ་བའི་དོན་ཏེ། སྐྱོང་མ་ནི་བཅོམ་ལྡན་འདས་ཀྱིས་བསྐྱེད་ཅིང་བསྐྱངས་ཏེ་འབྱོར་པར་བྱས་པས་སྐྱོང་མ་ནི་བཙུན་མོའི་མིང་ངོ༌། །དེ་ལྟ་བུའི་ཕྱག་རྒྱ་དེ་གྲུབ་པ་རྟག་ཏུ་དུས་ཐམས་ཅད་དུ་བདག་ལ་སྩལ་བར་གསོལ་བ་ཅི་དགོས་ཤེ་ན། སེམས་ཅན་ཀུན་གྱི་དོན་གྱི་ཕྱིར། །ཞེས་གསུངས་སོ། །ཕྱག་རྒྱའི་ཡོན་ཏན་ཅི་ཡོད་ཅེ་ན། གྲུབ་མཆོག་རབ་ཏུ་བསྒྲུབ་པའོ། །ཞེས་སོ། །རིག་འཛིན་ནམ་མཁའ་ལ་རྒྱུ་བ་ལ་སོགས་པ་ཕྱག་རྒྱ་འདིས་རབ་ཏུ་སྒྲུབ་པོ། །དེ་ནས་ཕྱག་ན་རྡོ་རྗེའི་གསང་བ་སྒྲུབ་པ་གསུངས་པ། ཕྱག་ན་རྡོ་རྗེའི་དཀྱིལ་འཁོར་དུ་ཞུགས་ཏེ་ཞེས་བྱ་བ་དག་གོ །ཕྱག་ན་རྡོ་རྗེའི་དཀྱིལ་འཁོར་གོང་དུ་སྨོས་པ་ཆོ་ག་བཞིན་དུ་བྲིས་ལ་དེར་ཞུགས་ནས་བསྐུལ་བའི་སྔགས་འདི་རྣམས་བརྗོད་ཅིག །སུ་ར་ཏེ་ས་མ་ཡ་སྟྭཾ་ཧོ་ཞེས་པ་ནི་ལྷའི་རང་བཞིན་བརྗོད་པ་སྟེ། རབ་ཏུ་དགྱེས་པའི་དམ་ཚིག་ཁྱོད། །ཅེས་བརྗོད་དོ། །བཛྲ་ཏྭ་ཞེས་པ་ལ་སོགས་པས་ནི་རྡོ་རྗེ་སེམས་དཔའ་དང་པོ་པ་བདག་གིས་གྲུབ་པར་གྱུར་ཅིག་ཅེས་བསྐུལ་བའོ། །དེ་ནས་བྱང་ཆུབ་སེམས་དཔའ་གཞན་རྣམས་ཀྱི་ཕྱག་རྒྱ་གསང་བ་སྒྲུབ་པ་གསུངས་པ། དེ་ནས་བྱང་ཆུབ་སེམས་དཔའ་གཞན་རྣམས་ཀྱི་གསང་བའི་ཕྱག་རྒྱ་སྒྲུབ་པ་ནི་ཞེས་པ་དག་གོ །དེའི་སྔགས་བོ་དྷི་སྟྭ་མ་ཧཱ་མ་ནཾ་ཞེས་པ་ནི་ལྷའི་རང་བཞིན་སྨོས་པ་སྟེ། བྱུང་ཆུབ་སེམས་དཔའ་ཆེ་བ་རྣམས། །ཞེས་པ་སྨོས་པའོ། །ལྷག་མས་ནི། རྟག་ཏུ་གྲུབ་པ་བདག་སྩོལ་ཅིག །ཅེས་བརྗོད་པའོ། །དེ་ནས་ལྷ་ཆེན་པོ་ལ་སོགས་པ་འཇིག་རྟེན་པའི་ལྷ་རྣམས་ཕྱག་རྒྱ་གསང་བ་བརྗོད་པ། དེ་ནས་ཕྱི་རོལ་གྱི་རྡོ་རྗེའི་རིགས་ཀྱི་ཞེས་བྱ་བ་དག་གོ །དེའི་སྔགས་ནི། ཀྲོ་དྷ་ཏུ་ཞེས་བྱ་བ་དག་སྟེ་ཁྲོ་བོ་ཐམས་ཅད་ཀྱི་བྱེད་པ་པོ་ཞེས་བྱ་བའི་དོན་ཏེ། འདི་སྐད་བརྗོད་པའི་ཚེ་ཕྱག་ན་རྡོ་རྗེའི་རྣལ་འབྱོར་བྱས་ལ་བརྗོད་ཅིག་ཅེས་པ་སྟེ། ཕྱག་ན་རྡོ་རྗེས་ཐམས་ཅད་གདུལ་བའི་ཕྱིར་དེ་ནི་དེ་དག་ལ་ལྷག་པར་འཇོམས་སོ། །འཇིག་རྟེན་པའི་ལྷ་མོ་རྣམས་ཀྱི་གསང་བ་སྒྲུབ་པ་གསུངས་པ། མ་རྣམས་ཀྱི་
གསང་བའི་ཕྱག་རྒྱ་ཞེས་པ་དག་གོ །དེ་ཡང་རང་གི་དཀྱིལ་འཁོར་གོང་དུ་སྨོས་པའི་ནང་དུ་ཞུགས་ལ་བྷྱོ་བྷྱོ་ཞེས་བྱ་བ་སྔགས་བརྗོད་ཅིག །དོན་རང་བཞིན་བསྟན་པ་སྟེ་མང་པོའི་ཚིག་ཏུ་སྟོན་པའོ། །གོང་དུ་དྲིས་པ་ལ་ནི་ཕྱག་རྒྱ་གསང་བས་སྒྲུབ་པའི་འོག་ཏུ་ཕྱག་རྒྱ་བཅིང་བ་བཤད་མོད་ཀྱི། ལན་བཏབ་པ་ལ་ནི་ཕྱག་རྒྱ་བཅིངས་པ་རྣམས་གསང་བ་སྒྲུབ་པའི་གོང་དུ་ཕྱག་རྒྱ་བཅིང་བ་བཤད་དོ། །དེ་ནས་ཕྱག་རྒྱའི་དེ་ཁོ་ན་འབྱུང་སྟེ་ཞེས་པ་ཕྱག་རྒྱ་ནི་སོ་སོའི་རྣམ་པར་གྲོལ་བའི་མཚན་མའོ། །དེ་ཁོ་ན་མི་སླུ་བ་སྟེ་ཡང་དག་པ་སྟེ། ཕྱག་རྒྱའི་རང་བཞིན་མི་སླུ་བ། །ཞེས་བྱ་བའི་དོན་ཏོ། །སེམས་ལས་སངས་རྒྱས་དང་ཆོས་འབྱུང་ངོ་ཞེས་པ་སེམས་ལས་ལོགས་ཤིག་ན་སངས་རྒྱས་དང་ཆོས་མི་དམིགས་ཏེ་ཁམས་གསུམ་སེམས་ཙམ་དུ་ཟད་པའི་ཕྱིར་རོ། །ཡང་དག་པར་ན་ཕྱག་རྒྱ་རྣམ་བཞི་ཡང་དེ་བཞིན་གཤེགས་པའི་ཡེ་ཤེས་ལ་གནས་སོ་ཞེས་གསུངས་པ་དེ་ཁོ་ན་ཉིད་དུ་ཞེས་བྱ་བ་དག་གོ །དེ་རྣམས་ཀྱི་ནི་ཞེས་བྱ་བ་ནི་དེ་བཞིན་གཤེགས་པའི་ཕྱག་རྒྱ་གོང་དུ་སྨོས་པ་རྣམས་སོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་ལྔ་རྣམས་སོ། །སྙིང་ལ་གནས་པ་ནི་སེམས་ལ་གནས་པ་ཞེས་བྱའོ། །སྐྱོང་མ་ནི་བཙུན་མོའི་རྣམ་གྲངས་ཏེ་ཇི་ལྟར་འཇིག་རྟེན་པའི་བཙུན་མོས་ཀྱང་ནི་གསོ་སྟེ་སྙིང་ལ་འབབ་ཅིང་ཡིད་དུ་འོང་བར་གྱུར་བའི་ཕྱིར་སྐྱོང་མ་ཞེས་བྱ་བ་བཞིན་དུ་ཕྱག་རྒྱ་རྣམ་བཞི་འདི་རྣམས་ཀྱང་བཅོམ་ལྡན་འདས་ཀྱིས་བསྐྱེད་ཅིང་བསྐྱངས་པའི་བཙུན་མོ་ཡེ་ཤེས་ཀྱི་རང་བཞིན་ལ་གནས་པའོ། །བདག་ཀྱང་དེ་བཞིན་གཤེགས་པ་སྟེ། །ཞེས་བྱ་བ་དག་ཀྱང་སངས་རྒྱས་ཉིད་དུ་མོས་པས་ང་རྒྱལ་བསྐྱེད་དེ། ཕྱག་རྒྱ་འདི་ཡང་བདག་གིས་སྐྱོང་མའོ་ཞེས་བསྒོམས་ལ་ཕྱག་རྒྱ་བཞི་སྒྲུབ་བོ། །ཕྱག་ན་རྡོ་རྗེའི་ཕྱག་རྒྱ་དེ་ཁོ་ན་བསྟན་པ། རབ་དགའ་སེམས་ཅན་ཀུན་གྱི་མཆོག ། ཅེས་པ་དག་གོ །ཕྱག་ན་རྡོ་རྗེའི་རང་བཞིན་བསྟན་པ་ནི་རབ་དགའ་ཞེས་བྱ་བ་དག་སྟེ། བྱང་ཆུབ་ཀྱི་སེམས་རབ་ཏུ་དགའ་ཞེས་པའི་རང་བཞིན་བྱང་ཆུབ་སེམས་དཔའ་ཀུན་གྱི་ནང་ན་མཆོག་གོ །དེ་ལ་ཕྱག་རྒྱ་རབ་ཏུ་བརྟགས། །ཞེས་པ་ཕྱག་ན་རྡོ་རྗེའི་རང་བཞིན་ལས་གྲུབ་པ་བརྟན་པ་མྱུར་དུ་
སྩོལ་བའི་ཕྱག་རྒྱ་བཞི་དག་རྡོ་རྗེ་སེམས་དཔའ་འདོད་པའི་རང་བཞིན་གྱིས་རབ་ཏུ་བརྟགས་སོ། །བཅོམ་ལྡན་རྟག་པ་འདོད་པ་སྟེ། །ཞེས་པ་བཅོམ་ལྡན་འདས་རྡོ་རྗེ་སེམས་དཔའ་འདོད་པ་དེ་ནི་རྟག་པ་སྟེ་དུས་ཐམས་ཅད་དུ་རྒྱུན་མི་འཆད་པའི་ཕྱིར་རོ། །དེ་ཉིད་དེ་བཞིན་གཤེགས་པའོ། །ཞེས་པ་འདོད་པའི་རང་བཞིན་དེ་ཉིད་དེ་བཞིན་གཤེགས་པ་རྣམ་པར་སྣང་མཛད་ལ་སོགས་པའོ། །དེ་ལས་ཐམས་ཅད་བདག་ཉིད་སྐུ། །ཞེས་པ་འདོད་པའི་རང་བཞིན་རྡོ་རྗེ་སེམས་དཔའ་དེ་ལས་བྱང་ཆུབ་སེམས་དཔའ་གཞན་ཐམས་ཅད་ཀྱི་སྐུ་འབྱུང་ངོ༌། །བདག་ཀྱང་དེ་ལས་བྱུང་བས་ན་ཕྱག་རྒྱ་རྣམ་བཞི་གྲུབ་པར་གྱུར་ཅིག་ཅེས་བྱ་བའི་དོན་ཏོ། །དེ་ནས་ཕྱི་རོལ་གྱི་རྡོ་རྗེའི་རིགས་ཀྱི་ཕྱག་རྒྱའི་དེ་ཁོ་ན་ནི་ཞེས་པ་ལྷ་ཆེན་པོ་ལ་སོགས་པ་ནས་ས་འོག་པའི་ལྷའི་བར་དུ་འཇིག་རྟེན་པའི་ལྷ་དེ་དག་གི་དེ་ཁོ་ནའོ། །ཕྱག་ན་རྡོ་རྗེས་ལྷ་ཐམས་ཅད་དབང་དུ་བྱས་ཞེས་པ་ནི་དེས་ལྷ་ཐམས་ཅད་འདུལ་བའི་ཕྱིར་རོ། །རྡོ་རྗེར་བྱས་ཞེས་པ་དེ་ནི་དེ་དག་ཐམས་ཅད་རྡོ་རྗེའི་རིགས་སུ་དབང་བསྐུར་བའི་ཕྱིར་རོ། །དེ་དག་གི་ཕྱག་རྒྱ་ཡང་རྡོ་རྗེའི་ཕྱག་རྒྱ་ཉིད་དོ་ཞེས་པ་གསལ་ཕུར་གསུམ་པ་ལ་སོགས་པ་རང་རང་གི་ཕྱག་རྒྱ་ཀུན་ཀྱང་ཕྱག་ན་རྡོ་རྗེའི་ཡེ་ཤེས་ཀྱིས་བྱིན་གྱིས་བརླབས་པའི་ཕྱིར་རོ། །དེ་ནས་མ་རྣམས་ཕྱག་རྒྱའི་དེ་ཁོ་ན་ཉིད་ནི་ཞེས་པ་སེམས་ཅན་མང་པོ་ལ་གནོད་པ་དང་དཀོན་མཆོག་གསུམ་ལ་འཚེ་བ་ལ་སོགས་པ་མ་རུངས་པའི་སེམས་ཅན་ཐམས་ཅད་མ་རྣམས་ཀྱིས་བཟའ་བར་བྱའོ་ཞེས་ལྷ་ཆེན་པོ་ལ་སོགས་པ་ཐམས་ཅད་ཀྱིས་བསྐོས་པ་སྟེ་གང་གིས་བསྐོས་པ་དེ་ནི་ཕྱག་རྒྱས་བཏབ་པ་ཡིན་པས། དེའི་ཕྱིར་དེ་ནས་མ་རྣམས་བསྒྲུབ་པར་བྱའོ། །དེ་བཞིན་གཤེགས་པའི་དེ་ཁོ་ན་ཉིད་ནི་རབ་ཏུ་སྦྱོར་བས་ཞེས་པ་དེ་ཁོ་ནའི་ཕྱག་རྒྱ་བསྒྲུབ་པའི་ཚེ་གང་སྒྲུབ་ཀྱང་རུང་སྟེ། ཐོག་མར་དེ་བཞིན་གཤེགས་པའི་དེ་ཁོ་ན་སྒོམ་པ་མངོན་དུ་བྱས་ནས་ཕྱིས་གཞན་བྱའོ་ཞེས་པའི་ཐ་ཚིག་གོ །དེ་ནས་རྟོག་པ་ཐམས་ཅད་ཀྱི་བྱིན་གྱིས་བརླབ་པ་ལ་སོགས་པའི་ལས་བཤད་དོ་ཞེས་པ་ཕྱག་ན་རྡོ་རྗེ་ལ་སོགས་པ་སོ་སོའི་རྟོག་པ་གོང་དུ་བཤད་པ་ཐམས་ཅད་ཀྱི་བྱིན་གྱིས་བརླབ་པ་དང་དབང་བསྐུར་བ་དང༌། ཏིང་ངེ་འཛིན་དང༌། མཆོད་པ་རྣམས་བཤད་དོ་ཞེས་བྱ་བའི་ཐ་ཚིག་གོ །ཉིན་རེ་ཇི་ལྟ་བུའི་དུས་མངོན་དུ་ཞེས་བ་ཉིན་གཅིག་ཅིང་
བཟླས་པའི་དུས་སྔ་དྲོ་དང༌། གུང་དང་དགོངས་གསུམ་མམ། ཡང་ན་དུས་གཅིག་ཏུ་ཟློས་ཀྱང་རུང་སྟེ་ཇི་ལྟ་བུའི་དུས་སུ་ཟློས་པ་དེའི་སྔོན་དུ་དང་པོར་རིགས་བཞིའི་ཕྱག་རྒྱ་དང་སྙིང་པོས་བྱིན་གྱིས་བརླབ་པོ་ཞེས་བསྟན་པ་སྟེ་དེ་ལ། རྡོ་རྗེ་མཆོག་གི་ཕྱག་རྒྱ་ཡིས། །ཞེས་བྱ་བ་ནི་རིགས་བཞི་སོ་སོའི་དམ་ཚིག་གི་ཕྱག་རྒྱས་རང་རང་གི་གནས་སུ་བཞག་སྟེ། སྙིང་གར་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱ་རྡོ་རྗེ་བཅིངས་པ་ལས་གུང་མོ་སྦྱར་ཏེ་བསྒྲེང་ལ་མཐེ་བོ་དང་མཐེའུ་ཆུང་སོ་སོར་བསྐྱེད་དེ་བསྒྲེང་བ་རྡོ་རྗེ་རྩེ་ལྔ་པའི་ཕྱག་རྒྱ་གོང་དུ་སྨོས་པ་དེ་ཉིད་བཞག་གོ །སྨིན་མཚམས་སུ་ནི་རིན་པོ་ཆེའི་རིགས་ཀྱི་དམ་ཚིག་གི་ཕྱག་རྒྱ་རྡོ་རྗེ་བཅིངས་པ་ལས་མཛུབ་མོ་རྡོ་རྗེ་ནོར་བུར་བྱས་པ་བཞག་གོ །ལྐོག་མར་ནི་པདྨོའི་རིགས་ཀྱི་ཕྱག་རྒྱ་རྡོ་རྗེ་བཅིངས་པ་ལས་མཛུབ་མོ་པདྨར་བྱས་པ་བཞག་གོ །སྤྱི་གཙུག་ཏུ་ནི་ལས་ཀྱི་རིགས་ཀྱི་ཕྱག་རྒྱ་རྡོ་རྗེ་བཅིངས་པ་ལས་མཐིལ་བསྐྱེད་དེ་མཐེའུ་ཆུང་མཐེ་བོ་སོ་སོར་ཕྱག་རྒྱ་བཞག་གོ །དེ་ལ་རྡོ་རྗེ་ཆེན་པོའི་རང་གི་རྣམ་པར་གྲོལ་བའི་ཡེ་ཤེས་ཏེ་འཇིག་རྟེན་པའི་ཤེས་པ་གཞན་པས་འཕགས་པའི་ཕྱིར་ཆེས་མཆོག་གོ །དེའི་རྟགས་ནི་ཕྱག་རྒྱ་སྟེ་རིགས་སོ་སོའི་ཡེ་ཤེས་ཀྱི་མཚན་མ། ལག་པའི་ཕྱག་རྒྱ་བཅིང་བས་བསྟན། །ཞེས་བྱ་བའི་ཐ་ཚིག་གོ །རང་བྱིན་གྱིས་བརླབས་པར་བསམ་པར་བྱ་ཞེས་པ་སྔགས་པ་སངས་རྒྱས་ལྔས་བྱིན་གྱིས་བརླབས་པར་བསམ་པའོ། །བཛྲ་སཏྭ་ཞེས་པ་ནི་རྡོ་རྗེ་རིགས་ཀྱི་སྙིང་པོའི། །བཛྲ་སཏྭ་ནི་རྡོ་རྗེ་རིན་པོ་ཆེའི་རིགས་ཀྱིའོ། །བཛྲ་དྷརྨ་ནི་པདྨའི་རིགས་ཀྱིའོ། །བཛྲ་ཀརྨཱ་ནི་ལས་ཀྱི་རིགས་ཀྱིའོ། །དབང་བསྐུར་བའི་ཆོ་ག་གསུངས་པ་དེ་ལ་འདི་ནི་རྡོ་རྗེ་རིན་པོ་ཆེའི་དབང་བསྐུར་བའི་སྙིང་པོའོ་ཞེས་པ་དག་གོ །རིན་པོ་ཆེའི་རིགས་ཐམས་ཅད་ལ་དབང་བསྐུར་བའི་ལས་ཀྱི་སྒོ་ཡིན་པའི་ཕྱིར་རོ། །དེ་ནས་ཏིང་ངེ་འཛིན་གྱི་ཆོ་ག་གསུངས་པ་དེ་ནས་ཏིང་ངེ་འཛིན་གྱི་ཡེ་ཤེས་བསྐྱེད་པ་ནི་ཞེས་པ་དག་གོ །ཏིང་ངེ་འཛིན་གྱི་ཡུལ་ལ་ཤེས་པ་བསྐྱེད་པའི་ཏིང་ངེ་འཛིན་གྱི་ཡེ་ཤེས་བསྐྱེད་པའོ། །ཕྱག་རྒྱ་ཆེན་པོའི་རྣལ་འབྱོར་བྱས་ལ་རང་གི་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པ་བསྒོམ་མོ། །དེའི་སྙིང་པོ་ནི། ཨོཾ་བཛྲ་ཨཱཏྨ་ཀ་རྡོ་རྗེའི་བདག་ཉིད་ཅེས་
པའི་དོན་ཏོ། །གོང་མ་བཞིན་ཏུ་ཏིང་ངེ་འཛིན་བྱས་པ་རྡོ་རྗེའི་བཟླས་པ་སྒྲ་མེད་པས་སྙིང་པོ་འདི་ཉིད་ཅི་འདོད་པ་ཅུང་ཟད་བཟླས་སོ། །དེ་ནས་མཆོད་པའི་ཆོ་ག་གསུངས་པ། རྡོ་རྗེ་མཆོད་པའི་རབ་ཏུ་བྱ་བ་ནི་ཞེས་བྱ་བ་དག་གོ །རྡོ་རྗེ་ཁུ་ཚུར་བྱས་ལ་མཁལ་ལྟག་གཡས་གཡོན་དུ་བརྟེན་ཏེ་བསྙེམས་པ་ནི་བཛྲ་ལཱ་སྱེ་མཆོད་པ་སྟེ། དེས་མཆོད་པ་དེ་སྒྲུབས་ཤིག་རྡོ་རྗེ་ཕྲེང་བ་ནི་རྡོ་རྗེ་ཁུ་ཚུར་གྱི་ཕྲེང་བ་འཛིན་པ་འདྲ་བར་བསྟན་པའོ། །རྡོ་རྗེ་གླུ་ནི་རྡོ་རྗེ་ཁུ་ཚུར་གྱིས་ཁ་ནས་དྲང་ངོ༌། །རྡོ་རྗེ་གར་ནི་ཐལ་མོ་བསྐྱེད་པ་བསྐོར་ནས་སྤྱི་བོ་ནས་དགྲོལ་བའོ། །དེས་བསྟོད་པ་བྱའོ་ཞེས་གསུངས་པ། དེ་ལ་ཡི་གེ་མཉམ་པ་ཡི། །ཞེས་བྱ་བ་དག་གོ །ཡི་གེ་མཉམ་པ་ནི་ཚིགས་སུ་བརྗོད་པ་ཀློག་པའོ། །རྡོ་རྗེའི་གླུ་ནི་ཤ་རྫ་དང༌། དྷེའི་བ་ཏ་ལ་སོགས་པའོ། །རྡོ་རྗེ་སེམས་དཔའ་བསྡུས་པའོ། །ཞེས་པ་རྡོ་རྗེའི་རིགས་ལ་བསྟོད་པ་སྟེ། རྡོ་རྗེ་སེམས་དཔའ་ཡེ་ཤེས་ཀྱི་རང་བཞིན་ཡིན་པས་ན་དེས་སངས་རྒྱས་དང་བྱང་ཆུབ་སེམས་དཔའ་ཐམས་ཅད་བསྡུས་སོ། །ཇི་ལྟ་ཞེ་ན་ཐམས་ཅད་ཀྱང་རྡོ་རྗེ་སེམས་དཔའི་རང་བཞིན་ཡིན་པའི་ཕྱིར་རོ། །རྡོ་རྗེ་རིན་ཆེན་བླ་ན་མེད། །ཅེས་པ་རིན་པོ་ཆེའི་རིགས་ལ་བསྟོད་པ་སྟེ། སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་དང༌། སྟོབས་བཅུ་དང༌། མི་འཇིགས་པ་ལ་སོགས་པ་དཀོན་ཞིང་རིན་པོ་ཆེའི་ཕྱིར་རིན་པོ་ཆེ་སྟེ་དེ་ལྟ་བུ་གཞན་ལ་མེད་པས་ན་བླ་ན་མེད་དོ། །རྡོ་རྗེ་ཆོས་ནི་གླུར་བླངས་པས། །ཞེས་པ་པདྨའི་རིགས་ལ་བསྟོད་པ་སྟེ། ཐེག་པ་གསུམ་གྱི་ལམ་སྟོན་ཅིང་སྒྲོགས་པས་ན་གླུ་བླངས་པས་དོན་སྒྲུབ་ཅེས་བྱའོ། །རྡོ་རྗེ་ལས་ནི་བྱེད་པར་འགྱུར། །ཞེས་པ་ལས་ཀྱི་རིགས་ལ་བསྟོད་པ་སྟེ། ཡེ་ཤེས་ཀྱིས་བྱིན་གྱིས་བརླབ་པའི་ལས་ནི་རྡོ་རྗེ་ལས་ཏེ་གོང་མའི་རྡོ་རྗེ་སྨོས་པ་རྣམས་ཀྱང་དེ་བཞིན་དུ་སྦྱར་རོ། །ལས་ནི་མཆོད་པ་སྣ་ཚོགས་དང་སེམས་ཅན་གྱི་དོན་སྣ་ཚོགས་མཛད་པར་འགྱུར་བའོ། །འདི་བརྩམས་ཏེ་དགའ་བ་དང་དབང་བསྐུར་བ་དང་ཞེས་བྱ་བ་བསྟོད་པ་འདི་བརྩམས་ཏེ་དགའ་བའི་མཆོད་པ་བྱང་ཆུབ་ཀྱི་སེམས་ཀྱི་རང་བཞིན་རྡོ་རྗེ་ལཱ་སྱེ་དང༌། བྱང་ཆུབ་ཀྱི་ཡན་ལག་གི་ཕྲེང་བའི་རང་བཞིན་གྱིས་དབང་བསྐུར་བ་དང༌། དམ་པའི་ཆོས་སྒྲོགས་པའི་གླུའི་མཆོད་པ་འདི་རྣམས་ཀྱིས་དེ་བཞིན་གཤེགས་པ་ཡང་འགྲུབ་ན་གཞན་ས་པའི་གྲུབ་པ་རྣམས་ལྟ་ཅི་སྨོས། ཅིའི་ཕྱིར་ཞེན། དེ་ལྟར་སེམས་དཔའི་བདེ་བ་དང་མཚུངས་པ་མེད་
དོ་ཞེས་པ་དེ་ལྟ་བུའི་མཆོད་པ་ནི་སངས་རྒྱས་དང་བྱང་ཆུབ་སེམས་དཔའ་རྣམས་བདེ་ཞིང་དགྱེས་པར་འགྱུར་བའི་རྒྱུ་ཡིན་ཏེ་བདེ་བར་འགྱུར་བ་བཞིན་འདི་དང་འདྲ་བ་མེད་དོ། །སེམས་དཔའ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ལ་བྱའོ། །དེ་ལྟར་བྱིན་གྱིས་བརླབས་པའི་སྤྱི་བོའི་ཚོགས་བཤད་ཟིན་ནས་ཕྱག་ན་རྡོ་རྗེའི་བྱིན་གྱིས་བརླབ་པ་ལ་སོགས་པ་ཁྱད་པར་དུ་གསུངས་པ། དེ་ནས་ཕྱག་ན་རྡོ་རྗེའི་བྱིན་གྱིས་བརླབ་པ་ལ་སོགས་པ་འབྱུང་བ་ནི་ཞེས་བྱ་བ་དག་གོ །ཉིན་རེ་ཇི་ལྟ་བུའི་དུས་སྔོན་དུ་ཞེས་པ་ནི་གོང་མ་བཤད་པ་བཞིན་ནོ། །རྡོ་རྗེ་བྱིན་བརླབ་ལ་སོགས་སྦྱོར། །ཞེས་བྱ་བ་སྙིང་གར་རྡོ་རྗེ་བྱིན་གྱིས་བརླབ་པ་ནས་སྤྱི་བོར་ལས་ཀྱི་རྡོ་རྗེས་བྱིན་གྱིས་བརླབ་པའི་བར་དུ་གོང་དུ་རིགས་བཞིར་བྱིན་གྱིས་བརླབ་པའི་སྦྱོར་བས་བདག་ངེས་པར་བྱིན་གྱིས་བརླབས་ལ་བདག་རང་ཕྱག་ན་རྡོ་རྗེ་ཉིད་དུ་རིགས་བཞིས་བྱིན་གྱིས་བརླབས་པར་གྱུར་ཏོ་ཞེས་པའི་རྣལ་འབྱོར་དང་ལྡན་པར་བྱའོ་ཞེས་གསུངས་པ། སེམས་དཔའི་བྱིན་བརླབས་རྣལ་འབྱོར་ལྡན། །ཞེས་སོ། །དེ་ནས་རྡོ་རྗེ་བཅིངས་པས་རྡོ་རྗེ་རྩེ་ལྔ་པ་ལག་ན་བཟུང་སྟེ་དགུག་པ་དང་གཞུག་པ་དང་འཆིང་བ་དང་དབབ་པར་བྱའོ་ཞེས་གསུངས་པ་རྡོ་རྗེ་དང་བཅས་ཏེ་རྡོ་རྗེ་འབེབས་སོགས་རྣལ་འབྱོར་གྱིས་བྱའོ་ཞེས་པའི་ཚིག་གི་ལྷག་མས་སྡུད་དོ། །དེ་ནས་རྡོ་རྗེ་ཁུ་ཚུར་གཉིས་སུ་བྱ་སྟེ་རྡོ་རྗེ་གཟུང་བས་ཕྱག་ན་རྡོ་རྗེ་ཉིད་ཀྱིས་ཕྱག་རྒྱ་བཅིང་བས་བཅིངས་ཏེ་བྱིན་གྱིས་བརླབ་པོ་ཞེས་གསུངས་པ། རྡོ་རྗེ་ཁུ་ཚུར་རྡོ་རྗེར་བཅས། །ཞེས་བྱ་བ་དག་གོ །གཉིས་བྱས་ཞེས་བྱ་བ་ནི་ཁུ་ཚུར་གཉིས་སུ་ཕྱེ་བའོ། །ཕྱག་རྒྱའི་ཆོག་ཞེས་བྱ་བ་ནི་རྡོ་རྗེ་ཧཱུཾ་ཀ་རའི་ཕྱག་རྒྱ་ཉིད་དེ་རྡོ་རྗེ་ཁུ་ཚུར་མཐེའུ་ཆུང་སྦྲེལ་ལ་དཔུང་པ་བསྣོལ་ཏེ་མཛུབ་མོ་བསྒྲེང་བའི་གོང་དུ་སྨོས་པའོ། །ཕྱག་རྒྱ་བཅིང་བ་དེ་བྱང་ཆུབ་སེམས་འདོད་པའི་རང་བཞིན་དེ་ཉིད་བདག་ཉིད་ཡིན་ནོ་ཞེས་བསྒོམས་ནས་ཕྱག་རྒྱ་བཅིང་ངོ་ཞེས་གསུངས་པ། འདོད་པ་བདག་ཅེས་བསྒོམས་ནས་སོ། །ཞེས་སོ། །ཕྱག་རྒྱ་དེ་ཉིད་དང་སྦྱར་བའི་སྙིང་པོ་གསུངས་པ། ཊཀྐི་ཛ་ཧོ་ཞེས་པ་སྟེ་འདོད་པའི་ཁྲོ་བོའི་རང་བཞིན་དོན་གོང་དུ་སྨོས་པ་བཞིན་ནོ། །སྙིང་པོ་སྨོས་པའི་ཞར་ལ་དེའི་སྒྲུབ་པའི་ཆོ་ག་ཚིག་གཞན་ཡང་གསུངས་པ། དེ་ནས་འདི་སྒྲུབ་པ་གཞན་ཡང་ཞེས་བྱ་བ་དག་གོ །རྡོ་རྗེ་བཅིང་བས་རྟག་གཟུང་སྟེ། །ཞེས་བྱ་བ་ནི་རང་གི་རྣམ་པར་གྲོལ་བའི་མཚན་མ་རྡོ་རྗེ་རྩེ་ལྔ་པ་
རྡོ་རྗེ་བཅིང་བའི་ཆང་པར་གཞུག་འདོད་པ་ཐམས་ཅད་དབང་བ་ཞེས་པ་བྱང་ཆུབ་ཀྱི་སེམས་མངོན་དུ་བྱ་བ་ལ་དབང་བའམ་འདོད་པ་རྣམ་ལྔ་ཅི་དགར་སྤྱོད་པའི་དབང་ཐོབ་པའོ། །འདོད་པའི་གཟུགས་དང་ཞེས་པ་ཇི་ལྟར་འདོད་པའི་ལུས་སུ་འགྱུར་བའོ། །འདོད་པའི་ཚེ་དང་ཞེས་པ་ཇི་སྲིད་དུ་གསོན་བ་དེ་སྲིད་དུ་འཚོའོ། །འདོད་པའི་བདག་པོ་ཞེས་པ་སེམས་ཅན་གང་ལ་དབང་བར་འདོད་པ་དེའི་བདག་པོར་འགྱུར་རོ། །ཀུན་དུ་འགྲོ་བ་ནི་ཕྱོགས་བཅུར་དགའ་མ་གུར་འགྲོ་བའོ། །དེ་ནས་ཕྱག་ན་རྡོ་རྗེ་དབང་བསྐུར་བའི་རབ་ཏུ་བྱ་བ་འབྱུང་བ་ནི་ཞེས་པ་དེ་བཞིན་གཤེགས་པ་ལྔ་རྣམས་ཀྱི་ཕྲེང་བའི་དབུ་རྒྱན་གྱི་དབང་བསྐུར་བ་སྟེ་གོང་དུ་དེ་བཞིན་གཤེགས་པའི་སྐུའི་དབུ་རྒྱན་གྱི་སྤྱི་བོར་ནི་རྣམ་པར་སྣང་མཛད་ཀྱི་སྐུའི་ཕྱག་རྒྱ་མཐེ་བོ་སྐྱིལ་མོ་ཀྲུང་བཅས་ཞེས་བྱ་བ་ལ་སོགས་པ་གསུངས་སོ། །དེ་བཞིན་དུ་དཔྲལ་བ་དང་གཡས་དང་ལྟག་པ་དང་གཡོན་དུ་ཡང་གུང་མོ་རྡོ་རྗེ་དང༌། རིན་པོ་ཆེ་དང༌། པདྨ་འདྲ་བ་དང༌། གུང་མོད་དཔྲལ་བ་རྣམས་རིམ་བཞིན་དུ་མི་བསྐྱོད་པ་དང༌། རིན་པོ་ཆེ་འབྱུང་བ་དང༌། སྣང་བ་མཐའ་ཡས་དང༌། གདོན་མི་ཟ་བར་གྲུབ་པའི་ཕྱག་རྒྱ་རེ་རེ་ཞིང་ཡང་སྙིང་པོ་འདི་ལན་རེ་བརྗོད་ལ་བྱིན་གྱིས་བརླབ་བོ། །ཕྱག་རྒྱ་དེ་ལྔའི་མཚན་ཉིད་ཞིབ་ཏུ་ནི་གོང་དུ་བཤད་པ་ཡིན་ནོ། །ཨོཾ་སརྦ་ཏ་ཐཱ་ག་ཏ་རཏྣ་ཨ་བྷི་ཥེ་ཀ་ཨཿཞེས་པ་དེ་བཞིན་གཤེགས་པ་ལྔ་རྣམས་ཉིད་རིན་པོ་ཆེ་སྟེ་དེས་དབང་བསྐུར་ཞེས་བྱ་བའི་དོན་ཏོ། །ཕྱག་ན་རྡོ་རྗེའི་ཏིང་གི་སྦྱོར་བ་གསུངས་པ་དེ་ནས་དེ་བཞིན་གཤེགས་པ་ཐམས་ཅད་ཀྱི་ཞེས་པ་དག་གོ །དེ་བཞིན་གཤེགས་པ་རྣམས་ཀྱི་ཡེ་ཤེས་དག་བསྐྱེད་པའི་རྒྱུ་ཏིང་ངེ་འཛིན་འོག་ནས་འབྱུང་བ་སྔོན་དུ་བྱ་ཞེས་བྱ་བའི་ཐ་ཚིག་གོ །ཇི་ལྟར་བཅོམ་ལྡན་འདས་སེམས་དཔའ་ཐམས་ཅད་ཅེས་པ། བཅོམ་ལྡན་འདས་རྡོ་རྗེ་སེམས་དཔའ་ནི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་རང་བཞིན་ཉིད་ཡིན་པ་དེ་ལྟར་བདག་ཀྱང་རྡོ་རྗེ་སེམས་དཔའ་དང་ཐ་མི་དད་པས་ན་ཐམས་ཅད་ཀྱི་རང་བཞིན་ནོ་ཞེས་ང་རྒྱལ་བསྐྱེད་ལ་དགུག་པ་དང་གཞུག་པ་ལ་སོགས་པའི་ཕྱག་རྒྱ་དང་ལྡན་པས་སྙིང་པོ་འདི་བརྗོད་དོ། །དེ་ལ་དགུག་པ་ནི་ཐམས་ཅད་ཀྱི་བདག་ཉིད་བདག་གི་རང་བཞིན་དུ་དབང་དུ་བྱའོ། །ཨོཾ་བཛྲ་སཏྭ་ཧཱུཾ། རྡོ་རྗེ་སེམས་དཔའི་རང་བཞིན་སྨོས་པའོ། །ཛཿནི་དགུག་པའོ། །ཧཱུཾ་ནི་གཞུག་པའོ། །བ་ནི་འཆིང་བའོ། །ཧོཿནི་
དབང་དུ་བྱེད་པའོ། །དེ་ནས་མཆོད་པའི་ཆོ་ག་གསུངས་པ། བཅོམ་ལྡན་འདས་ཀྱི་སྤྱན་སྔར་ཞེས་པ་དག་གོ །ཕྱག་ན་རྡོ་རྗེ་ཉིད་ཀྱི་ཆ་ལུགས་རི་མོའམ་བྱས་པའི་སྤྱན་སྔར་བདག་རང་གིས་བྱིན་གྱིས་བརླབ་པ་དང༌། དབང་བསྐུར་བ་དང༌། ཏིང་ངེ་འཛིན་བྱས་ནས་གར་ཐབས་ཀྱི་ཕྱག་རྒྱས་མེ་ཏོག་དང་དྲི་དང༌། བདུག་པ་དང༌། མར་མེ་རྣམས་དབུལ་ལོ། །སོགས་པའི་སྒྲས་ནི་བདུག་པ་ནས་མར་མེའི་བར་དུའོ། །གསང་བའི་མཆོད་པའི་ཕྱག་རྒྱས་དབུལ། །ཞེས་པ་མེ་ཏོག་ལ་སོགས་པ་དབུལ་བའི་ཚེ་གར་ཐབས་དང་སྦྱར་བའི་སྙིམ་པས་དབུལ་པ་ཉིད་གསང་བའི་ཕྱག་རྒྱའོ། །གཞུ་འདྲེན་པ་ཚུལ་གྱིས་སུ་ཞེས་པ་ཕྱག་ན་རྡོ་རྗེའི་དཀྱིལ་འཁོར་གྱི་དབུས་ན་བཞུགས་པའི་མདུན་རྡོ་རྗེ་གཞུ་འགེངས་པའི་ལྷ་མོ་སྟེ་མདའ་འཕེན་པའི་ཚུལ་དུ་བྱའོ། །གཡས་ན་ལྷ་མོ་ཀཱི་ལི་ཀཱི་ཀཱི་ལ་སྟེ་ཁུ་ཚུར་གྱི་པད་པས་ཕྱག་ན་རྡོ་རྗེ་ལ་འཁྱུད་པ་ལྟ་བུ་བའི་ཚུལ་སྟོན་པའོ། །རྒྱབ་ཏུ་ཆུ་སྲིན་གྱི་རྒྱལ་མཚན་ཐོགས་པའི་ལྷ་མོ་སྟེ་རྡོ་རྗེ་ཚུར་བཅིངས་ལ་གཡོན་པའི་ལག་ངར་བསྒྲེང་བའི་གྲུ་མོར་གཡས་པས་གཟུང་བ་ལྟར་བྱའོ། །གཡོན་ན་རྡོ་རྗེ་བསྙེམས་པའི་ལྷ་མོ་སྟེ། རྡོ་རྗེ་ཁུ་ཚུར་གཉིས་མཁལ་ལྟག་ཏུ་གཏད་དེ་བསྙེམས་པའི་འཇུམ་པས་གཡོན་དུ་འདུད་དོ། །དེ་ནས་ཕྱག་ན་རྡོ་རྗེ་ལ་བསྟོད་པའི་ཚིག་འོག་ནས་འབྱུང་བ་རྡོ་རྗེའི་གླུ་པོར་ལ་དང༌། ཤ་རྫ་ལ་སོགས་པ་དང་སྤྱར་ཏེ་བསྟོད་དོ་ཞེས་གསུངས་པ། རྡོ་རྗེ་བསྟོད་པའི་གླུ་བརྗོད་ཅིང༌། །ཞེས་པ་དག་གོ །རྡོ་རྗེའི་བསྟོད་པ་ནི་ཕྱག་ན་རྡོ་རྗེ་ལ་བསྟོད་ཅེས་བྱ་བའི་དོན་ཏོ། །གཟུགས་ལ་སོགས་པའི་བདེ་བ་ཞེས་པ་ནི་འདོད་པ་རྣམ་ལྔའི་བདེ་བས་འདོད་པ་ན་སྤྱོད་པའི་སེམས་ཅན་ཡིད་རབ་ཏུ་བདེ་བར་གྱུར་པ་དེ་དག་ཐམས་ཅད་ནི་རབ་ཏུ་དགྱེས་པ་ཞེས་བྱ་བའི་བཅོམ་ལྡན་འདས་རྡོ་རྗེ་སེམས་དཔའ་ཁྱོད་ལ་འདུལ་ཏེ། རྡོ་རྗེ་སེམས་དཔའ་དགའ་ནི་དགའ་ཞིང་བདེ་བ་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །བདག་ལ་ཡང་གྲུབ་པ་མྱུར་དུ་སྩོལ་དུ་སྩོལ་ཅིག་ཅེས་བསྐུལ་པ། ཀུན་དགའ་བདེ་བྱེད་དེ་རིང་བདག་ལ་གྱུར། །ཞེས་བྱ་བ་དག་གོ །དགའ་བ་ཀུན་ནི་བྱང་ཆུབ་སེམས་སོ། །དེའི་རྒྱུས་བདེ་བར་འགྱུར་བ་ཆོས་ཀྱིས་བདེ་འགྱུར་བ། དེ་རིང་བདག་གིས་ཐོབ་པར་གྱུར་ཅིག་ཅེས་སོ། རྡོ་རྗེ་སེམས་དཔའ་ཉིད་ཀྱང་མྱུར་དུ་གྲུབ་ཅིག་ཅེས་སྨྲས་པ། དམ་པ་དང་པོ་ནི་རྡོ་རྗེ་སེམས་དཔའ་སྟེ་སེམས་ཅན་
ཐམས་ཅད་ཀྱི་གདོད་མ་མཆོག་ཡིན་པའི་ཕྱིར་རོ། །དེ་ཁོ་ནའི་ཚིག་ཐམས་ཅད་སྨྲ་ཞེས་པ་མི་སླུ་བ་བདེན་པའི་ཚིག་སྨྲ་ཞེས་པའི་དོན་ཏོ། །དེ་ལྟར་ལན་ཅིག་བྱིན་གྱིས་བརླབས་ལ། དེ་ནས་སྒྲུབས་ཤིང་ཅེས་གྲུབ་པ་རབ་འབྲིང་ཞི་བ་དང་རྒྱས་པ་ལ་སོགས་པ་ཅི་སྒྲུབ་ཀྱང་རུང་དང་པོར་བྱིན་གྱིས་བརླབ་པ་ལ་སོགས་པ་བྱའོ། །དེ་ནས་ཉིན་གཅིག་བཞིན་དུ་བྱིན་གྱིས་བརླབ་པ་ལ་སོགས་པ་ཉིན་རེ་བྱས་ན་ཞེས་པ་ལ་སོགས་པའི་སྒྲས་ནི་དབང་དང་ཏིང་ངེ་འཛིན་དང་མཆོད་པ་དང་ཕྱག་རྒྱ་ཆེན་པོ་ལ་སོགས་པ་བསྒོམ་པའམ་རྡོ་རྗེ་ཚིག་ལ་སོགས་པ་བཟླས་པ་བྱའོ། །ཉིན་རེ་ལ་ན་རེ་ཞེས་བྱ་བ་ནི་ཉེ་བར་གཟུང་བའི་ཚིག་སྟེ་ཉིན་རེ་དུས་གསུམ་དུ་བྱས་ཀྱང་ཉེས་པ་མེད་དོ། ཕར་མོ་རྣམས་བརྩམས་ཏེ་སྟོན་པ་བྱེད་དེ་ཞེས་པ་སངས་རྒྱས་དང་བྱང་ཆུབ་སེམས་དཔའ་སྐུ་གཟུངས་འོད་མི་གསལ་བར་སྟོན་པ་ནས་བརྩམས་ཏེ། རབ་ཏུ་གསལ་བར་མངོན་དུ་སྟོན་པར་བྱེད་པའི་བར་དུ་འགྱུར་རོ། །དེ་ལ་སྔགས་པ་ལ་ཚིག་ཏུ་ཡང་སྨྲའོ། །བྱམས་པ་དང་མཆོད་པ་ཡང་བྱེད་དོ། །སྔགས་པ་དེ་ཡང་དེ་ཡང་དེ་དག་ལ་མཆོག་པ་བྱེད་དོ། །འཇིགས་པ་མེད་པ་དང་ཞེས་པ་སྔགས་པ་དེ་རྒྱལ་པ་དང་རྐུན་པོ་ལ་སོགས་པའི་འཇིགས་པ་ལྡས་མི་འཇིགས་པའོ། །ཟད་པ་མེད་པ་ནི་ཚེ་དང་མཐུ་ལ་སོགས་པ་གཏན་ཟང་པར་མི་འགྱུར་བའོ། །གོད་པ་མེད་པ་ནི་དེ་དག་མཐར་གྱིས་ཟད་པར་མི་འགྱུར་བའོ། །འཇིགས་པ་མེད་པ་ནི་ཅིག་ཅར་དུ་མི་འཇིགས་པའོ། །རང་ཡང་སངས་རྒྱས་ཀྱི་གཟུགས་ལ་སོགས་པ་ཐམས་ཅད་ཀྱི་གཟུགས་སུ་འགྱུར་བའོ་ཞེས་པ་བདག་གི་ལུས་ཉིད་སངས་རྒྱས་ལ་སོགས་པའི་གཟུགས་སུ་འགྱུར་བའོ། །གོང་མ་ནི་བདག་གི་ལུས་ལས་ཀུན་འབྱུང་བར་སྟོན་པའོ། །མིག་གིས་འདས་པ་དང་འོངས་པ་དང་ད་ལྟར་གྱི་ཤེས་པ་མཐོང་ཞེས་སྦྱར་ཏེ་ཇི་ལྟར་མཐོང་ཞེ་ན་གཟུགས་ཐམས་ཅད་དང་ཡི་གེ་རྣམས་ཀྱིས་མཐོང་ངོ་ཞེས་པ་སྟེ། འདས་པའི་དུས་ན་ཇི་ལྟར་གྱུར་པ་དེ་ཐམས་ཅད་ད་ལྟར་གཟུགས་སུ་སྣང་ངམ། ཡི་གེའི་འབྲུ་རྣམས་ཀྱིས་སྟོན་པ་མིག་གིས་མཐོང་ནས་འདས་པའོ་ཤེས་པ་མཐོང་བར་འགྱུར་ཏོ། །དེ་བཞིན་དུ་འོངས་པ་དང་ད་ལྟར་གྱི་ཡང་སྦྱར་རོ། །ཐམས་ཅད་ཐོས་ཤིང་ཞེས་པ་གྲོག་སྦུར་གྱི་སྐད་ཡན་ཆད་ཐོས་པའོ། །རང་གི་ལྕེ་སྨྲའོ་ཞེས་པ་དུས་གསུམ་གྱི་ལེགས་ཉེས་རང་གི་ལྕེ་ལས་སྒར་འབྱུང་ངོ༌། །སྟོན་སྐྱོབ་ཐམས་ཅད་དང་
ཞེས་ལྷུན་གྱིས་གྲུབ་པར་འགྱུར་རོ་ཞེས་བྱ་བ་དང་སྦར་ཏེ། འཇིག་རྟེན་དང་འཇིག་རྟེན་ལས་འདས་པའི་གཙུག་ལག་གོ །སིལ་སྙན་ནི་རྡ་ལ་སོགས་པ་ཤེས་པའོ། །མདའ་གཞུ་ནི་འཕོངས་ཤེས་པའོ། །མཚོན་འདེབས་པ་ནི་ཕུབ་འཇུར་དང་གསོར་མཁས་པའོ། །རྣམ་པར་ཤེས་པ་ནི་རོལ་མོ་དང་རྒྱས་པོ་ལ་སོགས་པ་སྣ་ཚོགས་ཤེས་པའོ། །བཟོ་ཤེས་པ་ནི་ལོ་མ་འདར་བ་དང༌། རི་མོ་ལ་སོགས་པ་ཤེས་པའོ། །མཁན་རྣམས་ཤེས་པ་ནི་ཆོས་དང་གླང་པོ་ཆེའི་ཆོས་དང་མདའ་གཞུ་ལ་སོགས་ལ་སོགས་པ་བྱེད་པའོ། །དེ་དག་མ་བསླབ་པར་ཤེས་པ་ནི་ལྷུན་གྱིས་གྲུབ་པའོ། །ཉིན་གཅིག་ཅིང་གཟུགས་ཆེན་པོ་དང་ཞེས་པ་ཉིན་གཅིག་བཞིན་དེ་དག་འཕེལ་བར་འགྱུར་པའོ། །ཉིན་གཅིག་བཞིན་ཐམས་ཅད་མངོན་པར་ཤེས་པར་འགྱུར་རོ་ཞེས་པ་དུས་ཐམས་ཅད་དུ་བདག་ལ་དགེ་སྡིག་ཅི་འོང་བ་མངོན་པར་ཤེས་པར་འགྱུར་རོ། །མདོར་ན་དེ་བཞིན་གཤེགས་པ་ཉིད་དང་ཞེས་བྱ་བ་བྱིན་གྱིས་བརླབ་པ་ལ་སོགས་བྱ་བ་སྟེ་བསྒོམ་པའམ་བཟླས་པ་རབ་ཏུ་གུས་པར་བྱས་ན་སྒྲུབ་པའི་ཚིག་གཞན་མ་བྱས་ཀྱང་འགྲུབ་པ་འགྲུབ་ཞེས་བྱ་བའི་ཐ་ཚིག་གོ །དེ་ལ་སྒྲུབ་པའི་རབ་ཏུ་བྱ་བ་འབྱུང་སྟེ་ཞེས་པ་གྲུབ་པ་རྣམས་སྒྲུབ་པའི་ལེའུ་སྟེ་སྙིང་པོ་ལ་སོགས་པ་ནི་སྔགས་དང་རང་གི་སངས་རྒྱས་ཀྱི་སྐུ་རྗེས་སུ་དྲན་པ་ཕྱག་རྒྱ་ཆེན་པོའི་རྣལ་འབྱོར་བྱས་ལ་བཅོམ་ལྡན་འདས་ཀྱི་སྤྱན་སྔར་ཕྱག་རྒྱ་བསྒོམ་ཞིང་སྙིང་པོ་དང་ཕྱག་རྒྱ་དང་སྔས་དང་རིག་པ་རྣམས་གང་སྒྲུབ་པ་དེ་མངོན་དུ་བྱ་ཞིང་བཟླས་ཏེ་སྒྲུབ་པོ། །དེ་ལ་དེ་བཞིན་གཤེགས་པའི་སྙིང་པོ་ནི་བཛྲ་བ་དེ་ཅེས་བརྗོད་པའོ། །ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའོ། །སྔགས་དང་རིག་པ་ནི་རྒྱུད་འདིར་གསལ་བར་མ་གསུངས་པས་རྒྱུད་གཞན་ལས་འབྱུང་བར་སྦྱར་རོ། །དེ་ཉིད་བསྡུས་པའི་རྒྱུད་ལས་ནི་སྙིང་པོ་ལ་སོགས་པ་བཞི་ཡང་དཀྱིལ་འཁོར་གྱི་ལས་བྱེ་བྲག་ལས་གྱུར་ཏེ་དཀྱིལ་འཁོར་ཆེན་པོར་གསུངས་པ་ནི་སྙིང་པོའོ། །དམ་ཚིག་གི་དཀྱིལ་འཁོར་དུ་གསུངས་པའི་སྔས་ནི་ཕྱག་རྒྱའོ། །ཆོས་ཀྱི་དཀྱིལ་འཁོར་དུ་གསུངས་པ་ནི་སྔགས་སོ། །ལས་ཀྱི་དཀྱིལ་འཁོར་དུ་གསུངས་པ་ནི་རིག་པའོ་ཞེས་གསུངས་ན། རྒྱུད་འདི་ལས་ནི་དཀྱིལ་འཁོར་བཞི་གསུངས་མོད་ཀྱི། དཀྱིལ་འཁོར་རེ་རེ་ཞིང་སྙིང་པོ་རེ་རེ་ཡང་གསུངས་པས་ན་སྙིང་པོ་གཅིག་པོ་གསལ་བར་གསུངས་ལ། གཞན་འདིར་མི་
གསལ་བ་རྣམས་ནི་རྒྱུད་གཞན་ལས་འབྱུང་བ་དང་སྤྱང་བར་ཤེས་པར་བྱའོ། །ཕྱག་ན་རྡོ་རྗེ་བསྒྲུབ་པ་ནི། །ཞེས་པའི་སྙིང་པོ་དང་ཕྱག་རྒྱ་ལ་སོགས་པ་འཇིག་རྟེན་གསུམ་ལས་རྣམ་པར་རྒྱལ་བའི་ཏིང་དེ་འཛིན་ལ་བཞུགས་ཤིང་ལྷ་ཆེན་པོ་ལ་སོགས་པ་བཏུལ་བའི་སྙིང་པོ་ནི་ཐོག་མ་ཉིད་ཀྱི་སྐྱིལ་འཁོར་དུ་གསུངས་པ་དང་སྦྱར་རོ། །དེའི་འོག་ཏུ་འདོད་པའི་ཁྲོ་བོའི་གཟུགས་སྙིང་ག་ནས་འདོད་པའི་ཁྲོ་བོའི་སྙིང་པོ་ནི་ཊཀྐི་ཧཱུཾ་ཛཿཞེས་བྱ་བའོ། །སྔགས་ལ་སོགས་པ་གྲངས་བཞིར་མ་ཚང་བ་ནི་གོང་དུ་སྨོས་པ་བཞིན་དུ་སྦྱར་རོ། །ཕྱག་ན་རྡོ་རྗེ་སེམས་དཔའི་ཏིང་ངེ་འཛིན་ཞི་བར་བཞུགས་པའི་སྙིང་པོ་ལ་སོགས་པ་བཞི་འོག་ནས་འགྱུར་བ་དང་སྤྱར་རོ། །སེམས་དཔར་བྱིན་གྱིས་བརླབ་པའི་རྣལ་འབྱོར་དང་ཞེས་པ་རྡོ་རྗེ་ཧཱུཾ་ཀ་རའི་སྐུ་ཕྱག་རྒྱ་བཞི་པར་བྱིན་གྱིས་བརླབ་པའོ། །འདོད་པ་སྒོམ་ཞེས་བྱ་བ་ནི་བྱང་ཆུབ་ཀྱི་སེམས་ཡོངས་སུ་དག་པ་གཟུང་བ་དང་འཛིན་པ་དང་བྲལ་བ་སྒོམ་པའོ། །རྡོ་རྗེ་སེམས་དཔའ་རྗེས་སུ་དྲན་པར་སྒོམ་པ་ནི་རྡོ་རྗེ་སེམས་དཔའ་ཞི་བའི་སྐུའི་རྣལ་འབྱོར་དུ་བདག་རང་བྱས་ལ་སྙིང་གར་རྡོ་རྗེ་རྩེ་ལྔ་པ་བསྒོམ་མོ། །གོང་མའི་རྣལ་འབྱོར་གང་བྱེད་ཀྱང་རུང་སྟེ། མདུན་ན་སངས་རྒྱས་ཀྱི་སྐུ་དྲན་པར་བྱའོ་ཞེས་བསྟན་པ་བདག་གི་མདུན་ན་ཞེས་བྱ་བ་དག་གོ །རང་གི་མདུན་ན་བཅོམ་ལྡན་འདས་རྣམ་པར་སྣང་མཛད་དམ། ཤཱཀྱ་ཐུབ་པ་ཅིག་བསམ་ཞེས་པའི་དོན་ཏོ། །སེམས་དཔའ་ཆེན་པོ་ཐམས་ཅད་ནི། །ཞེས་པ་ནི་བྱང་ཆུབ་སེམས་དཔའ་འཇམ་དཔལ་དང༌། སྤྱན་རས་གཟིགས་ལ་སོགས་པ་གཞན་རྣམས་ཀྱི་སྙིང་པོ་ལ་སོགས་པ་བསྒྲུབ་པ་ནི་གང་སྒྲུབ་པའི་བྱང་ཆུབ་སེམས་དཔའ་རང་རང་གི་ཕྱག་རྒྱ་ཆེན་པོའི་རྣམ་འབྱོར་བྱས་ཏེ་སྒྲུབ་བམ། ཡང་ན་རྣལ་འབྱོར་དེ་ལྟར་བྱས་པའི་སྙིང་གར་རྡོ་རྗེ་རྩེ་ལྔ་པ་ཟླ་བའི་དཀྱིལ་འཁོར་ལ་བཞག་པར་བསྒོམས་པས་སྒྲུབ་པོ། །ཕྱིའི་རྡོ་རྗེ་རིགས་ཀྱི་སྒྲུབ་པ་ནི་ཞེས་པ་ལྷ་ཆེན་པོ་ལ་སོགས་པ་རིག་པའི་རྒྱལ་པོ་མན་ཆད་ཀྱི་སྙིང་པོ་ལ་སོགས་པ་སྒྲུབ་པ་ནི་གོང་སྒྲུབ་ཀྱང་རུང་སྟེ། སོ་སོའི་ཁྲོ་བོའི་རྣལ་འབྱོར་དུ་བྱས་ནས་ཁྲོ་བའི་སེམས་ཀྱིས་བསྒྲུབ་པོ། །རྡོ་རྗེ་རྣམས་བསྒྲུབ་པ་ནི། །ཞེས་པ་ལྷ་ཆེན་པོའི་བཙུན་མོ་
མན་ཆད་ས་འོག་གི་ལྷ་མོ་ཡན་ཆད་ཀྱི་སྙིང་པོ་ལ་སོགས་པ་སྒྲུབ་པ་ནི་རྒྱུད་ལྔའི་སེམས་ཅན་ཐམས་ཅད་ཀྱི་རྐུན་པོ་དང་གཅན་གཟན་ལ་སོགས་པ་འཇིགས་པ་ཐམས་ཅད་བདག་གིས་བཟའོ་སྙམ་དུ་ཡིད་ལ་བྱ་བའམ། བདག་རང་རྡོ་རྗེ་འབར་བ་སྲིན་པོའི་གཟུགས་སུ་བརྩམས་ཏེ། རབ་ཏུ་ཁྲོ་བའི་བསམ་པ་དང་བཅས་པས་བསྒྲུབ་པོ། །དེ་ནས་སྒྲུབ་པའི་ཐབས་ཀྱི་རབ་ཏུ་བྱ་བ་འབྱུང་སྟེ་ཞེས་པ་གྲུབ་པ་འགྲུབ་པར་འགྱུར་བའི་རྒྱུ་བཤད་པའོ། །ཇི་ལྟར་འཇིག་རྟེན་འདུལ་འགྱུར་བ། །ཞེས་པ་ཕྱག་རྒྱ་ཆེན་པོ་ལ་སོགས་པ་ཚུལ་ཇི་ལྟ་བུས་སེམས་ཅན་འདུལ་བར་འགྱུར་བ་དེ་ལྟ་བུའི་རང་བཞིན་བསྟན་ནས་འཇིག་རྟེན་དང་འཇིག་རྟེན་ལས་འདས་པའི་གྲུབ་པ་ཐོབ་པར་འགྱུར་ཏེ། དེ་བས་ན་གྲུབ་པ་དེ་ལ་ཐབས་ཀྱི་ཕྱག་རྒྱ་རྣམས་ཏེ་ཕྱག་རྒྱ་རྣམས་ཏེ་ཕྱག་རྒྱ་དེ་ཡང་ཡོན་ཏན་ཇི་ལྟ་བུ་ཞིག་ཅེ་ན། གྲུབ་པ་ཐམས་ཅད་བྱེད་པའི་མཆོག་ཅེས་པ་སྟེ། གྲུབ་པའི་རྒྱུའི་མཆོག་ཅེས་བྱ་བའི་ཐ་ཚིག་གོ །དེ་ནས་རས་ཀྱི་རབ་ཏུ་བྱ་བ་འབྱུང་སྟེ་ཞེས་པ་སྐུ་གཟུགས་བྲི་བའི་རས་ཀྱི་ཆོ་ག་བཤད་དེ། དེ་བཞིན་གཤེགས་པའི་སྐུ་གཟུགས་བྲི་བའི་རས་ནི་དང་པོ་བརྟག་པའི་ཚེ་སྐྲ་ལ་སོགས་ཏེ་སེམས་ཅན་གྱི་སྤུའི་བག་མ་འདྲེས་པ་དྲའི་བའི་ཚེ་དབུས་ན་ཐིག་གིས་བསྐོར་ནས་གྲྭ་རྣམས་བསྐོར་བའི་ཕྱི་མ་ཟླུམ་པོ་ཉིད་དུ་འགྱུར་བར་བྱའོ། །ཡང་ན་བྲི་བའི་ཚེ་སྔར་དཀྱིལ་འཁོར་ཟླུམ་པོར་ཐིག་བཏབ་པ་དེའི་དབུས་སུ་སྐུ་གཟུགས་བྲིས་ཏེ། དེ་བཞིན་གཤེགས་པས་དུས་ཐམས་ཅད་དུ་ཞི་བའི་ལས་ལ་འཇུག་པས་ནི་དང་པོར་ཟླུམ་པོར་བརྩམ་མོ། །སྐྲ་ལ་སོགས་པ་མེད་པར་བྱ་བ་ནི་འོག་མ་རྣམས་ཀྱི་རས་ཀུན་ལ་ཡང་དེ་བཞིན་དུ་སྦྱར་རོ། །སེམས་ཅན་ཆེན་པོ་རྣམས་ཀྱི་ནི། །ཞེས་པ་འཇམ་དཔལ་དང་བྱམས་པ་ལ་སོགས་པའི་བྱང་ཆུབ་སེམས་དཔའ་གཞན་རྣམས་ཀྱི་རས་ནི་སོ་སོའི་འཁོར་ཇི་སྙེད་ཡོད་པ་ཤོང་བ་ཙམ་གྱི་ཚད་དུ་སྦྱར་རོ། །ཕྱི་ཡི་རྡོ་རྗེའི་རིགས་རྣམས་ཀྱི། །ཞེས་པ་ལྷ་ཆེན་པོ་ལ་སོགས་པའི་རས་ནི་མ་བཅགས་པ་ལ་བྲི་བའི་ཚེ་ཡང་འཁོར་དང་བཅས་པར་རིམ་བཞིན་དུ་དགོད་དོ། །རྡོ་རྗེ་མ་རྣམས་ཀྱི་ཞེས་པ་འཇིག་རྟེན་པའི་ལྷ་མོ་རྣམས་ཀྱི་རས་ནི་མ་བགོས་མ་སྤྱད་པ་ཁ་ཚར་དང་
བཅས་པའོ། །རི་མོ་བྲི་བ་ཀུན་གྱི་སྤྱིའི་ཆོ་ག་བསྟན་པ་རི་མོ་མཁན་གསོ་སྤྱོད་ཅན་གྱིས་ཞེས་བྱ་བ་དག་གོ །སྐུ་གཟུགས་ཅན་གྱི་ཚད་གསུངས་པ་དེ་ལ་ལུས་ཀྱི་ཚད་ཅེས་བྱ་བ་དག་གོ །དེ་བཞིན་གཤེགས་པའི་མཐོ་ཚད་ནི་མི་འབྲིད་པོའི་ཁྲུ་ཕྱེད་དང་དོ། །ཕྱག་ན་རྡོ་རྗེ་ནི་མཐའ་མེད་ཕྱིར་ཞེས་པ་རྒྱུད་འདིའི་སྐབས་སུ་ཕྱག་ན་རྡོ་རྗེས་ལྷ་ཆེན་པོ་ལ་སོགས་པ་ཐམས་ཅད་བཏུལ་བས་བདག་ཉིད་ཆེ་བ་བསྟན་པའི་ཕྱིར་མཐའ་མེད་ཅེས་སྨོས་ཏེ། ཚད་སྔགས་པ་ཅི་དགར་བྱ་ཞེས་པའི་དོན་ཏོ། །དེ་ལ་རྡོ་རྗེའི་ཚད་ནི་ཞེས་པ་མཐེ་བོང་ངོས་ཀྱི་སོར་བཅུ་དྲུག་ཏུ་བྱས་ཏེ། གཟུགས་ཐམས་ཅད་ཀྱང་པདྨོའི་གདན་ལ་བཞུགས་པར་བྱའོ། །དེ་ལ་རྟོག་པ་ཐམས་ཅད་དུ་རྡོ་རྗེའི་ཚིག་གིས་བཟླས་ཏེ་བསྒྲུབ་པོ་ཞེས་རྡོ་རྗེའི་ཚིག་འོག་ནས་འབྱུང་བ་ནི་རྟོག་པ་ཐམས་ཅད་དུ་ཡང་སྦྱར་ཞེས་པའི་དོན་ཏོ། །ཕྱག་ན་རྡོ་རྗེའི་གླུ་ཚིག་གིས་བཟླས་སོ་ཞེས་པ། རྡོ་རྗེའི་གླུ་ཤ་ཌ་བ་ལ་སོགས་པ་དང་སྦྱར་ཏེ་བཟླས་སོ། །ཆོས་ཀྱི་ཚིག་གིས་ཁྲོས་པ་ཆེན་པོའི་སྒྲ་གསལ་པར་བྱ་སྟེ་ཞེས་པ། ཆོས་ཐམས་ཅད་མི་རྟག་པ་དང༌། སྡུག་བསྔལ་བ་ལ་སོགས་པ་ཡིད་ལ་བྱེད་ཅིང་ཟློས་པའམ། བྱམས་པ་ཆེན་པོའི་ཆོས་ཡིད་ལ་བྱས་ཏེ་ཁྲོས་པ་ཆེན་པོའི་སྒྲ་ཟུར་ཕྱིན་པར་སྨྲ་བའོ། །རྡོ་རྗེ་མ་རྣམས་རྡོ་རྗེའི་ཚིག་ཕྲ་མོས་བཟླས་སོ་ཞེས་པ་ཁྲོས་པ་ཆེན་པོའི་སྒྲ་ལས་ཕྲ་མོར་བསྐྱུངས་པའོ། །དེ་ལ་ཏིང་ངེ་འཛིན་གྱི་ངག་ནི་ཞེས་པ་མཆུ་དང་ལྕེ་ལ་སོགས་པ་བསྒུལ་བ་མེད་པར་སྔགས་ཀྱི་ཡི་གེའི་འབྲུ་གསལ་བར་ཡིད་ཀྱིས་བརྗོད་པའོ། །རྡོ་རྗེའི་ངག་ནི་ལྕེའི་ཐོར་ཏོ་རབ་ཏུ་མི་འགུལ་བར་ཅུང་ཟད་བསྒུལ་ཞིང་སོ་དང་མཆུ་སྦྱར་ལ་སྒྲ་མེད་པར་བྱ་བའོ། །རྡོ་རྗེའི་གླུ་བསྟན་པ། ཤ་ཌ་བ་ལ་སོགས་པའི་གླུ། །ཞེས་པ་དག་གོ །སོགས་པའི་སྒྲས་ནི་དི་བ་ཏ་དང་བོ་ར་ལ་སོགས་པ་དབྱངས་བཅུ་བཞི་རྣམས་བསྡུའོ། །གྲོང་དགའ་བ་ནི་གླུའི་མིང་སྟེ་གྲོང་དགའ་བར་གཏོགས་པའི་གླུ་ཀེ་ཤི་ལ་སོགས་པ་རྣམ་པ་གསུམ་མོ། །རྡོ་རྗེའི་ཚིག་བཟླས་རྟོག་པ་རུ། །ཞེས་པ་དག་གི་སྐབས་སུ་རྡོ་རྗེའི་ཚིག་གླུ་གོང་དུ་སྨོས་པ་དང་སྦྱར་ཏེ་བཟླས་པའོ། །སྤྲིན་འབྲུག་ཀྱང་ནི་ཧཱུཾ་ཞེས་པ་སྒྲའི་ཐོག་མ་ཧཱུཾ་གིས་
དྲངས་ལ། འབྲུག་གི་སྒྲ་དལ་ལ་རན་པར་འབྱུང་བ་འདྲ་བའི་ཚུལ་ལས་མཐའ་མར་ཇེ་ཕྲ་ཇེ་ཕྲར་འབྱུང་བར་སེམས་ཀྱང་བསྐྱེད་ལ། ལུས་ཀྱི་ཚུལ་ཡང་ཁྲོ་བར་བསྟན་ཏོ། །དེ་ལ་འདི་ནི་འདས་པའི་ཆོ་གའི་རབ་ཏུ་བྱ་བ་ཡིན་ཏེ་ཞེས་པ་བཟླས་པའི་ཚེ་ལྷ་གང་སྒྲུབ་པ་དེའི་སྙིང་པོ་དང་ཕྱག་རྒྱ་ལ་སོགས་པ་དགུག་པ་དང་གཞུག་པ་ལ་སོགས་པའི་ཆོ་གས་ཇི་ལྟར་བྱིན་གྱིས་བརླབ་པ་དེ་བཞིན་དུ་བདག་རང་སྙིང་པོ་དང་ཕྱག་རྒྱ་དང༌། སྔགས་ཀྱི་རིག་པ་ཐམས་ཅད་དང་ལྡན་པར་བྱས་ལ་རྟོག་པ་ཀུན་ལ་དེ་ལྟར་བསྒྲུབ་པོ། །གནས་དང་སྲོག་ཆགས་ཐམས་ཅད་ནི། །ཞེས་པ་མཐོ་རིས་ལ་སོགས་པ་གནས་ཀྱི་ཁྱད་པར་སྒྲུབ་པ་དང༌། འཕྲུལ་གྱི་རྟ་ལ་སོགས་པ་སྲོག་ཆགས་འཕྲུལ་བག་ཅན་ནམ་མི་ཟད་པར་སྒྲུབ་པ་ནི་སོ་སོ་རང་རང་གི་ཆོ་ག་རྒྱུད་སོ་སོ་ལས་འབྱུང་བའི་ཚུལ་གྱིས་གྲུབ་པ་ཐམས་ཅད་བསྒྲུབ་པོ། །སྐབས་འདིར་རྡོ་རྗེའི་ཚིག་གིས་བཟླས་པ་དང་སྦྱར་ཀྱང་ཉེས་པ་མེད་དོ་ཞེས་སྨྲས་པ་རྡོ་རྗེ་བཟླས་པ་ནི་ཞེས་པ་དག་གོ །རྟོག་པ་ཐམས་ཅད་ཀྱི་སྒྲུབ་པ་པོ་ཡིན་པས་ན་འདིར་ཡང་དེ་དང་སྦྱར་ན་ཉེས་པ་མེད་ཅེས་བྱ་བའི་ཚིག་གོ །བཟླས་པའི་དོན་གྱིས་མགོན་བཟླས་ཏེ། །ཞེས་པ་བཟླས་པའི་ཚིག་གི་དོན་ཡིད་ལ་བྱ་སྟེ་མགོན་པོ་ཕྱག་ན་རྡོ་རྗེའི་སྔགས་བཟླས་ཏེ་བསྒྲུབ་པོ། །ཁྲོ་བས་མཉམ་པར་འཇོག་པས་སོ། །ཞེས་པ་ཁྲོ་བོའི་སེམས་རྩེ་གཅིག་ཏུ་གཞག་པའོ། །ཡིད་ཀྱིས་སྙིང་པོ་འཛིན་པའོ། །ཞེས་པའི་སྙིང་པོ་དོན་ཇི་ལྟ་བ་བཞིན་དུ་རྟོགས་པར་དམིགས་ཏེ་བཟླས་པའོ། །འདོད་པ་སྒོམ་ཞིང་བཟླས་པས་སོ། །ཞེས་པ་འདོད་པ་ནི་བྱང་ཆུབ་ཀྱི་སེམས་ཏེ་ཐམས་ཅད་ཀྱིས་འདོད་པར་བྱ་བའི་ཡུལ་ཡིན་པའི་ཕྱིར་རོ། །ཨོཾ་ཞེས་བྱ་བ་ནི་འདོད་པ་སྟེ་ཞེས་ཕྱག་ན་རྡོ་རྗེའི་སྙིང་པོ་ཨོཾ་ཞེས་བྱ་བ་ཡང་འདོད་པའི་རང་བཞིན་ཉིད་དུ་སྟོན་ཏེ་བདེ་བ་ཆེན་པོའི་བདག་ཉིད་དོ། །འདོད་པ་ནི་རྡོ་རྗེ་སེམས་དཔའ་སྟེ་དེས་ཐམས་ཅད་དགུག་པ་ལ་སོགས་པའི་ལས་ཀུན་ཀྱང་བྱེད་དོ། །འདོད་པ་ནི་ཤིན་ཏུ་ཆགས་པའོ་ཞེས་པ་འདོད་པ་ནི་བྱང་ཆུབ་ཀྱི་སེམས་སོ། །དེ་ཉིད་དུ་སུ་ར་ཏ་སྟེ་དགའ་བའམ་རབ་ཏུ་ཆགས་པའི་དངོས་པོའོ། །འདོད་པ་ནི་འདས་པའི་དོན་ཏོ་ཞེས་པ་ཕྱག་ན་རྡོ་རྗེའི་སྙིང་པོ་ཟློས་པའི་ཚེ་འདོད་པ་ཞེས་བྱ་བ་
བྱང་ཆུབ་ཀྱི་སེམས་དེ་ལ་དམིགས་ནས་བཟླས་པ་བྱ་སྟེ། དེ་བས་ན་འདོད་པ་ནི་སློབ་པའི་དོན་ཏོ་ཞེས་བཤད་དོ། །དེ་བཞིན་གཤེགས་པ་ཐམས་ཅད་ཀྱིས་ཀྱང་སླུ་བར་མི་ནུས་སོ་ཞེས་པ་དེ་བཞིན་གཤེགས་པ་ལས་མཐུ་ཆེ་བ་གཞན་མེད་པས་ཀྱང་བར་ཆད་བྱེད་པར་མི་ནུས་ན་གཞན་གྱིས་ལྟ་ག་ལ་ཞིག་བར་ཆད་བྱེད་པར་ནུས། མཆོད་པའི་ཆོ་ག་གསུངས་པ་ཐལ་མོ་ཁོང་སྟེང་དུ་བཅིངས་ལ་མཆོད་པ་བྱས་ཏེ་ཞེས་བྱ་བ་དག་གོ །གར་ཐབས་དང་སྦྱར་ཏེ་མེ་ཏོག་གསོལ་བ་ནི་གྱེན་དུ་བསྟོད་པའི་ཐབས་སུ་བརྐྱང་ངོ༌། །བདུག་པའམ་ཐལ་མོ་དེ་ཉིད་གར་དང་སྦྱར་ཏེ་ས་ལ་སྨད་དོ། །མར་མེ་ཡང་ཐལ་མོ་དེ་ཉིད་ལས་མཐེ་བོང་བསྙམས་པས་སྙིམ་པའི་ཁ་གཡོགས་ལ་ཐོར་ཏོ་མར་མེའི་སྙིང་པོ་འདྲ་བར་བསྒྲེང་བའོ། །དྲིའི་མཆོད་པ་ནི་ཐལ་མོ་དེ་ཉིད་མཐེ་བོང་སྤྲད་ལ་གཞན་བསྒྲང་དེ་ཉུག་པ་ལྟ་བུའི་ཚུལ་བསྟན་ཏོ། །སྟོང་པས་སམ་གང་བས་སོ་ཞེས་ཕྱག་རྒྱ་དེ་རྣམས་བཅིངས་ན་མཆོད་པའི་དངོས་པོ་མེ་ཏོག་ལ་སོགས་པ་མེད་ཀྱང་རུང་ཡོད་ཀྱང་རུང་ཞིང་ཐམས་ཅད་དང༌། དཀྱིལ་འཁོར་ཐམས་ཅད་ལ་སོགས་པའི་ལྷའི་རང་བཞིན་སྙིང་པོ་དང་ཕྱག་རྒྱ་དང་སྔགས་དང་རིག་པའི་རང་བཞིན་དུ་གྱུར་པ་ཐམས་ཅད་ལ་ཡང་མཆོད་པར་འགྱུར་རོ། །བསོད་ནམས་ཆུང་བ་རྣམས་ཀྱིས་དཀྱིལ་འཁོར་གང་འདོད་པ་ཆེ་ཆུང་ཇི་ཙམ་དུ་དད་པའི་ཚད་དུ་བྲིས་ཏེ་དེར་སྔགས་ཟློས་ཤིག་ཅེས་གསུངས་པ་དེ་ལ། བསོད་ནམས་མེད་པའི་སེམས་ཅན་གྱིས། །ཞེས་བྱ་བ་དག་གོ །གྲུབ་པ་མྱུར་དུ་ཐོབ་པར་འགྱུར་བའི་ཐབས་སུ་གསུངས་པ། དེ་ལ་གྲུབ་པ་མྱུར་དུ་འགྲུབ། །ཅེས་བྱ་བ་དག་གོ །ཏིང་ངེ་འཛིན་ནི་སེམས་རྩེ་གཅིག་པ་སྟེ་ལས་སུ་རུང་བའོ། །ཆོས་སྦྱིན་པ་ནི་ལྷ་དང་མི་ལ་སོགས་པ་ལ་དམ་པའི་ཆོས་བསྙད་པའོ། །སོགས་པའི་སྒྲས་ནི་ཆོས་བྲི་བ་དང་མཆོད་པ་ལ་སོགས་པ་མོས་པ་སྤྱོད་པའི་ཚེ། ཆོས་བཅུ་སྤྱད་པ་རྣམས་གཟུང་ངོ༌། །རྒྱ་ཆེན་ཚུལ་རྣམས་ཞེས་པ་ཐེག་པ་ཆེན་པོའི་མདོ་སྡེ་རྣམས་སོ། །དད་ལ་གནས་ཏེ་ཞེས་པ་དཀོན་མཆོག་ལ་སེམས་དད་པས་མཆོད་པའོ། །འདོད་ཆགས་འདོད་བྲལ་མ་ཡིན་པར། །ཞེས་པ་སེམས་ཅན་སྨིན་པ་དང་གྲོལ་བ་ལ་ཆགས་པ་དེ་ལྟ་བུ་སྤངས་ཏེ་འདོད་པ་དང་བྲལ་བར་མི་བྱ་བའོ། །འདོད་ལ་འདོད་ཆགས་མཆོག་གིས་མཆོད། །ཅེས་བྱང་ཆུབ་ཀྱི་སེམས་
འདོད་ཅེས་བྱ་བ་ལ་ཞེན་ཅིང་ཆགས་པ་བསྒོམ་པའི་སེམས་ཀྱིས་ཕྱག་ན་རྡོ་རྗེ་ལ་མཆོད་པར་བྱའོ། །འདི་ནི་ནན་ཏན་གྱི་མཆོད་པ་སྟེ་འདོད་ཆགས་མཆོག་ཅེས་བྱ་བའང་འདོད་པ་ལྔ་ལ་ཆགས་པ་བས་དམ་པར་གྱུར་པའི་ཕྱིར་མཆོག་གོ །ཅི་ནུས་འདོད་ལ་ཆགས་པས་ན། །ཞེས་པ་ལ་བྱང་ཆུབ་ཀྱི་སེམས་འདོད་པ་ལ་ཅི་ནུས་པར་བསྒོམས་ན་གྲུབ་པ་ཆེན་པོ་ཕྱག་ན་རྡོ་རྗེ་མྱུར་དུ་སྩོལ་ཏོ། །དེ་ནས་འཇམ་དཔལ་ལ་སོགས་པ་བྱང་ཆུབ་སེམས་དཔའ་ཆེན་པོ་གཞན་ཕ་རོལ་ཏུ་ཕྱིན་པ་དྲུག་མང་དུ་བྱས་པས་མྱུར་དུ་འགྲུབ་ཅེས་གསུངས་པ། དེ་ལ་འདི་ནི་སེམས་དཔའ་ཆེན་པོ་རྣམས་ཀྱི་ཞེས་བྱ་བ་དག་གོ །ལྷ་ཆེན་པོ་ལ་སོགས་པ་མྱུར་དུ་འགྲུབ་པའི་རྒྱུ་གསུངས་པ། ཕྱིའི་རྡོ་རྗེ་རིགས་ཀྱི་ཞེས་བྱ་བ་དག་གོ །སངས་རྒྱས་ལ་རྟག་ཏུ་མཆོད་ཅིང་དེ་བཞིན་དུ་ཕྱག་ན་རྡོ་རྗེ་ལ་ཡང་མཆོད་ཅིང་མོས་པ་དང་དད་པ་བསྐྱེད་ལ། ཕྱག་ན་རྡོ་རྗེ་ལ་བརྟུལ་ཞུགས་ལག་ན་རྟག་ཏུ་རྡོ་རྗེ་བཅང་བ་ལ་སོགས་པ་མི་བསྙེམས་པར་བྱས་ལ་དཀོན་མཆོག་གསུམ་ལ་འཚེ་བ་དང༌། སེམས་ཅན་མང་པོ་ལ་གནོད་པ་ལ་སོགས་པ་སེམས་ཅན་མི་བགྲུངས་པ་ཐམས་ཅད་ཐབས་སྣ་ཚོགས་ཀྱིས་ཚར་གཅད་པའོ། །དེ་ནས་ལྷ་ཆེན་པོའི་བཙུན་མོ་ལ་སོགས་པ་གྲུབ་པ་མྱུར་དུ་འགྲུབ་པའི་ཐབས་གསུངས་པ། སེམས་ཅན་དགེ་ལ་དད་པ་དང༌། །ཞེས་བྱ་བ་དག་གོ །སེམས་ཅན་ཚུལ་ཁྲིམས་དང་བརྟུལ་ཞུགས་ཅན་སེམས་ཅན་སེམས་ཅན་མང་པོ་ལ་མི་གནོད་ཅིང༌། དགེ་བ་ལ་སེམས་དང་པ་དང་བ་བསྐྱེད་ལ་དེ་མཆོད་ཅིང་སྔགས་ཀྱི་ཚུལ་གྱི་དམ་ཚིག་གཞུང་ལས་འབྱུང་བ་བཞིན་དུ་བསྲུངས་ལ་གར་ཐབས་དང་བཅས་པའི་ཕྱག་རྒྱས་ལྷ་མོ་རྣམས་མཆོད་པ་དང༌། དཀོན་མཆོག་གསུམ་ལ་གནོད་པ་ལ་སོགས་པ་སེམས་ཅན་མ་རུངས་པ་རྣམས་ལ་ཚར་གཅོད་པའོ། །རྒྱུད་འཆད་པ་དང༌། དཀྱིལ་འཁོར་བྲི་བ་དང༌། སློབ་མ་བསྡུ་བ་ལ་སོགས་ཏེ་སྔགས་ཀྱི་སློབ་དཔོན་དུ་དབང་བསྐུར་བའི་ཆོ་ག་བཤད་པ། དང་པོར་དེ་བཞིན་གཤེགས་པ་རྣམ་པར་སྣང་མཛད་ཀྱི་དབང་བསྐུར་བ་གསུངས་པ། དེ་ལ་འདི་ནི་དེ་བཞིན་གཤེགས་པའི་དཀྱིལ་འཁོར་ལ་ཞེས་བྱ་བ་དག་གོ །དཀྱིལ་འཁོར་དུ་རྣམ་པར་སྣང་མཛད་ཀྱི་སྤྱན་སྔར་སློབ་དཔོན་གྱིས་རྡོ་རྗེ་རིག་པའི་སྙིང་པོ་
ཨོཾ་བཛྲ་བིད་ཅེས་བྱ་བ་སྟོང་རྩ་བརྒྱད་བཟླས་སོ། །དེ་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་རྡོ་རྗེ་དབྱིངས་ཀྱི་བདག་མོ་བཅིངས་ལ་འོག་ནས་འབྱུང་བའི་སྙིང་པོ་སྟོང་བཟླས་སོ། །སྙིང་པོ་རྣམ་གཉིས་བཟླས་པས་ནི་སློབ་དཔོན་གྱིས་སྔགས་བསྙེན་པ་བྱས་པས་མཐུ་ཅན་དུ་འགྱུར་རོ། །སྔགས་ཀྱང་རིགས་བཞི་ཆར་གྱི་སྙིང་པོ་དང་དབང་བསྐུར་བར་གསུངས་སོ། །དེ་ནས་སྙིང་པོ་འདིས་སྙིང་ག་ནས་དཔྲལ་བ་དང་མགུལ་པ་དང་སྤྱི་བོར་དེ་བཞིན་གཤེགས་པའི་རིགས་དང༌། རིན་པོ་ཆེའི་རིགས་དང་པདྨོའི་རིགས་དང་ལས་ཀྱི་རིགས་རྣམས་ཀྱི་རང་གི་དམ་ཚིག་གི་ཕྱག་རྒྱ་སྙིང་ག་ལ་སོགས་པ་རིམ་བཞིན་དུ་སྔགས་ལན་རེ་བརྗོད་ཅིང་བཞག་ལ། དེ་ནས་སློབ་མའི་སྤྱི་པོར་ལས་ཀྱི་དམ་ཚིག་གི་ཕྱག་རྒྱ་བཅིངས་ཏེ་བཞག་ནས་སྔགས་འོག་ནས་བརྒྱ་ཚང་བར་བཟླས་སོ། །འདིས་ནི་རྣམ་པར་སྣང་མཛད་ཀྱི་རིགས་ཀྱི་སློབ་དཔོན་དུ་དབང་བསྐུར་བའོ། །དེ་ནས་དེ་བཞིན་གཤེགས་པའི་རིགས་ཀྱི་སློབ་དཔོན་དུ་དབང་བསྐུར་བའི་ཆོ་ག་གསུངས་པ། ཕྱག་ན་རྡོ་རྗེའི་ཆ་ལུགས་སྤྱི་བོར་བཟུང་ནས་ཞེས་བྱ་བ་དག་གོ །ཕྱག་ན་རྡོ་རྗེའི་སྐུ་གཟུགས་ཀྱང་ཏིང་ངེ་འཛིན་གྱི་དབང་གིས་རྣམ་པ་དུ་མར་འགྱུར་མོད་ཀྱི་འདིར་ནི་རྡོ་རྗེ་སེམས་དཔའི་སྐུ་གཟུགས་བཞག་གོ །དེ་ནས་སློབ་མའི་ལག་ཏུ་སློབ་དཔོན་གྱིས་རྡོ་རྗེ་ཡང་སྦྱིན་ནོ། །ལས་ཀྱི་རིགས་ཀྱི་སློབ་དཔོན་དུ་དབང་བསྐུར་བའི་ཆོ་ག་གསུངས་པ། དེ་ནས་རྡོ་རྗེའི་རིགས་ཀྱི་སྟེ་ལག་པ་གཉིས་སུ་རྡོ་རྗེ་བྱིན་ནས་ཞེས་པ་དག་གོ །སློབ་མའི་ལག་པར་རྡོ་རྗེ་རྒྱ་གྲམ་མམ། རྩེ་ལྔ་པ་བྱིན་ལ་འོག་ནས་འབྱུང་བའི་སྙིང་པོ་སྟོང་བཟླས་པའི་བུམ་པས་དབང་བསྐུར་རོ། །རྡོ་རྗེ་ཆུ་ཞེས་བྱ་བ་ནི་ཡེ་ཤེས་ཀྱི་བྱིན་གྱིས་བརླབས་པའི་ཆུའོ། །དེ་ནས་པདྨོའི་རིགས་ཀྱི་སློབ་དཔོན་དུ་དབང་བསྐུར་བ་གསུངས་པ། པདྨོ་ལག་ཏུ་བྱིན་ནས་ཞེས་བྱ་བ་དག་གོ ། དེ་ནས་རིན་པོ་ཆེའི་རིགས་ཀྱི་དབང་བསྐུར་བ་གསུངས་པ། རྡོ་རྗེ་རིན་པོ་ཆེའི་ཕྱག་རྒྱ་སློབ་མའི་དབང་བསྐུར་བའི་གནས་སུ་བཞག་གོ་ཞེས་བྱ་བ་དག་གོ །དབང་བསྐུར་བ་ཐམས་ཅད་རང་རང་གི་དཀྱིལ་འཁོར་དུ་ཞུགས་ནས་དབང་བསྐུར་བར་བྱའོ་ཞེས་གསུངས་པ། སློབ་
དཔོན་གྱིས་དཀྱིལ་འཁོར་ཐམས་ཅད་དུ་བཙུད་དེ་ཞེས་བྱ་བ་དག་གོ །སློབ་དཔོན་གྱིས་དབང་ཐོབ་ཟིན་པ་དམ་ཚིག་གསོ་བའམ་བགེགས་ཞི་བར་བྱ་བའི་ཕྱིར། བདག་རང་སློབ་དཔོན་དུ་དབང་བསྐུར་བར་འདོད་ན། དཀྱིལ་འཁོར་ཆོ་ག་བཞིན་དུ་བྲིས་ལ་ཕྱག་ན་རྡོ་རྗེ་རང་གི་སློབ་དཔོན་དུ་བརྟགས་ཏེ། རང་གིས་རང་དབང་བསྐུར་བར་ཡང་རུང་ངོ་ཞེས་གསུངས་པ། ཕྱག་ན་རྡོ་རྗེ་སློབ་དཔོན་དུ་བྱ་སྟེ་ཞེས་བྱ་བ་དག་གོ །དེ་ལྟར་སློབ་དཔོན་གྱི་དབང་མནོས་ནས་རིགས་སོ་སོའི་སློབ་དཔོན་གྱི་བརྟུལ་ཞུགས་ངེས་པར་སྦྱད་དགོས་ཏེ། དེ་བས་ན་དེ་བཞིན་གཤེགས་པའི་དཀྱིལ་འཁོར་དུ་སློབ་དཔོན་གྱི་དབང་བསྐུར་པའི་བརྟུལ་ཞུགས་གསུངས་པ། དེ་བཞིན་གཤེགས་པའི་སློབ་དཔོན་ནི་ཟླ་བ་གཅིག་གི་བར་དུ་ཞེས་བྱ་བ་དག་གོ །དགེ་སློང་དང་དགེ་ཚུལ་ལ་སོགས་པས་ནི་རང་གི་བསླབ་པ་མ་ཉམས་པར་བྱ་བ་དང༌། ཉམས་པ་གསོས་ཏེ་སྡོམ་པ་ལ་གནས་པར་བྱའོ། །ཁྱིམ་པ་ནི་ཟླ་བ་གཅིག་ཏུ་ཁྱིམ་གྱི་ཆོས་སྤངས་ཏེ་ཆངས་པར་སྤྱོད་པའི་སྔོམ་པ་གཟུང་ངོ༌། །དུས་གསུམ་དུ་མཆོད་ཅིང་བཟླས་པ་བྱའོ། །དེ་ནས་དེ་བཞིན་གཤེགས་པའི་རིགས་ཀྱི་སྤྱིའི་སློབ་དཔོན་གྱི་བརྟུལ་ཞུགས་གསུངས་པ། ཟླ་བ་ཕྱེད་ཀྱི་བར་དུ་ཉིན་རེ་ཞིང་ཞེས་བྱ་བ་དག་གོ །བྱིན་གྱིས་བརླབ་པ་ལ་སོགས་པ། །ཞེས་པ་ལ་སོགས་པའི་སྒྲས་ནི་དབང་བསྐུར་བ་དང་ཏིང་ངེ་འཛིན་དང་མཆོད་པ་དག་གཟུང་ངོ༌། །ཀྱོ་བ་ཏང་གིས་བཀུག་སྟེ་ཞེས་པ་བྱིན་གྱིས་བརླབ་པའི་ཕྱིར་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་ལ་སོགས་པ་བྱས་ནས་དུས་གསུམ་དུ་སྐྱོ་བ་མ་སྐྱེས་པའི་བར་དུ་བཟླས་སོ། །འདིར་བརྟུལ་ཞུགས་དུས་ཇི་སྲིད་དུ་སྦྱད་པ་དང་བཟླས་པ་དུས་དུ་བྱ་བ་གསལ་བར་མ་གསུངས་མོད་ཀྱི་དེ་བཞིན་ཞེས་བྱ་བའི་སྒྲས་ནི་གོང་དུ་དུས་གསུམ་དུ་སྒྲུབ་ཅིང་ཟླ་བ་གཅིག་ཏུ་སྤྱད་པའི་རིགས་སོ། །ཕྱག་ན་རྡོ་རྗེ་ཡང་དེ་བཞིན་གཤེགས་པའི་རིགས་ཀྱི་ནང་དུ་འདུས་མོད་ཀྱི། རྒྱུད་འཆད་པའི་གཙོ་བོ་ནི་དེའི་བརྟུལ་ཞུགས་ལོ་གས་ཤིག་ཏུ་གསུངས་པ། ནང་པར་ལངས་ནས་ཉིན་རེ་ཞིང༌། །ཞེས་བྱ་བདག་གོ །སྔགས་པ་རང་ཁྲུས་བྱས་དྲི་གཙང་མས་བྱུགས་གོས་འཚེར་བ་བགོས། དཔུང་རྒྱན་དང་དབུ་རྒྱན་ལ་སོགས་པས་ཆས་ཏེ་གླུ་ལ་སོགས་པས་མཆོད་དོ། །
གསང་བའི་མཆོད་པ་ནི་བཛྲ་ལཱ་སྱེ་ལ་སོགས་པའོ། །མེ་ཏོག་ལ་སོགས་པའི་མཆོད་པ་ནི་མེ་ཏོག་དང་དྲི་དང་བདུག་པ་དང་མར་མེ་དག་གོ །འདོད་པའི་དངོས་པོས་བཅོམ་ལྡན་འདས་དང་བདག་ལ་མཆོད་པ་བྱ་སྟེ་ཞེས་པ་བྱང་ཆུབ་སེམས་དཔའ་ལ་བསྒོམ་པའི་ནན་ཏན་གྱིས་མཆོད་པས་མཆོད་ཅེས་བྱ་བའི་དོན་ཏོ། །དམ་ཚིག་ཆེན་པོའི་དེ་ཁོ་ན་ཅི་འདོད་པ་བཟླས་ཞེས་པ་ས་མ་ཡ་ཧོ། །སུ་ར་ཏ་སྟྭཾ་ཞེས་གོང་དུ་སྨོས་པ་ཅི་རིགས་པར་བཟླས་སོ། །འདོད་པའི་ཡོན་ཏན་ཕྱི་དྲོའི་བར་དུ་སྤྱོད་ལ་ཞེས་པ་དད་པ་དང་བརྩོན་འགྲུས་ལ་སོགས་པ་དབང་པོ་ལྔ་ལ་ནན་ཏན་དུ་བྱའོ། །དེ་ནས་ལས་ཀྱི་རིགས་ཀྱི་བརྟུལ་ཞུགས་གསུངས་པ་ཟླ་བ་ཕྱེད་དུ་སྨྱོན་པར་བསྒྱུར་ནས་ཞེས་བྱ་བ་དག་གོ །ཆོས་ཐམས་ཅད་ལ་མི་རྟོག་པར་བསྒོམ་པའི་ཕྱིར་རམ། བདག་རང་ང་རྒྱལ་བཅག་པའི་ཕྱིར་སྨྱོན་པར་བསྒྱུར་རོ། །ཡང་ན་ཆོས་ཐམས་ཅད་རྟེན་ཅིང་འབྲེལ་ཏེ་འབྱུང་བ་ལས་ཀྱི་རིགས་ཀྱི་སློབ་དཔོན་བརྟུལ་ཞུགས་དེ་འདྲ་བས་འགྲུབ་པར་བཅོམ་ལྡན་འདས་ཀྱིས་མཁྱེན་ཏེ་བཀའ་སྩལ་པས་རིགས་པའི་གཏན་ཚིགས་སྨོས་མི་དགོས་ཏེ། ཕབས་དང་ནས་བ་སྲེས་པའི་རྒྱུ་ལས་ར་རོ་བ་འབྱུང་བ་རིགས་པས་སྒྲུབ་པ་མེད་མོད་ཀྱི་རྟེན་ཅིང་འབྲེལ་བར་འབྱུང་བའི་ཆོས་ཀྱིས་དེ་ལྟ་བུའོ། །ཕྱག་རྒྱའི་གར་བྱས་ཏེ་ཞེས་བརྐྱང་བསྐུམ་དང༌། ཕྱིར་བརྐྱང་བསྐུམ་དང༌། ཚམ་ངམ་དང༌། ཐལ་མོ་བསྐོར་བ་ལ་སོགས་པ་གར་ཐབས་བྱེད་པའོ། །ཡིད་ལ་དེ་བཞིན་གཤེགས་པ་བྲིས་ལ་ཞེས་པ་ནམ་མཁའ་ལ་དེ་བཞིན་གཤེགས་པའི་ཆ་ལུགས་ཡིད་ཀྱིས་བསམ་པའོ། །བརྒྱ་རྩ་བརྒྱད་དུ་བཟླས་ཞེས་པ་རང་གི་སྙིང་པོ་བརྒྱ་རྩ་བརྒྱད་ཉིན་གཅིག་བཞིན་བཟླས་སོ། །འདི་ཡང་དུས་ཇི་སྲིད་དུ་བྱ་བ་ངེས་པར་མ་གསུངས་པ་ནི་གོང་དུ་ཕྱག་ན་རྡོ་རྗེའི་བརྟུལ་ཞུགས་སྨོས་པའི་དུས་དང་སྦྱར་བར་རིགས་ཏེ། སློབ་དཔོན་མཁས་པ་དག་འཆད་པའི་ཚུལ་གྱིས་ན་བཤད་པའི་རིགས་པ་གསལ་བར་མ་བྱུང་པ་ནི་གོང་དུ་སྨོས་མ་ཐག་པའི་ཚུལ་དང་སྦྱར་བའི་ཕྱིར་རོ། །པདྨོའི་རིགས་ཀྱི་བརྟུལ་ཞུགས་གསུངས་པ། བཅོམ་ལྡན་འདས་ལ་མཆོད་པ་བྱས་ཏེ་ཞེས་པ་དག་གོ །རྟོག་པ་ཐམས་ཅད་བསྡུས་པ་ལས་འབྱུང་བའི་གཅིན་ནི་རྡོ་རྗེའི་ཆུའོ་ཞེས་འབྱུང་སྟེ། རྡོ་རྗེས་བྱིན་གྱིས་བརླབས་པའི་ཆུ་བཏུང་ངོ་ཞེས་པའི་དོན་ཏོ། །བའི་ལྕི་བ་ཅུང་ཟད་ཟོས་ནས་ཞེས་པ་པུ་རི་ཤ་ཞེས་བྱ་བའི་སྒྲ་མི་གཙང་བ་སླད་སའི་
མིང་དུ་ཡང་འདྲེན། པདྨོའི་རྩ་བ་ལ་ཡང་པུ་རུ་ཥ་ཞེས་བྱ་སྟེ་རྟོག་པ་ཐམས་ཅད་བསྡུས་པ་ལས་པུ་རི་ཤ་ནི་པདྨོ་ལས་བྱུང་བའོ་ཞེས་བཤད་པས་ན། འདིར་ཡང༌། པདྨོའི་རྩ་བ་ཅུང་ཟད་བཟའ། །ཞེས་པའི་དོན་ཏོ། །དེ་ཡང་ཡེ་ཤེས་ཀྱི་དྲི་མ་བཀྲུ་བའི་མཚན་མ་རྡོ་རྗེའི་ཆུ་བཏུད་ངོ༌། །ཅིས་ཀྱང་མི་གོས་པའི་བསོད་ནམས་དང་ཡེ་ཤེས་ཀྱི་ཚོགས་སྒོམ་པའི་མཚན་ལ་པདྨོའི་རྩ་བ་བཟའ་བར་བསྟན་པའོ། །དེ་ལྟར་བྱེད་ཅིང་ཞག་བདུན་གྱི་བར་དུ་སེམས་རྩེ་གཅིག་ཏུ་བྱས་པས་ཉིན་གཅིག་ཀྱང་རང་གི་སྙིང་པོ་གོང་དུ་སྨོས་པ་སྟོང་རྩ་བརྒྱད་བཟླས་སོ། །དེ་ནས་རིན་པོ་ཆེའི་རིགས་ཀྱི་དབང་བསྐུར་བ་གསུངས་པ། ཉིན་རེ་བཞིན་རང་ལ་དབང་བསྐུར་ནས་ཞེས་པ་དག་གོ །དབང་བསྐུར་བའི་སྔགས་གོང་དུ་སྨོས་པ་ཉིད་ཀྱིས་ཉི་མ་བརྒྱད་ཀྱི་བར་དུ་ཉིན་རེ་དབང་བསྐུར་བ་ཆོ་ག་གོང་མ་བཞིན་དུ་བྱའོ། །རྒྱལ་པོ་ལྟ་བུར་སྒོམ་ཞེས་པ་ནི་བདག་ཀྱང་ཆོས་ཀྱི་རྒྱལ་པོ་ཞེས་ང་རྒྱལ་བསྐྱེད་པའོ། །ཆོ་ག་དེ་ལྟར་བྱས་པས་སློབ་དཔོན་དུ་གྲུབ་པའི་ཡོན་ཏན་གསུངས་པ། དེ་ལྟར་སློབ་དཔོན་གྱིས་གྲུབ་པ་ཐམས་ཅད་དང་ཞེས་པ་དག་གོ །དེ་ནས་སྙིང་པོ་དང་ཕྱག་རྒྱ་ལ་སོགས་པ་ལས་སྒྲུབ་པའི་ཆོ་ག་བཤད་དེ་དེ་ལ་རེ་ཞིག་སྙིང་པོ་བཟླས་ཏེ། ལས་བསྒྲུབ་པ་གསུངས་པ། སྙིང་པོ་བརྒྱ་རྩ་བརྒྱད་བཟླས་ནས། །ཞེས་པ་དག་གོ །སྔར་བསྙེན་པ་ཚུལ་བཞིན་དུ་བྱས་ལ་ཞི་བ་དང་རྒྱས་པ་ལ་སོགས་པའི་ལས་བྱེད་པའི་ཚེ་བརྒྱ་རྩ་བརྒྱད་བཟླས་པས་འགྲུབ་བོ། །ཕྱག་རྒྱ་གྲུབ་པ་གསུངས་པ། རྡོ་རྗེ་ཕྱག་རྒྱ་ཆེན་པོ་བཅིངས་ནས་ཞེས་བྱ་བ་དག་གོ །རྡོ་རྗེས་བྱིན་གྱིས་བརླབ་པའི་ཕྱིར་ཕྱག་རྒྱ་ཆེན་པོ་ནི་རྡོ་རྗེའི་ཕྱག་རྒྱ་ཆེན་པོ་སྟེ་ལྷ་རྣམས་ཀྱི་སྐུར་རྣལ་འབྱོར་བྱའོ། །དེ་བྱས་ནས་ཏིང་ངེ་འཛིན་མངོན་དུ་ཁུགས་ནས་སྙིང་པོ་བརྒྱ་སྟོང་བཟླས་ན་དམ་ཚིག་དང༌། ལས་ཀྱི་ཕྱག་རྒྱ་ལ་སོགས་པ་བཅིངས་པ་ཙམ་གྱིས་ཞི་བ་དང་རྒྱས་པ་ལ་སོགས་ལས་ཐམས་ཅད་དང༌། འཇིག་རྟེན་གྱི་གྲུབ་པ་གཏེར་ལ་སོགས་པ་དང༌། འཇིག་རྟེན་ལས་འདས་པའི་གྲུབ་པ་ཕྱག་རྒྱ་ཆེན་པོ་ལ་སོགས་པ་དག་ཀྱང་འགྲུབ་ཅིང༌། ཕ་རོལ་སྒྲུབ་ཏུ་གཞུག་ན་ཡང་འགྲུབ་པར་འགྱུར་རོ། །སྔགས་ནི་རྡོ་རྗེ་ཚིག་གིས་ཞེས་པ་དག་སྟེ་སྔར་ཆོ་ག་བཞིན་
འབུམ་བཟླས་ན་ཞི་བ་ལ་སོགས་པ་ལས་ཀུན་འགྲུབ་བོ། །རིག་པའི་སྒྲུབ་པ་གསུངས་པ། རེག་པ་སྟོང་ཕྲག་བརྒྱ་བཟླས་ན། །ཞེས་པ་དག་གོ །དེ་ནས་རྡོ་རྗེ་སེམས་དཔའི་སྙིང་པོ་ལ་སོགས་པ་གསུངས་པ་དེ་ནས་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་འབྱུང་སྟེ་ཞེས་པའོ། །དེ་ལ་རྡོ་རྗེ་སེམས་དཔའ་ནི་ཉེ་བར་སྟོན་པར་ཟད་ཀྱི་ལྷ་རྣམས་ཀྱང་སྙིང་པོ་ལ་སོགས་པ་བཞིར་རིག་པར་བྱ་སྟེ་རྟོག་པ་འདིར་སྙིང་པོ་ལ་སོགས་པ་བཞིར་མ་ཚང་བ་རྣམས་ཀྱང་དེ་ཉིད་བསྡུས་པ་ལ་སོགས་པའི་རྒྱུད་ཆེན་པོ་གཞན་ལས་འབྱུང་བ་དང་སྦྱར་རོ། །སྙིང་པོ་ལ་སོགས་པ་བཞིས་མྱུར་དུ་འགྲུབ་པ་ན་བསྐུལ་པའི་ཆོ་ག་གསུངས་པ། དེ་ནས་སྙིང་པོ་དག་དང་ཕྱག་རྒྱ་དང༌། །ཞེས་བྱ་བ་དག་གོ །རྡོ་རྗེ་བཟླས་པའི་གླུས་རྡོ་རྗེའི་ཚིག་ཏུ་བཟླས་ན་ཞེས་པ་སྒྲ་མེད་ན་ནི་གླུར་ཡང་མི་རུང་ལ། རྡོ་རྗེའི་ཚིག་ནི་སྒྲ་མེད་པར་བཟླས་སོ་ཞེས་འབྱུང་སྟེ། འགལ་བ་གཉིས་ཅིག་ཅར་དུ་བརྗོད་དུ་བརྗོད་དུ་མི་རུང་ངོ་ཞེས་ཟེར་བ་ལ་ཇི་ལྟར་སྔགས་ཀྱི་ཚིག་སྒྲ་མེད་པར་བརྗོད་པ་བཞིན་དུ་རྡོ་རྗེ་གླུ་ཡང་སྒྲ་མེད་པར་ཡིད་ཀྱིས་བླང་བ་དང་སྔགས་སུ་སྦྱར་ཏེ་གླུ་ཡིད་ཀྱིས་བླངས་དུ་མི་རུང་དུ་ཟིན་ན་བསླབ་ཀྱང་ཇི་ལྟར་བསླབ། གོ་རིམས་སུ་ཕབ་སྟེ་ཁར་ཡང་ཇི་ལྟར་བརྗོད་དོ། དེ་ནས་ནས་སྔགས་པ་བཅོམ་ལྡན་འདས་ཀྱིས་བསྐྱབ་ཏུ་གསོལ་ཞེས་ཕྱག་ན་རྡོ་རྗེས་གསོལ་བ་དེ་ནས་བཅོམ་ལྡན་འདས་ལ་ཞེས་བྱ་བ་དག་གོ །སེམས་ཅན་གདུལ་བའི་ཕྱིར་ཞེས་བྱ་བ་ནི་སྐྱེ་བོ་སྔགས་ཀྱི་སྒོར་གཟུད་པའི་ཕྱིར་རོ། །གཞན་གྱི་ཡུལ་དུ་འགྲོ་བ་ཞེས་བྱ་བ་ནི་མ་མཆིས་པ་ཞེས་འོག་མ་དང་སྦྱར་ཏེ་བསྒོམ་པའི་བར་ཆད་དུ་འགྱུར་བའི་ཡུལ་རྒྱུ་བའི་སེམས་མ་མཆིས་པར་བྱིན་གྱིས་བརླབ་པར་གསོལ་ཞེས་པའི་དོན་ཏོ། །དེ་ནས་དེ་བཞིན་དུ་དབུལ་པོ་ལ་སོགས་པ་ཡང་མ་མཆིས་པར་ཞེས་འོག་ནས་འབྱུང་བ་དང་སོ་སོར་སྦྱོར་ཅིག །འདོད་པ་ཆུང་བ་ཞེས་པ་བྱང་ཆུབ་ཀྱི་སེམས་མེད་ཅེས་པའོ། །འདོད་ཆགས་དང་བྲལ་བ་ནི་བྱང་ཆུབ་ཀྱི་སེམས་ལ་ཞེན་པའོ། །རབ་ཏུ་འབྱུང་བར་སེམས་པ་ནི་གཅིག་ཏུ་འཁོར་བ་ལས་རབ་ཏུ་འབྱུང་བར་སེམས་པ་སྟེ་གཞན་གྱི་དོན་མི་བྱེད་ཅེས་པའི་དོན་ཏོ། །སྐྱོན་དེ་རྣམས་སྤངས་ནས་ཡོན་ཏན་འདི་འདྲ་བར་བྱིན་གྱིས་བརླབ་པར་གསོལ་པ། མོས་པའི་བསམ་པ་དང་ཞེས་བྱ་བ་དག་གོ །མོས་པའི་བསམ་པ་ནི་དཀོན་མཆོག་གསུམ་ལ་བསམ་པ་ཐག་པ་ནས་དད་པའོ། །ལྷག་པར་
བསམ་པར་བྱེད་པའི་ཆོས་ནི་བདག་དང་གཞན་གྱི་དོན་མཉམ་པར་བྱེད་པ་ཐེག་པ་ཆེན་པོའི་ཆོས་ཐོས་པར་འགྱུར་བའོ། །སྒྲིབ་པ་ཡོངས་སུ་བྱང་བར་ཞེས་པ་ལས་དང་ཉོན་མོངས་པའི་སྒྲིབ་པ་ཡོངས་སུ་བྱང་བར་བྱིན་གྱིས་བརླབ་ཏུ་གསོལ་པའོ། །དེ་ནས་བཅོམ་ལྡན་འདས་ཀྱིས་ཕྱག་ན་རྡོ་རྗེ་ལ་གསུངས་པ། དམ་ཚིག་ཆེན་པོའི་དེ་ཁོ་ན་འདི་ཞེས་བྱ་བ་དག་གོ །དམ་ཚིག་ཆེན་པོ་ནི་སྐབས་འདིར་ཡེ་ཤེས་ཀྱི་རང་བཞིན་ཏེ་ཐོབ་པར་བྱ་བའི་ཕྱིར་ན་དམ་ཚིག་གོ་ཞེས་བྱ་བ་དང་སྦྱར་རོ། །ཡེ་ཤེས་ཀྱི་རང་བཞིན་དེ་སེམས་ཅན་གྱི་དོན་སྣ་ཚོགས་ལ་སྙིང་པོ་དང་ཕྱག་རྒྱ་ལ་སོགས་པ་རྣམ་བ་དུ་མར་སྦྱོར་བ་ཡང་མི་སླུ་བའི་ཕྱིར་དེ་ཁོ་ན་ཞེས་བྱའོ། །སྙིང་པོ་དང་ཕྱག་རྒྱ་ལ་སོགས་པ་ཡང་བསྡུ་ན་ལུས་དང་ངག་དང་སེམས་རྡོ་རྗེར་འདུས་ཏེ་ལུས་ཀྱི་དཀྱིལ་འཁོར་དང༌། ངག་གི་དཀྱིལ་འཁོར་དང༌། སེམས་ཀྱི་དཀྱིལ་འཁོར་དུ་སྙིང་པོ་ལ་སོགས་པ་ཐམས་ཅད་གསུངས་པའི་ཕྱིར་རོ། །དེ་ལྟར་ལུས་ལ་སོགས་པ་རྡོ་རྗེ་ཐམས་ཅད་ཀྱང་ཁྱོད་ཀྱིས་སྐྱེ་བོ་མ་ལུས་པ་འདུལ་བའི་ཕྱིར་སྨྲས་པ་ཡིན་ཏེ། གདུལ་བ་དེ་དག་གི་དོན་གྱི་ཕྱིར་དེད་ཀྱི་བྱིན་གྱིས་བརླབ་ཅེས་བྱ་བའི་དོན་ཏོ། །སྒྲུབ་པ་པོ་རྣམས་ལ་དེ་བཞིན་གཤེགས་པས་བྱིན་གྱིས་བརླབ་པར་བསྐུལ་བ་དང༌། བྱང་ཆུབ་ཀྱི་སེམས་ལ་ཆགས་པ་མེད་ཀྱང་སྔགས་འདི་བརྗོད་ན་འགྲུབ་པར་འགྱུར་རོ་ཞེས་གསུངས་པ། དེ་བས་ན་སྒྲུབ་པ་པོ་དེས་དང་པོར་ཞེས་པ་དག་གོ །དེ་ནས་ཕྱག་ན་རྡོ་རྗེས་རྟོག་པ་འདིའི་ཡོན་ཏན་བསྔགས་པ། སེམས་ཅན་ཀུན་ལ་ཕན་ཕྱིར་དུ། །ཞེས་བྱ་བ་དག་གོ །མཉམ་པ་རུ་ནི་བསྲུངས་ནས་སོ། །ཞེས་པ་སུ་འདི་ལ་ནན་ཏན་བྱེད་པ་ཐམས་ཅད་འདག་གིས་མཉམ་པར་སྲུང་ངོ་ཞེས་པའི་དོན་ཏོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་རྫུ་འཕྲུལ་བསྟན་ནས་ཕྱག་ན་རྡོ་རྗེ་ལ་ལེགས་པ་བྱིན་པ། དེ་ནས་བཅོམ་ལྡན་འདས་གདན་ལས་བཞེངས་ཏེ་ཞེས་བྱ་བ་དག་གོ །ཁམས་གསུམ་ཐམས་ཅད་ལ་སྤྲུལ་པའི་སྐུ་ཕྲ་མོས་གང་པར་བྱས་ཞེས་བྱ་བའི་དོན་ཏོ། །བླ་མ་མང་དུ་ཐོས་པའི་མན་དག་ལ། །བརྟེན་ཏེ་མདོ་རུ་འགྲེལ་པ་འདི་བགྱིས་པས། །སྐྱེ་བོ་སྒྲིབ་པའི་མུན་པས་ཁེབས་པ་རྣམས། །སྒྲིབ་བྱང་རྡོ་རྗེ་སེམས་དཔའི་ཐབས་ཐོབ་ཤོག །འཇིག་རྟེན་གསུམ་ལས་རྣམ་པར་རྒྱལ་བའི་འགྲེལ་པ་མུ་ཏི་ཏ་ཀོ་ཥས་བྱས་པ་རྫོགས་སོ།། །།