དཔལ་མཆོག་དང་པོའི་རྒྱ་ཆེར་བཤད་པ།
ཀུན་དགའ་སྙིང་པོ།
དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུར། བཅོམ་ལྡན་འདས་རྡོ་རྗེ་འཆང་ཆེན་པོ་དཔལ་མཆོག་དང་པོ་ཀུན་གཞི་རྣམ་པར་ཤེས་པའི་གཉེན་པོ། །བྱང་ཆུབ་ཀྱི་སེམས་ཕྱག་རྒྱ་ཆེན་པོའི་ངོ་བོས་ཐམས་ཅད་དུ་ཁྱབ་པར་བསྟན་ནས། ད་ནི་དུམ་བུ་གཉིས་པ་རྩ་བའི་རྒྱུད་དུ་རྡོ་རྗེ་འཆང་ཆེན་པོ་དཔལ་མཆོག་དང་པོ། །ཉོན་མོངས་པ་ཅན་གྱི་ཡིད་ཀྱི་གཉེན་པོ་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་ངོ་བོ་ཆོས་ཐམས་ཅད་ཀྱི་མཚན་ཉིད་ལ་མངོན་པར་ཞེན་པ་དང་བྲལ་བའི་ངོ་བོ་ཉིད་ཀྱིས་སྦྱིན་པའི་ཕ་རོལ་ཏུ་ཕྱིན་པ་དང༌། དམ་ཚིག་གི་ཕྱག་རྒྱའི་མཚན་ཉིད་ཅན་གང་ཡིན་པ་དེ་གདུལ་བྱ་རྣམས་ཀྱིས་མངོན་དུ་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ་བཅོམ་ལྡན་འདས་འདོད་པའི་ཁམས་ཐམས་ཅད་ཀྱི། གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གཞལ་ཡས་ཁང་ན། ལག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྐོར་ཏེ་
བཞུགས་པ་ན། དེའི་རྗེས་ཐོགས་ཉིད་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འདི་གསུངས་པ་ཡིན་ནོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་དང༌། བྱང་ཆུབ་སེམས་དཔའ་རྣམ་པར་སྨིན་པའི་སྐུའི་རང་བཞིན་ཅན་ཐམས་ཅད་དོ།། དེ་རྣམས་ཀྱི་གསང་བའི་ཆོས་ཉིད་ནི་དཀྱིལ་འཁོར་ལ་སོགས་པའི་དེ་ཁོ་ན་ཉིད་བཅུའི་ངེས་པ་མཁྱེན་པ་སྟེ། དེ་བརྙེས་པས་དེ་བཞིན་གཤེགས་པ་ཐམས་ཅད་ཀྱི་གསང་བའི་ཆོས་ཉིད་བརྙེས་པ་ཞེས་བྱའོ། །ཆོས་ཐམས་ཅད་སྤྲོས་པ་མེད་པ་ཞེས་བྱ་བ་ནི། སངས་རྒྱས་རྣམས་ཀྱི་རྣམ་པར་སྨིན་པའི་སྐུའི་མཉམ་པ་ཉིད་ཀྱི་ཡེ་ཤེས་ཉོན་མོངས་པ་ཅན་དང་བྲལ་བ་དང༌། ཆོས་ཐམས་ཅད་མཚན་མ་མེད་པའི་རྣམ་པར་ཐར་བའི་སྒོ་སྟེ། དེ་རྣམས་ལ་སྤྲོས་པ་འདི་ཡོད་པ་མ་ཡིན་པས་སྤྲོས་པ་མེད་པ་སྟེ། རྟོག་པ་ཐམས་ཅད་དང་བྲལ་བའི་སྦྱིན་པའི་ཕ་རོལ་ཏུ་ཕྱིན་པའི་ངོ་བོ་ཉིད་ཅེས་བྱ་བའི་ཐ་ཚིག་གོ །ཡང་ཞེས་བྱ་བ་ནི་དུམ་བུ་དང་པོ་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པ་ལ་ལྟོས་ནས་ཡང་ཞེས་བྱ་
བའི་སྒྲ་སྨོས་པ་ཡིན་ཏེ། ཡང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་གསུངས་སོ་ཞེས་བྱ་བར་སྦྱར་རོ། །འདི་ཞེས་བྱ་བ་ནི། བློ་ལ་གནས་པ་སྟེ། འོག་ནས་བཤད་པའི་བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་པའོ། །བདེ་བ་ཡང་ཡིན་ལ་ཆེན་པོ་ཡང་ཡིན་པས་ན་བདེ་བ་ཆེན་པོ་སྟེ། སྦྱིན་པའི་ཕ་རོལ་ཏུ་ཕྱིན་པའི་ངོ་བོ་ཉིད་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཏེ། མི་འགྱུར་བདེ་བ་ཀུན་གྲུབ་པས། །བདེ་བ་ཆེན་པོ་ཞེས་བཤད་དོ། །ཞེས་གསུངས་པ་ཡིན་ནོ། །དེ་ཉིད་གཟུང་བ་དང་འཛིན་པའི་རྣམ་པར་རྟོག་པ་རྣམས་ཀྱིས་མི་ཤིགས་པས་ན་རྡོ་རྗེའོ། །དེ་ཉིད་ནི་དཀྱིལ་འཁོར་ལ་སོགས་པའི་རྒྱུར་གྱུར་པས་ན་དམ་ཚིག་སྟེ། དེ་ལས་དཀྱིལ་འཁོར་ལ་སོགས་པ་ངེས་པར་འབྱུང་བའི་ཕྱིར་ཏེ། དེ་སྐད་ཅེས་བྱ་བ་གསུངས་པའོ། །དེ་ཇི་ལྟ་བུ་ཞེ་ན། དོན་ཡོད་ཞེས་བྱ་བ་ལ་སོགས་པ་གསུངས་ཏེ། དོན་ཡོད་པ་ནི་འབྲས་བུ་ཡོད་བའོ། །རྡོ་རྗེ་ཆོས་ཉིད་ནི་རྒྱུའོ། །དོན་ཡོད་པ་ཡང་ཡིན་ལ་རྡོ་རྗེ་ཆོས་ཉིད་ཀྱང་ཡིན་པས་ན་རྡོ་རྗེ་ཆོས་ཉིད་དོ། དཀྱིལ་འཁོར་ལ་སོགས་པའི་དེ་ཁོ་ན་ཉིད་ངེས་པར་རྫོགས་ཞེས་བྱ་བའི་ཐ་ཚིག་གོ །དེ་ཡང་ཇི་ལྟ་བུ་ཞེ་ན། ཤེས་རབ་ཀྱི་ཕ་རོལ་ཏུ་ཕྱིན་པ་ཞེས་བྱ་བ་ལ་སོགས་པ་གསུངས་ཏེ། འདིར་ཤེས་རབ་ཀྱི་ཕ་རོལ་ཏུ་ཕྱིན་པ་ནི་ནམ་མཁའ་དང་མཉམ་པ་ཉིད་ཀྱི་ཡེ་ཤེས་སོ། །དེའི་སྒོ་ནི་འཇུག་པའི་ཐབས་ཏེ་ཐོས་པ་དང་བསམ་པ་དང་བསྒོམ་པའི་རང་བཞིན་ཅན་གྱི་ཡེ་ཤེས་གང་གིས་རྟོགས་ཤིང་མངོན་སུམ་དུ་བྱེད་པ་དེ་ལ་དེ་སྐད་ཅེས་བྱའོ། །དེ་ཡང་ཇི་ལྟ་བུ་ཞེ་ན། དཔལ་མཆོག་དང་པོ་ཞེས་བྱ་བ་གསུངས་ཏེ། མཆོག་ནི་ཕུལ་དུ་བྱུང་བའོ། །དང་པོ་ནི་བསྐལ་པ་བཟང་པོ་ལ་སོགས་པ་ཐོག་མར་གནས་པའོ། །མཆོག་ཀྱང་ཡིན་ལ་དང་པོ་ཡང་ཡིན་པས་ན་མཆོག་དང་པོའོ། །འདི་ཉིད་གསུངས་པ་ནི། ཐོག་མ་ཐ་མ་མེད་ཅེས་བྱ་བ་ཡིན་ཏེ། དེ་ལ་དང་པོ་ནི་ཐོག་མར་བྱུང་བའོ། །ཐ་མ་ནི་དུས་ཚིགས་མེད་པ་ཅན་གྱིས་འཇིག་པའོ། །གང་ལ་ཐོག་མ་དང་ཐ་མ་མེད་པ་དེ་ནི་ཐོག་མ་དང་ཐ་མ་མེད་པ་སྟེ། མཉམ་པ་ཉིད་ཀྱི་ཡེ་ཤེས་ཀྱི་ངོ་བོ་ཆོས་ཀྱི་དབྱིངས་སོ། །དབུས་མཆོག་ཅེས་བྱ་བ་དབུས་ཀྱང་ཡིན་ལ། མཆོག་ཀྱང་ཡིན་པས་ན་དབུས་མཆོག་སྟེ། དངོས་
པོ་དང་དངོས་པོ་མེད་པར་རྟག་པ་དང་བྲལ་བ་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཡིན་ནོ་ཞེས་སྟོན་ཏོ། །གསུངས་ཞེས་བྱ་བ་ནི་བཀའ་སྩལ་བའོ། །འདི་སྐད་སྟོན་ཏེ། བཅོམ་ལྡན་འདས་རྣམ་པར་སྣང་མཛད་ཐོག་མ་དང་ཐ་མ་མེད་པའི་ནམ་མཁའ་དང་མཉམ་པའི་ཡེ་ཤེས་མངོན་དུ་བྱེད་པའི་རྒྱུར་གྱུར་པ་དང༌། སྐུ་དེ་ཐོབ་པའི་རྒྱུར་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྟོན་པར་མཛད་པའོ། །བྱང་ཆུབ་སེམས་དཔའ་ཆེན་པོ་རྣམས་ཀྱི་འདོད་ཆགས་ཆེན་པོའི་དངོས་གྲུབ་ཅེས་བྱ་བ་ལ་སོགས་པ་ལ་འདོད་ཆགས་ཀྱང་ཡིན་ལ་ཆེན་པོ་ཡང་ཡིན་པས་ན། འདོད་ཆགས་ཆེན་པོ་སྟེ། ཆོས་བདག་མེད་པ་ལ་ཆགས་པ་དང༌། དེའི་རྒྱུ་མཐུན་པ་ལས་བྱུང་བའི་རྡོ་རྗེ་སེམས་དཔའི་སྐུའོ། །དེ་ཡང༌། འདོད་ཆགས་ཆེན་པོ་བཅོམ་ལྡན་འདས། །དངོས་གྲུབ་ཀུན་ལ་རྗེས་སུ་དགྱེས། །རྡོ་རྗེ་སེམས་དཔའི་ཕྱག་རྒྱ་འདི། །འོད་ཟེར་དམར་པོ་སྣ་ཚོགས་འབར། །ཞེས་གསུངས་པ་ཡིན་ནོ། །དེའི་དངོས་གྲུབ་ཀྱི་མཆོག་ནི་འདོད་ཆགས་ཆེན་པོའི་དངོས་གྲུབ་ཀྱི་མཆོག་སྟེ། དཔལ་རྡོ་རྗེ་སེམས་དཔའི་དངོས་གྲུབ་དང༌། དེའི་རིགས་ཀྱི་དངོས་གྲུབ་ནི་འདོད་ཆགས་ཆེན་པོའི་དངོས་གྲུབ་བོ། །བྱང་ཆུབ་ཆེན་པོའི་རང་བཞིན་གྱི་སེམས་དཔའ་ནི་སེམས་དཔའ་ཆེན་པོ་སྟེ། མི་བསྐྱོད་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་སོ། །དེ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པའི་རང་བཞིན་ཅན་གྱི་དངོས་གྲུབ་གདུལ་བྱའི་སྐྱེ་བོ་རྣམས་ཀྱི་རྒྱུད་ལ་ཕྱག་རྒྱ་ཆེན་པོ་ལ་སོགས་པ་བསྐྱེད་པ་གང་ཡིན་པ་དེ་ནི་བདེ་བ་ཆེན་པོའི་དངོས་གྲུབ་ཀྱི་མཆོག་དམ་པ་ལ་འཇུག་པར་འགྱུར་ཏེ། རྒྱུའི་ངོ་བོར་ཞལ་གྱིས་བཞེས་པར་མཛད་པའོ། །བདེ་བ་ཆེན་པོ་བཤད་ཟིན་ཏོ། །དེར་རྫོགས་པ་ནི་བདེ་བ་ཆེན་པོའི་དངོས་གྲུབ་ཀྱི་མཆོག་གྲུབ་པའོ། །འདི་སྐད་སྟོན་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོའི་དངོས་གྲུབ་དམ་པ་ནི། རྡོ་རྗེ་སེམས་དཔའི་གཟུགས་བརྙན་དང་མཚུངས་པར་བསྒོམ་པའི་དངོས་གྲུབ་དེས་གཉིས་སུ་མེད་པའི་ཡེ་ཤེས་ཀྱི་ངོ་བོ་བདེ་བ་ཆེན་པོའི་ངོ་བོར་གདུལ་བྱ་རྣམས་གྱུར་པའོ། །འདིས་ནི་རྡོ་རྗེ་སེམས་དཔའི་དཀྱིལ་འཁོར་སྟོན་ཏོ། །བདེ་བ་ཆེན་པོའི་དངོས་གྲུབ་དམ་པ་ཞེས་བྱ་བ་ལ་བདེ་བ་ཆེན་པོ་ནི་གཉིས་སུ་མེད་པའི་ཡེ་ཤེས་ཏེ། དེ་རྫོགས་
ཤིང་རྟོགས་པ་ནི་བྱང་ཆུབ་སེམས་དཔའ་ཆེན་པོ་རྣམས་ཀྱི་བདེ་བ་ཆེན་པོའི་དངོས་གྲུབ་དམ་པ་ཞེས་བྱ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བ་གང་ཡིན་པ་དེ་ལ་བདེ་བ་ཆེན་པོའི་དངོས་གྲུབ་ཀྱི་དམ་པ་ཞེས་བྱའི་ཉན་ཐོས་དང༌། རང་བྱང་ཆུབ་ཀྱི་རང་བཞིན་ནི་མ་ཡིན་ནོ། །བྱང་ཆུབ་སེམས་དཔའ་ཆེན་པོ་རྣམས་ཀྱིས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོ་ནི། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོ་དང༌། བྱང་ཆུབ་ཆེན་པོའི་རྒྱུར་གྱུར་པ་སྟེ། བྱང་ཆུབ་ཆེན་པོའི་དཀྱིལ་འཁོར་རོ། །དེའི་དངོས་གྲུབ་ཀྱི་མཆོག་ནི་དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པར་རྫོགས་པར་འགྱུར་བ་སྟེ། དེའི་དོན་དུ་འཇུག་པ་ཞེས་བྱ་བ་ནི། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་དམིགས་པ་མེད་པའི་སྙིང་རྗེ་ཆེན་པོའི་ངོ་བོའི་སེམས་དང་སེམས་ལས་བྱུང་བ་མཁྱེན་ནས། ཆ་མཉམ་པ་ལ་སྤྱོད་པའི་སེམས་ཅན་རྗེས་སུ་གཟུང་བའི་ཕྱིར། དེ་བཞིན་གཤེགས་པའི་དཀྱིལ་འཁོར་ལ་སོགས་པ་བསྐྱེད་པར་མཛད་ལ། དེས་ཀྱང་གདུལ་བྱ་རྣམས་དེ་བཞིན་གཤེགས་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཏུ་འགྱུར་རོ་ཞེས་བྱ་བ་སྟེ། འདིས་ནི་དེ་བཞིན་གཤེགས་པའི་དཀྱིལ་འཁོར་གྱི་དངོས་གྲུབ་སྟོན་ཏོ། །བྱང་ཆུབ་སེམས་དཔའ་ཆེན་པོ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཆེན་པོའི་དངོས་གྲུབ་ཀྱི་དམ་པ་ནི་བཤད་ཟིན་ཏོ། །དེ་བདུད་ཆེན་པོའི་སྟོབས་ཐམས་ཅད་རབ་ཏུ་འཇོམས་པའི་དངོས་གྲུབ་ཀྱི་དམ་པ་ལ་འཇུག་པ་ནི། བདུད་ཆེན་པོ་ཡང་ཡིན་ལ་ཐམས་ཅད་ཀྱང་ཡིན་པས་ན་བདུད་ཆེན་པོ་ཐམས་ཅད་དེ། མཐོ་རིས་དང་ཐར་པའི་དགེ་བའི་སྲོག་གི་བར་དུ་གཅོད་པར་བྱེད་པ་དྲག་པོ་ལ་སོགས་པ་འཁོར་དང་བཅས་པའོ། །དེ་རྣམས་རབ་ཏུ་འཇོམས་པ་ནི་རྡོ་རྗེ་རིགས་ཀྱིས་དེ་གཞོམ་པ་ལ་སོགས་པ་ལ་འཇུག་པ་སྐྲག་པར་མཛད་ནས། གདུག་ཅིང་གཏུམ་པ་ཉིད་ལས་བཟློག་པའོ། །དེའི་དངོས་གྲུབ་ཀྱི་མཆོག་ནི་ཕྱག་རྒྱ་ཆེན་པོ་ལ་སོགས་པ་རྫོགས་པའོ། །འདི་སྐད་སྟོན་ཏེ་གང་གི་ཚེ་སེམས་ཅན་གདུག་ཅིང་གཏུམ་པ་རྣམས་ཀྱི་དོན་དུ་དེ་བཞིན་གཤེགས་པའི་རང་གི་ངོ་བོ་ཞི་བའི་ཚུལ་གྱིས་མཛད་པར་མི་སྤྱོད་པ་དེའི་ཚེ། རྡོ་རྗེའི་རིགས་སྦྲུལ་
ནས་དེས་གདུག་ཅིང་གཏུམ་པ་རྣམས་སྐྲག་པར་མཛད་དེ། སྡིག་པ་ལས་བཟློག་ནས་རྡོ་རྗེ་རིགས་ཀྱི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྐྱེད་པར་མཛད་པ་སྟེ། འདིས་ནི་རྡོ་རྗེ་རིགས་ཀྱི་དཀྱིལ་འཁོར་གྱི་དོན་བསྟན་ཏོ། །བདུད་ཐམས་ཅད་རབ་ཏུ་འཇོམས་པའི་དངོས་གྲུབ་ཀྱི་མཆོག་ནི་བཤད་ཟིན་ཏོ། །དེ་ནི་བྱང་ཆུབ་སེམས་དཔའ་ཆེན་པོ་རྣམས་ཀྱི་ཁམས་གསུམ་མ་ལུས་པའི་བདག་པོའི་དངོས་གྲུབ་ལ་འཇུག་པར་གྱུར་པ་ནི་ཕྱོགས་བཅུ་ན་འདོད་པ་དང་གཟུགས་དང་གཟུགས་མེད་པའི་ཁམས་ཀྱི་ངོ་བོར་གནས་པ་ནི་ཁམས་གསུམ་མ་ལུས་པ་སྟེ་ཁམས་གསུམ་ཐམས་ཅད་དོ། །དེར་བདག་པོར་གྱུར་པ་ནི་ཁམས་གསུམ་པ་ན་སྤྱོད་པའི་ཉོན་མོངས་པ་བག་ཆགས་དང་བཅས་པ་སྤོང་བ་རང་དབང་དུ་གྱུར་པའོ། །དེའི་དངོས་གྲུབ་ཀྱི་མཆོག་ནི་འགྲོ་བ་ཐམས་ཅད་འདུལ་བའི་ཏིང་ངེ་འཛིན་བརྙེས་པའོ། །འདིས་ནི་དོན་འདི་སྐད་སྟོན་ཏེ། གང་གི་ཚེ་སེམས་ཅན་གདུག་ཅིང་གཏུམ་པར་མ་གྱུར་པ་དེ་རྣམས་ཀྱི་དོན་རྡོ་རྗེ་རིགས་ཀྱི་ཚུལ་གྱིས་མཛད་པར་མི་སྤྱོད་པ་དེའི་ཚེ། རང་བཞིན་གྱིས་དག་པའི་ཏིང་ངེ་འཛིན་གྱིས་དེ་རྣམས་ལ་ཡང་དག་པའི་ལམ་ལེགས་པར་སྟོན་པར་མཛད་ལ། དེ་ལས་དེ་རྣམས་འགྲོ་བ་འདུལ་བའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབས་པར་གྱུར་པ་སྟེ། འདི་ནི་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་གྱི་དོན་བསྟན་པ་ཡིན་ནོ། །བྱང་ཆུབ་སེམས་དཔའ་ཆེན་པོའི་ཁམས་གསུམ་མ་ལུས་པའི་བདག་པོའི་དངོས་གྲུབ་ཀྱི་མཆོག་ནི་བཤད་ཟིན་ཏོ། །མ་ལུས་ཤིང་ལུས་པ་མེད་པའི་བདེ་བ་ཆེན་པོའི་དངོས་གྲུབ་ཀྱི་མཆོག་ལ་འཇུག་པར་འགྱུར་རོ་ཞེས་བྱ་བ་ལ། སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་ཞེས་བྱ་བ་ནི་བཤད་ཟིན་ཏོ། །དེ་རྣམ་པར་སྦྱོང་བ་ནི་སྒྲིབ་པ་ཐམས་ཅད་སྦྱངས་པ་སྟེ། ཉོན་མོངས་པའི་སྒྲིབ་པ་དང༌། ཆོས་ཀྱི་སྒྲིབ་པ་དང༌། ལས་ཀྱི་སྒྲིབ་པ་སྤངས་པས་ཡང་དག་པར་སྦྱངས་པའོ། །དེའི་དོན་དུ་འཇུག་པ་ནི་མངོན་པར་འདོད་པའོ། །དེའི་རྫོགས་པའི་རྒྱུའི་རྒྱུར་གྱུར་པ་དེ་ལ་འཇུག་པ་ཇི་སྐད་བཤད་པའི་དངོས་གྲུབ་ཀྱི་མཆོག་ལ་འཇུག་པ་སྟེ། དེ་ཇི་སྐད་བཤད་པའི་དངོས་གྲུབ་སེམས་ཅན་གྱི་ཁམས་སྦྱོང་བ་ལ་བརྩོན་ཞིང་སྐྱེད་
པར་མཛད་པའི་རྒྱུའི་ངོ་བོར་གྱུར་པའོ་ཞེས་བྱ་བའི་ཐ་ཚིག་གོ །ཇི་ལྟ་བུའི་བྱང་ཆུབ་སེམས་དཔའ་ཆེན་པོ་རྣམས་ཀྱི་ཞེ་ན། རྟག་ཏུ་འཁོར་བར་འཇུག་པ་རྣམས་ཀྱི་ཞེས་བྱ་བ་སྟེ། སྐད་ཅིག་རེ་རེ་ཞིང་སེམས་ཅན་རྣམས་རྣམ་པར་སྤྱང་བར་བྱ་བའི་ཕྱིར། འཁོར་བ་མཐའ་མེད་པར་ཡོངས་སུ་མི་འདོར་བའི་ཐུགས་དང་ལྡན་པ་རྣམས་ཀྱིའོ། །བརྩོན་འགྲུས་ཆེན་པོ་རྣམས་ཀྱིས་ཞེས་བྱ་བ་ལ། བརྩོན་འགྲུས་ནི་དགེ་བའི་ཆོས་ལ་མངོན་པར་སྤྲོ་བའི་བརྩོན་པ་ཆེན་པོ་གང་ལ་མངའ་བ་དེ་ནི་བརྩོན་པ་ཆེན་པོ་སྟེ། བརྩོན་འགྲུས་ཆེན་པོ་དང་ལྡན་པ་དེ་རྣམས་ཀྱིས་འཁོར་བ་ཇི་སྲིད་པར་ཁམས་གསུམ་པའི་རྒྱ་མཚོ་ཆེན་པོ་ལས་སེམས་ཅན་རྣམས་སྒྲོལ་བ་ལ་སྦྱོར་བར་མཛད་དོ་ཞེས་བྱ་བའི་ཐ་ཚིག་གོ །སེམས་ཅན་གྱི་ཁམས་མ་ལུས་ཤིང་ལུས་པ་མེད་པ་རྣམས་ཡོངས་སུ་སྐྱོབ་པ་ཞེས་བྱ་བ་ནི་ཀུན་ནས་ཡོངས་སུ་སྐྱོབ་པར་མཛད་པ་སྟེ། ཕྱོགས་བཅུའི་སེམས་ཅན་གྱི་ཁམས་མ་ལུས་པ་དམྱལ་བ་ལ་སོགས་པའི་འཇིགས་པ་ལས་བཟློག་ཅིང་ཐར་བར་མཛད་པའོ། །ཕན་པ་ཐམས་ཅད་ནི་མ་འོངས་པའི་དུས་ན་རྣམ་པར་སྨིན་པ་བདེ་བར་གྱུར་པའི་ལས་སོ། །བདེ་བ་ཐམས་ཅད་ནི་ལུས་འདི་ཉིད་ཀྱིས་བདེ་བ་མྱོང་བ་དང༌། བསམ་གཏན་ལས་བྱུང་བའི་ཡིད་ཀྱི་བདེ་བའོ། །ཇི་སྐད་དུ་བཤད་པའི་ཕན་པ་དང་བདེ་བ་ཐམས་ཅད་ཀྱིས་ཡོངས་སུ་སྐྱོབ་པ་ནི། ཕན་པ་དང་བདེ་བ་ཐམས་ཅད་ཀྱིས་ཡོངས་སུ་སྐྱོབ་པ་སྟེ། དེས་སེམས་ཅན་གྱི་ཁམས་མཆོག་ཏུ་བསྟན་ཅིང་བདེ་བ་ལ་རབ་ཏུ་སྦྱོར་བའོ། །དེ་གང་ཞེ་ན། བདེ་བ་ཆེན་པོའི་དངོས་གྲུབ་སྟེ། སངས་རྒྱས་ཉིད་དང་རྡོ་རྗེ་འཆང་བ་ཉིད་ཐོབ་པའོ། །དེའི་དོན་དུ་འཇུག་པ་ནི་ཇི་སྐད་དུ་བཤད་པ་གྲུབ་པའོ། །འདི་སྐད་སྟོན་ཏེ། གང་གི་ཚེ་གདུལ་བྱའི་སེམས་ཅན་གྱི་ཁམས་བརྩོན་འགྲུས་ཞན་པ་རྣམས་འཇིག་རྟེན་དབང་ཕྱུག་གིས་རང་བཞིན་གྱིས་དག་པའི་ཏིང་ངེ་འཛིན་ལ་འཇོག་པར་མི་ནུས་པ་དེའི་ཚེ། ཐུགས་རྗེ་ཆེན་པོའི་གཞན་གྱི་དབང་གིས་ཕྱི་མའི་མཐའ་མེད་པའི་འཁོར་བར་གདུལ་བྱའི་སེམས་ཅན་གྱི་ཁམས་བྱ་བ་གྲུབ་པའི་ཡེ་ཤེས་ཀྱིས་སངས་རྒྱས་ཉིད་དང༌། རྡོ་རྗེ་འཆང་བ་ཉིད་ལ་ངེས་པར་སྦྱོར་བ་སྟེ། འདིས་ནི་ནམ་མཁའི་སྙིང་པོའི་དཀྱིལ་
༄༅། འཁོར་གྱི་དོན་བསྟན་པ་ཡིན་ནོ། །དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་གང་གི་ཕྱིར་ཏེ། གདུལ་བྱའི་སེམས་ཅན་གྱི་ཁམས་ལེ་ལོ་ཅན་གདུལ་བ་ལ་རབ་ཏུ་སྦྱོར་བའི་ཕྱིར་རྣལ་འབྱོར་པ་ཐུགས་རྗེ་ཆེན་པོའི་གཞན་གྱི་དབང་གིས་འཁོར་བ་ཕྱི་མའི་མཐའ་མེད་པར་གནས་པར་བྱེད་དོ་ཞེས་བསྟན་པར་བྱ་བའི་ཕྱིར། ཇི་སྲིད་ཅེས་བྱ་བ་ལ་སོགས་པ་གསུངས་ཏེ། འཁོར་བས་ན་འཁོར་བ་སྟེ། སེམས་ཅན་གྱི་འཇིག་རྟེན་དང༌། དེའི་གནས་སྣོད་ཀྱི་འཇིག་རྟེན་ནོ། །དེར་གནས་པས་ན་འདུག་པར་གྱུར་པའི་ཚེ་སྟེ་འདུག་པར་གྱུར་པ་ན་གནས་པར་མཛད་པ་སྟེ། མི་གནས་པའི་མྱ་ངན་ལས་འདས་པའི་ཚུལ་གྱིས་སོ། །འདུག་པར་གྱུར་པ་དེ་ཡང་སུ་ཞིག་ཡིན་ཞེ་ན། མཁས་མཆོག་ཅེས་བྱ་བ་སྨོས་ཏེ། མཁས་པ་ནི་གཟི་ཅན་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་ཀྱི་མེས་ཉོན་མོངས་པ་བག་ཆགས་དང་བཅས་བའི་བུད་ཤིང་ངེས་པར་སྲེག་པར་མཛད་པ་སྟེ། རྡོ་རྗེ་འཆང་ཆེན་པོ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་སོ། །མཆོག་ནི་དམ་པའོ། །དེ་སྲིད་མཚུངས་མེད་སེམས་ཅན་དོན། །ཞེས་བྱ་བ་ནི། གདུལ་བྱ་རྣམས་སྐལ་བ་ཇི་ལྟ་བ་བཞིན་དུ་མཚུངས་པ་མེད་ཅིང༌། ཉན་ཐོས་དང། རང་སངས་རྒྱས་དང༌། འཇིག་རྟེན་པའི་ལྷ་རྣམས་ལ་སོགས་པ་དང་འདྲ་ཞིང་མཉམ་པ་མ་ཡིན་པའི་སེམས་ཅན་གྱི་དགོས་པའི་དོན་མྱ་ངན་ལས་མི་འདའ་ཞིང་ཕུང་པོ་ལྷག་མ་མེད་པའི་མྱ་ངན་ལས་འདས་པས། མྱ་ངན་ལས་མི་འདའ་བར་དོན་བྱེད་ཅིང་རྫོགས་པར་ནུས་ཤིང་སྤྱོད་པར་འགྱུར་རོ་ཞེས་བྱ་བའི་དོན་ཏོ། །དེ་བས་ན་འཁོར་བའི་གནས་སུ་མཁས་པའི་མཆོག་དེ་རྣམས་འདུག་པར་འགྱུར་བ་ཡིན་ནོ། །བག་ཆགས་དང་བཅས་པའི་ཉོན་མོངས་པའི་བུད་ཤིང་བསྲེགས་པར་གྱུར་ཀྱང་ཇི་ལྟར་འཁོར་བར་གནས་པར་འགྱུར་ཞེ་ན། ཤེས་རབ་ཅེས་བྱ་བ་ལ་སོགས་པ་སྨོས་ཏེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་བཤད་ཟིན་ཏོ། །ཕྱག་རྒྱ་ཆེན་པོ་ལ་སོགས་པའི་ངོ་བོ་གཟུགས་བརྙན་དང་འདྲ་བ་དང༌། རྨི་ལམ་དང་འདྲ་བ་དང༌། སྤྲུལ་པ་དང་འདྲ་བ་ལ་སོགས་པ་ཉེ་བར་གཟུང་བ་ནི་ཐབས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཐབས་ནི་ཤེས་
རབ་ཀྱི་ཕ་རོལ་ཏུ་ཕྱིན་པའི་ཐབས་སོ། །དེའི་ཡེ་ཤེས་ནི་རྟོགས་པའོ། །དེང་བྱིན་གྱིས་བརླབས་པ་ནི་སྔ་མའི་འཕེན་ཤུགས་ཏེ། དམིགས་པ་མེད་པའི་སྙིང་རྗེ་ཆེན་པོ་ཐུགས་རྗེ་ཞེས་བྱ་བའི་ཐ་ཚིག་གོ །དེས་སྒྲུབ་པ་ནི་བསྐྱེད་པ་སྟེ། མི་གནས་པའི་མྱ་ངན་ལས་འདས་པ་གྲུབ་པ་བསྒྲུབས་སོ་ཞེས་བསྟན་པ་ཡིན་ནོ། །ཅི་འཁོར་བའི་ཉེས་པ་དེས་གོས་པར་མི་འགྱུར་རམ་ཞེ་ན། ཆོས་ཀུན་ཞེས་བྱ་བ་ལ་སོགས་པ་གསུངས་ཏེ། ཆོས་ཀྱང་ཡིན་ལ་ཀུན་ཀྱང་ཡིན་པས་ན་ཆོས་ཀུན་ཏེ། བྱང་ཆུབ་ཀྱི་སེམས་དང་སྦྱིན་པའི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ངོ་བོ་དེ་རྣམས་ཀྱི་རྣམ་པར་དག་པ་ནི་གཉིས་དང་བྲལ་བ་ཉིད་དེ། ཆོས་ཐམས་ཅད་རྣམ་པར་དག་པ་རྒྱུར་གྱུར་པ་དེས་སོ། །ནི་ཞེས་བྱ་བ་ནི་ངེས་པར་གཟུང་བ་སྟེ། ཆོས་ཐམས་ཅད་རྣམ་པར་དག་པའི་ཕྱིར་ཞེས་བྱ་བའི་དོན་ཏོ། །དངོས་རྣམས་དག་པར་འགྱུར་བ་ཡིན། །ཞེས་བྱ་བ་ལ་སྲིད་པ་ནི་འཁོར་བ་སྟེ། དེ་དག་ནི་སྲིད་པའི་ཉེས་པ་དང་བྲལ་བའོ། །འཁོར་བ་སྲིད་དུ་ཞེས་བྱ་ནི་འཁོར་བ་ཇི་སྲིད་གནས་པར་རོ། །ནིའི་སྒྲ་ནི་གང་གི་ཕྱིར་ཞེས་བྱ་བའི་དོན་དེ་གང་གི་ཕྱིར་མཁས་པའི་མཆོག་དེ་རྣམས་ཆོས་ཐམས་ཅད་རྣམ་པར་དག་པས་སྲིད་པ་རྣམ་པར་དག་པར་བྱེད་པར་འགྱུར་རོ། །དེ་བས་ན་འཁོར་བའི་ཉེས་པ་དང་བྲལ་བ་ཡིན་ནོ། །ཇི་ལྟར་ན་དེ་རྣམས་འཁོར་བའི་ཆགས་པ་དང་བྲལ་བཞིན་དུ་འཁོར་བར་བཞུགས་པར་མཛད་ཅེ་ན། ཆགས་ལས་ཞེས་བྱ་བ་ལ་སོགས་པ་སྨོས་ཏེ། འདོད་ཆགས་ནི་རྡོ་རྗེ་སེམས་དཔའོ། །སོགས་པའི་སྒྲས་ནི་དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་རྣམས་བསྡུའོ། །འདོད་ཆགས་ལ་སོགས་པ་གང་ཡིན་པ་དེ་ནི་ཆགས་པ་ལ་སོགས་པ་སྟེ། དེ་ཉིད་ཀྱིས་འདུལ་བས་ན་ཆགས་པ་ལ་སོགས་པས་འདུལ་བའི་འཇིག་རྟེན་སེམས་ཅན་ཁམས་རྣམས་སོ། །འདིས་སེམས་ཅན་གྱི་ཁམས་རྣམས་འདུལ་བས་ན་འདུལ་བ་སྟེ། སངས་རྒྱས་ཉིད་དང་རྡོ་རྗེ་འཛིན་པ་ཉིད་ལ་རབ་ཏུ་འཇོག་པའོ། །ཅིའི་ཕྱིར་འཇིག་རྟེན་རྣམས་ཆགས་པ་ལ་སོགས་པས་འདུལ་ཞེ་ན། འཇིག་རྟེན་སྡིག་བྱེད་ལ་
ཞེས་བྱ་བ་ལ་སོགས་པ་སྨོས་ཏེ། འཁོར་བ་ཐོག་མ་དང་ཐ་མའི་མཐའ་མེད། །འདོད་པའི་སྲིད་པ་ལ་སོགས་པའི་རང་བཞིན་ཅན་གྱི་སྲིད་པས་ན་འཁོར་བ་ཡིན་ལ། དེ་བས་ན་འཁོར་བ་ཐོག་མ་དང་ཐ་མ་མེད་པ་ནས་སྲིད་པ་རྒྱུ་བའི་ཚེ་རྟག་ཏུ་བུད་མེད་བསྟེན་པ་ལ་སོགས་པའི་སྡིག་པ་བྱེད་པའི་འཇིག་རྟེན་དེ་རྣམས་སྤྱང་བར་བྱ་བའི་ཕྱིར། འཁོར་བ་སྲིད་དུ་བདག་ཉིད་འདུལ། །ཞེས་བྱ་བ་ཡིན་ཏེ། འདོད་པ་དང་གཟུགས་དང་གཟུགས་མེད་པའི་སྲིད་པ་རྣམས་ན་རྟག་ཏུ་བུད་མེད་ལ་སོགས་པའི་ཡུལ་བསྟེན་ཅིང་མངོན་པར་ཞེན་པའི་སྡིག་པ་ལ་འཇུག་པ་རྣམས་བཟློག་ཅིང་སྤྱང་བར་བྱ་བའི་དོན་དུའོ། །ནི་ཞེས་བྱ་བ་ནི་ངེས་པར་གཟུང་བ་སྟེ། དེ་རྣམས་སྤྱང་བར་བྱ་བའི་དོན་ཉིད་དུ་ཞེས་བྱ་བའི་དོན་ཏོ། །འདུལ་བ་ནི་མི་གནས་པའི་མྱ་ངན་ལས་འདས་པའི་ངོ་བོར་བྱེད་པའོ། །འཁོར་བ་སྲིད་དུ་ཞེས་བྱ་བ་ནི་འཁོར་བ་ཕྱི་མའི་མཐའ་མེད་པའི་བར་དུའོ། །བདག་ཉིད་ཅེས་བྱ་བ་ནི་རང་གིས་ཏེ་མི་དམིགས་པའི་སྙིང་རྗེ་ཆེན་པོའི་ངོ་བོ་ཉིད་བྱེད་པ་པོར་འགྱུར་བས་མི་གནས་པའི་མྱ་ངན་ལས་འདས་པའི་རང་བཞིན་ཅན་གྱི་ལས་ཀྱི་ངོ་བོ་ཉིད་བདག་ཉིད་བྱེད་དོ་ཞེས་བྱ་བའི་ཐ་ཚིག་གོ །འདིས་ནི་དོན་འདི་སྐད་སྟོན་ཏེ། གང་གི་ཕྱིར་རྡོ་རྗེ་སེམས་དཔའ་ལ་སོགས་པའི་སྒེག་པ་དང༌། ཞི་བ་དང༌། དྲག་པོ་དང༌། དཔའ་བོ་ལ་སོགས་པའི་ཉམས་ཀྱིས་འདུལ་བའི་སེམས་ཅན་རྣམས་ཡོད་ལ། དེ་རྣམས་གདུལ་བར་བྱ་བའི་ཕྱིར་མཁས་མཆོག་དེ་རྣམས་བདག་ཉིད་རྡོ་རྗེ་སེམས་དཔའ་ལ་སོགས་པའི་ཚུལ་གྱིས་འཁོར་བ་ཇི་སྲིད་པར་མི་གནས་པའི་མྱ་ངན་ལས་འདས་པའི་ངོ་བོ་ཉིད་དུ་བྱེད་དོ་ཞེས་བྱ་བའི་དོན་ཏོ། །གལ་ཏེ་དེ་རྣམས་སེམས་ཅན་གདུལ་བྱའི་ཕྱིར་འཁོར་བ་ཇི་སྲིད་པར་གནས་ན་འཁོར་བའི་ཉེས་པ་འདོད་ཆགས་ལ་སོགས་པས་ཇི་ལྟར་གོས་པར་མི་འགྱུར་ཞེ་ན། ཇི་ལྟར་ཞེས་བྱ་བ་ལ་སོགས་པ་སྨོས་ཏེ་ཇི་ལྟར་པདྨ་ནི་རང་གི་ངོ་བོ་ཉིད་ཀྱི་ཁ་དོག་དམར་པོས་ནན་ཏན་དུ་དམར་བས་ན་རབ་ཏུ་དམར་པའོ། །ཡང་ཞེས་བྱ་བ་ནི་ཀྱང་ཞེས་བྱ་བའི་དོན་ཏོ། །རབ་ཏུ་དམར་བ་ཡང་ངོ༌། །ཚོན་གྱིས་ཉེས་པ་ཞེས་བྱ་བ་ནི་ཞེན་པའི་ཉེས་པ་ནི་ཚོན་གྱིས་ཉེས་པ་སྟེ། རྫས་
གཞན་དང་འདྲེས་པའི་ཉེས་པ་ལ་སོགས་པ་ཡོངས་སུ་མི་འདོར་བ་སྟེ། དེ་ནི་འདོད་ཆགས་ལ་སོགས་པའི་ཉེས་པས་གོས་པར་མི་འགྱུར་རོ། །དེ་ཡང་ཚོན་ཡོད་པའི་ལྗན་ལྗིན་ལ་སོགས་པའི་དྲི་མས་གོས་ཤིང་འབགས་པར་མི་འགྱུར་རེ་ཞེས་བྱ་བའི་ཐ་ཚིག་གོ །དེ་བཞིན་གནས་ཀྱི་ཉེས་པ་ཡིས། །འགྲོ་ཕན་རྣམས་ལ་མི་གོས་སོ། །ཞེས་བྱ་བ་ལ་གནས་ནི་ཁམས་གསུམ་པ་སྟེ། མི་གནས་པའི་མྱ་ངན་འདས་པའི་སྲིད་པའི་ངོ་བོ་ཉིད་ཀྱིས་གནས་པའོ། །དེའི་ཉེས་པ་ནི་འདོད་ཆགས་ལ་སོགས་པའོ། །དེས་མ་གོས་པ་ནི་གོས་པར་མི་འགྱུར་རོ། །རྟག་ཏུ་ཞེས་བྱ་བ་ནི་རྒྱུན་དུའོ། །འགྲོ་ཕན་རྣམས་ལ་ཞེས་བྱ་བ་ནི་སེམས་ཅན་གྱི་ཁམས་ཐམས་ཅད་ལ་ཕན་པ་ཐམས་ཅད་རྫོགས་པར་བྱེད་པའི་སེམས་དང་ལྡན་པའོ། །འདི་སྐད་སྟོན་ཏེ་ཇི་ལྟར་པདྨ་ཤིན་ཏུ་དམར་ཞིང་ཆུ་ལས་སྐྱེས་སུ་ཟིན་ཀྱང༌། ཆུའི་འདམ་ལ་སོགས་པ་ཆུའི་ཉེས་པས་གོས་ཤིང་འདྲེ་བར་མི་འགྱུར་རོ། །དེ་བཞིན་དུ་སེམས་ཅན་ཐམས་ཅད་སྨིན་ཅིང་གྲོལ་བར་བྱེད་པའི་འདོད་ཆགས་ཀྱི་ཆགས་པའི་བྱང་ཆུབ་སེམས་དཔའ་རྣམས་འཁོར་བར་སྐྱེས་སུ་ཟིན་ཀྱང་འདོད་ཆགས་ལ་སོགས་པའི་འཁོར་བའི་ཉེས་པ་རྣམས་ཀྱིས་གོས་པར་མི་འགྱུར་རོ། །ཡང་ཇི་ལྟར་ན་སེམས་ཅན་སྨིན་ཅིང་གྲོལ་བའི་འདོད་ཆགས་ཀྱིས་ཆགས་པའི་བྱང་ཆུབ་སེམས་དཔའ་རྣམས་འཁོར་བར་གནས་པ་ན་འཁོར་བའི་ཉེས་པས་ཇི་ལྟར་གོས་པར་མི་འགྱུར་ཏེ། འདོད་ཆགས་ལ་ཞེན་པའི་སེམས་ཅན་གཞན་དག་དང་འདྲ་བར་གོས་པ་ཁོ་ནར་འགྱུར་རོ་ཞེས་རྟོག་ཅིང་འདི་སྙམ་དུ་སེམས་པ་དེ་བསལ་བར་བྱ་བའི་ཕྱིར། འདོད་ཆགས་ཆེན་པོ་རྣམ་པར་དག །ཅེས་གསུངས་ཏེ། འདོད་ཆགས་ཆེན་པོ་ནི་སྙིང་རྗེ་ཆེན་པོའོ། །དེས་རྣམ་པར་དག་པ་ནི་འདོད་ཆགས་ཆེན་པོ་རྣམ་པར་དག་པ་སྟེ། གང་གི་ཕྱིར་དེ་རྣམས་ལ་དམིགས་སུ་མེད་པའི་སྙིང་རྗེ་ཆེན་པོ་མངའ་བ་དེས་ནི་དེ་རྣམས་ལ་རྣམ་པར་རྟོག་པ་མི་མངའ་ཡང༌། སྔོན་གྱི་འཕེན་པའི་ཤུགས་ཀྱིས་སེམས་ཅན་གྱི་དོན་ལ་འཇུག་པར་མཛད་དེ། དེ་བས་ན་འདོད་ཆགས་ཆེན་པོ་རྣམ་པར་དག་པའི་ཕྱིར་ཏེ། དེ་རྣམས་ལ་འདོད་ཆགས་ལ་སོགས་པའི་འཁོར་བའི་ཉེས་པ་རྣམ་པར་རྟོག་པའི་རང་བཞིན་ཅན་
གྱིས་གོས་པར་མི་འགྱུར་རོ་ཞེས་བྱ་བའི་དོན་ཏེ། ཉིད་ཅེས་བྱ་བའི་སྒྲ་ནི་ངེས་པར་གཟུང་བ་སྟེ་མི་གོས་པ་ཁོ་ན་ཡིན་ནོ། །འདིས་ནི་སེམས་ཅན་ཐམས་ཅད་ཀྱང་རྡོ་རྗེ་སེམས་དཔའི་ངོ་བོ་ཉིད་ཡིན་ནོ་ཞེས་སྟོན་ཏོ། །བདེ་བ་ཆེན་པོ་ཞེས་བྱ་བ་ལ་བདེ་བ་ཆེན་པོ་ནི་བཤད་ཟིན་ཏོ། །གང་ལ་བདེ་བ་ཆེན་པོ་མངའ་བ་དེ་ནི་བདེ་བ་ཆེན་པོ་སྟེ། འདོད་ཆགས་ཆེན་པོའི་རྣམ་པར་དག་པ་ཉིད་ཀྱིས་རྣམ་པར་རྟོག་པའི་ཀུན་དུ་སྤྱོད་པ་དང་ཤིན་ཏུ་བྲལ་བ་ཡིན་པས་ནི་བདེ་བ་ཆེའོ། །འདིས་ཀྱང་དེ་བཞིན་གཤེགས་པའི་ངོ་བོ་ཉིད་ཡིན་པར་བཤད་དོ། །ནོར་ཆེ་ལ་ཞེས་བྱ་བ་ནི་གདུག་ཅིང་གཏུམ་པའི་སེམས་ཅན་རྣམས་གདུལ་བར་བྱ་བའི་ཕྱིར། །ཐབས་དང་ཤེས་རབ་ཀྱིས་ཁྲོ་བོར་སྣང་བའི་ནོར་གང་ལ་མངའ་བ་དེ་ནི་ནོར་ཆེ་བའོ། །འདོད་ཆགས་ཆེན་པོ་རྣམ་པར་དག་པ་ཉིད་ཀྱིས་རྣམ་པར་རྟོག་པ་དང་བྲལ་བ་དེ་ནི་ནོར་ཆེ་བ་སྟེ་འདིས་ཀྱང་རྡོ་རྗེ་རིགས་ཀྱི་ངོ་བོ་ཉིད་ཡིན་པར་སྟོན་ཏོ། །ཁམས་གསུམ་པའི་དབང་ཕྱུག་ནི་འཇིག་རྟེན་དབང་ཕྱུག་སྟེ་དེའི་ངོ་བོ་ཉིད་ཡིན་པས་ན་ཁམས་གསུམ་དབང་ཕྱུག་ཉིད་དེ་དེ་ཐོབ་པའོ། །འདོད་ཆགས་ཆེན་པོ་རྣམ་པར་དག་པ་ཉིད་ཀྱིས་ཉོན་མོངས་པ་བག་ཆགས་དང་བཅས་པ་སྤངས་པའི་ཕྱིར་འཇིག་རྟེན་དབང་ཕྱུག་ཉིད་བརྙེས་པ་སྟེ། འདིས་ཀྱང་པདྨའི་རིགས་ཀྱི་ངོ་བོར་བཤད་པ་ཡིན་ནོ། །སེམས་ཅན་དོན་རྣམས་བརྟན་པར་བྱེད། །ཅེས་པ་ནི་བྱ་བ་སྒྲུབ་པའི་ཡེ་ཤེས་ཀྱིས་འཁོར་བའི་ཕྱི་མའི་མཐའ་ཇི་སྲིད་ཀྱི་བར་དུ་སེམས་ཅན་རྣམས་སྐལ་བ་ཇི་ལྟ་བ་བཞིན་དུ་འདུལ་བ་ནི་སེམས་ཅན་གྱི་དོན་ཏེ། དོན་དེ་མཁས་པའི་མཆོག་དེ་རྣམས་མཛད་པའོ། །བརྟན་པ་ནི་མི་ཕྱེད་པའོ། །དེ་ཡང་དོན་དུ་གཉེར་པས་ན་དོན་ཏེ་མཁས་པའི་མཆོག་དེ་རྣམས་འདོད་ཆགས་ཆེན་པོ་རྣམ་པར་དག་པ་ཉིད་ཀྱིས་སྐད་ཅིག་མ་རེ་རེ་ཞིང་སྤྲུལ་པས་སེམས་ཅན་གྱི་དོན་རྣམས་མཛད་དོ་ཞེས་བྱ་བའི་ཐ་ཚིག་གོ །འདིས་ཀྱང་ནོར་བུའི་རིགས་ཀྱི་ངོ་བོ་ཉིད་དུ་བཤད་པ་ཡིན་ནོ། །ད་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྟོན་པའི་ཕན་ཡོན་བསྟན་པའི་ཕྱིར་གང་ལ་ལ་ཞིག་ཅེས་བྱ་བ་ལ་སོགས་པ་གསུངས་ཏེ། གང་ལ་ཞེས་བྱ་བ་ནི་བུད་མེད་དམ་སྐྱེས་པའམ། ཁྱེའུ་འམ་བུ་མོ་གང་
ཞིག་ཇི་སྐད་དུ་གསུངས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་འདི་ཉིན་རེ་ཞིང་ནད་པར་ལངས་ན་འདོན་པ་གཞན་གྱིས་བསྟན་པ་ལས་ཇི་སྐད་དུ་བསྟན་པའམ། གླེགས་བམ་དུ་བྱེད་པའམ། ཀློག་པར་བྱེད་པའམ་ཉན་པ་ནི་སློབ་དཔོན་གྱིས་བསྟན་པ་ནི་རྣ་བའི་རྣམ་པར་ཤེས་པའི་རང་བཞིན་གྱིས་འཛིན་པར་བྱེད་པ་ནི་ཐོས་པར་བྱེད་པའོ། །ཐོས་ནས་ཚིག་དང་དོན་ཤེས་པར་འགྱུར་བ་མ་བརྗེད་པར་བློ་ལ་འཇོག་པར་བྱེད་པ་ནི་འཛིན་པའོ། །ཡི་དམ་དུ་བླངས་ནས་གླེགས་བམ་ཀློག་པར་བྱེད་པ་ནི་ཀློག་པའོ། །དང་ཞེས་བྱ་བ་ནི་བསྡུས་པའི་དོན་ཡིན་གྱི་ཕྱོགས་གཉིས་སུ་བརྟག་པའི་དོན་ནི་མ་ཡིན་ཏེ། གང་གི་ཕྱིར་ཚེ་འདི་ཉིད་ལ་དངོས་གྲུབ་ཐོབ་པར་འགྱུར་རོ་ཞེས་གསུངས་པས་སོ། །བརྟག་པའི་དོན་དུ་ཁས་བླངས་ནས་ནི་གླེགས་བམ་བཀླགས་པ་ཙམ་གྱིས་ཚེ་འདི་ཉིད་ལ་དངོས་གྲུབ་ཀྱི་མཆོག་ཏུ་གྱུར་ན་དེ་ལྟར་མི་འདོད་དེ་བསྒོམ་པའི་རང་བཞིན་ཅན་གྱི་ཡེ་ཤེས་ཉམས་སུ་ལེན་པ་མེད་པར་དངོས་གྲུབ་ཀྱི་མཆོག་ཏུ་འབྱུང་བར་མི་འགྱུར་རོ་ཞེས་བྱ་བ་ལ་སོགས་པས་རྣལ་འབྱོར་པ་ཁ་ཏོན་བྱེད་པ་ལ་སོགས་པ་ལ་རབ་ཏུ་སྦྱོར་བ་ནི་རྡོ་རྗེ་འཆང་བ་ལ་སོགས་པའི་བདེ་བ་དང་ཡིད་བདེ་བ་ཐོབ་པར་འགྱུར་ལ། བདེ་བ་དང་ཡིད་བདེ་བ་དེས་ཀྱང་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་གི་དངོས་གྲུབ་ཅེས་བྱ་བ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་དངོས་གྲུབ་བོ། །ཁྱད་པར་ཇི་ལྟ་བུ་ཞེ་ན། ཕུལ་དུ་བྱུང་བ་ཞེས་བྱ་བ་སྟེ་ཕྱི་མའི་མཐར་ཐུག་པ་མེད་པར་གནས་པའོ། །ཚེ་འདིར་ཞེས་པ་ད་ལྟར་ཉིད་ལ་བསྙེན་ཅིང་ཐོབ་པར་འགྱུར་བའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོའི་དངོས་གྲུབ་ཀྱི་མཆོག་ཀྱང་འགྲུབ་བོ་ཞེས་བྱ་བ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་སོགས་པ་གྲུབ་པ་དེས་ཀྱང༌། རྣལ་འབྱོར་པའི་དེ་བཞིན་གཤེགས་པ་ཐམས་ཅད་ཀྱིས་གཉིས་སུ་མེད་པའི་ཡེ་ཤེས་ཀྱི་དངོས་གྲུབ་ཐོབ་པར་འགྱུར་བས་ན། དེ་བཞིན་གཤེགས་པ་ཐམས་ཅད་ཀྱི་གསང་བ་མཆོག་གི་དངོས་གྲུབ་བོ་ཞེས་བྱའོ། །རྡོ་རྗེ་འཛིན་པ་ཆེན་པོར་འགྱུར་རོ་ཞེས་བྱ་བ་ལ་ཆོས་ཐམས་ཅད་ཀྱི་དེ་བཞིན་ཉིད་ནི་རྡོ་རྗེ་ཆེན་པོའོ། །དེ་འཆང་བས་ན་རྡོ་རྗེ་འཆང་བ་ཆེན་པོ་སྟེ་དེ་བཞིན་ཉིད་དུ་རོ་གཅིག་པའི་ཡེ་ཤེས་ཀྱི་ངོ་བོ་ཉིད་ཀྱིས་ཆོས་ཀྱི་དབྱིངས་
ཐོག་མ་དང་ཐ་མ་མེད་པའི་བདག་ཉིད་ཅན་རྣམ་པར་སྣང་མཛད་ཆེན་པོའོ། །དེ་བཞིན་གཤེགས་པ་ཞེས་བྱ་བ་ནི་དེ་བཞིན་གཤེགས་པ་ལྔའི་ངོ་བོར་གྱུར་པའོ། །འདིས་ནི་འདི་སྐད་སྟོན་ཏེ། རྣལ་འབྱོར་པ་ཤེས་རབ་ཀྱི་ཕ་རོལ་ཏུ་ཕྱིན་པ་ཀློག་པ་ལ་སོགས་པ་ཉམས་སུ་ལེན་པ་དང་ལྡན་པ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐོབ་པར་འགྱུར་ལ། ཡང་དེས་ཀྱང་དེ་བཞིན་གཤེགས་པ་ཐམས་ཅད་ཀྱི་གཉིས་སུ་མེད་པའི་ཡེ་ཤེས་ཐོབ་ཅིང་དེས་ཀྱང་རྡོ་རྗེ་འཛིན་པ་ཆེན་པོ་ཉིད་དམ། དེ་བཞིན་གཤེགས་པ་ཉིད་ཐོབ་པར་འགྱུར་རོ། །བདེ་བ་ཆེན་པོའི་རྡོ་རྗེ་ནི་གཉིས་སུ་མེད་པའི་ཡེ་ཤེས་སོ། །དེ་ཉིད་ནི་དོན་ཡོད་པའི་དམ་ཚིག་སྟེ། རིགས་ལྔ་པོ་སྐྱེད་པར་བྱེད་པའི་རྒྱུའོ། །དེ་བས་ན་ཇི་སྐད་དུ་བཤད་པའི་དཔལ་མཆོག་དང་པོ་དང་དེ་ཐོབ་པར་བྱེད་པའོ། །དེ་བཞིན་གཤེགས་པ་ཐམས་ཅད་ཀྱང་ཡིན་ལ་བདེ་བ་ཆེན་པོ་ཡང་ཡིན་པས། དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོའོ། །དེ་ཉིད་ནི་མི་ཕྱེད་པས་ན་རྡོ་རྗེའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་ཐོབ་པའི་ཐབས་ཀྱི་སྒོ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཞེས་བྱའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོའི་ཆོས་ཀྱི་རྣམ་གྲངས་དཔལ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་བསྐྱེད་པའི་རྒྱུར་གྱུར་པ་བསྟན་ནས། ད་ནི་བདེ་བ་ཆེན་པོ་རྡོ་རྗེ་སེམས་དཔའི་གཞལ་ཡས་ཁང་བསྒོམས་པའི་སྟོབས་ཀྱིས་བསྐྱེད་ནས་དེར་འདུག་སྟེ། བཅོམ་ལྡན་འདས་དཔལ་རྣམ་པར་སྣང་མཛད་ཀྱིས་རང་གི་རིགས་སྤྲུལ་པར་བྱ་བའི་ཕྱིར། རྡོ་རྗེ་སེམས་དཔའ་ལ་ཇི་ལྟ་བ་བཞིན་དུ་དབང་བསྐུར་བ་ནི། དེ་ནས་ཞེས་བྱ་བ་ལ་སོགས་པའི་གཞུང་གིས་སྟོན་ཏོ། །དེ་ནས་བཅོམ་ལྡན་འདས་བདེ་བ་ཆེན་པོ་རྡོ་རྗེ་སེམས་དཔའི་གཞལ་ཡས་ཁང་ན་བཞུགས་སོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་བསྟན་ནས་གཞལ་ཡས་ཁང་སྒོམ་པས་བདེ་བ་ཆེན་པོ་རྡོ་རྗེ་སེམས་དཔའི་གཞལ་ཡས་ཁང་བསྐྱེད་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཞེས་བྱ་བ་ནི་རྣམ་
པར་སྣང་མཛད་དོ། །འདི་ཉིད་ཇི་ལྟ་བུ་ཞེ་ན། དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ་བྱང་ཆུབ་ཀྱི་སེམས་ཆེན་པོའི་རང་བཞིན་གྱི་སེམས་དང་སེམས་ལས་བྱུང་བ་རྣམས་ཏེ། དེ་རྣམས་ཀྱི་རྡོ་རྗེ་སེམས་དཔའ་ལ་སོགས་པའི་གཟུགས་སོ། །ཡང་ན་དེ་བཞིན་གཤེགས་པ་ཐམས་ཅད་ཀྱང་ཡིན་ལ་རྡོ་རྗེ་སེམས་དཔའ་ཡང་ཡིན་པས་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སེམས་དཔའ་སྟེ། བྱང་ཆུབ་ཆེན་པོའི་རང་བཞིན་ཅན་གྱི་མི་བསྐྱོད་པའི་སེམས་དང་སེམས་ལས་བྱུང་བའི་ངོ་བོ་ཉིད་ཅེས་བྱ་བའི་ཐ་ཚིག་གོ །དེས་བྱིན་གྱིས་བརླབས་པ་ནི་སྔོན་གྱི་འཕེན་ཤུགས་སོ། །དེའི་རྡོ་རྗེ་ནི་སེམས་དཔའི་རྡོ་རྗེའོ། །དེའི་གསང་བའི་མཆོག་གི་དངོས་གྲུབ་ནི་དེ་བཞིན་གཤེགས་པའི་རིགས་སུ་བྱུང་བ་སྟེ། དེ་ལས་དེ་བྱུང་བ་ཡིན་པའི་ཕྱིར་།དེའི་ཆོ་ག་རྒྱས་པ་ནི་དེ་ཁོ་ན་ཉིད་བཅུའི་བདག་ཉིད་ཅན་ནོ། །ཆོ་ག་རྒྱས་པ་དེས་རྒྱལ་པོར་གྱུར་ཞིང་འབར་ལ་མཛེས་པས་ན། བཅོམ་ལྡན་འདས་རྣམ་པར་སྣང་མཛད་ལ་དེ་སྐད་ཅེས་བྱའོ། །འདིས་ནི་དེ་བཞིན་གཤེགས་པའི་རིགས་ཀྱི་ངོ་བོ་ཉིད་དུ་བསྟན་ཏོ། །ད་ནི་འདི་དེ་བཞིན་གཤེགས་པའི་རིགས་ཀྱི་ངོ་བོ་ཉིད་འབའ་ཞིག་ཡིན་པར་ཡང་མ་ཟད་ཀྱི། རིན་པོ་ཆེའི་རིགས་ཀྱི་རང་བཞིན་ཡང་ཡིན་ནོ་ཞེས་བསྟན་པའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་དེ་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་ངོ་བོ་སྦྱིན་པའི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་སྟེ། དེ་རྣམས་ཀྱི་སྐུ་དང་གསུང་དང་ཐུགས་རྡོ་རྗེ་ཐམས་ཅད་དེ་ལས་བྱུང་བའི་རིན་པོ་ཆེའི་རིགས་ཀྱི་སྐུ་དང་གསུང་དང་ཐུགས་རྡོ་རྗེའོ། །དེ་ཉིད་ནི་གསང་བ་དོན་ཡོད་པའི་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པ་བརྟན་ཞིང་མི་ཕྱེད་པའི་ཕྱག་རྒྱ་ཡིན་པས་ན། གསང་བའི་དོན་ཡོད་པའི་ཕྱག་རྒྱ་བསྟན་པ་སྟེ། ཕྱག་རྒྱ་དེ་རྣམས་ཀྱིས་སྐུ་དང་གསུང་དང་ཐུགས་རྡོ་རྗེ་ཐམས་ཅད་
རྒྱས་བཏབ་པ་གང་ཡིན་པ་དེ་ལ་དེ་སྐད་ཅེས་བྱའོ། །འདིས་ནི་བཅོམ་ལྡན་འདས་རྣམ་པར་སྣང་མཛད་རིན་པོ་ཆེའི་རིགས་ཀྱི་ངོ་བོ་ཉིད་ཡིན་པར་སྟོན་ཏོ། །ད་ནི་པདྨའི་རིགས་ཀྱི་ངོ་བོ་ཉིད་ཀྱང་ཡིན་ནོ་ཞེས་བསྟན་པར་བྱ་བའི་ཕྱིར། དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་ནི་སོ་སོར་རྟོག་པའི་ཡེ་ཤེས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བའོ། །དེ་རྣམས་ཀྱི་དམ་ཚིག་ཆེན་པོ་ཐམས་ཅད་ནི་པདྨའི་རིགས་སོ། །ནམ་མཁའི་ཁམས་ཐམས་ཅད་ཁྱབ་པས་ན་ཆེན་པོ་ཉིད་དོ། །གཟུགས་ཐམས་ཅད་ཀྱི་ངོ་བོ་ཉིད་ཡིན་པས་ན་དམ་ཚིག་ཆེན་པོ་ཐམས་ཅད་དོ། །ཕྱག་རྒྱའི་དམ་ཚིག་ཅེས་བཤད་དོ་ཞེས་གསུངས་པས་སོ། །དེར་བཞུགས་པ་ནི་པདྨའི་རིགས་སུ་གཏོགས་པར་གྱུར་པའོ། །ཅིའི་ཕྱིར་དེར་ཞུགས་ཤེ་ན། ཆོས་ཉིད་ཀྱི་ཡེ་ཤེས་ཐུགས་སུ་ཆུད་པ་ལ་རབ་ཏུ་གནས་པ་ཞེས་བྱ་བ་གསུངས་ཏེ། གང་གིས་རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཐུགས་སུ་ཆུད་ཅིང་མངོན་སུམ་དུ་མཛད་པར་གྱུར་པ་དེ་ནི་ཆོས་ཉིད་ཀྱི་ཡེ་ཤེས་ཐུགས་སུ་ཆུད་པའོ། །དེ་ལ་རབ་ཏུ་གནས་པ་ནི་ཕྱི་མའི་མཐའ་ཐུག་པ་མེད་པར་རྣམ་པར་མི་རྟོག་པའི་ཚུལ་གྱིས་བཞུགས་པའོ། །འདིས་ནི་པདྨའི་རིགས་ཀྱི་ངོ་བོ་ཉིད་ཡིན་པར་བསྟན་ཏོ། །དེ་ལྟར་བཅོམ་ལྡན་འདས་པདྨའི་རིགས་ཀྱི་ངོ་བོར་བསྟན་ནས། ད་ནི་ལས་ཀྱི་རིགས་ཀྱི་ངོ་བོ་ཉིད་དུ་བསྟན་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། བྱ་བ་སྒྲུབ་པའི་ཡེ་ཤེས་ཀྱི་ངོ་བོ་ཉིད་རང་བཞིན་གྱིས་འོད་གསལ་བའི་སེམས་དང་སེམས་ལས་བྱུང་བ་སྟེ། དེ་རྣམས་ཀྱིས་བྱ་བ་སྣ་ཚོགས་སོ། །དེ་ལས་སྐྱེས་པའི་དགེ་བའི་ལས་ཏེ་དེའི་ལས་ནི་སངས་རྒྱས་མཆོད་པ་དང༌། སེམས་ཅན་རྣམས་ཀྱི་དོན་བྱེད་པའོ། །ལས་དེས་དུས་གསུམ་སྟེ་འདས་པ་དང༌། མ་འོངས་པ་དང༌། ད་ལྟར་གྱི་དུས་རྣམས་སུ་འཇིག་རྟེན་གྱི་ཁམས་མ་ལུས་པ་གང་དག་གནས་པར་གྱུར་པ་དང་གནས་པར་འགྱུར་བ་དང༌།
གནས་པ་གང་ཡིན་པ་དེ་རྣམས་ལ་སྤྲོས་པ་ནི་ཁྱབ་པའོ། །དེ་ཉིད་ལས་ཀྱི་མཐའ་སྟེ་ལས་སུ་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །བཅོམ་ལྡན་འདས་ནི་དེ་བཞིན་གཤེགས་པ་རྣམ་པར་སྣང་མཛད་ཆེན་པོའོ། །འདིར་བཅོམ་ལྡན་འདས་རྣམ་པར་སྣང་མཛད་ཉིད་རྣམ་པར་སྣང་མཛད་ཆེན་པོ་ཡིན་གྱི་རྒྱུ་ལ་འབྲས་བུར་ཉེ་བར་བཏགས་ནས་རྡོ་རྗེ་འཛིན་པ་ཆེན་པོ་ལ་མི་བྱའོ། །དེ་ཅིའི་ཕྱིར་ཞེ་ན། རྡོ་རྗེ་འཆང་ཆེན་པོ་འདིའི་འོག་ནས་ལོགས་ཤིན་ཏུ་བསྟན་པས་སོ། །འདིས་ཀྱང་བཅོམ་ལྡན་འདས་ལས་ཀྱི་རིགས་ཀྱི་ངོ་བོ་ཉིད་དུ་བསྟན་ཏོ། །དེ་ལྟར་བཅོམ་ལྡན་འདས་ཀྱི་ཁྱད་པར་བསྟན་ནས། བདེ་བ་ཆེན་པོ་རྡོ་རྗེ་འཛིན་པའི་བཞུགས་གནས་ཀྱི་གཞལ་ཡས་ཁང་གི་ཁྱད་པར་བསྟན་པར་བྱ་བའི་ཕྱིར། ཟླ་བ་ཕྱེད་པ་དུ་མ་ལ་རབ་ཏུ་གནས་པ་ཞེས་བྱ་བ་ལ་སོགས་པ་གསུངས་ཏེ། ཟླ་བ་ཕྱེད་པ་དུ་མ་སྟེ་མང་པོར་རབ་ཏུ་གནས་པའི་གནས་གང་ཡིན་པ་དེ་ནི་ཟླ་བ་ཕྱེད་པ་དུ་མ་རབ་ཏུ་གནས་པ་ཞེས་བྱའོ། །རྡོ་རྗེ་རིན་པོ་ཆེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་རིན་པོ་ཆེ་ཆེན་པོ་སྟེ། རྡོ་རྗེ་རྩེ་ལྔ་པའི་རྩེ་མོ་ལ་ཡིད་བཞིན་གྱི་ནོར་བུ་རིན་པོ་ཆེ་ཡོད་པའོ། །ཟླ་བ་ཕྱེད་པ་རབ་ཏུ་གནས་པ་ཡང་ཡིན་ལ་རྡོ་རྗེ་རིན་པོ་ཆེ་ཡང་ཡིན་པས་ཟླ་བ་ཕྱེད་པ་དུ་མ་རབ་ཏུ་གནས་པའི་རྡོ་རྗེ་རིན་པོ་ཆེ་ཆེན་པོའོ། །དེ་རྣམས་ཀྱི་འོད་ཟེར་སྣ་ཚོགས་རྣམ་པར་འཕྲོ་ཞིང་འགྱེད་ལ་དེ་ཉིད་ན་འབར་བ་རྣམ་པར་འཕྲོ་བ་ཡིན་ཞིང་དེ་ཉིད་འོད་ཡིན་ནོ། །དེས་སྣང་ཞིང་གསལ་བར་བྱས་པ་དེ་ནི་འོད་གསལ་བར་བྱས་པའོ། །ཇི་སྐད་དུ་བཤད་པའི་འོད་ཀྱིས་གསལ་བར་བྱས་བ་དེར་རོ། །དེའི་འོད་ཀྱིས་གསལ་བར་བྱས་པ་འབའ་ཞིག་ཏུ་གྱུར་པར་མ་ཟད་ཀྱི་གསེར་གྱི་དྲིལ་བུ་བཏགས་པའི་བ་དན་སྣ་ཚོགས་རླུང་གིས་བསྐྱོད་པས་མཛེས་པར་བྱས་པ་ཡིན་ནོ། །གསེར་གྱི་དྲིལ་བུ་ནི་གསེར་གྱི་རྒྱུ་ལས་བྱས་པའི་དྲིལ་བུའོ། །བ་དན་སྣ་ཚོགས་ནི་ཁ་དོག་སྣ་ཚོགས་དང་ལྡན་པའི་དར་གྱི་བ་དན་ནོ། །རླུང་གིས་བསྐྱོད་པ་ནི་གཡོ་བར་བྱས་པའོ། །བཏགས་པ་ནི་སྤྲེལ་པའོ། །དེ་ལྟར་ན་དེ་དག་གིས་བརྒྱན་ཅིང་མཛེས་པར་བྱས་པས་བ་དན་གྱིས་མཛེས་པར་བྱས་པའོ།།
དེ་ལྟ་བུ་འབའ་ཞིག་ཏུ་མ་ཟད་ཀྱི་མེ་ཏོག་རྣམ་པ་སྣ་ཚོགས་པའི་ཆུན་འཕྱང་དང༌། གོས་དང༌། མེ་ལོང་རབ་ཏུ་འཕྱང་བའི་དྲ་བས་ཀྱང་རབ་ཏུ་བརྒྱན་པ་ཞེས་བྱ་བ་སྟེ། རིགས་སྣ་ཚོགས་ཤིང་ཐ་དད་པས་རྣམ་པ་དུ་མར་གྱུར་པའི་རྒྱུ་དེ་ཉིད་ཀྱིས་ན་མེ་ཏོག་སྣ་ཚོགས་པས་མཛེས་པར་བྱས་པའོ། །མེ་ཏོག་གི་ཆུན་འཕྱང་ནི་མེ་ཏོག་གི་ཕྲེང་བ་སྟེ། དེ་ལྟ་བུའི་ཕྲེང་བ་དང༌། གོས་དང་མེ་ལོང་རབ་ཏུ་འཕྱང་བའི་དྲ་བས་ཀྱང་རབ་ཏུ་བརྒྱན་ཅིང་མཛེས་པར་བྱས་པ་ཡིན་ནོ། །དེ་དེ་ལྟ་བུ་འབའ་ཞིག་ཏུ་མ་ཟད་ཀྱི་ཁ་ཁྱེར་སྣ་ཚོགས་པའི་ལེགས་པར་གནས་པའི་ལྷའི་བུ་མོ་དགོད་ཅིང་སྒེག་ལ་གླུ་དང་གར་བྱེད་པས་བསྔགས་ཤིང་བསྟོད་པའོ་ཞེས་བྱ་བ་སྟེ་སྣ་ཚོགས་ཤིང་ཁ་དོག་དུ་མ་དང་ལྡན་པའོ། །ཁ་ཁྱེར་གྱི་ནང་ན་གནས་པའི་ལྷའི་བུ་མོ་ཆེན་མོ་དེ་བཞིན་གཤེགས་པ་ཐམས་ཅད་ཀྱི་གཟུངས་ཀྱི་ངོ་བོ་ཉིད་དགོད་ཅིང་སྒེག་པས་རྩེ་བ་དང༌། གླུ་དང་གར་གྱིས་ཀྱང་ཀུན་ནས་བརྒྱན་ཅིང་མཛེས་པར་བྱས་པ་སྟེ། དེ་རྣམས་ཀྱི་གླུས་དཀྱིལ་འཁོར་གྱི་དེ་ཁོ་ན་ཉིད་སྟོན་ཅིང་རབ་ཏུ་བསྐུལ་བའོ། །དེ་རྣམས་ཀྱི་གླུ་ཉིད་ཀྱིས་བསྟོད་པ་ནི་དེ་ཁོ་ན་ཉིད་གསུམ་གྱི་གླུས་ཡང་དག་པར་ཡོན་ཏན་བརྗོད་པའོ། །དེ་ལྟ་བུའི་ཡོན་ཏན་གྱི་ཁྱད་པར་དང་ལྡན་པའི་བདེ་བ་ཆེན་པོ་རྡོ་རྗེ་སེམས་དཔའི་གཞལ་ཡས་ཁང་ན་བཞུགས་པའོ། །བདེ་བ་ཆེན་པོ་ནི་གཉིས་སུ་མེད་པའི་ཡེ་ཤེས་ཡིན་པར་བཤད་དོ། །དེ་ལས་བྱུང་བའི་རྡོ་རྗེ་སེམས་དཔའ་ནི་སྐུའི་གསང་བའི་ངོ་བོ་བདེ་བ་ཆེན་པོ་རྡོ་རྗེ་སེམས་དཔའོ། །དེའི་བཞུགས་གནས་ནི་ཕོ་བྲང་སྟེ། དེ་ཉིད་གཞལ་ཡས་ཁང་ཡིན་པས་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་ཀྱི་གཞལ་ཡས་ཁང་སྟེ། དེར་བཞུགས་པ་ནི་བཅོམ་ལྡན་འདས་རྣམ་པར་སྣང་མཛད་གནས་པར་མཛད་པའོ། །དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་ནས། དེའི་དོན་བསྒོམས་པས་བདེ་བ་ཆེན་པོ་རྡོ་རྗེ་སེམས་པའི་བཞུགས་གནས་ཀྱི་གཞལ་ཡས་ཁང་བསྐྱེད་ནས་ཇི་སྐད་དུ་བཤད་པའི་ཡོན་ཏན་གྱི་ཁྱད་པར་དང་ལྡ་པའི་བཅོམ་ལྡན་འདས་རྣམ་པར་སྣང་མཛད་ཇི་སྐད་དུ་བཤད་པའི་ཡོན་ཏན་གྱི་ཁྱད་པར་དང་ལྡན་པའི་གཞལ་ཡས་ཁང་ན་
བཞུགས་ནས། དེའི་རྗེས་ཐོགས་ཉིད་ལ་བཅོམ་ལྡན་འདས་རྡོ་རྗེ་སེམས་དཔའ་རང་གི་དཀྱིལ་འཁོར་བསྟན་པར་བྱ་བའི་ཕྱིར། དེ་བཞིན་གཤེགས་པ་ལ་རྗེས་སུ་གནང་བ་དང༌། དབང་བསྐུར་བ་གསོལ་བ་འདེབས་པ་ཡིན་པར་བསྟན་པའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲས་ནི་དེ་མ་ཐག་པའི་དོན་སྟོན་པའི་ཚིག་གོ །དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པས་ནི་རྡོ་རྗེ་སེམས་དཔའི་ཁྱད་པར་སྟོན་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ནི་བཤད་ཟིན་ཏོ། དེ་རྣམས་ཀྱིས་བྱིན་གྱིས་བརླས་པ་ནི་དེའི་འཕེན་ཤུགས་སོ། །དེས་ན་དམ་ཚིག་སེམས་དཔའ་ཐམས་ཅད་ནི་དེ་བཞིན་གཤེགས་པའི་རིགས་ཀྱི་ངོ་བོའི་སེམས་དཔའ་རྣམས་ཞེས་བྱ་བའི་ཐ་ཚིག་གོ །འདིས་ནི་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པའི་རིགས་ཀྱི་ངོ་བོ་ཉིད་ཡིན་པར་བཤད་དོ། །དབང་བསྐུར་བ་ཐམས་ཅད་ཅེས་བྱ་བ་ལ་དབང་བསྐུར་བ་ཡང་ཡིན་ལ་ཐམས་ཅད་ཀྱང་ཡིན་པས་ན་དབང་བསྐུར་བ་ཐམས་ཅད་དོ། །འདིས་ནི་རིན་པོ་ཆེའི་རིགས་ཀྱི་རང་བཞིན་ཡིན་པར་བཤད་དོ། །ཐམས་ཅད་མཁྱེན་པའི་ཏིང་ངེ་འཛིན་ཞེས་བྱ་བ་ལ་ཐམས་ཅད་ཀྱང་ཡིན་ལ་མཁྱེན་པ་ཡང་ཡིན་པས་ན་ཐམས་ཅད་མཁྱེན་པ་སྟེ། པདྨའི་རིགས་ཀྱི་ལྷ་རྣམས་ཀྱི་སངས་རྒྱས་ཐམས་ཅད་གཅིག་ཏུ་བསྡུས་པ་ལ་སོགས་པའི་རང་བཞིན་གྱིས་རྣམ་པར་དག་པའི་ཆོས་ཉིད་དུ་ངེས་པའོ། །དེ་རྣམས་ཀྱི་ཏིང་ངེ་འཛིན་ནི། ཐམས་ཅད་མཁྱེན་པའི་ཏིང་ངེ་འཛིན་ཏེ་འདི་ལ་སེམས་ཡང་དག་པར་གཏོད་ཅིང་གནས་པས་ན་ཏིང་ངེ་འཛིན་ཏོ། །འདིས་ཀྱང་བཅོམ་ལྡན་འདས་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་ཏིང་ངེ་འཛིན་གྱི་ཚུལ་གྱིས་པདྨའི་རིགས་ཀྱི་ངོ་བོ་ཉིད་ཡིན་པར་བཤད་དོ། །ལས་ཐམས་ཅད་ཀྱི་ཞེས་བྱ་བ་ལ་ལས་ཀྱང་ཡིན་ལ་ཐམས་ཅད་ཀྱང་ཡིན་པས་ལས་ཐམས་ཅད་དེ། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ལས་ཐམས་ཅད་དོ། །དེས་མཆོག་ཏུ་གྱུར་པ་ནི་ཕུལ་དུ་བྱུང་བའོ། །དེ་ཡང་འཁོར་གསུམ་ཡོངས་སུ་དག་པའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་ཚུལ་གྱིས་ལས་ཐམས་ཅད་ལ་འདྲ་
བའི་གཉིས་པ་མེད་པ་ཡིན་ལ་དེ་བས་ན་མཆོག་ཏུ་གྱུར་པ་སྟེ། བཅོམ་ལྡན་འདས་རྡོ་རྗེ་སེམས་དཔའ་མཆོག་ནི་ལས་ཀྱི་རིགས་ཀྱི་རང་བཞིན་ཅན་ཡིན་ནོ། །འདིས་ནི་བཅོམ་ལྡན་འདས་ལས་ཀྱི་རིགས་ཀྱི་ངོ་བོར་བཤད་དོ། །ཁམས་གསུམ་ཐམས་ཅད་ནི་ཕྱོགས་བཅུ་མཐའ་ཡས་པའི་འཇིག་རྟེན་གྱི་ཁམས་ཀྱི་སངས་རྒྱས་ཀྱི་ཞིང་ཉོན་མོངས་པ་ཅན་ནོ། །དེ་རྣམས་གདུལ་བ་ཞེས་བྱ་བ་ནི་འདུལ་བར་མཛད་པ་སྟེ། དེ་ལ་དབང་ཕྱུག་ཆེན་པོ་ལ་སོགས་པ་གདུག་ཅིང་གཏུམ་པ་འདུལ་བར་མཛད་པས་འདིར་བཅོམ་ལྡན་འདས་རྡོ་རྗེ་ཧཱུཾ་མཛད་ལ་བྱ་བར་འདོད་དོ། །ཁམས་གསུམ་པ་ཐམས་ཅད་ཀྱི་གདུལ་བྱའི་དབང་ཕྱུག་ཐམས་ཅད་ཅེས་བྱ་བ་ལ་དབང་ཕྱུག་ཀྱང་ཡིན་ལ་ཐམས་ཅད་ཀྱང་ཡིན་པས་ན་དབང་ཕྱུག་ཐམས་ཅད་དེ་བསྡུས་པའི་དཀྱིལ་འཁོར་གྱི་རང་བཞིན་ཡིན་པས་ཐམས་ཅད་དོ། །དེའི་བདག་པོ་ཡིན་པས་ན་དབང་ཕྱུག་གོ །རིགས་ཐམས་ཅད་སྐྱེས་པས་ན་བྱེད་པ་པོའོ། །ཁམས་གསུམ་ཐམས་ཅད་བསྐྱེད་བས་ན་འབྱིན་པ་པོའོ། །འདོད་པ་ཐམས་ཅད་ཅེས་བྱ་བ་ནི་རྡོ་རྗེ་སེམས་དཔའ་དང་རྡོ་རྗེ་ཡིད་ལས་བྱུང་བ་ལ་སོགས་པའི་སྐུའི་རང་བཞིན་ཡིན་པས་ན་འདོད་པ་ཐམས་ཅད་དེ་བཅོམ་ལྡན་འདས་རྡོ་རྗེ་སེམས་དཔའ་ནི་འདོད་པའོ་ཞེས་བཤད་པས་ན་འདོད་པའི་ཕྱིར་འདོད་པ་སྟེ། གདུལ་བྱ་རྣམས་མངོན་པར་དགའ་བས་ཞེས་བྱ་བའི་ཐ་ཚིག་གོ །འདོད་པ་ཡང་ཡིན་ལ་ཐམས་ཅད་ཀྱང་ཡིན་པས་ན་འདོད་པ་ཐམས་ཅད་དོ། །དངོས་གྲུབ་ཀྱི་ཆོ་ག་རྒྱས་པར་ཐམས་ཅད་ཅེས་བྱ་ལ། དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་ན། དངོས་གྲུབ་ཐམས་ཅད་དེ་རིགས་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །དེའི་ཆོ་ག་ནི་སྒྲུབ་པའི་ཐབས་སོ། །དེའི་རྒྱས་པ་ནི་རིགས་ཀྱི་དཀྱིལ་འཁོར་གྱི་དབྱེ་བས་ཕྱེ་བ་རྣམ་པ་སྣ་ཚོགས་ཀྱི་སྒྲུབ་པའི་རྒྱུན་ནོ། །རྟག་པ་ཞེས་བྱ་བ་ནི་ཐོག་མ་དང་ཐ་མ་མེད་པའོ། །དེ་བཞིན་གཤེགས་པ་ལ་གསོལ་བ་གདབ་བོ་ཞེས་བྱ་བ་ནི་བདག་ལ་རྗེས་སུ་གནང་བ་གསོལ་ཅིག་ཅེས་པའོ། །གསང་བའི་རྟོག་པ་རབ་བཤད་པ། །ཞེས་བྱ་བ་ནི། བཅོམ་ལྡན་
འདས་རྣམ་པར་སྣང་མཛད་ལ་གསོལ་བ་གདབ་པའོ། །རྡོ་རྗེ་སེམས་དཔའ་ཇི་སྐད་དུ་བཤད་པའི་ཇི་སྲིད་འཁོར་བའི་གནས་སུ་འཇུག་པ་ཞེས་བྱ་བ་ལ་འདིར་འཁོར་བས་ན་འཁོར་བ་སྟེ་སྣོད་ཀྱི་འཇིག་རྟེན་ནོ། །དེར་གནས་པ་ནི་བཞུགས་པ་སྟེ་མི་གནས་པའི་མྱ་ངན་ལས་འདས་པའི་ཚུལ་གྱིས་དེར་ཇི་སྲིད་གནས་ཤིང་འདུག་པ་དེ་སྲིད་ཀྱི་བར་དུའོ། །དེ་སྲིད་མཚུངས་མེད་སེམས་ཅན་དོན། །ཞེས་བྱ་བ་ནི། སེམས་ཅན་རྣམས་ཀྱིས་འདོད་ཅིང་དོན་དུ་གཉེར་བ་ཡིན་པས་ན་སེམས་ཅན་དོན་ཏེ་སངས་རྒྱས་ཉིད་དམ་བྱང་ཆུབ་སེམས་དཔའ་ཉིད་དོ། །དེ་ལྟ་བུའི་སེམས་ཅན་གྱི་དོན་མཆོག །དམ་པར་གྱུར་པ་བདག་བགྱིད་པར་རྗེས་སུ་གནང་བ་སྩོལ་ཅིག་པ་ནི། བདག་འཁོར་བ་ཇི་སྲིད་གནས་པའི་བར་དུ་སེམས་ཅན་གྱི་དོན་བགྱིད་པར་རྗེས་སུ་གནང་བ་སྩོལ་ཅིག་ཅེས་བྱ་བའི་ཐ་ཚིག་གོ །ཅིའི་ཕྱིར་ཞེ་ན། སེམས་ཅན་ཁམས་ནི་མཐའ་ཡས་པས། །ཞེས་བྱ་བ་གསུངས་པ་སྟེ། གང་གི་ཕྱིར་སེམས་ཅན་གྱི་ཁམས་ནི་མཐའ་ཡས་པ་ཡིན་པས་མཐའ་ཡས་པ་ཡིན་ལ་དེ་ཡང་དུས་རིང་མོ་ཞིག་ནས་སངས་རྒྱས་ཉིད་དམ་རྡོ་རྗེ་འཛིན་པ་ཉིད་ལ་འཇོག་པར་འདོད་ནུས་ཀྱི་ཐམས་ཅད་དུས་གཅིག་གི་ཚེ་སྐལ་བ་དང་ལྡན་པ་ཉིད་དུ་བྱ་བ་ནི་མི་སྲིད་དོ། །གཟི་ཅན་སྲིང་པ་ཚོལ་བྱེད་པ། །ཞེས་བྱ་བ་ལ་གཟི་ཅན་ནི་བྱང་ཆུབ་སེམས་དཔའ་ཆེན་པོའོ། །དེ་རྣམས་ཀྱིས་སྲིད་པ་འདོད་པ་ནི་འཁོར་བ་ཇི་སྲིད་པར་མི་གནས་པའི་མྱ་ངན་ལས་འདས་པ་སྐྱེ་བར་བཞེས་པ་སྟེ། དེ་རྣམས་ཀྱིས་སྲིད་པ་འདོད་པ་ནི་སྲིད་པའི་ཉེས་པ་གཞིག་པར་བྱ་བ་སྟེ། འདོད་ཆགས་ལ་སོགས་པ་ཉེས་པ་ཞི་བར་བྱ་བའི་ཕྱིར་རོ། །དེ་ཉིད་ཀྱིས་ན། སྲིད་པའི་ཉེས་པ་གཞིག་པ་ཡིས། །བདེ་བ་ཆེན་པོ་འཕེལ་བའི་ཕྱིར། །བྱང་ཆུབ་སེམས་དཔའ་དེ་དག་ཉིད་རྒྱུད་སྣ་ཚོགས་ཀྱིས་ཕྱེ་ཞིང་ཐ་དད་པའི་ཆོས་རྣམས་ཐུགས་སུ་ཆུད་པའི་ཐམས་ཅད་མཁྱེན་པའི་ཡེ་ཤེས་ཐུགས་སུ་ཆུད་པ་ནི་དེའི་དོན་དུ་བདག་ལ་རྗེས་སུ་གནང་བ་གསོལ་ཅིག་ཅེས་པའོ། །ཡུལ་གང་ལ་ཞེ་ན། གསང་བའི་རྟོག་པ་མཆོག་བཤད་པ། །ཞེས་སྨོས་ཏེ། གསང་བ་ཡང་ཡིན་ལ་རྟོག་པ་ཡང་ཡིན་པས་ན་གསང་བའི་རྟོག་པའོ། །རྟོག་པ་
ཡང་གཞན་ལས་ཁྱད་པར་དུ་འཕགས་པས་ན་མཆོག་སྟེ། བདེ་བ་ཆེན་པོ་རྡོ་རྗེ་སེམས་དཔའི་རྟོག་པ་བཤད་པར་བདག་ལ་གནང་བ་སྩོལ་ཅིག་པའོ། །དེ་ནས་ཞེས་བྱ་བ་ནི་རྗེས་སུ་གནང་བ་གསོལ་བ་གདབ་པའི་རྗེས་ཐོགས་ཉིད་ལའོ། །བཅོམ་ལྡན་འདས་དེ་བཞིན་གཤེགས་པ་ཞེས་བྱ་བ་ནི། དེ་བཞིན་གཤེགས་པ་རྣམ་པར་སྣང་མཛད་དོ། །ཇི་སྐད་དུ་བཤད་པ་བྱས་ནས་དང་པོའི་རྡོ་རྗེ་བདེ་བ་ཆེན་པོའི་རྡོ་རྗེ་སེམས་དཔའི་ཇི་སྐད་བཤད་པའི་དངོས་གྲུབ་ཀྱི་མཚན་མ་བདེ་བ་ཆེན་པོ་རྡོ་རྗེ་སེམས་དཔའ་ལག་པ་གཉིས་སུ་བྱིན་ནོ་ཞེས་བྱ་བར་སྦྱར་རོ། །ཆོས་ཐམས་ཅད་སྒྲིབ་པ་མེད་པ་ལ་དམིགས་ཏེ་ཞེས་བྱ་བ་ལ་ཐམས་ཅད་ཀྱང་ཡིན་ལ་ཆོས་ཀྱང་ཡིན་པས་ན་ཆོས་ཐམས་ཅད་དེ་རྡོ་རྗེ་སེམས་དཔའ་ལ་སོགས་པའོ། །དེ་རྣམས་ཀྱི་སྒྲིབ་པ་མེད་པ་ནི་དེ་བཞིན་ཉིད་དེ་ལ་དམིགས་པ་ནི་མངོན་སུམ་དུ་མཛད་པའོ། །ཅི་ཞིག་མཛད་ཅེ་ན་གདུལ་བྱ་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། འདིས་སེམས་ཅན་རྣམས་འདུལ་བས་ན་འདུལ་བ་སྟེ་ཆོས་ཀྱི་དབྱིངས་སོ། །ཐམས་ཅད་ཀྱི་འདུལ་བ་ནི་ཐམས་ཅད་འདུལ་བ་སྟེ། དེ་ཉིད་ནི་ཐུགས་རྗེ་ཆེན་པོ་ཡིན་ལ། དེ་ཡང་དམིགས་པ་མེད་པའི་ཐུགས་རྗེ་ཆེན་པོ་སྟེ། དེ་ལས་བྱུང་བའི་དང་པོའི་རྡོ་རྗེ་ཞེས་པ་སྣ་ཚོགས་རྡོ་རྗེ་བཅོམ་ལྡན་འདས་རྡོ་རྗེ་སེམས་དཔའ་རྡོ་རྗེ་རྩེ་ལྔ་པ་སྟེ། དེ་ལ་དམིགས་པའི་མིང་དེ་སྐད་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་པ་སྟེ། དང་པོའི་རྡོ་རྗེའི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །བདེ་བ་ཆེན་པོའི་རྡོ་རྗེ་དང་པོ་ཞེས་བྱ་བ་ནི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་ན་གནས་པ་གང་ཡིན་པ་དེ་རྡོ་རྗེ་སེམས་དཔའ་སྦྲུལ་པའི་དུས་སུ་དང་པོའི་རྡོ་རྗེ་ཆེན་པོ་དེ་ནི་དམིགས་པ་མེད་པ་ཐུགས་རྗེ་ཆེན་པོ་ལས་བྱུང་བའི་ཕྱིར་བདེ་བ་ཆེན་པོ་ཞེས་བྱའོ། །བདེ་བ་ཆེན་པོའི་རྡོ་རྗེ་དེ་རྒྱུ་ཅི་ཞིག་གི་ཕྱིར་སྩལ་ཞེ་ན། སེམས་ཅན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། མ་ལུས་ཤིང་ལུས་པ་མེད་པ་ཞེས་བྱ་བ་ནི་བཤད་ཟིན་ཏོ། །སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་བསམ་
བ་ཐམས་ཅད་ཡོངས་སུ་རྫོགས་པ་ནི་མངོན་པར་འདོད་པ་ཐམས་ཅད་བསྐངས་པའོ། །དེས་ཀྱང་སེམས་ཅན་ཐམས་ཅད་ཡོངས་སུ་བསྐྱབ་པ་ནི་འཇིགས་པ་ཐམས་ཅད་ཡོངས་སུ་བཟློག་པའོ། །ཕན་བ་དང་བདེ་བ་ནི་བཤད་ཟིན་ཏོ། །དངོས་གྲུབ་ཐམས་ཅད་ནི་ཕྱག་རྒྱ་ཆེན་པོ་ལ་སོགས་པ་རྫོགས་པའོ། །ཕུན་སུམ་ཚོགས་པ་ནི་རྡོ་རྗེ་འཛིན་པ་ཆེན་པོ་ལ་སོགས་པའི་འབྱོར་བའོ། །དེ་རྣམས་ཀྱི་ལས་ཞེས་པ་ནི་མཆོད་པའི་ལས་བཅུ་དྲུག་གི་ལས་སོ། །དངོས་གྲུབ་ཀྱི་མཆོག་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་རྫོགས་པའོ། །ཇི་སྐད་དུ་བཤད་པའི་སེམས་ཅན་གྱི་ཁམས་ཐམས་ཅད་ཀྱི་བསམ་བ་ཡོངས་སུ་རྫོགས་པར་མཛད་པའི་ཡོངས་སུ་སྐྱོབ་བ་དང༌། ཕན་བ་དང་བདེ་བ་དང་དངོས་གྲུབ་ཐམས་ཅད་དང༌། ཕུན་སུམ་ཚོགས་པ་དང་ཡེ་ཤེས་དང་ལས་དང་དངོས་གྲུབ་ཀྱི་མཆོག་ནི་སེམས་ཅན་གྱི་ཁམས་མ་ལུས་ཤིང་ལུས་པ་མེད་པའི་བསམ་པ་ཐམས་ཅད་ཡོངས་སུ་རྫོགས་པ་དང༌། སེམས་ཅན་ཐམས་ཅད་ཡོངས་སུ་སྐྱོབ་པར་བྱེད་པའི་ཕན་པ་དང་བདེ་བ་དང༌། དངོས་གྲུབ་ཐམས་ཅད་ཕུན་སུམ་ཚོགས་པའི་ཡེ་ཤེས་ཀྱི་ལས་ཀྱི་དངོས་གྲུབ་ཀྱི་མཆོག་རྣམས་ཞེས་བྱ་སྟེ། དེའི་དོན་དུ་ཞེས་བྱ་བ་ནི་དེ་བསྐྱེད་པར་བྱ་བའི་ཕྱིར་རོ། །བར་དུ་ཞེས་བྱ་བའི་སྒྲས་ནི་རྡོ་རྗེ་ཡིད་ལས་བྱུང་བ་ལ་སོགས་པ་བསྡུའོ། །དེ་བཞིན་གཤེགས་པ་ཐམས་ཅད་ཀྱི་དེ་ཁོ་ན་ཉིད་ནི་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ལྔའི་དེ་ཁོ་ན་ཉིད་དོ། །རྡོ་རྗེ་འཆང་ཆེན་པོའི་དེ་ཁོ་ན་ཉིད་ནི་ཤེས་པར་ཟད་དེ། དེ་བཞིན་གཤེགས་པ་ཐམས་ཅད་དང༌། རྡོ་རྗེ་འཆང་ཆེན་པོའི་དེ་ཁོ་ན་ཉིད་ཐོབ་པ་སྟེ་དེ་ཉིད་ནི་དངོས་གྲུབ་ཀྱི་དམ་པ་སྟེ། རྒྱུ་དེ་དག་གི་ཕྱིར། ཇི་སྐད་དུ་བཤད་པའི་རྡོ་རྗེ་དེ་ལག་པ་གཉིས་སུ་བྱིན་པའོ། །རྒྱུ་ཅི་ཞིག་གི་ཕྱིར་བྱིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཉིད་དུ་ཞེས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་དཀྱིལ་འཁོར་རོ། །དེ་བསྐོར་བའི་ངང་ཚུལ་འདི་ལ་ཡོད་པས་ན་དེའི་ངོ་བོ་ཉིད་དོ། །དེས་ན་དེ་བཞིན་གཤེགས་པ་ཐམས་ཅད་ཀྱི་འཁོར་ལོས་སྒྱུར་བ་ཉིད་དུ་ཞེས་བྱའོ། །དེ་བཞིན་
གཤེགས་པ་ཐམས་ཅད་ཀྱི་འཁོར་ལོ་བསྐོར་བ་ཉིད་ཀྱིས་དེར་ཅི་ཞིག་བྱེད་ཅེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང༌། དོན་ཡོད་པར་གྲུབ་པ་ནི་དེ་བཞིན་གཤེགས་པ་ཐམས་ཅད་དོ། །དེ་རྣམས་ཀྱི་སྐུ་ནི་ཕྱག་རྒྱ་ཆེན་པོའོ། །དེའི་ཕྲེང་བ་ནི་དེ་རྣམས་ཀྱིས་ཉེ་བར་མཚོན་པའི་ཅོད་པན་རྩེ་བྲན་ཅན་གང་ཡིན་པ་སྟེ། དེའི་དབང་བསྐུར་བས་དབང་བསྐུར་བ་ནི། ཅོད་པན་ཏེ་དེའི་མགོ་ལ་བཞག་ནས་རྡོ་རྗེ་དེ་དེའི་ལག་པ་གཉིས་སུ་བྱིན་པའོ། །དེ་ནས་རྡོ་རྗེ་དེ་བྱིན་པ་དང་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པས་མིང་གི་དབང་བསྐུར་བས་དབང་བསྐུར་བར་གྱུར་ཏོ། །གང་དུ་སོང་ཞེ་ན། འཇིག་རྟེན་གྱི་ཁམས་ཞེས་བྱ་བ་ལ་སོགས་པ་གསུངས་ཏེ། འཇིག་རྟེན་གྱི་ཁམས་ཀྱང་ཡིན་ལ་ཐམས་ཅད་ཀྱང་ཡིན་པས་ན། འཇིག་རྟེན་གྱི་ཁམས་ཐམས་ཅད་དེ་སངས་རྒྱས་དང་བཅས་པའི་སངས་རྒྱས་ཀྱི་ཞིང་རྣམས་སོ། །རྡུལ་ཕྲ་རབ་ཀྱང་ཡིན་ལ་ཐམས་ཅད་ཀྱང་ཡིན་པས་ན་རྡུལ་ཕྲ་རབ་ཐམས་ཅད་དེ་དེ་རྣམས་ཀྱི་ས་དང་ཆུ་དང་མེ་དང་རླུང་གི་ཁམས་ཉེ་བར་གཟུང་བའི་གཟུགས་ཀྱི་རྡུལ་ཏེ་དེ་ཉིད་ནི་ཕྲ་རབ་སྟེ། དེའི་ཚོགས་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་ཀྱི་དཀྱིལ་འཁོར་རོ། །དེ་རྣམས་སུ་གཏོགས་པ་ནི་ཆུད་པའོ། །དེ་དག་ཏུ་གཏོགས་པའི་དེ་བཞིན་གཤེགས་པ་ཐམས་ཅད་ཀྱིས་བཅོམ་ལྡན་འདས་རྡོ་རྗེ་འཆང་ཆེན་པོ་ཞེས་བྱ་བའི་མིང་གི་དབང་གི་དབང་བསྐུར་བས་དབང་བསྐུར་རོ། །དེ་ལ་ཆོས་ཀྱི་དབྱིངས་ཐོག་མ་དང་ཐ་མ་མེད་པ་ནི་རྡོ་རྗེ་ཆེན་པོ་སྟེ། དེ་ལས་བྱུང་བའི་དང་པོ་རྡོ་རྗེ་རྩེ་ལྔ་པ་ལ་ཡང་ཉེ་བར་བཏགས་པས་རྡོ་རྗེ་ཆེན་པོ་ཞེས་བྱའོ། །དེ་བས་ན་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རྡོ་རྗེ་དེ་བཞིན་ཉིད་དུ་རོ་གཅིག་པའི་ཡེ་ཤེས་འདི་ལག་པས་འཛིན་པར་བྱེད་པས་ན་རྡོ་རྗེ་འཆང་ཆེན་པོ་ནི་བཅོམ་ལྡན་འདས་ཕྱག་ན་རྡོ་རྗེའོ། །དེ་ལྟར་ན་བཅོམ་ལྡན་འདས་རྣམ་བར་སྣང་མཛད་ཅེས་བྱ་བ་ནས་བརྩམས་
ཏེ། རྡོ་རྗེ་མིང་གི་དབང་བསྐུར་བས་དབང་བསྐུར་རོ་ཞེས་བྱ་བའི་མཐར་ཐུག་པས་བསྟན་པའི་དོན་གཞན་ལ་དགོངས་པས་ནི། དང་པོ་སྦྱོར་བའི་ཏིང་ངེ་འཛིན་བཤད་པ་ཡིན་ནོ། །ད་ནི་དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་བཤད་ཟིན་ཏོ། །ཇི་སྐད་དུ་བཤད་པའི་སེམས་ཅན་གྱི་ཁམས་ཀྱི་བདེ་བ་ཆེན་པོ་དམ་པ་འགྲུབ་པ་ནི་རྡོ་རྗེ་འཆང་ཆེན་པོ་ཉིད་གྲུབ་པའོ། །མིང་ཐོག་མར་བྱས་ཏེ་དངོས་གྲུབ་ཐམས་ཅད་ཅེས་བྱ་བ་ལ། རྡོ་རྗེ་ཡིད་ལས་བྱུང་བ་ལ་སོགས་པའི་ངོ་བོ་ཐོབ་པར་བྱ་པའི་ཕྱིར་སེམས་དཔའི་སྐྱིལ་མོ་ཀྲུང་དུ་འདུག་ཅིང་བཅས་ཏེ་ལུས་དྲང་པོར་བཞག་ནས་ཞེས་བྱ་བ་གང༌། བཅོམ་ལྡན་འདས་རྣམ་པར་སྣང་མཛད་ཀྱིས་བྱིན་མ་ཐག་པའི་རྡོ་རྗེ་གཡོན་དཀུར་བརྟེན་ནས། རང་གི་ཐུགས་ཀར་འཇོག་པའི་ཚུལ་གྱིས་བསྣམས་ཤིང་ཞེས་བྱ་བ་ནི་བཤད་ཟིན་ཏོ། །བདེ་བ་ཆེན་པོའི་རྡོ་རྗེ་ཞེས་བྱ་བ་ནི་བདེ་བ་ཆེན་པོ་ནི་བཤད་ཟིན་ཏོ། །དེའི་རྡོ་རྗེ་ནི་དེ་ལས་བྱུང་བའི་སྙིང་པོ་ཡི་གེ་བཅུ་བདུན་གྱི་བདག་ཉིད་ཅན་གྱི་རང་བཞིན་གང་ཡིན་པ་ལ་མིང་དེ་སྐད་ཅེས་བྱ་སྟེ་གསུངས་སོ་ཞེས་བྱ་བར་སྦྱོར་རོ། །འདི་ཞེས་བྱ་བ་ནི་བཤད་མ་ཐག་པའོ། །ཁྱད་པར་ཇི་ལྟ་བུ་ཞིག་ཡིན་ཞེ་ན་ཞེས་བྱ་བ་སྨོས་ཏེ། རང་ཉིད་ཀྱི་ཕྱག་རྒྱ་ཐམས་ཅད་ནི་རང་གི་ཕྱག་རྒྱ་ཐམས་ཅད་དེ་བཅོམ་ལྡན་འདས་བདེ་བ་ཆེན་པོ་རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེའི་ཕྱག་རྒྱའོ། །དེ་རྣམས་ལས་བཅོམ་ལྡན་འདས་བདེ་བ་ཆེན་པོ་རྡོ་རྗེ་སེམས་དཔའི་སྙིང་པོ་དེ་ཕྱུང་བའོ། །ཨོཾ་ཞེས་བྱ་བ་ལ་སོགས་པ་ནི་ཡི་གེ་བཅུ་བདུན་གྱི་སྙིང་པོའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པ་ཞེས་བྱ་བ་ནི་ལག་པ་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིངས་པའོ། །དེ་གང་གིས་བསྐྱེད་ཅིང་འབྱིན་པར་བྱེད་པའི་སྙིང་པོ་དེ་ནི་རང་གི་བདག་ཉིད་ཐམས་ཅད་ཀྱི་ཕྱག་རྒྱའོ། །དེ་གང་ལས་བྱུང་ཞེ་ན། རང་གི་སྐུ་དང་གསུང་དང༌།
ཐུགས་རྡོ་རྗེ་ལས་ཞེས་བྱ་བ་གསུངས་ཏེ། སྐུ་དང་གསུང་དང་ཐུགས་རྡོ་རྗེ་ནི་བཤད་ཟིན་ཏོ། །སླར་ཡང་བྱང་ཆུབ་ཆེན་པོར་མངོན་པར་འཚང་རྒྱའོ་ཞེས་བྱ་བ་ནི་དེ་བཞིན་གཤེགས་པ་ཞི་བའི་ཉམས་མི་སྣང་བ་མཛད་ནས། རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་གྱིས་སྒེག་པའི་ཉམས་ཀྱི་ཆ་ལུགས་སུ་བཞུགས་པར་མཛད་པའོ། །བཞད་པ་ཆེན་པོ་སེམས་དཔའ་ཆེ། །ཞེས་བྱ་བ་ནི་ཐམས་ཅད་དུ་ཁྱབ་པའི་འཛུམ་པ་ནི་བཞད་པ་ཆེན་པོ་སྟེ། དེ་མཛད་པས་ན་བཞད་པ་ཆེན་པོའོ། །སེམས་དཔའ་ཆེ་ནི་རྡོ་རྗེ་སེམས་དཔས་འདུལ་བའི་སེམས་ཅན་གྱི་དོན་རྫོགས་པར་གཟིགས་ནས་དེ་བཞིན་གཤེགས་པ་རྣམས་ཐུགས་དགྱེས་པས་འཛུམ་པ་མཛད་དོ་ཞེས་བྱ་བའི་ཐ་ཚིག་གོ །འཇིག་རྟེན་གྱི་ཁམས་ཐམས་ཅད་གཡོས་ཏེ་ཞེས་བྱ་བ་ནི་འཇིག་རྟེན་གྱི་ཁམས་མི་མཇེད་དང་འདྲ་བའི་སངས་རྒྱས་ཀྱི་ཞིང་ཉོན་མོངས་པ་དང་བཅས་པ་དེ་དག་ནི་འཇིག་རྟེན་གྱི་ཁམས་ཐམས་ཅད་དོ། །དེ་རྣམས་སྙིང་པོ་འདིའི་མཐུས་གཡོས་པའོ། །དེ་ཉིད་ཤིན་ཏུ་གཡོས་པ་ནི། །རྣམ་པ་དྲུག་ཏུ་གཡོས་པ་སྟེ། །རྣམ་པ་དྲུག་ཏུ་འགུལ་བའོ། །དེ་ཉིད་རྡོ་རྗེ་སེམས་དཔའ་ཞེས་བྱ་བ་ནི་དེར་གཏོགས་པའི་སེམས་ཅན་གྱི་ཁམས་རྣམ་པར་སྦྱངས་པས་རྣམ་པར་དག་པའོ། །ཁམས་གསུམ་པ་མ་ལུས་པ་རྒྱས་པར་ཞེས་བྱ་བ་ནི་ཁམས་གསུམ་པ་ཉིད་ནི། ཁམས་གསུམ་པ་ཉིད་དེ། དེ་རྒྱས་པར་ནི་རབ་འབྱམ་མོ། །དེའི་སྤྲོས་པ་ནི་ཁྱབ་པ་སྟེ། གང་གིས་བཅོམ་ལྡན་འདས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་དེ་དེ་ལྟ་བུའི་ཚད་དུ་གྱུར་ཅིང་བྱུང་བའོ། །དེ་ལྟ་བུའི་ཚད་དུ་གྱུར་པ་དེས་ཇི་སྐད་དུ་བཤད་པའི་འཇིག་རྟེན་གྱི་ཁམས་གནས་པའི་སེམས་ཅན་ཐམས་ཅད་བདེ་བ་དང་ཡིད་བདེ་བ་ཐམས་ཅད་ཀྱི་ཡེ་ཤེས་སྐྱེས་པའོ་ཞེས་བྱ་བ་སྟེ། བདེ་བ་ཐམས་ཅད་ནི་འཇིག་རྟེན་དང༌། འཇིག་རྟེན་ལས་འདས་པ་སྟེ། རྡོ་རྗེ་སེམས་དཔའ་ལ་སོགས་པ་ལས་བྱུང་བའོ། །ཡིད་བདེ་བ་ནི་དགའ་བ་སྟེ་དེ་ཡང་དེ་བཞིན་དུ་ཤེས་པར་བྱའོ། །དེས་ན་དོན་འདི་སྐད་སྟོན་ཏོ། །བདེ་བ་དང་ཡིད་བདེ་བ་ཐམས་ཅད་ཐོབ་པར་གྱུར་ཏོ་ཞེས་བྱ་བ་ཡིན་ནོ། །དེ་ནས་ཞེས་བྱ་བ་ལ་སོགས་
པ་ལ། དེ་ནས་ཞེས་བྱ་བ་ནི་འདས་མ་ཐག་པའོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་དེ་བཞིན་གཤེགས་པ་ཐམས་ཅད་རྡོ་རྗེ་སེམས་དཔའ་ལ་སོགས་པའི་གཉིས་སུ་མེད་པའི་སེམས་དང་སེམས་ལས་བྱུང་བའོ། །དེ་རྣམས་ཀྱི་དོན་ཡོད་བ་ནི་འབྲས་བུ་ཡོད་པ་སྟེ། འདོད་པའི་དོན་རྫོགས་པར་བྱེད་པའོ། །ཐོགས་པ་མེད་པ་ནི་དེ་དོན་ཡོད་པ་ཉིད་ཡིན་པའི་ཕྱིར་རོ། །མངོན་པར་འཕགས་པ་ནི་ནམ་མཁའི་དབྱིངས་ཐམས་ཅད་དུ་རྟག་པར་གནས་པའི་སྐུ་དང་གསུང་དང་ཐུགས་རྡོ་རྗེ་ཉིད་དུ་ཕྱུང་བའོ། །དེ་གང་ཞེ་ན་བཅོམ་ལྡན་འདས་རྡོ་རྗེ་སེམས་དཔའི་ཐུགས་ཀར་གནས་པའི་སེམས་དཔའི་རྡོ་རྗེའོ། །དེ་ལྟ་བུའི་ཕྱག་རྒྱའི་ངོ་བོ་ལ་དམིགས་པས་མིང་དེ་སྐད་ཅེས་བྱ་བའི་ཏིང་ངེ་འཛིན་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་དོན་ཡོད་པའི་ཐོགས་པ་མེད་པ་མངོན་པར་འཕགས་པའི་རྡོ་རྗེ་ཆེན་པོའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་པའོ། །བཅོམ་ལྡན་འདས་སྙོམས་པར་ཞུགས་ནས་ཡང་ཅི་ཞིག་མཛད་ཅེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། བདེ་བ་ཆེན་པོ་ནི་བཤད་ཟིན་ཏོ། །དེ་ལས་བྱུང་བ་ནི་སེམས་དཔའི་རྡོ་རྗེ་ནི་སེམས་དཔའ་ཆེན་པོའི་རྡོ་རྗེའོ།། དེའི་དམ་ཚིག་ནི་རྡོ་རྗེ་ཡིད་ལས་བྱུང་བ་ལ་སོགས་པའི་ཕྱག་རྒྱ་ཆེན་པོ་སྟེ། དེ་རྣམས་དེ་ལས་བྱུང་བ་ཡིན་པའི་ཕྱིར་རོ། །དེས་རྣམ་པར་གནོན་པ་ནི་མིང་དེ་སྐད་ཅེས་བྱ་བ་སྟེ། རྡོ་རྗེ་ཡིད་ལས་བྱུང་བ་ལ་སོགས་པའི་གཟུགས་ཀྱིས་འདུལ་བའི་སེམས་ཅན་གྱི་ཁམས་རྣམས་ལ། རྡོ་རྗེ་ཡིད་ལས་བྱུང་བ་ལ་སོགས་པའི་མཐུས་དེ་རྟོགས་པ་རྫོགས་པར་བྱེད་པས་རྣམ་པར་གནོན་པ་དེ་མཛད་ནས། བཅོམ་ལྡན་འདས་བདེ་བ་དང་ཡིད་བདེ་བ་ཐམས་ཅད་འཁྲུངས་པར་གྱུར་ཏོ་ཞེས་བྱ་བར་སྦྱར་རོ། །སྐུ་ཐམས་ཅད་ཅེས་བྱ་བ་ལ་སོགས་པ་ལ་ཇི་སྐད་བཤད་པའི་ཚུལ་གྱིས་བཅོམ་ལྡན་འདས་རྡོ་རྗེ་འཆང་ཆེན་པོ་བདེ་བ་དང་ཡིད་བདེ་བ་ཐམས་ཅད་འཁྲུངས་ནས། རྡོ་རྗེ་ཡིད་ལས་བྱུང་བ་ལ་སོགས་པས་སྐུ་ཐམས་ཅད་ནས་ཕྱུང་སྟེ། ལོགས་ཐམས་ཅད་དུ་གནས་པར་གྱུར་པའོ། །ཁྱད་པར་ཇི་ལྟ་བུ་ཞེ་ན། དངོས་གྲུབ་ཐམས་ཅད་ཅེས་བྱ་བ་ལ་སོགས་པ་སྨོས་
ཏེ། དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་ན་དངོས་གྲུབ་ཐམས་ཅད་དེ་རྡོ་རྗེ་ཡིད་ལས་བྱུང་བ་ལ་སོགས་པའི་ཕྱག་རྒྱའི་དངོས་གྲུབ་རྣམས་སོ། །དེ་རྣམས་ཉིད་ཀྱི་བདེ་བ་དང་ཡིད་བདེ་བ་དང་དངོས་གྲུབ་ཐམས་ཅད་ཀྱི་བདེ་བ་དང༌། ཡིད་བདེ་བ་ནི་དོན་གྱིས་དངོས་གྲུབ་ཀྱི་བདེ་བ་དང་ཡིད་བདེ་བའོ། །དེ་རྣམས་སྩོལ་བ་ནི་སྐྱེད་པར་མཛད་པའོ། །རྟག་ཏུ་འབྲེལ་པ་ཞེས་བྱ་བ་ནི་བཅོམ་ལྡན་འདས་རྡོ་རྗེ་འཆང་བ་ཆེན་པོ་སྐད་ཅིག་མ་རེ་རེ་ཞིང་རྗེས་སུ་འབྲེལ་པ་ཉིད་ཡིན་པས་ན་རྟག་ཏུ་རྗེས་སུ་འབྲེལ་པའོ། །དོན་འདི་ཉིད་བསྟན་པའི་སྤྱོད་པ་མཛེས་པ་ཞེས་བྱ་བ་ཡིན་ནོ། །བདེ་བ་ཆེན་པོའི་རྡོ་རྗེ་ནི་བཤད་ཟིན་ཏོ། །དེའི་དམ་ཚིག་སེམས་དཔའ་ནི་ཀུན་རྫོབ་ཀྱི་སེམས་དཔའི་རང་བཞིན་གྱི་སེམས་དཔའ་ནི་དམ་ཚིག་སེམས་དཔའོ། །ཇི་སྐད་དུ་བཤད་པ་རྣམས་བཅོམ་ལྡན་འདས་ཀྱི་སྐུ་ལས་ཕྱུང་སྟེ། བཅོམ་ལྡན་འདས་ཀྱི་ཕྱོགས་དང་མཚམས་ཀྱི་ངོས་ཐམས་ཅད་དུ་གནས་པ་ལས་མདུན་དུ་ནི་རྡོ་རྗེ་གསང་བའི་ཡིད་ལས་བྱུང་བའི་ཞེས་བྱ་བ་ནི་རྡོ་རྗེ་ཡིད་ལས་བྱུང་བ་ཉིད་རྡོ་རྗེ་ཡིད་ལས་བྱུང་བའི་གསང་བ་ཡིན་ནོ། །གཡས་སུ་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་ན་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། བྲན་རྣམས་ཞེས་བྱ་བའི་བར་དུ་བསྟན་པས་ནི་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པས་བཟླས་པ་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་སོ། །སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་བསྟན་པའི་ཕྱིར་དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་ནི་རྣམ་པར་སྣང་མཛད་དོ། །བྱང་ཆུབ་རྡོ་རྗེ་ཞེས་བྱ་བའི་ཏིང་ངེ་འཛིན་ནི་རྡོ་རྗེ་སེམས་དཔའ་ལ་དམིགས་པའི་སེམས་རྩེ་གཅིག་པ་ཉིད་དོ། །སེམས་ཅན་ཐམས་ཅད་ཀྱི་ཞེས་བྱ་བ་ལ་སོགས་པ་
ལ་སེམས་ཅན་ཐམས་ཅད་ཀྱི་བདེ་བའི་དོན་དུ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་རྫོགས་པར་བྱ་བའི་ཕྱིར་རོ། །ཡང་དག་བར་བསྐྱེད་དེ་ཞེས་བྱ་བ་ནི་ཡང་དག་པར་བྱུང་བའོ། །རྒྱལ་བ་ཆེན་པོ་ཞེས་བྱ་བ་ནི། རྒྱལ་བ་ཡང་ཡིན་ལ་ཆེན་པོ་ཡང་ཡིན་པས་ན་རྒྱལ་བ་ཆེན་པོ་སྟེ། བག་ཆགས་དང་བཅས་པའི་ཉོན་མོངས་པ་དང་བྲལ་བ་ཞེས་བྱ་བའི་ཐ་ཚིག་གོ །འདི་གང་ལས་ཤེས་ཤེ་ན། གང་གི་ཕྱིར་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་བག་ཆགས་དང་བཅས་པའི་ཉོན་མོངས་པ་སྤངས་ཤིང་འདོད་ཆགས་དང་བྲལ་དུ་ཟིན་ཀྱང་འདོད་ཆགས་དང་ལྡན་པ་རྣམས་རྗེས་སུ་གཟུང་ཞིང་བླ་ན་མེད་པའི་བྱང་ཆུབ་ཐོབ་པར་བྱ་བའི་ཕྱིར། རང་གི་བཙུན་མོ་སྤྲུལ་པའི་སྐུས་རང་གི་བཙུན་མོ་ཡང་སྩོལ་བར་མཛད་ན་ཕྱིའི་དངོས་པོ་རྣམས་ལྟ་སྨོས་ཀྱང་ཅི་དགོས། གང་གི་ཕྱིར་དེ་ལྟར་སེམས་ཅན་ཐམས་ཅད་ལ་ཕན་པར་བྱ་བའི་ཕྱིར། རྒྱལ་པོ་ཆེན་པོར་འཁྲུངས་པ་དེ་བས་ན་རང་ཉིད་འདུལ་བ་མཆོག་ཅེས་བྱ་བ་སྨོས་ཏེ། འདིས་སེམས་ཅན་འདུལ་བས་ན་འདུལ་བ་སྟེ། རྡོ་རྗེ་སེམས་དཔའ་ལ་སོགས་པ་གྲུབ་ཅིང་བྱང་ཆུབ་ཆེན་པོར་འཇོག་ཅེས་བྱ་བའི་ཐ་ཚིག་གོ །དེ་ཉིད་ནི་མཆོག་སྟེ་གསང་བའི་རྟོག་པ་དམ་པའོ། །བདེ་བ་ཆེན་པོ་རྡོ་རྗེ་ཆེ། །ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་སྟེ། དེ་ཉིད་ནི་བརྟགས་པ་ལས་བྱུང་བའི་ཕྱིར་དང༌། བརྟགས་པའི་རང་བཞིན་ཡིན་པའི་ཕྱིར་གསང་བའི་རྟོག་པའོ། །དངོས་གྲུབ་རབ་སྩོལ་གསུངས་ཞེས་བྱ་བ་ནི་གང་གི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བོ། །སྩོལ་ཞེས་བྱ་བ་ནི་དངོས་གྲུབ་དེ་སྟེར་བས་ན་དངོས་གྲུབ་རབ་སྩོལ་ཞེས་བྱའོ། །གསུངས་ཞེས་བྱ་བ་ནི་ཇི་སྐད་དུ་གསུངས་པའི་དོན་གྲུབ་པའི་ཕྱིར་ཞེས་གསོལ་བ་འདེབས་པ་ཡིན་ནོ།། བཅོམ་ལྡན་འདས་རྣམ་པར་སྣང་མཛད་ནི་རྡོ་རྗེ་འཆང་ཆེན་པོའོ། །དེ་ནས་ཞེས་བྱ་བ་ནི་བར་མ་ཆད་པ་སྟེ་གསོལ་བ་བཏབ་པའི་རྗེས་ཐོགས་ཉིད་ལའོ། །བཅོམ་ལྡན་འདས་ཞེས་བྱ་བ་ནི་རྡོ་རྗེ་འཆང་ཆེན་པོ་སྟེ། དཀྱིལ་འཁོར་ཆེན་པོ་བཀའ་སྩལ་ཏོ། །ཞེས་བྱ་བར་སྦྱར་
རོ། །ཁྱད་པར་ཇི་ལྟ་བུ་ཞེ་ན། དོན་ཡོད་ཅིང་ཐོགས་པ་མེད་པར་བསྟན་པ་ཞེས་བྱ་བ་གསུངས་ཏེ། བསྟན་པ་སྟེ་བཀའ་དོན་ཡོད་ཅིང་འབྲས་བུ་དང་བཅས་ལ་ཐོགས་པ་མེད་པ་འདི་ལ་མངའ་བས་ན་བསྟན་པ་དོན་ཡོད་ཅིང་ཐོགས་པ་མེད་པ་ཞེས་བྱའོ། །ཅི་ཞིག་མཛད་ནས་ཤེ་ན་བདེ་བ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། བདེ་བ་ཡང་ཡིན་ལ་ཐམས་ཅད་ཀྱང་ཡིན་པས་བདེ་བ་ཐམས་ཅད་དེ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཅེས་བྱ་བའི་ཐ་ཚིག་གོ །དེ་ཉིད་ནི་འདུལ་བ་སྟེ། གང་གི་ཕྱིར་འདིས་འདུལ་ཞིང་རྡོ་རྗེ་སེམས་དཔའ་ལ་སོགས་པའི་བདེ་བ་ཐམས་ཅད་གྲུབ་པ་ཐོབ་པར་བྱེད་པས་ན་དེ་སྐད་ཅེས་བྱའོ། །རྡོ་རྗེ་འདོད་པ་ནི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱའི་ངོ་བོ་ཉིད་དོ། །དེའི་མཆོག་ནི་ཆོས་ཀྱི་དབྱིངས་ཏེ། དེ་ལས་བྱུང་བ་ནི་རྡོ་རྗེ་ལས་མཆོག་འདུལ་བར་རྣམ་པར་གནོན་པ་ཞེས་བྱ་སྟེ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ངོ་བོ་ཉིད་ཀྱིས་སེམས་ཅན་གྱི་དོན་བྱ་བ་སྟེ་དེ་མཛད་པའོ། །འདི་ཞེས་བྱ་བ་ནི་འོག་ནས་བཤད་པའི་ཤུགས་ལ་གནས་པའོ། །རྡོ་རྗེ་ཆེན་པོ་གསང་བའི་དམ་ཚིག་ཅེས་བྱ་བ་ནི་རྡོ་རྗེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་ཆེན་པོ་སྟེ། བྱང་ཆུབ་ཀྱི་མཚན་ཉིད་ཅན་གྱི་སེམས་སོ། །དེའི་གསང་བའི་རྡོ་རྗེ་སེམས་དཔའི་དཀྱིལ་འཁོར་སྐུ་ཐམས་ཅད་དེ་དེ་ལས་བྱུང་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའོ། །དམ་ཚིག་དེ་སྐད་ཅེས་བྱ་བའི་དཀྱིལ་འཁོར་ཆེན་པོ་བཀའ་སྩལ་པ་ནི་གསུངས་པའོ། །དེ་ནས་ཞེས་བྱ་བ་ནི་སྔ་མ་བཞིན་ཏེ་ཏིང་ངེ་འཛིན་གསུམ་གྱི་རྗེས་ཐོགས་ལ་ཞེས་བྱ་བའི་ཐ་ཚིག་གོ །གང་ཕྱིར་ཞེས་བྱ་བའི་རྒྱུ་སྟེ་གང་གི་ཕྱིར་དཀྱིལ་འཁོར་དུ་འཇུག་པ་མེད་པར་སེམས་ཅན་རྣམས་སྣོད་དང་ལྡན་པར་མི་འགྱུར་ཞིང༌། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ལ་སོགས་པ་མི་འགྲུབ་པ་དེ་བས་ན་ཡང་དག་པར་བཤད་པར་བྱ་ཞེས་བྱ་བ་སྟེ། ཡང་དག་པར་རབ་ཏུ་ཕྱེ་སྟེ་བཤད་པ་ཞེས་བྱའོ། །དེ་ཅི་ཞིག་ཅེ་ན། དཀྱིལ་འཁོར་ཆེན་པོ་ཞེས་བྱ་བ་གསུངས་ཏེ། རྡོ་རྗེ་སེམས་དཔའི་དཀྱིལ་འཁོར་
ཆེན་པོའོ། །དམ་པ་ནི་མཆོག་གོ །མིང་ཇི་སྐད་ཅེས་བྱ་ཞེ་ན་བདེ་བ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། བདེ་བ་ཆེན་པོ་ནི་བཤད་ཟིན་ཏོ། །དེའི་རྡོ་རྗེ་མཆོག་ནི་རྡོ་རྗེ་སེམས་དཔའི་སྐུ་ཐམས་ཅད་དོ། །དེ་ལས་བྱུང་བ་ནི་དམ་ཚིག་མཆོག་སྟེ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའོ། །ཇི་ལྟར་བྲི་ཞེ་ན་ལེགས་སྦྱངས་ཞེས་བྱ་བ་ལ་སོགས་པ་སྨོས་ཏེ་ས་སྦྱངས་པ་དང་ཡོངས་སུ་གཟུང་བའི་ཆོ་ག་དག་གིས་དཀྱིལ་འཁོར་གྱི་གནས་ལེགས་པར་སྦྱངས་ལ། དཀྱིལ་འཁོར་གྱིས་དེའི་དབུས་སུ་དཀྱིལ་འཁོར་ཇི་ལྟ་བ་བཞིན་དུ་བསྒྲུབ་པར་བྱའོ། །དེ་ཡང་སྔོན་དུ་བསྙེན་པའི་ཆོ་ག་ཇི་ལྟ་བ་བཞིན་དུ་བྱས་ལ། དཀྱིལ་འཁོར་གྱི་སའི་དབུས་སུ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོར་མཉམ་པར་བཞག་ལ་དཀྱིལ་འཁོར་ཆེན་པོ་འདི་བསྒྲུབ་པར་བྱའོ། །སར་བ་ཞེས་བྱ་བ་ནི་དཀྱིལ་འཁོར་གཞན་དུ་མ་སྤྱད་པའམ། གཞན་དུ་སྤྱད་མ་མྱོང་བའོ། །ལེགས་པར་བསྒྲིལ་བ་ཞེས་བྱ་བ་ནི་དྲི་ཞིམ་པོས་བསྒོས་པའི་གསེར་གྱི་སྣོད་ལ་སོགས་པར་གཞག་པས་སོ། །མདུད་པ་རྣམས་ནི་མེད་འགྱུར་པ། །ཞེས་བྱ་བ་ནི་གོ་སླའོ། །སྲད་བུ་ཁ་བསྒྱུར་བས་ཞེས་བྱ་བ་ནི་རྒྱ་སྐྱེགས་དང་ལྗང་བ་དང༌། སྔོ་བ་དང༌། སེར་པོ་དང༌། དཀར་པོའི་ཁ་དོག་ཚོན་སྣ་ལྔས་ཁ་བསྒྱུར་བའི་སྲད་བུ་ཁ་དོག་ལྔ་དང་ལྡན་པ་ནི་ཐིག་སྐུད་ཁ་བསྒྱུར་བའོ། །དེ་ལྟ་བུའི་ཚོན་སྐུད་གྱིས་ལེགས་པར་ཐིག་གདབ་པ་ནི་དམར་པོ་དང༌། ལྗང་གུ་དང༌། སྔོན་པོ་དང༌། སེར་པོ་དང༌། དཀར་པོས་ཁ་བསྒྱུར་བའི་སྲིད་བུས་དེ་ལེགས་པར་ཐིག་བཏབ་ལ། དཀྱིལ་འཁོར་ལེགས་པར་བྲི་བར་བྱའོ། །ཟུར་བཞི་ཞེས་བྱ་བ་ལ་སོགས་པ་ནི་གོ་སླའོ། །ཁ་ཁྱེར་གྱིས་ནི་རབ་བསྐོར་བ། །ཞེས་བྱ་བ་ནི་གཞལ་ཡས་ཁང་གི་ཕྱི་རོལ་ཀུན་ནས་བསྐོར་ཕྱོགས་སུ་ཁ་ཁྱེར་གྱིས་བསྐོར་བ་སྟེ། དེས་ལེགས་པར་བསྐོར་ཅིང་ཡོངས་སུ་འཁོར་བའོ། །ལྷ་མོ་རྣམས་ཀྱིས་ཉེ་བར་བསྐུལ། །ཞེས་བྱ་བ་ནི་ཁྱམས་ཀྱི་གྲྭ་མཚམས་རྣམས་སུ་དེ་བཞིན་གཤེགས་པ་ཐམས་ཅད་ཀྱི་གཟུངས་ཀྱི་རང་བཞིན་ཅན་གྱི་ལྷ་མོ་རྣམས་ཀྱིས་རབ་ཏུ་སད་ཅིང་ཉེ་བར་བསྐུལ་བར་བྱས་པའོ། །དོན་
འདི་ཉིད་ནི་དཀྱིལ་འཁོར་ཞེས་བྱ་བ་ལ་སོགས་པས་སྟོན་པ་ཡིན་ཏེ། ཡང་ཞེས་བྱ་བ་ནི་བསྡུ་བ་དང་རིམ་པ་ཐ་དད་དུ་དབྱེ་བའོ། །དཀྱིལ་འཁོར་གྱི་ནི་གྲྭ་དང་ནི། །སྒོ་ཁྱུད་ཀྱི་ནི་མཚམས་རྣམས་སུ། །ཞེས་བྱ་བ་ལ། དེ་ལ་དཀྱིལ་འཁོར་གྱི་མཚམས་ནི་རི་མོ་གཉིས་ཕྲད་བའོ། །སྒོ་རྣམས་ཀྱི་སྒོ་ཁྱུད་ནི་སྒོ་ཁྱུད་རྣམས་ཏེ་རི་མོ་དོད་པའོ། །དེ་རྣམས་ཀྱི་མཚམས་ནི་རི་མོ་གཉིས་སུ་འདུས་པའོ། །དེ་ལྟ་བུའི་དཀྱིལ་འཁོར་གྱི་གྲྭ་དང༌། སྒོ་རྣམས་ཀྱི་མཚམས་སོ། །དེ་རྣམས་སུ་ཟླ་བ་ཕྱེད་པ་ལ་གནས་པའི་རིན་པོ་ཆེ་དེ་གང་ཡིན་པ་དེ་ནི་ཟླ་བ་ཕྱེད་པ་ལ་གནས་པའི་རྡོ་རྗེ་རིན་པོ་ཆེའོ། །དེ་རྣམས་ཀྱི་འོད་ནི་འོད་ཟེར་ཏེ་ངེས་ཉེ་བར་འབར་བ་བྲི་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། དཀྱིལ་འཁོར་གྱི་གྲྭ་རྣམས་དང༌། སྒོ་ཁྱུད་ཀྱི་ནི་མཚམས་སུ་ཞེས་བཤད་པ་གང་ཡིན་པ་དེ་དག་ཏུ་རྡོ་རྗེ་རིན་པོ་ཆེའི་གཟུགས་བྲི་བར་བྱའོ། །རླུང་གིས་བསྐྱོད་པའི་རྩེ་མོ་མཆོག །བ་དན་དྲིལ་བུ་སྒྲ་སྒྲོགས་པ། །དྲ་བ་མེ་ལོང་མེ་ཏོག་ཕྲེང༌། །ཕྱི་རོལ་དཀྱིལ་འཁོར་བྲི་བར་བྱ། །མེ་ཏོག་ཆུན་འཕྱང་རྣམས་ཀྱིས་བརྒྱན། །ཞེས་བྱ་བ་ནི་རླུང་གིས་བསྐྱོད་པའི་དྲིལ་བུ་དང་བཅས་པའི་བ་དན་སྣ་ཚོགས་ཏེ། དེས་སྣ་ཚོགས་ཤིང་ཁ་དོག་དུ་མ་དང་ལྡན་པ་དེས་ཉེ་བར་མཛེས་པར་བྱས་པའོ། །དེ་བཞིན་དུ་མེ་ལོང་དང་དྲ་བ་དང་མེ་ཏོག་གི་ཆུན་འཕྱང་གིས་ཀྱང་བརྒྱན་བར་ཕྱིའི་དཀྱིལ་འཁོར་བྲི་བར་བྱ་སྟེ། མེ་ལོང་དང་དྲ་བ་དང་མེ་ཏོག་གི་ཆུན་འཕྱང་ གང་ལ་ཡོད་པ་དེ་དག་ལ་དེ་སྐད་ཅེས་བྱ་སྟེ། དེ་རྣམས་ཀྱིས་བརྒྱན་ཅིང་མཛེས་པར་བྱས 
་པ་ཕྱིའི་དཀྱིལ་འཁོར་དེ་ལྟ་བུར་བྲི་བར་བྱའོ། །དེའི་ཞེས་བྱ་བ་ནི་ཕྱིའི་དཀྱིལ་འཁོར་གྱིའོ། །ནང་དུ་ཞེས་བྱ་བ་ནི་ནང་ན་སྟེ་དབུས་སུ་ཞེས་བྱ་བའི་ཐ་ཚིག་གོ །འཁོར་ལོ་ནི་དཀྱིལ་འཁོར་རོ། །ཇི་ལྟ་བུ་ཞེ་ན། དཀྱིལ་འཁོར་བརྒྱད་པ་དང་འདྲ་བ་ཞེས་བྱ་བ་ལ་སོགས་པ་སྨོས་ཏེ། དུམ་བུ་དང་པོ་ལས་བཤད་པའི་རྡོ་རྗེ་སེམས་དཔའི་དཀྱིལ་འཁོར་བཞིན་དུ་ཤེས་པར་བྱའོ། །དེའི་ནང་ནི་དཀྱིལ་འཁོར་གྱི་དབུས་ཏེ་ལྟེ་བར་ཅི་རིགས་པར་བར་སྣང་གི་ཕྱོགས་ནས་ཕབ་སྟེ་ས་མ་ཡ་སྟྭཾ་ཞེས་བྱ་བ་དང༌། རང་གི་སྙིང་པོ་བརྗོད་ལ་རང་གི་གནས་སུ་གཞག་པར་བྱའོ། །སངས་རྒྱས་ཀྱི་ཕྲེང་
བ་དང༌། རིན་པོ་ཆེ་དང༌། པདྨ་དང༌། རྡོ་རྗེའི་ཕྲེང་བ་དང་ལྡན་པའི་ཅོད་པན་དང༌། རྣ་ཆ་ལ་སོགས་པས་ཀྱང་བརྒྱན་ཅིང་སྤྲས་པ་དང༌། དྲི་དང་ཚོན་དང་གུར་ཀུན་ལ་སོགས་པས་ཀྱང་ཀུན་དུ་གཏོར་བར་བྱའོ། །ཚོན་གྱིས་ཞེས་བྱ་བ་ནི་དྲི་ཞིམ་པོའི་པིར་དང་བཅས་པའོ། །ལྷག་མ་ནི་གོ་སླའོ། །དེ་བཞིན་དུ་ལྷ་མོའི་དཀྱིལ་འཁོར་ནི་ཁྱམས་སུ་དགོད་པར་བྱའོ་ཞེས་བྱ་བ་ནི་དཀྱིལ་འཁོར་ཆེན་པོ་ཇི་ལྟ་བ་བཞིན་དུ་འདིར་མདུན་དུ་ནི་རྡོ་རྗེ་མཚོན་ཆ་སྐུ་མདོག་དམར་པོ་མཚོན་ཆའི་ཐབས་ལ་བརྩོན་པའོ། །རྡོ་རྗེ་ཡིད་ལས་བྱུང་བ་དགོད་དོ་ཞེས་བྱ་བ་ལ་སོགས་པས་ནི་དགོད་པའི་ཆོ་ག་གསུངས་པ་ཡིན་ནོ། །དེ་ལྟར་དེ་བཞིན་གཤེགས་པའི་དཀྱིལ་འཁོར་དང༌། རྡོ་རྗེ་སེམས་དཔའི་གསང་བའི་དཀྱིལ་འཁོར་དུ་མདུན་དུ་རྡོ་རྗེ་ཡིད་ལས་བྱུང་བ། ཨོཾ་བཛྲ་དྲྀཥྚི་ས་ཡ་ཀེ་མ་ཊ་ཞེས་བྱ་བས། བུད་མེད་དུ་གྲགས་པ་རྣམས་དགོད་པར་བྱའོ། །གཡས་ལོགས་སུ་ནི་རྡོ་རྗེ་ཀི་ལི་ཀི་ལ་ཧཱུཾ་བཛྲ་ཀི་ལི་ཀི་ལ་ཧཱུཾ་ཞེས་བྱ་བ་དགོད་དོ། །རྒྱབ་ཏུ་ནི་རྡོ་རྗེ་དྲན་པ་ཧཱུཾ་སྨར་བཛྲ་ཧཱུཾ་ཞེས་བྱ་བས་སོ། །གཡོན་ལོགས་སུ་ནི་རྡོ་རྗེ་བསྙེམས་མ་ཧཱུཾ་ཏུ་དྷྱ་བཛྲ་ཎི་ཧཱུཾ་ཞེས་བྱ་བས་སོ། །དེ་བཞིན་དུ་རྡོ་རྗེ་སྦྲང་རྩི་མ་ལ་སོགས་པ་ནས་གར་མའི་བར་གྱི་མཆོད་པའི་ལྷ་མོ་རྣམས་རང་རང་གི་སྙིང་པོས་དགོད་པར་བྱས་ལ་རྡོ་རྗེ་ལྕགས་ཀྱུ་མ་ལ་སོགས་པ་ཡང་ལྷ་མོར་གྲགས་པ་དགོད་པར་བྱའོ། །དེ་ནས་ཛཿ་བཛྲ་ཨཾ་ཀུ་ཤ་།ཧཱུཾ་བཛྲ་པཱ་ཤ །བཾ་བཛྲ་སྥོ་ཊ། ཨ་བཛྲ་གཎྚེ་ཞེས་བྱ་བར་དགོངས་པར་རྟོགས་པར་བྱའོ་ཞེས་བྱ་བ་ནི་བར་སྣང་གི་ཕྱོགས་ལས་ཕབ་སྟེ། བྲིས་པ་དང་བླུགས་པ་ལ་སོགས་པའི་ནང་དུ་བཅུག་ལ་ཡེ་ཤེས་སེམས་དཔའ་དང༌། རང་བཞིན་གཅིག་ཏུ་གྱུར་པས་ལྷ་ཐམས་ཅད་བཞུགས་པར་མཛད་པར་བྱའོ་ཞེས་བྱ་བའི་ཐ་ཚིག་གོ །དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་བྲིས་པའི་རྗེས་ཐོགས་ཉིད་ལ། བུམ་པ་གང་བ་ལ་སོགས་པའི་མཆོད་པ་ཐམས་ཅད་ཀྱིས་ཡང་དག་པར་མཆོད་ལ། དར་དང་དྲིལ་བུ་ལ་སོགས་པ་དང་བཅས་པར་དཀྱིལ་འཁོར་གྱི་གྲྭ་བཞིའི་གནས་སུ་གཞག་པར་བྱའོ། །ལྷག་མ་ནི་གོ་བར་ཟད་དོ། །དེ་ནས་རང་གི་དམ་ཚིག་ཅེས་བྱ་བ་ལ་སོགས་པ་ལ། དེ་ལྟར་དཀྱིལ་འཁོར་བྲིས་ནས་སྒོ་ཕྱེ་ལ་བསྡུ་བ་བྱས་ནས་མཚན་བརྒྱ་རྩ་བརྒྱད་པས་
ཡང་དག་པར་བསྟོད་ལ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་གཡས་བའི་རྡོ་རྗེ་ལྕགས་ཀྱུས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་དཀྱིལ་འཁོར་དུ་ཇི་ལྟ་བ་བཞིན་དུ་བཅུག་ལ་མཆོད་ཡོན་ཕུལ་ནས། དེའི་རྗེས་ཐོགས་ཉིད་ལ། བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པས་རང་གི་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །ཛཿ་ཧཱུཾ་བཾ་ཧོཿ་ཞེས་བྱ་བ་བརྗོད་ལ། དགུག་ཅིང་ཞེས་བྱ་བ་ལ་སོགས་པ་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཇི་སྐད་དུ་བཤད་པའི་ལྕགས་ཀྱུས་དགུག་པ་དང༌། དཀྱིལ་འཁོར་དུ་གཞུག་པ་དང༌། རང་གི་གནས་རྣམས་སུ་དམ་ཚིག་གི་ལྕགས་སྒྲོག་གིས་བཅིངས་ནས། དེའི་འོག་ཏུ་རྡོ་རྗེ་སེམས་དཔའ་ལ་སོགས་པ་དབང་དུ་འགྱུར་བས་དེ་ཁོ་ན་བཞིན་དུ་དབང་དུ་བྱའོ་ཞེས་བྱ་བ་ཡིན་ནོ། །ཕྱག་རྒྱ་ཆེན་པོར་མཉམ་གཞག་སྟེ། །ཞེས་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་པའོ། །དེ་བཞིན་གཡས་མཛུབ་ལྕགས་ཀྱུར་བྱ། །ཞེས་བྱ་བ་ནི། གཡས་པའི་མཛུབ་མོ་ལྕགས་ཀྱུར་བྱས་ལ་དེ་བཞིན་ཞེས་བྱ་བ་རྣམ་པ་འདིས་ཕྱག་རྒྱ་ཆེན་པོའི་དངོས་གྲུབ་ཏུ་འགྱུར་རོ་ཞེས་བྱ་བའི་ཐ་ཚིག་གོ །འདི་དག་ནི་དགུག་པའོ། །ལྷན་ཅིག་མཆོག་ཏུ་འགུགས་པར་བྱེད། །ཅེས་བྱ་བ་ནི། དེ་བཞིན་དུ་ཕྱག་རྒྱ་ཆེན་པོའི་ལྕགས་ཀྱུ་བཅིངས་པའི་རྗེས་ཐོགས་ཉིད་འོག་ནས་བཤང་བའི། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་གྲུབ་པའི་སྙིང་པོ་ལན་ཅིག་བརྗོད་པར་བྱའོ། །དེ་ནས་བཅོམ་ལྡན་འདས་རྡོ་རྗེ་ཅན་རྡོ་རྗེ་སེམས་དཔའ་རང་ཉིད་དཀྱིལ་འཁོར་དུ་བྱོན་པར་གྱུར་པ་ནི་བྲིས་པའི་དཀྱིལ་འཁོར་དུ་བྱོན་ནས། གནས་ཇི་ལྟ་བ་བཞིན་དུ་ཞུགས་པར་རོ་ཞེས་སྟོན་པ་ཡིན་ནོ། །ཡང་ན་བཅོམ་ལྡན་འདས་ཉི་གཟིགས་པར་འགྱུར་རོ་ཞེས་བྱ་བ་ནི་ཡང་ན་རྣལ་འབྱོར་པ་རང་ཉིད་རྡོ་རྗེ་སེམས་དཔར་གྱུར་པ་བཅོམ་ལྡན་འདས་རྡོ་རྗེ་སེམས་དཔའ་རང་ཉིད་ཀྱིས་མཐོང་བར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཅོམ་ལྡན་འདས་དཀྱིལ་འཁོར་དུ་བཅུག་ནས། དམ་ཚིག་གི་ཕྱག་རྒྱ་རྣམས་ཀྱིས་ཇི་ལྟ་བ་བཞིན་དུ་ཡང་དག་པར་བསྒྲུབ་ལ། ཆོས་དང་ལས་དང་ཕྱག་
རྒྱ་ཆེན་པོ་རྣམས་ཀྱིས་རྒྱས་བཏབ་ལ་ཆོ་ག་ཐམས་ཅད་རྗེས་སུ་སྤྱད་ནས། དེའི་རྗེས་ལ་འཇུག་པའི་ཆོ་གས་བདག་ཉིད་འཇུག་པར་བྱའོ། །དེ་ལྟར་ཆོ་ག་ཐམས་ཅད་བྱས་པས་རང་ཉིད་ཞུགས་པའི་བསམ་གཏན་གྱི་སློབ་དཔོན་ནམ། དཀྱིལ་འཁོར་གཞན་དུ་དཀྱིལ་འཁོར་གྱི་སློབ་དཔོན་དུ་འགྱུར་རོ་ཞེས་བྱ་བར་དགོངས་སོ། །ཡང་ཞེས་བྱ་བའི་སྒྲས་ནི་གཞན་དག་ནི་མི་གཞུག་གོ་ཞེས་སྟོན་ཏོ། །རྡོ་རྗེ་འཛིན་ཀུན་སློབ་དཔོན་ནི། །ཞེས་བྱ་བ་ལ་རྡོ་རྗེ་འཛིན་པ་ཡང་ཡིན་ལ་ཀུན་ཀྱང་ཡིན་པས་ན་རྡོ་རྗེ་འཛིན་པ་ཀུན་ཏེ། རིགས་ཐམས་ཅད་ཀྱི་རང་བཞིན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་དཀྱིལ་འཁོར་གྱི་སློབ་དཔོན་ནི་རྡོ་རྗེ་འཛིན་ཀུན་སློབ་དཔོན་ནོ། །ཕྱག་རྒྱ་ཐམས་ཅད་ཀྱིས་ཞེས་བྱ་བ་ནི། ཕྱག་རྒྱ་ཡང་ཡིན་ལ་ཀུན་ཀྱང་ཡིན་པས་ན་ཕྱག་རྒྱ་ཀུན་ཏེ། རིགས་ཐམས་ཅད་ཀྱི་མཚན་མའི་ཕྱག་རྒྱ་སྟེ་དེ་རྣམས་ཀྱིས་གྲུབ་པའོ།། དམ་ཚིག་ཀུན་མཁྱེན་པ་ཞེས་བྱ་བ་ལ་དམ་ཚིག་ཀྱང་ཡིན་ལ་ཀུན་ཀྱང་ཡིན་པས་ན་དམ་ཚིག་ཀྱང་ཡིན་ལ་ཀུན་ཀྱང་ཡིན་པས་ན་དམ་ཚིག་ཀུན་ཏེ་རིགས་ཐམས་ཅད་ཀྱི་དམ་ཚིག་གི་དཀྱིལ་འཁོར་རོ། །དེ་མཁྱེན་པས་ན་དམ་ཚིག་ཐམས་ཅད་མཁྱེན་པའོ། །ལས་ཐམས་ཅད་ནུས་པ་ཞེས་བྱ་བ་ལ་རིགས་ཐམས་ཅད་ཀྱི་ལས་ཀྱི་དཀྱིལ་འཁོར་ནི་ལས་ཐམས་ཅད་དེ། དེ་རྣམས་བྱེད་པར་ནུས་པ་ལས་ཐམས་ཅད་ནུས་པ་སྟེ། བཅོམ་ལྡན་འདས་ཀྱིས་ལས་ཐམས་ཅད་ནུས་པར་བྱིན་གྱིས་རློབ་པར་མཛད་དོ་ཞེས་རེ་རེ་ཞིང་སྦྱར་བར་བྱའོ། །ཆོ་ག་ཇི་ཙམ་གྱིས་ཞུགས་ནས་བཅོམ་ལྡན་འདས་རྡོ་རྗེ་སེམས་དཔའ་དེ་ལྟར་བྱིན་གྱིས་རློབ་པར་མཛད་ཅེ་ན་འདི་ཡིས་ཞེས་བྱ་བ་གསུངས་ཏེ་རྗེས་ཐོགས་ལ་འཆད་པར་འགྱུར་བའི་འཇུག་པའི་ཆོ་ག་འདིས་ཞེས་བྱ་བའི་དོན་ཏོ། །ད་ནི་ཆོ་ག་དེ་བསྟན་པའི་ཕྱིར་རང་ཉིད་ཅེས་བྱ་བ་གསུངས་ཏེ། རྡོ་རྗེ་སློབ་དཔོན་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་པའི་སློབ་དཔོན་ནི་རྡོ་རྗེ་སློབ་དཔོན་ནོ། །ཇི་སྙེད་པའི་དྲིས་བྱུགས་ཤིང་བསྒོས་ལ་ཞེས་བྱ་བ་ལ། ཇི་ཙམ་སྙེད་པར་གྱུར་པའི་དྲིས་ལུས་ལ་ཉེ་བར་བྱུགས་ཤིང་བསྐུས་པ་ཡིན་པས་དེ་སྐད་ཅེས་བྱའོ། །རྒྱན་དང་བཅས་པ་ཞེས་བྱ་བ་ནི་རྡོ་རྗེ་སེམས་དཔའ་དང་རྗེས་སུ་མཐུན་པའི་རྒྱན་རྣམས་ཀྱིས་བརྒྱན་
པར་བྱས་པའོ། །ལུས་ཤིན་ཏུ་བརྒྱན་པ་ཞེས་བྱ་བ་ནི་རྒྱན་དང་བཅས་པའི་མེ་ཏོག་གི་ཕྲེང་བ་རྣམས་ཀྱིས་སྤུད་པའོ། །གོས་དམར་པོས་ཞེས་བྱ་བ་ལ་སོགས་པ་ལ་གོས་དམར་པོ་གཅིག་གིས་སྨད་གཡོགས་བྱས་ལ་གཉིས་པས་སྟོད་གཡོགས་བྱས་ནས། རང་ཉིད་རྡོ་རྗེ་དང་བཅས་པའི་རྡོ་རྗེ་བསྙེམས་པས་རང་ཉིད་འཇུག་པར་བྱའོ་ཞེས་བྱའོ་ཞེས་བྱ་བ་ནི་རྡོ་རྗེ་དང་ལྷན་ཅིག་པས་ན་རྡོ་རྗེ་དང་བཅས་པའོ། །རྡོ་རྗེ་བསྙེམས་མ་ནི་རྡོ་རྗེ་སེམས་དཔའ་ཀི་ཕྱག་རྒྱ་ཆེན་པོ་སྟེ། རྡོ་རྗེ་བསྙེམས་མའི་རྣལ་འབྱོར་དང་ལྡན་པའོ། །བསྒྲུབ་པར་བྱ་བའི་བུ་མོའོ། །རྡོ་རྗེ་དང་བཅས་པ་ཡང་ཡིན་ལ་རྡོ་རྗེ་བསྙེམས་མ་ཡང་ཡིན་པས་ན་རྡོ་རྗེ་དང་བཅས་པའི་རྡོ་རྗེ་བསྙེམས་མ་དེ་དང་ལྷན་ཅིག་བདག་ཉིད་འཇུག་པར་བྱའོ། །འདི་སྐད་སྟོན་ཏེ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་བསྒྲུབ་པར་བྱ་བ་རྡོ་རྗེ་བསྙེམས་མའི་རྣལ་འབྱོར་དང་ལྡན་པའི་སྔོན་དུ་སྤྱད་པ་བྱས་ལ་རྗེས་སུ་གནང་བ་ཐོབ་པ་དང༌། རྡོ་རྗེ་སེམས་དཔའི་ཕྱག་རྒྱ་ཆེན་པོའི་སྦྱོར་བ་དང་ལྡན་པས། བུ་མོ་རྡོ་རྗེ་དང་དྲིལ་བུ་འཛིན་པ་ལག་པ་གཡས་པས་གཟུང་བའི་ཚུལ་གྱིས་བླངས་ལ་རྡོ་རྗེ་སློབ་དཔོན་དཀྱིལ་འཁོར་དུ་འཇུག་པར་བྱའོ། །བཅོམ་ལྡན་འདས་ལ་མངོན་པར་བསྟོད་ཅིང་ཞེས་བྱ་བ་ནི་དྲུག་ལྡན་ལ་སོགས་པའི་གླུས་རྡོ་རྗེའི་གླུ་ལེན་ཅིང་འཇུག་པར་བྱའོ། །འདོད་ཆགས་ཞེས་བྱ་བ་ལ་སོགས་པ་ལ། འདོད་ཚགས་དམ་ཚིག་ཡིན་པར་བཤད། །ཅེས་གསུངས་པས་འདོད་ཆགས་ནི་རྡོ་རྗེ་སེམས་དཔའོ། །སོགས་པའི་སྒྲས་ནི་རྡོ་རྗེ་ཡིད་ལས་བྱུང་བ་ནས་བརྩམས་ཏེ། རྡོ་རྗེ་འབེབས་པའི་བར་དུ་གཟུང་དོ། །འདོད་ཆགས་ལ་སོགས་པ་གང་ཡིན་པ་དེ་ནི་འདོད་ཆགས་ལ་སོགས་པ་སྟེ་དེ་ཉིད་ནི་བདེ་བ་ཡང་ཡིན་ལས་ཐམས་ཅད་ཀྱང་ཡིན་པས་ན་བདེ་བ་ཐམས་ཅད་ངོ༌། །དེས་གང་གི་ཡིད་མཛེས་པར་གྱུར་པ་དེ་ནི་འདོད་ཆགས་ལ་སོགས་པས་བདེ་བ་ཡིད་དེ། དེ་བཞིན་གཤེགས་པ་རྣམས་སོ། །ཁྱེད་ནི་དེ་རྣམས་བསྡུས་པ་སྟེ་ཡང་དག་པར་བསྡུས་པས་ན་བསྡུས་པ་ཡིན་ཏེ། དེ་རྣམས་ཀྱིས་ཉེ་བར་བླངས་ཤིང་རྟོགས་པ་ཞེས་བྱ་བའི་ཐ་ཚིག་གོ །ནི་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏེ། གང་གི་ཕྱིར་ཁྱེད་ནི་
དེ་རྣམས་ཀྱིས་སྐྱེས་བུའི་དོན་གྲུབ་པར་བྱ་བའི་ཕྱིར་ཉེ་བར་བླངས་པ་ཡིན་པ་དེའི་ཕྱིར། ཁྱེད་བདག་ལ་བདེ་བ་སྩོལ་བར་མཛོད་ཅིག་ཅེས་བྱ་བ་ནི། ཇི་ལྟར་ཁྱད་སངས་རྒྱས་རྣམས་ཀྱིས་བསྡུས་པར་གྱུར་པའི་ཚུལ་གྱིས་སྐྱེས་བུའི་དོན་གྲུབ་པར་སྩོལ་བ་དེ་བཞིན་དུ་བདག་ལའང་བསྡུས་པའི་ཚུལ་གྱིས་སྐྱེས་བུའི་དོན་གྲུབ་པའི་དངོས་གྲུབ་སྩོལ་བར་མཛོད་ཅིག་ཅེས་སློབ་དཔོན་ལ་གསོལ་བ་འདེབས་པའོ། །རྡོ་རྗེ་སེམས་དཔའ་དགོངས་པར་མཛོད་ཅིག་ཅེས་བྱ་བ་ནི་བདེ་བ་སྩོལ་བ་ཉིད་དགོངས་ཤིང་མངོན་སུམ་དུ་མཛོད་ཅིག་པའོ། །བདག་ལ་བརྟན་པར་མཛོད་ཅིག་ཅེས་བྱ་བ་ནི། བདག་ལ་བདེ་བ་སྩོལ་བ་མི་ཕྱེད་པར་མཛོད་ཅིག་ཅེས་པའོ། །མྱུར་དུ་ཞེས་བྱ་བ་ནི་རིངས་པར་རོ། །བདག་ལ་དགྱེས་པར་མཛོད་ཅིག་ཅེས་བྱ་བའི་མངོན་སུམ་དུ་ཕྱོགས་ཤིང་གྲུབ་པར་མཛོད་ཅིག་པའོ། །ཡོངས་སུ་མཉེས་པར་མཛད་པ་དང་ཞེས་བྱ་བ་ལ་ཙའི་སྒྲ་ནི་བསྡུ་བའོ། །བདེ་བ་རྣམས་ཀྱི་མཆོག་ཡིན་པས་ན་བདེ་མཆོག་གོ །མཆོག་ཉིད་ཡིན་པས་ན་བདེ་མཆོག་གོ །ཕྱག་འཚལ་ལོ་ཞེས་བྱ་བ་ནི་རབ་ཏུ་འདུད་པའི་ཚིག་གིས་རང་གི་དབང་བསྐུར་བ་བདག་ལ་སྩོལ་ཅིག་ཅེས་སྟོན་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་འཇུག་པའི་རྗེས་ཐོགས་ལ་བཅོམ་ལྡན་འདས་རང་རང་གི་ངོ་བོས་བཅོམ་ལྡན་འདས་མངོན་དུ་བྱས་ལ་དྲན་པར་བྱའོ། །ཐོག་མ་དང་ཐ་མ་མེད་པའི་སེམས་དཔའ་ནི་ཆོས་ཀྱི་དབྱིངས་ཀྱི་རང་བཞིན་གྱི་སེམས་དཔའོ། །རྡོ་རྗེ་སེམས་དཔའ་ཞེས་བྱ་བ་ནི་གཟུང་བ་དང་འཛིན་པའི་རྟོག་པ་དང་བྲལ་བའི་ཕྱིར་མི་ཕྱེད་པའི་སེམས་དཔའ་ནི་རྡོ་རྗེ་སེམས་དཔའོ། །བདེ་བ་ཆེན་པོ་ཞེས་བྱ་བ་ནི་ཐར་བའོ། །ཀུན་དུ་བཟང་པོ་ཁྱོད་ཅེས་བྱ་བ་ནི་ཁྱེད་ལས་ཀུན་དུ་བཟང་པོར་འགྱུར་རོ་ཞེས་བྱ་བའི་དོན་ཏོ། །ཁྱེད་ནི་ཀུན་དུ་བཟང་པོ་སྟེ། །ཞེས་བྱ་བ་ནི་ཀུན་དུ་བཟང་པོ་ཡིན་ཞེས་བྱ་བ་སྟེ། བཅོམ་ལྡན་འདས་རྡོ་རྗེ་སེམས་དཔའ་དང་ལྷ་མོ་རྡོ་རྗེ་བསྙེམས་མའི་ཕྱག་རྒྱ་ཆེན་པོའོ། །དེའི་བདག་པོ་ཡིན་པས་ན་རྡོ་རྗེ་བསྙེམས་མའི་བདག་པོའོ། །དེ་ཡང་བྱང་ཆུབ་ཀྱི་སེམས་ཆེན་པོའི་དབང་གིས་རྡོ་རྗེ་བསྙེམས་མ་རྒྱུན་མི་འཆད་པར་འབྱུང་བས་དེའི་
ཕྱིར་བྱང་ཆུབ་ཀྱི་སེམས་ཀྱི་རང་བཞིན་ནི་རྡོ་རྗེ་སེམས་དཔའ་ཡིན་པས་རྡོ་རྗེ་བསྙེམས་མའི་བདག་པོའོ། །དེ་ཡང་སེམས་ནི་བཅོམ་ལྡན་འདས་དེ་འདོད་ཆགས་ཆེན་པོ་ནི་དེའི་ལྷ་མོའི་ཞེས་བཤད་པ་ཡིན་ནོ། །ཁམས་གསུམ་གྱི་དབང་ཕྱུག་ཡིན་པ་དང་རིགས་ཐམས་ཅད་ཀྱི་གཙོ་བོ་ཡིན་པས་ན་ཁྱབ་བདག་གོ །སེམས་ཞེས་བྱ་བ་ནི་དགེ་བའི་ཁམས་རྣམས་ཀྱིས་བསགས་པས་ན་སེམས་སོ། །དེ་ཡང་ཇི་ལྟར་ན་བཅོམ་ལྡན་འདས་སེམས་ཅན་ཐམས་ཅད་ཡིན་ཞེ་ན། བསམ་མི་ཁྱབ་ཅིང་རྒྱ་ཆེར་ཟབ། །མི་འགྱུར་བ་དེ་བ་ཀུན་གྲུབ་པ། །ཀུན་དུ་ཁྱབ་ཅིང་དྲི་མ་མེད། །བྱང་ཆུབ་སེམས་ནི་ཆེ་ཞིང་བརྟན། །ཞེས་གསུངས་པས། སེམས་དཔའ་ཞེས་བྱ་བ་ནི་སེམས་དེ་ཉིད་དེ། དེ་བཞིན་ཉིད་ཀྱི་རྡོ་རྗེ་དང་གཅིག་ཏུ་གྱུར་པར་བསྒོམས་པའི་མཐུས། རྣམ་པར་རྟོག་པ་ཐམས་ཅད་ཀྱིས་བསྐྱོད་པར་མི་ནུས་པས་ན་སེམས་དཔའ་སྟེ། སེམས་ཅན་ཀུན་གྱི་སེམས་གང་ཡིན། །བརྟན་པའི་ཕྱིར་ན་སེམས་དཔར་བཤད། །ཅེས་གསུངས་པའི་ཕྱིར་རོ། །ཏིང་ངེ་འཛིན་ཞེས་བྱ་བ་ནི་མི་གཡོ་བའི་སེམས་རྩེ་གཅིག་པོ་དེ་ཉིད་དང་ལྡན་པས་ཏིང་ངེ་འཛིན་ལས་མཉམ་པར་འཇོག་པའི་ཕྱིར་ཏིང་ངེ་འཛིན་ཞེས་བཤད་དོ། །རྡོ་རྗེ་ཞེས་བྱ་བ་ནི་ཏིང་ངེ་འཛིན་གྱི་རང་བཞིན་ཅན་གྱི་སེམས་ཏེ་དེ་ཉིད་ཟླ་བའི་དཀྱིལ་འཁོར་ལ་སོགས་པའི་རིམ་གྱིས་ཟླ་བའི་དཀྱིལ་འཁོར་གྱི་སྟེང་དུ་རྡོ་རྗེ་རྩེ་ལྔ་བའི་གཟུགས་སུ་གྱུར་པ་ནི་རྡོ་རྗེ་ཞེས་བཤད་ད། ངེས་པའི་ཕྱིར་ན་རྡོ་རྗེར་གྱུར། །ཞེས་བཤད་པའི་ཕྱིར་རོ། །དེ་བཞིན་རྡོ་རྗེ་འཛིན་ཞེས་བྱ་བ་ནི་རྡོ་རྗེར་གྱུར་པའི་རྡོ་རྗེ་སེམས་དཔའི་ཐུགས་དེ་ཉིད་བསྒོམས་པའི་སྟོབས་ཀྱིས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་རྡོ་རྗེ་དང་དྲིལ་བུ་འཛིན་པར་གང་གི་ཆེ་གྱུར་པ་དེའི་ཆེ་རྡོ་རྗེ་འཆང་བ་ཆེན་པོ་ཡིན་ཏེ། སེམས་དཔར་བྱིན་རླབས་སྦྱོར་བ་ཡིན། །སླར་ཡང་རྡོ་རྗེ་སེམས་དཔར་གྱུར། །ཞེས་གསུངས་པའི་ཕྱིར་རོ། །ཀུན་མཆོག་ཅེས་བྱ་བ་ལ་ཀུན་གྱི་མཆོག་ནི་ཆོས་ཀྱི་དབྱིངས་ཏེ་དེ་ལས་བྱུང་བའོ། །ཀུན་མཆོག་དམ་ཚིག་ཅེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་རང་བཞིན་གྱི་དམ་ཚིག་སྟེ་ཕྱག་རྒྱ་འདི་དམ་ཚིག་ཅེས་བསྒྲགས་སོ་ཞེས་གསུངས་པའི་ཕྱིར་རོ། །དངོས་
གྲུབ་ཅེས་བྱ་བ་ནི་རང་བཞིན་གྱིས་ཕྱག་རྒྱ་ཆེན་པོ་ལ་སོགས་པའི་ངོ་བོར་གྲུབ་ཅིང་བྱུང་བའོ། །རྡོ་རྗེ་སེམས་དཔའ་དེང་གྲུབ་མཛོད། །ཅེས་བྱ་བ་ནི་རྡོ་རྗེ་སེམས་དཔའ་ཡང་ཡིན་ལ་དེ་ཡང་ཡིན་པས་ན་རྡོ་རྗེ་སེམས་དཔའ་དེང་སྟེ་བདག་དེ་གྲུབ་པར་གྱུར་ཅིག་ཅེས་སློབ་དཔོན་ལ་གསོལ་བ་འདེབས་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་དུ་ཞུགས་ནས་སློབ་དཔོན་གྱིས་དྲན་ན་བཅོམ་ལྡན་འདས་རྡོ་རྗེ་སེམས་དཔའ་དགྱེས་པར་གྱུར་ལ། དེ་ནས་བཅོམ་ལྡན་འདས་རྡོ་རྗེ་འཆང་བ་དེ་དགྱིས་པས་སློབ་དཔོན་ལ་ཉིད་ཀྱི་ཡོན་ཏན་བསྐྱེད་པས་བྱིན་གྱིས་བརླབས་པ་མཛད་དོ། །དེ་ནས་བྱིན་གྱིས་བརླབས་པ་དེས་སྔོན་ཆད་མ་མྱོང་ཞིང་སྔར་མ་བྱུང་བའི་སློབ་དཔོན་དང་གཟུངས་མ་རྡོ་རྗེ་བསྙེམས་མ་གཉི་ག་ལ་ཞུགས་པས་རང་རིག་པའི་བདེ་བ་ཉམས་སུ་མྱོང་ཞིང་སྐྱེ་བར་འགྱུར་རོ། །བདེ་བ་དེས་ཀྱང་ཕྲ་མོ་འབབ་པར་གྱུར་པ་དང༌། བྱང་ཆུབ་ཀྱི་སེམས་རྟོགས་ཤིང་ཐབས་ཤེས་པར་ཡང་འགྱུར་རོ། །དེ་ནས་བདག་ལ་བཅོམ་ལྡན་འདས་གྲུབ་པར་གྱུར་ཏོ་ཞེས་ཤེས་པར་བྱའོ། །བདེ་བ་ཕྲ་མོ་འབབ་ཅིང་སྐྱེད་པ་དེས་བདག་ནི་བཅོམ་ལྡན་འདས་རྡོ་རྗེ་སེམས་དཔར་གྲུབ་པར་གྱུར་ཏེ་ཞེས་དེ་ལྟར་ཤེས་ཤིང་ངེས་པར་བརྟག་པར་བྱའོ། །དེ་ནས་དེ་བཞིན་དུ་འདུག་ལ་ཅི་འདོད་པར་ནི་བཟླས་བརྗོད་བྱའོ། །ཞེས་བྱ་བ་ནི་ཕྱག་རྒྱ་གང་ཞིག་བཅིངས་པ་ཉིད་དང༌། སེམས་དཔའི་སྐྱིལ་མོ་ཀྲུང་གིས་འདུག་ལ། ཇི་སྲིད་མཚན་མ་བྱུང་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དོན་འདི་ཉིད་བསྟན་པ་ནི་དེ་ནས་དེ་བཞིན་དུ་ཞེས་བྱ་བ་ལ་སོགས་པ་གསུངས་པ་ཡིན་ཏེ་འཇུག་པའི་ཕྱག་རྒྱ་ཇི་ལྟར་བཅིངས་པ་ཉིད་དང༌། སེམས་དཔའི་སྐྱིལ་མོ་ཀྲུང་གིས་འདུག་ལ་བཟླས་བརྗོད་དཔག་ཏུ་མེད་པ་བྱེད་ཅིང་འདུག་པ་ནི་དེ་བཞིན་དུ་འཇུག་པ་ཞེས་བྱའོ། །རང་གི་བསོད་ནམས་ཀྱི་བྱིན་གྱི་རླབས་ཀྱིས་ཞེས་བྱ་བ་ནི་རང་གི་བསོད་ནམས་དང་རྗེས་སུ་མཐུན་པའི་སྟོབས་ཀྱིས་མཁས་པ་རྣམས་ཡིད་ལ་འདོད་པའི་དངོས་གྲུབ་པ་རྣམས་འཐོབ་པར་གྱུར་པའོ། །དེ་ནས་བརྩམས་ཏེ་ཞེས་བྱ་བ་ནི་དེ་ནས་བཟུང་སྟེ། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་དུ་སྒྲུབ་པར་འགྱུར་ཞིང་
བཟླས་པ་ཙམ་གྱིས་རང་ཉིད་དབང་དུ་འགྱུར་རོ། །རང་དབང་ཉིད་དུ་གྱུར་པའི་སྟོབས་ཉིད་ཀྱིས་དེ་མཐོང་བར་འགྱུར་རོ། །དེ་ནས་དེ་མཐོང་བས་ཇི་ལྟར་མངོན་པར་འདོད་པའི་དངོས་གྲུབ་ཐམས་ཅད་དེ་ལ་སྩོལ་བར་མཛད་དོ། །འདིའི་རིགས་ཐམས་ཅད་ཀྱི་མཚན་མའི་ཕྱག་རྒྱ་ཡང་བདག་རང་ཉིད་ཀྱིས་བཅིངས་ནས་ལས་ཐམས་ཅད་ལ་མཚན་མའི་ཕྱག་རྒྱ་ཐམས་ཅད་ཀྱིས་ལས་རྣམས་འགྲུབ་པར་འགྱུར་རོ། །དམ་ཚིག་ཐམས་ཅད་ནི་རིགས་ཐམས་ཅད་ཀྱི་དཀྱིལ་འཁོར་རྣམས་བརྟན་པར་འགྱུར་ཞིང་རང་གི་དངོས་གྲུབ་སྩོལ་བའི་ཕྱིར་མི་ཕྱེད་པར་འགྱུར་བ་དང༌། ལས་ཐམས་ཅད་དེ་རིགས་ཀྱི་ལས་ཐམས་ཅད་དཀྱིལ་འཁོར་གྱི་ཚུལ་དུ་བསམས་པ་ཙམ་གྱིས་བྱེད་པ་དང༌། ཕྱག་རྒྱ་ཆེན་པོ་ལ་སོགས་པའི་ལས་ཀྱང་བྱེད་པའོ། །བདེ་བ་དང་ཡིད་བདེ་བ་ཐམས་ཅད་ཅེས་བྱ་བ་ལ་སོགས་པ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཀྱི་སྒྲ་ནི་ཕྱོགས་གཞན་སྟོན་པར་བྱེད་པ་ཡིན་ཏེ། དེ་ནས་བཤད་མ་ཐག་པའི་ཆོ་གས་བདག་ཉིད་ཀྱི་དོན་དུ་དཀྱིལ་འཁོར་བརྟག་པར་བྱ་བ་མ་ཡིན་མོད་ཀྱི་འོན་ཀྱང་སེམས་ཅན་ཐམས་ཅད་གཞུག་པའི་དོན་དུ་དཀྱིལ་འཁོར་བྲིས་ལ་དེ་ནས་རྡོ་རྗེ་སེམས་དཔའི་རྣལ་འབྱོར་བྱས་ཏེ་རྡོ་རྗེ་སེམས་དཔའི་རྒྱན་གྱིས་བརྒྱན་ནས། རབ་ཏུ་བདེ་བའི་རྡོ་རྗེའི་དམ་ཚིག་གི་ཕྱག་རྒྱའི་མཚན་ཉིད་འོག་ནས་བཤད་པ་བཅིངས་ལ་དེ་ནས་མེ་ཏོག་གི་ཕྲེང་བ་བླངས་ལ་སྔར་བཤད་པའི་གླུ་ལེན་ཅིང་འཇུག་པར་བྱའོ། །དེ་ནས་སྔ་མ་བཞིན་དུ་དྲན་པར་བྱའོ། །དགུག་པར་བྱ་སྟེ་ཞེས་བྱ་བ་ནི་ཆོ་ག་ཐམས་ཅད་རྗེས་སུ་སྤྱད་ལ་བསྡུ་བ་ཇི་ལྟ་བ་བཞིན་དུ་བྱས་ནས། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པ་རང་གི་དམ་ཚིག་གི་ཕྱག་རྒྱ་ལ་སོགས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་ཆོ་ག་ཐམས་ཅད་རྗེས་སུ་སྤྱད་དོ། །རབ་ཏུ་བདེ་བའི་རྡོ་རྗེ་དམ་ཚིག་གི །ཕྱག་རྒྱ་བཅིངས་ནས་ཇི་ལྟ་བ་བཞིན་དུ་བཞུགས་ལ། དྲན་པར་བྱ་ས་ནས་འདི་སྐད་ཅེས་བརྗོད་དོ། །སྲིད་པའི་བདེ་བ་ཞེས་བྱ་བ་ལ་སོགས་པ་ལ་འབྱུང་བས་ན་སྲིད་པ་སྟེ། །མི་གནས་པའི་མྱ་ངན་ལས་འདས་པའོ། །དེ་ལས་བྱུང་བའི་བདེ་བ་ནི་སྲིད་པའི་བདེ་བའོ། །དེའི་རྣམ་
པར་དག་པ་ནི་རྣམ་པར་རྟོག་པ་དང་བྲལ་བ་ཉིད་དོ། །དེའི་དོན་ནི་སྔར་བྱུང་བའི་གནས་ཏེ་སོ་སོ་སྐྱེ་བོའི་གནས་སྐབས་སུ་བཅོམ་ལྡན་འདས་རྡོ་རྗེ་སེམས་དཔའི་གཞལ་ཡས་ཁང་ངོ༌། །མི་གནས་པའི་མྱ་ངན་ལས་འདས་པ་འདིས་རང་བཞིན་གྱིས་མི་གནས་པའི་མྱ་ངན་ལས་འདས་པར་གྱུར་པས་ན་གཞལ་ཡས་ཁང་ངོ༌། །དགའ་བ་ནི་ཆགས་པར་འགྱུར་བའོ། །འདོད་པ་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་སྟེ། དེ་རྣམས་ཀྱི་དངོས་གྲུབ་ནི་གདུལ་བྱའི་རྒྱུད་ལ་དེ་བསྐྱེད་པར་གྱུར་པའོ། །དེའི་དོན་གྱི་དངོས་གྲུབ་ནི་འགྲོ་བ་ཐམས་ཅད་ལ་ཡང་བསྐྱེད་པ་སྟེ། སེམས་ཅན་ཐམས་ཅད་གྲུབ་པར་བྱས་པའོ་ཞེས་བདག་ཀྱང་ཞེས་བྱ་བའི་སྒྲས་སྟོན་ཏོ། །དེ་ལྟར་སློབ་མ་གཞུག་པའི་ཕྱིར་རྗེས་སུ་གནང་བ་བླངས་ནས་དཀྱིལ་འཁོར་གྱི་ལྷ་རྣམས་མེ་ཏོག་ལ་སོགས་པ་ཡང་དག་པར་མཆོད་དེ་སློབ་མ་གཞུག་པར་བྱའོ། །དེ་ཡང་རང་གི་ལྷ་གཞུག་པའི་ཆོ་གས་རང་གི་ལྷའི་དཀྱིལ་འཁོར་དུ་འཇུག་པའི་ཕྱག་རྒྱ་རྣམས་ཀྱིས་གཞུག་གོ །དེ་ལྟར་རང་གི་ལྷའི་འཇུག་པའི་ཆོ་གས་བཅུག་པའི་རྗེས་ཐོགས་ཉིད་ལ་འདི་སྐད་བརྗོད་པར་བྱའོ། །འདོད་ཆགས་དང་བྲལ་བ་ཞེས་བྱ་བ་ལ་སོགས་པ་ལ་འདོད་ཆགས་དང་བྲལ་བ་ནི་ཉན་ཐོས་དང༌། རང་སངས་རྒྱས་ཀྱི་མྱ་ངན་ལས་འདས་པའོ། །འདིས་འདུལ་བས་ན་འདུལ་བ་སྟེ། ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པ་ལ་རབ་ཏུ་འཇུག་པ་ཞེས་སྟོན་པ་ཡིན་ནོ། །འདོད་ཆགས་དང་བྲལ་བས་འདུལ་བ་གང་ཡིན་པ་དེ་ནི་འདོད་ཆགས་དང་བྲལ་བས་འདུལ་བའི་འཇིག་རྟེན་ནོ། །སེམས་ཅན་གྱི་ཁམས་འདོད་ཆགས་དང་བྲལ་བས་དག་པ་ཞེས་བྱ་བ་ནི་འདོད་ཆགས་དང་བྲལ་བས་འདུལ་བའི་འཇིག་རྟེན་གང་ཡིན་པ་དེ་ནི་ཇི་སྐད་དུ་བཤད་པའི་ཉན་ཐོས་དང་རང་སངས་རྒྱས་ཀྱི་མྱ་ངན་ལས་འདས་པའི་ཆགས་པ་དང་བྲལ་བས་ཡང་དག་པར་འགྱུར་ཞིང་འཁོར་བའི་དྲི་མ་དང་བྲལ་བར་འགྱུར་རོ། །རྡོ་རྗེ་སེམས་དཔའ་སྦས་པ་ཡིན། །ཞེས་བྱ་བའི་འདོད་ཆགས་དང་བྲལ་བས་འདུལ་བའི་འཇིག་རྟེན་ལ་ནི་བཅོམ་ལྡན་འདས་རྡོ་རྗེ་སེམས་དཔའ་གསང་ཞིང་སྦ་བར་བྱ་བ་ཡིན་གྱི་བསྟན་པར་ནི་མི་བྱའོ། །ནིའི་སྒྲ་ནི་རྒྱུའི་དོན་ཏེ་གང་གི་ཕྱིར་འདོད་ཆགས་དང་བྲལ་བས་
འདུལ་ཞིང་མོས་པ་དམན་པ་དང་ལྡན་པ་རྣམས་ལ་ཆོས་བདག་མེད་པའི་འདོད་ཆགས་རྡོ་རྗེ་འཆང་ཆེན་པོའི་ཆགས་པ་ཆེན་པོ་ཤིན་ཏུ་ཟབ་མོ་ཐོས་ནས་སྤོང་བར་འགྱུར་ལ། དེ་སྤངས་པས་དམྱལ་བ་ཆེན་པོ་མནར་མེད་པར་ལྟུང་བར་འགྱུར་རོ། །དེ་བས་ན་རྡོ་རྗེ་སེམས་དཔའ་སྦས་པ་ཡིན་ནོ། །འདོད་ཆགས་ཆེན་པོ་ཇི་ལྟ་བུ་ཞེ་ན། མི་དམིགས་པའི་ཐུགས་རྗེ་ཆེན་པོའི་སྟོབས་ཀྱིས་སེམས་ཅན་ཐམས་ཅད་ཡོངས་སུ་སྨིན་པར་བྱེད་པའི་བདེ་བ་ཆེན་པོའི་ཐར་པ་ཆེན་པོའོ། །ཇི་སྐད་དུ་བཤད་པའི་འདོད་ཆགས་དང་བྲལ་བ་དང་འདྲ་ཞིང་མཚུངས་པའི་སྡུག་བསྔལ་གཞན་དག་ནི་ཡོད་པ་མ་ཡིན་ཏེ། ལུས་དང་ངག་དང་སེམས་ཤིན་ཏུ་འགགས་པས་བདེ་བ་ཐམས་ཅད་མེད་པའི་ཕྱིར་རང་བཞིན་གྱིས་བདེ་བ་ཐམས་ཅད་མེད་པ་ཡིན་ལ། དེ་བས་ན་འདོད་ཆགས་དང་བྲལ་ཞིང་བྲལ་བར་མ་བྱེད་ཅིག་ཅེས་པའོ། །ཡང་ཞེས་བྱ་བ་ནི་གང་གི་ཕྱིར་འདོད་ཆགས་དང་བྲལ་བ་ལྟ་བུའི་སྡུག་བསྔལ་གཞན་དག་མེད་པ་དེ་བས་ན་འདོད་ཆགས་ཐམས་ཅད་དང་བྲལ་བ་ཉན་ཐོས་དང་རང་སངས་རྒྱས་ཀྱི་བྱང་ཆུབ་ཐོབ་པའི་གནས་སུ་མྱ་ངན་ལས་འདའ་བར་མ་བྱེད་ཅིག་ཅེས་བཟློག་པའོ། །ཡང་ཞེས་བྱ་བ་ནི་སེམས་དེ་ནམ་ཡང་མ་བྱེད་ཅིག་ཅེས་པའོ། །དེ་ནས་དེ་ཁོ་ན་ཉིད་ཆེན་པོ་བརྗོད་པར་བྱའོ་ཞེས་བྱ་བ་ནི། དཀྱིལ་འཁོར་གོ་རིམས་ཇི་ལྟ་བུ་བཞིན་དུ་བསྟན་ལ་དེ་བཞིན་གཤེགས་པའི་གསང་བ་བརྗོད་པར་བྱའོ། །དེ་ནི་འདི་ཡིན་ཏེ། སེམས་ཅན་ཀུན་གྱི་ཡིད་ཁྱབ་ཅིང༌། །སེམས་ཅན་ཀུན་ལ་བདེ་རབ་སྩོལ། །རྡོ་རྗེ་སེམས་དཔའ་སེམས་དཔའ་ཆེ། །འདོད་པ་འདི་ནི་དམ་ཚིག་མཆོག །འདི་ནི་ཐོག་མ་ཐ་མ་མེད། །ནམ་མཁའ་ལས་བྱུང་མཚན་ཉིད་ཅན། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་བདག་བདག་པོའོ་གཙོ། །འདི་ཉིད་ཁོ་ན་འགྲོ་བའི་སེམས། །བརྟན་པས་སེམས་དཔའ་ཞེས་བརྗོད་དེ། །མཉམ་པར་གཞག་པས་ཏིང་འཛིན་ཏེ། །ངེས་པའི་ཕྱིར་ན་རྡོ་རྗེར་གྱུར། །སེམས་དཔའ་བྱིན་རླབས་སྦྱོར་བ་ཡིས། །སླར་ཡང་རྡོ་རྗེ་སེམས་དཔར་འགྱུར། །འདི་ཉིད་ཐོག་མའི་སེམས་དཔའ་སྟེ། །འདོད་དང་འགྲོ་བ་ཀུན་གྱི་བདག །འདི་ཉིད་ཁོ་ན་སངས་རྒྱས་ཉིད། །འདི་ཉིད་དེ་བཞིན་
གཤེགས་པ་ཉིད། །འདི་ནི་ཁམས་གསུམ་ཐམས་ཅད་དེ། །དང་པོའི་སེམས་དཔར་ཡང་དག་བྱུང༌། །ཆགས་བྲལ་གྱིས་མཐར་མུ་སྟེགས་རྣམས། །དེ་འདུལ་བ་ཡི་དབང་གིས་འདིས། །བཅོམ་ལྡན་རབ་སྦས་གསང་ཉིད་དུ། །བདེ་བར་གཤེགས་པས་མཛད་པ་ཡིན། །དེ་ནས་བཅོམ་ལྡན་འདས་བསྟན་པར་བྱ་སྟེ། འདི་ནི་བཅོམ་ལྡན་འདས་ཕྱག་ན་རྡོ་རྗེ་བདེ་བ་ཆེན་པོ་རྡོ་རྗེ་སེམས་དཔའ་སེམས་ཅན་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པའི་དམ་ཚིག་ནི་འདི་ཡིན་ནོ་ཞེས་དང་པོའི་སེམས་དཔའ་ནས་བརྩམས་ཏེ། དེ་བཞིན་གཤེགས་པའི་བར་དུ་ཁྱེད་ཀྱིས་ང་ལ་བརྙས་པར་མི་བྱ་ཞིང་ནམ་ཡང་ཡོངས་སུ་སྤང་བར་མི་བྱའོ། །འདི་ལ་བརྙས་པར་གྱུར་ན་འདི་དག་གང་ཡིན་ཁྱོད་ལ་འབྱུང་བར་མི་འགྱུར་རོ། །སྙིང་པོ་ཡང་ཅི་འདོད་པར་བྱིན་ལ་ཞེས་བྱ་བ་ནི་དབང་བསྐུར་བ་ཐམས་ཅད་ཀྱིས་དབང་བསྐུར་ལ་དེ་རྣམས་ཇི་ལྟ་བ་བཞིན་དུ་ཡང་དག་པར་མཆོད་ནས་དེ་རང་གིས་མཉེས་པར་བྱ་བའི་ཡི་དམ་ལྷའི་སྙིང་པོ་སྦྱིན་པར་བྱའོ། །དེ་བྱིན་ནས་ཀྱང་ཕྱག་རྒྱ་བཞིའི་ཡེ་ཤེས་བསླབ་པར་བྱའོ། །བསྒྲུབས་ནས་ཞེས་བྱ་བ་ནི་སྙིང་པོ་བྱིན་ནས། ཕྱག་རྒྱ་བཞིའི་ཡེ་ཤེས་བསླབས་ལ་རང་གི་ལྷའི་རྣལ་འབྱོར་འདི་ལྟར་གྱིས་ཤིག་ཅེས་བསླབ་པར་བྱའོ། །དེ་ནས་ཡེ་ཤེས་སེམས་དཔའ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ནས་མདུན་དུ་ཇི་ལྟ་བ་བཞིན་དུ་ཇི་ལྟ་བ་བྱེད་དུ་བཅུག་ལ་དེ་རང་གི་ལུས་ལ་གཞུག་པ་བསྟན་པའི་རྗེས་ཐོགས་ཉིད་ལ། ཡེ་ཤེས་སེམས་དཔའ་དང་ལྷན་ཅིག་གཅིག་ཏུ་གྱུར་པར་གྱིས་ཤིག་ཅེས་བྱ་བས་བསྒྲུབས་ལ་ཆོ་ག་ཐམས་ཅད་དེ་ལ་བསྟན་པར་བྱའོ། །རང་གི་ལྷག་པའི་ལྷའི་དབང་བསྐུར་བས་དབང་བསྐུར་ཏེ་ཞེས་བྱ་བ་ནི། སྙིང་པོ་བྱིན་པ་གང་ཡིན་པ་འདི་ནས་བརྩམས་ཏེ་ཕྱག་རྒྱ་བཞི་ལ་སོགས་པ་སྦྱིན་པ་སློབ་མ་ལ་བརྗོད་པ་དེ་རང་གི་ལྷའི་དབང་བསྐུར་བ་ལ་སོགས་པས་དབང་བསྐུར་ནས་སྦྱིན་པར་བྱའོ་ཞེས་བྱ་བའི་དོན་ཏེ། །མཚན་མ་དེ་ལག་པ་གཉིས་སུ་བྱིན་ལ་ཞེས་བྱ་བ་ལ་སོགས་པ་ལ་རང་གི་ལྷའི་ཆུ་ཡིས་དབང་བསྐུར་བ་དང༌། ཕྱག་རྒྱ་དང་ཅོད་པན་གྱིས་དབང་བསྐུར་ལ། རྡོ་རྗེ་ལ་སོགས་པ་རང་རང་གི་ལྷའི་མཚན་
མའི་དབང་བསྐུར་བའི་སྔགས་ཀྱིས་སློབ་མའི་ལག་པ་གཉིས་སུ་སྦྱིན་པར་བྱའོ། །བྱིན་ནས་དེ་ལ་ཧཱུཾ་ཞེས་བྱ་བ་ལ་སོགས་པའི་སྙིང་པོ་འདིས། རང་གི་རིགས་ཀྱི་མིང་གི་དབང་བསྐུར་བས། དབང་བསྐུར་བར་བྱའོ། །དེ་ནས་ཕྱག་རྒྱ་བཅིང་བ་ཇི་ལྟ་བ་བཞིན་དུ་བསླབ་པར་བྱའོ། །དེའི་རྗེས་ལ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏི་སྟྭཾ་ཞེས་དམ་ཚིག་ཆེན་པོའི་དེ་ཁོ་ན་ཉིད་འདོན་དུ་བཅུག་ལ་འདི་བཤད་པར་བྱའོ། །དམ་ཚིག་ཆེན་པོ་ནི་སེམས་དཔའ་ཆེན་པོ་ལ་བྱའོ། །དེ་ཁོ་ན་ཉིད་ནི་རབ་ཏུ་དགའ་བ་ཡིན་པར་བཤད་དེ། བཅོམ་ལྡན་འདས་རབ་ཏུ་དགའ་བ་ལ་བསྐུལ་ན་འདོད་པ་ཐམས་ཅད་དེ་དངོས་གྲུབ་ཀྱི་དམ་པ་མྱུར་དུ་འགྲུབ་པར་འགྱུར་རོ། །དེ་བས་ན་དམ་ཚིག་ཆེན་པོའི་དེ་ཁོ་ན་ཉིད་བརྗོད་པར་བྱའོ། །བཅོམ་ལྡན་འདས་འདི་ནི་ཁམས་གསུམ་གྱི་དབང་ཕྱུག་སྟེ། ཐོག་མའི་སེམས་དཔའ་ཡིན་པས་འདོད་པ་ཀུན་གྱི་དབང་ཕྱུག་གོ །མ་དུལ་བ་རྣམས་ལ་རྡོ་རྗེ་བསྙེམས་མ་འཆང་བའི་མཆོག་ཡིན་ཏེ། དེ་བས་ན་རྡོ་རྗེ་བསྙེམས་མ་དོན་གྱིས་བརྗོད་པར་བྱའོ། །བཅོམ་ལྡན་འདས་ནི་ཐོག་མ་དང་ཐ་མ་མེད་པ་ཀུན་དུ་བཟང་པོའོ། །འདོད་པ་ནི་འགྲོ་བ་ཀུན་གྱི་བདག་པོའོ། །ཕྱག་ན་རྡོ་རྗེ་ནི་རྡོ་རྗེ་བསྙེམས་མའི་བདག་པོའོ། །དེ་རབ་ཏུ་དགའ་བ་འདིའི་སྦྱོར་བས་རྡོ་རྗེ་འཆང་བ་སྣ། དེ་བཞིན་གཤེགས་པ་ཐམས་ཅད་ཐུགས་འབྱུང་བར་མི་བྱེད་དོ། །གང་གི་ཚེ་རབ་ཏུ་དགའ་བས་བསྟོད་པར་བྱ་ཞིང་རྡོ་རྗེ་སེམས་དཔའ་འདི་ནི་བདེ་བ་ཆེན་པོ་ཡིན་པ་དེས་ན་ཉོན་མོངས་པ་མི་མངའ་བར། བདེ་བ་ཉིད་ཀྱིས་སངས་རྒྱས་ཀྱི་བྱང་ཆུབ་ལ་སོགས་པའི་དངོས་གྲུབ་ཐམས་ཅད་མྱུར་དུ་ཐོབ་པར་འགྱུར་ཏེ། དེས་ན་རབ་ཏུ་བདེ་བའི་ཕྱག་རྒྱ་འདི་བསྟོད་དེ་འཇོག་ཅིག །བཅོམ་ལྡན་འདས་གཡོན་པ་བསྙེམས་པ་དང་བཅས་པ་འདིས་གཡོན་ཕྱོགས་སུ་སྤྱོད་པའི་སེམས་ཅན་རྣམས་དབང་དུ་བྱེད་ཅིང་མགུ་བར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། འགྲོ་བ་རྣམས་དགའ་བའི་སྦྱོར་བས་མགུ་བར་བྱེད་པར་མ་ཟད་ཀྱི་ཞི་བར་བྱ་བའམ་ཞི་བ་ཉིད་ཀྱིས་འདུལ་བར་མི་ནུས་པ་དག་ལ་འདིར་བསྙེམས་པ་ལ་ཡང་སྦྱོར་རོ། །བསྙེམས་པ་འབའ་ཞིག་གིས་འདི་དག་འདུལ་བར་ནུས་པ་མ་ཡིན་གྱི་དེའི་དོན་དུ་བཅོམ་ལྡན་འདས་རྡོ་རྗེ་
བསྙེམས་མའི་བདག་པོར་གྱུར་ནས་འཇིག་རྟེན་གྱི་ཁམས་ཐམས་ཅད་དུ་གདུལ་མི་ནུས་པ་དག་ཀྱང་འདུལ་བར་སྤྱོད་པ་ཡིན་ནོ། །དེ་ལྟར་ཕྱག་རྒྱ་བཅིངས་པ་འདི། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བམ་ཧོཿ། སུ་ར་ཏ་སྟྭཾ། ཞེས་བྱ་བ་བརྗོད་པར་བྱའོ། །དེ་ནས་དེ་རྣམས་ཡིད་ལ་འདོད་པའི་དངོས་གྲུབ་ཐམས་ཅད་བདེ་བ་ཁོ་ནར་འབྱོར་ཅིང་ཐོབ་པར་འགྱུར་རོ། །འདི་དག་ནི་བཅོམ་ལྡན་འདས་རྡོ་རྗེ་སེམས་དཔའི་ཡན་ལག་ཡིན་ནོ། །འདི་ནི་བཅོམ་ལྡན་འདས་ཀྱི་འདོད་ཆགས་ཀྱི་ཡན་ལག་སྟེ། ཐུགས་མྱུར་དུ་འབིགས་པས་ན་སྙིང་པོའོ། །གཡོས་སུ་ནི་རབ་ཏུ་བདེ་བའི་སྦྱོར་བ་བདེ་བ་ཆེན་པོའོ། །རྒྱབ་ཏུ་ནི་རྩེ་བའི་འཆིང་བས་ཆུ་སྲིན་འདྲ་བ་ཡིན་པ་དེས་ན་འདི་ནི་ཆུ་སྲིན་གྱི་རྒྱལ་མཚན་ནོ། །གཡོན་དུ་ནི་བསྙེམས་མ་དབང་དུ་བྱེད་པ་ཡིན་ནོ། །འདི་དག་ནི་རབ་ཏུ་དགའ་བའི་མཆོད་པ་སྟེ་མེ་ཏོག་མ་ལ་སོགས་པའོ། །འདི་དག་ནི་སྒེག་མོ་ལ་སོགས་པའི་རྡོ་རྗེ་སྒེག་མོ་རྣམས་སོ། །འདི་དག་ནི་མིང་གིས་ཆགས་པར་བྱེད་པ་ལ་སོགས་པས་ཆགས་པའི་ལྕགས་ཀྱུ་ལ་སོགས་པ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བར་འཇུག་པ་དངོས་གྲུབ་ཐམས་ཅད་ཀྱི་བདེ་བ་རབ་ཏུ་གསོལ་བ་ཡིན་ཏེ་འདིས་ནི་སངས་རྒྱས་ཉིད་ཀྱང་ཐོབ་པར་གྱུར་ན། དངོས་གྲུབ་གཞན་ལྟ་སྨོས་ཀྱང་ཅི་དགོས། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་མཆོག་ཡིན་པའི་ཕྱིར་རོ། །དེ་ནས་སྙིང་པོ་བྱིན་ལ་དེ་ནས་ཕྱག་རྒྱ་བཅིངས་པ་བསླབ་པར་བྱའོ་ཞེས་བྱ་བ་ནི། དེ་ནས་ཕྱག་རྒྱ་ཆེན་པོ་བཅིང་པ་བསླབ་པར་བྱ་སྟེ། བསྙེམས་པ་དང་བཅས་པས་རྡོ་རྗེ་གསོར་ཞིང་ཊཀྐི་ཧཱུཾ་ཛཿཞེས་བྱ་བས་རྡོ་རྗེ་ཚིག་ཏུ་བརྗོད་པར་བྱའོ། །འདིས་དེ་བཞིན་གཤེགས་པ་ཐམས་ཅད་ཀྱི་རྗེས་སུ་བསྟན་པ་ལ་འཇུག་པར་འགྱུར་རོ། །དེ་ནས་རྡོ་རྗེ་དེ་རང་གི་སྙིང་གར་བསྟོད་པའི་ཚུལ་གྱིས་འཛིན་ཅིང་ཊཀྐི་ཛཿཧོཿཞེས་བརྗོད་པར་བྱའོ། །དེ་ནས་རྡོ་རྗེ་སེམས་དཔའི་སྐུ་དང་གསུང་དང་ཐུགས་སུ་རང་ཉིད་འགྱུར་རོ། །དེ་ནས་རྡོ་རྗེ་ཡིད་ལས་བྱུང་བ་ལ་སོགས་པའི་ཕྱག་རྒྱ་ཆེན་པོ་ཇི་ལྟར་བྲིས་པ་དང་རྗེས་སུ་མཐུན་པར་བསླབ་པར་བྱའོ། །ཇི་ལྟར་མངོན་པར་འདོད་པའི་མཆོད་པ་བྱས་ནས་ཞེས་བྱ་བ་ནི་དེ་ལྟར་སློབ་མ་འཇུག་པ་ལ་
སོགས་པའི་ཆོ་ག་རྗེས་སུ་སྤྱད་ནས་སློབ་དཔོན་གྱིས་ཇི་ལྟར་མངོན་པར་འདོད་པས་དཀྱིལ་འཁོར་པ་ཐམས་ཅད་ལ་མཆོད་པར་བྱའོ། །དེ་བྱས་ནས་སློབ་མ་ཡང་བྱེད་དུ་གཞུག་གོ །དེ་ནས་སློབ་མ་ཐམས་ཅད་ཁ་ཟས་དང་གནས་པ་ཐམས་ཅད་ཀྱིས་ཚིམ་པར་བྱ་བ་དང༌། རང་ཉིད་ཀྱིས་ཕྱག་རྒྱ་དང༌། ཕྱག་རྒྱའི་ལན་དང་གར་གྱི་མཆོད་པ་བྱས་ཏེ་སློབ་དཔོན་རང་གིས་རྡོ་རྗེ་ཡིད་ལས་བྱུང་བའི་ལས་ཀྱི་ཕྱག་རྒྱ་གར་བྱ་བའི་ཚུལ་གྱིས་བཅིང་བར་བྱའོ། །དེ་ནས་ནི་རྡོ་རྗེ་བསྙེམས་མའི་ལས་ཀྱི་ཕྱག་རྒྱའོ། །དེ་ནས་ནི་རྡོ་རྗེ་ཀི་ལི་ཀི་ལའི་ཕྱག་རྒྱའོ། །དེ་ནས་ནི་རྡོ་རྗེ་དྲན་པའི་ཕྱག་རྒྱའོ། །དེ་ནས་ནི་རྡོ་རྗེ་སྦྲང་རྩིའི་ཕྱག་རྒྱའོ། །དེ་ནས་ནི་རྡོ་རྗེ་དགུན་གྱི་ཕྱག་རྒྱའོ། །དེ་ནས་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །དེ་ནས་ནི་རྡོ་རྗེ་སྟོན་གྱི་ཕྱག་རྒྱའོ། །དེ་ནས་ནི་རྡོ་རྗེ་སྒེག་མོའི་ཕྱག་རྒྱའོ། །དེ་ནས་ནི་རྡོ་རྗེ་གར་མའི་ཕྱག་རྒྱའོ། །དེ་ནས་ནི་རྡོ་རྗེ་བཞད་མའི་ཕྱག་རྒྱའོ། །དེ་ནས་ནི་རྡོ་རྗེ་གླུ་མའི་ཕྱག་རྒྱའོ། །དེ་ནས་ནི་རྡོ་རྗེ་ལྕགས་ཀྱུའི་ཕྱག་རྒྱའོ། །དེ་ནས་ནི་རྡོ་རྗེ་འབེབས་པའི་ཕྱག་རྒྱའོ། །དེ་ནས་ནི་རྡོ་རྗེ་ཞགས་པའི་ཕྱག་རྒྱའོ། །དེ་ནས་ནི་རྡོ་རྗེ་ལྕགས་སྒྲོག་གི་ཕྱག་རྒྱ་བཅིངས་བར་བྱའོ། །དེ་ནས་དཔལ་རྡོ་རྗེ་སེམས་དཔའི་ཕྱག་རྒྱ་བཅིངས་ན་འགྲུབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་ཕྱག་རྒྱ་དང་ཕྱག་རྒྱའི་ལན་གྱི་གར་གྱི་མཆོད་པས་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ནས་དེའི་རྗེས་ཐོགས་ཉིད་ལ་སློབ་མ་ཐམས་ཅད་སླར་བཏང་ནས་འདི་སྐད་ཅེས་བརྗོད་པར་བྱའོ། །ཇི་སྐད་བརྗོད་པར་བྱ་ཞེ་ན་རབ་ཏུ་དགའ་བ་ཞེས་བྱ་བ་ལ་སོགས་པ་སྨོས་ཏེ་རབ་ཏུ་དགའ་བ་ནི་བཤད་ཟིན་ཏོ། །དེ་ལ་རག་ལས་པ་ནི་འབྲེལ་ཅིང་རག་ལུས་པ་སྟེ། དེ་ནས་རྡོ་རྗེ་སེམས་དཔའ་ནས་བརྩམས་ཏེ་རྡོ་རྗེ་འབེབས་པའི་མཐར་ཐུག་པའི་ཐོག་མཐའ་དེ་ལའོ། །འགྲོ་བ་འདི་ཀུན་རྒྱུ་བ་སྟེ།། ཞེས་བྱ་བ་ནི་སྐྱེ་ཞིང་འགྲོ་བས་ན་སྐྱེ་འགྲོའོ། །འདི་ཞེས་བྱ་བ་ནི་མངོན་དུ་གྱུར་པའོ། །ཐམས་ཅད་ནི་མ་ལུས་པའོ། །དཀྱིལ་འཁོར་གྱི་ལྷ་རྣམས་ཀྱི་ངོ་བོ་ཡིན་པར་བསྟན་པའི་ཕྱིར་རྒྱུ་བ་ཞེས་བྱ་བ་གསུངས་ཏེ་སེམས་དང་བཅས་པའོ། །དེ་ཡང་འགྲོ་བ་སེམས་དང་བཅས་པ་འདི་དག་
ཐམས་ཅད་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་ཉིད་ནས་རྡོ་རྗེ་འབེབས་པའི་ཕྱག་རྒྱའི་ངོ་བོ་ཉིད་ཀྱི་བར་ཡིན་ཏེ་རབ་ཏུ་དགའ་བ་ལ་རག་ལས་བས་ན་ཞི་བ་བྱང་ཆུབ་ཀྱི་སེམས་ཀྱི་ཁ་ན་ལུས་པ་ཡིན་ནོ་ཞེས་བྱ་བའི་ཐ་ཚིག་གོ །གང་གི་ཕྱིར་དེ་ལྟར་ཡིན་པ་དེས་ན་རྡོ་རྗེར་མཛོད་ཅེས་བྱ་བ་ནི་མི་ཕྱེད་པར་མཛོད་ཅིག་པའོ། །སེམས་དཔའ་ཆེན་པོ་ཞེས་བྱ་བ་ནི་བྱང་ཆུབ་ཆེན་པོའི་ངོ་བོ་ཅིའི་ཕྱིར་ཞེ་ན། སླར་ཡང་གཤེགས་པར་མཛད་དུ་གསོལ་ཞེས་བྱ་བ་ཡིན་ནོ། །འདི་ནི་ཇི་སྲིད་ཁྱེད་ལ་བདག་སྤྱན་འདྲེན་པར་བགྱིད་པ་དེ་སྲིད་ཀྱི་བར་དུ་གཤེགས་པར་མཛོད་ལ། སླར་སྤྱན་འདྲེན་པ་དེའི་ཚེ་ན་མི་ཕྱེད་བའི་ཐུགས་སུ་མཛད་དེ་གཤེགས་པར་མཛོད་ཅིག་ཅེས་པའོ། །འདི་སྐད་སྟོན་ཏེ་གང་གི་ཕྱིར་བྱང་ཆུབ་ཀྱི་སེམས་དང་འབྲེལ་པ་ཡིན་པས་འགྲོ་བ་འདི་དག་ཐམས་ཅད་ནི། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་ངོ་བོ་ཉིད་ཡིན་པའི་ཕྱིར། རྡོ་རྗེ་འབེབས་པའི་མཐར་ཐུག་པ་ཡིན་ནོ། །དེ་བས་ན་ཁྱེད་ལ་རག་ལུས་བའི་ཕྱིར་བདག་ཅག་རྣམས་ལ་རྗེས་སུ་བརྩེ་བའི་དོན་དུ་ཁྱེད་སླར་ཡང་གཤེགས་པའི་སྐད་དུ་མི་ཕྱེད་པའི་ཐུགས་སུ་མཛོད་ཅིག །ཁྱེད་གཤེགས་པས་སེམས་དཔའ་འདི་དག་ཐམས་ཅད་བྱོན་ནས་བདག་གི་བསམས་པ་ཐམས་ཅད་རྫོགས་པར་མཛད་པར་འགྱུར་རོ་ཞེས་སྟོན་ཏོ། །དེ་ནས་སྙིམ་པའི་མེ་ཏོག་གཏོར་ལ་དབྱུང་བར་བྱའོ། །དེ་ལྟར་བཅོམ་ལྡན་འདས་གཤེགས་པའི་ཕྱིར་སྤྱི་བོར་སྙིམ་པའི་མེ་ཏོག་གཏོར་བས་བསྐུལ་བར་བྱ་ཞིང༌། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭམ་མུཿཞེས་བརྗོད་དོ། །དེས་ནི་བཅོམ་ལྡན་འདས་འཁོར་དང་བཅས་པ་གཤེགས་སུ་གསོལ་བར་འགྱུར་རོ། །དེ་ལྟར་སྙིམ་པའི་མེ་ཏོག་གཏོར་བས་ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ཟློས་ཤིང་རང་ཉིད་ཀྱིས་དཀྱིལ་འཁོར་འཕྱག་པར་བྱའོ། །གལ་ཏེ་སློང་བ་ཡོད་ན་ཕྱེ་མ་དེ་ལས་རི་ལུ་བྱས་ཏེ་དཀྱིལ་འཁོར་རྣམས་ལ་ལན་བརྒྱ་རྩ་བརྒྱད་བཟླས་ལ་གཞག་པར་བྱ་སྟེ། དེས་དབང་དུ་བྱ་བ་ལ་སོགས་པའི་ལས་ཐམས་ཅད་འགྲུབ་པར་འགྱུར་རོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །གང་ཞིག་རི་མོའི་ལས་ལ་མཁས་པར་གྱུར་པ་དེས་ནི་རྡོ་རྗེ་ལ་སོགས་པ་མཚན་མའམ་ཕྱག་རྒྱ་
ལ་སོགས་པ་གཞག་པར་བྱའོ། །གང་ཞིག་མཚན་མའི་ཕྱག་རྒྱ་ལ་སོགས་པ་ཡང་དཀྱིལ་འཁོར་དུ་བྲི་བར་མི་ནུས་པ་དེས་ནི་ལྷ་རྣམས་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ལ། དེ་རྣམས་ཀྱི་ཆོས་དང་ལས་དང་ཕྱག་རྒྱ་ཆེན་པོ་བཅིང་བར་བྱའོ། །ཕྱག་རྒྱའི་ཆོ་ག་རྒྱས་པ་ཞེས་བྱ་བ་ནི་བྲི་བའི་ཕྱག་རྒྱ་རྣམས་ཀྱིས་དཀྱིལ་འཁོར་བརྟག་པའི་ཆོ་ག་གསུངས་པ་གང་ཡིན་པ་འདིའི་མཚན་མའི་ཕྱག་རྒྱ་རྣམས་དང་ལག་པའི་ཕྱག་རྒྱ་རྣམས་ཀྱིས་བྱ་བ་དེ་ནི་ཕྱག་རྒྱའི་ཆོ་ག་རྒྱས་པ་ཞེས་བྱའོ། །དེ་ལྟར་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། ཕྱག་རྒྱའི་ཆོ་ག་རྒྱས་པའོ་ཞེས་བྱ་བའི་བར་དུ་བསྟན་པས། སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །ཡང་འདིས་བདེ་བླག་ཏུ་རྟོགས་པར་བྱ་བའི་ཕྱིར། བརྗོད་པར་བྱ་སྟེ། རེ་ཞིག་དང་པོར་ཇི་སྐད་དུ་བཤད་པའི་ཆུའི་ཁྲུས་སམ་སེམས་ཀྱིས་ནང་གི་ཁྲུས་བྱས་ལ་ལྷའི་ཁང་པར་ཇི་ལྟ་བ་བཞིན་དུ་ཞུགས་ནས་འདུག་པར་བྱའོ། །དེ་ནས་སྔར་བཤད་པའི་ཆོ་གས་བདག་བསྲུང་བ་དང་བགེགས་བསལ་བ་ལ་སོགས་པ་བྱའོ། །དེ་ནས་མཆོད་ཡོན་ལ་བཟླས་པའི་བར་གྱི་ཆོ་ག་རྗེས་སུ་སྤྱད་ལ། རྟག་ཏུ་རྡོ་རྗེ་དྲིལ་འཆང་ཞིང༌། །ཐམས་ཅད་འགུགས་པའི་མཆོད་པ་སྟེ། །བདག་བྱིན་བརླབས་སོགས་སྒྲུབ་པ་ཡིས། །དངོས་གྲུབ་མཆོག་ནི་བསྒྲུབ་པར་བྱ། །ལུགས་མ་འམ་འབུར་དུ་བརྐོས་པའམ། །བྱས་པའམ་ཡང་ན་བྲིས་པ་ཡིས། །འཁོར་ལོ་དང་པོར་རབ་བཞག་ནས། །དེ་ཡི་མདུན་དུ་བསྒྲུབ་པར་བྱ། །སྔར་བཤད་པའི་རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་སྤྲུལ་ལ་མེ་ཏོག་ལ་སོགས་པས་ཡང་དག་པར་མཆོད་དེ། ཨོཾ་སརྦ་ཏ་ཐཱ་ག་ཏཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཱམ་ཀ་རོ་མི་ཞེས་བྱ་བས་བཅོམ་ལྡན་འདས་ལ་ཕྱོགས་ཐམས་ཅད་ནས་དཀྱིལ་འཁོར་ལྔ་པས་ཕྱག་བྱས་ལ་ཕྱག་བཞི་ལ་སོགས་པའི་ཆོ་ག་སྤྱད་ལ་སྔོམ་པ་གཟུང་བར་བྱའོ། །དེའི་རྗེས་ལ་ཨ་ནྱོ་ནྱ་ཨ་ནུ་ག་ཏ་སརྦ་དྷ་རྨཱ་ཞེས་བྱ་བས་ཐལ་མོ་ཁོང་སྟོང་བཅིང་བར་བྱའོ། །དེ་ནས་པ་ར་སྦ་ར་ཨ་ནུ་པྲ་བིཥྚ་སརྦ་དྷ་རྨཱ་ཨཉྫ་ལི་ཞེས་བརྗོད་ཅིང་རྡོ་རྗེ་ཐལ་མོ་
བཅིང་བར་བྱའོ། །དེ་ནས་ཨ་ཏྱནྟ་ཨ་ནུ་པྲ་བིཥྚ་སརྦ་དྷརྨཱ་བཛྲ་བནྡྷ་ཞེས་བརྗོད་ཅིང་ཐལ་མོ་བསྡམས་པ་བཅིང་བར་བྱའོ། །དེ་ནས་བཛྲ་བནྡྷ་ཏྲཊ་ཅེས་བརྗོད་ཅིང་རྡོ་རྗེ་བསྡམས་པ་སྙིང་གར་ལན་གསུམ་དྲལ་བར་བྱའོ། །རྡོ་རྗེ་དབབ་པའི་དམ་ཚིག་གི་ཕྱག་རྒྱ་བཅིངས་ལ་བཛྲ་ཨཱ་བེ་ཤ་ཨ་ཞེས་བྱ་བས་བདག་ཉིད་ལ་དབབ་པར་བྱའོ། །དེ་ནས་ཏིཥྛ་བཛྲ་ཞེས་པ་ལ་སོགས་པས་རྡོ་རྗེ་དབབ་པའི་དམ་ཚིག་གི་ཕྱག་རྒྱས་རང་གི་སྙིང་གར་དགྲོལ་བར་བྱའོ། །དེ་ནས་བཛྲ་མུཥྚི་ཞེས་བརྗོད་ཅིང་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་བཛྲ་སནྡྷི་བཾ་ཞེས་ལན་གསུམ་བཟླ་བར་བྱའོ། །དེ་ནས་ཡི་གེ་ཧཱུཨཾ་ཟློས་ཤིང་དང་པོའི་རྡོ་རྗེ་བཅིང་བར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་བཅིང་བ་འགྲུབ་ཅིང་རང་གི་ལས་རྣམས་བྱེད་པར་འགྱུར་རོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་གྱི་རང་གི་དམ་ཚིག་གི་ཕྱག་རྒྱ་རྣམས་ལ་ས་མ་ཡ་སྟྭམ་ཞེས་བརྗོད་ཅིང༌། བཅིངས་ལ་དེ་རྣམས་ཀྱི་རང་གི་སྙིང་པོ་ལན་གསུམ་བརྗོད་དེ། ཨོཾ་བཛྲ་མུཿཞེས་བྱ་བས་རང་གི་སྙིང་གར་གཞུག་པར་བྱའོ། །དེ་ནས་ཨོཾ་སརྦ་པཱ་པཱ་ཀཪྵ་ཎ་བི་ཤྭ་དྷ་ན་བཛྲ་ས་མ་ཡ་ཧཱུཾ་ཕཊ་ཅེས་བྱ་བས་ཕྱག་རྒྱ་དང་ལྡན་པས་སྡིག་པ་ཐམས་ཅད་དགུག་པར་བྱའོ། །དེ་ནས་འདིའི་ཕྱག་རྒྱ་ནི། །རྡོ་རྗེའི་ཕྱག་རྒྱ་གཉིས་ནང་དུ། །མཛུབ་མོ་གཉིས་ནི་བཅིངས་ནས་སུ། །ལེགས་པར་གྱེན་དུ་འཕངས་པ་ནི། །ལྟུང་བ་སློང་བའི་དམ་པའོ། །ཞེས་བྱ་བ་ཡིན་ནོ། །དེའི་རྗེས་ལ་ཨོཾ་བཛྲ་པཱ་ཎི་བི་སྥོ་ཊ་ཡ་སརྦ་ཨ་པ་ཡ་བནྡྷ་ནི་པྲ་མོ་ཀྵ་ཡ་སརྦ་པཱ་པ་སརྦ་ཨ་པ་ཡ་ག་ཏི་བྷྱཿ། སརྦ་ཏྭན་སརྦ་ཏ་ཐཱ་ག་ཏ་བཛྲ་ས་མ་ཡ་ཏྲཊ་ཅེས་བྱ་བའི་དིའི་ཕྱག་རྒྱ་དང་ལྡན་པས་སྡིག་པ་ཐམས་ཅད་དྲལ་བར་བྱའོ། །རྡོ་རྗེ་བཅིངས་པ་བསྡམས་བྱས་ཏེ། །གུང་མོ་གཉིག་སྦྱར་ནས་ནི། །ཐ་མ་བཞི་ནི་རྩེ་མོར་སྦྱར། །སྡིག་པ་འཇོམས་པར་གྲགས་པ་ཡིན། །དེ་ནས་རང་གི་སྙིང་གར་གནས་བའི་དང་པོའི་དང་པོའི་རྡོ་རྗེའི་དབུས་སུ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ཡིད་ཀྱིས་བྲིས་ལ་དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་དེ་ཉིད་ཡིད་ལ་ཟློས་ཤིང་དེ་ཉིད་དབྱངས་ཀྱི་ཡི་གེ་བཅུ་དྲུག་
དང་བཅས་པ་ལས་རང་གི་སེམས་ཀྱི་གཟུགས་བརྙན་ཟླ་བའི་དཀྱིལ་འཁོར་ལྟ་བུར་བསམ་པར་བྱའོ། །དེའི་སྟེང་དུ་སྙིང་པོ་དེ་ཉིད་ཡི་གེ་ཀ་ལ་སོགས་པ་དང་བཅས་པ་ལས་ཟླ་བའི་དཀྱིལ་འཁོར་གཉིས་པ་བསམ་པར་བྱའོ། །དེ་ནས་སྙིང་པོ་དེ་ཉིད་ཟློས་ཤིང་ཟླ་བའི་དཀྱིལ་འཁོར་དེ་དང་པོའི་རྡོ་རྗེར་བསམ་པར་བྱའོ། །དེ་ནས་དེའི་དབུས་སུ་སྙིང་པོ་དེ་ཡིད་གྱིས་བསམས་ལ་དེ་ཉིད་ཟློས་ཤིང་རྡོ་རྗེའི་ང་རྒྱལ་བསྒོམས་ལ་རྡོ་རྗེ་སེམས་དཔའི་དཀྱིལ་འཁོར་ཀྱི་ལྷ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པར་རྡོ་རྗེ་ལས་ཕྱུང་ལ་དེ་རྣམས་ཀྱིས་ནམ་མཁའི་ཁམས་ཐམས་ཅད་བཀང་ལ་སེམས་ཅན་ཐམས་ཅད་ཀྱི་དོན་བྱས་ནས་ཡང་རྡོ་རྗེ་དེར་ཡིད་ཀྱིས་བཅུག་སྟེ། སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་དེ་རྡོ་རྗེ་སེམས་དཔའི་བདག་ཉིད་དུ་བསམ་ཞིང་བཛྲ་སཏྭ་ཧཾ་ཞེས་ཀྱང་བཟླ་བར་བྱའོ། །དེ་ནས་བསྙེམས་པ་དང་བཅས་པས། རྡོ་རྗེ་གསོར་ལ་ཡང་བཛྲ་སཏྭ་ཧཾ་ཞེས་བརྗོད་པར་བྱ་ཞིང་དེ་ཡང་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་གཟུགས་བརྙན་དང་འདྲ་བར་ངེས་པར་བྱས་ལ་མ་ཧཱ་ས་མ་ཡ་སཏྭ་ཧཾ་ཞེས་བརྗོད་པར་བྱའོ། །དེ་ནས་དང་པོའི་རྡོ་རྗེ་བཅིངས་ལ། མ་ཧཱ་ས་མ་ཡ་ཧཾ་ཞེས་བརྗོད་ལ། དེ་ཉིད་ཀྱིས་སྙིང་ག་དང༌། དབྲལ་བ་དང༌། ལྐོག་མ་དང༌། སྤྱི་བོར་བྱིན་གྱིས་བརླབ་ཅིང་ས་མ་ཡ་སཏྭ་ཨ་དྷི་ཏིཥྛ་ས་མཱཾ་ཞེས་ཀྱང་བརྗོད་པར་བྱའོ། །དེ་ནས་བསྙེམས་པ་དང་བཅས་པས་ལུས་དྲང་པོར་གཞག་ལ་བསྙེམས་པ་དང་བཅས་པ་ཉིད་ཀྱིས་རྡོ་རྗེ་གསོར་ཞིང་ཊཀྐི་ཧཱུཾ་ཛཿཞེས་བརྗོད་པར་བྱའོ། །དེ་ནས་རྡོ་རྗེ་སྙིང་གར་བསྟོད་པའི་ཚུལ་གྱིས་འཇོག་ཅིང་ཊཀྐི་ཛཿཧོ་ཞེས་བརྗོད་པར་བྱའོ། །དེ་ནས་རང་གི་སྙིང་པོ་བཟླ་བར་བྱ་སྟེ། འདིར་ཕྱག་རྒྱ་ཆེན་པོ་བཅིང་བ་འདིས་བདག་ལ་བྱིན་གྱིས་བརླབས་པ་ཡིན་ལ་དེ་བས་ན་འདིས་རྣལ་འབྱོར་པ་རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེའི་ངོ་བོ་ཉིད་དུ་འགྱུར་རོ། །དེ་ནས་ནམ་མཁའ་དང་མཉམ་པའི་སྦྱོར་བས་རང་གི་ལུས་ལ་ཡིད་ཀྱི་ནང་དུ་ཞུགས་ལ། རང་གི་སྙིང་གར་ཟླ་བའི་དཀྱིལ་འཁོར་ལ་རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་སྤྲུལ་ལ། འཇུག་པའི་ཆོ་ག་གཉིས་པས་ཇི་ལྟ་བ་བཞིན་དུ་ཞུགས་ནས་རང་གི་སྤྱི་བོར་མེ་ཏོག་
གི་ཕྲེང་བ་དོར་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་གྱིས་ཆོ་ག་ཇི་ལྟ་བ་བཞིན་དུ་སྤྱད་ལ་དཀྱིལ་འཁོར་དེ་རང་གི་ཟླ་བར་ཞུ་ནས་དེ་དང་གཅིག་ཏུ་གྱུར་བར་བསམས་ནས། རང་གི་ལུས་ལ་རང་གི་ལྷའི་གནས་རྣམས་སུ་ཡི་གེ་ཧྲཱིཿལས་སྣ་ཚོགས་པདྨ་བསྐྱེད་ལ་གཞིའི་ལུས་ཀྱི་རང་གི་ལྷའི་གནས་སུ་གཞག་སྟེ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏེ་སྟྭཾ་ཨ་ཞེས་བརྗོད་ལ། གཞིའི་ལུས་ཀྱི་ཕྱི་རོལ་དུ་སྣ་ཚོགས་པདྨའི་སྟེང་དུ་དད་པོའི་རྡོ་རྗེ་ཁ་དོག་དམར་པོ་བསྐྱེད་པར་བྱའོ། །དེ་ནས་རྡོ་རྗེའི་དབུས་སུ་སྔགས་ཡིད་ཀྱིས་བྲིས་ལ་བཛྲ་ཧཾ་ཞེས་དེའི་ང་རྒྱལ་བསྒོམ་པར་བྱའོ། །དེ་ནས་སྔགས་དེ་ཡིད་ཀྱིས་བརྗོད་ལ་བཛྲ་སཏྭ་ཧཾ་ཞེས་བྱ་བས་རྡོ་རྗེ་དེ་རྡོ་རྗེ་སེམས་དཔའི་བདག་ཉིད་དུ་བསྒོམ་པར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ་གཞིའི་ལུས་ལ་ཡིད་ཀྱིས་ཨཱ་བཛྲ་བནྡྷ་ཞེས་བྱ་བས་རང་གི་གནས་ན་གནས་པར་བྱའོ། །རང་གི་ལུས་ཀྱི་ཕྱི་རོལ་གྱི་མདུན་དུ་སྣ་ཚོགས་པདྨའི་སྟེང་དུ་རྡོ་རྗེ་དྲིལ་བུ་བསྐྱེད་ལ། དེའི་དབུས་སུ་བཛྲ་གྷཎྚ་ཞེས་བྱ་བ་ཡིད་ཀྱིས་བྲིས་ལ། བཛྲ་གྷཎྚོ་ཧཾ་ཞེས་བྱ་བས་དྲིལ་བུའི་ང་རྒྱལ་བསྒོམ་པར་བྱའོ། །ཡང་བཛྲ་གྷཎྚོ་ཞེས་ཡིད་ལ་བརྗོད་ལ་བཛྲ་ཨཱ་བེ་ཤ་ཧཾ་ཞེས་བྱ་བས་རྡོ་རྗེ་དྲིལ་བུ་དེ་རྡོ་རྗེ་འབེབས་པའི་བདག་ཉིད་དུ་བསྒོམ་པར་བྱའོ། །དེ་ནས་རྡོ་རྗེ་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱས་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བས། རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་དུ་རང་གི་གཟུགས་བརྙན་ལ་རང་གི་དམ་ཚིག་གི་ཕྱག་རྒྱས་གོ་རིམས་འདིས་བསྒྲུབ་པར་བྱའོ། །དང་པོ་རྡོ་རྗེ་བཅིངས་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་དྲྀ་ཤྱ་ཞེས་བྱ་བ་དང་དཔལ་རྡོ་རྗེ་སེམས་དཔའ་བལྟ་བར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱིས་རང་གི་དམ་ཚིག་གི་ཕྱག་རྒྱ་བཅིངས་ལ། ཨཱ་བཛྲ་གྷཎྚ་དྲྀ་ཤྱ་ཞེས་བྱ་བས་རྡོ་རྗེ་འབེབས་པ་བལྟ་བར་བྱའོ། །དེ་ནས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་གཡས་པའི་མཛུབ་མོའི་ལྕགས་ཀྱུས་དཔལ་རྡོ་རྗེ་སེམས་དཔའ་ལ་སོགས་པ་རང་གི་ལུས་ལ་རང་གི་གནས་སུ་སྙིང་པོ་འདིས་གཞུག་པར་བྱའོ། ཨོཾ་མ་ཧཱ་སུ་ཁ་བཛྲ་སཏྭ་ཨ་ཧཱི་ཤཱི་གྷྲཾ་
མ་ཧཱ་སུ་ཁ་བཛྲ་གུ་ཧྱ་ས་མ་ཡ་མ་ནུ་སྨཱ་ར་པྲ་བུདྡྷ་ས་མ་ཡ་སྟྭཾ་དྲྀ་ཌྷ་སུ་ཏོ་ཥྱོ་ཨ་ནུ་རཀྟོ་སུ་པོ་ཥྱོ་མེ་བྷ་པ་ཨ་དྷི་ཏིཥྛ་བྷ་ག་བཱ་ན་ཨནྡྷི་ན་ཧི་ན་ས་ཏྭ་སིདྡྷི་དྷ་མ་མེ་མནྟྲ་པ་དེ་ཛཿཧཱུཾ་པཾ་ཧོཿ། ཡང་དང་པོའི་རྡོ་རྗེ་བཅིངས་ལ་ས་མ་ཡ་སྟྭཾ་ཞེས་བརྗོད་དེ་འོད་ཟེར་དམར་པོ་འཁྲུག་པ་འབྱར་བའི་འོད་ཀྱི་དཀྱིལ་འཁོར་ཅན་བསྐྱེད་ལ་ས་མ་ཡ་སྟྭཾ་ཛཿཧཱུཾ་བཾ་ཧོཿ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། མ་ཧཱ་སུ་ར་ཏ་སྟྭཾ་ཞེས་ལན་གསུམ་བཟླས་ལ། བཅོམ་ལྡན་འདས་རྡོ་རྗེ་སེམས་དཔའ་དང་བདག་ཉིད་གཅིག་ཏུ་གྱུར་པར་བསྒོམ་པར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱིས་དམ་ཚིག་གི་ཕྱག་རྒྱ་བཅིངས་ལ། ས་མ་ཡ་སྟྭཾ་ཞེས་བརྗོད་ཅིང་འོད་ཟེར་དམར་པོ་འབར་བ་འཁྲུག་པའི་འོད་ཀྱི་དཀྱིལ་འཁོར་བསྐྱེད་ལ་ས་མ་ཡ་སྟྭཾ་ཨ་ཧོ་ཛཿཧཱུཾ་བཾ་ཧོཿ། བཛྲ་གྷཎྚ། ཞེས་ལན་གསུམ་བཟླས་ལ། བཅོམ་ལྡན་འདས་རྡོ་རྗེ་འབེབས་པ་དང་བདག་ཉིད་གཅིག་ཏུ་གྱུར་པར་བསྒོམ་པར་བྱའོ། །དེ་ལྟར་ན་ཐམས་ཅད་བསྒྲུབ་པར་འགྱུར་རོ། །དེ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའ་ལ་སོགས་པ་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་སྔ་མ་བཞིན་དུ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་སངས་རྒྱས་ཐམས་ཅད་དེའི་ལུས་ལ་བཅུག་ལ་དམ་ཚིག་གི་ཕྱག་རྒྱ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་ཀྱང་རྒྱས་བཏབ་ལ། ཡང་དང་པོའི་རྡོ་རྗེ་བཅིངས་ནས་བཛྲ་སཏྭ་ཨ་དྷི་ཏིཥྛ་སཱ་མཱཾ་ཞེས་བྱ་བས་རང་གི་སྙིང་གའི་ཟླ་བ་ལ་དང་པོའི་རྡོ་རྗེ་རྩེ་ལྔ་པ་བསྐྱེད་པར་བྱའོ། །བཛྲ་རཏྣ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང་དབྲལ་བར་རྡོ་རྗེ་རིན་པོ་ཆེ། བཛྲ་དྷརྨྨ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང༌། ལྐོག་མའི་ཕྱོགས་སུ་རྡོ་རྗེ་པདྨ། བཛྲ་ཀརྨྨ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང༌། སྤྱི་བོར་སྣ་ཚོགས་རྡོ་རྗེ་བསམ་པར་བྱའོ། །དེ་ལྟར་བྱིན་གྱིས་བརླབས་པ་བྱས་ནས་སྔར་བཤད་པའི་དབང་བསྐུར་བའི་ཕྱག་རྒྱ་རྣམས་ཀྱིས་སངས་རྒྱས་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེའི་ཕྲེང་བའི་དབང་བསྐུར་བའི་ཅོད་པན་བསྐྱེད་ལ་ཡི་གེ་བརྒྱ་པས་བརྟན་པར་བྱའོ། །དེ་ནས་དང་པོའི་རྡོ་རྗེ་བདག་པོ་དང༌། མིང་གི་དབང་བསྐུར་བ་བླངས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་
ནས་རྡོ་རྗེ་མཚོན་ཆ་མ་ལ་སོགས་པ་བཅུ་གཉིས་ཀྱི་ལས་ཀྱི་ཕྱག་རྒྱས་བདག་ཉིད་ཡང་དག་པར་མཆོད་ལ། རོལ་པའི་རྡོ་རྗེ་དགའ་བའི་རྡོ་རྗེས་བཅོམ་ལྡན་འདས་ལ་ཕྱག་བྱས་ལ་དེ་ཁོ་ན་ཉིད་ཀྱིས་རྡོ་རྗེ་གཟུང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱའོ། །དེ་ནས་དམ་ཚིག་གསུམ་གྱི་རྡོ་རྗེའི་གླུའི་མཆོད་པ་བྱས་ལ་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ། །དེ་ལྟར་ཕྱག་རྒྱ་ཆེན་པོ་རབ་ཏུ་བསྒྲུབས་ནས་སྙིང་གར་རྡོ་རྗེ་འཁོར་ལོས་དེ་བཞིན་དུ་དཀྱིལ་འཁོར་སྤྲུལ་ལ་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། ས་མ་ཡ་སྟཾ་ཞེས་བྱ་བ་དང༌། དཔལ་རྡོ་རྗེ་སེམས་དཔའ་རང་གི་སྙིང་གར་གནས་པའི་རྡོ་རྗེ་སེམས་དཔའི་དཀྱིལ་འཁོར་གྱི་དབུས་སུ་གཞག་པར་བྱའོ། །དེ་བཞིན་དུ་བཛྲ་གྷཎྚ་ཞེས་བྱ་བ་དང་རང་གི་སྙིང་གར་གནས་པའི་རྡོ་རྗེ་སེམས་དཔའི་དཀྱིལ་འཁོར་གྱི་གནས་སུ་རྡོ་རྗེ་འབེབས་པའི་བར་དུ་གཞག་པར་བྱའོ། །དེ་ནས་ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ་྅ཧཾ། ཨོཾ་སརྦ་ས་མོ་ཧཾ། ཞེས་བྱ་བའི་སྙིང་པོ་གསུམ་ཟློས་ཤིང་རྡོ་རྗེའི་བདག་ཉིད་དུ་བསམས་ལ། བདེ་བ་ཆེན་པོ་རྡོ་རྗེ་རབ་མཆོག་དམ་ཚིག་པ་ཞེས་བྱ་བའི་དཀྱིལ་འཁོར་གྱི་རང་བཞིན་ནི་བདག་རང་ཉིད་ཡིན་ནོ་ཞེས་ང་རྒྱལ་པ་སྐྱེད་ལ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པའི་སྔགས་ལྷ་ཐམས་ཅད་ཀྱི་ཐུགས་ཀར་གནས་པའི་རྡོ་རྗེའི་དབུས་སུ་བསམས་ལ་ཡིད་ཀྱིས་རྡོ་རྗེའི་ཚིག་ཏུ་རབ་ཏུ་དགའ་བའི་རྡོ་རྗེ་ཚིག་ཟློས་ཤིང་ཐམས་ཅད་བདག་ཡིན་ནོ་ཞེས་ཇི་སྲིད་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །དེ་ནས་དེའི་དཀྱིལ་འཁོར་ཇི་ལྟ་བ་བཞིན་དུ་བྲིས་ལ་བསྒྲུབས་ན་རྡོ་རྗེ་འཆང་བ་ཉིད་འཐོབ་པར་འགྱུར་རོ། །ཡང་ན་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་རང་གི་སྙིང་པོ་ཟློས་པ་ལ་བརྩོན་པ་དང༌། གཡོན་པའི་མིག་ཏུ་ཊ་ལས་ཟླ་བ་སྟེ། གཡས་པར་མ་བཀོད་པ་ལས་ཉི་མ་བསམ། ཧྲི་ཡིས་མིག་འབྲས་བསྐལ་པའི་མེ་ལྟ་བུར་གནས་པ་འདིས་ནི་རྡོ་རྗེ་བལྟ་བར་བྱ། རྣལ་འབྱོར་པས་ཡིད་ཀྱིས་ནམ་མཁའི་ཕྱོགས་སུ་གནས་ལ་སྣོད་ཀྱི་འཇིག་རྟེན་གྱི་འོག་ཏུ་རླུང་གི་དཀྱིལ་འཁོར་ལ། ཡི་གེ་ཧཱུཾ་ལས་རྡོ་རྗེ་རྩེ་ལྔ་པ་འབར་བར་བསམས་ལ་རྡོ་རྗེ་དེའི་དབུས་སུ་ཡི་གེ་རཾ་བསམས་ཏེ། རྡོ་
རྗེ་དེ་རྡོ་རྗེ་མེ་ལྟ་བུའི་འོད་དང་ལྡན་པས་ཀུན་ནས་ཉོན་མོངས་པ་ཅན་གྱི་སངས་རྒྱས་ཀྱི་ཞིང་ཐམས་ཅད་ཐལ་བར་བྱས་པར་བསམ་པར་བྱའོ། །དེ་ནས་ཡི་གེ་ཁཾ་ལས་བཅོམ་ལྡན་འདས་རྣམ་པར་སྣང་མཛད་དཀར་པོ་ནམ་མཁའི་གཏོས་ཐམས་ཅད་ཁྱབ་པས་རྡོ་རྗེ་བདུད་རྩི་ཆུའི་རྒྱུན་གྱིས་སངས་རྒྱས་ཀྱི་ཞིང་ཚིག་པར་གྱུར་པར་བཀྲུས་ཏེ། འོ་མ་ཅན་གྱི་རྒྱ་མཚོ་ཆེན་པོ་དབའ་རླབས་ཀུན་དུ་འཁྲུག་པ་ཀུན་དུ་གང་བར་གནས་པར་བསམ་པར་བྱའོ། །དེ་ནས་ཡི་གེ་རའི་མེས་འོ་མ་ཅན་གྱི་རྒྱ་མཚོ་ཆེན་པོ་བསྐོལ་ལ། རའི་མེ་དང་རྒྱ་མཚོ་ཆེན་པོའི་དབུས་སུ་པདྨ་ཆེན་པོ་བསམ་པར་བྱའོ། །པདྨའི་རྩ་བར་ཡི་གེ་པྲ་ལས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་གསེར་གྱི་རུས་སྦལ་ཚད་མཐའ་ཡས་པ་དང༌། པདྨོའི་ཟླ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་ཡི་གེ་བྲ་གསེར་གྱི་མདོག་ཅན་དང༌། བཅོམ་ལྡན་འདས་རྣམ་པར་སྣང་མཛད་ཡི་གེ་ཁཾ་གི་གཟུགས་སུ་ནམ་མཁའི་ཕྱོགས་ནས་བྱོན་ནས་བཞུགས་པར་བསམས་ལ། པདྨ་དང་ཡི་གེ་པྲ་དང་ཡི་གེ་ཁཾ་གཅིག་ཏུ་བྱས་ལ་ཧཱུཾ་སུཾ་ཧཱུཾ་ཞེས་བརྗོད་དེ། དེ་ལས་རིའི་རྒྱལ་པོ་རི་རབ་ཟུར་བཞི་པ་རིན་པོ་ཆེ་སྣ་བཞིའི་རང་བཞིན་ཅན་རིན་པོ་ཆེ་སྣ་ཚོགས་ཀྱིས་བརྒྱན་པ་བསྐྱེད་པར་བྱའོ། །དེ་ནས་ཡང་ནམ་མཁའི་ཕྱོགས་སུ་འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་ལྷའི་གཞལ་ཡས་ཁང་དང་པོའི་རྡོ་རྗེ་བཅིངས་པ་ལ་ཧཱུཾ་ཞེས་བརྗོད་དེས་ལ་བཞག་ནས། ཨ་ནུ་རཱ་ག་ཡ་མི་ཧཱུཾ་ཞེས་བརྗོད་ལ། སྤྲུལ་ནས་ལྷ་ཐམས་ཅད་ཀྱི་གནས་སུ་ཡི་གེ་ཧྲིཿལས་སྣ་ཚོགས་པདྨའི་གདན་བསམས་ཏེ། ཨོཾ་བཛྲ་དྲྀ་ཌྷོ་མེ་བྷ་བ་རཀྵ་སརྦཾ་སྭཱ་ཧཱ་ཞེས་བརྗོད་དེ་རྡོ་རེ་བསྡམས་པ་བརྐྱང་བ་ས་ལ་བཞག་ནས་བྱིན་གྱིས་བརླབ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་ཇི་ལྟ་བ་བཞིན་དུ་འདུག་ལ་སྔ་མ་བཞིན་དུ་མངོན་པར་བྱང་ཆུབ་པ་རྣམ་པར་བསྒོམས་ནས་འོག་མིན་གྱི་གནས་ནས་བབས་ཏེ། འདོད་པའི་ཁམས་ཐམས་ཅད་ཀྱི་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ན། ཕྱག་ན་རྡོ་རྗེ་ལ་སོགས་པའི་བྱང་ཆུབ་སེམས་དཔའ་རྣམས་ཀྱིས་ཡོངས་སུ་བསྐོར་ནས་མདུན་གྱིས་བལྟས་ཏེ་གནས་སོ། །དེ་ནས་འདོད་ཆགས་ཆེན་པོ་ནི་
བྱང་ཆུབ་སེམས་དཔའ་ཆེན་པོའི་དངོས་གྲུབ་ཀྱི་མཆོག་གོ་ཞེས་བྱ་བ་ལ་སོགས་པ། ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་སྟོན་པས་དཀྱིལ་འཁོར་སྤྲུལ་པའི་ཕྱིར། རྡོ་རྗེ་སེམས་དཔའ་ཡང་དག་པར་སྤྲུལ་ཏེ། ཤེས་རབ་ཀྱི་ཕ་རོལ་ཏུ་ཕྱིན་པའི་དོན་ལ་ལྷག་པར་མོས་པའི་སྟོབས་ཀྱིས་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་ཀྱི་གཞལ་ཡས་ཁང་བསྐྱེད་དེ། དེར་རྣལ་འབྱོར་པ་རྣམ་པར་སྣང་མཛད་ཀྱི་ང་རྒྱལ་གྱིས་གནས་པར་བྱའོ། །དེ་ནས་རྡོ་རྗེ་སེམས་དཔའི་ང་རྒྱལ་གྱིས་བཅོམ་ལྡན་འདས་རྣམ་པར་སྣང་མཛད་ལ་གསོལ་བ་གདབ་པར་བྱ་སྟེ། ཇི་སྲིད་འཁོར་བའི་གནས་སུ་ནི། །དེ་སྲིད་མཚུངས་མེད་སེམས་ཅན་དོན། །སེམས་ཅན་ཁམས་ནི་མཐའ་ཡས་པ། །གཟི་ཅན་སྲིད་པ་ཚོལ་བྱེད་པ། །སྲིད་པའི་ཉེས་པ་གཞིག་པ་ཡིས། །བདེ་བ་ཆེན་པོ་འཕེལ་བའི་ཕྱིར། །གསང་བའི་རྟོག་པ་མཆོག་བཤད་པ། །བདག་ལ་རྗེས་སུ་གནང་བ་སྩོལ། །དེ་ནས་རྣམ་པར་སྣང་མཛད་ཀྱི་ང་རྒྱལ་གྱིས་རྡོ་རྗེ་འཆང་བ་ལ་དབང་བསྐུར་བར་བྱའོ། །དང་པོའི་རྣལ་འབྱོར་གྱི་ཏིང་ངེ་འཛིན་ཏོ། །དེ་ནས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་བརྗོད་ཅིང་རང་གི་སྐུ་དང་གསུང་དང་ཐུགས་ལས་རང་གི་ལྷ་དང་དཀྱིལ་འཁོར་གྱི་ལྷ་ཕྱུང་ལ། སྙིང་པོ་བརྗོད་ཅིང་རང་རང་གི་གནས་སུ་དཀྱིལ་འཁོར་གྱི་ཚུལ་གྱིས་ཇི་ལྟ་བར་གཞག་པར་བྱ་སྟེ། འདི་ནི་དཀྱིལ་འཁོར་གྱི་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་སྒོ་དབྱེ་བ་དང་བསྡུ་བ་བྱས་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས་བཅོམ་ལྡན་འདས་འཁོར་དང་བཅས་པ་བྱོན་ནས། ཇི་ལྟ་བར་བཞུགས་པར་བསམས་ལ་དབང་བསྐུར་བ་བླང་སྟེ། ལྕགས་ཀྱུ་ལ་སོགས་པས་དགུག་པ་དང༌། གཞུག་པ་དང་བཅིང་བ་དང་དབང་དུ་བྱས་ལ། རྡོ་རྗེ་གནོད་སྦྱིན་གྱིས་བགེགས་བསལ་བ་ལ་སོགས་པ་ཡང་བྱ། རྡོ་རྗེ་ཁུ་ཚུར་གྱིས་སྒོ་རྣམས་
བཅད་ལ། རྡོ་རྗེ་བསྲུང་བས་ཡང་དག་པར་བསྲུངས་ཏེ། བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལ། རྡོ་རྗེ་སེམས་དཔའི་སྙིང་བོ་བཟླས་པའི་མཆོད་ཡོན་ཕུལ་ལ་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པའི་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང༌། ལས་དང༌། ཕྱག་རྒྱ་ཆེན་པོ་འཁོར་དང་བཅས་པས་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ། རིམ་པ་འདིས་རང་རང་གི་ལས་ལ་ངེས་པར་སྦྱར་བར་བྱའོ། །དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། དཔལ་རྡོ་རྗེ་སེམས་དཔའ་ལ་འདི་སྐད་ཅེས་བརྗོད་པར་བྱ་སྟེ། དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་འདོད་ཆགས་ཆེན་པོ་འདི་དངོས་གྲུབ་ཀྱི་མཆོག་ལ་རབ་ཏུ་གཞག་པར་མཛོད་ཅིག །རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་ཡིས་ལས་བྱུང་བ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་འདོད་ཆགས་ཆེན་པོ་རབ་ཏུ་རྟོགས་པ་བཤད་པ་ལ་སྦྱོར་བར་མཛོད་ཅིག །ཀཱི་ལི་ཀི་ལའི་ཕྱག་རྒྱ་ཆེན་པོ་བཅིངས་ལ། ཀཱི་ལི་ཀི་ལ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པའི་སེམས་ཅན་གྱི་ཁམས་ཐམས་ཅད་འདོད་ཆགས་ཆེན་པོ་མངོན་དུ་གྱེད་པའི་དངོས་གྲུབ་ལ་རབ་ཏུ་གཞག་པར་མཛོད་ཅིག །རྡོ་རྗེ་དྲན་པའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་དྲན་པ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པའི་སེམས་ཅན་གྱི་ཁམས་ཐམས་ཅད་ཐུགས་རྗེ་ཆེན་པོའི་ཆགས་པའི་འཆིང་བས་བཅིངས་ལ་མི་གནས་པའི་མྱ་ངན་ལས་འདས་པའི་དབྱིངས་ལ་རབ་ཏུ་གཞག་པར་མཛོད་ཅིག །རྡོ་རྗེ་བསྙེམས་པའི་ཕྱག་རྒྱ་ཆེན་པོ་བཅིངས་ལ། རྡོ་རྗེ་བསྙེམས་པ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་
ལ་སོགས་པ་སེམས་ཅན་གྱི་ཁམས་ཐམས་ཅད་ལ་དབང་བྱེད་པའི་བདག་པོ་དངོས་གྲུབ་ཀྱི་བསྙེམས་པས་དབང་དུ་མཛོད་ཅིག །རྡོ་རྗེ་སྤྲང་རྩིའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་ཐམས་ཅད་རྡོ་རྗེ་སེམས་དཔའི་བསམ་གཏན་གྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་སྤྲིན་གྱི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་སྟོན་གྱི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་ཐམས་ཅད་རྡོ་རྗེ་སེམས་དཔའི་སྨོན་ལམ་གྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་དགུན་གྱི་ཕྱག་རྒྱ་ཆེན་པོ་བཅིངས་པ་དེ་ལ། འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་ཐབས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །སྒེག་མོའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །བཞད་མའི་ཕྱག་རྒྱ་ཆེན་པོ་བཅིངས་ལ། འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང་སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་འཛུམ་པ་རྨད་དུ་བྱུང་བ་ལ་རབ་ཏུ་འཇོག་པར་མཛོད་ཅིག །གླུ་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་བཟོད་པའི་ཕ་
རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །གར་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་རྡོ་རྗེ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་རབ་ཏུ་འཇོག་པར་མཛོད་ཅིག །རྡོ་རྗེ་ལྕགས་ཀྱུ་མའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་བྱང་ཆུབ་ཀྱི་སེམས་ཆེན་པོའི་ལྕགས་ཀྱུས་ཐར་པ་ཆེན་པོའི་གྲོང་ཁྱེར་དུ་གཞུག་པར་མཛོད་ཅིག །རྡོ་རྗེ་ཞགས་པའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་ཕ་རོལ་ཏུ་ཕྱིན་པ་བཅུའི་ཞགས་པས་ཐར་པ་ཆེན་པོའི་གྲོང་ཁྱེར་དུ་གཞུག་པར་མཛོད་ཅིག །རྡོ་རྗེ་ལྕགས་སྒྲོག་གི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་དེ་བཞིན་གཤེགས་པའི་བསམ་གཏན་གྱིས་བཅིངས་པར་མཛོད་ཅིག །རྡོ་རྗེ་འབེབས་པའི་ཕྱག་རྒྱ་ཆེན་པོ་བཅིངས་ལ། དེ་ལ་འདི་སྐད་ཅེས་བརྗོད་དོ། །དེ་བཞིན་གཤེགས་པ་ལ་སོགས་པ་དང༌། སེམས་ཅན་གྱི་ཁམས་ཐམས་ཅད་རང་བཞིན་གྱིས་འོད་གསལ་བའི་ཡེ་ཤེས་དབབ་པས་དབང་དུ་མཛོད་ཅིག་འདིར། འདི་ནི་ལས་ཀྱི་རྒྱལ་པོ་མཆོག །ཅེས་བྱ་བའི་ཏིང་ངེ་འཛིན་གསུམ་པའོ། །དེ་ལྟར་ཏིང་ངེ་འཛིན་གསུམ་པོ་རྣམ་པར་བསྒོམས་ལ་ཡང་སྒོ་དབྱེ་བ་དང༌། བསྡུ་བ་དང༌། མཚན་བརྒྱ་རྩ་བརྒྱད་ཀྱིས་བསྟོད་པ་ཡང་བྱས་ལ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ཏེ། གཡས་པའི་མཛུབ་མོའི་ལྕགས་ཀྱུས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་ཆེན་པོ་ཇི་ལྟ་བ་བཞིན་དུ་བཅུག་སྟེ། རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་དང༌། རྡོ་རྗེ་སྲུང་བའི་ལས་རྣམས་སྔ་མ་བཞིན་དུ་
བྱས་ལ། མཆོད་ཡོན་དེ་བཞིན་དུ་ཕུལ་ནས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་དམ་ཚིག་གི་ཕྱག་རྒྱ་བསྒྲུབ་པར་བྱའོ། །དེ་ནས་ཆོས་དང༌། ལས་དང༌། ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་ལ་མཆོད་པ་རྣམ་པ་ལྔ་དང༌། རྡོ་ཇེ་མཚོན་ཆ་ལ་སོགས་པ་མཆོད་པ་རྣམ་པ་བཅུ་གཉིས་ཀྱིས་ཡང་དག་པར་མཆོད་ནས་རྣམ་པར་སྒེག་པའི་དགའ་བའི་རྡོ་རྗེ་ཕྱག་བྱ་བ་དང༌། ཕྱག་བཞི་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། དཀྱིལ་འཁོར་གྱི་ལྷ་ཐམས་ཅད་ཀྱི་སྐུ་དང། གསུང་དང༌། ཐུགས་རྡོ་རྗེའི་ངོ་པོར་བདག་ཉིད་བསམ་ཞིང༌། ཨོཾ་བཛྲ་ཨཱཏྨ་ཀོ྅ཧཾ། ཞེས་བཟླ་བར་བྱའོ། །དེ་ནས་རང་བཞིན་གྱིས་འོད་གསལ་ཞིང་རང་བཞིན་གྱིས་དག་པར་ལྷག་པར་མོས་པ་བྱས་ལ། ཨོཾ་སྭ་བྷཱ་བ་ཤུདྡྷོ྅ཧཾ། ཞེས་བརྗོད་པར་བྱའོ། །དེ་ནས་ཆོས་ཀྱི་དབྱིངས་ཐོག་མ་དང་ཐ་མ་མེད་པ་ལས་བྱུང་བ་ལྷ་ཐམས་ཅད་ཀྱི་སྐུ་དང༌། གསུང་དང༌། ཐུགས་ཀྱི་ངོ་བོའི་གཟུགས་བརྙན་དང་མཉམ་པར་བདག་ཉིད་བསམས་ལ། ཨོཾ་སརྦ་ས་མོ྅ཧཾ་ཞེས་བརྗོད་པར་བྱའོ། །དེ་ནས་རྡོ་རྗེ་ཆེན་པོའི་གསང་བའི་དམ་ཚིག་གི་དཀྱིལ་འཁོར་ཆེན་པོའི་རང་བཞིན་ནི་བདག་ཉིད་ཡིན་ནོ་ཞེས་ང་རྒྱལ་བསྐྱེད་ལ། ལྷ་ཐམས་ཅད་ཀྱི་ཐུགས་ཀར་གནས་པའི་རྡོ་རྗེ་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ་སུ་ར་ཏ་སྟྭཾ་ཞེས་བྱ་བས་ཡིད་ཀྱིས་མངོན་པར་བྲི་ལ་འདི་ཉིད་ཟློས་ཤིང༌། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་རང་བཞིན་དུ་བདག་ཉིད་བསྒོམ་ཞིང༌། ལྷ་ཐམས་ཅད་ཀྱི་ཞལ་ནས་སྔགས་ཀྱི་སྒྲ་མངོན་པར་བྱུང་བར་བསམ་ཞིང་ངེས་པར་བསྐྱེད་པར་བྱ་སྟེ། དེ་ལྟ་བུས་ནི་ཐམས་ཅད་འགྲུབ་པར་འགྱུར་རོ། །དེ་ལྟར་ཉིན་རེ་ཞིང་ནང་པར་སྒྲུབ་པ་ལན་ཅིག་བྱས་ལ། དེའི་འོག་ཏུ་ཇི་ལྟར་འདོད་པར་བྱའོ། །ཀུན་བཟང་དེ་བཞིན་ཐམས་ཅད་བྱེད། །སྤྱོད་པ་ཅི་དགར་འདོད་པ་བྱེད། །ལངས་པ་དང་ནི་འདུག་པ་དང༌། །འཆག་གམ་དེ་བཞིན་གནས་པ་དང༌། །དགོད་དམ་རབ་ཏུ་སྨྲ་ཡང་རུང༌། །གང་ནི་ཇི་ལྟར་སྤྱོད་ཀྱང་རུང༌། །དབང་པོ་གང་དང་གང་ལམ་འགྱུར། །དེ་དང་
དེ་ཡི་ངོ་བོར་བྱ། །མཉམ་པར་མ་བཞག་སྦྱོར་བ་ཡིས། །རང་གི་ལྷར་ནི་བསྒྲུབ་པར་བྱ། །དེ་ཉིད་སྦྱོར་བ་འདི་ཡིས་ནི། །འདི་དག་ཐམས་ཅད་བསྒྲུབ་བྱས་ནས། །ཐམས་ཅད་རྡོ་རྗེ་སེམས་དཔའ་དངོས། །རྟག་ཏུ་བལྟས་པས་རབ་འགྲུབ་འགྱུར། །གང་གི་ཚེ་མཉམ་པར་བཞག་པའི་རྣལ་འབྱོར་གྱིས་དུབ་ན་མཉམ་པར་མ་བཞག་པའི་རྣལ་འབྱོར་བསྒོམ་པར་འདོད་པ་དེའི་ཚེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོས་རང་གི་གནས་སུ་བཞག་ལ་རང་གི་གནས་སུ་བཞག་པའི་དང་པོའི་རྡོ་རྗེས་བདག་ཉིད་བྱིན་གྱིས་བརླབས་ཏེ་དེ་བསྒོམ་པར་བྱའོ། །དེ་ནས་བྱ་བ་ཐམས་ཅད་བྱས་ལ་སླར་ཡང་ཞུགས་ཏེ་དང་པོའི་རྡོ་རྗེ་ཉིད་ཀྱིས། ཛཿཧཱུཾ་བཾ་ཧོཿཞེས་བརྗོད་དོ། །བཅོམ་ལྡན་འདས་རང་གི་ལུས་ལ་བཅུག་ལ་ཕྱག་རྒྱ་ཆེན་པོ་བཅིངས་ཏེ་དབུས་སུ་འདུག་ལ་མཚན་བརྒྱ་རྩ་བརྒྱད་ཀྱིས་བསྟོད་པ་བྱས་ནས་མཆོད་པ་ལྔ་དང༌། ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་དེ། རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་རྒྱ་བཞི་ཡང་བྱས་ལ་སྔ་མ་བཞིན་དུ་བསྒོམ་པར་བྱའོ། །གང་གི་ཚེ་དང་པོའི་གནས་སྐབས་སམ། གནས་སྐབས་གཉིས་པར་བཅོམ་ལྡན་འདས་གཤེགས་སུ་གསོལ་བར་འདོད་ན་ཡང་དེའི་ཚེ་མཚན་བརྒྱ་རྩ་བརྒྱད་ཀྱིས་བསྟོད་པ་དང༌། མཆོད་པ་དང་ཕྱག་བྱས་ལ་མངོན་པར་འདོད་པའི་དངོས་གྲུབ་ཀྱི་དོན་དུ་དགེ་བའི་རྩ་བ་ཡོངས་སུ་བསྔོས་ལ། ཕྱག་རྒྱ་གང་དང་གང་ནས་བྱུང་བ་དེ་དང་དེ་ནས་དགྲོལ་བ་ནི། ཇི་སྐད་བཤད་པའི་རྡོ་རྗེ་བསྡམས་པ་དགྲོལ་བ་དང་བཛྲ་མུཿཞེས་བྱ་བའོ། །དེ་ནས་གནས་ཀྱི་ངེས་པ་ནི་འདི་ཡིན་ཏེ། སྔགས་པའི་སྙིང་གའི་ཟླ་བའི་མདུན་དུ་རྡོ་རྗེ་སེམས་དཔའ་དང༌། རྡོ་རྗེ་ཡིད་ལས་བྱུང་བ་དབྲལ་བར་རྡོ་རྗེ་ཀི་ལི་ཀི་ལ་ལ། ལྐོག་མར་རྡོ་རྗེ་དྲན་པ། སྤྱི་བོར་རྡོ་རྗེ་བསྙེམས་པ། མགོ་ལ་རྡོ་རྗེ་དཔྱིད། གསང་བར་རྡོ་རྗེ་སྤྲིན། མིག་གཉིས་སུ་རྡོ་རྗེ་སྟོན། ནུ་མ་དང་བྲང་དང་སྙིང་གའི་ཕྱོགས་སུ་རྡོ་རྗེ་དགུན་མ། ནང་གིར་གཏོགས་པའི་རྡོ་རྗེ་
སེམས་དཔའི་གཡོན་ལོགས་སུ་རྡོ་རྗེ་སྒེག་མོ། རྣལ་འབྱོར་པའི་སོའི་ཕྲེང་བ་གཉིས་སུ་རྡོ་རྗེ་བཞད་མ། རྡོ་རྗེ་དྲན་པའི་གཡོན་ལོགས་སུ་གླུ་མ། རྡོ་རྗེ་བསྙེམས་མའི་གཡོན་ལོགས་སུ་གར་མ། རྣལ་འབྱོར་པའི་བརླག་ཡས་པར་རྡོ་རྗེ་ལྕགས་ཀྱུ། བརླ་གཡོན་པར་ཞགས་པ། བྱིན་པ་གཡས་པར་ལྕགས་སྒྲོག་བྱིན་པ་གཡོན་པར་འབེབས་པ་ཡང་དག་པར་གནས་སོ། །ལྷའི་རྣལ་འབྱོར་གྱི་དུས་སུ་དེ་བཞིན་གཤེགས་པ་རྣམས་ནི་ཕུང་པོ་ལྔའི་ངོ་བོ་ཉིད་ཀྱིས་ཐམས་ཅད་དུ་ཁྱབ་པའི་ཕྱིར་དེ་རྣམས་ཀྱི་གནས་ཀྱི་ངེས་པ་མེད་དོ། །ཕྱག་རྒྱ་དགྲོལ་བའི་དུས་སུ་ནི་རྣམ་པར་སྣང་མཛད་ནི་སྤྱི་གཙུག་གི་གནས་སུ་དགྲོལ་ལོ། །མི་བསྐྱོད་པ་ནི་རྡོ་རྗེ་སེམས་དཔའི་གནས་སུའོ། །རིན་ཆེན་འབྱུང་ལྡན་ནི་ཀི་ལི་ཀི་ལའི་གནས་སུའོ། །འོད་དཔག་ཏུ་མེད་པ་ནི་རྡོ་རྗེ་དྲན་པའི་གནས་སུའོ། །དོན་ཡོད་པར་གྲུབ་པ་ནི་རྡོ་རྗེ་བསྙེམས་མའི་གནས་སུ་དགྲོལ་བར་བྱའོ། །དེ་ལྟར་ཕྱག་རྒྱ་བཀྲོལ་ནས། རང་གི་སྙིང་གར་གནས་པའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་རང་གི་དབང་བསྐུར་པའི་གནས་སུ་བཞག་པས་དབང་བསྐུར་ལ། མཛུབ་མོ་གཉིས་ཀྱིས་ཕྲེང་བ་དཀྲིས་པ་བཅིངས་ལ། དེ་བཞིན་དུ་གོ་བ་གོ་བ་བཅིངས་ཤིང༌། ཨོཾ་བཛྲ་རཏྣ་ཨབྷི་ཥིཉྩ་སརྦ་མུ་དྲ་མཻ་ཏྲི་དྷྲི་ཀུ་རུ་བར་ཀ་བ་ཙེ་ན་བཾ་ཞེས་བཟླ་བར་བྱའོ། །དེ་ནས་དེ་བཞིན་དུ་མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་རབ་ཏུ་དགའ་བ་ལ་རག་ལས་པ་ཞེས་བྱ་བ་ལ་སོགས་པས་བསྐུལ་ལ། སྙིམ་པའི་མེ་ཏོག་གིས་ལྷ་རྣམས་ཇི་ལྟ་བ་བཞིན་དུ་གཤེགས་སུ་གསོལ་བར་བྱས་ནས། སྤྲུལ་པ་རྣམས་རང་གི་ལུས་ལ་བསྡུས་ཏེ། རྡོ་རྗེ་བསྲུང་བ་དང༌། རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་དང༌། རྡོ་རྗེ་སེམས་དཔའི་གཙུག་ཏོར་གྱི་ཕྱག་རྒྱ་བྱམས་པའི་གོ་ཆས་བདག་བསྲུང་བར་བྱས་ལ། ལངས་ནས་ཇི་ལྟར་མངོན་པར་འདོད་པའི་དགེ་བའི་བྱ་བས་གནས་པར་བྱའོ། །དེ་ལྟར་ཇི་སྲིད་དཀྱིལ་འཁོར་མངོན་སུམ་དུ་མཐོང་
བར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བྱའོ། །དེ་ལྟར་བྱས་ན་སྔོན་དུ་བསྙེན་པ་བྱས་པར་འགྱུར་རོ། །གང་ཞིག་དཀྱིལ་འཁོར་བསྒོམ་པར་མི་ནུས་པ་དེས་ནི་རྣལ་འབྱོར་ཆེན་པོ་བྱས་ལ་ལྷ་ཐམས་ཅད་ཀྱི་སྔགས་རེ་རེ་ཞིང་བཟླས་བརྗོད་འབུམ་འབུམ་བྱའོ། །སྔོན་དུ་བསྙེན་པའི་ཆོ་གའོ། །དེ་ལྟར་རིག་པའི་བརྟུལ་ཞུགས་རྗེས་སུ་སྤྱད་ལ། དངོས་གྲུབ་དོན་དུ་གཉེར་བས་ཇི་སྐད་དུ་བཤད་པའི་སྤྱང་བ་དང༌། ས་ཡོངས་སུ་གཟུང་བ་བྱས་ལ་དཀྱིལ་འཁོར་བྲི་བར་བྱའོ། །དེ་ལ་རེ་ཞིག་དང་པོར་ནི་བགེགས་གཞོམ་པར་བྱའོ། །དེ་ནས་རྡོ་རྗེ་འཁོར་ལོས་དཀྱིལ་འཁོར་སྤྲུལ་ལ་ཕྱག་འཚལ་བ་ལ་སོགས་པ་སྔོན་དུ་འགྲོ་བས་སྡོམ་པ་བཟུང་ལ། རྣལ་འབྱོར་ཆེན་པོ་དང་གཞལ་ཡས་ཁང་དང་གདན་རྣམས་བསྐྱེད་ལ་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་ཉིད་སྤྲོ་བ་བསྐྱེད་པར་བྱའོ། །དེང་དུ་བདག་ཆེ་འབྲས་བུ་ཡོད། །བདག་གི་གསོན་པའང་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་བདག་ནི་སོམ་ཉི་མེད། །བྱང་ཆུབ་སེམས་དང་སེམས་གཅིག་ལ། །མི་ལྡོག་པར་ནི་བདག་གྱུར་ཏེ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་གི་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །དེ་ནས་ལུས་ཐམས་ཅད་ཀྱིས་ཕྱག་བྱས་ཏེ་ལག་ན་སྤོས་སྣོད་ཐོགས་ཏེ། སངས་རྒྱས་ཐམས་ཅད་སྤྱན་དྲང་བར་བྱ་སྟེ། མ་ལུས་ཕྱོགས་ན་བཞུགས་པ་ཡི། །སངས་རྒྱས་ཐམས་ཅད་དགོངས་སུ་གསོལ། །བདག་མིང་འདི་ཞེས་བགྱི་བ་ཡིས། །རྡོ་རྗེ་ཅན་གྱི་དཀྱིལ་འཁོར་བྲི། །སངས་རྒྱས་ཐམས་ཅད་འདིར་གཤེགས་ཏེ། །དངོས་གྲུབ་འདི་ནི་སྩལ་དུ་གསོལ། །ཞེས་བརྗོད་ལ་ལུས་ཐམས་ཅད་ཀྱིས་ཕྱག་བྱས་ལ་དང་པོའི་རྣལ་འབྱོར་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་ཟློས་ཤིང་ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་དཀྱིལ་འཁོར་བྲི་བར་བྱ་བའི་ཕྱིར་བདག་ཉིད་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་
བཏབ་པར་བསམ་པར་བྱའོ། །སེམས་ཅན་ཀུན་ལ་ཕན་པའི་ཕྱིར། །རྒྱལ་བ་ཆེན་པོར་ཡང་དག་འཁྲུངས། །གང་ཕྱིར་ཆགས་བྲལ་བདག་ཉིད་ཀྱིས། །ཆགས་དང་བཅས་པ་གཟུང་བའི་ཕྱིར། །རྣམ་པར་གྲོལ་བས་གསོལ་བ་འདེབས། །རང་ཉིད་འདུལ་བའི་མཆོག་བཤད་ལ། །བདེ་བ་ཆེན་པོ་རྡོ་རྗེ་ཆེ། །གསང་རྟོག་དངོས་གྲུབ་རབ་སྩོལ་གསུངས། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་
བྱས་ལ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་ཀུན་དུ་གང ་བར་བསམས་ལ་འདི་སྐད་བརྗོད་པར་བྱའོ། །བདག་ནི་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་རང་བདག་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བདག་ཡིན། །རྣལ་འབྱོར་དབང་ཕྱུག་རྒྱལ་པོ་བདག །ཕྱག་ན་རྡོ་རྗེ་བསྟན་བདག་སྟེ། །བདག་པོ་རྡོ་རྗེ་ཆེན་པོ་བདག །བྱིན་གྱིས་བརླབས་པ་མི་འདོར་རོ། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏེ་སྟྭཾ་ཞེས་བརྗོད་པར་བྱའོ། །དེ་ལྟར་དམ་ཚིག་གསུམ་ཐོབ་པའི། །སློབ་དཔོན་རང་གི་ཕྱག་རྒྱ་ཡིས། །རྡོ་རྗེ་དྲིལ་བུ་འཆང་བྱ་ཞིང༌། །འཁོར་ལོའི་ཆོ་ག་ཐམས་ཅད་བྱ། །རྟོག་པ་ཀུན་ལ་མཉམ་འཇུག་པས། །དཀྱིལ་འཁོར་ཐམས་ཅད་བསྒྲུབ་པར་བྱ། །དམ་ཚིག་ཆེ་གསུམ་ཞེས་བྱ་བ། །རྒྱ་འདི་གསང་སྔགས་སྒྲུབ་བྱེད་པའོ། །དངོས་གྲུབ་ཆོ་ག་ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་བ། །འགྲུབ་འགྱུར་སྨད་པར་མི་བྱའོ། །ཞེས་བཅོམ་ལྡན་འདས་རྡོ་རྗེ་ཆེན་པོས་གསུངས་སོ། །དེ་ནས་དང་པོའི་རྡོ་རྗེས་ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་བཛྲོ་ད་ཏིཥྛ་མ་ཧཱ་མཎྜལ་ལཾ་ཨུ་པ་སྠཱནཱ་ཡ་ཞེས་བརྗོད་ལ་དཀྱིལ་འཁོར་དེ་སྟེང་དུ་ནམ་མཁར་བཞག་ལ། བདག་ལ་དེ་ཉིད་ཀྱིས་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ལ་བཛྲ་དྲཥྚི་མ་ཊ་ཞེས་བྱ་བ་མིག་གཉིས་སུ་བཀོད་ལ། དེ་བཞིན་འདུག་ལ་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །སྙིང་པོ་ཀུན་དུ་རྗོད་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །ཡི་གེ་ཨཿལས་རྐང་པ་གཉིས་ཀྱི་མཐིལ་དུ་སྣ་ཚོགས་རྡོ་རྗེ་བསམས་ལ་རྐང་པའི་མཐིལ་ནས་ཡོངས་སུ་
བཟུང་སྟེ། ནམ་མཁའི་ཁམས་རབ་འབྱམ་མ་ལུས་པའི་ཚད་ཙམ་གྱི་སའི་ཆ་རྡོ་རྗེར་གྱུར་པ་ལྷག་པར་མོས་པར་བྱས་ལ། རྡོ་རྗེ་བལྟ་བས་གཡོན་ནས་བསྐྲད་པར་བྱས་ལ་གཡས་ནས་འོག་བཅིང་བ་དང་ནམ་མཁའ་དང་ཕྱོགས་དང་མཚམས་དང་དཀྱིལ་འཁོར་བཅིང་བ་དང་རྡོ་རྗེ་དྲ་བ་བྱའོ། །དེ་ནས་སྒོ་དབྱེ་པའི་ཕྱག་རྒྱས་སྒོ་ཕྱེ་ལ་རྡོ་རྗེ་རྒྱུའི་ངོ་བོ་ཞལ་བཞི་དང་ཕྱག་བཞི་པའི་གསང་བའི་དཀྱིལ་འཁོར་སྔགས་དང་ཕྱག་རྒྱ་འདི་དང་ལྡན་པས་དགུག་པར་བྱའོ། །ཨོཾ་བཛྲ་མཎྜལ་ལ་ཧཱུཾ་ཛཿ། རྡོ་རྗེ་ཁུ་ཚུར་གཉིས་ཀྱིས་མཛུབ་མོ་དང་མཐེ་བོ་རྡོ་རྗེར་བྱ་བ་ནི། རྡོ་རྗེ་འཁོར་ལོ་ཞེས་བྱ་བའི་ཕྱག་རྒྱ་སྟེ་དཀྱིལ་འཁོར་ཐམས་ཅད་འགུགས་པར་བྱེད་པའོ། །ཨོཾ་མ་ཧཱ་བཛྲ་ཙཀྲ་ཨདྷི་ཏིཥྛ་སིདྡྷི་ཧཱུཾ་ཞེས་བྱ་བ་འདི་ཕྱག་རྒྱ་དང་ལྡན་པས་དཀྱིལ་འཁོར་བྱིན་གྱིས་བརླབ་པར་བྱའོ། །རྡོ་རྗེ་ཁུ་ཚུར་གཉིས་ཀྱིས་མགལ་མེ་འཁོར་བའི་ཚུལ་དུ་འཁོར་ལོ་བསྐོར་བ་ནི་འདིའི་ཕྱག་རྒྱའོ། །དེ་ནས་སེང་ལྡེང་ལས་བྱས་པའི་རྡོ་རྗེ་ཕུར་བུ་ཡི་གེ་ཧཱུཾ་ལས་སྟོད་ཁྲོ་བོའི་གཟུགས་ལ་སྨད་རྡོ་རྗེ་རྩེ་གཅིག་པ་ལྟ་བུ་མཐའ་ཡས་དང༌། རྣམ་པར་རྒྱལ་བ་དང༌། སྤྲིན་སྒྲ་དང༌། གསུས་པོ་ཆེ་དང༌། རྒྱལ་བ་ཞེས་བྱ་བ་དང་རིམ་པ་བཞིན་དུ་བསྐྱེད་ལ་ཙནྡན་དམར་པོས་བྱུགས་ཤིང་མེ་ཏོག་གི་ཕྲེང་བ་དམར་པོས་བརྒྱན་ལ་སྲད་བུ་དམར་པོས་བཅིང་བ་བྱས་ལ་ཨ་ཀོ་ཊ་ཡ་མ་ཧཱ་ཏྲི་ཏི་མ་ཊ་ཞེས་བྱ་བའི་སྔགས་ལན་བརྒྱ་རྩ་བརྒྱད་བཟླས་ཏེ། གཡོན་པའི་རྡོ་རྗེ་ཁུ་ཚུར་གྱིས་བཟུང་ལ་ཕྱིའི་དཀྱིལ་འཁོར་གྱི་མཚམས་བཞིར་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་ཞིང་རྡོ་རྗེའི་ཐོ་བས་བརྡུང་བར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་ལ་བསྲུང་བ་བྱས་ཏེ། རྡོ་རྗེ་ཁུ་ཚུར་གྱིས་སྒོ་རྣམས་བཅད་ལ། རྡོ་རྗེ་སྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། རྡོ་རྗེ་གནོད་སྦྱིན་གྱི་སྔགས་བཟླས་པའི་བུམ་པས་བསང་གཏོར་གྱི་དོན་དུ་དཀྱིལ་འཁོར་གྱི་ཁང་པའི་སྒོར་བཞག་ལ་རྡོ་རྗེ་བསྲུང་བ་ཡང་ཡོངས་སུ་བཟླས་པའི་སྤོས་ཆབ་རྡོ་རྗེ་གནོད་སྦྱིན་གྱི་སྔགས་ཟློས་བཞིན་དུ་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་བའི་རིམ་གྱིས་དཀྱིལ་འཁོར་གྱིས་གཞི་བྱུག་པའམ། བྱུག་ཏུ་གཞུག་པར་བྱའོ། །དེ་ནས་ལྷ་ཐམས་ཅད་ཀྱི་གནས་
སུ་དྲིའི་དཀྱིལ་འཁོར་བྱས་ལ། དཔལ་རྡོ་རྗེ་སེམས་དཔའ་ལ་སོགས་པའི་སྙིང་པོས་ལག་པས་རེག་པ་དང་རེ་རེ་ཞིང་ལན་བདུན་བདུན་བཟླས་ལ་དཀྱིལ་འཁོར་དེ་རྣམས་སུ་དཔལ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་དུ་བཀོད་ལ་མཆོད་པ་རྣམ་པ་ལྔས་ཡང་དག་པར་མཆོད་ལ་ཕྱི་རོལ་དུ་གཏོར་མ་སྦྱིན་པར་བྱའོ། །དེ་ནས་རྣམ་པར་རྒྱལ་བའི་བུམ་པ་ལ་རྡོ་རྗེ་གནོད་སྦྱིན་དང༌། རྡོ་རྗེ་མེ་དང༌། རྡོ་རྗེ་སེམས་དཔའ་ཇི་ལྟ་བ་བཞིན་དུ་བཟླས་ལ་དཔལ་རྡོ་རྗེ་སེམས་དཔའི་སྤྱན་སྔར་མཚན་ཉིད་ཇི་ལྟ་བ་བཞིན་དུ་བཞག་ལ་བསྙེན་པ་བྱའོ། །དཀྱིལ་འཁོར་གྱི་ཞག་ལ་ཡང་བཟླས་བརྗོད་ཐུན་གསུམ་བྱའོ། །དེ་ནས་རྡོ་རྗེ་གནོད་སྦྱིན་དང་སེམས་དཔའ་དང༌། སངས་རྒྱས་སྤྱན་ལ་སོགས་པས་རེ་རེ་ཞིང་མར་ལ་སོགས་པའི་སྦྱིན་སྲེག་བརྒྱ་རྩ་བརྒྱད་བྱས་ཏེ། འདི་ནི་ལྷག་པར་གནས་པའི་སྦྱིན་སྲེག་གི་ཆོ་གའོ། །དེ་ནས་མཚན་བརྒྱ་རྩ་བརྒྱད་པས་བསྟོད་ལ། རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ནས་དཀྱིལ་འཁོར་གྱི་ལྷ་རྣམས་ལ་ཕྱག་བྱས་ལ་མཆོད་ཡོན་ཕུལ་ཏེ་སྔར་བཤད་པའི་ཆོ་གས་སློབ་མ་ལྷག་པར་གནས་པར་བྱའོ། །དེ་ནས་ལྷ་ལྷག་པར་གནས་པའི་ཆོ་ག་ཡང་དེ་བཞིན་དུ་བྱས་ལ་བཅོམ་ལྡན་འདས་ལ་ཕྱག་བྱས་ཏེ་མཚན་བརྒྱ་རྩ་བརྒྱད་པས་བསྟོད་ལ། མཆོད་ཡོན་ཕུལ་ནས་ཡང་དག་པར་མཆོད་དེ་ཕྱག་བྱས་ནས་སློབ་མ་རྣམས་ལ་ཟབ་ཅིང་རྒྱ་ཆེ་བའི་ཆོས་བཤད་ལ་ཡང་དག་པར་སྤྲོ་བར་བྱས་ལ། སློབ་དཔོན་སློབ་མའི་ཚོགས་དང་བཅས་པ་དཀྱིལ་འཁོར་གྱི་སའི་མཐར་ཇི་སྐད་དུ་བཤད་པའི་མལ་དུ་ཉལ་བར་བྱའོ། །དེ་ནས་མལ་ནས་ལངས་ལ་རྣལ་འབྱོར་ཆེན་པོ་ཇི་ལྟ་བ་བཞིན་དུ་བྱས་ནས། ཉི་མ་འཆར་བའི་དུས་སུ་དཀྱིལ་འཁོར་ནམ་མཁའི་སྟེང་དུ་དེ་བཞིན་དུ་གཞག་སྟེ། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་ཟློས་ཤིང་སྔ་མ་བཞིན་དུ་ཐིག་གདབ་པར་བྱའོ། །དེ་ནས་ཚོན་དམར་པོ་ལ་སོགས་པས་དཀྱིལ་འཁོར་ཇི་ལྟ་བ་བཞིན་དུ་བྲིས་ལ། དཀྱིལ་འཁོར་དབུས་མའི་དབུས་སུ་སྣ་ཚོགས་པདྨའི་སྟེང་དུ་ལུགས་མ་ལ་སོགས་པའི་སྐུ་གཟུགས་འཛུམ་པ་དང་བཅས་པ་ཟླ་བའི་མདོག་ཅན་འོད་ཟེར་དཀར་པོ་
འབར་བ་འཁྲུག་པ། སངས་རྒྱས་ཀྱི་ཕྲེང་བ་ལ་སོགས་པས་བརྒྱན་ཅིང་ཡན་ལག་སྤྲས་པ། སེམས་དཔའི་སྐྱིལ་ཀྲུང་གིས་བཞུགས་པ་ཕྱག་རྒྱ་ཆེན་པོ་རྡོ་རྗེ་དྲིལ་བུ་བསྣམས་པའི་བཅོམ་ལྡན་འདས་རྡོ་རྗེ་སེམས་དཔའ་ས་མ་ཡ་སྟྭཾ། ཨོཾ་མ་ཧཱ་སུ་ཁ་བཛྲ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་ཟློས་ཤིང་བཀོད་ལ་ནམ་མཁའི་ཕྱོགས་ནས་ཕབ་སྟེ་གཟུགས་བརྙན་དང་ལྷན་ཅིག་ཏུ་གྱུར་པར་བསམ་པར་བྱའོ། །བཅོམ་ལྡན་འདས་རྡོ་རྗེ་སེམས་དཔའི་མདུན་དུ་མི་བསྐྱོད་པའི་གནས་སུ་རྡོ་རྗེ་ཡིད་ལས་བྱུང་བ་སྐུ་མདོག་དམར་པོ་གཡོན་པའི་རྡོ་རྗེ་ཁུ་ཚུར་གྱིས་མེ་ཏོག་གི་གཞུ་བསྣམས་པ། ཕྱག་གཡས་པ་མདའ་གསོར་བ་ལ་བརྩོན་པའོ། །བཅོམ་ལྡན་འདས་ཀྱི་གཡས་སུ་རིན་ཆེན་འབྱུང་ལྡན་གྱི་གནས་སུ་བཛྲ་ཀི་ལི་ཀི་ལི་སྐུ་མཆོག་ཤིན་ཏུ་དཀར་བ་ཕྱག་གཉིས་རྡོ་རྗེ་ཁུ་ཚུར་གཉིས་བཅིངས་པས་རང་གི་ཐུགས་ཀར་དང་པོའི་རྡོ་རྗེ་ཡོངས་སུ་འཁྱུད་དེ་བཞུགས་པའོ།། བཅོམ་ལྡན་འདས་ཀྱི་རྒྱབ་ཏུ་འོད་དཔག་ཏུ་མེད་པའི་གནས་སུ་རྡོ་རྗེ་དྲན་པ་སྐུ་མདོག་སེར་པོ་ཕྱག་གཡས་ཀྱིས་ཆུ་སྲིན་གྱི་རྒྱལ་མཚན་བསྣམས་ཤིང་ཕྱག་གཡོན་གྱིས་གདན་ལ་བརྟེན་ཏེ་བཞུགས་པའོ། །བཅོམ་ལྡན་འདས་ཀྱི་གཡོན་ལོགས་སུ་དོན་ཡོད་གྲུབ་པའི་གནས་སུ་རྡོ་རྗེ་བསྙེམས་མ་སྐུ་མདོག་སྔོན་པོ་ཕྱག་གཉིས་ཀྱིས་རྡོ་རྗེ་གཉིས་བསྣམས་ནས་དཀུ་གཉིས་སུ་འགྱིང་བག་གིས་བཞུགས་པའོ། །ནང་གི་དཀྱིལ་འཁོར་དེ་ཉིད་ཀྱི་མེའི་མཚམས་སུ་རྡོ་རྗེ་དཔྱིད་གསེར་གྱི་མདོག་ཅན། བདེན་བྲལ་གྱི་མཚམས་སུ་རྡོ་རྗེ་སྤྲིན་ཤིན་ཏུ་སྐུ་མདོག་དཀར་བ། རླུང་གི་མཚམས་སུ་རྡོ་རྗེ་སྟོན་སྐུ་མདོག་སེར་བ། དབང་ལྡན་གྱི་མཚམས་སུ་རྡོ་རྗེ་དགུན་སྐུ་མདོག་སྔོན་པོའོ། །ཡང་འདི་དག་གོ་རིམས་བཞིན་དུ་མེ་ཏོག་དང༌། སྤོས་དང༌། མར་མེ་དང༌། དྲི་བསྣམས་པ་དང༌། སྤྱི་བོའི་གནས་སུ་ཐལ་མོ་སྦྱར་ཏེ་འཇོག་པའོ། །ཕྱིའི་དཀྱིལ་འཁོར་གྱི་ལྷའི་སྣམ་བུ་ལ་མེའི་མཚམས་སུ་སྒེག་མོ་སྐུ་མདོག་དམར་པོ། ཁུ་ཚུར་གཉིས་ཀྱིས་རྡོ་རྗེ་གཉིས་བསྣམས་ནས་རྡོ་རྗེ་བསྙེམས་པའི་ཚུལ་གྱིས་འཛིན་ཅིང་བསམ་པ་གཡོས་པས་རབ་ཏུ་འདུད་པའོ། །བདེན་བྲལ་གྱི་ཕྱོགས་སུ་བཞད་མ་སྐུ་མདོག་ཤིན་ཏུ་དཀར་བ་སོའི་ཕྲེང་བ་གཉིས་དང་བཅས་པའི་རྡོ་རྗེ་རྩེ་ལྔ་པ་གཉིས་དང་བཅས་པ་
བསྣམས་ནས། རྡོ་རྗེ་སེམས་དཔའ་ལ་སོགས་པ་འཛུམ་པ་རྨད་དུ་བྱུང་བས་རབ་ཏུ་འཇོག་པར་མཛད་པ། ཕྱག་གཡོན་པ་གདན་ལ་བརྟེན་ཏེ་བཞུགས་པའོ། །རླུང་གི་མཚམས་སུ་གླུ་མ་ཆེན་མོ་སྐུ་མདོག་སེར་བ། རྡོ་རྗེ་པི་ཝང་ལེན་པ་ལ་བརྩོན་པར་བྱའོ། །དབང་ལྡན་གྱི་ཕྱོགས་སུ་གར་མ་སྐུ་མདོག་སྔོན་པོ་ཕྱག་གཉིས་ཀྱིས་རྡོ་རྗེ་རྩེ་གསུམ་པ་བསྣམས་ནས་གར་བྱེད་པའི་ཚུལ་གྱིས་བཞུགས་པའོ། །ཕྱི་དང་ནང་དུ་བཅས་པའི་ཤར་སྒོ་གཉིས་སུ་རྡོ་རྗེ་ལྕགས་ཀྱུ་སྐུ་མདོག་དམར་པོ་རྡོ་རྗེ་ལྕགས་ཀྱུས་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་འགུགས་པའི་ཚུལ་གྱིས་གཞུགས་པའོ། །ལྷོ་ཕྱོགས་ཀྱི་སྒོ་གཉིས་སུ་རྡོ་རྗེ་ཞགས་པ་སྐུ་མདོག་དཀར་བ། རྡོ་རྗེ་ཞགས་པས་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་ཐར་པ་ཆེན་པོའི་གྲོང་ཁྱེར་དུ་འཇུག་པར་མཛད་ཅིང་བཞུགས་པའོ། །ནུབ་ཕྱོགས་ཀྱི་སྒོ་གཉིས་སུ་རྡོ་རྗེ་ལྕགས་སྒྲོག་སྐུ་མདོག་སེར་པོ་རྡོ་རྗེ་ལྕགས་སྒྲོག་གིས་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་ཐམས་ཅད་འཆིང་བར་མཛད་པའོ། །བྱང་ཕྱོགས་ཀྱི་སྒོ་གཉིས་སུ་རྡོ་རྗེ་འབེབས་པ་སྐུ་མདོག་སེར་པོ་ཕྱག་གཡས་པས་རྡོ་རྗེ་དྲིལ་བུ་དཀྲོལ་བའི་ཚུལ་གྱིས་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་མཉེས་པར་མཛད་ཅིང་ཕྱག་གཡོན་པ་གདན་ལ་བརྟེན་ཏེ་བཞུགས་པ་བྲི་བར་བྱའོ། །དེ་ལ་འདི་དག་ནི་རྡོ་རྗེ་ཡིད་ལས་བྱུང་བ་ལ་སོགས་པ་ནས་རྡོ་རྗེ་འབེབས་པའི་བར་གྱི་དགོངས་པ་སྙིང་པོ་རྣམས་ཡིན་ནོ། །ཧོ་ཏྲི་ཥྛི་ས་ཡ་ཀ་མ་ཏ་ཧཱུཾ། བཛྲ་ཀི་ལི་ཀི་ལ་ཧཱུཾ་ཧཱུཾ་སྨ་ར་བཛྲ་བནྡྷ་ཧཱུཾ། བཛྲ་རོ་ཥ་ཧཱུཾ། ཧཱུཾ་མ་དྷུ་བཛྲ་ཧཱུཾ། བཛྲ་མེ་གྷེ་ཧཱུཾ། ཤ་ར་ཏ་བཛྲི། ཧཾ་བཛྲ། ཧཱུཾ་བཛྲ་ཤེ་ཤེ་ཥུ། ཧཱ་བཛྲ། ལཱ་སྐྱེ་ཧཱ། ཧ་ཧ་སྭ་བཛྲ་ཎི། ཨོཾ་བཛྲ་གཱི་ཏེ། ཨོཾ་བཛྲ་ནྲྀ་ཏྱ་བཛྲ། ཛཿབཛྲ་ཨཾ་ཀུ་ཤ །ཧཱུཾ་བཛྲ་པཱ་ཤ་།བཾ་བཛྲ་སྥོ་ཊ། ཨ་བཛྲ་གྷཎྚ། རྡོ་རྗེ་ཡིད་ལས་བྱུང་བ་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པ་འདི་དག་ཐམས་ཅད་ཀྱང་སངས་རྒྱས་ལྔའི་ཅོད་པན་ཅན་སེམས་དཔའི་སྐྱིལ་མོ་ཀྲུང་གིས་བཞུགས་པ་དཔལ་རྡོ་རྗེ་སེམས་དཔའ་ལ་མངོན་དུ་ཕྱོགས་པ་སྣ་ཚོགས་པདྨའི་གདན་ལ་བཞུགས་པ་ཡིན་ནོ། །དེ་ལྟར་དཀྱིལ་འཁོར་བྲིས་ནས། རྡོ་རྗེ་ཧཱུཾ་མཛད་ཀྱི་སྦྱོར་བས་དཀྱིལ་འཁོར་གྱི་སྒོ་ཕྱེ་ལ་དཔལ་རྡོ་རྗེ་སེམས་
དཔའི་སྦྱོར་བས་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་པ་བྱའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོར་བསམས་ལ། གཡས་པའི་མཛུབ་མོ་ལྕགས་ཀྱུས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་དང༌། རྡོ་རྗེ་སྲུང་བས་དེ་བཞིན་དུ་ལས་རྣམས་བྱས་ལ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པའི་སྙིང་པོས། །བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ནས་དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་དེ་བཞིན་དུ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ནས་ཡང་མཆོད་ཡོན་ལ་སོགས་པ་ཕུལ་ཏེ། བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལ་བུམ་པ་ལ་སོགས་པས་མཆོད་པར་བྱའོ། །དྲིལ་བུ་རྩེར་བཏགས་རྒྱལ་མཚན་ནི། །གྲྭ་རྣམས་སུ་ནི་གཞག་པར་བྱ། །ཕྱི་ཡི་མཚམས་ཀྱི་གནས་སུ་ནི། །བུམ་པ་ཡལ་གས་བརྒྱན་པ་གཞག །བུམ་པ་སྤོས་ཆུས་གང་བ་དང༌། །ནོར་བུ་རྡོ་རྗེ་དང་བཅས་པ། །རྡོ་རྗེ་སེམས་དཔའི་སྤྱན་སྔར་གཞག །མེ་ཏོག་ཡལ་ག་ལ་ཡོངས་བཟླ། །འདི་སྐད་སྟོན་ཏེ་བུམ་པ་རྩ་བ་ནག་པོ་མ་ཡིན་པ། གསུས་པ་ཆེ་བ། སྐེ་རིང་བ། མཆུ་འཕྱང་བ། གསེར་དང་བྱུ་རུ་དང་དུང་དང་མུ་ཏིག་དང་པདྨ་རཱ་ག་སྟེ། རིན་པོ་ཆེ་ཐམས་ཅད་དང༌། པྲྀ་ཧ་སྟི་དང༌། ཀཎྜ་ཀ་རི་དང༌། ཧ་ས་དེ་བ་དང༌། དཎྜོ་ཏ་པ་ལ་དང༌། ཀི་རི་ཀ་ནི་དཀར་པོ་སྟེ་སྨན་ཐམས་ཅད་དང༌། འབྲས་སཱ་ལུ་དང་ནས་དང་གྲོ་དང་ཏིལ་དང་མ་ཤ་སྟེ་འབྲུ་ཐམས་ཅད་དང༌། ཙནྡན་དཀར་པོ་ལ་སོགས་པ་དང་ལྡན་པའི་ཆུ་དང་མེ་ཏོག་དཀར་པོ་དང་དྲི་ཞིམ་པོས་ཡོངས་སུ་གང་བ་དང༌། ཕྱི་རོལ་ཀུན་དུ་དྲི་ཞིམ་པོས་བྱུག་བ་མེ་ཏོག་གི་ཕྲེང་བ་བཏགས་པ་རང་གི་ལྷའི་ཕྱག་རྒྱས་མཚན་པ་མགུལ་པ་རས་གཙང་ཞིང་བཟང་བས་བཅིངས་པ། མེ་ཏོག་དང་ལོ་མ་ཅན་གྱི་ཡལ་ག་ཡོད་པའི་ལྕུག་མ་རྡོ་རྗེ་དང་བཅས་པའི་རྡོ་རྗེ་ཁུ་ཚུར་གྱིས་བཟུང་ལ་རང་གི་སྔགས་བརྒྱ་རྩ་བརྒྱད་བཟླས་ཏེ། བུམ་པ་དེ་རྣམས་ལྷ་རྣམས་ཀྱི་ཕྱི་རོལ་དུ་ཀུན་ནས་རེ་རེ་དབུལ་བར་བྱའོ། །དང་པོར་ནི་དཔལ་རྡོ་རྗེ་སེམས་དཔའི་བུམ་པ་ཤར་
ཕྱོགས་ཀྱི་སྒོ་ལ་བལྟས་པར་ཕྱི་རོལ་ནས་དབུལ་ལོ། །གཉིས་པ་ནི་བཅོམ་ལྡན་འདས་རྡོ་རྗེ་སེམས་དཔའི་སྤྱན་སྔར་སྔགས་ནི་ལན་ཉི་ཤུ་རྩ་གཅིག་བཟླས་ལ་གཞག་པར་བྱའོ། །ཨོཾ་མ་ཧཱ་སུ་ཁ་བཛྲ་ས་མ་ཡ་ཨ་བྷི་ཥེ་ཀ་ཛཿཧཱུཾ་བཾ་ཧོཿ། དེ་ལྟར་བུམ་པ་ཕུལ་ནས་བུམ་པ་གང་བ་ལ་ཡང་རང་གི་སྔགས་ཡོངས་སུ་བཟླས་ལ་ལྷ་རྣམས་ལ་རེ་རེ་དབུལ་བར་བྱའོ། །དེ་ནས་རས་ཟུང་འབུམ་མམ་ཁྲིའམ་སྟོང་ངམ་རེ་རེ་ཞིང་ཟུང་རེ་ལ་ཨོཾ་དང་བཛྲ་རཏྣ་མ་ཧཱ་སུ་ཁ་ཞེས་བྱ་བ་བཟླས་པ་དང༌། བླ་རེ་དང༌། གདུགས་དང༌། རྒྱལ་མཚན་དང་རྣམ་པ་སྣ་ཚོགས་པ་དག་ཀྱང་བཛྲ་སྥ་ར་ཎ་ཁཾ་ཞེས་ཟློས་ཤིང། བཅོམ་ལྡན་འདས་འཁོར་དང་བཅས་པ་ལ་དབུལ་བར་བྱའོ། །མེ་ཏོག་གི་རིག་པ་བཟླས་པའི་མེ་ཏོག་གི་ཤིང་བརྒྱའམ་མེ་ཏོག་ཐམས་ཅད་དབུལ་བར་བྱའོ། །ག་པུར་དང་ཙནྡན་ལ་སོགས་པའི་དྲི་རྣམས་ནི་དྲིའི་རིག་པས་སོ། །ཨ་ག་རུ་ནག་པོ་ལ་སོགས་པའི་བདུག་སྤོས་རྣམས་ཀྱིས་བདུག་པའི་རིག་པས་སོ། །ཁ་ཟས་རོ་བརྒྱ་པ་ལ་སོགས་པ་ནི་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུ་ཏྤནྣ་ཏྭཱ་ཏ་ཅེས་བྱ་བ་བཟླས་ལ་མངོན་པར་དབུལ་ལོ། །མར་ལ་སོགས་པའི་མར་མེ་ནི་མར་མེའི་རིག་པ་ཟློས་ལ་སྡོང་བུ་ལེགས་པར་བཙུགས་པའི་མར་མེའི་སྣོད་སྟོང་ནས་ཐ་ན་བཞི་ཡན་ཆད་དེ་བཞིན་དུ་དབུལ་བར་བྱའོ། །རོལ་མོ་སྟོང་ངམ་རོལ་མོ་བཅུ་པོའི་ཡི་གེ་ཧཱུཾ་ཟློས་ཤིང་རོལ་མོའི་ཕྱག་རྒྱ་དང་ལྡན་པས་དེ་བཞིན་དུ་དབུལ་བར་བྱའོ། །དེ་བཞིན་དུ་གཞན་དག་ཀྱང་སྔ་མའི་རྗེས་སུ་འབྲངས་ནས་ཤེས་པར་བྱའོ། །དེ་ནས་ཕྱི་རོལ་དུ་གཏོར་མ་དང་སྦྱིན་སྲེག་བྱའོ། །དེ་ནས་ཕྱག་བཙལ་བ་ལ་སོགས་པ་སྔོན་དུ་འགྲོ་བས་སྡོམ་པ་བླངས་ལ། སརྦ་ཡོ་ག་ཙིཏྟོ་ཏ་པ་ད་ཡཱ་མི་ཞེས་བྱ་བས་བྱང་ཆུབ་ཀྱི་སེམས་ཆེན་པོ་བསྐྱེད་ལ། གཡས་པའི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་བླངས་ལ་རང་གི་སྙིང་གར་བཞག་སྟེ་རང་གི་སྙིང་གར་ཧཱུཾ་ལས་རྡོ་རྗེ་བསྐྱེད་དེ། སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷུ་རྠ་ཡ་ཐཱ་སུ་ཁཾ་ཞེས་བརྗོད་དེ། དེ་ནས་སྒོའི་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་བ་ལ་རྡོ་རྗེ་སློབ་དཔོན་རང་ཉིད་ཇི་སྙེད་པའི་དྲིས་བསྐུས་ཤིང་ཡན་ལག་བྱུགས་པ་དང༌། རྒྱན་གྱིས་བརྒྱན་ཅིང་མེ་ཏོག་གི་ཕྲེང་བས་སྤུད་པ་དང༌། གོས་
དམར་པོའི་ཟུང་གིས་བགོ་བ་དང༌། ཁ་དྲི་ཞིམ་པོར་བྱ་ཞིང་གོས་དམར་པོས་གདོང་གཡོགས་ལ། རྡོ་རྗེ་བསྙེམས་པའི་སྦྱོར་བ་དང་ལྡན་པས་སྔོན་དུ་སྤྱོད་པ་བྱས་པས་ལག་པ་གཡོན་པར་རྡོ་རྗེ་ཐོགས་པས་བུ་མོའི་ལག་པ་གཡས་པ་ནས་དེ་འཛིན་པའི་ཚུལ་གྱིས་བཟུང་ལ་ཕྱག་རྒྱ་ཆེན་པོས་འཇུག་པར་བྱའོ། །བྷ་ག་ཝཱན་ཨ་བི་སྟུ་ཏེ་རྭ་ག་དྷི་སརྦ་སུ་ཁ་ས་ན་མ་སན་ཏཾ་སཾ་གྲ་ཧོ་དྷི་བྷ་བ་མེ་སུ་ཁ་དྷརྨཱ་བཛྲ་ས་ཏྭ་དྲྀ་ཥྚ་བྷ་བ་མེ་ལ་གུད་དུ་ཤྱཱ་སིདྡྷ་ཙ་སུ་ཁ་གུ་ཧྱ་ནཱ་མ་ཞེས་གསང་བའི་ཚུལ་དྲུག་ལྡན་ལ་སོགས་པའི་གླུའི་ཚུལ་གྱིས་གླུར་བླངས་ཤིང༌། དང་པོ་ཤ་ཕྱོགས་ནས་ཞུགས་ལ། ཛཿབཛྲ་ཨཾ་ཀུ་ཤ་ཞེས་བྱ་བས་རྡོ་རྗེ་ལྕགས་ཀྱུས་བདག་ཉིད་དགུག་པར་བྱའོ། །ཡང་ལྷོ་ཕྱོགས་ཀྱི་སྒོ་ནས་ཞུགས་ལ་ཧཱུཾ་བཛྲ་པཱ་ཤ་ཞེས་བྱ་བས་རྡོ་རྗེ་ཞགས་པས་བདག་ཉིད་གཞུག་པར་བྱའོ། །དེ་ནས་ནུབ་ཕྱོགས་ཀྱི་སྒོ་ནས་ཞུགས་ལ་བཾ་བཛྲ་སྥོ་ཊ་ཞེས་བྱ་བས་རྡོ་རྗེ་ལྕགས་སྒྲོག་གིས་བདག་ཉིད་བཅིང་པར་བྱའོ། །ཡང་བྱང་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ་ཨ་བཛྲ་གྷཎྚ་ཞེས་བྱ་བས་རྡོ་རྗེ་འབེབས་པས་བདག་ཉིད་དབབ་པ་བྱས་ལ་ཡང་ཤར་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཁྱོད་ནི་ཀུན་དུ་བཟང་པོ་སྟེ། །རྡོ་རྗེ་བསྙེམས་པའི་བདག་པོ་གཙོ། །སེམས་དང་སེམས་དཔའི་ཏིང་ངེ་འཛིན། །རྡོ་རྗེ་དེ་བཞིན་ཏིང་ངེ་འཛིན། །ཀུན་མཆོག་དམ་ཚིག་རྣམས་གྲུབ་པ། །རྡོ་རྗེ་སེམས་དཔའ་བདག་གྲུབ་མཛོད། །ཅེས་བརྗོད་པར་བྱའོ། །དེ་ནས་རྡོ་རྗེ་གར་མ་ལས་བྱུང་བའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་ཕྱག་བྱའོ། །དེ་ཡང༌། གཡོན་པའི་མིག་གི་རྡོ་རྗེ་ཡིས། །ཞུགས་ནས་མགོན་ལ་ཕྱག་བྱས་ཏེ། །གཡོན་པ་བསྙེམས་པས་གནས་པའི་མཆོག །རོལ་པའི་མིག་ནི་འཛུམ་པར་བྱ། །ཞེས་གསུངས་པ་ཡིན་ནོ། །ཨོཾ་པ་ར་མ་སུ་ཁ་ཙིཏྟ་ལ་ལི་ཏ་བི་ལཱ་སྱ་ན་མཱ་སྟེ་བྷ་ག་བན་བནྡྷ་ནཾ་ཛཿཧཱུཾ་བཾ་ཧོཿ། ཧི་ཧི་ཧི་ཧི་ཧཱ་པྲ་ཏཱིཙྪ་ཀུ་སུ་མ་ཨཉྫ་ལི་ནི་ནཱ་ཐ། ཞེས་བྱ་བས་ཕྱག་བྱས་ཏེ་དཀྱིལ་འཁོར་དེ་ལན་གསུམ་བསྐོར་བར་བྱའོ། །དེ་ནས་མདུན་དུ་འདུག་ལ་དེ་ཁོ་ན་ཉིད་འདི་ལན་ཅིག་བརྗོད་པར་བྱའོ། །
འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེ་ཞིང་ནོར་ཆེ་ལ། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་བདག་དེང་གྲུབ་མཛོད། །ཡང་ཛཿཧཱུཾ་བཾ་ཧོཿ། པྲ་སིདྡྷྱ་མཱཾ་ཞེས་བརྗོད་པར་བྱའོ། །དེ་ནས་རྡོ་རྗེ་ཆུ་འཐུངས་ལ་ཨ་ཞེས་བྱ་བས་བདག་ཉིད་ལ་དབབ་པར་བྱའོ། །ཡང་གཡོན་པའི་རྡོ་རྗེ་ཁུ་ཚུར་གྱིས་སེམས་མ་རྡོ་རྗེ་དྲལ་ལ་འདིས་བདག་ཉིད་ལ་དབབ་པར་བྱའོ། །ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ། ཨ་ཞེས་བྱ་བ་ལན་བརྒྱའི་བར་དུ་བཟླས་སོ། །དེ་ནས་སྙིང་པོ་འདིས་མེ་ཏོག་དོར་བར་བྱའོ། །ཧཱུཾ་མ་ཧཱ་སུ་ཁ་བཛྲ་ས་ཏྭ་པྲ་ཏཱིཙྪ་ས་མ་ཡ་སྟྭཾ། དེ་ནས་དེ་བླངས་ལ་སྙིང་པོ་འདིས་རང་གི་མགོ་ལ་བཅིང་བར་བྱའོ། །དེང་ཁྱོད་རྡོ་རྗེ་ཅན་གྱིས་ནི། །དངོས་གྲུབ་ཐམས་ཅད་གྲུབ་པའི་ཕྱིར། །འདོད་པ་ཀུན་གྱི་དབང་ཕྱུག་དང༌། །སེམས་ཅན་ཀུན་ལ་བདེ་རབ་སྩོལ། །ཐམས་ཅད་གྲུབ་པའི་དབང་བསྐུར་རོ། །ཨོཾ་བཛྲ་མ་ཧཱ་སུ་ཁ་བཛྲ་ས་ཏྭ་ཨ་བྷི་ཥིཉྩ་སུ་ར་ཏ་སྟྭཾ། དེ་ནས་སྙིང་པོ་འདིས་གདོང་གཡོགས་དགྲོལ་བར་བྱའོ། །ཨོཾ་བཛྲ་ཙ་ཀྵུ་ས་མ་ཡ་སརྦ་སུ་ར་ཏ་སྟྭཾ། དེ་ནས་ཧཱུཾ་ལས་མིག་གཉིས་སུ་རྡོ་རྗེ་བསམས་ལ་ཧེ་བཛྲ་པཱ་ཤྱ་ཞེས་བརྗོད་པར་བྱའོ། །དེ་ནས་ཤར་ཕྱོགས་ཀྱི་སྒོ་ནས་བརྩམས་ཏེ། རྡོ་རྗེ་སེམས་དཔའི་མཐར་ཐུག་གི་བར་དུ་དཀྱིལ་འཁོར་ཆེན་པོ་བསྟན་པར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ་ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །དེ་ནས་ཤིས་པ་བརྗོད་པའི་ཚུལ་གྱིས་རྡོ་རྗེ་ཐལ་མོ་སྒེག་པས་བསྐོར་ལ་ཐལ་མོ་སྦྱར་ཏེ་བཅོམ་ལྡན་འདས་ལ་མཚན་བརྒྱ་རྩ་བརྒྱད་པས་བསྟོད་པར་བྱའོ། །དེ་ནས་རྡོ་རྗེ་མཚོན་ཆ་མ་ལ་སོགས་པའི་གསང་བའི་མཆོད་པ་བཞིས་བཅོམ་ལྡན་འདས་ལ་ཡང་དག་པར་མཆོད་ལ་གླུ་དང་རོལ་མོ་ལ་སོགས་པའི་མཆོད་པས་ཀྱང་མཆོད་ནས་ཕྱིའི་དཀྱིལ་འཁོར་གྱི་ནང་དུ་འཇུག་པའི་སྒོ་ལ་མངོན་པར་ཕྱོགས་པར་སྣ་ཚོགས་པདྨ་བྲིས་ལ་ཡང་རྣམ་པར་རྒྱལ་བའི་བུམ་པ་ལ་བུམ་པའི་སྔགས་ལན་ཉི་ཤུ་རྩ་གཅིག་དེ་བཞིན་དུ་བཟླས་ཏེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་པདྨ་དེ་ལ་ཇི་ལྟ་བ་བཞིན་དུ་འདུག་སྟེ། མེ་ཏོག་ལ་སོགས་པས་བདག་ཉིད་ལ་ལེགས་པར་མཆོད་ཅིང་
མཆོད་ཡོན་བླངས་ནས་རྡོ་རྗེ་སེམས་དཔའི་སྐུ་གཟུགས་མགོ་བོར་བཞག་སྟེ། རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླུགས་ལ། ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ། ཨོཾ་བཛྲ་ཨ་བྷི་ཥིཉྩ་ཞེས་ཟློས་ཤིང་དེས་བདག་ཉིད་དབང་བསྐུར་བར་བྱ་ཞིང་ཆུ་དེ་ལ་བཏུང་བར་ཡང་བྱའོ། །ཨོཾ་མ་ཧཱ་སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་བྱ་བ་དང༌། ཡང་དང་པོའི་རྡོ་རྗེ་རང་གི་སྤྱི་བོར་བཅིངས་ལ་ལན་བརྒྱ་རྩ་བརྒྱད་བཟླས་པར་བྱའོ། །དེ་ནས་རྡོ་རྗེ་སེམས་དཔའི་སྐུ་གཟུགས་བསམས་ལ་སངས་རྒྱས་རྡོ་རྗེ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེ་ཕྲེང་བ་དང་ལྡན་པའི་རིན་པོ་ཆེའི་ཅོད་པན་དང༌། དབང་བསྐུར་བའི་ཕྱག་རྒྱ་རྣམས་ཀྱིས་བདག་ཉིད་ལ་དབང་བསྐུར་ལ་ཡི་གེ་ཧཱུཾ་གིས་དང་པོའི་རྡོ་རྗེ་བྱིན་གྱིས་བརླབ་ཅིང་ཨ་ལས་བསྐྱེད་པའི་རྡོ་རྗེ་དྲིལ་བུ་དང་བཅས་པའི་དང་པོའི་རྡོ་རྗེ་སྙིང་པོ་འདིས་བླང་བར་བྱའོ། །ཧཱུཾ་སརྦ་མ་ཧཱ་བཛྲ་སུ་ཁོདྦྷ་བ་ཨེ་ཥ་སྟྭཾ་ཨ་བྷི་ཥིཉྩ་གྲྀ་ཧྞ་ཧྲྀ་ད་ཡ་སྟི་བཛྲ་ཏེ། ཀྱེ་ཆེ་གེ་མོ་གྲུབ་པ་ཨ། དེ་ལྟར་རྡོ་རྗེའི་དབང་བསྐུར་བ་བླངས་ནས་སྙིང་པོ་འདིས་བདག་པོའི་དབང་བསྐུར་བ་བླང་བར་བྱའོ། །ཛཿཧཱུཾ་བཾ་ཧོཿ། མ་ཧཱ་སུ་ཁ་བཛྲ་ས་ཏྭ་ཨ་བྷི་ཥེ་ཀ་ན་སྟྭཾ་ཨ་བྷི་ཥིཉྩཱ་མི་བཛྲ་ཨ་དྷི་པ་ཏི་ཏྭཾ་དྲྀ་ཌྷོ་མེ་བྷ་བ། སིདྡྷི་ནཱ་མ་ཏེ་བྷ་ག་བཱན་མ་ཧཱ་བཛྲ་ཧ་ར་སུ་ར་ཏ་སྟྭཾ། མ་ཧཱ་བཛྲས་ཏྭ་ཨོཾ་བྷུརྦྷུ་བ་སྭཿ། དེ་ནས་རྡོ་རྗེ་སྤྱི་བོར་བཞག་ལ་སྙིང་པོ་འདིས་མིང་གི་དབང་བསྐུར་བ་བླང་བར་བྱའོ། །སརྦ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩཱ་མི་མ་ཧཱ་བཛྲ་ནཱ་མ་སིདྡྷྱ་ས་མ་ཡ་སྟྭཾ་བྷུརྦྷུ་བ་སྲཿ། དེ་ནས་སྙིང་པོ་འདིས་དངོས་གྲུབ་ཀྱི་བརྟུལ་ཞུགས་ཀྱི་རྡོ་རྗེ་བླང་བར་བྱའོ། །ཨོཾ་སརྦ་ཏ་ཐཱ་ག་ཏ་ས་མ་ཡ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི། འདི་ནི་སངས་རྒྱས་ཐམས་ཅད་ཀྱི། །རྡོ་རྗེ་ཅན་གྱི་རྡོ་རྗེ་ཉིད། །རྡོ་རྗེ་ཅན་གྱི་བརྟུལ་ཞུགས་ནི། །ཁྱོད་ཀྱིས་ཀྱང་ནི་རྟག་ཏུ་བཅང༌། །འདི་ནི་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་དམ་པ་ཡིན་ཏེ་འདི་ཡོངས་སུ་མ་སྤངས་པར་རྟག་ཏུ་བཅང་བ་ཡིན་ནོ་ཞེས་བྱ་བ་ནི་འདིའི་གསང་བ་ཡིན་ཏེ་ཧི་བཛྲ་གརྦྷ་བ་པ་དེ་ཧི་བཛྲ་ནཱ་མ་སིདྡྷི་ས་མ་ཡ་སྟྭཾ་བྷུརྦྷུ་བ་སྭཿ། ཞེས་ཀྱང་བརྗོད་དོ། །དེ་ནས། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱའོ། །དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །
ཡང་དྲིལ་བུ་དཀྲོལ། དམ་ཚིག་གསུམ་གྱི་གླུས་བསྟོད་ལ། །མཆོད་པ་རྣམ་པ་ལྔ་དང༌། རྡོ་རྗེ་མཚོན་ཆ་ལ་སོགས་པའི་ཕྱག་རྒྱའི་མཆོད་པ་རྣམ་པ་བཅུ་གཉིས་ཀྱིས་ཀྱང་བདག་ཉིད་ལ་མཆོད་ནས། རྡོ་རྗེ་ཐལ་མོ་བསྐོར་བས་བཅོམ་ལྡན་འདས་ལ་སྔ་མ་བཞིན་དུ་ཕྱག་བྱས་ལ་མཆོད་པ་རྣམ་པ་ལྔ་དང༌། དབང་བསྐུར་བ་བླང་བར་བྱའོ། །ཡང་བཅོམ་ལྡན་འདས་ལ་ཕྱག་བྱས་ལ། སྔགས་གཟུང་བ་དང༌། ཕྱག་རྒྱ་བཞིའི་ཡེ་ཤེས་དང༌། གཟེངས་བསྟོད་པ་དང་ལུང་བསྟན་པ་བཅོམ་ལྡན་འདས་ལ་མནོས་ལ་བདག་ལ་བྱིན་གྱིས་བརླབ་པ་ལ་སོགས་པ་སྔ་མ་བཞིན་དུ་བྱས་ཏེ། མདུན་དུ་སྐྱིལ་མོ་ཀྲུང་གིས་འདུག་སྟེ་བུ་མོ་དང་ལྷན་ཅིག་ལ་འཇུག་པའི་ཕྱག་རྒྱ་བཅིངས་ལ་ཇི་སྲིད་ཡིད་ལ་མངོན་པར་འདོད་པའི་དངོས་གྲུབ་ཐོབ་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་མཆོད་པ་ཐམས་ཅད་ཀྱིས་བཅོམ་ལྡན་འདས་ལ་ཡང་དག་པར་མཆོད་ནས་ཕྱག་བྱས་ནས་སླར་དབྱུང་བར་བྱའོ། །དེ་ནས་སློབ་མ་གཞུག་པར་བྱ་བའི་ཕྱིར་དཀྱིལ་འཁོར་བརྟག་པར་བྱ་སྟེ། དེ་ནས་བུ་མོ་མེད་པར་རབ་ཏུ་དགའ་བའི་རྡོ་རྗེ་སློབ་དཔོན་བདག་ཉིད་འཇུག་པའི་ཆོ་ག་རྗེས་སུ་སྤྱད་ལ་སྔར་བཤད་པའི་ཆོ་ག་རྣམས་བྱས་ནས། སྲིད་པའི་བདེ་བ་རྣམ་དག་ཕྱིར། །ཁྱོད་སྔོན་ཁྱིམ་ལ་དགའ་བའི་ཕྱིར། །འདོད་པ་ཀུན་གྱི་དངོས་གྲུབ་ཅེས། །སེམས་ཅན་ཀུན་དོན་གྲུབ་ཕྱིར་བགྱིད། །ཅེས་བྱ་བས་གསོལ་བ་བཏབ་ལ། བཅོམ་ལྡན་འདས་འཁོར་དང་བཅས་པ་རྣམས་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་སློབ་མ་བསླབ་པའི་གཞི་ལྔ་ཡོངས་སུ་འཛིན་པའམ། དགེ་ཚུལ་ལམ་དགེ་སློང་གི་སྔོམ་པ་ཡོངས་སུ་བླངས་པས་སྔར་བཤད་པའི་ཆོ་གས་རིག་པའི་སྔོམ་པ་བཟུང་ལ་དེ་ནས། དེས་ཨོཾ་སརྦ་ཏ་ཐཱ་ག་ཏ་ཡོ་ག་ཙིཏྟོ་པ་ད་ཡཱ་མི་ཞེས་བྱ་བ་ལས་སློབ་དཔོན་གྱིས་བྱང་ཆུབ་ཀྱི་སེམས་བསྐྱེད་དུ་གཞུག་གོ །དེ་ནས་དེའི་སྙིང་གར་རྡོ་རྗེ་ཇི་ལྟ་བ་བཞིན་དུ་བསྐྱེད་ལ། དེ་ནས་རྡོ་རྗེ་སེམས་དཔར་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་ནས་འདི་སྐད་བརྗོད་པར་བྱའོ། །དེང་ཁྱོད་དེ་བཞིན་གཤེགས་པས་བྱིན་
གྱིས་བརླབ་པར་འགྱུར་གྱི། ཁྱོད་ཀྱིས་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དུ་མ་ཞུགས་པ་ལ་སྨྲ་བར་མ་བྱེད་ཅིག །དད་པ་དང་མི་ལྡན་པ་རྣམས་ལ་ཡང་མ་ཡིན་ནོ། །དེ་ནས་ཐོག་མ་ལྔ་པོ་བསྡུ་བ་བཅིངས་ལ་འདི་སྐད་ཅེས་བརྗོད་དོ། །སངས་རྒྱས་ཐམས་ཅད་བསྒྲུབ་པ་ཡི། །ཁྱེད་ཀྱིས་གསང་བའི་དམ་ཚིག་འདི། །སངས་རྒྱས་ཐམས་ཅད་རབ་གྲུབ་བྱེད། །གལ་ཏེ་དཀྱིལ་འཁོར་མ་མཐོང་སྨྲས། །ཁྱེད་ཀྱི་རིགས་ཀུན་བཅོམ་པར་འགྱུར། །ཨོཾ་མ་ཧཱ་སུ་ཁ་ཧ་ན་ས་མ་ཡ་མཱ་ཏི་ཀྲ་མ་སུ་ར་ཏ་སྟྭཾ། དེ་ནས་ཡོན་གྱི་མཆོག་བླངས་ལ་ཤར་ཕྱོགས་ཀྱི་སྒོ་ལ་བལྟས་ནས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ་རབ་ཏུ་དགའ་བའི་རྡོ་རྗེའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་འཛིན་དུ་བཅུག་ལ་སློབ་མ་ཐམས་ཅད་གཞུག་པའི་ཆོ་གས་གཞུག་པར་བྱའོ། །དེ་ནས་ཞུགས་ནས་རྣ་བར་འདི་སྐད་ཅེས་བསྟན་པར་བྱའོ། །ཆགས་བྲལ་གྱིས་འདུལ་འཇིག་རྟེན་ལ། །ཆགས་བྲལ་གྱིས་ནི་སྦྱོང་བར་བྱེད། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའ་སྦས་པ་ཡིན། །འདོད་ཆགས་བྲལ་བས་འདྲ་བའི་སྡིག །སྡུག་བསྔལ་དངོས་པོ་གཞན་མེད་དེ། །དེ་བས་འདོད་ལ་ཆགས་བྲལ་བ། །ཁྱོད་ཀྱིས་ནམ་ཡང་མ་བྱེད་ཅིག །དེ་ནས་འདི་སྐད་ཅེས་བརྗོད་པར་བྱའོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་གྲུབ་པའང་ཐོབ་ནས་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ་དེ་ལྟ་བུའི་ཡེ་ཤེས་བསྐྱེད་པར་བྱའི། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །དམ་ཚིག་ཉམས་པར་གྱུར་ཏ་རེ། དེ་ནས་རྡོ་རྗེ་སློབ་དཔོན་རང་ཉིད་ཀྱིས་སེམས་མ་རྡོ་རྗེ་མའི་ཕྱག་རྒྱ་ཁ་ཐུར་དུ་བསྟན་པ་དང་གྱེན་དུ་བསྟན་པ་བཅིངས་ལ། རྡོ་རྗེ་སློབ་མའི་སྤྱི་བོར་གཞག་སྟེ། འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་དམ་ཚིག་རྡོ་རྗེ་ཡིན་གྱི་གལ་ཏེ་འགའ་ཞིག་ལ་སྨྲས་ན། ཀླད་པ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང་མངའི་སྙིང་པོ་ལན་ཅིག་བཟླས་ལ་སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་
བྱའོ། །རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་གཤེགས། །བཛྲོད་ཀ་ཋ། དེ་ནས་སློབ་མ་ལ་འདི་སྐད་བརྗོད་པར་བྱའོ། །དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ་རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག་ཅེས་བརྗོད་པར་བྱའོ། །དེ་ནས་རྡོ་རྗེ་སློབ་དཔོན་གྱིས་རིངས་པར་སེམས་མ་རྡོ་རྗེ་མའི་རྡོ་རྗེ་བཅིངས་ལ་དེའི་སྙིང་གར་གཞག་སྟེ་འདི་སྐད་ཅེས་བརྗོད་པར་བྱའོ། །འདི་ནི་རྡོ་རྗེའི་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་བཤད། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་འབབ་པར་ཤོག །དེ་ནས་བཛྲ་ཨཱ་བེ་ཤ་ཨ་ཞེས་བྱ་བ་འདི་ལན་བརྒྱ་འདོན་དུ་གཞུག་གོ །ཡང་གཡོན་པའི་ཁྲོ་བོའི་ཁུ་ཚུར་གྱིས་རྡོ་རྗེ་སེམས་མ་དྲལ་ལ། ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཨ་ཨ་ཨ་ཨཱ་ཨཱ་ཞེས་བྱ་བ་ལན་བརྒྱ་ཟློས་སུ་བཅུག་ལ་བཅོམ་ལྡན་འདས་རྡོ་རྗེ་སེམས་དཔས་ཀུན་དུ་གང་བར་བསམ་པར་བྱ་སྟེ་དེས་ནི་འབབ་པར་གྱུར་པའམ། འདི་ལ་ལྷའི་ཡེ་ཤེས་སྐྱེ་བར་འགྱུར་རོ། །དེ་ནས་མེ་ཏོག་དོར་ལ་ཕྲེང་བས་དབང་བསྐུར་བ་དང༌། གདོང་གཡོགས་དགྲོལ་བ་དང༌། དཀྱིལ་འཁོར་བསྟན་པ་དང༌། ཕྱག་རྒྱ་དགྲོལ་བ་རྣམས་སློབ་དཔོན་གྱི་ཆོ་གས་བྱའོ། །དེ་ནས་དེ་ཁོ་ན་ཉིད་ཆེན་པོ་བརྗོད་པར་བྱ་སྟེ། དེ་ནི་འདི་ཡིན་ནོ། །སེམས་ཅན་ཀུན་གྱི་ཡིད་ཁྱབ་ཅིང༌། །སེམས་ཅན་ཀུན་ལ་བདེ་རབ་སྩོལ། །རྡོ་རྗེ་སེམས་དཔའ་སེམས་དཔའ་ཆེ། །འདོད་པ་འདི་ནི་དམ་ཚིག་མཆོག །འདི་ནི་ཐོག་མ་ཐ་མ་མེད། །ནམ་མཁའ་ལས་བྱུང་མཚན་ཉིད་ཡིན།། ཀུན་དུ་བཟང་པོ་ཀུན་བདག་ཉིད། །རྡོ་རྗེ་སྙེམས་ཚུལ་བདག་པོའི་གཙོ། །འདི་ཉིད་ཁོ་ནས་འགྲོ་བའི་སེམས། །བརྟན་པས་སེམས་དཔའ་ཞེས་བརྗོད་དེ། །མཉམ་པར་གཞག་པས་ཏིང་འཛིན་ཏེ། །ངེས་པའི་ཕྱིར་ན་རྡོ་རྗེར་འགྱུར། །སེམས་དཔའི་བྱིན་རླབས་སྦྱོར་བ་ཡིས། །སླར་ཡང་རྡོ་རྗེ་སེམས་དཔར་
འགྱུར། །འདི་ཉིད་ཐོག་མའི་སེམས་དཔའ་སྟེ། །འདོད་པ་འགྲོ་བ་ཀུན་གྱི་བདག །འདི་ཉིད་ཁོ་ནས་སངས་རྒྱས་ཉིད། །འདི་ཉིད་དེ་བཞིན་གཤེགས་པ་ཡིན། །འདི་ནི་ཁམས་གསུམ་ཐམས་ཅད་དེ། །དང་པོའི་སེམས་དཔར་ཡང་དག་བྱུང༌། །ཆགས་བྲལ་གྱིས་མཐར་མུ་སྟེགས་རྣམས། །དེ་ཉིད་འདུལ་བ་ཡང་དག་འདི། །བཅོམ་ལྡན་རབ་སྦས་གསང་ཉིད་དུ། །བདེ་བར་གཤེགས་པས་མཛད་པ་ཡིན། །དེ་ནས་བཅོམ་ལྡན་འདས་བསྟན་པར་བྱ་སྟེ། བཅོམ་ལྡན་འདས་ཕྱག་ན་རྡོ་རྗེ་འདི་ནི་བདེ་བ་ཆེན་པོ་རྡོ་རྗེ་སེམས་དཔའ་ཡིན་ཏེ། སེམས་ཅན་ཐམས་ཅད་དགུག་པ་དང་གཞུག་པ་དང༌། བཅིང་བ་དང༌། དབང་དུ་བྱ་བའི་དམ་ཚིག་ནི་འདི་ཡིན་ནོ་ཞེས་དང་པོའི་སེམས་དཔའ་ནས་བརྩམས་ཏེ་དེ་བཞིན་གཤེགས་པའི་བར་དུ་དེ་རྣམས་ལ་ཁྱེད་ཀྱིས་བརྙས་པར་མི་བྱ་ཞིང་ནམ་ཡང་ཡོངས་སུ་སྤང་བར་མི་བྱའོ། །འདི་ལ་བརྙས་པར་གྱུར་ན་ཁྱེད་ལ་ཉེས་པ་ཐམས་ཅད་མི་འབྱུང་བ་མ་ཡིན་ནོ། །དེ་ནས་ཡོན་གྱི་མཆོག་བླངས་ཏེ་སྣ་ཚོགས་པདྨ་དེ་བཞིན་དུ་བྲིས་ལ་སློབ་མ་རྡོ་རྗེ་སེམས་དཔར་བྱིན་གྱིས་བརླབས་ཏེ། པདྨ་དེར་རྡོ་རྗེ་སེམས་དཔའི་ཕྱག་རྒྱ་ཆེན་པོའི་སྦྱོར་བས་བཞག་ལ་མཆོད་ཡོན་བྱིན་ནས་མེ་ཏོག་ལ་སོགས་པས་ཡང་དག་པར་མཆོད་དེ་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། སློབ་དཔོན་གྱི་ཚོགས་དབང་བསྐུར་བར་བྱ་ཞིང་ཆུ་དེ་བླུད་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འགྱུར། །རྡོ་རྗེ་བདུད་རྩིའི་ཆུ་འཐུང་ཤིག །རྡོ་རྗེ་དྲིལ་བུའི་ཕྱག་རྒྱ་དག །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུས་པའི་ནང་སྨྲས་ན། །དད་པ་མེད་པར་བགད་པར་འགྱུར། །དེ་ནས་ཕྱག་རྒྱའི་དབང་བསྐུར་བ་དང༌། ཅོད་པན་དང༌། དར་དཔྱངས་དང༌། རྡོ་རྗེ་དང་བདག་པོ་དང་མིང་གི་དབང་བསྐུར་བ་བྱིན་ལ་དངོས་གྲུབ་ཀྱི་རྡོ་རྗེའི་བརྟུལ་ཞུགས་བྱིན་ནས་དེ་ཁོ་ན་ཉིད་དང་ཆོས་དང་དམ་ཚིག་ཀྱང་སྦྱིན་པར་བྱའོ། །དེ་ནས་མེ་ཏོག་ལ་སོགས་པ་དང་རྡོ་རྗེ་མཚོན་ཆ་ལ་སོགས་པ་ཕྱག་རྒྱའི་མཆོད་པ་ཕྱག་རྒྱ་བཅུ་གཉིས་ཀྱིས་དེ་ཡང་དག་པར་མཆོད་ལ། ཨོཾ་མ་ཧཱ་
སུ་ཁ་བཛྲ་སཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་བྱ་བས་དམ་ཚིག་ཆེན་པོའི་དེ་ཁོ་ན་ཉིད་མངོན་དུ་བཅུག་ནས་བཤད་པར་བྱའོ། །དམ་ཚིག་ཆེན་པོ་ནི་སེམས་དཔའ་ལ་བྱའོ། །དེ་ཁོ་ན་ཉིད་ནི་རབ་ཏུ་དགའ་བ་ཞེས་བྱ་སྟེ། བཅོམ་ལྡན་འདས་རབ་ཏུ་དགའ་བ་ལ་བསྐུལ་བས་དངོས་གྲུབ་ཐམས་ཅད་ཀྱི་མཆོག་འདོད་པ་ཐམས་ཅད་མྱུར་དུ་འཐོབ་པར་འགྱུར་རོ། །དེ་བས་ན་དམ་ཚིག་ཆེན་པོའི་དེ་ཁོ་ན་ཉིད་ཅེས་བཤད་དོ། །བཅོམ་ལྡན་འདས་འདི་ནི་ཁམས་གསུམ་གྱི་དབང་ཕྱུག་དང་པོའི་སེམས་དཔའ་ཉིད་ཡིན་པས་འདོད་པ་ཀུན་གྱི་དབང་ཕྱུག་སྟེ་མ་དུལ་བ་རྣམས་ལ་རྡོ་རྗེ་བསྙེམས་མའི་བདག་པོ་མཆོག་ཡིན་ནོ། །དེ་བས་ན་རྡོ་རྗེ་བསྙེམས་མའི་དོན་ཉིད་དུ་བརྗོད་པར་བྱའོ། །བཅོམ་ལྡན་འདས་ཐོག་མ་དང་ཐ་མ་མེད་པ་ཀུན་དུ་བཟང་པོའི་སྐུ་འགྲོ་བ་ཐམས་ཅད་ཀྱི་བདག་པོ་ཕྱག་ན་རྡོ་རྗེ་ཞེས་རྡོ་རྗེ་བསྙེམས་མའི་བདག་པོ་དེ་རབ་ཏུ་དགའ་བའི་སྦྱོར་བས་རྡོ་རྗེ་འདི་འཆང་བར་མཛད་ཅིང༌། དེ་བཞིན་གཤེགས་པ་ཐམས་ཅད་མཉེས་པར་བྱེད་པ་ཡིན་ལ། གང་གི་ཚེ་རབ་ཏུ་དགའ་བས་གཟེངས་བསྟོད་པ་དེའི་ཚེ་འདི་ནི་བདེ་བ་ཆེན་པོ་རྡོ་རྗེ་སེམས་དཔའ་ཡིན་ཏེ་ཉོན་མོངས་པ་མེད་ཅིང་བདེ་བ་ཉིད་ཀྱིས། སངས་རྒྱས་ཀྱི་བྱང་ཆུབ་ལ་སོགས་པ་དངོས་གྲུབ་ཐམས་ཅད་མྱུར་དུ་ཐོབ་པར་འགྱུར་བ་ཡིན་ནོ། །དེ་ནས་འདིས་ནི་རབ་ཏུ་དགའ་བས་བསྟོད་པའི་ཕྱག་རྒྱས་བཅོམ་ལྡན་འདས་གཡོན་བསྙེམས་པའི་ཚུལ་གྱིས་འདོད་ཆགས་ལ་སྤྱད་པའི་སེམས་ཅན་རྣམས། དབང་དུ་མཛད་ནས་མགུ་བར་མཛད་པ་ཡིན་ནོ། །དེ་ཅིའི་ཕྱིར་ཞེ་ན་དགའ་བའི་སྦྱོར་བས་འགྲོ་བ་རྣམས་མགུ་བར་མཛད་པ་འབའ་ཞིག་ཏུ་མ་ཟད་ཀྱི་དེ་བཞིན་ཉིད་ཀྱི་ཚུལ་གྱིས་འདུལ་བར་མི་ནུས་པ་རྣམས་ལ་འདིར་བསྙེམས་མའི་ཚུལ་ལ་ཡང་སྦྱོར་བར་མཛད་དོ། །བསྙེམས་པ་འབའ་ཞིག་གིས་འདུལ་བར་ནུས་པ་ལ་འདིའི་དོན་དུ་བཅོམ་ལྡན་འདས་རྡོ་རྗེ་བསྙེམས་མའི་བདག་པོར་གྱུར་ནས་འཇིག་རྟེན་གྱི་ཁམས་ཐམས་ཅད་དུ་ཡང་འདུལ་བར་སྟོན་པའོ། །དེའི་ཕྱག་རྒྱ་བཅིངས་ལ་ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་ཞེས་བརྗོད་པར་བྱའོ། །དེ་ནས་དེ་རྣམས་ཡིད་ལ་འདོད་པའི་དངོས་གྲུབ་ཐམས་ཅད་འགྲུབ་པར་འགྱུར་རོ། །རྡོ་རྗེ་
ཡིད་ལས་བྱུང་བ་ལ་སོགས་པ་འདི་རྣམས་ནི་བཅོམ་ལྡན་འདས་རྡོ་རྗེ་སེམས་དཔའ་དེའི་ཡན་ལག་ཡིན་ལ་འདི་ནི་བཅོམ་ལྡན་འདས་ཀྱི་འདོད་ཆགས་ཀྱི་ཡན་ལག་གི་མཐུས་འབིགས་པར་བྱེད་པས་ན་མཚོན་ཆའི་སྙིང་པོའོ། །གཡས་ན་རབ་ཏུ་དགའ་བའི་སྦྱོར་བས་བདེ་བ་ཆེན་པོའོ། །རྒྱབ་ན་ཆགས་པའི་འཆིང་བས་ཆུ་སྲིན་ལྟ་བུ་ཡིན་པས་ན་ཆུ་སྲིན་གྱི་རྒྱལ་མཚན་ནོ། །གཡོན་ན་ནི་བསྙེམས་པས་དབང་དུ་བྱས་པ་ན་དབང་དུ་བྱེད་པ་སྟེ། འདི་རྣམས་ནི་རབ་ཏུ་དགའ་བའི་མཆོད་པའོ། །མེ་ཏོག་མ་ལ་སོགས་པ་དང་སྒེག་མོ་ལ་སོགས་པ་འདི་དག་ནི་རྡོ་རྗེ་རྣམ་པར་རྩེ་མ་སྟེ། འདི་དག་ནི་མིག་གི་ཆགས་པའོ། །རྩེ་བའི་ལྕགས་ཀྱུ་ལ་སོགས་པའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་འདིར་དེ་ཞུགས་ན་འདི་ནི་སངས་རྒྱས་ཉིད་ཀྱང་འཐོབ་པར་འགྱུར་ན་དངོས་གྲུབ་གཞན་རྣམས་ལྟ་སྨོས་ཀྱང་ཅི་དགོས་ཏེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་གི་མཆོག་ཡིན་པའི་ཕྱིར་རོ། །དེ་ནས་སྙིང་པོ་བྱིན་ལ་ཕྱག་རྒྱ་ཆེན་པོ་ལ་སོགས་པ་བཅིང་བའི་ཕྱིར་སྦྱོར་བ་བཞི་ཇི་ལྟ་བ་བཞིན་དུ་བསླབ་པར་བྱའོ། །ལྷའི་རྣལ་འབྱོར་དུ་བྱས་ལ་ས་མ་ཡ་སཏྭ་ཨ་དྷིཥྛ་སྭ་མཱཾ་ཞེས་བྱ་བ་དང༌། རང་གི་དམ་ཚིག་གི་ཕྱག་རྒྱས་བདག་ཉིད་ཇི་ལྟ་བ་བཞིན་དུ་བྱིན་གྱིས་བརླབ་པར་བྱས་ལ། བསྙེམས་པ་དང་བཅས་པས་རྡོ་རྗེ་གསོར་ཞིང་འདི་སྐད་ཅེས་བརྗོད་པར་བྱའོ། །ཊཀྐི་ཧཱུཾ་ཛཿ། ཞེས་བྱ་བས་རྡོ་རྗེ་ཚིག་གིས་བཟླའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་རྗེས་སུ་གནས་པ་རབ་ཏུ་བསྟན་པར་བྱའོ། །དེ་ནས་རྡོ་རྗེ་དེ་རང་གི་སྙིང་གར་བསྟོད་པའི་ཚུལ་གྱིས་བཞག་ལ་འདི་སྐད་ཅེས་བརྗོད་པར་བྱའོ། །ཊཀྐི་ཛཿཧོ། དེ་ནས་སྐུ་དང་གསུང་དང་ཐུགས་རྡོ་རྗེ་སེམས་དཔའ་དང་འདྲ་བར་འགྱུར་རོ། །དེ་ནས་རྡོ་རྗེ་ཡིད་ལས་བྱུང་བ་ལ་སོགས་པའི་ཕྱག་རྒྱ་ཆེན་པོ་ཇི་ལྟར་བྲིས་པ་དང་རྗེས་སུ་མཐུན་པ་བཞིན་དུ་བསླབ་པར་བྱའོ། །དེ་ནས་ཆོས་དང་ལས་དང་དམ་ཚིག་གི་ཕྱག་རྒྱ་ཆེན་པོ་ལ་ཡང་བསླབ་པར་བྱའོ། །གང་ཡང་དེ་བཞིན་གཤེགས་པ་ལ་སོགས་པ་ལ་དད་པ་དེ་རྣམས་ལ་ཡང་འདིར་དེ་བཞིན་གཤེགས་པ་ལ་སོགས་པའི་རང་གི་དམ་ཚིག་ལ་སོགས་པས་འགྲུབ་པར་འགྱུར་རོ། །དེ་ནས་བཅོམ་ལྡན་འདས་འཁོར་དང་བཅས་
པ་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ལ་ཅི་ནུས་པར་མཆོད་ཅིག་ཅེས་བསྒོ་ལ། །སློབ་མ་ཐམས་ཅད་ཅི་ནུས་པར་མཆོད་པ་བྱེད་དུ་གཞུག་གོ །དེ་ནས་ཁ་ཟས་དང་སྤྱོད་ལམ་ཐམས་ཅད་ཀྱིས་སློབ་མ་རྣམས་ཚིམ་པར་བྱས་ལ་ཕྱག་རྒྱ་དང་ཕྱག་རྒྱའི་ལན་ཐམས་ཅད་ཀྱི་གར་གྱིས་མཆོད་པ་བྱའོ། །དེ་ནས་རྡོ་རྗེ་བསྡམས་པ་སྙིང་གར་དམ་དུ་བཅིངས་ལ་བཛྲ་མུཿཞེས་བྱ་བས་རང་གི་གནས་སུ་ཕྱག་རྒྱ་དགྲོལ་བའི་བསམ་པས་དགྲོལ་བར་བྱའོ། །དེ་ལྟར་ཕྱག་རྒྱ་བཀྲོལ་ནས་བཅོམ་ལྡན་འདས་གཤེགས་པར་བྱ་བའི་ཕྱིར་བསྐུལ་བར་བྱའོ། །ཐོག་མཐའ་རབ་དགར་རག་ལས་པ། །འགྲོ་བ་ཐམས་ཅད་འདི་ཡི་མཐུས། །སེམས་དཔའ་ཆེན་པོ་རྡོ་རྗེར་འགྱུར། །སླར་ཡང་འབྱོན་པར་མཛད་དུ་གསོལ། །ཞེས་བྱ་བ་བརྗོད་དེ། དེ་ནས་ཨོཾ་མ་ཧཱ་སུ་ཁ་བཛྲ་ས་ཏྭ་ཛཿཧཱུཾ་བཾ་ཧོཿ། སུ་ར་ཏ་སྟྭཾ་མུཿཞེས་བྱ་བ་བརྗོད་ལ་སྙིམ་པའི་མེ་ཏོག་གྱེན་དུ་གཏོར་བར་བྱའོ། །དེ་ལྟར་བཅོམ་ལྡན་འདས་འཁོར་དང་བཅས་པ་གཤེགས་སུ་གསོལ་བར་འགྱུར་རོ། །དེ་ནས་སྤྲུལ་པ་རྣམས་ཇི་ལྟ་བ་བཞིན་དུ་བསྡུ་བ་བྱས་ལ་འདོད་ཆགས་ཆེན་པོ་ནི་ཞེས་བྱ་བ་ལ་སོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་འདོན་པར་བྱའོ། །དེ་ནས་རྡོ་རྗེ་སྲུང་བ་ལ་སོགས་པས་བསྲུང་བ་བྱས་ལ་ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པས་དཀྱིལ་འཁོར་རང་ཉིད་ཀྱིས་དབྱི་བར་བྱའོ། །གང་དུ་ཁྱད་པར་གྱི་ཆོ་ག་མེད་པ་དེར་དཀྱིལ་འཁོར་ཆོ་ག་གཞན་དག་ལ་ཡང་ཆོ་ག་འདི་བཞིན་དུ་ཤེས་པར་བྱའོ། །སློབ་མ་གཞུག་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་ལས་ཀྱི་ཆོ་ག་རྒྱས་པ་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པར་བཤད་ནས་ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསྟན་པར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར་དེ་ལྟར་བཅོམ་ལྡན་འདས་དོན་ཡོད་པ་ཐོགས་པ་མེད་པ་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲས་ནི་འདས་མ་ཐག་པ་སྟོན་པའི་ཚིག་གོ །བཅོམ་ལྡན་འདས་ཞེས་བྱ་བ་ནི་རྡོ་རྗེ་འཆང་ཆེན་པོ་སྟེ་དེས་འདི་སྐད་ཅེས་བཀའ་སྩལ་ཏོ་ཞེས་བྱ་བར་སྦྱར་རོ། །དོན་ཡོད་པ་ཞེས་བྱ་བ་ལ་སོགས་པ་ལ་
དེ་ལ་དོན་ཡོད་པ་ནི་འདོད་པའི་འབྲས་བུ་སྟེ་ངེས་པར་སྩོལ་བའོ། །འདོད་པའི་འབྲས་བུ་སྩོལ་བར་མཛད་པའི་དོན་ལ་བཟློག་པར་མི་ནུས་པས་ན་ཐོགས་པ་མེད་པའོ། །མྱུར་དུ་གྲུབ་པ་ནི་ཚེ་འདི་ཉིད་ལ་སངས་རྒྱས་ཉིད་དམ་རྡོ་རྗེ་འཆང་བ་ཉིད་དུ་གྲུབ་པའོ། །དེའི་ཆོ་ག་ནི་རྫོགས་པར་བྱེད་པའི་རྒྱུ་སྟེ་གལ་ཏེ་བསྒྲུབ་པར་འདོད་ན་ཞེས་བྱ་བ་ལ་སོགས་པ་གང་བཤད་པའོ། །ཆོ་ག་དེའི་རྒྱས་པར་ནི་ཡུལ་རྣམ་པ་སྣ་ཚོགས་དང་ལྡན་པར་གྱུར་པའི་གསང་བའི་མཆོད་པ་རྣམས་ཀྱིས་ཡང་དག་པར་མཆོད་དེ་རང་རང་གི་ཕྱག་རྒྱས་རབ་ཏུ་བསྒྲུབས་ནས་དྲུག་ལྡན་ལ་སོགས་པ་སྙན་པའི་གླུ་དང་བཟླས་པའི་དོན་གྱིས་རྡོ་རྗེ་སེམས་དཔའ་རབ་ཏུ་བསྒྲུབ་པར་བྱའོ། །ཞེས་འོག་ནས་རྗེས་ཐོགས་ཉིད་ལ་སྟོན་པར་འགྱུར་བའོ། །དེའི་དམ་ཚིག་ནི་རྡོ་རྗེ་སེམས་དཔའ་ལ་སོགས་པའི་ངོ་བོ་ནི་རྡོ་རྗེ་དང་འདི་སྐད་ཅེས་བྱ་བའི་ཏིང་ངེ་འཛིན་ནི། ཏིང་ངེ་འཛིན་གྱི་ཆོ་ག་རྣམ་པར་གནོན་པ་གང་ཡིན་པ་དེ་མཛད་པ་སྟེ། དེ་ལ་རྡོ་རྗེ་སེམས་དཔའ་ལ་སོགས་པའི་ཚུལ་གྱིས་སེམས་ཅན་གྱི་དོན་རྫོགས་པར་མཛད་པ་ཐུགས་རྩེ་གཅིག་པ་ནི་ཏིང་ངེ་འཛིན་ཏོ། །དེའི་ཆོ་ག་ནི་རྡོ་རྗེ་སེམས་དཔའ་ལ་སོགས་པའི་ཐུགས་རྗེས་འགྲོ་བའི་དོན་མཛད་པ་སྟེ་དེ་ཉིད་ནི་རྣམ་པར་གནོན་པའོ།། འདི་སྐད་སྟོན་ཏེ་རྡོ་རྗེ་སེམས་དཔའི་སྐུར་བསྐྱེད་ནས་དེས་འདུལ་བའི་སེམས་ཅན་གྱི་ཁམས་རྣམས་རྡོ་རྗེ་སེམས་དཔའ་ལ་སོགས་པའི་ཏིང་ངེ་འཛིན་ལ་ངེས་པར་སྦྱོར་བར་མཛད་དོ། །འདི་གསུངས་སོ་ཞེས་བྱ་བ་ནི་བདེ་བ་ཆེན་པོ་ཞེས་བྱ་བ་ལ་སོགས་པའི་རྗེས་ཐོགས་ཉིད་ལ་སྟོན་པའོ། །སུ་ཞིག་གིས་འདི་སྐད་གསུངས་ཤེ་ན་རྡོ་རྗེ་འཆང་ཆེན་པོས་སོ་ཞེས་གསུངས་པ་ཡིན་ནོ། །བདེ་བ་ཆེན་པོ་རབ་གྲུབ་ཕྱིར། །ཞེས་བྱ་བ་ནི་སྤྱོད་པ་རྒྱ་ཆེན་པོ་དང་ལྡན་པའི་སེམས་ཅན་རྣམས་ཀྱིས་དེ་བཞིན་གཤེགས་པ་རྣམ་པར་ཐར་པ་མངོན་སུམ་དུ་བྱ་བའི་ཕྱིར་རོ། །འདོད་ཆགས་ཆེན་པོ་རྣམ་དག་ཕྱིར། །ཞེས་བྱ་བ་ནི་སྔོན་གྱི་འཕེན་ཤུགས་ཀྱིས་གཟུགས་ཐམས་ཅད་སྟོན་པའི་ཡེ་ཤེས་ཀྱིས་སེམས་ཅན་གྱི་དོན་མཛད་པ་ནི་འདོད་ཆགས་ཆེན་པོ་རྣམ་པར་དག་པ་སྟེ་དེའི་དོན་ཏོ། །རྡོ་རྗེ་སེམས་དཔའི་བསྒྲུབ་པ་ནི། །ཞེས་བྱ་བ་ནི་བཤད་མ་ཐག་པ་དེ་
བཤད་པར་བྱའོ། །མྱུར་དུ་རིངས་པར་རོ། །རྟག་ཏུ་ནི་བརྟན་པ་སྟེ་འཁོར་བ་ཇི་སྲིད་ཀྱི་བར་དུ་གནས་པའོ། །ཇི་སྲིད་གནས་ཞེས་བྱ་བ་ལ་འདིར་འཁོར་བས་ན་འཁོར་བ་སྟེ་སྣོད་ཀྱི་འཇིག་རྟེན་ནོ། །དེར་གནས་པ་ནི་ཕྱི་མའི་མཐར་ཐུག་པ་མེད་པར་བཞུགས་པ་སྟེ། མི་གནས་པའི་མྱ་ངན་ལས་འདས་པའི་ཚུལ་གྱིས་འཁོར་བར་བཞུགས་པའོ། །ནི་ཞེས་བྱ་བ་ནི་ངེས་པར་གཟུང་བའོ། །ཇི་སྲིད་ཅེས་བྱ་བ་ནི་བརྗོད་པར་འདོད་པའི་དོན་མ་ལུས་པར་སྟོན་པར་བྱེད་པའི་ཚིག་སྟེ། དེ་སྲིད་སེམས་ཅན་འདོན་པར་མཛད་པ་ནི་འཁོར་བའི་རྒྱ་མཚོ་ཆེན་པོ་ལས་དེ་སྙེད་ཅིག་ཁོ་ན་ཕྱག་རྒྱ་ཆེན་པོ་ལ་སོགས་པའི་ཕྱག་བརྐྱང་བས་སངས་རྒྱས་ཉིད་སྩོལ་བས་འདོན་པར་མཛད་དོ། །འདི་སྐད་སྟོན་ཏེ་ཇི་སྲིད་ཅིག་ཁོ་ན་མི་གནས་པའི་མྱ་ངན་ལས་འདས་པའི་ཚུལ་གྱིས་འཁོར་བར་བཞུགས་པར་མཛད་པ་དེ་སྲིད་ཁོ་ནས་བྱང་ཆུབ་སེམས་དཔའ་རྣམས་སྔོན་གྱི་འཕེན་ཤུགས་ཀྱིས་ཕྱག་རྒྱ་ཆེན་པོ་ལ་སོགས་པའི་ཕྱག་བརྐྱང་བར་མཛད་པས་སེམས་ཅན་གྱི་ཁམས་དཔག་ཏུ་མེད་པའི་འཁོར་བའི་རྒྱ་མཚོ་ཆེན་པོ་ལས་གདོན་པར་མཛད་པའོ། །མྱ་ངན་ལས་འདས་ཞེས་བྱ་བ་ལ་སོགས་པ་ནི་ཉན་ཐོས་དང་རང་སངས་རྒྱས་ལྟར་ཕུང་པོ་ལྷག་མ་མེད་པའི་མྱ་ངན་ལས་འདས་པས་ཡོངས་སུ་མྱ་ངན་ལས་འདས་ན་འཁོར་བ་ཕྱི་མའི་མཐར་ཐུག་པ་མེད་པར་སེམས་ཅན་གྱི་དོན་ཤིན་ཏུ་བྱེད་པར་མི་ནུས་སོ། །ཅིའི་ཕྱིར་ཞེ་ན། བྱང་ཆུབ་སྒྲིབ་ཅེས་བྱ་བ་གསུངས་ཏེ། ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་སྒྲིབ་ཅིང་འགེགས་པ་འདི་ལ་མངའ་བས་ན་བྱང་ཆུབ་སྒྲིབ་པའོ། །ཤིན་ཏུ་མི་སྣང་བར་གྱུར་པས་ན་དེའི་ཕྱིར་མྱ་ངན་ལས་འདས་པར་གྱུར་པས་འགྲོ་བའི་དོན་བྱེད་མི་ནུས་པའོ། །དེ་བས་ན་བྱང་ཆུབ་སེམས་དཔའ་མི་གནས་པའི་མྱ་ངན་ལས་འདས་པ་བསྒྲུབ་པར་བྱ་བའི་ཕྱིར། བྱང་ཆུབ་སེམས་དཔའི་ལམ་ཐབས་ཤེས་རབ་ཟུང་དུ་འཇུག་པས་བསྒོམ་པར་བྱའོ་ཞེས་སྟོན་པ་ཡིན་ནོ། །དེ་ཉིད་ཀྱིས་ན་ཞེས་བྱ་བ་ལ་སོགས་བ་ལ་ནི་ཞེས་བྱ་བའི་སྒྲ་ནི་གང་གི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་ཕུང་པོ་ལྷག་མ་མེད་པའི་མྱ་ངན་ལས་འདས་པས་ཤིན་ཏུ་མི་སྣང་བར་གྱུར་ན་སེམས་ཅན་གྱི་དོན་བྱེད་མི་ནུས་སོ། །རྒྱུ་དེས་ན་བྱང་ཆུབ་སེམས་
དཔའ་དམ་པ་རྣམས་ཀྱི་ཕྱི་མའི་མཐར་ཐུག་པ་མེད་པའོ། །འཁོར་བ་ཇི་སྲིད་པའི་བར་དུ་འཁོར་བར་གནས་ཤིང་འདོད་པ་དང་གཟུགས་དང་གཟུགས་མེད་པའི་སྲིད་པ་ཡོངས་སུ་མི་འདོར་བར་འཁོར་བའི་ཚུལ་གྱིས་མི་གནས་པའི་མྱ་ངན་ལས་འདས་པའི་ངོ་བོས་སེམས་ཅན་གྱི་དོན་ཉིད་ཅེས་སེམས་ཅན་གྱི་དོན་གྱི་ཕྱིར། འཁོར་བ་ཡོངས་སུ་མི་འདོར་བར་བཞེད་ཅིང་ཡོངས་སུ་འདོད་པ་ཡིན་ནོ། །དངོས་པོ་ལ་མངོན་པར་ཞེན་པས་ནི་མ་ཡིན་ནོ། །འོ་ན་ཇི་ལྟར་ཞེ་ན། ཐམས་ཅད་དག་པའི་མཆོག་ཆོས་ཅན། །ཞེས་བྱ་བ་གསུངས་ཏེ། ཐམས་ཅད་ཅེས་བྱ་བའི་སྒྲས་ནི་སོ་སོར་རྟོག་པའི་ཡེ་ཤེས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བ་ལ་བྱ་བར་བཤད་དོ། །དེ་རྣམས་ཀྱི་དག་པ་ནི་ཐམས་ཅད་དག་པ་སྟེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའོ། །དེ་ཉིད་ནི་མཆོག་ཆོས་ཏེ་དེ་གང་ལ་ཡོད་པ་ནི་ཐམས་ཅད་དག་པའི་མཆོག་ཆོས་ཅན་ཞེས་བྱ་སྟེ། རྣམ་པར་རྟོག་པ་ཐམས་ཅད་དང་བྲལ་བ། །དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ཅན་ནོ་ཞེས་སྟོན་པ་ཡིན་ནོ། །གལ་ཏེ་དེ་ལྟར་བྱང་ཆུབ་སེམས་དཔའ་རྣམས་འཁོར་བ་ཇི་སྲིད་པར་གནས་ཏེ་ཕྱི་མའི་མཐར་ཐུག་པ་མེད་པའི་སེམས་ཅན་གྱི་དོན་མཛད་པར་གྱུར་ན། སྦྱིན་པའི་ཕ་རོལ་ཏུ་ཕྱིན་པ་ལ་སོགས་པའི་སྤྱོད་པས་ཀྱང་དེ་ལྟ་བུའི་སེམས་ཅན་གྱི་དོན་བྱེད་པར་གྱུར་པ། གསང་སྔགས་ཀྱི་སྤྱོད་པ་ཅི་ཞིག་བྱ་ཞེས་དེ་ལྟར་རྟོག་པར་འགྱུར་བ་དག་ཡོད་པས་དེའི་ཕྱིར། དེ་ལྟར་ཡིན་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་ཕྱག་རྒྱ་ཆེན་པོ་ཉིད་དམ་རྡོ་རྗེ་འཆང་བ་ཉིད་ལ་སོགས་པ་འཐོབ་པའི་མཚན་ཉིད་ཅན་གྱི་སེམས་ཅན་གྱི་དོན་དུ་འགྱུར་བས་དེ་ལྟ་བུར་བྱང་ཆུབ་ཀྱི་སྤྱོད་པའི་མཆོག་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་འདིས་ཚེ་འདི་ཉིད་ལ་ཐོབ་པར་མི་འགྱུར་བའོ། །རང་གི་སེམས་ཇི་ལྟ་བ་བཞིན་དུ་ཤེས་པ་ནི་བྱང་ཆུབ་སྟེ། དེའི་དོན་གྱི་སྤྱོད་པ་ནི་བྱང་ཆུབ་ཀྱི་སྤྱོད་པའོ། །དེ་ཡང་འཁོར་གསུམ་ཡོངས་སུ་དག་པའི་ཕ་རོལ་ཏུ་ཕྱིན་པ་བཅུའི་སྤྱོད་པའོ། །དེ་རྣམས་ཀྱི་མཆོག་ནི་ཕུལ་དུ་བྱུང་བར་གནས་པ་སྟེ། དེ་ལ་ཡོད་པའི་སྦྱིན་པའི་ཕ་རོལ་ཏུ་
ཕྱིན་པ་ལ་སོགས་པ་ནི་བྱང་ཆུབ་སྤྱོད་མཆོག་གོ །བྱང་ཆུབ་སྤྱོད་མཆོག་ཀྱང་ཡིན་ལ་སྦྱིན་པའི་ཕ་རོལ་ཏུ་ཕྱིན་པ་ཡང་ཡིན་པས་ན་བྱང་ཆུབ་ཀྱི་སྤྱོད་པའི་མཆོག་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པའོ། །ཇི་ལྟར་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ཀྱི་དངོས་གྲུབ་ཐམས་ཅད་ཀྱང་བསྒྲུབས་པས་དེ་བཞིན་གཤེགས་པ་ཉིད་དམ། རྡོ་རྗེ་འཆང་ཉི་ལ་སོགས་པ་ཐོབ་པའི་མཚན་ཉིད་ཅན་གྱིས་སེམས་ཅན་ཐམས་ཅད་ཀྱི་དོན་འགྲུབ་པར་འགྱུར་བ་དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་བྱང་ཆུབ་ཀྱི་སྤྱོད་པའི་མཆོག་དེ་རྣམས་ཀྱིས་འགྲུབ་པར་མི་འགྱུར་རོ། །ཇི་ལྟར་གསང་སྔགས་ཀྱི་ཚུལ་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབས་པས་ཚེ་འདི་ཉིད་ལ་དེ་བཞིན་གཤེགས་པ་ཉིད་དམ། རྡོ་རྗེ་འཆང་ཉིད་ལ་སོགས་པ་ཐོབ་པའི་མཚན་ཉིད་ཅན་གྱི་སེམས་ཅན་གྱི་དོན་དུ་འགྱུར་བ། དེ་ལྟར་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་བྱང་ཆུབ་ཀྱི་སྤྱོད་པའི་མཆོག་རྣམས་ཀྱིས་ཀྱང་ཅིའི་ཕྱིར་མི་འགྱུར་ཞེ་ན། དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་ཏེ། གང་དེ་བཞིན་གཤེགས་པ་རྣམས་ཀྱིས་འདུལ་བར་མི་འགྱུར་བ་དེ་ནི་དེ་བཞིན་གཤེགས་པས་མི་འདུལ་བ་སྟེ། དེ་བཞིན་གཤེགས་པ་མཐོང་བའི་སྐལ་བ་མེད་པའི་སེམས་ཅན་རྣམས་སོ། །མི་འདུལ་བ་དེ་རྣམས་ལ་སེམས་ཅན་གྱི་དོན་སངས་རྒྱས་ཉིད་དུ་བྱ་བ་ལ་སོགས་པས་དེ་བཞིན་གཤེགས་པ་མི་མཛད་དོ། །ནི་ཞེས་བྱ་བའི་སྒྲ་ནི་གང་གི་ཕྱིར་དེ་བཞིན་གཤེགས་པ་རྣམས་ནི་མི་འདུལ་བ་རྣམས་ལ་སེམས་ཅན་གྱི་དོན་མི་མཛད་དོ། །དེ་བས་ན་ཅི་ཞིག་ཏུ་ངེས་ཤེ་ན། ཇི་ལྟར་སྔགས་ཀྱི་ཚུལ་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབས་པས། ཚེ་འདི་ཉིད་ལ་དེ་བཞིན་གཤེགས་པ་ལ་སོགས་པ་སྐྱེད་པར་བྱེད་དོ། །དེ་བས་ན་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་བྱང་ཆུབ་ཀྱི་སྤྱོད་པའི་མཆོག་གིས་ནི་དེ་ལྟར་མི་འགྱུར་རོ། །གསང་སྔགས་ཀྱི་ཚུལ་ལ་ཡང་དེ་དང་འདྲ་མོད། ཅིའི་ཕྱིར་དེ་ལྟར་མི་འགྱུར་ཞེ་ན། འདི་ན་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་འདི་ན་གསང་སྔགས་ཀྱི་ཚུལ་ལ་སྐལ་བ་དང་
མི་ལྡན་པ་རྣམས་ཀྱིས་ཀྱང་དཀྱིལ་འཁོར་ལ་སོགས་པ་མ་མཐོང་བའི་ཕྱིར་མི་ལྡོག་པའི་བག་ཆགས་བསྐྱེད་པས་ཕུལ་དུ་བྱུང་བས་ཚེ་འདི་ཉིད་ལ་དེ་བཞིན་གཤེགས་པ་ཉིད་ལ་སོགས་པ་དེ་རྣམས་གྲུབ་པའི་ཕྱིར་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རབ་ཏུ་གྲུབ་ཅིང་རྫོགས་པ་ཡིན་ནོ། །དེ་བས་ན་འདི་ནི་བཅོམ་ལྡན་འདས་དེ་བཞིན་གཤེགས་པ་ད་ལྟར་བྱུང་བར་ངོ་བོ་ཉིད་ཀྱིས་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་དུ་གྲུབ་པ་ཡིན་ནོ། །དུས་ཐམས་ཅད་ཁོ་ནར་ཇི་ལྟར་མངོན་པར་འདོད་པའི་དངོས་གྲུབ་རབ་ཏུ་སྟེར་ཞིང་ཐམས་ཅད་བྱེད་པ་ཡིན་ནོ། །དེ་ལ་འདི་ནི་ཞེས་བྱ་བ་ལ་སོགས་པ་གང་གི་ཕྱིར་གསང་སྔགས་ཀྱི་ཚུལ་འདི་ལ་དེ་བཞིན་གཤེགས་པའི་དཀྱིལ་འཁོར་མཐོང་བ་ལ་སོགས་པའི་སྟོབས་ཀྱིས་དུས་ཐམས་ཅད་དུ་གདུལ་བྱ་རྣམས་ལ་མངོན་པར་འདོད་པའི་དངོས་གྲུབ་རབ་ཏུ་གསོལ་བར་མཛད་དོ། །དེ་བས་ན་སྔགས་ཀྱི་ཚུལ་ལས་གསུངས་པའི་སྒྲུབ་པའི་དངོས་གྲུབ་མྱུར་དུ་གྲུབ་པར་བྱེད་པར་བཤད་དོ། །འདི་ཁྱད་པར་ཇི་ལྟ་བུ་ཞིག་ཅེ་ན་དངོས་གྲུབ་ཤིན་ཏུ་རྟག་པ་ཡིན་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཉིད་དང༌། རྡོ་རྗེ་འཆང་བ་ཉིད་ལ་སོགས་པའི་རང་བཞིན་ཅན་གྱི་མངོན་པར་འདོད་པའི་དངོས་གྲུབ་ཚེ་འདི་ཉིད་ལ་ཤིན་ཏུ་རྟག་པའི་དངོས་གྲུབ་ཀྱི་རྒྱུར་གྱུར་པའི་ཕྱིར་དངོས་གྲུབ་ཤིན་ཏུ་རྟག་པ་ཡིན་ཞེས་སྨྲའོ། །ཡང་ཅིའི་ཕྱིར་དངོས་གྲུབ་ཀྱི་རྒྱུར་གྱུར་པ་གྲུབ་པའི་སྒྲར་བརྗོད། གྲུབ་པ་ཉིད་ནི་མ་ཡིན་ཞེ་ན། གང་གིས་སྲིད་པ་འདི་ཉིད་དུ་ཤིན་ཏུ་རྟག་པའི་དངོས་གྲུབ་ཐོབ་པའི་རྗེས་ཐོགས་ཉིད་ལ་བཤད་པའི་ཕྱིར་ཏེ། གང་གིས་ཞེས་བྱ་བ་ནི་གྲུབ་པ་གང་གིས་སོ། །སྲིད་པ་འདི་ཉིད་དུ་ཞེས་བྱ་བ་ནི་སྐྱེ་བ་ གང་ལ་བསྒོམ་པ་ལ་མངོན་པར་བརྩོན་པ་བྱས ་པ་དེ་ཉིད་ལ་གྲུབ་པ་སྟེ། སངས་རྒྱས་ཉིད་དམ་རྡོ་རྗེ་འཆང་ཉིད་གྲུབ་པར་འགྱུར་བའོ། །ཁྱད་པར་ཇི་ལྟ་བུ་ཞིག་ཅེ་ན་ཤིན་ཏུ་རྟག་པ་ཞེས་བྱ་བ་སྟེ་ཕྱི་མའི་མཐའ་མེད་པར་གནས་པའོ། །དཀྱིལ་འཁོར་དག་ཏུ་མ་ཞུགས་ཀྱང༌། །ཞེས་བྱ་བ་འདི་ནི། འོག་ནས་སྟོན་པའི་སྒྲུབ་པའི་བདག་ཉིད་ཆེ་བ་སྟོན་ཏེ། ཇི་སྐད་དུ་བཤད་པའི་དཀྱིལ་འཁོར་དུ་འཇུག་པའི་ཕྱག་རྒྱས་དཀྱིལ་འཁོར་དུ་
མ་ཞུགས་པའོ། །ཀྱང་ཞེས་བྱ་བའི་སྒྲས་ནི་དཀྱིལ་འཁོར་དུ་ཞུགས་པ་རྣམས་ནི་ཤིན་ཏུ་ཡང་འགྲུབ་པར་འགྱུར་རོ་ཞེས་སྟོན་ཏོ། །དམ་ཚིག་རྣམ་པར་སྤངས་པའམ་ཞེས་བྱ་བ་ནི་དམ་ཚིག་མི་ཤེས་པའི་མདུན་དུ་སྔགས་དང་ཕྱག་རྒྱ་སྟོན་པ་ནི་དམ་ཚིག་སྟེ། རྡོ་རྗེ་སེམས་དཔའ་ལ་སོགས་པ་སྤངས་པས་ན་དམ་ཚིག་གི་སྤངས་པའོ། །དེ་ཡང་གལ་ཏེ་འོག་ནས་ཇི་སྐད་དུ་བཤད་པ་བཞིན་དུ་སྒྲུབ་པར་བྱེད་ན། བསྒོམས་པའི་སྟོབས་ཀྱིས་དངོས་གྲུབ་ངེས་པར་ཐོབ་པར་འགྱུར་ན་བསམ་གཏན་དང་ལྡན་ཞིང་དཀྱིལ་འཁོར་དུ་འཇུག་པའི་ཕྱག་རྒྱས་ཞུགས་པ་རྣམས་ལྟ་སྨོས་ཀྱང་ཅི་དགོས། སྲིད་པ་འདི་ལས་མྱུར་དུ་འགྲུབ། །ཅེས་བྱ་བ་ནི་དེས་སྐྱེ་བ་གང་ལ་སྒྲུབ་པར་བརྩམས་པ་སྐྱེ་བ་དེ་ཉིད་ལས་འགྲུབ་པ་དེས་མྱུར་བ་ཉིད་དུ་འགྲུབ་པར་འགྱུར། བསོད་ནམས་མེད་ཀྱང་ཐམས་ཅད་དུ། །ཞེས་བྱ་བ་ལ་དག་པར་བྱེད་པས་ན་བསོད་ནམས་ཏེ་མ་ཆགས་པ་དང་ཞེ་སྡང་མེད་པ་དང༌། གཏི་མུག་མེད་པའི་སྤྱོད་པས་སྦྱོང་བར་བྱེད་དོ་ཞེས་བྱ་བའི་དོན་ཏོ། །དེ་འདི་ལ་ཡོད་པ་མ་ཡིན་པས་ན་མེད་པའོ། །ཀྱང་ཞེས་བྱ་བའི་སྒྲས་ནི་གང་གི་ཕྱིར་བསོད་ནམས་དང་ལྡན་པ་ཡང་རིགས་ཐམས་ཅད་ཀྱི་དངོས་གྲུབ་ཀྱི་ཇི་སྐད་བཤད་པ་ཐམས་ཅད་ཚེ་འདི་ཉིད་ལ་མྱུར་དུ་འགྲུབ་པར་འགྱུར་བས། བསོད་ནམས་དང་ལྡན་པ་རྣམས་ནི་ཤིན་ཏུ་ཡང་མྱུར་དུ་འགྲུབ་པར་འགྱུར་རོ་ཞེས་སྟོན་ཏོ། །གལ་ཏེ་དངོས་གྲུབ་བསྒྲུབ་པར་འདོད་ན་ཞེས་བྱ་བ་ནི། ཇི་སྲིད་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་པར་འདོད་པར་གྱུར་ནའོ། །རྟག་ཏུ་ཡུལ་དང་ལྡན་གྱུར་ན། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་སྒྲུབ་པ་པོས་རྡོ་རྗེ་སེམས་དཔའ་ལ་སོགས་པའི་ངོ་བོར་བསྐྱེད་དོ་ཞེས་བྱ་བའི་དོན་ཏོ། །ཅི་ཞིག་བྱས་ནས་སྤྱད་པར་བྱ་ཞེ་ན་ཡང་དག་མཆོད་ཅེས་བྱ་བ་ལ་སོགས་པ་གསུངས་ཏེ་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ནས་ཡེ་ཤེས་སེམས་དཔའ་རང་གི་ལུས་ལ་བཅུག་ལ་རང་གི་དམ་ཚིག་གི་ཕྱག་རྒྱས་རབ་ཏུ་བསྒྲུབས་ཏེ་བྱིན་གྱིས་བརླབས་ཏེ་བང་བསྐུར་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ནས་རྡོ་རྗེ་མཚོན་ཆ་མ་ལ་སོགས་པའི་གསང་བའི་
མཆོད་པ་བཞིས་མཆོད་ལ་ཀཾ་ཀ་ལྱ་དང༌། དྲུག་ལྡན་ལ་སོགས་པའི་གླུའི་ཁུངས་ཐམས་ཅད་ཀྱིས་ཇི་སྐད་བཤད་པ་བཞིན་དུ་ཇི་ལྟར་མངོན་པར་འདོད་པས། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པའི་སྔགས་ཀྱི་སྒྲ་ཟློས་ཤིང་དོན་ལ་དམིགས་པའི་སྒོ་ནས་ཅི་ནུས་པར་བྱའོ། །ཅི་ནུས་པར་ཞེས་བྱ་བ་ནི་བདག་ཉིད་ཀྱི་ནུས་པ་དང་རྗེས་སུ་འཚམ་པས་སྔགས་ཟློས་ཤིང་བཅོམ་ལྡན་འདས་རྡོ་རྗེ་སེམས་དཔར་བདག་ཉིད་བསྐྱེད་ལ་བསྒྲུབ་པར་བྱའོ། །འདི་ཡིས་ཞེས་བྱ་བ་ནི་ཟློས་པའི་ཆོ་གས་སོ། །འདོད་པ་ཀུན་གྱི་དབང་ཕྱུག་ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་འབེབས་པའི་བར་གྱི་ལྷ་ཐམས་ཅད་ཀྱི་ཏིང་ངེ་འཛིན་འདོད་པ་ཙམ་གྱིས་མངོན་སུམ་དུ་བྱེད་པར་ནུས་པའོ། །དེ་ལ་ཇི་ལྟར་མངོན་པར་འདོད་པའི་ཕྱོགས་ཀྱི་བདག་པོ་ཞེས་བྱ་བ་ནི་ཕྱོགས་དེ་ནས་འདིར་སྐྱེ་ཞིང་སྟེང་དུ་ཡང་འགྲོ་བ་སྟེ་དེ་ལྟ་བུ་བསམས་བ་ཙམ་གྱིས་སོ། །གང་གི་ཕྱིར་དེ་ལྟར་ཡིན་པ་དེས་ན་བཤད་མ་ཐག་པའི་དངོས་གྲུབ་ཐམས་ཅད་ཀྱི་བདག་པོ་གཙོ་བོ་གྲུབ་པའོ། །རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་དངོས་གྲུབ་རྣམས་ཀྱིས་རྒ་ཤི་ནི་མེད་པར་འགྱུར་བའོ། །མཆོད་སྦྱིན་པ་ཞེས་བྱ་བ་ལ་སོགས་པ་ནི་གོ་སླའོ། །བདེ་བ་ཆེན་པོ་རྡོ་རྗེ་ཞེས་བྱ་བ་ནི་རྡོ་རྗེ་སེམས་དཔའ་འགྲུབ་པའི་རྣལ་འབྱོར་པ་ནི། བདེ་བ་ཆེན་པོ་རྡོ་རེ་སེམས་དཔའ་འགྲུབ་པའོ། །དེས་མཛེས་པས་ན་རྒྱལ་པོ་སྟེ་བདེ་བ་ཆེན་པོའོ། །རྡོ་རྗེ་གྲུབ་པ་ཡང་ཡིན་ལ་རྒྱལ་པོ་ཡང་ཡིན་པས་ན་བདེ་བ་ཆེན་པོ་རྡོ་རྗེ་གྲུབ་པའི་རྒྱལ་པོའོ། དེ་བཞིན་གཤེགས་པ་ལ་སོགས་པ་གང་ཡིན་པ་དེ་ནི་དེ་བཞིན་གཤེགས་པ་ལ་སོགས་པ་སྟེ། རྡོ་རྗེ་སེམས་དཔའ་དང་རྡོ་རྗེ་ཡིད་ལས་བྱུང་བ་ལ་སོགས་པའོ། །དེ་བཞིན་གཤེགས་པ་ལ་སོགས་པ་དེ་རྣམས་ཀྱི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་ནི་དེ་བཞིན་གཤེགས་པ་ལ་སོགས་པའི་དངོས་གྲུབ་ཐམས་ཅད་དེ། དེ་གདུལ་བྱ་རྣམས་ལ་སྩོལ་བར་མཛད་པས་ན་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་སྩོལ་བའོ། །རྡོ་རྗེ་འཆང་ཆེན་པོ་བྱང་ཆུབ་སེམས་དཔར་གྲུབ་པར་གྱུར་པ་ནི་སེམས་ཅན་གྱི་དོན་རྫོགས་པར་
མཛད་པའོ། །འདི་སྐད་སྟོན་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་ཡེ་ཤེས་སེམས་དཔའ་རང་གི་ལུས་ལ་བཅུག་སྟེ། བདག་ལ་བྱིན་གྱིས་བརླབ་པ་དང༌། དབང་བསྐུར་བ་དང་དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱི་བར་དུ་ཇི་ལྟ་བ་བཞིན་དུ་རྗེས་སུ་སྤྱད་ལ། རྡོ་རྗེ་མཚོན་ཆ་མ་ལ་སོགས་པ་གསང་བའི་མཆོད་པ་བཞིས་བདག་ཉིད་མཆོད་ལ་དེ་ཁོ་ན་ཉིད་དང༌། ཆོས་དང་ལས་དང་དམ་ཚིག་གིས་བཟུང་ནས་བཅོམ་ལྡན་འདས་རྡོ་རྗེ་སེམས་དཔའ་ཕྱག་རྒྱ་ཆེན་པོ་བཅིངས་ལ། རྣམ་པར་སྒེག་པའི་དགའ་བའི་རྡོ་རྗེས་བཅོམ་ལྡན་འདས་ལ་ཕྱག་འཚལ་ཏེ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་བཟླས་པར་བྱ་བའི་སྙིང་པོ་རང་གི་སྙིང་གར་གནས་པའི་རྡོ་རྗེའི་དབུས་སུ་ཡིད་ཀྱིས་བྲིས་ལ། ཀཾ་ཀ་ལྱ་དང་དྲུག་ལྡན་ལ་སོགས་པའི། ཐམས་ཅད་ཅི་འདོད་བླངས་ནས་ནི། །བཟླས་པའི་དོན་ནི་ཅི་ནུས་པ། །རྡོ་རྗེ་སེམས་དཔའ་བསྒྲུབ་པར་བྱའོ། །བདག་ལ་བྱིན་གྱིས་བརླབ་པ་ལ་སོགས་པ་དང་པོར་ལན་ཅིག་བྱས་ནས་ཇི་སྲིད་ཉིན་རེ་ལ་བདག་ཉིད་རྡོ་རྗེ་སེམས་དཔར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་དཔལ་རྡོ་རྗེ་སེམས་དཔའི་ཆ་ལུགས་འཛིན་པའི་རྣལ་འབྱོར་པས་བཅོམ་ལྡན་འདས་རྡོ་རྗེ་སེམས་དཔའི་རིག་པའི་བརྟུལ་ཞུགས་ཁམས་གསུམ་རྣམ་པར་རྒྱལ་བའི་རྒྱུད་ལས་གསུངས་པ་སྤྱད་པར་བྱའོ། །དེ་ནས་དཀྱིལ་འཁོར་བྲིས་ལ་ཟླ་བ་ཉ་བ་ལ་མཚན་ཐོག་ཐག་བསྒོམ་པར་བྱས་ན་རྡོ་རྗེ་འཛིན་པ་ཆེན་པོ་དང་འདྲ་བའི་བྱང་ཆུབ་སེམས་དཔའ་ཆེན་པོར་འགྱུར་རོ།། དེ་ནས་ཞེས་བྱ་བ་ལ་སོགས་པ་ལ་གལ་ཏེ་སྒྲུབ་པ་པོ་དེ་བཞིན་གཤེགས་པའི་དངོས་གྲུབ་ཀྱི་མཆོག་གྲུབ་པར་འདོད་ན། སྒྲུབ་པ་པོ་དེས་བཅོམ་ལྡན་འདས་རྣམ་པར་སྣང་མཛད་ཕྱག་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིངས་ལ་དེ་བཞིན་གཤེགས་པ་ཐམས་ཅད་ཀྱིས་ཡོངས་སུ་བསྐོར་བ་རས་རིས་ཀྱི་དབུས་སུ་འདྲིར་གཞུག་གོ །ངོས་ཐམས་ཅད་དུ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལས་གསུངས་པའི་སངས་རྒྱས་ཀྱི་སྐུ་གཟུགས་བརྒྱད་ཀྱིས་བཅོམ་ལྡན་འདས་རྣམ་པར་སྣང་མཛད་ལ་བསྐོར་བར་བྲི་བར་བྱའོ། །དེའི་མདུན་དུ་ཞེས་བྱ་བ་
ལ་སོགས་པ་ལ་རས་རིས་དེའི་མདུན་དུ་རྣལ་འབྱོར་པ་མདུན་དུ་བལྟས་ཏེ་བྱང་ཆུབ་མཆོག་གི་ཕྱག་རྒྱ་བཅིངས་ལ། ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་རྡོ་རྗེའི་ཚིག་གིས་བཟླས་བརྗོད་འབུམ་བྱའོ། །དེ་ནས་འབུམ་རྫོགས་པ་ན་དེ་ལ་བགེགས་བྱེད་པའི་ཕྱིར་མཚན་ཕྱེད་ཀྱི་དུས་ན་བདུད་ཀྱི་ཚོགས་འོང་བར་འགྱུར་རོ། །དེ་ནས་དེ་ལ་བདུད་ཀྱི་སྟོབས་ཐམས་ཅད་གཞོམ་པས་བཅོམ་པར་བྱའོ་ཞེས་བྱ་བ་སྟེ། བདག་ཉིད་མི་བསྐྱོད་པར་བསམས་ལ་རང་གི་སྙིང་གར་སེམས་མ་རྡོ་རྗེ་བསྒོམས་ཏེ། དེ་བཞིན་གཤེགས་པའི་ཁུ་ཚུར་བཅིངས་ལ་གཡོན་པའི་ཁུ་ཚུར་རང་གི་སྙིང་གར་བཞག་ལ་གཡས་པའི་ཁུ་ཚུར་གྱིས་སོར་མོ་ཐམས་ཅད་བརྐྱང་པས་ལ་རེག་པར་བྱས་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ། །སུ་ར་ཏ་སྟྭཾ་ཞེས་བཟླ་བར་བྱའོ། །དེ་ནས་སྒྲུབ་པ་པོའི་ལུས་ལས་བྱུང་བའི་རྡོ་རྗེ་འཛིན་པ་གཏུམ་པོ་ལ་སོགས་པ་རྣམས་ཀྱིས་བདུད་ཀྱི་སྟོབས་ཐམས་ཅད་བཅོམ་པར་བྱས་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བདུད་བཅོམ་པར་བྱས་པའི་རྗེས་ཐོགས་ཉིད་ལ་བྱང་ཆུབ་ཀྱི་མཆོག་གི་ཕྱག་རྒྱ་བཅིངས་ཏེ། ཇི་སྲིད་ནམ་ལངས་ཀྱི་བར་དུ་ཡང་བདེ་བ་ཆེན་པོ་བཟླ་བར་བྱའོ། །དེ་ནས་དེ་བཞིན་གཤེགས་པའམ་བྱང་ཆུབ་སེམས་དཔར་འགྱུར་རོ། །འདིས་ནི་དོན་འདི་སྐད་སྟོན་ཏེ་རྡོ་རྗེ་སེམས་དཔའི་རྣལ་འབྱོར་ཇི་ལྟ་བ་བཞིན་དུ་བྱས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྗེས་སུ་སྤྱན་ནས། རྡོ་རྗེ་མཚོན་ཆ་མ་ལ་སོགས་པ་གསང་བའི་མཆོད་པ་བཞིས་མཆོད་ལ་བདག་ཉིད་དང་ཆོས་དང་ལས་དང༌། དམ་ཚིག་གཟུང་ནས་ཕྱག་རྒྱ་བཞི་བྱས་ལ། རྣམ་པར་སྒེག་པའི་དགའ་བའི་རྡོ་རྗེས་ཕྱག་བྱས་ཏེ། བྱང་ཆུབ་མཆོག་གི་ཕྱག་རྒྱ་བཅིངས་ཏེ་རྣམ་པར་སྣང་མཛད་དུ་བདག་ཉིད་བསྒོམས་ལ་དམ་ཚིག་ཆེན་པོའི་དེ་ཁོ་ན་ཉིད་བཟླས་བརྗོད་འབུམ་བྱས་ན་སྔོན་དུ་བསྙེན་པ་བྱས་པར་འགྱུར་རོ། །དེ་ནས་རས་རིས་འདྲིར་བཅུག་སྟེ་རས་རིས་ལ་བཅོམ་ལྡན་འདས་རྣམ་པར་སྣང་མཛད་སྤྱན་དྲངས་ལ་རྡོ་རྗེ་སེམས་དཔའི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་ཀྱི་ཕྱག་རྒྱས་རྒྱས་གདབ་བོ། །དེ་ནས་དམ་ཚིག་ཆེན་
པོའི་དེ་ཁོ་ན་ཉིད་ཟློས་ཤིང་དེ་བཞིན་གཤེགས་པའི་ལས་ཀྱི་ཕྱག་རྒྱ་ཆེན་པོས་རྒྱས་བཏབ་ལ་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ་མཆོད་པ་རྣམ་པ་ལྔ་དང༌། རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ནས་ཕྱག་བཞི་བྱས་ལ། རྣམ་པར་སྒེག་པའི་དགའ་བའི་རྡོ་རྗེས་ཀྱང་ཕྱག་བྱས་ནས་བྱང་ཆུབ་མཆོག་གི་ཕྱག་རྒྱ་བཅིངས་ཏེ་བཟླས་བརྗོད་འབུམ་བྱས་ན་དེ་ནས་ནང་པར་དེ་བཞིན་དུ་འགྱུར་པར་འགྱུར་རོ། །དེ་ནས་རྡོ་རྗེ་འཆང་ཆེན་པོ་ཉིད་དུ་ཞེས་བྱ་བ་ལ་སོགས་པ་ལ་གལ་ཏེ་རྣལ་འབྱོར་པ་རྡོ་རྗེ་འཆང་ཆེན་པོ་བསྒྲུབ་པར་འདོད་ན། རྣལ་འབྱོར་པ་དེས་བཅོམ་ལྡན་འདས་རྡོ་རྗེ་སེམས་དཔའི་སྐུ་ལུགས་མའམ་བརྐོས་པ་བྱེད་དུ་གཞུག་གོ །ཇི་ལྟ་བུ་ཞིག་ཅེ་ན། དཀྱིལ་འཁོར་བཞིན་ཞེས་བྱ་བ་གསུངས་ཏེ། ཇི་ལྟར་དཀྱིལ་འཁོར་གྱི་སྐབས་སུ་དེའི་མཚན་ཉིད་བཤད་པ་བཞིན་དུ་ཞེས་བྱ་བའི་ཐ་ཚིག་གོ །དེ་ལྟ་བུར་བྱས་ནས་དེའི་མདུན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། དེར་བཅོམ་ལྡན་འདས་ཇི་ལྟ་བ་བཞིན་དུ་སྤྱན་དྲངས་ཏེ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་བཅོམ་ལྡན་འདས་ཀྱི་ཐུགས་ཀར་གནས་པའི་རྡོ་རྗེ་ལ་བཟླས་པ་བྱ་བའི་སྙིང་པོ་ཡིད་ཀྱིས་བྲིས་ལ་ཕྱག་རྒྱ་ཆེན་པོ་བཅིངས་ཏེ། ཉིན་རེ་ཞིང་ཇི་སྐད་དུ་བཤད་པའི་ཚིག་གི་སྔགས་ཟློས་ཤིང་བསྒོམ་པར་བྱའོ། །མཐར་ཟླ་བ་ཉ་བ་ལ་མཚན་ཐོག་ཐག་བསྒོམ་པར་བྱའོ། །དེ་ལྟ་བུས་ནི་ཟླ་བ་དྲུག་གིས་རྡོ་རྗེ་འཆང་ཆེན་པོ་དང་འདྲ་བར་འགྱུར་རོ། །དེ་ལྟར་དང་པོར་སྒྲུབ་པ་ལ་སྐུ་གཟུགས་ཀྱི་ཁྱད་པར་བྱས་པ་ཡིན་ནོ། །ཇི་ལྟར་རྡོ་རྗེ་འཆང་བ་སྒྲུབ་པ་ལ་སྐུ་གཟུགས་ཀྱི་ཁྱད་པར་འདིར་བཤད་པ་ལྟར། སྔར་བཤད་པའི་རྡོ་རྗེ་སེམས་དཔའི་སྒྲུབ་པ་ལ་ཡང་དེ་བཞིན་དུ་ཤེས་པར་བྱའོ། །རྡོ་རྗེ་སེམས་དཔའ་ཐོབ་པ་ཇི་ལྟར་བསྒྲུབ་པ་གསུངས་པ་བཞིན་དུ་ཞེས་བྱ་བ་ནི། ཇི་ལྟར་སྔར་བཤད་པའི་སྒྲུབ་པ་ལ་རྡོ་རྗེ་སེམས་དཔའི་ཆ་ལུགས་སུ་བྱས་ནས་སྒྲུབ་པར་གསུངས་པ་ཇི་ལྟར་ཐོབ་པ་དེ་བཞིན་དུ་འདིར་ཡང་ཤེས་པར་བྱའོ། །ཟླ་བ་དྲུག་གིས་ནི་རྡོ་རྗེ་འཆང་ཆེན་པོའི་དངོས་གྲུབ་འགྲུབ་བོ་ཞེས་བྱ་བ་ནི་བཤད་མ་ཐག་པའི་སྐུ་གཟུགས་ཀྱི་སྒྲུབ་བས་ཟླ་བ་དྲུག་གིས་རྡོ་རྗེ་འཛིན་
པ་ཆེན་པོའི་དངོས་གྲུབ་ཆེན་པོ་རྣལ་འབྱོར་པས་འཐོབ་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ནས་རྡོ་རྗེ་འཆང་ཆེན་པོ་བཀུག་པ་ཞེས་བྱ་བ་ལ་སོགས་པ་གལ་ཏེ་སྒྲུབ་པ་པོ་རྡོ་རྗེ་འཆང་ཆེན་པོ་འགུགས་པར་བྱེད་པར་འདོད་ན། ཇི་སྲིད་མཚན་མ་ཐོབ་པར་འགྱུར་བ་དེ་སྲིད་ཀྱི་བར་དུ་སྔོན་དུ་བསྙེན་པ་བྱའོ། །དེ་ནས་རས་རིས་འདྲིར་གཞུག་གོ །དེ་ནས་དེའི་མདུན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། རས་རིས་ལ་སྔར་བཤད་པའི་བཅོམ་ལྡན་འདས་སྤྱན་འདྲེན་པའི་སྔགས་དང༌། གསང་བའི་ལྕགས་ཀྱུ་མའི་ཕྱག་རྒྱས་དགུག་པ་དང། གཞུག་པ་དང༌། བཅིང་པ་དང༌། དབང་དུ་བྱས་ལ་དང་པོའི་རྡོ་རྗེའི་ཕྱག་རྒྱས་བསྒྲུབས་ལ། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་བའི་ཕྱག་རྒྱས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བཞི་བྱ་ཞིང་རྣམ་པར་སྒེག་པའི་དགའ་བའི་རྡོ་རྗེས་ཡང་ཕྱག་བྱའོ། །དེ་ལྟར་ཆོ་ག་ཐམས་ཅད་རྗེས་སུ་སྤྱད་ནས་སྒྲུབ་པ་པོས་ཡང་གསང་བའི་ལྕགས་ཀྱུ་མས་བཅིངས་ལ། ཇི་སྲིད་ཟླ་བ་ཕྱེད་ཙམ་ལོན་པ་དེ་སྲིད་ཀྱི་བར་དུ་ཇི་སྲིད་མངོན་པར་འདོད་པ་ཉིན་རེ་ཞིང་བསྒྲུབ་པར་བྱའོ། །དེ་ནས་བཅོམ་ལྡན་འདས་རྡོ་རྗེ་འཛིན་པ་ཆེན་པོས་ཐམས་ཅད་སྩོལ་བར་འགྱུར་རོ། །དེ་ནས་རང་གི་ཕྱག་རྒྱ་སྒྲུབ་པ་ནི་ཞེས་བྱ་བ་ནི་གལ་ཏེ་རྣལ་འབྱོར་པ་བདག་ཉིད་ཀྱིས་རང་གི་ལྷའི་ཕྱག་རྒྱ་ཆེན་པོའི་ཚུལ་བསྒྲུབ་པར་འདོད་ན། དེས་ཆོ་ག་ཐམས་ཅད་རྗེས་སུ་སྤྱད་ལ་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ་བཟླས་པ་ཉིད་ཀྱིས་རང་གི་ལྷའི་སྔགས་ཟློས་ཤིང་བསྒོམས་པས་དེའི་ང་རྒྱལ་མངོན་དུ་བྱ་བའི་ཚུལ་གྱིས། བདག་ནི་རྡོ་རྗེ་སེམས་དཔའོ་ཞེས་བྱ་བ་ལ་སོགས་པ་བསྒོམ་པར་བྱའོ། །བསྒོམས་ནས་བསྒྲུབ་པར་བྱའོ། །ཇི་ལྟར་འདོད་པ་བཟླས་པ་ཞེས་བྱ་བ་འདིས་ནི་འདིར་བསྒོམ་པ་གཙོ་བོ་ཡིན་གྱི། གྲངས་ཀྱི་ངེས་པ་ནི་མ་ཡིན་ནོ་ཞེས་བསྟན་ཏོ། །བདག་ཉིད་བསྒྲུབ་པར་བྱའོ་ཞེས་བྱ་བ་འདིས་ནི་ཚུལ་དེ་ལྟ་བུའི་ཇི་ལྟར་འདོད་པའི་བཟླས་བརྗོད་ཀྱིས་བདག་ཉིད་རྡོ་རྗེ་སེམས་དཔའི་བཟླས་པའི་དོན་ཉིད་དུ་བསྐྱེད་པར་བྱ་བའི་ཕྱིར་རས་རིས་ལ་སོགས་
པའི་ཚུལ་གྱིས་ནི་མ་ཡིན་ནོ། །ཡང་བསྒོམ་ཞིང་བསྒོམ་ཞིང་བཟླས་པ་ཞེས་བྱ་བ་ནི་བཟླས་པའི་ཚུལ་དོན་ཡང་དང་ཡང་དུ་མངོན་དུ་བྱས་ལ་བདག་ཉིད་རྡོ་རྗེ་སེམས་དཔའ་ཟློས་ཤིང་བསྒོམ་ཞིང་བཟླ་བར་བྱའོ། །ཇི་སྲིད་ཟླ་བ་ཕྱེད་ཀྱིས་རྡོ་རྗེ་འཆང་བ་ཉིད་ཐོབ་པ་ཞེས་བྱ་བ་ནི་ཉིན་རེ་ཞིང་བདག་ཉིད་ལ་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བས་ཕྱག་རྒྱ་ཆེན་པོ་བཅིངས་ལ་ཇི་སྲིད་ཟླ་བ་ཕྱེད་ལོན་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་ཟླ་བ་ཉལ་མཚན་ཐོག་ཐག་བཟླས་བརྗོད་བྱས་ན་ནང་པར་རྡོ་རྗེ་འཆང་ཉིད་ཐོབ་པར་འགྱུར་རོ། །འདིས་དོན་ནི་འདི་སྐད་སྟོན་ཏེ། བདག་ལ་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བས་ཕྱག་རྒྱ་ཆེན་པོ་བཅིངས་ལ། རང་གི་ལྷའི་སྐུར་བདག་ཉིད་ཉིན་རེ་ཞིང་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་དཔག་ཏུ་མེད་པ་བྱའོ། །དེ་ནས་ཟླ་བ་ཕྱེད་བཤད་མ་ཐག་པའི་ཕྱག་རྒྱ་ཆེན་པོ་བཅིངས་ལ་བསྒོམ་པར་བྱས་ན། དེའི་རྗེས་ལ་འགྲུབ་པར་འགྱུར་རོ། །དེ་ནས་འདོད་པ་ཐམས་ཅད་ཀྱི་དབང་ཕྱུག་བསྒྲུབ་པར་འདོད་ན་ཞེས་བྱ་བ་ནི། འདོད་པ་ན་སྤྱོད་པའི་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ནི་འདོད་པ་ཐམས་ཅད་དེ། དེ་རྣམས་དབང་ཕྱུག་ཡིན་པས་ན་འདོད་པ་ཐམས་ཅད་ཀྱི་དབང་ཕྱུག་སྟེ། གཞན་འཕྲུལ་དབང་བྱེད་ཀྱི་ལྷའི་རྒྱལ་པོ་དེའི་དངོས་པོ་ནི་འདོད་པ་ཐམས་ཅད་ཀྱི་དབང་ཕྱུག་ཉིད་དེ། དེའི་སྒྲུབ་པ་ནི་རང་གི་ལུས་དང་ངག་དང་ཡིད་དེའི་རང་བཞིན་དུ་སྐྱེས་པའོ། །དེ་ཇི་ལྟར་འགྱུར་ཞེ་ན། དེ་བཞིན་དུ་ཞེས་བྱ་བ་ལ་སོགས་པ་གསུངས་ཏེ་དཔལ་རྡོ་རྗེ་སེམས་དཔའི་སྐུ་གཟུགས་རང་གི་ལྷ་མོ་དང་བཅས་པ་མདུན་དུ་བཞག་སྟེ། བདག་ལ་བྱིན་གྱིས་བརླབ་པ་ལ་སོགས་པ་བྱས་ནས་ཇི་སྲིད་ཉིན་རེ་ཞིང་བསྒོམ་པའི་དུས་སུ། བདག་ཉིད་ལྷ་མོ་དང་བཅས་པའི་འདོད་པའི་དབང་ཕྱུག་ཉིད་དང་འདྲ་བར་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་སྔོན་དུ་བསྙེན་པ་བྱའོ། །དེ་ནས་ཟླ་བ་ཉ་བ་ལ་བཅོམ་ལྡན་འདས་ལྷ་མོ་དང་བཅས་པའི་ཕྱག་རྒྱ་ཆེན་པོ་བཅིངས་ལ། སྒྲུབ་པ་ལ་ཞུགས་ཏེ་ཇི་སྲིད་བདག་ཉིད་འདོད་པའི་ཁམས་ཀྱི་དབང་ཕྱུག་ལྷ་མོ་དང་བཅས་པ་ཉིད་དུ་འགྱུར་ཞིང༌། མིའི་རང་བཞིན་ལས་མི་སྣང་བར་འགྱུར་ཏེ་ལྷའི་འདོད་པའི་དབང་ཕྱུག་གི་
དགའ་བའི་ངོ་བོ་ཉིད་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་སྒྲུབ་པ་པོ་ཁམས་གསུམ་མ་ལུས་པའི་བདག་པོར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོ་ཇི་སྐད་དུ་བཤད་པའི་དོན་མཛད་ནས། ཏིང་ངེ་འཛིན་གྱི་ཕྱག་རྒྱ་ལས་བཀའ་སྩལ་ཏོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲས་ནི་འདས་མ་ཐག་པ་སྟོན་པའི་ཐ་ཚིག་གོ །འདོད་པའི་ཁམས་ཐམས་ཅད་ནི་ཕྱོགས་བཅུ་ན་གནས་པའི་ཁམས་གསུམ་པ་ཐམས་ཅད་ཀྱི་འདོད་པ་དང༌། གཟུགས་དང༌། གཟུགས་མེད་པའི་ཁམས་ཐམས་ཅད་དོ། །ཁམས་གསུམ་མ་ལུས་པ་དེར་དོན་ཡོད་པ་ནི་འབྲས་བུ་ཡོད་པ་སྟེ། གདུལ་བྱ་རྣམས་ཀྱི་དོན་སྐལ་བ་ཇི་ལྟ་བ་བཞིན་དུ་མཛད་པའོ། །ལས་རྣམས་ཀྱི་ཚོགས་ནི་རྒྱུན་གང་ཡིན་པ་སྟེ། གང་གི་ཕྲིན་ལས་ཁམས་གསུམ་པ་ན་དོན་ཡོད་པའི་ལས་ཀྱི་རྒྱུན་ནི་རྡོ་རྗེ་འཆང་ཆེན་པོའོ། །ཅི་ཞིག་མཛད་ནས་གསུངས་ཤེ་ན་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་ཀྱི་རང་བཞིན་དེ་ངོ་བོ་ཉིད་ཀྱིས་གྲུབ་ཅིང་རྫོགས་པར་གྱུར་པས་ན་རང་བཞིན་གྱིས་གྲུབ་པའི་ཆོས་ཉིད་དེ། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱིས་དག་པའི་ངོ་བོ་ཉིད་ཀྱིས་སེམས་དང་སེམས་ལས་བྱུང་བ་གཉིས་སུ་མེད་པའི་ངོ་བོ་ཉིད་ཅེས་བྱ་བའི་ཐ་ཚིག་གོ །སེམས་དང་སེམས་ལས་བྱུང་བ་ཐམས་ཅད་ཀྱི་རང་བཞིན་གྱིས་གྲུབ་པའི་ཆོས་ཉིད་ནི། ཐམས་ཅད་རང་བཞིན་གྱིས་གྲུབ་པའི་ཆོས་ཉིད་དེ་ཡེ་ཤེས་དེར་ངེས་པའོ། །དེའི་རྣམ་པར་རོལ་པ་ནི་དེའི་དབང་དུ་བྱས་ནས་གདུལ་བྱ་རྣམས་ཀྱི་བསྲུང་བ་ལ་སོགས་པ་ལས་རྫོགས་པར་མཛད་པའོ། །དེ་མཛད་ནས་ཐུགས་ལ་གཞག་པ་འདི་གསུངས་སོ། །འདི་ཅི་ཞིག་ཅེ་ན་མ་བསྒྲུབས་ཞེས་བྱ་བ་ལ་སོགས་པ་གསུངས་ཏེ། མ་བསྒྲུབས་པ་ནི་མ་བསྐྱེད་པ་སྟེ་སྒྲུབ་པ་པོས་རང་དབང་དུ་མ་བྱས་པའོ། །བདེ་བ་ཆེན་པོ་གསང་བའི་གཙུག་ཏོར་ལ་སོགས་པའི་ཕྱག་རྒྱ་ནི་མ་བསྒྲུབས་པའི་ཕྱག་རྒྱའོ། །དེ་རྣམས་ཀྱི་ལས་ནི་བདག་བསྲུང་བ་ལ་སོགས་པའོ། །དེའི་རྒྱུ་རྡོ་རྗེའི་རྒྱུན་རྣམ་པ་སྣ་ཚོགས་པ་རྡོ་རྗེ་ལྟར་མི་ཕྱེད་པའོ། །དེའི་ཆོ་ག་རྒྱས་པར་ནི་གང་གི་ལས་ཀྱི་རྒྱུན་དེ་མི་ཕྱེད་པར་རྫོགས་པར་
འགྱུར་བའོ། །དེ་ལ་བཀའ་སྩལ་པ་ནི་གསུངས་པའོ། །དེ་ནས་མ་བསྒྲུབས་པའོ་ཞེས་བྱ་བ་ལ་སོགས་པ་ལ། དེ་ནས་ཞེས་བྱ་བའི་སྒྲ་ནི་དེའི་རྗེས་ཐོགས་ལའོ། །གང་གི་ཚེ་ཇི་སྐད་དུ་བཤད་པའི་དངོས་གྲུབ་མ་བསྒྲུབས་པ་དེའི་ཚེ་མ་བསྒྲུབས་པའི་སྙིང་པོ་ཞེས་བྱའོ། །མ་བསྒྲུབས་པའི་སྙིང་པོ་དེའི་ལས་འོག་ནས་བཤད་པ་རྣམས་རྩོམ་པ་ཡིན་ནོ། །དེ་ཡང་གང་ཞིག་ཅེ་ན་འདི་ལྟར་ཞེས་བྱ་བ་ལ་སོགས་པ་གསུངས་ཏེ་འདི་ལྟར་ཞེས་བྱ་བ་ནི་ཉེ་བར་བསྟན་པའི་དོན་ཏོ། །བདག་ཉིད་བསྲུང་བ་ནི་བདག་བསྲུང་བ་སྟེ་གདོན་ལ་སོགས་པའི་འཇིགས་པ་རྣམས་བཟློག་པའོ། །དེ་གང་གིས་འགྱུར་ཞེ་ན་བདེ་བ་ཆེན་པོ་རྡོ་རྗེ་གསང་བའི་གཙུག་ཏོར་གྱིས་བྱ་བ་གསུངས་ཏེ། བདེ་བ་ཆེན་པོ་རྡོ་རྗེ་གསང་བ་ནི་བཅོམ་ལྡན་འདས་རྡོ་རྗེ་སེམས་དཔའོ། །དེའི་གཙུག་ཏོར་ནི་སྐྱེས་བུ་ཆེན་པོའི་མཚན་ནོ། །དེ་སྐྱེད་པར་བྱེད་པའི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་གསང་བའི་གཙུག་ཏོར་ཞེས་བྱའོ། །དེའི་མཚན་ཉིད་ནི་འདི་ཡིན་ཏེ་དང་པོའི་རྡོ་རྗེ་བཅིངས་ལ་མ་ཧཱ་སུ་ཁ་ཞེས་བྱ་བ་ལ་སོགས་པ་ཟློས་ཤིང་གཙུག་ཏོར་གྱི་གནས་སུ་བཞག་ན་བདག་བསྲུང་བར་འགྱུར་རོ། །ཐམས་ཅད་བསྲུང་བ་ཞེས་བྱ་བ་ནི་སྲིན་པོ་ལ་སོགས་པའི་འཇིགས་པས་སྐྲག་པ་ལ་སྲིན་པོ་ལ་སོགས་པའི་འཇིགས་པ་བཟློག་པ་ནི་ཐམས་ཅད་བསྲུང་བའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་མཛོད་སྤུས་ཞེས་བྱ་བ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་སྨིན་མཚམས་ཀྱི་དབུས་ཀྱི་དབྲལ་བའི་ཐིག་ལེའི་གནས་ན་སྐྱེས་བུའི་མཚན་མཛོད་སྤུ་དཀར་པོ་གཡས་སུ་འཁྱིལ་བ་ནི། བདེ་བ་ཆེན་པོ་རྡོ་རྗེ་གསང་བའི་མཛོད་སྤུ་སྟེ་དེ་སྟོན་པའི་ཕྱག་རྒྱ་ཆེན་པོ་ལ་ཡང་དེ་སྐད་ཅེས་བྱ་སྟེ། དེས་ཐམས་ཅད་བསྲུང་བར་འགྱུར་རོ། །འདི་སྐད་སྟོན་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་ཨོཾ་མ་ཧཱ་སུ་ཁ་ཞེས་བྱ་བ་ཟློས་ཤིང་སྤྱི་གཙུག་གི་གནས་སུ་བཞག་ནས་སྤྱི་གཙུག་གི་གནས་ལས་བྱུང་བའི་རིག་པའི་རྒྱལ་པོའི་རྡོ་རྗེ་མཛོད་སྤུ་རྣམས་ཀྱིས་བསྲུང་བར་བྱ་བའི་སེམས་ཅན་རྣམས་རང་རང་གི་ངོ་བོར་མཛད་ནས། དེ་རྣམས་ཀྱིས་སྲིན་པོ་ལ་སོགས་པ་ཀུན་དུ་སྐྲག་པར་བྱ་བར་བསམ་པར་བྱ་སྟེ། དེ་ལྟ་
བུས་ནི་དེ་རྣམས་བསྲུང་བར་འགྱུར་རོ། །ཕྱོགས་ཐམས་ཅད་དང་མཚམས་དང་དཀྱིལ་འཁོར་བཅིང་བ་ནི་ཞེས་བྱ་བ་ལ། ཕྱོགས་ཐམས་ཅད་ནི་ཕྱོགས་བཅུ་སྟེ། དེ་རྣམས་ཀྱིས་བཅིང་བ་ནི་རྡོ་རྗེས་བར་མཚམས་མེད་པར་ཁྱབ་པའོ། །མཚམས་བཅིང་བ་ནི་མངོན་པར་འདོད་པའི་སའི་ཕྱོགས་བཞི་ནས་རྡོ་རྗེས་ཕན་ཚུན་ཀུན་དུ་ཁྱབ་པས་མཚམས་སུ་བཅད་པ་བདག་གིར་བྱས་པའོ། །དཀྱིལ་འཁོར་བཅིང་བ་ནི་བདག་གིར་བྱས་པའི་སའི་ཆར་ར་བའི་རྩ་བའི་གནས་རྡོ་རྗེའི་རང་བཞིན་དུ་བྱས་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་འབར་བའི་ཕྲེང་བས་སོ་ཞེས་བྱ་བ་གསུངས་ཏེ། བདེ་བ་ཆེན་པོ་རྡོ་རྗེ་གསང་བ་ནི་བཅོམ་ལྡན་འདས་རྡོ་རྗེ་གསང་བ་སྟེ། དེའི་འབར་བའི་ཚོགས་ནི་འབར་བའི་ཕྲེང་བའོ། །དེ་སྐྱེད་པར་བྱེད་པའི་ཕྱག་རྒྱ་ལ་ཡང་དེ་སྐད་ཅེས་བྱ་སྟེ། དེས་ཕྱོགས་ཐམས་ཅད་བཅིང་བ་ལ་སོགས་པར་འགྱུར་རོ། །དེ་ཡང་དེ་བཞིན་དུ་དང་པོའི་རྡོ་རྗེ་བཅིངས་ལ་རང་གི་སྙིང་གར་བཞག་ནས་བདེ་བ་ཆེན་པོ་བཟླས་པས་རང་གི་སྙིང་གར་གནས་པའི་རྡོ་རྗེ་ལས་འབར་བའི་འོད་ཟེར་སྤྲོས་ལ་དེས་ཕྱོགས་བཅིང་བ་ལ་སོགས་པ་བྱའོ་ཞེས་བྱ་བའི་ཐ་ཚིག་གོ །བདུད་ཐམས་ཅད་ནི་ཉོན་མོངས་པ་དང༌། ཕུང་པོ་དང༌། འཆི་བདག་དང། ལྷའི་བུའི་རང་བཞིན་ཅན་ནོ། །དེ་རྣམས་ཀྱི་སྟོབས་ནི་སྡེ་སྟེ་དགྲ་པོར་གྱུར་པ་ནི་དཔུང་ངོ༌། །དེ་དག་གཞོམ་པ་ནི་མི་སྣང་བར་མཛད་པའོ། །དེ་གང་གིས་འགྱུར་ཞེ་ན་བདེ་བ་ཆེན་པོ་རྡོ་རྗེ་གསང་བའི་མི་བསྐྱོད་པས་སོ་ཞེས་བྱ་བ་གསུངས་ཏེ། ཇི་སྐད་དུ་བཤད་པའི་བདེ་བ་ཆེན་པོ་རྡོ་རྗེ་གསང་བའི་རྡོ་རྗེ་སེམས་དཔའ་མི་བསྐྱོད་པ་སྟེ། དེ་བཞིན་གཤེགས་པ་མི་བསྐྱོད་པའི་སྐུ་ཕྱག་རྒྱ་དང་དེ་སྟོན་པར་བྱེད་པའི་ཕྱག་རྒྱ་སྟེ་དེས་དེར་འགྱུར་རོ། །དེ་ཡང་དེ་བཞིན་དུ་ཐམས་ཅད་བྱས་ནས་དང་པོའི་རྡོ་རྗེ་བཅིངས་ལ་དེ་བཞིན་གཤེགས་པ་མི་བསྐྱོད་པའི་ཏིང་ངེ་འཛིན་གྱིས་བདེ་བ་ཆེན་པོའི་སྔགས་ཟློས་ཤིང་རང་གི་སྙིང་གར་རྡོ་རྗེ་རྩེ་ལྔ་པ་འཛིན་ཅིང་རྡོ་རྗེ་དེ་བསམས་ནས་རང་གི་ལུས་ལས་བྱུང་བའི་རྡོ་རྗེ་འཛིན་པ་གཏུམ་པོ་ལ་སོགས་པས་བདུད་རྣམས་ཀུན་དུ་བཅོམ་པར་བསམ་པར་བྱའོ། །དེ་ལྟ་བུས་ནི་བདུད་ཀྱི་སྟོབས་ཐམས་ཅད་འཇོམས་པར་འགྱུར་རོ། །ཚེ་འཕེལ་བར་བྱ་བ་ནི། བདེ་
བ་ཆེན་པོ་རྡོ་རྗེ་གསང་བའི་བདུད་རྩིས་སོ་ཞེས་བྱ་བ་ལ། ཚེ་ནི་སྲོག་སྟེ་དེའི་མངོན་པར་འཕེལ་བ་ནི་ཚེའི་རྒྱུན་གོང་ནས་གོང་དུ་འཕེལ་ཞིང་རྒྱུན་མི་འཆད་པའོ། །དེ་གང་གིས་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་བདུད་རྩིའི་ཕྱག་རྒྱ་དེས་འགྲུབ་པར་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་ཕྱག་རྒྱ་བྱས་ལ་དང་པོའི་རྡོ་རྗེ་ལས་གུང་མོ་སྦྱར་ཏེ་ཁ་དགབ་པར་བྱའོ། །ཇི་ལྟ་ཞེ་ན། ཨོཾ་མ་ཧཱ་ཞེས་བྱ་བ་ཟློས་ཤིང་སྟེང་དུ་བལྟས་ལ་ཕྱག་རྒྱ་བཅིངས་པ་ལས། དཔལ་རྡོ་རྗེ་སེམས་དཔའ་སྐུ་མདོག་དཀར་པོ་བདུད་རྩིའི་རྒྱུན་འབེབས་པ་རྣམས་བྱུང་བས་རང་གི་ཁ་ནས་ཡན་ལག་ཐམས་ཅད་ཀུན་དུ་འགེངས་པར་བསམ་པར་བྱའོ། །དེ་ལྟ་བུས་ནི་རྒ་བ་དང་འཆི་བ་མེད་པར་འགྱུར་ཞིང་རྡོ་རྗེའི་ཚེ་ཐོབ་པར་འགྱུར་རོ། །གཟུགས་ཆེན་པོ་ཕུན་སུམ་ཚོགས་པ་ཞེས་བྱ་བ་ལ་གཟུགས་ཀྱང་ཡིན་ལ་ཆེན་པོ་ཡང་ཡིན་བས་ན་གཟུགས་ཆེན་པོ་སྟེ་དཔལ་རྡོ་རྗེ་སེམས་དཔའ་ལ་སོགས་པའོ། །དེའི་ཕུན་སུམ་ཚོགས་པ་ནི་སྒྲུབ་པ་པོའི་རྒྱུད་ལ་མ་ཚང་བ་མེད་པར་གྱུར་པའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་གཟུགས་ཅན་གྱིས་སོ་ཞེས་བྱ་བ་ནི་བདེ་བ་ཆེན་པོ་རྡོ་རྗེ་གསང་བའི་གཟུགས་ཅན་ཞེས་བྱ་བའི་ཕྱག་རྒྱ་དེ་འཐོབ་པར་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་ཐམས་ཅད་བྱས་ལ་དཔལ་རྡོ་རྗེ་སེམས་དཔའི་སྦྱོར་བས་དང་པོའི་རྡོ་རྗེ་བཅིངས་ལ་སྔགས་ཟློས་ཤིང་དེས་རང་གི་གདོང་ཡོངས་སུ་བྱུགས་ལ་རང་གི་སྙིང་གར་བཀྲོལ་ལ་ཕྱག་རྒྱ་བཅིངས་ལ་བཅོམ་ལྡན་འདས་རྡོ་རྗེ་སེམས་དཔའ་རང་གི་སྙིང་ག་ནས་ཡན་ལག་ཐམས་ཅད་ཁྱབ་པར་རྡོ་རྗེ་སེམས་དཔར་གྱུར་པར་བསམ་མོ། །དེ་ལྟ་བུས་ནི་རྡོ་རྗེ་སེམས་དཔའ་ལ་སོགས་པའི་གཟུགས་ཐམས་ཅད་ཕུན་སུམ་ཚོགས་པར་འགྱུར་རོ། །གཟི་བརྗིད་དང་ན་ཚོད་ཤིན་ཏུ་བཟང་པོ་རབ་ཏུ་འཕེལ་བ་ལ་ནི་ཞེས་བྱ་བ་ལ་གཟི་མདངས་ཤིན་ཏུ་མཛེས་པ་ནི་གཟི་བརྗིད་ཤིན་ཏུ་ཆེ་བ་བཟང་བ་སྟེ། རྡོ་རྗེ་སེམས་དཔའི་གཟི་མདངས་སོ། །ན་ཚོད་བཟང་པོ་ནི་ན་ཚོད་ཤིན་ཏུ་གཞོན་པ་སྟེ། དཔལ་རྡོ་རྗེ་སེམས་དཔའ་ཉིད་ཀྱིས་ལོ་བཅུ་དྲུག་ལོན་པ་ལྟ་བུའི་གནས་སྐབས་སོ། །དེ་གཉིས་མངོན་པར་འཕེལ་བ་ནི་རང་གི་རྒྱུད་ལ་དེ་དག་གི་རྒྱུན་གོང་ནས་གོང་དུ་རྒྱུན་མི་འཆད་པར་བསྐྱེད་པའོ། །དེ་
ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་བཅུད་ཀྱིས་ལེན་གྱིས་སོ་ཞེས་པ་གསུངས་ཏེ། བདེ་བ་ཆེན་པོ་རྡོ་རྗེ་གསང་བའི་བཅུད་ཀྱིས་ལེན་ནི་བདེ་བ་ཆེན་པོ་རྡོ་རྗེ་གསང་བའི་གཟི་མདངས་དང་ན་ཚོད་འཕེལ་བར་བྱེད་པའི་ཕྱག་རྒྱ་དེས་སོ། །དེ་ཡང་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། ཨོཾ་མ་ཧཱ་སུ་ཁ་བཛྲ་ས་ཏྭ་ཛཿ་ཧཱུཾ་བཾ་ཧོཿ། སུ་ར་ཏ་སྟྭཾ་ཞེས་ཟློས་ཤིང་དང་པོའི་རྡོ་རྗེ་བཅིངས་ལ་དེའི་རྩེ་མོ་དབུས་མ་ལ་ལྡག་ཅིང་རྡོ་རྗེ་སེམས་དཔའི་བཅུད་ཀྱིས་ལེན་གྱི་ཕྲ་རབ་རྡོ་རྗེ་དབུ་མ་ལས་ཆུའི་རྒྱུན་བཞིན་དུ་འབྱུང་བས་ལྡག་པར་གྱུར་ཅིང༌། དེས་ཀྱང་ཡན་ལག་ཐམས་ཅད་ཀུན་དུ་ཚིམ་ཞིང་རྡོ་རྗེ་སེམས་དཔར་གྱུར་པར་བསམ་མོ། །དེ་ལྟ་བུས་ནི་གཟི་བརྗིད་དང་ན་ཚོད་བཟང་པོ་ཤིན་ཏུ་འཕེལ་བར་འགྱུར་རོ། །འདི་ནི་བདེ་བ་ཆེན་པོ་རྡོ་རྗེ་གསང་བའི་བཅུད་ཀྱིས་ལེན་ཡིན་ནོ། །དེ་བཞིན་དུ་འོག་ནས་བཤད་པའི་ལས་སྒྲུབ་པ་ཐམས་ཅད་ལ་ཡང་ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་བཟླས་པར་ཤེས་པར་བྱའོ། །སྟོབས་དང་མདོག་འཕེལ་བ་ལ་ནི་ཞེས་བྱ་བ་ལ་ལུས་དང་ངག་གི་སྟོབས་དང་དཔལ་རྡོ་རྗེ་སེམས་དཔའ་དང་འདྲ་བ་ནི་སྟོབས་སོ། །དེ་ཉིད་ཀྱི་སྐུ་མདོག་ཟླ་བའི་མདོག་ཅན་འདྲ་བ་ནི་ཁ་དོག་གོ །དེ་ཉིད་འཕེལ་བ་ནི་སྔ་མ་བཞིན་དུའོ། །སྟོབས་དང་མདོག་འཕེལ་བ་ལ་ནི་ལུས་དང་ངག་གི་སྟོབས་རྒྱུད་ལ་བསྐྱེད་པའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་མཐུས་སོ་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་སྟོབས་ཐོགས་པ་མེད་པ་འདི་ནི་སྟོབས་སོ། །ཐོགས་པ་མེད་པ་ནི་མཐུའོ། །དེ་སྐྱེད་པར་བྱེད་པའི་ཕྱག་རྒྱ་ལ་ཡང་མིང་དེ་སྐད་ཅེས་བྱ་སྟེ། དེས་དེ་ལྟར་འགྱུར་རོ། །འདི་སྐད་སྟོན་པ་ཡིན་ནོ། །དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེ་བཅིངས་ཏེ་རང་གི་དཔུང་མགོ་གཉིས་དང༌། སྙིང་གར་བཞག་ནས་ཕྱག་རྒྱ་ཆེན་པོ་བཅིངས་པ་ལས་བྱུང་བའི་བཅོམ་ལྡན་འདས་རྡོ་རྗེ་སེམས་དཔའ་ཡན་ལག་ཀུན་དུ་གང་ཞིང་དེའི་སྟོབས་དང་ཁ་དོག་དང་ལྡན་པར་བསམ་པར་བྱའོ། །དེ་ལྟ་བུས་ནི་སྟོབས་དང་མདོག་འཕེལ་བར་འགྱུར་རོ། །དབང་བསྐུར་བ་ཐམས་ཅད་ཐོབ་པ་ནི་ཞེས་བྱ་བ་ནི་འཇིག་རྟེན་དང་འཇིག་
རྟེན་ལས་འདས་པའི་དབང་བསྐུར་བ་རྣམས་ཐོབ་པ་ནི་དབང་བསྐུར་བ་ཐམས་ཅད་ཐོབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་ཅོད་པན་གྱིས་སོ་ཞེས་བྱ་བ་གསུངས་ཏེ། རྡོ་རྗེ་གསང་བ་ནི་རྡོ་རྗེ་སེམས་དཔའོ། དེའི་ཅོད་པན་སྐྱེད་པར་བྱེད་པའི་ཕྱག་རྒྱ་ནི་རྡོ་རྗེ་གསང་བའི་ཅོད་པན་ཏེ་དེས་དེར་འགྱུར་རོ། །དེ་ཡང་དཔལ་རྡོ་རྗེ་སེམས་དཔའི་སྦྱོར་བས་ལྔ་པོ་བསྡུས་པ་བཅིངས་ལ་མཛུབ་མོ་གཉིས་ལྕགས་ཀྱུར་བྱས་པས་ཅོད་པན་དང་དར་དཔྱངས་བཅིངས་པས་དབང་བསྐུར་བའི་ཚུལ་གྱིས་རིག་པ་འཛིན་པའི་འཁོར་ལོས་སྒྱུར་བ་ལ་སོགས་པའི་དབང་བསྐུར་བ་ཐོབ་པར་བསྒོམ་པར་བྱའོ། །དེ་ལྟ་བུས་ནི་དབང་བསྐུར་བ་ཐམས་ཅད་ཐོབ་པར་འགྱུར་རོ། །ནོར་ཐམས་ཅད་ཐོབ་པར་བྱེད་པ་ལ་ནི། ནོར་ཐམས་ཅད་ནི་ནོར་བུའི་རིགས་དང་འཇིག་རྟེན་པའི་གཏེར་ལ་སོགས་པ་ནི་ནོར་ཐམས་ཅད་དོ། །དེ་ཐོབ་པ་ནི་རྙེད་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་དབྱིག་གིས་སོ་ཞེས་བྱ་བ་གསུངས་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བས་ལྔ་པོ་བསྡུས་པ་བཅིངས་ལ། མཛུབ་མོ་གཉིས་ལྕགས་ཀྱུ་གཉིས་སུ་བྱས་ལ་བདག་ཉིད་ནོར་བུའི་རིགས་ཀྱི་བདག་ཉིད་དུ་བསྒོམས་ལ། ལྕགས་ཀྱུ་འདི་གཉིས་ཀྱིས་རང་གི་གསང་བའི་གནས་ནས་གསེར་གྱི་དོད་ཙེ་འབྱིན་པའི་ཚུལ་དུ་བྱ་བའམ། གཏེར་གྱི་གནས་ནས་ནོར་དེ་བླངས་ཤིང་དེ་དང་བདག་ཉིད་ལྡན་པར་བསམ་པར་བྱ་སྟེ། དེ་ལྟ་བུས་ནི་ནོར་ཐམས་ཅད་འཐོབ་པར་འགྱུར་རོ། །རྒྱལ་སྲིད་ཐོབ་པ་ལ་ནི་ཞེས་བྱ་བ་ལ་མཁར་གྱི་རྒྱལ་པོ་ལ་སོགས་པའི་རྒྱལ་སྲིད་རྙེད་པ་ནི་རྒྱལ་སྲིད་ཐོབ་པའོ། །དེ་ནི་རྡོ་རྗེ་གསང་བའི་རྒྱལ་པོའི་ཕྱག་རྒྱས་འཐོབ་པར་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་བཤད་མ་ཐག་པའི་ཚུལ་གྱིས་ལྕགས་ཀྱུ་གཉིས་བཅིངས་ལ། སྤྱི་གཙུག་གི་སྟེང་དུ་བཞག་སྟེ་བདག་ཉིད་ཀྱིས་མངོན་པར་འདོད་པའི་རྒྱལ་སྲིད་ཐོབ་པར་བསྒོམ་པར་བྱའོ། །ས་མ་ལུ་ས་པ་ཐོབ་པ་ཞེས་བྱ་བ་ནི་འཛམ་བུའི་གླིང་མ་ལུས་པའི་བདག་པོ་ཉིད་ཐོབ་པའོ། །རྡོ་རྗེ་གསང་བའི་རྩལ་གྱིས་སོ་ཞེས་བྱ་བ་ནི། རྡོ་རྗེ་གསང་བའི་རྩལ་གྱི་ཕྱག་རྒྱས་འགྱུར་རོ། །དེ་ནི་འདིའི་ཡོན་ཏན་ལྔ་པོ་བསྡུས་པ་དེ་ཉིད་བཅིངས་ལ་དེ་ལྔས་མཛུབ་མོ་ལྕགས་ཀྱུར་བྱས་ཏེ། དེས་ས་རྣམས་དགུག་ཅིང་བསྡུ་
བའི་ཚུལ་དུ་བྱ་ཞིང་ཕྱིར་རྒོལ་བ་ཐམས་ཅད་ཀྱང་རང་གི་ལུས་ལས་བྱུང་བའི་དཔུང་གི་ཆོགས་ཡན་ལག་བཞི་པས་ཟིལ་གྱིས་མནན་ནས་རང་དབང་དུ་བྱས་ཏེ་རབ་ཏུ་འདུད་པ་ཉིད་དུ་བསམ་པར་བྱའོ། །ཐམས་ཅད་དབབ་པ་ལ་ནི་ཞེས་བྱ་བ་ལ་སོགས་པ་ལ་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་དབབ་པ་ནི་ཐམས་ཅད་ལ་དབབ་པའོ། །དེ་རྣམས་ཉིད་རང་གི་གནས་ནས་གཡོ་བར་བྱས་པ་ནི་བསྐྱོད་པའོ། །དེ་བཞིན་དུ་དེ་རྣམས་གཉི་གར་བྱེད་དུ་གཞུག་པ་དང་དེ་རྣམས་ཉིད་དུས་གསུམ་བདེན་པ་ཉིད་དུ་སྨྲར་གཞུག་པའི་དུས་གསུམ་གྱི་དངོས་པོ་བདེན་པ་ཉིད་དུ་སྟོན་དུ་གཞུག་པའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་དམ་ཚིག་སྟོན་དུ་གཞུག་པས་སོ་ཞེས་བྱ་བ་གསུངས་ཏེ། དཔལ་རྡོ་རྗེ་སེམས་དཔའི་སྦྱོར་བས་ལྕགས་ཀྱུ་གཉིས་དེ་བཞིན་དུ་བཅིངས་ཏེ། དེས་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ལ་རྡོ་རྗེ་སེམས་དཔའ་དབབ་པའི་བསམ་པས་རང་གི་མཚན་མ་བཀུག་ནས་དེ་ལྟ་བུས་ནི་དེ་དབབ་པར་འགྱུར་རོ། །དེ་ཉིད་ཀྱིས་རྡོ་རྗེ་སེམས་དཔའ་བཅུག་ལ་དེས་དངོས་པོ་ཐམས་ཅད་རང་གི་གནས་ནས་གཡོ་བར་བྱས་ཏེ། དེ་ལྟ་བུས་ནི་ཐམས་ཅད་བསྐྱོད་པར་འགྱུར་རོ། །དེ་ཉིད་ཀྱིས་དངོས་པོ་ཐམས་ཅད་ལ་རྡོ་རྗེ་སེམས་དཔའ་བཅུག་ལ་གར་བྱེད་པར་བསམས་ན་གར་བྱེད་དུ་བཅུག་པར་འགྱུར་རོ། །དེ་ཉིད་ཀྱིས་དངོས་པོ་ཐམས་ཅད་ལ་རྡོ་རྗེ་སེམས་དཔའ་བཅུག་ལ་དུས་གསུམ་བདེན་པར་སྨྲ་བའི་བསམ་པ་བསྐྱེད་ན། དེ་ལྟ་བུ་ནི་དུས་གསུམ་བདེན་བ་ཉིད་དུ་སྨྲར་གཞུག་པར་འགྱུར་རོ། །པྲ་སེ་ན་ཐམས་ཅད་གྲུབ་པ་ནི་ཞེས་བྱ་བ་ནི་ནམ་མཁའ་དང་མེ་ལོང་དང་རལ་གྲི་དང་མཐེ་བོ་དང༌། ས་གཞི་བསྟར་བས་འཚེར་བར་བྱས་པ་དང༌། མར་མེ་དང༌། སྣོད་ལ་སོགས་པའི་མངོན་བར་འདོད་པའི་དངོས་པོ་ཐམས་ཅད་ཀྱིས་ཡང་དག་པ་ཉིད་ངེས་པར་ཤེས་པའི་ཡི་གེ་ལ་སོགས་པས་པྲ་སེ་ན་ཐམས་ཅད་གྲུབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་པྲ་སེ་ན་དབབ་པས་སོ་ཞེས་བྱ་བ་གསུངས་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བས་ལྕགས་ཀྱུ་གཉིས་བཅིངས་ལ་རང་དང་གཞན་གྱི་མིག་དང་རྣ་བ་གཉིས་ལ་ཡི་གེ་ཧཱུཾ་ལས་རྡོ་རྗེ་བསམས་ལ་རྡོ་རྗེ་སེམས་དཔའི་སྦྱོར་བས་བདེན་པ་གང་གིས་ཆོས་ཐམས་ཅད་གཟུགས་བརྙན་དང་འདྲ་བ་དང༌། བདེན་བ་གང་གིས་སྒྲ་ཐམས་ཅད་བྲག་ཅ་དང་འདྲ་བའི་
བདེན་པ་དེས། བདག་གིས་བདེན་པར་འདོད་པའི་དངོས་པོ་སྨོས་ཤིག །སྟོན་ཅིག་ཅེས་བདེན་པའི་བྱིན་གྱིས་བརླབས་པ་བྱས་ལ། ཆོས་ཐམས་ཅད་གཟུགས་བརྙན་ལྟ་བུར་བསྒོམ་པ་དང༌། སྒྲ་ཐམས་ཅད་བྲག་ཅ་ལྟ་བུར་བསྒོམས་པས་ཆོས་ཐམས་ཅད་མཐོང་བ་དང་ཐོས་པར་འགྱུར་རོ། རྡོ་རྗེ་སེམས་དཔའི་བྱིན་གྱི་རླབས་པས་བྱིན་གྱིས་བརླབས་པ་གཞན་དག་གིས་ཀྱང་མཐོང་བ་དང་ཐོས་པ་བྱ་བར་འགྱུར་རོ། །ལྕགས་ཀྱུ་གཉིས་པོ་དེ་རང་གི་མཚན་མ་ཁར་དྲངས་ན་གདོན་ཐམས་ཅད་ལས་ཐར་རོ་ཞེས་བྱ་བ་ལ་འཕགས་པ་རིག་པ་མཆོག་ལས་གསུངས་པའི་གདོན་བཅོ་བརྒྱད་ནི་གདོན་ཐམས་ཅད་དེ། དེ་རྣམས་ལས་ཐར་བར་བྱ་བ་ནི་གདོན་ཐམས་ཅད་ལས་ཐར་བར་བྱ་བའོ། །དེ་ལྟར་ཅི་ཞིག་གིས་འགྱུར་ཞེ་ན། རྡོ་རྗེ་གསང་བའི་གདོན་ལས་ཐར་བས་སོ་ཞེས་བྱ་བ་གསུངས་ཏེ། རྡོ་རྗེ་གསང་བ་ནི་བཅོམ་ལྡན་འདས་རྡོ་རྗེ་གསང་བ་སྟེ་དེའི་གདོན་ལས་ཐར་བའི་ཕྱག་རྒྱས་སོ། །དེ་ནི་འདི་ཡིན་ཏེ་སྔ་མ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བས་ལྔ་པོ་བསྡུས་པ་བཅིངས་ལ་དེའི་མཛུབ་མོ་གཉིས་ཀྱིས་ལྕགས་ཀྱུ་གཉིས་སུ་བྱས་ནས་བདག་ཉིད་རྡོ་རྗེ་སེམས་དཔའ་སྐུ་མདོག་ནག་པོ་ཤིན་ཏུ་དྲག་པོར་བསྒོམ་ཞིང་ལྕགས་ཀྱུ་གཉིས་པོ་དེས་རང་གི་མཚན་མ་ལ་གཏུགས་ཏེ་ལྕགས་ཀྱུ་དེ་ཉིད་དུ་དགྲོལ་ཞིང་རྡོ་རྗེ་སེམས་དཔའ་དྲག་པོ་ཆེན་པོས་གདོན་གྱིས་ཟིན་པའི་སྤྱི་བོ་ནས་བརྩམས་ཏེ། རྐང་མཐིལ་བར་གྱི་ལུས་ཀུན་དུ་གང་བར་གྱུར་པར་བསམ་པར་བྱ་སྟེ། དེ་ལྟ་བུས་ནི་གདོན་ཐམས་ཅད་ལས་ཐར་བར་འགྱུར་རོ། །གདུག་པ་ཐམས་ཅད་གཞིག་པ་ལ་ནི་ཞེས་བྱ་བ་ལ་གདུག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་གདུག་པ་ཐམས་ཅད་དེ། འཕགས་པ་དཔུང་བཟངས་ལས་གསུངས་པའི་བགེགས་ཐམས་ཅད་དོ། །དེ་རྣམས་གཞིག་པ་ནི་གཞོམ་པ་སྟེ་མི་སྣང་བར་འགྱུར་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་བགེགས་གཞོམ་པས་སོ་ཞེས་བྱ་བ་གསུངས་ཏེ་རྡོ་རྗེ་གསང་བ་སྟེ་རྡོ་རྗེ་སེམས་དཔའི་བགེགས་གཞོམ་པའི་ཕྱག་རྒྱས་སོ་ཞེས་བྱ་བའི་ཐ་ཚིག་གོ །དེ་ནི་འདི་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བདག་ཉིད་རྡོ་རྗེ་སེམས་དཔའ་འབར་བའི་ཕྲེང་བ་
འོད་ཀུན་དུ་འཁྲུག་པ་དྲག་པོ་ཆེན་པོར་བསམས་ལ། སྔར་བཤད་པའི་ལྕགས་ཀྱུ་གཉིས་བཅིངས་ནས་དེས་རང་གི་མཚན་མ་ལ་གཏུགས་ནས་ལོག་འདྲེན་གཞོམ་པའི་བསམ་པས་ལག་པ་གཡོན་པའི་མཐིལ་དུ་གཡས་པའི་མཐེ་བོ་མཚན་མས་བསྣུན་ཅིང་ལོག་འདྲེན་གྱི་སྟེང་དུ་རྡོ་རྗེ་སེམས་དཔའ་འོད་ཟེར་འབར་བའི་ཕྲེང་བ་འཁྲུག་པ་འབབ་པར་བསམ་པར་བྱ་སྟེ། དེ་ལྟ་བུས་ནི་དེ་བཅོམ་པར་འགྱུར་རོ། །ཐམས་ཅད་རེངས་པར་བྱ་བ་ནི་ཞེས་བྱ་བ་ལ་གཞན་གྱི་དཔུང་དང་སེང་གེ་དང་སྟག་དང་རྐུན་པོ་དང་སྤྲིན་དང་སྤྲུལ་དང་སྲིན་བུ་ལ་སོགས་པ་མི་འགུལ་བར་བྱས་པ་ནི་རེངས་པར་བྱས་པའོ། །དེར་ཇི་ལྟར་འགྱུར་ཞེ་ན། རྡོ་རྗེ་གསང་བའི་རེངས་པས་སོ་ཞེས་བྱ་བ་གསུངས་ཏེ། རྡོ་རྗེ་སེམས་དཔའི་རེངས་པ་ནི་རྡོ་རྗེ་གསང་བའི་རེངས་པ་སྟེ་དེའི་ཕྱག་རྒྱས་ཐམས་ཅད་རེངས་པར་འགྱུར་རོ། །འདི་སྐད་སྟོན་ཏེ་རྡོ་རྗེ་སེམས་དཔའི་རྣལ་འབྱོར་ཇི་ལྟ་བ་དེ་བཞིན་དུ་བྱས་ལ་ཕ་རོལ་གྱི་དམག་ཚོགས་ལ་སོགས་པའི་སྟེང་དུ་རྡོ་རྗེ་སེམས་དཔའ་དབང་ཆེན་གྱི་དཀྱིལ་འཁོར་ལ་བཞུགས་པ་ནམ་མཁའ་དང་མཉམ་པ་དེ་མནན་ནས་བཞུགས་པར་བསམ་ཞིང་སྔར་བཤད་པའི་ལྕགས་ཀྱུའི་ཕྱག་རྒྱས་རང་གི་མཚན་མ་བཙིར་བ་དེ་ལྟ་བུས་ནི་ཐམས་ཅད་རེངས་པར་འགྱུར་རོ། །ཐམས་ཅད་གཉིད་ལོག་པར་བྱ་བ་ལ་ནི་རྡོ་རྗེ་གསང་བའི་གཉིད་ཀྱིས་སོ་ཞེས་བྱ་བ་ལ་སེམས་ཅན་ཐམས་ཅད་གཉིད་ལོག་པར་བྱ་བ་ནི། དེ་ནི་ཐམས་ཅད་གཉིད་ལོག་པར་བྱ་བ་སྟེ། དེ་ནས་བཅོམ་ལྡན་འདས་རྡོ་རྗེ་གསང་བ་སྟེ་རྡོ་རྗེ་སེམས་དཔའི་གཉིད་ཀྱི་ཕྱག་རྒྱས་འགྱུར་རོ་ཞེས་བྱ་བའི་དོན་ཏོ། །དེའི་མཚན་ཉིད་ནི་དེ་ཡིན་པར་ཤེས་པར་བྱ་སྟེ་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཤད་མ་ཐག་པའི་ལྕགས་ཀྱུ་གཉིས་བཅིངས་ལ། རང་གི་མཚན་མ་ལ་རེག་པར་བྱས་ལ་ཡིད་ཀྱིས་བསྒྲུབ་བར་བྱ་བ་དང་གཅིག་ཏུ་གྱུར་བར་བྱས་ནས་བསྒྲུབ་པར་བྱ་བ་གཉིད་ལོག་ཏུ་གཞུག་པའི་བསམ་པས་རང་གི་མིག་བཙུམ་པར་བྱའོ། །ཐམས་ཅད་རྒྱས་བཏབ་པ་ཞེས་བྱ་བ་ནི་གདུག་ཅིང་གཏུམ་པའི་སེམས་ཅན་ཐམས་ཅད་རྒྱས་བཏབ་བོ། །དེས་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་མཁའ་འགྲོ་མས་སོ་ཞེས་བྱ་བ་གསུངས་ཏེ་བདེ་བ་ཆེན་པོ་རྡོ་རྗེ་
གསང་བ་ལ་ཞེས་པ་རྡོ་རྗེ་སེམས་དཔའི་དམ་ཚིག་གི་མཁའ་འགྲོ་མ་ནི་དཔལ་ཧེ་རུ་ཀ་འཁོར་དང་བཅས་པའི་སྐུས་ནམ་མཁའ་ཁྱབ་པའོ། །དེ་སྐྱེད་པར་བྱེད་པའི་ཕྱག་རྒྱ་ནི་དམ་ཚིག་གི་མཁའ་འགྲོ་མ་ཞེས་བྱའོ། །དེ་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བཤད་མ་ཐག་པའི་ལྕགས་ཀྱུའི་ཕྱག་རྒྱས་རང་གི་མཚན་མ་ལ་རེག་པར་བྱས་ཤིང་དཔལ་ཧེ་རུ་ཀའི་སྐུ་ཅན་གྱི་རྡོ་རྗེ་སེམས་དཔའ་མཁའ་འགྲོ་མའི་ཚོགས་དང་བཅས་པར་བདག་ཉིད་བསམས་ལ། གཡོན་ལོགས་སུ་ཕྱག་རྒྱ་བསྐོར་བར་བྱས་ལ་བསྒྲུབ་པར་བྱ་བ་ལ་ཁྲོ་བོའི་བལྟ་བས་བལྟ་ཞིང་བཅོམ་ལྡན་འདས་དཔལ་ཧེ་རུ་ཀ་ནམ་མཁའ་ཐམས་ཅད་དང་མཉམ་པའི་སྦྱོར་བས་བསྒྲུབ་པར་བྱ་བའི་ལུས་ལ་བཅུག་ནས་དེས་དེ་རྒྱས་བཏབ་པར་བསམ་པར་བྱའོ། །དེ་ལྟར་ན་ཐམས་ཅད་རྒྱས་བཏབ་པར་འགྱུར་རོ། །ཐམས་ཅད་དུ་གསད་པ་ལ་ནི་ཞེས་བྱ་བ་ལ་དཀོན་མཆོག་གསུམ་ལ་གནོད་པར་བྱེད་པ་དང༌། སེམས་ཅན་མང་པོ་འཁུ་བར་བྱེད་པ་ནི་ཐམས་ཅད་དོ། །དེ་རྣམས་གསད་པར་བྱ་བ་ནི་བརྒྱལ་བར་བྱ་བའམ། རྣམ་པར་སྤྱང་བར་བྱ་བའི་ཕྱིར་གཏན་འཕོ་བར་བྱ་བའོ། །དེས་ཇི་ལྟར་འགྱུར་ཞེ་ན། རྡོ་རྗེ་གསང་བའི་མཐར་བྱེད་པས་སོ་ཞེས་བྱ་བ་གསུངས་ཏེ། རྡོ་རྗེ་གསང་བ་སྟེ་རྡོ་རྗེ་སེམས་དཔའི་མཐར་བྱེད་པ་ནི་གདུག་པ་གཞོམ་པའི་ཕྱག་རྒྱའོ། །འདིས་ནི་དོན་འདི་སྐད་སྟོན་པ་ཡིན་ཏེ། རྣལ་འབྱོར་པ་བསམ་པ་རྣམ་པར་དག་པ་སྙིང་རྗེས་གཞན་དབང་དུ་གྱུར་པས་གལ་ཏེ་སེམས་ཅན་འགའ་ཞིག་མཚམས་མེད་པའི་ལས་ལ་སོགས་པ་ལ་འཇུག་པ་མཐོང་ན། གང་གི་ཚེ་དེ་ཐབས་གང་གིས་སྡིག་པ་དེ་ལས་བཟློག་པར་ནུས་པ་དེའི་ཚེ་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། བཤད་མ་ཐག་པའི་ཕྱག་རྒྱས་རང་གི་མཚན་མ་ལ་རེག་པར་བྱ་སྟེ། བཟློག་ལ་ཁའི་འགྲམ་གཉིས་སུ་མཆེ་བ་སྟོན་པའི་ཚུལ་གྱིས་འཛིན་ཅིང་བདག་ཉིད་རྡོ་རྗེ་གནོད་སྦྱིན་གྱི་མཆེ་བ་གཙིགས་པ་འཁོར་དང་བཅས་པ་བསམས་ལ། བསྒྲུབ་པར་བྱ་བ་རང་གི་ཁར་བཅུག་ནས་དེ་བཟའ་བར་བསམ་པར་བྱ་སྟེ། དེ་ལྟར་ན་ཐམས་ཅད་གསོད་པར་འགྱུར་རོ། །ཐམས་ཅད་བསྒྱེལ་བ་ལ་ནི་རྡོ་རྗེ་གསང་བའི་ཧཱུཾ་མཛད་ཀྱིས་སོ་ཞེས་བྱ་བ་ལ་དབང་ཕྱུག་ཆེན་པོ་ལ་སོགས་པ་བསྒྱེལ་
བ་ནི་ཐམས་ཅད་བསྒྱེལ་བའོ། །བཅོམ་ལྡན་འདས་རྡོ་རྗེ་གསང་བའི་ཧཱུཾ་མཛད་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་སྟེ་ཐམས་ཅད་བསྒྱེལ་བར་འགྱུར་རོ། །འདི་སྐད་སྟོན་ཏེ་དེ་བཞིན་དུ་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ལ་སྔར་བཤད་པའི་ལྕགས་ཀྱུའི་ཕྱག་རྒྱས་རང་གི་མཚན་མ་ལ་རེག་ཅིང། གཡས་པའི་མཛུབ་མོ་བསྒྲེང་ལ་དེས་བསྒྲུབ་པར་བྱ་བ་ལ་སྡིགས་མཛུབ་བྱ་ཞིང་རྡོ་རྗེ་ཧཱུཾ་མཛད་དུ་བདག་ཉིད་བསམས་ལ་བསྒྲུབ་པར་བྱ་བའི་སྟེང་དུ་ཕྱག་རྒྱ་བཅིངས་པ་ལས། རྡོ་རྗེ་ཧཱུཾ་མཛད་སྤྲོས་ལ་བསྒྲུབ་པར་བྱ་བའི་སྟེང་དུ་དབབ་པར་བྱ་སྟེ། དེ་ལྟ་བུས་ནི་ཐམས་ཅད་བསྒྱེལ་ཞིང་ལྷུང་བར་བྱས་པར་འགྱུར་རོ། །ཐམས་ཅད་བསླང་བ་ལ་ནི་ཞེས་བྱ་བ་ལ་དབང་ཕྱུག་ཆེན་པོ་ལ་སོགས་པ་བསྒྱེལ་བ་ཐམས་ཅད་བསླང་བ་ནི་ཐམས་ཅད་བསླང་བའོ། །དེས་ཇི་ལྟར་འགྱུར་ཞེ་ན། རྡོ་རྗེ་གསང་བའི་དམ་ཚིག་བསླང་བའི་ཕྱག་རྒྱ་སྟེ་ཞེས་བྱ་བ་གསུངས་ཏེ། རྡོ་རྗེ་གསང་བའི་དམ་ཚིག་བསླང་བ་ནི། རྡོ་རྗེ་གསང་བའི་དམ་ཚིག་བསླང་བའི་ཕྱག་རྒྱ་སྟེ། དེས་བསྒྱེལ་བ་ཐམས་ཅད་སློང་བར་འགྱུར་རོ། །དེ་ནི་འདི་ཡིན་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་དེས་བཤད་མ་ཐག་པའི་ཕྱག་རྒྱ་བཅིངས་ནས་དེས་རང་གི་མཚན་མ་ལ་རེག་པར་བྱ་ཞིང་བདག་ཉིད་རྡོ་རྗེ་ཧཱུཾ་མཛད་དུ་བསམས་ལ། དེ་སྡིགས་མཛུབ་བྱས་བའི་ཚུལ་ཉིད་དུ་བྱས་པས་བསྒྲུབ་པར་བྱ་བ་ས་ལས་བསླང་བའི་ཚུལ་དུ་བྱས་ཏེ་དེ་ལྟ་བུ་ལྷུང་བ་ཐམས་ཅད་སློང་བར་འགྱུར་རོ། །ཐམས་ཅད་བཅིང་བ་ནི་ཁམས་གསུམ་པའི་སྲིན་པོ་ལ་སོགས་པ་ཐམས་ཅད་བཅིང་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་བཅིང་བས་སོ་ཞེས་བྱ་བ་གསུངས་ཏེ། རྡོ་རྗེ་ཆེན་པོའི་གསང་བ་སྟེ། རྡོ་རྗེ་སེམས་དཔའི་བཅིང་བ་ནི་རྡོ་རྗེ་གསང་བ་བཅིང་བའི་ཕྱག་རྒྱ་གང་ཡིན་པ་སྟེ་དེས་ཐམས་ཅད་བཅིངས་པར་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་སྔར་བཤད་པའི་ལྕགས་ཀྱུ་གཉིས་བཅིངས་ཏེ་ཕྱག་རྒྱ་བཅིངས་པ་དེས་རང་གི་མཚན་མ་ལ་རེག་པར་བྱས་ནས། བདག་ཉིད་རྡོ་རྗེ་ལྕགས་སྒྲོག་ཏུ་བསམས་ལ་མཐེ་བོང་དང་མཐེའུ་ཆུང་བསྒྲེང་ལ་བསྒྲུབ་པར་བྱ་བ་ནི་རྡོ་རྗེ་ལྕགས་སྒྲོག་གིས་བཅིང་བར་བསམ་པར་བྱའོ། །ཐམས་ཅད་ཐར་
པར་བྱ་བ་ནི་དབང་ཕྱུག་ཆེན་པོ་ལ་སོགས་པ་འཇིག་རྟེན་གསུམ་གདུང་བ་ལ་སོགས་པའི་བཅིང་བ་ལས་ནི་ཐར་པར་བྱ་བ་ནི་ཐམས་ཅད་ཐར་པར་བྱའོ། །དེ་ལྟར་ཅིར་འགྱུར་ཞེ་ན། རྡོ་རྗེ་གསང་བའི་ཡི་གེ་མུས་སོ་ཞེས་བྱ་བ་གསུངས་ཏེ། དེའི་མཚན་ཉིད་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། སྔར་བཤད་པའི་ལྕགས་ཀྱུ་གཉིས་བཅིངས་ཏེ་རང་གི་མཚན་མ་ལ་བཞག་ནས། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ། སུ་ར་ཏ་སྟྭཾ་མུཿ་ཞེས་བྱ་བས་རྡོ་རྗེ་ལྕགས་སྒྲོག་ལ་སོགས་པའི་བཅིངས་པ་དགྲོལ་བར་བྱ་སྟེ། དེ་ལྟ་བུས་ནི་བཅིངས་པ་ཐམས་ཅད་ལས་ཐར་བར་འགྱུར་རོ། །ཕྲ་མེན་མ་ཐམས་ཅད་ལས་ཐར་བར་བྱ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ཕྲ་མེན་མའམ་མཁའ་འགྲོ་མས་ཟིན་པ་ལ་ཐར་བར་བྱ་བ་ནི་ཕྲ་མེན་མ་ཐམས་ཅད་ཀྱིས་གཡོ་བ་མེད་པར་བྱས་ཤིང་ཤི་བའོ། །དེའི་སྔོན་གྱི་གནས་སྐབས་རྗེས་སུ་སྦྱིན་པ་ནི། སེམས་དང་བཅས་པར་སྦྱིན་པར་བྱ་བ་དང་ཤི་བ་གསོ་བའོ། །འདི་གཉིས་ཇི་ལྟར་འགྱུར་ཞེ་ན། གསང་བ་ཆེན་པོ་ཧེ་རུ་ཀའི་རྡོ་རྗེས་སོ་ཞེས་བྱ་བ་གསུངས་ཏེ། གསང་བ་ཆེན་པོ་སྟེ་རྡོ་རྗེ་གསང་བའི་ཧེ་རུ་ཀ་བསྐྱེད་པའི་ཕྱག་རྒྱ་ནི་གསང་བ་ཆེན་པོའི་ཧེ་རུ་ཀའི་རྡོ་རྗེ་ཞེས་བྱ་བ་སྟེ། དེས་དེ་གཉིས་འགྲུབ་པར་འགྱུར་རོ། །འདི་སྐད་སྟོན་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ནས། དང་པོའི་རྡོ་རྗེ་བཅིངས་ལ་དཔལ་ཧེ་རུ་ཀར་བདག་ཉིད་བསམས་ལ་ཕྲ་མེན་མ་ཐམས་ཅད་ཀྱིས་ཟིན་པ་ལ་དང་པོའི་རྡོ་རྗེ་མཐེའུ་ཆུང་གཉིས་ཀྱིས་རྡོ་རྗེ་བསྣུན་པར་བྱ་ཞིང་དཔལ་ཧེ་རུ་ཀའི་རྡོ་རྗེ་མཁའ་འགྲོ་མ་དང་བཅས་པ་ནད་པའི་ལུས་ལ་ཞུགས་པས་ཕྲ་མའི་ཕྱག་རྒྱས་ཐམས་ཅད་ཐལ་བར་བྱས་ལ་འོད་ཟེར་གྱི་ཚོགས་ཀྱིས་ནད་པའི་སྙིང་ཕྲ་མེན་མའི་ལུས་ལས་བཀུག་ནས་ནད་པའི་ལུས་ལ་བཅུག་སྟེ། ནད་པ་ནད་མེད་པར་བྱས་ནས་ཐ་མལ་པར་གནས་པར་བསམ་པར་བྱའོ།། མ་མོའི་གདོན་ཐམས་ཅད་ལས་ཐར་བར་བྱ་བ་ལ་ནི་རྡོ་རྗེ་གསང་བ་དྲག་པོས་སོ་ཞེས་བྱ་བ་ནི། མ་མོའི་གདོན་ཐམས་ཅད་ལས་ཐར་བར་བྱ་བ་ནི་མ་མོའི་གདོན་ཐམས་ཅད་ལས་ཐར་བར་བྱའོ། །རྡོ་རྗེ་གསང་བ་ནི་རྡོ་རྗེ་སེམས་དཔའ་སྟེ། དེའི་བདག་པོ་ནི་རྡོ་རྗེ་གསང་བའི་དྲག་པོའི་ཕྱག་
རྒྱ་གང་གིས། མ་མོའི་གདོན་ཐམས་ཅད་ངེས་པར་བསྲེག་ཅིང་ཐར་པར་བྱེད་པའོ། །འདི་སྐད་སྟོན་ཏེ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ནས་བདག་ཉིད་རྡོ་རྗེ་འཛིན་པ་ཆེན་པོ་དྲག་པོའི་ཞལ་རྣམ་པར་འགྱུར་བ་འཁོར་དང་བཅས་པ་བསམས་ལ་མ་མོའི་གདོན་གྱིས་ཟིན་པའི་སྟེང་དུ་ཕྱག་རྒྱ་དེ་གདོང་རྣམ་པར་འགྱུར་ཞིང་མི་སྡུག་པས་འཕངས་ལ། བཅོམ་ལྡན་འདས་དྲག་པོ་ཆེན་པོའི་གཟུགས་ཅན་འཁོར་དང་བཅས་པ་བསྒྲུབ་པར་བྱ་བའི་ལུས་ལ་ཞུགས་པས་ཀྱང་དེའི་ལུས་ལ་གནས་པའི་མ་མོའི་གདོན་ཐམས་ཅད་བསྲེགས་པར་འགྱུར་ཞིང་སོས་པར་འགྱུར་རོ། །དེ་ལྟ་བུས་ནི་མ་མོའི་གདོན་ཐམས་ཅད་ལས་ཐར་བར་འགྱུར་རོ། །ཕྲ་མེན་མ་ཐམས་ཅད་ཀྱིས་རྒྱས་བཏབ་པ་ལས་ཐར་བར་བྱ་བ་ནི་ཞེས་བྱ་བ་ལ། འཇིག་རྟེན་དང་འཇིག་རྟེན་ལས་འདས་པའི་ཕྲ་མེན་མའམ་མཁའ་འགྲོ་མ་རྣམས་ཀྱིས་རྒྱས་བཏབ་པ་དེ་ལས་ཐར་པར་བྱ་བ་ནི་དེ་ལས་དགྲོལ་བའོ། །སྙིང་ཟོས་པ་ལས་སྙིང་གཞན་དབྱུང་བ་ཞེས་བྱ་བ་ལ་སོགས་པ་ལ་དེ་རྣམས་ཀྱིས་དེ་ལྟར་རྒྱས་བཏབ་པའི་ཚེ་སྙིང་གི་པདྨ་དྲལ་ནས་ཟོས་པར་གྱུར་པ་གང་ཡིན་པ་དེའི་སྙིང་གཞན་གང་ཡིན་པ་དབྱུང་བ་ནི་སྙིང་གི་པདྨ་གཞན་བསྐྱེད་པའོ། །དེ་རྣམས་ཀྱི་ལུས་ལ་ཕྲ་མེན་མ་ཐམས་ཅད་འཇུག་པ་ནི་བབས་པ་སྟེ་ཕྲ་མེན་མའི་ཕྱག་རྒྱ་གཡོ་བ་མེད་པར་བྱས་པ་དེ་རྣམས་ཀྱི་སེམས་ཡོད་པར་བྱས་ཤིང་ནད་མེད་པར་བྱས་པ་ནི་ཤི་བ་གསོས་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དམ་ཚིག་ཆེན་པོ་གསང་བའི་ཧེ་རུ་ཀའི་རྡོ་རྗེ་དབང་བསྐུར་བའི་ཕྱག་རྒྱས་སོ་ཞེས་བྱ་བ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་དམ་ཚིག་ཆེན་པོའི་གསང་བའི་དཔལ་ཧེ་རུ་ཀ་སྐྱེད་པར་བྱེད་པ་ནི་དཔལ་ཧེ་རུ་ཀ་གསལ་བར་བྱེད་ཅིང༌། དེ་སྐྱེད་པར་བྱེད་པའི་ཕྱག་རྒྱ་གང་ཡིན་པ་དེ་ནི་རྡོ་རྗེ་ཧེ་རུ་ཀའི་དབང་བསྐུར་བའི་ཕྱག་རྒྱ་སྟེ། དེས་འདི་དག་ཐམས་ཅད་བྱེད་པར་འགྱུར་རོ། །འདིའི་དོན་ནི་འདི་སྐད་སྟོན་པར་འགྱུར་ཏེ་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་ནས་དང་པོའི་རྡོ་རྗེ་བཅིངས་པ་བཟློག་ནས་དབྲལ་བའི་ཕྱོགས་སུ་བཞག་ནས་གྱེན་དུ་བལྟས་ལ། དཔལ་ཧེ་རུ་ཀར་བདག་
ཉིད་བསྒོམ་པར་བྱ་སྟེ། ཞལ་བཞི་པ་དེ་ལ་ཞལ་དང་པོ་དྲག་པོ་ཞལ་གཡས་པ་རབ་ཏུ་རྨོངས་པར་མཛད་པའོ། །རྒྱབ་ཀྱི་ཞལ་གདུག་པའི་པགས་པ་ཟ་བར་མཛད་པ་ལ་བརྩོན་པ། ཞལ་གཡོན་པ་སྒེག་པ་ཕྱག་གཉིས་ཀྱིས་རླུང་གི་གོས་འཛིན་པའི་ཚུལ་གྱིས་མིའི་པགས་པ་རློན་པ་བསྣམས་པ་གཉིས་ཀྱིས་དབྲལ་བའི་ཕྱོགས་སུ་ཧེ་རུ་ཀའི་རྡོ་རྗེའི་ཕྱག་རྒྱ་འཆང་བ། གཡས་པའི་ཕྱག་གསུམ་པས་རྡོ་རྗེ་རྩེ་ལྔ་པ་འབར་བ་གསོར་བ་ལ་བརྩོན་པ། བཞི་པ་ཁྲག་ཆེན་པོས་བཀར་བའི་ཐོད་པ་བསྣམས་པ། གཡོན་གྱི་ཕྱག་གསུམ་པས་དྲིལ་བུ་དང་བཅས་པའི་རྡོ་རྗེ་ཁ་ཊྭཱཾ་ག་བསྣམས་པ། བཞི་པ་ཤ་ཆེན་པོས་ཡོངས་སུ་གང་བའི་ཐོད་པ་བསྣམས་པའོ། །ཡང་ན་ཞལ་གཅིག་པ་ཕྱག་གཉིས་པ་དཔུང་པ་གཡོན་པར་དྲིལ་བུ་དང་བཅས་པའི་རྡོ་རྗེ་ཁ་ཊྭཱཾ་ག་མཆོད་ཕྱིར་ཐོགས་ཀྱི་ཚུལ་དུ་བསྣམས་པ། ཕྱག་གཡས་ཀྱིས་བ་དན་གསུམ་པའི་ཚུལ་གྱིས་རྡོ་རྗེ་རྩེ་ལྔ་པ་འབར་བ་བསྣམས་པ། ཕྱག་གཡོན་པས་ཤ་ཆེན་པོས་ཡོངས་སུ་གང་བའི་ཐོད་པ་བསྣམས་པའོ། །འདི་དག་གཉིག་ཡང་ཐོད་པའི་ཅོད་པན་གྱི་ཕྲེང་བ་ཅན་སྤྱི་གཙུག་ནས་སངས་རྒྱས་ཀྱི་གཙུག་གི་ནོར་བུ་ཅན་སྣ་ཚོགས་པདྨ་ལ་བཞུགས་པ། ཞབས་གཡོན་བ་ས་ལ་བཞག་ནས་ཞབས་གཡས་པ་སེམས་དཔའི་སྐྱིལ་མོ་ཀྲུང་གི་ཚུལ་དུ་བཞུགས་ནས་དེའི་ཞབས་མཐིལ་གཡོན་གྱི་བརླ་དང་སྦྱར་བའི་ཚུལ་དུ་བྱས་ནས་བཞུགས་པ། སྐུའི་གཟི་མདངས་སྔོན་པོ་འཚེར་བ་འོད་ཀྱི་དཀྱིལ་འཁོར་འཇིག་པ་ཆེན་པོའི་དུས་ཀྱི་མེ་ལྟར་འབར་ཞིང་དམར་བ། དབུ་སྐྲ་དམར་སེར་འབར་བ་ཞལ་སྣ་ཚོགས་པ་རྣམས་འབར་བར་འགྱུར་ཞིང་དྲག་པོ་ལ་སོགས་པའི་ཉམས་དང་ལྡན་པ་ཁྲོ་གཉེར་རྣམ་པར་འགྱུར་ཞིང་བསྡུས་པ་བལྟ་བ་རྣམ་པར་འབར་བར་སྣང་ཞིང་གཡོ་བའོ། །དེ་ལྟར་བདག་ཉིད་དཔལ་ཧེ་རུ་ཀར་བསམས་ནས་ཇི་སྐད་དུ་བཤད་པའི་ནད་པའི་ལུས་ལ། བཅོམ་ལྡན་འདས་རྡོ་རྗེ་མཁའ་འགྲོ་མའི་ཚོགས་དང་བཅས་པ་ཡིད་ཀྱིས་གཞུག་པར་བྱའོ། །དེ་ནས་ནད་པའི་ལུས་ལ་གནས་པའི་ཕྲ་མེན་མའི་ཕྱག་རྒྱ་ཐམས་ཅད་བཅོམ་ཞིང་ཟོས་པར་བསམ་པར་བྱའོ། །དེ་ནས་རྡོ་རྗེ་རྣལ་འབྱོར་མ་འོད་ཟེར་འབར་བའི་གཟུགས་ཅན་
རྣམས་སྤྲུལ་ལ་དེར་གནས་པ་ཉིད་ཀྱིས་དེར་མཁའ་འགྲོ་མ་དེ་བཀུག་ལ་ནད་པའི་ལུས་ལ་བཅུག་སྟེ་དེ་རྣམས་ལས་སྙིང་བླངས་ལ་ནད་པའི་ལུས་དེ་བརྟས་པར་བྱའོ། །དེ་ནས་དེ་རྣམས་ཡང་དག་པར་བཙིར་ཞིང་ངེས་པར་བཟུང་ལ་ནད་པ་སོས་ཤིང་རྣལ་མར་བྱས་ཤིང་བསླང་བར་བྱའོ།། གདུག་པ་ཐམས་ཅད་ཀྱི་ཕྱག་རྒྱ་གཞིག་པ་ལ་ནི་ཞེས་བྱ་བ་ལ་ལོག་འདྲེན་ཐམས་ཅད་ཀྱི་ཕྱག་རྒྱ་ནི་གདུག་པ་ཐམས་ཅད་ཀྱི་ཕྱག་རྒྱའོ། །དེ་རྣམས་གཞིག་པ་ནི་བསྒྲུབ་པར་བྱ་བའི་རྒྱུད་ལ་ལོག་འདྲེན་གྱིས་བཅིངས་པ་རྣམས་རྣམ་པར་གཞིག་པའོ། །ཡང་སྲིན་པོ་ལ་སོགས་པའི་གདུག་པ་ཐམས་ཅད་ཀྱིས་ཉེ་བར་གནོད་པ་བྱེད་པའི་ཕྱིར་འོངས་ནས་ཕྱག་རྒྱ་བཅིངས་པའི་ཕྱག་རྒྱ་དེ་རྣམ་པར་བརླག་པའི་གདུག་པ་ཐམས་ཅད་ཀྱི་ཕྱག་རྒྱ་གཞིག་པའོ། །དེས་ཇི་ལྟར་འགྱུར་ཞེ་ན། རྡོ་རྗེ་གསང་བའི་ཕྱག་རྒྱས་སོ་ཞེས་བྱ་བ་གསུངས་ཏེ། རྡོ་རྗེ་གསང་བ་སྟེ། རྡོ་རྗེ་སེམས་དཔའི་རྡོ་རྗེ་ནི་གསང་བའི་རྡོ་རྗེའི་ཕྱག་རྒྱ་གང་གིས་དེ་ལྟར་གྱུར་པ་སྟེ། རྡོ་རྗེ་གསང་བའི་རྡོ་རྗེ་དེས་གདུག་པ་ཐམས་ཅད་ཀྱི་ཕྱག་རྒྱ་གཞིག་པར་བྱའོ། །འདིས་ནི་འདི་སྐད་སྟོན་པར་འགྱུར་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ། བདག་ཉིད་རྡོ་རྗེ་སེམས་དཔའ་ཤིན་ཏུ་དྲག་པོ་བསམས་ལ་དང་པོའི་རྡོ་རྗེས་གདུག་པའི་ཕྱག་རྒྱའི་སྟེང་དུ་རྡོ་རྗེ་འབར་བ་དབབ་པའི་བསམ་བས་ནམ་མཁའི་ཕྱོགས་སུ་བསྣུན་པར་བྱ་སྟེ། དེ་ལྟ་བུས་ནི་གདུག་པ་ཐམས་ཅད་ཀྱི་ཕྱག་རྒྱ་བཅོམ་པར་འགྱུར་རོ། །རིམས་ཐམས་ཅད་ནི་ཉིན་གསུམ་པ་དང༌། ཉིན་བཞི་པ་དང༌། ཡང་དང་ཡང་ཟློས་པར་བྱེད་པ་དང༌། རྟག་པ་དང་ཁྱབ་འཇུག་གི་རིམས་སོ། །དེ་རྣམས་ཞི་བ་ནི་དེ་དག་དང་བྲལ་བའོ། །དེ་དག་གིས་ཅིར་འགྱུར་ཞེ་ན། རྡོ་རྗེ་གསང་བའི་འབར་བའི་ལྟ་བས་སོ་ཞེས་བྱ་བ་གསུངས་ཏེ་རྡོ་རྗེ་གསང་བ་སྟེ། རྡོ་རྗེ་སེམས་དཔའི་འབར་བའི་ལྟ་བ་ནི་བསྐྱོད་ཅིང་འཛུམ་པའི་ལྟ་བས་སོ། །དེ་དང་བཅས་པའི་ཕྱག་རྒྱས་བཅིངས་པས་སྦྱར་བར་བྱ་སྟེ། དེས་རིམས་ནད་ཐམས་ཅད་རབ་ཏུ་ཞི་བར་འགྱུར་རོ། །འདི་སྐད་སྟོན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་དཱིཔྟ་དྲྀ་ཤྱ་ཨཾ་ཀུ་ཤི་ཛཿ་ཞེས་བྱ་བ་མིག་གཉིས་སུ་བཀོད་ལ་རབ་ཏུ་འབར་བས་གཡོ་བའི་མིག །མིག་གི་རྫི་མ་འདྲེན་པ་ནི་ཞེས་བྱ་བའི་འབར་བའི་ལྟ་
བའི་ཕྱག་རྒྱས་རིམས་ཀྱིས་ཟིན་པ་རྣམས་ལ་བལྟས་ལ། དང་པོའི་རྡོ་རྗེས་བྱབ་པར་བྱ་ཞིང་བལྟས་པ་ལས་བྱུང་བའི་རྡོ་རྗེ་འབར་བའི་ལྕགས་ཀྱུ་རིམས་མགོ་བོ་གསུམ་པ། ལག་པ་གསུམ་པ་རྐང་པ་གསུམ་པ་དྲངས་ལ། རྒྱ་མཚོ་ཆེན་པོར་དོར་ཏེ། བསྒྲུབ་པར་བྱ་བའི་སྤྱི་བོ་ནས་བརྩམས་ཏེ། རྐང་མཐིལ་གྱི་བར་དུ་བཅོམ་ལྡན་འདས་རྡོ་རྗེ་སེམས་དཔས་ཁྱབ་ཅིང་རྡོ་རྗེ་སེམས་དཔར་བསམ་པར་བྱའོ། །དེ་ལྟ་བུས་ནི་རིམས་ནད་ཐམས་ཅད་རབ་ཏུ་ཞི་བར་འགྱུར་རོ། །གྲང་བའི་རིམས་ཞི་བར་བྱ་བའི་ཕྱིར་ནི་བཅོམ་ལྡན་འདས་སྐུ་མདོག་དམར་པོ་བསམས་ལ། ཚ་བའི་རིམས་ཞི་བར་བྱ་བའི་ཕྱིར་ནི་ཟླ་བའི་མདོག་ཅན་དུ་བསམ་པར་བྱའོ། །དུག་ཐམས་ཅད་ནི་རྒྱུ་བ་དང་མི་རྒྱུ་བ་རྣམས་སོ། །དེ་རྣམས་གཞིག་པ་ནི་རྣམ་པར་བསལ་བ་སྟེ། དེ་རྣམས་ཉིད་རང་དབང་དུ་བྱས་ནས་བཟླ་བར་བྱ་བའོ། །དེ་རྣམས་ཉིད་གཡོ་བ་ནི་འབབ་པའོ། །འགུལ་མི་ནུས་པའི་སེམས་ཅན་བདེ་བར་བྱ་བ་ནི་འཆི་བ་སླར་གསོ་བའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། གསང་བ་ཆེན་པོའི་རྡོ་རྗེའི་ནོར་བུའི་ཕྱག་རྒྱས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་མཐེའུ་ཆུང་གཉིས་ཀྱི་རྒྱབ་བཀུག་ལ་ནོར་བུས་བྱས་པ་འདི་ནི་གསང་བ་ཆེན་པོའི་ནོར་བུའི་ཕྱག་རྒྱའོ། །འདི་བཅིངས་ལ་རྡོ་རྗེ་སེམས་དཔའི་སྦྱོར་བས་མཐེའུ་ཆུང་གཉིས་ཀྱི་ནོར་བུས་དུག་ལ་རེག་པར་བྱས་ལ་དུག་དངོས་པོ་མེད་པའི་ངོ་བོ་ནམ་མཁར་གྱུར་པར་བསམ་པར་བྱའོ། །དེ་ལྟ་བུས་ནི་དུག་ཐམས་ཅད་འཇིག་པར་འགྱུར་རོ། །དེ་བཞིན་དུ་དུག་ལ་རེག་ཅིང་རྡོ་རྗེ་སེམས་དཔའ་སྐུ་མདོག་དཀར་པོ་ཕྲ་རབ་ཏུ་ཡོངས་སུ་གྱུར་པས་དཀར་པོར་གྱུར་པར་བསམས་ལ་དེ་ལྟར་བདུད་རྩིར་བྱས་ནས་དུག་ཐམས་ཅད་བཟའ་བར་བྱའོ། །དེ་བཞིན་དུ་རེག་པར་བྱས་ཤིང་དུག་གིས་ཟིན་པའམ་དུག་གམ་དུག་གིས་ཟིན་པའི་ཤུགས་སམ་དུག་གི་ཤུགས་ཀྱི་འོག་ཏུ་ཡི་གེ་ཧ་ལ་འམ། ཡཾ་ལས་རླུང་གི་དཀྱིལ་འཁོར་དེའི་སྟེང་དུ་ཡི་གེ་རཾ་ལས་མེའི་དཀྱིལ་འཁོར་དེའི་སྟེང་དུ་ཡི་གེ་ཨོཾ་དུས་མཐའི་རླུང་གིས་བསྐྱོད་པའི་བསྐལ་པའི་མེའི་ཕུང་པོ་ལྟ་བུ་དེའི་སྟེང་དུ་དུག་གིས་ཟིན་པའམ་དུག་གནས་པ་མེ་དེས་བུད་ཤིང་སྐམ་པོ་ལྟར་འབར་བར་གྱུར་པར་བསམ་པར་བྱ་སྟེ་དེ་ལྟ་
བུས་ནི་འབབ་པར་འགྱུར་རོ། །དེ་བཞིན་དུ་དུག་གི་ཤུགས་ཀྱིས་ཕོག་ཅིང་ཤི་བ་ལ་རེག་པར་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཟླ་བའི་མདོག་ཅན་གྱིས་དེའི་སྤྱི་བོ་ནས་བརྩམས་ཏེ། རྐང་མཐིལ་གྱི་བར་དུ་དེའི་ཡན་ལག་ཀུན་དུ་གང་ཞིང་རྡོ་རྗེ་སེམས་དཔར་གྱུར་པར་བསམ་པར་བྱའོ། །དེ་ལྟ་བུས་ནི་ཤི་བ་སླར་སོས་པར་འགྱུར་རོ། །དུག་ཐམས་ཅད་དང་སྦྱར་བའི་དུག་བདུད་རྩིར་བྱ་བ་ནི་ཞེས་བྱ་བ་ལ་དུག་ཐམས་ཅད་ནི་སྔར་བཤད་པ་རྣམ་སོ། །སྦྱར་བའི་དུག་ནི་ཡི་དྭགས་ཀྱི་འགྲོ་བས་བསྡུས་པའི་སེམས་ཅན་ལ་གནོད་པར་བྱེད་པའི་སེམས་ཅན་གྱི་སྐྲ་དང༌། སེན་མོ་དང༌། དྲི་མ་ལ་སོགས་པའི་སྦྱོར་བ་བྱས་ནས་སེམས་ཅན་གདུག་པ་རྣམས་ཀྱིས་བཏང་བའོ། །དེ་རྣམ་བདུད་རྩིར་བྱ་བ་ནི་སེམས་ཅན་ལ་ཕན་གདགས་པར་བྱ་བའི་ཕྱིར་གཟུགས་བསྒྱུར་བར་བྱའོ། དེ་ཇི་ལྟར་འགྱུར་ཞེ་ན། རྡོ་རྗེ་གསང་བའི་དུག་མེད་པས་སོ་ཞེས་བྱ་བ་གསུངས་ཏེ་དང་པོའི་རྡོ་རྗེ་བཅིངས་ལ་མཛུབ་མོ་གཉིས་སྦྱར་ཏེ་རྩེ་མོར་བྱས་པའི་མཛུབ་མོ་གཉིས་ཀྱི་རྩེ་མོ་དཔལ་རྡོ་རྗེ་སེམས་དཔའི་ཞབས་ཀྱི་སོར་མོའི་གཟུགས་སུ་ཡིད་ཀྱིས་བསྐྱེད་ལ། དུག་ཐམས་ཅད་དང་སྦྱར་བའི་དུག་གི་སྟེང་དུ་གཞག་སྟེ། དེས་དུག་ཐམས་ཅད་དང་སྦྱར་བའི་དུག་རྡོ་རྗེ་སེམས་དཔའི་ཞབས་ཀྱི་སོར་མོ་དང་རེག་པས་རྡོ་རྗེ་སེམས་དཔའི་བདུད་རྩིའི་ཕྲ་རབ་རྣམས་ཀྱིས་བདུད་རྩིར་གྱུར་པར་བྱའོ། །དེ་ལྟ་བུས་ནི་དུག་ཐམས་ཅད་དང་སྦྱར་བའི་དུག་བདུད་རྩིར་བྱེད་པར་འགྱུར་རོ། །གཤེད་བྱེད་ཐམས་ཅད་ནི་སྔགས་ཀྱི་སྟོབས་ཀྱིས་དགྲ་བོའི་སྲོག་འཕྲོག་པར་བྱ་བའི་ཕྱིར་ཁྲོ་བོའི་ལྷ་བསྐྱེད་པ་གང་གིས་ཕུར་བུའི་ཕྱག་རྒྱ་འམ། སེར་ལྡེང་ལ་སོགས་པའི་ཕུར་བུས་བཏབ་ལ། རོ་ལ་སྔགས་ཀྱི་སྟོབས་སམ་སྨན་གྱི་སྟོབས་ཀྱིས་དགྲ་པོ་གསད་པར་བྱ་བའི་ཕྱིར་ཤི་བའི་རོ་ལ་མཁས་པས་སྲིན་པོ་ལ་སོགས་པ་བཅུག་སྟེ་བྱས་པའམ་ཡང་ན་གཞན་ལ་གནོད་པར་བྱ་བའི་ཕྱིར་རང་ཉིད་ཤི་བའི་ལུས་ལ་སྲིན་པོ་ལ་སོགས་པ་ཞུགས་པ་གང་ཡིན་པའི་རོ་ལངས་དེའོ། །བྱུར་ནི་གོ་བར་ཟད་དོ། །གཤེད་བྱེད་ལ་སོགས་པ་འདི་དག་བཤིག་པ་ནི་རྡོ་རྗེ་གསང་བའི་སྦྱིན་སྲེག་གིས་
འགྱུར་བ་ནི། དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་མདུན་དུ་རྡོ་རྗེ་སེམས་དཔའ་སྤྱན་དྲངས་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བྱས་ཏེ། འབར་བའི་ཕྲེང་བ་ཀུན་དུ་འཁྲིགས་པའི་ཡེ་ཤེས་ཀྱི་མེ་ཐབ་ཀྱི་དབུས་ན་བཞུགས་པའི་དྲག་པོ་ཆེན་པོས་གཤེད་བྱེད་ལ་སོགས་པ་ཟ་བར་སྤྱོད་པ་དེར་བསམས་ལ་དང་པོའི་རྡོ་རྗེ་བཅིངས་ཏེ་མཛུབ་མོ་གཉིས་སྦྱར་བས་གཤེད་བྱེད་ལ་སོགས་པ་བླངས་ཏེ་དགང་བླུགས་ལ་སོགས་པ་དེ་ལྟར་དེའི་ཞལ་དུ་འབབ་པར་བསམ་མོ། །དེ་ལྟར་ན་གཤེད་བྱེད་ལ་སོགས་པ་རྣམ་པར་འཇིག་པར་འགྱུར་རོ། །རྩོད་པ་ཐམས་ཅད་ཅེས་བྱ་བ་ལ་སོགས་པ་ལ་མི་དགེ་བ་བཅུའི་ལས་ཀྱི་ལམ་ཆེན་པོ་ཀུན་དུ་སྤྱོད་པ་ནི་རྩོད་པ་ཐམས་ཅད་དོ། །ཞེ་སྡང་གིས་ཟིལ་གྱིས་གནོན་པ་རྣམས་ཕན་ཚུན་གཅིག་ལ་གཅིག་མི་སྙན་པར་བརྗོད་པ་ནི་འཐབ་པའོ། །འཐབ་མོ་ནི་གྲགས་པ་ཉིད་དོ། །རྩོད་པའི་དབང་དུ་བྱེད་པ་ལ་བརྩོན་པ་རྣམས་ཀྱིས་ཁྱེད་ཀྱི་ནི་མི་རིགས་སོ། །ངའི་རིགས་ཏེ་ངའི་འདི་ནི་ཆོས་གསལ་བར་བྱེད་པའི་ཚིག་ཡིན་ནོ་ཞེས་འགལ་བར་སྨྲ་བ་ནི་རྩོད་པའོ། །འདི་དག་གཞིག་པར་ཇི་ལྟར་འགྱུར་ཞེ་ན། རྡོ་རྗེ་གསང་བའི་ཞལ་རབ་ཏུ་གདངས་པས་སོ་ཞེས་བྱ་བ་གསུངས་ཏེ། རྡོ་རྗེ་གསང་བ་སྟེ་རྡོ་རྗེ་སེམས་དཔའི་ཞལ་གདངས་པ་ནི་རྡོ་རྗེ་གསང་བའི་ཞལ་གདངས་པའི་ཕྱག་རྒྱ་སྟེ་དེས་དེ་རྣམས་འཇིག་པར་འགྱུར་བའོ། །དེ་ཡང་ལྔ་པོ་བསྡུས་པ་བཅིངས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ལ་དེ་ཉིད་ཁར་དགྲོལ་བ་འདི་ནི་རྡོ་རྗེ་གསང་བའི་ཞལ་གདངས་པའོ། །འདི་སྐད་སྟོན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་གསང་བའི་ཞལ་གདངས་པ་བཅིངས་ཏེ་བསྒྲུབ་པར་བྱ་བ་དང༌། ཡིད་ཀྱིས་གཅིག་ཏུ་གྱུར་པར་བྱས་ལ་ཕྱག་རྒྱ་རང་གི་སྙིང་གར་དགྲོལ་ཏེ། བཅོམ་ལྡན་འདས་རྡོ་རྗེ་སེམས་དཔའ་རྩོད་པ་དང་འཐབ་མོ་ལ་སོགས་པ་འཇིག་པར་མཛད་པའི་བསམ་པས་བསྒྲུབ་པར་བྱ་བའི་ཁར་བཅུག་ནས་བཅོམ་ལྡན་འདས་དེ་ཞུགས་པས་བསྒྲུབ་པར་བྱ་བ་ཀུན་དུ་བཟང་པོར་གྱུར་ནས་རྩོད་པ་དང་འཐབ་མོ་ལ་སོགས་པ་དང་བྲལ་བར་བསམ་པར་བྱའོ། །ཡམས་དང་འཚེ་བ་ཐམས་ཅད་ཅེས་བྱ་བ་ལ་སོགས་པ་ལ་སེམས་
ཅན་རྣམས་ཀྱི་ལུད་པ་དང་དབུགས་མི་བདེ་བ་དང༌། རིམས་ལ་སོགས་པའི་སྡུག་བསྔལ་སྐྱེད་པར་བྱེད་པའི་བདུད་ཀྱི་ཕྱོགས་ཀྱི་དཔུང་དུ་གྱུར་པའི་ལྷ་རྣམས་ནི་ཡ་མས་ཐམས་ཅད་དོ། །སྲིན་པོ་ལ་སོགས་པ་ནས་ཡུལ་ཉེ་བར་གཙེས་པ་ནི་འཚེ་བ་ཐམས་ཅད་དོ། །ཁྱབ་འཇུག་དང་འཚོལ་བའི་རྒྱུད་ཀྱི་དོན་ཉམས་སུ་ལེན་པ་ནི་སྡིག་པའོ། །རྨི་ལམ་ངན་པ་ནི་རྒྱུད་དེ་དང་དེ་ལས་ཤེས་པར་བྱའོ། །འདི་རྣམས་གཞིག་པར་ཇི་ལྟར་འགྱུར་ཞེ་ན། རྡོ་རྗེ་གསང་བའི་གཞིག་པས་སོ་ཞེས་བྱ་བ་གསུངས་ཏེ་རྡོ་རྗེ་གསང་བ་ནི་རྡོ་རྗེ་སེམས་དཔའ་སྟེ་དེའི་ཞི་བ་ནི་རྡོ་རྗེ་གསང་བའི་ཞི་བའི་ཕྱག་རྒྱའོ། །འདིས་ནི་འདི་སྐད་སྟོན་ཏེ། བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་ཇི་ལྟ་བ་བཞིན་དུ་བྱས་ལ། མདུན་དུ་བཅོམ་ལྡན་འདས་སྤྱན་དྲངས་ལ་མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ནས། ཕྱག་བྱས་ནས་ཡེ་ཤེས་ཀྱི་མེ་འབར་བའི་ཕྲེང་བ་འཁྲུག་པར་ཞུགས་ཞལ་གྱི་མཆེ་བ་གཙིགས་པ། ཡམས་ལ་སོགས་པ་ཐམས་ཅད་བཟློག་པར་མཛད་པ་ལ་བརྩམས་པ་བདག་ཉིད་ཀྱང་དྲག་པོ་ཆེན་པོར་བསམས་ཏེ། ལྔ་པོ་བསྡུས་པ་བཅིངས་ཏེ་མཛུབ་མོ་གཉིས་ཀྱི་ལྕགས་ཀྱུས་ཡམས་ལ་སོགས་པ་བཀུག་སྟེ། བཅོམ་ལྡན་འདས་ཀྱི་ཞལ་དུ་དགང་བླུགས་དབུལ་བའི་ཚུལ་དུ་བསྟབ་པར་བྱའོ། །དེ་ལྟར་ན་ཡམས་ལ་སོགས་པ་རྣམ་པར་འཇིག་པར་འགྱུར་རོ། །གཞན་གྱི་དཔུང་ཐམས་ཅད་རེངས་པར་བྱ་བ་དང་ཉིད་ལོག་པར་བྱ་བ་དང༌། རྨོངས་པར་བྱ་བ་དང༌། ལྐུགས་པར་བྱེད་པ་དང༌། རྒྱས་བཏབ་པ་དང་བསད་པ་ལ་ནི་ཞེས་བྱ་བ་ནི་བཤད་ཟིན་ཏོ། །དེ་དག་ཐམས་ཅད་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་དམ་ཚིག་གི་གསང་བའི་གཤེད་བྱེད་ཀྱིས་སོ་ཞེས་བྱ་བ་གསུངས་ཏེ། བདེ་བ་ཆེན་པོ་རྡོ་རྗེ་དམ་ཚིག་གི་གསང་བ་ནི་རྡོ་རྗེ་སེམས་དཔའ་སྟེ། དེའི་གཤེད་བྱེད་སྐྱེད་པར་བྱེད་པའི་ཕྱག་རྒྱ་སྟེ། དེས་དེ་ཐམས་ཅད་ངེས་པར་འགྱུར་རོ། །འདིས་ནི་དོན་འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་སྔ་མ་བཞིན་དུ་བྱས་ལ་བཤད་མ་ཐག་པའི་ལྕགས་ཀྱུ་གཉིས་བཅིངས་ལ་བདག་ཉིད་རྡོ་རྗེ་སེམས་
དཔའ་དྲག་པོ་ཆེན་པོར་བསམས་ལ། མཐེའུ་ཆུང་གཉིས་རང་གི་གནས་སུ་བཅུག་ལ་ལྕགས་ཀྱུའི་ཕྱག་རྒྱས་དྲལ་ནས། རང་གི་ལུས་ལས་ཀྱང་གཤེད་བྱེད་དྲག་པོའི་གཟུགས་ཅན་རྣམས་ཕྱུང་ལ་དེས་གཞན་གྱི་དཔུང་མནན་པར་བསམ་པར་བྱའོ། །དེ་ལྟ་བུས་ནི་གཞན་གྱི་དམག་ཚོགས་རེངས་པར་འགྱུར་རོ། །དེ་ཉིད་དབྱེ་བ་མཐའ་ཡས་པའི་གཟུགས་ཅན་སྤྲོས་ལ། གཞན་གྱི་དམག་ཚོགས་ཀྱི་སེམས་ཅན་རེ་རེའི་ལུས་སུ་བཅུག་སྟེ་མིག་བཙུམས་ན་དེ་ལྟ་བུས་ནི་གཞན་གྱི་དཔུང་གཉིད་ལོག་པར་བྱས་པར་འགྱུར་རོ། །དེ་ཉིད་སྤྲོས་ལ་གཞན་གྱི་དཔུང་གི་སེམས་ཅན་རྣམས་ཀྱི་ལུས་རྣམས་ལ་བཅུག་ན་བདག་ཉིད་ཀྱི་ལུས་ཀྱི་ཡན་ལག་ཐམས་ཅད་ལྷོད་པར་གྱུར་པས་བསམ་པར་བྱ་སྟེ། དེ་ལྟ་བུས་དེ་ནི་རྨོངས་པར་བྱས་པར་འགྱུར་རོ། །དེ་བཞིན་དུ་དེ་བཅུག་ལ་གཞན་གྱི་དཔུང་གི་ཚིག་ཕྲོགས་པར་གྱུར་པར་བསམས་ན་ལྐུགས་པར་བྱས་པར་འགྱུར་རོ། །དེ་བཞིན་དུ་དེ་བཅུག་ལ་དེས་གཞན་གྱི་དཔུང་རྒྱས་བཏབ་པར་བསམས་ན་དེ་ལྟ་བུས་ནི་རྒྱས་བཏབ་པར་འགྱུར་རོ། །དེ་བཞིན་དུ་དེ་སྤྲོས་ལ་གཞན་གྱི་དཔུང་ཟ་བར་མཛད་པར་བསམས་ན་དེ་ལྟ་བུས་ནི་གསོད་པར་འགྱུར་རོ། །འཐབ་པ་ཐམས་ཅད་ལས་རྒྱལ་བ་ཐོབ་བ་ལ་ནི་རྡོ་རྗེ་གསང་བའི་རྒྱལ་མཚན་གྱི་རྩེ་མོས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་སྲིན་པོ་ལ་སོགས་པ་དང་འཐབ་པའི་ནང་དུ་ཞུགས་པ་ན་ལྔ་པོ་བསྡུས་པ་བཅིངས་ལ་མཛུབ་མོ་གཉིས་ལྕགས་ཀྱུར་བྱས་ཏེ། སྲིན་ལག་གཉིས་གཞིབས་ཏེ་རྩེ་མོ་སྦྱར་ནས་མཐེའུ་ཆུང་གཉིས་གཤིབས་པ་ཕྱེ་སྟེ་སྟེང་དུ་བཞག་ལ་གཟུང་བར་བྱ་ཞིང་རང་གི་ལུས་ལས་ཀྱང་དཔུང་གི་ཚོགས་ཡན་ལག་བཞི་ཕྱུང་ལ་དེས་གཞན་གྱི་དཔུང་བཅོམ་པ་དང་བརླག་པར་བྱེད་པར་བསམ་པར་བྱ་སྟེ། དེ་ལྟ་བུས་ནི་འཐབ་པ་ཐམས་ཅད་ལས་རྒྱལ་བ་ཐོབ་པར་འགྱུར་རོ། །གདུག་པ་ཐམས་ཅད་འཇིག་པ་ནི་རྡོ་རྗེ་གསང་བའི་རྡོ་རྗེ་ལེགས་པའི་གསང་བས་སོ་ཞེས་བྱ་བ་ལ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་མི་ལ་སོགས་པའི་གཙེ་བ་དང་ཕྲད་ན་རྡོ་རྗེ་བསྡམས་པ་བཅིངས་ལ། མཛུབ་མོ་
དང་མཐེ་བོས་ལེགས་སོ་ལེགས་སོ་ཞེས་བྱ་བ་སྦྱིན་པའི་ཚུལ་དུ་ཡང་དང་ཡང་དུ་བྱས་ལ། རང་གི་ལུས་ལས་བྱུང་བ་དང༌། རྡོ་རྗེ་ལེགས་པའི་སྐུ་ལ་ལེགས་སོ་ཞེས་བྱ་བའི་སྒྲ་བརྗོད་བ་ལ་བརྩོན་པས་མི་ལ་སོགས་པའི་གདུག་པ་བཅོམ་པར་གྱུར་པར་བསམ་པར་བྱའོ། །དེ་ལྟ་བུས་ནི་གདུག་པ་ཐམས་ཅད་འཇིག་པར་འགྱུར་རོ། །བགེགས་ཐམས་ཅད་ཞི་བར་བྱ་བ་ལ་ནི་རྡོ་རྗེ་གསང་བའི་བདུད་རྩི་ཐབ་སྦྱོར་གྱིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བདག་ཉིད་བདུད་རྩི་ཐབ་སྦྱོར་གྱི་གཟུགས་སུ་བསམས་ལ། དེའི་ཕྱག་རྒྱ་བཅིངས་ཏེ་བདུད་རྩི་ཐབ་སྦྱོར་སྐུ་མདོག་ནག་པོ་ཞལ་གྱི་མཆེ་བ་གཙིགས་པ། ཕྱག་གཡས་ན་རྡོ་རྗེ་དང་རལ་གྲི་དང་དགྲ་སྟ་བསྣམས་པ། ཕྱག་གཡོན་གཅིག་གིས་སྡིགས་མཛུབ་བྱེད་པ་ལ་བརྩོན་པ། གཉིས་པས་གཏུན་ཤིང་བསྣམས་པ། གསུམ་པས་ཞགས་པ་བསྣམས་པ། གཡོན་བརྐྱང་བས་བཞུགས་པ། དྲག་པོ་ཆེན་པོ་རྒྱན་ཐམས་ཅད་ཀྱིས་བརྒྱན་པར་བསམ་མོ། །དེ་ནས་རང་གི་ལུས་ལས་བདུད་རྩི་ཐབ་སྦྱོར་གྱི་གཟུགས་དཔག་ཏུ་མེད་པ་སྤྲོས་ལ་དེས་བགེགས་ཐམས་ཅད་གཞོམ་པར་བྱའོ། །དེ་ལ་འདིའི་ཕྱག་རྒྱ་ནི་རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་དང་མཐེ་བོ་གཉིས་ཅུང་ཟད་ཕྱེ་སྟེ་ཅུང་ཟད་བཀུག་ལ། མཛུབ་མོ་གཉིས་མཆེ་བ་ལྟར་ཁར་གཞག་པར་བྱའོ། །འདི་ནི་འཕགས་པ་བདུད་རྩི་ཐབ་སྦྱོར་གྱི་ཕྱག་རྒྱའོ། །དགྲ་བོ་ཐམས་ཅད་རྣམ་པར་གཞིག་པ་ལ་ནི་རྡོ་རྗེ་གསང་བའི་རྣམ་པར་འཐོར་བས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། བདག་ཉིད་རྡོ་རྗེ་སེམས་དཔའ་ནག་པོ་ཆེན་པོར་རྣམ་པར་བསམས་ལ་ལྷ་དང་མི་ལ་སོགས་པའི་དགྲ་བོ་ཐམས་ཅད་རྣམ་པར་གཞོམ་པའི་དོན་དུ་བཞུགས་པར་དམིགས་ལ་རྡོ་རྗེ་རྣམ་པར་འཐོར་བའི་ཕྱག་རྒྱ་བཅིངས་ལ། རང་གི་ལུས་ལ་རྡོ་རྗེ་གནོད་སྦྱིན་དང་སྲིན་པོ་དང་རོ་ལངས་རྣམས་ཕྱུང་སྟེ། དེས་དེ་རྣམས་རྣམ་པར་གཞིག་པར་བྱའོ། །དེ་ལ་ཕྱག་རྒྱ་ནི་འདི་ཡིན་ཏེ་དགྲ་བོ་རྣམ་པར་གཞིག་པའི་བསམ་པས་རྡོ་རྗེ་བསྡམས་པ་བཅིངས་ལ་
བསྐོར་ཏེ་དྲལ་བར་བྱའོ། །བདུད་ཀྱི་སྟོབས་ཐམས་ཅད་གཞོམ་པ་ལ་ནི་རྡོ་རྗེ་གསང་བའི་རབ་ཏུ་འདུལ་བས་སོ་ཞེས་བྱ་བ་ལ་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། བདག་ཉིད་དེ་བཞིན་གཤེགས་པ་མི་བསྐྱོད་པར་བསམས་ལ། རང་གི་སྙིང་གར་སེམས་མ་རྡོ་རྗེ་མ་དེ་ལས་རྡོ་རྗེ་བསྡམས་པ་བཅིངས་ལ་རྡོ་རྗེ་བསྡམས་པ་བརྐྱང་བའི་ལག་མཐིལ་ས་ལ་རེག་པར་བྱས་ལ། རང་གི་ལུས་ལ་རྡོ་རྗེ་སེམས་དཔའ་ལ་སོགས་པ་ཁྲོ་བོ་རྣམས་སྤྲོས་པ་དེས་བདུད་ཀྱི་སྡེ་ཐམས་ཅད་གཞོམ་པར་བྱའོ། །སྤྲིན་བསྐྱེད་པ་ལ་ནི་རྡོ་རྗེ་གསང་བའི་སྤྲིན་ཆེན་པོས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། མདུན་དུ་ཡཾ་ལས་རླུང་གི་དཀྱིལ་འཁོར་དེའི་སྟེང་དུ་བཾ་ལས་ཆུའི་དཀྱིལ་འཁོར་བསམས་ལ། དང་པོའི་རྡོ་རྗེ་བཅིངས་ལ་རང་གི་ལུས་ལས་རྡོ་རྗེ་ཀླུ་སྤྲོས་ཏེ་དང་པོའི་རྡོ་རྗེ་སྤྲིན་བསྐྱེད་པའི་ཚུལ་དུ་བྱས་ལ། དེས་ཀྱང་རྡོ་རྗེ་ཀླུ་ཡིས་རླུང་དང་ཆུའི་དཀྱིལ་འཁོར་བསམས་པ་ཙམ་གྱིས་བཏེག་པར་འགྱུར་བར་བསམ་པར་བྱ་སྟེ། དེ་ལྟ་བུས་ནི་སྤྲིན་བསྐྱེད་པར་འགྱུར་རོ། །ཆར་དབབ་པ་ལ་ནི་རྡོ་རྗེ་གསང་བའི་སྤྲིན་གྱིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་སྔར་བཤད་པའི་ཚུལ་གྱིས་སྤྲིན་བསྐྱེད་ནས་དང་པོའི་རྡོ་རྗེ་བཅིངས་པ་ལ་མཛུབ་མོ་གཉིས་གཞིབས་ཏེ་རྩེ་མོར་བྱས་ལ་རྩེ་མོར་དེས་ཆར་གྱི་རྒྱུན་འབབ་པའི་ཚུལ་དུ་བྱས་ལ། དེས་ཀྱང་རྡོ་རྗེ་ཀླུ་ནམ་མཁའི་ངོས་ཐམས་ཅད་བཀང་ལ་ཆར་གྱི་རྒྱུན་འབེབས་པར་བྱེད་པར་བསམ་པར་བྱའོ། །དེ་ལྟ་བུས་ནི་ཆར་འབབ་པར་འགྱུར་རོ། །ཐོག་འབབ་པ་དང། གློག་དང་རླུང་དང་ཆར་ཞི་པར་བྱ་བ་ལ་ནི་རྡོ་རྗེ་གསང་བའི་སྲིད་སྲུང་གིས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ་མཛུབ་མོ་གཉིས་གཤིབས་ལ་རྩེ་མོ་སྦྱར་ཏེ་རྩེ་མོ་དེ་ལ་རཾ་ལས་མེའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་བསམས་ལ། རྩེ་མོ་དེས་ཐོག་དབབ་པ་དང་གློག་དང་རླུང་དང་ཆར་སྡིགས་མཛུབ་བྱ་ཞིང་ཡི་གེ་ཧཱུཾ་དེ་ལས་རྡོ་རྗེ་འབར་བ་རྣམས་སྤྲོས་ལ་ངེས་ཐོག་འབེབས་པ་ལ་སོགས་པ་ཐལ་བར་བྱས་པར་བསམ་པར་བྱའོ། །དེ་ལྟ་བུས་ནི་ཐོག་དབབ་པ་ལ་སོགས་པ་ཞི་བར་འགྱུར་རོ། །སྤྲིན་དང་
མུན་པ་དང་ཁུག་རྣ་ཞི་བར་བྱ་བ་ལ་ནི་རྡོ་རྗེ་གསང་བའི་བདེ་བ་ཆེན་པོའི་སྤྱན་གྱིས་སོ་ཞེས་བྱ་བ་ནི། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེ་སྤྲིན་ལ་སོགས་པ་གསལ་བའི་ཚུལ་གྱིས་རྡོ་རྗེའི་བལྟ་བས་བལྟ་བར་བྱའོ། །དེ་ལྟ་བུས་ནི་སྤྲིན་དང་མུན་པ་དང་ཁུག་རྣ་ཞི་བར་འགྱུར་རོ། །ཀླུ་ཐམས་ཅད་དགུག་པ་ལ་ནི་རྡོ་རྗེ་གསང་བའི་ཕྱག་རྒྱས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། ལྔ་པོ་བསྡུས་པ་བཅིངས་ཏེ་མཛུབ་མོ་གཉིས་ལྕགས་ཀྱུར་བྱས་ནས་ཀླུ་ཐམས་ཅད་དགུག་པར་བྱའོ། །བཅོམ་ལྡན་འདས་རྡོ་རྗེ་ལྕགས་ཀྱུས་ཀྱང་ཀླུ་དབྲལ་བའི་ཕྱོགས་སུ་ལྕགས་ཀྱུས་ཕུལ་ལ་བཀུག་པར་གྱུར་པར་བསམ་པར་བྱའོ། །དེ་ལྟ་བུས་ནི་ཀླུ་ཐམས་ཅད་འགུགས་པར་འགྱུར་རོ། །ཀླུ་ཐམས་ཅད་དབང་དུ་བྱ་བ་ལ་ནི་གསང་བ་ཐམས་ཅད་ཀྱི་ནོར་བུའི་ཕྱག་རྒྱས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཤད་མ་ཐག་པའི་ལྕགས་ཀྱུས་བཅིངས་ལ། དེས་ཀླུ་བཀུག་སྟེ་མདུན་དུ་བཞག་ལ་མཛུབ་མོ་གཡས་པའི་རྒྱབ་བཀུག་པའི་ཚུལ་གྱིས་ནོར་བུར་བྱས་ལ་བདག་ཉིད་རྡོ་རྗེ་ཀླུར་བསམས་ལ་བཀུག་པའི་ཀླུ་ལ་ཕྱག་རྒྱ་བསྟན་པར་བྱའོ། །དེ་ལྟར་ན་ཀླུ་ཐམས་ཅད་དབང་དུ་བྱ་བར་འགྱུར་རོ། །ཀླུ་ཐམས་ཅད་རྗེས་སུ་འབྲང་བར་བྱ་བ་ལ་ནི་རྡོ་རྗེ་གསང་བའི་ཀླུ་འདུལ་བས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བས་ལྔ་པོ་བསྡུས་པ་བཅིངས་ལ་དེ་བཞིན་དུ་མཛུབ་མོ་གཉིས་ལྕགས་ཀྱུར་བྱས་ཏེ་མཐེའུ་ཆུང་གཉིས་གཞིབས་ལ་རྩེ་མོར་བྱས་ལ་རྩེ་མོ་དགུས་མེའི་དཀྱིལ་འཁོར་གྱི་སྟེང་དུ་ཡི་གེ་ཧཾ་བཀོད་ལ་ཀླུ་ལ་སྡིགས་མཛུབ་བྱའོ། །དེ་ལྟ་བུས་ནི་དེ་རྗེས་སུ་འབྲང་བར་འགྱུར་རོ། །ཀླུ་ཐམས་ཅད་འབྱིན་པ་ལ་ནི་རྡོ་རྗེ་གསང་བའི་ཀླུ་གདོན་པས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ཏེ་ལྕགས་ཀྱུ་གཉིས་པོ་དེ་ཀླུ་གནས་དང་བཅས་པར་ས་འོག་ནས་བསྒུལ་བར་བྱའོ། །དེ་ལྟ་བུས་ནི་ཀླུ་ཐམས་ཅད་འབྱིན་པར་འགྱུར་རོ། །ས་མ་ལུས་པར་གཡོ་ཞིང་འགུལ་བ་ལ་ནི་རྡོ་རྗེ་གསང་བའི་ཐར་བས་སོ་ཞེས་བྱ་བ་ལས་མ་ལུས་བ་རྣམས་
གྱི་གཡོ་བ་ནི་ས་མ་ལུས་པ་གཡོས་པ་སྟེ། ས་ཐམས་ཅད་བསྐྱོད་པའོ། །དེ་ཉིད་ནི་འགུལ་བ་ཡིན་ནོ། །དེ་ནི་རྡོ་རྗེ་གསང་བའི་ཐར་པའི་ཕྱག་རྒྱར་འགྱུར་རོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེས་ས་བཟུང་ནས་བསྐུལ་ཞིང་བཅོམ་ལྡན་འདས་རྡོ་རྗེ་སེམས་དཔའི་ཞབས་གཉིས་ཀྱིས་བཙིར་བ་ན་པདྨའི་འདབ་མ་བཞིན་དུ་གཡོ་བར་གྱུར་བར་བསམ་པར་བྱ་སྟེ། དེ་ལྟ་བུས་ནི་ས་ཐམས་ཅད་གཡོ་ཞིང་འགུལ་བར་འགྱུར་རོ། །ཆུ་མེད་པར་ཆུའི་ཕུང་པོ་ཤས་ཆེར་བསིལ་ཞིང་དྲི་མ་མེད་པ་བསྐྱེད་པ་ལ་ནི་བདེ་པ་ཆེན་པོ་རྡོ་རྗེ་ཀླུའི་ཕྱག་རྒྱས་སོ་ཞེས་བྱ་བ་ལ། རྡོ་རྗེ་ཆགས་པའི་གཟུགས་འཛིན་པའི་སེམས་དཔའ་ནི་བདེ་བ་ཆེན་པོ་ཀླུའི་རྒྱལ་པོའོ། །དེའི་ཕྱག་རྒྱ་ནི་དེ་སྟོན་པར་བྱེད་པའི་ཕྱག་རྒྱ་སྟེ། དེས་ཆུའི་ཕུང་པོ་འབྱུང་བར་འགྱུར་རོ། །འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ནས་མཛུབ་མོ་གཉིས་ཀྱིས་ཀླུའི་གདེངས་ཀ་གཉིས་ཀྱི་ཚུལ་དུ་བསྟན་ལ་རྡོ་རྗེ་ཀླུའི་རྒྱལ་པོའི་གཟུགས་སུ་བདག་ཉིད་བསམས་ནས་ཆུ་མེད་པའི་ས་ཕྱོགས་སུ་འོག་གི་ཆའི་ཀླུའི་གནས་ནས་རེ་ལ་སོགས་པ་ཕུག་སྟེ། ཡིད་ཀྱིས་བཏེག་ལ་ཕུག་པ་དེ་ལ་ཆུ་བོ་དཔག་ཏུ་མེད་པའི་རྒྱུན་རྒྱ་མཚོ་ཆེན་པོར་འབབ་པར་གྱུར་པར་བསམ་བར་བྱ་སྟེ། དེ་ལྟ་བུས་ཆུའི་ཕུང་པོ་ཆེན་པོ་འབྱུང་བར་འགྱུར་རོ། །མུན་པ་ཆེན་པོར་སྣང་བ་བསྐྱེད་པ་ལ་ནི་རྡོ་རྗེ་ཉི་མའི་ཕྱག་རྒྱས་སོ་ཞེས་བྱ་བ་ནི་དེ་བཞིན་དུ་དང་པོའི་རྡོ་རྗེའི་ཕྱག་རྒྱ་བཅིངས་ལ་མཐེའུ་ཆུང་དང་མཐེ་བོ་གཉིས་ཀྱིས་རྩེ་མོ་གཉིས་ཉི་མའི་འོད་ཟེར་གཏོང་པའི་ཚུལ་དུ་བསྟན་ལ་བདག་ཉིད་བྱང་ཆུབ་སེམས་དཔའ་རྡོ་རྗེ་ཉི་མར་བསམ་པར་བྱ་སྟེ། དེ་ལྟ་བུས་ནི་མུན་པར་ཉི་མའི་སྣང་བ་ཆེན་པོ་འབྱུང་བར་འགྱུར་རོ། །རླུང་ཐམས་ཅད་དབང་དུ་བྱ་བ་ལ་ནི། རྡོ་རྗེ་རླུང་ཐམས་ཅད་ཀྱིས་སོ་ཞེས་བྱ་བ་ནི་སྔ་མ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ། མཛུབ་མོ་གཉིས་གཞིབས་ལ་དེའི་རྩེ་མོས་རླུང་དབང་དུ་བྱ་ཞིང་རླུང་བསྐྱེད་པའི་ཚུལ་གྱིས་བདག་ཉིད་རྡོ་རྗེ་རླུང་དུ་བསམས་ལ་རླུང་
ཐམས་ཅད་རང་དབང་དུ་བྱའོ། །ནམ་མཁའ་ལ་གཟུགས་ཐམས་ཅད་ཀུན་དུ་སྟོན་པ་ལ་ནི་རྡོ་རྗེ་གསང་བའི་འཛིན་པས་སོ་ཞེས་བྱ་བ་ལ། རྡོ་རྗེ་གསང་བའི་འཛིན་པ་ནི་མེ་ལོང་གི་ཕྱག་རྒྱས་ཐམས་ཅད་གཟུགས་བརྙན་དང་འདྲ་བར་བསྒོམས་པས་དངོས་པོ་ཐམས་ཅད་བསྐྱེད་པའོ། །དེའི་མཚན་ཉིད་ནི་འདི་ཡིན་ཏེ་ལྔ་པོ་བསྡུས་པ་བཅིངས་ལ་མཛུབ་མོ་གཉིས་ལྕགས་ཀྱུར་བྱས་ཏེ་མཛུབ་མོ་གཉིས་ཀྱི་ངོས་མེ་ལོང་གི་དཀྱིལ་འཁོར་བསྟན་པའི་ཚུལ་གྱིས་གཟུང་བར་བྱ་སྟེ། འདི་ནི་རྡོ་རྗེ་གསང་བའི་འཛིན་པའོ། །འདིས་བཅིངས་ལ་བདག་ཉིད་རྡོ་རྗེ་སེམས་དཔའ་དངོས་པོ་ཐམས་ཅད་ཀྱི་བདག་ཉིད་ཅན་དུ་བསམས་ལ། ཆོས་ཐམས་ཅད་གཟུགས་བརྙན་དང་འདྲ་བར་བསྒོམས་ནས་ནམ་མཁའ་ལ་གཟུགས་བརྙན་ཐམས་ཅད་བསྟན་པར་བྱའོ། །ནམ་མཁའ་ལས་དངོས་པོ་ཐམས་ཅད་འབྱུང་བར་བྱ་བ་ལ་ནི་རྡོ་རྗེ་གསང་བ་འབྱུང་བས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་ལྔ་པོ་བསྡུ་བ་བཅིངས་ཏེ་མཛུབ་མོ་གཉིས་ལྕགས་ཀྱུ་གཉིས་སུ་བྱས་ལ་ལྕགས་ཀྱུ་དེ་ནམ་མཁའ་ལ་དངོས་པོ་ཐམས་ཅད་བསྐྱེད་པའི་ཚུལ་དུ་བྱའོ། །དེ་ཉིད་ནི་དེའི་འོག་ནས་སྟོན་པས་འཆད་དེ། རོལ་པ་ལ་ནི་རབ་ཏུ་དགའ་བའི་རྡོ་རྗེས་སོ་ཞེས་སྟོན་པས་འཆད་དེ་རབ་ཏུ་དགའ་བའི་རྡོ་རྗེས་ནམ་མཁའ་ལས་དངོས་པོ་ཐམས་ཅད་བསྐྱེད་པའི་ཚུལ་གྱིས་དངོས་པོ་ཐམས་ཅད་བསྐྱེད་ཅིང་བསྒྲུབ་པར་བྱའོ་ཞེས་སྟོན་པ་ཡིན་ནོ། །ནམ་མཁའ་ལས་རང་གི་མཚན་ཉིད་བསྟན་པར་བྱ་བ་ལ་ནི། རྡོ་རྗེ་གསང་བའི་རྫུ་འཕྲུལ་གྱིས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བཤད་མ་ཐག་པའི་ལྕགས་ཀྱུ་གཉིས་བཅིངས་ནས། ནམ་མཁའི་ཕྱོགས་སུ་ཡཾ་ལས་རླུང་གི་དཀྱིལ་འཁོར། དེའི་སྟེང་དུ་ལཾ་ལས་དབང་ཆེན་གྱི་དཀྱིལ་འཁོར། །དེའི་སྟེང་དུ་རྡོ་རྗེའི་བལྟ་བས་བལྟ་ཞིང་བདག་ཉིད་དཔལ་རྡོ་རྗེ་སེམས་དཔའི་ངོ་བོར་སྟོན་པའི་ཕྱིར་བདག་ཉིད་ཀྱི་ངོ་བོ་དེ་ལྟར་བསམས་ན་དེ་ལྟ་བུས་ནི་ནམ་མཁའ་ལ་རང་གི་ངོ་བོ་སྟོན་པར་འགྱུར་རོ། །ནམ་མཁའ་ལ་དེ་བཞིན་གཤེགས་པ་དང་རྡོ་རྗེ་འཛིན་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་དང༌། འཇིག་
རྟེན་གྱི་ཁམས་ཐམས་ཅད་ལ་རྡོ་རྗེ་གསང་བའི་རྣམ་པར་འཕྲུལ་པས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཤད་མ་ཐག་པའི་ལྕགས་ཀྱུ་གཉིས་བཅིངས་ཏེ། སྟེང་ནམ་མཁའ་ལ་བསྐོར་བར་བྱ་ཞིང་དེ་བཞིན་གཤེགས་པ་དང་རྡོ་རྗེ་འཛིན་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་དང༌། འཇིག་རྟེན་དང་འཇིག་རྟེན་གྱི་ཁམས་ཐམས་ཅད་གཟུགས་བརྙན་གྱི་ཚུལ་དུ་བསྒོམས་པས་ནམ་མཁའ་ལ་བསམས་ན་དེ་ལྟ་བུས་ནི་དེ་ཐམས་ཅད་སྟོན་པར་གྱུར་རོ། །ནམ་མཁར་ཤིང་ཐམས་ཅད་ལ་ལོ་མ་དང་མེ་ཏོག་དང་འབྲས་བུ་ཐམས་ཅད་འབྱུང་བ་ལ་ནི་རྡོ་རྗེ་གསང་བའི་དུས་ཀྱི་ཕྱག་རྒྱས་སོ་ཞེས་བྱ་བས་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བཅོམ་ལྡན་འདས་རྡོ་རྗེ་ཡིད་ལས་བྱུང་བའི་རྡོ་རྗེའི་ཕྱག་རྒྱ་བཅིངས་ལ་བདག་ཉིད་རྡོ་རྗེ་ཡིད་ལས་བྱུང་བར་བསམས་ལ། ནམ་མཁའ་ལ་ལོ་མ་དང་མེ་ཏོག་དང་འབྲས་བུ་བསྐྱེད་པའི་བསམ་པས་ཕྱག་རྒྱ་དེ་ཤིང་ཐམས་ཅད་དང༌། ལྗོན་ཤིང་ཐམས་ཅད་དང༌། ནགས་དང་འབྲུ་ཐམས་ཅད་ལ་གཞག་པར་བྱའོ། །དེ་ལྟ་བུས་ནི་དེ་རྣམས་པ་སྐྱེ་པར་འགྱུར་རོ། །སའི་ཆ་ཐམས་ཅད་ལས་འབྲུ་ཐམས་ཅད་སྨིན་པར་འབྱུང་བ་ནི་རྡོ་རྗེ་གསང་པ་སྟེ། རྡོ་རྗེ་སེམས་དཔའི་གཤོལ་གྱི་ཕྱག་རྒྱས་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ཏེ། རྡོ་རྗེ་ཡིད་ལས་བྱུང་བར་བདག་ཉིད་བསམས་ལ་ཕྱག་རྒྱ་དེས་ལྕགས་རྣོན་པོ་དང་བཅས་པའི་གཤོལ་བྱིན་གྱིས་བརླབས་ལ་དེས་ཁང་ཞིང་ལས་བྱས་ཏེ། དེ་ལྟ་བུས་ནི་སའི་ཆ་ཐམས་ཅད་ལས་འབྲུ་ཐམས་ཅད་སྨིན་པར་འབྱུང་བར་འགྱུར་རོ། །ཐམས་ཅད་ལས་ལྷའི་ཁ་ཟས་དང་བཏུང་བ་དང་གོས་དང་རྒྱན་དང་གནས་སར་པ་དང༌། བུ་མོ་གཞོན་ནུ་འབྱུང་བ་དང་སྐྱེས་པ་དང་བུད་མེད་དང་བྲན་ཕོ་དང་བྲན་མོ་ཐམས་ཅད་འབྱུང་བར་བྱ་བ་ནི་ཞེས་བྱ་བ་ལ། ཐམས་ཅད་ལས་ཞེས་བྱ་བ་ནི་དངོས་པོ་ཐམས་ཅད་ལས་སོ། །ལྷའི་ཁ་ཟས་དང་བཏུབ་དང་གོས་དང་རྒྱན་དང་གནས་སར་པ་དང༌། བུ་མོ་གཞོན་ནུ་མ་བསྐྱེད་ཅིང་འབྱུང་
པ་དང་སྐྱེས་པ་དང༌། བུད་མེད་དང༌། དྲན་ཕོ་དང་བྲན་མོ་ཐམས་ཅད་བསྐྱེད་པ་དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་དམ་ཚིག་གི་བསོད་ནམས་ཀྱི་ཆུ་ཡིས་སོ་ཞེས་བྱ་བ་ནི་བདེ་བ་ཆེན་པོའི་རྡོ་རྗེའི་དམ་ཚིག་ནི་རྡོ་རྗེ་སེམས་དཔའི་བསོད་ནམས་ཀྱི་ཆུ་བོའི་ཕྱག་རྒྱ་སྟེ་དེས་དེ་འབྱུང་པར་འགྱུར་རོ། །འདིས་ནི་འདི་སྐད་སྟོན་པར་འགྱུར་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ཏེ། རྡོ་རྗེ་ཡིད་ལས་བྱུང་བར་བདག་ཉིད་བསམས་ལ་ཕྱག་རྒྱ་དེས་དངོས་པོ་ཐམས་ཅད་ལས་བདག་ཉིད་ཀྱི་ལྷའི་ཁ་ཟས་ལ་སོགས་པ་ཐམས་ཅད་དགུག་པར་བྱ་སྟེ། དེ་ལྟར་ན་ཐམས་ཅད་ལས་ལྷའི་ཁ་ཟས་ལ་སོགས་པ་ཐམས་ཅད་འབྱུང་བར་འགྱུར་རོ། །གཡུལ་དུ་དཔུང་གི་ཚོགས་ཡན་ལག་བཞི་པ་སྟོན་ཏེ་གཡུལ་འགྱེད་པ་དེ་ལ་ནི་ཞེས་བྱ་བ་དེ་ནི་གཞན་གྱི་དམག་ཚོགས་གྱི་མདུན་དུ་རང་གི་དཔུང་གི་ཚོགས་ཡན་ལག་བཞི་པ་སྤྲུལ་པ་ཉེ་བར་བསྟན་ནས་དེས་གཞན་གྱི་དཔུང་གི་ཚོགས་ལས་རྒྱལ་བ་ནི་གཡུལ་འགྱེད་པའོ། །འདི་ཇི་ལྟར་འགྱུར་ཞེ་ན། རྡོ་རྗེ་བདེ་བ་ཆེན་པོའི་སྡོམ་པས་སོ་ཞེས་བྱ་བ་གསུངས་ཏེ། རྡོ་རྗེ་བདེ་བ་ཆེན་པོ་ཡང་ཡིན་ལ་སྡོམ་པ་ཡང་ཡིན་པས་ན་རྡོ་རྗེ་བདེ་བ་ཆེན་པོ་སྡོམ་པའི་ཕྱག་རྒྱའོ། །དེས་དཔུང་གི་ཚོགས་ཡན་ལག་བཞི་པ་སྤྲུལ་ལ། གཡུལ་འགྱེད་པ་རྫོགས་པར་བྱ་བའོ། །དེ་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ཏེ་རྡོ་རྗེ་ཡིད་ལས་བྱུང་བར་བདག་ཉིད་བསམས་ཏེ་ཕྱག་རྒྱ་དེས་དཔུང་གི་ཚོགས་ཡན་ལག་བཞི་བར་སྤྲུལ་ལ། གཡུལ་འགྱེད་པའི་བསམས་པས་གཞན་གྱི་དམག་ཚོགས་ཀྱི་མདུན་དུ་བསྒོམ་པར་བྱ་སྟེ། དེ་ལྟ་བུས་ནི་དཔུང་གི་ཚོགས་ཡན་ལག་བཞི་པ་བསྟན་ནས་གཡུལ་འགྱེད་པར་འགྱུར་རོ། །སྒྱུ་མ་ཐམས་ཅད་བསྟན་པ་ལ་ནི་རྡོ་རྗེ་བདེ་མཆོག་གིས་སོ་ཞེས་བྱ་བ་ལ་རྡོ་རྗེ་སྟེ། རྡོ་རྗེ་སེམས་དཔའི་བདེ་བའི་མཆོག་ནི་རྡོ་རྗེ་བདེ་མཆོག་སྟེ། དེ་བཞིན་གཤེགས་པ་ལ་སོགས་པའི་དངོས་པོ་ཐམས་ཅད་སྤྲུལ་པའི་རྗེས་ཐོགས་ལ་
བདེ་བ་དང་ཡིད་བདེ་བ་ཐོབ་པར་གྱུར་པ་གང་ཡིན་པ་སྟེ། ཤཾ་ཞེས་བྱ་བ་བདེ་བར་བཤད། །སངས་རྒྱས་ཀུན་གྱི་བདེ་བ་ཆེ། །སྒྱུ་མ་ཀུན་གྱི་སྦྱོར་བ་ཡིས། །བདེ་མཆོག་དེས་ནི་བདེ་བའི་མཆོག །ཅེས་གསུངས་པའི་ཕྱིར་རོ། །འདི་སྐད་སྟོན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་ཁུ་ཚུར་གཉིས་བཅིངས་ནས་དེས་བསྐྱེད་པའི་བསམ་པས་ཕྱག་རྒྱ་དེས་གློག་འགྱུ་བའི་ཚུལ་དུ་བསྐོར་བ་དེས་དེ་བཞིན་གཤེགས་པ་ལ་སོགས་པ་དངོས་པོ་ཐམས་ཅད་བསྟན་པར་བྱའོ། །བདེ་མཆོག་གི་བྱ་བ་ཐམས་ཅད་ནི། རྡོ་རྗེ་སྒྱུ་མའི་བྱ་བས་སོ་ཞེས་བྱ་བ་ཐམས་ཅད་ནི། སངས་རྒྱས་ཐམས་ཅད་ཀྱི་བདེ་བ་དང་འཇིག་རྟེན་པའི་བདེ་བ་སྐྱེད་པར་བྱེད་པའི་བདེ་བ་ནི་བདེ་མཆོག་ཐམས་ཅད་དེ། དེའི་དོན་བྱ་བ་ནི་ལས་སུ་བྱ་བ་སྟེ། དེ་ལ་བདེ་མཆོག་ཐམས་ཅད་ཀྱི་བྱ་བའོ། །རྡོ་རྗེ་ནི་རྡོ་རྗེ་སེམས་དཔའ་སྟེ་དེའི་སྒྱུ་མ་ནི་རྡོ་རྗེའི་སྒྱུ་མ་སྟེ། དེ་བཞིན་གཤེགས་པ་ལ་དངོས་པོ་ཐམས་ཅད་སྤྲུལ་པའོ། །དེའི་དོན་དུ་བྱས་པ་ནི་རྡོ་རྗེ་སྒྱུ་མ་ བྱས་པ་སྟེ། ཕྱག་རྒྱ་གང ་གིས་དེ་སྐྱེད་པར་བྱེད་པའོ། །འདི་སྐད་སྟོན་ཏེ། བཅོམ་ལྡན་འདས་རྡོ་རྗེ་སེམས་དཔའ་སྦྱོར་བ་བྱས་ལ་རྡོ་རྗེ་ཁུ་ཚུར་བཅིངས་ཏེ། དེ་བཞིན་གཤེགས་པ་ལ་སོགས་པ་ཐམས་ཅད་སྤྲུལ་པའི་བསམ་པས་གཡས་ཕྱོགས་ནས་བསྐོར་ནས་དེ་ནས་དེ་ཐམས་ཅད་འབྱུང་བར་འགྱུར་རོ། །ཡང་བདེ་བ་དེ་ཉམས་སུ་མྱོང་བར་བྱ་བའི་ཕྱིར་བསྐོར་ན་བདེ་བ་དེ་ཉིད་ཉམས་སུ་མྱོང་བར་འགྱུར་རོ། །རྨད་དུ་བྱུང་བ་དང་ཆོ་འཕྲུལ་ཐམས་ཅད་བསྟན་པ་ལ་ནི་ཞེས་བྱ་བ་ལ་དེ་བཞིན་གཤེགས་པ་ལ་སོགས་པའི་དངོས་པོ་བསྟན་པ་གང་ཡིན་པ་དེ་ནི་སྔོན་ཆད་མ་བྱུང་བས་རྨད་དུ་བྱུང་བའོ། །རྫུ་འཕྲུལ་དང་ཀུན་བརྗོད་པ་དང་བྱིན་གྱིས་བརླབས་པ་དང༌། རྗེས་སུ་བསྟན་པའི་མཚན་ཉིད་ཅན་གྱི་ཆོ་འཕྲུལ་རྣམ་པ་བཞི་ནི་ཆོ་འཕྲུལ་ཐམས་ཅད་དོ། །དེ་ཇི་ལྟར་འགྱུར་ཞེ་ན། རྡོ་རྗེ་རྨད་དུ་བྱུང་བའི་རྫུ་འཕྲུལ་གྱི་རྣམ་པར་འཕྲུལ་པས་སོ་ཞེས་བྱ་བ་གསུངས་ཏེ། རྡོ་རྗེ་སེམས་དཔའི་རྨད་དུ་བྱུང་བའི་རྫུ་འཕྲུལ་གྱི་རྣམ་པར་འཕྲུལ་པ་སྟེ། དེས་རྨད་དུ་བྱུང་བ་དང་ཆོ་འཕྲུལ་ཐམས་ཅད་བསྟན་པར་འགྱུར་རོ། །འདི་ནི་འདི་སྐད་སྟོན་ཏེ། དཔལ་རྡོ་རྗེ་སེམས་དཔའི་
སྦྱོར་བ་བྱས་ལ། རྡོ་རྗེ་ཁུ་ཚུར་གཉིས་བཅིངས་ནས་དེ་རྨད་དུ་བྱུང་བ་དང༌། ཆོ་འཕྲུལ་ཐམས་ཅད་བསྟན་པའི་བསམ་པས་ནམ་མཁའི་གློག་འགྱུར་བའི་ཚུལ་དུ་བསྐོར་ནས་དེ་ལས་དེ་ཐམས་ཅད་འབྱུང་བར་འགྱུར་རོ། །ལན་ཐམས་ཅད་གདབ་པར་བྱ་བ་ནི་ཞེས་བྱ་བ་ནི། འདས་པ་དང་མ་འོངས་པ་དང༌། ད་ལྟར་གྱི་དངོས་པོ་བསྟན་པ་ནི་ལན་ཐམས་ཅད་གདབ་པ་སྟེ། དེ་ཉིད་བྱ་བ་ཡིན་པས་ན་ལན་ཐམས་ཅད་གདབ་པ་ཡིན་ནོ། །དེ་ཇི་ལྟར་འགྱུར་ཞེ་ན། རྡོ་རྗེ་ལན་བསྟན་པས་སོ་ཞེས་བྱ་བ་གསུངས་ཏེ། རྡོ་རྗེའི་ལན་བསྟན་པ་ནི་རྡོ་རྗེའི་ལན་གདབ་པ་སྟེ་ཕྱག་རྒྱ་གང་གིས་དེ་བསྐྱེད་པར་འགྱུར་བའོ། །དེ་ནི་འདི་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། གཡོན་པའི་རྡོ་རྗེ་ཁུ་ཚུར་གཡས་པའི་རྡོ་རྗེ་ཁུ་ཚུར་གྱིས་བསྣུན་པ་དང༌། བཅོམ་ལྡན་འདས་རང་གི་ལྕེ་ལ་གནས་པར་གྱུར་བའི་ལྕེ་དེས་འདས་པ་དང༌། མ་འོངས་པ་དང༌། ད་ལྟར་གྱི་དངོས་པོའི་ལན་རྣམས་སྨྲ་བར་བསམ་པར་བྱ་སྟེ། དེ་ལྟ་བུས་ནི་ལན་ཐམས་ཅད་སྟོན་པར་བྱེད་པར་འགྱུར་རོ། །མེ་རེངས་པར་བྱ་བ་ལ་ནི་རྡོ་རྗེ་ཤིན་ཏུ་གྲང་བས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། མེའི་སྟེང་དུ་བཾ་ལས་ཆུའི་དཀྱིལ་འཁོར་རོ། །དེའི་སྟེང་དུ་དཔལ་རྡོ་རྗེ་སེམས་དཔའི་རང་གི་སྤྱི་བོའི་ཕྱོགས་བཞི་ནས་འོ་མའི་རྒྱ་མཚོ་ཆེན་པོ་བཞི་མེ་ལ་སོགས་པའི་མཚམས་བཞིར་གངྒཱ་དང་སིནྡྷུ་དང༌། པཀྵུ་དང༌། སི་ཏཱ་སྟེ་ཆུ་བོ་བཞི་སྤྱི་གཙུག་ནས་མཚོ་ཆེན་པོ་བཞི་མེ་ལ་སོགས་པའི་མཚམས་མ་དྲོས་པ་དབའ་ཀློང་འཁྱིལ་ཞིང་སྒྲ་དང་བཅས་ལ་དབུ་བ་དང་དབའ་རླབས་ཀུན་དུ་འཁྲུག་པ་འབྱུང་བར་བསམས་ལ། རྡོ་རྗེ་ཁུ་ཚུར་གཉིས་བཅིངས་ཏེ་མེའི་སྟེང་དུ་དྲག་ཏུ་འབབ་པ་ཉིད་དུ་བསམས་ཏེ། དེ་ལྟ་བུས་ནི་མེ་རེངས་པར་འགྱུར་རོ། །ཆུ་འབབ་པར་བྱ་བ་ལ་ནི་རྡོ་རྗེ་ཆུ་ཤེལ་གྱིས་སོ་ཞེས་བྱ་བ་བ་ནི། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་ནོར་བུ་ཆུ་ཤེལ་འཛིན་པར་བདག་ཉིད་བསམས་ལ་རྡོ་རྗེ་ཁུ་ཚུར་གཉིས་བཅིངས་ཏེ་མཛུབ་མོ་གཉིས་བསྒྲེང་ལ་རྒྱབ་བཀུག་པའི་ཚུལ་གྱིས་རིན་པོ་ཆེ་ལྟ་བུར་བྱས་ནས་བཟུང་སྟེ། རང་གི་ལག་ན་གནས་པའི་ནོར་བུ་རིན་པོ་ཆེ་ཆུ།
ཤེལ་ལས་ཆུའི་རྒྱུན་ཡིད་ཀྱིས་དབབ་པར་བྱ་སྟེ། དེ་ལྟ་བུས་ཆུའི་རྒྱུན་འབབ་པར་འགྱུར་རོ། །དགོན་པར་གྲོང་དང་ནགས་ཚལ་དང་ཆུ་བོ་དང་རྫིང་བུ་དང་སྐྱེད་མོས་ཚལ་དང༌། ཟས་དང་སྐོམ་དང༌། གཙུག་ལག་ཁང་སྤྲུལ་པ་ལ་ནི་རྡོ་རྗེ་གྲུབ་པས་སོ་ཞེས་བྱ་བ་ལ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། དགོན་པ་འབྲོག་སྟོང་པའི་དབུས་སུ་རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་གཞིབས་ཏེ་རྩེ་མོར་བྱས་ལ་གྲོང་ཁྱེར་ཆེན་པོ་ལ་སོགས་པར་སྤྲུལ་པར་བྱའོ། །ཆུའི་སྟེང་དུ་འཆག་པ་དང༌། བདག་ཉིད་མང་པོའི་གཟུགས་སྟོན་པ་དང༌། མི་སྣང་བ་དང་ནམ་མཁའ་ལ་འགྲོ་བའི་དངོས་གྲུབ་ལ་ནི་རྡོ་རྗེ་གསང་བའི་དངོས་གྲུབ་ཀྱིས་སོ་ཞེས་བྱ་བ་ནི་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་གཡོན་པའི་མཐེ་བོའི་བུ་གར་གཡས་པའི་མཛུབ་མོ་བྱང་ཆུབ་མཆོག་གི་ཕྱག་རྒྱའི་ཚུལ་དུ་བཅུག་ལ། ཆུའི་ཕྲ་རབ་ཐམས་ཅད་རྡོ་རྗེའི་གཟུགས་སུ་བསམས་ལ་ཆུའི་སྟེང་དུ་གཞག་པར་བྱའོ། །ཕྱག་རྒྱ་འདི་ཉིད་བཅིངས་ལ་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་རང་གི་ལུས་ལ་ཡིད་ཀྱིས་བཅུག་སྟེ། གཟུགས་བརྙན་གྱི་ཚུལ་དུ་བསྒོམས་པས་གཟུགས་ཐམས་ཅད་བསྟན་པ་ཡིན་ནོ། །འདི་ཉིད་བཅིངས་ལ་བདག་ཉིད་ནམ་མཁའ་དང་མཉམ་པར་བསམས་ན་དེ་ལྟ་བུས་ནི་མི་སྣང་བར་འགྱུར་རོ། །འདི་ཉིད་བཅིངས་ལ་གཞན་འཕྲུལ་དབང་བྱེད་ཀྱི་ལྷའི་རྒྱལ་པོ་ལ་སོགས་པའི་གནས་ཀྱི་བར་དུ་ཕྱིན་པའི་རྡོ་རྗེ་སྐས་ཀྱི་ཕྲེང་བར་བསམས་ན། དེས་གཞན་འཕྲུལ་དབང་བྱེད་ཀྱི་ལྷའི་རྒྱལ་པོའི་གནས་ལ་སོགས་པར་འགྲོ་བར་བྱས་ཏེ། དེ་ལྟ་བུས་ནི་ནམ་མཁའ་ལ་འགྲོ་བར་འགྱུར་རོ། །ལྷ་ལ་སོགས་པ་ཐམས་ཅད་མངག་གཞུག་པར་བྱ་བ་ལ་ནི་རྡོ་རྗེ་གསང་བའི་བཀའ་བསྒོས་སོ་ཞེས་བྱ་བ་ནི། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ལྔ་པོ་བསྡུས་པ་ལས་མཛུབ་མོ་གཉིས་སུ་བྱས་ཏེ། མངག་གཞུག་པའི་ཚོགས་སྤྲུལ་ལ་དབང་ཕྱུག་ཆེན་པོ་ལ་སོགས་པའི་ལུས་ལ་ཡིད་ཀྱིས་བཅུག་སྟེ། དེ་རྣམས་དང་ལྷན་ཅིག་གཅིག་ཏུ་གྱུར་ནས་བཀའ་ནོད་པ་ལ་སོགས་པ་བསམས་ནས། དབང་ཕྱུག་ཆེན་པོ་ལ་སོགས་པ་མངག་
གཞུག་པར་བྱ་བའི་ཕྱིར། ཕྱག་རྒྱ་དེས་སྟེང་གི་ནམ་མཁའ་ལས་བཀའ་བསྒོ་བའི་ཚུལ་དུ་བྱས་ཏེ་དེ་ལྟ་བུས་དབང་ཕྱུག་ཆེན་པོ་ལ་སོགས་པ་དེ་རྣམས་མངག་གཞུག་པའི་ཚོགས་དེ་རྣམས་ཀྱིས་རང་དབང་དུ་བྱས་ནས། སྒྲུབ་པ་པོའི་མངག་གཞུག་པ་བྱེད་པར་འགྱུར་རོ། །སེམས་ཅན་ཐམས་ཅད་དབང་དུ་བྱ་བ་ལ་ནི་རྡོ་རྗེ་གསང་བའི་དབང་གིས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བཤད་མ་ཐག་པའི་ལྕགས་ཀྱུ་གཉིས་བཅིངས་ཏེ། དེས་རང་གི་མཚན་མ་གཡོ་བར་བྱས་ཤིང་བཅོམ་ལྡན་འདས་རྡོ་རྗེ་སེམས་དཔའ་སྐུ་མདོག་དམར་པོ་འོད་ཟེར་དམར་པོས་བསྒྲུབ་པར་བྱ་བ་ཁ་དོག་དམར་པོར་བྱས་ལ་དབང་པོ་གཉིས་སྙོམས་པར་འཇུག་པའི་ཚུལ་གྱིས་རང་དབང་དུ་བྱས་པར་བསམ་པར་བྱ་སྟེ། དེ་ལྟ་བུས་ནི་དབང་དུ་བྱ་བར་འགྱུར་རོ། །མི་རྒྱུ་བ་ཐམས་ཅད་དྲང་བ་དང༌། དབབ་པ་དང་བདེན་པ་སྨྲར་གཞུག་པ་ལ་ནི་རྡོ་རྗེ་གསང་བའི་དངོས་གྲུབ་ཀྱི་ཕྱག་རྒྱས་སོ་ཞེས་བྱ་བ་ནི་དེ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་ལ། བཤད་མ་ཐག་པའི་ལྕགས་ཀྱུ་གཉིས་དང་གུང་མོ་གཉིས་གཞིབས་ཏེ་རྩེ་མོར་བྱས་ལ། མི་རྒྱུ་བའི་དངོས་པོ་ཐམས་ཅད་དགུག་ཅིང་དྲང་བའི་བསམ་བས་དེ་དང་མི་རྒྱུ་བའི་དངོས་པོ་ཐམས་ཅད་དྲངས་ནས་འོང་བར་འགྱུར་རོ། །མི་རྒྱུ་བའི་དངོས་པོ་དེ་ཉིད་ལ་དཔལ་རྡོ་རྗེ་སེམས་དཔའ་དབབ་པའི་སྦྱོར་བས་ཕབ་ན་མི་རྒྱུ་བ་ཐམས་ཅད་འབབ་པ་ཡིན་ནོ། །ཕབ་པ་དེ་ཉིད་ལ་བདེན་པ་སྨྲར་གཞུག་པའི་བསམ་པས་ནི་མི་རྒྱུ་བ་ཐམས་ཅད་བདེན་པར་སྨྲ་བར་འགྱུར་རོ། །གཟུགས་ཐམས་ཅད་དབབ་པ་དང༌། དགུག་པ་དང༌། དགོད་པར་བྱ་བ་དང༌། གར་བྱེད་དུ་གཞུག་པ་དང༌། རོལ་བར་བྱ་བ་དང་བསྒོ་བ་ཐམས་ཅད་བྱེད་དུ་གཞུག་པ་དང༌། ཐམས་ཅད་ཁྱེར་ཏེ་འོང་བ་དང༌། འཕྲོག་ཏུ་གཞུག་པ་དང་ལས་ཐམས་ཅད་བྱེད་དུ་གཞུག་པ་ལ་ནི་བདེ་བ་ཆེན་པོ་རྡོ་རྗེའི་དམ་ཚིག་བཏྟྲིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། ལྔ་པོ་བསྡུས་པ་བཅིངས་ལ་མཛུབ་མོ་གཉིས་བཀུག་པས་ལྕགས་ཀྱུ་གཉིས་བཅིངས་ལ། བསྐྱོད་པ་དང་བཙིར་བའི་ཕྱག་རྒྱ་འདིས་གཟུགས་བརྙན་ཐམས་ཅད་ལ་དབབ་པའི་
བསམ་པས་བྱས་ན་དེ་ལ་དཔལ་རྡོ་རྗེ་སེམས་དཔའ་འཇུག་པར་འགྱུར་རོ། །དེ་ནས་གཟུགས་བརྙན་ཐམས་ཅད་ལ་གཞུག་པ་དང༌། གཟུགས་བརྙན་དགུག་པའི་བསམ་པས་བསྐྱེད་ལ་དགུག་པར་འགྱུར་རོ། །དགོད་དུ་གཞུག་པའི་བསམ་པས་ནི་དགོད་པར་འགྱུར་རོ། །གར་བྱེད་པའི་བསམ་པས་ནི་གར་བྱེད་པར་འགྱུར་རོ། །ཀུན་དུ་རོལ་པར་བྱ་བའི་བསམ་པས་ནི་གཟུགས་བརྙན་ཐམས་ཅད་ཀུན་དུ་རོལ་པར་འགྱུར་ཏེ་རྩེ་བར་བྱེད་དོ་ཞེས་བྱ་བའི་ཐ་ཚིག་གོ །བསྒོ་བ་ཐམས་ཅད་བྱེད་དུ་གཞུག་པའི་བསམ་པས་ནི་གཟུགས་བརྙན་ཐམས་ཅད་བྱེད་དོ། །ཐམས་ཅད་ཁྱེར་ཏེ་འོང་བའི་བསམ་པས་ནི་གཟུགས་བརྙན་ཐམས་ཅད་ཁྱེར་ཏེ་འོང་ངོ༌། །ཐམས་ཅད་འཕྲོག་ཏུ་གཞུག་པའི་བསམ་པས་ནི་གཟུགས་བརྙན་ཐམས་ཅད་ཀྱིས་ཐམས་ཅད་འཕྲོག་གོ །ལས་ཐམས་ཅད་བྱེད་དུ་གཞུག་པའི་བསམ་པས་ནི་གཟུགས་བརྙན་ཐམས་ཅད་ཀྱིས་ལས་ཐམས་ཅད་བྱེད་པར་འགྱུར་ཏེ། གཟུགས་བརྙན་ཐམས་ཅད་ལ་དབབ་པ་སྔོན་དུ་འགྲོ་བ་འདི་དག་ནི་གཟུགས་བརྙན་ཐམས་ཅད་ཀྱི་ལས་ཡིན་པར་ཤེས་པར་བྱའོ། །ཐམས་ཅད་རྗེས་སུ་ཆགས་པར་བྱ་བ་ལ་ནི་བདེ་བ་ཆེན་པོ་རྡོ་རྗེ་ཡིད་ལས་བྱུང་བས་སོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་པོ་བཅིངས་ཏེ། རྡོ་རྗེ་ཡིད་ལས་བྱུང་བར་བདག་ཉིད་བསམས་ལ་མདུན་དུ་རྡོ་རྗེ་སེམས་དཔའ་ལ་སོགས་པ་ཇི་ལྟ་བ་བཞིན་དུ་སྤྱན་དྲངས་ཏེ། ཆོ་ག་ཐམས་ཅད་རྗེས་སུ་སྤྱོད་ནས་ཕྱག་རྒྱ་འདིས་རྗེས་སུ་དགྱེས་པར་བྱེད་དོ། །དེ་ལྟ་བུས་ནི་ཐམས་ཅད་རྗེས་སུ་དགྱེས་པར་འགྱུར་རོ། །རྒྱུ་བ་དང་མི་རྒྱུ་བ་ཐམས་ཅད་རྩེར་གཞུག་པ་ལ་ནི་རྡོ་རྗེ་ཀི་ལི་ཀི་ལའི་གསང་བས་སོ་ཞེས་བྱ་བ་ནི་དེ་བཞིན་དུ་བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་ལ་ཀི་ལི་ཀ་ལའི་ཕྱག་རྒྱ་ཆེན་པོ་བཅིངས་ལ་ཀི་ལི་ཀི་ལར་བདག་ཉིད་བསམས་ནས་གནོད་སྦྱིན་མོ་ལ་སོགས་པའི་གཟུགས་བརྙན་ལ་གནོད་སྦྱིན་ལ་སོགས་པ་བཀུག་སྟེ། དེའི་ཕྱག་རྒྱ་ཆེན་པོས་གནོད་སྦྱིན་ལ་སོགས་པ་དང་འཁྱུད་པས་ཟླ་བ་བྱ་སྟེ། དེ་ལྟ་བུས་ནི་ཐམས་ཅད་དགའ་མགུར་སྤྱོད་ཅིང་དགའ་བར་འགྱུར་རོ།།
ཐམས་ཅད་བརྟན་པར་བྱ་བ་ལ་ནི་རྡོ་རྗེ་ཆུ་སྲིན་གྱི་ཕྱག་རྒྱས་སོ་ཞེས་བྱ་བ་ལ་ནི་སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བཅོམ་ལྡན་འདས་རྡོ་རྗེ་དྲན་པའི་ཕྱག་རྒྱ་ཆེན་པོ་བཅིངས་ཏེ་བདག་ཉིད་རྡོ་རྗེ་དྲན་པར་བསམས་ཏེ། དེ་ནས་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་གཅིག་ཏུ་བྱས་ལ་བཟླས་བརྗོད་བྱས་ཏེ་དེ་ལྟ་བུས་ནི་ཐམས་ཅད་བརྟན་པར་འགྱུར་རོ། །ཐམས་ཅད་དང་བར་བྱ་བ་ནི་རྡོ་རྗེ་བསྙེམས་པས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བཅོམ་ལྡན་འདས་རྡོ་རྗེ་བསྙེམས་པའི་ཕྱག་རྒྱ་ཆེན་པོ་བཅིངས་ཏེ་རྡོ་རྗེ་བསྙེམས་པར་བདག་ཉིད་བསམས་ལ་ཁྲོས་པ་ཐམས་ཅད་ཀྱི་སེམས་དང་བར་བྱ་བའི་ཕྱིར་ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་གཅིག་ཏུ་བྱ་བ་སྟེ། བསྒྲུབ་པར་བྱ་བ་དེ་ལྟ་བུས་ནི་སེམས་དང་བར་བྱའོ། །རྨི་ལམ་གདབ་པ་གསོལ་བ་ལ་ནི་རྡོ་རྗེ་སློང་མོ་བས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་མདུན་དུ་སྤྱན་དྲངས་ཏེ་མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ནས་ཕྱག་བྱས་ལ་ཧཱུཾ་གཉིས་ལས་མིག་གཉིས་དང༌། རྣ་བ་གཉིས་སུ་རྡོ་རྗེ་བསམས་ལ་དེ་ནས་འདི་སྐད་དུ། བཅོམ་ལྡན་འདས་རྡོ་རྗེ་སེམས་དཔའ་བདེན་པ་གང་གིས་ཆོས་ཐམས་ཅད་རྨི་ལམ་དང་འདྲ་བར་མཉམ་པའི་བདེན་པ་དེས་བདག་འདོད་པའི་རྨི་ལམ་ལས་ཆེ་གེ་མོ་མཐོང་བར་མཛོད་ཅིག །ཐོས་པར་མཛོད་ཅིག་ཅེས་བརྗོད་པར་བྱའོ། །དེ་ནས་རྡོ་རྗེ་བསྙེམས་པའི་ཕྱག་རྒྱ་ཆེན་པོ་བཅིངས་ལ། མཛུབ་མོ་གཉིས་གཞིབས་ཏེ། རྩེ་མོར་བྱས་ནས་སྔགས་ཟློས་ཤིང་རྩེ་མོ་དེས་སློང་བའི་ཚུལ་དུ་བྱས་ཏེ། དེ་ལྟ་བུས་ནི་རྨི་ལམ་དུ་བཅོམ་ལྡན་འདས་ཐམས་ཅད་སྟོན་པར་མཛད་པ་དང་གསུང་བར་མཛད་དོ། །མཚན་ཕྱེད་དམ་ཐུན་ཐ་མ་ལ་ནི་རྨི་ལམ་དུ་གདབ་པར་བྱའོ། །ཡང་ན་གཞན་གྱིས་མངོན་བར་འདོད་པའི་རྨི་ལམ་མཐོང་བར་བྱ་བ་ལ་ཞེས་བྱ་བ་ནི་སྒྲུབ་པ་པོ་གཞན་དག་རང་དབང་དུ་བྱེད་པར་འདོད་པ་ལ་དེ་རྣམས་ཀྱིས་ཇི་ལྟར་མངོན་པར་འདོད་པའི་རྨི་ལམ་བསྟན་པར་བྱའོ། །ཇི་ལྟར་ཞེ་ན། རྡོ་རྗེ་རྨི་ལམ་མཐོང་བས་སོ་ཞེས་བྱ་བ་གསུངས་སོ། །རྡོ་རྗེ་སྟེ་རྡོ་རྗེ་སེམས་དཔའི་རྨི་
ལམ་མཐོང་བའི་ཕྱག་རྒྱ་ གང་ཡིན་པ་དེས་བསྟན་པར་བྱའོ། །འདི་སྐད་སྟོན་ཏེ། བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས ་ལ། ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་ཏུ་བྱས་ནས་བསྒྲུབ་པར་བྱ་བའི་མདུན་དུ་བཅོམ་ལྡན་འདས་རྡོ་རྗེ་སེམས་དཔའི་བསྒྲུབ་པར་བྱ་བ་ཅི་འདོད་པའི་ཚུལ་གྱིས་སྒྲ་སྟོན་པར་མཛད་པར་བསམས་ལ་བདེན་པའི་བྱིན་གྱི་རླབས་བྱས་ནས་རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་ཀྱིས་རང་གི་མིག་གཉིས་བཀབ་ལ་མིག་མི་བཙུམས་པར་འདིས་གཞན་རྣམས་ཀྱིས་ཇི་ལྟར་མངོན་པར་འདོད་པའི་རྨི་ལམ་སྟོན་པར་མཛོད་ཅིག་ཅེས་བཅོམ་ལྡན་འདས་བསྒོམ་པར་བྱའོ། །རྨི་ལམ་ངན་པ་ཐམས་ཅད་གཞིག་པ་ལ་ནི་རྡོ་རྗེ་སྲེག་བླུགས་ཀྱིས་སོ་ཞེས་བྱ་བ་ནི་སྒྲུབ་པ་པོ་ གང་གི་ཚེ་རྨི་ལམ་ངན་པ་མཐོང་བ་དེའི་ཚེ། བཅོམ་ལྡན་འདས་ཀྱི་སྦྱོར་བ་བྱས ་ལ། བཅོམ་ལྡན་འདས་མདུན་དུ་སྤྱན་དྲངས་ནས་ཆོ་ག་ཐམས་ཅད་ཇི་ལྟ་བ་བཞིན་དུ་རྗེས་སུ་སྤྱད་ལ། བདག་ཉིད་རྡོ་རྗེ་སེམས་དཔའ་དྲག་པོ་ཆེན་པོའི་སྐུར་བསམས་ཏེ། ཐབ་ཀྱི་དབུས་སུ་ཡེ་ཤེས་ཀྱི་མེ་ལ་བཅོམ་ལྡན་འདས་དྲག་པོ་ཆེན་པོའི་ཚུལ་ཅན་རྣམ་པར་བསྒོམས་ནས། རྡོ་རྗེ་བསྡམས་པ་བཅིངས་ཏེ་མཛུབ་མོ་གཉིས་གཞི་བས་ཏེ་རྩེ་མོར་བྱས་ལ། རྨི་ལམ་ངན་པ་ཐམས་ཅད་སྟོན་པར་བྱེད་པའི་སྡིགས་པའི་མཛུབ་མོའི་རྩེ་མོས་བླངས་ལ། བཅོམ་ལྡན་འདས་ཀྱི་ཞལ་དུ་སྲེག་བླུགས་དབུས་པའི་ཚུལ་གྱིས་བསྟབ་པར་བྱ་སྟེ། དེ་ལྟ་བུས་ནི་རྨི་ལམ་ངན་པ་ཐམས་ཅད་འཇིག་པར་འགྱུར་རོ། །རྨི་ལམ་བཟང་པོ་ཐམས་ཅད་བསྒྲུབ་པ་དང༌། བརྟན་པར་བྱ་བ་ལ་ནི་རྡོ་རྗེ་རྨི་ལམ་གྲུབ་པས་སོ་ཞེས་བྱ་བ་ནི་རྨི་ལམ་དུ་བདག་ཉིད་བྱང་ཆུབ་ཀྱི་སྙིང་པོར་འགྲོ་བ་དང༌། བདུད་བཏུལ་བ་དང༌། ཐམས་ཅད་མཉམ་པ་ཉིད་བྱང་ཆུབ་ཆེན་པོར་མངོན་པར་བྱང་ཆུབ་པ་དང༌། ཆོས་ཀྱི་འཁོར་ལོ་བསྐོར་བ་ལ་སོགས་པ་མཐོང་བ་ནི་རྨི་ལམ་བཟང་པོ་ཐམས་ཅད་དོ། །དེ་བསྒྲུབ་པར་བྱ་བ་ནི་རྫོགས་པར་བྱ་བའོ། །བརྟན་པར་བྱ་བ་ནི་མི་འགྱུར་བར་བྱ་བ་སྟེ། གཉིད་ལོག་པ་ནི་རྨི་ལམ་དུ་བྱང་ཆུབ་ཀྱི་སྙིང་པོར་འགྲོ་བ་ལ་སོགས་པ་ཉིད་མཐོང་གི་མི་དགེ་བའི་ལས་ཀྱི་འབྲས་བུ་གཞན་དག་
ནི་མ་ཡིན་པའི་རྡོ་རྗེ་རྨི་ལམ་གྱི་ཕྱག་རྒྱ་གང་ཡིན་པ་དེས་དེར་གྱུར་ཏེ་རྡོ་རྗེ་རྨི་ལམ་གྲུབ་པ་དེས་རྨི་ལམ་བཟང་པོ་ཐམས་ཅད་གྲུབ་པ་དང་བརྟན་པར་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་རྡོ་རྗེ་སེམས་དཔའ་མདུན་དུ་སྤྱན་དྲངས་ཏེ། ཆོ་ག་ཐམས་ཅད་རྗེས་སུ་སྤྱད་ལ་ཧཱུཾ་ལས་མིག་གཉིས་སུ་རྡོ་རྗེ་བསྐྱེད་ལ་རྡོ་རྗེ་བསྡམས་པ་བཅིངས་ཏེ་མཛུབ་མོ་གཉིས་ཀྱིས་མིག་བཀབ་སྟེ་བཟླས་བརྗོད་བྱའོ། །དེ་ལྟ་བུས་ནི་རྨི་ལམ་བཟང་པོ་ཐམས་ཅད་བསྒྲུབ་པ་དང༌། བརྟན་པར་བྱ་བའི་དངོས་གྲུབ་ཐམས་ཅད་འགྲུབ་པར་འགྱུར་རོ། །ནད་དང་གདོན་ཐམས་ཅད་བསལ་བ་ལ་ནི་རྡོ་རྗེ་སྨན་གྱིས་སོ་ཞེས་བྱ་བ་ནི་སྐྱ་སྦབ་ལ་སོགས་པའི་ནད་ཐམས་ཅད་དོ། །གཅོང་ཆེན་པོ་ལ་སོགས་པ་ནི་གདོན་ཐམས་ཅད་དོ། །ནད་དང་གནོད་པ་དེ་ཐམས་ཅད་བསལ་བ་ལ་ནི་བཅོམ་ལྡན་འདས་རྡོ་རྗེ་སྨན་གྱི་ཕྱག་རྒྱ་འགྱུར་རོ། །འདིས་ནི་འདི་སྐད་སྟོན་པ་ཡིན་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། བདག་ཉིད་འཕགས་པ་གཙུབ་འཕྱང་གི་གཟུགས་སུ་བསམས་ལ་རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་གཞིབས་ཏེ། རྩེ་མོར་བྱས་ལ་དེ་བརྟན་པས་གཟུང་བར་བྱའོ། །བཅོམ་ལྡན་འདས་གཙུག་འཕྱང་ཡང་ནད་པའི་ལུས་ལ་ཞུགས་པས་ནད་པའི་ལུས་ཐམས་ཅད་ཁྱབ་པ་དང༌། དཔལ་རྡོ་རྗེ་སེམས་དཔའི་ཕྲ་རབ་ཀྱི་རང་བཞིན་ཅན་གྱི་སྨན་ནད་པས་ཟོས་པར་བསམ་པར་བྱའོ། །རིམས་ནད་ཐམས་ཅད་གཞིག་པ་ལ་ནི་རྡོ་རྗེ་བཅུད་ཀྱིས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། འཕགས་པ་བདུད་རྩི་ཐབ་སྦྱོར་དུ་བསམས་ཏེ་མཛུབ་མོ་གཉིས་གཤིབས་ལ་རྩེ་མོར་བྱས་ལ་བཏུང་བར་བྱའོ། །བཅོམ་ལྡན་འདས་འཕགས་པ་བདུད་རྩི་ཐབ་སྦྱོར་གྱིས་ནད་པའི་སྤྱི་པོས་ནས་བརྩམས་ཏེ་རྐང་པའི་མཐར་ཐུག་པའི་བར་དུ་ཁྱབ་པ་དང༌། རྡོ་རྗེ་སེམས་དཔའི་ཕྲ་རབ་ཀྱི་ཚོགས་འཐུང་བར་བསམ་པར་བྱའོ། །དེ་ནས་ནད་པ་འཕགས་པ་བདུད་རྩི་ཐབ་སྦྱོར་དུ་གྱུར་པར་བྱའོ། །དུས་མ་ཡིན་པར་འཆི་བ་གཞིག་པ་ལ་ནི་རྡོ་རྗེ་དཱུར་བས་སོ་ཞེས་བྱ་བ་ནི། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་
ལ་མདུན་དུ་དཔལ་རྡོ་རྗེ་སེམས་དཔའ་སྤྱན་དྲངས་ནས་ཆོ་ག་ཐམས་ཅད་རྗེས་སུ་སྤྱད་ལ་བདག་ཉིད་རྡོ་རྗེ་སེམས་དཔའ་དྲག་པོ་ཆེན་པོར་བསམས་ཏེ་མདུན་ན་བཞུགས་པའི་རྡོ་རྗེ་སེམས་དཔའ་ཡེ་ཤེས་ཀྱི་མེ་ཐབ་ཀྱི་དབུས་ན་བཞུགས་པར་བསམས་ཏེ། རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་གཞིབས་ལ་ཙེ་མོར་སྦྱར་ཏེ། མཛུབ་མོའི་རྩེར་མོར་དུས་མ་ཡིན་པར་འཆི་བར་གཡོ་བའི་གཟུགས་ཅན་བླངས་ལ། བཅོམ་ལྡན་འདས་ཀྱི་ཞལ་དུ་སྲེག་བླུགས་འབུལ་པའི་ཚུལ་གྱིས་བསྟབ་པར་བྱ་བ་ནི་བཅོམ་ལྡན་འདས་ཀྱིས་བཞེས་པར་འགྱུར་པར་བསམ་པར་བྱའོ། །དམྱལ་བ་ལ་སོགས་པའི་ངན་འགྲོ་ཐམས་ཅད་གཞིག་པ་ལ་ནི་རྡོ་རྗེ་སྡིག་པ་དྲལ་བས་སོ་ཞེས་བྱ་བ་ནི། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བདག་ཉིད་དཔལ་རྡོ་རྗེ་ཧཱུཾ་མཛད་དུ་བསམས་ལ་སྔ་མ་བཞིན་དུ་རྡོ་རྗེ་བསྡམས་པའི་མཛུབ་མོ་གཉིས་རྩེ་མོ་སྦྱར་ལ་མཐེ་བོང་གཉིས་འོག་ཏུ་མཉམ་པོར་བརྐྱང་ལ་ངན་སོང་གསུམ་དེས་འདེགས་ཤིང་བསྒྲུབས་ལ་རྡོ་རྗེ་འབར་བ་ནམ་མཁའ་དང་མཉམ་པར་ངན་སོང་གསུམ་ཐལ་བར་བྱས་པར་བསམ་པར་བྱའོ། །དེ་ནས་ངན་འགྲོ་དེ་རྣམས་དེ་བཞིན་གཤེགས་པ་མི་བསྐྱོད་པའི་སངས་རྒྱས་ཀྱི་ཞིང་དུ་སྐྱེས་ཤིང་དུ་སྐྱེས་ཤིང་ས་བརྒྱད་པ་ཐོབ་པར་བསམ་པར་བྱ་སྟེ། དེ་ལྟ་བུས་ནི་སྡིག་པ་ཐམས་ཅད་དྲལ་བར་འགྱུར་རོ། །སྐུ་ཐམས་ཅད་བསྒྲུབ་པ་ནི་རྡོ་རྗེའི་སྐུའི་མཆོག་གིས་སོ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་སྐུ་ནི་སྐུ་ཐམས་ཅད་དོ། །དེའི་དངོས་གྲུབ་ནི་སྐྱེད་པ་སྟེ་རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་གཞིབས་ཏེ་རྩེ་མོ་སྦྱར་ལ་མཐེ་བོང་གཉིས་སྐྱིལ་མོ་ཀྲུང་དུ་བྱ་བ་ནི་རྡོ་རྗེ་སྐུའི་མཆོག་སྟེ། འདི་བཅིངས་ལ་དཔལ་རྡོ་རྗེ་སེམས་དཔའ་ལ་སོགས་པའི་སྦྱོར་བས། རྡོ་རྗེ་སེམས་དཔའ་ལ་སོགས་པའི་སྐུ་གང་དང་གང་བསྒྲུབ་པར་འདོད་པ་དེ་དང་དེར་བདག་ཉིད་བསམ་པར་བྱ་སྟེ། དེ་ལྟ་བུས་ནི་སྐུ་ཐམས་ཅད་འགྲུབ་པར་འགྱུར་རོ།།གསུང་ཐམས་ཅད་སྒྲུབ་པ་ལ་ནི་རང་གི་ལྕེ་ལ་རྡོ་རྗེ་གསང་བའི་ལྗགས་ཀྱི་མཆོག་གིས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རང་གི་ལྕེ་ལ་རྡོ་རྗེ་དཀར་པོ་བསམས་ལ་དེར་ཟློས་པར་བྱ་བའི་ཕྱིར་སྔགས་
ཡིད་ཀྱིས་བྲིས་ཏེ། རྡོ་རྗེ་སྐུའི་མཆོག་བཅིངས་ལ་གུང་མོ་གཉིས་ཀྱིས་པདྨ་ལྟར་བྱས་ནས་ངག་འབྱིན་པའི་ཚུལ་དུ་བྱས་ཏེ་དེ་ལྟ་བུས་ནི་གསུང་གི་དངོས་གྲུབ་ཏུ་གྱུར་ལ་འདས་བ་དང༌། མ་འོངས་པ་དང༌། ད་ལྟར་གྱི་དངོས་པོ་ཐམས་ཅད་བདེན་པར་སྟོན་པའི་མཚན་ཉིད་ཅན། རྡོ་རྗེ་གསང་བའི་ལྗགས་ཀྱི་མཆོག་གིས་འགྱུར་རོ། །ཐུགས་ཐམས་ཅད་གྲུབ་པ་ལ་ནི་རྡོ་རྗེ་ཐུགས་བསྐྱེད་པས་སོ་ཞེས་བྱ་བ་ལ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསམས་ཏེ། རང་གི་སྙིང་གའི་ཕྱོགས་སུ་རྡོ་རྗེ་སྐུའི་མཆོག་བཅིངས་ལ། ཨོཾ་བོ་དྷི་ཙིཏྟོ་ཏ་པ་ད་ཡཱ་མི་ཞེས་རྡོ་རྗེའི་སྙིང་པོ་དམ་པ་ཟློས་ཤིང་རྡོ་རྗེ་སེམས་དཔར་བདག་ཉིད་བསྒོམ་པར་བྱ་སྟེ། དེ་ལྟ་བུས་ནི་ཐུགས་ཀྱི་དངོས་གྲུབ་ཐོབ་པར་འགྱུར་རོ། །རྡོ་རྗེ་ཐམས་ཅད་ཀྱི་དངོས་གྲུབ་ནི་རབ་ཏུ་དགའ་བའི་རྡོ་རྗེས་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རང་གི་སྙིང་གར་ཡི་གེ་ས་ལས་སྣ་ཚོགས་རྡོ་རྗེ་བསམས་ལ་རྡོ་རྗེ་སྐུའི་མཆོག་བཅིངས་ཏེ་གཡས་པའི་མཐེ་བོང་གཡོན་པའི་མཐེ་བོང་གི་བུ་གར་བཅུག་ལ་བསྒོམ་པར་བྱ་སྟེ། དེ་ལྟ་བུས་ནི་རྡོ་རྗེ་ཐམས་ཅད་འགྲུབ་པར་འགྱུར་རོ། །དཀྱིལ་འཁོར་ཐམས་ཅད་དུ་འཇུག་པ་ལ་ནི་རྡོ་རྗེ་འཁོར་ལོས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བདག་ཉིད་བྱང་ཆུབ་སེམས་དཔའ་སེམས་བསྐྱེད་མ་ཐག་ཏུ་ཆོས་ཀྱི་འཁོར་ལོ་བསྐོར་བར་བསམས་ལ། རྡོ་རྗེ་ཁུར་གཉིས་བཅིངས་ལ། གློག་འགྱུ་བ་འདེགས་པའི་ཚུལ་གྱིས་གཡས་ཕྱོགས་ནས་བསྐོར་བ་འདི་ནི་རྡོ་རྗེ་འཁོར་ལོ་སྟེ། འདིས་དཀྱིལ་འཁོར་དུ་འཇུག་པར་འགྱུར་རོ། །ཕྱག་རྒྱ་ཐམས་ཅད་བཅིངས་པའི་དངོས་གྲུབ་ནི་ཞེས་བྱ་བ་ན། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིངས་པའི་དངོས་གྲུབ་པོ། །དེ་ཇི་ལྟར་འགྱུར་ཞེ་ན། རྡོ་རྗེ་དཔའི་དམ་ཚིག་གི་ཕྱག་རྒྱ་ཆེན་པོས་སོ་ཞེས་བྱ་བ་གསུངས་ཏེ་རྡོ་རྗེ་ནི་དེ་ཁོ་ན་ཉིད་དོ། །དེའི་གསང་བའི་དམ་ཚིག་ནི་དང་པོའི་རྡོ་རྗེའོ། །དེའི་ཕྱག་རྒྱ་ཆེན་པོ་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ནི་རྡོ་རྗེ་བསྙེམས་པའོ། །འདི་སྐད་སྟོན་ཏེ། རྡོ་རྗེ་
སེམས་དཔའི་སྦྱོར་བ་ཇི་ལྟ་བ་བཞིན་དུ་བྱས་ལ། རྡོ་རྗེ་སེམས་དཔའི་ལས་ཀྱི་ཕྱག་རྒྱ་དང༌། རྡོ་རྗེ་དང་བཅས་པ་བཅིངས་ལ་རྣག་གི་སྔགས་བརྗོད་པར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་བཅིངས་པ་བསྒྲུབ་པར་འགྱུར་རོ། །དམ་ཚིག་ཐམས་ཅད་གྲུབ་པ་ལ་ནི་རྡོ་རྗེ་དམ་ཚིག་གི་ཕྱག་རྒྱས་སོ་ཞེས་བྱ་བ་ལ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཁྲོ་བོའི་ཁུ་ཚུར་གྱིས་སྡིགས་མཛུབ་བྱེད་པ་ལ་བརྩོན་པ་དང༌། ཡི་གེ་ཧཱུཾ་གིས་བདག་ཉིད་རྡོ་རྗེ་ཁུ་ཚུར་བསམས་ལ་བསྒྲུབ་པར་བྱ་བ་རྡོ་རྗེ་རིགས་ཀྱི་ལྷ་མདུན་དུ་སྤྱན་དྲངས་ལ་སྡིགས་མཛུབ་བྱས་ཏེ། དེ་ལྟར་བུས་ནི་དེ་དགྱེས་ནས་རང་གི་དངོས་གྲུབ་སྩོལ་བར་མཛད་དོ། །དེ་ལྟར་ན་རྡོ་རྗེ་རིགས་ཀྱི་ངོ་བོའི་དམ་ཚིག་ཐམས་ཅད་འགྲུབ་པར་འགྱུར་རོ། །ལས་ཐམས་ཅད་གྲུབ་པ་ལ་ནི་རྡོ་རྗེ་གསང་བའི་མཆོད་པས་སོ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའ་སྦྱོར་བ་བྱས་ལ། ལྔ་པོ་བསྡུས་པ་བཅིངས་ཏེ་མཛུབ་མོ་གཉིས་ཀྱིས་ལྕགས་ཀྱུ་གཉིས་སུ་བྱས་ལ་དེ་གར་བྱ་བའི་ཚུལ་གྱིས་བཏེག་ནས་སྤྱི་བོར་ཐལ་མོ་སྦྱར་བ་བྱས་ནས་ལུས་ཐམས་ཅད་བྱུང་བ། རྡོ་རྗེ་མཚོན་ཆ་མ་ལ་སོགས་པས་བྱང་ཆུབ་ཏུ་སེམས་བསྐྱེད་པ་ལ་སོགས་པའི་སྒྲུབ་པའི་མཆོད་པས་བདག་ཉིད་མཆོད་པར་གྱུར་པར་བསམ་པར་བྱའོ། །དེ་ལྟ་བུས་ནི་ལས་ཀྱི་དཀྱིལ་འཁོར་ལ་སོགས་པའི་ལས་ཐམས་ཅད་འགྲུབ་པར་འགྱུར་རོ། །དངོས་གྲུབ་ཐམས་ཅད་ལ་ནི་བདེ་དབ་ཆེན་པོའི་གསང་བའི་བདེ་བ་གྲུབ་པས་སོ་ཞེས་ཡ་བ་ནི་རིགས་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པ་འགྲུབ་པ་ནི་དངོས་གྲུབ་ཐམས་ཅད་དེ། དེ་ནི་རྡོ་རྗེ་བདེ་བ་ཆེན་པོ་སྟེ་རྡོ་རྗེ་སེམས་དཔའི་གསང་བའི་བདེ་བ་གྲུབ་པ་བསྐྱེད་པས་ཐོབ་པར་འགྱུར་རོ། །འདི་སྐད་སྟོན་པར་འགྱུར་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་ཀྱིས་ལས་ཀྱི་ཕྱག་རྒྱ་བཅིངས་བར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་སྒྲུབ་པ་པོའི་དབང་དུ་འགྱུར་རོ། །ཕུན་སུམ་ཚོགས་པ་ཐམས་ཅད་ལ་ནི་རྡོ་རྗེ་ལྟུང་བ་ལས་གདོན་པའི་ཕྱག་རྒྱས་སོ་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་འབྱོར་བ་ནི་ཕུན་སུམ་ཚོགས་པ་ཐམས་ཅད་དོ། །རྡོ་རྗེ་ནི་རྡོ་རྗེ་སེམས་དཔའོ།།
ལྟུང་བ་ནི་རྒུད་པ་དང་ལྡན་པའི་སེམས་ཅན་དེ་རྒྱལ་སྲིད་ལས་ཉམས་པ་རྣམས་གདོན་ཞིང་སླར་ཡང་རྒྱལ་སྲིད་ལ་གཞག་པར་བྱ་བའི་ཕྱིར་དོན་གྱི་ཕྱག་རྒྱས་རྡོ་རྗེ་ལྟུང་བ་ལས་གདོན་པའི་ཕྱག་རྒྱ་སྟེ། གང་གིས་ལྟུང་བ་ལས་སློད་བར་བྱེད་པའོ། །དེ་ནི་འདི་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ནས་ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་ཏུ་བྱས་ལ་རྡོ་རྗེ་ཁུ་ཚུར་གཉིས་བཅིངས་ནས་མཐེའུ་ཆུང་གཉིས་ཕན་ཚུན་རྒྱབ་ཏུ་མདུད་པ་བྱས་ལ། མཛུབ་མོ་གཉིས་བཀན་ཏེ་གཞི་བས་ལ་རྩེ་མོར་བྱས་ནས་འོག་ནས་བཏེག་ལ་དབང་བསྐུར་བའི་གནས་སུ་བདེ་བར་གཞག་པར་བྱ་ཞིང་ཇི་ལྟར་མངོན་པར་འདོད་པའི་དབང་གིས་བདག་ཉིད་དབང་བསྐུར་བར་བསམ་པར་བྱ་སྟེ། དེ་ལྟ་བུས་ནི་རྒྱལ་སྲིད་ལས་ཉམས་པ་རྣམས་སླར་ཡང་རྒྱལ་སྲིད་ཀྱི་འབྱོར་བ་ཐམས་ཅད་ཐོབ་པར་འགྱུར་རོ། །ཐམས་ཅད་མཁྱེན་བ་ཐོབ་པ་ལ་ནི་རྡོ་རྗེ་ཡེ་ཤེས་ཀྱི་ཕྱག་རྒྱས་སོ་ཞེས་བྱ་བ་ལ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། བྱང་ཆུབ་མཆོག་གི་ཕྱག་རྒྱ་བཅིངས་ཏེ། རྣམ་པར་སྣང་མཛད་དུ་བདག་ཉིད་བསམས་ནས། དེ་ལྟ་བུས་ནི་ཐམས་ཅད་མཁྱེན་པའི་ཡེ་ཤེས་ཐོབ་པར་འགྱུར་རོ། །མཆོད་པ་ཐམས་ཅད་ནི་ཞེས་བྱ་བ་ནི་མཆོད་པ་ཐམས་ཅད་དང་ཐམས་ཅད་ཀྱི་མཆོད་པ་ནི་མཆོད་པ་ཐམས་ཅད་དོ། །དེའི་ངོ་བོ་ཉིད་ནི་མཆོད་པ་ཐམས་ཅད་ཉིད་དོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱིས་སོ་ཞེས་བྱ་བ་གསུངས་ཏེ། རྡོ་རྗེ་གར་གྱི་ཕྱག་རྒྱས་སོ་ཞེས་བྱ་བའི་དོན་ཏོ། །དེ་ཡང་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་ཁུ་ཚུར་གཉིས་བཅིངས་ཏེ་བསྒྱིངས་པ་དང་བཅས་པས་གློག་འགྱུར་བ་འདེགས་པའི་ཕྱག་རྒྱས་གཡས་ནས་བསྐོར་བ་འདི་ནི་རྡོ་རྗེ་གར་ཏེ་འདིས་ནི་ཇི་སྲིད་རྡོ་རྗེ་སེམས་དཔའ་ལ་སོགས་བས་མཐར་མངོན་སུམ་དུ་གར་གྱི་སྦྱོར་བས་མཆོད་པར་གྱུར་བ་དེ་སྲིད་ཀྱི་བར་དུ་བཟླ་བར་བྱའོ། །རྡོ་རྗེ་ཐབས་ཀྱི་དངོས་གྲུབ་དམ་པ་ནི་རྡོ་རྗེ་བདེ་བ་ཆེན་པོའི་རྡོ་རྗེ་སོ་ཞེས་བྱ་བ་ལ་སོགས་པ་ནི་དང་པོའི་རྡོ་རྗེ་ལ་སོགས་པ་རྡོ་རྗེ་ཐམས་ཅད་དེ། དེས་དམ་པ་གྲུབ་པ་ནི་རྡོ་རྗེ་ཐམས་ཅད་ཀྱི་དམ་པ་གྲུབ་པའི་བདེ་བ་ཆེན་པོ་ནི་རྡོ་རྗེ་སེམས་དཔའ་སྟེ་དེའི་རྡོ་རྗེ་གང་ཡིན་པ་དེ་གྲུབ་པར་འགྱུར་རོ། །དེ་ནི་འདི་ཡིན་ཏེ་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་
ལ། རང་གི་སྙིང་གའི་ཟླ་བ་ལ་དང་པོའི་རྡོ་རྗེ་རྩེ་ལྔ་པའམ་ཡིད་ན་དེ་བཞིན་གཤེགས་པ་ལ་སོགས་པའི་རྡོ་རྗེ་གཞན་བསམས་ལ། རྡོ་རྗེ་ཁུ་ཚུར་གཉིས་བཅིངས་ཏེ་མཛུབ་མོ་གཉིས་ཁ་ཕྱིར་བལྟས་པར་བསྒྲེང་སྟེ་གཤིབས་ལ་རྩེ་མོར་བྱས་ནས་སྙིང་གའི་ཕྱོགས་སུ་བཞག་ལ་ཞེས་བྱ་བས་དང་པོ་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱ་སྟེ་དེ་ལྟ་བུས་ནི་རྡོ་རྗེ་ཐམས་ཅད་ཀྱི་དངོས་གྲུབ་དམ་པར་འགྱུར་རོ། །སེམས་དཔའ་ཆེན་པོ་ཐམས་ཅད་ཀྱི་དངོས་གྲུབ་དམ་པ་ནི་རྡོ་རྗེ་སེམས་དཔའི་བདེ་བ་ཆེན་པོས་སོ་ཞེས་བྱ་བ་ནི་དེ་བཞིན་དུ་བཤད་མ་ཐག་པའི་ཕྱག་རྒྱ་བཅིངས་ལ་སེམས་དཔའི་རྡོ་རྗེ་སྙིང་པོས་བདག་ཉིད་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་ཆེན་པོ་བདག་གོ་ཞེས་བྱ་བར་བསྒོམ་པར་བྱ་སྟེ། དེ་ལྟར་ན་སེམས་དཔའ་ཆེན་པོ་ཐམས་ཅད་ཀྱི་དངོས་གྲུབ་དམ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་དམ་པ་ནི་རྡོ་རྗེ་གསང་བའི་བདེ་བ་ཆེན་པོས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བྱང་ཆུབ་མཆོག་གི་ཕྱག་རྒྱ་བཅིངས་ཏེ། བདག་ནི་དེ་བཞིན་གཤེགས་པའོ་ཞེས་བྱ་བ་བསྒོམས་ན་དེ་ལྟ་བུས་ནི་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །རྡོ་རྗེ་འཛིན་པ་ཐམས་ཅད་ཀྱི་དངོས་གྲུབ་དམ་པ་ནི་རྡོ་རྗེ་འཛིན་པ་ཆེན་པོ་ཡང་ཡིན་ལ་ཐམས་ཅད་ཀྱང་ཡིན་པས་རྡོ་རྗེ་འཛིན་པ་ཆེན་པོ་ཐམས་ཅད་དེ། རྡོ་རྗེ་སེམས་དཔའ་དང་རྡོ་རྗེ་ཡིད་ལས་བྱུང་བ་ལ་སོགས་པ་རྡོ་རྗེ་རིགས་ཀྱི་ལྷ་ཐམས་ཅད་དོ། །དེ་རྣམས་ཀྱི་དངོས་གྲུབ་དམ་པ་ནི་ཕྱག་རྒྱ་ཆེན་པོའི་དངོས་གྲུབ་བོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་གསང་བའི་དམ་ཚིག་གི་ཕྱག་རྒྱས་སོ་ཞེས་བྱ་བ་གསུངས་ཏེ། བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་ཕྱག་རྒྱ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ་དེས་དེ་འགྲུབ་པར་འགྱུར་རོ། །འདི་སྐད་སྟོན་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། ཆོས་ཐམས་ཅད་རྗེས་སུ་སྤྱད་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་དེའི་སྐུའི་གསང་བའམ། རྡོ་རྗེ་ཡིད་ལས་བྱུང་བ་ལ་སོགས་པ་བསྒོམ་པར་བྱའོ། །དེ་ལྟ་བུའི་རྣལ་འབྱོར་པས་རྡོ་རྗེ་འཛིན་པ་ཆེན་པོ་ཐམས་ཅད་ཀྱི་དངོས་གྲུབ་དམ་པ་འགྲུབ་པར་འགྱུར་རོ། །ལས་ཀྱི་ཕྱག་རྒྱ་བསྒྲུབ་པ་
བརྒྱ་པོ་འདི་དག་ནི་དཔལ་རྡོ་རྗེ་སེམས་དཔའི་སྒྲུབ་པ་པོ་ཡིན་པར་བཤད་དོ། །དཔལ་རྡོ་རྗེ་སེམས་དཔའི་སྒྲུབ་པ་པོ་ལ་ཇི་ལྟར་བཤད་པ་དེ་བཞིན་དུ་སྤྱིར་གསུངས་པ་ཡིན་པའི་ཕྱིར་རྡོ་རྗེ་ཡིད་ལས་བྱུང་བ་ནས་རྡོ་རྗེ་འབེབས་པའི་བར་གྱི་རྣལ་འབྱོར་པ་རྣམས་ཀྱིས་ཀྱང་རང་གི་རྣལ་འབྱོར་སྔོན་དུ་འགྲོ་བས་རང་གི་གནས་ཀྱི་སྒྲུབ་པར་ཤེས་པར་བྱའོ། །བདེ་བ་ཆེན་པོ་རྡོ་རྗེ་ནི་གཉིས་སུ་མེད་པའི་ཡེ་ཤེས་ཡིན་པར་བཤད་ཟིན་ཏོ།། །།དེའི་གསང་བ་ནི་དེའི་རྒྱུ་མཐུན་པར་གྱུར་པ་རྡོ་རྗེ་སེམས་དཔའི་དཀྱིལ་འཁོར་ལ་སོགས་པ་དེ་ཁོ་ན་ཉིད་དོ། །དེའི་རྣམ་པར་རྟོག་པ་ནི་རྟོག་པའོ། །དེ་སྟོན་པར་བྱེད་པའི་སྒྲའི་ཚོགས་ལ་ཡང་ཉེ་བར་རྟོག་པ་ཞེས་བཤད་དོ། །དེ་ཡང་རྟོག་པ་གཞན་རྣམས་ལས་ཤིན་ཏུ་ལྷག་པའི་ཚུལ་གྱིས་མཛེས་ཤིང་འབར་བས་ན་རྟོག་པ་ཆེན་པོའི་རྒྱལ་པོའོ། །རྩ་བའི་རྒྱུད་ཀྱི་རང་བཞིན་དེ་ལས་རབ་ཏུ་དགའ་བའི་རྡོ་རྗེ་གསང་བ་ཆེན་པོ་ཞེས་བྱ་བའི་རྡོ་རྗེ་སེམས་དཔའི་ཆོ་ག་རྒྱས་པར་ནི་བསྒྲུབ་པར་བྱ་བ་དང་བསྒྲུབ་པའི་རྒྱུན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས། དཔལ་མཆོག་དང་པོའི་རྒྱུད་ཆེན་པོའི་དུམ་བུ་གཉིས་པ་རྩ་བའི་རྒྱུད་ལས། དཔལ་རྡོ་རྗེ་སེམས་དཔའི་རྟོག་པ་བཤད་པ་རྫོགས་སོ།། །།དེ་ལྟར་འདོད་ཆགས་ཀྱིས་འདོད་ཆགས་སྤང་བར་བྱ་བའི་ཕྱིར། །དཔལ་རྡོ་རྗེ་སེམས་དཔའི་རྟོག་པ་གསུངས་ནས། ད་ནི་སེམས་ཅན་རང་བཞིན་བཟང་བ་དེ་བཞིན་གཤེགས་པས་འདུལ་བ་ལས་བརྩམས་ཏེ། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གདུལ་བྱ་དྲན་པ་དང༌། ཤེས་རབ་དང་ཡང་དག་པར་ལྡན་པ་རྣམས་ཀྱིས་དེ་བཞིན་གཤེགས་པའི་གཟུངས་དང་ཡེ་ཤེས་ཐོབ་པར་བྱ་བའི་ཕྱིར་དེ་བཞིན་གཤེགས་པའི་རྟོག་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཚིག་སྟེ། དང་པོའི་སྦྱོར་བའི་རྗེས་ཐོགས་ལའོ། །དང་པོའི་སྦྱོར་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་ཡིན་ནོ། །བཅོམ་ལྡན་འདས་ནི་རྣམ་པར་སྣང་མཛད་དོ། །བཅོམ་ལྡན་འདས་འདིའི་ཁྱད་པར་ཇི་ལྟ་བུ་ཞེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། བདེ་བ་ཆེན་པོའི་རྡོ་རྗེ་
ནི་དེ་བཞིན་གཤེགས་པ་རྣམས་ཀྱི་གཉིས་སུ་མེད་པའི་དྲན་པ་དང་ཤེས་རབ་དང་ཡང་དག་པར་ལྡན་པའི་ཐུགས་སོ། །དེའི་དམ་ཚིག་ནི་དེ་བཞིན་གཤེགས་པའི་དཀྱིལ་འཁོར་རོ། །བདེ་བའི་སེམས་དཔའི་ནི་རྒྱུའི་རང་བཞིན་དུ་དེ་བཞིན་གཤེགས་པའི་ཐུགས་ལ་གནས་པ་སེམས་དཔའི་རྡོ་རྗེའི་ཚུལ་རྡོ་རྗེ་འཆང་ཆེན་པོའོ། །དེའི་བྱིན་གྱི་རླབས་ནི་སྔོན་གྱི་འཕེན་ཤུགས་སོ། །དེའི་གསང་བའི་ཆོས་ཀྱི་དཀྱིལ་འཁོར་གྱི་ངོ་བོར་གྱུར་པ་གང་ཡིན་པ་དེ་ལ་དེ་སྐད་ཅེས་བྱའོ། །དེ་བཞིན་གཤེགས་པ་ཐམས་ཅད་ནི་བཅོམ་ལྡན་འདས་རྣམ་པར་སྣང་མཛད་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཡོངས་སུ་འཛིན་པ་ནི་ཕྱག་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིངས་པའོ། །དེ་ལ་རྡོ་རྗེ་སེམས་དཔས་གསོལ་བ་བཏབ་བོ་ཞེས་སྦྱར་རོ། །ཅི་ཞིག་མཛད་ཅེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་ནི་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་སྟེ། རྗེས་ཐོགས་ཉིད་ལ་སྟོན་པར་མཛད་པར་གྱུར་པའི་དེ་བཞིན་གཤེགས་པའི་དཀྱིལ་འཁོར་དེ་བྱིན་གྱིས་རློབ་ཅིང་ཐུགས་ལ་གཞག་པར་མཛད་པའི་ཏིང་ངེ་འཛིན་གང་གིས་རྡོ་རྗེ་ལྟར་མི་ཕྱེད་པར་གྱུར་པས་མིད་དེ་སྐད་ཅེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས་རང་གི་རྡོ་རྗེ་སེམས་དཔའ་སྟེ་ཉིད་ཀྱི་བྱང་ཆུབ་ཀྱི་སེམས་ཆེན་པོ་གསོལ་བ་འདེབས་ཤིང་གསོལ་བ་ལ་ཞུགས་པར་འགྱུར་བའོ། །དེ་ཇི་ལྟ་བུ་ཞེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། བདེ་བ་ཆེན་པོ་ནི་ཐར་བ་ཆེན་པོའོ། །དེ་རབ་ཏུ་གྲུབ་པ་ནི་ཉོན་མོངས་པ་བག་ཆགས་དང་བཅས་པ་སྤངས་པའི་ཚུལ་གྱིས་རྫོགས་པའོ། །དེའི་དོན་དུ། འདོད་ཆགས་ཆེན་པོ་རྣམ་དག་ཕྱིར། །ཞེས་བྱ་བ་སྟེ། འདོད་ཆགས་ཀྱང་ཡིན་ལ་ཆེན་པོ་ཡང་ཡིན་པས་ན་འདོད་ཆགས་ཆེན་པོ་སྟེ། གཟུགས་ཐམས་ཅད་ཀུན་དུ་སྟོན་པས་སེམས་ཅན་གྱི་དོན་མཛད་པའོ། །དེའི་རྣམ་པར་དག་པ་ནི་སྔོན་གྱི་འཕེན་ཤུགས་ཀྱི་སྟོབས་ཀྱིས་ལྷུན་གྱིས་གྲུབ་པར་འཇུག་པའོ། །དེ་བཞིན་གཤེགས་པའི་མཐའ་ཡས་ཉིད། །ཅེས་བྱ་བ་ནི་དེ་བཞིན་གཤེགས་པ་རྣམས་ཀྱིས་མཐའ་ཡས་ཤིང་ཚད་མེད་པའོ། །
ནམ་མཁའ་དང་མཉམ་པ་ནི་ནམ་མཁའི་ཁམས་ཐམས་ཅད་ཁྱབ་པར་བྱེད་པའོ། །བསྐྱེད་དུ་གསོལ་ཞེས་བྱ་བ་ནི་ཀུན་ནས་བསླང་བའོ། །རིགས་དམ་པ་ནི་རིགས་བཟང་ཞིང་མཛེས་པ་སྟེ་རིགས་ཀྱི་མཆོག་སྐྱེད་པར་མཛོད་ཅིག་ཅེས་བྱ་བའི་ཐ་ཚིག་གོ །འདིས་ནི་འདི་སྐད་སྟོན་པར་འགྱུར་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་སྤྲུལ་པར་མཛད་པའི་ཕྱིར། རང་གི་དཀྱིལ་འཁོར་གྱི་རྣམ་པར་ཐུགས་རྩེ་གཅིག་ཏུ་མཛད་པ་ནི། བཅོམ་ལྡན་འདས་དཔལ་རྡོ་རྗེ་སེམས་དཔས་གསོལ་བ་བཏབ་པ་ཡིན་ནོ། །དེ་ནས་བཅོམ་ལྡན་འདས་རྡོ་རྗེ་འཆང་ཆེན་པོས་གཟུངས་གསུངས་སོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱིས་རང་གི་རིགས་སྦྲུལ་བར་མཛད་པའི་ཕྱིར། བཅོམ་ལྡན་འདས་རྡོ་རྗེ་འཆང་བས་གསོལ་བ་བཏབ་ནས་དེ་བཞིན་གཤེགས་པའི་དཀྱིལ་འཁོར་སྦྲུལ་པའི་ཕྱིར་གཟུངས་གསུངས་པ་ཡིན་ནོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ནི་དེ་བཞིན་གཤེགས་པའི་དཀྱིལ་འཁོར་རོ། །དེ་ཉིད་ནི་བདེ་བ་ཆེན་པོའི་རྒྱུ་མཐུན་པ་ཡིན་པའི་ཕྱིར་བདེ་བ་ཆེན་པོ་མངོན་སུམ་དུ་བྱེད་པའི་རྒྱུར་གྱུར་པ་ཉིད་ཡིན་པའི་ཕྱིར་བདེ་བ་ཆེན་པོའོ། །དེ་མི་ཕྱེད་པའི་རྣམ་པར་གནོན་པ་ནི་སྐྱེས་བུ་བྱེད་པའི་རྩལ་ཏེ། དེ་བཞིན་གཤེགས་པའི་དཀྱིལ་འཁོར་གྱིས་འདུལ་བའི་སེམས་ཅན་གྱི་ཁམས་རྣམས་ལ་དེ་བཞིན་གཤེགས་པའི་གཟུངས་རྟོགས་པ་བསྐྱེད་དོ་ཞེས་བྱ་བའི་ཐ་ཚིག་གོ །རྣམ་པར་གནོན་པ་དེ་མཛད་ནས། བཅོམ་ལྡན་འདས་རྡོ་རྗེ་འཆང་ཆེན་པོ་ཅི་ཞིག་མཛད་ཅེ་ན་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་དེ་བཞིན་གཤེགས་པ་རྣམ་པར་སྣང་མཛད་ཆེན་པོ་བྱང་ཆུབ་མཆོག་གི་ཕྱག་རྒྱ་ཕྱག་གཉིས་ཀྱིས་བཅིངས་ནས། སྐུའི་རྡོ་རྗེ་ཐམས་ཅད་ལ་ནི་ཕྱག་རྒྱ་ཆེན་པོའི་ཕྲ་རབ་ཐམས་ཅད་གསུང་གི་རྡོ་རྗེ་ཐམས་ཅད་ལ་ནི་ལྗགས་ཀྱི་ཕྲ་རབ་ཐམས་ཅད་ཐུགས་ཀྱི་རྡོ་རྗེ་ཐམས་ཅད་ལ་ནི་རང་གི་ཐུགས་ཀར་གནས་པའི་སེམས་དཔའི་རྡོ་རྗེ་ཕྲ་རབ་ཐམས་ཅད་ཞུགས་པར་
གྱུར་ཏོ། །དེ་ནས་ཞུགས་ཏེ་ཅི་ཞིག་མཛད་ཅེ་ན། ཐམས་ཅད་ཀྱི་བདག་ཉིད་དང་མཉམ་པར་ཞེས་བྱ་བ་ལ་སོགས་པ་གསུངས་ཏེ། སྐུ་དང་གསུང་དང་ཐུགས་རྡོ་རྗེའི་རྡུལ་ཕྲ་རབ་ཐམས་ཅད་ལ་ཕྲ་རབ་དེ་རྣམས་ཕྲ་རབ་གཅིག་ཀྱང་མང་པོར་ཞུགས་ཏེ། དེ་ལྟར་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་ངོ་བོ་ཐམས་ཅད་ཀྱི་བདག་ཉིད་རྣམ་པར་སྣང་མཛད་རྣམ་པར་སྤྲོས་ནས། སྐུ་དང་གསུང་དང་ཐུགས་རྡོ་རྗེའི་ཕྲ་རབ་མ་ལུས་པ་དེར་ཁྱབ་ནས་དེ་དང་ཆུ་དང་འོ་མ་བཞིན་དུ་གཅིག་ཏུ་གྱུར་པའོ། །བདེ་བ་ཆེན་པོའི་རྡོ་རྗེ་ནི་གཉིས་སུ་མེད་པའི་དྲན་པ་དང་ཤེས་རབ་དང་རབ་ཏུ་ལྡན་པའི་དེ་བཞིན་གཤེགས་པའི་ཐུགས་སོ། །དེའི་ཕྱག་རྒྱ་ནི་དེའི་རྒྱུ་མཐུན་པ་ལས་གྱུར་པའོ། །དེ་བཞིན་གཤེགས་པའི་དཀྱིལ་འཁོར་རོ། །དེ་སྐྱེད་པར་བྱེད་པའི་གཟུངས་གང་ཡིན་པ་དེ་གསུངས་པ་ནི་བཀའ་སྩལ་བ་སྟེ། ཨོཾ་དྷཱི་ཞེས་པའོ། །འདི་ཞེས་བྱ་བ་ནི་ཐུགས་ལ་གནས་པའོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་བཅོམ་ལྡན་འདས་རྡོ་རྗེ་སེམས་དཔའ་རྣམ་པར་སྣང་མཛད་དང་གཅིག་ཏུ་གྱུར་ནས། ཨོཾ་དྷཱི་ཞེས་བྱ་བའི་གཟུངས་འདི་གསུངས་པ་ཙམ་གྱི་རྗེས་ཐོགས་ཉིད་ལ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་སྲས་དང་བཅས་པ་ཐམས་ཅད་རྣམ་པ་དྲུག་ཏུ་གཡོས་པར་གྱུར་ཏོ། །དེ་ནས་དེ་རྣམས་རྣམ་པ་དྲུག་ཏུ་གཡོས་བས་བསྐུལ་པར་གྱུར་པས་འདུས་པར་མཛད་དོ། །བརྟན་པ་ནི་མི་ཕྱེད་པའོ། །དེ་ལ་རྣམ་པ་དྲུག་ཏུ་གཡོས་པ་ནི་འདི་ཡིན་ཏེ། སྐུའི་སྟོད་མཐོན་ནི་སྐུའི་སྨད་དམའ། །སྐུ་སྨད་མཐོ་ན་སྐུ་སྟོད་དམའ། གཡས་ལོགས་མཐོན་གཡོན་ལོགས་དམའ། གཡོན་ལོགས་མཐོན་གཡས་ལོགས་དམའ། སྐུའི་དབུས་མཐོ་ན་མཐའ་དམའ། མཐའ་མཐོན་དབུས་དམའོ། །ཐམས་ཅད་གྲུབ་པའི་ཕྱིར་དཀྱིལ་འཁོར་ཆེན་པོའི་ཚུལ་གྱིས་ཞུགས་སོ་ཞེས་བྱ་བ་ནི། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས། དེ་བཞིན་གཤེགས་པའི་དཀྱིལ་འཁོར་དེ་དེ་བཞིན་གཤེགས་པས་འདུལ་བའི་སེམས་ཅན་རྣམས་ལ། དེ་བཞིན་གཤེགས་པའི་དཀྱིལ་འཁོར་དུ་གསུངས་པའི་དངོས་གྲུབ་ཐམས་ཅད་གྲུབ་པར་བྱ་བའི་ཕྱིར་ཞུགས་སོ། །ཅི་ཞིག་མཛད་
ནས་ཞུགས་ཤེ་ན། བཞད་པ་ཆེན་པོའི་ཁྱད་པར་གྱིས། །རྨད་བྱུང་ཆེན་པོ་རབ་ཏུ་བཞད། །ཅེས་བྱ་བ་ལ་སོགས་པ་གསུངས་ཏེ། བཞད་པ་ཡང་ཡིན་ལ་ཆེན་པོ་ཡང་ཡིན་པས་ན་བཞད་པ་ཆེན་པོ་སྟེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་བདག་ཉིད་ཀྱི་དངོས་པོ་ཐམས་ཅད་དུ་འགྲོ་བའི་དོན་ལ་འཛུམ་པ་རབ་ཏུ་མཛད་དོ། །ངོ་མཚར་ཆེན་པོར་གྱུར་པའི་ཚུལ་ནི་རྨད་བྱུང་ཆེན་པོའོ། །འདིས་ཀྱང་དོན་འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་དཀྱིལ་འཁོར་སྦྲུལ་པས་སེམས་ཅན་གྱི་ཁམས་ཐམས་ཅད་ཀྱི་དེ་བཞིན་གཤེགས་པའི་གཟུངས་ཐོབ་པར་གཟིགས་པས་ཐུགས་དགྱེས་པར་གྱུར་ནས་བཤད་པ་ཆེན་པོ་ཐམས་ཅད་དུ་སོང་བའི་འཛུམ་པ་མཛད་པར་གྱུར་ཏོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། བཞད་པ་ཆེན་པོའི་ཁྱད་པར་གྱིས། །རྨད་བྱུང་ཆེན་པོར་རབ་ཏུ་བཞད། །ཅེས་བྱ་བའི་བར་གྱིས་ནི་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་སྒོ་དབྱེ་བ་བྱས་ལ་བསྡུ་བར་བྱའོ། །དེ་ནས་དེ་བཞིན་དུ་རང་གི་དབང་བསྐུར་བ་བླངས་པའི་ཕྱིར། རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་གཞུག་པ་དང་བཅིང་བ་དང་དབང་དུ་བྱས་ནས། བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པ་ལ་དམ་ཚིག་གི་ཕྱག་རྒྱ་རྣམས་ཀྱིས་ཇི་ལྟ་བ་བཞིན་དུ་རབ་ཏུ་བསྒྲུབས་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ནས་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ལ་ལས་ལ་སྦྱོར་བར་བྱ་སྟེ། འདི་ནི་ལས་ཀྱི་རྒྱལ་པོ་མཆོག་ཅེས་བྱ་སྟེ། ཏིང་ངེ་འཛིན་གསུམ་པའོ། །དེ་ལ་ལས་ནི་འདི་རྣམས་ཡིན་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ་འདི་སྐད་ཅེས་བརྗོད་དོ། །བཅོམ་ལྡན་འདས་རྣམ་པར་སྣང་མཛད་སེམས་ཅན་གྱི་ཁམས་ཐམས་ཅད་ཀྱིས་དྲན་པ་དང་གཟུངས་དང༌། ཡེ་ཤེས་རྟོགས་པར་མཛོད་ཅིག །རྡོ་རྗེ་མཚོན་ཆ་མ་ལ་སོགས་པ་ནས། རྡོ་རྗེ་འབེབས་པའི་བར་གྱིས་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་རྡོ་རྗེ་ཡིད་ལས་བྱུང་བ་ལ་སོགས་བའི་ལས་ལ་སྦྱར་བ་ཉིད་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་
ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་རྒྱས་པ་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ་དེ་ལྟར་ལས་ཀྱི་རྒྱལ་པོ་མཆོག་གསུངས་པའི་རྗེས་ཐོགས་ཉིད་ལའོ། །བཅོམ་ལྡན་འདས་དེ་བཞིན་གཤེགས་པའི་རྡོ་རྗེ་སེམས་དཔའ་ཞེས་བྱ་བ་ནི་རྡོ་རྗེ་སེམས་དཔའི་སྐུའི་ཚུལ་འཛིན་པར་མཛད་པའི་རྣམ་པར་སྣང་མཛད་ལ་དེ་བཞིན་གཤེགས་པ་རྡོ་རྗེ་སེམས་དཔའ་ཞེས་བྱའོ། །དེ་བཞིན་དུ་རྡོ་རྗེ་བསྙེམས་པས་ཞུགས་ཏེ་ཞེས་བྱ་བ་ནི། ཇི་ལྟར་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཅོམ་ལྡན་འདས་རྡོ་རྗེ་སེམས་དཔའ་ཕྱག་རྒྱ་ཆེན་པོས་བཞུགས་པ་དེ་བཞིན་དུ་འདིར་ཡང་བཅོམ་ལྡན་འདས་རྣམ་པར་སྣང་མཛད་རྡོ་རྗེ་བསྙེམས་པས་རྡོ་རྗེ་སེམས་དཔའི་ཕྱག་རྒྱ་ཆེན་པོས་ཞུགས་ནས་དཀྱིལ་འཁོར་འདི་གསུངས་སོ་ཞེས་བྱ་བར་སྦྱར་རོ། །འདི་ཞེས་བྱ་བ་ནི་ཐུགས་ལ་གནས་པའོ། །བདེ་བ་ཆེན་པོའི་དམ་ཚིག་ཅེས་བྱ་བ་ལ་བདེ་བ་ཆེན་པོ་ནི་ཐར་པ་ཆེན་པོའོ། །དེའི་དམ་ཚིག་ནི་དེ་བཞིན་གཤེགས་པའི་གཟུངས་སོ། །དེ་ཉིད་ནི་རྡོ་རྗེ་གསང་བ་སྟེ། སྐྱེ་བོ་ཐམས་ཅད་དང་ཐུན་མོང་མ་ཡིན་པ་བཅོམ་ལྡན་འདས་རྣམ་པར་སྣང་མཛད་ཀྱི་མི་ཕྱེད་པའི་གསང་བའོ། །མིང་དེ་སྐད་ཅེས་བྱ་བའི་གཟུངས་ཀྱི་ཕྱག་རྒྱ་རྣམས་ཀྱིས་དཀྱིལ་འཁོར་གསུངས་པ་ནི་བཀའ་སྩལ་པའོ། །ཇི་ལྟར་ཆོས་ཀྱི་ཞེས་བྱ་བ་ལ་སོགས་པ་ལ་དེ་བཞིན་གཤེགས་པའི་དཀྱིལ་འཁོར་གྱི་སྒྲུབ་པ་པོས་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་སྔོན་དུ་བསྙེན་པའི་ཆོ་གས་བསྙེན་པར་བྱས་ལ། དེ་ནས་ས་སྤྱང་བ་དང༌། ཁང་པ་བརྩེགས་པ་དང་བསྲུང་བའི་ཆོ་ག་རྣམས་རྗེས་སུ་སྤྱད་ལ་ལྷག་པར་གནས་པར་བྱས་ནས་ཇི་ལྟར་བཤད་པའི་ཆོ་གས་ཐིག་གདབ་པར་བྱའོ། །དེ་ནས་ཚོན་རྩི་དབྱེ་བ་བྱས་ནས་ས་མ་ཡ་སྟྭཾ་ཨོཾ་དྷཱི་ཞེས་ཟློས་ཤིང་བཅོམ་ལྡན་འདས་རྣམ་པར་སྣང་མཛད་བར་སྣང་ལས་བབས་ཏེ་སྣ་ཚོགས་པདྨའི་གདན་ལ་ལུགས་མའམ་བརྐོས་པ་ལ་སོགས་པའི་གཟུགས་བརྙན་གྱི་སྐུ་རྡོ་རྗེ་སེམས་དཔའ་ལྟར་རྡོ་རྗེ་བསྙེམས་པ་འཆང་བ་དང་གཅིག་ཏུ་བྱའོ། །དེ་ལྟར་དེ་བཀོད་ནས་དེ་
བཞིན་གཤེགས་པའི་དཀྱིལ་འཁོར་གྱི་ལྷ་རྣམས་ཇི་ལྟ་བུ་ཞེ་ན། དམ་ཚིག་རྣམས་ཀྱི་མཆོག་གི་མཆོག་ནི་དམ་པའོ། །དེ་བཞིན་གཤེགས་པ་ནི་མི་བསྐྱོད་པ་ལ་སོགས་པ་དེའོ། །སྲས་དང་བཅས་པ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་རྡོ་རྗེ་མཚོན་ཆ་མ་ལ་སོགས་པ་དང་བཅས་པ་བཟུང་སྟེ་དེ་དག་ཡོངས་སུ་དགོད་དོ། །བྱང་ཆུབ་སེམས་དཔའ་སེམས་དང་འཆེ། །མེ་ཏོག་ལ་སོགས་སྤྱིར་ཐལ་སྦྱར། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པ་ཡེ་ཤེས་ཀྱི་སེམས་དཔའ་འདི་དག་ཉིད་དང༌། མེ་ཏོག་དང༌། བདུག་པ་དང་མར་མེ་ཆེན་པོ་དང༌། དྲི་ལ་སོགས་པ་ཐལ་མོ་སྦྱོར་བ་སྤྱི་བོར་འཇོག་པར་རྡོ་རྗེ་སྦྲང་རྩི་མ་ལ་སོགས་པའི་གཟུགས་སུ་གནས་པར་བྲི་བར་བྱའོ། །དེ་བཞིན་དུ་སྒེག་མོ་ལ་སོགས་པའི་གཟུགས་འཛིན་པའི་ལྷ་མོ་ལ་སོགས་པ་བྲི་བར་བྱའོ། །དེ་ལ་འདི་ནི་འཇུག་པའི་ཆོ་ག་རྒྱས་པའི་ཁྱད་པར་ཡིན་ནོ་ཞེས་བྱ་བ་ལ། དེ་ལ་ཞེས་བྱ་བའི་སྒྲ་ནི་ཚེ་གཉེ་བར་དགོད་པའི་དོན་ཏོ། །འདི་ནི་ཞེས་བྱ་བ་ལ་ཐུགས་ལ་གནས་པར་གསུངས་ཏེ། འཇུག་པ་ལ་སོགས་པའི་ཆོ་ག་རྒྱས་པ་གང་ཡིན་པ་དེ་ལ་དེ་སྐད་ཅེས་བྱའོ། །སོགས་པའི་སྒྲས་ནི། ཐོག་མཐའ་མེད་པའི་སེམས་དཔའ་ནི། །ཞེས་བྱ་བ་ནས་བརྩམས་ཏེ་མཆོད་ཅིང་ཕྱག་བྱས་ནས་སླར་བྱུང་ཞེས་བྱ་བའི་བར་གྱིས་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་གསུངས་པའི་ཆོ་ག་རྣམས་གཟུང་ངོ༌། །དེ་བཞིན་གཤེགས་པ་ཐམས་ཅད་ལ་ཕྱག་བྱ་བའི་ཕྱག་རྒྱས་འཇུག་པར་བྱའོ་ཞེས་བྱ་བ་ནི་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ་དེས་མེ་ཏོག་གི་ཕྲེང་བ་བླངས་ནས་དཀྱིལ་འཁོར་ལྔ་པས་ཕྱག་བྱས་ལ་དཀྱིལ་འཁོར་དུ་འཇུག་པའོ། །འདིའི་དེ་བཞིན་གཤེགས་པ་ཐམས་ཅད་ལ་ཕྱག་བྱ་བའི་ཕྱག་རྒྱས་ཏེ། དེས་དཀྱིལ་འཁོར་འདིར་འཇུག་པར་བྱའོ། །ཇི་ལྟར་ཞེ་ན། གླུ་འདི་ཡིས་ཞེས་བྱ་ལ་སོགས་པ་གསུངས་ཏེ། འདི་ཡིས་ཞེས་བྱ་བ་ནི་འོག་ནས་བཤད་པའི་རྡོ་རྗེས་ཐོགས་ཉིད་ལ་ཤད་པའི་རྡོ་རྗེ་གླུས་སོ། །རྡོ་རྗེ་བསྡུས་པས་ན་ཞེས་བྱ་བ་ནི་ཐབས་དང་ཤེས་རབ་ཀྱི་རང་བཞིན་བྱང་ཆུབ་ཀྱི་སེམས་ཆེན་པོ་བསྐྱེད་པ་ནི་རྡོ་རྗེ་སེམས་དཔས་བསྡུས་ཤིང་ཉེ་བར་
བླངས་པ་ཡིན་ཏེ། ཐབས་དང་ཤེས་རབ་ཀྱི་རང་བཞིན་དེ་བཞིན་གཤེགས་པའི་རིགས་སུ་ཆུད་པ་ཞེས་བྱ་བའི་ཐ་ཚིག་གོ །དེ་ལྟར་རྡོ་རྗེ་སེམས་དཔའི་བསྡུས་པའི་རྒྱུ་དེས་ན། རྡོ་རྗེ་རིན་ཆེན་བླ་ན་མེད་པར་འགྱུར་རོ་ཞེས་བྱ་བར་ཤུགས་ཀྱིས་སྦྱར་ཏེ། སྦྱིན་པའི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་དང༌། རིན་པོ་ཆེའི་རིགས་ནི་རྡོ་རྗེ་རིན་ཆེན་དེ་ཉིད་ནི་འདིའི་གོང་ན་གཞན་མེད་པས་བླ་ན་མེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་གྱི་སེམས་དང་སེམས་ལས་བྱུང་བ་རྣམས་དང༌། པདྨའི་རིགས་ནི་རྡོ་རྗེ་ཆོས་ཏེ་དེ་རྣམས་ཀྱི་གླུ་བླངས་པས་ནི་སོ་སོ་རང་རིག་པའི་རྣམ་པས་མངོན་དུ་བྱེད་པས་ནི་རྡོ་རྗེ་ཆོས་ཀྱི་གླུ་བླངས་པ་ཡིན་ཏེ། རྡོ་རྗེ་ཆོས་ནི་གླུ་བླངས་པ་དེས་སོ་སོར་རྟོག་པའི་ཡེ་ཤེས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བ་རྒྱུག་གྱུར་བས། རྡོ་རྗེ་ལས་ནི་བྱེད་པར་འགྱུར། །ཞེས་སྒྲུབ་པ་བོས་བོས་པ་ཡིན་ཏེ། ལས་ཀྱིས་དངོས་གྲུབ་གསོལ་བ་འདེབས་ཤིང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་དང༌། ལས་ཀྱི་རིགས་ནི་རྡོ་རྗེ་ཞེས་པ་བཅོམ་ལྡན་འདས་རྣམ་པར་སྣང་མཛད་དོན་ཡོད་པར་གྲུབ་པའི་རང་བཞིན་ཅན་གྱི་སེམས་ལས་དེ་དག་བྱེད་ཅིང་རྫོགས་པར་གྱུར་པར་མཛོད་ཅིག་ཅེས་སློབ་དཔོན་གྱིས་བོད་པའི་ཚིག་ཏུ་སྨྲས་པ་དང༌། བཅོམ་ལྡན་འདས་ལ་གསོལ་བ་འདེབས་པ་ཡིན་ནོ། །དེ་ནས་ཞེས་བྱ་བ་དེ་ལྟར་ཞུགས་ནས་ཐོག་མཐའ་མེད་པ་ཞེས་བྱ་བ་ནས་བརྩམས་ཏེ། མཆོད་ཅིང་ཕྱག་བྱས་ལ་སླར་བྱུང་ཞེས་བྱ་བའི་བར་གྱི་ཆོ་ག་རྣམས་སྦྱང་བའི་རྗེས་ཐོགས་ཉིད་ལ་སྒོ་དབྱེ་བ་དང་བསྡུ་བ་བྱས་ནས། མཚན་བརྒྱ་རྩ་བརྒྱད་པས་ཡང་དག་པར་བསྟོད་ལ། དེ་ནས་དགུག་པར་བྱ་བ་ཡིན་ནོ། །གང་གིས་དེ་འགུག་པར་བྱེད་ཅེ་ན། དེ་བཞིན་གཤེགས་པ་ཐམས་ཅད་ཀྱི་གཟུངས་ཞེས་བྱ་བ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱི་དྲན་པ་དང་ཤེས་རབ་དང་ཡང་དག་པར་ལྡན་པའི་གཉིས་སུ་མེད་པའི་ཡེ་ཤེས་ནི་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་གཟུངས་ཏེ་དེས་སྟོན་པར་བྱེད་པའི་རིགས་ལས་ཉེ་བར་གདགས་པས་དེ་སྐད་ཅེས་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་ཀྱི་གཟུངས་
ཏེ། དེས་བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པ་དགུག་པར་བྱའོ། །ཕྱག་རྒྱ་གང་ཞིག་ཅེ་ན། བདེ་བ་ཆེན་པོའི་རྡོ་རྗེའི་ལྕགས་ཀྱུས་སོ་ཞེས་བྱ་བ་སྨོས་ཏེ། དེ་བཞིན་གཤེགས་པའི་ཁུ་ཚུར་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིངས་ལ། མཛུབ་མོ་གཡས་པ་ལྕགས་ཀྱུར་བྱས་ལ་འདི་ནི་བདེ་བ་ཆེན་པོ་རྡོ་རྗེ་གསང་བའི་ལྕགས་ཀྱུ་མ་ཡིན་ནོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་ཆོ་ག་རྒྱས་པ་ནི་དེ་བཞིན་ནོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བགེགས་བསལ་བ་ལ་སོགས་པའི་ཆོ་ག་གསུངས་པ་དེ་བཞིན་དུ་འདིར་བྱ་སྟེ། འདི་ནི་སློབ་དཔོན་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་གསུངས་པ་ཡིན་ནོ། །ཡང་འདིའི་ཆོ་གའི་དོན་གསལ་བར་བྱ་བའི་ཕྱིར་བརྗོད་པར་བྱ་སྟེ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་བཤད་པའི་རིམ་པས་སྔོན་དུ་བསྙེན་པའི་ཆོ་གས་རྗེས་སུ་སྤྱད་ལ། ས་སྤྱང་བ་དང༌། ཡོངས་སུ་གཟུང་བ་བྱས་ལ་དཀྱིལ་འཁོར་བྲི་བར་བྱའོ། །དེ་ལ་རེ་ཞིག་དང་པོར་བགེགས་གཞོམ་པ་ལ་སོགས་པ་བྱས་ལ། དེ་ནས་རྡོ་རྗེ་འཁོར་ལོས་དཀྱིལ་འཁོར་སྤྲུལ་ལ། ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་གཟུང་བར་བྱའོ། །དེ་ནས་རིམ་པ་འདིས་རྣལ་འབྱོར་ཆེན་པོ་བྱའོ། །དེ་ལ་དང་པོར་རེ་ཞིག་བཛྲ་ཨཉྫ་ལི་ཞེས་བྱ་བས་རྡོ་རྗེ་ཐལ་མོ་བཅིངས་ལ། བཛྲ་བནྡྷ་ཞེས་བྱ་བས་རྡོ་རྗེ་བསྡམས་པ་བྱས་ནས་བཛྲ་བནྡྷ་ཏྲཊ་ཅེས་བྱ་བས་རྡོ་རྗེ་ཐལ་མོ་སྙིང་གར་དགྲོལ་བར་བྱའོ། །བཛྲ་ཨཱ་བེ་ཤ་ཨ་ཞེས་བྱ་བས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། ཨ་ཞེས་བྱ་བས་བདག་ཉིད་ལ་དབབ་པར་བྱའོ། །ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་ཕྱག་རྒྱ་བཀྲོལ་ལ་བཛྲ་མུཥྚི་ཞེས་བྱ་བ་ཟློས་ཤིང་དམ་ཚིག་གི་རྡོ་རྗེ་ཁུ་ཚུར་བཅིངས་ལ། ཨོཾ་བཛྲ་སནྡྷི་བཾ་ཞེས་བྱ་བ་ལན་གསུམ་བཟླ་བར་བྱའོ། །དེ་ནས་ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ལ། རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་བར་དག་གིས་དམ་ཚིག་གི་ཕྱག་རྒྱས་ས་མ་ཡ་སྟྭཾ་ཞེས་བརྗོད་ལ་བཅིངས་ནས། དེ་རྣམས་ཀྱིས་རང་རང་གི་སྙིང་པོ་ལན་གསུམ་བརྗོད་ནས། ཨོཾ་བཛྲ་མུཿཞེས་བརྗོད་དེ་རང་གི་སྙིང་གར་
ཕྱག་རྒྱ་བཀྲོལ་བའི་རྣམ་པར་སྣང་མཛད་ནས་རྡོ་རྗེ་འབེབས་པའི་བར་དུ་རང་གི་སྙིང་གར་གནས་པའི་སེམས་མ་རྡོ་རྗེ་ཡིད་ཀྱིས་གཞུག་པར་བྱའོ། །དེ་ནས་དེ་བཞིན་དུ་སྡིག་པ་དྲལ་བའི་ཕྱག་རྒྱས་སྡིག་པ་དྲལ་བར་བྱའོ། །དེ་ནས་མངོན་པར་བྱང་ཆུབ་པ་ལྔའི་རིམ་པས་དེ་བཞིན་དུ་རྣམ་པར་སྣང་མཛད་དུ་བསམས་ལ། རྡོ་རྗེ་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་བཅིངས་ལ་འདི་སྐད་ཅེས་བརྗོད་པར་བྱའོ། །ས་མ་ཡ་སྟྭཾ་ཧཾ། དེ་ནས་དམ་ཚིག་གི་ཕྱག་རྒྱ་བཅིངས་པ་དེ་ཉིད་ཀྱིས་སྙིང་ག་དང་དབྲལ་བ་དང༌། ལྐོག་མ་དང༌། སྤྱི་བོར་བྱིན་གྱིས་བརླབ་ཅིང་ས་མ་ཡ་སྟྭཾ། ས་ཏྭ་ཨ་དྷི་ཏིཥྛ་སྭ་མཱཾ། ཞེས་བརྗོད་དེ། དེ་ནས་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ་གཡོན་པའི་དེ་བཞིན་གཤེགས་པའི་ཁུ་ཚུར་རྡོ་རྗེ་དྲིལ་བུ་དང་བཅས་པས་བསྙེམས་པར་བྱས་ཏེ་བཞག་ལ། གཡས་པས་དེ་བཞིན་གཤེགས་པའི་རྡོ་རྗེ་བླངས་ལ་གསོར་ཞིང་རང་གི་སྙིང་གར་བསྟོད་པའི་ཚུལ་གྱིས་བཞག་ལ། ཨོཾ་དྷི་ཞེས་བྱ་བའི་གཟུངས་བརྗོད་ནས། སྐུ་དང་གཟུང་དང་ཐུགས་རྡོ་རྗེ་རྣམ་པར་སྣང་མཛད་དུ་རང་ཉིད་འགྱུར་རོ། །འདི་ནི་བདག་ལ་བྱིན་གྱིས་བརླབ་པར་ཡང་འགྱུར་བ་ཡིན་ནོ། །དེ་ནས་རང་གི་སྙིང་གར་ཟླ་བའི་དཀྱིལ་འཁོར་བསམས་ལ། དེའི་སྟེང་དུ་རྣམ་པར་སྣང་མཛད་ཀྱི་དཀྱིལ་འཁོར་ནམ་མཁའ་དང་མཉམ་པའི་སྦྱོར་བས་ཞུགས་ལ་བསྐྱེད་པར་བྱའོ། །དེ་ནས་བདག་ཉིད་དཀྱིལ་འཁོར་དུ་འཇུག་པའི་ཆོ་གས་ཞུགས་ལ་རང་གི་མགོ་ལ་མེ་ཏོག་གི་ཕྲེང་བ་གཏོར་ཏེ་བླངས་ནས་ཇི་ལྟ་བ་བཞིན་དུ་བཅིངས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་རྗེས་སུ་སྤྱད་ལ་དཀྱིལ་འཁོར་དེ་རང་གི་སྙིང་གའི་ཟླ་བར་གནས་པ་དང་གཅིག་ཏུ་གྱུར་པར་བསམས་ལ་རྗེས་སུ་སྦྱོར་བར་བྱས་ལ། རྡོ་རྗེ་དབྱིངས་ལས་གསུངས་པའི་རྣལ་འབྱོར་ཆེན་པོ་བྱའོ། །དེ་ནས་དང་པོའི་རྡོ་རྗེ་བཅིངས་ལ་བཛྲ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱ་བས་རང་གི་སྙིང་གའི་ཟླ་བའི་རྡོ་རྗེ་རྩེ་ལྔ་པ་བསམ་པར་བྱའོ། །བཛྲ་རཏྣ། ཨ་དྷི་ཏིཥྛ་སྭ་མཱཾ་ཞེས་བྱ་བས་དབྲལ་བའི་གནས་སུ་རྡོ་རྗེ་རིན་པོ་ཆེའོ། །བཛྲ་དྷརྨ་ཨ་སྭ་མཱཾ་ཞེས་བྱ་བས་ལྐོག་མའི་ཕྱོགས་སུ་རྡོ་རྗེ་པདྨ། བཛྲ་ཀརྨ་ཨ་དྷི་ཏིཥྛ་སྭ་མཱཾ་ཞེས་པས་སྤྱི་བོར་རྡོ་རྗེ་སྣ་ཚོགས་བསམ་པར་བྱའོ། །དེ་ནས་རྡོ་རྗེ་
རིན་པོ་ཆེའི་ཅོད་པན་གྱིས་དབང་བསྐུར་ལ་ཡི་གེ་གཉིས་ཀྱི་ཆོ་གས་བདག་ཉིད་གོ་བགོས་ལ་མཐར་མཉམ་པའི་ཐལ་མོས་མཉེས་པར་བྱའོ། །དེ་ནས་ཡི་གེ་བརྒྱ་པས་བརྟན་པར་བྱས་ནས་དེ་བཞིན་གཤེགས་པའི་རྡོ་རྗེ་དང་བདག་པོ་དང་མིང་གི་དབང་བསྐུར་བླངས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ནས་རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ། རྣམ་པར་སྒེག་པའི་བཅོམ་ལྡན་འདས་རྣམ་པར་སྣང་མཛད་ལ་ཕྱག་བྱས་ནས་དེ་ཁོ་ན་ཉིད་ཀྱིས། དེ་བཞིན་གཤེགས་པའི་རྡོ་རྗེ་གཟུང་ཞིང་ཆོས་ཀྱི་དྲིལ་བུ་དཀྲོལ་ལོ། །དེ་ནས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ལ། ཨོཾ་དྷཱི་ཞེས་བྱ་བ་ལན་གསུམ་བརྗོད་པར་བྱའོ། །དེ་ལྟར་རྣལ་འབྱོར་ཆེན་པོ་བསྐྱེད་ལ་དང་པོའི་རྡོ་རྗེ་བཅིངས་ཏེ་ས་ལ་བཞག་སྟེ། ཨ་ནུ་རཱ་ག་ཡ་མི་ཧཱུཾ་ཞེས་བརྗོད་ཅིང༌། བཅོམ་ལྡན་འདས་རྣམ་པར་སྣང་མཛད་ཀྱི་གཞལ་ཡས་ཁང་ནམ་མཁའི་གཏོས་ཐམས་ཅད་དང་མཉམ་པར་བསྐྱེད་པར་བྱའོ། །དེ་ནས་ལྷ་ཐམས་ཅད་ཀྱི་གནས་སུ་ཧྲཱིཿལས་སྣ་ཚོགས་པདྨའི་གདན་རྣམ་པར་བསམས་ལ་དེ་ནས་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། བདག་ཉིད་སྤྲོ་བ་བསྐྱེད་པར་བྱའོ། །དེང་དུ་བདག་ཚེ་འབྲས་བུ་ཡོད། །བདག་གི་གསོན་པ་འབྲས་བུར་བཅས། །ལྷ་དང་དམ་ཚིག་གིས་མཉམ་པར། །གྱུར་པར་བདག་ནི་ཐེ་ཚོམ་མེད། །བྱང་ཆུབ་སེམས་དང་སེམས་གཅིག་ལ། །མི་ལྡོག་པར་ནི་བདག་གྱུར་པ། །དེ་བཞིན་གཤེགས་པའི་རིགས་སུ་ནི། །དེང་བདག་སྐྱེ་བར་ཐེ་ཚོམ་མེད། །དེང་བདག་ཉི་མ་དམ་པ་སྟེ། །བདག་ནི་མཆོད་སྦྱིན་བླ་ན་མེད། །སངས་རྒྱས་ཐམས་ཅད་སྤྱན་འདྲེན་པས། །དེང་བདག་འདུས་པའི་མཆོག་ཡིན་ནོ། །ཞེས་བརྗོད་ལ་དེ་ནས་ལུས་ཐམས་ཅད་ཀྱིས་ཕྱག་བྱས་ལ། དང་པོའི་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་པོའི་མཆོག་བསྒོམ་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ་ཨོཾ་དྷཱི་ཞེས་བཟླ་བར་བྱའོ། །དེ་ནས་བདག་ཉིད་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་
བ་བཏབ་པར་གྱུར་པར་བསམས་ལ། བཅོམ་ལྡན་ཁྱོད་ལ་གསོལ་བ་ནི། །འདོད་ཆགས་ཆེན་པོ་བདེ་བ་ཆེ། །སྙིང་པོ་ཡིད་ནི་བརྟག་པ་ཉིད། །བདེ་ཆེན་མྱུར་དུ་གྲུབ་པར་མཛོད། །དེ་ནས་ལངས་ཏེ་དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་གང་བར་བསམས་ལ། དེ་བཞིན་གཤེགས་པ་ཐམས་ཅད་ལ་ཕྱག་འཚལ་བ་འདི་སྐད་བརྗོད་དོ། །བདག་ཉིད་རང་ཉིད་རྡོ་རྗེ་ཅན། །རྡོ་རྗེ་སེམས་དཔའ་བདག་རང་ཉིད། །བདག་ནི་སངས་རྒྱས་རྒྱལ་པོ་ཆེ། །སྟོབས་ཆེན་རྡོ་རྗེ་ཅན་བག་ཉིད། །བདག་ཉིད་རྣལ་འབྱོར་དབང་ཕྱུག་རྒྱལ། །ཕྱག་ན་རྡོ་རྗེ་བརྟན་བདག་ཉིད། །བདག་པོ་རྡོ་རྗེ་ཆེན་པོ་བདག །བྱིན་གྱིས་བརླབ་པ་མི་འདོར་རོ། །ཨོཾ་དྷཱི་ཞེས་བྱ་བ་བརྗོད་པར་ཡའོ། །དངོས་གྲུབ་ཆོ་ག་ཐམས་ཅད་ལ། །རྡོ་རྗེ་དྲིལ་བུ་རབ་བསྐུལ་བས། །ཆོ་ག་ལྷག་གམ་མ་ཚང་བ། །འགྲུབ་འགྱུར་སྨད་པར་མི་བྱའོ། །ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་དང༌། ཨོཾ་དྷཱི་བཛྲོ་ཏིཥྛ་མཎྜལ་ཨུ་ད་ཐ་པ་ཡེ་ཞེས་བརྗོད་ལ་དཀྱིལ་འཁོར་བཏེག་ལ་ནམ་མཁར་བཞག་སྟེ། དེ་ཉིད་ཀྱིས་བདག་ལ་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ཏེ། བཛྲོ་དྲྀཥྚི་མ་ཊ་ཞེས་བྱ་བ་མིག་གཉིས་སུ་བཀོད་ལ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །སྙིང་པོ་ཡང་དག་ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །ཨོཾ་དྷཱི་ཨ་ལས་རྐང་མཐིལ་གཉིས་སུ་སྣ་ཚོགས་རྡོ་རྗེ་བསམས་ལ་རྐང་མཐིལ་ནས་བརྩམས་ཏེ་ནམ་མཁའི་ཁམས་མ་ལུས་པའི་གཏོས་དང་མཉམ་པའི་སའི་ཆ་རྡོ་རྗེར་གྱུར་པར་བསམ་པར་བྱའོ། །རྡོ་རྗེའི་ལྟ་བས་ཀྱང་གཡོན་ནས་བསྐྲད་པ་དང༌། གཡས་ནས་འོག་བཅིང་བ་དང༌། ནམ་མཁའ་བཅིང་བ་དང༌། ཕྱོགས་དང་མཚམས་དང་དཀྱིལ་འཁོར་བཅིང་བ་བྱས་ནས་རྭ་བ་དང་དྲ་བ་བྱའོ། །དེ་ནས་སྒོ་དབྱེ་བའི་ཕྱག་རྒྱས་ཕྱེ་བ་ལ་གསང་བའི་དཀྱིལ་འཁོར་རྡོ་རྗེ་རྒྱུའི་ངོ་བོ་ཞལ་བཞི་པ་ཕྱག་བཞི་པ་ཕྱག་རྒྱ་འདི་དང་ལྡན་པས་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿཞེས་བྱ་བ་དང༌། རྡོ་རྗེ་ཁུ་ཚུར་གྱི་མཛུབ་མོ་དང་མཐེ་བོང་རྡོ་རྗེ་བྱས་པ་ནི་རྡོ་རྗེ་འཁོར་ལོའི་ཕྱག་
རྒྱ་ཞེས་བྱ་སྟེ་དཀྱིལ་འཁོར་ཐམས་ཅད་འགུགས་པར་བྱེད་པའོ། །ཨོཾ་བཛྲ་ཙཀྲ་ཨ་དྷི་ཏིཥྛ་སཏྟི་ཡ་ཧཱུཾ་ཞེས་བྱ་བའི་རིག་པའི་ཕྱག་རྒྱ་དང་ལྡན་པས་ཡེ་ཤེས་ཀྱི་དཀྱིལ་འཁོར་བྱིན་གྱིས་བརླབ་པར་བྱའོ། །འདིའི་ཕྱག་རྒྱ་ནི་རྡོ་རྗེ་ཁུ་ཚུར་གཉིས་མགལ་མེའི་འཁོར་ལོ་བསྐོར་བའི་ཚུལ་དུ་བྱའོ། །དེ་ནས་སེང་ལྡེང་ལ་སོགས་པའི་ཕུར་བུ་ཞེས་བྱ་བ་ནས་བསང་ཆུའི་བུམ་པ་གཞག་པའི་བར་སྔ་མ་བཞིན་དུ་ཐིག་གདབ་པར་བྱའོ་ཞེས་བྱ་བའི་བར་དུ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་ཆོ་ག་རྣམས་རྗེས་སུ་སྤྱད་ལ། ཚོན་དམར་པོ་དང་ལྗང་གུ་དང་སྔོན་པོ་དང་སེར་པོ་དང་དཀར་པོས་ཇི་སྐད་བཤད་པའི་ཚུལ་གྱིས་ཕྱི་རོལ་གྱི་རྭ་བ་ནས་བརྩམས་ཏེ་རྭ་བ་ཇི་ལྟ་བ་བཞིན་དུ་ཡང་དག་པར་བྲིས་ལ་སྣ་ཚོགས་པདྨའི་གདན་ལ་སོགས་པ་ཡང་དག་པར་བྲི་བར་བྱའོ། །དཀྱིལ་འཁོར་འདི་ཐམས་ཅད་རྡོ་རྗེ་སེམས་དཔའི་དཀྱིལ་འཁོར་དང་འདྲ་བས། དཀྱིལ་འཁོར་དབུས་མའི་དབུས་སུ་བཅོམ་ལྡན་འདས་རྣམ་པར་སྣང་མཛད་ཟླ་བའི་མདོག་ཅན་ཕྱག་གཡོན་པ་དེ་བཞིན་གཤེགས་པའི་ཁུ་ཚུར་གྱིས་རྡོ་རྗེ་དྲིལ་བུ་འགྱིང་བག་གིས་བསྣམས་པ། ཕྱག་གཡས་པ་ལ་དེ་བཞིན་གཤེགས་པའི་རྡོ་རྗེ་རང་གི་ཐུགས་ཀར་བསྟོད་པའི་ཚུལ་གྱིས་བསྣམས་པ་འཛུམ་པ་དང་བཅས་པ། འོད་ཟེར་དམར་པོ་འབར་བ་ཀུན་དུ་འཁྲུག་པ་དེ་བཞིན་གཤེགས་པ་ཐམས་ཅད་ཀྱི་རིན་པོ་ཆེའི་ཅོད་པན་དང༌། དར་དཔྱངས་ཀྱི་དབང་བསྐུར་བ་སྣ་ཚོགས་པདྨ་ལ་རྡོ་རྗེའི་སྐྱིལ་མོ་ཀྲུང་གིས་སྐུ་དྲང་པོར་བཞག་སྟེ་བཞུགས་པ། ཨོཾ་ས་མ་ཡ་སྟྭཾ་ཞེས་བརྗོད་ཅིང་བྲི་བར་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་རྡོ་རྗེ་ཡིད་ལས་བྱུང་བའི་གནས་སུ་རྡོ་རྗེ་མཚོན་ཆ་མ། ཕྱག་གཡོན་ན་དེ་བཞིན་གཤེགས་པའི་ཁུ་ཚུར་གྱིས་མེ་ཏོག་གི་གཞུ་བསྣམས་པ་ཕྱག་གཡས་པས་རྡོ་རྗེ་མདའ་གསོར་བ་ལ་བརྩོན་པའོ། །བཅོམ་ལྡན་འདས་ཀྱི་གཡས་ལོགས་སུ་རྡོ་རྗེ་ཀི་ལི་ཀི་ལའི་གནས་སུ་རྡོ་རྗེ་ཀི་ལི་ཀི་ལི་ལ་མ་ཕྱག་གཉིས་དེ་བཞིན་གཤེགས་པའི་ཁུ་ཚུར་བཅིངས་པས་དེ་བཞིན་གཤེགས་པའི་རྡོ་རྗེ་རང་གི་ཐུགས་ཀའི་གནས་སུ་འཁྱུད་པའི་ཚུལ་གྱིས་བཞུགས་པའོ། །བཅོམ་ལྡན་འདས་ཀྱི་རྒྱབ་ལོགས་སུ་རྡོ་རྗེ་དྲན་པའི་
གནས་སུ་རྡོ་རྗེ་དྲན་མ་དེ་བཞིན་གཤེགས་པའི་ཁུ་ཚུར་གྱིས་ཆུ་སྲིན་གྱི་རྒྱལ་མཚན་བསྣམས་ཤིང་གཡོན་པས་གདན་ལ་བསྙེམས་པ་དང་བཅས་པས་བཞུགས་པའོ། །བཅོམ་ལྡན་འདས་ཀྱི་གཡོན་ལོགས་སུ་རྡོ་རྗེ་སྙིང་པོའི་གནས་སུ་རྡོ་རྗེ་སྙིང་པོ་མ། དེ་བཞིན་གཤེགས་པའི་ཁུ་ཚུར་གྱིས་དེ་བཞིན་གཤེགས་པའི་རྡོ་རྗེ་བསྙེམས་ཚུལ་གཉིས་ཀྱིས་བཞུགས་པ་ལ་བརྩོན་པའོ། །ནང་གི་དཀྱིལ་འཁོར་དེ་ཉིད་ཀྱི་མེའི་མཚམས་སུ་རྡོ་རྗེ་མི་ཕྱེད་མ། བདེན་བྲལ་གྱི་མཚམས་སུ་རྡོ་རྗེ་སྤྲིན་མ། རླུང་གི་མཚམས་སུ་རྡོ་རྗེ་སྟོན་མ། དབང་ལྡན་གྱི་མཚམས་སུ་རྡོ་རྗེ་དགུན་མ་སྟེ། གོ་རིམས་བཞིན་དུ་མེ་ཏོག་དང༌། བདུག་སྤོས་དང༌། མར་མེ་དང༌། དྲི་སྤྱི་བོར་ཐལ་མོ་སྦྱོར་བའི་ཚུལ་གྱིས་བསྣམས་པར་རོ། །ཕྱིའི་དཀྱིལ་འཁོར་གྱི་ལྷའི་སྣམ་བུར་མེའི་མཚམས་སུ་སྒེག་མོ། དེ་བཞིན་གཤེགས་པའི་ཁུ་ཚུར་གཉིས་ཀྱིས་དེ་བཞིན་གཤེགས་པའི་རྡོ་རྗེ་བསྣམས་ནས་རྡོ་རྗེ་བསྙེམས་མའི་ཚུལ་གྱིས་བསམ་པ་གཡོས་པ་དང་རབ་ཏུ་འདུད་པའོ། །བདེན་བྲལ་གྱི་མཚམས་སུ་བཞད་མ་ཕྱག་གཡས་ན་སོའི་ཕྲེང་བ་གཉིས་དང་ལྡན་པ། དེ་བཞིན་གཤེགས་པའི་རྡོ་རྗེ་བསྣམས་ནས། རྣམ་པར་སྣང་མཛད་ལ་སོགས་པ་རང་གི་འཛུམ་པ་རྨད་དུ་བྱུང་བ་ལ་འཇོག་པ། ཕྱག་གཡོན་གདན་ལ་བསྙེམས་པའི་ཚུལ་གྱིས་བཞུགས་པའོ། །རླུང་གི་མཚམས་སུ་གླུ་ཆེན་པོ་རྡོ་རྗེ་པི་ཝང་ལེན་པར་བརྩོན་པའོ། །དབང་ལྡན་གྱི་མཚམས་སུ་གར་མ་རྡོ་རྗེ་རྩེ་གསུམ་པས་མཚན་པ་ཕྱག་གཉིས་ན་བསྣམས་ནས་གར་མཛད་པར་བཞུགས་པའོ། །ཕྱི་དང་ནང་དུ་བཅས་པའི་ཤར་སྒོ་གཉིས་སུ་རྡོ་རྗེ་ལྕགས་ཀྱུ་མ་རྡོ་རྗེ་ལྕགས་ཀྱུས་དེ་བཞིན་གཤེགས་པ་ཐམས་ཅད་འགུགས་པར་མཛད་པའོ། །ལྷོ་ཕྱོགས་ཀྱི་སྒོ་གཉིས་སུ་རྡོ་རྗེ་ཞགས་པ་མ་རྡོ་རྗེ་ཞགས་པས་དེ་བཞིན་གཤེགས་པ་ཐམས་ཅད་དཀྱིལ་འཁོར་དུ་འཇུག་པར་མཛད་པའོ། །ནུབ་ཕྱོགས་ཀྱི་སྒོ་གཉིས་སུ་རྡོ་རྗེ་ལྕགས་སྒྲོག་མ་རྡོ་རྗེ་ལྕགས་སྒྲོག་གིས་དེ་བཞིན་གཤེགས་པ་ཐམས་ཅད་འཆིང་བར་མཛད་པའོ། །བྱང་ཕྱོགས་ཀྱི་སྒོ་གཉིས་སུ་རྡོ་རྗེ་འབེབས་མ་རྡོ་རྗེ་དྲིལ་བུས་དེ་བཞིན་གཤེགས་པ་ཐམས་ཅད་དབང་
དུ་མཛད་ཅིང་ཡང་དག་པར་བཞུགས་པ་བྲི་བར་བྱའོ། །དེ་ནས་འདི་རྣམས་ཀྱི་སྙིང་པོ་གོ་རིམས་ཇི་ལྟ་བ་བཞིན་དུ་བཤད་པར་བྱའོ། །ཨོཾ་བཛྲ་དྷིཥྛ་སཱ་མ་ཀེ་མ་ཊ། ཨོཾ་བཛྲ་ཀི་ལི་ཀི་ལ་ཧཱུཾ། ཧཱུཾ་བཛྲ་སྨ་ར་བཛྲི་ཎི་བནྡྷ། ཧཱུཾ་ཏུ་ཥྱ་ཏ་བཛྲ་ཎི་ཧཱུཾ། ཧཱུཾ་བཛྲ་མེ་གྷེ། ཧཱུཾ་ཤ་རད་བཛྲི་ཧཱུཾ་བཛྲི་ཤེ་ཤི་ནི། ཧཾ་བཛྲ་ལཱ་སྱེ། ཧཱ་ས་བཛྲ་ཎི། ཨོཾ་བཛྲ་གཱི་ཏེ། ཨོཾ་བཛྲ་ནྲྀ་ཏྱ་བཛྲི། ཛཿབཛྲ་ཨཾ་ཀུ་ཤེ། ཧཱུམ་བཛྲ་པཱ་ཤེ། བཾ་བཛྲ་སྥོ་ཊེ། ཨ་བཛྲ་གྷཎྚེ། འདི་དག་ཐམས་ཅད་ལ་སྣ་ཚོགས་པདྨའི་གདན་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། སངས་རྒྱས་ལྔའི་ཅོད་པན་ཅན་སྐུ་མདོག་དཀར་པོ་རྣམ་པར་སྣང་མཛད་ལ་མངོན་པར་ཕྱོགས་པའོ། །དེ་ནས་དཀྱིལ་འཁོར་གྱི་སྒོ་ཇི་ལྟ་བ་བཞིན་དུ་ཕྱེ་ལ། མཆོད་ཡོན་ཕུལ་ཏེ། བུམ་པ་ལ་སོགས་པས། བཅོམ་ལྡན་འདས་རྣམ་པར་སྣང་མཛད་ལ་སོགས་པ་འཁོར་དང་བཅས་པ་ལ་མཆོད་པར་བྱའོ། །དྲིལ་བུ་རྩེར་བཏགས་རྒྱལ་མཚན་རྣམས། །མཚམས་ཀྱི་མདུན་དུ་གཟུགས་པར་བྱའོ། །ཕྱི་ཡི་མཚམས་ཀྱི་གནས་རྣམས་སུ། །བུམ་པ་ལྕུག་མས་རྣམ་བརྒྱན་དང༌། །རྣམ་པར་སྣང་མཛད་སྤྱན་སྔར་ནི། །དྲི་ཡི་ཆུས་བཀང་བུམ་པ་བཞག །ཁེངས་ཤིང་ནོར་བབས་རྡོ་རྗེར་བཅས། །ལྕུག་མ་ལས་ཀྱང་བཟླས་བརྗོད་བྱ། །འདི་སྐད་སྟོན་པར་འགྱུར་ཏེ། བུམ་པ་ནག་པོ་ར་རི་མེད་པ་ལྟོ་ཆེ་བ་དང༌། སྐེ་རིང་བ། མཆུ་འཕྱང་བ། རིན་པོ་ཆེ་ལ་སོགས་པ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པ། རྫས་ཐམས་ཅད་དང་ལྡན་པའི་བུམ་པ། དེ་བཞིན་གཤེགས་པའི་ཁུ་ཚུར་གྱིས་ཡོངས་སུ་བཟུང་སྟེ། རྡོ་རྗེ་མེ་ཏོག་གི་ལྕུག་མ་ལས་རྣམ་པར་སྣང་མཛད་ལ་སོགས་པའི་སྙིང་པོ་བརྒྱ་རྩ་བརྒྱད་བཟླས་ནས་ཕྱི་རོལ་དུ་ལྷ་རྣམས་ལ་རེ་རེ་དབུལ་བར་བྱའོ། །དང་པོར་ནི་བཅོམ་ལྡན་འདས་རྣམ་པར་སྣང་མཛད་ཀྱི་བུམ་པ་ཤར་སྒོར་བལྟས་པར་ཕྱི་རོལ་དུ་གཞག་པར་བྱའོ། །གཉིས་པ་ནི་ནང་གི་དཀྱིལ་འཁོར་བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་ཡང་སྔགས་འདི་ཉི་ཤུ་རྩ་གཅིག་བཟླས་ལ་གཞག་པར་བྱའོ། །ཨོཾ་མ་ཧཱ་སུ་ཁ་བཛྲ་ས་མ་ཡ་ཨ་བྷི་ཥེ་ཀ་ཛཿཧཱུཾ་བཾ་ཧོཿ། དེ་ལྟར་བུམ་པ་ཕུལ་ནས་
བུམ་པ་གང་བ་ལ་ཡང་རྣམ་པར་སྣང་མཛད་ལ་སོགས་པའི་སྙིང་པོ་བཟླས་ལ་ལྷ་རྣམས་ལ་རེ་རེ་དབུལ་བར་བྱ། དེ་ནས་བཟའ་བ་ལ་སོགས་པ་སྔ་མ་བཞིན་དུ་ཕུལ་ལ། མཆོད་པ་རྣམ་པ་ལྔ་ཀར་ཡང་སྔ་མའི་རྗེས་སུ་འབྲངས་ནས་དབུལ་བར་བྱ་བ་དང༌། རོལ་མོ་བཅུ་བོ་སྟོང་ངམ་རོལ་མོ་བཅུ་པོ་ཇི་ལྟ་བ་བཞིན་དུ་དབུལ་བར་བྱ་སྟེ། གཞན་དག་ཀྱང་དེ་བཞིན་དུ་ཤེས་པར་བྱའོ། །དེ་ནས་ཕྱི་རོལ་དུ་གཏོར་མ་བྱིན་ནས་རས་ཤིན་ཏུ་དམར་པོ་ལ་སྔ་མ་བཞིན་དུ་བཟླས་ཏེ། སྨད་གཡོགས་དང་སྟོད་གཡོགས་དང་གདོང་གཡོགས་བྱས་ལ་སྔོམ་པ་ཇི་ལྟ་བ་བཞིན་དུ་བླངས་ཏེ། ཨོཾ་སརྦ་ཡོ་ག་ཙིཏྟོ་ཏྤཱ་ད་ཡཱ་མི་ཞེས་བྱ་བས་བྱང་ཆུབ་ཆེན་པོར་སེམས་བསྐྱེད་ལ། གཡས་པའི་དེ་བཞིན་གཤེགས་པའི་ཁུ་ཚུར་གྱིས་རང་གི་རྡོ་རྗེ་བླངས་ཏེ། རང་གི་སྙིང་གར་བཞག་ནས། ཧཱུཾ་ལས་རང་གི་སྙིང་གར་རྡོ་རྗེ་བསྐྱེད་ལ་འདི་སྐད་ཅེས་བརྗོད་པར་བྱའོ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷ་ཡ་ཐཱ་སུ་ཁཾ། དེ་ནས་ཕྱི་རོལ་གྱི་སྒོར་མངོན་དུ་བལྟས་ནས་གཞག་པའི་བུམ་པའི་ཆུས་བདག་ཉིད་དབང་བསྐུར་ལ་ཇི་སྐད་དུ་བཤད་པའི་ཕྱག་འཚལ་བའི་ཕྱག་རྒྱས་བཛྲ་བཛྲ། རྡོ་རྗེ་སེམས་དཔའ་བསྡུས་པ་ན། །རྡོ་རྗེ་རིན་པོ་ཆེ་བླ་ན་མེད། །རྡོ་རྗེ་ཆོས་ཀྱི་གླུ་བླངས་བ། །རྡོ་རྗེ་ལས་ནི་བྱེད་པར་འགྱུར། །ཞེས་བྱ་བ་དང༌། རྡོ་རྗེའི་གླུ་ལེན་ཅིང་དང་པོར་ཤར་སྒོ་ནས། དཀྱིལ་འཁོར་དུ་ཞུགས་ལ་ཛཿབཛྲ་ཨཾ་ཀུ་ཤ་ལན་གསུམ་བརྗོད་ལ། རྡོ་རྗེ་ལྕགས་ཀྱུ་མས་བདག་ཉིད་བཀུག་པར་གྱུར་པར་བསམ་པར་བྱའོ། །ཡང་ལྷོ་ཕྱོགས་ཀྱི་སྒོ་ནས་དེ་བཞིན་དུ་ཞུགས་ལ། ཧཱུཾ་བཛྲ་པཱ་ཤེ་ཞེས་བརྗོད་ཅིང་རྡོ་རྗེ་ཞགས་པ་མས་བདག་ཉིད་བཅུག་པར་བསམ་པར་བྱའོ། །དེ་ནས་ནུབ་ཕྱོགས་ནས་དེ་བཞིན་དུ་ཞུགས་ལ་བཾ་བཛྲ་སྥོཊ་ཞེས་ཟློས་ཤིང་རྡོ་རྗེ་ལྕགས་སྒྲོག་མས་བདག་ཉིད་བཅིང་བཞིན་པར་བསམ་པར་བྱའོ། །དེ་ནས་དེ་བཞིན་དུ་བྱང་སྒོ་ནས་ཞུགས་ལ། ཧོ་བཛྲ་གྷཎྚེ་ཞེས་བརྗོད་ཅིང་རྡོ་རྗེ་འབེབས་པས་བདག་ཉིད་དབང་དུ་བྱས་པར་བསམ་པར་བྱའོ། །དེ་ནས་དེ་བཞིན་དུ་ཡང་ཤར་ཕྱོགས་ཀྱི་སྒོ་ནས་ཞུགས་ལ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་བདེ་བ་ཆེ། །ཁྱོད་ནི་ཀུན་དུ་བཟང་པོ་སྟེ།།
རྡོ་རྗེ་བསྙེམས་མའི་བདག་པོ་གཙོ། །རྡོ་རྗེ་སེམས་དཔའི་ཏིང་འཛིན་གྱིས། །རྡོ་རྗེ་དེ་བཞིན་རྡོ་རྗེ་འཛིན། །རྡོ་རྗེ་ཀུན་མཆོག་རྣམ་བསྒྲུབས་པ། །རྡོ་རྗེ་སེམས་དཔའ་བདག་གྲུབ་མཛད། །དེ་ནས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་ཆོ་ག་སྔ་མ་བཞིན་དུ་རྗེས་སུ་སྤྱད་ལ། མཚན་བརྒྱ་རྩ་བརྒྱད་པས་བསྟོད་ནས། རྡོ་རྗེ་མཚོན་ཆ་མ་ལ་སོགས་པའི་གསང་བའི་མཆོད་པ་བཞི་དང༌། གླུ་དང་རོལ་མོའི་མཆོད་པས་བཅོམ་ལྡན་འདས་ལ་ཡང་དག་པར་མཆོད་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨ་ཤར་སྒོར་བལྟས་པ་བྲིས་ལ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོར་པདྨ་དེར་ཇི་ལྟ་བ་བཞིན་དུ་འདུག་སྟེ། དྲི་དང་མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ལ། མཆོད་ཡོན་བླངས་ནས་རྣམ་པར་རྒྱལ་བའི་བུམ་པ་ལས་དེ་བཞིན་གཤེགས་པའི་ཁུ་ཚུར་གྱིས་ཆུ་བླངས་ལ། ཨོཾ་དྷཱི་ཨོཾ་བཛྲ་ཨ་བྷིཥིཉྩ་ཞེས་བརྗོད་ལ། དེས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་བྱའོ། །དེ་ནས་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱས་བདག་ཉིད་དབང་བསྐུར་བའི་རྡོ་རྗེ་རིན་ཆེན་གྱིས་བྱིན་གྱིས་བརླབས་པའི་རིན་ཆེན་ཅོད་པན་གྱིས་ཀྱང་དབང་བསྐུར་བར་བྱའོ། །དེ་ནས་འདིས་དེ་བཞིན་གཤེགས་པའི་རྡོ་རྗེ་དང་རྡོ་རྗེ་དྲིལ་བུ་བླང་བར་བྱའོ། །ཧཱུཾ་སརྦ་དྷརྨཱ་མ་ཧཱ་བཛྲ་དྷ་ར་ཨེ་ཥ་ཏྭཾ་ཨ་བྷི་ཥིཉྩཱ་མི་གྲྀ་ཧྞ། ཀྱེ་ཆེ་གེ་མོ་སིདྡྷ་ཨཱ། དེ་ལྟར་རྡོ་རྗེའི་དབང་བསྐུར་བ་བླངས་ནས། བདག་པོའི་དབང་བསྐུར་བ་སྔ་མ་བཞིན་དུ་བླང་བར་བྱའོ། །དེ་ནས་མིང་གི་དབང་བསྐུར་བ་བླངས་ནས་དངོས་གྲུབ་ཀྱི་རྡོ་རྗེའི་བརྟུལ་ཞུགས་བླང་བར་བྱའོ། །དེ་ནས་དེ་ཁོ་ན་ཉིད་ཀྱིས་རྡོ་རྗེ་གཟུང་ཞིང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ལ། ཨོཾ་དྷཱི་ཞེས་བྱ་བ་བཟླ་བར་བྱའོ། །དེ་ནས་མཆོད་པ་རྣམ་པ་ལྔ་དང༌། རྡོ་རྗེ་མཚོན་ཆ་མ་ལ་སོགས་པ་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ། ཚིགས་སུ་བཅད་པ་ལྔས་རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་དང༌། སྔགས་དང་ཕྱག་རྒྱ་བཞིའི་མན་ངག་བཅོམ་ལྡན་འདས་ལ་ཕྱག་བྱས་ལ། བཅོམ་ལྡན་འདས་ལས་མནོས་
ཏེ་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། རང་གི་མིང་ནས་བརྗོད་དོ། །བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ། ཨོཾ་དྷཱི་ཞེས་ཟློས་ཤིང་བཅོམ་ལྡན་འདས་རྣམ་པར་སྣང་མཛད་དཀྱིལ་འཁོར་དབུས་མའི་རང་གི་གནས་སུ་དེ་བཞིན་གཤེགས་པའི་རྡོ་རྗེར་བསམ་པར་བྱའོ། །དེ་ནས་ཨོཾ་དྷཱི་བཛྲོ་ཧཾ་ཞེས་ཟློས་ཤིང༌། དེ་བཞིན་གཤེགས་པའི་རྡོ་རྗེར་བདག་ཉིད་བསྒོམ་པར་བྱའོ། །དེ་ནས་ཨོཾ་དྷཱི་བཻ་རོ་ཙ་ན་ཧཱུཾ། ཞེས་བྱ་བས་རྡོ་རྗེ་རྣམ་པར་སྣང་མཛད་དུ་བསྒོམ་པར་བྱའོ། །དེ་བཞིན་དུ་རྡོ་རྗེ་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ། ཨ་བཛྲ་གྷཎྚེ་ཨ་ཞེས་བརྗོད་ལ། རྡོ་རྗེ་འབེབས་པའི་གནས་སུ་རྡོ་རྗེ་འབེབས་པའི་རང་བཞིན་རྡོ་རྗེ་དྲིལ་བུའི་ངོ་བོར་བསམ་པར་བྱའོ། །དེ་ནས་དྲིལ་བུ་ཨ་བཛྲ་གྷཎྚ་ཞེས་བྱ་བ་དང༌། བཛྲ་གྷཎྚོ་ཧཾ་ཞེས་བྱ་བས་རྡོ་རྗེ་དྲིལ་བུའི་ང་རྒྱལ་བསྒོམ་པར་བྱའོ། །ཨ་བཛྲ་གྷཎྚེ་བཛྲ་གྷཎྚོ་ཞེས་ཟློས་ཤིང་དྲིལ་བུ་དེ་རྡོ་རྗེ་དྲིལ་བུའི་གཟུགས་སུ་བདག་ཉིད་བསྒོམ་པར་བྱའོ། །དེ་ལྟར་དཀྱིལ་འཁོར་རབ་ཏུ་བསྒྲུབས་ནས་བསྡུ་བ་བྱས་ནས་མཚན་བརྒྱ་རྩ་བརྒྱད་པས་བསྟོད་ལ། ཇི་སྐད་དུ་བཤད་པའི་བདེ་བ་ཆེན་པོའི་རྡོ་རྗེ་ལྕགས་ཀྱུ་མ་ཐམས་ཅད་མཉམ་པ་ཉིད་ཀྱི་ཡེ་ཤེས་འཛིན་མ་ཟློས་ཤིང༌། བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པའི་དཀྱིལ་འཁོར་དུ་ཞུགས་ནས། རྡོ་རྗེ་གནོད་སྦྱིན་གྱིས་བགེགས་བསྐྲད་པ་བྱས་ལ་མཚམས་དང༌། དཀྱིལ་འཁོར་སྟེང་འོག་དང༌། ནམ་མཁའ་བཅིང་བ་དང༌། ཕྱོགས་བཅིང་བ་དང། རྭ་བ་དང༌། དྲ་བ་ཡང་བྱས་ལ་རྡོ་རྗེ་ཁུ་ཚུར་གྱིས་དཀྱིལ་འཁོར་སྒོ་རྣམས་བཅད་དོ། །རྡོ་རྗེ་སྲུང་བས་དཀྱིལ་འཁོར་གྱི་སྒོ་ཐམས་ཅད་ཀྱི་བསྲུང་བ་ཡང་དག་པར་བསྲུངས་ལ། ཨོཾ་དྷཱི་ཞེས་ཟློས་ཤིང་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ནས། བཅོམ་ལྡན་འདས་འཁོར་དང་བཅས་པ་དམ་ཚིག་གི་ཕྱག་རྒྱས་མངོན་པར་བསྒྲུབ་པའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ། དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ། ཡང་མཆོད་ཡོན་ཕུལ་ཏེ་མཆོད་པ་ལྔས་མཆོད་ཅིང་རྡོ་རྗེ་མཚོན་ཆ་
མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ་རྣམ་པར་སྒེག་པའི་དགའ་བའི་རྡོ་རྗེས་ཕྱུག་བཞི་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་བདག་ཉིད་ཅན་དུ་བསྒོམ་ཞིང༌། ཨོཾ་བཛྲ་ཨཱཏྨ་ཀོ་྅ཧཾ་ཞེས་བཟླའོ། །དེ་ནས་ཆོས་ཐམས་ཅད་རང་བཞིན་གྱིས་དག་པར་བསྒོམས། ཨོཾ་སྭ་བྷཱ་བ་ཤུདྡྷོ་྅ཧཾ་ཞེས་བཟླས་ཤིང་དེ་ནས་སརྦ་ས་མོ་྅ཧཾ་ཞེས་བཟླས་ཤིང༌། ཆོས་ཐམས་ཅད་བདག་མེད་པར་མཉམ་པ་ཉིད་ཀྱི་ལྷ་ཐམས་ཅད་བདག་ཉིད་མཉམ་པར་བསྒོམ་མོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཡང་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ནས་ཕྱག་བྱས་ལ་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཕྱག་བྱས་ལ་འདི་སྐད་ཅེས་བརྗོད་དོ། །ཁྱེད་སྔོན་ཁྱིམ་ལ་དགའ་བ་ཡི། །སྲིད་པའི་བདེ་བ་དག་བྱའི་ཕྱིར། །འདོད་པ་ཀུན་གྱི་དངོས་གྲུབ་ཅེས། །འགྲོ་བ་ཀུན་ཀྱང་གྲུབ་པར་མཛད། །དེ་ལྟར་བཀའ་ནོད་ནས་སློབ་མ་གཞུག་པར་བྱའོ། །སློབ་དཔོན་ལས་ཀྱི་ཆོ་ག་རྫོགས་སོ།། །།དེ་ནས་བསླབ་པའི་གཞི་ལྔ་ཡོངས་སུ་གཟུང་བའམ། དགེ་སྦྱོང་ངམ། དགེ་སློང་གི་བསླབ་པ་ཡོངས་སུ་བཟུང་བས་སྔར་བཤད་པའི་ཆོ་གས་རིག་པའི་སྔོམ་པ་སློབ་མས་གཟུང་བར་བྱའོ། །དེ་ནས་སློབ་དཔོན་གྱིས་ཨོཾ་སརྦ་ཡོ་ག་ཙིཏྟོ་ཏཔ་ད་ཡཱ་མི་ཞེས་བྱ་བ་བྱང་ཆུབ་ཀྱི་སེམས་བསྐྱེད་དུ་གཞུག་གོ །དེ་ནས་དེའི་སྙིང་གར་སྔ་མ་བཞིན་དུ་རྡོ་རྗེ་བསྐྱེད་ལ། དེ་ནས་རྣམ་པར་སྣང་མཛད་དུ་བྱིན་གྱིས་བརླབས་ལ། སྤོས་དང་མེ་ཏོག་ལ་སོགས་པས་མངོན་པར་མཆོད་དེ། ཡོན་གྱི་མཆོག་བླངས་ནས་ཕྱི་རོལ་ནས་ཤར་ཕྱོགས་ཀྱི་སྒོར་བལྟས་ཏེ་གནས་པའི་བུམ་པའི་ཆུས་དབང་བསྐུར་ལ། བདག་ཉིད་འཇུག་པའི་ཚུལ་གྱིས་བཅུག་ལ། དེའི་རྣ་བར་འདི་སྐད་ཅེས་བརྗོད་དོ། །ཆགས་བྲལ་གྱིས་འདུལ་འཇིག་རྟེན་རྣམས། །ཆགས་བྲལ་གྱིས་ནི་འདུལ་བར་འགྱུར། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའི་བཟླས་པ་ཡིན། །
འདོད་ཆགས་བྲལ་འདྲའི་སྡུག་བསྔལ་ནི། །གཞན་དག་ངོ་བོ་ཉིད་ཀྱིས་མེད། །དེ་བས་ཀུན་ལ་ཆགས་བྲལ་བར། །ཁྱོད་ནི་ནམ་ཡང་མ་བྱེད་ཅིག །དེ་ནས་འདི་སྐད་ཅེས་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། ངས་ཁྱེད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་འགྲུབ་པ་ཡང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་བསྐྱེད་པར་བྱ་ཡིས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་སློབ་དཔོན་རང་ཉིད་ཀྱིས། སེམས་མ་རྡོ་རྗེ་མའི་ཕྱག་རྒྱ་ཁ་ཐུར་དུ་བསྟན་པ་དང༌། གྱེན་དུ་བསྟན་པ་བཅིངས་ལ་རྡོ་རྗེ་སློབ་མའི་སྤྱི་བོར་བཞག་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་དམ་ཚིག་ཡིན་གྱིས་གལ་ཏེ་འགའ་ཞིག་ལ་སྨྲས་ན་གླང་བ་འགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང༌། མནའི་སྙིང་པོ་འདི་ལན་ཅིག་བཟླས་ནས། སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་དམ་ཚིག་གི་སྙིང་པོ་ནི་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་གཤེགས། །བཛྲོད་ཀ་ཥཿ་ཞེས་བྱ་བའོ། །དེ་ནས་སློབ་མ་དེ་ལ་འདི་སྐད་ཅེས་བརྗོད་པར་བྱའོ། །དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པས་ཁྱོད་དུས་བྱས་ནས་དམྱལ་བར་ལྟུང་བར་འགྱུར་ཏ་རེ། དེ་ནས་འདི་སྐད་ཅེས་བརྗོད་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་སྨྲོས་ཤིག །དེ་ནས་རྡོ་རྗེ་སློབ་དཔོན་གྱིས་མྱུར་དུ། རྡོ་རྗེ་སེམས་དཔའི་ཕྱག་རྒྱ་བཅིངས་ལ་དེའི་སྙིང་གར་བཞག་སྟེ། འདི་སྐད་ཅེས་བརྗོད་དུ་གཞུག་གོ །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡི་ཤེས་བླ་མེད་ནི། །དེ་རིང་ཉིད་དུ་འབབ་པར་
ཤོག །བཛྲ་ཨཱ་བེ་ཤ་ཨ་ཞེས་ལན་བརྒྱའི་བར་དུ་བཟླས་པར་བྱའོ། །ཡང་གཡོན་པའི་རྡོ་རྗེ་ཁུ་ཚུར་གྱིས་སེམས་མ་རྡོ་རྗེ་མ་དྲལ་བར་བྱ་ཞིང༌། ཨོཾ་དྷཱི། ཨ་ཨ་ཨ་ཨ་ཞེས་ཨ་བཞི་དང་བཅས་པའི་གཟུངས་ལན་བརྒྱར་བཟླ་བར་བྱ་ཞིང༌། བཅོམ་ལྡན་འདས་རྣམ་པར་སྣང་མཛད་སྐུ་མདོག་དམར་པོས་ཡོངས་སུ་གང་བར་བྱའོ། །དེ་ནས་བབས་ནས་ལྷའི་ཡེ་ཤེས་ཀྱང་སྐྱེ་བར་འགྱུར་རོ། །དེ་ནས་མེ་ཏོག་དོར་ལ་ཕྲེང་བའི་དབང་བསྐུར་བ་དང༌། གདོང་གཡོགས་དགྲོལ་བ་དང༌། དཀྱིལ་འཁོར་བསྟན་པ་དང༌། འཇུག་པའི་ཕྱག་རྒྱ་དགྲོལ་བ་དག་སློབ་དཔོན་གྱི་ཆོ་གས་བྱེད་དུ་གཞུག་གོ །དེ་ནས་སློབ་དཔོན་གྱིས་དབང་བསྐུར་བ་བྱིན་ལ་དེ་བླུད་དེ་འདི་སྐད་ཅེས་བརྗོད་དོ། །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་འགྱུར། །རྡོ་རྗེ་བདུད་རྩིའི་ཆུ་འཐུང་ཤིག །རྡོ་རྗེ་དྲིལ་བུའི་ཕྱག་རྒྱ་དག །གལ་ཏེ་དཀྱིལ་འཁོར་མ་མཐོང་སྨྲས། །དད་པ་མེད་པས་བགད་པའམ། །སྐྱེ་བོ་འདུས་ནང་ན་གནས་སྨྲས། །དེ་ནས་རྡོ་རྗེ་རིན་པོ་ཆེའི་ཕྱག་རྒྱས་དབང་བསྐུར་བ་དང༌། རྡོ་རྗེ་རིན་པོ་ཆེའི་ཅོད་པན་དང༌། དར་དཔྱངས་ཀྱི་དབང་བསྐུར་བ་བྱིན་ལ། རྡོ་རྗེ་དང་བདག་པོ་དང་མིང་གི་དབང་བསྐུར་བ་དང༌། དངོས་གྲུབ་ཀྱི་རྡོ་རྗེའི་བརྟུལ་ཞུགས་ཀྱང་སྦྱིན་པར་བྱའོ། །དེ་ནས་དེ་ཁོ་ན་ཉིད་ཀྱིས་རྡོ་རྗེ་བྱིན་ལ། ཆོས་ཀྱི་རྡོ་རྗེ་དྲིལ་བུ་དཀྲོལ་དུ་གཞུག་ཅིང༌། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་པར་བྱ་བའི་ཕྱིར་མན་ངག་བསླབ་པར་བྱའོ། །དེ་ནས་མེ་ཏོག་ལ་སོགས་པ་དང༌། རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་དེ་ལེགས་པར་མཆོད་ལ། ཨོཾ་དྷཱི་ཞེས་བྱ་བའི་སྔགས་བྱིན་ལ་ཕྱག་རྒྱ་ཆེན་པོ་ལ་སོགས་པ་བཞི་བཅིངས་པ་བསླབ་པར་བྱའོ། །ཆོ་ག་ལྷག་མ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པ་ལས་ཤེས་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྫོགས་སོ།། །།ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱའི་ཆོ་ག་བསྟན་པར་བྱ་བའི་ཕྱིར་བསྒྲུབ་པར་བྱ་ཞེས་བྱ་བ་ལ་སོགས་
པ་གསུངས་ཏེ། འདི་བསྒྲུབས་པས་ན་སྒྲུབ་པ་སྟེ། སྒྲུབ་པའི་ཐབས་སོ། །འདིར་དེ་ཇི་ལྟ་བུ་ཞེ་ན་དེ་བཞིན་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་དཔལ་རྡོ་རྗེ་སེམས་དཔའི་སྒྲུབ་པ་གསུངས་པས། དེ་བཞིན་དུ་དཔལ་རྣམ་པར་སྣང་མཛད་ཀྱི་སྒྲུབ་པ་ལ་ཡང་དེ་ལྟར་བྱ་བར་ཤེས་པར་བྱའོ་ཞེས་བྱ་བའི་ཐ་ཚིག་གོ །ཡིད་ལ་འདོད་པའི་དངོས་གྲུབ་རྣམས། །ཞེས་བྱ་བ་གསུངས་ཏེ། ཇི་ལྟར་རྡོ་རེ་སེམས་དཔའ་བསྒྲུབས་པས་ཡིད་ལ་མངོན་པར་འདོད་པ་བསྒྲུབ་པའི་འབྲས་བུའི་ཚུལ་གྲུབ་པར་འདོད་པ་དེ་བཞིན་དུ་རྣམ་པར་སྣང་མཛད་བསྒྲུབ་པར་འགྱུར་རོ་ཞེས་སྟོན་ཏོ། །དོན་ཡོད་པ་དང་ཐོགས་པ་མེད་པར་མྱུར་དུ་དམ་པ་གྲུབ་པ་ཡིན་ཏེ་ཞེས་བྱ་བ་ནི་ཇི་ལྟར་རྡོ་རྗེ་སེམས་དཔའ་བསྒྲུབས་པས་དོན་ཡོད་ཅིང་འབྲས་བུ་དང་བཅས་པ་གཞོམ་པར་མི་ནུས་པས། ཐོགས་པ་མེད་པ་ཡིན་པ་དང༌། མྱུར་བ་སྟེ་ཚེ་འདི་ཉིད་ལ་སངས་རྒྱས་ཉིད་དམ་རྡོ་རྗེ་འཛིན་པ་ཉིད་ཀྱི་མཚན་ཉིད་ཀྱི་དངོས་གྲུབ་ཏུ་འགྱུར་པ་ཡིན་པ་དེ་བཞིན་དུ་རྣམ་པར་སྣང་མཛད་བསྒྲུབས་པས་ཀྱང་འབྲས་བུ་འབྱུང་བར་འགྱུར་རོ་ཞེས་སྟོན་ཏོ། འདི་སྐད་སྟོན་ཏེ་བཛྲ་ཨཉྫ་ལི་ཞེས་བྱ་བས་རྡོ་རྗེ་ཐལ་མོ་བཅིང་པར་བྱའོ། །དེ་ནས་བཛྲ་བནྡྷ་ཞེས་བྱ་བས་རྡོ་རྗེ་བསྡམས་པ་བཅིངས་ལ། བཛྲ་བནྡྷ་ཏྲཊ་ཅེས་བྱ་པས་རྡོ་རྗེ་བསྡམས་པས་སྙིང་གར་ལན་གསུམ་དྲལ་བར་བྱའོ། །དེ་ནས་བཛྲ་ཨཱ་བེ་ཤ་ཞེས་བྱ་བས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ་ཨ་ཞེས་པས་བདག་ཉིད་དབབ་པར་བྱའོ། །ཏིཥྛ་བཛྲ་ཞེས་བྱ་བས་དབབ་པའི་ཕྱག་རྒྱ་རང་གི་སྙིང་གར་བཀྲོལ་ལ། བཛྲ་མུཥིཊ་ཞེས་ཟློས་ཤིང་དམ་ཚིག་གི་རྡོ་རྗེ་ཁུ་ཚུར་བཅིངས་ལ། ཨོཾ་བཛྲ་སིནྡྷ་བཾ་ཞེས་བརྗོད་པར་བྱའོ། །དེ་ནས་ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ལ། ཧཱུཾ་ཉིད་ཟློས་ཤིང་ཕྱག་རྒྱ་བཅིངས་པ་ཐམས་ཅད་རང་དབང་དུ་བྱའོ། །དེ་ནས་སྔ་མ་བཞིན་དུ་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིང་པར་བྱའོ། །དེ་ནས་སྔར་བཤད་པའི་ཚུལ་གྱིས་གསང་བའི་ལྕགས་ཀྱུ་མ་བཅིངས་ལ་ཡེ་ཤེས་སེམས་དཔའི་རང་བཞིན་ཅན་གྱི་རྣ་པར་སྣང་མཛད་ལུས་ལ་བཅུག་ལ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་བཅིངས་ལས་མ་ཡ་
སྟྭཾ། ཞེས་བརྗོད་དེ་འོད་ཀྱི་དཀྱིལ་འཁོར་འོད་ཟེར་དམར་པོ་འབར་བ་ཀུན་དུ་འཁྲུག་པ་བསྐྱེད་ནས་ས་མ་ཡ་སྟྭཾ། ཨ་ཧཾ་ཨོཾ་དྷཱི་ཞེས་ལན་གསུམ་བཟླས་ཏེ། རང་གི་ལུས་ཀྱི་ནང་དུ་ཆུད་པའི་བཅོམ་ལྡན་འདས་དང་བདག་ཉིད་ཆུ་དང་འོ་མ་ལྟར་གཅིག་ཏུ་གྱུར་པར་བསམ་པར་བྱའོ། །དེ་ནས་ཆོས་ཀྱི་ཕྱག་རྒྱ་ལྕེ་ལ་བཀོད་ཅིང༌། ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་ཡང་བཅིངས་ལ། དེ་བཞིན་དུ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་སངས་རྒྱས་ཐམས་ཅད་ལུས་ལ་བཅུག་ལ། རང་གི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་དེ་རྣམས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དང་པོས་རྡོ་རྗེ་བཅིངས་ཏེ། སྔ་མ་བཞིན་དུ་བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ་བཛྲ་ཨ་དྷི་ཏིཥྛ་སྭ་མཱཾ་ཞེས་བྱ་བས་བྱིན་གྱིས་བརླབས་ནས། རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ཏེ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྣམས་རྗེས་སུ་སྤྱང་ལ་རྡོ་རྗེ་མཚོན་ཆ་མ་ལ་སོགས་པ་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་ནས། རྣམ་པར་སྒེག་པའི་དགའ་བྱེད་རྡོ་རྗེའི་བཅོམ་ལྡན་འདས་ལ་ཕྱག་བྱས་ནས་ཕྱག་བཞི་ཡང་བྱ་སྟེ། དེ་ཉིད་ཀྱིས་ནི་རྡོ་རྗེ་གཟུང། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེ། །བྱིན་གྱིས་བརླབས་ནས་སྙིང་པོ་བཟླས། །ཞེས་བྱ་བ་རང་གི་སྙིང་གར་གནས་པའི་དེ་བཞིན་གཤེགས་པའི་རྡོ་རྗེ་ལ། ཨོཾ་དྷཱི་ཞེས་བྱ་བ་ཡིད་ཀྱིས་བྲིས་ལ། རྡོ་རྗེ་དམ་ཚིག་གིས་ཟློས་ཤིང་ཕྱག་རྒྱ་ཆེན་པོ་བཅིངས་ལ་བསྒོམ་པར་བྱའོ། །དེ་ལྟར་བྱིན་གྱིས་བརླབས་པ་ལ་སོགས་པ་ལན་ཅིག་བྱས་ན་ཇི་སྲིད་ཟླ་བ་གཅིག་གམ་ཟླ་བ་དྲུག་གམ་ལོ་གཅིག་གིས་བདག་ཉིད་རྣམ་པ་སྣང་མཛད་དུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཉ་བ་ལ་མཚན་ཐོག་ཐག་བསྒོམ་པར་བྱའོ། །དེ་ནས་ཉི་མ་འཆར་བའི་དུས་སུ་དེ་བཞིན་གཤེགས་པར་འགྱུར་རོ། །གལ་ཏེ་རས་ལ་བསྒྲུབ་པར་འདོད་ན་སྔར་བཤད་པའི་ཚུལ་གྱིས་མཚན་མ་ཐོབ་པར་གྱུར་པ་དང༌། རས་ལ་བཅོམ་ལྡན་འདས་རྣམ་པར་སྣང་མཛད་འདྲིར་གཞུག་པར་བྱ་སྟེ། དེའི་
ཕྱོགས་དང་མཚམས་རྣམས་སུ་དེ་བཞིན་གཤེགས་པའི་དཀྱིལ་འཁོར་ལས་བཤད་པའི་དེ་བཞིན་གཤེགས་པ་བརྒྱད་བྲིས་ལ། དེའི་མདུན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ལ་རས་རིས་ལ་བཅོམ་ལྡན་འདས་སྤྱན་དྲངས་ལ་མཆོད་པ་ཐམས་ཅད་ཀྱིས་ཇི་ལྟར་དེ་བཞིན་དུ་ཡང་དག་པར་མཆོད་ལ་ཕྱག་བྱས་ནས་མདུན་དུ་འདུག་ལ་སྙིང་གར་གནས་པའི་དེ་བཞིན་གཤེགས་པའི་རྡོ་རྗེའི་དབུས་སུ་ཨོཾ་དྷཱི་ཞེས་བྱ་བ་ཡིད་ཀྱིས་བྲིས་ལ། བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་བཟླས་བརྗོད་འབུམ་ཇི་ལྟ་བ་བཞིན་དུ་བྱའོ། །དེ་ནས་ཟླ་བ་ཉ་བ་ལ་མཚན་ཐོག་ཐག་བཟླས་བརྗོད་བྱའོ། །མཚན་ཕྱེད་ན་བདུད་ཀྱི་དཔུང་མཐོང་བར་འགྱུར་ལ་དེ་བཞིན་དུ་བདུད་ཐམས་ཅད་བཅོམ་པས་གཞོམ་པར་བྱའོ། །དེ་ནས་དེ་བཞིན་དུ་ཕྱག་རྒྱ་ཆེན་པོ་བཅིངས་ལ་བསྒོམ་པར་བྱས་ལ་ནང་པར་དེ་བཞིན་གཤེགས་པ་ཉིད་དམ། བྱང་ཆུབ་སེམས་དཔའ་ཆེན་པོ་ཉིད་ཐོབ་པར་འགྱུར་རོ། །གལ་ཏེ་རྡོ་རྗེ་འཛིན་པ་ཆེན་པོ་ཉིད་ཐོབ་པར་འདོད་ན་དེ་བཞིན་དུ་མཚན་མ་ཐོབ་པས་རྡོ་རྗེ་སེམས་དཔའི་སྐུ་གཟུགས་སྔར་བཤད་པའི་མཚན་ཉིད་ཅན་བྱེད་དུ་གཞུག་གོ །དེ་ནས་དེའི་མདུན་དུ་དེ་བཞིན་གཤེགས་པའི་རྣལ་འབྱོར་བྱས་ལ་སྐུ་གཟུགས་ལ་རྡོ་རྗེ་སེམས་དཔའ་གསང་བའི་ལྕགས་ཀྱུ་མས་སྤྱན་དྲངས་ལ། དེ་བཞིན་གཤེགས་པའི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཨོཾ་དྷཱི་ཞེས་བརྗོད་པས་དེ་བཞིན་གཤེགས་པའི་ཆོས་ཀྱི་ཕྱག་རྒྱ་རྡོ་རྗེ་སེམས་དཔའི་ལྔ་གསལ་ལ་བསམས་ནས། རྡོ་རྗེ་སེམས་དཔའི་ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་ཡང་ཉེ་བར་བསྟན་པར་བྱའོ། །དེ་ནས་སངས་རྒྱས་ལྔའི་ཅོད་པན་གྱིས་དབང་བསྐུར་ལ་མཆོད་པ་རྣམ་པ་ལྔ་དང༌། རྡོ་རྗེ་མཚོན་ཆ་མ་ལ་སོགས་པ། དེ་བཞིན་གཤེགས་པའི་ཕྱག་རྒྱ་བཅུ་གཉིས་ཀྱིས་ཡང་དག་པར་མཆོད་ནས་རྣམ་པར་སྒེག་པའི་དགའ་བའི་རྡོ་རྗེ་དང༌། ཕྱག་བཞིས་ཕྱག་བྱའོ། །དེ་ནས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། ཨོཾ་དྷཱི་ཞེས་བྱ་བ་ཟློས་ཤིང་རྡོ་རྗེ་སེམས་དཔའ་བདག་ཉིད་བསྒོམས་ན་ཟླ་བ་དྲུག་ན་རྡོ་རྗེ་འཛིན་པར་འགྱུར་རོ། །གལ་ཏེ་དེ་བཞིན་གཤེགས་པའི་སྐུ་གཟུགས་ལ་དེ་བཞིན་གཤེགས་པ་
འགུགས་ན་དེ་བཞིན་དུ་མཚན་མ་ཐོབ་པས། དེའི་མདུན་དུ་འདུག་ལ་གསང་བའི་ལྕགས་ཀྱུ་མ་བཅིངས་ཏེ། ཨོཾ་དྷཱི་ཞེས་བྱ་བས་ཉིན་རེ་ཞིང་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས་བསྒྲུབ་པར་བྱའོ། །དེ་ནས་བཟླ་པ་ཕྱེད་ཀྱིས་ཐམས་ཅད་སྩོལ་བར་འགྱུར་རོ།། དེ་ནས་དེ་བཞིན་གཤེགས་པའི་ཕྱག་རྒྱ་ཆེན་པོས་བདག་ཉིད་དེ་བཞིན་གཤེགས་པ་བསྒྲུབ་པར་འདོད་ན་དེ་བཞིན་དུ་མཚན་མ་ཐོབ་ནས་ཕྱག་རྒྱ་ཆེན་པོ་བཅིངས་ལ་ལ་བ་ཕྱེད་ཙམ་བསྒོམས་ནས་མཐར་མཚན་ཐོག་ཐག་བསྒོམས་ན་དེའི་འོག་ཏུ་དེ་བཞིན་གཤེགས་པར་འགྱུར་རོ། །དེ་ནས་མ་བསྒྲུབས་པའི་ཞེས་བྱ་བ་ལ་སོགས་པ་བཤད་མ་ཐག་པའི་བསྒྲུབས་པས་མ་བསྒྲུབས་པའི་སྙིང་པོ་ནི་མ་བསྒྲུབས་པ་སྟེ། མ་བསྒྲུབས་པའི་སྙིང་པོ་ལན་ཅིག་བཟླས་པས་ཐམས་ཅད་བསྲུང་བ་ལ་སོགས་པའི་ལས་རྣམས་བྱེད་པར་འགྱུར་རོ། །ཐམས་ཅད་བསྲུང་བ་ལ་སོགས་པ་རྡོ་རྗེ་གཙུག་ཏོར་གྱིས་སོ་ཞེས་བྱ་བ་ནི་སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ། རྡོ་རྗེ་བསྡམས་པ་ལག་མཐིལ་ཕྱེ་བ་བཅིངས་ལ། མཐེ་བོ་གཉིས་དཔའ་བོའི་སྐྱིལ་མོ་ཀྲུང་དུ་བྱས་ལ་མཛུབ་མོ་གཉིས་གཤིབས་ཏེ་རྩེ་མོ་བྱས་ནས། ཨོཾ་དྷཱི་ཞེས་བྱ་བ་ཟློས་ཤིང་སྤྱི་གཙུག་ཏུ་གཞག་ལ་བསྒྲུབ་པར་བྱ་བ་དང༌། ལྷན་ཅིག་ཏུ་གྱུར་པར་བས་ལ་ཡིད་ཀྱིས་བསྒྲུབ་པར་བྱ་བ་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དབུའི་གཙུག་ཏོར་དང་ལྡན་པའི། དེ་བཞིན་གཤེགས་པའི་སྐུར་བསམ་པར་བྱའོ། །དེ་ལྟ་བུས་ནི་ཐམས་ཅད་བསྲུང་བར་འགྱུར་རོ། །སེམས་ཅན་ཐམས་ཅད་དབང་དུ་བྱ་བ་ལ་ནི་རྡོ་རྗེ་མཛོད་སྤུས་སོ་ཞེས་བྱ་བ་ནི་དེ་བཞིན་དུ་དེ་བཞིན་གཤེགས་པའི་སྦྱོར་བ་བྱས་ལ། བཤད་མ་ཐག་པའི་ཕྱག་རྒྱས་བཟློག་ནས་མཛོད་སྤུ་རུ་མཛུབ་མོའི་རྩེ་མོ་གཉིས་བཞག་ལ། མཛོད་སྤུའི་ཕྱོགས་ནས་རིག་པའི་རྒྱལ་པོ་རྡོ་རྗེ་མཛོད་སྤུ་སྤྲོས་ལ་དེས་བསྒྲུབ་པར་བྱ་བ་ཞལ་གྱིས་བཞེས་ཏེ་ཟིལ་གྱིས་མནན་ཏེ། རང་གི་རྐང་མཐིལ་དུ་བབས་ཤིང་རང་དབང་དུ་བྱ་བར་བསམ་པར་བྱས་ཏེ། དེ་ལྟ་བུས་དབང་དུ་བྱས་པར་འགྱུར་རོ། །ཆོས་ཉིད་ཐམས་ཅད་ཐོབ་པ་ལ་ནི་རྡོ་རྗེ་ཆོས་ཀྱིས་སོ་ཞེས་བྱ་བ་ནི། དེ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ། ཐམས་ཅད་
བསྲུང་བའི་ཕྱག་རྒྱ་དེ་ཉིད་སྙིང་གར་བཞག་སྟེ། ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམ་ཞིང་རྡོ་རྗེ་ཆོས་ཀྱི་སྐུར་ཡང་བདག་ཉིད་བསམ་པར་བྱ་སྟེ། དེ་ལྟ་བུས་ནི་ཆོས་ཐམས་ཅད་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་མཆོད་པའི་དངོས་གྲུབ་ནི་རྡོ་རྗེ་མཆོད་པས་སོ་ཞེས་བྱ་བ་ནི་སྔ་མ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ་བཤད་མ་ཐག་པའི་ཕྱག་རྒྱ་གར་གྱི་ཁུ་ཚུར་གྱིས་བསྐོར་ལ་མཁུར་བ་སྤྱི་གཙུག་ཏུ་གཞག་པར་བྱ་ཞིང༌། རྡོ་རྗེ་མཚོན་ཆ་མ་ལ་སོགས་པ་མཆོད་པ་རྣམས་ཀྱིས་བདག་ཉིད་མཆོད་པར་བསམ་པར་བྱ་སྟེ། དེ་ལྟ་བུས་ནི་མཆོད་པ་ཐམས་ཅད་འགྲུབ་པར་འགྱུར་རོ། །གདུག་པ་ཐམས་ཅད་འདུལ་བ་ལ་ནི་རྡོ་རྗེ་ཁྲོ་བོས་སོ་ཞེས་བྱ་བ་ནི། དེ་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ་རྡོ་རྗེ་ཁུ་ཚུར་གཉིས་བཅིངས་པ་སྟེ། རྡོ་རྗེ་ཧཱུཾ་མཛད་དུ་བདག་ཉིད་བསམས་ལ་མཛུབ་མོ་གཉིས་ཀྱིས་སྡིགས་མཛུབ་བྱ་ཞིང་རང་གི་སྙིང་གར་རྡོ་རྗེའི་རིགས་རྣམས་སྤྲོས་ལ་ངེས་གདུག་པ་ཐམས་ཅད་གདུལ་བར་བྱའོ། །བྱང་ཆུབ་ཀྱི་སྤྱོད་པ་མ་ལུས་པར་རྫོགས་པར་བྱ་བ་ལ་ནི་རྡོ་རྗེ་སྤྱོད་པའི་ཕྱག་རྒྱ་སོ་ཞེས་བྱ་བ་ནི་བཞིན་དུ་དེ་བཞིན་གཤེགས་པའི་རྣལ་འབྱོར་བྱས་ལ་དེ་བཞིན་གཤེགས་པའི་ཁུ་ཚུར་གཉིས་ཀྱིས་སྦྱིན་པ་གཏོང་བ་ལྟར་བྱ་ཞིང༌། ཐམས་ཅད་སྒྲོལ་བ་ལ་སོགས་པའི་ཚུལ་གྱིས་དབྱེ་བ་མཐའ་ཡས་པ་དང༌། ནམ་མཁའི་མཛོད་ཀྱི་ཏིང་ངེ་འཛིན་གྱིས་ནམ་མཁའི་ཁམས་ཐམས་ཅད་གང་བའི་སྦྱིན་པ་གཏོང་བར་བྱེད་པར་བདག་གཉིད་བསམ་པར་བྱའོ། །བདུད་ཐམས་ཅད་གཞོམ་པ་ལ་ནི་བདུད་ཐམས་ཅད་འཇོམས་པར་བྱེད་པས་སོ་ཞེས་བྱ་བ་ནི་དེ་བཞིན་གཤེགས་པའི་རྣལ་འབྱོར་བྱས་ལ། གཡོན་པའི་དེ་བཞིན་གཤེགས་པའི་ཁུ་ཚུར་སྙིང་གར་བཞག་ལ་གཡས་པའི་དེ་བཞིན་གཤེགས་པའི་ཁུ་ཚུར་གྱི་སོར་མོ་ཐམས་ཅད་བརྐྱང་བས་ས་ལ་རེག་པར་བྱ་ཞིང༌། དེ་བཞིན་གཤེགས་པ་མི་བསྐྱོད་པའི་སྐུར་བདག་ཉིད་བསམས་ལ་རང་གི་ལུས་ལས་བྱུང་བའི་རྡོ་རྗེ་འཛིན་པ་ལ་སོགས་པས་བདུད་བཅོམ་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་བདུད་ཐམས་ཅད་བཅོམ་པར་འགྱུར་རོ། །འདིར་རང་གི་སྙིང་པོས་ཀྱང་རྡོ་རྗེ་སེམས་དཔར་ལྷག་པར་མོས་
པར་བྱའོ། །དེ་བཞིན་གཤེགས་པ་ཐམས་ཅད་ཉིད་དུ་བྱ་བ་ལ་ནི་རྡོ་རྗེ་ཡེ་ཤེས་ཀྱི་ཁུ་ཚུར་གྱིས་སོ་ཞེས་བྱ་བ་ནི། དེ་བཞིན་དུ་རྣམ་པར་སྣང་མཛད་ཀྱི་སྦྱོར་བ་བྱས་ལ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། ཇི་སྲིད་བདག་ཉིད་དེའི་གཟུགས་སུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །བདེ་བ་ཆེན་པོ་རྡོ་རྗེ་གསང་བ་ནི་དེ་བཞིན་གཤེགས་པའི་དཀྱིལ་འཁོར་ཏེ། དེ་ལས་དེ་བཞིན་གཤེགས་པ་ཐམས་ཅད་ཀྱི་བདེ་བ་ཆེན་པོ་རྡོ་རྗེ་གསང་བ་ཉིད་ཀྱི་ཆོ་ག་རྒྱས་པ་སྟེ། དེ་སྟོན་པར་བྱེད་པའི་རྟོག་པའི་རྒྱུན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པར་ཙ་བའི་རྒྱུད་ལས། དེ་བཞིན་གཤེགས་པའི་རྟོག་པ་བཤད་པ་རྫོགས་སོ།། །།དེ་ལྟར་དེ་བཞིན་གཤེགས་པས་འདུལ་བའི་སེམས་ཅན་རྣམས་རྗེས་སུ་གཟུང་བར་བྱ་བའི་ཕྱིར་དེ་བཞིན་གཤེགས་པའི་རྟོག་པ་བསྟན་ནས། ད་མི་ཁྲོ་བས་ཁྲོ་བ་སྤང་བའི་ཕྱིར། དེ་ནས་བཅོམ་ལྡན་ལྡས་ཞེས་བྱ་བ་ལ་སོགས་པས་རྡོ་རྗེ་རིགས་ཀྱི་རྟོག་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། དང་པོ་སྦྱོར་བའི་རྗེས་ཐོགས་ཉིད་ལའོ། །འདིར་དང་པོ་སྦྱོར་བ་ནི་དཔལ་རྡོ་རྗེ་སེམས་དཔའི་ཀྱིལ་འཁོར་ཆེན་པོར་བཤད་པ་ཉིད་དོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །ཐོགས་པ་མེད་པ་ནི་མི་ཆོམས་པའོ། །དོན་ཡོད་པ་ནི་འབྲས་བུ་ཡོད་པའོ། །བཀའ་ནི་ལུང་བསྒོ་བའོ། །དེ་ཉིད་ཀྱི་བསྟན་པ་འདི་ལ་མངའ་བས་ན་དེ་བཞིན་གཤེགས་པ་ཐོགས་པ་མེད་ཅིང་དོན་ཡོད་པའི་བཀའི་བསྟན་པ་ལ་རྡོ་རྗེ་སེམས་དཔའ་ལ་གསོལ་བ་བཏབ་པོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོ་ནི་གཉིས་སུ་མེད་པའི་ཐུགས་རྡོ་རྗེ་ཆེན་པོའོ། །དེས་བསྐྱེད་པའི་རྡོ་རྗེའི་རིགས་ནི་ཐབས་སོ། །དེ་ཉིད་ནི་བདེ་བ་ཆེན་པོའི་ཁྲོ་བོ་ཐོབ་པའི་ཐབས་ཡིན་པའི་ཕྱིར་བདེ་བ་ཆེན་པོའི་ཁྲོ་བོ་སྟེ། དེ་ལས་སྐྱེ་ཞིང་དེའི་རང་བཞིན་ཡིན་པའི་ཕྱིར་བདེ་བ་ཆེན་པོའོ། །དེ་ལ་དམིགས་པའི་ཏིང་ངེ་འཛིན་གང་
ཡིན་པ་དེ་ལ་ནི་མིང་དེ་སྐད་ཅེས་བྱ་སྟེ། དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་པའོ། །རང་གི་རྡོ་རྗེ་སེམས་དཔའ་ནི་རང་ཉིད་ཀྱི་རྡོ་རྗེ་སེམས་དཔའ་སྟེ། རང་གི་བྱང་ཆུབ་ཀྱི་ཐུགས་ཞེས་བྱ་བའི་ཐ་ཚིག་གོ །དེ་ལ་གསོལ་བ་བཏབ་པོ་ཞེས་བྱ་བ་ནི་གསོལ་བ་བཏབ་པར་འགྱུར་རོ། །བདེ་བ་ཆེན་པོ་རབ་གྲུབ་ཕྱིར། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །གདུག་པ་ཐམས་ཅད་གཞོམ་པའི་ཕྱིར། །རང་རིགས་སྤྲུལ་མཛད་རྡོ་རྗེ་འཛིན། །ཅེས་བྱ་བ་ནི་གདུག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་གདུག་པ་ཐམས་ཅད་དེ། དྲག་པོ་ལ་སོགས་པའོ། །དེ་རྣམས་གཞོམ་པ་ནི་སྡིག་པ་ལས་བཟློག་པའི་ཕྱིར་བཙིར་ཞིང་ཚར་གཅོད་པའོ། །རང་གི་རིགས་ནི་རྡོ་རྗེའི་རིགས་སོ། །སྤྲུལ་པར་མཛོད་ཅིག་པ་ནི་སྐྱེད་པར་མཛོད་ཅིག་པའོ། །རྡོ་རྗེ་འཛིན་ཅེས་བྱ་བ་ནི་བོད་པའོ། །དེ་ནས་ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ཉིད་ལ་བཅོམ་ལྡན་འདས་རྡོ་རྗེ་སེམས་དཔའ་ཁྲོ་བོ་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱི་ཞེས་བྱ་བ་ལས་གོས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་བཀའ་ནི་གདུག་པ་གདུལ་བར་བྱ་བའི་ཕྱིར་ལུང་བསྒོ་བའོ། །ཨོཾ་རཀྣ་ཛྭ་ལ་ཞེས་བྱ་བ་ལ་སོགས་པ་ནི་སྔགས་སོ། །དེའི་མི་ཕྱེད་པའི་ཏིང་ངེ་འཛིན་ནི་རྡོ་རྗེ་རིགས་ཀྱི་དཀྱིལ་འཁོར་རོ། །སྤྲུལ་པ་དེས་སེམས་ཅན་གྱི་དོན་མཛད་པས་མིང་དེ་སྐད་ཅེས་བྱ་བའི་རྣམ་པར་གནོན་པ་དེ་མཛད་པའོ། །རབ་ཏུ་དགའ་བའི་རྡོ་རྗེ་ཁྲོ་བོ་ཞེས་བྱ་གསུངས་སོ་ཞེས་བྱ་བ་ལ་རབ་ཏུ་དགའ་བ་ནི་རྡོ་རྗེ་སེམས་དཔའ་སྟེ། དེ་ལས་བྱུང་བའི་རྡོ་རྗེ་ཁྲོ་བོ་ནི་རབ་ཏུ་དགའ་བའི་རྡོ་རྗེ་ཁྲོ་བོ་སྟེ། བཅོམ་ལྡན་འདས་ཐུགས་རྗེ་ཆེན་པོའི་སྟོབས་ཀྱིས་གདུག་པ་གདུལ་བར་བྱ་བའི་ཕྱིར་རྡོ་རྗེའི་རིགས་གང་ཞིག་སྟོན་པར་མཛད་པ་དེ་སྟོན་པར་བྱེ་དཔའི་སྔགས་ལ་ཡང་ཉེ་བར་གདགས་པས་རབ་ཏུ་དགའ་བའི་རྡོ་རྗེ་ཁྲོ་བོ་ཞེས་བྱ་བ་སྟེ། དེ་གསུངས་པ་ནི་བཀའ་སྩལ་པའོ། །འདི་ནི་ཞེས་བྱ་བ་ནི་ཐུགས་ལ་གནས་པའོ། །དེ་ནས་ཞེས་བྱ་བ་ལ་སོགས་པ་ལ་བཅོམ་ལྡན་འདས་ཕྱག་ན་རྡོ་རྗེའི་རྡོ་རྗེ་ལས་བྱུང་སྟེ། དཀྱིལ་འཁོར་
ཆེན་པོའི་ཚུལ་གྱིས་བཞུགས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རྡོ་རྗེ་སེམས་དཔའ་རབ་ཏུ་དགའ་བའི་རྡོ་རྗེ་ཁྲོ་བོའི་སྔགས་གསུངས་པ་ཙམ་གྱི་རྗེས་ཐོགས་ཉིད་ལ་བཅོམ་ལྡན་འདས་ཕྱག་ན་རྡོ་རྗེའི་ཕྱག་ན་གནས་པའི་རྡོ་རྗེ་ལས་སོ། །ཀུན་ནས་དམར་པོ་འབར་བའི་སྙིང་པོ་ཞེས་བྱ་བ་ནི་ཀུན་ནས་དམར་པོ་འབར་བ་སྟེ་དེའི་སྙིང་པོ་ནི་དེའི་དབུས་ན་བཞུགས་པས་ཞེས་བྱ་བའི་ཐ་ཚིག་གོ །སྨིན་མ་འགྱུར་ཞིང་ཁྲོ་གཉེར་བསྡུ་བ་གང་ཡིན་པ་དེ་ལ་དེ་སྐད་ཅེས་བྱ་ལ། དེ་བཞིན་དུ་སྨར་གསེར་གྱི་མདོག་ཏུ་གནས་པ་དང༌། སྤྱན་དམར་བ་གང་ཡིན་པ་དེ་ལ་མིང་དེ་སྐད་ཅེས་བྱའོ། །རྡོ་རྗེ་མཆེ་བ་གཉིས་གཙིགས་པ་ནི་ཤིན་ཏུ་ཁྲོ་བར་སྟོན་པར་བྱེད་པའོ། །སྒྲོས་རྣམ་པར་གནོན་པ་ནི་མ་མཆུ་མནན་པའོ། །དེ་ལྟར་མ་མཆུ་རྣམ་པར་གནོན་པ་ཉིད་ཀྱིས་མི་བཟད་ཅིང་འཇིགས་སུ་རུང་བའི་ཞལ་གང་ལ་མངའ་བ་དེ་ལ་དེ་སྐད་ཅེས་བྱའོ། །སྨིན་མ་འགྱུར་ཞིང་ཁྲོ་གཉེར་བསྡུས་པ་ཡང་ཡིན་ལ་སྨ་ར་སེར་ཞིང་སྤྱན་འབར་བ་ཡང་ཡིན་ཞིང་རྡོ་རྗེའི་མཆེ་བ་གཙིགས་པས་མ་མཆུའི་སྒྲོས་མནན་པའི་ཞལ་མི་བཟད་པ་ཡང་མངའ་བ་གང་ཡིན་པ་དེ་ནི་སྨིན་མ་འགྱུར་ཞིང་ཁྲོ་གཉེར་བསྡུས་པ། སྨ་ར་སེར་ཞིང་སྤྱན་འབར་བ་ལ་རྡོ་རྗེ་མཆེ་བ་གཙིགས་པས་མ་མཆུའི་སྒྲོས་མནན་པའི་ཞལ་མངའ་བ་ཞེས་བྱ་བའོ། །དེ་ལྟ་བུ་ཡིན་པ་འབའ་ཞིག་ཏུ་མ་ཟད་ཀྱི་དབུ་སྐྲ་གྱེན་དུ་འབར་ཞིང་རབ་ཏུ་འབར་བ་གང་ལ་མངའ་བ་དེ་ནི་དབུ་སྐྲ་གྱེན་དུ་འབར་བའོ། །དེ་ལ་མཚོན་ཆ་ཇི་ལྟ་བུ་ཞེ་ན། རྡོ་རྗེ་གཞུ་ལ་སོགས་པ་ཡོངས་སུ་འཛིན་པ་ཞེས་བྱ་བ་སྨོས་ཏེ། རྡོ་རྗེའི་གཞུ་ནི་རྡོ་རྗེ་ཡིད་ལས་བྱུང་བའི་ཁྲོ་བོའི་གཞུ་དང་བཅས་པ་ཡིན་པས་ཤེས་པར་བྱའོ། །དེ་ཉིད་ཐོག་མར་ བྱས་པ་གང ་ཡིན་པ་དེ་ནི་རྡོ་རྗེ་གཞུ་ལ་སོགས་པ་སྟེ། དེ་ཡོངས་སུ་འཛིན་པ་གང་ཡིན་པ་དེ་ནི་རྡོ་རྗེ་གཞུ་ལ་སོགས་པ་ཡོངས་སུ་འཛིན་པའོ། །དེ་ཡང་རྡོ་རྗེ་ཡིད་ལས་བྱུང་བའི་ཁྲོ་བོ་ནས་བརྩམས་ཏེ། རྡོ་རྗེ་འབེབས་པའི་ཁྲོ་བོའི་བར་དུའོ། །དཀྱིལ་འཁོར་ཆེན་པོའི་ཚུལ་གྱིས་བཞུགས་སོ་ཞེས་བྱ་བ་ནི། རྡོ་རྗེ་སེམས་དཔའི་དཀྱིལ་འཁོར་གྱི་དབྱིངས་སུ་བཞུགས་པའོ། །བཅོམ་ལྡན་འདས་ཀྱིས་ཞེས་བྱ་བ་ནི། རབ་ཏུ་དགའ་
བའི་རྡོ་རྗེ་ཁྲོ་བོ་སྟེ་ཧཱུཾ་མཛད་དུ་འབྲེལ་བའོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་ཆེན་པོའི་ཚུལ་གྱིས་གནས་པའི་རྡོ་རྗེ་ཡིད་ལས་བྱུང་བའི་ཁྲོ་བོ་རྣམས་ལ། དེའི་རྗེས་ཐོགས་ཉིད་ལ་བཅོམ་ལྡན་འདས་ཀྱིས་དཀྱིལ་འཁོར་བྱིན་གྱིས་བརླབས་སོ་ཞེས་བྱ་བར་སྦྱར་རོ། །བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོ་ཁམས་གསུམ་པ་ཐམས་ཅད་འདུལ་བར་མཛད་ནས། ཀུན་ནས་ཉོན་མོངས་པ་དང་ལྡན་པའི་འཇིག་རྟེན་གྱི་ཁམས་ན་གནས་པའི་དབང་ཕྱུག་ཆེན་པོ་ལ་སོགས་པའི་འཇིག་རྟེན་གསུམ་པོ་ཕྱིར་མི་ལྡོག་པའི་ས་ལ་བཞག་པས་འདུལ་བར་མཛད་དོ། །དེ་ནས་དེ་མཛད་ནས་རྡོ་རྗེ་དམ་ཚིག་ཆེན་པོའི་དཀྱིལ་འཁོར་ཆེན་པོ་བྱིན་གྱིས་བརླབས་སོ་ཞེས་བྱ་བ་ལ། རྡོ་རྗེ་དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་དམ་ཚིག་ཆེན་པོ་སྟེ། རྡོ་རྗེ་རིགས་ཆེན་པོ་སྟེ། རབ་ཏུ་དགའ་བའི་རྡོ་རྗེ་ཁྲོ་བོ་ལ་སོགས་པ་ནས། རྡོ་རྗེ་འབེབས་པའི་ཁྲོ་བོའི་མཐར་ཐུག་པའོ། །དེའི་དཀྱིལ་འཁོར་ནི་དེའི་དམ་ཚིག་ཆེན་པོའི་དཀྱིལ་འཁོར་རོ། །དེ་བྱིན་གྱིས་བརླབས་པ་ནི་བརྟན་པར་མཛད་པ་སྟེ་སློབ་དཔོན་གཅིག་ནས་གཅིག་ཏུ་བརྒྱུད་པས་ཕྱི་མའི་མཐར་ཐུག་པ་མེད་པར་འཁོར་བ་ལས་སེམས་ཅན་གདོན་པར་བྱ་བའི་ཕྱིར་བྱིན་གྱིས་བརླབས་པའོ། །དེ་ལྟར་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ། རྡོ་རྗེ་དམ་ཚིག་ཆེན་པོའི་དཀྱིལ་འཁོར་བྱིན་གྱིས་བརླབས་སོ་ཞེས་བྱ་བའི་བར་དུ་བསྟན་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་བྱ་སྟེ། བདག་ཉིད་དབང་བསྐུར་བ་ཇི་ལྟ་བ་བཞིན་དུ་བླངས་ནས། རྡོ་རྗེ་ལྕགས་ཀྱུས་ཁྲོ་བོ་འཁོར་དང་བཅས་པ་དགུག་པར་བྱ་ཞིང༌། རྡོ་རྗེ་ཞགས་པས་ཁྲོ་བོ་བཅུག་ལ། རྡོ་རྗེ་ལྕགས་སྒྲོག་གིས་ཁྲོ་བོ་བཅིངས་ནས། རྡོ་རྗེ་འབེབས་པས་ཁྲོ་བོ་དབང་དུ་བྱའོ།། དེ་ནས་དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་ནས་ཕྱག་རྒྱ་ཆེན་པོ་ལས་སྦྱར་བར་བྱའོ། །དེ་ལ་ལས་ནི་འདི་དག་ཡིན་ཏེ། རབ་ཏུ་དགའ་བའི་རྡོ་རྗེ་ཁྲོ་
བོའི་ཕྱག་རྒྱ་བཅིངས་ལ། བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོ་ཐུགས་རྗེ་ཆེན་པོའི་ཁྲོ་བོས་སེམས་ཅན་གྱི་ཁམས་གདུག་ཅིང་གཏུམ་པ་རྣམས་བྱང་ཆུབ་ཀྱི་སེམས་ཆེན་པོ་ལ་རབ་ཏུ་འཇོག་པར་མཛོད་ཅིག་ཅེས་བརྗོད་པར་བྱའོ། །རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་པོ་བཅིངས་ནས། བཅོམ་ལྡན་འདས་རྡོ་རྗེ་ཡིད་ལས་བྱུང་བའི་ཁྲོ་བོ་འདོད་ཆགས་ཀྱི་མདའ་རྣམ་པར་དག་པའི་ཁྲོ་བོ་དེ་འདོད་ཆགས་ཀྱི་མདའ་རྣམ་པར་དག་པའི་གནས་ལ་རབ་ཏུ་དགོད་པར་མཛོད་ཅིག་ཅེས་པ་དང༌། རྡོ་རྗེ་ཀི་ལི་ཀི་ལའི་ཁྲོ་བོའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་རྡོ་རྗེ་ཀི་ལི་ཀི་ལའི་ཁྲོ་བོ་རེག་པ་རྣམ་པར་དག་པའི་གནས་ལ་རབ་ཏུ་འཇོག་པར་མཛོད་ཅིག་ཅེས་བྱ་བ་དང༌། རྡོ་རྗེ་དྲན་པའི་ཁྲོ་བོའི་ཕྱག་རྒྱ་ཆེན་པོ་བཅིངས་ནས། བཅོམ་ལྡན་འདས་རྡོ་རྗེ་དྲན་པའི་ཁྲོ་བོའི་སྡུག་པའི་འཆིང་བ་རྣམ་པར་དག་པའི་ཁྲོ་བོས་དེ་སྡུག་པའི་འཆིང་བ་རྣམ་པར་དག་པའི་གནས་ལ་འཇོག་པར་མཛོད་ཅིག་ཅེས་བརྗོད་དོ། །རྡོ་རྗེ་བསྙེམས་པའི་ཁྲོ་བོའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་རྡོ་རྗེ་བསྙེམས་པའི་ཁྲོ་བོ་ཐམས་ཅད་ལ་དབང་ཕྱུག་དང་དབང་རྣམ་པར་དག་པའི་ཁྲོ་བོས་དེ་ཐམས་ཅད་ཀྱི་དབང་ཕྱུག་དང་དབང་རྣམ་པར་དག་པར་མཛོད་ཅིག་ཅེས་བརྗོད་ནས། རྡོ་རྗེ་འབེབས་པའི་ཁྲོ་བོའི་ཕྱག་རྒྱ་ཆེན་པོ་བཅིངས་ལ་བཅོམ་ལྡན་འདས་རྡོ་རྗེ་འབེབས་པའི་ཁྲོ་བོས་སེམས་ཅན་གྱི་ཁམས་སུ་གདུག་ཅིང་གཏུམ་པ་རྣམས་རང་བཞིན་གྱིས་འོད་གསལ་བའི་ཡེ་ཤེས་བབས་པས་དབང་དུ་མཛོད་ཅིག་ཅེས་བརྗོད་དོ། །འདི་ནི་འདིར་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་ནོ། །དེ་ལྟར་ཏིང་ངེ་འཛིན་གསུམ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པས་བཟླས་པ་དང་བསྒོམ་པར་བྱའོ་ཞེས་བྱ་བའི་དོན་བསྟན་པར་བྱ་བའི་ཕྱིར། དཀྱིལ་འཁོར་ཆེན་པོའི་ཚུལ་གྱིས་ནི། །ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོག་རྒྱས་པ་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དཀྱིལ་འཁོར་ཆེན་པོའི་ཚུལ་གྱིས་ནི། །ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས་
སོ། །དཀྱིལ་འཁོར་ཐམས་ཅད་ཐིག་གདབ་པར་བྱ་སྟེ། དཀྱིལ་འཁོར་གྱི་ཕྱི་དང་ནང་དུ་བཅས་པའི་ཐིག་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་དུ་བྱའོ་ཞེས་བྱ་བའི་དོན་ཏོ། །དེ་ལ་དང་པོ་ཁྲོས་པས་གཞག །ཅེས་བྱ་བ་ནི་དེར་ཞེས་བྱ་བའི་དཀྱིལ་འཁོར་དེའི་དབུས་སུ་དང་པོའི་རྡོ་རྗེ་སེམས་དཔའི་ཁྲོས་པས་གཞག་པར་བྱའོ། །ཅི་ཞིག་ཟློས་ཤིང་གཞག་པར་བྱ་ཞེ་ན། སུ་ར་ཏོ་བྷ་བ་ཧཱུཾ་གསུངས་སོ། །སྐུ་མདོག་ཅི་འདྲ་ཞེ་ན། ཨུཏྤལ་སྔོན་པོའི་འདབ་མའི་མདངས་ཞེས་བྱ་བ་སྨོས་ཏེ། ཨུཏྤལ་སྔོན་པའི་འདབ་མའི་མདོག་འདྲ་བའོ། །འབར་ཞེས་བྱ་བ་ནི་སྤྲིན་དང་བྲལ་བའི་ཉི་མ་ཕྱེད་ཀྱི་དུས་ལྟར་འོད་གསལ་བའོ། །རྡོ་རྗེ་བསྙེམས་པ་འཛིན་པའི་མཆོག །ཅེས་བྱ་བ་རྡོ་རྗེ་དྲིལ་བུ་དང་བཅས་པའི་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་བསྙེམས་པ་སྟེ། དེ་འཛིན་པས་ན་རྡོ་རྗེ་བསྙེམས་པ་འཛིན་པའོ། །མཆོག་ནི་དམ་པ་སྟེ། རྡོ་རྗེ་བསྙེམས་པ་འཛིན་པའི་མཆོག་ཏུ་དེ་གཞག་པར་བྱའོ། །མཆེ་བ་ཅུང་ཟད་གཙིགས་པའི་ཞལ་གྱིས་ཞེས་བྱ་བ་ནི། མཆེ་བ་ཡང་ཡིན་ལ་ཅུང་ཟད་ཀྱང་ཡིན་པས་ན་མཆེ་བ་ཅུང་ཟད་དེ། མཆེ་བ་ཞལ་ནས་ཅུང་ཟད་བྱུང་བ་ཞེས་བྱ་བའི་ཐ་ཚིག་གོ །དེ་ཉིད་གཙིགས་པ་ནི་བསྡམས་ཤིང་འབུར་བའི་ཞལ་གང་ལ་མངའ་བ་ལ་དེ་སྐད་ཅེས་བྱ་བའོ། །ཁྲོ་དང་བཅས་པ་བཞད་པའི་ཞལ། །ཞེས་བྱ་བ་ནི། ཁྲོ་ཞིང་གཏུམ་པ་དང་བཅས་པས་གནས་པས་ན་ཁྲོ་བཅས་སོ། །ཁྲོ་བ་དང་བཅས་པ་ཡང་ཡིན་ལ། བཞད་པའི་ཞལ་ཡང་ཡིན་པས་ན་ཁྲོ་བ་དང་བཅས་པས་བཞད་པའི་ཞལ་ལོ། །ཁྲོ་བ་དང་བཅས་པས་ཞལ་མངའ་བ་དེ། རྡོ་རྗེ་སྐྱིལ་མོ་ཀྲུང་གིས་བཞུགས་པ་ཡང་ཡིན་ཏེ། གཡས་པའི་ཕང་པར་རྐང་པ་གཡོན་པ་འཇོག་ཅིང་གཡོན་པར་རྐང་པ་གཡས་པ་འཇོག་པ་འདི་ནི་རྡོ་རྗེ་སྐྱིལ་མོ་ཀྲུང་ངོ༌། །དེས་ཡང་དག་པར་བཞུགས་པས་ན། རྡོ་རྗེ་སྐྱིལ་ཀྲུང་ལེགས་བཞུགས་ཉིད་དོ། །ཉིད་ཅེས་བྱ་བ་ནི་ངེས་པར་བཟུང་བ་སྟེ། རྡོ་རྗེ་སྐྱིལ་མོ་ཀྲུང་ཉིད་ཀྱིས་ལེགས་པར་བཞུགས་པ་ཡིན་ནོ། །འོད་ཟེར་འབར་བ་འཁྲུག་པའི་འོད། །ཅེས་བྱ་བ་ནི་འོད་ཟེར་འབར་བ་ཀུན་དུ་འཁྲུག་པའི་འོད་གང་ལ་མངའ་བ་དེ་ནི། འོད་ཟེར་འབར་བ་འཁྲུག་པའི་འོད་དེ་བཅོམ་ལྡན་འདས་རབ་ཏུ་དགའ་
བའི་རྡོ་རྗེ་ཁྲོ་བོ་འབར་བ་ཀུན་དུ་འཁྲུག་པའི་འོད་མངའ་བ་དེ་གཞག་པར་བྱའོ། །དཀྱིལ་འཁོར་ཆེན་པོའི་ཚུལ་གྱིས་ནི། །ཐམས་ཅད་དུ་ནི་ཁྲོ་བོ་བྲི། །ཞེས་བྱ་བ་ནི་རབ་ཏུ་དགའ་བའི་རྡོ་རྗེ་ཁྲོ་བོ་དེ་ཕྱོགས་དང་མཚམས་རྣམས་སུ་རྡོ་རྗེ་ཡིད་ལས་བྱུང་བ་ལ་སོགས་པའི་ཁྲོ་བོའི་རྡོ་རྗེ་སེམས་དཔའ་དཀྱིལ་འཁོར་ཆེན་པོའི་དབྱིབས་སུ་བྱིན་པ་ཡིན་པས་ན་བཤད་པའི་མཚན་ཉིད་ཅན་བྲིའོ། །འཇུག་པ་ནི། རབ་དགའ་རྡོ་རྗེ་ཁྲོ་བོ་ཡིས། །ཞེས་བྱ་བ་ནི་བཅོམ་ལྡན་འདས་རྡོ་རྗེ་ཧཱུཾ་མཛད་ནི་རབ་ཏུ་དགའ་བའི་རྡོ་རྗེ་ཁྲོ་བོ་སྟེ། དེའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་དང་འདྲ་བ་ནི་རབ་ཏུ་དགའ་བའི་རྡོ་རྗེ་ཁྲོ་བོ་ཞེས་བྱ་སྟེ། འདིར་དེས་དང་པོ་སློབ་དཔོན་གྱིས་འཇུག་པ་བྱའོ་ཞེས་བྱ་བ་ནི་དང་པོ་ཁོ་ན་སློབ་དཔོན་གྱིས་དེ་བཞིན་གཤེགས་པའི་དཀྱིལ་འཁོར་དུ་འཇུག་པ་ལྟར། འདིར་འཇུག་པ་བྱས་ལ་ཕྱིས་ནི་གཞན་དག་བྱའོ་ཞེས་བྱ་བའི་ཐ་ཚིག་གོ །སློབ་མ་རྣམས་ཀྱང་དེ་བཞིན་ནོ། །ཞེས་བྱ་བ་ནི་རབ་ཏུ་དགའ་བའི་རྡོ་རྗེ་ཁྲོ་བོས་སློབ་དཔོན་ཇི་ལྟར་འཇུག་པ་དེ་བཞིན་དུ་སློབ་མ་རྣམས་ཀྱང་འཇུག་པར་བྱའོ། །སློབ་དཔོན་ཞུགས་ནས་ཁྲོས་པས་ལྕགས་ཀྱུ་དེ་ཉིད་ཀྱིས་དགུག་པར་བྱའོ་ཞེས་བྱ་བ་ནི་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོས། སློབ་དཔོན་ཞུགས་ནས་རང་གི་ཆོ་ག་ཐམས་ཅད་རྗེས་སུ་སྤྱད་ལ། དཀྱིལ་འཁོར་རྡོ་རྗེས་རབ་ཏུ་བསྒྲུབས་ནས། སྒོ་དབྱེ་བ་བྱས་ལ་འཇུག་པའི་ཕྱག་རྒྱས་མཛུབ་མོ་གཡས་པ་ལྕགས་ཀྱུར་བྱས་ལ། དཀྱིལ་འཁོར་གྱི་ལྷ་ཐམས་ཅད་སྤྱན་དྲང་བའི་སྔགས་ཀྱིས་ལྷ་ཐམས་ཅད་སྤྱན་དྲང་བར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་ཆོ་ག་རྒྱས་པ་ཡང་དེ་བཞིན་ནོ་ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་ཆོ་ག་ཇི་ལྟར་གསུངས་པ་དེ་བཞིན་དུ་འདིར་ཡང་ཤེས་པར་བྱའོ། །དེ་ལྟར་སློབ་དཔོན་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར་བསྒྲུབས་ན་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ལ་འདི་
བསྒྲུབས་པས་ན་བསྒྲུབས་པ་སྟེ། སྒྲུབ་པའི་ཐབས་ལ་སྒྲུབ་པ་ཞེས་བྱའོ། །ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ནི་དངོས་གྲུབ་ཐམས་ཅད་དེ། དེ་བསྒྲུབ་པར་བཤད་པ་ན་དེའི་འབྲས་བུ་གྲུབ་པ་རྣམས་བཤད་པར་བྱའོ། །དེ་ཡང་སྔ་མ་བཞིན་དུ་རྡོ་རྗེ་སེམས་དཔའ་བསྒྲུབ་པའི་ཚུལ་གྱིས་དང་པོའི་རྡོ་རྗེ་ཕྱག་རྒྱ་བཅིངས་པའི་བར་གྱིས་ཕྱག་རྒྱ་བཅིངས་པ་རྗེས་སུ་སྤྱད་ལ། རང་གི་སྙིང་གར་གནས་པའི་རྡོ་རྗེ་འབར་བ་རྩེ་མོ་བཞིའི་དབུས་སུ་བཅོམ་ལྡན་འདས་ཀྱི་སྔགས་ཀྱི་ཡི་གེ་ཡིད་ཀྱིས་བྲིས་ལ། དེ་ཉིད་ལ་ཟློས་ཤིང་བདག་མེད་པར་བསྒོམ་པར་བྱའོ། །དེ་ནས་དེའི་དབྱངས་ཀྱི་ཡི་གེ་བཅུ་དྲུག་དང་བཅས་པ་ལས་རང་གི་སེམས་ཟླ་བའི་དཀྱིལ་འཁོར་གྱི་རྣམ་པ་ཚད་མཐའ་ཡས་པར་བསམ་པར་བྱའོ། དེའི་སྟེང་དུ་ཡང༌། དེ་ཉིད་དང་ཀ་ལ་སོགས་པས་གསལ་བྱེད་ཀྱི་ཡི་གེ་ཟླ་བ་ལྟ་བུ་དང་བཅས་པ་ལས། ཟླ་བའི་དཀྱིལ་འཁོར་གཉིས་པ་བསམ་པར་བྱའོ། །དེ་ནས་ཟླ་བའི་དཀྱིལ་འཁོར་གཉིས་པ་དེའི་སྟེང་དུ་སྔགས་ཀྱི་ཡི་གེ་རྣམས་བསམས་ལ། དེ་ཟླ་བའི་དཀྱིལ་འཁོར་གཉིས་པ་དེ་དང་བཅས་པ་ལས་རྡོ་རྗེ་འབར་བའི་རྩེ་མོ་བཞི་པ་བསམ་པར་བྱའོ། །དེ་ནས་རྡོ་རྗེ་འབར་བའི་དབུས་སུ་སྔགས་ཀྱི་ཡི་གེ་རྣམས་བསམས་ལ། སེམས་དཔའ་ཇི་ལྟ་བུར་ཕྱག་རྒྱ་དེ་བཞིན། ཕྱག་རྒྱ་ཇི་ལྟར་བདག་ཀྱང་དེ་བཞིན་ནོ་ཞེས་ང་རྒྱལ་བསྒོམས་ལ། རྡོ་རྗེ་འབར་བ་ལས་རྡོ་རྗེའི་རིགས་རྣམས་སྤྲོས་ཏེ། དེས་ཕྱོགས་བཅུར་གདུག་པ་ཐམས་ཅད་བཏུལ་བར་བྱས་ནས། དེ་རྣམས་རྡོ་རྗེ་དེར་ཡིད་ཀྱིས་བཅུག་ནས། རྡོ་རྗེ་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་བདག་ཉིད་བསམས་ལ་རབ་ཏུ་དགའ་བའི་རྡོ་རྗེ་ཁྲོ་བོ་ཟློས་ཤིང་བདག་ཉིད་ཀྱི་རྡོ་རྗེ་སེམས་དཔའི་གཟུགས་རབ་ཏུ་དགའ་བའི་རྡོ་རྗེ་ཁྲོ་བོར་བསམ་པར་བྱའོ། །དེ་ནས་མ་ཧཱ་ས་མ་ཡ་སྟྭ་ཧཾ་ཞེས་བྱ་བ་ལན་གསུམ་བཟླས་ལ། དམ་ཚིག་ཆེན་པོའི་སེམས་དཔའི་ང་རྒྱལ་བསྐྱེད་ནས། རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་བཅིངས་ལ། ས་མ་ཡ་ཧཾ་ཞེས་ཟློས་ཤིང་དམ་ཚིག་སེམས་དཔའི་བདག་ཉིད་བསྒོམས་ལ། ས་མ་ཡ་སྟྭ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང༌། དེ་ཉིད་ཀྱིས་སྙིང་ག་དང་དཔྲལ་བ་དང༌།
ལྐོག་མ་དང༌། སྤྱི་བོར་བྱིན་བརླབ་པར་བྱའོ། །དེ་ན་རྡོ་རྗེ་སྐྱིལ་མོ་ཀྲུང་བཅས་པ་གཡོན་པའི་རྡོ་རྗེ་ཁུ་ཚུར་གྱིས་འབར་བའི་རྡོ་རྗེ་དྲིལ་བུ་བླངས་ལ། གཡས་པས་རྡོ་རྗེ་འབར་བ་རྩེ་བཞི་པ་གཟུང་སྟེ། དེ་བསྙེམས་པ་དང་བཅས་པ་ལ་རྡོ་རྗེ་གསོར་ནས། རང་གི་སྔགས་ཟློས་ཤིང་རང་གི་སྙིང་གར་བསྟོད་པའི་ཚུལ་གྱིས་འཛིན་པའི་སྐུ་དང་གསུང་དང༌། ཐུགས་རྡོ་རྗེས་རབ་ཏུ་དགའ་བའི་རྡོ་རྗེ་ཁྲོ་བོར་བདག་ཉིད་བསམ་པ་འདི་ནི། བཅོམ་ལྡན་འདས་ཀྱི་ཕྱག་རྒྱ་ཆེན་པོའོ། །དེ་ལྟར་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ཀྱི་སྔགས་ཟློས་ཤིང༌། ཨ་ཞེས་བྱ་བ་བརྗོད་དེ། མདུན་དུ་སྣ་ཚོགས་པདྨའི་སྟེང་དུ། རྡོ་རྗེ་འབར་བ་རྩེ་བཞི་པ་བསམ་པར་བྱའོ། །དེའི་དབུས་སུ་བཅོམ་ལྡན་འདས་ཀྱི་སྔགས་བསམས་ལ། དེ་ཉིད་ཟློས་ཤིང་རྡོ་རྗེ་འབར་བ་ནི། བདག་གོ་ཞེས་བསྒོམ་པར་བྱའོ། །དེ་ནས་དེ་ཉིད་ཟློས་ཤིང་རྡོ་རྗེ་འབར་བ་དེ་རབ་ཏུ་དགའ་བའི་རྡོ་རྗེ་ཁྲོ་བོར་བདག་ཉིད་བསམས་ལ། སུ་ར་ཏ་བཛྲ་ཀྲོ་དྷི་ཧཾ་ཞེས་བཟླ་བར་བྱའོ། །དེ་ནས་དེ་བཞིན་དུ་རྡོ་རྗེ་ལྕག་སྐྱུའི་ཁྲོ་བོ་ལ་སོགས་པའི་ཕྱག་རྒྱ་རྣམས་ཀྱིས་བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ལ་རབ་ཏུ་དགའ་བའི་རྡོ་རྗེ་ཁྲོ་བོའི་དམ་ཚིག་གི་ཕྱག་རྒྱ་བཅིངས་ལ། ཧཱུཾ་རཀྟ་ཛཱ་ལ་མཱ་ལ་པྲ་ལ་ཡ་ཨགྣི་པྲ་དཱི་པྟ་ཏེ་ཛ་མ་ཧཱ་སུ་ཁ་སུ་ར་ཏ་བཛྲ་ཀྲོ་དྷ་ཛཿ་ཧཱུཾ་བཾ་ཧོཿ་ཕཊ་དྲྀ་ཤྱ་ཞེས་བྱ་བས་བལྟ་བར་བྱ་བའོ། །ཡེ་ཤེས་སེམས་དཔའ་དེ་མཐོང་ནས། །རང་གི་ལུས་ལ་རབ་ཏུ་བསྒོམ། །དགུག་ཅིང་བཅུག་ལ་བཅིང་བ་དང༌། །དབང་དུ་བྱས་ཏེ་བསྒྲུབ་པར་བྱ། །ཕྱག་རྒྱ་ཆེན་པོ་བཅིངས་ཏེ་གཡས་པའི་མཛུབ་མོ་ལྕགས་ཀྱུས་ཧཾ་སུ་ར་ཏ་བཛྲ་ཀྲོ་དྷ་ཨ་ཡཱ་ཧི་མ་ཧཱ་སུ་ཁ་བཛྲ་སཏྭ་ཛ། སརྦ་ཀུ་ལ་ནི་པྲ་བེ་ཤ་ཡ་ཧཱུཾ་སརྦ་མུ་དྲ་བནྡྷ་ན་བཾ། སརྦ་ས་མ་ཡཾ་བ་ཤིཾ་ཀུ་རུ་ཧོ་སརྦ་ཀརྨ་ཎི་ས་དྷྱ་ཨཱཿ་སརྦ་སིདྡྷྱ་སིདྡྷྱ་ཨ་ཞེས་བརྗོད་པར་བྱའོ། །དེ་ནས་རང་གི་སྙིང་གར་ཧཱུཾ་ལས་རྡོ་རྗེ་འབར་བ་བསམས་ལ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་བཅིངས་ཏེ་ས་མ་ཡ་སྟྭཾ་ཞེས་བརྗོད་དོ། །རྒྱབ་ཏུ་ཟླ་བའི་དཀྱིལ་འཁོར་བསམས་ཏེ་དེ་
ནས་རང་གི་ལུས་ལ་གནས་པའི་བཅོམ་ལྡན་འདས་དང་བདག་ཉིད་ཆུ་དང་འོ་མ་ལྟར་གཅིག་ཏུ་གྱུར་པར་བསམས་ལ་ས་མ་ཡ་སྟྭཾ་ཧཱུཾ། རཀྟ་ཛཱ་ལ་མཱ་ལ་པྲ་ལ་ཡ། ཨགྣི་པྲ་དཱིཔྟ་ཏེ་ཛ་མ་ཧཱ་སུ་ཁ་སུ་ར་ཏ་བཛྲ་ཀྲོ་དྷ་ཛཿ་ཧཱུཾ་བཾ་ཧོཿ་ཕཊ་ཅེས་ལན་གསུམ་བཟླས་ལ། སྣ་ཚོགས་པདྨ་ལ་བཞུགས་པ། །ཨུཏྤལ་སྔོན་པོའི་མདངས་འབར་ཞིང༌། །རྡོ་རྗེ་བསྙེམས་པ་འབར་བའི་མཆོག །མཆེ་བ་ཅུང་ཟད་གཙིགས་པའི་ཞལ། །ཁྲོ་དང་བཅས་པར་བཞད་པའི་ཞལ། །རྡོ་རྗེ་སྐྱིལ་ཀྲུང་ལེགས་བཞུགས་ཉིད། །འོད་ཟེར་འབར་བ་འཁྲུག་པའི་འོད། །ཅེས་བྱ་བ་བསམ་མོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་བདག་ཉིད་རྒྱས་བཏབ་ནས་དེ་བཞིན་དུ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་ལུས་ལ་དེ་བཞིན་གཤེགས་པ་ཐམས་ཅད་བཅུག་ལ་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་དེ་བཞིན་གཤེགས་པ་རྣམས་ལ་རྒྱས་བཏབ་ལ་དང་པོའི་རྡོ་རྗེ་བཅིངས་ཏེ། རྡོ་རྗེ་སེམས་དཔའ་དང༌། རིན་ཆེན་དང༌། ཆོས་དང་ལས་ཀྱི་སྙིང་པོས་བདག་ཉིད་དེ་བཞིན་ཉིད་དུ་བྱིན་གྱིས་བརླབས་ལ་སངས་རྒྱས་ལྔ་དང༌། རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱས་དབང་བསྐུར་བར་བྱའོ། །དེ་ནས་རྡོ་རྗེ་དང་བདག་པོ་དང་མིང་གི་དབང་བསྐུར་བ་བླངས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་གཟུང་བར་བྱའོ། །དེ་ནས་ཁྲོ་བོའི་རྡོ་རྗེ་མཚོན་ཆ་མ་ལ་སོགས་པ་གསང་བའི་ཕྱག་རྒྱའི་མཆོད་པ་བཞིས་བདག་ཉིད་ཡང་དག་པར་མཆོད་ལ་རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་རྒྱ་བཞིས་བཅོམ་ལྡན་འདས་ལ་ཕྱག་བྱས་ལ། ཡང་ཕྱག་རྒྱ་ཆེན་པོ་བཅིངས་ཏེ་དེ་ཁོ་ན་ཉིད་ཀྱི་རྡོ་རྗེ་གཟུང་བར་བྱའོ། །དེ་ནས་ཆོས་ཀྱི་དྲིལ་བུ་དཀྲོལ་ལོ། །དེ་ནས་དམ་ཚིག་གི་ཕྱག་རྒྱ་ཆེན་པོ་བྱིན་གྱིས་བརླབ་པར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་འབར་བའི་དབུས་སུ་རྡོ་རྗེ་བཟླས་པའི་དོན་དུ་སྔགས་ཡིད་ཀྱིས་བྲིས་ལ། ཉིན་རེ་ཞིང་བདག་ལ་བྱིན་གྱིས་བརླབ་པ་ལ་སོགས་པ་ལན་ཅིག་བྱས་ནས་ཇི་སྲིད་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གིས་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་ཁྲོ་བོའི་ཚིག་གིས་བཟླས་བརྗོད་བྱའོ། །དེ་ནས་ཟླ་བ་ཉ་བ་ལ་བཟླས་བརྗོད་མཚན་ཐོག་ཐག་བཟླས་ནས། ནང་པར་རྡོ་
རྗེ་ཧཱུཾ་མཛད་དུ་གྱུར་པ་ནི་དངོས་གྲུབ་དང་པོའོ། །གལ་ཏེ་དེ་བཞིན་གཤེགས་པ་བསྒྲུབ་པར་འདོད་ན་དེས་རྡོ་རྗེ་སེམས་དཔའི་རྟོག་པ་ལ་བཤད་པའི་ཆོ་གས་བཅོམ་ལྡན་འདས་རྣམ་པར་སྣང་མཛད་དེ་བཞིན་གཤེགས་པ་བརྒྱད་ཀྱིས་བསྐོར་བ། ཕྱག་གཉིས་ཀྱིས་བྱང་ཆུབ་མཆོག་གི་ཕྱག་རྒྱ་བཅིངས་ལ་རས་ལ་འདྲིར་གཞུག་པར་བྱའོ། །དེའི་མདུན་དུ་སྔ་མ་བཞིན་དུ་རབ་ཏུ་དགའ་བའི་རྡོ་རྗེ་ཁྲོ་བོའི་སྦྱོར་བ་བྱས་ལ། རས་རིས་ལ་བཅོམ་ལྡན་འདས་རྣམ་པར་སྣང་མཛད་རབ་ཏུ་དགའ་བའི་རྡོ་རྗེ་ཁྲོ་བོའི་ལྕགས་ཀྱུ་ཆེན་པོས་སྤྱན་དྲངས་ལ། རབ་ཏུ་དགའ་བའི་རྡོ་རྗེ་ཁྲོ་བོའི་དམ་ཚིག་གི་ཕྱག་རྒྱས་བསྒྲུབ་བོ། །དེ་ནས་རབ་ཏུ་དགའ་བའི་རྡོ་རྗེ་ཁྲོ་བོའི་ཆོས་ཀྱི་ཕྱག་རྒྱས་བཏབ་ནས་དེ་བཞིན་གཤེགས་པའི་ལས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོས་རབ་ཏུ་དགའ་བའི་རྡོ་རྗེ་ཁྲོ་བོའི་སྔགས་ཟློས་ཤིང་རྒྱས་གདབ་པར་བྱའོ། །དེ་ནས་རྡོ་རྗེ་རིན་ཆེན་གྱི་དབང་བསྐུར་བའི་ཕྱག་རྒྱས་དབང་བསྐུར་ལ་བཅོམ་ལྡན་འདས་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཕྱག་བྱས་ལ་འདུག་ནས་བྱང་ཆུབ་མཆོག་གི་ཕྱག་རྒྱ་ཆེན་པོ་བཅིངས་ཏེ། དེ་བཞིན་གཤེགས་པར་བདག་ཉིད་བསམས་ལ་ཇི་སྲིད་འབུམ་ཕྲག་བརྒྱ་ཚང་བར་གྱུར་པ་དེ་སྲིད་ཀྱི་བར་དུ་དགའ་བའི་རྡོ་རྗེ་ཁྲོ་བོའི་སྔགས་བཟླས་པར་བྱའོ། །དེ་ནས་འབུམ་ཚང་བ་དང་མཚན་ཕྱེད་ན་བདུད་ཀྱི་དཔུང་ཐམས་ཅད་འོང་བར་འགྱུར་རོ། །དེ་ནས་རྣལ་འབྱོར་པས་བདུད་ཐམས་ཅད་འཇོམས་པར་བྱེད་པས་བདུད་ཀྱི་སྟོབས་གཞོམ་པར་བྱའོ། །དེ་ནས་ནང་པར་གྱི་དུས་སུ་དེ་བཞིན་གཤེགས་པ་ཉིད་དམ་བྱང་ཆུབ་སེམས་དཔའ་ཆེན་པོ་ཉིད་ཐོབ་པར་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་བས་གསུངས་སོ། །གལ་ཏེ་དེ་རབ་ཏུ་དགའ་བའི་རྡོ་རྗེ་ཁྲོ་བོ་ཉིད་བསྒྲུབ་པར་འདོད་ན་དེས་རབ་ཏུ་དགའ་བའི་རྡོ་རྗེ་ཁྲོ་བོའི་སྐུ་གཟུགས་བྱེད་དུ་བཅུག་ལ། །དེའི་མདུན་དུ་དེ་བཞིན་དུ་རབ་ཏུ་དགའ་བའི་རྡོ་རྗེ་ཁྲོ་བོའི་རྣལ་འབྱོར་བྱས་ལ་སྐུ་གཟུགས་ལ། བཅོམ་ལྡན་འདས་སྔར་བཤད་པའི་སྤྱན་དྲང་བའི་ཆོགས་སྤྱན་དྲངས་ལ་མཆོད་པ་ཐམས་ཅད་ཀྱིས་ཡང་དག་པ་ཇི་ལྟ་བ་བཞིན་དུ་མཆོད་ནས་ཕྱག་བྱས་ལ་ཕྱག་རྒྱ་ཆེན་པོ་བཅིངས་ཏེ། ཉིན་རེ་
བཞིན་དུ་བདག་ལ་བྱིན་གྱིས་བརླབས་པ་ལ་སོགས་པ་ལན་ཅིག་བྱས་ལ་བསྒྲུབ་པར་བྱས་ཤིང་བཟླས་བརྗོད་དཔག་ཏུ་མེད་པ་བྱས་ནས། ཟླ་བ་དྲུག་གིས་རྡོ་རྗེ་ཧཱུཾ་མཛད་ཉིད་དེས་ཐོབ་པར་འགྱུར་རོ། །ཡང་ན་རབ་ཏུ་དགའ་བའི་རྡོ་རྗེ་ཆེན་པོའི་ཕྱག་རྒྱས་བདག་ཉིད་རབ་ཏུ་དགའ་བའི་རྡོ་རྗེ་ཁྲོ་བོས་བསྒྲུབ་པར་འདོད་ན། དེ་བཞིན་དུ་རབ་ཏུ་དགའ་བའི་རྡོ་རྗེ་ཁྲོ་བོའི་སྦྱོར་བ་བྱས་ལ། ཉིན་རེའི་སྦྱོར་བས་ཕྱག་རྒྱ་ཆེན་པོ་བཅིངས་ལ་ཇི་སྲིད་ཉིན་རེ་ཞིང༌། བདག་ཉིད་དེའི་སྐུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཕྱེད་ཙམ་བསྒོམས་ལ་བསྒྲུབས་ན་རབ་ཏུ་དགའ་བའི་རྡོ་རྗེ་ཁྲོ་བོར་འགྱུར་རོ། །དེ་བཞིན་དུ་དངོས་གྲུབ་གཞན་དག་ཀྱང་སྔ་མའི་རྗེས་སུ་འབྲངས་ནས་བསྒྲུབ་པ་ཡིན་པར་ཤེས་པར་བྱའོ། །དེ་ནས་མ་གྲུབ་པ་ནི་ཞེས་བྱ་བ་ལ་སོགས་པ་ལ་དེ་ལྟར་བཤད་མ་ཐག་པའི་སྒྲུབ་པ་གང་གི་ཚེ། ཇི་སྐད་སྔོན་དུ་བཤད་པའི་དངོས་གྲུབ་གྲུབ་པར་མ་གྱུར་པའི་སྔགས་ནི་མ་གྲུབ་པ་ཞེས་བྱ་བ་ལ། མ་གྲུབ་པ་དེ་མ་གྲུབ་ཏུ་ཟིན་ཀྱང༌། ལན་ཅིག་བཟླས་པ་ཙམ་གྱིས་ཇི་སྐད་དུ་བཤད་པའི་ལས་རྣམས་བྱེད་པར་འགྱུར་རོ། །ཁམས་གསུམ་མ་ལུས་པ་ལས་རྒྱལ་བར་བྱ་བ་ནི། རྡོ་རྗེ་ཧཱུཾ་མཛད་ཀྱི་ཕྱག་རྒྱས་སོ་ཞེས་བྱ་བ་ནི་འཇིག་རྟེན་གྱི་ཁམས་མི་མཇེད་ལ་སོགས་པ། སངས་རྒྱས་ཀྱི་ཞིང་མ་དག་པ་ནི་ཁམས་གསུམ་པ་མ་ལུས་པའོ། །དེ་ལས་རྒྱལ་བ་ནི་དེར་གནས་པའི་དབང་ཕྱུག་ཆེན་པོ་ལ་སོགས་པ་འདུལ་བའོ། །དེ་ཡང་རྡོ་རྗེ་ཧཱུཾ་མཛད་དུ་མཉམ་པར་བཞག་ལ། ཁྲོ་བོའི་ཁུ་ཚུར་གཉིས་བཅིངས་ཏེ། མཐེའུ་ཆུང་གཉིས་ཕན་ཚུན་ལྕགས་སྒྲོག་ཏུ་སྤྲེལ་ལ། མཛུབ་མོ་གཉིས་བསྒྲེང་སྟེ། སྡིགས་མཛུབ་བྱེད་པ་ལ་སོགས་པས་སྙིང་གའི་ཕྱོགས་སུ་བཞག་པ་འདི་ནི། རྡོ་རྗེ་ཧཱུཾ་མཛད་ཀྱི་ཕྱག་རྒྱ་སྟེ་འདིས་ཁམས་གསུམ་མ་ལུས་པ་ལས་རྒྱལ་བར་འགྱུར་རོ། །ཐམས་ཅད་དུ་ཡང་རབ་ཏུ་དགའ་བའི་རྡོ་རྗེ་ཁྲོ་བོའི་སྔགས་བཟླས་པས་ལས་རྣམས་གྲུབ་པར་གྱུར་པར་ཤེས་པར་འགྱུར་རོ། །འདིས་ནི་འདི་སྐད་སྟོན་ཏེ་དེ་བཞིན་དུ་རབ་ཏུ་དགའ་བའི་རྡོ་རྗེ་ཁྲོ་བོའི་སྦྱོར་བ་བྱས་ལ་དབང་ཕྱུག་ཆེན་པོ་ལ་སོགས་པ་འདུལ་བའི་བསམ་པས་རྡོ་རྗེ་ཧཱུཾ་མཛད་
ཀྱི་ཕྱག་རྒྱ་བཅིངས་ལ་བཟླས་བརྗོད་བྱས་ནས་རང་གི་ལུས་ལས་བྱུང་བའི་རྡོ་རྗེ་ཧཱུཾ་མཛད་ཀྱི་སྐུས་དབང་ཕྱུག་ཆེན་པོ་ལ་སོགས་པ་ཐམས་ཅད་རྗེས་སུ་བཏུལ་བར་བསམ་པར་བྱའོ། །དེ་ལྟ་བུས་ནི་ཁམས་གསུམ་མ་ལུས་པ་ལས་རྣམ་པར་རྒྱལ་བར་འགྱུར་རོ།། སེམས་ཅན་གྱི་ཁམས་ཐམས་ཅད་འདུལ་བ་ནི་ཞེས་བྱ་བ་ནི་སེམས་ཅན་གྱི་ཁམས་ཐམས་ཅད་སྐལ་བ་ནི་ཇི་ལྟ་བ་བཞིན་དུ་ལུང་དང་རྟོགས་པའི་བདག་ཉིད་ཅན་ལ་རབ་ཏུ་གཞག་པ་ནི་བཏུལ་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་ཁྲོ་བོའི་གསང་བས་སོ་ཞེས་བྱ་བ་གསུངས་ཏེ། རྡོ་རྗེ་ཁྲོ་བོ་ནི་རྡོ་རྗེ་ཁྲོ་བོ་སྟེ། རབ་ཏུ་དགའ་བའི་རྡོ་རྗེ་ཁྲོ་བོའི་གསང་བ་ནི་རྡོ་རྗེ་ཁྲོ་བོའི་གསང་བའི་ཕྱག་རྒྱ་སྟེ། དེས་རབ་ཏུ་འཇིགས་པར་འགྱུར་རོ། །འདི་སྐད་སྟོན་པ་ཡིན་ཏེ་དེ་བཞིན་དུ་རབ་ཏུ་དགའ་བའི་རྡོ་རྗེ་ཁྲོ་བོའི་སྦྱོར་བ་བྱས་ལ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་དེ་བཞིན་དུ་བཅིངས་ལ། གཡོན་པའི་མཛུབ་མོས་བསྒྲུབ་པར་བྱ་བ་ལ་སྡིགས་མཛུབ་བྱའོ། །དེ་ནས་ཕྱག་རྒྱ་འདི་ལས་བྱུང་བའི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིས་རྗེས་སུ་བསྟན་ཅིང་དུལ་བ་ལ་རབ་ཏུ་འཇོག་པར་འགྱུར་རོ། །འཇིག་རྟེན་གསུམ་མ་ལུས་པ་ལས་རྣམ་པར་རྒྱལ་བ་ནི་ཞེས་བྱ་བ་ལ། དབང་ཕྱུག་ཆེན་པོ་ལ་སོགས་པ་འཇིག་རྟེན་ལས་རྒྱལ་བ་ནི་འཇིག་རྟེན་གསུམ་མ་ལུས་པ་ལས་རྒྱལ་བའོ། །དེ་ཇི་ལྟར་འགྱུར་ཞེ་ན། འཇིག་རྟེན་གསུམ་རྣམ་པར་རྒྱལ་བའི་རྡོ་རྗེས་སོ་ཞེས་བྱ་བ་གསུངས་ཏེ། དེ་བཞིན་དུ་བཅོམ་ལྡན་འདས་ཀྱིས་སྦྱོར་བ་བྱས་ལ། རྡོ་རྗེ་ཧཱུཾ་མཛད་གཡོན་བརྐྱང་བའི་གནས་པའི་བཞུགས་པས་སྡིགས་མཛུབ་བྱས་ཤིང་རང་གི་ལུས་ལས་བྱུང་བའི་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཞབས་གཡོན་པས་བསྒྲུབ་པར་བྱ་བ་མནན་པར་བྱས་ཏེ། དེ་ལྟ་བུས་ནི་འཇིག་རྟེན་གསུམ་མ་ལུས་པ་ལས་རྣམ་པར་རྒྱལ་བར་འགྱུར་རོ། །ཐམས་ཅད་དགུག་པ་དང་ཞེས་བྱ་བ་ལ་སོགས་པ་ལ་དབང་ཕྱུག་ཆེན་པོ་ལ་སོགས་པ་དགུག་པ་ནི་ཐམས་ཅད་དགུག་པའོ། །དེ་རྣམས་ཉིད་དཀྱིལ་འཁོར་རམ་སྣོད་ལ་འཇུག་པ་དང༌། སྣོད་ལ་ཞུགས་པ་དེ་རྣམས་ཉིད་དབབ་པ་ནི་གཡོ་བ་ལ་སོགས་པས་
དབབ་པའོ། །གདོན་དེ་རྣམས་རྡོ་རྗེ་ལྕགས་སྒྲོག་གིས་བསྡམས་ཏེ་རང་དབང་མེད་པར་བྱས་ནས་བཅིངས་པའོ། །དེ་རྣམས་ཉིད་རང་དབང་དུ་བྱ་བ་ནི་དབང་དུ་བྱ་བའོ། །དེ་རྣམས་གཡུལ་འགྱེད་པར་ཞུགས་པའི་དྲེགས་པ་བསལ་བར་བྱ་བའམ། ས་འོག་གི་འཁྲུལ་འཁོར་ལ་སོགས་པ་གཞོམ་པ་ནི་གཞིག་པའོ། །དེ་རྣམས་ཉིད་མི་འགྱུར་བར་བྱས་པ་ནི་རེངས་པར་བྱས་པའོ། །དེ་རྣམས་གཉིད་ལོག་པར་བྱ་བ་དང༌། རྒྱས་གདབ་པ་དང༌། བསྒྱེལ་བ་དང༌། གསད་པར་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་བྱ་ཞེ་ན། བདེ་བ་ཆེན་པོ་རྡོ་རྗེ་གསང་བའི་དམ་ཚིག་གི་ཁྲོ་བོས་སོ་ཞེས་བྱ་བ་གསུངས་ཏེ། དེ་བཞིན་དུ་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ལ་རྡོ་རྗེ་ཧཱུཾ་མཛད་བཅིངས་ཏེ། མཛུབ་མོ་གཉིས་གཤིབས་ལ་རྩེ་མོ་སྦྱར་ནས་བསྒྲུབ་པར་བྱ་བ་ལ་སྡིགས་མཛུབ་བྱས་ཏེ། འདི་ནི་བདེ་བ་ཆེན་པོ་གསང་བའི་དམ་ཚིག་གི་ཁྲོ་བོའི་ཕྱག་རྒྱ་ཡིན་ཏེ། དེས་བསྒྲུབ་པར་བྱ་བ་དགུག་པའི་བསམ་པས་བསྒྲུབ་པར་བྱ་བ་ལ་སྡིགས་མཛུབ་བྱ་ཞིང༌། སྡིགས་མཛུབ་ཀྱི་རྡོ་རྗེ་ལས་བྱུང་བའི་བཅོམ་ལྡན་འདས་རྡོ་རྗེ་ལྕགས་ཀྱུའི་ཁྲོ་བོས་བསྒྲུབ་པར་བྱ་བ་འགུགས་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་དགུག་པར་འགྱུར་རོ། །གཞུག་པའི་བསམ་པས་དེ་བཞིན་དུ་སྡིགས་མཛུབ་བྱས་ལ་སྡིགས་མཛུབ་ཀྱི་རྡོ་རྗེ་ལས་བྱུང་བའི་རྡོ་རྗེ་ཞགས་པས་བཏབ་པར་བསམས་ན་དེ་ལྟ་བུས་ནི་བཅིངས་པར་འགྱུར་རོ། །དེ་བཞིན་དུ་དབབ་པའི་བསམ་པས་སྡིགས་མཛུབ་བྱས་ལ། བཅོམ་ལྡན་འདས་རྡོ་རྗེ་འབེབས་པའི་ཕྱག་རྒྱ་ཁྲོ་བོ་སྐུ་མདོག་དམར་པོ་རླུང་དང་མེའི་དཀྱིལ་འཁོར་གྱི་དབུས་ན་བཞུགས་པས་བསྒྲུབ་པར་བྱ་བའི་རྐང་པ་ནས་བརྩམས་ཏེ། སྤྱི་བོའི་བར་དུ་ཤིང་སྐམ་པོ་བཞིན་དུ་རབ་ཏུ་འབར་བར་བསམས་ན་དེ་ལྟ་བུས་ནི་འབབ་པར་འགྱུར་རོ། །དེ་བཞིན་དུ་བཅིང་བའི་བསམ་པས་སྲིན་པོ་ལ་སོགས་པ་སྡིགས་མཛུབ་བྱས་ལ་བཅོམ་ལྡན་འདས་རྡོ་རྗེ་ལྕགས་སྒྲོག་གི་ཁྲོ་བོས་ལྕགས་སྒྲོག་གིས་བསྡམས་པར་བསམས་ན་དེ་ལྟ་བུས་ནི་བཅིངས་པར་འགྱུར་རོ། །དེ་བཞིན་དུ་དབང་དུ་བྱ་བའི་བསམ་པས་སྡིགས་མཛུབ་བྱ་ཞིང་བཅོམ་ལྡན་
འདས་རྡོ་རྗེ་ཡིད་ལས་བྱུང་བའི་ཁྲོ་བོ་མེ་ཏོག་གི་མདངས་ཀྱང་བསྒྲུབ་པར་བྱ་བའི་སྙིང་གར་ཕོག་ཅིང་དམར་པོར་གྱུར་པས་དབང་དུ་གྱུར་ནས་རང་ཉིད་དམ་ནོར་གྱིས་ཀྱང་རྐང་པ་ལ་འདུད་པར་བསམ་པར་བྱ་སྟེ། དེ་ལྟ་བུས་ནི་དབང་དུ་འགྱུར་རོ། །དེ་བཞིན་དུ་གཞོམ་པར་བྱ་པའི་བསམ་པས་སྡིགས་མཛུབ་བྱ་ཞིང་ཕྱག་རྒྱ་བཅིངས་པ་ལས་རྡོ་རྗེ་འབར་བ་རྩེ་མོ་བཞི་པ་སྤྲོས་ལ། འཁྲུལ་འཁོར་ལ་སོགས་པ་ལ་དབབ་པར་བྱ་སྟེ་དེ་ལྟ་བུས་ནི་རྣམ་པར་གཞིག་པར་འགྱུར་རོ། །དེ་བཞིན་དུ་དབབ་པ་ལ་སོགས་པ་ལ་རེངས་པར་བྱ་བའི་བསམ་པས་སྡིགས་མཛུང་བྱ་ཞིང་བཅོམ་ལྡན་འདས་རྡོ་རྗེ་ཧཱུཾ་མཛད་སྐུ་མདོག་སེར་པོ་སྣ་ཚོགས་རྡོ་རྗེ་གསེར་གྱི་མདོག་ཅན་ནམ་མཁའ་དང་མཉམ་པའི་སྟེང་ན་གཡོན་བརྐྱང་བས་བཞུགས་པས་བསྒྲུབ་པར་བྱ་བ་མནན་པར་བསམ་པར་བྱ་སྟེ་དེ་ལྟ་བུས་ནི་རེངས་པར་འགྱུར་རོ། །དེ་བཞིན་དུ་གཉིད་ལོག་ཏུ་གཞུག་པའི་བསམ་པས་བསྒྲུབ་པར་བྱ་བ་སྡིགས་མཛུབ་བྱ་ཞིང་བཅོམ་ལྡན་འདས་རྡོ་རྗེ་ཧཱུཾ་མཛད་བསྒྲུབ་པར་བྱ་བ་དང་ལྷན་ཅིག་ཏུ་གྱུར་ནས། མིག་བཙུམས་ཏེ་གཉིད་ལོག་པར་བསམས་ན་དེ་ལྟ་བུས་ནི་གཉིད་ལོག་པར་འགྱུར་རོ། །དེ་བཞིན་དུ་རྒྱས་བཏབ་པའི་བསམ་པས་སྡིགས་མཛུབ་བྱ་ཞིང་བསྒྲུབ་པར་བྱ་བའི་སྙིང་གར་ཡང་ཧཱུཾ་ལས་རྡོ་རྗེ་འབར་བ་བྱུང་བར་བསམ་པར་བྱ་སྟེ། དེ་ལྟ་བུས་ནི་རྒྱས་བཏབ་པར་འགྱུར་རོ། །དེ་བཞིན་དུ་བསྒྱེལ་བའི་བསམ་པས་སྡིག་མཛུབ་བྱས་ལ་སྡིགས་མཛུབ་ཀྱི་རྡོ་རྗེ་འབར་བ་སྤྲོས་ལ་བསྒྲུབ་པར་བྱ་བའི་སྟེང་དུ་འབབ་པར་ཡང་དང་ཡང་དུ་བསམས་ན་འགྱེལ་བར་འགྱུར་རོ། །དེ་བཞིན་དུ་བསད་པའི་བསམ་པས་སྡིགས་མཛུབ་བྱས་ལ་རང་གི་ལུས་ལ་རྡོ་རྗེ་གནོད་སྦྱིན་དང༌། སྲིན་པོ་དང༌། མཁའ་འགྲོ་དང༌། བྱ་རྒོད་དང༌། སྟག་དང༌། སེང་གེ་དང༌། བྱ་རོག་དང༌། ཝ་དང་སྤྱང་ཀི་ལ་སོགས་པ་བྱུང་ལ་བསྒྲུབ་པར་བྱ་བ་ཟོས་པར་བསམས་ན་དེ་ལྟ་བུས་ནི་གསོད་པར་འགྱུར་རོ། །ཐམས་ཅད་ལྟུང་བར་བྱ་བ་ལ་ནི་རྡོ་རྗེ་ཕྲ་མོ་ཁྲོ་བོས་སོ་ཞེས་བྱ་བ་ནི་དེ་བཞིན་དུ་བཅོམ་ལྡན་འདས་ཀྱི་སྦྱོར་བ་བྱས་ལ། རྡོ་རྗེ་ཧཱུཾ་མཛད་བཅིངས་ནས་སྣའི་དབུགས་ཀྱི་རླུང་གིས་སྣའི་རྩེ་མོ་ལས་རྡོ་རྗེ་
ཕྲ་མོ་བྱུང་ལ། དེ་བསྒྲུབ་པར་བྱ་བའི་སྟེང་དུ་དབབ་པར་བྱ་སྟེ་དེ་ལྟ་བུས་ནི་ཐམས་ཅད་ལྟུང་བར་འགྱུར་རོ། །ཐམས་ཅད་དུ་དབབ་པ་ལ་ནི་རྡོ་རྗེ་འབེབས་པའི་ཁྲོ་བོས་ཞེས་བྱ་བ་ནི་དེ་བཞིན་དུ་བཅོམ་ལྡན་འདས་ཀྱི་སྦྱོར་བ་བྱས་ལ་རྡོ་རྗེ་ཧཱུཾ་མཛད་བཅིངས་ཏེ། ཡི་གེ་ཨའི་མཐའ་ཅན་གྱི་སྔགས་བཟླས་ཏེ། བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིས་ཀུན་དུ་གང་བར་གྱུར་པར་བསམ་པར་བྱ་སྟེ་དེ་ལྟ་བུས་ནི་ཐམས་ཅད་འབབ་པར་འགྱུར་རོ། །ཐམས་ཅད་ངེས་པར་གནོན་པ་ལ་ནི་རྡོ་རྗེ་གད་རྒྱངས་ཀྱིས་སོ་ཞེས་བྱ་བ་ལ་ནི་བཅོམ་ལྡན་འདས་ཀྱི་སྦྱོར་བ་བྱས་ལ་རྡོ་རྗེ་ཧཱུཾ་མཛད་བཅིངས་ཏེ་ཡི་གེ་ཧའི་མཐའ་ཅན་གྱི་སྔགས་ཟློས་ཤིང་ཧ་ཧ་ཞེས་བྱ་བའི་གད་མོ་རྟ་གང་བྱས་ཤིང་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཞབས་ཀྱིས་བསྒྲུབ་པར་བྱ་བ་ལ་བསྣུན་པས་ཁ་ཐུར་དུ་བུ་བཅིང་འགྱེལ་བར་བསམ་པར་བྱ་སྟེ་དེ་ལྟ་བུས་ནི་ངེས་པར་གནོན་པར་འགྱུར་རོ། །ལས་ཐམས་ཅད་ལ་ཉེ་བར་དགོད་པ་ཞེས་བྱ་བ་ལ་ནི་ལས་ཀྱང་ཡིན་ལ་ཐམས་ཅད་ཀྱང་ཡིན་པས་ལས་ཐམས་ཅད་དེ། རབ་ཏུ་དགའ་བའི་རྡོ་རྗེ་ཁྲོ་བོ་ལ་སོགས་པ་ནས་རྡོ་རྗེ་འབེབས་པའི་ཁྲོ་བོའི་བར་གྱི་ཕྱག་རྒྱ་ཆེན་པོ་ལ་སོགས་པའི་ལས་རྣམས་སོ། །དེ་རྣམས་ལ་ཉེ་བར་དགོད་པ་ནི་ཕྱག་རྒྱ་ཆེན་པོ་ལ་སོགས་པའི་ལས་ཀྱིས་ཕྱག་རྒྱ་ཆེན་པོ་ལ་སོགས་པའི་འབྲས་བུ་ཐོབ་པའོ། །དེ་ཇི་ལྟར་འགྱུར་ཞེ་ན་བདེ་བ་ཆེན་པོ་རྡོ་རྗེ་དམ་ཚིག་གི་ཁྲོ་བོས་སོ་ཞེས་བྱ་བ་གསུངས་ཏེ། དེ་བཞིན་དུ་བཅོམ་ལྡན་འདས་ཀྱི་སྦྱོར་བ་བྱས་ལ་རྡོ་རྗེ་འབར་བ་རྩེ་མོ་བཞི་པ་བསྒོམ་ཞིང་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོ་བཅིངས་ལ་ལས་གང་དགོས་པ་དེ་ཐོབ་ཅིང་རྙེད་པའི་བསམ་པས་སྔགས་བཟླ་བར་བྱའོ། །དེ་ལྟ་བུས་ནི། ཕྱག་རྒྱ་ཆེན་པོ་ལ་སོགས་པ་ལས་ཐམས་ཅད་ཀྱི་འབྲས་བུ་ཐོབ་པར་འགྱུར་རོ། །བདེ་བ་ཆེན་པོ་རྡོ་རྗེ་གསང་བ་ལས་ཞེས་བྱ་བ་ལ་བདེ་བ་ཆེན་པོ་རྡོ་རྗེ་ནི་བཤད་ཟིན་ཏོ།། །། དེའི་གསང་བ་ནི་རྡོ་རྗེ་རིགས་ཀྱི་རྟོག་པའོ། །དེ་ལས་རབ་ཏུ་དགའ་བ་ལས་བྱུང་བ་རྡོ་རྗེ་གསང་བའི་དམ་ཚིག་གི་རྡོ་རྗེ་སེམས་དཔའ་ལས་བྱུང་བའི་རབ་ཏུ་དགའ་བའི་རྡོ་རྗེ་ཁྲོ་བོ་སྟེ། དེའི་ཆོ་ག་རྒྱས་པ་ནི་དེའི་དཀྱིལ་འཁོར་ལ་སོགས་པ་སྒྲུབ་པ་དང༌། བསྒྲུབ་པར་བྱ་བའི་རྟོག་པའི་རྒྱུན་ཡིན་ནོ། །
ཡང་འདིའི་དོན་བདེ་བླག་ཏུ་རྟོགས་པར་བྱ་བའི་ཕྱིར་བརྗོད་པར་བྱ་སྟེ། དམ་ཚིག་སེམས་དཔར་བྱིན་གྱིས་བརླབས་པ་སྔ་མ་བཞིན་དུ་བྱས་ལ་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོ་བཅིངས་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཡིད་ཀྱིས་ཞུགས་ལ། དེར་རྡོ་རྗེ་ཁྲོ་བོའི་ཕྱག་རྒྱས་རབ་ཏུ་དགའ་བའི་རྡོ་རྗེ་ཁྲོ་བོའི་དཀྱིལ་འཁོར་ནམ་མཁའ་དང་མཉམ་པར་སྤྲུལ་ལ་འོག་ནས་བཤད་པའི་འཇུག་པའི་ཆོ་གས་མེ་ཏོག་གི་ཕྲེང་བ་བླངས་ཏེ་འཇུག་པར་བྱའོ། །དེ་ནས་རང་གི་མགོར་མེ་ཏོག་གི་ཕྲེང་བ་གཏོར་ལ་ཇི་ལྟ་བ་བཞིན་དུ་བཅིངས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྣམས་རྗེས་སུ་སྤྱད་ལ་དཀྱིལ་འཁོར་དེའི་རང་གི་སྙིང་གར་ཟླ་བའི་དཀྱིལ་འཁོར་གྱི་ནང་དུ་འདུས་ཤིང་གཅིག་ཏུ་གྱུར་པར་བསམ་པར་བྱའོ། །དེ་ནས་རྡོ་རྗེ་སེམས་དཔའི་རྣལ་འབྱོར་ཆེན་པོ་ལྟར་རང་གི་རྣལ་འབྱོར་ཆེན་པོ་བྱས་ལ་ཆོ་ག་ཐམས་ཅད་རྗེས་སུ་སྤྱད་དེ། དེ་ཁོ་ན་ཉིད་ཀྱིས་རྡོ་རྗེ་བཟུང་ཞིང་ཆོས་ཀྱི་དྲིལ་བུ་དཀྲོལ་ལ་དམ་ཚིག་གིས་ཕྱག་རྒྱ་ཆེན་པོར་བྱིན་གྱིས་བརླབས་ནས་རང་གི་སྔགས་ལན་གསུམ་བཟླ་བར་བྱའོ། །དེ་ནས་རྡོ་རྗེ་འཁོར་ལོས་ནམ་མཁའི་ཕྱོགས་སུ་བཅོམ་ལྡན་འདས་ཀྱི་དཀྱིལ་འཁོར་སྤྲུལ་ལ་ལྷ་ཐམས་ཅད་ཀྱི་གནས་སུ་ཨ་ཧྲཱི་ཞེས་བྱ་བས་སྣ་ཚོགས་པདྨ་བསྐྱེད་པར་བྱའོ། །དེ་ནས་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་ལ་སྔོན་དུ་བསྙེན་པ་བྱ་བ་དང༌། དེ་བཞིན་དུ་བདག་ཉིད་སྤྲོ་བ་བསྐྱེད་པར་བྱའོ། །དེ་ནས་སྔ་མ་བཞིན་དུ་སངས་རྒྱས་སྤྱན་དྲང་བར་བྱས་ནས་དེའི་འོག་ཏུ་ཏིང་ངེ་འཛིན་རྣམ་པ་གསུམ་བསྒོམ་པར་བྱའོ་།དེ་ནས་བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོ་བཅིངས་ལ་སྔགས་དེ་བཟླ་བར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ལ་གསོལ་བ་བཏབ་པར་བསམ་པར་བྱའོ། །བཅོམ་ལྡན་ཁྱོད་ལ་གསོལ་བ་ནི། །འདོད་ཆགས་ཆེན་པོ་བདེ་བ་ཆེ། །སྙིང་པོ་འདི་ཡིས་བརྟན་པ་ཉིད། །བདེ་ཆེན་མྱུར་དུ་སྒྲུབ་པར་མཛོད། །ཅེས་གསོལ་བ་བཏབ་པར་བསམ་མོ། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ལ་ཕྱག་ བྱས་ལ་དེ་བཞིན་གཤེགས་པ་ཐམས་ཅད་
ཀྱིས་ནམ་མཁའི་ཁམས་གང ་བར་བསམས་ལ། བདག་ནི་རང་ཉིད་རྡོ་རྗེ་ཅན། །ཞེས་བྱ་བ་ལ་སོགས་པ་བརྗོད་དེ་དེའི་འོག་ཏུ་རང་གི་སྔགས་བཟླའོ། །དེ་ནས་བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོའི་དམ་ཚིག་གི་ཕྱག་རྒྱ་དང༌། ཧཱུཾ་རཀྟ་ཛཱ་ལ་མཱ་ལ་པྲ་ལ་ཡ་ཨགྣི་པྲ་དཱིཔྟ་ཏེ་ཛ་ས་མ་ཧཱ་སུ་ཁ་སུ་ར་ཏ་མ་ཧཱ་ཀྲོ་དྷ། ཛཿ་ཧཱུཾ་བཾ་ཧོཿ་ཕཊ། བཛྲོ་ཏྟིཥྛ་མཎྜལ་ཨུཏ་ཐ་པ་ཡ་ཞེས་བརྗོད་དེ་དཀྱིལ་འཁོར་བཏེག་ལ་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་དེ་ཉིད་ཀྱིས་བདག་ཉིད་ལ་ལན་ཅིག་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོར་བསམས་ཏེ། ཕྱག་རྒྱ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རང་གི་སྔགས་ནི་རབ་བཟླས་ཤིང༌། །བསྙེན་པས་ཡོངས་སུ་བསྐོར་བར་བྱ། །དེ་ནས་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་ཆོ་ག་རྣམས་རྗེས་སུ་སྤྱད་ལ། དཀྱིལ་འཁོར་འདི་ཇི་ལྟ་བ་བཞིན་དུ་བྲི་བར་བྱའོ། །དེ་ནས་དཀྱིལ་འཁོར་དབུས་མའི་དབུས་སུ་སྣ་ཚོགས་པདྨའི་སྟེང་དུ་བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོའི་སྙིང་པོ་འདིས་སྔར་བཤད་པའི་མཚན་ཉིད་ཅན་བྲི་བར་བྱའོ། །སུ་ར་ཏོད་བྷ་བ་ཧཱུཾ། བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོའི་ཐམས་ཅད་དུ་རྡོ་རྗེ་ཡིད་ལས་བྱུང་བ་ནས་རྡོ་རྗེ་འབེབས་པའི་བར་དུ། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་སྦྱོར་བས་རྡོ་རྗེ་སྐྱིལ་མོ་ཀྲུང་དུ་བཞུགས་པ། སྐུ་མདོག་སྔོ་བ་དང་རྡོ་རྗེ་གཞུ་དང་མདའ་ལ་སོགས་པ་བསྣམས་པ་འོད་ཟེར་དམར་པོ་ཀུན་ནས་འབར་བས་ཁྱབ་པ་།ཁྲོ་གཉེར་བསྡུས་ཞིང་བསྡུས་པ་སྨ་ར་དམར་སེར་ཅན། སྤྱན་འབར་བ་རྡོ་རྗེའི་མཆེ་བ་གཙིགས་པས་མ་མཆུའི་སྒྲོས་མནན་པ། ཞལ་རྣམ་པར་འགྱུར་བ། དབུ་སྐྲ་གྱེན་དུ་བརྫེས་ཤིང་འབར་བ་བྲི་བར་བྱའོ། །དེ་ནས་འདི་རྣམས་ཀྱི་སྙིང་པོ་བཤད་པར་བྱའོ། ཧོ་དྲྀཥྚ་སཱ་ཡ་ཀ་མ་ཊ་ཧཱུཾ་བཛྲ་ཀཱི་ལི་ཀི་ལ་ཧཱུཾ་ཧཾ་སྨར་བཛྲ་བནྡྷ་ཧཱུཾ་བཛྲ་ཏོ་ཥ་ཧཱུཾ། ཨོཾ་མ་དྷུ་བཛྲ། ཨོཾ་མ་གྷཱ་བཛྲི་ཧཱུཾ་ཤ་རད་པ་ཛྲི། ཧཱུཾ་ཤེ་ཤེ་རི། ཧཱུཾ་བཛྲ་ལཱ་སྱི། ཧཱ་སྱ་བཛྲ་ནི། ཨོཾ་བཛྲ་གཱི་ཏེ། ཨོཾ་ནྲྀ་རྟེ་བཛྲི། ཛཿ་བཛྲ་ཨཾ་ཀུ་ཤ་།ཧཱུཾ་བཛྲ་པཱ་ཤ །བཾ་བཛྲ་སྥོ་ཊ། ཨ་བཛྲ་གྷཎྚ། འདི་དག་ཐམས་ཅད་ཀྱང་སངས་རྒྱས་ལྔའི་ཅོད་པན་དང༌། རྡོ་རྗེ་ཕྲེང་བས་དབང་
བསྐུར་བའི་ཅོད་པན་ཅན་ཡིན་ནོ། །དེ་ནས་ཇི་ལྟ་བ་བཞིན་དུ་སྒོ་ཕྱེ་ལ། ཁྲོ་བོའི་ཁུ་ཚུར་གྱིས་ཡོངས་སུ་གཟུང་བའི་རྡོ་རྗེ་འབར་པ་དང༌། མེ་ཏོག་གི་ལྕུག་མ་ལ་ཡོངས་སུ་བཟླས་པའི་བུམ་པ་དང༌། བུམ་པ་གང་བ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་ལ་སྔ་མ་བཞིན་དུ་མཆོད་ལ། མཆོད་པ་ཐམས་ཅད་ཀྱིས་ཀྱང་ཡང་དག་པར་མཆོད་པར་བྱའོ། །དེ་ནས་སྔ་མ་བཞིན་དུ་ཡོངས་སུ་བཟླས་པའི་གོས་སྔོན་བོས་སྨད་གཡོགས་དང༌། སྟོད་གཡོགས་དང༌། གདོང་གཡོགས་པ་ཇི་ལྟ་བ་བཞིན་དུ་བྱས་ལ་སྡོམ་པ་ཡང་ཇི་ལྟ་བ་བཞིན་དུ་བླངས་ནས། བྱང་ཆུབ་ཀྱི་སེམས་བསྐྱེད་དེ། ཁྲོ་བོའི་ཁུ་ཚུར་གྱིས་རང་གི་རྡོ་རྗེ་བླངས་ལ། རང་གི་སྙིང་གར་བཞག་ནས། ཧཱུཾ་ལས་རང་གི་སྙིང་གར་རྡོ་རྗེ་བསྐྱེད་ལ། འདི་སྐད་ཅེས་བརྗོད་དོ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་ཕྱི་རོལ་གྱི་སྒོར་བལྟས་པའི་བུམ་པའི་ཆུས་བདག་ཉིད་ལ་དབང་བསྐུར་ལ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་འཇུག་པའི་གླུ་དེ་བཞིན་དུ་ལེན་ཅིང་འཇུག་པར་བྱའོ། །དེ་ནས་དེ་བཞིན་དུ་བདག་ལ་བྱིན་གྱིས་བརླབ་པ་བྱས་ནས་རྣམ་པར་རྒྱལ་བའི་བུམ་པ་ལས་ཁྲོ་བོའི་ཁུ་ཚུར་གྱིས་ཆུ་བླངས་ནས་བདག་ཉིད་དབང་བསྐུར་བར་བྱའོ། །དེ་ནས་སངས་རྒྱས་ལྔའི་ཅོད་པན་དང་དབང་བསྐུར་བའི་ཕྱག་རྒྱས་བདག་ཉིད་ལ་དབང་བསྐུར་ནས། ཕྱི་རོལ་གྱི་སངས་རྒྱས་ལྔའི་ཅོད་པན་འབར་བའི་རྡོ་རྗེ་ཕྲེང་བ་དང་བཅས་པས་ཀྱང་དབང་བསྐུར་བར་བྱའོ། །དེ་ནས་འབར་བའི་རྡོ་རྗེ་དང༌། བདག་པོ་དང་མིང་གི་དབང་བསྐུར་བས་དབང་བསྐུར་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ལ་འབར་བའི་རྡོ་རྗེ་ཕྲེང་བའི་ཕྱག་རྒྱ་ནི་འདི་ཡིན་ཏེ། རྡོ་རྗེ་ཐལ་མོ་བཅིངས་ལ་མཛུབ་མོ་གཉིས་ཕན་ཚུན་དུ་ལྕགས་སྒྲོག་ཏུ་སྦྲེལ་ཏེ། མཐེ་བོང་གཉིས་གཞིབས། སྲིན་ལག་གཉིས་གཞིབས་ཏེ། རྩེ་མོར་བྱས་ལ་བཟློག་སྟེ། འདིས་སྤྱི་བོ་ནས་བརྩམས་ཏེ་ཕྱོགས་བཞིར་གཏུགས་ནས་དབྲལ་བར་གཞག་པར་བྱ་སྟེ། དེ་ལྟ་བུས་ནི་འབར་བའི་རྡོ་རྗེའི་ཕྲེང་བས་དབང་བསྐུར་བར་འགྱུར་རོ། །འདིའི་སྙིང་པོ་ནི་ཨ་བྷི་ཥེ་ཀ་ཞེས་བྱའོ། །དེ་ནས་དེ་ཁོ་ན་ཉིད་ཀྱིས་
རྡོ་རྗེ་གཟུང་ཞིང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་ཆེན་པོས་བྱིན་གྱིས་བརླབས་ནས་རང་གི་སྔགས་བཟླ་བར་བྱའོ། །དེ་ནས་མཆོད་པ་ལྔ་དང༌། རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ། ཚིགས་སུ་བཅད་པ་ལྔས་རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་དང༌། སྔགས་གཟུང་བ་དང༌། ཕྱག་རྒྱ་བཞི་བསླབ་པ་བཅོམ་ལྡན་འདས་ལ་ཕྱག་བྱས་ནས། བཅོམ་ལྡན་འདས་ལ་མནོས་ལ་སྔ་མ་བཞིན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། རང་གི་མིང་ནས་བརྗོད་དོ། དེ་ནས་རྡོ་རྗེ་བསྒྲུབ་པར་བྱའོ། །རྡོ་རྗེ་སློབ་དཔོན་སེམས་དཔའ་ཡི། །རྡོ་རྗེ་ལྕགས་ཀྱུ་བཅིངས་ནས་ནི། །སེ་གོ་ལ་མང་པོ་བརྡབ་བགྱིས་ལ། །སངས་རྒྱས་ཐམས་ཅད་བསྡུ་བར་བྱ། །དེ་ནས་མཚན་བརྒྱ་རྩ་བརྒྱད་པས་བསྟོད་པ་ཇི་ལྟ་བ་བཞིན་དུ་བྱས་ལ། སྔར་བཤད་པའི་ལྕགས་ཀྱུས་བཅོམ་ལྡན་འདས་འཁོར་དང་བཅས་པ། དཀྱིལ་འཁོར་ཆེན་པོར་བཅུག་ལ་རྡོ་རྗེ་གནོད་སྦྱིན་གྱིས་བགེགས་བསྐྲད་དེ། རྭ་བ་དང་དྲ་བ་ཡང་བྱས་ལ། རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ། རྡོ་རྗེ་བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། བཅོམ་ལྡན་འདས་འཁོར་དང་བཅས་པ་ལ་རང་གི་སྔགས་ཀྱིས་མཆོད་ཡོན་ཕུལ་ལ། བཅོམ་ལྡན་འདས་འཁོར་དང་བཅས་པ་རང་གི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དབང་བསྐུར་བའི་ཕྱག་རྒྱ་གཉིས་ཀྱིས་དབང་བསྐུར་ལ། ཡང་མཆོད་ཡོན་ཕུལ་ལ་མཆོད་པ་དང་རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ནས་རྣམ་པར་སྒེག་པའི་དགའ་པའི་རྡོ་རྗེ་དང་ཕྱག་བྱས་ལ་ཕྱི་རོལ་ཏུ་གཏོར་མ་བྱིན་ཏེ་སྦྱིན་སྲེག་བྱའོ། །དེ་ནས་བཅོམ་ལྡན་འདས་འཁོར་དང་བཅས་པ་ལ་ཡང་དག་པར་མཆོད་ནས་ཕྱག་རྒྱ་ཆེན་པོ་བཅིངས་ལ་ཇི་སྲིད་མཚན་མ་མ་ཐོབ་པར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་བསྒོམ་པར་བྱའོ། །དེ་ནས་ཕྱག་བྱས་ལ་འདི་སྐད་ཅེས་བརྗོད་པར་བྱའོ། །སྲིད་པའི་བདེ་བ་དག་བྱའི་ཕྱིར། །ཁྱེད་སྲིན་
སྲིད་པ་ལ་དགར་འགྱུར། །འདོད་པ་ཀུན་གྱི་དངོས་གྲུབ་ཆེ། །འགྲོ་བ་ཀུན་ལའང་གྲུབ་པ་ཡིན། །དེ་ལྟར་གནང་བ་ཐོབ་ནས་སློབ་མ་གཞུག་པར་བྱའོ། སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།། །།དེ་ནས་བསླབ་པའི་གཞི་ལྔ་ལ་སོགས་པ་ཡོངས་སུ་གཟུང་བའི་སློབ་མ་སྡོམ་པ་དོན་དུ་གཉེར་བ་ལ་སྡོམ་པ་འཛིན་དུ་གཞུག་གོ །དེ་ནས་དེའི་སྙིང་གར་རྡོ་རྗེ་དེ་བཞིན་དུ་བསམ་པར་བྱའོ། །དེ་ནས་དེ་རབ་ཏུ་དགའ་བའི་རྡོ་རྗེ་ཁྲོ་བོའི་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་དེ་ཡོན་གྱི་མཆོག་བླངས་ལ་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ་རང་གི་འཇུག་པའི་ཚུལ་གྱིས་བཅུག་ལ་རྣ་བར་འདི་སྐད་ཅེས་བརྗོད་པར་བྱའོ། །འདོད་ཆགས་བྲལ་བ་ཞེས་བྱ་བ་ནས་མ་བྱེད་ཅིག་ཅེས་བྱ་བའི་བར་དུ་དེ་བཞིན་གཤེགས་པའི་དཀྱིལ་འཁོར་ལས་བཤད་པའི་ཆོ་ག་ལྟར་དེའི་ཆོ་ག་ཐམས་ཅད་བྱའོ། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།ཆོ་ག་གཞན་དག་ནི་གསལ་བས་མ་བཤད་དོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས། རབ་ཏུ་དགའ་བའི་རྡོ་རྗེ་ཁྲོ་བོའི་རྟོག་པ་བཤད་པ་རྫོགས་སོ།། །།དེ་ལྟར་ཁྲོ་བས་ཁྲོ་བ་སྤང་བའི་ཕྱིར་རབ་ཏུ་དགའ་བའི་རྡོ་རྗེ་ཁྲོ་བོའི་རྟོག་པ་གསུངས་ནས་ད་ནི་ལོག་པར་ལྟ་བའི་གཉེན་པོར་གྱུར་པ་ཡང་དག་པར་ལྟ་བའི་རང་བཞིན་ཅན་ཤེས་རབ་ཀྱི་ཕ་རོལ་ཏུ་ཕྱིན་པའི་བདག་ཉིད་པདྨའི་རིགས་བསྟན་པའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་བར་མ་ཆད་པ་སྟེ་དང་པོ་སྦྱོར་བའི་རྗེས་ཐོགས་ཉིད་ལའོ། །འདིར་དང་པོ་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་དེ་རང་བཞིན་གྱིས་དག་ཅིང་གཉིས་སུ་མེད་པའི་སེམས་དང་སེམས་ལས་བྱུང་བ་དེ་ཉིད་ནི་དོན་ཡོད་ཅིང་ཐོགས་པ་མེད་པ་ཡིན་ནོ། །ཐམས་ཅད་དག་པ་ནི་སྒྲིབ་པ་མེད་པའོ། །པདྨའི་
རིགས་ཀྱི་ཚུལ་གྱི་ཆོས་གང་ཡིན་པ་དེ་ལ་དེ་སྐད་ཅེས་བྱའོ། །དེ་དེ་ལྟར་གྱུར་པ་བཅོམ་ལྡན་འདས་རྡོ་རྗེ་སེམས་དཔའི་རང་བཞིན་གྱི་བྱིན་གྱིས་བརླབ་པའོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ལ་སོགས་པ་གསུངས་ཏ་ད་བཞིན་གཤེགས་པ་ཐམས་ཅད་ཀྱི། རྡོ་རྗེ་ཡེ་ཤེས་ནི་ཆོས་ཐམས་ཅད་རང་བཞིན་གྱིས་དག་པའོ་ཞེས་ངེས་པར་བྱས་པའོ། །དེའི་ཕྱག་རྒྱ་ནི་པདྨའི་རིགས་ཏེ་དེ་གཟུགས་བརྙན་གྱི་ཚུལ་དུ་སེམས་ཅན་གྱི་ཁམས་རྒྱས་བཏབ་ནས་ཕྱག་རྒྱའོ། །དངོས་པོར་འཛིན་པའི་མངོན་པར་ཞེན་པ་ནི་སྒྲིབ་པའོ། །དེ་འདི་ལ་མི་མངའ་བས་ན་སྒྲིབ་པ་མེད་པའོ། །དེའི་ཕྱག་རྒྱ་ནི་པདྨའི་རིགས་ཏེ་དེས་གཟུགས་དེ་ལྟ་བུ་གང་ཡིན་པ་དེ་ལ་དམིགས་པས་མིད་དེ་སྐད་བྱ་བའི་ཏིང་ངེ་འཛིན་ནི་དེ་བཞིན་གཤེགས་པ་ཐམས་ཅད་ཀྱི་སྒྲིབ་པ་མེད་པའི་རྡོ་རྗེ་ཡེ་ཤེས་ཀྱི་ཚུལ་གྱི་ཕྱག་རྒྱ་ཞེས་བྱ་བའི་ཏིང་ངེ་འཛིན་དེ་ལ་སྙོམས་པར་ཞུགས་པའོ། །སྙོམས་པར་ཞུགས་ནས་བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་པར་གྱུར་པའོ། །འདི་སྐད་སྟོན་ཏེ། བཅོམ་ལྡན་འདས་རྣམ་པར་སྣང་མཛད་པདྨའི་རིགས་ཀྱི་རྣམ་པར་ཐུགས་རྩེ་གཅིག་ཏུ་མཛད་དེ་པདྨའི་རིགས་ཀྱི་རྣམ་པར་ཐུགས་རྩེ་གཅིག་ཏུ་མཛད་དེ་པདྨའི་རིགས་སྤྲུལ་ནས་སེམས་ཅན་གྱི་དོན་བྱ་བའི་ཕྱིར་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ནོ། །བདེ་བ་ཆེན་པོ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །པདྨ་ཡང་ཡིན་ལ་ཆེན་པོ་ཡང་ཡིན་པས་ན་པདྨའི་རིགས་ཆེན་ནོ། །དེ་ཉིད་གཟུང་བ་དང་འཛིན་པའི་དྲི་མ་དང་བྲལ་བས་ན་དག་པའོ། །སྐྱེད་པར་མཛོད་ཅེས་བྱ་བ་ནི་འབྱུང་བར་མཛོད་ཅིག་པའོ། །མཆོག་ཀྱང་ཡིན་ལ་ཆེན་པོ་ཡང་ཡིན་པས་ན་མཆོག་ཡིན་ཏེ། རང་བཞིན་གྱིས་ཡང་དག་པའི་ཡེ་ཤེས་ཀྱི་ཚུལ་གྱིས་ཐམས་ཅད་དུ་སོང་བས་ན་ཆེན་པོའོ། །ཚུལ་དེ་ཉིད་ཀྱི་དམ་པར་གྱུར་པས་ན་མཆོག་གོ །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ་གསོལ་བ་བཏབ་པའི་རྗེས་ཐོགས་ལ་ཞེས་བྱ་བའི་ཐ་ཚིག་གོ །བཅོམ་ལྡན་འདས་རྡོ་རྗེ་འཆང་ཆེན་པོ་སྟེ་སྔགས་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། ཆོས་ཐམས་ཅད་ཅེས་བྱ་བ་ལ་སོགས་པ་སྨོས་ཏེ་ཆོས་ཀྱང་ཡིན་ལ་
ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ་པདྨའི་རིགས་ཀྱི་ཚུལ་ལོ། །དེ་རྣམས་ལ་གཟིགས་པ་ནི་ཏིང་ངེ་འཛིན་གྱི་ཚུལ་གྱིས་སོ་སོར་རྟོག་པར་མཛད་པའོ། །དེ་ནས་རྡོ་རྗེ་ལྟར་མི་ཕྱེད་པ་གང་ཡིན་པ་དེ་ལ་མིང་དེ་སྐད་ཅེས་བྱའོ། །རྣམ་པར་གནོན་པ་ནི་མཐུ་རྩལ་ལོ། །པདྨའི་རིགས་ཀྱི་སྤྲུལ་པས་འགྲོ་བའི་དོན་མཛད་ནས་སྔགས་གསུངས་པ་ཡིན་ནོ། །བཅོམ་ལྡན་འདས་ཀྱི་ཞལ་ནས་ཞེས་བྱ་བ་ནི་རྡོ་རྗེ་འཇིག་རྟེན་དབང་ཕྱུག་གི་ཞལ་ནས་སོ། །པདྨའི་མདོག་གི་མདངས་ཅན་ཞེས་བྱ་བ་ནི་དཀར་དམར་རོ། །ཟླ་བའི་དཀྱིལ་འཁོར་གྱི་འོད་ཅན་ནོ་ཞེས་བྱ་བ་ནི་གོ་སླའོ། །དེ་རྣམས་ཀྱི་ཕྱག་ན་ཅི་ཞིག་བསྣམས་ཞེས་པདྨའི་མདའ་ལ་སོགས་པ་ཡོངས་སུ་འཛིན་པ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཡིད་ལས་བྱུང་བ་ལ་སོགས་པ་དེ་དག་ཉིད་པདྨས་མཚན་པའི་རྡོ་རྗེ་མདའ་ལ་སོགས་པ་བསྣམས་པ་པདྨའི་རིགས་ཀྱི་ཚུལ་གྱིས་བྱུང་ངོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པའི་དབང་བསྐུར་བ་འཆང་ཞེས་བྱ་བ་ནི་དེ་བཞིན་གཤེགས་པ་འོད་དཔག་ཏུ་མེད་པ་འཛིན་པའོ། །རལ་པ་དང༌། ཅོད་པན་དང༌། ན་བཟའ་དམར་པོ་འཆང་བ་ཞེས་བྱ་བ་ནི་གོ་བར་ཟད་དོ། །པདྨ་ཆེན་པོའི་སེམས་དཔའ་རྣམས་ཕྱུང་ནས་དཀྱིལ་འཁོར་ཆེན་པོའི་ཚུལ་གྱིས་བཞུགས་སོ་ཞེས་བྱ་བ་ནི་པདྨ་ཆེན་པོའི་རིགས་ཀྱི་སེམས་དཔའི་ངོ་བོར་སེམས་དཔའ་དེ་རྣམས་རྡོ་རྗེ་འཇིག་རྟེན་དབང་ཕྱུག་གི་ཞལ་ནས་བྱུང་ནས། རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་ཡོངས་སུ་བསྐོར་ནས། ཕྱོགས་དང་མཚམས་རྣམས་སུ་ཞུགས་པའོ། །བཅོམ་ལྡན་འདས་ནི་འཇིག་རྟེན་དབང་ཕྱུག་གོ །ཞལ་རབ་ཏུ་བཞད་པ་ཞེས་བྱ་བ་ནི་འགྲོ་བའི་དོན་གཟིགས་པས་སོ། །གཡས་པས་དེ་བཞིན་གཤེགས་པའི་རྡོ་རྗེ་རང་གི་ཐུགས་གར་བསྟོད་པའི་ཚུལ་གྱིས་བསྣམས་ཞིང་གཡོན་པས་ཞེས་བྱ་བ་གཡོན་གྱི་པདྨའི་ཁུ་ཚུར་གྱིས་རྡོ་རྗེ་པདྨ་འཛིན་ཞིང་བསྙེམས་པའི་ཚུལ་གྱིས་པདྨའི་སྐྱིལ་མོ་ཀྲུང་དུ་བཞུགས་པའོ། །དེ་ལྟར་ན་བཅོམ་ལྡན་འདས་ཞེས་བྱ་བ་ནས་བརྩམས་ཏེ་རྡོ་རྗེ་སྐྱིལ་མོ་
ཀྲུང་གིས་བཞུགས་སོ་ཞེས་བྱ་བའི་བར་གྱིས་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བས་རང་གི་ཆོ་ག་རྣམས་རྗེས་སུ་སྤྱད་ནས། རྡོ་རྗེ་པདྨའི་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱ་རྣམས་བཅོམ་ལྡན་འདས་འཁོར་དང་བཅས་པ་དགུག་པ་དང་གཞུག་པ་དང༌། བཅིང་བ་དང་དབང་དུ་བྱ་བ་ལ་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་མངོན་པར་འདོད་པའི་དབང་བསྐུར་བའམ་པདྨའི་ཕྲེང་བས་དབང་བསྐུར་ལ་ལས་རྣམས་ལ་སྦྱོར་བར་བྱའོ། །དེ་ལ་ལས་ནི་འདི་དག་ཡིན་ཏེ། བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་བཅིངས་ལ། དེའི་སྔགས་བཟླས་ནས་འདི་སྐད་དུ་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་རང་བཞིན་གྱིས་དག་པའི་ཏིང་ངེ་འཛིན་གྱིས་སེམས་ཅན་གྱི་ཁམས་ཐམས་ཅད་རྣམ་པར་དག་པར་མཛོད་ཅིག་ཅེས་བརྗོད་དོ། །དེ་ནས་པདྨའི་རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་བོ་བཅིངས་ལ། བཅོམ་ལྡན་འདས་པདྨོའི་རྡོ་རྗེ་ཡིད་ལས་བྱུང་བ་པདྨའི་འདོད་ཆགས་ཀྱི་མདའ་རྣམ་པར་དག་པའི་གནས་ལ་སེམས་ཅན་གྱི་ཁམས་རབ་ཏུ་འཇོག་པར་མཛོད་ཅིག་ཅེས་བརྗོད་པར་བྱའོ། །པདྨ་ཀཱི་ལི་ཀཱི་ལའི་ཕྱག་རྒྱ་ཆེན་པོ་བཅིངས་ལ་བཅོམ་ལྡན་འདས་པདྨ་ཀཱི་ལི་ཀཱི་ལ་ལ་སེམས་ཅན་གྱི་ཁམས་མ་ལུས་པ་པདྨའི་རིགས་པའི་གནས་རྣམ་པར་དག་པའི་གནས་ལ་འཇོག་པར་མཛོད་ཅེས་བརྗོད་དོ། །དེ་བཞིན་དུ་པདྨའི་འབེབས་པའི་བར་གྱི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་པདྨའི་འབེབས་པས་སེམས་ཅན་གྱི་ཁམས་མ་ལུས་པ་རང་བཞིན་གྱིས་འོད་གསལ་བའི་པདྨ་འབེབས་པའི་ཡེ་ཤེས་ཉིད་ཀྱིས་དབང་དུ་མཛོད་ཅིག་ཅེས་བྱ་བའི་བར་དུ་བརྗོད་པར་བྱའོ། །འདི་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པ་ཡིན་ནོ། །དེ་ལྟར་ཏིང་ངེ་འཛིན་གསུམ་བཤད་ནས་ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར་དཀྱིལ་འཁོར་ཞེས་བྱ་བ་
ལ་སོགས་པ་ལ་སློབ་དཔོན་གྱི་ལས་ཀྱི་ཆོག་དང༌། སློབ་མ་འཇུག་པ་ལ་སོགས་པའི་ལས་ཀྱི་ཆོ་ག་གསུངས་པ་ཡིན་ནོ། །དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཐིག་གདབ་བོ། །ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ལྟར་འདིའི་ཕྱིའི་དཀྱིལ་འཁོར་ཐིག་གདབ་པར་བྱའོ། །དེའི་ནང་དུ་སྔ་མ་བཞིན་དུ་ཀ་བརྒྱད་ཀྱི་ཚུལ་གྱི་པདྨ་འདབ་མ་བརྒྱད་པ་ལ་པདྨའི་ཕྲེང་བས་ཡོངས་སུ་བསྐོར་བ་བྲི་བ་ནི་རྡོ་རྗེ་འཇིག་རྟེན་དབང་ཕྱུག་དང་པདྨ་རྡོ་རྗེ་ཡིད་ལས་བྱུང་བ་དང༌། པདྨ་ཀཱི་ལི་ཀཱི་ལ་དང། པདྨ་དྲན་པ་དང༌། པདྨ་བསྙེམས་པའི་སྔགས་ཐིག་སྐུད་ལ་ལན་བརྒྱ་རྩ་བརྒྱད་བཟླས་ཤིང༌། ཨོཾ་བཛྲ་སཱུ་ཏྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ་ཞེས་བྱ་བ་རྡོ་རྗེ་བསྡམས་པ་བཟུང་ལ་ཐིག་སྐུད་ལ་བརྒྱ་རྩ་བརྒྱད་བཟླ་བར་བྱའོ། །དེ་ནས་དེས་དཀྱིལ་འཁོར་ཐིག་གདབ་བོ། །དེ་བཞིན་དུ་ཐམས་ཅད་དུ་ཡང་བདག་པོ་ལྔའི་སྔགས་བཟླས་པ་དེའི་རྗེས་ལ་ཐིག་གདབ་པའི་སྔགས་ཐིག་སྐུད་ལ་ལན་བརྒྱ་རྩ་བརྒྱད་བཟླས་པ་ཡིན་པར་ཤེས་པར་བྱའོ། །རྡོ་རྗེ་འཇིག་རྟེན་དབང་ཕྱུག་གཞག །པདྨས་མཚན་པའི་ཚོགས་རྣམས་བྲི། །ཞེས་བྱ་བ་ནི་དེ་ལྟར་དཀྱིལ་འཁོར་ཐིག་བཏབ་ནས་དེ་བཞིན་དུ་ཡང་བདག་པོ་ལྔའི་སྔགས་བཟླས་ལ། ཚོན་རྩི་དགྱེ་བ་བྱས་ལ་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་དཀྱིལ་འཁོར་དབུས་མའི་དབུས་སུ་ཇི་ལྟ་བ་བཞིན་དུ་གཞག་ཅིང་བཞུགས་སུ་གསོལ་ལ་པདྨའི་རྡོ་རྗེ་ཡིད་ལས་བྱུང་བ་ནས་པདྨ་འབེབས་པའི་བར་དུ་རང་རང་གི་གནས་སུ་ཇི་ལྟ་བ་བཞིན་དུ་བྲི་བར་བྱའོ། །ཨོཾ་ཧྲཱིཿ་བཾ་ཧོཿ་ཞེས་བྱ་བ་ནི་བཅོམ་ལྡན་འདས་ཀྱི་སྙིང་པོའོ། །གཞན་དག་གི་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་སྙིང་པོ་རྣམས་ཡིན་པར་ཤེས་པར་བྱའོ། །དེ་ནས་དཀྱིལ་འཁོར་བྲིས་ནས་སློབ་དཔོན་རྡོ་རྗེ་པདྨའི་ཕྱག་རྒྱ་དང༌། བཛྲ་བཛྲ་ཞེས་བྱ་བ་རྡོ་རྗེ་ཤུགས་ཟློས་ཤིང་རྡོ་རྗེ་སེམས་དཔའི་དཀྱིལ་འཁོར་ཆེན་པོར་འཇུག་པའི་གླུ་ཡང་ལེན་ཅིང་འཇུག་པར་བྱའོ། །རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེ་བཅིངས་ལ་མཛུབ་མོ་གཉིས་བསྒྲེང་ལ་བཀུག་སྟེ་པདྨའི་
འདབ་མ་གཉིས་ཀྱི་ཚུལ་གྱིས་བཀན་ཏེ་བཞག་ལ་སྙིང་གའི་ཕྱོགས་སུ་གཞག་པ་ནི་རྡོ་རྗེ་པདྨ་སྟེ་དཀྱིལ་འཁོར་དུ་འཇུག་པའི་ཕྱག་རྒྱའོ། །འདིས་ཞུགས་པ་ལ་ཆོ་ག་ཐམས་ཅད་རྗེས་སུ་སྤྱད་དེ། དཀྱིལ་འཁོར་ཇི་ལྟ་བ་བཞིན་དུ་བསྒྲུབ་པར་བྱའོ། །དེ་ནས་བསྡུ་བ་བྱས་ལ་མཚན་བརྒྱ་རྩ་བརྒྱད་ཀྱིས་ཡང་དག་པར་བསྟོད་ནས། བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་སྤྱན་དྲང་བར་བྱའོ། །མཛུབ་མོའི་ལྕགས་ཀྱུ་གཉིས་ཀྱིས་ཞེས་བྱ་བ་འཇུག་པའི་ཕྱག་རྒྱའི་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ལ་སྤྱན་དྲང་བའི་སྔགས་ཟློས་ཤིང་དེས་དགུག་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །ཆོ་ག་རྒྱས་པ་ཐམས་ཅད་དེ་བཞིན་ནོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་དུ་ཆོ་ག་ཐམས་ཅད་ཇི་ལྟར་གསུངས་པ་འདིར་ཡང་དེ་བཞིན་དུ་བྱའོ་ཞེས་བྱ་བའི་ཐ་ཚིག་གོ །དེ་ལྟར་གཞུང་འདིས་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །ཡང་འདིའི་དོན་བརྗོད་པར་བྱ་སྟེ་བདག་བསྲུང་བ་དང་གནས་བསྲུང་བ་བྱས་ནས་རྡོ་རྗེ་འཁོར་ལོའི་ཕྱག་རྒྱས་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་གསུང་གི་དཀྱིལ་འཁོར་སྦྲུལ་ཏེ། ཕྱག་འཚལ་བ་ལ་སོགས་པ་བྱས་ནས་སྔོམ་པ་གཟུང་བར་བྱའོ། །དེ་ནས་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་ལ་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པས་བདག་ཉིད་ལ་དབབ་པར་བྱས་ལ་རང་གི་སྙིང་གར་ཕྱག་རྒྱ་དགྲོལ་བར་བྱས་ནས་རྡོ་རྗེ་ཁུ་ཚུར་གྱིས་དམ་ཚིག་གི་ཕྱག་རྒྱ་བཅིངས་ལ་སྔ་མ་བཞིན་དུ་དང་པོའི་རྡོ་རྗེ་བཅིང་བར་བྱའོ། །དེ་ནས་རང་གི་སྙིང་གར་ཕྱག་རྒྱ་ཐམས་ཅད་དགྲོལ་བར་བྱས་ལ་སྡིག་པ་རྣམས་དྲལ་བར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་འཇིག་རྟེན་དབང་ཕྱུག་གི་སྙིང་པོ་ཨོཾ་དྷི་བཾ་ཧོ་ཞེས་བྱ་བ་ཡིད་ཀྱིས་བྲིས་ལ་དེ་ཉིད་ཡིད་ལ་ཟློས་ཤིང་སྦ་བྷཱ་བ་ཤུདྡྷ་སྶརྦ་དྷརྨཱ་ཞེས་བྱ་བས་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་རང་གི་སེམས་དབྱངས་ཀྱི་ཡི་གེ་བཅུ་དྲུག་སྙིང་པོ་དང་བཅས་པ་ལས་ཟླ་བའི་དཀྱིལ་འཁོར་གྱི་གཟུགས་སུ་
བསམ་པར་བྱའོ། །དེའི་སྟེང་དུ་ཡི་གེ་ཀ་ལ་སོགས་བ་གསལ་བའི་སྙིང་པོ་དང་བཅས་པ་ལས་ཟླ་བའི་དཀྱིལ་འཁོར་གཉིས་པ་བསམ་པར་བྱའོ། །ཡང་དེ་ཉིད་དུ་སྙིང་པོ་དང་བཅས་པ་ལས་དང་པོའི་རྡོ་རྗེ་རྩེ་ལྔ་པ་རྡོ་རྗེ་པདྨར་བསམས་ལ་དེའི་དབུས་སུ་སྙིང་པོ་བསམས་ཏེ། རྡོ་རྗེ་པདྨ་ནི་བདག་གོ་ཞེས་བསྒོམ་ཞིང༌། པདྨ་ལས་པདྨའི་རིགས་སྤྲུལ་ལ་དེས་འགྲོ་བ་ཐམས་ཅད་འདུལ་བར་བྱས་ནས། དེ་ཡང་པདྨ་དེར་ཡིད་ཀྱིས་བཅུག་ལ་པདྨ་དེ་རྡོ་རྗེ་སེམས་དཔར་བྱིན་གྱིས་བརླབ་པའི་སྦྱོར་བས་དཔལ་རྡོ་རྗེ་སེམས་དཔའི་ཆོ་ག་རྣམ་པར་བསམས་ལ་སྙིང་པོ་རྡོ་རྗེ་འཇིག་རྟེན་དབང་ཕྱུག་གི་བདག་ཉིད་རྡོ་རྗེ་སེམས་དཔར་བསམས་ནས་འདི་སྐད་ཅེས་བརྗོད་དོ། །མ་ཧཱ་ས་མ་ཡ་སཏྭ་ཧཾ། དེ་ནས་འཕགས་པ་སྤྱན་རས་གཟིགས་དབང་ཕྱུག་གི་དམ་ཚིག་གི་ཕྱག་རྒྱ་བཅིངས་ལ་འདི་སྐད་བརྗོད་དོ། །ས་མ་ཡོ྅ཧཾ་དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་དབྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབས་ལ་ས་མ་སཏྭ་ཨདྷི་ཏིཥྛ་སྭ་མཾ་ཞེས་བརྗོད་དོ། །དེ་ནས་སྙིང་པོ་ཟློས་ཤིང་རྡོ་རྗེ་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གའི་ཟླ་བར་ཡིད་ཀྱིས་ཞུགས་ལ་རྡོ་རྗེ་འཁོར་ལོའི་ཕྱག་རྒྱས་བཅོམ་ལྡན་འདས་ཀྱི་དཀྱིལ་འཁོར་དེ་བཞིན་དུ་བསྐྱེད་ལ། འཇུག་པའི་ཕྱག་རྒྱས་མེ་ཏོག་གི་ཕྲེང་བ་བླངས་ལ་འཇུག་པའི་ཆོ་གས་འཇུག་པར་བྱའོ། །དེ་ནས་རང་གི་མགོར་མེ་ཏོག་གི་ཕྲེང་བ་དོར་ལ་ལངས་ཏེ་ཇི་ལྟ་བ་བཞིན་དུ་བཅིངས་ནས། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྣམས་རྗེས་སུ་སྤྱད་ལ་དཀྱིལ་འཁོར་དེ་རང་གི་སྙིང་གར་ཟླ་བར་བཅུག་སྟེ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་རྣལ་འབྱོར་ཆེན་པོ་བསྒྲུབ་པའི་ཚུལ་གྱིས་རྡོ་རྗེ་འཇིག་རྟེན་དབང་ཕྱུག་གི་རྣལ་འབྱོར་ཆེན་པོ་བསྒྲུབ་པར་བྱའོ། །དེ་ནས་དང་པོའི་རྡོ་རྗེས་རྡོ་རྗེ་སེམས་དཔའ་ལ་སོགས་པ་བྱིན་གྱིས་བརླབས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་ཆོག་རྗེས་སུ་སྤྱད་པར་བྱའོ། །དེ་ནས་དེ་ཁོ་ན་ཉིད་ཀྱིས་རྡོ་རྗེ་པདྨ་གཟུང་ཞིང་ཆོས་ཀྱི་དྲིལ་བུ་དཀྲོལ་ལ་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ཏེ་
སྙིང་པོ་ལན་གསུམ་བཟླ་བར་བྱའོ། །དེ་ནས་པདྨའི་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་ལ་ཡང་དག་པར་མཆོད་ནས་ཕྱག་རྒྱ་ཆེན་པོ་བཅིངས་ཏེ་ཡིད་ཀྱིས་ནམ་མཁའི་ཕྱོགས་སུ་གནས་ནས་རང་གི་སྙིང་པོ་བརྗོད་པར་བྱའོ། །དེ་ནས་དེ་ཉིད་དུ་རྡོ་རྗེ་འཁོར་ལོའི་ཕྱག་རྒྱས་ནམ་མཁའ་ལྟར་མཐའ་ཡས་བའི་རང་གི་དཀྱིལ་འཁོར་བསྐྱེད་ལ་ལྷ་ཐམས་ཅད་ཀྱི་གནས་སུ་ཧྲི་ལས་སྣ་ཚོགས་པདྨའི་གདན་བསྐྱེད་དེ། ཏིང་ངེ་འཛིན་གསུམ་ནས་བརྩམས་ཏེ་ཇི་སྲིད་དཀྱིལ་འཁོར་མངོན་སུམ་དུ་མཐོང་བར་གྱུར་བ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །དེ་ནས་སྔར་བཤད་པ་བཞིན་དུ་དཀྱིལ་འཁོར་གྱི་སའི་དབུས་སུ་འདུག་ལ་ཆོ་ག་རྣམས་དེ་བཞིན་དུ་རྗེས་སུ་སྤྱད་ཅིང་རྡོ་རྗེ་འཁོར་ལོས་རང་གི་དཀྱིལ་འཁོར་ནམ་མཁའ་དང་མཉམ་པ་དེ་བཞིན་དུ་བསྐྱེད་ནས་སྣ་ཚོགས་པདྨའི་གདན་ནམ་མཁའ་ལྟར་མཐའ་ཡས་པ་བསྐྱེད་པར་འདུག་སྟེ་སྔ་མ་བཞིན་བདག་ཉིད་སྤྲོ་བ་བསྐྱེད་པར་བྱའོ། །དེ་ནས་དེ་བཞིན་དུ་སངས་རྒྱས་ཐམས་ཅད་སྤྱན་དྲང་བར་བྱས་ནས་ཏིང་ངེ་འཛིན་གསུམ་པོ་བསྒོམ་པར་བྱའོ། །དེ་ནས་བཅོམ་ལྡན་འདས་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་བཅིངས་ལ་དེའི་སྙིང་པོ་བརྗོད་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་དེ་བཞིན་དུ་བདག་ཉིད་ལ་གསོལ་བ་བཏབ་པར་བསམ་པར་བྱའོ། །དེ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་རང་གི་དམ་ཚིག་གི་ཕྱག་རྒྱ་བཅིངས་ཏེ། ཨོཾ་དྷི་བཾ་ཧོ་བཛྲོ་ད་ཏིཥྛ་མཎྜ་ལཾ་ཨུད་ཐ་པ་ཡ་ཞེས་ཟློས་ཤིང༌། །དཀྱིལ་འཁོར་བཏེག་ལ་ནམ་མཁའི་ཕྱོགས་སུ་བཞག་སྟེ། བདག་ཉིད་དེ་ཉིད་གྱི་རང་གི་དམ་ཚིག་གི་ཕྱག་རྒྱས་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ཏེ། ཕྱག་རྒྱལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །སྙིང་པོ་ཡང་དག་ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་རྡོ་རྗེ་སེམས་དཔའི་དཀྱིལ་འཁོར་ཆེན་པོར་སྔགས་བཤད་བའི་རང་གི་ཆོ་ག་རྣམས་རྗེས་སུ་སྤྱད་ལ། དཀྱིལ་འཁོར་ཐི་གདབ་སྟེ་བྲིས་ནས། འཇིག་རྟེན་དབང་ཕྱུག་འཁོར་དང་བཅས་པ་སྔར་བཤད་པའི་སྙིང་
པོས་གནས་ཇི་ལྟ་བ་བཞིན་དུ་དགོད་པར་བྱའོ། །དེ་ནས་སྒོ་ཕྱེ་ལ་པདྨའི་ཁུ་ཚུར་གྱིས་པདྨའི་ལྕུག་མ་ལ་བུམ་པ་དང་བུམ་པ་གང་བ་ལ་དེ་བཞིན་དུ་བཟླས་ཏེ་ལྷ་རྣམས་ལ་དབུལ་བར་བྱའོ། །དེ་ནས་མཆོད་པ་རྣམ་པ་ལྔ་དང་མཆོད་པ་ཐམས་ཅད་ཀྱིས་ཀྱང་བཅོམ་ལྡན་འདས་འཁོར་དང་བཅས་པ་ལ་ཡང་དག་པར་མཆོད་ལ། རྡོ་རྗེ་གནོད་སྦྱིན་ལ་སོགས་པ་བཟླས་པའི་གོས་དམར་པོས་སྨད་གཡོགས་དང་སྟོད་གཡོགས་དང་གདོང་གཡོགས་བྱས་ལ། ཕྱག་བྱ་བ་ལ་སོགས་པའི་ཆོ་ག་རྗེས་སུ་སྤྱད་ནས་སྔོམ་པ་བླངས་ལ། བྱང་ཆུབ་ཀྱི་སེམས་བསྐྱེད་ནས་གཡས་པའི་པདྨའི་ཁུ་ཚུར་གྱིས་རྡོ་རྗེ་པདྨ་བཟུང་ལ་རང་གི་སྙིང་གའི་ཕྱོགས་སུ་འཛིན་ཅིང་རང་གི་སྙིང་གའི་ཟླ་བར་རྡོ་རྗེ་པདྨའི་སྙིང་པོ་འདིས་བསམ་པར་བྱའོ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷ་ཡ་ཐཱ་སུ་ཁཾ། དེ་ནས་ཤར་ཕྱོགས་ཀྱི་སྒོ་ནས་བལྟས་ཏེ་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ་འཇུག་པའི་ཕྱག་རྒྱས་བཅིངས་ཏེ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ལ་བཛྲ་བཛྲ་ཞེས་ཟློས་ཤིང་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་གླུ་ཟློས་ཤིང་རང་གི་ཆོ་གས་སྔ་མ་བཞིན་དུ་འཇུག་པར་བྱའོ།། དེ་ནས་རང་གི་ཆོ་ག་རྗེས་སུ་སྤྱད་ལ་པདྨའི་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ་དེ་ནས་དེས་བདག་ཉིད་ཇི་ལྟ་བ་བཞིན་དུ་དབང་བསྐུར་ལ། འོད་དཔག་ཏུ་མེད་པའི་དབང་བསྐུར་བ་དང༌། པདྨའི་དབང་བསྐུར་བ་ཡང་བླངས་ལ་འོད་དཔག་ཏུ་མེད་པ་དང༌། པདྨའི་ཕྲེང་བ་དག་དང་ལྡན་པའི་ཅོད་པན་གྱིས་དབང་བསྐུར་ནས་རྡོ་རྗེ་པདྨ་དང༌། བདག་པོ་དང་མིང་གི་དབང་བསྐུར་བས་དབང་བསྐུར་ཏེ་དེ་བཞིན་དུ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ནས་དེ་བཞིན་དུ་དེ་ཁོ་ན་ཉིད་ཀྱི་རྡོ་རྗེ་པདྨ་བཟུང་ལ་ཆོས་ཀྱི་དྲིལ་བུ་དཀྲོལ་ལ་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ནས་སྙིང་པོ་བཟླ་བར་བྱའོ། །དེ་ནས་མཆོད་པ་རྣམ་པ་ལྔ་དང༌། པདྨའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་གང་བདག་ཉིད་ལ་མཆོད་ནས་བཅོམ་ལྡན་འདས་ལས་ཚིགས་སུ་བཅད་པ་ལྔས་
རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་དང༌། རང་གི་སྔགས་གཟུང་བ་དང༌། ཕྱག་རྒྱ་བཞིའི་ཡེ་ཤེས་ཉེ་བར་བསྟན་པ་དག་བཅོམ་ལྡན་འདས་ལ་ཕྱག་འཚལ་ཏེ་བླངས་ནས་ཡང་དེ་བཞིན་དུ་བདག་ལ་བྱིན་གྱིས་བརླབ་པ་ལ་སོགས་པ་བྱས་ཏེ་རང་གི་མིང་ནས་བརྗོད་ལ་རྡོ་རྗེས་བསྒྲུབ་པར་བྱའོ། །དེ་ནས་པདྨའི་སློབ་དཔོན་གྱིས། སེམས་དཔའི་རྡོ་རྗེ་ལྕགས་ཀྱུ་བཅིངས། །སེལ་གོལ་མང་པོ་གདབ་བྱས་ནས། །སངས་རྒྱས་ཐམས་ཅད་བསྡུ་བར་བྱ། །དེ་ནས་མཚན་བརྒྱ་རྩ་བརྒྱད་པས་བསྟོད་པར་བྱས་ལ་ལྔར་བཤད་པའི་ལྕགས་གྱུས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་དང༌། ཁུ་ཚུར་དང་བསྲུང་བས་ལས་རྣམས་དེ་བཞིན་དུ་བྱས་ནས་བཅོམ་ལྡན་འདས་འཁོར་དང་བཅས་པ་ལ་རང་གི་སྔགས་ཀྱིས་མཆོད་ཡོན་ཕུལ་ལ། དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་ལ་བསྒྲུབ་པར་བྱའོ། །དེ་ནས་ཆོས་དང་ལས་དང༌། ཕྱག་རྒྱ་ཆེན་པོས་རྒྱས་བཏབ་ལ་དབང་བསྐུར་ནས་ཡང་མཆོད་ཡོན་ཕུལ་ལ་མཆོད་པ་རྣམ་པ་ལྔ་དང་པདྨའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་རྣམས་ཀྱིས་ཡང་དག་པར་མཆོད་ལ་ཕྱི་རོལ་ཏུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཡང་བཅོམ་ལྡན་འདས་ལ་མཆོད་ནས་རྣམ་པར་སྒེག་པའི་དགའ་བའི་རྡོ་རྗེ་དང༌། ཕྱག་བཞིས་ཀྱང་ཕྱག་བྱས། ཇི་སྲིད་དངོས་གྲུབ་ཀྱི་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་དཀྱིལ་འཁོར་བསྒོམ་པར་བྱའོ། །དེ་ནས་ཕྱག་བྱས་ལ་འདི་སྐད་དུ། སྲིད་པའི་སྦྱོར་བ་རྣམ་དག་ཕྱིར། །ཞེས་བྱ་བ་ལ་སོགས་པ་བརྗོད་དོ། །དེ་ལྟར་བཀའ་ནོས་ནས་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་བསླབ་པའི་གཞི་ལྔ་ཡོངས་སུ་གཟུང་བའམ་དགེ་སྦྱོང་ངམ་དགེ་སློང་གི་བསླབ་པ་ཡོངས་སུ་མ་གཟུང་བ་སྡོམ་པ་དོན་དུ་གཉེར་བ་དག་སྔོམ་པ་འཛིན་དུ་གཞུག་གོ །དེ་ནས་དེའི་སྙིང་གར་པདྨའི་ཁུ་ཚུར་གྱིས་རྡོ་རྗེ་པདྨ་བཞག་ལ་དེ་བཞིན་དུ་རྡོ་རྗེ་པདྨ་བསྐྱེད་པར་བྱའོ། །དེ་ནས་སློབ་མ་རྡོ་རྗེ་འཇིག་རྟེན་དབང་ཕྱུག་ཏུ་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་དེ་ཡོན་གྱི་
མཆོག་བླངས་ནས། ཤར་གྱི་ཕྱོགས་ཀྱི་སྒོར་ཁ་བལྟས་ཏེ་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ་རང་གི་འཇུག་པའི་ཆོ་གས་གཞུག་པར་བྱའོ། །དེ་ནས་དེའི་རྣ་བར་འདོད་ཆགས་དང་བྲལ་བ་ཞེས་བྱ་བ་ནས་མ་བྱེད་ཅིག་ཅེས་བྱ་བའི་བར་དུ་བརྗོད་པར་བྱའོ། །དེ་ནས་ཚེ་ག་ལྷག་མ་རྣམས་ནི་དེ་བཞིན་གཤེགས་པའི་དཀྱིལ་འཁོར་དུ་བཤད་པ་ལས་ཤེས་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང༌། །སློབ་མ་འཇུག་པ་ལ་སོགས་པའི་ཆོ་ག་བཤད་ནས་ད་ནི་དམ་ཚིག་དང་དབང་བསྐུར་བ་ཐོབ་བ་རྣམས་ལ་ད་སློབ་དཔོན་གྱི་དངོས་གྲུབ་ཀྱི་ཡེ་ཤེས་ཐོབ་པར་བྱའོ་ཞེས་བྱ་བའི་དོན་བསྟན་པའི་ཕྱིར་བསྒྲུབ་པ་ཞེས་བྱ་བ་ལ་སོགས་པ་ཡིན་ཏེ། དེ་སྒྲུབ་པ་ནི་སྒྲུབ་པའི་ཐབས་སོ། །དངོས་གྲུབ་ཐམས་ཅད་ཅེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་དངོས་གྲུབ་ཇི་སྐད་བཤད་པ་དེ་ཐམས་ཅད་བསྟན་པའོ། །འདི་སྐད་སྟོན་ཏེ་བདག་བསྲུང་བ་དང་གནས་བསྲུང་བ་བྱས་ལ། བཅོམ་ལྡན་འདས་ཀྱི་སྐུ་གཟུགས་ལུགས་མའམ་བརྐོས་མ་ལ་སོགས་པ་མདུན་དུ་གཞག་སྟེ། གསུམ་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་བླངས་ལ་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིང་བར་བྱའོ། །དེ་ནས་རྡོ་རྗེ་བསྡམས་པ་སྙིང་གར་དགྲོལ་ལོ། །དེ་ནས་རྡོ་རྗེ་དབབ་པ་བསྐྱེད་ལ་རྡོ་རྗེ་འབེབས་པའི་ཕྱག་རྒྱ་དེ་བཞིན་དུ་བཀྲོལ་ཏེ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་དང་པོའི་རྡོ་རྗེ་བཅིངས་ལ་རང་གི་སྙིང་གར་གནས་པའི་རྡོ་རྗེ་པདྨ་ལ་བཟླས་པར་བྱ་བའི་སྔགས་བསམས་ཏེ། ཆོས་ཐམས་ཅད་བདག་མེད་པ་ལ་སོགས་པ་བསྒོམས་ལ་དམ་ཚིག་སེམས་དཔར་བྱིན་གྱིས་བརླབས་པའི་བར་གྱི་ཆོ་ག་རྫོགས་པར་བྱས་ནས་ཕྱག་རྒྱ་ཆེན་པོ་བཅིངས་ནས་ཡེ་ཤེས་སེམས་དཔའ་རང་གི་ལུས་ལ་བཅུག་ལ་དམ་ཚིག་གི་ཕྱག་རྒྱ་སྒྲུབ་སྟེ། ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་པ་ནས་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་སྟེ། དམ་ཚིག་གི་ཕྱག་རྒྱ་བསྒྲུབ་པར་བྱའོ། །དེ་ནས་དེ་རྣམས་ཆོས་དང་ལས་དང་ཕྱག་
རྒྱ་ཆེན་པོས་རྒྱས་བཏབ་ནས་དང་པོའི་རྡོ་རྗེས་དེ་བཞིན་དུ་བདག་ཉིད་བྱིན་གྱིས་བརླབས་ལ། དེ་བཞིན་གཤེགས་པའི་སྐུའི་མཆོག་བཅིངས་ཏེ་འོད་དཔག་ཏུ་མེད་པས་དབང་བསྐུར་ལ། པདྨའི་ཕྲེང་བའི་རིམ་པས་པདྨའི་ཕྲེང་བའི་དབང་བསྐུར་བ་ཡང་བླངས་ལ། རྡོ་རྗེ་པདྨའི་བདག་པོ་དང༌། མིང་གི་དབང་བསྐུར་བ་ཡང་བླངས་ཏེ་དངོས་གྲུབ་ཀྱི་རྡོ་རྗེ་བརྟུལ་ཞུགས་བཟུང་ནས་པདྨའི་མཚོན་ཆ་མ་ལ་སོགས་པའི་གསང་བའི་མཆོད་པ་བཞིས་བདག་ཉིད་མཆོད་ལ། རྣམ་པར་སྒེག་པའི་དགའ་བ་རྡོ་རྗེ་དང་ཕྱག་རྒྱ་བཞིས་ཕྱག་བྱས་ནས་རྡོ་རྗེ་པདྨ་དེ་ཁོ་ན་ཉིད་ཀྱིས་བཟུང་ལ། ཆོས་ཀྱི་པདྨའི་དྲིལ་བུ་དཀྲོལ་ཏེ་དེ་ནས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ནས། རང་གི་སྙིང་པོ་ལན་གསུམ་བཟླས་ནས། རང་གི་སྙིང་གར་གནས་པའི་རྡོ་རྗེ་པདྨ་ལ་བཟླས་པར་བྱ་བའི་སྔགས་ཡིད་ཀྱིས་བྲིས་ཏེ། རྡོ་རྗེ་ཏིང་ངེ་འཛིན་གྱི་ཚིག་གིས་ཟློས་ཤིང་བཟླས་པའི་དོན་གྱིས་བདག་ཉིད་རྡོ་རྗེ་འཇིག་རྟེན་དབང་ཕྱུག་ཏུ་བསྒོམ་པར་བྱ་སྟེ་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གམ་དུས་ཇི་སྲིད་ཀྱི་བདག་ཉིད་རང་གི་ལྷའི་སྐུར་མངོན་སུམ་དུ་མཐོང་པར་གྱུར་པ་དེ་སྲིད་ཀྱི་བར་དུ་ཉིན་རེ་ཞིང་བསྒོམ་པར་བྱའོ། །དེ་ནས་ཟླ་བ་ཕྱེད་ཙམ་བསྒོམས་ནས་རྡོ་རྗེ་འཇིག་རྟེན་དབང་ཕྱུག་ཏུ་འགྱུར་རོ། །དེ་བཞིན་དུ་དངོས་གྲུབ་གཞན་དག་བསྒྲུབ་པ་ལ་ཡང་སྔ་མའི་རྗེས་སུ་འབྲངས་ནས་ཤེས་པར་བྱའོ། །དེ་ནས་མ་བསྒྲུབས་པ་ནི་ཞེས་བྱ་བ་ལ་སོགས་པ་སྔ་མ་བཞིན་ནོ། །སྒྲིབ་པ་ཐམས་ཅད་རྣམ་པར་སྤྱང་བ་ལ་ནི་པདྨ་ཆེན་པོས་སོ་ཞེས་བྱ་བ་ལ་ནི། དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ། ཐལ་མོ་ཁོང་སྟོང་བཅིངས་ཏེ་མཐེ་པོ་གཉིས་དང་མཐེ་ཆུང་གཉིས་ཕྱེ་ལ་པདྨ་འདབ་མ་བཞི་པའི་ཚུལ་དུ་སྙིང་གར་གཞག་པ་འདིས་ནི་པདྨ་ཆེན་པོའོ། །འདི་བཅིངས་ནས་སྭ་བྷཱ་བ་ཤུདྡྷ་སྶརྦ་དྷརྨ་ཞེས་བྱ་བའི་སྙིང་པོ་འདི་ཟློས་ཤིང་བསྒོམས་ན་དེ་ལྟ་བུས་ནི་སྒྲིབ་པ་ཐམས་ཅད་རྣམ་པར་སྦྱོང་བར་འགྱུར་རོ། །ཐམས་ཅད་བསྲུང་བ་ལ་ནི་པདྨའི་གཙུག་ཏོར་གྱིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ་པདྨ་ཆེན་པོའི་ཕྱག་རྒྱས་བཅིངས་ཏེ་སྤྱི་བོར་བཞག་ལ་ཡིད་ཀྱིས་གྲུབ་
པར་བྱ་བ་དང་ལྷན་ཅིག་ཏུ་བྱས་ལ། བསྒྲུབ་པར་བྱ་བ་སྐྱེས་བུ་ཆེན་པོའི་མཚན་སྤྱི་གཙུག་ལྟར་མི་མངོན་པ་དང་ལྡན་པའི་རྡོ་རྗེ་འཇིག་རྟེན་དབང་ཕྱུག་ཏུ་བསྒོམ་པར་བྱ་སྟེ། དེ་ལྟ་བུས་ནི་ཐམས་ཅད་བསྲུང་བར་འགྱུར་རོ། །ཐམས་ཅད་རྗེས་སུ་ཆགས་པར་བྱས་པ་ལ་ནི་པདྨ་ལ་བལྟས་པས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ་རང་གི་སྙིང་གའི་ཕྱོགས་སུ་པདྨ་ཆེན་པོ་བཅིངས་ཏེ། དེ་ཉིད་ལ་རྡོ་རྗེའི་ལྟ་བས་བལྟ་ཞིང་པདྨའི་འདབ་མ་ཁ་བྱེ་བ་ལ་སོགས་པས་རང་ཉིད་འཇིག་རྟེན་དབང་ཕྱུག་སྐུ་མདོག་དམར་བོ། །པདྨ་དམར་པོའི་འོད་ཟེར་གྱི་ཚོགས་ཀྱིས་བསྒྲུབ་པར་བྱ་བ་ཀུན་དུ་བསྐང་ཞིང་ཁ་དོག་དམར་པོར་བྱས་ལ་རྗེས་སུ་ཆགས་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་རྗེས་སུ་ཆགས་པར་འགྱུར་རོ། །ཐམས་ཅད་དག་པའི་ཏིང་ངེ་འཛིན་ཐོབ་པ་ལ་ནི་པདྨ་ཁ་འབྱེད་པས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ་པདྨ་ཆེན་པོ་བཅིངས་ཏེ། དེའི་སོར་མོ་ཐམས་ཅད་ཀྱིས་པདྨ་ཁ་ཕྱེ་བ་བྱས་ལ་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་སྒོམ་ཞིང༌། བདག་ཉིད་པདྨ་ཁ་འབྱེད་པའི་ཚུལ་གྱིས་གནས་ཤིང་འཇིག་རྟེན་དབང་ཕྱུག་ཏུ་བསམ་པར་བྱ་སྟེ། དེ་ལྟ་བུས་ནི་ཐམས་ཅད་དག་པའི་ཏིང་ངེ་འཛིན་ཐོབ་པར་འགྱུར་རོ། །བུད་མེད་ཐམས་ཅད་དབང་དུ་བྱ་བ་ལ་ནི་པདྨ་ཆེན་པོའི་འདོད་ཆགས་ཀྱིས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ། རང་གི་སྙིང་གའི་ཕྱོགས་སུ་པདྨ་ཆེན་པོ་བཅིངས་ཏེ་མཛུབ་མོ་གཉིས་གུང་མོ་གཉིས་ཀྱི་རྒྱབ་ཏུ་སྦྱར་ལ་གུང་མོ་དང་མཐེ་བོང་གཉིས་གཞིབས་ལ་མིག་འབྲས་ཀྱི་ཚུལ་དུ་བྱས་པ་འདི་ནི་རྡོ་རྗེ་སྤྱན་པདྨའི་འདོད་ཆགས་ཞེས་བྱ་བ་ཡིན་ཏེ་འདི་བཅིངས་ལ་པདྨ་རྡོ་རྗེ་ཡིད་ལས་བྱུང་བ་ཁ་དོག་དམར་པོ་བདག་ཉིད་བསྒོམ་ཞིང་པདྨ་དམར་པོའི་འོད་ཀྱི་ཚོགས་ཀྱིས་བསྒྲུབ་པར་བྱ་བའི་གནོད་སྦྱིན་མ་ལ་སོགས་པའི་གཟུགས་ཀུན་དུ་གང་བར་བྱ་ཞིང་ཁ་དོག་དམར་པོར་བྱས་ནས་འོད་ཀྱི་ཚོགས་དེ་ཡང་དྲངས་ལ་རང་གི་རྐང་པའི་དྲུང་དུ་བཞག་ནས། ལུང་ནོད་པ་ལ་འབད་པས་རབ་ཏུ་གདུག་ཅིང་བདག་ཉིད་དང་ནོར་གྱིས་ཕྱོགས་པར་བྱེད་ཅིང་
དབང་དུ་གྱུར་པར་བསམ་པར་བྱ་སྟེ། དེ་ལྟ་བུས་ནི་བུད་མེད་ཐམས་ཅད་དབང་དུ་འགྱུར་རོ། །སྐྱེས་པ་ཐམས་ཅད་དབང་དུ་བྱ་བ་ལ་ནི་པདྨའི་དབང་གིས་སོ་ཞེས་བྱ་བ་ནི་དེ་བཞིན་དུ་འཇིག་རྟེན་དབང་ཕྱུག་གི་སྦྱོར་བ་བྱས་ལ་པདྨ་ཆེན་པོ་བཅིངས་ཏེ་མཐེ་བོ་དང་མཛུབ་མོས་ལེགས་སོ་ཞེས་བྱ་བ་སྦྱིན་པར་བྱའོ། །བདག་ཉིད་ཀྱང་པདྨ་ལེགས་པའི་སྐུ་ཁ་དོག་དམར་པོ་བསམས་ལ་བསྒྲུབ་པར་བྱ་བ་པདྨ་དམར་པོའི་འོད་ཀྱིས་བཀང་སྟེ་བཀུག་ནས་རང་གི་རྐང་མཐིལ་ལ་འདུད་བར་བྱས་ཏེ། དེ་ལྟར་བུས་ནི་སྐྱེས་པ་ཐམས་ཅད་དབང་དུ་འགྱུར་རོ། །རྨི་ལམ་གདབ་པ་ལ་ནི་པདྨ་ཆེན་པོ་དམར་པོས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ་བཅོམ་ལྡན་འདས་སྤྱན་དྲངས་ཏེ། མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ལ་མཚན་ཕྱེད་ཀྱི་དུས་སུ་པདྨ་ཆེན་པོ་བཅིངས་ལ། དཔྲལ་བའི་ཕྱོགས་སུ་བཞག་ལ་འདི་སྐད་དུ་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་བདེན་པ་གང་གིས་ཆོས་ཐམས་ཅད་རྨི་ལམ་ལྟ་བུ་ཡིན་པའི་བདེན་པ་དེས་མངོན་པར་འདོད་པའི་དོན་དེ་རྨི་ལམ་དུ་མཐོང་ཞིང་སྟོན་པར་མཛོད་ཅིག་ཅེས་བརྗོད་ལ། དེ་ནས་ཇི་སྲིད་ཡིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་སྙིང་པོ་བཟླ་བར་བྱའོ། །དེ་ནས་རྡོ་རྗེ་འཇིག་རྟེན་དབང་ཕྱུག་དེ་ཉིད་ལ་གསོལ་བ་འདེབས་ཤིང་གཡས་ལགས་ཕབ་སྟེ་ཉལ་བ་ན་ཐམས་ཅད་སྟོན་པར་མཛད་དོ། །བཅོམ་ལྡན་འདས་ལས་མཆོག་ཐོབ་པར་བྱ་བ་ལ་ནི་རྡོ་རྗེ་གསང་བའི་པདྨ་རྨོངས་པ་མེད་པས་སོ་ཞེས་བྱ་བ་ནི་དེ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་སྦྱོར་བ་བྱས་ལ་བཅོམ་ལྡན་འདས་མདུན་དུ་སྤྱན་དྲངས་ཏེ། ཆོ་ག་ཐམས་ཅད་ཇི་ལྟ་བ་བཞིན་དུ་རྗེས་སུ་སྤྱད་ལ་པདྨ་ཆེན་པོ་བཅིངས་ཏེ། གཡོན་པའི་མཐེ་བོང་དང་མཛུབ་བ་མོ་སྐྱེ་གནས་སུ་བྱས་པར་གཡས་པའི་མཐེ་བོའི་མཚན་མ་བཅུག་ལ་མཆོག་གསོལ་བ་འདེབས་པའི་བསམས་པས་སྙིང་པོ་བཟླ་བར་བྱ་སྟེ། དེ་ལྟ་བུས་ནི་མཆོག་ཐམས་ཅད་ཐོབ་པར་འགྱུར་རོ། །དཔལ་ལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་དུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས། བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་རྟོག་
པའི་རྒྱལ་པོ་རྫོགས་སོ།། །།དེ་ལྟར་ལོག་པར་ལྟ་བ་སྤངས་པའི་ཕྱིར་པདྨའི་རིགས་བསྟན་ནས། ད་ནི་སེར་སྣ་སྤང་བའི་ཕྱིར་རིན་པོ་ཆེའི་རིགས་གསུངས་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ་དང་པོ་སྦྱོར་བའི་རྗེས་ཐོགས་ཉིད་ལ་ཞེས་བྱ་བའི་ཐ་ཚིག་གོ །འདིར་དང་པོའི་སྦྱོར་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཡིན་ནོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དོ། །འཇིག་རྟེན་གསུམ་པོ་མ་ལུས་པའི་བདག་པོ་ཞེས་བྱ་བ་ནི་ཕྱོགས་བཅུ་ན་གནས་པའི་ཁམས་གསུམ་པ་ཐམས་ཅད་ཁམས་གསུམ་པ་མ་ལུས་པའོ། །དེའི་བདག་པོར་གྱུར་པ་ནི་ཁམས་གསུམ་པ་ཐམས་ཅད་ན་སྤྱོད་པའི་ཉོན་མོངས་པ་བག་ཆགས་དང་བཅས་པ་སྤངས་པས་ཆོས་ཀྱི་རྒྱལ་སྲིད་ཐོབ་པའི་ཕྱིར་རོ། །ཁམས་གསུམ་མ་ལུས་པ་དེར་རང་དབང་ཐོབ་པས་ན་དབང་ཕྱུག་གོ །དེ་བཞིན་གཤེགས་པ་ཞེས་བྱ་བ་ནི་བཤད་ཟིན་ཏེ། བསམ་པ་ཐམས་ཅད་རྫོགས་པའི་རྡོ་རྗེ་རིན་ཆེན་ཞེས་བྱ་བ་ལ་སོགས་པ་རིན་པོ་ཆེའི་རིགས་རྣམས་ཐོབ་པར་སྲེད་པ་ནི་བསམ་པ་ཐམས་ཅད་དོ། །དེས་འདུལ་པའི་སེམས་ཅན་གྱི་ཁམས་ལ་རིན་པོ་ཆེའི་རིགས་དྲུག་པ་དེ་ལ་ཀུན་ནས་ཡོངས་སུ་བསྐྱེད་ཅིང་རྫོགས་པར་མཛད་པ་ནི་ཡོངས་སུ་རྫོགས་པའོ། །དེའི་དོན་གྱི་རྡོ་རྗེ་རིན་པོ་ཆེའི་རྩེ་མོ་རྡོ་རྗེ་ལྔ་པས་མཚན་པ་ཡིད་བཞིན་གྱི་ནོར་བུ་རིན་པོ་ཆེའོ། །དེ་ལས་བྱུང་བ་ནི་རིན་ཆེའི་རིགས་ཀྱི་ཚུལ་གྱིས་དབང་བསྐུར་བའི་ཕྱག་རྒྱ་ནི། རྡོ་རྗེ་རིན་ཆེན་གྱི་དབང་བསྐུར་བའི་ཕྱག་རྒྱའོ། །གང་ཡང་མིང་དེ་སྐད་ཅེས་བཏགས་ཤིང་དེ་ལ་དམིགས་པའི་ཏིང་ངེ་འཛིན་དེ་ནི་བསམ་པ་ཐམས་ཅད་ཡོངས་སུ་རྫོགས་པའོ། །རྡོ་རྗེ་རིན་པོ་ཆེ་དབང་བསྐུར་བའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཏེ་སྙོམས་པར་ཞུགས་ཤིང་མངོན་དུ་མཛད་དོ། །ནོར་བུའི་རིགས་ཀྱི་རྣམ་པར་ཐུགས་རྩེ་གཅིག་ཏུ་མཛད་ཅེས་བྱ་བའི་ཐ་ཚིག་གོ །རང་གི་རྡོ་རྗེ་སེམས་དཔའི་ལ་སོགས་པ་ནི་བཤད་ཟིན་ཏོ། །འགྲོ་བ་ཞེས་བྱ་བ་ལ་སོགས་པ་ལ་འགྲོ་བ་ནི་སེམས་ཅན་གྱི་ཁམས་རྣམས་སོ། །དེའི་འབྱོར་པ་ནི་རྣམ་པར་འབྱོར་ཞིང་ཕུན་སུམ་ཚོགས་པ་
སྟེ་ནོར་བུའི་རིགས་གྲུབ་ཅེས་བྱ་བའི་ཐ་ཚིག་གོ །དེ་ལྟ་བུའི་དོན་དུ་ནོར་བུ་རིན་པོ་ཆེའི་རིགས་ཀྱི་མཆོག་བསྐྱེད་པར་མཛོད་ཅིག་པ་ནི་ཉིད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ལས་དབྱུང་བར་གསོལ་ཞེས་པའོ། །དེ་ནས་བཅོམ་ལྡན་འདས་ཞེས་བྱ་བ་ནི་བཅོམ་ལྡན་འདས་ཀྱིས་གསོལ་བའི་རྗེས་ཐོགས་ཉིད་ལ། བཅོམ་ལྡན་འདས་རྡོ་རྗེ་འཆང་ཆེན་པོས་རིག་པ་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། དེ་བཞིན་གཤེགས་པ་ཐམས་ཅད་ཀྱིས་ཞེས་བྱ་བ་ལ་སོགས་པ་སྨོས་ཏེ། དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ནི་ནོར་བུའི་རིགས་ཏེ་དེ་ཉིད་ནི་དམ་ཚིག་གོ །དེ་རབ་ཏུ་གཞག་པ་ནི་ཁམས་གསུམ་པའི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱ་བའི་ཕྱིར་ཕྱིར་མའི་མཐར་ཐུག་པ་མེད་པར་བཞག་པའོ། །དེའི་དོན་དུ་རྡོ་རྗེ་ལྟར་མི་ཕྱེད་པ་གང་ཡིན་པ་དེ་ལ་མིང་དེ་སྐད་ཅེས་བྱ་བའི་རྣམ་པར་གནན་པས་ནོར་བུའི་རིགས་ཡང་དག་པར་སྟོན་པས་དོན་ཐམས་ཅད་དེ། དེ་ནི་དེ་བཞིན་གཤེགས་པ་ཐམས་ཅད་ཀྱི་དབང་བསྐུར་བ་ལ་རབ་ཏུ་གཞག་པ་རྡོ་རྗེ་ཞེས་བྱ་བའི་རྣམ་པར་གནོན་པ་མཛད་ནས་རྡོ་རྗེ་རིན་པོ་ཆེའི་ནོར་བུའི་རིགས་ཀྱི་རྒྱལ་མཚན་ཏེ། མཚན་མ་གང་ཡིན་པའི་རིག་པ་ལ་མིང་དེ་སྐད་ཅེས་བྱ་སྟེ་རྡོ་རྗེ་རིན་པོ་ཆེའི་རྒྱལ་མཚན་ཞེས་བྱ་བའི་རིག་པ་དེ་གསུངས་པ་ནི་བཀའ་སྩལ་བ་སྟེ། ཨོཾ་ལི་ཊིབ་བེ་ཊཊ་ཏྲཾ་ཞེས་བྱ་བའོ། །བཅོམ་ལྡན་འདས་རྡོ་རྗེའི་དབང་བསྐུར་བའི་བདེ་བ་ཆེན་པོ་རྡོ་རྗེ་ལས་བྱུང་བ་ནི། བཅོམ་ལྡན་འདས་རྡོ་རྗེ་འཆང་ཆེན་པོའི་མཛོད་སྤུའི་ཕྱོགས་ནས་ཇི་སྐད་དུ་བཤད་པའི་མཚན་ཉིད་དང་ལྡན་པའི་ནོར་བུ་རིན་པོ་ཆེ་སྟེ། ཡིད་བཞིན་གྱི་ནོར་བུ་རིན་པོ་ཆེ་བྱུང་ནས་བཅོམ་ལྡན་འདས་རྡོ་རྗེ་འཆང་ཆེན་པོའི་ཕྱག་གཡོན་པར་རབ་ཏུ་གནས་སོ། །དེ་ནས་ཞེས་བྱ་བ་ལ་སོགས་པ་བཅོམ་ལྡན་འདས་ཀྱི་ཕྱག་གཡོན་པར་གནས་པའི་རྡོ་རྗེ་རིན་པོ་ཆེ་དེ་ལས་སོ། །ཉོན་མོངས་པའི་དྲི་མ་ཐམས་ཅད་དང་བྲལ་བས་ན་དག་པའོ། །ཁ་དོག་ཇི་ལྟ་བུ་ཞེ་ན་མ་རྒད་རྙོག་པ་མེད་པའི་མདོག་ཅན་ནོ་ཞེས་བྱ་བ་གསུངས་ཏེ། རྙོག་པ་ནི་དྲི་མ་དང་བཅས་པའོ། །རྙོག་པ་དང་བྲལ་བ་ནི་རྙོག་པ་མེད་པའོ། །མརྒད་ནི་
རིན་པོ་ཆེའོ། །དེ་དང་མདོག་འདྲ་བ་གང་ཡིན་པ་དེ་ནི་མ་རྒད་རྙོག་པ་མེད་པའི་མདག་ཅན་ཏེ། པྲི་ཡང་ཀུ་ལྟར་མདོག་ལྗང་སེར་ཞེས་བྱ་བའི་ཐ་ཚིག་གོ །རྡོ་རྗེ་རིན་པོ་ཆེའི་རང་གི་འོད་ཟེར་གྱིས་དབང་བསྐུར་བ་ཞེས་བྱ་བ་ནི་རིན་པོ་ཆེའི་རང་གི་འོད་གང་ཡིན་པ་དེས་དབང་བསྐུར་བའི་ཅོད་པན་གང་ལ་མངའ་བ་དེ་ནི་རྡོ་རྗེ་རིན་པོ་ཆེའི་རང་གི་འོད་ཟེར་གྱིས་དབང་བསྐུར་བ་སྟེ་རྡོ་རྗེ་རིན་པོ་ཆེའི་འོད་ཟེར་ལས་གྲུབ་པའི་རྡོ་རྗེ་རིན་པོ་ཆེའི་ཅོད་པན་གྱིས་དབང་བསྐུར་བ་ཡིན་ནོ་ཞེས་སྟོན་ཏོ། །དེས་མཚོན་ཆ་ཅི་ཞིག་བསྣམས་ཤེ་ན། ནོར་བུ་རིན་པོ་ཆེའི་མདའ་ལ་སོགས་བའི་མཚན་མ་ཡོངས་སུ་བསྣམས་པ་ཞེས་བྱ་བ་སྨོས་ཏེ། རྡོ་རྗེ་ཡིད་ལས་བྱུང་བ་དེ་དག་ཉིད་རང་གི་མཚན་མ་ནོར་བུས་མཚན་པ་ཐོགས་ཏེ་བྱུང་ངོ་ཞེས་བྱ་བའི་ཐ་ཚིག་གོ །བྱུང་ནས་གང་དུ་བཞུགས་ཤེ་ན། བཅོམ་ལྡན་འདས་ཀྱི་དཀྱིལ་འཁོར་ཆེན་པོའི་ཚུལ་གྱིས་བཞུགས་སོ་ཞེས་བྱ་བ་སྨོས་ཏེ་བཅོམ་ལྡན་འདས་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས་བཅོམ་ལྡན་འདས་འཕགས་པ་ནམ་མཁའི་སྙིང་པོ་ལ་ཡོངས་སུ་བསྐོར་ཏེ་བཞུགས་སོ། །དེ་ལྟར་དེ་ནས་ཞེས་བྱ་བ་ནས་བརྩམས་ཏེ་དཀྱིལ་འཁོར་ཆེན་པོར་བཞུགས་སོ་ཞེས་བྱ་བའི་བར་གྱིས་བཤད་པས་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་བསྡུ་བར་བྱའོ། །དེ་ནས་དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རིན་པོ་ཆེ་ལྕགས་ཀྱུ་ལ་སོགས་པས་བཅོམ་ལྡན་འདས་འཁོར་དང་བཅས་པ་དགུག་པ་དང༌། གཞུག་པ་དང་བཅིང་བ་དང༌། དབང་དུ་བྱས་ལ་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ནས་རྡོ་རྗེ་རིན་ཆེན་གྱི་དབང་བསྐུར་བའི་ཕྱག་རྒྱས་དབང་བསྐུར་བ་ནས་ལས་ལ་སྦྱོར་བ་ནི་ལས་ཀྱི་རྒྱལ་པོ་མཆོག་ཅེས་བྱ་བ་ལ་ཏིང་ངེ་འཛིན་གསུམ་པ་ཡིན་ནོ། །དེ་ནས་ལས་རྣམ་བཤད་པར་བྱ་སྟེ་བཅོམ་ལྡན་འདས་འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ་བཅོམ་ལྡན་འདས་ནམ་མཁའི་སྙིང་པོ་སེམས་ཅན་གྱི་ཁམས་ཐམས་ཅད་རང་གི་དབང་བསྐུར་བས་དབང་བསྐུར་བར་མཛོད་ཅིག་ཅེས་བརྗོད་པར་བྱའོ། །དེ་བཞིན་དུ་ནོར་བུ་རིན་པོ་ཆེ་འབེབས་
པའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་རིན་པོ་ཆེ་ཡིད་ལས་བྱུང་བས་སེམས་ཅན་གྱི་ཁམས་ཐམས་ཅད་རིན་པོ་ཆེ་འདོད་ཆགས་ཀྱི་མདའ་རྣམ་པར་དག་པའི་གནས་ལ་རབ་ཏུ་འཇོག་པར་མཛོད་ཅིག་ཅེས་བརྗོད་པར་བྱའོ། །དེ་བཞིན་དུ་ནོར་བུ་རིན་པོ་ཆེ་འབེབས་པའི་ཕྱག་རྒྱ་ཆེན་པོ་བཅིངས་ལ། བཅོམ་ལྡན་འདས་ནོར་བུ་རིན་པོ་ཆེ་འབེབས་པས་སེམས་ཅན་གྱི་ཁམས་ཐམས་ཅད་རང་བཞིན་གྱིས་འོད་གསལ་བའི་ནོར་བུ་རིན་པོ་ཆེ་འབེབས་པའི་ཡེ་ཤེས་གྱི་དབང་དུ་མཛོད་ཅིག་ཅེས་བྱ་བའི་བར་དུ་བརྗོད་པར་བྱའོ། །དེ་ལྟར་ཏིང་ངེ་འཛིན་གསུམ་བཤད་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱི་བཟླས་པ་དང་བསྒོམ་པ་བྱའོ་ཞེས་བྱ་བ་འདི་ནི་བྱ་བ་བསྟན་པའི་ཕྱིར། དེ་ནས་དཀྱིལ་འཁོར་ཆེན་པོ་ཞེས་བྱ་བ་ལ་སོགས་པའི་སློབ་དཔོན་གྱི་ཆོག་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དཀྱིལ་འཁོར་ཆེན་པོ་ཞེས་བྱ་བ་ནི་འབྱུང་སྟེ་ཞེས་བྱ་བར་དོན་གྱིས་སྦྱར་རོ། །དཀྱིལ་འཁོར་ཆེན་པོའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས་སོ། །དཀྱིལ་འཁོར་ཐམས་ཅད་ཐིག་གདབ་བོ། །ཞེས་བྱ་བ་ནི་ཕྱིའི་དཀྱིལ་འཁོར་ཐིག་གདབ་བོ་ཞེས་བྱ་བའི་ཐ་ཚིག་གོ །ནང་གི་དཀྱིལ་འཁོར་ནི་དུམ་བུ་དང་པོ་ལས་བཤད་པའི་ནོར་བུའི་རིགས་ཀྱི་དཀྱིལ་འཁོར་ལྟར་ཤེས་པར་བྱ་སྟེ། གང་གི་ཕྱིར་འོག་ནས་རིགས་ཐམས་ཅད་འཁོར་ལོའི་ཁྱད་པར་དེ་ལྟར་བཤད་པའི་ཕྱིར་རོ། །རྡོ་རྗེ་འཁོར་ལོར་གང་བསྟན་པ་དེ་ནི་འཁོར་ལོ་དམ་པའོ། །དེ་བཞིན་དུ་འབར་བའི་འཁོར་ལོ་དམ་པ་ནི་པདྨ་འདབ་མ་བརྒྱད་པའི་ནོར་བུ་ཆེན་པོར་བྱའོ། །རྡོ་རྗེ་རིན་ཆེན་བདག་པོ་གཞག །ནོར་བུའི་རིག་ནི་ཆེན་པོ་བྲི། །ཞེས་བྱ་བ་ནི་དཀྱིལ་འཁོར་དབུས་མའི་དབུས་སུ་བཅོམ་ལྡན་འདས་འཕགས་པ་ནམ་མཁའི་སྙིང་པོ་བྲིས་ལ་རྡོ་རྗེ་ཡིད་ལས་བྱུང་བའི་གནས་སུ་རིན་པོ་ཆེ་ཡིད་ལས་བྱུང་བ་ལ་སོགས་པ་བྲིའོ། །རྡོ་རྗེ་རིན་ཆེན་གྱི་ཕྱག་རྒྱས་བཞུགས་ཏེ་ཞེས་བྱ་བ་ནི་རྡོ་རྗེ་ཐལ་མོ་བརྐྱང་ལ་མཛུབ་མེ་དང་མཐེ་
བོའི་རྩེ་མོ་སྦྱར་ཏེ། དབྲལ་བའི་མཛོད་སྤུའི་གནས་སུ་གཞག་པ་འདི་ནི་ཐམས་ཅད་དབང་བསྐུར་བའི་ཕྱག་རྒྱ་སྟེ། རྡོ་རྗེ་རིན་ཆེན་གྱི་ཕྱག་རྒྱའོ། །འདིས་མེ་ཏོག་གི་ཕྲེང་བ་བླངས་ལ། བཛྲ་བཛྲ་ཞེས་བྱ་བ་དང༌། རྡོ་རྗེ་སེམས་དཔའི་དཀྱིལ་འཁོར་ཆེན་པོར་གསུངས་པའི་འཇུག་པའི་གླུ་ཟློས་ཤིང་དཀྱིལ་འཁོར་དུ་ཇི་ལྟ་བ་བཞིན་དུ་འཇུག་པར་བྱའོ། །མཛུབ་མོ་གཉིས་པོ་དེ་ཉིད་ལྕགས་ཀྱུར་བྱས་ལ་དགུག་པ་བྱ་ཞིང་ཞུགས་ནས་ཆོ་ག་ཐམས་ཅད་རྫོགས་པར་བྱས་ལ་འཇུག་པའི་ཕྱག་གྱ་ལས་མཛུབ་མོ་གཉིས་ལྕགས་ཀྱུ་གཉིས་སུ་བྱས་ཏེ་དེ་དང་སྤྱན་འདྲེན་པའི་སྔགས་ཀྱིས་དཀྱིལ་འཁོར་གྱི་ལྷ་ཐམས་ཅད་བཀུག་ནས་དཀྱིལ་འཁོར་དུ་གཞུག་པར་བྱའོ། །དེ་ནས་ཞེས་བྱ་བ་ནི་གོ་སླའོ། །ཆོ་ག་རྒྱས་པ་ཐམས་ཅད་དེ་བཞིན་ནོ་ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པའི་བསྒྲུབ་པར་བྱ་བ་དང་སྒྲུབ་པའི་རྒྱུན་རྣམས་གཟུང་ངོ་ཞེས་བྱ་བའི་ཐ་ཚིག་གོ །འདི་སྐད་སྟོན་ཏེ་བདག་བསྲུང་བ་དང༌། གནས་བསྲུང་བ་བྱས་ལ་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་ཆོ་ག་བཤད་པའི་ཚུལ་གྱིས་སྡིག་པ་དྲལ་བའི་མཐར་ཐུག་པའི་ཆོ་ག་རྣམས་རྗེས་སུ་སྤྱད་ནས་རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལ་ཨོཾ་ལི་ཊི་བ་བེ་ཏྲཊ་ཏྲཾ་ཞེས་བྱ་བ་ཡིད་ཀྱིས་བྲིས་ལ་རིག་པ་འདི་ཉིད་ཡིད་ལ་ཟློས་ཤིང་ཆོས་ཐམས་ཅད་ནམ་མཁའ་དང་མཉམ་པར་བསྒོམ་པར་བྱའོ། །དེ་ནས་རིག་པ་དེ་ཉིད་དབྱངས་ཀྱི་ཡི་གེ་བཅུ་དྲུག་དང་བཅས་པས་རང་གི་སེམས་ཟླ་བའི་དཀྱིལ་འཁོར་དུ་བསམས་ལ། དེའི་སྟེང་དུ་རིག་པ་དེ་ཉིད་དང༌། ཀ་ལ་སོགས་པ་ནས་ཀྵའི་མཐར་ཐུག་གི་བར་དུ་སྐར་མ་ལྟ་བུའི་གཟུགས་ཅན་འདྲ་བ་ལས་ཟླ་བའི་དཀྱིལ་འཁོར་གཉིས་པའོ། །ཡང་ཟླ་བའི་དཀྱིལ་འཁོར་གཉིས་པ་རིག་པ་དེ་དང་བཅས་པ་ལས་དང་པོའི་རྡོ་རྗེ་བསམ་པར་བྱའོ། །དེ་ནས་རིག་པ་ཟློས་ཤིང་རྡོ་རྗེ་དེ་རྡོ་རྗེ་རིན་པོ་ཆེར་བསམས་ལ་རིན་པོ་ཆེའི་དབུས་སུ་རིག་པའི་ཡི་གེ་རྣམ་པར་བསམས་ནས་དེ་ཉིད་ཡིད་ལ་ཟློས་ཤིང་སངས་རྒྱས་ཐམས་ཅད་ཀྱི་དབང་བསྐུར་བ་དང༌། བཅོམ་ལྡན་འདས་རྡོ་རྗེ་ལས་ཀྱི་མཆོད་པའི་
དམ་ཚིག་གི་དངོས་གྲུབ་བསྒྲུབ་པར་བསྒོམ་ཞིང་དེ་ཐམས་ཅད་ལས་ནོར་བུའི་རིགས་ཡིད་ཀྱིས་སྤྲོས་ཏེ། དེས་སེམས་ཅན་གྱི་ཁམས་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱས་ནས་དེ་རྣམས་དེར་བཅུག་ལ། རིན་པོ་ཆེའི་ང་རྒྱལ་བསྒོམ་པར་བྱའོ། །དེ་ནས་རིན་པོ་ཆེ་དེ་སེམས་དཔར་བྱིན་གྱིས་བརླབ་པའི་སྦྱོར་བས་བདག་ཉིད་རྡོ་རྗེ་སེམས་པར་བསྐྱེད་ལ། ཡང་རིག་པ་ཟློས་ཤིང་རྡོ་རྗེ་སེམས་དཔའི་དེ་འཕགས་པ་ནམ་མཁའི་སྙིང་པོར་བདག་ཉིད་བསམ་པར་བྱའོ། །དེ་ནས་མ་ཧཱ་ས་མ་ཡ་ས་ཏྭ་ཧཾ་ཞེས་ང་རྒྱལ་བསྐྱེད་ལ། རང་གི་དམ་ཚིག་གི་ཕྱག་རྒྱས་བཅིངས་ཏེ། ས་མ་ཡོ་ཉ་ཧཾ་ཞེས་བྱ་བས་དམ་ཚིག་ནི་བདག་ཡིན་ནོ་ཞེས་བསྒོམ་པར་བྱའོ། །དེ་ནས་དམ་ཚིག་གི་ཕྱག་རྒྱ་དེ་ཉིད་ཀྱིས་རང་གི་སྙིང་ག་དང་དབྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབ་པར་བྱ་ཞིང་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་དམ་ཚིག་སེམས་དཔར་བྱིན་གྱིས་བརླབ་པར་བྱའོ། །དེ་ནས་སེམས་དཔའི་སྐྱིལ་མོ་ཀྲུང་དུ་འདུག་ལ་གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བཟུང་ལ་སྙེམས་ཚུལ་དུ་བྱས་ཏེ་ལག་བ་གཡས་ལ་ནོར་བུས་མཚན་པའི་དང་པོའི་རྡོ་རྗེ་རང་གི་སྙིང་གར་བསྟོད་པའི་ཚུལ་གྱིས་འཇོག་ཅིང་རིག་པ་བཟླ་བར་བྱ་སྟེ་འདི་ནི་བཅོམ་ལྡན་འདས་ཀྱི་ཕྱག་རྒྱ་ཆེན་པོའོ། །དེ་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གའི་ཟླ་བར་ཡིད་ཀྱིས་ཞུགས་ལ་རྡོ་རྗེ་འཁོར་ལོས་འཕགས་པ་ནམ་མཁའི་སྙིང་པོའི་དཀྱིལ་འཁོར་བསྐྱེད་ལ་འཇུག་པའི་ཕྱག་རྒྱ་བཅིངས་ཏེ། དེས་མེ་ཏོག་གི་ཕྲེང་བ་བླངས་ལ་དཀྱིལ་འཁོར་དུ་འཇུག་པར་བྱའོ། །ཞུགས་ནས་མེ་ཏོག་གི་ཕྲེང་བ་དེ་རང་གི་མགོ་ལ་དོར་བར་བྱའོ། །དེ་ནས་དེ་རང་གི་མགོ་ལ་ཇི་ལྟ་བ་བཞིན་དུ་བཅིངས་ཏེ་དངོས་གྲུབ་ཀྱིར་དོ་རྗེ་བརྟུལ་ཞུགས་ཀྱི་བར་གྱི་ཆོ་ག་རྫོགས་པར་བྱས་ནས། དཀྱིལ་འཁོར་དེ་རང་གི་སྙིང་གའི་ཟླ་བར་ཞུགས་པར་བསམས་ལ་སྔར་བཤད་པའི་ཚུལ་གྱིས་རྣལ་འབྱོར་ཆེན་པོ་བྱས་ནས་ཆོ་ག་ཐམས་ཅད་རྗེས་སུ་སྤྱད་ལ་ཕྱག་རྒྱ་ཆེན་པོ་བཅིངས་ཏེ། ཡིད་ཀྱིས་ནམ་མཁའི་ཕྱོགས་སུ་འདུག་སྟེ་ཡང་རྡོ་རྗེ་འཁོར་ལོས་ནམ་མཁའི་ཕྱོགས་སུ་རང་གི་
ལྷའི་དཀྱིལ་འཁོར་བསྐྱེད་ལ། ལྷ་ཐམས་ཅད་ཀྱི་གནས་སུ་ཧྲི་ལས་ན་ཚོགས་པདྨའི་གདན་སྐྱེད་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ་དེ་བཞིན་དུ་འདུག་ལ་བདག་ཉིད་ལ་སྤྲོ་བ་བསྐྱེད་པར་བྱའོ། །དེ་ནས་དེ་བཞིན་དུ་སངས་རྒྱས་ཐམས་ཅད་སྤྱན་དྲངས་པར་བྱས་ནས་ཏིང་ངེ་འཛིན་གསུམ་བསྒོམ་པར་བྱའོ། །དེ་ནས་བཅོམ་ལྡན་འདས་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ་རང་གི་རིག་པ་བརྗོད་པར་བྱའོ། །དེ་ནས་དེ་བཞིན་དུ་དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ལ་གསོལ་བ་བཏབ་པར་བསམ་པར་བྱའོ། །དེ་ནས་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་ལ་བཅོམ་ལྡན་འདས་ཀྱིས་རང་གི་དམ་ཚིག་གི་ཕྱག་རྒྱ་བཅིངས་ཏེ་རང་གི་རིག་པ་ཟློས་ཤིང་བཛྲོད་ཏིཥྛ་མཎྜལཾ་ཨུད་ཐ་བ་ཡཱ་ཞེས་བྱ་བས་དཀྱིལ་འཁོར་དེ་ནམ་མཁར་གཞག་སྟེ་དམ་ཚིག་གི་ཕྱག་རྒྱ་དེ་ཉིད་ཀྱིས་བདག་ཉིད་ལ་ལན་ཅིག་བྱིན་གྱིས་བརླབས་ལ་ཡང་ཕྱག་རྒྱ་ཆེན་པོ་བཅིངས་ཏེ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །རང་གི་རིག་པ་ཡོངས་ཟློས་ཤིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་དཀྱིལ་འཁོར་ཐིག་གདབ་བོ། །ཡང་དག་པར་བྲིས་ལ་སྔར་བཤད་པའི་མཚན་ཉིད་དང་ལྡན་པའི་བཅོམ་ལྡན་འདས་ནམ་མཁའི་སྙིང་པོ་འཁོར་དང་བཅས་པ་གནས་ཇི་ལྟ་བ་བཞིན་དུ་དགོད་པར་བྱའོ། །བཅོམ་ལྡན་འདས་ཀྱི་དགོད་པའི་རིག་པ་ནི་རང་གི་རིག་པ་ཉིད་ཡིན་ནོ། །རིན་པོ་ཆེ་ཡིད་ལས་བྱུང་བ་ལ་སོགས་པ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་རྣམས་ཡིན་ནོ། །དེ་ལྟར་དཀྱིལ་འཁོར་ཡང་དག་པར་བྲིས་ལ། སྒོ་ཕྱི་ལ་གཡས་པའི་རིན་པོ་ཆེའི་ཁུ་ཚུར་གྱིས་གཟུང་བའི་རིན་པོ་ཆེའི་མེ་ཏོག་གི་ལྕུག་མ་ལ་བུམ་བ་དང༌། བུམ་པ་གང་བ་ལས་ཡོངས་སུ་བཟླས་ལ་ལྷ་ཐམས་ཅད་ལ་དབུལ་བར་བྱའོ། །དེ་ནས་མཆོད་པ་རྣམ་པ་ལྔ་དང་མཆོད་པ་ཐམས་ཅད་ཀྱིས་ཀྱང་བཅོམ་ལྡན་འདས་འཁོར་དང་བཅས་པ་
ལ་ཡང་དག་པར་མཆོད་ལ་རྡོ་རྗེ་གནོད་སྦྱིན་ལ་སོགས་པ་ཡོངས་སུ་བཟླས་པའི་རས་སེར་པོས་སྟོད་གཡོགས་དང་སྨད་གཡོགས་དང་གདོང་གཡོགས་བྱས་ལ། ཕྱག་བྱ་བ་ལ་སོགས་པའི་ཆོ་ག་རྗེས་སུ་སྤྱད་དེ་སྔོམ་པ་གཟུང་བ་ནས་བྱང་ཆུབ་ཀྱི་སེམས་བསྐྱེད་དེ་གཡས་པའི་རིན་པོ་ཆེ་ཁུ་ཚུར་གྱིས་རྡོ་རྗེ་རིན་པོ་ཆེ་བཟུང་ལ་རང་གི་སྙིང་གར་འཇོག་ཅིང་སྙིང་པོ་འདིས་རང་གི་སྙིང་གར་རྡོ་རྗེ་རིན་པོ་ཆེ་བསམ་པར་བྱའོ། །སུ་ར་ཏ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ། དེ་ནས་ཤར་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་གཡས་པའི་རིན་པོ་ཆེའི་ཁུ་ཚུར་གྱིས་བླངས་ལ་བདག་ཉིད་ལ་དབང་བསྐུར་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་པ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ལ་བཛྲ་བཛྲ་ཞེས་ཟློས་ཤིང་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་འཇུག་པའི་གླུ་ཡང་འདོན་ཞིང་དཀྱིལ་འཁོར་དུ་ཇི་ལྟ་བ་བཞིན་དུ་འཇུག་པར་བྱའོ། །དེ་ནས་རང་གི་ཆོ་ག་རྗེས་སུ་སྤྱད་དེ་གཡས་པའི་རིན་པོ་ཆེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ནས་དེ་བཞིན་དུ་ཇི་ལྟ་བ་བཞིན་དུ་དབང་བསྐུར་ཞིང་རྡོ་རྗེ་རིན་པོ་ཆེའི་ཕྱག་རྒྱ་དང་རིན་པོ་ཆེའི་ཅོད་པན་གྱིས་ཀྱང་བདག་ཉིད་དབང་བསྐུར་ལ། རྡོ་རྗེ་རིན་པོ་ཆེ་དང་བདག་པོ་དང་མིང་གི་དབང་བསྐུར་བས་ཀྱང་དབང་བསྐུར་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ཏེ་དུམ་བུ་དང་པོ་ལས་བཤད་པའི་ཚུལ་གྱིས་ཇི་ལྟ་བ་དེ་ཁོ་ན་ཉིད་ཀྱིས་རྡོ་རྗེ་རིན་པོ་ཆེ་བཟུང་ཞིང་ཆོས་ཀྱི་དྲིལ་བུ་དཀྲོལ་ལ། དེ་བཞིན་དུ་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ལ་སྙིང་པོ་བཟླ་བར་བྱའོ། །དེ་ནས་མཆོད་པ་རྣམ་པ་ལྔ་དང་རིན་པོ་ཆེའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ། བཅོམ་ལྡན་འདས་ལས་ཚིགས་སུ་བཅད་པ་ལྔས་རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་དང༌། རིག་པ་དང༌། ཕྱག་རྒྱ་བཞི་ཉེ་བར་བསྟན་པ་བཅོམ་ལྡན་འདས་ལ་ཕྱག་བྱས་ནས་བཅོམ་ལྡན་འདས་ལས་གནང་པ་མནོས་ལ། ཡང་དེ་བཞིན་དུ་བདག་ལ་བྱིན་གྱིས་བརླབ་པ་བྱས་ལ། རང་གི་མིང་ནས་ཀྱང་བརྗོད་ནས། དཀྱིལ་འཁོར་
དེ་བཞིན་དུ་རྡོ་རྗེས་བསྒྲུབ་པར་བྱའོ། །དེ་ནས་རིན་ཆེན་སློབ་དཔོན་གྱིས། །སེམས་དཔའི་ལྕགས་ཀྱུ་བཅིངས་ནས་ནི། །སོ་གོལ་མང་པོ་བརྡབ་བགྱིས་ལ། །སངས་རྒྱས་ཐམས་ཅད་བསྡུ་བར་བྱ། །དེ་ནས་མཚན་བརྒྱ་རྩ་བརྒྱད་པས་བསྟོད་པ་བྱས་ནས། སྔར་བཤད་པའི་ལྕགས་ཀྱུས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་སྟེ། རྡོ་རྗེ་གནོད་སྦྱིན་དང་ཁུ་ཚུར་དང་བསྲུང་བས་ལས་རྣམས་བྱས་ལ། བཅོམ་ལྡན་འདས་འཁོར་དང་བཅས་པ་ལ་རང་གི་རིག་པས་མཆོད་ཡོན་ཕུལ་ལ། དམ་ཚིག་ཕྱག་རྒྱས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དབང་བསྐུར་བའི་ཕྱག་རྒྱས་དབང་བསྐུར་བ་དང་ཡང་མཆོད་ཡོན་ཕུལ། མཆོད་པ་རྣམ་པ་ལྔ་དང༌། རིན་པོ་ཆེའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ནས། ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཡང་བཅོམ་ལྡན་འདས་ལ་ཡང་དག་པར་མཆོད་དེ་རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་རྒྱ་བཞིས་ཀྱང་ཕྱག་བྱས་ལ་ཕྱག་རྒྱ་ཆེན་པོ་བཅིངས་ཏེ་ཇི་སྲིད་མཚན་མ་ཐོབ་པ་དེ་སྲིད་ཀྱི་བར་དུ་དཀྱིལ་འཁོར་བསྒོམ་པར་བྱའོ། །དེ་ནས་ཕྱག་བྱས་ནས། སྲིད་པའི་བདེ་བ་རྣམ་དག་ཕྱིར། །ཞེས་བྱ་བ་ལ་སོགས་པ་བརྗོད་པར་བྱའོ། །དེ་ལྟར་བཀའ་མནོས་ནས་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་བསླབ་པའི་གཞི་ལྔ་ཡོངས་སུ་འཛིན་པའམ་དགེ་སྦྱོང་དང་དགེ་སློང་གི་བསླབ་པ་གཟུང་བའི་སློབ་མ་ལ་རིག་པའི་སྔོམ་པ་ཇི་ལྟ་བ་བཞིན་དུ་འཛིན་དུ་གཞུག་གོ །དེ་ནས་དེ་བྱང་ཆུབ་ཀྱི་སེམས་བསྐྱེད་པ་བྱེད་དུ་གཞུག་གོ །དེ་ནས་དེའི་སྙིང་གར་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ་གཞག་སྟེ་སྔ་མ་བཞིན་དུ་བསྐྱེད་དོ། །དེ་ནས་སློབ་མ་འཕགས་པ་ནམ་མཁའི་སྙིང་པོར་བྱིན་གྱིས་བརླབས་ལ་དྲི་དང་མེ་ཏོག་ལ་སོགས་པས་མཆོད་ནས་ཡོན་གྱི་མཆོག་བླངས་ཏེ། ཤར་སྒོར་བལྟས་ཏེ་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། རང་གི་འཇུག་པའི་ཚུལ་གྱིས་དཀྱིལ་
འཁོར་དུ་འཇུག་པར་བྱའོ། །དེ་ནས་དེའི་རྣམ་པར་ཆགས་བྲལ་ལྟ་བུ་ཞེས་བྱ་བ་ལ་སོགས་པ་བརྗོད་པར་བྱའོ། །ཆོ་ག་ལྷག་མ་རྣམས་ནི་དེ་བཞིན་གཤེགས་པའི་དཀྱིལ་འཁོར་དུ་བཤད་པ་ལས་ཤེས་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་བཤད་ནས། ད་ནི་དམ་ཚིག་གི་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་བསྒྲུབ་བའི་ཡེ་ཤེས་བསླབ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར་དེ་བཞིན་དུ་ཞེས་བྱ་བ་ལ་སོགས་པ་གསུངས་ཏེ། དེ་ནས་མ་བསྒྲུབས་པའི་ལས་རྣམས་ལན་ཅིག་བཟླས་པར་འགྱུར་རོ་ཞེས་བྱ་བ་ནི་ཇི་སྐད་བཤད་པའི་བསྒྲུབ་པ་ བྱས་པ་ན་གང ་གི་ཚེ་རྣལ་འབྱོར་པས་ཇི་སྐད་དུ་བཤད་པའི་དངོས་གྲུབ་མ་ཐོབ་ན་དེའི་ཚེ་རང་གི་རིག་པ་དེ་ལན་ཅིག་བཟླས་པའི་རྗེས་ཐོགས་ཉིད་ལ་འཆད་པར་འགྱུར་བའི་ལས་རྣམས་གྲུབ་པར་འགྱུར་བའོ། །འདི་སྐད་སྟོན་ཏེ་བདག་བསྲུང་བ་དང་གནས་བསྲུང་བ་བྱས་ནས་བཅོམ་ལྡན་འདས་ནམ་མཁའི་སྙིང་པོའི་སྐུ་གཟུགས་ལུགས་མ་འམ་བརྐོས་པ་ལ་སོགས་པ་མདུན་དུ་བཞག་ལ་དེ་ལ་ཕྱག་བྱས་ནས་གསུམ་ལ་སྐྱབས་སུ་འགྲོ་བ་དང། བྱང་ཆུབ་ཀྱི་སེམས་བསྐྱེད་པ་དང༌། དང་པོའི་རྡོ་རྗེ་བཅིང་བའི་བར་དུ་བྱས་ལ། རྡོ་རྗེ་ཐལ་མོ་ལ་སོགས་པའི་ཕྱག་རྒྱ་བཅིང་པའི་ཆོ་ག་རྣམས་རྗེས་སུ་སྤྱད་དེ། རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལ་རིག་པ་ཡིད་ཀྱིས་བྲིས་ལ། ཆོས་ཐམས་ཅད་བདག་མེད་པར་བསྒོམས་ནས་དམ་ཚིག་སེམས་དཔར་བྱིན་གྱིས་བརླབ་པའི་བར་གྱི་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་ཇི་སྐད་དུ་བཤད་པའི་ཡེ་ཤེས་སེམས་དཔའ་རང་གི་ལུས་ལ་བཅུག་སྟེ། དམ་ཚིག་གི་ཕྱག་རྒྱས་བསྒྲུབས་ནས། ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དེ་བཞིན་དུ་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་སྟེ། དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དང་བོའི་རྡོ་རྗེ་བྱིན་གྱིས་བརླབ་པ་སྔ་མ་བཞིན་དུ་བྱས་ལ།
རྡོ་རྗེ་རིན་ཆེན་གྱི་ཕྱག་རྒྱས་བདག་ཉིད་དབང་བསྐུར་ཏེ། རྡོ་རྗེ་རིན་པོ་ཆེ་དང༌། བདག་པོ་དང་མིང་གི་དབང་གིས་དབང་བསྐུར་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བཟུང་ནས། རིན་པོ་ཆེ་མཚོན་ཆ་མ་ལ་སོགས་པ་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་དེ། རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་རྒྱས་བཅོམ་ལྡན་འདས་ལ་ཕྱག་བྱས་ལ་དེ་ཁོ་ན་ཉིད་ཀྱིས་རྡོ་རྗེ་གཟུང་ཞིང་ཆོས་ཀྱི་དྲིལ་བུ་དཀྲོལ་བར་བྱའོ། །དེ་ནས་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབ་བོ། །དེ་ནས་རང་གི་རིག་པ་ལན་གསུམ་བཟླས་ལ་རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལ་རིག་པ་ཡིད་ཀྱིས་བྲིས་ལ། རང་གི་ཚིག་གིས་ཟློས་ཤིང་བཟླས་པའི་དོན་གྱིས་བདག་ཉིད་རྡོ་རྗེ་རིན་པོ་ཆེའི་རིགས་ཀྱི་བདག་པོ་ཞེས་བྱ་བ་འཕགས་པ་ནམ་མཁའི་སྙིང་པོ་ཟླ་བ་གཅིག་ལ་སོགས་པ་ཇི་སྲིད་མངོན་དུ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཟླ་བ་ཕྱེད་ཙམ་གྱི་བར་དུ་བསྒོམས་ནས་བསྒྲུབས་ན། འཕགས་པ་ནམ་མཁའི་སྙིང་པོར་འགྱུར་རོ། །དེ་བཞིན་དུ་དངོས་གྲུབ་གཞན་དག་ཀྱང་སྔར་བཤད་པའི་རྗེས་སུ་འབྲངས་ནས་བསྒྲུབ་པར་ཤེས་པར་བྱའོ། །དེ་ལྟར་བསྒྲུབ་པ་འདིས་གང་གི་ཚེ་སྙིང་པོར་གྲུབ་པར་མ་གྱུར་པ་དེའི་ཚེ་དེ་མ་གྲུབ་པ་མ་ཡིན་ཏེ། མ་གྲུབ་པ་དེ་ཡང་ལས་འདི་བྱེད་པར་འགྱུར་རོ། །དབང་བསྐུར་བ་ཐམས་ཅད་ཐོབ་པ་ལ་ནི་རྡོ་རྗེ་རིན་པོ་ཆེ་མྱུ་གུས་སོ་ཞེས་བྱ་བ་ནི་དེ་བཞིན་དུ་འཕགས་པ་ནམ་མཁའི་སྙིང་པོའི་སྦྱོར་བ་བྱས་ལ། འཕགས་པ་ནམ་མཁའི་སྙིང་པོའི་རྡོ་རྗེ་རིན་ཆེན་གྱི་ཕྱག་རྒྱ་རྡོ་རྗེ་ཐལ་མོ་ལས་བྱུང་བ་བཅིངས་ལ། གུང་མོ་གཞིབས་ཏེ་རྩེ་མོར་བྱས་ནས་རིག་པ་ཟློས་ཤིང་དབྲལ་བའི་ཕྱོགས་སུ་བཞག་ལ། འཕགས་པ་ནམ་མཁའི་སྙིང་པོའི་བདག་ཉིད་དབང་བསྐུར་བར་བསམ་པར་བྱ་སྟེ། དེ་ལྟ་བུས་དབང་བསྐུར་བ་ཐམས་ཅད་ཐོབ་པར་འགྱུར་རོ། །ནོར་ཐམས་ཅད་ཐོབ་པ་ལ་ནི་རྡོ་རྗེ་རིན་ཆེན་གྱི་རྒྱལ་མཚན་གྱི་རྩེ་མོས་སོ་ཞེས་བྱ་བ་ནི་དེ་བཞིན་དུ་འཕགས་པ་ནམ་མཁའི་སྙིང་པོའི་སྦྱོར་བ་བྱས་ལ་བཤད་མ་ཐག་པའི་རྡོ་རྗེ་རིན་ཆེན་གྱི་ཕྱག་རྒྱ་བཅིངས་ལ། རྡོ་རྗེ་རིན་ཆེན་བཀྲོལ་ཏེ། རྡོ་རྗེ་ཐལ་
མོ་ཁོང་སྟོང་བྱས་ནས་སྲིན་ལག་གཉིས་གཤིབས་ཏེ་རྩེ་མོར་བྱས་ལ་མཐེའུ་ཆུང་གཉིས་ཕྱེ་སྟེ་བརྐྱང་བ་འདི་ནི་རྡོ་རྗེ་རིན་ཆེན་གྱི་རྒྱལ་མཚན་གྱི་རྩེ་མོ་སྟེ་འདི་བཅིངས་ལ་རིག་པ་ཟློས་ཤིང་གཏེར་ལ་སོགས་པ་ཐོབ་པར་བསམ་པར་བྱ་སྟེ་དེ་ལྟ་བུས་ནི་ནོར་ཐམས་ཅད་ཐོབ་པར་འགྱུར་རོ། །བསམ་པ་ཐམས་ཅད་ཡོངས་སུ་རྫོགས་པར་བྱ་བ་ལ་ནི་རྡོ་རྗེ་ནོར་བུ་ཆེན་པོའི་མཚན་མའི་ཕྱག་རྒྱས་སོ་ཞེས་བྱ་བ་ནི་རྡོ་རྗེ་རིན་ཆེན་བཅིངས་ལ་གུང་མོ་གཉིས་ནོར་བུར་བྱ་བ་འདི་ནི་རྡོ་རྗེ་ནོར་བུ་ཆེན་པོའི་མཚན་མའི་ཕྱག་རྒྱ་སྟེ་འདི་བཅིངས་ལ་སྔ་མ་བཞིན་དུ་འཕགས་པ་ནམ་མཁའི་སྙིང་པོའི་སྦྱོར་བ་བྱས་ལ། རིག་པ་ཟློས་ཤིང་མངོན་པར་འདོད་པའི་ནོར་འཐོབ་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་བསམ་བ་ཐམས་ཅད་ཡོངས་སུ་རྫོགས་པར་འགྱུར་རོ། །གཏེར་ཆེན་པོ་ཐོབ་པ་ལ་ནི་རྡོ་རྗེ་རིན་ཆེན་གྱི་ས་འོག་གི་ཕྱག་རྒྱས་སོ་ཞེས་བྱ་བ་ནི་འཕགས་པ་ནམ་མཁའི་སྙིང་པོའི་སྦྱོར་བ་བྱས་ལ། རྡོ་རྗེ་རིན་ཆེན་བཅིངས་ཏེ་མཐེ་ཆུང་གཉིས་གཞིབས་ནས་རྩེ་མོར་བྱས་ལ་རིག་པ་བཟླ་བར་བྱའོ། །འདི་ནི་རྡོ་རྗེ་རིན་ཆེན་གྱི་ས་འོག་གི་ཕྱག་རྒྱ་སྟེ་འདི་བཅིངས་ནས་ཡིད་ཀྱིས་གཏེར་བླངས་ལ་གདེག་པར་བྱ་སྟེ། དེ་ལྟ་བུས་ནི་གཏེར་ཆེན་པོ་ཐོབ་པར་འགྱུར་རོ། །རྡོ་རྗེ་དབང་བསྐུར་བ་ཐོབ་པ་ལ་ནི་ཞེས་བྱ་བ་ནི་ནོར་བུའི་མཚན་མ་ཐོབ་པ་ལ་སོགས་པ་ནི་རྡོ་རྗེ་དབང་བསྐུར་བ་ཐོབ་པ་སྟེ། བཅོམ་ལྡན་འདས་འཕགས་པ་ནམ་མཁའི་སྙིང་པོ་ལས་དང་པོའི་རྡོ་རྗེ་ཐོབ་པ་ཞེས་བྱ་བའི་དོན་ཏེ། དེ་ཇི་ལྟར་ཐོབ་པར་འགྱུར་ཞེ་ན། རྡོ་རྗེ་རིན་ཆེན་ཆེན་པོའི་ས་འོག་གི་ཕྱག་རྒྱས་སོ་ཞེས་བྱ་བ་གསུངས་ཏེ། དེ་བཞིན་དུ་འཕགས་པ་ནམ་མཁའི་སྙིང་པོས་སྦྱོར་བ་བྱས་ལ་རྡོ་རྗེ་རིན་ཆེན་བཅིངས་ལ། འདི་ཐུར་དུ་བླུགས་པ་ལྟར་བྱས་པ་འདི་ནི་རྡོ་རྗེ་རིན་ཆེན་ས་འོག་གི་ཕྱག་རྒྱ་སྟེ། འདི་བཅིངས་ལ་སྟོང་པ་ཉིད་བསྒོམ་ཞིང་འཕགས་པ་ནམ་མཁའི་སྙིང་པོས་གཟུགས་བརྙན་ལྟ་བུ་ནོར་བུས་མཚན་པའི་དང་པོའི་རྡོ་རྗེ་སྩོལ་བ་ལ་སོགས་པ་མདུན་དུ་བསམ་པར་བྱ་སྟེ། དེ་ལྟ་བུས་ནི་རྡོ་རྗེ་དབང་བསྐུར་བ་ཐོབ་པར་འགྱུར་རོ། །རྡོ་རྗེ་དབང་བསྐུར་བ་ཐོབ་པ་ལ་ནི་ཞེས་བྱ་བ་ལ། །རྡོ་རྗེ་རིན་ཆེན་གྱི་ཅོད་པན་གྱིས་དབང་བསྐུར་
བ་ཐོབ་པ་ལ་ནི་རྡོ་རྗེ་དབང་བསྐུར་བ་ཐོབ་པ་སྟེ། དེ་ཇི་ལྟར་འགྱུར་ཞེ་ན། རྡོ་རྗེ་ཆེན་པོའི་ཕྲེང་བས་སོ་ཞེས་བྱ་བ་གསུངས་ཏེ། །རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་ཀྱིས་ནོར་བུར་བྱས་ལ་འདི་ནི་རྡོ་རྗེ་ཕྲེང་བ་ཆེན་པོ་འདི་བཅིངས་ཏེ། །འཕགས་པ་ནམ་མཁའི་སྙིང་པོའི་སྦྱོར་བས་དབང་བསྐུར་བར་གསོལ་བའི་བསམ་པས་བཅོམ་ལྡན་འདས་མདུན་ན། དབང་བསྐུར་སྩོལ་བ་ལ་བརྩོན་བར་མཛད་པར་བསམ་པར་བྱ་སྟེ་དེ་ལྟ་བུས་ནི་རྡོ་རྗེ་ཕྲེང་བ་ཆེན་པོའི་དབང་བསྐུར་བ་ཐོབ་པར་འགྱུར་རོ། །བྱང་ཆུབ་སེམས་དཔའ་ཆེན་པོར་དབང་བསྐུར་བ་ཐོབ་པ་ལ་ནི་ཞེས་བྱ་བ་ནི་བྱང་ཆུབ་སེམས་དཔའ་ཆེན་པོ་འཕགས་པ་ནམ་མཁའི་སྙིང་པོའི་དབང་བསྐུར་བ་ཐོབ་པ་ནི། བྱང་ཆུབ་སེམས་དཔའ་ཆེན་པོའི་དབང་བསྐུར་བ་ཐོབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་རིན་པོ་ཆེ་ཆེན་པོའི་ཕྲེང་བས་སོ་ཞེས་བྱ་བ་གསུངས་ཏེ་རྡོ་རྗེ་བསྡམས་པ་བཅིངས་ཏེ་མཐེ་བོང་དང་མཛུབ་མོ་དང༌། གུང་མོའི་སོར་མོས་ནོར་བུ་རིན་པོ་ཆེ་གསུམ་བྱས་ཏེ་མདུན་དང་མགོ་པོ་དང་རྣ་བ་གཉིས་ཀྱི་སྟེང་དུ་བདག་ཉིད་དབང་བསྐུར་བ་བྱས་ཏེ། འདི་ནི་རྡོ་རྗེ་རིན་ཆེན་གྱི་ཕྲེང་བའི། །འདི་བཅིངས་ལ་དེ་བཞིན་གཤེགས་པ་ནམ་མཁའི་སྙིང་པོའི་སྦྱོར་བས་མདུན་དུ་ཡང་བཅོམ་ལྡན་འདས་བསམས་ནས་དེ་ནས་དབང་བསྐུར་བ་བླང་བར་བྱའོ། །དེ་བཞིན་གཤེགས་པའི་དབང་བསྐུར་བ་ཐོབ་པ་ལ་ནི་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་དབང་བསྐུར་བ་ཐོབ་པ་ནི་དེ་བཞིན་གཤེགས་པའི་དབང་བསྐུར་བ་ཐོབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་རིན་ཆེན་གྱི་དབང་བསྐུར་བ་དམ་པའི་ཕྲེང་བས་སོ་ཞེས་བྱ་བ་གསུངས་ཏེ། དེ་བཞིན་དུ་ནམ་མཁའི་སྙིང་པོའི་སྦྱོར་བ་བྱས་ལ་བདག་ཉིད་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་སྐུར་བསམས་ཏེ། རྡོ་རྗེ་བསྡམས་བ་ལས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱས་བཅིངས་ལ་མཛོད་སྤུའི་གནས་སུ་བཞག་ནས། །མཛུབ་མོ་གཉིས་ཀྱིས་རྒྱབ་ཏུ་མདུད་དེ་དར་དཔྱངས་ཀྱི་ཚུལ་དུ་བྱའོ། །འདི་བཅིངས་ལ་རེག་པ་བཟླས་ན་དེ་ལྟ་བུས་ནི་དེ་བཞིན་གཤེགས་པའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་
འཛིན་པ་ཆེན་པོའི་དབང་བསྐུར་བ་ཐོབ་པ་ལ་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་རྡོ་རྗེ་རིན་ཆེན་གྱི་ཅོད་པན་གྱི་ཕྲེང་བས་སོ་ཞེས་བྱ་བ་ནི་དེ་བཞིན་དུ་འཕགས་པ་ནམ་མཁའི་སྙིང་པོའི་སྦྱོར་བ་བྱས་ལ། རྡོ་རྗེ་སེམས་དཔར་བདག་ཉིད་བསམས་ཏེ། རྡོ་རྗེ་བསྡམས་པ་བཅིངས་ལ་མཐེ་བོ་གཉིས་དཔའ་པོའི་སྐྱིལ་མོ་ཀྲུང་དུ་བྱས་ལ་མཛུབ་མོ་གཉིས་བཀུག་སྟེ་ཟླུམ་པོར་བྱས་པ་ནི་སྐུའོ། །གུང་མོ་གཉིས་གཤིབས་ཏེ་བསྒྲེང་བ་ནི་མཆོག་སྟེ་དེ་བཞིན་གཤེགས་པའི་སྐུའི་མཆོག་འདིར་དང་རིག་པ་ཟློས་ཤིང་ཤར་ནས་བརྩམས་ནས་མདུན་དང༌། གཡས་དང། རྒྱབ་དང༌། གཡོན་དུ་ཅོད་པན་གྱི་ཚུལ་དུ་བྱས་ལ་མདུན་དུ་དེ་བཞིན་དུ་མདུད་ལ་ཕྲེང་བ་འཆིང་བའི་ཚུལ་གྱིས་རྒྱབ་ཏུ་མདུད་ལ་སྒེག་པ་དང་བཅས་པས་མཐའ་ནས་དགྲོལ་བས་ངོས་གཉིས་ཀ་ནས་དར་དཔྱངས་འཕྱར་བའི་ཚུལ་དུ་བྱའོ། །འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་རྡོ་རྗེ་རིན་ཆེན་གྱིས་དབང་བསྐུར་བའི་ཕྲེང་བ་ཡིན་ཏེ། དེ་སངས་རྒྱས་ལྔའི་ཅོད་པན་གྱི་དབང་བསྐུར་བའི་རྡོ་རྗེ་འཛིན་པ་ཆེན་པོར་འགྱུར་རོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས་གསུངས་པའི། འཕགས་པ་ནམ་མཁའི་སྙིང་པོའི་རྟོག་པ་བཤད་པ་རྫོགས་སོ།། །།དེ་ལྟར་དུམ་བུ་གཉིས་པ་རྩ་བའི་རྒྱུད་དུ་རིགས་ལྔའི་དཀྱིལ་འཁོར་བསྟན་ནས། ད་ནི་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་དུ་འཇུག་པ་དང༌། དབང་བསྐུར་བ་དང༌། བསྒྲུབ་པ་དང༌། དངོས་གྲུབ་རྣམས་དཀྱིལ་འཁོར་གཅིག་ཉིད་དུ་བསྡུ་བར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་བསྡུས་པའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ། དང་པོའི་སྦྱོར་བའི་རྗེས་ཐོགས་ལ། །ཞེས་བྱ་བའི་ཐ་ཚིག་གོ །འདི་དང་པོའི་སྦྱོར་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཉིད་ཡིན་པར་ཤེས་པར་བྱའོ། །བཅོམ་ལྡན་འདས་ཞེས་བྱ་བ་ནི་རྣམ་པར་སྣང་མཛད་དེ་རྡོ་རྗེ་སེམས་དཔའ་ལ་གསོལ་བ་བཏབ་པོ་ཞེས་བྱ་བར་སྦྱར་རོ། །བཅོམ་ལྡན་འདས་ཁྱད་པར་ཇི་ལྟ་བུ་ཞིག་ཅེ་ན།
རིགས་ཐམས་ཅད་ཀྱིས་ཞེས་བྱ་བ་ལ་སོགས་པ་གསུངས་ཏེ། རིགས་ཀྱང་ཡིན་ལ་ཐམས་ཅད་ཀྱང་ཡིན་པས་ན་རིགས་ཐམས་ཅད་དོ། །དེ་རྣམས་ཀྱི་བསྡུས་པ་ནི་ཉེ་བར་བསྡུས་པའོ། །རྡོ་རྗེ་ལྟར་མི་ཕྱེད་པར་བྱིན་གྱིས་བརླབས་ཤིང་ཕྱི་མའི་མཐར་ཐུག་པ་མེད་པར་བརྟན་པར་ བྱས་པ་གང ་ཡིན་པ་དེ་བརྙེས་ཤིང་ཐུགས་སུ་ཆུད་དོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཅི་ཞིག་མཛད་ནས་བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་ཅེ་ན། སེམས་ཅན་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སེམས་ཅན་ཡང་ཡིན་ལ་ཐམས་ཅད་ཀྱང་ཡིན་པས་ན་སེམས་ཅན་ཐམས་ཅད་དེ། རྡོ་རྗེ་སེམས་དཔའ་ལ་སོགས་པས་འདུལ་བ་རྣམས་སོ། །དེ་རྣམས་གཞུག་པར་བྱ་བའི་ཕྱིར་འཁོར་ལོ་ནི་བསྡུས་པའི་དཀྱིལ་འཁོར་ཏེ་དེ་ཉིད་རྡོ་རྗེ་ལྟར་མི་ཕྱེད་པའི་ཕྱག་རྒྱ་གང་ཡིན་པ་དེ་ལ་མིང་དེ་སྐད་ཅེས་བཏགས་པ་དེ་ལ་མི་དམིགས་པས་ན་སེམས་ཅན་ཐམས་ཅད་འཇུག་པའི་འཁོར་ལོ་རྡོ་རྗེའི་ཕྱག་རྒྱས་ཞེས་བྱ་བའི་ཏིང་ངེ་འཛིན་གང་ཡིན་པ་དེ་ལ་སྙོམས་པར་ཞུགས་ཤིང་མངོན་སུམ་དུ་མཛད་ནས། བཅོམ་ལྡན་འདས་རྣམ་པར་སྣང་མཛད་ཀྱིས་བཅོམ་ལྡན་འདས་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་གསོལ་བ་བཏབ་པར་མཛད་པ་ནི་གསོལ་བ་བཏབ་པར་གྱུར་པ་སྟེ། བཅོམ་ལྡན་འདས་རྣམ་པར་སྣང་མཛད་བསྡུས་པའི་དཀྱིལ་འཁོར་གྱི་རྣམ་པར་ཐུགས་རྩེ་གཅིག་ཏུ་མཛད་ནས། བཅོམ་ལྡན་འདས་རྡོ་རྗེ་སེམས་དཔའ་སེམས་ཅན་ཐམས་ཅད་དེར་འཇུག་ཅིང་དེར་བསྐྱེད་པར་བྱ་བའི་ཕྱིར། བཅོམ་ལྡན་འདས་རྡོ་རྗེ་སེམས་དཔའ་ལ་གསོལ་བ་བཏབ་པ་ཡིན་ནོ། །བདེ་བ་ཆེན་པོ་རབ་གྲུབ་ཕྱིར། །འདོད་ཆགས་ཆེན་པོ་ཡང་དག་བརྗོད། ཅེས་བྱ་བ་ནི་བཤད་ཟིན་ཏོ། །བདེ་བ་ཆེན་པོའི་དོན་གྱི་ཕྱིར། །ཞེས་བྱ་བ་ནི་བདེ་བ་ཡང་ཡིན་ལ་ཆེན་པོ་ཡང་ཡིན་པས་ན་བདེ་བ་ཆེན་པོ་སྟེ། རྣལ་འབྱོར་པ་སྔགས་པ་ཐམས་ཅད་ཀྱི་སྟོབས་ཀྱིས་འཇིག་རྟེན་པའི་བདེ་བ་གང་ཡིན་པ་ཡང་ཐར་པ་ཆེན་པོ་མངོན་སུམ་དུ་བྱེད་པའི་རྒྱུར་གྱུར་པས་བདེ་བ་ཆེན་པོ་ཡིན་ཏེ། དེའི་དོན་བསྡུས་པའི་དཀྱིལ་འཁོར་དུ་འགྲོ་བ་རྣམས་འཇུག་པར་གྱིས་ཤིག་
པའོ། །ཅི་བདེ་བ་ཞེས་བྱ་བ་ནི་ཅི་འདོད་པར་རོ། །དེ་ནས་བཅོམ་ལྡན་འདས་ཀྱི་སྙིང་པོ་ཐམས་ཅད་གསུངས་སོ་ཞེས་བྱ་བར་སྦྱར་རོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ་གསོལ་བ་བཏབ་པའི་རྗེས་ཐོགས་ཉིད་ལའོ། །ཐམས་ཅད་ཅེས་བྱ་བ་ལ་སོགས་པ་ནི་དེ་ཁྱད་པར་དུ་བྱེད་དེ། འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བ་ནི་ཐམས་ཅད་ལས་རྣམ་པར་རྒྱལ་བ་སྟེ་རྡོ་རྗེ་ཧཱུཾ་མཛད་དོ། །དེ་ཡང་རབ་ཏུ་དགའ་བའི་རྡོ་རྗེ་ཁྲོ་བོའི་སྐུ་དང་ལྡན་པ་འདིས་དབང་ཕྱུག་ཆེན་པོ་ལ་སོགས་པ་འཇིག་རྟེན་གསུམ་པོ་ལས་རྣམ་པར་རྒྱལ་བས་ན་དེ་སྐད་ཅེས་བྱ་སྟེ། དབང་ཕྱུག་ཆེན་པོ་ལ་སོགས་པ་དད་པའི་སེམས་ཅན་གྱི་ཁམས་ནི་འགྲོ་བ་སྟེ། དེས་དབང་ཕྱུག་ཆེན་པོ་ལ་སོགས་པའི་ཚུལ་གྱིས་རང་བཞིན་གྱིས་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ལམ་ལ་རབ་ཏུ་འཇོག་ཅིང་འདུལ་བར་མཛད་པས་ན་འགྲོ་བ་འདུལ་བ་སྟེ། འཇིག་རྟེན་དབང་ཕྱུག་གོ །དམ་ཚིག་ཐམས་ཅད་ཅེས་བྱ་བ་ལ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་དྲན་པ་དང་ཤེས་རབ་དང་རབ་ཏུ་ལྡན་པའི་ཤེས་རབ་སེམས་དང་སེམས་ལས་བྱུང་བ་དང་དེ་བཞིན་གཤེགས་པའི་དཀྱིལ་འཁོར་ནི། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་འདའ་བར་བྱ་བ་མ་ཡིན་པས་ན་དམ་ཚིག་ཐམས་ཅད་དོ། །དངོས་གྲུབ་ཐམས་ཅད་རབ་ཏུ་གསོལ་བ་ཞེས་བྱ་བ་ནི་ནོར་བུའི་རིགས་ཆེན་པོའི་ཚུལ་གྱིས་སེམས་ཅན་ཐམས་ཅད་ལ་འཇིག་རྟེན་དང༌། འཇིག་རྟེན་ལས་འདས་པའི་དངོས་གྲུབ་རྣམས་རབ་ཏུ་སྩོལ་བས་ན་དངོས་གྲུབ་ཐམས་ཅད་སྩོལ་བའོ། །རྡོ་རྗེ་འཆང་ཆེན་པོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོར་ཐམས་ཅད་དུ་སོང་བའི་རྡོ་རྗེ་ཆེན་པོ་འཛིན་པར་མཛད་པ་འམ། དེ་ཁོ་ན་ཉིད་ཀྱི་རྡོ་རྗེ་ཆེན་པོ་འཛིན་པར་མཛད་པས་སམ་གཞན་དག་ཏུ་བྱང་ཆུབ་ཆེན་པོར་མཚན་ཉིད་ཅན་གྱི་ཐུགས་ཀྱི་རྡོ་རྗེ་འཆང་ཆེན་པོའི་ཞེས་བྱ་སྟེ། སེམས་དཔར་བྱིན་གྱིས་བརླབས་པའི་སྦྱོར་བ་ལས་བྱུང་བའི་རྡོ་རྗེ་སེམས་དཔའོ། །དེ་ཡང་དེ་ལྟར་ན་བཅོམ་ལྡན་འདས་རྡོ་རྗེ་འཆང་ཆེན་པོ་ཉིད་གང་ཡིན་ཞེ་ན། སེམས་དཔར་བྱིན་རླབས་སྦྱོར་བས་ནི། །བདག་ལ་བྱིན་བརླབས་མཆོག་གྲུབ་
པ། །ཉིན་རེ་གྲུབ་པ་དེ་ཡིས་ནི། །རྡོ་རྗེ་སེམས་དཔའ་ཉིད་ཐོབ་བོ། །ཞེས་འོག་ནས་བཤད་པའི་ཕྱིར་རོ། །སྟོན་པ་པོ་ཞེས་བྱ་བ་ནི་བདེན་པ་རྟོགས་པར་བྱ་བའི་ཕྱིར་ཡང་དག་པའི་ལམ་རྟོགས་པར་འཆད་པའི་སེམས་ཅན་རྣམས་འདུལ་ཞིང་རང་གི་བཀའ་བསྒོ་བ་ལས་འཇོག་པར་མཛད་པས་ན་སྟོན་པའོ། །སྲུང་མཛད་ཅེས་བྱ་བ་ནི་ངན་འགྲོར་འགྲོ་བ་ལ་སོགས་པའི་འཇིགས་པ་ཐམས་ཅད་ལས། འཕགས་པ་གཙུག་ཏོར་རྣམ་པར་རྒྱལ་བ་ལ་སོགས་པའི་གཟུངས་དང༌། འདི་ལས་བཤད་པ་ཇི་སྐད་དུ་གསུངས་པའི་ལས་ཀྱི་ཕྱག་རྒྱ་རྣམས་ཀྱིས་སེམས་ཅན་རྣམས་ཀུན་དུ་སྲུང་བར་མཛད་པས་ན་བསྲུང་བའོ། །སྟོབས་དང་ཕ་རོལ་གནོན་པ་ཐོགས་མེད་པ། །ཞེས་བྱ་བ་ནི། དེ་བཞིན་གཤེགས་པའི་སྟོབས་བཅུ་དང་སྐུའི་སྟོབས་དེ་རྣམས་དང་ཐོགས་པ་མེད་པ་དང༌། ཆོ་འཕྲུལ་བཞིས་སེམས་ཅན་གྱི་དོན་མཛད་པ་ནི་ཕ་རོལ་གནོན་པ་སྟེ་དེ་དག་ཐོགས་པ་མེད་པས་སོ། །རྣམ་པར་གནོན་པ་དོན་ཡོད་པ་གྲུབ་པ་ཞེས་བྱ་བ་ནི་ཐོགས་པ་མེད་པར་སེམས་ཅན་གྱི་དོན་གྱི་བྱ་བ་ལ་མཛད་པ་ནི་དོན་ཡོད་པར་གྲུབ་པའོ། །དེ་ཉིད་འདིའི་རྣམ་པར་གནོན་པ་ཡིན་པས་ན་རྣམ་པར་གནོན་པ་དོན་ཡོད་པར་གྲུབ་པ་ཞེས་བྱའོ། །དེ་ཡོན་ཏན་གྱི་ཁྱད་པར་ཇི་ལྟ་བུ་དང་ལྡན་པའི་བཅོམ་ལྡན་འདས་རྡོ་རྗེ་འཆང་ཆེན་པོས་སྙིང་པོ་ཐམས་ཅད་གསུངས་སོ། །ཅི་ཞིག་མཛད་ན་ས་ཤེ་ན། ཐམས་ཅད་ལ་རྗེས་སུ་སྟོན་པ་ཞེས་བྱ་བ་གསུངས་ཏེ། རྡོ་རྗེ་སེམས་དཔའ་ལ་སོགས་པས་འདུལ་བ་ནི་ཐམས་ཅད་དེ་དེ་རྣམས་རྗེས་སུ་འདུལ་བར་མཛད་བས་ན་ཐམས་ཅད་ལ་རྗེས་སུ་བསྟན་པའོ། །རྡོ་རྗེ་སེམས་དཔའ་ལ་སོགས་པའི་བསྒྲུབ་པས་རྡོ་རྗེ་སེམས་དཔའ་ལ་སོགས་པ་གྲུབ་ཅིང་དེའི་དོན་དུའོ། །དམ་ཚིག་གིས་བསྡུས་པའི་དཀྱིལ་འཁོར་ནི་འཁོར་ལོ་ཞེས་བཤད་དེ། དེ་ཉིད་དམ་ཚིག་ཅེས་གྲགས་སོ་ཞེས་བཤད་པའོ། །དེ་རྡོ་རྗེ་ལྟར་མི་ཕྱེད་པའི་ཕ་རོལ་གནོན་པ་དེ་ཡིས་བསྡུས་པས་སེམས་ཅན་གྱི་དོན་མཛད་པས་ན་དེ་སྐད་བཀའ་སྩལ་པ་དེ་ལ་དེ་སྐད་ཅེས་བྱ་སྟེ། དེ་མཛད་པ་ནི་བསྡུས་པའི་དཀྱིལ་འཁོར་སྤྲུལ་
པ་དེས་འདུལ་བའི་སེམས་ཅན་གྱི་ཁམས་འདུལ་བ་ནས་ཞེས་བྱ་བའི་ཐ་ཚིག་གོ །བདེ་བའི་དངོས་གྲུབ་ཐམས་ཅད་ཀྱིས་དམ་ཚིག་ཅེས་བྱ་བ་ནི་དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་ན་དངོས་གྲུབ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་འཇིག་རྟེན་དང་འཇིག་རྟེན་ལས་འདས་པ་བདེ་བའི་དངོས་གྲུབ་ཐམས་ཅད་དོ། །དེ་རྣམས་ཀྱི་དམ་ཚིག་ནི་སྐྱེ་བའི་རྒྱུའོ། །མིང་དེ་སྐད་ཅེས་བྱ་ཞིང་དོན་ཡོད་པར་འབྲས་བུ་དང་བཅས་པ་ཡིན་ལ། མཚུངས་པ་མེད་པ་ནི་འདྲ་བ་མེད་པའོ། །རིགས་ཐམས་ཅད་ཀྱི་ངོ་བོ་ཉིད་བསྡུས་པའི་དཀྱིལ་འཁོར་བསྐྱེད་པའི་རྒྱུའོ། །སྙིང་པོ་ཐམས་ཅད་གསུངས་པ་ནི་བཀའ་སྩལ་པ་སྟེ། ཧོ་ཨ་ཧཱུཾ་ཧྲི་ཏྲཾ་ཞེས་བྱ་བའོ། །དེ་ནས་ཞེས་བྱ་བ་ལ་སོགས་པ་བསྡུས་པའི་དཀྱིལ་འཁོར་སྐྱེད་པར་བྱེད་པའི་སྙིང་པོ་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་པ་ཙམ་གྱིས་སོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་ཐམས་ཅད་ཀྱང་ཡིད་ལ། དེ་བཞིན་གཤེགས་པ་ཡང་ཡིན་པས་ན་དེ་བཞིན་གཤེགས་པ་ཐམས་ཅད་དེ། དཔལ་རྡོ་རྗེ་སེམས་དཔའ་ལ་སོགས་པ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པ་རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་པར་གྲུབ་པའི་སྐུ་སྤྲུལ་པའི་སྐུ་དང་བཅས་པའོ། །དེ་རྣམས་གྱི་དཀྱིལ་འཁོར་ནི་རྡོ་རྗེ་སེམས་དཔའ་དང༌། རྣམ་པར་སྣང་མཛད་ཀྱི་དཀྱིལ་འཁོར་རོ། །དེ་དང་པོར་གྱུར་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ལ་སོགས་པའི་དཀྱིལ་འཁོར་རོ། །དེ་གང་ཡིན་ཞེ་ན་འཇིག་རྟེན་དང་འཇིག་རྟེན་ལས་འདས་པ་ཞེས་བྱ་བ་སྨོས་ཏེ། དེ་ལ་འཇིག་རྟེན་པའི་དཀྱིལ་འཁོར་ནི་མིང་པོ་གསུམ་དང༌། སྲིང་མོ་བཞི་དང༌། ལྷ་མ་ཡིན་དང༌། ཀླུའི་དཀྱིལ་འཁོར་རོ། །འཇིག་རྟེན་ལས་འདས་པའི་ནི། རྡོ་རྗེ་སེམས་དཔའ་དང་དེ་བཞིན་གཤེགས་པ་དང༌། རབ་ཏུ་དགའ་བའི་རྡོ་རྗེ་ཁྲོ་བོ་དང༌། འཇིག་རྟེན་དབང་ཕྱུག་དང༌། འཕགས་པ་ནམ་མཁའི་སྙིང་པོའི་དཀྱིལ་འཁོར་རོ། །དཀྱིལ་འཁོར་ཆེན་པོ་དེར་ཞེས་བྱ་བ་ནི་
བསྡུས་པའི་དཀྱིལ་འཁོར་དུའོ། །ཡང་དག་པར་གནས་པ་ཞེས་བྱ་བ་ནི་དེའི་ཁོངས་སུ་ཆུད་པའོ། །དཀྱིལ་འཁོར་གཅིག་ཏུ་གྱུར་ཏོ་ཞེས་བྱ་བ་ནི་བསྡུས་པའི་དཀྱིལ་འཁོར་དུ་གྱུར་པའོ། །དེ་ལྟར་ན་དེ་ནས་བཅོམ་ལྡན་འདས་ཞེས་བྱ་བ་ནས་བརྩམས་ཏེ་དཀྱིལ་འཁོར་གཅིག་ཏུ་གྱུར་ཏོ་ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བའི་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ཏེ་ཏིང་ངེ་འཛིན་གསུམ་གྱི་རྗེས་ཐོགས་ཉིད་ལ། བཅོམ་ལྡན་འདས་རྡོ་རྗེ་འཆང་ཆེན་པོས་དཀྱིལ་འཁོར་ཐམས་ཅད་གསུངས་སོ་ཞེས་བྱ་བར་སྦྱར་རོ། །མིང་དེ་སྐད་ཅེས་བྱ་ཞེ་ན་སེམས་ཅན་ཐམས་ཅད་ཅེས་བྱ་བ་ལ་སོགས་པ་སྨོས་ཏེ་སེམས་ཅན་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་འདུལ་བ་རྣམས་སོ། །དེས་བསྡུས་པའི་དཀྱིལ་འཁོར་དུ་ཞུགས་པ་ནི་སེམས་ཅན་ཐམས་ཅད་རྗེས་སུ་ཞུགས་པའོ། །དེའི་དོན་དུ་བདེ་བ་ཆེན་པོ་ལས་བྱུང་བའི་དང་པོའི་རྡོ་རྗེ་དམ་ཚིག་ནི་བདེ་བ་ཆེན་པོའི་རྡོ་རྗེ་དམ་ཚིག་སྟེ་བསྡུས་པའི་དཀྱིལ་འཁོར་རོ། །དེ་ཉིད་སྐྱེ་བོ་ཐམས་ཅད་དང་ཐུན་མོང་མ་ཡིན་པས་ན་གསང་བའོ། །མིང་དེ་སྐད་ཅེས་བྱ་བའི་དཀྱིལ་འཁོར་ཐམས་ཅད་གསུངས་པ་ནི་བཀའ་སྩལ་པའོ། །དཀྱིལ་འཁོར་ཆེན་པོའི་ཚུལ་གྱིས་ནི། །དཀྱིལ་འཁོར་ཐམས་ཅད་ཀུན་དུ་བྲི། །ཞེས་བྱ་བ་ནི་དུམ་བུ་གཉིས་པའི་རྩ་བའི་དཀྱིལ་འཁོར་ཀྱི་དབྱིབས་ལྟར་འདིའི་གཞིའི་དཀྱིལ་འཁོར་ཀུན་དུ་བྲི་བར་བྱའོ། །དཀྱིལ་འཁོར་ཆེན་པོ་དང་པོར་ནི། །དེ་ཡི་དབུས་སུ་བརྟག་པར་བྱ། །ཞེས་བྱ་བ་ལ་དཔལ་རྡོ་རྗེ་སེམས་དཔའི་དཀྱིལ་འཁོར་ནི་དཀྱིལ་འཁོར་ཆེན་པོ་སྟེ་དཀྱིལ་འཁོར་ཆེན་པོ་དང་པོ་དེ་གཞིའི་དཀྱིལ་འཁོར་དེའི་དབུས་སུ་སྟེ་རེའུ་ཆ་དབུས་མ་ལ་བརྟག་པར་བྱ་
ཞིང་ཡང་དག་པར་བྲི་བར་བྱའོ། །དེའི་ཞེས་བྱ་བ་ལ་དཀྱིལ་འཁོར་དབུས་མའི་རེའུ་ཆ་དབུ་མར་བྲི་བས་རྡོ་རྗེ་སེམས་དཔའི་དཀྱིལ་འཁོར་དེའི་ཕྱོགས་བཞིར་དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ཀྱི་དཀྱིལ་འཁོར་ཡང་དག་པར་བྲི་བར་བྱའོ། །ཕྱིའི་དཀྱིལ་འཁོར་གྱི་མཚམས་ཀྱི་མཐའ་ནི་ཕྱིའི་མཚམས་ཀྱི་མཐའ་སྟེ། དེ་རྣམས་ཀྱི་དབྱིབས་ཀྱི་གནས་ལ་ཕྱིའི་དཀྱིལ་འཁོར་གྱི་ཚོགས་བྲི་བར་བྱའོ། །སྒོ་རྣམས་ཀུན་དུ་འཇུག་པར་ནི། །རང་གི་ཕྱག་རྒྱར་རབ་ཏུ་གནས། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་དུ་འཇུག་པ་ཇི་ལྟར་བཤད་པ་བཞིན་དུ། རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་ནས་ཀླུའི་དཀྱིལ་འཁོར་གྱི་བར་དུ་འཇུག་པར་བྱའོ། །དེ་བས་ན་འདིར་སྒོ་ཐམས་ཅད་དུ་འཇུག་པས་ན་རང་གི་ཕྱག་རྒྱ་དང་རྗེས་སུ་འབྲེལ་པ་ཡིན་པས་རང་གི་ཕྱག་རྒྱ་ལ་རབ་ཏུ་སྟེ་ཤིན་ཏུ་གནས་པར་འགྱུར་བ་ཡིན་པས་ན་རང་གི་ཕྱག་རྒྱ་དང་རྗེས་སུ་འབྲེལ་ཏོ་ཞེས་བྱ་བའི་ཐ་ཚིག་གོ །རྡོ་རྗེ་ཤུགས་ཀྱིས་འཇུག་བྱ་ཞིང༌། །དཀྱིལ་འཁོར་དམ་པ་ལྔས་སྡུད་དོ། །ཞེས་བྱ་བ་ནི་རང་གི་དཀྱིལ་འཁོར་གྱི་བདག་པོའི་སྦྱོར་པས་རྣལ་འབྱོར་ཆེན་པོ་བྱས་ལ་བཛྲ་བཛྲ་ཞེས་ཟློས་ཤིང་འཇུག་པའི་གླུ་ཡང་ལེན་ཅིང་འཇུག་པར་བྱའོ་ཞེས་བྱ་བའི་ཐ་ཚིག་གོ །རྡོ་རྗེ་སེམས་དཔའ་དང༌། རྣམ་པར་སྣང་མཛད་དང༌། རབ་ཏུ་དགའ་བའི་རྡོ་རྗེ་ཁྲོ་བོ་དང༌། རྡོ་རྗེ་འཇིག་རྟེན་དབང་ཕྱུག་དང། འཕགས་པ་ནམ་མཁའི་སྙིང་པོའི་དཀྱིལ་འཁོར་ཏེ། དཀྱིལ་འཁོར་ལྔ་བདག་ཉིད་ལ་རབ་ཏུ་སྡུད་ཅིང་འཇུག་པས་དཀྱིལ་འཁོར་དམ་པ་ལྔ་སྡུད་དོ་ཞེས་བྱ་བ་བསྡུས་པའི་དཀྱིལ་འཁོར་རོ། །དཀྱིལ་འཁོར་གྱི་ཆོ་ག་རྒྱས་པ་ཐམས་ཅད་ཀྱང་དེ་བཞིན་ནོ་ཞེས་བྱ་བ་ནི་བསྡུས་པའི་དཀྱིལ་འཁོར་དུ་གཏོགས་པའི་རྡོ་རྗེ་སེམས་དཔའི་དཀྱིལ་འཁོར་རྣམས་སོ། །རང་གི་ཕྱག་རྒྱས་འཇུག་པས་སོ་སོའི་ཁྱད་པར་གྱི་འཇུག་པ་གསུངས་པ་དེ་བཞིན་དུ་དེ་དག་ལས་བཤད་པའི་སོ་སོའི་སྒྲུབ་པ་དང་བསྒྲུབ་པར་བྱ་བའི་ཁྱད་པར་ཡང་དེ་ལྟར་བྱ་བ་
ཡིན་པར་ཤེས་པར་བྱའོ། །འདི་སྐད་སྟོན་ཏེ་རྡོ་རྗེ་སེམས་དཔའི་སྦྱོར་བས་རྣམ་འབྱོར་ཆེན་པོ་བྱས་ལ། རང་གི་སྙིང་གར་ཇི་སྲིད་དཀྱིལ་འཁོར་འདི་མངོན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་དང་པོའི་སྦྱོར་བ་བསྒོམས་ནས། བསྡུས་པའི་དཀྱིལ་འཁོར་སྤྲུལ་པ་ཇི་ལྟ་བ་བཞིན་དུ་བྱས་ལ་ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་ནས་དང་པོའི་རྡོ་རྗེས་དཀྱིལ་འཁོར་འདི་ནམ་མཁའ་ལ་བཞག་ལ། དེ་ཉིད་ལ་བདག་ཉིད་ཀྱིས་བྱིན་གྱིས་བརླབས་ལ་བསྡུས་པའི་དཀྱིལ་འཁོར་གྱི་སྙིང་པོ་ཟློས་བཞིན་དུ་བསྐོར་བར་བྱའོ། །དེ་ནས་དུམ་བུ་གཉིས་པའི་རྩ་བའི་རྒྱུད་ལས་གསུངས་པའི་དང་པོའི་དཀྱིལ་འཁོར་ལྟར་དཀྱིལ་འཁོར་ཐིག་གདབ་པར་བྱའོ། །དཀྱིལ་འཁོར་དབུས་མའི་དབུས་ཀྱི་རེ་མིག་གི་ཆར་རྡོ་རྗེ་སེམས་དཔའི་དཀྱིལ་འཁོར་ཆེན་པོར་རྡོ་རྗེ་ཡིད་ལས་བྱུང་བའི་གནས་སུ་རྣམ་པར་སྣང་མཛད་ཀྱི་དཀྱིལ་འཁོར། ཀཱི་ལི་ཀི་ལའི་གནས་སུ་རབ་ཏུ་དགའ་བའི་རྡོ་རྗེ་ཁྲོ་བོའི་དཀྱིལ་འཁོར། རྡོ་རྗེ་དྲན་པའི་གནས་སུ་རྡོ་རྗེ་འཇིག་རྟེན་དབང་ཕྱུག་གི་དཀྱིལ་འཁོར། རྡོ་རྗེ་སྙིང་པོའི་གནས་སུ་ནམ་མཁའི་སྙིང་པོའི་དཀྱིལ་འཁོར། ཕྱིའི་དཀྱིལ་འཁོར་གྱི་སྣམ་བུ་ལ་མེའི་མཚམས་ཀྱི་ཆར་མིང་བོ་གསུམ་གྱི་དཀྱིལ་འཁོར། བདེན་བྲལ་གྱི་མཚམས་སུ་སྲིང་མོ་བཞིའི་དཀྱིལ་འཁོར། རླུང་གི་མཚམས་སུ་ལྷ་མ་ཡིན་གྱི་དཀྱིལ་འཁོར། དབང་ལྡན་གྱི་མཚམས་སུ་ཀླུའི་དཀྱིལ་འཁོར་ཐིག་གདབ་པར་བྱའོ། །དེ་ནས་ཇི་ལྟ་བ་བཞིན་དུ་བྲིས་ལ་རྡོ་རྗེ་སེམས་དཔའི་དཀྱིལ་འཁོར་དུ་རྡོ་རྗེ་སེམས་དཔའི་དཀྱིལ་འཁོར་དང་བཅས་པ་བྲི་བར་བྱའོ། །དེ་བཞིན་དུ་ཀླུའི་དཀྱིལ་འཁོར་དང་ཀླུའི་བདག་པོ་འཁོར་དང་བཅས་པའི་བར་དུ་བྲི་བར་བྱའོ། །གཞིའི་དཀྱིལ་འཁོར་གྱི་ནང་དུ་དཀྱིལ་འཁོར་གྱི་མཚམས་བཞིར་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་རྡོ་རྗེ་སྦྲང་རྩི་མ་ལ་སོགས་པ་བཞི་བྲི་བར་བྱའོ། །དེ་ཉིད་ཀྱི་ཕྱི་དང་ནང་གི་སྒོ་རྣམས་སུ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་
པའི་སྒོ་སྲུང་བཞི་བྲི་བར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་སེམས་དཔའི་སྦྱོར་བས་རྣལ་འབྱོར་ཆེན་པོ་བྱས་ལ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་འཇུག་པའི་ཆོ་གས་གཞིའི་དཀྱིལ་འཁོར་དུ་འཇུག་པར་བྱའོ། །དེ་ནས་སློབ་དཔོན་གྱི་ལས་ཐམས་ཅད་བྱས་ལ་དཀྱིལ་འཁོར་དབུས་མའི་དབུས་ཀྱི་རེའུ་ཆར་གནས་པའི་རྡོ་རྗེ་སེམས་དཔའི་དཀྱིལ་འཁོར་དུ་རང་གི་ཆོ་གས་འཇུག་པར་བྱའོ། །དེ་བཞིན་དུ་ཀླུའི་དཀྱིལ་འཁོར་གྱི་བར་ལ་རང་གི་ཆོ་གས་འཇུག་པར་བྱའོ། །དེ་ནས་སློབ་དཔོན་གྱི་ལས་གྱི་ཆོ་ག་ཐམས་ཅད་བྱའོ། །སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།། །།དེ་ནས་རང་གི་འཇུག་པ་ལ་སོགས་པའི་ཆོ་ག་བཞིན་དུ། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་བཤད་ནས། ད་ནི་དམ་ཚིག་དང་དབང་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་བསྟན་པའི་ཕྱིར། དཀྱིལ་འཁོར་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གང་དང་གང་དུ་དངོས་གྲུབ་གང་དང་གང་ལས་གང་དང་གང་བཤད་པའི་དངོས་གྲུབ་དང༌། ལས་དེ་དག་ཐམས་ཅད་བསླབ་པར་བྱའོ་ཞེས་བྱ་བའི་ཐ་ཚིག་གོ །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ། དུམ་བུ་གཉིས་པ་རྩ་བའི་རྒྱུད་ལས་བསྡུས་པའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་སེམས་ཅན་ཐམས་ཅད་རྗེས་སུ་འཛིན་པར་བྱེད་པས་བསྡུས་པའི་དཀྱིལ་འཁོར་གསུངས་ནས་ད་ནི་མིང་པོ་གསུམ་གྱིས་འདུལ་བའི་འགྲོ་བ་རྣམས་ཀྱི་དོན་དུ་མིང་པོ་གསུམ་གྱི་དཀྱིལ་འཁོར་གསུངས་པ་ནི། དེ་ནས་ཞེས་བྱ་བ་ལ་སོགས་པས་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དང་པོ་སྦྱོར་བའི་རྗེས་ཐོགས་ཉིད་ལ་འདིར་དང་པོ་སྦྱོར་བ་ནི་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་ཡིན་ནོ། །ལྷ་ལ་
སོགས་པ་གང་ཡིན་པ་དེ་ནི་ལྷ་ལ་སོགས་པ་སྟེ། ལྷག་མ་ཁྲོ་བོའི་ཚོགས་དང་ཕོ་ཉ་དང་བྲན་ཆུང་མ་དང་བཅས་པའོ། །དམ་ཚིག་སེམས་དཔའ་ཐམས་ཅད་ཅེས་བྱ་བ་ནི་བཤད་མ་ཐག་པའི་ལྷ་ལ་སོགས་པ་སྟེ། དམ་ཚིག་སེམས་དཔའ་ཡང་ཡིན་ལ་ཐམས་ཅད་ཀྱང་ཡིན་པས་དམ་ཚིག་སེམས་དཔའ་ཐམས་ཅད་དེ། དེ་ལྟར་གྲགས་པའི་ལྷ་ལ་སོགས་པའི་གཟུགས་ནི་ཀུན་རྫོབ་ཀྱི་སེམས་དཔའ་ཡིན་གྱི། བྱང་ཆུབ་ཀྱི་སེམས་ལ་སོགས་པའི་དོན་དམ་པའི་བདེ་བའི་རང་བཞིན་མ་ཡིན་ནོ་ཞེས་བྱ་བའི་དོན་ཏོ། །འདིས་ནི་འཇིག་རྟེན་པའི་ཤེས་པའི་རྒྱུ་མཐུན་པ་ལས་བྱུང་བའི་དམ་ཚིག་གི་སེམས་དཔའ་བཤད་པ་ཡིན་ལ་འཇིག་རྟེན་ལས་འདས་པ་ཡེ་ཤེས་ཀྱི་རྒྱུ་མཐུན་པ་ལས་བྱུང་བ་ནི་སེམས་དཔའ་ཆེན་པོ་ཞེས་བཤད་པ་ཡིན་ནོ། །བཅོམ་ལྡན་འདས་ལས་རང་རང་གི་རྗེས་སུ་གནང་བ་མནོས་ཏེ་ཞེས་བྱ་བ་ནི་བཅོམ་ལྡན་འདས་རྡོ་རྗེ་འཆང་ཆེན་པོ་ལས་སྙིང་པོ་སྨྲ་བའི་བཀའ་མནོས་ནས་རང་རང་གི་སྙིང་པོ་ཕུལ་ལོ། །འདི་ཞེས་བྱ་བ་ནི་བྲོ་ལ་གནས་པའོ། །སེམས་ཅན་ཀུན་ལ་བདེ་སླད་དུ། །ཞེས་བྱ་བ་ནི། འཇིག་རྟེན་པའི་ལྷ་ལ་ལྷག་པར་མོས་པའི་སེམས་ཅན་རྣམས་ལ་འཇིག་རྟེན་པའི་ལྷའི་དཀྱིལ་འཁོར་བསྐྱེད་པས་སངས་རྒྱས་ཉིད་ཐོབ་པའི་ཕྱིར་ཞེས་བྱ་བ། ཕྱིར་མི་ལྡོག་པའི་ས་བོན་བསྐྱེད་པ་ནི་འདིར་བདེ་བ་ཡིན་ཏེ་དེའི་དོན་དུ་བཅོམ་ལྡན་འདས་རྡོ་རྗེ་འཆང་ཆེན་པོའི་ཞབས་ལ་ཕྱག་བྱའོ་ཞེས་བྱ་བ་ནི། བཅོམ་ལྡན་འདས་རྡོ་རྗེ་འཆང་ཆེན་པོ་མཉེས་པར་བྱ་བའི་ཕྱིར་བདག་ཉིད་བཅོམ་ལྡན་འདས་ཀྱིས་ཅི་ཞིག་བགྱི་ཞེས་བྱ་བའི་ཕྱིར་རང་གི་གསང་བའི་སྙིང་པོ་སྟེ། རང་གི་ཤེས་པའི་ངེས་པ་སྟོན་པར་བྱེད་པའི་སྒྲའི་ཚུལ་ཕུལ་བ་ནི་བསྟབས་པའོ། །དེ་ནས་ཞེས་བྱ་བའི་སྒྲ་ནི་གནས་སྐབས་ཏེ་རང་གི་གསང་བའི་སྙིང་པོ་འདི་ཕུལ་བའི་གནས་སྐབས་སུ་ཞེས་བྱ་བའི་ཐ་ཚིག་གོ །འཇིག་རྟེན་གསུམ་པོས་གསོལ་བ་ནི་སྨྲས་པ་སྟེ་ཨོཾ་ཧཱུཾ་ཧྲི་ཞེས་བྱ་བས་སོ། །དེ་ལྟར་ན་ལྷ་ལ་སོགས་པ་ཞེས་བྱ་བ་ནས་བརྩམས་ཏེ་ཨོཾ་བྷུ་གྲི་ཞེས་བྱ་བའི་བར་གྱི་བཤད་པས་འཇིག་རྟེན་གསུམ་གྱི་ཏིང་ངེ་འཛིན་གཉིས་པ་གསུང་
པ་ཡིན་ནོ། །དེ་ནས་བསྡུ་བའི་སྔོན་དུ་འགྲོ་བ་ནི་གསུམ་པ་ཡིན་པར་བྱའོ། །དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པ་ནི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟེ་དམ་ཚིག་གསུམ་གྱི་རྗེས་ཐོགས་ཉིད་ལའོ། །དཀྱིལ་འཁོར་ཞེས་བྱ་བ་ནི་དཀྱིལ་འཁོར་བཤད་པའོ་ཞེས་བྱ་བར་ཤུགས་ཀྱིས་སྦྱོར་རོ། །ཟུར་བཞི་པ་ལ་སོགས་པ་ནི་བཤད་ཟིན་ཏོ། །གཞུའི་སེ་རལ་ཁ་ཞེས་བྱ་བ་ནི་གཞུའི་མཆོད་ཕྱིར་ཐོགས་ཡོད་པའོ། །མདའ་དང་ཙ་ཤ་ཀ་ཞེས་བྱ་བ་ནི་ལག་པ་གཡས་ན་མདའ་ཐོགས་པ། གཡོན་ན་ཁམ་ཕོར་ཙ་ཤ་ཀ་ཞེས་བྱ་བ་ཐོགས་པའོ། །འཇུག་པ་ནི་མདུང་རྩེ་གསུམ་པའི་ཕྱག་རྒྱས་སོ་ཞེས་བྱ་བ་ནི། མིང་པོ་གསུམ་གྱི་དཀྱིལ་འཁོར་འདིར་སློབ་དཔོན་གྱིས་འཇུག་པ་ནི་མདུང་རྩེ་གསུམ་པས་མཚན་པའི་ཕྱག་རྒྱ་འོག་ནས་བཤད་པའི་མཚན་ཉིད་ཅན་གྱིས་འཇུག་པར་བྱའོ། །དེའི་མཚན་ཉིད་ནི་འདེ་ཡིན་ཏེ་མཛུབ་མོ་དང་གུང་མོ་དང་སྲིན་ལག་གཞིབས་ཏེ་རྩེ་གསུམ་པ་བྱས་ལ་མཐེ་བོ་དང་མཐེའུ་ཆུང་གཉིས་གདུ་བུར་སྦྲེལ་ལ་ཤེས་པར་བྱའོ། །པུས་མོའི་ལྷ་ང་ཞེས་པ་ནི་མིང་པོ་གསུམ་གྱི་དཀྱིལ་འཁོར་དུ་པུས་མོའི་ལྷ་སྔ་ས་ལ་བཙུགས་ཏེ་འཇུག་པར་བྱའོ་ཞེས་བྱ་བའི་ཐ་ཚིག་གོ །ཞུགས་ནས་དམ་ཚིག་བཅིངས་ནས་ནི། །ཡང་དག་འགུགས་པ་ཉིད་དུ་བྱ། །ཞེས་བྱ་བ་ནི། ཇི་སྐད་བཤད་པའི་འཇུག་པའི་ཕྱག་རྒྱས་ཞུགས་ལ། དུམ་བུ་དང་པོ་ལས་བཤད་པའི་རང་གི་ཆོ་གས་རང་གི་ཆོ་ག་ཐམས་ཅད་རྫོགས་པར་བྱས་ལ། བཤད་མ་ཐག་པའི་མདུད་རྩེ་གསུམ་པས་མཚན་པའི་ཕྱག་རྒྱ་ལས་གཡས་པའི་མཛུབ་མོ་ལྕགས་ཀྱུར་བྱས་པ་དང༌། འགུགས་པའི་སྙིང་པོ་ལན་ཉི་ཤུ་རྩ་གཅིག་བཟླས་ལ་མིང་པོ་གསུམ་འཁོར་དང་བཅས་པ་དགུག་པར་བྱའོ། །དེ་ལ་འགུགས་པའི་སྙིང་པོ་ནི་འདི་ཡིན་ཏེ། ཨོཾ་བྷུར་བྷུ་ཝ་སྭཿ་སློབ་དཔོན་གྱིས་འཇུག་པའི་སློབ་མ་ཐམས་ཅད་ལ་ཞུགས་པར་བྱའོ་ཞེས་བྱ་བ་ནི།
དེ་ལྟར་མིང་པོ་གསུམ་གྱི་དཀྱིལ་འཁོར་དང་བཅས་པ་དྲངས་ནས་དམ་ཚིག་གི་ཕྱག་རྒྱ་བསྒྲུབ་བར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ་མཆོད་པ་རྣམ་པ་ལྔ་དང༌། ཕྱག་རྒྱའི་མཆོད་པ་ལ་སོགས་པས་ལེགས་པར་མཆོད་ལ་སློབ་མ་གཞུག་པའི་ཕྱིར། གནང་བ་ནོས་ནས་རང་གི་འཇུག་པའི་ཆོ་གས་སློབ་མ་ཐམས་ཅད་གཞུག་པར་བྱའོ། །དེ་ཁོ་ན་ཉིད་དང་གསང་བ་ཡང་བརྗོད་པར་བྱ་སྟེ། རྡུལ་དང་མུན་པ་སྙིང་སྟོབས་ཉིད། །ཚངས་པ་ཁྱབ་འཇུག་དབང་ཕྱུག་ཆེ། །མིང་པོ་གསུམ་པོ་འདི་དག་ནི། །འདི་ཉིད་དེ་ཡི་གསང་བར་བརྗོད། །ཅི་ཞིག་བྱས་ནས་དེ་ཁོ་ན་ཉིད་གསང་བརྗོད་པར་བྱ་ཞེ་ན། དམ་ཚིག་མཆོག་ནི་བྱིན་ནས་ནི། །ཞེས་བྱ་བ་སྨོས་ཏེ། གལ་ཏེ་མ་བརྟགས་ལ་སྨྲས་སམ། །ཞེས་བྱ་བ་ལ་སོགས་པའི་དམ་ཚིག་བྱིན་ལ་དེ་ཁོ་ན་ཉིད་དང༌། གསང་བ་འདི་བརྗོད་པར་བྱའོ། །གལ་ཏེ་མ་བརྟགས་ལ་སྨྲས་ན། །ཞེས་བྱ་བ་ལ་སོགས་པ་དཀྱིལ་འཁོར་དུ་མ་ཞུགས་པ་ནི་མ་བརྟགས་པ་སྟེ་དཀྱིལ་འཁོར་དུ་མ་ཞུགས་ཤིང་མ་བརྟགས་པ་དེ་ལ། གལ་ཏེ་མིང་པོ་གསུམ་གྱི་དཀྱིལ་འཁོར་འདི་སྨྲས་པར་གྱུར་ན། དེའི་ཚེ་ཁྱེད་ཀྱི་སྙིང་མདུང་རྩེ་གསུམ་གྱིས་བཅོམ་ཞིང་གསོད་པར་འགྱུར་རོ། །འོན་ཏེ་ཇི་སྐད་བཤད་པའི་ཆོས། །འདིར་ནི་ཀུན་དུ་མ་སྤྱད་ན། །རྩེ་གསུམ་གྱིས་ནི་ཁྱོད་སྙིང་འཇོམས། །ཞེས་བྱ་བ་ནི་དཀྱིལ་འཁོར་དུ་མ་ཞུགས་པ་ལ་སྨྲ་བས་རྩེ་གསུམ་གྱིས་ཁྱོད་ཀྱི་སྙིང་འཇོམས་པར་མ་ཟད་ཀྱི། ཇི་སྐད་དུ་བཤད་པའི་ཆོས་མ་སྤྱད་ན་ཡང་ཁྱེད་ཀྱི་སྙིང་མདུང་རྩེ་གསུམ་ཀྱིས་འཇོམས་པར་འགྱུར་རོ་ཞེས་བྱ་བ་སྟེ་གལ་ཏེ་སྙིང་སྟོབས་དང་རྡུལ་དང་མུན་བ་ཁྱེད་སྒོམ་པར་མི་བྱེད་ན་དེའི་ཚེ་ཡང་ཁྱེད་ཀྱི་སྙིང་མདུང་རྩེ་གསུམ་གྱིས་གསོད་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ནི་སྙིང་སྟོབས་ཞེས་བྱ་བ་ལ་སོགས་པས་ཆོས་དེ་རྣམ་པར་འགྲེལ་པ་ཡིན་ཏེ། དེ་ལ་སྙིང་སྟོབས་ནི་དབང་ཕྱུག་ཆེན་པོ་སྟེ། སེམས་ཀྱི་རང་བཞིན་དྲི་མ་ཐམས་ཅད་དང་བྲལ་བ་དང་ཞིང་འོད་གསལ་བའོ། །རྡུལ་ནི་ཚངས་
པ་སྟེ་འཇིག་རྟེན་གསུམ་བྱེད་པའོ། །མུན་པ་ནི་ཁྱབ་འཇུག་སྟེ། འཇིག་རྟེན་གསུམ་སྟོན་པར་བྱེད་པ་སྟེ་སེམས་ཅན་ཐམས་ཅད་ཀྱི་རྒྱུད་ལ་རྗེས་སུ་ཞུགས་པའི་འདོད་ཆགས་དང་ཞེ་སྡང་དང་གཏི་མུག་ནི་དེ་དག་ཡིན་པས་སེམས་ཅན་ཐམས་ཅད་ཚངས་པ་དང་ཁྱབ་འཇུག་དང་དབང་ཕྱུག་ཆེན་པོར་བརྟག་གོ་ཞེས་བྱ་བའི་ཐ་ཚིག་གོ །འདི་དག་ཀྱང་དངོས་པོ་ལ་མངོན་པར་ཞེན་པས་ནི་ངན་སོང་གསུམ་གྱི་རྒྱུར་འགྱུར་ལ་རང་བཞིན་གྱིས་ཡང་དག་པར་བསྒོམས་ཏེ་བསྟེན་པས་ནི་བདུད་རྩིའི་རྒྱུར་འགྱུར་བ་ཡིན་ནོ། །དེ་ཡང༌། འདོད་ཆགས་ཞེ་སྡང་གཏི་མུག་རྣམས། །ཐམས་ཅད་ལ་ནི་རྣམ་པར་གནས། །མི་བཟད་པར་ནི་བསྟེན་གྱུར་ན། །དུག་ཉིད་དུ་ནི་འགྱུར་བ་ཡིན། །བདུད་རྩིའི་ཚུལ་དུ་བསྟེན་གྱུར་ན། །བདུད་རྩི་ཉིད་དུ་འགྱུར་བ་ཡིན། །འདོད་ཆགས་ཚངས་པ་བྱིན་པའི་མཆོག །ཞེ་སྡང་དྲག་པོའི་ཏིང་འཛིན་ཉིད། །གཏི་མུག་ཁྱབ་འཇུག་བསྟེན་བྱས་པ། །འཇིག་རྟེན་གསུམ་ལེགས་བྱིན་གྱིས་བརླབས། །ཞེས་བཤད་པ་ཡིན་ནོ། །མིང་པོ་གསུམ་པོ་འདི་དག་སྟེ། །ཞེས་བྱ་བ་ནི་ཚངས་པ་དང༌། ཁྱབ་འཇུག་དང༌། དབང་ཕྱུག་ཆེན་པོ་གང་ཡིན་པ་དེ་ཉིད་ནི་མིང་པོ་གསུམ་པོ་འདི་ཡིན་ཏེ། རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པའི་ངོ་བོ་ཡང་གཞན་མ་ཡིན་ནོ། །དེ་ལ་རྒྱལ་བར་བྱེད་པ་ནི་སྟོབས་བཟངས་ཀྱི་གཟུགས་འཛིན་པ་ནི་དབང་ཕྱུག་ཆེན་པོའོ། །སྦྲང་རྩིར་བྱེད་པ་ནི་འདོད་པའི་ལྷའི་གཟུགས་འཛིན་པའི་ཚངས་པའོ། །དོན་ཐམས་ཅད་གྲུབ་པ་ནི་དཔྱིད་ཀྱི་གཟུགས་འཛིན་པ་ནི་ཁྱབ་འཇུག་གོ །ནམ་ཡང་བརྙས་པར་མི་བྱའོ་ཞེས་བྱ་བ་ནི། འཇིག་རྟེན་གསུམ་དུ་ལྷག་པར་མོས་པས་དེའི་གཟུགས་སུ་བསྒོམས་ནས་སྐྱེས་བུ་དོན་བཞི་པོ་བསྒྲུབ་པར་འདོད་པས་མིང་པོ་གསུམ་པོ་དེ་དག་གཟུགས་བརྙན་ལྟ་བུར་བསྒོམ་པར་བྱའོ། །འདིས་ཅི་ཞིག་བྱ་ཞེ་ན། ནམ་ཡང་བརྙས་པར་མི་བྱ་ཞིང་འདི་ལ་དངོས་པོ་ལ་མངོན་པར་ཞེན་པ་ཡང་མི་བྱའོ། །གང་ཞིག་འདི་དག་ལ་ཞེས་བྱ་བ་ལ་སོགས་པ་ལས་འདི་ལ་དད་པ་གང་ལ་ལ་ཞིག་ཚུལ་འདི་གཉིས་ཀྱིས་བརྙས་པར་མི་བྱེད་པ་དག་
དཀྱིལ་འཁོར་བྲིས་ནས་ཞུགས་ལ་ཡང་དང་ཡང་དུ་མཆོད་པར་བྱེད་པ་དེ་ཐམས་ཅད་ཀྱི་ཆོས་དང་ནོར་བུ་འདོད་པ་དང་ཐར་པའི་རང་བཞིན་ལ་ཐམས་ཅད་གྲུབ་པ་ཐབ་པར་འགྱུར་རོ། །ཕྱག་རྒྱ་དག་ཀྱང་བསྟན་པར་བྱ། །ཞེས་བྱ་བ་ནི་ཕྱག་རྒྱ་ཆེན་པོ་དང༌། དམ་ཚིག་དང་ཆོས་དང་ལས་ཀྱི་ཕྱག་རྒྱ་རྣམས་སློབ་མ་རྣམས་ལ་བསྟན་ཞིང་བསླབས་ནས་ཞེས་བྱ་བའི་ཐ་ཚིག་གོ །དེ་ཡིས་གར་གྱི་མཆོད་པར་བྱ། །ཞེས་བྱ་བ་ནི་མིང་པོ་གསུམ་འཁོར་དང་བཅས་པའི་ལས་ཀྱི་ཕྱག་རྒྱས་གར་གྱི་མཆོད་པ་བྱ་བའི་ཚུལ་གྱིས་གར་བྱ་བའི་མཆོད་པས་སློབ་དཔོན་གྱིས་དཀྱིལ་འཁོར་འདིར་མཆོད་པར་བྱའོ། །རྟག་ཏུ་ཞེས་བྱ་བ་ནི་ཉིན་རེ་ཞིང་རྒྱུན་དུའོ། །འདོད་པའི་ཡོན་ཏན་ལྔས་ཞེས་བྱ་བ་ནི། །གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་དང༌། ནོར་དང༌། ཐར་པ་དང་རྗེས་སུ་མཐུན་པར་བྱ་བའི་ངན་སོང་དུ་འགྲོ་བའི་རྒྱུར་གྱུར་པས་ནི་མ་ཡིན་ནོ། །འདིའི་ཆོ་ག་རྒྱས་པར་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུར་བཤད་ཟིན་པས་དེ་ཉིད་ལས་ཤེས་པར་བྱའོ། །འདིར་ཁྱད་པར་ནི་འདི་ཡིན་པར་ཤེས་པར་བྱ་སྟེ། བཛྲ་བཛྲ་ཨོཾ་བྷུ་ཧྲི་ཞེས་བྱ་བའི་ཡི་གེ་གསུམ་གྱི་སྙིང་པོས་འཇུག་པར་བྱའོ། །དེ་ལ་བཛྲ་སྭ་བྱ་བའི་ཡི་གེ་གཅིག་པའི་སྙིང་པོ་དང་བཅས་པར་བྱའོ། །དུམ་བུ་གཉིས་པ་རྩ་བའི་རྒྱུད་ལས་མིང་པོ་གསུམ་གྱི་རྟོག་པ་བཤད་པ་རྫོགས་སོ།། །།དེ་ལྟར་མིང་པོ་གསུམ་གྱི་དཀྱིལ་འཁོར་བཤད་ནས། ད་ནི་སྲིང་མོ་བཞིས་འདུལ་བ་ལས་བརྩམས་ཏེ། དེ་ནས་ཞེས་བྱ་བ་ནས་བརྩམས་ནས་སྲིང་མོ་བཞིའི་རྟོག་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟེ་དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བ་ནི་མིང་པོ་གསུམ་གྱིས་སྐབས་སུ་བཤད་པ་ཉི་ཡིན་ནོ། །གསང་བའི་ལྷ་མོ་ཞེས་བྱ་བ་ནི་འདི་དག་ནི་མིང་པོ་གསུམ་གྱིས་སྤྲུལ་པ་ཡིན་གྱི། འདི་དག་རྒྱུད་གཞན་ལས་སྤྲུལ་པ་ནི་མ་ཡིན་ནོ། །དེ་བས་ན་འདིས་ནི་དེ་རྣམས་ཀྱིས་རང་བཞིན་གྱིས་འོད་གསལ་བ་ལ་བརྩོན་པའི་རང་བཞིན་ཅན་གྱི་ལས་ཀྱི་གསང་བའི་རང་བཞིན་གསལ་བར་བྱེད་པ་དང༌།
དེ་ཐོབ་པར་བྱེད་པ་ཡིན་པས། དེའི་ཕྱིར་དེ་དག་ནི་གསང་བ་འང་ཡིན་ལ་ལྷ་མོ་ཡང་ཡིན་པས། གསང་བའི་ལྷ་མོ་སྟེ། དགའ་བ་མོ་ལ་སོགས་པ་བཞིའོ། །རང་གི་ཕྱག་རྒྱ་ཕུལ་ལོ་ཞེས་བྱ་བ་ནི་རང་གི་དཀྱིལ་འཁོར་སྒྲུབ་པར་བྱེད་པའི་རིག་པ་ནི་རང་གི་ཕྱག་རྒྱ་སྟེ་དེ་ཕུལ་ཞིང་བསྟབས་པའོ། །དེ་ནི་ཧྲི་ཧཱུཾ་ཤྲི་བྷྱོ་ཞེས་བྱ་བ་ཡིན་ནོ། །འདི་ཡན་ཆད་ཀྱི་སྲིང་མོ་བཞིའི་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་དེ་བཞིན་དུ་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །དེ་ལྟར་དམ་ཚིག་གསུམ་བཤད་ནས། དམ་ཚིག་དང༌། དབང་བསྐུར་བ་ཐོབ་པ་རྣམས་ཀྱིས་འདིར་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པར་བྱ་བའི་ཕྱིར། །དེ་ནས་དཀྱིལ་འཁོར་ཞེས་བྱ་བ་ལ་སོགས་པས། སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་དཀྱིལ་འཁོར་ཞེས་བྱ་བ་ནི་གོ་སླའོ། །དེ་ནས་དང་པོར་དཀྱིལ་འཁོར་དུ། །དེ་བཞིན་ཀུན་ནས་འཇུག་པར་བྱ། །ཞེས་བྱ་བ་ནི་དེ་ལྟར་དཀྱིལ་འཁོར་བྲིས་ནས་དེའི་རྗེས་ཐོགས་ཉིད་ལ་འཇུག་པར་བྱ་སྟེ། དང་པོ་ཁོ་ནར་སྤྱན་དྲང་བ་བྱས་ནས་དཀྱིལ་འཁོར་གྱི་སྒོ་བཞི་ནས། ཇི་ལྟར་ཤར་ནས་བྱ་བ་དེ་བཞིན་དུ་ལྷོ་དང་ནུབ་དང་བྱང་ནས་ཀུན་དུ་འཇུག་པར་བྱའོ་ཞེས་བྱ་བ་ནི། དེ་བཞིན་ཞེས་བྱ་བའི་སྒྲས་སྟོན་ཏོ། །ཕྱག་རྒྱ་གང་གིས་འཇུག་པར་བྱ་ཞེ་ན། སྲིང་མོ་བཞིའི་ཕྱག་རྒྱ་བཞིས། །ཞེས་བྱ་བ་སྨོས་ཏེ་སྲིང་མོ་བཞིའི་རང་གི་ཕྱག་རྒྱ་གང་ཡིན་པ་དེས་འཇུག་པར་བྱའོ། །དེ་ཡང་ཇི་ལྟར་ཞེ་ན་ཇི་ལྟ་བའི་གོ་རིམས་ཞེས་བྱ་བ་སྨོས་ཏེ་ཤར་གྱི་དཀྱིལ་འཁོར་ནས་ནི་དགའ་བ་མོའི་སྦྱོར་བས་སོ། །ལྷོ་ནས་ནི་སྲིང་མོའི་སྦྱོར་བས་སོ། །ནུབ་ནས་ནི་ཕག་མོའི་སྦྱོར་བས་སོ། །བྱང་གི་དཀྱིལ་འཁོར་ནས་ནི་གྲུབ་པ་མོའོ་སྦྱོར་བས་འཇུག་པར་བྱ་ཞིང་ཐམས་ཅད་དུ་བཛྲ་བཛྲ་ཧྲི་ཧཱུཾ་ཤྲི་ཧཱུཾ་བྷྱོ་ཞེས་ཟློས་ཤིང་འཇུག་པར་བྱ་སྟེ། འདི་ནི་གོ་རིམས་ཞེས་བྱ་བའི་སྒྲའི་དོན་ཡིན་ནོ། །ཞུགས་ནས་བདུག་པ་ལ་སོགས་ཀྱིས། །ཆོ་ག་བཞིན་དུ་དེ་བཞིན་མཆོད། །ཅེས་བྱ་བ་ལ་སོགས་པ་ལ། དེ་ལྟར་ཞུགས་ནས་རང་གི་
ཆོ་ག་ཐམས་ཅད་སྔ་མའི་རྗེས་སུ་འབྲང་བར་བྱས་ལ། མཆོད་པ་རྣམ་པ་ལྔས་དཀྱིལ་འཁོར་ཇི་ལྟ་བ་བཞིན་དུ་ལེགས་པར་མཆོད་དེ་སྤྱན་དྲང་བ་དང༌། དགུག་པ་དག་སློབ་དཔོན་དེས་བྱའོ། །གང་གིས་བྱ་ཞེ་ན། གསང་བའི་དེ་ཉིད་རབ་གྲུབ་པས། །ཨོཾ་ཞེས་བྱ་བ་ལ་སོགས་པའི་སྙིང་པོ་ནི་དེ་ཁོ་ན་ཉིད་གསང་བས་གཙོ་བོ་སྟེ། དེ་ཁོ་ན་ཉིད་དང༌། གསང་བ་ཉིད་དང༌། གསང་བ་གྲུབ་པ་དེ་སྤྱན་དྲང་པའི་ཕྱག་རྒྱ་དང་ལྡན་པས་ལྷ་མོ་རྣམས་ཡང་དག་པར་དགུག་པར་བྱའོ། །གུང་མོ་དང་སྲིན་ལག་རྡོ་རྗེ་བསྡམས་པ་བྱས་ལ། མཐེ་བོ་དེ་གུང་མོ་དང་མཐེའུ་ཆུང་དང་སྲིན་ལག་གི་སོར་མོ་བརྒྱད་རྩེ་སྤྲད་པ་ནི་སྲིང་མོ་བཞིའི་དམ་ཚིག་གི་ཕྱག་རྒྱ་སྟེ། འདི་ཉིད་ཀྱིས་སྤྱན་དྲང་བ་དང་འདི་ཉིད་ཀྱིས་དཀྱིལ་འཁོར་དུ་གཞུག་པར་བྱའོ། །དེ་ནས་ཐམས་ཅད་འབབ་པར་འགྱུར་རོ་ཞེས་བྱ་བ་ནི་དེ་ལྟར་སྤྱན་དྲང་བ་བྱས་ནས་ལྷག་པར་གནས་པར་བྱ་བའི་སློབ་མ་ཐམས་ཅད་ལ་འབབ་པར་འགྱུར་རོ། །ལྷ་མོ་རྣམས་སྤྱན་དྲངས་པའི་མཐུས་དེ་རྣམས་ལ་འབབ་པར་འགྱུར་རོ་ཞེས་བྱ་བའི་ཐ་ཚིག་གོ །བབས་ནས་གཞུག་པར་བྱའོ་ཞེས་བྱ་བ་ནི་ལྷ་མོའི་ཚོགས་རྣམས་སྤྱན་དྲངས་ནས་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ཏེ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་སློབ་མ་བཅུག་ན་རང་གི་འཇུག་པའི་སྦྱོར་བས་སློབ་དཔོན་འཇུག་པར་བྱ་སྟེ། གང་གི་ཕྱིར་དེ་བཞིན་ཞེས་བཤད་པའི་ཕྱིར་རོ། །དེ་ནས་ཕྱག་རྒྱ་བཅིངས་པ་བསླབས་ལ་གསང་བ་བརྗོད་པར་བྱའོ་ཞེས་བྱ་བ་ནི་ལྷ་མོ་རྣམས་ཀྱི་སྙིང་པོ་བྱིན་ནས་ཕྱག་རྒྱ་ཆེན་པོ་བཅིངས་པ་དང་ཆོས་དང་ལས་དང་དམ་ཚིག་གི་ཕྱག་རྒྱ་བཅིངས་པར་བསླབ་པར་བྱའོ། །དེ་ལྟར་བསླབས་ནས་དེ་རྣམས་ལ།། འདོད་ཆགས་ཞེ་སྡང་གཏི་མུག་དང༌། །ཟས་དང་སྐོམ་དང་རོ་དེ་བཞིན། །ཆོས་ཀྱིས་བསྟེན་ན་བདེ་བ་སྟེ། །ཆོས་མིན་པས་ནི་སྡུག་བསྔལ་བསྐྱེད། །ཅེས་བྱ་བའི་གསང་བ་བརྗོད་པར་བྱའོ། །ཇི་ལྟར་ཞེ་ན། མནས་བསྒགས་ནས་ནི་ཞེས་བྱ་བ་སྨོས་ཏེ་མནའ་ནི་འདི་ཡིན་པ་སྟེ།
སེམས་ཅན་དོན་ལ་གང་ཞུགས་པ། །ཞེས་བྱ་བ་ནས་བརྩམས་ཏེ། གལ་ཏེ་གསང་བ་མི་སྲུང་ན། །ཞེས་བྱ་བའི་བར་ཡིན་ནོ། །ད་ནི་འདོད་ཆགས་ཞེས་བྱ་བ་ལ་སོགས་པའི་གསང་བ་བརྗོད་པར་བྱ་བ་ཡིན་ནོ། །འདོད་ཆགས་ཞེ་སྡང་གཏི་མུག་དང༌། །ཞེས་བྱ་བ་ནི་བཤད་ཟིན་ཏོ།། དེ་བཞིན་ཟས་དང་སྐོམ་དང་རོ། །ཞེས་བྱ་བ་ལ་ཟས་ལ་སོགས་པའོ། །སྐོམ་ནི་བཏུང་བ་ལ་སོགས་པས་གཤེར་པའི་རྫས་སོ། །རོ་ནི་མངར་བ་དང༌། སྐྱུར་བ་དང༌། ལན་ཚྭ་དང༌། ཁ་བ་དང༌། ཚ་བ་དང༌། བསྐ་བའི་དབྱེ་བས་རྣམ་པ་དྲུག་གོ །དེ་བཞིན་ཞེས་བྱ་བ་ནི་རྣམ་པ་དེ་དང་འདྲ་བས་ཇི་ལྟར་འདོད་ཆགས་དང༌། ཞེ་སྡང་དང༌། གཏི་མུག་ཆོས་ཀྱིས་བསྟན་ན་ནི་བདེ་བར་འགྱུར་ལ་ཆོས་མ་ཡིན་པས་བསྟེན་ན་ནི་སྡུག་བསྔལ་བསྐྱེད་པ་དེ་བཞིན་དུ་ཟས་དང་སྐོམ་དང་རོ་ཡང་དེ་དང་འདྲའོ་ཞེས་སྟོན་པ་ཡིན་ནོ། །འདི་སྐད་སྟོན་པ་ཡིན་ཏེ། གང་ལ་ལ་ཞིག་རྒྱལ་བར་བྱེད་པ་ལ་སོགས་པའི་སྦྱོར་བས་སྲིང་མོ་བཞི་སྒྲུབ་པར་བྱེད་པ་དེས་བདག་ཉིད་གཟུགས་བརྙན་དང་འདྲ་བར་མིང་པོ་གསུམ་གྱི་གཟུགས་སུ་བསམས་ལ་ལྷ་མོ་དེ་རྣམས་ཀྱང་གཟུགས་བརྙན་དང་མཉས་པས་མདུན་དུ་བཞག་ལ་དེ་དང་ཡང་དག་པར་སྦྱོར་བར་བསྒོམ་པར་བྱ་ཞིང་དེ་ཟས་དང་སྐོམ་དང་རོ་རྣམས་གཟུགས་བརྙན་དང་འདྲ་བར་ལྷག་པར་མོས་པར་བསྟེན་པར་བྱ་སྟེ། དེ་ནི་འདི་རྣམས་ཀྱི་ཆོས་དང་ལས་དང་རིགས་པ་ཡིན་ནོ། །ཆོས་འདིས་བསྟེན་ན་འཇིག་རྟེན་དང་འཇིག་རྟེན་ལས་འདས་པའི་བདེ་བ་བསྐྱེད་པར་འགྱུར་རོ། །དངོས་པོ་ལ་མངོན་པར་ཞེན་པས་ནི་དམྱལ་བ་ལ་སོགས་པ་ངན་འགྲོའི་རྒྱུར་འགྱུར་རོ། །དེ་ལྟར་ཡང་ཇི་ལྟར་ཤེས་ཤེ་ན་གང་གི་ཕྱིར་སྲིང་མོ་རྣམས་ནི་འདོད་ཆགས་དང་ཞེ་སྡང་དང་གཏི་མུག་དམ་པོར་བྱེད་པའི་རྒྱུ་ཉིད་ཡིན་པར་བཅོམ་ལྡན་འདས་ཀྱིས་གསུངས་པ་ལ། འདི་སྐད་གཟུགས་བརྙན་དང་འདྲ་བར་བསྒོམས་པས་ནི་དེས་འདུལ་བ་རྣམས་ལ་མིང་པོ་གསུམ་གྱི་ཏིང་ངེ་འཛིན་རྫོགས་པར་བྱེད་པ་ཡིན་ནོ། །དེ་བས་ན་འདི་དག་ནི་དམ་པར་བྱེད་པའི་རྒྱུ་ཉིད་ཡིན་པས་ཐབས་དང་ལྡན་པས་བསྟེན་དགོས་སོ། །ཕྱག་རྒྱ་ཞེས་བྱ་བ་ལ་སོགས་པ་ལ་དེ་ལྟར་
སློབ་མའི་ཚོགས་ལ་བརྟེན་ནས། སློབ་དཔོན་སློབ་མའི་ཚོགས་དང་བཅས་པས་སྲིང་མོ་བཞིའི་ལས་ཀྱི་ཕྱག་རྒྱས་གར་གྱི་མཆོད་པ་བྱས་ཏེ། སྲིང་མོ་བཞི་པོ་དེ་དག་རྟག་པ་ཉིད་དུ་མཆོད་པར་བྱའོ། །ཇི་ལྟར་ཞེ་ན། ཅི་འདོད་པ་ཞེས་བྱ་བ་སྨོས་ཏེ་ཇི་ལྟར་མངོན་པར་འདོད་པས་ཞེས་བྱ་བའི་ཐ་ཚིག་གོ །དེ་ཇི་ལྟ་བུའི་ཚུལ་གྱིས་སྦྱིན་པར་བྱ་ཞེ་ན། ཅི་འདོད་པར་ནི་མཆོད་པར་བྱ། །ཞེས་སྨོས་པ་ཡིན་ནོ། །ཇི་སྙེད་པ་ཞེས་བྱ་བ་ལ་སོགས་པ་ལ་ཡུལ་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ཇི་སྙེད་པ་ལྷ་རྣམས་གྲུབ་པའི་རྒྱུན་གྱུར་པ་ལྷ་མོ་རྣམས་ལ་དབུལ་བར་བྱ་སྟེ། བདེ་བའི་ཕྱག་རྒྱ་གར་གྱི་མཆོད་པས་ཡང་དག་པར་མཆོད་དེ་ཞེས་བྱ་བ་ཡིན་ནོ། །དཀྱིལ་འཁོར་འདིའི་ཆོ་གའི་དབྱེ་བ་རྒྱས་པ་དང༌། །བསྒྲུབ་པ་དང༌། བསྒྲུབ་པར་བྱ་བའི་ཁྱད་པར་རྣམས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུར་བཤད་པས་དེ་ཉིད་ལས་ཤེས་པར་བྱའོ། །དཔལ་མཆོག་དང་པོའི་དུམ་བུ་གཉིས་པ་རྩ་བའི་རྒྱུད་ལས། སྲིང་མོ་བཞིའི་རྟོག་པ་བཤད་པ་རྫོགས་སོ།། །།སྲིང་པོ་བཞིའི་རྟོག་པ་བཤད་ནས། ད་ནི་དེ་ནས་ཞེས་བྱ་བ་ལ་སོགས་པས་ཁྱབ་འཇུག་དང་བཅས་པའི་ལྷ་མ་ཡིན་ལ་སོགས་པའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲས་ནི་སྔ་མ་བཞིན་ཏེ་དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བ་ནི་མིང་པོ་གསུམ་གྱི་སྐབས་སུ་བཤད་པ་ཡིན་ནོ། །ལྷ་མ་ཡིན་རྣམས་ཀྱིས་རང་གི་སྙིང་པོ་ཕུལ་ལོ། །དེ་རྣམས་ཀྱི་སྙིང་པོ་ཕུལ་བ་དང༌། དེ་ནས་ལྷ་མ་ཡིན་གྱི་དཀྱིལ་འཁོར་བྱུང་བ་ནི་ཏིང་ངེ་འཛིན་གཉིས་པ་ཡིན་ནོ། །དེ་ནས་བསྡུ་བ་བརྩམས་ཏེ་གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པ་ཆོ་ག་རྒྱས་པར་བསྟན་པ་ཡིན་ནོ། །དེ་ནས་དཀྱིལ་འཁོར་ཞེས་བྱ་བ་ལ་འབྱུང་སྟེ་ཞེས་བྱ་བ་ཤུགས་ཀྱིས་སྦྱར་རོ། །བརྐོས་ཏེ་ཞེས་བྱ་བ་ལ་སོགས་པ་སོར་ཉི་ཤུ་རྩ་བཞི་ཙམ་སྐས་རིམ་པ་བཞི་ལས་བཅས་པར་
རྒྱར་ཁྲུ་བརྒྱད་པར་ས་བརྐོས་ལ་དེར་དཀྱིལ་འཁོར་གྲུ་བཞི་པ་སྒོ་ཤར་དུ་བཏོད་ཅིང་ཁ་གྱེན་དུ་བལྟས་པ་བྲི་བར་བྱའོ། །དེ་ལྟར་བྲིས་ནས་དེའི་དབུས་སུ་ཁྱབ་འཇུག་གི་འཁོར་ལོ་བྲི་བར་བྱའོ། །དེའི་ཤར་གྱི་དབུས་སུ་ལྷ་མ་ཡིན་གྱི་དབང་པོ་བདེ་མཆོག་བྲི་བར་བྱའོ། །ལྷོར་ཐགས་བཟངས་རིས། ནུབ་ཏུ་ལག་བཟངས། བྱང་དུ་ལྷ་མ་ཡིན་གྱི་དབང་པོ་སྲིན་པོ་ཞེས་བྱ་བ་བྲི་བར་བྱ་སྟེ། འདི་དག་ཐམས་ཅད་ཀྱང་འཁོར་དང་བཅས་པར་བྲི་བར་བྱའོ། །མཚམས་བཞིར་ལྷ་མ་ཡིན་གྱི་བུ་མོ་བྲི་བར་བྱའོ། །འཁོར་ལོས་ཞུགས་ལ་ཞེས་བྱ་བ་ནི། དེ་ལྟར་དཀྱིལ་འཁོར་བྲིས་ནས་འཁོར་ལོའི་ཕྱག་རྒྱ་བཅིངས་ཏེ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ལ་སློབ་དཔོན་འཇུག་པར་བྱའོ། །དེ་ནས་རང་གི་ཆོ་ག་བྱས་ལ་ཁྱབ་འཇུག་འཁོར་དང་བཅས་པ་དགུག་ཅིང་སྤྱན་དྲང་བར་བྱའོ་ཞེས་བྱ་བའི་ཐ་ཚིག་གོ །དེ་ནས་ཇི་ལྟ་བ་བཞིན་དུ་སྤྱན་དྲངས་ལ་ཁྱབ་འཇུག་འཁོར་དང་བཅས་པ་ལ་མཆོད་པ་རྣམ་པ་ལྔས་མཆོད་ནས་ལྷ་མ་ཡིན་གྱི་དབང་པོ་འཁོར་དང་བཅས་པ་རྣམས་ལ་ཉ་ལ་སོགས་པ་གཏོར་མ་སྦྱིན་པར་བྱའོ། །སློབ་མ་ཡང་དེ་བཞིན་དུ་གཞུག་པར་བྱའོ་ཞེས་བྱ་བ་ནི། ཇི་ལྟར་སློབ་དཔོན་འཇུག་པ་དེ་བཞིན་དུ་འདིར་སློབ་མ་གཞུག་པར་བྱའོ། །འདི་སྐད་སྟོན་ཏེ་བདག་བསྲུང་བ་དང་གནས་བསྲུང་བ་བྱས་ལ་རྡོ་རྗེ་འཁོར་ལོའི་ཕྱག་རྒྱས་མདུན་དུ་ལྷ་མ་ཡིན་གྱི་དཀྱིལ་འཁོར་སྤྲུལ་ལ་མེ་ཏོག་ལ་སོགས་པས་ལེགས་པར་མཆོད་དེ་ཕྱག་བཞི་བྱས་ལ། བྱང་ཆུབ་ཆེན་པོར་སེམས་བསྐྱེད་པ་དང༌། གསུམ་ལ་སྐྱབས་སུ་འགྲོ་བ་བྱས་ནས་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིང་པར་བྱའོ། །དེ་ནས་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པའི་ཕྱག་རྒྱས་བདག་ཉིད་ལ་དབབ་པར་བྱའོ། །དེ་ནས་དེ་བཞིན་དུ་ཕྱག་རྒྱ་དགྲོལ་བ་བྱས་ལ། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་དང་པོའི་རྡོ་རྗེ་སྔ་མ་བཞིན་དུ་བསམ་མོ། །དེ་ནས་རང་གི་སྙིང་གར་གནས་པའི་རྡོ་རྗེ་ལ། སརྦ་ས་མ་ཡ་ཙ་ཀྲཾ་པྲ་བརྟ་ཡ་ངཪྴ་ཡ་ཧཱུཾ་ཕཊ་ཅེས་བྱ་བ་ཡིད་ཀྱིས་བྲིས་ལ། འདི་ཉིད་ཡིད་ཀྱིས་ཟློས་ཤིང་ཆོས་ཐམས་ཅད་བདག་མེད་པར་
བསྒོམ་པར་བྱའོ། །དེ་ནས་སྙིང་པོ་དེ་ཉིད་ཀྱིས་རང་གི་སེམས་ཟླ་བའི་དཀྱིལ་འཁོར་ལྟ་བུར་བསྐྱེད་ལ་དེའི་སྟེང་དུ་སྙིང་པོ་དེ་ཉིད་ཀྱིས་ཟླ་བའི་དཀྱིལ་འཁོར་གཉིས་པ་ཡང་སྙིང་པོ་དེ་དང་བཅས་པའི་དང་པོའི་རྡོ་རྗེ་དེ་ཉིད་ཁྱབ་འཇུག་གི་འཁོར་ལོ་དེའི་དབུས་སུ་སྙིང་པོ་བསམས་ལ། དེ་ཉིད་ཟློས་ཤིང་འཁོར་ལོ་ནི་བདག་ཡིན་ནོ་ཞེས་བསྒོམ་པར་བྱའོ། །འཁོར་ལོ་དེ་ཉིད་སེམས་དཔར་བྱིན་གྱིས་བརླབས་པའི་སྦྱོར་བས། རྡོ་རྗེ་སེམས་དཔར་བདག་ཉིད་བསྐྱེད་ལ་ཨོཾ་སརྦ་ས་མ་ཡ་ཙ་ཀྲཾ་པྲ་བརྟ་ཡ་དཪྴ་ཡ་སརྦ་ཧཱུཾ་ཕཊ་ཅེས་བརྗོད་ལ། རྡོ་རྗེ་སེམས་དཔའ་འམ་ཁྱབ་འཇུག་ཏུ་བདག་ཉིད་བསྒོམ་པར་བྱའོ། །དེ་ནས་མ་ཧཱ་ས་མ་ཡ་ས་ཏྭ་ཨ་ཧཾ་ཞེས་བརྗོད་ལ་དམ་ཚིག་སེམས་དཔའ་ཆེན་པོའི་ང་རྒྱལ་བསྐྱེད་ལ་ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱ་བཅིངས་ལ་ས་མ་ཡ་ཧཱུཾ་ཞེས་ཟློས་ཤིང་དམ་ཚིག་སེམས་དཔའི་ང་རྒྱལ་བསྐྱེད་ལ། ས་མ་ཡ་ས་ཏྭ་ཨ་དྷི་ཏིཥྛ་སྭ་མཱཾ་ཞེས་ཟློས་ཤིང་ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱ་དེ་ཉིད་ཀྱིས། སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར་བྱིན་གྱིས་བརླབ་པར་བྱའོ། །དེ་ནས་ཁྱབ་འཇུག་གི་ཚུལ་གྱིས་འཁོར་ལོ་ཐོགས་ལ་སྙིང་པོ་ཟློས་ཤིང་འཇུག་པར་བྱ་སྟེ། འདི་ནི་དེ་ལ་ཕྱག་རྒྱ་ཆེན་པོའོ། །དེ་ལྟ་བུའི་ཕྱག་རྒྱ་ཆེན་པོ་བཅིངས་ལ་ཨའི་མཐར་ཐུག་པའི་སྙིང་པོ་ཟློས་ཤིང་མདུན་དུ་ཁྱབ་འཇུག་གི་འཁོར་ལོ་སྣ་ཚོགས་པདྨའི་སྟེང་དུ་བསྒོམ་པར་བྱའོ། །དེའི་དབུས་སུ་སྙིང་པོ་བསམས་ལ་འཁོར་ལོའི་ང་རྒྱལ་བསྒོམ་པར་བྱའོ། །ཡང་སྙིང་པོ་དེ་ཉིད་ཟློས་ཤིང་བདག་ཉིད་ཁྱབ་འཇུག་ཏུ་བསྒོམ་པར་བྱའོ། །དེ་ཉིད་དུ་ཁྱབ་འཇུག་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ནས་ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱ་བཅིངས་ཏེ་ཨོཾ་སརྦ་ས་མ་ཡཱ་ཙ་ཀྲཾ་པྲ་བརྟ་ཡ་དཪྴ་ཡ་སརྦ་ཧཱུཾ་ཕཊ་དྲྀ་ཤྱ་ཞེས་བརྗོད་ལ་བལྟ་བར་བྱའོ། །དེ་ནས་འཁོར་ལོ་ལྕགས་ཀྱུས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ལ་རང་གི་ལུས་ལ་ཁྱབ་འཇུག་གི་འཁོར་ལོའི་ཕྱག་
རྒྱ་བཅིངས་ལ་སམ་ཡ་སྟྭཾ་ཞེས་བརྗོད་དེ་འོད་ཀྱི་དཀྱིལ་འཁོར་བསྐྱེད་པར་བྱའོ། །དེ་ནས་རང་གི་ལུས་ཀྱི་ནང་དུ་ཆུད་པའི་ཁྱབ་འཇུག་གི་ལུས་དང་ལྷན་ཅིག་ཏུ་གྱུར་པར་བདག་ཉིད་བསམས་ལ། ས་མ་ཡ་སྟྭཾ་ཨ་ཧཾ། ཨོཾ་ས་མ་ཡ་ཙ་ཀྲཾ་པྲ་བརྟ་ཡ་དཪྴ་ཡ་སརྦ་ཧཱུཾ་ཕཊ་ཅེས་བྱ་བ་ལན་གསུམ་བརྗོད་པར་བྱའོ། །དེ་ནས་ཁྱབ་འཇུག་གི་འཁོར་ལོའི་དམ་ཚིག་ཕྱག་རྒྱ་ནི་འདི་ཡིན་ཏེ། ལག་པ་གཡོན་པ་བཀན་ཏེ་ཤིན་ཏུ་བརྐྱང་བའི་སྟེང་དུ་ལག་པ་གཡས་པ་ཁ་སྦུབས་ལ། ཤིན་ཏུ་བརྐྱང་སྟེ་བཞག་ལ། དེ་ནས་མཐེ་བོ་དང་མཐེའུ་ཆུང་གཉིས་རྡོ་རྗེ་རྩེ་གཅིག་པ་ལྟར་བྱས་ལ། སོར་མོ་ལྷག་མ་རྣམས་ཀྱིས་རྩིབས་དྲུག་པར་བྱས་པ་འདི་ནི་ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱའོ། །ཕྱག་རྒྱ་འདི་ཉིད་ཀྱི་མཛུབ་མོ་གཉིས་ལ་ལྕགས་ཀྱུ་གཉིས་བྱས་ལ། དགུག་པའི་སྙིང་པོ་ཟློས་ཤིང་དགུག་པར་བྱའོ། །དེ་ནས་དང་པོའི་རྡོ་རྗེ་དཀར་པོ་བསམས་ལ་སྙིང་པོ་བཀོད་པའི་འདི་ནི་འདིར་ཆོས་ཀྱི་ཕྱག་རྒྱའོ། །ཡི་གེ་ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསམས་པ་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་ཧཱུཾ་ལས་རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ་ཁྱབ་འཇུག་གི་ཕྱག་རྒྱ་ཆེན་པོ་བསམ་བར་བྱའོ། །དེ་ནས་དང་པོའི་རྡོ་རྗེ་བཅིངས་ལ་དེ་བཞིན་དུ་བདག་ཉིད་བྱིན་གྱིས་བརླབས་ལ་རྡོ་རྗེ་རིན་པོ་ཆེའི་ཕྱག་རྒྱས་དབང་བསྐུར་ནས། འཁོར་ལོའི་དབང་བསྐུར་བ་དང༌། བདག་པོ་དང་མིང་གི་དབང་བསྐུར་བའི་སྙིང་པོ་ཟློས་ཤིང་བླངས་ལ། མེ་ཏོག་ལ་སོགས་པའི་མཆོད་པ་རྣམས་དང༌། རང་གི་ལས་ཀྱི་ཕྱག་རྒྱ་རྣམས་ཀྱིས་བདག་ཉིད་ལ་མཆོད་ལ། ཁྱབ་འཇུག་གི་ཕྱག་རྒྱ་ཆེན་པོ་བཅིངས་ལ་བདག་ནི་ཁྱབ་འཇུག་གོ་ཞེས་ང་རྒྱལ་བསྐྱེད་ནས། རང་གི་སྙིང་གར་གནས་པའི་རྡོ་རྗེ་ལ་སྙིང་པོ་བསམས་ནས། ཉིན་རེའི་སྦྱོར་བས་བཟླས་བརྗོད་འབུམ་བྱས་ནས་སྔོན་དུ་བསྙེན་པ་བྱས་པར་འགྱུར་རོ། །དེ་ནས་དེ་བཞིན་དུ་ཁྱབ་འཇུག་གི་སྦྱོར་བ་བྱས་ལ་དཀྱིལ་འཁོར་གྱི་སའི་དབུས་སུ་འདུག་སྟེ། ཏིང་ངེ་འཛིན་གསུམ་པོ་ཇི་ལྟ་བ་བཞིན་དུ་བསྒོམས་ལ་དམ་ཚིག་གི་ཕྱག་རྒྱས་དཀྱིལ་འཁོར་ནམ་
མཁར་གཞག་པར་བྱའོ། །དེ་ནས་དེ་ཉིད་ཀྱིས་བདག་ལན་ཅིག་བྱིན་གྱིས་བརླབས་ལ་ཡོངས་སུ་བསྐོར་བར་བྱའོ། །དེ་ནས་ཇི་སྐད་བཤད་པའི་ཚུལ་གྱིས་ལྷག་པར་གནས་པའི་ཆོ་ག་བྱས་ལ། ཉི་མ་འཆར་བའི་དུས་སུ་དཀྱིལ་འཁོར་ཐིག་གདབ་པར་བྱའོ། །དེ་ནས་ཚོན་གྱི་ཕྱེ་མ་ལྔས་དཀྱིལ་འཁོར་བྲིས་ལ། དཀྱིལ་འཁོར་གྱི་ལྟེ་བར་སྣ་ཚོགས་པདྨ་ལ་ཁྱབ་འཇུག་གི་འཁོར་ལོ་བྲི་བར་བྱ་ཞིང་ལྷ་མ་ཡིན་གྱི་དབང་པོ་འཁོར་དང་བཅས་པ་བྲི་བར་བྱའོ། །དེ་ནས་སྒོ་དབྱེ་བའི་ཕྱག་རྒྱས་སྒོ་ཕྱེ་ལ་ཁྱབ་འཇུག་འཁོར་དང་བཅས་པ་ལ་བུམ་པ་ལ་སོགས་པས་ལེགས་པ་མཆོད་ནས། རྡོ་རྗེ་གནོད་སྦྱིན་ལ་སོགས་པ་ཡོངས་སུ་བཟླས་པའི་རས་ཀྱིས་གདོང་གཡོགས་པ་ལ་སོགས་པ་བྱས་ལ། ཕྱག་རྒྱ་བཞི་སྔོན་དུ་འགྲོ་བས་བྱང་ཆུབ་ཀྱི་སེམས་བསྐྱེད་པར་བྱས་ལ་སྐྱབས་སུ་འགྲོ་བ་གཟུང་བར་བྱའོ། །དེ་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ་ཕྱི་རོལ་གྱི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་རང་གི་སྙིང་གར་བཞག་ལ། དེ་བསྐྱེད་ལ་མེ་ཏོག་ལ་སོགས་པས་བདག་ཉིད་མཆོད་ལ། ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱ་བཅིངས་ལ་བཛྲ་བཛྲ་ཞེས་ཟློས་ཤིང་རང་གི་སྙིང་པོས་དཀྱིལ་འཁོར་དུ་འཇུག་པར་བྱའོ། །དེ་ནས་ཁྱབ་འཇུག་ལ་ཕྱག་བྱས་ལ། དཀྱིལ་འཁོར་ལ་སྐོར་བ་ལན་གསུམ་བྱས་ནས་ཁྱབ་འཇུག་གི་མདུན་དུ་འདུག་སྟེ། འདི་སྐད་ཅེས་བརྗོད་པར་བྱའོ། །ཛཿ་ཧཱུཾ་བཾ་ཧོཿ། པྲ་སིདྡྷྱ་མཾ། དེ་ནས་རྡོ་རྗེ་ཆུ་འཐུངས་ལ་བདག་ཉིད་ལ་དབབ་པར་བྱའོ། །ཨ་ཞེས་བྱ་བ་བརྒྱ་རྩ་བརྒྱད་བཟླ་བར་བྱའོ། །ཡང་ཁྲོ་བོའི་རྡོ་རྗེ་ཁུ་ཚུར་གྱིས་སེམས་མའི་རྡོ་རྗེ་དྲལ་ལ་བདག་ཉིད་ལ་དབབ་པར་བྱའོ། །ཨ་ཞེས་བྱ་བ་དེ་བཞིན་དུ་བཟླ་པར་བྱའོ། །དེ་ནས་རང་གི་སྙིང་པོས་མེ་ཏོག་དོར་བར་བྱའོ། །དེ་ནས་དེ་བླངས་ལ་དེ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་དཀྱིལ་འཁོར་གྱི་ཤར་ཕྱོགས་ནས་བརྩམས་ཏེ་དབུས་མའི་
འཁོར་ལོའི་བར་དུ་བལྟ་བར་བྱའོ། །དེ་ནས་ཁྱབ་འཇུག་གི་དམ་ཚིག་གི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བ་ལ་སོགས་པས་སྙིང་གར་དགྲོལ་བར་བྱའོ། །དེ་ནས་ཁྱབ་འཇུག་གི་ཕྱག་རྒྱ་ཆེན་པོ་བཅིངས་ལ་དེ་རྡོ་རྗེ་བལྟ་བ་ཁྲོ་བ་དང་བཅས་པས་བལྟས་ལ། ཇི་སྲིད་མཐོང་བར་གྱུར་ཅིང་རང་གི་དངོས་གྲུབ་སྟེར་བ་དེ་སྲིད་ཀྱི་བར་དུ་སྙིང་པོ་བཟླ་བར་བྱའོ། །དེ་ནས་དེ་བཞིན་དུ་བལྟས་ལ་རྡོ་རྗེ་ཐལ་མོས་བསྐོར་བས་ཕྱག་བྱས་ནས་མེ་ཏོག་ལ་སོགས་པའི་དབང་བསྐུར་བས་བླང་བར་བྱའོ། །དེ་ལ་དང་པོར་རེ་ཞིག་ཕྱི་རོལ་གྱི་རྡོ་རྗེ་ཁུ་ཚུར་གྱིས་བཟུང་བའི་འཁོར་ལོའི་ལྕུག་མ་ལ་ཡང༌། རྣམ་པར་རྒྱལ་བའི་བུམ་པ་ལ་དཔལ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་བུམ་པ་ལ་སྔགས་ལན་ཉི་ཤུ་རྩ་གཅིག་ཡོངས་སུ་བཟླ་བར་བྱའོ། །དེ་ནས་བདག་ཉིད་ཁྱབ་འཇུག་ཏུ་བྱིན་གྱིས་བརླབས་ལ། དཀྱིལ་འཁོར་ནང་གི་ཤར་ངོས་སུ་སྣ་ཚོགས་པདྨ་བྲིས་ནས། དེའི་སྟེང་དུ་ཁྱབ་འཇུག་གི་ཕྱག་རྒྱ་ཆེན་པོར་བསམས་ཏེ་འདུག་ལ་མེ་ཏོག་ལ་སོགས་པས་བདག་ཉིད་མཆོད་ལ། མཆོད་ཡོན་བླངས་ཏེ། ཕྱི་རོལ་གྱི་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ནས། ཨོཾ་སརྦ་ས་མ་ཡ་ཙ་ཀྲཾ་པྲ་བརྟ་ཡ་དཪྴ་ཡ་ས་ར་བི་ཧཱུཾ་ཕཊ། ཨོཾ་བཛྲ་ཨ་བྷི་ཥི་ཉྩ་ཞེས་བརྗོད་ཅིང་དེ་ནས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ། རིན་པོ་ཆེའི་ཅོད་པན་གྱིས་དབང་བསྐུར་བར་བྱའོ། །དེ་ནས་རང་གི་སྙིང་གར་འཁོར་ལོ་དྲིལ་བུ་དང་བཅས་པ་བཟུང་ལ། དེ་ཉིད་ཀྱིས་བདག་པོ་དང༌། མིང་གི་དབང་བསྐུར་བ་བླངས་ནས། མཆོད་པ་རྣམ་པ་ལྔ་དང༌། ལས་ཀྱི་ཕྱག་རྒྱ་རྣམས་ཀྱིས་ཀྱང་བདག་ཉིད་ཡང་དག་པར་མཆོད་ལ་ཁྱབ་འཇུག་ལ་ཕྱག་བྱས་ཏེ་སྙིང་པོ་གཟུང་ལ་ཕྱག་རྒྱ་བཞིའི་ཡེ་ཤེས་བླངས་ནས། བདག་ལ་བྱིན་གྱིས་བརླབས་པ་ལ་སོགས་པ་བྱས་ལ་རང་གི་མིང་ནས་བརྗོད་དེ། དཀྱིལ་འཁོར་རྡོ་རྗེ་བསྒྲུབ་པར་བྱའོ། །དེ་ནས་བསྡུ་བ་བྱས་ལ་ཁྱབ་འཇུག་གི་འཁོར་ལོའི་ཕྱག་རྒྱའི་མཛུབ་མོ་གཉིས་ཀྱི་ལྕགས་ཀྱུས་ཁྱབ་འཇུག་འཁོར་
དང་བཅས་པ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ལ་དཀྱིལ་འཁོར་དུ་བསྒྲུབ་པར་བྱའོ། །དེ་ནས་ཁྱབ་འཇུག་གི་འཁོར་ལོའི་དམ་ཚིག་གི་ཕྱག་རྒྱ་བཅིངས་ལ། ཨོཾ་སརྦ་ས་མ་ཡ་ཙ་ཀྲཾ་པྲ་བརྟ་ཡ་དཪྴ་ཡ་སརྦ་ཧཱུཾ་ཕཊ་དྲྀ་ཤྱ་ཛཿ་ཧཱུཾ་བཾ་ཧོཿ། ས་མ་ཡ་སྟྭཾ་ཨ་ཧཾ། ཨོཾ་སརྦ་ས་མ་ཡ་ཙ་ཀྲཾ་པྲ་བརྟ་ཡ་ད་ཪྴ་ཡ་ཧཱུཾ་ཕཊ་ཅེས་ལན་གསུམ་བརྗོད་པར་བྱའོ། །དེ་ནས་དེ་བཞིན་དུ་ཁྱབ་འཇུག་གི་འཁོར་དང་བཅས་པའི་ལྕེ་ལ་སྙིང་པོ་བསམས་ལ་ལས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་བཅིངས་ཏེ། རྡོ་རྗེ་རིན་ཆེན་གྱི་ཕྱག་རྒྱས་ཁྱབ་འཇུག་འཁོར་དང་བཅས་པ་ལ་དབང་བསྐུར་ཏེ་ཡོན་བྱིན་ལ་མཆོད་ཡོན་ཐམས་ཅད་ཀྱིས་མཆོད་པར་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཁྱབ་འཇུག་གི་ཕྱག་རྒྱ་ཆེན་པོ་བཅིངས་ལ། ཇི་སྲིད་མཚན་མ་ཐོབ་པར་གྱུར་པ་དེ་སྲིད་གྱི་བར་དུ་དཀྱིལ་འཁོར་བསྒོམ་པར་བྱའོ། །དེ་ནས་བཀའ་མ་ནོས་ལ་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །དེ་ནས་རང་གི་འཇུག་པའི་ཆོ་གས་སློབ་མ་བཅུག་ལ་དམ་ཚིག་སྦྱིན་པར་བྱའོ། །འདི་ནི་ཁྱེད་ཀྱི་དམ་ཚིག་ཡིན་ཏེ། སེམས་ཅན་ཐམས་ཅད་ལ་ཡིད་མི་རྟོན་པ་དང༌། རྟག་ཏུ་སྒྱུ་མའི་མཆོག་ཐམས་ཅད་སྟོན་ཅིང་བསླབ་པ་དང༌། དེ་རྣམས་ལ་ཁྱེད་ཀྱིས་བརྙས་པར་མ་བྱེད་ཅིག །དེ་ནས་ཆོ་ག་ཐམས་ཅད་རྫོགས་པར་བྱས་ལ་སློབ་མ་རྣམས་ལ་རྨ་བྱའི་སྒྲོའི་ཆིངས་མ་སྤྱིན་པར་བྱ་ཞིང་སྒྲུབ་པ་བསླབ་པར་བྱའོ། །རས་ལ་འཁོར་ལོ་བྲིས་ལ་དེའི་ངོས་ཐམས་ཅད་དུ་བདེ་མཆོག་ལ་སོགས་པ་ལྷ་མ་ཡིན་གྱི་དབང་པོ་འཁོར་དང་བཅས་པ་དང༌། རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བྲི་པར་བྱའོ། །དེ་ནས་ཚེས་བཅུ་བཞི་ལ་རས་རིས་ཀྱི་མདུན་དུ་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། རས་རིས་ལ་ཁྱབ་འཇུག་འཁོར་དང་བཅས་པ་སྤྱན་དྲངས་ཏེ། མཆོད་པ་ཐམས་ཅད་ཀྱིས་ལེགས་པར་མཆོད་ལ་ཕྱག་བྱས་ལ། རྨ་བྱའི་མཇུག་སྒྲོའི་ཆིངས་མ་ལ་བཟླས་བརྗོད་འབུམ་བྱའོ། །དེ་ནས་
ཆིངས་མ་བླངས་ཏེ། ལག་པས་བཟུང་ལ་ཉིན་རེ་བྱ་བའི་སྦྱོར་བས་བཟླས་བརྗོད་འབུམ་བྱའོ། །དེ་ནས་གང་གི་ཚེ་ཉལ་བ་དེའི་ཚེ་མགོ་བོར་གཞག་གོ །དེ་ནས་བཟླས་བརྗོད་འབུམ་ཚང་བ་དང༌། ཚེས་བཅུ་བཞི་ལ་འཁོར་ལོའི་ཕྱག་རྒྱས་བཟུང་སྟེ། མཚན་ཐོག་ཐག་བཟླས་བརྗོད་བྱས་ན་ནང་བར་དེ་ལས་ཐམས་ཅད་མཐོང་བར་འགྱུར་རོ། །དེ་ནས་བརྩམས་ཏེ་སྒྱུ་མ་ཐམས་ཅད་སྟོན་པར་བྱེད་དོ། །དཔལ་མཆོག་དང་པོའི་དུམ་བུ་གཉིས་པའི་རྩ་བའི་རྒྱུད་ལས། ལྷ་མ་ཡིན་གྱི་རྟོག་པ་བཤད་པ་རྫོགས་སོ།། །།དེ་ལྟར་ལྷ་མ་ཡིན་གྱི་རྟོག་པ་བཤད་ནས་དེ་ནས་ཞེས་བྱ་བ་ལ་སོགས་པས་ཀླུས་འདུལ་བ་ལས་བརྩམས་ཏེ་ཀླུའི་རྟོག་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཐི་ཚག་སྟེ། དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བ་ནི་མིང་པོ་གསུམ་གྱི་དཀྱིལ་འཁོར་ལས་བཤད་པ་ཉིད་ཡིན་ནོ། །ཀླུའི་རིགས་བཞི་ཞེས་བྱ་བ་ནི་བྲམ་ཟེ་ལ་སོགས་པའི་དབྱེ་བས་ཀླུའི་རིགས་བརྒྱད་པོ་བཞིར་འགྱུར་རོ། །དེ་ལ་མཐའ་ཡས་དང་རིགས་ལྡན་ནི་བྲམ་ཟེའོ། །ནོར་རྒྱས་དང་དུང་སྐྱོང་ནི་རྒྱལ་རིགས་སོ། །འཇོག་པོ་དང་པདྨ་ཆེན་པོ་ནི་རྗེའུ་རིགས་སོ། །ཀརྐོ་ཊ་དང་པདྨ་ནི་དམངས་རིགས་སོ། །རང་གི་སྙིང་པོ་ཕུལ་བ་ནི་ཕུཿ་ཞེས་བྱ་བ་ཕུལ་བའོ། །འདི་བརྗོད་པ་ཙམ་གྱིས་ཀླུའི་དཀྱིལ་འཁོར་བྱུང་བར་འགྱུར་ཏེ། འདི་ཡན་ཆད་ཀྱིས་ནི་ཏིང་ངེ་འཛིན་གཉིས་པ་བཤད་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང་བསྒོམ་པ་བྱའོ་ཞེས་དེའི་ཆོ་ག་བསྟན་པར་བྱ་བའི་ཕྱིར། །དེ་ནས་དཀྱིལ་འཁོར་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པར་གསུང་པ་ཡིན་ནོ། །དེ་ནས་དཀྱིལ་འཁོར་ཞེས་བྱ་བ་ལ་སོགས་པ་ལས་འབྱུང་སྟེ་ཞེས་བྱ་བར་ཤུགས་ཀྱིས་སྦྱོར་བར་བྱའོ། །སྒོ་བཞི་ཞེས་བྱ་བ་ལ་སོགས་པ་ལ་རྣམ་པ་ཐམས་ཅད་དུ་ཤར་དང༌། ལྷོ་དང༌། ནུབ་དང༌། བྱང་གི་རི་མོའི་
རྩེ་མོ་བཞི་འདི་ལ་ཡོད་པས་ན། དཀྱིལ་འཁོར་ཟུར་བཞི་པའོ། །སྒོ་བཞི་ཞེས་བྱ་བ་ནི་ངོས་བཞིའི་དབུས་ཀྱི་ཆར་ཆ་བརྒྱད་པའི་ཚད་ཀྱི་སྒྲོ་བཞི་འདི་ལ་ཡོད་པས་ན་སྒོ་བཞིའོ། །སྤྲུལ་གྱི་ཐིག་གིས་ཀུན་དུ་བྲི། །ཞེས་བྱ་བ་ནི། སྦྲུལ་ལྟ་བུའི་ཚོན་གྱི་རི་མོ་ནི་སྦྲུལ་ཏེ། དེ་སྲད་བུ་འདི་ལ་ཡོད་པས་ན་སྤྲུལ་གྱི་ཐིག་གོ །ཀླུ་ཡི་གདེངས་ཀའི་རྩེ་སྒོ་ཁྱུད། །ཅེས་བྱ་བ་ནི་ཀླུའི་གདེངས་ཀ་ནི་སྤྲུལ་གྱི་གདེངས་ཀ་སྟེ། དེའི་རྩེ་མོ་ཅན་གྱི་སྒོ་ཁྱུད་འདི་ལ་ཡོད་པས་ན། ཀླུའི་གདེངས་ཀའི་རྩེ་མོའི་སྒོ་ཁྱུད་ཅན་གྱི་དཀྱིལ་འཁོར་རོ།། དེ་ཡང་སྒོ་རེ་རེ་ཞིང་སྤྲུལ་གཉིས་གཉིས་ཀྱི་གདེངས་ཀའི་རྣམ་པ་སྒོ་ཁྱུད་འདི་ལ་ཡོད་དོ་ཞེས་བྱ་བའི་ཐ་ཚིག་གོ །མཚམས་ཀྱི་མཐར་ནི་མཇུག་རྩེ་མདུད། །ཅེས་བྱ་བ་ནི་མཚམས་ཀྱི་མཐར་སྤྲུལ་གྱི་མཇུག་མ་འདི་ལ་ཡོད་པས་ན་མཚམས་མཐར་ཏེ། སྦྲུལ་གྱི་མཇུག་མ་དེའི་རྩེ་མོ་སྟེ་ཐ་མར་མདུད་པ་བྱས་པ་འདི་ལ་ཡོད་པས་ན། མཚམས་ཀྱི་མཐར་ནི་མཇུག་རྩེ་མདུད། །ཅེས་བྱའོ། །དེ་ཡང་དཀྱིལ་འཁོར་གྱི་མཚམས་རེ་རེ་ཞིང་སྤྲུལ་གྱི་མཇུག་མ་གཉིས་ཕན་ཚུན་མདུད་པར་བྱས་པས་མཚམས་སུ་མདུད་པར་བྱས་པས་ཞེས་བྱ་བའི་ཐ་ཚིག་གོ །དེའི་ཞེས་བྱ་བ་ལ་སོགས་པ་ལ་དེ་ལྟར་སྤྲུལ་བརྒྱད་ཀྱིས་ཟུར་བཞི་པ་སྒོ་བཞིན་པ་སྤྲུལ་གྱི་གདེངས་ཀའི་རྩེ་མོ་སྒོ་ཁྱུད་མཚམས་ཀྱི་མཐར་མཇུག་རྩེ་མདུད་པའི་དཀྱིལ་འཁོར་བྲིས་ནས་དེའི་དབུས་སུ་ཆུ་སྲིན་ལ་སོགས་པས་ཡོངས་སུ་གང་བར་བྱའོ། །དཀྱིལ་འཁོར་དེའི་ལྟེ་བའི་ཕྱོགས་སུ་ཀླུའི་རྒྱལ་པོ་ཤེ་ཥ་གདེངས་ཀ་བརྒྱད་དང་ལྡན་པ་ལུས་ཀྱི་ཚད་མེད་པ་བྲི་བར་བྱའོ། །དེ་ནས་ཤར་ཕྱོགས་ཀྱི་ཆར་ཀླུའི་རྒྱལ་པོ་མཐའ་ཡས་གདེངས་ཀ་བདུན་དང་ལྡན་པ། མེའི་མཚམས་སུ་རིགས་ལྡན། ལྷོ་ཕྱོགས་སུ་ནོར་རྒྱས། བདེན་བྲལ་གྱི་མཚམས་སུ་དུང་སྐྱོང༌། ནུབ་ཕྱོགས་སུ་འཇོག་པོ། །རླུང་གི་ཕྱོགས་སུ་པདྨ་ཆེན་པོ། །བྱང་ཕྱོགས་སུ་ཀ་རྐོ་ཊ། དབང་ལྡན་གྱི་མཚམས་སུ་པདྨ་བྲི་བར་བྱའོ། །དེ་ནས་འཇུག་པར་བྱའོ་ཞེས་བྱ་བ་ལ་སོགས་པ་དེ་ལྟར་ལྷ་རྣམས་བཀོད་ནས་སྒོ་དབྱེ་བ་ལ་སོགས་པ་
བྱས་ཏེ། བུམ་པ་ལ་སོགས་པས། དཀྱིལ་འཁོར་ཡང་དག་པར་མཆོད་ལ་སྲོག་དང་བཅས་པའམ་བཟོར་བྱས་པའི་སྤྲུལ་བླངས་ལ། བཛྲ་བཛྲ་ཕུཿ་ཞེས་ཟློས་ཤིང༌། ཁྲོས་པའི་ཤུགས་ཀྱིས་རྒྱུག་ཅིང༌། དཀྱིལ་འཁོར་དུ་ཞུགས་ལ་གདེངས་ཀའི་ཕྱག་རྒྱ་བཅིངས་ནས། དེ་ཉིད་ཀྱིས་མེ་ཏོག་ཕྲེང་བ་བླང་བར་བྱའོ། །དེ་ནས་རང་གི་ཆོ་ག་ཐམས་ཅད་རྗེས་སུ་སྤྱད་ལ། གདེངས་ཀའི་ཕྱག་རྒྱ་དང༌། ཨོཾ་ཧྲཱིཿ་ཨ་ནཱི་ལ་བཛྲཱ་བེ་ག་པྲ་ཏི་བྷི་ནྡྷ་ར་ཤེ་ཥ་ཨ་ཡ་ཧི་ཕུ། སརྦ་ནཱ་ག་ཀུ་ལ་ཨཱ་ན་ཡ་ཧཱུཾ་ཕུ། ས་མ་ཡ་པྲ་བེ་ཤ་ཕུ། སརྦཾ་སཱ་དྷ་ཡ་ཕུ་ཕུ་ཕུ་ཞེས་བྱ་བའི་སྙིང་པོས་ཀླུའི་རྒྱལ་པོ་ཤེ་ཥ་འཁོར་དང་བཅས་པ་ཇི་ལྟ་བ་བཞིན་དུ་དགུག་པར་བྱའོ། །དེ་ནས་ཞེས་བྱ་བ་ལ་སོགས་པས་དེ་ལྟར་དགུག་པའི་རྗེས་ཐོགས་ཉིད་ལ། ཀླུའི་བུའི་སློབ་མ་རྣམས་ཕུ་ཞེས་བྱ་བ་ཟློས་ཤིང་དཀྱིལ་འཁོར་དུ་ཞུགས་ནས་བབས་པར་གྱུར་ཞིང་ཕན་ཚུན་འཐབ་བོ། །དེ་ནས་སློབ་དཔོན་གྱིས་ཕུ་ཞེས་བྱ་བ་ཟློས་ཤིང་རི་མོའི་ཕྱག་རྒྱ་བཅིངས་ལ་དེ་རྣམས་དུག་མེད་པར་བྱའོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་སློབ་དཔོན་གྱི་གདེངས་ཀའི་ཕྱག་རྒྱ་དང༌། རང་གི་འཇུག་པའི་ཆོ་གས་སློབ་མ་ཐམས་ཅད་གཞུག་པར་བྱའོ། །དེ་ནས་འདི་སྐད་ཅེས་བརྗོད་པར་བྱ་སྟེ། ཁྱེད་རྣམས་ཀྱིས་ཀླུ་རྣམས་དབྱུང་བར་མི་བྱ། སྦྲུལ་ཐམས་ཅད་གསད་པར་མི་བྱ། སྦྲུལ་ཟ་བ་རྣམས་ལ་བསྲུང་བ་དང༌། བྱབ་པ་དང༌། གསོ་བ་མ་བྱེད་ཅིག །གསང་བའི་དམ་ཚིག་འདི་ཡང་བརྗོད་པར་བྱ་སྟེ། མཛའ་མིན་ཐབས་ནི་གཞན་དག་གིས། །དུག་མ་གཏོགས་པར་གནོད་མི་བྱ། །དུག་བསླང་བའམ་དམ་ཚིག་འདས། །ཀླུ་ཡི་རིགས་ཀུན་རིགས་བསྲེགས་འགྱུར། །དེ་ནས་ཡང་མནའི་དམ་ཚིག་སྦྱིན་པར་བྱ་སྟེ། འདོད་ཆགས་ཞེ་སྡང་གཏི་མུག་སྟེ། །འདི་དག་འཇིག་རྟེན་དུག་གསུམ་པོ། །གལ་ཏེ་དེ་ལས་འདས་གྱུར་ན། །འཚོ་བའི་འཇིག་རྟེན་འདིར་བརྟགས་ནས། །གལ་ཏེ་དངོས་གྲུབ་ཐོབ་འདོད་ན། །གློག་ལ་བརྙས་པར་མི་བྱ་ཞིང༌། །སེར་བ་བཟློག་པར་མི་བྱ་ལ། །སྤྲུལ་ནི་གང་ཡང་གསོད་མི་བྱ། །དེ་ནས་སྙིང་པོ་བྱིན་ལ་ཕྱག་
རྒྱ་བཞི་བླང་བར་བྱའོ། །གདེངས་པའི་ལག་པ་དང༌། ནམ་མཁའི་ལྡིང་གི་དེ་ཁོ་ན་ཉིད་དང༌། དུག་བསྐྱེད་པ་དང༌། དུག་བསྔལ་བ་ནི་ཞེས་བྱ་བ་ནི་དེ་རྣམས་ཀྱི་སྒྲུབ་པ་ཡིན་ནོ། །ཁྲོ་བོ་གོས་ཀྱིས་གཡོགས་ལ་ལས་བྱའོ་ཞེས་བྱ་བ་ནི་དེ་ནས་བརྩམས་ཏེ་དུག་ཐམས་ཅད་ཟོས་ཀྱང་བདུད་རྩི་ལྟར་འཇུ་པར་འགྱུར་རོ། །ནོར་རྒྱས་དང་ཡང་ལྷན་ཅིག་གར་བྱེད་དོ། །དུག་ཐམས་ཅད་སྦྱར་བ་དང་གཞིག་པར་ནུས་པར་འགྱུར་རོ། །ཡང་འདིའི་དོན་བརྗོད་པར་བྱ་སྟེ། དེ་བཞིན་དུ་དང་པོའི་རྡོ་རྗེའི་ཕྱག་རྒྱ་བཅིངས་པའི་བར་གྱི་ཕྱག་རྒྱ་བཅིངས་པར་བྱས་ལ་རང་གི་སྙིང་གར་གནས་པའི་རྡོ་རྗེ་ཡི་གེ་ཕུ་བསམས་ལ་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་ཕུ་ཞེས་བྱ་བ་དེ་ཉིད་ལས་རང་གི་སེམས་ཟླ་བའི་དཀྱིལ་འཁོར་དུ་བསམས་ལ་དེའི་སྟེང་དུ་ཡི་གེ་ཕུ་ལས་ཟླ་བའི་དཀྱིལ་འཁོར་གཉིས་པ་ཕུ་ཉིད་དང་བཅས་པའི་དང་པོའི་རྡོ་རྗེ་ཉིད་ལས་ཀླུའི་ཞགས་པ་དེའི་དབུས་སུ་ཡི་གེ་ཕུ་བསམས་ལ། ཀླུའི་ཞགས་པའི་ང་རྒྱལ་བསྒོམས་ནས་ཞགས་པ་དེ་སེམས་དཔར་བྱིན་གྱིས་བརླབས་པའི་སྦྱོར་བས། རྡོ་རྗེ་སེམས་དཔར་བདག་ཉིད་བསམས་ལ་ཕུ་དེ་ཉིད་ཟློས་ཤིང་ཀླུའི་རྒྱལ་པོ་ཤེ་ཥའི་གདེངས་ཀ་བརྒྱད་དང་ལྡན་པར་བདག་ཉིད་བསམས་ལ། མ་ཧཱ་ས་མ་ཡ་ས་ཏྭོ྅ཧཾ་ཞེས་ཟློས་ཤིང་དམ་ཚིག་ཆེན་པོ་སེམས་དཔའི་ང་རྒྱལ་བསྐྱེད་ལ་དམ་ཚིག་ནི་བདག་གོ་ཞེས་བསྒོམ་ཞིང་ས་མ་ཡ་ས་ཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར་བྱིན་གྱིས་བརླབ་པར་བྱའོ། །དེ་ནས་ལག་པ་གཡས་པས་རྡོ་རྗེ་རྩེ་གསུམ་པ་བཟུང་ཞིང༌། གཡོན་པས་ཀླུའི་ཞགས་པ་བཟུང་ལ་ཕུ་ཞེས་ཟློས་པ་འདི་ནི་ཕྱག་རྒྱ་ཆེན་པོའོ། །དེ་ལྟར་ཕྱག་རྒྱ་ཆེན་པོ་བཅིངས་ནས་ཕུ་ཨ་ཞེས་ཟློས་ཤིང་མདུན་དུ་སྣ་ཚོགས་པདྨའི་སྟེང་དུ་ཀླུའི་ཞགས་པ་བསྐྱེད་ལ་ཕུ་ཞེས་ཟློས་ཤིང་ཀླུའི་ཞགས་པའི་ང་རྒྱལ་བསྒོམས་ལ་དེ་ཉིད་ཀླུའི་རྒྱལ་པོ་ཤེ་ཥར་བསམས་ལ། ཤེཥ་ནཱ་ག་རཱ་ཛ་ཧོ་ཕུ་ཞེས་བརྗོད་པར་བྱའོ། །དེ་ནས་དེ་ཉིད་དུ་རྡོ་རྗེ་ལྕགས་ཀྱུ་ལ་སོགས་པས་དགུག་པ་དང་གཞུག་པ་
དང། བཅིང་བ་དང་དབང་དུ་བྱས་ལ་ཀླུའི་རྒྱལ་པོ་ཤེ་ཥའི་ཁའི་གདེངས་ཀའི་ཕྱག་རྒྱ་བཅིངས་ལ་ཕུ་དྲྀ་ཤྱ་ཞེས་བྱ་བས་བལྟ་བར་བྱའོ། །དེ་ནས་དགུག་པའི་ཕྱག་རྒྱ་དང༌། དགུག་པའི་སྙིང་པོས་རང་གི་ལུས་ལ་དགུག་པ་དང༌། གཞུག་པ་དང༌། བཅིང་བ་དང་དབང་དུ་བྱས་ལ་ཡང་གདེངས་ཀའི་ཕྱག་རྒྱ་བཅིངས་ལ། ས་མ་ཡ་སྟྭཾ་ཞེས་བརྗོད་ཅིང༌། འོད་ཀྱི་དཀྱིལ་འཁོར་བསམས་ཏེ། དེར་ཞུགས་པས་ཀླུའི་རྒྱལ་པོ་ཤེ་ཥ་དང་ལྷན་ཅིག་ཏུ་གྱུར་པར་བསམས་ལ་ས་མ་ཡ་སྟྭཾ་ཨ་ཧཾ་ཕུ་ཞེས་ལན་གསུམ་བཟླ་བར་བྱའོ། །དེ་ལ་གདེངས་ཀ་ཆེན་པོའི་ཕྱག་རྒྱ་ཞེས་བྱ་བ་ནི་འདི་ཡིན་ཏེ་མཐེ་བོ་གཉིས་བཅིངས་ལ་ཁ་ཕྱི་རོལ་བསྟན་ཏེ། སོར་མོ་བརྒྱད་གདེངས་ཀའི་ཚོགས་སུ་བྱས་པ་ནི་ཀླུ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བའི་དམ་ཚིག་གི་སོར་མོ་ཐམས་ཅད་ལེགས་པར་བཅེར་ལ་གདེངས་ཀའི་སྟེང་དུ་གཞག་པ་ནི་གདེངས་ཀའི་ལག་པའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་བདག་ཉིད་རྒྱས་བཏབ་ལ་དང་པོའི་རྡོ་རྗེ་དེ་བཞིན་དུ་བྱིན་གྱིས་བརླབས་ནས། རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ལ་ཕུ་ཞེས་བྱ་བས། ཀླུའི་ཞགས་པ་དང་རྡོ་རྗེ་རྩེ་གསུམ་པ་ཐོགས་ལ་ཕུ་ཉིད་ཀྱིས་བདག་པོའི་དབང་བསྐུར་བ་དང༌། མིང་གི་དབང་བསྐུར་བ་བླངས་ལ་ལས་ཀྱི་ཕྱག་རྒྱས་ཡང་དག་པར་མཆོད་དེ། རྣམ་པར་སྒེག་པའི་དགའ་བའི་རྡོ་རྗེ་དང༌། ཕྱག་རྒྱ་བཞིས་ཕྱག་བྱས་ལ་སྤྱན་དྲངས་པ་སྔོན་དུ་འགྲོ་བ་དང༌། ཀླུའི་རྒྱལ་པོ་ཤེ་ཥའི་སྙིང་པོའམ་རང་གི་སྙིང་པོ་དང་པོའི་རྡོ་རྗེ་བསམས་ལ། དེའི་དབུས་སུ་ཉིན་རེའི་སྦྱོར་བས་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་བཟླས་ཏེ་བསྒོམ་པར་བྱའོ། །དེ་ནས་དཀྱིལ་འཁོར་གྱི་སའི་དབུས་སུ། ཀླུའི་རྒྱལ་པོ་ཤེ་ཥའི་རྣལ་འབྱོར་དེ་བཞིན་དུ་བྱས་ལ་ཏིང་ངེ་འཛིན་གསུམ་པོ་ཇི་ལྟ་བ་བཞིན་དུ་བསྒོམ་པར་བྱའོ། །དེ་ནས་གདེངས་ཀའི་ཕྱག་རྒྱ་དང༌། ཕུ་བཛྲོ་ཏིཥྛ་མཎྜལ་ཨུཏྤཱ་དཱ་ཡཿ། ཞེས་བརྗོད་ཅིང༌། དཀྱིལ་འཁོར་ནམ་མཁར་གཞག་པར་བྱའོ། །དེ་ནས་གདེངས་ཀའི་ཕྱག་རྒྱ་དང་ཕུ་ཞེས་བྱ་བས་
བདག་ཉིད་བྱིན་གྱིས་བརླབས་ལ་ཕྱག་རྒྱ་ཆེན་པོ་བཅིངས་ཏེ་ཡོངས་སུ་བསྐུར་བར་བྱའོ། །དེ་ནས་ཇི་སྐད་བཤད་པའི་ཚུལ་གྱིས་བསྙེན་པར་བྱས་ལ། ཉི་མ་འཆར་ཀའི་ཚེ། དཀྱིལ་འཁོར་ཐིག་གདབ་པར་བྱའོ། །དེ་ནས་ཀླུའི་དཀྱིལ་འཁོར་ཀླུའི་རིགས་བརྒྱད་དང་བཅས་པ་སྔ་མ་བཞིན་དུ་བྲི་བར་བྱའོ། །དེ་ནས་སྒོ་དབྱེ་བ་བྱས་ལ་ཀླུའི་རྒྱལ་པོ་འཁོར་དང་བཅས་པ་མཆོད་ནས། རྡོ་རྗེ་གནོད་སྦྱིན་དང༌། ཕུ་བཟླས་པའི་གོས་ཀྱིས་གདོང་གཡོགས་པ་ལ་སོགས་པ་བྱས་ལ། ཕྱག་རྒྱ་བཞི་སྔོན་དུ་འགྲོ་བས་བྱང་ཆུབ་ཆེན་པོའི་སེམས་བསྐྱེད་པ་དང། གསུམ་ལ་སྐྱབས་སུ་འགྲོ་བ་བླངས་ལ་ཕྱི་རོལ་གྱི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་རང་གི་སྙིང་གར་འཛིན་ཅིང༌། རང་གི་སྙིང་གར་དེ་བཞིན་དུ་བསྐྱེད་ལ། ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ། ལག་པ་གདེངས་ཀའི་ཕྱག་རྒྱ་བཅིངས་ཏེ། དེ་ཉིད་ཀྱིས་མེ་ཏོག་གི་ཕྲེང་བ་བླངས་ཏེ། ལག་པ་གཡོན་པས་ཀླུའི་ཞགས་པ་བཟུང་སྟེ། བཛྲ་བཛྲ་ཕུ་ཞེས་ཟློས་ཤིང་དཀྱིལ་འཁོར་དུ་འཇུག་པར་བྱེད། དེ་ནས་ཀླུའི་རྒྱལ་པོ་ཤེ་ཥ་ཀླུའི་རིགས་བརྒྱད་དང་བཅས་པ་ལ་ཕྱག་བྱས་ལ། དཀྱིལ་འཁོར་ལན་གསུམ་བསྐོར་བ་བྱས་ནས། ཤེ་ཥའི་མདུན་དུ་འདུག་ལ་འདི་སྐད་ཅེས་བརྗོད་པར་བྱའོ། །ཛཿ་ཧཱུཾ་བཾ་ཧོཿ་པྲ་སིདྡྷ་མཾ། དེ་ནས་རྡོ་རྗེ་ཆུ་འཐུངས་ལ་ཨ་ཞེས་བྱ་བ་ལན་བརྒྱ་རྩ་བརྒྱད་ཟློས་ཤིང་བདག་ཉིད་ལ་དབབ་པར་བྱའོ། །ཡང་ཁྲོ་བོའི་ཁུ་ཚུར་གྱིས་སེམས་མའི་རྡོ་རྗེ་ཕྱེ་ལ་ཨ་ཞེས་བྱ་བ་དེ་བཞིན་དུ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་ཕུ་ཉིད་ཀྱིས་མེ་ཏོག་དོར་བར་བྱའོ། །དེ་ནས་དེ་བླངས་ལ་དེ་ཉིད་ཀྱིས་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་དཀྱིལ་འཁོར་བལྟ་བར་བྱའོ། །དེ་ནས་གདེངས་ཀའི་ལག་པ་བཅིངས་ལ་ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །དེ་ནས་ཤེ་ཥའི་ཕྱག་རྒྱ་བཅིངས་ལ་དེ་རྡོ་རྗེ་བལྟ་བ་ཁྲོ་བོ་དང་བཅས་པས་བལྟས་ལ་ཇི་སྲིད་དངོས་གྲུབ་སྟེར་བར་བྱེད་པ་དེ་སྲིད་ཀྱི་བར་དུ་ཕུ་ཞེས་བྱ་བ་བརྗོད་པར་བྱའོ། །དེ་
ནས་དེ་བཞིན་དུ་བལྟས་ལ་རྡོ་རྗེ་ཐལ་མོས་བསྐོར་བ་བྱས་ལ། མེ་ཏོག་གི་ཕྲེང་བ་ལ་སོགས་པའི་དབང་བསྐུར་བ་ཡང་བླང་བར་བྱའོ། །དེ་ལ་དང་པོར་རེ་ཞིག་ཕྱི་རོལ་གྱི་རྡོ་རྗེ་ཁུ་ཚུར་གྱིས་ཡོངས་སུ་བཟུང་བའི་རྡོ་རྗེ་མེ་ཏོག་གི་ལྕུག་མ་ལས། རྣམ་པར་རྒྱལ་བའི་བུམ་པ་ལ། དཔལ་རྡོ་རྗེ་སེམས་དཔའི་དཀྱིལ་འཁོར་དུ་བཤད་པའི་བུམ་པའི་སྔགས་ལན་ཉི་ཤུ་རྩ་གཅིག་བཟླས་པར་བྱའོ། །དེ་ནས་བདག་ཉིད་ཤེ་ཥར་བྱིན་གྱིས་བརླབས་ལ་ཤར་ཕྱོགས་ཀྱི་སྒོར་བལྟས་པས་དཀྱིལ་འཁོར་གྱི་ནང་དུ་སྣ་ཚོགས་པདྨ་བྲིས་ལ། དེའི་སྟེང་དུ་ཤེ་ཥའི་ཕྱག་རྒྱ་ཆེན་པོས་འདུག་སྟེ། དྲི་ལ་སོགས་པས་བདག་ཉིད་མཆོད་དེ། མཆོད་ཡོན་བླངས་ནས་ཕྱི་རོལ་གྱི་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ། ཕུ་ཨོཾ་བཛྲ་ཨ་བྷི་ཥིཉྩ་ཞེས་ཟློས་ཤིང༌། དེས་བདག་ཉིད་ལ་དབང་བསྐུར་བར་བསམ་ཞིང་ཆུ་དེ་བཏུང་བར་ཡང་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་ཞིང་རིན་པོ་ཆེའི་ཅོད་པན་གྱིས་དབང་བསྐུར་བར་བྱའོ། །དེ་ནས་ཞེས་བྱ་བ་དང༌། རྡོ་རྗེ་རྩེ་གསུམ་པ་བླངས་ལ་དེ་བཞིན་དུ་བདག་པོའི་དབང་བསྐུར་བ་དང༌། མིང་གི་དབང་བསྐུར་བ་བླངས་པར་བྱའོ། །དེ་ནས་མཆོད་པ་རྣམ་པ་ལྔ་དང་ལས་ཀྱི་ཕྱག་རྒྱ་རྣམས་ཀྱིས་བདག་ཉིད་ལ་མཆོད་ལ་ཤེ་ཥ་ལ་ཕྱག་བྱ་ཞིང་ཕུ་ཞེས་བྱ་བ་དང༌། ཕྱག་རྒྱ་བཞིའི་ཡེ་ཤེས་བླངས་ལ། བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། རང་གི་མིང་ནས་ཀྱང་བརྗོད་དེ་དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་བྱས་ལ། གདེངས་ཀའི་ལག་པས་ཤེ་ཥ་འཁོར་དང་བཅས་པ་དཀྱིལ་འཁོར་དུ་བཅུག་ལ། གདེངས་ཀའི་ཕྱག་རྒྱ་བཅིངས་ལ་ཕུ་དྲྀ་ཤྱ་ཞེས་བྱ་བས་ཤེ་ཥ་འཁོར་དང་བཅས་པ་ལ་བལྟ་བར་བྱས་ལ་ས་མ་ཡ་སྟྭཾ། ས་མ་ཡ་ཛཿ་ཧཱུཾ་བཾ་ཧོཿ་ཕུ་ཞེས་ལན་གསུམ་བརྗོད་ལ་བསྒྲུབ་པར་བྱའོ། །དེ་ནས་ཧཱུཾ་ལས་རང་གི་ལྕེ་ལ་རྡོ་རྗེ་དཀར་པོ་བསམས་ལ་ཤེ་ཥ་ལ་སོགས་པའི་ལྕེ་ལ་ཡང་ཕུ་ཞེས་བྱ་བ་བསམས་ལ། འདི་ནི་དེ་རྣམས་ཀྱི་ཆོས་ཀྱི་ཕྱག་རྒྱའོ། །ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསམས་ལ།
ཤེ་ཥ་ལ་སོགས་པའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་ཧཱུཾ་ལས་རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ་ཤེ་ཥ་ལ་སོགས་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་རྡོ་རྗེ་རིན་གྱི་ཕྱག་རྒྱས་ཤེ་ཥ་ལ་སོགས་པ་ལ་དབང་བསྐུར་ལ་མཆོད་པ་རྣམ་པ་ལྔས་མཆོད་པར་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་སྦྱིན་སྲེག་བྱའོ། །དེ་ནས་ཡང་ཕྱག་རྒྱ་ཆེན་པོ་བཅིངས་ལ་ཇི་སྲིད་མཚན་མ་ཐོབ་པར་འགྱུར་བ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ལེགས་པར་མཆོད་ལ་ཕྱག་བྱས་ཏེ། སློབ་མ་གཞུག་པའི་ཕྱིར་བཀའ་ནོས་ལ་སློབ་མ་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་སློབ་མ་ཐམས་ཅད་དུག་མེད་པར་བྱས་ལ། རང་གི་འཇུག་པའི་ཚོ་གས་བཅུག་ལ་རང་གི་ཆོ་ག་དང་དེ་རྣམས་ཀྱི་ཁྱད་པར་གྱི་ཆོ་ག་སྔ་མ་ལྟར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དཔལ་མཆོག་དང་པོའི་དུམ་བུ་གཉིས་པ་རྩ་བའི་རྒྱུད་ལས། ཀླུའི་དཀྱིལ་འཁོར་གྱི་རྟོག་པ་རྒྱས་པར་བཤད་པ་རྫོགས་སོ།། །།བདེ་བ་ཆེན་པོ་རྡོ་རྗེ་གསང་བ་ནི་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དེ། རྟོག་པ་བཅུའོ། །དེ་ཉིད་ནི་རྟོག་པའི་རྒྱལ་པོ་ཆེན་པོ་དེ་ཉིད་ལས་བདེ་བ་ཐམས་ཅད་ཀྱི་དམ་ཚིག་ཆེན་པོ་རྡོ་རྗེ་གསང་བའི་ཆོ་ག་རྒྱས་པ་རྫོགས་པ་ནི། རྩ་བའི་རྒྱུད་ཀྱི་ཚུལ་གྱིས་སོ། །དེ་ལ་བདེ་བ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པའོ། །དེ་ཉིད་ནི་འཇིག་རྟེན་དང་འཇིག་རྟེན་ལས་འདས་པའི་ཚུལ་གྱིས་ཐམས་ཅད་དུ་ཁྱབ་པས་ན་དམ་ཚིག་གོ །དེ་ལས་བྱུང་བ་ནི་དང་པོའི་རྡོ་རྗེའོ། །དེའི་གསང་བ་ནི་ཇི་སྐད་དུ་བཤད་པའི་འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་བཅུའོ། །དེའི་ཆོ་ག་རྒྱས་པ་ནི་བསྒྲུབ་པར་བྱ་བ་དང༌། སྒྲུབ་པར་བྱེད་པའི་ཚོགས་སོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ལས། དུམ་བུ་གཉིས་པའི་རྩ་བའི་རྒྱུད་ལས་འཇིག་རྟེན་པ་དང་འཇིག་རྟེན་ལས་འདས་པའི་དཀྱིལ་འཁོར་བཅུའི་རྟོག་པ་བཤད་པ་
རྫོགས་སོ།། །།དེ་ལྟར་དུམ་བུ་གཉིས་པ་རྩ་བའི་རྒྱུད་ལས། དཀྱིལ་འཁོར་བཅུའི་རྟོག་པ་གསུངས་ནས། ད་ནི་ཤེས་རབ་ཀྱི་ཕ་རོལ་ཏུ་ཕྱིན་པར་གསུངས་པའི་རྟོག་པ་རྣམས་ཀྱང་གལ་ཏེ་གདུལ་བྱའི་ཉེས་པས་གྲུབ་པར་མ་གྱུར་ན། བསྒྲུབ་པའི་ཁྱད་པར་གྱིས་མྱུར་དུ་བསྒྲུབ་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པས་དཔལ་རྡོ་རྗེ་སེམས་དཔའི་གསང་བའི་རྟོག་པ་གསུངས་པ་ཡིན་ནོ། །དེ་ནས་ཞེས་བྱ་བ་ནི་འདས་མ་ཐག་པ་སྟོན་པའི་ཚིག་སྟེ། སྔར་བཤད་པའི་ཚུལ་གྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་སྒོའི་ཆོས་ཀྱི་རྣམ་གྲངས་བསྟན་ནས་དོན་དེ་བསྒོམ་པར་བྱ་བའི་ཕྱིར་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་ཀྱི་གཞལ་ཡས་ཁང་བསྐྱེད་ནས། དེར་ཇི་ལྟ་བ་བཞིན་དུ་བཞུགས་ཏེ་རྡོ་རྗེ་སེམས་དཔའི་དབང་བསྐུར་ནས། བཅོམ་ལྡན་འདས་རྣམ་པར་སྣང་མཛད་བཞུགས་པ་དེའི་རྗེས་ཐོགས་ཉིད་ལའོ། །རྡོ་རྗེ་རི་རབ་ཆེན་པོའི་རྩེ་མོ་དེའི་སྟེང་ན་རྡོ་རྗེ་གཞལ་ཡས་ཁང་ཆེན་པོ་ན། བདེ་བ་ཆེན་པོའི་ཚུལ་གྱིས་བཞུགས་སོ་ཞེས་བྱ་བར་སྦྱར་རོ། །དེ་བཞིན་གཤེགས་པ་ཐམས་ཅད་ཀྱི་ཚོགས་ལས་བྱུང་བ་འདོད་པའི་ཁམས་ཐམས་ཅད་ཀྱི་གདུལ་བྱ་རྣམས་ལ་སོ་སོར་སྣང་བར་གྱུར་བ་རྡོ་རྗེའི་རང་བཞིན་ཅན་གྱི་རི་རབ་ཆེན་པོའི་རྩེ་མོ་དེའི་སྟེང་ན་ཕྱོགས་བཅུ་ཐམས་ཅད་དུ་གནས་པའི་རྡོ་རྗེ་ནོར་བུ་ཆེན་པོར་རོ། །དེར་ཁྱད་པར་ཇི་ལྟ་བུས་བཅོམ་ལྡན་འདས་བཞུགས་ཤེ་ན་རྡོ་རྗེ་རིན་ཆེན་པོ་ལ་སོགས་པ་སྨོས་ཏེ། རྡོ་རྗེ་རྩེ་ལྔ་པས་རྩེ་མོ་མཚན་པའི་ཡིད་བཞིན་གྱི་ནོར་བུ་རིན་པོ་ཆེ་འདིར། ནོར་བུ་རིན་པོ་ཆེ་ཡིན་ཏེ། གང་གི་ཕྱིར་རྡོ་རྗེ་ཕྱེད་དང་ལྡན་པ་ནི་རྡོ་རྗེ་རིན་ཆེན་ནོ་ཞེ་འོག་ནས་བཤད་པའི་ཕྱིར་རོ། །དེ་རྣམས་ཀྱི་འོད་འབར་བ་སྟེ། དེ་ཉིད་ཀྱིས་གསལ་བའི་སྣང་བ་འདི་ལ་ཡོད་པས་ན། རྡོ་རྗེ་རིན་ཆེན་འོད་གསལ་བའོ། །དེས་བརྒྱན་པ་ནི་བརྒྱན་པར་བྱས་པའོ། །དྲ་བ་དང་དྲ་བ་ཕྱེད་ལ་སོགས་པས་འོད་དང་མདངས་དྲི་མ་མེད་པ་འདི་ལ་ཡོད་པས་ན་དྲི་མེད་མདངས་དང་ལྡན་པའོ། །དྲི་མ་མེད་པའི་འོད་ཀྱིས་བརྒྱན་པ་དེ་ནི་དེ་སྐད་ཅེས་བྱའོ། །ཟུར་བཞི་པ་ཞེས་བྱ་བ་ལ་
སོགས་པ་ནི་བཤད་ཟིན་ཏོ། །བ་དན་དང་འཕན་རླུང་གིས་བསྐྱོད་པ་ནི་ཤིན་ཏུ་མཛེས་པ་དེ་ལ་དྲིལ་བུ་བཏགས་པ་དེས་སྒྲ་སྒྲོགས་པ་ནི་ཐེག་པ་གསུམ་གྱིས་ཆོས་སྟོན་པའི་སྒྲ་སྒྲོགས་པ་དེ་ནའོ། །དྲ་བ་ཞེས་བྱ་བ་ལ་སོགས་པ་ལ་དེ་ལ་དྲ་བ་ནི་མུ་ཏིག་གི་ཆུན་འཕྱང་དབུས་ན་ཡོད་པའོ། །མེ་ལོང་ནི་གོ་བར་ཟད་དོ། །མེ་ཏོག་ཆུན་པོ་ནི་དཔག་བསམ་གྱི་ཤིང་གི་མེ་ཏོག་གོ །དྲ་བ་དང་མེ་ལོང་དང་མེ་ཏོག་ཆེན་པོ་དང༌། མེ་ཏོག་གི་ཕྲེང་བ་དང༌། རྒྱན་རྣམས་ཀྱིས་བསྐོར་བ་ནི་བརྒྱན་པའོ། །དེ་ལྟ་བུ་དེར་བདེ་བ་ཆེན་པོ་རྡོ་རྗེ་ཆེན་པོ་སྟེ་དེར་དང་པོའི་རྡོ་རྗེའོ། །རྡོ་རྗེ་ཀུན་གྱིས་ནི་རྡོ་རྗེ་དང༌། རྡོ་རྗེ་རིན་ཆེན་དང༌། རྡོ་རྗེ་པདྨ་དང༌། སྣ་ཚོགས་རྡོ་རྗེའོ། །བདེ་བ་ཆེན་པོ་རྡོ་རྗེ་ཆེན་པོ་དང༌། རྡོ་རྗེ་ཐམས་ཅད་ནི་བདེ་བ་ཆེན་པོ་རྡོ་རྗེ་ཐམས་ཅད་དོ། །དེ་རྣམས་ཀྱིས་མངོན་པར་འདུས་བྱས་པ་ནི་བསྐྱེད་པའོ། །དེར་རྡོ་རྗེ་སེམས་དཔའི་སྣང་བ་ཆེན་པོ་ཡོད་པ་ནི་རྡོ་རྗེ་ཆེན་པོའི་སྣང་བ་ཆེན་པོའོ། །དེར་སངས་རྒྱས་ཀུན་གྱིས་ཞེས་བྱ་བ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་ཀྱིས་ངེས་པར་བསྟེན་པ་སྟེ། དེར་བཞུགས་པས་དེ་བསྟེན་པར་མཛད་པའོ། །གནས་དེར་བྱང་ཆུབ་སེམས་དཔའི་རང་བཞིན་ཅན་གྱི་སེམས་དཔའ་ནི་བྱང་ཆུབ་སེམས་དཔའ་སྟེ། དེ་རྣམས་ཀྱིས་གནས་པ་ནི་སྤྱོད་ལམ་རྣམ་པ་བཞི་དང༌། ཐུགས་རྗེ་ཆེན་པོ་ལ་སོགས་པ་ཡིད་ཀྱིས་བཞུགས་པའོ། །དེ་མཆོག་ཏུ་གྱུར་པས་ན་བྱང་ཆུབ་སེམས་དཔའི་གནས་པ་མཆོག་ཅེས་བྱའོ། །དེར་རྡོ་རྗེ་འཆང་བ་ཀུན་ནི་དེ་བཞིན་གཤེགས་པ་རྣམས་དང༌། རིགས་ལྔ་པོ་རྣམས་སོ། །དེ་རྣམས་ཀྱི་གནས་ནི་བཞུགས་གནས་ཏེ། དེར། བདེ་བ་ཆེན་པོ་རྡོ་རྗེ་ཆེ། །ནོར་བུ་རིན་ཆེན་ཞེས་བྱ་བ་ནི། བདེ་བ་ཆེན་པོའི་ནོར་བུ་ཆེན་པོ་རྡོ་རྗེ་ནོར་བུ་རིན་ཆེན་ནི་ཇི་སྐད་དུ་བཤད་པའི་ནོར་བུ་ཆེན་པོའོ། །དེས་མཆོག་ཏུ་གྱུར་པ་ནི་དམ་པར་གྱུར་པ་གང་ཡིན་པ་དེ་ལ་མིང་དེ་སྐད་ཅེས་བྱ་བས་ནོར་བུ་རིན་ཆེན་མཆོག་ཅེས་བྱ་བ། རྡོ་རྗེ་ཆེན་པོའི་གཞལ་ཡས་ཁང་ཞེས་བྱའོ། །དེར་སྟོང་པ་ཉིད་བཅོ་བརྒྱད་ཀྱི་ཏིང་ངེ་འཛིན་
ནི་རྡོ་རྗེ་ཆེན་པོ་སྟེ། དེར་རྒྱུ་མཐུན་པ་ལས་བྱུང་བའི་གཞལ་ཡས་ཁང་ཡིན་པས་ན། རྡོ་རྗེ་ཆེན་པོའི་ཁང་བརྩེགས་ན། །ཞེས་བྱའོ། །ན་ཞེས་བྱ་བའི་སྒྲ་ནི་ངེས་པར་གཟུང་བའོ། །རྣམ་པར་བཞུགས་ཞེས་བྱ་བ་ནི། དེ་ལྟ་བུའི་ཁྱད་པར་ཅན་གྱི་གནས་ན་བདེ་བ་ཆེན་པོ་བཞུགས་པ་ནི་གནས་པར་མཛད་པའོ། །འདིར། བདེ་བ་ཆེན་པོས་རྣམ་པར་བཞུགས། །ཞེས་བྱ་བ་ནི་འདི་ལ་བདེ་བ་ཆེན་པོ་མངའ་བས་ན། བདེ་བ་ཆེན་པོ་ནི་དཔལ་རྡོ་རྗེ་སེམས་དཔའ་སྟེ། འདིའི་གཉིས་སུ་མེད་པའི་ཡེ་ཤེས་ཞེས་བྱ་བའི་ཐ་ཚིག་གོ །བདེ་བ་ཆེན་པོ་འདིའི་ཁྱད་པར་ཇི་ལྟ་བུ་ཞིག་ཅེ་ན། ཐོག་མ་ཐ་མ་མེད་ཅེས་བྱ་བ་ལ་སོགས་པས་དེ་ཁྱད་པར་དུ་བྱས་པ་ཡིན་ཏེ། ཐོག་མ་ཐ་མ་མེད་ཅེས་བྱ་བ་ནི། དང་པོ་ནི་ཐོག་མར་སྐྱེ་པའོ། །ཐ་མ་ནི་དུས་ཚིགས་མེད་པར་འཇིག་པའོ། །གང་ལ་ཐོག་མ་དང་ཐ་མ་མེད་པ་དེ་ནི་ཐོག་མཐའ་མེད་པའོ། །སེམས་དཔའ་ནི་དམིགས་པ་མེད་པའི་ཐུགས་རྗེ་ཆེན་པོའི་ཚུལ་གྱིས་འགྲོ་བའི་དོན་ལ་ཆགས་པས་ན་སེམས་དཔའོ། །རྡོ་རྗེ་སེམས་དཔའ་ཞེས་བྱ་བ་ནི་སྟོང་པ་ཉིད་བཅུ་དྲུག་གི་རང་བཞིན་ཡིན་པས་ན་རྡོ་རྗེ་སེམས་དཔའོ། །དེ་ཡང་ཐོག་མ་དང་ཐ་མ་མེད་པ་ཉིད་དང༌། རྡོ་རྗེ་སེམས་དཔའ་ཉིད་ཀྱིས་དབང་དུ་མཛད་ནས། དེ་ལ་ཇི་ལྟར་ན་ཐོག་མ་དང་ཐ་མ་མེད་པ་ཡིན་ཞིང་རྡོ་རྗེ་སེམས་དཔའ་ཡིན་ཞེ་ན། ནམ་མཁའ་ལས་བྱུང་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །རྡོ་རྗེ་སེམས་དཔའི་དམ་ཚིག་སེམས། །རྡོ་རྗེ་སེམས་དཔའ་ཞེས་བཤད་དོ། །ཞེས་འོག་ནས་བཤད་པའི་ཕྱིར་རོ། །ཡང་དགའ་བ་ཆེན་པོ་ཅི་ཞིག་ལ་ཆགས་ཤེ་ན། སེམས་ཅན་རྣམས་ལ་ཆགས་པར་མཛད་དོ་ཞེས་གསུངས་པ་ཡིན་ནོ། །དགའ་བ་ཆེ་ཞེས་བྱ་བ་ནི་ཆོས་ཐམས་ཅད་ཀྱི་དེ་ཁོ་ན་ཉིད་ལ་དགྱེས་པ་དང༌། སེམས་ཅན་གྱི་དོན་ལ་དགྱེས་པས་ན་དགའ་བ་ཆེའོ། །དེ་ཡང་ཇི་ལྟར་ན། བཅོམ་ལྡན་འདས་དགའ་བ་ཆེན་པོ་ཉིད་ཡིན་ཞེ་ན། ཉེས་བྲལ་ཤིན་ཏུ་རྟོག་པ་དང༌། །ཆགས་པ་ཀུན་ལ་རྗེས་སུ་དགྱེས། །དེ་ཉིད་ཀྱིས་གསང་བཅོམ་
ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་གསུངས་པའི་ཕྱིར་རོ། །ཀུན་དུ་བཟང་པོ་ཆེ་ཞེས་བྱ་བ་ནི་གདུལ་བྱ་རྣམས་ལ་འདི་ནས་ཀུན་ནས་བཟང་ཞིང་དགེ་བས་ན་ཀུན་དུ་བཟང་པོ་སྟེ། ཀུན་དུ་བཟང་པོ་ཡིན་པའམ། ཉོན་མོངས་བས་ཆགས་དང་བཅས་པ་དང་བྲལ་བ་ཉིད་ཀྱི་ཕྱིར་ཀུན་ནས་ཡོངས་སུ་དག་པས་ན། ཀུན་དུ་བཟང་པོའོ། །ཀུན་བདག་ཉིད་ཅེས་བྱ་བ་ནི་ཐམས་ཅད་ཀྱི་བདག་པོ་སྟེ། རང་བཞིན་ཡིན་པས་ན་ཀུན་བདག་ཉིད་དེ། རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ཀྱི་རང་བཞིན་ཞེས་བྱ་བའི་ཐ་ཚིག་གོ།། དོན་གཉིས་པ་འདི་ཉིད་ཀྱི་དབང་དུ་བྱས་ནས། ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའ་སེམས་དཔའི་མཆོག །ཅེས་འོག་ནས་བཤད་པ་ཡིན་ནོ། །རྡོ་རྗེ་སྙེམས་ཚུལ་བདག་པོའི་བདག །ཅེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་གང་ཡིན་པ་དང༌། དེ་ཉིད་ཀྱི་ལྷ་མོ་གང་ཡིན་པ་དེ་ནི་རྡོ་རྗེ་སྙེམས་ཚུལ་ལོ། །དེའི་བདག་པོ་ནི་བྱང་ཆུབ་ཆེན་པོའི་མཚན་ཉིད་ཅན་གྱི་ཐུགས་སོ། །དེའི་དབང་དུ་བྱས་ནས་ཕྱག་རྒྱ་དེ་གང་གི་ཕྱིར་འཁོར་བ་ཇི་སྲིད་པའི་བར་དུ་རྒྱུན་དུ་འགྲོ་བའི་དོན་མཛད་པའི་ཕྱིར་བཞུགས་པ་ཡིན་ལ། ཕྱག་རྒྱ་ཆེན་པོ་དེ་ལ་ཡང་རྟག་པ་ཉིད་དུ་དབང་ཉིད་ཀྱིས་གཙོ་བོར་གྱུར་པ་ཉིད་མངའ་བའོ་ཞེས་བདག་པོའི་སྒྲ་གཉིས་པས་སྟོན་པ་ཡིན་ནོ། །དེ་ནས་ཡང་བཅོམ་ལྡན་འདས་ཀྱིས། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་ཕྱག་རྒྱ་ཡིས། །རྡོ་རྗེའི་དབང་ཕྱུག་ཆེར་བསྟོད་པ། །རྡོ་རྗེ་སྙེམས་ཚུལ་བདག་པོའི་བདག །ཅེས་གསུངས་པ་ཡིན་ནོ། །ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པའི་བདེ་བ་ཆེན་པོ་ཉིད་དུ་ཇི་ལྟར་འགྱུར་ཞེས་རྟོག་པ་དག་ཡོད་པས་བདེ་བ་ཆེན་པོ་ཉིད་རྟོགས་པར་བྱ་བའི་ཕྱིར། སེམས་ཅན་ཀུན་གྱིས་ཞེས་བྱ་བ་ལ་སོགས་པ་རང་གི་སེམས་ཡོངས་སུ་སྤྱང་བའི་ཡེ་ཤེས་གསུངས་པ་ཡིན་ཏེ། སེམས་ཅན་ཀུན་གྱི་སེམས་ཀུན་གཞིའི་རྣམ་པར་ཤེས་པ་གང་ཡིན་པ་དེ་ཉིད་ཆོས་བདག་མེད་པའི་ཚུལ་གྱིས་
རང་བཞིན་གྱིས་འོད་གསལ་བ་ཡིན་ཞིང༌། གཟུང་བ་དང་འཛིན་པའི་རྣམ་པར་རྟོག་པས་བསྐྱོད་པར་མི་ནུས་པས་ན་བརྟན་པ་ཡིན་ལ། ཉོན་མོངས་པ་དང༌། ཕུང་པོ་དང༌། འཆི་བདག་དང༌། ལྷའི་བུའི་བདུད་ཀྱིས་རྡོ་རྗེ་ལྟར་མི་ཕྱེད་པ་ཡིན་ལ། དེ་ལྟར་མི་ཕྱེད་པ་དེ་ཉིད་ཀྱིས་བྱང་ཆུབ་ཆེན་པོ་ལས་བཟློག་པར་མི་ནུས་པའི་ཕྱིར་སེམས་དཔའ་ཞེས་བཤད་དེ། མི་ཤིགས་པའི་ཚུལ་ཅན་ནོ། །མཉམ་པར་ག་ཞག་པས་ཏིང་ངེ་འཛིན། །ཞེས་བྱ་བ་ནི། མི་ཤིགས་པའི་ཚུལ་ཅན་གྱི་སེམས་དེ་ཉིད་སེམས་ཅན་ཐམས་ཅད་ཀྱི་རྣམ་པར་རྟོག་པ་ཐམས་ཅད་དང་བྲལ་ལ། དེ་བཞིན་ཉིད་དུ་རོ་གཅིག་པར་སེམས་རྩེ་གཅིག་པ་ཉིད་ནི་མཉམ་པར་གཞག་པའི་རང་བཞིན་ཉིད་ཡིན་པས་ཏིང་ངེ་འཛིན་ཞེས་བྱ་བར་བཤད་དོ། །ངེས་པའི་ཕྱིར་ན་རྡོ་རྗེར་གྱུར། །ཅེས་བྱ་བ་ནི། སེམས་ཅན་ཐམས་ཅད་ཀྱི་སེམས་ཆོས་བདག་མེད་བའི་རང་བཞིན་ཅན་དེ་ཉིད་ཟླ་བའི་དཀྱིལ་འཁོར་གྱི་རྣམ་པ་དང༌། ཟླ་བའི་དཀྱིལ་འཁོར་ལ་རྡོ་རྗེ་རྩེ་ལྔ་པ། རྡོ་རྗེའི་བདག་ཉིད་ཅན་དུ་བསྒོམས་པའི་ངེས་པའི་རྒྱུར་གྱུར་པ་ལས་རྡོ་རྗེ་ཉིད་དུ་གྱུར་པ་ཡིན་ཏེ། རྡོ་རྗེ་ངོ་བོ་ཉིད་ནི་རྡོ་རྗེ་ངོ་བོ་ཉིད་དེ་རྡོ་རྗེའི་རང་བཞིན་ཐོབ་པའོ། །སེམས་དཔར་བྱིན་རླབས་སྦྱོར་བ་ཡིས། །རྡོ་རྗེ་སེམས་དཔའ་ཉིད་དུ་འགྱུར། །ཞེས་བྱ་བ་ནི། རྡོ་རྗེར་གྱུར་པའི་སེམས་དེ་ཉིད་སེམས་དཔར་བྱིན་རླབས་ཚུལ་གྱིས་ཞེས་བྱ་བ་ལ་རྡོ་རྗེ་སེམས་དཔའི་སྐུར་རྣམ་པར་བསྒོམས་ནས། རྡོ་རྗེ་སེམས་དཔའི་སྐུར་ཡང་འགྱུར་རོ། །དེ་ལྟར་རྡོ་རྗེ་སེམས་དཔའ་སྐྱེད་པ་བསྟན་ནས། ད་ནི་དེ་ཉིད་ཅེས་བྱ་བ་ལ་སོགས་པས་དེ་བཞིན་གཤེགས་པར་བསྐྱེད་པར་གསུངས་པ་ཡིན་ནོ། །དེ་ཉིད་ཅེས་བྱ་བ་ནི་ཐོག་མ་དང་ཐ་མ་མེད་པ་ཆོས་ཀྱི་དབྱིངས་དེ་ཉིད་བདུད་བཞི་བཅོམ་པས་ན། བཅོམ་ལྡན་འདས་ཞེས་བྱའོ།། རྟག་པ་ནི་བརྟན་ཞིང་མི་འགྱུར་པའོ། །བྱང་ཆུབ་སྤྱོད་པའི་རྗེས་འགྲོ་ཡིན། །ཞེས་བྱ་བ་ནི་མངོན་པར་བྱང་ཆུབ་པ་ལྔ་ནི་བྱང་ཆུབ་བོ། །དེའི་དོན་དུ་སྤྱོད་པ་ནི་བྱང་ཆུབ་སྤྱོད་པ་སྟེ། རང་གི་སེམས་ཇི་ལྟ་བ་བཞིན་དུ་རྟོགས་པའི་སངས་རྒྱས་ཀྱི་རང་བཞིན་ཇི་ལྟ་བ་བཞིན་དུ་
རྟོགས་ཤིང་རྗེས་སུ་འགྲོ་བ་ཡིན་པའི་ཕྱིར། བྱང་ཆུབ་སྤྱོད་པ་རྗེས་འགྲོ་ཡིན། །ཞེས་བྱའོ། །ཇི་ལྟར་ན་འདི་བྱང་ཆུབ་ཀྱི་སྤྱོད་པའི་རྗེས་སུ་འགྲོ་བ་ཡན་ཞེ་ན། རང་གི་སེམས་སོ་སོར་རྟོགས་པ་ལ་སོགས་པ་ནི་སངས་རྒྱས་བྱང་ཆུབ་ཅེས་བྱ་བ་ལ་སོགས་པ་ནི། རང་ཉིད་ཀྱི་སེམས་ནི་རང་གི་སེམས་ཏེ་ཀུན་གཞི་རྣམ་པར་ཤེས་པ་དང༌། ཉོན་མོངས་པ་ཅན་གྱི་ཡིད་དང༌། ཡིད་ཀྱི་རྣམ་པར་ཤེས་པ་དང༌། མིག་ལ་སོགས་པའི་སྒོ་ལྔའི་རྣམ་པར་ཤེས་པའོ། །དེའི་སོ་སོར་རྟོགས་པ་ནི་གཟུང་བ་དང་འཛིན་པའི་ངོ་བོ་ཉིད་མེད་པའི་རྟོགས་པའོ། །དེ་ཉིད་ལ་སོགས་པ་སངས་རྒྱས་ཀྱི་བྱང་ཆུབ་གང་ཡིན་པ་དེ་ནི་རང་གི་སེམས་སོ་སོར་རྟོགས་པ་ལ་སོགས་པ་ནི་སངས་རྒྱས་ཀུན་གྱི་བྱང་ཆུབ་ཡིན་ཏེ། འཕགས་པ་དེ་ཁོ་ན་ཉིད་བསྡུས་པ་ལས་མངོན་པར་བྱང་ཆུབ་པ་རྣམ་པ་ལྔ་ཇི་ལྟར་གསུངས་པ་དེ་བཞིན་དུ། མངོན་པར་བྱང་ཆུབ་པ་ལྔ་བསྒོམས་པས་བཅོམ་ལྡན་འདས་དེ་སངས་རྒྱས་ཀྱི་བྱང་ཆུབ་ཀྱི་རང་བཞིན་དུ་གྱུར་པས་ན་སེམས་དཔར་བྱིན་གྱིས་བརླབས་པ་ལས་བྱུང་བའི་རིགས་ཀྱི་རང་བཞིན་དུ་འགྱུར་རོ་ཞེས་སྟོན་པ་ཡིན་ནོ། །བདུད་ཅེས་བྱ་བ་ནི་དེ་ཉིད་ནི་སེམས་ཅན་ཐམས་ཅད་ཀྱི་བདུད་ལྟ་བུའི་སེམས་ཅན་ཡིན་པས་ན་བདུད་དོ། །སངས་རྒྱས་ཞེས་བྱ་བ་ནི་སེམས་དཔའི་རྡོ་རྗེར་གྱུར་པ་དེ་ཉིད་སངས་རྒྱས་ཀྱི་སྐུར་བསྒོམས་པས་སངས་རྒྱས་སུའོ། །རྡོ་རྗེ་ཆེན་པོ་ཞེས་བྱ་བ་ནི་རྡོ་རྗེ་ཡང་ཡིན་ལ་ཆེན་པོ་ཡང་ཡིན་པས་ན་རྡོ་རྗེ་ཆེན་པོ་སྟེ། དང་པོའི་རྡོ་རྗེའོ། །གང་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་འཆང་ཆེན་པོ་ཉིད་ཐོབ་པར་བྱ་བའི་ཕྱིར། །གང་ཞིག་མཛད་པ་དེ་ནི་རྡོ་རྗེ་འཆང་ཆེན་པོ་ཞེས་བྱའོ། །རྡོ་རྗེ་ཆེན་པོ་འཛིན་པ་ཉིད། ཅེས་བྱ་བ་ནི་རྡོ་རྗེ་སེམས་དཔར་གྱུར་པའི་བཅོམ་ལྡན་འདས་དེ་ཉིད་སེམས་དཔར་བྱིན་གྱིས་བརླབས་པའི་རྡོ་རྗེ་དང་དྲིལ་བུ་བསྣམས་པའི་ཕྱག་རྒྱ་ཆེན་པོའི་ཚུལ་གྱི་ཏིང་ངེ་འཛིན་གྱིས་བསྐྱེད་པའི་རྡོ་རྗེ་འཛིན་པ་ཆེན་པོའོ། །དེ་ཉིད་དེ་བཞིན་གཤེགས་པའི་རིགས། །ཞེས་བྱ་བ་ནི་རྡོ་རྗེ་འཆང་ཆེན་པོར་གྱུར་པའི་སེམས་དཔའ་དེ་ཉིད་རྡོ་རྗེ་ཡིད་ལས་བྱུང་བའི་སྐུར་བསྒོམས་
ན་དེ་བཞིན་གཤེགས་པའི་རིགས་སུ་འགྱུར་རོ། །དེ་ཉིད་རྡོ་རྗེ་རིགས་ཆེན་པོ། །ཞེས་བྱ་བ་ནི་སེམས་དཔའི་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་གྱུར་པ་དེ་ཉིད་རབ་ཏུ་དགའ་བའི་རྡོ་རྗེ་ཁྲོ་བོ་ལ་སོགས་པའི་སྐུར་བསྒོམས་ན། རབ་ཏུ་དགའ་བའི་རྡོ་རྗེ་སེམས་དཔའ་ལ་སོགས་པའི་ཁྲོ་བོའི་ཚུལ་གྱིས་ནམ་མཁའ་ཆེན་པོ་དང་མཉམ་པའི་རྡོ་རྗེའི་རིགས་སུ་འགྱུར་རོ། །དེ་ཉིད་པདྨའི་རིགས་དག་པ། །ཞེས་བྱ་བ་ནི་སེམས་དཔར་བྱིན་གྱིས་བརླབས་པའི་སྦྱོར་བའི་རྡོ་རྗེ་སེམས་དཔར་གྱུར་པ་དེ་ཉིད་རྡོ་རྗེ་འཇིག་རྟེན་དབང་ཕྱུག་ལ་སོགས་པའི་སྐུར་བསྒོམས་པས་རྡོ་རྗེ་འཇིག་རྟེན་དབང་ཕྱུག་ལ་སོགས་པའི་ཚུལ་གྱིས་རང་བཞིན་གྱིས་དག་པའི་པདྨའི་རིགས་སུ་འགྱུར་རོ། །དེ་ཉིད་ནོར་བུའི་རིགས་དམ་པ། །ཞེས་བྱ་བ་ནི་སེམས་དཔར་བྱིན་གྱིས་བརླབས་པའི་སྦྱོར་བ་ལས་བྱུང་བའི་རྡོ་རྗེ་སེམས་དཔའ་དེ་ཉིད་འཕགས་པ་ནམ་མཁའི་སྙིང་པོའི་སྐུ་དང༌། དེའི་རིགས་ཀྱི་ཚུལ་དུ་བསྒོམས་ན་ནོར་བུའི་རིགས་དམ་པར་འགྱུར་རོ། །དེ་ཉིད་འདོད་ཆགས་ཞེས་བྱ་བ་ནི་སེམས་ཅན་སྨིན་ཅིང་གྲོལ་བ་ལ་ཆགས་པ་ནི་འདོད་ཆགས་སོ། །ཆགས་བྲལ་ཉིད་ཅེས་བྱ་བ་ནི། །འདོད་པ་ཐམས་ཅད་དང་བྲལ་བའི་རང་བཞིན་ཉན་ཐོས་དང༌། རང་སངས་རྒྱས་ཀྱི་བྱང་ཆུབ་ཅེས་བྱ་བའི་ཐ་ཚིག་གོ །འདོད་ན་ཞེས་བྱ་བ་ནི་འདོད་ཅིང་དོན་དུ་གཉེར་བ་ཞེས་བྱ་བའི་ཐ་ཚིག་སྟེ། འདོད་པ་ནི་བཅོམ་ལྡན་འདས་རྡོ་རྗེ་སེམས་དཔའ་ནི་འདོད་པ་ཞེས་གསུངས་པ་ཡིན་ནོ། །ཐར་པ་ཞེས་བྱ་བ་ནི་གཉིས་སུ་མེད་པའི་སེམས་དང་སེམས་ལས་བྱུང་བ་ནི་ཐར་པ་ཡིན་པའམ། བདེ་བ་ཆེན་པོ་ལ་བྱ་སྟེ། ང་ནི་ཐར་པའོ་ཞེས་འོག་ནས་བཤད་པའི་ཕྱིར་རོ། །དུས་གསུམ་ཞེས་བྱ་བ་ནི་དུས་གསུམ་དུ་སྣང་བའི་ཡེ་ཤེས་ཀྱི་ངོ་བོ་ཡིན་པའི་ཕྱིར་རོ། །སྲིད་གསུམ་ཞེས་བྱ་བ་ནི་མིང་པོ་གསུམ་གྱི་ཚུལ་གྱིས་སེམས་ཅན་གྱི་དོན་བྱེད་པའི་ཕྱིར་རོ། །མཆོག་གསུམ་ཞེས་བྱ་བ་ནི་དེ་ཉིད་ཀྱི་མིང་གི་ཁྱད་པར་གཞན་ནོ། །འཇིག་རྟེན་གསུམ་ཞེས་བྱ་བ་ནི་སའི་འཇིག་རྟེན་ལ་སོགས་པའི་རང་བཞིན་ཡིན་པའི་ཕྱིར་རོ། །ཁམས་གསུམ་པ་ཞེས་བྱ་བ་ནི་སའི་འཇིག་རྟེན་ལ་སོགས་པའི་
སེམས་ཅན་གྱི་འདོད་པ་དང་གཟུགས་དང་གཟུགས་མེད་པའི་ཚུལ་གྱིས་གནས་པར་མཛད་པའི་ཕྱིར་རོ། །མི་གཡོ་བ་ཞེས་བྱ་བ་ནི་མི་འགྱུར་བ་སྟེ། རི་རབ་ལ་སོགས་པ་ཐམས་ཅད་དོ། །མཆོག་ནི་དམ་པའོ། །བརྟན་ཞིང་སྲ་བ་ནི་རྡོ་རྗེ་དང་འདྲ་པའོ། །ནོར་ཆེ་བ་ནི་རིན་པོ་ཆེའི་འབྱུང་ཁུང་ཡང་དེ་ཉིད་ཡིན་ནོ། །རྒྱུ་བ་ཞེས་བྱ་བ་ནི་སེམས་དང་ལྡན་པའི་སྟོབས་ཀྱིས་འགྲོ་བས་ན་རྒྱུ་བའོ། །དེ་ཉིད་བསྟན་པ་ནི་སེམས་ཀྱི་འདུ་བྱེད་པ་ཞེས་བྱ་བ་ཡིན་ཏེ། སེམས་ཀྱིས་འདུ་བྱས་པ་ནི་སེམས་ཀྱི་འདུ་བྱེད་དེ་སེམས་ཀྱི་འདུ་བྱེད་དེ་ལས་དེ་ཤིན་ཏུ་འགྲོ་བས་ན་རྒྱུ་བ་སྟེ། བཅོམ་ལྡན་འདས་སོ། །འདོད་ཆགས་ལ་སོགས་པའི་སེམས་ལས་བྱུང་བའི་ཚུལ་སྟོན་པའི་སྒོ་ནས་ཁམས་གསུམ་དུ་ཟོ་ཆུན་བརྒྱུད་པའི་ཚུལ་གྱིས་ཡང་དང་ཡང་དུ་སྐྱེ་བར་ཀུན་དུ་སྟོན་པར་མཛད་དོ་ཞེས་བྱ་བའི་ཐ་ཚིག་གོ །ཐམས་ཅད་བྱེད་པ་ཞེས་བྱ་བ་ནི་ཇི་སྐད་དུ་བཤད་པའི་རྡོ་རྗེ་སེམས་དཔའི་ངོ་བོ་ཉིད་ནས་རྒྱུ་བ་ཞེས་བྱ་བའི་བར་དུ་མཛད་པས་ན་ཐམས་ཅད་བྱེད་དོ། །ཐམས་ཅད་ཉིད་ཅེས་བྱ་བ་ནི་དངོས་པོ་ཐམས་ཅད་ཀྱི་ངོ་བོ་ཉིད་ཡིན་པའི་ཕྱིར་རོ། །དང་པོའི་སེམས་དཔའ་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་དང་པོར་ཐོག་མ་མེད་པའི་ངོ་བོར་བཞུགས་པའི་ཕྱིར། དང་པོའི་སེམས་དཔའོ། །སེམས་དཔའ་ཆེ་ཞེས་བྱ་བ་ནི། ཆོས་བདག་མེད་པའི་ཡེ་ཤེས་ཀྱི་ཚུལ་གྱིས་ཐམས་ཅད་དུ་ཁྱབ་པས་ན་སེམས་དཔའ་ཆེན་པོའོ། །བྱང་ཆུབ་སེམས་དཔའ་ཞེས་བྱ་བ་ནི་བྱང་ཆུབ་ཀྱི་རང་བཞིན་ཅན་གྱི་སེམས་དཔའ་ཡིན་པས་ན་བྱང་ཆུབ་སེམས་དཔའ་ཆེན་པོའོ། །བདེ་བ་རབ་སྩོལ་ཞེས་བྱ་བ་ནི་སེམས་ཅན་གྱི་ཚོགས་ལ་སྐལ་བ་ཇི་ལྟ་བ་བཞིན་དུ་རྡོ་རྗེ་སེམས་དཔའ་ལ་སོགས་པའི་བདེ་བ་སྩོལ་བས་བདེ་རབ་སྩོལ་ཏོ། །སེམས་དཔའི་སྐྱིལ་ཀྲུང་ཞེས་བྱ་བ་ལ་སོགས་པ་ནི་གོ་སླའོ། །བཙུན་མོའི་ཚོགས་བཅས་ཞེས་བྱ་བ་ནི་བཙུན་མོའི་འཁོར་གྱི་ཚོགས་དང་ལྷན་ཅིག་བཞུགས་པའོ། །སྣ་ཚོགས་པ་ནི་དངོས་པོ་ཐ་དད་པའི་བདག་ཉིད་ཅན་ཏེ། །རྡོ་རྗེ་མཚོན་ཆ་མ་ལ་སོགས་པ་ནས་རྡོ་རྗེ་འབེབས་པའི་བར་གྱི་རྡོ་རྗེ་ལྷ་མོ་རྣམས་ཀྱི་མདུན་དུ་བལྟས་ནས་དེ་བཞིན་གཤེགས་པ་
བཞུགས་པས་ན། རྡོ་རྗེ་ལྷ་མོས་ཡོངས་སུ་བསྐོར་བའོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། རྡོ་རྗེ་ལྷ་མོས་ཡོངས་སུ་བསྐོར། །ཞེས་བྱ་བའི་བར་གྱི་བཤད་པ་ནི་འདིར་དང་པོ་སྦྱོར་བའི་ཏིང་ངེ་འཛིན་གསུངས་པ་ཡིན་ནོ། །དེ་ལྟར་དང་པོའི་སྦྱོར་བ་གསུངས་ནས་ད་ནི། བདེ་བ་ཆེན་པོ་རབ་གྲུབ་ཕྱིར། །ཞེས་བྱ་བ་ལ་སོགས་པས། ཏིང་ངེ་འཛིན་གཉིས་པ་གསུངས་པ་ཡིན་ནོ། །བདེ་བ་ཆེན་པོ་ནི་ཐར་པ་ཆེན་པོ་སྟེ། དེ་གྲུབ་པ་ནི་མངོན་སུམ་དུ་བྱེད་པའོ། །དེའི་དོན་དུ། འདོད་ཆགས་ཆེན་པོ་རྣམས་དག་ཕྱིར། །ཞེས་བྱ་སྟེ། འདོད་ཆགས་ཆེན་པོ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེ་ཡང༌། དངོས་གྲུབ་ཀུན་ལ་རྗེས་ཆགས་པས། །འདོད་ཆགས་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའི་ཕྱག་རྒྱ་འདི། །འོད་ཟེར་དམར་པོ་སྣ་ཚོགས་འབར། །ཞེས་གསུངས་པའི་ཕྱིར་རོ། །དེའི་རྣམ་པར་དག་པ་ནི་ཉོན་མོངས་པ་བག་ཆགས་དང་བཅས་པ་བྲལ་པ་སྟེ། དེའི་དོན་དུའོ། །མ་ལུས་གདུལ་བྱའི་དོན་དུ་ནི། །ཞེས་བྱ་བ་ནི། འཇིག་རྟེན་དང་འཇིག་རྟེན་ལས་འདས་པའི་ཐེག་པ་མ་ལུས་པ་ལ་ལྷག་པར་མོས་པའི་སེམས་ཅན་གྱི་ཁམས་མ་ལུས་པ་ཐམས་ཅད་ལུང་དང་རྟོགས་པ་ལ་རབ་ཏུ་འཇོག་པ་ནི་འདུལ་བའོ། །དེའི་དོན་དུ། དངོས་གྲུབ་ཐམས་ཅད་རབ་གྲུབ་ཕྱིར། །ཞེས་བྱ་བ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ནི་དངོས་གྲུབ་ཐམས་ཅད་དོ། །དེ་རབ་ཏུ་གྲུབ་པ་ནི་དེ་བསྒོམ་པ་དང་ལྡན་པ་རྣམས་ཀྱིས་དེ་ཤིན་ཏུ་ཐོབ་པ་སྟེ། དེའི་ཕྱིར་བདག་སོགས་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའི་རང་གི་ངོ་བོ་སྟེ། དེ་ལ་སོགས་པའི་མཛེས་པ་གང་ཡིན་པ་དེ་ནི་སེམས་དཔའ་ཆེན་པོ་ལ་སོགས་པ་སྟེ། རྡོ་རྗེ་ཡིད་ལས་བྱུང་བ་ལ་སོགས་པ་སེམས་དཔའ་ཆེན་པོ་དམ་པ་ནི། རྡོ་རྗེ་སེམས་དཔའི་ཚུལ་གྱི་རྡོ་རྗེ་འཆང་བ་ཆེན་པོའི་བདག་ཉིད་དོ། །སོགས་པའི་སྒྲས་ནི་རྡོ་རྗེ་ཡིད་ལས་བྱུང་བ་ནས་བརྩམས་ཏེ། ཀླུའི་དཀྱིལ་འཁོར་གྱི་བར་གྱི་ཚུལ་ལ་བསླབ་པའོ། །དེ་རྣམས་ཀྱི་དངོས་གྲུབ་ཐམས་ཅད་ནི་ཇི་སྐད་བཤད་པའི་དངོས་གྲུབ་ཐམས་
ཅད་དོ། །དེ་ལྟ་བུའི་དངོས་གྲུབ་ཐམས་ཅད་རབ་ཏུ་གྲུབ་པར་བྱ་བའི་ཕྱིར། དམ་ཚིག་ལས་མི་འདའ་བར་བྱའོ། །དམ་ཚིག་མཆོག་ནི་དེ་བཞིན་གཤེགས་པ་རྣམས་ཀྱིའོ། །རྒྱལ་བས་ཀྱང་ནི་བསྲུང་བར་བྱ། །ཞེས་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རང་བཞིན། དེ་བཞིན་གཤེགས་པ་རྣམས་ཀྱིས་ཀྱང་བསྲུང་བར་བྱ་སྟེ། དཔལ་རྡོ་རྗེ་སེམས་དཔའ་ལྷག་པར་མོས་པའི་སེམས་ཅན་གྱི་དོན་དུ་དཔལ་རྡོ་རྗེ་སེམས་དཔའི་གཟུགས་འཛིན་པའི་དེ་བཞིན་གཤེགས་པ་རྣམས་ཀྱི་ཚུལ་དུ་བྱས་ལ། དེ་ལྟར་ན་དེ་བསྲུང་བར་བྱ་བ་ཡིན་ནོ། །རྡོ་རྗེ་བསྙེམས་མའི་ཚུལ་འཆང་ཞེས་པ་ནི་བཤད་ཟིན་ཏོ། །ཕྱག་རྒྱ་ཐམས་ཅད་རྣམ་དག་ཕྱིར། །ཞེས་བྱ་བ་ནི་ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ཕྱག་རྒྱ་ཐམས་ཅད་དེ། ཕྱག་རྒྱ་ཆེན་པོ་ལ་སོགས་པ་རིགས་ཐམས་ཅད་ཀྱི་ཕྱག་རྒྱའོ། །དེ་རྣམས་ཀྱི་རྣམ་པར་དག་པ་ནི་གདུལ་བྱ་གཞན་དུ་མ་གྱུར་པའི་སེམས་ཀྱིས་རྟོགས་པའོ། །རྡོ་རྗེ་སེམས་དཔའ་མཆོག་གྲུབ་ཕྱིར། །ཞེས་བྱ་བ་ནི་རྡོ་རྗེ་སེམས་དཔའི་དངོས་གྲུབ་ཀྱི་མཆོག་ནི། རྡོ་རྗེ་སེམས་དཔའི་གྲུབ་མཆོག་པ་སྟེ། གདུལ་བྱ་རྣམས་ཀྱིས་རྡོ་རྗེ་འཆང་ཆེན་པོ་མངོན་སུམ་དུ་བྱས་པའོ། །བདེ་ཆེན་རྡོ་རྗེ་ཆེ་སྒྲུབ་པ། །ཞེས་བྱ་བ་ནི་བདེ་བ་ཆེན་པོ་ནི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་རོ། །དེ་སྒྲུབ་པ་ནི་བསྐྱེད་པའོ། །རྒྱུ་ཅི་ཞིག་གི་ཕྱིར་ཞེ་ན། དངོས་གྲུབ་ཀུན་ལ་ཞེས་བྱ་བ་སྨོས་ཏེ། ཕྱག་རྒྱ་ཆེན་པོའི་དངོས་གྲུབ་ལ་སོགས་པ་ཐམས་ཅད་དོ།། དེ་ཐམས་ཅད་སྒྲུབ་པ་དེའི་དོན་དུ་སྙིང་པོ་གསུངས་པའོ། །ཅི་དེ་འབའ་ཞིག་གསུངས་སམ་ཞེ་ན། །ཡེ་ཤེས་ཕྱག་རྒྱར་ཡང་དག་ལྡན། །ཞེས་གསུངས་ཏེ། དེ་ལ་ཕྱག་རྒྱ་ཆེན་པོ་ལ་སོགས་པས་བསྒྲུབ་པ་ལ་ངེས་པར་སྦྱོར་བའི་བསྒོམ་པ་ནི་ཡེ་ཤེས་ཀྱི་ཕྱག་རྒྱའོ། །དེ་སྟོན་པར་བྱེད་པའི་སྒྲ་ལ་ཡང་ཉེ་བར་གདགས་པས་དེ་སྐད་ཅེས་བྱ་སྟེ། ཨ་ནུ་རཱ་ག་ཡ་མི་ཞེས་གང་བཤད་པའོ། །འདོད་ཆགས་དམ་ཚིག་ཅེས་གྲགས་ཏེ། ཆོས་ཀྱི་འདོད་པ་ཡིད་དུ་འོང༌། །དེ་ཡི་རྗེས་གྲུབ་རྣལ་འབྱོར་ནི། །རྗེས་སུ་ཆགས་པ་ཞེས་པ་བཤད་དོ། །ཞེས་གསུངས་པ་ཡིན་
ནོ། །ཡེ་ཤེས་ཀྱི་ཕྱག་རྒྱ་ཉིད་དམ་ཚིག་སྟེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་སུ་རོ་གཅིག་པའི་ཡེ་ཤེས་ལ་ངེས་པར་སྦྱོར་བའི་ཚུལ་གྱིས་གཟུང་བ་དང་འཛིན་པའི་རྣམ་པར་རྟོག་པ་མེད་པའི་ཕྱིར་དེ་དང་ཡང་དག་པར་ལྡན་པ་ནི་བཅིངས་བ་སྟེ། ཡེ་ཤེས་ཀྱི་ཕྱག་རྒྱ་དང་ཡང་དག་པའི་སྙིང་པོ་ནི་ཡེ་གེ་ཧཱུཾ་དེ་སྟོན་པར་བྱེད་པའམ་དེ་སྐྱེད་པར་བྱེད་པའོ། །དེ་ཉིད་ཀྱིས་ན་དམ་པའོ། །གང་གིས་བསོད་ནམས་མི་ལྡན་པ། །ཞེས་བྱ་བ་ནི་དམ་པའི་ཆོས་སྤོང་བའམ། མཚམས་མེད་པ་ལ་སོགས་པ་མི་དགེ་བ་ཐམས་ཅད་བྱེད་པ་ནི་བསོད་ནམས་མི་ལྡན་པའོ། །དེ་རྣམས་ཀྱང་གང་གི་དངོས་གྲུབ་ཐམས་ཅད་རྙེད་པར་དཀའ་བ་མ་ཡིན་པར་འགྱུར་རོ། །དེ་བཞིན་དཀྱིལ་འཁོར་མ་ཞུགས་པ། །ཞེས་བྱ་བ་ནི་དཀྱིལ་འཁོར་དུ་ཇི་ལྟ་བ་བཞིན་དུ་མ་ཞུགས་ཏེ་དེ་དག་ཀྱང་ངོ༌། །དོན་ཡོད་པ་ནི་འབྲས་བུ་ཡོད་པའོ། །ཐོགས་པ་མེད་པ་ནི་བཟློག་ཏུ་མེད་པའོ། །མྱུར་བ་ནི་རིངས་པའོ། །མཆོག་ནི་དམ་པར་གྱུར་པའོ། །ཐམས་ཅད་ནི་མ་ལུས་པ་སྟེ་དངོས་གྲུབ་ཐམས་ཅད་རྙེད་པར་དཀའ་བ་མ་ཡིན་པ་སྟེ། སྙིང་པོ་གང་ཞིག་གསུངས་པ་དེས་དོན་ཡོད་པ་དང༌། ཐོགས་པ་མེད་པ་དང༌། མྱུར་བ་དང༌། མཆོག་གི་དངོས་གྲུབ་ཐམས་ཅད་རྣལ་འབྱོར་པ་རྣམས་ཀྱིས་དངོས་གྲུབ་རྡོ་རྗེ་སེམས་དཔའ་ལ་སོགས་པར་སྐྱེད་པར་གྱུར་པ་དེ་ལ་དེ་སྐད་ཅེས་བྱའོ། །བདེ་བ་ཆེན་པོ་རྡོ་རྗེ་ཆེ། །གསང་བའི་མཆོག་སྟེ་དམ་ཚིག་བརྟན། །ཞེས་བྱ་བ་ནི་བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་གྱི་དམ་ཚིག་གི་མཆོག་སྟེ་བསྐྱེད་པའི་རྒྱུའོ། །བརྟན་པ་ནི་མི་ཤིགས་པའོ། །དངོས་པོ་ཐམས་ཅད་བསྒྲུབ་པ་ནི། །ཞེས་བྱ་བ་ནི་བུམ་པ་བཟང་པོ་ལ་སོགས་པ་དངོས་པོ་ཐམས་ཅད་བསྒྲུབ་པའོ། །རྟོག་པ་ཐམས་ཅད་མྱུར་འགྲུབ་བྱེད། །ཅེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུར། ཕྱག་རྒྱ་ཆེན་པོ་ལ་སོགས་པའི་ཚུལ་གྱིས་རྟོགས་པ་གསུངས་པ་དང༌། གཉིས་པར་གང་གསུངས་པ་དེ་རྣམས་བསྒྲུབ་པ་ནི་ཡི་གེ་ཧཱུཾ་སྙིང་པོའི་ཚུལ་གྱིས་བསྒྲུབ་བོ། །ཐོག་མ་མཐའ་མེད་ཅིང་ཞེས་བྱ་བ་ལ་སོགས་པ་ལ་ཐོག་མ་ནི་དང་པོར་སྐྱེ་བའོ། །ཐ་མ་ནི་འཇིག་པའོ། །འདི་ལ་མི་མངའ་བས་ན་
ཐོག་མཐའ་མེད་ཅིང་ཞེས་བྱ་བ་སྟེ། ཐོག་མ་དང་ཐ་མའི་བྲལ་བ་དང༌། ད་ལྟར་བྱུང་བའི་ངོ་བོ་ཉིད་ཀྱིས་རྟག་ཏུ་བཞུགས་སོ་ཞེས་སྟོན་པ་ཡིན་ནོ། །དང་པོར་བྱུང་བཞེས་བྱ་བ་ནི། བསྐལ་བ་བཟང་པོ་ལ་སོགས་པའི་དང་པོར་ཐོག་མ་མེད་པའི་ཚུལ་ཉིད་ཀྱིས་བཞུགས་པ་ཡིན་པའི་ཕྱིར་དང་པོ་བྱུང་བའོ། །བསོད་ནམས་ཐམས་ཅད་ཆེར་མ་ཐོབ། །ཞེས་བྱ་བ་ནི་གཙང་བར་བྱེད་པས་བསོད་ནམས་ཏེ། སྡིག་པའི་དྲི་མ་ཐམས་ཅད་འཁྲུད་པས་དག་པར་བྱེད་དོ་ཞེས་བྱ་བའི་ཐ་ཚིག་གོ །བསོད་ནམས་ཀྱང་ཡིན་ལ་ཐམས་ཅད་ཀྱང་ཡིན་པས་ན་བསོད་ནམས་ཐམས་ཅད་དེ་འཇིག་རྟེན་དང་འཇིག་རྟེན་ལས་འདས་པའི་བསོད་ནམས་དེ་ཐམས་ཅད་ནི་ཆེན་པོ་ཡང་ཡིན་ལ་མཐོན་པོ་ཡང་ཡིན་པས་ན། བསོད་ནམས་ཐམས་ཅད་ཆེར་མ་ཐོབ་སྟེ། བསོད་ནམས་མ་ལུས་པར་སྐྱེས་ཞེས་བྱ་བའི་ཐ་ཚིག་གོ །གཟི་ཅན་རྣམས་ཀྱི་བདེ་མཆོག་ཕྱིར། །ཞེས་བྱ་བ་ནི། ཆོས་བདག་མེད་པའི་ཡེ་ཤེས་ཀྱི་སྣང་བས་བག་ཆགས་དང་བཅས་པའི་ཉོན་མོངས་པའི་བུད་ཤིང་ངེས་པར་བསྲེག་པས་ན་གཟི་ཅན་ཏེ། གཟི་མདངས་ཀྱིས་འབར་བའི་བྱང་ཆུབ་སེམས་དཔའ་རྣམས་སོ། །གཟི་ཅན་དེ་རྣམས་ཀྱི་རང་གི་དང་གིས་རྣམ་པ་རྟོག་པ་མེད་པར་བྱུང་བ་སེམས་དང་སེམས་ལས་བྱུང་བ་དེ་ནི་བདེ་བ་ཡིན་ཏེ། དེའི་དོན་དུ་གདུལ་བྱ་རྣམས་ཀྱི་ཐར་པ་ཆེན་པོ་བསྒྲུབ་པའི་ཕྱིར་ཞེས་བྱ་བའི་ཐ་ཚིག་གོ །འདོད་ཆགས་ཆེན་པོ་རྣམ་དག་ཕྱིར། །ཞེས་བྱ་བ་ནི་དེ་རྣམས་ཀྱི་ནི་ཨ་ནུ་རཱ་ག་ཡ་མི་ཞེས་བྱ་བ་ལ་སོགས་པ་ཡིན་ཏེ། རྗེས་སུ་ཆགས་པ་སྒོམ་པ་སྟེ། །ཐབས་དང་ཤེས་རབ་ཀྱི་ངོ་བོ་གསང་བའི་དཀྱིལ་འཁོར་གྱི་རང་བཞིན་བཅོམ་ལྡན་འདས་རྡོ་རྗེ་འཆང་བ་ཆེན་པོ་ཡང་དང་ཡང་མངོན་དུ་བྱའོ་ཞེས་བྱ་བ་ནི་རྗེས་སུ་ཆགས་པར་བྱའོ་ཞེས་བྱ་བ་ཡིན་ནོ་ཞེས་བྱ་བ་ནི་རྣམ་པར་སྟོན་པའི་ཚིག་སྟེ། དེ་ལྟ་བུའི་རྣམ་པ་ཞེས་བྱ་བའི་ཐ་ཚིག་གོ །ཅི་བཞིན་ཞེས་བྱ་བ་ནི་ཅི་ནུས་པ་སྟེ། རང་གི་ནུས་པས་སམ་སྔོན་གྱི་འཕེན་ཤུགས་ཀྱིས་ཞེས་བྱ་བའི་ཐ་ཚིག་གོ །ཡེ་ཤེས་རབ་འཇུག་ཅེས་བྱ་བ་ནི་ལྷག་པའི་རྣལ་འབྱོར་ནི་ངེས་བདེ་ནི་ཡེ་ཤེས་ཏེ། །དེའི་རབ་ཏུ་འཇུག་
པ་ནི་གསང་བའི་དཀྱིལ་འཁོར་བསྐྱེད་དེ། སེམས་ཅན་ཐམས་ཅད་དང་ཐུན་མོང་དུ་བྱ་བའོ། །དེས་ན་ཨ་ནུ་རཱ་ག་ཡ་མི་ཞེས། །ཇི་བཞིན་ཡེ་ཤེས་རབ་འཇུག་པས། །ཞེས་བྱ་བ་ནི་འདིས་འདུལ་བ་རྣམས་ལ་ཐུན་མོང་དུ་བྱ་བའི་ཕྱིར་རོ། །ཉེ་བའི་སྙིང་པོ་དང་བཅས་སྙིང་པོ་ཞེས་བྱ་བ་ནི། ཉེ་བའི་སྙིང་པོ་དང་བཅས་པའི་སྙིང་པོ་ནི་ཡི་གེ་ཧཱུཾ་ངོ༌། །དེ་ཉིད་ནི་དང་པོ་སྟེ་ཐོག་མ་མེད་པའི་ཚུལ་གྱིས་བསྐལ་པ་བཟང་པོ་ལ་སོགས་པའི་ཐོག་མར་རྒྱུན་མི་འཆད་པར་བཞུགས་ཤིང་མཐའ་མེད་པས་ན་དང་པོའོ། །བསྐལ་ཐོག་ཅེས་བྱ་བ་ནི་བསྐལ་པ་ནི་བཟང་པོ་ལ་སོགས་པའི་ཐོག་མ་སྟེ། དང་པོར་བཅོམ་ལྡན་འདས་གསུངས་ཞེས་བྱ་བ་ལ། བཅོམ་ལྡན་འདས་རྡོ་རྗེ་སེམས་དཔས་གསུངས་ཤིང་བཀའ་སྩལ་པ་སྟེ། ཨ་ནུ་རཱ་ག་ཡ་མི་ཧཱུཾ་ཞེས་བྱ་བ་ཉེ་བའི་སྙིང་པོ་དང་བཅས་པའི་སྙིང་པོ་གསུངས་སོ་ཞེས་བྱ་བའི་ཐ་ཚིག་གོ ། འདུས་པར་འགྱུར་ཞེས་བྱ་བ་ནི། གཅིག་ཏུ་ཚོགས་པར་མཛད་པའོ། །ཕྱུང་ཞེས་བྱ་བ་ནི་བསྐྱེད་པར་གྱུར་པ་སྟེ། ཕྱོགས་བཅུ་ཐམས་ཅད་དུ་འགྲོ་བ་སེམས་ཅན་དང་སྣོད་ཀྱི་འཇིག་རྟེན་བསྐྱེད་པར་བྱའོ་ཞེས་བྱ་བའི་ཐ་ཚིག་གོ །འདི་སྐད་སྟོན་པ་ཡིན་ཏེ་སྔོན་གྱི་སངས་རྒྱས་ཀྱི་ཞིང་འདི་ཆགས་པའི་གོང་ན་ནམ་མཁར་གྱུར་པ་ནམ་མཁའི་ཕྱོགས་དེར། བཅོམ་ལྡན་འདས་རྡོ་རྗེ་སེམས་དཔའ་ནམ་མཁའ་ཐམས་ཅད་ལ་གནས་པའི་རྡོ་རྗེ་ཆེན་པོའི་གཞལ་ཡས་ཁང་ན་སྣ་ཚོགས་པདྨ་ལ་རྡོ་རྗེ་ལྷ་མོའི་ཚོགས་དང་བཅས་པ་བཞུགས་ཏེ། ཨ་ནུ་རཱ་ག་ཡ་མི་ཧཱུཾ་ཞེས་གསུངས་པར་གྱུར་པ་ཡིན་ནོ། །དེ་ནས་འཇིག་རྟེན་གྱི་ཁམས་གཞན་ན་བཞུགས་པའི་དེ་བཞིན་གཤེགས་པ་རྣམས་འདུས་པར་མཛད་ནས་གཤེགས་ཏེ། བྱོན་ནས་སངས་རྒྱས་ཀྱི་ཞིང་འདིའི་སེམས་ཅན་གྱི་འཇིག་རྟེན་དང་བཅས་པ་སྐྱེད་པར་མཛད་པ་ཡིན་ནོ། །ཕྱུང་ཞིང་འགྲོ་བ་ཐམས་ཅད་དང་སྣོད་ཀྱི་འཇིག་རྟེན་སྣ་ཚོགས་ཏེ། རྒྱུ་བ་དང་མི་རྒྱུ་བའི་རང་བཞིན་ཅན་སྐྱེད་ཅིང་ཕྱུང་བར་གྱུར་ཏོ། །གཙོ་བོས་དངོས་གྲུབ་དྲིས་གྱུར་པ། །ཞེས་བྱ་བ་ནི་སེམས་ཅན་གྱི་ཁམས་དེ་བསྐྱེད་པ་རྡོ་རྗེ་སེམས་དཔའ་ལ་སོགས་པ་ཇི་ལྟར་
གྲུབ་པར་འགྱུར་ཞེ་ན། བཅོམ་ལྡན་འདས་རྡོ་རྗེ་སེམས་དཔའ་ལ་དྲེས་པ་ཡིན་ནོ། །ཇི་ལྟར་སྐད་ཅིག་གིས་འགྲོ་གྲུབ། །སེམས་དཔའ་ཆེན་པོ་མྱུར་དུ་སྨྲོས། །ཞེས་བྱ་བ་ནི་ཇི་ལྟར་འགྲོ་བ་སེམས་ཅན་གྱི་ཁམས་འདི་རྣམས་སྐད་ཅིག་གིས་ཞེས་བྱ་བ་བསྐྱེད་པའི་རྗེས་ཐོགས་ཉིད་ལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཚེ་འདི་ཉིད་ལ་མྱུར་དུ་གྲུབ་པ་དེ་ལྟ་བུས་སེམས་ཅན་ཆེན་པོ་མྱུར་དུ་སྨྲོས་ཤིག་ཅེས་གཙོ་བོས་དཔལ་རྡོ་རྗེ་སེམས་དཔའ་ལ་དྲིས་པ་ཡིན་ནོ་ཞེས་བྱ་བའི་ཐ་ཚིག་གོ །དེ་ནས་ཞེས་བྱ་བ་ལ་སོགས་པ་ནི། དེ་ནས་དྲིས་པའི་རྗེས་ཐོགས་ཉིད་ལ། བཅོམ་ལྡན་འདས་རྡོ་རྗེ་སེམས་དཔའ་དང་པོའི་དཀྱིལ་འཁོར་དེ་གསང་བའི་དཀྱིལ་འཁོར་དང་པོར་སེམས་ཅན་ཐམས་ཅད་གཞུག་པས། བྱིན་གྱིས་བརླབས་ནས་རྒྱ་ཆེ་བའི་ཚུལ་ཅན་གྱིས། སེམས་ཅན་ཐམས་ཅད་ལ་སོ་སོར་སྣང་བ་བསྐྱེད་པའི་ཕྱིར། གསང་བའི་དཀྱིལ་འཁོར་དེ་བསྟན་པར་མཛད་པ་ཡིན་ནོ། །དེའི་ཁྱད་པར་ཇི་ལྟ་བུ་ཞེ་ན། རྡོ་རྗེ་ཀུན་མཆོག་དམ་ཚིག་ནི། །ཞེས་བྱ་བ་གསུངས་ཏེ། རྡོ་རྗེ་ཀུན་ནི་དེ་བཞིན་གཤེགས་པའི་རིགས་ཀྱིས་བསྡུས་པ་གཉིས་སུ་མེད་པའི་སེམས་དང་སེམས་ལས་བྱུང་བའོ། །དེ་རྣམས་ཀྱི་དམ་ཚིག་ནི་གསང་བའི་དཀྱིལ་འཁོར་དེའོ། །དེ་ནས་བསྒྲུབ་པ་ནི་རྡོ་རྗེ་འཛིན་པ་ཉིད་ལ་སོགས་པ་བསྐྱེད་པ་ནི་གྲུབ་པའོ། །ཆོ་ག་ཇི་ལྟ་བ་ནི། ཇི་ལྟར་སློབ་མ་འཇུག་པའི་ཆོ་གས་འདིར་སློབ་མ་སྒྲུབ་པ་དེ་བཞིན་དུ་དེ་རྣམས་ཀྱང་རིང་པོར་མི་ཐོགས་པར་སྣོད་དུ་རུང་བར་བསྒྲུབ་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་རིང་པོར་མི་ཐོགས་པར་སྣོད་དུ་བྱས་པའི་སེམས་ཅན་རྣམས་ལ་རྡོ་རྗེ་སེམས་དཔའ་ཉིད་ལ་སོགས་པ་དངོས་གྲུབ་ཀྱི་མཆོག་བསྒྲུབ་པར་འགྱུར་པ་ན། དེའི་རྗེས་ཐོགས་ཉིད་ལ་སྐྱེས་ཤིང་བྱུང་བའོ། །དེ་ཕན་ཆད་ཅེས་བྱ་བ་ནི་སེམས་ཅན་ཁམས་གསུམ་ན་སྤྱོད་པ་ཐམས་ཅད་དོ། །ཇི་བཞིན་ལས་ཀྱི་རྗེས་སུ་འགྲོ། །ཞེས་བྱ་བ་ནི་སེམས་ཅན་ གང་དེ་དག་གི་ལས་དཀར་པོའམ་ནག་པོའམ། འདྲེས་མ་ཇི་ལྟར་བྱས་པ ་དེ་བཞིན་དུ་ལས་དེས་བདེ་འགྲོ་ལ་སོགས་པར་ཇི་ལྟ་བ་བཞིན་དུ་ཉེ་བར་འགྲོ་བས་ན། ཇི་བཞིན་ལས་ཀྱི་རྗེས་སུ་
འགྲོ་ན། རང་གི་ལས་དང་ཉོན་མོངས་པའི་དབང་ལས་སྐྱེས་ཞེས་བྱ་བའི་ཐ་ཚིག་གོ །རྟག་པར་སྡིག་ཀུན་ཀུན་དུ་སྤྱོད། །ཅེས་བྱ་བ་ནི། རྟག་ཏུ་ཞེས་བྱ་བ་ནི་ཉིན་རེའོ། །སྡིག་པ་ཀུན་ནི་སྲོག་གཅོད་པ་ལ་སོགས་པའོ། །ཀུན་དུ་སྤྱོད་པ་ནི་བྱེད་པ་སྟེ། དེས་ན་རྟག་པར་སྡིག་ཀུན་ཀུན་དུ་སྤྱོད། ཅེས་བྱ་བ་སྟེ་འདིས་ནི་སེམས་ཅན་སྡིག་པ་ཅན་མི་དགེ་བ་ཀུན་དུ་སྤྱོད་པ་ཡིན་ནོ། །ངན་ཞེ་ན་ནི་དངོས་པོ་ངན་པ་ལ་ཆགས་ཤིང་ཞེན་པ་སྟེ་དེ་ཉིད་དུ་མཐས་གཏུགས་པ་ཞེས་བྱ་བའི་ཐ་ཚིག་གོ །འདིས་ནི་སེམས་ཅན་གྱི་ཚོགས་གཉིས་པ་གསུངས་པ་ཡིན་ནོ། །ལེ་ལོ་བྱས་པ་ནི་དགེ་བའི་ལས་ལ་མི་འཇུག་པ་དང༌། མི་དགེ་བའི་ལས་ལ་མི་འཇུག་པ་དང༌། ནོར་བ་སོགས་པ་ལ་ཡང་མི་འཇུག་པ་གང་ཡིན་པ་དེ་ནི་ཅི་ཡང་མི་བྱེད་པས་ན། དེ་ནི་འདིར་ལེ་ལོ་ཅན་ཞེས་བྱ་བའོ། །འདིས་ནི་སེམས་ཅན་གྱི་ཚོགས་གསུམ་པ་གསུངས་པ་ཡིན་ནོ། །ད་ནི་ཞེས་པ་ནི་ད་ལྟར་ཏེ། བཤད་མ་ཐག་པའི་སེམས་ཅན་གྱི་ཚོགས་གསུམ་པ་ནི་སེམས་ཅན་གྱི་ཁམས་ལ་གཟིགས་པའི་འཇིག་རྟེན་གྱི་མགོན་པོ་དེ་བཞིན་གཤེགས་པས་བཅོམ་ལྡན་འདས་རྡོ་རྗེ་འཆང་ཆེན་པོ་ལ་དྲིས་པར་གྱུར་པ་སྟེ། འདྲི་བ་མཛད་པའོ། །ཇི་ལྟར་ཞེ་ན། བཅོམ་ལྡན་འདས་འོ་ན་ཇི་ལྟར་ན་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་ནི་རྡོ་རྗེ་འཆང་ཆེན་པོ་ཇི་ལྟར་ཞེས་བྱ་བ་ནི་མི་བཟོད་པའོ། །ན་ཞེས་བྱ་བའི་སྒྲ་ནི་རྟོག་པའོ། །འབྱིན་པ་ཞེས་བྱ་བ་ནི་སེམས་ཅན་ཐམས་ཅད་བསྐྱེད་པའོ། །དགེ་བ་ཐམས་ཅད་ཀུན་དུ་བསྐྱེད། །ཅེས་བྱ་བ་ནི། དགེ་བ་ནི་བསོད་ནམས་སོ། །ཐམས་ཅད་ནི་མ་ལུས་པའོ། །ཀུན་དུ་བསྐྱེད་པ་ནི་བསྐྱེད་པར་གྱུར་པའོ། །འདི་སྐད་སྟོན་པ་ཡིན་ཏེ། གལ་ཏེ་བཅོམ་ལྡན་འདས་རྡོ་རྗེ་སེམས་དཔའ་སེམས་ཅན་ཐམས་ཅད་སྐྱེད་པར་མཛད་ན། བསོད་ནམས་ཐམས་ཅད་བསྐྱེད་པར་གྱུར་ན། དེའི་ཡོངས་སུ་དག་པ་ཉིད་ཀྱིས་སེམས་ཅན་དག་པར་གྱུར་ན། དེ་ལྟ་བུར་མི་སྣང་ངོ༌། །དེ་བས་ན་ཅི་ཞིག་ཏུ་ངེས་ཤེ་ན་སེམས་ཅན་གྱི་ཕུང་པོ་ཉེ་བར་ངེས་པས་ན་བཅོམ་ལྡན་འདས་ནི་སྐྱེད་པ་པོ་མ་ཡིན་ནོ། །དེ་རྣམས་ཀྱི་ནི་ཚིག་གསན་ནས། །ཞེས་བྱ་བ་ནི་དེ་རྣམས་ཀྱིས་དྲིས་པའི་ཚིག་གསན་ནས་སོ། །ཚིག་ནི་
འདི་སྐད་དུ་གསུངས་པ་ཡིན་ཞེས་བྱ་བ་ནི་གསུངས་པར་འགྱུར་པའོ། །ཅི་ཞིག་གསུངས་ཤེ་ན། །རྡོ་རྗེ་འཛིན་ཅེས་བྱ་བ་ལ་སོགས་པ་སྟེ། རྡོ་རྗེ་འཛིན་ན་ནི་རྡོ་རྗེ་འཆང་ངོ༌། །རྒྱུ་བ་དང་མི་རྒྱུ་བའི་དངོས་པོ་ཐམས་ཅད་སྤྲུལ་པས་ན་ཀུན་བྱེད་དོ། །སྐྱེད་པར་བྱེད་པ་ཡིན་པས་ན་འབྱིན་པའོ། །ཡང་ཅི་ཞིག་གསུངས་ཤེ་ན། ལས་ཀྱི་འཆིང་བ་ལྷོད་གྱུར་པ། །ཞེས་བྱ་བ་གསུངས་ཏེ། འདི་དག་མི་དགེ་བ་ལ་འཇུག་པ་ལས་ཀྱང་དགེ་བ་ལ་འཇུག་པར་བྱེད་ལ། དགེ་བ་ལ་ཞུགས་པ་ལས་ཀྱང་མི་དགེ་བ་ལ་འཇུག་པར་འགྱུར་ལ། ལ་ལ་ནི་དགེ་བ་དང་མི་དགེ་བ་གཉི་ག་ལ་འཇུག་པའམ། ཅི་ཡང་མི་བྱེད་པ་དག་ཀྱང་ཡོད་དོ། །དེ་བས་ན་འདི་དག་ནི་འདྲེས་མར་སྤྱོད་པ་ཡིན་གྱི། འདི་རྣམས་ཀྱི་ལས་ཀྱི་མཐའ་དགེ་བ་དང༌། མི་དགེ་བའི་ཚུལ་གཅིག་ཏུ་ངེས་པར་བསྟན་པར་གྱུར་པ་ནི་མ་ཡིན་ནོ། །དེ་བས་ན་འདི་རྣམས་རྣམ་པ་གསུམ་དུ་གྱུར་པ་ལ། ང་ནི་ལུང་འབོགས་པ་ཙམ་གྱི་ཚུལ་གྱིས་འདི་རྣམས་ཀྱི་འབྱིན་པ་པོ་ཡིན་གྱི། རྣམ་པ་ཐམས་ཅད་ནས་ཐམས་ཅད་དུ་སྐྱེད་པར་བྱེད་པ་ནི་མ་ཡིན་ནོ། །གལ་ཏེ་ཐམས་ཅད་ནས་ཐམས་ཅད་དུ་སྐྱེད་པ་པོ་ཡིན་པར་གྱུར་ན་ནི། དེའི་ཚེ་ཐམས་ཅད་བདེ་བ་ཉིད་དུ་འགྱུར་བ་ཡིན་ནོ། །དེའི་ཚིག་དེ་ཞེས་བྱ་བ་ལ་སོགས་པ་ནི་གོ་བར་ཟད་དོ། །ཤིན་ཏུ་ཆགས་པ་རྣམས་དག་ཕྱིར། །ཞེས་བྱ་བ་ནི། ལྷག་པར་ཆགས་པས་ན་ཤིན་ཏུ་ཆགས་པ་སྟེ། ཆོས་བདག་མེད་པའི་འདོད་ཆགས་དང༌། དམིགས་པ་མེད་པའི་ཐུགས་རྗེ་ཆེན་པོ་དང༌། དེའི་རྒྱུ་མཐུན་པ་ལས་བྱུང་བའི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་རྣམ་པར་དག་པའི་གསང་བའི་དཀྱིལ་འཁོར་གཟུགས་བརྙན་དང་འདྲ་བར་རྟོགས་པའོ། །ཡང་ན་ཆོས་བདག་མེད་པ་དངོས་པོ་མེད་པའི་ངོ་བོ་ཉིད་རྟོགས་པར་བྱེད་པའི་གདུལ་བྱ་རྣམས་ཏེ་དེའི་དོན་ཏོ། །ཀུན་མཆོག་ཆོ་ག་རྒྱས་པ་ནི། །ཞེས་བྱ་བ་ནི་ཐམས་ཅད་ཀྱི་མཆོག་ཏུ་གྱུར་པ་གསང་བའི་དཀྱིལ་འཁོར་བསྒྲུབ་པའི་རྒྱུན་ཏེ་ཐམས་ཅད་ཀྱི་མཆོག་ཏུ་གྱུར་པའི་ཆོ་ག་རྒྱས་པ་དེ་བཀའ་སྩོལ་ཅིག་ཅེས་གསོལ་བ་བཏབ་བོ། །འདི་སྐད་སྟོན་པ་ཡིན་ཏེ། །གལ་ཏེ་ལས་ཀྱི་འཆིང་བ་ལྷོད་པས་འགྲོ་
བའི་ཚོགས་རྣམ་པ་གསུམ་སྐྱེ་བར་འགྱུར་ལ། འཆིང་བ་དམ་པོ་ནི་ཚུལ་གཅིག་པ་ཉིད་དུ་འགྱུར་པ་དེ་བས་ན་ཤིན་ཏུ་ཆགས་པ་ཉིད་ཐོབ་པར་བྱ་བའི་ཕྱིར་གསང་བའི་དཀྱིལ་འཁོར་གྱི་ཆོ་ག་རྒྱས་པར་བཤད་པ་གང་གིས་སེམས་ཅན་དེ་རྣམས་ཤིན་ཏུ་ཆགས་པ་རྣམ་པར་དག་པ་ཐོབ་པར་བྱེད་པས་བསམ་པ་ཤིན་ཏུ་བརྟན་པའི་ལས་ཀྱི་ཕྱིར་མི་ལྡོག་པའི་གོ་འཕང་རྟོགས་པ་ཉིད་དུ་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཞེས་བྱ་བའི་སྒྲ་ནི་དེ་མ་ཐག་སྟོན་པར་བྱེད་པའི་ཚིག་སྟེ། བཅོམ་ལྡན་འདས་རྡོ་རྗེ་འཆང་པ་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་རྗེས་ཐོགས་ཉིད་ལ་བཅོམ་ལྡན་འདས་རྡོ་རྗེ་འཆང་ཆེན་པོས་བཀའ་སྩལ་བ་ཡིན་ནོ། །དངོས་གྲུབ་ཐམས་ཅད་སྩོལ་པ་ནི་གསང་བའི་དཀྱིལ་འཁོར་གྱི་དངོས་གྲུབ་ཐམས་ཅད་སྩོལ་པའོ། །བདེ་བ་ཆེན་པོའི་རྡོ་རྗེ་གསང་བའི་དང་པོའི་རྟོག་པ་ཐམས་ཅད་ཅེས་བྱ་བ་ནི་བདེ་བ་ཆེན་པོའི་བདག་ཉིད་ནི་བདེ་བ་ཆེན་པོ་སྟེ། དེའི་རྡོ་རྗེ་གསང་བ་ཡིན་པས་ན་བདེ་བ་ཆེན་པོ་རྡོ་རྗེ་གསང་བ་ཡིན་ནོ། །དེ་ཉིད་དང་པོ་སྟེ། བསྐལ་པ་བཟང་པོ་ལ་སོགས་པའི་ཐོག་མ་ཉིད་དུ་གནས་པས་ན་བདེ་བ་ཆེན་པོའི་རྡོ་རྗེ་གསང་བ་དང་པོ་སྟེ། བཅོམ་ལྡན་འདས་རྡོ་རྗེ་སེམས་དཔའི་གསང་བའི་དཀྱིལ་འཁོར་རོ། །གཉིས་སུ་མེད་པའི་ཡེ་ཤེས་ལས་བྱུང་བས་ན་མཆོག་དམ་པ་སྟེ། བཅོམ་ལྡན་འདས་རྡོ་རྗེ་གསང་བས་གསུངས་སོ། །དངོས་གྲུབ་ཐམས་ཅད་སྩོལ་པ་འབའ་ཞིག་ཏུ་མ་ཟད་ཀྱི། རྟོག་པ་ཀུན་གྱི་བདེ་བ་ཆེ། རྡོ་རྗེ་གསང་བས་བཀའ་སྩལ་ཏོ། །ཞེས་བྱ་བ་སྟེ། །ཡི་གེ་ཧཱུཾ་གི་རང་བཞིན་ཅན་གྱི་རྟོག་པ་ཐམས་ཅད་གསུངས་སོ་ཞེས་བྱ་བར་སྦྱར་རོ། །རང་བཞིན་ཇི་ལྟ་བ་བཞིན་དུ་དཔའ་བོ་ཞེས་བྱ་བ་གསུངས་ཏེ། གདུལ་བྱའི་སྐྱེ་བོ་རྣམས་ཀྱི་དོན་བསྐྱེད་པར་བྱ་བའི་ཕྱིར། སྩོལ་བཞིན་པའི་ཚུལ་གྱིས་འཇིགས་པ་མེད་པར་རྟག་ཏུ་བཞུགས་པའི་ཕྱིར། །ཡི་གེ་ཧཱུཾ་གི་སྙིང་པོ་འདི་ནི་དཔའ་པོའོ། །དེ་ལྟ་བུའི་སྙིང་པོ་དཔའ་བོ་དེའི་རྟོག་པ་འདི་ཡང་ཇི་ལྟ་བུ་གཞན་ཡིན་ཞེ་ན། དཀྱིལ་འཁོར་ལ་སོགས་པ་ཆོ་ག་ཞེས་བྱ་བ་གསུངས་སོ། །ཆོ་ག་ཆེན་པོ་དེ་ཉིད་རྣམ་པར་དབྱེ་བ་ནི་སྣ་
ཚོགས་ཞེས་བྱ་བ་ལ་སོགས་པ་སྨོས་པ་ཡིན་ཏེ། དངོས་པོ་ཐམས་ཅད་ཀྱི་བདག་ཉིད་ཅན་ཡིན་པས་ན་སྣ་ཚོགས་སོ། །འཇིག་རྟེན་ལས་འདས་པའི་སྦྱོར་བ་ནི་རྒྱུད་ཕྱི་མ་སྟེ། དེ་དང་ལྷན་ཅིག་གནས་པས་ན་ཕྱི་མའི་རྒྱུད་དང་བཅས་པ་ཞེས་བྱ་བ་ཡིན་ནོ། །དངོས་གྲུབ་ཐམས་ཅད་རབ་གྲུབ་བྱེད། །ཅེས་བྱ་བ་ནི། སེམས་ཅན་རྣམས་ཀྱི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་བསྐྱེད་ཅིང༌། རྫོགས་པར་བྱེད་པས་ན། དངོས་གྲུབ་ཐམས་ཅད་རབ་གྲུབ་བྱེད། ཅེས་སོ། །དེ་ཉིད་ཅིའི་ཕྱིར། རྡོ་རྗེ་འཆང་བའི་སྙིང་པོའི་རྟོག་པ་གསུང་བར་མཛད་ཅེ་ན། འཇིག་རྟེན་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། ཐམས་ཅད་ཀྱང་ཡིན་ལ། འཇིག་རྟེན་ཡང་ཡིན་པས་ན། འཇིག་རྟེན་ཐམས་ཅད་དེ། སེམས་ཅན་གྱི་འཇིག་རྟེན་ནོ། །དེའི་ཁམས་ཆེན་པོ་ནི་སྣོད་ཀྱི་འཇིག་རྟེན་ཏེ། ཕྱོགས་བཅུ་ན་སངས་རྒྱས་བཞུགས་པ་དང༌། སངས་རྒྱས་མི་བཞུགས་པའི་ཞིང་ཁམས་སོ། །དེའི་རྡུལ་ཕྲ་རབ་ཇི་སྙེད་ཡོད་པ་དེ་དང་མཉམ་པའི་སེམས་ཅན་རྣམས་ཞེས་བྱ་བ་ཡི་གེ་ཧཱུཾ་གི་རང་བཞིན་ནམ་མཁའ་དང་མཉམ་པས་རྒྱ་ཆེ་བ། སངས་རྒྱས་ཉིད་དུ་གྲུབ་པ་ལ་སོགས་པས་བདེ་བ་དམ་པ་ཉིད་དུ་འགྱུར་རོ་ཞེས་ཏེ། བདེ་བ་ཡང་ཡིན་ལ་དམ་པ་ཡང་ཡིན་པས་ན་དམ་པ་ཉིད་བདེ་བ་དམ་པ་སྟེ། སངས་རྒྱས་པའི་བདེ་བ་ཆེན་པོ་ཐམས་ཅད་དོ། །དེའི་ངོ་བོར་གྱུར་པས་ནི་བདེ་བ་དམ་པ་ཉིད་དོ། །གྱུར་པ་ནི་ཐོབ་པའོ་ཞེས་ངེས་པར་བྱས་པའོ། །འདི་སྐད་སྟོན་པ་ཡིན་ཏེ་སྙིང་པོ་འདིས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སེམས་ཅན་རྣམས་སངས་རྒྱས་ཉིད་ལ་སོགས་པའི་དངོས་གྲུབ་ཀྱི་སྐལ་པ་བཟང་པོ་ལ་སོགས་པའི་དང་པོར་གྱུར་པ་ཡིན་ཏེ། དེ་བས་ན་སྙིང་པོ་འདི་ནི་དངོས་གྲུབ་ཀྱི་དམ་པ་བསྐྱེད་པ་ཡིན་ནོ་ཞེས་ངེས་བསྐྱེད་ནས། བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པས་གསོལ་བ་བཏབ་པའི་ཚིག་གསན་ནས་རྟོག་པ་གསུངས་པ་ཡིན་ཏེ། འཇིག་རྟེན་ཐམས་ཅད་སངས་རྒྱས་ཉིད་གྲུབ་པར་བྱ་བའི་ཕྱིར་རོ། །དེ་ལྟར། བདེ་བ་ཆེན་པོ་རབ་
གྲུབ་ཕྱིར། །ཞེས་བྱ་བ་ནས་བརྩམས་ཏེ། བདེ་བ་དམ་པ་ཉིད་དུ་འགྱུར། །ཞེས་བྱ་བའི་བར་གྱི་བཤད་པས་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང༌། བསྒོམ་པ་བྱའོ་ཞེས་དོན་བསྟན་པར་བྱ་བའི་ཕྱིར་དེ་ནས་དེ་བཞིན་གཤེགས་པ་དེ་རྣམས་ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་དང༌། བཅོམ་ལྡན་འདས་རྡོ་རྗེ་སེམས་དཔས་བསྐལ་པ་བཟང་པོ་ལ་སོགས་པའི་ཐོག་མར་སེམས་ཅན་ཐམས་ཅད་ལ་སངས་རྒྱས་ཉིད་དུ་གྲུབ་པ་ལ་སོགས་པའི་རྟོག་པ་གསུངས་པའི་རྗེས་ཐོགས་ཉིད་ལའོ། །བདེ་བར་གཤེགས་པ་དེ་རྣམས་ཞེས་བྱ་བ་ནི་གོ་སླའོ། །དང་པོའི་དཀྱིལ་འཁོར་བསྒྲུབ་པར་སྩོལ། །ཞེས་བྱ་བ་ནི་དང་པོ་ནི་བཅོམ་ལྡན་འདས་རྡོ་རྗེ་སེམས་དཔའ་ནི་དཀྱིལ་འཁོར་གྱི་དངོས་གྲུབ་སྩོལ་པས་ན་དངོས་གྲུབ་སྟེ། དཀྱིལ་འཁོར་གྱི་དངོས་གྲུབ་སྩོལ་པ་ལ་དེ་བཞིན་གཤེགས་པས་གསོལ་བ་བཏབ་པ་ཡིན་ནོ། །ཅི་ཆགས་པ་དང་བྲལ་པའི་གདུལ་བྱ་རྣམས་ཀྱི་ཕྱིར་ཆགས་པ་མེད་པར་བསྟན་པར་བྱ་བའམ་ཞེས་བྱ་བ་ནི། ཉམ་ཐོས་དང༌། རང་སངས་རྒྱས་ཀྱི་མྱ་ངན་ལས་འདས་པ་ནི་ཆགས་པ་དང་བྲལ་བའོ། །ཉན་ཐོས་དང་རང་སངས་རྒྱས་ཀྱི་བྱང་ཆུབ་འདིར་འདུལ་ཞིང་རབ་ཏུ་འཇོག་པས་ན་དེའི་གདུལ་བྱའོ། །ཅི་ཆགས་པ་དང་བྲལ་བས་འདུལ་བ་གང་ཡིན་པ་དེ་ལ་ཆགས་པ་དང་བྲལ་བས་འདུལ་ཞིང་དོན་དུ་གཉེར་བ་དེའི་ཆེད་དུ་ཆགས་པ་མེད་པར་སོ་སོར་ཐར་པའི་སྔོམ་པ་བསྟན་པར་བྱ་པའི་ཕྱིར། སྤྲུལ་པའི་སྐུ་དེས་འདུལ་བ་རྣམས་ཀྱི་ཕྱིར། བསླབ་པ་དང་བཅས་པར་བྱ་བའམ་ཞེས་པ་སྟེ། མདོ་སྡེའི་ཚུལ་བསྟན་པར་བྱ་བའམ་ཞེས་བྱ་བའི་ཐ་ཚིག་གོ །འདོད་ཆགས་ཐམས་ཅད་ཅེས་བྱ་བ་ལ་སོགས་པ་ལ། འདོད་ཆགས་ཀྱང་ཡིན་ལ་ཐམས་ཅད་ཀྱང་ཡིན་
པས་ན་འདོད་ཆགས་ཐམས་ཅད་དེ་རིགས་ལྔའི་ལྷ་རྣམས་བསྒོམ་པས་འདུལ་བ་རྣམས་སོ། །དེའི་རྣམ་པར་དག་པ་ནི་གཟུང་བ་དང༌། འཛིན་པའི་རྟོག་པ་དང་བྲལ་བ་ཉིད་ཀྱིས་རིགས་ལྔར་རྟོགས་པའོ། །དེའི་དོན་དུ་རྡོ་རྗེ་འཆང་ཆེན་པོས་གསུངས་ཤིག་ཅེས། དེ་བཞིན་གཤེགས་པས་བཅོམ་ལྡན་འདས་རྡོ་རྗེ་སེམས་དཔའ་ཉིད་ཀྱི་ཐུགས་ཀྱི་བྱ་བ་གསོལ་བ་བཏབ་པ་ཡིན་ནོ། །དེ་ལ་ཉིད་ཀྱི་ཐུགས་ཀྱི་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔའ་ནི་གསང་བའི་དཀྱིལ་འཁོར་གྱི་ཚུལ་གྱིས་སེམས་ཅན་གྱི་དོན་མཛད་པའོ། །དེ་ནས་བཅོམ་ལྡན་འདས་ཀྱིས་དཀྱིལ་འཁོར་བརྟག་པར་མཛད་དོ་ཞེས་བྱ་བར་སྦྱར་རོ། །དེ་ནས་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གི་རྗེས་ཐོགས་ཉིད་ལ་བཅོམ་ལྡན་འདས་རྡོ་རྗེ་སེམས་དཔས་རྡོ་རྗེའི་གླུ་གསུངས་སོ་ཞེས་བྱ་བ་སྟེ། རྡོ་རྗེའི་གླུ་ལེན་ཅིང་དཀྱིལ་འཁོར་ཏེ། གསང་བའི་དཀྱིལ་འཁོར་བརྟག་པར་མཛད་པ་ནི། ཡོངས་སུ་བརྟག་པར་མཛད་པ་སྟེ། དཀྱིལ་འཁོར་བྲི་བའི་ཆོ་ག་གསུངས་པའོ་ཞེས་བྱ་བའི་ཐ་ཚིག་གོ །ད་ནི་རྡོ་རྗེ་གླུ་སྟེ། རྗེས་སུ་ཆགས་པ་ཞེས་བྱ་བ་ལ་སོགས་པ་གསུངས་པ་ཡིན་ཏེ། རྗེས་སུ་ཆགས་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྗེས་སུ་ཆགས་པ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པའི་སྔགས་བསྒྲུབ་པའི་སྦྱོར་བའོ། །དེས་བསྐྱེད་པའི་བདེ་བ་ནི་རྗེས་སུ་ཆགས་པ་ཐམས་ཅད་ཀྱིས་བསྐྱེད་པའི་བདེ་བའོ། །དེས་ཡིད་མཆོག་ཏུ་བདེ་བར་གྱུར་པ་ནི་རྗེས་སུ་ཆགས་པ་ཐམས་ཅད་ཀྱི་བདེ་བ་དམ་པ་ཡིན་ནོ། །དེ་རྣམས་འབྱུང་བའི་རྒྱུ་ནི་ཁྱེད་གཉིས་ཡིན་པས་ན་བསྐྱེད་པའི་རྒྱུའོ། །ཇི་ལྟར་ཞེ་ན། རབ་དགའ་བ་ཞེས་བྱ་བ་ལ་སོགས་པ་སྨོས་ཏེ། གང་གི་ཕྱིར་ཁྱེད་ནི་རབ་ཏུ་དགའ་བ་ཡིན་ཞིང་འགྲོ་བ་སྟེ། སེམས་ཅན་རྣམས་ཀྱི་བདེ་བ་ཆེན་པོ་བརྟན་ཞིང་མཐོ་བར་བྱེད་པ་ཞེས་བྱ་བ་ནི་བདེ་བ་ཆེན་པོ་སྟེ། གཉིས་སུ་མེད་པའི་ཡེ་ཤེས་ཀྱི་བརྟན་པ་ནི་རྡོ་རྗེ་ལྟར་མི་ཕྱེད་པའོ། །དེ་མཛད་པས་ན་བརྟན་ཞིང་མཐེ་བར་མཛད་པའོ། །བདག་ཀྱང་དེར་མཛོད་ཅེས་བྱ་བ་ནི་ཇི་ལྟར་ཁྱེད་ནི་དེ་རྣམས་ཀྱི་བརྟན་
ཞིང་མཐོང་བར་མཛད་པ་དེ་བཞིན་དུ་བདག་ཀྱང་བརྟན་ཞིང་མཐོ་བར་མཛད་པ་དེ་བཞིན་དུ་མཛོད་ཅིག་པའོ། རྡོ་རྗེ་སེམས་དཔའི་གསང་བའི་དཀྱིལ་འཁོར་ལ་རིངས་ཤིང་མྱུར་བར་གྲུབ་པ་ཉིད་དུ་ཕྱོགས་ཤིང་མངོན་དུ་གྱུར་པར་མཛོད་ཅིག་ཅེས་པ་ཏེ། སློབ་དཔོན་དེ་ལྟ་བུའི་གླུ་ལེན་ཞིང་རྟག་པས་རྡོ་རྗེ་སེམས་དཔའི་གསང་བའི་དཀྱིལ་འཁོར་བྲི་བར་བྱའོ་ཞེས་བྱ་བའི་ཐ་ཚིག་གོ །དཀྱིལ་འཁོར་ཆེན་པོའི་ཚུལ་གྱིས་ནི། །དང་པོའི་དཀྱིལ་འཁོར་བསྟན་པར་བྱ། །ཞེས་བྱ་བ་ནི། དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ལྟར། དཀྱིལ་འཁོར་འདི་ཐམས་ཅད་བྲི་བར་བྱའོ། །ཕྱག་ན་རྡོ་རྗེ་ཐམས་ཅད་དུ། །རྡོ་རྗེ་ལྷ་མོ་ལ་སོགས་ཚོགས། །ཞེས་བྱ་བ་ནི། འདིར་ཁྱད་པར་ནི་འདི་ཡིན་ཏེ། ཐམས་ཅད་དཀྱིལ་འཁོར་ཆེན་པོ་དང་འདྲ་བ་ལས་འདིར་རྡོ་རྗེ་ཡིད་ལས་བྱུང་བ་ནས་རྡོ་རྗེ་འབེབས་པའི་བར་དུ་ཐམས་ཅད་བུད་མེད་ཀྱི་ཆ་ལུགས་འཛིན་པར་བྱའོ། །དེ་ལྟར་རྡོ་རྗེའི་གླུ་ལེན་ཅིང་དཀྱིལ་འཁོར་བྲིས་ནས་དཀྱིལ་འཁོར་བྲི་བར་བྱའོ། །ཇི་ལྟར་ཞེ་ན། ཆོ་ག་གཞན་དུ་ཞེས་བྱ་བ་གསུངས་ཏེ། ཇི་ལྟར་སྔར་བཤད་པའི་རྡོ་རྗེ་སེམས་དཔའི་རྣལ་འབྱོར་ཆེན་པོ་བྱས་ལ། རང་གི་སྙིང་པོས་ལྷ་རྣམས་དགོད་པར་བྱའོ། །དེ་ལ་སྙིང་པོ་ནི་འདི་དག་ཡིན་ཏེ། ཨ་ནུ་རཱ་ག་ཡ་ག་མཾ་ཧཱུཾ་ཞེས་བྱ་བ་ནི་བཅོམ་ལྡན་འདས་ཀྱིའོ། །ཧཱུཾ་བཛྲ་དྲྀ་ཥྚི་ས་མ་ཀི་མ་ཊ། ཧཱུཾ་བཛྲ་ཀཱི་ལི་ཀཱི་ལི་ཧཱུཾ། ཧཱུཾ་སྨ་ར་ཊ་བཛྲི་ཎི་བནྡྷ། ཧཱུཾ་ཏུ་ཥྱ་བཛྲ་ཎི་ཧཱུཾ་ཞེས་བྱ་བ་ནི། རྡོ་རྗེ་ཡིད་ལས་བྱུང་བ་ལ་སོགས་པའོ། །རྡོ་རྗེ་མཚོན་ཆ་མ་ལ་སོགས་པ་དང༌། རྡོ་རྗེ་སྦྲང་རྩི་མ་ལ་སོགས་པའི་སྙིང་པོ་ནི་དཀྱིལ་འཁོར་ཆེན་པོ་ལས་གསུངས་པ་ཡིན་ནོ། །རྡོ་རྗེ་ལྕགས་ཀྱུ་མ་ལ་སོགས་པ་ནི་དེ་བཞིན་གཤེགས་པའི་དཀྱིལ་འཁོར་ལས་གསུངས་པའི་སྙིང་པོ་རྣམས་ཡིན་པར་ཤེས་བར་བྱའོ། །དེ་ནས་སྒོ་དབྱེ་བ་བྱས་ལ་མཆོད་ཡོན་དབུལ་བར་བྱའོ། །དེ་ནས་བུམ་པ་ལ་སོགས་པས་དཀྱིལ་འཁོར་ཐམས་ཅད་ཡང་དག་པར་མཆོད་ལ། དཀྱིལ་འཁོར་ཆེན་པོ་ལས་བཤད་པའི་ཚུལ་དུ་བདག་ཉིད་རྒྱན་གྱིས་བརྒྱན་ལ། སྔོན་དུ་སྤྱོད་པ་བྱས་ཤིང་སེམས་རྩེ་
གཅིག་པ་ཐོབ་པའི་རྡོ་རྗེ་སྙེམས་མའི་ལྷ་མོའི་སྦྱོར་བ་དང་ལྡན་པའི་གཟུངས་མ་གཡས་པའི་ཁུ་ཚུར་གྱིས་རྡོ་རྗེ་དྲིལ་བུ་ཐོགས་པ་དང་བཅས་པས་སྙེམས་པ་བྱས་ཤིང་ལག་པ་གཡོན་པ་ན་དང་པོའི་རྡོ་རྗེ་ཐོགས་པ་བླངས་ལ་འཛིན་པའི་ཚུལ་གྱིས་རྡོ་རྗེ་དང་བཅས་པའི་རྡོ་རྗེ་སྙེམས་མ་མཆོག་གི་ཕྱག་རྒྱས་བདག་ཉིད་འཇུག་པར་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་རྡོ་རྗེ་དྲིལ་བུ་དང་བཅས་པ་བཅིངས་ལ་ལག་པ་གཡས་པས་ཇི་སྐད་དུ་བཤད་པའི་གཟུངས་མ་བླངས་ནས་བཟུང་བའི་ཚུལ་གྱིས་བཛྲ་བཛྲ་ཞེས་བྱ་བ་དང༌། སྔར་བཤད་པའི་ཚུལ་གྱིས་རྡོ་རྗེའི་གླུ་ཟློས་ཤིང་དེ་བཞིན་དུ། སློབ་དཔོན་བདག་ཉིད་འཇུག་པར་བྱའོ། །ཞུགས་པ་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་དུ་ཞུགས་ནས་སྐོར་བ་ལན་གསུམ་བྱས་ཏེ། བཅོམ་ལྡན་འདས་ཕྱག་ན་རྡོ་རྗེའི་སྤྱན་སྔར་འདུག་ལ་ཧཱུཾ་ཞེས་བྱ་བ་ལ་སོགས་པས་དེ་ཁོ་ན་ཉིད་དང༌། གསང་བ་བརྗོད་ལ་སྔར་བཤད་པའི་ཆོ་ག་ཐམས་ཅད་བྱའོ། །དེ་ལྟར་སྔར་བཤད་པའི་ཆོ་ག་རྒྱས་པར་རྫོགས་པར་བྱས་ནས། དབང་བསྐུར་བ་ཐམས་ཅད་ཀྱིས་བདག་ཉིད་ཇི་ལྟ་བ་བཞིན་དུ། དབང་བསྐུར་ལ་དངོས་གྲུབ་ཀྱི་རྡོ་རྗེའི་བརྟུལ་བཞུགས་བླངས་ནས་མཆོད་པ་ཐམས་ཅད་ཀྱིས་མཆོད་དེ། དེ་ཁོ་ན་ཉིད་ཀྱིས་རྡོ་རྗེ་བཟུང་ཞིང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ནས་རྗེས་སུ་གནང་བ་དང༌། ལུང་བསྟན་པ་དང༌། སྙིང་པོ་དང་ཕྱག་རྒྱ་བཞིའི་ཡེ་ཤེས་བཅོམ་ལྡན་འདས་ལ་བླངས་ནས། བདག་ལ་བྱིན་གྱིས་བརླབ་པ་ལ་སོགས་པ་བྱས་ལ། རང་གི་རྡོ་རྗེ་མིང་ནས་བརྗོད་པ་ཡང་བྱས་ནས། དཀྱིལ་འཁོར་རྡོ་རྗེས་བསྒྲུབ་པར་བྱའོ། །དེ་ནས་བསྡུ་བ་དང༌། མཚན་བརྒྱ་རྩ་བརྒྱད་པས་བསྟོད་པར་བྱས་ལ། སྔ་མ་བཞིན་དུ་དཀྱིལ་འཁོར་ཆེན་པོ་ལས་བཤད་པའི་ཆོ་གས། བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་གཞུག་པར་བྱའོ། །དེ་ནས་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་སློབ་དཔོན་རབ་ཏུ་དགའ་བའི་རྡོ་རྗེའི་དམ་ཚིག་གི་ཕྱག་རྒྱས་རྗེས་སུ་ཞུགས་པ་དེ་
བཞིན་དུ་དེ་ཁོ་ན་ཉིད་ཆེན་པོ་འབྱུང་བས་རྗེས་སུ་བསྐུལ་ཏེ། །རང་གི་ཆོ་ག་ཐམས་ཅད་རྗེས་སུ་སྤྱད་པ་ལ། སྲིད་པའི་བདེ་བ་རྣམ་དག་ཕྱིར། །ཞེས་བྱ་བ་ལ་སོགས་པ་སློབ་མ་གཞུག་པའི་ཕྱིར། བཀའ་མ་ནོས་ལ་ཕྱིར་འབྱུང་བར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ། །སློབ་མ་གཞུག་པར་བྱའོ་ཞེས་བྱ་བ་ནི། དཀྱིལ་འཁོར་ཆེན་པོ་ལས་བཤད་པའི་ཆོ་ག་ཉིད་ཀྱིས། །རབ་ཏུ་དགའ་བའི་རྡོ་རྗེ་དམ་ཚིག་གིས་སློབ་མ་གཞུག་པར་བྱའོ། །དེ་ནས་དེ་བཞིན་དུ་ལས་ཀྱི་ཆོ་ག་ཐམས་ཅད་རྫོགས་པར་བྱའོ། །འདིར་ཡང་རང་ཉིད་འཇུག་པས་དཀྱིལ་འཁོར་དུ་འཇུག་པར་འགྱུར་རོ་ཞེས་བྱ་བ་ནི། ཇི་ལྟར་དཀྱིལ་འཁོར་དུ་རང་ཉིད་འཇུག་པས། དཀྱིལ་འཁོར་དུ་འཇུག་པར་འགྱུར་པ་དེ་བཞིན་དུ་འདིར་ཡང་འཇུག་པར་འགྱུར་རོ་ཞེས་སྟོན་ཏོ། །རྡོ་རྗེ་སློབ་དཔོན་ཐམས་ཅད་ཅེས་བྱ་བ་ནི། དཀྱིལ་འཁོར་གྱི་སློབ་དཔོན་ཐམས་ཅད་དོ། །ཕྱག་རྒྱ་ཐམས་ཅད་ཀྱི་བདག་པོ་ཞེས་བྱ་བ་ནི། དཀྱིལ་འཁོར་གྱི་མཚན་མ་ཐམས་ཅད་ཀྱི་བདག་པོའོ། །དམ་ཚིག་ཐམས་ཅད་ཤེས་པ་ཞེས་བྱ་བ་ནི། དམ་ཚིག་ཐམས་ཅད་ནི་དཀྱིལ་འཁོར་གྱི་དམ་ཚིག་ཐམས་ཅད་དེ། དེ་ཤེས་པས་ན་དམ་ཚིག་ཐམས་ཅད་ཤེས་པའོ། །དེ་ཡང་དམ་ཚིག་གི་དཀྱིལ་འཁོར་གྱི་སློབ་དཔོན་ཞེས་བྱ་བའི་ཐ་ཚིག་གོ །ཐམས་ཅད་ཚར་གཅོད་པ་དང༌། ཕན་འདོགས་པར་ནུས་པ་ཞེས་བྱ་བ་ནི། ལས་ཀྱི་ཕྱག་རྒྱ་ཐམས་ཅད་ཀྱི་དཀྱིལ་འཁོར་གྱི་སློབ་དཔོན་གྱི་ཚུལ་གྱིས་སེམས་ཅན་ཐམས་ཅད་ལ་ཚར་གཅོད་པ་དང༌། ཕན་འདོགས་པར་ནུས་པའོ། །ཇི་ལྟར་ན་དེ་ལྟར་འགྱུར་ཞེ་ན། དངོས་གྲུབ་ཐམས་ཅད་ཅེས་བྱ་བ་ལ་སོགས་པ་སྨོས་ཏེ། གང་གི་ཕྱིར་དངོས་གྲུབ་ཐམས་ཅད་ཕུན་སུམ་ཚོགས་པའི་ཡེ་ཤེས་ཀྱི་ལས་སྐད་ཅིག་གིས་བྱེད་པ་ཉིད་དུ། བཅོམ་ལྡན་འདས་ཀྱིས་བྱིན་གྱིས་བརླབས་པ་མཛད་པ་དེར་དངོས་གྲུབ་ཐམས་ཅད། རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་པ་དེས། འཇིག་རྟེན་དང་འཇིག་རྟེན་ལས་འདས་པའི་འབྱོར་པ་ཐམས་ཅད་ཕུན་སུམ་ཚོགས་པའི་ཡེ་ཤེས་
ཏེ་ལས་གང་གིས་བྱེད་པ་སྟེ། སེམས་ཅན་གྱི་དོན་གྱི་བྱ་བ་དང༌། སངས་རྒྱས་ཀྱི་མཆོད་པ་ལ་སོགས་པའི་ཚུལ་དེ་དག་གི་དངོས་གྲུབ་ཐམས་ཅད་ནི་ཡེ་ཤེས་ཕུན་སུམ་ཚོགས་པའི་ལས་ཏེ། དེ་བྱེད་པས་ན་དངོས་གྲུབ་ཐམས་ཅད་ཀྱི་ཕུན་སུམ་ཚོགས་པའི་ཡེ་ཤེས་ཀྱི་ལས་བྱེད་པའོ། །སྐད་ཅིག་ཉིད་ཀྱིས་ཞེས་བྱ་བ་ནི། བཅོམ་ལྡན་འདས་རྡོ་རྗེ་སེམས་དཔས་དུས་གཞན་དུ་བྱིན་གྱིས་བརླབས་པར་མཛད་པ་མ་ཡིན་གྱི། རིགས་ལྔའི་དངོས་གྲུབ་ཀྱི་བྱ་བ་བྱེད་པར་མཛད་དོ་ཞེས་བྱ་བའི་ཐ་ཚིག་གོ །ཇི་ལྟར་ཞེ་ན། རང་ཉིད་འཇུག་པ་ཉིད་ཀྱིས་ཞེས་བྱ་བ་གསུངས་ཏེ། འཇུག་པ་ཙམ་ཞེས་སྨོས་པས་ནི་དབང་བསྐུར་བ་དགར་བ་ཡིན་ཏེ། དེས་ནི་ཤིན་ཏུ་ཡང་བྱིན་གྱིས་རློབ་པར་མཛད་དོ་ཞེས་སྟོན་ཏོ། །སློབ་དཔོན་མ་ཡིན་པ་ཡང་ཞེས་བྱ་བ་ནི་དཀྱིལ་འཁོར་འདིར་མ་ཞུགས་པའོ། །དེ་ཅིའི་ཕྱིར་ཞེ་ན་ཞེས་བྱ་བ་ནི་རྒྱུ་ཅིའི་ཕྱིར་སློབ་དཔོན་མ་ཡིན་ཞིང་དཀྱིལ་འཁོར་དུ་མ་ཞུགས་པ་དག་ལ་ཡང་བཅོམ་ལྡན་འདས་དེ་ལྟར་བྱིན་གྱི་རློབ་པར་མཛད་ཅེ་ན། འདི་ལྟར་ཞེས་བྱ་བ་ལ་སོགས་པ་གསུངས་ཏེ། འདི་ལྟར་ཞེས་བྱ་བ་རྣམ་པ་འདིས་རང་ཉིད་དཀྱིལ་འཁོར་དུ་འཇུག་པར་བྱེད་པ་དང༌། གང་གི་ཕྱིར་བཅོམ་ལྡན་འདས་རྡོ་རྗེ་སེམས་དཔའ་ངེས་པར་རང་གི་དམ་ཚིག་གིས་ཞེས་པ་དཀྱིལ་འཁོར་དུ་འཇུག་པའི་རང་གི་དམ་ཚིག་གི་ཆོ་ག་འདིས་རྡོ་རྗེ་སློབ་དཔོན་དུ་གྱུར་ནས་སོ། །སློབ་དཔོན་འཇུག་པ་ནི་ཞེས་བྱ་བ་ནི་ཞུགས་ནས་དབབ་པ་ལ་སོགས་པའི་ཆོ་ག་ཐམས་ཅད་བྱེད་དུ་འཇུག་པའོ། །སྙིང་པོ་འདི་ཡང་བྱིན་གྱིས་བརླབས་ཀྱིས་ཞེས་བྱ་བ་ནི་ཧཱུཾ་གི་མཐུས་དཀྱིལ་འཁོར་དུ་མ་ཞུགས་པ་ལ་ཡང་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་དུ་འཇུག་པའོ། །རྡོ་རྗེ་སློབ་དཔོན་ཐམས་ཅད་ཅེས་བྱ་བ་ནི། རྡོ་རྗེ་སེམས་དཔའི་དཀྱིལ་འཁོར་གྱི་སློབ་དཔོན་དུ་ཧཱུཾ་ཞེས་བྱ་བ་ལན་ཅིག་བཟླས་པས་ཀྱང་འགྲུབ་པའོ། །མི་སོད་པ་ཞེས་བྱ་བ་ནི་རྡོ་རྗེ་ལ་སོགས་པས་ཀྱང་བཅོམ་པར་མི་ནུས་པའོ། །མི་ཚུགས་པ་ཞེས་བྱ་བ་ནི་ཟིལ་གྱིས་མནན་པར་མི་ནུས་པའོ། ཐམས་ཅད་བྱེད་ཅེས་བྱ་བ་ནི་སྔ་མ་
བཞིན་ནོ། །ནམ་མཁའ་ལ་སོགས་པ་ལས་ཨ་ལ་སོགས་པའི་ཡི་གེ་ཐམས་ཅད་ནས་སྣ་ཚོགས་སྟོན་ཅིང་མངོན་པར་འདོད་པའི་དོན་གསལ་བར་བྱེད་པའི་ལུས་ཀྱིས་ཐམས་ཅད་མཐོང་ངོ་ཞེས་བྱ་བ་ནི་འདས་པ་དང༌། མ་འོངས་པ་དང༌། ད་ལྟར་བྱུང་བའི་མངོན་པར་འདོད་པའི་དངོས་པོ་ཐམས་ཅད་ཡི་གེས་གསལ་བར་བྱས་ནས་མིག་གིས་མཐོང་བའོ། །ཐོས་ཞེས་བྱ་བ་ནི་རྣ་བས་སོ། །རིག་ཅེས་བྱ་བ་ནི་ཡིད་ཀྱི་རྣམ་པར་ཤེས་པས་སོ། །ཤེས་ཞེས་བྱ་བ་ནི་བསམ་པའི་རང་བཞིན་གྱི་ཤེས་པས་ངེས་པར་འཛིན་པའོ། །དངོས་པོ་ཐམས་ཅད་ཅེས་བྱ་བ་ནི་གསང་བའི་དཀྱིལ་འཁོར་ལ་སོགས་པའི་ཚུལ་ལོ། །དེ་བཞིན་གཤེགས་པ་ནི་རྣམ་པར་སྣང་མཛད་ལ་སོགས་པའོ། །རྡོ་རྗེ་འཆང་ཆེན་པོ་ནི་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་དང་བཅས་པར་འདུས་པར་མཛད་ནས་གསོལ་པའོ། །ཡོངས་སུ་སྤྱང་བའི་དོན་ནི་མ་ཡིན་ནོ་ཞེས་བྱ་བ་ལ་སོགས་པ་ལ། ཇི་ལྟར་དཀྱིལ་འཁོར་ཆེན་པོ་བསྒྲུབ་པ་ནི་དབང་བསྐུར་བར་བྱེད་པ་ལྟར་ནི་མ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་དེ་ཉིད་བསྒྲུབ་པར་གསོལ་བའོ། །དེ་བཞིན་གཤེགས་པ་རྣམས་རྣམ་པར་དག་པ་དང་གདུལ་བར་བྱ་བའི་ཕྱིར་བགེགས་མཛད་པ་དང༌། སྡུག་བསྔལ་སྐྱེད་པར་མཛད་པ་དེ་བཞིན་དུ་གསང་བའི་དཀྱིལ་འཁོར་དུ་རང་ཉིད་ཞུགས་པ། དཀྱིལ་འཁོར་དུ་མ་ཞུགས་པའི་སློབ་དཔོན་ལ་ཡང་དེ་ལྟར་མཛད་པ་མ་ཡིན་ནོ། །བཅོམ་ལྡན་འདས་ཞེས་བྱ་བ་ལ་སོགས་པ་ལ། དེ་བཞིན་གཤེགས་པ་རྣམས་དེ་ལ་བགེགས་མི་མཛད་པར་མ་ཟད་ཀྱི། བཅོམ་ལྡན་འདས་བདེ་བ་ཆེན་པོ་རྡོ་རྗེ་འཆང་ཤིན་ཏུ་བརྟན་པའི་སེམས་རྩེ་གཅིག་པ་མངོན་དུ་འགྱུར་ཞིང༌། ཤིན་ཏུ་དགྱེས་པ་ནི་སྒྲུབ་པ་པོའི་ཏིང་ངེ་འཛིན་གྱིས་ཡང་དག་པའི་ཚུལ་གྱིས་མངོན་དུ་བྱའོ།། རྗེས་སུ་ཆགས་པ་ནི་སྒྲུབ་པ་པོ་རང་གི་དངོས་གྲུབ་རྫོགས་པར་མཛད་པ་ལ་ཐུགས་རྩེ་གཅིག་པའོ། །ཤིན་ཏུ་རྒྱས་པ་ནི་ཏིང་ངེ་འཛིན་གྱི་སྟོབས་ཀྱིས་སྒྲུབ་པ་པོས་བདག་ཉིད་ཀྱི་ངོར་བྱའོ། །དངོས་གྲུབ་ཐམས་ཅད་ནི་ཇི་སྐད་བཤད་པ་རྣམས་སོ། །ཕུན་སུམ་ཚོགས་པ་ཐམས་
ཅད་དང་ཡེ་ཤེས་ཐམས་ཅད་དང༌། ལས་ཐམས་ཅད་ནི་ཇི་སྐད་དུ་བཤད་པ་རྣམས་སྒྲུབ་པར་མཛད་པ་ཡིན་ནོ། །ཇི་ལྟར་སྒྲུབ་པར་མཛད་ཅེ་ན། གདོན་མི་ཟ་བར་གྲུབ་པ་ཞེས་བྱ་བས་སོ། །དུས་རིང་པོས་སམ་ཞེ་ན། མ་ཡིན་ཏེ་མྱུར་དུ་ཞེས་བྱ་བས་སོ། །འོན་ཀྱང་ཞེས་བྱ་བ་ལ་སོགས་པ་ལ་རང་ཉིད་ཞུགས་པ་ཙམ་གྱིས་དེ་ལྟ་བུ་ལ་སོགས་པའི་དངོས་གྲུབ་དེ་ལ་གསོལ་བར་མཛད་པ་དེ་འབའ་ཞིག་ཏུ་མ་ཟད་ཀྱི། གསང་བའི་དཀྱིལ་འཁོར་སློབ་དཔོན་གང་གིས་དཀྱིལ་འཁོར་བྲི་བའམ། དེའི་གསང་བའི་དཀྱིལ་འཁོར་འདྲིར་བཅུག་གམ་གསང་བའི་དཀྱིལ་འཁོར་གྱི་རྟོག་པ་ལན་ཅིག་བརྗོད་པའམ། གཞུང་དང་དོན་གྱི་རང་བཞིན་འཛིན་པ་དེས་བསྒྲུབས་ནའང་ཞེས་བྱ་བ་ནི་བསྒྲུབས་པ་འབའ་ཞིག་ལ་གསོལ་བར་མ་ཟད་ཀྱི་འོན་ཀྱང་མ་བསྒྲུབས་པ་ལ་ཡང་ངོ༌། །དཀྱིལ་འཁོར་མ་ཞུགས་ན་ཡང་ཞེས་བྱ་བ་ནི་ཀློག་པ་དང་འཛིན་པའི་ནུས་པས་དངོས་གྲུབ་ཐམས་ཅད་དང་བཅས་པའི་མཆོག་གི་དངོས་གྲུབ་འབྱུང་བར་འགྱུར་རོ། །དངོས་གྲུབ་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་དངོས་གྲུབ་ཐམས་ཅད་དེ། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་དོ། །དེ་རྣམས་དང་བཅས་པའི་མཆོག་གི་དངོས་གྲུབ་ནི་རྡོ་རྗེ་འཆང་བ་ཆེན་པོ་ཉིད་ལ་སོགས་པ་ཐོབ་པའོ། །སྐྱེ་བ་འདི་ཉིད་ལ་ཞེས་བྱ་བ་ནི་སྐྱེ་བ་གང་ལ་དེས་གསང་བའི་རྟོག་པ་འདི་ལན་ཅིག་བརྗོད་པའམ། འཛིན་པའི་སྐྱེ་བ་དེ་ཉིད་ལ་ཇི་ལྟར་འདོད་པའི་དངོས་གྲུབ་ཐམས་ཅད་དང་བཅས་པའི་མཆོག་གི་དངོས་གྲུབ་ཐོབ་པ་ཡིན་ནོ། །གཞུང་འདིས་ནི་སྐྱེ་བ་བརྒྱུད་པས་གོམས་པའི་རྣལ་འབྱོར་གང་ལྷན་ཅིག་ཏུ་བརྗོད་པའམ། འཛིན་པ་དེ་ཉིད་སྐྱེ་བ་འདི་ལ་མཆོག་གི་དངོས་གྲུབ་སྒྲུབ་པར་བྱེད་པ་ཡིན་ཏེ། གཞན་ནི་མ་ཡིན་ནོ་ཞེས་བསྟན་ཏོ། །དེ་ཅིའི་ཕྱིར་ཞེ་ན་ཞེས་བྱ་བ་ནི། རྒྱུ་གང་གི་ཕྱིར་ཏེ་དགེ་བའི་རྩ་བ་ཡོངས་སུ་སྨིན་པས་གང་ཞིག་ཉན་པ་དང་འཛིན་པ་དེ། ཚེ་འདི་ཉིད་དུ་མཆོག་གི་དངོས་གྲུབ་སྒྲུབ་པར་བྱེད་པ་ཡིན་ཏེ། གཞན་ནི་མ་ཡིན་ནོ་ཞེས་བསྟན་པའི་ཕྱིར། །འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཡི་གེ་
ཧཱུཾ་གི་རྟོག་པ་འདིས་གང་ཟག་ཁྱད་པར་ཅན་དེ་ལ་འདོད་པའི་དངོས་གྲུབ་རྫོགས་པར་བྱེད་པས། གདོན་མི་ཟ་བ་དང་ཐོགས་པ་མེད་པའོ། །ཅིའི་ཕྱིར་གདོན་མི་ཟ་བ་དང༌། ཐོགས་པ་མེད་པ་ཡིན་ཞེ་ན། བདག་ཅེས་བྱ་བ་ལ་གང་གི་ཕྱིར་རྡོ་རྗེ་འཆང་བདག་དང༌། དེ་བཞིན་གཤེགས་པ་ཐམས་ཅད་ཀྱིས་ཀྱང་འདི་ལ་བར་གཅོད་བྱེད་པར་ནུས་པ་མ་ཡིན་ནོ། །དེ་ཉིད་ཅིའི་ཕྱིར་ཞེ་ན། ཐམས་ཅད་རྗེས་སུ་ཆགས་པ་ཉིད་ཀྱི་ཕྱིར་ཞེས་བྱ་བ་སྨོས་ཏེ། ཐམས་ཅད་ཀྱང་ཡིན་ལ་རྗེས་སུ་ཆགས་པ་ཡང་དེ་ཉིད་ཡིན་པས་ན་ཐམས་ཅད་རྗེས་སུ་ཆགས་པ་ཞེས་བྱ་སྟེ། སེམས་རྩེ་གཅིག་པའི་རང་བཞིན་གྱིས་ཤིན་ཏུ་རྣལ་འབྱོར་དང་ལྡན་པའི་ཕྱིར་ཞེས་བྱ་བའི་དོན་ཏོ། །སངས་རྒྱས་ཀྱི་བྱང་ཆུབ་ཀྱང་རྗེས་སུ་ཆགས་པ་ལས་ཀྱང་བྱུང་བ་ཡིན་ནོ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའི་རང་བཞིན་གྱི་སེམས་རྩེ་གཅིག་པ་ཉིད་ཀྱི་མཚན་ཉིད་ཀྱིས་རྗེས་སུ་ཆགས་པ་དེས་མཉམ་པ་མེད་པའི་སངས་རྒྱས་ཀྱི་རྣལ་འབྱོར་རྣམས་ལས་འབྱུང་བར་འགྱུར་ན། དངོས་གྲུབ་གཞན་ཡང་འབྱུང་བར་མི་འགྱུར་བ་མ་ཡིན་ཏེ། འོན་ཀྱང་འབྱུང་བ་ཡིན་ཞེས་བསྟན་པ་ཡིན་ནོ། །རྗེས་སུ་ཆགས་པ་འབྱུང་ཞེས་བྱ་བ་བསྟན་པའི་ཕྱིར་འདོད་པ་བསྟན་པ་ཞེས་བྱ་བ་ལ་སོགས་པ་གསུངས་ཏེ། འདོད་པ་བསྟན་པ་ནི་སངས་རྒྱས་ཉིད་ལ་སོགས་པ་འདོད་པའི་བསམ་པ་བསྟན་པས་ཤིན་ཏུ་རྣལ་འབྱོར་གྱི་མཚན་ཉིད་ཅན་གྱི་རྗེས་སུ་ཆགས་པ་དེ་འབྱུང་བ་ཡིན་གྱི་གཞན་དུ་མ་ཡིན་ནོ། །འདོད་པ་བསྟན་པ་དེ་ལ་ཅི་དགོས་ཞེས་རྣམ་པར་རྟོག་པ་དེ་བསལ་བའི་ཕྱིར་དེ་མི་འདོད་པས་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་རྣལ་འབྱོར་གྱི་རང་བཞིན་རྗེས་སུ་ཆགས་པ་དེ་མི་འདོད་ན་ཇི་ལྟར་འབྱུང་བར་འགྱུར་ཞེས་སྦྱར་རོ། །ཇི་ལྟར་ཞེས་བྱ་བ་ནི་ཡུན་རིང་པོས་ཞེས་བྱ་བའི་དོན་ཏོ། །མཆོག་ནི་ཕུལ་དུ་འབྱུང་བའོ། །བདེ་བ་ཆེན་པོ་ལ་སོགས་པའི་གོ་འཕང་ཐམས་ཅད་ཅེས་བྱ་བ་ལ། བདེ་བ་ཆེན་པོ་ནི་རྡོ་རྗེ་སེམས་དཔའ་སྟེ། རྡོ་རྗེ་ཡིད་ལས་བྱུང་བ་ལ་སོགས་པ་གང་ལ་དེ་ཉིད་ཐོག་མར་ཡོད་པ་དེ་ཉིད་དུ་བདེ་བ་ཆེན་པོ་ལ་སོགས་
པའི་གོ་འཕང་ངོ༌། །ཐམས་ཅད་ཀྱང་ཡིན་ལ་གོ་འཕང་ཡང་དེ་ཉིད་ཡིན་པས་ཐམས་ཅད་ཀྱི་གོ་འཕང་ངོ༌། །བདེ་བ་ཆེན་པོ་ལ་སོགས་པ་ཡང་ཡིན་ལ་ཐམས་ཅད་ཀྱི་གོ་འཕང་ཡང་ཡིན་པས་ན་བདེ་བ་ཆེན་པོ་ལ་སོགས་པ་ཐམས་ཅད་ཀྱི་གོ་འཕང་ངོ༌། །གྲུབ་ན་ཞེས་བྱ་བ་ལ་སོགས་པ་ལ་ཤིན་ཏུ་རྣལ་འབྱོར་གྱི་མཚན་ཉིད་ཅན་གྱི་དེ་བཞིན་གཤེགས་པ་ལ་སོགས་པའི་བསྒོམ་པས་གྲུབ་པའི་རྣལ་འབྱོར་ལའོ། །ནིའི་སྒྲ་ནི་ངེས་པར་གཟུང་བས་ཏེ་གྲུབ་པ་པོ་ཁོ་ན་ལའོ། །བདེ་བ་ཆེན་པོ་ནི་ཐར་པ་ཆེན་པོའོ། །གསང་བ་ཆེན་པོ་ནི་ཕྱག་རྒྱ་ཆེན་པོ་སྟེ། སྙིང་པོ་འདི་དག་སྐད་ཅིག་མ་གཅིག་གིས་སྟེར་བར་བྱེད་པས་ན། བདེ་བ་ཆེན་པོ་དང༌། རྡོ་རྗེ་ཆགས་པ་སྐད་ཅིག་མ་གཅིག་ལ་སྟེར་བའོ། །དེ་གང་ཡིན་ཞེ་ན། སྒྲུབ་པའི་དམ་ཚིག་འདི་ཡིན་ཏེ། །ཞེས་བྱ་བས་ནི་བསྒྲུབ་པར་བྱ་བས་བསྒྲུབ་པ་སྟེ། བདེ་བ་ཆེན་པོ་དང་ཆགས་པ་ཆེན་པོ་སྟེ། རྫོགས་པར་བྱའོ་ཞེས་བྱ་བའི་དོན་ཏོ། །བསྒྲུབ་པའི་དམ་ཚིག་ནི་སྒྲུབ་པའི་དམ་ཚིག་སྟེ་རྒྱུའོ། །དེ་ཡང་ཤིན་ཏུ་རྣལ་འབྱོར་གྱི་མཚན་ཉིད་དོ། །འདི་ནི་ཀུན་གྱིས་འདའ་བར་དཀའ། །ཞེས་བྱ་བ་ནི་ཤིན་ཏུ་རྣལ་འབྱོར་གྱི་རང་བཞིན་སྒྲུབ་པའི་དམ་ཚིག་འདི་དེ་བཞིན་གཤེགས་པ་ཐམས་ཅད་ཀྱི་ཚུལ་གང་གིས་ཀྱང་འདའ་བར་མི་སྤྱོད་པས་ན་འདའ་བར་དཀའ་བ་ཡིན་ནོ། །སྡིག་པ་ཆེན་པོ་བྱེད་པ་དང༌། །དེ་བཞིན་དཀྱིལ་འཁོར་མ་མཐོང་བ། །ཞེས་བྱ་བ་ནི་གང་ཞིག་དམ་པའི་ཆོས་སྤངས་པ་དང༌། མཚམས་མེད་པ་ལ་སོགས་པའི་སྡིག་པ་ཆེན་པོ་བྱེད་པ་དང༌། གང་ཞིག་དཀྱིལ་འཁོར་ལ་མ་ཞུགས་པ་དེ་རྣམས་ཀྱང་ཤིན་ཏུ་རྣལ་འབྱོར་གྱི་མཚན་ཉིད་ཅན་གྱིས་བསྒྲུབ་པའི་དམ་ཚིག་འདིས་དཔལ་རྡོ་རྗེ་སེམས་དཔའ་ལ་སོགས་པ་བསྒྲུབ་པ་ཡིན་ནོ། །དངོས་གྲུབ་གང་གིས་འགྲུབ་ཅེ་ན། མཆོག་གི་དངོས་གྲུབ་ཅེས་བྱ་བ་ནི་རང་གི་ཕྱི་མའི་མཐའ་ལ་སྟོན་པའི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཀྱིའོ། །ནིའི་སྒྲ་ནི་ངེས་པར་གཟུང་བའོ། །མཆོག་གི་དངོས་གྲུབ་ཀྱིས་ཇི་ལྟར་འགྲུབ་ཅེ་ན། ལན་ཅིག་བཟླས་པས་སྡིག་པ་སྤྱང་བས་ཞེས་བྱ་བ་ནི་ཤིན་ཏུ་རྣལ་འབྱོར་འདིས། རྡོ་རྗེ་
འཆང་བ་ཆེན་པོ་ལན་ཅིག་བཟླས་པས་རྣལ་འབྱོར་པ་ལ་དམ་པའི་ཆོས་སྤངས་པ་ལ་སོགས་པའི་རང་བཞིན་གྱི་སྡིག་པ་སྤྱང་བར་མཛད་པ་ཡིན་ནོ། །སྡིག་པ་སྤྱང་བའི་རྒྱུ་ལན་ཅིག་གི་བཟླས་པས་དེས་མཆོག་གི་སྒྲུབ་པ་ཡིན་ནོ། །རྟོག་པ་གསུངས་པ་ཞེས་བྱ་བ་ནི་དཔལ་རྡོ་རྗེ་སེམས་དཔའ་འམ་དེ་བཞིན་གཤེགས་པ་ལ་སོགས་པ་གཞན་གྱིས་རང་རང་གི་བརྟག་པ་རྣམ་པ་གསུམ་ཞལ་བཞི་དང༌། ཕྱག་བརྒྱད་པ་ལ་སོགས་པའི་ཕྱག་རྒྱ་ཆེན་པོའི་ཁྱད་པར་དཔལ་རྡོ་རྗེ་སེམས་དཔའ་ལ་སོགས་པ་རྣམས་ཀྱིས་གང་གསུངས་པའི་རྟོག་པ་རྣམས་ལས་གསུངས་པ་དེ་རང་གི་ཡིད་ཀྱིས་འདོད་པའི་གཟུགས་བརྙན་རྗེས་སུ་དྲན་པའི་སྒོམ་པ་ནི་ཕྱག་རྒྱ་ཆེན་པོའི་ཁྱད་པར་བསྒོམས་པ་རྣམས་ཀྱིས་སྙིང་པོ་ཡི་གེ་ཧཱུཾ་བརྗོད་པའམ། གླེགས་བམ་ཞེས་བྱ་བ་ནི་དཔལ་མཆོག་དང་པོའི་གླེགས་བམ་མདུན་དུ་བཞག་ནས། །དེར་བཅོམ་ལྡན་འདས་སྤྱན་དྲངས་ཏེ་བསྒོམས་ན་དེ་ཡང་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན། ཐམས་ཅད་ཉིད་ཀྱི་ཕྱིར་ཞེས་བྱ་བ་ལ། བཅོམ་ལྡན་འདས་དེ་ཉིད་དམ་ཚིག་ཆེན་པོའི་དེ་ཁོ་ན་ཉིད་ལ་སོགས་པའི་རྟོག་པ་ལས་གསུངས་པའི་ཕྱག་རྒྱ་ཆེན་པོའི་གཟུགས་ཡི་གེ་ཧཱུཾ་དང་གླེགས་བམ་གྱི་ཚུལ་དུ་བཞུགས་པ་རྣམས་ཀྱི་དེའི་ཕྱིར། ཐམས་ཅད་ཉིད་ཀྱི་བདག་པོ་འགྲུབ། །ཅེས་བྱ་བ་ནི། གང་ལ་ཞེས་བྱ་བ་ལ་སོགས་པ་ལ་སྒྲུབ་པ་པོ་གང་ལ་གཟུགས་བརྙན་ནམ། །གླེགས་བམ་མེད་པ་ན་དེའི་སྙིང་པོ་ཡི་གེ་ཧཱུཾ། རས་སམ་རྩིག་པ་ལ་བྲིས་ནས་བསྒྲུབ་པ་ནི་སྔོན་དུ་བསྙེན་པ་བྱས་ཤིང་བཟླས་པ་དང། བསྒོམ་པ་དག་གིས་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱའོ། །གང་གིས་ཡི་གེ་ཧཱུཾ་བྲི་ཞེ་ན། བདག་གིས་ཞེས་བྱ་བ་ནི་བདག་གིས་ཡི་གེ་ཧཱུཾ་བྲིས་ནས། བདག་ཉིད་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱ་བ་ཡིན་ནོ། །འདི་གང་གིས་གསུངས་ཤེ་ན། དོན་ཡོད་ཅིང་ཐོགས་པ་མེད་པའི་དངོས་གྲུབ་ཅན་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་གསུངས་པ་ལ་གལ་ཏེ། སློབ་དཔོན་གང་ཞིག་གསང་བའི་རྟོག་པ་འདི་དང༌། དཀྱིལ་འཁོར་ཆེན་པོ་ལ་སོགས་པའི་རྟོག་པ་རྣམས་སྒྲུབ་པར་
འདོད་ན། དེའི་གསང་བའི་དཀྱིལ་འཁོར་འདི་ལ་ཐིག་གདབ་པར་བྱ་སྟེ། ཇི་ལྟ་བ་བཞིན་དུ་དཔལ་རྡོ་རྗེ་སེམས་དཔའ་ལ་སོགས་པའི་མཚན་མའི་ཕྱག་རྒྱ་རྣམས་བྲིས་ནས། དཔལ་རྡོ་རྗེ་སེམས་དཔའ་ལ་སོགས་པའི་གནས་རྣམས་སུ་བྲི་བར་བྱའོ། །དེ་སྒོ་དབྱེ་བ་བྱས་པ་ལ་བུམ་པ་ལ་སོགས་པ་རྣམས་ཀྱི་དཀྱིལ་འཁོར་ཐམས་ཅད་ཡང་དག་པར་མཆོད་དེ། ཆོ་ག་ཇི་ལྟ་བ་བཞིན་དུ་དང་པོའི་རྡོ་རྗེ་བཅིངས་ནས་རང་ཉིད་འཇུག་པར་བྱའོ། །ཞུགས་ནས་ཆགས་པ་ཆེན་པོ་ཞེས་བྱ་བ་ལ་སོགས་པ་བརྗོད་པར་བྱའོ། །ཆགས་པ་ཆེན་པོ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཆགས་པ་ཆེན་པོ་དེ་ལས་ཐོགས་པ་ཆེན་པོ་སྟེ་རྣལ་འབྱོར་ཐམས་ཅད་སྐྱེ་བར་འགྱུར་ཏེ། ཐམས་ཅད་བདག་ཉིད་ཡིན་ནོ་ཞེས་བྱ་བ་ནི། རྣལ་འབྱོར་སྒྲུབ་པ་པོ་རྣམས་ལ་སྐྱེ་བར་འགྱུར་རོ། །དངོས་གྲུབ་ཐམས་ཅད་རྗེས་ཆགས་ཕྱིར། །ཆགས་པ་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའི་ཕྱག་རྒྱ་ནི། །སྣ་ཚོགས་དམར་བའི་འོད་འབར་བ། །ཞེས་འོག་ནས་གསུངས་པའི་ཕྱིར་རོ། །ཐེག་པ་ཆེ་ལས་བདེ་བ་ཆེ། །ཞེས་བྱ་བ་ནི་ཐམ་ཅད་ཀྱི་རྣལ་འབྱོར་དེ་ལས་བདེ་བ་ཆེན་པོ་སྟེ་བདེ་བ་ཆེན་པོ་མངོན་དུའོ། །བྱང་ཆུབ་ཀྱི་སེམས་ཀྱི་རང་བཞིན་ཅན་གཉིས་སུ་མེད་པའི་སེམས་དང་སེམས་ལས་བྱུང་བ་མངོན་དུ་བྱས་པར་འགྱུར་རོ་ཞེས་བྱ་བའི་དོན་ཏོ། །བདེ་བ་ཆེ་ལས་རྡོ་རྗེ་བརྟན། །ཞེས་བྱ་བ་གཉིས་སུ་མེད་པའི་སེམས་དང་སེམས་ལས་བྱུང་བའི་རང་བཞིན་བྱང་ཆུབ་ཀྱི་སེམས་ཀྱི་ངོ་བོ་དེ་ལས་སྟོང་བ་ཉིད་བཅུ་དྲུག་གི་ཏིང་ངེ་འཛིན་གྱི་ངོ་བོ་མི་ཕྱེད་པ་དང་པོའི་རྡོ་རྗེ་རྩེ་ལྔ་པ་བྱུང་བ་ཡིན་ནོ། །རྡོ་རྗེ་ལས་ནི་ཕྱག་རྒྱ་འབྱུང༌། །ཞེས་བྱ་བ་ནི་དང་པོའི་རྡོ་རྗེ་དེ་ལས་མདའ་ལ་སོགས་པའི་ཕྱག་རྒྱ་རྣམས་འབྱུང་བར་འགྱུར་བ་ཡིན་ནོ། །དང་པོའི་རྡོ་རྗེ་ལ་སོགས་པའི་ཕྱག་རྒྱ་རྣམས་ཅིའི་ཕྱིར་ཕྱག་རྒྱ་ཞེས་བརྗོད་སྙམ་དུ་རྟོག་པ་བསལ་བའི་ཕྱིར་སྐུ་གསུང་ཐུགས་ཀྱི་རྡོ་རྗེ་ཞེས་བྱ་བ་ལ་སོགས་པ་གསུངས་ཏེ། སྐུ་གསུང་ཐུགས་ཀྱི་རྡོ་རྗེ་ནི་བཤད་ཟིན་ཏོ། །དེ་རྣམས་ཀྱི་གཟུགས་བརྙན་གྱི་སྦྱོར་བ་ནི་དེའི་རང་བཞིན་ལ་ལྷག་པར་མོས་པའོ། །གཟུགས་བརྙན་གྱི་སྦྱོར་བ་
དེས་ཕྱག་རྒྱ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཤད་པ་ཡིན་ནོ། །སྒྲུབ་པ་པོ་ལ་སོགས་པའི་རྒྱུད་ལ་རྒྱས་འདེབས་པས་ན་ཕྱག་རྒྱ་ཞེས་རབ་ཏུ་གྲགས་པ་ཡིན་ནོ། །དམ་ཚིག་འདའ་བར་དཀའ་བ་ཞེས་བྱ་བ་ནི་འདའ་བར་དཀའ་བའི་དོན་ནི་དམ་ཚིག་ཅེས་བྱ་བར་བརྗོད་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་དཀའ་བ་ཉིད་ཀྱི་ཕྱིར་རོ། །ཇི་སྐད་དུ། ཕྱག་རྒྱའི་དམ་ཚིག་རབ་གསུངས་ཏེ། །ཡིད་ཀྱིས་གཟུགས་ནི་བརྟན་ཕྱིར་རོ། །ཞེས་གསུངས་སོ། །ཅིའི་ཕྱིར་ཕྱག་རྒྱའི་དམ་ཚིག་འདའ་བར་དཀའ་བ་ཡིན་ཞེ་ན། ཕྱག་རྒྱ་བཅིངས་པ་ཙམ་གྱིས་ནི། ཞེས་བྱ་བ་ལ་སོགས་པ་ལ་སྐུ་གསུང་ཐུགས་ཀྱི་རྡོ་རེ་སྟོན་ཅིང་མངོན་པར་འདྲེན་པའི་རང་བཞིན་གྱིས་ཕྱག་རྒྱ་རྣམས་བཅིངས་པ་ཙམ་གྱིས་སངས་རྒྱས་དང༌། རྡོ་རྗེ་འཆང་ལ་སོགས་པ་ཡང་བསྡུས་པས་འགྲུབ་པར་འགྱུར་རོ། །ཉམས་པས་འཇིགས་པ་ཞེས་བྱ་བ་ནི་དམ་ཚིག་ཉམས་པས་འཇིགས་པས་དེ་རྣམས་འགྲུབ་པར་འགྱུར་རོ། །ཕྱག་རྒྱའི་རག་བཞིན་གྱི་དམ་ཚིག་རྣམས་ཀྱིས་ཇི་ལྟར་འདའ་བར་མི་མཛད་ཅེ་ན། དཔེར་ན་འཁོར་ལོས་སྒྱུར་བཱ་རྒྱལ་པོའི་བཀའ་ལ་ཕྱག་རྒྱའི་རྒྱས་བཏབ་པ་དེའི་ཡུལ་ན་གནས་པ་རྣམས་ཀྱིས། འདའ་བར་མི་ནུས་པ་དེ་བཞིན་དུ་ཕྱག་རྒྱ་རྣམས་སྐྱེ་བོ་ཐམས་ཅད་ཀྱིས་ཀྱང་འདའ་བར་ནུས་པ་མ་ཡིན་ནོ། །དེ་བས་ན་དེ་བཞིན་གཤེགས་པ་རྣམས་ཉམས་པས་འཇིགས་པས་གྲུབ་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པས་ཀྱང་གཞུང་ལུགས་ཉམས་པའི་འཇིགས་པས་གྲུབ་ན། དེའི་ཕྱིར་ཕྱག་རྒྱའི་དམ་ཚིག་འདིས་ཅི་ཞིག་བྱ་ཞེ་ན། སངས་རྒྱས་ཉིད་ཅེས་བྱ་བ་ལ་སོགས་པ་ལ་ཇི་ལྟར་བཤད་པའི་རང་བཞིན་གྱིས་སངས་རྒྱས་ཉིད་དམ་རྡོ་རྗེ་འཆང་ཉིད་ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པའི་རྣམ་པས་བསྐལ་པ་བྱ་བ་རྣམས་ཀྱིས་ཀྱང་དེ་ལྟར་ཐོབ་པ་མ་ཡིན་ན། ཇི་ལྟར་ཚེ་འདི་ཉིད་ལ་ཕྱག་རྒྱ་ཆེན་པ་ལ་སོགས་པའི་ཕྱག་རྒྱའི་མཆོག་བསྡུས་པ་ཡོད་ན་ཐོག་པར་འགྱུར་རོ། །དེ་ཅིའི་ཕྱིར་ཞེ་ན། ཇི་ལྟར་ཞེས་བྱ་བ་ལ་སོགས་པ་ལ་གང་གིས་འཇིག་རྟེན་གདུལ་བར་བྱ་བ་དེ་ནི་འདུལ་བ་སྟེ། རྡོ་རྗེ་
སེམས་དཔའ་ལ་སོགས་པའི་བསྒོམ་པའོ། །རྣམ་པ་གང་གིས་ཇི་ལྟར་འདུལ་བར་ཡོད་པ་དེ་ནི་ཇི་ལྟར་འདུལ་བ་ཅན་གྱི་འཇིག་རྟེན་ནོ། །དེ་བཞིན་དངོས་གྲུབ་གསུངས་པ་ཡིན། །ཞེས་བྱ་བ་ནི། དེ་ལྟ་བུའི་དངོས་གྲུབ་འཇིག་རྟེན་དེ་ལ་གསུངས་བ་ནི། དེ་བས་ན་དེ་དེའི་ཐོབ་པར་བྱ་བའི་ཕྱིར་ཐབས་གསུངས་པ་ནི། དེ་ཡི་ཐབས་ནི་ཕྱག་རྒྱ་ཡིན། །ཞེས་བྱ་བ་ལ་སོགས་པ་དངོས་གྲུབ་དེ་ལ་ཇི་ལྟར་འདུལ་བ་དང་ལྡན་པའི་འཇིག་རྟེན་པས་རྡོ་རྗེ་སེམས་དཔའ་ལ་སོགས་པ་ཐོབ་པའི་ཕྱིར་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཁ་ན་ཐབས་ཡིན་ནོ། །ཐབས་དེའི་ལས་ཇི་ལྟ་བུར་ལྡན་པ་ཡིན་ཞེ་ན། དངོས་གྲུབ་ཐམས་ཅད་བྱེད་པ་མཆོག །ཅེས་བྱ་བ་ལ་མཆོག་ནི་ཕུལ་དུ་བྱུང་བའོ། །དེ་ནས་ཆོ་ག་རྒྱས་པ་ནི་དེ་ཡིན་ནོ་ཞེས་བྱ་བ་ནི་དེ་ལྟ་བ་བཞིན་དུ་བཤད་པའི་རིམ་པས་ཕྱག་རྒྱའི་དཀྱིལ་འཁོར་འདིར་སློབ་དཔོན་གྱིས་འཇུག་པར་བྱའོ། །ཞུགས་ནས་ཆགས་ལ་སོགས་པ་ཆེ། །ཞེས་བྱ་བ་ནས་བརྩམས་ནས། དངོས་གྲུབ་ཐམས་ཅད་བྱེད་པ་མཆོག །ཅེས་བྱ་བའི་བར་དུ་བརྗོད་ལ། རང་གི་ཆོ་ག་ཐམས་ཅད་རྗེས་སུ་བརྗོད་ནས། སློབ་མ་གཞུག་པར་བྱ་བའི་ཕྱིར། གནང་བ་ཐོབ་ནས་སློབ་མ་གཞུག་པར་བྱ་བ་སྟེ། འདི་ནི་དེ་ནས་དེ་བཞིན་དུ་ཆོ་ག་རྒྱས་པའོ་ཞེས་བྱ་བའི་དོན་ཡིན་ནོ། །དངོས་གྲུབ་ཐམས་ཅད་ཤིན་ཏུ་གདོན་མི་ཟའོ་ཞེས་བྱ་བ་ནི་ཇི་ལྟར་གསང་བའི་དཀྱིལ་འཁོར་དུ་སློབ་དཔོན་དང༌། སློབ་མ་དག་ལ། དངོས་གྲུབ་ཐམས་ཅད་འབྱུང་བ་དེ་བཞིན་དུ་ཕྱག་རྒྱ་ཆེན་པོའི་དཀྱིལ་འཁོར་དུ་ཡང་ཤིན་དུ་གདོན་མི་ཟ་བར་འབྱུང་བ་ཡིན་ནོ་ཞེས་བྱ་བའི་དོན་ཏོ། །སླར་ཡང་འདིའི་དོན་བཤད་པར་བྱ་སྟེ། དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་རྣལ་འབྱོར་ཆེན་པོ་སྒྲུབ་པའི་ཚུལ་གྱིས་གསང་བའི་དཀྱིལ་འཁོར་གྱི་དཔལ་རྡོ་རྗེ་སེམས་དཔའི་རྣལ་འབྱོར་ཆེན་པོ་རབ་ཏུ་བསྒྲུབས་ལ། རང་གི་སྙིང་གར་རྡོ་རྗེ་འཁོར་ལོས་གསང་བའི་དཀྱིལ་འཁོར་སྤྲུལ་ལ། དཔལ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་འབེབས་པའི་བར་དུ་རང་རང་གི་སྙིང་པོ་རྣམས་ཀྱིས་རང་རང་གི་གནས་སུ་གཞག་སྟེ། ཨོཾ་བཛྲ་ཨཱཏྨ་ཀོ྅ཧཾ་ཞེས་བྱ་བ་བརྗོད་ལ། དཔལ་རྡོ་
རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེའི་རང་བཞིན་དུ་བདག་ཉིད་བསྒོམ་པར་བྱའོ། །དེ་ནས་ཨོཾ་སྭ་བྷ་བ་ཤུདྡྷཿ་སརྦ་དྷརྨཱཿ་སྭ་བྷཱ་བ་ཤུདྡྷོ྅ཧཾ་ཞེས་བྱ་བས་རང་བཞིན་གྱིས་དག་པར་བྱའོ། །དེ་ནས་བདག་མེད་པར་མཉམ་པ་ཉིད་ཀྱིས་ཨོཾ་སརྦ་ས་མོ་྅ཧཾ་ཞེས་བྱ་བས་ཆོས་ཐམས་ཅད་མཉམ་པ་ཉིད་དུ་བདག་ཉིད་བསྒོམ་མོ། །དེ་ནས་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་རང་བཞིན་བདག་རང་ཡིན་ནོ་ཞེས་བྱ་བའི་ང་རྒྱལ་བསྐྱེད་པར་བྱའོ། །དེ་ནས་བཅོམ་ལྡན་འདས་ཀྱིས་ཕྱག་རྒྱ་ཆེན་པོ་བཅིངས་ལ། ལྷ་ཐམས་ཅད་སྙིང་ག་ན་གནས་པའི་དང་པོའི་རྡོ་རྗེའི་ནང་དུ། ཨ་ནུ་རཱ་ག་ཡ་མི་ཞེས་བྱ་བ་བསམས་ཏེ། རབ་ཏུ་དགའ་བའི་ངག་གམ། རྡོ་རྗེའི་ངག་གམ། ཡིད་ཀྱིས་བརྗོད་ཅིང་བཟླས་པའི་དོན་དུ་བསྒོམ་པར་བྱའོ། །ཉིན་རེ་བཞིན་དུ་ལན་ཅིག་བྱིན་གྱིས་བརླབ་པ་ལ་སོགས་པ་བྱས་ནས། ཇི་སྲིད་མངོན་སུམ་དུ་བྱས་པ་དེ་བཞིན་དུ་ཟླ་བ་གཅིག་གམ། ཟླ་བ་དྲུག་གམ། ལོ་གཅིག་གིས་དཀྱིལ་འཁོར་མཐོང་བར་འགྱུར་རོ། །དེ་ནས་ཉིན་རེའམ་ཟླ་བ་རེ་རེ་ལ་དཀྱིལ་འཁོར་བྲི་བར་བྱའོ། །དེ་ལ་རེ་ཞིག་དང་པོ་ཇི་ལྟར་བཤད་པའི་དཀྱིལ་འཁོར་གྱིས་གཞིའི་དབུས་སུ་བདག་བསྲུང་བ་དང་གནས་བསྲུང་བ་བྱས་ལ། རྣལ་འབྱོར་ཆེན་པོ་རྫོགས་པའི་བར་གྱི་ཆོ་ག་རྫོགས་པར་བྱའོ། །དེ་ནས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་སྙིང་པོ་དང་བཅས་པའི་ཡི་གེ་ཧཱུཾ་བརྗོད་པ་ལ་བརྩོན་པས། ཡི་གེ་ཊ་ལས་མིག་གཡོན་ཟླ་བར་བྱ། །གཡས་པ་ཡི་གེ་མ་ལས་ཉི་མར་དགོད། །ཧཱུཾ་གིས་མིག་འབྲས་བསྐལ་པའི་མེར་བྱས་ཏེ། །ཚུལ་འདི་ཉིད་ཀྱིས་རྡོ་རྗེའི་བལྟ་བ་བྱས་ནས། རླུང་གི་དཀྱིལ་འཁོར་ལས་བྱུང་བའི། །རྣོ་ཞིང་འབར་བས་ཁྱབ་པར་བྱེད། །དབུས་སུ་ཡི་གེ་བཀོད་པ་ཡི། །རྡོ་རྗེ་བརྟུལ་ཞུགས་ཅན་གྱིས་བསམ། །རྡོ་རྗེ་མེ་ཡིས་ཐལ་བར་བྱས་པའི་རྒྱ་མཚོ་དང༌།། ས་འཛིན་དང་བཅས་ས་ཉིད་ཀྱང་ནི་དེ་བཞིན་དུ། །ནམ་མཁའི་ཁམས་སུ་ཡི་གེ་ཁཾ་ནི་རྣམ་བསྒོམས་ལ། །རྣམ་པར་སྣང་མཛད་ཆུ་རྒྱུན་འབེབས་པ་བསམ་པར་བྱ། །དབའ་རླབས་ཕྲེང་བ་ཀུན་དུ་འཁྲུག་པར་གྱུར་པ་ཡི། །དཔག་ཏུ་མེད་པའི་ཆུ་ཡི་ཕུང་པོ་དེ་བཞིན་འབྱུང༌། །དེ་ཚེ་ཡི་
གེ་ར་ཡིས་ཆུ་ཡི་རྒྱ་མཚོ་མཆེད། །པདྨ་གྱུར་པ་ཡོངས་སུ་བརྟག་པར་བྱ་བ་ཡིན། །གསེར་གྱི་རུས་སྦལ་སྣང་བ་ཞེས་རབ་གྲགས་པ་ནི། །ཆུ་སྐྱེས་ཀྱི་ནི་རྩ་བར་བསམ་པར་བྱ་བ་ཡིན། །འཛམ་བུ་གསེར་དང་མཚུངས་པའི་ལྟེ་བ་རུ། །རྣམ་པ་ཉིད་ནི་དེ་ཉིད་དུ་ཡང་བསམ་པར་བྱ། །དེ་ནས་ཁཾ་གི་ངོ་བོ་རྣམ་སྣང་མཛད་དང་བཅས། །བྱོན་ནས་ལྟེ་བ་ལ་ནི་བཞུགས་པར་གྱུར་པ་ཡིན། །དེ་ནས་གཅིག་ཏུ་གྱུར་པ་ཉིད་ལས་རི་རབ་ནི། །རིན་ཆེན་བཞི་ཡི་ཆ་ཤས་ལས་ནི་གྱུར་པ་ཡིན། །ཧཱུཾ་སུཾ་ཧཱུཾ་ཞེས་བྱ་བའི་རི་རབ་སྐྱེད་པར་བྱེད་པའི་ས་བོན་གྱི་ཡི་གེ་རྣམས་བརྗོད་ཅིང་བསམ་པར་བྱའོ། །དེ་ནས་རྡོ་རྗེ་བཅིངས་པས་ས་ལ་དེ་བཞིན་དུ་རེག་ཅིང་རྡོ་རྗེའི་རི་རབ་བྱིན་གྱིས་བརླབས་ནས། དེའི་སྟེང་དུ་རྡོ་རྗེ་འཁོར་ལོའི་ཕྱག་རྒྱས་ཇི་སྐད་བཤད་པའི་མཚན་ཉིད་ཅན་གྱི་དཔལ་རྡོ་རྗེ་སེམས་དཔའི་བཞུགས་གནས་རྡོ་རྗེ་ཆེན་པོའི་གཞལ་ཡས་ཁང་བསྐྱེད་ལ་ཡི་གེ་ཧྲཱི་ལས་ལྷ་ཐམས་ཅད་ཀྱི་གནས་རྣམས་སུ་སྣ་ཚོགས་པདྨ་རྣམས་བསྐྱེད་ནས། དཀྱིལ་འཁོར་གྱི་སའི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་ལ། བདག་ཉིད་སྤྲོ་བ་བསྐྱེད་པར་བྱའོ། །དེ་ནས་དེ་བཞིན་དུ་སངས་རྒྱས་ཐམས་ཅད་སྤྱན་དྲངས་ནས། དང་པོ་སྦྱོར་བ་དང༌། དཀྱིལ་འཁོར་རྒྱལ་མཆོག་དང༌། ལས་ཀྱིས་རྒྱལ་པོ་མཆོག་བསྒོམ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་དེ་བཞིན་དུ་ཡི་གེ་བརྗོད་ཅིང་བསྒོམ་པར་བྱའོ། །དེ་ནས་དཀྱིལ་འཁོར་བྲི་བར་བྱ་བའི་ཕྱིར་སྔ་མ་བཞིན་དུ་དེ་བཞིན་དུ་སངས་རྒྱས་གཤེགས་པ་ཐམས་ཅད་ལ་གསོལ་བ་བཏབ་པར་བསམ་པར་བྱའོ། །དེ་ནས་ལངས་ཏེ་དེ་བཞིན་གཤེགས་པ་ཐམས་ཅད་ལ་ཕྱག་ བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་གང ་བར་བསམས་ལ། ཐམས་ཅད་བདག་ཉིད་ཡིན་ནོ་ཞེས་བྱ་བ་ལ་སོགས་པ་བརྗོད་པར་བྱའོ། །དེ་ནས་དང་པོའི་རྡོ་རྗེ་ཨ་ནུ་རཱ་ག་ཡ་མི་ཧཱུཾ་བཛྲ་ཏིཥྛ་གུ་ཧྱ་མཎྜལ་ཨུ་ཐ་པ་ཡ་ཞེས་བརྗོད་ཅིང་ནམ་མཁའ་ལ་དཀྱིལ་འཁོར་བཏེག་ཅིང་དེ་ཉིད་དུ་བཞག་ལ། དང་པོའི་རྡོ་རྗེ་དེ་ཉིད་ཀྱིས་ལན་ཅིག་བདག་ཉིད་བྱིན་གྱིས་བརླབས་ནས་སླར་ཡང་
ཕྱག་རྒྱ་ཆེན་པོ་བཅིངས་ལ། བཛྲ་དྲྀ་ཥྚ་མཊ་ཅེས་བྱ་བ་མིག་གཉིས་ལ་རྣམ་པར་བཀོད་དོ། །ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །ཡི་གེ་ཧཱུཾ་ནི་བརྗོད་པ་ཡིས། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས། མལ་ནས་ལངས་ཏེ་ཇི་ལྟ་བ་བཞིན་དུ་རྣལ་འབྱོར་ཆེན་པོ་བྱས་ནས། ཉི་མ་འཆར་ཀའི་དུས་སུ་དཀྱིལ་འཁོར་དེ་བཞིན་དུ་ནམ་མཁའི་ཕྱོགས་སུ་གཞག་སྟེ། ཨོཾ་བཛྲ་ས་མ་ཡ་སཱུ་ཏྲཾ་མ་ཏི་ཀྲ་མ་ཧཱུཾ་ཞེས་བྱ་བ་དང༌། རྡོ་རྗེའི་གླུ་ལེན་ཅིང་སྔ་མ་བཞིན་དུ་ཐིག་གདབ་པར་བྱའོ། །དེ་ནས་ཇི་ལྟ་བ་བཞིན་དུ་ཡང་དག་པར་བྲིས་ཏེ། དབུས་ཀྱི་དཀྱིལ་འཁོར་གྱི་ལྟེ་བའི་དབུས་སུ་སྣ་ཚོགས་པདྨའི་སྟེང་དུ་ལུགས་མ་ལ་སོགས་པ་རང་བཞིན། །འོད་ཟེར་དམར་པོ་འབར་བ་འཁྲུག །ཟླ་བ་དང་མཚུངས་ཞལ་བཞད་པ། །སངས་རྒྱས་ཕྲེང་བ་སོགས་ཀྱིས་མཛེས། །ཁ་དོག་རྣམས་ཀྱིས་དབུ་ལ་བྱུགས། །སེམས་དཔའི་སྐྱིལ་མོ་ཀྲུང་གིས་བཞུགས། །རྡོ་རྗེ་སྙེམས་པ་འཛིན་པའི་མཆོག །གཡོན་ན་རྡོ་རྗེ་ཁུ་ཚུར་གྱིས་སྙེམས་པས་དྲིལ་བུ་འཛིན་པ། གཡས་པ་བསྟོད་པའི་ཚུལ་གྱིས་རང་གི་ཐུགས་ཀར་དང་པོའི་རྡོ་རྗེ་འཛིན་པའི་དཔལ་རྡོ་རྗེ་སེམས་དཔའ། །ས་མ་ཡ་སྟྭཾ། ཨ་ནུ་རཱ་ག་ཡ་མི་ཧཱུཾ་བརྗོད་ཅིང་དགོང་པར་བྱའོ། །བཅོམ་ལྡན་འདས་རྡོ་རྗེ་སེམས་དཔའི་མདུན་དུ་རྡོ་རྗེ་ཡིད་ལས་བྱུང་བའི་གནས་སུ་རྡོ་རྗེ་མཚོན་ཆ་མ་ལ་རྡོ་རྗེ་ཡིད་ལས་བྱུང་བ་དང་འདྲ་བས་ན། ཇི་སྲིད་རྡོ་རྗེ་དྲིལ་བུའི་གནས་སུ་རྡོ་རྗེ་དྲིལ་བུ་མ་རྡོ་རྗེ་དྲིལ་བུད་དང་བཅས་པ་འདྲ་བའི་བར་དུ་བྲི་བར་བྱའོ། །འདི་རྣམས་ཀྱི་སྙིང་པོ་ནི་བཤད་ཟིན་ཏོ། །དེ་ནས་དེ་བཞིན་དུ་དཀྱིལ་འཁོར་གྱི་སྒོ་རྣམས་ཕྱེ་ལ། དཔལ་རྡོ་རྗེ་སེམས་དཔའི་རྣལ་འབྱོར་གྱིས་བསྡུ་བ་བྱས་ལ། མཚན་བརྒྱ་རྩ་བརྒྱད་ཀྱིས་བསྟོད་པར་བྱའོ།། དེ་ནས་བཅོམ་ལྡན་འདས་ཀྱིས་ཕྱག་རྒྱ་ཆེན་པོ་བཅིངས་ལ་གཡས་པའི་སྡིགས་མཛུབ་ཀྱི་ལྕགས་ཀྱུས་བཅོམ་ལྡན་འདས་འཁོར་དབང་བཅས་པ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་སྤྱན་དྲང་བའི་སྔགས་ཀྱིས་དཀྱིལ་འཁོར་དུ་གཞུག་པར་བྱའོ། །དེ་ནས་དེ་བཞིན་
དུ་ཆོ་ག་ཐམས་ཅད་རྗེས་སུ་སྤྱད་ནས་ཕྱག་བཞི་སྔོན་དུ་འགྲོ་བས་སྡོམ་བ་བླངས་ལ། ཨོཾ་སརྦ་ཡོ་ག་ཙིཏྟཾ་ཨུཏྤཱ་ད་ཡཱ་མི་ཞེས་བྱ་བས། བྱང་ཆུབ་ཆེན་པོར་སེམས་བསྐྱེད་ནས། གཡས་པའི་རྡོ་རྗེ་ཁུ་ཚུར་གྱི་དང་པོའི་རྡོ་རྗེ་བླངས་ཏེ། རང་གི་སྙིང་གར་བཞག་ལ་སུར་ཏེ་ས་མ་ཡ་སྟྭམ་ཧོ་བཛྲ་སིདྡྷི་ཡ་ཐཱ་སུ་ཁཾ་ཞེས་བྱ་བ་བརྗོད་ཅིང་ཡི་གེ་ཧཱུཾ་ལས་རྡོ་རྗེ་བསྐྱེད་པར་བྱའོ། །དེ་ནས་ཕྱིའི་སྒོ་ལ་མངོན་པར་ཕྱོགས་ནས་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ཏེ། རྡོ་རྗེ་སློབ་དཔོན་རང་ཉིད་ཇི་སྙེད་པའི་དྲིས་ལུས་ལ་བྱུགས་ཏེ། རྒྱན་དང་བཅས་ཤིང་མེ་ཏོག་གི་ཕྲེང་བས་བརྒྱན་པ། གོས་དམར་པོ་ཟུང་གཅིག་བགོས་པ། ཁ་དྲི་ཞི་མ་པོས་བགོས་པ། གོས་དམར་པོས་གདོང་གཡོགས་བཅིངས་ནས། རྡོ་རྗེ་སེམས་དཔའི་ཡིད་འོང་མའི་རྣལ་འབྱོར་དང་ལྡན་པའི་གཟུགས་མ་ལག་པ་གཡོན་པས་རྡོ་རྗེ་འཛིན་པ། གཡས་པས་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་འཛིན་པ། རྐང་པ་ཡ་གཅིག་མདུན་དུ་འདོར་བ་ཕྱག་གཡས་པས་མེ་སྐོར་གྱི་ཚུལ་གྱིས་བླངས་ལ་འཇུག་པར་བྱའོ། །བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། དེ་ཉིད་ཀྱིས་མེ་ཏོག་གི་ཕྲེང་བ་བླངས་ཏེ། འདོད་ཆགས་ལ་སོགས་པ་དེ་ཀུན་ཡིད་ཁྱོད་ནི། །ཀུན་བསྡུས་བདག་ལ་བདེ་བ་སྩོལ་མཛོད་ཅིག །རྡོ་རྗེ་སེམས་དགོངས་མྱུར་དུ་བདག་བསྟན་མཛོད། །བདག་དགྱེས་མཛད་དང་བདེ་མཆོག་གྲུབ་ལ་འདུད། །ཅེས་བྱ་བའི་དྲུག་ལྡན་ལ་སོགས་པའི་གླུའི་རྒྱལ་པོ་ཐམས་ཅད་ཀྱིས་གསང་བའི་གླུ་བརྗོད་ལ། དང་པོར་ཤར་གྱི་སྒོ་ནས་འཇུག་པར་བྱའོ། །རྡོ་རྗེ་ལྕགས་ཀྱུ་མ་ཡང་བརྗོད་པར་བྱའོ། །སླར་ཡང་ལྷོའི་སྒོ་ནས་འཇུག་སྟེ་རྡོ་རྗེ་ཞགས་པ་མའི་སྙིང་པོ་བརྗོད་པར་བྱའོ། །དེ་ནས་དེ་བཞིན་དུ་ནུབ་ཀྱི་སྒོ་ནས་ཞུགས་ཏེ། རྡོ་རྗེ་ལྕགས་སྒྲོག་མའི་སྙིང་པོ་བརྗོད་པར་བྱའོ།། དེ་ནས་དེ་བཞིན་དུ་བྱང་གི་སྒོ་ནས་ཞུགས་ཏེ། རྡོ་རྗེ་དྲིལ་བུ་མའི་སྙིང་པོ་བརྗོད་པར་བྱའོ། །སླར་ཡང་ཤར་གྱི་སྒོ་ནས་སྔ་མ་བཞིན་དུ་ཞུགས་ཏེ། སྒེག་མོ་དགའ་བའི་རྡོ་རྗེ་མས་བཅོམ་ལྡན་འདས་ལ་ཕྱག་བྱས་ཏེ། དཀྱིལ་འཁོར་ལ་ལན་གསུམ་བསྐོར་བ་བྱས་ལ། བཅོམ།
ལྡན་འདས་ཀྱི་མདུན་དུ་འདུག་སྟེ་འདི་སྐད་ཅེས་བརྗོད་པར་བྱའོ། །ཧཱུཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ། ས་མ་ཡ་སྟྭཾ། ཨ་ནུ་རཀྟོ་མེ་བྷ་བ་སུ་ཏོ་ཥྱོ་མེ་བྷ་བ། དྲྀ་ཌྷོ་མེ་བྷ་བ། སུ་པོ་ཥྱོ་མེ་བྷ་བ། ཨ་དྷི་ཏིཥྛ་ག་བཱན། ཨ་ནཱ་དྷི་ནི་དྷ་ནས་ཏྭཱ་མ་ཧཱ་སུ་ཁ་བཛྲ་གུ་ཧྱ་ས་མ་ཡཿ་སིདྷིམྨེ་པྲ་ཡ་ཙྪ། ཧ་ཧ་ཧ་ཧ་ཨཱ། དེ་ནས་རྡོ་རྗེ་ལྷ་མོ་བཞི་པོ་འདི་རྣམས་ཀྱིས་བསྐུལ་བར་བྱའོ། །ཧཱུཾ་བཛྲ་དྲྀཥྚ་ས་ཡ་ཀེ་ཕཊ། ཧཱུཾ་བཛྲ་ཀཱི་ལི་ཀཱི་ལི་ཧཱུཾ། ཧཱུཾ་སྨར་བཛྲ་ཎཱི་ཧཱུཾ། ཧཱུཾ་རུ་ཥྱ་བཛྲ་ཎཱི་ཧཱུཾ། སླར་ཡང་བཅོམ་ལྡན་འདས་ཀྱི་མདུན་དུ་འདུག་སྟེ། དེ་ཁོ་ན་ཉིད་འདི་ལན་ཅིག་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། རྡོ་རྗེ་ཆེན་པོ་ནོར་ཆེ་བ། ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔའ་དེང་བདག་གྲུབ། །ཛཿ་ཧཱུཾ་བཾ་ཧོཿ། པྲ་སིདྡྷ་མཾ་ཞེས་བྱ་བ་ཡང་བརྗོད་པར་བྱའོ། །དེ་ནས་རྡོ་རྗེའི་ཆུ་འཐུངས་ལ། ཡི་གེ་ཨ་ཡིས་བདག་ཉིད་ལ་དབབ་པར་བྱ་སྟེ། སླར་ཡང་གཡོན་པའི་ཁྲོ་བོའི་ཁུ་ཚུར་གྱིས། ཐམས་ཅད་ཀྱིས་རྡོ་རྗེ་མ་བྲལ་ཞིང་བདག་ཉིད་ལ་འདིས་དབབ་པར་བྱ་སྟེ། ཨ་ནུ་རཱ་ག་ཡ་མི་ཧཱུཾ་ཨ་སུ། དེ་ནས་མ་ཧཱ་སུ་ཁ་བཛྲ་སཏྭ་པྲ་ཏི་གྲྀཧཎ་ས་མ་ཡ་སྟྭཾ་ཞེས་བྱ་བ་འདིས་མེ་ཏོག་རྣམས་དོར་བར་བྱའོ། །དེ་ནས་དེ་རྣམས་བླངས་ཏེ། དེ་རིང་ཁྱོད་ལ་རྡོར་འཛིན་གྱིས། །དངོས་གྲུབ་ཀུན་ཕྱིར་དབང་བསྐུར་མཛོད། །འདོད་པ་ཀུན་གྱི་དབང་ཕྱུག་ཉིད། །སེམས་ཅན་ཀུན་ལ་བདེ་བ་སྟེར། །ཞེས་བྱ་བ་འདིས་རང་གི་སྤྱི་བོ་ལ་བཅིང་བར་བྱའོ། །ཨོཾ་མ་ཧཱ་སུ་ཁ་བཛྲ་སཏྭ་ཨ་བྷི་ཥིཉྩ་སུ་ར་ཏ་སྟྭཾ། ཞེས་བྱ་བ་ཡང་བརྗོད་དོ། །དེ་ནས་ཨོཾ་བཛྲ་ཙཀྵུ་ཀ་མ་མས་ཡ་སརྦ་སུ་ར་སྟྭཾ་ཞེས་བྱ་བ་འདིས་གདོང་གཡོགས་དགྲོལ་བར་བྱའོ། །དེ་ནས་ཧེ་བཛྲ་པཱ་ཤྱ་ཞེས་བྱ་བ་བརྗོད་ཅིང་ཤར་གྱིས་སྒོ་ནས་དཀྱིལ་འཁོར་ལ་བལྟ་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ་ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་བར་བྱའོ། །དེ་ནས་རྡོ་རྗེ་ཐལ་མོ་བསྐོར་བས་ཤིས་བ་བརྗོད་པ་སྦྱིན་པའི་མངོན་པར་འདྲེན་པས་སྙིང་གའི་ཕྱོགས་སུ་འཛིན་ཅིང་མཚན་བརྒྱ་རྩ་བརྒྱད་ཀྱིས་བསྟོད་པར་བྱའོ། །དེ་ནས་རྡོ་རྗེ་མཚོན་ཆ་མ་ལ་སོགས་པ་གསང་བའི་མཆོད་པ་བཞི་པོས་བཅོམ་ལྡན་འདས་ལ་ཡང་དག་པར་མཆོད་ལ། གླུ་དང་རོལ་མོའི་མཆོད་པས་བཅོམ་ལྡན་འདས་ཀྱི་
མདུན་དུ་གཟུངས་མ་དང་བཅས་པས་སེམས་དཔའི་སྐྱིལ་མོ་ཀྲུང་གིས་ཉེ་བར་འདུག་ལ་འཇུག་པའི་ཕྱག་རྒྱ་བཅིངས་ཏེ། སྒེག་མོ་དགའ་བའི་རྡོ་རྗེ་མས་སླར་ཡང་བཅོམ་ལྡན་འདས་ལ་ཕྱག་རྒྱས་ལ་འདི་སྐད་ཅེས་བརྗོད་པར་བྱ་སྟེ། ཨེ་ཡཾ་སུ་ར་ཏེ་ར་ཧཾ་སུ་ར་ཏཾ་མེ་བྷ་ག་བཱན། །སརྦ་སུ་ཁ་བྷ་མནྠ་ཨུཏྟ་མ་སིདྡྷིཾ་མེ་པྲ་ཡ་ཙྪ། ཨ་ནི་ནས་ཏྱི་ན་ཨོཾ་མ་ཧཱ་སུ་ཁ་བཛྲ་སྟྭ་ཛཿ་ཧཱུཾ་བཾ་ཧོཿ། སུ་ར་སྟྭཾ། བྷ་ག་བཱ་ན། སིདྡྷ། འདི་ཡང་བརྗོད་པར་བྱ་སྟེ། མྱུར་དུ་ཐམས་ཅད་རྗེས་ཆགས་པ། །ཀོ་ལི་ཀི་ལས་ཐམས་ཅད་ནུས། །ཐམས་ཅད་རྗེས་སུ་ཆགས་དྲན་པས། །རྟག་ཏུ་ཡང་ནི་ལེགས་དགྱེས་འགྱུར། །ཨོཾ་མ་ཧཱ་སུ་ཁ་སིདྡྷ་བཛྲ་སྟྭ་སིདྡྷྱ་ཛཿ་ཧཱུཾ་བཾ་ཧོཿ། སིདྡྷ་ས་མ་ཡ་སྟྭཾ་སིདྡྷི་ཧཱུཾ། དེ་ནས་ཇི་སྲིད་མཚན་མ་ཐོབ་ཀྱི་བར་དུ་ཕྱག་རྒྱ་ཆེན་པོ་བསྒོམ་པར་བྱའོ། །དེ་ནས་བཅོམ་ལྡན་འདས་ཀྱིས་དབང་བསྐུར་བ་ཐམས་ཅད་ཀྱིས་དེ་ལ་དབང་བསྐུར་བ་མཛད་པར་འགྱུར་རོ། །དེ་ནས་སྐད་ཅིག་མ་དེ་ཉིད་དུ་རྡོ་རྗེ་སེམས་དཔའ་འདྲ་བར་འགྱུར་རོ། །གཟུངས་མ་དེ་ཡང་རྡོ་རྗེ་སྙེམས་མ་དང་འདྲ་བར་འགྱུར་རོ། །གལ་ཏེ་བཅོམ་ལྡན་འདས་ཀྱིས་དེ་ལ་དབང་བསྐུར་བར་མི་མཛད་ན་དེའི་ཚེ། །རང་ཉིད་ཀྱིས་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་ཆོ་གས་དབང་བསྐུར་བ་ཐམས་ཅད་བླང་བར་བྱའོ། །དེ་ནས་རྡོ་རྗེ་བརྟུལ་ཞུགས་ཀྱི་དངོས་གྲུབ་བླངས་ཏེ། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་རྗེས་ཆགས་བྱ། །ཧཱུཾ་ཞེས་བྱ་བ་ལན་གསུམ་བརྗོད་པར་བྱའོ། །སླར་ཡང་དྲིལ་བུ་དཀྲོལ་ལ། དམ་ཚིག་གསུམ་གྱི་རྡོ་རྗེ་གླུའི་མཆོད་པ་བྱས་ལ། མཆོད་པ་ལྔ་དང་རྡོ་རྗེ་མཚོན་ཆ་མ་ལ་སོགས་པའི་ལྷ་མོ་བཅུ་གཉིས་ཀྱིས་བདག་ཉིད་མཆོད་པར་བྱའོ།། དེ་ནས་ཚིགས་སུ་བཅད་པ་ལྔས་རྗེས་སུ་གནང་བ་དང༌། སྙིང་པོ་དང་ཕྱག་རྒྱ་བཞིའི་ཡེ་ཤེས་དང༌། ལུང་བསྟན་པ་འབྱུང་བ་བཅོམ་ལྡན་འདས་ཀྱི་དྲུང་ནས་བླངས་ཏེ་མཆོད་པ་ཐམས་ཅད་ཀྱིས་བཅོམ་ལྡན་འདས་ཡང་དག་པར་མཆོད་ནས་དབྱུང་བར་བྱའོ། །དེ་ནས་སློབ་
མ་གཞུག་པར་བྱ་བའི་ཕྱིར། དཀྱིལ་འཁོར་འདྲི་བ་ཡིན་ན། དེའི་ཚེ་རབ་ཏུ་དགའ་བའི་རྡོ་རྗེའི་དམ་ཚིག་གི་ཕྱག་རྒྱ་གཟུངས་མ་མེད་པར་སློབ་དཔོན་གྱིས་འཇུག་པར་བྱའོ། །ཞུགས་ནས་ཆོ་ག་ཐམས་ཅད་རྫོགས་པར་བྱས་ནས། རྗེས་སུ་གནང་བ་ནོད་པར་བྱ་སྟེ། སྲིད་པའི་བདེ་བ་རྣམ་དག་ཕྱིར། །སྔར་གྱི་སྲིད་པ་ལ་ཁྱོད་དགའ། །འདོད་པ་ཀུན་གྱི་དངོས་གྲུབ་ཆེ། །འགྲོ་བ་ཀུན་ལ་བསྒྲུབ་པར་གྱིས། །དེ་ལྟར་རྗེས་སུ་གནང་བ་མནོས་ལ་སློབ་མ་རྣམས་གཞུག་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྒྱས་པ་རྫོགས་སོ།། །། དེ་ལ་བསླབ་པ་ནི་གནས་ལང་ཡོངས་སུ་འཛིན་པའམ། དགེ་སྦྱོང་དང༌། དགེ་སློང་གི་སྡོམ་པ་ཡོངས་སུ་འཛིན་པའི་སློབ་མས་སྔར་བཤད་པའི་ཆོགས་རིག་པའི་སྡོམ་པ་གཟུང་བར་བྱ་བ་ཡིན་ནོ། །དེ་ནས་སརྦ་ཡོ་ག་ཙིཏྟཾ་ཨུཏྤ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་པ་སློབ་དཔོན་གྱིས་བྱེད་དུ་གཞུག་གོ །དེ་ནས་དེའི་སྙིང་གར་དེ་བཞིན་དུ་རྡོ་རྗེ་སེམས་དཔར་བྱིན་གྱིས་བརླབས་ནས། མཆོད་པ་ལྔ་ཡིས་ཡང་དག་པར་མཆོད་པར་བྱའོ། །དེ་ནས་དེ་ལ་འདི་ལྟར་བརྗོད་པར་བྱ་སྟེ། དེང་ཁྱོད་བཅོམ་ལྡན་འདས་ཀྱིས་བྱིན་གྱིས་བརླབས་པར་གྱུར་པ་ཡིན་གྱིས། དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་དུ་མ་ཞུགས་པ་ལ་ཁྱོད་ཀྱིས་སྨྲ་བར་མི་བྱ་བ་དང༌། དད་པ་མེད་པ་རྣམས་ལ་བརྗོད་པར་མི་བྱའོ། །དེ་ནས་མདའ་ལྔ་བསྡུས་པ་བཅིངས་ནས་འདི་ལྟར་བརྗོད་པར་བྱ་སྟེ། སངས་རྒྱས་ཀུན་གྱིས་རབ་བསྒྲུབས་པའི། །ཁྱོད་ཀྱི་དམ་ཚིག་གསང་བ་འདི། །གལ་ཏེ་དཀྱིལ་འཁོར་མེད་ལ་སྨྲས། །ཁྱོད་ཀྱི་རིགས་ཀུན་བརླག་པར་འགྱུར། །ཨོཾ་མ་ཧཱ་སུ་ཁ་ཧ་ན་ས་མ་ཡ་ཨ་ཏི་ཀྲ་མེ་ན་ཎཾ་སུ་ར་ཏ་སྟྭཾ། དེ་ནས་ཡོན་གྱི་མཆོག་བླངས་ལ་ཤར་གྱི་སྒོ་ལ་མངོན་བར་ཕྱོགས་པའི་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། རབ་ཏུ་དགའ་བའི་རྡོ་རྗེའི་དམ་ཚིག་གི་ཕྱག་རྒྱས་མེ་ཏོག་གི་ཕྲེང་བ་འཛིན་དུ་འཇུག་ལ། རང་ཉིད་འཇུག་པའི་སྦྱོར་བས་སློབ་མ་གཞུག་པར་བྱའོ། །དེ་ནས་རྣ་བར་འདི་ལྟར་བརྗོད་པར་བྱ་སྟེ། ཆགས་
བྲལ་འདུལ་བའི་འཇིག་རྟེན་ནི། །ཆགས་བྲལ་ཉིད་ཀྱིས་དག་པར་འགྱུར། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའ་སྦས་པ་ཡིན། །འདོད་ཆགས་བྲལ་བ་ལྟ་བུ་ཡི། །སྡུག་བསྔལ་གཞན་ནི་རང་བཞིན་མེད། །དེ་བས་སེམས་ཅན་ཆགས་བྲལ་ལ། །སླར་ཡང་ཡིད་ནི་མ་བྱེད་ཅིག །དེ་ནས་འདི་ལྟར་བརྗོད་པར་བྱ་སྟེ། དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས། དེ་བས་ན་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐོབ་པར་འགྱུར་བའི་རྡོ་རྗེའི་ཡེ་ཤེས་སྐྱེད་པར་གྱུར་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་ཀྱང་དཀྱིལ་འཁོར་མ་མཐོང་བ་ལ་བརྗོད་པར་མི་བྱའོ། །དེ་ལྟ་མ་ཡིན་ན་ཁྱོད་ལ་དམ་ཚིག་གིས་གནོད་པར་འགྱུར་རོ། །དེ་ནས་རྡོ་རྗེ་སློབ་དཔོན་རང་ཉིད་ཀྱིས་སེམས་མ་རྡོ་རྗེ་མའི་ཕྱག་རྒྱ་འོག་དང་སྟེང་དུ་ཁ་ལྟ་བ་བཅིངས་ལ། རྡོ་རྗེ་སློབ་མའི་སྤྱི་བོར་བཞག་ནས་འདི་སྐད་ཅེས་བརྗོད་པར་བྱ་སྟེ། འདི་ནི་རྡོ་རྗེའི་དམ་ཚིག་སྟེ། །ཁྱོད་ཀྱིས་སུ་ལ་སྨྲས་ན་ནི། །ཁྱོད་ཀྱི་སྤྱི་བོ་འགེམས་པར་བྱེད། །དེ་ནས་ཕྱག་རྒྱ་དེ་ཉིད་ཀྱིས་མནའ་བསྒག་པར་བྱ་བའི་ཕྱིར།། སྙིང་པོ་ཆུ་ལ་ལན་ཅིག་བཟླས་ལ། སློབ་མ་དེ་འཐུང་དུ་གཞུག་པར་བྱའོ། །དེ་ལ་འདི་སྐད་བརྗོད་པར་བྱ་སྟེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛོད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །བཛྲོད་ཀ་ཋ་ཞེས་བྱའོ། །དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེ་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས། །ངས་གང་བསྒོ་བ་དེ་གྱིས་ཤིག །ཁྱོད་ཀྱིས་ང་ལ་བརྙས་པར་མ་བྱེད་ཅིག །དེ་མ་ཡིན་ན་མི་བདེ་བ་མ་སྤངས་པར་འཆི་བའི་དུས་བྱས་ནས་སེམས་ཅན་དམྱལ་བར་ལྟུང་བར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་པ་མཛད་པ་དང༌། རྡོ་རྗེ་སེམས་དཔའ་བདག་ལ་དབབ་པར་མཛོད་ཅིག་ཅེས་སྨྲོས་ཤིག་བརྗོད་པར་བྱའོ། །དེ་ནས་མྱུར་དུ་རྡོ་རྗེ་སློབ་དཔོན་གྱིས་སེམས་དཔའ་རྡོ་རྗེ་མ་བཅིངས་
ཏེ། དེའི་སྙིང་གར་བཞག་ནས། དི་སྐད་ཅེས་བརྗོད་པར་བྱ་སྟེ། འདི་དེ་རྡོ་རྗེའི་དམ་ཚིག་སྟེ། རྡོ་རྗེ་སེམས་དཔའ་ཞེས་བརྗོད་པས། རྡོ་རྗེ་ཡེ་ཤེས་བླ་མེད་པ། །ཁྱོད་ལ་དེ་རིང་དབབ་པར་མཛད། །དེ་ནས་བཛྲ་ཨཱ་བེ་ཤ་ཞེས་བྱ་བ་འདིས་ལན་བརྒྱ་བརྗོད་པར་བྱའོ། །སླར་ཡང་གཡོན་པའི་ཁྲོ་བོའི་ཁུ་ཚུར་གྱིས་སེམས་མ་དྲལ་ཞིང༌། ཨོ་ནུ་རཱ་ག་ཡ་མི་ཧཱུཾ། ཨ་ཨ་ཨ་ཨཿ་ཞེས་བྱ་བ་ལན་བརྒྱ་བརྗོད་ན་དེས་པར་འབབ་པ་ཡིན་ནོ། །དེ་ནས་སྔགས་དེ་ཉིད་ཀྱིས་མེ་ཏོག་གི་ཕྲེང་བ་འདོད་དུ་གཞུག་པར་བྱའོ། །དེ་ནས་ཕྲེང་བའི་དབང་བསྐུར་བ་བྱིན་ནས། གདོང་གཡོགས་དགྲོལ་བར་བྱའོ། །དེ་ནས་དཀྱིལ་འཁོར་བསྟན་པར་བྱའོ། །དེ་ནས་འཇུག་པའི་ཕྱག་རྒྱ་སློབ་མའི་སྙིང་གར་དེ་བཞིན་དུ་དགྲོལ་དུ་བཅུག་ལ། སེམས་ཅན་ཀུན་གྱི་ཡིད་ཁྱབ་ཅིང༌། །ཞེས་བྱ་བ་ལ་སོགས་པའི་དེ་ཁོ་ན་ཉིད་ཆེན་པོ་སྔ་མ་བཞིན་དུ་བརྗོད་པར་བྱའོ། །དེ་ནས་དེ་བཞིན་དུ་དབང་བསྐུར་བ་ཐམས་ཅད་ཀྱིས་སློབ་མ་ལ་དབང་བསྐུར་ཏེ། རྡོ་རྗེ་བརྟུལ་ཞུགས་ཀྱི་དངོས་གྲུབ་བྱིན་ལ། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །ཞེས་བྱ་བ་དེ་ལ་སྦྱིན་པར་བྱའོ། །དེ་ནས་དམ་ཚིག་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བ་སློབ་ཏུ་གཞུག་གོ །དེ་ནས་མེ་ཏོག་ལ་སོགས་པ་དང༌། རྡོ་རྗེ་ལ་སོགས་པ་ཕྱག་རྒྱ་བཅུ་གཉིས་ཀྱིས་དེ་ཡང་དག་པར་མཆོད་ལ། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ། སུ་ར་ཏ་སྟྭཾ་ཞེས་དམ་ཚིག་ཆེན་པོའི་དེ་ཁོ་ན་ཉིད་བརྗོད་དུ་བཅུག་ལ་དེ་བཞིན་དུ་བཤད་པར་བྱའོ། །དེ་ནས་རྡོ་རྗེ་སྙེམས་མའི་དོན་བརྗོད་པར་བྱ་ཞེས་བྱ་བ་ནས་བརྩམས་ཏེ། ཇི་སྲིད་དེ་ནས་ཆོས་དང་ལས་ཀྱི་ཕྱག་རྒྱ་རྣམས་ལ་ཡང་བསླབ་པར་བྱའོ་ཞེས་བྱ་བའི་བར་དུ་སློབ་ཏུ་གཞུག་གོ།། །གང་ཞིག་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་སྐབས་སུ་གསུངས་པ་དེ་དག་ཐམས་ཅད་འདིར་ཡང་རྗེས་སུ་སྤྱད་ལ་ཐམས་ཅད་ཀྱི་ས་ཅི་ནུས་པར་མཆོད་པར་བྱ་བ་དེ་བཞིན་གཤེགས་པ་ཐམས་ཅད་ལ་ཞུ་བ་བྱས་ལ། སློབ་མ་ཐམས་ཅད་མཆོད་པ་བྱེད་དུ་གཞུག་གོ་ཞེས་བྱ་བ་ལ་སོགས་པའི་
སྔར་བཤད་པའི་ཆོ་ག་ཤེས་པར་བྱའོ། །སློབ་མ་གཞུག་པའི་ཆོ་ག་རྒྱས་པ་རྫོགས་སོ།། །།དེ་ལྟར་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་དུ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་བཞུགས་པ་ལ་སོགས་པའི་ཆོ་ག་རྒྱས་པ་བསྟན་ནས། ད་ནི་རྟོག་པ་ཐམས་ཅད་ལས་གསུངས་པའི་དངོས་གྲུབ་དང༌། རང་གི་རྟོག་པ་ལས་གསུངས་པའི་རང་གི་ལྷ་མོ་ཕྱག་རྒྱ་བཞིས་རང་གི་ལྷའི་རྣལ་འབྱོར་བྱས་ནས་མདུན་དུ་ཡང༌། རང་གི་ལྷ་ལ་སོགས་པའི་ལྷ་རྣམས་ལ་རང་གི་ཕྱག་རྒྱ་བཞིས་རྒྱས་བཏབ་ནས། མངོན་པར་འདོད་པའི་ཕྱག་རྒྱ་བཅིངས་པས་བསྒྲུབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་དང་པོའི་དཀྱིལ་འཁོར་གྱི་གསང་བའི་དམ་ཚིག་གི་ཕྱག་རྒྱ་བཅིངས་པ་འདི་ཡིན་ནོ་ཞེས་བྱ་བ་གསུངས་ཏེ། དེ་ནས་ཞེས་བྱ་བའི་སྒྲས་ནི་སྐབས་སུ་བབ་པའོ། །དང་པོའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་རོ། །དེ་ལ་གསང་བའི་དམ་ཚིག་གི་ཕྱག་རྒྱ་ནི་གསང་བའི་དཀྱིལ་འཁོར་གྱི་རྡོ་རྗེ་སེམས་དཔའ་ལ་སོགས་པ་རྣམས་ཀྱི་དམ་ཚིག་འཛིན་པའི་ཕྱག་རྒྱ་རྣམས་ཏེ། དེ་རྣམས་བཅིང་བ་ནི་འཆིང་བའི་མཚན་ཉིད་སྐབས་སུ་བབ་པ་ཡིན་ནོ། །དེ་ལ་རྡོ་རྗེ་ཐལ་མོ་དང་རྡོ་རྗེ་བསྡམས་པ་ནི་གོ་སླའོ། །རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་བཅིངས་ལ་གཡོན་པའི་མཛུབ་མོ་དང་མཐེ་བོ་གཉིས་ཀྱི་ཚིགས་གསུམ་པ་ཕན་ཚུན་སྦྱར་ནས་སྐྱེ་གནས་སུ་བྱས་ལ། དེ་གཉིས་ཀྱི་བུ་གར་གཡས་པའི་མཐེ་བོ་འོག་ཏུ་ཁ་བལྟ་བ་བཅུག་ནས་བཙིར་བར་བྱས་ཏེ། དེ་ནས་མཐེ་བོ་དེ་ཉིད་དུ་བསྐྱོད་ལ་ལྕགས་ཀྱུའི་རྣམ་པ་བྱས་པ་ནི། མདའ་ལྔ་བསྡུས་པ་ཞེས་བྱ་བ་ལ་སོགས་པ་ལ། འདི་བཅིངས་ནས་སོར་མོ་དབུས་མ་གཉིས་ནང་དུ་བཅུག་ལ། རྩེ་མོའི་སྦྱོར་བས་གཟུང་བར་བྱའོ། །མཐེ་བོ་བསྙམས་པའི་མཐའ་རྡོ་རྗེ་ཞེས་བྱ་བ་མཐེ་བོ་གཉིས་བསྙམས་ལ་སྦྱར་ནས། རྩེ་མོ་དང་མཐེ་ཆུང་གཉིས་ཀྱང་མཉམ་པར་སྦྱར་ལ་རྩེ་མོར་བྱས་ཏེ། མཐེ་བོ་དང་མཐའ་མ་བསྙམས་པའི་རྡོ་རྗེར་འགྱུར་རོ། །འདིའི་ཁྱད་པར་
ཇི་ལྟ་བུ་ཡིན་ཞེ་ན། དེ་དང་པོར་ཞེས་བྱ་བ་ལ་སོགས་པ་ལ་གང་ཞིག་བཅོམ་ལྡན་འདས་རྣམ་པར་སྣང་མཛད་ཀྱིས་དཔལ་རྡོ་རྗེ་སེམས་དཔའ་ལ་བྱིན་པ་དང་པོ་སྟེ། འདིར་ནི་བདེ་པ་བསྟན་པ་ནི་མི་ཕྱེད་པ་རོ་རྗེ་ལྟ་བུ་སྟེ། བདུད་ཐམས་ཅད་ཀྱིས་མི་ཕྱེད་པ་ཉིད་ཀྱི་ཕྱིར་རོ། །འདིས་ནི་འདི་ལྟར་བཤད་པར་འགྱུར་ཏེ། མདའ་ལྔ་བསྡུས་པ་བཅིངས་ནས། སོར་མོ་དབུས་མ་གཉིས་ནང་དུ་བཅུག་ལ། རྩེ་མོར་བྱས་ཏེ་མཐེ་བོ་གཉིས་དང༌། མཐེ་ཆུང་གཉིས་ཀྱིས་ཟུར་ལ་རྩེ་མོ་གཉིས་བྱས་ཏེ། འདི་ནི་དང་པོའི་རྡོ་རྗེ་ཞེས་བྱ་བ་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་གཉིས་པ་ཡིན་ནོ། །མཐེབ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་བྱས་འཛིན་པ་ཡི། །ཞེས་བྱ་བ་ལ། དང་པོའི་རྡོ་རྗེ་གཡོན་པའི་སོར་མོ་དབུས་མའི་རྩེ་མོ། གཡས་པའི་མཛུབ་མོ་དང་མཐེ་བོ་ཞགས་པའི་རྣམ་པས་བཟུང་བ་སྟེ། འདི་ནི་རྡོ་རྗེ་མཚོན་ཆ་མའི་དམ་ཚིག་གི་ཕྱག་རྒྱ་ཡིན་ནོ། །དབུས་མའི་རྡོ་རྗེ་འོག་ཏུ་ནི། །མཐེ་བོང་གིས་མནན་བཙིར་བར་བྱ། །ཞེས་བྱ་བ་ནི། དང་པོའི་རྡོ་རྗེ་ཁོ་ན་ལས། །དབུས་མའི་རྡོ་རྗེ་མཐེ་བོ་གཉིས་ཀྱིས་དེ་ཉིད་དུ་སྦྱར་ལ། རབ་ཏུ་བཙིར་བ་འདི་ནི། །ཀི་ལི་ཀི་ལའི་ཡིན་ནོ། །རྡོ་རྗེ་འདྲེན་མ་དང་འདྲ་བའི། །སྲིན་ལག་མཐེ་ཆུང་ཁ་ཕྱེ་བའི། །ཞེས་བྱ་བ་ནི། རྡོ་རྗེ་མཚོན་ཆ་མའི་ཕྱག་རྒྱ་ནི་རྡོ་རྗེ་འདྲེན་མ་སྟེ། སྲིན་ལག་གཉིས་དང་མཐེའུ་ཆུང་གཉིས་སྦྱར་བའི་རྩེ་མོའི་ཁ་ཕྱི་བ་ནི་རྡོ་རྗེ་འདྲེན་མའིའོ། །བསྐོར་ནས་པུས་མོར་གཞག་བ་ནི། ཞེས་བྱ་བ་ནི་དང་པོའི་རྡོ་རྗེ་ཁོ་ན་གཡས་པའི་པུས་མོའི་ཕྱོགས་སུ་བཞག་ནས་བསྐོར་ཏེ། པུས་མོ་གཡོན་པའི་ཕྱོགས་སུ་འཛིན་པ་ནི་རྡོ་རྗེ་མཚོན་མའོ། །གྱེན་དུ་འཕང་པ་ཞེས་བྱ་བ་ནི་དང་པོའི་རྡོ་རྗེ་ཁོ་ན་མེ་ཏོག་དབུལ་བའི་ཚུལ་གྱིས་གྱེན་དུ་གཏོར་བ་ནི་རྡོ་རྗེ་དཔྱིད་མའིའོ།། ཐུར་དུ་བླུགས་པ་ཞེས་བྱ་བ་ནི་དང་པོའི་རྡོ་རྗེ་ཁོ་ན་སྤོས་དབུལ་བའི་ཚུལ་དུ་ཐུར་དུ་བླུགས་པ་ནི་རྡོ་རྗེ་སྤྲིན་མའིའོ། །མཐེ་བོ་སྦྱར་པས་བསྐོར་བའིའོ་ཞེས་བྱ་བ་ནི་དང་པོའི་རྡོ་རྗེ་དེ་ཁོ་ན་ལས་མཐེ་བོ་གཉིས་ཕན་ཚུན་གྱི་ཕྱོགས་སུ་ཡང་དག་པར་སྦྱར་ནས། རྩེ་མོ་གྱེན་དུ་བྱས་ལ། མར་མེ་
དབུལ་བའི་ཚུལ་གྱིས་བསྐོར་བ་ནི། རྡོ་རྗེ་སྟོན་ཀ་མའིའོ། །རབ་ཏུ་བརྐྱང་ཞིང་བྱུག་པ་དང༌། །བསྐོར་ཞིང་སྤྱི་བོར་གནས་པའོ། །ཞེས་བྱ་བ་ནི་དང་པོའི་རྡོ་རྗེ་རབ་ཏུ་བརྐྱང་བ་དེ་ཉིད་དྲི་བྱུག་པའི་ཚུལ་དུ་བྱས་ནས། སླར་ཡང་དང་པོའི་རྡོ་རྗེ་དེ་ཉིད་བསྐོར་ཞིང་སྤྱི་བོར་འཛིན་པ་སྟེ། འདི་ནི་རྡོ་རྗེ་དགུན་མའིའོ། །བསྐོར་ཞིང་སྙིང་གར་གཞག་པར་བྱ། །ཞེས་བྱ་བ་ནི་དང་པོའི་རྡོ་རྗེ་སྙིང་གའི་ཕྱོགས་སུ་གཡོན་དུ་བསྐོར་ཞིང་འཛིན་པར་བྱེད་པ་སྟེ། འདི་ནི་སྒེག་མོའིའོ། །ཡོངས་སུ་བསྐོར་ཞིང་དགོད་པར་བྱའོ། །ཞེས་བྱ་བ་ནི་དང་པོའི་རྡོ་རྗེ་དགོད་པའི་ཚུལ་གྱིས་ཁ་ལ་ཡོངས་སུ་བསྐོར་ནས། ཁའི་མཐའ་རུ་ཡོངས་སུ་འཛིན་པ་སྟེ། འདི་ནི་བཞད་མའིའོ། །ཁ་ལས་གྱེན་དུ་དབྱུང་བ་ནི། །ཞེས་བྱ་བ་ནི། དང་པོའི་རྡོ་རྗེས་ཚིག་འབྱིན་པའི་ཚུལ་དུ་བྱས་པ་འདི་ནི་གླུ་མའིའོ། །དེ་བཞིན་གར་གྱིས་བསྐོར་བའོ། །ཞེས་བྱ་བ་ནི། དང་པོའི་རྡོ་རྗེ་བཅིངས་ལ་གར་གྱི་ཚུལ་དུ་བསྐོར་བ་འདི་ནི་རྡོ་རྗེ་གར་མའོ། །མཛུབ་མོའི་སོར་མོ་གཉིས་ཀྱིས་ནི། །ཞེས་བྱ་བ་ལ་དང་པོའི་རྡོ་རྗེ་ཁོ་ན་ལས། མཛུབ་མོ་གཉིས་ལྕགས་ཀྱུ་ལྟར་བཀུག་པ་འདི་ནི་རྡོ་རྗེ་ལྕགས་ཀྱུ་མའིའོ། །གཡོན་པའི་མཛུབ་མོ་གཡས་ཀྱིས་གཟུང༌། །ཞེས་བྱ་བ་ནི་དང་པོའི་རྡོ་རྗེ་མཛུབ་མོའི་ཚུལ་ལྕགས་ཀྱུས་གཡོན་མཛུབ་མོ་བསྒྲེང་བ་གཟུང་བ་བྱས་པ་འདི་ནི་རྡོ་རྗེ་ཞགས་པ་མའིའོ། །མཛུབ་མོའི་མཐེ་བོར་བཅིང་བ་ནི། །ཞེས་བྱ་བ་ལ། དང་པོའི་རྡོ་རྗེ་ཁོ་ན་ལས། མཛུབ་མོ་དང་མཐེ་བོ་དག་གི་ཕན་ཚུན་ལུ་གུ་རྒྱུད་དུ་བཅིང་བ་ནི་རྡོ་རྗེ་ལྕགས་སྒྲོག་མའིའོ། །མཐེ་བོང་མཐའ་མའི་ནང་དུ་གཞུག །ཅེས་བྱ་བ་ནི། དང་པོའི་རྡོ་རྗེ་ལས་མཐེ་བོ་རང་གི་སྲིན་ལག་དང་མཐེ་ཆུང་གི་ནང་དུ་འཛིན་པ་འདི་ནི། རྡོ་རྗེ་དྲིལ་བུ་མའི་དམ་ཚིག་གི་ཕྱག་རྒྱ་འོ། །ཁུ་ཚུར་གྱི་ཕྱག་རྒྱ་རྣམས་སོ་ཞེས་བྱ་བ་ནི་སྐུ་གསུང་ཐུགས་ཀྱི་རྡོ་རྗེ་རྣམས་ཆོས་བདག་མེད་པའི་སྦྱོར་བས་གཅིག་ཏུ་བྱེད་པ་ནི་ཁུ་ཚུར་ཏེ། དེ་དང་རྒྱུ་མ་ཐུན་པའི་དཔལ་རྡོ་རྗེ་སེམས་དཔའི་དཀྱིལ་འཁོར་ཡང་སྟོན་པར་བྱེད་པའོ། །དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་དམ་ཚིག་གི་ཕྱག་རྒྱ་རྣམས་ནི་ཁུ་ཚུར་གྱི་ཕྱག་རྒྱ་ཞེས་བརྗོད་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་དེ་
ནས་ཞེས་བྱ་བའི་སྒྲ་ནི་སྐབས་སུ་བབ་པའོ། །དོན་ཡོད་པ་དང་ཐོགས་པ་མེད་པ་ནི་གོ་སླའོ། །འདི་རྣམས་ཁོ་ན་ཞེས་བྱ་བ་ནི། དང་པོའི་རྡོ་རྗེ་ལ་སོགས་པ་རྣམས་ཀྱིའོ། །ལས་ཀྱི་ཕྱག་རྒྱ་བཅིང་བ་ཞེས་བྱ་བ་ནི། ལས་ཀྱི་ཕྱག་རྒྱ་བཅིང་བའི་མཚན་ཉིད་དོ། །མཆོག་ཏུ་གསང་བ་ཞེས་བྱ་བ་ནི། མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བའོ། །མཆོག་ནི་ཕུལ་དུ་བྱུང་བའོ། །གསང་བ་ནི་སྐྱེ་བོ་ཐམས་ཅད་དང་ཐུན་མོང་མ་ཡིན་པའོ། །བླ་ན་མེད་པ་ཞེས་བྱ་བ་ལ་སོགས་པ་ལ། དེའི་གོང་ན་གཞན་མེད་པས་ན། བླ་ན་མེད་པ་ཉིད་ཀྱི་ཕྱིར། །བླ་ན་མེད་པ་སྟེ་ཕུལ་དུ་བྱུང་བའོ། །ལས་ཀྱི་ཚོགས་སྒྲུབ་པར་བྱེད་པ་ནི་སྐད་ཅིག་མས། རྡོ་རྗེ་འཆང་ཆེན་པོ་ཉིད་ལ་སོགས་པའི་ལས་ཀྱི་ཚོགས་རྫོགས་པར་བྱེད་པ་གང་ཡིན་པ་དེ་སྐབས་སུ་བབ་པ་འདི་ཡིན་ཏེ། གནོད་པར་མི་ནུས་པ་ནི་སྔགས་ལ་སོགས་པས་གནོད་པར་མི་ནུས་པ་སྟེ། སངས་རྒྱས་ཐམས་ཅད་དང་བཅས་པའི་རྡོ་རྗེ་འཆང་བདག་གིས་ཀྱང་གནོད་པར་མི་ནུས་སོ། །དེ་ལས་བདེ་བ་ཆེན་པོའི་རྡོ་རྗེ་དབུས་མའི་ལས་ཞེས་བྱ་བ་ནི། དང་པོའི་རྡོ་རྗེ་ཁོ་ན་བདེ་བ་ཆེན་པོའི་རྡོ་རྗེ་སྟེ། དབུས་མའི་རྩེ་མོ་དེ་ཉིད་ཀྱིས། རྡོ་རྗེ་འཆང་ཆེན་པོ་ཉིད་ལ་སོགས་པའི་ལས་བྱེད་པར་འགྱུར་བས་ན། དབུས་མའི་ལམ་སོ། །རྡོ་རྗེ་ཆེ་མོའི་རྩེ་མོ་མཆུ་ལ་སོགས་པར་གཞག་པར་བྱ་ཞེས་བྱ་བ་ལ་སོགས་རྡོ་རྗེ་ནི་དབུས་མའི་རྩེ་མོ་སྟེ་དེའི་སེན་མོ་དག་གོ །རྩེ་མོ་མཆུ་ལ་སོགས་པ་གང་ལ་ཡོད་པ་དེ་ནི་རྩེ་མོ་མཆུ་ལ་སོགས་པ་ཅན་ནོ། །རྡོ་རྗེ་ན་མོ་ཡང་དེ་ཡིན་ལ། རྩེ་མོ་མཆུ་ལ་སོགས་པ་ཡང་དེ་ཉིད་ཡིན་པས་ན། རྡོ་རྗེ་སེན་མོའི་མཆུ་ལ་སོགས་པ་ཅན་ཏེ། དེ་དག་གཞག་པར་བྱའོ། །འདིའི་དོན་ནི་འདི་ཡིན་ཏེ། སྒྲུབ་པ་ཆེན་པོ་ལ་ཞུགས་པའི་རྣལ་འབྱོར་ལ་གལ་ཏེ་གྲུབ་པར་མ་གྱུར་ན། དེའི་ཚེ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ཏེ། དང་པོའི་རྡོ་རྗེ་བཅིངས་ནས། དེའི་དབུས་མའི་རྡོ་རྗེ་རྩེ་མོ་གཉིས་མཆུ་དང༌། དཔྲལ་བ་དང་སྤྱི་བོ་དང་སྙིང་གར་བཞག་ཅིང་བདག་ཉིད་རྡོ་རྗེ་འཆང་ཆེན་པོར་བསྒོམ་པར་བྱའོ། །འཁོར་ལོ་རབ་ཏུ་བསྐོར་བ་ཞེས་བྱ་བ་དེ་བཞིན་དུ། དཔལ་
རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ། དེའི་དབུས་མའི་རྩེ་མོ་ཆོས་ཀྱིས་འཁོར་ལོ་བསྐོར་བའི་ཚུལ་དུ་བྱས་ཤིང༌། ཨ་ནུ་རཱ་ག་ཡ་མི་ཧཱུཾ། ཞེས་བྱ་བ་བརྗོད་ཅིང་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་ལ་ཆོས་བསྟན་པར་མཛད་པའི་དེ་བཞིན་གཤེགས་པ་སྣང་བ་མཐའ་ཡས་སུ་བདག་ཉིད་བསམ་པར་བྱའོ། །རྡོ་རྗེ་ནོར་བུ་ཞེས་བྱ་བ་ནི་དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས། དང་པོའི་རྡོ་རྗེ་དབུས་མའི་རྩེ་མོས་རིན་ཆེན་བྱས་ཏེ། ཨ་ནུ་རཱ་ག་ཡ་མི་ཧཱུཾ། ཞེས་བྱ་བ་བརྗོད་ཅིང་རིན་པོ་ཆེའི་རིགས་ཀྱི་རང་བཞིན་དུ་བདག་ཉིད་བསྒོམ་པར་བྱའོ། །ཇི་ལྟར་འདོད་པའི་དངོས་གྲུབ་ཀུན་བྱེད་པ་རྣམས་ཞེས་བྱ་བ་ཇི་ལྟར་འདོད་པའི་དངོས་གྲུབ་ནི། ཕྱག་རྒྱ་ཆེན་པོ་ལ་སོགས་པ་ཇི་ལྟ་བ་དེ་བཞིན་དུ་འདོད་པའི་དངོས་གྲུབ་བོ། །ཀུན་དུ་བྱེད་པ་ནི་ཇི་ལྟར་མངོན་པར་འདྲེན་པ་སྟེ། །དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས། དང་པོའི་རྡོ་རྗེ་བཅིངས་ཏེ་ཕྱག་རྒྱ་ཆེན་པོའི་དངོས་གྲུབ་ཀྱི་ཚུལ་དུ་དབུས་མའི་རྩེ་མོས་བྱས་ཏེ། ཨ་ནུ་རཱ་ག་ཡ་མི་ཧཱུཾ། ཞེས་བྱ་བ་བརྗོད་ཅིང༌། རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཀྱི་རང་བཞིན་དུ་བདག་ཉིད་བསམ་པར་བྱའོ། །ཀུན་དུ་བྱེད་པ་ཞེས་བྱ་བའི་སྒྲ་འདི་ནི། རྣལ་འབྱོར་བ་བཞི་ཆར་ལ་ཡང་སྦྱར་བར་བྱའོ། །དེ་རྣམས་ཀྱི་འབྲས་བུ་བསྟན་པའི་ཕྱིར། རྡོ་རྗེ་འཆང་ཆེན་པོ་ཞེས་བྱ་བ་ལ་སོགས་པ་གསུངས་ཏེ། དེ་ལ་རྡོ་རྗེ་སེན་མོའི་རྩེ་མོའི་མཆུ་ལ་སོགས་པར་བཞག་པས་རྡོ་རྗེ་འཆང་ཆེན་པོའི་དངོས་གྲུབ་བོ། །འཁོར་ལོ་རབ་ཏུ་བསྐོར་བའི་ཚུལ་གྱིས་སངས་རྒྱས་དང་བྱང་ཆུབ་སེམས་དཔའི་དངོས་གྲུབ་བོ། །རྡོ་རྗེ་ནོར་བུའི་སྦྱོར་བའི་ཚུལ་གྱིས་རྡོ་རྗེ་རིན་པོ་ཆེའི་རིགས་ཀྱིས་དངོས་གྲུབ་བོ། །ཇི་ལྟར་མངོན་པར་འདོད་པའི་དངོས་གྲུབ་ཀྱི་ཚུལ་གྱིས་མཆོག་གི་དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ལྟར་དཔལ་རྡོ་རྗེ་སེམས་དཔའི་རྣལ་འབྱོར་གྱིས་ལས་བཞི་པོ་བསྟན་ནས། ད་ནི་རྡོ་རྗེ་མཚོན་ཆ་མའི་རྣལ་འབྱོར་གྱིས་ལས་ཀྱི་ཆོ་ག་དངོས་གྲུབ་བསྟན་པའི་ཕྱིར། རྡོ་རྗེ་འདྲེན་མས་ནི་མིག་འབྲས་ཀྱི་ལས་སོ་
ཞེས་བྱ་བ་གསུངས་ཏེ་རྡོ་རྗེ་འདྲེན་མ་ནི་རྡོ་རྗེ་མཚོན་ཆ་མའི་དམ་ཚིག་གི་ཕྱག་རྒྱའོ། །དེ་བཅིངས་ཏེ་མིག་གཉིས་ཀྱིས་ཐམས་ཅད་རྗེས་སུ་ཆགས་པར་བྱེད་པ་ལ་སོགས་པའི་ལས་ནི་མིག་འབྲས་གཉིས་ཀྱི་ལས་ཡིན་ནོ། །མིག་གཡོན་པ་དང་གཡས་ཞེས་བྱ་བ་ལ་སོགས་པ་ལ། རྡོ་རྗེ་མཚོན་ཆ་མའི་རྣལ་འབྱོར་བྱས་ནས། རྡོ་རྗེ་འདྲེན་མ་བཅིངས་ལ་རྡོ་རྗེ་མཚོན་ཆ་མའི་སྙིང་པོ་བརྗོད་ཅིང༌། མིག་གཡོན་པ་དང་གཡས་པ་སྟེང་དུ་བལྟས་པས་རྡོ་རྗེ་ཡིད་ལས་བྱུང་བ་ལ་སོགས་པ་ཐམས་ཅད་རྗེས་སུ་ཆགས་པར་བྱས་པ་ཡིན་ནོ། །མིག་ཚུར་འདྲེན་པས་དགུག་པའོ་ཞེས་བྱ་བ་ནི། དེ་བཞིན་དུ་རྡོ་རྗེ་མཚོན་ཆ་མའི་རྣལ་འབྱོར་གྱིས་རྡོ་རྗེ་འདྲེན་མ་བཅིངས་ལ་མིག་འབྲས་ཚུར་འདྲེན་པ་དག་གིས་རྡོ་རྗེ་ཡིད་ལས་བྱུང་བ་ལ་སོགས་པ་དངོས་པོ་ཐམས་ཅད་དགུག་པར་འགྱུར་རོ། །འཇུག་པ་ཐམས་ཅད་འཇུག་པའོ། །ཞེས་བྱ་བ་ལ་དེ་བཞིན་དུ་རྡོ་རྗེ་མཚོན་ཆ་མའི་རྣལ་འབྱོར་གྱིས་རྡོ་རྗེ་འདྲེན་མ་བཅིངས་ལས། རང་གི་ལུས་ལ་སོགས་པར་རྡོ་རྗེ་ཡིད་ལས་བྱུང་བ་ལ་སོགས་པ་དངོས་པོ་ཐམས་ཅད་གཞུག་པའི་བསམ་པས། མིག་འབྲས་རབ་ཏུ་གཞུག་པར་བྱས་ལ་དངོས་པོ་ཐམས་ཅད་འཇུག་པར་འགྱུར་རོ། །ཆེན་པོའི་རྡོ་རྗེ་ནི་དང་པོའི་རྡོ་རྗེ་སྟེ། དེའི་དབུས་མའི་རྩེ་མོ་ལས་ཐམས་ཅད་བྱེད་པར་འགྱུར་བའི་ཚུལ་དུ། ཨ་ནུ་རཱ་ག་ཡ་མི་ཧཱུཾ་ཞེས་བྱ་བའི་བཟླས་པ་བྱ་ཞིང་དཔལ་རྡོ་རྗེ་སེམས་དཔའི་རྣལ་འབྱོར་པ་ལས་ཐམས་ཅད་སྒྲུབ་པར་བྱེད་པས། དངོས་གྲུབ་ཐམས་ཅད་འབྱུང་བར་འགྱུར་རོ། །སྒེག་མོ་དགའ་པའི་རྡོ་རྗེ་མ། །ཞེས་བྱ་བ་ལ་སོགས་པ་ལ། འདས་མ་ཐག་ཏུ་བཤད་པའི་ལས་འདི་རྣམས་ཁོ་ན་སྒེག་མོ་དགའ་བའི་རྡོ་རྗེ་མས་ཕྱག་འཚལ་ཞིང༌། ཕྱག་བཙལ་ནས་མི་གཡོ་བ་ལས་གྲུབ་པའི་ཚུལ་དུ་ བྱས་ནས་ཐོགས་པ་མེད་པར་འགྲུབ་པས་ལས་ཐམས་ཅད་འགྲུབ་པར་འགྱུར་བ་ཡིན་ནོ། །དེ་བཞིན་དུ་གང ་གི་ཕྱག་རྒྱ་མཚན་མ་རྣམས་ཀྱིས་དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་བྱ་བ་ནི་ཇི་ལྟར་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་ལས་ཐམས་ཅད་དོན་ཡོད་ཅིང་གྲུབ་པས་འགྲུབ་པར་འགྱུར་བ་དེ་བཞིན་དུ་རྡོ་རྗེ་མཚོན་ཆ་
མ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་རྣམས་དང༌། རང་རང་གི་སྙིང་པོ་བཟླས་པ་ལས་ཐམས་ཅད་དོན་ཡོད་ཅིང་འགྲུབ་པར་འགྱུར་བ་ཡིན་ནོ། །དེ་ལྟར་གསངས་བའི་དཀྱིལ་འཁོར་གྱི་དམ་ཚིག་གི་ཕྱག་རྒྱ་རྣམས་དང༌། ལས་འགྲུབ་པར་བྱེད་པའི་ཕྱག་རྒྱ་རྣམས་བསྟན་པ་ཡིན་ནོ། །ཕྱག་རྒྱ་ཆེན་པོ་དང༌། ཆོས་དང་ལས་ཀྱི་ཕྱག་རྒྱ་དང༌། མཆོད་པའི་ཕྱག་རྒྱ་རྣམས་ཀྱི་དཀྱིལ་འཁོར་ཆེན་པོ་ལས་གསུངས་པ་གཟུང་བར་བྱའོ། །དང་པོའི་ཉིན་རེ་ལན་ཅིག་ཏུ། །ཕྱག་རྒྱ་ཆེན་པོས་སྙིང་པོ་བཟླ། །ཞེས་བྱ་བ་ལ་སོགས་པ་ལ་ཇི་ལྟར་ཡང་གསུངས་པའི་ལས་རྣམས་བྱེད་པར་འདོད་ན། རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས་ནས་རང་གི་ལྷའི་ཕྱག་རྒྱ་རྣམས་རང་གི་ལྷའི་སྙིང་པོ་བཟླ་ཞིང་བཅིང་བར་བྱའོ། །དེའི་འོག་ཏུ་རྡོ་རྗེ་སེམས་དཔའི་ལས་སྒྲུབ་པར་བྱེད་པས་ཨ་ནུ་རཱ་ག་ཡ་མི་ཧཱུཾ་ཞེས་བྱ་བའི་ཉེ་བའི་སྙིང་པོ་དང་བཅས་པའི་སྙིང་པོ་བཟླ་ཞིང་ལས་ཐམས་ཅད་བསྒྲུབ་པར་བྱ་བ་ཡིན་ནོ། །རྡོ་རྗེ་མཚོན་ཆ་མ་ལ་སོགས་པའི་ཟློས་པ་པོ་རྣམས་ཀྱིས་ཀྱང་ཨ་ནུ་རཱ་ག་ཡ་མི་ཧཱུཾ་བཛྲཾ་དྲཥྚི་ས་མ་ཀི་མ་ཊ་ཞེས་བྱ་བ་ལ་སོགས་པའི་རྡོ་རྗེ་མཚོན་ཆ་མ་ལ་སོགས་པའི་སྙིང་པོ་བཟླ་ཞིང་ཇི་ལྟར་གསུངས་པའི་ལས་རྣམས་བསྒྲུབ་པར་བྱ་བ་ཡིན་ནོ། །ཐམས་ཅད་ཡོད་པར་གྲུབ་པ་ཞེས་བྱ་བ་ནི་གང་ཞིག་ཉེ་བའི་སྙིང་པོ་འདི་ཐམས་ཅད་ཡོད་པར་སྒྲུབ་པར་བྱེད་པས་ན་དེའི་ཕྱིར། དེ་དང་ལྷན་ཅིག་ཏུ་སྙིང་པོ་ཐམས་ཅད་བཟླས་ནས་ཐམས་ཅད་སྒྲུབ་པར་བྱེད་པ་ཡིན་ནོ། །བདེ་བ་ཆེན་པོའི་རྡོ་རྗེ་ནི་ཇི་ལྟར་བཤད་པའོ། །དེའི་གསང་བའི་རྟོག་པ་ནི་སེམས་དཔའི་གསང་བའི་འཁོར་གྱི་རྟོག་པའི་རྗེས་ལ་བཤད་པའོ། །དེའི་མཆོག་ནི་ཕུལ་དུ་བྱུང་བ་སྟེ། ཡི་གེ་ཧཱུཾ་རང་བཞིན་གྱི་སྙིང་པོའོ། །དེ་ཅིའི་ཕྱིར་ཕུལ་དུ་བྱུང་བ་ཡིན་ཞེ་ན། ཕྱི་མ་ཞེས་བྱ་བ་ལ་ཕྱི་མ་ནི་མཆོག་ཏུ་གྱུར་བ་སྟེ། ཐུགས་ཀྱི་གསང་བ་སྟོན་པར་བྱེད་པའོ་ཞེས་བྱ་བའི་དོན་ཏོ། །སྒྲུབ་པ་དོན་ཡོད་དམ་ཚིག་ནི། །ཞེས་བྱ་བ་ལ། སྒྲུབ་པ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་སྟེ། འབྲས་བུ་ཡོད་པའི་རྒྱུ་ཉིད་ཡིན་པའི་ཕྱིར་དོན་ཡོད་པའི་དམ་ཚིག་གོ །དོན་ཡོད་པའི་དམ་
ཚིག་ཡིན་པའི་ཕྱིར་དེ་ཉིད་སྙིང་པོས་སྐད་ཅིག་དངོས་གྲུབ་ཅེས་བྱ་བ་ཡིན་ནོ། །རྩ་བའི་རྒྱུད་ཅེས་བྱ་བ་ནི་འདས་མ་ཐག་ཏུ་བཤད་པའི་དཀྱིལ་འཁོར་བཅུ་གཅིག་གི་རྒྱུད་དེ་ནི་རྩ་བའི་རྒྱུད་དང༌། རྒྱུད་ཕྱི་མ་ནི་འོག་ནས་འཆད་པར་འགྱུར་བའི་དཔལ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་སྟོན་པར་བྱེད་པའོ། །འདི་གཉིས་དང་བཅས་པ་འདས་མ་ཐག་ཏུ་བཤད་པའི་དཀྱིལ་འཁོར་གྱི་ཕྱག་རྒྱའི་རྒྱུད་ནི་བླ་ན་མེད་པ་ཡིན་ནོ། །དེའི་ཅིའི་ཕྱིར་ཞེ་ན། དངོས་གྲུབ་མཆོག་ནི་འདི་བཞིན་དུ། །ཞེས་བྱ་བ་ལ། རང་གི་རྟོག་པའི་ཆོ་གས་ཕྱག་རྒྱའི་རྒྱུད་འདི་ཇི་ལྟར་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྫོགས་པར་བྱེད་པས། མཆོག་ཏུ་གྱུར་པ་དེ་བཞིན་དུ་དེ་དག་དང་བཅས་པ་ཡང་བླ་ན་མེད་པའི་ཡེ་ཤེས་སྒྲུབ་པར་བྱེད་པ་ཡིན་ནོ། །དཔལ་མཆོག་དང་པོའི་རྒྱུ་ཆེར་བཤད་པ། ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས། དུམ་བུ་གཉིས་པ་རྩ་བའི་བརྒྱུད་ལས། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་ཕྱག་རྒྱའི་རྟོག་པ་བཤད་པ་རྫོགས་སོ།། །།ད་ནི་དུམ་བུ་གཉིས་པ་རྩ་བའི་རྒྱུད་ལས་གསུངས་པའི། དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ནས་བརྩམས་ཏེ། ཕྱག་རྒྱའི་མཚན་ཉིད་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པ་ལ་སྟེ་གསང་བའི་དཀྱིལ་འཁོར་གྱི་ཕྱག་རྒྱ་བཅིངས་པའི་རྗེས་ཐོགས་ལའོ། །དང་པོའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་ལ་སོགས་པའི་ཕྱག་རྒྱ་ཐམས་ཅད་དེ། ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང་ལས་ཀྱི་ཕྱག་རྒྱའོ། །དེ་རྣམས་ཀྱི་རྒྱུད་ནི་སྟོན་བར་བྱེད་པའི་སྒྲའི་ཚོགས་ཏེ། དེའི་ཆོ་ག་རྒྱས་པ་ནི་ཕྱག་རྒྱ་ཆེན་པོ་ལ་སོགས་པའི་མཚན་ཉིད་ཅན་གྱི་སྒྲུབ་པར་བྱེད་པའི་འབྲས་བུ་སྟོན་པའི་རྒྱུན་ནོ། །དེ་ལ་བཅོམ་ལྡན་འདས་ཀྱི་ཕྱག་རྒྱ་ཆེན་པོའི་རྒྱུད་ནི་ཞེས་བྱ་བ་ལ། དཀྱིལ་འཁོར་ཆེན་པོ་ལས་གསུངས་པའི་དཔལ་རྡོ་རྗེ་སེམས་དཔའི་རྟོགས་པ་དང་ཡེ་ཤེས་ཀྱི་བརྩོན་འགྲུས་ཀྱི་ལས་སོ། །དེ་སྟོན་པར་བྱེད་པ་དང༌། དེ་དང་རྒྱུ་མཐུན་པ་དང༌། དེ་སྐྱེད་པར་བྱེད་པའི་ལས་ཀྱི་ཕྱག་རྒྱ་ནི་ལས་ཀྱི་
ཕྱག་རྒྱའོ། །རྡོ་རྗེ་ཁུ་ཚུར་མེད་པ་རྣམས་ཀྱིས་རྟོགས་པར་བྱའོ་ཞེས་བྱ་བ་ལ་རྡོ་རྗེ་ལ་སོགས་པའི་ཕྱག་མཚན་དང་བྲལ་བའི་རྡོ་རྗེ་ཁུ་ཚུར་རྣམས་ནི་རྡོ་རྗེ་ཁུ་ཚུར་རྡོ་རྗེ་མེད་པ་རྣམས་སོ། །དེ་དག་གིས་ལས་ཀྱི་ཕྱག་རྒྱ་རྣམས་རྟོགས་པར་བྱ་སྟེ། ལས་ཀྱི་ཕྱག་རྒྱ་ཐམས་ཅད་རྡོ་རྗེ་ཁུ་ཚུར་གཉིས་ལས་བྱུང་བ་སློབ་མ་རྣམས་ལ་བསྟན་པར་བྱའོ་ཞེས་བྱ་བའི་དོན་ཏོ། །གཡོན་དུ་རྡོ་རྗེ་སྙེམས་པ་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གཉིས་བཅིངས་ནས་གཡོན་པའི་རྡོ་རྗེ་ཁུ་ཚུར་གྱིས་བསྙེམས་པར་བྱས་ནས་གཡས་པའི་རྡོ་རྗེ་ཁུ་ཚུར་རང་གི་སྙིང་གར་སྟོད་པའི་ཚུལ་གྱིས་འཛིན་པ་འདི་ནི་རྡོ་རྗེ་སྙེམས་པ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ཡིན་ནོ། །འདིའི་ལས་བསྟན་པར་བྱ་བའི་ཕྱིར་རབ་ཏུ་དགའ་བ་བརྟན་པར་བྱེད་ཅིང་དངོས་གྲུབ་ཐམས་ཅད་སྟེར་བའོ་ཞེས་བྱ་བ་ལ། རབ་ཏུ་དགའ་བ་ནི་བཤད་ཟིན་ཏོ། །དེ་བརྟན་པར་བྱེད་ཅིང་བརྩོན་འགྲུས་ཀྱི་སྟོབས་ཀྱིས་གང་གི་ཕྱིར་རྣལ་འབྱོར་པ་རྣམ་པར་རྟོག་པ་ཐམས་ཅད་ཀྱིས་མི་བསྐྱོད་པའི་ཕྱིར་རབ་ཏུ་དགའ་བ་མི་ཕྱེད་པ་དང་ལྡན་པར་འགྱུར་བ་ཡིན་ནོ། །དངོས་གྲུབ་ཐམས་ཅད་སྟེར་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་སྩོལ་བའོ། །འདིས་ནི་དོན་འདི་བསྟན་པར་འགྱུར་རོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་སྒྲུབ་པར་བྱེད་པས་ལས་ཀྱི་ཕྱག་རྒྱ་རྣམས་བཅིང་བར་བྱ་བ་ཡིན་ནོ། །གཞུ་དང་མདའ་གཏོད་པས་རྡོ་རྗེ་མཚོན་ཆ་མའོ་ཞེས་བྱ་བ་ནི་གཡོན་པའི་རྡོ་རྗེ་ཁུ་ཚུར་གྱིས་གཞུ་འཛིན་པའི་ཚུལ་དུ་བྱས་ལ་རྡོ་རྗེ་ཁུ་ཚུར་དེ་སྙིང་གའི་ཕྱོགས་སུ་གྱེན་དུ་ཁ་བལྟས་པར་བཞག་ནས་དེའི་སྟེང་དུ་གཡས་པའི་རྡོ་རྗེ་ཁུ་ཚུར་འོག་ཏུ་བལྟ་བ་བཞག་སྟེ། སླར་ཡང་དེས་མདའ་གསོར་བའི་ཚུལ་དུ་བྱས་པ་འདི་ནི་རྡོ་རྗེ་ཡིད་ལས་བྱུང་བའོ། །འོག་ཏུ་འཁྱུད་པ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་ཀྱིས་མཆན་ཁུང་གི་འོག་ཏུ་འཁྱུད་པ་འདི་ནི་ཀི་ལི་ཀི་ལའིའོ། །རྒྱལ་མཚན་གྱེན་དུ་བསྒྲེང་བ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་རྒྱལ་མཚན་གྱེན་དུ་བསྒྲེང་བའི་ཚུལ་དུ་འཛིན་པ་འདི་ནི་རྡོ་རྗེ་དྲན་པའིའོ། །རྡོ་རྗེ་བསྙེམས་པ་གཉིས་བསྟོད་པ། །ཞེས་བྱ་བ་ནི་རྡོ་རྗེ་
ཁུ་ཚུར་གཉིས་བཅིངས་ཏེ་ནང་དུ་མངོན་པར་ཕྱོགས་ཤིང་སྟེང་དུ་ཁ་བལྟ་བ་དེས་ལག་པ་གཉིས་དཀུ་ལ་བརྟེན་པར་བྱས་པ་ནི། རྡོ་རྗེ་བསྙེམས་པའིའོ། །སྒེག་པ་དང་བཅས་པས། མཐའ་ལ་སོགས་པ་དགྲོལ་བར་བྱ། །ཞེས་པ་ལ་སོགས་པ་ལ་ཁུ་ཚུར་གཉིས་བཅིངས་ནས། སྒེག་པ་དང་བཅས་པས་མཐའ་མ་ལ་སོགས་པའི་སོར་མོ་ཐམས་ཅད་བཀྲོལ་ནས་ཀློག་འགྱུ་བའི་ཚུལ་གྱིས་གར་བྱའོ། །དེ་ཇི་ལྟ་བུ་ཞེ་ན། གཡས་སུ་ཡོངས་སུ་བསྐོར་བས་ཞེས་བྱ་བ་ནི་གཡས་སུ་བསྐོར་བ་ནི་གཡས་སུ་ཡོངས་སུ་བསྐོར་བ་སྟེ། དེས་མེ་ཏོག་ལ་སོགས་པའི་ཀ་པུ་ཊ་གཡས་སུ་བསྐོར་བ་ནི་མེ་ཏོག་ལ་སོགས་པའི་ཀ་པུ་ཊའོ། །མེ་ཏོག་ལ་སོགས་སྟོན་པར་བྱེད་པའི་ཀ་པུ་ཊ་ནི་མེ་ཏོག་ལ་སོགས་པའི་ཀ་པུ་ཊའི་ཐལ་མོའོ། །སོགས་པའི་སྒྲས་ནི་སྤོས་དང་མར་མེ་དང་དྲི་སྟོན་པར་བྱེད་པའི་ཀ་པུ་ཊ་ཤེས་པར་བྱའོ། །མེ་ཏོག་ལ་སོགས་པའི་ཀ་པུ་ཊ་དེ་སྤྱི་བོའི་ཕྱོགས་སུ་འཛིན་ཞིང་དེ་ནས་ཕབ་ལ་དེ་བཞིན་དུ་སྒེག་པ་དང་བཅས་པས་མཆོད་པ་དོར་བར་བྱའོ་ཞེས་བྱ་བ་དང་སྦྱར་རོ། །ཇི་ལྟར་ཞེ་ན། རྡོ་རྗེ་ཐལ་མོས་ཞེས་བྱ་བའི་མེ་ཏོག་ལ་སོགས་པའི་ཀ་པུ་ཊ་དེ་ཕབ་ནས་རྡོ་རྗེ་ཐལ་མོ་བྱས་ཏེ། བྱེད་པར་གྱུར་པའི་རྡོ་རྗེ་ཐལ་མོ་དེ་རྣམ་པར་འགྱུར་བ་ཡིན་ནམ་མ་ཡིན་ཞེ་ན། དཀྲོལ་བ་ཞེས་བྱ་བ་ནི་མེ་ཏོག་ལ་སོགས་པ་དཀྲོལ་བའི་ཚུལ་དང་བཅས་པས་སོ། །སྒེག་པ་དང་བཅས་པས་མཆོད་པ་དོར་བའོ་ཞེས་བྱ་བ་ནི་སྒེག་པ་དང་བཅས་པས་མེ་ཏོག་ལ་སོགས་པ་འབུལ་བའི་ཚུལ་གྱིས་དོར་བར་བྱའོ། །དེ་ལ་རྡོ་རྗེ་ཐལ་མོས་སྒེག་པ་དང་བཅས་པས་མཆོད་པ་དོར་བ་ཇི་ལྟ་བུ་ཞེ་ན། དེ་བཞིན་དུའོ་ཞེས་བྱ་བ་སྟེ། ཇི་ལྟར་དམ་ཚིག་གི་ཕྱག་རྒྱའི་སྐབས་སུ་སྒེག་པ་དང་བཅས་པས་མཆོད་པ་དོར་བས་བསྟན་པ་དེ་བཞིན་དུ་ལས་ཀྱི་ཕྱག་རྒྱའི་སྐབས་སུ་འདིར་ཡང་བྱ་བ་ཡིན་ནོ། །འདིས་ནི་འདི་ལྟར་འཆད་པར་འགྱུར་ཏེ་རྡོ་རྗེ་ཁུ་ཚུར་གཉིས་ཀྱིས་ཇི་སྐད་བཤད་པའི་རྡོ་རྗེ་མཚོན་ཆ་མའི་སྙིང་པོ་བརྗོད་ཅིང་གར་བྱ་སྟེ། ཀ་པུ་ཊའི་ཐལ་མོ་བཅིངས་ལ་སྤྱི་བོར་གཟུང་བར་བྱ་སྟེ། དེ་ནས་དེ་ལས་ཕབ་ནས་རྡོ་རྗེ་ཐལ་མོ་བཅིངས་ཏེ། དེ་ནས་རྗེས་ལ་སྒེག་པ་དང་བཅས་པས་མེ་ཏོག་འབུལ་བའི་ཚུལ་གྱིས་སྟེང་དུ་གཏོར་བར་བྱ་སྟེ།
དེ་ནས་རྡོ་རྗེ་མཚོན་ཆ་མའི་ལས་ཀྱི་ཕྱག་རྒྱ་བཅིངས་བར་བྱའོ། །དེ་ནས་རྡོ་རྗེ་ཀཱི་ལི་ཀཱི་ལའི་སྙིང་པོ་བརྗོད་ཅིང་དེ་བཞིན་དུ་རྡོ་རྗེ་ཐལ་མོ་བཅིངས་ལ་དེ་ཉིད་སྒེག་མས་སྦོས་འབུལ་གྱིས་ཚུལ་གྱིས་འོག་ཏུ་ལྡུགས་པ་སྟེ། དེས་ནས་ཀཱི་ལི་ལའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་རྡོ་རྗེ་དྲན་མའི་སྙིང་པོ་བརྗོད་ཅིང་དེ་བཞིན་དུ་རྡོ་རྗེ་ཐལ་མོ་བཅིངས་ལ་དེ་ཉིད་སྒེག་པས་མར་མེ་འབུལ།བའི་ཚུལ་གྱིས་མཐེ་བོ་སྦྱར་ནས་བསྐོར་བར་བྱ་སྟེ། རྡོ་རྗེ་དྲན་མའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་རྡོ་རྗེ་སྙེམས་མའི་སྙིང་པོ་བརྗོད་ཅིང་དེ་བཞིན་དུ་རྡོ་རྗེ་ཐལ་མོ་བཅིང་ནས་དེ་ཉིད་སྒེག་པས་སྙིང་གའི་ཕྱོགས་སུ་བརྐྱང་ལ་དྲིས་བྱུག་བའི་ཚུལ་དུ་སྦྱར་ཏེ། རྡོ་རྗེ་ཐལ་མོ་སྤྱི་བོར་གཟུང་བར་བྱ་སྟེ། དེ་ནས་རྡོ་རྗེ་སྙེམས་མའི་ལས་ཀྱི་ཕྱག་རྒྱ་བཅིང་བར་བྱའོ། །རྡོ་རྗེ་ཡིད་ལས་བྱུང་བ་དང༌། ཀཱི་ལི་ཀཱི་ལ་དང་རྡོ་རྗེ་དྲན་མ་དང༌། རྡོ་རྗེ་སྙེམས་མའི་ལས་ཀྱི་ཕྱག་རྒྱ་རྣམས་གང་ཡིན་པ་དེ་ཉིད་གོ་རིམས་ཇི་ལྟ་བ་བཞིན་དུ་རྡོ་རྗེ་མཚོན་ཆ་དང༌། ཀཱི་ལི་ཀཱི་ལ་དང༌། རྡོ་རྗེ་དྲན་མ་དང༌། རྡོ་རྗེ་སྙེམས་མ་ལ་སོགས་པ་རྣམས་ཀྱི་ཡང་ཡིན་པར་གཟུང་བར་བྱའོ། །དེ་ལྟར་རྡོ་རྗེ་མཚོན་ཆ་མ་ལ་སོགས་པའི་ལས་ཀྱི་ཕྱག་རྒྱ་བསྟན་ནས། ད་ནི་དཔྱིད་ཀ་རྡོ་རྗེ་མ་ལ་སོགས་པའི་ལས་ཀྱི་ཕྱག་རྒྱ་བསྟན་པར་བྱ་བའི་ཕྱིར། རྡོ་རྗེ་གར་ནི་ནང་གི་མཚམས་རྣམས་ལའོ་ཞེས་བྱ་བ་ལ་རྡོ་རྗེ་གར་ནི་འདས་མ་ཐག་ཏུ་བཤད་པའི་མཚན་ཉིད་ཅན་དེ། ནང་གི་མཚམས་བཞི་པོ་ལ་དཔྱིད་ཀ་རྡོ་རྗེ་མ་ལ་སོགས་པ་བཞི་དང༌། ཕྱིའི་དཀྱིལ་འཁོར་གྱི་མཚམས་བཞི་ལ་སྒེག་མོ་ལ་སོགས་པ་རྣམས་ཀྱི་ལས་ཀྱི་ཕྱག་རྒྱ་བསྐྱེད་པའི་རྒྱུར་གྱུར་པ་ཤེས་པར་བྱའོ། །དེ་ཅིའི་ཕྱིར་ཞེ་ན། རྫོགས་པ་ཞེས་བྱ་བ་ལ་སོགས་པ་སྟེ། ཕྱིའི་ཡོ་བྱད་མེ་ཏོག་དང་སྤོས་དང་མར་མེ་དང་དྲི་དང་ལྡན་པ་ནི་རྫོགས་པའོ། །མཚང་བ་ནི་དེ་དང་བྲལ་བའོ། །ཡང་ན་ཇི་ལྟར་རྙེད་པའི་ཞེས་བྱ་བ་ལ་མེ་ཏོག་ལ་སོགས་པའི་མཆོད་པའི་རྫས་རྣམས་ལས་ཕྱོགས་གཅིག་ཐོབ་པ་ནི་ཇི་སྙེད་པ་སྟེ་ཇི་སྙེད་པ་དེས་ཀྱང་ངོ༌། །མེ་ཏོག་ལ་སོགས་པའི་མཆོད་པ་རྣམས་ཀྱི་མཚན་མ་ནི་མེ་ཏོག་ལ་སོགས་པའི་མཆོད་པའི་མཚན་མ་སྟེ།
མེ་ཏོག་ལ་སོགས་པའི་ཚུལ་རྣམས་སོ། །སོགས་པའི་སྒྲས་ནི་སྤོས་ལ་སོགས་པ་གཟུང་བར་བྱའོ། །མེ་ཏོག་ལ་སོགས་པའི་མཆོད་པའི་མཚན་མ་དེ་རྣམས་ཀྱི། དངོས་གྲུབ་ཀུན་གསོལ་ཐུན་མོང་ཡིན། །ཞེས་བྱ་བ་ནི་དཔྱིད་ཀ་རྡོ་རྗེ་མ་ལ་སོགས་པའི་ལས་ཀྱི་ཕྱག་རྒྱ་ཐམས་ཅད་གྲུབ་པའི་ཕྱིར། ཐུན་མོང་གི་རྒྱུར་གྱུར་པ་རྡོ་རྗེ་ཡིན་པས་ན། དཔྱིད་ཀ་རྡོ་རྗེ་མ་ལ་སོགས་པའི་ལས་ཀྱི་ཕྱག་རྒྱ་རྣམས་བསྐྱེད་པའི་རྒྱུར་གྱུར་པ་ཡིན་ནོ། །དཔྱིད་ཀ་རྡོ་རྗེ་མ་ལ་སོགས་པའི་ལས་ཀྱི་ཕྱག་རྒྱ་མ་རྣམས་ཀྱི་མཚན་ཉིད་ཇི་ལྟར་ཤེས་པར་བྱ་ཞེ་ན། དམ་ཚིག་གི་ཕྱག་རྒྱའི་སྦྱོར་བས་མཚན་མ་ཡོངས་སུ་གཟུང་བ་ཞེས་བྱ་བ་ལ་ཇི་ལྟར་དཔྱིད་ཀའི་རྡོ་རྗེ་མ་ལ་སོགས་པའི་དམ་ཚིག་གི་ཕྱག་རྒྱའི་སྦྱོར་བ་བསྟན་པ་དེ་བཞིན་དུ་དེ་རྣམས་ཀྱི་ལས་ཀྱི་ཕྱག་རྒྱའི་སྦྱོར་བ་ཡང་དེ་བཞིན་ནོ། །འདིས་ནི་འདི་ལྟར་བསྟན་པར་འགྱུར་ཏེ། རྡོ་རྗེ་ཁུ་ཚུར་གཉིས་བཅིངས་ལ། དཔྱིད་ཀ་རྡོ་རྗེ་མའི་སྙིང་པོ་བརྗོད་ཅིང་གར་བྱས་ཏེ་སྔ་མ་བཞིན་དུ་ཀ་པུ་ཊའི་ཐལ་མོ་སྤྱི་བོའི་ཕྱོགས་སུ་བཅིང་བར་བྱ་ཞིང་དེ་ནས་དེ་ཕབ་ལ་རྡོ་རྗེ་ཁུ་ཚུར་གཉིས་བསྐོར་བས་བཅིངས་ཏེ་མེ་ཏོག་འབུལ་བའི་ཚུལ་གྱིས་སྟེང་དུ་གཏོར་བར་བྱ་སྟེ། འདིས་ནི་དཔྱིད་ཀ་རྡོ་རྗེ་མའི་ལས་ཀྱི་ཕྱག་རྒྱ་ཡིན་ནོ། །དེ་ནས་དེ་བཞིན་དུ་རྡོ་རྗེ་སྤྲིན་མའི་སྙིང་པོ་བརྗོད་ཅིང༌། རྡོ་རྗེའི་གར་བྱ་སྟེ་ཀ་པུ་ཊའི་ཐལ་མོ་སྤྱི་པོའི་ཕྱོགས་སུ་བཅིངས་ལ་ཕབ་སྟེ། རྡོ་རྗེ་ཁུ་ཚུར་གཉིས་བསྐོར་བ་བཅིངས་ཏེ། སྤོས་འབུལ་བའི་ཚུལ་གྱིས་བླུགས་པར་བྱ་སྟེ། འདིས་ནི་རྡོ་རྗེ་སྤྲིན་མའིའོ། །དེ་ནས་དེ་བཞིན་དུ་སྟོན་ཀའི་རྡོ་རྗེ་མའི་སྙིང་པོ་བརྗོད་ཅིང་སྤྱི་བོའི་ཕྱོགས་སུ་ཀ་བུ་ཊའི་ཐལ་མོ་བཅིངས་ནས་ཕབ་ལ། རྡོ་རྗེ་ཁུ་ཚུར་གཉིས་བསྐོར་བ་བཅིངས་ཏེ་མར་མེ་འབུལ་བའི་ཚུལ་གྱིས་མཐེ་བོ་སྦྱར་ལ་བསྐོར་བར་བྱ་སྟེ། འདི་ནི་སྟོན་ཀའི་རྡོ་རྗེ་མའིའོ། །དེ་བཞིན་དུ་དགུན་མའི་སྙིང་པོ་བརྗོད་ཅིང་གར་བྱས་ལ་སྤྱི་བོའི་ཕྱོགས་སུ་ཀ་པུ་ཊའི་ཐལ་མོ་བཅིངས་ནས་ཕབ་སྟེ། རྡོ་རྗེ་ཁུ་ཚུར་གཉིས་བཅིངས་ཤིང་སྙིང་གའི་ཕྱོགས་སུ་བརྐྱང་སྟེ། སླར་ཡང་རྡོ་རྗེ་ཁུ་ཚུར་གཉིས་བཅིངས་པ། སྤྱི་བོར་གཟུང་བར་བྱ་སྟེ། འདི་ནི་རྡོ་རྗེ་དགུན་མའི་ལས་ཀྱིས་ཕྱག་རྒྱའོ། །རྡོ་རྗེ་ཁུ་ཚུར་
གཉིས་ཀྱིས་བསྐོར་བ་དེ་བཞིན་དུ་སྒེག་མོའི་སྙིང་པོ་བརྗོད་ཅིང༌། ཀ་པུ་ཊའི་ཐལ་མོ་བཅིངས་ཤིང་ཕབ་ལ་རྡོ་རྗེ་ཁུ་ཚུར་གཉིས་བཅིངས་ལ་སྙིང་གའི་ཕྱོགས་སུ་བསྐོར་བས་གཟུང་བར་བྱ་སྟེ་འདི་ནི་སྒེག་མོའིའོ། །དེ་བཞིན་དུ་བཞད་མའི་སྙིང་པོ་བརྗོད་ཅིང་ཀ་པུ་ཊའི་ཐལ་མོ་བཅིངས་ལ། རྡོ་རྗེ་ཁུ་ཚུར་གཉིས་ཀྱིས་བསྐོར་བས་བཅིངས་ལ་དགོད་པའི་ཚུལ་གྱིས་ཡོངས་སུ་བསྐོར་ཏེ། ཁའི་ཕྱོགས་སུ་གཟུང་བར་བྱ་སྟེ་འདི་ནི་བཞད་མའིའོ། །དེ་བཞིན་དུ་གླུ་མའི་སྙིང་པོ་བརྗོད་ཅིང་ཀ་པུ་ཊའི་ཐལ་མོ་བཅིངས་ནས་ཕབ་ལ་རྡོ་རྗེ་ཁུ་ཚུར་གཉིས་བསྐོར་བ་བཅིངས་ཏེ་ཚིག་འབྱིན་པའི་ཚུལ་གྱིས་ཁའི་ཕྱོགས་ནས་གྱེན་དུ་འདྲེན་པའི་ཚུལ་དུ་བྱ་སྟེ་འདི་ནི་གླུ་མའིའོ། །དེ་བཞིན་དུ་རྡོ་རྗེ་གར་མའི་སྙིང་པོ་བརྗོད་ཅིང་གར་མའི་ལས་བྱུང་བའི་ཀ་པུ་ཊའི་ཐལ་མོ་བཅིངས་ནས་ཕབ་ལ་རྡོ་རྗེ་ཁུ་ཚུར་གཉིས་བསྐོར་བ་བཅིངས་ཏེ། གར་གྱི་ཚུལ་གྱིས་བསྐོར་བར་བྱས་ཏེ་འདི་ནི་གར་མའིའོ། །དེ་ནས་རྡོ་རྗེ་ལྕགས་ཀྱུ་མའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་ཀྱིས་ལྕགས་ཀྱུར་བྱས་ཏེ། འདི་ནི་རྡོ་རྗེ་ལྕགས་ཀྱུ་མའིའོ། །དེ་ནས་རྡོ་རྗེ་ཞགས་པའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གཉིས་བཅིངས་ལ། གཡས་པའི་མཛུབ་མོ་ལྕགས་ཀྱུས་གཡོན་པའི་མཛུབ་མོ་བསྒྲེང་བ་གཟུང་བར་བྱ་སྟེ་འདི་ནི་རྡོ་རྗེ་ཞགས་པའིའོ། །དེ་ནས་ལྕགས་སྒྲོག་གི་སྙིང་པོ་རྗེས་སུ་དྲན་ཞིང་རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་དང་མཐེ་བོ་དག་གིས་མདུད་པ་བཅིངས་པའི་ཚུལ་དུ་བྱ་སྟེ། འདི་ནི་རྡོ་རྗེ་ལྕགས་སྒྲོག་གིའོ། །དེའི་རྗེས་ལ་རྡོ་རྗེ་དྲིལ་བུའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གཉིས་བཅིངས་ལ། ཕན་ཚུན་ཡང་དག་པར་སྦྱོར་བ་འདི་ནི་རྡོ་རྗེ་དྲིལ་བུ་ལས་ཀྱི་ཕྱག་རྒྱའོ། །འདི་རྣམས་ཀྱི་དོན་ཡོད་བའི་ལས་ལ་གྲུབ་པ་རྣམས་སོ་ཞེས་བྱ་བ་ནི་ཇི་ལྟར་ཕྱག་རྒྱ་ཆེན་པོ་རྣམས་དང་དམ་ཚིག་དང་ཆོས་ཀྱི་ཕྱག་རྒྱ་རྣམས་དོན་ཡོད་པའི་ལས་གྲུབ་པའི་རྒྱུར་གྱུར་པ་དེ་བཞིན་དུ་ལས་ཀྱི་ཕྱག་རྒྱ་རྣམས་ཀྱང་དངོས་གྲུབ་ཐམས་ཅད་ཀྱི་དོན་དུ་གྱུར་པ་ཡིན་ནོ། །རྡོ་རྗེ་ཁུ་ཚུར་གྱིས་བདུད་རྩིའི་ཆུ་བཟླའོ་ཞེས་བྱ་བ་ལ། རྡོ་རྗེ་ཁུ་ཚུར་གྱིས་རྡོ་རྗེ་མེ་ཏོག་གི་ཡལ་ག་གཅིག་བཟུང་སྟེ་བུམ་
པའི་སྔགས་ཀྱིས་བུམ་པ་ལ་མངོན་པར་བསྔགས་པར་བྱའོ་ཞེས་བྱ་བའི་ཐ་ཚིག་གོ །འཇུག་པའི་མཆོག་ནི་ཕྱག་རྒྱ་བཤད་པ་ཡིན་ཞེས་བྱ་བ་ལ་དཀྱིལ་འཁོར་དུ་འཇུག་པའི་ཕྱག་རྒྱ་སྟེ་དེ་སྔར་བཤད་ཟིན་ཏོ། །དཀྱིལ་འཁོར་ཆེན་པོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་སྟེ། དེར་ཐམས་ཅད་ཀྱི་སློབ་དཔོན་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་སློབ་དཔོན་ཡིན་ནོ། །དེ་བྱིན་གྱིས་བརླབས་པ་ནི་བསྟན་པར་བྱ་བ་སྟེ། ཕྱི་མའི་མཐའི་བར་དུའོ། །དེའི་དོན་དུ་གསང་བའི་དམ་ཚིག་ཅེས་བྱ་བའི་ཕྱག་རྒྱ་གང་ཡིན་པ་དེ་བཤད་ཟིན་ཏོ། །འཇུག་པའི་ཕྱག་རྒྱ་གཉིས་པ་ཞེས་བྱ་བ་ནི། སློབ་མ་འཇུག་པའི་དོན་དུ་དཀྱིལ་འཁོར་བརྟགས་ལ་འཇུག་པའི་ཕྱིར་བཤད་པའི་ཕྱག་རྒྱ་གཉིས་པ་ཡིན་ནོ། །དེ་ཇི་ལྟ་བུ་ཡིན་ཞེ་ན། རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་བཅིངས་ནས་གཡོན་པའི་མཛུབ་མོ་དང་མཐེ་བོ་དག་གིས་དེ་བཞིན་དུ་སྐྱེ་གནས་དེར་གཡས་པའི་མཐེ་བོ་འོག་ཏུ་ཁ་ལྟ་པ་བཅུག་ལ་བཙིར་ཏེ་མཛུབ་མོ་གཉིས་ཀྱིས་ལྕགས་ཀྱུ་བྱས་ལ་དཀྱིལ་འཁོར་ཆེན་པོར་འཇུག་པར་བྱའོ། །ཡང་ན་སེམས་དཔའ་གང་ལ་འཇུག །དེ་ནི་མྱུར་དུ་འགྲུབ་པར་འགྱུར། །ཞེས་བྱ་བ་ལ་རྣམ་པར་སྣང་མཛད་ལ་སོགས་པའི་དཀྱིལ་འཁོར་གང་ལ་ཡང་འདི་བཅིངས་ནས། རྣམ་པར་སྣང་མཛད་ལ་སོགས་པའི་འཇུག་པའི་ཆོ་གས་འཇུག་ན། སེམས་དཔའ་དེ་རྣམ་པར་སྣང་མཛད་ལ་སོགས་པའི་རང་གི་དངོས་གྲུབ་ཀྱི་རྣམ་པར་སྣང་མཛད་ལ་སོགས་པའི་དཀྱིལ་འཁོར་དེར་མྱུར་བ་ཁོ་ནར་འགྲུབ་པར་འགྱུར་རོ། །འདིས་ནི་དཀྱིལ་འཁོར་ཐམས་ཅད་ལ་འཇུག་པའི་ཐུན་མོང་གི་ཕྱག་རྒྱ་འདི་ཡིན་ནོ་ཞེས་བསྟན་པ་ཡིན་ནོ། །རབ་ཏུ་དགའ་བའི་རྡོ་རྗེ་མ། །ཞེས་བྱ་བ་ལ་རབ་ཏུ་དགའ་བའི་རྡོ་རྗེ་སེམས་དཔའ་སྟེ། དེའི་ཕྱག་རྒྱ་གང་ཡིན་པ་དེ་ནི་རབ་ཏུ་དགའ་བའི་རྡོ་རྗེ་མ་ཡིན་ནོ། །རང་གི་ཁུ་ཚུར་གྱིས་རྡོ་རྗེའི་བདུད་རྩིའི་ཆུ་བླངས་ནས་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའི་དཀྱིལ་འཁོར་དུ་རྡོ་རྗེ་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ནས་དེས་བདག་ཉིད་དང་སློབ་མ་རྣམས་ལ་དབང་
བསྐུར་བར་བྱའོ། །དེ་བཞིན་གཤེགས་པའི་དཀྱིལ་འཁོར་དུ་དེ་བཞིན་གཤེགས་པའི་ཁུ་ཚུར་དང༌། རྡོ་རྗེ་རིགས་ཀྱི་དཀྱིལ་འཁོར་དུ་རྡོ་རྗེ་ཁྲོ་བོའི་ཁུ་ཚུར་དང་པདྨ་རིགས་ཀྱི་དཀྱིལ་འཁོར་དུ་པདྨ་རིགས་ཀྱི་ཁུ་ཚུར་དང༌། ནོར་བུའི་རིགས་ཀྱི་དཀྱིལ་འཁོར་དུ་རིན་པོ་ཆེའི་ཁུ་ཚུར་དང༌། ཕྱི་རོལ་དུ་རྡོ་རྗེ་རིགས་ཀྱི་དཀྱིལ་འཁོར་དུ་ཕྱི་རོལ་གྱི་རྡོ་རྗེའི་ཁུ་ཚུར་གྱིས་ཆུ་བླངས་ཏེ། རང་དང་གཞན་དག་ལ་དབང་བསྐུར་བར་བྱའོ། །དེ་ཉིད་ཀྱིས་ཆུ་དེ་རང་འཐུངས་པ་དང་གཞན་འཐུང་དུ་བཅུག་ནས་རྣལ་འབྱོར་བ་དང་ཕ་རོལ་པོ་ཡང་དབང་བསྐུར་བར་འགྱུར་རོ། །ཐམས་ཅད་ཅེས་བྱ་བ་ལ་སོགས་པ་ནི་གོ་སླའོ། །སྐྱིལ་མོ་ཀྲུང་གིས་གར་དང་མཆོད་པ་དབུལ་བར་བྱའོ་ཞེས་བྱ་བ་ལ་རྡོ་རྗེ་སེམས་དཔའ་དཀྱིལ་འཁོར་དུ་སེམས་དཔའི་སྐྱིལ་མོ་ཀྲུང་དང༌། དེ་བཞིན་གཤེགས་པ་དང༌། རབ་ཏུ་དགའ་བའི་རྡོ་རྗེ་ཁྲོ་བོའི་རྡོ་རྗེ་དང༌། འཇིག་རྟེན་དབང་ཕྱུག་གི་དཀྱིལ་འཁོར་རྣམས་སུ་རྡོ་རྗེ་སྐྱིལ་མོ་ཀྲུང་གིས་འདུག་སྟེ་མཆོད་པ་དང་གར་དབུལ་བར་བྱ་བ་ཡིན་ནོ། །ནོར་བུའི་རིགས་ཀྱི་དཀྱིལ་འཁོར་དུ་ཡང་མཆོད་པ་དང་གར་དབུལ་བ་ནི་སེམས་དཔའི་སྐྱིལ་མོ་ཀྲུང་ཁོ་ནས་བྱ་བ་ཡིན་ནོ། །དེ་བས་མཆོད་པ་རྣམས་ནི་རྡོ་རྗེ་གར་གྱི་ས་སོ་ཞེས་བྱ་བ་ལ། ཕྱག་རྒྱ་བཅུ་གཉིས་ཀྱིས་མཆོད་པ་ཐམས་ཅད་དུ་རྡོ་རྗེ་གར་གྱིས་བྱ་བ་ཡིན་གྱི་གཞན་གྱིས་ནི་མ་ཡིན་ནོ་ཞེས་བྱ་བའི་ངེས་པ་བསྟན་པ་ཡིན་ནོ། །རྡོ་རྗེའི་གླུ་བླངས་པས་རྡོ་རྗེ་གང་དབུལ་བར་བྱའོ་ཞེས་བྱ་བ་ནི་ཕྱག་རྒྱ་བཅུ་གཉིས་ཀྱིས་མཆོད་པ་དང་གར་དབུལ་བ་ནི། འདོད་ཆགས་ལ་སོགས་བདེ་ཀུན་ཡིད་ཁྱོད་ནི། །ཀུན་བསྡུས་བདག་ལ་བདེ་བ་སྩོལ་མཛོད་ཅིག །རྡོ་རྗེ་སེམས་དགོངས་མྱུར་དུ་བདག་བསྟན་མཛོད། །བདག་དགྱེས་མཛད་དང་བདེ་མཆོག་གྲུབ་ལ་འདུད། །ཅེས་བྱ་བའི་རྡོ་རྗེའི་གླུ་ལེན་ཅིང་བྱ་བ་ཡིན་ནོ། །དེ་ལྟར་ཕྱག་རྒྱ་བཅུ་གཉིས་ཀྱིས་མཆོད་པ་རྣམས་ཀྱི་ཐུན་མོང་གི་ཆོ་ག་བསྟན་ནས། ད་ནི་གསང་བའི་མཆོད་པ་བཞི་པོའི་ཁྱད་པར་གྱི་མཚན་ཉིད་བསྟན་པར་བྱ་བའི་ཕྱིར། རྡོ་རྗེ་གར་གྱི་མཆོད་པ་རྣམས་དབུལ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཁུ་ཚུར་གཉིས་བཅིངས་ནས་སྔར་བཤད་པའི་རྡོ་རྗེའི་གླུ་ལེན་
ཅིང༌། ཇི་སྐད་བཤད་པའི་གར་བྱས་ཏེ་ཀ་པུ་ཊའི་ཐལ་མོ་ཁ་སྦྱོར་སྤྱི་བོར་བཅིངས་ཏེ་དེ་ལས་ཕབ་ལ་རྡོ་རྗེ་ཐལ་མོ་བྱས་ནས་མེ་ཏོག་འབུལ་བའི་ཚུལ་གྱིས་སྒེག་པ་དང་བཅས་པས་སྟེང་དུ་གཏོར་བར་བྱའོ། །དེ་ནས་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་སེམས་དཔའི་ཕྱག་རྒྱ་རྡོ་རྗེ་སྙེམས་མ་བཅིང་པར་བྱའོ། །དེ་ནས་རྡོ་རྗེ་མཚོན་ཆ་མའི་ལས་ཀྱི་ཕྱག་རྒྱ་བཅིང་བར་བྱ་སྟེ། འདི་ནི་རྡོ་རྗེ་ཁུ་ཚུར་གཉིས་ཀྱིས་མདའ་གཞུ་འདྲེན་པའི་ཚུལ་ཅན་ནོ། །འདི་ནི་གསང་བའི་མཆོད་པའི་ཕྱག་རྒྱ་དང་པོ་ཡིན་ནོ། །སླར་ཡང་རྡོ་རྗེ་ཁུ་ཚུར་གཉིས་བཅིངས་ནས་རྡོ་རྗེའི་གླུ་ལེན་ཅིང་གར་བྱས་ཏེ། ཀ་པུ་ཊའི་ཐལ་མོ་ཁ་སྦྱར་བ་བཅིངས་ལ་ཕབ་ནས་རྡོ་རྗེ་ཐལ་མོ་བཅིངས་ལ་སྤོས་འབུལ་བའི་ཚུལ་གྱིས་འོག་ཏུ་བླུགས་པར་བྱའོ། །འདིས་ནི་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ནས་དེ་ཉིད་ཀྱི་སྙིང་པོ་བརྗོད་པར་བྱའོ། །དེ་ནས་རྡོ་རྗེ་ཀཱི་ལི་ཀཱི་ལའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གཉིས་ཀྱིས་བདག་ཉིད་ལ་འཁྱུད་པར་བྱ་སྟེ། འདི་ནི་གསང་བའི་མཆོད་པ་གཉིས་པ་ཡིན་ནོ། །དེ་ནས་དེ་བཞིན་དུ་རྡོ་རྗེ་ཐལ་མོ་བཅིངས་ནས་དེ་ཉིད་སྒེག་པས་མར་མེ་འབུལ་བའི་ཚུལ་གྱིས་མཐེ་བོ་སྦྱར་བ་བསྐོར་བར་བྱ་སྟེ། རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་རྡོ་རྗེ་བྲན་མའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གཉིས་ཀྱིས་རྒྱལ་མཚན་བསྒྲེང་བའི་ཚུལ་དུ་བྱས་ཏེ་འདི་ནི་གསང་བའི་མཆོད་པ་གསུམ་པའོ། །དེ་ནས་དེ་བཞིན་དུ་རྡོ་རྗེ་ཐལ་མོ་བཅིངས་ལ་དེ་ཉིད་སྒེག་པས་སྙིང་གའི་ཕྱོགས་སུ་བཅིངས་ཏེ། དྲི་ཆུས་བྱུག་པའི་ཚུལ་གྱིས་རབ་ཏུ་སྦྱར་ལ། རྡོ་རྗེ་ཐལ་མོ་བཅིངས་ལ་སྤྱི་བོར་གཟུང་བར་བྱའོ། །དེ་ནས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་རྡོ་རྗེ་སྙེམས་མའི་སྙིང་པོ་བརྗོད་ཅིང་རྡོ་རྗེ་ཁུ་ཚུར་གྱིས་སྙིམ་པ་གཉིས་བཅིངས་བར་བྱ་སྟེ། འདི་ནི་གསང་བའི་མཆོད་པའི་ཕྱག་རྒྱ་བཞི་བའོ། །ལྷ་མོ་རྣམས་ཀྱི་ལས་ཀྱི་ཕྱག་རྒྱ་དང༌། གང་ཞིག་མཆོད་པའི་ཕྱག་རྒྱ་དང་དེ་རྣམས་ཀྱི་ཁྱད་པར་གང་ཞིག་ཡིན་ཞེས་བྱ་བའི་རྣམ་པར་རྟོག་པ་འདི་ལ་ཁྱད་པར་བརྗོད་པར་བྱ་སྟེ། རྡོ་རྗེ་མཚོན་ཆ་མ་ལ་སོགས་པའི་སྙིང་པོ་བཟླ་ཞིང་གར་བྱས་ནས་ལས་ཀྱི་ཕྱག་རྒྱ་བཅིང་བར་བྱའོ། །རྡོ་རྗེ་གླུ་ལེན་
ཅིང་གར་བྱས་ནས་མཐར་རྡོ་རྗེ་མཚོན་ཆ་མ་ལ་སོགས་པའི་སྙིང་པོ་བཟླས་ནས་མཆོད་པའི་ཕྱག་རྒྱ་རྣམས་བཅིང་བར་བྱའོ་ཞེས་བྱ་སྟེ། ཁྱད་པར་འདི་ཡིན་ནོ། །གསང་བའི་མཆོད་པ་རྣམས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ལས་བྱུང་བ་ཡིན་ནོ་ཞེས་བྱ་བ་ནི་འདིའི་ཁྱད་པར་གཉིས་པ་ཡིན་ནོ། །དེ་ལྟར་རྡོ་རྗེ་མཚོན་ཆ་མ་ལ་སོགས་པའི་ཁྱད་པར་དུ་བྱས་པའི་རྡོ་རྗེ་མཚོན་ཆ་མ་ལ་སོགས་པའི་གསང་བའི་མཆོད་པ་བཞི་པའོ། །རྡོ་རྗེ་སེམས་དཔའ་ལ་སོགས་པའི་རྣལ་འབྱོར་དང་ལྡན་པའི་བདག་ཉིད་ལ་ཡང་དག་པར་མཆོད་ལ་མཐར་སྒེག་མོ་དགའ་བའི་རྡོ་རྗེ་མ་གསང་བའི་ཕྱག་རྒྱས་ཕྱག་འཚལ་བར་བྱའོ། །སྒེག་མོ་དགའ་བའི་རྡོ་རྗེ་མ་དེ་ཁྱད་པར་ཇི་ལྟ་བུ་ཞིག་ཡིན་ཞེ་ན། བཞད་པ་དང་བཅས་པའི་ཞལ་དང་སྤྱན་གཡོ་བ་གང་ཡིན་པ་དེས་འདུད་པའམ་ཡང་ན་སྤྱི་བོ་བཀུག་པས་ཕྱག་འཚལ་བ་གང་ཡིན་པ་འདིའི་སྒེག་མོ་དགའ་བའི་རྡོ་རྗེ་མའོ། །འདིས་ནི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་ཕྱག་འཚལ་བའི་གླུ་ལེན་ཅིང་ཕྱག་འཚལ་བར་བྱ་བ་ཡིན་ནོ། །ཕྱག་འཚལ་བ་དེས་ཇི་ལྟར་འགྱུར་ཞེ་ན། བཅོམ་ལྡན་འདས་རྡོ་རྗེ་འཆང་དགྱེས་པས་དགའ་བ་ཐམས་ཅད་ལ་སོགས་པའི་བདེ་བ་ཐམས་ཅད་དང་ཡིད་བདེ་བའི་དངོས་གྲུབ་ཐམས་ཅད་སྩོལ་བ་ཡིན་ནོ་ཞེས་བྱ་བ་ལ། དེ་ལ་ཟག་པ་དང་བཅས་པ་དང་ཟག་པ་མེད་པའི་ཡིད་བདེ་བའི་ཁྱད་པར་བ་སྤུ་ལྡང་བའི་རྒྱུར་གྱུར་པ་ནི་དགའ་བ་ཡིན་ནོ། །བདེ་བ་ནི་ལུས་ཀྱི་ཚོར་བ་བདེ་བའོ། །དེ་ལས་གཞན་པ་སེམས་ཀྱི་ཚོར་བ་བདེ་བ་ནི་ཡིད་བདེ་བའོ།། དགའ་བ་ཐམས་ཅད་ལ་སོགས་པའི་བདེ་བ་དང་ཡིད་བདེ་བ་གང་ལ་ཐོག་མར་ཡོད་པ་དེ་ནི། དགའ་བ་ཐམས་ཅད་ལ་སོགས་པའི་བདེ་བ་ཐམས་ཅད་དང་ཡིད་བདེ་བ་རྣམས་སོ། །དེ་དག་གི་དངོས་གྲུབ་ནི་ཡོངས་སུ་རྫོགས་པ་སྟེ་དངོས་གྲུབ་དེ་རྣམས་སྒེག་མོ་དགའ་བའི་རྡོ་རྗེ་མས་རྡོ་རྗེ་འཆང་ཆེན་པོ་ལ་ཕྱག་འཚལ་ནས་སྒྲུབ་པ་པོ་ལ་སྩོལ་བ་ཡིན་ནོ། །རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ་དཀྱིལ་འཁོར་བྲིས་ནས་རང་དང་གཞན་གྱི་ཆོ་ག་ཐམས་ཅད་ཡོངས་སུ་རྫོགས་པར་བྱས་ལ། སྔོན་དུ་བསྙེན་པའི་དུས་སམ་བསྒྲུབ་པའི་དུས་སུ་བཟླས་པ་དང་བསྒོམ་
པས། སློབ་དཔོན་ནམ་སློབ་མ་སྐྱོ་བར་གྱུར་པས་ལྷ་གཤེགས་སུ་གསོལ་འདོད་ན། དེའི་ཚེ་རྡོ་རྗེ་བསྡམས་པ་བཅིངས་ནས་རང་གི་ལྷའི་སྙིང་པོ་བཟླ་ཞིང་རང་གི་སྙིང་གའི་ཕྱོགས་སུ་བདེ་བར་བཅིངས་ལ་བཛྲ་མུཿ་ཞེས་བྱ་བ་འདིས་དགྲོལ་བར་བྱའོ། །ཕྱག་རྒྱ་ཐམས་ཅད་རང་རང་གི་གནས་སུ་དགྲོལ་བར་བསམས་ན། དེ་ལྟར་དཀྱིལ་འཁོར་གྱི་ཕྱག་རྒྱ་ཐམས་ཅད་དཀྲོལ་བར་འགྱུར་རོ། །སྔོན་དུ་བསྙེན་པ་ལ་སོགས་པའི་དུས་སུ་ཡང་རྣལ་འབྱོར་བ་རྣམས་ཀྱིས་རང་གི་ལྷའི་ཕྱག་རྒྱ་ཐམས་ཅད་ཀྱང་དཀྲོལ་བར་འགྱུར་རོ། །རྡོ་རྗེ་སེམས་དཔའི་བསྒོམ་པས་ཞེས་བྱ་བ་ལ་སོགས་པ་ལ། བཛྲ་བཛྲ་ཞེས་བརྗོད་ཅིང་བདག་ཉིད་རྡོ་རྗེ་སེམས་དཔའ་བསྒོམས་ལ་རྡུལ་ཚོན་གྱི་རེ་ཁཱ་དང༌། ཐིག་སྐུད་ཀྱི་རེ་ཁཱ་དང༌། རྡོ་རྗེ་དང་རིགས་ཐམས་ཅད་ཕྱག་མཚན་ཡིད་ཀྱིས་གྱེན་དུ་བཏེག་ལ། རྡོ་རྗེ་ཤུགས་ཀྱིས་དཀྱིལ་འཁོར་གྱི་ནང་དུ་འཇུག་པའམ། ཕྱིར་འབྱུང་བར་བྱས་ནས་རྣལ་འབྱོར་པའི་དམ་ཚིག་ཉམས་པར་མི་འགྱུར་རོ། །དེ་བཞིན་དུ་རྡོ་རྗེ་སེམས་དཔའ་བསྒོམ་པས་དཀྱིལ་འཁོར་ཕྱག་ན་དམ་ཚིག་ཉམས་པར་མི་འགྱུར་རོ་ཞེས་བྱ་བ་ལ་སྔར་བཤད་པའི་ཚུལ་གྱིས་དཀྱིལ་འཁོར་བྲིས་ནས། ཆོ་ག་ཐམས་ཅད་རྗེས་སུ་སྤྱད་ལ་ཕྱག་རྒྱ་བཀྲོལ་བར་བྱས་ནས་ལྷ་ཐམས་ཅད་གཤེགས་སུ་གསོལ་བར་བྱའོ། །དེ་ནས་སྤྲུལ་པའི་དཀྱིལ་འཁོར་རང་གི་ལུས་ལ་བཅུག་སྟེ། ཁ་དོག་དང་དབྱིབས་ཀྱི་བདག་ཉིད་ཅན་གྱི་ར་བ་ལ་སོགས་པ་ཇི་ལྟར་བྲིས་པ་རྡོ་རྗེ་སེམས་དཔའི་སྙིང་པོ་བརྗོད་ཅིང་ཆགས་ན་དམ་ཚིག་ཉམས་པར་མི་འགྱུར་རོ། །དེ་ནས་ལས་ཀྱི་ཕྱག་རྒྱའི་རྒྱུད་ཅེས་བྱ་བ་ལ་དེ་ནས་ཀྱི་སྒྲ་ནི་སྐབས་ལ་བབ་པའོ། །ལས་སྒྲུབ་པར་བྱེད་པའི་ཕྱག་རྒྱ་ནི་ལས་ཀྱི་ཕྱག་རྒྱ་སྟེ་དེ་རྣམས་སྟོན་པར་བྱེད་པའི་སྒྲའི་ཚོགས་ནི་རྒྱུད་དེ། དེ་འདི་ལྟར་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །དེ་ཇི་ལྟར་ཡིན་ཞེ་ན། བདེ་བ་ཆེན་པོའི་རྡོ་རྗེ་ཞེས་བྱ་བ་ལ་སོགས་པ་ལ། དང་པོའི་རྡོ་རྗེ་ནི་བདེ་བ་ཆེན་པོའི་རྡོ་རྗེ་སྟེ་དེ་བཅིངས་ལ་སྤྱི་བོར་འཛིན་ན་བདག་ཉིད་བསྲུང་བར་འགྱུར་རོ། །དཔྲལ་བར་འཛིན་ན་གཞན་བསྲུང་བར་འགྱུར་རོ། །སྙིང་གའི་ཕྱོགས་སུ་ཕབ་ནས་བཞག་ན་ཕྱོགས་ཐམས་ཅད་དུ་འབར་བའི་རྣམ་པ་ཅན་གྱི་བྱེད་
པ་དང་ལྡན་པའི་རྡོ་རྗེ་འབར་བ་འབྱུང་བ་ཡིན་ནོ། །རྡོ་རྗེ་ཁྲོ་བའི་རྒྱལ་པོ་རྣམས་ཀྱིས་ཀྱང་འཇུག་པར་མི་ནུས་སོ་ཞེས་བྱ་བར་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །འདིས་ནི་ཕྱོགས་དང་མཚམས་ཐམས་ཅད་དང་དཀྱིལ་འཁོར་བཅིངས་པར་འགྱུར་རོ། །སྙིང་གར་བསྒོམ་པ་རྡོ་རྗེ་དང་བཅས་པའོ་ཞེས་བྱ་བ་ལ། དེ་ཉིད་སྙིང་གའི་ཕྱོགས་སུ་བཞག་ལ་རང་རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསྒོམ་བར་བྱས་ན་བདུད་ཐམས་ཅད་ཀྱི་སྟོབས་འཇོམས་པར་འགྱུར་རོ། །གྱེན་དུ་ཁ་བལྟ་བ་བཏུང་བར་བྱའོ་ཞེས་བྱ་བ་ནི་དེ་ཉིད་བཅིངས་ནས་དེའི་དབུས་མའི་རྡོ་རྗེའི་སྟེང་དུ་ཁ་བལྟས་པར་བཞག་ནས་འཐུངས་ན་ཚེ་འཕེལ་བར་འགྱུར་རོ། །རང་གི་གདོང་ཡོངས་སུ་སྦྱངས་ནས་གདོང་པར་དགྲོལ་བར་བྱའོ་ཞེས་བྱ་བ་ལ་དང་པོའི་རྡོ་རྗེས་རང་གི་གདོང་བ་ཡོངས་སུ་སྦྱངས་ནས་དེ་ཉིད་རང་གི་གདོང་པ་ཡོངས་སུ་བཀྲོལ་བར་བྱས་ནས། གཟུགས་ཕུན་སུམ་ཚོགས་པ་ཆེན་པོ་དང་ལྡན་པར་འགྱུར་རོ། །དབུས་མ་རྡོ་རྗེ་ལྡེག་པར་ཡང་བྱའོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེ་ལྡེག་བར་བྱས་ནས་གཟི་བརྗིད་འཕེལ་བར་འགྱུར་རོ། །དཔུང་མགོ་གཉིས་སུ་བཞག་ཅིང་སྙིང་གར་གཞག་པར་བྱའོ་ཞེས་བྱ་བ་ལ། དང་པོའི་རྡོ་རྗེ་དཔུང་མགོ་གཉིས་ལ་བཞག་ནས། སྙིང་གའི་ཕྱོགས་སུ་གཟུགས་ན་མདངས་དང་སྟོབས་འཕེལ་བར་འགྱུར་རོ། །རབ་ཏུ་དགའ་བའི་རྡོ་རྗེ་མདའ་ལྔ་བསྡུས་པའི་མཛུབ་མོ་གཉིས་ཀྱི་ལྕགས་ཀྱུ་ གང་ཡིན་པ་དེས། ཅོད་པན་དང་དར་དཔྱངས་བཅིངས་པའི་དབང་བསྐུར་བ་མཐོང་བའི་ཚུལ་བྱས ་ནས། དབང་བསྐུར་བ་ཐམས་ཅད་ཐོབ་པར་འགྱུར་རོ། །སྐྱེ་གནས་ལས་དོང་ཚེ་འབྱིན་པའོ་ཞེས་བྱ་བ་ནི། རབ་ཏུ་དགའ་བའི་རྡོ་རྗེས་རང་གི་རྟགས་ལས་དོང་ཚེ་འབྱིན་པའི་ཚུལ་བསྟན་ན། ནོར་རྙེད་པར་འགྱུར་རོ། །སྤྱི་བོར་གཞག་པར་བྱ་བ་ལ་རབ་ཏུ་དགའ་བའི་རྡོ་རྗེ་སྤྱི་བོར་བཟུང་ན་རྒྱལ་སྲིད་རྙེད་པར་འགྱུར་རོ། །ས་ལ་རེག་པར་བྱ་ཞེས་བྱ་ཞེས་བ་ལ་རབ་ཏུ་དགའ་བའི་རྡོ་རྗེས་ས་ལ་རེག་ན་ཐོབ་བར་འགྱུར་རོ། །རབ་ཏུ་དགའ་བའི་རྡོ་རྗེས་རྟགས་ཀྱི་ལས་སོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་བཅིངས་ཏེ། དེས་ཐམས་ཅད་
དབབ་པ་ལ་སོགས་པའི་རང་གི་རྟགས་ལ་རེག་པས་ལས་རྣམས་འབྱུང་བར་འགྱུར་རོ། །དེ་ཇི་ལྟར་ཞེ་ན། ལྕགས་ཀྱུ་ཞེས་བྱ་བ་ལ་རབ་ཏུ་དགའ་བའི་རྡོ་རྗེའི་མཛུབ་མོ་གཉིས་ཀྱི་ལྕགས་ཀྱུས་རང་གི་རྟགས་ལ་འདྲེན་པས་ཐམས་ཅད་དབབ་པ་དང༌། ས་གཡོ་བ་དང༌། གར་བྱེད་དུ་བཅུག་པ་དང༌། དུས་གསུམ་གྱི་བདེན་པ་སྨྲར་འཇུག་པར་འགྱུར་རོ། །རྩེ་མོ་གཏོད་པ་ཞེས་བྱ་བ་ལ་རབ་ཏུ་དགའ་བའི་རྡོ་རྗེའི་མཛུབ་མོ་གཉིས་ཀྱི་ལྕགས་ཀྱུས་རང་གི་རྟགས་ཀྱི་རྩེ་མོ་གཏོད་པར་བྱས་ན། པྲ་དབབ་པ་ཐམས་ཅད་འགྲུབ་པར་འགྱུར་རོ། །སྐྱེ་གནས་བཀྲོལ་བའོ་ཞེས་བྱ་བ་ནི་རང་གི་རྟགས་ཏེ་རང་གི་སྐྱེ་གནས་དེ་ལ་རབ་ཏུ་དགའ་བའི་རྡོ་རྗེ་རེག་པའི་ཚུལ་གྱིས་བཀྲོལ་བར་བྱས་ནས། གདོན་ཐམས་ཅད་ལས་གྲོལ་བར་འགྱུར་རོ། །ལག་པ་གཡོན་པའི་མཐིལ་ཉེད་ཅིང་བསྣུན་པར་བྱའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེས་རང་གི་རྟགས་ལ་རེག་ཅིང་ལག་པ་གཡོན་པའི་མཐིལ་གཡས་པའི་མཐེ་བོས་མཉེ་ཞིང་བསྣུན་ན་གདུག་པ་ཐམས་ཅད་འཇིག་པར་འགྱུར་རོ། །བཙིར་བར་བྱའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེས་རང་གི་རྟགས་བཙིར་ན་ཐམས་ཅད་རེངས་པར་འགྱུར་རོ། །མིག་བཙུམ་པར་བྱའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེས་རང་གི་རྟགས་ལ་རེག་ཅིང་མིག་བཙུམས་པར་བྱས་ན་ཐམས་ཅད་གཉིད་ལོག་ཏུ་བཅུག་པར་འགྱུར་རོ། །བསྐོར་ཞིང་བཙིར་ནས་རྡོ་རྗེ་ཁྲོ་བོའི་ལྟ་བས་བལྟ་བར་བྱའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེས་རང་གི་རྟགས་ལ་རེག་ཅིང་དེ་ལྟར་གཏོད་པར་བྱས་ནས་བཙིར་ཏེ། རབ་ཏུ་གཙིགས་ཤིང་ཁྲོ་གཉེར་བསྡུས་པའི་ཁྲོ་བོའི་མིག་གི་ལྟ་བས་བསྒྲུབ་བྱ་ལ་བལྟས་ན་ཐམས་ཅད་ལ་རྒྱས་བཏབ་པར་འགྱུར་རོ། །ཡོངས་སུ་བསྐོར་ནས་ཁའི་མཐར་མཆེ་བ་བསྟན་པའི་ཞེས་བྱ་བ་ལ། རབ་ཏུ་དགའ་བའི་རྡོ་རྗེས་རང་གི་རྟགས་ལ་རེག་ནས་བསྐོར་ཏེ་ཁའི་མཐའ་གཉིས་སུ་མཆེ་བ་སྟོན་པའི་ཚུལ་གྱིས་གཟུང་ན་ཐམས་ཅད་གསོད་པར་འགྱུར་རོ། །གཡས་པའི་མཛུབ་མོས་སྡིགས་མཛུབ་བྱའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེས་རང་གི་རྟགས་ལ་རེག་ཅིང་གཡས་པའི་མཛུབ་མོས་བསྒྲུབ་བྱ་ལ་སྡིགས་
མཛུབ་བྱས་ན་ཐམས་ཅད་ལྟུང་བར་འགྱུར་རོ། །མཛུབ་མོས་ས་ལས་ལྡང་བར་བྱའོ་ཞེས་བྱ་ལ་རབ་ཏུ་དགའ་བའི་རྡོ་རྗེ་བཅིངས་ནས། དེ་ཡིས་རང་གི་རྟགས་ལ་རེག་ཅིང་གཡས་པའི་མཛུབ་མོས་བསླང་བར་བྱས་ལ་དེས་བསྒྲུབ་བྱ་ལས་བསླང་བ་བྱས་ན་ཐམས་ཅད་བསླང་བར་འགྱུར་རོ། །མཐེ་བོང་མཐེ་བོ་བཅིང་བར་བྱའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་དེ་ཡིས་རང་གི་རྟགས་ལ་རེག་ཅིང་མཐེ་བོ་བཅིང་བར་བྱས་ན་ཐམས་ཅད་འཆིང་བར་འགྱུར་རོ། །ཡི་གེ་མུཿ་ཡིས་ཕྱག་རྒྱ་བཀྲོལ་བའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས། དེ་ཡིས་རང་གི་རྟགས་ལ་བཞག་སྟེ། ཨོཾ་མ་ཧཱ་སུ་ཁ་བཛྲ་སཏྭ་ཛཿ་ཧཱུཾ་བཾ་ཧོཿ། སུ་ར་ཏེ་སྟྭཾ་མུཿ་ཞེས་བྱ་བ་བརྗོད་ཅིང་ཐམས་ཅད་དགྲོལ་བའི་བསམ་པས་རང་གི་རྟགས་བཀྲོལ་བར་བྱས་ན་དེ་ལྟར་ཐམས་ཅད་དགྲོལ་བར་འགྱུར་རོ། །དང་པོའི་རྡོ་རྗེ་མཐེའུ་ཆུང་གི་རྡོ་རྗེས་བསྣུན་པར་བྱའོ་ཞེས་བྱ་བ་ལ། དང་པོའི་རྡོ་རྗེའི་མཐེའུ་ཆུང་གཉིས་ཀྱི་རྩེ་མོས་བསྒྲུབ་བྱ་ལ་བརྡེག་པར་བྱས་ན་དེ་ལྟར་ན་ཕྲ་མེན་མ་ཐམས་ཅད་ལས་གྲོལ་བར་འགྱུར་རོ། །དེ་ཉིད་རྣམ་པར་འགྱུར་པའི་གདོང་པས་སོ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས། གདོང་པ་རྣམས་བསྒྱུར་བར་སྦྱར་བར་བྱ་སྟེ་དེ་ལྟར་ན་མ་མོ་དང་གདོན་ཐམས་ཅད་ལས་གྲོལ་བར་འགྱུར་རོ། །དེ་ཉིད་ཡོངས་སུ་བསྐོར་ནས་དབྲལ་བར་གྱེན་དུ་ཁ་ལྟ་བར་གནས་པར་ཞེས་བྱ་བ་ལ་དང་པོའི་རྡོ་རྗེ་བཅིངས་ཏེ། ཡོངས་སུ་བསྐོར་ནས་དབྲལ་བའི་ཕྱོགས་སུ་མཐེ་བོང་གི་རྩེ་མོ་གཉིས་ཀྱིས་རྡོ་རྗེ་ཧེ་རུ་ཀའི་ཕྱག་རྒྱ་བཅིངས་ཏེ་བཞག་ན། དེ་ལྟར་མཁའ་འགྲོ་མ་ཐམས་ཅད་ཀྱིས་རྒྱས་བཏབ་པ་ལས་གྲོལ་བ་དང་རེངས་པར་འགྱུར་རོ། །དེ་ཉིད་ཀྱིས་ནམ་མཁའ་ལ་བརྡེག་པའོ་ཞེས་བྱ་བ་ལ་དང་པོའི་རྡོ་རྗེ་ཉིད་ཀྱིས་གདུག་པ་ཐམས་ཅད་ཀྱི་ཕྱག་རྒྱ་གཞིག་བའི་བསམ་པས་ནམ་མཁའ་བརྡེག་པའི་ཚུལ་བྱས་ཏེ། དེ་ལྟར་ན་གདུག་པ་ཐམས་ཅད་ཀྱི་ཕྱག་རྒྱ་འཇིག་པར་འགྱུར་རོ། །གཡོ་ཞིང་བཙུམས་པའི་མིག་གཉིས་ཀྱིས། །ཕྱག་རྒྱ་བཅིངས་པ་བཀྲོལ་བའོ། །ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་དེ་ནས་རིམས་ཀྱིས་
བཏབ་པའི་སྤྱི་བོ་ནས་བརྩམས་ཏེ། བྱབ་པར་བྱ་སྟེ་གཡོ་ཞིང་བཙུམས་པའི་མིག་གིས་དེ་ཉིད་བཀྲོལ་བར་བྱས་ན། དེ་ལྟར་ན་རིམས་ཐམས་ཅད་ཞི་བར་འགྱུར་རོ། །མཐེ་ཆུང་གི་ནོར་བུས་རེག་པར་བྱ་ཞེས་བྱ་བ་ལ། དང་པོའི་རྡོ་རྗེ་མཐེ་ཆུང་གཉིས་རྡོ་རྗེ་རིན་པོ་ཆེར་བྱས་ན་དེས་དུག་ལ་སོགས་པ་ཐམས་ཅད་འཇིག་པར་འགྱུར་རོ། །མཛུབ་མོ་མཉམ་པོས་ཞབས་ཀྱི་སོར་མོ་བརྗེ་བར་བྱ་སྟེ། བཟའ་བའམ་ཡིད་ཀྱིས་གཞག་པར་བྱའོ་ཞེས་བྱ་བ་ལ། དང་པོའི་རྡོ་རྗེ་མཛུབ་མོ་གཉིས་ཡང་དག་པར་སྦྱར་ཞིང་རྩེ་མོར་བྱས་ལ་དེ་ཉིད་དཔལ་རྡོ་རྗེ་སེམས་དཔའི་ཞབས་ཀྱི་སོར་མོའི་རང་བཞིན་ཅན་དུ་བསམ་པར་བྱ་སྟེ། དེ་ལྟར་མཛུབ་མོ་མཉམ་པ་དང་ཞབས་ཀྱི་སོར་མོ་བརྗེ་བར་བྱས་པར་འགྱུར་ཏེ། དེ་ལྟར་ཞབས་ཀྱི་སོར་མོ་བརྗེ་བར་བྱས་ནས་ཕྱག་རྒྱ་དེ་ཉིད་དུག་གི་སྟེང་དུ་བཞག་སྟེ་བདུད་རྩིར་བྱས་ནས་བཟའ་བར་བྱའོ། །ཡང་ན་ཡིད་ཀྱིས་ཇི་ལྟར་མངོན་པར་འདོད་པའི་གནས་སུ་གཞག་པར་བྱ་སྟེ་དེ་ལྟར་ན་དུག་ཐམས་ཅད་བདུད་རྩིར་བྱས་པར་འགྱུར་རོ། །མཛུབ་མོས་སྦྱིན་སྲེག་བྱེད་པ་ཞེས་བྱ་བ་ནི་དང་པོའི་རྡོ་རྗེ་བཅིངས་ཏེ་མཛུབ་མོ་གཉིས་ཀྱིས་ཁ་ལ་སྦྱིན་སྲེག་གི་ཚུལ་དུ་བྱས་ན་གཤེགས་བྱེད་དང༌། བྱུར་དང། རོ་ལངས་དང༌། དཔལ་དང་མི་ལྡན་པ་འཇིག་པར་འགྱུར་རོ། །རབ་ཏུ་དགའ་བའི་རྡོ་རྗེ་ནི། མདའ་ལྔ་བསྡུས་པའི་མཛུབ་མོ་གཉིས་ཀྱི་ལྕགས་ཀྱུ་སྟེ་དེ་གཉིས་གདོང་དུ་བཀྲོལ་བར་བྱས་ནས། འཐབ་མོ་དང་འཐབ་པ་དང་རྩོད་པ་དང་འགྱེད་བ་ཐམས་ཅད་འཇིག་པར་འགྱུར་རོ། །སྦྱིན་སྲེག་བྱེད་པ་ཞེས་བྱ་བ་ནི་རབ་ཏུ་དགའ་བའི་རྡོ་རྗེ་བཅིངས་ནས་སྦྱིན་སྲེག་གི་ཚུལ་དུ་བྱས་ན་ཡམས་དང་བྱུར་དང་སྡིག་པ་དང༌། རྨི་ལམ་ངན་པ་ཐམས་ཅད་འཇིག་པར་འགྱུར་རོ། །མཐེ་ཆུང་གཉིས་སྐྱེ་གནས་སུ་བྱས་ལ་སྦྱར་ཏེ། ཕྱག་རྒྱ་དྲལ་བར་བྱའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་བཅིངས་ཏེ། དེའི་མཐེ་ཆུང་གཉིས་རང་གི་རྟགས་ལ་བཞག་ནས་ཕྱག་རྒྱ་བཅིངས་པ་དྲལ་བར་བྱས་ན། ཕ་རོལ་གྱི་དཔུང་ཐམས་ཅད་རེངས་པ་དང༌། གཉིད་ལོག་པར་བྱ་བ་དང༌། རྨོངས་པ་དང་འཇིག་པ་དང༌། རྒྱས་བཏབ་པ་དང༌། གསོད་པར་འགྱུར་རོ། །སྲིན་
ལག་ཐ་མ་མཉམ་པར་སྦྱར་ཏེ་སོ་སོར་བ་དན་གྱི་ཚུལ་དུ་བསྒྲེང་བར་བྱའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་བཅིངས་ནས་སྲིན་ལག་གཉིས་དང༌། མཐེའུ་ཆུང་གཉིས་བརྐྱང་ནས་སོ་སོར་སྦྱར་ཏེ་རྩེ་མོ་གཉིས་བྱས་ནས་གྱེན་དུ་གཏོད་ཅིང་གཟུང་ན་འཐབ་མོ་ཐམས། ཅད་ལས་རྒྱལ་བ་ཐོབ་པར་འགྱུར་རོ། །རྡོ་རྗེ་བསྡམས་པ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ཏེ། དེས་ལས་རྣམས་བྱ་བ་ཡིན་ནོ། །ཇི་ལྟར་ཞེ་ན། ལེགས་པར་བྱེད་པ་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་བཅིངས་ནས་མཛུབ་མོ་དང་མཐེ་བོ་དག་གིས་ལེགས་པ་སྦྱིན་པའི་ཚུལ་དུ་བྱས་ན་སྡིག་པ་ཐམས་ཅད་འཇིག་པར་འགྱུར་རོ། །མཛུབ་མོ་དང་མཐེ་བོ་མཉམ་པོར་ཕྱེ་བ་དགུག་པ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་དང་མཐེ་བོང་གཉིས་མཉམ་པར་བྱས་ནས་ཅུང་ཟད་ཁ་ཕྱེ་བ་དང༌། ཅུང་ཟད་བཀུག་པ་བྱས་ཏེ་མཐེ་བོ་ལྟར་ཁར་གཟུང་བ་བྱས་ནས་འདིས་བགེགས་ཐམས་ཅད་རྣམ་པར་འཇིག་པར་འགྱུར་རོ། །བསྐོར་ནས་དྲལ་བར་བྱའོ་ཞེས་བྱ་བ་ནེ་རྡོ་རྗེ་བསྡམས་པ་བཅིངས་ནས་བསྐོར་ཏེ་དྲལ་བར་བྱས་ན་དགྲ་ཐམས་ཅད་རྣམ་པར་འཇོམས་པར་འགྱུར་རོ། །རྡོ་རྗེ་བསྡམས་པ་ནང་དུ་བརྐྱང་བའི་མཐིལ་གྱིས་ས་ལ་རེག་པ་ཞེས་བྱ་བ་ནི་རྡོ་རྗེ་བསྡམས་པ་བཅིངས་ཏེ། བརྐྱངས་ནས་རྡོ་རྗེ་བསྡམས་པ་བརྐྱང་བའི་མཐིལ་དེས་སའི་སྟེང་དུ་རེག་པར་བྱས་ན་བདུད་ཀྱི་དཔུང་ཐམས་ཅད་འཇིག་པར་འགྱུར་རོ། །དང་པོའི་རྡོ་རྗེ་སྤྲིན་བསྐྱེད་པ། །ཞེས་བྱ་བ་ནི་དང་པོའི་རྡོ་རྗེ་བཅིངས་ནས་སྤྲིན་བསྐྱེད་པའི་ཚུལ་དུ་བྱས་ན་འདིས་སྤྲིན་བསྐྱེད་པར་འགྱུར་རོ། །མཛུབ་མོས་ཆར་བསྐྱེད་པ་ཞེས་བྱ་བ་ནི་སྔར་བཤད་པའི་ཚུལ་གྱིས་སྤྲིན་བསྐྱེད་པར་བྱས་ནས། དེ་མ་ཐག་ཏུ་དང་པོའི་རྡོ་རྗེས་བཅིངས་ཏེ་མཛུབ་མོ་གཉིས་ཀྱི་རྩེ་མོ་སྦྱར་བ་བྱས་ནས་རྩེ་མོ་དེས་ཆར་གྱི་རྒྱུན་འབབ་པའི་ཚུལ་བྱས་ན་ཆར་འབབ་པར་འགྱུར་རོ། །མཛུབ་མོ་བཟློག་པར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ནས་མཛུབ་མོ་གཉིས་སྦྱར་བའི་རྩེ་མོ་དེས་བཟློག་པར་བྱས་ན་ཐོག་དང་གློག་དང་ཆར་རྣམས་ཞི་བར་འགྱུར་རོ། །རྡོ་རྗེ་བལྟ་བས་འཕྲོག་པར་བྱའོ་ཞེས་བྱ་བ་ལ་དང་
པོའི་རྡོ་རྗེ་བཅིངས་ནས་མཛུབ་མོ་གཉིས་སྦྱར་བའི་རྩེ་མོ་བྱས་ཏེ། རྡོ་རྗེ་བལྟ་བའི་ཕྱག་རྒྱ་དང་བཅས་པའི་རྩེ་མོ་དེས་སྤྲིན་དང་མུན་པ་དང་ཁུག་རྣ་རྣམས་བསལ་བར་བྱས་ཏེ། དེ་ལྟར་དེ་རྣམས་བཟློག་པར་འགྱུར་རོ། །རབ་ཏུ་དགའ་བའི་རྡོ་རྗེ་བཤད་པའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་མཛུབ་མོ་གཉིས་ཀྱི་ལྕགས་ཀྱུས་ཀླུ་ཐམས་ཅད་འགུགས་པའོ། །མཛུབ་མོ་གཅིག་ནི་ནོར་བུའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་གཡས་པའི་མཛུབ་མོའི་སྟེང་དུ་བསྐུལ་བའི་སྦྱོར་བས་ནོར་བུ་བྱས་ན་ཀླུ་ཐམས་ཅད་དབང་དུ་བྱ་བ་ཡིན་ནོ། །མཐེའུ་ཆུང་གི་རྡོ་རྗེས་སྡིགས་མཛུབ་ཅེས་བྱ་བ་ལ་རབ་ཏུ་དགའ་བའི་རྡོ་རྗེས་མཐེའུ་ཆུང་གཉིས་ཡང་དག་པར་སྦྱར་བའི་རྩེ་མོ་སྡིགས་མཛུབ་ཀྱི་ཚུལ་དུ་བཞག་ན་འདིས་གླུ་ཐམས་ཅད་བྲན་དུ་བྱེད་པར་འགྱུར་བ་ཡིན་ནོ། །མཛུབ་མོས་སའི་འོག་ནས་ཆུ་མིག་བཀུག་པ་སྟོན་པའོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་བཅིངས་ནས་མཛུབ་མོ་གཉིས་ཀྱི་ལྕགས་ཀྱུས་ཆུ་མིག་དང་བཅས་པའི་ཀླུ་དགུག་པ་བྱས་ནས་ཀླུ་ཐམས་ཅད་གདོན་པར་གྲུབ་པ་ཡིན་ནོ། །བདེ་བ་ཆེན་པོའི་རྡོ་རྗེས་ས་ལ་གཟུང་ནས་གཡོ་བར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་དེས་ས་ལ་བཟུང་ནས་གཡོ་བ་བྱས་ནས་མ་ལུས་པ་གཡོ་བར་བྱེད་པའོ། །མཛུབ་མོ་གཉིས་ཀྱིས་གདེངས་ཀའི་ཚུལ་བསྟན་པའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས་མཛུབ་མོ་གཉིས་ཀྱི་ལྟོ་འཕྱེའི་གཟུགས་ཀྱི་ཚུལ་དུ་བྱས་ན་འདིས་ཆུ་མེད་པའི་ཡུལ་དུ་ཆུའི་ཕུང་པོ་འབྱུང་བར་འགྱུར་རོ། །རྩེ་མོ་བཞིའི་འོད་ཟེར་གྱིས་མེ་སྟག་བསྟན་པའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ནས་མཐའ་མ་གཉིས་དང་བཞིའི་རྩེ་མོས་ཉི་མའི་འོད་འབར་བའི་ཚུལ་དུ་བྱས་ན་འདིས་མུན་པར་ཉི་མའི་སྣང་བ་བསྐྱེད་པར་འགྱུར་རོ། །མཛུབ་མོས་རླུང་བསྐྱོད་པའོ་ཞེས་བྱ་བ་ནི་དང་པོའི་རྡོ་རྗེ་བཅིངས་ནས་མཛུབ་མོ་གཉིས་ཡང་དག་པར་སྦྱར་ནས། རྩེ་མོར་བྱས་ནས་རྩེ་མོ་དེས་རླུང་བསྐྱེད་པའི་ཚུལ་དུ་བྱས་ན་རླུང་ཐམས་ཅད་དབང་དུ་བྱ་བ་ཡིན་ནོ། །རབ་ཏུ་དགའ་བའི་རྡོ་རྗེ་ཞེས་བྱ་བ་ནི་ཇི་ལྟར་བཤད་པའི་མཚན་ཉིད་ཅན་གྱི་རབ་ཏུ་དགའ་བའི་རྡོ་རྗེས་གཟུགས་ཐམས་ཅད་མཐོང་བ་ལ་
སོགས་པའི་ལས་རྣམས་སྒྲུབ་པར་བྱེད་དོ། །ཇི་ལྟར་ཞེ་ན། མཛུབ་མོ་ཞེས་བྱ་བ་ལ་སོགས་པ་ལ་རབ་ཏུ་དགའ་བའི་རྡོ་རྗེ་བཅིངས་ནས། མཛུབ་མོ་གཉིས་ཀྱི་རྩེ་མོ་མེ་ལོང་གི་དཀྱིལ་འཁོར་ལ་བ་ལྟ་བའི་ཚུལ་གྱིས་གཟུང་བར་བྱས་ན། འདིས་ནམ་མཁའ་ལ་གཟུགས་ཐམས་ཅད་མཐོང་བར་བྱེད་དོ། །རོ་ལངས་ཞེས་བྱ་བ་ནི་དངོས་པོ་ཐམས་ཅད་བསྒྲུབ་པའོ། །འདིས་ནི་འདི་སྐད་སྟོན་པར་འགྱུར་ཏེ། རབ་ཏུ་དགའ་བའི་རྡོ་རྗེ་བཅིངས་ནས་དེའི་མཛུབ་མོ་གཉིས་ཀྱི་ལྕགས་ཀྱུས་ནམ་མཁའ་ལ་དངོས་པོ་ཐམས་ཅད་བསྒྲུབ་པའི་ཚུལ་དུ་བྱས་ནས་དངོས་པོ་ཐམས་ཅད་འབྱུང་བ་ཡིན་ནོ། །ནམ་མཁའ་ལ་རྡོ་རྗེའི་ལྟ་བས་སོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེས་ནམ་མཁའ་རྡོ་རྗེ་བཅིངས་ནས་ནམ་མཁའ་ལ་རྡོ་རྗེའི་ལྟ་བས་བལྟ་ཞིང་དེ་ཉིད་ནམ་མཁའ་ལ་རང་གི་བདག་ཉིད་ཀྱིས་དངོས་པོ་བལྟ་བའི་ཚུལ་གྱིས་བཟུང་ན་ནམ་མཁར་རང་གི་བདག་ཉིད་ཀྱི་དངོས་པོ་མཐོང་བ་ཡིན་ནོ། །སྟེང་དུ་བསྐོར་བར་བྱའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་ཤིན་ཏུ་བསྐོར་བར་བྱས་ན་ནམ་མཁར་དེ་བཞིན་གཤེགས་པ་ཐམས་ཅད་དང༌། བྱང་ཆུབ་སེམས་དཔའ་ལ་སོགས་པ་ཐམས་ཅད་མཐོང་བར་འགྱུར་རོ། །རྡོ་རྗེ་མདའ་ཞེས་བྱ་བ་ལ། བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱས་མེ་ཏོག་ལ་སོགས་པ་བསྐྱེད་པར་འགྱུར་རོ། །ཇི་ལྟར་ཞེ་ན། ཤིང་དྲུང་དང༌། ནགས་ཚལ་དང༌། སྐྱེད་མོས་ཚལ་ཐམས་ཅད་དང༌། འབྲུ་རྣམས་ལ་གཞག་པར་བྱའོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ནས་ཤིང་དྲུང་དང༌། ནགས་ཚལ་དང༌། སྐྱེད་མོས་ཚལ་ཐམས་ཅད་དང་འབྲུ་རྣམས་ལ་ནམ་མཁར་མེ་ཏོག་དང༌། ལོ་མ་འབྲས་བུ་བསྐྱེད་པའི་བསམ་པས་གཞག་པར་བྱས་ན་ནམ་མཁའ་ལ་མེ་ཏོག་དང་ལོ་མ་དང་འབྲས་བུ་ཐམས་ཅད་སྐྱེ་བར་འགྱུར་རོ། །རྣོན་པོས་ས་རློག་པར་བྱའོ་ཞེས་བྱ་བ་ལ། བཅོམ་ལྡན་འདས་རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་བཅིངས་ནས་ལྕགས་རྣོ་བ་དང་ལྡན་པའི་གཤོལ་ལ་བྱིན་གྱིས་བརླབས་
པར་བྱས་ན་ཕྱག་རྒྱ་དེ་ཉིད་དང་གཤོལ་དེས་ས་རློག་ན་ཐམས་ཅད་སྨིན་པ་འབྱུང་བར་འགྱུར་རོ། །བདག་ཉིད་ཀྱིས་ཐམས་ཅད་ལ་དྲལ་བར་བྱའོ་ཞེས་བྱ་བ་ལ། རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་དེ་ཉིད་བཅིངས་ལ་འདིས་དངོས་པོ་ཐམས་ཅད་ལས་བཟའ་བ་ལ་སོགས་པ་ཐམས་ཅད་རང་ཉིད་ཀྱིས་དྲང་བར་བྱས་ནས་ཐམས་ཅད་ལས་བཟའ་བ་དང་བཏུང་བ་དང༌། གོས་དང༌། རྒྱན་དང༌། གནས་ཐམས་ཅད་དང༌། མཆོག་ཏུ་གྱུར་པའི་བུ་མོ་གཞོན་ནུ་དང༌། བུད་མེད་ཐམས་ཅད་དང་སྐྱེས་བུ་དང་བྲན་ཕོ་དང་བྲན་མོ་རྣམས་འབྱུང་བར་འགྱུར་རོ། །གཞན་གྱི་དཔུང་གི་མདུན་དུ་བསྐོར་བར་བྱའོ་ཞེས་བྱ་བ་ལ། རྡོ་རྗེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་དེ་ཉིད་བཅིངས་ལ་གཞན་གྱི་དཔུང་གི་མདུན་དུ་བསྐོར་བར་བྱས་ན། གཡུལ་དུ་ཡན་ལག་བཞིའི་དཔུང་གི་ཚོགས་སུ་མཐོང་ཞིང་འཐབ་པར་མཐོང་བར་འགྱུར་རོ། །རྡོ་རྗེ་ཁུ་ཚུར་གཉིས་ཀྱིས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས། འདིས་སྒྱུ་མ་མཐོང་བ་ལ་སོགས་པའི་ལས་རྣམས་བསྒྲུབ་པར་བྱའོ། །ཇི་ལྟར་ཞེ་ན། གློག་འགྱུར་བ་ལ་བསྐོར་བར་བྱའོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ལ་གློག་འགྱུ་བའི་ཚུལ་གྱིས་བསྐོར་བ་བྱས་ན་སྒྱུ་མ་ཐམས་ཅད་སྟོན་པར་འགྱུར་རོ། །བསྐོར་བ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ཏེ་མགལ་མེའི་འཁོར་ལོ་བཞིན་དུ་བསྐོར་བ་བྱས་ན་ཇི་ལྟར་གསུངས་པའི་ལས་ཐམས་ཅད་ཀྱི་བྱ་བ་འགྲུབ་པ་ཡིན་ནོ། །གློག་འགྱུ་བའི་ནམ་མཁའ་ལ་ཞེས་བྱ་བ་ནི་རྡོ་རྗེ་ཁུ་ཚུར་གཉིས་བཅིངས་ལ་གློག་འགྱུ་བའི་ཚུལ་གྱིས་ནམ་མཁའ་ལ་བསྐོར་བར་བྱས་ཏེ་དེ་ལྟར་རྨད་དུ་བྱུང་བ་དང་ཆོ་འཕྲུལ་ཐམས་ཅད་མཐོང་བར་འགྱུར་རོ། །གཡས་པས་གཡོན་པ་ལ་བརྡེག་པར་བྱའོ་ཞེས་བྱ་བ་ལ་གཡས་པའི་རྡོ་རྗེ་ཁུ་ཚུར་ཀྱིས་གཡོན་པའི་རྡོ་རྗེ་ཁུ་ཚུར་ལ་བརྡེག་ན་ཐམས་ཅད་ཕྱིར་བཟློག་པའི་བྱ་བ་འགྲུབ་པར་འགྱུར་རོ། །རྡོ་རྗེ་ཁུ་ཚུར་གཉིས་གཡོ་ཞིང་གཡོ་བ་མེ་ལ་གཞག་པར་བྱའོ་ཞེས་བྱ་བ་ནི། རྡོ་རྗེ་ཁུ་ཚུར་གཉིས་བཅིངས་ནས་སྔར་བཤད་པའི་ཚུལ་གྱིས་མེའི་སྟེང་དུ་གཡོ་བ་དང་བཅས་པར་བཞག་ན་མེ་རེངས་པར་འགྱུར་རོ། །མཛུབ་མོ་མཉམ་པའི་
དཀྱིལ་འཁོར་ནི་ནོར་བུའོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་གཉིས་བླངས་པ་བཟུང་ལ་ནོར་བུ་རིན་པོ་ཆེའི་རྣམ་པར་སྟེང་ནས་དགུག་པའི་ཚུལ་དུ་བྱས་ཏེ་ཆུ་དྲང་བར་བྱའོ། །མཛུབ་མོ་རྡོ་རྗེ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་གཉིས་ཡང་དག་པར་སྦྱར་ནས་རྩེ་མོར་བྱས་ཏེ་འདིས་དགོན་པར་གྲོང་ཁྱེར་དང༌། ཆུ་བོ་དང༌། མཚོ་དང༌། སྐྱེད་མོས་ཚལ་དང༌། བཟའ་བ་དང༌། བཏུང་བ་དང༌། གནས་སྤྲུལ་པར་འགྱུར་རོ། །མཐེ་བོ་གཡོན་པའི་བུག་ལ་གཡས་པའི་མཛུབ་མོ་གཞུག་པར་བྱ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས་མཐེ་བོ་གཡོན་པའི་བུ་ག་ལ་བྱང་ཆུབ་མཆོག་གི་ཚུལ་གྱིས་གཡས་པའི་མཛུབ་མོ་གཞུག་པར་བྱ་སྟེ། འདིས་ནི་སྔར་བཤད་པའི་ཚུལ་གྱིས་ཆུའི་སྟེང་དུ་འཆག་པ་དང༌། གཟུགས་མང་པོའི་རང་བཞིན་གྱི་བདག་ཉིད་ཀྱི་དངོས་པོ་མཐོང་བ་དང༌། མི་སྣང་བ་དང༌། ནམ་མཁའ་ལ་འགྲོ་བའི་དངོས་གྲུབ་ཐོབ་པར་འགྱུར་རོ། །རབ་ཏུ་དགའ་བའི་རྡོ་རྗེ་ཞེས་བྱ་བ་ལ་ཇི་ལྟར་བཤད་པའི་མཚན་ཉིད་ཅན་གྱིས་རབ་ཏུ་དགའ་བའི་རྡོ་རྗེས་ལྷ་ལ་སོགས་པ་ཐམས་ཅད་མངག་གཞུག་བྱེད་པའི་དངོས་གྲུབ་ཐོབ་པར་འགྱུར་རོ། །ཇི་ལྟར་ཞེ་ན། སྟེང་དུ་ནམ་མཁའ་ལ་བཀའ་བསྐྱོད་པ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་སྒྲིབ་པ་མེད་པའི་སྟེང་གི་ཕྱོགས་སུ་བཀའ་བསྒོ་བའི་ཚུལ་གྱིས་རབ་ཏུ་དགའ་བའི་རྡོ་རྗེ་དེ་ཉིད་བསྐྱོད་པར་བྱས་ན་ལྷ་ལ་སོགས་པ་ཐམས་ཅད་མངག་གཞུག་བྱེད་པར་འགྱུར་རོ། །སྐྱེ་གནས་གཡོ་པ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་དེ་ཉིད་ཀྱིས་རང་རྟགས་གཡོ་བར་བྱས་ན་སེམས་ཅན་ཐམས་ཅད་དབང་དུ་བྱེད་པར་འགྱུར་རོ། །དབུས་མ་རྡོ་རྗེ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས་སོར་མོ་དབུས་མ་གཉིས་ཀྱི་རྩེ་མོར་ཡང་དག་པར་སྦྱར་བ་བྱས་ན། མི་རྒྱུ་བ་ཐམས་ཅད་དགུག་པ་དང༌། དབབ་པ་དང་བདེན་པར་སྨར་འཇུག་པར་འགྱུར་རོ། །བསྐྱོད་ཅིང་བཙིར་བའོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་བཅིངས་ནས། བསྐྱོད་ཅིང་བཙིར་བ་བྱས་ན་གཟུགས་བརྙན་གྱི་སྐུ་ཐམས་ཅད་དབབ་པ་དང༌། དགུག་
པ་དང་དགོད་དུ་གཞུག་པ་དང༌། གར་བྱེད་དུ་གཞུག་པ་དང༌། རྩེར་གཞུག་པ་དང་བཀའ་བསྒོ་བ་ཐམས་ཅད་བྱེད་པ་དང༌། ཐམས་ཅད་འདྲེན་པ་དང་འཕྲོག་ཏུ་གཞུག་པ་དང༌། ལས་ཐམས་ཅད་བྱེད་དུ་གཞུག་པ་དང༌། དེ་རྣམས་བྱེད་དུ་འཇུག་པར་འགྱུར་རོ། །རྡོ་རྗེ་ཡིད་ལས་བྱུང་བ་ཞེས་བྱ་བ་ལ་བཅོམ་ལྡན་འདས་རྡོ་རྗེ་ཡིད་ལས་བྱུང་བའི་ཕྱག་རྒྱ་ཆེན་པོ་ནི། རྡོ་རྗེ་ཡིད་ལས་བྱུང་བ་སྟེ། དེས་ཐམས་ཅད་རྗེས་སུ་ཆགས་པར་འགྱུར་བ་ཡིན་ནོ། །རྡོ་རྗེ་ཀཱི་ལི་ཀཱི་ལའོ་ཞེས་བྱ་བ་ནི་བཅོམ་ལྡན་འདས་ཀཱི་ལི་ཀི་ལའི་ཕྱག་རྒྱ་ཆེན་པོ་གང་ཡིན་པ་དེ་ནི། རྡོ་རྗེ་ཀཱི་ལི་ཀི་ལ་སྟེ་དེས་རྒྱུ་བ་དང་མི་རྒྱུ་བ་ཐམས་ཅད་རྩེར་འཇུག་པར་འགྱུར་རོ། །རྡོ་རྗེ་ཆུ་སྲིན་ནོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་དྲན་པའི་ཕྱག་རྒྱ་ཆེན་པོ་གང་ཡིན་པ་དེ་ནི་རྡོ་རྗེ་ཆུ་སྲིན་ཏེ། དེས་ཐམས་ཅད་བརྟན་པར་བྱེད་པར་འགྱུར་རོ། །རྡོ་རྗེ་སྙེམས་མའི་ནི་བཤད་པའོ་ཞེས་བྱ་པ་ལ་བཅོམ་ལྡན་འདས་རྡོ་རྗེ་སྙེམས་མའི་ཕྱག་རྒྱ་ཆེན་པོ་གང་ཡིན་པ་དེ་ནི། རྡོ་རྗེ་སྙེམས་མ་སྟེ་དེས་ཐམས་ཅད་ས་རབ་ཏུ་བསྒྲུབ་པར་འགྱུར་རོ། །བཤད་པ་ཞེས་བྱ་བ་ནི་རེ་རེ་ལ་ཡང་སྦྱར་ཏེ། རྡོ་རྗེ་ཡིད་ལས་བྱུང་བ་བཤད་པ་དང༌། ཀཱི་ལི་ཀཱི་ལའི་བཤད་པ་དང༌། རྡོ་རྗེ་ཆུ་སྲིན་བཤད་པ་དང༌། རྡོ་རྗེ་སྙེམས་མ་བཤད་པའོ་ཞེས་བྱ་བའོ། །རྡོ་རྗེ་བསྡམས་པ་མཛུབ་མོ་རྡོ་རྗེས་སོ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཀྱི་རྩེ་མོར་ཡང་དག་པར་སྦྱར་བར་བྱས་ན། དེས་རྨི་ལམ་འདེབས་པར་འགྱུར་རོ། །ཇི་ལྟར་ཞེ་ན། གསོལ་བ་འདེབས་པར་བྱེད་པས་ཞེས་བྱ་བ་ལ་མཛུབ་མོ་གཉིས་ཀྱི་རྩེ་མོ་དེ་ཉིད་གསོལ་བ་བཏབ་པའི་ཚུལ་གྱིས་བཟུང་ན་རྨི་ལམ་འབེབས་པ་སྒྲུབ་པར་བྱེད་པ་ཡིན་ནོ། །མཛུབ་མོ་གཉིས་ཀྱིས་རང་གི་མིག་གཉིས་བཀབ་ལམ་བཙུམས་པར་བསྒོམས་ནས་གང་མངོན་པར་འདོད་པའོ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཀྱིས་རང་གི་མིག་གཉིས་བཀབ་ལ་མིག་མ་བཙུམས་པར་ཇི་ལྟར་འདོད་པའི་བཅོམ་ལྡན་འདས་མདུན་དུ་བསྒོམ་པར་བྱས་ན་གཞན་རྣམས་ལ་རང་གི་མངོན་པར་འདོད་པའི་རྨི་ལམ་སྟོན་པར་བྱེད་
པ་ཡིན་ནོ། །སྦྱིན་སྲེག་བྱེད་པ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཡང་དག་པར་སྦྱར་བའི་རྩེ་མོས་སྦྱིན་སྲེག་བྱེད་པའི་ཚུལ་བྱས་ན། །འདིས་རྨི་ལམ་ངན་པ་ཐམས་ཅད་འཇིག་པར་འགྱུར་རོ། །མཛུབ་མོ་གཉིས་ཀྱི་རྩེ་མོས་རང་གི་མིག་བཀབ་ན་རྨི་ལམ་བཟང་པོ་ཐམས་ཅད་བརྟན་པར་སྒྲུབ་པར་བྱེད་པར་འགྱུར་རོ། །སོ་རྣམས་ཀྱིས་གཟུང་བར་བྱའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱ་སྟེ་སོ་རྣམས་ཀྱིས་གཟུང་བ་བྱས་ན་འདིས་འབྲས་དང་ནད་ཐམས་ཅད་འཕྲོག་པར་འགྱུར་རོ། །བཏུང་བར་བྱའོ་ཞེས་བྱ་བ་ནི། མཛུབ་མོ་གཉིས་ཀྱི་རྩེ་མོ་དེ་ཉིད་བཏུང་བའི་ཚུལ་དུ་བྱས་ན་ནད་ཐམས་ཅད་ཞི་བར་འགྱུར་རོ། །རྩེ་མོ་བསྐྱོད་ཅིང་སྦྱིན་སྲེག་བྱའོ་ཞེས་བྱ་བ་ལ། མཛུབ་མོ་གཉིས་ཀྱི་རྩེ་མོ་ཁ་ལ་བསྐྱོད་ཅིང་སྦྱིན་སྲེག་གི་ཚུལ་དུ་བྱས་ནས་འདིས་དུས་མ་ཡིན་པར་འཆི་བ་ཞི་བར་འགྱུར་རོ། །རང་གི་མཐེ་བོ་འོག་ཏུ་རབ་ཏུ་བརྐྱང་ལ་བརྡེག་བར་བྱའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ཏེ། མཐེ་བོ་གཉིས་འོག་ཏུ་མཉམ་པོར་བྱས་ལ་བརྐྱང་སྟེ་མཐེ་བོང་གཉིས་པོ་དེས་སྡིག་པ་ལ་བརྡེག་པར་བྱས་ན་ངན་སོང་གསུམ་པོ་དྲལ་བར་འགྱུར་རོ། །རྡོ་རྗེ་སྐུ་མཆོག་གི་ཕྱག་རྒྱ་ཞེས་བྱ་བ་ནི། གང་ཞིག་རྡོ་རྗེའི་སྐུའི་མཆོག་ཏུ་གྱུར་པའི་ཕྱག་རྒྱ་དེས་སྐུ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །དེས་ཇི་ལྟ་བུ་ཡིན་ཞེ་ན། མཐེ་བོ་སེམས་དཔའི་སྐྱིལ་ཀྲུང་གིས། མཛུབ་མོའི་རྡོ་རྗེའི་སྐུ་མཆོག་གོ །ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཐེ་བོ་གཡོན་པའི་སྟེང་དུ་མཐེ་བོ་གཡས་སེམས་དཔའི་སྐྱིལ་མོ་ཀྲུང་གི་ཚུལ་གྱིས་བཞག་ལ། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བ་བྱས་ན་འདིས་རྡོ་རྗེ་སྐུའི་མཆོག་སྟེ་འདིས་སྐུ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །དབུས་མའི་མཉམ་པའི་ཁ་དབུས་ཀྱི་ངག་འབྱིན་པ་ཞེས་བྱ་བ་ལ་རྡོ་རྗེ་སྐུའི་མཆོག་གི་ཕྱག་རྒྱའི་སོར་མོ་དབུས་མ་གཉིས་ཀྱི་མེ་ཏོག་གི་མགོ་ལྕོགས་ཀྱི་ཚུལ་བྱས་ཏེ་ཕྱག་
རྒྱ་འདིས་ངག་འབྱིན་པའི་ཚུལ་གྱིས་ཁ་ལ་གྱེན་དུ་བསྒྲེང་བར་བྱས་ན་ངག་གི་དངོས་གྲུབ་ཐམས་ཅད་གྲུབ་པར་འགྱུར་རོ། །སྙིང་གར་བཞག་ནས་ཨོཾ་བོ་དྷི་ཙིཏྟ་ཨུ་ཏྤཱ་ད་ཡཱ་མི་ཞེས་བྱ་བ་བསྒོམ་པར་བྱའོ་ཞེས་བྱ་བ་ལ། རྡོ་རྗེ་སྐུ་མཆོག་བཅིངས་ནས་རང་གི་སྙིང་གའི་ཕྱོགས་སུ་བཟུང་སྟེ། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི་ཞེས་བྱ་བ་བརྗོད་ཅིང་རང་གི་སྙིང་གར་སེམས་དཔའི་རྡོ་རྗེ་བསྒོམ་པར་བྱས་ནས་ཐུགས་ཀྱི་དངོས་གྲུབ་ཐམས་ཅད་འགྲུབ་པར་འགྱུར་རོ། །མཐེ་བོའི་རྟགས་གཡོན་པའི་མཐེ་བོའི་བུ་གར་གཞུག་པར་བྱའོ་ཞེས་བྱ་བ་ལ། སྐུ་མཆོག་བཅིངས་ནས་གཡོན་པའི་མཐེ་བོའི་བུ་གང་གཡས་པའི་མཐེ་བོ་འོག་ཏུ་ཁ་བལྟ་བ་བཅུག་ན་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །རྡོ་རྗེ་ཁུ་ཚུར་གཉིས་ཀྱིས་གློག་འགྱུ་བ་ལྟར་བསྐོར་བས་རྡོ་རྗེའི་འཁོར་ལོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས། དེ་ཉིད་གློག་འགྱུ་བའི་ཚུལ་གྱིས་བསྐོར་བར་བྱས་ན་ས་འདིས་དཀྱིལ་འཁོར་ཐམས་ཅད་ལ་གཞུག་པར་འགྱུར་རོ། །རྡོ་རྗེ་སྙེམས་མ་དང་བཅས་པའོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་རྡོ་རྗེ་ཁུ་ཚུར་གཉིས་ལས་བྱུང་བའི་ཕྱག་རྒྱ་རྡོ་རྗེ་དང་བཅས་པ་བཅིངས་ནས། འདིས་ཕྱག་རྒྱ་ཐམས་ཅད་བཅིང་བའི་དངོས་གྲུབ་ཐོབ་པར་འགྱུར་རོ། །ཡི་གེ་ཧཱུཾ་གིས་སྡིགས་མཛུབ་བྱའོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས་ཡི་གེ་ཧཱུཾ་བརྗོད་པ་དང་བཅས་པས་མཛུབ་མོ་གཉིས་སོ་སོར་བསྒྲེང་སྟེ་སྡིགས་མཛུབ་བྱས་ན་དེས་དམ་ཚིག་ཐམས་ཅད་འགྲུབ་པར་འགྱུར་རོ། །རབ་ཏུ་དགའ་བའི་ལས་རྡོ་རྗེ་གར་གྱི་ཚུལ་གྱིས་ཁ་སྦྱར་རོ་ཞེས་བྱ་བ་ལ། རབ་ཏུ་དགའ་བའི་རྡོ་རྗེ་བཅིངས་ནས་གར་གྱི་ཚུལ་གྱིས་ལངས་ཏེ་སྤྱི་བོར་ཐལ་མོ་ཁ་སྦྱར་བ་བྱས་ནས་འདིས་ནི་ལས་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །རྡོ་རྗེ་སྙེམས་མ་བཤད་པའོ་ཞེས་བྱ་བ་ལ་དཔལ་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ནི། རྡོ་རྗེ་སྙེམས་མ་སྟེ་དེས་ལས་ཀྱི་དངོས་གྲུབ་ཐམས་ཅད་ཐོབ་པར་འགྱུར་རོ། །མཐེ་ཆུང་གི་ངོས་ཀྱིས་མདུད་པའི་མཛུབ་མོ་མཉམ་པ་རྩེ་མོ་ཡོངས་སུ་བསྐོར་ཏེ་འོག་ནས་བཏེག་པ་ལ་མཛུབ་མོ་མཉམ་པའི་རྩེ་
མོ་དབང་བསྐུར་བའི་གནས་སུ་བཞག་ན་རྡོ་རྗེ་མཛོད་སྤུའོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ནས། མཐེའུ་ཆུང་གཉིས་ཕན་ཚུན་དུ་ས་ལ་མདུད་པ་བྱས་ན་མཛུབ་མོ་གཉིས་ཀྱི་རྩེ་མོའི་སྟེང་དུ་ཁ་བལྟ་བར་ཡང་དག་པར་སྦྱར་ནས་འོག་ནས་བཏེག་ལ་དབང་བསྐུར་བའི་གནས་སུ་གཟུང་བར་བྱས་ན་འདིས་ཕུན་སུམ་ཚོགས་པ་ཐམས་ཅད་འཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་འོག་ནས་བཤད་པར་བྱའོ་ཞེས་བྱ་བ་ནི། དུམ་བུ་འདི་གཉིས་ཀྱི་རྒྱུད་ཕྱི་མ་ལས་རྡོ་རྗེ་ཁུ་ཚུར་གཉིས་ལས་བྱུང་བའི་བྱང་ཆུབ་མཆོག་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་དུ་འཆད་པ་ཡིན་ནོ། །དེ་བཅིངས་ནས་ཡེ་ཤེས་ཐམས་ཅད་འཐོབ་པར་འགྱུར་རོ། །རྡོ་རྗེ་གར་ནི་བཤད་པ་ཡིན་ནོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ཏེ། སྒེག་པ་དང་བཅས་པ་ཐམས་ཅད་ལ་སོགས་པ་བཀྲོལ་བས་ཀློག་འགྱུ་བའི་གར་གྱིས་གཡས་སུ་བསྐོར་བ་གང་ཡིན་པ་དེ་ནི་རྡོ་རྗེ་གར་མ་སྟེ། དེས་ནི་ཐམས་ཅད་ཀྱིས་མཆོད་པར་བྱ་བ་ཉིད་འཐོབ་པར་འགྱུར་རོ། །མཛུབ་མོ་ཕྱིར་ཕྱོགས་པ་བསླང་བའི་རྡོ་རྗེ་སྙིང་གར་བཛྲ་ཧཱུཾ་ཞེས་བྱ་བ་ནི་ཕྱག་རྒྱ་ཆེན་པོའི་ཞེས་བྱ་བ་ལ། རྡོ་རྗེ་ཁུ་ཚུར་གཉིས་བཅིངས་མཛུབ་མོ་གཉིས་ཕྱིར་བལྟ་བ་བསླང་སྟེ་རྩེ་མོ་ཡང་དག་པར་སྦྱར་ནས་སྙིང་གའི་ཕྱོགས་སུ་བཟུང་ཞིང་བཛྲོ྅ཧཾ་ཞེས་བྱ་བ་བསམས་ནས་རྡོ་རྗེ་ཐམས་ཅད་ཀྱི་མཆོག་གི་དངོས་གྲུབ་འཐོབ་པར་འགྱུར་རོ། །ཡེ་ཤེས་ཀྱི་ཁུ་ཚུར་གྱིས་ཏ་ཐཱ་ག་ཏོ྅ཧཾ་ཞེས་བྱ་བ་ལ་བྱང་ཆུབ་མཆོག་བཅིངས་ནས་ཏ་ཐཱ་ག་ཏོ྅ཧཾ་ཞེས་བྱ་བ་ལ་བསྒོམས་ན་འདིས་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་འཐོབ་པར་འགྱུར་རོ། །ལས་ཀྱི་ཕྱག་རྒྱའི་མཚན་ཉིད་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཤད་པ་ཡིན་ནོ་ཞེས་བྱ་བ་ལ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་བཤད་ཟིན་པ་སྟེ། དེས་རྡོ་རྗེ་འཆང་བ་ཆེན་པོའི་མཆོག་གི་དངོས་གྲུབ་ཐམས་ཅད་འཐོབ་པར་འགྱུར་རོ། །ལས་ཀྱི་ཕྱག་རྒྱའི་མཚན་ཉིད་ཐམས་ཅད་བསྟན་པ་ཡིན་ནོ། །རྡོ་རྗེ་མེད་པའི་རྡོ་རྗེ་ཁུ་ཚུར་རྣམས་ཀྱི་ལས་ཀྱི་ཕྱག་རྒྱ་བཅིང་བར་བྱའོ་ཞེས་བྱ་བ་གསུངས་ཏེ། རྡོ་རྗེ་ཁུ་ཚུར་
དེ་དག་བསྐྱེད་པའི་རྒྱུ་བཤད་པར་བྱ་བའི་ཕྱིར། དེ་ནས་རྡོ་རྗེ་ཁུ་ཚུར་བཅིང་བའོ། །ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པ་རྗོད་པར་བྱེད་པ་སྟེ། རང་གི་རྡོ་རྗེ་ཁུ་ཚུར་གྱིས་ཕྱག་རྒྱ་རྣམས་གང་ལས་བྱུང་བ་ཞེས་བྱ་བའི་རྣམ་པར་རྟོག་པ་འདི་བསྐྱེད་པས་དེ་མ་ཐག་ཁོ་ནར་རྡོ་རྗེ་ཁུ་ཚུར་གྱི་ཕྱག་རྒྱ་འཆིང་བའི་མཚན་ཉིད་ནི་འཆིང་བ་ཞེས་བརྗོད་པར་བྱ་སྟེ། རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ་ཇི་ལྟར་བཤད་པའི་མཚན་ཉིད་ཅན་གྱི་རྡོ་རྗེ་བསྡམས་པ་བཅིངས་ཏེ། མཐེ་བོ་གཉིས་རྡོ་རྗེ་བསྡམས་པའི་ནང་དུ་བཅུག་སྟེ། རང་གི་མཐེ་ཆུང་དང་སྲིན་ལག་གི་ཕྱག་རྒྱ་འཆིང་བའི་བར་དུ་བཞག་ནས་མཛུབ་མོ་གཉིས་བཀུག་ཅིང་དེའི་རྩེ་མོ་རང་གི་མཐེ་བོའི་སྟེང་དུ་གཞག་པར་བྱས་ནས། འདིས་ནི་དམ་ཚིག་ཆེན་པོའི་རྡོ་རྗེ་མཆོག་གི་ཁུ་ཚུར་ཞེས་བྱ་བའི་ཕྱག་རྒྱའོ། །ཐམས་ཅད་དངོས་གྲུབ་མཆོག་སྩོལ་བ། །ཞེས་བྱ་བ་ལ། ཕྱག་རྒྱ་ཐམས་ཅད་འཆིང་བའི་དངོས་གྲུབ་སྟེར་བ་ཡིན་ནོ། །དེ་ཉིད་དུ་བྱས་ནས་ཞེས་བྱ་བ་དེ་ནི་དམ་ཚིག་རྡོ་རྗེ་མཆོག་གི་ཁུ་ཚུར་རོ། །དངོས་གྲུབ་ཕྱིར་ཞེས་བྱ་བ་ནི་ལས་ཀྱི་ཕྱག་རྒྱ་ཐམས་ཅད་བཅིང་བ་རྫོགས་པའི་དོན་དུའོ། །རྡོ་རྗེ་ཁུ་ཚུར་རབ་ཏུ་བརྟག །ཅེས་བྱ་བ་ལ། འཇིག་རྟེན་དང་འཇིག་རྟེན་ལས་འདས་པའི་རྡོ་རྗེ་ཐམས་ཅད་ལ་བྱིན་གྱིས་བརླབས་པ་དང༌། མཛད་པ་དང་ལས་ཀྱི་ཕྱག་རྒྱ་རྫོགས་པར་མཛད་པའི་ཕྱིར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་རྡོ་རྗེ་ཁུ་ཚུར་གཉིས་པོ་འདི་བརྟག་པར་མཛད་པ་ཡིན་ནོ། །དཔལ་མཆོག་དང་བོའི་རྒྱ་ཆེར་བཤད་པ། ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས། དུམ་བུ་གཉིས་པ་རྩ་བའི་རྒྱུད་ལས། དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཕྱག་རྒྱའི་བཤད་པ་རྫོགས་སོ།། །།དེ་ལྟར་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཕྱག་རྒྱའི་མཚན་ཉིད་བསྟན་ནས། ད་ནི་དེ་བཞིན་གཤེགས་པའི་དཀྱིལ་འཁོར་གྱི་ཕྱག་རྒྱའི་མཚན་ཉིད་བསྟན་པར་བྱ་བའི་ཕྱིར། དེ་ནས་དེ་བཞིན་གཤེགས་པའི་རིགས་ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྐབས་ལ་བབས་པའོ། །དེ་བཞིན་
གཤེགས་བ་དང༌། དེའི་རིགས་ནི་དེ་བཞིན་གཤེགས་པའི་རིགས་ཏེ། དེའི་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་ཏེ། དེ་རྣམས་ཀྱི་རྒྱུད་ནི་ཕྱག་རྒྱའི་མཚན་ཉིད་སྟོན་པའི་སྒྲའི་ཚོགས་སོ། །དེའི་ཆོ་ག་རྒྱས་པ་ནི་ཕྱག་རྒྱ་ཆེན་པོ་ལ་སོགས་པའི་དབྱེ་བས་ཕྱེ་བར་གྱུར་པའི་རྒྱུན་ནོ། །ཕྱག་རྒྱ་ཆེན་པོ་རྣམས་ཀྱི་དེ་བཞིན་གཤེགས་པ་ནི་བདག་ཡིན་ནོ་ཞེས་བྱ་བ་བཅིངས་བར་བྱ་བ་ཡིན་ཏེ། ཇི་ལྟ་བ་བཞིན་དུ་སེམས་སོ་སོར་རྟོགས་པ་ལ་སོགས་པའི་རིམ་པས་བདག་ཉིད་དེ་བཞིན་གཤེགས་པར་བསམས་ལ། ཡ་ཐཱ་སརྦ་ཏ་ཐཱ་ག་ཏ་ཏིཥྛ་ཧཾ་ཞེས་བྱ་བས་ང་རྒྱལ་བསྐྱེད་ལ། དེ་ནས་ས་མ་ཡོ་ཉ་ཧཾ་ཞེས་བྱ་བས་དམ་ཚིག་གི་ང་རྒྱལ་བསྐྱེད་པར་བྱའོ། །དེ་ནས་རང་གི་དམ་ཚིག་གི་ཕྱག་རྒྱས་ས་མ་ཡ་སཏྭ་ཨ་དྷི་ཏིཥྚསྭ་མཾ་ཞེས་བྱ་བས་བྱིན་གྱིས་བརླབས་ལ་རྡོ་རྗེ་སྐྱིལ་མོ་ཀྲུང་བཅིངས་ལ། དེ་བཞིན་གཤེགས་པའི་ཁུ་ཚུར་གཉིས་བཅིང་བར་བྱ་སྟེ། ཁུ་ཚུར་གཡོན་པ་དེ་བཞིན་གཤེགས་པའི་དྲིལ་བུ་དང་བཅས་པ་བསྙེམས་པར་བྱས་ནས། གཡས་པས་དེ་བཞིན་གཤེགས་པའི་རྡོ་རྗེ་བླངས་ལ་གསོར་ཏེ། ཨོཾ་དྷི་ཏ་ཐཱ་ག་ཏོ྅ཧཾ་ཞེས་བརྗོད་ཅིང་རང་གི་སྙིང་གར་བསྟོད་པའི་ཚུལ་གྱིས་གཟུང་བར་བྱས་ནས། འདི་ནི་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་ཡིན་ནོ། །རྡོ་རྗེ་མཚོན་ཆ་མ་ལ་སོགས་པ་རྣམས་ཀྱི་ཕྱག་རྒྱ་ཆེན་པོ་ནི། ཇི་ལྟར་བྲིས་པའི་རྗེས་སུ་འབྲངས་པ་ལས་འདིར་ཤེས་པར་བྱའོ། །དམ་ཚིག་མཆོག་ཅེས་བྱ་བ་ནི་དམ་ཚིག་གི་ཕྱག་རྒྱ་རྣམས་ཏེ། དེ་དག་ཇི་ལྟར་ཤེས་པར་བྱ་ཞེ་ན། མཐེ་བོ་མཐེ་ཆུང་མཉམ་པ་ཡི། །རྡོ་རྗེ་སྣ་ཚོགས་རྡོ་རྗེའོ། །ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཐེ་བོ་གཉིས་ཀྱི་རྩེ་མོ་ཟུར་དུ་ཡང་དག་པར་སྦྱར་བ་བྱས་ལ། མཐེ་ཆུང་གཉིས་ཀྱིས་ཀྱང་རྩེ་མོ་སྦྱར་ཏེ་དང་པོའི་རྡོ་རྗེའི་ཚུལ་གྱིས་དབུས་མ་གཉིས་ནང་དུ་བཅུག་སྟེ་རྩེ་མོ་སྦྱར་ཏེ་འདི་ནི་དབུས་མའི་རྩེ་མོ་ཅན་ཏེ། སྣ་ཚོགས་རྡོ་རྗེ་ཞེས་བྱ་བ་ཡིན་ནོ། །འདི་ཡང་དེ་བཞིན་གཤེགས་པའི་དམ་ཚིག་གི་ཕྱག་རྒྱ་སྟེ། སྣ་ཚོགས་རྡོ་རྗེ་ཞེས་བྱ་བར་བརྗོད་དོ། །མདའ་ལ་སོགས་པ་བཅིང་བ་ནི་དེ་བཞིན་ནོ་ཞེས་བྱ་བ་ལ། ཇི་ལྟར་རྡོ་
རྗེ་སེམས་དཔའི་གསང་བའི་དཀྱིལ་འཁོར་དུ་རྡོ་རྗེ་མཚོན་ཆ་མ་ལ་སོགས་པ་རྣམས་ཀྱི་དང་པོའི་རྡོ་རྗེ་ལས་བྱུང་བའི་མདའ་གཞུ་ལ་སོགས་པའི་ཕྱག་རྒྱ་བསྟན་པ་དེ་བཞིན་དུ་འདིར་ཡང་དེ་བཞིན་གཤེགས་པའི་དམ་ཚིག་གི་ཕྱག་རྒྱ་ལས་བྱུང་བའི། །རྡོ་རྗེ་མཚོན་ཆ་མ་ལ་སོགས་པའི་དམ་ཚིག་གི་ཕྱག་རྒྱ་རྣམས་ཤེས་པར་བྱའོ། །འདིས་ནི་འདི་སྐད་བསྟན་པར་འགྱུར་ཏེ། རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེ་ནི་བཅོམ་ལྡན་འདས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་སྟེ། འདི་ཉིད། མཐེ་བ་མཛུབ་རྩེ་སྦྱར་དབུས་མའི་རྩེ། །མིག་འབྲས་ལྟར་བྱས་འཛིན་པའོ། །ཞེས་བྱ་བ་ནི་རྡོ་རྗེ་མཚོན་ཆ་མའིའོ། །དེ་ཉིད། དབུས་མའི་རྡོ་རྗེ་འོག་ཏུ་ནི། །མཐེ་བོང་གིས་མནན་བཙིར་བར་བྱ། །ཞེས་བྱ་བ་ནི་ཀཱི་ལི་ཀཱི་ལའིའོ། །རྡོ་རྗེ་མཚོན་ཆ་མའི་ཕྱག་རྒྱ་ཉིད་རྡོ་རྗེ་འདྲེན་མ་དང་འདྲ་བར། སྲིན་ལག་མཐེ་ཆུང་ཁ་ཕྱེ་བ། །ཞེས་བྱ་བ་ནི་རྡོ་རྗེ་འདྲེན་མའིའོ། །དེ་བཞིན་གཤེགས་པའི་དམ་ཚིག་གི་ཕྱག་རྒྱ་ཉིད་བསྐོར་ནས་པུས་མོར་གཞག་པ་གང་ཡིན་པ་དེ་ནི་རྡོ་རྗེ་སྙེམས་མའིའོ། །དེ་བཞིན་གཤེགས་པའི་ཕྱག་རྒྱ་ཉིད། །གྱེན་དུ་གཏོར་དང་ཐུར་དུ་བླུགས། །མཐེ་བོ་སྦྱར་ནས་བསྐོར་བ་དང༌། རང་ཏུ་བརྐྱང་ཞིང་བྱུག་པ་དང༌། །བསྐོར་ཞིང་སྤྱི་བོར་གནས་པ་དང༌། །བསྐོར་ཞིང་སྙིང་གར་གཞག་པར་བྱ། །ཡོངས་སུ་བསྐོར་ཞིང་བཞད་པ་དང༌། །ཁ་ལས་གྱེན་དུ་དབྱུང་བ་དང༌། །དེ་བཞིན་གར་གྱིས་བསྐོར་བའོ། །མཛུབ་མོའི་སོར་མོ་གཉིས་ཀྱིས་སོ། །གཡོན་པའི་མཛུབ་མོ་གཡས་ཀྱིས་གཟུང༌། །མཛུབ་མོ་མཐེ་བོ་འཆིང་བ་དང༌། །མཐེ་བོ་མཐའ་མའི་ནང་དུ་གཞག །ཅེས་བྱ་བ་འདི་རྣམས་རིམ་པ་བཞིན་དུ་དཔྱིད་ཀ་རྡོ་རྗེ་མ་ནས་བརྩམས་ཏེ། རྡོ་རྗེ་དྲིལ་བུ་མའི་བར་གྱི་དམ་ཚིག་གི་ཕྱག་རྒྱ་རྣམས་ཡིན་ནོ། །དེ་བཞིན་གཤེགས་པ་ལ་སོགས་པ་རྣམས་ཀྱི་རང་གི་སྙིང་པོ་རྣམས་ཁོ་ན་འདིར་ཆོས་ཀྱི་ཕྱག་རྒྱ་རྣམས་ཡིན་ནོ། །ལས་ཀྱི་ཕྱག་རྒྱ་རྣམས་ནི་དེ་ཉིད་ཡིན་ནོ་ཞེས་བྱ་བ་ལ་རྡོ་རྗེ་སེམས་དཔའི་དཀྱིལ་འཁོར་དུ་རྡོ་རྗེ་སེམས་དཔའ་ནས་བརྩམས་ཏེ། རྡོ་རྗེ་དྲིལ་བུ་མའི་བར་དུ་ལས་ཀྱི་ཕྱག་རྒྱ་རྣམས་གང་བར་བསྟན་པ་དེ་ཉིད་དེ་བཞིན་གཤེགས་པའི་དཀྱིལ་
འཁོར་འདིར་ཡང་ལས་ཀྱི་ཕྱག་རྒྱ་གཟུང་བར་བྱའོ། །ཁྱད་པར་ནི་འདི་ཡིན་ཏེ་འདིར་ཁུ་ཚུར་གཉིས་ལས་འབྱུང་བ་ཡིན་ནོ། །འདི་ཉིད་བསྟན་པར་བྱ་བའི་ཕྱིར་དེ་བཞིན་གཤེགས་པའི་ཁུ་ཚུར་གྱིས་དེ་བཞིན་དུ་བཅིང་བའོ་ཞེས་བྱ་བ་ལ། འདིས་ནི་དོན་འདི་བསྟན་པར་འགྱུར་ཏེ། དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་གཡོན་པ་རྡོ་རྗེ་སྙེམས་མ་དང༌། གཡས་པ་རྡོ་རྗེ་བསྟོད་པའི་ཚུལ་གྱིས་སྙིང་གར་བཟུང་སྟེ། འདི་ནི་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱ་ཡིན་ནོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་སྒེག་པ་དང་བཅས་པས་མཐའ་ལ་སོགས་པ་བཀྲོལ་ལ་ཀློག་འགྱུ་བའི་ཚུལ་གྱིས་གཡས་སུ་ཡོངས་སུ་བསྐོར་ཏེ་སྤྱི་བོའི་ཕྱོགས་སུ་ཀ་པུ་ཊའི་ཐལ་མོ་ཁ་སྦྱོར་བཅིངས་ཏེ་ཕབ་ནས་རྡོ་རྗེ་ཐལ་མོ་བཅིངས་ལ་དེ་ཉིད་སྒེག་པས་མེ་ཏོག་འབུལ་བའི་ཚུལ་གྱིས་ཏེ། སྟེང་དུ་གཏོར་ལ་སླར་ཡང་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ། མདའ་དང་གཞུ་གཏོད་པའི་ཚུལ་བྱ་སྟེ་འདི་ནི་རྡོ་རྗེ་མཚོན་ཆ་མའི་ལས་ཀྱི་ཕྱག་རྒྱ་ཡིན་ནོ། །དེ་བཞིན་དུ་གར་བྱས་ནས་རྡོ་རྗེ་ཐལ་མོ་བཅིངས་ལ། དེ་ཉིད་སྒེག་པས་སྦོས་འབུལ་བའི་ཚུལ་གྱིས་འོག་ཏུ་བླུགས་ལ། དེ་བཞིན་གཤེགས་པའི་ཁུ་ཚུར་གཉིས་བཅིངས་ལ་བདག་ཉིད་འཁྱུད་པར་བྱ་སྟེ། འདི་ནི་རྡོ་རྗེ་ཀཱི་ལི་ཀཱི་ལའིའོ། །དེ་བཞིན་དུ་གར་བྱས་ནས་རྡོ་རྗེ་ཐལ་མོ་བཅིངས་ཏེ་དེ་ཉིད་སྒེག་ཅིང་མར་མེ་འབུལ་བའི་ཚུལ་གྱིས་མཐེ་བོ་སྦྱོར་ཞིང་བསྐོར་བར་བྱས་ལ། དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་རྒྱལ་མཚན་བསྒྲེང་བའི་ཚུལ་གྱིས་གཟུང་བར་བྱ་སྟེ། འདི་ནི་རྡོ་རྗེ་དྲན་མའིའོ། །དེ་བཞིན་དུ་གར་བྱས་ལ་རྡོ་རྗེ་ཐལ་མོ་བཅིངས་ཏེ། དེ་ཉིད་སྒེག་པས་སྙིང་གའི་ཕྱོགས་སུ་བརྐྱང་ལ་དྲིས་བྱུག་པའི་ཚུལ་གྱིས་རབ་ཏུ་སྦྱར་ཏེ། སླར་ཡང་རྡོ་རྗེ་ཐལ་མོ་བཅིངས་ནས་སྤྱི་བོར་བཟུང་སྟེ། དེ་ནས་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ་སྙེམས་པ་གཉིས་བྱ་སྟེ། འདི་ནི་རྡོ་རྗེ་སྙེམས་མའིའོ། །དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་ཀྱིས་གར་བྱས་ལ་ཁ་སྦྱོར་གྱི་ཐལ་མོ་སྤྱི་བོར་བཅིངས་ནས་ཕབ་སྟེ།
དེ་ནས་དེ་བཞིན་གཤེགས་པའི་ཁུ་ཚུར་གཉིས་སྙིང་གའི་ཕྱོགས་སུ་བསྐོར་ཞིང་བཅིངས་ཏེ། མེ་ཏོག་འབུལ་བའི་ཚུལ་གྱིས་སྟེང་དུ་གཏོར་བར་བྱ་སྟེ། འདི་ནི་རྡོ་རྗེ་དཔྱིད་ཀ་མའིའོ། །དེ་བཞིན་དུ་གར་བྱས་ནས་དེ་བཞིན་གཤེགས་པའི་ཁུ་ཚུར་གཉིས་བསྐོར་ཞིང་སྙིང་གའི་ཕྱོགས་སུ་བཅིངས་ལ། སྤོས་འབུལ་བའི་ཚུལ་གྱིས་འོག་ཏུ་བླུགས་པར་བྱ་སྟེ་འདི་ནི་རྡོ་རྗེ་སྤྲིན་མའིའོ། །དེ་བཞིན་གཤེགས་པའི་ཁུ་ཚུར་གཉིས་བསྐོར་ཞིང་བཅིངས་ལ། མར་མེ་འབུལ་བའི་ཚུལ་གྱིས་མཐེ་བོ་སྦྱར་ཞིང་བསྐོར་བར་བྱ་སྟེ། འདི་ནི་སྟོན་ཀ་རྡོ་རྗེ་མའིའོ། །དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་བསྐོར་ཏེ་སྙིང་གའི་ཕྱོགས་སུ་བརྐྱང་སྟེ། དེས་དྲིས་བྱུག་པའི་ཚུལ་དུ་བྱ་སྟེ། སླར་ཡང་དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་སྤྱི་བོའི་ཕྱོགས་སུ་གཟུང་བར་བྱ་སྟེ་འདི་ནི་རྡོ་རྗེ་དགུན་མའིའོ། །དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་བསྐོར་ནས་སྙིང་གའི་ཕྱོགས་སུ་བཅིངས་ནས་གཟུང་བར་བྱ་སྟེ། འདི་ནི་སྒེག་མོའིའོ། །དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་བསྐོར་ཞིང་བཅིངས་ལ་བཞད་པའི་ཚུལ་གྱིས་ཡོངས་སུ་བསྐོར་ནས་ཁའི་མཐར་གཟུང་བར་བྱ་སྟེ། འདི་ནི་བཞད་མའིའོ། །དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་བཅིངས་ལ། ངག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱ་སྟེ། འདི་ནི་གླུ་མའིའོ། །དེ་བཞིན་གཤེགས་པའི་ཁུ་ཚུར་གཉིས་བསྐོར་ཞིང་བཅིངས་ལ། གར་གྱི་ཚུལ་གྱིས་བསྐོར་བར་བྱ་སྟེ་འདི་ནི་གར་མའིའོ། །གར་དང་བྲལ་བའི་དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ། མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ཏེ་འདི་ནི་རྡོ་རྗེ་ལྕགས་ཀྱུ་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་གཡས་བའི་མཛུབ་མོའི་ལྕགས་ཀྱུས་གཡོན་པའི་མཛུབ་མོ་བྶྤྲེང་བ་གཟུང་བར་བྱ་སྟེ། འདི་ནི་རྡོ་རྗེ་ཞགས་པ་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་མཛུབ་མོ་དང་མཐེ་བོ་དག་གིས་མདུད་པའི་ཚུལ་དུ་བཅིངས་བར་བྱས་ཏེ་འདི་ནི་རྡོ་རྗེ་ལྕགས་སྒྲོག་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་
ཏེ་ཕན་ཚུན་ཡང་དག་པར་སྦྱར་བ་བྱས་ནས་རང་རང་གི་མཐེ་ཆུང་དང༌། སྲིན་ལག་གི་ནང་དུ་མཐེ་བོ་གཉིས་བཅག་ལ་གཟུང་བར་བྱས་ཏེ། འདི་ནི་རྡོ་རྗེ་དྲིལ་བུ་མའི་ལས་ཀྱི་ཕྱག་རྒྱ་ཡིན་ནོ། །ལྕགས་ཀྱུ་མ་ནི་དེ་བཞིན་དུ་ཞེས་བྱ་བ་ལ། དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ལ། གཡས་པའི་མཛུབ་མོའི་ལྕགས་ཀྱུ་ནི་རྡོ་རྗེ་ཆེན་པོ་གསང་བའི་ལྕགས་ཀྱུ་མ་སྟེ། འདིས་ཨོཾ་བཛྲ་དྷ་རི་ཎི་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་མཉམ་པ་ཉིད་ཀྱི་གཟུངས་བརྗོད་ཅིང༌། དེ་བཞིན་གཤེགས་པའི་དཀྱིལ་འཁོར་དུ་འཁོར་དང་བཅས་པའི་དེ་བཞིན་གཤེགས་པ་སྤྱན་དྲང་བར་བྱའོ། །ཁུ་ཚུར་གྱི་ཁྱད་པར་རོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པའི་ཕྱག་རྒྱ་ཆེན་པོ་དང༌། དེ་བཞིན་གཤེགས་པའི་ལས་ཀྱི་ཕྱག་རྒྱ་རྣམས་དང༌། རྡོ་རྗེ་སེམས་དཔའི་ལས་ཀྱི་ཕྱག་རྒྱ་རྣམས་ཀྱི་ཁུ་ཚུར་གྱི་ཁྱད་པར་ཤེས་པར་བྱའོ། །འདིས་ནི་འདི་སྐད་སྟོན་པར་འགྱུར་ཏེ། དེ་བཞིན་གཤེགས་པའི་ཁུ་ཚུར་གཉིས་ལས་བྱུང་བ་ནི་དེ་བཞིན་གཤེགས་པའི་དཀྱིལ་འཁོར་གྱི་ཕྱག་རྒྱ་ཆེན་པོའོ། །སླར་ཡང་རྡོ་རྗེ་ཁུ་ཚུར་མཐེ་བོ་གཉིས་ལས་བྱུང་བ་ནི་རྡོ་རྗེ་སེམས་དཔའི་དཀྱིལ་འཁོར་གྱི་ལས་ཀྱི་ཕྱག་རྒྱའོ། །དེ་བཞིན་གཤེགས་པའི་ཁུ་ཚུར་གཉིས་ལས་བྱུང་བ་ནི་དེ་བཞིན་གཤེགས་པའི་དཀྱིལ་འཁོར་གྱི་ལས་ཀྱི་ཕྱག་རྒྱ་རྣམས་ཏེ་དེ་ལྟར་ཁུ་ཚུར་གྱི་ཁྱད་པར་ཤེས་པར་བྱའོ། །ད་ནི་ཁུ་ཚུར་གྱི་ཁྱད་པར་ཉིད་བསྟན་པར་བྱ་བའི་ཕྱིར། རྡོ་རྗེ་ཁུ་ཚུར་མཐེ་བོ་གཉིས་ལ་གནས་པ་ཞེས་བྱ་བ་ལ་སོགས་པ་གསུངས་ཏེ། དམ་ཚིག་རྡོ་རྗེའི་ཁུ་ཚུར་བཅིངས་ལ་མཐེ་བོ་གཉིས་ཀྱི་རྩེ་མོ་ཕྱི་རོལ་ཏུ་ཡང་དག་པར་སྦྱར་བར་བྱ་སྟེ། འདི་ནི་དེ་བཞིན་གཤེགས་པའི་དཀྱིལ་འཁོར་དུ་དམ་ཚིག་གི་ཕྱག་རྒྱའོ། །དེ་གཉིས་སུ་ཕྱེ་ནས་དེ་བཞིན་གཤེགས་པའི་ཁུ་ཚུར་རོ་ཞེས་བྱ་བ་ལ་འདས་མ་ཐག་ཏུ་བཤད་པའི་མཚན་ཉིད་ཅན་གྱི་དེ་བཞིན་གཤེགས་པའི་དམ་ཚིག་གི་ཁུ་ཚུར་དེ་གཉིས་སུ་བྱས་ནས་དེ་བཞིན་གཤེགས་པའི་ཁུ་ཚུར་གཉིས་འབྱུང་བ་ཡིན་ནོ། །དེ་བཞིན་གཤེགས་པའི་ཁུ་ཚུར་གཉིས་དང༌། དཀྱིལ་འཁོར་
ལྔས་ཕྱག་བཙལ་ཞིང་འཇུག་པར་བྱའོ་ཞེས་བྱ་བ་ལ། འདས་མ་ཐག་ཏུ་བཤད་པའི་དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ། དེ་བཞིན་གཤེགས་པའི་དཀྱིལ་འཁོར་དུ་སྤྱི་བོ་དང་ལག་མཐིལ་གཉིས་དང༌། པུས་མོའི་ལྷ་ང་གཉིས་ཀྱིས་རང་བཞིན་དཀྱིལ་འཁོར་ལྔས་ཕྱག་འཚལ་བ་དང༌། འཇུག་པའི་གླུ་བརྗོད་ཅིང་འཇུག་པར་བྱའོ། །འདི་དག་ཀྱང་དངོས་གྲུབ་ཐམས་ཅད་གསོལ་པ་ཞེས་བྱ་བ་ལ། ཇི་ལྟར་རྡོ་རྗེ་སེམས་དཔའ་གསང་བའི་དཀྱིལ་འཁོར་དུ་གསུངས་པའི་ཕྱག་རྒྱ་ཆེན་པོ་དང༌། དམ་ཚིག་དང་ཆོས་ཀྱི་ཕྱག་རྒྱ་རྣམས་དངོས་གྲུབ་ཐམས་ཅད་སྟེར་བ་དེ་བཞིན་དུ་དེ་བཞིན་གཤེགས་བའི་དཀྱིལ་འཁོར་ལས་གསུངས་པའི། དེ་བཞིན་གཤེགས་པའི་ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང་ལས་ཀྱི་ཕྱག་རྒྱ་འདི་རྣམས་ཀྱིས་ཀྱང་ལས་ཀྱི་དངོས་གྲུབ་ཐམས་ཅད་སྩོལ་བ་ཡིན་ནོ། །དེ་ལྟར་དེ་བཞིན་གཤེགས་པའི་དཀྱིལ་འཁོར་གྱི་ཕྱག་རྒྱ་རྣམས་བསྟན་ནས། ད་ནི་དེ་བཞིན་གཤེགས་པའི་དཀྱིལ་འཁོར་གྱི་ལས་ཀྱི་ཚོགས་སྒྲུབ་པར་བྱེད་པའི་ཕྱག་རྒྱ་རྣམས་བསྟན་པར་བྱ་བའི་ཕྱིར། དེ་ནས་ལས་ཀྱི་ཕྱག་རྒྱ་བཅིངས་པ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྐབས་ལ་བབ་པ་སྟེ། ལས་ཀྱི་ཕྱག་རྒྱ་བཅིང་བའི་སྐབས་སུ་བབ་པ་ཞེས་བྱ་བའི་དོན་ཏོ། །ལས་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་མཚན་ཉིད་ནི་བཅིང་བ་ཞེས་བརྗོད་དོ། །རྡོ་རྗེ་སྐུ་མཆོག་གི་ཞེས་བྱ་བ་ལ། རྡོ་རྗེ་བསྡམས་པ་འོག་ཏུ་བཅིངས་ནས། མཐེ་བོ་གཉིས་བརྟན་པའི་སྐྱིལ་མོ་ཀྲུང་གི་ཚུལ་བྱས་ལ། མཛུབ་མོ་གཉིས་ཡང་དག་པར་སྦྱར་ནས། རྩེ་མོའི་ཚུལ་གྱིས་གཟུང་བར་བྱ་སྟེ། འདི་ནི་རྡོ་རྗེ་སྐུ་མཆོག་གི་ཕྱག་རྒྱའོ། །འདི་བཅིངས་ལ་གར་གྱི་ཚུལ་གྱིས་ཡོངས་སུ་བསྐོར་བར་བྱ་སྟེ། རྡོ་རྗེ་སྐུ་མཆོག་འདིས་ཐམས་ཅད་བསྲུང་བ་ལ་སོགས་པ་བསྒྲུབ་པར་བྱའོ། །ཇི་ལྟར་ཞེ་ན། གཙུག་ཏོར་ཞེས་བྱ་བ་ལ་ཇི་ལྟར་བཤད་པའི་མཚན་ཉིད་ཅན་གྱི་རྡོ་རྗེ་སྐུ་མཆོག་འདི་གཙུག་ཏོར་གྱི་ཚུལ་དུ་བཞག་ན་གཙུག་ཏོར་གྱི་ཕྱག་རྒྱར་འགྱུར་ཏེ། གཙུག་ཏོར་འདིས་ཐམས་ཅད་
བསྲུང་བར་འགྱུར་བ་ཡིན་ནོ། །འདི་ཉིད་ཡོངས་སུ་བསྐོར་ནས་མཛུབ་མོ་གཉིས་ཀྱིས་མཛོད་སྦུའི་ཕྱོགས་སུ་འཛིན་པར་བྱེད་ནས་མཛུབ་མོ་གཉིས་ཀྱིས་མཛོད་སྦུའི་ཕྱོགས་སུ་འཛིན་པར་བྱེད་མཆོག་དེ་ཉིད་སྙིང་གའི་ཕྱོགས་སུ་འཛིན་ན་འདིས་ཆོས་ཐམས་ཅད་འཐོབ་པར་འགྱུར་རོ། །བསྐོར་ཞིང་བསྐོར་བས་མཁུར་ཆོས་དང༌། གཙུག་ཏོར་ཞེས་བྱ་བ་ལ་རྡོ་རྗེ་སྐུ་མཆོག་བཅིངས་ནས་གར་གྱི་ཚུལ་གྱིས་ཡོངས་སུ་བསྐོར་བར་བྱ་སྟེ། དེ་ནས་ཡང་བསྐོར་ཞིང་མཁུ་ཚོར་དང༌། སྤྱི་བོར་གཟུང་བ་བྱས་ནས་འདིས་མཆོད་པ་ཐམས་ཅད་ཀྱི་དངོས་གྲུབ་འཐོབ་པར་འགྱུར་རོ། །དེ་བཞིན་གཤེགས་པའི་ཁུ་ཚུར་གཉིས་ཀྱིས་སྡིགས་མཛུབ་བྱས་ན། འདིས་གདུལ་བ་ཐམས་ཅད་འདུལ་བར་འགྱུར་རོ། །དེ་བཞིན་གཤེགས་པའི་ཁུ་ཚུར་གཉིས་སྦྱིན་པའི་ཚུལ་བྱས་ན་འདིས་བྱང་ཆུབ་ཀྱི་སྤྱོད་པ་རྫོགས་པར་འགྱུར་རོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་གཡོན་པའི་ཁུ་ཚུར་སྙིང་གའི་ཕྱོགས་སུ་གཟུང་སྟེ། དེ་བཞིན་གཤེགས་པའི་ཁུ་ཚུར་གཡས་པ་བརྐྱང་ནས་ས་ལ་རེག་པར་བྱས་ན་འདིས་བདུད་ཐམས་ཅད་འཇོམས་པར་འགྱུར་རོ། །གཡོན་པའི་ཁྲོ་བོའི་མཛུབ་མོ་ཞེས་བྱ་བ་ལ་སོགས་པ་ལ། བྱང་ཆུབ་མཆོག་བཅིངས་ནས་བདག་ཉིད་རྣམ་པར་སྣང་མཛད་དུ་བསྒོམས་ནས་འདིས་དེ་བཞིན་གཤེགས་པ་ཐམས་ཅད་ཉིད་དུ་འགྱུར་བ་ཡིན་ནོ། །རྡོ་རྗེ་བསྡམས་པ་འོག་ཏུ་བཅིངས་ནས་སྐྱིལ་མོ་ཀྲུང་ངོ་ཞེས་བྱ་བ་ལ། རྡོ་རྗེ་བསྡམས་པའི་ནང་དུ་བཅིངས་ལ་མཐེ་བོ་བརྟན་པའི་སྐྱིལ་མོ་ཀྲུང་དུ་བྱས་ཏེ། མཛུབ་མོ་གཉིས་ཡང་དག་པར་སྦྱར་བའི་རྩེ་མོ་འདིར་རྡོ་རྗེ་སྐུ་མཆོག་ཤེས་པར་བྱའོ་ཞེས་བྱ་བའི་ཐ་ཚིག་གོ །དཔལ་མཆོག་དང་པོའི་རྒྱ་ཆེར་བཤད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས། དེ་བཞིན་གཤེགས་པའི་དཀྱིལ་འཁོར་གྱི་ཕྱག་རྒྱའི་བཤད་པ་རྫོགས་སོ།། །།དེ་ལྟར་དེ་བཞིན་གཤེགས་པའི་དཀྱིལ་འཁོར་གྱི་ཕྱག་རྒྱའི་རྟོག་པ་བསྟན་ནས་ད་ནི་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར། དེ་ནས་རྡོ་རྗེའི་རིགས་
ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་སྟེ། ཕྱག་རྒྱའི་མཚན་ཉིད་སྟོན་པའི་སྐབས་སུའོ། །རྡོ་རྗེའི་རིགས་ཏེ། དེ་ལས་བྱུང་བའོ། །གང་གི་ཕྱིར། ཕྱག་ན་རྡོ་རྗེའི་རྡོ་རྗེ་ལས་བྱུང་བའི་ཕྱིར་རོ། །རྡོ་རྗེའི་རིགས་དེའི་ཕྱག་རྒྱ་ནི། ཕྱག་རྒྱ་ཆེན་པོ་ལ་སོགས་པའི་རང་བཞིན་ཅན་ནོ། །དེའི་རྒྱུད་ནི་སྔ་མ་བཞིན་ནོ། །དེའི་ཆོ་ག་རྒྱས་ལ་ནི་རྒྱུན་ནོ། །འཇུག་པའི་ཕྱག་རྒྱ་ནི་རབ་ཏུ་དགའ་བའི་རྡོ་རྗེ་ཁྲོ་བོ་ཞེས་བྱ་བ་ལ། བཅོམ་ལྡན་འདས་བདེ་བ་ཆེན་པོ་རབ་ཏུ་དགའ་བའི་རྡོ་རྗེ་ཁྲོ་བོ་ཧཱུཾ་མཛད་ཀྱི་ཕྱག་རྒྱ་ཆེན་པོ་ནི་རབ་ཏུ་དགའ་བའི་རྡོ་རྗེ་ཁྲོ་བོ་ཞེས་བྱ་བ་སྟེ། དེ་འདིར་རྡོ་རྗེ་རིགས་ཀྱི་དཀྱིལ་འཁོར་དུ་འཇུག་པའི་ཕྱག་རྒྱ་ཡིན་ནོ། །དགུག་པའི་ཕྱག་རྒྱ་དེ་ཉིད་དེ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོ་ཉིད་ནི་མཛུབ་མོ་གཡས་པའི་ལྕགས་ཀྱུ་མ་སྟེ། དཀྱིལ་འཁོར་གྱི་ལྷ་ཐམས་ཅད་དགུག་པའི་ཕྱག་རྒྱའོ། །དེ་ནས་བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོ་འཁོར་དང་བཅས་པ་སྔར་བཤད་པའི་སྤྱན་དྲང་བའི་སྔགས་ཀྱིས་དཀྱིལ་འཁོར་དུ་གཞུག་པར་བྱའོ། །ཕྱག་རྒྱ་ཆེན་པོ་དེ་བཞིན་དུ་བྱའོ་ཞེས་བྱ་བ་ལ། བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོ་འཁོར་དང་བཅས་པ་བྲིས་པའི་ཆོ་གར་ཕྱག་རྒྱ་ཆེན་པོ་ཇི་ལྟར་བསྟན་པ་དེ་བཞིན་དུ་བཅིང་བར་བྱའོ་ཞེས་བྱ་བའི་དོན་ཏོ། །དམ་ཚིག་ནི་དམ་ཚིག་གི་ཕྱག་རྒྱའོ། །འོག་ཏུ་རྡོ་རྗེ་བསྡམས་པ་ནི་རྡོ་རྗེ་བསྡམས་པ་ནང་དུ་བཅིངས་ཏེ། སོར་མོ་ཐམས་ཅད་ནང་དུ་བཅིངས་ཏེ། དེར་མཐེ་བོ་རྡོ་རྗེ་ཞེས་བྱ་བ་ནི་ཇི་ལྟར་བཤད་པའི་རྡོ་རྗེ་བསྡམས་པ་ནང་དུ་བཅིངས་ནས་སྟེང་དུ་ཁ་བལྟས་པར་བྱས་ལ། སོར་མོ་ཐམས་ཅད་ཕན་ཚུན་དུ་ཡང་དག་པར་སྦྱར་ཏེ་འབར་བ་ལྟར་གཟུང་བ་བྱས་ལ། མཐེ་བོ་གཉིས་ཀྱི་རྩེ་མོ་ཡང་དག་པར་སྦྱར་ཞིང་སྲིན་ལག་དང་དབུས་མའི་སོར་མོ་དག་ནི་ནང་དུ་གཟུང་བར་བྱས་ནས་འདིས་ནི་རྡོ་རྗེ་ཁྲོ་བོ་ཏི་རིན་ཏི་རི་ཞེས་བྱ་བ་ལ་རྡོ་རྗེ་འཆང་ཆེན་པོའི་དམ་ཚིག་གི་ཕྱག་རྒྱ་སྟེ་རྡོ་རྗེ་འཆང་ཆེན་པོ་སྒྲུབ་པར་བྱེད་པའོ། །གཞན་དག་ཀྱང་དེ་བཞིན་ནོ་ཞེས་བྱ་བ་ལ་རྡོ་རྗེ་ཁྲོ་བོ་ཡིད་ལས་བྱུང་བའི་དམ་ཚིག་
ཕྱག་རྒྱ་ནི་རྡོ་རྗེ་ཡིད་ལས་བྱུང་བ་ལ་སོགས་པའི་དམ་ཚིག་གི་ཕྱག་རྒྱ་ཉིད་ཡིན་ནོ། །འདིས་ནི་འདི་ལྟར་སྟོན་པར་འགྱུར་ཏེ། དང་པོའི་རྡོ་རྗེ་བཅིངས་ནས་མཛུབ་མོ་གཉིས་ལྕགས་ཀྱུ་ཕྱི་རོལ་དུ་མངོན་པར་ཕྱོགས་པ་དང༌། མཐེ་བོས་འཁྱུད་པ་དང་མཐེ་བོ་གཉིས་ཁ་ཕྱེ་ལ་མཛུབ་མོ་གཉིས་ཀྱི་རྩེ་མོ་དབུས་མ་དག་གི་རྩེ་མོ་ཕན་ཚུན་འདྲེན་ཅིང་མཐའ་མ་དང་སྲིན་ལག་མཉམ་པར་བྱས་ཏེ་ཁ་ཕྱེ་ལ་རྡོ་རྗེ་ཆུ་སྲིན་གྱི་རྒྱལ་མཚན་བསྒྲེང་བ་དང༌། བརླ་གཉིས་ལ་བསྐོར་ཞིང་གནས་པ་དང༌། རྡོ་རྗེ་ཐལ་མོ་བསྐོར་བའི་ཕྱག་རྒྱ་ནི། གྱེན་དུ་གཏོར་དང་ཐུར་དུ་བླུགས། །མཐེ་བོ་སྦྱར་ནས་བསྐོར་བ་དང༌། །རབ་ཏུ་བརྐྱང་ཞིང་བྱུག་པ་དང༌། །བསྐོར་ཞིང་སྤྱི་བོར་གནས་པ་དང༌། །བསྐོར་ནས་སྙིང་གར་གཞག་པར་བྱ། །ཡོངས་སུ་བསྐོར་ཞིང་བཤད་པ་དང༌། །ཁ་ལས་གྱེན་དུ་འབྱིན་པ་དང༌། །དེ་བཞིན་གར་གྱིས་བསྐོར་བའོ། །རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་ཀྱིས་ལྕགས་ཀྱུ་དང༌། །གཡོན་པའི་མཛུབ་མོ་གཡས་ཀྱིས་གཟུང༌། །མཛུབ་མོ་མཐེ་བོའི་འཆིང་བ་དང༌། །མཐེ་བོ་མཐའ་མའི་ནང་དུ་གཞག །ཅེས་བྱ་བ་ནི་རྣམས་རྡོ་རྗེ་ཁྲོ་བོ་ཡིད་ལས་བྱུང་བ་ནས་བརྩམས་ཏེ། རྡོ་རྗེ་ཁྲོ་བོ་དྲིལ་བུའི་བར་གྱི་དམ་ཚིག་གི་ཕྱག་རྒྱ་ཡིན་ནོ། །ཆོས་ཀྱི་ཕྱག་རྒྱ་ནི་དེ་རྣམས་ཉིད་དོ་ཞེས་བྱ་བ་ལ། རྡོ་རྗེ་སེམས་དཔའི་དཀྱིལ་འཁོར་ཆེ་པོ་ལས་གསུངས་པ་ཉིད་འདི་ལྟར་ལྷ་ཐམས་ཅད་ཀྱི་ཕྱག་རྒྱ་ཡིན་ནོ། །དེ་ཡང་འདི་དག་ཡིན་ཏེ་ཧོ་ཞེས་བྱ་བ་ནི་བཅོམ་ལྡན་འདས་ཀྱིའོ། །བྷིད་ཅེས་བྱ་བ་ནི་ཁྲོ་བོ་ཡིད་ལས་བྱུང་བའིའོ། །ཧཱུཾ་ཞེས་བྱ་བ་ནི་ཁྲོ་བོ་ཀཱི་ལི་ཀཱི་ལའིའོ། །དྷྲིད་ཅེས་བྱ་བ་ནི་ཁྲོ་བོ་རྡོ་རྗེ་དྲན་མའིའོ། །ཧཱུཾ་ཞེས་བྱ་བ་ནི་ཁྲོ་བོ་རྡོ་རྗེ་སྙེམས་པའི་ལྷག་མ་རྣམས་ཀྱི་ཡང་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་སྙིང་པོ་རྣམས་ཉིད་ཆོས་ཀྱི་ཕྱག་རྒྱ་ཡིན་ནོ། །ལས་ཀྱི་ཕྱག་རྒྱ་རྣམས་ནི་དེ་བཞིན་དུ་ཞེས་བྱ་བ་ལ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཉིད་ཁྲོ་བོ་རབ་ཏུ་དགའ་བའི་རྡོ་རྗེ་ལ་སོགས་པའི་ལས་ཀྱི་ཕྱག་རྒྱ་རྣམས་སུ་ཤེས་པར་བྱའོ། །ཁུ་ཚུར་གྱི་ཁྱད་པར་རོ་ཞེས་བྱ་བ་
ལ་དེས་རྡོ་རྗེ་ཁུ་ཚུར་གཉིས་ལས་བྱུང་བ་ཡིན་པ་ལ་འདིས་ཁྲོ་བོའི་ཁུ་ཚུར་གཉིས་ལས་བྱུང་བ་སྟེ་འདི་ནི་ཁྱད་པར་ཡིན་ནོ། །རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་སྡིགས་མཛུབ་བོ་ཞེས་བྱ་བ་ལ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་གཉིས་སྡིགས་མཛུབ་ཀྱི་ཚུལ་གྱིས་བཟུང་ལ་སོ་སོར་བསྒྲེང་བར་བྱ་སྟེ། འདི་ནི་ཁྲོ་བོའི་ཁུ་ཚུར་གཉིས་ཀྱི་ཕྱག་རྒྱ་ཡིན་ནོ། །དམ་ཚིག་ལས་བྱུང་བ་ནི་དེ་བཞིན་ནོ་ཞེས་བྱ་བ་ལ་ཇི་ལྟར་རྡོ་རྗེ་སེམས་དཔའི་དཀྱིལ་འཁོར་དུ་དམ་ཚིག་གི་རྡོ་རྗེ་ཁུ་ཚུར་བཅིངས་ལ་དེ་གཉིས་སུ་བྱས་ནས་རྡོ་རྗེ་ཁུ་ཚུར་གཉིས་ཀྱི་ཕྱག་རྒྱ་འབྱུང་བ་དེ་བཞིན་དུ་འདིར་ཡང་ངོ༌། །འདིས་ནི་འདི་སྐད་སྟོན་པར་འགྱུར་ཏེ། དམ་ཚིག་གི་རྡོ་རྗེ་ཁུ་ཚུར་བཅིངས་ཏེ་དེ་གཉིས་སུ་བྱས་ལ་རྡོ་རྗེ་ཁུ་ཚུར་གཉིས་སུ་བྱས་ནས་འདིའི་མཛུབ་མོ་གཉིས་གཟུང་བར་བྱས་ན་ཁྲོ་བོའི་ཁུ་ཚུར་གཉིས་སུ་འགྱུར་བ་ཡིན་ཏེ། འདིས་ལས་ཀྱི་ཕྱག་རྒྱ་རྣམས་བཅིང་བར་བྱའོ། །དེ་དག་ཀྱང་འདི་ཡིན་ཏེ། གཡོན་པའི་བསྙེམས་པ་དང་བཅས་པའི་ཁུ་ཚུར་གཏོད་པའི་ཚུལ་གྱིས་གཟུང་བར་བྱ་སྟེ། འདི་ནི་རབ་ཏུ་དགའ་བའི་རྡོ་རྗེ་ཁྲོ་བོའི་ལས་ཀྱི་ཕྱག་རྒྱ་ཡིན་ནོ། །མདའ་གཞུ་གཏོད་པ་ནི་ཁྲོ་བོ་རྡོ་རྗེ་ཡིད་ལས་བྱུང་བའིའོ། །འོག་ཏུ་འཁྱུད་པའི་ཁྲོ་བོའི་རྡོ་རྗེ་ཀཱི་ལི་ཀཱི་ལའིའོ། །རྒྱལ་མཚན་བསྒྲེང་བ་རྡོ་རྗེ་དྲན་པའིའོ། །སྙེམས་པ་གཉིས་གཏོད་པ་ཁྲོ་བོའི་སྙེམས་པའིའོ། །ཁྲོ་བོའི་ཁུ་ཚུར་གཉིས་པོ་དེ་ཉིད་སྒེག་པ་དང་བཅས་པས་མཐའ་མ་ལ་སོགས་པ་དགྲོལ་བས། གློག་འགྱུ་བའི་གར་གྱིས་ཡོངས་སུ་བསྐོར་བས་སྤྱི་བོའི་ཕྱོགས་སུ་ཀ་པུ་ཊའི་ཐལ་མོ་བཅིངས་ཏེ་ཕབ་ལ། ཁྲོ་བོའི་ཁུ་ཚུར་གཉིས་བསྐོར་ཞིང་བཅིངས་ཏེ། མེ་ཏོག་འབུལ་བའི་ཚུལ་གྱིས་སྟེང་དུ་གཏོར་བར་བྱ་སྟེ་འདི་ནི་དཔྱིད་ཀ་རྡོ་རྗེ་མའིའོ། །དེ་ནས་དེ་བཞིན་དུ་ཁྲོ་བོའི་ཁུ་ཚུར་གར་བྱས་ལ། ཁྲོ་བོའི་ཁུ་ཚུར་གཉིས་བསྐོར་ཞིང་བཅིངས་ཏེ། སྤོས་འབུལ་བའི་ཚུལ་གྱིས་འོག་ཏུ་བླུགས་པར་བྱ་སྟེ། འདི་ནི་རྡོ་རྗེ་སྤྲིན་མའིའོ། །དེ་ནས་དེ་བཞིན་དུ་ཁྲོ་བོའི་རྡོ་རྗེ་ཁུ་ཚུར་གཉིས་བསྐོར་ཞིང་བཅིངས་ཏེ་མར་མེ་འབུལ་བའི་ཚུལ་གྱིས་མཐེ་བོ་མཉམ་པས་བསྐོར་བར་བྱ་སྟེ། འདི་ནི་སྟོན་ཀ་རྡོ་རྗེ་
མའི་འོ། །དེ་བཞིན་དུ་ཁྲོ་བོའི་ཁུ་ཚུར་གཉིས་བཅིངས་ཏེ་དགོད་པའི་ཚུལ་གྱིས་ཡོངས་སུ་བསྐོར་ལ་ཁའི་མཐར་གཟུང་བར་བྱ་སྟེ། འདི་ནི་བཞད་མའི་འོ། །དེ་བཞིན་དུ་ཁྲོ་བོའི་ཁུ་ཚུར་གཉིས་བཅིངས་ཏེ། ངག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱ་སྟེ་འདི་ནི་གླུ་མའི་འོ། །དེ་བཞིན་དུ་ཁྲོ་བོའི་ཁུ་ཚུར་གཉིས་བཅིངས་ཏེ་གར་གྱི་ཚུལ་གྱིས་བསྐོར་བར་བྱས་ཏེ་འདི་ནི་གར་མའིའོ། །གར་དང་བྲལ་བའི་ཁྲོ་བོའི་ཁུ་ཚུར་གཉིས་བཅིངས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ལ་འདི་ནི་ཁྲོ་བོ་རྡོ་རྗེ་ལྕགས་ཀྱུའིའོ། །ཁྲོ་བོའི་ཁུ་ཚུར་གཉིས་བཅིངས་ཏེ་གཡས་པའི་མཛུབ་མོའི་ལྕགས་ཀྱུ་གཡོན་པའི་མཛུབ་མོ་བསྒྲེང་བས་གཟུང་བར་བྱ་སྟེ་འདི་ནི་ཁྲོ་བོ་རྡོ་རྗེ་ཞགས་པའི་འོ། །ཁྲོ་བོའི་ཁུ་ཚུར་གཉིས་བཅིངས་ཏེ་མཛུབ་མོ་དང་མཐེ་བོ་དག་གིས་མདུད་པ་བཅིང་བར་བྱ་སྟེ་འདི་ནི་ཁྲོ་བོ་རྡོ་རྗེ་ལྕགས་སྒྲོག་གིའོ། །ཁྲོ་བོའི་ཁུ་ཚུར་གཉིས་བཅིངས་ཏེ་ཕན་ཚུན་ཡང་དག་པར་སྦྱར་བར་བྱ་སྟེ། འདི་ནི་ཁྲོ་བོ་རྡོ་རྗེ་དྲིལ་བུའི་ལས་ཀྱི་ཕྱག་རྒྱ་ཡིན་ནོ། དེ་ལྟར་དཀྱིལ་འཁོར་གྱི་ཕྱག་རྒྱ་རྣམས་བསྟན་ནས་ད་ནི་ལས་ཀྱི་ཚོགས་སྒྲུབ་པར་བྱེད་པའི་ཕྱག་རྒྱ་རྣམས་བསྟན་པར་བྱ་བའི་ཕྱིར། དེ་ནས་ལས་ཀྱི་ཕྱག་རྒྱ་ཞེས་བྱ་བ་གསུངས་ཏེ། འཇིག་རྟེན་གསུམ་མ་ལུས་པ་ལས་རྣམ་པར་རྒྱལ་བ་ལ་སོགས་པའི་ལས་སྒྲུབ་པར་བྱེད་པའི་ཕྱག་རྒྱ་ནི་ལས་ཀྱི་ཕྱག་རྒྱ་རྣམས་སོ། །རྡོ་རྗེ་ཧཱུཾ་མཛད་ལས་བྱུང་བའོ་ཞེས་བྱ་བ་ལ། འཇིག་རྟེན་གསུམ་མ་ལུས་པ་ལས་རྣམ་པར་རྒྱལ་བ་ལ་སོགས་པ་སྒྲུབ་པར་བྱེད་པའི་ཕྱག་རྒྱ་རྣམས་ཀྱང་རྡོ་རྗེ་ཧཱུཾ་མཛད་ལས་བྱུང་བར་གཟུང་བར་བྱའོ། །རྡོ་རྗེ་ཧཱུཾ་མཛད་དེ་ཇི་ལྟ་བུ་ཡིན་ཞེ་ན། ལག་པ་རྡོ་རྗེ་ཞེས་བྱ་བ་ལ་སོགས་པ་ལ། རྡོ་རྗེ་ཁུ་ཚུར་གཉིས་བཅིངས་ཏེ། རྡོ་རྗེ་ལག་པ་མཉམ་སྦྱར་ནས། །མཐེ་ཆུང་ལྕགས་ཀྱུ་བཅིངས་བྱས་ཏེ། མཛུབ་མོ་གཉིས་ཀྱི་སྡིགས་མཛུབ་ནི། །འཇིག་རྟེན་གསུམ་རྒྱལ་བྱ་བ་ཡིན། །དེ་ནི་རྡོ་རྗེ་ཧཱུཾ་མཛད་དོ། །འདིས་འཇིག་རྟེན་གསུམ་མ་ལུས་པ་ལས་རྣམ་པར་རྒྱལ་བའི་དངོས་གྲུབ་འཐོབ་པར་འགྱུར་རོ། །གཡོན་པའི་མཛུབ་མོ་ཞེས་བྱ་བ་
ལ། རྡོ་རྗེ་ཧཱུཾ་མཛད་བཅིངས་ནས་གཡོན་པའི་མཐེ་མཛུབ་ཀྱིས་བསྒྲུབ་བྱ་ལ་སྡིགས་མཛུབ་བྱ་སྟེ། འདིས་སེམས་ཅན་གྱི་ཁམས་ཐམས་ཅད་ལས་རྣམ་པར་རྒྱལ་བར་འགྱུར་རོ། །རྡོ་རྗེ་ཧཱུཾ་མཛད་གཡོན་པ་བརྐྱང་བས་གནས་པ་ཞེས་བ་པ་ལ། ཇི་ལྟར་བཤད་པའི་རྡོ་རྗེ་ཧཱུཾ་མཛད་བཅིངས་ལ་གཡོན་བརྐྱང་བའི་ལྟ་སྟངས་ཀྱིས་འདུག་ནས་བསྒྲུབ་བྱ་ལ་སྡིགས་མཛུབ་བྱས་ནས་འདིས་ནི་ཁམས་གསུམ་མ་ལུས་པ་ལས་རྣམ་པར་རྒྱལ་བར་འགྱུར་རོ། །མཛུབ་མོའི་རྡོ་རྗེས་སྡིགས་མཛུབ་པོ། །ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ཏེ། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བ་བྱས་ནས་དེས་སྡིགས་མཛུབ་བྱས་ནས་དགུག་པ་ལ་སོགས་པའི་ལས་ཐམས་ཅད་འགྲུབ་པར་བྱེད་པ་ཡིན་ནོ། །སྣའི་དབུགས་དང་ཡི་གེ་ཧཱུཾ་གིས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ཏེ་སྣའི་དབུགས་དང་ཡི་གེ་ཧཱུཾ་གིས་ཐམས་ཅད་བཏུང་བར་འགྱུར་རོ། །ཁྲོས་བས་ཡི་གེ་ཨ་སྦྱར་པར་བྱའོ་ཞེས་བྱ་བ་ལ། རྡོ་རྗེ་ཧཱུཾ་མཛད་བཅིངས་ཏེ་ཁྲོས་པས་ཡི་གེ་ཨ་བརྗོད་པར་བྱས་ན་འདིས་ཐམས་ཅད་བབ་པར་འགྱུར་རོ། །ཧ་ཧ་དགོད་པར་བྱ་ཞེས་བྱ་བ་ལ། རྡོ་རྗེ་ཧཱུཾ་མཛད་བཅིངས་ཧེ་ཧ་ཧ་ཞེས་དགོད་པར་བྱས་ནས་འདིས་ཐམས་ཅད་གཞོན་པར་འགྱུར་རོ། །སྙིང་གར་རྡོ་རྗེ་བསྒོམས་པས་རྡོ་རྗེའི་ཕྱག་རྒྱ་ཆེན་པོའི་ཞེས་བྱ་བ་ལ། རང་གི་སྙིང་གར་ཁྲོ་བོ་རྡོ་རྗེ་རྩེ་བཞི་པ་བསྒོམ་ཞིང༌། བཅོམ་ལྡན་འདས་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱ་ཆེན་པོ་བཅིངས་ནས་ལས་ཐམས་ཅད་དགོས་པའི་དངོས་གྲུབ་ཐམས་ཅད་སྒྲུབ་པར་བྱེད་པ་ཡིན་ནོ། །དཔལ་མཆོག་དང་པོའི་རྒྱ་ཆེར་བཤད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པའི་རྩ་བའི་རྒྱུད་ཀྱི་རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་རྒྱའི་རྟོག་པ་བཤད་པ་རྫོགས་སོ།། །།དེ་ལྟར་རྡོ་རྗེ་རིགས་ཀྱི་ཕྱག་རྒྱའི་རྟོག་པ་བསྟན་ནས་ད་ནི་པདྨའི་རིགས་ཀྱི་ཕྱག་རྒྱའི་རྟོག་པ་བསྟན་པའི་ཕྱིར། །དེ་ནས་པདྨའི་རིགས་ཀྱི་ཕྱག་རྒྱའི་ཆོས་རྒྱས་པའི་རྒྱུད་ཅེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །པདྨའི་ནི་རྡོ་རྗེ་འཇིག་རྟེན་དབང་ཕྱུག་སྟེ་དེའི་རིགས་ནི་པདྨའི་རིགས་སོ། །དེའི་ཕྱག་རྒྱ་ཆེན་པོ་དང་དམ་
ཚིག་དང་ཆོས་དང་ལས་ཀྱི་ཕྱག་རྒྱ་རྣམས་སོ། །དེའི་ཆོ་ག་རྒྱས་པའི་རྒྱུད་ནི་སྒྲའི་ཚོགས་སོ། །དེ་བཞིན་གཤེགས་པའི་རྡོ་རྗེའི་མཛུབ་མོ་གཉིས་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེ་ནི་དེ་བཞིན་གཤེགས་པའི་རྡོ་རྗེ་སྟེ། མཛུབ་མོ་གཉིས་བསྒྲེང་བ་བཀུག་ལ་པདྨ་འདབ་མ་གཉིས་ཀྱི་རྣམ་པས་གར་བྱས་ལ་སྙིང་གའི་ཕྱོགས་སུ་གཟུང་བར་བྱ་སྟེ། འདི་ནི་རྡོ་རྗེ་པདྨ་ཞེས་བྱ་བ་ལ་འཇིག་རྟེན་དབང་ཕྱུག་གི་དཀྱིལ་འཁོར་དུ་འཇུག་པའི་ཕྱག་རྒྱ་ཡིན་ནོ། །འདི་ཉིད་མཛུབ་མོ་གཉིས་ཀྱི་ལྕགས་ཀྱུས་རྡོ་རྗེ་འཇིག་རྟེན་དབང་ཕྱུག་འཁོར་དང་བཅས་པ་སྤྱན་དྲང་བའི་སྔགས་ཀྱིས་སྤྱན་དྲང་བར་བྱའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་ནི་དེ་བཞིན་དུའོ་ཞེས་བྱ་བ་ལ་ཇི་ལྟར་རྡོ་རྗེ་སེམས་དཔའི་དཀྱིལ་འཁོར་ཆེན་པོར་དཔལ་རྡོ་རྗེ་སེམས་དཔའ་ལ་སོགས་པ་རྣམས་ཀྱི་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་རྣམས་བསྟན་པ་དེ་བཞིན་འདིར་ཡང་ཤེས་པར་བྱའོ། །དམ་ཚིག་གི་ཁྱད་པར་དང་ཁུ་ཚུར་གྱི་ཁྱད་པར་རོ་ཞེས་བྱ་བ་ལ་འདིར་ཡང་དམ་ཚིག་གི་ཕྱག་རྒྱ་ཁྱད་པར་ཅན་དུ་ཤེས་པར་བྱའོ། །ཕྱག་རྒྱ་ཆེན་པོ་དང༌། ལས་ཀྱི་ཕྱག་རྒྱ་རྣམས་བསྐྱེད་པའི་རྒྱུར་གྱུར་པའི་ཁུ་ཚུར་གྱི་ཁྱད་པར་ཡང་ཤེས་པར་བྱ་བ་ཡིན་ནོ། །ད་ནི་དམ་ཚིག་གི་ཕྱག་རྒྱའི་ཁྱད་པར་དང༌། ཁུ་ཚུར་གྱི་ཁྱད་པར་བསྟན་པར་བྱ་བའི་ཕྱིར། ཁ་འབུས་པའི་ཐལ་མོ་ཞེས་བྱ་བ་ལ་སོགས་པ་གསུངས་ཏེ། ཁ་འབུས་པའི་ཐལ་མོས་བཅིངས་ནས་མཐེ་བོ་གཉིས་མཐེ་ཆུང་གཉིས་ཁ་ཕྱེ་བར་བྱས་ལ། པདྨ་འདབ་མ་བཞི་པའི་ཚུལ་གྱིས་གཟུང་བར་བྱ་སྟེ། འདི་ནི་པདྨ་ཆེན་པོ་ཞེས་བྱ་བ་འཕགས་པ་སྤྱན་རས་གཟིགས་དབང་ཕྱུག་གི་དམ་ཚིག་གི་ཕྱག་རྒྱ་ཡིན་ནོ། །ཐམས་ཅད་བཅིང་བ་ནི་ཇི་ལྟ་བ་བཞིན་ནོ་ཞེས་བྱ་བ་ལ། པདྨ་ཡིད་ལས་བྱུང་བ་ལ་སོགས་པ་རྣམས་ཀྱི་ཁ་འབུས་པའི་ཐལ་མོ་ལས་བྱུང་བའི་དམ་ཚིག་གི་ཕྱག་རྒྱ་བཅིང་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་ཚུལ་གྱིས་ཤེས་པར་བྱའོ་ཞེས་བྱ་བའི་དོན་ཏོ། །དེ་ལྟར་དམ་ཚིག་གི་ཕྱག་རྒྱའི་ཁྱད་པར་བསྟན་ནས་ཁུ་ཚུར་
གྱི་ཁྱད་པར་བསྟན་པར་བྱ་བའི་ཕྱིར། ཁུ་ཚུར་གྱི་ཁྱད་པར་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་དང་དབུས་མ་གཉིས་མཉམ་པོར་བྱས་ལ། མཐེ་བོའི་རྩེ་མོར་རང་རང་གི་དབུས་མ་དང་མཛུབ་མོའི་རྩེ་མོ་སྦྱར་ལ་གཟུང་བར་བྱ་སྟེ། འདི་ནི་པདྨའི་ཁུ་ཚུར་གྱི་དམ་ཚིག་གི་ཕྱག་རྒྱ་ཡིན་ནོ། །འདི་གཉིས་སུ་བྱས་ལ་ཕྱག་རྒྱ་ཆེན་པོ་དང་ལས་ཀྱི་ཕྱག་རྒྱ་རྣམས་བཅིང་བར་བྱའོ། །འདིས་ནི་འདི་སྐད་སྟོན་པར་འགྱུར་ཏེ། པདྨའི་ཁུ་ཚུར་གཉིས་བཅིངས་ལ་གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨ་བླངས་ཏེ་བསྙེམས་པར་བྱས་ནས་གཡས་པའི་པདྨའི་ཁུ་ཚུར་གྱིས་རྡོ་རྗེ་རྩེ་ལྔ་པ་བླངས་ཏེ་གསོར་ལ་གཏོད་པའི་ཚུལ་གྱིས་རང་གི་སྙིང་གར་འཛིན་པར་བྱ་སྟེ། འདི་ནི་རྡོ་རྗེ་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་ཡིན་ནོ། །འདི་བཞིན་དུ་པདྨའི་ཡིད་ལས་བྱུང་བ་ལ་སོགས་པ་རྣམས་ཀྱི་རང་གི་ཕྱག་རྒྱ་ཆེན་པོ་བྲིས་པའི་རྗེས་སུ་འབྲངས་ནས་བཅིང་བར་བྱའོ། །བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་དམ་ཚིག་གི་ཕྱག་རྒྱ་ནི་པདྨ་ཆེན་པོ་ཞེས་བྱ་བས་བསྟན་ཟིན་ཏོ། །ཁ་འབུས་པའི་ཐལ་མོ་བཅིངས་ལ་མཛུབ་མོ་གཉིས་ཀྱིར་རྩེ་མོ་ཕྱི་རོལ་དུ་ཕྱོགས་པར་བཀུག་པར་བྱས་ཏེ་འདི་ནི་པདྨའི་ཡིད་ལས་བྱུང་བའིའོ། །ཁ་འབུས་པའི་ཐལ་མོ་བཅིངས་ཏེ་མཐེ་བོ་གཉིས་པའི་སྐྱིལ་མོ་ཀྲུང་གིས་འཁྱུད་པར་བྱ་སྟེ། འདི་ནི་པདྨ་ཀཱི་ལི་ཀཱི་ལའིའོ། །ཁ་འབུས་པའི་ཐལ་མོ་གཡས་པའི་མཛུབ་མོའི་ལྕགས་ཀྱུས་གཡོན་པའི་དབུས་མའི་རྩེ་མོ་གཟུང་བ་དང༌། གཡོན་པའི་མཛུབ་མོའི་ལྕགས་ཀྱུས་གཡས་པའི་དབུས་མའི་རྩེ་མོར་གསུང་བར་བྱས་ལ་མཐེ་བོ་གཉིས་སོ་སོར་བསྒྲེང་སྟེ་སྲིན་ལག་གཉིས་ཀྱི་རྩེ་མོ་ཡང་དག་པར་སྦྱར་ཞིང་ཐ་མ་གཉིས་སོ་སོར་རབ་ཏུ་ཕྱིར་བརྐྱང་ནས་གཟུང་བར་བྱས་ཏེ། འདི་ནི་པདྨ་དྲན་པའིའོ། །ཁ་འབུས་པའི་ཐལ་མོ་བསྐོར་ནས་བརླ་གཉིས་ལ་གཟུང་བར་བྱ་སྟེ་འདི་ནི་པདྨ་སྙེམས་མའིའོ། །ཁ་འབུས་པའི་ཐལ་མོ་བསྐོར་ཞིང་བཅིངས་ལ་སྟེང་དུ་གཏོར་བར་བྱ་སྟེ་འདི་ནི་དཔྱིད་ཀའི་རྡོ་རྗེ་མའིའོ། །དེ་ཉིད་སྤོས་འབུལ་བའི་ཚུལ་གྱིས་འོག་ཏུ་བླུགས་པར་བྱས་ཏེ་འདི་ནི་སྤྲིན་མའིའོ། །དེ་ཉིད་མར་མེ་
འབུལ་བའི་ཚུལ་གྱིས་མཐེ་བོ་སྦྱར་ཞིང་བསྐོར་བའི་རྣམ་པས་གཟུང་བར་བྱས་ཏེ། འདི་ནི་སྟོན་ཀ་རྡོ་རྗེ་མའིའོ། །དེ་ཉིད་སྙིང་གའི་ཕྱོགས་སུ་བརྐྱང་ཞིང་དྲིས་བྱུག་པའི་ཚུལ་དུ་རབ་ཏུ་སྦྱར་ཞིང་བསྐོར་ལ་སྤྱི་བོར་གཟུང་བར་བྱ་སྟེ་འདི་ནི་དགུན་མའིའོ། །པདྨའི་ཐལ་མོ་བསྐོར་ཞིང་སྙིང་གའི་ཕྱོགས་སུ་གཟུང་བ་སྟེ་འདི་ནི་སྒེག་མའིའོ། །པདྨའི་ཐལ་མོ་སྦྱར་ཞིང་དགོད་པའི་ཚུལ་གྱིས་ཡོངས་སུ་བསྐོར་ལ་ཁའི་ཐད་ཀར་གཟུང་བར་བྱས་ཏེ་འདི་ནི་བཞད་པ་མའིའོ། །པདྨའི་ཐལ་མོ་བསྐོར་བ་དག་འབྱིན་པའི་ཚུལ་ཁ་ལས་གྱེན་དུ་དྲང་བར་བྱ་སྟེ་འདི་ནི་གླུ་མའིའོ། །པདྨའི་ཐལ་མོ་བསྐོར་ཞིང་གར་གྱི་ཚུལ་གྱིས་བསྐོར་བར་བྱ་སྟེ་འདི་ནི་པདྨ་གར་མའིའོ། །ཁ་འབུས་པའི་ཐལ་མོའི་མཛུབ་མོ་གཉིས་ཀྱི་ལྕགས་ཀྱུ་གཉིས་བྱ་སྟེ་འདི་ནི་པདྨ་ལྕགས་ཀྱུའིའོ། །ཁ་འབུས་པའི་ཐལ་མོ་གཡོན་པའི་མཛུབ་མོ་བསྒྲེངས་ལ་གཡས་པའི་མཛུབ་མོས་གཟུང་བར་བྱ་སྟེ་འདི་ནི་པདྨ་ཞགས་པ་མའིའོ། །ཁ་འབུས་པའི་ཐལ་མོ་བཅིངས་ལ་མཛུབ་མོ་དང་མཐེ་བོ་དག་གིས་ལུ་གུ་རྒྱུད་དུ་བཅིང་བར་བྱ་སྟེ་འདི་ནི་པདྨ་ལྕགས་སྒྲོག་གིའོ། །ཁ་འབུས་པའི་ཐལ་མོའི་མཐེ་བོ་གཉིས་རང་གི་སྲིན་ལག་དང་མཐེའུ་ཆུང་གི་ནང་དུ་བཅུག་ལ་གཟུང་བར་བྱས་ཏེ་འདི་ནི་པདྨ་དྲིལ་བུའི་དམ་ཚིག་གི་ཕྱག་རྒྱ་ཡིན་ནོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཉིད་ཆོས་ཀྱི་ཕྱག་རྒྱར་གཟུང་བར་བྱའོ། །པདྨའི་ཁུ་ཚུར་གཉིས་ཀྱིས་ལས་ཀྱི་ཕྱག་རྒྱ་རྣམས་བཅིང་བར་བྱའོ། །གཡོན་པའི་ཁུ་ཚུར་གྱིས་བསྙེམས་པ་བྱས་ནས་གཡས་པའི་པདྨའི་ཁུ་ཚུར་རང་གི་སྙིང་གར་གཏོད་པའི་ཚུལ་གྱིས་གཟུང་བར་བྱ་བ་སྟེ། འདི་ནི་རྡོ་རྗེ་འཇིག་རྟེན་དབང་ཕྱུག་གི་ལས་ཀྱི་ཕྱག་རྒྱ་ཡིན་ནོ། །གཡོན་པའི་པདྨའི་ཁུ་ཚུར་གྱིས་གཞུ་བླང་བའི་ཚུལ་གྱིས་ཏེ། དེ་ཉིད་སྙིང་གའི་ཕྱོགས་སུ་གྱེན་དུ་ཁ་བལྟས་པར་གཞག་པ་དེའི་སྟེང་དུ་གཡས་པའི་པདྨའི་ཁུ་ཚུར་འོག་ཏུ་ཁ་བལྟས་པར་བཞག་ལ་སླར་དེས་མདའ་གསོར་པའི་ཚུལ་དུ་བྱས་ན་འདི་ནི་པདྨ་ཡིད་ལས་བྱུང་བའིའོ། །པདྨའི་ཁུ་ཚུར་གཉིས་ཀྱིས་བདག་ཉིད་ལ་འཁྱུད་པར་བྱ་སྟེ། འདི་ནི་ཀཱི་ལི་ཀཱི་ལའིའོ། །པདྨའི་ཁུ་ཚུར་གཉིས་ཀྱིས་རྒྱལ་
མཚན་བསྒྲེང་བའི་ཚུལ་དུ་བྱ་སྟེ་འདི་ནི་པདྨ་དྲན་པའིའོ། །པདྨའི་ཁུ་ཚུར་གཉིས་ནང་དུ་ཁ་བལྟས་པའི་ལག་པ་གཉིས་དཀུར་གཞག་པར་བྱ་སྟེ་འདི་ནི་པདྨ་སྙེམས་པའིའོ། །པདྨའི་ཁུ་ཚུར་གཉིས་བཅིངས་ཏེ་སྒེག་པ་དང་བཅས་པས་མཐའ་མ་ལ་སོགས་པ་དཀྲོལ་ཞིང་ཀློག་འགྱུ་བའི་གར་གྱིས་གཡས་སུ་བསྐོར་ནས་སྤྱི་བོའི་ཕྱོགས་སུ་ཀ་པུ་ཊའི་ཁ་སྦྱོར་བཅིངས་ཏེ་ཕབ་ལ། པདྨའི་ཁུ་ཚུར་གཉིས་བསྐོར་ཞིང་བཅིངས་ཏེ། སྙིང་གའི་ཕྱོགས་སུ་བཞག་ནས་མེ་ཏོག་འབུལ་བའི་ཚུལ་གྱིས་གྱེན་དུ་གཏོར་བར་བྱ་སྟེ། འདི་ནི་དཔྱིད་ཀ་པདྨའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ལ་སྙིང་གའི་ཕྱོགས་སུ་བཅིངས་ཏེ་སྤོས་འབུལ་བའི་ཚུལ་གྱིས་ཐུར་དུ་བླུགས་པར་བྱ་སྟེ་འདི་ནི་པདྨ་སྤྲིན་མའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ལ་མར་མེ་འབུལ་བའི་ཚུལ་གྱིས་མཐེ་བོ་གཉིས་སྦྱར་ཞིང་བསྐོར་བར་བྱ་སྟེ། འདི་ནི་སྟོན་ཀ་པདྨའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ཏེ་སྙིང་གའི་ཕྱོགས་སུ་བརྐྱང་ལ་དྲིས་བྱུག་པའི་ཚུལ་གྱིས་རབ་ཏུ་སྦྱར་ཏེ། སླར་ཡང་པདྨའི་ཁུ་ཚུར་གཉིས་བསྐོར་ཞིང་བཅིངས་ནས་སྤྱི་བོའི་ཕྱོགས་སུ་གཟུང་བར་བྱ་སྟེ་འདི་ནི་པདྨ་དགུན་མའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ལ་སྙིང་གའི་ཕྱོགས་སུ་གཟུང་བར་བྱ་སྟེ། འདི་ནི་པདྨ་སྒེག་མའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ལ་དགོད་པའི་ཚུལ་གྱིས་ཡོངས་སུ་བསྐོར་ཞིང་ཁའི་མཐར་གཟུང་བར་བྱ་སྟེ་འདི་ནི་པདྨ་བཞད་མའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ལ་ཁ་ལས་གྱེན་དུ་དྲང་བར་བྱ་སྟེ་འདི་ནི་པདྨ་གླུ་མའིའོ། །དེ་བཞིན་དུ་པདྨའི་ཁུ་ཚུར་གཉིས་བསྐོར་ཞིང་བཅིངས་ལ་གར་གྱི་ཚུལ་གྱིས་བསྐོར་བར་བྱ་སྟེ་འདི་ནི་པདྨ་གར་མའིའོ། །གར་དང་བྲལ་བའི་པདྨའི་ཁུ་ཚུར་གཉིས་བཅིངས་ཏེ། མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ཏེ་འདི་ནི་པདྨ་ལྕགས་ཀྱུ་མའིའོ། །པདྨའི་ཁུ་ཚུར་གཉིས་བཅིངས་ལ་གཡས་པའི་མཛུབ་མོའི་ལྕགས་ཀྱུས་གཡོན་པའི་མཛུབ་མོ་བསྒྲེང་བ་གཟུང་བར་བྱ་སྟེ། འདི་ནི་པདྨ་ཞགས་པའིའོ།།
པདྨའི་ཁུ་ཚུར་གཉིས་བཅིངས་ཏེ་མཛུབ་མོ་དང་མཐེ་བོ་དག་གིས་མདུད་པ་བཅིང་བར་བྱ་སྟེ། འདི་ནི་པདྨ་ལྕགས་སྒྲོག་མའིའོ། །པདྨའི་ཁུ་ཚུར་གཉིས་བཅིངས་ཏེ་ཕན་ཚུན་དུ་ཡང་དག་པར་སྦྱར་ལ་མཐེ་ཆུང་སྲིན་ལག་གི་ནང་དུ་མཐེ་བོ་གཉིས་བཅུག་ནས་གཟུང་བར་བྱ་སྟེ་འདི་ནི་པདྨའི་དྲིལ་བུ་ལས་ཀྱི་ཕྱག་རྒྱ་ཡིན་ནོ། །དེ་ནས་ལས་ཀྱི་ཕྱག་རྒྱ་རྣམས་ཞེས་བྱ་བ་ལ་ལས་ཀྱི་ཚོགས་སྒྲུབ་པར་བྱེད་པའི་ཕྱག་རྒྱ་ནི་ལས་ཀྱི་ཕྱག་རྒྱ་རྣམས་ཏེ་དེ་དག་བརྗོད་པར་བྱའོ་ཞེས་བྱ་བའི་དོན་ཏོ། །པདྨ་ཆེན་པོ་བཤད་དོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་འཇིག་རྟེན་དབང་ཕྱུག་གི་དམ་ཚིག་གི་ཕྱག་རྒྱ་ གང་ཡིན་པ་དེ་ནི་པདྨ་ཆེན་པོ་ཞེས་བྱ་བ་སྟེ། དེ་བཅིངས་ནས་སྙིང་གར་གཞག་པར་བྱས ་ན་སྒྲིབ་པ་ཐམས་ཅད་རྣམ་པར་སྦྱོར་བར་འགྱུར་རོ། །དེ་ཉིད་སྤྱི་བོ་ཞེས་བྱ་བ་ལ་པདྨ་ཆེན་པོ་དེ་ཉིད་བཅིངས་ལ་སྤྱི་བོའི་ཕྱོགས་སུ་གཟུང་བར་བྱས་ན་ཐམས་ཅད་བསྲུང་བར་འགྱུར་རོ། །དེ་ཉིད་རྡོ་རྗེ་ལྟ་བས་བལྟ་བར་བྱའོ་ཞེས་བྱ་བ་ལ་པདྨ་ཆེན་པོ་དེ་ཉིད་བཅིངས་ལ་རྡོ་རྗེ་ལྟ་བས་བལྟ་བར་བྱས་ན་ཐམས་ཅད་རྗེས་སུ་ཆགས་པར་འགྱུར་རོ། །དེ་ཉིད་སོར་མོ་ཐམས་ཅད་ལ་ཁ་ཕྱེ་བའོ་ཞེས་བྱ་བ་ལ་པདྨ་ཆེན་པོ་བཅིངས་ལ་སོར་མོ་ཐམས་ཅད་ཁ་ཕྱེ་ལ་པདྨ་འདབ་མ་བརྒྱད་པའི་རྣམ་པས་གཟུང་བར་བྱས་ན་ཏིང་ངེ་འཛིན་ཐམས་ཅད་ཐོབ་པར་འགྱུར་རོ། །དེ་ཉིད་རྡོ་རྗེ་གཉིས་ཀྱི་མིག་གོ་ཞེས་བྱ་བ་ལ་མཛུབ་མོས་འཁྱུད་པའི་དབུས་མའི་མིག་འབྲས་མཐེ་བོ་དང་སྦྱར་བ་ཞེས་བྱ་བ་གང་ཡིན་པ་དེ་ནི་རྡོ་རྗེ་གཉིས་ཀྱི་མིག་སྟེ་འདིས་བུད་མེད་ཐམས་ཅད་དབང་དུ་བྱེད་པར་འགྱུར་རོ། །འདི་ཉིད་ལེགས་པར་བྱེད་པའོ་ཞེས་བྱ་བ་ལ་པདྨ་ཆེན་པོ་བཅིངས་ཏེ་མཛུབ་མོ་དང་མཐེ་བོ་དག་གིས་ལེགས་པར་སྦྱིན་པའི་ཚུལ་དུ་བྱ་བ་སྟེ་འདིས་སྐྱེས་པ་ཐམས་ཅད་དབང་དུ་བྱེད་པར་འགྱུར་རོ། །དེ་ཉིད་དཔྲལ་བར་བྱས་ནས་གསོལ་བ་གདབ་པར་བྱའོ་ཞེས་བྱ་བ་ལ། པདྨ་ཆེན་པོ་དབྲལ་བའི་ཕྱོགས་སུ་གཟུང་ཞིང་གསོལ་བ་གདབ་པར་བྱ་སྟེ་རྨི་ལམ་འདེབས་པ་གྲུབ་པར་འགྱུར་རོ། །དེ་ཉིད་གཡོན་པའི་སྐྱེ་གནས་སུ་མཐེ་བོའི་རྟགས་ཀྱི་མིང་ལའོ་ཞེས་བྱ་བ་ལ་པདྨ་ཆེན་པོ་བཅིངས་ཏེ་
གཡོན་པའི་མཛུབ་མོ་དང་མཐེ་བོ་སྐྱེ་གནས་བྱས་ལ་སྐྱེ་གནས་དེ་ལ་གཡས་པའི་མཐེ་བོ་འོག་ཏུ་ཁ་བལྟ་བ་བཅུག་སྟེ། མཆོག་འདོད་པའི་བསམ་པས་སྙིང་པོ་བཟླ་བར་བྱ་སྟེ། དེ་ལྟར་བྱས་ན་མཆོག་ཐམས་ཅད་བསྐྱེད་པར་འགྱུར་རོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས། རྡོ་རྗེ་འཇིག་རྟེན་དབང་ཕྱུག་གི་ཕྱག་རྒྱའི་རྟོག་པའི་བཤད་པ་རྫོགས་སོ།། །།དེ་ལྟར་རྡོ་རྗེ་འཇིག་རྟེན་དབང་ཕྱུག་གི་ཕྱག་རྒྱའི་རྟོག་པ་བསྟན་ནས་ད་ནི་ནོར་བུའི་རིགས་ཀྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར་དེ་ནས་ནོར་བུའི་རིགས་ཀྱི་ཕྱག་རྒྱའི་རྒྱུད་ཀྱི་ཆོ་ག་རྒྱས་པའོ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །ཇི་ལྟ་བ་བཞིན་དུ་བཤད་པའི་འཕགས་པ་ནམ་མཁའི་སྙིང་པོ་ཕྱག་ན་གནས་པའི་ཡིད་བཞིན་གྱི་ནོར་བུ་རིན་པོ་ཆེ་ནི་ནོར་བུ་སྟེ། དེའི་རིགས་ནི་དེ་ལས་བྱུང་བ་རིན་པོ་ཆེའི་རིགས་སོ། །དེའི་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་ཏེ་སྟོན་པར་བྱེད་པའི་སྒྲའི་ཚོགས་ནི་རྒྱུད་དོ། །དེའི་ཆོག་རྒྱས་པ་ནི་ཕྱག་རྒྱ་ཆེན་པོ་ལ་སོགས་པའི་རྫོགས་པར་བྱེད་པའི་རྒྱུན་ནོ། །རྡོ་རྗེ་ཐལ་མོ་ཞེས་བྱ་བ་ལ་སོགས་པ་ལ་རྡོ་རྗེའི་ཐལ་མོ་བཅིངས་ཏེ་མཐེ་བོ་གཉིས་ཡང་དག་པར་སྦྱར་ནས་མཛུབ་མོའི་རྩེ་མོ་བསྒྲེང་བར་བྱས་ལ། མཛུབ་མོ་གཉིས་རྩེ་མོ་ཕན་ཚུན་དུ་སྦྱར་ཏེ་སྟེང་ནས་བཀུག་པ་རིན་པོ་ཆེར་བྱས་ནས་མཐེ་བོའི་རྩེ་མོ་གཉིས་སུ་སྦྱར་བ་བྱས་ཏེ། དེ་ནས་མཛོད་སྤུའི་ཕྱོགས་སུ་གཟུང་བར་བྱས་ན་འདི་ནི་རྡོ་རྗེ་རིན་ཆེན་གྱི་ཕྱག་རྒྱ་སྟེ་འདི་ནི་ནོར་བུའི་རིགས་ཀྱི་དཀྱིལ་འཁོར་དུ་གཞུག་པར་འགྱུར་རོ། །རྡོ་རྗེ་རིན་ཆེན་གྱི་ཕྱག་རྒྱ་ཉིད་ཀྱི་མཛུབ་མོ་གཉིས་ལྕགས་ཀྱུས་བཅོམ་ལྡན་འདས་ནམ་མཁའི་སྙིང་པོ་འཁོར་དང་བཅས་པ་སྤྱན་འདྲེན་པའི་སྔགས་དང་བཅས་པས་སྤྱན་དྲངས་ལ་དཀྱིལ་འཁོར་དུ་གཞུག་པར་བྱའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བ་ནི་དེ་བཞིན་ནོ་ཞེས་བྱ་བ་ལ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་ཆེན་པོ་དང༌། ཆོས་དང་ལས་
ཀྱི་ཕྱག་རྒྱ་བཅིང་བ་བཞིན་དུ་འདིར་ཡང་ཕྱག་རྒྱ་ཆེན་པོ་དང༌། ཆོས་དང་ལས་ཀྱི་ཕྱག་རྒྱ་བཅིང་བ་ཤེས་པར་བྱའོ་ཞེས་བྱ་བའི་ཐ་ཚིག་གོ །དམ་ཚིག་ནི་རྡོ་རྗེ་བསྡམས་པའི་མཛུབ་མོ་ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་བཅིངས་ཏེ་མཐེ་བོ་གཉིས་བསྒྲེང་བའི་རྩེ་མོ་ཡང་དག་པར་སྦྱོར་བའི་ཚུལ་གྱིས་གཟུང་བར་བྱ་སྟེ་མཛུབ་མོ་གཉིས་བསྒྲེང་ལ། རྩེ་མོ་ཕན་ཚུན་ཡང་དག་པར་སྦྱར་ཏེ་སྟེང་ནས་བཀུག་ཅིང་རིན་པོ་ཆེ་བྱས་ལ་མཐེ་བོའི་རྩེ་མོ་གཉིས་ཀྱི་སྟེང་དུ་སྦྱར་བར་བྱ་སྟེ། འདི་ནི་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་རྡོ་རྗེ་ནོར་བུ་ཞེས་བྱ་བ་ཡིན་ནོ། །གཞན་རྣམས་ནི་དེ་ལས་བྱུང་བའོ་ཞེས་བྱ་བ་ལ་འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱ་ལས་བྱུང་བའི་རིན་པོ་ཆེ་ཡིད་ལས་བྱུང་བ་ལ་སོགས་པ་རྣམས་ཀྱི་དམ་ཚིག་གི་ཕྱག་རྒྱ་རྣམས་གཟུང་བར་བྱའོ། །རིན་པོ་ཆེའི་ཁུ་ཚུར་ཞེས་བྱ་བ་ནི་རྡོ་རྗེ་བསྡམས་པ་བཅིངས་ཏེ་མཐེ་བོ་ཡང་དག་པར་སྦྱར་ཞིང་བསྒྲེང་བར་བྱས་ལ་མཛུབ་མོ་གཉིས་བསྒྲེང་བའི་རྩེ་མོ་གཉིས་ཀྱིས་རང་གི་མཐེ་བོའི་རྩེ་མོ་ཡང་དག་པར་སྦྱར་ཞིང་གཟུང་བར་བྱ་སྟེ། འདི་ནི་རྡོ་རྗེ་རིན་པོ་ཆེའི་ཁུ་ཚུར་ཞེས་བྱ་བའི་ཕྱག་རྒྱ་ཡིན་ནོ། །དེ་གཉིས་སུ་བྱས་ལ། ནོར་བུའི་ཁུ་ཚུར་རོ་ཞེས་བྱ་བ་ལ། རྡོ་རྗེ་རིན་པོ་ཆེའི་ཁུ་ཚུར་གཉིས་སུ་བྱས་ན་ནོར་བུའི་ཁུ་ཚུར་གཉིས་སུ་འགྱུར་བ་ཡིན་ནོ། །འདིས་ནི་འདི་སྐད་བཤད་པར་འགྱུར་ཏེ། གཡོན་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ནས་གཡས་པའི་ཁུ་ཚུར་གྱིས་ནོར་བུས་མཚན་པའི་རྡོ་རྗེ་རྩེ་ལྔ་པ་བླངས་ཏེ་གསོར་ལ་རང་གི་སྙིང་གར་བསྟོད་པའི་ཚུལ་གྱིས་གཟུང་བར་བྱ་སྟེ་འདི་ནི་འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་ཡིན་ནོ། །རིན་པོ་ཆེ་ཡིད་ལས་བྱུང་བ་ལ་སོགས་པ་རྣམས་ཀྱི་ཡང་རིན་པོ་ཆེའི་ཁུ་ཚུར་གཉིས་ཀྱིས་རང་རང་གི་ཕྱག་མཚན་དང་བཅས་པ་ཇི་ལྟ་བ་བཞིན་དུ་བྲིས་པའི་རྗེས་སུ་འབྲངས་ཏེ་ཕྱག་རྒྱ་ཆེན་པོ་བཅིང་བར་བྱ་བ་ཡིན་ནོ། །འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱའི་ཕྱི་རོལ་དུ་མངོན་པར་ཕྱོགས་པའི་ལྕགས་ཀྱུ་ནི་རིན་པོ་ཆེ་ཡིད་ལས་བྱུང་བའི་དམ་ཚིག་གི་ཕྱག་རྒྱ་ཡིན་ནོ། །འཕགས་པ་
ནམ་མཁའི་སྙིང་པོའི་ཕྱག་རྒྱ་ཉིད་མཐེ་བོ་གཉིས་ཀྱིས་འཁྱུད་པ་ནི་ཀཱི་ལི་ཀི་ལའིའོ། །འཕགས་པ་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིང་བ་ཉིད་མཐེ་བོ་གཉིས་ཁ་ཕྱེ་ལ་མཛུབ་མོ་གཉིས་ཀྱི་རྩེ་མོ་དབུས་མ་དག་གི་རྩེ་མོ་ཕན་ཚུན་འདྲེན་ཅིང་མཐའ་མ་དང་སྲིན་ལག་མཉམ་པར་བྱ་སྟེ། ཁ་ཕྱེ་ལ་རྡོ་རྗེ་ཆུ་སྲིན་གྱི་རྒྱལ་མཚན་བསྒྲེང་བ་ནི་རིན་པོ་ཆེ་དྲན་པའིའོ། །འཕགས་པ་ནམ་མཁའི་སྙིང་པོའི་ཕྱག་རྒྱ་ཉིད་བརླ་གཉིས་ལ་བསྐོར་ཞིང་གཞག་པ་ནི། རིན་པོ་ཆེ་སྙེམས་པའིའོ། །དེ་ཉིད་སྟེང་དུ་གཏོར་བ་ནི་དཔྱིད་ཀ་རིན་པོ་ཆེ་མའིའོ། །འོག་ཏུ་བླུགས་པ་ནི་རིན་པོ་ཆེ་སྤྲིན་མའིའོ། །མཐེ་བོ་གཉིས་སྦྱོར་ཞིང་བསྐོར་བ་ནི་སྟོན་ཀ་རིན་པོ་ཆེ་མའིའོ། །རབ་ཏུ་བརྐྱང་ཞིང་བྱུག་པ་དང༌། བསྐོར་ཞིང་སྤྱི་བོར་གཞག་པ་ཞེས་བྱ་བ་ནི་རིན་ཆེན་དགུན་མའིའོ། །བསྐོར་ཞིང་སྙིང་གར་གཞག་པ་ནི་རིན་ཆེན་སྒེག་མའིའོ། །ཡོངས་སུ་བསྐོར་ཞིང་དགོད་པ་ནི་རིན་པོ་ཆེ་བཞད་མའིའོ། །ཁ་ལས་གྱེན་དུ་འབྱིན་པ་ནི་རིན་ཆེན་གླུ་མའིའོ། །དེ་བཞིན་བསྐོར་ནས་གར་བྱེད་པ་ནི་རིན་ཆེན་གར་མའིའོ། །མཛུབ་མོའི་ལྕགས་ཀྱུ་གཉིས་ནི་རིན་ཆེན་ལྕགས་ཀྱུ་མའིའོ། །གཡོན་པའི་མཛུབ་མོ་གཡས་ཀྱིས་གཟུང་བ་ནི་རིན་ཆེན་ཞགས་པ་མའིའོ། །མཛུབ་མོའི་མཐེ་བོང་འཆིང་བ་ནི་རིན་ཆེན་ལྕགས་སྒྲོག་གིའོ། །མཐེ་བོ་མཐའ་མའི་ནང་དུ་གཞག་པ་ནི་རིན་ཆེན་དྲིལ་བུའི་དམ་ཚིག་གི་ཕྱག་རྒྱ་ཡིན་ནོ། །རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཉིད་འདིར་ཆོས་ཀྱི་ཕྱག་རྒྱ་རྣམས་གཟུང་བར་བྱའོ། །རིན་པོ་ཆེའི་ཁུ་ཚུར་གཉིས་བཅིངས་པ་ལས་ཀྱི་ཕྱག་རྒྱ་རྣམས་བཅིང་བར་བྱའོ། །གཡོན་པའི་རིན་པོ་ཆེ་བསྙེམས་པས་གཡས་པའི་ཁུ་ཚུར་གཏོད་པའི་ཚུལ་གྱིས་སྙིང་གར་གཟུང་བར་བྱ་སྟེ་འདི་ནི་བཅོམ་ལྡན་འདས་ཀྱི་ལས་ཀྱི་ཕྱག་རྒྱ་ཡིན་ནོ། །གཞུ་དང་མདའ་གཏོད་པ་ནི་རིན་པོ་ཆེ་ཡིད་ལས་བྱུང་བའིའོ། །འོག་ཏུ་འཁྱུད་པ་ནི་རིན་པོ་ཆེ་ཀཱི་ལི་ཀཱི་ལའིའོ། །རྒྱལ་མཚན་བསྒྲེང་པ་ནི་རིན་པོ་ཆེ་དྲན་པའིའོ། །སྙེམས་པ་གཉིས་གཏོད་པ་ནི་རིན་ཆེན་སྙེམས་པའིའོ། །རིན་པོ་ཆེའི་ཁུ་ཚུར་གཉིས་བཅིངས་ཏེ་སྒེག་པ་དང་བཅས་པས་མཐའ་མ་ལ་
སོགས་པ་ནས་བཀྲོལ་ནས་གློག་འགྱུ་བའི་གར་གྱིས་གཡས་ཕྱོགས་སུ་བསྐོར་བས་བསྐོར་ཏེ། སྤྱི་བོའི་ཕྱོགས་སུ་ཀ་པུ་ཊའི་ཐལ་མོ་ཁ་སྦྱོར་བ་བཅིངས་ཤིང་ཕབ་ལ་རིན་པོ་ཆེའི་ཁུ་ཚུར་གཉིས་བསྐོར་ཞིང་སྙིང་གར་བཅིངས་ནས་མེ་ཏོག་འབུལ་བའི་ཚུལ་གྱིས་སྟེང་དུ་གཏོར་བར་བྱ་སྟེ་རིན་ཆེན་དཔྱིད་ཀ་མའིའོ། །དེ་བཞིན་དུ་རིན་པོ་ཆེ་ཁུ་ཚུར་གཉིས་བསྐོར་ཞིང་བཅིངས་ཏེ། སྤོས་འབུལ་པའི་ཚུལ་གྱིས་འོག་ཏུ་ལྡུགས་པར་བྱ་སྟེ་འདི་ནི་རིན་ཆེན་སྤྲིན་མའིའོ། །དེ་བཞིན་དུ་རིན་པོ་ཆེའི་ཁུ་ཚུར་གཉིས་བསྐོར་ཞིང་བཅིངས་ཏེ། མར་མེ་འབུལ་བའི་ཚུལ་གྱིས་མཐེ་བོར་སྦྱར་ཞིང་བསྐོར་བར་བྱ་སྟེ་འདི་ནི་རིན་ཆེན་སྟོན་ཀ་མའིའོ། །དེ་བཞིན་དུ་རིན་པོ་ཆེའི་ཁུ་ཚུར་གཉིས་བསྐོར་ཞིང་བཅིངས་ཏེ། སྙིང་གའི་ཕྱོགས་སུ་བརྐྱང་ལ་དྲིས་བྱུག་པའི་ཚུལ་གྱིས་རབ་ཏུ་སྦྱར་ཏེ། སླར་ཡང་རིན་པོ་ཆེའི་ཁུ་ཚུར་གཉིས་བཅིངས་ཏེ། སྤྱི་བོའི་ཕྱོགས་སུ་བསྐོར་ཞིང་གཞག་པར་བྱ་སྟེ་འདི་ནི་རིན་ཆེན་དགུན་མའིའོ། །དེ་བཞིན་དུ་རིན་པོ་ཆེའི་ཁུ་ཚུར་བསྐོར་ཞིང་བཅིངས་ནས་སྙིང་གའི་ཕྱོགས་སུ་བསྐོར་ཞིང་གཞག་པར་བྱ་སྟེ། འདི་ནི་རིན་ཆེན་སྒེག་མོའིའོ། །དེ་བཞིན་དུ་རིན་པོ་ཆེའི་ཁུ་ཚུར་གཉིས་བསྐོར་ཞིང་བཅིངས་ནས་དགོད་པའི་ཚུལ་གྱིས་ཡོངས་སུ་བསྐོར་ལ་ཁའི་མཐར་གཟུང་བར་བྱ་སྟེ། འདི་ནི་རིན་ཆེན་བཞད་པ་མའིའོ། །དེ་བཞིན་དུ་རིན་པོ་ཆེའི་ཁུ་ཚུར་བསྐོར་ཞིང་བཅིངས་ནས་ཁ་ལས་གྱེན་དུ་དྲང་བར་བྱ་སྟེ། འདི་ནི་རིན་ཆེན་གླུ་མའིའོ། །དེ་བཞིན་དུ་རིན་པོ་ཆེའི་ཁུ་ཚུར་གཉིས་བསྐོར་ཞིང་བཅིངས་ནས་གར་གྱི་ཚུལ་གྱིས་བསྐོར་བར་བྱ་སྟེ་འདི་ནི་རིན་ཆེན་གར་མའིའོ། །གར་དང་བྲལ་བའི་རིན་པོ་ཆེའི་ཁུ་ཚུར་གཉིས་བཅིངས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ཏེ་རིན་ཆེན་ལྕགས་ཀྱུའིའོ། །རིན་པོ་ཆེའི་ཁུ་ཚུར་གཉིས་བསྐོར་ཞིང་བཅིངས་ནས་གཡས་པའི་མཛུབ་མོ་ལྕགས་ཀྱུས་གཡོན་པའི་མཛུབ་མོ་བསྒྲེང་བ་གཟུང་བར་བྱ་སྟེ། འདི་ནི་རིན་ཆེན་ཞགས་པའིའོ། །རིན་པོ་ཆེའི་ཁུ་ཚུར་གཉིས་བཅིངས་ནས་མཛུབ་མོ་དང་མཐེ་བོ་དག་གིས་མདུད་པ་བཅིང་བར་བྱས་ཏེ། འདི་ནི་རིན་ཆེན་ལྕགས་སྒྲོག་གིའོ། །རིན་པོ་ཆེའི་ཁུ་ཚུར་གཉིས་བཅིངས་ལ་ཕན་
ཚུན་ཡང་དག་པར་སྦྱར་ཏེ་རང་གི་སྲིན་ལག་དང་མཐེ་ཆུང་གི་ནང་དུ་མཐེ་བོ་གཉིས་བཅུག་ལ་གཟུང་བར་བྱ་སྟེ་འདི་ནི་རིན་ཆེན་དྲིལ་བུའི་ལས་ཀྱི་ཕྱག་རྒྱ་ཡིན་ནོ། །དེ་ནས་ལས་ཀྱི་ཕྱག་རྒྱ་རྣམས་ཞེས་བྱ་བ་ལ་ལས་ཀྱི་ཚོགས་སྒྲུབ་པར་བྱེད་པའི་ཕྱག་རྒྱ་རྣམས་ནི་ལས་ཀྱི་ཕྱག་རྒྱའོ། །རྡོ་རྗེ་རིན་པོ་ཆེ་ཞེས་བྱ་བ་ལ་འཇུག་པའི་ཕྱག་རྒྱ་རྡོ་རྗེ་རིན་ཆེན་བཅིངས་ནས། དབུས་མ་གཉིས་ཀྱི་རྩེ་མོ་སྦྱར་ཏེ། འདི་དབྲལ་བར་བཞག་པས་དབང་བསྐུར་བ་ཐམས་ཅད་ཐོབ་པར་འགྱུར་རོ། །ཁ་གཉིས་ཀྱི་རྩེ་མོ་ཡང་དག་པར་སྦྱར་ཞིང་མཐའ་མ་གཉིས་ཁ་ཐལ་མོ་བཅིངས་ནས། སྲིན་ལག་གཉིས་ཀྱི་རྩེ་མོ་ཡང་དག་པར་སྦྱར་ཞིང་མཐའ་མ་གཉིས་ཁ་ཕྱེ་བར་བྱས་ལ་བསྒྲེང་སྟེ་གཟུང་བར་བྱས་ན། འདིས་དོན་ཐམས་ཅད་འཐོབ་པར་འགྱུར་རོ། །དབུས་མའི་ནོར་བུ་ཞེས་བྱ་བ་ལ་རྡོ་རྗེ་རིན་ཆེན་བཅིངས་ཏེ། སོང་མོ་དབུས་མ་གཉིས་ཀྱིས་ནོར་བུ་བྱས་ནས། འདིས་འདོད་པ་ཐམས་ཅད་ཡོངས་སུ་རྫོགས་པར་འགྱུར་རོ། །མཐེའུ་ཆུང་གི་རྩེ་མོ་ཞེས་བྱ་བ་ལ་རྡོ་རྗེ་རིན་ཆེན་བཅིངས་ནས། མཐེའུ་ཆུང་གཉིས་ཡང་དག་པར་སྦྱར་ནས་རྩེ་མོར་བྱས་ན་འདིས་གཏེར་ཐམས་ཅད་རྙེད་པར་འགྱུར་རོ། །འོག་ཏུ་གཏོར་བ་ཞེས་བྱ་བ་ལ་རྡོ་རྗེ་རིན་ཆེན་བཅིངས་ནས། དེའི་འོག་ཏུ་གཏོར་བར་བྱས་ན་དེ་ལྟར་རྡོ་རྗེའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་བསྡམས་པ་ལས་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་རྡོ་རྗེ་བསྡམས་པ་དེ་ལས་ཕྱག་རྒྱ་གང་དག་བྱུང་བ་དེ་རྣམས་ཀྱི་ལས་རྣམས་བྱ་བ་ཡིན་ནོ། །ཇི་ལྟར་ཞེ་ན། མཛུབ་མོའི་ནོར་བུ་བརྐྱང་བའི་ཕྲེང་བའོ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ཏེ་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བ་བྱས་ལ་ཕན་ཚུན་སྦྱར་བའི་རྩེ་མོའི་སྟེང་ནས་བཀུག་ཅིང་ནོར་བུར་བྱས་ཏེ་དེ་ལྟར་ན་རྡོ་རྗེའི་དབང་བསྐུར་བ་ཐོབ་པར་འགྱུར་རོ། །རྡོ་རྗེའི་དབང་བསྐུར་བ་སྔ་མ་ལས་འདི་ཁྱད་པར་ཅི་ཡོད་ཅེ་ན། སྔ་མ་ནི་ནོར་བུས་མཚན་པའི་རྡོ་རྗེ་རྩེ་ལྔ་པའི་དབང་བསྐུར་བ་ཡིན་ལ། འདི་ནི་རྡོ་རྗེ་རིན་ཆེན་གྱི་ཅོད་པན་གྱིས་དབང་བསྐུར་བ་ཡིན་ཏེ། ཁྱད་པར་ནི་འདི་ཡིན་ནོ། །རྡོ་རྗེ་རིན་པོ་ཆེ་གསུམ་བདུན་དང་ལོགས་བཅིང་བར་བྱའོ་ཞེས་བྱ་བ་རྡོ་རྗེ་བསྡམས་པ་བཅིངས་ཏེ་མཐེ་བོ་དང་མཛུབ་མོ་དང་
དབུས་མ་རྣམས་ཀྱིས་ནོར་བུ་རིན་པོ་ཆེ་གསུམ་བྱས་ཏེ། སླར་ཡང་སྤྱི་བོ་དང་རྣ་བ་གཉིས་ཀྱི་སྟེང་དུ་གཟུང་བར་བྱ་སྟེ། དེ་ལྟར་ན་བྱང་ཆུབ་སེམས་དཔའ་ཆེན་པོའི་དབང་བསྐུར་བ་ཐོབ་པར་འགྱུར་རོ། །རྡོ་རྗེ་རིན་ཆེན་མཛོད་སྤུའི་ཕྱོགས་སུ་བཞག་སྟེ་མཛུབ་མོའི་རྩེ་མོས་སྟེང་དུ་མདུད་ལ། དར་དཔྱངས་འཆིང་བའི་ཚུལ་དུ་བྱའོ་ཞེས་བྱ་བ་ལ། རྡོ་རྗེ་བསྡམས་པ་ལས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱ་བཅིངས་ལ་མཛོད་སྤུའི་ཕྱོགས་སུ་བཞག་སྟེ་མཛུབ་མོ་གཉིས་ཀྱི་སྟེང་དུ་མདུད་པའི་ཚུལ་དུ་བྱས་ན་དར་དཔྱངས་བཅིང་བའི་རྣམ་པ་བྱས་ན་འདིས་དེ་བཞིན་གཤེགས་པའི་དབང་བསྐུར་བ་ཐོབ་པར་འགྱུར་རོ། །མཐེ་བོ་གཉིས་ཀྱིས་བརྟན་པའི་སྐྱིལ་མོ་ཀྲུང་ཞེས་བྱ་བ་ལ། རྡོ་རྗེ་བསྡམས་པ་བཅིངས་ལ་མཐེ་བོ་གཉིས་ཀྱིས་བརྟན་པའི་སྐྱིལ་མོ་ཀྲུང་བྱས་ཏེ། མཛུབ་མོ་གཉིས་བསྒྲེང་བ་བཀུག་ཅིང་དབུས་མའི་སོར་མོ་གཉིས་ཀྱིས། རྩེ་མོའི་ཚིགས་གསུམ་པ་བཀུག་ལ་རལ་གྲིར་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་ཅེས་བྱ་བའི་ཕྱག་རྒྱ་འདིས་སྤྱི་བོ་ནས་བརྩམས་ཏེ། མདུན་དང་རྣ་བ་གཡས་པའི་སྟེང་གི་མགོ་བོའི་སྟེང་དང་རྣ་བ་གཡོན་པའི་སྟེང་དུ་ཅོད་པན་གྱི་ཚུལ་བྱས་ལ། སླར་ཡང་མདུན་དུ་ཕྲེང་བའི་འཆིང་བའི་ཚུལ་གྱིས་མདུད་པ་བྱའོ། །སླར་ཡང་སྟེང་དུ་བསྟན་པར་བྱའོ་ཞེས་བྱ་བ་རྣ་བ་གཉིས་ཀྱི་སྟེང་དུ་ཕྲེང་བ་ཆེན་པོ་འཆིང་བའི་ཚུལ་དུ་བྱས་ནས། སྒེག་པ་དང་བཅས་པས་མཐའ་མ་ལ་སོགས་པ་དཀྲོལ་ཏེ། ལོགས་གཉིས་སུ་དར་དཔྱངས་འཆིང་བའི་ཚུལ་དུ་བྱས་ན། རྡོ་རྗེ་འཆང་ཆེན་པོའི་དབང་བསྐུར་བ་ཐོབ་པར་འགྱུར་རོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ། རྩ་བའི་རྒྱུད་ཀྱི་འཕགས་པ་ནམ་མཁའི་སྙིང་པོའི་ཕྱག་རྒྱའི་རྟོག་པ་བཤད་པ་རྫོགས་སོ།། །།དེ་ལྟར་འཕགས་པ་ནམ་མཁའི་སྙིང་པོའི་ཕྱག་རྒྱའི་རྟོག་པ་བསྟན་ནས་ད་ནི་བསྡུས་པའི་དཀྱིལ་འཁོར་ཀྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར། རྡོ་རྗེ་ཐམས་ཅད་ཀྱི་རྟོག་པ་ཐམས་ཅད་ནི་གོང་དུ་ཇི་ལྟ་བ་བཞིན་ནོ་ཞེས་བྱ་བ་ལ། ཇི་ལྟར་དཔལ་རྡོ་རྗེ་
སེམས་དཔའི་དཀྱིལ་འཁོར་ཆེན་པོ་དང༌། དེ་བཞིན་གཤེགས་པ་དང༌། རབ་ཏུ་དགའ་བའི་རྡོ་རྗེ་ཁྲོ་བོ་དང༌། རྡོ་རྗེ་འཇིག་རྟེན་དབང་ཕྱུག་དང༌། འཕགས་པ་ནམ་མཁའི་སྙིང་པོ་རྣམས་ཀྱི་དཀྱིལ་འཁོར་དུ་ཕྱག་རྒྱ་གང་བསྟན་པ་དེ་ཉིད་བསྡུས་པའི་དཀྱིལ་འཁོར་གྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་གཟུང་བར་བྱ་བ་ཡིན་ནོ། །བསྡུས་པའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་བསྡུས་པའི་དཀྱིལ་འཁོར་གྱི་ཕྱག་རྒྱའི་རྟོག་པ་བསྟན་ནས། ད་ནི་ཕྱིའི་རྡོ་རྗེའི་རིགས་ཀྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར། དེ་ནས་ཕྱིའི་ཕྱག་རྒྱ་ཤེས་པར་བྱ། །ཞེས་བྱ་བ་ལ་དེ་ནས་ཀྱི་སྒྲ་ནི་སྔ་མ་བཞིན་ནོ། །ཕྱི་ནི་འཇིག་རྟེན་ལས་འདས་པའི་ཡེ་ཤེས་ལས་ཕྱི་རོལ་དུ་གྱུར་པ་རྣམ་པར་རྟོག་པ་དང་བཅས་པའི་ཤེས་པ་ཅན་རྣམས་ཀྱི་ཕྱག་རྒྱ་ཆེན་པོ་ལ་སོགས་པ་རྣམས་ནི་ཕྱིའི་ཕྱག་རྒྱ་སྟེ་དེ་དག་ལས་ངེས་པའི་ཤེས་པའོ། །དེ་བྱ་བ་ནི་སྐབས་ལ་བབ་པའོ། །ཕྱག་རྒྱ་ཆེན་པོ་ནི་གཡོན་པ་ཁམ་པོར་དང་གཡས་སུ་མདའ་གཏོད་པ་ཉིད་ལས་ཀྱི་ཕྱག་རྒྱའོ་ཞེས་བྱ་བ་ལ་མིང་པོ་རྣམས་ནི་ལུས་སྟོན་པར་བྱེད་པའི་ཕྱག་རྒྱ་ནི་ཕྱག་རྒྱ་ཆེན་པོ་སྟེ། དེའི་ལག་པ་གཡོན་པས་ཁམ་པོར་འཛིན་པ་དང༌། ལག་པ་གཡས་པ་མདའ་གཏོད་པ་སྟེ། མིང་པོ་གསུམ་གྱི་ཕྱག་རྒྱ་ཡིན་ནོ། །འདི་ཉིད་གར་གྱི་ཚུལ་གྱིས་དེ་རྣམས་ཀྱི་ལས་ཀྱི་ཕྱག་རྒྱ་ཡིན་ནོ། །དམ་ཚིག་འཇུག་པ་ཞེས་བྱ་བ་ལ་མིང་པོ་གསུམ་གྱི་དཀྱིལ་འཁོར་དུ་དམ་ཚིག་གི་ཕྱག་རྒྱ་གང་གིས་འཇུག་པར་འགྱུར་བ་འདི་ནི་དམ་ཚིག་འཇུག་པའི་སྒྲས་བཤད་པ་ཡིན་ནོ། །མཛུབ་མོ་དང་གུང་མོ་དང་སྲིན་ལག་གཤིབས་ཏེ་རྩེ་མོ་གསུམ་པར་བྱས་ལ་མཐེ་བོ་དང་མཐེ་ཆུང་གཉིས་ཀྱི་གདུ་བུ་གཉིས་ལྕགས་ཀྱི་ལུ་གུ་རྒྱུད་ནི་མིང་པོ་རྣམས་ཀྱིའོ་ཞེས་བྱ་བ་མཐེ་བོ་དང་མཐེ་ཆུང་རྣམས་ཀྱི་ལྕགས་ཀྱི་ལུ་གུ་རྒྱུད་བཅིངས་ལ་མཛུབ་མོ་དང་གུང་མོ་དང་སྲིན་ལག་གི་སོར་མོ་དྲུག་གིས་རྩེ་གསུམ་པར་བྱས་ཏེ། འདི་ནི་མིང་པོ་རྣམས་ཀྱི་རྩེ་གསུམ་གྱིས་མཚན་པ་ཞེས་བྱ་བའི་དམ་ཚིག་གི་ཕྱག་རྒྱ་ཡིན་ནོ། །དེ་ཉིད་བཅིངས་ལ་གཡས་པའི་སྡིགས་མཛུབ་ཀྱི་ལྕགས་ཀྱུས་མིང་པོ་གསུམ་འཁོར་དང་བཅས་པ་དཀྱིལ་འཁོར་དུ་གཞུག་པར་བྱའོ།།
མིང་པོ་རྣམས་ཀྱི་སྙིང་པོ་ཁོ་ན་ཆོས་ཀྱི་ཕྱག་རྒྱ་ཡིན་ནོ། །དེ་ལྟར་མིང་པོ་གསུམ་གྱི་ཕྱག་རྒྱའི་རྟོག་པ་བསྟན་ནས། ད་ནི་སྲིང་མོ་བཞིའི་བསྟན་པར་བྱ་བའི་ཕྱིར་ཇི་ལྟར་བཟུང་བ་བཞིན་དུ་ལྷ་མོ་རྣམས་ཀྱི་ཕྱག་རྒྱའོ་ཞེས་བྱ་བ་ལ་བྲི་བའི་ཆོ་གར་ཇི་ལྟར་བསྟན་པ་དེ་བཞིན་དུ་སྲིང་མོ་བཞིའི་ཕྱག་རྒྱ་ཆེན་པོ་བཅིང་བཤེས་པར་བྱའོ། །གར་གྱི་ཚུལ་གྱིས་ལྷ་མོ་རྣམས་ཀྱི་ཕྱག་རྒྱ་ཆེན་པོ་ཉིད་བཅིངས་ན་ལས་ཀྱི་ཕྱག་རྒྱར་འགྱུར་རོ། །དམ་ཚིག་གི་གུང་མོ་དང་སྲིན་ལག་རྡོ་རྗེ་བསྡམས་པས་སོ་ཞེས་བྱ་བ་ལ་དམ་ཚིག་ནི་དམ་ཚིག་གི་ཕྱག་རྒྱ་སྟེ་གུང་མོ་དང་སྲིན་ལག་གི་སོར་མོ་རྣམས་ཀྱི་རྡོ་རྗེ་བསྡམས་པ་བཅིངས་ལ། རྡོ་རྗེ་བསྡམས་པ་དེས་གཡས་པའི་མཛུབ་མོ་གཡོན་པའི་གུང་མོའི་རྩེ་མོ་དང་ཡང་དག་པར་སྦྱར་བ་དང༌། གཡོན་པའི་མཛུབ་མོའི་གཡས་པའི་གུང་མོའི་རྩེ་མོ་དང་ཡང་དག་པར་སྦྱར་ཏེ། གཡས་པའི་སྲིན་ལག་གི་རྩེ་མོ་གཡོན་པའི་མཐེའུ་ཆུང་གི་རྩེ་མོར་སྦྱར་ལ། གཡོན་པའི་སྲིན་ལག་གི་རྩེ་མོ་གཡས་པའི་མཐེའུ་ཆུང་གི་རྩེ་མོ་དང་སྦྱར་ནས་གཟུང་བར་བྱ་སྟེ། འདི་སྲིང་མོ་བཞིའི་དམ་ཚིག་གི་ཕྱག་རྒྱ་ཡིན་ནོ། །འདི་ཉིད་ཀྱིས་སྤྱན་དྲང་བ་དང་འདི་ཉིད་ཀྱིས་དཀྱིལ་འཁོར་དུ་འཇུག་པར་བྱའོ། །ལྷག་མ་ནི་གོ་སླའོ། །དེ་བཞིན་དུ་ཆོས་ཀྱི་ཕྱག་རྒྱ་རྣམས་ནི་སྙིང་པོ་རྣམས་ཉིད་ཡིན་ནོ། །སྲིང་མོ་བཞིའི་ཕྱག་རྒྱའི་རྟོག་པའི་བཤད་པ་རྫོགས་སོ།། །།དེ་ལྟར་སྲིང་མོ་བཞིའི་ཕྱག་རྒྱའི་རྟོག་པ་བཤད་ནས། ད་ནི་ལྷ་མ་ཡིན་གྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་སྒྱུ་མའི་འཁོར་ལོ་ཞེས་བྱ་བ་ལྷ་མ་ཡིན་རྣམས་ཀྱི་སྒྱུ་མའི་འཁོར་ལོ་ནི་མཚན་མའི་ཕྱག་རྒྱའོ། །ཇི་ལྟ་བུ་ཞེ་ན་གཡོན་པའི་སྟེང་དུ་ཞེས་བྱ་བ་ལ་སོགས་པ་ལ། ལག་པ་གཡོན་པ་བརྐྱང་བའི་སྟེང་དུ་ལག་པ་གཡས་པ་བརྐྱང་སྟེ་འོག་ཏུ་ཁ་བལྟ་བར་བཞག་ནས་གཡོན་པའི་མཐེའུ་ཆུང་གི་ཚིགས་གསུམ་པ་ལ། གཡས་པའི་མཐེ་བོང་གི་ཚིགས་གསུམ་པའི་ནང་དུ་ཡང་དག་པར་སྦྱར་བར་བྱ་སྟེ། གཡས་པའི་མཐེའུ་ཆུང་གི་ཚིགས་གསུམ་པ་ལ་གཡོན་པའི་ཚིགས་གསུམ་པའི་ནང་ཡང་དག་པར་སྦྱར་བ་གཟུང་
བར་བྱ་སྟེ་འདི་ནི་ལྷ་མ་ཡིན་ཐམས་ཅད་ཀྱི་དམ་ཚིག་གི་ཕྱག་རྒྱ་ཡིན་ནོ། །སྒྱུ་མ་ཐམས་ཅད་དོན་ཡོད་པར་སྒྲུབ་པའོ་ཞེས་བྱ་བ་ལ། འདིས་ལྷ་མ་ཡིན་ཐམས་ཅད་ཀྱི་སྒྱུ་མ་ངེས་པར་སྒྲུབ་པ་ཡིན་ཏེ། དེའི་ཕྱིར་དོན་ཡོད་པར་སྒྲུབ་པའི་ཕྱག་རྒྱ་འདི་ཡིན་ནོ། ཕྱག་རྒྱ་འདི་ཉིད་ཀྱིས་དཀྱིལ་འཁོར་དུ་འཇུག་པར་འགྱུར་རོ། །ཕྱག་རྒྱ་འདི་ཉིད་མཛུབ་མོ་གཉིས་ཀྱི་ལྕགས་ཀྱུ་གཉིས་བྱས་ནས་སྤྱན་དྲང་བར་བྱའོ། །ལྷ་མ་ཡིན་གྱི་དཀྱིལ་འཁོར་གྱི་ཕྱག་རྒྱའི་རྟོག་པ་བཤད་པ་རྫོགས་སོ།། །།དེ་ལྟར་ལྷ་མ་ཡིན་གྱི་ཕྱག་རྒྱའི་རྟོག་པ་བསྟན་ནས། ད་ནི་ཀླུའི་དཀྱིལ་འཁོར་གྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར། གདེངས་ཀ་ཅན་གྱི་དབང་པོ་ཞེས་བྱ་བ་ལ་སོགས་པ་གསུངས་ཏེ། གདེངས་ཀ་ཅན་གྱི་དབང་པོ་ནི་ཀླུ་ཡིན་ལ་དེ་རྣམས་ཀྱི་ཕྱག་རྒྱ་ནི་འདི་ཡིན་ཏེ། ལག་པ་གཉིས་བརྐྱང་ལ་མཐེ་བོང་གཉིས་ཕན་ཚུན་ལྕགས་ཀྱུར་བཅིངས་ནས་ལྷག་མའི་སོར་མོ་བརྒྱད་པ་རྣམས་ཀྱིས་གདེངས་ཀའི་ཚུལ་གྱིས་གདེངས་ཀ་བསྒྲེང་བར་བྱས་ཏེ། འདི་ནི་ལྟོ་འཕྱེ་ཆེན་པོའི་ལག་པ་ཞེས་བྱ་བའི་ཕྱག་རྒྱ་ཡིན་ཏེ། ཀླུ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པའི་དམ་ཚིག་གོ །འདི་ཅིའི་ཕྱིར་ཞེ་ན། གལ་ཏེ་འདས་པར་བྱས་ན་འཆིང་བར་འགྱུར་རོ་ཞེས་གསུངས་སོ། །དབུས་མ་དང་སྲིན་ལག་ཅེས་བྱ་བ་ལ་སོགས་པ་ལ་གུང་མོ་དང་སྲིན་ལག་གི་སོར་མོ་བཞི་པོས་རྡོ་རྗེ་བསྡམས་པ་ནང་དུ་བྱས་ལ་མཛུབ་མོ་དང་མཐེ་བོ་དག་གིས་མགུ་བའི་ཚུལ་གྱིས་སྟེང་དུ་བསྒྲེང་བར་བྱས་ན་དེ་ལྟར་ན་དུག་ཐམས་ཅད་འབར་བར་འགྱུར་བ་ཡིན་ནོ། །ཕྱག་རྒྱ་འདི་ཉིད་བཅིངས་ལ་མཛུབ་མོ་གཉིས་ཀྱིས་དུག་ཐམས་ཅད་བླངས་ཏེ་དུག་བཅིང་བའི་བསམ་བས་མཛུབ་མོ་གཉིས་ཀྱི་རྩེ་མོར་མཐེ་བོང་གཉིས་ཀྱི་རྩེ་མོ་གཟུང་བར་བྱས་ཏེ། འདིས་དུག་ཐམས་ཅད་འཆིང་བར་འགྱུར་རོ། །དེ་ལྟར་དུག་ཡང་དག་པར་བསྡུས་ཏེ་མཐེ་ཆུང་གཉིས་ཀྱི་རྩེ་མོས་བརྡེག་པར་བྱས་ཏེ་དུག་ཐམས་ཅད་འཇིག་པར་འགྱུར་རོ། །འདི་ཉིད་ཀྱིས་ཞེས་བྱ་བ་ལ་མཐེ་ཆུང་གཉིས་ཀྱི་རྩེ་མོ་བརྡེག་པས་དུག་ཐམས་ཅད་བཟའ་བ་དང་ཕོ་བ་དང་དུག་མེད་པ་ཉིད་དུ་འགྱུར་བ་ཡིན་ནོ། །ཕྱག་རྒྱ་བཅིང་བ་ལྷག་
མ་རྣམས་ནི་སྔར་བཤད་པ་བཞིན་དུ་ཤེས་པར་བྱའོ། །ཀླུའི་དཀྱིལ་འཁོར་གྱི་ཕྱག་རྒྱའི་རྟོག་པའི་བཤད་པ་རྫོགས་སོ།། །།ཕྱི་རོལ་གྱི་ཕྱག་རྒྱའི་ཆོ་ག་རྒྱས་པའི་རྒྱུད་ཅེས་བྱ་བ་ཇི་ལྟར་བཤད་པའི་ཕྱི་རོལ་གྱི་ཕྱག་རྒྱ་རྣམས་ཀྱི་ཆོག་རྒྱས་པ་གང་ཡིན་པ་དེ་སྟོན་པར་བྱེད་པའི་རྒྱུད་ནི་ཕྱི་རོལ་གྱི་ཕྱག་རྒྱ་རྒྱས་པའི་རྒྱུད་དོ། །ཕྱི་རོལ་གྱི་རྡོ་རྗེ་རིགས་ཀྱི་ཕྱག་རྒྱའི་རྟོག་པའི་བཤད་པ་རྫོགས་སོ།། །།དེ་ནས་ཀྱི་སྒྲ་ནི་སྐབས་ལ་བབས་པའོ། །རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་དེ། ཇི་ལྟར་བཤད་པའི་རྡོ་རྗེ་སེམས་དཔའི་རྟོག་པ་རྣམས་སོ། །དེ་རྣམས་བསྒྲུབ་པ་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་རྟོག་པ་སྟེ། དེའི་དོན་དུ་ཕྱག་རྒྱ་གང་ཡིན་པ་དེ་སྟོན་པར་བྱེད་པའི་རྒྱུད་ནི་རྒྱུན་དེ་ཉིད་ཀྱི་ཆོ་ག་རྒྱས་པ་གང་ཡིན་པ་དེ་བཤད་པར་བྱ་བ་ནི་བསྟན་པར་བྱ་བ་ཡིན་ནོ་ཞེས་བྱ་བ་ལ་བཅོམ་ལྡན་འདས་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་རྡོ་རྗེ་སེམས་དཔས་གསུངས་སོ། །དེ་ལ་ཞེས་བྱ་བའི་སྒྲ་ནི་དམིགས་ཀྱིས་དགར་བའོ། །ལྔ་ཞེས་བྱ་བ་ནི་ཕྱག་རྒྱ་ལྔའི་རྟོག་པ་ཐམས་ཅད་སྒྲུབ་པར་བྱེད་དོ་ཞེས་བྱ་བའི་དོན་ཏོ། །སྐུའི་ཕྱག་རྒྱ་ཞེས་བྱ་བ་རེ་ཞིག་སྐུའི་ཕྱག་རྒྱ་རྟོག་པ་ཐམས་ཅད་སྒྲུབ་པར་བྱེད་པ་ཡིན་ནོ། །སྐུའི་ཕྱག་རྒྱ་དེ་གང་ཡིན་ཞེ་ན་ཕྱག་རྒྱ་ཆེན་པོ་ཞེས་བྱའོ། །ཕྱག་རྒྱ་ཆེན་པོ་དེ་རིགས་གང་ལ་རྟོག་པ་ཐམས་ཅད་སྒྲུབ་པར་བྱེད་པ་ཡིན་ཞེ་ན། རྡོ་རྗེ་འཆང་ཆེན་པོའི་རིགས་སོ། །འདིས་ནི་འདི་སྐད་སྟོན་པར་འགྱུར་ཏེ་ཕྱག་རྒྱ་ཆེན་པོ་བཅིངས་ལ་རྡོ་རྗེ་སེམས་དཔའི་རིགས་ལ་དངོས་གྲུབ་གང་བསྟན་པ་དེ་རྣམས་བསྒྲུབ་པར་བྱའོ། །དམ་ཚིག་གི་ཕྱག་རྒྱ་ནི་དེ་བཞིན་གཤེགས་པའི་རིགས་ལ་ཞེས་བྱ་བ་ལ་དམ་ཚིག་གི་ཕྱག་རྒྱ་བཅིངས་ལ། དེ་བཞིན་གཤེགས་པའི་དཀྱིལ་འཁོར་ལས་གསུངས་པའི་དངོས་གྲུབ་ཐམས་ཅད་བསྒྲུབ་པར་བྱའོ། །རྡོ་རྗེ་ཧཱུཾ་མཛད་ནི་རྡོ་རྗེའི་རིགས་སོ་ཞེས་བྱ་བ་ལ། རྡོ་རྗེ་ཧཱུཾ་མཛད་བཅིངས་ཏེ་རབ་ཏུ་དགའ་བའི་རྡོ་རྗེ་ཁྲོ་བོའི་རྟོག་པ་ལས་གསུངས་པའི་དངོས་གྲུབ་ཐམས་ཅད་བསྒྲུབ་པར་བྱའོ། །པདྨ་ཆེན་པོ་ནི་པདྨའི་རིགས་སོ་ཞེས་བྱ་བ་ལ། པདྨ་ཆན་པོ་བཅིངས་ལ་
རྡོ་རྗེ་འཇིག་རྟེན་དབང་ཕྱུག་གི་རྟོག་པ་ལས་གསུངས་པའི་དངོས་གྲུབ་རྣམས་བསྒྲུབ་པར་བྱའོ། །རྡོ་རྗེ་ནོར་བུ་རིན་པོ་ཆེ་ནི་ནོར་བུའི་རིགས་ལའོ་ཞེས་བྱ་བ་ལ་བཅོམ་ལྡན་འདས་འཕགས་པ་ནམ་མཁའི་སྙིང་པོའི་རྡོ་རྗེ་བསྡམས་པ་ལས་བྱུང་བའི་རྡོ་རྗེ་རིན་པོ་ཆེའི་ཕྱག་རྒྱ་ནི་རྡོ་རྗེ་ནོར་བུ་རིན་པོ་ཆེ་སྟེ། དེ་བཅིངས་ལ་འཕགས་པ་ནམ་མཁའི་སྙིང་པོའི་རིགས་ལས་གསུངས་པའི་དངོས་གྲུབ་རྣམས་བསྒྲུབ་པར་བྱའོ། །འདིས་ནི་ཆོ་ག་རྒྱས་པའི་འཇིགས་པས་འཇིགས་པ་རྣམས་ལ། ཕྱག་རྒྱ་རེ་རེས་རང་གི་རིགས་ལས་བྱུང་བའི་དངོས་གྲུབ་ཐམས་ཅད་བསྒྲུབ་པའི་ཕྱིར་མན་ངག་བསྟན་པ་ཡིན་ནོ། །རང་གི་ངག་གི་སྔགས་ཀྱི་བཟླས་པ་བྱ་ཞིང་དངོས་གྲུབ་ཐམས་ཅད་བསྒྲུབ་པའོ་ཞེས་བསྟན་པར་བྱ་བའི་ཕྱིར། དེ་ནས་གསུང་གི་ཕྱག་རྒྱ་ལྔ་པོ་ནི་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང། རྡོ་རྗེའི་རིགས་དང༌། པདྨ་དང་ནོར་བུའི་རིགས་ཀྱི་གསུང་གི་དབྱེ་བས་གསུང་གི་ཕྱག་རྒྱ་ལྔ་པོ་ཡིན་ནོ། །སྙན་པའི་གླུ་ཞེས་བྱ་བ་ལ་སོགས་པ་ལ། སྙན་པའི་གླུ་ནི་དེ་ལས་མཁས་པ་ལས་ཤེས་པར་བྱའོ། །རབ་ཏུ་དགའ་བའི་རྡོ་རྗེའི་ངག་ནི། རྡོ་རྗེ་སེམས་དཔའི་རིགས་ལ་སྟེ་འདིས་སྔགས་བརྗོད་ཅིང་རྡོ་རྗེ་སེམས་དཔའི་རིགས་ཀྱི་ཟློས་པ་པོས་ཕྱག་རྒྱ་ལ་སོགས་པ་བསྒྲུབ་པར་བྱའོ། །ལྕེ་དང་མཆུ་གཉིས་ཅུང་ཟད་གཡོ་བ་གང་ལ་ཡོད་པ་དེ་ནི་ལྕེ་དང་མཆུ་གཉིས་ཤིན་ཏུ་གཡོ་བ་མ་ཡིན་པ་སྟེ། སོ་དང་མཆུ་ཤིན་ཏུ་མ་འབྱར་བ་དབྱངས་བདུན་དང་བྲལ་བའི་སྒྲ་དང་མི་ལྡན་པ་དེ་ནི་རྡོ་རྗེའི་དག་སྟེ། དེ་བཞིན་གཤེགས་པའི་རིགས་ལའོ། །རིགས་ཐམས་ཅད་ལ་དགོས་པ་ཞེས་བྱ་བ་ལ་རྡོ་རྗེ་སེམས་དཔའི་རིགས་ལ་ཡང་འདིར་བཟླས་པར་བྱ་བ་ཡིན་ནོ། །གང་གི་ཕྱིར་འདིས་ཀྱང་ཐམས་ཅད་ཀྱི་དངོས་གྲུབ་ཐོབ་པར་འགྱུར་བ་དེའི་ཕྱིར། སྤྲིན་གྱི་འབྲུག་སྒྲའི་ཡི་གེ་ཧཱུཾ་ཞེས་བྱ་བ་ལ་སྤྲིན་བཞིན་དུ་ཡི་གེ་ཧཱུཾ་འབྲུག་སྒྲ་གང་ལས་བྱུང་བ་དེ་ནི་སྤྲིན་གྱི་འབྲུག་སྒྲའི་ཡི་གེ་ཧཱུཾ་ངོ༌། །ཕྲ་མོ་སྒྲ་དང་ལྡན་པ་ཞེས་བྱ་བ་ལ་ཅུང་ཟད་ཙམ་གྱི་སྒྲ་གང་ལ་ཡོད་པ་དེ་ནི་སྒྲ་ཕྲ་མོ་དང་ལྡན་པ་སྟེ། ཁྲོ་བོའི་རྡོ་རྗེ་ཞེས་བྱ་བ་གསུང་རྡོ་རྗེའི་
རིགས་ལའོ། །ཏིང་ངེ་འཛིན་གྱི་ངག་པདྨའི་རིགས་སོ་ཞེས་བྱ་བ་ལ་གཞན་དུ་ནི་མི་གཡེང་བའི་སེམས་ཀྱིས་ཡིད་ཀྱིས་བཟླས་པ་ནི་ཏིང་ངེ་འཛིན་གྱི་ངག་གོ །རང་བཞིན་གྱིས་དག་པའི་པདྨ་ཞེས་བྱ་བ་ལ། ཆོས་ཐམས་ཅད་རང་བཞིན་གྱིས་དག་པའོ་ཞེས་པའི་བསྒོམ་པ་གང་ཡིན་པ་དེ་ནི་པདྨ་ལྟར་དངོས་པོར་འཛིན་པའི་ཞེན་པ་དང་བྲལ་བ་ཡིན་ལ། དེའི་ཕྱིར་རང་བཞིན་གྱིས་དག་པའི་པདྨ་ཞེས་བྱ་བར་བརྗོད་པ་ཡིན་ཏེ། རང་བཞིན་གྱིས་དག་པ་ལ་ལྷག་པར་མོས་པའི་རང་བཞིན་ཅན་ནོ་ཞེས་བྱ་བའི་ཐ་ཚིག་གོ །ཆོས་ཀྱི་ངག་ནི་ནོར་བུའི་རིགས་ལའོ་ཞེས་བྱ་བ་ལ་ནོར་བུའི་རིགས་ཀྱི་སྒོམ་པས་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པའི་ཆོས་སོ། །དེ་སྟོན་པར་བྱེད་པའི་ངག་གི་ཆོས་སོ། །དེ་ཉིད་སོ་སོར་རྟོགས་པའི་མཆོད་པའི་ནོར་བུའི་རིགས་བསྐྱེད་པའི་རྒྱུར་འགྱུར་བ་དང༌། དེ་ལྟར་སྟོན་པར་བྱེད་པ་དང༌། དེ་དང་རྒྱུ་མཐུན་པ་སྟེ། དེའི་ཕྱིར་མཆོད་པའི་ནོར་བུའོ། །འདིས་ནི་འདི་ལྟར་སྟོན་པར་འགྱུར་ཏེ། ནོར་བུའི་རིགས་ལ་ལྷག་པར་མོས་པའི་རང་བཞིན་ཅན་གྱི་སྨྲ་བར་འདོད་པ་ནི་ཆོས་ཀྱི་ངག་ཅེས་བྱ་བར་བརྗོད་པ་ཡིན་ནོ། །དེ་ནས་ཐུགས་ཀྱི་ཕྱག་རྒྱ་ལྔའོ་ཞེས་བྱ་བ་ལ། དེ་ནས་ཀྱི་སྒྲ་ནི་སྔ་མ་བཞིན་ནོ། །བསྒོམ་པར་བྱ་བའི་རང་བཞིན་ཅན་གྱི་ཕྱག་རྒྱ་རྣམས་ནི་ཐུགས་ཀྱི་ཕྱག་རྒྱ་སྟེ། སེམས་ཀྱི་དམིགས་པའི་ཡུལ་རྣམས་སོ་ཞེས་བྱ་བའི་དོན་ཏོ། །དེ་རྣམས་ཀྱང་རིགས་ཀྱི་དབྱེ་བས་ལྔར་འགྱུར་རོ། །ཐམས་ཅད་བསྒྲུབ་པར་བྱ་བ་ནི་རྡོ་རྗེ་སེམས་དཔའི་བསྒོམ་པའོ་ཞེས་བྱ་བ་ལ། རྡོ་རྗེ་སེམས་དཔའི་རིགས་ཀྱི་རྣལ་འབྱོར་པས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང་ལས་ཀྱིས་ཕྱག་རྒྱ་རྣམས་དང༌། བྱང་ཆུབ་ཀྱི་སེམས་ཀྱི་རང་བཞིན་དང༌། བྱང་ཆུབ་ཀྱི་སེམས་ཀྱི་རྒྱུ་མཐུན་པར་འགྱུར་བ་བསྒོམ་ཞིང་བདག་གམ་གཞན་ལ་ཡིད་བཞིན་གྱི་ནོར་བུ་དང༌། བུམ་པ་བཟང་པོ་ལ་སོགས་པའི་རྫས་ཐམས་ཅད་རྡོ་རྗེ་སེམས་དཔའི་རང་བཞིན་དུ་བསྒོམ་ཞིང་བསྒྲུབ་པར་བྱའོ། །སངས་རྒྱས་རྗེས་སུ་དྲན་པས་དེ་བཞིན་གཤེགས་པའི་རིགས་ལའོ་ཞེས་བྱ་བ་ལ་བཅོམ་ལྡན་
འདས་རྣམ་པར་སྣང་མཛད་ཀྱི་རིགས་ནི་དེ་བཞིན་གཤེགས་པའི་རིགས་ཏེ། དེ་བཞིན་གཤེགས་པའི་རིགས་དེ་ལས་བསྒྲུབ་པར་བྱ་བ་ཐམས་ཅད་གཉིས་སུ་མེད་པའི་སེམས་ལས་བྱུང་བའི་རང་བཞིན་དང༌། དེ་བཞིན་གཤེགས་པའི་རང་བཞིན་དང༌། དེ་དང་རྒྱུ་མཐུན་པར་གྱུར་པ་རྡོ་རྗེ་མཚོན་ཆ་མ་ལ་སོགས་པའི་རང་བཞིན་དུ་དེའི་རིགས་ཀྱི་རྣལ་འབྱོར་པས་བསྒོམ་པར་བྱ་བ་ཡིན་ནོ། །བདག་གམ་བདག་གིས་མདུན་དུ་གསད་པར་བྱའོ་ཞེས་བྱ་བ་ལ། རྡོ་རྗེའི་རིགས་ལའོ་ཞེས་བྱ་བ་ལ་བདག་ནི་བདག་ཉིད་དེ་འཁོར་བའི་དངོས་པོའོ། །དེ་ཉིད་རྡོ་རྗེའི་རིགས་ཀྱི་རང་གི་བདག་ཉིད་ལ་ལྷག་པར་མོས་པས་མི་སྣང་བར་བྱེད་པའོ། །ཡང་ན་མདུན་དུ་བུམ་པ་བཟང་པོ་ལ་སོགས་པ་བསྒྲུབ་བྱ་རྡོ་རྗེའི་རིགས་ཀྱི་རང་བཞིན་དུ་བྱེད་པ་ནི་གསོད་པ་སྟེ་དེ་ལྟར་བསྒོམ་ཞིང་རྡོ་རྗེའི་རིགས་ཀྱི་ཟློས་པ་པོས་བཟླ་བར་བྱ་བ་ཡིན་ནོ། །བདག་གིས་སྤྱང་བར་བྱའོ་ཞེས་བྱ་བ་ལ་པདྨའི་རིགས་སོ་ཞེས་བྱ་བ་ལ་རང་བཞིན་གྱིས་དག་པའི་སྒོམ་པ་གཟུང་བ་དང༌། འཛིན་པའི་རྣམ་པར་རྟོག་པའི་དྲི་མ་བདག་ཉིད་དམ་མདུན་དུ་སྤྱང་བར་བྱ་སྟེ། སེལ་བར་བྱེད་པའོ་ཞེས་བྱ་བ་འདི་ལྟར་པདྨའི་རིགས་ཀྱི་ཟློས་པ་པོས་བསྒོམ་པར་བྱ་ཞིང་བཟླ་བར་བྱ་བ་ཡིན་ནོ། །ནམ་མཁའ་ཐམས་ཅད་ཀྱི་བསྒོམ་པས་ནོར་བུའི་རིགས་ལའོ་ཞེས་བྱ་བ་དང༌། ནོར་བུའི་རིགས་ཀྱི་རྣལ་འབྱོར་པས་ནི་ནམ་མཁའི་སྙིང་པོ་ལ་སོགས་པ་རྣམས་གཟུགས་བརྙན་དང་མཉམ་པ་དང༌། ནམ་མཁའ་དང་མཚུངས་པར་བསྒོམ་པར་བྱས་ཏེ་བསྒོམ་པ་འདིས་ནི་ནོར་བུའི་རིགས་ལ་བཟླས་པ་བྱ་བ་ཡིན་ནོ། །དེ་ནས་རྡོ་རྗེའི་ཕྱག་རྒྱ་ལྔ་པོ་ཞེས་བྱ་བ་ལ་རིགས་ལྔའི་དབང་བསྐུར་བའི་མཚན་མ་ནི་རྡོ་རྗེའི་ཕྱག་རྒྱ་དེ་ཉིད་རིགས་ཀྱི་དབྱེ་བས་རྣམ་པ་ལྔར་འགྱུར་བ་ཡིན་ནོ། །རྡོ་རྗེ་རྩེ་ལྔ་པ་ཞེས་བྱ་བ་ལ་སོགས་པ་ལ་རྩེ་ལྔ་པའི་རྡོ་རྗེ་ནི་རྩེ་ལྔ་པའོ། །འདི་ཉིད་བསྟན་པར་བྱ་བའི་ཕྱིར་རྡོ་རྗེ་རྩེ་མོ་ཞེས་བྱ་བ་གསུངས་ཏེ། འོད་ཟེར་གྱི་ཕྲེང་བས་ཡོངས་སུ་ཁྱབ་པ་ནི་རྩེ་མོའི་འོད་ཟེར་གྱི་ཕྲེང་བ་དང་ལྡན་པའོ། །དང་པོ་ཞེས་བྱ་བ་ནི་བསྐལ་པ་བཟང་པོ་ནས་སྔ་ནས་གནས་པའོ། །བདེ་
བ་ཆེན་པོའི་རྒྱུ་མཐུན་པ་དང༌། བདེ་བ་ཆེན་པོ་སྟོན་པར་བྱེད་པ་དང༌། བདེ་བ་ཆེན་པོ་ཐོབ་པར་བྱེད་པས་ན་བདེ་བ་ཆེན་པོའི་རྡོ་རྗེ་སྟེ། དེ་ལྟ་བུར་གྱུར་པའི་རྡོ་རྗེ་དེ་རྡོ་རྗེ་ཁུ་ཚུར་གྱིས་བླངས་ཏེ། རྡོ་རྗེ་སེམས་དཔའི་རིགས་ལ་དབང་བསྐུར་བར་བྱ་བ་ཡིན་ནོ། །རྡོ་རྗེ་རྩེ་ལྔ་པ་འོད་ཟེར་དང་བཅས་པ་དེ་བཞིན་གཤེགས་པའི་ཁུ་ཚུར་བླངས་ཏེ། དེ་བཞིན་གཤེགས་པའི་རིགས་ལ་དབང་བསྐུར་བར་བྱའོ། །འབར་བའི་ཁྲོ་བོས་རྡོ་རྗེ་རྩེ་བཞི་པ་ཁྲོ་བོའི་ཁུ་ཚུར་གྱིས་བླངས་ཏེ་རྡོ་རྗེའི་རིགས་ལ་མཚན་མའི་དབང་བསྐུར་པར་བྱའོ། །འདབ་མ་བཅུ་དྲུག་པའི་འདབ་མའི་ལྟེ་བར་གནས་པའི་དེ་བཞིན་གཤེགས་པའི་རྡོ་རྗེ་པདྨའི་ཁུ་ཚུར་གྱིས་བླངས་ཏེ། པདྨའི་རིགས་ལས་མཚན་མའི་དབང་བསྐུར་བར་བྱའོ། །རྡོ་རྗེ་རྩེ་ལྔ་པ་རྩེ་མོའི་ཕྱོགས་སུ་གནས་པ་ལས་ཕྱེད་ཡིད་བཞིན་གྱི་ནོར་བུ་རིན་པོ་ཆེའི་ནང་དུ་ཞུགས་པའི་རྡོ་རྗེ་ཕྱེད་པ་ནི་རྡོ་རྗེ་རིན་ཆེན་སྟེང་དུ་ནོར་བུའི་ཁུ་ཚུར་གྱིས་བླངས་ཏེ། ནོར་བུའི་རིགས་ལ་དབང་བསྐུར་བར་བྱ་བ་ཡིན་ནོ། །དེ་ལྟར་རིགས་ཐམས་ཅད་ཀྱི་ཕྱག་རྒྱའི་དབང་བསྐུར་བ་བསྟན་ནས། ད་ནི་རྡོ་རྗེ་སེམས་དཔའི་དམ་ཚིག་གི་སྙིང་པོའི་ཐུགས་ཀྱི་ལས་ཀྱི་ཕྱག་རྒྱའི་ཚུལ་གྱིས་དངོས་གྲུབ་གང་འདོད་པ་དེ་ཉིད་རྣལ་འབྱོར་པས་བསྒྲུབ་པར་བྱ་བའོ་ཞེས་བསྟན་པར་བྱ་བའི་ཕྱིར། དེ་ནས་རིགས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་ནས་རིགས་ཐམས་ཅད་ཀྱི་རྟོག་པའི་སྒྲུབ་པ་ཐམས་ཅད་ཀྱི་རྒྱུད་འདིར་བཤད་པར་བྱའོ་ཞེས་བྱ་བ་དང་སྦྱར་རོ། །དེ་ནས་ཀྱི་སྒྲ་ནི་སྔ་མ་བཞིན་ནོ། །རིགས་ཐམས་ཅད་ཀྱི་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ཏེ། དེ་རྣམས་ཀྱི་རྟོག་པ་ནི་ཇི་ལྟར་བཤད་པའོ། །དེ་རྣམས་ཀྱི་སྒྲུབ་པའི་རྒྱུ་གང་ཡིན་པ་དེའི་ཁྱད་པར་བསྟན་པའི་ཕྱིར། གསང་བ་ཞེས་བྱ་བ་ལ་སོགས་པ་གསུངས་ཏེ་སྐྱེ་བོ་ཐམས་ཅད་ཀྱི་མངོན་སུམ་མ་ཡིན་པའི་ཕྱིར་གསང་བའོ། །གང་གིས་ཀྱང་དགག་པར་མི་ནུས་པའི་ཕྱིར་ཐོགས་པ་མེད་པའོ། །འདོད་པའི་དངོས་གྲུབ་ངེས་པར་སྒྲུབ་པར་བྱེད་པའི་ཕྱིར་དོན་ཡོད་པའོ། །རྒྱུ་དེ་འདི་
ལྟར་གྱུར་པ་ཅིའི་ཕྱིར་ཞེ་ན། དེ་ཁོ་ན་ཉིད་ཀྱི་བདེན་པའོ་ཞེས་བྱ་བ་ལ་སོགས་པ་ལ། བྱང་ཆུབ་ཀྱི་སེམས་ཀྱི་སྒྲའི་རྗེས་སུ་འགྲོ་པའི་ཤེས་རབ་རང་བཞིན་གྱིས་དག་པའི་ཡེ་ཤེས་ཀྱི་རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་རྣམས་ནི། །དེ་ཁོ་ན་ཉིད་ཀྱི་བདེན་པ་ཡིན་ལ་དེའི་མཆོག་ནི་ཕུལ་དུ་བྱུང་བ་སྟེ། མྱུར་དུ་དངོས་གྲུབ་སྩོལ་བའི་རྡོ་རྗེ་སེམས་དཔའི་དམ་ཚིག་གི་སྙིང་པོ་རྗེས་སུ་ཆགས་པའི་ལས་ཀྱི་ཕྱག་རྒྱ་གང་ཡིན་པ་དེ་རྣམས་ཀྱི་ཆོ་ག་རྒྱས་པ་ནི། དམ་ཚིག་གི་ཕྱག་རྒྱ་ལ་སོགས་པ་ངེས་པར་བསྒྲུབ་པའི་རྒྱུན་ནོ། །དེ་ཉིད་འདོད་པའི་དངོས་གྲུབ་ཐམས་ཅད་བསྒྲུབ་པའི་རྒྱུན་ཡིན་པས་ན། དེའི་གསང་བ་དང༌། ཐོགས་པ་མེད་པ་དང༌། དོན་ཡོད་པའི་རྒྱུད་ཡིན་ནོ། །དེ་བཤད་པར་བྱ་བའི་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་དེ་སྐད་གསུངས་པའོ། །དེ་ཇི་ལྟ་བུ་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། གང་ཡིན་པ་དེས་རྟོག་པ་ཐམས་ཅད་ལས་གསུངས་པའི་དངོས་གྲུབ་ཐོབ་པར་འགྱུར་རོ། །དེ་གང་ཞེ་ན། བདེ་བ་ཆེན་པོ་རྡོ་རྗེ་གསང་བའི་དམ་ཚིག་གོ་ཞེས་བྱ་བ་དང་པོའི་རྡོ་རྗེ་ནི་བདེ་བ་ཆེན་པོའི་དམ་ཚིག་ཅེས་བསྟན་པ་ཡིན་ནོ། །འདིས་ནི་འདི་ལྟར་བསྟན་པར་འགྱུར་ཏེ། དང་པོའི་རྡོ་རྗེ་བཅིངས་ལ་དངོས་གྲུབ་གང་དང་གང་བསྒྲུབ་པར་འདོད་པ་དེ་དང་དེ་བསྒྲུབ་པར་བྱ་སྟེ། དོན་ཡོད་པའི་དེ་དང་དེའི་དངོས་གྲུབ་ཐོབ་པར་འགྱུར་རོ། །གསུང་གི་ཕྱག་རྒྱ་ནི་སྙིང་པོ་ཞེས་བྱ་བ་ལ། རྡོ་རྗེ་སེམས་དཔའི་སྙིང་པོ་ནི་གསུང་གི་ཕྱག་རྒྱ་སྟེ། དེ་བཟླ་ཞིང་རིགས་ཐམས་ཅད་ལས་གསུངས་པའི་འདོད་པའི་དངོས་གྲུབ་བསྒྲུབ་པར་བྱའོ། །ཐུགས་ཀྱི་ཕྱག་རྒྱ་ཉེ་བའི་སྙིང་པོ་ཞེས་བྱ་བ་ལ། དངོས་གྲུབ་གང་དང་གང་སྒྲུབ་པར་བྱེད་པ་དེ་དང་དེ་ཨ་ནུ་རཱ་ག་ཡ་མི་ཞེས་བྱ་བའི་བཟླས་པའོ། །དོན་ཤེས་པ་བསྒྲུབ་པར་བྱ་སྟེ། དེ་ལྟར་ན་རིགས་ཐམས་ཅད་ལས་གསུངས་པའི་དངོས་གྲུབ་རྣམས་ཐོབ་པར་འགྱུར་རོ། །རྡོ་རྗེའི་ཕྱག་རྒྱ་རྡོ་རྗེ་སྙེམས་མའིའོ་ཞེས་
བྱ་བ་ལ། རྡོ་རྗེ་སེམས་དཔའི་ལས་ཀྱི་ཕྱག་རྒྱ་ནི་རྡོ་རྗེ་སྙེམས་མ་སྟེ། དེ་བཅིངས་ལ་རིགས་ཐམས་ཅད་ལས་གསུངས་པའི་ཇི་ལྟར་མངོན་པར་འདོད་པའི་དངོས་གྲུབ་རྣམས་སྒྲུབ་པར་བྱེད་པ་ཡིན་ནོ། །དེ་ལྟར་རྡོ་རྗེ་སེམས་དཔའི་ཕྱག་རྒྱ་བཞི་པོས་རྟོག་པ་ཐམས་ཅད་ལས་གསུངས་པའི་དངོས་གྲུབ་སྒྲུབ་པར་བསྟན་ནས། །ད་ནི་རིགས་དང་རིགས་སུ་བལྟ་བའི་ལས་ཀྱི་དངོས་གྲུབ་བསྟན་པར་བྱ་བའི་ཕྱིར། །ཕྲ་མོའི་ལས་ཀྱི་ཕྱག་རྒྱ་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །ཕྲ་མོ་ཡང་དེ་ཡིན་ལ་ལས་ཀྱི་ཕྱག་རྒྱ་ཡང་དེ་ཡིན་པས་ན། ཕྲ་མོའི་ལས་ཀྱི་ཕྱག་རྒྱ་རྣམས་ཏེ་བལྟ་བའི་ཕྱག་རྒྱའོ། །དེ་རྣམས་ཀྱི་རྒྱུད་ཀྱི་ཁྱད་པར་ཇི་ལྟ་བུ་ཡིན་ཞེ་ན། །དོན་ཡོད་ཅིང་ཐོགས་པ་མེད་པ་གང་ཡིན་པ་དེ་སྐབས་སུ་བབ་པའོ། །མ་མཆུའི་སྒྲོས་སོ་རྣམས་ཀྱིས་བཟུང་ནས་ཞེས་བྱ་བ་ལ། རྡོ་རྗེ་སེམས་དཔའི་རིགས་སམ། །གནོད་སྦྱིན་མོ་ལ་སོགས་པའི་བསྒྲུབ་བྱ་མདུན་དུ་བཀུག་པ་དེ་ལ། ཙུམྦ་ནའི་བསམ་བས་བདག་ཉིད་ཀྱི་མ་མཆུ་སོ་རྣམས་ཀྱིས་གཟུང་བར་བྱ་སྟེ་དེ་ཡང་རྡོ་རྗེའི་ལྟ་བས་བལྟ་ཞིང་བཟླས་པའམ་བསྒོམ་པ་བྱས་ན་ཐམས་ཅད་རྗེས་སུ་ཆགས་པ་དང༌། དབང་དུ་བྱེད་པ་དང་རོལ་པ་དང༌། བརྟན་པར་བྱེད་པའི་དངོས་གྲུབ་ཀྱི་མཚན་མ་ཐོབ་ན་སྐད་ཅིག་མས་སོ་སོར་ཉམས་སུ་མྱོང་བར་བྱེད་པ་ཡིན་ནོ། །སྒྲུབ་པ་ལ་འཇུག་པ་དེ་རིགས་གང་ལས་ཤེ་ན་རྡོ་རྗེ་སེམས་དཔའི་རིགས་ལས་སོ། །རྡོ་རྗེ་ཕྲ་མོ་ཞེས་བྱ་བ་ལ་སྣའི་རྩེ་མོ་ནས་འབྲས་ཀྱི་ཚད་ཙམ་གྱི་རྡོ་རྗེ་རྩེ་ལྔ་པའི་རྣམ་པ་ཅན། སེམས་རྩེ་གཅིག་པ་ཉིད་ནི་ཕྲ་མོའི་རྡོ་རྗེ་སྟེ་དེ་དང་ལྷན་ཅིག་ཏུ་ཞི་བ་ལ་སོགས་པའི་ལྟ་བ་འདོམ་གང་ཙམ་དུ་བལྟ་བ་གང་ཡིན་པ་དེ་ནི་ཞི་བའི་ལྟ་བ་འདོམ་གང་གི་ཚད་དུ་ཁྱབ་པར་བྱེད་པ་དེས་དེ་བཞིན་གཤེགས་པ་ཐམས་ཅད་ཀྱི་ཚུལ་ཁྲིམས་ལ་སོགས་པའི་དངོས་གྲུབ་ཐོབ་པར་འགྱུར་རོ། །ལྟ་བ་འདི་ནི་རིགས་གང་ཞེ་ན། དེ་བཞིན་གཤེགས་པའི་རིགས་ལས་སྐྱེས། །ཞེས་བྱ་བ་ལ་དེ་བཞིན་གཤེགས་པའི་རིགས་ལས་བྱུང་བས་ན་དེ་བཞིན་གཤེགས་པའི་རིགས་ལས་སྐྱེས་པའོ། །ཁྲོ་
བོ་སྟོན་པར་བྱེད་པའི་དབྲལ་བའི་ཕྱོགས་ཀྱི་རི་མོ་ནི་ཁྲོ་གཉེར་ཏེ་དེ་དང་བཅས་པའི་ཁྲོ་བོ་ནི་རྡོ་རྗེ་སེམས་དཔའི་རིགས་ཏེ་ཞེས་སྡང་ངོ༌། །དེས་མི་བཟད་པ་སྟེ་འཇིགས་པར་བྱེད་པའི་ལྟ་བ་ གང་ཡིན་པ་དེ་བྱས ་ལས་ཤིན་ཏུ་མ་མགལ་བསྡམས་པའི་རྣལ་འབྱོར་གང་ཡིན་པ་དེ་རྡོ་རྗེ་རིགས་ཀྱི་ལྟ་བས་ལས་རྣམས་བྱེད་ན་ཐམས་ཅད་ལྟུང་བ་དང༌། དབབ་པ་དང༌། རེངས་བ་དང༌། གཉིད་ལོག་ཏུ་གཞུག་པ་དང༌། རྒྱས་བཏབ་པ་དང༌། གསོད་པ་དང༌། གཞན་གྱི་དཔུང་གཞིག་པ་རྣམས་ཀྱི་མཚན་མ་ཐོབ་ན། སྐད་ཅིག་མས་ཐམས་ཅད་ལས་རྣམ་པར་རྒྱལ་བའི་དངོས་གྲུབ་ཐོབ་པར་འགྱུར་རོ། །ལྟ་བ་འདི་རིགས་གང་ལས་ཤེ་ན། རྡོ་རྗེའི་རིགས་ཀྱི་ཁྲོ་བོ་རྡོ་རྗེ་ལྟ་བའོ་ཞེས་བྱ་བ་ལ། ཁྲོ་བོ་རྡོ་རྗེ་ནི་རྡོ་རྗེའི་རིགས་ཏེ་དེའི་ལྟ་བ་ནི་ཁྲོ་བོ་རྡོ་རྗེའི་ལྟ་བའོ། །མིག་མ་བཙུམས་པ་ཞེས་བྱ་བ་ལ་སོགས་པ་ལ། བཙུམས་པ་མེད་པའི་བརྟན་པའི་རྡོ་རྗེའི་ལྟ་བས་བལྟ་བའི་རྣལ་འབྱོར་པས་མཆུ་གཉིས་མཉམ་པར་སྦྱར་ནས་བཟླས་པ་བྱས་ན་སྒྲིབ་པ་ཐམས་ཅད་སྤྱང་བ་དང༌། བསྲུང་བ་དང༌། ཏིང་ངེ་འཛིན་མངོན་དུ་གྱུར་པའི་དངོས་གྲུབ་ཀྱིས་གྲུབ་པར་འགྱུར་རོ། །རིགས་གང་ལ་ཞེ་ན། པདྨའི་རིགས་ལའོ། །འབར་བའི་ལྟ་བས་ཞེས་བྱ་བ་ལ་སོགས་པ་ལ་མང་དུ་རབ་ཏུ་གཡོ་བ་མིག་གི་རྫི་མ་འདྲེན་པའི་མིག་གིས་འབར་བའི་ལྟ་བས་བཞད་པའི་རྣལ་འབྱོར་པས། དབང་བསྐུར་བ་ཐམས་ཅད་དང་དོན་ཐམས་ཅད་དང༌། རྫོགས་པ་དང༌། མཆོད་པའི་ཆོ་ག་ཐམས་ཅད་རྒྱས་པའི་དངོས་གྲུབ་མྱུར་དུ་ཐོབ་པར་འགྱུར་རོ། །དེ་ལྟར་ཕྱག་རྒྱ་ཐམས་ཅད་བཅིངས་པའི་མཚན་ཉིད་བསྟན་ནས་ད་ནི་རང་གི་ལྷའི་སྙིང་པོ་བརྗོད་ཅིང་དམ་ཚིག་གི་ཕྱག་རྒྱ་རྣམས་ཀྱི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་བཅིང་བ་བསྒྲུབ་པའོ་ཞེས་བྱ་བ་གསུངས་ཏེ། ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ཕྱག་རྒྱ་ཐམས་ཅད་དེ་དམ་ཚིག་གི་ཕྱག་རྒྱ་ལ་སོགས་པའི་ཕྱག་རྒྱ་རྣམས་སོ། །དེ་རྣམས་བཅིང་བ་ནི་ཕྱག་རྒྱ་ཐམས་ཅད་བཅིང་བའོ། །དེ་བསྒྲུབ་པ་ནི་རང་ཉིད་ལ་དབང་དུ་བྱ་བའི་ཕྱིར། རང་གི་
ལྷའི་སྙིང་པོ་བཟླ་བའོ། །ཉིན་རེ་ཞེས་བྱ་བ་ནི་ཞག་རེ་རེ་ལའོ། །སྔོན་དུ་ནི་སྔ་མའི་ཐུན་མཚམས་ཀྱི་དུས་སུའོ། །ལན་ཅིག་ནི་ལན་ཅིག་གོ །རང་གི་ལྷའི་སྙིང་པོས་རང་ཉིད་བསྒྲུབ་པ་ནི་བདག་ཉིད་བསྒྲུབ་པའོ། །རང་ཉིད་བསྒྲུབ་པ་འདིས་ཅིར་འགྱུར་ཞེ་ན་།རང་གི་བཅིངས་ནས་མདོར་བསྡུས་པས། །ཕྱག་རྒྱ་ཐམས་ཅད་འགྲུབ་པར་འགྱུར། །ཞེས་བྱ་བ་ལ་འདིས་ནི་འདི་སྐད་སྟོན་པར་འགྱུར་ཏེ། རང་གི་ལྷའི་ཕྱག་རྒྱ་གང་དང་གང་བཅིངས་ཏེ་དེ་དང་དེ་རང་གི་ལྷའི་སྙིང་པོ་བརྗོད་ཅིང་བཅིང་བར་བྱས་ན། འདི་ལྟར་ཕྱག་རྒྱ་དེ་དང་རང་ཉིད་དམ་ཚིག་གི་བཅིང་བས་བཅིངས་ནས་སྒྲུབ་པ་པོ་དེའི་དབང་དུ་འགྱུར་བ་ཡིན་ནོ། །འདོད་པའི་དངོས་གྲུབ་ཐམས་ཅད་ཀྱང་འབྱུང་ངོ༌། །དེ་ལྟར་རང་གི་ལྷའི་སྙིང་པོ་བརྗོད་པས། །དང་པོར་ཕྱག་རྒྱ་ཐམས་ཅད་བཅིངས་ཏེ། ཕྱི་ནས་རང་གི་ལྷའི་སྙིང་པོ་ཨ་ནུ་རཱ་ག་ཡ་མི་ཞེས་པ་འདི་དང་བཅས་པར་བཟླས་ན་དེ་རྣམས་གྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཕྱག་རྒྱ་ཐམས་ཅད་ཀྱི་གསང་བ་བསྒྲུབ་པ་ཞེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་རྣམས་ཀྱི་གསང་བ་བསྒྲུབ་པ། ཨ་ནུ་རཱ་ག་ཡ་མི་ཞེས་བྱ་བའི་སྙིང་པོ་འདི་དང་བཅས་པའི་རིགས་ཐམས་ཅད་ཀྱི་སྙིང་པོ་བརྗོད་པར་བྱའོ། །སྙིང་པོ་ཕྱག་རྒྱ་སྔགས་རིག་པ། །ཞེས་བྱ་བ་ལ་སྙིང་པོ་ནི་དཀྱིལ་འཁོར་ཆེན་པོ་ལས་གསུངས་པའི་རིགས་དང་རིགས་སུ་སྔགས་ཀྱི་ཡི་གེ་རྣམས་སོ། །ཕྱག་རྒྱ་ནི་གཟུངས་སོ། །སྔགས་ནི་ཆོས་ཀྱི་དཀྱིལ་འཁོར་ལས་གསུངས་པའི་ཡི་གེ་རྣམས་སོ། །རིགས་པ་ནི་ལས་ཀྱི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་དང༌། ཆོས་དང་ལས་ཀྱི་ཕྱག་རྒྱ་རྣམས་ཀྱང་སྙིང་པོ་སྔགས་དང་ཕྱག་རྒྱ་དང༌། རིག་པར་བརྗོད་པ་ཡིན་ཏེ། སྙིང་པོ་སྔགས་དང་ཕྱག་རྒྱ་དང༌། རིག་པ་འདི་རྣམས་བསྒྲུབ་པ་འདི་ནི་རྗེས་སུ་ཆགས་པའི་མཚན་ཉིད་ཅན་ཉེ་བའི་སྙིང་པོའོ། །དེ་ཉིད་རྨད་དུ་བྱུང་བ་ནི་སྔོན་མ་བྱུང་བའི་ཕྱིར་རོ། །འདི་ཉིད་བསྟན་པར་བྱ་བའི་ཕྱིར། །ཅི་ནུས་ཅི་འདོད་བཟླས་པ་ཡི། །ཉེ་བའི་སྙིང་པོ་གསང་བའོ། །ཞེས་བྱ་བ་ལ་གང་
ཞིག་འདི་ཅི་ནུས་པ་དང༌། ཡིད་ཀྱིས་མངོན་པར་འདོད་པའི་བཟླས་པས་གསང་བ་སྟེ། རྗེས་སུ་ཆགས་པའི་དངོས་པོ་ཉེ་བའི་སྙིང་པོ་སྒྲུབ་པ་བསྟན་པ་དེ་ནི་རྨད་དུ་བྱུང་བའི་སྒྲུབ་པ་ཡིན་ནོ། །དེ་ཅིའི་ཕྱིར་ཞེ་ན། དོན་ཡོད་ཅེས་བྱ་བ་ལ་དོན་ཡོད་ཐོགས་མེད་གསང་བ་ནི་ཕྱག་རྒྱ་རྣམས་སོ། །གྲུབ་པ་ནི་དེ་དག་གྲུབ་པའོ། །ཇི་ལྟར་ཞེ་ན་རང་བཞིན་ཞེས་བྱ་བ་སྟེ་རང་བཞིན་གྱིས་སོ། །དེ་བཞིན་དུ་རྗེས་སུ་ཆགས་པ་སྒྲུབ་པའི་རྣམ་པ་དེས་བསོད་ནམས་དང་མི་ལྡན་པའི་སྒྲུབ་པ་པོ་སྡིག་བ་དང་ལྡན་པ་རྣམས་ཀྱི་ཡང་ཕྱག་རྒྱ་ཆེན་པོ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་རྣམས་དངོས་གྲུབ་ཐམས་ཅད་འགྲུབ་པར་འགྱུར་ཏེ། དེའི་ཕྱིར་ཕྱག་རྒྱ་ཐམས་ཅད་སྒྲུབ་པ་འདིས་རྨད་དུ་བྱུང་བ་ཡིན་ནོ། །དཀྱིལ་འཁོར་དུ་མ་ཞུགས་པ་རྣམས་ལ་སྙིང་པོ་མཆོག་ནི་སྦྱིན་པར་མི་བྱའོ་ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་སྙིང་པོ་དཀྱིལ་འཁོར་དུ་མ་ཞུགས་པ་རྣམས་ལ་སྦྱིན་པར་མི་བྱའོ། །གསང་ཞིང་གསང་བའི་རྒྱུད་དེ་ནི། །ཞེས་བྱ་བ་ལ། ཡང་དཔལ་མཆོག་དང་པོའི་རྒྱུད་འདི་གསང་ཞིང་གསང་བའི་དཀྱིལ་འཁོར་དུ་མ་ཞུགས་པ་རྣམས་ལ་བསྟན་པར་མི་བྱའོ། །གལ་ཏེ་དངོས་གྲུབ་ཡིད་འོང་འདོད། །ཅེས་བྱ་བ་ལ་གལ་ཏེ་སློབ་དཔོན་ངེས་དཔལ་མཆོག་དང་པོའི་དངོས་གྲུབ་ཤིན་ཏུ་ཡིད་དུ་འོང་བ་འདོད་ན་དེའི་ཚེ་དཀྱིལ་འཁོར་དུ་མ་ཞུགས་པ་རྣམས་ལ་སྦྱིན་པར་མི་བྱའོ། །གང་གི་ཁྱིམ་དུ་གནས་གྱུར་པ། །ཞེས་བྱ་བ་ལ་སོགས་པ་ནི་གོ་སླའོ།། །།དེ་ལྟར་དུམ་བུ་གཉིས་པའི་རྩ་བའི་རྒྱུད་བསྟན་ནས། །ད་ནི་དེ་ཉིད་དང་དུམ་བུ་དང་པོ་ལས་གསུངས་པའི་རྩ་བའི་རྒྱུད་ཀྱི་རྟོག་པ་ཐམས་ཅད་བསྡུ་བའི་ཕྱིར། སེམས་ཅན་ཐམས་ཅད་བདེ་དོན་དུ། །ཞེས་བྱ་བ་ལ་སོགས་པ་གསུངས་ཏེ། དེ་ལ་སེམས་ཅན་ཐམས་ཅད་ཀྱི་བདེ་བ་འཇིག་རྟེན་དང་འཇིག་རྟེན་ལས་འདས་པ་སྟེ་དེའི་དོན་དུའོ། །དེ་བཞིན་དུ་བསྟན་པ་ཐམས་ཅད་ནི་དེ་བཞིན་གཤེགས་པའི་བཀའ་ཕན་པ་དང་བདེ་བའི་དོན་དུ་གཉེར་བ་རྣམས་ཀྱི་བྱ་བ་འདི་ཡིན་ནོ་ཞེས་བྱའོ། །དེ་གྲུབ་པ་ནི་གདུལ་བྱ་རྣམས་ཀྱིས་དེའི་རྗེས་སུ་འབྲང་བས་ཏེ། དེའི་དོན་དུ་
འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་ཐམས་ཅད་དེ། དེ་བཞིན་གཤེགས་པ་རྣམས་བྱང་ཆུབ་སེམས་དཔའ་སྲས་དང་བཅས་པས། བཅོམ་ལྡན་འདས་རྡོ་རྗེ་མཆོག་འཛིན་པ་རྡོ་རྗེ་འཆང་ཆེན་པོ་དེ་ལ་འདི་སྐད་ཅེས་ཞུས་སོ། །བདེ་བ་ཆེན་པོ་རབ་གྲུབ་ཕྱིར། །ཞེས་བྱ་བ་ནི་གདུལ་བྱ་རྣམས་ཀྱིས་སོ། །ཆགས་པ་ཆེན་པོ་རྣམ་དག་ཕྱིར། །ཞེས་བྱ་བ་ནི་དེ་དག་ཉིད་ཀྱིས་སོ། །རྟོག་པ་ཐམས་ཅད་བསྡུས་པའི་རྒྱུད། །སེམས་དཔའ་ཆེན་པོ་བཤད་དུ་གསོལ། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་རྟོག་པ་རྣམས་བསྡུས་པ་ནི་རྟོག་པ་ཐམས་ཅད་བསྡུས་པ་སྟེ། དེ་དང་དེར་བསྟན་པའི་རྟོག་པ་ལ་སོགས་པའི་སྒྲ་ཐམས་ཅད་ཀྱི་དོན་གདུལ་བྱ་རྣམས་ཀྱིས་གཟུང་བའི་དོན་ཞེས་བྱ་བའི་ཐ་ཚིག་གོ །དེ་སྟོན་པར་བྱེད་པའི་རྒྱུད་ནི་མིང་གི་རྣམ་གྲངས་ཀྱི་སྒོ་ནས་དོན་སྟོན་པར་བྱེད་པའི་སྒྲའི་ཚོགས་གསུངས་ཤིག་ཅེས་བྱ་བ་ལ་དེ་བཞིན་གཤེགས་པ་སྲས་དང་བཅས་པ་རྣམས་ཀྱིས་བཅོམ་ལྡན་འདས་རྡོ་རྗེ་འཆང་ཆེན་པོ་ལ་ཞུས་པའོ། །རྣམ་རྟོག་མེད་པའི་ཆོས་རྣམས་ལ། །ཞེས་བྱ་བ་ནས་བརྩམས་ཏེ། བདག་ཅག་རྣམས་ལ་བཤད་དུ་གསོལ། །ཞེས་བྱ་བའི་བར་གྱིས་མདོར་བསྟན་པའི་གཞུང་གིས་ཞུས་པ་ཡིན་ནོ། །དེ་ནས་ཀྱི་སྒྲ་ནི་དེ་མ་ཐག་པ་ལ་སྟེ་དེ་བཞིན་གཤེགས་པ་ཐམས་ཅད་ཀྱིས་ཞུས་པའི་རྗེས་ཐོགས་ཉིད་ལའོ། །སེམས་ཅན་ཐམས་ཅད་ཀྱི་དོན་དུ་དེ་བཞིན་གཤེགས་པ་ཐམས་ཅད་ཀྱི་རྟོག་པ་རྣམས་བསྡུས་པ་དྲིས་པའི་བཀའ་གྲུབ་པ་བསྟན་པའི་དོན་ཡོད་པར་གཟིགས་ནས་ཞལ་ཤིན་ཏུ་རྣམ་པར་བཞད་པའོ། །དམ་ཚིག་ཆེན་པོ་ཐམས་ཅད་ཀྱི་དེ་ཁོ་ན་ཉིད་ཀྱི་རྡོ་རྗེ་ཞེས་བྱ་བ་རྣམ་པར་གནོན་པ་མཛད་ནས་ཞེས་བྱ་བ་ལ། དམ་ཚིག་ཆེན་པོ་ཡང་ཡིན་ལ་ཐམས་ཅད་ཀྱང་ཡིན་པས་ན་དམ་ཚིག་ཆེན་པོ་ཐམས་ཅད་དེ། རིགས་ཐམས་ཅད་གཉིས་སུ་མེད་པར་ཤེས་པའོ། །དེ་ཁོ་ན་ཉིད་ཀྱིས་ནི་རིགས་ལྔའི་དེ་ཁོ་ན་ཉིད་བཅུའི་བདག་ཉིད་དོ། །དེ་ཉིད་དེ་བཞིན་ཉིད་རྡོ་རྗེ་ལྟར་མི་ཕྱེད་པའི་ཕྱིར་རྡོ་རྗེ་སྟེ།
དེའི་མིང་ཅན་གྱིས་རྣམ་པར་གནོན་པའི་རིགས་ལྔར་སྦྲུལ་པས་སེམས་ཅན་གྱི་དོན་མཛད་ནས་འདི་ཞེས་བྱ་བ་ནི་ཐུགས་ལ་གནས་པའི་རྟོག་པ་ཐམས་ཅད་ཇི་ལྟ་བ་བཞིན་དུ་ཤེས་པའི་རྒྱུད་ཕྱི་མ་སྟེ། མཆོག་ཏུ་གྱུར་པའི་སྒྲའི་ཚོགས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་པ་ཡིན་ནོ། །དེ་ལ་ཕྱག་རྒྱ་ཆེན་པོ་ལ་སོགས་པའི་རྟོག་པ་ངེས་པར་ཤེས་པས་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། །དེ་ལ་རྣམ་པར་མི་རྟོག་པའི་རྟོག་པ་ཁྱབ་པའི་རྒྱུད་འདི་ཡིན་ནོ་ཞེས་བྱ་བ་གསུངས་ཏེ། དེ་ལ་ཞེས་བྱ་བའི་སྒྲ་ནི་དམིགས་ཀྱིས་དགར་བའམ། ངག་ཉེ་བར་དགོད་པ་ལ་བལྟ་བར་བྱའོ། །འདི་ཞེས་བྱ་བ་ནི་སྔ་མ་བཞིན་ནོ། །རྣམ་པར་མི་རྟོག་པ་ནི་རྟོག་པ་མེད་པའི་ཏིང་ངེ་འཛིན་ཏེ། དེ་ལས་སྔོན་གོམས་པའི་སྟོབས་ཀྱིས་འབྱུང་བའི་དཀྱིལ་འཁོར་ལ་སོགས་པ་སྒྲུབ་པའི་རྣམ་པར་རྟོག་པ་ནི་རྣམ་པར་མི་རྟོག་པའི་རྟོག་པའོ། །དེ་ཁྱབ་པ་ནི་གདུལ་བྱ་སྐྱེ་བོའི་རྒྱུད་ལ་སོས་སོར་གཏད་པའི་དོན་དུ་སྒྲའི་ཚོགས་ནི་འདིར་ཁྱབ་པའི་རྒྱུད་ཡིན་ནོ། །དེ་བཞིན་གཤེགས་པ་རྣམས་ཀྱིས་གཟུང་བ་དང་འཛིན་པའི་རྟོག་པ་ཕྲལ་བའི་ཆོས་བདག་མེད་པའི་ཏིང་ངེ་འཛིན་རྣམ་པར་མི་རྟོག་པའོ། །ནིའི་སྒྲ་ནི་ངེས་པར་བཟུང་བ་སྟེ་རྣམ་པར་མི་རྟོག་པའི་ཏིང་ངེ་འཛིན་དེ་ཉིད་ལས་སོ། །སེམས་ཅན་དོན་ནི་ཡོངས་སུ་བརྟག །ཅེས་བྱ་བ་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་སེམས་ཅན་རྣམས་ཀྱི་དོན་དུ་གཉེར་བར་བྱས་ན་སེམས་ཅན་གྱི་དོན་ནོ། །སེམས་ཅན་གྱི་དོན་དེ་ཡོངས་སུ་ནི་ཕྱོགས་བཅུ་ཀུན་དུ་སངས་རྒྱས་བཅོམ་ལྡན་འདས་རྣམས་ཀྱི་རབ་ཏུ་འཇུག་པས་ན་ཡོངས་སུ་བརྟག་པར་བརྗོད་པ་ཡིན་ནོ། །ཡོངས་སུ་བརྟག་པའི་རྒྱུད་དེའི་ཕྱིར། དེས་ན་རྟོག་པ་བཤད་པ་སྟེ་ཞེས་བྱ་བ་ལ། རྟོག་པ་ལས་བྱུང་བའི་རྒྱུད་དེ་ཉིད་ཀྱི་ཕྱིར་ཕྱག་རྒྱ་ཆེན་པོ་ལ་སོགས་པར་སྟོན་པར་བྱེད་པའི་སྒྲའི་ཚོགས་ནི་རྟོག་པ་ཞེས་བྱ་བ་སྟེ། །དེ་བཤད་པ་ནི་བརྗོད་པ་ཡིན་ནོ། །རྟོག་པ་ཡོངས་སུ་དག་ཕྱིར་རོ། །ཞེས་བྱ་བ་ལ་སོགས་པ་གདུལ་བྱ་རྣམས་ཀྱི་རྣམ་པར་རྟོག་པ་སྤང་བའི་ཕྱིར་རོ། །འདིས་ནི་འདི་སྐད་སྟོན་པར་འགྱུར་ཏེ། སངས་
རྒྱས་བཅོམ་ལྡན་འདས་རྣམས་ནི་རྟག་ཏུ་མཉམ་པར་གཞག་པ་སྟེ། སྔོན་གྱི་འཕེན་པའི་ཤུགས་ཀྱི་དབང་གིས་བསྟན་པ་ལ་འཇུག་པ་ཡིན་ནོ། །སླར་ཡང་གདུལ་བྱ་རྣམས་ལ་ནི། འདི་ལྟར་རྟོག་པ་འབྱུང་བ་ཡིན་ཏེ། བཅོམ་ལྡན་འདས་ནི་རྣམ་པར་རྟོག་ཅིང་རྣམ་པར་དཔྱད་ནས་ཚིག་ཏུ་གསུང་པ་ཡིན་གྱི་རྣམ་པར་རྟོག་པ་དང༌། རྣམ་པར་དཔྱོད་པ་མེད་པས་ནི་མ་ཡིན་ནོ། །དེ་ལྟར་བསྟན་པའི་ཕྱག་རྒྱ་ཆེན་པོ་ལ་སོགས་པའི་སྒོམ་པ་པོ་རྣམས་རྣམ་པར་མི་རྟོག་པའི་ཏིང་ངེ་འཛིན་རྟོག་པའི་ཕྱིར་སློབ་བཞིན་པ་རྣམས་ཀྱི་རྣམ་པར་རྟོག་པ་དང་བྲལ་བའི་ཏིང་ངེ་འཛིན་ཡིན་ནོ། །དེ་བས་རྟོག་པ་ཡོངས་སུ་དག་པའི་ཕྱིར་རྟོག་པ་བཤད་པ་ཡིན་ནོ། །དེ་ལྟར་ཕྱག་རྒྱ་ཆེན་པོ་ལ་སོགས་པའི་རྟོག་པ་ཤེས་པ་བསྟན་ནས། ད་ནི་སྙིང་པོའི་རྒྱུད་ཤེས་པས་དངོས་གྲུབ་ཐོབ་པ་ཡིན་གྱི་རྣམ་པ་གཞན་གྱིས་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར། དེ་ལ་བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་ནི། རིགས་ཐམས་ཅད་ཀྱི་དཀྱིལ་འཁོར་ཡིན་ལ། དེ་སྟོན་པར་བྱེད་པའི་རྒྱུད་ནི་འདི་ཡིན་ཏེ། ས་ལ་ཡི་གེ་གནས་བྲིས་ནས། ཞེས་བྱ་བ་ལ། ཇི་ལྟར་བཤད་པའི་མཚན་ཉིད་ཅན་གྱི་དཀྱིལ་འཁོར་གྱིས་གཞི་ལ། ཁ་དོག་དབྱིབས་ཀྱིས་བདག་ཉིད་ཅན་གྱི་དཀྱིལ་འཁོར་བྲི་བར་བྱའོ། །ཇི་ལྟ་བུ་ཡིན་ཞེ་ན། ཡི་གེའི་གནས་ནི་ཡི་གེའི་གནས་ཏེ་རྟེན་ནོ། །འགྱུར་བ་མེད་པ་ཆོས་ཀྱི་དབྱིངས་མངོན་དུ་བྱེད་པའི་ཐབས་སོ། །བདེ་བ་ཆེན་པོ་ཞེས་བརྗོད་དོ། །ཞེས་བྱ་བ་ལ་བདེ་བ་ཆེན་པོ་ཐོབ་པར་བྱེད་པའི་ཐབས་དང༌། བདེ་བ་ཆེན་པོའི་རྒྱུ་དང་མཐུན་པ་དང༌། བདེ་བ་ཆེན་པོ་སྟོན་པར་བྱེད་པ་ཉིད་ཀྱི་ཕྱིར། ཁ་དོག་དང་དབྱིབས་ཀྱི་བདག་ཉིད་ཀྱི་དཀྱིལ་འཁོར་དེ་ཉིད་བདེ་བ་ཆེན་པོ་ཞེས་བྱ་བར་བརྗོད་པ་ཡིན་ནོ། །དེའི་དམ་ཚིག་རྡོ་རྗེ་ཞེས་བྱ་བ་ལ་གང་ཞིག་བདེ་བ་ཆེན་པོའི་སྙིང་པོ་ཡི་གེ་བཅུ་བདུན་པོ་ཉིད་ནི་མི་ཕྱེད་པའི་ཕྱིར་རོ། །རྡོ་རྗེ་དེ་ཉིད་རིགས་ཐམས་ཅད་ཀྱི་དཀྱིལ་འཁོར་དེའི་དམ་ཚིག་ནི་བསྐྱེད་པའི་རྒྱུ་ཡིན་ནོ། །དེ་ཇི་ལྟ་བུ་ཞེ་ན། སྙིང་པོ་
ཐམས་ཅད་སྒྲུབ་པར་བྱེད་པོའོ་ཞེས་བྱ་བ་ལ་རྣམ་པར་མི་རྟོག་པའི་ཡེ་ཤེས་བྱང་ཆུབ་ཆེན་པོའི་མཚན་ཉིད་ཅན་གང་ཡིན་པ་དེ་ནི་སྙིང་པོ་སྟེ། དེ་ལས་བྱུང་བའི་ཡི་གེ་བཅུ་བདུན་གྱི་བདག་ཉིད་ཅན་ཉེ་བར་བཏགས་པའི་སྙིང་པོའོ། །དེ་ཉིད་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་ཐམས་ཅད་རྫོགས་པར་བྱེད་པ་ཉིད་ཀྱི་ཕྱིར་ཐམས་ཅད་སྒྲུབ་པར་བྱེད་པ་ཡིན་ནོ། །འདིས་ནི་བྱང་ཆུབ་ཆེན་པོའི་མཚན་ཉིད་ཅན་དུ་ངེས་པའི་ཡེ་ཤེས་ནི་སྙིང་པོའོ། །དེ་ལས་བྱུང་བའི་སྒྲའི་རང་བཞིན་རིགས་ཐམས་ཅད་ཀྱི་དཀྱིལ་འཁོར་རྣམས་བསྐྱེད་པའི་རྒྱུ་གང་ཡིན་པ་དེ་ཡང་སྙིང་པོར་བསྟན་ཏོ། །དེ་ཅིའི་ཕྱིར་ཞེ་ན། བསྐལ་པ་བཟང་པོ་ལ་སོགས་པ་ལས་སྔོན་དུ་ཐོག་མ་མེད་པའི་ངོ་བོ་ཉིད་གཉིས་སུ་མེད་པའི་ཡེ་ཤེས་གནས་པ་ཡིན་ཏེ་དེའི་ཕྱིར་ཡི་གེ་བཅུ་བདུན་པའི་སྙིང་པོ་བར་མཚམས་མེད་པ་ཉིད་དུ་རིགས་ཐམས་ཅད་ཀྱི་དཀྱིལ་འཁོར་རྣམས་སྐྱེད་པར་བྱེད་པ་ཉིད་དུ་གནས་པ་ཡིན་ནོ། །དེ་ལྟར་སྙིང་པོ་ཤེས་པའི་རྒྱུད་བསྟན་ནས། །ད་ནི་ཇི་ལྟར་སྦྲུལ་པའི་དཀྱིལ་འཁོར་ཤེས་པས་དངོས་གྲུབ་ཐོབ་པའི་དོན་དུ་དཀྱིལ་འཁོར་གྱི་བཤད་པའི་རྒྱུད་བསྟན་པའི་ཕྱིར། །དེ་ལ་ཞེས་བྱ་བ་ལ་སོགས་པ་གསུངས་ཏེ་ཇི་ལྟར་གནས་ཞེས་བྱ་བ་ནི་ཇི་ལྟར་དཀྱིལ་འཁོར་རྒྱལ་མཆོག་བསྒོམས་པའི་དུས་སུ། །གཞན་འཕྲུལ་དབང་བྱེད་ཀྱི་ལྷའི་གནས་ལ་སོགས་པའི་གནས་བསྟན་པ་དེ་བཞིན་དུ་སྐྱེད་མོས་ཚལ་གྱི་གནས་སུ་དཀྱིལ་འཁོར་གནས་ཏེ་རྣམ་པར་བསྒོམས་ལ། གནས་དེ་རུ་དཀྱིལ་འཁོར་བྲི་བར་བྱའོ། །ཇི་ལྟར་དུས་ཞེས་བྱ་བ་ནི། རྒྱས་པའི་ལས་ནི་སྔ་དྲོ། །དྲག་པོའི་ལས་ནི་ཉི་མ་ཕྱེད་དམ་མཚན་ཕྱེད། །ཞི་བ་ལ་ནི་སྲོད་ཀྱི་དུས་སུའོ། །སྒྲུབ་པ་ཆེན་པོ་ལ་ནི་ཉི་མ་འཆར་ཀའི་དུས་སུ་དཀྱིལ་འཁོར་བྲི་བར་བྱའོ། །ཇི་ལྟར་འཇིག་རྟེན་ཞེས་བྱ་བ་ནི་དཔལ་རྡོ་རྗེ་སེམས་དཔའི་རིགས་སུ་ནི་སྒེག་པའི་ཉམས་གཙོ་བའོ། །དེ་བཞིན་གཤེགས་པ་ནི་ཞི་བའི་ཉམས་གཙོ་བའོ། །རྡོ་རྗེ་ཧཱུཾ་མཛད་ཁྲོ་ཞིང་རྔམ་པ་སྟེ་ཁྲོ་བོའི་ཉམས་གཙོ་བའོ། །རྡོ་རྗེ་འཇིག་རྟེན་དབང་ཕྱུག་གི་ནི་སྙིང་རྗེའི་ཉམས་གཙོ་བའོ། །འཕགས་པ་
ནམ་མཁའི་སྙིང་པོའི་ཁམས་གསུམ་པའི་ཆོས་ཀྱི་རྒྱལ་སྲིད་ཀྱི་རང་བཞིན་དཔའ་བའི་ཉམས་གཙོ་བ་སྟེ་དགྱེས་ཤིང་དགྱེས་པ་ཡིན་ནོ། །འདིར་འཇིག་རྟེན་གྱི་སྒྲས་རིགས་བརྗོད་པ་ཡིན་ཏེ། འཇིག་རྟེན་དེ་ཡང་གང་གི་གང་ཡིན་པ་དེ་ཉིད་ཀྱིས་དེ་བྲི་བར་བྱའོ། །ཇི་ལྟ་བུ་ཞེས་བྱ་བ་ནི་དབྱིབས་ལ་བརྟེན་ནས་འདི་གསུངས་པ་ཡིན་ཏེ། འཇིག་རྟེན་དེའི་དབྱིབས་ཇི་ལྟ་བུ་ཡོད་པ་དེ་ལྟ་བུ་ཁོ་ན་དཀྱིལ་འཁོར་དུ་བྲི་བར་བྱའོ། །འཁོར་ནི་དགོད་པར་བྱ་བ་སྟེ་ཞེས་བྱ་བ་ལ་བྲི་བའི་དཀྱིལ་འཁོར་ཆོ་ག་གོང་དུ་ལྷ་རྣམས་ཀྱི་གནས་ཀྱི་ངེས་པ་བསྟན་པ་དེ་བཞིན་དུ་ལྷ་དེ་བྲི་བར་བྱ་སྟེ་གཞན་དུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་དཀྱིལ་འཁོར་གྱི་དོན་གྱི་རྒྱུད་བསྟན་ནས། ད་ནི་དཀྱིལ་འཁོར་དུ་ཞུགས་པའི་ཕན་ཡོན་ཤེས་པས་ཀྱང་དངོས་གྲུབ་འགྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དཀྱིལ་འཁོར་དུ་ཞུགས་པའི་རྣམ་པར་སྨིན་པའི་རྒྱུད་ཅེས་བྱ་བ་གསུངས་ཏེ། རིགས་ཐམས་ཅད་ཀྱི་དཀྱིལ་འཁོར་དུ་ཞུགས་ན་བསོད་ནམས་དང༌། ཡེ་ཤེས་ཀྱི་ཚོགས་གདུལ་བྱ་རྣམས་ལ་གང་འབྱུང་བ་དེ་ནི་རྣམ་པར་སྨིན་པ་ཞེས་བརྗོད་དེ་ཕན་ཡོན་ཞེས་བྱ་བའི་དོན་ཏོ། །རྡོ་རྗེ་སེམས་དཔའ་སོགས་སེམས་དཔའི། །ཞེས་བྱ་བ་ལ། རྡོ་རྗེ་སེམས་དཔའ་གང་ལ་ཡོད་པ་དེ་ནི་རྡོ་རྗེ་སེམས་དཔའ་ལ་སོགས་པའི་སེམས་དཔའ་རྣམས་ཏེ། རྡོ་རྗེ་ཡིད་ལས་བྱུང་བ་ནས་བརྩམས་ཏེ། རིན་ཆེན་དྲིལ་བུའི་མཐར་ཐུག་པའི་རིགས་ལྔའི་ལྷ་རྣམས་སོ། །དེ་རྣམས་ཀྱི་འཁོར་དང་བཅས་པ་དེ་ཚེ་དཀྱིལ་འཁོར་དུ་ཞེས་བྱ་བ་ལ། འཁོར་དང་ལྷན་ཅིག་ཏུ་ཞུགས་པས་ན་འཁོར་དང་བཅས་པ་སྟེ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་རོ། །ཆོས་ཀྱི་ལོངས་སྤྱོད་ཀྱི་ཕྱིར་སྤྲུལ་པའི་འཁོར་དང་བཅས་པའི་དཀྱིལ་འཁོར་དེར་དེ་ཚེ་སྟེ་དེའི་དུས་སུ་ཇི་ལྟར་སྐལ་བ་དང་ལྡན་པ་རྣམས་བཞུགས་པས། བསོད་ནམས་ཀྱི་ཚོགས་ཇི་ཙམ་འབྱུང་བའི་ཚད་དེ་ཙམ་དང་མཚུངས་པ་ཉིད་ཀྱི་བྲི་བའི་དཀྱིལ་འཁོར་འདིར་དེ་ལྟར་ཞུགས་ཀྱང་འབྱུང་བ་ཡིན་ནོ། །དེ་ལྟར་དཀྱིལ་འཁོར་དུ་ཞུགས་པའི་འབྲས་བུ་གདུལ་བྱའི་
སྐྱེ་བོ་རྣམས་སྤྲོས་པར་བྱ་བའི་ཕྱིར་བསྟན་ནས། ད་ནི་རིགས་ཐམས་ཅད་ཀྱི་འཁོར་ལོའི་ཁྱད་པར་ཤེས་པས་ཀྱང་དངོས་གྲུབ་འབྱུང་བ་ཡིན་ནོ་ཞེས་རབ་ཏུ་བསྟན་པར་བྱ་བའི་ཕྱིར། དེ་ནས་རིགས་ཐམས་ཅད་འཁོར་ལོའི་རྒྱུད་ཅེས་བྱ་བ་རིགས་ཐམས་ཅད་ཀྱི་འཁོར་ལོའི་ཁྱད་པར་ཤེས་པའི་རྒྱུད་གསུངས་པ་ཡིན་ཏེ། རིགས་ཐམས་ཅད་ཀྱི་འཁོར་ལོའི་དཀྱིལ་འཁོར་ཏེ། དེ་རྣམས་ཀྱི་ཁྱད་པར་ནི་གསལ་བའི་དབྱེ་བའོ། །རྡོ་རྗེ་འཁོར་ལོ་བསྟན་པ་བཞིན། །ཞེས་བྱ་བ་ལ་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དག་གི་དཀྱིལ་འཁོར་ནི། རྡོ་རྗེ་འཁོར་ལོ་སྟེ་སྔར་བྲི་བའི་ཆོ་གར་གཉིས་པོའི་ཁ་དོག་དང་དབྱིབས་ཀྱི་བདག་ཉིད་ཇི་ལྟར་བཤད་པ་དེ་བཞིན་དུ་གཟུང་བར་བྱའོ། །ལྕགས་ཀྱི་འཁོར་ལོ་དམ་པ་སྟེ། །ཞེས་བྱ་བ་ལ་དཀྱིལ་འཁོར་དམ་པ་ནི་ཕུལ་དུ་བྱུང་བ་སྟེ་ནང་གི་དཀྱིལ་འཁོར་ནི་ལྕགས་ཀྱིས་བྲི་བར་བྱའོ། །དེ་གང་ཡིན་ཞེ་ན། འབར་བའི་འཁོར་ལོ་ཞེས་བྱ་བ་ལ་རབ་ཏུ་དགའ་བའི་རྡོ་རྗེ་ཁྲོ་བོའི་ནང་གི་རིམ་པ་གང་ཡིན་པ་དེ་འབར་བའི་འཁོར་ལོ་སྟེ། ལྕགས་ཀྱི་ཡིན་ནོ་ཞེས་པའི་དོན་ཏོ། །དེ་བཞིན་དུ་པདྨ་འདབ་བརྒྱད་ཅེས་བྱ་བ་ལ་ཇི་ལྟར་སྔར་བཤད་པའི་མཚན་ཉིད་ཅན་གྱིས་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དག་གི་དཀྱིལ་འཁོར་དུ་གསུངས་པ་དེ་བཞིན་དུ་མཚན་ཉིད་དེ་ཉིད་ཀྱིས། རྡོ་རྗེ་འཇིག་རྟེན་དབང་ཕྱུག་གི་ནང་གི་དཀྱིལ་འཁོར་པདྨ་འདབ་མ་བརྒྱད་པར་ཤེས་པར་བྱའོ། །ནོར་བུ་ཆེ་ཞེས་བྱ་བ་འཕགས་པ་ནམ་མཁའི་སྙིང་པོའི་ནང་གི་དཀྱིལ་འཁོར་ཟུར་བརྒྱད་པའི་ནོར་བུ་ཆེན་པོའི་རང་བཞིན་དུ་ཤེས་པར་བྱའོ། །དེ་ལྟར་འཁོར་ལོའི་ཁྱད་པར་ཤེས་པ་བསྟན་ནས། ད་ནི་དཀྱིལ་འཁོར་ཐམས་ཅད་ཀྱི་སྒྲུབ་པ་ཤེས་པས་དངོས་གྲུབ་འབྱུང་བ་ཡིན་ནོ་ཞེས་བསྟན་པར་བྱ་བའི་ཕྱིར། དེ་ནས་དཀྱིལ་འཁོར་ཐམས་ཅད་སྒྲུབ་པའི་རྒྱུད་ཅེས་བྱ་བ་གསུངས་ཏེ། དཀྱིལ་འཁོར་ཐམས་ཅད་ནི་ཇི་ལྟར་བཤད་པ་བཞིན་ཏེ། དེ་རྣམས་སྒྲུབ་པ་ནི་རྫོགས་པའི་རྒྱུའོ། །དཀྱིལ་འཁོར་བརྟག་པར་བྱས་ནས་ནི། །ཞེས་བྱ་བ་ཇི་ལྟ་བ་བཞིན་དུ་དཀྱིལ་འཁོར་བྲིས་ཏེ་ཡང་དག་པར་
མཆོད་ལ། ནང་གི་རིམ་པས་འཇུག་བྱ་སྟེ། །ཞེས་བྱ་བ་ལ་འཇུག་པའི་ཚོགས་དཀྱིལ་འཁོར་དུ་ཞུགས་ནས། དཀྱིལ་འཁོར་གྱི་བདག་ཉིད་ཆེན་པོ་སྟེ་གཙོ་བོ་ལ། ཛཿ་ཧཱུཾ་བཾ་ཧོཿ། པྲ་སིདྡྷྱ་མཾ་ཞེས་བྱ་བ་བརྗོད་པར་བྱའོ། །དེ་ལྟར་དཀྱིལ་འཁོར་བསྒྲུབ་པའི་རྒྱུད་བསྟན་ནས། ད་ནི་རྡོ་རྗེ་སེམས་དཔའ་ཉིད་ཤེས་པས་ཀྱང་དེ་བསྒྲུབ་བོ་ཞེས་བསྟན་པའི་ཕྱིར། དེ་ནས་རྡོ་རྗེ་སེམས་དཔའ་ཉིད་བཤད་པའི་རྒྱུད་ཅེས་བྱ་བ་གསུངས་ཏེ་རྡོ་རྗེ་སེམས་དཔའ་དངོས་པོ་ནི་རྡོ་རྗེ་སེམས་དཔའ་ཉིད་དོ། །དེའི་བཤད་པའི་རྒྱུད་འདི་ཡིན་ཏེ། སངས་རྒྱས་ལ་སོགས་སེམས་ཅན་ཀུན། །ཞེས་བྱ་བ་ལ་འཇིག་རྟེན་དང་འཇིག་རྟེན་ལས་འདས་པའི་སེམས་ཅན་ཐམས་ཅད་ཀྱི་དང་པོར་སངས་རྒྱས་གང་ལ་ཡོད་པ་དེ་ནི་སངས་རྒྱས་ལ་སོགས་སེམས་ཅན་ཀུན་ཏེ། སངས་རྒྱས་ལ་སོགས་པའི་སེམས་ཅན་ཐམས་ཅད་དོ། །དེ་རྣམས་ཀྱི་ཐམས་ཅད་ཉིད་ནི་ཐམས་ཅད་ཀྱི་སེམས་ཀྱི་ངོ་བོའོ། །དེ་གང་ཡིན་ཞེ་ན། བཅོམ་ལྡན་འདས་རྡོ་རྗེ་འཆང་ཆེན་ཡིན་ལ། ཐོག་མ་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་ཅན་བཅོམ་ལྡན་འདས་རྡོ་རྗེ་འཆང་ཆེན་པོའོ། །མཆོག་ཅེས་བྱ་བ་ནི་ཕུལ་དུ་བྱུང་བ་སྟེ། ཀུན་གཞིའི་རྣམ་པར་ཤེས་པ་ལ་སོགས་པའི་སེམས་ཅན་ནི་དོན་དམ་པར་ཐོག་མ་ནས་མ་སྐྱེས་པའི་ཕྱིར་ཞེས་བྱ་བར་དགོངས་སོ། །སེམས་ཅན་འབྱུང་ཕྱིར་སེམས་དཔའ་སྟེ། །ཞེས་བྱ་བ་ལ། ཐོག་མ་ཐ་མ་མེད་པའི་ཆོས་ཀྱི་དབྱིངས་ཀྱི་ངོ་བོ་བཅོམ་ལྡན་འདས་རྡོ་རྗེ་འཆང་ཆེན་པོ་དེ་ལ་རིགས་ལྔའི་རང་བཞིན་གྱི་སེམས་ཅན་རྣམས་སྔོན་གོམས་པའི་སྟོབས་ཀྱིས། སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་བྱེད་པར་འབྱུང་བ་ཡིན་ཏེ་དེའི་ཕྱིར་ཉེ་བར་བཏགས་ནས་སེམས་དཔའ་ཞེས་བརྗོད་པ་ཡིན་ནོ། །རྡོ་རྗེ་སེམས་དཔའ་ནི་མི་ཕྱེད་པའོ། །རབ་ཏུ་གྲགས་པ་ནི་རྡོ་རྗེ་འཆང་གིས་རབ་ཏུ་བསྟན་པ་ཡིན་ནོ། །དེ་ལྟར་རྡོ་རྗེ་སེམས་དཔའ་བཤད་ནས། ད་ནི་དམ་ཚིག་ཆེན་པོའི་དེ་ཁོ་ན་ཉིད་ཤེས་ན་དངོས་གྲུབ་ཐོབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དམ་
ཚིག་ཆེན་པོའི་དེ་ཁོ་ནའི་རྒྱུད་ཅེས་བྱ་བ་གསུངས་ཏེ། དམ་ཚིག་ཀྱང་ཡིན་ལ་ཆེན་པོ་ཡང་ཡིན་པས་དམ་ཚིག་ཆེན་པོ་སྟེ། ཐོག་མ་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་ཐམས་ཅད་ལ་ཁྱབ་པའི་ཕྱིར། རྡོ་རྗེ་འཆང་ཆེན་པོའི་དེ་ཉིད་ཡིན་ནོ། །དེའི་དེ་ཁོ་ན་ཉིད་ནི་རབ་ཏུ་དགའ་བའི་ཀུན་དུ་བཟང་པོ་ཉིད་དོ། །ཐོག་མ་ཐ་མ་མེད་པའོ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །ཁམས་གསུམ་པའི་ཆོས་ཉིད་དང༌། ཁམས་གསུམ་ལ་སྤྲུལ་པ་མཐོང་བས་འཁོར་བའོ། དེ་བཞིན་མྱ་ངན་འདས་ཞེས་བྱ་བ་ནི་ཉན་ཐོས་དང་རང་སངས་རྒྱས་དང༌། དེ་བཞིན་གཤེགས་པའི་མྱ་ངན་ལས་འདས་པའི་རང་བཞིན་ཉིད་ཡིན་པའི་ཕྱིར་དོན་དམ་པ་སྟེ། དེའི་ཕྱིར་མྱ་ངན་ལས་འདས་པའོ། །དེ་ལྟར་དམ་ཚིག་ཆེན་པོའི་དེ་ཁོ་ན་ཉིད་ཀྱི་བཤད་པའི་རྒྱུད་བསྟན་ནས། ད་ནི་ཐོག་མ་དང་ཐ་མ་མེད་པ་ཉིད་ཤེས་པས་དངོས་གྲུབ་ཐོབ་པར་འགྱུར་རོ་ཞེས་བསྟན་པར་བྱ་བའི་ཕྱིར། ཐོག་མ་དང་ཐ་མ་མེད་པ་ཉིད་བཤད་པའི་རྒྱུད་ཅེས་བྱ་བ་གསུངས་ཏེ། ཐོག་མ་དང་ཐ་མ་མེད་པའི་དངོས་པོ་ནི་ཐོག་མ་དང་ཐ་མ་མེད་པ་ཉིད་དེ། ཐོག་མ་དང་ཐ་མ་མེད་པ་ཉིད་ནི་དང་པོ་ནས་མ་སྐྱེས་པའི་འདུས་བྱས་ཐམས་ཅད་དོ། །དེ་ཉིད་བཤད་པར་བྱ་བ་ནི། ནམ་མཁའ་འབྱུང་བ་ཆེན་པོའི་གནས། །ཞེས་བྱ་བ་གསུངས་སོ། །ནམ་མཁའི་སྐྱེ་བ་ཞེས་བྱ་བ་ནི་རྩིག་པ་ལ་སོགས་པ་ཞིག་པས་ནམ་མཁའ་སྐྱེ་བ་སྟེ། རྫས་ཐམས་ཅད་མེད་པའི་མཚན་ཉིད་ཅན་ནོ། །ཅིའི་ཕྱིར་ཞེ་ན། སྐྱེ་མེད་ཕྱིར་ཞེས་བྱ་བ་ལ། །སྐྱེ་བ་མེད་པ་ནི་སྐྱེ་བ་མེད་པ་སྟེ། རྒྱུ་དེའི་ཕྱིར་རྩིག་པ་ལ་སོགས་པ་ཞིག་པ་ཉིད་ནམ་མཁའི་སྐྱེ་བ་སྟེ་ནམ་མཁའི་རྫས་མ་ཡིན་པའི་ཕྱིར་རོ། །རྡོ་རྗེ་སེམས་དཔའ་དེ་བཞིན་ནོ་ཞེས་བྱ་བ་ལ། ཇི་ལྟར་རྩིག་པ་ལ་སོགས་པ་རྣམ་པར་ཞིག་པ་ནི་ནམ་མཁའ་སྐྱེ་བར་འདོགས་པ་དེ་བཞིན་དུ་རྣལ་འབྱོར་བ་ལས་མ་བྱུང་བའི་ཀུན་དུ་བརྟགས་པ་འཇིག་པ་ནི་རྡོ་རྗེ་སེམས་དཔའ་སྐྱེ་ཞེས་འདོགས་པ་ཡིན་ནོ། །དེ་ལྟར་ཐོག་མ་དང་ཐ་མ་མེད་པ་ཉིད་བསྟན་ནས་ད་ནི་རབ་ཏུ་དགའ་བ་ཉིད་ཤེས་པས་ཀྱང་དངོས་གྲུབ་ཐོབ་བོ་ཞེས་བསྟན་པའི་ཕྱིར། དེ་ནས་བཅོམ་ལྡན་འདས་ཀྱིས་རབ་ཏུ་
དགའ་བ་ཉིད་ཀྱི་བཤད་པའི་རྒྱུད་ཅེས་བྱ་བ་གསུངས་ཏེ་མི་གནས་པའི་མྱ་ངན་ལས་འདས་པའི་རང་བཞིན་ཅན། བསྐལ་པ་བཟང་པོ་ལ་སོགས་པ་ལས་ཀྱང་སྔར་གནས་པའི་རྣལ་འབྱོར་པས། རྡོ་རྗེ་ལྷ་མོ་ཚོགས་ཀྱི་ནང་དུ་བདེ་བ་དང་ཡིད་བདེ་བ་ཐམས་ཅད་ཉམས་སུ་མྱོང་ཞིང་ཞུགས་པའི་བཅོམ་ལྡན་འདས་རྡོ་རྗེ་སེམས་དཔའ་ནི་རབ་ཏུ་དགའ་བ་སྟེ་དེའི་དངོས་པོ་ནི་རབ་ཏུ་དགའ་བ་ཉིད་དོ། །རབ་ཏུ་དགའ་ཕྱིར་ཉོན་མོངས་ཏེ། །ཞེས་བྱ་བ་ལ། བུད་མེད་དང་སྐྱེས་པ་དག་གི་དབང་པོ་གཉིས་སྙོམས་པར་ཞུགས་པ་ལས་བྱུང་བའི་བདེ་བ་དང་ཡིད་བདེ་བའི་ཁྱད་པར་ནི་རབ་ཏུ་དགའ་བའོ། །དེའི་དོན་དུ་འགྲོ་བ་ཐམས་ཅད་སྟེ་ཆགས་པ་དང་བཅས་པའི་སེམས་ཅན་གྱི་ཁམས་ཉོན་མོངས་པར་འགྱུར་རོ། །དེ་ཁྱད་པར་ཅི་དང་ལྡན་པ་ཡིན་ཞེ་ན། བདེ་བ་འདོད་པ་ཞེས་བྱ་བ་ནི། འགྲོ་བ་དེ་དག་ཐམས་ཅད་བདེ་བ་འདོད་པས་ཚོལ་ཁྲོའི་སྡུག་བསྔལ་གྱིས་ཉོན་མོངས་པར་འགྱུར་རོ། །དེ་ལ་ཞེས་བྱ་བའི་ནི་འགྲོ་བ་དེར་རོ། །བདེ་བ་རྣམ་དག་ཕྱིར་ཞེས་བྱ་བ་ནི་བདེ་བ་རྣམ་པར་དག་པའི་དོན་དུའོ། །བསྐལ་པ་བཟང་པོ་ལ་སོགས་པ་ལས་སྔ་རོལ་དུ་ལྷ་མོའི་ཚོགས་ཀྱི་ནང་ན་ཞུགས་པ་ཐོགས་མ་དང་ཐ་མ་མེད་པའི་བཅོམ་ལྡན་འདས་རྡོ་རྗེ་སེམས་དཔའ་སྐྱེ་བ་ཡིན་ཏེ། འདོད་པའི་ཁམས་ཀྱི་དབང་ཕྱུག་ལ་སོགས་པ་འདུལ་བར་མཛད་པའི་ཕྱིར་རྡོ་རྗེ་འདོད་པའི་ཁམས་ཀྱི་དབང་ཕྱུག་གི་གཟུགས་སུ་སྐྱེ་བ་ཡིན་ནོ། །དེ་ནས་དེའི་གཟུགས་མཐོང་ནས་འདོད་པའི་ཁམས་ཀྱི་དབང་ཕྱུག་ཡེ་ཤེས་འབབ་པ་མཐོང་ནས་ས་བརྒྱད་དབང་ཕྱུག་ཏུ་གྲུབ་སྟེ། དེའི་ཕྱིར་བཅོམ་ལྡན་འདས་འདོད་པའི་ཁམས་ཀྱི་དབང་ཕྱུག་ཐོབ་པར་འདོད་པ་གཞན་དག་ཀྱང་འདུལ་བར་མཛད་པའི་ཕྱིར། རྡོ་རྗེ་འདོད་པའི་དབང་ཕྱུག་གི་གཟུགས་སུ་ཕྱི་མའི་མཐའི་བར་དུ་འཁོར་བར་བཞུགས་པ་ཡིན་ནོ། །དེ་ལྟར་བཅོམ་ལྡན་འདས་ཀྱིས་རབ་ཏུ་དགའ་བ་ཉིད་བསྟན་ནས། ད་ནི་སྙིང་པོའི་དེ་ཁོ་ན་ཉིད་ཤེས་པས་དངོས་གྲུབ་ཐོབ་པར་འགྱུར་རོ་ཞེས་བསྟན་པར་བྱ་བའི་ཕྱིར། དེ་ནས་དང་པོའི་སྙིང་པོ་དེ་ཁོ་ན་ཉིད་བཤད་པའི་རྒྱུད་ཅེས་
བྱ་བ་གསུངས་ཏེ། དང་པོ་ཡང་ཡིན་ལ་སྙིང་པོ་ཡང་ཡིན་པས་དང་པོའི་སྙིང་པོ་སྟེ་ཡི་གེ་ཧཱུཾ་ངོ༌། །དེའི་དེ་ཁོ་ན་ཉིད་ནི་འདོད་པ་ཅན་ཐམས་ཅད་སད་པར་བྱེད་པའི་ལས་སོ། །ཆགས་པ་ཀུན་ནས་ཆགས་པ་ཆེ། །ཞེས་བྱ་བ་ལ་ཆགས་པ་ཡང་ཡིན་ལ་ཀུན་ཀྱང་ཡིན་པས་ཆགས་པ་ཀུན་ཏེ། རྡོ་རྗེ་སེམས་དཔའ་ལ་སོགས་པ་རྣམས་ཀྱི་ཐབས་དང་ཤེས་རབ་ཀྱི་རང་བཞིན་ཉིད་དོ། །ཆགས་པ་ཀུན་དེ་ཉིད་ལས་ཆགས་པ་ཆེ་བ་སྟེ། སྙིང་པོ་འབྱུང་བ་ཡིན་ནོ། །དེ་ལས་ཇི་ལྟ་བུ་དང་ལྡན་པ་ཡིན་ཞེ་ན། འདོད་ལྡན་ཐམས་ཅད་སད་པར་བྱེད། །ཅེས་བྱ་བ་ལ། དངོས་གྲུབ་ཐམས་ཅད་འདོད་པ་ནི་འདོད་ལྡན་ཐམས་ཅད་དོ། །དེ་སད་པ་ནི་རབ་ཏུ་གསལ་བར་བྱེད་པའོ། །ཆགས་པ་འབར་བ་དྲི་ཟའི་སྙིང་པོ་ཞེས་བྱ་བ་ལ་ཆགས་པ་ནི་རྡོ་རྗེ་སེམས་དཔའ་སྟེ། ཆགས་པ་དམ་ཚིག་རབ་ཏུ་བཤད། །ཅེས་འོག་ནས་གསུངས་པའི་ཕྱིར་རོ། །དེ་འབར་བ་ནི་སྒྲུབ་པ་པོའི་རྒྱུད་ལ་མངོན་དུ་འགྱུར་བར་བྱེད་པ་སྟེ། དེའི་དོན་དུ་དྲི་ཟའི་སྙིང་པོ་ནི་གླུའི་སྙིང་པོ་སྟེ་ཡི་གེ་ཧཱུཾ་ཡིན་ནོ་ཞེས་བྱ་བའི་དོན་ཏོ། །དེ་གང་གི་སྙིང་པོ་ཡིན་ཞེ་ན། ཕྱག་ན་རྡོ་རྗེ་ཞེས་བྱ་བ་སྟེ་རྡོ་རྗེ་འཆང་གིའོ་ཞེས་བྱ་བའི་ཐ་ཚིག་གོ །ད་ནི་ཡི་གེ་ཧཱུཾ་གི་གླུ་བླང་བ་ཤེས་པས་དངོས་གྲུབ་ཐོབ་པར་འགྱུར་རོ་ཞེས་བསྟན་པའི་ཕྱིར་དེ་ནས་ཡི་གེ་ཧཱུཾ་གི་གླུ་བླང་བའི་རྒྱུད་ཅེས་བྱ་བ་གསུངས་ཏེ། ཡི་གེ་ཧཱུཾ་ཉིད་གླུ་སྟེ་ཡི་གེ་ཧཱུཾ་གི་གླུའོ། །དེའི་གླུ་བླང་བ་ནི་དྲུག་ལྡན་ལ་སོགས་པའི་གླུ་རྣམ་པ་ཐམས་ཅད་ཀྱིས་མངོན་པར་འདོད་པའི་དོན་སྒྲུབ་པའི་ཕྱིར་བཟླས་པའོ། །གླུ་ལས་ཆགས་པ་ཞེས་བྱ་བ་ནི་ཡི་གེ་ཧཱུཾ་དང་བཅས་པའི་གླུའི་བཟླས་པ་ལས་རྡོ་རྗེ་སེམས་དཔའ་ལ་སོགས་པའི་ཡུལ་ལ་ཆགས་པ་ནི་ཞེན་པའོ། །ཞེན་པ་དེ་ལས་དགའ་བ་སྐྱེ་བའོ། །དགའ་བ་ལས་འདོད་པ་སྟེ། རྡོ་རྗེ་སེམས་དཔའ་ལ་སོགས་པའི་བསྒོམ་པ་ལས་བྱུང་བའི་བདེ་བ་དང་ཡིད་བདེ་བ་ནི་འདོད་པའོ། །རབ་ཏུ་དགའ་བས་ཐམས་ཅད་འབྱུང༌། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་བསྒོམ་པ་ལས་བྱུང་བའི་བདེ་བ་དང༌། ཡིད་བདེ་བའི་བདག་ཉིད་ཀྱི་རབ་ཏུ་དགའ་བ་དེ་ལས་
རིགས་ཐམས་ཅད་འབྱུང་བ་ཡིན་ནོ། །ཐམས་ཅད་འབྱུང་བར་གྲུབ་པའི་ཕྱིར། །བསྐལ་པའི་དང་པོར་བཅོམ་ལྡན་གསུངས། །ཞེས་བྱ་བ་ལ། རིགས་ཐམས་ཅད་འབྱུང་བ་ནི་སྐྱེ་བ་སྟེ། དེ་གྲུབ་པ་ནི་གདུལ་བྱའི་སྐྱེ་བོའི་རྒྱུད་ལ་རྫོགས་པའོ། །དེའི་དོན་དུ་བསྐལ་པ་བཟང་པོའི་དང་པོར་བཅོམ་ལྡན་འདས་རྡོ་རྗེ་འཆང་ཆེན་པོས་ཡི་གེ་ཧཱུཾ་གི་ཞེས་བྱ་བའི་སྙིང་པོ་གསུངས་པ་ཡིན་ནོ། །དེ་ལྟར་ཡི་གེ་ཧཱུཾ་གི་གླུ་བླང་བའི་རྒྱུད་བསྟན་ནས། ད་ནི་ཡི་གེ་ཧཱུཾ་གི་གླུའི་བཟླས་པའི་དོན་ཤེས་པས་དངོས་གྲུབ་ཐོབ་པ་ཡིན་ནོ་ཞེས་བསྟན་པའི་ཕྱིར། དེ་ནས་ཡི་གེ་ཧཱུཾ་གི་བཟླས་པའི་དོན་གྱི་བཤད་པའི་རྒྱུད་ཅེས་བྱ་བ་གསུངས་ཏེ། ཡི་གེ་ཧཱུཾ་གི་བཟླས་པའི་དོན་ནི་རྗེས་སུ་ཆགས་པ་སྟེ། དེ་སྟོན་པར་བྱེད་པའི་རྒྱུད་བཅོམ་ལྡན་འདས་ཀྱིས་གསུངས་པའོ། །མྱུར་དུ་ཐམས་ཅད་རྗེས་ཆགས་པས། །ཞེས་བྱ་བ་ལ། ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་སྟེ། དེ་རྗེས་སུ་ཆགས་པ་ནི་ཡང་དང་ཡང་དུ་མངོན་དུ་གྱུར་པའོ། །ཐམས་ཅད་རྗེས་སུ་ཆགས་པ་དེ་ལས་མྱུར་དུ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་རྗེས་སུ་ཆགས་པ་ནི་སྒྲུབ་པ་པོའི་མངོན་དུ་གྱུར་པ་ཡིན་ནོ། །རྗེས་སུ་ཆགས་པར་བྱེད་མཆོག་ནི། །ཞེས་བྱ་བ་ལ། ཇི་ལྟར་བཞུགས་པའི་ཐབས་དང་ཤེས་རབ་ཀྱི་རང་བཞིན་ཅན་རྡོ་རྗེ་སེམས་དཔའ་ལ་སོགས་པའི་སྐུ་ཡང་དང་ཡང་དུ་རྗེས་སུ་ཆགས་པར་བྱེད་པ་ནི་བདག་གི་མངོན་སུམ་དུ་བྱེད་པ་ཡིན་ནོ་ཞེས་བྱ་བ་དེ་ལྟ་བུའི་མཆོག་ནི་ཕུལ་དུ་བྱུང་བ་སྟེ་སྙིང་པོའི་ཡི་གེ་ཧཱུཾ་བཟླས་པའི་དོན་ཡིན་ནོ། །ནིའི་སྒྲ་ནི་ངེས་པར་གཟུང་བ་སྟེ་སྙིང་པོའི་བཟླས་པའི་དོན་འདི་ཉིད་མཆོག་ཏུ་གྱུར་པ་ཡིན་གྱི་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཡི་གེ་ཧཱུཾ་གི་གླུའི་བཟླས་པའི་དོན་བསྟན་ནས་ད་ནི་རྡོ་རྗེ་སེམས་དཔར་ཤེས་པས་དངོས་གྲུབ་ཐོབ་པ་ཡིན་ནོ་ཞེས་བསྟན་པར་བྱ་བའི་ཕྱིར། དེ་ནས་རྡོ་རྗེ་སེམས་དཔར་བྱུང་བའི་བཤད་པའི་རྒྱུད་ཅེས་བྱ་བ་གསུངས་ཏེ་གླུ་རྣམས་ཞེས་བྱ་བ་ལ་སོགས་པ་ལ། ཇི་ལྟར་གླུ་རྣམས་ཁྲོ་བོའི་རྣམ་པ་ཅན་གྱི་སེམས་རྩེ་གཅིག་པ་ཉིད་ཀྱི་མཐུ་ལས་རྡོ་རྗེ་ཐོག་རྫོགས་པའི་བློས། །རྡོ་རྗེ་
ཐོག་བསྟན་པར་གྱུར་པ་འབེབས་པ་དེ་བཞིན་དུ་རྡོ་རྗེ་བསྡུས་པའོ་ཞེས་བྱ་བ་ལ་ཆོས་བདག་མེད་པའི་ཏིང་ངེ་འཛིན་ཆོས་ཐམས་ཅད་རང་བཞིན་མེད་པའི་སྤྱོད་པའི་སེམས་རྩེ་གཅིག་པའི་ངོ་བོས་དེ་བཞིན་གཤེགས་པ་ལྔའི་ཡེ་ཤེས་ལྔའི་རྩེ་མོ་མི་ཕྱེད་པ་ཅན་གྱི་སེམས་བསྡུས་པར་བརྟག་པར་ནི་རྡོ་རྗེ་སེམས་དཔའ་ཉིད་དུ་འགྱུར་རོ། །དེ་ལྟར་སེམས་རྡོ་རྗེ་ཉིད་དུ་བསྟན་ནས་ད་ནི་རྡོ་རྗེ་སེམས་དཔའ་འབྱུང་བ་ཤེས་པས་དངོས་གྲུབ་ཐོབ་པར་འགྱུར་རོ་ཞེས་བྱ་བ་བསྟན་པའི་ཕྱིར། དེ་ནས་རྡོ་རྗེ་སེམས་དཔའ་འབྱུང་བ་ཤེས་པའི་རྒྱུད་ཅེས་བྱ་བ་གསུངས་ཏེ། རྡོ་རྗེ་སེམས་དཔའ་འབྱུང་བ་ནི་སྐྱེ་བ་སྟེ། རྣལ་འབྱོར་པའི་རྒྱུད་ལ་ཤེས་པ་གང་ལས་འབྱུང་བ་དེ་ནི་རྡོ་རྗེ་སེམས་དཔའི་འབྱུང་བའི་ཤེས་པའོ། །སེམས་དཔའ་ནི་རྡོ་རྗེ་སེམས་དཔའོ། །ནིའི་སྒྲ་ནི་གང་གི་ཕྱིར་ཞེས་བྱ་བའི་ཐ་ཚིག་གོ །ཐམས་ཅད་བདག་ཉིད་ཅེས་བྱ་བ་ལ་ཐམས་ཅད་ནི་དེ་བཞིན་གཤེགས་པ་ལ་སོགས་པའི་སེམས་ཅན་རྣམས་ཏེ། དེའི་བདག་ཉིད་ནི་ཐམས་ཅད་ཀྱི་བདག་ཉིད་དེ་ཐམས་ཅད་སེམས་དང་སེམས་ལས་བྱུང་བའི་རང་བཞིན་ཅན་ནོ་ཞེས་བྱ་བའི་དོན་ཏོ། །བདག་གི་བདག་ཉིད་ལ་ཡང་གནས། །ཞེས་བྱ་བ་ལ། བདག་གི་སེམས་དང་སེམས་ལས་བྱུང་བ་ལ་ཡང་དེའི་བདག་ཉིད་རྗེས་སུ་ཞུགས་ཏེ་ཐ་མི་དད་པའི་ཚུལ་གྱིས་ཐོག་མ་དང་ཐ་མ་མེད་པའི་ཆོས་ཀྱི་ངོ་བོ་ཉིད་དུ་གནས་པ་ཡིན་ནོ། །རྡོ་རྗེ་སེམས་དཔའ་དངོས་སུ་འདིར། །ཞེས་བྱ་བ་ལ་དངོས་སུ་ལྷག་པའི་བསམ་པའི་སྟོབས་ཀྱིས་རྡོ་རྗེ་དང་དྲིལ་བུ་འཛིན་པའི་བཅོམ་ལྡན་འདས་རྡོ་རྗེ་སེམས་དཔའ་རྣལ་འབྱོར་པ་འདི་ལ་བཞུགས་པ་སྟེ། གཟུང་བའི་ཆའི་དངོས་པོ་ཏིང་ངེ་འཛིན་ལ་ཐ་མི་དད་པར་འགྱུར་ཞིང་མྱུར་དུ་ཞུགས་པ་ཡིན་ནོ། །རྡོ་རྗེ་སེམས་དཔའ་དེ་ཇི་ལྟ་བུ་ཡིན་ཞེ་ན། ཐམས་ཅད་ལ་བཞུགས་ཞེས་བྱ་བ་ལ། སེམས་ཅན་ཐམས་ཅད་ཀྱི་རྒྱུད་ལ་བཞུགས་པའོ། །དེ་ལྟར་རྡོ་རྗེ་སེམས་དཔའ་འབྱུང་བའི་ཤེས་པའི་རྒྱུད་བསྟན་ནས། ད་ནི་དེ་བཞིན་གཤེགས་པ་འབྱུང་བར་ཤེས་པ་སངས་རྒྱས་ཉིད་ཐོབ་པ་ཡིན་ནོ་ཞེས་རབ་ཏུ་བསྟན་པའི་ཕྱིར། དེ་ནས་དེ་བཞིན་གཤེགས་པའི་རྒྱུད་ཅེས་
བྱ་བ་གསུངས་ཏེ། འདོད་པས་ཆགས་པ་ཞེས་བྱ་བ་ལ་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་རྣམས་ནི་འདོད་པ་དེ་ལ་ཆགས་པ་སྟེ་ཡུལ་ལ་ཆགས་པའོ། །དགའ་ལས་བདེ་ཞེས་བྱ་བ་ལ་འདོད་པ་ལ་བརྟེན་པ་དགའ་བའི་སེམས་ལས་འཁོར་བའི་སེམས་ཅན་རྣམས་ལ་བདེ་བ་འབྱུང་བའོ། །བདེ་བ་ལས་སྡིག་པ་ཞེས་བྱ་བ་ལ། མི་དགེ་བ་བཅུའི་ལས་ཀྱི་ལམ་ལ་སྤྱོད་པའི་སྡིག་པའོ། །སྡིག་པ་ལས་སྡུག་བསྔལ་ཞེས་བྱ་བ་ལ། མི་དགེ་བ་བཅུའི་ལས་ཀྱི་ལམ་ལ་སྤྱོད་པའི་སྡིག་པའི་དངོས་པོ་དེ་ལས་མཐོང་བའི་ཆོས་ལ་གསོད་པ་དང་འཆིང་བ་ལ་སོགས་པའི་སྡུག་བསྔལ་འབྱུང་ངོ༌། །སྡུག་བསྔལ་ལས་ཏིང་ངེ་འཛིན་ཞེས་བྱ་བ་ལ། ནད་ལ་སོགས་པའི་སྡུག་བསྔལ་འབྱུང་བས། འཁོར་བའི་སྐྱོན་རྣམས་རྟོགས་པར་འགྱུར་རོ། །དེ་ནས་འཁོར་བ་ལས་སེམས་སྐྱོ་བ་སྟེ། འཁོར་བ་སྤང་བའི་ཕྱིར་ཏིང་ངེ་འཛིན་སྐྱེད་པར་བྱེད་པ་སྟེ། དེའི་ཕྱིར་སྡུག་བསྔལ་ལས་ཏིང་ངེ་འཛིན་འབྱུང་བ་ཡིན་ནོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། ཤིན་ཏུ་བརྟན་པ་ཞེས་བྱ་བ་ལ། ཆོས་བདག་མེད་པའི་ཏིང་ངེ་འཛིན་རྣམ་པར་རྟོག་པ་ཐམས་ཅད་ཀྱིས་མི་གཡོ་བའི་ཕྱིར། རྡོ་རྗེ་བཞིན་དུ་ཤིན་ཏུ་བརྟན་པ་ཡིན་ནོ། །རྡོ་རྗེ་ཉིད་ལས་སངས་རྒྱས་འབྱུང༌། །ཞེས་བྱ་བ་ལ། ཆོས་བདག་མེད་པའི་ཏིང་ངེ་འཛིན་གྱི་རང་བཞིན་ཅན་གྱི་རྡོ་རྗེ་སེམས་དཔའི་ངོ་བོ་རྡོ་རྗེ་དེ་ལས་བྱུང་བ་སྟེ། རྣམ་པར་སྣང་མཛད་ཀྱི་སྐུའི་གསང་བ་སྐྱེ་བར་འགྱུར་རོ། །དེ་ལྟར་དེ་བཞིན་གཤེགས་པའི་འབྱུང་བ་ཤེས་པའི་རྒྱུད་བསྟན་ནས། ད་ནི་དེ་བཞིན་གཤེགས་པའི་རིགས་ལ་སོགས་པའི་རིགས་ཐམས་ཅད་ཀྱི་རྣལ་འབྱོར་པ་རྣམས་ཀྱི། དེ་བཞིན་གཤེགས་པའི་རིགས་ལ་སོགས་པ་ཤེས་ན་རང་རང་གི་རིགས་ཀྱི་དངོས་གྲུབ་ཐོབ་པ་ཡིན་ནོ་ཞེས་རབ་ཏུ་སྟན་པའི་ཕྱིར། དེ་ནས་ཞེས་བྱ་བ་ལ་སོགས་པའི་དེའི་རྒྱུད་གསུངས་ཏེ། དེ་བཞིན་གཤེགས་པའི་རྒྱུད་རིགས་དེ་ཉིད་ཅེས་བྱ་བ་ལ། སེམས་དཔའ་བྱིན་གྱིས་བརླབ་པའི་སྦྱོར་བས། རྡོ་རྗེ་སེམས་དཔར་གྱུར་པའི་རྣལ་འབྱོར་པ་གང་ཡིན་པ་དེ་
ཉིད་རྡོ་རྗེ་ཡིད་ལས་བྱུང་བ་ལ་སོགས་པའི་དེ་བཞིན་གཤེགས་པའི་རིགས་ཀྱི་རང་བཞིན་དུ་རྣམ་པར་བསྒོམས་ན། རྡོ་རྗེ་ཡིད་ལས་བྱུང་བ་ལ་སོགས་པའི་རང་བཞིན་ཅན་དུ་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་དང༌། རྡོ་རྗེ་འཇིག་རྟེན་དབང་ཕྱུག་དང༌། འཕགས་པ་ནམ་མཁའི་སྙིང་པོ་སྟེ། དེ་དག་གི་རིགས་ཀྱི་རང་བཞིན་དུ་དེ་ཉིད་བསྒོམས་ན་དེའི་རང་བཞིན་ཅན་དུ་འགྱུར་བ་ཡིན་ནོ་ཞེས་བྱ་བའི་དོན་བསྟན་པར་བྱ་བའི་ཕྱིར། དེ་ཉིད་རྡོ་རྗེའི་རིགས་ཆེན་པོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལ་དེ་བཞིན་གཤེགས་པའི་རིགས་ལ་སོགས་པའི་འབྱུང་བ་ཤེས་པའི་རྒྱུན་བསྟན་ནས། ད་ནི་མངོན་པར་བྱང་ཆུབ་པ་ཤེས་པས། དེ་བཞིན་གཤེགས་པའི་རྣལ་འབྱོར་པས། དེ་བཞིན་གཤེགས་པར་འགྱུར་བ་ཡིན་ནོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་ནས་མངོན་པར་བྱང་ཆུབ་པ་འབྱུང་བ་ཤེས་པའི་རྒྱུད་ཅེས་བྱ་བ་གསུངས་ཏེ། སེམས་སོ་སོར་རྟོགས་པས་ནི་ཞེས་བྱ་བའི་དོན་ཏོ། །རང་ཉིད་ཀྱི་སེམས་ནི་རང་སེམས་ཏེ་ཀུན་གཞི་རྣམ་པར་ཤེས་པ་ལ་སོགས་པའི་རྣམ་པར་ཤེས་པའི་ཚོགས་བརྒྱད་དོ། །དེ་དག་སོ་སོར་རྟོགས་པ་ནི། །ཨོཾ་ཙིཏྟ་པྲ་ཏི་བཻ་དྷཾ་ཀ་རོ་མི། ཞེས་བྱ་བ་བརྗོད་ཅིང་གཟུང་བ་དང༌། འཛིན་པ་དངོས་པོ་མེད་པའི་རང་བཞིན་དུ་རྟོགས་པའོ། །ནིའི་སྒྲ་ནི་ངེས་པར་གཟུང་བ་སྟེ། དེ་ཉིད་ཁོ་ན་ལས་སོ་ཞེས་བྱ་བའི་དོན་ཏོ། །དེ་ལས་ཅི་འབྱུང་ཞེ་ན། བྱང་ཆུབ་སེམས་ནི་ཡང་དག་འབྱུང༌། །ཞེས་བྱ་བ་དང༌། བྱང་ཆུབ་ཀྱི་རང་བཞིན་གྱི་སེམས་ནི་བྱང་ཆུབ་ཀྱི་སེམས་ཏེ། ཐབས་དང་ཤེས་རབ་ཀྱི་རང་བཞིན་ཅན་ནོ་ཞེས་བྱ་བའི་དོན་ཏོ། །དེ་ཡང་དག་པར་འབྱུང་བ་ནི། ཨོཾ་བོ་དྷི་ཙིཏྟ་ཨུཏྤཱ་ད་ཡཱ་མི། ཞེས་བྱ་བ་བརྗོད་ནས་དེ་བསྐྱེད་ཅིང༌། དེ་ལྟར་བྱུང་ཆུབ་ཀྱི་སེམས་བསྐྱེད་ནས་སེམས་དཔའི་རྡོ་རྗེ་བདག་ཉིད་དུ་བསྒོམ་པར་བྱའོ་ཞེས་བསྟན་པའི་ཕྱིར། རྡོ་རྗེ་ཉིད་ཕྱིར་ཞེས་བྱ་བ་གསུངས་ཏེ། ཨོཾ་ཏིཥྛ་བཛྲ་བཛྲ་ཨཱཏྨ་ཀོ྅ཧཾ། ཞེས་བྱ་བ་བརྗོད་ཅིང་སེམས་ཏེ་རྡོ་རྗེ་དང་རྡོ་རྗེའི་བདག་ཉིད་དུ་བསྒོམ་པར་བྱའོ་ཞེས་བསྟན་པའི་ཕྱིར། རྡོ་རྗེ་ཉིད་ཕྱིར་ཤེས་པར་བྱའོ་
ཞེས་བྱ་བའི་དོན་ཏོ། །དེ་ནས་སེམས་དཔའི་རྡོ་རྗེར་གྱུར་པའི་སེམས་དེ་ཉིད། ཨོཾ་ཡ་ཐཱ་སརྦ་ཏ་ཐཱ་ག་ཏ་ཏི་ཥྛ་ཨ་ཧཾ་ཞེས་བྱ་བ་བརྗོད་ཅིང་སངས་རྒྱས་ཉིད་དུ་བསྒོམ་པར་བྱའོ་ཞེས་བྱ་བ་བསྟན་པར་བྱ་བའི་ཕྱིར། བདག་ཉིད་སངས་རྒྱས་རབ་ཏུ་བསྒོམ། །ཞེས་བྱ་བ་གསུངས་ཏེ། སེམས་དཔའི་རྡོ་རྗེར་གྱུར་པའི་སེམས་དེ་ཉིད་རང་གི་བདག་ཉིད་ཀྱིས་རྣམ་པར་སྣང་མཛད་ཀྱི་སྐུར་བསྒོམ་པ་ནི། །བདག་ཉིད་སངས་རྒྱས་རབ་ཏུ་བསྒོམ་པ་སྟེ། སངས་རྒྱས་ཉིད་དེ་རྣམ་པར་སྣང་མཛད་ཉིད་ཐོབ་པར་འགྱུར་རོ། །དབང་ཕྱུག་ལ་སོགས་པའི་མཆོག་སྦྱིན་པ་གཞན་ལ་མ་ཡིན་ནོ། །འདིས་ནི་འདི་སྐད་བསྟན་པར་འགྱུར་ཏེ། ཨོཾ་ཙི་ཏྟ་པྲ་ཏི་བེ་དྷཾ་ཀ་རོ་མི། ཞེས་བྱ་བ་ཇི་ལྟ་བ་བཞིན་དུ་བརྗོད་ཅིང་སེམས་སོ་སོར་རྟོགས་པར་བྱའོ། །དེ་ནས་ཨོཾ་བོ་དྷི་ཙི་ཏྟཾ་ཨུ་ཏྤཱ་ད་ཡ་མི། ཞེས་བྱ་བས་བྱང་ཆུབ་ཀྱི་སེམས་བསྐྱེད་པར་བྱའོ། དེ་ནས་ཨོཾ་ཏི་ཥྛ་བཛྲ་ཞེས་བྱ་བས་རྡོ་རྗེ་དང༌། བཛྲ་ཨཱ་ཏྨ་ཀོ་྅ཧཾ་ཞེས་བྱ་བས་རྡོ་རྗེའི་བདག་ཉིད་དུ་བསྐྱེད་པར་བྱའོ། །ཨོཾ་ཡ་ཐཱ་སརྦ་ཏ་ཐཱ་ག་ཏ་ཧཾ་ཞེས་བྱ་བ་བརྗོད་ཅིང་རྣལ་འབྱོར་བ་བདག་ཉིད་རྣམ་པར་སྣང་མཛད་དུ་བསྒོམ་པར་བྱས་ན། དེ་བཞིན་གཤེགས་པར་འགྱུར་རོ། །དེ་ལྟར་མངོན་པར་བྱང་ཆུབ་པ་འབྱུང་བ་ཤེས་པའི་རྒྱུད་བསྟན་ནས། ད་ནི་དེ་བཞིན་གཤེགས་པའི་བདུད་ཉིད་དུ་ཤེས་ནས་རྣལ་འབྱོར་བ་བགེགས་མེད་པར་འགྱུར་རོ་ཞེས་བསྟན་པའི་ཕྱིར། དེ་བཞིན་གཤེགས་པ་བདུད་ཉིད་དུ་ཤེས་པའི་རྒྱུད་ཅེས་བྱ་བ་གསུངས་ཏེ། རང་གི་སེམས་ཉིད་དུ་བདུད་ཉིད་དེ་ཞེས་བྱ་བ་ལ། རྣལ་འབྱོར་བའི་བདུད་དུ་རྣམ་པར་རྟོག་པ་ཅན་གྱི་སེམས་ཉིད་བདུད་དེ། དེའི་དངོས་པོ་ནི་བདུད་ཉིད་དོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་བདུད་ཀྱི་རྣམ་པར་རྟོག་པའི་རྣམ་པ་ཅན་གྱི་རྣལ་འབྱོར་བའི་རང་གི་སེམས་ཁོ་ན་བདུད་དེ། ཕྱི་རོལ་གྱི་ལྷའི་བུ་ལ་སོགས་པའི་རང་བཞིན་གྱི་བདུད་ནི་མ་ཡིན་པས། དེའི་ཕྱིར་རྣལ་འབྱོར་བས་བདུད་ཀྱི་རྣམ་པ་ཅན་གྱི་སེམས་ཆོས་བདག་མེད་པའི་བསྒོམ་པས་མི་སྣང་བར་བྱས་ལ་འཇིགས་པ་སྤང་བར་བྱའོ། །ཆོས་བདག་མེད་པའི་སྒོ་ནས་ཇི་ལྟར་རྣལ་
འབྱོར་པས་འཇིགས་པ་འདི་སྤང་བར་བྱ་བ་ཡིན་ཞེ་ན། སེམས་ཉིད་དེ་བཞིན་གཤེགས་པ་ཡིན། །ཞེས་བྱ་བ་ལ། གང་གི་ཕྱིར་གཟུང་བ་དང་འཛིན་པ་བྲལ་བའི་སེམས་དེ་ཉིད་དེ་བཞིན་གཤེགས་པ་ནི་རྟོགས་པ་སྟེ། ཆོས་ཐམས་ཅད་དངོས་པོ་མེད་པའི་རང་བཞིན་དུ་རྟོགས་པའི་བདག་ཉིད་ཡིན་ཏེ། དེའི་ཕྱིར་བདག་དང་གཞན་གྱི་དབྱེ་བ་མེད་པ་བསྒོམ་པ་འདིས་བདུད་ཀྱི་འཇིགས་པ་སྤང་བར་བྱ་བ་ཡིན་ནོ། །རང་བཞིན་གྱི་སེམས་ནི་འདུལ་བར་བྱ་བའི་ཕྱིར་ཞེས་བྱ་བ་ལ། གང་གི་ཕྱིར་དེ་ལྟར་ཡིན་པ་དེའི་ཕྱིར་རང་གི་སེམས་ལ་གཟུང་བ་དང་འཛིན་པའི་རྣམ་པར་རྟོག་པ་དགག་པའི་ཕྱིར། སངས་རྒྱས་ནི་དེ་བཞིན་གཤེགས་པ་སྟེ། དེའི་དངོས་པོ་ནི་བདུད་ཉིད་དུ་འགྲོ་བ་ཡིན་ནོ། །དེ་ཅིའི་ཕྱིར་ཞེ་ན། རང་གི་སེམས་གྱི་གཟུང་བ་དང་འཛིན་པའི་རྣམ་པར་རྟོག་པ་གསོད་པ་ན་བདུད་དོ། །སངས་རྒྱས་ནི་དེ་བཞིན་གཤེགས་པ་སྟེ་དེའི་དངོས་པོ་ནི་བདུད་ཉིད་དོ། བདུད་ཉིད་དེ་ནི་དེ་བཞིན་གཤེགས་པ་ངོ་བོ་ཡོང་ན་པར་བྱང་ཆུབ་པའི་རང་བཞིན་དུ་གཤེགས་པ་ཡིན་ནོ། །དེ་ལྟར་དེ་བཞིན་གཤེགས་པ་བདུད་ཉིད་ཀྱི་རྒྱུད་བསྟན་ནས། ད་ནི་རྟོག་པ་ཐམས་ཅད་ཀྱི་སྒྲུབ་པ་ཤེས་པས་ཡིད་བཞིན་ནོར་བུ་དང༌། བུམ་པ་བཟང་པོ་དང༌། དཔག་བསམ་གྱི་ཤིང་དང༌། རལ་གྲི་དང༌། མིག་སྨན་དང༌། འབར་བའི་རས་དང༌། རྐང་མགྱོགས་དང༌། རི་ལུ་ལ་སོགས་པའི་དངོས་གྲུབ་ཐོབ་པ་ཡིན་ནོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ནས་རྟོག་པ་ཐམས་ཅད་སྒྲུབ་པ་ཤེས་པའི་རྒྱུད་ཅེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའ་དང་དེ་བཞིན་གཤེགས་པ་དང༌། རབ་ཏུ་དགའ་བའི་རྡོ་རྗེ་ཁྲོ་བོ་དང༌། རྡོ་རྗེ་འཇིག་རྟེན་དབང་ཕྱུག་དང༌། འཕགས་པ་ནམ་མཁའི་སྙིང་པོ་དང༌། ཕྱིའི་རྡོ་རྗེའི་རིགས་ཀྱི་རྟོག་པ་རྣམས་ནི་རྟོག་པ་ཀུན་ཏེ། རྟོག་པ་ཀུན་དེ་རྣམས་སུ་ཡིད་བཞིན་གྱི་ནོར་བུ་དང༌། བུམ་པ་བཟང་པོ་ལ་སོགས་པ་བསྟན་པ་བསྒྲུབ་པར་བྱ་བ་གང་ཡིན་པ་དང༌། ཡང་ན་ཁྱེའུ་དང་བུ་མོ་ལ་སོགས་པ་སེམས་དང་བཅས་པའི་རང་བཞིན་ཅན་གྱི་གཡོ་བ་བསྒྲུབ་པར་བྱ་བ་གང་ཡིན་པ་དེ་ནི་བརྟན་
པ་དང་གཡོ་བ་སྟེ། བསྒྲུབ་པར་བྱ་བ་དེ་དག་ཐམས་ཅད་རང་གི་ལྷག་པའི་ལྷའི་རྣལ་འབྱོར་ནི། འདོད་པའི་ལྷའི་རྣལ་འབྱོར་ཏེ་དེས་བསྒྲུབ་པར་བྱས་ན་དེ་དག་འགྲུབ་པར་འགྱུར་རོ། །དེ་ལྟར་རྟོག་པ་ཐམས་ཅད་སྒྲུབ་པའི་རྒྱུད་བསྟན་ནས། ད་ནི་དང་པོའི་སྙིང་པོ་སྒྲུབ་པ་ཤེས་ནས་དཔལ་རྡོ་རྗེ་སེམས་དཔའི་དངོས་གྲུབ་ཐོབ་པར་འགྱུར་རོ་ཞེས་བྱ་བ་རབ་ཏུ་བསྟན་པའི་ཕྱིར། དེ་ནས་དང་པོའི་སྙིང་པོ་སྒྲུབ་པ་ཤེས་པའི་རྒྱུད་ཅེས་བྱ་བ་གསུངས་ཏེ། དང་པོ་ཡང་ཡིན་ལ་སྙིང་པོ་ཡང་དེ་ཉིད་ཡིན་པས་ན་དང་པོའི་སྙིང་པོ་སྟེ། ཨོཾ་མ་ཧཱ་སུ་ཁ་བཛྲ་ས་ཏྭ་ཛཿ་ཧཱུཾ་བཾ་ཧོཿ་སུ་ར་ཏ་སྟྭཾ་ཞེས་བྱ་བའི་ཡི་གེ་བཅུ་བདུན་གང་བསྟན་པ་དེ་སྒྲུབ་པའི་ཕྱིར་ཤེས་པ་ནི་ངེས་པ་སྟེ། དེ་སྟོན་པར་བྱེད་པའི་རྒྱུད་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །བཟླས་པའི་དོན་ཤེས་ཞེས་བྱ་བ་ལ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས། ཡེ་གེ་བཅུ་བདུན་པོའི་སྙིང་པོ་རང་གི་སྙིང་ག་ན་གནས་པའི་རྡོ་རྗེའི་དབུས་སུ་ཡིད་ཀྱིས་མངོན་པར་བྲིས་ལ། རབ་ཏུ་དགའ་བའི་ངག་གམ། རྡོ་རྗེའི་དག་གིས་བརྗོད་ཅིང་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བདག་ཉིད་ཅན་དུ་བདག་ཉིད་བསྒོམ་པར་བྱ་སྟེ། འདི་ནི་བཟླས་པའི་དོན་ཤེས་པར་བརྗོད་པ་ཡིན་ནོ། །བཟླས་པའི་དོན་ཤེས་པ་ངེས་ནུས་པ་ཞེས་བྱ་བ་ནི། ཇི་ལྟར་བདག་ཉིད་ནུས་པའི་སྟོབས་ཀྱིས་རྡོ་རྗེ་སེམས་དཔར་རབ་ཏུ་བསྒྲུབ་པར་བྱའོ། །ཇི་སྲིད་འདོད་པས་བཟླས་པ་མཆོག །ཅེས་བྱ་བ་ལ་བསྒོམ་པ་ཁོ་ན་ལ་འདིར་འབད་པར་བྱ་བ་ཡིན་གྱི། གྲངས་ཀྱི་བཟླས་པ་ལ་ནི་མ་ཡིན་ནོ་ཞེས་བསྟན་ཏོ། །དངོས་གྲུབ་ཆེན་པོའི་བདེ་བ་སྟེར། །ཞེས་བྱ་བ་ལ། སྙིང་པོ་དེ་དཔག་ཏུ་མེད་པ་བཟླས་པས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཆེན་པོའི་བདེ་བ་སྟེར་བ་ཡིན་ནོ། །དེ་ལྟར་དང་པོའི་སྙིང་པོའི་སྒྲུབ་པ་ཤེས་པའི་རྒྱུད་བསྟན་ནས། ད་ནི་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་ཀྱི་ཤེས་པས་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་ཀྱི་
དངོས་གྲུབ་ཐོབ་པར་འགྱུར་རོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ནས་སྙིང་པོ་དང་ཕྱག་རྒྱ་དང་སྔགས་དང་རིག་པ་བསྒྲུབ་པ་ཤེས་པའི་རྒྱུད་ཅེས་བྱ་བ་གསུངས་ཏེ། དེ་ལ་སྙིང་པོ་ནི་འདིར་ཕྱག་རྒྱ་ཆེན་པོའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །སྔགས་ནི་ཆོས་ཀྱི་ཕྱག་རྒྱའོ། །རིག་པ་ནི་ལས་ཀྱི་ཕྱག་རྒྱའོ། །རྒྱུད་གཞན་ནས་གསུངས་པའི་སྙིང་པོ་དང་ཕྱག་རྒྱ་ལ་སོགས་པ་ཡང་དེ་བཞིན་དུ་ཤེས་པར་བྱ་བའི་ཕྱིར། སེམས་དཔའ་གང་གིས་ཞེས་བྱ་བ་ལ། རྡོ་རྗེ་སེམས་དཔའ་ལ་སོགས་པའི་ཇི་ལྟར་བཤད་པའི་སྙིང་པོ་དང༌། ཕྱག་རྒྱ་དང༌། སྔགས་དང༌། རིག་པ་རྣམས་བཟླས་པའི་དོན་དུ་བདག་ཉིད་དམ་མདུན་དུ་བསྒྲུབ་པར་བྱས་ན། དེ་ལྟར་འགྲུབ་པར་འགྱུར་རོ། །ད་ནི་དངོས་གྲུབ་ཤེས་པས་རིགས་ལྔ་ལས་གསུངས་པའི་དངོས་གྲུབ་ཐོབ་པར་འགྱུར་རོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ནས་དངོས་གྲུབ་ཤེས་པའི་རྒྱུད་ཅེས་བྱ་བ་གསུངས་ཏེ། རྡོ་རྗེ་སེམས་དཔའི་ཉང་དང༌། དེ་བཞིན་གཤེགས་པ་ཉིད་དང༌། རྡོ་རྗེ་འཆང་ཉིད་དང༌། འཇིག་རྟེན་དབང་ཕྱུག་ཉིད་དང༌། འཕགས་པ་ནམ་མཁའི་སྙིང་པོ་ཉིད་རྫོགས་ཤིང་ངེས་པར་འགྲུབ་པ་གང་ཡིན་པ་དེ་ནི་དངོས་གྲུབ་ཤེས་པའོ། །རྡོ་རྗེ་སེམས་དཔའི་དངོས་གྲུབ་ཆེ། །ཞེས་བྱ་བ་ལ། རྡོ་རྗེ་སེམས་དཔའ་ཉིད་རྟོག་པ་ནི་རྡོ་རྗེ་སེམས་དཔའི་དངོས་གྲུབ་ཆེན་པོའོ། །དེ་བཞིན་གཤེགས་པ་ཡང་ཡིན་ལ་ཀུན་ཀྱང་ཡིན་པས་ན་དེ་བཞིན་གཤེགས་པ་ཀུན་ཏེ། དེ་རྣམས་ཀྱི་དངོས་གྲུབ་གང་ཡིན་པ་དེ་ནི་དེ་བཞིན་གཤེགས་པ་ཀུན་གྱིའོ། །རྡོ་རྗེ་ནི་རྡོ་རྗེའི་རིགས་ཏེ་དེའི་དངོས་པོ་ནི་རྡོ་རྗེ་ཉིད་དོ། །བྱང་ཆུབ་ཀྱི་རང་བཞིན་ཅན་གྱི་སེམས་དཔའ་ནི་བྱང་ཆུབ་སེམས་དཔའ་སྟེ་པདྨའི་རིགས་སོ། །དེའི་དངོས་པོ་ནི་བྱང་ཆུབ་སེམས་དཔའ་ཉིད་དོ། །ལས་ཀྱང་ཡིན་ལ་ཀུན་ཡང་ཡིན་པས་ཀུན་ཏེ་རིན་པོ་ཆེའི་རིགས་རྣམས་སོ། །འདི་རྣམས་ཀྱི་མཆོག་གི་དངོས་གྲུབ་ནི་རིགས་ཐམས་ཅད་རྟོགས་པའི་རང་བཞིན་ཅན་ནོ། །དེ་དག་གི་མཆོག་གི་དངོས་གྲུབ་
ནི་འདི་རྣམས་ཡིན་ནོ་ཞེས་བྱ་བར་ངེས་པ་བསྐྱེད་ནས། དེ་རྣམས་ཐོབ་པར་བྱ་བའི་ཕྱིར་བསྒོམ་པ་བྱས་ནས་རྣལ་འབྱོར་གྲུབ་པར་འགྱུར་རོ། །དེ་ལྟར་དངོས་གྲུབ་ཤེས་པའི་རྒྱུད་བསྟན་ནས། ད་ནི་བསོད་ནམས་མེད་པའི་དངོས་གྲུབ་ཤེས་པས་བསོད་ནམས་མེད་པ་རྣམས་མེད་ཀྱང་འགྲུབ་པར་འགྱུར་རོ་ཞེས་བྱ་བ་རབ་ཏུ་བསྟན་པའི་ཕྱིར། དེ་ནས་བསོད་ནམས་མེད་པ་རྣམས་ཀྱི་ཡང་དངོས་གྲུབ་ཤེས་པའི་རྒྱུད་ཅེས་བྱ་བ་གསུངས་ཏེ། ཅི་འདོད་འཁོར་ལོར་བྲིས་ནས་ནི། །ཞེས་བྱ་བ་ལ་སོགས་པ་ལ་ གང་གི་ཚེ་ཇི་སྐད་བཤད་པའི་བསྙེན་པ་སྔོན་དུ་བྱས ་པས་ཀྱང་རྣལ་འབྱོར་བ་ལ་སྒྲིབ་པ་ཡོད་པས་མངོན་པར་འདོད་པའི་དངོས་གྲུབ་གྲུབ་པར་མ་གྱུར་ན། དེའི་ཚེ་རང་གི་རིགས་ཀྱི་ལྷའི་དཀྱིལ་འཁོར་མཐའ་མར་ཐལ་པས་ཀྱང་བྲིས་པ་ལ་འཇུག་པའི་ཆོ་གས་ཞུགས་ཏེ། ཞག་བཞིར་ཕྱག་རྒྱ་ཆེན་པོ་བཅིངས་ནས་དཀྱིལ་འཁོར་བསྒོམ་པར་བྱས་ན། དེ་སྒྲིབ་པ་ཐམས་ཅད་སྤོང་བར་འགྱུར་རོ། །དེ་ལྟར་བསོད་ནམས་མེད་པ་རྣམས་ཀྱི་ཡང་སྒྲུབ་པ་ཤེས་པ་བསྟན་ནས། ད་ནི་སློབ་དཔོན་གྱི་དངོས་གྲུབ་ཤེས་པས་ཀྱང་དངོས་གྲུབ་ཐོབ་པར་འགྱུར་རོ་ཞེས་བྱ་བ་རབ་ཏུ་བསྟན་པའི་ཕྱིར། དེ་ནས་སློབ་དཔོན་ཉིད་ཀྱི་དངོས་གྲུབ་ཤེས་པའི་རྒྱུད་ཅེས་བྱ་བ་གསུངས་ཏེ། བདེ་བ་ཆེན་པོའི་རྡོ་རྗེ་ཆེན་པོ་ནི་རྡོ་རྗེ་སེམས་དཔའ་ལ་སོགས་པ་རྣམས་ཏེ། དེ་དག་གི་གསང་བ་མཆོག་གི་དམ་ཚིག་ནི་དཀྱིལ་འཁོར་ཆེན་པོ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་ཏེ། དེར་ཇི་སྐད་བཤད་པའི་འཇུག་པའི་ཚོགས་ཞུགས་ཏེ། སྔར་བཤད་པའི་ཆོགས་བདག་ཉིད་ལ་དབང་བསྐུར་བར་བྱ་སྟེ། དེ་ལྟར་ན་སློབ་དཔོན་ཉིད་དུ་འགྱུར་རོ། །ད་ནི་མེ་ཏོག་ལ་སོགས་པའི་མཆོད་པ་འབུལ་བ་ཤེས་པས་མེ་ཏོག་ལ་སོགས་པ་ཕུལ་བས་ཚོགས་ཡོངས་སུ་རྫོགས་ནས་དངོས་གྲུབ་ཐོབ་པར་འགྱུར་རོ་ཞེས་བྱ་བ་རབ་ཏུ་བསྟན་པའི་ཕྱིར་མེ་ཏོག་ལ་སོགས་པའི་མཆོད་པ་འབུལ་བ་ཤེས་པའི་རྒྱུད་ཅེས་བྱ་བ་གསུངས་ཏེ། རྡོ་རྗེ་
འཛིན་ལ་མཆོད་པ་ཀུན། །ཞེས་བྱ་བ་ལ་སྔོན་པོ་དང༌། སེར་པོ་དང༌། དམར་པོ་དང༌། དཀར་པོའི་ཁ་དོག་ཅན་གྱི་མེ་ཏོག་ལ་སོགས་པ་རྣམས་ནི་རྡོ་རྗེ་སེམས་དཔའི་རིགས་ལ་དབུལ་པར་བྱའོ། །དེ་བཞིན་གཤེགས་པའི་རིགས་ལ་ནི་ཁ་དོག་དཀར་པོ་ཅན་ནོ། །རྡོ་རྗེའི་བདག་ཉིད་ཅན་གྱི་རིགས་ལ་ནི་ཁ་དོག་ནག་པོ་ཅན་ནོ། །པདྨའི་རིགས་ལ་ནི་ཁ་དོག་དམར་པོ་ཅན་ནོ། །ནོར་བུའི་རིགས་ལ་ནི་ཁ་དོག་སེར་བོ་ཅན་ནོ། །འདི་རྣམས་ཀྱང་དཔྱིད་ཀའི་རྡོ་རྗེ་མ་ལ་སོགས་པའི་མཆོད་པའི་ཕྱག་རྒྱ་རྣམས་ཀྱིས་བླངས་ཏེ་དབུལ་བར་བྱ་བ་ཡིན་ནོ་ཞེས་བསྟན་པར་བྱ་བའི་ཕྱིར། དེ་ནས་འབུལ་བ་ཤེས་པའི་རྒྱུད་ཅེས་བྱ་བ་གསུངས་ཏེ། རྫོགས་པའམ་ཞེས་བྱ་བ་ནི་དཔྱིད་ཀ་རྡོ་རྗེ་མ་ལ་སོགས་པའི་མཆོད་པའི་ཕྱག་རྒྱ་ཕྱི་རོལ་གྱི་མེ་ཏོག་ལ་སོགས་པའི་མཆོད་པ་དང་བཅས་པའོ། །དེ་དང་བྲལ་བ་ནི་མ་ཚང་བའོ། །ཡང་ན་ཇི་ལྟར་རྙེད་པའོ་ཞེས་བྱ་བ་ལ། ཕྱོགས་གཅིག་ཙམ་ཐོབ་པ་ནི་བསྐྱེད་པའོ། །རྡོ་རྗེ་གར་མ་ལ་སོགས་པའི་མཆོད་པ་ཡིས་ཞེས་བྱ་བ་ལ། རྡོ་རྗེ་གར་ནི་སྔར་བཤད་ཟིན་ཏོ། །དེ་ཉིད་དང་པོ་གང་དག་ལ་ཡོད་པ་དེ་ནི་རྡོ་རྗེ་གར་མ་ལ་སོགས་བའི་མཆོད་པའོ། །དཔྱིད་ཀ་རྡོ་རྗེ་མ་ལ་སོགས་པའི་མཆོད་པའི་ཕྱག་རྒྱ་རྣམས་སོ། །དེ་དག་གིས་རྟག་ཏུ་སྟེ་རྟག་པ་ཁོ་ནར་ཕྱོགས་བཅུ་ཐམས་ཅད་ཀྱི་སངས་རྒྱས་དང་བྱང་ཆུབ་སེམས་དཔའི་དཀྱིལ་འཁོར་དུ་མེ་ཏོག་ལ་སོགས་པའི་མཆོད་པ་གྲུབ་པར་འགྱུར་རོ། །ད་ནི་དུས་ཀྱི་མཆོད་པ་བསྒྲུབ་པར་ཤེས་པས་ཀྱང་མངོན་པར་འདོད་པའི་དངོས་གྲུབ་གྲུབ་པར་འགྱུར་རོ་ཞེས་བྱ་བ་རབ་ཏུ་བསྟན་པའི་ཕྱིར། །དེ་ནས་དུས་ཀྱི་མཆོད་པ་ཤེས་པ་སྒྲུབ་པ་ཤེས་པའི་རྒྱུད་ཅེས་བྱ་བ་གསུངས་ཏེ། དྲུག་ལྡན་ལ་སོགས་པའི་གླུའི་ཁྱད་པར་གྱིས་རྡོ་རྗེ་གླུ་བརྗོད་ཅིང་གར་ལས་བྱུང་བའི་དཔྱིད་ཀ་རྡོ་རྗེ་མ་ལ་སོགས་པ་མཆོད་པའི་ཕྱག་རྒྱ་དེ་བཞིན་དུ་བཅིང་བར་བྱའོ། །དེ་ནས་དཔྱིད་ཀ་རྡོ་རྗེ་མ་ལ་སོགས་པའི་སྙིང་པོ་བརྗོད་ཅིང༌། དཔྱིད་ཀ་རྡོ་རྗེ་མ་ལ་སོགས་པའི་ཕྱག་རྒྱས་དོར་བས། མེ་ཏོག་ལ་སོགས་
པའི་རང་བཞིན་གྱིས་མཆོད་པ་རབ་ཏུ་སྦྱར་བར་བྱའོ། །དེ་ལྟར་དུས་ཀྱི་མཆོད་པ་བསྒྲུབ་པ་ཤེས་པའི་རྒྱུད་བསྟན་ནས། ད་ནི་རྡོ་རྗེ་མཚོན་ཆ་མ་ལ་སོགས་པའི་གསང་བའི་མཆོད་པ་བཞི་པོ་ཤེས་བས་ཀྱང་དངོས་གྲུབ་ཐོབ་པ་ཡིན་ནོ་ཞེས་རབ་ཏུ་བསྟན་པར་བྱ་བའི་ཕྱིར། དེ་ནས་གསང་བའི་མཆོད་པ་ཤེས་པའི་རྒྱུད་ཅེས་བྱ་བ་གསུངས་ཏེ། རྡོ་རྗེ་གར་གྱི་མཆོད་པ་ནི་ཇི་སྐད་བཤད་པའི་མཚན་ཉིད་ཅན་དུ་ཤེས་པར་བྱ་སྟེ་བཅས་པའོ། །གོ་རིམས་ཇི་ལྟ་བ་བཞིན་དུ། །ཞེས་བྱ་བ་ནི། རྡོ་རྗེ་གླུ་ལེན་ཅིང་སྔར་བཤད་པའི་ཚུལ་གྱིས་ཁ་སྦྱོར་གྱི་ཐལ་མོ་སྤྱི་བོར་བཅིངས་ཏེ་ཕབ་ལ། རྡོ་རྗེ་ཐལ་མོ་བཅིངས་ནས་སྔ་མ་བཞིན་དུ་མེ་ཏོག་ལ་སོགས་པ་འབུལ་བའི་ཚུལ་གྱིས་ཏེ་དེར་དོར་ལ་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ནས། རྡོ་རྗེ་མཚོན་ཆ་མ་ལ་སོགས་པའི་ལས་ཀྱི་ཕྱག་རྒྱ་བཅིང་བ་ནི་གོ་རིམས་ཇི་ལྟ་བ་བཞིན་ཞེས་བྱ་བའི་སྒྲས་བརྗོད་པ་ཡིན་ནོ། །བཟླས་པའི་དོན་གྱིས་མ་བརྗོད་ཀྱང༌། མཆོག་གི་དངོས་གྲུབ་གྲུབ་པར་འགྱུར། །ཞེས་བྱ་བ་ལ་རྡོ་རྗེ་གླུའི་དོན་གང་ཡིན་པ་དང༌། རྡོ་རྗེ་མཚོན་ཆ་མ་ལ་སོགས་པའི་སྙིང་པོའི་དོན་གང་ཡིན་པ་དེ་ནི་བཟླས་པའི་དོན་ཏོ། །བཟླས་པའི་དོན་དེས་རྡོ་རྗེ་གླུ་དང་རྡོ་རྗེ་མཚོན་ཆ་མ་ལ་སོགས་པའི་སྙིང་པོ་མ་བརྗོད་ན་ཡང་གསང་བའི་མཆོད་པའི་དངོས་གྲུབ་ཀྱི་རྣལ་འབྱོར་པ་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ནི་སྒྲུབ་པ་མཆོག་ཡིན་པའི་ཕྱིར་རོ། །ད་ནི་བདག་ཉིད་ལ་སྨད་པར་མི་བྱའོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ནས་སྡིག་པ་ཆེན་པོ་བྱེད་པ་ཡང་གྲུབ་པ་ཤེས་པའི་རྒྱུད་ཅེས་བྱ་བ་གསུངས་ཏེ། དཀྱིལ་འཁོར་ལ་ནི་མ་ཞུགས་ཀྱང༌། །ཞེས་བྱ་བ་ལ་སོགས་པ་ལ། རྣལ་འབྱོར་བ་གང་ཞིག་དཀྱིལ་འཁོར་དུ་ཞུགས་པར་མ་གྱུར་པ་དེ་ཡང་ཕྱག་རྒྱ་ཆེན་པོ་བཅིངས་ནས་ཏིང་ངེ་འཛིན་མངོན་དུ་བྱེད་ན་སྡིག་པ་ཐམས་ཅད་ལས་རྣམ་པར་འགྱུར་ན་གཞན་ལྟ་སྨོས་ཀྱང་ཅི་དགོས། དེའི་ཕྱིར་ན་ངག་ཚུལ་ཁྲིམས་འཆལ་བ་ཡིན་ནོ་ཞེས་བྱ་བ་ལ་སོགས་པས་
རྣལ་འབྱོར་པ་བདག་ཉིད་ལ་སྨད་པར་མི་བྱ་སྟེ། ཕྱག་རྒྱ་ཆེན་པོའི་ཏིང་ངེ་འཛིན་གྱི་སྟོབས་ཀྱིས་ཚུལ་ཁྲིམས་འཆལ་བ་ལ་སོགས་པ་འཇིག་པ་དང༌། ཚུལ་ཁྲིམས་ལ་སོགས་པའི་ཡོན་ཏན་ཐམས་ཅད་རྫོགས་པའི་ཕྱིར་རོ། །བྱང་ཆུབ་ཀྱི་སེམས་ལ་སྨད་པ་དང་དངོས་གྲུབ་ཐོབ་པར་མི་འགྱུར་ཏེ། དེ་བས་ན་དེ་ཡོངས་སུ་སྤང་བར་བྱ་བའི་ཕྱིར། དེ་ནས་དངོས་གྲུབ་མི་ཐོབ་པའི་རྒྱུ་ཤེས་པའི་རྒྱུད་ཅེས་བྱ་བ་གསུངས་ཏེ། ཆགས་པ་ནི་ཆོས་བདག་མེད་པ་ལ་ཆགས་པ་དང༌། སེམས་ཅན་སྨིན་པ་དང་གྲོལ་བ་ལ་ཆགས་པའོ། །དེའི་ཕྱིར་སེམས་ཅན་ལ་ཆགས་པས་ཅི་ཞིག་བྱ་ཞེས་བྱ་བའི་དོན་སྨོད་པ་རྣལ་འབྱོར་བས་མི་བྱའོ། །དེ་ཅིའི་ཕྱིར་ཞེ་ན། རྣམ་པར་དག་བ་ཞེས་བྱ་བ་སྟེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་ཕྱིར། དེ་རྣམ་པར་དག་པ་ཡིན་ནོ། །དེ་བཞིན་བདེ་བ་སྟེར་ཞེས་བྱ་བ་ལ་དེའི་དམིགས་པ་ལ་ཞུགས་པའི་སྒྲུབ་པ་པོ་རྣམས་ལ་ཆགས་པ་དེས་འཇིག་རྟེན་དང་འཇིག་རྟེན་ལས་འདས་པའི་བདེ་བ་སྟེར་བ་ཡིན་ནོ། །བཅོམ་ལྡན་འདས་ཀྱང་ཆགས་པ་ཆེ། །ཞེས་བྱ་བ་ལ་ཐོག་མ་དང་ཐ་མ་མེད་པའི་བཅོམ་ལྡན་འདས་རྡོ་རྗེ་འཆང་ཆེན་པོ་ནི་ཆགས་པ་ཆེན་པོ་སྟེ་སྨད་པར་མི་བྱའོ། །དེ་ཅིའི་ཕྱིར་ཞེ་ན། འདི་མ་དག་པས་གྲུབ་མི་འགྱུར། །ཞེས་བྱ་བ་ལ། ཆགས་པ་ཆེན་པོའི་རང་བཞིན་ཅན་སེམས་ཅན་ཐམས་ཅད་རྗེས་སུ་ཆགས་པ་འདི་མ་དག་ན་ནི། གཟུང་བ་དང་འཛིན་པའི་རྣམ་པར་རྟོག་པའི་དྲི་མས་གོས་པས་རྣལ་འབྱོར་པ་གྲུབ་པར་མི་འགྱུར་པ་དེའི་ཕྱིར་འདི་ལ་སྨད་པར་མི་བྱ་སྟེ་ཤིན་ཏུ་གུས་པས་བསྒོམ་པར་བྱའོ་ཞེས་བྱ་བའི་ཐ་ཚིག་གོ །དེ་ལྟར་བྱང་ཆུབ་ཀྱི་སེམས་ལ་སྨོད་པ་དགག་པར་བྱས་ནས་རེ་ཞིག་རང་གི་ལྷའི་ཚུལ་འཛིན་པའི་རྣལ་འབྱོར་པ་ལ། དཀྱིལ་འཁོར་ལ་སོགས་པའི་མཆོག་གི་དངོས་གྲུབ་འབྱུང་ངོ་ཞེས་བྱ་བར་བསྟན་པར་བྱ་བའི་ཕྱིར། དེ་ནས་དངོས་གྲུབ་བསྒྲུབ་པ་ཤེས་པའི་རྒྱུད་ཅེས་བྱ་བ་གསུངས་ཏེ། ཇི་བཞིན་ཡུལ་ངང་ལྡན་གྱུར་ནས། །ཞེས་བྱ་
བ་ལ་ཇི་ལྟར་དཔལ་རྡོ་རྗེ་སེམས་དཔའ་འམ། རྡོ་རྗེ་ཡིད་ལས་བྱུང་བ་ལ་སོགས་པའི་ལྷའི་ཁྱད་པར་གཞན་དག་ཅོད་པན་ལ་སོགས་པའི་ཡུལ་རྣམས་ཀྱིས་ཡུལ་དང་ལྡན་པ་དེ་བཞིན་དུ་རང་གི་ལྷའི་རྒྱན་རྣམས་ཀྱི་རྣལ་འབྱོར་བ་ཡུལ་དང་ལྡན་པར་གྱུར་ནས་རང་གི་ཕྱག་རྒྱ་ཆེན་པོ་ལ་སོགས་པའི་མཆོག་གི་དངོས་གྲུབ་བསྒྲུབ་པར་བྱ་བ་ཡིན་ནོ། །དེ་ཅིའི་ཕྱིར་རང་གི་ལྷའི་ཚུལ་འཛིན་པས་བསྒྲུབ་པར་བྱ་བ་ཡིན་ནོ་ཞེ་ན་རྟོག་པ་ཐམས་ཅད་ཅེས་བྱ་བ་ལ་སོགས་པ་ལ། གང་གི་ཕྱིར་རྟོག་པ་ཐམས་ཅད་ལ་རང་གི་ལྷའི་ཚུལ་གྱིས་རྣལ་འབྱོར་འདི་སྐྱེ་བ་འདི་ཉིད་ལ་ཕྱག་རྒྱ་ཆེན་པོ་ལ་སོགས་པ་སྒྲུབ་པར་བྱེད་པ་ནི་རྣལ་འབྱོར་པ་རྣམས་ལ་རྫོགས་པར་བྱེད་པའོ། །བདེ་བ་ཆེན་པོའི་རྡོ་རྗེ་གསང་བ་ཞེས་བྱ་བ་ལ། བདེ་བ་ཆེན་པོའི་རྡོ་རྗེ་ནི་རིགས་ཐམས་ཅད་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་ཏེ། དེ་དག་གི་གསང་བ་ནི་རིགས་ཐམས་ཅད་དུ་གཏོགས་པའི་ངོ་བོ་སྟེ། དེ་རྣམས་ཉིད་ནི་རྟོགས་པ་ཆེན་པོའོ། །དེ་ཉིད་ནམ་མཁའི་ཁམས་ཐམས་ཅད་ལ་རྟག་ཏུ་བཞུགས་པའི་རིགས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ཐམས་ཅད་ལ་ཁྱབ་པ་རྣམས་ཀྱི་སྐྱེད་པའི་རྒྱུ་པར་མཚམས་མེད་པ་ཉིད་དུ་གྱུར་པའི་ཕྱིར་མཛེས་ཤིང་གསལ་བར་གྱུར་པས་ན་རྟོག་པ་ཆེན་པོའི་རྒྱལ་པོའོ། །དེ་ལས་བྱུང་བའི་སྒྲའི་ཚོགས་ཀྱང་དེ་སྟོན་པར་བྱེད་པའི་ཕྱིར་རྟོག་པ་ཆེན་པོའི་རྒྱལ་པོའོ། །རྟོག་པ་ཆེན་པོའི་རྒྱལ་པོ་དེ་ལས་རྟོག་པ་ཐམས་ཅད་ཀྱི་རྒྱུད་ཕྱི་མ་ཞེས་བྱ་བ་འདི་རྡོ་རྗེ་སེམས་དཔའ་ལ་སོགས་པའི་རྟོག་པ་ཐམས་ཅད་རྩ་བའི་རྒྱུད་ཀྱི་རང་བཞིན་གང་ཡིན་པ་དེ་དག་གི་རྟོག་པ་ཐམས་ཅད་བསྡུས་པ་ཞེས་བྱ་བ་ཕྱི་མའི་རྒྱུད་ནི་ཕུལ་དུ་བྱུང་བའི་རྒྱུད་དོ། །དེའི་ཆོ་ག་རྒྱས་པ་ནི་རྣམ་པ་སྣ་ཚོགས་པའི་བསྒྲུབ་པར་བྱ་བ་དང་སྒྲུབ་པ་བསྟན་པ་ཡིན་ནོ། །དེ་ལྟར་རྟོག་པ་ཐམས་ཅད་ཀྱི་རྒྱུད་ཕྱི་མའི་ཆོ་ག་རྒྱས་པ་མཆོག་གི་དངོས་གྲུབ་བསྒྲུབ་པར་བྱེད་པ་བསྟན་ནས། ད་ནི་བཅོམ་ལྡན་འདས་རྟག་པ་ཞེས་བྱ་བ་ལ་སོགས་པས་དཔལ་རྡོ་རྗེ་སེམས་དཔའི་ལྷ་
མོའི་དཀྱིལ་འཁོར་ལས་གསུངས་པའི་འབྲས་བུའི་ཁྱད་པར་བསྒྲུབ་པ་གསུངས་པ་ཡིན་ནོ། །དེ་ནས་བཅོམ་ལྡན་རྡོ་རྗེ་འཆང་ཆེན་པོས་རྡོ་རྗེ་བསྒྲུབ་པའི་རྒྱུད་གསུངས་སོ་ཞེས་བྱ་བ་དང་སྦྱར་རོ། །དེ་ནས་ཀྱི་སྒྲ་ནི་སྐབས་ལ་བབ་པའོ། །བཅོམ་ལྡན་འདས་ཞེས་བྱ་བ་ནི་བཤད་ཟིན་ཏོ། །རྟག་པ་ཞེས་བྱ་བ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་དང་དེའི་རྒྱུ་མཐུན་པར་དེ་ལྟར་བྱུང་བའི་རང་བཞིན་གྱིས་རྟག་ཏུ་བཞུགས་པ་རྡོ་རྗེ་སེམས་དཔའོ། །འདིས་ནི་རྡོ་རྗེ་སེམས་དཔའི་དཀྱིལ་འཁོར་གྱི་རང་བཞིན་ཅན་རྡོ་རྗེ་འཆང་ཆེན་པོ་དང༌། དེ་བཞིན་གཤེགས་པའི་དཀྱིལ་འཁོར་གྱི་རང་བཞིན་ཅན་བསྟན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསང་བ་ཞེས་བྱ་བ་ལ། དེ་བཞིན་གཤེགས་པ་ཡང་ཡིན་ལ་གསང་བ་ཡང་ཡིན་པས་ན་དེ་བཞིན་གཤེགས་པ་ཐམས་ཅད་དེ། དེ་རྣམས་ཀྱི་རྡོ་རྗེ་ནི་བཅོམ་ལྡན་འདས་རྡོ་རྗེ་སེམས་དཔའ་དང༌། རབ་ཏུ་དགའ་བའི་རྡོ་རྗེ་ཁྲོ་བོའི་ཕྱག་ན་གནས་པའི་འབར་བའི་རྡོ་རྗེའོ། །དེ་ལས་བྱུང་བའི་བཅོམ་ལྡན་འདས་རབ་ཏུ་དགའ་པའི་རྡོ་རྗེ་ཁྲོ་བོའི་རིགས་ཀྱང་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་སྟེ་རྡོ་རྗེ་འཆང་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱི་དབང་བསྐུར་པ་ནི་ནོར་བུའི་རིགས་ཏེ། དེ་ཉིད་མི་ཕྱེད་པས་ན་འདིའི་རྡོ་རྗེ་རིན་པོ་ཆེ་སྟེ། དེ་བཞིན་གཤེགས་པ་ཐམས་ཅད་ཀྱི་དབང་བསྐུར་པའི་རྡོ་རྗེ་རིན་པོ་ཆེ་ནི་རྡོ་རྗེ་འཆང་ཆེན་པོའོ།། དེ་བཞིན་གཤེགས་པ་ཐམས་ཅད་ཀྱི་ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་དང༌། པདྨའི་རིགས་ཏེ། དེ་ལས་གཟིགས་པ་ནི་ཆོས་ཐམས་ཅད་རང་བཞིན་གྱིས་དགའ་བའི་ཞེས་བྱ་བར་སོ་སོར་རྟོག་བའི་དེར་ཤེས་པ་ནི་ངེས་པ་སྟེ་དེས་དབང་ཕྱུག་ནི་རང་དབང་སྟེ་དངོས་པོར་འཛིན་པའི་ཞེན་པ་ནི་གཞན་དབང་དང་བྲལ་བའོ། །ཡེ་ཤེས་ཀྱི་དབང་ཕྱུག་ཉིད་མི་ཕྱེད་པའི་པདྨ་འདི་ལ་ཡོད་པས་ན། དེ་བཞིན་གཤེགས་པ་ཐམས་ཅད་ཀྱི་ཆོས་གཟིགས་པའི་
ཡེ་ཤེས་ཀྱི་དབང་ཕྱུག་གི་རྡོ་རྗེའི་པདྨའོ། །དེ་བཞིན་གཤེགས་པ་ཐམས་ཅད་ཀྱི་སྣ་ཚོགས་པ་ནི་རྣམ་པ་སྣ་ཚོགས་པའི་སངས་རྒྱས་ཀྱི་མཆོད་པའི་མཚན་ཉིད་ཅན་དང༌། སེམས་ཅན་གྱི་དོན་བྱེད་པའི་རང་བཞིན་ཅན་གྱི་མཛད་པའོ། །མཛད་པས་ན་མཛད་པ་སྟེ། དེ་བཞིན་གཤེགས་པ་ཐམས་ཅད་ཀྱི་མཛད་པ་མཛད་པས་ན་དེ་བཞིན་གཤེགས་པ་ཐམས་ཅད་ཀྱི་མཛད་པ་མཛད་པའོ། །དེའི་དངོས་པོ་ནི་མཛད་པ་ཉིད་དོ། །དེས་ཕྲིན་ལས་དམ་པ་ནི་སངས་རྒྱས་ཀྱི་སྤྲུལ་པས་སེམས་ཅན་གྱི་དོན་མཛད་བའི་མཚན་ཉིད་ཅན་གྱི་ཆོ་ག་རྒྱས་པ་ནི་བསྒྲུབ་པར་བྱ་བ་དང་སྒྲུབ་པའི་རྒྱུན་རྡོ་རྗེ་ལྟར་མི་ཕྱེད་པའི་རྡོ་རྗེ་འཆང་ག་ལ་ཡོད་པ་དེ་ལ་དེ་སྐད་ཅེས་བྱའོ། །ཡོན་ཏན་གྱི་ཁྱད་པར་དེ་ལྟ་བུ་དང་ལྡན་པའི་རྡོ་རྗེ་འཆང་ཆེན་པོས་ཅི་མཛད་ནས་རྒྱུད་དེ་གསུངས་ཤེ་ན། ཐམས་ཅད་ཁྱབ་པ་ཞེས་བྱ་བ་ལ་སོགས་པ་ལ། དེ་བཞིན་གཤེགས་པའི་འཁོར་ལ་ཐམས་ཅད་ལ་ཁྱབ་པ་དེ་མཛད་པར་ཤེས་པར་མཛད་ནས་ཞེས་བྱ་བ་དང་སྦྱར་རོ། །ཐམས་ཅད་ལ་ཁྱབ་པ་ནི་ཀུན་དུ་ཁྱབ་པའོ། །དེ་ཉིད་ཀྱི་ཁྱབ་པ་བསྟན་པར་བྱ་བའི་ཕྱིར། མ་ལུས་ཤིང་ཞེས་བྱ་བ་ལ་སོགས་པ་གསུངས་ཏེ་མ་ལུས་ཤིང་ལུས་པ་མེད་པའི་སྒྲའི་དོན་བཤད་ཟིན་ཏོ། །རིགས་ཐམས་ཅད་ཀྱི་ལྷ་རྣམས་ཀྱི་སྐུ་གསུང་ཐུགས་ཀྱི་རྡོ་རྗེ་ཁམས་ཏེ། དེ་དག་གི་བསྟན་པ་ནི་མི་འཇིགས་པའི་དངོས་གྲུབ་ནི་སེམས་ཅན་ཐམས་ཅད་ཀྱི་རྒྱུད་ལ་རྫོགས་པའོ། །དེའི་ཆོ་ག་རྒྱས་པ་ནི་བསྒྲུབ་པར་བྱ་བ་དང་སྒྲུབ་པའི་ཚོགས་ཏེ། དེ་སྤྲོ་བ་ནི་ཕྱོགས་བཅུ་ཁྱབ་པའི་འཁོར་ལོ་གང་ལ་ཡོད་པ་དེ་ལ་དེ་སྐད་ཅེས་བྱའོ། དེ་ཚད་ཅི་དང་ལྡན་ཞེ་ན། ནམ་མཁའི་ཁམས་ཀྱི་མཐར་ཐུག་པ། །ཞེས་བྱ་བ་ལ། རྫས་ཐམས་ཅད་ཀྱི་དངོས་པོ་མེད་པའི་རང་བཞིན་ནི་ནམ་མཁའ་སྟེ། དེ་ཉིད་མཐར་ཐུག་པ་ནི་ཡོངས་སུ་རྫོགས་པའི་འཁོར་ལོ་གང་ལ་ཡོད་པ་དེ་ནི་ནམ་མཁའི་ཁམས་ཀྱི་མཐར་ཐུག་པའི་འཁོར་ལོ་སྟེ། ནམ་མཁའ་ཐམས་ཅད་ཁྱབ་པར་བྱེད་པ་ཞེས་བྱ་བའི་དོན་ཏོ། །ཆོས་ཀྱི་དབྱིངས་ནི་དེ་
བཞིན་ཉིད་དེ། དེ་ཁྱད་པར་མེད་པས་ན་ཆོས་ཀྱི་དབྱིངས་རྣམ་པར་སྤྲོ་བའོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་རྣམས་ཏེ་ཁམས་ཐམས་ཅད་དེ། དེར་ཀུན་དུ་འགྲོ་བ་གང་ལ་ཡོད་པ་ནི་ཁམས་ཀུན་དུ་འགྲོ་བའི་དེ་བཞིན་གཤེགས་པ་ཐམས་ཅད་ཀྱི་འཁོར་ལོ་སྟེ། རིགས་ཐམས་ཅད་ཀྱི་རྟེན་དང་བརྟེན་པའི་དཀྱིལ་འཁོར་ཡིན་ནོ། །དེ་མངོན་པར་ཤེས་པར་མཛད་པ་ནི་གདུལ་བྱ་རྣམས་ཀྱིས་རྟོགས་པར་མཛད་ནས་སོ། །འདི་ཞེས་བྱ་བ་ནི་ཐུགས་ལ་གནས་པའི་དང་པོའི་སྙིང་པོའི་ཡི་གེ་ཧཱུཾ་སྟེ། དེའི་གསང་པའི་དེ་ཁོ་ན་ཉིད་ཀྱི་རྡོ་རྗེ་སྒྲུབ་པའི་རྒྱུད་གང་ཡིན་པ་དེ། བྱང་ཆུབ་སེམས་དཔའ་རྣམས་ཀྱི་དོན་གྱི་ཕྱིར་མི་གནས་པའི་མྱ་ངན་ལས་འདས་པ་སྒྲུབ་པའི་དོན་དུ་གསུངས་པ་ཡིན་ནོ། །མི་གནས་པའི་མྱ་ངན་ལས་འདས་པའི་དེས་ཅི་ཞིག་བྱ་ཞེ་ན། ཇི་སྲིད་འཁོར་པའི་གནས་ལ་བཞུགས། །ཞེས་བྱ་བ་ལ། འཁོར་བ་ནི་ཕྱི་མའི་མཐར་ཐུག་པ་ཚང་མེད་པའོ། །དེ་ཉིད་གནས་ཏེ་བཞུགས་གནས་སོ། །དེར་མི་གནས་པའི་མྱ་ངན་ལས་འདས་པའི་རང་བཞིན་གྱིས་བཞུགས་པས་ན་འཁོར་བའི་གནས་ལ་བཞུགས་པའི་བྱང་ཆུབ་སེམས་དཔའ་དེ་སྲིད་འདོན་པ་མཛད་ཅེས་བྱ་བ་ནི་ཚད་མེད་པའི་འཁོར་བའི་གནས་ལ་བཞུགས་པའི་བྱང་ཆུབ་སེམས་དཔའ་ནི་ཚད་མེད་པ་ཁོ་ནའི་སེམས་ཅན་རྣམས་འཁོར་བའི་རྒྱ་མཚོ་དམ་པའི་ཆོས་བསྟན་པའི་ཕྱག་བརྐྱང་བ་དག་གིས་ཀུན་ནས་འདོན་པར་མཛད་པ་ཡིན་ནོ། །སེམས་ཅན་དོན་ཞེས་བྱ་བ་ལ་སོགས་པ་ལ། གང་གི་ཕྱིར་ལྷག་མ་མེད་པ་མྱ་ངན་ལས་འདས་པ་ཡོངས་སུ་མྱ་ངན་ལས་འདས་པའི་གཟི་བརྗིད་ཅན་གྱི་བྱང་ཆུབ་སེམས་དཔའ་རྣམས་མེད་པའི་རང་བཞིན་དུ་གྱུར་པས་སེམས་ཅན་གྱི་དོན་མཛད་པར་ནུས་པ་མ་ཡིན་ནོ། །དེའི་ཕྱིར་སེམས་དཔའ་རྣམས་ཞེས་བྱ་བ་ལ། རྒྱུད་དེ་ཉིད་ཀྱི་ཕྱིར་སེམས་ཅན་བྱང་ཆུབ་སེམས་དཔའ་རྣམས་འཁོར་བ་སྲིད་དུ་འཁོར་བར་བཞུགས་ནས་ཕྱི་མའི་མཐར་ཐུག་པའི་བར་དུ་འཁོར་བར་སྐུ་སྐྱེ་བ་ཡོངས་
སུ་བཟུང་བ་ནི་སེམས་ཅན་གྱི་དོན་མངོན་པར་མཛད་པ་ཡིན་ནོ། །དེ་དག་ཇི་ལྟ་བུ་ཞེ་ན། ཐམས་ཅད་དག་པའི་ཆོས་མཆོག་ཅན། །ཞེས་བྱ་བ་ལ། གཟུགས་བརྙན་དང་འདྲ་བའི་ཁམས་གསུམ་གྱི་ཡེ་ཤེས་མངའ་བའོ། །འདིས་ནི་འདི་སྐད་སྟོན་པར་འགྱུར་ཏེ་གང་གི་ཕྱིར་ལྷག་མ་མེད་པའི་མྱ་ངན་ལས་འདས་པའོ། །ཁམས་ཐོབ་པའི་ཉན་ཐོས་དང༌། རང་སངས་རྒྱས་དང༌། བྱང་ཆུབ་སེམས་དཔའ་རྣམས་འགོག་པར་འགྱུར་བས་མཐོང་བ་ལ་སོགས་པས་སེམས་ཅན་གྱི་དོན་བྱེད་པར་མི་ནུས་པ་ཡིན་ནོ། །དེ་ལས་གོ་བཟློག་པས་ནི་ནུས་པ་ཡིན་ནོ། །དེའི་ཕྱིར་གཟུགས་བརྙན་དང་འདྲ་བར་རྟེན་ཅིང་འབྲེལ་བར་འབྱུང་བ་ངེས་པར་བྱས་ནས། སེམས་ཅན་གྱི་དོན་གྱི་ཆེད་དུ་ཕྱི་མའི་མཐར་ཐུག་པར་མི་གནས་པའི་མྱ་ངན་ལས་འདས་པས། བྱང་ཆུབ་སེམས་དཔའ་རྣམས་འཁོར་བར་བཞུགས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གཞན་གྱིས་ཀྱང༌། མི་གནས་པའི་མྱ་ངན་ལས་འདས་པ་གྲུབ་པ་ཡིན་ཏེ། དེའི་ཕྱིར། སྒྲུབ་པའི་རྒྱུད་འདིས་འབྲས་བུ་ཁྱད་པར་ཐོབ་པ་མེད་དོ་ཞེ་ན། དེ་ནི་མ་ཡིན་ཏེ། ཅིའི་ཕྱིར་མ་ཡིན་ཞེ་ན། དེ་བཞིན་གཤེགས་པས་མི་འདུལ་ལ། །ཞེས་བྱ་བ་གསུངས་ཏེ། དེ་བཞིན་གཤེགས་པས་འདུལ་བར་མ་གྱུར་པ་ནི། དེ་བཞིན་གཤེགས་པས་མི་འདུལ་བ་སྟེ། དེའི་ཕྱིར་གང་མདོ་སྡེ་པ་རྣམས་མ་ཡིན་པ། །སྔགས་ཀྱི་དཔྱོད་པ་ལ་དཔྱོད་པ་དེ་བཞིན་གཤེགས་པས་མི་འདུལ་བ་སྟེ། སྔགས་ལ་མོས་པའི་སེམས་ཅན་རྣམས་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་ཐེག་པ་བསྟན་པས་མི་གནས་པའི་མྱ་ངན་ལས་འདས་པའི་མཚན་ཉིད་ཅན་གྱི་དོན་དེ་བཞིན་གཤེགས་པ་རྣམས་ཀྱིས་མི་མཛད་པའོ།། གང་གི་ཕྱིར་ཤེས་རབ་ཀྱི་ཕ་རོལ་ཏུ་ཕྱིན་པའི་སྤྱོད་པ་སྒྲུབ་པར་བྱེད་པའི་བག་ཆགས་སེམས་ཅན་དེ་རྣམས་ལ་མེད་པའི་ཕྱིར་རོ། །འདིར་རབ་ཏུ་གྲུབ་ཅེས་བྱ་བ་ལ་དང་པོའི་གསང་བའི་དེ་ཁོ་ན་ཉིད་ཀྱིས་རྡོ་རྗེ་བསྒྲུབ་པས་སྔགས་ཀྱི་ཚུལ་འདིར་སྔགས་ཀྱི་སྤྱོད་པ་ལ་
ལྷག་པར་མོས་པའི་སྒྲུབ་པ་ནི་རྫོགས་པའོ། །དངོས་གྲུབ་རྣམས་ཀྱི་མཆོག་ནི་དེ་བཞིན་གཤེགས་པ་སྟེ། དུས་ཐམས་ཅད་དུ་བསྐྱེད་པར་བྱའོ། །ནིའི་སྒྲ་ནི་ངེས་པར་གཟུང་བ་སྟེ། དུས་ཐམས་ཅད་ཁོ་ནར་རོ། །དེ་བཞིན་གཤེགས་པ་རྣམས་བྱུང་རུང་མ་བྱུང་རུང་ཆོས་རྣམས་ཀྱི་ཆོས་ཉིད་ནི་རྟག་ཏུ་གནས་པ་ཞེས་གསུངས་སོ། །ཐམས་ཅད་མཛད་ཅེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་སེམས་ཅན་ལ་མཛད་པ་ཡིན་ནོ། །གལ་ཏེ་བསྒྲུབ་པ་འདི་མེད་པས་དེ་བཞིན་གཤེགས་པས་འདུལ་བར་མི་འགྱུར་བ་རྣམས་ལ། དེ་བཞིན་གཤེགས་པ་རྣམས་ཀྱིས་སེམས་ཅན་གྱི་དོན་མཛད་པར་མི་དཔྱོད་ན། འོ་ན་རྡོ་རྗེ་འཆང་ཆེན་པོ་ལ་སོགས་པས་ནུས་པར་འགྱུར་ཏེ། དེ་བས་ན་འདིས་ཅི་ཞིག་བྱ་ཞེ་ན། དེ་ནི་མ་ཡིན་ཏེ། ཅིའི་ཕྱིར་མ་ཡིན་ཞེ་ན། རྡོ་རྗེ་འཆང་ཆེན་པོ་ལ་སོགས་པ་ཞེས་བྱ་བ་ལ་སོགས་པ་ལ། གང་གི་ཕྱིར་རྡོ་རྗེ་འཆང་ཆེན་པོ་ལ་སོགས་པ་རྣམས་ནི། རྡོ་རྗེ་སེམས་དཔའ་དང༌། རྡོ་རྗེ་ཡིད་ལས་བྱུང་བ་དང༌། རྡོ་རྗེ་ཀི་ལི་ཀི་ལ་ལ་སོགས་པ་ནས། རིན་ཆེན་དྲིལ་བུའི་མཐར་ཐུག་པ་རྣམས་ཀྱིས་ཀྱང༌། ཇི་ལྟར་བསོད་ནམས་རྣམས་སྨིན་གྱིས། །ཞེས་བྱ་བ་ལ་སོགས་པ་ལ། བག་ཆགས་ཇི་ལྟ་བ་བཞིན་དུ་སྔགས་པའི་ནུས་པ་ཡོད་པས་དེ་རྣམས་ཀྱིས་ཀྱང༌། སེམས་ཅན་གྱི་དོན་མཛད་པར་ནུས་པ་ཡིན་གྱི་བག་ཆགས་མེད་ན་ནི་མ་ཡིན་ནོ། །ཅིའི་ཕྱིར་ཞེ་ན། སྐལ་བ་མེད་པའི་སེམས་ཅན་རྣམས་ཀྱི་དོན་མཐོང་བ་ལ་སོགས་པའི་བསྒོམ་པ་མཛད་པར་མི་དཔྱོད་པའི་ཕྱིར་རོ། །རང་གི་ལས་ཞེས་བྱ་བ་ནི། དམ་པའི་ཆོས་སྤོང་བར་འགྱུར་བའི་ལས་བསགས་པའི་སྒྲིབ་པས་དེ་རྣམས་ལ་སྒྲིབ་པར་འགྱུར་བའི་ཕྱིར་རོ། །སྒྲིབ་པ་འདིས་རྡོ་རྗེ་འཆང་ཆེན་པོ་ལ་སོགས་པ་རྣམས་སྐལ་བ་མེད་པ་དེ་རྣམས་ལ་ཡང་དུས་ཐམས་ཅད་དུ་ཐམས་ཅད་མཛད་པར་འགྱུར་རོ་ཞེས་བྱ་བར་ཇི་ལྟར་ཤེས་པར་བྱ་ཞེ་ན། དཀྱིལ་འཁོར་དུ་ནི་མ་ཞུགས་ཀྱང༌། །ཞེས་བྱ་བ་ལ་སོགས་པ་ལ། སྒྲུབ་པ་པོ་གང་ཞིག་དཀྱིལ་འཁོར་
དུ་མ་ཞུགས་ན་ཡང་བསྒྲུབ་པ་འདིས་འདོད་པའི་དངོས་གྲུབ་ཀྱི་སྲིད་པ་འདི་ཉིད་ལ་མྱུར་དུ་གྲུབ་པར་འགྱུར་རོ། །ཅིའི་ཕྱིར་ཞེ་ན། མཐོང་བ་ལ་སོགས་པས་བར་མཚམས་མེད་པ་ཉིད་དུ་འཁོར་བ་ཇི་སྲིད་བར་དུ་སེམས་ཅན་ཐམས་ཅད་རབ་ཏུ་གསལ་བར་མཛད་པ་ནི་རྡོ་རྗེ་འཆང་ཆེན་པོ་སྟེ། ཀུན་ནས་ནི་དངོས་པོ་ཐམས་ཅད་ལས་སོ། །དུས་ཀུན་དུ་ནི་དུས་ཐམས་ཅད་དོ། །ཐམས་ཅད་ཅེས་བྱ་བ་ནི་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ནོ། །གང་གི་ཕྱིར་དངོས་གྲུབ་ཐམས་ཅད་རབ་ཏུ་སྩོལ་བར་འགྱུར་བས་ན་དེའི་ཕྱིར་བསྒྲུབ་བྱ་འདི་བཤད་ཅེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དང་པོའི་སྙིང་པོའི་གསང་བའི་སྙིང་པོ་བསྒྲུབ་པ་འདིས། རྒྱལ་པོ་རྡོ་རྗེ་འཆང་ཆེན་པོ་སྲིད་པའི་དབང་ཕྱུག་ཀུན་གྱི་གཙོ་གང་ཡིན་པ་དེས། དཀྱིལ་འཁོར་དུ་མ་ཞུགས་པ་ལ་ཡང་མཐོང་བ་ལ་སོགས་པའི་དངོས་གྲུབ་རབ་ཏུ་སྩོལ་བའི་རྒྱུ་དེའི་ཕྱིར་འོག་ནས་འཆད་པར་འགྱུར་བའི་སྙིང་པོའི་སྒྲུབ་པ་ཕྱག་རྒྱ་ཆེན་པོ་ལ་སོགས་པའི་རྫོགས་པར་བྱེད་པའི་རྒྱུ་བཤད་པ་ནི་བསྟན་པར་བྱའོ། །དངོས་གྲུབ་ཅེས་བྱ་བ་ལ། སྒྲུབ་པ་དེ་ཉིད་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཀྱི་རྒྱུ་གཉིས་ཀྱི་ཕྱིར་དངོས་གྲུབ་བོ། །དངོས་གྲུབ་དེ་ཇི་ལྟ་བུ་ཡིན་ཞེ་ན། ཤིན་ཏུ་བརྟག་པའོ་ཞེས་བྱ་བ་ལ། ཐོག་མ་ཐ་མ་མེད་པའི་རྡོ་རྗེ་སེམས་དཔའ་མངོན་དུ་བྱེད་པའི་རྒྱུ་ཉིད་ཀྱི་ཕྱིར་ཤིན་ཏུ་བརྟག་པའི་དངོས་གྲུབ་སྟེ། དེ་བསྒྲུབས་པས་ཤིན་ཏུ་བརྟག་པའི་དངོས་གྲུབ་ཡིན་ནོ། །སྒྲུབ་པ་བཤད་པར་བྱ་བ་དེ་ཁྱད་པར་ཇི་ལྟ་བུ་དང་ལྡན་པའི་སྒྲུབ་པ་བཤད་པར་བྱ་བ་ཡིན་ཞེ་ན། གང་གིས་ཞེས་བྱ་བ་ལ་སོགས་པ་ལ་རང་གི་ལྷའི་དབྱིབས་ལ་སོགས་པ་ལ་རང་བཞིན་གྱིས་སྒྲུབ་པ་གང་གིས་སྲིད་པ་འདི་ཉིད་ལ་ཤིན་ཏུ་བརྟག་པའི་དངོས་གྲུབ་ནི་ཐོག་མ་ཐ་མ་མེད་པའི་རྡོ་རྗེ་འཆང་ཆེན་པོའི་དངོས་གྲུབ་སྒྲུབ་པ་གང་གི་ཚེ་འདི་ཉིད་ལ་རྣལ་འབྱོར་པས་ཐོབ་པའི་སྒྲུབ་པ་དེ་བཤད་པར་བྱའོ། །ད་ནི་སྒྲུབ་པ་དེ་བསྟན་པར་བྱ་བའི་ཕྱིར། ལུགས་མ་ཞེས་བྱ་བ་ལ་སོགས་པ་གསུངས་
ཏེ། དེ་དག་ནི་བཤད་ཟིན་ཏོ། །བདེ་བ་ཆེན་པོ་རྡོ་རྗེ་གསང་བའི་ནི། གསང་བའི་དཀྱིལ་འཁོར་ལས་གསུངས་པའི་རྡོ་རྗེ་སེམས་དཔའི་སྐུ་སྟེ། དེ་ཉིད་དམ་ཚིག་གོ །དེའི་དེ་ཁོ་ན་ཉིད་རབ་ཏུ་དགའ་བ་ཉིད་དོ། །ཀུན་དུ་བཟང་པོ་ཉིད་དོ། །དེའི་སྒྲུབ་པ་གང་ཡིན་པ་དེ་ཉིད་དངོས་གྲུབ་ཀྱི་རྒྱུ་ཉིད་ཡིན་པའི་ཕྱིར་དངོས་གྲུབ་སྟེ། དེའི་ཆོ་ག་རྒྱས་པར་ནི་རྣམ་པ་སྣ་ཚོགས་པའི་རང་བཞིན་ཅན་འདས་མ་ཐག་ཏུ་བཤད་པའོ། །དེ་ལྟར་དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་ལས་གསུངས་པའི་འབྲས་བུའི་ཁྱད་པར་བསྒྲུབ་པ་བསྟན་ནས། ད་ནི་རྟོག་པ་ཐམས་ཅད་ཀྱི་སྒྲུབ་པ་པོ་རྣམས་ཀྱིས་དང་པོའི་རྡོ་རྗེའི་ཕྱག་རྒྱ་ཡི་གེ་ཧཱུཾ་བརྗོད་ཅིང་བཅིང་བར་བྱ་སྟེ། ཕྱི་ནས་ཕྱག་རྒྱ་གཞན་ནོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །བཅོམ་ལྡན་འདས་ཞེས་བྱ་བ་ནི། རྡོ་རྗེ་འཆང་ཆེན་པོའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེའི་ཕྱག་རྒྱ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་ཀ་ན་གནས་པའི་རྡོ་རྗེ་སེམས་དཔའ་སྟེ། དེའི་ཡེ་ཤེས་གང་ལ་ཡོད་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཕྱག་རྒྱའི་ཡེ་ཤེས་ཏེ། རྡོ་རྗེ་འཆང་ཆེན་པོའོ། །སྔ་མའི་སྒྲུབ་པ་ལ་ལྟོས་ཏེ་སླར་ཡང་ཞེས་བྱ་བའི་སྒྲ་ནི་ཀུན་སྡུད་པའོ། །འདི་ཞེས་བྱ་བ་ནི་ཐུགས་ལ་གནས་པ་གསུངས་པའོ། །ཕྱག་རྒྱ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ཕྱག་རྒྱ་ཐམས་ཅད་དེ། དམ་ཚིག་དང༌། ཆོས་དང༌། ལས་དང༌། ཕྱག་རྒྱ་ཆེན་པོ་རྣམས་སོ། །དེ་རྣམས་བསྒྲུབ་པ་ནི་རྫོགས་པའི་རྒྱུ་སྟེ། དེ་བསྒྲུབ་པ་ནི་རང་གི་བྱ་བ་རྫོགས་པའི་དོན་ཡོད་པ་ཉིད་དོ། །དེ་སྟོན་པར་བྱེད་པའི་རྒྱུད་བཅོམ་ལྡན་འདས་ཀྱིས་གསུངས་སོ། །ཉིན་རེ་ཞེས་བྱ་བ་ལ་སོགས་པ་ལ་ཞག་རེ་རེ་བཞིན་དུ་སྔ་མའི་ཐུན་མཚམས་ཀྱི་དུས་སུ་རྡོ་རྗེ་དབབ་པའི་རྗེས་ཐོགས་ཁོ་ནར་རྟོག་པ་ཐམས་ཅད་སྒྲུབ་པར་བྱེད་པའི་རྣལ་འབྱོར་པས་ཡི་གེ་ཧཱུཾ་བརྗོད་
ཅིང། དང་པོའི་རྡོ་རྗེ་བཅིང་བར་བྱའོ། །དེ་ནས་དེའི་རྗེས་ལ་ཕྱིས་ཀྱི་དུས་སུ་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་བཅིང་བར་བྱས་ནས། རང་གི་ལས་ཀྱི་དངོས་གྲུབ་སྒྲུབ་པར་བྱེད་པ་ཡིན་ནོ། །འདིས་ཞེས་བྱ་བ་ལ་དང་པོའི་རྡོ་རྗེ་བཅིང་བའི་སྒྲུབ་པ་འདིས་རྟོག་པ་ཐམས་ཅད་དེ་འཇིག་རྟེན་དང་འཇིག་རྟེན་ལས་འདས་པའི་རྟོག་པ་ཐམས་ཅད་ལ་ཇི་ལྟར་བཤད་པའི་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཐམས་ཅད་མདོར་བསྡུས་པས་རང་གིས་རང་ཉིད་བཅིངས་ནས་བསྒྲུབ་པའི་དབང་དུ་འགྱུར་ཞིང་གྲུབ་པར་འགྱུར་བས། དེའི་ཕྱིར་མ་བསྒྲུབ་ཀྱང་འགྲུབ་པར་འགྱུར་ཞེས་བྱ་བ་ལ། དང་པོའི་རྡོ་རྗེ་བཅིངས་པ་ལས་དུས་ཕྱིས་སྔར་བཤད་པའི་རང་གི་སྙིང་པོ་བརྗོད་པ་མེད་ཀྱང་ཕྱག་རྒྱ་དེ་རྣམས་འགྲུབ་པར་འགྱུར་རོ། །དེ་ལྟར་དང་པོའི་རྡོ་རྗེས་བཅིངས་ནས། ཕྱག་རྒྱ་གཞན་ཡང་བཅིང་བར་བྱའོ་ཞེས་བྱ་བ་བསྟན་ནས། རེ་ཞིག་སྤྱོད་ལམ་བཞི་པོས་ཆོས་ཀྱི་ཕྱག་རྒྱ་ཐམས་ཅད་བསྒྲུབ་པར་བྱའོ་ཞེས་བྱ་བའི་དོན་རབ་ཏུ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཀྱིས་རྡོ་རྗེ་ཆོས་ཀྱི་དེ་ཁོ་ན་ཉིད་ཀྱི་གསང་བའི་སྔགས་བསྒྲུབ་པ་གསུངས་སོ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །བཅོམ་ལྡན་འདས་ཞེས་བྱ་བ་ནི་རྡོ་རྗེ་འཆང་ཆེན་པོའོ། །ཆོས་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བའོ། །དེ་དག་གི་དེ་ཁོ་ན་ཉིད་ནི་རང་བཞིན་གྱིས་དག་པ་ཡིན་ལ་དེའི་གསང་བའི་སྔགས་ནི་ལྷ་ཐམས་ཅད་ཀྱི་ཆོས་ཀྱི་ཡི་གེ་རྣམས་ཏེ་དེའི་བསྒྲུབ་པ་གསུངས་པ་ཡིན་ནོ། །ལངས་པ་འམ་ནི་འདུག་པའམ། །ཞེས་བྱ་བ་ལ་སོགས་པ་ལ། རང་གི་ལྷའི་རྣལ་འབྱོར་བྱས་ལ་ལྕེ་ལ་རྡོ་རྗེ་དགེ་བ་རྣམ་པར་བསམས་ཏེ། རང་གི་ལྷའི་ཆོས་ཀྱི་ཕྱག་རྒྱ་བཀོད་ནས། དེ་ཉིད་སླར་ཡང་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རབ་ཏུ་དགའ་བ་རྡོ་རྗེ་ཁྲོ་བོའི་རྣལ་འབྱོར་རམ། དེའི་རིགས་ཀྱི་རྣལ་འབྱོར་པས་རང་གི་སྙིང་ག་ན་གནས་པའི་སེམས་དཔའི་རྡོ་རྗེ་ལ་དགོད་པར་བྱའོ། །པདྨ་དང་རིན་
པོ་ཆེའི་རིགས་ཀྱི་རྣལ་འབྱོར་པས་ནི་རང་གི་སྙིང་ག་ན་གནས་པའི་རང་གི་རིགས་ཀྱི་མཚན་མ་ལ་བཀོད་དེ། དེ་ཉིད་བརྗོད་ཅིང་རང་གི་ལྷའི་སྐུ་གཟུགས་བརྙན་བཞིན་དུ་ལངས་པའམ་འདུག་པས་བསྒོམ་པར་བྱའོ། །ཐམས་ཅད་རྗེས་ཆགས་རྣལ་འབྱོར་ནི་འདིར་རང་བཞིན་གྱིས་དག་པའི་ངོ་བོ་ཡིན་ནོ། །དེས་ཅིར་འགྱུར་ཞེ་ན། དངོས་གྲུབ་ཐམས་ཅད་ཐོབ་པར་འགྱུར་ཞེས་བྱ་བ་ལ། རིགས་ཐམས་ཅད་ཀྱི་རང་གི་ལྷ་རྣམས་ཀྱི་ཕྱག་རྒྱ་གྲུབ་པ་ནི། དངོས་གྲུབ་ཐམས་ཅད་དེ། དེ་ཐོབ་པར་འགྱུར་རོ། །དེ་ལྟར་ཕྱག་རྒྱ་བསྒྲུབ་པ་བསྟན་ནས། ད་ནི་ལས་ཀྱི་ཕྱག་རྒྱའི་སྒྲུབ་པ་པོས་ཡི་གེ་ཨ་ལས་རང་གི་སྙིང་གར་སྣ་ཚོགས་རྡོ་རྗེ་རྣམ་པར་བསམས་ལ་ལས་ཀྱི་ཕྱག་རྒྱ་བཅིངས་ཏེ། རང་གི་ལྷའི་སྙིང་པོ་བརྗོད་ཅིང༌། གར་གྱི་ཚུལ་གྱིས་སམ། ཕྱག་རྒྱ་བཅུ་གཉིས་ཀྱི་རྣམ་པས་མཆོད་པ་བྱ་ཞིང། གར་གྱི་ཚུལ་གྱིས་རང་གི་ལྷ་བསྒོམ་པར་བྱའོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ཀྱིས་ལས་ཀྱི་གསང་བའི་དེ་ཁོ་ན་ཉིད་སྒྲུབ་པའི་རྒྱུད་ཅེས་བྱ་བ་གསུངས་ཏེ། ལས་ཀྱི་གསང་བའི་དེ་ཁོ་ན་ཉིད་ཀྱི་སྒྲུབ་པ་ནི་ཕྱག་རྒྱ་བཅུ་གཉིས་ཀྱི་གར་གྱི་མཆོད་པ་འབུལ་བའམ། གར་གྱི་ཚུལ་གྱིས་བསྒོམ་པ་སྟེ་དེ་སྟོན་པར་བྱེད་པའི་རྒྱུད་བཅོམ་ལྡན་འདས་ཀྱིས་གསུངས་སོ། །གསང་བའི་གར་མཆོག་མཆོད་པ་ལ། །ཞེས་བྱ་བ་ལ། རང་གི་ལྷའི་རྣལ་འབྱོར་ཇི་ལྟ་བ་བཞིན་དུ་བྱས། རང་གི་ལྷའི་ཕྱག་རྒྱ་བཅིང་བར་བྱའོ། །དེ་ནས་གར་གྱི་ཚུལ་གྱིས་བསྒོམ་པར་བྱ་ཞིང་རང་གི་ལྷ་བསྒྲུབ་པར་བྱའོ། །ཡང་ན་མཆོད་པ་ཅི་བདེ་བར། །ཞེས་བྱ་བ་ལ་རྣམ་པ་བཅུ་གཉིས་ཀྱི་ཕྱག་རྒྱའི་མཆོད་པ་ཡང་དང་ཡང་དུ་བྱ་ཞིང་རང་གི་ལྷ་བསྒྲུབ་པར་བྱའོ། །དེ་ལྟར་རྟག་ཏུ་རྣལ་འབྱོར་བསྒོམས་ན། ཆོ་ག་འདིས་མཆོག་གི་དངོས་གྲུབ་མྱུར་དུ་ཐོབ་པར་འགྱུར་རོ། །དེ་ལྟར་ལས་ཀྱི་ཕྱག་རྒྱ་སྒྲུབ་པ་བསྟན་ནས། ད་ནི་རང་གི་ལྷའི་སྙིང་པོ་བརྗོད་ཅིང་རང་གི་ལྷའི་ཕྱག་རྒྱ་ཆེན་པོ་བསྒོམ་པར་བྱའོ་ཞེས་བྱ་བའི་ཆོ་ག་འདི་རབ་ཏུ་
བསྟན་པར་བྱ་བའི་ཕྱིར། དེ་ནས་རང་གི་ཕྱག་རྒྱའི་བདག་ཉིད་སྒྲུབ་པའི་རྒྱུད་ཅེས་བྱ་བ་གསུངས་ཏེ། རང་གི་ཕྱག་རྒྱ་ནི་རང་གི་ལྷའི་ཕྱག་རྒྱ་ཆེན་པོ་སྟེ། དེས་བདག་ཉིད་སྒྲུབ་པ་ནི་རང་གི་རྒྱུད་ལ་རང་གི་ལྷའི་ཕྱག་རྒྱའི་སྐུ་རྫོགས་པའོ། །ཕྱག་རྒྱ་ཆེན་པོ་མཉམ་གཞག་སྟེ། །ཞེས་བྱ་བ་ལ། ཇི་སྐད་བཤད་པའི་ཆོ་གས་རང་གི་ལྷའི་རྣལ་འབྱོར་བྱས་ལ་ཡེ་ཤེས་སེམས་དཔའ་བཅུག་སྟེ། ཆོ་ག་ཐམས་ཅད་རྗེས་སུ་སྤྱད་ནས་ཕྱག་རྒྱ་ཆེན་པོ་བཅིངས་ཏེ། རང་གི་སྙིང་པོ་ལན་ཅིག་བཟླ་བར་བྱའོ། །དེ་ལྟར་བྱས་པས་ཅིར་འགྱུར་ཞེ་ན། བརྟན་ཞིང་ཤིན་ཏུ་དགྱེས་ཀུན་ཆགས། །ཤིན་ཏུ་རྒྱས་འགྱུར་བདག་པོ་འགྲུབ། །ཅེས་བྱ་བ་ལ་བརྟན་པ་ནི་མི་ཕྱེད་པའོ། །ཤིན་ཏུ་མཉེས་པར་གྱུར་པས་ན་ཤིན་ཏུ་དགྱེས་པའོ། །ཐུགས་གཞན་དུ་མི་འགྱུར་ཞིང་ཡང་དག་པར་ཞེན་པས་ན་ཀུན་ཏུ་ཆགས་པའོ། །ཁྱད་པར་དུ་འཕེལ་བར་འགྱུར་བས་ན་ཤིན་ཏུ་རྒྱས་པར་འགྱུར་བའོ། །བདག་པོ་ནི་སྒྲུབ་པ་འདོད་པའི་ལྷའི་སྐུའི་རང་བཞིན་ཅན་ཕྱག་རྒྱ་ཆེན་པོའི་དངོས་གྲུབ་ཀྱིས་གྲུབ་པར་འགྱུར་བ་ཡིན་ནོ། །དེ་ལྟར་ཕྱག་རྒྱ་ཆེན་པོའི་སྒྲུབ་པ་བསྟན་ནས། ད་ནི་རྡོ་རྗེ་སེམས་དཔའི་སྒྲུབ་པ་པོས་རི་བྷི་ཏ་ལ་སོགས་པའི་བྱེད་པའི་ཁམས་ཀྱི་གླུ་རྒྱན་དང་བཅས་པ་ལྔ་ཡི་གེ་ཧཱུཾ་བརྗོད་ཅིང་བཅོམ་ལྡན་འདས་དཔལ་རྡོ་རྗེ་སེམས་དཔའ་རབ་ཏུ་བསྒྲུབ་པར་བྱའོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་ནས་ཡི་གེ་ཧཱུཾ་གིས་གླུ་བླང་བ་གྲུབ་པའི་རྒྱུད་ཅེས་བྱ་བ་གསུངས་ཏེ། ཡི་གེ་ཧཱུཾ་ཉིད་གླུ་སྟེ་ཡི་གེ་ཧཱུཾ་གི་གླུའོ། །དེ་བླངས་པས་གྲུབ་པ་ནི་དཔལ་རྡོ་རྗེ་སེམས་དཔའ་ཉིད་ཐོབ་པའོ། །རི་བྷི་ཏ་སོགས་རྒྱན་དང་ལྡན། །ཞེས་བྱ་བ་ལ། རི་བྷི་ཏ་ཞེས་བྱ་བ་ནི་བྱེད་པའི་ཁམས་ཏེ། པི་ཝང་ལ་སོགས་པའི་རོལ་མོ་རྣམས་ལ་རབ་ཏུ་གྲགས་པ་ཡིན་ནོ། །སོགས་པའི་སྐྲས་ནི་ནི་ད་དང༌། ནི་ལ་ཏི་ཏ་དང༌། ཧྲ་ད་དང་རྗེས་སུ་འབྲེལ་པ་ཞེས་བྱ་བ་སྟེ་བཞི་ཤེས་པར་བྱའོ། །རི་ད་ལ་སོགས་པའི་རྒྱན་ནི་རི་ད་ལ་སོགས་པའི་རྒྱན་ཏེ་རིད་ལ་སོགས་པའི་དེ་རྣམས་དང་ལྡན་པའོ། །ཅི་ནུས་པ་ཞེས་བྱ་བ་ལ་ནུས་པ་
དང་རྗེས་སུ་མཐུན་པའོ། །ཅི་འདོད་པར་ཞེས་བྱ་བ་ནི་རང་གི་འདོད་པ་དང་རྗེས་སུ་མཐུན་པའོ། །བླངས་ནས་ཞེས་བྱ་བ་ནི་གླུར་བླངས་ནས་སོ། །དེ་གང་ཡིན་ཞེ་ན། གནྡྷ་རྦྷ་ཞེས་བྱ་བའི་གླུ་སྟེ་དབྱངས་བདུན་གྱི་རང་བཞིན་ཅན་ནོ། །དང་པོ་ནི་ད་ལྟར་བྱུང་བ་སྟེ། རང་བཞིན་གྱིས་རྟག་ཏུ་གནས་པ་གྲུབ་པར་འགྱུར་རོ། །ཡི་གེ་གང་གིས་ཤེ་ན། ཡི་གེ་ཧཱུཾ་གིས་སོ། །ལྷག་མ་ནི་གོ་སླའོ། །དེ་ཁོ་ན་ཉིད་ཆེན་པོ་ཞེས་བྱ་བ་ལ། དེ་ཁོ་ན་ཉིད་ཀྱང་ཡིན་ལ་ཆེན་པོ་ཡང་དེ་ཉིད་ཡིན་པས་ན་དེ་ཁོ་ན་ཉིད་ཆེན་པོ་སྟེ། ཐོག་མ་ཐ་མ་མེད་པའི་ཆོས་ཀྱི་དབྱིངས་སོ། །དེའི་གསང་བའི་དངོས་གྲུབ་ནི། རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་པོ། །དེ་བསྒྲུབ་པ་ནི་འདས་མ་ཐག་ཏུ་བཤད་པ་དེ་ཉིད་དོ། །རྒྱུད་ཅེས་བྱ་བ་ཡང་ངོ༌། །རི་བྷི་ཏ་ལ་སོགས་པའི་ཁམས་ལྔ་རྒྱན་དང་བཅས་པ་རྣམས་ཀྱིས་ཡི་གེ་ཧཱུཾ་གིས་དང་པོར་གནྡྷ་རྦྷ་བླང་ཞིང༌། བཅོམ་ལྡན་འདས་རྡོ་རྗེ་སེམས་དཔའ་ཉིད་རབ་ཏུ་བསྒྲུབ་པའི་ཕྱིར་ལས་བརྒྱ་རྣམ་པར་བསྒོམ་པར་བྱའོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་ནས་རྟོག་པ་ཐམས་ཅད་ཀྱི་ཕྱག་རྒྱ་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པའོ། །རྟོག་པ་ཡང་ཡིན་ལ་ཐམས་ཅད་ཀྱི་དེ་ཁོ་ན་ཉིད་ཀྱང་ཡིན་པས་ན། རྟོག་པ་ཐམས་ཅད་དེ། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་རྟོག་པའོ། །དེའི་ལས་སྒྲུབ་པར་བྱེད་པའི་ཕྱག་རྒྱ་རྣམས་ནི། ལས་ཀྱི་ཕྱག་རྒྱ་སྟེ། དེ་སྟོན་པར་བྱེད་པའི་རྒྱུད་བཤད་པར་བྱའོ་ཞེས་བྱ་བ་ནི་བཅོམ་ལྡན་འདས་ཐོག་མ་དང་ཐ་མ་མེད་པའི་ཕྲིན་ལས་ཅན་གྱི་རྡོ་རྗེ་སེམས་དཔས་གསུངས་སོ། །ཐོག་མ་ཐ་མ་མེད་པ་ནི་ཤིན་ཏུ་ཚེ་རིང་ཞིང་འཕེལ་བ་ལ་སོགས་པའི་ལས་རྣམས་གང་ལ་ཡོད་པ་དེ་ནི་ཐོག་མ་ཐ་མ་མེད་པའི་ཕྲིན་ལས་ཅན་ནོ། །ཤིན་ཏུ་ཚེ་རིང་ཞིང་འཕེལ་བ་ཞེས་བྱ་བ་ཚེ་རིང་བ་ནི་བསྐལ་པ་ལ་སོགས་པ་དུས་ཀྱི་གྲངས་ལས་འདས་པའོ། །ཤིན་ཏུ་ཡང་ཡིན་ལ་ཚེ་རིང་བ་ཡང་ཡིན་པས་ན་ཤིན་ཏུ་ཚེ་རིང་བ་སྟེ་སྲོག་གོ །འཕེལ་བ་ནི་གོང་ནས་གོང་དུ་སྐད་ཅིག་མའི་རྒྱུན་གྱིས་མི་གནས་པའི་མྱ་ངན་ལས་འདས་
པའི་རང་བཞིན་རྫོགས་པའོ། །དེ་ཇི་ལྟར་འབྱུང་བར་འགྱུར་ཞེ་ན། བདེ་བ་ཆེན་པོ་རྡོ་རྗེ་ཆོས་སོ། །དང་པོའི་རྡོ་རྗེ་ནི། བདེ་བ་ཆེན་པོའི་རྡོ་རྗེའི་ཚེ་སྟེ། དེས་དེ་འབྱུང་བ་ཡིན་ནོ། །འདིས་ནི་འདི་སྐད་སྟོན་པར་འགྱུར་ཏེ། གསང་བའི་དཀྱིལ་འཁོར་ལས་གསུངས་པའི་ཆོ་གས་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་དཔྱད་ནས་དང་པོའི་རྡོ་རྗེ་བཅིངས་ཏེ། དཔལ་རྡོ་རྗེ་སེམས་དཔའ་རང་གི་སྙིང་གའི་ཟླ་བ་དང༌། སྤྱི་བོར་ཟླ་བའི་དཀྱིལ་འཁོར་ལ་བཞུགས་པར་བསྒོམས་ལ། ཟླ་བའི་དཀྱིལ་འཁོར་ཡང་བདུད་རྩིའི་རྒྱུན་རྣམས་ཀྱིས་སྒྲུབ་པ་པོའི་ལུས་མ་ལུས་པ་ གང་བར་བྱེད་པ་ཟླ་བ་ཕྱེད་ཀྱི་བར་ཉིན་རེ་ཞིང༌། ལན་ཅིག་བྱིན་གྱིས་བརླབ་པ་བྱས ་ལ། མཐར་མཚན་ཐོག་ཐག་བསྒོམས་ན། ཐོ་རངས་རྡོ་རྗེ་སེམས་དཔའི་རྡོ་རྗེའི་ཚེ་དང་འདྲ་བར་འགྱུར་ཏེ། དང་པོའི་རྡོ་རྗེ་སྤྱི་བོའི་ཕྱོགས་སུ་བཟུང་ཞིང་བསྒོམ་པར་བྱ་བ་ཡིན་ནོ། །ཤིན་ཏུ་གཞོན་པའི་ན་ཚོད་འཕེལ་བ་ཞེས་བྱ་བ་ནི། དཔལ་རྡོ་རྗེ་སེམས་དཔའ་བཞིན་དུ་ལོ་བཅུ་དྲུག་ལོན་པའི་རྣམ་པ་ཅན་གྱི་ན་ཚོད་རྫོགས་པ་ནི་ཤིན་ཏུ་གཞོན་པའོ། །དེ་གོང་ནས་གོང་དུ་འཁོར་བ་ཇི་སྲིད་ཀྱི་བར་དུ་འཇུག་པ་ནི་འཕེལ་བའོ། །དེ་ཇི་ལྟར་ཞེ་ན། བདེ་བ་ཆེན་པོ་རྡོ་རྗེ་བཅུད་ཀྱིས་ལེན་གྱིས་སོ་ཞེས་བྱ་བ་ལ། བདེ་བ་ཆེན་པོ་རྡོ་རྗེ་བཅུད་ཀྱིས་ལེན་ནོ། །རྡོ་རྗེ་སེམས་དཔའ་སྟེ། དེའི་ཕྱག་རྒྱ་ཆེན་པོ་གང་ཡིན་པ་དེ་ནི། བདེ་བ་ཆེན་པོ་རྡོ་རྗེ་བཅུད་ཀྱིས་ལེན་ཏེ། དེས་དེ་ཐོབ་པར་འགྱུར་རོ།། འདིས་ནི་འདི་སྐད་སྟོན་པར་འགྱུར་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། ཆོ་ག་ཐམས་ཅད་རྗེས་སུ་དཔྱད་ནས། དང་པོའི་རྡོ་རྗེ་བཅིངས་ཏེ། དེའི་དབུས་མའི་རྡོ་རྗེ་བཏུང་བར་བྱའོ། །དཔལ་རྡོ་རྗེ་སེམས་དཔའ་དབུས་མའི་རྡོ་རྗེ་ལས་བྱུང་བའི་རྡོ་རྗེ་སེམས་དཔའི་རྡུལ་ཕྲ་རབ་ཀྱི་བཅུད་ཀྱིས་ལེན་གྱི་རྒྱུད་ཀྱིས་ཀྱང་ཁ་གཏང་བར་བྱ་སྟེ། ལུས་ཐམས་ཅད་ཁྱབ་པར་བསམ་པར་བྱས་ན། དེ་ལྟར་ན་ཚོད་ཤིན་ཏུ་གཞོན་པ་འཕེལ་བར་འགྱུར་རོ། །གཟུགས་ཆེན་པོ་དང་གཟི་
བརྗིད་འཕེལ་བར་ཞེས་བྱ་བ་ལ། གཟུགས་ཆེན་པོ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུའོ། །རྡོ་རྗེ་སེམས་དཔའ་ལྟ་བུའི་མཐུ་ནི་གཟི་བརྗིད་ཆེན་པོའོ། །དེ་དག་འཕེལ་བ་ནི་གོང་ནས་གོང་དུ་འཁོར་བ་ཇི་སྲིད་ཀྱི་བར་དུ་རབ་ཏུ་འཇུག་བ་ཡིན་ནོ། །དེ་ཇི་ལྟར་ཞེ་ན། བདེ་བ་ཆེན་པོ་རྡོ་རྗེའི་གཟུགས་ཀྱི་གཟི་བརྗིད་ཀྱིས་སོ་ཞེས་བྱ་བ་ལ། བདེ་བ་ཆེན་པོ་རྡོ་རྗེ་གཟུགས་ཀྱི་གཟི་བརྗིད་ནི་རྡོ་རྗེ་སེམས་དཔའ་སྟེ། དེའི་ཕྱག་རྒྱ་གང་ཡིན་པ་དེ་ནི་བདེ་བ་ཆེན་པོའི་རྡོ་རྗེའི་གཟུགས་ཀྱི་གཟི་བརྗིད་དོ། །དེ་བཞིན་དུ་ཐམས་ཅད་བྱས་ལ། དང་པོའི་རྡོ་རྗེ་དབུས་མ་དང་མཐེ་བོ་དང་མཐེའུ་ཆུང་རྣམས་ཀྱིས་རྩེ་མོའི་ཚུལ་དུ་བྱས་ཏེ་རང་གི་གདོང་ཡོངས་སུ་སྦྱངས་ལ་ཕྱག་རྒྱ་རང་གི་གདོང་དུ་དགྲོལ་བར་བྱས་ཏེ། རང་གི་གདོང་ལ་རབ་ཏུ་ཞུགས་པའི་བཅོམ་ལྡན་འདས་རྡོ་རྗེ་སེམས་དཔས་ཀྱང་ལུས་ཐམས་ཅད་ཁྱབ་ཅིང་རྡོ་རྗེ་སེམས་དཔའ་ཉིད་དུ་གྱུར་པར་བསམ་པར་བྱ་སྟེ། དེ་ལྟར་ན་གཟུགས་ཆེན་པོ་དང༌། གཟི་བརྗིད་འཕེལ་བར་འགྱུར་རོ། །འདུ་བྱེད་ཐམས་ཅད་འཕེལ་བ་ཞེས་བྱ་བ་ལ། འདུ་བྱེད་ཀྱང་ཡིན་ལ་ཆེན་པོ་ཡང་དེ་ཉིད་ཡིན་པས་ན་འདུ་བྱེད་ཕུང་པོ་སྟེ། དཔལ་རྡོ་རྗེ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་གྱི་འདུ་བྱེད་ཀྱི་ཕུང་པོའོ། །དེ་འཕེལ་བ་ནི་སྔ་མ་བཞིན་ནོ། །དེ་ཇི་ལྟར་ཞེ་ན་བདེ་བ་ཆེན་པོའི་རྡོ་རྗེ་འདུ་བྱེད་ཆེན་པོས་སོ་ཞེས་བྱ་བ་ལ་བདེ་བ་ཆེན་པོའི་རྡོ་རྗེ་འདུ་བྱེད་ཆེན་པོ་ནི་དོན་ཡོད་གྲུབ་པའི་རང་བཞིན་ཅན་གྱི་རྡོ་རྗེ་སེམས་དཔའ་སྟེ་དེའི་ཕྱག་རྒྱ་གང་ཡིན་པ་སྟེ་དེ་ནི་བདེ་བ་ཆེན་པོའི་འདུ་བྱེད་ཆེན་པོའོ། །འདིས་ནི་འདི་སྐད་འཆད་པར་འགྱུར་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་གྱི་ཆོ་ག་ཐམས་ཅད་རྗེས་སུ་དཔྱད་ལ་དང་པོའི་རྡོ་རྗེ་བཅིངས་ཏེ། རང་གི་ལུས་ཐམས་ཅད་དུ་བསྐོར་བར་བྱའོ། །དེ་ནས་བདག་ཉིད་དེ་བཞིན་གཤེགས་པ་དོན་ཡོད་གྲུབ་པར་བསྒོམ་ཞིང་སྙིང་གར་ཕྱག་རྒྱ་དགྲོལ་བར་བྱའོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་དོན་ཡོད་གྲུབ་པའི་སྐུ་
རྣམས་རང་གི་སྙིང་གར་གཞུག་པར་བྱ་སྟེ་དེ་ལྟར་འདུ་བྱེད་ཆེན་པོ་ཐམས་ཅད་འཕེལ་བར་འགྱུར་རོ། །སེམས་ཅན་ཐམས་ཅད་ཀྱི་བདག་ཉིད་ཐམས་ཅད་བསྲུང་བར་བྱ་བ་ལ། སེམས་ཅན་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་སེམས་ཅན་ཐམས་ཅད་དེ། དེ་རྣམས་ཀྱི་བདག་ཉིད་ནི་སེམས་ཅན་ཐམས་ཅད་ཀྱི་བདག་ཉིད་དེ། ཕུང་པོ་ལྔའི་རང་བཞིན་གྱི་བདག་ཉིད་ཀྱི་དངོས་པོའོ། །དེ་ཐམས་ཅད་བསྲུང་བ་ནི་ཐམས་ཅད་བསྲུང་བའོ། །དེ་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་བསྲུང་བས་སོ་ཞེས་བྱ་བ་ལ་བདེ་བ་ཆེན་པོའི་རྡོ་རྗེ་བསྲུང་བ་ནི། རྡོ་རྗེ་སེམས་དཔའི་གཙུག་ཏོར་གྱི་གཟུངས་དང་ལྡན་པའི་རྡོ་རྗེ་སེམས་དཔའ་སྟེ། དེའི་ཕྱག་རྒྱ་གང་ཡིན་པ་དེ་ནི་བདེ་བ་ཆེན་པོའི་རྡོ་རྗེ་བསྲུང་བའོ། །དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་བསྲུང་བར་བྱ་བའི་སེམས་ཅན་དང་ཡིད་ཀྱིས་གཅིག་ཏུ་བྱས་ལ། རྡོ་རྗེ་སེམས་དཔའི་ཅོད་པན་གྱི་རང་བཞིན་ཅན་དུ་བདག་ཉིད་བསྒོམ་ཞིང་དང་པོའི་རྡོ་རྗེ་སྤྱི་བོའི་ཕྱོགས་སུ་གཟུང་བར་བྱས་ཏེ། དེ་ལྟར་ན་སེམས་ཅན་ཐམས་ཅད་ཀྱི་བདག་ཉིད་ཐམས་ཅད་བསྲུང་བར་འགྱུར་བ་ཡིན་ནོ། །ཕྱོགས་ཐམས་ཅད་དང༌། མཚམས་དང༌། དཀྱིལ་འཁོར་བཅིང་བ་ནི་བཤད་ཟིན་ཏོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་བསྐོར་བས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་གྱིས་དང་པོའི་རྡོ་རྗེ་བཅིངས་ཏེ། ཕྱོགས་བཅིང་བའི་བསམ་བས་ཕྱོགས་བཅུར་བསྐོར་བར་བྱས་ན་ཕྱོགས་ཐམས་ཅད་རྡོ་རྗེ་འབར་བ་རྣམས་ཀྱིས་བར་མཚམས་མེད་པར་ཁྱབ་པར་འགྱུར་བ་ཡིན་ཏེ། དེ་ལྟར་ན་ཕྱོགས་ཐམས་ཅད་བཅིང་བར་འགྱུར་བ་ཡིན་ནོ། །དེ་ཉིད་མཚམས་བཅིང་བའི་ཚུལ་གྱིས་བསྐོར་བར་བྱ་སྟེ། དེ་ལྟར་ན་རྡོ་རྗེའི་མཚམས་བཅིང་བར་འགྱུར་རོ། །དེ་ཉིད་དཀྱིལ་འཁོར་བཅིང་བའི་ཚུལ་གྱིས་བསྐོར་བར་བྱ་སྟེ། དེ་ལྟར་ན་དཀྱིལ་འཁོར་བཅིང་བར་འགྱུར་རོ། །དེ་ལྟར་བྱས་པས་ཅིར་འགྱུར་ཞེ་ན། ཐམས་ཅད་རྡོ་རྗེ་ཁྲོ་བོའི་ངོ་བོ་ཉིད་རྡོ་རྗེ་ཁྲོ་བོའི་རྒྱལ་པོ་ཆེན་པོ་ནི་རྡོ་རྗེ་ཧཱུཾ་མཛད་དེ་དེས་
ཀྱང་ཞུགས་པར་མི་ནུས་ཤིང་མི་ཕྱེད་པར་འགྱུར་རོ། །སྡིག་པ་ཐམས་ཅད་བསྲུང་བ་ཞེས་བྱ་བ་ལ། སྡིག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་སྡིག་པ་ཐམས་ཅད་དེ། སེམས་ཅན་ཐམས་ཅད་ལ་འཚེ་བར་བྱེད་པའི་བདུད་ཀྱི་ལུས་ཅན་གྱི་ལྷའི་གཟུགས་སོ། །དེ་རྣམས་ལས་ཐམས་ཅད་དུ་བསྲུང་བས་ན་སྡིག་པ་ཐམས་ཅད་བསྲུང་བ་སྟེ། འདོད་ཆགས་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་ལས་རང་གི་སེམས་བསྲུང་བའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེས་བྱིན་གྱིས་བརླབས་སོ་ཞེས་བྱ་བ་ལ། དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ། གོ་ཆ་བཅིང་བའི་བསམ་པས་སྙིང་གར་བཞག་ལ་སེམས་ཀྱིས་རྒྱུ་བ་དང༌། དེ་ནས་དཔུང་པ་གཉིས་དང༌། སྤྱི་བོ་དང་དཔྲལ་བར་བཞག་ལ་རྡོ་རྗེ་ཁུ་ཚུར་གཉིས་ཀྱི་ཕྲེང་བ་བཅིངས་ཏེ། སྙིང་གའི་ཕྱོགས་སུ་རྡོ་རྗེ་ཁུ་ཚུར་གཉིས་ཀྱི་གོ་ཆ་བཅིང་བར་བསམ་པར་བྱའོ། །དེ་བཞིན་དུ་མགྲིན་པའི་སྟེང་དང༌། སླར་ཡང་སྙིང་ག་དང༌། དེ་ནས་ནུ་མའི་བར་དང༌། སླར་ཡང་སྙིང་ག་དང༌། དེ་ནས་མགྲིན་པའི་སྟེང་དང༌། དཔྲལ་བའི་སྟེང་དང༌། དེ་ནས་སྙིང་གར་བཅིང་བའི་ཚུལ་གྱིས་རྣ་བ་གཉིས་ཀྱི་སྟེང་དུ་ནམ་མཁའ་ལྡིང་གི་གཤོག་པ་བྱས་ལ་མཐར་དར་དཔྱངས་སུ་བྱས་ཏེ། འདི་ནི་བདེ་བ་ཆེན་པོ་རྡོ་རྗེའི་བྱིན་གྱིས་བརླབས་པ་སྟེ། འདིས་སྡིག་པ་ཐམས་ཅད་ལས་བསྲུང་བར་འགྱུར་རོ། །བདག་ཉིད་ཀྱི་དངོས་པོ་ཐམས་ཅད་དམ། གཞན་དག་རྡོ་རྗེར་བྱེད་པ་ཞེས་བྱ་བ་ནི་གོ་སླའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གོ་ཆས་སོ། །ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ། རྡོ་རྗེ་བསྲུང་བར་བདག་ཉིད་བསམས་ནས་བདག་ཉིད་གོ་ཆའི་བསམ་པའམ། གཞན་བསྲུང་བའི་བསམ་པས་ཕྱག་རྒྱ་དེ་སྙིང་གའམ། དཔྲལ་བའམ། སྤྱི་བོའི་ཕྱོགས་སུ་གཟུང་བར་བྱ་སྟེ། དེ་ལྟར་ན་བདག་ཉིད་ཀྱི་དངོས་པོ་ཐམས་ཅད་དམ་གཞན་དག་གི་རྡོ་རྗེ་ཉིད་དུ་བྱེད་པར་འགྱུར་རོ། །འཐབ་མོ་ཐམས་ཅད་ལས་རྣམ་པར་རྒྱལ་
བ་ཞེས་བྱ་བ་ལ། མཆོག་དང་མཆོག་མ་ཡིན་པའི་འཐབ་མོ་ཀུན་ལས་རྣམ་པར་རྒྱལ་བ་ནི་འཐབ་མོ་ཐམས་ཅད་ལས་རྣམ་པར་རྒྱལ་བའོ། །དེ་ཇི་ལྟར་ཞེ་ན་བདེ་བ་ཆེན་པོའི་རྡོ་རྗེ་རྒྱལ་མཚན་མཆོག་གི་དཔུང་རྒྱན་གྱིས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ་གྱེན་དུ་དྲངས་ལ་སོར་མོ་དབུས་མ་གཉིས་དར་གྱི་བ་དན་གྱི་ཚུལ་གྱིས་གཟུང་བར་བྱ་སྟེ། ཕྱག་རྒྱ་བཅིང་བ་དེ་ལས་ཀྱང་ཡན་ལག་བཞིའི་དཔུང་གི་ཚོགས་སྤྲོས་ལ་དེ་ཡིས་ཕ་རོལ་གྱི་དཔུང་གསད་པར་བྱ་སྟེ། དེ་ལྟར་ན་འཐབ་མོ་ཀུན་ལས་རྣམ་པར་རྒྱལ་བར་འགྱུར་བ་ཡིན་ནོ། །འཐབ་མོ་བསྲུང་བ་ཞེས་བྱ་བ་ལ། འཐབ་མོ་ཐམས་ཅད་ལས་བདག་ཉིད་ཀྱི་དཔུང་བསྲུང་བ་ནི་འཐབ་མོ་བསྲུང་བའོ། །དེ་ཇི་ལྟར་ཞེ་ན། བདེ་བ་ཆེན་པོའི་རྡོ་རྗེ་གཞན་གྱིས་མི་ཐུབ་པས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ། བདག་ཉིད་འཕགས་པ་བྱམས་པར་རྣམ་པར་བསམས་ལ་བྱམས་པའི་གོ་ཆས་ལུས་ཐམས་ཅད་བྱུགས་ཤིང་དེས་བསྲུང་བར་བྱས་ཏེ། དེ་ལྟར་ན་འཐབ་མོ་ཐམས་ཅད་ལས་བསྲུང་བར་འགྱུར་རོ། །ཕ་རོལ་གྱི་དཔུང་ཐམས་ཅད་གཞིག་པ་ནི་གོ་སླའོ། །ཇི་ལྟར་ཞེ་ན། བདེ་བ་ཆེན་པོ་རྡོ་རྗེ་འཇིགས་པར་བྱེད་པས་སོ་ཞེས་བྱ་བ་དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་བདག་ཉིད་ཞལ་གྱི་མཆེ་བ་རྣམ་པར་གཙིགས་པའི་རྡོ་རྗེ་གནོད་སྦྱིན་དུ་རྣམ་པར་བསམས་ལ་འཇིགས་པར་བྱེད་པའི་ལྟ་བས་བལྟ་ཞིང་སྟེང་དུ་ཁ་བལྟས་པས་ཁྲོ་བོའི་བཞད་པ་བྱ་སྟེ། སྟེང་དུ་ཁ་བལྟ་བའི་ཕྱག་རྒྱ་རང་གི་ཁར་བཟུང་ཞིང་རང་གི་ཁ་ལས་ཀྱང་རྡོ་རྗེ་གནོད་སྦྱིན་སྲིན་པོ་རོ་ལངས་རྣམས་སྤྲོས་ལ་དེ་རྣམས་ཀྱིས་གཞན་གྱི་དཔུང་བཟའ་བར་བྱ་སྟེ། དེ་ལྟར་ན་གཞན་གྱི་དཔུང་ཐམས་ཅད་འཇིགས་པར་འགྱུར་རོ། །གཞན་གྱི་དཔུང་ཐམས་ཅད་ཉམས་པ་ཞེས་བྱ་བ་ལ་སོགས་པ་ལ། ཉམས་པ་ནི་དམན་པ་སྟེ་སྟོབས་ཆུང་བ་ཉིད་དུ་བྱེད་པའོ། །དེ་ཉིད་ལས་གཞན་ཟིལ་གྱིས་གནོན་པའི་ནུས་པ་བསྐྱེད་པ་
ནི་ལྡང་བའོ། །རྒྱས་བཏབ་པ་ནི་ཐམས་ཅད་སྙིང་གའི་ཟླ་བ་རྣམས་ལ་འབར་བའི་རྡོ་རྗེ་བསྐྱེད་པའོ། །ལྟུང་བ་ནི་གོ་སླའོ། །གསད་པ་ནི་བྱ་བ་བྱེད་པ་མེད་པ་དང༌། ཤིན་ཏུ་གསད་པའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་གློག་བསྐོར་བས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་བདག་ཉིད་དྲག་པོ་ཆེན་པོའི་བདག་པོ་རྡོ་རྗེ་ཧཱུཾ་མཛད་ཞལ་བཞི་པ་ཕྱག་བརྒྱད་པ་རྡོ་རྗེའི་རིགས་སྤྲོ་བའི་ཚུལ་གྱིས་བཞུགས་པར་རྣམ་པར་བསམས་ལ། དང་པོའི་རྡོ་རྗེ་མཐེའུ་ཆུང་དང༌། མཐེ་བོ་དག་གིས་འབར་བ་བཞི་པའི་ཚུལ་བྱས་ལ་ཁྲོ་ཞིང་གཞན་གྱི་དཔུང་མངོན་པའི་ཕྱོགས་སུ་གཏོར་བར་བྱ་སྟེ། ཕྱག་རྒྱ་གཏོར་བ་ལས་རྡོ་རྗེ་རོ་ལངས་ལ་སོགས་པ་སྤྲོས་ཏེ། དེ་རྣམས་ཀྱིས་གཞན་གྱི་དཔུང་ཉམས་པའམ། ལྡང་བའམ་རྒྱས་གདབ་པའམ་ལྟུང་བའམ། གསད་པར་བསམ་པར་བྱ་སྟེ། དེ་ལྟར་ན་ཇི་ལྟ་བ་བཞིན་དུ་བསམ་པ་གང་ཡིན་པ་དེ་འགྲུབ་པར་འགྱུར་རོ། །རིམས་ཐམས་ཅད་ལ་སོགས་པ་དང༌། །ནད་ཐམས་ཅད་དང༌། ནད་ཆེན་པོ་ཞི་བ་ཞེས་བྱ་བ་ལ། རིམས་ཐམས་ཅད་ནི་སྨན་གྱི་བསྟན་བཅོས་ལས་ཇི་ལྟར་གྲགས་པའོ། །ནད་ཐམས་ཅད་ནི་སྐྱ་རྦབ་ལ་སོགས་པའི་ནད་དོ། །ནད་ཆེན་པོ་ནི་གཅོད་ཆེན་པོ་ལ་སོགས་པའོ། །དེ་རྣམས་ཞི་བ་ནི་འཇིག་པའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་ལྟ་བས་འཕྲོག་པས་སོ་ཞེས་བྱ་བ་ལ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་རང་གི་སྙིང་གར་བཅིངས་ཏེ། ཞི་བའི་ལྟ་བས་དེའི་དབུས་མ་རྡོ་རྗེའི་རྩེ་མོ་འཕྲོག་ཅིང་རིམས་ནད་ཐམས་ཅད་ལ་སོགས་པ་འཕྲོག་པར་བྱེད་པ་ཡིན་ནོ། །བདག་ཉིད་འཕགས་པ་གཙུག་སྤྱོད་ཀྱི་རང་བཞིན་དུ་བསམས་ལ། བཅོམ་ལྡན་འདས་འཕགས་པ་གཙུག་སྤྱོད་ཀྱིས་ཀྱང༌། ནད་པའི་སྤྱི་བོ་ནས་རྐང་བའི་བར་དུ་གང་བར་བསམ་པར་བྱའོ། །དེ་ལྟར་ན་རིམས་ཐམས་ཅད་དང་ནད་ཐམས་ཅད་དང་ནད་ཆེན་པོ་ཞི་བར་འགྱུར་རོ། །དུག་ཐམས་ཅད་གཞིག་པར་བྱ་བ་ལ་ནི་མི་སྣང་བར་བྱའོ། །དུག་ཐམས་ཅད་
ཀྱི་ནུས་པ་འཕྲོག་པ་ནི་དུག་མེད་པར་བྱ་བའོ། །དེ་ཇི་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་ལྟ་བས་འཕྲོག་པས་སོ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས་བྱམས་པའི་ལྟ་བས་འཕྲོག་པར་བྱའོ། །འདི་ལྟར་སྟོན་པར་འགྱུར་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་བྱམས་པའི་ལྟ་བས་བལྟ་ཞིང་དང་པོའི་རྡོ་རྗེ་དུག་འཕྲོག་པར་བྱའོ། །བཅོམ་ལྡན་འདས་རྡོ་རྗེ་སེམས་དཔའ་ཟླ་བའི་སྐུ་མདོག་ཅན་གྱིས་ཀྱང་དུག་ཐམས་ཅད་བདུད་རྩིར་གྱུར་པར་བསམ་པར་བྱ་སྟེ། དེ་ལྟར་ན་དུག་ཐམས་ཅད་འཇིག་པ་དང་དུག་མེད་པར་འགྱུར་རོ། །གདོན་ཐམས་ཅད་དགྲོལ་བར་ཞེས་བྱ་བ་ལ། རིག་པ་མཆོག་ལས་གསུངས་པའི་གདོན་བཅོ་བརྒྱད་ནི་གདོན་ཐམས་ཅད་དེ། དེ་རྣམས་བཀྲོལ་བ་ནི་གདོན་ཐམས་ཅད་བཀྲོལ་བ་སྟེ་གདོན་ཐམས་ཅད་ཀྱིས་བཟུང་བ་རྣམས་སེལ་བ་ཞེས་བྱ་བའི་ཐ་ཚིག་གོ །དེ་ཇི་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་འབྱུང་བོ་བསྐྲད་པས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ཏེ་དང་པོའི་རྡོ་རྗེ་བཅིངས་ལ་འཕགས་པ་སྟོབས་པོ་ཆེ་དབུ་སྟོང་དང༌། ཕྱག་སྟོང་མངའ་བར་བདག་ཉིད་བསམས་ལ་དེས་བསྒྲུབ་བྱ་ལ་དབབ་པར་བྱའོ། །བསྒྲུབ་བྱའི་སྙིང་ག་ན་བཞུགས་པའི་བཅོམ་ལྡན་འདས་འཕགས་ པ་སྟོབས་པོ་ཆེས་ཀྱང་བསྒྲུབ་བྱ་ཀུན་དུ་གང་བར་བྱས ་ནས། དང་པོའི་རྡོ་རྗེ་དབུས་མའི་རྩེ་མོས་གདོན་བླངས་ཏེ། གདོན་དགྲོལ་བའི་བསམ་པས་དང་པོའི་རྡོ་རྗེ་ཞུ་ནས་དགྲོལ་བར་བྱ་སྟེ། དེ་ལྟར་ན་གདོན་ཐམས་ཅད་ལས་གྲོལ་བར་འགྱུར་རོ། །མ་མོ་དང་མཁའ་འགྲོ་མ་དང༌། གདོན་ཐམས་ཅད་ནི་ཤེས་པར་ཟད་དོ། །དེ་རྣམས་དགྲོལ་བ་ཆེན་པོ་ནི་བསྒྲུབ་བྱའི་ལུས་ལས་ཤིན་ཏུ་འཇིག་པའོ། །དེ་རྣམས་ཉིད་ཀྱི་འཐབ་པ་སྔགས་དང་ཕྱག་རྒྱ་དག་གིས་འཇོམས་པའོ། །དེ་དག་ཉིད་ཀྱིས་སེམས་ཅན་གང་གི་སྙིང་བཏོན་ནས་ཟོས་པ་དེ་ལས་གཞན་གྱི་སྙིང་བཅུག་པ་ནི་འབྱུང་བའོ། །དེ་ཉིད་ཀྱིས་བསད་པའི་སེམས་ཅན་ནི་ཤི་བ་སྟེ་དེ་གསོ་བ་ནི་ཤི་བ་གསོ་བ་སྟེ་སླར་ཡང་སྲོག་བྱིན་པའོ། །དེ་ཉིད་ལས་སྲོག་བྱིན་ནས་
སྔར་སྔོན་གྱི་བསགས་པའི་ཚེའི་བར་ཆོད་མེད་པ་ཉིད་དུ་གོང་ནས་གོང་དུ་རབ་ཏུ་འཇུག་པ་ནི་ཚེ་འཕེལ་བའོ། །མ་མོ་དང་མཁའ་འགྲོ་མ་དང༌། གདོན་ཐམས་ཅད་ཀྱིས་དེ་ཟིལ་གྱིས་ནོན་པར་མི་འགྱུར་བ་ཉིད་ནི་ཤིན་ཏུ་བསྲུང་བའོ། །དེ་ཇི་ལྟར་བྱ་བ་ཡིན་ཞེ་ན། བདེ་བ་ཆེན་པོའི་རྡོ་རྗེའི་ཕྱག་རྒྱའི་ལན་གྱིས་སོ་ཞེས་བྱ་བ་ལ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་སྔར་བཤད་པའི་མཚན་ཉིད་ཅན་གྱི་དཔལ་ཧེ་རུ་ཀར་བདག་ཉིད་རྣམ་པར་བསམས་ལ་དང་པོའི་རྡོ་རྗེས་ཡོངས་སུ་བསྐོར་ཏེ། མཐེ་བོའི་རྩེ་མོ་དག་གིས་མཛོད་སྤུའི་ཕྱོགས་སུ་གཟུང་བར་བྱའོ། །དེ་ནས་སོར་མོ་དབུས་མ་གཉིས་བསྐྱོད་པར་བྱའོ། །དཔལ་ཧེ་རུ་ཀ་འཁོར་དང་བཅས་པས་བསྒྲུབ་བྱའི་ལུས་ལ་ཞུགས་ཏེ། མ་མོ་དང༌། མཁའ་འགྲོ་མ་དང༌། གདོན་ཐམས་ཅད་ཟ་བར་འགྱུར་བར་བསམ་པར་བྱས་ཏེ་དེ་ལྟར་ནམ་མོ་དང༌། མཁའ་འགྲོ་མ་དང༌། གདོན་ཐམས་ཅད་ལས་གྲོལ་བར་འགྱུར་བ་ཡིན་ནོ། །འཐབ་པར་འགྱུར་བ་དེ་རྣམས་ཀྱི་སྔགས་དང་ཕྱག་རྒྱ་དག་གིས་དབུས་མའི་རྡོ་རྗེ་རྩེ་མོ་ལས་འབར་བའི་རྡོ་རྗེ་རྣམས་སྤྲོས་ཏེ་དེ་རྣམས་ཀྱི་སྟེང་དུ་ཡིད་ཀྱིས་དབབ་པར་བྱ་སྟེ་དེ་ལྟར་ན་འཇོམས་པར་འགྱུར་རོ། །དེ་བཞིན་དུ་དབུས་མའི་རྩེ་མོ་གཉིས་བསྐྱོད་པར་བྱས་ཤིང་དཔལ་ཧེ་རུ་ཀ་འཁོར་དང་བཅས་པ་སྙིང་བཏོན་པའི་ལུས་ལ་བཅུག་སྟེ། དེའི་འབར་བའི་ལྕགས་ཀྱུ་རྣམས་ཀྱིས་མཁའ་འགྲོ་མ་དང་གདོན་རྣམས་ལས་སྙིང་བཀུག་ལ་བསྒྲུབ་པར་བྱ་བའི་ལུས་ལ་རབ་ཏུ་བཅུག་པར་བྱ་སྟེ། དེ་ལྟར་ན་སྙིང་གཞན་ཡང་འབྱུང་བར་འགྱུར་རོ། །དེ་བཞིན་བདག་ཉིད་དཔལ་ཧེ་རུ་ཀར་རྣམ་པར་བསམས་ལ། དབུས་མའི་རྩེ་མོ་གཉིས་བསྐྱེད་ཅིང་དཔལ་ཧེ་རུ་ཀ་བསྒྲུབ་བྱའི་ལུས་ལ་རབ་ཏུ་བཅུག་སྟེ། བྱ་བ་མེད་པར་འགྱུར་བའི་བསྒྲུབ་བྱ་ལྡང་དུ་བཅུག་སྟེ་དེ་ལྟར་ན་འཆི་བ་གསོ་བའོ། །དེ་ལྟར་སྲོག་བྱིན་ལ་ཆེ་འཕེལ་བའི་བསམས་བས་སྙིང་གར་དཔལ་རྡོ་རྗེ་དཔའ་བསམས་ཞིང་དེ་ཉིད་སྤྱི་བོར་ཡང་བདུད་རྩི་འཛག་པར་བསམ་པར་བྱ་སྟེ། དེ་ལྟར་ན་ཚེ་འཕེལ་བར་འགྱུར་རོ། །དེ་བཞིན་དུ་དབུས་མའི་རྩེ་མོ་བསྐྱོད་ཅིང་བསྒྲུབ་
བྱའི་སྙིང་གར་རྡོ་རྗེ་བསམ་པར་བྱ་སྟེ་དེ་ལྟར་ན་ཤིན་ཏུ་བསྲུང་བར་འགྱུར་རོ། །ཐམས་ཅད་དབབ་པ་ནི་རྒྱུ་བ་དང་མི་རྒྱུ་བ་ཐམས་ཅད་དབབ་པའོ། །གཡོ་བ་ནི་དེ་ཉིད་རང་གི་གནས་ནས་བསྐྱོད་པའོ། །འཆི་བ་ནི་དེ་ཉིད་རྡོ་རྗེ་ལྕགས་ཀྱུའི་ལུ་གུ་རྒྱུད་ཀྱིས་སོ། །གར་ནི་དེ་ཉིད་གར་བྱེད་དུ་བཅུག་པའོ། །གླུ་ནི་གླུ་ལེན་དུ་བཅུག་པའོ། །སྔར་མ་བྱུང་བ་སོ་སོར་སྟོན་པ་ནི་དེ་ཉིད་འདས་པ་དང༌། མ་འོངས་པ་དང༌། ད་ལྟར་བྱུང་བ་སྨྲར་གཞུག་པའོ། །དེ་ཉིད་རྨད་དུ་བྱུང་བ་སྨྲར་གཞུག་པ་དང་དེ་ཉིད་རྫུ་འཕྲུལ་སྟོན་དུ་གཞུག་པ་དང༌། དེ་ནི་བདེན་པ་སྨྲར་གཞུག་པ་དང༌། དེ་ཉིད་བཅིངས་པ་དགྲོལ་བ་དང༌། དེ་ཉིད་བྱུར་ཐམས་ཅད་ཕྲལ་བ་དེ་ལས་བསྲུང་བའོ། །སོས་སུ་གཞུག་པ་ནི་སེམས་ཅན་གྱི་ཁམས་ཐམས་ཅད་དེ་ཉིད་ལ་རྒས་པ་ལ་སོགས་པ་འཇིག་པར་བྱེད་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། བདེ་བ་ཆེན་པོའི་རྡོ་རྗེ་དབབ་པས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་སྙིང་གའི་ཕྱོགས་སུ་བཞག་སྟེ། དེའི་དབུས་མའི་རྩེ་མོ་རང་གི་སྙིང་ག་ལས་བསྟོད་པས་ཐམས་ཅད་ལ་དབབ་པ་སྟེ། དཔལ་རྡོ་རྗེ་སེམས་དཔའ་བཞུགས་པའི་བསྒོམ་པས་སོ། །དེ་ཉིད་ཀྱིས་རང་གི་སྙིང་བསྐྱོད་ཅིང་དངོས་པོ་ཐམས་ཅད་གཡོ་བའོ། །དེ་ཉིད་ཀྱིས་བཅིང་བའི་བསམ་པས་རྡོ་རྗེ་ལྕགས་སྒྲོག་གི་ཕོ་ཉས་དངོས་པོ་ཐམས་ཅད་བཅིང་བའོ། །གར་བྱེད་དུ་གཞུག་པའི་བསམ་པ་དབུས་མའི་རྩེ་མོ་དེ་ཉིད་ཀྱི་དངོས་པོ་ཐམས་ཅད་ལ་རྡོ་རྗེ་སེམས་དཔའ་བཅུག་ནས། གར་བྱེད་དུ་བཅུག་པ་སྟེ་དེ་དག་གར་བྱེད་དུ་བཅུག་པ་ཡིན་ནོ། །དབུས་མའི་རྩེ་མོ་དེ་ཉིད་ཀྱི་བསྒྲུབ་བྱའི་ལུས་ལ་བཅུག་སྟེ། གླུ་ལེན་དུ་བཅུག་པའི་བསམ་པས་ཁ་ལས་གྱེན་དུ་དྲང་བར་བྱ་སྟེ། དེ་ལྟར་ན་གླུ་ལེན་དུ་བཅུག་པའོ། །དབུས་མའི་རྩེ་མོ་དེ་ཉིད་ཕན་ཚུན་བཙིར་བར་བྱ་སྟེ། དེ་ལྟར་སྔར་མ་བྱུང་བའི་སོ་སོར་བསྟན་པ་མཐོང་བར་འགྱུར་རོ། །དབུས་མའི་རྩེ་མོ་དེ་ཉིད་ཕན་ཚུན་ཁ་འབུས་པའི་རྣམ་པར་བྱས་ན་རྨད་དུ་བྱུང་བ་དང༌། ཆོ་འཕྲུལ་མཐོང་བར་འགྱུར་རོ། །དབུས་མའི་རྩེ་མོ་དེ་ཉིད་
ངག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱས་ཏེ་དེ་ལྟར་ན་བདེན་པ་ཐམས་ཅད་སྨྲར་གཞུག་པའོ། །དབུས་མའི་རྩེ་མོ་དེ་ཉིད་བཅིངས་ལ་ཐམས་ཅད་དགྲོལ་བའི་བསམ་པས་མྱུར་དུ་དགྲོལ་བར་བྱས་ཏེ་དེ་ལྟར་ན་ཐམས་ཅད་བཀྲོལ་བའོ། །དབུས་མའི་རྩེ་མོ་དེ་ཉིད་བསྲུང་བའི་བསམ་པས་བསྐྱོད་པར་བྱ་སྟེ། དེ་ལྟར་ན་གོ་ཆ་ལ་སོགས་པ་ཐམས་ཅད་བསྲུང་བར་འགྱུར་རོ། །དབུས་མའི་རྩེ་མོ་དེ་ཉིད་ཀྱིས་བསྒྲུབ་བྱ་བྱབ་པར་བྱ་སྟེ་དེ་ལྟར་ན་ཐམས་ཅད་སོས་སུ་བཅུག་པར་འགྱུར་རོ། །རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ལ་ཡིད་ཀྱིས་འདོད་པའི་པྲ་དབབ་པ་ཐམས་ཅད་གྲུབ་པ་ཞེས་བྱ་བ་ལ་པྲ་དབབ་པ་ཐམས་ཅད་ནི་སྔར་བཤད་པ་སྟེ། དེ་རྣམས་ཇི་ལྟར་བསྒྲུབ་པར་བྱ་ཞེ་ན། བདེ་བ་ཆེན་པོའི་རྡོ་རྗེ་པྲ་དབབ་པས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ཏེ་ཁྱེའུའམ་བུ་མོ་དང་པོའི་རྡོ་རྗེ་སེམས་དཔར་བྱིན་གྱིས་བརླབས་ཏེ། དེའི་རྣ་བ་དང་མིག་གཉིས་ལ་ཡི་གེ་ཧཱུཾ་ལས་རྡོ་རྗེ་རྣམ་པར་བསམས་ལ་ཨ་ནུ་རཱ་ག་ཡ་མི་ཧཱུཾ་ཞེས་བརྗོད་ཅིང༌། སྦྱིན་སྲེག་གི་ཐལ་བས་མེ་ལོང་ཡང་དག་པར་སྦྱངས་ལ་ཉེ་འཁོར་གྱི་སའི་ཕྱོགས་དྲི་བཟང་པོས་བྱུག་པར་བྱས་ནས་མེ་ཏོག་བཀྲམ་པས་ཉེ་བར་མཛེས་པར་བྱས་ལ་དེར་མེ་ལོང་བཞག་སྟེ་དེ་ལ་བཅོམ་ལྡན་འདས་སྦྲུལ་ཏེ། འདུས་བྱས་ནས་མཚན་བརྒྱ་རྩ་བརྒྱད་ཀྱིས་བསྟོད་པ་བྱས་ཏེ་སྒོ་ཕྱེ་ནས་སྤྱན་དྲངས་བའི་ཕྱག་རྒྱ་དང་སྔགས་དག་གིས་སྤྲུལ་པ་ལ་བཅུག་པར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསྐྲད་པ་ལ་སོགས་པ་བྱས་ནས་རྡོ་རྗེ་ཁུ་ཚུར་གྱིས་སྒོ་བཅད་དེ་ཨ་ཀ་རུ་ཕུལ་ལ་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་དང༌། ཕྱག་རྒྱ་ཆེན་པོ་ལ་སོགས་པ་རྣམས་ཀྱིས་བཅོམ་ལྡན་འདས་ལ་རྒྱས་བཏབ་ལ་དབང་བསྐུར་བའི་ཕྱག་རྒྱ་དབང་བསྐུར་བ་སྟེ། མཆོད་པ་ལྔས་ཡང་དག་པར་མཆོད་ལ་རྣམ་པ་བཅུ་གཉིས་ཀྱི་ཕྱག་རྒྱའི་མཆོད་པ་རྣམས་ཀྱིས་ཀྱང་ཡང་དག་པར་མཆོད་དེ། ཕྱག་བྱས་ནས་བཟླས་པ་བརྒྱ་རྩ་བརྒྱད་བྱའོ། །དེ་ནས་སླར་ཡང་ཡང་
དག་པར་མཆོད་དེ། ཀྱེ་བཅོམ་ལྡན་འདས་རྡོ་རྗེ་སེམས་དཔའ་བདེན་པ་གང་གིས། ཆོས་ཐམས་ཅད་གཟུགས་བརྙན་དང་མཚུངས་པའི་བདེན་པ་དེས་བདག་ལ་མངོན་པར་འདོད་པའི་དངོས་པོ་སྟོན་ཅིག་ཅེས་བྱ་བ་དང༌། བདེན་པ་གང་གིས་སྒྲ་རྣམས་བྲག་ཅ་དང་འདྲ་བའི་བདེན་པ་དེས། བདག་ལ་མངོན་པར་འདོད་པ་གསུངས་ཤིག་ཅེས་བྱ་བའི་བདེན་པའི་བྱིན་རླབས་བྱས་ནས་དང་པོའི་རྡོ་རྗེ་བཅིངས་ཏེ་རང་གི་སྙིང་གར་བཞག་ནས་དབུས་མའི་ཁ་སྦྱོར་བསྐྱོད་ཅིང་བཟླ་བར་བྱ་སྟེ། དེ་ལྟར་ན་ཁྱེའུ་དང་བུ་མོ་དག་གིས་ཐམས་ཅད་མཐོང་བ་དང་ཐོས་པ་ཡིན་ནོ། །དེ་ལྟར་ན་པྲ་དབབ་པ་གཞན་རྣམས་ཀྱི་སྒྲུབ་པ་ཡང་ཤེས་པར་བྱའོ། །རང་གི་ལུས་ཞེས་བྱ་བ་ལ་སོགས་པ་རང་གི་ལུས་དང་ཡིད་དག་ནི་རང་གི་ལུས་དང་ཡིད་རྣམས་སོ། །དེ་དག་ཉིད་རྩེ་གཅིག་པའི་རྣལ་འབྱོར་གྱི་རྟོག་པ་མེད་ཅིང་མི་ཕྱེད་པ་རྡོ་རྗེ་ལྟ་བུ་སྟེ་རྡོ་རྗེའོ། །དེ་རྣམས་ཀྱིས་ཇི་ལྟ་བ་བཞིན་དུ་ཐམས་ཅད་མཐོང་བ་དང༌། ཐོས་པ་དང༌། སྨྲ་བ་དང༌། སྟོན་པའི་ཤེས་པ་རྣམས་གྲུབ་པ་ནི་རྫོགས་པའོ། །དེ་ཇི་ལྟར་ཞེ་ན། བདེ་བ་ཆེན་པོའི་རྡོ་རྗེའི་བདག་ཉིད་རྣམ་པར་བསྒོམས་པས་སོ་ཞེས་བྱ་བ་ལ་དེ་ཡང་འདི་ཡིན་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་ནི་རང་གི་སྙིང་གའི་ཕྱོགས་སུ་བཅིངས་ཏེ། དེས་ཉིན་རེར་ལུས་ལ་སྦྱངས་པས་ལུས་འགྲུབ་པར་འགྱུར། དེ་ཉིད་ངག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱ་སྟེ་དེ་ལྟར་ན་ངག་གྲུབ་པའོ། །དེ་ཉིད་སྙིང་གར་བཞག་ལ་རང་གི་སྙིང་གར་སེམས་དཔའི་རྡོ་རྗེ་བསྒོམས་ཏེ་དེ་ལྟར་ན་སེམས་གྲུབ་པའོ། །དེ་ཉིད་ལ་བལྟ་ཞིང་བཟླས་པར་བྱས་ཏེ། དེ་ལྟར་ན་ཐམས་ཅད་མཐོང་བ་ཡིན་ནོ། །དེ་ཉིད་རྣ་བ་ལ་གཞག་པར་བྱ་སྟེ། དེ་ལྟར་ན་རྣ་བའི་ཤེས་པ་གྲུབ་པའོ། །དེ་ཉིད་ཁ་ལ་བཞག་ནས་བཟླས་པར་བྱ་སྟེ་དེ་ལྟར་ན་ལྕེས་ཐམས་ཅད་སྨྲ་བ་ཡིན་ནོ། །དེ་ཉིད་ཆོས་བསྟན་པའི་བསམ་པས་ཁར་བཟུང་ཞིང་བལྟ་བར་བྱས་ནས་ཐམས་ཅད་སྟོན་པའི་ཤེས་པ་གྲུབ་པར་འགྱུར་རོ། །ཐམས་ཅད་ལས་འདས་པ་དང་མ་
འོངས་པ་དང༌། ད་ལྟར་བྱུང་བ་ཞེས་བྱ་བ་ལ་སོགས་པ་ལ་དངོས་པོ་ཐམས་ཅད་དང༌། ནམ་མཁའི་ཕྱོགས་ལས་འདས་པ་དང༌། མ་འོངས་པ་དང༌། ད་ལྟར་བྱུང་བའི་དངོས་པོའི་རང་བཞིན་གང་ཡིན་པ་དེ་ལ། བཀའ་ཤེས་པ་སྨྲ་བ་པ་དེ། མཐོང་བ་ནི་མངོན་སུམ་དུ་བྱེད་པའོ། །དེ་ཇི་ལྟར་ཞེ་ན། ཡི་གེ་ཨ་ལ་སོགས་པ་སྟེ། དེ་ཉིད་སྣ་ཚོགས་པ་ནི་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོའི་རང་བཞིན་ཅན་ཡིན་ནོ། །ཡང་ན་དངོས་པོ་ཐམས་ཅད་ནི་འདས་པ་དང༌། མ་འོངས་པ་དང༌། ད་ལྟར་བྱུང་བའི་དངོས་པོའི་རང་བཞིན་རྣམས་ཀྱིས་རྣ་བའི་ཤེས་པ་འཇུག་པ་ནི་མ་འཁྲུལ་པའི་རྣ་བའི་རྣམ་པར་ཤེས་པ་ལ་སོགས་པ་རྫོགས་པ་དེ་ཉིད་སྒྲུབ་པ་ཡིན་ནོ། །དེ་ཕྱག་རྒྱ་གང་གིས་རྫོགས་པ་ཡིན་ཞེ་ན། བདེ་བ་ཆེན་པོའི་རྡོ་རྗེ་ཐམས་ཅད་མཁྱེན་པས་སོ་ཞེས་བྱ་བ་ལ། བདེ་བ་ཆེན་པོ་རྡོ་རྗེ་སེམས་དཔའ་སྟེ། དེའི་ཐམས་ཅད་མཁྱེན་པ་ནི་དུས་གསུམ་གྱི་དངོས་པོ་འཛིན་པའི་རྣམ་པར་ཤེས་པ་ལ་སོགས་པ་སྟེ། དེ་རྫོགས་པར་བྱེད་པའི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་ཐམས་ཅད་མཁྱེན་པ་སྟེ། དེས་དེ་ཐོབ་པར་འགྱུར་རོ། །འདི་ལྟར་བཤད་པར་འགྱུར་ཏེ་གསང་བའི་དཀྱིལ་འཁོར་ལས་གསུངས་པའི་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ལ་བདེན་པའི་བྱིན་གྱི་རླབས་བྱའོ། །དེ་ནས་བདག་ཉིད་རྡོ་རྗེ་སེམས་དཔའ་བསྐོར་ཞིང་ཕྱག་རྒྱ་དེས་འདས་པ་དང༌། མ་འོངས་པ་དང༌། ད་ལྟར་བྱུང་བའི་གཟུགས་མཐོང་བའི་བསམ་པས་ཉིན་རེ་ཞིང་ལན་ཅིག་མིག་ཏུ་བཞག་སྟེ་ཐམས་ཅད་དུ་བསྐོར་བར་བྱས་ན་ཐམས་ཅད་མཐོང་བར་འགྱུར་རོ། །རྣ་བར་བཞག་ནས་བསྐོར་བ་བྱས་ན་ཐམས་ཅད་ཐོས་པ་དང༌། སྣར་བཞག་ནས་སྣོམ་པ་དང༌། ལྕེར་བཞག་ནས་ཐམས་ཅད་སྨྲ་བ་དང༌། ལུས་ལ་བཞག་ནས་ཐམས་ཅད་ལ་རེག་པ་དང༌། སྙིང་གར་བཞག་ནས་ཐམས་ཅད་དུ་བསྐོར་བར་བྱས་ན་དེ་ལྟར་ཡིད་ཀྱིས་ཐམས་ཅད་ཤེས་པ་ཡིན་ནོ། །གློག་དང་ཆར་དང་ཐོག་འབབ་པ་ཐམས་ཅད་བཟློག་པ་དང༌། སྤྲིན་གཞིག་པ་ཞེས་བྱ་བ་ནི་གོ་སླའོ། །ཇི་ལྟར་ཞེ་ན་བདེ་བ་ཆེན་པོ་རྡོ་རྗེ་ཁྲོ་བོའི་ལྟ་བས་སོ་ཞེས་བྱ་
བ་ལ། བདེ་བ་ཆེན་པོ་རྡོ་རྗེ་ཁྲོ་བོའི་ལྟ་བ་ནི། ཁྲོས་པས་བལྟ་བ་སྟེ་དེ་དང་བཅས་པའི་དང་པོའི་རྡོ་རྗེ་ཕྱག་རྒྱས་བདེ་བ་ཆེན་པོ་རྡོ་རྗེ་ཁྲོ་བོའི་ལྟ་བ་སྟེ་དེས་དེ་འགྲུབ་པར་འགྱུར་བ་ཡིན་ནོ། །འདི་ལྟར་བཤད་པར་འགྱུར་ཏེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་ལ་དང་པོའི་རྡོ་རྗེ་བཅིངས་ལ་དེའི་དབུས་མའི་རྡོ་རྗེ་དང་ཁྲོ་བོའི་ལྟ་བས་བལྟས་ཞིང་གློག་བཟློག་པའི་ཚུལ་གྱིས་གློག་བཟློག་པར་བྱའོ། །ཆར་བཟློག་པའི་ཚུལ་གྱིས་ཆར་བཟློག་པར་བྱའོ། །ཐོག་འབབ་པ་བཟློག་པའི་ཚུལ་གྱིས་ཐོག་བཟློག་པར་བྱའོ། །སྤྲིན་གཞིག་པའི་ཚུལ་གྱིས་སྤྲིན་གཞིག་པར་བྱའོ། །སའི་འོག་ནས་སྔར་མ་བྱུང་བའི་འབྲུ་ལ་སོགས་པ་ཐམས་ཅད་ཅེས་བྱ་བ་ལ་སོགས་པ་ལ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་དབུས་མའི་རྡོ་རྗེ་འདི་རྣམས་བྱ་སྟེ། འོག་ནས་འབྱུང་བའི་སྦྱོར་བས་སའི་འོག་ནས་སྔར་མ་བྱུང་བའི་འབྲུ་ལ་སོགས་པའི་འབྲས་བུ་ཐམས་ཅད་འབྱུང་བའི་བསམ་པས་སྔར་མ་བྱུང་བའི་འབྲས་བུ་བསྐྱེད་པར་བྱའོ། །དེ་ཉེ་བར་ལེན་པ་ནི་ཐམས་ཅད་ལས་དགུག་ཅིང་ཉེ་བར་བླངས་པའོ། །ཆུ་མེད་པའི་གནས་ལས་ཆུའི་ཕུང་པོ་འབྱུང་བ་ནི་བསྐྱེད་པའོ། །དེ་ཉིད་སྦྱིན་པའི་ཚུལ་གྱིས་ཉེ་བར་བླང་བའོ། །འབར་བ་དང་མེ་སྟག་འཕྲོ་བས་མུན་པར་སྣང་བ་ཆེན་པོ་བསྐྱེད་པ་སྟེ་སྣང་བ་ཆེན་པོ་སྦྱོར་བའི་ཚུལ་གྱིས་སྣང་བ་ཆེན་པོ་ཉེ་བར་ལེན་པའོ། །རླུང་གི་ཚུལ་གྱིས་རླུང་ཐམས་ཅད་བཀའ་བསྒོ་བ་སྟེ་རླུང་ཐམས་ཅད་ཉེ་བར་བླང་པའི་ཚུལ་གྱིས་དེ་ཉེ་བར་ལེན་པའོ། །ཕྱོགས་བཅུར་གནས་པའི་ནམ་མཁའ་ཐམས་ཅད་ལས་དངོས་པོ་ཐམས་ཅད་མཐོང་བའི་བསྒོམ་པས་དངོས་པོ་ཐམས་ཅད་མཐོང་བའོ། །དངོས་པོ་ཐམས་ཅད་ཉེ་བར་ལེན་པའི་བསྒོམས་པས་དངོས་པོ་ཐམས་ཅད་ཉེ་བར་བླང་བར་བྱ་སྟེ། འདི་ནི་བདེ་བ་ཆེན་པོའི་རྡོ་རྗེ་དབྱིངས་ཀྱི་དབང་ཕྱུག་མ་ཡིན་ནོ། །ཐམས་ཅད་གཞོམ་པ་དང༌། རེངས་པ་དང༌། དྲལ་བ་དང༌། རྨུགས་པ་དང༌། གཉིད་ལོག་པར་བྱ་བ་དང༌། རྒྱས་གདབ་པ་དང༌། ལྟུང་བ་དང༌། རྨོངས་པ་དང༌། གསད་པ་དང༌།
ཕྱིར་མི་ལྡོག་པ་རྣམས་ནི་བཤད་ཟིན་ཏོ། །འདི་རྣམས་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་གདུག་པའི་ཕྱག་རྒྱས་སོ་ཞེས་བྱ་བ་ལ། བདེ་བ་ཆེན་པོ་གདུག་པ་ནི་དྲག་པོའི་གཟུགས་ཅན་གྱི་རྡོ་རྗེ་སེམས་དཔའ་སྟེ། དེའི་རྡོ་རྗེའི་ཕྱག་རྒྱའི་བ་དན་གྱིས་ལས་དེ་རྣམས་འགྲུབ་པར་འགྱུར་རོ། །འདིས་ནི་འདི་སྐད་སྟོན་པར་འགྱུར་ཏེ། དེ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ། བདག་ཉིད་དྲག་པོ་ཆེན་པོའི་གཟུགས་ཅན་གྱིས་རྡོ་རྗེ་སེམས་དཔར་རྣམ་པར་བསམས་ལ། དང་པོའི་རྡོ་རྗེས་དབུས་མའི་རྡོ་རྗེའི་ལས་རྣམས་བྱའོ། །དབུས་མའི་རྡོ་རྗེ་བསྣུན་པས་ཐམས་ཅད་འཇོམས་པའོ། །དབུས་མའི་རྡོ་རྗེ་རྩེ་མོ་གཉིས་སྙིང་གའི་ཕྱོགས་སུ་བཙིར་བས་བཙིར་ན། ཐམས་ཅད་རེངས་པའོ། །དབུས་མའི་རྩེ་མོ་རྡོ་རྗེ་སེན་མོ་དག་དྲལ་བས་ན་ཐམས་ཅད་དྲལ་བའོ། །དབུས་མ་རྡོ་རྗེས་རང་གི་མིག་ལ་རེག་པས་ཐམས་ཅད་རྨུགས་པར་བྱེད་པའོ། །དབུས་མའི་རྡོ་རྗེས་རང་གི་མིག་བཙུམས་པར་བྱས་ན་ཐམས་ཅད་གཉིད་ལོག་ཏུ་བཅུག་པའོ། །དབུས་མའི་རྡོ་རྗེ་སོར་མོ་བཅུ་གཉིས་ཕན་ཚུན་སྙོམ་པར་ཡང་དག་པར་སྦྱར་བར་བྱ་སྟེ། དེས་རང་གི་སྙིང་གར་མན་པར་བྱས་ན་རྒྱས་བཏབ་བའོ། །དབུས་མའི་རྡོ་རྗེས་ལྟུང་བའི་ཚུལ་དུ་བྱས་ན་ཐམས་ཅད་ལྟུང་བའོ། །དབུས་མའི་རྡོ་རྗེས་གློད་པར་བྱས་ན་རྨོངས་པར་བྱེད་བའོ། །དབུས་མའི་རྡོ་རྗེས་ཕན་ཚུན་དུ་བརྡེག་པས་གསོད་པའོ། །དབུས་མའི་རྡོ་རྗེའི་དངོས་པོ་ཉིད་རང་གི་སྙིང་གར་གཟུང་བར་བྱས་ན་ཕྱིར་བཟློག་པར་འགྱུར་རོ། །ཐམས་ཅད་རྗེས་སུ་ཆས་པ་དང༌། དགུག་པ་དང༌། གཞུག་པ་དང༌། དབབ་པ་དང༌། བཅིང་བ་དང༌། དགྲོལ་པ་དང༌། དྲལ་བ་དང༌། ལྟུང་བ་སློང་བ་དང༌། འདྲེན་བ་དང། བྲན་དུ་བྱེད་པ་དང༌། མངག་གཞུག་བསྒོ་བར་བྱེད་བ་དང༌། ཐམས་ཅད་ཚུར་དྲང་བ་དང༌། ཕར་གཏོང་བ་དང༌། གསད་པ་དང༌། སླར་གསོ་བ་ལ་སོགས་པའི་ལས་ཐམས་ཅད་བྱེད་པ་དང༌། །དབང་དུ་བྱེད་པའི་སྒྲུབ་པ་ནི་བདེ་བ་ཆེན་པོའི་རྡོ་རྗེ་ཐམས་ཅད་གྲུབ་
པས་སོ་ཞེས་བྱ་བ་ལ། དེ་བཞིན་དུ་དཔལ་རྡོ་རྗེས་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་དབུས་མའི་རྡོ་རྗེ་དེ་རྣམས་བྱ་བ་ཡིན་ཏེ། མདའ་གཏོད་པའི་ཚུལ་གྱིས་ཐམས་ཅད་རྗེས་སུ་ཆགས་པའོ། །དབུས་མ་གཉིས་ཀྱིས་ལྕགས་ཀྱུ་གཉིས་བྱ་སྟེ་དེས་བསྒྲུབ་བྱ་བཀུག་པའི་ཚུལ་གྱིས་ཐམས་ཅད་དུག་པའོ། །གཡོན་པའི་དབུས་མའི་རྡོ་རྗེ་ལས་གཡས་པའི་དབུས་མའི་སོར་མོ་བཅུག་པས་ཐམས་ཅད་གཞག་པའོ། །དབུས་མའི་རྡོ་རྗེའི་རྩེ་མོ་བསྐྱོད་པས་དབབ་པའོ། །དབུས་མའི་རྡོ་རྗེ་གདུ་བུ་བཅིངས་པས་བཅིང་བའོ། །དབུས་མའི་རྡོ་རྗེ་མྱུར་དུ་བཀྲོལ་པས་བཀྲོལ་བའོ། །དབུས་མའི་རྡོ་རྗེ་སོར་མོ་གཉིས་མཉམ་པོར་བྱས་ལ་མྱུར་དུ་དྲལ་བས་ན་དྲལ་བའོ། །དབུས་མའི་རྡོ་རྗེ་ལྟུང་བར་བྱས་པས་ན་ལྟུང་བའོ། །དབུས་མའི་རྡོ་རྗེ་འོག་ནས་སྟེང་དུ་དྲངས་པས་ལྟུང་བ་བསླང་བར་བྱའོ། །དབུས་མའི་རྡོ་རྗེ་སོར་མོ་གཡོན་པ་གཡས་པའི་སོར་མོ་དབུས་མས་དྲངས་པས་ན་འདྲེན་པའོ། །དབུས་མའི་རྡོ་རྗེ་ལས་ཐམས་ཅད་སྦྱོར་བར་བྱེད་པས་ན་བྲན་དུ་བྱེད་པའོ། །དབུས་མའི་རྡོ་རྗེས་འོག་ཏུ་བསྐྱོད་བཅིང་སྟེང་དུ་དོར་བས་མངག་གཞུག་བཀའ་བསྒོ་བར་བྱེད་པའོ། །དབུས་མའི་རྡོ་རྗེ་ཚུར་དྲངས་པས་ཚུར་འདྲེན་པའོ། །དབུས་མའི་རྡོ་རྗེས་མངོན་པར་འདོད་པའི་གནས་སུ་ཁྱེར་ནས་གཞག་པས་ཕར་གཏང་བའོ། །དབུས་མའི་རྡོ་རྗེའི་གཡོན་པ་དང་གཡས་བ་དྲག་ཏུ་བརྡེགས་པས་གསད་པའོ། །དབུས་མའི་རྡོ་རྗེ་རང་གི་སྙིང་ག་ལ་གནས་པའི་རྩེ་མོ་གྱེན་དུ་དྲངས་པས་སླར་གསོ་བ་ལ་སོགས་པའོ། །དབུས་མའི་རྡོ་རྗེ་ལས་ཐམས་ཅད་སྦྱོར་བར་བྱེད་པས་ལས་ཐམས་ཅད་བྱེད་པ་དང་དབང་དུ་བྱེད་པ་གྲུབ་པར་འགྱུར་རོ། །ཐམས་ཅད་ཅེས་བྱ་བ་ལ་སོགས་པ་ལ། རིགས་ཐམས་ནི་འཇིག་རྟེན་དང་འཇིག་རྟེན་ལས་འདས་པའི་རིགས་ཀྱི་དཀྱིལ་འཁོར་རྣམས་སོ། །དེ་དག་གི་མཆོག་གི་དངོས་གྲུབ་ནི་ས་དང་ཕ་རོལ་ཏུ་ཕྱིན་བ་ལ་སོགས་པ་རྫོགས་པའོ། །དེ་ཉིད་སངས་རྒྱས་ཉིད་དང༌། རྡོ་རྗེ་འཆང་བ་ཉིད་ཀྱི་མཚན་ཉིད་ཅན་གྱི་མཆོག་གི་དངོས་གྲུབ་
ཐམས་ཅད་ཀྱི་དང་པོར་གང་ལ་ཡོད་པ་དེ་ལ་དེ་སྐད་ཅེས་བྱའོ། །མཆོག་གི་དངོས་གྲུབ་ཐམས་ཅད་ནི་ཁམས་གསུམ་པའི་ཆོས་ཀྱི་རྒྱ་སྲིད་ཀྱི་དབང་བསྐུར་བའོ། །དེ་ཉིད་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ཀྱི་ཐོག་མར་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཐམས་ཅད་རྗེས་སུ་ཆགས་པ་ལ་སོགས་པའི་བདེ་བ་དང་ཡིད་བདེ་བ་ཐམས་ཅད་རབ་ཏུ་ཞུགས་པ་ནི་བདག་དང་གཞན་གྱི་རྒྱུད་ལ་རྫོགས་པའོ། །མཆོད་པ་ཆེན་པོ་ཐམས་ཅད་ནི་རྡོ་རྗེ་མཚོན་ཆ་མ་ལ་སོགས་པའི་མཆོད་པ་བཅུ་གཉིས་དང༌། ལས་ཀྱི་དཀྱིལ་འཁོར་ལས་གསུངས་པའི་མཆོད་པ་བཅུ་དྲུག་སྟེ། དེ་དག་ལས་ཐམས་ཅད་ཀྱི་སྒྲུབ་པ་མྱུར་དུ་གྲུབ་པའི་ཆོ་ག་རྒྱས་པའི་དང་པོར་གང་ལས་ཡོད་པ་དེ་ལ་དེ་སྐད་ཅེས་བྱའོ། །དེ་ཇི་ལྟར་འགྱུར་ཞེ་ན། །བདེ་བ་ཆེན་པོ་རྡོ་རྗེ་མཆོག་གི་དངོས་གྲུབ་ཀྱིས་སོ་ཞེས་བྱ་བ་ལ་སོགས་པ་འདི་ལྟར་འཆད་པར་འགྱུར་ཏེ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དང་པོའི་རྡོ་རྗེ་བཅིངས་ཏེ་སྙིང་གའི་ཕྱོགས་སུ་དཀྱིལ་འཁོར་སྤྲུལ་པའི་ཚུལ་གྱིས་བསྐོར་བར་བྱ་སྟེ། རིགས་ཐམས་ཅད་ཀྱི་མཆོག་གི་དངོས་གྲུབ་ལ་སོགས་པའི་མཆོག་གི་དངོས་གྲུབ་ཐམས་ཅད་ཐོབ་པར་འགྱུར་རོ། །དང་པོ་རྡོ་རྗེ་དེ་ཉིད་ཀྱིས་དབང་བསྐུར་བའི་ཕྲེང་བ་དང༌། དར་དཔྱངས་འཆིང་བའི་ཚུལ་བྱས་ལ། དབང་བསྐུར་བ་ཐམས་ཅད་ལ་སོགས་པའི་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་རོ། །དང་པོའི་རྡོ་རྗེ་སྙིང་གའི་ཕྱོགས་ནས་བཏེག་སྟེ། བདེ་བ་དང་ཡིད་བདེ་བ་ཉམས་སུ་མྱོང་བའི་བསམ་པས་དེ་ཉིད་ཀྱིས་བདག་ཉིད་ལ་བདེ་བར་ཡོངས་སུ་སྤྱང་བ་བྱ་སྟེ། ཐམས་ཅད་རྗེས་སུ་ཆགས་པ་ལ་སོགས་པའི་བདེ་བ་དང་ཡིད་བདེ་བ་ཐམས་ཅད་རབ་ཏུ་ཞུགས་པར་འགྱུར་རོ། །དང་པོའི་རྡོ་རྗེ་གར་གྱི་ཚུལ་གྱིས་སླང་སྟེ་སྤྱི་བོར་བཀྲོལ་བར་བྱས་ནས་མཆོད་པ་ཐམས་ཅད་ལ་སོགས་པའི་ལས་ཐམས་ཅད་ཀྱི་སྒྲུབ་པ་མྱུར་དུ་གྲུབ་པའི་ཆོ་ག་རྒྱས་པ་གྲུབ་པ་ཡིན་ནོ། །དེ་ལ་འདི་ཞེས་བྱ་བ་ལ་རྟོག་པ་ཐམས་ཅད་ཀྱི་ཕྱག་རྒྱའི་མཚན་ཉིད་ཀྱི་རྒྱུད་ཐུགས་ལ་ངས་པ་གསུངས་ཏེ་དེ་ལ་
འདིའི་རྒྱུད་ཅེས་བྱ་བ་དང་སྦྱོར་རོ། །བདེ་བ་ཆེན་པོ་རྡོ་རྗེ་གསང་བའི་དམ་ཚིག་ནི་གསང་བའི་དཀྱིལ་འཁོར་ཏེ། དེའི་དང་པོ་མཆོག་ནི་ཕུལ་དུ་བྱུང་བའི་དམ་ཚིག་གི་རང་བཞིན་ཅན་གྱི་ལས་གྲུབ་པར་བྱེད་པའི་ཕྱག་རྒྱ་ནི་བདེ་བ་ཆེན་པོ་རྡོ་རྗེ་གསང་བའི་དང་པོ་མཆོག་ནི་དམ་ཚིག་གི་ལས་ཀྱི་ཕྱག་རྒྱ་རྣམས་སོ། །དེ་སྟོན་པར་བྱེད་པའི་སྒྲུབ་པའི་ཚོགས་ནི་རྒྱུད་དེ་འདས་མ་ཐག་ཏུ་བཤད་པའི་རྡོ་རྗེ་སེམས་དཔའི་གསང་བའི་དཀྱིལ་འཁོར་ལས་གསུངས་པའི་ལས་བརྒྱ་རྩ་བརྒྱད་སྒྲུབ་པར་བྱེད་པའི་བདེ་བ་ཆེན་པོའི་རྡོ་རྗེ་ཚེ་ལ་སོགས་པའི་ཕྱག་རྒྱའི་མཚན་ཉིད་འདི་ཡིན་ནོ་ཞེས་བྱ་བའི་དོན་ཏོ། །བདེ་བ་ཆེན་པོ་རྡོ་རྗེ་དང་པོའི་རྡོ་རྗེ་སྟེ་དེ་སྒྲུབ་པ་པོ་ལ་རྡོ་རྗེ་སེམས་དཔའི་ཚེ་སྟེར་བ་ཡིན་ནོ། །འདིར་ལས་ཀྱི་ཕྱག་རྒྱ་ཐམས་ཅད་བཅིང་བར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་བདེ་བ་ཆེན་པོ་རྡོ་རྗེ་ཚེ་ལ་སོགས་པའི་ཕྱག་རྒྱ་རྣམས་བཅིང་བར་བྱའོ་ཞེས་བྱ་བ་ལ་སོགས་པའི་དོན་ཏོ། །དབུས་མའི་རྡོ་རྗེ་བཏུང་བར་བྱའོ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྩེ་མོས་བཏུང་བར་བྱས་ནས་ཚེ་ཤིན་ཏུ་ཏིང་བ་འཕེལ་བར་འགྱུར་རོ། །རྩེ་མོ་འོད་ཟེར་བྱས་པས་གདོད་ཡོང་སུས་སྦྱངས་ཏེ་གདོང་བ་དགྲོལ་བར་བྱའོ་ཞེས་བྱ་བ་ལ། དང་པོའི་རྡོ་རྗེ་དབུས་མ་དང༌། མཐེ་བོའི་རྩེ་མོ་དག་གིས་འབར་བའི་ཚུལ་བྱས་ཤིང་རང་གི་གདོང་ཡོངས་སུ་སྦྱངས་ཏེ། ཕྱག་རྒྱ་རང་གི་གདོང་པར་བཀྲོལ་བར་བྱས་ན་གཟུགས་དང་གཟི་བརྗོད་འཕེལ་བར་འགྱུར་རོ། །བདག་ཉིད་ལ་ཐམས་ཅད་དུ་བསྐོར་ཞིང་སྙིང་གར་དགྲོལ་བར་བྱའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ལ་རང་གི་ལུས་ཐམས་ཅད་དུ་བསྐོར་བར་བྱ་ཞིང་དེ་ནས་སྙིང་གར་བཀྲོལ་ན་འདུ་བྱེད་ཆེན་པོ་ཐམས་ཅད་འཕེལ་བར་འགྱུར་རོ། །གཙུག་ཏོར་ཞེས་བྱ་བ་ལ་དང་པོའི་རྡོ་རྗེ་སྤྱི་བོར་གཟུང་བར་བྱས་ན་སེམས་ཅན་ཐམས་ཅད་ཀྱི་བདག་ཉིད་དངོས་པོ་བསྲུང་བའོ། །ཕྱོགས་ཐམས་ཅད་དང་དཀྱིལ་འཁོར་བསྐོར་བའོ་ཞེས་བྱ་བ་ལ། དང་པོའི་རྡོ་རྗེ་ཕྱོགས་བཅིང་བའི་བསམ་པས་ཕྱོགས་ཐམས་ཅད་བཅིང་བར་འགྱུར་རོ། །དེ་ཉིད་མཚམས་བཅིང་བའི་ཚུལ་གྱིས་བསྐོར་
བར་བྱས་ན་མཚམས་བཅིང་བར་འགྱུར་རོ། །དེ་ཉིད་དཀྱིལ་འཁོར་བཅིང་བའི་ཚུལ་གྱིས་བསྐོར་ན་དཀྱིལ་འཁོར་བཅིང་བར་འགྱུར་རོ། །སྙིང་ག་དང་ཡིད་ཀྱིས་རྒྱབ་དང་ཕྲག་བ་དང་སྤྱི་བོ་དང་དབྲལ་བར་བྱས་ན་རྡོ་རྗེ་ཁུ་ཚུར་གཉིས་ཀྱི་ཕྲེང་བ་བཅིངས་ལ་གོ་ཆ་བྱས་ཏེ་མདུད་པ་བྱས་ལ་རྡོ་རྗེའི་གནས་རྣམས་སུ་སླར་ཡང་ཕྲེང་བ་བྱས་པས་རྒྱབ་ཏུ་མདུད་པ་བྱ་སྟེ། དར་དཔྱངས་བྱའོ་ཞེས་བྱ་བ་ལ། དང་པོའི་རྡོ་རྗེ་སྙིང་གའི་ཕྱོགས་སུ་གོ་ཆ་བཅིང་བའི་བསམ་པས་གཞན་ལ་ཡིད་ཀྱིས་རྒྱབ་ཏུ་བཞག་སྟེ། དེ་ནས་ཕྲག་པ་ལ་སོགས་པར་བཞག་ལ། ཁུ་ཚུར་གཉིས་བཅིངས་ཏེ་དེས་ཕྲེང་བ་འཆིང་བའི་ཚུལ་དུ་བྱས་ནས་སྙིང་གའི་ཕྱོགས་སུ་གོ་ཆ་འཆིང་བའི་ཚུལ་དུ་བྱའོ། །དེ་བཞིན་དུ་མགྲིན་པའི་སྟེང་དང༌། སླར་ཡང་སྙིང་ག་དང༌། དེ་ནས་ནུ་མའི་བར་དང༌། སླར་ཡང་སྙིང་ག་དང༌། དེ་ནས་དཔྲལ་བའི་སྟེང་དུ་མདུད་པ་བཅིངས་པའི་ཚུལ་དུ་བྱས་ལ། སླར་ཡང་དར་དཔྱངས་འཆིང་བའི་ཚུལ་གྱིས་རྣ་བ་གཉིས་ཀྱི་སྟེང་དུ་ནམ་མཁའི་ལྡིང་གི་གཤོག་པ་བྱས་ནས་མཐར་དང་དབྱངས་སུ་དམིགས་པར་བྱས་ན། འདིས་སྡིག་པ་ཐམས་ཅད་ལས་བསྲུངས་པ་ཡིན་ནོ། །སྙིང་ག་དང༌། དཔྲལ་བ་དང༌། མགྲིན་པ་དང། སྤྱི་བོར་བཞག་ལ་ཞེས་བྱ་བ་ནི་དང་པོའི་རྡོ་རྗེ་བཅིང་ནས་སྙིང་གའི་ཕྱོགས་དང༌། དབྲལ་བ་དང༌། མགྲིན་པ་དང༌། སྤྱི་བོའི་ཕྱོགས་སུ་གོ་ཆ་བསྐྱེད་པའི་བསམ་པས་གཟུང་བར་བྱ་སྟེ། དེ་ལྟར་ན་བདག་ཉིད་ཀྱི་དངོས་པོ་ཐམས་ཅད་དག་གཞན་དག་རྡོ་རྗེ་ཉིད་དུ་བྱེད་པར་འགྱུར་རོ། །དབུས་མའི་དར་མཆོག་ཅེས་བྱ་བ་ལ་དང་པོའི་རྡོ་རྗེ་སོར་མོ་དབུས་མ་གཉིས་དར་གྱི་བ་དན་གྱི་ཚུལ་གྱིས་གྱེན་དུ་གཟུང་བར་བྱས་ཏེ། འདིས་འཐབ་མོ་ཐམས་ཅད་ལས་རྣམ་པར་རྒྱལ་བར་འགྱུར་རོ། །བྱ་བ་ཞེས་བྱ་བ་ལ་དང་པོའི་རྡོ་རྗེ་རང་གི་དཔུང་གི་ཚོགས་ཐམས་ཅད་བྱ་བ་པར་བྱ་སྟེ། དེ་ལྟར་རྣ་འཐབ་མོ་བསྲུང་བའོ། །གྱེན་དུ་ཁ་བལྟ་བའི་དབུགས་དང་འཇིགས་བྱེད་ཀྱི་གདོང་གི་ལྟ་བས་ཞེས་བྱ་བ་ལ། དང་པོའི་རྡོ་རྗེ་བཅིངས་ལ་འཇིགས་བྱེད་ཀྱི་ལྟ་བས་བལྟ་ཞིང་སྟེང་དུ་ཁ་བལྟས་པའི་ཁོར་བོའི་བཞད་པ་བྱས་ཏེ་ཕྱག་
རྒྱ་དེ་ཡང་གྱེན་དུ་ཁ་བལྟས་པས་རང་གི་ཁར་བཟུང་ན། ཕ་རོལ་གྱི་དཔུང་ཐམས་ཅད་གཞོམ་པའོ། །འབར་བ་བཞིའི་ཚུལ་གྱིས་དོར་ཞིང་ཁྲོས་པའི་ཞེས་བྱ་བ་ལ། དང་པོའི་རྡོ་རྗེ་མཐེ་བོང་དང་མཐེའུ་ཆུང་ཁྲོས་པ་འབར་བཞིའི་ཚུལ་དུ་བྱས་ཏེ་དེ་ལྟར་ཕ་རོལ་གྱི་དཔུང་ཐམས་ཅད་འཇིག་པ་དག །བསླང་བ་དག །རྒྱས་གདབ་པ་དང༌། གསད་པ་དང༌། བརྡེག་པར་འགྱུར་རོ། །རང་གི་སྙིང་པར་བཅིངས་ཏེ་ཞི་བའི་ལྟ་བས་རྩེ་མོ་འཕྲོགས་པར་བྱའོ་ཞེས་བྱ་བ་ལ་དང་བོའི་རྡོ་རྗེ་རང་གི་སྙིང་གའི་ཕྱོགས་སུ་བཅིངས་ཏེ་ཞི་བའི་ལྟ་བས་དེའི་དབུས་མའི་རྡོ་རྗེའི་རྩེ་མོ་འཕྲོག་པར་བྱས་ཏེ་དེ་ལྟར་ན་རིམས་ནད་ལ་སོགས་པ་དང༌། ནད་ཐམས་ཅད་ཞི་བར་འགྱུར་རོ། །ལྟ་བས་འཕྲོག་པར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་བྱམས་པའི་ལྟ་བས་བལྟ་ཞིང་དུག་འཕྲོག་པར་བྱ་སྟེ། དེ་ལྟར་ན་དུག་ཐམས་ཅད་འཇིག་པ་དང་དུག་མེད་པར་འགྱུར་རོ། །དབབ་པས་མྱུར་དུ་དགྲོལ་བར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་དེས་བསྒྲུབ་ཡ་ལ་དབབ་ཅིང་ཕྱག་རྒྱ་བྱ་ལ་མྱུར་དུ་དགྲོལ་བར་བྱ་སྟེ། དེ་ལྟར་ན་གདོན་ཐམས་ཅད་དགྲོལ་བར་འགྱུར་རོ། །ཡོངས་སུ་བསྐོར་ནས་དབྲལ་བར་བཞག་སྟེ། དབུས་མའི་རྡོ་རྗེ་རྩེ་མོ་གཉིས་བསྐྱོད་པར་བྱས་ན་ཇི་ལྟ་བ་བཞིན་དུ་ལས་བྱེད་པའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་ཡོངས་སུ་བསྐོར་ལ་མཐེ་བོའི་རྩེ་མོ་གཉིས་ཀྱི་མཛོད་སྤུའི་ཕྱོགས་སུ་ཡོངས་སུ་གཟུང་བར་བྱས་ལ་དེ་ནས་སོར་མོ་དབུས་མའི་རྩེ་མོ་གཉིས་བསྐྱོད་པར་བྱས་ཏེ་དེ་ལྟར་ནམ་མོ་ཐམས་ཅད་དང༌། མཁའ་འགྲོ་མ་དང༌། གདོན་རྣམས་དགྲོལ་བ་ཆེན་པོ་དང༌། སྙིང་གཞན་དབྱུང་བ་དང༌། འཆི་བ་འཚོ་བ་དང༌། ཚེ་འཕེལ་བ་དང༌། ཤིན་ཏུ་བསྲུང་བ་རྣམས་སྔར་བཤད་པའི་ཚུལ་གྱིས་འབྱུང་བར་འགྱུར་རོ། །སྙིང་གར་བཞག་སྟེ་དབུས་མའི་རྡོ་རྗེ་ལས་སོ་ཞེས་བྱ་བ་ལ། དང་པོའི་རྡོ་རྗེ་རང་གི་སྙིང་གའི་ཕྱོགས་སུ་གཟུང་ཞིང་དབུས་མའི་རྩེ་མོས་ལས་རྣམས་བྱའོ། དེ་དག་གང་ཡིན་ཇི་ལྟར་བྱ་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་ལ་སྙིང་གར་བསྟོད་བ་ཞེས་བྱ་བ་ནི་དང་པོའི་རྡོ་རྗེ་སྙིང་གའི་ཕྱོགས་སུ་
བཞག་ལ་དེའི་དབུས་མའི་རྩེ་མོ་སྙིང་གར་བསྟོད་པས་ཐམས་ཅད་དབབ་པའོ། །བསྐྱོད་བ་ཞེས་བྱ་བ་ནི་དང་པོའི་རྡོ་རྗེ་རང་གི་སྙིང་བསྐྱོད་པས་ཐམས་ཅད་གཡོ་བར་བྱེད་དོ། །འཆིང་བ་ཞེས་བྱ་བ་ནི་དང་པོའི་རྡོ་རྗེས་དངོས་པོ་ཐམས་ཅད་བཅིང་བའི་བསམ་པས་དངོས་པོ་ཐམས་ཅད་འཆིང་བའོ། །གར་བྱེད་དུ་གཞུག་པ་ཞེས་བྱ་བ་ནི་དང་པོའི་རྡོ་རྗེའི་རྩེ་མོས་གར་གྱི་བསམ་པས་བསྐོར་ན་དངོས་པོ་ཐམས་ཅད་གར་བྱེད་དུ་གཞུག་གོ །མགྲིན་པ་གསལ་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་ངག་འབྱིན་པའི་བསམ་པས་སྙིང་ལས་གྱེན་དུ་དྲང་བར་བྱ་སྟེ། །དེ་ལྟར་ན་དངོས་པོ་ཐམས་ཅད་གླུ་ལེན་དུ་འཇུག་པའོ། །རྡོ་རྗེ་བཙིར་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོ་ཕན་ཚུན་བཙིར་བར་བྱ་སྟེ། དེ་ལྟར་ན་ཐམས་ཅད་སོ་སོར་བསྟན་པ་མཐོང་བའོ། །ཁ་འབུས་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོ་ཁ་འབུས་པའི་ཚུལ་དུ་བྱས་ཏེ། དེ་ལྟར་ན་རྨད་དུ་བྱུང་བ་ཐམས་ཅད་མཐོང་བའོ། །མགྲིན་པ་གསལ་བ་ནི་དང་པོའི་རྡོ་རྗེ་དབུས་མའི་རྩེ་མོ་ངག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱ་སྟེ། དེ་ལྟར་ན་དངོས་པོ་ཐམས་ཅད་བདེན་པ་སྨྲར་གཞུག་པའོ། །བཅིངས་པ་མྱུར་དུ་བཀྲོལ་བ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྩེ་མོ་མྱུར་དུ་བཀོལ་བར་བྱས་ཏེ། དེ་ལྟར་ན་བཅིང་པ་ཐམས་ཅད་བཀྲོལ་བའོ། །བསྲུང་བ་ཞེས་བྱ་བ་ནི་དད་པོའི་རྡོ་རྗེ་དབུས་མའི་རྩེ་མོ་བསྲུང་བར་བྱ་སྟེ་དེ་ལྟར་ན་ཐམས་ཅད་བསྲུང་བའོ། །བྱབ་པའི་ལས་ཞེས། བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་བསྒྲུབ་བྱ་བ་ལ་བྱབ་པར་བྱ་སྟེ་དེ་ལྟར་ན་ཐམས་ཅད་སོས་པར་བྱེད་པ་ཡིན་ནོ། །སྙིང་གར་ཁ་སྦྱོར་བསྐྱོད་པའོ། །ཞེས་བྱ་བ་ལ་དང་པོའི་རྡོ་རྗེ་དབུས་ནའི་ཁ་སྦྱོར་རང་གི་སྙིང་གའི་ཕྱོགས་སུ་བསྐྱོད་པར་བྱ་སྟེ་ཏེ་ལྟར་ན་པྲ་དབབ་པ་ཐམས་ཅད་འཇུག་པར་འགྱུར་རོ། །ཉིན་རེ་ཞེས་བྱ་བ་ནི་ཞག་རེ་ལའོ། །སྔ་གྲོལ་དུ་ཞེས་བྱ་པ་ནི་དུས་མཚམས་སྔ་མའི་དུས་སུའོ། །ལན་ཅིག་ནི་འོར་གཅིག་གོ །ལུས་ཡོང་སུས་སྦྱངས་པ་ནི་དང་པོའི་རྡོ་རྗེ་རང་གི་སྙིང་གའི་ཕྱོགས་སུ་བཅིངས་ཏེ། ཉིན་རེ་ཞིང་སྔ་རོལ་ལན་ཅིག་དེས་
རང་གི་ལུས་ལ་ཡོངས་སུ་བྱ་བ་པར་བྱ་སྟེ། དེ་ལྟར་ན་ལུས་གྲུབ་པར་འགྱུར་རོ། །མགྲིན་པ་གསལ་བའི་དག་ཅེས་བྱ་བ་ནི་དང་པོའི་རྡོ་རྗེ་དག་འབྱིན་པའི་ཚུལ་གྱིས་ཁ་ལས་གྱེན་དུ་དྲང་བར་བྱ་སྟེ་དེ་ལྟར་ན་དག་གྲུབ་པའོ། །སྙིང་གར་གཞག་པ་ཞེས་བྱ་བ་ནི་དེ་ཉིད་རང་གི་སྙིང་གའི་ཕྱོགས་སུ་བཞག་ན་ཡིད་གྲུབ་པའོ། །ཕྱག་རྒྱ་ལ་ལྟ་བ་ཞེས་བྱ་བ་ནི་དང་པོའི་རྡོ་རྗེ་ལ་བལྟ་ཞིང་བཟླས་པ་བྱ་སྟེ་དེ་ལྟར་ན་ཐམས་ཅད་མཐོང་བ་ཡིན་ནོ། །དེ་ཉིད་རྣ་བར་གཞག་པར་བྱ་སྟེ་དེ་ལྟར་ན་རྣ་བའི་ཤེས་པ་གྲུབ་པའོ། །དེ་ཉིད་ཁ་ལ་བཞག་ཅིང་བཟླས་པ་བྱ་སྟེ་དེ་ལྟར་ན་ཐམས་ཅད་སྨྲ་བ་ཡིན་ནོ། །དེ་ཉིད་ཆོས་སྟོན་པའི་བསམ་པས་བལྟ་ཞིང་བཟླས་པ་བྱ་སྟེ་དེ་ལྟར་ན་ཆོས་ཐམས་ཅད་སྟོན་པའི་ཤེས་པ་གྲུབ་པར་འགྱུར་རོ། །ཉིན་རེར་སྔ་དྲོ་ལན་ཅིག་ཅེས་བྱ་བ་ནི་སྔ་མ་བཞིན་ནོ། དབང་པོ་ཐམས་ཅད་ལ་བཞག་སྟེ་ཐམས་ཅད་དུ་བསྐོར་བར་བྱའོ་ཞེས་བྱ་བ་ལ། དང་པོའི་རྡོ་རྗེ་བཅིངས་ལ་མིག་ལ་བཞག་སྟེ་ཉིན་རེར་སྔ་དྲོ་ལན་ཅིག་ཏུ་དངོས་པོ་ཐམས་ཅད་ལ་བལྟ་བའི་བསམ་པས་ཐམས་ཅད་དུ་བསྐོར་བར་བྱ་སྟེ་དེ་ལྟར་ཐམས་ཅད་མཐོང་བའོ། །སྒྲ་ཐམས་ཅད་ཉན་པའི་བསམ་པས་རྣ་བར་བཞག་ལ་ཐམས་ཅད་དུ་བསྐོར་བར་བྱས་ཏེ། ཐམས་ཅད་ཐོས་པའོ། །དྲི་ཐམས་ཅད་ལ་སྣོམ་པའི་བསམ་པས་སྣས་ཐམས་ཅད་སྣོམ་པའོ། །ཐམས་ཅད་སྨྲ་བའི་བསམ་པས་ལྕེས་ཐམས་ཅད་སྨྲ་བ་ཡིན་ནོ། །རེག་བྱ་ཐམས་ཅད་ཉམས་སུ་མྱོང་བའི་བསམ་པས་ལུས་ལ་བཞག་སྟེ་ཐམས་ཅད་དུ་བསྐོར་བར་བྱ་སྟེ། དེ་ལྟར་ན་ལུས་ཀྱིས་ཐམས་ཅད་ལ་རེག་པའོ། །སྙིང་གར་བཞག་ནས་ཐམས་ཅད་དུ་བསྐོར་བར་བྱས་ཏེ་དེ་ལྟར་ན་ཡིད་ཀྱིས་ཐམས་ཅད་ཤེས་པར་འགྱུར་རོ། །དབུས་མའི་རྡོ་རྗེས་བྱེད་པ་ཞེས་བྱ་བ་ལ། དང་པོའི་རྡོ་རྗེ་དབུས་མའི་གློག་བཟློག་པ་ལ་སོགས་པའི་ལས་ཀྱི་ཚུལ་ནི་བྱེད་པའོ། །ཁྲོ་བོའི་རྡོ་རྗེ་བལྟ་བས་སོ་ཞེས་བྱ་བ་ལ་ཁྲོ་བོའི་ལྟ་བ་དང་བཅས་པས་སོ། །འདི་ལྟར་འཆང་པར་འགྱུར་ཏེ་དང་པོའི་རྡོ་རྗེ་བཅིངས་ལ་ཁྲོ་བོའི་ལྟ་པས་བལྟ་ཞིང༌། དབུས་མའི་རྡོ་རྗེ་གློག་
བཟློག་པའི་ཚུལ་གྱིས་བཟློག་པར་བྱའོ། །ཆར་བཟློག་པའི་ཚུལ་གྱིས་ཆར་བཟློག་པར་བྱའོ། །ཐོག་འབབ་པ་བཟློག་པའི་ཚུལ་གྱིས་ཐོག་འབབ་པ་བཟློག་པར་བྱའོ། །སྤྲིན་གཞིག་པའི་བསམ་པས་སྤྲིན་གཞིག་བར་བྱའོ། །དབུས་མའི་རྡོ་རྗེའི་ལས་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྩེ་མོའི་ལས་ནི་དབུས་མའི་རྡོ་རྗེའི་ལས་ཏེ་སྔར་མ་བྱུང་བའི་འབྲས་བུ་བསྐྱེད་པ་ལ་སོགས་པའི་ལས་སོ། །འོག་ནས་འབྱུང་སྟེ་ཞེས་བྱ་བ་ལ། དང་པོའི་རྡོ་རྗེ་བཅིངས་ཏེ་དེའི་དབུས་མའི་རྩེ་མོ་འོག་ནས་འབྱུང་བའི་ཚུལ་དུ་བྱས་ཏེ་དེ་ལྟར་ན་ཐམས་ཅད་ཀྱི་འོག་ནས་སྔར་མ་བྱུང་བའི་འབྲས་བུ་འབྱུང་བར་འགྱུར་རོ། །ཉེ་བར་ལོངས་སྤྱོད་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོ་འབྲས་བུ་ལ་ཉེ་བར་ལོངས་སྤྱོད་པའི་ཚུལ་དུ་བྱ་སྟེ་འབྲས་བུ་ཐམས་ཅད་ཉེ་བར་ལོངས་སྤྱོད་པའོ། །ཐམས་ཅད་འགུགས་པར་བྱེད་པ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྩེ་མོས་རི་བོ་ལ་སོགས་པའི་ཕྱོགས་ལ་ཀླུ་དགུག་པའི་ཚུལ་དུ་བྱས་ཏེ་དེ་བཀུག་པས་རི་བོ་ལ་སོགས་པ་ཆུ་མེད་པའི་ཕྱོགས་སུ་འབབ་ཆུ་ལ་སོགས་པའི་ཆུ་འབྱུང་བར་འགྱུར་རོ། །དབབ་པ་སྦྱིན་པ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྩེ་མོས་ཆུ་འབབ་པ་སྦྱིན་པའི་ཚུལ་དུ་བྱ་སྟེ་དེ་ལྟར་ན་ཆུའི་ཕུང་པོ་ཉེ་བར་ལེན་པར་འགྱུར་རོ། །འབར་བའི་མེ་ཏོག་བྱེད་པ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྩེ་མོས་འབར་བའི་མེ་ཏོག་གི་ཚུལ་བྱ་སྟེ། དེ་ལྟར་མུན་པ་སྣང་བ་ཆེན་པོར་བསྐྱེད་པ་ཡིན་ནོ། །ཉེ་བར་ལེན་པ་ཞེས་བྱ་བ་ལ། ཉེ་བར་ལེན་པ་ནི་ངེས་པར་སྦྱར་བའོ། །དེ་ཡང་དང་པོའི་རྡོ་རྗེ་དབུས་མའི་རྩེ་མོ་བྱས་ཏེ་དེ་ལྟར་ན་སྣང་བ་ཆེན་པོ་ཉེ་བར་ལེན་པའོ། །རླུང་གི་ཚུལ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྩེ་མོས་རླུང་གི་ཚུལ་བྱ་སྟེ་དེ་ལྟར་ན་རླུང་ཐམས་ཅད་ལ་བཀའ་བསྒོ་བ་ཉན་པར་འགྱུར་རོ། །ཉེ་བར་ལེན་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་རླུང་ཐམས་ཅད་ཉེ་བར་སྤྱོར་བའི་ཚུལ་བྱ་སྟེ་དེ་ལྟར་ན་རླུང་ཐམས་ཅད་ཉེ་བར་ལེན་པར་འགྱུར་རོ། །ནམ་མཁའ་ཐམས་ཅད་བསྒོམ་པ་ལས་དུ་མའོ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་ཕྱོགས་བཅུར་གནས་པའི་ནམ་
མཁའ་ལས་དངོས་པོ་ཐམས་ཅད་མཐོང་བའི་ཚུལ་བྱས་ན་དངོས་པོ་ཐམས་ཅད་མཐོང་བའི་བསྒོམ་པས་དངོས་པོ་ཐམས་ཅད་མཐོང་བ་ཡིན་ནོ། །དངོས་པོ་ཐམས་ཅད་ཉེ་བར་སྦྱོར་བའི་ཚུལ་དང༌། སྒོམ་པ་དག་གིས་དངོས་པོ་ཐམས་ཅད་ཉེ་བར་ལེན་པར་འགྱུར་བ་ཡིན་ནོ། །དབུས་མའི་རྡོ་རྗེའི་ལས་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྩེ་མོ་ལས་ནི་དབུས་མའི་རྡོ་རྗེ་ལས་ཏེ་ཐམས་ཅད་གཞོམ་པ་ལ་སོགས་པའོ། །ཕྱག་རྒྱ་གཞོམ་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་ཐམས་ཅད་འཇོམས་པའི་བསམ་པས་གཞོམ་པས་ན་ཐམས་ཅད་འཇོམས་པའོ། །རྩེ་མོ་གཉིས་སྙིང་གར་བཙིར་བ་ཞེས་བྱ་བ་ནི་དང་པོའི་རྡོ་རྗེའི་རྩེ་མོ་སྙིང་གའི་ཕྱོགས་སུ་བཅིར་ན་ཐམས་ཅད་རེངས་པའོ། །སེན་མོ་དག་བྲུད་བ་ཞེས་བྱ་བ་ནི་དང་པོའི་རྡོ་རྗེ་དབུས་མས་རྡོ་རྗེའི་སེན་མོ་གཉིས་བྲུད་པས་ཐམས་ཅད་དྲལ་བའོ། །མིག་ལ་རེག་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་རང་གི་མིག་མཉེས་ན་ཐམས་ཅད་རྨུགས་པའོ། །བཙུམས་པ་ཞེས་བྱ་བ་ནི་ངང་པོའི་རྡོ་རྗེ་དབུས་མའི་རྩེ་མོར་རང་གི་མིག་བཙུམས་པར་བྱས་ན་ཐམས་ཅད་གཉིད་ལོག་ཏུ་བཅུག་པའོ། །སོར་མོ་མཉམ་པོ་སྙིང་གར་བརྡེག་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེའི་རྩེ་མོ་གཉིས་ཕན་ཚུན་ཡང་དག་པར་སྦྱར་བར་བྱ་སྟེ། དེས་རང་གི་སྙིང་གར་བརྡེག་པར་བྱས་ན་ཐམས་ཅད་ལ་རྒྱས་བཏབ་པའོ། །ལྟུང་བར་བྱེད་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་ལྟུང་བའི་ཚུལ་བྱས་ན་ཐམས་ཅད་ལྟུང་བའོ། །གློད་པར་བྱེད་པ་ཞེས་བྱ་བ་ནི་དང་པོའི་རྡོ་རྗེས་གློད་པར་བྱས་ན། ཐམས་ཅད་རྨོངས་པའོ། །ཕན་ཚུན་བརྡེག་པ་ཞེས་བྱ་བ་ལ་དང་པོའི་རྡོ་རྗེ་ཕན་ཚུན་བརྡེགས་ན་ཐམས་ཅད་གསད་པའོ། །རང་གི་སྙིང་གར་རང་བཞིན་དུ་གཞག་པའི་ལས་སོ་ཞེས་བྱ་བ་ལ། དེའི་དབུས་མའི་རྡོ་རྗེ་རང་གི་སྙིང་གར་རྣལ་དུ་གཟུང་བར་བྱས་ན་ཐམས་ཅད་ཕྱིར་བཟློག་པར་འགྱུར་རོ། །དབུས་མའི་རྡོ་རྗེ་ལས་ཞེས་བྱ་བ་ནི་སྔ་མ་བཞིན་ནོ། །མདའ་གཏོད་པ་ཞེས་བྱ་བ་ནི། དང་པོའི་རྡོ་རྗེའི་དབུས་མའི་རྡོ་རྗེས་མདའ་གཏོད་
པའི་ཚུལ་དུ་བྱས་ཏེ། དེ་ལྟར་ན་ཐམས་ཅད་རྗེས་སུ་ཆགས་པར་འགྱུར་རོ། །ལྕགས་ཀྱུ་གཉིས་ཀྱིས་དགུག་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྩེ་མོས་ལྕགས་ཀྱུ་གཉིས་བྱས་ཏེ་དེས་བསྒྲུབ་བྱ་དགུག་པར་བྱས་ན་ཐམས་ཅད་འགུགས་པའོ། །གཡོན་པ་ལ་གཡས་པ་བཅུག་པ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྡོ་རྗེ་གཡོན་པ་ལ་གཡས་པའི་སོར་མོ་དབུས་མ་བཅུག་པས་ཐམས་ཅད་གཞུག་པའོ། །རྩེ་མོ་བསྐྱོད་པས་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྡོ་རྗེ་རྩེ་མོ་བསྐྱོད་པ་ཐམས་ཅད་འབབ་པའོ། །གདུ་བུ་འཆིང་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེ་གདུ་བུར་བཅིངས་པས་ཐམས་ཅད་འཆིང་བའོ། །མྱུར་དུ་དགྲོལ་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེ་མྱུར་དུ་བཀྲོལ་བས་ཐམས་ཅད་བཀྲོལ་བའོ། །སོར་མོ་མཉམ་པོར་མྱུར་དུ་དྲལ་བ་ཞེས་བྱ་བ་ནི་དང་པོའི་རྡོ་རྗེ་སོར་མོ་དབུས་མ་གཉིས་མཉམ་པོར་བྱས་ལ། མྱུར་དུ་དྲལ་བར་བྱས་ན་ཐམས་ཅད་དྲལ་བར་འགྱུར་རོ། །ལྟུང་བར་བྱེད་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེས་ལྟུང་བའི་ཚུལ་བྱས་ཏེ་ངེས་ཐམས་ཅད་ལྟུང་བར་འགྱུར་རོ། །འོག་ནས་བཏེག་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེས་འོག་ནས་གྱེན་དུ་གདེག་པར་བྱ་སྟེ་དེ་ལྟར་ན་ལྟུང་བ་སློང་བའོ། །གཡོན་པས་གཡས་པ་དྲང་བར་ཞེས་བྱ་བ་ནི་གཡོན་པའི་སོར་མོ་དབུས་མའི་རྡོ་རྗེ་གཡས་པའི་སོར་མོ་དབུས་མས་དྲངས་ནས་ཐམས་ཅད་འདྲེན་པའོ། །ལས་ཐམས་ཅད་ལ་སྦྱོར་བར་བྱེད་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེ་ལས་ཐམས་ཅད་ལ་ངེས་པར་སྦྱར་བའི་ཚུལ་དུ་བྱས་ཏེ། དེ་ལྟར་ན་གནོད་སྦྱིན་ལ་སོགས་པ་རྗེས་སུ་འབྲང་བར་བྱེད་དོ། །འོག་ནས་བསྐྱོད་ཅིང་གྱེན་དུ་དྲང་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེ་འོག་ནས་བསྐྱོད་ཅིང༌། གྱེན་དུ་བཏེག་པས་མངག་གཞུག་བཀའ་བསྒོ་བར་བྱེད་པའོ། །ཚུར་འདྲེན་པ་ཞེས་བྱ་བ་ནི་དྲང་པོའི་རྡོ་རྗེ་དབུས་མའི་རྡོ་རྗེ་ཚུར་དྲངས་པས་ཐམས་ཅད་ཚུར་འགུགས་པ་ཡིན་ནོ། །ཕར་གཏོང་བ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེས་
མངོན་པར་འདོད་པའི་གནས་སུ་ཁྱེར་ཞིང་བཞག་པས་ཕར་གཏོང་བའོ། །གཡོན་དང་གཡས་ཀྱིས་དྲག་པོར་བརྡེག་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་སོར་མོ་གཉིས་ཁྲོས་པས་ཕན་ཚུན་བརྡེག་པར་བྱ་སྟེ་དེ་ལྟར་ན་ཐམས་ཅད་གསོད་པའོ། །རང་གི་སྙིང་གར་རྩེ་མོ་འདྲེན་པ་ཞེས་བྱ་བ་ནི་དང་པོའི་རྡོ་རྗེ་དབུས་མའི་རྡོ་རྗེས་རྩེ་མོ་རང་གི་སྙིང་གར་གྱེན་དུ་དྲང་བར་བྱ་སྟེ་དེ་ལྟར་ན་སླར་གསོ་བ་ལ་སོགས་པའོ། །ལས་ཐམས་ཅད་ལ་ངེས་པར་སྦྱོར་བར་བྱེད་པའི་ལས་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྡོ་རྗེ་ལས་ཐམས་ཅད་ངེས་པར་སྦྱར་བའི་ཚུལ་གྱིས་དབང་དུ་བྱེད་པ་སྒྲུབ་པ་ཡིན་ནོ། །སྙིང་གར་འཁོར་ལོ་གཞུག་པ་ཞེས་བྱ་བ་ནི་དང་པོའི་རྡོ་རྗེ་བཅིངས་ལ་རང་གི་སྙིང་གའི་ཕྱོགས་སུ་དཀྱིལ་འཁོར་སྤྲུལ་བའི་བསམ་པས་བསྐོར་བར་བྱ་སྟེ། དེ་ལྟར་ན་རིགས་ཐམས་ཅད་ཀྱི་མཆོག་གི་དངོས་གྲུབ་ཐམས་ཅད་འགྲུབ་པར་འགྱུར་རོ། །དབང་བསྐུར་བའི་ཕྲེང་བ་དང༌། དར་འཆིང་བར་བྱེད་པ་ཞེས་བྱ་བ་ནི། དང་པོའི་རྡོ་རྗེ་དབང་བསྐུར་བའི་ཕྲེང་བ་དང༌། དར་འཆིང་བའི་ཚུལ་བྱས་ཏེ་དེ་ལྟར་ན་དབང་བསྐུར་བ་ཐམས་ཅད་ལ་སོགས་པའི་ཕུན་སུམ་ཚོགས་པ་ཐམས་ཅད་ཐོབ་པར་འགྱུར་རོ།། སྙིང་ག་ལས་དྲངས་ཏེ་བདེ་བ་ཐམས་ཅད་ཡོངས་སུ་སྤྱང་བ་ཞེས་བྱ་བ་ནི་དང་པོའི་རྡོ་རྗེ་རང་གི་སྙིང་གར་བཅིངས་ཏེ་བསླངས་ནས་བདེ་བ་དང༌། ཡིད་བདེ་བ་ཉམས་སུ་མྱོང་བའི་བསམ་པས་དེ་ཉིད་ཀྱི་བདེ་བས་བདག་ཉིད་ལ་ཀུན་དུ་ཁྱབ་པར་བྱས་ཏེ་དེ་ལྟར་ན་ཐམས་ཅད་རྗེས་སུ་ཆགས་པ་ལ་སོགས་པ་དང༌། བདེ་བ་དང་ཡིད་བདེ་བ་ཐམས་ཅད་རབ་ཏུ་འཇུག་པར་འགྱུར་རོ། །གར་གྱིས་བཏེག་སྟེ་སྤྱི་པོར་བཀྲོལ་བའི་ལས་སོ་ཞེས་བྱ་བ་ལ་དང་པོའི་རྡོ་རྗེ་བཅིངས་ལ་གར་གྱི་ཚུལ་གྱིས་བསླངས་ཏེ་སྤྱི་བོར་དགྲོལ་བར་བྱའོ། །ལས་ནི་དང་པོའི་རྡོ་རྗེས་རང་གི་ལྷའི་མཆོད་པ་ཐམས་ཅད་ལ་སོགས་པའི་ལས་ཐམས་ཅད་གྲུབ་པར་འགྱུར་རོ། །ལས་རྒྱ་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་མཚན་ཉིད་འདི་དག་བསྟན་པ་ཡིན་ནོ། །ཕྱག་རྒྱའི་རྒྱུད་འདི་ཅིའི་དོན་དུ་གསུངས་པ་ཡིན་ཞེ་ན། བདེ་བ་ཆེན་པོ་རབ་ཏུ་བསྒྲུབ་པ་དང༌། །
ཆགས་པ་ཆེན་པོ་རྣམས་དག་ཕྱིར། །ཞེས་བྱ་བ་ལ་སོགས་པས་འབྲས་བུ་བསྟན་པ་ཡིན་ནོ། །རྡོ་རྗེ་འཛིན་པ་ཆེན་པོ་ཡིས། །ཞེས་བྱ་བས་ནི་རྡོ་རྗེ་སེམས་དཔས་སོ། །དེས་ཕྱག་རྒྱའི་རྒྱུད་འདི་གང་ལ་བདེ་བ་ལ་སོགས་པ་སྒྲུབ་པའི་དོན་དུ་རབ་ཏུ་བརྟག་པ་ཡིན་ཞེ་ན། སངས་རྒྱས་སྲས་བཅས་བདག་ཉིད་ཀུན། །ཞེས་བྱ་བ་ལ། སྲས་དང་བཅས་པའི་དེ་བཞིན་གཤེགས་པ་རྣམས་ལའོ་ཞེས་བྱ་བའི་དོན་ཏོ། །སེམས་ཅན་ཡང་ཡིན་ལ་ཀུན་ཀྱང་ཡིན་པས་སེམས་ཅན་ཀུན་ཏེ། དེ་དག་གི་དངོས་གྲུབ་མྱུར་བ་ནི་གདུལ་བྱ་རྣམས་ལ་སྐྱེ་བ་འདི་ཉིད་ལ། རྡོ་རྗེ་སེམས་དཔའ་ལ་སོགས་པའི་དངོས་གྲུབ་སྒྲུབ་པའོ། །དེའི་དོན་དུ། དོན་ཡོད་དངོས་གྲུབ་ཀུན་སྩོལ་བའོ། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ངེས་པར་སྟེར་བ་ནི་འདི་ཉིད་ཡིན་ནོ། །དཀྱིལ་འཁོར་དག་ཏུ་མ་ཞུགས་པ། །ཞེས་བྱ་བ་ལ། རྡོ་རྗེ་སེམས་དཔའི་གསང་བའི་དཀྱིལ་འཁོར་འདིར་གང་དག་མ་ཞུགས་པ་དེ་དག་ལ་ཡང་དངོས་གྲུབ་ཐམས་ཅད་སྟེར་བའི་ཕྱག་རྒྱའི་རྒྱུད་འདི་ཡིན་ནོ། །སྡིག་པའི་ལས་ནི་ཀུན་དང་ལྡན། །ཞེས་བྱ་བ་ལ་མཚམས་མེད་པ་སོགས་པ་བྱེད་པ་རྣམས་ལ་ཡོད་དོ། །དེ་དག་ཀྱང་ཞེས་བྱ་བ་ནི་གོ་སླའོ། །མཚམས་མེད་པ་ལ་སོགས་པ་བྱེད་པ་རྣམས་ཀྱི་ཡང་དངོས་གྲུབ་ཐམས་ཅད་རྫོགས་པའི་ཕྱིར་གྲུབ་པ་ཡིན་ནོ། །ཀྱང་གི་སྒྲ་ནི་དཀྱིལ་འཁོར་དུ་ཞུགས་པ་དང༌། ཆོས་དང་ལྡན་པ་རྣམས་ལ་ཕྱག་རྒྱ་ཆེན་པོ་རྒྱུད་འདིས་ཤིན་ཏུ་གྲུབ་པ་ཡིན་ནོ་ཞེས་བསྟན་པ་ཡིན་ནོ། །རྒྱུ་གང་གི་ཕྱིར་དེ་དག་ལས་འགྲུབ་པ་ཡིན་ཞེ་ན། བཅིངས་པ་ཙམ་གྱིས་སྡིག་སྤྱང་ཕྱིར། །ཞེས་བྱ་བ་ལ། གང་གི་ཕྱིར་ལས་བརྒྱ་སྒྲུབ་པར་བྱེད་པའི་ཕྱག་རྒྱ་འདི་རྣམས་སྒྲུབ་པ་པོ་རྣམས་ཀྱིས་བཅིངས་པ་ཙམ་གྱིས་སྒྲུབ་པ་པོ་རྣམས་ལ་སྡིག་པ་ཐམས་ཅད་སྦྱོང་བར་བྱེད་པའི་ཕྱིར་རོ། །གང་ཞིག་ལེ་ལོ་ཉིད་ཀྱིས་ཞེས་བྱ་བ་ལ། གང་ཞིག་ལེ་ལོ་ཉམས་པས་ཡོ་བྱད་ཡོད་ཀྱང་འཁོར་ལོ་བརྟག་པར་མི་ནུས་པའམ། ཡང་ན་བརྩོན་འགྲུས་དང་ལྡན་ན་ཡང༌། ཕུན་
སུམ་ཚོགས་པ་མ་ཚད་བ་དེ་རྣམས་ལ་ཡང་བཅོམ་ལྡན་འདས་རྡོ་རྗེ་སེམས་དཔའ་ལས་བརྒྱ་འགྲུབ་པའི་ཕྱག་རྒྱ་བཅིང་བའི་ནུས་པ་གྲུབ་པར་འགྱུར་ཏེ། དེའི་ཕྱིར་བཅིངས་པ་ཙམ་གྱིས་ལས་བརྒྱ་སྒྲུབ་པར་བྱེད་པའི་ཕྱག་རྒྱ་འདི་རྣམས་ཀྱིས་སྡིག་པ་སྦྱང་བར་བྱ་བ་ཡིན་ནོ། །དཀྱིལ་འཁོར་མེད་པའི་སེམས་ཅན་གང༌། །ཞེས་བྱ་བ་ནི་དཀྱིལ་འཁོར་དུ་མ་ཞུགས་པའོ། །སློབ་དཔོན་ཉིད་བྱིན་གྱིས་མ་བརླབས་པ་ཞེས་བྱ་བ་ལ་ཡང་ན་དཀྱིལ་འཁོར་དུ་ཞུགས་ན་ཡང་སློབ་དཔོན་གྱིས་དབང་བསྐུར་བ་མ་བསྐུར་བའོ། །དེ་དག་གྲུབ་མཆོག་རྡོ་རྗེ་ཆེ། །ཞེས་བྱ་བ་ལ་སོགས་པ་ལ། དཀྱིལ་འཁོར་དུ་མ་ཞུགས་པའམ། དབང་མ་བསྐུར་བར་དཀྱིལ་འཁོར་དུ་ཞུགས་པ་དེ་རྣམས་ཕྱག་རྒྱ་བཅིངས་པ་ཙམ་གྱིས་རྡོ་རྗེ་སློབ་དཔོན་དུ་འགྱུར་རོ། །སླར་ཡང་དེའི་ཁྱད་པར་བསྟན་པར་བྱ་བའི་ཕྱིར་དོན་ཡོད་པ་ཞེས་བྱ་བ་གསུངས་ཏེ་དོན་མེད་པ་མ་ཡིན་ནོ། །མཆོག་ནི་ཕུལ་དུ་བྱུང་བའོ། །སྣ་ཚོགས་པའི་མངོན་པར་འདོད་པའི་བྱ་བ་ཐམས་ཅད་སྒྲུབ་པར་བྱེད་པའོ། །བཅིངས་པ་ཙམ་གྱིས་མྱུར་འགྲུབ་ཅེས་བྱ་བ་ལ་ཇི་ལྟ་བ་བཞིན་དུ་བཤད་པའི་བསམ་པ་ཐམས་ཅད་ཡོངས་སུ་རྫོགས་པ་སངས་རྒྱས་ཉིད་དང༌། བྱང་ཆུབ་སེམས་དཔའ་ཉིད་ལ་སོགས་པའི་མཆོག་གི་དངོས་གྲུབ་ཐམས་ཅད་གདུལ་བྱ་རྣམས་ལ་རབ་ཏུ་འཇུག་པར་བྱེད་པ་ཡིན་ནོ། །ཕྱག་རྒྱའི་རྒྱུད་འདི་གང་ལས་བྱུང་ཞེ་ན། དང་པོ་ཞེས་བྱ་བ་ལ་སོགས་པ་ལ། བསྐལ་པ་བཟང་པོ་འདིའི་སྔ་རོལ་དུ་བྱུང་བས་ན་དང་པོར་བྱུང་བའོ། །རྡོ་རྗེ་རྣམས་ཀྱི་ཕུལ་དུ་བྱུང་བས་ན་རྡོ་རྗེ་མཆོག་གོ །དང་པོར་བྱུང་བ་ཡང་ཡིན་ལ་རྡོ་རྗེ་མཆོག་ཀྱང་ཡིན་པས་ན་དང་པོར་བྱུང་བའི་རྡོ་རྗེ་མཆོག་གོ །དང་པོར་བྱུང་བའི་རྡོ་རྗེ་མཆོག་ཀྱང་དེ་ཉིད་ཡིན་ལ་བདེ་བ་ཆེན་པོ་ཡང་ཡིན་པས་ན། དང་པོ་བྱུང་བའི་རྡོ་རྗེ་མཆོག་གི་བདེ་བ་ཆེན་པོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་རང་བཞིན་ཅན་ཐོག་མ་ཐ་མ་མེད་པའི་ཆོས་ཀྱི་དབྱིངས་ཏེ། དེ་ལས་བྱུང་བའི་སྐྱེ་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དག་པ་ནི་འདོད་ཆགས་ལ་སོགས་པ་དང་བྲལ་བའོ།
ཤིན་ཏུ་གྲུབ་པ་ཞེས་བྱ་བ་ནི་མི་འཇིགས་པའི་དངོས་གྲུབ་ཀྱིས་གྲུབ་པའོ། །གང་ལ་ཞེ་ན་འགྲོ་བ་ཐམས་ཅད་ལ་ཡང་ངོ་ཞེས་བྱ་བ་ལ། དཀྱིལ་འཁོར་དུ་མ་ཞུགས་པ་རྣམས་ལ་ཡང་ཞེས་བྱ་བའི་ཐ་ཚིག་གོ །དེ་ལྟར་ལས་བརྒྱ་སྒྲུབ་པར་བྱེད་པའི་ཕྱག་རྒྱའི་རྒྱུད་བསྟན་ནས། ད་ཡི་གེ་ཧཱུཾ་བརྗོད་ཅིང་ལས་བརྒྱ་སྒྲུབ་པར་བྱེད་པའི་ཕྱག་རྒྱ་བཅིངས་ཏེ། དེའི་རྗེས་ལ་ཨ་ནུ་རཱ་ག་ཡ་མི་ཧཱུཾ་ཞེས་བྱ་བ་བརྗོད་ཅིང་ལས་བརྒྱ་རབ་ཏུ་བསྒྲུབ་བར་བྱའོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར་དེ་ནས་ཕྱག་རྒྱ་ཐམས་ཅད་བསྒྲུབ་པའི་གསང་བའི་རྒྱུད་ཅེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔར་བཤད་པའི་དེ་མ་ཐག་པའི་དོན་སྟོན་པར་བྱེད་པའོ། །ཕྱག་རྒྱ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ཕྱག་རྒྱ་ཐམས་ཅད་དེ་ལས་བརྒྱ་སྒྲུབ་པར་བྱེད་པའོ། །དེ་རྣམས་སྒྲུབ་པར་བྱེད་པ་ནི་རྫོགས་པར་བྱེད་པའི་རྒྱུ་སྟེ། དེ་སྟོན་པར་བྱེད་པའི་གསང་བའི་རྒྱུད་འདི་ཡིན་ཏེ། ལས་འདོད་པ་ཞེས་བྱ་བ་ལ་ཚེ་འཕེལ་བ་ལ་སོགས་པའི་ལས་བྱེད་པར་འདོད་པས་དང་པོ་ཁོ་ནར་ཡི་གེ་ཧཱུཾ་བརྗོད་ཅིང་དང་པོའི་རྡོ་རྗེ་བཅིང་བར་བྱ་སྟེ། དེ་ནས་ཨ་ནུ་རཱ་ག་ཡ་མི་ཧཱུཾ་ཞེས་བྱ་བ་བཟླ་ཞིང་ལས་ཐམས་ཅད་བསྒྲུབ་པར་བྱ་བ་ཡིན་ནོ། །བདེ་བ་ཆེན་པོའི་བྱ་བ་ལ་སོགས་པ་ནི་བཤད་ཟིན་ཏོ། །རྒྱུད་ཕྱི་མའི་ཆོག་རྒྱས་བའོ་ཞེས་བྱ་བ་ལ། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་རྒྱུད་ཀྱི་རང་བཞིན་གྱི་ཆོག་རྒྱས་པ་ནི་བསྒྲུབ་པར་བྱ་བ་དང༌། སྒྲུབ་པར་བྱེད་པའི་རྒྱུན་ཏེ་ཡོངས་སུ་རྫོགས་པ་ནི་མཐར་ཐུག་པ་ཡིན་ནོ། །དེ་ལྟར་དུ་མ་བུ་གཉིས་པ་རྩ་བའི་རྒྱུད་དང་རྒྱུད་ཕྱི་མ་རྒྱས་པར་བཤད་པ་བྱས་ནས་ད་ནི་ཇི་ལྟ་བ་བཞིན་དུ་བྲིས་པའི་དཀྱིལ་འཁོར་རྣམས་གཤེགས་སུ་གསོལ་ནས། སློབ་དཔོན་གྱིས་སྤྲུལ་བ་རང་གི་ལུས་ལ་བཅུག་སྟེ། དེ་བཞིན་གཤེགས་པ་ཐམས་ཅད་ཀྱི་རྟོག་པ་འདི་བྱིན་གྱིས་བརླབ་པའི་ཕྱིར་བདག་ཉིད་གསོལ་བ་འདེབས་པ་བྱེད་པར་རྣམ་པར་བསམས་ལ་ཡོངས་སུ་རྫོགས་ཤིང་མཐར་ཐུག་པར་བྱིན་གྱིས་བརླབ་པའི་ཚིགས་སུ་བཅད་པ་བརྗོད་ནས་བདག་ཉིད་བསྲུང་པར་བྱས་ལ་ལྡང་བར་བྱའོ་ཞེས་བྱ་བ་བསྟན་པའི་ཕྱིར་དེ་ནས་ཞེས་བྱ་བ་
ལ་སོགས་པ་གསུངས་ཏེ། དེ་ནས་བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་སེམས་དཔའ་ལ་གསོལ་བ་བཏབ་པའོ་ཞེས་བྱ་བ་དང་སྦྱར་རོ། །ཇི་ལྟར་ཞེ་ན་ཡོངས་སུ་མཐར་ཐུག་པ་མེད་པ་ཞེས་བྱ་བ་ལ་སོགས་པ་ལ་ཡོངས་སུ་མཐར་ཐུག་པ་ནི་ཡོངས་སུ་རྫོགས་པའོ། །ཡོངས་སུ་མཐར་ཐུག་པ་མེད་པ་ནི་ཡོངས་སུ་མཐར་མ་ཐུག་པ་སྟེ་ཡོངས་སུ་མ་རྫོགས་པའོ། །སྐུ་གསུང་ཐུགས་ཀྱི་རྡོ་རྗེ་ཐམས་ཅད་ཀྱི་ལས་ཀྱི་སྦྱོར་བ་ཞེས་བྱ་བ་ནི་ནམ་མཁའ་ཐམས་ཅད་ཁྱབ་པར་བྱེད་པའི་གཟུགས་ཐམས་ཅད་གཟིགས་པའི་ཡེ་ཤེས་ཀྱིས་འཁོར་བ་ཇི་སྲིད་ཀྱི་བར་དུ་སངས་རྒྱས་བཅོམ་ལྡན་འདས་རྣམས་སེམས་ཅན་གྱི་དོན་མཛད་པ་སྟེ་མཐར་ཐུག་པ་མེད་པའི་སྦྱོར་བ་ངེས་དེ་རྣམས་ཀྱིས་གསོལ་བ་བཏབ་པ་ཡིན་ནོ། །འོ་ན་དེ་རྣམས་གཅིག་བུ་ཡིན་ནམ་ཞེ་ན། རྡོ་རྗེ་འཆང་དང་བཅས་ཞེས་བྱ་བ་ནི་རྡོ་རྗེ་ཡིད་ལས་བྱུང་བ་ལ་སོགས་པའི་རྡོ་རྗེ་འཆང་ཆེན་པོ་ངང་བཅས་པ་རྣམས་སོ། །ཅིའི་དོན་དུ་ཞེ་ན་འདི་ཞེས་བྱ་བ་ལ་སོགས་པ་ལ། རྟོག་བའི་རྒྱལ་པོ་ཆེན་པོ་འདིར་ཡོངས་སུ་མཐར་ཐུག་པའི་དོན་ཏོ་ཞེས་བྱ་བ་དང་སྦྱར་རོ། །དུམ་བུ་གཉིས་པ་རྩ་བའི་རྒྱུད་དང་ཕྱི་མའི་རང་བཞིན་འདས་མ་ཐག་ཏུ་བཤད་པའི་ཐོག་མ་ཐ་མ་མེད་པའི་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་དང༌། སྦྱིན་པའི་ཕ་རོལ་ཏུ་ཕྱིན་པ་དང༌། དམ་ཚིག་གི་ཕྱག་རྒྱ་ལས་བྱུང་བའོ། །བདེ་བ་ཆེན་པོ་རྡོ་རྗེ་གསང་བའི་དམ་ཚིག་ཅེས་བྱ་བ་ནི་གཟུགས་ཐམས་ཅད་སྟོན་པར་ནམ་མཁའ་ཐམས་ཅད་ཁྱབ་པར་བྱེད་པའོ། །ཁམས་ཐམས་ཅད་ཅེས་བྱ་བ་ནི་ནམ་མཁའི་ཁམས་དང་ཆོས་ཀྱི་དབྱིངས་དང༌། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་རྣམས་ནི་ཁམས་ཐམས་ཅད་དོ། །ཁམས་ཐམས་ཅད་ཀྱང་དེ་ཡིན་ལ་མ་ལུས་པ་ཡང་དེ་ཡིན་པས་ཁམས་ཐམས་ཅད་མ་ལུས་པའོ། །དེར་ཀུན་དུ་འགྲོ་བ་ནི་སྤྲོ་བ་སྟེ་ཁྱབ་པ་གང་ལ་ཡོད་པ་དེ་ལ་དེ་སྐད་ཅེས་བྱའོ། །ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་ཀྱི་ཆོ་ག་རྒྱས་པ་ནི་བསྒྲུབ་པར་བྱ་བ་དང་སྒྲུབ་པར་བྱེད་པའི་རྒྱུན་གང་ལ་ཡོད་པ་དེ་ལ་ཡང་དེ་སྐད་ཅེས་བྱའོ། །སྲིད་པ་ཐམས་
ཅད་ཀྱི་མཐའ་ནི་ཁམས་གསུམ་གྱི་རང་བཞིན་ཅན་ཏེ་དེ་ཡོངས་སུ་མཐར་མ་ཐུག་པའི་གསུང་རབ་ཀྱི་བསྟན་པ་གང་ལ་ཡོང་བ་དེ་ལ་དེ་སྐད་ཅེས་བྱ་སྟེ། དེ་ཡོངས་སུ་མཐར་ཐུག་པའི་དོན་ནི་ཡོངས་སུ་རྫོགས་པའི་ཕྱིར་ཐོག་མ་ཐ་མ་མེད་པའི་རྡོ་རྗེ་སེམས་དཔའ་ལ་དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པ་ཡིན་ནོ། །གང་ཞིག་ཡོངས་སུ་མཐར་ཐུག་པའི་བྱིན་གྱིས་བརླབ་པའི་དོན་དུ་གསོལ་བ་བཏབ་པའི་རྟོག་པའི་རྒྱལ་པོ་དེ་ཉིད་ཀྱིས་ཁྱད་པར་སླར་ཡང་བསྟན་པའི་ཕྱིར་རྡོ་རྗེ་ནམ་མཁའ་ལ་སོགས་པ་གསུངས་ཏེ་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཡིན་པའི་ཕྱིར་རོ། །རྡོ་རྗེ་ནི་ནམ་མཁའོ། །རྒྱུ་འདི་ཉིད་ཀྱི་ཕྱིར་ཆོས་ཀྱི་དབྱིངས་ཆེན་པོ་སྤྲོ་བ་སྟེ་དེ་བཞིན་ཉིད་ཀྱིས་ཁྱབ་པའི་དངོས་པོའོ། །རྡོ་རྗེ་འཆང་གི་ཐེག་པ་ནི་རྟོག་པའི་རྒྱལ་པོ་འདི་ཉིད་དེ། དེའི་ཕྱིར་རྟོག་པ་གཞན་དག་ལས་མཆོག་སྟེ་ཕུལ་དུ་བྱུང་བའོ། །ཆོས་ཐམས་ཅད་ལས་ཁྱབ་པར་བྱེད་པའི་དེ་བཞིན་ཉིད་ནི་རྡོ་རྗེ་ནམ་མཁའ་ཆེན་པོའི་ཆོས་ཀྱི་དབྱིངས་ཏེ། དེ་སྤྲོ་བའི་དངོས་གྲུབ་ནི་དེ་བཞིན་ཉིད་རྟོག་པའོ། །དེ་སྩོལ་བས་ན་རྡོ་རྗེ་འཆང་ཆེན་པོའི་ཆོས་ཀྱི་དབྱིངས་སྤྲོ་པའི་དངོས་གྲུབ་སྩོལ་བ་སྟེ། རྡོ་རྗེ་འཆང་རྣམས་ཀྱི་ཐེག་པ་དེ་ཡིན་ནོ། །དེ་ལྟར་གྱུར་པའི་ཐེག་པ་ཆེན་པོ་སྟེ་རྡོ་རྗེ་འཆང་གཅིག་བུའི་མ་ཡིན་ཏེ། འོན་ཀྱང་རྟག་ཏུ་སངས་རྒྱས་ཐམས་ཅད་དང༌། རྡོ་རྗེ་འཆང་ཆེན་པོ་དང་བཅས་བ་ཞེས་བྱ་བ་ལ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང༌། དོན་ཡོངས་གྲུབ་པ་བ་གཙོ་བོར་གྱུར་པའི་སངས་རྒྱས་ཐམས་ཅད་དོ། །དེ་དག་ཉིད་རྟག་ཏུ་སྟེ། དུས་ཐམས་ཅད་དུ་དེ་བཞིན་ཉིད་ཀྱི་རྡོ་རྗེ་ཆེན་པོ་འཛིན་པས་ན། རྡོ་རྗེ་འཆང་ཆེན་པོ་སྟེ་རྡོ་རྗེ་སེམས་དཔའ་ལ་སོགས་པའི་རིགས་ཐམས་ཅད་ཀྱི་ལྷའི་རང་བཞིན་ཅན་རྡོ་རྗེ་འཆང་ཆེན་པོ་སྟེ། དེ་དང་བཅས་པ་ནི་དེ་དང་ལྷན་ཅིག་ཏུའོ། །རྡོ་རྗེ་འཆང་གི་ཐེག་པ་ནི། །ཞེས་བྱ་བ་ལ་སངས་རྒྱས་དང་བྱང་ཆུབ་སེམས་དཔའ་ཉིད་རྡོ་རྗེ་འཆང་
ཆེན་པོ་སྟེ། དེ་རྣམས་ཉིད་ཀྱི་རྟོག་པའི་རྒྱལ་པོ་ཆེན་པོ་དེ་ཐེག་པ་ཡིན་ཏེ་གཞན་དག་ནི་མ་ཡིན་ནོ། །ཡོངས་སུ་མཐར་ཐུག་ནུས་པ་མིན། །ཞེས་བྱ་བ་ལ་ནམ་མཁའ་ཁྱབ་པས་མཐའ་ཡས་པའི་ཕྱིར་རྟོག་པའི་རྒྱལ་པོའི་ཐེག་པ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་ཡོངས་སུ་རྫོགས་པར་བསྟན་པས་གདུལ་བྱ་རྣམས་ལ་བསྟན་པར་མི་སྤྱོད་པ་དེའི་ཕྱིར་ལེ་ལོ་ཅན་ལ་མདོར་བསྡུས་ནས་རབ་ཏུ་བསྟན་པར་མཛད་པའི་ཕྱིར་རྟོག་པ་འདི་ཡོངས་སུ་མཐར་ཐུག་པར་བྱིན་གྱིས་བརླབ་པའི་དོན་དུ་དེ་བཞིན་གཤེགས་པ་རྣམས་ཀྱིས་རྡོ་རྗེ་འཆང་ཆེན་པོ་ལ་གསོལ་བ་བཏབ་པ་ཡིན་ནོ། །དངོས་པོ་མི་སྡུག་པ་ལ་ཞེན་པས་ན་ངན་ཞེན་ནོ། །ཨེ་མའི་སྒྲ་ནི་རྗེས་སུ་བཟུང་བ་ལའོ། །རྟོག་པའི་རྒྱལ་པོ་ཆེན་པོ་ཐོས་པ་དང༌། བསམ་པ་ལ་རབ་ཏུ་འཇུག་པ་ལ་དབང་བ་མེད་པའི་སེམས་ཅན་ནི་ལེ་ལོ་ཅན་ནོ། །མི་དགེ་བའི་ལས་ཀྱི་ལམ་བཅུ་ལ་སྤྱོད་པས་ན་ལས་ཀུན་ལྡན་པའོ། །ཐུགས་རྗེ་དམ་པའི་རྡོ་རྗེ་ཁྱོད། །ཅེས་བྱ་བ་ལ་དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ནི་ཐུགས་རྗེ་དམ་པའི་རྡོ་རྗེའོ། །བྱང་ཆུབ་སེམས་ནི་བླ་ན་མེད། །ཅེས་བྱ་བ་ལ་སོགས་པ་ནི་གོ་སླའོ། །རབ་སྒྲུབ་པ་ཞེས་བྱ་བ་ནི་རྒྱ་ཆེ་བས་འཇིགས་པས་འཇིགས་པ་རྣམས་ལ་མངོན་པར་འདོད་པའི་དངོས་གྲུབ་རབ་ཏུ་བསྒྲུབ་པ་སྟེ། དེ་ལྟར་ཡོངས་སུ་མཐར་ཐུག་པར་བྱིན་གྱིས་བརླབ་པའི་དོན་དུ་གསོལ་བ་བཏབ་པའི་བཅོམ་ལྡན་འདས་རྡོ་རྗེ་འཆང་ཆེན་པོས་མདོར་བསྡུས་པའི་གཞུང་བྱིན་གྱིས་བརླབས་ལ་ཐུགས་རྩེ་གཅིག་པར་མཛད་ནས། བདེ་བ་ཆེན་པོ་རབ་སྒྲུབ་པ། །ཞེས་བྱ་བ་ལ་སོགས་པ་ནི་ཡོངས་སུ་རྫོགས་པའི་བྱིན་གྱིས་བརླབ་པ་གསུང་པ་ཡིན་ནོ། །གང་གི་ཚུལ་འདི་ཉན་པར་འགྱུར། །ཞེས་བྱ་བ་ལ་སོགས་པ་ལ་གང་གི་ཚུལ་འདིས་ནི་དུམ་བུ་གཉིས་པའི་རྩ་བའི་རྒྱུད་དང༌། རྒྱུད་ཕྱི་མ་འཁྲུལ་པ་མེད་པའི་རྣ་བའི་ཤེས་པ་མཆོག་སྟེ་ཕུལ་དུ་བྱུང་བ་ཉན་པར་འགྱུར་བའམ། རིགས་ཐམས་ཅད་ཀྱི་གསང་བའི་རང་བཞིན་གྱི་ཚུལ་འདི་གླེགས་བམ་ལ་བྲིས་ཏེ་སེམས་ཅན་གང་དག་གི་ཁྱིམ་ན་གནས་པར་གྱུར་པ་དེ་རྣམས་ལ་ཇི་ལྟ་བ་བཞིན་དུ་
བཤད་པའི་ཕན་ཡོན་ཅན་གྱི་མངོན་པར་འདོད་པའི་དངོས་གྲུབ་ཚེ་འདི་ཉིད་ལ་འགྲུབ་པར་འགྱུར་ཏེ། ཇི་ལྟར་བྱ་བའི་རྒྱུད་ལ་སོགས་པའི་སྒྲུབ་པ་པོའི་གདུལ་བྱ་རྣམས་ལ་སྡིག་པ་ཡོངས་སུ་ཟས་པར་བྱ་བའི་ཕྱིར་དེ་བཞིན་གཤེགས་པ་རྣམས་ཀྱིས་ཐོག་མར་སྤྱོད་པ་ལ་སོགས་པའི་ཚུལ་མཛད་པ་དེ་བཞིན་དུ་འདིར་ནི་མ་ཡིན་ཏེ། བསྒོམས་པའི་སྟོབས་ཁོ་ནས་སྡིག་པ་ཡོངས་སུ་ཟད་པའི་ཕྱིར་རོ། །རྒྱུ་འདི་ཉིད་ཀྱིས་ཕྱིར་ཕྱི་རོལ་གྱི་བགེགས་རྣམས་འབྱུང་བ་མ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། བགེགས་མེད་དེ་བཞིན་བདུད་ཀྱང་མེད། །རྟོག་པར་ཞེས་བྱ་བ་ལ་མཉམ་པ་ཉིད་ཀྱི་ཡེ་ཤེས་བསྒོམས་པའི་སྟོབས་ཀྱིས་བདུད་བཞི་མི་དམིགས་པའི་ཕྱིར་རྟོག་པ་འདིར་དངོས་གྲུབ་ཐམས་ཅད་འཕེལ་བ་ཁོ་ནར་བྱིན་གྱིས་བརླབས་པ་སྟེ། ཇི་ལྟ་བ་བཞིན་དུ་བྲིས་པའི་དཀྱིལ་འཁོར་བྱས་པ་ལ་མངོན་པར་ཞེན་པ་རྣམས་ལ་བདུད་ཆེན་པོའི་གཟུགས་དམིགས་པའི་ནུས་པས་བདུད་ཉིད་དུ་བདག་འགྱུར་བ་དེ་བཞིན་དུ་འདིར་ནི་མ་ཡིན་ནོ། །བསྟན་པ་མེད་པ་ཉིད་ཅེས་བྱ་བ་ལ་སོགས་པ་ནི་གོ་སླའོ། །འདིས་ནི་འདི་སྐད་སྟོན་པར་འགྱུར་ཏེ། ཇི་ལྟ་བ་བཞིན་བྲིས་པའི་དཀྱིལ་འཁོར་རྣམས་ཇི་ལྟར་བཤད་པའི་ཚུལ་གྱིས་ཡང་དག་པར་མཆོད་ནས་གཤེགས་སུ་གསོལ་བ་ལ་སློབ་དཔོན་གྱིས་སྤྲུལ་པ་རང་གི་ལུས་ལ་བཅུག་སྟེ། དེ་བཞིན་གཤེགས་པ་རྣམས་ཀྱིས་གསོལ་བ་བཏབ་པའི་རྡོ་རྗེ་སེམས་དཔར་བདག་ཉིད་རྣམ་པར་བསམས་ལ། བྱིན་གྱིས་བརླབ་པའི་ཚིགས་སུ་བཅད་པ་བརྗོད་ནས། རྡོ་རྗེ་བསྲུང་བ་དང་རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་རྣམས་ཀྱིས་བདག་ཉིད་བསྲུང་བ་བྱས་ན་ཡང་རྡོ་རྗེ་སེམས་དཔའ་ཡང་ནས་ཡང་དུ་ཡོངས་སུ་བཟླས་ཏེ། ཡི་གེ་བརྒྱ་བ་ལན་གསུམ་བརྗོད་ནས་ལངས་ཏེ། ཇི་ལྟར་མངོན་པར་འདོད་པའི་གླེགས་བམ་བཀླག་པ་ལ་སོགས་པ་བྱའོ། །དགེ་བའི་བྱ་བས་གནས་པར་བྱའོ། །བདེ་བ་ཆེན་པོ་ཞེས་བྱ་བ་ལ་སོགས་པ་ལ། བདེ་བ་ཆེན་པོ་ནི་འདིར་མཉམ་པ་ཉིད་ཀྱི་ཡེ་ཤེས་ཏེ་དེ་ཉིད་རྡོ་རྗེའོ། །དེའི་གསང་བ་ནི་དེ་དང་རྒྱུ་མཐུན་པའི་དུམ་བུ་གཉིས་པ་ལ་རྩ་བའི་རྒྱུད་དང༌། རྒྱུད་ཕྱི་མའི་
རང་བཞིན་ཅན་གྱི་རྟོག་པའི་རྒྱལ་པོའོ། །དང་པོ་ཞེས་བྱ་བ་ནི་བསྐལ་བ་བཟང་པོ་ལས་སྔ་ནས་གནས་པའོ། །མཆོག་ཏུ་གྲུབ་པ་ཞེས་བྱ་བ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་ལ་ལྟོས་ན་མཆོག་གི་བསྒྲུབ་བྱ་དང༌། སྒྲུབ་པའི་ཆོ་ག་རྒྱས་པའི་རང་བཞིན་ཉིད་ཀྱི་ཕྱིར། མཆོག་ཏུ་གྲུབ་པ་ཡིན་ནོ། །ཡོངས་སུ་རྫོགས་པ་ནི་མཐར་ཐུག་པ་སྟེ། ཉོན་མོངས་པ་ཅན་གྱི་ཡིད་རྣམ་པར་དག་པའི་མཚན་ཉིད་ཀྱི་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་བསྟན་པའི་ངོ་བོ་དང༌། རྣམ་པར་སྨིན་པའི་སྐུ་དང༌། མཚན་མ་མེད་པ་རྣམ་པར་ཐར་པའི་སྒོ་དང༌། སྦྱིན་པའི་ཕ་རོལ་ཏུ་ཕྱིན་པ་དང༌། དམ་ཚིག་གི་ཕྱག་རྒྱ་བསྟན་པའི་ངོ་བོ་ཉིད་ཡིན་པའི་ཕྱིར་རོ། །དཔལ་མཆོག་དང་པོའི་རྒྱ་ཆེར་བཤད་པ། ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་དང༌། རྒྱུད་ཕྱི་མའི་བཤད་པ་རྫོགས་སོ།། །།རྒྱ་གར་གྱི་མཁན་པོ་པཎྜི་ཏ་མཁས་པ་ཆེན་པོ་མནྟྲ་ཀ་ལ་ཤ་དང༌། སྒྲ་བསྒྱུར་གྱི་ལོ་ཙཱ་བ་ཆེན་པོ་བོད་ཀྱི་དཔལ་ལྷ་བཙན་པོ་ལྷ་བླ་མ་དགེ་སློང་ཞི་བའི་འོད་ཀྱི་ཞལ་སྔ་ནས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།དེ་ལྟར་དུམ་བུ་གཉིས་པ་རྩ་རྟ་བའི་རྒྱུད་དང༌། རྒྱུད་ཕྱི་མ་གསུངས་ནས། ད་ནི་དུམ་བུ་གཉིས་པ་ཉིད་ཀྱི་རྟོག་པ་ཐམས་ཅད་ཀྱི་ཕྱི་མའི་རྒྱུད་ཀྱི་རང་བཞིན་སྒྲུབ་པ་པོའི་རང་བཞིན་མྱུར་དུ་གྲུབ་པ་བཤད་པ་ནི་དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་དང་པོ་གནས་ཉམས་དགར། །བདེ་བ་ཆེན་པོ་རྣམ་པར་བཞུགས། །ཞེས་བྱ་བར་སྦྱར་ཏེ། དེ་ནས་ཞེས་བྱ་བ་ནི་དེ་མ་ཐག་པ་སྟོན་པའི་ཚིག་ཡིན་ཏེ་དུམ་བུ་དང་པོ་དང་གཉིས་པ་ལས་གསུངས་པའི་དོན་གྱི་བསྒྲུབ་པའི་ཁྱད་པར་གྱིས་དངོས་གྲུབ་མྱུར་དུ་སྒྲུབ་པར་བཅོམ་ལྡན་འདས་རྡོ་རྗེ་སེམས་དཔས་གསུངས་ལ། སྔར་གསུངས་པའི་སྒྲུབ་པ་དེས། གལ་ཏེ་བདག་ཅག་མ་གྲུབ་པར་གྱུར་ན། ཡང་དོན་དེ་ཉིད་སྒྲུབ་པར་བྱའི། སྲོག་ལ་ཐུག་ཀྱང་དོར་བར་མི་བྱའོ་ཞེས་མངོན་པར་འདོད་པ་སྐྱེས་པའི་གདུལ་བྱ་རྣམས་ཀྱི་བསམ་པ་མཁྱེན་པའི་རྗེས་ཐོགས་ཉིད་ལ། དང་པོར་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་ཐོག་མར་
གནས་པའི་ཕྱིར་དང་པོར་རོ། །གནས་ཞེས་བྱ་བ་ནི་གཞལ་ཡས་ཁང་ཐམས་ཅད་ཀྱི་གཞིར་གྱུར་པས་ན་གནས་ཏེ། དང་པོ་ཡང་ཡིན་ལ་གནས་ཀྱང་ཡིན་པས་ན་དང་པོའི་གནས་སོ། །ཁྱད་པར་ཇི་ལྟ་བུ་ཞིག་ཅེ་ན། ཉམས་དགའ་བ་ཞེས་བྱ་བ་གསུངས་ཏེ། ཤིན་ཏུ་སྦྱོར་བ་དང་ལྡན་པའི་དཔལ་རྡོ་རྗེ་སེམས་དཔའ་ཞེས་བྱ་བ་ལ་སོགས་པས་ཡིད་དང་རྗེས་སུ་མཐུན་པ་ཡིན་པས་ན་ཡིད་དུ་འོང་བ་ཡིན་པའི་ཕྱིར་ཉམས་དགའ་བའོ། །རྣམ་མཁའ་ཡང་ཡིན་ལ་ཀུན་ཀྱང་ཡིན་པས་ན་ནམ་མཁའ་ཀུན་ཏེ། ཕྱོགས་བཅུ་ན་རྫས་དང་བྲལ་བའི་རང་བཞིན་རྣམས་སོ།། དེ་ན་ཟླ་བ་ལྟ་བུར་རབ་ཏུ་སྣང་བས་ན་གདུལ་བྱ་ཐམས་ཅད་ཀྱི་རྒྱུད་ལ་སོ་སོར་སྣད་བར་གྱུར་པ་དེ་ནི། ནམ་མཁའ་ཀུན་ལ་རབ་ཏུ་གནས། །ཞེས་བྱ་བའོ། །རྡོ་རྗེ་རིན་ཆེན་ཞེས་བྱ་བ་ནི་རྡོ་རྗེ་རྩེ་ལྔ་པས་རྩེ་མོ་མཚན་པའི་ཡིད་བཞིན་གྱི་ནོར་བུ་རིན་པོ་ཆེའོ། །དེ་རྣམས་ཀྱི་འོད་ནི་འོད་ཟེར་རྣམས་ཏེ་དེ་རྣམས་ཀྱིས་འདི་གསལ་ཞིང་སྣང་བར་བྱས་པས་ན་རྡོ་རྗེ་རིན་ཆེན་འོད་འབར་གསལ་ཞེས་བྱའོ། །བརྒྱན་ཅིང་ཞེས་བྱ་བ་ནི་དར་དང༌། གདུགས་དང༌། དྲི་དང༌། བདུག་སྤོས་དང༌། མར་མེ་དང༌། སྒོ་ཁྱུད་དང༌། རྟ་བ་བས་རྣམ་བ་སྣ་ཚོགས་དང༌། སྐས་དང༌། མདའ་ཡབ་ཀྱི་ཕྲེང་བ་ལ་སོགས་པས་བརྒྱན་ཅིང་སྤུངས་པའོ། །དྲི་མེད་པ་དང་ས་ལྡན་ཞེས་བྱ་བ་ནི་རང་གི་འོད་དྲི་མ་མེད་པ་ནམ་མཁའ་དང་མཉམ་པས་སྣང་བར་བྱས་ན་དྲི་མེད་མདངས་ལྡན་པའོ། །དེ་ནི་རྡོ་རྗེ་རིན་པོ་ཆེའི་འོད་ཀྱིས་གསལ་བར་བྱས་པ་ཡང་ཡིན་ལ་བརྒྱན་པ་ཡང་ཡིན་ཞིང་དྲི་མ་མེད་བའི་མདངས་དང་ལྡན་པ་ཡིན་པས་ན། རྡོ་རྗེ་རིན་ཆེན་འོད་ཀྱིས་གསལ། །བརྒྱན་ཅིང་དྲི་མེད་མདངས་ལྡན་པའོ། །ཞེས་བྱ་བ་སྟེ། བརྒྱན་ཅིང་མདངས་དང་ལྡན་པའི་གནས་དེར་རོ། །ཟུར་བཞི་པ་ཞེས་བྱ་བ་ལ་སོགས་པ་ནི་གོ་བར་ཟད་དོ། །རྡོ་རྗེ་ལྷ་མོའི་ཚོགས་ཀྱིས་མཆོད། །ཅེས་བྱ་བ་ནི་སངས་རྒྱས་ཐམས་ཅད་ཀྱི་གཟུངས་ཀྱི་ལྷ་མོའི་ཚོགས་ནི་རྡོ་རྗེ་ལྷ་མོའི་ཚོགས་ཏེ་དེ་རྣམས་ཁ་ཁྱེར་ལ་གནས་པ་རྣམས་ནི་མེ་ཏོག་ལ་སོགས་པའི་མཆོད་པས་མཆོད་ཅིང་བསྙེན་བཀུར་བྱེད་པའོ། །གྲྭ་ཡི་ཆ་ནི་ཐམས་ཅད་དང༌། །སྒོ་ཁྱུད་ཀྱི་ནི་
མཚམས་རྣམས་སུ། །ཟླ་བ་ཕྱེད་ལ་གནས་པ་ཡིས། །རྡོ་རྗེ་རིན་ཆེན་ཡང་དག་འབར། །ཞེས་བྱ་བ་ནི་གནས་འདི་དག་ཏུ་ཟླ་བ་ཁམ་པ་ལ་གནས་བའི་རྡོ་རྗེ་རིན་པོ་ཆེ་འོད་འབར་བ་ཡོད་པའོ། །རླུང་གིས་བཏེག་པ་ནི་ཞེས་བྱ་བ་ནི་བཏེག་པའོ། །སྣ་ཚོགས་བ་ནི་ཁ་དོག་ཐ་དད་པ་སྟེ། ཁ་དོག་སྔོན་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། དཀར་པོ་ཞེས་བྱ་བའི་ཐ་ཚིག་གོ །གནས་གང་དུ་ཞེ་ན། རྩེར་ཞེས་བྱ་བ་སྨོས་ཏེ་རྩེ་ནི་མཐར་ཏེ་ཐམས་ཅད་ཀྱི་འོག་གི་ཆར་རོ། །གང་གི་མཐར་ཞེས་ན་བ་དན་ཞེས་བྱ་བ་སྨོས་ཏེ། དེ་ལྟ་བུའི་བ་དན་དེའི་རྩེ་མོར་རོ། །དྲིལ་བུ་བཏགས་པ་སྒྲ་སྒྲོགས་པ་ཡིན་པས་ན། རླུང་གིས་བསྐྱོད་པ་སྣ་ཚོགས་པ། །བ་དན་རྩེར་བཏགས་དྲིལ་སྒྲ་སྒྲོགས། །ཞེས་བྱ་བའོ། །དྲ་བ་ནི་མུ་ཏིག་གི་ཆུན་འཕྱང་མཆོག་དབུས་སུ་བཏགས་པའོ། །མེ་ལོང་ནི་མེ་ལོང་གི་དཀྱིལ་འཁོར་ཉིད་དོ། །མེ་ཏོག་རྟག་ཅེས་བྱ་བ་ནི་མེ་ཏོག་གི་ཤིང་རྟག་ཏུ་མེ་ཏོག་ཐམས་ཅད་ཀྱི་ཆར་འབེབས་པའི་ཚུལ་གྱིས་རྟག་པར་གནས་པའོ། །མེ་ཏོག་གི་ཕྲེང་བ་ནི་མེ་ཏོག་གི་ཆུན་འཕྱང་ངོ༌། །རྒྱན་གྱིས་ཞེས་བྱ་བ་ནི་ཇི་སྐད་དུ་བཤད་པ་ལས་གཞན་པ་དག་ཡིན་པར་ཤེས་པར་བྱ་སྟེ། དྲ་བ་ལ་སོགས་པ་དེ་རྣམས་ཀྱིས་བསྐོར་བ་ནི་ཀུན་ནས་བསྐོར་ཏེ་མཛེས་པར་བྱས་པའོ། །བདེ་བ་ཆེན་པོ་ནི་ཐར་པ་ཆེན་པོ་སྟེ། དེའི་རྒྱུ་མཐུན་པ་ལས་བྱུང་བ་བཅོམ་ལྡན་འདས་རྡོ་རྗེ་སེམས་དཔའི་དང་པོའི་རྡོ་རྗེ་ནི་བདེ་བ་ཆེན་པོའི་རྡོ་རྗེའོ། །རྡོ་རྗེ་དང༌། རྡོ་རྗེ་རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་ནི་རྡོ་རྗེ་ཀུན་ནོ། །བདེ་བ་ཆེན་པོའི་རྡོ་རྗེ་ཆེན་པོ་དང༌། རྡོ་རྗེ་ཀུན་གྱིས་མངོན་པར་འདུ་བྱས་པ་ནི་དེ་ལས་བྱས་ཤིང་བསྐྱེད་པ་ཞེས་བྱ་བའི་ཐ་ཚིག་གོ །འཇིག་རྟེན་དང་འཇིག་རྟེན་ལས་འདས་པའི་གནས་རྣམས་ཀྱི་གཞིར་གྱུར་པས་ན། རྡོ་རྗེ་སེམས་དཔའི་བཞུགས་གནས་ཆེ། །ཞེས་བྱ་བ་སྟེ། དེ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་རྣམས་འདུས་པར་མཛད་པས་བཞུགས་གནས་སུ་མཛད་བ་ན། སངས་རྒྱས་ཀུན་གྱིས་རྗེས་བསྟེན་པ། །ཞེས་བྱའོ། །བྱང་ཆུབ་ཀྱི་རང་བཞིན་ཅན་
གྱི་སེམས་དཔའི་ནི་བྱང་ཆུབ་སེམས་དཔའ་སྟེ་རྡོ་རྗེ་སེམས་དཔའོ། །དེའི་གནས་སུ་གྱུར་པ་དེ་ཉིད་ཀྱིས་ན་མཆོག་གོ །རྡོ་རྗེ་འཆང་བ་ཀུན་ནི་རྡོ་རྗེ་སེམས་དཔའ་དང༌། རྡོ་རྗེ་རྒྱལ་པོ་དང༌། རྡོ་རྗེ་ཆགས་པ་ལ་སོགས་པ་དང༌། རྡོ་རྗེ་ཡིད་ལས་བྱུང་བ་ལ་སོགས་པའོ། །དེ་རྣམས་ཀྱི་གནས་ནི་བཞུགས་གནས་སོ། །དེ་ནི་བདེ་བ་ཆེན་པོའི་ནོར་བུ་རིན་ཆེན་གྱི་མཆོག་ཅེས་བྱ་བ་ཡིན་པས་ན། དེ་ལྟ་བུ་གང་ཡིན་པ་དེ་ལ་ནི། བདེ་བ་ཆེན་པོ་རྡོ་རྗེ་ཆེ། །ནོར་བུ་རིན་ཆེན་མཆོག་ཅེས་བྱ། །ཞེས་བྱ་བའོ། །རྡོ་རྗེ་ཆེན་པོའི་གཞལ་ཡས་ཁང༌། །དེ་ནས་བདེ་བ་ཆེན་པོ་རྡོ་རྗེ་སེམས་དཔའ་བཞུགས་པ་ནི་རྣམ་པར་གནས་པར་མཛད་པའོ། །དེ་ཇི་ལྟ་བུ་ཞེ་ན། ཐོག་མ་ཐ་མ་མེད་སེམས་པ། །ཞེས་བྱ་བ་ལ་སོགས་པ་གསུངས་ཏེ། དེ་ལ་ཐོག་མ་ཐ་མ་མེད་པ་ལ་སོགས་པ་ནི་བཤད་ཟིན་པའོ། །སྣ་ཚོགས་བཙུན་མོའི་ཚོགས་བཅས་པར། །ཞེས་བྱ་བ་ལ་སྣ་ཚོགས་ཞེས་བྱ་བ་ནི་རྒྱུ་དང་མི་རྒྱུ་པའི་དངོས་པོ་ཐམས་ཅད་ཀྱི་བདག་ཉིད་ཅན་ནོ། །བཙུན་མོའི་ཚོགས་གང་ཞིག་དང་ལྷན་ཅིག་བཞུགས་ཤེ་ན། རྡོ་རྗེ་ལྷ་མོས་ཡོངས་སུ་བསྐོར། །ཞེས་བྱ་བ་གསུངས་ཏེ། རྡོ་རྗེ་མཚོན་ཆ་མ་དང་རྡོ་རྗེ་ཀཱི་ལི་ཀཱི་ལི་དང༌། རྡོ་རྗེ་དྲན་པ་དང༌། རྡོ་རྗེ་སྙེམས་པ་ལ་སོགས་པའི་རྡོ་རྗེ་ལྷ་མོ་རྣམས་ཀྱིས་ཡོངས་སུ་བསྐོར་བ་ཡིན་གྱི། འཁོར་བའི་བུད་མེད་རྣམས་ཀྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ན། དེ་ནས་དང་པོའི་གནས་ཉམས་དགའ། །ཞེས་བྱ་བ་ནས་བརྩམས་ཏེ། རྡོ་རྗེ་ལྷ་མོས་ཡོངས་སུ་བསྐོར། །ཞེས་བྱ་བའི་བར་གྱིས་བཤད་པས་ནི་ཏིང་ངེ་འཛིན་དང་པོ་གསུངས་པ་ཡིན་ནོ། །ད་ནི་བདེ་ཆེན་རབ་སྒྲུབ་ཕྱིར། །ཞེས་བྱ་བ་ལ་སོགས་པས་ཏིང་ངེ་འཛིན་གཉིས་པ་གསུངས་པ་ཡིན་ཏེ་ཐར་པ་ཆེན་པོ་རབ་ཏུ་གྲུབ་པ་ནི་བདེ་བ་ཆེན་པོས་རབ་ཏུ་གྲུབ་པའོ། །གདུལ་བྱ་རྣམས་ཀྱི་འདོད་ཆགས་ཆེན་པོ་རྣམ་པར་དག་ཅིང་འདོད་ཆགས་ལ་སོགས་པ་དང་བྲལ་བས་སེམས་ཅན་སྨིན་ཅིང་གྲོལ་བའི་ཚུལ་གྱིས་འགྲུབ་བོ། །མ་ལུས་འདུལ་བ་ནི་སེམས་ཅན་གྱི་ཁམས་བསྐལ་བ་དང་ལྡན་པ་དང༌། མི་ལྡན་པ་རྣམས་ཀྱི་བྱང་ཆུབ་ཆེན་པོར་བསྐྱེད་
པ་ནི་མ་ལུས་འདུལ་བ་སྟེ། དེའི་དོན་དུའོ། །དངོས་གྲུབ་ཐམས་ཅད་ནི་འཇིག་རྟེན་དང་འཇིག་རྟེན་ལས་འདས་པའི་ལས་ཀྱི་རྒྱུ་རྣམས་གྲུབ་པ་སྟེ། དེ་རབ་ཏུ་གྲུབ་པའི་ཕྱིར་བཅོམ་ལྡན་འདས་ཀྱིས་ཉེ་བའི་སྙིང་པོ་དང་བཅས་པའི་སྙིང་པོ་བསྐལ་བ་དང་པོར་གསུངས་སོ་ཞེས་བྱ་བར་སྦྱར་རོ། །བཅོམ་ལྡན་འདས་ཁྱད་པར་ཇི་ལྟ་བུ་ཞེ་ན། དམ་ཚིག་ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཚུལ་ནི་དམ་ཚིག་གོ །དམ་ཚིག་མཆོག་ནི་དེ་བཞིན་གཤེགས་པ་རྣམས་ཏེ་དེ་རྣམས་ཀྱི་དམ་ཚིག་ནི་འདའ་བར་མི་བྱའོ། །རྒྱལ་པོས་ཀྱང་ནི་བསྲུང་བར་བྱ། །ཞེས་བྱ་བ་ནི་རྡོ་རྗེ་སེམས་དཔས་འདུལ་བའི་གདུལ་བྱའི་སེམས་ཅན་གང་ཡིན་པ་ལ་རྡོ་རྗེ་སེམས་དཔའི་ཚུལ་ཅན་གྱིས་དེ་བཞིན་གཤེགས་པ་རྣམས་ཀྱིས་ངེས་པར་སྤྲུལ་པར་བྱ་བ་ཡིན་པས་དེས་ན། རྒྱལ་པོས་ཀྱང་ནི་བསྲུང་བར་བྱ། །ཞེས་བྱ་བ་སྟེ་བཅོམ་ལྡན་འདས་ཀྱི་ཕྱག་རྒྱ་ཆེན་པོའོ། །རྡོ་རྗེ་སྙེམས་པའི་ཚུལ་འཆང་ཞིང༌། །སྙེམས་དང་བཅས་པས་རྡོ་རྗེ་གསོར། །ཞེས་བྱ་བ་ནི་རང་གི་ཕྱག་རྒྱ་ཆེན་པོ་བཅིངས་ནས་དེ་ཉིད་མངོན་སུམ་དུ་བྱེད་པའོ། །ཕྱག་རྒྱ་ཐམས་ཅད་མྱུར་གྲུབ་ཕྱིར། །ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ཕྱག་རྒྱ་ཆེན་པོ་ལ་སོགས་པ་ཐམས་ཅད་རིངས་པར་གྲུབ་པར་བྱ་བའི་ཕྱིར་རོ། །རྡོ་རྗེ་སེམས་དཔའ་མཆོག་གྲུབ་ཕྱིར། །ཞེས་བྱ་བ་ནི་རྡོ་རྗེ་འཆང་ཆེན་པོ་རྟོག་པའི་གདུལ་བྱ་རྣམས་ཀྱི་རྡོ་རྗེ་སེམས་དཔའི་དངོས་གྲུབ་ཀྱི་མཆོག་སྒྲུབ་པའི་ཕྱིར་རོ། །དངོས་གྲུབ་ཀུན་གྱི་ཐབས་ཆེན་པོ། །ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམས་ཐོབ་པར་བྱ་བའི་ཕྱིར་ཏེ་ཐབས་ཀྱང་ཡིན་ལ་ཆེན་པོ་ཡང་ཡིན་པས་ན་ཐབས་ཆེན་པོའོ། །བསོད་ནམས་ཀུན་གྱི་ཆེར་མཐོ་བ། །ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་བསོད་ནམས་ཐམས་ཅད་ནི་བསོད་ནམས་ཀུན་ནོ། །དེ་རྣམས་ཀྱི་ཆེན་པོ་ཡང་ཡིན་ལ་མཐོ་བ་ཡང་ཡིན་བས་ན་བསོད་ནམས་ཆེར་མཐོ་བ་སྟེ། སྙིང་པོ་དེ་དེའི་རྒྱུར་གྱུར་བའི་ཕྱིར་རོ། །ཡེ་ཤེས་ཕྱག་རྒྱར་ཡང་དག་ལྡན། །ཞེས་བྱ་བ་ནི་ཨ་ནུ་རཱ་ག་ཡ་མི་
ཞེས་བྱ་བའོ། །བཟླ་བའི་དོན་གྱིས་ཡེ་ཤེས་ནི་ཕྱག་རྒྱ་སྟེ་དེ་དང་བཅས་ཤིང་ཡང་དག་པར་ལྡན་པས་ཡེ་ཤེས་ཀྱི་ཕྱག་རྒྱར་ལྡན་པའོ། །དེ་སུ་ཞིག་ཡིན་ཞེ་ན། སྙིང་པོ་ཆེན་པོ་ཞེས་བྱ་བ་གསུངས་ཏེ་ཡི་གེ་ཧཱུཾ་ཞེས་བྱ་བའི་ཐ་ཚིག་གོ །དེ་ཉིད་ནི་ཐམས་ཅད་ཀྱི་མཆོག་ཏུ་གྱུར་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟོན་པར་བྱེད་པས་ན་དམ་པ་ཡིན་ཞེས་བྱའོ། །གང་གིས་ཞེས་བྱ་བ་ནི་སྙིང་པོ་གང་གིས་སོ། །བསོད་ནམས་མི་ལྡན་པའམ་ཞེས་བྱ་བ་ནི་མཚམས་མེད་པ་ལྔ་ལ་སོགས་པའི་ལས་རྣམས་བྱེད་པ་ཡང་ངོ༌། །དེ་བཞིན་དཀྱིལ་འཁོར་མེད་པའང་ཡིན། །ཞེས་བྱ་བ་ནི་དཀྱིལ་འཁོར་དག་ཏུ་ཇི་ལྟ་བ་བཞིན་དུ་མ་ཞུགས་པའོ། །དོན་ཡོད་པ་ནི་འབྲས་བུ་ཡོད་པའོ། །དེ་ཉིད་ཀྱིས་ན་ཐོགས་པ་མེད་པའོ། །མྱུར་བ་ནི་ཚེ་འདི་ཉིད་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་མྱུར་དུ་ཐོབ་པའོ། །མཆོག་ནི་དམ་པའོ། །དངོས་གྲུབ་ཐམས་ཅད་རྙེད་མི་དཀའ། །ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་རྙེད་པར་དཀའ་བ་མ་ཡིན་པར་འགྱུར་རོ། །བདེ་བ་ཆེན་པོ་རྡོ་རྗེ་ཆེ། །ཞེས་བྱ་བ་ནི་བླ་ན་མེད་པའི་བྱང་ཆུབ་སྟེ། དེའི་གསང་བ་མཆོག་གི་དམ་ཚིག་ཐོབ་པའི་རྒྱུའོ། །བསྟན་པ་ནི་སྙིང་པོ་སྟེ། རྡོ་རྗེ་ལྟར་མི་ཕྱེད་པའོ། །དངོས་གྲུབ་ཐམས་ཅད་སྒྲུབ་པ་ནི་རིགས་ཐམས་ཅད་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་གང་དག་བཤད་པ་དེ་རྣམས་དང་པོའི་ཚུལ་ནི་ཡི་གེ་ཧཱུཾ་ཡིན་པས་སྒྲུབ་ཅིང་སྐྱེད་པར་བྱེད་པའི་རྒྱུ་ཡིན་ཏེ་གང་གི་ཕྱིར་ཡི་གེ་ཧཱུཾ་བཟླས་པས་དེ་དག་ཐམས་ཅད་ཅད་གྲུབ་པར་གྱུར་པ་དེས་ན། རྟོག་པ་ཐམས་ཅད་མྱུར་གྲུབ་བྱེད། །ཅེས་བྱ་སྟེ། དུམ་བུ་དང་པོ་དང༌། གཉིས་པར་རྡོ་རྗེ་སེམས་དཔའ་ལ་སོགས་པའི་རྟོག་པ་གང་དག་བཤད་པ་དེ་རྣམས་མྱུར་དུ་སྒྲུབ་པར་བྱེད་པ་ཡིན་ནོ། །ཐོག་མཐའ་མེད་ཅིང་ཞེས་བྱ་བ་ནི། དང་པོ་ཞེས་བྱ་བ་ནི་ཐོག་མར་སྐྱེས་པའོ། །ཐ་མ་ནི་དུས་མཚམས་མེད་པའི་མྱ་ངན་ལས་འདས་པའོ། །གང་ལ་གཉིས་པོ་དེ་དག་མེད་པ་དེ་ནི་ཐོག་མཐའ་མེད་པ་སྟེ། ད་ལྟར་བྱུང་བའི་ངོ་བོས་རྟག་ཏུ་བཞུགས་པའོ། །དང་པོར་བྱུང་ཞེས་བྱ་བ་ནི་བསྐལ་པ་བཟང་པོ་ལ་སོགས་པའི་དང་པོར་ཡང་ད་ལྟར་
བྱུང་བའི་ངོ་བོ་ཉིད་ཁོ་ན་བྱུང་བའི་ཕྱིར་རོ། །མཆོག་དང་པོ་ཞེས་བྱ་བར་བཤད་ཅེས་བྱ་བ་ལས་མཆོག་ནི་དམ་པའོ། །དང་པོའི་ནི་བསྐལ་པ་བཟང་པོའི་ཐོག་མར་རོ། །བཤད་ཅེས་བྱ་བ་ནི་བསྟན་ཅིང་བསྒྲགས་པའོ། །ཚིག་ཀུན་གྱིས་ནི་ཅི་འདོད་དང༌། །ཞེས་བྱ་པ་ལ་ཚིག་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཚིག་ཐམས་ཅད་དེ། གླུའི་ཚུལ་བདུན་ནོ། །དེས་གདུལ་བྱ་ཇི་ལྟར་འདོད་པ་བཞིན་དུ་གསུང་པས་ན། ཚིག་ཀུན་གྱིས་ནི་ཅི་འདོད་པ། །ཞེས་བྱའོ། །ཆགས་པ་ཀུན་གྱིས་ཅི་དགའ་བར། །ཞེས་བྱ་བ་ནི་གླུའི་ལམ་གྱི་ཆགས་པ་ཞེས་བྱ་བ་གདངས་ཀྱི་བྱེ་བྲག་རྣམས་ཀྱིས་ཅི་དགའ་བར་ཞེས་བྱ་བ་གདུལ་བྱ་རྣམས་རྡོ་རྗེ་སེམས་དཔའ་ལ་སོགས་པ་ཐོབ་པར་བྱ་བའི་ཕྱིར་ཇི་ལྟར་དགའ་ཞིང་སྲེད་པ་དེ་བཞིན་དུ་སྙིང་པོ་དེ་གསུང་བར་མཛད་པའོ། །ཨ་ནུ་རཱ་ག་ཡ་མི་ཞེས་བྱ་བ་ནི་རྗེས་སུ་ཆགས་པར་བྱའོ་ཞེས་པ་སྟེ། རྡོ་རྗེ་སེམས་དཔའ་ལ་སོགས་པའི་རང་བཞིན་ཐབས་དང༌། ཤེས་རབ་ཀྱི་ངོ་བོ་ཇི་ལྟ་བ་བཞིན་དུ་གནས་པ་ཡང་དང་ཡང་དུ་མངོན་དུ་བྱའོ་ཞེས་བྱ་བ་ནི་རྗེས་སུ་ཆགས་པར་བྱ་བའོ་ཞེས་བྱ་བ་ཡིན་ནོ། །ཇི་བཞིན་དབབ་པའི་ཡེ་ཤེས་འཇུག །ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་བསྒོམས་པས་མངོན་སུམ་དུ་བྱ་བ་ནི་ཇི་བཞིན་དབབ་པ་སྟེ། དེར་འབབ་པ་ནི་ཡེ་ཤེས་སོ། །དེ་ལ་འཇུག་པ་ནི་མངོན་སུམ་དུ་བྱ་བའོ། །དེ་བས་ན་ཇི་ལྟ་བ་བཞིན་དུ་འབབ་པའི་ཡེ་ཤེས་ལ་རབ་ཏུ་འཇུག་པས་ན། ཅི་ཞིག་འབབ་པའི་ཡེ་ཤེས་འཇུག་ཅེས་བྱའོ། །ཉེ་བའི་སྙིང་པོར་བཅས་ཞེས་བྱ་བ་ནི་ཉེ་བའི་སྙིང་པོ་དང་ལྷན་ཅིག་ཏུ་བཅས་པའི་སྙིང་པོའོ། །ཉིད་ཅེས་བྱ་བ་ནི་ངེས་པར་གཟུང་བ་སྟེ་ཉེ་བའི་སྙིང་པོ་དང་བཅས་པ་ཁོ་ནའོ། །བསྐལ་པ་དང་པོ་ཞེས་བྱ་བ་ནི་བསྐལ་བ་བཟང་པོ་ལ་སོགས་པའི་དང་པོ་སྟེ་ཐོག་པ་མར་རོ། །གསུངས་ཞེས་བྱ་བ་ནི་བཀའ་སྩལ་པའོ། །འདི་སྐད་སྟོན་པ་ཡིན་ཏེ་བསྐལ་བ་བཟང་པོའི་དང་པོར་ཆགས་པའི་བསྐལ་བའི་ཚེ་སངས་རྒྱས་ཀྱི་ཞིང་ནམ་མཁར་གྱུར་པར་བཅོམ་ལྡན་འདས་རྡོ་རྗེ་སེམས་དཔའ་ཇི་སྐད་དུ་བཤད་པའི་གཞལ་ཡས་ཁང་དུ་བཞུགས་ནས་དང་པོ་ཁོ་ནར། །ཨ་ནུ་རཱ་ག་ཡ་མི་ཧཱུཾ་ཞེས་
བྱ་པའི་ཉེ་བའི་སྙིང་པོ་ཧཱུཾ་དང་བཅས་པ་བཅོམ་ལྡན་འདས་ཀྱིས་ཇི་ལྟ་བ་བཞིན་དུ་གསུངས་པ་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་པ་སྟོན་པར་བྱེད་པའི་ཐ་ཚིག་གོ །འདི་ནི་ཞེས་བྱ་བ་ནི་ཉེ་བའི་སྙིང་པོ་དང་བཅས་པའི་ཡི་གེ་ཧཱུཾ་ངོ༌། །གསུངས་པ་ཙམ་གྱིས་ཞེས་བྱ་བ་ནི་ཚིག་ཐམས་ཅད་ཀྱིས་བཀའ་སྩལ་པ་ཙམ་གྱིས་སོ། །སངས་རྒྱས་ཐམས་ཅད་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའོ། །སྲས་བཅས་པ་ནི་བྱམས་པ་ལ་སོགས་པ་བྱང་ཆུབ་སེམས་དཔའ་དང་བཅས་པའོ། །རྡོ་རྗེ་འཛིན་བཅས་ནི་རྡོ་རྗེ་སེམས་དཔའ་དང༌། རྒྱལ་པོ་དང༌། ཆགས་པ་དང༌། ལེགས་པ་ལ་སོགས་པ་རིགས་པའི་ལྷ་ཐམས་ཅད་དང་བཅས་པའོ། །རྡོ་རྗེ་འཛིན་པ་ཆེན་པོ་ནམ་མཁའི་ཁམས་ཐམས་ཅད་ན་རྟག་ཏུ་བཞུགས་པ། སྐུ་དང་གསུང་དང་ཐུགས་རྡོ་རྗེ་དངོས་པོ་ཐམས་ཅད་ཀྱི་བདག་ཉིད་ཅན་ཡིན་པས་སྣ་ཚོགས་པའོ། །དེ་དང་ལྷན་ཅིག་ཏུ་སྐད་ཅིག་གིས་འདུས་ཤིང་བྱོན་ནས་གཅིག་ཏུ་ཚོགས་པར་མཛད་པས་ནི་དེ་སྐད་ཅེས་བྱའོ། །རྡོ་རྗེ་འཆང་ཆེན་པོ་ཞེས་བྱ་བ་ནི་རྡོ་རྗེ་སེམས་དཔའ་རབ་ཏུ་བསྐུལ་བས་སོ། །ཐོག་མར་ཞེས་བྱ་བ་ནི་ཆགས་པའི་བསྐལ་པའི་ཐོག་མར་ཏེ་བསྐལ་བ་བཟང་པོའི་དང་པོའི་ཚེ་ནའོ། །ཡུད་ཀྱིས་བྱ་བ་ནི་ཡུད་ཙམ་ཁོ་ནས་ཡིན་གྱི་དུས་གཞན་དུ་ནི་མ་ཡིན་ནོ། །འཇིག་རྟེན་གསུམ་ཞེས་བྱ་བ་ནི་འདོད་པ་དང་བཞུགས་མེད་པའི་ཁམས་ཀྱི་རང་བཞིན་ནོ། །བྱུང་བ་ནི་བསྐྱེད་པའོ། །དེ་གང་གིས་ཕྱུང་ཞེ་ན། འདུས་པར་གྱུར་ནས་གཤེགས་པའི་རྣམ་པར་སྣར་མཛད་ལ་སོགས་པའི་ཇི་སྐད་དུ་བཤད་པའི་བདེ་བར་གཤེགས་པ་རྣམས་ཀྱིས་སོ། །དེ་ལྟར་དེས་སེམས་ཅན་གྱི་ཁམས་བསྐྱེད་པས་ཅི་ཞིག་མཛད་ཅེ་ན། དངོས་གྲུབ་རིགས་ཞེས་བྱ་བ་ལ་སོགས་པ་གསུངས་ཏེ་སེམས་ཅན་གྱི་ཁམས་ཇི་ལྟར་བསྐྱེད་པ་དེ་སངས་རྒྱས་ཉིད་དམ། རྡོ་རྗེ་འཛིན་པ་ཉིད་དུ་ཇི་ལྟར་འགྱུར་བ་དེ་ལྟར་སྟོན་ཅེས་བཅོམ་ལྡན་འདས་རྡོ་རྗེ་སེམས་དཔའ་ལ་དྲིས་པ་ཡིན་ནོ། །ཇི་ལྟར་དྲིས་པ་ཡིན་ཞེ་ན། །ཇི་ལྟར་འགྲོ་བ་
རང་གྲུབ་ཅེས་བྱ་བ་སྨོས་ཏེ། འཇིག་རྟེན་གསུམ་གྱི་རང་བཞིན་ཅན་གྱི་ཁམས་གསུམ་པའི་སེམས་ཅན་གྱི་ཁམས་རྣམས་སངས་རྒྱས་པ་ཉིད་དམ། རྡོ་རྗེ་འཆང་ཉིད་དུ་ཇི་ལྟར་འགྲུབ་པར་འགྱུར། དེ་བཞིན་གཤེགས་པ་དེ་དག་རང་ཉིད་བཅོམ་ལྡན་འདས་རྡོ་རྗེ་སེམས་དཔའ་ལ་དྲིས་པར་གྱུར་པའོ། །དེ་རྣམས་ཀྱི་ཞེས་བྱ་བ་ནི་བདེ་བར་གཤེགས་པ་རྣམས་ཀྱིའོ། །བཀའ་གསན་ནས་ཞེས་བྱ་བ་ནི་ཇི་སྐད་དུ་བཤད་པའི་ཐོས་པའི་རང་བཞིན་ཅན་གྱིས་ཞེས་པས་ངེས་པར་བཟུང་ནས་སོ། །རྡོ་རྗེ་འཛིན་ཞེས་བྱ་བ་ནི་རྡོ་རྗེ་སེམས་དཔའོ།། ཇི་ལྟ་བུ་ཞེ་ན་རང་ཉིད་ཀྱིས་ཞེས་བྱ་བ་ལ་སོགས་པ་སྨོས་ཏེ། རང་ཉིད་ཀྱིས་ཞེས་བྱ་བ་ནི་བདག་ཉིད་ཁོ་ནས་སོ། །འགྲོ་བ་ནི་སེམས་ཅན་གྱི་ཁམས་སོ། །འབྱིན་པ་ནི་འདོད་པ་ན་གཟུགས་དང་གཟུགས་མེད་པའི་ཁམས་བསྐྱེད་པའོ། །སངས་རྒྱས་ཉིད་ལ་སོགས་པ་སྩོལ་བར་མཛད་པས་ན་སྩལ་བའོ། །སངས་རྒྱས་ཉིད་ལ་སོགས་པ་ཐོབ་པར་བྱེད་པའི་རྒྱུར་གྱུར་པ་སྟོན་པར་མཛད་པས་ན་སྟོན་པའོ། །དེ་ཉིད་སངས་རྒྱས་ཉིད་ལ་སོགས་པ་སྐྱེད་པར་མཛད་པས་ན་བྱེད་པའོ། །ཚིག་ནི་འདི་སྐད་ཅེས་གསུངས་ཞེས་བྱ་བ་ནི་བཀའ་སྩལ་པར་གྱུར་པའོ། །ཚིག་ཇི་ལྟ་བུ་ཞིག་གསུངས་ཏེ་ཞེ་ན། འཇིག་རྟེན་འདོད་ཆགས་དང་ཞེས་བྱ་བ་ལ་སོགས་པ་སྨོས་ཏེ། ཉན་ཐོས་དང་རང་སངས་རྒྱས་ཀྱིས་མྱ་ངན་ལས་འདས་པའི་སེམས་ནི་སངས་རྒྱས་ཀྱི་བྱང་ཆུབ་ལས་ཕྱིར་ཕྱོགས་པ་ཡིན་ན་ཆགས་པ་དང་བྲལ་བའོ། །དེས་འདུལ་བའི་སེམས་ཅན་ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་རབ་ཏུ་འཇོག་ཅིང་དགོད་པས་ན་འདུལ་བ་སྟེ། དེ་ལྟ་བུས་འདུལ་བའི་འཇིག་རྟེན་གང་ཡིན་པ་དེ་ལ་དེ་སྐད་ཅེས་བྱའོ། །ཆགས་བྲལ་ཉིད་ཀྱིས་དག་པར་འགྱུར། །ཞེས་བྱ་བ་ནི་འདོད་ཆགས་དང་བྲལ་བས་འདུལ་བའི་འཇིག་རྟེན་ནི་ཇི་སྐད་དུ་བཤད་པའི་ཉན་ཐོས་དང་རང་སངས་རྒྱས་ཀྱི་བྱང་ཆུབ་བསྒོམས་པའི་སེམས་ཉིད་ཀྱིས་དག་པར་འགྱུར་ཞིང་ཉན་ཐོས་དང་རང་སངས་རྒྱས་ཀྱི་བྱང་ཆུབ་མངོན་དུ་བྱེད་པར་འགྱུར་རོ། །འདིར་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་
ཆུབ་དོན་དུ་གཉེར་བའི་འཇིག་རྟེན་རྡོ་རྗེ་ཐེག་པ་འདི་ལའོ། །འདོད་ཆགས་ཆེན་པོ་ནི་རྡོ་རྗེ་སེམས་དཔའ་སྟེ། ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །བདེ་བ་ཆེན་པོ་ཞེས་བྱ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་ངོ་བོར་ཐར་པ་ཆེན་པོའོ། །ཇི་ལྟར་ཞེས་བྱ་བ་ནི་ཐབས་གང་གིས་ན་ཞེས་རྣམ་པར་རྟོག་པའོ། །འགྲུབ་པར་འགྱུར་ཞེས་བྱ་བ་ནི་མངོན་སུམ་དུ་བྱེད་ཅིང་རྫོགས་པར་བྱེད་པའོ། །དེ་ཡི་ཚིག་དེ་གསན་པ་དང༌། །ཞེས་བྱ་བ་ནི་དཔལ་རྡོ་རྗེ་སེམས་དཔའི་ཚིག་འཇིག་རྟེན་ཆགས་བྲལ་ཞེས་བྱ་བ་ནས་འགྲུབ་པར་འགྱུར་ཞེས་བྱ་བའི་བར་གསན་པ་དང༌། རྒྱལ་བ་རང་ཉིད་ཀྱིས་ཚིག་འདི་སྐད་གསུངས་ཤིང་བཀའ་སྩལ་ཏོ། །ཚིག་ཇི་ལྟ་བུ་གསུངས་ཤེ་ན། ཁྱོད་ནི་ཐབས་ཆེན་ཉིད་ཡིན་ཏེ། །ཞེས་བྱ་བ་སྨོས་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱ་བ་ལ་ཁྱེད་ཉིད་ཐབས་ཆེན་པོ་ཡིན་ནོ་ཞེས་བྱ་བ་སྟེ་ཉིད་ཅེས་བྱ་བའི་སྒྲ་ནི་ངེས་པར་གཟུང་བའི་དོན་ཏོ། །བྱང་ཆུབ་སེམས་དཔའ་སྟེ་ཐོག་མའི་ལྷ་ཞེས་བྱ་བ་ནི་བྱང་ཆུབ་ཀྱི་མཚན་ཉིད་ཅན་གྱི་སེམས་ནི་བྱང་ཆུབ་ཀྱི་སེམས་ཏེ། དེའི་རྒྱུ་མཐུན་པ་ལས་བྱུང་བའི་ལྷག་པའི་ལྷ་ཡིན་པས་ན་བྱང་ཆུབ་སེམས་ཏེ་ཐོག་མའི་ལྷ་ཞེས་བྱ་བ་ལ་ལྷག་པའི་ལྷ་ཉིད་ཡིན་པས་ན་ལྷག་པའི་ལྷ་སྟེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཞེས་བྱ་བའི་ཐ་ཚིག་གོ །དེ་ཡང་བཅོམ་ལྡན་འདས་སེམས་ནི་འདོད་ཆགས་ཆེན་པོ་སྟེ། འདིའི་ལྷ་ཉིད་དོ་ཞེས་འོག་ནས་བཤད་པ་ཡིན་ནོ། །འདིས་ནི་དོན་འདི་སྐད་སྟོན་ཏེ་གང་གི་ཕྱིར་ཁྱེད་ནི་གདུལ་བྱ་རྣམས་ཀྱི་བྱང་ཆུབ་ཀྱི་སེམས་ལྷག་པའི་ལྷ་ཉིད་ཡིན་ལ་དེ་བས་ན་ཁྱོད་ཉིད་འདོད་ཆགས་ཆེན་པོ་དང༌། བདེ་བ་ཆེན་པོ་དགའ་བ་བསྐྱེད་པའི་ཕྱིར་རྒྱུར་གྱུར་པ་ཡིན་གྱི་གཞན་པས་ན། འདོད་ཆགས་ཆེན་པོ་བདེ་བ་ཆེ། །ཇི་ལྟར་འདིར་ནི་གྲུབ་པར་འགྱུར། །ཞེས་རྟོག་པ་འདིས་ཅི་ཞིག་བྱ་ཞེས་བྱ་བའི་ཐ་ཚིག་གོ །ཇི་སྲིད་འཁོར་བའི་གནས་སུ་ནི། །ཞེས་བྱ་བ་སོགས་པ་ནི་བཤད་ཟིན་ཏོ། །ཇི་སྲིད་སེམས་ནི་རྣམ་རྟོག་པ། །ཞེས་བྱ་བ་ལ་སོགས་པ་ལ། །འགྲོ་ལ་ཕན་ཕྱིར་སངས་རྒྱས་
འགྲུབ་པར་ཤོག །ཅེས་བྱ་བས་སེམས་ཅན་གཅིག་གི་ཆེད་དུ་ཡང་ཕྱི་མའི་མཐར་ཐུག་པ་མེད་པར་གནས་པར་མཛད་པས་ཇི་སྲིད་སྨོན་ལམ་གྱི་སྟོབས་ཀྱིས་འཕངས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་སེམས་ཡོད་པར་གྱུར་པ་དེ་ཇི་སྲིད་ཀྱི་བར་དུ་འཁོར་བ་ཆེན་པོར་མི་གནས་པའི་མྱ་ངན་ལས་འདས་པའི་རང་བཞིན་ཅན་གྱི་སངས་རྒྱས་བཅོམ་ལྡན་འདས་སུ་འགྱུར་བ་ཡིན་ནོ། །བྱང་ཆུབ་སེམས་ཅན་ལ་ཕན་ཕྱིར། །རྡོ་རྗེ་ཅན་གྱིས་ཅི་བདེར་གྱིས། །ཞེས་བྱ་བ་ལ་བྱང་ཆུབ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །སེམས་ཅན་སྐལ་པ་ཇི་ལྟ་བ་བཞིན་དུ་སངས་རྒྱས་ཉིད་དུ་སྒྲུབ་པ་ནི་ཕན་པའི་ཕྱིར་ཞེས་བྱ་བ་དེའི་དོན་དུ་ཀྱེ་རྡོ་རྗེ་ཅན་རྡོ་རྗེ་འཆང་བ་ཅི་བདེ་བར་གྱིས་ཤིག་ཅེས་དེ་སྐད་རྡོ་རྗེ་སེམས་དཔས་གསུངས་པ་ཡིན་ནོ། །འདི་སྐད་སྟོན་པ་ཡིན་ཏེ་ཐབས་དང་ཤེས་རབ་ཀྱིས་འདུལ་བའི་གདུལ་བྱ་རྣམས་ཀྱི་ཕྱིར་ཁྱེད་ཀྱི་རང་བཞིན་ཐོས་པ་དང༌། བསམ་པ་དང༌། བསྒོམ་པའི་རང་བཞིན་ཅན་གྱི་སྟོབས་ཀྱིས་གདུལ་བྱ་གང་ཞིག་གིས་བསྒྲུབས་ཤིང་མངོན་སུམ་དུ་བྱས་པས་སངས་རྒྱས་ཉིད་ཐོབ་པར་འགྱུར་པ་དེ་ལྟར་གྱིས་ཤིག་པའོ། །དེ་ནས་ཞེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཀྱིས་རྡོ་རྗེ་སེམས་དཔའ་ལ་དེ་སྐད་ཅེས་གསུངས་པ་དང༌། རང་གི་ལྷ་མོའི་དཀྱིལ་འཁོར་བསྐལ་པ་བཟང་པོའི་ཐོག་མ་སྟེ། སྔོན་དུ་གནས་པས་དང་པོར་གྱུར་པ་ཐོག་མ་ཞེས་པ་སྔར་སེམས་ཅན་ཐམས་ཅད་གཞུག་བར་བྱ་བའི་ཕྱིར་དཀྱིལ་འཁོར་བྱིན་གྱིས་བརླབས་ཤིང་བརྟན་པར་མཛད་ནས། རྡོ་རྗེ་ཀུན་གྱིས་ཞེས་བྱ་བ་དེ་བཞིན་གཤེགས་པའི་རིགས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བ་དེ་རྣམས་ཀྱི་དམ་ཚིག་གི་མཆོག་ནི་དེའི་ལྷ་མོའི་དཀྱིལ་འཁོར་ཏེ་དེ་ལས་སྐྱེས་པའོ། །ཇི་བཞིན་ཆོ་གས་སྒྲུབ་པ་ཉིད། །ཅེས་བྱ་བ་ནི་ཇི་ལྟར་བྲིས་བའི་དཀྱིལ་འཁོར་དུ་འཇུག་པ་ལ་སོགས་པའི་ཆོ་ག་འབྱུང་བར་འགྱུར་བ་དེ་བཞིན་དུ་བསམ་གཏན་གྱི་དཀྱིལ་འཁོར་དུ་རིང་པོར་མ་ལོན་པར་ནི་དེའི་སྣོད་དུ་གྱུར་པ་རྣམས་ལ་བཅོམ་ལྡན་འདས་རྡོ་རྗེ་སེམས་དཔས་
འཇུག་པ་ལ་སོགས་པའི་ཆོ་ག་མཛད་ལ། ཆོ་ག་དེས་སངས་རྒྱས་ཉིད་དང་རྡོ་རྗེ་འཛིན་པའི་དངོས་གྲུབ་ཉིད་སྒྲུབ་པ་ཡིན་ནོ། །དེ་ལྟར་ན། བདེ་བ་ཆེན་པོར་རབ་གྲུབ་ཕྱིར། །འདོད་ཆགས་ཆེན་པོ་དག་ཕྱིར་དང༌། །ཞེས་བྱ་བ་ནས་བརྩམས་ཏེ། ཇི་བཞིན་ཆོ་གས་སྒྲུབ་པ་ཉིད། །ཅེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ལ་སོགས་པས་ནི་གསུམ་པ་ཡིན་པར་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པས་བཟླས་བརྗོད་དང༌། བསྒོམ་པ་བྱའོ་ཞེས་བྱ་བ་འདིའི་ཆོ་ག་བསྟན་པའི་ཕྱིར། དེ་ནས་བཅོམ་ལྡན་འདས་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་རྒྱས་པ་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་བཅོམ་ལྡན་འདས་དེ་ནི་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་སེམས་ཅན་ཐམས་ཅད་དཀྱིལ་འཁོར་དུ་འཇུག་པས་སངས་རྒྱས་ཉིད་དང༌། རྡོ་རྗེ་འཛིན་པ་ཉིད་གྲུབ་ཅིང་བསྐྱེད་པར་གྱུར་ནས། དེའི་རྗེས་ཐོགས་ཉིད་ལ་སྔར། །ཇི་ལྟར་འགྲོ་བ་རང་གྲུབ་འགྱུར། །ཞེས་དངོས་གྲུབ་འདྲི་བར་མཛད་པ་གང་ཡིན་པའི་བཅོམ་ལྡན་འདས་དེ་རྣམས་ཀྱིས་བཅོམ་ལྡན་འདས་རྡོ་རྗེ་སེམས་དཔས་ལ། དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་བྲིས་ནས་སེམས་ཅན་རྣམས་ཇི་སྐད་དུ་གྲུབ་པར་བྱ་བའི་ཕྱིར། གསོལ་བ་བཏབ་པ་ཡིན་ནོ། །ཇི་ལྟར་གསོལ་བ་བཏབ་ཅེ་ན། བཅོམ་ལྡན་འདས་ཁྱེད་ལ་གསོལ་བ་ནི། །ཞེས་བྱ་བ་ལ་སོགས་པ་གསུངས་པ་ཡིན་ཏེ། སྙིང་པོ་རྟོག་པ་དམ་པ་འདི། །ཞེས་བྱ་བ་ནི་ཉེ་བའི་སྙིང་པོ་དང་བཅས་པའི་ཡི་གེ་ཧཱུཾ་གི་རྟོག་པ་དམ་པ་སྟེ། མཆོག་ཏུ་གྱུར་པ་བཤད་དུ་གསོལ། །ཞེས་ཤུགས་ཀྱིས་སྦྱར་རོ། །ལས་ཅི་ཞིག་བྱེད་ཅེ་ན། བདེ་ཆེན་མྱུར་དུ་གྲུབ་བྱེད་པའོ། །ཞེས་བྱ་བ་གསུངས་ཏེ། ཐར་པ་ཆེན་པོ་མྱུར་བ་ཉིད་དུ་སྒྲུབ་པར་བྱེད་པའོ། །དེ་རྣམས་ཀྱི་ནི་བཀའ་གསན་ནས། །ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསན་ནས། རྡོ་རྗེ་སེམས་དཔའ་བདེ་ཆེན་པོ། །ཞེས་བྱ་བ་
དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ན་ལྷ་མོའི་དཀྱིལ་འཁོར་གང་ཡིན་པ་དེ་བཀའ་སྩལ་བ་ནི་གསུངས་པའོ། །དེ་ནས་ཞེས་བྱ་བ་ནི་འདས་མ་ཐག་པ་སྟོན་པའི་ཚིག་གོ །གང་གི་ཕྱིར་ཞེས་བྱ་བ་ནི་རྒྱུ་སྟེ་གང་གི་ཕྱིར་དཀྱིལ་འཁོར་དུ་འཇུག་པ་མེད་པར་གདུལ་བྱ་སྐལ་བ་དང་ལྡན་པ་རྣམས་སངས་རྒྱས་ཉིད་དམ། རྡོ་རྗེ་འཛིན་པ་ཉིད་བསྟན་པའི་སྣོད་དུ་མི་འགྱུར་རོ། །དེ་བས་ན་དེ་རྣམས་སངས་རྒྱས་དང་བྱང་ཆུབ་སེམས་དཔའ་བསྟན་པའི་སྣོད་དུ་གྱུར་པ་རྣམས་ལ། སངས་རྒྱ་དང་བྱང་ཆུབ་སེམས་དཔའ་རྣམས་བསྟན་ཅིང་སྐལ་བ་དང་ལྡན་པ་ཉིད་དུ་ས་བོན་བསྐྱེད་པར་བྱ་བའི་ཕྱིར་དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་ཆེན་པོ་དམ་པ་སྟེ། མཆོག་ཏུ་གྱུར་པ་ཡང་དག་པར་བཤད་པར་བྱའོ་ཞེས་པའོ། །མིང་ཇི་སྐད་ཅེས་བྱ་ཞེ་ན། བདེ་བ་ཆེན་པོ་རྡོ་རྗེ་མཆོག །གསང་བ་དམ་པ་ཞེས་བཤད་དོ། །ཞེས་གསུངས་པ་ཡིན་ཏེ། བཤད་དོ་ཞེས་བྱ་བ་ནི་བསྟན་པ་ཞེས་པའོ། །དམ་ཚིག་གསུམ་ཞེས་བྱ་བ་ནི་རྡོ་རྗེ་དང༌། དྲིལ་བུ་དང༌། ཕྱག་རྒྱ་ནི་དམ་ཚིག་གསུམ་མོ། །གང་གིས་འདི་དག་ཐོབ་པ་ནི་དམ་ཚིག་གསུམ་ཐོབ་པའོ། །སློབ་དཔོན་དུ་རབ་ཏུ་གྱུར་པ་ཞེས་བྱ་བ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་དབང་བསྐུར་བར་གྱུར་པ་ནི་སློབ་དཔོན་དུ་རབ་ཏུ་གྱུར་པ་ཡིན་ནོ། །རང་གི་ཕྱག་རྒྱ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ་རང་གི་ཕྱག་རྒྱ་དེས་འཁོར་ལོའི་ཆོ་ག་ཐམས་ཅད་བྱའོ། །ཇི་ལྟ་བུ་ཞེ་ན། རྟག་ཏུ་རྡོ་རྗེ་དྲིལ་འཆང་ཞིང༌། །ཞེས་བྱ་བ་སྨོས་ཏེ། རྡོ་རྗེ་སེམས་དཔའི་སྦྱོར་བ་བྱས་ལ་དཀྱིལ་འཁོར་གྱི་ལས་ལ་རྡོ་རྗེ་དང་དྲིལ་བུ་རྟག་ཏུ་འཆང་བས་དཀྱིལ་འཁོར་ཐམས་ཅད་ཀྱི་ལས་རྣམས་རྟག་ཏུ་བྱའོ་ཞེས་བྱ་བའི་ཐ་ཚིག་གོ །ཅིའི་ཕྱིར་རྡོ་རྗེ་དང་དྲིལ་བུ་བཅང་བར་བྱ་ཞེ་ན་གང་གི་ཕྱིར། རྡོ་རྗེ་སེམས་དཔའ་ལ་སོགས་པའི་སྐུ་དང་གསུང་དང་ཐུགས་རྡོ་རྗེའི་ངོ་བོའི་རྟོག་པ་ཐམས་ཅད་ནི་རྡོ་རྗེ་དང་དྲིལ་བུ་འཆང་བའི་སྟོབས་ཀྱིས་དཀྱིལ་འཁོར་དུ་ཡང་དག་པར་འཇུག་ཅིང་རབ་ཏུ་འཇུག་པར་འགྱུར་རོ། །དེ་བས་
ན་དཀྱིལ་འཁོར་ཐམས་ཅད་དུ་རབ་ཏུ་འཇུག་ཅིང་འབེབས་པར་བྱེད་པའི་རྡོ་རྗེ་དྲིལ་བུ་ལ་ནི་དམ་ཚིག་གསུམ་ཞེས་བྱའོ། །རྡོ་རྗེ་ཐམས་ཅད་ཡང་དག་པར་འབེབས་པས་དེ་ནི་སྔགས་གྲུབ་པའི་ཕྱག་རྒྱ་ཡིན་ནོ། །གང་གི་ཕྱིར་དེ་ལྟར་ཡིན་པས་དེས་ན་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་སྒྲུབ་པ་ནི་རྡོ་རྗེ་དྲིལ་བུ་དཀྲོལ་བར་བྱའོ། །རྡོ་རྗེ་དང་དྲིལ་བུ་བསྒྲགས་པ་དེས། །ཇི་ལྟར་འགྱུར་ཞེ་ན། ཆོ་ག་ལྷག་གམ་མཚང་ཡང༌། །འགྲུབ་འགྱུར་སྨད་པར་མི་བྱའོ། །ཞེས་བྱ་བ་གསུངས་ཏེ། རྣལ་འབྱོར་འབད་པས་འཇུག་པར་གྱུར་ཀྱང༌། གལ་ཏེ་བག་མེད་པས་ཆོ་ག་ལྷག་པའམ་མཚང་བར་གྱུར་ན་འདི་ལ་དྲིལ་བུའི་སྒྲས་བསྐང་བར་བྱས་ཏེ་དེས་ཉེས་པ་གཉིས་དང་ལྡན་པར་གྱུར་པའི་རྣལ་འབྱོར་པ་ནི་ཇི་ལྟར་མངོན་པར་འདོད་པའི་དངོས་གྲུབ་ངེས་པར་འགྲུབ་པར་འགྱུར་རོ། །དེ་ནི་ཉེས་པ་གཉིས་པོ་དེས་སྨད་པར་བྱ་བ་མ་ཡིན་ནོ་ཞེས་གསུངས་པ་ཡིན་ནོ། །ཡང་དཀྱིལ་འཁོར་ཇི་ལྟར་བསྒྲུབ་པར་བྱ་ཞེ་ན། དཀྱིལ་འཁོར་གནས་ནི་ཞེས་བྱ་བ་ལ་སོགས་པ་གསུངས་ཏེ། ས་སྤྱང་བ་དང་ཡོངས་སུ་གཟུང་བ་དང༌། བྱིན་གྱིས་བརླབ་པའི་ཆོ་ག་གསང་བ་མཐོན་པོ་ལས་གསུངས་པའི་སྦྱོར་བས་སམ། གསང་བའི་རྒྱུད་ལས་བཤད་པའི་ཚུལ་གྱིས་དཀྱིལ་འཁོར་བྲི་བར་བྱ་བའི་ཕྱིར་གནས་སྤྱང་བ་ལེགས་པར་བྱས་ལ་དཀྱིལ་འཁོར་གྱིས་དེའི་དབུས་སུ་དེར་རིག་པའི་བརྟུལ་ཞུགས་སྔོན་དུ་སྤྱད་པའི་སློབ་དཔོན་གྱིས་དཀྱིལ་འཁོར་བསྒྲུབ་པར་བྱའོ་ཞེས་བྱ་བ་ནི་ཆོ་ག་བཞིན་ཞེས་བྱ་བའི་དོན་ཡིན་ནོ། །དེ་ཇི་ལྟར་བསྒྲུབ་པར་བྱ་ཞེ་ན། དངོས་གྲུབ་བྱིན་བརླབ་ཆོ་ག་ཡིས། །ཞེས་བྱ་བ་གསུངས་ཏེ། དཀྱིལ་འཁོར་གྱི་དངོས་གྲུབ་བྱིན་གྱིས་བརླབ་པའི་ཆོ་ག་ནི་དངོས་གྲུབ་བྱིན་གྱིས་བརླབ་པའི་ཆོ་གའོ། །དཀྱིལ་འཁོར་གྱི་དངོས་གྲུབ་ཀྱི་རྗེས་ཐོགས་ཉིད་ལ་འོག་ནས་སྟོན་པའི་གླུ་དང་རོལ་མོའི་མཆོད་པའི་ཆོ་གས་བྱ་བ་ཡིན་ནོ། །དེ་ལ་དཀྱིལ་འཁོར་ཞེས་བྱ་བ་ནི་ལྷ་མོའི་དཀྱིལ་འཁོར་ཏེ་བསྒྲུབ་པར་བྱའོ། །ད་ནི་དངོས་གྲུབ་བྱིན་གྱིས་བརླབ་པའི་ཆོ་ག་བསྟན་པའི་ཕྱིར། གླུ་དང་རོལ་མོ་ཞེས་
བྱ་བ་ལ་སོགས་པ་བསྟན་པ་ཡིན་ཏེ་དེ་ལ་རྡོ་རྗེ་གླུ་ལ་སོགས་པ་ནི་གླུའོ། །རྡོ་རྗེ་རོལ་མོ་ལ་སོགས་པ་ནི་རོལ་མོའོ། དེ་བདག་ཉིད་ཀྱིས་མཆོད་པ་ནི་མཆོད་པ་ཡིན་པས་གླུ་དང་རོལ་མོའི་མཆོད་པའོ། །མེ་ཏོག་སྤོས་སོགས་མཆོད་པ་ཡིས། །ཞེས་བྱ་བ་ནི་མཆོད་པ་རྣམ་པ་ལྔ་དང༌། གདུགས་དང༌། རྒྱལ་མཚན་དང༌། བ་དན་དང༌། མེ་ཏོག་གི་ཕྲེང་བ་དང༌། དར་དང༌། བླ་བྲེ་དང༌། ན་བཟའ་དང༌། མེ་ཏོག་གི་ཤིང་ལ་སོགས་པ་ནི། སྤོས་ལ་སོགས་པ་མཆོད་པ་ཡིས། །ཞེས་བྱའོ། །མཆོག་དང་པོ་ནི་བརྟག་པར་བྱ། །ཞེས་བྱ་བ་ནི་བཅོམ་ལྡན་འདས་ཀྱིས་ལྷ་མོའི་དཀྱིལ་འཁོར་ཁ་དོག་དང་དབྱིབས་ཀྱི་བདག་ཉིད་བསམ་པར་བྱ་བའི་ཚུལ་ཅན་གྱིས་བཅོམ་ལྡན་འདས་ཀྱི་ལྷ་མོའི་དཀྱིལ་འཁོར་བསྐྱེད་པར་བྱའོ། །ཇི་སྙེད་པ་ཞེས་བྱ་བ་ནི་ཕྱིའི་ཡོ་བྱད་ཇི་སྙེད་པས་སོ། །ཅི་འདོད་པ་ཞེས་བྱ་བ་ནི་ཚད་ཅི་འདོད་པའོ། །ཅིའི་ཕྱིར་ཚད་ཅི་འདོད་པར་བརྟག་པར་བྱ་ཞེ་ན། མཆོག་དང་པོ་ཞེས་བྱ་བ་སྨོས་ཏེ་གང་གི་ཕྱིར་འདི་ནི་མཆོག་དང་པོ་ཡིན་ཞིང་ཆོས་ཀྱི་དབྱིངས་ཀྱི་རྒྱུ་མཐུན་པ་ལས་འབྱུང་བ་ཡིན་པས་ན་ཐོག་མ་མེད་ཅིང་ཐ་མ་དང་དབུས་ཀྱི་ཆ་ཡང་མེད་པ་ཡིན་ནོ་ཞེས་བྱ་བའི་ཐ་ཚིག་གོ །རྩ་མོ་ཞེས་བྱ་བ་ནི་མཐའི་ཆའོ། །གང་ལ་མཐའ་ཡོད་པ་མ་ཡིན་པ་དེ་ནི་མཐའ་ཡས་མཆོག་སྟེ། མཐའ་དང་བྲལ་བའོ། །བླ་ན་མེད་པ་ཞེས་བྱ་བ་ནི་འདིའི་གོང་ན་གཞན་མེད་པས་བླ་ན་མེད་པའོ། །རྒྱུ་འདི་ཉིད་ཀྱིས་ན་འདི་ལ་འདྲ་བའི་དཔེ་གཞན་མེད་པས་ན་དཔེ་མེད་པའོ། །ནམ་མཁའ་ཀུན་ལ་རབ་ཏུ་གནས། །ཞེས་བྱ་བ་ནི་ཟླ་བ་ལྟར་ཐམས་ཅད་དུ་སྣང་བར་གྱུར་པའི་ཕྱིར་རོ། །གྲོང་ཁྱེར་ཞེས་བྱ་བ་ནི་དཀྱིལ་འཁོར་རོ། །དེ་ལྟར་བྱུང་བའི་ངོ་བོ་ཉིད་ཀྱིས་རྟག་ཏུ་བཞུགས་པས་ན་མི་འགྱུར་མཆོག་ཅེས་བྱ་སྟེ། རྟག་པ་ཞེས་བྱ་བའི་ཐ་ཚིག་གོ །ཇི་ལྟར་ན་མི་འགྱུར་བའི་མཆོག་པ་ཡིན་ཞེ་ན། ཐོག་མ་མེད་མཆོག་ཅེས་བྱ་བ་ལ་སོགས་པ་གསུངས་ཏེ། གང་གི་ཕྱིར་
འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ཐམས་ཅད་བྱུང་ནས་རྟག་ཏུ་འཁོར་བར་བཞུགས་པའོ། །ཡང་ཞེས་བྱ་བའི་སྒྲས་ནི་མ་བྱུང་ན་ཡང་ཞེས་སྟོན་པ་ཡིན་ནོ། །བཞུགས་པ་ནི་ད་ལྟར་བྱུང་བའི་ངོ་བོ་ཉིད་ཀྱིས་གནས་ཤིང་བཞུགས་པའོ། །དེ་བས་ན། གྲོང་ཁྱེར་དེ་ནི་མི་འགྱུར་མཆོག །ཅེས་བྱའོ། །གལ་ཏེ་བཞུགས་གནས་དེ་ནམ་མཁའ་ཐམས་ཅད་ལ་གནས་པས་ནམ་མཁའ་དང་མཉམ་པ་ཡིན་ནོ། །ཇི་ལྟར་ན་སོ་སོའི་སྐྱེ་བོ་རྣམ་པར་རྟོག་པ་ལྷན་ཅིག་མ་ཚང་བས་ཀུན་དུ་གང་བ་ཡིན་ཞེ་ན། ཀུན་མཆོག་མཉམ་པ་ཉིད་ཀྱིས་ན། །ཞེས་བྱ་བ་གསུངས་ཏེ། དེ་བཞིན་ཉིད་བསྒོམས་པས་སོ་ཞེས་བྱ་བའི་ཐ་ཚིག་གོ །ཐ་མ་དབུས་མེད་ནམ་མཁའ་ནི། །ཞེས་བྱ་བ་ནི་ནམ་མཁའ་གང་ལ་མཐའ་འམ་དབུས་མེད་པ་དེ་ནི་གྲོང་ཁྱེར་འདིའོ། །མཐའ་དང་དབུས་མེད་པ་ན་འདི་ལ་དཀྱིལ་ཡང་མེད་དོ་ཞེ་ན། འདི་ཡི་དབུས་མར་བརྟགས་པ་ན། །ཞེས་བྱ་བ་གསུངས་ཏེ། འདིའི་དབུས་མང་བརྟགས་པས་ན་འདི་དབུས་ཀྱི་ཐ་སྙད་འཇུག་པ་ཡིན་ནོ། །ཐ་མ་བཞིའི་ཆ་མཉམ་པ་ལ་ལྟོས་ནས་ཚད་དུ་བྱ་བ་ཉིད་འདིའི་དབུས་ཀྱི་ཆར་ཇི་ལྟར་བརྟག་པར་བྱ་ཞེ་ན། དེའི་ཕྱིར་ཕྱག་རྒྱའི་སྦྱོར་བའི་ཏིང་ངེ་འཛིན་གྱིས་རྣམ་པར་བརྟག་པ་འདིའི་དབུས་ཉིད་ཅེས་གསུངས་ཏེ། མི་འགྱུར་བའི་རང་བཞིན་གྱིས་གནས་འདི་ནས་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཏིང་ངེ་འཛིན་གྱིས་དབུས་ཀྱི་ཆར་སློབ་དཔོན་གྱིས་བརྟག་པར་བྱའོ། །དེ་ནས་ཅི་ཞིག་བྱ་ཞེ་ན། དེ་ལ་ཞེས་བྱ་བ་ལ་སོགས་པ་གསུངས་ཏེ། དེར་ཞེས་བྱ་བ་བཞུགས་གནས་དེའི་དབུས་སུ་སློབ་དཔོན་གྱིས་ཡུ་བར་བཅས་ཞེས་བྱ་བ་སྡོང་བུ་དང་བཅས་པའི་པདྨ་ཆེན་པོ་བྱའོ། །དེ་ཁྱད་པར་ཇི་ལྟ་བུ་ཞེ་ན། སྣ་ཚོགས་འདབ་མས་ཡང་དག་ཁེབས། །ཞེས་བྱ་བ་གསུངས་ཏེ། ཁ་དོག་སྔོན་པོ་དང༌། སེར་པོ་དང༌། དམར་པོ་དང༌། ལྗང་གུ་དང༌། དཀར་པོའི་འདབ་མ་དང་ལྡན་པས་ཀུན་དུ་ཁེབས་པའོ། །ཅིའི་ཕྱིར་ཁ་དོག་སྣ་ལྔས་ཀུན་
ཏུ་ཁེབས་པ་ཡིན་ཞེ་ན། ཐམས་ཅད་དག་པ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བྱང་ཆུབ་ཀྱི་སེམས་ཆེན་པོ་དང༌། མེ་ལོང་ལྟ་བུ་དང༌། མཉམ་པ་ཉིད་དང༌། སོ་སོར་རྟོག་པ་དང༌། བྱ་བ་གྲུབ་པའི་ཡེ་ཤེས་ཀྱི་རང་བཞིན་ཅན་དཔལ་རྡོ་རྗེ་སེམས་དཔའི་ཐམས་ཅད་དག་པའི་གདན་དུ་གྱུར་པ་ནི་པདྨ་དེ་ཡིན་ལ། དེ་བས་ན་ཡེ་ཤེས་སྣ་ཚོགས་པའི་རྣམ་པར་དག་པ་སྟོན་པར་བྱེད་པས་ན་ཁ་དོག་སྣ་ཚོགས་པ་ཡིན་ནོ། །དེ་ནས་ཐིག་ནི་གདབ་བྱས་ཏེ། །ཞེས་བྱ་བ་ནི་ཇི་སྐད་བཤད་པའི་ཚུལ་དང༌། སློབ་མ་དཀྱིལ་འཁོར་གྱི་ལྷ་ཐམས་ཅད་ལྷག་པར་གནས་པར་བྱས་ནས་ཉི་མ་འཆར་བའི་དུས་སུ་སློབ་དཔོན་གྱིས་ཇི་སྐད་བཤད་པའི་ཆོ་གས་སྲད་བུ་དཀྱིལ་འཁོར་གྱི་ཉིས་འགྱུར་དང་དེ་ནས་ཐིག་གདབ་པར་བྱའོ། །ཚད་ཇི་ཙམ་ཞེ་ན། ནམ་མཁའ་ཀུན་གྱི་ཚད་ཀྱིས་ནི། །ཚད་ནི་ཚད་མེད་པ་ཉིད་ཡིན། །ཞེས་བྱ་བ་གསུངས་ཏེ། གང་གི་ཕྱིར་འདི་ནི་ནམ་མཁའ་དང་མཉམ་པ་ཡིན་པས་དེའི་ཕྱིར། འདི་ལ་ཁྲུ་ལ་སོགས་པའི་ཚད་ཀྱིས་ངེས་པར་མི་བྱ་བའི་ཐ་ཚིག་གོ །ད་ནི་མི་མཉམ་མེད་པས་ཞེས་བྱ་བ་ལ་སོགས་པས་འདིའི་དབྱིབས་སུ་གསུངས་པ་ཡིན་ཏེ་ཤར་དང༌། ལྷོ་དང༌། ནུབ་དང༌། བྱང་གི་ངོས་བཞིའི་རི་མོ་དང་བཅས་པའི་ཟུར་བཞིའོ། །ཅིའི་ཕྱིར་ཞེ་ན། མི་མཉམ་མེད་པས་ཞེས་བྱ་བ་ལ་སོགས་པ་གསུངས་ཏེ། བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་ཀྱི་ཚུལ་གྱིས་གནོད་སེམས་ལ་སོགས་པ་མི་མཉམ་ཞིང་མི་ཟད་པ་དང་བྲལ་བས་མི་མཉམ་པ་མེད་པའོ། །དེ་ལྟར་ན་མི་མཉམ་པ་མེད་པས་ན་དཀྱིལ་འཁོར་འདི་ནི་ཟུར་བཞི་པ་ཡིན་ནོ། །དྲན་དང་དབང་པོ་སྒོ་བཞི་སྟེ། །ཞེས་བྱ་བ་འདི་ལ་ཤར་དང༌། ལྷོ་དང༌། ནུབ་དང༌། བྱང་གི་སྒོ་བཞི་ཡོད་པས་ན་སྒོ་བཞིའོ། །དྲན་ཞེས་སྨོས་པ་ནི་དད་པ་དང༌། བརྩོན་འགྲུས་དང༌། དྲན་པ་དང༌། ཏིང་ངེ་འཛིན་དང༌། ཤེས་རབ་ཀྱི་དབང་པོ་སྒོ་བཞིའི་ཚུལ་དུ་གྱུར་པ་འདི་ལས་ཐར་པའི་གྲོང་ཁྱེར་དུ་འཇུག་པར་འགྱུར་རོ་ཞེས་བསྟན་པར་བྱ་བའི་ཕྱིར་འདི་སྐད་སྨོས་པ་ཡིན་ནོ། །བསམ་
གཏན་རྣམས་ཀྱི་རྟ་བབས་བཞི། །ཞེས་བྱ་བ་ནི་འདི་ནི་བསམ་གཏན་དང་པོ་དང༌། གཉིས་པ་དང༌། གསུམ་པ་དང༌། བཞི་པ་དང་ལྡན་ནོ་ཞེས་བསྟན་པའི་ཕྱིར་རྟ་བབས་བཞི་དང་བཅས་པ་ཡིན་ནོ། །ཏིང་འཛིན་ཁྱམས་སུ་བཤད་པ་ཡིན། །ཞེས་བྱ་བ་ནི་གཞལ་ཡས་ཁང་གི་ཕྱི་རོལ་ཀུན་ནས་ཡོངས་སུ་བསྐོར་བར་ཁ་ཁྱེར་གྱིས་བསྐོར་བ་དེ་ནི་ཁྱམས་ཞེས་བྱ་སྟེ། དེ་ནི་འདིའི་ཏིང་ངེ་འཛིན་ནོ་ཞེས་བཤད་ཅིང་བསྟན་ཏོ། །ཁྱམས་ལ་བརྟེན་པ་ཞེས་བྱ་བ་ལ་སོགས་པ་ལ་དཀྱིལ་འཁོར་གྲྭ་བཞིར་ཟླ་བ་ཕྱེད་པ་ལ་གནས་པའི་རྡོ་རྗེ་རིན་པོ་ཆེའི་ཚུལ་གྱི་གཟུངས་རྣམས་ནི་རྡོ་རྗེའི་བདག་ཉིད་ཅན་གྱི་གཟུངས་རྣམས་སོ། །ཁྱམས་ལ་བརྟེན་པ་ལ་ཡང་ཡིན་ལ། རྡོ་རྗེའི་བདག་ཉིད་ཅན་གྱི་གཟུངས་རྣམས་ཀྱང་ཡིན་པས། ཁྱམས་ལ་བརྟེན་པའི་རྡོ་རྗེ་བདག་ཉིད་ཅན་གྱི་གཟུངས་རྣམས་ཞེས་བྱའོ། །འདི་ཉིད་ལྷ་མོ་སྟེ། དེ་རྣམས་ཀྱིས་མཆོད་པའོ། །རྒྱན་རྣམས་ཀུན་གྱིས་ཞེས་བྱ་བ་ནི་གོས་དང་གདུགས་ལ་སོགས་པས་བཀྲ་བ་གང་ཡིན་པ་དེ་ནི་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ། །ཐམས་ཅད་དུ་ཁྱབ་པས་ན་ཀུན་དུ་འགྲོ་བ་སྟེ་ནམ་མཁའ་ཐམས་ཅད་ཁྱབ་པའོ། །འདིས་སེམས་ཅན་ཐམས་ཅད་རྣམས་འདུལ་བས་ན་འདུལ་བ་སྟེ། སངས་རྒྱས་དང་རྡོ་རྗེ་འཆང་ལ་སོགས་པའོ། །བསྐྱོད་ནི་གཡོ་བར་བྱས་པའོ། །འཇིག་རྟེན་དང་འཇིག་རྟེན་ལས་འདས་པའི་བསྟན་པའི་ཆོས་རྣམས་སྣ་ཚོགས་པའོ། །དམ་པ་སངས་རྒྱས་ལ་སོགས་པའི་ཆོས་ཡིན་པས་ན། འདུལ་བས་བསྐྱོད་པ་སྣ་ཚོགས་མཆོག །དམ་ཆོས་ཞེས་བྱའོ། །དེ་ལ་མཆོག་ཀྱང་ཡིན་ལ། དེ་ཐམས་ཅད་དུ་འགྲོ་བ་ཡང་ཡིན་པས་ན། འདུལ་བས་བསྐྱོད་པ་སྣ་ཚོགས་མཆོག ། དམ་ཆོས་མཆོག་སྟེ་ཀུན་དུ་འགྲོ། །ཞེས་བྱའོ། །ཡོན་ཏན་འདི་གསལ་བར་བསྟན་པར་བྱ་བའི་ཕྱིར་རླུང་གིས་བསྐྱོད་པ་སྣ་ཚོགས་པའོ། །བ་དན་རྩེར་བཏགས་དྲིལ་སྒྲ་སྒྲོགས། །ཞེས་བྱ་བ་འདི་བྲིས་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པ་ནི། མེ་ལོང་ལྟ་བུའི་ཡི་
ཤེས་རྟག །ཅེས་བྱ་བ་ཡིན་ནོ། །ཐབས་ཀྱི་ཕ་རོལ་ཏུ་ཕྱིན་པ་ནི་མེ་ཏོག་ཅེས་བྱ་བ་དུས་ཐམས་ཅད་པའི་མེ་ཏོག་ཡིན་ནོ། །བྱང་ཆུབ་ཡན་ལག་མེ་ཏོག་ཕྲེང༌། །ཞེས་བྱ་བ་ནི་བྱང་ཆུབ་ཀྱི་ཡན་ལག་བདུན་ནི་མེ་ཏོག་གི་ཕྲེང་བའི་མཚན་ཉིད་ཅན་ཡིན་ནོ། །དེ་དག་གསལ་བར་བསྟན་པའི་ཕྱིར། །དྲ་བ་མེ་ལོང་མེ་ཏོག་ཆེ། །མེ་ཏོག་ཕྲེང་བ་རྒྱན་གྱིས་བསྐོར། །ཞེས་བྱ་བ་འདི་བྲིས་པ་ཡིན་ནོ། །ཀུན་གྲུབ་མི་འགྱུར་བདེ་བ་ནི། །བདེ་བ་ཆེན་པོ་ཞེས་བཤད་དོ། །ཞེས་བྱ་བ་འདི་ནི་དངོས་གྲུབ་ཐམས་ཅད་ཀྱི་རང་བཞིན་མི་འགྱུར་བའི་བདེ་བ་དེ་ཉིད་ནི་བདེ་བ་ཆེན་པོ་ཞེས་བཤད་ཅིང་བསྟན་པ་ཡིན་ནོ། །ཚུལ་དེ་ལྟར་བདེ་བ་ཆེན་པོ་རྡོ་རྗེ་སེམས་དཔའི་བཞུགས་གནས་དང༌། དང་པོའི་གནས་བྲི་པར་བྱའོ། །དེ་ལྟར་ཐར་པའི་གྲོང་ཁྱེར་དེ་ལེགས་པར་བྲིས་ནས་ཐོག་མ་དང་ཐ་མ་མེད་པ་ཡིན་པའི་ཕྱིར་ཕྱོགས་ཐམས་ཅད་མཉམ་པ་ཉིད་དུ་བསམ་ཞིང་མངོན་དུ་བྱའོ། །དེ་ལྟར་འདི་ཡན་ཆད་ཀྱི་གཞུང་གིས་ནི་ཕྱིའི་དཀྱིལ་འཁོར་སྟོན་པར་གྱུར་པ་ཡིན་ནོ། །ཕྱིའི་དཀྱིལ་འཁོར་དེའི་ནང་དུ་དབུས་སུ་རྡོ་རྗེ་འཁོར་ལོ་ཞེས་བྱ་བའི་ཐིག་གདབ་པ་ནི་ནང་གི་དཀྱིལ་འཁོར་ཡིན་ནོ། །ཇི་ལྟ་བུ་ཞེ་ན། དཀྱིལ་འཁོར་བརྒྱད་པ་ལྟ་བུ་ནི། །ཞེས་བྱ་བ་སྨོས་ཏེ། དཀྱིལ་འཁོར་བརྒྱད་པའི་ཐིག་གིས་དཀྱིལ་འཁོར་བརྒྱད་པ་ལྟར་ བྱས་པ་གང ་ཡིན་པ་དེ་ནི་དཀྱིལ་འཁོར་བརྒྱད་པ་ལྟ་བུ་ཡིན་ཞེས་བྱའོ། །ཅི་ཞིག་གི་རང་བཞིན་ཡིན་ཞེ་ན། འདི་ནི་རྣམ་ཐར་བརྒྱད་པོ་སྟེ།། དངོས་གྲུབ་ཀུན་གྱི་བདེ་བ་སྟེར། །ཞེས་བྱ་བ་སྨོས་ཏེ། རྣམ་པར་ཐར་པ་བརྒྱད་ནི་བཤད་ཟིན་ཏོ། །དེའི་རང་བཞིན་ཡིན་པ་ཉིད་ཀྱིས་འདི་ནི་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཐམས་ཅད་རབ་ཏུ་སྟེར་བ་ཡིན་ནོ། །ཐེག་པ་ཆེན་པོ་ལ་སོགས་པ་གདུལ་བྱ་རྣམས་ཀྱི་བྱང་ཆུབ་ཀྱི་སེམས་ཀྱི་རང་བཞིན་ཅན་གྱི་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་མདོ་སྡེའི་འཁོར་ལོ་གདུལ་བྱའི་སྐྱེ་བོའི་རྒྱུད་ལ་བསྐོར་ཞིང་སྐྱེད་པར་མཛད་པས་ན། ཐེག་པ་ཆེན་པོ་བྱང་ཆུབ་ཀྱི་སེམས་མདོ་སྡེའི་འཁོར་ལོ་བསྐོར་བའི་རྒྱུ་དེས་ན། རྡོ་རྗེ་ཐིག་གིས་ཡོངས་
བསྐོར་བར། །ཞེས་བྱ་བ་རྡོ་རྗེའི་ཕྲེང་བས་ཕྱི་རོལ་ཀུན་ནས་ཡོངས་སུ་བསྐོར་བར་ནང་གི་དཀྱིལ་འཁོར་བྲི་བར་བྱའོ། །དེར་ཞེས་བྱ་བ་ནི་ནང་གི་དཀྱིལ་འཁོར་གྱི་ལྟེ་བའི་ཕྱོགས་སུ་སྣ་ཚོགས་པདྨ་ཆེན་པོ་བྲིས་པར་རྡོ་རྗེ་སེམས་དཔའ་དགོད་པར་བྱའོ། །ཇི་ལྟར་ཞེ་ན། ལུགས་མ་འམ་ཞེས་བྱ་བ་ལ་སོགས་པ་སྣོས་ཏེ། གསེར་དངུལ་ལ་སོགས་པ་བཞུ་ནས་བླུགས་ཏེ་སྐུ་གཟུགས་སུ་བྱས་པ་ནི་ལུགས་མའོ། །ཤེལ་ལ་སོགས་པ་ལ་འབུར་དུ་བརྐོས་ཏེ་བྱས་པ་ནི་བསྐོར་པའོ། །ཤིང་མཁན་གྱི་བཟོ་བོས་བྱས་པ་ནི་བྱས་པའོ། །རས་དཀར་པོ་ལ་སོགས་པ་ལ་ཚོན་གྱིས་བྲིས་པ་ནི་བྲིས་པའོ། །འཛུམ་བཅས་ཟླ་བའི་མདོག་ཅན་ལ། །ཞེས་བྱ་བ་ནི་གོ་བར་ཟད་དོ། །དམར་ཞིང་སྣ་ཚོགས་འོད་འབར་བ། །ཞེས་བྱ་བ་ནི་དམར་བ་སྟེ་ཁ་དོག་དམར་པོའི་མཐར་དཀར་པོ་དང༌། སེར་པོ་དང༌། སྔོན་པོ་དང༌། ལྗང་གུ་དང༌། དམར་པོའི་རི་མོ་སྣ་ཚོགས་ཤིང་འབར་བ་གང་ཡིན་པ་དེ་ནི་དམར་ཤིང་ཁ་དོག་འབར་བ་ཞེས་བྱའོ། །སངས་རྒྱས་ཀྱང་ཡིན་ལ་ཐམས་ཅད་ཀྱང་ཡིན་པས་ན་སངས་རྒྱས་ཐམས་ཅད་དེ་དེ་བཞིན་གཤེགས་པ་ལྔའོ། །དེ་དང་ལྡན་པའི་ཅོད་པན་ནི་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བའོ། །དེ་ཉིད་ལ་སོགས་པ་ནི་གདུ་བུ་དང༌། སྙན་ཆ་དང༌། དཔུང་རྒྱན་ལ་སོགས་པ་དང༌། ན་བཟའ་སྣ་ཚོགས་ཤིང་རྣམ་པ་ཐ་དད་པ་མངའ་བ་གང་ཡིན་པ་དེ་ནི། སངས་རྒྱས་ཀུན་གྱི་དབང་བསྐུར་སོགས། །རྒྱན་དང་ན་བཟའ་སྣ་ཚོགས་པ། །ཞེས་བྱའོ། །སེམས་དཔའི་སྐྱིལ་མོ་ཀྲུང་ནི། རྡོ་རྗེ་སྐྱིལ་ཀྲུང་ཕྱེད་པའོ། །དེས་བཞུགས་པས་ན། སེམས་དཔའི་སྐྱིལ་མོ་ཀྲུང་གིས་བཞུགས། །ཞེས་བྱའོ། །རྡོ་རྗེ་སྙེམས་པ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེས་འཛིན་པར་མཛད་བས་ན། རྡོ་རྗེ་སྙེམས་ཚུལ་འཆང་བའི་མཆོག །ཅེས་བྱ་སྟེ། མཆོག་ནི་དང་པོའོ། །སུ་ར་ཏ་སཏྭཾ་ཞེས་བརྗོད་ལ་ཞེས་བྱ་བ་ནི་ཨོཾ་སུ་ར་ཏ་སྟྭཾ་ཧཱུཾ་ཞེས་བརྗོད་ལ་བཞུགས་སུ་གསོལ་བར་བྱའོ། །དེ་ཡི་ཕྱོགས་ནི་ཐམས་ཅད་དུ། །ཞེས་བྱ་བ་ལ་སོགས་པ་ནི་གོ་སླའོ། །དམ་ཚིག་མཆོག་ནི་འདི་རྣམས་ཀྱིས། །ཞེས་བྱ་བ་ནི། ཛཿ་བཛྲ་དྲྀཥིཊ་
ས་མ་ཀེ་མ་ཊ་ཞེས་བྱ་བ་ནས། བཛྲ་གྷ་ཎྚི་ཧོཿ་ཞེས་བྱ་བའི་བར་གསུང་གི་ཕྱག་རྒྱས་འདའ་བར་མི་བྱ་བའི་རང་བཞིན་ཅན་ནི་མཆོག་སྟེ། དམ་པར་གྱུར་པ་ནི་འདི་རྣམས་ཀྱི་སྐུ་དང༌། གསུང་དང་ཐུགས་རྡོ་རྗེ་བཞུགས་པ་བརྟག་པ་ནི་དགོངས་པ་བརྟག་པ་ཞེས་བྱའོ། །གང་གིས་དེ་རྣམས་དགོངས་པར་འགྱུར་ཞེ་ན། རྡོ་རྗེ་ལྷ་མོ་ལ་སོགས་ཚོགས། །ཞེས་བྱ་བ་སྨོས་ཏེ། འདོད་ཆགས་རྡོ་རྗེ་མ་ལ་སོགས་པའི་སྐུ་གཟུགས་ལ་འདོད་ཆགས་རྡོ་རྗེ་མ་ལ་སོགས་པ་ལྷ་མོའི་ཚོགས་རྣམས་དགོངས་ཤིང་བྱིན་གྱིས་བརླབས་པར་འགྱུར་བའོ། །དངོས་གྲུབ་ཀུན་ལ་གྲུབ་པར་འགྱུར། །ཞེས་བྱ་བ་ནི་རྡོ་རྗེ་ལྷ་མོ་ལ་སོགས་པ་དགོངས་ཤིང་བྱིན་གྱིས་རློབ་པ་དེ་རྣམས་སློབ་དཔོན་དང་སློབ་མ་དེ་ཇི་ལྟར་མངོན་པར་འདོད་པའི་དངོས་གྲུབ་རྣམས་གྲུབ་པར་མཛད་པའོ། །དེ་ནས་སྐུ་མཆོག་ལ་སོགས་པ། །མངོན་བྲིས་ཡང་དག་བསྒྲུབ་པར་བྱ། ཞེས་བྱ་བ་ནི་དེའི་རྗེས་ཐོགས་ལ་བཤད་མ་ཐག་པའི་དགོད་པའི་ཆོ་གས་ཀུན་མཆོག་ལ་སོགས་ཏེ་དཔལ་རྡོ་རྗེ་སེམས་དཔའ་ལ་སོགས་པ་ནས། རྡོ་རྗེ་དྲིལ་བུ་མའི་བར་གྱི་ལྷ་རྣམས་བཀོད་པ་ཡང་དག་པར་བསྒྲུབ་པར་བྱའོ། །ཅི་ཞིག་ཟློས་ཤིང་བསྒྲུབ་པར་བྱ་ཞེ་ན། དམ་ཚིག་མཆོག་ནི་བཅིངས་ནས་སུ། །ཛཿ་ཧཱུཾ་བཾ་ཧོཿ་ཞེས་བརྗོད་བྱ། །ཞེས་བྱ་བ་གསུངས་ཏེ། དང་པོའི་རྡོ་རྗེ་ལ་སོགས་པ་ནི་ཕྱག་རྒྱ་ནི་དམ་ཚིག་མཆོག་སྟེ། དེ་བཅིངས་ལ་ཛཿ་ཧཱུཾ་བཾ་ཧོཿ། ཞེས་བྱ་བ་རྡོ་རྗེ་ཚིག་གིས་ཟློས་བཞིན་པ་བསྒྲུབ་པར་བྱ་ཞིང་རང་དབང་དུ་བྱའོ། །ཅི་ཞིག་ཟློས་ཤིང་བསྒྲུབ་པར་བྱ་ཞེ་ན། ཅི་ཞིག་བྱས་ནས་ཡང་དག་པར་བྱས་ཤེ་ན། རེ་ཞིག་དང་པོར་བཅོམ་ལྡན་འདས་རྡོ་རྗེ་སེམས་དཔའི་སྤྱན་སྔར་རྣལ་འབྱོར་པ་རྡོ་རྗེ་སེམས་དཔའི་སྦྱོར་བས་འདུག་ལ། བདེ་བ་ཆེན་པོ་རྡོ་རྗེ་མཆོག །གསང་བའི་ལྕགས་ཀྱུའི་ཕྱག་རྒྱ་དྲིལ་བུ་དང་བཅས་པས་བདག་པོ་སྟེ། གཙོ་བོ་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལན་ཅིག་ཡང་དག་པར་དགུག་པར་བྱ་ཞིང་སྤྱན་དྲངས་པར་བྱའོ། །སྔགས་གང་གིས་ཤེ་ན། མ་ཧཱ་སུ་ཁ་ཞེས་བྱ་བ་ནས། ཛཿ་ཧཱུཾ་བཾ་ཧོཿ་ཞེས་བྱ་བའི་བར་གྱིས་སོ། །འདི་
ཡིས་ཞེས་བྱ་བ་ནི་སྤྱན་དྲང་བའི་ཆོགས་སོ། །བཅོམ་ལྡན་འདས་རྟག་པར་ནི་ཞེས་བྱ་བ་ནི་བརྟན་པའོ། །རང་ཉིད་ཅེས་བྱ་བ་ནི་བདག་ཉིད་རྡོ་རྗེ་སློབ་དཔོན་གྱིས་བྲིས་པའི་དཀྱིལ་འཁོར་དུ་བྱོན་ཞིང་གཤེགས་པར་འགྱུར་རོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་གནས་ཇི་ལྟ་བ་བཞིན་དུ་བཞུགས་པར་བྱའོ། །ཅིའི་ཕྱིར་ཞེ་ན། དགུག་ཅིང་ཞེས་བྱ་བ་ལ་སོགས་པ་གསུངས་ཏེ་ གང་གི་ཕྱིར་སྤྱན་དྲང་བའི་ཆོ་ག་འདིས་དགུག་པ་དང༌། གཞུག་པ་དང་བཅིང་བ་བྱས ་ལ། ཞུགས་ནས་ཤིན་ཏུ་བརྟན་པ་སྟེ། ཐུགས་གཞན་དུ་མི་འགྱུར་བས་དབང་དུ་བྱས་ནས་གྲུབ་པར་འགྱུར་རོ། །འོད་ཟེར་ཀུན་དུ་སྟོན་ལ་སོགས། །ཞེས་བྱ་བ་ནི་གོ་སླའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཅོམ་ལྡན་འདས་འཁོར་དང་བཅས་པ་སྤྱན་དྲངས་ནས་རྗེས་ཐོགས་ཉིད་ལ་བཤད་པའི་རྡོ་རྗེ་མཆོད་ཡོན་གྱིས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་དབུལ་བར་བྱའོ། །དེ་ལྟར་མཆོད་ཡོན་ཕུལ་ནས་བུམ་པ་གང་བ་ལ་སོགས་པས་བཅོམ་ལྡན་འདས་འཁོར་དང་བཅས་པ་ལ་ཀུན་དུ་མཆོད་པར་བྱའོ། །གང་གིས་མཆོད་ཡོན་ཕུལ་བར་བྱེད་པའི་མཆོད་ཡོན་གྱི་ཕྱག་རྒྱ་དེ་ཇི་ལྟར་དབུལ་བར་བྱ་ཞེ་ན། རྡོ་རྗེ་ཐལ་མོ་ཁ་ཕྱེ་བ། །ཞེས་བྱ་བ་གསུངས་ཏེ། གཞི་ཐལ་མོ་སྦྱར་བ་ལས་རྡོ་རྗེ་ཐལ་མོ་ཁ་ཕྱེ་བ་ནི་མེ་ཏོག་གི་རྡོ་རྗེ་ཐལ་མོ་སྟེ་ཁ་ཕྱེ་བའོ། །འདི་སྐད་སྟོན་པ་ཡིན་ཏེ། རྡོ་རྗེ་ཐལ་མོ་བཅིངས་ལ། མཐེ་བོང་གཉིས་བརྐྱང་སྟེ་སོར་མོ་ལྷག་མ་རྣམས་ཀྱི་རྡོ་རྗེ་ཐལ་མོ་ཁ་ན་ཕྱེ་བར་གཞིའི་ཐལ་མོ་ བྱས་ལ་སོར་མོ་ཐམས་ཅད་རྡོ་རྗེའི་ཚུལ་ཉིད་ཀྱིས་སོ་སོར་གཞག་པར་བྱའོ། །བུམ་པ་གང ་བ་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་འཁོར་ལོར་མ་ཞུགས་ཀྱང༌། །ཞེས་བྱ་བ་ནི་དེ་ལྟར་བཤད་མ་ཐག་པའི་ཆོ་གས་ཞུགས་ནས་དེའི་རྗེས་ལ་བདག་ཉིད་ཐོག་མར་འབྱུང་བར་ཞུགས། །རྡོ་རྗེ་ཀུན་གྱིས་སློབ་དཔོན་ཆེར། །རྡོ་རྗེ་སེམས་དཔར་བྱིན་གྱིས་རློབ། །ཅེས་བྱ་བ་སྟེ། གང་གིས་དཀྱིལ་འཁོར་དུ་འཇུག་པའི་ཆོ་གས་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་དུ་ཞུགས་པ་དེ་ནི་འཁོར་ལོར་མ་
ཞུགས་སུ་ཟིན་ཀྱང་དཀྱིལ་འཁོར་དུ་ཞུགས་པ་ཡིན་ནོ། །ཀྱང་ཞེས་བྱ་བའི་སྒྲས་ནི་འཁོར་ལོར་ཞུགས་པ་དག་ལ་ནི་ཤིན་ཏུ་ཡང་བྱིན་གྱིས་རློབ་པར་འགྱུར་རོ། །བདག་ཉིད་ཅེས་བྱ་བ་ནི་རང་ཉིད་དོ། །ཐོག་མར་འབྱུང་ཞེས་བྱ་བ་ནི་བསྐལ་པ་བཟང༌། པོ་ལ་སོགས་པའི་སྔོན་དུ་ཡང་དག་ད་ལྟར་བྱུང་བའི་ཚུལ་གྱིས་བཞུགས་པའི་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་རོ། །ཞུགས་ཏེ་ཞེས་བྱ་བ་ནི་འཇུག་པའི་ཆོ་གས་ཞུགས་པའོ། །རྡོ་རྗེ་ཀུན་གྱི་ནི་སངས་རྒྱས་ཐམས་ཅད་ཀྱི་སློབ་དཔོན་ཆེན་པོ་ཡིན་པས། རྡོ་རྗེ་ཀུན་གྱི་སློབ་དཔོན་ཆེར། །ཞེས་བྱ་བ་སྟེ། སངས་རྒྱས་ཐམས་ཅད་ཀྱི་རིགས་རྣམ་པ་བརྒྱའི་དཀྱིལ་འཁོར་གྱི་སློབ་དཔོན་ཞེས་བྱ་བའི་ཐ་ཚིག་གོ །རྡོ་རྗེ་ཅན་གྱིས་རང་བྱིན་རློབ། །ཅེས་བྱ་བ་ནི་རྡོ་རྗེ་འཆང་ཆེན་པོས་རང་ཞེས་བྱ་བ་སློབ་དཔོན་གྱི་རང་བཞིན་རྡོ་རྗེ་འཆང་ཆེན་པོའི་ངོ་བོར་བྱིན་གྱིས་རློབ་ཅིང་བསྐྱེད་པ་བརྟན་པར་འགྱུར་བའོ། །དེ་ནས་ཞེས་བྱ་བ་ནི་རྒྱུ་སྟེ། གང་གི་ཕྱིར་དཀྱིལ་འཁོར་འདིར་ཞུགས་པའི་སངས་རྒྱས་ཐམས་ཅད་ཀྱི་སློབ་དཔོན་ཆེན་པོ་ལ་བཅོམ་ལྡན་འདས་རྡོ་རྗེ་སེམས་དཔར་བྱིན་གྱིས་རློབ་པར་མཛད་དོ། །དེ་བས་ན་འདིས་རྡོ་རྗེ་སེམས་དཔའི་རྣལ་འབྱོར་ཆེན་པོ་དང་ལྡན་པའི་རྡོ་རྗེ་འཛིན་པའི་སློབ་དཔོན་འོག་ནས་བཤད་པའི་ཆོ་ག་འདིས་འཇུག་པར་བྱའོ། །ཁྲུས་བྱས་དྲི་ཡིས་རྗེས་བྱུགས་ཤིང༌། །ཞེས་བྱ་བ་ལ་སོགས་པ་ནི་གོ་བར་ཟད་དོ། །ཕྱག་རྒྱ་ཀུན་གྱི་སྦྱོར་ཆེན་ལྡན། །ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་དྲིལ་བུ་མའི་བར་གྱི་དམ་ཚིག་དང༌། ཆོས་དང་ལས་དང༌། ཕྱག་རྒྱ་ཆེན་པོ་ནི་དམ་ཚིག་ཀུན་ནོ། །དེའི་རྣལ་འབྱོར་ཆེན་པོ་ནི། །སངས་རྒྱས་ཀུན་གྱི་སྦྱོར་ཆེན་ནོ། །དེ་འདི་ལ་ཡོད་པས་ན། ཕྱག་རྒྱ་ཀུན་གྱི་སྦྱོར་ཆེན་ལྡན་ནོ། །མི་ཤེས་པ་ཞེས་བྱ་བས་ནི་གོ་བར་ཟད་དོ། །མཆོག་དང་པོ་ཞེས་བྱ་བ་ནི་མཆོག་ཀྱང་ཡིན་ལ་དང་པོ་ཡང་ཡིན་པས་ན་མཆོག་དང་པོ་སྟེ་མཆོག་ནི་ཕུལ་དུ་བྱུང་བའོ། །དང་པོ་ནི་བསྐལ་པ་བཟང་པོ་ལ་སོགས་པའི་ཡང་ཐོག་མར་དང་ད་ལྟར་བྱུང་བའི་ངེ་བོ་ཉིད་ཀྱིས་ལྷ་མོའི་དཀྱིལ་འཁོར་གྱི་དབུས་
ན་ཡི་ག་ཧཱུཾ་ཟླས་པ་ལ་མངོན་པར་བརྩོན་པར་རྟག་པར་རྒྱུན་དུ་ཞུགས་པའོ། །དེ་ཡང༌། ཐོག་མཐའ་མེད་ཅིང་མཆོག་གྱུར་པས། །མཆོག་དང་པོར་ཞེས་བྱ་བར་བཤད། །འཁོར་ལོར་ཀུན་བདག་ཉིད་འགྱུར་བས། །མཆོག་སྟེ་མི་འགྱུར་མཆོག་ཡིན་ནོ། །ཞེས་གསུངས་པ་ཡིན་ནོ། །སེམས་དཔའ་ཆེན་པོ་ཞེས་བྱ་བ་ནི་སེམས་དཔའ་ཡང་ཡིན་ལ་ཆེན་པོ་ཡང་ཡིན་པས་ན་སེམས་དཔའ་ཆེན་པོ་སྟེ། ཆོས་ཐམས་ཅད་བདག་མེ་དཔར་རྟོག་པའི་ངོ་བོ་ཉིད་ཀྱིས་ཐམས་ཅད་དུ་ཁྱབ་པའི་རྡོ་རྗེ་ཡིད་ལས་བྱུང་བ་དང༌། འདོད་ཆགས་རྡོ་རྗེ་མའོ། །དེ་ཡང་འདི་ནི་བཅོམ་ལྡན་འདས་ཀྱི་ཐུགས་འབིགས་ཤིང་མྱུར་བའི་སྙིང་པོ་ཡིན་པའི་ཕྱིར་ཆགས་པའི་ཡན་ལག་ཡིན་ནོ་ཞེས་བྱ་བ་བཤད་པ་ཡིན་ནོ། །རྡོ་རྗེ་ཡིད་ལས་བྱུང་བའི་དབང་དུ་མཛད་ནས་ཐམས་ཅད་ཀྱི་མཆོག་སོ་སོར་རྟོགས་པར་བྱ་བ་ནི་འདོད་ཆགས་རྡོ་རྗེ་མའི་དབང་དུ་བྱས་པའོ། །དགའ་བ་ཆེན་པོ་ཞེས་བྱ་བ་ནི་དགའ་བ་ཡང་ཡིན་ལ་ཆེན་པོ་ཡང་ཡིན་པས་ན། དགའ་བ་ཆེན་པོ་སྟེ། ཆེན་པོ་ཉིད་ནི་བྱང་ཆུབ་ཀྱིས་ཚན་ཉིད་ཅན་རྡོ་རྗེ་རལ་པ་མ་དང༌། རྡོ་རྗེ་ཀཱི་ལི་ཀི་ལ་གཉིས་ཀྱིས་གཉིས་སུ་མེད་པའི་ཐུགས་མངོན་དུ་བྱས་པས་ཐམས་ཅད་དུ་ཁྱབ་ཅིང། གཟུགས་ཐམས་ཅད་ཀུན་དུ་སྟོན་པ་ཉིད་ཀྱིས་ན་ཆེ་བ་ཡིན་ནོ། །དེ་ཡང༌། ཉེས་པ་མེད་ཅིང་ཤིན་ཏུ་བརྟག །འདོད་ཆགས་ཀུན་གྱི་རྗེས་སུ་ཆགས། །དེ་ཉིད་གསང་བ་བཅོམ་ལྡན་འདས། །འདོད་ཆགས་ཆེན་པོ་དགའ་བ་ཆེ། །ཞེས་གསུངས་པ་ཡིན་ནོ། །དགའ་བ་ནི་དགའ་ཞིང་མ་གུ་བ་མཐའ་ཡས་པ་མི་གནས་པའི་མྱ་ངན་ལས་འདས་པ་དང༌། སོ་སོར་རྟོག་པའི་ཡེ་ཤེས་ཀྱི་རྒྱུ་མཐུན་པ་ལས་བྱུང་བ་རྡོ་རྗེ་དྲན་པ་དང༌། རྡོ་རྗེ་དྲན་མའི་ངོ་བོ་དགའ་བ་འདི་ལ་མངའ་བས་ན་དགའ་བ་ཆེན་པོའོ། །ཀུན་དུ་བཟང་པོ་ཞེས་བྱ་བ་ནི་འདི་ལ་ཀུན་ནས་བཟང་བ་མངའ་བས་ཏེ་སངས་རྒྱས་ཉིད་དམ་བྱང་ཆུབ་སེམས་དཔའ་ཉིད་འདི་ལས་འབྱུང་བས་ན་ཀུན་དུ་བཟང་པོའོ། །རྡོ་རྗེ་སྙེམས་པ་ནི་རྡོ་རྗེ་སྙེམས་པའི་ཆ་ལུགས་འཆང་བའི་རྡོ་རྗེ་འཆང་ཆེན་པོའོ། །ཀུན་བདག་ཉིད་ནི་རབ་ཏུ་དགའ་བ་ལ་སོགས་པ་ལྷ་མོ་ཐམས་ཅད་
ཀྱི་ཚུལ་འཛིན་པའི་རྡོ་རྗེ་འཆང་ཆེན་པོའོ། །དོན་འདི་ཉིད་ནི་འདིའི་འོག་ནས། ཤིན་ཏུ་དག་པ་ཀུན་གྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔའ་གོ་ཆ་མཆོག །ཅེས་བྱ་བ་བཤད་པ་ཡིན་ནོ། །རྡོ་རྗེ་སྙེམས་ཚུལ་བདག་པོ་ནི། །ཞེས་བྱ་བ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་དང༌། ལྷ་མོ་རྡོ་རྗེ་སྙེམས་མ་ནི་རྡོ་རྗེ་སྙེམས་ཚུལ་ཞེས་བྱའོ། །དེའི་བདག་པོ་ཡིན་པས་ན་རྡོ་རྗེ་སྙེམས་མ་བདག་པོ་སྟེ། ཆོས་ཀྱི་དབྱིངས་ཐོག་མ་དང་ཐ་མ་མེད་པའི་རང་བཞིན་རྡོ་རྗེ་འཆང་ཆེན་པོ་ནི་གང་གི་ཕྱིར་གཉིས་སུ་མེད་པའི་ཡེ་ཤེས་ཀྱི་རྒྱུ་མཐུན་པ་ནི་རྡོ་རྗེ་སྙེམས་ཚུལ་ཡིན་པའི་ཕྱིར་རོ། །དེ་ཡང་ཐུགས་ནི་བཅོམ་ལྡན་འདས་འདོད་ཆགས་ཆེན་པོ་དང་འདིའི་ལྷ་མོ་ཞེས་གསུངས་པས། བྱེ་བྲག་གི་ཚིག་གསུངས་པའི་ཕྱིར་དང༌། ཡང༌། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་ཕྱག་རྒྱའི་མཆོག །རྡོ་རྗེའི་དབང་བསྐུར་ཆེར་བསྟོད་པ། །རྡོ་རྗེ་སྙེམས་ཚུལ་བདག་པོའི་བདག །ཅེས་ཀྱང་གསུངས་པ་ཡིན་ནོ། །བདག་ཅེས་བྱ་བ་ནི་ཡང་དག་པར་རྫོགས་པའི་སངས་རྒྱས་ལ་སོགས་པའི་དངོས་པོ་རྣམས་རྒྱུན་དམིགས་སུ་མེད་པའི་ཐུགས་རྗེ་ཆེན་པོའི་རང་བཞིན་བཅོམ་ལྡན་འདས་རྡོ་རྗེ་སེམས་དཔའ་ཡིན་པས་བདག་པོ་སྟེ། བསྐྱེད་པའི་རྒྱུ་ཞེས་བྱ་བའི་ཐ་ཚིག་གོ །སེམས་དང་ཞེས་བྱ་བ་ནི་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་སེམས་དང་སེམས་ལས་བྱུང་བའོ། །རང་བཞིན་གྱིས་འོད་གསལ་བ་ནི་དགེ་བའི་ཁམས་བསགས་པ་ཡིན་པས་ན་སེམས་ཞེས་བྱའོ། །དེ་ཡང༌། བསམ་གྱིས་མི་ཁྱབ་རྒྱ་ཆེར་ཟབ། །དངོས་གྲུབ་ཀུན་གྱི་མི་འགྱུར་བ་དེ། །ཀུན་དུ་ཁྱབ་ཅིང་དྲི་མ་མེད། །བྱང་ཆུབ་སེམས་སྙོམས་བརྟན་པ་དག །ཅེས་གསུངས་པ་ཡིན་ནོ། །འདི་རྟོགས་པར་བྱ་བའི་ཕྱིར་མན་ངག་གསུངས་པ་ནི་སེམས་དཔའ་ཞེས་བྱ་བ་ལ་སོགས་པ་ཡིན་ཏེ་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་སེམས་དེ་ཉིད་རང་བཞིན་གྱིས་དག་པར་རྟོག་པས་རྣམ་པར་རྟོག་པ་ཐམས་ཅད་ཀྱིས་བསྐྱོད་པར་མི་ནུས་པ་ལ་ནི་སེམས་དཔའ་ཞེས་བྱ་སྟེ། སེམས་ནི་
བརྟན་པས་སེམས་དཔར་བཤད། །ཅེས་གསུངས་པ་ཡིན་ནོ། །རྣམ་པར་རྟོག་པ་ཐམས་ཅད་ཀྱིས་མི་ཕྱེད་པའི་སེམས་དཔར་གྱུར་པ་དེ་ཉིད་རྣམ་པར་གཡེང་བ་ཐམས་ཅད་དང་བྲལ་བས་ཏིང་ངེ་འཛིན་མཆོག་ཅེས་བྱ་སྟེ་ཏིང་ངེ་འཛིན་གྱི་དམ་པའོ། །དེ་ཡང་དེ་མཉམ་པར་བཞག་པས་ཏིང་ངེ་འཛིན་ཞེས་གསུངས་པ་ཡིན་ཏེ། དེ་བཞིན་ཉིད་ཀྱི་རྣམ་པར་སེམས་རྩེ་གཅིག་པའི་ཚུལ་གྱིས་ཏིང་ངེ་འཛིན་ཐམས་ཅད་ལས་མཆོག་ཏུ་གྱུར་པའི་ཕྱིར་རོ། །རྡོ་རྗེ་ཞེས་བྱ་བ་ནི་ཆོས་བདག་མེད་པའི་ཏིང་ངེ་འཛིན་གྱི་རང་བཞིན་དེ་ཉིད་ཟླ་བའི་དཀྱིལ་འཁོར་གྱི་རྣམ་པར་ཟླ་བའི་དཀྱིལ་འཁོར་ལས་རྡོ་རྗེ་རྡོ་རྗེར་ངེས་པ་ལས་སེམས་དཔའི་རྡོ་རྗེར་གྱུར་པའི་སེམས་དེ་ནི་རྣམ་པར་རྟོག་པ་ཐམས་ཅད་དང་བྲལ་བས། ཏིང་ངེ་འཛིན་གྱི་མཆོག་རྡོ་རྗེ་ཞེས་བྱ་སྟེ། ངེས་པ་ལས་ནི་རྡོ་རྗེར་འགྱུར། །ཞེས་གསུངས་པའི་ཕྱིར་དང༌། རྡོ་རྗེ་ཞེས་བྱ་བ་ནི་སེམས་དཔར་བྱིན་གྱིས་བརླབ་པ་ལས་བྱུང་བའི་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་བྱ་སྟེ། ཚིག་གི་ཕྱོགས་གཅིག་སྨོས་པའི་ཚུལ་གྱིས་ཚིག་གི་སྤྱི་སྡུད་དེ་དཔེར་ན་འཇིག་ཅེས་སྨོས་པས་འཇིག་རྟེན་སྟོན་པ་དང་འདྲའོ། །མཆོག་ཆེན་ཞེས་བྱ་བ་ལ། མཆོག་ཀྱང་ཡིན་ལ་ཆེན་པོ་ཡང་ཡིན་པས་མཆོག་ཆེན་ཏེ་དམ་ཚིག་ཆེན་པོའི་སེམས་དཔའ་ནི་ང་ཡིན་ནོ་ཞེས་ཆོས་ཀྱི་དབྱིངས་ཀྱི་ང་རྒྱལ་བྱེད་པའོ། །ཀུན་དུ་བཟང་པོའི་སྤྱོད་པ་མཆོག །ཅེས་བྱ་བ་ལ་ཀུན་དུ་བཟང་པོ་ནི་བཤད་ཟིན་ཏོ། །དེའི་སྤྱོད་པ་ནི་ལྷ་ཆེན་པོ་ལ་སོགས་པའི་གཟུགས་ཐམས་ཅད་དུ་ཡང་དག་པར་སྟོན་པས་སེམས་ཅན་གྱི་དོན་མཛད་པའོ། །དེ་མཆོག་ཏུ་གྱུར་པས་ན། ཀུན་དུ་བཟང་པོའི་སྤྱོད་པ་མཆོག །ཅེས་བྱ་སྟེ། དེ་ཡང་གང་གི་ཕྱིར། སྙིང་སྟོབས་རྡུལ་དང་མུན་པས་ཀྱང༌། །གང་ཕྱིར་སེམས་ཅན་དོན་མཛད་པས། །དེས་ན་འདི་ནི་ཀུན་དུ་བཟང༌། །བྱང་ཆུབ་སྤྱོད་པའི་རྗེས་བཞིན་འཇུག །ཅེས་གསུངས་པ་ཡིན་ནོ། །བདུད་དང་ཞེས་བྱ་བ་ནི་སངས་རྒྱས་ཀྱི་བྱང་ཆུབ་ལ་འཇུག་པ་རྣམས་ལ་ཤིན་ཏུ་བརྩོན་པས་བསྐྱེད་པར་བྱ་བའི་ཕྱིར་བདུད་ཀྱི་སྡེ་སྤྲུལ་ནས་འཆོ་བས་བདུད་ཅེས་བྱའོ། །བདུད་ནི་རབ་འཛོམས་པ་ཞེས་བྱ་བ་ནི་རྡོ་རྗེ་གནོད་སྦྱིན་
གྱི་ཚུལ་གྱིས་བདུད་ཐམས་ཅད་ཟ་བར་མཛད་པས་ན། བདུད་ཐམས་ཅད་འཇོམས་པར་མཛད་པའོ། །དེ་ཡང་སེམས་ཉིད་ཁོ་ན་བདུད་ཡིན་ཏེ། སེམས་ཉིད་དེ་བཞིན་གཤེགས་པ་ཡིན། །རང་གི་སེམས་ནི་འདུལ་བའི་ཕྱིར། །བདུད་ཉིད་དུ་ནི་རང་གྱུར་ཏོ། །ཞེས་གསུངས་པ་དང༌། ཡང་ཇི་ལྟ་ཇི་ལྟར་བཅོམ་ལྡན་འདས་འདོད་པ་རྡོ་རྗེ་སེམས་དཔའ་བྱང་ཆུབ་ཀྱི་སྙིང་པོར་འགྲོ་བའི་བྱང་ཆུབ་སེམས་དཔའ་ལ་བདུད་ཀྱི་གཟུགས་ས་ཉེ་བར་འཆོ་བར་བྱེད་པ་དེ་ལྟ་དེ་ལྟར་བྱང་ཆུབ་སེམས་དཔའི་སེམས་བྱང་ཆུབ་ཆེན་པོར་ཤིན་ཏུ་བརྟན་པར་ཉེ་བར་སྐྱེ་བར་འགྱུར་རོ། །དེ་ལྟར་ན་མཚན་བཅུ་བདུན་པོ་དེ་དག་ནི་དཔལ་རྡོ་རྗེ་སེམས་དཔའི་རྡོ་རྗེའི་རིགས་ཀྱི་ཡང་དག་པའི་ཡོན་ཏན་སྟོན་པར་བྱེད་པ་ཡིན་ནོ། །ཐམས་ཅད་བྱང་ཆུབ་ཆེ་ཞེས་བྱ་བ་ནི་སངས་རྒྱས་ཐམས་ཅད་གཅིག་ཏུ་བསྡུས་པར་གྱུར་པ་རྣམ་པར་སྣང་མཛད་ནི་བྱང་ཆུབ་ཐམས་ཅད་དོ། །བྱང་ཆུབ་ཆེ་ཞེས་བྱ་བ་ནི་མི་བསྐྱོད་པ་དང༌། མི་བསྐྱོད་པའི་རིགས་ནི་ཉན་ཐོས་དང་རང་སངས་རྒྱས་ཀྱི་བྱང་ཆུབ་ལ་ལྟོས་ན་བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པས་ན་བྱང་ཆུབ་ཆེན་པོ་སྟེ། སངས་རྒྱས་ཞེས་བྱ་བ་ནི་ནམ་མཁའ་ཐམས་ཅད་དང་མཉམ་པའི་ཡེ་ཤེས་ཐུགས་སུ་ཆུད་པས་ན་སངས་རྒྱས་ཏེ་བཅོམ་ལྡན་འདས་ནི་རིན་ཆེན་འབྱུང་ལྡན་གྱི་རིགས་དང་བཅས་པའོ། །སངས་རྒྱས་ཉིད་སྐྱེས་ཞེས་བྱ་བ་ནི་སངས་རྒྱས་རྣམས་ཀྱི་བྱང་ཆུབ་བདག་ཉིད་ལས་འཁྲུངས་པས་ན་སངས་རྒྱས་ཉིད་སྐྱེས་ཏེ་གཟུགས་ཐམས་ཅད་སྟོན་པའི་ཡེ་ཤེས་ཀྱི་སེམས་ཅན་ཐམས་ཅད་གདུལ་བྱའི་སྤྱོད་པའི་མཆོག་མངའ་བ་སྟེ། བཅོམ་ལྡན་འདས་འོད་དཔག་ཏུ་མེད་པའི་འཁོར་དང་བཅས་པའོ། །མཆོག་སྐྱེས་པ་ཞེས་བྱ་བ་ནི་མཆོག་ལས་སྐྱེས་པས་ན་མཆོག་ལས་སྐྱེས་པ་སྟེ། རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་མཆོག་དེ་ལས་འཁྲུངས་པ་དོན་ཡོད་པར་གྲུབ་པའི་རིགས་དང་བཅས་པའི་ངོ་བོའོ། །དེ་ཡང་ཇི་ལྟར་ན་བཅོམ་ལྡན་འདས་མངོན་པར་རྫོགས་པའི་བྱང་ཆུབ་དང་སངས་རྒྱས་ཡིན་ཞེ་ན། རང་སེམས་སོ་སོར་རྟོགས་པ་
ལས། །བྱང་ཆུབ་སེམས་མཆོག་རྡོ་རྗེ་ཉིད། །དེ་ཡིད་དེ་ཉིད་སངས་རྒྱས་ཉིད། །གང་ལ་བྱིན་རླབས་མཆོག་གྲུབ་པ། །ཞེས་གསུངས་པ་ཡིན་ནོ། །དེ་ལྟར་ན་མཚན་ལྔ་པོ་དག་གིས་ནི་དེ་བཞིན་གཤེགས་པའི་རིགས་ཀྱི་ཡོན་ཏན་སྟོན་པར་བྱེད་པ་ཡིན་ནོ། །རྡོ་རྗེ་ཧཱུཾ་མཛད་ཅེས་བྱ་བ་ནི། ཨུ་ཏིཥྛ་ས་མ་ཡ་ཀྲོ་དྷ། ནི་སུཾ་བྷ་ཛྭ་ལ་བཛྲ་ཧཱུཾ་ཞེས་བྱ་བས་རྡོ་རྗེ་མེ་ལྟར་འབར་བ། རྡོ་རྗེ་ཧཱུཾ་མཛད་དུ་སྤྲུལ་པའི་སྙིང་པོ་ཡིན་ལ། སྤྲུལ་པ་ཡང་ཁྲོ་བོ་ཡིན་པར་བཤད་དོ། །ཡི་གེ་ཧཱུཾ་ཞེས་བྱ་བ་ནི་འཇིག་རྟེན་གསུམ་པོ་ལ་སོགས་པ་འདུལ་བའི་སྙིང་པོ་མཚན་གཉིས་པོ་འདི་དག་ནི་རྡོ་རྗེ་རིགས་ཀྱི་སྒོ་ནས་བརྗོད་པ་ཡིན་ནོ། །འཇིག་རྟེན་དབང་ཕྱུག་ཅེས་བྱ་བ་ནི། ཇི་ལྟར་པདྨ་དམར་པོ་འདི། །ཞེས་བྱ་བ་ལ་སྔར་གསུངས་པ་ཡིན་ཏེ་མཚན་འདི་ནི་པདྨ་རིགས་ཀྱི་སྒོ་ནས་བརྗོད་པ་ཡིན་ནོ། །ནོར་བུ་རབ་གསོལ་ཞེས་བྱ་བ་ནི་ནོར་བུའི་རིགས་ཀྱི་སྔགས་ཀྱི་སྒོ་ནས་སོ། །འདོད་ཆགས་ཆེན་པོ་ཞེས་བྱ་བ་ནི་གཟུགས་ཐམས་ཅད་སྟོན་པས་སེམས་ཅན་ཐམས་ཅད་སྦྱིན་པ་ལ་ཆགས་པས་འདོད་ཆགས་ཆེན་པོའོ། །དེ་ཡང༌། དངོས་གྲུབ་ཀུན་ལ་རྗེས་ཆགས་པས། །འདོད་ཆགས་ཆེན་པོ་བཅོམ་ལྡན་འདས། །རྡོ་རྗེ་སེམས་དཔའི་དཔལ་རྒྱལ་འདི། །དམར་ཞིང་སྣ་ཚོགས་འོད་འབར་བ། །ཞེས་གསུངས་པ་ཡིན་ནོ། །བདེ་ཆེན་ཉིད་ཅེས་བྱ་བ་ནི་བདེ་བ་ཡང་ཡིན་ལ་ཆེན་པོ་ཡང་ཡིན་པས་ན་བདེ་བ་ཆེན་པོ་སྟེ། སངས་རྒྱས་རྣམས་ཀྱང་ཟག་པ་མེད་ཅིང་ཐོག་མ་དང་ཐ་མ་མེད་པའི་བདེ་བ་དང་ཡིད་བདེ་བ་ནི་བདེ་བ་ཆེན་པོ་སྟེ། དེའི་ངོ་བོ་ཉིད་ཡིན་པས་ན་བདེ་ཆེན་ཉིད་དོ། །འདི་ཉིད་ནི། དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བཤད་དོ། །ཞེས་འོག་ནས་བཤད་པ་ཡིན་ནོ། །འདོད་དང་ཞེས་བྱ་བ་ནི་འདོད་པར་བྱ་བ་ཉིད་ཡིན་པས་ན་འདོད་པ་སྟེ། མངོན་པར་འདོད་པའི་ཞེས་བྱ་བའི་ཐ་ཚིག་གོ །དེ་ཡང་བྱང་ཆུབ་ཀྱི་མཚན་ཉིད་ཅན་གྱི་རྡོ་རྗེ་སེམས་དཔའ་དང༌། བྱང་ཆུབ་ཀྱི་སེམས་བསྒོམ་པ་ནི་འདོད་པའི་ཡོན་ཏན་ནོ། །ཐར་པ་ཞེས་བྱ་བ་ནི་ཇི་སྐད་དུ་བཤད་པའི་བདེ་བ་ཆེན་པོ་དེའི་ངོ་བོ་ཉིད་གྱུར་པ་དང་མཐར་ཐུག་པའོ། །དེ་ཡང་ཇི་ལྟར་བཅོམ་
ལྡན་འདས་འདོད་པ་དང་ཐར་བ་ཡིན་ཞེ་ན། དངོས་གྲུབ་ཀུན་ལ་རྗེས་ཆགས་པས། །འདོད་ཆགས་ཆེན་པོ་བཅོམ་ལྡན་འདས། །དངོས་གྲུབ་ཀུན་གྱི་མི་འགྱུར་བདེ། །བདེ་བ་ཆེན་པོ་ཞེས་བཤད་དོ། །ཞེས་གསུངས་པ་ཡིན་ནོ། །ནོར་ཆེ་བ་ཞེས་བྱ་བ་ནི་ནམ་མཁའ་དང་མཉམ་པའི་ཡེ་ཤེས་ཀྱི་འཇིག་རྟེན་དང་འཇིག་རྟེན་ལས་འདས་པའི་རིན་པོ་ཆེ་ཐམས་ཅད་ཀྱི་འབྱུང་གནས་ཡིན་པས་ན་ནོར་ཆེ་བའོ། །དུས་གསུམ་ཞེས་བྱ་བ་ནི་འདས་པ་དང་མ་འོངས་པ་དང་ད་ལྟར་བྱུང་བ་རྣམས་ཀྱི་སེམས་དང་སེམས་ལས་བྱུང་བའི་ངོ་བོ་ཡིན་པས་ན་དུས་གསུམ་མོ། །སྲིད་གསུམ་ཞེས་བྱ་བ་ནི་འདོད་པའི་སྲིད་པ་དང༌། གཟུགས་ཀྱི་སྲིད་པ་དང༌། གཟུགས་མེད་པའི་སྲིད་པ་ནི་སྲིད་པ་གསུམ་མོ། །དེ་ཡང་མཐའ་ཡས་པ་ན་འཇིག་རྟེན་གསུམ་འདུལ་པས་སྲིད་གསུམ་ཡིན་ནོ་ཞེས་གསུངས་པ་ཡིན་པས་སྲིད་པ་གསུམ་གྱིས་འདུལ་བ་རྣམས་ཀྱི་ཕྱིར་བཅོམ་ལྡན་འདས་སྲིད་པ་གསུམ་གྱི་ངོ་བོར་སྟོན་ཅིང་བཞུགས་པས་ན་སྲིད་པ་གསུམ་ཞེས་བཤད་པ་ཡིན་ནོ། །མཚན་གསུམ་པོ་དེ་དག་གིས་ཀྱང་དཔལ་རྡོ་རྗེ་སེམས་དཔའི་རིགས་སུ་སྟོན་པར་ཤེས་པ་ཡིན་ནོ། །མཆོག་གསུམ་ཞེས་བྱ་བ་ནི་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པ་ལ་མཆོག་གསུམ་ཞེས་བྱའོ། །འཇིག་རྟེན་གསུམ་མཆོག་ཅེས་བྱ་བ་ནི་དེ་རྣམས་ཀྱི་མིང་གི་ཁྱད་པར་ལ་འཇིག་རྟེན་གསུམ་ཞེས་བྱ་སྟེ། འཇིག་རྟེན་མཆོག་གསུམ་གྱི་བྱིན་གྱིས་བརླབས་ཞེས་གསུངས་པའི་ཕྱིར་རོ། །ཁམས་གསུམ་པ་ཞེས་བྱ་བ་ནི་འདོད་པ་དང་གཟུགས་དང་གཟུགས་མེད་པའི་ཁམས་སུ་སྤྲུལ་པས་ན་ཁམས་གསུམ་པ་ཞེས་བྱའོ། བརྟན་དང་ཞེས་བྱ་བ་ནི་རིའི་རྒྱལ་པོ་རི་རབ་ལ་སོགས་པ་དངོས་པོ་ཐམས་ཅད་འབྱུང་བའི་ཚུལ་གྱིས་གནས་པས་ན་བརྟན་པ་ཞེས་བྱའོ། །དེ་ཡང༌། སེམས་ཅན་བསོད་ནམས་ཆེར་མཐོང་བས། །བརྟན་པ་ཀུན་ཉིད་ང་ཡིན་ནོ། །ཞེས་འོག་ནས་བཤད་པ་ཡིན་ནོ། །རང་འབྱུང་ཞེས་བྱ་བ་ནི་རྫོགས་པའི་སངས་རྒྱས་ལ་སོགས་པ་དངོས་པོ་ཐམས་ཅད་འབྱུང་བའི་རྒྱུར་གྱུར་པས་ན་རང་འབྱུང་བ་སྟེ་ཆོས་ཀྱི་དབྱིངས་ཐོག་མ་དང་ཐ་མ་མེད་པའོ། །
གསལ་ཞེས་བྱ་བ་ནི་ཐམས་ཅད་ཀྱི་སོ་སོར་རང་གིས་རིག་པའི་ངོ་བོ་ཆོས་ཀྱི་དབྱིངས་སོ། །ཕྲ་རབ་ཅེས་བྱ་བ་ནི་ཤིན་ཏུ་ཕྲ་བས་ན་ཤིན་ཏུ་ཕྲ་བ་སྟེ་ཆོས་ཀྱི་དབྱིངས་དེ་ཉིད་དོ། །སྦོམ་པ་དང་ཞེས་བྱ་བ་ནི་སྐུ་ཕྱག་རྒྱ་ཆེན་པོ་ལ་སོགས་པ་ནམ་མཁའ་ཁྱབ་པས་ན་སྦོམ་པའོ། །བསགས་པ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པའི་རིགས་རྣམས་བསགས་ཤིང་བསྡུས་པའི་ངོ་བོ་ཉིད་ཡིན་པས་སོ། །རྒྱུ་བ་ཞེས་བྱ་བ་ནི་མངལ་ནས་སྐྱེས་པ་དང༌། སྒོ་ང་ལས་སྐྱེས་པ་དང༌། རྫུས་ཏེ་སྐྱེས་པ་དང༌། དྲོད་གཤེར་ལས་སྐྱེས་པ་སྟེ་རང་གི་ལས་ཀྱི་སྟོབས་ལས་སྐྱེས་པ་ནི་རྒྱུ་བ་ཞེས་བྱ་བ་སྟེ་སེམས་ཅན་སེམས་དང་ལྡན་པའོ། །བཅོམ་ལྡན་འདས་ཀྱང་ཆོས་ཉིད་ལ་དགོངས་ནས་དེའི་ངོ་བོ་ཉིད་ཡིན་པས་ན་དེ་སྐད་ཅེས་བྱའོ། །དེ་ཡང་སེམས་ཀྱི་འདུ་བྱེད་པས་རྒྱུ་བ་ཞེས་འོག་ནས་བཤད་པའི་ཕྱིར་རོ། །རབ་མཆོག་ཅེས་བྱ་བ་ནི་ཕུལ་དུ་བྱུང་བ་སྟེ། འཁོར་ལོས་སྒྱུར་བ་ལ་སོགས་པའི་གཟུགས་རབ་མཆོག་གིས་འདུལ་བ་རྣམས་ལ་དེའི་གཟུགས་སུ་སྟོན་པར་མཛད་པའི་ཕྱིར་དེ་སྐད་ཅེས་བྱའོ། །ཐོབ་མཛད་པ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པ་བསྒོམ་པ་དང་ལྡན་པ་རྣམས་ལ་དེ་མངོན་སུམ་དུ་གྱུར་པར་མཛད་པས་ན་ཐོབ་པའོ། །སྲིད་པ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པ་ཐོབ་པར་མཛད་པ་དེས་མི་གནས་པའི་མྱ་ངན་ལས་འདས་པའི་མཚན་ཉིད་དུ་སྲིད་པ་ཤིན་ཏུ་གྲུབ་པར་ནི་སྲིད་པ་ཞེས་བྱའོ། །འཁོར་བ་ཞེས་བྱ་བ་ནི་དེ་འདུལ་བའི་སེམས་ཅན་རྣམས་རྗེས་སུ་གཟུང་བའི་ཕྱིར་འགྲོ་བ་རིགས་དྲུག་གི་མཚན་གྱིས་བཞུགས་པར་མཛད་པ་དང་ཆོས་ཉིད་ཀྱི་ཚུལ་གྱིས་འཁོར་བ་ཞེས་བྱའོ། །སྦྱོང་མཛད་པ་ཞེས་བྱ་བ་ནི་སངས་རྒྱས་ལ་སོགས་པའི་ཚུལ་གྱིས་སེམས་ཅན་ཐམས་ཅད་སྦྱོང་བར་མཛད་པས་ན་སྦྱོང་མཛད་བའོ། །ཐོག་མཐའ་མེད་པ་ཞེས་བྱ་བ་དང་པོའི་ཐོག་མ་སྟེ་སྐྱེ་བའོ། །ཐ་མ་ནི་དུས་ཚིག་ངེས་པ་མེད་པའི་མྱ་ངན་ལས་འདས་པའོ། །གང་ལ་ཐོག་མ་དང་ཐམ་ཅད་པ་དེ་ནི་ཐོག་མ་དང་ཐ་མ་མེད་པ་སྟེ། ཆོས་ཀྱི་དབྱིངས་ཀྱི་རང་ཞིན་ནོ། ཐོག་མ་ཐམ་ཅན་ཞེས་བྱ་བ་ནི་ཆོས་ཀྱི་དབྱིངས་ཀྱི་
རྒྱུ་མཐུན་པ་ལས་བྱུང་བའི་རྡོ་རྗེ་སེམས་དཔའི་སྐུ་ནས་བརྩམས་ཏེ། དུམ་བུ་བཞི་པ་ལས་བཤད་པའི་འཕགས་པ་ནམ་མཁའི་སྙིང་པོའི་རང་བཞིན་རས་རིས་ཀྱི་དཀྱིལ་འཁོར་ལས་གསུངས་པའི་རིན་པོ་ཆེའི་དྲིལ་བུ་མའི་བར་གྱི་ལྷ་ཐམས་ཅད་ཀྱི་སྐུའི་ངོ་བོར་གྱུར་པས་ན་ཐོག་མ་ཅན་ནོ། །མདངས་དམར་བ་ཞེས་བྱ་བ་ནི་བལྟས་པས་མི་ངོམས་པའི་སྐུ་མངའ་བས་ཀུན་གྱི་མངོན་པར་འདོད་པར་བྱ་བ་ཡིན་པས་ན་མདངས་ལྡན་ནོ། །དང་པོ་ཞེས་བྱ་བ་ནི་བསྐལ་པ་བཟང་པོ་ཞེས་བྱ་བ་ལ་སོགས་པའི་ཐོག་མ་གནས་པས་ན་དང་པོའི་ཐོག་མར་རོ། །ཐམས་ཅད་ཡང་དག་གནས་པ་ཞེས་བྱ་བ་ནི་སྡུད་པའི་དཀྱིལ་འཁོར་དུ་རིགས་ཐམས་ཅད་ཀྱི་གནས་པའི་ཚུལ་གྱིས་ཞུགས་པ་ན་ཐམས་ཅད་ཡང་དག་གནས་པའོ། །དེ་ལ་མཆོག་གསུམ་དང་འཇིག་རྟེན་གསུམ་མཆོག་ཅེས་བྱ་བའི་མཚན་གཉིས་པོ་འདི་ནི་འཇིག་རྟེན་པའི་དཀྱིལ་འཁོར་གྱི་སྒོ་ནས་བསྟན་པ་ཡིན་ནོ། །ཁམས་གསུམ་པ་དང༌། བརྟན་པ་དང༌། རང་འབྱུང་དང༌། གསལ་བ་དང༌། ཕྲ་རབ་དང༌། སྦོམ་པོ་དང༌། བསགས་པ་དང༌། རྒྱུ་པ་དང༌། རབ་མཆོག་དང༌། ཐོབ་མཛད་དང༌། སྲིད་པ་དང༌། འཁོར་བ་དང༌། སྤྱོད་མཛད་དང༌། ཐོག་མཐའ་མེད་པ་དང༌། ཐོག་མཐའ་ཅན་དང༌། མདངས་ལྡན་དང༌། དང་པོ་དང༌། ཐམས་ཅད་ཡང་དག་གནས་ཞེས་བྱ་བ་མཚན་བཅོ་བརྒྱད་པོ་འདི་དག་ནི་བསྡུས་པའི་དཀྱིལ་འཁོར་སྒོ་ནས་གསུངས་པ་ཡིན་ནོ། །སྙིང་པ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པ་ངེས་པའི་ཡེ་ཤེས་ཏེ་དེ་ཁོ་ན་ཡིན་ལ། དེ་སྟོན་པར་བྱེད་པའི་སྡིག་ལ་ཉེ་བར་གདགས་པས་སྙིང་པོ་ཞེས་བྱ་སྟེ། དེ་ཉིད་གདགས་པས་གསང་ཆེན་པོ། །སྙིང་པོ་ཞེས་ནི་རབ་ཏུ་བཤད། །ཅེས་བྱ་བ་གསུངས་པའི་ཕྱིར་དང༌། ཡང་དེ་ཉིད་ཁོ་ན་ཉིད་དང༌། གསང་བའི་སྙིང་པོ་ཞེས་གསུངས་པའི་ཕྱིར་རོ། །ཕྱག་རྒྱ་ཞེས་བྱ་བ་ནི་དམ་ཚིག་དང༌། ཆོས་དང༌། ལས་དང༌། ཕྱག་རྒྱ་ཆེན་པོ་ལ་བྱ་སྟེ། སེམས་ཅན་གྱི་ཁམས་སྐུར་བསྟན་པར་བྱེད་པའམ། རྒྱས་འདེབས་པའི་ཕྱིར་དེ་ནི་ཕྱག་རྒྱ་ཞེས་བྱའོ། །རྣལ་འབྱོར་ཞེས་བྱ་བ་ནི་རྣལ་འབྱོར་དང་རྗེས་སུ་རྣལ་
འབྱོར་དང༌། ཐམས་ཅད་ཀྱི་རྣལ་འབྱོར་དང༌། ཤིན་ཏུ་རྣལ་འབྱོར་གྱི་དབྱེ་བས་རྣམ་པ་བཞིའོ། །དེ་ལ་དེ་ཁོ་ན་ཉིད་རྣམ་པ་ལྔ་བསྒོམས་པས་བདག་ཉིད་རང་ལྷའི་ངོ་བོ་ཉིད་དུ་བསྐྱེད་པ་བསྒོམ་པ་ནི་རལ་འབྱོར་ཞེས་བྱའོ། །ཡེ་ཤེས་སེམས་དཔའ་བཅུ་ནས་དེ་དང་ལྷན་ཅིག་ཏུ་གྱུར་པར་ལྷག་པར་མོས་པ་ནི་རྗེས་སུ་རྣལ་འབྱོར་ཞེས་བྱའོ། །རྒྱུ་བ་དང་མི་རྒྱུ་བ་ཐམས་ཅད་ཀྱི་ངོ་བོ་ཉིད་ཀྱི་རང་བཞིན་དུ་བདག་ཉིད་བསྒོམ་པ་ནི་ཐམས་ཅད་ཀྱི་རྣལ་འབྱོར་ཞེས་བྱའོ། །རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་ཀྱི་རལ་འབྱོར་རྣམས་པར་བསྒོམས་པས་སེམས་རྩེ་གཅིག་ཏུ་གྱུར་པ་གང་ཡིན་པ་དེ་ནི་ཤིན་ཏུ་རྣལ་འབྱོར་ཞེས་བྱའོ། །དམ་ཚིག་ཅེས་བྱ་བ་ནི་མི་འདའ་བའི་དོན་ལ་ནི་དམ་ཚིག་ཅེས་བྱ་བ་སྟེ་སྐུའི་རང་བཞིན་ནོ། །དེ་ཡང་སྐུའི་གསང་བའི་དབང་དུ་བྱས་ནས། དེ་བཞིན་གཤེགས་པ་ཀུན་གྱིས་ཀྱང༌། །འདའ་བ་རུ་ནི་མི་མཛད་པས། །ཕྱག་རྒྱ་དམ་ཚིག་ཅེས་གྲགས་ཏེ། །ཡིད་ཀྱི་གཟུགས་ནི་བསྟན་ཕྱིར་རོ། །ཞེས་གསུངས་པ་ཡིན་ནོ། །དེ་ཉིད་ཅེས་བྱ་བ་ནི། ཐོག་མ་ཐ་མ་མེད་སེམས་པ། །ཞེས་བྱ་བ་ལ་སོགས་པ་གང་ཡིན་པ་དེ་ནི་དེ་ཁོ་ན་ཉིད་དོ། །བདེན་པ་ཞེས་བྱ་བ་ནི་ཀུན་རྫོབ་ཀྱི་བར་གྱི་བདེན་བ་དང་དོན་དམ་པའི་བདེན་པ་དང༌། འཕགས་པའི་བདེན་པ་བཞི་ནི་བདེན་པའོ། །མཆོད་པ་ཆེ་ཞེས་བྱ་བ་ནི་འདོད་ཆགས་རྡོ་རྗེ་ལ་སོགས་པ་རིགས་ཐམས་ཅད་ཀྱི་མཆོད་པ་ནི་མཆོད་པ་ཆེན་པོའོ། །དེ་ལྟར་མཚན་དུན་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་གྱི་སྒོ་ནས་ལྷ་ཐམས་ཅད་ཀྱི་རང་བཞིན་སྟོན་པ་ཡིན་པར་ཤེས་པར་བྱའོ། །དེ་བཞིན་གཤེགས་པ་ཞེས་བྱ་བ་ནི་དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་གྱི་རང་བཞིན་ནོ། །དངོས་གྲུབ་ཆེ་ཞེས་བྱ་བ་ནི་དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་གྱི་དངོས་གྲུབ་ཆེན་པོའོ། །ཆོས་ཞེས་བྱ་བ་ནི་ཆོས་ཀྱི་ཕྱག་རྒྱའི་ངོ་བོ་ཉིད་ཡིན་པས་ན་ཆོས་སོ། །ལས་ཞེས་བྱ་བ་ནི། ལས་ཀྱི་ཕྱག་རྒྱའི་ངོ་བོ་ཉིད་ཡིན་པས་ན་ལས་སོ། །མཁས་པ་ཆེན་པོ་ཞེས་བྱ་བ་ནི་དེ་བཞིན་གཤེགས་པ་ཉིད་ལ་སོགས་པ་ཡོངས་སུ་ཤེས་པས་མཁས་
པ་ཆེན་པོའོ། །དམ་པའི་ཆོས་ཞེས་བྱ་བ་ནི་དེ་བཞིན་གཤེགས་པའི་དཀྱིལ་འཁོར་ཆོས་ཀྱི་འཁོར་ལོ་བསྐོར་བའི་ཚུལ་གྱིས་བཞུགས་པའི་འོད་དཔག་ཏུ་མེད་པའི་ཚུལ་གང་ཡིན་དེ་ནི་དམ་པའི་ཆོས་སོ། །ལས་མཆོག་ཅེས་བྱ་བ་ནི་དེ་ཉིད་དུ་དོན་ཡོད་པར་གྲུབ་པའི་ཚུལ་གྱིས་བཞུགས་པ་གང་ཡིན་པ་དེ་ནི་ལས་མཆོག་གོ །བདག་ཅེས་བྱ་བ་ནི་དེ་ཉིད་ལས་རིན་ཆེན་འབྱུང་ལྡན་གྱི་ངོ་བོ་བཞུགས་པ་གང་ཡིན་པ་དེ་ནི་བདག་པོའོ། །བྱང་ཆུབ་སེམས་དཔའ་ཞེས་བྱ་བ་ནི་དེ་ཉིད་དུ་མི་བསྐྱོད་པའི་ངོ་བོས་བཞུགས་པ་གང་ཡིན་པ་དེ་ནི་བྱང་ཆུབ་ཀྱི་སེམས་སོ། །རབ་སྦྱོང་མཛད་ཅེས་བྱ་བ་ནི་དེ་བཞིན་གཤེགས་པའི་དཀྱིལ་འཁོར་དེ་ཉིད་དུ་རྣམས་པར་སྣང་མཛད་ཀྱི་ངོ་བོས་བཞུགས་པ་གང་ཡིན་པ་དེ་ནི་སངས་རྒྱས་ཐམས་ཅད་པ་སྡུས་པའི་ཚུལ་གྱིས་སེམས་ཅན་གྱི་ཁམས་ཐམས་ཅད་སྦྱོར་བར་མཛད་པས་ན། རབ་སྤྱོད་མཛད་ཅེས་བྱའོ། །ལ་ལ་ལས་ནི་རབ་སད་མཛད་པས་ན་རབ་སད་མཛད་ཅེས་བྱ་བ་ཡིན་པར་ཤེས་བྱའོ། །མཚན་བཅུ་པོ་འདི་དག་ནི་དེ་བཞིན་གཤེགས་པའི་ལས་རིས་ཀྱི་དཀྱིལ་འཁོར་གྱི་ཡོན་ཏན་སྟོན་པར་བྱེད་པ་ཡིན་ནོ། །རྡོ་རྗེ་ཁྲོ་བོ་ཞེས་བྱ་བ་ནི་རྡོ་རྗེ་ཧཱུཾ་མཛད་ལ་སོགས་པའི་ཕྱག་རྒྱ་ཆེན་པོའི་རང་བཞིན་ནོ། །ཁྲོ་བོ་ཞེས་བྱ་བ་ནི་ཁྲོ་བོའི་རིགས་ཀྱིས་ནམ་མཁའ་ཐམས་ཅད་ཁྱབ་པར་མཛད་པའོ། །དུས་མཐའ་ལྟར་འབར་ཞེས་བྱ་བ་ནི་སྲེག་པའི་བསྐལ་པ་ལྟ་བུའི་རྡོ་རྗེ་འབར་བས་ཁམས་གསུམ་མ་ལུས་བར་བཀང་སྟེ། སེམས་ཅན་གྱི་ཁམས་མ་ལུས་ཀུན་ཏུ་རྨོངས་པར་མཛད་པ་སྟེ། དེ་ཡང༌། འཇིག་པའི་བསྐལ་བ་ལྟ་བུ་ཡི། །རྡོ་རྗེ་འབར་བ་ཀུན་འཁྲུགས་པས། །ལྷ་ལ་སོགས་པའི་སྲིད་གསུམ་ཀུན། །སྐད་ཅིག་གིས་ནི་ཀུན་རྨོངས་མཛད། །ཅེས་གསུངས་པ་ཡིན་ནོ། །འདུལ་བ་པོ་ཞེས་བྱ་བ་ནི་ཡང་སླར་གསོ་བའི་རིགས་པས་ལྷ་ལ་སོགས་པ་སེམས་ཅན་གྱི་ཁམས་ཐམས་ཅད་བླངས་ནས། ཧྲཱིཿ་ཞེས་བྱ་བས་བཀུག་ནས་བཅུག་ལ་བཅིངས་ཏེ། དབང་དུ་མཛད་པས་ན་འདུལ་པ་པོ་ཞེས་བྱའོ། །འདུལ་མཛད་ཆེན་པོ་ཞེས་བྱ་བ་ནི་འདིས་དབང་ཕྱུག་ཆེ་པོ་ལ་སོགས་པ་འདུལ་
པར་མཛད་པས་ན་འདུལ་མཛད་ཆེན་པོ་སྟེ། གང་གི་ཕྱིར་བཅོམ་ལྡན་འདས་རྡོ་རྗེ་འཛིན་པ་ཆེན་པོ་རྡོ་རྗེ་རིགས་ཀྱི་རང་བཞིན་གྱིས་དབང་ཕྱུག་ཆེན་པོ་ལ་སོགས་པ་བྱང་ཆུབ་ཆེན་པོ་རབ་ཏུ་འཇོག་པར་མཛད་པས་ན་འདུལ་པ་ཡང་ཡིན་ལ་ཆེན་པོ་ཡང་ཡིན་པས་ན་འདུལ་མཛད་ཆེན་པོའོ། །གདུག་བའི་མཆོག་ཅེས་བྱ་བ་ནི་སེམས་ཅན་ཐམས་ཅད་ལ་ཉེ་བར་འཚེ་ཞིང་གནོད་པར་བྱེ་དཔའི་སེམས་དང་ལྡན་པ་ནི་གདུག་པའི་ཡིད་ཅེས་བྱ་སྟེ། དེ་རྣམས་ལ་འཇིགས་བ་བསྐྱེད་པར་བྱ་བའི་ཕྱིར་ཤིན་ཏུ་གདུག་པ་སྟོན་པས་ན་གདུག་པའི་མཆོག་སྟེ། གདུག་པ་རྣམས་ལས་ཀྱང་གདུག་པ་ཞེས་བྱ་བའི་ཐ་ཚིག་གོ །དྲག་པོ་ཞེས་བྱ་བ་ནི་གདུག་པ་དེ་རྣམས་ཉིད་གདུལ་བར་བྱ་བའི་ཕྱིར་རྡོ་རྗེ་དྲག་པོའི་སྐུར་སྟོན་པས་ན་དྲག་པོའོ། །དྲག་པོ་ཉིད་ཅེས་བྱ་བ་ནི་རྡོ་རྗེ་མཁའ་འགྲོ་མའི་ཚོགས་སྤྲུལ་ནས་དྲག་པོ་ཐམས་ཅད་ཟ་བར་མཛད་པས་ན་དྲག་པོ་ཉིད་དོ། །ཟ་མཛད་ཅེས་བྱ་བ་ནི་ཁྲོ་བོ་སྟོབས་པོ་ཆེས་གདུག་པའི་ཚོགས་རྣམས་ཟ་བར་མཛད་པས་ན་ཟ་མཛད་དོ། །མཚན་དགུ་པོ་འདི་དག་ནི་རྡོ་རྗེ་རིགས་ཀྱི་གསང་བའི་རས་རིས་ཀྱི་དཀྱིལ་འཁོར་གྱི་སྒོ་ནས་བསྟོད་པ་ཡིན་ནོ། ཐམས་ཅད་དག་པ་ཞེས་བྱ་བ་ནི་ཕྱག་རྒྱ་ཆེན་པོའི་རང་བཞིན་ནོ། །པདྨ་ཆེན་པོ་ཞེས་བྱ་བ་ནི་པདྨའི་དམ་ཚིག་གི་ཕྱག་རྒྱའོ། །ཤེས་རབ་ཐབས་དང་ཞེས་བྱ་བ་ནི་ཤེས་རབ་ཀྱིས་བསྐྱེད་པའི་ཐབས་ནི་ཤེས་རབ་ཐབས་ཏེ། སེམས་ཅན་ཐམས་ཅད་འདུལ་པའི་ཕྱིར་ཁྲོ་གཉེར་ཅན་ལ་སོགས་པ་ལྷ་མོའི་ཚོགས་ཀྱི་དབུས་ན་བཞུགས་པའི་འཇིག་རྟེན་དབང་ཕྱུག་གི་སྐུའོ། །ཚུལ་ཆེན་ཞེས་བྱ་བ་ནི་གཟུགས་ཐམས་ཅད་ཀུན་དུ་སྟོན་པས་སེམས་ཅན་གྱི་ཁམས་ཅད་རྣམས་པར་སྦྱོང་བར་མཛད་པས་ན་ཚུལ་ཆེན་པོའོ། །འདོད་ཆགས་དག་པ་ཞེས་བྱ་བ་ནི། ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པ། །དེ་བཞིན་དག་པའི་ཁམས་གསུམ་པ། །གནས་ཀྱི་ཉེས་པས་མི་གོས་སོ། །ཞེས་བྱ་བ་ནི་པདྨ་འདབ་མ་ཕྱེད་པའི་རྣལ་འབྱོར་རྡོ་རྗེ་ཆོས་ཀྱི་བསྒོམ་པས་འདོད་ཆགས་དག་པའོ། །ཏིང་ངེ་འཛིན་མཆོག་ཅེས་བྱ་བ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་
བྱ་བར་སེམས་རྩེ་གཅིག་བ་གང་ཡིན་པ་དེ་ནི་ཏིང་ངེ་འཛིན་མཆོག་སྟེ་དམ་པའོ། །སྣ་ཚོགས་ཆགས་པ་ཞེས་བྱ་བ་ནི་སྣ་ཚོགས་ཆག་སྤ་སྟེ་སེམས་ཅན་ཐམས་ཅད་འདུལ་བ་ལ་ཞེ་ན་པའོ། །དབང་ཕྱུག་ཆེ་ཞེས་བྱ་བ་ནི་དབང་ཕྱུག་ཆེན་པོས་འདུལ་པ་རྣམས་ལ་དེའི་གཟུགས་འཛིན་པར་མཛད་པས་ན་དབང་ཕྱུག་ཆེན་པོའོ། །མཚན་བརྒྱད་པོ་འདི་དག་ནི་པདྨའི་རིགས་ཀྱི་རས་རིས་ཀྱི་དཀྱིལ་འཁོར་གྱི་སྒོ་ནས་བསྟོད་པའོ། ནམ་མཁའ་ཞེས་བྱ་བ་ནི། ནམ་མཁའ་དང་མཉམ་པའི་ཡེ་ཤེས་མངའ་བས་ན་ནམ་མཁའོ། །མཐའ་ཡས་ཞེས་བྱ་བ་ནི་ནམ་མཁའ་དང་ཉེ་བར་ཡེ་ཤེས་རྒྱུ་མཐུན་པ་ལས་བྱུང་བར་གྱུར་པའི་རིན་པོ་ཆེའི་རིགས་ཀྱི་ངོ་བོའི་སྐུ་དང་གསུང་དང་ཐུགས་རྡོ་རྗེ་ན་མཁའི་ཁམས་ཐམས་ཅད་ན་རྟག་ཏུ་བཞུགས་པ་ལ། མཐའ་ཡས་པའི་སྒྲར་བཤད་དོ། །རྟག་པ་ཞེས་བྱ་བ་ནི་རྟག་པ་དང་མི་འགྱུར་བ་ནི་རྟག་པའོ། །དོན་ཞེས་བྱ་བ་ནི་དོན་དུ་གཉེར་བས་ན་དོན་ཏེ། སེམས་ཅན་རྣམས་ཀྱི་དོན་དུ་གཉེར་བ་ཡིན་ནོ་ཞེས་སྟོན་པ་ཡིན་ཏེ། འདི་ནི་བཅོམ་ལྡན་འདས་ནམ་མཁའ་མཛོད་ཀྱི་ངོ་བོ་ཉིད་དུ་སྟོན་པ་ཡིན་ནོ། །འབྱུང་བོ་ཐམས་ཅད་ཅེས་བྱ་བ་ནི་འབྱུང་བས་ན་འབྱུང་བོ་སྟེ། སེམས་ཅན་དང་སེམས་ཅན་མ་ཡིན་པའི་ངོ་བོའོ། །གནས་ཆེན་པོ་ཞེས་བྱ་བ་ནི་ནམ་མཁའ་ཐམས་ཅད་ལ་གནས་པའི་དང་པོའི་གཞལ་ཡས་ཁང་གི་ངོ་བོ་ཉིད་དུ་གྱུ་བས་ན་གནས་ཆེན་པོའོ། །འབྱོར་པ་ཞེས་བྱ་བ་ནི་དབང་བསྐུར་བའི་ལྷའི་ངོ་བོ་ཉིད་དུ་གྱུར་པའོ། །དཔལ་ཞེས་བྱ་བ་ནི་གཏེར་གྱི་ལྷ་མོའི་རང་བཞིན་དུ་གྱུར་པའོ། །གཙོ་བོ་ཞེས་བྱ་བ་ནི་རྒྱལ་མཚན་མཆོག་གི་ལྷ་མོའི་ངོ་བོ་ཉིད་དུ་གྱུར་པས་ཐམས་ཅད་དུ་སྤོད་བའོ། །རྒྱལ་ཞེས་བྱ་བ་ནི་ལྷ་མོ་ཆེན་མོའི་བདག་པོར་གྱུར་བའི་ངོ་བོ་ཉིད་ཀྱིས་མཛེས་ཤིང་གསལ་བས་ན་རྒྱལ་པོའོ། །བསམ་པ་ཐམས་ཅད་རྫོགས་མཛད་པ། །ཞེས་བྱ་བ་ནི་དབང་བསྐུར་བ་ལ་སོགས་པའི་ངོ་བོ་ཉིད་ཀྱིས་སེམས་ཅན་ཐམས་ཅད་ཀྱི་མངོན་པར་འདོད་པའི་དངོས་གྲུབ་སྩོལ་བས་ན་ཐམས་ཅད་རྫོགས་པར་མཛད་པའོ། །མཚན་བཅུ་གཅིག་པོ་འདི་དག་ནི་རིན་པོ་ཆེའི་རིགས་ཀྱི་
རས་རིས་ཀྱི་དཀྱིལ་འཁོར་གྱི་སྒོ་ནས་བསྟོད་པ་ཡིན་ནོ། །ཕྱག་འཚལ་ཁྱོད་ལ་ཕྱག་འཚལ་ལོ། །ཕྱག་འཚལ་འདུད་ཅིང་ཕྱག་འཚལ་ལོ། །ཞེས་བྱ་བ་ཡང་དུ་ཕྱག་འཚལ་འདུད་པ་ནི་ལྷག་པར་གུས་པའི་ཁྱད་པ་སྟོན་པ་ཡིན་ནོ། །དད་པས་ཁྱེད་ལ་བདག་བརྟེན་བགྱིད། །ཅེས་བྱ་བ་ནི་ཁྱེད་མངོན་སུམ་དུ་བྱ་སྟེ་ཞེས་བྱ་བ་ནི་རྟག་པ་ཁོ་ནར་བསྒོམ་པར་བགྱིའོ་ཞེས་བྱ་བའི་ཐ་ཚིག་གོ །རྡོ་རྗེ་སེམས་དཔའ་ཞེས་བྱ་བ་ནི་དེ་བཞིན་དུ་རོ་གཅིག་པ་སྟེ། དེ་ཡང༌། ཐོག་མ་ཐམ་མ་མེད་ཅིང་རྟག །མི་ཟད་མཉམ་པ་མེད་མི་འགྱུར། །སེམས་དཔའ་རྡོ་རྗེ་ཆེ་རང་བཞིན། །སེམས་དཔའ་རྡོ་རྗེ་ཞེས་བཤད་དོ། །ཞེས་འོག་ནས་བཤད་པ་ཡིན་ནོ། །དང་པོ་ཞེས་བྱ་བ་ནི་ད་ལྟར་བྱུང་བའི་དུས་ངོ་བོ་ཉིད་ཀྱིས་རྟག་པ་བཞུགས་པ་ཡིན་པས་ན་དང་པོའི་ཞེས་སྔར་བཤད་པ་ཡིན་ནོ། །མཚན་གཉིས་པོ་འདི་ནི་ཐམས་ཅད་དུ་དཔལ་རྡོ་རྗེ་སེམས་དཔའི་ངོ་བོ་ཉིད་ཡིན་ནོ་ཞེས་སྟོན་པ་ཡིན་ནོ། །བདག་གྲུབ་མཛད་དོ་ཞེས་བྱ་བ་ནི་སློབ་དཔོན་གསོལ་བ་འདེབས་པའོ། །ད་ནི་གང་ཞིག་ཅེས་བྱ་བ་ལ་སོགས་པས་མཚན་བརྒྱ་རྩ་བརྒྱད་པས་བསྟོད་པའི་ཕན་ཡོན་གསུངས་པ་ཡིན་ནོ། །ཉིན་རེ་ཞེས་བྱ་བ་ནི་རེ་རེ་ཞིང་ངོ། །ནང་བར་ཞེས་བྱ་བ་ནི་སྔ་དྲོའི་ཐུན་ཚིགས་དང་པོ་སྟེ། བཟླས་བརྗོད་དང་བསྒོམ་པའི་སྔོན་དུ་ཞེས་བྱ་བའི་ཐ་ཚིག་གོ །རྗོད་བྱེད་ན་ཞེས་བྱ་བ་ནི་འདོན་པར་བྱེད་ནའོ། །ཇི་ལྟར་ཞེ་ན། ཆོས་ཀྱི་ཚིག་གི་ལན་ཅིག་ནི། །ཞེས་བྱ་བ་སྨོས་ཏེ། རྔ་སྒྲ་ལྟར་ཟབ་པའི་དབྱངས་ནི་ཆོས་ཀྱི་ཚིག་གོ །ཆོས་ཀྱི་ཚིག་དེས་འདོན་ཅིང་རྗོད་པར་བྱེད་པ་གང་ཡིན་པ་དེ་ལ་ཅི་ཞིག་ཏུ་འགྱུར་ཞེ་ན། དངོས་གྲུབ་ཤིན་ཏུ་མྱུར་བར་འགྱུར། །ཞེས་བྱ་བ་གསུངས་ཏེ། རྣལ་འབྱོར་པ་དངོས་གྲུབ་གང་ཞིག་སྒྲུབ་པ་ལ་འཇུག་པར་འགྱུར་བ་དེ་འདིར་མཚན་བརྒྱ་རྩ་བརྒྱད་པའི་མཐུས་རིང་པོར་མི་ཐོགས་པར་མྱུར་དུ་འགྲུབ་པར་འགྱུར་པའོ། །གལ་ཏེ་འདིར་གྲུབ་མི་འདོད་ན། །ཞེས་བྱ་བ་ནི་གལ་ཏེ་རྣལ་འབྱོར་པ་གང་ལ་ལ་ཞིག་བཟླས་བརྗོད་དང་བསྒོམ་པའི་ཚེ་འདི་ལ་དངོས་གྲུབ་གང་ཞིག་དོན་དུ་གཉེར་ན། དང་པོ་སེ་ཉིན་རེ་ཞིག་སྡང་དྲོ་དང༌། ཉི་མ་ཕྱེད་
དང། ཕྱི་དྲོའི་དུས་གསུམ་དུ་ཇི་སྐད་དུ་བཤད་པའི་མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་བསྟོད་པར་བྱའོ། །བསྟོད་ན་རྣལ་འབྱོར་པ་དེ་ཅིར་འགྱུར་ཞེ་ན། སྡིག་པ་ཀུན་ལས་མྱུར་དུ་གྲོལ། །ཞེས་བྱ་བ་གསུངས་ཏེ། སྒྲིབ་པ་ཐམས་ཅད་དང་བྲལ་བར་འགྱུར་རོ། །དེ་ལྟར་སྡིག་པ་ཐམས་ཅད་ལས་ངེས་པར་གྲོལ་བའི་ཕྱིར་འཆི་བའི་དུས་བྱས་ནས་སངས་རྒྱས་ཀྱི་ཞིང་ཡོངས་སུ་དག་པར་སྐྱེ་བར་འགྱུར་རོ། །དེ་ནས་དེར་སྐྱེས་ནས་རྡོ་རྗེ་འཆང་ཆེན་པོའི་དངོས་གྲུབ་འགྲུབ་པར་འགྱུར་རོ། །ལན་ཅིག་ཕྱིར་བརྗོད་ཙམ་གྱིས་ཀྱང། །རྟག་ཏུ་སྡུག་བསྔལ་ཐམས་ཅད་སེལ། །ཞེས་བྱ་བ་ནི་གོ་བར་ཟད་དོ། །དངོས་གྲུབ་ཐམས་ཅད་ནི་དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་ལ་མཚན་བརྒྱ་རྩ་བརྒྱད་པ་འདིས་སྐལ་བ་བཟང་པོར་བྱེད་དེ་འདིས་དངོས་གྲུབ་ཐམས་ཅད་འགྲུབ་པར་འགྱུར་རོ་ཞེས་སྟོན་པ་ཡིན་ནོ། །དཔལ་གྱི་ཕུན་སུམ་ཚོགས་པ་ནི་ཕྱག་རྒྱལ་སོགས་པའི་འབྱོར་བའོ། །དེ་འཕེལ་བར་བྱེད་པ་ནི་འདི་གོང་ནས་གོང་དུ་རྒྱས་པར་བྱེད་པའོ། །དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་དངོས་གྲུབ་ཐམས་ཅད་དོ། །ཕྱག་རྒྱ་ཆེན་པོ་ལ་སོགས་པ་རྫོགས་པའོ། །དེའི་དོན་ཡོད་པ་ནི་འབྲས་བུ་ཡོད་པ་བསྐྱེད་པའི་རྒྱུར་གྱུར་པའོ། །ཡོན་ཏན་གྱི་རྒྱུ་ཡིན་པས་ན་ཡོན་ཏན་ནོ། །མཚན་བརྒྱ་རྩ་བརྒྱད་དམ་པ་ནི། །ཞེས་བྱ་བ་ནི་གསང་བ་དམ་པ་སྐྱེ་བོ་ཐམས་ཅད་ཀྱི་ཐུན་མོང་དུ་གྱུར་པའོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཅོམ་ལྡན་འདས་ལ་མཚན་བརྒྱ་རྩ་བརྒྱད་པ་འདིས་ཡང་དག་པར་བསྟོད་ནས། དེས་ཕྱིས་འདོད་ཆགས་རྡོ་རྗེ་མ་དང༌། ཀཱི་ལི་ཀཱི་ལི་མ་དང༌། རྡོ་རྗེ་དྲན་མ་དང༌། རྡོ་རྗེ་སྙེམས་མའི་མཆོད་པའི་ཕྱག་རྒྱ་རབ་ཏུ་དགའ་བ་ཞེས་བྱ་བ་གུས་བས་ཡང་དག་པར་མཆོད་ལ། ཡང་གླུ་མ་དང་རོལ་མོའི་མཆོད་བ་འོག་ནས་བཤད་པའི་མཚན་ཉིད་ཅན་གྱིས་བཅོམ་ལྡན་འདས་བདེ་བ་ཆེན་པོ་རྡོ་རྗེ་སེམས་དཔའ་ལ་མཆོད་པར་བྱའོ། །དེ་ནས་ཅི་ཞིག་བྱ་ཞེ་ན། རང་གི་ཕྱག་རྒྱ་ཞེས་བྱ་བ་ལ་སོགས་པ་གསུངས་ཏེ།
རང་གི་ཕྱག་རྒྱས་གྲུབ་ནས་སྙིང་པོ་འདིས་རྡོ་རྗེ་བླང་བར་བྱའོ་ཞེས་བྱ་བར་སྦྱོར་རོ། །དེ་ལྟར་བཅོམ་ལྡན་འདས་ཡང་དག་པར་མཆོད་པས་དཔལ་རྡོ་རྗེ་སེམས་དཔའི་སྦྱོར་བས་ཕྱག་རྒྱ་ཆེན་པོ་ཇི་ལྟ་བ་བཞིན་དུ་བཅིང་བར་བྱའོ། །དེ་ལྟར་ན་ཕྱག་རྒྱའི་དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ནས་རྣམ་པར་རྒྱལ་བའི་བུམ་པའི་ཆུས་དབང་བསྐུར་བའི་རྗེས་ཐོགས་ཉིད་ལ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག །མཚན་ཉིད་འོག་ནས་བཤད་པས་བདག་ཉིད་དབང་བསྐུར་ལ། སངས་རྒྱས་ཐམས་ཅད་ཀྱི་རིན་པོ་ཆེའི་ཅོད་པ་ནི་རིན་པོ་ཆེ་ལས་བྱས་པ་ལུགས་མའམ་བརྐོས་པའམ་བྱས་པའམ་བྲིས་བས་དབང་བསྐུར་བར་བྱའོ། །ཕྱག་བྱས་ནས་ཞེས་བྱ་བ་ནི་ཐམས་ཅད་ལ་སྦྱར་བའོ། །རང་གི་རྡོ་རྗེ་བླངས་ཞེས་བྱ་བ་ནི་དཔལ་རྡོ་རྗེ་སེམས་དཔའི་དང་པོའི་རྡོ་རྗེ་སེམས་དཔའ་གང་ཡིན་པ་དེ་ནི་རྣལ་འབྱོར་པ་འདིའི་རང་གི་རྡོ་རྗེ་ཡིན་ནོ། །འདི་སྐད་སྟོན་ཏེ། དང་པོའི་རྡོ་རྗེ་དྲིལ་བུ་དང་བཅས་པ་བླངས་པར་བྱའོ་ཞེས་བྱ་བའི་ཐ་ཚིག་གོ །དེ་ལ་ཞེས་བྱ་བ་ལ་སོགས་པ་ནི་གོ་བར་ཟད་དོ། །དེ་ནས་ཀྱང་ནི་ཅི་འདོད་པར། །ཞེས་བྱ་བ་ནི་དེ་ལྟར་བདག་ཉིད་འཇུག་པ་ལ་སོགས་པའི་གོ་ཆ་རྗེས་སུ་སྤྱད་ནས། དུས་ཕྱིས་བདག་བྱིན་གྱིས་བརླབས་པ་ལ་སོགས་པ་བྱ་སྟེ། ཇི་ལྟར་སྤྲོ་བས་གང་ཞིག་འདོད་པ་འང་གྲུབ་པ་ནས་ཆོ་གའི་མཆོག་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བསྒོམས་པ་བསྒྲུབས་ནས། རྡོ་རྗེ་གར་གྱི་མཆོད་པས་ཡང་དག་པར་མཆོད་ནས་རབ་ཏུ་གྲུབ་པར་འགྱུར་རོ་ཞེས་བྱ་བ་ནི་འདོད་ཆགས་རྡོ་རྗེ་ལ་སོགས་པའི་མཆོད་པ་རྣམ་པ་བཅུ་གཉིས་ནི་རྡོ་རྗེ་གར་གྱི་མཆོད་པ་སྟེ། རྡོ་རྗེ་གར་གྱི་མཆོད་པ་དེས་བཅོམ་ལྡན་འདས་རྡོ་རྗེ་སེམས་དཔའི་འཁོར་དང་བཅས་པ་ལ། མཆོད་པ་བྱས་ནས་ཡང་དག་པར་རྫོགས་པར་འགྱུར་པ་སྟེ། དཀྱིལ་འཁོར་གྱི་དངོས་གྲུབ་འགྲུབ་པར་འགྱུར་རོ་ཞེས་བྱ་བའི་ཐ་ཚིག་གོ །དེ་ནས་བརྩམས་ཏེ་ཞེས་བྱ་བ་ནི། དཀྱིལ་འཁོར་བསྒྲུབས་པ་ནས་ཉེ་བར་བཟུང་སྟེ། རྡོ་རྗེ་བདག་ནི་རྡོ་རྗེ་སྐུའི། །རྡོ་རྗེ་ཀུན་གྱི་གསང་མཆོག་འཛིན། །ཞེས་བྱ་བ་ནས།
རྡོ་རྗེ་ཀུན་གྱི་རིགས་ལྔའི་རང་བཞིན་ཅན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེ་རྣམས་ཀྱི་གསང་བ་བཟང་པོ་ནི་གསང་བ་མཆོག་སྟེ། དཔལ་རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེའོ། །དེ་འཛིན་པས་ན། རྡོ་རྗེ་ཀུན་གྱི་གསང་མཆོག་འཛིན། །ཞེས་བྱ་སྟེ། དཔལ་རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེའི་དངོས་གྲུབ་མཉམ་པར་འགྲུབ་པ་དེའི་བདག་ཉིད་ཀྱིས་འཛིན་པར་བྱེད་དོ་ཞེས་བྱ་བའི་ཐ་ཚིག་གོ །ཇི་ལྟར་ཞེ་ན། རྡོ་རྗེ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། གང་ཕྱིར་དཀྱིལ་འཁོར་དེ་གྲུབ་པས། །རྡོ་རྗེ་ཐམས་ཅད་འཛིན་སློབ་དཔོན། །ཞེས་བྱ་བ་རྡོ་རྗེ་སེམས་དཔའི་སློབ་དཔོན་དཔལ་རྡོ་རྗེ་སེམས་དཔའ་སྐུ་དང་གསུང་དང་ཐུགས་རྡོ་རྗེ་དངོས་གྲུབ་ཐམས་ཅད་འགྲུབ་པར་འགྱུར་རོ། །རྡོ་རྗེ་སེམས་དཔའི་དངོས་གྲུབ་ཆེན་པོ་གྲུབ་པ་ནི། རྡོ་རྗེ་སེམས་དཔའི་དངོས་གྲུབ་ཆེ། །ཞེས་བྱའོ། །ཕྱག་རྒྱ་ཆེ་ཀུན་ནི་ལྷ་མོའི་རང་བཞིན་ཏེ། དེ་རྣམས་ཀྱི་བདག་ནི་རིགས་ཀྱི་བདག་པོ་སྟེ། རྡོ་རྗེ་སེམས་དཔའ་ཞེས་བྱ་བའི་ཐ་ཚིག་གོ །དེ་ཉིད་ཀྱིས་ན་དབང་ཕྱུག་སྟེ། གཙོ་བོའོ། །ཐམས་ཅད་མཁྱེན་པ་ཞེས་བྱ་བ་ནི་དེ་བཞིན་གཤེགས་པ་དང༌། དེ་བཞིན་གཤེགས་པའི་རིགས་དང༌། འཇིག་རྟེན་དབང་ཕྱུག་དང༌། དེའི་རིགས་ཀྱི་ངོ་བོ་ཉིད་ཡིན་པས་ཐམས་ཅད་མཁྱེན་པའོ། །རྡོ་རྗེ་ཞེས་བྱ་བ་ནི་རྡོ་རྗེ་རིགས་ཀྱི་བདག་པོ་དང༌། དེའི་རིགས་ཀྱི་ངོ་བོ་ཉིད་ཀྱིས་ཐམས་ཅད་དུ་སོང་བའི་ཕྱིར་རྡོ་རྗེ་ཆེའོ། །ཐམས་ཅད་མཁྱེན་པ་ཡང་ཡིན་ལ་རྡོ་རྗེ་ཆེན་པོ་ཡང་ཡིན་པས་ན་ཐམས་ཅད་མཁྱེན་པའི་རྡོ་རྗེ་ཆེའོ། །ལས་རྣམས་ཐམས་ཅད་ཅེས་བྱ་བ་ནི་ནོར་བུའི་རིགས་དང་ལས་ཀྱི་རིགས་གཉིས་ཀྱི་དཀྱིལ་འཁོར་གྱི་ལས་གང་ཡིན་པ་དེ་ནི་ལས་རྣམས་ཐམས་ཅད་དེ། དེ་རྫོགས་པར་བྱེད་ནུས་པར་འགྱུར་རོ། །རྟོག་པ་དང་ཞེས་བྱ་བ་ནི་དུས་ཐམས་ཅད་དུའོ། །ཟིལ་གྱིས་གནོན་པར་མི་ནུས་པས་ན་མི་ཚུགས་པའོ། །ལྷ་དང་བཅས་པའི་འཇིག་རྟེན་གྱིས་ཀྱང་གསད་པར་མི་ནུས་པས་ན་མི་གསོད་པའོ། །
འཇིག་རྟེན་དང་འཇིག་རྟེན་ལས་འདས་པའི་ལས་ཐམས་ཅད་བྱེད་པས་ན་ཀུན་བྱེད་དོ། །རྒྱུ་དེ་ཉིད་ཀྱིས་ན་གདུལ་བྱ་རྣམས་ལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་སྩལ་བར་འགྱུར་རོ། །སེམས་ཅན་ཐམས་ཅད་ཀྱི་བདག་པོར་གྱུར་པས་ན་རྒྱལ་ཆེན་ནོ། །དེ་ཉིད་ཀྱིས་ན་ཚར་གཅོད་པ་དང༌། ཕན་འདོགས་པ་ཡིན་ནོ། །རྡོ་རྗེ་སེམས་དཔའ་ལ་སོགས་པའི་ལྷ་ཐམས་ཅད་སྒོམ་པ་པོ་ནི་རྗེས་སུ་ཆགས་པའོ། །དེ་ཉིད་ནི་རྣལ་འབྱོར་ཐམས་ཅད་ཀྱི་མཆོག་ཏུ་གྱུར་པས་ཐམས་ཅད་མཆོག་གོ །རྡོ་རྗེ་སེམས་དཔའ་ལ་སོགས་པ་ཡེ་ཤེས་ཀྱི་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་རྟོག་པས་ན་ཀུན་རིག་གོ །རིགས་ཐམས་ཅད་ཀྱི་གཞིར་གྱུར་པས་ན་ཐམས་ཅད་གནས་སོ། །འཇིག་རྟེན་དང་འཇིག་རྟེན་ལས་འདས་པའི་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་ནི་འདོད་པ་ཐམས་ཅད་དོ། །དེ་རྣམས་ལ་རབ་ཏུ་སྤྱོད་པ་ནི་བདག་པོར་འགྱུར་བའོ། །དོན་འདི་ཉིད་བཤད་པ་ནི། ཕུན་ཚོགས་ཀུན་གྱི་དབང་ཕྱུག་ཆེ། །ཞེས་བྱ་བ་ཡིན་ནོ། །ལྷག་མ་ནི་གོ་བར་ཟད་དོ། །ཚེ་འདི་ཉིད་ལ་འགྲུབ་པར་འགྱུར། །ཞེས་བྱ་བ་ནི་དེ་ལྟར་དཀྱིལ་འཁོར་སྦྲུལ་བས་འགྲུབ་པའི་རྣལ་འབྱོར་བ་ནི་ལུས་དེ་ཉིད་ཀྱིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་གྱུར་པ་ནི་གྲུབ་པའོ། །ཅིའི་ཕྱིར་འདི་རང་ཉིད་དཀྱིལ་འཁོར་དུ་འཇུག་པས་དེ་ལྟ་བུའི་ཡོན་ཏན་གྱི་ཁྱད་པར་ཐོབ་པར་འགྱུར་ཞེ་ན། འདི་ལྟར་ཞེས་བྱ་བ་སྨོས་ཏེ། ནི་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་བཤད་མ་ཐག་པའི་སྒྲུབ་པའི་ཆོ་གའི་རྣམ་པས་བསམ་པ་དག་པ་སྟེ་སེམས་དག་པར་གྱུར་པས་རང་ཉིད་དགྱེས་ནས་དེའི་བདག་པོའི་རྡོ་རྗེ་སློབ་དཔོན་དུ་འགྱུར་བའོ། །དད་པར་གྱུར་པས་ཀྱང་ཞེས་བྱ་བ་ནི་དད་པ་ནི་སེམས་དང་བ་སྟེ། མ་དད་པ་ནི་དྲི་མ་དང་བྲལ་བས་དད་པར་འགྱུར་བ་སྟེ། དད་པར་གྱུར་པ་དེས་ཀྱང་ངོ༌། །ཇི་ལྟར་ན་དད་པར་འགྱུར་བ་ཡིན་ཞེ་ན། དེ་ཁོ་ན་ཉིད་ཅེས་བྱ་བ་སྨོས་ཏེ། དེ་ཁོ་ན་ཉིད་ཀྱིས་རྡོ་རྗེ་བཟུང་བ་དང༌། ཆོས་ཀྱི་དྲིལ་བུ་དཀྲོལ་བ་
དང། དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་པ་ནི་དེ་ཁོ་ན་ཉིད་དེ། དེས་དད་པར་གྱུར་པ་སྟེ། རྡོ་རྗེ་སེམས་དཔའི་སྐུ་དང་གསུང་དང་ཐུགས་རྡོ་རྗེ་ལ་སྒྲིབ་པ་མེད་པའི་སེམས་ཉེ་བར་སྐྱེ་བར་འགྱུར་རོ་ཞེས་བྱ་བའི་ཐ་ཚིག་གོ །དགྱེས་པ་ནི་ཐུགས་རངས་བའོ།། རང་ཉིད་ནི་རང་བདག་ཉིད་དེ། སྒྲུབ་པ་པོ་དེའི་བདག་པོར་རྡོ་རྗེ་སེམས་དཔའ་སློབ་དཔོན་དུ་གྱུར་ནས་དཀྱིལ་འཁོར་དུ་འཇུག་པར་མཛད་པ་དེའི་ཕྱིར་དཀྱིལ་འཁོར་བསྒྲུབས་པས་ཇི་སྐད་བཤད་པའི་དངོས་གྲུབ་འགྲུབ་པར་འགྱུར་རོ། །བདེ་བ་ཆེན་པོ་ནི་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་རོ། །དེས་རྡོ་རྗེ་སེམས་དཔས་བྱིན་གྱིས་བརླབས་པའི་སློབ་དཔོན་ནི། བདེ་བ་ཆེན་པོའི་རྡོ་རྗེ་སློབ་དཔོན་ནོ། །དེའི་བྱིན་གྱིས་བརླབས་པའི་རྡོ་རྗེ་སེམས་དཔའི་སྐུ་དང་གསུང་དང་ཐུགས་སུ་བསྐྱེད་པ་སྟེ། དེ་དོན་དུ་འཇུག་པ་ལ་སོགས་པའི་ཆོ་ག་རྒྱས་པ་ནི་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་དུ་འཇུག་པ་ལ་སོགས་པའི་བྱ་བའི་རྒྱུད་དེ་དེ་སྟོན་པར་བྱེད་པའི་རྒྱུད་རྫོགས་སོ།། །།དེ་ལྟར་སློབ་དཔོན་ལས་ཀྱི་ཆོ་ག་གསུངས་ནས། ད་ནི་དེ་ནས་ཞེས་བྱ་བ་ལ་སོགས་པས་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པའི་དོན་སྟོན་པའི་ཚིག་ཡིན་ནོ། །བཅོམ་ལྡན་འདས་རྡོ་རྗེ་སེམས་པར་བྱིན་གྱིས་བརླབས་པའི་སློབ་མ་ནི་རྡོ་རྗེ་སློབ་མ་སྟེ། དེ་རྣམས་ཀྱི་ཆོ་ག་རྒྱས་པ་ནི་འཇུག་པ་ལ་སོགས་པའི་བྱ་བའི་རྒྱུན་ཏེ། དེ་སྟོན་པར་བྱེད་པའི་རྒུད་རྗེས་སུ་བཤད་པར་བྱའོ་ཞེས་བྱ་བ་ནི་བསྟན་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་པས་གསུངས་སོ། །རྡོ་རྗེ་མཆོད་ཡོན་བསྐོར་བཅིངས་པས། །ཞེས་བྱ་བ་ནི་རྡོ་རྗེ་སེམས་དཔའི་རྣལ་འབྱོར་ཆེན་པོ་དང༌། ཇི་ལྟ་བ་བཞིན་དུ་ལྡན་པའི་ཕྱག་འཚལ་བ་ལ་སོགས་པ་སྔོན་དུ་འགྲོ་བ་ཇི་སྐད་དུ་བཤད་པའི་མཚན་ཉིད་ཅན་གྱིས་རྡོ་རྗེ་མཆོད་ཡོན་གྱི་ཕྱག་རྒྱ་རང་གི་སྙིང་གའི་ཕྱོགས་སུ་བསྐོར་ལ་མེ་ཏོག་གི་ཕྲེང་བ་དང་ལྡན་པར་བཅིངས་ཏེ། ལྷག་པར་མོས་པའི་ཁྱད་པར་ཕུལ་དུ་བྱུང་བས་བཞིན་གྱི་པདྨ་གཡོས་པ་ནི་བསམས་པ་བཞིན་གཡོས་
པ་སྟེ། དེས་བཅོམ་ལྡན་འདས་ལ་མགོ་བོས་ཡང་དག་པར་ཕྱག་བྱས་པ་ནི་མགོ་བོས་ཡང་དག་པར་ཕྱག་བྱས་པའོ། །དངོས་གྲུབ་ཐམས་ཅད་སྒྲུབ་བྱེད་ཡིན། །ཞེས་བྱ་སྟེ། རྣལ་འབྱོར་བའི་དངོས་གྲུབ་ཀུན་སྐྱེད་པར་བྱེད་པ་ཡིན་ནོ། །རྣལ་འབྱོར་བ་གནས་གང་དུ་གནས་ནས་བཅོམ་ལྡན་འདས་ལ་ཕྱག་བྱ་ཞེ་ན། དཀྱིལ་འཁོར་ཞུགས་ནས་ཞེས་བྱ་བའི་ཐ་ཚིག་གསུངས་ཏེ། ནང་གི་དཀྱིལ་འཁོར་བཅོམ་ལྡན་འདས་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་དུ་ཞུགས་ནས་ཞེས་བྱ་བའི་ཐ་ཚིག་གོ །དེ་ཅི་ཞིག་བྱ་ཞེ་ན། བདེ་བ་ཆེན་པོ་ཞེས་བརྗོད་ཅིང༌། །ཞེས་བྱ་བ་གསུངས་སོ། ཅི་ཞིག་བྱེད་ཅིང་དེ་སྐད་ཅེས་བརྗོད་ཅེ་ན། བསྐོར་བ་ལན་གསུམ་བྱེད་བཞིན་དུ། །ཞེས་བྱ་བ་གསུངས་ཏེ། ནང་གི་དཀྱིལ་འཁོར་ལ་བསྐོར་བ་ལན་གསུམ་དུ་བྱེད་ཅིང་ཞེས་བྱ་བའི་ཐ་ཚིག་གོ །འདོད་ཆགས་ཆེན་པོ་བདེ་བ་ཆེ།། འགྲོ་བ་ཀུན་ལ་གྲུབ་པར་མཛོད། །ཅེས་བྱ་བ་ལ་སོགས་པ་ནི་གོ་བར་ཟད་དོ། །འཁོར་ལོ་བཤད་དོ་ཞེས་བྱ་བར་སྦྱར་རོ། །དེ་ཁྱད་པར་དུ་བྱེད་པ་ནི་གནས་ནི་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་བཞིན་གཤེགས་པ་དང༌། རྡོ་རྗེ་པདྨ། ནོར་བུའི་རིགས་དང༌། འཇིག་རྟེན་པའི་གཞལ་ཡས་ཁང་ཐམས་ཅད་ཀྱི་གཞིར་གྱུར་པས་ན་གནས་སོ། །དངོས་གྲུབ་མཐའ་ཡས་ནི་ནམ་མཁའ་ཐམས་ཅད་ལ་རྟག་ཏུ་བཞུགས་པའི་རྡོ་རྗེ་སེམས་དཔའ་ལ་སོགས་པའི་སྐུ་དག་གསུང་དང་ཐུགས་རྡོ་རྗེ་བསྐྱེད་པ་གང་ཡིན་པ་དེའི་མཐའ་ནི་སྔར་བཤད་པའི་ཚུལ་གྱིས་མཐར་ཐུག་པར་མི་ནུས་པ་ན་མཐའ་མེད་པའོ། །བཤད་དོ་ཞེས་བྱ་བ་ནི་བཤད་མཐའ་གཞུང་དེས་རབ་ཏུ་བསྟན་པའོ། །ནམ་མཁའ་ཕྱོགས་སུ་མ་ལུས་པ་ནི་ཕྱོགས་བཅུའི་ནམ་མཁའོ། །དེ་ལ་རབ་ཏུ་གནས་ཤིང་གཞིར་བྱ་བ་གང་ཡིན་པ་དེ་ལ་དེ་སྐད་ཅེས་བྱའོ། །མཉམ་པ་མེ་དཔའི་བདེ་བ་ནི་དེ་བཞིན་གཤེགས་པའི་གཉིས་སུ་མེད་པའི་ཡེ་ཤེས་སོ། །དེའི་རྡོ་རྗེ་དང་པོའི་རྡོ་རྗེ་དང༌། རིན་པོ་ཆེ་དང་པདྨ་དང༌། སྣ་ཚོགས་རྡོ་རྗེའོ། །དེ་རྣམས་ཀྱི་གསང་བ་ནི་འཁོར་ལོ་དེ་སྟེ། དེ་རྣམས་ཀྱིས་
ལེགས་པར་སྦྱར་བའི་ཕྱིར་རོ། །དང་པོ་ཞེས་བྱ་བའི་སྒྲ་ནི་བཤད་ཟིན་ཏོ། །བདེ་བ་ཡང་ཡིན་ལ་མཆོག་ཀྱང་ཡིན་པས་ན་བདེ་བའི་མཆོག་ཡིན་ཏེ། དངོས་གྲུབ་ཐམས་ཅད་མི་འགྱུར་བའི་བདེ་བའོ། །མཆོག་ཀྱང་ཡིན་ལ་དང་པོའི་བདེ་བ་ཡང་ཡིན་པས་ན་མཆོག་དང་པོའི་སྐྱེས་བུ་སྟེ། རྡོ་རྗེ་འཆང་ཆེན་པོའོ། །དེའི་འཁོར་ལོའོ། །ཡང་འདིའི་དོན་བརྗོད་པར་བྱ་སྟེ། བདག་བསྲུང་བ་དང༌། བགེགས་གཞོམ་པ་ལ་སོགས་པ་བྱས་ལ་བསང་གཏོར་བྱ་བའི་ཕྱིར་སྤོས་ཆབ་ཀྱིས་བཀང་བའི་སྣོད་ལ་རྡོ་རྗེ་གནོད་སྦྱིན་ཡོངས་སུ་བཟླས་ལ་ལྷའི་ཁང་པའི་སྒོར་བཞག་ལ་མཆོད་ཡོན་དང༌། མཆོད་པ་རྣམ་པ་ལྔས་ཇི་ལྟ་བ་བཞིན་དུ་མངོན་པར་བཟླའོ། །མཆོད་ཆེན་ཐམས་ཅད་དགུག་པ་དང༌། །བདག་ལ་བྱིན་རླབས་སོགས་གྲུབ་པས། །རྟག་ཏུ་རྡོ་རྗེ་དྲིལ་འཆང་ཞིང༌། །དངོས་གྲུབ་མཆོག་ནི་བསྒྲུབ་པར་བྱ། །ལུགས་མའམ་ཡང་ན་བརྐོས་པའམ། བྱས་པའམ་ནི་བྲིས་པ་ཡི། །དང་པོའི་འཁོར་ལོ་བཞག་ནས་ནི། །དེར་ནི་ལྷར་ཡང་རབ་ཏུ་འགྲུབ། །ཡི་གེ་ཧཱུཾ་ཟློས་ཤིང་དང་པོའི་རྡོ་རྗེ་ཕྱག་རྒྱ་བཅིངས་ལ། ཨ་ནུ་རཱ་ག་ཡ་མི་ཞེས་བརྗོད་ནས་ས་ལ་བཞག་སྟེ། བཅོམ་ལྡན་འདས་ཡུམ་གྱི་དཀྱིལ་འཁོར་སྤྲུལ་ལ། དེ་ཉིད་རང་གི་སྙིང་གར་བཞག་ན་དཀྱིལ་འཁོར་དར་རབ་ཏུ་ཞུགས་པར་འགྱུར་རོ། །དེ་ནས་གལ་ཏེ་འབྱོར་པ་ཡོད་ན་མེ་ཏོག་ལ་སོགས་པའི་དཀྱིལ་འཁོར་མཆོད་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི་ཞེས་བྱ་བ་དང་ཕྱོགས་ཐམས་ཅད་ནས་ཡན་ལག་ལྔས་བཅོམ་ལྡན་འདས་འཁོར་དང་བཅས་པ་ལ་ཕྱག་བྱས་ལ། ཕྱག་བཞི་སྔོན་དུ་འགྲོ་བས་སྔོམ་པ་བཟུང་ལ། སྡིག་པ་དྲལ་བའི་བར་གྱི་ཆོ་ག་རྣམས་རྗེས་སུ་སྤྱད་པར་བྱའོ། །དེ་ནས་རང་གི་སྙིང་གའི་ཟླ་བ་ལ་གནས་པའི་དང་པོའི་རྡོ་རྗེའི་དབུས་སུ་ཡི་གེ་ཧཱུཾ་མངོན་པར་ཡིད་ཀྱིས་བྲིས་ལ། དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་རང་བཞིན་གྱིས་འོད་གསལ་ཞིང༌། ནམ་མཁའ་དང་མཉམ་པའི་སེམས་ཡི་གེ་ཧཱུཾ་དབྱངས་ཀྱི་ཡི་གེ་བཅུ་དྲུག་གིས་བསྐོར་བ་ཟླ་བའི་དཀྱིལ་འཁོར་དུ་གྱུར་བ་
བསམ་པར་བྱའོ། །དེའི་སྟེང་དུ་ཡང་ཧཱུཾ་ཀ་ནས་ཀཥའི་བར་དུ་གསལ་བའི་ཡི་གེ་སྐར་མ་ལྟ་བུ་ལས་ཟླ་བའི་དཀྱིལ་འཁོར་གཉིས་པ་བསམས། ཡང་ཟླ་བའི་དཀྱིལ་འཁོར་གཉིས་པ་ཧཱུཾ་དང་བཅས་པ་ལས་དང་པོའི་རྡོ་རྗེ། རྡོ་རྗེའི་དབུས་སུ་ཡང་ཧཱུཾ་བསམས་ལ་བཛྲ་ཧཱུཾ་ཞེས་ཟློས་ཤིང་རྡོ་རྗེ་ནི་བདག་གོ་ཞེས་རྡོ་རྗེའི་ང་རྒྱལ་དུ་བསྒོམས་ནས། རྡོ་རྗེ་ལས་རྡོ་རྗེ་སེམས་དཔའ་དང་བཅས་པའི་ལྷ་མོའི་དཀྱིལ་འཁོར་གྱི་འཇིག་རྟེན་གྱི་ཁམས་ཐམས་ཅད་དུ་རྡུལ་ཕྲ་རབ་དང་མཉམ་པ་སྤྲོས་ལ། དེས་སེམས་ཅན་གྱི་ཁམས་ཐམས་ཅད་རྡོ་རྗེ་འཆང་ཆེན་པོར་རྟོགས་པར་བྱས་ནས། རྡོ་རྗེ་འཆང་ཆེན་པོར་བྱས་ནས་དེ་རྡོ་རྗེ་དེར་ཡིད་ཀྱིས་གཞུག་པར་བྱའོ། །དེ་ནས་རྡོ་རྗེ་དེ་བཛྲ་སཏྭ་ཧཾ་ཞེས་ཟློས་ཤིང་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་བདག་ཉིད་བསམས་ལ། རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་བླངས་ལ་ལག་པ་གཡས་པས་དང་པོའི་རྡོ་རྗེ་བསྙེམས་པ་དང་བཅས་པས་གསོར་ལ། ཡང་བཛྲ་སཏྭ་ཧཾ་ཞེས་བརྗོད་དོ། །དེ་ནས་མ་ཧཱ་ས་མ་ཡ་སཏྭ་ཧཾ་ཞེས་བྱ་བ་ནི་སྤྱིའི་སྔགས་བརྗོད་པར་བྱའོ། །དེ་ནས་དང་པོའི་རྡོ་རྗེ་ཇི་ལྟ་བ་བཞིན་དུ་བཅིངས་ལ་ས་མ་ཡཱ་ཧཾ་ཞེས་བརྗོད་པར་བྱའོ། །དེ་ཉིད་ཀྱི་སྙིང་ག་དང་དབྲལ་བ་དང་ལྐོག་མ་དང༌། སྤྱི་བོར་བྱིན་གྱིས་བརླབས་ལ་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བརྗོད་དོ། །དེ་ནས་སེམས་དཔའི་སྐྱིལ་མོ་ཀུང་བཅས་ནས། ལུས་ནི་དྲང་པོར་གཞག་བྱས་ལ། །རྡོ་རྗེ་བསྙེམ་མ་འཆང་བྱེད་ཅིང། །བསྒྱིངས་དང་བཅས་པས་རྡོ་རྗེ་གསོར། །སྐུ་དང་གསུང་ཐུགས་རྡོ་རྗེ་ཡིས། །རྡོ་རྗེ་སེམས་དཔར་རྣག་ཉིད་འགྱུར། །ཞེས་བྱ་བ་འདིས་ནི་བཅོམ་ལྡན་འདས་ཀྱི་ཕྱག་རྒྱ་ཆེན་པོའོ། །དེ་ལྟར་ཕྱག་རྒྱ་ཆེན་པོ་བཅིངས་ནས། རང་གི་སྙིང་གའི་ཟླ་བའི་དཀྱིལ་འཁོར་ནམ་མཁའི་ཁམས་ཐམས་ཅད་དང་མཉམ་པར་འཇུག་པའི་ཚུལ་ཙམ་དུ་ཡིད་ཀྱིས་ཞུགས་ལ། སྔ་མ་བཞིན་དུ་དང་པོའི་རྡོ་རྗེ་དེར་ལྷ་མོའི་དཀྱིལ་འཁོར་སྤྲུལ་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་གྱིས་རང་གི་འཇུག་པའི་ཆོ་ག་བྱས་ལ། དཀྱིལ་
འཁོར་དེ་རང་གི་ལུས་ལ་ཐེམ་པར་བསམས་ནས་རང་གི་ལུས་ཀྱི་ལྷ་ཐམས་ཅད་ཀྱི་གནས་སུ་ཧྲཱིཿ་ལས་སྣ་ཚོགས་པདྨའི་གདན་བསམས་ལ་གཞིའི་ལུས་ལ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ། རང་གི་གནས་སུ་འདུག་ལ་མདུན་དུ་ནམ་མཁའི་ཕྱོགས་སུ་ཧཱུཾ་ཨཱ་ཞེས་བྱ་བ་སྣ་ཚོགས་པདྨའི་སྟེང་དུ་དང་པོའི་རྡོ་རྗེ་ཁ་དོག་དམར་པོ་བསྐྱེད་ལ། དེའི་དབུས་སུ་ཧཱུཾ་བསམས་ལ། ཧཱུཾ་བཛྲ་ཧཾ་ཞེས་ཟློས་ཤིང་རྡོ་རྗེའི་ང་རྒྱལ་དུ་བསྒོམས་ནས་ཧཱུཾ་བཛྲ་སཏྭ་ཧཾ་ཞེས་བརྗོད་ལ་རྡོ་རྗེ་དེ་རྡོ་རྗེ་སེམས་དཔའི་བདག་ཉིད་བསྒོམ་པར་བྱའོ། །དེ་བཞིན་དུ་རྡོ་རྗེ་དྲིལ་བུའི་ཕྱག་རྒྱ་ཆེན་པོ་བཅིངས་ལ་གཞིའི་ལུས་ལ་རང་གི་གནས་ནས་ཡིད་ཀྱིས་བཛྲ་གྷཎྚ་ཧོ་ཨཱ་ཞེས་ཡིད་ལ་ཟློས་ཤིང་མདུན་གྱི་ནམ་མཁའི་ཕྱོགས་སུ་སྣ་ཚོགས་པདྨའི་སྟེང་དུ་རྡོ་རྗེ་དྲིལ་བུ་བསྐྱེད་པར་བྱའོ། །རྡོ་རྗེ་དྲིལ་བུའི་དབུས་སུ་བཛྲ་གྷཎྚ་ཧོ། ཞེས་ཟློས་ཤིང་བསམས་ལ། བཛྲ་གྷཎྚ་ཧོ། ཞེས་ཟློས་ཤིང་རྡོ་རྗེ་དྲིལ་བུའི་ང་རྒྱལ་དུ་རྣམ་པར་བསྒོམས་ལ། བཛྲ་གྷཎྚ་ཧོ྅ཧཾ་ཞེས་ཟློས་ཤིང་དྲིལ་བུ་མའི་གཟུགས་སུ་བསྒོམ་པར་བྱའོ། །དེ་ནས་རྡོ་རྗེ་ལྕགས་ཀྱུ་མ་ལ་སོགས་པའི་ལས་ཀྱི་ཕྱག་རྒྱས་བཅོམ་ལྡན་འདས་འཁོར་དད་བཅས་པ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བའོ། །དེ་ནས་དང་པོའི་རྡོ་རྗེ་བཅིངས་ལ་ཧཱུཾ་དྲྀ་ཤྱ་ཞེས་བྱ་བས་བཅོམ་ལྡན་འདས་བལྟ་བར་བྱའོ། །དེ་བཞིན་དུ་རྡོ་རྗེ་དྲིལ་བུ་མའི་ཕྱག་རྒྱ་བཅིངས་ལ། བཛྲ་གྷཎྚ་ཧོཿ་དྲྀ་ཤྱ་ཞེས་བྱ་བས་རྡོ་རྗེ་དྲིལ་བུ་མ་བལྟ་བར་བྱའོ། །དེ་ནས་གསང་བའི་ལྕགས་ཀྱུ་མ་བཅིངས་ལ། ཧཱུཾ་ཟློས་ཤིང་བཅོམ་ལྡན་འདས་འཁོར་དང་བཅས་པ་རང་གི་ལུས་ལ་གནས་ཤིང་ཇི་ལྟ་བ་བཞིན་དུ་གཞུག་པར་བྱའོ། །དེ་ནས་དང་པོའི་རྡོ་རྗེ་བཅིངས་ལ་ས་མ་ཡ་སྟྭཾ་ཞེས་ཟློས་ཤིང་འོད་ཟེར་དམར་པོ་འབར་བའི་འོད་ཀྱི་དཀྱིལ་འཁོར་བསྐྱེད་ལ། ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་ཧོ་ཨཾ། ཨོཾ་སུ་ར་ཏ་སྟྭཾ། ཨ་ནུ་རཱ་ག་ཡ་མི་ཞེས་ལན་གསུམ་ཟློས་ཤིང་བཅོམ་ལྡན་འདས་བསྒྲུབ་པར་བྱའོ། །དེ་བཞིན་དུ་རྡོ་རྗེ་དྲིལ་བུ་མའི་དམ་ཚིག་གི་ཕྱག་རྒྱ་བཅིངས་ལ། ས་མ་
ཡ་སྟྭཾ་ཞེས་ཟློས་ཤིང་འོད་ཟེར་དམར་པོ་འབར་བའི་འོད་ཀྱི་དཀྱིལ་འཁོར་བསྐྱེད་ལ། ཛཿ་ཧཱུཾ་བཾ་ཧོཿ། ས་མ་ཡ་སྟྭཾ་ཧཾ་བཛྲ་གྷཎྚེ་ཧོ། ཞེས་ལན་གསུམ་ཟློས་ཤིང་བཅོམ་ལྡན་འདས་མ་བསྒྲུབ་པར་བྱའོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པ་དང་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། ཛཿ་ཧཱུཾ་བཾ་ཧོཿ། ཞེས་བརྗོད་དེ་བསྡུ་པའི་ཕྱག་རྒྱ་བཅིངས་ལ་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་རང་གི་ལུས་དང་འདོད་ཆགས་རྡོ་རྗེ་མ་ལ་སོགས་པའི་སྐུ་ལ་དེ་བཞིན་གཤེགས་པ་ཐམས་ཅད་བཅུག་ལ། རང་གི་དམ་ཚིག་གི་ཕྱག་རྒྱ་རྣམས་ཀྱིས་དེ་བཞིན་དུ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་དེ་བཞིན་དུ་དེ་བཞིན་གཤེགས་པ་ཐམས་ཅད་རྒྱས་བཏབ་ལ། དང་པོའི་རྡོ་རྗེ་བཅིངས་ནས་བཛྲ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་རང་གི་སྙིང་གར་རྡོ་རྗེ་བསམ་མོ། །དེ་ཉིད་ཀྱི་དབྲལ་བའི་གནས་སུ་བཛྲ་རཏྣ། ཨ་དྷི་ཏིཥྛ་སྭ་མཾ་ཞེས་རིན་པོ་ཆེ། དེ་ཉིད་ཀྱི་ལྐོག་མའི་ཕྱོགས་སུ་བཛྲ་དྷརྨ་ཨ་དྷི་ཏིཥྛ་སྭ་མཾ་ཞེས་པདྨ། དེ་ཉིད་ཀྱི་སྤྱི་བོར་བཛྲ་ཀརྨྨ་ཨ་དྷི་ཏིཥྛ་སྭ་མཾ་ཞེས་བྱ་བས་སྣ་ཚོགས་རྡོ་རྗེ་བསམས་མོ། །དེ་ནས་ཡི་གེ་བརྒྱ་བས་བརྟན་པར་བྱས་ལ། སངས་རྒྱས་ལྔའི་ཅོད་པན་གྱིས་དབང་བསྐུར་བའི་ཕྱག་རྒྱས་དབང་བསྐུར་ལ། དེ་བཞིན་དུ་ཡི་གེ་གཉིས་ཀྱི་གོ་ཆས་བདག་ཉིད་བགོ་བར་བྱའོ། །དེ་ནས་རྡོ་རྗེའི་དབང་བསྐུར་བ་དང༌། བདག་པོའི་དབང་བསྐུར་བ་བླངས་ལ། མིང་གི་དབང་བསྐུར་བ་བླང་བར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ། འདོད་ཆགས་རྡོ་རྗེ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་མཆོད་ལ་མཆོད་པ་དེ་རྣམས་རང་གི་གནས་སུ་གཞག་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་དེ་ཁོ་ན་ཉིད་ཀྱིས་རྡོ་རྗེ་གཟུང་ཞིང་ཆོས་ཀྱི་དྲིལ་བུ་དཀྲོལ་ལ། དམ་ཚིག་གི་ཕྱག་རྒྱ་བཅིངས་ལ། ཧཱུཾ་ཞེས་ལན་གསུམ་བརྗོད་པར་བྱའོ། །དེ་ནས་དྲིལ་བུ་དཀྲོལ་ཞིང་དམ་ཚིག་གསུམ་གྱི་གླུའི་མཆོད་པ་བྱའོ། །དེ་ནས་དང་པོའི་རྡོ་རྗེ་ནམ་མཁའི་ཕྱོགས་སུ་ཇི་སྐད་དུ་
བཤད་པ་ལ་དང་པོའི་གཞལ་ཡས་ཁང་བསྐྱེད་ལ་ལྷ་ཐམས་ཅད་ཀྱི་གནས་སུ་ཧྲཱིཿ་ལས་སྣ་ཚོགས་པདྨའི་གདན་བསམ་པར་བྱའོ། །དེའི་རྗེས་ལ། དེ་ནས་གཞལ་ཡས་ཁང་ཉམས་དགའ། །ནམ་མཁའ་ཀུན་ལ་རབ་ཏུ་གནས། །ཞེས་བྱ་བ་ནས་བརྩམས་ཏེ་དང་པོའི་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་པོ་མཆོག་བསྒོམས་ནས། སྒོ་ཕྱེ་བ་ལ་ཡང་བསྡུ་བར་བྱའོ། །དེ་ནས་རྡོ་རྗེ་སེམས་དཔའ་ཡི། །ཕྱག་རྒྱ་ཆེན་པོ་སྒོམ་བྱེད་ཅིང༌། །མིང་བརྒྱ་རྩ་བརྒྱད་དམ་པ་འདི། །ལན་ཅིག་རབ་ཏུ་བརྗོད་པར་བྱ། །དེ་ནས་གསང་བའི་ལྕགས་ཀྱུ་མ་དང༌། །སྤྱན་དྲང་བའི་སྔགས་ཀྱིས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་ལ་རྡོ་རྗེ་གནོད་སྦྱིན་ལ་སོགས་པས་བགེགས་བསལ་བ་ལ་སོགས་པ་བྱས་ལ། རྡོ་རྗེ་ཁུ་ཚུར་གྱིས་དཀྱིལ་འཁོར་གྱི་སྒོ་རྣམས་བཅད་དེ། རྡོ་རྗེ་བསྲུང་བས་བསྲུང་བ་ཐམས་ཅད་ཡང་དག་པར་བསྲུངས་ལ། ཧཱུཾ་ཞེས་བྱ་བས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ལ་མཆོད་ཡོན་ཕུལ་ལ། དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་ཆོས་དང༌། ལས་དང༌། ཕྱག་རྒྱ་ཆེན་པོས་རྒྱས་བཏབ་ལ། དབང་བསྐུར་བའི་ཕྱག་རྒྱས་དབང་བསྐུར་ནས་མཆོད་ཡོན་ཕུལ་ལ། མཆོད་པ་རྣམ་པ་ལྔ་དང་འདོད་ཆགས་རྡོ་རྗེ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་པར་བྱའོ། །དེ་ནས་རྣམ་པར་དག་པའི་སྒེག་པའི་རྡོ་རྗེ་མས་ཕྱག་བྱས་ལ། ཕྱག་བཞི་བྱས་ནས་ཡང་ཕྱག་རྒྱ་ཆེན་པོ་བཅིངས་ཏེ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ྅ཧཾ། ཨོཾ་སརྦ་ས་མོ྅ཧཾ། ཞེས་བྱ་བའི་སྙིང་པོ་ཟློས་ཤིང་དོན་རྣམ་པར་བསྒོམས་ལ། བདག་ནི་རང་ཉིད་དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་གྱི་ངོ་བོ་ཉིད་ཡིན་ནོ་ཞེས་བརྗོད་པར་བྱའོ། །དེ་ནས། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེ་ཉིད་དབང་ཕྱུག་ཆེ། །འདོད་ཆགས་ཆེན་པོ་
བདེ་བ་ཆེ། །རྡོ་རྗེ་སེམས་དཔར་བདག་གྱུར་ཅིག །ཅེས་བརྗོད་ལ་རང་གི་སྙིང་གར་རྡོ་རྗེའི་དབུས་སུ་ཡི་གེ་ཧཱུཾ་ཡིད་ཀྱིས་བྲིས་ཏེ། རྡོ་རྗེའི་དམ་ཚིག་གམ། རབ་ཏུ་དགའ་བའི་ཚིག་ཟློས་ཤིང་ལྷ་མོའི་དཀྱིལ་འཁོར་གྱི་ངོ་བོ་ཉིད་དུ་བསྒོམ་པར་བྱའོ། །དེ་ལྟར་དང་པོ་བྱིན་གྱིས་བརླབས་ པ་ལན་ཅིག་བྱས་ནས་གང ་གི་ཚེ་མཉམ་པར་མ་བཞག་པའི་སྦྱོར་བས་གནས་པར་འདོད་པ་དེའི་ཚེ། བཛྲ་ས་ཏྭ་ཧཱུཾ་ཞེས་བྱ་བས་རྡོ་རྗེ་སེམས་དཔའི་གནས་སུ་རྡོ་རྗེ་སེམས་དཔའ་ཡིད་ཀྱིས་བཞག་ལ། དེ་ལྟར་དང་པོའི་རྡོ་རྗེར་བདག་ཉིད་བྱིན་གྱིས་བརླབས་ལ་གནས་ཏེ། བྱ་བ་ཐམས་ཅད་བྱས་ནས་ཡང་ཞུགས་ཏེ་ཧཱུཾ་ཟློས་ཤིང་གསད་བའི་ལྕགས་ཀྱུ་མས་བཅོམ་ལྡན་འདས་རང་གི་ལུས་ལ་བཅུག་ལ་མཚན་བརྒྱ་རྩ་བརྒྱད་པས་བསྟོད་དེ། མཆོད་པ་བཅུ་གཉིས་ཀྱིས་མཆོད་ནས་ཕྱག་ཀྱང་བྱས་ལ། དེ་བཞིན་དུ་བསྒོམ་པར་བྱའོ། །སྒོམ་པས་དུབ་བར་གྱུར་ན་ཡང་མཚན་བརྒྱ་རྩ་བརྒྱད་པས་བསྟོད་ནས་མཆོད་པ་རྣམ་པ་ལྔ་དང༌། འདོད་ཆགས་རྡོ་རྗེ་མ་ལ་སོགས་པའི་མཆོད་པ་ཡང་བྱས་ནས་ཡང་རྣམ་པར་དག་པའི་སྒེག་པའི་དགའ་བའི་རྡོ་རྗེ་དང་ཕྱག་རྒྱ་བཞིས་ཕྱག་བྱས་ལ་བཅོམ་ལྡན་འདས་འཁོར་དང་བཅས་པ་ཇི་ལྟ་བ་བཞིན་དུ་གཤེགས་སུ་གསོལ་ལོ། །དེ་ལྟར་ཉིན་རེ་ཞིང་ཟླ་བ་གཅིག་གམ། དྲུག་གམ་ལོ་གཅིག་གི་བར་དུ་ཉིན་རེ་དཀྱིལ་འཁོར་ཐམས་ཅད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བྱའོ། །དེ་ནས་ཉིན་རེའམ་ཟླ་བ་རེའམ། ལོ་རེ་ཞིང་དཀྱིལ་འཁོར་བིར་བར་བྱའོ། །དེ་ལ་དང་པོར་ས་སྤྱང་བ་དང༌། ས་ཡོངས་སུ་གཟུང་བའི་ཆོ་ག་རྗེས་སུ་སྤྱད་ལ། དང་པོས་རྡོ་རྗེས་དེ་བཞིན་དུ་དཀྱིལ་འཁོར་སྤྲུལ་ལ། ཕྱག་བྱ་བ་ལ་སོགས་པ་སྔོན་དུ་འགྲོ་བས། སྔོམ་བ་བཟུང་ལ་རྣལ་འབྱོར་ཆེན་པོ་དང༌། གཞལ་ཡས་ཁང་དང་གདན་རྣམས་བསྐྱེད་ནས། དཀྱིལ་འཁོར་གྱི་དབུས་སུ་སེམས་དཔའི་སྐྱིལ་ལ་མོ་ཀྲུང་དུ་འདུག་ལ། དེང་དུས་བདག་ཚེ་འབྲས་བུ་ཡོད། །ཅེས་བྱ་བ་ལ་སོགས་པས་བདག་ཉིད་སྤྲོ་བ་
བསྐྱེད་པར་བྱའོ། །དེ་ནས་ཡན་ལག་ཐམས་ཅད་ཀྱིས་ཕྱག་བྱས་ལ་སྤོས་སྣོད་ལག་ན་ཐོགས་ཏེ། མ་ལུས་ཕྱོགས་ན་བཞུགས་པ་ཡི། །ཞེས་བྱ་བ་ལ་སོགས་པས་སངས་རྒྱས་ཐམས་ཅད་སྤྱན་དྲང་བར་བྱའོ། །དེ་ནས་ཡན་ལག་ཐམས་ཅད་ཀྱིས་ཕྱག་བྱས་ལ། དང་པོའི་སྦྱོར་བ་ལ་སོགས་པའི་ཏིང་ངེ་འཛིན་གསུམ་རྣམ་པར་བསྒོམས་ཤིང་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། ཧཱུཾ་ཞེས་ཟློས་ཤིང་ཕྱག་རྒྱ་ཆེན་པོ་བཅིངས་ལ་དཀྱིལ་འཁོར་ཆེན་པོ་བསྒོམ་པར་བྱའོ། །དེ་ནས་དཀྱིལ་འཁོར་ཆེན་པོ་བྲི་བར་བྱ་བའི་ཕྱིར་བཅོམ་ལྡན་ཁྱོད་ལ་གསོལ་བ་ནི་ཞེས་བྱ་བ་ལ་སོགས་པ་དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ལ་གསོལ་བ་བཏབ་པར་བསམ་མོ། །དེ་ནས་ལངས་ལ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་ བྱས་ནས་དེ་བཞིན་གཤེགས་པ་ཐམས་ཅད་ཀྱིས་ནམ་མཁའ་གང ་བར་བསམས་ཏེ། བདག་ནི་རང་ཉིད་རྡོ་རྗེ་ཅན། །ཞེས་བྱ་བ་ལ་སོགས་པ་ཚིགས་སུ་བཅད་པ་དང༌། ཧཱུཾ་ཞེས་བརྗོད་པར་བྱའོ། །དེ་ནས་དང་པོའི་རྡོ་རྗེའི་ཧཱུཾ་བཛྲོད་ཏིཥྛ་མཎྜལ་ཨུཏྤཱ་ད་ཡ་མི་ཞེས་ཟློས་ཤིང་དཀྱིལ་འཁོར་བཏེག་ལ། ནམ་མཁའི་ཕྱོགས་སུ་ཡིད་ཀྱིས་བཏེག་ནས་ཡང་དང་པོས་རྡོ་རྗེ་དང་ཧཱུཾ་ཞེས་བྱ་བས་སྙིང་ག་དང་ལྐོག་མ་དང་དབྲལ་བ་དང་སྤྱི་བོར་བདག་ཉིད་བྱིན་གྱིས་བརླབས་ལ་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་བཛྲ་དྲྀཥྚ་མ་ཊ་ཞེས་བྱ་བ་མིག་གཉིས་སུ་དགོད་ལ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །ཧཱུཾ་ཞེས་བྱ་བ་ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་སློབ་མ་ཐམས་ཅད་ལྷག་པར་གནས་པ་དང༌། ལྷ་ལྷག་པར་གནས་པ་བྱས་ནས་ཉི་མ་འཆར་བའི་དུས་སུ། གསང་བའི་དཀྱིལ་འཁོར་དུ་སྔར་བཤད་པའི་ཆོ་གས་ཐིག་གདབ་པར་བྱའོ། །དེ་ནས་ཡི་གེ་ཧྲིཿ་ལས་མིག་གཡོན་པ་དང་གཡས་པ་གཉིས་སུ་ཉི་མ་དང་ཟླ་བ་བསྐྱེད་ལ་ཁྲོ་བོའི་ལྟ་བས་ཀུན་ནས་བལྟ་ཞིང་
སྒོ་རྣམས་བྱའོ། །དེ་ལྟར་ཐིག་གདབ་པའི་ཆོ་ག་བྱས་ནས་ཚོན་དགྱེ་བར་བྱའོ། །རེ་ཞིག་དང་པོར་ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བྱ་བས་ཚོན་རྩི་ཐམས་ཅད་ལ་རེ་ཞིག་ལན་བདུན་བདུན་བཟླ་བར་བྱའོ། །དེ་ནས་རྡོ་རྗེ་ཉི་མའི་ཁྲོ་བོའི་ཕྱག་རྒྱ་དང༌། ཧི་ཞེས་བྱ་བས་སྦར་བར་བྱའོ། །དེ་ནས་དང་པོའི་རྡོ་རྗེའི་ཡི་གེ་ཧཱུཾ་ཟློས་ཤིང་དབང་ལྡན་གྱི་ཕྱོགས་ནས་བརྩམས་ཏེ། གཡས་ནས་བསྐོར་བའི་རིམ་གྱིས་ཚོན་རྩི་ཐམས་ཅད་དགྱེ་བ་ནི་དང་པོ་རྩོམ་པའི་ཚེ་ནས་བྱས་ནས་ཕྱིས་ནི་ཅི་བདེར་བྱའོ། །རིམ་བ་ནི་འདི་ཡིན་ཏེ། དམར་པོ་དང་ལྗང་གུ་དང༌། སྔོན་པོ་དང་སེར་པོ་དང༌། དཀར་པོ་ནི་ཐམས་ཅད་ཀྱི་ནང་དུ་བྱའོ། །དཀྱིལ་འཁོར་དབུས་སུ་སྣ་ཚོགས་པདྨ་སྡོང་བུ་དང་བཅས་པར་དཔལ་རྡོ་རྗེ་སེམས་དཔའ་ལུགས་མའམ། འབུར་དུ་བརྐོས་བའམ། བྲིས་པ། འཛུམ་བཅས་ཟླ་བའི་མདོག་ཅན་ལ། །འོད་ཟེར་དམར་པོ་འབར་བའི་འོད། །སངས་རྒྱས་ཀུན་གྱི་དབང་བསྐུར་སོགས། །རྒྱན་དང་ན་བཟའ་སྣ་ཚོགས་ལྡན། །ཞེས་བྱ་བ། ཨོཾ་སུ་ར་ཏ་སྟྭཾ་ཞེས་ཟློས་ཤིང༌། སེམས་དཔའི་སྐྱིལ་མོ་ཀྲུང་གིས་རྡོ་རྗེ་སྙེམས་ཚུལ་དུ་བཞུགས་པ་དགོད་པར་བྱའོ། །དེའི་ཤར་གྱི་ཆར་རྡོ་རྗེ་ཡིད་ལས་བྱུང་བའི་གནས་སུ་འདོད་ཆགས་རྡོ་རྗེ་མ་སྐུ་མདོག་དམར་མོ་གཡོན་པའི་རྡོ་རྗེ་ཁུ་ཚུར་གྱིས་གཞུ་བསྣམས་ཤིང་གཡས་པས་མདའ་གསོར་བ་ལ་བརྩོན་པ་གཡས་ལོགས་སུ་རྡོ་རྗེ་ཀཱི་ལི་ཀཱི་ལའི་གནས་སུ་རྡོ་རྗེ་ཀཱི་ལི་ཀཱི་ལ་ཡ་སྐུ་མདོག་དཀར་ལྗང་ཕྱག་གཉིས་ཀྱིས་དང་པོའི་རྡོ་རྗེ་འཁྱུད་དེ་བཞུགས་པ། རྒྱབ་ཏུ་རྡོ་རྗེ་དྲན་མའི་གནས་སུ་ལྷ་མོ་དྲན་མ། སྔོན་མོ་ཕྱག་གཡོན་ཆུ་སྲིན་གྱི་རྒྱལ་མཚན་བསྣམས་པ། ཕྱག་གཡས་ཇི་ལྟར་མཛེས་པར་བཞུགས་པའོ། །བཅོམ་ལྡན་འདས་ཀྱི་གཡོན་ལོགས་སུ་རྡོ་རྗེ་སྙེམས་མའི་གནས་སུ་འདོད་པ་མའི་དབང་ཕྱུག་མ་སྐུ་མདོག་སྔོ་བ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་རྩེ་ལྔ་པ་གཉིས་བསྣམས་ཏེ་གཉིས་ཀ་དཀུར་བརྟེན་པར་བཞུགས་པའོ། །འདི་རྣམས་དགོད་པའི་སྔགས་ནི་ཛཿབཛྲ་དྲྀཥྚ་ས་མ་ཡ་
ཀེ་མ་ཊ། ཧཱུཾ་བཛྲ་ཀཱི་ལི་ཀཱི་ལ་ཡ་ཧཱུཾ། བཾ་བཛྲི་ཎི་སྨ་ར་ཏ། ཧོ་བཛྲ་ཀཱ་མེ་ཤྭ་རི་ཏྭཾ། ནང་གི་དཀྱིལ་འཁོར་དེ་ཉིད་ཀྱི་མེའི་མཚམས་སུ་རབ་ཏུ་དགའ་བ་མ་སྐུ་མདོག་དམར་བ། བདེན་བྲལ་གྱི་མཚམས་སུ་ཤིན་ཏུ་དགའ་མ་བ་ལ་ཤའི་མདོག་ལྟར་དཀར་བ། རླུང་གི་མཚམས་སུ་སྤྱན་མ་སྐུ་མདོག་སྔོ་བ། དབང་ལྡན་གྱི་མཚམས་སུ་དཔལ་མོ་ཆེན་མོ་གསེར་གྱི་མདོག་ཅན་འདི་རྣམས་ནི་མེ་ཏོག་དང༌། བདུག་སྤོས་དང༌། མར་མེ་ཆེན་པོ་དང༌། དྲི་སྤྱི་བོར་ཐལ་མོ་སྦྱར་ཏེ་འཇུག་པའོ། །ལྷ་མོ་རྡོ་རྗེ་རྒྱལ་མོ་འདི་རྣམས་ཀྱི་སྔགས་བཤད་པ་ནི་ཧེ་བཛྲ་ར་ཏི། མ་ཧཱ་ར་ཏི། ཨོཾ་བཛྲ་ལོ་ཙན་ནི་མ་ཤ་རི་བི་བཛྲ་ཧོ། །ཕྱིའི་དཀྱིལ་འཁོར་གྱི་མེའི་མཚམས་སུ་སྒེག་མོ་སྐུ་མདོག་དམར་བ། རྡོ་རྗེ་ཁུ་ཚུར་གྱིས་རྡོ་རྗེ་རྩེ་མོ་ལྔ་པ་བསྣམས་ནས། དཀུ་གཉིས་སུ་བརྟེན་ཏེ་བཞུགས་པ། བདེན་བྲལ་གྱི་མཚམས་སུ་བཞད་མ་པ་ལ་ཤའི་མདོག་ལྟར་དཀར་བ། ཕྱག་གཉིས་ཀྱིས་སོའི་ཕྲེང་བ་གཉིས་བསྣམས་ནས་བཞད་པར་སྟོན་པ། རླུང་གི་མཚམས་སུ་གླུ་མ་སྐུ་མདོག་སྔོ་བ་པི་ཝང་ལེན་པ་ལ་བརྩོན་པའོ། །དབང་ལྡན་གྱི་མཚམས་སུ་གར་མ་སྐུ་མདོག་སེར་བ་རྡོ་རྗེ་རྩེ་གསུམ་པས་མཚན་པ་ཕྱག་གཉིས་ན་བསྣམས་ཏེ་གར་མཛད་པའོ། །དེ་ལ་འདི་རྣམས་ཀྱི་སྙིང་པོ་ནི་ཧེ་ར་ཏི་བཛྲ་བི་ལཱ་ས་ནི་ཏྲ་ཊ། བེ་བ་ག་ཏེ་བཛྲ་ཧཱ་སེ་ཧ་ཧ། ཧེ་ར་ཧི་བཛྲ་གཱི་ཏེ། གཱི་ཏེ་གཱི་ཏེ། ཧེ་ར་ཏི་བཛྲ་ནྲྀ་ཏྱེ། བེ་བ་བེ་བ། དེ་ནས་ཕྱི་དང་ནང་དུ་བཅས་པའི་ཤར་སྒོ་གཉིས་སུ་རྡོ་རྗེ་ལྕགས་ཀྱུ་མ་སྐུ་མདོག་དམར་བ་རྡོ་རྗེ་ལྕགས་ཀྱུས་རྡོ་རྗེ་འཆང་ཆེན་པོ་ལ་སོགས་པའི་ལྷ་རྣམས་དགུག་པར་མཛད་པ། ལྷོ་ཕྱོགས་ཀྱི་སྒོ་གཉིས་སུ་རྡོ་རྗེ་ཞགས་པ་རྣམས་པ་ལ་ཤ་ལྟར་དཀར་བ། རྡོ་རྗེ་ཞགས་པས་གཞུག་པར་མཛད་པའོ། །ནུབ་ཕྱོགས་ཀྱི་སྒོ་གཉིས་རྡོ་རྗེ་ལྕགས་སྒྲོག་མ། སྐུ་མདོག་སྔོ་བ་ལྕགས་སྒྲོག་གིས་འཆིང་བར་མཛད་པའོ། །བྱང་ཕྱོགས་ཀྱི་སྒོ་གཉིས་སུ་རྡོ་རྗེ་དྲིལ་བུ་མ་སྐུ་མདོག་སེར་བ་ཕྱག་གཡས་པས་རྡོ་རྗེ་དྲིལ་བུ་དཀྲོལ་བ་ཕྱག་གཡོན་པས་སྟན་ལ་སྙེམས་པ་བྲིའོ། །དེ་ནས་འདི་རྣམས་ཀྱི་སྙིང་པོ་ནི་འདི་ཡིན་ཏེ། བཛྲ་ཨཾ་ཀུ་ཤ་ཛཿ། བཛྲ་པཱ་
ཤ་ཧཱུཾ། བཛྲ་ཤྲིཾ་ཁ་ལེ་བཾ། བཛྲ་གྷ་ཎྚེ་ཧོཿ། དེ་ལ་དཔལ་རྡོ་རྗེ་སེམས་དཔའ་ནི་འཛུམ་པ་དང་བཅས་ཤིང་དགའ་བ་ཆེན་པོས་གཟིགས་པ་སྟེ། འདོད་ཆགས་རྡོ་རྗེ་མ་དང་རབ་ཏུ་དགའ་མ་དང་སྒེག་མོ་དང༌། ལྕགས་ཀྱུ་མ་རྣམས་ཀྱིས་སྒེག་ཅིང་འཛུམ་པ་དང་བཅས་པས་རྣམ་པར་གཡོ་ཞིང་ཟུར་གྱིས་བལྟ་བ་ལ་སྤྱན་རས་གཟིགས་པ་ཀཱི་ལི་ཀཱི་ལ་དང༌། ཤིན་ཏུ་དགའ་མ་དང༌། བཞད་མ་དང༌། ཞགས་པ་མ་འཛུམ་ཞིང་མིག་མི་འཛུམས་པ་ལ་ལོངས་སྤྱོད་པར་མཛད་པ། རྡོ་རྗེ་དྲན་མ་དང༌། སྤྱན་དང༌། གླུ་མ་དང༌། ལྕགས་སྒྲོག་མའི་སྙེམས་མ་དང་བཅས་པ་ལ་མཆོག་ཏུ་བཞད་པས་སྤྱན་གཡོན་དུ་གཟིགས་པ། རྡོ་རྗེ་འདོད་པའི་དབང་ཕྱུག་མ་དང༌། དཔལ་ཆེན་མོ་དང༌། གར་མ་དང༌། དྲིལ་བུ་མ་རྣམས་ཀྱིས་རྣམ་པར་སྒེག་པའི་འཛུམ་ཞིང་རབ་ཏུ་འདུད་པ་དང་ལྡན་པ་ལ་གཟིགས་པར་མཛད་པའོ། །འདི་དག་ཐམས་ཅད་ཀྱང་སྣ་ཚོགས་པདྨ་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། དགོད་ཅིང་བདེ་བའི་གཟུགས་ཅན་ནོ། །ཤར་ཕྱོགས་ན་བཞུགས་པ་རྣམས་ནི། མི་བསྐྱོད་པའི་ཅོད་པན་གྱི་དབང་བསྐུར་ལ། ལྷོ་ཕྱོགས་པ་རྣམས་ནི་རིན་ཆེན་འབྱུང་ལྡན་ཅོད་པན་གྱིས་སོ། །ནུབ་ཕྱོགས་པ་རྣམས་ནི་འོད་དཔག་ཏུ་མེད་པའི་ཅོད་པན་གྱིས་སོ། །བྱང་ཕྱོགས་པ་རྣམས་ནི་དོན་ཡོད་གྲུབ་པའི་ཅོད་པན་གྱིས་དབང་བསྐུར་བ་བྲི་བར་བྱའོ། །དེ་ལྟར་དཀྱིལ་འཁོར་བྲིས་ཤིང་བཀོད་ནས་སྒོ་དབྱེ་བ་དང༌། བསྡུ་བ་ཇི་ལྟ་བ་བཞིན་དུ་བྱས་ལ། མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་བསྟོད་པ། རྡོ་རྗེ་ཅན་གྱི་སྤྱན་སྔར་ནི། །སེམས་དཔའི་སྐྱིལ་ཀྲུང་གིས་འདུག་སྟེ། །བདེ་ཆེན་རྡོ་རྗེ་ཅན་རབ་མཆོག །བདག་པོ་ལན་ཅིག་ཡང་དག་དགུག །ཧེ་མ་ཧཱ་སུ་ཁ་བཛྲ་ཨ་མོ་གྷ་ས་མ་ཡ་མ་ནུ་པཱ་ལ་ཡ། པྲ་བུདྡྷ་སུ་ར་ཏ་སྟྭཾ། ཨ་ནུ་རཀྟོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་དྲྀ་ཌྷོ་མེ་བྷ་ཝ། སུ་པོ་ཥྱོ་མེ་བྷ་ཝ། བྷ་ག་ཝཱན། ཨ་དྷི་ནི་ད་ན་སཏྭ་སརྦ་སིདྡྷི་མྨེ་པྲ་ཡ་ཙྪ། ཨེ་ཥ་སྟྭཾ་ཨ་ཀྲྀ་ཤ་པྲ་བེ་ཤ་ཡ་ས་མ་ཡེ་རབ་ཏཾ་བ་ཤི་ཀ་རོ་མི། ཨི་མེར་མུ་དྲ་མནྡྲ་པཱ་དེ་ཛཿ་ཧཱུཾ་བཾ་ཧོཿ་དེ་ལ་བདེ་བ་ཆེན་པོ་རྡོ་རྗེ་ཆེ།།
རྡོ་རྗེ་མཆོག་མ་ནི་རྡོ་རྗེ་གསང་བའི་ལྕགས་ཀྱུ་མའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་བ་ལ་སོགས་པ་བྱས་ནས་རྡོ་རྗེ་ཁུ་ཚུར་གྱི་དཀྱིལ་འཁོར་གྱི་སྒོ་ཐམས་ཅད་ལ་རྡོ་རྗེ་བསྲུང་བའི་དམ་ཚིག་གི་ཕྱག་རྒྱས། ལྷ་ཐམས་ཅད་ལེགས་པར་བསྲུངས་ནས་བཅོམ་ལྡན་འདས་འཁོར་དང་བཅས་པ་ལ་ཧཱུཾ་ཞེས་བྱ་བས་མཆོད་ཡོན་ཕུལ་ལ་ཧཱུཾ་དྲྀ་ཤྱ་ཛཿ་ཧཱུཾ་པཾ་ཧོཿ་ས་མ་ཡ་སྟྭཾ། ས་མ་ཡ་སྟྭཾ། ཨོཾ་སུ་ར་ཏ་སྟྭཾ། ཨ་ནུ་རཱ་གཱ་མི་ཧཱུཾ། ཞེས་ལན་གསུམ་ཟློས་ཤིང་དང་པོའི་རྡོ་རྗེ་བཅིངས་ལ་དཔལ་རྡོ་རྗེ་སེམས་དཔའ་བསྒྲུབ་པར་བྱའོ། །དེ་ནས་རྡོ་རྗེ་འདོད་ཆགས་མའི་རྡོ་རྗེ་དམ་ཚིག་གི་ཕྱག་རྒྱ་བཅིངས་ལ། ཛཿབཛྲ་དྲྀཥྛ་ཛཿཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ། ཨ་ཧཾ། བཛྲ་བཛྲ་དྲྀཥྛ་ས་མ་ཡ་ཀེ་མ་ཊ། ཅེས་ལན་གསུམ་བརྗོད་ལ། འདོད་ཆགས་རྡོ་རྗེ་མ་བསྒྲུབ་པར་བྱའོ། །དེ་བཞིན་དུ་རྡོ་རྗེ་དྲིལ་བུའི་དམ་ཚིག་གི་ཕྱག་རྒྱ་བཅིངས་ལ། བཛྲ་གྷཎྚེ་ཧོཿདྲྀ་ཤྱ་ཛཿ་ཧཱུཾ་བཾ་ཧོཿས་མ་ཡ་སྟྭཾ། ས་མ་ཡ་སྟྭཾ། ཨོཾ་བཛྲ་གྷཎྚེ་ཧོཿ། ཞེས་ལན་གསུམ་བཟླས་པ་ལ་རྡོ་རྗེ་དྲིལ་བུ་མ་བསྒྲུབ་པར་བྱའོ། །ཡང་གསང་བའི་ལྕགས་ཀྱུ་མ་བཅིངས་ལ། ཨ་ནུ་རཱ་ག་ཡ་མི་ཧཱུཾ་ཞེས་བྱ་བ་དང༌། བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །ཡང་གསང་བའི་རྡོ་རྗེ་ལྕགས་ཀྱུ་མ་འདོད་ཆགས་རྡོ་རྗེ་མ་ལ་སོགས་པ་ལ་བསྟན་པར་བྱའོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པ་ལ་ཆོས་དང༌། ལས་དང༌། ཕྱག་རྒྱ་ཆེན་པོ་རྣམས་ཀྱིས་རྒྱས་གདབ་པར་བྱའོ། །དེ་ནས་དབང་བསྐུར་བའི་ཕྱག་རྒྱས་དབང་བསྐུར་བར་བྱའོ། །དེ་ནས་མཆོད་ཡོན་ཕུལ་ལ་བུམ་པ་གང་བ་ལ་སོགས་པས་ཡང་དག་པར་མཆོད་དེ། རྡོ་རྗེ་གནོད་སྦྱིན་བཟླས་པའི་གོས་དང་ཡང་སྒོ་སྲུང་བཟླས་པའི་གོས་ཀྱིས་གདོང་གཡོགས་ལ་གོས་སྣ་ཚོགས་བགོས་ཤིང་མེ་ཏོག་གི་ཕྲེང་བ་བཏགས་པ་དང༌། ཁ་དྲི་ཞིམ་པོར་བྱས་ལ། ཕྱག་བཞི་བྱས་ནས་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང༌།
ཡོངས་སུ་མྱ་ངན་ལས་མི་འདའ་བར་གསོལ་བ་བཏབ་ནས་སྔོམ་པ་གཟུང་བར་བྱའོ། །དེ་ནས་ཕྱི་རོལ་ན་གནས་པའི་བུམ་པའི་ཆུ་ལ་དཔལ་རྡོ་རྗེ་སེམས་དཔའ་ཡོངས་སུ་བཟླས་པས་བདག་ཉིད་དབང་བསྐུར་ལ་བཛྲ་བཛྲ་ཞེས་ཟློས་ཤིང་རྡོ་རྗེ་ཤུགས་ཀྱིས་དཀྱིལ་འཁོར་དུ་ཞུགས་ཤིང༌། དཀྱིལ་འཁོར་གྱི་རྡོ་རྗེ་གླུ་འདི་ཕྱག་རྒྱ་དང་བཅས་པས་བླང་བར་བྱའོ། །རྗེས་སུ་ཆགས་པ་ཐམས་ཅད་ཀྱི། །ཡིད་ཀྱི་བདེ་བ་དམ་པ་ཡི། །རྡོ་རྗེ་སེམས་དཔའ་བསྐྱེད་པའོ། །རབ་ཏུ་དགའ་བའི་འགྲོ་རྣམས་ལ། །བདེ་བ་ཆེན་པོ་བརྟན་ཞིང་མཐོང༌། །ཐོག་མའི་གྲུབ་པ་མྱུར་མཛོད་ཅིག །ཨོཾ་མ་ཧཱ་སུ་ཁ་བཛྲ་སིདྡྷི། བཛྲ་སཏྭ་སིདྡྷྱ་ཛཿཧཱུཾ་བཾ་ཧོཿ་སིདྡྷི་ས་མ་ཡ་སིདྡྷི་ཧཱུཾ། ཞེས་བྱ་བ་ནི་རྡོ་རྗེའི་གླུའོ། །དེ་ལ་ཕྱག་རྒྱ་འདི་ཡིན་ཏེ། རྡོ་རྗེ་གར་གྱི་སྦྱོར་བ་ཡིས། །སྤྱི་བོར་ཐལ་སྦྱར་མེ་ཏོག་བཅས། །ཕྱག་རྒྱ་ཀུན་གྱི་རྣལ་འབྱོར་ཆེ།། དཀྱིལ་འཁོར་དམ་པར་འཇུག་པར་བྱའོ། །སྒོ་སྲུང་གི་ལྷ་མོ་རྣམས་ཀྱི་སྙིང་པོ་ཡང་དེ་བཞིན་དུ་བཟླས་པར་བྱའོ། །དེ་ནས་འདིའི་མཚན་ཉིད་བརྗོད་པར་བྱ་སྟེ། བ་དན་གསུམ་པ་རྩེ་གསུམ་བཅས། །བསྒྱིངས་བཅས་མཐའ་སོགས་ལས་གྲོལ་བས། །གློག་འགྱུ་ལྟར་གདེག་མདུན་དུ་བསྐོར། །དེ་ནི་རྡོ་རྗེ་གར་ཞེས་བཤད། །ཐལ་མོ་ཁོང་སྟོང་མེ་ཏོག་གི་ཕྲེང་བ་དང་བཅས་པ་སྤྱི་བོར་གཞུག་པར་བྱའོ། །དེ་ནས་འདི་སྐད་ཅེས་བརྗོད་དོ། །མ་ཧཱ་ར་ཏ་སུ་དྲྀ་ཌྷ། སུ་དྲྀ་ཤྱ་སུ་ཁ་སུ་སཏྭ་ཨ་སིདྡྷྱ་མི། རྣམ་སྒེག་དགའ་བའི་རྡོ་རྗེ་ནི། །རྣམ་པར་འགྱུར་བས་སྒེག་བཅས་པ། །བཞིན་རས་པདྨ་ཁ་ཕྱེ་བས། །བཞུགས་གནས་མགོན་ལ་ཕྱག་བྱའོ། །ཨོཾ་པར་མ་སུ་ཁ་ཤ་ཡ་སུ་ལ་ལི་ཏ། བི་ལཱ་སྱ་ན་མ་སྟི། ན་མ་མི། བྷ་ག་ཝཱ་ནྟཾ་ཛཿཧཱུཾ་བཾ་ཧོཿཧི་ཧི་ཧི་ཧི་པྲ་ཏཱི་ཙྪ་ཀུ་སུ་མཱ་ཉྫ་ལི་ནཱ་ཐ་ཞེས་བརྗོད་པར་བྱའོ། །དེ་ལ་འདིའི་རྣམ་པར་སྒེག་པའི་དགའ་བའི་རྡོ་རྗེ་སྟེ། རྡོ་རྗེ་གར་གྱི་མཆོད་པ་དང་བཅས་པའི་འཛུམ་པའི་མིག་དང་ཕྱག་བྱ་བས་རྡོ་རྗེ་སེམས་དཔའ་དང༌། དེ་བཞིན་གཤེགས་པ་ཐམས་ཅད་རྗེས་སུ་མཉེས་བར་བྱའོ་ཞེས་བྱ་བའི་བསམ་པས་ཕྱག་
རྒྱའོ། །དེ་ནས་དཀྱིལ་འཁོར་བསྐོར་བ་ལན་གསུམ་བྱས་ལ་བཅོམ་ལྡན་འདས་ཀྱི་སྤྱན་སྔར་འདུག་ལ། མཆོད་པ་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་བདག་དེང་གྲུབ་མཛོད། །ཅེས་བྱ་བ་དེ་ཁོ་ན་ཉིད་བརྗོད་བར་བྱའོ། །དེ་ནས་ཛཿཧཱུཾ་བཾ་ཧོཿབྲ་སིདྡྷ་མཾ་ཞེས་བྱ་བ་འདི་བརྗོད་པར་བྱའོ། །དེ་ནས་རྡོ་རྗེ་ཆུ་འཐུངས་ལ་གཡོན་བའི་ཁྲོ་བོའི་ཁུ་ཚུར་གྱིས་སེམས་མའི་རྡོ་རྗེ་ཕྱེ་ལ་ཧཱུཾ་ཨཱཿཞེས་ལན་བརྒྱ་རྩ་བརྒྱད་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་མེ་ཏོག་དོར་བར་བྱའོ། །ཨོཾ་པ་རམ་སུ་ཁ་ཤ་ཡ་ཞེས་བྱ་བ་ལ་སོགས་པ་ཕྱག་བྱ་བའི་གླུ་དང་ཟློས་ཤིང་འཇུག་པའི་ཕྱག་རྒྱ་ཉིད་ཕབ་ལ་བསྒྱིངས་པ་དང་བཅས་པས་མཛུབ་མོ་དང་མཐེ་ཆུང་གི་རྩེ་མོ་མཐའ་ནས་དགྲོལ་བ་ནི་མེ་ཏོག་དོར་བའི་ཕྱག་རྒྱའོ། །དེ་ནས་ཕྲེང་བ་དེ་བླངས་ལ་འདིས་རང་གི་མགོ་ལ་བཅིང་བར་བྱའོ། །དེང་ཁྱོད་ཅེས་བྱ་བ་ལ་སོགས་པ་ནས་ཨོཾ་མ་ཧཱ་སུ་ཁ་བཛྲ་སཏྭ་ཨ་བྷི་ཥིཉྩ་མཾ་སུ་ར་ཏ་སྟྭཾ་ཞེས་བྱ་བའི་བར་དུ་བརྗོད་དོ། །དེ་ནས་སྙིང་པོ་འདིས་གདོང་གཡོགས་དགྲོལ་བར་བྱའོ། །ཨོཾ་བཛྲ་ཙཀྵུ་མ་ཧཱ་སུ་ཁ་སུ་ར་ཏ་སྟྭཾ། དེ་ནས་ཧེ་བཛྲ་པཱ་ཤྱ་ཞེས་ཟློས་ཤིང༌། རྡོ་རྗེ་ལྕགས་ཀྱུ་མ་ནས་བརྩམས་ཏེ། རྡོ་རྗེ་སེམས་དཔའི་བར་གྱི་དཀྱིལ་འཁོར་རྣམས་ཀྱི་ངོ་བོར་བསྟན་པར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ། ཏིཥྛ་བཛྲ་ཞེས་བྱ་བ་ལ་སོགས་པ་འདིས་རང་གི་སྙིང་གར་དགྲོལ་བར་བྱའོ། །དེ་ནས་རྡོ་རྗེ་ཐལ་མོ་བསྐོར་བས་ཤིས་པར་བརྗོད་པའི་ཚུལ་དུ་རང་གི་སྙིང་གར་བཞག་ལ། མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་བསྟོད་པར་བྱའོ། །དེ་ནས་འདོད་ཆགས་རྡོ་རྗེ་མ་ལ་སོགས་པ་གསང་བའི་མཆོད་པ་བཞི་གླུ་དང་རོལ་མོའི་མཆོད་པས་བཅོམ་ལྡན་འདས་ལ་ཡང་དག་པར་མཆོད་པར་བྱའོ། །དེ་ནས་བདག་ཉིད་དཔལ་རྡོ་རྗེ་སེམས་དཔར་བསམས་ལ་དང་པོའི་རྡོ་རྗེ་དང་བཛྲ་སཏྭ་ཞེས་བྱ་བ་ཟློས་ཤིང་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ལ་འདོད་ཆགས་རྡོ་རྗེ་མ་ལ་སོགས་པའི་དམ་ཚིག་གི་ཕྱག་
རྒྱས་རང་གི་ལུས་ལ་གནས་ཇི་ལྟ་བ་བཞིན་དུ། བདག་ཉིད་དབང་བསྐུར་བ་ལ་སོགས་པ་གཟེངས་བསྟོད་པ་དང༌། ལུང་བསྟན་པའི་བར་གྱི་ཆོ་ག་རྣམས་རྗེས་སུ་སྤྱད་ནས་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། ཇི་ལྟར་མངོན་བར་འདོད་པའི་བཟླས་བརྗོད་བྱའོ། །དེ་ནས་མཆོད་པ་ཐམས་ཅད་ཀྱིས་བཅོམ་ལྡན་འདས་ལ་ཡང་དག་པར་མཆོད་ལ་ཕྱིར་དབྱུང་བར་བྱའོ། །དེ་ནས་སློབ་མ་གཞུག་པར་འདོད་ན། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་མཆོད་ཡོན་བསྐོར་བཅིངས་ལ། །སྙིང་ནས་བསམ་པ་གཡོས་པ་ཡིས། །མགོ་བོས་ཡང་དག་ཕྱག་བྱས་ལ། །དངོས་གྲུབ་དམ་པར་རབ་གྲུབ་བྱེད། །དཀྱིལ་འཁོར་ཉིད་དུ་ཞུགས་པས་ཀྱང༌། །བསྐོར་བ་ལན་གསུམ་བྱ་བ་ཡིན། །བདེ་བ་ཆེན་པོ་འདོད་ཆགས་ཆེ། །འགྲོ་བ་ཀུན་ཀྱང་གྲུབ་ཕྱིར་བྱ།། དེ་ནས་མཆོད་པ་བཞི་པ་ཡིས། །བདེ་བ་ཆེ་ལ་ཡང་དག་མཆོད། །དེ་བཞིན་རྡོ་རྗེ་དབང་བསྐུར་ལ། །སློབ་མ་བཟུང་སྟེ་གཞུག་པར་བྱ། །འདིར་ཆོ་ག་ཐམས་ཅད་དང་པོར་གཞུག་པར་བཤད་པ་ཡིན་ལ། འདིར་ཁྱད་པར་ནི་འདི་ལྟར་རྡོ་རྗེ་མཆོད་ཡོན་གྱི་ཕྱག་རྒྱས་འཇུག་པ་ཡིན་ནོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ལ་བསླབ་པའི་གཞི་ལྔ་ཡོངས་སུ་གཟུང་བའི་དགེ་བསྙེན་ནམ། དགེ་སྦྱོང་ངམ་དགེ་སློང་གི་སྔོམ་པ་ཡོངས་སུ་བཟུང་བ་ལ་རིག་པའི་སྔོམ་པ་འཛིན་དུ་བཅུག་སྟེ། དེས་སློབ་དཔོན་ལ་ཕྱག་བྱས་ནས་ཞེས་བྱ་བ་ནས་བརྩམས་ཏེ། སེམས་ཅན་མྱ་ངན་འདས་ལ་དགོད། །ཅེས་བྱ་བའི་བར་གྱི་རིམ་པས་འཛིན་དུ་གཞུག་གོ །དེ་ནས་སློབ་དཔོན་གྱིས་སློབ་མ་བྱང་ཆུབ་ཏུ་སེམས་བསྐྱེད་དུ་གཞུག་སྟེ། ཨོཾ་སརྦ་ཏ་ཐཱ་ག་ཏ་པ་རམ་མ་ཧཱ་བོ་དྷི་ཙིཏྟ་ཨུཏྤཱ་ད་ཡ་མི་ཨ་བེ་ཤ་སརྦ་སཏྭ་དྷཱ་ཏུ་པ་རི་ཏྲན་སུ་ཁོཏྟ་མ་སིདྡྷི་ནི་མི་ཏྟཾ་ཨ་ཏ་ག་དཾ་བྷ་བ་ས་མ་སིདྡྷི་མ་ཧཱ་ཤྱ་དྱ་དྱི་བཏྟྱ་ཡཱ་ཨ་བད་སརྦ་ད་མ་མ་ཧཱ་སིདྡྷི་མ་ཧཱ་ཧི་ཤྭ་དྱ་དྷི་སིདྡྷ་ཡཱ་ཡ་ཙ་ཞེས་བྱ་བའི་སྔགས་ཀྱིས་བྱ་བའོ། །དེ་ནས་དེའི་སྙིང་གར་སུ་ར་ཏེ་ས་མ་ཡ་སྟྭཾ་ཧི་བཛྲ་སིདྡྷ་ཡ་
ཐ་སུ་ཁཾ་ཞེས་བྱ་བ་དང༌། དེ་བཞིན་དུ་རྡོ་རྗེ་བསྐྱེད་ལ། དེ་སློབ་དཔོན་གྱིས་རྡོ་རྗེ་སེམས་དཔའི་བཤད་པའི་སྔགས་དང༌། ཕྱག་རྒྱས་བྱིན་གྱིས་བརླབ་པར་བྱའོ། །དེ་ནས་མེ་ཏོག་ལ་སོགས་པས་མཆོད་ལ་ཡོན་གྱི་མཆོག་བླངས་ཏེ། སློབ་དཔོན་གྱིས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་བ་ལ། དང་པོའི་འཇུག་པའི་ཕྱག་རྒྱ་དང༌། རྡོ་རྗེ་ཤུགས་ཀྱིས་རང་གི་དབང་བསྐུར་བའི་ཆོ་གས་དབང་བསྐུར་བར་བྱའོ། །སྒོ་བཞི་ལས་ཤར་སྒོ་ནས་རྡོ་རྗེ་ལྕགས་ཀྱུ་མའི་ལས་ཀྱི་ཕྱག་རྒྱས་དགུག་པར་བྱའོ། །ལྷོ་ཕྱོགས་ནས་ཞགས་པའི་ལས་ཀྱི་ཕྱག་རྒྱས་གཞུག་པར་བྱའོ། །ནུབ་ནས་ལྕགས་སྒྲོག་མས་བཅིང་བར་བྱའོ། །བྱང་ནས་དྲིལ་བུ་མའི་ལས་ཀྱི་ཕྱག་རྒྱས་དབང་དུ་བྱའོ། །དེ་ནས་ཤར་ཕྱོགས་ནས་ཡང་བཅུག་ལ་འདི་སྐད་ཅེས་བརྗོད་དོ། །འདོད་ཆགས་བྲལ་འདུལ་འཇིག་རྟེན་ལ། །ཆགས་བྲལ་གྱིས་ནི་དག་པར་འགྱུར། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་སེམས་དཔའ་སྦས་པ་ཡིན། །འདོད་ཆགས་བྲལ་འདྲའི་སྡིག་པ་ནི། །གཞན་དག་ངོ་བོ་ཉིད་ཀྱིས་མེད། །དེ་བས་ཀུན་དང་ཆགས་བྲལ་བར། །ཁྱོད་ནི་ནམ་ཡང་མ་བྱེད་ཅིག །དེ་ནས་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ཞེས་བྱ་བ་ནི་དཀྱིལ་འཁོར་བསྟན་ཞིང་དབབ་པའི་ཕྱག་རྒྱ་དགྲོལ་བའི་བར་གྱི་ཆོ་ག་སྔར་བཤད་པ་བཞིན་དུ་བྱའོ། །དེ་ནས་ཕྱིའི་དཀྱིལ་འཁོར་གྱི་ནང་དུ་ཤར་སྒོར་བལྟས་པའོ། །སྣ་ཚོགས་པདྨ་ལ་བྲིས་ལ། སློབ་མ་དཔལ་རྡོ་རྗེ་སེམས་དཔར་བྱིན་གྱིས་བརླབས་ལ། ཕྱག་རྒྱ་ཆེན་པོ་པདྨའི་སྟེང་དུ་གཞག་སྟེ། དབང་བསྐུར་བ་ནས་ཕྱག་རྒྱ་བཞི་བྱིན་གྱིས་བརླབ་པའི་བར་གྱི་ཆོག་རྒྱས་པ་རྣམས་བྱ་བ་ནི་སྔར་དཔལ་རྡོ་རྗེ་སེམས་དཔའི་ཆོ་ག་ལས་གསུངས་པའི་ཚུལ་དུ་ཐམས་ཅད་བྱ་བར་ཤེས་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་བསྟན་ནས། ད་ནི་དམ་
ཚིག་དང་དབང་བསྐུར་བ་ཐོབ་པ་རྣམས་ལ། སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བ་ནི་འདས་མ་ཐག་པ་སྟོན་པའོ། །དེ་ཕྱིར་ཞེས་བྱ་བ་ནི་རྒྱུ་སྟེ། གང་གི་ཕྱིར་སྒྲུབ་པ་མེད་པར་གདུལ་བྱ་རྣམས་ཀྱིས་མངོན་པར་འདོད་པའི་དོན་གྲུབ་པར་མི་འགྱུར་བས་ན་རྒྱུ་དེའི་ཕྱིར་སྒྲུབ་པ་བཤད་པར་བྱའོ། །སྒྲུབ་པ་དེ་ཉིད་དངོས་གྲུབ་ཀྱི་རྒྱུ་ཡིན་པས་ན་སྒྲུབ་པའོ། །སྒྲུབ་པ་དེའི་དངོས་གྲུབ་ཁྱད་པར་ཇི་ལྟ་བུ་ཡིན་ཞེ་ན། ཤིན་ཏུ་རྟག་པ་ཡིན་ཞེས་གསུངས་ཏེ་ཐོག་མ་དང་ཐ་མ་མེད་པ་དཔལ་རྡོ་རྗེ་སེམས་དཔའ་ལ་སོགས་པ་མངོན་སུམ་དུ་བྱེད་པའི་རྒྱུར་གྱུར་པའི་ཕྱིར་ཤིན་ཏུ་རྟག་པའི་དངོས་གྲུབ་སྟེ། དངོས་གྲུབ་ཤིན་ཏུ་རྟག་པ་དེའི་སྒྲུབ་པ་བཤད་པའོ་ཞེས་བྱ་བའི་དོན་ཏོ། །སྲིད་པ་འདིར་ཞེས་བྱ་བ་ནི་ཚེ་འདི་ཉིད་ལའོ། །གང་གི་ཕྱིར་ཐོབ་ཅེས་བྱ་བ་ནི་སྒྲུབ་པ་གང་གིས་དེ་ཐོབ་པར་འགྱུར་བའོ། །ཅི་ཞིག་ཐོབ་ཅེ་ན། ཤིན་ཏུ་རྟག་པའི་དངོས་གྲུབ་ཉིད། །ཅེས་བྱ་བ་གསུངས་ཏེ། དཔལ་རྡོ་རྗེ་སེམས་དཔའ་ཉིད་ཐོབ་པ་ནི་ཤིན་ཏུ་རྟག་པའི་དངོས་གྲུབ་བོ། །ཅིའི་ཕྱིར་སྒྲུབ་པ་འདིས་ཤིན་ཏུ་རྟག་པའི་དངོས་གྲུབ་ཚེ་འདི་ཉིད་ལ་ཐོབ་པར་འགྱུར་ཞེ་ན། འདི་ཡིས་ཞེས་བྱ་བ་ལ་སོགས་པ་གསུངས་ཏེ། འོག་ནས་བཤད་པའི་སྒྲུབ་པ་འདིས་སོ། །བྱང་ཆུབ་སེམས་དཔའ་ནི་ཞེས་བྱ་བ་སྒྲུབ་པ་པོ་སྲིད་པར་གནས་ཤིང་ཞེས་བྱ་བ་ལ་འདོད་པ་དང༌། གཟུགས་དང་གཟུགས་མེད་པའི་སྲིད་པ་ན་གནས་པའོ། །སྲིད་པ་སྤངས་པ་ཞེས་བྱ་བ་འདོད་པའི་སྲིད་པ་ལ་སོགས་པ་སྤངས་པའོ། །དངོས་གྲུབ་ཀུན་གྱི་དབང་ཕྱུག་ཆེ། །ཞེས་བྱ་བ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་ཐོབ་ཅིང་རྡོ་རྗེ་སེམས་དཔའ་ལ་སོགས་པའི་དངོས་གྲུབ་རྫོགས་པས་ན། དངོས་གྲུབ་ཀུན་གྱི་དབང་ཕྱུག་ཆེ། །ཞེས་བྱའོ། །རྟག་ཏུ་སེམས་ཅན་ཀུན་དོན་བྱེད། །ཅེས་བྱ་བ་ནི་ཕྱི་མའི་མཐར་ཐུག་པ་མེད་པར་སེམས་ཅན་གྱི་དོན་མཛད་
པའོ། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་སྦྱོར་བས་ཀྱང་ཚེ་འདི་ཉིད་ལ་སྲིད་པ་ལ་གནས་ཤིད་སྲིད་པ་སྤངས་པ་གྲུབ་ཅིང་སེམས་ཅན་གྱི་དོན་རྟག་ཏུ་བྱེད་པར་འགྱུར་བས་ན་སྒྲུབ་པ་འདི་ཅི་ཞིག་བྱ་ཞེས་རྟོག་ན་དེའི་ཕྱིར་ཇི་ལྟར་འདི་ཡིས་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་གྲུབ་པ་འདིས་ཚེ་འདི་ཉིད་ལ་སྲིད་པར་གནས་ཤིང་སྲིད་པ་སྤངས་པ་གྲུབ་པར་གྱུར་པ་དེ། དེ་ལྟར་ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་ལ་སོགས་པས་སྒྲུབ་པ་ནི་མ་ཡིན་ཏེ། གང་གི་ཕྱིར་དེས་བསྐལ་པ་གྲངས་མེད་པ་གསུམ་གྱིས་སངས་རྒྱས་ཉིད་ཐོབ་པར་བཤད་པའི་ཕྱིར་རོ། །བྱང་ཆུབ་སྤྱོད་པ་ཞེས་བྱ་བ་ནི་ཕ་རོལ་ཏུ་ཕྱིན་པ་བཅུ་དང༌། བྱང་ཆུབ་སེམས་དཔའི་ས་བཅུའི་སྤྱོད་པའོ། །དེ་ལ་སོགས་པ་གང་ཡིན་པ་དེ་ནི་བྱང་ཆུབ་སྤྱོད་པ་ལ་སོགས་ཏེ། ཉན་ཐོས་དང་རང་སངས་རྒྱས་ཀྱི་ས་ཐོབ་པར་བྱ་བ་དང༌། བསམ་པ་དང༌། བསྒོམ་པའི་རང་བཞིན་ཅན་གྱི་གང་ཡིན་པ་དེ་ནི་བྱང་ཆུབ་ཀྱི་སྤྱོད་པ་ལ་སོགས་པ་ཞེས་བྱའོ། །དགེ་བའི་ཚུལ་ནི་གཞན་གྱིས་ཀྱང༌། །ཞེས་བྱ་བ་ནི་འཇིག་རྟེན་པའི་དགེ་བའི་སྤྱོད་པས་ཀྱང་སྟེ། དེ་དག་གིས་ཚེ་འདི་ཉིད་ལ་སངས་རྒྱས་ཐམས་ཅད་ལ་སོགས་པའི་དངོས་གྲུབ་ཀྱི་མཆོག་སྟེ། དམ་པར་གྱུར་པ་ཇི་ལྟར་འདིས་ཐོབ་པར་གྱུར་པ་དེ་བཞིན་དུ་དེ་དག་གིས་ཐོབ་པར་མི་འགྱུར་རོ། །ཚུལ་གཞན་དག་གིས་སངས་རྒྱས་ཉིད་ལ་སོགས་པའི་དངོས་གྲུབ་ཚེ་འདི་ཉིད་ལ་གྲུབ་པ་དང༌། སེམས་ཅན་ཐམས་ཅད་ཀྱི་དོན་ཅིའི་ཕྱིར་མི་བྱེད་ཅེ་ན། གདུལ་བྱ་མིན་པ་དང་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཉིད་ལ་སོགས་པའི་དངོས་གྲུབ་བསྐྱེད་པའི་ཕག་ཆགས་མེད་པས་སངས་རྒྱས་དང་ཏིང་ངེ་འཛིན་ལ་སོགས་པ་མཐོང་བ་ལྟ་བུའི་སྐལ་པ་མེད་པའི་སེམས་ཅན་གྱི་ཁམས་ནི་གདུལ་བྱ་མ་ཡིན་པའོ། །མཚམས་མེད་པ་ལ་སོགས་པའི་ལས་གྱི་ལམ་དང་ལྡན་པའི་སེམས་ཅན་གྱི་ཁམས་ནི་བསོད་ནམས་མེད་པའོ། །དེ་བས་ན་གདུལ་བྱ་མ་ཡིན་པ་འམ། བསོད་
ནམས་མེད་པའི་རྒྱུའི་ཚུལ་གཞན་གྱིས་སངས་རྒྱས་དང་རྡོ་རྗེ་འཆང་ལ་སོགས་པ་མཐོང་ནས་སེམས་ཅན་གྱི་དོན་བྱ་བར་མི་ནུས་ཤིང༌། ཚེ་འདི་ཉིད་ལ་སངས་རྒྱས་ཉིད་ལ་སོགས་པས་སེམས་ཅན་ཐམས་ཅད་ཀྱི་དོན་རྫོགས་པར་མི་འགྱུར་རོ། །དེ་བས་རྒྱུད་ཆེན་ལས་གྲུབ་པས། །ཞེས་བྱ་བ་ནི་བསྐྱེད་པའོ། །ཅི་ཞིག་ཅེ་ན། སངས་རྒྱས་ཡང་ན་རྡོ་རྗེ་འཛིན། །ཞེས་བྱ་བ་གསུངས་ཏེ། འོག་ནས་ཇི་སྐད་བཤད་པའི་སྒྲུབ་པས་གྲུབ་ཅིང་སངས་རྒྱས་སམ། །རྡོ་རྗེ་འཛིན་པ་ཐོབ་པའམ། ཐོས་པ་འམ། རེག་པས་སམ། ཆོས་རྟོག་པའི་བག་ཆགས་བསྐྱེད་པས་འགྲོ་བའི་དོན་བྱེད་པའི་མཐོང་བ་ལ་སོགས་པ་རྒྱུར་གྱུར་པས་གདུལ་བྱ་རྣམས་ཀྱིས་ཕྱག་རྒྱ་ཆེན་པོ་ལ་སོགས་པ་རྫོགས་པར་བྱེད་པའི་སེམས་ཅན་གྱི་དོན་བྱེད་པ་ཡིན་ནོ། །ཚད་རྩི་ཙམ་ཞིག་ཅེ་ན། ནམ་མཁའ་དང་མཉམ་པ་ཞེས་བྱ་བ་གསུངས་ཏེ། འཇིག་རྟེན་གྱི་ཁམས་ཀྱི་རྡུལ་ཕྲ་རབ་དང་མཉམ་པའི་བདག་ཉིད་ཀྱི་དངོས་པོ་སངས་རྒྱས་ཉིད་དང་རྡོ་རྗེ་འཆང་ཉིད་དུ་བསྐྱེད་པ་རྫོགས་པར་བྱས་པ་ནི་སེམས་ཅན་གྱི་དོན་ནམ་མཁའ་དང་མཉམ་པ་སྟེ། ནམ་མཁའ་དང་མཉམ་པ་དེ་མཛད་པའོ། །ཇི་ལྟ་བུའི་སངས་རྒྱས་དང་བྱང་ཆུབ་སེམས་དཔའ་དག་སེམས་ཅན་གྱི་དོན་མཛད་ཅེ་ན། སྲིད་པའི་ཉེས་པ་དྲི་མ་མེད། །ཅེས་བྱ་བ་ལ་སོགས་པ་གསུངས་ཏེ། འདོད་པ་དང་གཟུགས་དང་གཟུགས་མེད་པའི་སྲིད་པའོ། །འདོད་པའི་འདོད་ཆགས་ལ་སོགས་པ་ནི་སྲིད་པའི་ཉེས་པའོ། །དེའི་དྲི་མ་མེད་པ་ནི་དྲི་མ་དེ་དང་བྲལ་བའོ། །འདོད་ཆགས་ཆེན་པོ་བདེ་བ་ཆེ། །ཞེས་བྱ་བ་ནི་གོ་བར་ཟད་དོ། །ནམ་མཁའ་མཐའ་ཡས་པ་ཞེས་བྱ་བ་ནི་ནམ་མཁའ་དང་འདྲ་བར་མཐའ་ཡས་པས་ནམ་ནམ་མཁའ་མཐའ་ཡས་ཏེ། དེའི་ངོ་བོ་ཉིད་ནི་ནམ་མཁའ་མཐའ་ཡས་པ་ཉིད་དོ། །ནམ་མཁའ་མཐའ་ཡས་པ་ཉིད་དེས་ནམ་མཁའ་མཐའ་ཡས་ལྟར་ཐམས་ཅད་དུ་སོང་བས་སངས་རྒྱས་དང་རྡོ་རྗེ་འཆར་དེ་རྣམས་མི་གནས་པའི་མྱ་ངན་ལས་འདས་པའི་
ཁམས་ལ་བཞུགས་ནས་མྱ་ངན་ལས་མི་འདའ་བར་སེམས་ཅན་གྱི་དོན་མཛད་པའོ། །ཇི་ལྟར་ནམ་མཁའ་དང་མཉམ་པར་སེམས་ཅན་ཐམས་ཅད་ཀྱི་དོན་མཛད་ཅེ་ན། དཀྱིལ་འཁོར་དག་ཏུ་མ་ཞུགས་པའམ། །ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བསྒྲུབ་པ་འདིས་སེམས་ཅན་དཀྱིལ་འཁོར་དུ་མ་ཞུགས་པ་དང༌། བསོད་ནམས་མེད་པ་དང༌། ལེ་ལོ་ཅན་ཡང་འགྲུབ་པར་འགྱུར་རོ། །དེ་བས་ན་འདིའི་ནུས་པས་སངས་རྒྱས་རྡོ་རྗེ་འཛིན་ལ་སོགས་པ་དེ་རྣམས་ནམ་མཁའ་དང་མཉམ་པའི་སེམས་ཅན་ཐམས་ཅད་ཀྱི་དོན་མཛད་དོ། །སུ་ཞིག་གིས་དེ་སྐད་གསུངས་ཤེ་ན། བཅོམ་ལྡན་འདས་དོན་ཡོད་པར་གྲུབ་པ་རྡོ་རྗེ་སེམས་དཔའ་ཞེས་བྱ་བ་གསུངས་སོ། །དེ་ལྟར་སློབ་དཔོན་གྱི་སྒྲུབ་པ་བཤད་ནས། ད་ནི་རྭ་ནས་བཟུང་བའི་ཚུལ་གྱིས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དོན་ཡོད་པ་ནི་འབྲས་བུ་ཡོད་པ་སྟེ། དེ་ཉིད་ཀྱིས་ན་ཐོགས་པ་མེད་པའོ། །མྱུར་བ་ནི་རིང་པོར་མི་ཐོགས་པའོ། །མཆོག་ནི་བསྒྲུབ་པའི་ཐབས་གཞན་ལས་དམ་པར་གྱུར་པའོ། །དེ་ཡང་གང་ཞིག་ཡིན་ཞེ་ན། བསྒྲུབ་པ་ཞེས་བྱ་བ་སྟེ། འདི་སངས་རྒྱས་ཉིད་དམ་རྡོ་རྗེ་འཆང་བ་ཉིད་སྒྲུབ་པས་ན། སྒྲུབ་པ་ཞེས་བྱའོ། །རྗེས་སུ་བཤད་པ་ཞེས་བྱ་བ་ནི། བཤད་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔར་གསུངས་སོ། །ལུགས་མའམ་ཞེས་བྱ་བ་ལ་སོགས་པ་ནི། དཔལ་རྡོ་རྗེ་སེམས་དཔའི་སྐུ་གཟུགས་བཟོ་བོ་བཟང་པོ་བྱེད་དུ་གཞུག་པའམ། རང་ཉིད་ཀྱིས་བྱས་པའོ། །དེ་ནས་ཡིད་དང་རྗེས་སུ་མཐུན་པའི་གནས་སུ་བཞག་ལ་བསྒྲུབ་པར་བྱའོ། །ཇི་ལྟར་བསྒྲུབ་པར་བྱ་ཞེ་ན། ཉིན་རེ་ཞེས་བྱ་བ་ལ་སོགས་པ་གསུངས་ཏེ། ཉི་མ་རེ་རེ་ནི་ཉིན་རེའོ། །བཟླས་པ་དང་བསྒོམ་པའི་དུས་ཀྱི་ཐོག་མ་ནི་དང་པོའོ། །ལན་ཅིག་ནི་ཞེས་བྱ་བ་ནི་ལན་ཅིག་གཅིག་གོ །ཡུལ་དང་ལྡན་གྱུར་པ་ཞེས་བྱ་བ་ནི། དཔལ་རྡོ་རྗེ་སེམས་དཔའི་ཆ་ལུགས་དང་རྒྱན་གྱིས་
བདག་ཉིད་བརྒྱན་པར་གྱུར་པའོ། །དེ་བཞིན་ཞེས་བྱ་བ་ནི་རྣམ་པ་དེ་ལྟ་བུས་དགུག་ཅིང་སྤྱན་དྲངས་ལ། མཆོད་པ་ཞེས་བྱ་བ་གསང་བའི་མཆོད་པ་བཞིས་ཡང་དག་པར་མཆོད་དོ། །གང་གིས་ཡང་དག་པར་དགུག་པར་བྱ་ཞེ་ན། གསང་བ་མཆོག་གིས་ཞེས་བྱ་བ་གསུངས་ཏེ། ཡི་གེ་ཧཱུཾ་ཟློས་ཤིང་གསང་བའི་ལྕགས་ཀྱུ་དྲིལ་བུ་དང་བཅས་པས་རང་གི་ལུས་ལ་གཞུག་པར་བྱའོ་ཞེས་བྱ་བའི་ཐ་ཚིག་དོ། །ཕྱག་རྒྱ་ཆེན་པོས་རང་བྱིན་གྱིས་བརླབ་ཅེས་བྱ་བ་ནི། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་རབ་ཏུ་ཞེས་བྱ་བ། ཤིན་ཏུ་བྱིན་གྱིས་བརླབ་པ་སྟེ། རྡོ་རྗེ་སེམས་དཔར་བྱས་པ་ནི། ཕྱག་རྒྱ་ཆེན་པོར་རབ་བྱིན་བརླབ། །ཅེས་བྱའོ། །རྡོ་རྗེ་མིག་གིས་དེ་བཞིན་བལྟ། །ཞེས་བྱ་བ་ནི། ཇི་ལྟར་དཔལ་རྡོ་རྗེ་སེམས་དཔའ་བསྐལ་པ་བཟང་པོའི་ཐོག་མར། རྡོ་རྗེ་ལྟ་བའི་ཕྱག་རྒྱས་གཟིགས་ཤིང། ཡི་གེ་ཧཱུཾ་གི་གླུ་གསུང་ཞིང་བཞུགས་པ་དེ་བཞིན་དུ་རྣལ་འབྱོར་པས་རྡོ་རྗེ་མིག་གིས་བལྟ་བར་བྱའོ། །རྡོ་རྗེ་བསྙེམས་ཚུལ་བདག་ཅེས་བྱ་བ་ལ། རྡོ་རྗེ་བསྙེམས་ཚུལ་ནི། རྡོ་རྗེ་སེམས་དཔའི་ཕྱག་རྒྱ་ཆེན་པོ་དང་ལྷ་མོའོ། །དེའི་བདག་ཉིད་ནི་གཉིས་སུ་མེད་པའི་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ཀྱི་ངོ་བོ་བཅོམ་ལྡན་འདས་རྡོ་རྗེ་སེམས་དཔའོ། །རང་ཉིད་ནི་བདག་ཉིད་ཀྱི་རྣལ་འབྱོར་པའོ། །ཡི་གེ་ཧཱུཾ་ནི་གླུ་ཟློས་པས། །རྡོ་རྗེ་སེམས་དཔའ་བསྒྲུབ་པར་བྱ། །ཞེས་བྱ་བ་ནི་འདི་སྐད་སྟོན་པ་ཡིན་ཏེ། རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པའི་དམ་ཚིག་གི་ཕྱག་རྒྱ་བཅིངས་ལ། བཛྲ་ཨཱ་བེ་ཤ་ཨཱ་ཞེས་བྱ་བས་བདག་ཉིད་ལ་དབབ་པར་བྱས། ཏིཥྛ་བཛྲ་ཞེས་བྱ་བ་ལ་སོགས་པས་རྡོ་རྗེ་འབེབས་པའི་དམ་ཚིག་ཕྱག་རྒྱ་རང་གི་སྙིང་གར་དགྲོལ་ལ། དམ་ཚིག་གི་རྡོ་རྗེ་ཁུ་ཚུར་གཅིག་བར་བྱའོ། །དེ་ནས་སྙིང་གར་གནས་པའི་རྡོ་རྗེ་རྩེ་ལྔ་པ་ལས། ཡི་གེ་ཧཱུཾ་ཡིད་ཀྱིས་བྲིས་ནས་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་རང་གི་སེམས་ནམ་མཁའི་ཕྱོགས་སུ་ཡི་གེ་ཧཱུཾ་གི་
གཟུགས་སུ་བསམས་ལ། དེ་ཉིད་ཟླ་བའི་དཀྱིལ་འཁོར། དེའི་སྟེང་དུ་ཡི་གེ་ཧཱུཾ་གིས་ཟླ་བའི་དཀྱིལ་འཁོར་གཉིས་པ་ཧཱུཾ་དང་བཅས་པ་ལས་དང་པོའི་རྡོ་རྗེ་དང༌། རྡོ་རྗེའི་དབུས་སུ་ཧཱུཾ་བསམས་ལ། རྡོ་རྗེ་ནི་བདག་པོ་ཞེས་བསྒོམ་པར་བྱའོ། །དེ་ནས་རྡོ་རྗེ་སེམས་དཔར་བྱིན་གྱིས་བརླབ་པའི་སྦྱོར་བས། བཛྲ་སཏྭ་ཧཾ་ཞེས་ཟློས་ཤིང་རྡོ་རྗེ་སེམས་དཔར་བདག་ཉིད་བསྒོམ་པར་བྱའོ། །དེ་ནས་བསྙེམས་པ་དང་བཅས་པས་རྡོ་རྗེ་གསོར་ལ། བཛྲ་སཏྭ་ཧཾ་ཞེས་ཡང་བཟླ་བར་བྱའོ། །དེ་ནས་མ་ཧཱ་ས་མ་ཡ་ས་ཏྭ་ཧཾ་ཞེས་བརྗོད་དོ། །དེ་ནས་ས་མ་ཡ་སྟྭཾ་ཞེས་ཟློས་ཤིང་དང་པོའི་རྡོ་རྗེ་བཅིངས་ལ། ས་མ་ཡ་སྟྭཾ་ཞེས་བཟླ་བར་བྱའོ། །དེ་ནས་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས། སྙིང་ག་དང༌། དབྲལ་བ་དང༌། ལྐོག་མ་དང༌། སྤྱི་བོར་བདག་ཉིད་བྱིན་གྱིས་བརླབ་པར་བྱའོ། །དེ་ནས་ཧཱུཾ་ཟློས་ཤིང་ཕྱག་རྒྱ་ཆེན་པོ་བཅིངས་ལ། ཧཱུཾ་ཨ་ཞེས་བྱ་བས་མདུན་དུ་སྣ་ཚོགས་པདྨ་དང་པོའི་རྡོ་རྗེ་རྩེ་ལྔ་པ་བསྐྱེད་པར་བྱས་ལ་བཛྲ་ཧཾ་ཞེས་བྱ་བས་ང་རྒྱལ་བསྒོམས་ལ། རྡོ་རྗེ་བཛྲ་ས་ཏྭ་ཧཾ་ཞེས་ཟློས་ཤིང་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་ཉིད་བསྒོམ་པར་བྱའོ། །དེ་ནས་དེར་རྡོ་རྗེ་ལྕགས་ཀྱུ་མ་ལ་སོགས་པའི་ལས་ཀྱི་ཕྱག་རྒྱ་བཞིས་བཅོམ་ལྡན་འདས་རྡོ་རྗེ་སེམས་དཔའ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱས་ལ་དང་པོའི་རྡོ་རྗེ་བཅིངས་ཏེ་ཧཱུཾ་དྲྀ་ཤྱ་ཞེས་བྱ་བས་ལྟ་བ་བྱས་ནས་གསང་བའི་ལྕགས་ཀྱུ་མ་དང་ཧཱུཾ་གིས་རང་གི་ལུས་ལ་བཅུག་ལ་དང་པོའི་རྡོ་རྗེ་བཅིངས་ཏེ། ས་མ་ཡ་སྟྭཾ་ཞེས་བརྗོད་ཅིང་འོད་ཟེར་དམར་པོ་འབར་བའི་འོད་ཀྱིས་དཀྱིལ་འཁོར་བསྐྱེད་པར་བྱའོ། །དེ་ནས་རང་གི་ལུས་ཀྱི་ནང་དུ་ཆུད་པའི་བཅོམ་ལྡན་འདས་རྡོ་རྗེ་སེམས་དཔའ་དང་ཆུ་དང་འོ་མ་བཞིན་དུ་གཅིག་ཏུ་གྱུར་པར་བདག་ཉིད་བསམས་ལ། ས་མ་ཡ་སྟྭཾ་ཨ་ཧཾ་ཛཿ་ཧཱུཾ་བཾ་ཧོ། ཞེས་ལན་གསུམ་བཟླ་པར་བྱ་ཞིང༌། ལྔ་པོ་བསྡུས་པ་བཅིངས་ལ། ཨོཾ་སུ་ར་ཏ་སྟྭཾ་ཞེས་བརྗོད་དོ། །དེ་ནས་གསང་བའི་ལྕགས་ཀྱུ་མ་བཅིངས་ལ། ཨ་ནུ་རཱ་ག་ཡ་མི་ཧཱུཾ་ཞེས་ལན་
གསུམ་བཟླས་ལ་བསྒྲུབ་པར་བྱའོ། །དེ་ནས་དང་པོའི་རྡོ་རྗེ་བཅིངས་ལ། བཛྲ་སཏྭ། བཛྲ་རཏྣ། བཛྲ་དྷརྨའ། བཛྲ་ཀརྨཱ་ཞེས་བྱ་བ་དེ་བཞིན་དུ་བྱིན་གྱིས་བརླབ་པར་བྱའོ། །དེ་ནས་དེ་བཞིན་གཤེགས་པའི་སྐུའི་མཆོག་བཅིངས་ལ། ཡི་གེ་གཉིས་ཀྱི་གོ་ཆས་གོ། བགོས་ལ་རྡོ་རྗེ་དང༌། བདག་པོ་དང༌། མིང་གི་དབང་བསྐུར་བ་དང༌། དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ། འདོད་ཆགས་རྡོ་རྗེ་མ་ལ་སོགས་པ་གསང་བའི་མཆོད་པ་བཞིས་བདག་ཉིད་ལ་ཡང་དག་པར་མཆོད་དེ། རྣམ་པར་སྒེག་པའི་དགའ་བའི་རྡོ་རྗེས་ཕྱག་བྱས་ལ། དེ་ཉིད་ཀྱིས་ནི་རྡོ་རྗེ་བཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གི་ནི་ཕྱག་རྒྱ་ཆེ། །བྱིན་གྱིས་བརླབས་ནས་སྙིང་པོ་བཟླས། །དེ་ལྟར་བསྒྲུབ་པ་ལན་ཅིག་བྱས་ནས། དེའི་རྗེས་ལ་ཐམས་ཅད་རྡོ་རྗེ་སེམས་དཔའི་རང་བཞིན་ཡིན་པར་བསམས་ནས། མཉམ་པར་མ་བཞག་པའི་རྣལ་འབྱོར་པས། རས་རིས་དང་སྐུ་གཟུགས་ལ་སོགས་པ་ལས། ཡི་གེ་ཧཱུཾ་གི་གླུ་ཉིད་ཀྱིས་ཇི་ལྟར་འདོད་པ་བཞིན་དུ་བསྒྲུབ་པར་བྱའོ། །དེ་ལྟར་ཉིན་རེ་ཞིང་བྱིན་གྱིས་བརླབས་པ་ལན་ཅིག་བྱས་ནས། ཇི་སྲིད་བཅོམ་ལྡན་འདས་བདག་ཉིད་ཀྱི་མདུན་དུ་ཉིན་རེ་ཞིང་མདུན་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་མཚན་ཐོག་ཐག་བསྒོམ་པར་བྱའོ། །དེ་ནས་དེ་ཅིར་འགྱུར་ཞེ་ན། འདི་ཞེས་བྱ་བ་ལ་སོགས་པ་གསུངས་ཏེ། འདི་ཡིས་ཞེས་བྱ་བ་ནི། བཤད་མ་ཐག་པའི་བསྒྲུབ་པས་སོ། །རྡོ་རྗེ་འདོད་པ་ཀུན་དབང་ཕྱུག །འདོད་པ་ཙམ་གྱིས་འགྲོ་འོང་ལྡིང༌། །ཞེས་བྱ་བ་ནི། འདོད་པ་ཡང་ཡིན་ལ་ཀུན་ཀྱང་ཡིན་པས་འདོད་པ་ཀུན་ཏེ། རྡོ་རྗེ་སེམས་དཔའ་ལ་སོགས་པ་དང༌། ཕྱིའི་འདོད་པའི་ཡོན་ཏན་ལྔའོ། །དབང་ཕྱུག་ནི་དེ་རྣམས་ལ་དབང་བྱེད་པའི་བདག་པོའོ། །འདོད་པ་ཙམ་གྱིས་ཞེས་བྱ་བ་ནི་བསམས་པ་ཙམ་གྱིས་སོ། །འགྲོ་བ་ནི་རང་གི་གནས་ནས་འོག་མིན་ལ་སོགས་པའི་གནས་སུ་སོང་བའོ། །འོང་བ་ནི་གནས་དེ་ནས་རང་གི་
གནས་སུ་ཕྱིར་ལྡོག་པའོ། །དངོས་གྲུབ་ཀུན་ནི་རྡོ་རྗེ་སེམས་དཔའ་ལ་སོགས་པ་གྲུབ་པ་སྟེ། དེ་ལ་དབང་དུ་བྱེད་པའམ་དེས་དབང་ཕྱུག་ཏུ་གྱུར་པས་ན་རྡོ་རྗེ་ཀུན་གྱི་དབང་ཕྱུག་གོ །ཇི་ལྟ་ཞེ་ན། གྲུབ་ཅེས་བྱ་བ་གསུངས་ཏེ་ཇི་སྐད་དུ་བཤད་པའི་བསྒྲུབ་པ་འདིས་རྡོ་རྗེ་སེམས་དཔའི་དངོས་གྲུབ་རྫོགས་པར་འགྱུར་བ་ནི་གྲུབ་པའོ། །ཀུན་མཆོག་དམ་པའི་དབང་ཕྱུག་ཡིན། །ཞེས་བྱ་བ་ནི་ཀུན་ཀྱང་ཡིན་ལ་མཆོག་དམ་པ་ཡང་ཡིན་པས་ན་ཀུན་མཆོག་དམ་པའོ། །དེ་ཉིད་ནི་དབང་ཕྱུག་ཡིན་པས་ན་ཀུན་མཆོག་དམ་པའི་དབང་ཕྱུག་ཅེས་བྱའོ། །ཕུན་སུམ་ཚོགས་པ་ཡང་ཡིན་ལ་ཀུན་ཀྱང་ཡིན་པས་ཕུན་སུམ་ཚོགས་པ་ཀུན་དེ་བཞིན་གཤེགས་པ་ཐམས་ཅད་ལ་སོགས་པའི་འབྱོར་པའོ། །དེ་རྣམས་ཀྱི་བདག་པོ་ཡིན་པས་ན་ཕུན་སུམ་ཚོགས་པ་ཀུན་བདག་གོ །ཐམས་ཅད་ཡིན་ཞེས་བྱ་བ་ནི་བསྡུས་པའི་དཀྱིལ་འཁོར་གྱི་རང་བཞིན་ནོ། །འདོད་ཆགས་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ཚུལ་ལོ། །བདེ་བ་ཆེན་པོ་ནི་བཤད་ཟིན་ཏོ། །ཐམས་ཅད་འདུལ་ཞེས་བྱ་བ་ནི་རྡོ་རྗེ་རིགས་ཀྱི་བདག་པོར་གྱུར་པའོ། །སྣ་ཚོགས་ཞེས་བྱ་བ་ནི་རྡོ་རྗེའི་རིགས་རྣམས་ཀྱི་རང་བཞིན་ནོ། །རྟག་པར་ཞེས་བྱ་བ་ནི་དུས་ཐམས་ཅད་དུའོ། །ཀུན་དུ་འདུལ་བའོ་ཞེས་བྱ་བ་ནི་འགྲོ་བ་འདུལ་བའི་དཀྱིལ་འཁོར་གྱི་ཚུལ་གྱིས་ཐམས་ཅད་འདུལ་བར་མཛད་པས་ན་ཀུན་དུ་འདུལ་བའོ། །དངོས་གྲུབ་ཀུན་གྱི་བདེ་མཆོག་མཆོག །ཅེས་བྱ་བ་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པའི་དངོས་གྲུབ་ནི་དངོས་གྲུབ་སྟེ། དེས་བསྐྱེད་པའི་བདེ་བ་ནི་དངོས་གྲུབ་ཀུན་གྱི་བདེ་བའོ། །བདེ་བ་མཆོག་ཅེས་བྱ་བ་དེ་བཞིན་གཤེགས་པ་རྣམས་ཀྱི་མཆོག་ཡིན་པས་ན་དངོས་གྲུབ་ཀུན་གྱི་བདེ་མཆོག་ཅེས་བྱའོ། །ཕྱག་རྒྱ་ཀུན་བདག་དབང་ཕྱུག་ཡིན། །ཞེས་བྱ་བ་ལ། ཕྱག་རྒྱ་ཡང་ཡིན་ལ་ཀུན་ཀྱང་ཡིན་པས་ན་ཕྱག་རྒྱ་ཀུན་ཏེ། རྡོ་རྗེ་མཚོན་ཆ་མ་ལ་སོགས་པ་ལྷ་
མོའི་རང་བཞིན་ནོ། །དེ་རྣམས་ཀྱི་བདག་པོ་ནི་གཙོ་བོའོ། །དེ་རྣམས་ཀྱི་གཙོ་བོར་གྱུར་པ་ཉིད་ཀྱིས་ན་དབང་ཕྱུག་ཡིན་ཞེས་བྱའོ། །རྡོ་རྗེ་ཀུན་གྱི་དངོས་གྲུབ་ཆེ། །ཞེས་བྱ་བ་ལ། རྡོ་རྗེ་ཡང་ཡིན་ལ་ཀུན་ཀྱང་ཡིན་པས་ན་རྡོ་རྗེ་ཀུན་ཏེ། རྡོ་རྗེ་རིགས་ཀྱི་རས་རིས་ཀྱི་དཀྱིལ་འཁོར་གྱི་རང་བཞིན་ཅན་གྱི་སངས་རྒྱས་དང་བྱང་ཆུབ་སེམས་དཔའ་རྣམས་སོ། །དེའི་ཕྱག་རྒྱ་ཆེན་པོའི་དངོས་གྲུབ་ལ་སོགས་པ་ནི་དངོས་གྲུབ་ཆེན་པོའོ། །ཐམས་ཅད་མཁྱེན་པའི་འབྱུང་གནས་ཆེ། །ཞེས་བྱ་བ་ལ་ཐམས་ཅད་མཁྱེན་པ་ནི་པདྨའི་རིགས་ཀྱི་རས་རིས་ཀྱི་དཀྱིལ་འཁོར་རོ། །དེའི་འབྱུང་གནས་ཀྱང་ཡིན་ལ་ཆེན་པོ་ཡང་ཡིན་པས་ན། ཐམས་ཅད་མཁྱེན་པའི་འབྱུང་གནས་ཆེ། །ཞེས་བྱ་སྟེ། པདྨའི་རིགས་ཀྱི་རས་རིས་ཀྱི་དཀྱིལ་འཁོར་གྱི་རྒྱུར་གྱུར་པ་ཉིད་ཀྱིས་ཐམས་ཅད་དུ་ཁྱབ་པའི་འཕགས་པ་འཇིག་རྟེན་དབང་ཕྱུག་གོ །མི་ཚུགས་པ་ནི་ཟིལ་གྱིས་གནོན་པར་མི་ནུས་པའོ། །མི་སོད་པ་ནི་གསོད་པར་མི་ནུས་པའོ། །ཐམས་ཅད་བྱེད་ཅེས་བྱ་བ་ལ་ནི་འཕགས་པ་ནམ་མཁའི་སྙིང་པོའི་རས་རིས་ཀྱི་དཀྱིལ་འཁོར་གྱི་ཚུལ་གྱིས་སེམས་ཅན་ཐམས་ཅད་ཀྱི་བསམ་པ་རྣམས་ཡོངས་སུ་རྫོགས་པའི་ལས་བྱེད་པས་ན་ཐམས་ཅད་བྱེད་པའོ། །དེ་ཀུན་གྱི་གནས་ཞེས་བྱ་བ་ནི་སེམས་ཅན་ཐམས་ཅད་ཀྱི་རྟེན་དུ་གྱུར་པའོ། །ཁམས་གསུམ་ལས་རྒྱལ་བ་ཞེས་བྱ་བ་ནི་འདོད་པ་དང༌། གཟུགས་དང་གཟུགས་མེད་པ་ན་གནས་པའི་སེམས་ཅན་གྱི་ཁམས་རྣམས་འདུལ་བར་མཛད་པས་ན་ཁམས་གསུམ་ལས་རྒྱལ་བའོ། །སྣ་ཚོགས་པ་ཞེས་བྱ་བ་ནི་ཐམས་ཅད་དུ་ཁྱབ་པའོ། །ཇི་ལྟར་ཁམས་གསུམ་ལས་རྣམ་པར་རྒྱལ་བ་ཡིན་ཞེ་ན། ཚར་གཅོད་པ་དང་ཕན་འདོགས་ནུས་ཞེས་གསུངས་ཏེ། གང་གི་ཕྱིར་འདི་ཁམས་གསུམ་པ་ལ་སྤྱོད་པའི་སེམས་ཅན་ཐམས་ཅད་ལ། ཚར་གཅོད་པ་དང་ཕན་འདོགས་པ་ནུས་པས་ན་རྡོ་རྗེ་སེམས་དཔའ་ལ་སོགས་པ་ལྷ་ཐམས་ཅད་ཀྱི་སྦྱོར་བ་སེམས་
ཅན་གྱི་ཁམས་ཐམས་ཅད་ལ་སྩོལ་བ་ཡིན་པའི་ཕྱིར་ཏེ། དེ་བས་ན་ཐམས་ཅད་ལ་རྗེས་སུ་དགའ་བས་ཀུན་ལ་རྗེས་སུ་ཆགས་པའི་སེམས་ཀྱི་ངོ་བོས་སོ། །དེ་བཞིན་གཤེགས་པ་ལ་སོགས་པའི་གཟུགས་ཅན་ཐམས་ཅད་བསྐྱེད་པར་མཚུངས་པ་མེད་པ་གཉིས་པ་མེད་པའི་ཕྱིར་དེ་བཞིན་གཤེགས་པ་ཐམས་ཅད་ལ་སོགས་པའི་མཆོག་ཡིན་པས་ན་ཀུན་མཆོག་གོ །ཀུན་རིག་ནི་དེ་བཞིན་གཤེགས་པ་ཐམས་ཅད་ཀྱི་ངོ་བོ་ཉིད་ཡིན་པས་སོ། །དངོས་གྲུབ་ཐམས་ཅད་སྟེར་ཞེས་བྱ་པ་ནི་དེ་བཞིན་གཤེགས་པ་ལ་སོགས་པའི་དངོས་གྲུབ་ཐམས་ཅད་སྟེར་བས་ན་དངོས་གྲུབ་ཐམས་ཅད་སྟེར་བའོ། །འཇིག་རྟེན་ཁམས་ནི་ཐམས་ཅད་དུ། །ཞེས་བྱ་བ་ལ་སོགས་པ་ཐམས་ཅད་ནི་གོ་བར་ཟད་དོ། །རྣམ་པ་དེ་ལྟ་བུར་བསྒོམས་པས་རྡོ་རྗེ་སེམས་དཔའ་ལ་སོགས་པ་དང་འདྲ་བར་གྲུབ་པར་གསུངས་ནས་ད་ནི་རྡོ་རྗེ་སེམས་དཔའ་ལ་སོགས་པའི་གཟུགས་བརྙན་དང་འདྲ་བར་བསྒོམས་པས། རྡོ་རྗེ་འཛིན་པ་ཉིད་དམ། དེ་བཞིན་གཤེགས་པ་ཉིད་དུ་འགྱུར་རོ་ཞེས་བསྟན་པར་བྱ་བའི་ཕྱིར། །གལ་ཏེ་ཞེས་བྱ་བ་ལ་སོགས་པ་གསུངས་ཏེ་གལ་ཏེ་ཞེས་བྱ་བ་ནི་ཅི་སྟེ་ཞེས་བྱ་བའི་དོན་ཏེ། ཇི་སྟེ་དངོས་གྲུབ་ཐམས་ཅད་ཀྱི་མཆོག་རྡོ་རྗེ་འཛིན་པ་ཉིད་དམ། སངས་རྒྱས་ཉིད་དམ་བྱང་ཆུབ་སེམས་དཔའི་ས་དང་པོ་ཉིད་ལ་སོགས་པའི་མཚན་ཉིད་ཅན་སྒྲུབ་པར་འདོད་པ་དེའི་དངོས་གྲུབ་ཀྱི་མཆོག་སྒྲུབ་པའི་ཐབས་དམ་ཚིག་ཆེན་པོའི་དེ་ཁོ་ན་ཉིད་ཀྱི་སྦྱོར་བས་དེ་འདི་ལྟར་སྒྲུབ་ན་སྒྲུབ་པའི་དངོས་གྲུབ་ཐམས་ཅད་ཚེ་འདི་ཉིད་ལ་འགྲུབ་པར་འགྱུར་རོ། །དོན་འདི་ཉིད་བསྟན་པར་བྱ་བའི་ཕྱིར། ཕྱི་མས་ཞེས་བྱ་བ་ལ་སོགས་པ་གསུངས་ཏེ། རྒྱུད་ཀྱི་ཕྱི་མ་ལས་གསུངས་པའི་ཆོ་ག་རྣམས་ཀྱིས་སམ། དབང་ཕྱུག་ཆེན་པོ་ལ་སོགས་པའི་རྒྱུད་ལས་བཤད་པའི་འཇིག་རྟེན་བས་སམ། དེ་བཞིན་གཤེགས་པ་ལ་སོགས་པའི་རྟོག་པ་ལས་གསུངས་པའི་རྟོག་པ་ཐམས་
ཅད་ཀྱིས་སམ། རང་ཉིད་ཀྱིས་མཛད་པ་ཞེས་བྱ་བ་རྡོ་རྗེ་སེམས་དཔས་གསུངས་པའི་ཆོ་གས་མྱུར་ཞིང་རིངས་པ་དང༌། རྟོག་ཅིང་བརྟན་པར་དངོས་གྲུབ་ཐམས་ཅད་འགྲུབ་པར་འགྱུར་བ་ཡིན་ནོ། །དེ་ལྟར་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བསྒྲུབ་པར་བྱ་བའི་ཕྱིར་ཆོ་ག་གསུངས་ནས། ད་ནི་རང་གི་ལྷའི་སྐུར་བདག་ཉིད་བསྐྱེད་དེ། དངོས་གྲུབ་འདི་དག་ཐམས་ཅད་བསྒྲུབ་པར་བྱའོ་ཞེས་བརྟན་པར་བྱ་བའི་ཕྱིར། དེ་ལ་ཇི་ལྟར་ན་རང་གི་ཕྱག་རྒྱས་བདག་ཉིད་བསྒྲུབ་པར་བྱ་ཞེ་ན་ཞེས་བྱ་བ་ལ་སོགས་པ་གསུངས་པ་ཡིན་ཏེ། རང་གི་ཕྱག་རྒྱས་རང་གི་ལྷའི་སྐུ་དང་གསུངས་དང་ཐུགས་རྡོ་རྗེའི་ངོ་བོར་བདག་ཉིད་སྒྲུབ་པ་ནི་རང་གི་ལྷའི་སྐུར་བདག་ཉིད་བསྐྱེད་པའོ། །དེ་ཇི་ལྟར་འགྱུར་ཞེ་ན། ཕྱག་རྒྱ་ཆེན་པོར་མཉམ་གཞག་ལ། །ཞེས་བྱ་བ་ལ་སོགས་པ་གསུངས་ཏེ། རང་གི་ལྷའི་སྐུའི་གསང་བ་ནི་ཕྱག་རྒྱ་ཆེན་པོའོ། །དེར་མཉམ་པར་གཞག་པ་ནི་ཇི་སྐད་དུ་གསུངས་པའི་ཚུལ་གྱིས་རྣམ་པར་བསྒོམས་ནས་བསྒྲུབ་པར་བྱ་ཞིང་བརྟན་པར་བྱའོ། །རང་གི་སྙིང་པོ་ཞེས་བྱ་བ་ནི་རང་གི་ལྷའི་སྙིང་པོས་སོ། །ལན་ཅིག་ཅེས་བྱ་བ་ནི་ལན་ཅིག་སྟེ། ཐུན་མཚམས་དང་པོ་ལ་ཞེས་བྱ་བའི་ཐ་ཚིག་གོ །འདི་སྐད་སྟོན་པ་ཡིན་ཏེ། ཡེ་ཤེས་སེམས་དཔའ་རང་གི་ལུས་ལ་ཇི་ལྟ་བ་བཞིན་དུ་བཅུག་ལ། དམ་ཚིག་གི་ཕྱག་རྒྱས་རབ་ཏུ་བསྒྲུབས་ནས། ཆོས་དང་ལས་ཀྱི་ཕྱག་རྒྱ་གཉིས་ཀྱིས་རྒྱས་བཏབ་ལ། ཕྱག་རྒྱ་ཆེན་པོ་བཅིངས་ཏེ་རང་གི་ལྷའི་སྙིང་པོ་བཟླ་བར་བྱའོ། །དེ་ལྟར་ན་རྣལ་འབྱོར་པ་ལ་རང་གི་ལྷའི་སྙིང་པོ་དེས་རང་གི་སྐུའི་གསང་བས་བྱིན་གྱིས་རློབ་པར་འགྱུར་རོ། །ལྷག་མ་ནི་གོ་སླའོ། །དེ་ལྟར་ཆོ་ག་ཐམས་ཅད་རྗེས་སུ་སྤྱད་ནས་ཕྱག་རྒྱ་ཆེན་པོས་བདག་ལ་བྱིན་གྱིས་བརླབ་པ་བྱས་ཏེ། དེའི་རྗེས་ལ་རང་གི་ལྷའི་སྙིང་པོ་བཟླ་བར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར། དེ་ལ་ཇི་ལྟར་ན་ཡི་གེ་ཧཱུཾ་གི་གླུ་ཞེས་བྱ་བ་ལ་སོགས་པ་གསུངས་པ་ཡིན་ནོ། །རོ་བྷི་ཏ་སོགས་ཕྱག་རྒྱར་ལྡན། །ཞེས་བྱ་བ་ལ་
སོགས་པ་ནི་བཤད་ཟིན་ཏོ། །འདིས་ནི་དོན་འདི་སྐད་སྟོན་པ་ཡིན་ནོ། །རྒྱུད་འདི་ལས་ནི་གཙོ་བོར་ཤེས་རབ་ཀྱི་ཕ་རོལ་ཏུ་ཕྱིན་བ་སྟོན་པ་ཡིན་ལ། དེ་བས་ན་ལྕེ་ལ་རྡོ་རྗེ་དཀར་པོ་བསམས་ལ་ལྟེ་བར་ཧཱུཾ་ལ་སོགས་པ་རང་གི་ལྷའི་སྙིང་པོ་བསམས་ལ་ཡང་རང་གི་སྙིང་གར་གནས་པའི་རྡོ་རྗེ་རྩེ་ལྔ་པ་ལ་ཡི་གེ་ཧཱུཾ་ལ་སོགས་པ་རྣམ་པར་བསམས་ནས། དེ་ཉིད་ཇི་ལྟ་བ་བཞིན་དུ་ཟློས་ཤིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་རྡོ་རྗེ་སེམས་དཔའི་རང་བཞིན་བསྒོམ་པར་བྱའོ། །དེ་ལྟར་ཆོས་ཀྱི་ཕྱག་རྒྱ་སྒྲུབ་པ་གསུངས་ནས། ད་ནི་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་སྒྲུབ་པ་གསུངས་པ་ནི་དེ་ནས་ཕྱག་རྒྱ་ཐམས་ཅད་ཀྱི་མཆོག་སྒྲུབ་པའི་རྒྱུད་བཤད་དོ་ཞེས་བྱ་བ་གསུངས་པ་ཡིན་ཏེ། ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ཕྱག་རྒྱ་ཐམས་ཅད་དེ། དཔལ་རྡོ་རྗེ་སེམས་དཔའ་ལ་སོགས་པ་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱའོ། །དེ་རྣམས་ཀྱི་མཆོག་གྲུབ་པ་ནི། རྡོ་རྗེ་སེམས་དཔའ་ལ་སོགས་པའི་སྐུའི་གསང་བར་བདག་ཉིད་བསྒོམ་པའོ། །གལ་ཏེ་ཕྱག་རྒྱ་བསྒྲུབ་པར་འདོད་ན་ཞེས་བྱ་བ་ནི་གལ་ཏེ་རྣལ་འབྱོར་པ་གང་ལ་ལ་ཞིག་རྡོ་རྗེ་སེམས་དཔའི་སྐུའི་གསང་བ་སྒྲུབ་པར་འདོད་པ་དེས་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་བཅིངས་ལ། དཔལ་རྡོ་རྗེ་སེམས་དཔའི་ཆ་ལུགས་འཛིན་པ་ཉིད་ཀྱིས་རང་གི་སྙིང་པོ་བཟླས་ཤིང༌། དཔལ་རྡོ་རྗེ་སེམས་དཔའ་ལ་སོགས་པའི་སྐུ་ཇི་སྲིད་སྐྱོ་བར་མ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །སྐྱོ་བར་གྱུར་པ་ན་ངལ་སོ་ཞིང་བྱའོ། །དེ་ནས་ཕྱག་རྒྱ་ཆེན་པོ་བཤད་པར་གསུངས་ནས། ད་ནི་དམ་ཚིག་གི་ཕྱག་རྒྱ་བསྒྲུབ་པར་གསུངས་པ་ནི། དེ་ལ་ཇི་ལྟར་དམ་ཚིག་ཐམས་ཅད་གྲུབ་པའི་རྒྱུད་ཡིན་ཞེ་ན་ཞེས་བྱ་བ་ཡིན་ཏེ། དམ་ཚིག་ཕྱག་རྒྱ་བཅིངས་ནས་ནི། །ཞེས་བྱ་བ་ནི་གོ་བར་ཟད་དོ། །འདི་སྐད་སྟོན་པ་ཡིན་ཏེ་སྔ་མ་བཞིན་དུ་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས་ས་མ་
ཡ་སྟྭཾ། ཞེས་བརྗོད་ཅིང་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ། རང་གི་སྙིང་གར་གནས་པའི་སྐུའི་རྡོ་རྗེ་ལ་རང་གི་ལྷའི་སྙིང་པོ་ཡིད་ཀྱིས་བྲིས་ལ། རང་གི་ལྷའི་སྐུ་གཟུགས་བརྙན་དང་མཚུངས་པར་བསྒོམས་ཏེ། རང་གི་ལྷའི་སྙིང་པོ་བཟླ་པར་བྱའོ། །དེ་ལྟར་དམ་ཚིག་གི་ཕྱག་རྒྱ་སྒྲུབ་པ་གསུངས་ནས། ད་ནི་ལས་ཀྱི་ཕྱག་རྒྱ་བསྒྲུབ་པ་གསུངས་པ་ནི། དེ་ནས་ལས་ཀྱི་ཕྱག་རྒྱའི་མཆོག །ཅེས་བྱ་བ་ལ་སོགས་པ་ཡིན་ནོ། །རྡོ་རྗེ་གར་གྱི་མཆོད་པ་ཡིས། །ཞེས་བྱ་བ་ནི་ཕྱག་རྒྱའི་མཆོད་པ་རྣམ་པ་བཅུ་གཉིས་ནི་གར་གྱི་མཆོད་པ་ཡིན་པའམ། ལས་ཀྱི་ཕྱག་རྒྱའི་གར་གྱི་མཆོད་པའོ། །གར་གྱི་མཆོད་པ་རྒྱུར་གྱུར་པས། །དེས་སྒྲུབ་ཅིང་བསྐྱེད་པར་བྱའོ། །སྐྱོ་བར་མ་གྱུར་ཞེས་བྱ་བ་ནི་གོ་བར་ཟད་དོ། །མཆོད་པ་ཡང་ཡིན་ལ་ཐམས་ཅད་ཀྱང་ཡིན་པས་ན་མཆོད་པ་ཐམས་ཅད་དེ། ཕྱག་རྒྱའི་མཆོད་པ་བཅུ་གཉིས་སོ། །དེ་ལ་སོགས་པ་གང་ཡིན་པ་དེ་ནི་མཆོད་པ་ཐམས་ཅད་ལ་སོགས་པ་ལས་ཐམས་ཅད་ཀྱི་མཆོག་སོ་སོར་རྟོགས་པ་ལ་སོགས་པའི་ངོ་བོའོ། །ཚེ་འདི་ཉིད་ལ་གྲུབ་བར་འགྱུར། །ཞེས་བྱ་བ་ནི་དེ་སྒྲུབ་པ་པོ་ལ་སྐྱེ་བ་འདི་ཁོ་ནར་འགྲུབ་པར་འགྱུར་པའོ། །རྡོ་རྗེ་འཆང་ཆེན་ཉིད་དང་ནི། །ཞེས་བྱ་བ་ལ་སོགས་པ་ནི་གོ་སླའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་ལྷའི་རྣལ་འབྱོར་བྱས་ལ། རྡོ་རྗེ་མཚོན་ཆ་མ་ལ་སོགས་པའི་མཆོད་པ་རྣམ་པ་བཅུ་གཉིས་ཀྱིས་རང་གི་ལྷ་ཡང་དག་པར་མཆོད་པས་ཕྱག་བྱས་ཏེ། ཨ་ཞེས་བྱ་བས་སྙིང་གར་སྣ་ཚོགས་རྡོ་རྗེ་བསྐྱེད་ལ། དེའི་སྟེང་དུ་རང་གི་ལྷའི་བཟླ་བར་བྱ་བའི་སྙིང་པོ་བསམས་ནས་དེ་ཉིད་ཟློས་ཤིང་རང་གི་ལྷའི་ལས་ཀྱི་ཕྱག་རྒྱ་བཅིངས་ལ། རང་གི་ལྷ་དང་ཆོས་ཐམས་ཅད་རང་གིས་འོད་གསལ་བར་བསྒོམ་པར་བྱའོ། །རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་དེ། ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། །ལས་ཀྱི་ཕྱག་རྒྱའོ། །དེ་རྣམས་ཀྱི་སྒྲུབ་བ་ཆེན་པོ་ནི་བཤད་མ་ཐག་
པ་ཉིད་དོ། །དེ་ཉིད་ནི་དོན་ཡོད་པར་གྲུབ་པའི་ཆོ་ག་རྒྱས་པའོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་ཆེན་པོ་ཞེས་བྱའོ། །དེ་ལྟར་ཆོས་ཀྱི་ཕྱག་རྒྱ་ལ་སོགས་པ་ཕྱག་རྒྱ་བཞི་བསྒྲུབ་པ་བཤད་ནས་ད་ནི་ཆོས་ཀྱི་ཕྱག་རྒྱ་ལ་སོགས་པ་བསྒྲུབ་པ་དང༌། རབ་ཏུ་ལྡན་པའི་སྒྲུབ་པ་བདུན་གྱིས་ཀྱང་གལ་ཏེ་གྲུབ་པར་མ་གྱུར་ན། དེའི་ཚེ་འོག་ནས་རྗེས་ཐོགས་ཉིད་ལ་འཆད་པའི་ལས་རྣམས་ལན་ཅིག་བཟླས་པས་གྲུབ་པར་འགྱུར་རོ་ཞེས་བསྟན་པར་བྱ་བའི་ཕྱིར། །དེ་ནས་རྟོག་པ་ཐམས་ཅད་བསྒྲུབ་པའི་དངོས་གྲུབ་ཐམས་ཅད་ཀྱི་རྒྱུད་ནི་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཆོས་དང་ཕྱག་རྒྱ་ཆེན་པོ་དང༌། དམ་ཚིག་དང་ལས་ཀྱི་ཕྱག་རྒྱ་ནི་རྟོག་པ་ཐམས་ཅད་དོ། །དེ་རྣམས་ཀྱི་སྒྲུབ་པ་ནི་ཇི་སྐད་དུ་བཤད་པས་ན་མ་གྲུབ་པ་ནི་བསྐྱེད་ཅིང་རྫོགས་པར་མ་གྱུར་པའོ། །དངོས་གྲུབ་ཐམས་ཅད་ནི་ལས་ཉིས་བརྒྱ་གྲུབ་བའོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་དེ། དེ་བཤད་པར་བྱའོ་ཞེས་སྦྱར་བར་བྱའོ། །ཉིན་རེ་ཞེས་བྱ་བ་ནི་ཉིན་ཞག་རེ་རེ་ཞིང་ངོ༌། །དང་པོར་ཞེས་བྱ་བ་ནི་ཆོས་ཀྱི་ཕྱག་རྒྱ་ལ་སོགས་པ་སྒྲུབ་པའི་སྔོན་དུའོ། །ལན་ཅིག་ཅེས་བྱ་བ་ནི་ལན་ཅིག་གཅིག་གོ །ཕྱག་རྒྱ་སྒྲུབ་པ་ལ་དོན་ཡོད་པ། །ཞེས་བྱ་བ་ནི་ཆོས་ཀྱི་ཕྱག་རྒྱ་ལ་སོགས་པ་བསྒྲུབ་པའི་དོན་ཡོད་ཅིང་འབྲས་བུ་དང་བཅས་པའོ། །དེ་ཉིད་ཀྱིས་ན་དངོས་གྲུབ་ཐོགས་པ་མེད་པ་སྟེ། རྒྱུ་དེ་རྗེས་སུ་བཤད་པར་བྱའོ་ཞེས་བྱ་བ་ནི་བསྟན་པར་བྱའོ་ཞེས་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །འདིས་ནི་འདི་སྐད་སྟོན་པ་ཡིན་ཏེ། གལ་ཏེ་ཇི་སྐད་དུ་བཤད་པའི་སྒྲུབ་པ་བདུན་གྱིས་བསྒྲུབས་སུ་ཟིན་ཀྱང༌། ཆོས་ཀྱི་ཕྱག་རྒྱ་ལ་སོགས་པ་སྒྲུབ་པ་པོས་གྲུབ་པར་མ་གྱུར་ན། དེའི་ཚེ་ཡང་རང་གི་ལྷའི་སྦྱོར་བ་བྱས་ལ། ཐམས་ཅད་རྗེས་སུ་མཉེས་པར་བྱ་བ་ལ་སོགས་པའི་ལས་གྲུབ་པར་བྱེད་པའི་ཕྱག་རྒྱ་བཅིངས་ལ་ཐམས་ཅད་རྗེས་སུ་མཉེས་པར་བྱེད་པ་ལ་སོགས་པའི་ལས་ལན་ཅིག་བྱའོ། །དེའི་རྗེས་ལ་ཆོས་ཀྱི་ཕྱག་རྒྱ་ལ་སོགས་པ་བཞི་
བསྒོམ་པར་བྱའོ། །དེ་ལྟར་ན་ཕྱག་རྒྱ་བཞིའི་དངོས་གྲུབ་ངེས་བ་དེ་ཁོ་ནར་འགྲུབ་པར་འགྱུར་རོ། །ད་ནི་ལས་སྒྲུབ་པར་བྱེད་པའི་ཕྱག་རྒྱ་བསྟན་པར་བྱ་བའི་ཕྱིར། ཐམས་ཅད་རྗེས་སུ་མཉེས་པར་བྱ་བ་དང་ཞེས་བྱ་བ་ལ་སོགས་པ་གསུངས་ཏེ། དཔལ་རྡོ་རྗེ་སེམས་དཔའ་ལ་སོགས་པ་རྗེས་སུ་མཉེས་པར་བྱ་བ་ནི་རྒྱབ་ཀྱིས་ཕྱོགས་པར་གྱུར་པ་ལས་རང་དབང་དུ་གྱུར་པར་བྱ་བའི་ཕྱིར་མངོན་དུ་ཕྱོགས་བར་བྱའོ། །དགུག་པ་དང་ཞེས་བྱ་བ་ནི་དེ་རྣམས་ཉིད་སྤྱན་དྲང་བ་ནི་དགུག་པའོ། །བཅིང་བ་དང་ཞེས་བྱ་བ་ནི་སྤྱན་དྲངས་པ་དེ་རྣམས་ཉིད་རང་དབང་དུ་བྱས་པའི་ཕྱིར་རྡོ་རྗེ་ལྕགས་སྒྲོག་གིས་མི་འགུལ་བར་བྱ་བ་ནི་བཅིང་བའོ། །དབང་དུ་བྱ་བ་དང་ཞེས་བྱ་བ་ནི་དེ་རྣམས་ཉིད་རང་དབང་དུ་བྱས་པ་ནི་དབང་དུ་བྱ་བའོ། །དེ་ལྟར་ན་ཐམས་ཅད་རྗེས་སུ་མཉེས་པར་བྱ་བ་དང༌། དགུག་པ་དང༌། བཅིང་བ་དང༌། དབང་དུ་བྱ་བ་སྒྲུབ་པ་ནི་དེ་བསྐྱེད་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། བདེ་བ་ཆེན་པོ་རྡོ་རྗེ་ལྟ་བས་སོ་ཞེས་བྱ་བ་གསུངས་ཏེ། བདེ་བ་ཆེན་པོ་ནི་རྡོ་རྗེ་སེམས་དཔའོ། །དེའི་ལྟ་བ་ནི་བདེ་བ་ཆེན་པོ་རྡོ་རྗེ་ལྟ་བ་སྟེ། རྡོ་རྗེ་འབར་བའི་ལྟ་བ་བརྟན་པ་དང་པོའི་རྡོ་རྗེ་དང་བཅས་པའོ། །འདི་སྐད་སྟོན་པ་ཡིན་ཏེ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་དཔལ་རྡོ་རྗེ་སེམས་དཔའ་ལ་སོགས་པ་བསྒྲུབ་པར་བྱ་བ་གསང་བའི་ལྕགས་ཀྱུས་སྤྱན་དྲངས་ལ། མདུན་དུ་ཇི་ལྟ་བ་བཞིན་དུ་བསྒྲུབས་ཏེ། ཕྱག་རྒྱ་ཐམས་ཅད་ཀྱིས་དབང་བསྐུར་ཏེ་ཕྱག་བྱས་ལ། དང་པོའི་རྡོ་རྗེ་བཅིངས་ཏེ་ཧཱུཾ་ཟློས་ཤིང་དེའི་རྗེས་ལ་ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་འཛུམ་པའི་བལྟ་བས་བཅོམ་ལྡན་འདས་ལ་བལྟ་ཞིང་དེ་བསྒོམ་པར་བྱའོ། །དེ་ལྟ་བུས་ནི་རྗེས་སུ་མཉེས་པར་གྱུར་ཏེ། སྒྲུབ་པ་པོ་གང་ལ་རྗེས་སུ་ཆགས་པ་དང་བཅས་པར་འགྱུར་རོ་ཞེས་བྱ་བའི་ཐ་ཚིག་གོ །དེ་བཞིན་དུ་གནོད་སྦྱིན་མོ་ལ་སོགས་པ་བསྒྲུབས་ན་ཡང་རྗེས་སུ་ཆགས་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་དང་པོའི་རྡོ་རྗེ་བཅིངས་ཏེ། འབར་བའི་ལྟ་བས་དཔལ་རྡོ་རྗེ་སེམས་དཔའ་ལ་སོགས་
པ་སྤྱན་དྲང་བར་བྱ་སྟེ། དེ་ལྟ་བུས་ནི་དེ་ཐམས་ཅད་འགུག་པར་འགྱུར་རོ། །གནོད་སྦྱིན་མོ་ལ་སོགས་པ་བསྒྲུབ་པ་ནི། དཔལ་རྡོ་རྗེ་སེམས་དཔའི་བཙུན་མོ་གནོད་སྦྱིན་མོ་ལ་སོགས་པའི་ལུས་སུ་ཡིད་ཀྱིས་བཅུག་ལ། གནོད་སྦྱིན་མོ་ལ་སོགས་བའི་ལུས་དང་དེ་གཅིག་ཏུ་བྱས་ལ་འཛུམ་པའི་ལྟ་བས་དེ་དགུག་པར་བྱའོ། །དེ་ལྟ་བུས་དེ་སྒྲུབ་པ་པོས་བཀུག་ནས་དབང་དུ་བྱས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། དང་པོའི་རྡོ་རྗེ་བཅིངས་ཏེ་དཔལ་རྡོ་རྗེ་སེམས་དཔའ་ལ་སོགས་པ་བསྒྲུབ་པར་བྱ་བ་ལ་བརྟན་པའི་ལྟ་བས་བལྟ་བཞིན་དུ་བཟླས་པར་བྱ་སྟེ། དེ་ལྟ་བུས་ནི་རྡོ་རྗེ་ལྕགས་སྒྲོག་གིས་བཅིང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་བཅིངས་ཏེ། འཛུམ་པའི་ལྟ་བས་དཔལ་རྡོ་རྗེ་སེམས་དཔའ་ལ་སོགས་པ་བསྒྲུབ་པར་བྱ་བ་ལ་བལྟ་ཞིང༌། དེ་རྣམས་དགའ་བ་བསྐྱེད་པའི་བསམ་པས་བཟླ་བར་བྱས་ཏེ་དེ་ལྟ་བུས་ནི་དབང་དུ་བྱས་པར་འགྱུར་རོ། །བདེ་བ་དང༌། ཡིད་བདེ་བ་དང༌། ཕུན་སུམ་ཚོགས་པ་དང༌། དངོས་གྲུབ་ཐམས་ཅད་མངོན་པར་འཕེལ་བར་བྱ་བ་ལ་ནི་ཞེས་བྱ་བ་ལ། འཇིག་རྟེན་དང་འཇིག་རྟེན་ལས་འདས་པའི་བདེ་བ་ནི་བདེ་བ་ཐམས་ཅད་དོ། །ཡིད་བདེ་བ་ཡང་དེ་བཞིན་ནོ། །འཇིག་རྟེན་དང་འཇིག་རྟེན་ལས་འདས་པའི་སྦྱོར་བ་ཕུན་སུམ་ཚོགས་པའོ། དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ནི་དངོས་གྲུབ་ཐམས་ཅད་དོ། །བདེ་བ་དང༌། ཡིད་བདེ་བ་དང༌། དངོས་གྲུབ་འདི་ཐམས་ཅད་མངོན་པར་འཕེལ་བ་ནི་གོང་ནས་གོང་དུ་རྒྱུན་མི་འཆད་པའི་ཚུལ་གྱིས་སྐྱེ་བའོ། །དེ་ཇི་ལྟར་འགྱུར་ཞེ་ན། བདེ་བའི་རྡོ་རྗེ་ཆེན་པོའི་རྡོ་རྗེས་སོ་ཞེས་གསུངས་ཏེ། དང་པོའི་རྡོ་རྗེ་མཚན་མ་ལ་སོགས་པར་གནས་པའི་ཕྱིར་ཞེས་བྱ་བའི་ཐ་ཚིག་གོ ། འདིས་ནི་དོན་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཡི་གེ་ཧཱུཾ་ཟློས་ཤིང་དང་པོའི་རྡོ་རྗེ་བཅིངས་ལ་རང་གི་མཚན་མར་གཞག་སྟེ། ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་བཅོམ་ལྡན་འདས་ཡུམ་རྡོ་རྗེ་བསྙེམས་མ་དང་ལྷན་ཅིག་ཡང་དག་པར་སྦྱོར་
བ་བསྒོམ་པར་བྱའོ། །དེ་ལྟ་བུས་ནི་དེ་ཉིད་ཀྱིས་བདེ་བ་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་སྙིང་གར་འཇོག་ཅིང༌། རྡོ་རྗེ་སེམས་དཔར་བདག་ཉིད་བསྒོམ་པར་བྱ་སྟེ། དེ་ལྟ་བུས་ནི་ཡིད་བདེ་བ་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་དབྲལ་བར་བཞག་ལ། བདག་ཉིད་རྡོ་རྗེ་སེམས་དཔའ་རིན་པོ་ཆེ་སྣ་བདུན་དང་ལྡན་པའི་འཁོར་ལོས་སྒྱུར་བའི་རང་བཞིན་དུ་བསྒོམ་པར་བྱའོ། །དེ་ལྟ་བུས་ནི་ཕུན་སུམ་ཚོགས་པ་ཐམས་ཅད་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་སྤྱི་པོར་འཇོག་ཅིང་བདག་ཉིད་རྡོ་རྗེ་སེམས་དཔའི་ཕྱག་རྒྱ་ཆེན་པོ་ལ་སོགས་པ་གྲུབ་པར་བསམས་ཏེ། དེ་ལྟ་བུས་ནི་དངོས་གྲུབ་ཐམས་ཅད་འཕེལ་བར་འགྱུར་རོ། །ཚེ་དང་ལང་ཚོ་དང༌། གཟུགས་དང་གཟི་བརྗིད་ཆེན་པོ་མངོན་པར་འཕེལ་བར་བྱ་བ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་ཚེ་ནི་ཚེ་ཆེན་པོའོ། །ཚེ་དང་ལང་ཚོ་ནི་དེ་རྣམས་ཉིད་ཀྱི་ན་ཚོད་དར་ལ་བབ་པའོ། །དེ་རྣམས་ཉིད་ཀྱི་མཚན་སུམ་ཅུ་རྩ་གཉིས་དང༌། དཔེ་བྱད་བཟང་པོ་བརྒྱད་ཅུ་དང་ལྡན་པ་ནི་གཟུགས་སོ། །དེ་རྣམས་ཉིད་ཀྱི་གཟི་མདངས་ནི་གཟི་བྱིན་ཆེན་པོའོ། །ཚེ་དང་ལང་ཚོ་དང་གཟུགས་དང་གཟི་བྱིན་འདི་རྣམས་མངོན་པར་འཕེལ་བ་ནི་སྔ་མ་བཞིན་ནོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་བཅུད་ཀྱིས་ལེན་གྱིས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་ནི་དབུས་མ་སྙིང་ག་ལ་སོགས་པར་གཞག་སྟེ་བཏུང་བར་བྱ་བ་འདི་ནི་དང་པོའི་རྡོ་རྗེ་བཅུད་ཀྱིས་ལེན་པ་ཡིན་ནོ། །འདི་སྐད་སྟོན་ཏེ་དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཧཱུཾ་གིས་དང་པོའི་རྡོ་རྗེ་བཅིངས་ཏེ་ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་རང་གི་སྙིང་གར་དེའི་རྩེ་མོ་དབུས་མ་གཞག་པའམ་ཁར་བཞག་ནས་གཞིབ་ཅིང་བཏུང་བ་དཔལ་རྡོ་རྗེ་སེམས་དཔའ་ཟླ་བའི་མདོག་ཅན་གྱི་བདུད་རྩིའི་རྒྱུན་དུ་རྩེ་མོ་དབུས་མ་ལས་བྱུང་བས། རང་གི་ཁ་ཀུན་དུ་གང་ནས་ཡན་ལག་ཐམས་ཅད་དུ་ཁྱབ་པས། དེས་ལུས་ཐམས་ཅད་རྡོ་རྗེ་སེམས་དཔར་གྱུར་པར་
བསམ་པར་བྱ་སྟེ། དེ་ལྟ་བུས་ནི་ཚེ་ཆེན་པོ་མངོན་པར་འཕེལ་བར་འགྱུར་རོ། །དེ་བཞིན་དུ་དེ་རང་གི་མཚན་མར་བཞག་སྟེ། ཁར་འཇོག་ཅིང་བཏུང་བར་བྱས་ཏེ། དེ་ལྟ་བུས་ནི་རྡོ་རྗེ་སེམས་དཔའི་ལང་ཚོ་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ནས། རང་གི་ཁར་བཞག་ནས་བཏུང་བར་བྱ་སྟེ། དེ་ལྟ་བུས་ནི་གཟུགས་ཐམས་ཅད་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ནས། དབྲལ་བར་བཞག་ལ་དེའི་འོག་ཏུ་ཁར་བཞག་ནས་རྡོ་རྗེ་རྩེ་མོའི་དབུས་མའི་དེ་ཉིད་བཏུང་བར་བྱ་སྟེ། དེ་ལྟ་བུས་ནི་རྣལ་འབྱོར་པའི་གཟི་བྱིན་མངོན་པར་འཕེལ་བར་འགྱུར་རོ། །དཔལ་ཆེན་པོ་དང༌། སྐལ་བ་བཟང་པོ་དང༌། གྲགས་པ་དང༌། སྙན་པ་འཕེལ་བར་བྱ་བ་ལ་ནི་དཔལ་རྡོ་རྗེ་སེམས་དཔའི་ཆ་ལུགས་ཕུན་སུམ་ཚོགས་པ་གང་ཡིན་པ་དེ་ནི་དཔལ་ཆེན་པོའོ། །དེ་ཉིད་ཀྱིས་སེམས་ཅན་ཐམས་ཅད་ཀྱི་སེམས་བདེ་བ་དང༌། ཡིད་བདེ་བ་གྲུབ་པར་བྱ་བའི་ཕྱིར་དངོས་པོ་ཐམས་ཅད་ནི་བདག་ཉིད་ཅན་གང་ཡིན་པ་དེ་ནི་སྐལ་བ་བཟང་བའོ། །དེ་ཉིད་ཀྱིས་ནམ་མཁའི་ཁམས་ཐམས་ཅད་ན་རྟག་ཏུ་གནས་པའི་སྐུ་དང་གསུང་དང་ཐུགས་རྡོ་རྗེ་བཅོམ་ལྡན་འདས་རྡོ་རྗེ་འཛིན་པ་ཆེན་པོ་ཞེས་ཕྱོགས་བཅུར་སྒྲས་ཁྱབ་པ་གང་ཡིན་པ་དེ་ནི་གྲགས་པའོ། །དེ་ཉིད་ཀྱིས་དེ་བཞིན་གཤེགས་པ་ཐམས་ཅད་དང་མཉམ་པར་འཇུག་པས་རྡོ་རྗེ་དབྱིངས་ཐམས་ཅད་ཐུགས་སུ་ཆུད་པའི་སེམས་ཡེ་ཤེས་སེམས་དཔའོ་ཞེས་སྙན་པའི་སྒྲས་ཁྱབ་པ་གང་ཡིན་པ་དེ་ནི་སྙན་པའོ། །དཔལ་ཆེན་པོ་དང༌། གྲགས་པ་ལ་སོགས་པ་འདི་དག་འཕེལ་བ་ནི་དཔལ་རྡོ་རྗེ་སེམས་དཔའ་ནི་ཞེས་སྔ་མ་བཞིན་དུ་སྦྱར་རོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་གྲུབ་པས་སོ། །ཞེས་བྱ་བ་གསུངས་ཏེ། དང་པོའི་རྡོ་རྗེ་ནི་མཛུབ་མོ་དང་གུང་མོ་དང་སྲིན་ལག་དང༌། མཐེའུ་ཆུང་གི་རྡོ་རྗེ་ནི་དང་པོའི་རྡོ་རྗེ་གྲུབ་པ་སྟེ། དེ་ཉིད་ཀྱི་ལས་བཞི་པོ་འདི་དག་མངོན་པར་འཕེལ་བར་འགྱུར་རོ། །འདི་སྐད་སྟོན་ཏེ་སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ཏེ་
མཛུབ་མོ་གཉིས་གཤིབས་ལ་རྩེ་མོར་བྱས་ནས་བདག་ཉིད་དཔལ་རྡོ་རྗེ་སེམས་དཔའི་རྒྱལ་སྲིད་ཀྱི་དཔལ་དང་ལྡན་པའི་དཔལ་རྡོ་རྗེ་སེམས་དཔར་སྒོམ་ཞིང་ཨ་ནུ་རཱ་ག་ཡ་མི་ཧཱུཾ་ཞེས་བཟླ་བར་བྱ་སྟེ། དེ་ལྟ་བུས་ནི་དཔལ་རྡོ་རྗེ་སེམས་དཔའ་ཆེན་པོ་མངོན་པར་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་གུང་མོ་གཉིས་གཤིབས་པའི་རྩེ་མོར་ཕྱི་རོལ་དུ་བཞག་ལ། སྔར་བཤད་པའི་དོན་བསྒོམས་པས་དཔལ་རྡོ་རྗེ་སེམས་དཔའི་སྐལ་བ་བཟང་པོ་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་སྲིན་ལག་གཉིས་རྩེ་མོར་བྱས་པས་དཔལ་རྡོ་རྗེ་སེམས་དཔའི་གྲགས་པ་བསྒོམས་པས་གྲགས་པ་འཕེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོ་རྡོ་རྗེ་མཐེའུ་ཆུང་གཉིས་གཤིབས་ཏེ་རྩེ་མོར་སྦྱར་ལ་བསྒྲེང་སྟེ་བཞག་ནས། བདག་ཉིད་རྡོ་རྗེ་སེམས་དཔའི་སྙན་པ་དང་ལྡན་པར་བསམས་ན་དེ་ལྟ་བུས་ནི་སྙན་པ་འཕེལ་བར་འགྱུར་རོ། །སྟོབས་ཆེན་པོ་དང༌། ཡེ་ཤེས་དང་ཆོས་དང་ལས་བསྒྲུབ་པར་བྱ་བ་ལ་ནི་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་སྟོབས་ནི་སྟོབས་ཆེན་པོའོ། །དེ་རྣམས་ཉིད་ཀྱི་ངེས་པའི་ཡེ་ཤེས་དང༌། དེ་རྣམས་དེ་ཉིད་ཀྱི་ཡང་དག་པའི་རིག་པ་བསྙེན་པའི་ཆོས་དང༌། སངས་རྒྱས་ཀྱི་སྤྲུལ་པ་དང༌། སེམས་ཅན་གྱི་དོན་མཛད་པའི་ལས་ནི་དེ་རྣམས་ཀྱི་སྟོབས་པོ་ཆེ་དང༌། ཡེ་ཤེས་དང༌། ལས་དེ་གྲུབ་པ་ནི་རྫོགས་པའོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་སྙིང་པོ་སྟོབས་ཆེ་བའོ་ཞེས་བྱ་བ་གསུངས་ཏེ་རང་ཉིད་དང༌། སྙིང་ག་དང༌། ལྕེ་དང་མགོ་བོར་བསྟོད་པ་ནི་དང་པོའི་རྡོ་རྗེའི་སྙིང་སྟོབས་ཆེ་བས་སོ་ཞེས་བྱའོ། །འདིས་ནི་དོན་འདི་སྐད་སྟོན་པར་འགྱུར་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཧཱུཾ་གིས་དང་པོའི་རྡོ་རྗེ་བཅིངས་ལ། ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང༌། དེས་བདག་ཉིད་བསྟོད་པའི་ཚུལ་དུ་བྱས་ཏེ། དེ་ལྟ་བུས་ནི་དཔལ་རྡོ་རྗེ་སེམས་དཔའ་ལ་སོགས་པའི་སྟོབས་གྲུབ་པར་འགྱུར་རོ། །རང་གི་སྙིང་གར་རྡོ་རྗེ་རྩེ་ལྔ་པ་བསམས་ལ། རྡོ་རྗེ་སེམས་དཔའ་ལ་སོགས་པའི་ཡེ་
ཤེས་བསྐྱེད་པའི་བསམ་པས་དང་པོའི་རྡོ་རྗེ་རང་གི་སྙིང་གར་བསྟོད་ཅིང་བཟླས་བརྗོད་བྱས་ཏེ་དེ་ལྟ་བུས་ནི་དེ་གྲུབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། རང་གི་ལྕེ་ལ་རྡོ་རྗེ་བསམས་པས་ཡི་གེ་ཧཱུཾ་ཡིད་ཀྱིས་བྲིས་ལ་དང་པོའི་རྡོ་རྗེའི་རྩེ་བསྟོད་པའི་ཚུལ་གྱིས་བྱ་ཞིང་བཟླས་བརྗོད་བྱས་ཏེ་དེ་ལྟ་བུས་ནི་སོ་སོ་ཡང་དག་པའི་རིག་པ་བཞིའི་བདག་ཉིད་ཅན་གྱིས་ཆོས་གྲུབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། སངས་རྒྱས་ཀྱི་སྤྲུལ་པ་དང༌། སེམས་ཅན་གྱི་དོན་བྱ་བའི་བསམ་པས་རང་གི་རྡོ་རེ་མགོ་པོར་བསྟོད་པའི་ཚུལ་དུ་བྱེད་ཅིང་དེ་བཞིན་དུ་བྱས་ན་དེ་ལྟ་བུས་ནི་ལས་ཐམས་ཅད་འགྲུབ་པར་འགྱུར་རོ། །རྫུ་འཕྲུལ་དང༌། ཆོ་འཕྲུལ་དང༌། རྨད་དུ་བྱུང་བ་དང༌། རྣམ་པར་འཕྲུལ་པ་ཐམས་ཅད་སྟོན་པ་ལ་ནི་ཞེས་བྱ་བ་ནི་ཕྱོགས་བཅུའི་ནམ་མཁའ་ལ་འགྲོ་བ་ནི་རྫུ་འཕྲུལ་ཐམས་ཅད་དོ། །འབར་བའི་འབྱིན་པ་ལ་སོགས་པས་བསྟོད་པ་ནི་ཆོ་འཕྲུལ་ལོ། །སྔོན་ཆད་མ་མྱོང་བའི་བདེ་བ་དང༌། ཡིད་བདེ་བ་བསྐྱེད་པ་ནི་རྨད་དུ་བྱུང་བའོ། །རང་གི་ལུས་ལ་སོགས་པ་ལ་དེ་བཞིན་གཤེགས་པ་དང༌། དེའི་རིགས་དང༌། རྡོ་རྗེའི་རིགས་དང༌། པདྨའི་རིགས་དང༌། ནོར་བུའི་རིགས་སྤྲུལ་པ་ནི་རྣམ་པར་འཕྲུལ་བའོ། །རྫུ་འཕྲུལ་དང༌། ཆོ་འཕྲུལ་དང༌། རྨད་དུ་བྱུང་བ་དང༌། རྣམ་པར་འཕྲུལ་པ་དེ་དག་ཐམས་ཅད་སྟོན་པ་ལ་ནི་མིག་གི་རྣམ་པར་ཤེས་པ་ལ་སོགས་པ་ཉེ་པར་དམིགས་སུ་རུང་བར་བྱའོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་རྣམ་པར་འཕྲུལ་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་བཅིངས་ལ། ནམ་མཁར་བསྐྱེད་པ་དང༌། མཐེ་བོང་དང་སྲིན་ལག་འབར་བའི་ཚུལ་དུ་བྱ་བ་དང༌། སྙིང་དགའ་བ་དང༌། རང་གི་ལུས་ལ་བསྐོར་བའི་ཚུལ་དུ་བྱ་བ་འདི་ནི་དང་པོའི་རྡོ་རྗེའི་རྣམ་པར་འཕྲུལ་པ་ཞེས་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་ཨ་ཧཱུཾ་གིས་དང་པོའི་རྡོ་རྗེ་བཅིངས་ལ། ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་ནམ་མཁར་བཅོམ་ལྡན་འདས་རྡོ་རྗེ་སེམས་དཔའ་བསྐྱེད་པའི་ཚུལ་དུ་བྱས་ནས། དེ་ལྟ་བུས་ནི་ཕྱོགས་བཅུར་རྡོ་རྗེ་སེམས་དཔའི་སྐུས་བདག་
ཉིད་འགྲོ་བ་སྟོན་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། དང་པོའི་རྡོ་རྗེ་དེ་བཞིན་དུ་བཅིངས་ཏེ། དེའི་མཐེ་བོར་གཉིས་དང༌། སྲིན་ལག་གཉིས་འབར་བའི་ཚུལ་དུ་བྱས་ནས་དེ་ལྟ་བུས་ནི་ཆོ་འཕྲུལ་ཐམས་ཅད་སྟོན་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་བཅིངས་ཏེ་རང་གི་སྙིང་གར་དགའ་བ་བསྐྱེད་པའི་ཚུལ་དུ་བཞག་ན། དེ་ལྟ་བུས་ནི་རྨད་དུ་བྱུང་བ་སྟོན་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་བཅིངས་ཏེ། རིགས་ལྔ་བསྐྱེད་པའི་བསམ་པས་རང་གི་ལུས་ལ་བསྐོར་བར་བྱས་ཏེ། དེ་ལྟ་བུས་ནི་རྣམ་པར་འཕྲུལ་པ་ཐམས་ཅད་སྟོན་པར་འགྱུར་རོ། །ཐམས་ཅད་དུ་ཡི་གེ་དང༌། གཟུགས་ཀྱིས་བདེན་པ་ཐམས་ཅད་མཐོང་བ་དང༌། ཐོས་པ་དང་སྨྲ་བ་དང་འདྲི་བར་གྲུབ་པར་བྱ་བ་ལ་ནི་ཞེས་བྱ་བ་ནི་ནམ་མཁའ་དང༌། རས་རིས་དང༌། རྩིག་པ་དང༌། སྐུ་གཟུགས་ལ་སོགས་པ་ཐམས་ཅད་ལས་མངོན་པར་འདོད་པའི་དོན་སྟོན་པར་བྱེད་པའི་ཡི་གེ་ཨ་ལ་སོགས་པ་དང༌། རྡོ་རྗེ་སེམས་དཔའི་སྐུ་ལ་སོགས་པའི་གཟུགས་ཀྱིས་འདས་པ་དང༌། མ་འོངས་པ་དང༌། ད་ལྟར་བྱུང་བའི་དངོས་པོ་ཇི་ལྟ་བ་བཞིན་དུ་མིག་གི་རྣམ་པར་ཤེས་བས་མཐོང་བ་དང༌། རྣ་བའི་རྣམ་པར་ཤེས་པས་ཐོས་པ་དང༌། ལྕེས་སྨྲ་བ་དང་ལུས་ཀྱིས་འདྲི་བ་སྟེ། འདི་རྣམས་གྲུབ་པ་ནི་རྫོགས་པར་སྣང་བའོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་དོན་ཡོད་བའི་བདེན་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་བཅིངས་ལ་ཐམས་ཅད་དུ་བསྐོར་ཏེ་དབང་པོ་ཐམས་ཅད་ལ་གཞག་པ་ནི་དང་པོའི་རྡོ་རྗེ་དོན་ཡོད་པའི་བདེན་བའོ། །འདི་ནི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ། ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ཏེ། ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་ཐམས་ཅད་བསྐོར་བར་ཧཱུཾ་ལས་མིག་གཉིས་སུ་རྡོ་རྗེ་བསམས་ལ་མིག་དང་གཟུགས་ཐམས་ཅད་ལས་བདེན་པ་ཐམས་ཅད་མཐོང་བའི་བསམ་པས་མིག་ཏུ་གཞག་པར་བྱ་སྟེ། དེ་ལྟ་བུས་ནི་ཐམས་ཅད་བདེན་པ་ཐོབ་པར་འགྱུར་རོ། །ཧཱུཾ་གིས་རྣ་བ་གཉིས་སུ་རྡོ་རྗེ་གཉིས་བསམས་ལ། དེ་བཞིན་དུ་བསྐོར་ནས་རྣ་བ་གཉིས་སུ་གཞག་པར་བྱས་ཏེ། དེ་ལྟ་
བུས་ནི་ཐམས་ཅད་བདེན་པ་ཐོབ་པར་འགྱུར་རོ། །ལྕེ་ལ་ཧཱུཾ་ལས་རྡོ་རྗེ་དཀར་པོ་བསམས་ལ་ཧཱུཾ་ཡིད་ཀྱིས་བྲིས་ཏེ། དེ་ལྟ་བུས་ནི་ཐམས་ཅད་བདེན་པ་ཐོབ་པ་སྨྲ་བར་འགྱུར་རོ། །ཡི་གེ་ཧཱུཾ་ལས་ཐམས་ཅད་ལ་ཡིད་ཀྱིས་བྲིས་ལ་དེ་བཞིན་དུ་དང་པོའི་རྡོ་རྗེ་བཅིངས་ཏེ་ཀུན་དུ་བསྐོར་ལ་ལུས་ལ་བཞག་ན། དེ་ལྟ་བུས་ནི་ལུས་ཀྱིས་ཐམས་ཅད་དྲིས་པས་གྲུབ་པར་འགྱུར་རོ། །དབང་པོ་ཐམས་ཅད་ཀྱིས་བདེ་བ་ཐམས་ཅད་མཐོང་བ་དང་ཐོས་པ་དང་སྒྲ་བ་དང་ཟིལ་གྱིས་གནོན་པར་བྱ་བ་ལ་ཞེས་བྱ་བ་ནི་དབང་པོ་ཡང་ཡིན་ལ་ཐམས་ཅད་ཀྱང་ཡིན་པས་ན་དབང་པོ་ཐམས་ཅད་དེ། མིག་དང་རྣ་བ་དང་སྣ་དང་ལྕེ་དང་ལུས་ཀྱི་དབང་པོའོ། །དེ་རྣམས་ཀྱིས་བདེན་པ་ཐམས་ཅད་སྟོན་ཏེ། དེ་ལ་མིག་གི་དབང་པོས་ཐམས་ཅད་བདེན་པར་མཐོང་བ་དང༌། རྣ་བའི་དབང་པོས་ཐམས་ཅད་བདེན་པར་ཐོས་པ་དང༌། ལྕེའི་དབང་པོས་ཐམས་ཅད་བདེན་པར་སྨྲ་བ་དང། ལུས་ཀྱི་དབང་པོས་ཟིལ་གྱིས་གནོན་པའི་ལང་ཚོ་དང་ལྡན་པ་ཞེས་བྱ་བའི་དོན་ཏོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་དོན་ཡོད་པའི་བདེན་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་རྩེ་མོ་དབུས་མས་དབང་པོ་ཐམས་ཅད་ལ་རེག་པར་བྱ་བ་ནི་དང་པོའི་རྡོ་རྗེ་དོན་ཡོད་པའི་བདེན་པས་སོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ལ་ཧཱུཾ་ཉིད་ཀྱིས་མིག་གཉིས་སུ་རྡོ་རྗེ་བསམས་ལ་ཨ་ནུ་རཱ་ག་ཡ་མི་ཧཱུཾ་ཞེས་ཟློས་ཤིང་རྡོ་རྗེ་སེམས་དཔའ་དེས་ཐམས་ཅད་བདེན་པ་མཐོང་བའི་བསམ་བས་མིག་གཉིས་ལ་རེག་པར་བྱས་ན་ཐམས་ཅད་བདེན་པ་མཐོང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ། ཧཱུཾ་ལས་རྣ་བ་གཉིས་སུ་རྡོ་རྗེ་བསམས་ལ་རྡོ་རྗེ་དབུས་མ་རྣ་བ་གཉིས་སུ་རེག་པར་བྱས་ན། དེ་ལྟ་བུས་ནི་ཐམས་ཅད་ཐོས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ལྕེ་ལ་སྔ་མ་བཞིན་དུ་རྡོ་རྗེ་བསམས་ཏེ་ཡིད་ཀྱིས་ཧཱུཾ་བྲིས་ལ་རྡོ་རྗེ་དབུས་མ་དེས་ལྕེ་ལ་རིག་པར་བྱས་ཏེ། དེ་ལྟ་བུས་ནི་ལྕེ་ཐམས་ཅད་བདེན་པ་སྨྲ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་ལུས་ལ་ཧཱུཾ་ལས་རྡོ་རྗེར་
བསམས་ཏེ། རྡོ་རྗེ་དབུས་མ་དེས་རང་གི་ལུས་ལ་རེག་པར་བྱས་ལ་རྡོ་རྗེ་སེམས་དཔའི་ལང་ཚོ་དང་བདག་ཉིད་ལྡན་པར་བསམས་ན། དེ་ལྟ་བུས་ནི་རྡོ་རྗེ་སེམས་དཔའི་ལང་ཚོ་དང་ལྡན་པར་འགྱུར་རོ། །སྒྱུ་མ་ཐམས་ཅད་དང༌། བདེ་བའི་མཆོག་དང༌། ལུང་བསྒོ་བ་དང༌། ལན་ཐོབ་པར་གྱུར་པ་ལ་ནི་ཞེས་བྱ་བ་ནི་དངོས་པོ་ཐམས་ཅད་སྦྲུལ་བ་ནི་སྒྱུ་མ་ཐམས་ཅད་དོ། །འཇིག་རྟེན་དང་འཇིག་རྟེན་ལས་འདས་པའི་བདེ་བ་ཉམས་སུ་མྱོང་བ་ནི་བདེ་བའི་མཆོག་གོ །མ་འོངས་བའི་དོན་ལུང་སྟོན་པ་ནི་ལུང་བསྒོ་བའོ། །ཡན་ལག་ཏུ་མ་གྱུར་པར་རང་གི་ལྷ་དངོས་ལ་གཞན་དག་ཟློས་ཤིང་ཅེས་བསྟན་པའམ། དངོས་པོ་གང་བྱེད་འདོད་པ་དེ་ཡོངས་སུ་དོར་ལ་གཞན་དག་གྱིས་ཤིག་ཅེས་ལྷས་བསྟན་པ་གང་ཡིན་པ་དེ་ནི་ལན་ཐོས་པ་ཞེས་བྱའོ། །འདི་རྣམས་ཀྱི་གྲུབ་པ་ནི་སྔ་མ་བཞིན་ནོ། །དེ་གང་གིས་འགྱུར་ཞེ་ན། དང་པོའི་རྡོ་རྗེ་རྨད་དུ་བྱུང་བས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་རང་གི་ལས་བྱེད་པས་ན་དང་པོའི་རྡོ་རྗེ་རྨད་དུ་བྱུང་བའོ། །འདིས་ནི་དོན་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་ཧཱུཾ་ཟློས་ཤིང་དང་པོའི་རྡོ་རྗེ་བཅིངས་ལ། ཨ་ནུ་ར་ག་ཡཱ་མི་ཧཱུཾ་ཞེས་ཟློས་ཤིང་དང་པོའི་རྡོ་རྗེ་རྩེ་མོ་དབུས་མས་སྒྱུ་མ་བསྟན་པའི་ཚུལ་དུ་བྱས་ཏེ། དེ་ལྟ་བུས་ནི་སྒྱུ་མ་ཐམས་ཅད་སྟོན་པར་འགྱུར་རོ། །དེ་ཉིད་ཀྱིས་བདེ་བའི་མཆོག་ཐམས་ཅད་བསྟན་པའི་ཚུལ་དུ་བྱས་ནས་དེ་ལྟ་བུས་ནི་བདེ་བའི་མཆོག་ཐམས་ཅད་སྟོན་པར་འགྱུར་རོ། །དེ་ཉིད་ཀྱིས་ལུང་བསྒོ་བ་བསྟན་པའི་ཚུལ་དུ་བྱས་ན་ལུང་བསྒོ་བ་ཐམས་ཅད་བསྟན་པར་འགྱུར་རོ། །དེ་ཉིད་ཀྱིས་ལན་ཐམས་ཅད་བསྟན་པའི་ཚུལ་དུ་བྱས་ན་དེ་ལྟ་བུས་ནི་ལན་ཐམས་ཅད་ཐོབ་པ་སྟོན་པར་འགྱུར་རོ། །གཏེར་ཐམས་ཅད་འབྱུང་བ་དང༌། ནོར་འཕྲོག་པ་དང༌། རྒྱལ་སྲིད་ཐོབ་བ་དང༌། ས་ལ་ཉེ་བར་ལོངས་སྤྱོད་པ་ནི་ཞེས་བྱ་བ་ནི་གཏེར་ཐམས་ཅད་ནི་གོ་བར་ཟད་དོ། །ནོར་ནི་འཇིག་རྟེན་དང་འཇིག་རྟེན་ལས་འདས་པའོ། །དེ་རྣམས་འཕྲོག་པ་ནི་དགུག་པའོ། །རྒྱལ་སྲིད་ནི་འཇིག་རྟེན་དང་འཇིག་རྟེན་ལས་འདས་པའོ། །ས་ལ་ཉེ་བར་ལོངས་སྤྱོད་པ་ནི་ཁམས་གསུམ་
གྱི་རྒྱལ་པོར་དབང་བསྐུར་བ་ཐོབ་པས་སྐྱེ་བོ་ཐམས་ཅད་བསྒོ་བ་ཉན་ཅིང་རང་དབང་དུ་བྱེད་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོས་རྡོ་རྗེས་དབང་བསྐུར་བས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་དབུས་མ་དབང་བསྐུར་བའི་གནས་སུ་བཞག་ལ། དེ་བཞིན་དུ་འདིའི་དངོས་གྲུབ་བྱེད་པ་ནི་འདིའི་མཚན་ཉིད་ཡིན་ནོ། །འདི་སྐད་སྟོན་པ་ཡིན་ཏེ། ཧཱུཾ་གིས་དང་པོའི་རྡོ་རྗེ་བཅིངས་ལ་དེའི་རྡོ་རྗེ་དབུས་མ་མཛོད་སྤུའི་གནས་སུ་བཞག་སྟེ། སྔར་བཤད་པའི་གཏེར་དབྱུང་བའི་སྦྱོར་བས་ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང༌། དེ་གཏེར་དབྱུང་བའི་ཚུལ་དུ་བྱས་ཏེ། དེ་ལྟ་བུས་ནི་གཏེར་ཐམས་ཅད་འབྱིན་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དེ་ཉིད་དབྲལ་བའི་ཕྱོགས་སུ་གཞག་སྟེ། དེས་ནོར་འགུགས་པའི་ཚུལ་དུ་བྱས་ལ་དེ་ལྟ་བུས་ནི་ནོར་ཐམས་ཅད་འཕྲོག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དབྲལ་བའི་ཕྱོགས་སུ་དབུས་མའི་རྡོ་རྗེ་བཞག་ལ། ཁམས་ཀྱི་རྒྱལ་པོའི་དབང་བསྐུར་བས་བདག་ཉིད་དབང་བསྐུར་བར་བསམ་པར་བྱ་ཞིང་དེས་དབང་བསྐུར་བ་སྦྱིན་པའི་ཚུལ་དུ་བྱས་ནས་དེ་ལྟ་བུས་ནི་རྒྱལ་སྲིད་ཐམས་ཅད་ཐོབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དེའི་དབུས་མའི་རྡོ་རྗེ་དབང་བསྐུར་བའི་གནས་སུ་བཞག་ལ། སྐྱེ་བོའི་ཚོགས་ཐམས་ཅད་རང་དབང་དུ་བྱས་པའི་ཚུལ་གྱིས་བཞག་ན་དེ་ལྟ་བུས་ནི་སའི་བདག་པོ་ཉིད་དུ་འགྱུར་རོ། །ཡུལ་ཐམས་ཅད་དང་སྐྱེ་བོ་དང་གྲོང་དང་ནགས་དང༌། ཆུའི་ཉེ་བར་ལོངས་སྤྱོད་པ་སྦྲུལ་བ་ལ་ནི་ཞེས་བྱ་བ་ཡུལ་ཐམས་ཅད་ནི་གོ་བར་ཟད་དོ། །སྐྱེ་བོ་ནི་མངོན་པར་འདོད་པའི་སྐྱེ་བོའོ། །གྲོང་ལ་སོགས་པ་ཡང་གོ་བར་ཟད་དོ། །དེ་རྣམས་ཉེ་བར་ལོངས་སྤྱོད་པ་ནི་ཀུན་དུ་ལོངས་སྤྱོད་པའོ། །དེ་རྣམ་པར་སྦྲུལ་པ་ནི་གོ་བར་ཟད་དོ། །དེ་ཇི་ལྟར་འབྱུང་བར་འགྱུར་ཞེ་ན། དང་པོའི་རྡོ་རྗེ་བསྒྲུབ་པས་སོ། །ཞེས་བྱ་བ་གསུངས་ཏེ། དང་པོའི་རྡོ་རྗེ་ནི་དབུས་མ་ས་ལ་བཞག་པ་དེ་དག་གི་ཚུལ་དུ་བྱ་བ་འདི་ནི་དང་པོའི་རྡོ་རྗེ་གྲུབ་པའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཡི་གེ་ཧཱུཾ་ཟློས་ཤིང་དང་པོའི་རྡོ་རྗེ་བཅིངས་ལ།
དེའི་དབུས་མའི་རྡོ་རྗེ་ས་ལ་བཞག་ལ། དེས་ཡུལ་ཐམས་ཅད་སྦྲུལ་བའི་ཚུལ་དུ་བྱ་ཞིང་ཨ་ནུ་རཱ་ག་ཡཱ་མི་ཧཱུཾ་ཞེས་བཟླས་བརྗོད་བྱས་ནས་ཡུལ་ཐམས་ཅད་སྦྲུལ་ནས་ཉེ་བར་ལོངས་སྤྱོད་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེ་དབུས་མ་ས་ལ་བཞག་སྟེ། དེས་མངོན་པར་འདོད་པའི་སྐྱེ་བོ་སྦྲུལ་པའི་ཚུལ་དུ་བྱས་ལ། དེ་བཞིན་དུ་བཟླས་ན་དེ་ལྟ་བུས་ནི་སྐྱེ་བོ་ཐམས་ཅད་སྦྲུལ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དང་པོའི་རྡོ་རྗེའི་རྡོ་རྗེ་དབུས་མ་ས་ལ་གཞག་སྟེ། དེས་མངོན་པར་འདོད་པའི་གྲོང་སྦྲུལ་པར་བྱས་ཏེ། དེ་ལྟ་བུས་ནི་གྲོང་སྦྲུལ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། དང་པོའི་རྡོ་རྗེའི་རྡོ་རྗེ་དབུས་མ་ས་ལ་གཞག་སྟེ། འདིས་ནགས་དང་ཆུ་བོ་སྦྲུལ་པའི་ཚུལ་དུ་བྱ་ཞིང༌། དེ་བཞིན་དུ་བཟླས་བརྗོད་བྱས་ན་ནགས་དང་ཆུ་བོ་ལ་སོགས་པ་སྤྲུལ་པར་འགྱུར་རོ། །ཐམས་ཅད་ལ་སྔོན་མ་བྱུང་བའི་ཡུལ་ལྷའི་ཡུལ་དང༌། རིན་པོ་ཆེ་དང༌། གཡོག་འཁོར་ཤིན་ཏུ་བཟང་པོ་ལ་སོགས་པ་སྦྲུལ་ཏེ་ཉེ་བར་སྤྱོད་པ་ལ་ནི་ཐམས་ཅད་ལས་ཞེས་བྱ་བ་ནི་ལས་ལ་སོགས་པའི་དངོས་པོ་ཐ་ན་ལས་སྔོན་མ་བྱུང་བའི་ལྷའི་ཡུལ་དང༌། ལྷའི་རིན་པོ་ཆེ་དང༌། ལྷའི་བདེ་བ་དང༌། ཡིད་བདེ་བ་སྐྱེད་པར་བྱེད་པའི་རིག་འཛིན་ལྟ་བུའི་བསྙེན་བཀུར་བ་མཐའ་ཡས་པ་དག་སྤྲུལ་ནས། དེ་རྣམས་ལ་ཉེ་བར་ལོངས་སྤྱོད་ཅིང་ཀུན་དུ་ཡོངས་སྤྱོད་པར་འགྱུར་བ་དེ་ཕྱག་རྒྱ་གང་གིས་འགྱུར་ཞེ་ན། དང་པོའི་རྡོ་རྗེ་སྤྲུལ་པས་སོ། །ཞེས་བྱ་བ་གསུངས་ཏེ། དང་པོའི་རྡོ་རྗེའི་རྡོ་རྗེ་དབུས་མ་ཐམས་ཅད་དུ་བསྐོར་ལ་ཡིད་ཀྱིས་དེ་དག་སྤྲུལ་པར་བྱས་ཏེ། འདི་ནི་དང་པོའི་རྡོ་རྗེ་སྤྲུལ་པའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། དེ་བཞིན་དུ་དང་པོའི་རྡོ་རྗེ་བཅིངས་པ་སྟེ། སྔགས་ཟློས་ཤིང་དང་པོའི་རྡོ་རྗེའི་རྡོ་རྗེ་དབུས་མ་སྔོན་མ་བྱུང་བའི་ལྷའི་ཡུལ་སྤྲུལ་པའི་བསམ་པས་ཐམས་ཅད་བསྐོར་བར་བྱས་ཏེ་དེ་ལྟ་བུས་ནི་ལྷའི་ཡུལ་སྤྲུལ་པར་འགྱུར་རོ། །རིན་པོ་ཆེ་མངོན་པར་སྤྲུལ་པའི་བསམ་པས་ནི་ལྷའི་རིན་པོ་ཆེ་སྤྲུལ་པར་འགྱུར་རོ། །ལྷའི་དཀྱིལ་འཁོར་གྱི་དབང་བསྐུར་བ་བཟང་པོ་མངོན་པར་སྤྲུལ་པའི་བསམ་
བས་ནི་གཡོག་འཁོར་ཤིན་ཏུ་བཟང་པོ་སྤྲུལ་པར་འགྱུར་རོ། །ལྷའི་ཡུལ་ལ་སོགས་པ་ཇི་ལྟར་སྤྲུལ་པ་ཡོངས་སུ་ལོངས་སྤྱོད་པའི་བསམ་པས་ཐམས་ཅད་དུ་བསྐོར་ན་ལྷའི་ལོངས་སྤྱོད་ལ་སོགས་པ་ཐམས་ཅད་འབྱུང་བར་འགྱུར་རོ། །སྐད་ཅིག་གཅིག་གིས་ས་གཞི་ཐམས་ཅད་ལས་འབྲུ་ལ་སོགས་པ་སྨིན་པར་བསྐྱེད་པ་དང༌། ཆུའི་ཕུང་པོ་ཆེན་པོ་དབྱུང་བ་དང༌། སྣང་བ་ཆེན་པོ་བསྐྱེད་པ་དང༌། རླུང་ཐམས་ཅད་དབང་དུ་བྱ་བ་ལ་ནི་ཞེས་བྱ་བ་ནི་གོ་སླའོ། །དེ་ཇི་ལྟར་འབྱུང་བར་འགྱུར་ཞེ་ན། དང་པོའི་རྡོ་རྗེ་དབྱིངས་ཀྱི་དབང་ཕྱུག་གིས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་རྩེ་མོ་དབུས་མ་ལ་ཁྲོ་བོ་འབར་བའི་ལྟ་བ་གཡོ་བས་མིག་མི་འཛུམས་པར་བལྟ་ཞིང་ལས་འདི་དག་སྒྲུབ་པར་བྱེད་པས་ན། འདི་ནི་དང་པོའི་རྡོ་རྗེ་དབང་ཕྱུག་གོ །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེའི་རྡོ་རྗེ་དབུས་མས་ཇི་ལྟར་མངོན་པར་འདོད་པའི་འབྲུལ་སོགས་པ་ས་གཞི་ལས་བསྐྱེད་པའི་ཚུལ་དུ་བྱ་ཞིང་མིག་མི་འཛུམས་པར་བལྟས་ན་དེ་ལྟ་བུས་ནི་སྦྲུལ་པར་འགྱུར་རོ། །དེ་ཉིད་ཀྱིས་ཆུ་མེད་པའི་ཕྱོགས་སུ་ཆུའི་ཕུང་པོ་བསྐྱེད་པའི་ཚུལ་དུ་བྱ་ཞིང་མིག་མི་འཛུམས་པར་བལྟས་ལ་བཟླས་བརྗོད་བྱས་ཏེ། དེ་ལྟ་བུས་ནི་ཆུའི་ཕུང་པོ་ཆེན་པོ་འབྱུང་བར་འགྱུར་རོ། །དེ་ཉིད་ཀྱིས་མུན་པར་སྣང་བ་ཆེན་པོ་བསྐྱེད་པའི་ཚུལ་དུ་བྱ་ཞིང་འབར་བའི་ལྟ་བས་བལྟ་བཞིན་དུ་བཟླས་བརྗོད་བྱས་ཏེ། དེ་ལྟ་བུས་ནི་མུན་པར་སྣང་བ་ཆེན་པོ་འབྱུང་བར་འགྱུར་རོ། །གཡོ་བའི་ལྟ་བས་བལྟ་ཞིང་འདི་ཉིད་ཀྱིས་ལྷ་ལ་སོགས་པའི་སེམས་ཅན་ཐམས་ཅད་རང་དབང་དུ་བྱ་བའི་ཚུལ་དུ་བྱས་ཏེ་དེ་ལྟ་བུས་ནི་དབང་དུ་འགྱུར་རོ། །རྒྱུ་བ་དང་མི་རྒྱུ་བའི་དངོས་པོ་ཐམས་ཅད་བཟའ་བ་དང་བཏུང་བ་དང་ཞེས་བྱ་བ་ནི་གོ་བར་ཟད་དོ། །རྩེར་གཞུག་པ་ནི་དགའ་ཞིང་རོལ་པའོ། །ལས་ཐམས་ཅད་ལ་སྦྱོར་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་དོན་ཡོད་པའི། །ཐམས་ཅད་དབང་དུ་བྱེད་པས་སོ། །ཞེས་བྱ་བ་ནི་དང་པོའི་རྡོ་རྗེ་བཅིངས་ལ་དེའི་རྡོ་རྗེ་དབུས་མ་ལས་གྲུབ་པའི་ཚུལ་དུ་བྱས་ལ་ལྡང་བ་དང༌། བཏུང་བ་དང་ལུས་བསྐྱོད་པའི་ཚུལ་དང༌། མགོ་
བོས་བཀའ་བསྒོ་བའི་ཚུལ་དུ་བྱས་པ་འདི་ནི་དང་པོའི་རྡོ་རྗེ་དོན་ཡོད་པའི་ཐམས་ཅད་དབང་དུ་བྱས་པ་ཡིན་ནོ། །འདི་སྐད་སྟོན་ཏེ། དཔལ་རྡོ་རྗེ་སེམས་དཔའི་སྦྱོར་བ་བྱས་ལ་དེ་བཞིན་དུ་དང་པོའི་རྡོ་རྗེ་བཅིངས་ནས་དེའི་དབུས་མའི་རྡོ་རྗེས་སྲིན་པོ་ལ་སོགས་པ་ཟ་བལྟར་བྱེད་ཅིང་བཟླས་བརྗོད་བྱས་ཏེ་དེ་ལྟ་བུས་ནི་ཐམས་ཅད་ཟོས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་དབུས་མའི་རྡོ་རྗེས་རྒྱ་མཚོ་ཆེན་པོ་བཏུང་བའི་ཚུལ་དུ་བྱ་ཞིང་བཟླས་བརྗོད་བྱས་ནས་དེ་ལྟ་བུས་ནི་ཐམས་ཅད་འཐུང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་དབུས་མ་དེས་གནོད་སྦྱིན་མོ་ལ་སོགས་པ་དང་རྩེད་མོའི་ཚུལ་དུ་བྱས་ལ། ཡང་དག་པའི་སྦྱོར་བས་བསྒོམས་ནས་དེ་ལྟ་བུས་ནི་ཐམས་ཅད་རྩེ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ། དང་པོའི་རྡོ་རྗེ་དབུས་མས་ལྷ་ལ་སོགས་པའི་སེམས་ཅན་ཐམས་ཅད་དང༌། མི་རྒྱུ་བའི་དངོས་པོ་ཐམས་ཅད་ལ་ངེས་པར་སྦྱོར་བའི་ཚུལ་དུ་བྱེད་ཅིང་རང་གི་མགོ་བོས་ལུང་བསྒོ་བའི་ཚུལ་དུ་བྱེད་ཅིང་བཟླས་བརྗོད་བྱས་ཏེ། དེ་ལྟ་བུས་ནི་ལས་ཐམས་ཅད་ལ་ངེས་པར་སྦྱོར་བར་འགྱུར་རོ། །དངོས་པོ་ཐམས་ཅད་ལ་དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། རྡོ་རྗེ་འཛིན་པ་དང༌། རྡོ་རྗེ་ལ་སོགས་པ་ཐམས་ཅད་མཐོང་བ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་བསྙེམས་པས་སོ། །ཞེས་བྱ་བ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། གཡས་པ་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་བླངས་ལ། དེ་བཞིན་གཤེགས་པ་ལ་སོགས་པ་རྗེས་སུ་དྲན་པ་བསྒོམ་ཞིང་ཐམས་ཅད་དུ་བསྐོར་བ་འདི་ནི་དང་པོའི་རྡོ་རྗེ་བསྙེམས་པ་ཐམས་ཅད་དོ། །དེ་ཡང་ཐམས་ཅད་རྗེས་སུ་དྲན་ཞིང་ཐམས་ཅད་དུ་བསྐོར་བར་བྱའོ་ཞེས་བཤད་པ་ཡིན་ནོ། །འདིས་ནི་དོན་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ཏེ། གཡས་པའི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་བླངས་ཏེ། དེ་བཞིན་གཤེགས་པ་ཐམས་ཅད་རྗེས་སུ་དྲན་ཞིང་ཐམས་ཅད་དུ་བསྐོར་བར་བྱ་སྟེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་མཐོང་བར་
འགྱུར་རོ། །བྱམས་པ་ལ་སོགས་པ་བྱང་ཆུབ་སེམས་དཔའ་ཐམས་ཅད་རྗེས་སུ་དྲན་པས་ནི་བྱང་ཆུབ་སེམས་དཔའ་ཐམས་ཅད་མཐོང་ངོ༌། །རྡོ་རྗེ་སེམས་དཔའ་ལ་སོགས་པ་རྡོ་རྗེ་འཛིན་པ་ཐམས་ཅད་རྗེས་སུ་དྲན་པས་ནི་རྡོ་རྗེ་སེམས་དཔའ་ལ་སོགས་པའི་རྡོ་རྗེ་འཛིན་པ་ཐམས་ཅད་མཐོང་ངོ༌། །དང་པོའི་རྡོ་རྗེ་ལ་སོགས་པ་མཚན་མ་ཐམས་ཅད་རྗེས་སུ་དྲན་པས་ནི་དང་པོའི་རྡོ་རྗེ་ལ་སོགས་པ་རྡོ་རྗེ་ཐམས་ཅད་མཐོང་བར་འགྱུར་རོ། །རང་ཞེས་བྱ་བའི་བདག་ཉིད་དོ། །དེ་གང་གིས་ཤེ་ན། བདག་ཉིད་ཀྱིས་ཞེས་བྱ་བ་སྨོས་ཏེ། སྒྲུབ་པ་པོའིའོ། །དེ་ཅི་ཞིག་ཅེ་ན། རྡོ་རྗེ་སེམས་དཔའ་ལ་སོགས་པའི་གཟུགས་ཐམས་ཅད་སྟོན་པ་དང༌། མི་སྣང་བ་དང༌། ནམ་མཁའ་ལ་འགྲོ་བའོ། །དེ་གྲུབ་པ་ནི་རྫོགས་པའོ། །ཤིན་ཏུ་ཕྲ་བ་དང༌། སྦོམ་པ་དང༌། དུ་མར་སྟོན་པ་ཞེས་བྱ་བ་ལ་རབ་ཏུ་ཕྲ་བ་ནི་ཤིན་ཏུ་ཕྲ་བ་སྟེ། རྡུལ་ཕྲ་རབ་ལ་སོགས་པའི་ཚུལ་ལོ། །ཤིན་ཏུ་ཕྲ་བ་དེ་རི་རབ་ལ་སོགས་པའི་ཚུལ་དུ་བྱིན་གྱིས་རློབ་པ་ནི་བརྩོན་པའོ། །ནམ་མཁའ་ཐམས་ཅད་ཁྱབ་པའི་གཟུགས་སྣ་ཚོགས་སྟོན་པའི་བྱིན་གྱིས་བརླབས་པ་ནི་དུ་མ་སྟེ། འདི་ཐམས་ཅད་ཀྱིས་ཉེ་བར་སྟོན་པ་དམིགས་པར་འགྱུར་བ་ནི་སྟོན་པའོ། །འདི་དག་ནི་ཇི་ལྟར་འགྱུར་ཞེ་ན། དང་པོའི་རྡོ་རྗེའི་གཟུགས་སྣ་ཚོགས་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་བཅིངས་ལ་མཐེའུ་ཆུང་དང༌། མཐེ་བོང་དང༌། གུང་མོའི་རྡོ་རྗེ་བཞི་སྙིང་གར་གཞག་པར་བྱས་ཏེ། འདི་ནི་དང་པོའི་རྡོ་རྗེ་སྣ་ཚོགས་གཟུགས་ཅན་ཡིན་ནོ། །འདིས་ནི་དོན་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་དང་པོའི་རྡོ་རྗེ་བཅིངས་ཏེ། མཐེའུ་ཆུང་གཉིས་གཤིབས་པའི་རྩེ་མོ་གུང་མོ་གཉིས་གཤིབས་པའི་རྩེ་མོ་དང་སྦྱར་ལ་སྙིང་གར་བཞག་སྟེ། བདག་ཉིད་ཀྱི་ལུས་ལས་དཔལ་རྡོ་རྗེ་སེམས་དཔའ་ལ་སོགས་པའི་སྤྲུལ་པ་བསྒྲུབ་པའི་བསམ་བས་དེ་བཞིན་དུ་བཟླས་བརྗོད་བྱས་ཏེ། དེ་ལྟ་བུས་དེ་གྲུབ་པར་འགྱུར་རོ། །མི་སྣང་བའི་བསམ་བས་བཟླས་ན་མི་སྣང་བ་གྲུབ་པར་འགྱུར་རོ། །ནམ་མཁའ་ལ་འགྲོ་བ་བསྒོམ་པས་ནི་ནམ་མཁའ་ལ་འགྲོ་བར་གྲུབ་བོ། །ཤིན་ཏུ་ཕྲ་བ་དང་སྦོམ་པོ་དང༌། དུ་མར་སྟོན་པ་བསྒོམ་པས་ནི་ཤིན་ཏུ་ཕྲ་བ་དང༌། སྦོམ་པ་དང་དུ་མར་སྟོན་
པར་འགྱུར་རོ། །ཁམས་གསུམ་གྱི་བདག་པོ་ཐམས་ཅད་དབབ་པ་དང༌། བཅིང་པ་དང༌། དབང་དུ་བྱ་བ་དང༌། ལས་ཐམས་ཅད་ལ་ངེས་པར་སྦྱར་བ་ནི་གོ་བར་ཟད་དོ། །འདི་དག་ཐམས་ཅད་ནི་ཇི་ལྟར་འགྱུར་ཞེ་ན། དང་པོའི་རྡོ་རྗེ་ཧཱུཾ་མཛད་ཀྱིས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་བཅིངས་ལ་མཛུབ་མོ་གཉིས་ཧཱུཾ་མཛད་དང་བཅས་པ་ལྟ་བུར་བྱས་ཏེ། འདི་ནི་དང་པོའི་རྡོ་རྗེ་ཧཱུཾ་མཛད་དོ། །འདིས་ནི་འདི་སྐད་སྟོན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་དང་པོའི་རྡོ་རྗེ་བཅིངས་ཏེ། མཛུབ་མོ་གཉིས་སོ་སོར་བསྒྲེང་བ་གྱེན་དུ་བཏེག་སྟེ། ཁམས་གསུམ་པའི་བདག་པོ་ཐམས་ཅད་དབབ་པའི་བསམ་བས་འོག་ཏུ་བསྒྱེལ་ལ། ཨ་ནུ་རཱ་ག་ཡཱ་མི་ཧཱུཾ་ཧཱུཾ་ཞེས་བཟླས་ན་དེ་འགྲུབ་པར་འགྱུར་རོ། །དེ་བཞིན་དུ་ཟློས་ཤིང་མཛུབ་མོ་གཉིས་པོ་དེས་ཁམས་གསུམ་གྱི་བདག་པོ་ཐམས་ཅད་དབང་དུ་བྱས་པའི་བསམ་པས་སྡིགས་མཛུབ་བྱས་ནས། དེ་ལྟ་བུས་ནི་དེ་འགྲུབ་པར་འགྱུར་རོ། །མཛུབ་མོ་གཉིས་པོ་དེ་ཉིད་ཀྱིས་ཁམས་གསུམ་གྱི་བདག་པོ་ཐམས་ཅད་བཅིང་བའི་བསམ་བས་ནི་དེ་རྣམས་རྡོ་རྗེ་ལྕགས་སྒྲོག་གིས་བཅིང་བར་འགྱུར་རོ། །མཛུབ་མོ་གཉིས་པོ་དེ་ཉིད་ཀྱིས་ཁམས་གསུམ་གྱི་བདག་པོ་ཐམས་ཅད་ལ་ངེས་པར་སྦྱོར་བའི་བསམ་བས་དེ་ལ་སྡིགས་མཛུབ་བྱས་ནས། དེ་ལྟ་བུས་ནི་དེ་མངོན་པར་འདོད་པའི་ལས་ཐམས་ཅད་བྱེད་པར་འགྱུར་རོ། །ལྷ་ཐམས་ཅད་དབབ་པ་དང༌། བཅིང་བ་དང༌། དབང་དུ་བྱ་བ་དང༌། ལས་ཐམས་ཅད་ལ་ངེས་པར་སྦྱོར་བ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཇི་ལྟར་འགྱུར་ཞེ་ན། དང་པོའི་རྡོ་རྗེའི་ལྷའི་བདག་པོས་ཞེས་བྱ་བ་སྨོས་ཏེ་དང་པོའི་རྡོ་རྗེ་དབུས་མའི་རྡོ་རྗེ་དབྲལ་བའི་ཐད་ཀར་མིག་ལྟ་བུའི་ཚུལ་དུ་བྱས་པ་ནི་དང་པོ་ལྷའི་བདག་པོའི་ཕྱག་རྒྱའི་བདག་པོའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའ་སྦྱོར་བ་བྱས་ལ། དེ་བཞིན་དུ་དང་པོའི་རྡོ་རྗེ་བཅིངས་ཏེ། ལྷ་ཐམས་ཅད་དབབ་པའི་བསམ་བས། དབུས་མའི་རྡོ་རྗེས་དབྲལ་བར་ཕྲེད་དུ་མིག་གི་ཚུལ་དུ་བྱས་ན་འདིར་འགྱུར་རོ། །དེ་བཞིན་དུ་ལྷ་ཐམས་ཅད་བཅིང་བའི་བསམ་བས་མིག་གི་ཚུལ་དུ་བྱས་ན་ད་ལྟ་བུས་ནི་རྡོ་རྗེ་ལྕགས་སྒྲོག་གིས་བཅིང་བར་འགྱུར་
རོ། །དེ་བཞིན་དུ་ལྷ་ཐམས་ཅད་དབང་དུ་བྱ་བའི་བསམ་པས་མིག་གི་ཚུལ་དུ་བྱས་ལ་བཟླས་བརྗོད་བྱས་ནས་དེ་ལྟ་བུས་ནི་དབང་དུ་འགྱུར་རོ། །དེ་བཞིན་དུ་ལྷ་ཐམས་ཅད་ལས་ཐམས་ཅད་ལ་ངེས་པར་སྦྱོར་བའི་བསམ་པས་མིག་གི་ཚུལ་དུ་བྱས་ལ་བཟླས་བརྗོད་བྱས་ན་ལྷ་ཐམས་ཅད་ལས་ཐམས་ཅད་ལ་སྦྱར་བར་འགྱུར་རོ། །ཀླུ་ཐམས་ཅད་གནོད་པ་དང༌། འདུལ་བ་དང་དབང་དུ་བྱ་བ་དང༌། ལས་ཐམས་ཅད་ལ་ངེས་པར་སྦྱར་བར་བྱ་བ་དང་སྐྲག་པར་བྱ་བ་ལ་ནི་ཞེས་བྱ་བ་ནི་གོ་བར་ཟད་དོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་འབར་བའི་རྡོ་རྗེས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་རང་གི་སྙིང་གར་བཅིངས་ལ་བསྐྱོད་ཅིང་འཛུམ་པའི་ལྟ་བས་འོག་ཏུ་བལྟ་ཞིང་ཧ་ཧཱུཾ་ཧོ་དྷྲྀ་ཞེས་བྱ་བ་ཟློས་པ་འདི་དང་པོའི་རྡོ་རྗེ་འབར་བའི་རྡོ་རྗེའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དེ་བཞིན་དུ་དང་པོའི་རྡོ་རྗེ་རང་གི་སྙིང་གར་བཅིངས་ཏེ། བསྐྱོད་ཅིང་འཛུམ་པའི་ལྟ་བས་འོག་ཏུ་བལྟ་ཞིང་ཨ་ནུ་རཱ་ག་ཡཱ་མི་ཧཱུཾ་ཧ་ཞེས་ཟློས་ཤིང་འོད་ཟེར་འབར་བས་ཀུན་འཁྲུགས་པའི་རྡོ་རྗེ་ལྕགས་ཀྱུའི་ཁྲོ་བོས་ཀླུ་རྣམས་ཀུན་དུ་དྲངས་བར་བསམ་བར་བྱས་ཏེ། དེ་ལྟ་བུས་ནི་ཀླུ་ཐམས་ཅད་དབང་དུ་འགྱུར་རོ། །ཨ་ནུ་རཱ་ག་ཡཱ་མི་ཧཱུཾ་ཞེས་བྱ་བ་ཟློས་ཤིང་ཀླུ་ལ་བལྟ་བར་བྱས་ཏེ། དེ་ལྟ་བུས་ནི་དགུག་པར་འགྱུར་བའི་ཀླུ་ཐམས་ཅད་འདུལ་བར་འགྱུར་རོ། །ཨ་ནུ་རཱ་ག་ཡཱ་མི་ཧཱུཾ་ཧོ་ཞེས་བྱ་བས་དགུག་པའི་ལྟ་བས་བཀུག་པར་བལྟ་ཞིང་བཟླས་པར་བྱས་ཏེ། དེ་ལྟ་བུས་ནི་ཀླུ་ཐམས་ཅད་དབང་དུ་འགྱུར་རོ། །དེ་བཞིན་དུ་བཀུག་པའི་ཀླུ་ལ་བལྟ་ཞིང་ལས་ཐམས་ཅད་ལ་ངེས་པར་སྦྱར་བའི་བསམ་བས་ཨ་ནུ་རཱ་ག་ཡཱ་མི་ཧཱུཾ་དྷྲྀ་ཞེས་བྱ་བ་བཟླས་པར་བྱས་ཏེ། དེ་ལྟ་བུས་ནི་ཀླུ་ཐམས་ཅད་ལས་ཐམས་ཅད་ལ་སྦྱོར་བར་འགྱུར་རོ། །གནོད་སྦྱིན་ལ་སོགས་པ་ཐམས་ཅད་དགུག་པ་དང་དབང་དུ་བྱ་བ་དང༌། ལས་ཐམས་ཅད་ལ་ངེས་པར་སྦྱར་བ་དང༌། སྐྲག་པར་བྱ་བ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་གནོད་འདུལ་བས་སོ་ཞེས་བྱ་བ་གསུངས་ཏེ། ས་ལ་གནོད་སྦྱིན་ལ་སོགས་པའི་གཟུགས་བྲིས་ལ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་
ནས་དང་པོའི་རྡོ་རྗེ་སྔ་མ་བཞིན་དུ་བཅིངས་ལ་གནོད་སྦྱིན་ལ་སོགས་པ་དེའི་གདོང་ལ་དབུས་མའི་རྡོ་རྗེ་བཞག་སྟེ། དེའི་བར་བའི་ལྕགས་ཀྱུས་གནོད་སྦྱིན་ལ་སོགས་པ་དགུག་པར་བྱ་ཞིང་དེ་བཞིན་དུ་དེ་རྣམས་ལ་སྔར་བཤད་པའི་གཡོ་ཞིང་འབར་བའི་ལྟ་བས་བལྟས་ན་འགུགས་པར་འགྱུར་རོ། །དབང་དུ་བྱ་བའི་བསམ་བས་བཞག་ལ་བཟླས་ན་དེ་ལྟ་བུས་ནི་དབང་དུ་འགྱུར་རོ། །བཅིང་བའི་བསམ་པས་ནི་རྡོ་རྗེ་ལྕགས་སྒྲོག་གི་བཅིང་བར་འགྱུར་རོ། །ལས་ཐམས་ཅད་ལ་ངེས་པར་སྦྱོར་བའི་བསམ་པས་བཟླས་ན་དེ་ལྟ་བུས་ནི་གནོད་སྦྱིན་ལ་སོགས་པ་ཐམས་ཅད་ལས་ཐམས་ཅད་ལ་ངེས་པར་སྦྱར་བར་འགྱུར་རོ། །དཀྱིལ་འཁོར་ཐམས་ཅད་བརྟག་པ་དང༌། འཇུག་པ་དང༌། མཆོད་པ་དང༌། སྒྲུབ་པ་ལ་ནི་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་བརྟག་བ་ནི་རས་དང༌། རྩིག་པ་དང༌། ནམ་མཁའ་ལ་སོགས་པའི་གནས་ཐམས་ཅད་དུ་སྤྲུལ་བའོ། །ཇི་ལྟར་སྤྲུལ་པའི་དཀྱིལ་འཁོར་དུ་བདག་ཉིད་འཇུག་པ་ནི་འཇུག་པའོ། །མེ་ཏོག་ལ་སོགས་པའི་ཕྱི་རོལ་གྱི་ཡོ་བྱད་ཀྱི་ཚུལ་རྣམས་དང་རྡོ་རྗེ་མཚོན་ཆ་མ་ལ་སོགས་པས་དཀྱིལ་འཁོར་ཐམས་ཅད་མཆོད་པ་ནི་མཆོད་པའོ། །དཀྱིལ་འཁོར་དེ་རྣམས་དམ་ཚིག་གི་ཕྱག་རྒྱ་ལ་སོགས་པས་རང་གི་དབང་དུ་བྱས་པ་ནི་བསྒྲུབ་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་འཁོར་ལོས་སོ། །ཞེས་བྱ་བ་གསུངས་ཏེ། དང་པོའི་དབུས་མའི་རྡོ་རྗེ་རྩེ་མོ་ཐུར་དུས་གཞི་ལ་གཟུགས་པས་ནི་བརྟག་པར་འགྱུར་རོ། །ཁའི་དབུས་སུ་བཞག་པས་ནི་ཞུགས་པར་འགྱུར་རོ། །ཕྱག་བྱས་པས་ནི་མཆོད་པར་འགྱུར་རོ། །སྙིང་གར་བཞག་པས་ནི་བསྒྲུབས་པར་གྱུར་པ་འདི་ནི་དང་པོའི་རྡོ་རྗེ་འཁོར་ལོའི་མཚན་ཉིད་དོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཧཱུཾ་གིས་དང་པོའི་རྡོ་རྗེ་བཅིངས་ཏེ། དེའི་རྩེ་མོ་དབུས་མའི་དཀྱིལ་འཁོར་སྤྲུལ་བའི་བསམ་པས་ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང་ས་ལ་བཞག་ན་དེ་ལྟ་བུས་ནི་དཀྱིལ་འཁོར་སྤྲུལ་པར་འགྱུར་རོ། །ཁར་བཞག་སྟེ་བཟླས་ནས་དེ་ལྟ་བུས་ནི་དཀྱིལ་འཁོར་དུ་འཇུག་པར་འགྱུར་རོ། །དེའི་རྩེ་མོ་དབུས་མ་བཏུད་དེ་ཕྱག་བྱས་ན་དེ་ལྟ་བུས་ནི་དཀྱིལ་འཁོར་མཆོད་པར་འགྱུར་རོ། །དེའི་རྩེ་མོ་
དབུས་མ་སྙིང་གར་བཞག་སྟེ་བཟླས་ན་དཀྱིལ་འཁོར་བསྒྲུབས་བར་འགྱུར་རོ། །ཕྱག་རྒྱ་ཐམས་ཅད་དགུག་པ་དང༌། བཅིང་བ་དང༌། བརྟན་པར་བྱ་བ་དང༌། བསྒྲུབ་པ་ཞེས་བྱ་བ་ནི་ཕྱག་རྒྱ་ཆེན་པོ་ལ་སོགས་པའི་རིགས་ཐམས་ཅད་ཀྱི་ཕྱག་རྒྱ་ནི་ཕྱག་རྒྱ་ཐམས་ཅད་དོ། །དེ་རྣམས་སྤྱན་དྲང་བ་ནི་དགུག་པའོ། །དེ་རྣམས་ཉིད་ཀྱི་དམ་ཚིག་གིས་བཅིངས་པས་ནི་བཅིངས་པའོ། །སྒྲུབ་པ་པོའི་འདོད་པ་རྫོགས་པར་བྱ་བ་ལ་དེ་རྣམས་ཉིད་ཀྱི་ཐུགས་རྩེ་གཅིག་པ་ཉིད་དུ་འགྱུར་བ་ནི་བརྟན་པའོ། །དེས་དབང་དུ་བྱ་བ་ནི་སྒྲུབ་པ་པོ་འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེའི་ཕྱག་རྒྱ་བསྒྲུབས་པས་སོ་ཞེས་བྱ་བ་གསུངས་ཏེ། དང་པོའི་ཕྱག་རྒྱ་བཅིངས་མོད་ལ་སོར་མོ་ཐམས་ཅད་དྲང་བ་ལས་ཡིད་ལ་བྱ་བ་ནི་དང་པོའི་རྡོ་རྗེ་སྒྲུབ་པའི་མཚན་ཉིད་དོ། །འདིས་ནི་འདི་སྐད་སྟོན་པར་འགྱུར་བ་སྟེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེ་བཅིངས་ཏེ། རིགས་ཀྱི་ལྷ་ཐམས་ཅད་ཀྱི་དམ་ཚིག་དང༌། ཆོས་དང་ལས་ཀྱི་ཕྱག་རྒྱ་དགུག་པའི་བསམ་པས། རང་གི་སྙིང་གར་རྡོ་རྗེ་བསྡམས་པ་དྲལ་བའི་ཚུལ་དུ་མོས་ལ་སོར་མོ་ཐམས་ཅད་དྲལ་བར་བྱ་སྟེ། དེ་ལྟ་བུས་ནི་ཕྱག་རྒྱ་ཐམས་ཅད་དགུག་པར་འགྱུར་རོ། །བཅིང་པའི་བསམ་པས་ནི་ཕྱག་རྒྱ་ཐམས་ཅད་བཅིང་བར་འགྱུར་རོ། །ཕྱག་རྒྱ་ཐམས་ཅད་བརྟན་པར་བྱ་བའི་བསམ་པས་ནི་ཕྱག་རྒྱ་ཐམས་ཅད་སྒྲུབ་པར་འགྱུར་རོ། །དམ་ཚིག་ཐམས་ཅད་ནི་ཡེ་ཤེས་སེམས་དཔའོ། །དེ་རྣམས་དགུག་པ་ནི་སྤྱན་དྲང་བའོ། །དེ་རྣམས་གཞུག་པ་ནི་རང་གི་ལུས་སམ་རས་རིས་ལ་སོགས་པ་ལ་གཞུག་པའོ། །དེ་རྣམས་ཉིད་བཅིང་བ་ནི་རང་གི་ལུས་ལ་སོགས་པ་ལ་བརྟན་པར་བྱའོ། །དེ་རྣམས་ཉིད་གྲུབ་པ་ནི་ལུས་ལ་སོགས་པ་ལ་རང་དབང་དུ་བྱ་བའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་དམ་ཚིག་གི་མཆོག་གིས་སོ་ཞེས་བྱ་བ་གསུངས་ཏེ། དད་པོའི་རྡོ་རྗེ་བཅིངས་ལ་ཛཿ་ཧཱུཾ་བཾ་ཧོཿ་ཞེས་ཟློས་པ་འདི་ནི་དང་པོའི་རྡོ་རྗེ་དམ་ཚིག་གི་མཆོག་གོ །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའ་ལ་སོགས་པའི་སྦྱོར་བ་བྱས་ལ། ཡེ་ཤེས་སེམས་དཔའ་ཇི་ལྟ་བ་བཞིན་དུ་སྤྱན་དྲངས་ལ་རང་གི་དམ་ཚིག་གི་ཕྱག་རྒྱས་
ཇི་ལྟ་བ་བཞིན་དུ་བལྟ་བ་བྱས་ལ་དང་པོའི་རྡོ་རྗེ་དེ་ཛཿ་ཧཱུཾ་བཾ་ཧོཿ་ཟློས་ཤིང་རང་གི་ལུས་ལ་དཀྱིལ་འཁོར་ལ་སོགས་པ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བའོ། །ལས་ཐམས་ཅད་རབ་ཏུ་བསྒྲུབ་པ་དང༌། རྣམ་པར་མི་འཇིག་པར་བྱ་བ་དང༌། བརྟན་པར་བྱ་བ་དང༌། གྲགས་པ་ཆེན་པོ་རབ་ཏུ་བསྒྲགས་པ་ནི་ཞེས་བྱ་བ་ནི་ཐམས་ཅད་ཀྱང་ཡིན་ལ་ལས་ཀྱང་ཡིན་པས་ན་ལས་ཐམས་ཅད་དེ། ཐམས་ཅད་རྗེས་སུ་མཉེས་པར་བྱ་བ་ལ་སོགས་པའོ། །དེ་རྣམས་བསྒྲུབ་པ་ནི་རང་དབང་དུ་བྱ་བ་རྫོགས་པར་བྱེད་ཅེས་བྱ་བའི་ཐ་ཚིག་གོ །རང་དབང་དུ་བྱ་བ་རྣམས་ཕྱི་མའི་མཐར་ཐུག་པ་མེད་པའི་བར་དུ་བརྟན་པར་བྱ་བ་ནི་རྣམ་པར་མི་འཇིག་པར་བྱ་བའོ། །སྲོག་ཆགས་དང་སྲོག་ཆགས་མ་ཡིན་པ་རྣམས་ཀྱིས་མི་ཤིགས་པར་བྱ་བ་ནི་བརྟན་པར་བྱ་བའོ། །ཐམས་ཅད་རྗེས་སུ་མཉེས་པར་བྱ་བ་ལ་སོགས་པས་རྣལ་འབྱོར་བ་ཆེ་གེ་མོ་ཞིག་སེམས་ཅན་གྱི་དོན་བྱེད་དེ་ཞེས་ཕྱོགས་བཅུར་སྒྲ་གྲག་པར་འགྱུར་བ་ནི་གྲགས་བ་ཆེན་པོ་བསྒྲགས་པའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། དང་པོའི་རྡོ་རྗེ་ལས་ཀྱི་ཕྱག་རྒྱས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེའི་དབུས་མའི་ཕྱི་རོལ་གྱི་སྤྱི་བོ་དང༌། སྙིང་ག་དང༌། ཁ་དང༌། ཕྱོགས་ཐམས་ཅད་དུ་བསྐོར་བ་ནི་འདིའི་མཚན་ཉིད་ཡིན་ནོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེ་བཅིངས་ཏེ། དེའི་རྩེ་མོ་དབུས་མ་ཕྱིར་བསྟན་ཏེ། སྤྱི་བོར་གཞག་པར་བྱས་ཏེ་དེ་ལྟ་བུས་ནི་ལས་ཐམས་ཅད་རབ་ཏུ་འགྲུབ་པར་འགྱུར་རོ། །སྙིང་གར་བཞག་ན་ལས་ཐམས་ཅད་རྣམ་པར་མི་འཇིག་པར་འགྱུར་རོ། །ཁར་བཞག་ན་དེ་ལྟ་བུས་ནི་ལས་ཐམས་ཅད་བརྟན་པར་འགྱུར་རོ། །ཕྱོགས་ཐམས་ཅད་དུ་བསྐོར་ན་གྲགས་པ་ཆེན་པོ་རབ་ཏུ་སྒྲོགས་པར་འགྱུར་རོ། །རྡོ་རྗེ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་བསྒྲུབ་པ་ནི་དང་པོའི་རྡོ་རྗེས་སོ་ཞེས་བྱ་བ་ནི་དང་པོའི་རྡོ་རྗེ་དང༌། དེ་བཞིན་གཤེགས་པའི་རྡོ་རྗེ་དང༌། རྡོ་རྗེ་ཁྲོ་བོའི་རྡོ་རྗེ་དང༌། པདྨའི་རིགས་དང༌། རྡོ་རྗེ་རིན་ཆེན་ཏེ། རིགས་ཐམས་ཅད་ཀྱི་མཚན་མ་ནི་རྡོ་རྗེ་ཐམས་ཅད་དོ། །དེ་རྣམས་དགུག་པ་ལ་སོག་བ་ནི་ཇི་སྐད་བཤད་
བ་བྱེད་པར་འདོད་པས་རང་གི་སྙིང་གར་དང་པོའི་རྡོ་རྗེ་བཅིངས་ལ་རང་གི་སྙིང་གར་བཞག་སྟེ། རང་གི་བདག་ཉིད་རྡོ་རྗེ་བསྒོམ་པ་ནི་དང་པོའི་རྡོ་རྗེའི་མཚན་ཉིད་དོ། །འདི་སྐད་སྟོན་པ་ཡིན་ཏེ། དེ་བཞིན་དུ་ཐམས་ཅད་བྱས་ནས་ཇི་སྐད་དུ་བཤད་པའི་ཚུལ་གྱིས་དང་པོའི་རྡོ་རྗེ་བཅིངས་ལ། ཨ་ནུ་རཱ་ག་ཡཱ་མི་ཧཱུཾ། ཞེས་ཟློས་ཤིང་དང་པོའི་རྡོ་རྗེར་བདག་ཉིད་བསྒོམ་པར་བྱས་ཏེ། དེ་ལྟ་བུས་ནི་རྡོ་རྗེ་ཐམས་ཅད་དགུག་པ་ལ་སོགས་པར་འགྱུར་རོ། །སེམས་དཔའ་ཆེན་པོ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་བསྒྲུབ་པ་ལ་ནི་དང་པོའི་རྡོ་རྗེ་སེམས་དཔས་སོ་ཞེས་བྱ་བ་ནི་སེམས་དཔའ་ཆེན་པོ་ཡང་ཡིན་ལ་ཐམས་ཅད་ཀྱང་ཡིན་པས་ན་སེམས་དཔའ་ཆེན་པོ་ཐམས་ཅད་དེ། རྡོ་རྗེ་སེམས་དཔའ་ནས་བརྩམས་ཏེ་བསྐལ་བ་བཟང་པོའི་མཐར་ཐུག་པ་རྣམས་སོ། །དེ་རྣམས་དགུག་པ་ལ་སོག་ས་ནི་གོ་བར་ཟད་དོ། །འདི་དག་ཐམས་ཅད་ནི་དང་པོའི་རྡོ་རྗེ་སེམས་དཔར་གྱུར་ཏེ། དང་པོའི་རྡོ་རྗེ་བཅིངས་ལ་རང་གི་བྱང་ཆུབ་སེམས་དཔའ་བསྒོམ་པ་ནི་འདིའི་མཚན་ཉིད་ཡིན་ཏེ། འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་དང་པོའི་རྡོ་རྗེ་ཇི་ལྟ་བ་བཞིན་དུ་བཅིངས་ཏེ། ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང་རྡོ་རྗེ་སེམས་དཔའ་བདག་ཉིད་རྡོ་རྗེ་ཡིད་ལས་བྱུང་བ་ལ་སོགས་པའི་བྱང་ཆུབ་སེམས་དཔའ་ཉིད་དུ་བསྒོམ་པར་བྱས་ཏེ། དེ་ལྟ་བུས་ནི་དེ་དག་ཐམས་ཅད་དུ་འགྱུར་རོ། །དེ་བཞིན་གཤེགས་པ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་བསྒྲུབ་པ་ལ་ནི་ཞེས་བྱ་བ་ནི་གོ་སླའོ། །འདི་དག་ཇི་ལྟར་འགྱུར་ཞེ་ན། དང་པོའི་རྡོ་རྗེའི་དེ་བཞིན་གཤེགས་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་བཅིངས་ལ་རང་གི་དེ་བཞིན་གཤེགས་པ་ཐམས་ཅད་རྗེས་སུ་དྲན་པ་ནི་འདིའི་མཚན་ཉིད་ཡིན་ནོ། །འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དང་པོའི་རྡོ་རྗེ་ཇི་ལྟ་བ་བཞིན་དུ་བཅིངས་ལ་སྔ་མ་བཞིན་དུ་ཟློས་ཤིང་དེ་བཞིན་གཤེགས་པ་རྣམ་པར་སྣང་མཛད་དམ། མི་བསྐྱོད་པ་ལ་སོགས་པར་བདག་ཉིད་བསྒོམ་པར་བྱས་ཏེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་དགུག་པ་ལ་
སོགས་པར་འགྱུར་རོ། །རྡོ་རྗེ་འཛིན་པ་ཆེན་པོ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་ལ་ནི་ཞེས་བྱ་བ་ལ་རྡོ་རྗེ་འཛིན་པ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་ངོ་བོ་ཉིད་དོ། །དེ་དགུག་པ་ལ་སོགས་པ་ལ་ནི་གོ་བར་ཟད་དོ། །དེ་ཇི་ལྟར་འགྱུར་ཞེ་ན། དང་པོའི་རྡོ་རྗེ་འཛིན་པས་སོ་ཞེས་བྱ་བ་གསུངས་ཏེ། དང་པོའི་རྡོ་རྗེ་ཉིད་དང་པོའི་རྡོ་རྗེ་འཛིན་པ་ཡིན་ཏེ། རྡོ་རྗེ་འཆང་ཆེན་པོར་རང་ཉིད་རྗེས་སུ་དྲན་པ་བསྒོམ་པར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཧཱུཾ་གིས་དང་པོའི་རྡོ་རྗེ་བཅིངས་ལ་ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང་རྡོ་རྗེ་འཛིན་པ་ཆེན་པོར་བདག་ཉིད་བསྒོམ་པར་བྱས་ཏེ། དེ་ལྟ་བུས་ནི་རྡོ་རྗེ་འཛིན་པ་ཆེན་པོ་རྣལ་འབྱོར་པ་རང་གི་ལུས་ལ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བར་འགྱུར་རོ། །ཡང་གསུངས་པ་ཞེས་བྱ་བ་ལ་སོགས་པ་གོ་སླའོ། །འདི་ལས་སྒྲུབ་པ་ཐམས་ཅད་ལ་ཡི་གེ་ཧཱུཾ་གིས་རང་གི་ཕྱག་རྒྱ་བཅིངས་ལ་ཨ་ནུ་རཱ་ག་ཡཱ་མི་ཧཱུཾ་ཞེས་བཟླ་བར་བྱའོ། །དེ་ལྟར་ཕྱག་རྒྱ་བཞི་ཚོམས་ཀྱི་ཚུལ་གྱིས་ལས་བརྒྱ་བཅུ་གཉིས་སུ་གསུངས་ཏེ། ད་ནི་དེ་ནས་དང་པོའི་སྙིང་པོ་མ་གྲུབ་པའོ་ཞེས་བྱ་བ་ལ་སོགས་པས་ཕྱག་རྒྱ་ལྔ་ཚོམས་ཀྱི་ཚུལ་གྱིས་གར་ལས་བྱུང་བའི་ལས་ཀྱི་ཕྱག་རྒྱ་ལས་བརྒྱ་པ་བསྒྲུབ་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་སྟོན་པའི་ཚིག་ཡིན་ཏེ། གང་གི་ཚེ་རྣལ་འབྱོར་པས་ཇི་སྐད་དུ་བཤད་པའི་སྒྲུབ་པས་ཧཱུཾ་ཞེས་བྱ་བའི་སྙིང་པོས་མངོན་པར་འདོད་པའི་དངོས་གྲུབ་མ་བསྒྲུབས་ཤིང་རང་དབང་དུ་མ་བྱས་པ་དེའི་ཚེ་ནི་མ་བསྒྲུབས་པར་གྱུར་པ་ཡིན་ཏེ། མ་བསྒྲུབས་པ་ནི་དང་པོའི་སྙིང་པོ་ཡི་གེ་ཧཱུཾ་དེ་ཐམས་ཅད་དེ། ལྷག་མ་མ་ལུས་པ་དང༌། དོན་ཡོད་པ་སྟེ། འབྲས་བུ་ཡོད་པ་ཡིན་ལ་དེ་ཉིད་ནི་ཐོགས་པ་མེད་པའོ། །ལས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ལས་ཐམ་ཅད་དེ། ཐམས་ཅད་ཤིན་དུ་བསྲུང་བ་ལ་སོགས་པ་ལས་རྣམ་པ་བརྒྱའོ། །དེ་རྣམས་ཀྱི་རབ་འབྱམ་ནི་རྒྱུན་ཏེ། དེ་སྐད་ཅིག་གིས་བསྒྲུབས་པ་ནི་སྐད་ཅིག་རང་དབང་དུ་བྱ་བའོ། །དེ་ཐམས་ཅད་རྗེས་སུ་བཤད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་ཐམས་ཅད་ཀྱི་སྣ་ཚོགས་ཕྲིན་ལས་རྡོ་རྗེ་འཆང་ཆེན་པོས་
གསུངས་སོ་ཞེས་བྱ་བ་ནི་རྡོ་རྗེ་སེམས་དཔས་བཀའ་སྩལ་པའོ། །དོན་ཡོད་བ་ཞེས་བྱ་བ་ལ་སོགས་པ་ནི་གོ་བར་ཟད་དོ། །ལས་ཀྱི་རྒྱུན་དེ་དག་ཀྱང་གང་ཞེ་ན། དངོས་གྲུབ་སྐད་ཅིག་གིས་གྲུབ་ཅེས་གསུངས་པ་དང༌། འདི་ལྟ་སྟེ་ཞེས་བྱ་བ་ལ་སོགས་པ་གསུངས་པ་ཡིན་ཏེ། འདི་ལྟར་ཞེས་བྱ་བ་ཉེ་བར་སྟོན་པའི་ཚིག་ཡིན་ནོ། །ཐམས་ཅད་ཤིན་ཏུ་བསྲུང་བ་དང༌། ཡོངས་སུ་སྐྱོང་བ་དང༌། ཞི་བ་དང༌། བདེ་ལེགས་སུ་བྱ་བ་དང༌། ཚེ་མངོན་པར་འཕེལ་བ་ལ་ནི་ཞེས་བྱ་བ་ནི་རྒྱུ་བ་དང་མི་རྒྱུ་བའི་དངོས་པོ་ལྷག་པར་བསྲུང་བ་ནི་ཐམས་ཅད་ཤིན་ཏུ་བསྲུང་བའོ། །རྒྱལ་སྲིད་ལ་སོགས་པའི་ལོངས་སྤྱོད་ཡོངས་སུ་འཕེལ་བར་བྱ་བ་ནི་སེམས་ཅན་ཡོངས་སུ་བསྐྱང་བ་ཡིན་ཏེ། བདེ་བ་དང་ཡིད་བདེ་བ་ཐམས་ཅད་འབྱིན་པ་ཞེས་བྱ་བའི་ཐ་ཚིག་གོ །དུས་མ་ཡིན་པར་འཆི་བ་དང༌། ཡམས་དང་ཉེ་བར་འཚེ་བ་ཞི་བར་བྱ་བ་ནི་ཞི་བའོ། །འདི་དག་ཉིད་མ་སྐྱེས་པ་རྣམས་མི་སྐྱེ་བར་བྱ་བའི་ཕྱིར་ཞི་བའི་ལས་གང་ཞིག་བྱེད་པ་དེ་ནི་བདེ་ལེགས་སོ། །ཚེ་སྲུང་བར་བྱེད་པ་ནི་ཚེ་མངོན་པར་འཕེལ་བའོ། །འདི་དག་ཐམས་ཅད་ཇི་ལྟར་ཞེ་ན། རྡོ་རྗེ་གར་གྱི་རྡོ་རྗེ་སེམས་དཔའི་གཙུག་ཏོར་གྱིས་སོ་ཞེས་གསུངས་ཏེ། རྡོ་རྗེ་གར་ལས་བྱུང་པའི་རྡོ་རྗེ་སེམས་དཔའི་གཙུག་ཏོར་གྱི་ཕྱག་རྒྱས་ཞེས་བྱ་བའི་ཐ་ཚིག་གོ །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་སྐུའི་མཆོག་གི་གཙུག་ཏོར་གྱི་ལས་དང༌། རྡོ་རྗེ་བསྡམས་པ་བཙིར་བ་དང༌། དབུས་མའི་ནོར་བུ་བསྐོར་བ་དང༌། སོར་མོ་ཐམས་ཅད་ཀྱི་རྡོ་རྗེ་དང་སོར་མོ་ལྷག་མ་རྣམས་ཀྱི་འོད་ཀྱི་རྡོ་རྗེའོ། །འདིས་ནི་འདི་སྐད་སྟོན་པར་འགྱུར་ཏེ། སྔ་མ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཐལ་མོའི་མཛུབ་མོ་གཉིས་གཞིབས་ཏེ་རྩེ་མོར་བྱས་ནས་གཡོན་པའི་མཐེ་བོའི་སྟེང་དུ་གཡས་པའི་མཐེ་བོང་སེམས་དཔའི་སྐྱིལ་མོ་ཀྲུང་གི་ཚུལ་དུ་བཞག་པ་འདི་ནི་རྡོ་རྗེ་སྐུའི་མཆོག་གོ །འདི་སྤྱི་གཙུག་ཏུ་བཞག་ལ་བཙིར་ཞིང་བསྒྲུབ་པར་བྱ་བའི་སྐྱེས་བུ་ཆེན་པོའི་མཚན་གཙུག་ཏོར་དང་ལྡན་པའི་རྡོ་རྗེ་སེམས་དཔའི་གཙུག་ཏོར་གྱི་རང་བཞིན་དུ་བསམ་པར་བྱ་སྟེ། དེ་ལྟ་བུས་ནི་ཐམས་ཅད་ཤིན་ཏུ་བསྲུང་བར་འགྱུར་རོ། །ཕྱག་རྒྱ་དེ་ཉིད་ཀྱི་གུང་མོ་སོར་མོ་དབུས་མ་གཉིས་ཀྱིས་རྒྱབ་ཏུ་བཀུག་ལ།
ནོར་བུར་བྱས་པ་བསྒྲུབ་པར་བྱ་བའི་སེམས་ཅན་གྱི་ཁམས་ཐམས་ཅད་དབང་བསྐུར་བ་ཐོབ་པ་ལས་རིན་པོ་ཆེ་སྣ་བདུན་དང་ལྡན་པའི་རྒྱལ་སྲིད་ལ་རབ་ཏུ་གཞག་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་ཡོང་སུས་བསྐྱང་པར་འགྱུར་རོ། །གཙུག་ཏོར་གྱི་ཕྱག་རྒྱ་དེ་གཉིས་བསྐོར་ལ་བསྒྲུབ་པར་བྱ་བ་ཡང་བཅོམ་ལྡན་འདས་རྡོ་རྗེ་སེམས་དཔའི་བདུད་རྩིའི་ཕྲ་རབ་ཀྱིས་ཡོངས་སུ་བཀང་ལ་རྡོ་རྗེ་སེམས་དཔར་བྱས་ཏེ། དེ་ལྟ་བུས་ནི་ཞི་བར་འགྱུར་རོ། །གཙུག་ཏོར་གྱི་ཕྱག་རྒྱ་ཉིད་ཀྱིས་མཐེ་བོང་གཉིས་གཞིབས་ཏེ་རྩེ་མོར་བྱས་པ་དང༌། མཛུབ་མོ་གཉིས་ཀྱི་རྩེ་མོ་དང༌། གུང་མོ་གཉིས་ཀྱི་རྩེ་མོ་དང༌། སྲིན་ལག་གཉིས་ཀྱི་རྩེ་མོ་དང༌། མཐེའུ་ཆུང་གཉིས་ཀྱི་རྩེ་མོར་བྱས་ལ་བསྒྲུབ་པར་བྱས་པའི་དུས་མ་ཡིན་པའི་འཆི་བ་དང༌། ནད་ལ་སོགས་པ་ཟིལ་གྱིས་མནན་ལ་རྡོ་རྗེ་སེམས་དཔར་འགྱུར་པར་བསམ་པར་བྱ་སྟེ། དེ་ལྟ་བུས་ནི་བདེ་ལེགས་སུ་བྱས་པར་འགྱུར་རོ། །གཙུག་ཏོར་གྱི་ཕྱག་རྒྱ་དེ་ཉིད་བཅིངས་ལ། སྲིན་ལག་དང་མཐེའུ་ཆུང་རྡོ་རྗེ་ཐལ་མོ་ཁ་ཕྱེ་བ་བཅིངས་ཏེ། འོད་ཀྱི་དཀྱིལ་འཁོར་བྱས་ལ་དཔལ་རྡོ་རྗེ་སེམས་དཔའི་བདུད་རྩིའི་རྒྱུན་གྱིས་བསྒྲུབ་པར་བྱ་བ་ཀུན་བཀང་ལ། རྡོ་རྗེ་སེམས་དཔའ་གྱུར་ནས་རྒ་ཤི་མེད་པར་བསམས་ནས་ཚེ་མངོན་པར་འཕེལ་བར་འགྱུར་རོ། །དཀྱིལ་འཁོར་ཐམས་ཅད་དང༌། མཚམས་དང༌། ཕྱོགས་དང༌། དམ་ཚིག་དང༌། དངོས་གྲུབ་བཅིང་བ་དང༌། བསྲུང་བ་ལ་ནི་ཞེས་བྱ་བ་ནི་དཀྱིལ་འཁོར་ཐམས་ཅད་བཅིང་པ་ནི་ར་བའི་འོག་གི་ཆ་རྡོ་རྗེར་བྱ་བའོ། །མཚམས་བཅིང་བ་ནི་མངོན་པར་འདོད་པའི་སའི་ཆ་ཀུན་ནས་རྡོ་རྗེ་ཕྲེང་བས་ཡོངས་སུ་བསྐོར་བའོ། །ཕྱོགས་བཅིང་བ་ནི་ལྷའི་ཁང་པ་ནང་དུ་བཅུག་པར་བྱས་ནས་ཕྱོགས་བཅུར་རྡོ་རྗེའི་མེ་འབར་བར་བསྐྱེད་དེ། འདི་དག་གིས་དཀྱིལ་འཁོར་ཐམས་ཅད་དང༌། མཚམས་དང༌། ཕྱོགས་བཅིང་བས་བསྲུང་བ་ནི་དཀྱིལ་འཁོར་གཞན་དག་ཏུ་ཡང་བྱ་བ་ཡིན་ནོ། །རྡོ་རྗེ་སེམས་དཔའ་ལ་སོགས་པའི་སེམས་དཔའ་དང༌། ཕྱག་རྒྱ་ཆེན་པོའི་རང་བཞིན་ནམ་དཀྱིལ་འཁོར་ནི་དམ་ཚིག་ཆེན་པོའོ། །རྡོ་རྗེ་སེམས་དཔའ་ལ་སོགས་པའི་དངོས་གྲུབ་ནི་རྫོགས་པར་འགྱུར་རོ། །ལས་ལྔ་པོ་འདི་དག་ཇི་ལྟར་འགྲུབ་པར་འགྱུར་ཞེ་ན། རྡོ་རྗེ་ཆེན་པོའི་གར་གྱིས་སོ་སོར་འབྲང་བས་སོ་ཞེས་བྱ་བ་
གསུངས་ཏེ། ཁྲོ་བོའི་ཁུ་ཚུར་གཉིས་ཀྱིས་ཕྱོགས་ཀྱི་ཚོགས་གཡས་ནས་ཡོངས་སུ་བསྐོར་བ་དང༌། ཁར་བསྐོར་བ་དང༌། སྙིང་གར་ཞུགས་ན་འབར་བའི་རྣམ་པར་བྱ་བ་དང༌། དམ་ཚིག་ལ་ནི་བཾ་ཞེས་བྱ་བ་དང༌། གྲུབ་པ་ལ་ཡང་བཾ་བརྗོད་པར་བྱས་ཏེ། འདི་ནི་འདིའི་མཚན་ཉིད་ཡིན་ཏེ། འདིས་ནི་འདི་སྐད་སྟོན་པར་འགྱུར་རོ། །དེ་ཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཁྲོ་བོའི་ཁུ་ཚུར་གཉིས་ཀྱིས་ཕྱོགས་ཀྱི་ཚོགས་གཡས་ནས་བསྐོར་བའི་ཚུལ་དུ་བྱས་ནས་དཀྱིལ་འཁོར་བཅིང་བར་འགྱུར་རོ། །དེ་ཉིད་ཁར་བསྐོར་ལ་དེས་མཚམས་བཅིང་བའི་ཚུལ་དུ་བྱས་ཏེ། འདི་ལྟ་བུས་ནི་མཚམས་བཅིང་བར་འགྱུར་རོ། །དེ་ཉིད་རང་གི་སྙིང་གར་བཞུགས་པར་བྱས་ལ་རང་གི་སྙིང་ག་ལས་རྡོ་རྗེ་འབར་བས་ཕྱུང་ལ་དེས་ཕྱོགས་བཅིང་བར་བྱ་ཞིང༌། ཕྱག་རྒྱས་ཕྱོགས་བཅིང་བའི་ཚུལ་དུ་བྱས་ནས་འདིས་ཕྱོགས་བཅིང་བར་འགྱུར་ཏེ་ཕྱོགས་ཐམས་ཅད་དུ་མེ་འབར་བའི་རབ་བྱས་ཏེ། ཁྲོ་བོ་ཆེན་པོ་འབར་བའི་རྡོ་རྗེ་བཀོད་པར་ཡང་མི་འཇུག་གོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཡི་གེ་བཾ་དང་ཁྲོ་བོའི་ཁུ་ཚུར་གཉིས་པོ་དེ་གཉིས་ཀྱིས་རྡོ་རྗེ་སེམས་དཔའ་ལ་སོགས་པའི་དམ་ཚིག་ལ་རབ་ཏུ་གཞག་པར་འགྱུར་རོ། །ཁྲོ་བོའི་ཁུ་ཚུར་གཉིས་པོ་དེ་ཉིད་དང་བཾ་ཟློས་ཤིང་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་ན། དེ་ལྟ་བུས་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་སྒྲུབ་པར་འགྱུར་རོ། །ཉིན་གསུམ་པ་དང་ཉིན་བཞི་པ་དང༌། སླར་ཟློས་པ་དང་རྟག་པ་དང༌། ཁྱབ་འཇུག་གི་རིམས་ཐམས་ཅད་ཅེས་བྱ་བ་ནི་སྨན་དཔྱད་ཀྱི་གཙུག་ལག་ལས་ཤེས་པར་བྱའོ། །བསལ་བ་ལ་ནི་ཞེས་བྱ་བ་ནི་དེ་རྣམས་ནད་པའི་རྒྱུད་ལས་ངེས་པར་བསལ་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱིས་རིམས་ནད་དང་བྲལ་བས་སོ་ཞེས་བྱ་བ་གསུངས་སོ། །འདིའི་མཚན་ཉིད་ནི་འདི་ཡིན་ཏེ། སེམས་མའི་རྡོ་རྗེ་ལྟ་བས་བསལ་བས་ཉིན་གསུམ་པ་དང༌། བཞི་བ་དང༌། སླར་ཟློས་པ་དང༌། རྟག་པའི་རིག་མ་སེལ་ཏོ། །ཚད་མེད་པར་བསྐོར་བས་ནི་དམིགས་འབྱེད་མི་ནུས་པ་ཞི་བར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་པ་བྱས་ལ། རྡོ་རྗེ་དབུས་མའི་གུང་མོ་གཉིས་བསྒྲེང་སྟེ། མྱུ་གུར་
བྱས་པའི་སེམས་མ་རྡོ་རྗེ་མ་བཅིངས་ལ། དེས་རིམ་གྱིས་གཟུང་བར་བྱ་ཞིང༌། བྱམས་པའི་ལྟ་བས་ཀྱང་བསལ་ལ། བཅོམ་ལྡན་འདས་གཙུག་འཕྱང་གིས་ཀྱང་ནད་པའི་ལུས་ཀྱིས་ཕྱི་བོ་ནས་བརྩམས་ཏེ་རྐང་མཐིལ་གྱི་བར་དུ་ཀུན་དུ་གང་བར་བསམ་པར་བྱ་སྟེ། དེ་ལྟ་བུས་ནི་ཉིན་གསུམ་པ་དང༌། ཉིན་བཞི་པ་དང༌། སླར་ཟློས་པ་དང༌། རྟག་པའི་རིམས་དང་བྲལ་བར་འགྱུར་རོ། །ཁྱབ་འཇུག་གི་རིམས་ནི་དཔག་ཏུ་མེད་པར་ཁྱབ་ཅིང་བསྐོར་བས་བྲལ་བར་འགྱུར་རོ། །ལྟུང་བ་ནི་སེམས་ཀྱི་སྡུག་བསྔལ་ལོ། །གནོད་པ་ནི་གཅོང་ཆེན་པོ་ལ་སོགས་པའོ། །ནད་ནི་སྐྱ་རྦབ་ལ་སོགས་པའོ། །མྱ་ངན་ནི་འཇིག་རྟེན་དུ་གྲགས་པར་ཟད་དོ། །ལུས་ཀྱིས་གནོད་པ་མྱོང་བ་ལ་སོགས་པ་ནི་སྡུག་བསྔལ་ལོ། །འདི་དག་རྣམ་པར་གཞག་པ་ནི་མེད་པར་བྱ་བའོ། །འདིའི་དོན་ཇི་ལྟར་འགྱུར་ཞེ་ན། རྡོ་རྗེ་གར་གྱི་སྡུག་བསྔལ་ཉེ་བར་ཞི་བས་སོ་ཞེས་བྱ་བས་གསུངས་སོ། །དེས་ན་འདིའི་མཚན་ཉིད་བཤད་པ་ནི་རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་གཉིས་ལྕགས་ཀྱུར་སྤྲེལ་ལ་བཏུད་དེ། མཛུབ་མོ་གཞིབས་པའི་རྩེ་མོས་ལས་ཀྱི་དུས་སུ་སྙིང་གར་གཞག་པར་བྱ་བ་དང༌། མཛུབ་མོའི་རྩེ་མོ་བཙིར་བ་དང༌། ཁར་གཞུག་པ་དང་བཟློག་སྟེ། མཛོད་སྤུའི་གནས་སུ་གཞག་པའོ། །འདི་དག་གིས་ནི་དོན་འདི་སྐད་སྟོན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཁུ་ཚུར་གཉིས་བཅིངས་པ་སྟེ། མཐེའུ་ཆུང་གཉིས་ལྕགས་ཀྱུར་བྱས་ལ་ཕན་ཚུན་སྦྲེལ་བ་བཅིངས་པ་ལ་མཛུབ་མོ་གཉིས་གཞི་བས་པ་རྩེ་མོར་བྱས་ནས་རང་དང་གཞན་གྱི་སྙིང་གའི་ཕྱོགས་སུ་བཞག་ལ། སྔགས་ཟློས་ཤིང་རྡོ་རྗེ་སེམས་དཔས་བསྒྲུབ་པར་བྱ་བའི་ལུས་ལ་ཀུན་དུ་བཀང་ནས་བདེ་བ་དང༌། ཡིད་བདེ་བ་ཐམས་ཅད་དང་ལྡན་པར་བསམ་པར་བྱས་ཏེ། དེ་ལྟ་བུས་ནི་ལྟུང་བ་ཐམས་ཅད་ཞི་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཕྱག་རྒྱ་དེ་ཉིད་ཀྱིས་བསྒྲུབ་པར་བྱ་བ་ལ་བྱ་བ་པར་བྱ་ཞིང༌། བཅོམ་ལྡན་འདས་ཀྱི་ཕྱག་གིས་ཀྱང་དེ་བཞིན་དུ་བསྒྲུབ་པར་བྱ་བའི་ལུས་ཁྱབ་པར་གྱུར་པར་བསམ་པར་བྱས་ཏེ། དེ་ལྟ་བུས་ནི་གནོད་པ་ཐམས་ཅད་ཞི་བར་འགྱུར་རོ། །དེ་བཞིན་དུ་ཐམས་ཅད་བྱ་ལ་མཛུབ་མོ་གཉིས་ཀྱི་རྩེ་མོས་ནད་པ་བཙིར་བར་བྱ་ཞིང༌། བཅོམ་ལྡན་འདས་
གཙུག་འཕྱང་གིས་ཀྱང་ནད་བའི་ལུས་ལ་ཁྱབ་པར་གྱུར་པར་བསམ་པར་བྱས་ཏེ། དེ་ལྟ་བུས་ནད་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། ཕྱག་རྒྱ་དེ་ཉིད་བཀོད་པའི་ཚུལ་གྱིས་ཁར་བཞག་ལ། ཡིད་ཀྱིས་བསྒྲུབ་པར་བྱ་ཞིང་ནད་པའི་ལུས་དང་ལྷན་ཅིག་ཏུ་བྱས་ཏེ། དེ་ལྟ་བུས་ནི་བསྒྲུབ་པར་བྱ་བ་རྡོ་རྗེ་སེམས་དཔའི་བདེ་བ་ངང་ཡིད་བདེ་བ་ཐོབ་ནས་མྱ་ངན་ཐམས་ཅད་དང་བྲལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཕྱག་རྒྱ་དེ་ཉིད་ཡོངས་སུ་བཟློག་སྟེ། མཛོད་སྤུར་བཞག་སྟེ་བཅོམ་ལྡན་འདས་རྡོ་རྗེ་སེམས་དཔའ་བསྒྲུབ་པར་བྱ་བ་ཁྱབ་པར་བསམ་པར་བྱས་ཏེ། དེ་ལྟ་བུས་ནི་སྡུག་བསྔལ་ཐམས་ཅད་འཇིག་པར་འགྱུར་རོ། །དུག་དང་སྦྱར་བའི་དུག་ཐམས་ཅད་ཉེ་བར་སྦྱར་བ་དང༌། དབབ་པ་དང༌། བཟའ་བ་དང༌། བཅིང་བ་དང༌། བདུད་རྩིར་བྱ་བ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་གང་གིས་བྱ་ཞེ་ན། རྡོ་རྗེ་གར་གྱི་ཉེ་བའི་དུག་གིས་སོ་ཞེས་བྱ་བ་གསུངས་ཏེ། དེ་ལ་འདིའི་མཚན་ཉིད་འདི་ཡིན་ཏེ། རྡོ་རྗེ་བསྡམས་པའི་མཐེ་ཆུང་གཉིས་སྤྲེལ་ཏེ། བ་དན་གསུམ་པ་རྡོ་རྗེ་མགུ་བའི་ཚུལ་གྱིས་ཉེ་བར་བསྐུལ་བ་དང༌། སྡུད་པའི་ཚུལ་དང༌། རྡོ་རྗེ་བསྣུན་པ་དང༌། སྙིམ་པས་བཟེད་པ་དང༌། རྡོ་རྗེ་བཏུང་བའོ། །འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། དུག་དང་སྦྱར་བའི་དུག་ཐམས་ཅད་ཀྱི་འོག་ཏུ། ཡཾ་ལས་རླུང་གི་དཀྱིལ་འཁོར་དེའི་སྟེང་དུ་རཾ་ལས་མེའི་དཀྱིལ་འཁོར། །དེའི་སྟེང་དུ་ཡི་གེ་ཧཱུཾ་འོད་ཟེར་འབར་བ་ཀུན་དུ་འཁྲུགས་པ་བསམས་ལ། ལག་པ་གཉིས་ཀྱིས་བ་དན་གསུམ་པ་བཅིངས་ལ། མཐེའུ་ཆུང་གཉིས་ཀྱིས་ཤིན་ཏུ་མགུ་བའི་ཚུལ་གྱིས་བྱས་ཏེ། དེས་ཀྱང་རླུང་གི་དཀྱིལ་འཁོར་གྱིས་སྦར་པའི་མེའི་དཀྱིལ་འཁོར་ཧཱུཾ་དང་བཅས་པས་དུག་གམ་སྦྱར་བའི་དུག་ཤིང་སྐམ་པོ་བཞིན་ཉེ་བར་འབར་བར་བསམས་ཏེ། དེ་ལྟ་བུས་ནི་དུག་དང་སྦྱར་བའི་དུག་ཐམས་ཅད་ཉེ་བར་འབར་བར་འགྱུར་རོ། །མཐེའུ་ཆུང་གཉིས་པོ་དེ་ཡིད་ཀྱིས་བསྡུ་བའི་ཚུལ་དུ་བྱས་པས་ནི་དུག་དང་སྦྱར་བའི་དུག་ཐམས་ཅད་བཅིང་བར་འགྱུར་རོ། །དེ་བཞིན་དུ་མཐེའུ་ཆུང་གཉིས་ཀྱིས་བསྣུན་པའི་ཚུལ་དུ་བྱས་པ་ནི་དུག་དང་སྦྱར་བའི་དུག་
ཐམས་ཅད་དབང་པོའི་གདུ་བུས་བཅིང་བར་འགྱུར་རོ། །ལྕེ་ལ་ཧཱུཾ་ལས་རྡོ་རྗེ་དཀར་པོ་བསམས་ལ་དེ་ལ་ཡི་གེ་ཧཱུཾ་ཟླ་བའི་མདོག་ཅན་གྱི་འོད་ཟེར་འབར་བ་བསམས་ལ་བ་དན་གསུམ་པ་གཉིས་ཀྱི་སྙིམ་པས་དུག་དང་སྦྱར་བའི་དུག་ཐམས་ཅད་བསལ་བའི་ཚུལ་དུ་བྱ་ཞིང་དུག་ཀྱང་སྦྱར་བའི་དུག་བཟའ་བར་བྱའོ། །ཡི་གེ་བཾ་ལས་སྦྱར་བའི་དུག་གི་སྟེང་དུ་ཆུའི་དཀྱིལ་འཁོར་གྱི་སྟེན་དུ་ཡི་གེ་ཧཱུཾ་ལས་ཟླ་བའི་འོད་ཟེར་རྣམ་པར་འགྲོ་བ་དང༌། ཡི་གེ་ཧཱུཾ་གིས་དུག་དང་སྦྱར་བའི་དུག་བདུད་རྩིར་བྱས་པར་བསམས་ལ། བ་དན་གསུམ་པའི་ལག་པ་གཉིས་ཀྱིས་སྙིམ་པ་བྱས་པ་བཏུང་བའི་ཚུལ་དུ་བྱས་ཏེ། དེ་ལྟ་བུས་ནི་བདུད་རྩིར་བྱས་པར་འགྱུར་རོ། །གདོན་ཐམས་ཅད་དབབ་པ་དང༌། བཅིང་བ་དང༌། དམ་ཚིག་འཛིན་དུ་གཞུག་པ་དང༌། རབ་ཏུ་འདུལ་བ་དང་བསྲུང་བ་ལ་ནི་ཞེས་བྱ་བ་གོ་བར་ཟད་དོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་གདོན་ལས་ཐར་བས་སོ། །དེ་ལ་འདིའི་མཚན་ཉིད་འདི་ཡིན་ཏེ། རྡོ་རྗེ་བསྡམས་པའི་མཛུབ་མོ་གཉིས་པ་བཀུག་ལ་མཐེ་བོང་གཉིས་བསྒྲེངས་ནས་ཕྱེ་སྟེ། མཆེ་བར་བྱ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱ་སྟེ། དེས་ལག་མཐིལ་དལ་བུས་བརྡབ་པ་དང༌། མཛུབ་མོའི་སོར་མོ་བཙིར་བ་དང༌། གུང་མོའི་རྡོ་རྗེ་བསྡམས་པ་དང༌། བྱབ་ཅིང་ཕྱག་རྒྱ་མྱུར་དུ་དགྲོལ་བ་དང༌། སོར་མོ་ལྷག་མ་རྡོ་རྗེ་གཙུག་ཏོར་དུ་བྱ་བའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་བཀུག་པ་ནང་དུ་བཅུག་སྟེ། མཐེ་བོང་གཉིས་ཁ་ཕྱེ་ལ་བྱེ་བའི་ཚུལ་གྱིས་རང་གི་ཁར་བཞག་ནས་རྡོར་ཇེ་གནོད་སྦྱིན་དུ་བདག་ཉིད་བསམས་ན་ལག་མཐིལ་གཉིས་དལ་གྱིས་བརྡབ་ཅིང་གདོན་གྱིས་ཟིན་པའི་སྙིང་གར་ཡང་རླུང་དང་མེའི་དཀྱིལ་འཁོར་གྱི་དབུས་ན་གནས་པའི་རྡོ་རྗེ་གནོད་སྦྱིན་རང་བཞིན་དུ་དྲག་པ་འོད་ཟེར་འབར་བ་ཀུན་དུ་འཁྲུགས་པ་ཡིད་ཀྱིས་བཅུག་ན་དེས་གནོད་སྦྱིན་གྱིས་བཟུང་བའི་ལུས་ལ་གནས་པའི་གདོན་ཤིང་སྐམ་པོ་ལྟར་འབར་ཞིང་སྲེག་པར་བསམ་པར་བྱས་ཏེ། དེ་ལྟ་བུས་ནི་འབར་བར་འགྱུར་རོ། །ཕྱག་རྒྱ་འདི་ཉིད་ཀྱིས་མཛུབ་མོ་འདི་ཉིད་ཀྱི་སེན་
མོ་ཕན་ཚུན་བཙིར་བའི་ཚུལ་དུ་བྱས་ཏེ། དེ་ལྟ་བུས་ནི་རྡོ་རྗེ་ལྕགས་སྒྲོག་གིས་གདོན་བཅིང་བར་འགྱུར་རོ། །ཕྱག་རྒྱ་འདི་ཉིད་གུང་མོ་གཉིས་རྩེ་མོ་སྦྱར་ལ་བསྟན་ན་ཐམས་ཅད་དུ་གདོན་དམ་ཚིག་འཛིན་པར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་གྱི་ཕྱག་རྒྱ་བྱས་ལ། གདོན་ལུས་ལས་བསལ་བའི་བསམ་པས་གདོན་འབྱུང་བའི་ཚུལ་དུ་བྱས་ནས་མྱུར་དུ་བཀྲོལ་ན་དེ་ལྟ་བུས་ནི་གདོན་ཐམས་ཅད་འདུལ་བར་འགྱུར་ཏེ། གདོན་ལས་ཐར་ཏོ་ཞེས་བྱ་བའི་ཐ་ཚིག་གོ །རྡོ་རྗེ་གནོད་སྦྱིན་གྱི་ཕྱག་རྒྱ་དེ་གཉིས་ཀྱིས་མཛུབ་མོ་དང༌། མཐེ་བོང་གི་གདོང་སྦྱར་ལ་ཕྱག་རྒྱ་དེ་བསྒྲུབ་པར་བྱ་བའི་སྤྱི་གཙུག་ཏུ་གཞག་པར་བྱས་ཏེ། དེ་ལྟ་བུས་ནི་བསྲུང་བར་འགྱུར་རོ། །གདོན་བསལ་ནས་བསྒྲུབ་པར་བྱ་བ་ཕྱག་རྒྱ་འདིས་བསྲུང་བར་བྱའོ་ཞེས་སྟོན་པ་ཡིན་ནོ། །ཐམས་ཅད་བཅིང་བ་དང༌། ཐར་བ་དང༌། དྲལ་བ་དང༌། ལྟུང་བར་བྱ་བ་དང༌། བསླང་བ་ལ་ནི་ཞེས་བྱ་བ་ནི་གོ་བར་སླའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་ཁྲོ་བོ་ཆེན་པོས་སོ། །ཞེས་བྱ་བ་གསུངས་སོ། །འདིའི་མཚན་ཉིད་ནི་འདི་ཡིན་ཏེ། བ་དན་གསུམ་པ་གཉིས་བཀན་ཏེ། མཛུབ་མོ་ཁས་སྦུབ་པ་དང༌། གུང་མོ་མདུད་པར་བཅིངས་ལ་གུང་མོ་དང་མཛུབ་མོ་གདོང་སྦྱར་བ་དེ་དང་རྡོ་རྗེ་ཧཱུཾ་མཛད་ཀྱིས་ལས་བྱ་བ་ནི་མདུད་པ་བཙིར་བ་དང༌། ཕྱག་རྒྱ་མོད་ལ་དགྲོལ་བ་དང༌། བཙིར་ཏེ་སེ་གོལ་གཏོགས་པ་དང༌། གུང་མོས་བརྡེབ་ཅིང་དོང་དུ་ལྟུང་བར་བྱ་བ་དང༌། བསླང་བའི་གུང་ཚུལ་དུ་བྱ་བའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། བ་དན་གསུམ་པ་གཉིས་པ་གཉིས་བཀན་ཏེ་བཞག་ནས་དེ་ནས་དེ་ཁས་སྦུབ་ལ། གུང་མོ་གཉིས་མདུད་པ་བྱས་ལ། མཛུབ་མོ་གཉིས་དང་གུང་མོ་གཉིས་གདོང་སྤྲད་དེ་ཕྱག་རྒྱ་བཙིར་ཞིང་ཧཱུཾ་བཟླས་ནས་བདག་ཉིད་རྡོ་རྗེ་ཧཱུཾ་མཛད་དུ་བསམས་ཏེ། ཧཱུཾ་ཞེས་བཟླས་ན་ཐམས་ཅད་བཅིང་བར་འགྱུར་རོ། །ཧཱུཾ་དེ་ཉིད་ཟློས་ཤིང༌། ལྕགས་སྒྲོག་ལ་སོགས་པ་བཅིངས་པའི་སྟེང་དུ་འབར་བའི་རྡོ་རྗེ་དབབ་པར་ཡིད་ཀྱིས་བསམ་པར་བྱས་ཏེ། དེ་ལྟ་བུས་ནི་བཅིངས་པ་ཀུན་ལས་གྲོལ་བར་བྱེད་པར་འགྱུར་རོ། །དེ་ཉིད་ཟློས་ཤིང་ཕྱག་རྒྱ་བཙིར་ལ་འཁྲུལ་འཁོར་ལ་སོགས་པ་གཞིག་པའི་བསམ་པས་རྡོ་རྗེ་འབར་བ་
དེ་ལ་ཡིད་ཀྱིས་དབབ་པར་བྱས་ཏེ། དེ་རྣམ་པར་བཤིག་ན་དེ་ལྟ་བུས་ཐམས་ཅད་དྲལ་བར་འགྱུར་རོ། །དེ་ཕྱག་རྒྱ་དེ་ཉིད་བཅིངས་ཏེ། གུང་མོ་གཉིས་རྩེ་མོ་སྦྱར་ནས་རྩེ་མོ་དེས་ལྷ་ལ་སོགས་པ་ལྷུང་བར་བྱ་བའི་བསམ་བས་ཧཱུཾ་བཟླས་ལ་ནམ་མཁའ་ལ་བསྣུན་ན། དེ་ལྟ་བུས་ནི་ཐམས་ཅད་དོང་དུ་ལྟུང་བར་འགྱུར་རོ། །ཡང་གུང་མོ་གཉིས་སྔ་མ་བཞིན་དུ་བཅིངས་ཏེ་འདིས་བླང་བའི་ཚུལ་དུ་བྱེད་ཅིང་ཡི་གེ་ཧཱུཾ་བཟླས་པར་བྱས་ཏེ། དེ་ལྟ་བུས་ནི་ལྷུང་བ་ཐམས་ཅད་ལས་བསླང་བར་འགྱུར་རོ། །མཁའ་འགྲོ་མ་ཐམས་ཅད་ཀྱི་ཕྱག་རྒྱ་གཞིག་པ་དང༌། གདོན་ལས་ཐར་པར་བྱ་བ་དང༌། འཆི་བ་སློང་བ་དང༌། ཚེ་མངོན་པར་འཕེལ་བ་དང༌། ཤིན་ཏུ་བསྲུང་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་ལན་གྱི་ཕྱག་རྒྱས་སོ་ཞེས་བྱ་བ་གསུངས་སོ། །བ་དན་གསུམ་པ་གཉིས་མཉམ་པོར་བྱས་ལ་མཛུབ་མོ་དང་མཐེ་ཆུང་རྡོ་རྗེར་བྱས་ཏེ། གུང་མོ་མདུད་ལ་བཟློག་སྟེ། དབང་བསྐུར་བའི་གནས་དང༌། ཁར་བཞག་ལ་ཧཱུཾ་གིས་གཞིག་པ་དང༌། མུས་གདོན་ལས་ཐར་བར་བྱ་བ་དང༌། ཨ་ཞེས་བྱ་བ་ལ་སོགས་པས་འཇིག་བ་ལས་བསླང་བ་དང༌། ཧཱུཾ་གི་གླུས་ཚེ་མངོན་པར་འཕེལ་པ་དང༌། ཡི་གེ་ཧཱུཾ་གི་ཆོས་ཀྱི་ཚིག་གིས་ཤིན་ཏུ་བསྲུང་པ་ནི་འདིའི་མཚན་ཉིད་ཡིན་ནོ། །འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་ཡི་གེ་ཧཱུཾ་ལས་ཇི་སྐད་དུ་བཤད་པའི་མཚན་ཉིད་ཅན་གྱིས་དཔལ་ཧེ་རུ་ཀར་བདག་ཉིད་བསྐྱེད་ལ་བ་དན་གསུམ་པ་གཉིས་བཅིངས་ཏེ། གུང་མོའི་སོར་མོ་གཉིས་མདུད་པའི་ཚུལ་དུ་བཅིངས་ལ། མཛུབ་མོ་གཉིས་དང༌། མཐེ་ཆུང་གཉིས་ཀྱི་རྩེ་མོ་གཉིས་བྱས་ལ་བཟློག་སྟེ། མཛུབ་མོ་གཉིས་ཀྱི་གདོང་མཛོད་སྤུའི་གནས་སུ་བཞག་ལ། ཡི་གེ་ཧཱུཾ་ཟློས་ཤིང་མཁའ་འགྲོ་མའམ། །ཕྲ་མེན་མས་ཟིན་པའི་ལུས་ལ་དཔལ་ཧེ་ར་ཀ་འཁོར་དང་བཅས་པ་ཡིད་ཀྱིས་བཅུག་ལ་དེས་མཁའ་འགྲོ་མའི་ཕྱག་རྒྱ་ཐམས་ཅད་ཟོས་པར་བསམ་པར་བྱས་ཏེ། དེ་ལྟ་བུས་ནི་མཁའ་འགྲོ་མའི་ཕྱག་རྒྱ་ཐམས་ཅད་གཞག་པར་འགྱུར་རོ། །གལ་ཏེ་མཁའ་འགྲོ་མ་རྣམས་ཕྱག་རྒྱ་བཅིངས་པས་གནོད་པར་བྱེད་པར་འགྱུར་ན་དེའི་ཚེ་དེའི་ཕྱག་རྒྱའི་སྟེང་དུ་ཧཱུཾ་གིས་རྡོ་རྗེ་
འབར་བ་དབབ་པར་བྱས་ཏེ། དེ་ལྟ་བུས་ཀྱང་མཁའ་འགྲོ་མའི་ཕྱག་རྒྱ་ཐམས་ཅད་འཇིག་པར་འགྱུར་རོ། །ཕྱག་རྒྱ་འདི་ཉིད་བཅིངས་ལ་མཁའ་འགྲོ་མ་ལ་སོགས་པའི་གདོན་ལས་ཐར་བར་བྱ་བའི་བསམ་པས་མུ་ཞེས་བྱ་བ་བཟློས་ཤིང་བཅོམ་ལྡན་འདས་དཔལ་ཧེ་རུ་ཀ་ཡང་བསྒྲུབ་པར་བྱ་བའི་ལུས་ལ་ཞུགས་ནས་གདོན་རྣམས་ངེས་པར་འབྱིན་པར་བསམ་པར་བྱས་ཏེ། དེ་ལྟ་བུས་ནི་གདོན་ལས་ཐར་བར་འགྱུར་རོ། །ཕྱག་རྒྱ་འདི་ཉིད་བཅིངས་ལ་མཁའ་འགྲོ་མའི་གདོན་གྱིས་བསད་པའི་ལུས་ལ། དཔལ་ཧེ་རུ་ཀ་འཁོར་དང་བཅས་པའི་ཡེ་གེ་ཨ་ཟློས་ཤིང་ཡིད་ཀྱིས་བཅུག་ལ་རྡོ་རྗེ་འབར་བའི་ལྕགས་ཀྱུས་མཁའ་འགྲོ་མའི་གདོན་ལས་སྙིང་བཀུག་ལ་བཅིངས་པའི་ལུས་ལ་བཅུག་ལ། དེའི་སྙིང་ལ་བཞག་སྟེ། དེས་བདེ་ཞིང་སླར་འཚོ་བར་འགྱུར་པར་བསམས་པར་བྱ་སྟེ། དེ་ལྟ་བུས་ནི་འཆི་བ་བསླང་བར་འགྱུར་རོ། །ཕྱག་རྒྱ་དེ་ཉིད་བཅིངས་ལ་ཧཱུཾ་གིས་གླུ་ཟློས་ཤིང་བསྒྲུབ་པར་བྱ་བའི་སྙིང་དར་དཔལ་རྡོ་རྗེ་སེམས་དཔའི་ཟླ་བའི་མདོག་ཅན་གྱི་མགོ་ལ་བདུད་རྩིའི་ཆར་འབེབས་པར་བསམ་པར་བྱས་ཏེ། དེ་ལྟ་བུས་ནི་ཚེ་འདི་མངོན་པར་འཕེལ་པར་འགྱུར་རོ། །དེ་བཞིན་དུ་ཕྱག་རྒྱ་དེ་བཅིངས་ལ་ཆོས་ཀྱི་ཚིག་གིས་ཡི་གེ་ཧཾ་ཟློས་ཤིང༌། བསྒྲུབ་པར་བྱ་བའི་རྡོ་རྗེའི་གོ་ཆས་རྡོ་རྗེར་བྱ་བར་བསམ་པར་བྱས་ཏེ། དེ་ལྟ་བུས་ནི་ཤིན་ཏུ་བསྲུང་པར་འགྱུར་རོ། །སྒྲུབ་པ་ཐམས་ཅད་ཅེས་བྱ་བ་ལ་སོགས་པ་ནི་བཤད་ཟིན་ཏོ། །སྲིན་པོ་ལ་སོགས་པའི་གདོན་གྱིས་ཉེ་བ་ནི་སྡིག་པའོ། །རྨི་ལམ་ངན་པ་དང༌། ལྟས་ངན་པ་དང༌། བྱུར་ནི་གོ་བར་ཟད་དོ། །བྱུར་ལ་སོགས་པ་འདི་དག་གཞིག་པ་ནི་ཞི་བའོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་ཞི་བས་སོ་ཞེས་གསུངས་ཏེ། པདྨ་ཆེན་པོ་བཅིངས་ལ་ཇི་སྲིད་འདོད་པར་བཟླས་པའམ་ཡང་ན་པདྨའི་ཁུ་ཚུར་གཡོན་པ་བསྟན་ཏེ། མར་དང༌། ཏིལ་མར་དང༌། ཏིལ་དང༌། འབྲས་དང༌། འབྱུང་ཁུང་གི་ཕྱེ་མའི་སྤྱིན་སྲེག་བྱ་བ་ནི་འདིའི་མཚན་ཉིད་ཡིན་ནོ། །དེ་ལ་རྡོ་རྗེ་ཐལ་མོ་ཁོང་སྟོང་དུ་བྱས་པ་ལས་མཛུབ་མོ་དང༌། གུང་མོ་དང་མཐེ་བོང་དང༌། མཐེའུ་ཆུང་དང་མཐེ་བ་མོའི་འདབ་མ་བཞིར་བྱ་བ་ནི་པདྨ་ཆེན་པོའི་མཚན་ཉིད་ཡིན་ནོ། །པདྨའི་ཁུ་ཚུར་གྱི་
མཚན་ཉིད་ཀྱང་འཕགས་པ་སྤྱན་རས་གཟིགས་དབང་ཕྱུག་གི་དཀྱིལ་འཁོར་ལས་འོག་ནས་བཤད་པ་ལས་ཤེས་པར་བྱའོ། །འདི་སྐད་ཅེས་སྟོན་པ་ཡིན་ཏེ། དེ་སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་རས་རིས་ལ་སོགས་པ་ཇི་ལྟ་བ་བཞིན་དུ་སྤྱན་དྲངས་ལ། ཡང་དག་པར་མཆོད་དེ་ཕྱག་བྱས་ནས་དེའི་འོག་ཏུ་པདྨ་ཆེན་པོ་བཅིངས་ཏེ་འོད་ཟེར་འབར་བས་ཀུན་དུ་འཁྲུགས་པ། འཕྲོ་བ་རྣམས་པར་འབར་བའི་འོད་ཀྱི་རང་བཞིན་ནི་དཔལ་རྡོ་རྗེ་སེམས་དཔའི་ཡེ་ཤེས་ཀྱི་འོད་ཟེར་གྱི་སྤྱན་སྔར་འདུག་པ་ལ། ཨོཾ་ནི་ར་ཝར་ཎ་སརྦ་དྷ་རྨ་ཏཱ་བཛྲ་དྷ་རི་ཎི་ཧཾ། ཞེས་ཟློས་ཤིང་པདྨ་ཆེན་པོའི་ཕྱག་རྒྱས་སྒྲིབ་པ་ཐམས་ཅད་བླངས་ལ་བསྲེག་པར་བྱའོ། །དེ་ལྟ་བུས་ནི་སྒྲིབ་པ་ཐམས་ཅད་འཇིག་པར་འགྱུར་རོ། །ཨོཾ་རོ་ཛོ་བི་ག་ཏ་སརྦ་དྷ་རྨཱ་བཛྲ་དྷ་རི་ཎི་ཧཾ། ཞེས་བྱ་བས་སྡིག་པ་ཐམས་ཅད་བླངས་ལ་བསྲེག་པར་བྱའོ། །དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ། །ཨོཾ་སྭ་པོན་པ་མ་སརྦ་དྷརྨཱཿ་པྲ་ཏི་བེ་ད་བཛྲ་དྷ་རི་ཎྀ་ཧཾ། ཞེས་བྱ་བས་རྨི་ལམ་དན་པ་བླངས་ལ་བསྲེག་པར་བྱའོ། །དེ་ལྟ་བུས་ནི་རྨི་ལམ་དང་ངན་པ་ཐམས་ཅད་འཇིག་པར་འགྱུར་རོ། །ཨོཾ་ནི་རྣི་མི་ཏྟ་སརྦ་དྷརྨཱ་ཛྙཱ་ན་བཛྲ་དྷ་རི་ཎི་ཧཾ། ཞེས་བྱ་བས་ལྟས་ངན་པ་ཐམས་ཅད་བླངས་ལ་བསྲེག་པར་བྱའོ། །དེ་ལྟ་བུས་ནི་ལྟས་ངན་པ་ཐམས་ཅད་འཇིག་པར་འགྱུར་རོ། །ཨོཾ་སྭ་བྷཱ་ཝ་པྲ་བྷ་སྭ་ར་སརྦ་དྷརྨཱ་བཛྲ་དྷ་རི་ཎི་ཧཾ། ཞེས་བྱ་བས་བྱུར་ཐམས་ཅད་བླངས་ལ་བསྲེག་པར་བྱས་ན་དེ་ལྟ་དུས་ནི་བྱུར་ཐམས་ཅད་འཇིག་པར་འགྱུར་རོ། །ཡང་ན་པདྨ་ཅན་གྱི་ཁུ་ཚུར་གྱིས་ཕྱིའི་སྤྱིན་སྲེག་བྱས་ཏེ། རྡོ་རྗེ་སེམས་དཔའི་རྣལ་འབྱོར་བྱས་ལ། ལས་ཐམས་ཅད་པའི་ཐབ་ཁུང་དུ་བཅོམ་ལྡན་འདས་ཇི་ལྟ་བ་བཞིན་དུ་སྤྱན་དྲངས་ནས། གཡོན་པའི་པདྨའི་ཁུ་ཚུར་དང༌། གཡས་པ་པདྨའི་ཁུ་ཚུར་གྱིས་དགད་གཟར་དང་བླུགས་གཟར་བླངས་ཏེ། ཨོཾ་ནི་ར་ཝར་ཎ་སརྦ་དྷརྨ་ཏཱ་བཛྲ་དྷ་རི་ཎི་ཧཾ། ཞེས་མར་གྱི་སྤྱིན་སྲེག་བྱས་ཏེ། དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས། ཨོཾ་རོ་ཛོ་བོ་ག་ཏ་སརྦ་དྷརྨཱ་བཛྲ་དྷ་རི་ཎྀ་ཧཾ་ཞེས་ཟློས་ཤིང་ཏིལ་མར་གྱི་སྤྱིན་སྲེག་བྱས་དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ།།
དེ་བཞིན་དུ་ཐམས་ཅད་བྱས་ལ། ཨོཾ་སྭཔོན་པ་མ་སརྦ་དྷརྨཱཿ་པྲ་ཏི་བེ་ད་བཛྲ་དྷ་རི་ཎི་ཧཾ། ཞེས་ཟློས་ཤིང་ཏིལ་གྱི་སྤྱིན་སྲེག་བྱས་ན་རྨི་ལམ་ངན་པ་རྣམས་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། ཨོཾ་ནི་རྣི་མི་ཏྟ་སརྦ་དྷརྨཱ་ཛྙཱ་ན་བཛྲ་དྷ་རི་ཎི་ཧཾ། ཞེས་བྱ་བས་འབྲས་ཀྱི་སྤྱིན་སྲེག་བྱས་ན་དེ་ལྟ་བུས་ནི་ལྟས་ངན་པ་ཐམས་ཅད་འཇིག་པར་འགྱུར་རོ། དེ་བཞིན་དུ་ཐམས་ཅད་བྱས་ལ་ཨོཾ་སྭ་དྷཱ་བ་པྲ་བྷ་སྭ་ར་སརྦ་དྷརྨཱ་དྷ་རི་ཎི་ཧཾ། ཞེས་བྱ་བས་གསེར་ཁམས་ཀྱི་ཕྱེ་མའི་སྤྱིན་སྲེག་བྱས་ན་ངེས་ནི་བྱུར་རྣམས་འཇོམས་པར་འགྱུར་རོ། །ཐམས་ཅད་དབབ་པ་དང༌། བསྒུལ་བ་དང༌། གར་བྱེད་དུ་གཞུག་པ་དང༌། ཐམས་ཅད་དབང་པར་སྨྲར་གཞུག་པ་དང༌། པྲ་སེ་ན་ཐམས་ཅད་བསྒྲུབ་པར་ཡང་ཤེས་པར་བྱའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་མའི་འབེབས་པའི་ཕྱག་རྒྱས་སོ་ཞེས་བྱ་བ་ནི་ཐམས་ཅད་དབབ་པ་དང༌། བསྐྱོད་པ་དང༌། གར་བྱེད་དུ་གཞུག་པ་དང༌། ཐམས་ཅད་བདེན་པར་སྨྲར་གཞུག་པ་དང༌། པྲ་སེ་ན་ཐམས་ཅད་སྒྲུབ་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་འབེབས་བའི་ཕྱག་རྒྱས་སོ་ཞེས་བྱ་བ་གསུངས་སོ། །དེ་ལ་འདིའི་མཚན་ཉིད་ནི་འདི་ཡིན་ཏེ། བ་དན་གསུམ་པའི་རྡོ་རྗེ་གཉིས་བཅིངས་ལ་དགའ་བའི་ཚུལ་གྱིས་སེན་མོས་རོལ་མོ་བྱེད་པ་དང༌། རྡོ་རྗེ་བཅིངས་པ་སྟེང་དང་འོག་ཏུ་བསྐྱོད་པ་དང༌། རྡོ་རྗེ་བསྡམས་པའི་ཐ་མ་ལ་སོགས་པ་ནས་གྲོལ་བར་གར་བྱ་བ་དང༌། རྡོ་རྗེ་བསྡམས་པའི་མཛུབ་མོ་གཉིས་ཁ་ནས་དབྱུང་བ་ལྟ་བུ་དང༌། བདེ་བ་ཆེན་པོ་དོན་ཡོད་པའི་དམ་ཚིག་གི་ལྕགས་ཀྱུས་དངོས་པོ་ཐམས་ཅད་ལ་རྒྱུ་བ་དང་མི་རྒྱུ་བ་རྣམས་གཟུགས་བརྙན་གྱི་ཚུལ་གྱིས་གསལ་བར་བསྟན་པ་དང༌། སྒྲ་སྙན་གྱི་ཚུལ་གྱིས་སེམས་ཅན་དང༌། བདག་ཉིད་ཀྱིས་ཐམས་ཅད་བདེ་བར་གསལ་བར་ཐོབ་པའོ། །འདིས་ནི་འདི་སྐད་སྟོན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་བ་དན་གསུམ་པ་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་བ་བཅིངས་ལ་དགའ་བའི་ཚུལ་གྱིས་མཐེ་བོང་དང༌། མཛུབ་མོའི་སེན་མོས་རོལ་མོ་བྱེད་ཅིང་བཅོམ་ལྡན་འདས་དཔལ་རྡོ་རྗེ་
སེམས་དཔའ་རླུང་དང་མེའི་དཀྱིལ་འཁོར་ལ་ཞུགས་པ་འབར་བའི་འོད་ཟེར་ཀུན་དུ་འཁྲུགས་པས་བསྒྲུབ་པར་བྱ་བ་ཀུན་དུ་གང་པར་འགྱུར་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་འབབ་པར་འགྱུར་རོ། །བ་དན་གསུམ་པ་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་བསྒྲུབ་པར་བྱ་བ་བསྐྱོད་པའི་བསམ་པས་སྟེང་དང་འོག་ཏུ་བསྐུལ་པར་བྱས་ཏེ། དེ་ལྟ་བུས་ནི་ཐམས་ཅད་བསྐུལ་བར་བྱས་ཏེ། དེ་བཞིན་དུ་ཐམས་ཅད་བྱས་ལ། ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་གཅིག་ཏུ་བྱས་ཏེ་བ་དན་གསུམ་པ་གཉིས་ཀྱི་རང་བཞིན་ཅན་རྡོ་རྗེ་བསྡམས་པ་བཅིངས་ཏེ། ཐ་མ་ལ་སོགས་པ་ནས་གྲོལ་བའི་ཚུལ་གྱིས་གར་བྱས་ནས་དེ་ལྟ་བུས་ནི་ཐམས་ཅད་གར་བྱེད་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་གཅིག་ཏུ་བྱས་ཏེ། བ་དན་གསུམ་པ་གཉིས་ཀྱིས་རང་བཞིན་ཅན་གྱི་རྡོ་རྗེ་བསྡམས་པ་བཅིངས་ལ། མཛུབ་མོ་གཉིས་གཞིབས་ཏེ། རྩེ་མོར་བྱས་ནས་ཚིག་འབྱུང་བའི་ཚུལ་གྱིས་ཁའི་ཕྱོགས་ནས་གྱེན་དུ་བཏེག་ན་དབབ་པར་གྱུར་པའི་སེམས་ཅན་ཐམས་ཅད་སྨྲ་བར་འགྱུར་རོ། །གསང་བའི་ལྕགས་ཀྱུས་བཅིངས་ལ་དངོས་པོ་ཐམས་ཅད་གཟུགས་བརྙན་གྱི་ཚུལ་དུ་བྱུང་བར་དུ་བྱུང་བར་བསྒོམ་ནས་རྡོ་རྗེ་སེམས་དཔའ་ལ་སོགས་པ་དངོས་པོ་ཐམས་ཅད་ལ་བཀུག་ན་དེ་རང་ཉིད་ཀྱིས་མ་ཐོང་ཞིང་གཞན་རྣམས་ལ་ཡང་སྟོན་པར་འགྱུར་པ་དང༌། བྲག་ཅ་དང་འདྲ་བའི་སྦྱོར་བས་ནི་སྒྲ་ཐམས་ཅད་རང་གིས་ཐོས་པ་དང༌། གཞན་གྱིས་ཐོས་པར་བྱེད་པར་འགྱུར་རོ། །ཐམས་ཅད་རྒྱས་གདབ་པ་དང༌། གསད་པ་དང༌། ལྟུང་བར་བྱ་བ་དང༌། བསླང་བ་དང༌། སླར་གསོ་བ་དོན་ཡོད་པར་གྲུབ་པ་ལ་ནི་ཞེས་བྱ་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་མཁའ་འགྲོ་མ་ཆེན་པོས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁྲོ་བོའི་ཁུ་ཚུར་གཉིས་བཅིངས་ལ་རྡོ་རྗེ་ལྟ་བས་ལས་བྱ་བ་ནི་འདི་ལྟ་སྟེ་མིག་མི་འཛུམས་པར་བལྟ་བ་དང༌། མིག་འབྲས་གྱེན་དུ་བཟློག་པ་དང༌། མྱུར་དུ་བཙུམས་ཏེ་བསྒྱེལ་བ་དང༌།
འོག་ནས་བསླང་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ། ཡི་གེ་ཧཱུཾ་ལས་རྡོ་རྗེ་ལྟར་འབར་པར་བདག་ཉིད་བསམས་ཏེ། ཁྲོ་བོའི་ཁུ་ཚུར་གཉིས་བཅིངས་སྒྲུབ་པར་བྱ་བ་ལ་མིག་མི་འཛུམས་པར་བལྟ་ཞིང་བསྒྲུབ་པར་བྱ་བའི་སྙིང་གར་རྡོ་རྗེ་འབར་བ་བསམ་པར་བྱས་ཏེ། དེ་ལྟ་བུས་ནི་ཐམས་ཅད་རྒྱས་བཏབ་པར་འགྱུར་རོ། །མིག་གྱེན་དུ་བསྒུལ་ལ་ཡིད་ཀྱིས་བསྒྲུབ་པར་བྱ་བའི་ལུས་ལ་ཞུགས་ལ་བསྒྲུབ་པར་བྱ་བའི་སྲོག་བླངས་ནས་གྱེན་དུ་འཕུར་བར་བྱས་ཏེ། དེ་ལྟ་བུས་ནི་ཐམས་ཅད་གསོད་པར་འགྱུར་རོ། །བསྒྲུབ་པར་བྱ་བ་ལྟུང་བར་བྱ་བའི་བསམ་པས་མིག་འཛུམས་ལ་མྱུར་དུ་ལྟུང་བར་བྱས་པས་ནི་ཐམས་ཅད་ལྟུང་བར་འགྱུར་རོ། །ཁྲོ་བོའི་ཁུ་ཚུར་གཉིས་པོ་དེ་ཉིད་ཀྱིས་བསླང་པའི་ཚུལ་དུ་བྱ་ཞིང༌། ལྟ་བས་བསླང་བ་ནི་ཐམས་ཅད་བསླང་བར་འགྱུར་རོ། །བལྟ་བ་དེ་ཉིད་དང་ཁོར་བོའི་ལྟ་བས་བྱས་ན་ཐམས་ཅད་སླར་སོས་པར་འགྱུར་རོ། །ཐམས་ཅད་རེངས་པར་བྱ་བ་དང༌། རྨོངས་པར་བྱ་བ་དང༌། གཉིད་ལོག་པར་བྱ་བ་དང༌། གསད་པ་དང༌། བཟའ་པར་བྱ་བ་ལ་ནི་ཞེས་བྱ་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་གདུག་པའི་སྲིན་པོས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ་མཛུབ་མོ་གཉིས་བཟློག་ནས་མཆེ་བར་བྱ་ཞིང་མཐེ་ཆུང་སོར་བྱས་པས་གཟུང་ཞིང་མཆེ་བ་གཙིགས་པས་འཇིགས་སུ་རུང་བའི་ཁས་མི་འགུལ་བ་ཉིད་དང༌། ཡན་ལག་ཐམས་ཅད་ལྷོད་པ་དང་གཉིད་ཡུར་ཞིང་གལ་ལ་བ་དང༌། རང་གི་སྙིང་འཇོམས་པ་དང༌། མྱུར་དུ་ལྡང་བའོ། །འདིས་ནི་འདི་སྐད་སྟོན་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་གནོད་སྦྱིན་དུ་བདག་ཉིད་བསམས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ནས་ཁ་འགྲམ་གཉིས་སུ་མཆེ་བའི་ཚུལ་དུ་བཞག་ལ། མཐེའུ་ཆུང་གཉིས་འཇིགས་སུ་རུང་བའི་ཁས་བསྒྲུབ་པར་བྱ་བ་ལེན་པའི་བསམ་པས་སོས་འཛིན་པར་བྱས་ཏེ། དེ་
ལྟ་བུས་ནི་ཐམས་ཅད་རེངས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཡིད་ཀྱིས་བསྒྲུབ་པར་བྱ་བ་དང༌། གཅིག་ཏུ་གྱུར་པར་བྱས་ཏེ། ཕྱག་རྒྱ་འདི་ཉིད་བཅིངས་ལ་བསྒྲུབ་པར་བྱ་བ་རྨོངས་པར་བྱ་བའི་བསམས་པས་ཡན་ལག་ཐམས་ཅད་ལྷོད་པར་གྱུར་པར་བྱས་ན་དེ་ལྟ་བུས་ནི་ཐམས་ཅད་རྨོངས་པར་འགྱུར་རོ། །དེ་ཉིད་བཅིངས་ལ་བསྒྲུབ་པར་བྱ་བ་དང༌། གཅིག་ཏུ་གྱུར་པར་བསམས་ལ་མིག་བཙུམས་ཏེ་གླལ་བར་བྱས་ན་དེ་ལྟ་བུས་ནི་ཐམས་ཅད་གཉིད་ལོག་པར་བྱ་བར་འགྱུར་རོ། །བསྒྲུབ་པར་བྱ་བ་གཞིག་པའི་བསམ་པས་སྙིང་གར་ཕྱག་རྒྱ་གཞིག་པར་བྱས་ཏེ། དེ་ལྟ་བུས་ནི་ཐམས་ཅད་གསོད་པར་འགྱུར་རོ། །བསྒྲུབ་པར་བྱ་བ་བཟའ་བའི་བསམ་པས་མྱུར་དུ་ལྡན་པའི་ཚུལ་བྱས་ན་དེ་ལྟ་བུས་ནི་ཐམས་ཅད་ཟ་པར་འགྱུར་རོ། །གཞན་གྱི་དཔུང་ཐམས་ཅད་སྐྲག་པར་བྱ་བ་དང༌། གཞིག་པར་བྱ་བ་དང༌། ལྟུང་བར་བྱ་བ་དང༌། གསད་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་རྣམས་ཇི་ལྟར་འགྱུར་ཞེ་ན། རྡོ་རྗེ་གར་གྱི་གཤེད་བྱེད་ཀྱིས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཁུ་ཚུར་གཉིས་བཅིངས་ལ་ཁ་གདངས་པ་དང༌། གདོང་འཇིགས་སུ་རུང་བ་སྐྲ་གྱེན་དུ་བརྫེས་པ། མགོ་ཐུར་དུ་འདུད་ཅིང་འདེགས་པས་ལས་བྱའོ་ཞེས་བྱ་བས་རྡོ་རྗེ་ཁུ་ཚུར་འཕེན་པ་དང༌། ཁུ་ཚུར་བཙིར་བ་དང༌། ཡི་གེ་ཧཱུཾ་གིས་མགོ་པོས་སྡིགས་མཛུབ་བྱེད་པ་དང༌། རང་ཉིད་ཁྲོ་ཞིང་མྱུར་དུ་བསྒྱེལ་བའོ། །འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ཏེ། རྡོ་རྗེ་གནོད་སྦྱིན་གྱི་སྤྲུལ་པ་བསམས་ཏེ། རྡོ་རྗེ་ཁུ་ཚུར་གཉིས་བཅིངས་ནས་རྣལ་འབྱོར་བ་ཁ་གདངས་ཤིང་སྐྲ་གྱེན་དུ་བརྫེས་པ། མགོ་པོའི་འོག་ནས་བསྟོད་དེ་བྷྱོ་ཞེས་ཟློས་ཤིང་རྡོ་རྗེ་གནོད་སྦྱིན་གྱི་གཟུགས་ཚད་མེད་པས་གཞན་གྱི་དཔུང་མཆོག་ཏུ་སྐྲག་པར་བྱས་པར་བསམ་པར་བྱས་ཏེ། དེ་ལྟ་བུས་ནི་གཞན་གྱི་དཔུང་ཐམས་ཅད་སྐྲག་བར་བྱས་པར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམས་ལ་གཞན་གྱི་དཔུང་གཞིག་ཅིང་གཞོམ་པའི་བསམས་པས་དེའི་ཐད་ཀར་འཕང་
ཞིང་རྡོ་རྗེ་འབར་བའི་ཕྲ་རབ་གཞན་གྱི་དཔུང་གི་སྟེང་དུ་འབེབས་པར་བསམ་པར་བྱ་སྟེ། དེ་ལྟ་བུས་ནི་གཞན་གྱི་དཔུང་ཐམས་ཅད་བཅོམ་པར་བྱས་པར་འགྱུར་རོ། །སྔ་མ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམས་ལ། རྡོ་རྗེ་ཚུར་གཉིས་བཅིང་ཞིང༌། གཞན་གྱི་དཔུང་ཁྲོ་བོའི་རྡོ་རྗེ་གཉིས་ཀྱི་བར་དུ་བཙིར་བར་གྱུར་པར་བསམས་ན། དེ་ལྟ་བུས་ནི་རང་དབང་དུ་བྱས་པར་འགྱུར་རོ། །སྔ་མ་བཞིན་དུ་བདག་ཉིད་བསམས་ལ་ཧཱུཾ་དང་མགོ་བོས་སྡིགས་མཛུབ་བྱས་ཤིང་གཞན་གྱི་དཔུང་གི་སྟེང་དུ་རྡོ་རྗེ་གནོད་སྦྱིན་གྱི་ལུས་ཆེན་པོ་ལྟུང་བར་བསམ་པར་བྱས་ཏེ། དེ་ལྟ་བུས་ནི་གཞན་གྱི་ལུས་ཐམས་ཅད་ལྷུང་བར་འགྱུར་རོ། །དེ་བཞིན་དུ་རྡོ་རྗེ་གནོད་སྦྱིན་དུ་བདག་ཉིད་བསམ་ལ་རྡོ་རྗེ་ཁུ་ཚུར་གཉིས་བཅིངས་ཏེ། ཁྲོ་བོ་ཆེན་པོ་ཟིལ་གྱིས་གནོན་པར་གྱུར་པ་དང༌། གཞན་གྱི་དཔུང་གསད་པའི་བསམ་པས་ཤིན་ཏུ་མྱུར་དུ་ལྷུང་བར་བྱ་ཞིང། བཅོམ་ལྡན་འདས་རྡོ་རྗེ་གནོད་སྦྱིན་ཡང་རྡོ་རྗེ་འོད་ཟེར་འབར་བ་རབ་ཀུན་དུ་འཁྲུག་པས་གཞན་གྱི་དཔུང་གི་སྟེང་དུ་ཕབ་པས་གཞན་གྱི་དཔུང་ཐལ་པར་གྱུར་པར་བསམས་པར་བྱས་ཏེ། དེ་ལྟ་བུས་ནི་གཞན་གྱི་དཔུང་ཐམས་ཅད་གསོད་པར་འགྱུར་རོ། །ཁྲོ་བ་ཐམས་ཅད་བསལ་བ་དང༌། བཞིན་རས་དང་བར་བྱ་བ་དང༌། རྩོད་པ་ལས་རྒྱལ་བ་དང༌། འཇིགས་པ་ཐམས་ཅད་ལས་ཐར་བ་དང༌། གཡུལ་འགྱེད་པ་ལས་རྒྱལ་བ་གྲུབ་པ་ལ་ནི་ཞེས་བྱ་བ་ནི་གོ་བར་ཟད་དོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་རྒྱལ་མཚན་མཆོག་གི་དཔུང་རྒྱན་གྱི་རྩེ་མོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་གནོད་སྦྱིན་གྱི་སྲིན་ལག་དང་མཐེ་ཆུང་གཉིས་མཉམ་པོར་ཕྱེ་སྟེ། བ་དན་བྱ་བ་ནི་རྒྱལ་མཚན་མཆོག་གི་རྩེ་མོ་སྟེ། ལས་ནི་རབ་ཏུ་འདུད་པ་དང༌། འཛུམ་པ་དང༌། ལྕེ་སྟོན་པ་དང༌། ཕྲག་པ་གཉིས་བསྙེམས་པ་སྟོན་པ་དང༌། རྒྱལ་མཚན་བསྒྲེང་བའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་གནོད་སྦྱིན་དུ་བདག་ཉིད་བསམས་ནས་རྡོ་རྗེ་བསྡམས་པ་བཅིངས་ཏེ། མཛུབ་མོ་གཉིས་བཀུག་ནས་བར་ཡོད་པར་གནས་པར་བྱས་ལ་མཐེ་བོང་གཉིས་
ཕྱེ་སྟེ། བསྒྲེངས་ལ་མཆེ་བ་བྱས་པ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །འདི་ཉིད་ཀྱི་སྲིན་ལག་དང་མཐེ་ཆུང་གཉིས་ཕྱེ་སྟེ། བ་དན་ལྟ་བུར་བྱ་བའི་ནི་རྒྱལ་མཚན་མཆོག་གི་དཔུང་རྒྱན་ཏེ། འདི་བཅིངས་ལ་བསྒྲུབ་པར་བྱ་བ་དང༌། ལྷན་ཅིག་གཅིག་ཏུ་བྱས་ལ་བསྒྲུབ་པར་བྱ་བ་རབ་ཏུ་འདུད་བའི་བསམ་པས་ཕྱག་བྱས་ནས་དེ་ལྟ་བུས་ཁོར་བ་ཐམས་ཅད་བསལ་བར་འགྱུར་རོ། །དེ་ཉིད་བཅིངས་ལ་བསྒྲུབ་པར་བྱ་བ་དང༌། གཅིག་ཏུ་བྱས་ཏེ། འཛུམ་པ་བྱས་ནས་བཞིན་རས་དང་བར་འགྱུར་རོ། །འདི་ཉིད་བཅིངས་ལ་ལྕེ་བསྟོད་དེ་བསྐྱོད་པས་ནི་རྩོད་པ་ལས་རྒྱལ་བའོ། །དེ་ཉིད་བཅིངས་པས་ཕྱག་པ་གཉིས་བསྙེམས་པ་བསྟོད་པའི་ཚུལ་དུ་བྱས་ལ་དེ་ལྟ་བུས་ནི་འཇིགས་པ་ལས་ཐར་བར་འགྱུར་རོ། །དེ་ཉིད་བཅིངས་ལ་ལག་ངར་གཉིས་བརྐྱང་སྟེ་སྤྱི་བོར་བཞག་ལ་ཕྱག་རྒྱ་བཅིངས་པ་དེ་ལས་དཔུང་གི་ཚོགས་ཡན་ལག་བཞི་པོ་ཕྱུང་སྟེ། དེས་གཞན་གྱི་དཔུང་བཅོམ་པར་བསམས་ན་དེ་ལྟ་བུས་ནི་གཡུལ་འགྱེད་པ་ལས་རྣམ་པར་རྒྱལ་བར་འགྱུར་རོ། །སྤྲིན་ཐམས་ཅད་ཡང་དག་པར་བཟུང་ཞིང་མི་གཡོ་བར་བྱ་བ་དང༌། ཆར་ཆེན་པོ་དབབ་པ་དང༌། རླུང་དང༌། ཆར་དང༌། གློག་དང༌། སེར་བ་དང༌། སྤྲིན་བཟློག་པ་དང༌། ཚ་བ་དང༌། གྲང་བ་བསལ་བས་ནི་ཞེས་བྱ་བ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་གར་གྱི་དབང་པོས་རྡོ་རྗེས་སོ་ཞེས་བྱ་བ་གསུངས་སོ། །དེ་ལས་དཔལ་འདི་དག་གི་མཚན་ཉིད་འདི་ཡིན་ཏེ། སེམས་དཔའི་སྐྱིལ་མོ་ཀྲུང་དུ་འདུག་ལ་རྡོ་རྗེ་གསོར་ཞིང་ལས་བྱ་བ་ནི་ནམ་མཁར་དབུགས་གཏོང་བ་དང༌། ཐམས་ཅད་དུ་བསྐྱོད་ཅིང་གཡོ་བའི་ལྟ་པས་ཆར་དབབ་པའི་ཚུལ་དང༌། ཁྲོ་བོ་རྡོ་རྗེ་མེ་ལྟར་འབར་བའི་བཟླས་པས་ཆར་གཅད་པ་དང༌། གྲང་བས་ཡན་ལག་འདར་བའི་ཚུར་དང་ཐམས་ཅད་དུ་འབར་བའི་རྣམ་པར་བསམ་པར་བྱའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་རྣལ་འབྱོར་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ། ལག་པ་གཡས་པས་དང་པོའི་རྡོ་རྗེ་གསོར་ལ་ནམ་མཁར་དབུགས་གཏོང་ཞིང་ཟླས་བརྗོད་བྱས་ནས་རང་གི་དབུགས་ཀྱི་རྡོ་རྗེ་རང་གི་དཀྱིལ་
འཁོར་གྱིས་ཀྱང་སྤྲིན་མི་འགུལ་བར་བྱས་པར་བསམ་པར་བྱས་ཏེ། དེ་ལྟ་བུས་ནི་སྤྲིན་ཐམས་ཅད་ཡང་དག་པར་གཟུང་བར་འགྱུར་རོ། །དེ་བཞིན་དུ་རྡོ་རྗེ་གསོར་ཏེ་ཐམས་ཅད་དུ་བསྐྱོད་ཅིང་འཛུམ་པའི་བསམ་པའི་ལྟ་བས་ཆར་དབབ་པའི་ཚུལ་དུ་བྱས་ཏེ། དེ་ལྟ་བུས་ནི་ཆར་འབེབས་པར་འགྱུར་རོ། །དེ་བཞིན་དུ་རྡོ་རྗེ་གསོར་ཞིང་རྡོ་རྗེ་མེ་ལྟར་འབར་བར་བདག་ཉིད་བསམས་ལ་ཧཱུཾ་ཟློས་ཤིང་ཁྲོ་བོའི་ལྟ་བས་རླུང་དང༌། ཆར་དང༌། སེར་བ་དང༌། གློག་དང༌། སྤྲིན་བསལ་བས་ནི་དེ་དག་ཞི་བར་འགྱུར་རོ། །དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་གསོར་ཞིང༌། གྲང་བ་དང་རླུང་ཆེན་པོ་བསྒོམས་པས་ཡན་ལག་གྲང་བས་འདར་ཚུལ་དུ་བྱས་ན། དེ་ལྟ་བུས་ནི་ཚ་བ་ཐམས་ཅད་སེལ་བར་འགྱུར་རོ། །དེ་བཞིན་དུ་རྡོ་རྗེ་མེ་ལྟར་འབར་བར་བདག་ཉིད་བསམས་ལ་རྡོ་རྗེ་གསོར་ཞིང་ཐམས་ཅད་དུ་མེ་འབར་བ་བསྐྱེད་པའི་ཚུལ་དུ་བྱས་ཏེ། དེ་ལྟ་བུས་ནི་གྲང་བ་བསལ་ཞིང་འཇིག་པར་འགྱུར་རོ། །གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་རྣམས་ཤིན་ཏུ་གྲུབ་པ་ནི་རྟག་པར་གྲུབ་པའོ། །དེ་ཇི་ལྟར་འགྱུར་ཞེ་ན། རྡོ་རྗེ་གར་གྱི་འདོད་པའི་དབང་ཕྱུག་གིས་སོ་ཞེས་བྱ་བ་གསུངས་ཏེ། དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་བསྡམས་པའི་རྡོ་རྗེ་སྤྱན་དང༌། རྡོ་རྗེ་བསམས་པའི་མཛུབ་མོ་གཡོན་པའི་རྩེ་མོ་བཀུག་ལ་ཡུ་བར་བྱས་པ་ལ་མཛུབ་མོ་གཡས་པས་རྡོ་རྗེ་པི་ཝང་བརྡུང་བ་དང༌། རྡོ་རྗེ་བསྡམས་པའི་མཐིལ་གཉིས་མཉེ་བ་དང༌། ཐལ་མོ་ཁོང་སྟོང་དུ་སྦྱར་བའི་དབུས་སུ་ལྕེ་བཅུག་པ་ལ་རབ་ཏུ་དགའ་བའི་རྡོ་རྗེའོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་བསྡམས་པ་བཅིངས་ཏེ་གཡས་པའི་མཛུབ་མོས་གཡོན་པའི་གུང་མོའི་ཚིགས་གསུམ་པ་བཟུང་ལ། གཡོན་པའི་མཛུབ་མོས་གཡས་པའི་གུང་མོའི་ཚིགས་གསུམ་པ་བཟུང་སྟེ། མཐེ་བོང་གཉིས་དང་མཛུབ་མོ་གཉིས་གདོང་སྤྲད་པར་བྱ་བ་འདི་ནི་རྡོ་རྗེ་སྤྱན་ཞེས་བྱ་བའི་ཕྱག་རྒྱ་ཡིན་ཏེ། འདི་བཅིངས་ལ་བྱང་ཆུབ་སེམས་དཔའ་རྡོ་རྗེའི་གཟུགས་སུ་བདག་ཉིད་བསམ་པར་བྱས་ཏེ། དེ་ལྟ་བུས་ནི་རྡོ་རྗེ་གཟུགས་ཀྱི་དངོས་གྲུབ་བརྟན་པ་
ཐོབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་བསྡམས་པའི་མཛུབ་མ་གཡོན་པ་བཀུག་པའི་ཡུ་བ་མཛུབ་མོ་གཡས་པས་བརྡུང་བའི་ཕྱག་རྒྱ་འདི་བཅིངས་ལ། བྱང་ཆུབ་སེམས་དཔའ་རྡོ་རྗེ་སྒྲར་བདག་ཉིད་བསམ་པར་བྱས་ཏེ། དེ་ལྟ་བུས་ནི་རྡོ་རྗེ་སྒྲའི་དངོས་གྲུབ་རྟག་པར་ཐོབ་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་སེམས་དཔའ་རྡོ་རྗེ་དྲིར་བདག་ཉིད་བསྒོམ་ཞིང་རྡོ་རྗེ་བསྡམས་པ་བཅིངས་ལ་ལག་མཐིལ་གཉིས་ཕན་ཚུན་མཉེ་བར་བྱས་ཏེ། དེ་ལྟ་བུས་ནི་རྡོ་རྗེ་དྲི་བྱང་ཆུབ་སེམས་དཔའི་དངོས་གྲུབ་ཐོབ་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའ་སྦྱོར་བ་བྱས་ལ་བྱང་ཆུབ་སེམས་དཔའི་རྡོ་རྗེ་རོར་བདག་ཉིད་བསམས་ལ་རྡོ་རྗེ་བསྡམས་པ་བཅིངས་ལ། ཐལ་མོ་ཁོང་སྟོང་གི་དབུས་སུ་ལྕེ་ཆུད་པར་བྱས་ཏེ། །དེ་ལྟ་བུས་ནི་བྱང་ཆུབ་སེམས་དཔའ་རྡོ་རྗེ་རོ་ཤིན་ཏུ་གྲུབ་པར་འགྱུར་རོ། །སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ། རྡོ་རྗེ་ཀཱི་ལི་ཀཱི་ལར་བདག་ཉིད་བསམས་ལ་ལྔ་པོ་བསྡུས་པ་བཅིངས་ལ། ཨ་ནུ་རཱ་ག་ཡཱ་མི་ཧཱུཾ་ཞེས་བཟླ་བར་བྱས་ཏེ། དེ་ལྟ་བུས་ནི་རྡོ་རྗེ་ཀཱི་ལི་ཀཱི་ལའི་རེག་ཤིན་ཏུ་གྲུབ་པར་འགྱུར་རོ། །རྒྱུ་བ་དང་མི་རྒྱུ་བ་ཐམས་ཅད་རྗེས་སུ་ཆགས་པ་དང༌། དགུག་པ་དང༌། དབང་དུ་བྱས་ལ་རྩེ་བ་དང༌། ལས་ཐམས་ཅད་ལ་སྦྱར་བ་ལ་ནི་ཞེས་བྱ་བ་ནི་བཤད་ཟིན་ཏོ། །འདི་དག་ཐམས་ཅད་ཅིར་འགྱུར་ཞེ་ན། རྡོ་རྗེ་གར་གྱིས་ཐམས་ཅད་གྲུབ་པས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། བདེ་བ་ཆེན་པོ་རྡོ་རྗེ་མཆོད་པའི་ལས་དང་དང་པོའི་གླུའི་བཟླས་བརྗོད་ཅི་འདོད་པར་བྱ་བ་དང༌། ཤིན་ཏུ་བསྡུས་པའི་འཛུམ་པས་དགོད་པ་དང་རབ་ཏུ་དགའ་བའི་རྡོ་རྗེ་ལྕགས་ཀྱུ་རང་གི་མ་མཆུའི་ནང་སོས་བཟུང་བ་དང་རང་གི་དབང་པོ་གཡོ་བ་དང༌། རབ་ཏུ་དགའ་བའི་རྡོ་རྗེའི་ཚིག་གིས་ཡིད་ལ་འདོད་པའི་ལུང་བསྒོ་བ་བཅོམ་ལྡན་འདས་རྡོ་རྗེ་སེམས་དཔའི་སྦྱོར་བ་བྱས་ཏེ། དེས་ཀྱང་འདའ་བར་མཛད་པར་མི་སྤྱོད་ན། རྒྱུ་བ་དང་མི་རྒྱུ་བ་གཞན་དག་གིས་ལྟ་སྨོས་ཅི་དགོས། འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་
སེམས་དཔའི་སྦྱོར་པ་བྱས་ལ་རྒྱུ་བ་དང་མི་རྒྱུ་བའི་དངོས་པོ་ཐམས་ཅད་ཀྱི་རང་བཞིན་རང་གི་ངོ་བོར་བསམས་ཏེ། གར་དང་ཧཱུཾ་གི་གླུའི་བཟླས་བརྗོད་བྱས་ཏེ། དེ་ལྟ་བུས་ནི་རྒྱུ་བ་དང་མི་རྒྱུ་བ་ཐམས་ཅད་རྗེས་སུ་ཆགས་པར་འགྱུར་རོ། །དེ་བཞིན་དུ་གར་དང་རྡོ་རྗེའི་ལྕགས་ཀྱུས་ངེས་པར་བསྡུས་པའི་མཛུབ་མོ་དང་བོད་པའི་ཚུལ་གྱིས་ཡི་གེ་ཧཱུཾ་གི་གླུས་བཟླས་བརྗོད་བྱས་ཏེ། དེ་ལྟ་བུས་ནི་དངོས་པོ་ཐམས་ཅད་འགུགས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་གར་བྱེད་ཅིང་བསྒྲུབ་པར་བྱ་བ་དང༌། མཆུ་སྤྲད་པའི་བསམ་པས་མ་མཆུའི་ནང་རོལ་སོས་བཟུང་བར་བྱས་ཏེ། དེ་ལྟ་བུས་ནི་ཐམས་ཅད་དབང་དུ་བྱས་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་རང་གི་དབང་པོ་གཡོ་བའི་ཚུལ་གྱིས་ཡི་གེ་ཧཱུཾ་གི་གླུ་ཟློས་ཤིང་བསྒྲུབ་པར་བྱ་བའི་གནོད་སྦྱིན་མོ་ལ་སོགས་པ་དང་ལྷན་ཅིག་ཡང་དག་སྤྱང་བར་བསྒོམ་པར་བྱས་ཏེ། དེ་ལྟ་བུས་ནི་ཐམས་ཅད་དང་རྩེ་བར་འགྱུར་རོ། དེ་བཞིན་དུ་ཐམས་ཅད་བྱས་ལ། གར་བྱེད་ཅིང་རྡོ་རྗེ་སེམས་དཔའ་ལ་སོགས་པ་དངོས་པོ་ཐམས་ཅད་ལ་ཡིད་ལ་མངོན་པར་འདོད་པའི་ལུང་བསྒོ་བའི་བསམ་པས་ཧཱུཾ་གི་གླུའི་བཟླས་བརྗོད་བྱ་སྟེ། དེ་ལྟ་བུས་ནི་ཐམས་ཅད་ལས་ལ་ངེས་པར་སྦྱར་བར་འགྱུར་རོ། །ལྷ་ཐམས་ཅད་དབབ་པ་དང༌། ཀླུ་ཐམས་ཅད་དབང་དུ་བྱ་བ་དང༌། གནོད་སྦྱིན་དང༌། འབྱུང་པོ་དང༌། མ་མོ་ཐམས་ཅད་ལས་ཐམས་ཅད་ལ་ངེས་པར་སྦྱར་བ་ལ་ནི། རྡོ་རྗེ་གར་གྱི་སྐུའི་མཆོག་གིས་སོ་ཞེས་བྱ་བ་ནི་དེ་ལ་རྡོ་རྗེ་གར་གྱི་སྐུའི་མཆོག་འདི་ཡིན་ཏེ། རྡོ་རྗེ་ཐལ་མོའམ་མཐེ་བོང་གཉིས་སེམས་དཔའི་སྐྱིལ་མོ་ཀྲུང་དུ་བྱས་ལ་མཛུབ་མོ་གཉིས་བསྒྲེང་བ་ནི། བཅོམ་ལྡན་འདས་རྡོ་རྗེ་སེམས་དཔའ་སྐུའི་མཆོག་སྟེ་འདི་གཟུང་བར་སྐད་ཅིག་གིས་བཅོམ་ལྡན་འདས་དགོངས་ཤིང་བྱིན་གྱིས་བརླབ་པར་མཛད་པའི་ཕྱིར་གཟུང་བ་དང༌། མཆོད་པ་དང༌། སྒྲུབ་པར་འགྱུར་ཞིང་དངོས་གྲུབ་ཐམས་ཅད་ལ་ཡང་སྒྲུབ་པའི་ཐབས་སུ་དགོངས་པ་ཡིན་ནོ། །སྤྱི་བོར་བཞག་ནས་སྟེང་ནས་ཡོངས་སུ་དབབ་པར་བྱ་བ་དང༌། ས་ལ་བཞག་ནས་ཁྲོ་གཉེར་གྱིས་གདེག་པ་
དང། གནོད་སྦྱིན་གྱི་གཟུགས་བརྙན་བྱས་ནས་དེའི་སྙིང་གར་བཞག་ན་མངག་བཞུགས་པར་འགྱུར་རོ། །དབང་ཕྱུག་ཆེན་པོའི་གནས་སུ་ཁྲོས་པས་བཟླ་བ་དང༌། མ་མོའི་གནས་སུ་བཅིངས་ཏེ་བྷྱོ་ཞེས་བྱ་བ་དང་སྦྱར་ནས་མ་མོ་ཐམས་ཅད་དབང་དུ་འགྱུར་རོ། །རྩེ་བ་ལ་སོགས་པའི་བསྒོ་བ་ཐམས་ཅད་བྱེད་པར་འགྱུར་རོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཐལ་མོ་བཅིངས་ཏེ། མཐེ་བོང་གཡོན་པའི་སྟེང་དུ་མཐེ་བོ་གཡས་པ་སེམས་དཔའི་སྐྱིལ་མོ་ཀྲུང་གི་ཚུལ་དུ་བཞག་ལ། མཛུབ་མོ་གཉིས་གཞིབས་ཏེ་སོར་མོ་སྦྱར་བ་འདི་ནི། དཔལ་རྡོ་རྗེ་སེམས་དཔའི་སྐུའི་མཆོག་ཅེས་བྱ་བ་ནི་ཕྱག་རྒྱ་འདི་ཡིན་ཏེ། འདི་བཅིངས་ལ་སྤྱི་བོར་བཞག་ནས་སྟེང་གི་ཕྱོགས་ནས་ལྷ་ཐམས་ཅད་དབབ་པའི་བསམ་པས་གཡས་ལོགས་ནས་ཐུར་དུ་འབབ་པར་བྱས་ཏེ། དེ་ལྟ་བུས་ནི་ལྷ་ཐམས་ཅད་དབབ་པར་བྱས་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་རྡོ་རྗེ་སྐུའི་མཆོག་བཅིངས་ཏེ་ས་ལ་བཞག་ན་ཀླུ་ཐམས་ཅད་དབང་དུ་བྱ་བའི་བསམ་པས་ཁྲོ་གཉེར་བསྡུས་ལ་བཏེག་ན་ཀླུ་ཐམས་ཅད་དབང་དུ་བྱེད་དོ། །དེ་བཞིན་དུ་ཐམས་ཅད་བྱས་ལ་གནོད་སྦྱིན་གྱི་གཟུགས་བརྙན་བྲིས་ཏེ། རྡོ་རྗེ་སྐུའི་མཆོག་དེའི་སྙིང་གར་གཞག་པར་བྱས་ཏེ། དེ་ལྟ་བུས་ནི་མངག་གཞུག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། དབང་ཕྱུག་ཆེན་པོའི་གནས་སུ་ཁྲོས་པའི་སྐུའི་མཆོག་བཅིངས་ལ་བཟླས་བརྗོད་བྱས་ན་འབྱུང་པོ་ཐམས་ཅད་མངག་གཞུག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། བདག་ཉིད་དཔལ་ཧེ་རུ་ཀའི་སྐུར་བསམས་ལ་རྡོ་རྗེ་སྐུའི་མཆོག་བཅིངས་ཏེ། བྷྱོ་ཞེས་བྱ་བ་བཟླས་ནས་མ་མོ་ཐམས་ཅད་གཡོག་མོར་འགྱུར་ཞིང་རྩེ་ཞིང་རོལ་པ་ལ་སོགས་པའི་བསྒོ་བའི་ལས་ཐམས་ཅད་བྱེད་པར་འགྱུར་རོ། །རྣམ་ཐོས་སྲས་མནན་ནས་དཔལ་དྲང་བ་དང༌། ལྷའི་བུ་མོ་ཐམས་ཅད་དབྲོག་པ་དང༌། ལྷ་དང་ལྷ་མ་ཡིན་གྱི་བུད་མེད་ཐམས་ཅད་རྩེ་བ་དང༌། འཇིག་རྟེན་གསུམ་པོ་མ་ལུས་པ་ལས་རྒྱལ་བ་དང༌། འདོད་པའི་དབང་ཕྱུག་ཐམས་ཅད་དབྲོག་པ་ལ་ནི་
རྡོ་རྗེ་གར་གྱི་སྐྱེས་བུ་བྱེད་པ་ཆེན་པོས་སོ་ཞེས་བྱ་བ་ལ་དེ་ནས་དེའི་མཚན་ཉིད་བཤད་པར་བྱ་སྟེ། རྡོ་རྗེ་གསོར་བའི་ཕྱག་རྒྱ་ཁྲོ་བ་དང་བཅས་པའི་བཞིན་གྱི་འཛུམ་གྱིས་ལས་བྱའོ། །འདི་ལྟ་སྟེ་ལུས་ངན་པ་རྐང་པ་གཡོན་པས་མནན་ཏེ། བསྒྲུབ་པ་དང་གཞོན་ནུ་མའི་མདུན་དུ་སྒྲུབ་བཅིང་འབར་བའི་མིག་སྦྱོར་བ་བྱ་བ་དང༌། འབག་བྲིས་ལ་བལྟ་ཞིང་བསྒྲུབ་པ་དང༌། དབང་ཕྱུག་ཆེན་པོས་རྐང་པ་གཡོན་པས་མནན་ལ་ཧཱུཾ་མཛད་དུ་སྦྱོར་བ་དང༌། ཨ་ནུ་རཱ་ག་ཡཱ་མི་ཧཱུཾ་ཧཱུཾ་ཞེས་བྱ་བས་འདོད་པའི་དབང་ང་ཕྱུག་རྡོ་རྗེའི་མདས་བསད་ལ་ཁ་སྤུབ་ཏུ་བཞག་སྟེ་རྡོ་རྗེ་གསེར་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་མེ་ལྟར་འབར་བར་བདག་ཉིད་བསམས་ཏེ། དེའི་ཕྱག་རྒྱ་ཆེན་པོ་དེས་རྡོ་རྗེ་འབར་བ་གསོར་ཞིང་ཁྲོ་བ་དང་བཅས་པས་མཛུབ་པའི་བཞིན་གྱིས་ལུས་ངན་པོའི་གཟུགས་བརྙན་རྐང་པ་གཡོན་པས་མནན་ལ་བཟླས་བརྗོད་བྱའོ། །དེ་ལྟ་བུས་ནི་དཔལ་དྲང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་གཞོན་ནུ་མའི་མདུན་དུ་ལྷའི་བུ་མོ་ཐམས་ཅད་འཕྲོག་པའི་བསམ་པས་རྡོ་རྗེ་འབར་བའི་ལྟ་བས་དགུག་ཅིང་བཟླས་ན་དེ་ལྟ་བུས་ནི་ལྷའི་བུ་མོ་ཐམས་ཅད་འཕྲོག་པར་འགྱུར་རོ། །རྩིག་པ་ལ་སོགས་པ་ལ་བུད་མེད་ཀྱི་གཟུགས་བྲིས་ལ་གནོད་སྦྱིན་མ་ལ་སོགས་པ་ལྷ་དང་ལྷ་མ་ཡིན་མ་ཡིན་པའི་མངོན་པར་འདོད་པའི་བུད་མེད་དེར་བཅུག་ལ་ཡང་དག་པར་སྦྱོར་བ་བསྒོམ་ཞིང་དེ་ལ་བལྟ་བཞིན་དུ་བཟླས་ན་དེ་ལྟ་བུས་ནི་བུད་མེད་ཐམས་ཅད་དང་རྩེ་བར་འགྱུར་རོ། །དེ་བཞིན་དུ་རྡོ་རྗེ་གསོར་ཞིང་དབང་ཕྱུག་ཆེན་པོའི་གཟུགས་བརྙན་རྐང་བ་གཡོན་པས་མནན་ལ། ཨ་ནུ་རཱ་ག་ཡཱ་མི་ཧཱུཾ་ཧཱུཾ་ཞེས་བྱ་བ་བཟླས་པ་བྱས་ན་དེ་ལྟ་བུས་ནི་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བར་འགྱུར་རོ། །རྡོ་རྗེ་མདའི་ཕྱག་རྒྱ་སྔར་བཤད་པའི་ཚུལ་གྱིས་འདོད་པའི་དབང་ཕྱུག་གི་གཟུགས་བརྙན་ལ་བསྣུན་ལ་དེ་ནས་དེ་ཁ་སྤུབ་ཏུ་བཞག་སྟེ། རྡོ་རྗེ་གསོར་ཞིང་བཟླས་པར་བྱས་ཏེ། དེ་ལྟ་བུས་ནི་དབང་ཕྱུག་ཆེན་པོ་ཐམས་ཅད་འཕྲོག་བར་འགྱུར་རོ། །མཆོད་པ་ཐམས་ཅད་གྲུབ་པ་དང༌།།
ཞེས་བྱ་བ་ནི་འདོད་ཆགས་རྡོ་རྗེ་ལ་སོགས་པའི་མཆོད་པ་ཐམས་ཅད་དེ། དེ་རྣམས་ཀྱིས་བསྒྲུབ་པ་སྐྱེད་པའོ། །ཐམས་ཅད་རྡོ་རྗེར་བྱ་བ་དང༌། །ཞེས་བྱ་བ་ནི་བདག་དང་གཞན་གྱིས་མི་ཕྱེད་པར་བྱའོ། །བདུད་ལ་སོགས་པ་གདུག་པ་ཐམས་ཅད་ནི་གཞན་ལ་གནོད་པར་བྱེད་པར་ཉེ་བར་ཞུགས་པ་རྣམས་སོ། །དེ་རྣམས་རབ་ཏུ་གཞོམ་པ་ནི་ཤིན་ཏུ་འདུལ་བའོ། །ཕྱག་རྒྱ་ཐམས་ཅད་བཅིངས་པ་ནི་ཕྱག་རྒྱ་ཆེན་པོ་ལ་སོགས་པ་ཕྱག་རྒྱ་ཐམས་ཅད་ངེས་པར་བཅིངས་པའོ། །དངོས་གྲུབ་ཀྱི་མཆོག་ལ་སོགས་པ་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་རྒྱུན་ནི་དེའི་ལས་ཀྱི་རབ་འབྱམ་སྟེ། དེ་མྱུར་དུ་བསྒྲུབ་པར་བྱ་བ་ལ་ནི་རྫོགས་པར་བྱ་བའོ། །འདི་དག་ཐམས་ཅད་ཇི་ལྟར་གྲུབ་པར་འགྱུར་ཞེ་ན། རྡོ་རྗེ་གར་གྱི་དོན་ཡོད་པའི་ཐོགས་པ་མེད་པ་ལ་མྱུར་བའི་ལས་སྣ་ཚོགས་ཀྱི་དངོས་གྲུབ་དམ་པས་སོ་ཞེས་གསུངས་སོ།། །དེ་ནས་འདིའི་མཚན་ཉིད་ནི་བཤད་པར་བྱ་སྟེ། རྡོ་རྗེ་གསང་བའི་མཆོད་པ་རྣམས་ནི་བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ཅེས་བྱའོ། །རྡོ་རྗེ་ཁུ་ཚུར་གཉིས་ཀྱིས་གོ་ཆའི་རྣམ་པར་སྤྱད་ལ་སྤྱི་བོར་དབང་བསྐུར་བ་གཉིས་བཞག་ལ་དོས་གཉིས་སུ་ཕྲེང་བ་གཉིས་ཀྱི་རྣམ་པར་བྱས་ལ་དེ་བཞིན་དུ་དར་དཔྱངས་བཅིངས་པ་དང༌། གཡོན་དུ་རྡོ་རྗེ་མདའ་འཕང་བ་དང༌། རྡོ་རྗེ་སྙེམས་མ་དང༌། ཕྱག་རྒྱ་ཆེན་པོའོ། །འདི་སྐད་སྟོན་པ་ཡིན་ཏེ། དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ། དང་པོའི་རྡོ་རྗེ་བཅིངས་ཏེ། རྡོ་རྗེ་མཚོན་ཆ་མ་ལ་སོགས་པ་མཆོད་པ་བཅུ་གཉིས་བསྐྱེད་ལ་དེ་རྣམས་ཀྱིས་དཔལ་རྡོ་རྗེ་སེམས་དཔའ་ལ་སོགས་པ་ཡིད་ཀྱིས་མཆོད་པར་བྱས་ཏེ། དེ་ལྟ་བུས་ནི་ཐམས་ཅད་གྲུབ་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཁུ་ཚུར་བཅིངས་ཏེ། སྙིང་ག་དང༌། ལྐོག་མ་དང། རྒྱབ་དང༌། ཡང་སྙིང་ག་དང༌། དེ་ནས་ནུ་མའི་བར་དང༌། དེ་ནས་སྙིང་ག་དང༌། ལྐོག་མ་དང༌། ལྟག་པར་དེ་ནས་དབང་བསྐུར་བའི་གནས་སུ་མདུད་པའི་ཚུལ་གྱིས་གོ་ཆ་བགོ་བ་བྱས་ལ་སྤྱི་བོ་དང་དབང་བསྐུར་བའི་གནས་སུ་མདུད་པ་བྱ་བའི་ཚུལ་དང༌། གཡས་དང་གཡོན་གྱི་
མགོ་བོའི་ལོགས་སུ་མདུད་པའི་ཚུལ་དུ་བྱས་ལ་དར་དཔྱངས་བཅིངས་པའི་ཚུལ་དུ་བྱས་ཏེ། འདིས་ནི་ཐམས་ཅད་རྡོ་རྗེར་བྱས་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་གྱི་གོ་ཆ་ཐམས་ཅད་བྱས་ལ་རྡོ་རྗེ་ཁུ་ཚུར་གཉིས་བཅིངས་ཏེ། གཡོན་ལོགས་སུ་མདའ་འཕང་བའི་ཚུལ་དུ་བྱ་ཞིང༌། རྡོ་རྗེ་མདས་ཀྱང་གདུག་པ་ཐམས་ཅད་འཇོམས་པར་བྱེད་པར་བསམ་པར་བྱས་ཏེ། དེ་ལྟ་བུས་ནི་བདུད་ལ་སོགས་པའི་གདུག་པ་ཐམས་ཅད་རབ་ཏུ་འཇོམས་པར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་རྡོ་རྗེ་བསྙེམས་པ་བཅིངས་ནས་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་མ་ལུས་བར་བཅིང་བར་བསམ་པར་བྱས་ཏེ། དེ་ལྟ་བུས་ནི་ཕྱག་རྒྱ་ཐམས་ཅད་ངེས་པར་འཆིང་བར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་སྦྱོར་བ་བྱས་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིང་བར་བྱའོ། །འདིས་ནི་དངོས་གྲུབ་དམ་པ་མ་ལུས་ཤིང་ལུས་པ་མེད་པ་ཡིད་ལ་མངོན་པར་འདོད་པ་གྲུབ་པར་འགྱུར་རོ། །གར་ལས་བྱུང་བའི་ཕྱག་རྒྱ་བརྒྱ་ཕྲག་གཉིས་པ་འདི་རྫོགས་པ་སྟེ། ལས་ཉིས་བརྒྱ་སྒྲུབ་པར་བྱེད་པའི་ཕྱག་རྒྱ་ཡི་གེ་ཧཱུཾ་ཟློས་ཤིང་བཅིང་བར་བྱའོ། །ཨ་ནུ་རཱ་ག་ཡཱ་མི་ཧཱུཾ་ཞེས་ཟློས་ཤིང་ལས་ལ་ངེས་པར་སྦྱར་བར་བྱའོ། །དེ་ལྟར་ལས་ཉིས་བརྒྱ་བསྒྲུབ་པར་བྱ་བའི་ཕྱིར། ཕྱག་རྒྱ་ཉིས་བརྒྱའི་མཚན་ཉིད་གསུངས་ནས་ད་ནི་ཕྱག་རྒྱ་ཆེན་པོ་བཅིང་བ་དེ་རྣམས་ཀྱི་སྙིང་པོ་དང༌། བཟླས་པའི་སྙིང་པོ་གསུངས་པ་ནི་དེ་ནས་ཕྱག་རྒྱ་ཐམས་ཅད་བསྒྲུབ་པའི་ཆོ་ག་རྒྱས་པའི་རྒྱུད་དོ་ཞེས་བྱ་བ་ཡིན་ཏེ། དེ་ནས་ཞེས་བྱ་བའི་སྒྲ་ནི་གནས་སྐབས་སོ། །ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ཕྱག་རྒྱ་ཐམས་ཅད་དེ། །ཇི་སྐད་དུ་བཤད་པའི་ལས་ཐམས་ཅད་སྒྲུབ་པར་བྱེད་པ་རྣམས་སོ། །དེ་རྣམས་ཀྱི་སྒྲུབ་པ་ནི་རང་དབང་དུ་བྱ་བའོ། །དེའི་ཆོ་ག་ནི་ཡི་གེ་ཧཱུཾ་བཟླས་ནས་ལས་ཐམས་ཅད་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་བཅིང་བའོ། །དེའི་རྒྱས་པ་ནི་དེའི་རྒྱུན་ནོ། །ཉིན་རེ་ཞེས་བྱ་བ་ནི་ཉིན་ཞག་རེ་རེ་ཞིང་ངོ༌། །དང་པོར་ཞེས་བྱ་བ་ནི་ལས་རྣམས་
ཀྱི་ཐོག་མར་རོ། །ལན་ཅིག་ཅེས་བྱ་བ་ནི་ལན་ཅིག་གཅིག་གོ །ཕྱག་རྒྱ་ཆེན་པོ་རབ་གྲུབ་བྱ། །ཞེས་བྱ་བ་ནི་རྗེས་སུ་མཉེས་པར་བྱེད་པ་ལ་སོགས་པ་གྲུབ་པར་བྱེད་པའི་ཇི་སྐད་དུ་བཤད་པའི་མཚན་ཉིད་ཅན་གྱི་ཕྱག་རྒྱ་ནི་ཕྱག་རྒྱ་ཆེན་པོ་དེ་བསྒྲུབ་པར་བྱའོ། །གང་གིས་དེ་བསྒྲུབ་པར་བྱ་ཞེ་ན། ལན་ཅིག་བཟླས་པ་ཞེས་བྱ་བ་གསུངས་ཏེ། ལན་ཅིག་བཟླས་པ་དེས་སོ། །དེ་ནས་ཅི་ཞིག་ལན་ཅིག་བཟླས་ཤེ་ན། སྙིང་པོ་མཆོག་ཅེས་བྱ་བ་ལ་གསུངས་ཏེ་སྙིང་པོ་བཟང་པོ་ནི་སྙིང་པོ་མཆོག་སྟེ། ཡི་གེ་ཧཱུཾ་དང༌། སྙིང་པོ་མཆོག་མངོན་པར་འདོད་པའི་དངོས་གྲུབ་སྩོལ་བར་བྱེད་པའི་ཕྱག་རྒྱ་དེ་ལ་ལན་ཅིག་མངོན་པར་བསྔགས་ཤིང་ལན་ཅིག་བཟླས་པའི་སྙིང་པོ་མཆོག་གིས་ཕྱག་རྒྱ་ཆེན་པོ་རབ་ཏུ་བསྒྲུབ་པར་བྱའོ། །རྒྱུ་ཅི་ཞིག་གི་ཕྱིར་ཞེ་ན། གང་གི་ཕྱིར། ཕྱག་རྒྱ་ཐམས་ཅད་སྒྲུབ་བྱེད། །ཅེས་བྱ་བ་གསུངས་ཏེ། ཇི་སྐད་དུ་བཤད་པའི་ལས་སྒྲུབ་པར་བྱེད་པའི་ཕྱག་རྒྱ་དེ་རྣམས་ནི་ཤིན་ཏུ་བསྒྲུབ་པ་ཡིན་པས་ན། ཕྱག་རྒྱ་ཐམས་ཅད་རབ་གྲུབ་བྱེད། །ཅེས་བྱ་བ་སྟེ། གང་གི་ཕྱིར་ཧཱུཾ་གི་གཟུགས་ཅན་འདི་ནི་སྙིང་པོ་ཡིན་ནོ། །དེ་བས་ན་ལས་ཐམས་ཅད་སྒྲུབ་པར་བྱེད་པའི་ཕྱག་རྒྱ་ལ་ཧཱུཾ་ཟློས་ཤིང་བཅིང་བར་བྱའོ། དེ་ཡི་རྗེས་ལ་ཉི་སྙིང་པོ། །ལས་རྣམས་ཀུན་ལ་ངེས་སྦྱོར་བས། །ཞེས་བྱ་བ་ནི་དེ་ལྟར་ཡི་གེ་ཧཱུཾ་ལན་ཅིག་བཟླས་ལ། མངོན་པར་འདོད་པའི་དངོས་གྲུབ་སྒྲུབ་པར་བྱེད་པའི་ལས་ཀྱི་ཕྱག་རྒྱ་བཅིངས་ནས། དེའི་རྗེས་ལ་ཨ་ནུ་རཱ་ག་ཡཱ་མི་ཧཱུཾ་ཞེས་བྱ་བ་ཉེ་བའི་སྙིང་པོ་དང་བཅས་པའི་ཧཱུཾ་བཟླས་པར་བྱ་སྟེ། དེ་ལྟ་བུས་ནི་རྗེས་སུ་མཉེས་པར་བྱ་བ་ལ་སོགས་པ་ལས་ཀྱི་དངོས་གྲུབ་ཐམས་ཅད་ལ་ངེས་པར་སྦྱོར་བར་བྱས་པར་འགྱུར་རོ། །དེ་ལྟར་བྱས་པས་ཇི་ལྟར་འགྱུར་ཞེ་ན། དོན་ཡོད་གྲུབ་པས་ལས་རྣམས་ནི། །ཀུན་ལ་ཤིན་ཏུ་གྲུབ་པར་འགྱུར། །ཞེས་བྱ་བ་གསུངས་ཏེ། དོན་ཡོད་པར་གྲུབ་པར་འགྱུར་བས་ཕྱག་རྒྱའི་ལས་ཀུན་ལ་ཞེས་པ་རྗེས་སུ་མཉེས་པར་བྱ་བ་ལ་སོགས་པ་ཐམས་ཅད་ཤིན་ཏུ་ཞེས་བྱ་བ་ལྷག་པར་གྲུབ་པར་འགྱུར་རོ། །ཕྱག་རྒྱ་ཐམས་ཅད་བདག་བྱིན་བརླབ། །ཅེས་བྱ་བ་ལས་ཐམས་ཅད་འགྲུབ་པར་བྱེད་པའི་ཕྱག་རྒྱ་རྣམས་ནི་ཕྱག་རྒྱ་རྣམས་ནི་ཕྱག་རྒྱ་ཐམས་ཅད་དེ། དེ་རྣམས་ཀྱིས་
ལེགས་པར་བྱིན་གྱིས་རློབ་པ་ནི་ཕྱག་རྒྱ་ཐམས་ཅད་རབ་ཏུ་བྱིན་གྱིས་རློབ་པ་སྟེ། དཔལ་རྡོ་རྗེ་སེམས་དཔའི་སྐུ་དང༌། གསུང་དང༌། ཐུགས་རྡོ་རྗེའི་ནུས་པ་གདུལ་བྱ་རྣམས་ཀྱི་རྒྱུད་ལ་གྲུབ་པའོ། །དེའི་དོན་གྱིས་ཕྱག་རྒྱ་ནི་ཇི་སྐད་དུ་བཤད་པའི་མཚན་ཉིད་ཅན་ཡིན་ནོ། །ཕྱག་རྒྱ་རྡོ་རྗེ་ཞེས་བྱ་བ་ནི་དཔལ་རྡོ་རྗེ་སེམས་དཔའི་ཕྱག་རྒྱ་འདིའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། ཕྱག་རྒྱ་ཐམས་ཅད་མཆོག་ཏུ་བྱིན་གྱིས་རློབ་པའི་དོན་དེ་ཉིད་དུའོ། །དེ་ཅིའི་ཕྱིར་ཞེ་ན། གང་གི་ཕྱིར། དཀྱིལ་འཁོར་དག་ཀྱང་མ་མཐོང་བའམ། མ་བཤད་པ་ལའང་རབ་གྲུབ་འགྱུར། །ཞེས་བྱ་བ་གསུངས་ཏེ། དཀྱིལ་འཁོར་དུ་མ་ཞུགས་པ་ལ་མ་བཤད་པ་ཡང་ཇི་སྐད་དུ་བཤད་པའི་མཚན་ཉིད་དུ་གྲུབ་པར་འགྱུར་རུ་ཞེས་བྱའོ། །རྟོག་པ་འདིར་ནི་ཞེས་བྱ་བ་རྒྱུད་འདིས་རོ། །འཇིགས་པ་ཡོད་མི་ནེ་ཞེས་བྱ་བ་ནི་དམ་ཚིག་ལས་ཉམས་པ་མེད་པའོ། །ཕྱག་རྒྱ་སྦྱིན་པ་ནི་རྗེས་སུ་མཉེས་པ་ལ་སོགས་པའི་ལས་སྒྲུབ་པར་ཕྱག་རྒྱའི་ཆེ་བ་ཉིད་བསྟན་པར་འདོད་པར་བྱ་བའི་ཕྱིར་གདུལ་བྱ་རྣམས་ལ་རབ་ཏུ་སྟོན་པར་བཤད་ཅིང་འཁོར་ལོ་མེད་པས་ཏེ། དཀྱིལ་འཁོར་དུ་མ་ཞུགས་པ་རྣམས་ལའོ། །ཅིའི་ཕྱིར་འཁོར་ལོ་མེད་པ་རྣམས་ལ་ཕྱག་རྒྱ་བསྟན་ན་རྟོག་པ་འདི་ལ་འཇིགས་ཤིང་ཉམས་པ་མེད་ཅེ་ན། གང་གི་ཕྱིར་བདག་ལ་བྱིན་གྱིས་རློབ་པས། རང་སྲས་རྒྱུར་ནི་འགྱུར་བ་ཡིན། །ཞེས་བྱ་བ་གསུངས་ཏེ། གང་གི་ཕྱིར་དཀྱིལ་འཁོར་དུ་མ་ཞུགས་པ་དེ་རྣམས་ཀྱིས་ཀྱང་ཕྱག་རྒྱ་བཅིངས་ཏེ། བཟླས་ན་འདི་སྐད་བཤད་པའི་བདག་ལ་བྱིན་གྱིས་བརླབས་པས། དེ་བཞིན་དུ་གཤེགས་པ་ཉིད་ཀྱི་སྲས་བྱང་ཆུབ་སེམས་དཔའ་རྣམས་ལ་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་དངོས་གྲུབ་ཀྱི་བག་ཆགས་བསྐྱེད་པར་འགྱུར་རོ། བསམ་པ་ཤེས་ནས་སྦྱིན་པར་བྱ། །ཞེས་བྱ་བ་ཕྱག་རྒྱའི་ཡུལ་ལ་གདུལ་བྱ་རྣམས་ཀྱི་སེམས་དང་བ་ཉིད་དུ་ཤེས་ན་ཕྱག་རྒྱ་སྦྱིན་པར་བྱའོ། །ཇི་ལྟ་བུ་ཞེས་ན། སྡིག་པ་ཆེན་པོ་བྱེད་པའང་ཞེས་བྱ་བ་གསུངས་ཏེ། མཚམས་མེད་པའི་ལས་ནི་སྡིག་པ་ཆེན་པོ་སྟེ། གང་གིས་དེ་བྱས་པ ་དེ་ནི་སྡིག་པ་ཆེན་པོ་བྱེད་པའོ། །སྡིག་པ་ཆེན་པོ་བྱེད་པ་དེ་རྣམས་
ལ་འདྲ་ཞེས་བྱ་བའི་སྒྲས་ནི་གཞན་དག་ལ་ནི་ཤིན་ཏུ་འང་སྦྱིན་པར་བྱའོ། །ཇི་ལྟ་བུ་ཞེ་ན་ཞེས་སྟོན་ཏོ། །དེ་ལྟ་བུ་ལ་ནི་སྙིང་པོ་བྱིན་ཡང་དགོས་པ་ཅི་འང་མེད་དོ་ཞེས་གཞན་དག་རྟོགས་ན། དེའི་ཕྱིར་འདི་དག་བཅིངས་པ་ཙམ་གྱིས་དེ་དག་ཅེས་བྱ་བ་གསུངས་ཏེ། ཇི་སྐད་དུ་བཤད་པའི་ལས་གྲུབ་པའི་ཕྱག་རྒྱ་འདི་དག་སྡིག་པ་ཆེན་པོ་བྱེད་པ་རྣམས་ཀྱིས་ཀྱང་བཅིངས་པ་ཙམ་གྱིས་སྡིག་པ་ཆེན་པོ་བྱེད་པའི་སེམས་ཅན་དེ་ནི་དེ་དག་རྣམ་པར་སྦྱོང་བར་བྱེད་ཅིང་གཙང་བ་དང་དག་པར་བྱེད་པ་ཡིན་ནོ། །གང་གི་ཕྱིར་སྡིག་པ་བྱེད་པས་ཀྱང༌། འདིའི་བཅིངས་པ་ཙམ་གྱིས་དག་པར་བྱེད་པ་དེས་བྱིན་ཞིང་སྩལ་ན། དངོས་གྲུབ་ཐམས་ཅད་འགྲུབ་པར་འགྱུར་བས་ན་དགོས་པ་ཡོད་པ་ཉིད་ཡིན་ནོ། །མཆོག་དང་པོ་ཞེས་བྱ་བ་ནི་བཤད་ཟིན་ཏོ། །རྟོགས་པ་ཡང་ཡིན་ལ་ཆེན་པོ་ཡང་ཡིན་པས་ན་རྟོག་པ་ཆེན་པོའོ། །དེ་ཉིད་རྟོག་པ་ཐམས་ཅད་ལས་མཆོག་ཏུ་གྱུར་པས་མཛད་ཤིང་འབར་བས་ན་རྒྱལ་པོའོ། །དེའི་བདེ་བ་ཆེན་པོ་ནི་ཐར་པ་ཆེན་པོའོ། །དེ་ཉིད་ནི་མི་ཕྱེད་པས་ན་རྡོ་རྗེ་ལྟ་བུ་ཡིན་པས་ན་རྡོ་རྗེའོ། །མངོན་པར་འདོད་པའི་དངོས་གྲུབ་ཐམས་ཅད་བསྐྱེད་པ་ཉིད་ཀྱིས་འབྲས་བུ་དང་བཅས་པས་ན་དེ་ཉིད་དོན་ཡོད་པའོ། །དེའི་རྒྱུ་མཐུན་པ་ལས་བྱུང་བ་དཔལ་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་ལ་སོགས་པའི་དེ་ཁོ་ན་ཉིད་ནི་དམ་ཚིག་གོ །དེའི་ཆོ་ག་རྒྱས་པ་ནི་སྒྲུབ་པ་དང་བསྒྲུབ་པར་བྱ་བའི་རྒྱུན་ནི་དེ་སྟོན་པར་བྱེད་པའི་སྒྲའི་ཚོགས་ནི་རྟོག་པ་ལས་བྱུང་བའི་ཕྱིར་རྟོག་པ་ཞེས་བྱའོ། །དཔལ་མཆོག་དང་པོའོ་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པའི་རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་ལས། དཔལ་རྡོ་རྗེ་སེམས་དཔའི་བདེ་བ་ཆེན་པོ་རྡོ་རྗེ་གསང་བའི་དཀྱིལ་འཁོར་ཆེན་པོའི་བཤད་པ་རྫོགས་སོ།། །།དེ་ལྟར་འདོད་ཆགས་ཀྱིས་འདོད་ཆགས་སྤང་བར་བྱ་བའི་ཕྱིར་དཔལ་རྡོ་རྗེ་སེམས་དཔའི་དཀྱིལ་འཁོར་གསུངས་ནས། ད་ནི་རང་བཞིན་བཟང་བའི་སེམས་ཅན་རྣམས་རྗེས་སུ་གཟུང་བའི་ཕྱིར་དེ་བཞིན་གཤེགས་པའི་རྟོག་པ་གསུངས་པ་ནི། དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་
བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཉིད་གཟུང་ངོ༌། །སྟོན་པ་ཞེས་བྱ་བ་ནི་བྱང་ཆུབ་ཀྱི་སེམས་ལ་སོགས་པ་རྟོགས་པར་བྱ་བའི་ཕྱིར་སེམས་ཅན་རྣམས་ཀྱི་དོན་མཛད་ཅིང༌། སྟོན་པས་རང་གི་བཀའ་བསྒོ་བ་ལ་དེས་པར་སྦྱོར་བར་མཛད་པས་ན་སྟོན་པའོ། །རྡོ་རྗེ་འཛིན་པ་ནི་རྡོ་རྗེ་སེམས་དཔའོ། །འབྱིན་པ་ནི་སངས་རྒྱས་ལ་སོགས་པའི་སྦྲུལ་པ་མཛད་པའོ། །བྱེད་པ་ཞེས་བྱ་བ་ནི་འདུལ་བའི་སྐྱེ་བོ་རྣམས་དཔལ་རྡོ་རྗེ་སེམས་དཔའ་ལ་སོགས་པའི་ངོ་བོར་མཛད་པའོ། །བདེ་བ་ཆེ་ཞེས་བྱ་བ་ནི་བཤད་ཟིན་ཏོ། །བདེ་བ་ཆེན་པོ་རབ་བརྟན་ཕྱིར། །ཞེས་བྱ་བ་ནི། རབ་ཏུ་དགའ་བ་ལ་སོགས་པའི་ས་ཐོབ་པའི་སེམས་ཅན་རྣམས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བའི་བརྟན་པའི་དོན་ཏོ། །སེམས་ཅན་ཐམས་ཅད་རྣམ་དག་ཕྱིར། །ཞེས་བྱ་བ་ནི་ཁམས་གསུམ་པར་གཏོགས་པའི་སེམས་ཅན་གྱི་ཁམས་ཐམས་ཅད་སངས་རྒྱས་ཉིད་དུ་རྟོགས་པ་ནི་སེམས་ཅན་ཐམས་ཅད་རྣམ་པར་དག་པ་སྟེ། སེམས་ཅན་ཐམས་ཅད་རྣམ་པར་དག་པའི་ཕྱིར་དེ་བཞིན་གཤེགས་པའི་རིགས་འབྱུང་ངོ་ཞེས་བྱ་བར་སྦྱར་རོ། །ཅི་ཞིག་མཛད་ནས་དེ་བཞིན་གཤེགས་པའི་རིགས་སྦྲུལ་པར་མཛད་ཅེ་ན། ཀུན་གྱི་བདག་ཉིད་ལ་ཞུགས་ཏེ། །ཞེས་བྱ་བ་གསུངས་ཏེ། ཐམས་ཅད་ཀྱི་བདག་ཉིད་ནི་ཀུན་གྱི་བདག་ཉིད་དེ་བཅོམ་ལྡན་འདས་རྣམ་པར་སྣང་མཛད་དོ། །དེ་ཡང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་རང་བཞིན་ཞེས་བྱ་བའི་ཐ་ཚིག་གོ །ཀུན་གྱི་བདག་ཉིད་དེར་ཞུགས་པ་ནི་ཞུགས་པར་མཛད་པའོ། །རྡོ་རྗེ་ཞེས་བྱ་བའི་སྒྲ་ནི་ངེས་པར་བཟུང་བ་སྟེ། དེ་ཉིད་རབ་ཏུ་ཞུགས་པའོ། །ཀུན་གྱི་བདག་ཉིད་ཀྱི་ཁྱད་པར་ཇི་ལྟ་བུ་ཞེ་ན། ཁམས་གསུམ་དང་མཉམ་ཟད་པ་མེད། །ཅེས་བྱ་བ་གསུངས་ཏེ། ནམ་མཁའི་ཁམས་ཐམས་ཅད་ན་རྟག་ཏུ་གནས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་ཁམས་ནི་ཐམས་ཅད་ཀུན་ནོ། །ཁམས་དེ་དག་
ཐམས་ཅད་མཉམ་ཞིང་མཚུངས་པས་ན་ཁམས་ཀུན་དང་མཉམ་མོ། །དེ་ཉིད་ཀྱིས་མི་ཟད་པ་ཡིན་པས་ན། ཁམས་ཀུན་དང་མཉམ་ཟད་པ་མེད། །ཅེས་བྱའོ། །ཁམས་ཀུན་དང་མཉམ་པ་ཡང་ཡིན་ལ་ཟད་པ་མེད་པ་ཡང་ཡིན་པས། ཁམས་ཀུན་དང་མཉམ་ཟད་བ་མེད། །ཅེས་བྱ་སྟེ། ཁམས་ཀུན་དང་མཉམ་ཞིང་ཟད་པ་མེད་པའི་རྣམ་པར་སྣང་མཛད་དེ་ལ་ཞུགས་ནས། ཀུན་གྱི་བདག་ཉིད་དེ་མཉམ་ཞིང་མི་མཉམ་པ་མེད་པར་སྤྲོ་ཞིང་ཁྱབ་པར་མཛད་པ་ཡང་དག་པར་གྲུབ་པ་སྟེ། ལེགས་པར་གྲུབ་པའམ། །མ་ཉམས་པར་གྲུབ་པ་མི་འབྱུང་བའོ། །དེ་ཡང་ལོངས་སྤྱོད་རྫོགས་པའི་སྐུའི་རང་བཞིན་རྣམ་པར་སྣང་མཛད་ཀྱི་སྐུ་ལ་ཁྱབ་ཅིང་བཅོམ་ལྡན་འདས་རྣམ་པར་སྣང་མཛད་དང་ལྷན་ཅིག་ཏུ་གྱུར་ཏོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པའི་རིགས་ཕྱུང་ངོ་ཞེས་བྱ་བ་ནི་དེ་བཞིན་གཤེགས་པ་རྣམས་ཀྱི་རིགས་གང་ཡིན་པ་དེ་བསྐྱེད་པར་འགྱུར་རོ། །ཞིང་ནི་ཐམས་ཅད་མཐའ་ཡས་པ། །ཞེས་བྱ་བ་ནི་སངས་རྒྱས་ཀྱི་ཞིང་ནམ་མཁའི་ཁམས་ཐམས་ཅད་དང་འདྲ་བར་མཐའ་ཡས་ཤིང་རྒྱ་ཆེ་བའོ། །དེ་ཉིད་ནི་འཇིག་རྟེན་ཐམས་ཅད་དོ། །ཁམས་བཅས་པ་ཞེས་བྱ་བ་ནི་སངས་རྒྱས་ཀྱི་ཞིང་དེ་རྣམས་ཉིད་ནས་ས་འོག་དང་ས་བླ་དང་ལྷ་ཡུལ་གྱི་རང་བཞིན་ཅན། མཐའ་ཡས་པའི་འཇིག་རྟེན་གསུམ་པོ་གང་ཡིན་པ་ནི་འཇིག་རྟེན་ཐམས་ཅད་དེ་ནི་འདོད་པ་དང་གཟུགས་དང་གཟུགས་མེད་པའི་ཁམས་ཀྱི་མཐའ་ཡས་པ་དང་ལྷན་ཅིག་ཏུ་གནས་པས་ན། འཇིག་རྟེན་ཐམས་ཅད་དང་ཁམས་ཐམས་ཅད་ཅེས་བྱའོ། །དེའི་ཚེ་སངས་རྒྱས་ཐམས་ཅད་ཀྱིས། །ཏིལ་གྱི་གོང་བུ་བཞིན་དུ་གང༌། །ཞེས་བྱ་བ་ནི། ཞིང་ཁམས་ཐམས་ཅད་དང་ཇི་སྐད་དུ་བཤད་པའི་འཇིག་རྟེན་ཐམས་ཅད་ཁམས་དང་བཅས་པ་གང་ཡིན་པ་དེ་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་རིགས་བསྐྱེད་པར་བྱ་བས་ན། དཔེར་ན་ཏིལ་གྱི་གོང་བུལ་ཏིལ་གྱི་ས་བོན་གྱིས་བར་མཚམས་མེད་པར་ཡོངས་སུ་གང་བ་དེ་བཞིན་དུ་འཇིག་རྟེན་གྱི་ཁམས་ཐམས་ཅད་རྡུལ་ཕྲ་རབ་དང་མཉམ་པའི་ཞིང་ཐམས་ཅད་དང༌། ཁམས་དང་བཅས་པའི་
འཇིག་རྟེན་ཐམས་ཅད་རྣམ་པར་སྣད་མཛད་ལ་སོགས་པའི་སངས་རྒྱས་ཐམས་ཅད་ཀྱིས་དུས་དེའི་ཚེ་མྱུར་ཞིང་རེངས་པར་ཡོངས་སུ་གང་བར་འགྱུར་རོ། །འཇིག་རྟེན་ཁམས་ནི་ཐམས་ཅད་ན། །སེམས་ཅན་ཀུན་མདུན་ཡང་དག་བཞུགས། །ཞེས་བྱ་བ་འདི་ན་སངས་རྒྱས་ཀྱི་ཞིང་མཐའ་ཡས་པ་ཡོངས་སུ་གང་བ་མཛད་པ་ནི་སངས་རྒྱས་དང་བཅས་པ་དང༌། སངས་རྒྱས་མེད་པའི་འཇིག་རྟེན་གྱི་ཁམས་ཐམས་ཅད་ན་འགྲོ་བ་དྲུག་ཏུ་གཏོགས་པའི་སེམས་ཅན་ཐམས་ཅད་ལ་རེ་རེའི་ཡང་མདུན་ན་བཞུགས་པར་སྣང་བས། སེམས་ཅན་ཀུན་མདུན་ཡང་དག་བཞུགས། །ཞེས་བྱ་བའོ། །ཅི་ཞིག་གི་དོན་དུ་ཞེ་ན། སེམས་ཅན་ཐམས་ཅད་རྣམ་དག་ཕྱིར། །ཞེས་བྱ་བ་གསུངས་ཏེ། སེམས་ཅན་ཡང་ཡིན་ལ་ཐམས་ཅད་ཀྱང་ཡིན་པས་ན་སེམས་ཅན་ཐམས་ཅད་དོ། །དེ་རྣམ་པར་དག་པ་ནི་བླ་ན་མེད་པའི་བྱང་ཆུབ་མངོན་སུམ་དུ་བྱས་པས་ཉོན་མོངས་པ་བག་ཆགས་དང་བཅས་པའི་དྲི་མ་དང་བྲལ་བ་སྟེ། དེའི་དོན་དུ་སེམས་ཅན་ཐམས་ཅད་ཀྱི་མདུན་ན་བཞུགས་སོ། །སེམས་ཅན་དེ་དག་ཐམས་ཅད་དེ་རྣམས་བཞུགས་པས་ཡང་དག་པར་འགྱུར་རམ་མི་འགྱུར་ཞེ་ན། རང་གི་ལས་ཀྱིས་དག་མ་གྱུར། །ཞེས་བྱ་བ་གསུངས་ཏེ། དམ་པའི་ཆོས་སྤོང་བ་ལ་སོགས་པའི་རང་གི་ལས་ལ་འཇུག་པ་གང་ཡིན་པས་སེམས་ཅན་དེ་དག་ཐམས་ཅད་དག་པར་མི་འགྱུར་ཞིང༌། སངས་རྒྱས་ཉིད་མངོན་སུམ་དུ་བྱས་པར་མ་གྱུར་ཏོ། །དེའི་ཚེ་ནི་དེའི་དུས་ནའོ། །དེ་རྣམས་ནི་འདུས་པར་མཛད་དེ། སེམས་ཅན་ཐམས་ཅད་ཀྱི་མདུན་དུ་བཞུགས་པའི་སངས་རྒྱས་ཐམས་ཅད་དོ། །སེམས་ཅན་གྱི་ཁམས་གསོ་དཀའ་བ་ཉིད་ཡིན་ཞེ་ན། རང་བཞིན་གྱིས་ཞེས་བྱ་བ་སྨོས་ཏེ། རང་གི་ངོ་བོ་ཉིད་ནི་རང་བཞིན་ཏེ། དམ་པའི་ཆོས་སྤོང་བ་ལ་སོགས་པ་ལ་འཇུག་པའི་ལས་ཀྱིས་སངས་རྒྱས་ཀྱི་བྱང་ཆུབ་ཀྱི་སྣོད་དུ་མ་གྱུར་པ་ཡིན་ནོ། །སེམས་ཅན་གྱི་ཁམས་རྣམས་རང་བཞིན་གྱིས་གསོ་དཀའ་བ་དེས་ན། རང་གི་ལས་ནི་སྤྱང་བའི་ཕྱིར། བཏང་སྙོམས་ཆེན་པོ་མཛད་པ་ཡིན། །ཞེས་བྱ་བ་ཡིན་ཏེ། རང་གི་ཡང་ཡིན་ལ་ལས་ཀྱང་ཡིན་
བས་རང་གི་ལས་ཏེ། སེམས་ཅན་དེ་རྣམས་ཀྱི་དམ་པའི་ཆོས་སྤོང་བ་ལ་སོགས་པའི་ལས་རྣམས་སོ། །སྦྱང་བའི་ཕྱིར་ཞེས་བྱ་བ་ནི་སྐལ་བ་མེད་པའི་སེམས་ཅན་དེ་རྣམས་ཀྱི། སྡིག་པ་བསལ་བའི་དོན་སྤྱང་བའི་ཕྱིར་རོ། །དོན་དེའི་ཕྱིར་སངས་རྒྱས་དེ་དག་ཐམས་ཅད་བཏང་སྙོམས་ཆེན་པོ་མཛད་པ་ཡིན་ཏེ། སྐལ་བ་དང་མི་ལྡན་པའི་སེམས་ཅན་དེ་རྣམས་སྤྱང་བའི་ཕྱིར་རེ་ཞིག་འབད་པ་མི་མཛད་ཀྱི། དུས་གཞན་གྱི་ཚེ་སྨིན་པར་བྱ་བའི་སྒོ་ནས་སེམས་ཅན་གྱི་ཁམས་སྤྱང་བར་བྱའོ་སྙམ་དུ་དགོངས་ནས་བཏང་སྙོམས་ཆེན་པོ་མཛད་པ་ཡིན་ནོ། །ཇི་སྐད་དུ་བཤད་པའི་སེམས་ཅན་ཐམས་ཅད་ཡོངས་སུ་སྤྱང་བའི་ཕྱིར། གང་གི་ཚེ་མདུན་ན་བཞུགས་པར་གྱུར་པས་སེམས་ཅན་གྱི་ཁམས་རྣམས་སོ། །རྣམ་པར་སྦྱོང་བར་མཛད་པར་མི་སྤྱོད་པར་གྱུར་པ་དེའི་ཚེ། སེམས་ཅན་གྱི་ཁམས་སྐལ་བ་མེད་པ་ན་འབད་པ་ནི་འབྲས་བུ་མེད་པར་མཁྱེན་ན། སངས་རྒྱས་དེ་ཐམས་ཅད་སེམས་ཅན་ཐམས་ཅད་སྤྱང་བའི་དོན་དུ་འབད་པ་བཏང་ནས་བཞུགས་པ་ཡིན་ནོ། །དེ་ནས་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་བཏང་སྙོམས་ཆེན་པོ་མཛད་པའི་རྗེས་ཐོགས་ཉིད་ལའོ། །བཅོམ་ལྡན་འདས་རྡོ་རྗེ་ཅན་ཞེས་བྱ་བ་ནི་རྡོ་རྗེ་སེམས་དཔའོ། །སེམས་དཔའ་ཆེན་པོ་བདེ་བ་ཆེ། །ཞེས་བྱ་བ་ནི་བཤད་ཟིན་ཏོ། །སྐད་ཅིག་གིས་ཞེས་བྱ་བ་ནི། སྐད་ཅིག་མ་གཅིག་གིས་སོ། །ཡང་དག་བསྐུལ་ཞེས་བྱ་བ་ནི་སངས་རྒྱས་ཐམས་ཅད་ལ་སེམས་ཅན་ཐམས་ཅད་ཀྱི་དོན་མཛད་པའི་ཕྱིར་ཡང་དག་པར་བསྐུལ་བར་གྱུར་པའོ། །རྡོ་རྗེ་ཅན་རང་བཞིན་ཇི་ལྟ་བུ་ཞིག་སྐད་ཅིག་གཅིག་གིས་སངས་རྒྱས་ཐམས་ཅད་ཡང་དག་པར་བསྐུལ་ཞེ་ན། བྱང་ཆུབ་ཆེན་པོར་ཐུགས་བརྟན་པས། །ཞེས་བྱ་བ་གསུངས་ཏེ། བྱང་ཆུབ་ཀྱང་ཡིན་ལ་ཆེན་པོ་ཡང་ཡིན་པས་བྱང་ཆུབ་ཆེན་པོ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །དེའི་རང་བཞིན་ཡིན་པས་ན་བརྟན་ཞིང་མི་ཕྱེད་པའི་ཐུགས་འདི་ལ་ཡོད་པས་ན་བྱང་ཆུབ་ཆེན་པོར་ཐུགས་བརྟན་པ་སྟེ། དེ་ལྟ་བུའི་རྡོ་རྗེ་ཅན་གྱིས་སངས་རྒྱས་ཐམས་ཅད་སྐད་ཅིག་གིས་ཡང་དག་པར་བསྐུལ་བར་གྱུར་པའོ། །ཇི་
ལྟར་ཡང་དག་པ་བསྐུལ་ཞེ་ན། སེམས་ཅན་ཀུན་ལ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཀྱང་ཡིན་ལ་ཀུན་ཀྱང་ཡིན་པས་སེམས་ཅན་ཀུན་ནོ། །དེ་རྣམས་ལ་ཕན་པ་ནི་མ་འོངས་པའི་དུས་ན་བདེ་བའི་ལས་སོ། །དེ་ཉིད་ནི་བསོད་ནམས་ཏེ། གཙང་ཞིང་དག་པར་བྱེད་པས་ན་བསོད་ནམས་སོ། །དེ་ཅི་ཞིག་ཅེ་ན། བྱང་ཆུབ་སེམས་དཔའ་ཞེས་བྱ་བ་གསུངས་ཏེ། བྱང་ཆུབ་ཀྱི་མཚན་ཉིད་ཅན་གྱི་སེམས་ནི་བྱང་ཆུབ་སེམས་སོ། །བདག་ཉིད་ཅེས་བྱ་བ་ནི་བདག་ཉིད་ཡིན་པར་སྟོན་ཏོ། །ཅི་ཞིག་ཏུ་རུང་བ་ཞིག་གམ་འོན་ཏེ་མ་ཡིན་ཞེ་ན། བརྟན་པ་ཞེས་བྱ་བ་གསུངས་ཏེ། དེ་བཞིན་ཉིད་ཀྱི་རྡོ་རྗེ་མི་ཤིགས་པ་ནི་བདག་ཉིད་སྟོན་ཏོ། །ཤིན་ཏུ་བཏང་སྙོམས་མ་མཛད་ཅིག །ཅེས་བྱ་བ་ནི་གང་གི་ཕྱིར་སེམས་ཅན་ཀུན་ལ་ཕན་པའི་བསོད་ནམས་བྱང་ཆུབ་ཀྱི་སེམས་བརྟན་ཞིང་མི་ཕྱེད་པ་དག་ཡིན་པ་དེས་ན་སེམས་ཅན་ཐམས་ཅད་སྤྱང་བའི་ཕྱིར་སངས་རྒྱས་བཅོམ་ལྡན་འདས་བཏང་སྙོམས་མ་མཛད་ཅིག །དེ་ཅིའི་ཕྱིར་ཞེ་ན། ཁྱེད་རྣམས་ཀྱིས་བཏང་སྙོམས་མཛད་ན་སེམས་ཅན་རྣམས་ངན་འགྲོར་འགྲོ་བས་སེམས་ཅན་གྱི་ཁམས་བརྒྱུད་པར་འགྱུར་རོ། །དེ་ལྟར་དཔལ་རྡོ་རྗེ་སེམས་དཔའི་སངས་རྒྱས་ཐམས་ཅད་སེམས་ཅན་གྱི་དོན་གྱི་ཕྱིར་ཡང་དག་པར་བསྐུལ་བར་གྱུར་པ་དང༌། དེ་རྣམས་སེམས་ཅན་གྱི་དོན་གྱི་ཐབས་སྟོན་ཅིག་ཅེས་སངས་རྒྱས་རྣམས་ཀྱིས་དེ་སྐད་དུ་གསུངས་པ་ཡིན་ནོ། །དེ་ནས་ཞེས་བྱ་བ་ནི་དེ་མ་ཐག་སྟོན་པའི་ཚིག་གོ །སངས་རྒྱས་ཀྱིས་ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་སོ། །གང་གསུངས་ཤེ་ན། སྐུ་གསུང་ཐུགས་ཀྱི་རྡོ་རྗེ་ཅན། །ཞེས་བྱ་བ་གསུངས་ཏེ། སྐུ་དང་གསུང་དང་ཐུགས་ནི་སྐུ་གསུང་ཐུགས་སོ། །དེ་འདི་ལ་མངའ་བས་ན་སྐུ་གསུང་ཐུགས་རྡོ་རྗེ་ཅན་ཏེ། སྐུ་དང་གསུང་དང་ཐུགས་རྡོ་རྗེ་དང་ལྡན་པའི་རྡོ་རྗེ་སེམས་དཔའོ། །ཇི་ལྟར་གསུངས་ཤིང་ཅི་ཞིག་གསུངས་ཤེ་ན། ཁྱེད་ནི་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་ཞེས་བྱ་བ་ནི་བྱང་ཆུབ་གྱི་མཚན་ཉིད་ཅན་གྱི་སེམས་སོ། །བདག་ཅི་ཞིག་ཡིན་ཞེ་ན། ཐབས་ཞེས་བྱ་བ་གསུངས་ཏེ།
ཡིད་ལ་མངོན་པར་འདོད་ཅིང་བསམ་པའི་དོན་བདེ་བས་ཐོབ་པར་བྱེད་པས་ན་ཐབས་ཞེས་བྱའོ། །གང་གི་ཐབས་ཡིན་ཞེ་ན། སྙིང་རྗེའི་བདག་ཉིད་ཅན་གྱི་ཞེས་བ་གསུངས་ཏེ། མི་དམིགས་པའི་ཐུགས་རྡོ་རྗེ་ཆེན་པོའི་རང་བཞིན་ཅན་སངས་རྒྱས་བཅོམ་ལྡན་འདས་རྣམས་ཀྱིའོ། །ཁྱེད་ཅེས་བྱ་བ་ནི་ཁྱེད་ཉིད་ཡིན་ཏེ་གཞན་མ་ཡིན་པའོ། །འདིས་ནི་འདི་སྐད་སྟོན་ཏེ། གང་གི་ཕྱིར་ཁྱེད་ནི་དམིགས་སུ་མེད་པའི་ཐུགས་རྗེ་ཆེན་པོའི་རང་བཞིན་ཅན་གྱི་སངས་རྒྱས་བཅོམ་ལྡན་འདས་རྣམས་ཀྱི་སེམས་ཅན་རྣམ་པར་སྤྱང་བའི་ཐབས་ཡིན་ལ། དེ་བས་ན་སེམས་ཅན་རྣམ་པར་སྦྱོང་བའི་ཐབས་ཁྱེད་ཀྱིས་སྨྲོས་ཤིག་ཅེས་དེ་བཞིན་གཤེགས་པ་རྣམས་ཀྱིས་བཅོམ་ལྡན་འདས་རྡོ་རྗེ་སེམས་དཔའ་ལ་གསུངས་པ་ཡིན་ནོ། །འདི་ལྟར་སེམས་ཅན་གྱི་དོན་གྱི་ཕྱིར་སངས་རྒྱས་བཅོམ་ལྡན་འདས་ཐམས་ཅད་ཀྱིས་རྡོ་རྗེ་འཆང་ལ་གསོལ་བ་བཏབ་པ་དང༌། དེ་མཛད་པ་བསྟན་པའི་ཕྱིར། དེ་ནས་སྟོན་པ་ཞེས་བྱ་བ་ལ་སོགས་པ་སྨོས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །སྟོན་པ་རྡོ་རྗེ་འཛིན་ཞེས་བྱ་བ་ནི་བཤད་ཟིན་ཏོ། །དེ་ཚེ་ཀུན་ནས་བྱིན་གྱིས་བརླབས། །ཞེས་བྱ་བ་ནི། དེ་བཞིན་གཤེགས་པའི་དཀྱིལ་འཁོར་གྱི་ཁམས་གསུམ་པ་ཐམས་ཅད་ཀུན་ནས་ཁྱབ་པར་བྱིན་གྱིས་བརླབས་པས་ན། ཀུན་ནས་བྱིན་གྱིས་བརླབས་པ་སྟེ་དེ་མཛད་པར་གྱུར་པས་ན། ཀུན་ནས་བྱིན་གྱིས་བརླབས་ཞེས་བྱ་བ་སྟེ། དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་དུས་སུ་དེ་ལྟར་མཛད་པའོ། །ཅི་ཞིག་ཀུན་ནས་བྱིན་གྱིས་བརླབས་ཤེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་སྨོས་ཏེ། བདེ་བ་ཆེན་པོ་རྡོ་རྗེ་ཞེས་བྱ་བ་ནི་གཉིས་སུ་མེད་པའི་ཡེ་ཤེས་སོ། །དེ་ལས་སྐྱེས་པས་ན་དེ་བཞིན་གཤེགས་པའི་དཀྱིལ་འཁོར་ནི་དཀྱིལ་འཁོར་ཆེན་པོ་ཞེས་བྱ་བའོ། །དེ་ཉིད་ཀྱིས་ན་དམ་པ་སྟེ་མཆོག་གོ །དེའི་ཚད་ཇི་ཙམ་ཞེ་ན། ཁམས་གསུམ་འཁོར་ལོའི་རྒྱ་ཁྱོན་གྱི། །ཞེས་བྱ་བ་གསུངས་ཏེ། འདོད་པ་དང༌། གཟུགས་དང་གཟུགས་མེད་པའི་ཁམས་ནི་ཁམས་གསུམ་གྱི་འཁོར་ལོའོ། །དེས་ཁྱབ་པའི་དང་ཚུལ་འདི་ལ་ཡོད་པས་ན། ཁམས་གསུམ་གྱི་ནི་རྒྱ་ཁྱོན་ཞེས་བྱའོ། །འཁོར་ལོ་ཡང་
ཡིན་པ་ཆེན་པོ་ཡང་ཡིན་ལས་ན་འཁོར་ལོ་ཆེན་པོ་སྟེ། རྣམ་པར་སྣང་མཛད་ཀྱི་དཀྱིལ་འཁོར་རོ། །ཁམས་གསུམ་འཁོར་ལོའི་རྒྱ་ཁྱོན་ཡང་ཡིན་ལ་འཁོར་ལོ་ཆེན་པོ་ཡང་ཡིན་པས་ན་ཁམས་གསུམ་པའི་རྒྱ་ཁྱོན་གྱི་འཁོར་ལོ་ཆེན་པོའོ། །གདོད་ནས་བྱུང་ཞེས་བྱ་བ་ནི་ད་ལྟར་བྱུང་བའི་ཚུལ་གྱིས་རྟག་ཏུ་བཞུགས་པས་ན་གདོད་མ་ནས་བྱུང་བའོ། །དེ་ཡིས་ཁམས་གསུམ་ལ་གནས་པའི་སེམས་ཅན་རྣམས་རབ་ཏུ་བསྒྲུབ་ཅེས་བྱ་བ་ནི། ཁམས་གསུམ་གྱི་འཁོར་ལོའི་རྒྱ་ཁྱོན་ཅན་གྱི་རྣམ་པར་སྣང་མཛད་ཀྱི་དཀྱིལ་འཁོར་དེས། འདོད་པ་དང༌། གཟུགས་དང༌། གཟུགས་མེད་པ་སྟེ། ཁམས་གསུམ་ན་གནས་པའི་སེམས་ཅན་ཐམས་ཅད་བསྐལ་པ་ཇི་ལྟ་བ་བཞིན་དུ་དེ་བཞིན་གཤེགས་པའི་རིགས་ལ་མངོན་པར་འདོད་ཅིང་བརྩོན་པར་རབ་ཏུ་བསྒྲུབས་ཏེ། དེ་བཞིན་གཤེགས་པའི་རིགས་རྟོགས་པར་བྱ་བའི་ཕྱིར་བྱང་ཆུབ་ཀྱི་སེམས་བསྐྱེད་པ་ལ་སོགས་པ་ལ་རབ་ཏུ་གཞག་པའོ། །དེ་ཆོ་དག་པ་གྲུབ་པར་འགྱུར། །ཞེས་བྱ་བ་ནི་དེ་ནས་དུས་དེའི་ཚེ་སྟེ་བསྐལ་པ་བཟང་པོ་ལ་སོགས་པ་དང་པོའི་ཚེའོ། །སེམས་ཅན་སྐལ་བ་ཇི་ལྟ་བ་བཞིན་དུ་ཉོན་མོངས་པ་བག་ཆགས་དང་བཅས་པ་དང་བྲལ་བས་དག་པ་ཡིན་ནོ། །ཁམས་གསུམ་གྱི་ཆོས་ཀྱི་རྒྱལ་སྲིད་ཀྱི་དབང་བསྐུར་བ་ཐོབ་པས་གྲུབ་པ་ཡིན་ནོ། །སངས་རྒྱས་ཀུན་སོགས་དངོས་གྲུབ་པ་ལ། ཞེས་བྱ་བ་ནི་སངས་རྒྱས་ཀྱང་ཡིན་ལ་ཀུན་ཀྱང་ཡིན་པས་ན་སངས་རྒྱས་ཀུན་ཏེ། རྣམ་པར་སྣང་མཛད་ལ་སོགས་པའོ། དེ་རྣམས་ཀྱི་དངོས་གྲུབ་ནི་སངས་རྒྱས་ཀུན་སོགས་དངོས་གྲུབ་སྟེ། །སངས་རྒྱས་བྱང་ཆུབ་ཐོབ་པའོ། །དེ་ལ་སོགས་པའི་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་སེམས་དཔའི་བར་གྱི་རིགས་ཐམས་ཅད་ཀྱི་དངོས་གྲུབ་གང་ཡིན་པ་དེ་ནི་སངས་རྒྱས་ཀུན་སོགས་དངོས་གྲུབ་སྟེ། སངས་རྒྱས་ཀུན་སོགས་པའི་དངོས་གྲུབ་ཀྱི་ཡུལ་དེ་ལའོ། །དེ་ནས་ཞེས་བྱ་བ་ལ་སོགས་པ་ལ། སྐུ་དང་གསུང་དང་ཐུགས་ཞེས་བྱ་བ་ལ་སོགས་པ་གང་གསུངས་པ་དེས་འདུས་པ་མཛད་པའི་སངས་རྒྱས་ཐམས་ཅད་ཀྱིས་གསོལ་བ་བཏབ་པ་ཡིན་ཏེ། འདུས་པ་མཛད་ནས་རྡོ་རྗེ་སེམས་
དཔའ་ལ་དེ་བཞིན་གཤེགས་པའི་རིགས་སྟོན་པར་མཛད་པའི་ཕྱིར་གསོལ་བ་བཏབ་པ་ཡིན་ནོ། །ཇི་ལྟ་བུ་ཞེ་ན། དེ་བཞིན་གཤེགས་པའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །དེ་བཞིན་གཤེགས་པའི་དཀྱིལ་འཁོར་ནི་དེ་བཞིན་གཤེགས་པའི་རིགས་ཏེ། དེ་ཡང་ནམ་མཁའ་ཐམས་ཅད་ཁྱབ་པས་ན་ཆེན་པོའོ། །སངས་རྒྱས་ཀུན་ནི་ཇི་སྐད་དུ་བཤད་པ་རྣམས་སོ། །དེ་རྣམས་ཀྱི་མཆོག་ཡིན་པས་ན་སངས་རྒྱས་ཀུན་མཆོག་སྟེ། བྱང་ཆུབ་ཆེན་པོའི་མཚན་ཉིད་ཀྱི་སེམས་ཀྱི་རང་བཞིན་གྱིས་སྐུའི་གསང་བའི་ཚུལ་གྱིས་དེ་བཞིན་གཤེགས་པ་རྣམས་ལས་དམ་པར་གྱུར་པས་ན་མཆོག་སྟེ། གང་གི་ཕྱིར་དེ་རྣམས་སེམས་དེ་དང་རྗེས་སུ་འབྲེལ་པ་ཡིན་ནོ། །དེ་ནས་སངས་རྒྱས་ཐམས་ཅད་ཀྱི། །ཞེས་བྱ་བ་ནི་གསོལ་བ་བཏབ་པའི་རྗེས་ཐོགས་ཉིད་ལ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་རྣམ་པར་སྣང་མཛད་ལ་སོགས་པ་འདུས་ནས་བྱོན་པ་དེ་ཐམས་ཅད་ཀྱི་སྐུ་དང་གསུང་དང་ཐུགས་ལ་ཡང་དག་བཞུགས་པས་ན། སྐུ་གསུང་ཐུགས་ལ་ཡང་དག་བཞུགས། །ཞེས་བྱའོ། །སྐུ་གསུང་ཐུགས་ཀྱི་རྡོ་རྗེ་ལས། །ཡང་དག་སྤྲོས་ནས་འདི་གསུངས་སོ། །ཞེས་བྱ་བ་ནི་དེ་ལྟར་བཤད་མ་ཐག་པའི་ཚུལ་གྱིས་རྡོ་རྗེ་སེམས་དཔའ་སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཞུགས་ཏེ། དེ་ནས་འདི་གསུངས་སོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན། ཡང་དག་པར་སྤྲོས་ནས་ཞེས་བྱ་བ་གསུངས་པ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཆུ་དང་འོ་མ་ལྟར་གཅིག་ཏུ་གྱུར་པའི་རྡོ་རྗེ་སེམས་དཔའི་མཉམ་པའི་སྤྲོ་བ་དེ་མཛད་པ་ནི་ཡང་དག་པར་མཉམ་པར་སྤྲོ་བའོ། །འདི་གསུངས་སོ་ཞེས་བྱ་བ་ཨོཾ་བྷུ་ཁཾ་ཞེས་བྱ་བ་བཀའ་སྩལ་པའོ། །དེ་ནས་འདི་ནི་ཞེས་བྱ་བ་ལ་སོགས་པ་ནི་གོ་སླའོ། །བདུད་རྣམས་བཅོམ་པ་ལ་སོགས་པ་ཞེས་བྱ་བ་ནི་ཇི་ལྟར་འདི་ནི་བཅོམ་ལྡན་འདས་རྡོ་རྗེ་གདན་ལ་བཞུགས་ཏེ། བདུད་བཅོམ་པར་མཛད་པ་དེ་བཞིན་དུ། དེའི་ཚེ་འདུལ་བར་མཛད་པའི་སངས་རྒྱས་ཐམས་ཅད་
ཀྱིས་བདུད་བཅོམ་བར་མཛད་ཅིང་ཁམས་གསུམ་པ་དེར་བྱང་ཆུབ་ཀྱི་སྙིང་པོར་བྱིན་གྱིས་བརླབས་ཤིང་བརྟན་པར་མཛད་པ་ཡིན་ནོ། །སོགས་པའི་སྒྲས་ནི་དབང་བསྐུར་བ་དང༌། ཆོས་ཀྱི་འཁོར་ལོ་བསྐོར་བ་དང༌། ལོག་པར་སྤྱོད་པའི་སེམས་ཅན་འདུལ་བ་དང༌། སངས་རྒྱས་ཐམས་ཅད་གཅིག་ཏུ་བསྡུས་པ་རྣམས་འདུལ་བ་ལ་བྱའོ། །དེ་ལ་མི་བསྐྱོད་པའི་ཚུལ་གྱིས་ནི་བདུད་རབ་ཏུ་བཅོམ་པ་ཡིན་ནོ། །རིན་ཆེན་འབྱུང་ལྡན་གྱིས་ནི་དབང་བསྐུར་བ་ཐོབ་པ་ཡིན་ནོ། །འོད་དཔག་ཏུ་མེད་པའི་ཚུལ་གྱིས་ནི་ཆོས་ཀྱི་འཁོར་ལོ་བསྐོར་བ་ཡིན་ནོ། །དོན་ཡོད་པར་གྲུབ་པའི་ཚུལ་གྱིས་ནི་ལོག་པར་སྤྱོད་པའི་སེམས་ཅན་རྣམས་འདུལ་བ་ཡིན་ནོ། །རྣམ་པར་སྣང་མཛད་ཀྱི་ཚུལ་གྱིས་ནི་སངས་རྒྱས་ཐམས་ཅད་བསྡུས་པ་ཡིན་ནོ། །དེ་ལྟར་ན། དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ། བྱང་ཆུབ་སྙིང་པོར་བྱིན་གྱིས་བརླབས། །ཞེས་བྱ་བའི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་ནས་བརྩམས་ཏེ་གསུངས་པ་ཡིན་པས་ཤེས་པར་བྱའོ། །ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། དེ་ནས་སྟོན་པ་རྡོ་རྗེ་འཛིན། །དཀྱིལ་འཁོར་མཆོག་ནི་བཀའ་སྩལ་པ། །ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་སྟེ། ལས་ཀྱི་རྒྱལ་པོ་མཆོག་གི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །རྡོ་རྗེ་འཛིན་པ་ཞེས་བྱ་བ་ནི་གོ་བར་ཟད་དོ། །རྟོག་པ་ཀུན་གྱི་བདེ་བ་ཆེ། །ཞེས་བྱ་བ་རྟོག་པ་ཡང་ཡིན་ལ་ཀུན་ཀྱང་ཡིན་པས་ན་རྟོག་པ་ཀུན་ཏེ། རྣམ་པར་སྣང་མཛད་ལ་སོགས་པའི་ཕྱག་རྒྱའི་ཚུལ་ལོ། །དེ་རྣམས་ཀྱི་བདེ་བ་ཆེན་པོའི་སངས་རྒྱས་ཀྱི་བྱང་ཆུབ་སྟེ། དེ་ཐོབ་པའི་རྒྱུར་གྱུར་པའི་ཕྱིར་དང༌། དེའི་རྒྱུ་མཐུན་པ་ལས་བྱུང་བས། དཀྱིལ་འཁོར་འདི་ཡང༌། རྟོག་པ་ཀུན་གྱི་བདེ་བ་ཆེ། །ཞེས་བྱའོ། །དེ་ནས་ཞེས་བྱ་བ་ནི་རྗེས་ཐོགས་ལའོ། །གང་གི་ཕྱིར་ཞེས་བྱ་བ་ནི་རྒྱུ་གང་གི་
ཕྱིར་རོ། །ཡང་དག་པར་རབ་ཏུ་ཕྱེ་སྟ་བཤད་པས་ན་ཡང་དག་རབ་བཤད་པའོ། །དཀྱིལ་འཁོར་ཆེན་པོ་ནི་དེ་བཞིན་གཤེགས་པ་རྣམ་པར་སྣང་མཛད་ཀྱི་དཀྱིལ་འཁོར་ཏེ། སྐུའི་གསང་བ་གཙོར་གྱུར་བའི་དཀྱིལ་འཁོར་ཆེན་པོའི་དེ་ཉིད་ནི་དེ་བཞིན་གཤེགས་པའི་རིགས་ཀྱིས་འདུལ་བའི་སེམས་ཅན་རྣམས་འདུལ་བས་ན་དཀྱིལ་འཁོར་གཞན་ལས་མཆོག་ཏུ་གྱུར་པས་ན་དམ་པ་ཡིན་ཞེས་བྱའོ། །འདིས་ནི་འདི་སྐད་སྟོན་པ་ཡིན་ཏེ། ཏིང་ངེ་འཛིན་གསུམ་བསྒོམ་པ་ནས་ཉེ་བར་བཟུང་སྟེ་རྣམ་པར་སྣང་མཛད་དཀྱིལ་འཁོར་ཆེན་པོ་འདི་ཇི་སྲིད་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་དེའི་རྗེས་ཐོགས་ཉིད་ལ་དེ་བཞིན་གཤེགས་པ་མཐོང་པའི་སྐལ་བ་མེད་པའི་སེམས་ཅན་རྣམས་སྐལ་བ་དང་ལྡན་པར་བྱ་བའི་ཕྱིར་དཀྱིལ་འཁོར་ཡང་དག་པར་བྲི་བར་བྱའོ། །དབྱིབས་ཇི་ལྟ་བུར་བྲི་བར་བྱ་ཞེ་ན། དཀྱིལ་འཁོར་ཆེན་པོ་ཞེས་བྱ་བ་ལ་སོགས་པ་གསུངས་ཏེ། དཔལ་རྡོ་རྗེ་སེམས་དཔའི་ཕྱི་མའི་དཀྱིལ་འཁོར་བཤད་མ་ཐག་པའི་དཀྱིལ་འཁོར་ཆེན་པོ་འདིར་ཕྱིའི་དཀྱིལ་འཁོར་ཡིན་ལ། དེའི་མཆོག་གང་ཡིན་པ་དེ་ནི་དཀྱིལ་འཁོར་ཆེན་པོའི་ཕྱིའི་མཆོག་ཅེས་བྱའོ། །དེར་ཅི་ཞིག་བྱ་ཞེ་ན། རྡོ་རྗེ་འཁོར་ལོ་ཡང་དག་བྲི། །ཞེས་བྱ་བ་སྟེ། རྡོ་རྗེ་འཁོར་ལོ་ཟླུམ་པོ་ལ་རྡོ་རྗེ་ཕྲེང་བའི་ཚུལ་དང་ཀ་བ་བརྒྱད་ཀྱིས་ཉེ་བར་མཛད་པར་བྱས་པའི་དཀྱིལ་འཁོར་ནི་རྡོ་རྗེ་འཁོར་ལོ་སྟེ་ཡང་དག་པར་བྲི་བར་བྱའོ། །འཁོར་ལོའི་ལྟེ་བ་ཞེས་བྱ་བ་ལ་སོགས་པ་ལ་དེ་ལྟར་དཀྱིལ་འཁོར་ཆེན་པོ་དེ་བྲིས་ནས་དཀྱིལ་འཁོར་དབུས་མའི་དབུས་ཀྱི་ལྟེ་བར་སངས་རྒྱས་བཅོམ་ལྡན་འདས་རྣམ་པར་སྣང་མཛད་འཛུམ་པ་མི་སྣང་བ་སྟེ། ཚེ་མས་མངོན་པའི་འཛུམ་པ་གང་ཡིན་བ་དེ་ནི་འཛུམ་པ་སྣང་བ་ཡིན་ལ། འདིའི་འཛུམ་པ་མི་མངོན་བས་ན་མི་སྣང་བ་སྟེ། འཛུམ་པ་མི་སྣང་བའི་སངས་རྒྱས་ཀྱི་མཆོག་བཅོམ་ལྡན་འདས་རྣམ་པར་སྣང་མཛད་དེ། སུ་ར་ཏེ་ས་མ་ཡ་སྟྭཾ་ཧོ་སིདྡྷི་མཾ། ཞེས་ཟློས་ཤིང་དབུས་སུ་དགོད་བར་བྱའོ། །དེ་ནས་རྣམ་པར་སྣང་མཛད་དེའི་མདུན་དུ་འདོད་ཆགས་རྡོ་རྗེ་མའི་གནས་སུ་བདུད་ལས་རྣམ་པར་རྒྱལ་བར་མཛད་པའི་སངས་རྒྱས་མི་བསྐྱོད་པ་
ཡང་དག་པར་བྲི་བར་བྱ་སྟེ། རྣལ་འབྱོར་པ་མི་བསྐྱོད་པའི་སྦྱོར་བས་བདུད་ལས་རྣམ་པར་རྒྱལ་བར་བྱེད་ཅིང༌། བཛྲ་སཏྭ། ཞེས་ཟློས་བཞིན་དུ་སངས་རྒྱས་བཅོམ་ལྡན་འདས་མི་བསྐྱོད་པ་བྲི་བར་བྱའོ་ཞེས་བྱ་བའི་ཐ་ཚིག་གོ །གཡས་སུ་བྱང་ཆུབ་སེམས་དཔའ། ནོར་ཆེན་གྱིས་ནི་དབང་བསྐུར་བ། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཡས་ཀཱི་ལི་ཀཱི་ལའི་གནས་སུ་རྣལ་འབྱོར་པས་འཕགས་པ་ནམ་མཁའི་སྙིང་པོ་ལ་སོགས་པའི་ནོར་ཆེན་པོ་རིན་པོ་ཆེའི་རིགས་ཀྱི་རང་བཞིན་གྱིས་དབང་བསྐུར་ཞིང་དབང་བསྐུར་བ་དེ་བྱེད་བཞིན་དུ་བྲི་བར་བྱའོ། །འདི་སྐད་སྟོན་ཏེ། རྣལ་འབྱོར་པ་རིན་ཆེན་འབྱུང་ལྡན་གྱི་ང་རྒྱལ་དང་ལྡན་པས་བཛྲ་རཏྣ་ཞེས་བཟླས་ལ་བདག་ཉིད་འཕགས་པ་ནམ་མཁའི་སྙིང་པོ་ལ་སོགས་པ་ནོར་བུའི་རིགས་ཀྱི་རང་བཞིན་གྱི་བྱང་ཆུབ་སེམས་དཔའི་རིན་པོ་ཆེའི་ཅོད་པན་ལ་སོགས་པས་དབང་བསྐུར་བར་བསམ་ཞིང་བཅོམ་ལྡན་འདས་སངས་རྒྱས་རིན་ཆེན་འབྱུང་ལྡན་བཛྲ་རཏྣ་ཞེས་ཟློས་ཤིང་གཡས་ལོགས་སུ་བྲི་བར་བྱའོ། །རྒྱབ་ཏུ་བྱང་ཆུབ་སེམས་དཔའ་དང་མ་ཉམ་དུ་ཆོས་ཀྱི་འཁོར་ལོ་བསྐོར་བ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་རྒྱབ་ཏུ་རྡོ་རྗེ་དྲན་མའི་གནས་སུ་རྡོ་རྗེ་ཆོས་ལ་སོགས་པ་བྱང་ཆུབ་སེམས་དཔའ་རྣམས་དང་མཉམ་དུ་ལྷན་ཅིག་ཆོས་ཀྱི་འཁོར་ལོ་བསྐོར་ཞིང་དམ་པའི་ཆོས་སྟོན་པ་སྟེ། ཆོས་ཐམས་ཅད་ནི་རང་བཞིན་གྱིས་རྣམ་པར་དག་པའོ་ཞེས་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་ཆོས་སྟོན་ཅིང་རྣལ་འབྱོར་པས་བཅོམ་ལྡན་འདས་སངས་རྒྱས་འོད་དཔག་ཏུ་མེད་པ་བྲི་བར་བྱའོ། །འདི་སྐད་སྟོན་ཏེ། རྣལ་འབྱོར་པ་འོད་དཔག་མེད་པའི་ང་རྒྱལ་བསྒོམ་ཞིང་བཛྲ་དྷརྨཱ་ཞེས་ཟློས་ཤིང་རྡོ་རྗེ་ཆོས་ལ་སོགས་པའི་པདྨའི་རིགས་ཀྱི་བྱང་ཆུབ་སེམས་དཔའ་རྣམས་དང་ལྷན་ཅིག་ཏུ་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་སྟོན་ཅིང་སངས་རྒྱས་བཅོམ་ལྡན་འདས་འོད་དཔག་ཏུ་མེད་པ་བྲི་བར་བྱའོ། །གཡོན་དུ་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་གཡོན་ལོགས་རྡོ་རྗེ་བསྙེམས་མའི་གནས་སུའོ། །ལོག་པར་རྣམ་དྲེགས་པ་ནི་དབང་ཕྱུག་
ཆེན་པོ་ལ་སོགས་པ་དྲེགས་པ་བདོ་བ་རྣམས་ནི་ལོག་པར་རྣམ་པར་དྲེགས་པའོ་ཞེས་བྱའོ། །ལོག་པར་དྲེགས་པ་དེ་བསྒྲུབ་པ་ནི་ཁམས་གསུམ་རྣམ་པར་རྒྱལ་བ་ལ་སོགས་པའི་ཚུལ་སྤྲུལ་པར་མཛད་ནས་དེ་ནས་དེ་རྣམས་རང་དབང་དུ་མཛད་པའོ། །བསྟན་པ་དམ་པ་ལ་མངོན་པར་དགའ་ཞིང་ནན་ཏན་ལྷུར་བྱེད་པ་དང་ལྡན་པའི་དམ་པ་རྣམས་ལྟ་སྨོས་ཀྱང་ཅི་དགོས་ཏེ། དེ་དག་ནི་ཤིན་ཏུ་ཡི་རངས་མཛད་པ་བཅོམ་ལྡན་འདས་སངས་རྒྱས་དོན་ཡོད་གྲུབ་པ་བྲི་བར་བྱའོ། །འདིས་ནི་འདི་སྐད་སྟོན་པ་ཡིན་ཏེ། སྔགས་པས་དོན་ཡོད་པར་གྲུབ་པའི་ང་རྒྱལ་བསྐྱེད་ལ། བཛྲ་ཀརྨ་ཞེས་ཟློས་ཤིང་རང་གི་ལུས་ལས་རྡོ་རྗེ་རིགས་རྣམས་སྤྲོས་ལ། དེས་ལྷ་ཆེན་པོ་ལ་སོགས་དྲེགས་པ་བདོ་བའི་སེམས་ཅན་བཏུལ་ཏེ། རང་དབང་དུ་བྱས་པར་ཡིད་ཀྱིས་བསམས་ཤིང་བསྟན་པ་ལ་མངོན་པར་དགའ་བ་རྣམས་ཀྱང་ཞི་བའི་ཚུལ་གྱིས་རང་དབང་དུ་བྱས་པར་ཡིད་ཀྱིས་བསམས་ལ། བཛྲ་ཀརྨ། ཞེས་བྱ་བའི་སྙིང་པོ་འདིས་བཅོམ་ལྡན་འདས་དོན་ཡོད་གྲུབ་པ་བྲི་བར་བྱའོ། །དེ་ནས་འདི་རྣམས་ཀྱི་ཞེས་བྱ་བ་ལ་སོགས་པ་ནི་གོ་བར་ཟད་དོ། །མཚམས་ཀྱི་ཆར་ནི་རྡོ་རྗེ་དང༌། །རིན་ཆེན་སྡོང་བུ་ནོར་བུ་བྲིའོ། །ཞེས་བྱ་བ་ནི་ནང་གི་དཀྱིལ་འཁོར་དེ་ཉིད་ཀྱི་མེའི་མཚམས་སུ་རྡོ་རྗེ་རྩེ་ལྔ་པ། བདེན་བྲལ་དུ་རྡོ་རྗེ་རིན་ཆེན། རླུང་གི་མཚམས་སུ་སྡོང་བུ་སྟེ་རྡོ་རྗེ་པདྨ། དབང་ལྡན་དུ་སྣ་ཚོགས་རྡོ་རྗེའི་མིང་ནོར་བུ་ཞེས་བྱ་བ་བྲི་བར་བྱའོ། །དེ་ནས་འདི་རྣམས་ཀྱི་ཞེས་བྱ་བ་ནི་གོ་སླའོ། །མཚམས་རྣམས་སུ་ནི་ལྷ་མོར་བཤད། །ཅེས་བྱ་བ་ནི། སྒེག་མོ་བཞད་མ་གླུ་ཆེན་མོ། །གར་མཛད་མ་སྟེ་ལྷ་མོའི་ཚོགས། །འདི་དག་རྡོ་རྗེ་རྣམ་སྒེག་མོའི། །ཕྱི་ཡི་མཚམས་སུ་བྱ་བར་བཤད། །ཅེས་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་དེ་ཉིད་འདིར་བྲི་བར་བྱའོ། །སྒོ་ཉིད་དུ་ནི་ལྕགས་ཀྱུ་ཞེས་བྱ་བ་ནི་བདེ་བ་ཆེན་པོ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་རྡོ་རྗེ་ལྕགས་ཀྱུ་དང་ཞགས་པ་དང༌། ལྕགས་སྒྲོག་དང༌། རྡོ་རྗེ་དྲིལ་བུ་ཞེས་གསུངས་པ་དེ་འདིར་སྒོ་རུ་བྲི་བར་བྱའོ། །དེ་བཞིན་སྔ་མ་ཇི་ལྟ་བཞིན། །འཁོར་ལོ་དེ་ནི་བརྟག་པར་བྱ། །ཞེས་བཅོམ་ལྡན་འདས་རྣམ་
པར་སྣང་མཛད་ཀྱི་དཀྱིལ་འཁོར་དེ་ལེགས་པར་བྲིས་ལ་རྡོ་རྗེ་སེམས་དཔའི་དཀྱིལ་འཁོར་བྲིས་པའི་ཚུལ་གྱིས་ཆོ་ག་ཐམས་ཅད་རྗེས་སུ་སྤྱད་དོ། །དེ་ནས་མཆོད་པའི་ཐལ་མོ་ཞེས་བྱ་བ། ཐལ་མོ་ཁོང་སྟོང་སྙིང་གར་བཅིངས། །ཞེས་བྱ་བ་རང་གི་སྙིང་གའི་ཕྱོགས་སུ་བཅིངས་ལ། གཡོན་དུ་དེ་བཞིན་བསྐོར་བ་ནི། །ཞེས་བྱ་བ་ནི་རང་གི་སྙིང་གའི་གཡོན་ལོགས་སུ་དེ་བཞིན་གཤེགས་པ་སྔར་བཤད་པའི་ཚུལ་གྱིས་བསྐོར་ཞེས་བྱ་བའི་ཐ་ཚིག་གོ །མེ་ཏོག་དང་བཅས་ཕྱག་རྒྱ་འདི། །སངས་རྒྱས་ཀུན་གྱི་དམ་ཚིག་གཅིག །ཅེས་བྱ་བ་ནི་གོ་བར་ཟད་དོ། །དེ་ནི་ཞེས་བྱ་བ་ལ་སོགས་པ་ལ་དམ་ཚིག་གི་རིམ་པའི་ཕྱག་རྒྱ་བཅིང་བའོ། །བསམ་པ་གཡོས་པས་འདུད་པར་བྱ། །ཞེས་བྱ་བ་ནི་ལྷག་པར་མོས་པ་ཕུལ་དུ་བྱུང་བས་དེ་བཞིན་གཤེགས་པ་ཐམས་ཅད་ལ་ཕྱག་བྱའོ། །དེ་ནས་ཕྱག་བྱས་ལ་མེ་ཏོག་དོར་བར་བྱའོ། །གང་གི་དུས་སུ་ཞེ་ན། བསྐོར་བ་ལན་གསུམ་བྱས་ནས་ནི། །ཞེས་བྱ་བ་གསུངས་ཏེ། བསྐོར་བ་ལན་གསུམ་བྱས་ནས་སོ། །ཤིན་ཏུ་གསང་བས་ཡང་དག་དགུག །ཅེས་བྱ་བ་ནི། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎའཾ་ཨཱ་དྱ་ནུཏྤ་ནན་ཏྭཱ་ཏ། ཅེས་ཟློས་ཤིང་གསང་བའི་ལྷགས་ཀྱུ་མས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བའོ། །དེ་ནས་ཆོ་ག་ཇི་བཞིན་དུ། །སྟོན་པ་ལ་ནི་མེ་ཏོག་དོར། །ཞེས་བྱ་བ་ནི་དེ་ལྟར་བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པ་གསང་བའི་ལྕགས་ཀྱུས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱ་བ་ལ་ཇི་ལྟ་བ་བཞིན་དུ་ཞུགས་ཏེ། རྡོ་རྗེ་སེམས་དཔའི་དཀྱིལ་འཁོར་ཆེན་པོ་བཤད་པའི་ཚོགས་ཆོ་ག་ཐམས་ཅད་རྗེས་སུ་སྤྱད་ལ་མེ་ཏོག་དོར་བའི་སྔགས་ཀྱིས་མེ་ཏོག་གི་སིལ་མ་དོར་བར་བྱའོ། །སངས་རྒྱས་བྱང་ཆུབ་རབ་གྲུབ་ཕྱིར། །འགྲོ་བའི་མགོན་ལ་དེ་ཉིད་བརྗོད། །ཅེས་བྱ་བ་ནི་བསྐོར་བ་ལན་གསུམ་བྱས་ནས་བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་འདུག་སྟེ། འདོད་ཆགས་ཆེན་པོ་བདེ་བ་ཆེ། །ཞེས་བྱ་བ་ལ་སོགས་པ་སྔར་བཤད་པའི་དེ་ཁོ་ན་ཉིད་འགྲོ་བའི་མགོན་པོ་བཅོམ་ལྡན་འདས་རྣམ་པར་སྣང་མཛད་ཀྱི་སྤྱན་སྔར་བརྗོད་པར་བྱའོ། །
ཅིའི་ཕྱིར་ཞེ་ན། སངས་རྒྱས་བྱང་ཆུབ་རབ་གྲུབ་ཕྱིར། །ཞེས་བྱ་བ་སྟེ། སངས་རྒྱས་རྣམས་ཀྱི་བྱང་ཆུབ་ནི་སངས་རྒྱས་ཀྱི་བྱང་ཆུབ་བོ། །དེ་བཞིན་དུ་ཕུལ་དུ་བྱུང་བ་བསྒྲུབ་པ་ནི་རབ་གྲུབ་པ་སྟེ། སངས་རྒྱས་ཀྱི་བྱང་ཆུབ་སྟེ་ཤིན་ཏུ་གྲུབ་པར་བྱ་བའི་ཕྱིར་རོ། །འདིས་ནི་འདི་སྐད་སྟོན་པ་ཡིན་ཏེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎའཾ་ཨཱ་དྱ་ནུཏྦ་ནན་ཏྭཱ་ཏ། ཅེས་བྱ་བའི་སྙིང་པོ་དང་དྲུལ་བུ་དང་བཅས་པའི་གསང་བའི་ལྕགས་ཀྱུ་མ་དང་འབེབས་པས་དགུག་ཅིང་སྤྱན་དྲངས་ནས་མྱུར་བ་ཉིད་དུ་རྣམ་པར་སྣང་མཛད་ལ་སོགས་པའི་སངས་རྒྱས་ཐམས་ཅད་འདུས་ཤིང་བྱོན་པར་འགྱུར་རོ། །ཐམས་ཅད་མ་སྐྱེས་སྦྱོར་བ་ཡིས། །ཞེས་བྱ་བ་ནི་ཐམས་ཅད་ཀྱིས་མ་སྐྱེས་པ་ནི། ཐམས་ཅད་མ་སྐྱེས་པ་སྟེ་ཆོས་ཐམས་ཅད་མ་སྐྱེས་པའི་དེ་བཞིན་ཉིད་དོ། །དེ་བཞིན་ཉིད་དུ་རོ་གཅིག་པའི་སེམས་ཀྱི་སྦྱོར་བ་དེས་དངོས་གྲུབ་ཀུན་ནི་རྣམ་པར་སྣང་མཛད་ལ་སོགས་པའི་སྒྲུབ་པ་པོའི་དངོས་གྲུབ་ཐམས་ཅད་སྩོལ་ཞིང་སྟེར་བར་མཛད་པར་འགྱུར་རོ། །ནི་ཞེས་བྱ་བ་ནི་གང་གི་ཕྱིར་ཞེས་བྱ་བའི་དོན་ཏོ། །གང་གི་ཕྱིར་འདུས་པ་རྣམས་ཐམས་ཅད་མ་སྐྱེས་པའི་སྦྱོར་བས་སྒྲུབ་པ་པོའི་དངོས་གྲུབ་ཐམས་ཅད་རྣལ་འབྱོར་པ་ལ་སངས་རྒྱས་ཐམས་ཅད་ཀྱིས་སྩོལ་བར་འགྱུར་རོ། །ཞུགས་ནས་ཞེས་བྱ་བ་ནི་དཀྱིལ་འཁོར་དེར་ཞུགས་ནས་སོ། །དངོས་གྲུབ་ཐམས་ཅད་འགྲུབ་པར་འགྱུར། །ཞེས་བྱ་བ་ནི་དཀྱིལ་འཁོར་དེར་ཞུགས་ནས་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་འགྲུབ་པར་འགྱུར་རོ། །དགའ་བ་ལ་སོགས་མཚན་མ་མཆོག །སྣ་ཚོགས་པ་ནི་འབྱུང་བར་འགྱུར། །ཞེས་བྱ་བ་ནི་དཀྱིལ་འཁོར་དེར་ཞུགས་ནས་སྒྲུབ་པར་བྱེད་པ་ནི་རྣལ་འབྱོར་པ་ལ་དངོས་གྲུབ་ཀྱི་ལྟས་དགའ་བ་དང༌། ཡིད་བདེ་བ་དང༌། འོད་ཟེར་མཐོང་བ་ལ་སོགས་པའི་མཆན་མའི་མཆོག་སྟེ། དམ་པའི་ཚུལ་རྣམ་པ་སྣ་ཚོགས་སྐྱེ་ཞིང་འབྱུང་བར་འགྱུར་རོ། །དེ་ནས་ཞེས་བྱ་བ་ནི་སློབ་དཔོན་གྱི་ལས་ཀྱི་ཆོ་གའི་རྗེས་ཐོགས་ལའོ། །མཆོག་ཏུ་སློབ་མ་གཞུག་པ་ནི་དཀྱིལ་འཁོར་ཆེན་པོར་རོ། །ཆོ་ག་རྒྱས་པ་དེ་བཞིན་ནོ། །ཞེས་བྱ་བ་ནི་འདིར་སློབ་དཔོན་གྱིས་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་སློབ་མ་འཇུག་པའི་ཆོ་ག་རྒྱས་པ་ཐམས་ཅད་འདིར་བྱ་བ་ཡིན་
ནོ། །མཆོད་པའི་ཐལ་མོས་འཁོར་ལོ་ཆེ། །མཆོད་ པ་བྱས་ནས་སླར་འབྱུང་བྱ། །ཞེས་བྱ་བ་ནི་གང ་འདི་ན་དེ་བཞིན་གཤེགས་པའི་དཀྱིལ་འཁོར་ཆེན་པོར་མཆོད་པའི་ཐལ་མོ་དེས་མེ་ཏོག་དང༌། བདུག་སྤོས་དང༌། མར་མེ་དང༌། དྲི་ལ་སོགས་པ་བླངས་ནས་མེ་ཏོག་ལ་སོགས་པ་དེར་འཁོར་ལོ་ཆེ་ཞེས་བྱ་བའི་དཀྱིལ་འཁོར་མཆོད་པ་བྱས་ནས་ཆོ་ག་ཐམས་ཅད་རྗེས་སུ་སྤྱད་ལ་དཀྱིལ་འཁོར་ཆེན་པོ་དེ་ལས་སླར་འབྱུང་བར་བྱའོ། །དངོས་གྲུབ་ཆོ་ག་ཇི་བཞིན་དུ། །སྒྲུབ་པ་རྣམས་ནི་རབ་བཤད་བྱ། །ཞེས་བྱ་བ་ལ་དངོས་གྲུབ་ནི་བསྒྲུབས་པའི་འབྲས་བུའོ། །ཆོ་ག་ཇི་བཞིན་ཞེས་བྱ་བ་ནི་ཆོ་གའི་རིམ་པ་མ་འཆོལ་བར་རོ། །སྒྲུབ་ཅེས་བྱ་བ་ནི་འདིས་སྒྲུབ་པས་ན་བསྒྲུབ་པ་སྟེ། རས་རིས་ལ་སོགས་པའོ། །རབ་བཤད་བྱ་ཞེས་བྱ་བ་ནི་དེ་རབ་ཏུ་ཕྱེ་སྟེ་སྒྲུབ་པ་དང་དངོས་གྲུབ་བཤད་པར་བྱའོ་ཞེས་བྱ་བ་སྟེ་ཅི་ཡང་རུང་བའི་ཚུལ་དུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལ་ཆོ་ག་ཇི་བཞིན་ཞེས་བྱ་བ་ནི་སྒྲའི་དོན་ནི་འདི་ཡིན་ཏེ། དེ་བཞིན་གཤེགས་པའི་དཀྱིལ་འཁོར་དུ་ཞུགས་ལ་རང་གི་ལྷའི་སྔགས་དང༌། ཕྱག་རྒྱ་ཇི་ལྟ་བ་བཞིན་དུ་བླངས་ཏེ། རང་གི་ལྷའི་རྣལ་འབྱོར་བྱས་ལ་མདུན་དུ་རང་གི་ལྷ་སྤྱན་དྲངས་པ་དང། མཆོད་པ་དང༌། ཕྱག་བྱས་ནས་དེའི་དམ་ཚིག་གི་ཕྱག་རྒྱ་བཅིངས་ཏེ། བདག་ལ་བྱིན་གྱིས་བརླབས་པ་ལ་སོགས་པ་བྱས་ནས་རས་རིས་ལ་སོགས་པ་ཇི་ལྟ་བ་བཞིན་དུ་ཉེ་རེག་ལན་ཅིག་བྱས་ལ། ཟླ་བ་གཅིག་ཙམ་གྱི་བར་དུ་བཟླས་བརྗོད་བྱས་ལ་དེ་ནས་ཇི་སྐད་བཤད་པའི་ཚུལ་གྱིས་རས་རིས་ཀྱི་དཀྱིལ་འཁོར་གྱི་ཚུལ་ལམ་དཔའ་བོ་གཅིག་པུ་འདིར་གཞུག་པར་བྱའོ། །དེའི་མདུན་དུ་བདག་ལ་བྱིན་གྱིས་བརླབས་པ་ལ་སོགས་པ་བྱས་ནས། རས་རིས་ལ་རང་གི་ལྷ་ཇི་ལྟ་བ་བཞིན་དུ་སྤྱན་དྲངས་ནས་ཆོ་ག་ཐམས་ཅད་རྗེས་སུ་སྤྱད་པའམ། རང་གི་ལྷའི་ཕྱག་རྒྱ་ཆེན་པོ་སྔར་བཤད་པའི་ཚུལ་གྱིས་ཡང་ཟླ་བ་གཅིག་གི་བར་དུ་བཟླས་བརྗོད་བྱས་ལ། མཐར་ཟླ་བ་ཉ་བ་ལ་མཚན་ཐོག་ཐག་བཟླས་བརྗོད་བྱའོ། །དེ་ནས་ཇི་ལྟར་མངོན་པར་འདོད་པའི་དངོས་གྲུབ་རྣམས་གྲུབ་པར་འགྱུར་རོ། །དོན་འདི་ཉིད་སྟོན་པས་ནི། བདུད་ལ་སོགས་
ལས་རྣམ་རྒྱལ་བརྙེས། །བཅོམ་ལྡན་རས་ལ་བྲི་བར་བྱ། །སྒྲུབ་པ་འདི་ལས་གཅིག་ཙམ་ནི། །དེ་ལྟའི་བསྒྲུབ་བྱས་སྒྲུབ་པར་འགྱུར། །ཞེས་བྱ་བ་འདི་ནི་དཀྱིལ་འཁོར་གྱི་རས་རིས་སྒྲུབ་པ་ལ་གསུངས་པ་ཡིན་ནོ། །དཔའ་བོ་གཅིག་པུའི་དབང་དུ་བྱས་ནས། སྐུ་གཟུགས་ལ་སོགས་མདུན་དུ་ཡང། །ཞེས་བྱ་བ་ལ་སོགས་པ་གསུངས་པ་ཡིན་ཏེ། འདི་ནི་གོ་བར་ཟད་དོ། །འདིས་ཀྱང་འདི་སྐད་སྟོན་པ་ཡིན་ཏེ། སྔ་མ་བཞིན་དུ་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་ཟླ་བ་གཅིག་ཙམ་བཟླས་པར་བརྗོད་བྱས་ནས་རང་གི་ལྷ་དཔའ་བོ་གཅིག་པུ་རས་ལ་སོགས་པ་ལ་གཞུག་པ་མདུན་དུ་གཞུག་སྟེ་ཆོ་ག་ཐམས་ཅད་རྗེས་སུ་སྤྱད་ལ། རང་གི་ལྷའི་ཕྱག་རྒྱ་ཆེན་པོ་བཅིངས་ལ་སླར་བཟླས་བརྗོད་འབུམ་བྱའོ། །དེ་ནས་ཟླ་བ་ཉ་བ་ལ་མཚན་ཐོག་ཐག་བཟླས་བརྗོད་བྱས་ན་དེ་ལྟ་བུས་ནི་རང་གི་ལྷའི་ཕྱག་རྒྱ་ཆེན་པོའི་དངོས་གྲུབ་ཐོག་པར་འགྱུར་རོ། །རྒྱུད་འདི་ལ་ཐམས་ཅད་དུ་ཡང་རས་རིས་སྒྲུབ་པ་ལ། ལྕེ་ལ་རྡོ་རྗེ་དཀར་པོ་བསམས་ཏེ་བཟླས་བརྗོད་བྱ་བར་ཤེས་པར་བྱའོ། །གཞུང་འདིས་ནི་ཆོས་ཀྱི་ཕྱག་རྒྱ་སྒྲུབ་པ་ཡང་བཤད་པར་གྱུར་པ་ཡིན་ཏེ། གང་གི་ཕྱིར་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང༌། ལས་ཀྱི་ཕྱག་རྒྱ་རྣམས་བསྒྲུབས་པའི་རྗེས་ཐོགས་ཉིད་ལ་སྟོན་པ་ཡིན་གྱི་ཆོས་ཀྱི་ཕྱག་རྒྱ་ནི་མ་ཡིན་ནོ། །དེ་ནས་དེ་བཞིན་གཤེགས་པའི་ཕྱག་རྒྱའི་སྒྲུབ་པ་ཆེན་པོའི་རྒྱུད་ནི་ཞེས་བྱ་བ་ནི་དེ་ནས་ཞེས་བྱ་བའི་སྒྲ་ནི་གནས་སྐབས་ཞེས་བྱ་བའི་ཐ་ཚིག་གོ །དེ་བཞིན་གཤེགས་པའི་དཀྱིལ་འཁོར་དུ་དེ་བཞིན་གཤེགས་པའི་རིགས་རྣམས་ཀྱི་ཕྱག་རྒྱ་ཆེན་པོ་ནི་དེ་བཞིན་གཤེགས་པའི་ཕྱག་རྒྱའོ། །དེ་རྣམས་ཀྱི་སྒྲུབ་པ་ཆེན་པོ་ནི་རང་གི་སྐུའི་ངོ་བོར་བདག་ཉིད་བསྒོམ་པའོ། །དེ་སྟོན་པར་བྱེད་པའི་སྒྲ་ནི་ཚོགས་རྒྱུད་དོ། །ཕྱག་རྒྱ་གཅིག་བཅིངས་ནས་ནི། །བདག་ཉིད་སངས་རྒྱས་ཡིན་བསམས་ན། །ཞེས་བྱ་བ་ནི་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་བཅིངས་ལ། བདག་ཉིད་སངས་རྒྱས་ཡིན་ནོ་ཞེས་བསྒོམ་ཞིང་ཡང་དང་ཡང་དུ་མངོན་དུ་བྱེད་པའོ། །དེས་ཅིར་འགྱུར་ཞེ་ན། ཕྱག་རྒྱ་ཆེན་པོ་དངོས་གྲུབ་ཆེ། །བརྟན་པ་རིང་པོར་མི་ཐོགས་ཐོབ། །ཅེས་བྱ་བ་གསུངས་ཏེ། རྣམ་པར་སྣང་མཛད་
ལ་སོགས་པའི་ཕྱག་རྒྱ་ཆེན་པོ་བཅིངས་ནས་རྣམ་པར་སྣང་མཛད་ལ་སོགས་པའི་རང་བཞིན་ནི་བདག་ཉིད་ཡིན་ནོ་ཞེས་བསྒོམས་ན། རྣལ་འབྱོར་པ་རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོའི་དངོས་གྲུབ་བཅར་དུ་མིང་ཅིང་གཞིག་ཏུ་མེད་པར་བརྟན་པ་རིང་པོར་མི་ཐོགས་ཤིང་མྱུར་བ་ཉིད་དུ་ཐོབ་པའོ། །དེ་ལྟར་ཕྱག་རྒྱ་ཆེན་པོའི་བསྒྲུབ་པ་གསུངས་ནས། ད་ནི་དམ་ཚིག་ཐམས་ཅད་སྒྲུབ་པ་གསུངས་པ་ནི། དེ་ནས་དམ་ཚིག་ཐམས་ཅད་སྒྲུབ་པ་ཞེས་བྱ་བ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔ་མ་བཞིན་ནོ། །དམ་ཚིག་ཐམས་ཅད་ནི་དམ་ཚིག་གི་ཕྱག་རྒྱ་ཐམས་ཅད་དོ། །དེ་རྣམས་ཀྱིས་སྒྲུབ་པ་ནི་རང་གི་སྙིང་གར་སེམས་དཔའི་རྡོ་རྗེ་བསམས་ལ། ས་མ་ཡ་སྟྭཾ། ཞེས་ཕྱག་རྒྱ་བཅིང་བའི་སྙིང་པོ་ཟློས་ཤིང་བཅིང་བའོ། །འདི་ཉིད་གསུངས་པ་ནི། སྙིང་གར་རྡོ་རྗེའི་གཟུགས་བཞག་སྟེ། ས་མ་ཡ་སྟྭཾ། ཞེས་བརྗོད་ནས། བཟླས་བརྗོད་འབུམ་གྱིས་བསྒྲུབས་ནས་ནི། དངོས་གྲུབ་ཐམས་ཅད་ཐོབ་པར་འགྱུར། །ཞེས་བྱ་བ་ཡིན་ནོ། །འདི་སྐད་སྟོན་པ་ཡིན་ཏེ། དམ་ཚིག་གི་ཕྱག་རྒྱ་བསྒྲུབ་བར་འདོད་པའི་སྒྲུབ་པ་པོས་བདག་ལ་བྱིན་གྱིས་བརླབ་པ་ལ་སོགས་པ་བྱས་ནས། སེམས་དཔའི་རྡོ་རྗེ་སྙིང་གར་བསམས་ལ། ས་མ་ཡ་སྟྭཾ། ཞེས་བརྗོད་ལ་རང་གི་ལྷའི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་ཟླ་བ་གཅིག་ཙམ་གྱི་བར་དུ་ཕྱག་རྒྱ་བཅིང་བ་དང༌། རང་གི་ལྷའི་སྔགས་བཟླས་བརྗོད་དཔག་ཏུ་མེད་པ་བྱའོ། །དེ་ནས་ཡང་དེ་བཞིན་དུ་བཟླས་བརྗོད་བྱས་ལ་མཐར་ཟླ་བ་ཉ་བ་ལ་མཚན་ཐོག་ཐག་བཟླས་བརྗོད་བྱས་ན་དེ་ལྟ་བུས་ནི་དམ་ཚིག་གི་ཕྱག་རྒྱ་ཐམས་ཅད་ཀྱི་དངོས་གྲུབ་ཐོབ་པར་འགྱུར་རོ། །དེ་ལྟར་དམ་ཚིག་གི་ཕྱག་རྒྱ་བསྒྲུབ་པ་གསུངས་ནས། ད་ནི་ལས་ཀྱི་ཕྱག་རྒྱ་ཐམས་ཅད་སྒྲུབ་པ་གསུངས་པ་ནི། དེ་ནས་ལས་ཀྱི་ཕྱག་རྒྱ་ཐམས་ཅད་སྒྲུབ་པའི་རྒྱུད་ནི་ཞེས་བྱ་བ་ཡིན་ཏེ། དེ་ནས་ཞེས་བྱ་བ་ནི་སྔ་མ་བཞིན་ནོ། །ལས་ཀྱི་ཕྱག་རྒྱ་ཡང་ཡིན་ལ་ཐམས་ཅད་ཀྱང་ཡིན་པས་ན་ལས་ཀྱི་ཕྱག་རྒྱ་ཐམས་ཅད་དོ། །དེ་རྣམས་ཀྱི་བསྒྲུབ་པ་ནི་བདུད་བཅོམ་པ་ལ་སོགས་བ་སྒྲུབ་པའོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་དོ། །བདུད་ལས་རྒྱལ་བ་ཞེས་བྱ་བ་ནི་མི་བསྐྱོད་པའི་ལས་ཀྱི་
ཕྱག་རྒྱ་བཅིངས་ལ་བདུད་ཀྱི་སྡེ་ལས་རྒྱལ་བར་བྱའོ། །མཆོག་རྟོགས་ཤིང་ཞེས་བྱ་བ་ནི་མཆོག་ནི་དམ་པ་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །དེ་རྟོགས་པ་ནི་མངོན་པར་བྱང་ཆུབ་པའོ། །ཆོས་ཀྱི་འཁོར་ལོ་རབ་ཏུ་བསྐོར། །ཞེས་བྱ་བ་ནི། འོད་དཔག་ཏུ་མེད་པའི་ལས་ཀྱི་ཕྱག་རྒྱ་བཅིངས་ནས་ཆོས་སྟོན་པའོ། །མཚུངས་མེད་སེམས་དང་དོན་བྱས་ནས། །ཞེས་བྱ་བ་ནི་དོན་ཡོད་པར་གྲུབ་པའི་ལས་ཀྱི་ཕྱག་རྒྱ་བཅིངས་ཏེ། ལོག་པར་སྤྱོད་པའི་སེམས་ཅན་རྣམས་ཀྱི་དོན་བྱ་བར་ཡིད་ལ་བསམས་པར་བྱས་ནའང་དེ་ལྟ་བུས་ཅིར་འགྱུར་ཞེ་ན། ལས་ཀྱི་ཕྱག་རྒྱ་གྲུབ་པར་འགྱུར། །ཞེས་བྱ་བ་གསུངས་སོ། །འདི་སྐད་སྟོན་པ་ཡིན་ཏེ། བདག་ལ་བྱིན་གྱིས་བརླབ་པ་ལ་སོགས་པ་བྱས་ནས་ཡི་གེ་ཨ་ལས་རང་གི་སྙིང་གར་སྣ་ཚོགས་རྡོ་རྗེ་བསམས་ལ། བཛྲས་ཏྭ། ཞེས་ཟློས་ཤིང་མི་བསྐྱོད་པའི་ལས་ཀྱི་ཕྱག་རྒྱ་བཅིངས་ལ་བདུད་རབ་ཏུ་གཞོམ་པར་བྱའོ། །དེ་ནས་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱ་བཅིངས་ལ་ཨོཾ་བྷུ་ཁཾ་ཞེས་ཟློས་ཤིང་མངོན་པར་བྱང་ཆུབ་པ་ལྔའི་རིམ་པས་བདག་ཉིད་མངོན་པར་སངས་རྒྱས་པར་བསམ་པར་བྱའོ། །བཛྲ་རཏྣ་ཞེས་ཟློས་ཤིང་རིན་པོ་ཆེའི་རིགས་ཀྱི་རང་བཞིན་ཅན་གྱིས་བྱང་ཆུབ་སེམས་དཔའི་ནོར་བུ་ཆེན་པོས་བདག་ཉིད་ལ་དབང་བསྐུར་ལ། བཛྲ་དྷརྨཱ་ཞེས་ཟློས་ཤིང་འོད་དཔག་ཏུ་མེད་པའི་ལས་ཀྱི་ཕྱག་རྒྱ་བཅིངས་ལ་ཆོས་ཀྱི་འཁོར་ལོ་བསྐོར་བར་བྱའོ། །དེ་ནས་བཛྲ་ཀརྨ་ཞེས་ཟློས་ཤིང་དོན་ཡོད་པར་གྲུབ་པའི་ལས་ཀྱི་ཕྱག་རྒྱ་བཅིངས་ལ། སེམས་ཅན་ལོག་པར་སྤྱོད་པ་དང༌། ཡོངས་སུ་དགའ་བ་རྣམས་དབང་དུ་བསྡུས་ཤིང་དོ་བྱས་ནས་བདག་ཉིད་བྱ་བ་བྱས་པ་ལྟ་བུར་བསམས་ལ། རང་གི་ལྷའི་ཕྱག་རྒྱ་བཅིངས་ཏེ། སྔ་མ་བཞིན་དུ་ཟླ་བ་གཅིག་བཟླས་བརྗོད་དཔག་ཏུ་མེད་པ་བྱའོ། །དེའི་རྗེས་ལ་ཟླ་བ་གཉིས་པ་ལ་ཡང་མཐར་ཟླ་བ་ཉ་ལ་མཚན་ཐོག་ཐག་བཟླས་བརྗོད་བྱས་ཏེ། དེ་ལྟ་བུས་ནི་ལས་ཀྱི་ཕྱག་རྒྱ་ཐམས་ཅད་ཀྱི་དངོས་གྲུབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་མཆོག་ནི་ལས་ཀྱི་ཕྱག་རྒྱལ་སོགས་པ་སྒྲུབ་པའོ། །དེའི་ཆོ་ག་ནི་བྱ་བ་རྣམས་སོ། །དེའི་ཆོ་ག་རྒྱས་པ་ནི་ཆོས་
ཀྱི་ཕྱག་རྒྱལ་སོགས་པ་སྒྲུབ་པའི་རྒྱུན་ནོ། །དེ་སྟོན་པར་བྱེད་པ་སྒྲའི་ཚོགས་ནི་རྒྱུད་དོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།ཡང་འདིའི་དོན་བརྗོད་པར་བྱ་སྟེ། ཡང་བདག་བསྲུང་བ་དང༌། བགེགས་གཞོམ་པ་ལ་སོགས་པ་བྱས་ལ་བསང་གཏོར་བྱ་བའི་ཕྱིར་སྤོས་ཆབ་ཀྱིས་བཀང་བའི་སྣོད་ལ་རྡོ་རྗེ་གནོད་སྦྱིན་ཡོངས་སུ་བཟླས་ཏེ། ལྷའི་ཁང་པའི་སྒོར་བཞག་ལ། མཆོད་ཡོན་དང་མཆོད་པ་རྣམ་པ་ལྔ་ལ་ཇི་ལྟ་བ་བཞིན་དུ་མངོན་པར་བཟླའོ། །མཆོད་ཆེན་ཐམས་ཅད་དགུག་པ་དང༌། བདག་ལ་བྱིན་རླབས་ལ་སོགས་བསྒྲུབ། །རྟག་ཏུ་རྡོ་རྗེ་དྲིལ་འཆད་ཞིང༌། །དངོས་གྲུབ་མཆོག་ནི་བསྒྲུབ་པར་བྱ། །ལུགས་མའམ་ཡང་ན་བརྐོས་པའམ། བྱས་པའམ་ནི་བྲིས་པ་ཡི། །དང་པོའི་འཁོར་ལོ་བཞག་ནས་ནི། །དེས་ནི་སླར་ཡང་རབ་ཏུ་འགྲུབ། །ཡི་གེ་ཧཱུཾ་མ་རྡོ་རྗེ་འཁོར་ལོའི་ཕྱག་རྒྱ་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་སྤྲུལ་པར་བྱའོ། །དེ་ནས་གལ་ཏེ་འབོར་པ་ཡོད་ན་མེ་ཏོག་ལ་སོགས་པས་དཀྱིལ་འཁོར་མཆོད་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་ཝཱ་ཀ་ཙིཏྟ་པྲ་ཎ་མེ་ན་བཛྲ་བནྡྷ་ནཾ་ཀ་རོ་མི། ཞེས་ཟློས་ཤིང་ཕྱོགས་ཐམས་ཅད་ནས་དཀྱིལ་འཁོར་ལྔ་པས་བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པ་ལ་ཕྱག་བཞི་བྱས་ནས་ཆོ་ག་ཐམས་ཅད་རྗེས་སུ་སྤྱད་ཅིང༌། སྡོམ་པ་གཟུང་བར་བྱའོ། །དེ་ནས་རྡོ་རྗེ་ཐལ་མོ་དང༌། རྡོ་རྗེ་བསྡམས་པ་བཅིངས་ནས་རྡོ་རྗེ་བསྡམས་པ་རང་གི་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པ་བསྐྱེད་ལ། ཏིཥྛ་བཛྲ་ཞེས་བྱ་བ་ལ་སོགས་པ་ཟློས་ཤིང་རང་གི་སྙིང་གར་རྡོ་རྗེ་འབེབས་པའི་ཕྱག་རྒྱ་དགྲོལ་བས་དབབ་པ་བརྟན་པར་བྱས་ལ་རྡོ་རྗེ་ཁུ་ཚུར་གྱིས་དམ་ཚིག་གི་ཕྱག་རྒྱ་བཅིངས་ལ། ཨོཾ་བཛྲ་མུཥྚ་བཾ་ཞེས་བརྗོད་པར་བྱའོ། །དེ་ནས་ཕྱག་རྒྱ་དགྲོལ་བར་བྱས་ལ་སྡིག་པ་དྲལ་བའི་ཕྱག་རྒྱས་སྡིག་པ་རྣམ་པར་དྲལ་བར་བྱའོ། །དེ་ནས་རྡོ་རྗེ་སྐྱིལ་མོ་ཀྲུང་བཅས་ལ་སྐྱིལ་མོ་ཀྲུང་གི་སྟེང་དུ་རྡོ་རྗེ་བསྡམས་པ་བཀན་ཏེ་བཞག་ལ། སྙིང་གར་སེམས་མ་རྡོ་རྗེ་བཀོད་དེ། འཕགས་པ་དེ་ཁོ་ན་ཉིད་བསྡུས་པ་ལས་གསུངས་
པའི་མངོན་པར་བྱང་ཆུབ་པ་ལྔའི་རིམ་པ་བསྒོམ་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་བཅིངས་ལ། ས་མ་ཡ་སྟྭཾ་ཧཾ། ཞེས་བསྒོམས་ལ། ས་མ་ཡ་ས་ཏྭ་ཨ་དྷི་ཏིཥྛ་སྭ་མཾ། ཞེས་བྱ་བ་དང༌། དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་དཔྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབ་པར་བྱའོ། །དེ་ནས་རྣམ་པ་སྣང་མཛད་ཀྱི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ནམ་མཁའ་དང་མཉམ་པའི་སྦྱོར་བས་རང་གི་སྙིང་གར་ཡིད་ཀྱིས་ཞུགས་ལ། རྡོ་རྗེ་འཁོར་ལོའི་ཕྱག་རྒྱས་དེ་ཉིད་དུ་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོ་མངོན་པར་སྤྲུལ་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་གྱི་བདག་ཉིད་འཇུག་པའི་ཆོ་ག་རྣམས་རྗེས་སུ་སྤྱད་དེ། རང་གི་སྙིང་གར་ཟླ་བའི་ནང་དུ་འདྲེས་པར་བསམས་ལ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ནས། ཨོཾ་བྷུ་ཁཾ་ཨ་ཞེས་ཟློས་ཤིང་མདུན་དུ་སྣ་ཚོགས་པདྨའི་སྟེང་དུ། དེ་བཞིན་གཤེགས་པའི་རྡོ་རྗེ་བསམས་ལ། བཛྲ་ཧཱུཾ་ཞེས་བྱ་བས་རྡོ་རྗེའི་ང་རྒྱལ་དུ་བསྒོམས་ཏེ། བཻ་རོ་ཙ་ན་ཧཱུཾ་ཞེས་བྱ་བས་རྡོ་རྗེ་རྣམ་པར་སྣང་མཛད་དུ་བདག་ཉིད་བསམས་ནས་དེ་ཉིད་དུ་བཅོམ་ལྡན་འདས་རྣམ་པར་སྣང་མཛད་རྡོ་རྗེ་ལྕགས་ཀྱུ་ལ་སོགས་པའི་ལས་ཀྱི་ཕྱག་རྒྱ་སྔར་བཤད་པའི་སྙིང་པོ་དང་བཅས་པས་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱའོ། །དེ་ནས་དེ་བཞིན་གཤེགས་པའི་དམ་ཚིག་གི་ཕྱག་རྒྱ་དང༌། ཨོཾ་བྷུ་ཁཾ་དྲྀ་ཤྱ་ཞེས་བྱ་བས་རྣམ་པར་སྣང་མཛད་བལྟ་བར་བྱས་ལ། ཨོཾ་བྷུ་ཁཾ་ཞེས་བྱ་བ་དང༌། གསང་བའི་ལྕགས་ཀྱུ་མས་རང་གི་ལུས་ལ་བཅུག་ལ་ཡང་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་བཅིངས་ཏེ། ས་མ་ཡ་སཏྭཾ་ཞེས་བརྗོད་ལ་འོད་ཀྱི་དཀྱིལ་འཁོར་བསྐྱེད་ནས་ས་མ་ཡ་སཏྭཾ་ཛཿ་ཧཱུཾ་བཾ་ཧོཿ། ཨོཾ་བྷུ་ཁཾ་ཞེས་ལན་གསུམ་བཟླས་ལ་བཅོམ་ལྡན་འདས་རྣམ་པར་སྣང་མཛད་དང་བདག་ཉིད་ཆུ་དང་འོ་མ་ལྟར་གཅིག་ཏུ་གྱུར་པར་བསམ་པར་བྱའོ། །དེ་ནས་བཅོམ་ལྡན་འདས་ཀྱི་ཆོས་དང་ལས་དང༌། ཕྱག་རྒྱ་ཆེན་པོ་བཅིང་བར་བྱའོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་
པའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་དང་པོའི་རྡོ་རྗེས་བདག་ལ་བྱིན་གྱིས་བརླབ་པ་བྱས་ནས་ཡི་གེ་བརྒྱ་པས་བརྟན་པར་བྱས་ལ། རིན་པོ་ཆེའི་དབང་བསྐུར་བའི་ཕྱག་རྒྱས་དབང་བསྐུར་ཏེ། ཡི་གེ་གཉིས་ཀྱིས་གོ་ཆ་བགོ་བར་བྱའོ། །དེ་ནས་དེ་བཞིན་གཤེགས་པའི་རྡོ་རྗེ་དང་བདག་པོ་དང༌། མིང་གི་དབང་བསྐུར་བ་བླངས་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་གཟུང་བར་བྱའོ། །དེ་ནས་འདོད་ཆགས་རྡོ་རྗེ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་དེ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོས་བཅིངས་ལ། དེ་ཁོ་ན་ཉིད་ཀྱིས་རྡོ་རྗེ་བཟུང་སྟེ། ཆོས་ཀྱི་དྲིལ་བུ་དཀྲོལ་ཞིང་དམ་ཚིག་གི་ཕྱག་རྒྱ་ཆེན་པོ་བྱིན་གྱིས་བརླབས་ལ། ཨོཾ་བྷུ་ཁཾ་ཞེས་ལན་གསུམ་བཟླ་བར་བྱའོ། །དེ་ནས་དང་པོའི་རྡོ་རྗེ་ནམ་མཁའི་ཕྱོགས་སུ་རྡོ་རྗེ་སེམས་དཔའི་གཞལ་ཡས་ཁང་དེ་བཞིན་དུ་བསྐྱེད་དེ། ལྷ་ཐམས་ཅད་ཀྱི་གནས་སུ་ཧྲི་ལས་སྣ་ཚོགས་པདྨའི་གདན་བསམས་ལ། ལྷ་མོའི་དཀྱིལ་འཁོར་གྱི་ཚུལ་གྱིས་བདག་ཉིད་རྡོ་རྗེ་སེམས་དཔའ་བསྒོམ་པ་ནི་དང་པོའི་སྦྱོར་བའི་ཏིང་ངེ་འཛིན་ཏོ། །དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ། བྱང་ཆུབ་སྙིང་པོར་བྱིན་རློབ་མཛོད། །ཅེས་བྱ་བའི་བར་གྱིས་བཤད་པ་བསྒོམ་པ་ནི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པའོ། །དེ་ནས་སྒོ་དབྱེ་བ་བྱས་ལ་བསྡུ་བར་བྱའོ། །དེ་ནས་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་ཆོ་ག་ཐམས་ཅད་རྗེས་སུ་སྤྱད་པར་བྱ་བ་ནི་ལས་ཀྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གསུམ་པའོ། །དེ་ལྟར་ཏིང་ངེ་འཛིན་གསུམ་བསྒོམས་ནས་ཡང་བསྡུ་བར་བྱས་ལ། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བསྒོམ་ཞིང༌། དཔལ་མཆོག་དང་པོའི་སེམས་དཔའ་ཆེ། །དགའ་བ་ཆེན་པོ་མགུ་བ་ཆེ། །ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་ཚུལ་བདག་པོའི་བདག །ཅེས་བྱ་བ་ལ་སོགས་པ་མཚན་བརྒྱ་རྩ་བརྒྱད་པས་བསྟོད་པ་བྱས་ལ། ཨོཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཾ་ཨཱ་དྱ་ནུཏྤ་ཎྞ་ཏྭཱ་ཏ་ཅེས་ཟློས་ཤིང་གསང་
བའི་ལྕགས་ཀྱུ་མས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་ལ། དམ་ཚིག་གི་ཕྱག་རྒྱས་ཇི་ལྟ་བ་བཞིན་དུ་བསྒོམས་ནས་ཆོས་དང༌། ལས་དང་ཕྱག་རྒྱ་ཆེན་པོས་རྒྱས་གདབ་པར་བྱའོ། །དེ་ནས་རྡོ་རྗེ་རིན་ཆེན་གྱི་ཕྱག་རྒྱས་དེ་བཞིན་གཤེགས་པ་རྣམས་དབང་བསྐུར་ལ་རྡོ་རྗེ་སེམས་མ་ནས་རྡོ་རྗེ་དྲིལ་བུའི་བར་དུ་སངས་རྒྱས་ལྔའི་ཅོད་པན་གྱི་དབང་བསྐུར་ནས་མཆོད་ཡོན་ཕུལ་ཏེ། མཆོད་པ་རྣམ་པ་ལྔ་དང༌། ཕྱག་རྒྱའི་མཆོད་པ་བཅུ་གཉིས་ཀྱི་བཅོམ་ལྡན་འདས་རྣམ་པར་སྣང་མཛད་འཁོར་དང་བཅས་པ་ཡང་དག་པར་མཆོད་པར་བྱའོ། །དེ་ནས་རྣམ་པར་སྒེག་པའི་དགའ་བའི་རྡོ་རྗེས་ཕྱག་བྱས་ལ། ཕྱག་བཞི་བྱས་ནས་ཡང་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ལ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སྭ་བྷཱ་བ་ཤུདྡྷོ་྅ཧཾ། ཨོཾ་སརྦ་ས་མོ྅ཧཾ། ཞེས་བྱ་བའི་སྙིང་པོ་གསུམ་ཟློས་ཤིང༌། དོན་གསུམ་རྣམ་པར་བསྒོམས་ལ། ཏ་ཐཱ་ག་ཏ་མཎྜལ་སྭ་བྷཱ་ཝ་ཧཾ་སྭ་མཾ། ཞེས་ཟློས་ཤིང་བདག་ཉིད་ནི་རང་ཉིད་དེ། ད་བཞིན་གཤེགས་པའི་དཀྱིལ་འཁོར་གྱི་ངོ་བོ་ཡིན་ནོ་ཞེས་བསམ་མོ། །དེ་ནས། ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་དབང་ཕྱུག་ཆེ། །བདེ་བ་ཆེན་པོ་དངོས་གྲུབ་མཆོག །དེ་བཞིན་གཤེགས་པར་བདག་གྱུར་ཅིག །ཅེས་བསམས་ལ་རང་གི་སྙིང་གར་གནས་པའི་རྡོ་རྗེའི་དབུས་སུ། ཨོཾ་བྷུ་ཁཾ་ཞེས་བྱ་བ་ཡིད་ཀྱིས་བྲིས་ལ་འདི་ཉིད་ཆོས་ཀྱི་ཚིག་གིས་ཟློས་ཤིང་བདག་ཉིད་ལྷ་ཐམས་ཅད་ཀྱི་རང་བཞིན་ཡིན་པར་བསྒོམ་པར་བྱའོ། །དེ་ལྟར་ན་དང་པོར་བདག་ལ་བྱིན་གྱིས་བརླབ་ པ་ལན་ཅིག་བྱས་ནས་གང ་གི་ཚེ་མཉམ་པར་གཞག་པའི་སྦྱོར་བས་གནས་པར་འདོད་པ་དེའི་ཚེ། ཨོཾ་བྷུ་ཁཾ་ཞེས་ཟློས་ཤིང་རྣམ་པར་སྣང་མཛད་ཀྱི་གནས་སུ་རྣམ་པར་བཞག་ལ། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གིས། །ཨོཾ་བྷུ་ཁཾ་ཞེས་ཟློས་ཤིང་བདག་ཉིད་ཀྱི་གནས་བཞིར་དེ་བཞིན་དུ་བྱིན་གྱིས་བརླབས་ལ་གནས་པར་བྱའོ། །བྱ་བ་ཐམས་ཅད་བྱས་ནས་ཡང་སླར་ཞུགས་ཏེ། གསང་བའི་ལྕགས་ཀྱུ་མ་དང༌། རྣམ་པར་སྣང་མཛད་ཀྱི་སྙིང་པོས་རྣམ་པར་སྣང་མཛད་རང་གི་ལུས་ལ་བཅུག་ལ་མཚན་བརྒྱ་རྩ་བརྒྱད་པས་བསྟོད་
པ་དང༌། མཆོད་པ་བཅུ་གཉིས་དང༌། ཕྱག་ཀྱང་བྱས་ལ་དེ་བཞིན་དུ་བསྒོམས་པར་བྱའོ། །བསྒོམ་པས་དུབ་པར་གྱུར་ན་ཡང་མཚན་བརྒྱ་རྩ་བརྒྱད་པས་བསྟོད་པ་དང༌། མཆོད་པ་རྣམ་པ་ལྔ་དང༌། ཕྱག་རྒྱའི་མཆོད་པ་བཅུ་གཉིས་བྱས་ནས་དེ་བཞིན་དུ་ཕྱག་བྱས་ལ་དེ་བཞིན་དུ་བཅོམ་ལྡན་འདས་འཁོར་དང་བཅས་པ་གཤེགས་སུ་གསོལ་བར་བྱའོ། །དེ་ལྟར་ཟླ་བ་གཅིག་གམ་ཟླ་བ་དྲུག་གམ། །ལོ་གཅིག་གམ། །དུས་ཇི་སྲིད་ཀྱིས་བཅོམ་ལྡན་འདས་ཀྱིས་རྗེས་སུ་གནང་བ་སྩོལ་བ་དེ་སྲིད་ཀྱི་བར་དུ་ཉིན་རེ་ཞིང་བྱའོ། །དེ་ནས་ཉིན་རེའམ་ཟླ་བ་རེ་འམ། ལོ་རེ་ཞིང་དཀྱིལ་འཁོར་བྲི་བར་བྱའོ། །དེ་ལ་དང་པོར་ས་སྤྱང་བ་དང༌། ས་ཡོངས་སུ་གཟུང་བའི་ཆོ་ག་རྗེས་སུ་སྤྱད་ལ་བགེགས་གཞོམ་པ་ལ་སོགས་པ་བྱས་ནས་རྡོ་རྗེ་འཁོར་ལོས་རྣམ་པར་སྣང་མཛད་ཀྱི་དཀྱིལ་འཁོར་བསྐྱེད་ལ་ཕྱག་འཚལ་བ་སྔོན་དུ་འགྲོ་བས་སྔོམ་པ་བཟུང་ལ་རྣལ་འབྱོར་ཆེན་པོ་དང༌། གཞལ་ཡས་ཁང་དང་གདན་རྣམས་བསྐྱེད་དེ། དཀྱིལ་འཁོར་གྱི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་ལ། སྔ་མ་བཞིན་དུ་བདག་ཉིད་སྤྲོ་བ་བསྐྱེད་པར་བྱའོ། །དེ་ནས་དེ་བཞིན་དུ་སངས་རྒྱས་ཐམས་ཅད་སྤྱན་དྲང་བ་བྱས་ལ་ཡང་ཕྱག་བྱས་ནས་དང་པོའི་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང༌། ལས་ཀྱི་རྒྱལ་མཆོག་རྣམ་པར་བསྒོམས་ལ། དཀྱིལ་འཁོར་བྲི་བར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱིས། །དེ་བཞིན་གཤེགས་པའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །ཞེས་བྱ་བས་བདག་ཉིད་ལ་གསོལ་བ་བཏབ་པར་བསམ་མོ། །དེ་ནས་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱ་དང༌། ཨོམ་བྷུ་ཁཾ་བཛྲ་ཏིཥྛ་མཎྜལ་ཨུཏྛ་པ་ཡ་ཞེས་ཟློས་ཤིང་ཡིད་ཀྱིས་དཀྱིལ་འཁོར་བཏེག་ལ་ནམ་མཁར་གཞག་སྟེ། ཨོཾ་བྷུ་ཁཾ་ཨ་དྷི་ཏིཥྛ་སྭ་མཾ་ཞེས་བྱ་བ་དང༌། དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར་བདག་ཉིད་ལ་བྱིན་གྱིས་བརླབ་པ་དང༌། བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོ་བཅིངས་ཏེ། བཛྲ་དྲྀཥྛ་མཊ་ཅེས་བྱ་བ་མིག་གཉིས་སུ་དགོད་པ་དང༌། ཕྱག་རྒྱལ་གནས་དེ་བཞིན་ལངས། །ཀུན་དུ་རྣམ་
པར་བལྟས་ནས་ནི། །ཨོཾ་བྷུ་ཁཾ་ཞེས་ཟློས་ཤིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་སློབ་མ་ལྷག་པར་གནས་པ་དང༌། ལྷ་ལྷག་པར་གནས་པའི་ཆོ་ག་བྱས་ནས་ཉི་མ་འཆར་ཀར་དཀྱིལ་འཁོར་གྱི་ཐིག་གདབ་པར་བྱ་སྟེ། ཕྱིའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་གྱི་ཐིག་གདབ་པའི་ཆོ་གས་ཐིག་གདབ་པར་བྱའོ། །དེའི་ནང་དུ་ཕྱེད་ཀྱི་ཚད་ལ་རྡོ་རྗེ་རྩེ་གསུམ་པ་ཟླུམ་པོར་བསྐོར་བ། ཀ་བ་བརྒྱད་ཀྱིས་ཉེ་བར་མཛེས་པར་བྲི་བའི་ཐིག་གདབ་བོ། །དེ་ནས་ཚོན་སྣ་ལྔའི་ཕྱེ་མས་དཀྱིལ་འཁོར་བྲིས་ལ། ནང་གི་དཀྱིལ་འཁོར་གྱི་ལྟེ་བར་སྣ་ཚོགས་པདྨ་ལ་བཅོམ་ལྡན་འདས་རྣམ་པར་སྣང་མཛད་གསེར་གྱི་མདོག་ཅན་ཞལ་གཅིག་པ། བྱང་ཆུབ་མཆོག་གི་ཕྱག་རྒྱས་དེ་བཞིན་གཤེགས་པའི་རྡོ་རྗེ་བསྣམས་པ། རྡོ་རྗེ་སྐྱིལ་མི་ཀྲུང་གིས་བཞུགས་པ་ཉི་མའི་འོད་མངའ་བ། རིན་པོ་ཆེའི་ཅོད་པན་གྱིས་དབང་བསྐུར་བ། ཞལ་ཤར་དུ་གཟིགས་པ་ཅུང་ཟད་འཛུམ་པ་སུ་ར་ཏེ་ས་མ་ཡ་སྟྭཾ་ཧོ་སིདྡྷ་མཾ་ཞེས་ཟློས་ཤིང་བྲི་བར་བྱའོ། །དེའི་མདུན་དུ་འདོད་ཆགས་རྡོ་རྗེ་མའི་གནས་སུ་བཅོམ་ལྡན་འདས་མི་བསྐྱོད་པ་ཟླ་བའི་མདོག་ཅན་ས་གནོན་གྱི་ཕྱག་རྒྱས་བཞུགས་པ་རྡོ་རྗེ་རིན་པོ་ཆེའི་ཅོད་པན་གྱིས་དབང་བསྐུར་བ། རྣལ་འབྱོར་པ་མི་བསྐྱོད་པའི་ང་རྒྱལ་གྱིས་བདུད་ལས་རྣམ་པར་རྒྱལ་བར་བསམ་ཞིང་རྡོ་རྗེ་སེམས་དཔའི་སྙིང་པོ་བཛྲ་སཏྭ་ཧཱུཾ། ཞེས་ཟློས་ཤིང་བྲི་པར་བྱའོ། །ཀཱི་ལི་ཀཱི་ལའི་གནས་སུ་བཅོམ་ལྡན་འདས་རིན་ཆེན་འབྱུང་ལྡན་བཻ་ཌཱུ་ཪྻའི་མདོག་ཅན། མཆོག་སྦྱིན་གྱི་ཕྱག་རྒྱས་བཞུགས་པ་རིན་པོ་ཆེའི་ཅོད་པན་གྱིས་དབང་བསྐུར་བ། རྣལ་འབྱོར་པ་རིན་ཆེན་འབྱུང་ལྡན་གྱི་ང་རྒྱལ་གྱིས་བྱང་ཆུབ་སེམས་དཔའི་ནོར་ཆེན་པོས་བདག་ལ་དབང་བསྐུར་བར་བསམ་ཞིང༌། བཛྲ་རཏྣ་ཞེས་ཟློས་ཤིང་བྲི་བར་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི་རྒྱབ་ཏུ་རྡོ་རྗེ་དྲན་མའི་གནས་སུ་བཅོམ་ལྡན་འདས་སྣང་བ་མཐའ་ཡས་སྐུ་མདོག་དམར་པོ་ཏིང་ངེ་འཛིན་མཆོག་གི་ཕྱག་རྒྱས་བཞུགས་པ་རིན་པོ་ཆེའི་ཅོད་པན་གྱིས་དབང་བསྐུར་བ། རྣལ་འབྱོར་པ་འོད་དཔག་ཏུ་མེད་པའི་ང་རྒྱལ་
གྱིས་རྡོ་རྗེ་ཆོས་ལ་སོགས་པ་བྱང་ཆུབ་སེམས་དཔའ་རྣམས་དང་ལྷན་ཅིག་ཆོས་དཀྱིལ་འཁོར་ལོ་སྐོར་བར་བསམ་མ་ཞིང༌། བཛྲ་དྷརྨཱ་ཧྲིཿཟློས་ཤིང་སྲོག་པར་བྱའོ། །བཅོམ་ལྡན་འདས་རྣམ་པར་སྣང་མཛད་ཀྱི། །གཡོན་ལོགས་སུ་རྡོ་རྗེ་སྙེམས་མའི་གནས་སུ་བཅོམ་ལྡན་འདས་དོན་ཡོད་གྲུབ་བ་སྣ་ཚོགས་མདོག་ཅན་མི་འཇིགས་པ་སྦྱིན་པའི་ཕྱག་རྒྱས་བཞུགས་ཏེ། རིན་པོ་ཆེའི་ཅོད་པན་གྱིས་དབང་བསྐུར་བ་རྣལ་འབྱོར་པ་དོན་ཡོད་པར་གྲུབ་པའི་ང་རྒྱལ་གྱིས་གཡོན་ལོགས་སུ་བཞུགས་པར་བརྩོན་པའི་སེམས་ཅན་ཐམས་ཅད་ཀྱང་འདུལ་བར་བྱེད་ན། དམ་པ་རྣམས་ལ་སྨོས་ཀྱང་ཅི་དགོས་ཞེས་ཡིད་ལ་ཞིང་བཛྲ་ཀརྨ་ཞེས་ཟློས་ཤིང་བྲི་བར་བྱའོ། །དེ་ལ་བཅོམ་ལྡན་འདས་རྣམ་པར་སྣང་མཛད་ནི་ལོངས་སྤྱོད་རྫོགས་པའི་སྐུའི་ངོ་བོ་མི་བསྐྱོད་པ་ལ་སོགས་པ་ནི་སྤྲུལ་པའི་སྐུའི་ངོ་བོ་རབ་ཏུ་བྱུང་བའི་ཆ་ལུགས་ཅན། ཆོས་གོས་བསྣམས་པ་སྣ་ཚོགས་པདྨ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་ཤིང་བཅོམ་ལྡན་འདས་རྣམ་པར་སྣང་མཛད་ལ་མངོན་པར་ཕྱོགས་ཤིང༌། རྡོ་རྗེ་དང་རིན་པོ་ཆེ་དང༌། པདྨ་དང༌། སྣ་ཚོགས་པདྨ་བསྣམས་པ་ཉི་མའི་དཀྱིལ་འཁོར་མངའ་བའོ། །དེ་ནས་རང་གི་དཀྱིལ་འཁོར་དེ་ཉིད་ཀྱི་མེའི་མཚམས་སུ་རྡོ་རྗེ་རྩེ་ལྔ་པ། བདེན་བྲལ་གྱི་མཚམས་སུ་རྡོ་རྗེ་རིན་པོ་ཆེ། རླུང་གི་མཚམས་སུ་རྡོ་རྗེ་པདྨ་དང༌། དབང་ལྡན་གྱི་མཚམས་སུ་སྣ་ཚོགས་རྡོ་རྗེ། དེ་ལ་འདི་རྣམས་ཀྱི་སྙིང་བོ་ནི་སཏྭ་བཛྲ། བཛྲ་རཏྣ། བཛྲ་བདྨོ་ནི། བི་ཤྭ་བཛྲ་ཎི། ཞེས་བྱ་བ་ཡིན་ནོ། །ཕྱིའི་དཀྱིལ་འཁོར་གྱི་སྣམ་བུའི་མཚམས་སུ་སྒེག་མོ་དང་བཞད་མ་དང༌། གླུ་ཆེན་མོ་དང༌། གར་མ་ཞེས་བྱ་བའི་ལྷ་མོའི་ཚོགས་རྣམས་སྙིང་པོ་འདིས་བྲིས་པར་བྱའོ། །ཧེ་ར་ཏི་བཛྲ། བི་ལཱ་སྱ་ནི་ཏྲཊ། ཧེ་བེ་ག་བ་ཏཱི་བ་ཛྲ། ཧ་སེ་ཧ་ཏ། ཧེ་བཛྲ་ར་ཏི། བཛྲ་གཱི་ཏེ་རི་ཏེ། ཧེ་ར་ཏི་བཛྲ། ནྲྀ་ཏྱ་བེ་བ་བེ་བ་ཞེས་བྱ་བ་ཡིན་ནོ། །ཤར་ཕྱོགས་ཀྱི་སྒོའི་དབུས་སུ་རྡོ་རྗེ་ལྕགས་ཀྱུ་སྐུ་མདོག་དཀར་དམར་རྡོ་རྗེ་ལྕགས་ཀྱུས་དེ་བཞིན་གཤེགས་པ་ལ་འཛིན་པར་བརྩོན་པ། ལྷོ་ཕྱོགས་ཀྱི་སྒོའི་དབུས་སུ་རྡོ་རྗེ་ཞགས་པ་སྐུ་མདོག་དཀར་པོ། །རྡོ་རྗེ་ཞགས་པས་དེ་བཞིན་
གཤེགས་པ་ཐམས་ཅད་འཛུད་པ་ལ་བརྩོན་པ། ནུབ་ཕྱོགས་ཀྱི་སྒོའི་དབུས་སུ་རྡོ་རྗེ་ལྕགས་སྒྲོག་སྐུ་མདོག་སེར་པོ་རྡོ་རྗེ་ལྕགས་སྒྲོག་གིས་དེ་བཞིན་གཤེགས་པ་ཐམས་ཅད་འཆིང་བར་མཛད་པ། བྱང་ཕྱོགས་ཀྱི་སྒོའི་དབུས་སུ་རྡོ་རྗེ་དྲིལ་བུ་སྐུ་མདོག་སྔོ་བོ་ཕྱག་གཡས་ན་རྡོ་རྗེ་དྲིལ་བུ་བསྣམས་པ། ཕྱག་གཡོན་པས་གདན་ལ་བསྙེམས་ཏེ་བཞུགས་པ་བྲི་བར་བྱའོ། །དེ་རྣམས་ཀྱི་སྙིང་པོ་ནི་ཛཿབཛྲ་ཨཾ་ཀུ་ཤ །ཧཱུཾ་བཛྲ་པཱ་ཤ །བཾ་བཛྲ་སྥོ་ཊ། ཧོཿབཛྲ་གྷཎྚ། ཞེས་བྱ་བ་ཡིན་ནོ། །འདི་དག་ཐམས་ཅད་ཀྱང་སྣ་ཚོགས་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པའོ། །སངས་རྒྱས་ལྔའི་ཅོད་པན་གྱིས་དབང་བསྐུར་བ་དང་ལྡན་པ། བཅོམ་ལྡན་འདས་རྣམ་པར་སྣང་མཛད་ལ་མངོན་པར་ཕྱོགས་པར་བྲིའོ། །དེ་ལྟར་དཀྱིལ་འཁོར་བྲིས་ནས་སྒོ་དབྱེ་བའི་ཕྱག་རྒྱས་སྒོ་ཕྱེ་ལ་བསྡུ་བ་བྱས་ནས་མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་མངོན་པར་བསྟོད་དེ། བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་འདུག་ལ་རྡོ་རྗེ་སྐྱིལ་མི་ཀྲུང་གིས་གནས་ཏེ་གསང་བའི་ལྕགས་ཀྱུ་མའི་སྙིང་པོ་སྔར་བཤད་པས་བཅོམ་ལྡན་འདས་འཁོར་དང་བཅས་པའི་དཀྱིལ་འཁོར་དུ་བཅུག་ལ། རྡོ་རྗེ་གནོད་སྦྱིན་གྱིས་བགེགས་བསལ་བར་བྱས་ནས་ར་བ་དང་དྲ་བ་བྱའོ། །དེ་ནས་རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ་རྡོ་རྗེ་བསྲུང་བ་ཐམས་ཅད་ཀྱིས་ཡང་དག་པར་བསྲུངས་ལ། ཨོཾ་བྷུ་ཁཾ་ཞེས་བྱ་བས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ནས། ཨོཾ་བྷུ་ཁཾ་དྲྀ་ཤྱ་ས་མ་ཡ་སྟྭཾ་ས་མ་ཡ་སྟྭཾ་ཧཾ་ཛཿ་ཧཱུཾ་བཾ་ཧོཿ། ཨོཾ་བྷུ་ཁཾ། ཞེས་བྱ་བས་བཅོམ་ལྡན་འདས་རྣམ་པར་སྣང་མཛད་རང་གི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་བཞིན་དུ་ཨཿ་བཛྲ་གྷ་ཏྟྀ་དྲ་ཤྱ་ས་མ་ཡ་སྟྭཾ་ས་མ་ཡ་སྟྭཾ་ཨ་ཧཾ་ཛཿཧཱུཾ་བཾ་ཧོཿ། ཨཿབཛྲ་གྷ་ཎྚ། ཞེས་བྱ་བ་ལན་གསུམ་བཟླས། རྡོ་རྗེ་དྲིལ་བུའི་བར་དུ་རང་གི་དམ་ཚིག་གི་ཕྱག་རྒྱས་བསྒྲུབ་པར་བྱའོ། །དེ་ནས་ཆོས་དང་ལས་སང་ཕྱག་རྒྱ་ཆེན་པོ་རྣམ་པར་སྣང་མཛད་ལ་སོགས་པ་རྒྱས་བཏབ་ལ་དེ་བཞིན་གཤེགས་པ་ལྔའི་རྡོ་རྗེ་རིན་པོ་ཆེའི་ཕྱག་རྒྱས་དབང་བསྐུར་ཞིང་རྡོ་རྗེ་སེམས་དཔའ་ལ་སོགས་པ་སངས་རྒྱས་ལྔའི་ཅོད་པན་གྱི་དབང་བསྐུར་བའི་ཕྱག་རྒྱས་དབང་
བསྐུར་བར་བྱའོ། །དེ་ནས་མཆོད་ཡོན་ཕུལ་ལ་བུམ་པ་གང་བ་ལ་སོགས་པ་ཡང་དག་པར་མཆོད་ནས་ཆོས་གོས་སུ་གྱོན་པའི་གོས་ལ་རྡོ་རྗེ་གནོད་སྦྱིན་བཟླས་པ་དང༌། ཡང་གདོང་གཡོགས་ཀྱི་དང་ལ་སྒོ་བ་བཞིའི་སྙིང་པོ་བཟླས་ཏེ། དེས་རང་གི་གདོང་གཡོགས་ལ། ཤིན་ཏུ་དམར་བའི་གོས་གྱོན་ཞིང༌། མེ་ཏོག་གི་ཕྲེང་བ་བཏགས་བ་དང༌། གདོང་དྲི་ཞིམ་པོར་བྱས་ལ་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། དེ་བཞིན་གཤེགས་པ་ཐམས་ཅད་ལ་ཆོས་ཀྱི་འཁོར་ལོ་བསྐོར་བར་བསྐུལ་བ་དང༌། མྱ་ངན་ལས་མི་འདའ་བར་བྱ་བའི་ཕྱིར་གསོལ་བ་བཏབ་པ་བྱས་ནས་སྡོམ་པ་གཟུང་བར་བྱའོ། །དེ་ནས་ཕྱི་རོལ་ན་གནས་པའི་བུམ་པའི་ཆུ་ལ་ཨོཾ་བྷུ་ཁཾ་ཞེས་བྱ་བ་ཇི་ལྟ་བ་བཞིན་དུ་བདག་ཉིད་དབང་བསྐུར་ལ། ཐལ་མོ་ཁོང་སྟོང་དུ་སྦྱར་བའི་མཚན་ཉིད་ལ་མེ་ཏོག་དང་བཅས་པའི་སྙིང་གར་གཡོན་གྱིས་བསྐོར་བའི་ཚུལ་གྱིས་བཅིངས་ལ་དེ་ནས་མེ་ཏོག་གི་ཕྲེང་བ་བླངས་ནས། བཛྲ་བཛྲ། རྡོ་རྗེ་སེམས་དཔའ་བསྡུས་པ་ན། །རྡོ་རྗེ་རིན་ཆེན་བླ་ན་མེད། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུ་བླངས་པས། །རྡོ་རྗེ་ལས་ནི་བྱེད་པར་འགྱུར། །ཞེས་བརྗོད་ཅིང་རྡོ་རྗེ་ཤུགས་ཀྱིས་དཀྱིལ་འཁོར་དུ་འཇུག་པར་བྱའོ། །སྒོ་བཞིར་རྡོ་རྗེ་ལྕགས་ཀྱུ་མ་ལ་སོགས་པའི་སྙིང་པོ་ཡང་དེ་བཞིན་དུ་བཟླ་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་ཀྱི་སྤྱན་སྔར་འདུག་ལ་འདི་སྐད་ཅེས་བརྗོད་པར་བྱའོ། །མ་ཧཱ་སུ་ར་ཏ་སུ་སིདྡྷི་སུ་ཏོ་ཥྱོ་མེ་སུ། སུ་ཁཾ་བཛྲས་ཏྭ་ཨཱདྱསིདྡྱ་སྭ་མཱཾ། དེའི་འོག་ཏུ་འཇུག་པའི་ཕྱག་རྒྱ་མེ་ཏོག་དང་བཅས་པ་རང་གི་སྙིང་གར་བཞག་ལ། ཨོཾ་པ་ར་མ་སུ་ཁ་ཤ་ཡ་ཞེས་བྱ་བ་ལ་སོགས་པ་ཟློས་ཤིང་བསམ་པ་གཡོས་པས་རྣམ་པར་སྣང་མཛད་ལ་སོགས་པ་ལ་ཕྱག་བྱའོ། །དེ་ནས་དཀྱིལ་འཁོར་ལན་གསུམ་བསྐོར་བ་བྱས་ལ་བཅོམ་ལྡན་འདས་རྣམ་པར་སྣང་མཛད་ཀྱི་མདུན་དུ་འདུག་སྟེ་དེ་ཁོ་ན་ཉིད་བརྗོད་པར་བྱའོ། །འདོད་ཆགས་ཆེན་པོའི་བདེ་བ་ཆེ། །རྡོ་རྗེ་ཆེན་པོ་ནོར་ཆེ་ཞིང༌། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་དཔར་བདག་གྲུབ་མཛོད། །དེ་ནས་ཛཿ་ཧཱུཾ་བཾ་ཧོཿ། ཞེས་བརྗོད་དོ། །དེ་ནས་རྡོ་རྗེ་ཆུ་འཐུངས་ལ། །གཡོན་པའི་ཁྲོ་བོའི་ཁུ་ཚུར་གྱིས་སེམས་མའི་
རྡོ་རྗེ་ཕྱེ་ལ་ཨོཾ་བྷུ་ཁཾ་ཨ་ཞེས་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་མེ་ཏོག་སིལ་མ་གཏོར་ལ་འཇུག་པའི་མཛུབ་མོའི་ཕྱག་རྒྱ་དང༌། མཐེ་ཆུང་གི་རྩེ་མོ་བསྒྱིངས་བ་དང་བཅས་པས་དཀྲོལ་ལ། ཨོཾ་པ་ར་མ་སུ་ཁཾ་ཤ་ཡ་སུ་ལ་ལི་ཏ་བི་ལཱ་སྱ་ན་མི་ཏེ་ན་མ་མི་བྷ་ག་བཱནྟཾ་ཛཿ་ཧཱུཾ་བཾ་ཧོཿ་ཧི་ཧི་ཧི་ཧི་པྲ་ཏཱི་ཙྪ་ཀུ་སུ་མཱ་ཐ་ཞེས་བརྗོད་དོ། །དེ་ནས་ཕྲེང་བ་དེ་བླངས་ལ། རང་གི་མགོ་ལ་བཅིང་བར་བྱའོ། །དེང་ཁྱོད་དབང་བསྐུར་བ་དང༌། འདི་གཞན་ལ་སྨྲས་ན། གལ་ཏེ་སྐྱེ་བོ་འདུས་ནང་སྨྲས། །དད་པ་མེད་པས་པ་གང་པར་འགྱུར། །ཨོཾ་མ་ཧཱ་སུ་ཁ་བཛྲ་ས་ཏྭ་ཨ་བྷི་ཥི་ཉྩ་སུ་ར་སྟྭཾ་དེ་ནས་སྙིང་པོ་འདིས་གདོང་གཡོགས་དགྲོལ་བར་བྱའོ། །ཨོཾ་བཛྲ་ཙཀྵུ་ཀ་མ་ཡ་ས་རྦ་སུ་ར་ཏ་སྟྭཾ། དེ་ནས་ཧེ་བཛྲ་པ་ཤྱ་ཞེས་ཟློས་ཤིང་རྡོ་རྗེ་ལྕགས་ཀྱུ་ནས་བརྩམས་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་བར་གྱི་དཀྱིལ་འཁོར་ཐམས་ཅད་ཀྱི་ལྷའི་ངོ་བོ་ཉིད་བསྟན་པར་བྱའོ། །དེ་ནས་ཏིཥྛ་བཛྲ་ཞེས་ཟློས་ཤིང་འཇུག་པའི་ཕྱག་རྒྱས་སྙིང་གར་དགྲོལ་བར་བྱའོ། །དེ་ནས་རྡོ་རྗེ་ཐལ་མོ་བསྐོར་ལ་ཤིང་བ་བརྗོད་པའི་ཚུལ་དུ་སྙིང་གར་བཅིངས་ནས། མཚན་བརྒྱ་རྩ་བརྒྱད་པས་བཅོམ་ལྡན་འདས་འཁོར་དང་བཅས་པ་ལ་བསྟོད་པར་བྱའོ། །དེ་ནས་རྣམ་པར་སྣང་མཛད་དུ་བདག་ཉིད་བསམས་ལ། རྡོ་རྗེ་སེམས་དཔར་བྱིན་གྱིས་བརླབས་ནས། ཡང་དང་པོའི་རྡོ་རྗེ་བཛྲ་སཏྭ་ཞེས་ཟློས་ཤིང་བྱིན་གྱིས་བརླབས་ལ། མི་བསྐྱོད་པ་ལ་སོགས་པའི་དམ་ཚིག་གི་ཕྱག་རྒྱས་མི་བསྐྱོད་པ་ལ་སོགས་པའི་རང་གི་ལུས་ལ་གནས་ཇི་ལྟ་བ་བཞིན་དུ་བཀོད་ནས། ཇི་ལྟ་བ་བཞིན་དུ་དབང་བསྐུར་ཏེ། གཟེངས་བསྟོད་པ་དང༌། ལུང་བསྟན་པའི་བར་གྱི་ཆོ་ག་རྗེས་སུ་སྤྱད་ནས། བདག་བྱིན་གྱིས་བརླབ་པ་ལ་སོགས་པ་བྱས་ལ། ཇི་ལྟར་མངོན་པར་འདོད་པར་བཟླས། །དེ་ནས་བཅོམ་ལྡན་འདས་འཁོར་དང་བཅས་པ་ལ་མཆོད་པ་ཐམས་ཅད་ཀྱིས་ལང་དག་པར་མཆོད་ནས་ཕྱིར་འབྱུང་བར་འགྱུར་རོ། །དེ་ནས་སློབ་མ་གཞུག་པར་འདོད་ན། སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རྡོ་རྗེ་མཆོད་ཡོན་བསྐོར་བཅིངས་ཏེ། །སྙིང་ནས་བསམ་པ་གཡོས་
པ་ཡིས། །མགོ་བོས་ཡང་དག་ཕྱག་བྱས་པ། །དངོས་གྲུབ་ཐམས་ཅད་སྒྲུབ་བྱེད་ཡིན། །ཞུགས་པས་དཀྱིལ་འཁོར་ལན་གསུམ་ནི། །བསྐོར་བ་བྱས་ནས་བརྗོད་པར་བྱ། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ལའང་གྲུབ་པར་མཛོད། །དེ་ནས་དུས་ཀྱི་མཆོད་པ་ཡིས། །དེ་བཞིན་གཤེགས་པ་ཡང་དག་མཆོད། །དེ་བཞིན་དབང་བསྐུར་རྡོ་རྗེ་ནི། །བཟུང་སྟེ་སློབ་མ་གཞུག་པར་བྱ། །སློབ་དཔོན་གྱི་ལས་ཀྱི་ཆོ་གའོ། །དེ་ནས་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་བཤད་པར་བྱའོ། །དེ་ལ་སློབ་མ་བསླབ་པའི་གཞི་ལྔ་ཡོངས་སུ་གཟུང་བའམ། དགེ་སྦྱོང་ངམ། དགེ་སློང་གི་སྔོམ་པ་ཡོངས་སུ་བཟུང་བས་སྔར་བཤད་པའི་ཆོ་གས་རིག་པའི་སྔོམ་པ་གཟུང་བར་བྱའོ། །དེ་ནས་སློབ་དཔོན་གྱིས་སློབ་མ་ལ་འདི་སྐད་ཅེས་སྨྲར་གཞུག་པར་བྱའོ། །ཨོཾ་སརྦ་ཏ་ཐཱ་ག་ཐཱ་ག་པར་མ་མ་ཧཱ་ཨུ་ཏྤཱ་ད་ཨཱ་མི་ཨ་ཤེ་ཥ་ན་བི་ཤེ་ཥ་སརྦ་ས་ཏྭ་ས་དྷཱ་ཏུ་དྷ་དྲ་ན་ཧྲི་ཏེ་སུ་ཁོཏྟ་མ་སིདྡྷི་ནི་མིཏྟ་ཨ་དྱནྟ་བྷ་བ་སིདྡྷི་མ་ཧེ་ཤྭ་ཪྻ་དྷི་པ་ཏྱ་ཡཾ། ཡ་བོདྡྷ་སཏྭ་ཏ་མ་ཧཱ་ཡ་དྷི། མ་ཧེ་ཤྭ་ཪྻ་དྷི་པ་ཏྱ་ཡཾ། དེ་ནས་སློབ་མའི་སྙིང་གར་སུ་ར་ཏེ་ས་མ་མ་ཡ་སྟྭཾ་ཧོ་སི་དྡྷི་བཛྲ་ཡ་ཐཱ་སུ་ཁཾ་ཞེས་བྱ་བས་དེ་བཞིན་དུ་རྡོ་རྗེ་བསྐྱེད་ལ། སློབ་དཔོན་གྱིས་སློབ་མ་རྣམ་པར་སྣང་མཛད་ཀྱི་སྐུར་བྱ། དེ་ནས་མེ་ཏོག་ལ་སོགས་པས་མཆོད་ལ། ཡོན་གྱི་མཆོག་བླངས་ཏེ། ཕྱི་རོལ་ན་གནས་པའི་བུམ་པའི་ཆོས་དབང་བསྐུར་ལ། དང་པོར་འཇུག་པའི་ཕྱག་རྒྱས་སློབ་དཔོན་འཇུག་པའི་ཚུལ་དུ་ཞུགས་པར་བྱའོ། །དེ་ནས་འདི་སྐད་ཅེས་སྨྲར་གཞུག་གོ །མ་ཧཱ་ར་ཏ་སུ་ཏྲི་ཏ་སུ་ཏོ་ཥྱ་སུ་སུ་ཁོ་བཛྲ་སཏྭ་ཨཱ་དྱ་སིདྡྷྱ་མཾ། དེ་ནས་ཡང་ངས་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་གྲུབ་པར་ཡང་མཐོང་ན་དངོས་གྲུབ་གཞན་ལྟ་སྨོས་ཀྱང་ཅིང་དགོས་ཏེ་དེ་ལྟ་བུའི་ཡེ་ཤེས་བསྐྱེད་པར་བྱས། ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་
ནས་རྡོ་རྗེ་སློབ་དཔོན་རང་གི་སེམས་མའི་རྡོ་རྗེ་ཕྱག་རྒྱ་ཁ་ཐུར་དུ་བསྟན་པ་དང༌། གྱེན་དུ་བསྟན་པ་བཅིངས་ལ་རྡོ་རྗེ་སློབ་མའི་སྤྱི་བོར་བཞག་ལ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་རྡོ་རྗེའི་དམ་ཚིག་ཡིན་གྱིས་གལ་ཏེ་གང་ཞིག་ལ་སྨྲས་ན་གླང་བ་འགགས་པར་འགྱུར་རོ། །དེ་ནས་དམ་ཚིག་གི་ཕྱག་རྒྱ་དེ་ཉིད་དང༌། མནའི་སྙིང་པོ་འདི་ལན་ཅིག་བཟླས་ནས་སློབ་མ་དེ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་དམ་ཚིག་གི་སྙིང་པོ་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་ཞུགས་པར་མཛད། །གལ་ཏེ་ཚུལ་འདི་སྨྲས་ན་ནི།། དེ་མ་ཐག་ཏུ་དྲལ་ནས་གཤེགས། །བཛྲ་ཨུ་ད་ཀ་ཋ་ཋ་ཞེས་བྱའོ། །དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ནི་ང་ཡིན་གྱིས་སངས་རྒྱས་འདི་བྱོས་ཤིག་ཅེས་བསྒོ་བ་གང་ཡིན་པ་དེ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་དམྱལ་བར་ལྟུང་བར་གྱུར་ཏ་རེ། དེ་ནས་འདི་སྐད་ཅེས་བརྗོད་པར་བྱའོ། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ལ་རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག །དེ་ནས་རྡོ་རྗེ་སློབ་དཔོན་གྱིས་མྱུར་དུ་རྡོ་རྗེ་སེམས་མའི་ཕྱག་རྒྱ་བཅིངས་ལ་དེའི་སྙིང་གར་བཞག་སྟེ་འདི་སྐད་ཅེས་བརྗོད་དུ་གཞུག་གོ །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དི་རིང་ཉིད་དུ་འབབ་པར་ཤོག །བཛྲ་ཨེ་བེ་ཤ་ཨ། ཞེས་ལན་བརྒྱ་རྩ་བརྒྱད་བཟླ་བར་བྱའོ། །ཡང་ཁྲོ་བོའི་ཁུ་ཚུར་བཅིངས་ལ་རྡོ་རྗེ་སེམས་མས་གཡས་པ་དྲལ་བར་བྱ་ཞིང་ཨོཾ་བྷུ་ཁཾ་ཨ་ཨ་ཨ་ཨ་ཞེས་ལན་བརྒྱ་བཟླ་བར་བྱའོ། །དེ་ནས་དེ་བཞིན་དུ་མེ་ཏོག་གི་ཕྲེང་བ་དོར་བར་བྱའོ། །དེ་ནས་སྔ་མ་བཞིན་དུ་ཕྲེང་བའི་དབང་བསྐུར་བ་སྦྱིན་པར་བྱའོ། །དེ་ནས་དེ་བཞིན་དུ་གདོང་གཡོགས་དགྲོལ་བར་བྱའོ། །དེ་ནས་ཧེ་བཛྲ་པ་ཥྱ་ཞེས་བྱ་བ་དང༌། དཀྱིལ་འཁོར་བསྟན་པར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ་ཏིཥྛ་བཛྲ་ཞེས་བྱ་བ་ལ་སོགས་པས་སྙིང་གར་དགྲོལ་བར་བྱའོ། །དེ་ནས་ཕྱི་རོལ་གྱི་དཀྱིལ་འཁོར་གྱི་ནང་དུ་ཤར་སྒོར་
བལྟས་པའི་སྣ་ཚོགས་པདྨ་བྲིས་ལ་སློབ་མ་རྣམ་པར་སྣང་མཛད་དུ་བསམས་ཏེ་སེམས་མ་རྡོ་རྗེས་བྱིན་གྱིས་བརླབས་ལ་པདྨའི་སྟེང་དུ་ལས་ཀྱི་ཕྱག་རྒྱ་བཞག་ནས་ཡོན་གྱི་མཆོག་བླངས་ལ། སློབ་མ་ལ་མཆོད་ཡོན་བྱིན་ཏེ། དེ་ནས་མཆོད་པ་རྣམ་པ་ལྔས་མཆོད་ནས། དེ་བཞིན་གཤེགས་པའི་ཁུ་ཚུར་གྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ལ་ཨོཾ་བྷུ་ཁཾ་ཨོཾ་བཛྲ་ཨ་བྷི་ཥིཉྩ། ཞེས་བྱ་བས་དེ་དབང་བསྐུར་ལ་འདི་སྐད་བརྗོད་ཅིང་ཆུ་དེ་འཐུང་དུ་ཡང་གཞུག་གོ །འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་ཉམས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུངས་ཤིག །རྡོ་རྗེ་དྲིལ་བུའི་ཕྱག་རྒྱ་འདི། །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུས་ནང་བསྟན་པ་དང༌། །དད་པ་མེད་པས་བགད་པར་འགྱུར། །སློབ་མས་ཀྱང་ཐལ་མོ་བསྐོར་བས་སློབ་དཔོན་ལ་ཕྱག་བྱས་ལ་རྡོ་རྗེ་མེ་ཏོག་ལ་སོགས་པས་དབང་བསྐུར་པ་ཐམས་ཅད་བླང་བར་བྱ་ཞིང་ཡོན་ཡང་རྒྱུན་དུ་དབུལ་བར་བྱའོ། །དེ་ནས་རྡོ་རྗེ་རིན་པོ་ཆེའི་དམ་ཚིག་གི་ཕྱག་རྒྱས་རིན་པོ་ཆེའི་ཅོད་པན་གྱི་དབང་བསྐུར་བ་དང༌། དར་དཔྱངས་ཀྱི་དབང་བསྐུར་བས་ཀྱང་དེ་དབང་བསྐུར་ལ། ཛཿ་ཧཱུཾ་བཾ་ཧོཿ་མ་ཧཱ་སུ་ཁ་བཛྲ་ས་ཏྭ་ཨ་བྷི་ཥེ་ཀ་ན་སྟྭཾ། ཨ་བྷི་ཤཉྩཱི་མི་སརྦ་བཛྲ་ཨ་ཏི་བ་ཏེ་ཏྲི་ཏོ་མེ་བྷ་བ། སིདྡྷ་ནཱ་མ་ཏེ། བྷ་ག་བཱ་ན་མ་ཧཱ་བཛྲ་དྷ་ར་སུ་ར་ཏ་སྟྭཱཾ་ཧཾ། བཛྲ་སཏྭ་ཨོཾ་བྷུར་བྷུ་བ་སྭཿ་ཞེས་བྱ་བའི་སྔགས་དང༌། དེ་བཞིན་གཤེགས་པའི་ཁུ་ཚུར་གྱིས་དེ་བཞིན་གཤེགས་པའི་རྡོ་རྗེ་བླངས་ཏེ་རྡོ་རྗེའི་དབང་བསྐུར་བ་དང༌། བདག་པོའི་དབང་བསྐུར་བ་ཡང་བྱིན་ལ་མིང་གི་དབང་བསྐུར་བ་ཡང་འདིས་སྦྱིན་པར་བྱའོ། །ཨོཾ་སརྦ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་མ་ཧཱ་དྷ་ར་ཏེ་བཛྲ་ནཱ་མ་ཨ་བྷི་ཥིཉྩ་མཾ་ས་མ་ཡ་སྟྭཾ་བྷུར་བྷུ་བ་སྭཿ། དེ་ནས་འདིས་དངོས་གྲུབ་ཀྱི་རྡོ་རྗེ་བརྟུལ་ཞུགས་སྦྱིན་པར་བྱའོ། །ཨོཾ་སརྦ་ཏ་ཐཱ་ག་ཏ་ས་མ་ཡ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་མ་ཧཱ་བཛྲ་དྷ་ར། འདི་ནི་སངས་རྒྱས་ཐམས་ཅད་ཉིད། །རྡོ་རྗེ་ཅན་གྱི་རྡོ་རྗེ་ཡིན། །ཁྱོད་ཀྱིས་ཀྱང་ནི་རྟག་ཏུ་བཅང༌། །རྡོ་རྗེ་འཆང་ཆེན་བརྟུལ་ཞུགས་ཡིན། །འདི་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བྱང་ཆུབ་ཆེན་པོའི་སེམས་ཡོངས་སུ་མི་སྤང་བར་རྟག་ཏུ་བཅང་བར་བྱའོ་ཞེས་བྱ་བ་ནི་གསང་བའོ། །ཧེ་བཛྲ་གརྦྷ་པ་ཏེ་ཨ་བྷི་
ཥཉྩི་ཧེ་བཛྲ་ནཱ་མ་སིདྡྷི་ས་མ་ཡ་སྟྭཾ་བྷུར་བྷུ་བ་སྭཿ། དེ་ནས་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་བཅུ་གཉིས་ཀྱིས་ཡང་དག་པར་མཆོད་ལ་དེ་བཞིན་གཤེགས་པ་ཐམས་ཅད་ཀྱི་གསང་བ་ལྔ་བཤད་པར་བྱའོ། །དེ་ལ་འདི་ནི་དེ་བཞིན་གཤེགས་པ་ཐམས་ཅད་ཀྱི་གསང་བ་ཆེན་པོ་ལྔ་ཡིན་ཏེ། རྟག་དང་མི་བསྐྱོད་རིན་ཆེན་མཆོག །འཇིག་རྟེན་དབང་དང་དོན་ཡོད་གྲུབ། །དེ་བཞིན་གཤེགས་ཀུན་ཉིད་ཡིན་པས། །དེ་བཞིན་གཤེགས་པ་ཀུན་དུ་བཤད། །དེ་ལ་རིགས་ཀྱི་དེ་ཁོ་ན་ཉིད་ནི། རྡོ་རྗེ་སེམས་དཔའ་མི་བསྐྱོད་པ། །རིན་ཆེན་འབྱུང་ལྡན་རིན་ཆེན་དབང༌། །འཇིག་རྟེན་དབང་ཕྱུག་རྡོ་རྗེ་ཆོས། །རྡོ་རྗེ་ལས་ནི་རབ་གྲུབ་ཡིན། །དེ་ནས་དེ་ཉིད་ཀྱིས་ནི་རྡོ་རྗེ་བཟུང༌། །ཆོས་ཀྱི་དྲིལ་བུ་དཀྲོལ་བར་བྱའོ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླས། །ཞེས་བྱ་བ་བསླབ་པར་བྱའོ། །དེ་ནས་དམ་ཚིག་གསུམ་གྱི་གླུའི་མཆོད་པ་བླངས་ནས་རང་གི་ལྷའི་ཕྱག་རྒྱ་བཞིས་མནའ་བསྒགས་ལ་བསླབ་པར་བྱའོ། །ཆོག་རྒྱས་པ་ནི་སྔར་བཤད་པ་ལས་ཤེས་པར་བྱའོ། །སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་བསྟན་ནས་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་སྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར། དེ་ནས་མ་གྲུབ་དངོས་གྲུབ་མཆོག །ཅེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲས་ནི་དེ་མ་ཐག་པ་སྟེ། ཆོས་ཀྱི་ཕྱག་རྒྱའམ། ཕྱག་རྒྱ་ཆེན་པོའམ། དམ་ཚིག་གི་ཕྱག་རྒྱ་འམ། ལས་ཀྱི་ཕྱག་རྒྱ་ཟླ་བ་གཉིས་ཀྱིས་བསྒྲུབ་ས་པ་ན་གང་གི་ཚེ་གྲུབ་པར་མ་གྱུར་པ་དེའི་རྗེས་ཐོགས་ཉིད་ལའོ། །གྲུབ་པ་ནི་ཕྱག་རྒྱ་ཆེན་པོ་ལ་སོགས་པ་རྫོགས་པར་གྱུར་པའོ། །གྲུབ་པ་མེད་པས་ན་མ་གྲུབ་པ་སྟེ། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཀྱི་མཆོག་མ་གྲུབ་པ་ནི་དངོས་གྲུབ་མཆོག་གོ །ལས་རྣམས་ནི་འདོད་ཆགས་བ་ལ་སོགས་པ་འཇིག་རྟེན་པའི་མཚན་ཉིད་ཅན་གྱིའོ། །རྒྱུན་ནི་རབ་འབྱམ་སྟེ། དེ་ནི་མ་གྲུབ་དངོས་གྲུབ་མཆོག །ལས་རྣམས་ཀྱི་ནི་རྒྱུན་ཞེས་བྱའོ། །དེ་ཉིད་ནི་ལས་གཞན་ལས་དམ་པར་གྱུར་པས་ན་མཆོག་གོ །སྡིག་པ་ཀུན་
སེལ་ཞེས་བྱ་བ་ནི་སྲོག་གཅོད་པ་ལ་སོགས་པ་ཉེས་པར་སྤྱོད་པའི་གཉེན་པོར་གྱུར་པའོ། །སྣ་ཚོགས་པ་ཞེས་བྱ་བ་ནི་དབྱེ་བ་རྣམ་པ་བརྒྱས་དངོས་གྲུབ་ཐམས་ཅད་གྲུབ་པར་བྱེད་པའོ། །གོ་རིམས་བཞིན་དུ་ཞེས་བྱ་བ་ནི་རིམ་པ་བཞིན་ཏེ། ཇི་སྐད་བཤད་པའི་སྒྲུབ་པའི་ཐབས་ཀྱི་ཆོ་གའི་རིམ་གྱིས་ཞེས་བྱ་བའི་ཐ་ཚིག་གོ །རབ་བཤད་ཅེས་བྱ་བ་དེ་ལྟར་གྱུར་པ་དེ་རབ་ཏུ་བཤད་ཅིང་བསྟན་བར་བྱའོ་ཞེས་པའོ། །ཁྱེད་འཆད་པར་བྱེད་པ་གང་ཞིག་ཡིན་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ། འདི་ལྟ་སྟེ་ཞེས་བྱ་བའི་སྒྲ་ནི་ཉེ་བར་སྟོན་པའི་དོན་ཏོ། །ནད་ཀྱང་ཡིན་ལ་ཐམས་ཅད་ཀྱང་ཡིན་པས་ན་ནད་ཐམས་ཅད་དེ་སྐྱ་རྦབ་ལ་སོགས་པའོ། །མྱ་ངན་ཞེས་བྱ་བ་ནི་སྡུག་པ་དང་བྲལ་བ་ལས་བྱུང་བའི་ཡིད་མི་བདེ་བའི་རྒྱུན་ནོ། །གནོད་པ་ནི་མ་འོངས་པའི་དོན་གྲུབ་པ་མ་རྙེད་པ་ལས་བྱུང་བའི་སྡུག་བསྔལ་ལོ། །གནོད་བྱེད་ནི་གཅོང་ཆེན་པོ་ལ་སོགས་པའོ། །དུག་ནི་རྒྱུ་བ་དང༌། མི་རྒྱུ་བའི་བདག་ཉིད་ཅན་ནོ། །སྦྱར་བའི་དུག་ནི་སྦྱར་བའི་ལས་བྱུང་བའི་བདག་ཉིད་ཅན་ནོ། །གཤེད་བྱེད་ནི་གཞན་ལ་གནོད་པ་བྱེད་པའི་ཕྱིར། ལྷ་དགུག་པ་དག་སྔགས་ཀྱི་སྟོབས་ཀྱིས་བསྐྱེད་པ་གང་ཡིན་པའོ། །གཡེང་བྱེད་ནི་ཕུར་བུའི་ཕྱག་རྒྱའམ། མིང་རུས་ལ་སོགས་པ་ཕྱིའི་ཕུར་བུས་ལྷ་ལ་སོགས་པས་ཕུར་བུ་བཏབ་པའོ། །རོ་ལངས་ནི་འདིར་གཞན་དག་ལ་གནོད་པར་བྱ་བའི་ཕྱིར་ཤི་བའི་རོལ་སྲིན་པོ་གདུག་པ་བཅུག་པའོ། །སྔགས་ནི་སྒྲུབ་པ་པོའི་དོན་ལ་གེགས་བྱེད་པར་འགྱུར་བའོ། །སྨན་ནི་འདོད་པའི་དོན་ལ་གེགས་བྱེད་པས་གཟུང་ངོ༌། །བགེགས་ནི་སྒྲུབ་པ་པོའི་འདོད་ཆགས་པ་ནང་གི་བགེགས་དང༌། དངོས་གྲུབ་གྱི་བར་དུ་གཅོད་པའི་ཕྱིར་བགེགས་རྣམས་སོ། །ལོག་འདྲེན་ནི་གོ་བར་ཟད་དོ། །སྡིག་པ་ནི་སྒྲུབ་པ་པོ་ལ་ཟ་བར་བརྩོན་པའི་སྲིན་པོ་ལ་སོགས་པའོ། །རྨི་ལམ་ངན་པ་དང༌། དུས་མ་ཡིན་པར་འཆི་བ་དང༌། རིམས་ནི་གོ་བར་ཟད་དོ། །གདོན་ནི་སེམས་ཅན་གྱི་རྒྱུད་དུ་གཏོགས་པའི་ལྷའི་གདོན་ལ་སོགས་པ་རིག་པ་མཆོག་པས་གསུངས་པ་བཅོ་བརྒྱད་དོ། །མཁའ་འགྲོ་མ་ནི་འཇིག་རྟེན་དང་འཇིག་རྟེན་ལས་འདས་པའོ། །ཉེ་བར་འཚེ་བ་ནི་ཁྱིམ་དུ་སྲིན་པོ་ལ་སོགས་པ་སྣང་བའོ། །དེས་ཉེ་བར་བཅོམ་པ་ནི་ཉེ་བར་འཚེ་བའོ། །གློ་བུར་བ་ནི་འགོ་
བའི་ནད་དོ། །ཉེས་པ་ནི་ཁང་པ་ལ་སོགས་པར་ཉེས་བ་གློ་བུར་དུ་བྱུང་བའོ། །ཉོན་མོངས་པ་ནི་ལུས་ཀྱི་སྡུག་བསྔལ་ལོ། །ལུས་དང་ངག་དང་སེམས་ཀྱི་སྡུག་བསྔལ་ཐམས་ཅད་ནི་གོ་བར་ཟད་དོ། །འདི་རྣམས་འཇིག་པ་ཇི་ལྟར་འགྱུར་ཞེ་ན། དེ་བཞིན་གཤེགས་པ་ཐམས་ཅད་ཀྱི་སྡུག་བསྔལ་འཕྲོག་པར་བྱེད་པས་སོ་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱིས་ནད་བཙིར་བ་དང༌། མིག་དབྱེ་བ་དང༌། སྙིང་གར་གཞག་པ་དང༌། བྱ་བ་དང༌། ཁུ་ཚུར་གྱིས་བསལ་བ་དང༌། ཁ་ཟས་དང་ཁྲོ་བས་ཕུར་བུ་དབྱུང་བ་དང༌། རྟིང་པས་བརྡེག་པ་དང༌། ཨོཾ་བྲིས་ནས་ཕྱི་བ་དང༌། སོས་བཟུང་བ་དང༌། ཧཱུཾ་དང་བཅས་པས་བསྣུན་པ་དང༌། ལོག་འདྲེན་ལ་བརྡེག་པ་དང༌། ཚོན་བྲིས་ནས་ཕྱིར་བྱུང་བ་དང༌། སྦྱིན་སྲེག་བྱ་བ་དང༌། དཱུར་བའི་སྦྱིན་སྲེག་བྱ་བ་དང༌། སྤྱི་བོར་གཞག་པ་དང༌། ལྟ་བས་བྱབ་པ་དང༌། སྐྲ་ནས་བཟུང་སྟེ་སྦྲུག་པ་དང༌། ཁ་ཊྭཱཾ་ག་སྟེང་དུ་བཟུང་བ་དང༌། རང་གི་ཁྱིམ་དུ་གཞག་པ་དང༌། ཞུགས་པ་དང༌། སྙིང་ལས་གདོན་པ་དང༌། ལུས་ལས་བསྐོར་བ་དང༌། ཚིག་འབྱིན་པའི་ཚུལ་དང༌། སྙིང་གར་བཙིར་བའོ། །འདི་སྐད་སྟོན་པ་ཡིན་ཏེ། དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ། གཡས་པ་ཀུན་དུ་བསྒྲེང་བ་ནི། གཡོན་པའི་རྡོ་རྗེ་སོར་མོས་གཟུང། །བྱང་ཆུབ་མཆོག་གི་ཕྱག་རྒྱ་འདི། །སངས་རྒྱས་བྱང་ཆུབ་རང་བཞིན་བྱེད། །ཅེས་བྱ་བ་ནི་དེ་བཞིན་གཤེགས་པའི་ཁུ་ཚུར་རོ། །བདག་ལ་བྱིན་གྱིས་བརླབ་པ་ལ་སོགས་པས་རྣམ་པར་སྣང་མཛད་དུ་བདག་ཉིད་བསྐྱེད་དེ། འདི་བཅིངས་ནས་ཨོཾ་བྷུ་ཁཾ་ཞེས་ཟློས་ཤིང་དེས་ནད་བཙིར་ལ་བཅོམ་ལྡན་འདས་རྣམ་པར་སྣང་མཛད་ཀྱིས་ནད་པའི་སྤྱི་བོ་ནས་བརྩམས་ཏེ་རྐང་མཐིལ་གྱི་བར་དུ་ཡོངས་སུ་བཀང་བར་བསམ་པར་བྱ་སྟེ། དེ་ལྟ་བུས་ནི་ནད་ཞི་བར་འགྱུར་རོ། །དེ་བཞིན་དུ་རྣམ་པར་སྣང་མཛད་ཀྱི་སྦྱོར་བ་བྱས་ལ། བྱང་ཆུབ་མཆོག་གི་ཕྱག་རྒྱ་བཅིངས་ཏེ་བསྒྲུབ་པར་བྱ་བ་དང༌། ལྷན་ཅིག་ཡིད་ཀྱིས་གཅིག་ཏུ་བྱས་ལ་མྱ་ངན་གཞིག་པའི་བསམ་པས་བྱང་ཆུབ་མཆོག་གི་ཕྱག་རྒྱས་རང་གི་མིག་ཕྱི་ཞིང་བདེ་བ་སྐྱེས་པར་བསམས་ཏེ། དེ་ལྟ་བུས་ནི་མྱ་ངན་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་བསྒྲུབ་པར་བྱ་བ་དང་ལྷན་ཅིག་ཏུ་བྱས་པར་བསམས་ལ་བསྒྲུབ་པར་བྱ་བ་
དང་བདེ་བ་ངང་ཡིད་བདེ་བ་སྐྱེས་པའི་བསམ་བས་བྱང་ཆུབ་མཆོག་གི་ཕྱག་རྒྱ་བཅིངས་ཏེ་སྙིང་གར་གཞག་པར་བྱ་སྟེ་དེ་ལྟ་བུས་ནི་གནོད་པ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་གི་ཕྱག་རྒྱ་བཅིངས་ཏེ། ནད་པའི་ལུས་ལ་བྱ་བ་པར་བྱ་ཞིང་དེ་དང་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་པོས་ནད་པའི་ལུས་དེ་བཞིན་དུ་ཀུན་དུ་གང་བར་བསམས་ཏེ་དེ་ལྟ་བུས་ནི་གནོད་བྱེད་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱས་ཁུ་ཚུར་གཉིས་ཀྱིས་བསལ་བར་བྱས་པས་ནི་དུག་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱས་ཁ་ཟས་རྙེད་པ་ན་སྔགས་བཟླ་ཞིང་ཁ་ཟས་དེ་རྣམ་པར་སྣང་མཛད་ཀྱི་རང་བཞིན་དུ་བསམས་ལ་དེ་ནས་ཁ་ཟས་དེ་ཟོས་ན་སྦྱར་བའི་དུག་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱ་བཅིངས་ཏེ། གཤེད་བྱེད་ལ་མངོན་དུ་ཕྱོགས་ཏེ་ཁྲོས་པས་རྡོ་རྗེ་འབར་བ་འཕངས་ཏེ་གཤེད་བྱེད་ཀྱི་སྟེང་དུ་བབས་པར་བསམ་པར་བྱ་སྟེ། དེ་ལྟ་བུས་ནི་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་གི་ཕྱག་རྒྱས་ཕུར་བུ་བཟུང་ལ་ཡིད་ཀྱིས་ཕྱུང་ལ་དེ་ལྟ་བུས་ནི་བཀའ་འཁོར་དུ་འཇུག་གོ །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་གི་ཕྱག་རྒྱས་ཕུར་བུ་བཟུང་ལ་བཅིངས་ཏེ། དེས་རྟིང་པས་བརྡེག་པའི་ཚུལ་དུ་བྱས་ཤིང་ཕྱག་རྒྱ་བཅིངས་ལ། ལས་ཀྱང་རྡོ་རྗེ་འབར་བ་སྤྲོས་ལ་རོ་ལངས་ཀྱི་སྟེང་དུ་དབབ་པར་བྱ་སྟེ། དེ་ལྟ་བུས་ནི་རོ་ལངས་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱས་ཡི་གེ་ཨོཾ་བྲིས་ལ། སྔགས་ཐམས་ཅད་གཞིག་པའི་བསམ་བས་དབྱི་བར་བྱ་སྟེ། དེ་ལྟ་བུས་ནི་སྔགས་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ། བྱང་ཆུབ་མཆོག་གི་ཕྱག་རྒྱ་བཅིངས་ཏེ། སྨན་ཐམས་ཅད་བཟུང་བའི་བསམ་བས་དེ་སོགས་གཟུང་བར་བྱ་སྟེ། དེ་ལྟ་བུས་ནི་སྨན་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱ་ཚམ་ངམ་དང་བཅས་པ་དང༌། ཨོཾ་བྷུ་ཁཾ་ཧཱུཾ་ཞེས་བྱ་བས་བགེགས་ཐམས་ཅད་ལ་བསྣུན་ཅིང༌། བགེགས་ཐམས་ཅད་
ཀྱི་སྟེང་དུ་རྡོ་རྗེ་འབར་བ་ཡིད་ཀྱིས་ཕབ་ན་དེ་ལྟ་བུས་ནི་བགེགས་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ་ལོག་འདྲེན་བཀུག་སྟེ་དེའི་སྟེང་དུ་བྱང་ཆུབ་མཆོག་གི་ཕྱག་རྒྱ་རྡོ་རྗེ་འབར་བར་བྱ་སྟེ། དེ་ལྟ་བུས་ནི་ལོག་འདྲེན་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱས་སྲིན་པོ་ལ་སོགས་པ་སྡིག་པ་ཐམས་ཅད་བསད་པའི་བསམ་པ་དེ་ཉིད་ཀྱིས་དབྱི་བར་བྱ་ཞིང༌། བཅོམ་ལྡན་འདས་རྡོ་རྗེ་མེ་ལྟར་འབར་བས་ཀྱང་དེ་ཐལ་བར་བྱས་པར་བསམ་པར་བྱ་སྟེ། དེ་ལྟ་བུས་ནི་སྡིག་པ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ། མདུན་དུ་བཅོམ་ལྡན་འདས་རྣམ་པར་སྣང་མཛད་སྤྱན་དྲངས་ཏེ། ཆོ་ག་ཐམས་ཅད་རྗེས་སུ་སྤྱད་ལ། བྱང་ཆུབ་མཆོག་གི་ཕྱག་རྒྱས་རྨི་ལམ་ངན་པ་ཐམས་ཅད་གཞིག་པའི་བསམ་པས་སྦྱིན་སྲེག་བྱས་ན། དེ་ལྟ་བུས་ནི་རྨི་ལམ་ངན་པ་ཐམས་ཅད་འཇིག་པར་འགྱུར་རོ། དེ་བཞིན་དུ་ཐམས་ཅད་བྱས་ནས། བཅོམ་ལྡན་འདས་ཐབ་ཀྱི་དབུས་སུ་སྤྱན་དྲངས་ལ་ཆོ་ག་ཐམས་ཅད་རྗེས་སུ་སྤྱད་དེ། བྱང་ཆུབ་མཆོག་གི་ཕྱག་རྒྱས་དཱུར་བའི་སྦྱིན་སྲེག་བྱས་ན་དུས་མ་ཡིན་པར་འཆི་བའི་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱ་བཅིངས་ལ་སྤྱི་བོར་བཞག་སྟེ། བྱམས་པའི་ལྟ་བས་བསྒྲུབ་པར་བྱ་བ་ལ་བྱ་བཅིང་བཅོམ་ལྡན་འདས་གཙུག་འཕྱང་གིས་ཀྱང་བསྒྲུབ་པར་བྱ་བའི་ལུས་ཀུན་དུ་གང་ལ་རིམས་བཅོམ་བར་གྱུར་པར་བསམ་བར་བྱ་སྟེ། དེ་ལྟ་བུས་ནི་རིམས་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་གི་ཕྱག་རྒྱས་ནད་པའི་སྐྲ་ནས་བཟུང་ལ་སྦྲུག་ཅིང༌། བཅོམ་ལྡན་འདས་ཁྲོ་བོ་སྟོབས་པོ་ཆེས་བསྒྲུབ་པར་བྱ་བའི་ལུས་ལས་གདོན་བླངས་ཏེ། གཞན་དུ་དོར་བར་བསམ་བར་བྱ་སྟེ། དེ་ལྟ་བུས་ནི་གདོན་འཇིག་གོ །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་བཅིངས་ཏེ། དེའི་སྟེང་ན་ཁ་ཊྭཱཾ་ག་འཛིན་པའི་ཚུལ་དུ་གཞག་ཅིང་བདག་ཉིད་དཔལ་ཧེ་རུ་ཀར་བསམས་ལ་བཅོམ་ལྡན་འདས་དཔལ་ཧེ་རུ་ཀ་ལ་སོགས་པ་དང་བཅས་པས་བསྒྲུབ་པར་བྱ་བའི་ལུས་ལ་ཁྱབ་ནས་མཁའ་འགྲོ་མའི་ཕྱག་རྒྱ་རྣམས་ཐལ་བར་མཛད་པར་བསམ་པར་བྱ་སྟེ། དེ་ལྟ་
བུས་ནི་བསྒྲུབ་པར་བྱ་བའི་ལུས་ལ་ཡོད་པའི་མཁའ་འགྲོ་མ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་བཅིངས་ཏེ་རང་གི་ཁྱིམ་དུ་བསྐོར་ལ་རྡོ་རྗེ་རིགས་ཀྱིས་ཀྱང་ཡམས་ཀུན་དུ་འབྱིན་པར་བསམ་པར་བྱ་སྟེ། དེ་ལྟ་བུས་ནི་ཡམས་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་བཅིངས་ཏེ། རང་གི་ཁྱིམ་དུ་བཞག་ལ་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཁྱིམ་དེར་རྡོ་རྗེ་རིགས་འབྱིན་པའི་ཚུལ་གྱིས་གདུག་པ་ཐམས་ཅད་ངེས་པར་སྐྲོད་པར་མཛད་པ་ལ་བརྩོན་པར་བསམས་ན་དེ་ལྟ་བུས་ནི་ཉེ་བར་འཚེ་བ་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་བཅིངས་ཏེ། རང་གི་ཁྱིམ་དུ་ཞུགས་ལ་བཅོམ་ལྡན་འདས་རྣམ་པར་སྣང་མཛད་སྐུ་མདོག་དཀར་བོས་ཁང་བ་ཐམས་ཅད་སྣང་བར་མཛད་ཅིང༌། དེ་བཞིན་གཤེགས་པ་ཐམས་ཅད་འདུས་པའི་དབུས་ན་བཞུགས་པར་བསམ་པར་བྱ་སྟེ། དེ་ལྟ་བུས་ནི་གློ་བུར་བའི་ཉེས་པ་སེལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་བཅིངས་ཏེ། རང་གི་སྙིང་ག་ནས་བཏོན་ཏེ། བཅོམ་ལྡན་འདས་རྣམ་པར་སྣང་མཛད་ཀྱིས་བསྒྲུབ་པར་བྱ་བའི་ལུས་ལ་ཁྱབ་པར་བྱས་པར་བསམས་ན་དེ་ལྟ་བུས་ནི་ཉོན་མོངས་པ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བྱང་ཆུབ་མཆོག་བཅིངས་ཏེ་ལུས་ལ་བསྐོར་བས་ལུས་ཐམས་ཅད་རྣམ་པར་སྣང་མཛད་ཀྱི་རང་བཞིན་དུ་བསམ་པར་བྱ་སྟེ། དེ་ལྟ་བུས་ནི་ལུས་ཀྱི་སྡུག་བསྔལ་ཐམས་ཅད་འཇིག་པར་འགྱུར་རོ། །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་བཅིངས་ཏེ། དེས་ཚིག་འབྱིན་པའི་ཚུལ་དུ་བྱ་ཞིང་བདག་ཉིད་རྣམ་པར་སྣང་མཛད་ཀྱི་ཞལ་གྱི་ངོ་བོར་བསམ་པར་བྱ་སྟེ། དེ་ལྟ་བུས་ནི་ངག་གི་སྡུག་བསྔལ་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ནས་བྱང་ཆུབ་མཆོག་བཅིངས་ཏེ། སྙིང་གའི་ཕྱོགས་སུ་བཙིར་ཞིང་སྙིང་གར་སེམས་དཔའ་རྡོ་རྗེ་བསྒོམས་ན་དེ་ལྟ་བུས་ནི་སེམས་ཀྱི་སྡུག་བསྔལ་ཐམས་ཅད་ཞི་བར་འགྱུར་རོ། །དེ་ལྟར་བཅོམ་ལྡན་འདས་ཀྱིས་བྱང་ཆུབ་མཆོག་གི་ཕྱག་རྒྱ་ལས་ཉི་ཤུ་རྩ་ལྔ་བསྒྲུབ་པར་གསུངས་ནས། ད་ནི་དེ་ཉིད་ཀྱི་དམ་ཚིག་གི་ཕྱག་རྒྱ་ལས་ཉི་ཤུ་རྩ་ལྔ་པོས་གཞན་བྱ་བར་
གསུངས་པ་ནི་ཚེ་ཆེན་པོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིས་ཀྱང་འདི་སྐད་སྟོན་པ་ཡིན་ཏེ། བཅོམ་ལྡན་འདས་རྣམ་པར་སྣང་མཛད་ཀྱི་རྣལ་འབྱོར་ཇི་ལྟ་བ་བཞིན་དུ་བྱས་ལ་རྣམ་པར་སྣང་མཛད་ཀྱི་དམ་ཚིག་གི་ཕྱག་རྒྱས་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་བཅིངས་ལ་རང་གི་སྙིང་གར་བརྟན་པར་བྱ་ཞིང་རང་གི་སྙིང་གར་རྣམ་པར་སྣང་མཛད་ཟླ་བའི་མདོག་ཅན་བསམ་པར་བྱ་སྟེ། དེ་ལྟ་བུས་ནི་ཚེ་ཆེན་པོ་འཕེལ་བར་འགྱུར་རོ། །དེ་ཉིད་དབང་པོ་ཐམས་ཅད་དུ་བཞག་ལ་བཅོམ་ལྡན་འདས་རྣམ་པར་སྣང་མཛད་ལོ་བཅུ་དྲུག་ལོན་པ་ཙམ་དང་བདག་ཉིད་ཆུ་དང་འོ་མ་བཞིན་དུ་གཅིག་ཏུ་གྱུར་པར་བསམ་པར་བྱ་སྟེ། དེ་ལྟ་བུས་ནི་ན་ཚོད་ཆེན་པོ་འཕེལ་བར་འགྱུར་རོ། །དེ་ཉིད་ཁར་བཞག་ལ་བཅོམ་ལྡན་འདས་རྣམ་པར་སྣང་མཛད་བའི་སྒོ་ནས་ཞུགས་ཏེ། ཡན་ལག་ཐམས་ཅད་ཁྱབ་ནས་རྣམ་པར་སྣང་མཛད་དུ་བྱས་པར་བསམ་པར་བྱ་སྟེ། དེ་ལྟ་བུས་ནི་གཟུགས་ཆེན་པོ་འཕེལ་བར་འགྱུར་རོ། །དེ་ཉིད་ཁར་བསྐོར་ལ་བཅོམ་ལྡན་འདས་རྣམ་པར་སྣང་མཛད་སྐུ་ལ་མཚན་སུམ་ཅུ་རྩ་གཉིས་ཀྱིས་ཡང་དག་པར་བརྒྱན་པ། དཔེ་བྱད་བཟང་པོ་བརྒྱད་ཅུས་ཡན་ལག་རྣམ་པར་མཛེས་པ་ཁའི་སྒོ་ནས་ཞུགས་ཏེ། ཡན་ལག་ཐམས་ཅད་ཁྱབ་པས་རྣམ་པར་སྣང་མཛད་དུ་བྱས་པར་བསམ་པར་བྱ་སྟེ། དེ་ལྟ་བུས་ནི་ཁ་དོག་ཆེན་པོ་འཕེལ་བར་འགྱུར་རོ། །དེ་ཉིད་དབྲལ་བར་བཞག་ལ་བཅོམ་ལྡན་འདས་རྣམ་པར་སྣང་མཛད་ཀྱིས་ཁམས་གསུམ་གྱིས་ཆོས་ཀྱི་རྒྱལ་པོར་དབང་བསྐུར་བས་དབང་བསྐུར་ཏེ། ཁམས་གསུམ་གྱི་ཆོས་ཀྱི་རྒྱལ་སྲིད་ཐོབ་བས་བདག་ཉིད་གཟི་བརྗིད་མཐའ་ཡས་པའི་རྣམ་པར་སྣང་མཛད་དུ་བསམ་པར་བྱ་སྟེ། དེ་ལྟ་བུས་ནི་གཟི་བརྗིད་ཆེན་པོ་འཕེལ་བར་འགྱུར་རོ། །དེ་ཉིད་སྙིང་གར་གཞག་སྟེ་རང་གི་སྙིང་གར་གནས་པས་བཅོམ་ལྡན་འདས་རྣམ་པར་སྣང་མཛད་ཀྱིས་བདག་ཉིད་སྣང་བར་བྱས་ཤིང་དེའི་མདངས་དང་ལྡན་བར་བསམ་པར་བྱ་སྟེ། དེ་ལྟ་བུས་ནི་མདངས་འཕེལ་བར་འགྱུར་རོ། །དེ་ཉིད་ཕྲག་པ་གཉིས་སུ་བཞག་ལ་བཅོམ་ལན་འདས་རྣམ་པར་སྣང་མཛད་སྟོབས་ནམ་མཁའ་དང་མཉམ་པར་རང་གི་ཡན་ལག་ཁྱབ་ཅིང་དེའི་སྟོབས་དང་ལྡན་པར་བསམ་པར་བྱ་སྟེ། དེ་ལྟ་བུས་ནི་སྟོབས་འཕེལ་བར་
འགྱུར་རོ། །དེ་གཉིས་བརླ་གཉིས་སུ་བཞག་ནས་བཅོམ་ལྡན་འདས་དོན་ཡོད་པར་གྲུབ་པས་ཡན་ལག་ཐམས་ཅད་ལ་ཁྱབ་ཅིང་དེའི་སྤྲོ་བ་དང་ལྡན་པར་བསམ་པར་བྱ་སྟེ། དེ་ལྟ་བུས་ནི་སྤྲོ་བ་འཕེལ་བར་འགྱུར་རོ། །དེ་ཉིད་བཅིངས་ལ་དེས་ཕྲེང་བ་བཅིངས་པའི་ཚུལ་དུ་བྱ་ཞིང་བཅོམ་ལྡན་འདས་རྣམ་པར་སྣང་མཛད་ཀྱིས་སྣ་ཚོགས་ཕྲེང་བའི་དབང་གིས་བདག་ཉིད་དབང་བསྐུར་བས་བྱང་ཆུབ་སེམས་དཔའ་ཆེན་པོ་རྡོ་རྗེ་ལས་ཀྱི་རང་བཞིན་དུ་གྱུར་བར་བསམ་པར་གྱུར་པ་སྟེ། དེ་ལྟ་བུས་ནི་བརྩོན་འགྲུས་འཕེལ་བར་འགྱུར་རོ། །དེ་ཉིད་དབང་པོ་ཐམས་ཅད་ལ་བཞག་ལ་བཅོམ་ལྡན་འདས་རྣམ་པར་སྣང་མཛད་ཀྱིས་བདག་ཉིད་ལ་འཕགས་པ་ནམ་མཁའི་སྙིང་པོའི་དབང་གིས་དབང་བསྐུར་བས་ནོར་བུའི་རིགས་ཀྱི་རང་བཞིན་དུ་བསམ་པར་བྱ་སྟེ། དེ་ལྟ་བུས་ནི་དཔལ་ཆེན་པོ་འཕེལ་བར་འགྱུར་རོ། །དེ་ཉིད་སྤྱི་བོར་བཞག་ལ་བཅོམ་ལྡན་འདས་རྣམ་པར་སྣང་མཛད་ཀྱི་རྡོ་རྗེ་སེམས་དཔའི་དབང་གིས་དབང་བསྐུར་བས་བདག་ཉིད་རྡོ་རྗེ་སེམས་དཔར་གྱུར་པར་བསམ་པར་བྱ་སྟེ། དེ་ལྟ་བུས་ནི་དཔལ་རྡོ་རྗེ་སེམས་དཔའི་སྐལ་བ་བཟང་པོ་འཕེལ་བར་འགྱུར་རོ། །དེ་ཉིད་ཁར་བཞག་ལ་བཅོམ་ལྡན་འདས་རྣམ་པར་སྣང་མཛད་ཁའི་སྒོ་ནས་ཞུགས་པས་ལུས་ཐམས་ཅད་ཁྱབ་པས་རྣམ་པར་སྣང་མཛད་དུ་གྱུར་ཅིང་རྣམ་པར་བསམ་པར་བྱ་སྟེ། དེ་ལྟ་བུས་ནི་བསོད་ནམས་འཕེལ་བར་འགྱུར་རོ། །དེ་ཉིད་ཁ་ནས་བྱུང་བས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་བྱང་ཆུབ་སེམས་དཔའ་ཀུན་དུ་བཟང་པོ་རང་གི་ཁ་ནས་བྱུང་བས་ཕྱོགས་བཅུར་རང་གི་མིང་སྒྲོགས་པར་བསམ་པར་བྱ་སྟེ། དེ་ལྟ་བུས་ནི་མིང་འཕེལ་བར་འགྱུར་རོ། །དེ་ཉིད་ཐམས་ཅད་དུ་བསྐོར་ལ་རང་གི་ལུས་བྱུང་བ་དེའི་ཕྱོགས་བཅུར་རང་གི་སྙན་པས་ཁྱབ་པར་བསམ་པར་བྱ་སྟེ། དེ་ལྟ་བུས་ནི་སྙན་པ་འཕེལ་བར་འགྱུར་རོ། །དེ་ཉིད་ཕྱོགས་ཀུན་ནས་བསྐོར་ལ་བཅོམ་ལྡན་འདས་རྡོ་རྗེ་སེམས་དཔའ་བྱང་ཆུབ་ཀྱི་སེམས་གྲགས་པ་སྒྲོགས་པར་བདག་ཉིད་བསམ་པར་བྱ་སྟེ། དེ་ལྟ་བུས་ནི་གྲགས་པ་འཕེལ་བར་འགྱུར་རོ། །དེ་ཉིད་བཅིངས་ལ་དེ་བཞིན་གཤེགས་པ་རྗེས་སུ་དྲན་པ་བསྒོམས་ན་དེ་ལྟ་བུས་ནི་
དྲན་པ་འཕེལ་བར་འགྱུར་རོ། །དེ་ཉིད་བཅིངས་ལ་སྙིང་གནས་དབྱུང་བའི་ཚུལ་དུ་བྱས་ན་བློ་གྲོས་འཕེལ་བར་འགྱུར་རོ། །དེ་ཉིད་སྙིང་གར་བཞག་ལ་དགའ་བ་ཐོབ་པར་བྱས་ན་དེ་ལྟ་བུས་ནི་བརྟན་པར་འགྱུར་རོ། །དེ་ཉིད་བཅིངས་ལ་སངས་རྒྱས་ཀྱི་ཚུལ་དུ་བདག་ཉིད་བསྒོམས་ན་དེ་བཞིན་གཤེགས་པའི་རྟོག་པ་འཕེལ་བར་འགྱུར་རོ། །དེ་ཉིད་བཅིངས་ལ་སངས་རྒྱས་ཐམས་ཅད་དུ་བསྒོམས་པས་དེ་བཞིན་གཤེགས་པའི་ཏིང་ངེ་འཛིན་འཕེལ་བར་འགྱུར་རོ། །དེ་ཉིད་བཅིངས་ལ་ཕུང་པོ་ལྔ་པོ་བཞག་ན་དེ་བཞིན་གཤེགས་པའི་འཇིག་རྟེན་ལས་འདས་པའི་ཕུང་པོ་ལྔ་འཕེལ་བར་འགྱུར་རོ། །དེ་ཉིད་རྫ་མཁན་གྱི་འཁོར་ལོ་བསྐོར་བ་ལྟར་བསྐོར་ཞིང་དོན་ཡོད་པར་གྲུབ་པའི་རང་བཞིན་དུ་བདག་ཉིད་བསམས་ན་དེ་ལྟ་བུས་ནི་དོན་ཡོད་པར་གྲུབ་པའི་རང་བཞིན་དུ་འདུ་བྱེད་འཕེལ་བར་འགྱུར་རོ། །དེ་ཉིད་བཅིངས་ལ་རྣམ་པར་སྣང་མཛད་ཀྱི་སྐུར་བདག་ཉིད་བསྒོམས་ན། དེ་ལྟ་བུས་ནི་སྐུ་འཕེལ་བར་འགྱུར་རོ། །དེ་ཉིད་ལྕེ་ལ་བཞག་ན་དེ་ལྟ་བུས་ནི་དེ་བཞིན་གཤེགས་པའི་གསུང་རྣམ་པར་འཕེལ་བར་འགྱུར་རོ། །དེ་ཉིད་བཅིངས་ལ་ཡིད་ཀྱིས་དེ་བཞིན་གཤེགས་པ་ཐམས་ཅད་ལ་ཕྱག་བྱས་ལ་རང་གི་སྙིང་གར་སེམས་དཔའི་རྡོ་རྗེ་བསྒོམས་ན། དེ་ལྟ་བུས་ནི་ཐུགས་འཕེལ་བར་འགྱུར་རོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་ལས་ཉི་ཤུ་རྩ་ལྔ་པ་བསྒྲུབ་པར་གསུངས་ནས། ད་ནི་དེ་ཉིད་ཀྱི་ལས་ཉི་ཤུ་རྩ་ལྔ་གཞན་དག་བསྒྲུབ་པར་གསུངས་པ་ནི། དེ་བཞིན་གཤེགས་པ་ཐམས་ཅད་ཀྱི་སྦྱིན་པ་དང་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་བཅོམ་ལྡན་འདས་རྣམ་པར་སྣང་མཛད་ཀྱི་རྣལ་འབྱོར་བྱས་ལ། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་བཅིངས་ཏེ། ཕྱོགས་བཅུའི་སེམས་ཅན་ཐམས་ཅད་སྒེག་མོ་རྟོགས་པའི་སྦྱིན་པས་བསམ་པ་ཐམས་ཅད་ཡོངས་སུ་རྫོགས་པར་བྱེད་པར་བདག་ཉིད་བསམ་པར་བྱའོ། །དེ་བཞིན་དུ་གཏོང་བ་རྗེས་སུ་དྲན་པས་ནི་སྦྱིན་པའི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །དེ་ཉིད་བཅིངས་ལ་རྡོ་རྗེ་ཕྲེང་བ་མ་རྟོགས་པས་སེམས་ཅན་གྱི་ཁམས་ཐམས་ཅད་ཡང་དག་པར་སྦྱོར་བ་དང༌། དེ་བཞིན་དུ་ཚུལ་ཁྲིམས་རྗེས་སུ་དྲན་པས་ནི་ཚུལ་
ཁྲིམས་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་སེམས་ཅན་གྱི་ཁམས་ཐམས་ཅད་ལ་བྱམས་པ་ཡང་དག་པར་སྤྲོས་ཏེ་དེ་ལྟ་བུས་ནི་བཟོད་པའི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །དེ་ཉིད་བཅིངས་ལ་གར་མའི་ཚུལ་གྱིས་སེམས་ཅན་གྱི་ཁམས་ཐམས་ཅད་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ལ་གཞག་པར་བྱ་སྟེ། དེ་ལྟ་བུས་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་རྡོ་རྗེ་མེ་ཏོག་མེའི་ཚུལ་གྱིས་སེམས་ཅན་གྱི་ཁམས་ཐམས་ཅད་བསམ་གཏན་གྱི་ཕ་རོལ་ཏུ་ཕྱིན་པ་ལ་གཞག་པར་བྱ་སྟེ། དེ་ལྟ་བུས་ནི་བསམ་གཏན་གྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་རྡོ་རྗེ་བདུག་པ་མའི་ཚུལ་གྱིས་སེམས་ཅན་གྱི་ཁམས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གཞག་པར་བྱ་སྟེ། དེ་ལྟ་བུས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ། བདག་ཉིད་རྣམ་པར་སྣང་མཛད་ཀྱི་ཡེ་ཤེས་ཐོབ་པར་བསྒོམས་ན། དེ་ལྟ་བུས་ནི་ཡེ་ཤེས་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་སྟོབས་ཀྱི་ཕ་རོལ་ཏུ་ཕྱིན་པ་སྒོམ་པས་ནི་སྟོབས་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་རྡོ་རྗེ་དྲིལ་བུའི་ཚུལ་དུ་བདག་ཉིད་བསྒོམ་པར་བྱ་སྟེ། དེ་ལྟ་བུས་ནི་ཐབས་ཀྱི་ཕ་རོལ་ཏུ་ཕྱིན་པ་འགྲུབ་བོ། །དེ་ཉིད་བཅིངས་ལ་མདུན་དུ་རྡོ་རྗེ་བསྒོམས་ན། དེ་ལྟ་བུས་ནི་རྡོ་རྗེ་འགྲུབ་བོ། །དེ་ཉིད་བཅིངས་ལ་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་གཟུགས་རྣམ་པར་བསྒོམས་ན་དེའི་སྒྲུབ་པ་གནས་པ་འགྲུབ་བོ། །དེ་ཉིད་བཅིངས་ལ་དྲན་པ་དང་ཤེས་རབ་དང༌། ཡང་དག་པར་ལྡན་པའི་དེ་བཞིན་གཤེགས་པའི་ཐུགས་བསྒོམས་ན་གཟུངས་རྣམས་འགྲུབ་བོ། །དེ་ཉིད་བཅིངས་ལ་ཚུལ་གསུམ་གྱི་བཤད་པའི་ཆོས་བསྒོམས་ན་ཆོས་འགྲུབ་བོ། །དེ་ཉིད་བཅིངས་ལ་རྡོ་རྗེ་ལས་ཀྱི་གཟུགས་སུ་བདག་ཉིད་བསྒོམས་ཏེ། སངས་རྒྱས་ཀྱི་སྤྲུལ་པ་དང༌། སེམས་ཅན་གྱི་དོན་བྱེད་པའི་མཚན་ཉིད་ཅན་གྱི་ལས་བསྒོམས་ན་ལས་འགྲུབ་པའོ། །དེ་ཉིད་བཅིངས་ལ་གཟུགས་ཐམས་ཅད་ཀུན་དུ་སྟོན་པའི་ཏིང་ངེ་འཛིན་གྱིས་སེམས་ཅན་ཐམས་ཅད་ཀྱི་དོན་བྱེད་པ་བསྒོམས་པས་ནི་སྣ་ཚོགས་པའི་བྱ་བ་གྲུབ་བོ། །དེ་ཉིད་བཅིངས་ལ་རྡོ་རྗེ་རྒྱལ་མཚན་གྱི་གཟུགས་སུ་བདག་ཉིད་བསམས་ལ་
ཡིད་བཞིན་གྱི་ནོར་བུའི་རྒྱལ་མཚན་གྱིས་སེམས་ཅན་ཐམས་ཅད་ཀྱི་དོན་བྱེད་པར་ཡིད་ལ་བྱས་ལ་དེ་ལྟ་བུས་ནི་སེམས་ཅན་གྱི་དོན་གྲུབ་བོ། །ཕྱོགས་བཅུར་སངས་རྒྱས་ཀྱི་སྤྲུལ་པས་སེམས་ཅན་ཐམས་ཅད་ཀྱི་དོན་བྱེད་པར་བསྒོམས་པས་ནི་སངས་རྒྱས་ཀྱི་མཛད་པའི་དོན་འགྲུབ་བོ། །དེ་ཉིད་བཅིངས་ལ་རྣམ་པར་སྣང་མཛད་ཀྱི་སྐུར་བདག་ཉིད་བསྒོམས་ན་དེ་ལྟ་བུས་ནི་སྐུ་འགྲུབ་བོ། །དེ་ཉིད་བཅིངས་ལ་ལྕེ་ལ་རྡོ་རྗེ་དཀར་པོ་བསམས་ལ་ཨོཾ་བྷཱུ་ཁཾ་ཞེས་བྱ་བ་ཡིད་ཀྱིས་བྲིས་ལ་རྣམ་པར་སྣང་མཛད་དུ་བདག་ཉིད་བསྒོམས་ན་དེ་ལྟ་བུས་ནི་གསུང་འགྲུབ་བོ། །དེ་ཉིད་བཅིངས་ལ་རང་གི་སྙིང་གར་སེམས་དཔའི་རྡོ་རྗེ་བསྒོམས་ན་དེ་ལྟ་བུས་ནི་ཐུགས་འགྲུབ་བོ། །དེ་ཉིད་བཅིངས་ལ་རྡོ་རྗེ་བདག་ཉིད་བསྒོམས་ན་དེ་ལྟ་བུས་ནི་རྡོ་རྗེ་འཆང་ཆེན་པོ་འགྲུབ་པར་འགྱུར་རོ། །གང་དུ་ཁྱད་པར་དགག་པ་མེད་པ་དེ་ཐམས་ཅད་དུ་ཨོཾ་བྷུ་ཁཾ་ཞེས་བྱ་བའི་སྙིང་པོ་བཟླ་བར་བྱའོ། །དེ་ལྟར་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག །དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཐམས་ཅད་ཅེས་བྱ་བའི་ལས་བཤད་ནས། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་ཕྱག་རྒྱ་ཉིད་ཀྱི་དེ་བཞིན་གཤེགས་པ་ཐམས་ཅད་སྣ་ཚོགས་རྡོ་རྗེ་ཞེས་བྱ་བའི་ཕྲིན་ལས་གསུངས་པ་ནི། བྱང་ཆུབ་ཀྱི་སེམས་ཆེན་པོ་བསྐྱེད་པ་དང་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་བཞིན་དུ་རྣམ་པར་སྣང་མཛད་ཀྱི་རྣལ་འབྱོར་བྱས་ལ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་བཅིངས་ཏེ། ཨོཾ་བོ་དྷི་ཙིཏྟ་བཛྲ། ཞེས་ཟློས་ཤིང༌། ཟླ་བའི་དཀྱིལ་འཁོར་དུ་བདག་ཉིད་བསྒོམས་ན་དེ་ལྟ་བུས་ནི་བྱང་ཆུབ་ཀྱི་སེམས་ཆེན་པོ་ཐམས་ཅད་བསྐྱེད་པར་འགྲུབ་པར་འགྱུར་རོ། །དེ་ཉིད་བཅིངས་ལ་ཨོཾ་ས་མནྟ་བྷ་དྲ་ཙཪྻ། ཞེས་ཟློས་ཤིང་བདག་ཉིད་ཀུན་དུ་བཟང་པོའི་སྤྱོད་པའི་ཚུལ་དུ་བསྒོམ་པར་བྱ་སྟེ། དེ་ལྟ་བུས་ནི་ཀུན་དུ་བཟང་པོའི་སྤྱོད་པ་སྣ་ཚོགས་རྫོགས་པར་འགྱུར་རོ། །འདི་ཉིད་བཅིངས་ལ་ཨོཾ་ཙིནྟཱ་མ་ཎི། ཞེས་ཟློས་ཤིང་རྡོ་རྗེ་དཔལ་དུ་བདག་ཉིད་བསམས་ལ་སེམས་ཅན་གྱི་ཁམས་ཐམས་ཅད་ཀྱིས་བསམས་པ་ཐམས་ཅད་ཡོངས་སུ་རྫོགས་པར་ཡིད་ལ་བྱ་སྟེ། དེ་ལྟ་བུས་ནི་སེམས་ཅན་གྱི་དོན་འགྲུབ་པར་འགྱུར་རོ། །ཨོཾ་ཨ་ནི་རོ་དྷ། ཞེས་
ཟློས་ཤིང་བདག་ཉིད་དགའ་ལྡན་གྱི་གནས་དམ་པ་ནས་འཕོ་བ་ཉེ་བར་བསྟན་ནས་ཤཱཀྱའི་རིགས་སུ་ལྷ་མོ་སྒྱུ་འཕྲུལ་གྱི་ལྷུམས་སུ་འཇུག་པར་བསམ་པར་བྱ་སྟེ། དེ་ལྟ་བུས་ནི་ལྷུམས་སུ་ཞུགས་པ་གྲུབ་བོ། །ཨོཾ་ཛཱ་ཏི་བི་བརྟེ་ཞེས་ཟློས་ཤིང་བདག་ཉིད་ཡུམ་གྱི་ལྷུམས་ནས་བལྟམས་པའི་དོན་ཐམས་ཅད་གྲུབ་པའི་གཟུགས་སུ་བསམ་པར་བྱ་སྟེ། དེ་ལྟ་བུས་ནི་སྐྱེ་བའི་ས་ཡང་དག་པར་སྟོན་པར་འགྲུབ་བོ། །ཨོཾ་སརྦཱ་བྷི་ཛྙཱ་ནི། ཞེས་ཟློས་ཤིང་བདག་ཉིད་གཞོན་ནུའི་རོལ་པ་སྟོན་པ་ལ་སོགས་པ་བསམ་པར་བྱ་སྟེ། དེ་ལྟ་བུས་ནི་གཞོན་ནུའི་རོལ་པར་འགྱུར་རོ། །ཨོཾ་མ་ཧཱི་བ་རཱ་ག་དྷརྨ། ཞེས་ཟློས་ཤིང་བདག་ཉིད་མངོན་པར་འབྱུང་བར་བསྒོམ་པར་བྱ་སྟེ། དེ་ལྟ་བུས་ནི་དེ་གྲུབ་པར་འགྱུར་རོ། །ཨོཾ་བཱི་ཪྻ་ཀཱ་བཙེ། ཞེས་ཟློས་ཤིང་བདག་ཉིད་དཀའ་བ་སྤྱོད་པ་ལ་གནས་པར་བསམ་པར་བྱ་སྟེ། དེ་ལྟ་བུས་ནི་དེ་འགྲུབ་བོ། །ཨོཾ་སརྦཱ་ག་མི་ནི་ཞེས་ཟློས་ཤིང་བདག་ཉིད་བྱང་ཆུབ་ཆེན་པོའི་སྙིང་པོར་འགྲོ་བར་བསམ་པར་བྱ་སྟེ། དེ་ལྟ་བུས་ནི་དེ་འགྲུབ་བོ། །ཨོཾ་བཛྲ་དྷི་ར་ཙིཏྟེ་ཧཱུཾ། ཞེས་ཟློས་ཤིང་རང་གི་ལུས་ལས་དཔུང་གི་ཚོགས་ཡན་ལག་བཞི་པ་ཕྱུང་ལ་དེས་བདུད་ཀྱི་སྡེ་བཅོམ་པར་བྱ་སྟེ། དེ་ལྟ་བུས་ནི་བདུད་བརྟུལ་པ་འགྲུབ་བོ། །ཨོཾ་སརྦ་ཏ་ཐཱ་ག་ཏེ་ཞེས་ཟློས་ཤིང་མངོན་པར་བྱང་ཆུབ་པ་མངོན་དུ་བྱ་བར་བསྒོམ་པར་བྱ་སྟེ། དེ་ལྟ་བུས་ནི་མངོན་པར་བྱང་ཆུབ་པ་འགྲུབ་བོ། །ཨོཾ་སྭ་བྷཱ་བ་ཤུདྡྷོ་དྷརྨ་ཏཱ་ཛྙཱ་ན་པི་ཤུདྡྷེ་ཞེས་ཟློས་ཤིང་བདག་ཉིད་ཝཱ་རཱ་ཎ་སཱི་ར་ཆོས་ཀྱི་འཁོར་ལོ་བསྐོར་བར་བསྒོམ་པར་བྱ་སྟེ། དེ་ལྟ་བུས་ནི་ཆོས་ཀྱི་འཁོར་ལོ་བསྐོར་བ་འགྲུབ་བོ། །ཨོཾ་ཀརྨ་བི་ཤྭ་དྷ་ནི་ཞེས་ཟློས་ཤིང་བདག་ཉིད་མུ་སྟེགས་ཅན་གཞན་དག་ཚར་གཅོད་པར་བསམ་པར་བྱ་སྟེ། དེ་ལྟ་བུས་ནི་མུ་སྟེགས་པ་གཞན་ཚར་གཅོད་པ་འགྲུབ་བོ། །ཧཱུཾ་ནི་སུ་བྷ་བཛྲ་ཎི་ཕཊ་ཅེས་ཟློས་ཤིང་བདག་ཉིད་འཇིག་རྟེན་གསུམ་པོ་ཐམས་ཅད་ལས་རྒྱལ་བར་བྱེད་ཅིང་རྡོ་རྗེ་རིགས་ཀྱི་རང་བཞིན་དུ་བསམ་པར་བྱ་སྟེ། དེ་ལྟ་བུས་ནི་འཇིག་རྟེན་གསུམ་ལས་རྣམ་པར་རྒྱལ་བ་འགྲུབ་བོ། །ཨོཾ་མ་ཧཱ་རཱ་གེ་ཞེས་ཟློས་ཤིང་བདག་ཉིད་ལྷ་ལས་འབབ་པར་བསྒོམ་པར་བྱ་སྟེ། དེ་ལྟ་བུས་ནི་དེ་འགྲུབ་བོ། །ཨོཾ་ཛ་བཛྲ་ཎི་ཞེས་ཟློས་ཤིང་འདུས་པ་ཆེན་པོ་བྱིན་གྱིས་བརླབ་པར་
བསྒོམ་བར་བྱ་སྟེ། །དེ་ལྟ་བུས་ནི་དེ་འགྲུབ་བོ། །ཨོཾ་ཧཱུཾ་སརྦ་དྷརྨ་ཎི་ཞེས་ཟློས་ཤིང་གདུག་པ་ཐམས་ཅད་རྡོ་རྗེ་རིགས་ཀྱི་ཚུལ་གྱིས་ཡིད་ཀྱིས་གདུལ་བར་བྱ་སྟེ། དེ་ལྟ་བུས་ནི་གདུག་པ་ཐམས་ཅད་འདུལ་བ་འགྲུབ་བོ། །ཨོཾ་ཧྲི་ཞེས་ཟློས་ཤིང་བདག་ཉིད་འགྲོ་བ་འདུལ་བའི་སྐུར་བསམས་ལ་གཟུགས་ཐམས་ཅད་ཡང་དག་པར་སྟོན་པས་སེམས་ཅན་གདུལ་བར་ཡིད་ཀྱིས་བྱ་སྟེ། དེ་ལྟ་བུས་ནི་འདུལ་བ་ལ་རབ་ཏུ་འཇོག་པ་འགྲུབ་བོ། །ཨོཾ་ཨ་ཀཱ་རོ་མུ་ཁཾ་ཞེས་ཟློས་ཤིང་ངན་སོང་གསུམ་ཡིད་ཀྱིས་བཏོན་ལ་གསད་བར་བྱ་ཞིང་སེམས་ཅན་དེ་རྣམས་ཀྱང་བཅོམ་ལྡན་འདས་རྣམ་པར་སྣང་མཛད་ཀྱི་ཞབས་དྲུང་དུ་སྐྱེས་ནས་བྱང་ཆུབ་སེམས་དཔར་གྱུར་པར་བསམ་པར་བྱ་སྟེ། དེ་ལྟ་བུས་ནི་ངན་སོང་ཐམས་ཅད་ལས་གདོན་པ་འགྲུབ་བོ། །ཨོཾ་པྲ་ཛྙཱ་པཱ་ར་མི་ཏ་ཞེས་ཟློས་ཤིང་བདག་ཉིད་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་མདོ་སྡེ་ཐམས་ཅད་སྟོན་པ་ལ་བརྩོན་པའི་དེ་བཞིན་གཤེགས་པར་གྱུར་པར་བསམ་པར་བྱ་སྟེ། དེ་ལྟ་བུས་ནི་མདོ་སྡེ་ཐམས་ཅད་སྟོན་པ་འགྲུབ་བོ། །ཨོཾ་བ་ཧཱུཾ་ཞེས་ཟློས་ཤིང་བདག་ཉིད་རྡོ་རྗེ་དབྱིངས་ལ་སོགས་པ་འཇིག་རྟེན་པ་དང་འཇིག་རྟེན་ལས་འདས་པའི་སྔགས་ཀྱིས་རྟོག་པ་ཐམས་ཅད་བརྟན་པར་བྱེད་པར་བསྒོམ་པར་བྱ་སྟེ། དེ་ལྟ་བུས་ནི་རྟོག་པ་ཐམས་ཅད་བྱིན་གྱིས་རློབ་པ་འགྲུབ་བོ། །ཨ་ཞེས་ཟློས་ཤིང་སངས་རྒྱས་ཉིད་ལ་སོགས་པ་སྒྲུབ་པར་བྱེད་པ་རྣམས་ལ་སངས་རྒྱས་ཉིད་ལ་སོགས་པ་སྟེར་བར་བསྒོམ་པར་བྱ་སྟེ། དེ་ལྟ་བུས་ནི་དངོས་གྲུབ་ཐམས་ཅད་སྟེར་བ་འགྲུབ་བོ། །ཨོཾ་སརྦ་ཏ་ཐཱ་ག་ཏ་ཀཱ་ཡཱ་གྲེ་ཞེས་ཟློས་ཤིང་བདག་ཉིད་རྣམ་པར་སྣང་མཛད་ལ་སོགས་པའི་སྐུའི་རང་བཞིན་དུ་བསྒོམ་པར་བྱ་སྟེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་རབ་ཏུ་ཐོབ་པ་འགྲུབ་བོ། །ཨོཾ་སརྦ་ཏ་ཐཱ་ག་ཏ་ཝཱག་པི་ཤུདྡྷེ་ཞེས་ཟློས་ཤིང་དེ་བཞིན་གཤེགས་པ་ཐམས་ཅད་ཀྱི་གསུང་གི་རང་བཞིན་དུ་བསྒོམས་ན་དེ་བཞིན་གཤེགས་པ་ཐམས་ཅད་ཀྱི་གསུང་རབ་ཏུ་ཐོབ་པ་འགྲུབ་བོ། །ཨོཾ་སརྦ་ཏ་ཐཱ་ག་ཏ་ཙིཏྟ་བཛྲེ་ཎི་ཞེས་ཟློས་ཤིང་རང་གི་སྙིང་གའི་ཟླ་བ་ལ་རྡོ་རྗེ་རྩེ་ལྔ་པ་བསྒོ་པར་བྱ་སྟེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་
རབ་ཏུ་ཐོབ་ཅིང་རྣམ་པར་གྲོལ་བ་ཐོབ་པར་འགྱུར་རོ། །དེ་ལ་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་ཆེན་པོ་བསྐྱེད་པ་ལ་སོགས་པ་འདུལ་བའི་སྒོ་རྣམས་རྣམ་པར་སྦྱོང་བ་ནི་རྣམ་པར་འཕྲུལ་པའོ། །དེ་སྒྲུབ་པ་ནི་རྫོགས་པའོ། །འདིར་ཐམས་ཅད་ལ། ཡང་དེ་བཞིན་དུ་རྣམ་པར་སྣང་མཛད་ཀྱི་སྦྱོར་བ་བྱས་ལ། དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་བཅིངས་ཏེ། བསྒོམ་པར་བྱ་བ་ཡིན་པར་ཤེས་པར་བྱའོ། །ཇི་ལྟར་ཕྱག་རྒྱ་འདི་དག་གིས་ཞེས་བྱ་བ་ནི་གོ་བར་ཟད་དོ། །དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་རྡོ་རྗེ་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །དེ་རྣམས་ཀྱི་བྱང་ཆུབ་ནི་གཉིས་སུ་མེད་པའི་ཡེ་ཤེས་སོ། །དེའི་རྡོ་རྗེ་ནི་རྣམ་པར་སྣང་མཛད་ཀྱི་དཀྱིལ་འཁོར་རོ། །དེའི་རྣམ་པ་ལ་རྣམ་པར་རྟོག་པ་ནི་རྟོག་པའོ། །དེ་སྟོན་པར་བྱེད་པའི་སྒྲ་ལ་ཡང་ཉེ་བར་བཏགས་པས་དེ་སྐད་ཅེས་བྱ་བའོ། །དེ་ཉིད་ནི་སྟོན་པ་སྟེ་བྱ་བའོ། །དེའི་རྒྱས་པ་ནི་རྒྱུན་ནོ། །དཔལ་མཆོག་དང་པོའི་རྒྱ་ཆེར་བཤད་པར་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པ་རྩ་བའི་རྒྱུད་ལས་གསུངས་པའི་བཅོམ་ལྡན་འདས་རྣམ་པར་སྣང་མཛད་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་སེམས་ཅན་རང་བཞིན་བཟང་བ་རྣམས་ཀྱི་དོན་དུ་རྣམ་པར་སྣང་མཛད་ཀྱི་དཀྱིལ་འཁོར་གསུངས་ནས། ད་ནི་ཁྲོ་བས་ཁྲོ་བ་སྤང་བར་བྱ་བའི་ཕྱིར་རྡོ་རྗེ་མེ་ལྟར་འབར་བའི་དཀྱིལ་འཁོར་གསུངས་པ་ནི། དེ་ནས་སྣ་ཚོགས་ལས་ཆེན་པོ། །ཞེས་བྱ་བ་ལ་སོགས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་བཤད་པ་ཉིད་ཡིན་ནི། །སྣ་ཚོགས་ནི་རྣམ་པ་ཐ་དད་པ་སྟེ། རྗེས་སུ་མཉེས་པར་བྱ་བ་ལ་སོགས་པའི་རང་བཞིན་ནོ། །འདི་ལ་ཕྲིན་ལས་ཆེན་པོ་མངའ་བས་ན་སྣ་ཚོགས་ལས་ཆེན་པོའོ། །ཁྱབ་བདག་རྡོ་རྗེ་འཛིན་ཆེན་པོ། །ཞེས་བྱ་བ་ནི་ཐམས་ཅད་དུ་ཁྱབ་པར་མཛད་པའོ། །གདུག་
པ་ཐམས་ཅད་ནི་དབང་ཕྱུག་ཆེན་པོ་ལ་སོགས་པ་སྟེ་དེ་རྣམས་འདུལ་བའི་མཆོག་ནི་འདུལ་བར་མཛད་པའི་དམ་པ་ཞེས་བྱ་བའི་དོན་ཏོ། །ཇི་ལྟ་ཞེ་ན། གང་གི་ཕྱིར། སེམས་ཅན་ཀུན་ལ་རྗེས་སྟོན་མཛད། །ཅེས་བྱ་བ་གསུངས་ཏེ་སེམས་ཅན་ཡང་ཡིན་ལ་ཐམས་ཅད་ཀྱང་ཡིན་པས་ན་སེམས་ཅན་ཐམས་ཅད་དེ། ཚར་གཅད་པར་འོས་པ་དང༌། ཕན་གདགས་པར་འོས་པ་རྣམས་སོ། །དེ་རྣམས་ལ་རྗེས་སུ་སྟོན་པར་མཛད་པ་ནི་རང་གི་བཀའ་ལ་ངེས་པར་སྦྱོར་བར་མཛད་པའོ། །དེ་བཞིན་གཤེགས་པའི་ཏིང་ངེ་འཛིན་གྱིས། དེ་བཞིན་གཤེགས་པའི་རིགས་བསྐྱེད་པ། །ཞེས་བྱ་བ་ནི་བཤད་མ་ཐག་པའི་དེ་བཞིན་གཤེགས་པའི་ཏིང་ངེ་འཛིན་གྱིས་སེམས་ཅན་རང་བཞིན་བཟང་བ་རྣམས་གདུལ་བར་བྱ་བའི་ཕྱིར་རྣམ་པར་སྣང་མཛད་ཀྱི་དཀྱིལ་འཁོར་བསྐྱེད་ནས་སེམས་ཅན་གྱི་ཁམས་རང་བཞིན་བཟང་བ་རྣམས་འདུལ་བའི་དེ་བཞིན་གཤེགས་པའི་ཏིང་ངེ་འཛིན་ཞི་བ་དེས་དབང་ཕྱུག་ཆེན་པོ་ལ་སོགས་པ་གདུག་ཅིང་གཏུམ་པའི་སེམས་ཅན་ཀུན་གྱི་དོན་བྱ་ཞིང༌། དབང་ཕྱུག་ཆེན་པོ་ལ་སོགས་པའི་འཇིག་རྟེན་གསུམ་འདུལ་བར་རབ་ཏུ་བསྒྲུབ་པར་མི་ནུས་སོ་ཞེས་བྱ་བ་སྟེ། འཇིག་རྟེན་གསུམ་པོ་དེ་གདུལ་བར་བྱ་བ་དེ་བཞིན་གཤེགས་པའི་ཏིང་ངེ་འཛིན་ཞི་བར་ནུས་པར་མ་གྱུར་པའོ། །ཅིའི་ཕྱིར་ནུས་པར་མ་གྱུར་ཅེ་ན། གང་གི་ཕྱིར་ཞེས་བྱ་བ་ལ་སོགས་ པ་གསུངས་ཏེ། གང་གི་ཕྱིར་ཞེ་སྡང་ལ་སོགས་པའི་ཉེས་བྱས ་རྣམས་ཀྱིས་གདུག་ཅིང་མ་རུངས་པར་གྱུར་པ་རང་གི་སྟེ། རང་ཉིད་ཀྱིས་རང་གི་སེམས་ཀྱི་སྤྱོད་པ་རང་བཞིན་དེས་འགྲོ་བ་འདི་དག་ཀུན་རྣམ་པར་སྣང་མཛད་ལ་སོགས་པ་སངས་རྒྱས་ཐམས་ཅད་ཀྱིས་ཞི་བ་སྟེ། ཞི་བའི་ཉམས་ཀྱིས་བཞུགས་པས་རབ་ཏུ་བསྒྲུབ་པར་བྱ་བ་མ་ཡིན་ནོ། །གདུག་ཅིང་གཏུམ་པའི་རང་བཞིན་ཅན་ཡིན་པའི་ཕྱིར་རོ། །དེ་བས་ན་བདེ་བར་གཤེགས་པ་སྟེ། དེ་བཞིན་གཤེགས་པ་རྣམས་ཀྱིས་སེམས་ཅན་རྣམས་ཀྱིས་དོན་མཛད་པར་གྱུར་པ་དག་གང་གི་ཚེ་སྟེ་དུས་གང་གི་ཚེ་གདུག་ཅིང་གཏུམ་པའི་སེམས་ཅན་གྱི་དོན་མཛད་པར་སྤྱོད་པར་མ་གྱུར་པ་དེའི་ཚེ། ཉིད་ཀྱི་དངོས་པོ་ཀུན་ཞེས་བྱ་བ་ཉིད་ཀྱི་རང་གི་བྱང་ཆུབ་ཀྱི་སེམས་ཀྱི་མཚན་ཉིད་ཀྱི་དངོས་
པོ་ཀུན་ཞེས་བྱ་བ་ལ་རྡོ་རྗེ་སེམས་དཔའ་སྟེ་དེ་ལ་གསོལ་བ་བཏབ་པ་ནི་གསོལ་བ་བཏབ་པར་གྱུར་པ་སྟེ། གདུག་ཅིང་གཏུམ་པའི་སེམས་ཅན་རྣམས་གདུལ་བར་བྱ་བའི་ཕྱིར་རྡོ་རྗེ་རིགས་ཀྱི་རང་བཞིན་དུ་མཛོད་ཅིག་ཅེས་གསོལ་བ་བཏབ་བོ། །ཚིག་ཇི་ལྟ་བུས་ཤེ་ན། སེམས་ཅན་གྱི་ཞེས་བྱ་བ་ལ་སོགས་པ་གསུངས་ཏེ། དེ་ནས་སྔགས་འདི་གསུངས་པ་ཙམ་གྱིས་ཞེས་བྱ་བ་ནི། ཨུ་ཏིཥྛ་ས་མ་ཡ་ཀྲོ་དྷ་ནི་སུཾ་བྷ་ཛྭ་ལ་བཛྲ་ཧཱུཾ་ཞེས་བྱ་བའི་སྔགས་དེ་བཞིན་གཤེགས་པ་ཐམས་ཅད་ཀྱིས་གསུངས་པ་ཙམ་གྱིས་སོ། །ཕྱག་ན་རྡོ་རྗེ་ནི་རྡོ་རྗེ་སེམས་དཔའོ། །རང་ཉིད་གཙོ་བོ་ནི་རང་དབང་ཅན་ནོ། །སྐུ་གསུང་ཐུགས་ཀྱི་རྡོ་རྗེ་ལས། །ཞེས་བྱ་བ་ནི། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཞུགས་ནས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེ་དེ་རྣམས་ལ་སླར་འབྱུང་ཞིང་ཕྱིར་འཐོན་ཏེ། དེ་བཞིན་གཤེགས་པ་ཐམས་ཅད་ཀྱི་མདུན་ན་གནས་ཞེས་བྱ་བ་ལ་སྤྱན་སྔར་བཞུགས་པའོ། །སྐུ་གང་གིས་སྐྱིལ་མོ་ཀྲུང་དུ་ནི་གང་གིས་ཤེ་ན། ཁྲོ་བོ་ཆེན་པོ་རྒྱལ་པོའི་སྐུ་ཡིས་ནི། །སེམས་དཔའི་སྐྱིལ་ཀྲུང་གིས་ལེགས་བཞུགས། །ཞེས་བྱ་བ་སྨོས་ཏེ། ཁྲོ་བོ་ཆེན་པོ་ནི་རྡོ་རྗེ་མེ་ལྟར་འབར་བའོ། །དེ་ནི་རྡོ་རྗེ་རིགས་ཀྱི་བདག་པོར་གྱུར་པ་ཉིད་ཀྱིས་ནི་མཛེས་ཤིང་འབར་བས་ན་རྒྱལ་པོའོ། །དེའི་སྐུ་ནི་གཟི་མདངས་ལྡན་པ་སྟེ། ཁྲོ་བོ་ཆེན་པོ་རྒྱལ་པོའི་སྐུ་དེས་སྒེག་པའི་སྐུའི་མདངས་གསལ་ཏེ། ཁྲོ་བོའི་གཞི་མདངས་ཀྱིས་བཞུགས་སོ་ཞེས་པའི་ཐ་ཚིག་གོ། སེམས་དཔའི་སྐྱིལ་ཀྲུང་ནི་བཤད་ཟིན་ཏོ། །འབར་བ་ཉིད་ཕྲེང་བ་དཀྲིགས་པས་ནི་འབར་བའི་ཕྲེང་བ་སྟེ་དེ་ཉིད་འོད་ཡིན་ལ་དེས་གསལ་ཞིང་སྣང་བ་འདི་ལ་མངའ་བས་ན་དེ་སྐད་ཅེས་བྱའོ། །དེ་ཇི་ལྟ་བུས་སྣང་བར་བྱེད་ཅེ་ན། སྲེག་པའི་བསྐལ་པ་གཞན་འདྲ་བའམ། ཞེས་བྱ་བ་སྨོས་ཏེ། རྡོ་རྗེ་མཆོག་བསྡམས་པ་རྣམ་པར་སྲེག་པའི་བསྐལ་པ་གཉིས་འདྲ་བའི་དང་པོའི་རྡོ་རྗེ་གསོར་ཞིང་སྙིང་པོ་གསུངས་སོ་ཞེས་བྱ་བར་སྦྱར་རོ། །གཞན་ཡང་དེ་ཉིད་ཀྱི་ཁྱད་པར་བསྟན་པའི་ཕྱིར། །གཡོན་པའི་རྡོ་རྗེ་བསྙེམས་པ་ཆེ། །ཞེས་བྱ་བ་ལ་སོགས་པ་སྨོས་ཏེ།
གཡོན་པའི་རྡོ་རྗེ་ཁུ་ཚུར་ཁྲོ་བོའི་དྲིལ་བུ་དང་བཅས་པ་དཀུར་འཇོག་པར་མཛད་པ་ནི་གཡོན་བསྙེམས་པའོ། །དེས་ཤུགས་དང་བཅས་པས་ན་དྲག་པོ་སྟེ། དེས་གསོར་བ་ནི་ཕྱག་གཡས་པས་དང་པོའི་རྡོ་རྗེ་གྱེན་དུ་འཕེན་པའོ། །ཁྱད་པར་ཇི་ལྟ་བུས་དེས་གསོར་ཞེ་ན། བསྐྱོད་ཅེས་བྱ་བ་སྨོས་ཏེ། མྱུར་ཞིང་ཤིན་ཏུ་རིངས་པར་ཞེས་བྱ་བའི་ཐ་ཚིག་གོ །འབར་བ་ནི་རྡོ་རྗེ་ཆེར་འབར་ཞེས་བྱ་བ་འབར་ཞིང་རབ་ཏུ་འབར་བའི་རྡོ་རྗེ་ནི་ཆེར་འབར་བའོ། །དེའི་འབར་བས་ནམ་མཁའི་ཁམས་ཐམས་ཅད་ཁྱབ་པས་ན་འབར་བའི་རྡོ་རྗེ་ཆེར་འབར་བའོ། །དེའི་མེ་སྟག་རྣམས་ཀྱིས་ཞེས་བྱ་བ་ནི་རྡོ་རྗེ་མེའི་མེ་སྟག་ཆུང་དུ་རྣམས་ཏེ་དེས་སྲེག་པ་འདྲ་ཞེས་བྱ་བ་ནི་ཁམས་གསུམ་པ་ཐམས་ཅད་སྲེག་པའོ། །གསོར་བ་ནི་གྱེན་དུ་འཕེན་པའོ། །འབར་བ་ཆེན་པོ་ནི་ནམ་མཁའི་ཁམས་ཐམས་ཅད་ཁྱབ་པའི་རྡོ་རྗེ་འབར་བས་རབ་ཏུ་འབར་བའོ། །དེ་ཇི་ལྟ་བུས་ཤེ་ན། བསྐལ་བའི་མེ་དཔུང་ལྟ་བུ་ཡིན། །ཞེས་བྱ་བ་སྨོས་སོ། །གང་ཞིག་ཡིན་ཞེ་ན། དང་པོའི་རྡོ་རྗེ་ཞེས་བྱ་བ་སྨོས་ཏེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་ན་གནས་པ་རྡོ་རྗེ་གང་ཡིན་པ་དེ་ནི་དང་པོའི་རྡོ་རྗེའོ། །ཁྲོ་གཉེར་བཅས་ཞེས་བྱ་བ་ནི་ཁོར་གཉེར་བཅས་པར་གནས་པས་བཅས་སོ། །རྡོ་རྗེ་མཆོག་འཛིན་ནི་རྡོ་རྗེ་དམ་པ་སྣང་བ་སྟེ། དང་པོའི་རྡོ་རྗེ་བསྡམས་པ་ཞེས་བྱ་བའི་ཐ་ཚིག་གོ །གསུངས་པ་ཞེས་བྱ་བ་ནི་བཀའ་སྩལ་པའོ། །ཅི་ཞིག་གསུངས་ཤེ་ན། དེ་ལ་འདི་ནི་དེ་ནས་ཞེས་བྱ་བ་ལ་སོགས་པ་སྨོས་ཏེ། ཧཱུཾ་ཞེས་བྱ་བའི་སྙིང་པོ་གསུངས་པའོ། །རྡོ་རྗེ་འབར་བ་ཆེན་པོ་འདི་ལ་མངའ་བས་ན་རྡོ་རྗེ་འབར་པ་ཆེན་པོའོ། །རྡོ་རྗེ་འབར་བ་ཆེན་པོ་ཡང་ཡིན་ལ་མེ་ལྟར་འབར་བ་ཡང་ཡིན་ཞིང་དེ་ལྟ་བུས་ནི་ཉི་མ་དང་ལྡན་པས་ན་འདི་ལ་རྡོ་རྗེ་མེ་འབར་བ་ཆེན་པོ་མོ་དང་ཉི་མ་ཞེས་བྱ་སྟེ། རྡོ་རྗེ་མེ་འབྱུང་བའི་རྡོ་རྗེ་ཧཱུཾ་མཛད་དོ། །དེའི་ངེས་པའི་ཡེ་ཤེས་ནི་སྙིང་པོའོ། །དེ་སྟོན་པར་བྱེད་པའི་སྒྲ་ཧཱུཾ་ཞེས་བྱ་བ་ལ་ཡང་ཉེ་བར་བཏགས་པས་མེའི་སྙིང་པོ་ཞེས་བྱ་བའོ། །སྙིང་པོ་ཞེས་འདི་སྐད་སྟོན་པ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་ཚིག་གིས་བཅོམ་ལྡན་འདས་རྡོ་རྗེ་སེམས་དཔའ་དེ་བཞིན་གཤེགས་པ་ཐམས་
ཅད་ཀྱི་སྐུ་དང་གསུང་དང་ཐུགས་རྡོ་རྗེ་ལ་ཞུགས་ལ། དེ་ནས་དེར་གནས་ནས་དེ་རྣམས་ལས་རྡོ་རྗེ་མེ་ལྟར་འབར་བའི་སྐུར་སླར་བྱུང་སྟེ། དེ་བཞིན་གཤེགས་པ་ཐམས་ཅད་ཀྱི་སྤྱན་སྔར་ཞུགས་སོ། །དེ་ནས་གདུག་ཅིང་གཏུམ་པ་རྣམས་ནི་ངེས་པར་རྡོ་རྗེ་རིགས་ཀྱིས་འདུལ་བ་ཡིན་ནོ་སྙམ་དུ་དགོངས་ནས་ཤིན་ཏུ་དགྱེས་པས་ཇི་སྐད་དུ་བཤད་པའི་ཚུལ་གྱིས་ཧཱུཾ་ཞེས་བྱ་བ་གསུངས་སོ། །སྡིག་པ་ཡང་ཡིན་ལ་ཀུན་ཀྱང་ཡིན་པས་སྡིག་པ་ཀུན་ཏེ། མི་དགེ་བ་བཅུའི་ལས་ཀྱི་ལམ་གྱི་ཚུལ་ལོ། །དེ་ཉིད་ནི་བུད་ཤིང་དང་དྲ་བར་ཡེ་ཤེས་ཀྱི་མེས་བསྲེག་པར་བྱས་པ་ཡིན་པས་ན་སྡིག་པ་ཀུན་གྱི་བུད་ཤིང་ངོ༌། །དེ་རྣམས་ཟད་པ་ནི་ཟད་པའི་རྒྱུ་སྟེ། ཡེ་ཤེས་ཀྱི་མེའི་རང་བཞིན་ཅན་གྱི་ཡི་གེ་ཧཱུཾ་ངོ༌། །སྡིག་པ་ཀུན་གྱི་བུད་ཤིང་ཟད་པའི་སྙིང་པོ་ཕྱུང་བ་ལ་གཡོས་པ་ནི་གཡོས་པར་གྱུར་པའོ། །འགུལ་བ་ནི་འགུལ་བར་གྱུར་པ་སྟེ། ཕྱོགས་བཅུ་ཀུན་ནས་ཉོན་མོངས་པ་ཅན་གྱིས་སངས་རྒྱས་ཀྱི་རང་བཞིན་ཅན་གྱི་འཇིག་རྟེན་གསུམ་པོ་ས་འོག་དང་ས་སྟེང་དང༌། མཐོ་རིས་ཀྱི་མཚན་ཅན་གྱི་འཇིག་རྟེན་གྱི་ཁམས་ཐམས་ཅད་གཡོས་ཤིང་འགུལ་བར་བསྐྱོད་པར་གྱུར་པའོ། །ལྷ་ཆེན་ལ་སོགས་ལྷ་རྣམས་ནི། །གཡོ་བ་མེད་ཅིང་རྨོངས་པར་འགྱུར། །ཞེས་བྱ་བ་ནི་ཡི་གེ་ཧཱུཾ་དེས་འཇིག་རྟེན་གྱི་ཁམས་ཐམས་ཅད་རབ་ཏུ་གཡོས་པར་བྱས་ནས་ལྷ་ཆེན་པོ་ལ་སོགས་པ་ཡང་བརྒྱལ་ཞིང༌། ཀུན་དུ་རྨོངས་པ་སྐྱེ་བར་གྱུར་པ་དེས་ན་དེ་རྣམས་གཡོ་བ་མེད་ཅིང་རྨོངས་པ་ཉིད་དུ་གྱུར་ཏོ། རྡོ་རྗེ་འབར་བས་འཁྲུགས་པ་ཀུན། །ཞེས་བྱ་བ་ལ་སོགས་པ་ནི་གོ་བར་ཟད་དོ། །ལྷ་ལ་སོགས་ཞེས་བྱ་བ་ནི་གཟུགས་དང་གཟུགས་མེད་པ་ལ་སྤྱོད་པ་ནི་ལྷ་སྟེ། དེ་ལ་སོགས་པ་གང་ཡིན་པ་དེ་ནི་ལྷ་ལ་སོགས་སོ། །སྲིད་པ་གསུམ་པོ་ཀུན་གྱི་ཕྱོགས་བཅུ་ན་གནས་པ་ཐམས་ཅད་དོ། །སངས་རྒྱས་ཐམས་ཅད་ཅེས་བྱ་བ་ལ་འཇིག་རྟེན་གྱི་ཁམས་ཐམས་ཅད་ཀྱི་རྔུལ་ཕྲ་རབ་དང་མཉམ་པའི་དེ་བཞིན་གཤེགས་པ་ཐམས་ཅད་ཀྱང་འདུས་པར་མཛད་པར་གྱུར་པའོ། །དེ་ནས་འདུས་པར་གྱུར་པ་དེ་རྣམས་ཀྱིས་སངས་རྒྱས་ཀྱི་བྱང་ཆུབ་བརྟན་ཞིང་མི་ཕྱེད་པར་མཛད་
ནས། རྡོ་རྗེ་རིགས་ཀྱི་རང་བཞིན་གྱི་གདུག་ཅིང་གཏུམ་པའི་སེམས་ཅན་ཐམས་ཅད་གདུལ་བའི་ཕྱིར་ཐབས་ཆེན་པོ་ཞེས་བྱ་བ་སྟེ། ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ནོ། །དམ་པ་བདག་ཅེས་བྱ་བ་ནི་རྡོ་རྗེ་རིགས་ཀྱི་རང་བཞིན་དེ་ཉིད་ཀྱི་མཆོག་ཏུ་གྱུར་པའོ། །ཀྱང་ཞེས་བྱ་བ་ནི་ཞི་བ་ལ་སོགས་པའི་ཉམས་དང་ལྡན་པའི་རྫོགས་པའི་བྱང་ཆུབ་ལ་ལྟོས་ནས་ཀྱང་གི་སྒྲ་སྨོས་པ་ཡིན་ནོ། །ཐུགས་སུ་ཆུད་ཅེས་བྱ་བ་ནི་རྡོ་རྗེ་རིགས་ཀྱི་རང་བཞིན་དུ་བདག་ཉིད་མངོན་སུམ་དུ་བྱས་པ་ནི་ཐུགས་སུ་ཆུད་པའོ། །དེ་ནས་རྡོ་རྗེ་འབར་བའི་ཚོགས་ལས་ཞེས་བྱ་བ་ནི་ཕྱག་གཡས་པའི་རྡོ་རྗེ་རྩེ་ལྔ་པ་འབར་བ་ལས་སོ། །འབར་བའི་ཕྲེང་བ་འཁྲུག་པའི་འོད། །ཅེས་བྱ་བ་ལ་སོགས་པ་ནི་གོ་བར་ཟད་དོ། །རྡོ་རྗེ་འབར་བ་དེ་ལ་མཁའ་འགྲོ་མའི་དཀྱིལ་འཁོར་ཕྱུང་སྟེ་ཞེས་བྱ་བར་སྦྱར་རོ། །དེ་ཉིད་ཀྱི་ཁྱད་པར་བསྟན་པའི་ཕྱིར་དྲག་པོའི་ཞེས་བྱ་བ་ལ་སོགས་པ་སྨོས་པ་ཡིན་ཏེ། དྲག་པོ་ཡང་ཡིན་ལ་ཆེན་པོ་ཡང་ཡིན་པས་ན་དྲག་པོ་ཆེན་པོ་སྟེ། མཆེ་བ་གཙིགས་པ་ལ་སོགས་པས་འཇིགས་སུ་རུང་བ་ཞེས་བྱ་བའི་ཐ་ཚིག་གོ །ཕྱག་རྒྱའི་གར་གྱིས་འབར་ཞེས་བྱ་བ་ནི་ཕྱག་རྒྱའི་གར་གྱིས་འབར་བའོ། །དེ་ནས་ཕྱོགས་བཅུར་ཁྱབ་པར་འཇུག་པས་ན་ཀུན་དུ་འཁྲུག་པའོ། །དྲག་པོ་ཆེན་པོ་ཡང་ཡིན་ལ་ཕྱག་རྒྱ་གར་གྱིས་འབར་བ་ཡང་ཡིན་ཞིང་ཀུན་དུ་འཁྲུག་པ་ཡང་ཡིན་པས་ན་རྡག་པོ་ཆེན་པོ་སྟེ། ཕྱག་རྒྱའི་གར་གྱིས་འབར་ཞིང་འཁྲུག །ཅེས་བྱ་བའོ། །རྡོ་རྗེ་ཐམས་ཅད་ནི་རྡོ་རྗེ་ཧཱུཾ་མཛད་ལ་སོགས་པ་རྡོ་རྗེའི་རིགས་ཀྱི་བདག་པོ་རྣམས་སོ།། དེ་རྣམས་ཀྱི་གསང་བ་ཆེན་པོ་ནི་སྐྱེ་བོ་ཐམས་ཅད་ཀྱི་མངོན་སུམ་དུ་མ་གྱུར་པའོ། །དེ་ཅི་ཞིག་ཅེ་ན་མཁའ་འགྲོ་མའི་རྣལ་འབྱོར་དཀྱིལ་འཁོར་ཡིན་ཞེས་བྱ་བ་སྟེ། མཁའ་འགྲོ་མའི་རྣལ་འབྱོར་པ་རྣམས་ཀྱི་འཁོར་ལོ་ཡིན་པས་ནམ་མཁའ་འགྲོ་མའི་རྣལ་འབྱོར་དཀྱིལ་འཁོར་རོ། །དེ་ལ་རྡོ་རྗེ་མི་ལྟར་འབར་བའི་ཏིང་ངེ་འཛིན་ནི་རྣལ་འབྱོར་རོ། །དེ་ལས་བྱུང་བའི་རྡོ་རྗེའི་རིགས་ཀྱི་ལྷ་ནམ་མཁའ་ལ་རྒྱུ་བ་ཐམས་ཅད་ནི་མཁའ་འགྲོའོ། །དེ་ཕྱུང་ནས་ཞེས་བྱ་བ་ནི་རྣལ་འབྱོར་མཁའ་འགྲོའི་དཀྱིལ་འཁོར་རྡོ་རྗེ་དེ་ལས་བྱུང་ཞིང་བཏོན་ན་ཆོ་ག་བཞིན་ཏེ།
རྡོ་རྗེ་འཛིན་པ་ཆེན་པོའི་རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་གྱི་དབྱིབས་ཀྱིས་སོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ། རྡོ་རྗེ་འཛིན་པ་ཆེན་པོ་ཉིད་ཀྱིའོ། །ལྷ་མོའི་དཀྱིལ་འཁོར་ཚུལ་གྱིས་ནི། །ཞེས་བྱ་བ་ནི་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་གྱི་ཚུལ་གྱིས་སོ། །ལོགས་ཀུན་དུ་ནི་ཡང་དག་གནས། །ཞེས་བྱ་བ་ནི་བཅོམ་ལྡན་འདས་རྡོ་རྗེ་འཛིན་པ་ཆེན་པོའི་ཕྱོགས་དང་མཚམས་རྣམས་སུ་གནས་པའོ། །སངས་རྒྱས་ཐམས་ཅད་སྲས་བཅས་པ། །ཞེས་བྱ་བ་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་དེ་བཞིན་གཤེགས་པ་ཐམས་ཅད་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པའི་རྡོ་རྗེ་གཙུག་ཏོར་ལ་སོགས་པའི་རང་བཞིན་ལྟ་བུར་རྡོ་རྗེ་རིགས་ཆེན་པོ་བྱུང་ཞིང་རྣམ་པར་སྟོན་པར་གྱུར་པའོ། །དེ་ནས་རྡོ་རྗེ་དེ་ལས་ཏེ་འོད་འབར་བའི་རྡོ་རྗེ་དེ་ལས་སོ། །སྣ་ཚོགས་གཟུགས་མཆོག་གྲུབ་པའི་ཕྱིར། །ཞེས་བྱ་བ་ནི་རྡོ་རྗེའི་རིགས་ཀྱི་ཚུལ་དུ་སེམས་ཅན་གྱི་ཁམས་ཐམས་ཅད་བསྐྱེད་པ་དང༌། སེམས་ཅན་གདུག་ཅིང་གཏུམ་པ་རྣམས་བཏུལ་བ་ནི་སྣ་ཚོགས་གཟུགས་མཆོག་གྲུབ་པ་སྟེ་དེའི་དོན་དུ་བྱུང་བའོ། །ཕྱུང་ནས་ཀུན་དུ་བཞུད་པར་འགྱུར། ཞེས་བྱ་བ་ནི་སངས་རྒྱས་སྲས་དང་བཅས་པ་ཐམས་ཅད་རྡོ་རྗེ་དེ་ལས་ཕྱུང་ནས་ཕྱོགས་བཅུར་སོང་བ་ནི་ཀུན་དུ་བཞུད་པ་ཡིན་ནོ། །ཀུན་དུ་འབར་བ་རྣམ་པར་འཁྲུག །ཅེས་བྱ་བ་ནི་ཐམས་ཅད་དུ་འབར་བའི་ནང་དུ་ཆུད་པས་ན་ཀུན་དུ་འབར་བའོ། །ཕན་ཚུན་དུ་རྣམ་པར་ཁྱབ་པས་ན་རྣམ་པར་འཁྲུག་པའོ། །རླུང་གིས་སྐྱོད་པ་པོས་ཞེས་བྱ་བ་ནི་གོ་བར་ཟད་དོ། །སངས་རྒྱས་ཐམས་ཅད་དེ་ཞེས་བྱ་བ་ལ་སོགས་པ་གང་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་སངས་རྒྱས་བཅོམ་ལྡན་འདས་ཐམས་ཅད་སྲས་ཏེ། བྱང་ཆུབ་སེམས་དཔའ་དང་བཅས་པའི་འཇིག་རྟེན་གྱི་ཁམས་མ་ལུས་པ་ན་བཞུགས་ཤིང་གནས་པར་མཛད་པ་རྣམས་ཧཱུཾ་ཞེས་བྱ་བ་དེས་ཡང་དག་པར་བསྐུལ་བ་སྟེ། འགྲོ་བའི་དོན་ལ་འདིར་གཤེགས་ཤིག །ཅེས་ཐུགས་སུ་ཆུད་པར་མཛད་ནས། འཇིག་རྟེན་ཀུན་གྱིས་ཡོངས་བསྐོར་བ། །ཞེས་བྱ་བ་གང་དེ་དག་རང་རང་གི་དཀྱིལ་འཁོར་གྱི་
འཁོར་བརྒྱ་བྱིན་ལ་སོགས་པའི་རང་བཞིན་ཅན་ལྟ་བུ་ནི་འཇིག་རྟེན་དེ་དག་ཀུན་གྱིས་སངས་རྒྱས་དེ་དག་ཐམས་ཅད་ཡོངས་སུ་བསྐོར་ནས་བཞུགས་པས་ན་འཇིག་རྟེན་ཀུན་གྱིས་ཡོངས་སུ་བསྐོར་བ་སྟེ་ཡོངས་སུ་བསྐོར་བའི་སངས་རྒྱས་དེ་དག་ཐམས་ཅད་པ་ཀུག་ཅིང་སྤྱན་དྲངས་པའོ། །ཅིའི་ཕྱིར་ཞེ་ན། སེམས་ཅན་ཀུན་གྱི་དོན་དང་ནི། །ཞེས་བྱ་བ་སྨོས་ཏེ། དྲག་ཅིང་དྲག་པོའི་སྦྱོར་བས་སེམས་ཅན་གདུག་ཅིང་གཏུམ་པ་རྣམས་གདུལ་བར་བྱ་བའི་ཕྱིར་དང་ཞི་བས་བསྡུ་བར་འོས་པའི་སེམས་ཅན་རྣམས་ཀུན་དུ་བསྡུ་བར་བྱ་བའི་ཕྱིར་དང༌། སངས་རྒྱས་ཐམས་ཅད་དགུག་ཅིང་སྤྱན་དྲངས་པ་ཡིན་ནོ། བསྟན་པ་ཐམས་ཅད་གྲུབ་པའི་ཕྱིར། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་བཀའ་རྣམ་པ་སྣ་ཚོགས་པ་ནི་དེ་བཞིན་གཤེགས་པ་ཐམས་ཅད་ཀྱིས་བསྟན་པའོ། །དེ་གྲུབ་པ་ནི་རྫོགས་པ་སྟེ། དེ་བཞིན་གཤེགས་པའི་བཀས་གདུལ་བྱ་རྣམས་མི་དགེ་བ་བཅུ་ཡོངས་སུ་སྤོང་ཞིང་དགེ་བ་བཅུ་ཉམས་སུ་ལེན་པ་ཞེས་བྱ་བའི་ཐ་ཚིག་སྟེ། དེའི་དོན་དུ་སངས་རྒྱས་དེ་ཐམས་ཅད་ལ་ཡང་དག་པར་བསྐུལ་ནས་སྤྱན་དྲངས་པ་ཡིན་ནོ། །འཇིག་རྟེན་གསུམ་དག་དེ་རྣམས་ཀྱང༌། །ཞེས་བྱ་བ་ནི་དེ་བཞིན་གཤེགས་པ་ཐམས་ཅད་སེམས་ཅན་ཀུན་གྱི་དོན་གྱི་ཕྱིར་དང༌། བསྟན་པ་ཐམས་ཅད་གྲུབ་པར་བྱ་བའི་ཕྱིར་དགུག་པར་མ་ཟད་ཀྱི་ཧཱུཾ་ཞེས་བྱ་བ་དེས་དབང་ཕྱུག་ཆེན་པོ་ལ་སོགས་པ་ཁམས་གསུམ་གྱི་བདག་པོ་དེ་རྣམས་ཀྱང་ཀུན་དུ་རྒྱལ་བས་གཡོ་བ་མེད་པར་བྱ་ཞིང༌། རྒྱུ་དང་མི་རྒྱུར་བཅས་པ་སྟེ། །གནས་དང་གཞལ་ཡས་ཁང་དང་རང་རང་གི་འཁོར་གྱི་ཚོགས་དང་བཅས་པར་དགུག་གོ །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟེ། དེ་ལྟར་རྡོ་རྗེའི་རིགས་བསྐྱེད་པ་དེས་དེ་བཞིན་གཤེགས་པ་ཐམས་ཅད་ལ་སོགས་པ་ཇི་སྐད་དུ་བཤད་པའི་ཚུལ་གྱིས་བཀུག་པའི་རྗེས་ཐོགས་ཉིད་ལ་རྡོ་རྗེ་འཛིན་པ་སྟེ། རྡོ་རྗེ་མེ་ལྟར་འབར་བར་ཇི་སྐད་དུ་བཤད་པའི་མཚན་ཉིད་ཅན་དེ་རྣམས་ལ་སྟེ། དབང་ཕྱུག་ཆེན་པོ་ལ་སོགས་པ་གཡོ་བ་མེད་པར་གྱུར་པ་སྟེ། དེ་རྣམས་ལ་ཐུགས་རྗེ་སྐྱེས་ནས་ཐུགས་རྗེ་ཞེས་བྱ་བ་ཐུགས་རྗེ་དང་ལྡན་པའི་ཐུགས་ཀྱིས་འཆི་བ་སློང་བར་བྱེད་པའི་རིགས་པ་
གསུངས་པས་ན། ཤི་བ་སླར་གསོ་བརྟན་པར་གསུངས། །ཞེས་བྱ་སྟེ། ཤི་བ་སླར་གསོ་བའི་དོན་ལ་བཟློག་དཀའ་བའོ། །ཨོཾ་ཞེས་བྱ་བ་ལ་སོགས་པ་ནི་གོ་བར་ཟད་དོ། །ཧི་ཞེས་བྱ་བ་ནི་ཉེ་བའི་སྙིང་པོ་སྟེ། བཅོམ་ལྡན་འདས་རྡོ་རྗེ་མེ་ལྟར་འབར་བས་ཁམས་གསུམ་གདུལ་བར་བྱ་བའི་ཕྱིར་གསུངས་པ་ཡིན་ནོ། །དེ་ནས་དེ་གསུངས་པའི་རྗེས་ཐོགས་ཉིད་ལ་བཅོམ་ལྡན་འདས་རྡོ་རྗེ་མེ་ལྟར་འབར་བའི་ཁྲོ་གཉེར་གྱི་ཕྱོགས་ནས་རྡོ་རྗེ་མེ་ལྟར་འབར་བའི་གཟུགས་འཛིན་པའི་ཉེ་བའི་སྙིང་པོ་ཁྲོ་བོ་གཉིས་པོ་ཕྱུང་ནས་དེའི་རྡོ་རྗེའི་རིགས་ཐམས་ཅད་རང་གི་རྡོ་རྗེ་ལས་ཕྱུང་སྟེ། དབང་ཕྱུག་ཆེན་པོ་ལ་སོགས་པ་འཁོར་དང་བཅས་པ་བཏུལ་ནས། རྡོ་རྗེ་མིང་བྱིན་ཏེ་འཇིག་རྟེན་གསུམ་གྱི་མཆོག་ཏུ་བྱིན་གྱིས་བརླབ་པའི་བར་དུ་མཛད་པ་ཡིན་ནོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ། འཇིག་རྟེན་གསུམ་མཆོག་བྱིན་གྱིས་རློབ། །ཅེས་བྱ་བའི་བར་གྱི་བཤད་པས་ནི་ཁྲོ་བོའི་དཀྱིལ་འཁོར་གྱི་རྒྱལ་པོ་མཆོག་ཅེས་བྱ་བའི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་ནོ། །དེ་ལྟར་ཏིང་ངེ་འཛིན་གསུམ་གསུངས་ནས་ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར། དེ་ནས་རྡོ་རྗེ་འཛིན་ཆེན་མཆོག །མགོན་པོ་ཡིས་ནི་གསོལ་བཏབ་པ། །ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟོན་པའི་ཚིག་ཡིན་ཏེ་གསོལ་བ་བཏབ་པའི་རྗེས་ཐོགས་ཉིད་ལའོ། །རྡོ་རྗེ་འཛིན་པ་ཆེན་པོ་ནི་རྡོ་རྗེ་མེ་ལྟར་འབར་བའོ། །མཆོག་ནི་དམ་པའོ། །མགོན་པོ་ཡིས་ནི་དེ་བཞིན་གཤེགས་པ་རྣམས་ཀྱིས་སོ། །གསོལ་བ་བཏབ་པ་ནི་གསོལ་བས་བཏབ་པར་གྱུར་པའོ། །ཅིའི་ཕྱིར་གསོལ་བ་བཏབ་ཅེ་ན། རྟོག་པ་འདི་ནི་བཤད་པའི་ཕྱིར། །ཞེས་བྱ་བ་སྨོས་ཏེ། འོག་ནས་རྗེས་ཐོགས་ཉིད་ལ་འཆད་པར་འགྱུར་བའི་རྡོ་རྗེ་རིགས་ཀྱི་རྟོག་པ་འདི་བཤད་ཅིང་བསྟན་པར་བྱ་བའི་ཕྱིར། སེམས་ཅན་ཐམས་ཅད་ལ་
རྗེས་སུ་སྟོན་པར་མཛད་པ་བཅོམ་ལྡན་འདས་རྡོ་རྗེ་འཆང་བ་ལ་གསོལ་བ་བཏབ་པར་གསུངས་པ་ཡིན་ནོ། །ཅི་ཞིག་གསུངས་ཤེ་ན། དཀྱིལ་འཁོར་ཆེན་པོའི་ཕྱི་རོལ་དུ། །ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའི་ཕྱིའི་དཀྱིལ་འཁོར་གང་ཡིན་པ་དེ་ནི་སྔར་བཤད་པ་ཡིན་ལ་དཀྱིལ་འཁོར་ཆེན་པོའི་ཕྱི་རོལ་པ་གང་ཡིན་པ་དེ་ནི་དཀྱིལ་འཁོར་ཆེན་པོའི་ཕྱི་རོལ་ལོ། །དེ་ཅི་ཞིག་ཡིན་ཞེ་ན། འབར་བའི་འཁོར་ལོ་ཞེས་བྱ་བ་གསུངས་ཏེ། འབར་བའི་འོད་དེས་ཉེ་བར་མཚོན་པའི་འཁོར་ལོ་སྟེ་དཀྱིལ་འཁོར་ལ་ནི་འབར་བའི་འཁོར་ལོ་ཞེས་བྱ་སྟེ། ནང་གི་དཀྱིལ་འཁོར་འབར་བ་དང་བཅས་པ་ཞེས་སྟོན་པ་ཡིན་པས་དེ་རྣལ་འབྱོར་བས་ཡང་དག་པར་བྲི་བར་བྱའོ། །དེའི་ནང་གི་དཀྱིལ་འཁོར་གྱི་ལྟེ་བར་རོ། །གཞག་པར་བྱ་ཞེས་བྱ་བ་ནི་ལུགས་མའམ་བརྐོས་པ་ལ་སོགས་པའི་རང་བཞིན་ཅན་ནོ། །སྔོན་པོ་འབར་བའི་སྐུ་བཟང་པོ། །ཞེས་བྱ་བ་ནི་རྡོ་རྗེ་སྔོན་པོ་འབར་བ་ལས་གྲུབ་པས་ཤིན་ཏུ་མཛེས་པའི་སྐུ་ནི། སྔོན་པོ་འབར་བའི་སྐུ་བཟང་པོ། །ཞེས་བྱ་བ་སྟེ། འོད་ཟེར་སྔོན་པོ་འབར་བ་དང་ལྡན་པའི་སྐུ་ཞེས་བྱ་བའི་ཐ་ཚིག་གོ །ཞལ་གྱི་མཆེ་བ་ཅུང་ཟད་གཙིགས། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །བསྙེམས་བཅས་ཤས་ཆེར་འབར་བ་ལ། །ཞེས་བྱ་བ་ནི་བསྙེམས་པ་དང་བཅས་པའི་ཤུགས་དང་ལྡན་པའི་འབར་བ་གང་ཡིན་པ་དེ་ནི་བསྙེམས་བཅས་ཤས་ཆེར་འབར་བ་སྟེ། གཡོན་པའི་རྡོ་རྗེ་ཁུ་ཚུར་རྡོ་རྗེ་དྲིལ་བུ་དང་བཅས་པ་ཁ་བཀན་ཏེ་ཁ་ནང་དུ་བསྟན་པ་ནི་འདིར་བསྙེམས་པ་ཞེས་བྱ་བ་སྟེ། དེ་ལྟ་བུས་ནི་རྡོ་རྗེ་འབར་བ་གསོར་བ་ལ་བརྩོན་པ་ནི་དེ་ལ་འབད་པའོ། །འདི་སྐད་སྟོན་པ་ཡིན་ཏེ། གཡོན་པའི་རྡོ་རྗེ་ཁུ་ཚུར་རྡོ་རྗེ་དྲིལ་བུ་དང་བཅས་པས་ཇི་སྐད་དུ་བཤད་པའི་སྙེམས་ཚུལ་བྱས་ནས་ཕྱག་གཡས་པས་འབར་བ་དང་བཅས་པའི་རྡོ་རྗེ་གསོར་ཞིང་བཞུགས་པ་བྲི་བར་བྱའོ། །དེ་ཡི་ངོས་ནི་ཐམས་ཅད་དུ། །ཞེས་བྱ་བ་ནི་ཕྱོགས་དང་མཚམས་རྣམས་སུའོ། །རྡོ་རྗེ་རྣལ་འབྱོར་མ་ཡི་གཟུགས། །ཞེས་བྱ་བ་ནི་རྡོ་རྗེ་མཚོན་ཆ་མ་ལ་སོགས་པའི་སྐུའོ། །རྡོ་རྗེ་རྣལ་འབྱོར་མའི་སྐུ་མཚོན་ཆ་ཅི་ཞིག་བསྣམས་པ་བྲི་ཞེ་ན། རྡོ་རྗེ་མཚོན་ཆ་མདུང་ཆེན་དང༌། །རལ་གྲི་
པདྨ་མཆོག་འཛིན་མ། །ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་མཚོན་ཆ་མ་ནི་རྡོ་རྗེའི་མཚོན་ཆ་བསྣམས་མའོ། །རྩེ་གསུམ་པ་འཛིན་པ་ནི་རྩེ་གསུམ་པ་བསྣམས་པའོ། །རལ་གྲི་འཛིན་པ་ནི་རལ་གྲི་བསྣམས་པའོ། །པདྨ་འཛིན་པ་ནི་ཞགས་པ་དང་ཐོབ་བ་བསྣམས་པའོ། །མདའ་འཛིན་པ་ནི་མདའ་བསྣམས་པའོ། །ཁ་ཊྭཱཾ་ག་འཛིན་མ་ནི་ཁ་ཏྭཱཾ་ག་བསྣམས་པའོ། །འཁོར་ལོ་འཛིན་པ་ནི་འཁོར་ལོ་བསྣམས་པའོ། །བ་དན་སྣ་ཚོགས་འཛིན་པ་ནི་ལྷ་མོ་རྡོ་རྗེ་དྲིལ་བུ་བ་དན་མའོ། །རྡོ་རྗེ་རིགས་ཆེན་པོ་ནི་ཞེས་བྱ་བ་ནི་རྡོ་རྗེ་གཙུག་ཏོར་ལ་སོགས་པའོ། །འབར་བའི་འཁོར་ལོའི་རྗེས་མཐུན་པ།། ཞེས་བྱ་བ་འཇིག་རྟེན་གསུམ་གྱི་གསང་བར་འབར་བའི་འཁོར་ལོའི་དཀྱིལ་འཁོར་དུ་རྡོ་རྗེའི་རིགས་ཆེན་པོའི་དཀྱིལ་འཁོར་ཆེན་པོ་ཇི་ལྟར་བཀོད་པ་དེ་བཞིན་དུ་འདིར་ཡང་དགོད་པར་བྱའོ། །གང་དུ་ཞེ་ན། ཐིག་བདུན་གྱི་ནི་ཞེས་བྱ་བ་སྨོས་སོ། །དེ་ཉིད་བསྟན་པ་ནི། དང་པོར་རྡོ་རྗེའི་ཕྱག་རྒྱ་བདག །ཅེས་བྱ་བ་ལ་སོགས་པ་གསུངས་པ་ཡིན་ཏེ། འབར་བའི་འཁོར་ལོས་ཡོངས་སུ་བསྐོར་བའི་དཀྱིལ་འཁོར་དང་པོར་ནི་རྡོ་རྗེ་གཙུག་ཏོར་ལ་སོགས་པ་ནས་རྡོ་རྗེ་འབེབས་པའི་བར་དུ་བྲིའོ། །དེ་བཞིན་དུ་དྲུག་པའི་བར་ལ་རྡོ་རྗེ་ཕོ་ཉའི་མཆོག་དང༌། གནོད་སྦྱིན་དང་སྲིན་པོ་དང༌། མངག་གཞུག་པ་རྣམས་བྲིའོ། །བདུན་པ་ལ་ནི་ཡང་དག་གནོན། །རི་མོ་དེར་ནི་དགོད་པར་བྱ། །རྡོ་རྗེ་འཆང་བ་ཆེན་པོ་ཡི། །རྡོ་རྗེ་རིགས་ནི་སྣ་ཚོགས་པ། །ཞེས་བྱ་བ་འདི་ཉིད་ཀྱི་དོན་བསྟན་པ་ནི། དབང་ཕྱུག་དམ་པ་དྲག་པོའི་ཚོགས། །གཏུམ་པོ་ཆེན་པོ་འདུལ་བར་མཛད། །ཅེས་བྱ་བ་ཡིན་ནོ། །རི་མོ་བདུན་པའི་བར་དུ་རྡོ་རྗེ་གཙུག་ཏོར་ལ་སོགས་པས་གདུལ་བར་གྱུར་པའི་ལྷ་ཆེན་པོ་ལ་སོགས་པ་ནས་ཆུ་ལྷའི་བར་དུ་ཆུང་མ་དང་བཅས་པ་བྲི་བར་བྱའོ། །ཕྱིའི་དཀྱིལ་འཁོར་གནས་སུ་ནི། །ལྷ་ལ་སོགས་པ་ཀུན་གྱི་ཚོགས། །ཞེས་བྱ་བ་ནི་ཕྱི་མའི་དཀྱིལ་འཁོར་གྱི་གནས་སུ་ནི་མེ་ལ་སོགས་པའི་མཚམས་སུ་ལྷ་ཡང་ཡིན་པས་ལྷ་ཀུན་ནོ། །དེ་རྣམས་ཀྱི་ཚོགས་ནི་དཀྱིལ་འཁོར་ཏེ། དེ་རྣམས་རང་རང་གི་ཕྱོགས་སུ་དགོད་པར་བྱའོ། །དེ་ཉིད་བཤད་པ་ནི། མདོར་ན་མིང་པོ་གསུམ་ལ་སོགས། རང་གི་ཕྱོགས་
སུ་དགོད་པར་བྱའོ་ཞེས་བྱ་བ་ཡིན་ཏེ། རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པ་ནི་མིང་པོ་གསུམ་མོ། །དེ་ལ་སོགས་པ་ནི་སྔོན་དུ་བྱ་བའི་ལྷའི་ཚོགས་ཐམས་ཅད་མདོར་བསྡུས་ནས་རང་གི་ཕྱོགས་སུ་དགོད་པར་བྱའོ། །མཚམས་སུ་ལྷ་མོར་བཤད་པ་ཡི། །ཞེས་བྱ་བ་ནི་སྒེག་མོ་ལ་སོགས་པའོ། །སྒོ་དབུས་སུ་ཡང་དེ་རྣམས་ཉིད། །ཅེས་བྱ་བ་ནི་དཀྱིལ་འཁོར་གྱི་ཚོགས་ནི། རྡོ་རྗེ་སེམས་དཔའི་དཀྱིལ་འཁོར་དུ་གང་བཞག་པ་དེ་དག་འདིར་དགོད་པར་བྱའོ། །རྡོ་རྗེ་ལྕགས་ཀྱུ་ཚོགས་བཅས་པའི། །ཁྲོ་བོ་གོ་རིམས་ཇི་བཞིན་བྱ། །ཞེས་བྱ་བ་ནི་རྡོ་རྗེ་ལྕགས་ཀྱུ་མ་ལ་སོགས་པའི་སྒོ་སྲུང་མ་རྣམས་དང༌། སྒེག་མོ་ལ་སོགས་པའི་རྣམ་པར་འཇོམས་མ་ཁྲོ་བོ་དང་བཅས་པའི་དཀྱིལ་འཁོར་གྱི་ཚོགས་དེ་རྣམས་སུ་ཇི་སྐད་བཤད་པའི་སྙིང་པོས་དགོད་པར་བྱའོ་ཞེས་བྱ་བའི་ཐ་ཚིག་གོ །དཀྱིལ་འཁོར་ཆེན་པོའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ལྟར་འདིར་ཡང་ཆོ་ག་ཐམས་ཅད་དེ་བཞིན་དུ་བྱའོ་ཞེས་བྱ་བའི་ཐ་ཚིག་གོ །ཁྲོས་པས་རྡོ་རྗེ་གསོར་བ་དང༌། །ཁྲོ་གཉེར་འཛུམ་དང་བཅས་པས་འདུད། །དེ་ནས་མེ་ཏོག་བླངས་ནས་ནི། །ཁྲོས་པས་བདག་པོ་ཆེ་ལ་གཏོར། །ཞེས་བྱ་བར་སྦྱར་ཏེ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་འཇུག་པའི་ཆོ་གས་ཞུགས་པ་བདག་ཉིད་ལ་དབབ་པར་བྱའོ། །མེ་ཏོག་དོར་ལ་རྡོ་རྗེ་གསོར་བའི་ཕྱག་རྒྱ་བཅིངས་ཏེ། ཁྲོས་པར་གྱུར་པས་ཁྲོ་གཉེར་བསྡུས་པ་དང༌། འཛུམ་པ་དང་བཅས་པས་བཅོམ་ལྡན་འདས་ལ་བདུད་ཅིང་ཕྱག་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །རྡོ་རྗེ་འབར་བའི་ལྕགས་ཀྱུ་ཆེས། །ཡང་དག་པར་ནི་དགུག་པར་བྱའོ། །ཞེས་བྱ་བ་ནི་རྡོ་རྗེ་འབེབས་པའི་བར་གྱི་དཀྱིལ་འཁོར་གྱི་ཚོགས་རྣམས་ཡང་དག་པ་ཇི་ལྟ་བ་བཞིན་དུ་བཀོད་ལ། དཀྱིལ་འཁོར་གྱི་སྒོ་ལེགས་པར་ཕྱེ་སྟེ། བསྡུ་བ་བྱས་ལ་མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་ཡང་དག་པར་བསྟོད་ནས་རྡོ་རྗེ་འབར་བའི་ལྕགས་ཀྱུ་ཆེན་པོ་སྤྱན་འདྲེན་པའི་སྔགས་དང་བཅས་པས་བཅོམ་ལྡན་འདས་རྡོ་རྗེ་མེ་ལྟར་འབར་བ་འཁོར་
དང་བཅས་པ་དཀྱིལ་འཁོར་དུ་སྤྱན་དྲངས་ཤིང་དགུག་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །བཅོམ་ལྡན་འདས་ཀྱང་དེ་ཁོ་ན་ཉིད་ཀྱི་སྙིང་པོས་གཞག་པར་བྱའོ་ཞེས་བྱ་བ་ནི་ཧི་ཞེས་བྱ་བས་དེ་ཁོ་ན་ཉིད་ཀྱི་སྙིང་པོ་བསྟན་པས་སོ། །འདི་སྐད་སྟོན་པ། ཡིན་ཏེ། ཧཾ་ཞེས་བྱ་བཟློས་ཤིང་བཅོམ་ལྡན་འདས་མེ་ལྟར་འབར་བའི་དཀྱིལ་འཁོར་དུ་བཞུགས་སུ་གསོལ་བར་བྱའོ། །དེ་ནས་དམ་ཚིག་བརྗོད་པར་བྱའོ་ཞེས་བྱ་བ་ནི་དེ་ལྟར་སློབ་མ་ལ་བསྟན་པའི་རྗེས་ཐོགས་ཉིད་ལ། དེ་སེམས་ཅན་མང་ལ་བདེ་ཕྱིར་དང༌། །ཞེས་བྱ་བ་ལ་སོགས་པ་དམ་ཚིག་བརྗོད་པར་བྱའོ། །དེ་ནས་བཅོམ་ལྡན་འདས་ཧཱུཾ་མཛད་ཀྱི་ཕྱག་རྒྱ་དང་བཅས་པའི་མཛུབ་མོ་སྦྱར་བར་བྱའོ་ཞེས་བྱ་བ་ནི་དེ་ལྟར་དཀྱིལ་འཁོར་བྲིས་ནས་ཇི་སྐད་དུ་བཤད་པའི་ཆོ་གས་བཅོམ་ལྡན་འདས་འཁོར་དང་བཅས་པ་སྤྱན་དྲངས་ཏེ་བཅུག་ནས་རྡོ་རྗེ་ཧཱུཾ་མཛད་ཡི་གེ་ཧཱུཾ་དང་བཅས་པས་སྡིགས་མཛུབ་བྱའོ་ཞེས་བསླབ་པར་བྱའོ། །དེ་ནས་ཞེས་བྱ་བ་ལ་སོགས་པ་ནི་སྡིགས་མཛུབ་ཀྱི་ཕན་ཡོན་གསུངས་པ་ཡིན་ནོ། །དེ་ནས་ཆོ་ག་རྒྱས་པ་ཇི་ལྟ་བ་བཞིན་དུ་བྱའོ་ཞེས་བྱ་བ་ནི། དེ་ལྟར་སློབ་མ་ཞུགས་པར་བྱས་ནས། དེ་ལ་དབབ་པ་དང༌། དེ་ནས་མེ་ཏོག་དོར་དུ་གཞུག་གོ །དེ་ནས་དེ་བླངས་ལ་མགོ་ལ་བཅིང་བར་བྱའོ། །དེ་ནས་དཀྱིལ་འཁོར་བསྟན་པ་ལ་སྙིང་གར་གཞུག་པའི་ཕྱག་རྒྱ་དགྲོལ་བར་བྱ་སྟེ། འདི་ནི་ཆོ་ག་རྒྱས་པ་ཇི་ལྟ་བ་བཞིན་དུ་བྱའོ་ཞེས་བྱ་བའི་སྒྲའི་དོན་ཡིན་ནོ། །དབང་བསྐུར་བ་ལ་སོགས་པ་དེ་བཞིན་དུ་བྱའོ་ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་བཤད་པའི་ཆོ་གས་སློབ་མ་རྣམས་ལ་དབང་བསྐུར་བ་དང༌། དངོས་གྲུབ་ནི་རྡོ་རྗེ་བརྟུལ་ཞུགས་དང༌། རྡོ་རྗེ་རིགས་བདག་པོའི་དེ་ཁོ་ན་ཉིད་བསྟན་པ་དང༌། དམ་ཚིག་གསུམ་སྦྱིན་པ་དང་ལུང་བསྟན་པ་དང་སྙིང་པོ་སྦྱིན་པ་དང་ཕྱག་རྒྱ་བསླབ་པ་དང༌། མཆོད་པ་དང༌། གཟེངས་བསྟོད་པ་ལ་སོགས་པའི་འབྲས་བུ་བཤད་པ་དང༌། དམ་ཚིག་བསྟན་པ་རྣམས་བྱའོ་ཞེས་བྱ་བའི་ཐ་ཚིག་གོ །རྡོ་རྗེ་ཁྲོ་བོ་ནི་རྡོ་རྗེ་མེ་ལྟར་འབར་བའོ། །དེའི་ལས་ཀྱི་དབྱེ་བ་བཞི་པོ་གང་ཡིན་
བདེ་དེ་རྣམས་ལ་བསླབ་པར་བྱ་ཞིང་བསྟན་པར་བྱའོ། །དེ་དག་གང་ཞེ་ན། རྒྱས་གདབ་པ་དང་ཞེས་བྱ་བ་ལ་སོགས་པ་སྨོས་པ་ཡིན་ཏེ་དེ་ལ་རྒྱས་གདབ་པ་བསྒྲུབ་པར་བྱ་བའི་སྙིང་པོ་ལ་རྡོ་རྗེ་མདའ་བསྐྱེད་པའོ། །ཕྱག་རྒྱ་གཞིག་པ་ནི་གདོན་གྱིས་ཟིན་པའི་རྒྱུད་ལ་ཡོད་པའི་ཁ་ཊྭཱཾ་ག་འཛིན་པའི་ཕྱག་རྒྱས་གདོན་གྱི་ཕྱག་རྒྱ་གཞིག་པའོ། །འཁོར་ལོ་འཛིན་པའི་ཕྱག་རྒྱས་གདོན་གྱིས་བཟུང་བའི་རྒྱུད་ལ་ཡོད་པའི་གདོན་གསད་པ་ནི་གསད་པའོ། །བ་དན་སྣ་ཚོགས་འཛིན་པའི་ཕྱག་རྒྱས་གདོན་གྱིས་ཟིན་པའི་སེམས་ཅན་རྣམས་ལ་ཡང་སྲོག་འབྱིན་པ་ནི་སེམས་ཅན་རྣམས་ལ་སླར་འཚོ་བར་བྱ་བའོ། །རྡོ་རྗེ་ཁྲོ་བོའི་ལས་བཞི་པོ་འདི་དག་གདོན་གྱིས་བཟུང་བ་ལ་བྱ་བ་ཡིན་ནམ་འོན་ཏེ་མ་ཡིན་པ་ཇི་ལྟར་ཤེས་པར་བྱ་ཞེ་ན། །གང་ལ་ཞེས་བྱ་བ་ལ་སོགས་པ་སྨོས་པ་ཡིན་ཏེ། སེམས་ཅན་གང་ལ་མདའ་འཛིན་མ་ལ་སོགས་པའི་ཕྱག་རྒྱ་སྦྱར་བ་ན་འགྱུར་བསྐྱེད་པར་བྱེད་ན། སེམས་ཅན་དེ་ནི་གདོན་གདུག་པས་ཟིན་པ་ཡིན་པར་ཤེས་པར་བྱའོ། །དེ་ནས་འཚོ་བར་བྱེད་པའི་ཕྱག་རྒྱ་སྣ་ཚོགས་བ་དན་འཛིན་པའི་ཕྱག་རྒྱས་སེམས་ཅན་དེ་འཚོ་བར་བྱས་ལ། ཤིན་ཏུ་བསྲུང་བའི་ཕྱག་རྒྱས་སླར་ཡང་གནོད་པར་མི་འགྱུར་ཞིང་སེམས་ཅན་དེ་ལ་གདོན་གྱིས་འགྱུར་བ་ཡང་བྱེད་པར་མི་འགྱུར་བར་བྱ་བའི་ཕྱིར་དེ་ལ་བསྲུང་བར་བྱའོ། །འཚོ་བའི་ཕྱག་རྒྱ་གང་ཡིན་པ་འདིས་སྲོག་བྱིན་ཏེ་བསྲུང་བར་བྱ་བ་དེ་ཇི་སྲིད་འཚོའི་བར་དུ་དེ་བྱའོ། །དེ་ནས་བརྩམས་ཏེ་ཞེས་བྱ་བ་ལ་སོགས་པ་ནི་གོ་བར་ཟད་དོ།། དེ་ནས་འདིར་བསྒྲུབ་པ་བཤད་བྱ་སྟེ་ཞེས་བྱ་བ་ནི་དེ་ནས་ཞེས་བྱ་བའི་སྒྲས་ནི་གནས་སྐབས་སོ། །འདིར་ཞེས་བྱ་བ་ནི་རྡོ་རྗེའི་རིགས་ལའོ། །སྒྲུབ་པ་ནི་བསྒྲུབ་པའི་ཐབས་ལས་སོ། །བཤད་ཅེས་བྱ་སྟེ་ཞེས་བྱ་བ་ནི་བསྟན་པར་བྱ་བའོ། །ཇི་བཞིན་སྐུ་ནི་དགེ་འདུན་དུ། །ཞེས་བྱ་བ་ལ་སོགས་པ་ལ་བཅོམ་ལྡན་འདས་མེ་ལྟར་འབར་བའི་རས་རིས་ལ་སོགས་པ་ཇི་སྐད་དུ་བཤད་པའི་མཚན་ཉིད་དང་ལྡན་པའི་སྐུ་གཟུགས་དགེ་ཞིང་སྡིག་པ་དང་བྲལ་བ་དེའི་མདུན་དུ་སྟེ། སྤྱན་སྔར་རྡོ་རྗེ་གསོར་བས་རྡོ་རྗེ་གསོར་ཞིང་དང་པོ་ཞེས་བྱ་བ་བསྒྲུབ་པའི་
ཞག་ནས་བརྩམས་ཏེ་བཟླས་བརྗོད་སྟོང་ཕྲག་བརྒྱ་བྱའོ་ཞེས་བྱ་བ་བཟླས་བརྗོད་འབུམ་བྱའོ། །དེ་ནས་ཅིར་འགྱུར་ཞེ་ན། འབུམ་ཚང་ནས་ཞེས་བྱ་བ་ལ་སོགས་པས་དེའི་འབྲས་བུ་གསུངས་པ་ཡིན་ནོ། །དེ་ལྟར་ཡི་གེ་ཧཱུཾ་གི་སྒྲུབ་པ་གསུངས་ནས། ད་ནི་དེ་ནས་དེ་ཁོ་ན་ཉིད་ཀྱི་སྙིང་པོ་བསྒྲུབ་པ་ནི་ཞེས་བྱ་བ་ནི་སོགས་པས་ཡི་གེ་ཧཱུཾ་གི་སྒྲུབ་པ་གསུངས་པ་ཡིན་ནོ། །འདི་ཡང་གོ་སླའོ། །དེ་ལྟར་ཆོས་ཀྱི་ཕྱག་རྒྱའི་རང་བཞིན་ཅན་གྱི་སྙིང་པོ་དང་ཉེ་བའི་སྙིང་པོ་གསུངས་ནས། ད་ནི་དེ་ནས་ཞེས་བྱ་བ་ལ་སོགས་པས་ཕྱག་རྒྱ་ཆེན་པོ་ལ་སོགས་པ་སྒྲུབ་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་བཞིན་ནོ། །ཕྱག་རྒྱ་རྣམས་ཀྱི་དམ་པ་བསྒྲུབ་པ་ནི་དམ་ཚིག་སྒྲུབ་པ་སྟེ། ཕྱག་རྒྱ་ཆེན་པོ་ཐམས་ཅད་མངོན་དུ་བྱས་པའི་ཐབས་སོ། །དེ་ཉིད་བསྟན་པ་ནི། ཇི་བཞིན་རབ་ཏུ་ཕྱག་རྒྱ་བཅིང༌། །ཞེས་བྱ་བ་ཡིན་ཏེ་མཉམ་པར་གཞག་པའི་སྦྱོར་བ་ལ་གནས་པའི་སྐབས་ནི་ཇི་བཞིན་དུས་ཏེ། དེའི་དུས་སུ་ཕྱག་རྒྱ་ཆེན་པོ་བཅིངས་ཏེ། བདག་ཉིད་བསྲེག་བར་བྱའོ་ཞེས་བྱ་བ་རང་ཉིད་ཐལ་བར་བྱའོ་ཞེས་བྱ་བ་སེམས་བསྐྱེད་ལ་བཟླས་བརྗོད་ཀྱི་དོང་ཡིས་རང་གི་ལྷའི་སྙིང་པོ་ཟློས་ཤིང་སྲིད་པ་འདི་ཉིད་དུ་ཞེས་བྱ་བ་ཚེ་འདི་ཉིད་ལ་ཁྲོ་བོ་ཆེ་ཞེས་བྱ་བ་རྡོ་རྗེ་མེ་ལྟར་འབར་བའི་སྒྲུབ་པ་པོའི་ཕྱག་རྒྱ་ཆེན་པོ་སྒོམ་པར་བྱེད་པའི་ཕྱག་རྒྱ་ཆེན་པོའི་དངོས་གྲུབ་ཐམས་ཅད་འགྲུབ་པར་འགྱུར་རོ། །དེ་ལྟར་རྡོ་རྗེའི་རིགས་ཐམས་ཅད་ཀྱི་ཕྱག་རྒྱ་ཆེན་པོ་བསྒྲུབ་པ་གསུངས་ནས་ད་ནི་དེ་ནས་ཞེས་བྱ་བ་ལ་སོགས་པས་རྡོ་རྗེའི་རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་བསྒྲུབ་པ་གསུངས་པ་ཡིན་ནོ། །དམ་ཚིག་གི་ཕྱག་རྒྱ་སྒྲུབ་པ་ནི་ཞེས་བྱ་བ་ནི་རྡོ་རྗེ་མེ་ལྟར་འབར་བ་ལ་རྡོ་རྗེ་རིགས་ཐམས་ཅད་ཀྱི་དམ་ཚིག་འཛིན་པར་བྱེད་པའི་ཕྱག་རྒྱ་ནི་དམ་ཚིག་གི་ཕྱག་རྒྱ་སྟེ། དེའི་སྒྲུབ་པ་ནི་དེ་བཞིན་ནོ། །དེ་ཉིད་བསྟན་པ་ནི་བདག་ནི་ཐམས་ཅད་མི་སྣང་བར་བྱ་ཞེས་བརྗོད་ཅིང་ཕྱག་ན་རྡོ་རྗེ་ཡི་ཞེས་བྱ་བ་ནི། བདག་ནི་ཆོས་ཀྱི་དབྱིངས་ཐམས་ཅད་ཀྱི་རང་བཞིན་ཏེ། སྟོང་པ་ཉིད་བཅུ་དྲུག་གི་ངོ་བོ་ཉིད་ཡིན་ཞེས་བྱ་བའི་ཐ་ཚིག་གོ །གསད་པར་བྱའོ་ཞེས་བྱ་བ་རྡོ་རྗེ་འཆང་ལ་སོགས་པའི་རང་
བཞིན་ཐམས་ཅད་མི་སྣང་བར་བྱའོ་ཞེས་བྱ་བ་སྟེ། ཆོས་བདག་མེད་པར་བསྒོམ་པས་བསྒོམ་པའི་དུས་ཀྱི་དང་པོར་དེ་སྐད་བརྗོད་ལ་ཕྱག་ན་རྡོ་རྗེ་སྟེ། རྡོ་རྗེ་མེ་ལྟར་འབར་བའི་དམ་ཚིག་སྒྲུབ་པའི་ཕྱག་རྒྱ་བཅིངས་ལ། བཟླས་བརྗོད་བྱས་ན་རྣལ་འབྱོར་པ་རྡོ་རྗེ་འཛིན་པ་འགྲུབ་བར་འགྱུར་བ་སྟེ། རྡོ་རྗེ་མེ་ལྟར་འབར་བར་འགྱུར། །ཞེས་བྱ་བའི་ཐ་ཚིག་གོ །དེ་ལྟར་དམ་ཚིག་གི་ཕྱག་རྒྱ་བསྒྲུབ་པ་བསྟན་ནས། ད་ནི་དེ་ལས་ཀྱི་ཕྱག་རྒྱ་བསྒྲུབ་པ་ནི་ཞེས་བྱ་བ་ལས་ཀྱི་ཕྱག་རྒྱ་བསྒྲུབ་པ་གསུངས་པ་ཡིན་ནོ། །སྒྲུབ་པ་དེའི་རང་གི་ཚུལ་གསུངས་པ་ནི། རྣམ་པ་བཞི་པོ་ལ་ཞེས་བྱ་བ་ལ་སོགས་པ་གསུངས་པ་ཡིན་ཏེ་འཕགས་པ་དེ་ཁོ་ན་ཉིད་བསྡུས་པའི་ཁམས་གསུམ་རྣམ་པར་རྒྱལ་བའི་དུམ་བུའི་ལས་ཀྱི་དཀྱིལ་འཁོར་ལས་བཤད་པའི་མཆོད་པ་ཆེན་པོ་དང༌། དབང་བསྐུར་བ་དང༌། ཆོས་དང་ལས་ཀྱི་མཆོད་པའི་མཚན་ཉིད་ཅན་གྱི་ལས་བཞི་པོ་གང་ཡིན་པ་དེ་ནི་ཤིན་ཏུ་བྱེད་ཅེས་བྱ་བ་ནི་རབ་ཏུ་བྱེད་པའོ། །ཉིད་ཅེས་བྱ་བ་ངེས་པར་གཟུང་སྟེ། དེ་ཉིད་བསྒྲུབ་པའི་མཆོག་གི་ལས་བྱེད་པས་རྡོ་རྗེ་ལས་ཉིད་ཐོབ་པ་ཡིན་ནོ། །ཇི་ལྟར་ཞེ་ན། ཐམས་ཅད་བདེ་བའི་ཕྱིར་ཟློས་ན། །ཞེས་བྱ་བ་གསུངས་ཏེ། སེམས་ཅན་ཐམས་ཅད་རྡོ་རྗེའི་རིགས་རྟོགས་པའི་བར་དུ་བསྐྱེད་པ་ནི་ཐམས་ཅད་བདེ་བའོ། །དེའི་དོན་དུ་བཟླས་ན་རྡོ་རྗེའི་ལས་ཉིད་དེ་རྡོ་རྗེ་མེ་ལྟར་འབར་བའི་ལས་ཀྱི་ཕྱག་རྒྱའོ། །དེ་ཐོབ་པ་ནི་རྙེད་པའོ། །བསྐལ་བ་ཆེན་པོ་ནི་ཆོས་དང་ལས་དང༌། དམ་ཚིག་དང་ཕྱག་རྒྱ་ཆེན་པོ་སྒྲུབ་པའོ། །དེ་ཉིད་ཆོ་ག་སྟེ། དེའི་རྒྱས་པ་ནི་དེའི་རྒྱུན་ནོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུད་དོ། །འདིས་ནི་དོན་འདི་སྐད་སྟོན་པ་ཡིན་པར་ཤེས་པར་བྱ་སྟེ། རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་ཏེ་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་དབབ་པ་བསྐྱེད་ལ། དབབ་པའི་ཕྱག་རྒྱ་རང་གི་སྙིང་གར་དྲལ་བར་བྱའོ། །དེ་ནས་རྡོ་རྗེ་ཁུ་ཚུར་གྱི་དམ་ཚིག་གི་ཕྱག་རྒྱ་བཅིང་བར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་དབབ་པ་ལ། ཡི་གེ་ཧཱུཾ་ཡིད་ཀྱིས་བྲིས་ལ། དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་
ཡི་གེ་ཧཱུཾ་དང་ཡི་གེ་ཨའི་ཡེ་ཤེས་དབྱངས་ཀྱི་ཡི་གེ་བཅུ་དྲུག་དང་བཅས་པ་ལ། རང་གི་སེམས་ཟླ་བའི་དཀྱིལ་འཁོར་གྱི་རྣམ་པར་བསམ་པར་བྱའོ། །དེའི་སྟེང་དུ་ཡི་གེ་ཧཱུཾ་ཉིད་དང་ཀ་ལ་སོགས་པ་གསལ་བྱའི་ཡི་གེ་དང་བཅས་པ་ལས་ཟླ་བའི་དཀྱིལ་འཁོར། གཉིས་པ་ཡང་དེ་ཧཱུཾ་དང་བཅས་པ་ལས་རྡོ་རྗེ་འབར་བ་དེའི་དབུས་སུ་ཡི་གེ་ཧཱུཾ་བསམས་ལ་གཉིས་སུ་མེད་པའི་ཐུགས་རྡོ་རྗེ་ཆེན་པོའི་མཚན་ཉིད་ལྟར་རྡོ་རྗེ་དེ་བཞིན་ནོ་ཞེས་རྡོ་རྗེའི་ང་རྒྱལ་བསྒོམས་ལ། རྡོ་རྗེ་དེ་ལས་རྡོ་རྗེ་རིགས་རྣམས་སྦྲུལ་ཏེ། དེས་གདུག་པ་ཐམས་ཅད་བཏུལ་ནས། དེ་ཡང་རྡོ་རྗེ་དེར་ཡིད་ཀྱིས་ཞུགས་པར་བྱའོ། །དེ་ནས་རྡོ་རྗེ་སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་སེམས་དཔར་བདག་ཉིད་བསམས་ལ། ཡི་གེ་ཧཱུཾ་གིས་རྡོ་རྗེ་མེ་ལྟར་འབར་བར་བསམ་མོ། །དེ་ནས་མ་ཧཱ་ས་མ་ཡ་ས་ཏྭ་ཧཾ། ཞེས་ཟློས་ཤིང་དམ་ཚིག་ཆེན་པོའི་སེམས་དཔར་བདག་ཉིད་བསྒོམ་མོ། །དེ་ནས་རྡོ་རྗེ་མེ་ལྟར་འབར་བའི་དམ་ཚིག་གི་ཕྱག་རྒྱ་བཅིངས་ལ་མ་ཧཱ་ས་མ་ཡོ྅ཧཾ། ཞེས་ཟློས་ཤིང་རྡོ་རྗེ་མེ་ལྟར་འབར་བའི་སྐུ་དང་གསུང་དང༌། ཐུགས་རྡོ་རྗེའི་ངོ་བོར་བདག་ཉིད་བསམས་ལ་ཕྱག་རྒྱ་དེ་ཉིད་དང༌། ས་མ་ཡ་ས་ཏྭ་ཨ་དྷི་ཏིཥྛ་སྭ་མཱཾ་ཞེས་ཟློས་ཤིང། སྙིང་ག་དང་དབྲལ་བ་དང༌། ལྐོག་མ་དང་སྤྱི་བོར་བྱིན་གྱིས་བརླབ་པར་བྱའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། ཧཱུཾ་ཨཿ་ཞེས་ཟློས་ཤིང་སྣ་ཚོགས་པདྨའི་སྟེང་དུ་རྡོ་རྗེ་འབར་བ་བསྐྱེད་པར་བྱའོ། །དེ་ནས་རྡོ་རྗེའི་དབུས་སུ་ཧཱུཾ་བསམས་ལ། བཛྲ྅ཧཾ་ཞེས་བསྒོམས་ནས། དེ་ཉིད་བཛྲ་ཛྭ་ལ་ཨ་ན་ལཱརྐ་ཧཱུཾ་ཞེས་བྱ་བས་རྡོ་རྗེ་མེ་ལྟར་འབར་བ་བདག་ཉིད་བསམས་ལ། དེ་ནས་དེ་ཉིད་དུ་རྡོ་རྗེ་ལྕགས་ཀྱུ་ལ་སོགས་པ་བཅོམ་ལྡན་འདས་མེ་ལྟར་འབར་བར་དགུག་པ་དང༌། གཞུག་པ་དང་བཅིང་བ་དང༌། དབང་དུ་བྱས་ལ་རང་གི་དམ་ཚིག་གི་ཕྱག་རྒྱ་བཅིངས་ཏེ། ཧཱུཾ་དྲྀ་ཤྱ་ཞེས་བྱ་བས་བལྟ་བར་བྱས་ལ་རྡོ་རྗེ་འབར་བའི་ལྕགས་ཀྱུ་ཆེན་པོའི་ཧཱུཾ་གིས་རང་གི་ལུས་ལ་བཅོམ་ལྡན་འདས་གཞུག་པར་བྱའོ། །དེ་ནས་རང་གི་དམ་ཚིག་གི་ཕྱག་རྒྱ་ཆེན་པོ་བཅིངས་ལ། ས་མ་ཡ་སྟྭཾ་ཧི་ཞེས་ཟློས་ཤིང་འོད་ཀྱི་དཀྱིལ་འཁོར་
བསྐྱེད་ལ་དེ་ཞུགས་པས་བཅོམ་ལྡན་འདས་དང་བདག་ཉིད་གཅིག་ཏུ་གྱུར་ནས། རྡོ་རྗེ་མེ་ལྟར་འབར་བ་བསྒོམས་ལ། ཛཿ་ཧཱུཾ་བཾ་ཧོཿ། ས་མ་ཡ་སྟྭཾ་ཧཾ་ཧོ་ཞེས་ལན་གསུམ་བཟླ་པར་བྱའོ། །དེ་ནས་ཆོས་དང་ལས་དང༌། ཕྱག་རྒྱ་ཆེན་པོས་བཅོམ་ལྡན་འདས་རྒྱས་བཏབ་ལ། ཛཿ་ཧཱུཾ་བཾ་ཧོཿ་།ཞེས་ཟློས་ཤིང་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་རང་གི་ལུས་ལ་སངས་རྒྱས་ཐམས་ཅད་བཅུག་ལ་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོ་ལས་བཤད་པའི་དེ་བཞིན་གཤེགས་པའི་དམ་ཚིག་གི་ཕྱག་རྒྱ་རྣམས་ཀྱིས་དེ་བསྒྲུབ་པར་བྱའོ། །དེ་ནས་དེ་ལས་བཤད་པའི་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་དེ་རྣམས་ལ་རྒྱས་བཏབ་ལ། དང་པོའི་རྡོ་རྗེ་བཅིངས་ཏེ། སྔ་མ་བཞིན་དུ་རྡོ་རྗེ་སེམས་དཔའ་ལ་སོགས་པས་བདག་ཉིད་བྱིན་གྱིས་བརླབ་པར་བྱའོ། །དེ་ནས་ཡི་གེ་བརྒྱ་པས་བརྟན་པར་བྱས་ལ་དེ་བཞིན་གཤེགས་པ་ཐམས་ཅད་ཀྱི་སྐུའི་མཆོག་གི་ཕྱག་རྒྱས་སངས་རྒྱས་ལྔའི་ཅོད་པན་གྱི་དབང་དང༌། རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱས་རྡོ་རྗེ་རྩེ་ལྔ་པ་འབར་བའི་ཕྲེང་བས་དབང་བསྐུར་བ་བླངས་ལ་ཡི་གེ་གཉིས་ཀྱི་གོ་ཆས་བདག་ཉིད་གོ་བགོ་བར་བྱའོ། །དེ་ནས་ཁྲོ་བོ་རྡོ་རྗེ་རྩེ་ལྔ་པས་བདག་པོ་དང༌། མིང་གི་དབང་བསྐུར་བ་བླངས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ནས་ཁྲོ་བོའི་རྡོ་རྗེ་མཚོན་ཆ་མ་ལ་སོགས་པ་གསང་བའི་མཆོད་པ་གཉིས་ཀྱིས་རྡོ་རྗེ་བཟུང་ཞིང་ཆོས་ཀྱི་དྲིལ་བུ་དཀྲོལ་ལ་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ནས་ཧཱུཾ་ལན་གསུམ་བཟླས་པར་བྱའོ། །དེ་ནས་རྡོ་རྗེ་གསོར་ཞིང་ཁྲོ་གཉེར་དང་འཛུམ་པ་དང་བཅས་པས་སྡུད་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ། ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེ་ཉིད་བདག་པོ་མཆོག །རྡོ་རྗེ་སེམས་དཔར་བདག་གྱུར་ཅིག ། དེ་སྐད་ཅེས་བརྗོད་ལ་རབ་ཏུ་བསྒྲུབ་པར་བྱའོ། །ལྕེ་ལ་རྡོ་རྗེ་དཀར་པོ་དེ་ལ་ཧཱུཾ་བསམ་མོ། །དེ་ནས་རང་གི་སྙིང་གར་གནས་པའི་རྡོ་རྗེ་འབར་བའི་གནས་སུ་ཧཱུཾ་མཛད་སྒྲུབ་པར་བྱེད་པའི་ཡི་གེ་ཧཱུཾ་བྲིས་ལ་བདག་ཉིད་རྡོ་རྗེ་མེ་ལྟར་འབར་བ་དང༌། གཟུགས་བརྙན་ཙམ་དང་
མཚུངས་པར་བསམ་ཞིང་བཟླས་པའི་དོན་ལ་དམིགས་ཤིང་ཟླ་བ་གཅིག་གི་བར་དུ་བསྒོམ་པར་བྱའོ། །མདུན་དུ་ཡང་རས་རིས་ལ་སོགས་པ་ལ་བཅོམ་ལྡན་འདས་ཇི་ལྟ་བ་བཞིན་དུ་སྤྱན་དྲངས་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བྱས་ནས་རྡོ་རྗེ་གསོར་བའི་ཕྱག་རྒྱས་ཡི་གེ་ཧཱུཾ་བཟླས་བརྗོད་འབུམ་བྱའོ། །དེ་ནས་ཟླ་བ་ཉ་བའི་དུས་སུ་མཚན་ཐོག་ཐག་བཟླས་བརྗོད་བྱས་ན། ནང་པར་རྡོ་རྗེ་མེ་ལྟར་འབར་བ་དང་མཉམ་པར་འགྱུར་རོ། །ཡང་ན་ཧི་ཞེས་བྱ་བ་དེ་བཞིན་དུ་བསྒྲུབས་ལ་ཟླ་བ་གཅིག་ཙམ་བཟླས་ལ་དེའི་རྗེས་ལ་རས་རིས་ཀྱི་མདུན་དུ་སྟོང་ཕྲག་བརྒྱ་བཟླས་ནས་མཐར་ཡང་ཟླ་བ་ཉ་བ་ལ་མཚན་ཐོག་ཐག་བཟླས་བརྗོད་བྱས་ན། ཉི་མ་འཆང་བའི་དུས་སུ་རྡོ་རྗེ་མེ་ལྟར་འབར་བ་དང་འདྲ་བར་འགྱུར་རོ། །དེ་ནས་ཕྱག་རྒྱ་ཆེན་པོ་བསྒྲུབ་པར་འདོད་ན་དེ་བཞིན་དུ་ཐམས་ཅད་བྱས་ལ། ཟླ་བ་གཅིག་ཙམ་དུ་བཟླས་བརྗོད་དཔག་ཏུ་མེད་པ་བཟླས་ནས་ཐམས་ཅད་བྱའོ་ཞེས་བསྒོམ་མོ། །དེ་ནས་སྔ་མ་བཞིན་དུ་བཅོམ་ལྡན་འདས་ཀྱི་སྤྱན་སྔར་གཞག །ཡང་ཟླ་བ་གཅིག་ཙམ་བསྒོམས་ལ་མཐར་དེ་བཞིན་དུ་མཚན་ཐོག་ཐག་བསྒོམས་ན་རྡོ་རྗེ་འཆང་བ་དང་འདྲ་བར་འགྱུར་རོ། །འོན་ཏེ་དམ་ཚིག་གི་ཕྱག་རྒྱ་བསྒྲུབ་པར་འདོད་ན་དེ་བཞིན་དུ་ཐམས་ཅད་བྱས་ནས་རང་གི་སྙིང་གར་གནས་པའི་རྡོ་རྗེ་ལ་ཧཱུཾ་ཡིད་ཀྱིས་བྲིའོ། །དེ་ནས་ཆོས་ཐམས་ཅད་གཟུགས་བརྙན་དང་འདྲ་བར་དངོས་པོ་མེད་པའི་ངོ་བོ་ཉིད་བར་བསྒོམས་ལ་དམ་ཚིག་གི་ཕྱག་རྒྱ་བཅིངས་ནས་ཟླ་བ་གཅིག་ཙམ་དུ་ཧཱུཾ་བཟླས་ལ། དེ་ནས་བཅོམ་ལྡན་འདས་དེ་བཞིན་དུ་མདུན་དུ་བཞག་ལ་ཟླ་བ་གཞན་ལ་བདག་གིས་ཐམས་ཅད་གསང་པར་བྱའོ་ཞེས་བརྗོད་ལ་དམ་ཚིག་གི་ཕྱག་རྒྱ་བཅིངས་ལ་བཟླས་བརྗོད་བྱའོ། །མཐར་དེ་བཞིན་དུ་མཚན་ཐོག་ཐག་བཟླས་བརྗོད་བྱས་ན་རྡོ་རྗེ་འཛིན་པ་ཉིད་ཐོབ་པར་འགྱུར་རོ། །འོན་ཏེ་ལས་ཀྱི་ཕྱག་རྒྱ་བསྒྲུབ་པར་འདོད་ན་དེ་བཞིན་དུ་ཆོག་ཐམས་ཅད་རྗེས་སུ་སྤྱད་ལ་འཕགས་པ་དེ་ཁོ་ན་ཉིད་བསྡུས་པ་ལས་གསུངས་པའི་ཁམས་གསུམ་རྣམ་པར་རྒྱལ་བའི་ལས་ཀྱི་དཀྱིལ་འཁོར་གྱི་མཆོད་
པ་རྣམ་པ་བཅུ་དྲུག་གིས་མཆོད་པ་དང༌། ཕྱག་བྱས་ལ་བཅོམ་ལྡན་འདས་ཀྱི་ལས་ཀྱི་ཕྱག་རྒྱ་བཅིངས་ནས་རང་གི་སྙིང་གར་གནས་པའི་སྣ་ཚོགས་རྡོ་རྗེ་ལ་ཧཱུཾ་བསམས་ནས་དེ་ཉིད་བཟླས་ཤིང་ཟླ་བ་གཅིག་ཙམ་གྱི་བར་དུ་བསྒོམ་པར་བྱའོ། །ཡང་བཅོམ་ལྡན་འདས་མདུན་དུ་བཞག་ལ་མཆོད་པ་ཐམས་ཅད་ཀྱིས་ཡང་དག་པར་མཆོད་དེ། ཡང་ཟླ་བ་གཅིག་ཙམ་གྱི་བར་དུ་བཟླས་བརྗོད་བྱས་ཏེ། མཚན་ཐོག་ཐག་བཟླས་ཤིང་བསྒོམས་ནས་དེའི་རྗེས་ལ་ཉི་མ་འཆར་ཀར་རྡོ་རྗེ་ཧཱུཾ་མཛད་དང་འདྲ་བ་ཡས་ཐམས་ཅད་ནུས་པར་འགྱུར་རོ། །དེ་ལྟར་ན་དེ་ནས་རྡོ་རྗེ་འཆང་ཆེན་པོ་ཞེས་བྱ་བ་ནས་བརྩམས་ཏེ་བསྒྲུབ་པའི་ཆོ་ག་རྒྱས་པའི་རྒྱུད་དོ་ཞེས་བྱ་བའི་བར་གྱི་བཤད་པས་ནི་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །ཡང་འདིའི་དོན་བརྗོད་པར་བྱས་ཏེ། བདག་དང་གནས་བསྲུང་བ་བྱས་ལ་རྡོ་རྗེ་འཁོར་ལོའི་ཕྱག་རྒྱས་རྡོ་རྗེ་མེ་ལྟར་འབར་བའི་དཀྱིལ་འཁོར་མདུན་དུ་བསྐྱེད་ནས་མངོན་སུམ་དང་འདྲ་བར་བལྟས་ལ། གལ་ཏེ་འབྱོར་བ་ཡོད་ན་མེ་ཏོག་ལ་སོགས་པས་ཡང་དག་པར་མཆོད་ནས་དཀྱིལ་འཁོར་ལྔ་པས་ཕྱག་བྱ་པ་དང༌། ཕྱག་བཞི་ལ་སོགས་པ་སྔོན་དུ་འགྲོ་བས་སྔ་མ་བཞིན་དུ་སྡོམ་པ་གཟུང་བར་བྱའོ། །དེ་ནས་དེ་བཞིན་དུ་རྡོ་རྗེ་ཐལ་མ་ལ་སོགས་པ་ནས་དམ་ཚིག་གི་ཁུ་ཚུར་བཅིང་བའི་བར་གྱིས་ཕྱག་རྒྱ་བཅིང་བ་ཐམས་ཅད་བྱས་ལ་དེ་ནས་ཡི་གེ་ཧཱུཾ་ཟློས་ཤིང་རྡོ་རྗེ་མེ་ལྟར་འབར་བ་ལ་སོགས་པ་ནས་ལྷ་མོ་རྡོ་རྗེ་དྲིལ་བུ་མའི་བར་གྱི་དམ་ཚིག་གི་ཕྱག་རྒྱས་བཅིངས་ལ་དེའི་སྙིང་པོ་ལན་གསུམ་བཟླས་ནས། ཨོཾ་བཛྲ་མུཿ། ཞེས་བྱ་བས་དམ་ཚིག་གི་ཕྱག་རྒྱ་རྣམས་རང་གི་སྙིང་གར་གཞུག་གོ །རྡོ་རྗེ་མེ་ལྟར་འབར་བ་ལ་སོགས་པའི་གཟུགས་ཀྱང་རང་གི་སྙིང་གར་གནས་པའི་རྡོ་རྗེ་འབར་བར་ཡིད་ཀྱིས་གཞུག་པར་བྱའོ། །དེ་ནས་སྡིག་པ་དྲལ་བའི་ཕྱག་རྒྱས་སྡིག་པ་ཐམས་ཅད་དྲལ་བར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་འབར་བ་ལ་ཧཱུཾ་ཡིད་ཀྱིས་བྲིས་ལ་དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་
དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་བཅོམ་ལྡན་འདས་རྡོ་རྗེ་མེ་ལྟར་འབར་བའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ནམ་མཁའ་རབ་འབྱམ་གྱི་ཚད་ཙམ་གྱི་རང་གི་སྙིང་གའི་ཟླ་བའི་དཀྱིལ་འཁོར་དུ་ནམ་མཁའ་དང་མཉམ་པའི་སྦྱོར་བས་ཞུགས་ལ་རྡོ་རྗེ་འཁོར་ལོའི་ཕྱག་རྒྱས་རྡོ་རྗེ་མེ་ལྟར་རབ་ཏུ་འབར་བའི་དཀྱིལ་འཁོར་བསྐྱེད་པར་བྱའོ། །དེ་ནས་རྡོ་རྗེ་མེ་ལྟར་འབར་བའི་བདག་ཉིད་བསམས་ལ་འཇུག་པའི་དམ་ཚིག་གི་ཕྱག་རྒྱ་བཅིངས་ལ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ལ། དཀྱིལ་འཁོར་དེར་ཡིད་ཀྱིས་འཇུག་པའི་གླུ་ལེན་ཅིང་འཇུག་པར་བྱའོ། །དེ་ནས་མེ་ཏོག་དོར་བའི་གླུ་ལེན་ཅིང་རང་གི་མགོར་མེ་ཏོག་གི་ཕྲེང་བ་དོར་ལ་དེ་ནས་ཇི་ལྟ་བ་བཞིན་བཅིང་བར་བྱའོ། །དེ་ནས་དངོས་གྲུབ་ཀྱི་བརྟུལ་ཞུགས་བཟུང་བའི་བར་གྱིས་ཆོག་རྣམས་རྗེས་སུ་སྤྱད་ལ། དཀྱིལ་འཁོར་དེར་རང་གི་སྙིང་གའམ་ཟླ་བར་ཡིད་ཀྱིས་གཞུག་པར་བྱའོ། །དེ་ནས་རྡོ་རྗེ་འབར་བའི་ལྕགས་ཀྱུ་ཆེན་པོ་དང༌། ཧཱུཾ་གིས་བཅོམ་ལྡན་འདས་རྡོ་རྗེ་མེ་ལྟར་འབར་བ་སྔ་མ་བཞིན་དུ་རང་གི་ལུས་ལ་བཅུག་ལ་དེ་ནས་སྔ་མ་བཞིན་དུ་འོད་ཀྱི་དཀྱིལ་འཁོར་བསྐྱེད་དེ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོར་རྒྱས་བཏབ་ལ་འཕགས་པ་དེ་ཁོ་ན་ཉིད་བསྡུས་པ་ལ་སོགས་པའི་རྡོ་རྗེ་རིགས་ཀྱི་རྣལ་འབྱོར་ཆེན་པོ་བྱས་ལ་དང་པོའི་རྡོ་རྗེ་བཅིངས་ཏེ། རྡོ་རྗེ་སེམས་དཔའ་ལ་སོགས་པས་སྔ་མ་བཞིན་དུ་བདག་ཉིད་བྱིན་གྱིས་བརླབས་ལ། རྡོ་རྗེ་ཧཱུཾ་མཛད་དུ་ཡི་གེ་ཧཱུཾ་གིས་བྱིན་གྱིས་བརླབས་པར་བྱའོ། །དེ་ནས་ཡི་གེ་བརྒྱ་པས་བརྟན་པར་བྱས་ལ་སངས་རྒྱས་ལྔའི་ཅོད་པན་གྱིས་དབང་བསྐུར་པའི་ཕྱག་རྒྱའམ། རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱས་བདག་ཉིད་དབང་བསྐུར་ལ་ཡི་གེ་གཉིས་ཀྱི་གོ་ཆས་གོ་བགོ་བར་བྱའོ། །དེ་ནས་རྡོ་རྗེ་དང་བདག་པོ་དང༌། མིང་གི་དབང་བསྐུར་བ་བླངས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བཟུང་ནས། །བྲོ་བོའི་རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ་བཅོམ་ལྡན་འདས་ལ་ཁྲོ་གཉེར་འཛུམ་པ་དང་བཅས་པས་བཏུད་པར་བྱས་ལ་ཕྱག་བཞི་བྱས་ལ། དེའི་རྗེས་ལ་དེ་ཁོ་ན་ཉིད་ཀྱིས་རྡོ་རྗེ་བཟུང་
ཞིང་ཆོས་ཀྱི་དྲིལ་བུ་དཀྲོལ་ལ་དམ་ཚིག་གི་ཕྱག་རྒྱ་ཆེན་པོར་བྱིན་གྱིས་བརླབས་ནས་ཧཱུཾ་ལན་གསུམ་བཟླས་པར་བྱའོ། །དེའི་རྗེས་ལ་ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བས་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེར་བདག་ཉིད་བསྒོམ་པར་བྱའོ། །ཨོཾ་སྭ་བྷཱ་བ་ཤུདྡྷོ྅ཧཾ་ཞེས་ཟློས་ཤིང་གཟུགས་བརྙན་དང་འདྲ་ཞིང་སྟོང་པ་ཉིད་ཀྱི་ངོ་བོ་ཡིན་པར་བདག་ཉིད་བསྒོམ་པར་བྱའོ། །དེ་ནས་སརྦ་ས་མོ྅ཧཾ་ཞེས་ཟློས་ཤིང་ཆོས་ཐམས་ཅད་བདག་མེད་པའི་མཉམ་པ་ཉིད་ཀྱིས་ཐབས་དང་ཤེས་རབ་ཀྱི་འཐས་བུ་ལྷ་ཐམས་ཅད་ཀྱི་རང་བཞིན་ཡིན་པར་བདག་ཉིད་བསྒོམ་པར་བྱའོ། །དེ་ནས་སྙིང་གར་གནས་པའི་རྡོ་རྗེ་འབར་བ་ལ་ཡིད་གེ་ཧཱུཾ་ཡིད་ཀྱིས་བྲིས་ལ་སརྦྷོདྷ་མ་མ་ཧཱ་ཧེ་ཤྭཪྻ་དྷི་པ་རཾ། ས་མ་ཡོ྅ཧཾ་བཛྲ་ས་ཏྭ་སྟྭཾ་ཞེས་བརྗོད་ལ། ཉིན་རེའི་སྦྱོར་བས་བཟླས་བརྗོད་བྱའོ། །དཀྱིལ་འཁོར་གཞན་རྣམས་ཀྱི་སྔགས་ནི་བཟླས་འབུམ་བྱའོ། །དེ་ལྟར་སྔོན་དུ་བསྙེན་པ་བྱ་བར་འགྱུར་རོ། །ཡང་ན་རང་གི་སྙིང་གར་རྡོ་རྗེ་འཁོར་ལོའི་ཕྱག་རྒྱས་རྡོ་རྗེ་མེ་ལྟར་འབར་བའི་དཀྱིལ་འཁོར་བསྐྱེད་ལ་རང་རང་གི་སྙིང་པོས་རྡོ་རྗེ་མེ་ལྟར་འབར་བ་ལ་སོགས་པ་ནས་རྡོ་རྗེ་འབེབས་པའི་བར་དུ་རང་གི་སྙིང་གའི་དཀྱིལ་འཁོར་དུ་རང་རང་གི་གནས་སུ་ཡིད་ཀྱིས་བཀོད་ལ། ཨོཾ་བཛྲ་ཨཱཏྨ་ཀོ྅ཧཾ། ཨོཾ་སརྦ་ཤུདྡྷོ྅ཧཾ། ཨོཾ་སརྦ་ས་མོ྅ཧཾ། ཞེས་ཟློས་ཤིང་སྔ་མ་བཞིན་དུ་དོན་གསུམ་པ་བསྒོམ་པར་བྱའོ། །དེ་ནས་བཛྲ་ཛྭ་ལ་ཨ་ན་ལཱརྐ་ཨཱཏྨ་མ་ཧཱ་མཎྜལ་སྭ་བྷ་པོ྅ཧཾ་སྭ་མཾ་ཞེས་བྱ་བས་རང་གི་སྙིང་གར་གནས་པའི་རྡོ་རྗེ་མེ་ལྟར་འབར་བའི་ང་རྒྱལ་གྱིས་བདག་ཉིད་བསམས་ལ། ལྷ་ཐམས་ཅད་ཀྱི་ཐུགས་ན་གནས་པའི་རྡོ་རྗེ་འབར་བའི་དབུས་སུ་ཡི་གེ་ཧཱུཾ་ཡིད་ཀྱིས་བྲིས་ལ། དེ་ཉིད་རྡོ་རྗེའི་ཚིག་གམ་ཁྲོ་བོའི་ཚིག་གིས་ཟློས་ཤིང་ཇི་སྲིད་དཀྱིལ་འཁོར་དེ་ཉིད་ཉིན་རེ་བསྒོམ་པའི་དུས་སུ་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བཟླས་བརྗོད་དང་བསྒོམ་པ་བྱའོ། །དེ་ལྟར་སྔོན་དུ་བསྙེན་པ་ལེགས་པར་བྱས་པར་འགྱུར་རོ། །དེ་ལྟར་སྔོན་དུ་བསྙེན་པ་བྱས་ནས་ཞག་བདུན་གྱི་བར་དུ་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ་དཀྱིལ་འཁོར་བསྒོམ་པར་བྱའོ། །དེ་ནས་ཉིན་རེ་འམ་ཟླ་རེའམ།
ལོ་རེ་ཞིང་དཀྱིལ་འཁོར་བྲི་བར་བྱའོ། །དེ་ཡང་གཙུག་ལག་ཁང་ངམ། ཀུན་དགའ་ར་བའམ། གྲོང་རྡལ་ལམ། གྲོང་ཁྱེར་རམ། ཡུལ་ལྗོངས་ཀྱི་བྱང་དང༌། ཤར་གྱི་མཚམས་ཀྱི་སའི་ཆར་བསམ་པར་བྱའོ། །དེ་ལ་དཀྱིལ་འཁོར་གྱི་ཤར་ཕྱོགས་སུ་བྲིས་ན། རྒྱལ་པོ་རྣམ་པར་རྒྱལ་བ་དང༌། ཡུལ་གྱི་སྐྱེ་པོ་རྣམས་དང་འཚེ་བ་མང་བར་འགྱུར་རོ། །གྲོང་ཁྱེར་གང་གི་ལྷོ་ཕྱོགས་སུ་བྲིས་པར་གྱུར་ན་དེ་སྟོང་པར་འགྱུར་རོ། །གང་ལ་དམིགས་ནས་བྲིས་པ་དེ་འཆི་བར་འགྱུར་རོ། །ནུབ་ཕྱོགས་སུ་བྲིས་ན། དཀྱིལ་འཁོར་གྱི་སློབ། དཔོན་འཆི་བར་འགྱུར་རོ། །བྱང་ཕྱོགས་སུ་བྲིས་ན། དེར་གང་ཞིག་ཞུགས་པ་དེ་འཆི་བར་འགྱུར་རོ། །མེའི་མཚམས་ཀྱི་སར་བྲིས་ན། ཆར་མི་འབབ་པ་དང༌། མེའི་འཇིགས་པ་འབྱུང་བར་འགྱུར་རོ། །བདེན་བྲལ་དུ་ནི་བྲིས་ན། མུ་གེ་འབྱུང་བར་འགྱུར་རོ། །རླུང་གི་ཆར་བྲིས་ན་ཆུ་ཆེན་པོ་འབབ་པར་འགྱུར་རོ། །དེ་བས་ན་གྲོང་ཁྱེར་གྱི་དབང་ལྡན་གྱི་ཕྱོགས་ཆར་བརྟེན་ནས་ས་ཡོངས་སུ་བརྟག་པར་བྱའོ། །མཆོད་རྟེན་དང་ཉེ་བ་མ་ཡིན་རླུང་གི་གནས་སུ་ཡང་མ་ཡིན། མཆོད་རྟེན་གྱི་གནས་སུ་ནི་འཆི་བར་འགྱུར་རོ། །ཤིང་གི་གནས་སུ་ནི་འཆི་བའོ། །ཀླུའི་གནས་སུ་འཆི་བ་དང༌། ཆུའི་དམུ་རྫིང་འབྱུང་བར་འགྱུར་རོ། །ཇི་སྐད་བཤད་པའི་གནས་སུ་ནི། རྡོ་བ་དང༌། རུས་པ་དང༌། གྱོ་མོ་དང༌། ཕུབ་མ་དང༌། སོལ་བ་ལ་སོགས་པ་བསལ་ལ་དཀྱིལ་འཁོར་བྲི་བར་བྱའོ། །གང་གི་ཕྱིར་རྡོ་བ་དང་བཅས་པར་ནི་རླུང་འབྱུང་བར་འགྱུར་རོ། །རུས་པ་དང་བཅས་པར་ནི་གཟེར་གྱིས་འདེབས་སོ། །གསེག་མ་དང་བཅས་པའི་གནས་སུ་ལྐུགས་པ་ཉིད་དུ་འགྱུར་རོ། །ཕུབ་མ་དང༌། སོལ་བ་དང་བཅས་པའི་གནས་སུ་རིམས་འབྱུང་བར་འགྱུར་རོ། །ཇི་སྐད་དུ་བཤད་པའི་ཕྱོགས་ཀྱི་ཆ་དེའི་ས་དེ་ཡང་བྲམ་ཟེ་དང༌། རྒྱལ་རིགས་དང༌། རྗེའུ་རིགས་དང༌། དམངས་རིགས་ཏེ་རིགས་བཞིར་ཤེས་པར་བྱའོ། །དེ་ལ་དཀར་པོ་གང་ཡིན་པ་དེ་ནི་བྲམ་ཟེའི་རིགས་ཏེ། ས་ཕྱོགས་དེར་གང་རིག་པ་སྒྲུབ་པར་བྱེད་ན་བསང་ཕྱེ་དང༌། ཕྲེང་བ་དང༌།
དབྱིག་པ་དང༌། དབྱི་གུ་དང༌། སྤྱི་བླུགས་ལ་སོགས་པའི་རྫས་དང༌། ངེས་དེར་དཀྱིལ་འཁོར་བྲི་པར་བྱའོ། །དམར་པོ་གང་ཡིན་པ་དེ་ནི་རྒྱལ་རིགས་ཏེ། གང་དེ་སྒྲུབ་པར་བྱེད་པས་ན་རྡོ་རྗེ་དང༌། འཁོར་ལོ་དང༌། རལ་གྲི་དང༌། མདུང་དང༌། མདུང་ཐུང་དང༌། མངའ་བོ་ཆེ་དང༌། འཕང་མདུང་དང༌། ལྕགས་མདའ་ལ་སོགས་པ་སྒྲུབ་པར་བྱེད་དེ་དེར་དེས་དཀྱིལ་འཁོར་བྲི་བར་བྱའོ། །སེར་པོ་གང་ཡིན་པ་དེ་ནི་རྗེའུ་རིགས་ཏེ་གང་ཞིག་དེར་བསྒྲུབས་པས་ནི་དགྲ་སྟ་དང༌། ཞགས་པ་དང༌། ཏོག་སྤྱད་ལ་སོགས་པ་བསྒྲུབ་པ་སྟེ་དེས་དཀྱིལ་འཁོར་བྲི་བར་བྱའོ། །ནག་པོ་གང་ཡིན་པ་དེ་ནི་དམངས་རིགས་ཏེ། ས་ཕྱོགས་གང་ཡིན་པ་དེར་ནི་ཅིག་ཤོས་ཀྱི་དཀྱིལ་འཁོར་བྲི་བར་བྱའོ། །ཚོན་སྣ་ལྔའི་སྲད་བུས་ཐིག་བཏབ་ལ་རི་མོ་ཤིན་ཏུ་མི་སྦོམ་པ་ཤིན་ཏུ་མི་ཕྲ་བ་ཤིན་ཏུ་མི་འབྱེར་པ། རྒྱུན་མི་ཆད་པར་བྱའོ། །དེ་ལ་རི་མོ་ཕྲ་བས་ནི་ཟ་བྱེད་ཀྱི་ལས་བསྐྱེད་དོ། །སྦོམ་པོས་ནི་ཀླུའི་གནས་བསྐྱེད་དོ་ཞེས་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །དེ་ལ་དང་པོར་རེ་ཞིག་ཡོ་བྱད་ཐམས་ཅད་དང་ལྡན་པས་མངོན་པར་གང་འདོད་པའི་སའི་དབུས་སུ་མི་རུས་ཀྱི་ཕྱེ་མ་ལ་སོགས་པས་དཀྱིལ་འཁོར་གྱི་བགེགས་བཟློག་ལ་བདག་དང་སློབ་མ་ཞི་བའི་སྦྱིན་སྲེག་བྱའོ། །དེ་ནས་རྡོ་རྗེ་གནོད་སྦྱིན་གྱིས་གདུག་པ་རྣམས་བསྐྲད་ལ་གནས་བསྲུང་བ་རྣམས་བྱས་ནས་ཡང་ཉུངས་ཀར་དང་ཆུ་དང༌། ཐལ་བ་ལ་དཀྱིལ་འཁོར་དེ་ཉིད་ལན་བདུན་བཟླས་པས་གཏོར་ལ། ས་ཕྱོགས་དེར་ཁྲུ་གང་ཙམ་མམ་འདོམ་གང་ཙམ་དུ་བརྐོས་ཏེ་ཟློས་ལ་སྐྲ་དང་ཕུབ་མ་དང་རུས་པ་དང༌། གསེག་མ་དང༌། ཐལ་བ་དང༌། སོལ་བ་ལ་སོགས་པ་བསལ་ལ་སྦྱངས་ནས་སྤོས་ཆུའི་དྲི་ཞིམ་པོས་སྤགས་པའི་སས་བཀང་སྟེ། རྡོ་རྗེ་རྩེ་མོ་ཡོངས་སུ་བཟླས་པའི་དྲིའི་ཆུས་ཡང་དང་ཡང་ཆག་ཆག་བཏབ་ལ་ཀུན་དུ་བརྡུང་བར་བྱའོ། །དེ་ནས་ཤིན་ཏུ་མཉམ་པར་བྱས་པ་སྒོ་བཞི་དང་ལྡན་པའི་ཁང་པ་བརྩེགས་མའི་ནང་དུ་ཆུད་བ་དང༌། རྟ་བབས་བཞི་ས་མཛེས་པར་བྱས་པ་ཕྱོགས་བཞིར་སྐར་ཁུང་བཞེས་ཡོངས་སུ་བསྐོར་བ་དེར་སློབ་མ་ཤིན་ཏུ་བྱང་བས་
བའི་རྣམ་ལྔ་ལ་རྡོ་རྗེ་གནོད་སྦྱིན་ཡོངས་སུ་བཟླས་པས་ཤར་ཕྱོགས་ནས་བརྩམས་ཏེ། སྐྱང་ནུལ་བྱེད་དུ་བཅུག་ཅིང་དེ་ཉིད་ཡོངས་སུ་བཟླས་པའི་དྲི་ཆུས་བསང་གཏོར་བྱས་ལ་དེ་ཉིད་བཟླས་པའི་རིན་པོ་ཆེ་དང༌། སྨན་དང་འབྲུ་ཐམས་ཅད་སའི་དབུས་དང་ཕྱོགས་བཞིར་དགུག་པར་བྱའོ། །ས་གཞི་ཡོངས་སུ་སྤྱང་བའི་ཆོ་གའོ། །རྩིག་པ་ལ་སོགས་པ་ཤིན་ཏུ་བྱི་དོར་བྱས་པའི་ཆར་རྡོ་རྗེ་གནོད་སྦྱིན་གྱིས་བགེགས་བསྐྲད་ལ་ཡུངས་ཀར་དང་ཆུ་དང་ཐལ་བ་ལ་དེ་ཉིད་ཡོངས་སུ་བཟླས་པས་ས་ལ་གཏོར་ནས་ཡང་སློབ་མ་ཤིན་ཏུ་བྱང་བས་རྡོ་རྗེ་གནོད་སྦྱིན་བཟླས་པའི་བའི་རྣམ་ལྔས་ཤར་ཕྱོགས་ནས་བརྩམས་ཏེ་བྱུག་པར་བྱའོ། །དེ་ནས་རྡོ་རྗེ་གནོད་སྦྱིན་ཡོངས་སུ་བཟླས་པའི་དྲིའི་ཆུས་གཏོར་བར་བྱས་ལ་དེ་ཉིད་བཟླས་པའི་རིན་པོ་ཆེ་དང་སྨན་དང་འབྲུ་རྣམས་སྔ་མ་བཞིན་དུ་བཅུག་པར་བྱའོ། །དེ་ནས་ཡང་སློབ་མ་ཤིན་ཏུ་བྱང་བས་རྡོ་རྗེ་གནོད་སྦྱིན་ཡོངས་སུ་བཟླས་པའི་སྦོས་ཆུས་ཤར་ཕྱོགས་ནས་བརྩམས་ཏེ་བྱུང་ཏུ་གཞུག་གོ །དེ་ནས་སངས་རྒྱས་དང་བྱང་ཆུབ་སེམས་དཔའ་དང་རིག་པའི་ལྷ་མོ་རྣམས་ཀྱི་སྐུ་གཟུགས་ལུགས་མའམ། འབུར་དུ་བརྐོས་པའམ། བྱས་པ་དང༌། བྲིས་པ་རྣམས་ཀྱིས་བརྒྱན་པར་བྱ་བ་དང༌། མཐའ་མར་ཚོན་གྱི་ཕྲེང་བས་ཉེ་བར་མཛེས་པར་བྱས་ལ་དྲིལ་བུ་བཏགས་པའི་ཏོག་བཟང་པོ་དང༌། བླ་རེ་དང༌། འཕན་གདུགས་མཆོག་གི་ས་རྣམ་པར་བརྒྱན་པ་དྲ་བ་དང༌། དྲ་བ་ཕྱེད་པ་དང༌། རྡོ་རྗེ་རིན་པོ་ཆེ་དང༌། དར་དང༌། རྔ་ཡབ་དང༌། མེ་ཏོག་གི་ཆུན་འཕྱང་དང༌། གོས་སྣ་ཚོགས་དང༌། ཕྲེང་བ་དང༌། མར་མེ་ལ་སོགས་པས་ཤིན་ཏུ་མཛེས་པར་བྱས་ལ་མཚམས་བཞིར་གནས་པའི་སྤོས་སྣོད་ལས་བདུག་པ་གཏུལ་བ་དང༌། ཕྱི་རོལ་དུ་གླུ་དང༌། གར་ལ་སོགས་པ་བྱེད་དུ་བཅུག་པས་ཀྱང་ཡང་དག་པར་མཆོད་ལ། ས་ལ་ལག་པ་གཞག་སྟེ་ཡི་གེ་ཧཱུཾ་དང༌། ཡི་གེ་བརྒྱ་པ་ལན་བདུན་བཟླས་པར་བྱའོ། །ས་ཡོངས་སུ་གཟུང་བའི་ཆོ་གའོ། །དེ་ནས་དཀྱིལ་འཁོར་གྱི་སའི་དབུས་སུ་འདུག་ལ་རྡོ་རྗེ་མེ་ལྟར་འབར་བའི་ཁྲོ་བོར་སྙོམས་པར་ཞུགས་པས་བླངས་
ལ་བགེགས་གཞོམ་པ་ལ་སོགས་པ་བྱས་ནས་མཆོད་པ་རྣམས་པ་ལྔ་དང༌། མཆོད་ཡོན་དང་ལས་ཐམས་ཅད་པའི་སྤོས་ཆུ་ལ། སྔགས་ཡོངས་སུ་བཟླས་ལ་རྡོ་རྗེ་འཁོར་ལོའི་ཕྱག་རྒྱས་རྡོ་རྗེ་མེ་ལྟར་འབར་བའི་དཀྱིལ་འཁོར་ཆེན་པོར་མངོན་པར་སྤྲུལ་ལ་ཕྱག་བྱ་བ་ལ་སོགས་པ་སྔོན་དུ་འགྲོ་བས་སྔོམ་པ་བཟུང་ནས་རྡོ་རྗེ་མེ་ལྟར་འབར་བའི་སྦྱོར་བས་རྣལ་འབྱོར་པས་དེ་བཞིན་བསྒྲུབས་ནས་ཆོ་ག་ཐམས་ཅད་རྗེས་སུ་སྤྱད་ལ། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེའི་རྗེས་ལ། གཡོན་པའི་མིག་ཏུ་ཊ་ལས་ཟླ་བ་བྱ། །གཡས་པར་མ་བཀོད་ཉི་མའི་དཀྱིལ་འཁོར་བསྐྱེད། །ཧཱུཾ་གིས་མིག་འབྲས་བསྐལ་བའི་མེ་ལྟ་བུར། །གནས་པ་འདིས་ནི་རྡོ་རྗེའི་ལྟ་བ་བྱ། །ཞེས་བྱ་བ་དང་ཧཱུཾ་ཟློས་པ་ལ་བརྩོན་ཞིང་ཡིད་ཀྱིས་ཕྱག་རྒྱ་ཆེན་པོ་བཅིངས་ལ་བར་སྣང་གི་ཕྱོགས་སུ་གནས་ཏེ། རླུང་གི་དཀྱིལ་འཁོར་ལས་བྱུང་བའི། །འོད་ཟེར་རྣོན་པོ་རྣམ་པར་འཕྲོ། །དབུས་སུ་ས་བོན་རྣམ་བཀོད་པའོ། །རྡོ་རྗེ་བརྟུལ་ཞུགས་ཅན་གྱིས་བསམ། །རི་བོ་དང་བཅས་ས་གཞི་རྣམས་དང་ནི། །ཆུ་ཚོགས་རྡོ་རྗེ་མེ་ཡི་ཐལ་བར་བྱས། །ནམ་མཁའི་ཕྱོགས་སུ་ཁཾ་ནི་རྣམ་བསམས་ན། །རྣམ་པར་སྣང་མཛད་ཆུ་ནི་རྣམ་པར་འབེབས། །ཀུན་ནས་དཔའ་རླབས་འཁྲུག་པར་འགྱུར་པའོ། །རྒྱ་མཚོ་དཔག་ཏུ་མེད་པར་དེ་རྗེས་འགྱུར། །དེ་ཚེ་རྒྱ་མཚོར་མེ་ཡིས་བསྐོར་བ་ལ། །པདྨར་ཡོངས་སུ་གྱུར་པར་བརྟག་པར་བྱ། །ཤེས་རབ་ཅེས་བཤད་འཛམ་བུའི་གསེར་མཆོག་ཅན། །རུས་སྦལ་པདྨའི་རྩ་བར་བསམ་པར་བྱ། །འདིར་ནི་ལྟེ་བ་དག་ཏུ་ཕྲ་ཉིད་ནི། །ཛམྦུའི་གསེར་དུ་སྣང་བ་རྣམས་པར་བསམ། །དེ་ནས་རྣམ་པར་སྣང་མཛད་ཁཾ་གི་ནི། །ངོ་བོ་ཉིད་དུ་བྱོན་ནས་ལྟེ་བར་བཞུགས། །གཅིག་ཏུ་གྱུར་པ་དེ་ལས་རི་རབ་ནི། །རིན་ཆེན་བཞི་ཡི་ཆར་ལྡན་ཡང་དག་བྱུང༌། །ཞེས་བྱ་བ་དང༌། ཧཱུཾ་སུཾ་ཧཱུཾ་ཞེས་བྱ་བ་ལས་ས་བོན་གྱི་ཡི་གེ་ལས་རི་རབ་བསྐྱེད་པར་བྱ་བའོ་ཞེས་བསམ་མོ། །དེ་ནས་དེ་བཞིན་དུ་རྡོ་རྗེ་ཐལ་མོ་བརྐྱང་བས་ས་ལ་རེག་པར་
བྱས་ལ་རི་རབ་རྡོ་རྗེའི་རང་བཞིན་དུ་བྱིན་གྱིས་བརླབ་པོ། །དེ་ནས་རི་རབ་ཀྱི་སྟེང་དུ་རྡོ་རྗེ་འཁོར་ལོའི་ཕྱག་རྒྱས་རྡོ་རྗེ་མེ་ལྟར་འབར་བར་བསྐྱེད་ལ་དཀྱིལ་འཁོར་གྱི་སའི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་ལ། བདག་ཉིད་སྤྲོ་བ་བསྐྱེད་པར་བྱའོ། །དེང་དུ་བདག་ཚེ་འབྲས་བུ་ཡོད། །ཅེས་བྱ་བ་ལ་སོགས་པ་བརྗོད་ལ། ཡན་ལག་ཐམས་ཅད་ཀྱིས་ཕྱག་བྱས་ཏེ། དངོས་གྲུབ་འདི་ནི་སྩལ་དུ་གསོལ། །ཞེས་བྱ་བའི་བར་དུ་བརྗོད་དོ། །དེ་ནས་ཡང་ཡན་ལག་ཐམས་ཅད་ཀྱིས་ཕྱག་བྱས་ལ་དང་པོ་སྦྱོར་བ་དང༌། དཀྱིལ་འཁོར་གྱི་རྒྱལ་པོ་མཆོག་དང་ལས་ཀྱི་རྒྱལ་པོ་མཆོག་བསྒོམ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ཏེ། ཧཱུཾ་ཟློས་པ་ལ་བརྩོན་ཞིང་དཀྱིལ་འཁོར་བྲི་བའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་བདག་ཉིད་ལ་གསོལ་བར་བསམ་མོ། །སེམས་ཅན་ཀུན་ལ་རྗེས་སྟོན་པས། །བཅོམ་ལྡན་ཁྱོད་ལ་གསོལ་བ་ནི། །ཨུ་ཏྟིཥྛ་ས་མ་ཡ་ཀྲོ་དྷ་ནི་སུམྦྷ་ཛྭ་ལ་བཛྲ། དེ་ནས་རང་གིས་དམ་ཚིག་གི་ཕྱག་རྒྱ་དང༌། ཧཱུཾ་ཧཱུཾ་བཛྲ་ཏིཥྛ་མ་ཧཱ་མཎྜལ་ཨུཏྤཱ་ད་ཡ་ཞེས་ཟློས་ཤིང༌། དཀྱིལ་འཁོར་ཆེན་པོ་བཏེག་ལ་ཡིད་ཀྱིས་བར་སྣང་གིས་ཕྱོགས་སུ་བཏེག་ལ་རང་གི་དམ་ཚིག་གི་ཕྱག་རྒྱ་དེ་ཉིད་སྙིང་ག་དང་དབྲལ་བ་དང་ལྐོག་མ་དང་སྤྱི་བོར་བདག་ཉིད་བྱིན་གྱིས་བརླབས་ལ། ཡང་ཕྱག་རྒྱ་ཆེན་པོ་བཅིངས་ཏེ། ཀྲོ་དྷ་དྲཥྚི་ཧི་ཞེས་བྱ་བ་མིག་གཉིས་སུ་བཀོད་ལ། ཕྱག་རྒྱལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །ཧཱུཾ་ཞེས་ཀུན་དུ་ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །ཡི་གེ་ཨ་ལས་རྐང་པ་གཉིས་ཀྱི་མཐིལ་དུ་སྣ་ཚོགས་རྡོ་རྗེ་བསམས་ལ། རྐང་མཐིལ་ནས་བཟུང་སྟེ། རི་རབ་ཀྱི་སྟེང་ནས་བརྩམས་ཏེ། ས་གཞི་བརྟན་པ་ལ་ཐུག་གི་བར་དུ་དཀྱིལ་འཁོར་གྱི་སའི་ཆ་རྡོ་རྗེའི་རང་བཞིན་དུ་བསམ་ཞིང་ཁྲོ་བོའི་ལྟ་བས་ཀྱང་མཚམས་དང་ཕྱོགས་དང༌། ནམ་མཁའ་དང་འོག་དང་དཀྱིལ་འཁོར་བཅིང་པ་དང༌། དྲ་བ་དང་རབ་དག་བྱའོ། །ཡང་ཧཱུཾ་ཟློས་ཤིང་དེ་བཞིན་གཤེགས་པ་ཐམས་
ཅད་ཀྱི་ཐུགས་ཀ་ནས་ཕྱུང་སྟེ། རྡོ་རྗེ་སེམས་དཔའ་ལ་སོགས་པའི་ཁྲོ་བོས་འཇིག་རྟེན་གྱི་ཁམས་ཐམས་ཅད་དུ་རྡོ་རྗེ་འབར་བ་འཁྲུག་ཅིང༌། མི་བཟད་པའི་ཧཱུཾ་གི་སྒྲ་འཇིགས་པས་ཀུན་དུ་ཁེངས་ཤིང་སྡོང་བུ་ཅན་གྱི་པདྨའི་འདབ་མ་བཞིན་དུ་ཀུན་ནས་གཡོ་བར་བྱེད་པའོ། །རྡོ་རྗེ་འབེབས་པའི་སྦྱོར་བས་ནམ་མཁའི་ཕྱོགས་ཐམས་ཅད་ནས་བབས་ལ། གར་ལས་བྱུང་བའི་མེ་ཏོག་གི་ཐལ་མོས་དེ་བཞིན་གཤེགས་པ་ཐམས་ཅད་ཡང་དག་པར་མཆོད་དེ། དཀྱིལ་འཁོར་གྱི་ལྟེ་བར་གཡོན་བརྐྱང་བའི་གནས་པས་འདུག་ལ། བསྐལ་པའི་མེའི་ཕུང་པོ་ལྟ་བུའི་ཁྲོ་བོའི་ཚོགས་བྱོན་པས་བདུད་ཐམས་ཅད་སྐྲག་པར་བྱའོ། །དེ་ནས་དགའ་བ་ཡོངས་སུ་གྱུར་པའི་ལུས་ཀྱིས་ཤར་ཕྱོགས་སུ་འགྲོ་བར་བྱའོ། །དེ་ནས་གཡོན་བརྐྱང་བའི་གནས་པས་དེ་ཉིད་དུ་འདུག་སྟེ། དེ་བཞིན་དུ་བགེགས་ཐམས་ཅད་བསྐྲད་པར་བྱའོ། །དེ་ནས་གནས་དེ་ནས་གནོད་སྦྱིན་གྱི་འགྲོས་ཀྱིས་ལྷོ་ཕྱོགས་སུ་སོང་ལ་གཡས་བརྐྱང་བའི་གནས་པས་འདུག་སྟེ་དེ་བཞིན་དུ་བགེགས་རྣམས་རྗེས་སུ་བསྐྲད་པར་བྱའོ། །དེ་ནས་གནས་དེ་ནས་ལངས་ལ་གཡས་བརྐྱང་བ་དང་གཡོན་བརྐྱང་བ་གཉིས་ཀྱིས་ནུབ་ཕྱོགས་སུ་སོང་ལ་ཟླུམ་པོའི་འདུག་སྟངས་བཅིངས་ཏེ་དེ་བཞིན་དུ་བགེགས་རྣམས་ཤིན་ཏུ་བསྐྲད་པར་བྱའོ། །དེ་ནས་གནས་དེ་ནས་ནམ་མཁའི་ཁམས་ཀྱི་གཏོས་མ་ལུས་པ་དང་མཉམ་པའི་འཇིག་རྟེན་གྱི་ཁམས་སུ་བསྐྱོད་ཅིང་རྡོ་རྗེའི་འགྲོས་ཀྱིས་བྱང་ཕྱོགས་སུ་འགྲོ་བར་བྱའོ། །དེ་ནས་གཡས་བརྐྱང་བ་དང་གཡོན་བརྐྱང་བ་དང་ས་གའི་འདུག་སྟངས་དང༌། ཟླུམ་པོའི་འདུག་སྟངས་དང༌། མཐུན་པའི་རྐང་སྟབས་ཏེ་ལྔས་དེ་བཞིན་དུ་བགེགས་བསྐྲད་པར་བྱས་ནས་རྡོ་རྗེ་འགྲོས་ཀྱིས་གནས་ཏེ། དེ་ནས་ཤར་ཕྱོགས་སུ་འགྲོ་བར་བྱའོ། །དེ་ལྟར་སྟང་སྟབས་བཞིས་བགེགས་ཐམས་ཅད་བཅོམ་པར་གྱུར་པ་ཡིན་ནོ། །དཀྱིལ་འཁོར་གྱི་དུས་སུ་ཇི་ལྟ་བྱ་བ་དེ་བཞིན་དུ་འཁྲུལ་འཁོར་ལ་སོགས་པ་གཞིག་པ་ལ་ཡང་སྦྱར་
བར་བྱའོ། །དེ་ལྟར་འཁྲུལ་འཁོར་ལ་སོགས་པས་བཅོམ་པར་གྱུར་པ་ཡིན་ནོ། །སྟང་སྟབས་ཀྱི་དུས་འདིར་ཡི་གེ་ཧཱུཾ་ཁྲོ་བོའི་ཚིག་གིས་རྒྱུན་མི་ཆད་པར་བཟླ་བར་བྱའོ། །དེ་ནས་སྒོ་དབྱེ་བའི་ཕྱག་རྒྱས་སྒོ་བཞི་ཕྱེ་ལ་གསང་བའི་དཀྱིལ་འཁོར་ཞལ་བཞི་པ་ཕྱག་བཞི་པ། རྡོ་རྗེ་རྒྱུའི་ངོ་བོ་ཉིད་སྔགས་དང་ཕྱག་རྒྱ་དང་བཅས་པ་འདིས་དགུག་པར་བྱའོ། །ཨོཾ་བཛྲ་མཎྜལ་ཧཱུཾ་ཛཿ་རྡོ་རྗེ་ཁུ་ཚུར་གཉིས་ཀྱིས་མཛུབ་མོ་དང་མཐེ་བོང་གཉིས་སྦྱར་བ་འདི་ནི་རྡོ་རྗེ་འཁོར་ལོ་ཞེས་བྱ་བའི་ཕྱག་རྒྱ་སྟེ་དཀྱིལ་འཁོར་དགུག་པའོ།། དའི་རྗེས་ལ་ཨོཾ་བཛྲ་ཙཀྲ་ཨ་དྷི་ཏིཥྛ་སིདྡྷྱ་ཧཱུཾ་ཞེས་བྱ་བ་ཕྱག་རྒྱ་དང་བཅས་པ་ཡང་དཀྱིལ་འཁོར་བྱིན་གྱིས་བརླབ་པར་བྱའོ། །རྡོ་རྗེ་ཁུ་ཚུར་གཉིས་ཀྱིས་མགལ་མེའི་འཁོར་ལོ་བསྐོར་བ་ལྟར་ཡོངས་སུ་བསྐོར་བ་ནི་འདིའི་ཕྱག་རྒྱའོ། །དེ་ནས་སེང་ལྡེང་གི་རྡོ་རྗེ་ཕུར་བ་ཧཱུཾ་ལས་མཐའ་ཡས་དང་རྣམ་པར་རྒྱལ་བ་དང༌། སྤྲིན་སྒྲ་དང༌། གསུས་པོ་ཆེ་དང༌། རྒྱལ་བ་ཞེས་བྱ་བ་སྟོད་ཁྲོ་བོ་ལ་སྨད་རྡོ་རྗེ་རྩེ་གཅིག་པ་ལྟ་བུར་བསམ་པར་བྱའོ། །དེ་ནས་ཙནྡན་དམར་བོས་བྱུགས་ཤིང་སྲད་དུ་དམར་པོས་དཀྲིས་ལ། མེ་ཏོག་གི་ཕྲེང་བ་དམར་པོ་བཏགས་ཏེ། ཧཾ་ཀྲོ་དྷ་ཡ་ས་ཧཾ་ཏྲི་ཤ་ཏ་ཏྲི་ཏ་ཏི་ཞེས་ལན་བརྒྱ་རྩ་བརྒྱད་བཟླས་ལ་གཡོན་པའི་ཁྲོ་བོ་ཁུ་ཚུར་གྱིས་བཟུང་ནས། ཕྱིའི་དཀྱིལ་འཁོར་གྱི་མཚམས་བཞིར་རྡོ་རྗེ་ཐོ་བས་བརྡུང་བར་བྱའོ། །དེ་ནས་རྡོ་རྗེ་གནོད་སྦྱིན་གྱིས་བགེགས་བསྐྲད་ལ་བསྲུང་བ་བྱས་ནས་དེ་བཞིན་དུ་རྡོ་རྗེ་ཁུ་ཚུར་གྱིས་སྒོ་བཅད་དེ། རྡོ་རྗེ་བསྲུང་བས་བསྲུང་བའི་ལྷ་ཐམས་ཅད་ཡང་དག་པར་བསྲུངས་ལ་རྡོ་རྗེ་གནོད་སྦྱིན་ཡོངས་སུ་བཟླས་པའི་བུམ་པས་བསང་གཏོར་བྱ་བའི་ཕྱིར་སྒོར་བཞག་ནས་རྡོ་རྗེ་གནོད་སྦྱིན་གྱི་སྔགས་ཟློས་ཤིང་སློབ་དཔོན་རང་ཉིད་དམ་གྲོགས་དང་བཅས་པས་ཤར་ཕྱོགས་ནས་བརྩམས་ཏེ་དཀྱིལ་འཁོར་གྱིས་བྱུག་པར་བྱའོ། །དེ་ནས་སློབ་དཔོན་གྱིས་ལྷ་ཐམས་ཅད་ཀྱི་གནས་སུ་དྲི་ཞིམ་པོས་དཀྱིལ་འཁོར་བྱས་ལ་དཔལ་རྡོ་རྗེ་མེ་ལྟར་འབར་བ་ལ་སོགས་པའི་སྙིང་པོ་ལག་པ་བདུགས་པ་ལ་ལན་
བདུན་བདུན་བཟླས་པར་བྱའོ། །དེ་ནས་དཀྱིལ་འཁོར་དེ་རྣམས་སུ་རང་རང་གི་སྙིང་པོ་ཉིད་ཀྱིས་རྡོ་རྗེ་མེ་ལྟར་འབར་བ་ལ་སོགས་པ་བཀོད་པར་བྱའོ། །དེ་ནས་དེ་རྣམས་ལ་མཆོད་པ་རྣམ་པ་ལྔས་མཆོད་དེ། དེ་ནས་ཕྱི་རོལ་དུ་གཏོར་མ་བྱིན་ནས་ཇི་སྐད་དུ་བཤད་པའི་མཚན་ཉིད་ཅན་གྱི་རྣམ་པར་རྒྱལ་བའི་བུམ་པ་རིན་པོ་ཆེ་དང༌། སྨན་དང་འབྲུ་ཐམས་ཅད་དང་ལྡན་པ་རས་སྔོན་པོ་ཟུང་གཅིག་གིས་མགུལ་པ་བཅིངས་ལ། མེ་ཏོག་གི་ཕྲེང་བ་བཏགས་ལ། ཕྱི་རོལ་ཀུན་དུ་དྲིས་བྱུགས་པ། མེ་ཏོག་གི་སིལ་མ་གཏོར་བ། དྲི་ཞིམ་པོ་དང་ལྡན་པའི་ལྕུག་མ་བཏགས་ལ་ལོ་མ་བཟང་པོས་ཁ་བརྒྱན་པ་རྡོ་རྗེ་མེ་ལྟར་འབར་བས་ཀྱང་སྤྲོས་ཆུ་ཅུང་ཟད་བཅུག་ལ། ཆོ་ག་འདིས་ལྷག་པར་གནས་པར་བྱའོ། །རྡོ་རྗེ་གནོད་སྦྱིན་གྱི་ཁྲོ་བོས་མཆོད་ཡོན་ལ་ལན་བརྒྱ་བཟླས་ལ་བུམ་པ་དེར་རྡོ་རྗེ་གནོད་སྦྱིན་གྱི་ཁྲོ་བོ་ཧཱུཾ་ལས་བསྐྱེད་དེ། རང་གི་ཕྱག་རྒྱས་དབང་བསྐུར་བའི་ཕྱག་རྒྱས་དབང་བསྐུར་ཏེ། མཆོད་ཡོན་ཕུལ་ལ་མཆོད་པ་རྣམ་པ་ལྔ་དང༌། ཁྲོ་བོ་རྡོ་རྗེ་མཚོན་ཆ་མ་ལ་སོགས་པས་ཡང་དག་པར་མཆོད་ནས་རྡོ་རྗེ་གནོད་སྦྱིན་གྱི་བུམ་པ་དམ་ཚིག་གི་ཕྱག་རྒྱས་བཟུང་བའི་ཁྲོ་བོ་རྡོ་རྗེ་དང༌། མེ་ཏོག་གི་ལྕག་མ་ལ་སོགས་པ་རྡོ་རྗེ་གནོད་སྦྱིན་གྱི་ཁྲོ་བོའི་སྔགས་བརྒྱ་རྩ་བརྒྱད་བཟླ་བར་བྱའོ། །དེ་ནས་མེ་ཏོག་རྣམས་བུམ་པ་དེར་བཅུག་ལ་རྡོ་རྗེ་གནོད་སྦྱིན་གྱི་སྔགས་ཉིད་ཀྱིས་བདུག་སྦོས་དབུལ་བར་བྱའོ། །དེ་ལྟར་ན་རྡོ་རྗེ་མེ་ལྟར་འབར་བའི་བུམ་པ་དེ་ལ་ཡང་རྡོ་རྗེ་གནོད་སྦྱིན་གྱི་ཆོ་ག་བཟླ་བར་བྱའོ། །དེ་ནས་ཉི་མ་གཉིས་པ་ལ་ཐུན་གསུམ་དུ་བཟླས་བརྗོད་དེ་བཞིན་དུ་བྱའོ། །བུམ་པ་ལྷག་པར་གནས་པའི་ཆོ་གའོ། །དེ་ནས་རྡོ་རྗེ་གནོད་སྦྱིན་གྱི་ཁྲོ་བོ་དང༌། རྡོ་རྗེ་མེ་ལྟར་འབར་བ་དང༌། མཱ་མ་ཀཱིས་ཉིན་རེ་ཞིང་མར་ལ་སོགས་པའི་སྦྱིན་སྲེག་བརྒྱ་རྩ་བརྒྱད་བྱ་སྟེ། འདི་ནི་བསྙེན་པའི་སྦྱིན་སྲེག་གི་ཆོ་གའོ། །དེ་ལྟར་མཚན་བརྒྱ་རྩ་བརྒྱད་པས་བཅོམ་ལྡན་འདས་འཁོར་དང་བཅས་པ་ཡང་དག་པར་བསྟོད་ལ། ཁྲོ་བོ་རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་དང༌། མེ་ཏོག་ལ་སོགས་པས་ཡང་
དག་པར་མཆོད་དེ་སློབ་མ་རྣམས་ལྷག་པར་གནས་པར་བྱའོ། །དེ་ལ་རེ་ཞིག་དང་པོར་སློབ་མ་ལག་ན་མེ་ཏོག་ཐོགས་པས་ཕྱག་བྱས་ནས་འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་ལས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་བདག་ནི་ཕྱག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྔོམ་པ་རྣམས་ཀྱང་བདག་ལ་སྩོལ། །དེ་ནས་སློབ་དཔོན་གྱིས་དེ་རྣམས་ཀྱི་སྙིང་གར་ས་མ་ཡ་ཨ་ཞེས་བྱ་བས་ཟླ་བའི་དཀྱིལ་འཁོར་བསྐྱེད་ལ། དེ་ཧཱུཾ་ལས་རྡོ་རྗེ་རྩེ་ལྔ་པ་འབར་བ་བསམས་ལ་ལག་པ་གཡས་པའི་ཁྲོ་བོའི་ཁུ་ཚུར་གྱིས་རྡོ་རྗེ་འབར་བ་བླངས་ལ་དེའི་སྙིང་གར་བཞག་ལ་འདི་སྐད་ཅེས་བརྗོད་པར་བྱའོ། །སུ་ར་ཏ་སྟྭཾ་ས་མ་ཡ་སྟྭཾ་ཧཾ་བཛྲ་སིདྡྷ་ཡ་ཐ་སུ་ཁཾ། དེ་ནས་སྡིག་པ་བཤགས་པ་ལ་སོགས་པ་བྱེད་དུ་བཅུག་སྟེ། རྟོག་པ་རྣམས་ནི་ལེགས་པར་བསྡུས་ནས་ནི། །ཤིན་ཏུ་བསམ་པ་བཟང་པོ་ལྡན་པས་ཉོན། །བརྗེད་ངས་བློ་ལ་རྡོ་རྗེ་སེམས་སོགས་པའི། །བདེ་བར་གཤེགས་པ་རྣམས་ཀྱིས་བྱིན་མི་རློབ། །དབང་མེད་བདག་གིས་མི་དགེ་བགྱིས་པ་དང༌། །རྗེས་སུ་ཡི་རང་ཡང་ན་བགྱིད་སྩལ་གང༌། །དེ་དག་ཐམས་ཅད་བྱང་ཆུབ་མཆོག་གི་ནི། །སྤྱན་སྔར་མ་ལུས་དེ་ལྟར་སོ་སོར་བཤགས། །བདེ་གཤེགས་སྲས་ཀྱིས་ཚོགས་གཉིས་ཟབ་པ་དང༌། །རྒྱ་ཆེན་འགྲོ་བ་མ་ལུས་པ་ཡི་དོན། །སྒྲུབ་པར་བྱེད་དང་དེ་ལས་གཞན་པ་ལའང༌། །རྟག་ཏུ་བདག་ནི་རྗེས་སུ་ཡི་རང་ངོ༌། །ཐུགས་རྗེས་ཁྱབ་པའི་ཐུགས་དང་ལྡན་གྱུར་ཅིག །བློ་གྲོས་སྡིག་བྲལ་གཏི་མུག་ཚོགས་ཀུན་བཅོམ། །མ་ལུས་རིགས་ཀྱི་པདྨའི་ནང་ཞུགས་པ། །བདེ་བར་གཤེགས་པ་རྣམས་ལ་སྐྱབས་སུ་མཆི། །བློ་མཆོག་རྣམས་ཀྱི་ཀུན་དགའ་རབ་སྟེ། །དམན་པས་འཇིགས་དང་བྲལ་བས་རྒྱལ་བྱེད་ཚལ། །སྲིད་པའི་སྦྱོར་བ་ཟིལ་གྱིས་གནོན་པའི་མཆོག །གསུང་མཆོག་ཆོས་ལ་བདག་ནི་སྐྱབས་སུ་མཆི། །འདོད་ཆགས་ལ་སོགས་སྦྲུལ་གྱི་དུག་བཅོམ་ཞིང༌། །བློ་གྲོས་རྣམ་རྒྱས་ཐུགས་རྗེ་ཆེར་ལྡན་པའི།།
བརྟུལ་ཞུགས་བཟང་པོའི་ཚོགས་ལ་སྐྱབས་སུ་མཆི། །སྲིད་དང་བྲལ་བ་རྣམས་ལ་བདག་ཕྱག་འཚལ། །རྒྱུ་ཡི་རྗེས་ལ་བདག་པོའི་ཡུལ་བདག་ཉིད། །འབྲས་བུའི་སྟོབས་ཀྱིས་དགྲ་ལས་རྒྱལ་འགྱུར་བ། །སྙིང་རྗེའི་རྩ་བ་ཟུག་ཅིང་ཡང་དག་རྟོགས། །མཉམ་མེད་བྱང་ཆུབ་རྣམ་པར་གཟུང་བར་བགྱི། །སེམས་ཅན་རྣམས་ནི་ཡོངས་སུ་སྨིན་པའམ། །ཡང་ན་ཡོངས་སུ་སྐྱོབ་པར་བྱ་ཕྱིར་རམ། །རང་གི་སེམས་ནི་དག་པར་བྱ་བའི་ཕྱིར། །འདི་དག་ཐམས་ཅད་རྩྭ་སོགས་བཞིན་དུ་གཏང༌། །དེ་བཞིན་ཚུལ་ཁྲིམས་བཟོད་དང་བརྩོན་འགྲུས་དང༌། །བསམ་གཏན་ཤེས་རབ་བླ་ན་མེད་པ་ནི། །བདག་དང་གཞན་ལ་ཕན་པར་བྱ་བའི་ཕྱིར། །སྐད་ཅིག་རེ་རེ་ཞིང་ཡང་བསྒོམ་པར་བྱ། །བདེ་བར་གཤེགས་པ་སྔགས་ལ་མཁས་པ་ཡིས། །ཆོས་རྒྱལ་རྟག་ཏུ་ལྷུན་གྱིས་གྲུབ་པ་ནི། །བློ་སོགས་རྣམས་ཀྱིས་ཐོབ་པར་བྱ་བའི་ཕྱིར། །ཁྱད་འཕགས་གནས་ལ་བདག་ནི་གནས་པར་བགྱི། །ཞེས་ལན་གསུམ་བརྗོད་དོ། །བདག་གིས་དེ་སྐད་ཅེས་བརྗོད་པའི་དགེ་བའི་རྩ་བ་འདིས་བདག་གིས་ཐམས་ཅད་ཡོངས་སུ་གཏང་བར་བགྱིའོ། །བདག་གིས་སེམས་ཅན་ཐམས་ཅད་ལ་མཉམ་པའི་སེམས་བསྐྱེད་པར་བགྱིའོ། །བདག་གིས་སེམས་ཅན་ཐམས་ཅད་དང༌། ཐབས་ཀྱི་བྱེ་བྲག་ཐམས་ཅད་ཀྱིས་བཏུལ་ནས་མི་གནས་པའི་མྱ་ངན་ལས་འདས་པའི་དབྱིངས་ལ་རབ་ཏུ་གཞག་པར་བྱའོ། །བདག་གིས་སེམས་ཅན་ཐམས་ཅད་ཡོངས་སུ་མྱ་ངན་ལས་འདས་པར་གྱུར་ཀྱང་སེམས་ཅན་འགའ་ཡང་ཡོངས་སུ་མྱ་ངན་ལས་འདས་པ་མེད་དོ་ཞེས་སེམས་བསྐྱེད་པར་བགྱིའོ། །བདག་གིས་ཆོས་ཐམས་ཅད་སྐྱེ་བ་མེད་པ་ཉིད་དུ་རྗེས་སུ་རྟོག་པར་བགྱིའོ། །བདག་གིས་མ་ཡེངས་བའི་སེམས་དང། ཐམས་ཅད་མཁྱེན་པའི་ཡེ་ཤེས་ཀྱི་སེམས་ཀྱིས་ཕ་རོལ་ཏུ་ཕྱིན་པ་དྲུག་ལ་བསླབ་པར་བྱའོ། །བདག་གིས་ཐོས་པ་གཅིག་གི་ཚུལ་དུ་གནས་པར་ཡང་རྟོག་པར་བགྱིའོ། །བདག་གིས་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་གནས་པར་སོ་སོར་རྟོགས་
པར་བྱ་བའི་ཕྱིར་བསླབ་པར་བྱའོ། །བདག་གིས་སྟོབས་བཅུ་དང༌། མི་འཇིགས་པ་བཞི་དང༌། སོ་སོ་ཡང་དག་པར་རིག་པ་དང༌། སངས་རྒྱས་ཀྱི་ཆོས་མ་འདྲེས་པ་རྣམས་སོ་སོར་རྟོགས་པར་བྱ་བའི་ཕྱིར་མངོན་པར་བརྩོན་པར་བགྱིའོ། །དེ་བཞིན་དུ་བདག་གིས་སངས་རྒྱས་ཀྱི་ཆོས་ཚད་མེད་པ་མ་ལུས་པའི་བར་ལ་མངོན་པར་གནས་པར་བྱ་བའི་ཕྱིར་མངོན་པར་བསྒྲུབ་པར་བགྱིའོ། །འདི་ཉིད་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་ཆེན་པོར་སེམས་བསྐྱེད་པ་རྡོ་རྗེ་ལྟ་བུ་ཡིན་ཏེ། དེ་བཞིན་གཤེགས་པ་ཐམས་ཅད་ཀྱི་ཡབ་དང༌། དེ་བཞིན་གཤེགས་པ་ཐམས་ཅད་ཀྱི་བཀའ་བཞིན་བྱེད་པ་དང༌། དེ་བཞིན་གཤེགས་པ་ཐམས་ཅད་ཀྱི་སྲས་ཀྱི་ཐུ་བོ་སྟེ། འདི་ཉིད་ནི་བཅོམ་ལྡན་འདས་ཀུན་དུ་བཟང་པོའོ། །དེ་དགེ་བའི་རྩ་བ་རྣམས་ཀྱིས་ཇི་ལྟ་བ་བཞིན་དུ་ཡང་དག་པར་བྱས་པའི་སྟོབས་ཀྱིས་བདག་སེམས་བསྐྱེད་པ་འདི་ལ་གནས་པས་ཀུན་དུ་བཟང་པོའི་སྤྱོད་པ་ཞེས་བྱ་བ་སྒོ་མཐའ་ཡས་པ་ལ་གནས་པ་མཐའ་མེད་པར་འགྱུར་བ་རྫོགས་པར་བྱས་ནས་གདུལ་བྱའི་འགྲོ་བའི་ཚོགས་མ་ལུས་པ་རྣམས་ལ་སྤྱོད་པའི་རབ་ཏུ་དབྱེ་བའི་སྒོ་མང་པོ་བསྟན་པས་ཡང་དག་པར་མགུ་བར་བྱ་བ་དང༌། ཡང་དག་པར་དགའ་བར་བྱེད་པ་དང༌། ཡང་དག་པར་གཟེངས་བསྟོད་པ་ལ་ངེས་པར་སྦྱར་བར་བགྱིའོ། །དེ་ནས་སློབ་མའི་ལག་ཏུ་རྡོ་རྗེ་ཁྲོ་བོའི་དྲིས་དྲི། མེ་ཏོག་གིས་མེ་ཏོག །རྡོ་རྗེ་བདུག་པས་དེ་ལ་བདུག་སྤོས་སྦྱིན་ཞིང༌། རྡོ་རྗེ་མར་མེས་མར་མེ་སྣང་བར་བྱའོ། །དེ་ནས་ཨུ་དུམྺཱ་ར་དང༌། ཨ་ཤྭ་ཏྠ་ལས་བྱས་པའི་སོ་ཤིང་དྲིས་བྱུགས་ཤིང་མེ་ཏོག་བཅིངས་པས་རྡོ་རྗེ་བཞད་པའི་ཁྲོ་བོ་བཟླས་ཤིང་བསྲུང་བར་བྱས་པ་སྦྱིན་པར་བྱའོ། །ཀུ་ཤ་སར་པ་ལས་རྡོ་རྗེ་རྣོན་པོའི་ཁྲོ་བོ་བཟླས་པ་སྦྱིན་ནོ། །དེ་ནས་སྲུང་སྐུད་མདུད་པ་གསུམ་དང་ལྡན་པ་དཔུང་པ་གཡོན་པར་རང་ཉིད་ཀྱིས་བཅིང་བར་བྱའོ། །ཨོཾ་བཛྲ་ཧ་ས་ཀྲོ་དྷ་ཧཱ་ཧཱ་ཧཱ་ཧཱ་ཧཱུཾ་ཕཊ། ཅེས་བྱ་བ་ནི་སོ་ཤིང་ལ་བཟླ་བའི་སྔགས་སོ། །ཨོཾ་བཛྲ་ཏིཥྛ་ཀྲོ་དྷ་ཙྪིནྡ་ཙྪིནྡ་ཧཱུཾ་ཕཊ། ཅེས་བྱ་བ་ནི་ཀུ་ཤ་ལ་
བཟླ་བའི་སྔགས་སོ། །ཨོཾ་བཛྲ་རཀྵ་ཧཱུཾ་ཀྲོ་དྷ་རཀྵ་ཧཱུཾ་ཕཊ། ཅེས་བྱ་བ་ནི་སྲུང་སྐུད་ལ་བཟླ་བའི་སྔགས་སོ། །ཨོཾ་བུདྡྷ་མཻ་ཏྲི་བཛྲ་རཀྵ་ཧཾ། ཞེས་བྱ་བ་བྱམས་པའི་གོ་ཆས་ཐམས་ཅད་ཡང་དག་པར་བསྲུང་བར་བྱའོ། །ཨོཾ་བཛྲ་སཏྭ་ཨུཥྵི་ཥེ་ཧཱུཾ་ཕཊ། ཅེས་བྱ་བ་རྡོ་རྗེ་སེམས་དཔའི་གཙུག་ཏོར་གྱི་ཕྱག་རྒྱ་དང་ལྡན་པས་ཀྱང་བསྲུང་བར་བྱའོ། །དེ་ནས་འདི་སྐད་བརྗོད་པར་བྱ་སྟེ། བཞིན་བཟངས་རྣམས་ལོངས་ལ་དེ་བཞིན་གཤེགས་པ་ཐམས་ཅད་ལ་ཕྱག་འཚོལ་ཅིག །ནང་པར་ཐར་པ་ཆེན་པོ་གྲོང་ཁྱེར་ཆེན་པོ་མཐོང་བར་འགྱུར་རོ། །སློབ་མ་ལྷག་པར་གནས་པའི་ཆོ་གའོ། །ཡང་མཆོད་པ་བྱས་ལ་བདུག་སྤོས་གཏུལ་ཏེ་བཅོམ་ལྡན་འདས་ལྷག་པར་གནས་པར་བྱའོ། །བཅོམ་ལྡན་འདས་རྡོ་རྗེ་མེ་ལྟར་འབར། །ཁྲོ་བོའི་རྒྱལ་ལ་ཕྱག་འཚལ་ལོ། །བདག་ལ་བརྩེ་བར་གྱུར་ནས་སུ། །སློབ་མ་རྣམས་ལ་བརྩེ་བ་དང༌། །ཁྱེད་རྣམས་ལ་ཡང་མཆོད་པའི་ཕྱིར། །དཀྱིལ་འཁོར་བྲི་བར་འཚལ་ལགས་ན། །བཅོམ་ལྡན་བདག་ནི་གུས་པ་ལ། །དེ་བས་གནང་བ་མཛད་པར་རིགས། །སངས་རྒྱས་མགོན་པོ་བརྩེར་ལྡན་དང༌། །བྱང་ཆུབ་སེམས་དཔའ་དགྲ་བཅོམ་དང༌། །གསང་སྔགས་ལྷ་གཞན་གང་ལགས་དང༌། །འཇིག་རྟེན་སྐྱོང་བའི་ལྷ་རྣམས་དང༌། །གང་ཡང་འབྱུང་པོ་མཐུ་ཆེན་དང༌། །གང་སུ་ལྷ་ཡི་སྤྱན་མངའ་བའི། །སེམས་ཅན་བསྟན་ལ་དགའ་བ་རྣམས། །བདག་ལ་དགོངས་པ་མཛད་དུ་གསོལ། །བདག་མིང་འདི་ཞེས་བགྱི་བ་ཡི། །སང་ནི་དཀྱིལ་འཁོར་བཟང་པོའི་མིང༌། །འདི་ཞེས་བགྱི་བ་ཅི་ནུས་ཀྱིས། །ཆོ་ག་བཞིན་དུ་བྲི་ལགས་ན། །བདག་དང་སློབ་མར་བཅས་པ་ལ། །ཐུགས་ནི་བརྩེ་བར་དགོངས་ནས་སུ། །ཚོགས་པ་ཐམས་ཅད་དཀྱིལ་འཁོར་དུ། །བྱིན་གྱིས་བརླབ་པ་མཛད་དུ་གསོལ། །ཞེས་ལན་གསུམ་བརྗོད་ནས། སྙིང་ནས་དད་པས་ཕྱག་བྱའོ། །བསྟོད་པའི་ཆོ་ག་ཉིད་ཀྱང་བྱ། །དེ་ནས་ཆོ་ག་འདི་བྱའོ། །འདོད་ཆགས་བྲལ་བ་དང་ལྡན་པའི། །ཆོས་ནི་སློབ་མ་ལ་བཤད་པ། །བྱས་ནས་དང་པོ་བློ་ལྡན་གྱིས། །ཀུ་ཤའི་སྟན་ལ་ཉལ་དུ་གཞུག །རྨི་ལམ་སངས་རྒྱས་མཐོང་བ་ནི། །ཡོན་ཏན་རྒྱ་
མཚོ་མངོན་སུམ་བཞིན། །མཆོད་པ་དང་ནི་སྐུ་གཟུགས་མཐོང༌། །དེ་ལ་མཆོད་པ་རྩོམ་པ་དང༌། །དགེ་སློང་དག་ལས་ཆོས་ཉན་དང༌། །ཡང་ན་གཞན་ལས་ཉན་ཀྱང་རུང༌། །ཆོས་ནི་རྣམ་པར་སྤྱོད་པ་དང༌། །དེ་བཞིན་གླེགས་བམ་བཀླག་པ་དང༌། །རྨི་ལམ་དགེ་འདུན་མཐོང་བ་དང༌། །ཡང་ན་དགེ་སློང་གཅིག་མཐོང་བ་དང༌། །དེ་དང་འགྲོགས་ཤིང་གཏམ་ཟེར་དང༌། །ཡང་ན་དགེ་སློང་དངོས་བོར་འགྱུར། །གཙུག་ལག་ཁང་དག་མཐོང་བ་དང༌། །དེ་བཞིན་དགེ་སློང་རྣམ་དག་མཐོང༌། །རྒྱལ་བའི་སྲས་རྣམས་མཐོང་བ་དང༌། །དེ་བཞིན་ཕ་མ་བླ་མ་དང༌། །མཛའ་བོ་རྣམ་པ་སྣ་ཚོགས་རྣམས། །རྨི་ལམ་དུ་ནི་མཐོང་ན་ཤིས། །རིག་སྔགས་དང་ནི་དངོས་གྲུབ་ཐོབ། །དེ་བཞིན་བསླབ་པ་འཛིན་པ་དང༌། །ཀུན་དགའ་རྣམ་པ་སྣ་ཚོགས་དང༌། །འབབ་ཆུ་རྣམས་དང་རྒྱ་མཚོ་དང༌། །རི་དང་གླང་པོ་ཆེ་དག་དང༌། །མཐོང་ན་ཡང་ནི་དགེ་བར་གྲགས། །རྒྱལ་པོ་དག་ནི་མཐོང་ན་ཤིས། །བདེ་གཤེགས་སྤྱོད་པ་མཐུན་པ་ཡི། །དཀའ་ཐུབ་ཅན་དང་བྲམ་ཟེ་དང༌། །ཕྱུག་པོ་སྐྱེས་བུ་དམ་པ་དང༌། །བ་ལང་རྟ་དང་ངང་པ་དང༌། །སེང་གེ་དང་ནི་རི་དྭགས་རྣམས། །རྨི་ལམ་དུ་ནི་མཐོང་ན་ཤིས། །བཀྲ་ཤིས་པ་ཡི་བྱ་རྣམས་དང༌། །གསེར་དག་དང་ནི་གཏེར་རྣམས་དང༌། །རིན་པོ་ཆེ་དང་དངུལ་དག་དང༌། །ནོར་ནི་རྣམ་པ་སྣ་ཚོགས་དང༌། །མདོར་ནི་འབྱུང་ཁུངས་རྣམ་པ་དང༌། །མཚོན་ཆ་རྣམས་དང་འབྲུ་རྣམས་དང༌། །འབྲས་བུ་རྣམས་དང་མེ་ཏོག་དང༌། །རྒྱན་ནི་རྣམ་པ་སྣ་ཚོགས་དང༌།། ཁ་ཟས་དང་ནི་གོས་རྣམས་དང༌། །བྱིས་པ་དག་ནི་གཞོན་ནུ་དང༌། །བུད་མེད་གཟུགས་ནི་བཟང་མོ་དག །རྨི་ལམ་དུ་ནི་མཐོང་ན་བཟང༌། །ཡང་ན་ཐོབ་ཅིང་རེག་སྨྲ་དང༌། །རྨི་ལམ་དུ་ནི་དབང་བསྐུར་དང༌། །རྒྱལ་པོར་གྱུར་ཅིང་འབྱོར་པ་དང༌། །དམག་དཔོན་དུ་ནི་གྱུར་པ་དང༌། །གཡུལ་ལས་རྒྱལ་ཞིང་དགྲ་སོད་དང༌། གཉེན་དང་ལྷན་ཅིག་འགྲོགས་པ་དང༌། །ལྷ་རྣམས་ཀྱང་ནི་མཐོང་བ་དང༌། །ཐེག་པ་དང་ནི་ཤིང་རྟ་ཞོན། །དེ་བཞིན་རི་དང་ཡང་ཐོག་འཛེག །ངོ་མཚར་རྣམ་པ་སྣ་ཚོགས་དག །རྨི་ལམ་དུ་ནི་མཐོང་ན་དགེ །ཡམ་ཤིང་མེ་ལ་སྦྱིན་སྲེག་
བྱ། །བྱ་བ་བཟང་པོ་དག་ལ་འཇུག །ཆུ་ལས་རྒལ་ཞིང་རི་ལས་རྒལ། །རྐུན་པོ་དག་ནི་ཚར་གཅོད་དང༌། །སྟོབས་འགྱེད་པ་ལས་རྒྱལ་བ་དང༌། །གྱད་སྟབས་རྡོ་བཅིང་འགྱིང་བ་དང༌། །རྩེད་མོ་སྣ་ཚོགས་རྨི་ལམ་དང༌། །དེ་བཞིན་བརྩོན་དང་སྤུང་བྱེད་དང༌། །བཀྲ་ཤིས་དག་ནི་ཐམས་ཅད་ཀྱང༌། །མཐོང་ན་རབ་ཏུ་དགེ་བར་བཤད། །གསང་སྔགས་ཆོ་ག་ཉན་པ་དང༌། །དགའ་སྟོན་དགེ་བ་མཐོང་བ་དང༌། །སྒྲུབ་བ་བཟང་པོ་རྩོམ་པ་དང༌། །དེ་ལ་སོགས་པའི་ལྷ་རྣམས་ནི། །དགེ་བ་རྣམ་པ་དུ་མ་དག །བློ་ཡིས་རྣམ་པར་དཔྱད་བྱ་ཞིང༌། །དེ་ལས་བཟློག་པ་སྤང་བར་བྱ། །དགེ་བ་རྣམས་ནི་སྒྲུབ་པར་འགྱུར། །མི་དགེ་བ་དག་ཤེས་ནས་སུ། །དེ་དག་མཁས་པས་སྤང་བར་བྱ། །དགེ་བ་ཡི་ནི་ལྟས་རྣམས་ནི། །རབ་དང་འབྲིང་དང་ཐ་མ་ལས། །གསང་སྔགས་དངོས་གྲུབ་རྣམ་གསུམ་པོ། །རབ་དང་འབྲིང་དང་ཐ་མ་འགྲུབ། །མི་དགེ་བ་ལ་ཞི་བ་ཡི། །སྦྱིན་སྲེག་ཞི་བའི་གསང་སྔགས་ཀྱིས། །བ་ཡི་མར་ལ་བརྒྱ་རྩ་བརྒྱད། །ཆོ་ག་ཇི་བཞིན་བྲི་བར་བྱ། །དེ་ནས་སློབ་མ་སྡིག་བྲལ་ཞིང༌། །རྣམ་པར་དག་པ་དེ་དག་ལ། །རྗེས་སུ་བརྩེ་བར་བྱ་བའི་ཕྱིར། །ཅི་འདོད་པར་ནི་གཟུང་བར་བྱ། །དེ་ནས་མལ་ནས་ལངས་ལ་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། ཉི་མ་འཆར་བའི་དུས་སུ་དཀྱིལ་འཁོར་དེ་བཞིན་དུ་བར་སྣང་གི་ཕྱོགས་སུ་བཞག་ལ་ཚོན་སྣ་ལྔའི་སྲད་བུ་ལ་སྲད་བུའི་སྔགས་དང༌། ཧཱུཾ་ལན་བརྒྱ་རྩ་བརྒྱད་བཟླ་བར་བྱའོ། །དེ་ནས་དཀྱིལ་འཁོར་གྱིས་གཞི་དྲིས་བྱུགས་ལ། མེ་ཏོག་གི་སིལ་མས་གཏོར་ནས་བར་སྣང་ལ་བཞུགས་པའི་བཅོམ་ལྡན་འདས་འཁོར་དང་བཅས་པ་ལ་མཆོད་པ་རྣམ་པ་ལྔ་དང༌། གླུ་དང་རོལ་མོ་ལ་སོགས་པས་ཡང་དག་པར་མཆོད་ནས། མིག་གཡོན་དང་གཡས་སུ་ཛ་ལས་ཉི་མ་དང་ཟླ་བ་སེར་པོ་སྣང་བ་བསྐྱེད་ལ། རང་གི་ལག་ན་གནས་པའི་རྡོ་རྗེ་འབར་བ་ལ་གནས་པའི་ཡི་གེ་ཧཱུཾ་ལས་གྲོགས་བོ་རྡོ་རྗེ་ལས་ཀྱི་ཁྲོ་བོར་ཕྱུང་ནས་གཡོན་པའི་རྡོ་རྗེ་ཁུ་ཚུར་གྱིས་ཚོན་སྣ་ལྔའི་སྲད་བུ་བླངས་ནས་སྔགས་ཀྱིས་སྦྱངས་པའི་ཐིག་ཆལ་དཀར་པོ་ལ་སྦངས་
བ་ཛཿ་ཡིས་སྲད་བུ་དེ་རང་གི་ལག་ནས་གྲོགས་པོའི་ལག་ཏུ་བཏང་ལ་གྲོགས་པོས་ཀྱང་ཛཿ་ཛཿ་ཛཿ་ཞེས་ཡི་གེ་ཛཿ་ལན་གསུམ་བཟླ་བར་བྱའོ། །དེ་ནས་ཕྱོགས་ཐམས་ཅད་མཉམ་པ་ཉིད་དུ་བསམ་ཞིང་སློབ་དཔོན་ནུབ་ཏུ་འདུག་ཅིང་ཤར་ཕྱོགས་སུ་བལྟས་ལ། ཨོཾ་བཛྲ་ས་མ་ཡ་སུ་ཏྲ་མ་ཏི་ཀྲ་མ་ཧཱུཾ། ཞེས་ཟློས་ཤིང་ཐིག་གདབ་པར་བྱའོ། །ཡང་སློབ་དཔོན་ལྷོ་ཕྱོགས་སུ་འདུག་སྟེ། བྱང་ཕྱོགས་སུ་བལྟས་ལ་ཚངས་པའི་ཐིག་གཉིས་པ་གདབ་པར་བྱའོ། །དེ་ནས་མེའི་མཚམས་སུ་འདུག་སྟེ་བྱང་ཕྱོགས་སུ་བལྟས་ལ་ཕྱིའི་དཀྱིལ་འཁོར་གྱི་ཤར་ངོས་ཀྱི་ཐིག་གདབ་བོ། །རླུང་གི་ཕྱོགས་ནས་ལྷོ་ཕྱོགས་སུ་བལྟས་ལ་ནུབ་ངོས་སུ་ཐིག་གདབ་བོ། །དེ་ནས་དེ་ཉིད་དུ་འདུག་ལ་ཤར་ཕྱོགས་སུ་བལྟས་ཏེ། བྱང་ཕྱོགས་སུ་ཐིག་གདབ་བོ། །དེ་ནས་ཡང་མེའི་ཕྱོགས་སུ་འདུག་ལ་ནུབ་ཏུ་བལྟས་ཏེ་ལྷོ་ཕྱོགས་སུ་ཐིག་གདབ་པོ། །དེ་བཞིན་དུ་ཁ་ཁྱེར་དང་ལྷའི་སྣམ་བུའི་ཐིག་གདབ་པར་བྱ་ཞིང༌། སློབ་དཔོན་དང་སྒྲུབ་པའི་གྲོགས་མཆོག་གཉིས་ཀ་གཡས་ནས་བསྐོར་བའི་ཚུལ་གྱིས་འགྲོ་བར་བྱའོ། །ཡང་མེའི་མཚམས་སུ་འདུག་ལ་རླུང་གི་མཚམས་ཀྱི་བར་དུ་ཐིག་གདབ་པར་བྱའོ། །ཡང་བདེན་བྲལ་གྱི་མཚམས་སུ་འདུག་པ་དབང་ལྡན་གྱི་མཚམས་ཀྱི་བར་དུ་ཐིག་གདབ་པར་བྱའོ། །དེ་ནས་སྒོ་དང་སྒོ་ཁྱུད་དང་རྟ་བབས་ཀྱི་ཐིག་གདབ་པར་བྱ་སྟེ། ཕྱིའི་དཀྱིལ་འཁོར་གྱི་ཐིག་གདབ་པའི་ཆོ་གའོ། །དེ་ལྟར་ཕྱིའི་དཀྱིལ་འཁོར་ལེགས་པར་ཐིག་བཏབ་ནས་དེའི་དབུས་སུ་དཀྱིལ་འཁོར་གྱི་ལྟེ་བར་སེང་ལྡེང་ལ་སོགས་པའི་རྡོ་རྗེ་ཕུར་བུ་ལ་སྔར་བཤད་པའི་ཕུར་བུའི་སྔགས་བརྒྱ་རྩ་བརྒྱད་བཟླས་ལ་ཧཱུཾ་ཟློས་ཤིང་རྡོ་རྗེས་བརྡུང་བར་བྱའོ། །ཕུར་བུ་དེས་ཚོན་སྣ་ལྔའི་སྲད་བུ་བལྟབས་ཏེ་བཏགས་ལ་དེས་དབང་ལྡན་གྱི་ཕྱོགས་ནས་བརྩམས་ཏེ་གཡས་ནས་བསྐོར་ཞིང་ཆ་ཉི་ཤུའི་ཚད་ཀྱིས་ཐིག་གདབ་ལ་ཐམས་ཅད་ཀྱི་ནང་དུ་རྡོ་རྗེ་འབར་བའི་དཀྱིལ་འཁོར་གྱི་ཐིག་གདབ་པར་བྱའོ། །དེའི་ཉིས་འགྱུར་གྱིས་དངོས་པོ་འབར་པའི་འཁོར་ལོས་ཡོངས་སུ་བསྐོར་བའི་ནང་དུ་ཐིག་གདབ་པོ། །དེའི་ཉིས་འགྱུར་གྱིས་ནི་གཉིས་པའོ། །དེའི་
བཞི་འགྱུར་གྱིས་ནི་གསུམ་པའོ། །དེའི་ལྔ་འགྱུར་གྱིས་ནི་བཞི་པའོ། །དེའི་དྲུག་འགྱུར་གྱིས་ནི་ལྔ་པའོ། །དེའི་བདུན་འགྱུར་གྱིས་ནི་དྲུག་པའོ། །དེའི་བརྒྱད་འགྱུར་གྱིས་ནི་བདུན་པའོ། །ཐིག་གིས་བར་དུ་ཆོད་པར་ཐིག་གདབ་པར་བྱའོ། །དེ་ནས་རྡོ་རྗེའི་ཐིག་དང་དཀྱིལ་འཁོར་གྱི་ཀ་བ་བརྒྱད་ཐིག་གིས་ལེགས་པར་ཐིག་བཏབ་ལ། ཕྱིའི་དཀྱིལ་འཁོར་གྱི་ནང་གི་མཚམས་ལས་མེའི་ཕྱོགས་ནས་བརྩམས་ཏེ་མིང་པོ་གསུམ་དང་སྲིང་མོ་བཞི་དང༌། གླུ་དང་སྡུག་བསྔལ་གདོན་པའི་དཀྱིལ་འཁོར་གྱི་ཐིག་གདབ་པར་བྱའོ། །དེ་ནས་ཁམས་གསུམ་རྣམ་པར་རྒྱལ་བའི་ཕྱག་རྒྱ་བཅིངས་ལ། ཧཱུཾ་བཞི་ཟློས་ཤིང་དཀྱིལ་འཁོར་གྱི་ལྟེ་བར་གནས་པའི་ཕུར་བུ་བཏོན་ལ། རང་གི་རྡོ་རྗེ་འབར་བར་ཡིད་ཀྱིས་གཞུག་པར་བྱའོ། །དེ་ནས་ཕུར་བུའི་ཁུང་བུ་ཕྱེ་མ་ལྔས་བཀང་ལ་མཉམ་པར་བྱའོ། །དེ་ནས་ཧི་ཞེས་བྱ་བ་མིག་གཡོན་དང་གཡས་སུ་ཉི་མ་དང་ཟླ་བ་བསྐྱེད་དེ་ཁྲོ་བོའི་ལྟ་བས་ཀུན་དུ་བལྟས་ཤིང་སྒོ་རྣམས་དབྱེའོ། །ད་ནི་ལུང་ལས་བཤད་པའི་ཐིག་གི་མཚན་ཉིད་བརྗོད་པར་བྱ་སྟེ། དེ་ནས་སྲད་བུ་ཉིས་འགྱུར་དུ། །བྱས་པས་ཐིག་ནི་གདབ་པར་བྱའོ། །ནམ་མཁའ་ཀུན་དང་ཆ་མཉམ་པས། །ཚད་ནི་ཚད་མེད་པ་ཉིད་ཡིན། །གྲུ་བཞི་པ་ལ་སྒོ་བཞི་པ། །རྟ་བབས་བཞིས་ནི་རྣམ་པར་བརྒྱན། །ཁ་ཁྱེར་གྱིས་ནི་ཡོངས་བསྐོར་ཅིང༌། །མཚམས་སུ་ལྷ་མོས་རྣམ་སད་བྱས། །དཀྱིལ་འཁོར་གྱི་ནི་གྲྭ་རྣམས་དང༌། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་ཕྱེད་པ་ལ་གནས་པའི། །རྡོ་རྗེ་རིན་ཆེན་གྱིས་མཛེས་བྱས། །མི་མཉམ་མེད་པར་ཟུར་བཞི་སྟེ། །དྲན་དང་དབང་པོ་སྒོ་བཞི་ཡིན། །བསམ་གཏན་གྱིས་ནི་རྟ་བབས་ཏེ། །ཏིང་ངེ་འཛིན་རྣམས་ཁྱམས་སུ་བཤད། །ཁྱམས་དེར་གནས་པའི་རྡོ་རྗེ་བདག །གཟུངས་རྣམས་ལྷ་མོས་མཆོད་པ་ཡིན། །བསམ་པ་ཐམས་ཅད་རྫོགས་མཛད་པས། །རྒྱན་རྣམས་ཀུན་གྱིས་རྣམ་པར་མཛེས། །དམ་ཆོས་མཆོག་གི་ཡན་ལག་ཀུན། །གདུལ་བྱས་བསྐྱོད་པ་སྣ་ཚོགས་མཆོག །རླུང་གིས་བསྐྱོད་པ་སྣ་ཚོགས་མཆོག །བ་དན་དྲིལ་བུ་
སྒྲ་སྒྲོགས་ཡིན། །མེ་ལོང་ཡེ་ཤེས་རྟག་མེ་ཏོག །བྱང་ཆུབ་ཡན་ལག་མེ་ཏོག་ཕྲེང༌། །དྲ་བ་མེ་ལོང་མེ་ལོང་ཆེ། །མེ་ཏོག་ཕྲེང་བའི་རྒྱན་གྱིས་བསྐོར། །ཀུན་དུ་མི་ཟད་བདེ་བ་ནི། །བདེ་བ་ཆེན་པོ་ཞེས་བཤད་དོ། །དེ་ལྟར་དཀྱིལ་འཁོར་ཐིག་བཏབ་ནས། །རིན་ཆེན་སྣ་ཚོགས་ཕྱེ་མའམ། །ཁམས་སྣ་ཚོགས་ཀྱི་ཕྱེ་མའམ། །ནས་དང་འབྲས་ཀྱི་ཕྱེ་མའམ། །དེ་བཞིན་ཉུངས་ཀར་ཕྱེ་མ་ནི། །རྒྱ་སྐྱེགས་ཡུང་དང་སྔོ་དང་ལྗང༌། །ཚོན་སྣ་བཞི་ཡིས་བཙོས་གྱུར་ཅིང༌། །དྲི་ཞིམ་ཕྱེ་མ་དང་བསྲེས་ལ། །སྲད་བུ་དེ་རྣམས་དགང་བར་བྱ། །རིན་ཆེན་ཕྱེ་མས་རྒྱལ་སྲིད་ཐོབ། །ཁམས་ཀྱི་ཕྱེ་མ་གསེར་མང་རྙེད། །འབྲུ་ཡི་ཕྱེ་མས་འབྲུ་མང་སྐྱེད། །ཉུངས་ཀར་གྱིས་ནི་དོན་ངེས་འགྲུབ། །དེ་ལ་ཕྱི་ཡི་དཀྱིལ་འཁོར་ནི། ཚོན་དམར་པོ་དང༌། ལྗང་གུ་དང༌། སྔོན་པོ་དང༌། སེར་པོ་དང༌། དཀར་པོས་རི་མོ་ལྔ་བྱའོ། །རི་མོ་བདུན་ལ་ནི་ཁ་དོག་སེར་པོའི་རི་མོ་གཅིག་གིས་འབར་བའི་འཁོར་ལོ་བྱས་ཏེ། འབར་བའི་འཁོར་ལོ་ཇི་སྐད་བཤད། །ལྕགས་ཀྱི་འཁོར་ལོ་དམ་པ་ཡིན། །ཞེས་གསུངས་པ་ཡིན་ནོ། །ལྷག་མ་གོ་བར་ཟད་དོ། །ཚོན་མངོན་པར་སྤྱང་བ་ནི་སྔར་བཤད་པ་ལས་གཟུང་ངོ། །ཚོན་རྩི་ལྔ་དང་བོ་དགྱེ་བ་དང༌། དང་པོའི་རྡོ་རྗེ་དང༌། ཧཱུཾ་གིས་བརྩམ་པར་བྱས་ཏེ། ཕྱིས་ནི་ཅི་བ་དེར་བྱའོ། །དེ་ནས་ཧི་ཟློས་ཤིང་འཁོར་ལོ་འབར་བའི་ལྟེ་བའི་ཕྱོགས་སུ་སྣ་ཚོགས་པདྨའི་གདན་ལ་རྡོ་རྗེ་མེ་ལྟར་འབར་བའི་སྐུ་གཟུགས་ལུགས་མའམ། བརྐོས་པའམ། བྲིས་པ་བཞུགས་སུ་གསོལ་བའམ། ནམ་མཁའི་ཕྱོགས་ལས་ཕབ་སྟེ། སྐུའི་གཟུགས་བརྙན་དང་གཅིག་ཏུ་བྱའོ། །ཧི་ཧཱུཾ་ཞེས་ཟློས་ཤིང་མདུན་དུ་འདོད་ཆགས་རྡོ་རྗེ་མའི་གནས་སུ་རྡོ་རྗེ་མཚོན་ཆ་འཛིན་མ། གཡས་ལོགས་སུ་ཀཱི་ལི་ཀཱི་ལའི་གནས་སུ་མཐུ་ཆེན་འཛིན་མ། དེའི་རྒྱབ་ཏུ་རྡོ་རྗེ་དྲན་མའི་གནས་སུ་མཛོད་འཛིན་མ། གཡོན་དུ་རྡོ་རྗེ་འདོད་པའི་དབང་ཕྱུག་མའི་གནས་སུ་ཐོད་པའི་ཞགས་པ་འཛིན་མ། མེའི་མཚམས་སུ་མདའ་འཛིན་མ། བདེན་བྲལ་དུ་ཁ་ཊྭཱཾ་ག་འཛིན་མ། རླུང་གི་མཚམས་སུ་འཁོར་ལོ་འཛིན་མ། དབང་ལྡན་གྱི་མཚམས་སུ་བ་
དན་སྣ་ཚོགས་འཛིན་མ་དགོད་པར་བྱའོ། །དེ་ནས་འདི་རྣམས་ཀྱི་སྙིང་པོ་བཤད་པར་བྱ་སྟེ། ཧཱུཾ་བཛྲ་པྲ་ཧ་ར་ནི་མ་ཊ། ཧཱུཾ་བཛྲ་ཤཱུ་ལ་གྲི་བིནྡྷ་མཊ། ཨོཾ་བཛྲ་ཀྲོ་ཤེ་ཙྪི་ནྡ་མཊ། ཨོཾ་བཛྲ་ཨ་མ་ལ་པདྨེ་མཊ། ཧཱུཾ་བཛྲ་གུ་ཧྱ་སིདྡྷྱ་པ་ར་མ་ཡོ་གཱི་ཤྭ་རི་ཧྲཱིཿ་ཧཱུཾ་བཛྲ་ཙཎྜེ་ཤྭ་རི་ཁ་ཊྭཱཾ་གི །མ་ཧཱ་བཛྲ་ཀ་པཱ་ལི་མཱ་ལ་མ་ཀུ་ཊེ། རུ་ལུ་རུ་ལུ་ལེ་ཧི། ཧཱུཾ་བཛྲ་ན་ར་ཡ་ནི་བཛྲི། ཧཱུཾ་མ་ཧཱ་བཛྲ་པ་ཏཱ་ཀེ་ཛྫི། དེ་ལྟར་རྡོ་རྗེ་འབར་བའི་འཁོར་ལོར་ལྷ་རྣམས་བཀོད་པ་བྱས་ནས་དེ་ནས་རྡོ་རྗེ་ཤུགས་ཀྱིས་བྱུང་ལ། འབར་བའི་འཁོར་ལོ་རིམ་པས་བསྐོར་བ་དང་པོའི་ཐིག་གི་ནང་དུ་རྡོ་རྗེ་གཙུག་ཏོར་མ། ཨོཾ་ཏྲཾ་བནྡྷ་ཧཾ་ཞེས་ཟློས་ཤིང་བཞི་པོ་ཤར་ཕྱོགས་ནས་བརྩམས་ཏེ་གྲལ་རིམ་པ་བཞིན་དུ་བྲི་བར་གཞག་པར་བྱའོ། །དེ་ནས་རྡོ་རྗེ་ཧཱུཾ་མཛད་སྤྲུལ་པའི་ཁྲོ་བོ་བཞིས། །ཨོཾ་སརྦ་བཛྲ་ཨདྷི་པ་ཏི་སྟྭཾ་ཨ་བྷི་ཥི་ཉྩཱ་མི་བྷུར་བྷུ་བ་སྭཿ་ཞེས་བྱ་བ་དང༌། དེ་ནས་ཨོཾ་སུཾ་བྷ་ནི་དྷ་ཏི་བཛྲེ་ན་ཙྪིནྡ་ཏི་ཧ་ན་ཏི་ད་ཧ་ཏི་བ་ཙ་ཏི་བྷི་རི་བྷི་རི་སྭཱ་ཧཱ། ཞེས་བྱ་བ་རིག་པའི་མཆོག་ཞལ་ནས་བྱིན་པའོ། །ན་མོ་བཛྲ་པཱ་ཎི་སྱ་ཨོཾ་ཊ་ཀྐི་ཧཱུཾ་ཛཿ་ཞེས་བྱ་བས་ཁྲོ་བོ་འདོད་པ། ཧོ་བཛྲ་པཱ་ཎི་ཧཱུཾ་ཕཊ་ཅེས་བྱ་བས་གཤིན་རྗེ་གཤེད། ཀ་ནི་དྷུ་ནི་ས་ཧཱུཾ་ཕཊ་ཅེས་པས་ཁྲོ་བོ་ཀ་ནི། ཧེ་མ་ཧཱ་ཨཾ་ཀུ་ཤེ་ཧོ་བྷ་ག་བཱ་ན་བཛྲ་ཧཱུཾ་ཛཿ་ཞེས་ཁྲོ་བོ་རྡོ་རྗེ་ལྕགས་ཀྱུ། ཨོཾ་བཛྲ་པཱ་ཤ་ཧྲཱིཿ་ཞེས་བྱ་པས་རྡོ་རྗེ་ཞགས་པ། ཧེ་བཛྲ་ཀཱི་ལི་ཀཱི་ལ། ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་ཞེས་བྱ་བས་ཁྲོ་བོ་རྡོ་རྗེ་ཀཱི་ལི་ཀཱི་ལ། ཧེ་བཛྲ་ཨ་ན་ཡ་སརྦ་བཛྲ་ཨ་དྷི་པ་ཏི་སྟྭཾ་མ་ཧཱ་པ་ར་མེ་ཤྭ་ར་ལ་གྷུ་ལ་གྷུ་བྷ་ག་བཱ་ན། བཛྲ་ཨ་ཀྲོ་མ་ཧཱ་སརྦ་བི་ཛ་ཡ་ཀྲོ་དྷ་ཧ་ར་ཧཱུཾ་ཕཊ། ཅེས་བྱ་བས་ཁྲོ་བོ་བསྙེམས་པ། ཨོཾ་བཛྲ་མི་ཏྲ་ཏེ་ན་སུ་ཁ་ཏེ་ན་ཨ་བྷྱ་ནྟ་ར་ཏེ་ན། ཨུ་པ་ཏིཥྛ་དྲྀ་ཌྷོ་མེ་བྷ་ཝ། ཨཱ་ཧ་རོ་མེ་བྷ་ཝ་ཧཾ། ཨ་པྲ་ཏི་ཧ་ཏྱོ་མེ་བྷ་ཝ། ཤ་ཤྭ་ཏྭ་མེ་བྷ་ཝ་ཧཾ། སརྦ་ཙིཏྟ་ཤྲེ་ཡོ་མེ་ཀུ་རུ་སིདྡྷྱ་ཧ་ཧ་ཧི་ཞེས་བྱ་བས་ཁྲོ་བོ་རྡོ་རྗེ་བསྡམས་པ། ཨོཾ་རུ་ཏ་རུ་ཏ་ཧཱུཾ་ཕཊ་ཅེས་བྱ་བས་ཁྲོ་བོ་རྡོ་རྗེ་ཁུ་ཚུར། ཨོཾ་བཛྲ་ལོ་ཀེ་ཤྭ་ར་ཨ་ན་ཧི་ནི་དྷི་ནི་པ་ར་མེ་ཤྭ་ར་ལ་གྷུ་ལ་གྷུ་བྷ་ག་བཱ་ན་བཛྲ་ཀྲ་མ་སརྦ་བི་ཛ་ཡེ་ཀྲྀ་ཌ་ཏ་ཨོཾ་ཧ་ར་ཧ་ར་ཧཱུཾ་ཕཊ་ཅེས་བྱ་བས་ཁྲོ་བོ་རྡོ་རྗེ་སྙེམས་མ། ཨོཾ་བཛྲ་མི་ཏྲ་ཏེ་ན་སུ་ཁ་ཏེ་ན་ཨ་བྷྱ་ནྟ་ར་ཏེ་ན། ཨུ་པ་ཏིཥྛ་རེ་ཏྭ་ས་ཏྭ་ཤོ་དྷ་ཡ། བྷ་
ག་བཱན་བཛྲ་སུ་དྷ་ཡ་སརྦ་མ་ཧཱ་ས་ཏྭ་ཧཱུཾ་ཕཊ་ཅེས་བྱ་བས་རྡོ་རྗེ་སྡེ། བཛྲ་ཧོ་བཛྲ་བནྡྷ་ར་སརྦ་ཀརྨཱ་དྷི་པ་ཏེ་མ་ཧཱ་བཛྲ་དྷ་རི་པྲི་ཡ་སརྦ་དུ་ཥྚཱ་ན་པྲ་དུ་ཥྚཱ་ན་ཧ་ན་ཙྪིནྡ་སྥོ་ཊ་ཡ་མ་རྨ་ནི་པྲ་ཧ་ར་པྲ་ཧ་ར་སྨ་ར་སྨ་ར་ཡ་ཐཱ་ཏ་ཐཱ་ཏྲཻ་ལོ་ཀྱ་བི་ཛ་ཡེ་ཙིན་ཏཾ་པུཏྟ་དྷྱ་ན་བཛྲ་དྷ་ར་མ་དྷེ་ན། ཨཱ་བེ་ཤ་ཡ་སརྦ་ལཱ་ལཱ་ལཱ་ལཱ་ལི་ལ་ཡ་མ་ན། ཧ་ཧ་ཧ་ཧཱ་མ་མ་ས་ཏྭ་ས་མ་ཡ་མ་ནུ་པཱ་ལ་ཡ་ཧཱུཾ་ཕཊ་ཅེས་བྱ་བས་རྡོ་རྗེ་གཙུག་འཕྱང་ངོ༌། །ཨོཾ་ན་མཿ་སརྦ་ཏ་ཐཱ་ག་ཏེ་བྷྱཿ་སྭཱ་ཧཱ་ཞེས་བྱ་བས་ནི་རྡོ་རྗེ་ཕྱག་འཚལ་ལོ། །ཨོཾ་བཛྲ་མུཙྪ་ཡ་པྲ་མུཙྪ་ཡ་ཨ་བི་ཤ་ས་མ་ཡོ་ཙེ་ན་ཙ་མེ་ཧཱུཾ་ཕཊ་ཅེས་བྱ་བ་ནི་རྡོ་རྗེ་རྐང་གདུབ་བོ། །ཨོཾ་ཀུ་རུ་ཀུ་རུ་སུ་རུ་སུ་རུ་ཏིཥྛ་ཏིཥྛ་བནྡྷ་བནྡྷ་མ་ཧཱ་བ་ལ་ས་མ་ཡ་མ་ནུ་སྨ་ར་ཧ་ན་ཧ་ན་ཕཊ་ཅེས་བྱ་བས་ནི་རྡོ་རྗེ་སྒེག་མོའོ། །ཨོཾ་བཛྲ་ཨ་ཀྲ་མ་ཨ་ཀྲ་མ་སརྦ་ཧཱུཾ་ཕཊ་ཅེས་བྱ་བས་ནི་རྡོ་རྗེ་རྣོན་པོའོ། །ཨོཾ་ཧཱུཾ་ཧུ་ལུ་ཧུ་ལུ་མ་ནོ་ཛ་བ་ཤཱི་གྷྲཾ་ཨཱ་གཙྪ་ཡ་ཨཱ་གཙྪ་ཡ། སརྦ་ཀུ་རུ་སརྦ་ཏ་ཐཱ་ག་ཏ་ས་ཏྱ་མ་ནུ་པཱ་ལ་ཡ་ཨ་ནི་ཡཾ་སྭ་ཨ་ནི་ཡ་བཛྲ་ས་མ་ཡ་ས་ཏྭ་ཡ་ཧཱུཾ་ཧུ་ལུ་ཧུ་ལུ་ཞེས་བྱ་བ་ནི་རྡོ་རྗེ་ཤུགས་ཀྱི་བྲི་བའམ་དགོད་པར་བྱའོ། །དེ་ལྟར་སྲད་བུ་དང་པོའི་ནང་དུ་རྡོ་རྗེ་ཕྱག་རྒྱའི་དབང་པོ་རྣམས་བཀོད་ནས་གཉིས་པར་སྔགས་ཀྱི་ཕྲེང་བ་རྣམས་ས་མ་ཡ་ཞེས་བྱ་བ་འདིས་བྲི་བར་བྱའོ། །དེ་རྣམས་ཀྱི་གཡོན་ལོགས་སུ་རྡོ་རྗེ་གླུ་མའི་གཟུགས་ཅན་གྱི་ལྷ་མོ་པི་ཝང་ལེན་པ་ལ་བརྩོན་པ། ཨོཾ་བཛྲ་བེ་ཏི་བེ་ཏེ་སྭཱ་ཧཱ་ཞེས་བྱ་བའི་སྙིང་པོ་འདིས་དགོད་པར་བྱའོ། །ཡང་རྡོ་རྗེ་མགོན་པོ་བཙུན་མོ་དང་བཅས་པ་རྣམས་བྲི་བར་བྱའོ། །བཛྲ་ཨ་མ་ར་ཨོཾ་ར་ཏ་ཧཱུཾ་ན་མ་ཞེས་བྱ་བ་ནི་རྡོ་རྗེ་མགོན་པོ་རྣམས་ཀྱི་སྙིང་པོའོ། །ཨོཾ་བཛྲ་ཨ་ཏེ་པ་ཏི་ཡ་ཧི་ཞེས་བྱ་བ་ནི་དེ་རྣམས་ཀྱི་བཙུན་མོ་རྣམས་ཀྱིའོ། །དེ་ལྟར་གཉིས་པ་སྔགས་ཀྱི་ལྷ་རྣམས་བྲིས་ནས་གསུམ་པར་རྡོ་རྗེ་རྒྱལ་པོ་རྡོ་རྗེ་ལྷ་མོས་བསྐོར་བ་རྣམས་བྲི་བར་བྱའོ། །བཛྲ་པ་ཞེས་བྱ་བ་ནི་རྡོ་རྗེ་རྒྱལ་པོ་རྣམས་ཀྱི་སྙིང་པོའོ། །ཨོཾ་བཛྲ་ཨ་ཏི། དེ་བ་དེ་ཧེ་ཞེས་བྱ་བ་ནི་རྡོ་རྗེ་ལྷ་མོ་རྣམས་ཀྱིའོ། །དེ་ལྟར་སྲད་བུ་གསུམ་པའི་ནང་དུ་རྡོ་རྗེ་རྒྱལ་པོ་རྣམས་རྡོ་རྗེ་ལྷ་མོ་རྣམས་ཀྱིས་བསྐོར་བར་བྲི་བར་བྱའོ། །བཞི་པ་རྡོ་རྗེ་རྣམ་པར་འཇོམས་པ་ཆེན་པོ་སྟེ་སྒེག་མོ་དང༌། བཞད་མ་དང༌། གླུ་མ་དང༌། གར་མ་དང༌། ཚོགས་ཀྱི་དབང་ཕྱུག་
རྡོ་རྗེ་རོལ་མོ་རྣམས་བརྡུང་བ་ལ་བརྩོན་པ་རྣམས་ཀྱང་བྲི་བར་བྱའོ། །དེ་རྣམས་ཀྱི་སྙིང་པོ་ཡི་གེ་ཧཱུཾ་ཡིན་ནོ། །ལྔ་པར་ནི་རྒྱལ་ཕྲན་རྣམས་དང་སྒོར་སྒོ་བ་རྣམས་དང༌། ཚོགས་དང་ཁྲོ་བོ་རྣམས་བྲི་བར་བྱའོ། །བཛྲ་བྷ་བྷ་ཞེས་བྱ་བ་ནི་རྒྱལ་ཕྲན་རྣམས་ཀྱི་སྙིང་པོའོ། །བཛྲ་བེ་ཏྲ་དྷ་ར་ཞེས་བྱ་བ་ནི་སྒོ་བ་རྣམས་ཀྱིའོ། །ཨོཾ་བཛྲ་ཤ་ས་ཡ་ཧཱུཾ་ཕཊ་ཅེས་བྱ་བ་ནི་ཚོགས་རྣམས་ཀྱིའོ། །བཛྲ་ཧཱུཾ་ཞེས་བྱ་བ་ནི་ཁྲོ་བོ་རྣམས་ཀྱིའོ། །དྲུག་པ་ནི་རྡོ་རྗེ་ཕོ་ཉ་གཏུམ་པོ་དང༌། གནོད་སྦྱིན་དང༌། སྲིན་པོ་དང༌། མངག་གཞུག་རྣམས་བྲི་བར་བྱའོ། །ཨོཾ་བཛྲ་ཨ་མ་ཧི་ཨ་ན་ཡ་སརྦ་ཛ་ཞེས་བྱ་བ་ནི་རྡོ་རྗེ་ཕོ་ཉ་རྣམས་ཀྱི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཨ་ཞེས་བྱ་བ་ནི་རྡོ་རྗེ་གནོད་སྦྱིན་རྣམས་ཀྱིའོ། །བཛྲ་རཱཀྵ་ས་རཀྵ་མཾ་ཕཊ་ཅེས་བྱ་བ་ནི་སྲིན་པོ་རྣམས་ཀྱིའོ། །ཧེ་བཛྲ་ཀྲྀ་ཏ་ཅེས་བྱ་བ་ནི་མངག་གཞུག་པ་རྣམས་ཀྱི་སྙིང་པོའོ། །དེ་ནས་སྲད་བུ་བདུན་པའི་ནང་དུ་བཏུལ་བར་གྱུར་པའི་གཏུམ་པོ་ཆེན་པོ་དྲག་པོ་ལ་སོགས་པ་དབང་ཕྱུག་དམ་པར་རྡོ་རྗེ་གཙུག་ཏོར་ལ་སོགས་པ་དང་བདས་པ་བྲི་བར་བྱའོ། །དེ་ལ་རྡོ་རྗེ་གཙུག་ཏོར་གྱིས་ཚར་གཅད་པ་དྲག་པོ་ལ་སོགས་པ་ནས་ཆུ་ལྷའི་བར་དུ་བྲི་བར་བྱའོ། །རྡོ་རྗེ་སྨིན་མཚམས་ཀྱིས་ནི་ཟིལ་གྱིས་གནོན་ཏོ། །རིག་པ་མཆོག་གིས་ནི་དམ་ཚིག་གི་སུན་འབྱིན་ཏེ། །སྙིང་པོས་ནི་ངེས་པར་གནོན་ཏོ། །འཕགས་པ་གཤིན་རྗེ་གཤེད་ཀྱིས་ནི་བསྐྱེད་དོ། །ཁྲོ་བོ་ཀ་ནི་ས་ནི་རྨོངས་པར་བྱས་སོ། །རྡོ་རྗེ་ལྕགས་ཀྱུས་ནི་བཀུག །རྡོ་རྗེ་ཞགས་པས་ནི་བཅིངས། ཀཱི་ལི་ཀཱི་ལས་ནི་བཙིར། རྡོ་རྗེ་བསྙེམས་པས་ནི་ཆད་པས་བཅད། རྡོ་རྗེ་བསྡམས་པས་ནི་རྒྱས་བཏབ། རྡོ་རྗེ་ཁུ་ཚུར་གྱིས་ནི་བརྒྱལ་བར་བྱས། རྡོ་རྗེ་སྡེས་ནི་བརྟུལ། གཙུག་འཕྱང་གིས་ནི་བཅོམ། རྡོ་རྗེ་པུས་མོས་ནི་མདུད་པར་བྱས། རྡོ་རྗེ་རྐང་གདུབ་ཀྱིས་རྒྱལ། རྡོ་རྗེ་སྒྲོག་གིས་ནི་བཅིངས། རྡོ་རྗེ་འཁོར་ལོས་ནི་སྨྲ་བར་བྱེད། རྡོ་རྗེ་རྐང་པས་ནི་མཉེས། ཕྱག་རྒྱ་རིག་པའི་ལྟག་པའི་ལྷས། །རྒྱས་གདབ་པ་དང་འབེབས་པ་ཉིད། །རྡོ་རྗེ་མགོན་པོ་ལྷ་མོར་བཅས། །བཏུལ་བ་དང་ནི་བརྡེག་པ་ཡིས། །རྡོ་རྗེ་རྒྱལ་པོ་ལྷ་མོར་བཅས། །བཏུལ་དང་སྣུན་པར་བྱེད་པ་དང༌། །རྒྱལ་ཕྲན་གྱིས་ནི་མངོན་པར་
བཅོམ། །སྒོ་བ་རྣམས་ཀྱིས་གཡུལ་དུ་བཅོམ། །མི་བཟད་ཚོགས་ཀྱིས་རྗེས་སུ་བཏུལ། །རྡོ་རྗེ་ཁྲོ་བོས་རྣམ་པར་བརླག །ཕོ་ཉ་ཕོ་ཉ་མོ་ཡིས་བཀུག །རྡོ་རྗེ་གནོད་སྦྱིན་སྲིན་པོ་དང༌། །མངག་གཞུ་པ་ཡིས་གསོད་དང་ཟད། །སྐྲག་པར་བྱས་དང་ཟོས་པ་ཡིན། །ལས་རྣམས་ཀུན་ལ་རྡོ་རྗེ་ཡི། །རྣལ་འབྱོར་ཕྲ་མེན་མ་རྣམས་ཀྱིས། །ཡིད་ཀྱིས་རྒྱས་བཏབ་རྨོངས་བྱས་བཏུལ། །ཕྱག་རྒྱ་རིགས་ལྷག་ལྷ་རྣམས་ཀྱིས། །ཀུན་དུ་བརྡེགས་ན་བཟའ་བར་བྱེད། །དེ་ལ་ཕྱག་རྒྱའི་རིགས་པའི་ལྷག་པའི་ལྷ་རྣམས་ཀྱི་སྔགས་བརྗོད་པར་བྱའོ། །བྷེ་དྷི་ཏེ་ཞེས་བྱ་བ་ནི་རྡོ་རྗེ་རྣལ་འབྱོར་གྱི་ཕྲ་མེན་མ་རྣམས་ཀྱི་སྙིང་པོའོ། །ཨོཾ་བཛྲ་ཨ་པ་ར་ཙི་ཏི་རུ་ཊ་མ་ཊ་ཕོ་ཉ་མོ་རྣམས་ཀྱི་སྙིང་པོའོ། །རྡོ་རྗེ་ཁ་ཊྭཱཾ་གའི་ཚོགས་ཆེན་མོས་ཀྱང་དྲག་པོ་ནས་ཆུ་ལྷའི་མཐར་ཐུག་པའི་བར་དུ་ཆུང་མ་དང་བཅས་པ་ཉལ་བའི་ཚུལ་དུ་བྱས་པ་བྲི་བར་བྱའོ། །རྡོ་རྗེ་མདུང་གིས་ནི་སྐྲག་པར་བྱས། རྡོ་རྗེ་རལ་གྲིས་ནི་བཅད། རྡོ་རྗེ་ཞགས་པས་ནི་དྲངས། རྡོ་རྗེ་དབྱུག་པས་ནི་བཅག །རྡོ་རྗེ་མདུང་གིས་ནི་ཕུག །རྡོ་རྗེ་མདས་ནི་ངེས་པར་རྒྱལ་བར་བྱེད། རྡོ་རྗེ་ཁ་ཊྭཱཾ་གས་ནི་བཅོམ་པར་བྱས། རྡོ་རྗེ་འཁོར་ལོས་ནི་དངོས་གྲུབ་ཀྱི་མཆོག་བསྒྲུབ་པོ། །རུ་ལུ་རུ་ལུ་ཞེས་བྱ་བ་ནི་རྡོ་རྗེ་ཁ་ཊྭཱཾ་གའི་ཚོགས་ཀྱི་སྙིང་པོའོ། །ཨོཾ་ཧྲིཿ་ཕཊ་ཅེས་བྱ་བ་ནི་རྡོ་རྗེ་མདུང་གི་ཚོགས་ཀྱིའོ། །ཨོཾ་ཙྪི་ནྡ་བཛྲ་ཞེས་བྱ་བ་ནི་རྡོ་རྗེ་ཞགས་པའི་ཚོགས་ཀྱིའོ། །བཛྲ་ཧཱུཾ་བཾ་ཞེས་བྱ་བ་ནི་རྡོ་རྗེ་དབྱུག་པའི་ཚོགས་ཀྱིའོ། །བྷིནྡ་བཛྲ་ཞེས་བྱ་བ་ནི་རྡོ་རྗེ་མདུང་གི་ཚོགས་ཀྱིའོ། །བཛྲ་བ་ན་ཞེས་བྱ་བ་ནི་རྡོ་རྗེ་གཞུའི་ཚོགས་ཀྱིའོ། །བཛྲ་པྲ་བརྟ་ཀ་ཞེས་བྱ་བ་ནི་རྡོ་རྗེ་འཁོར་ལོའི་ཚོགས་ཀྱི་སྙིང་པོའོ། །ཡིད་ལ་འདོད་པའི་ཆོ་གའི་སྦྱོར་བས་ལས་འདི་དག་ཐམས་ཅད་རབ་ཏུ་སྒྲུབ་པར་བྱེད་པར་འགྱུར་རོ། །དེ་ནས་ཕྱིའི་དཀྱིལ་འཁོར་གྱི་ལྷའི་སྣམ་བུའི་མེའི་མཚམས་སུ་ཁྲོ་བོའི་སྒེག་མོའོ། །བདེན་བྲལ་དུ་བཞད་མའོ། །རླུང་གི་མཚམས་སུ་གླུ་མ། དབང་ལྡན་གྱི་མཚམས་སུ་གར་མ། ཤར་ཕྱོགས་ཀྱི་སྒོའི་དབུས་སུ་རྡོ་རྗེ་ལྕགས་ཀྱུ་མ་ཁྲོ་བོ་དང་བཅས་པ། ལྷོ་སྒོར་རྡོ་རྗེ་ཞགས་པ་མ། ནུབ་ཏུ་རྡོ་རྗེ་ལྕགས་སྒྲོག་མ། བྱང་གི་སྒོའི་དབུས་སུ་རྡོ་རྗེ་དྲིལ་བུ་མ། རྡོ་རྗེ་སེམས་
དཔའི་དཀྱིལ་འཁོར་ཆེན་པོ་བཤད་པའི་སྙིང་པོས་བྲི་བར་བྱའོ། །ཡང་ཕྱིའི་དཀྱིལ་འཁོར་གྱི་ལྷའི་སྣམ་བུ་དང་ཉེ་བའི་ནང་གི་གནས་ཀྱི་མེའི་མཚམས་སུ་མིང་པོ་གསུམ་གྱི་དཀྱིལ་འཁོར། བདེན་བྲལ་གྱི་མཚམས་སུ་སྲིང་མོ་བཞིའི་དཀྱིལ་འཁོར། རླུང་གི་མཚམས་སུ་ཀླུའི་དཀྱིལ་འཁོར་དང། དབང་ལྡན་གྱི་མཚམས་སུ་སྡུག་བསྔལ་གདོན་པའི་དཀྱིལ་འཁོར་འོག་ནས་བཤད་པའི་ཆོ་གས་བྲི་བར་བྱའོ། །དེ་ལ་རྡོ་རྗེ་མེ་ལྟར་འབར་བ་སྐུ་མདོག་སྔོ་བ། ཞལ་ཁྲོ་བ་དང་བཅས་པས་བཞད་པ། མཆེ་བ་ཅུང་ཟད་གཙིགས་པ། གཡོན་པའི་རྡོ་རྗེ་ཁུ་ཚུར་ཁྲོ་བོའི་དྲིལ་བུ་དང་བཅས་པས་བསྙེམས་པའི་ཚུལ་གྱིས་འཆང་བ། ཕྱག་གཡས་པས་ཁྲོ་བོའི་རྡོ་རྗེ་བླངས་ཏེ་དྲེས་པས་གསོར་བར་བརྩོན་པ། སེམས་དཔའི་སྐྱིལ་མོ་ཀྲུང་གིས་བཞུགས་པ་འབར་བའི་ཕྲེང་བ་ཅན་འོད་ཟེར་འབར་བ་ཀུན་དུ་འཁྲུག་པ། སངས་རྒྱས་ལྔའི་རྡོ་རྗེ་ཕྲེང་བའི་ཅོད་པན་གྱིས་དབང་བསྐུར་བ། ཁྲོ་གཉེར་དང་བཅས་ཤིང་ཁྲོ་བོ་རྡོ་རྗེ་བལྟ་བས་གཟིགས་པའོ། །སྒེག་མོ་དང་རྡོ་རྗེ་ལྕགས་ཀྱུ་མ་སྐུ་མདོག་དཀར་མོ་རྡོ་རྗེ་མཚོན་ཆ་དང་མངའ་བསྣམས་པ། བཞད་མ་དང་ཞགས་པ་མ་སྐུ་མདོག་དཀར་པོ། མདུང་ཆེན་པོ་བསྣམས་པ་དང༌། ཁ་ཊྭཱཾ་ག་བསྣམས་པ་གླུ་མ་དང་ལྕགས་སྒྲོག་མ་སྐུ་མདོག་དཀར་ལྗང་རལ་གྲི་བསྣམས་པ། གར་མ་དང་དྲིལ་བུ་མ་སྐུ་མདོག་གསེར་བཙོ་མའི་མདོག་ཅན་ཞགས་པ་བསྣམས་པ་དང༌། བ་དན་སྣ་ཚོགས་བསྣམས་པའོ། །འདི་དག་ཐམས་ཅད་ཀྱང་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ། མཆེ་བ་ཅུང་ཟད་གཙིགས་པ། ཁྲོ་བ་དང་བཅས་པས་བཞད་པའི་ཞལ་རས་ཅན། ཁྲོ་གཉེར་དང་བཅས་པའི་ཁྲོ་བོ་རྡོ་རྗེ་ལྟ་བ་དང་ལྡན་པ། འོད་ཟེར་གྱི་ཕྲེང་བ་འབར་བ་ཀུན་དུ་འཁྲུག་པས་ཀྱང་སངས་རྒྱས་ལྔའི་རྡོ་རྗེ་ཕྲེང་བའི་ཅོད་པན་གྱིས་དབང་བསྐུར་བའོ། །གང་དུ་ཁྱད་པར་གྱི་ཚིག་མེད་པ་དེར་རྡོ་རྗེ་མཚོན་ཆ་འཛིན་མ་ཕྱག་གཡས་ཀྱིས་རྡོ་རྗེ་རྩེ་ལྔ་པ་གསོར་བ་ལ་བརྩོན་པ། ཕྱག་གཡོན་པས་གདན་ལ་བསྙེམས་པས་བཞུགས་པའོ། །མདུང་ཆེན་འཛིན་མ་ཕྱག་གཡས་ཀྱིས་རྩེ་གསུམ་བསྣམས་པ། ཕྱག་གཡོན་གྱིས་གདན་ལ་བསྙེམས་
པའོ། །རལ་གྲི་འཛིན་མ་ཕྱག་གཡས་ཀྱིས་རྡོ་རྗེ་ཁུ་ཚུར་གྱིས་རལ་གྲི་བསྣམས་པ། གཡོན་པའི་ཁྲོ་བོའི་ཁུ་ཚུར་རང་གི་ཐུགས་ཀར་འཇོག་པའི་སྡིགས་མཛུབ་མཛད་པ་ཞགས་པ་འཛིན་མ་གཡས་རྡོ་རྗེ་ཁུ་ཚུར་གྱིས་ཞགས་པ། ཕྱག་གཡོན་གྱིས་ཐོད་པ་བསྣམས་པའོ།། མདའ་འཛིན་མ་ཕྱག་གཡོན་གྱིས་རྡོ་རྗེ་གཞུ་བསྣམས་པའོ། གཡས་ཀྱི་མདའ་དང་བཅས་པའི་གཞུ་རྒྱུད་བཟུང་ནས་མདའ་འཕེན་པ། ཁ་ཊཱཾ་ག་འཛིན་པ། ཐོད་པའི་ཕྲེང་བའི་ཅོད་པན་སངས་རྒྱས་ཀྱི་གཙུག་གི་ནོར་བུས་བརྒྱན་པས་ཕྱག་གཡས་ཀྱིས་རྡོ་རྗེ་རྩེ་ལྔ་འབར་བ་རྩེ་མོར་བཏགས་པའི་ཁ་ཊྭཱཾ་ག་བསྣམས་པ། ཕྱག་གཡོན་གྱིས་གདན་ལ་བསྙེམས་ནས་བཞུགས་པའོ། །འཁོར་ལོ་འཛིན་མ་ཕྱག་གཡས་ཀྱི་གུང་མོས་རྡོ་རྗེ་འཁོར་ལོ་རྩིབས་བརྒྱད་པ་བསྟོད་པའི་ཚུལ་དུ་བསྣམས་པ། ཕྱག་གཡོན་གྱིས་གདན་ལ་བསྙེམས་པ། བ་དན་སྣ་ཚོགས་འཛིན་མ། ཕྱག་གཡས་ཀྱིས་དྲིལ་བུ་འདབ་མ་སྣ་ཚོགས་ཅན་བཏགས་པ་གཡོན་རྡོ་རྗེ་ཁུ་ཚུར་དྲིལ་བུ་དང་བཅས་པ་དཀུར་བསྟན་ཏེ་བསྙེམས་པར་བཞུགས་པའོ། །སྒེག་མོ་ལ་སོགས་པ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་ལས་འདིར་ཁྲོ་བོ་དང་བཅས་པས་བཞུགས་པའོ། །རྡོ་རྗེ་གཙུག་ཏོར་ལ་སོགས་པ་རྣམས་ཀྱི་ནི་རྡོ་རྗེ་ཁུ་ཚུར་གཉིས་ལས་བྱུང་བའི་ཕྱག་རྒྱ་ཆེན་པོའོ། །དེ་ལ་རྡོ་རྗེ་གཙུག་ཏོར་བཞི་ནི་སྐུ་མདོག་སྔོ་བ་གཡས་པའི་ཁུ་ཚུར་གྱིས་རྡོ་རྗེ་གཙུག་ཏོར་བསྣམས་པ། གཡོན་པའི་ཁུ་ཚུར་གྱིས་སྡིགས་མཛུབ་བྱེད་པ་ལ་བརྩོན་པའོ། །རྡོ་རྗེ་སྨིན་མཚམས་རིགས་པའི་རྒྱལ་པོ་བཞི་ནི་སྐུ་མདོག་དཀར་པོ་ཕྱག་གཡས་པས་མཛོད་སྤུ་དཀར་པོ་བསྡམས་པ། གཡོན་པའི་ཁུ་ཚུར་གྱི་མཛུབ་མོས་སྡིགས་མཛུབ་བྱེད་པ་ལ་བརྩོན་པའོ། །རིག་པ་མཆོག་སྐུ་མདོག་སྔོ་བ་ཆོས་ཀྱི་ཧཱུཾ་མཛོད་ཀྱི་ཚུལ་ཅན་གཡས་པའི་ཁུ་ཚུར་གྱིས་རྡོ་རྗེ་པདྨ་བསྣམས་པ། གཡོན་པའི་རྡོ་རྗེ་ཁུ་ཚུར་གྱིས་སྡིགས་མཛུབ་བྱེད་པ་ལ་བརྩོན་པ། ཁྲོ་བོ་ཊིཀྐ་སྐུ་མདོག་སྔོ་བ། ཁུ་ཚུར་གཉིས་རྡོ་རྗེ་མདའ་འཕེན་ཞིང་བཞུགས་པའོ། །གཤིན་རྗེ་གཤེད་སྐུ་མདོག་ནག་པོ་གཡོན་པའི་མཛུབ་མོས་སྡིགས་མཛུབ་མཛད་ཅིང་གཡས་པའི་ཁུ་ཚུར་གྱིས་རལ་གྲི་བསྣམས་ནས་གདུག་པ་ཐམས་ཅད་
རྣམ་པར་དཀྲུགས་པའོ། །ཁྲོ་བོ་ཀ་ནི་སྐུ་མདོག་དམར་བ་གཡས་ཀྱི་ཁུ་ཚུར་གྱིས་རལ་གྲི་བསྣམས་པ། གཡོན་པའི་མཛུབ་མོས་སྡིགས་མཛུབ་མཛད་པའོ། །རྡོ་རྗེ་ལྕགས་ཀྱུ་མདོག་སྔོ་བ། གཡས་པའི་ཁུ་ཚུར་གྱིས་རྡོ་རྗེ་ལྕགས་ཀྱུ་བསྣམས་པ། གཡོན་པའི་ཁུ་ཚུར་གྱི་མཛུབ་མོས་དེ་བཞིན་དུ་སྡིགས་མཛུབ་མཛད་པ། རྡོ་རྗེ་ཞགས་པ་སྐུ་མདོག་སེར་པོ་གཡས་པའི་ཁུ་ཚུར་གྱིས་ཞགས་པ་བསྣམས་པ། གཡོན་པའི་མཛུབ་མོས་དེ་བཞིན་དུ་སྡིགས་མཛུབ་མཛད་པའོ། །རྡོ་རྗེ་ཀཱི་ལི་ཀཱི་ལ་སྐུ་མདོག་ལྗང་གུ་ཕྱག་གཉིས་ཁུ་ཚུར་དུ་བྱས་པས་རང་གི་ཐུགས་ཀར་རྡོ་རྗེ་རྩེ་ལྔ་པ་འཁྱུད་པའི་ཚུལ་གྱིས་བཞུགས་པའོ། །རྡོ་རྗེ་བསྙེམས་པ་སྐུ་མདོག་སྔོ་བ་ཁུ་ཚུར་གཉིས་ཀྱིས་རྡོ་རྗེ་གཉིས་བསྣམས་ཏེ་བསྙེམས་ཚུལ་གཉིས་མཛད་པས་བཞུགས་ཤིང་དཔུང་པ་གཡོན་དུ་འདུད་པའོ། །རྡོ་རྗེ་བསྡམས་པ་སྐུ་མདོག་གསེར་པོ་གཡས་པའི་ཁུ་ཚུར་གྱིས་རྡོ་རྗེ་བསྣམས་ནས་གཡོན་པའི་ཁུ་ཚུར་གྱིས་བསྡིགས་པར་མཛད་པ་ལ་བརྩོན་པའོ། །རྡོ་རྗེ་ཁུ་ཚུར་སྐུ་མདོག་པདྨ་ལྟར་དམར་སྐྱ་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་དང་བཅས་པའི་རྡོ་རྗེ་ཁུ་ཚུར་གྱིས་སྡིག་མཛུབ་མཛད་པ་ལ་བརྩོན་པའོ། །རྡོ་རྗེ་སྡེ་སྐུ་མདོག་དཀར་དམར་གཡས་པའི་ཁུ་ཚུར་གྱིས་རྡོ་རྗེ་པདྨ་བསྣམས་པ། གཡོན་པའི་ཁུ་ཚུར་གྱིས་དེ་བཞིན་དུ་སྡིགས་མཛུབ་མཛད་པའོ། །གཙུག་འཕྱང་སྐུ་མདོག་དམར་པོ་མདའ་དང་གཞུ་བསྣམས་པ་རྡོ་རྗེའི་མདའ་འཕེན་པས་གདུག་པ་ཐམས་ཅད་གསོད་པའོ། །རྡོ་རྗེ་ཕྱག་མཚན་སྐུ་མདོག་སྔོ་བ། གཡས་པའི་ཁུ་ཚུར་གྱིས་རྡོ་རྗེ་བསྡམས་པ། གཡོན་པའི་ཁུ་ཚུར་གྱི་མཛུབ་མོས་གདུག་པ་ཐམས་ཅད་ལ་ཡང་དག་པར་བསྡིགས་ཏེ་འདུག་པ་མཛད་ཅིང་བཞུགས་པའོ། །རྡོ་རྗེ་རྐང་གདུབ་སྐུ་མདོག་དམར་པོ་གཡས་པའི་ཁུ་ཚུར་གྱིས་རྡོ་རྗེ་རྐང་གདུབ་བསྣམས་པ། གཡོན་པའི་ཁུ་ཚུར་གྱིས་གདུག་པ་ཐམས་ཅད་ཀུན་དུ་བསྡིགས་ནས་བརྒྱལ་བར་མཛད་པའོ། །རྡོ་རྗེ་སྒྲོག་སྐུ་མདོག་དཀར་དམར་གཡས་དང་གཡོན་གྱི་ཁུ་ཚུར་གཉིས་ཀྱིས་རྡོ་རྗེ་ལྕགས་སྒྲོག་བསྣམས་པས་གདུག་པ་ཐམས་ཅད་བཅིང་བའི་ཚུལ་གྱིས་བཞུགས་པའོ། །རྡོ་རྗེ་རྣོ་བ་སྐུ་མདོག་སྔོ་བ་གཡས་པའི་
རྡོ་རྗེ་ཁུ་ཚུར་གྱི་མཛུབ་མོས་གདུག་པ་ཐམས་ཅད་རབ་ཏུ་བསྡིགས་པའོ། །རྡོ་རྗེ་འབེབས་པ་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་བསྡམས་ནས་གསོར་བ། །གཡོན་པའི་རྡོ་རྗེ་ཁུ་ཚུར་གྱིས་གདུག་པ་ཐམས་ཅད་བསྡིགས་ཤིང་བཞུགས་པའོ། །འདི་དག་ཐམས་ཅད་ཀྱང་གཡོན་བརྐྱང་བའི་ཚུལ་གྱིས་བཞུགས་པ། འོད་ཟེར་འབར་བ་ཀུན་དུ་འཁྲུག་པ། མཆེ་བ་ཅུང་ཟད་གཙིགས་པ། ཁྲོ་པ་དང་བཅས་པ་བཞད་པའི་ཞལ་རས་ཅན། ཁྲོ་གཉེར་དང་བཅས་ཤིང་ཁྲོ་བའི་ལྟ་བ་དང་ལྡན་པའི་སངས་རྒྱས་ལྔ་དང༌། རྡོ་རྗེ་ཕྲེང་བས་དབང་བསྐུར་བ་དང་ལྡན་པ་སྣ་ཚོགས་པའི་གདན་ལ་བཞུགས་པའོ། །རིམ་པ་གཉིས་པ་ལ་སྔགས་རྣམས་ནི་གཡས་ཀྱི་ཁུ་ཚུར་གྱི་ས་དམ་ཚིག་གི་འཆིང་བ་གཡོན་གྱིས་སྔ་མ་བཞིན་དུ་སྡིགས་མཛུབ་ལ་བརྩོན་པ་རྡོ་རྗེ་ཁུ་ཚུར་གཟུགས་ཅན་ནོ། །དེ་རྣམས་ཀྱི་ལྷ་མོ་ནི་རྡོ་རྗེ་ཁུ་ཚུར་གཉིས་ཀྱིས་པི་ཝང་ཐོགས་ཏེ་བརྡུང་བ་དང། རྡོ་རྗེ་གླུ་མའི་གཟུགས་ཅན་དུ་གཡོན་ཕྱོགས་ཉིད་ལ་གནས་པའོ། །རྡོ་རྗེ་མགོན་པོ་ནི་བྱང་ཆུབ་སེམས་དཔའི་གཟུགས་ཅན་གཡས་པའི་ཁུ་ཚུར་གྱིས་རྡོ་རྗེ་བཟུང་སྟེ་སྟོད་དེ་མཆོད་པ་དང་གཡོན་པས་གདན་ལ་བསྙེམས་ཏེ་གནས་པའོ། །དེ་རྣམས་ཀྱི་ལྷ་མོ་ཉིད་ཀྱང་དེའི་གཟུགས་འཆད་བ་ཉིད་ཀྱིས་གཡོན་ལོགས་ན་གནས་པའོ། །ཡང་སྲད་བུ་གསུམ་པར་རྡོ་རྗེ་རྒྱལ་པོ་རྣམས་ནི་རྡོ་རྗེ་སེམས་དཔའི་ཕྱག་རྒྱའི་ཚུལ་ཅན་གསེར་གྱི་མདོག་འདྲ་བ། ལྷ་མོ་བཞིའི་དབུས་ན་གནས་པ་སྟེ། ལྷ་མོ་དེ་རྣམས་ཀྱང་དེའི་ཚུལ་འཛིན་པ་ཉིད་དོ། །ཡང་སྲད་བུ་བཞི་པར་རྡོ་རྗེ་ཆེན་པོ་འཇོམས་མ་རྣམས་ནི་སྒེག་པ་དང༌། བཞད་པ་དང༌། གླུ་ལེན་པ་དང༌། གར་བྱེད་པ་རྡོ་རྗེའི་རོལ་མོ་ཆེན་པོ་གླུ་ལེན་པའི་ཚོགས་རྣམས་དང་ལྷན་ཅིག་གནས་ཤིང་ཇི་ལྟར་མངོན་པར་འདོད་པའི་གྲངས་དང་ལྡན་པར་ཤེས་པའོ། །ཡང་སྲད་བུ་ལྔ་པའི་ནང་དུ་རྒྱལ་ཕྲན་རྣམས་སྔར་བཤད་པའི་མཚན་ཉིད་དང་ལྡན་པར་ཤེས་པར་བྱའོ། །སྒོ་བ་རྣམས་ནི་མདོག་སྔོ་བ། གཡོན་པའི་རྡོ་རྗེ་ཁུ་ཚུར་དཀུར་བརྟེན་ནས་གཡས་པས་རྡོ་རྗེ་དབྱུག་པ་འཛིན་པའོ། །རྡོ་རྗེ་ཚོགས་ནི་སྐུ་མདོག་སྔོ་བའོ། །གཡོན་པའི་མཛུབ་མོ་སྡིགས་མཛུབ་བྱེད་པར་བརྩོན་པ། གཡས་པའི་
རྡོ་རྗེ་ཁུ་ཆུར་གྱིས་རྡོ་རྗེ་ཐོགས་ནས་མདུན་དུ་བསྡུ་བ་དང་ཕྱིར་འགྱེད་པའི་ཚུལ་གྱིས་གནས་པའི་ཁྲོ་བོ་རྣམས་ནི་མདོག་སྣ་ཚོགས་པ་གཡས་པའི་ཁུ་ཚུར་རྡོ་རྗེ་དང་བཅས་པས་སྡིགས་མཛུབ་བྱེད་པ་ལ་བརྩོན་པ། གཡོན་དཀུར་བརྟེན་པར་གནས་པའོ། །སྒོ་བ་ལ་སོགས་པ་འདི་དག་ཐམས་ཅད་གཡོན་བརྐྱང་བའི་གནས་པས་གནས་པ། སྤྱན་དམར་ཞིང་འཇིགས་སུ་རུང་བ། འོད་ཟེར་འབར་བ་ཀུན་དུ་འཁྲུག་པ། ཁྲོ་གཉེར་དང་བཅས་ཤིང་སྨིན་མ་བསྡུས་པ། ཞལ་གྱི་མཆེ་བ་གཙིགས་པའོ། རིམ་པ་དྲུག་པ་ལ་ཕོ་ཉ་རྣམས་ནི་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་འོད་མའི་ལྷུག་མ་གཉིས་ཐོགས་པའོ། །གནོད་སྦྱིན་རྣམས་ནི་གཡོན་པའི་ཁུ་ཚུར་གྱི་མཛུབ་མོས་སྡིགས་མཛུབ་བྱེད་པ་ལ་བརྩོན་པ་གཡས་པའི་ཁུ་ཚུར་གྱིས་དྲིལ་བུ་འཛིན་པའོ། །སྲིན་པོ་རྣམས་ནི་གཡོན་བའི་ཁུ་ཚུར་གྱི་མཛུབ་མོས་སྡིགས་མཛུབ་བྱེད་པ། གཡས་པའི་ཁུ་ཚུར་གྱིས་རྡོ་རྗེ་མཆེ་བ་ཐོགས་པའོ། །མངག་གཞུག་པ་རྣམས་ནི་གཡོན་པའི་ཁུ་ཚུར་གྱི་མཛུབ་མོས་སྡིགས་མཛུབ་བྱེད་པ། གཡས་རལ་གྲི་འཛིན་པའོ། །རིམ་པ་བདུན་པར་ནི་དབང་ཕྱུག་ཆེན་པོ་ལ་སོགས་པ་འཇིག་རྟེན་པ་དགོད་དོ། །འདི་དག་ཐམས་ཅད་ཀྱང་གཡོན་བརྐྱང་བའི་གནས་པས་འདུག་ལ། འོད་ཟེར་འབར་བ་ཀུན་དུ་འཁྲུག་པ། །གདོང་ལ་མཆེ་བ་རྣམ་པར་གཙིགས་པ། དཔྲལ་བ་ཁྲོ་གཉེར་དང་བཅས་ཤིང་བཅུམ་པ་མིག་དམར་ལ་འཇིགས་སུ་རུང་བའོ། །རྡོ་རྗེའི་རིགས་ཐམས་ཅད་ཀྱང་རྡོ་རྗེ་ཕྲེང་བས་སངས་རྒྱས་ལྔ་དང་ལྡན་པའི་ཅོད་པན་གྱིས་དབང་བསྐུར་བ་ཡིན་ནོ། །སྲིན་པོ་ལ་སོགས་པ་ནི་ཀུན་དུ་གདུག་པའི་གཟུགས་ཅན་ཐོད་པའི་ཕྲེང་བ་ཅོད་པན་ཡིན་པར་ཤེས་པར་བྱའོ། །རྡོ་རྗེ་ཕྲ་མན་མ་བཞི་ནི་ཁ་དོག་སྣ་ཚོགས་པ། གཡས་ཀྱི་ཁུ་ཚུར་གྱིས་རྩེ་གསུམ་པ་ཁ་ཊྭཱཾ་ག་དང་དབྱུག་པ་དང༌། བ་དན་ཐོགས་པ། གཡོན་གྱིས་ཐོད་པ་ཐོགས་ཤིང་གར་བྱེད་པའི་ཚུལ་གྱིས་གནས་པར་ཤེས་པར་བྱའོ། །དེ་ལྟར་དཀྱིལ་འཁོར་བྲིས་ནས་ཕྱི་དྲོའི་ཚེ་དགོངས་ཀའི་དུས་སུ་རྡོ་རྗེ་ཧཱུཾ་མཛད་ཀྱི་སྦྱོར་བས་རྡོ་རྗེ་རིགས་ཀྱི་དམ་ཚིག་གི་ཕྱག་རྒྱས་ཁྲོ་བོ་ཏི་རནྟི་རི་བཅིངས་ལ། དེ་ཉིད་ཀྱིས་མེ་ཏོག་གི་ཕྲང་བ་བླངས་ཏེ་ཧཱུཾ་བཞི་ཟློས་ཤིང༌། རྡོ་རྗེ་ཤུགས་ཀྱིས་འཇུག་
པར་བྱའོ། །དེ་ལྟར་ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར་རྡོ་རྗེ་དྲིལ་བུ་དཀྲོལ་ཞིང་དཀྱིལ་འཁོར་བསྐོར་བ་ལན་བདུན་བྱའོ། །དེ་ནས་བཞུགས་ལ་དཀྱིལ་འཁོར་མ་ཚང་བ་ནི་བཀང་བར་བྱའོ། །ལྷག་པ་ནི་བསལ་བར་བྱའོ། །དེ་ནས་མེ་ཏོག་དེ་ཡི་གེ་ཧཱུཾ་གིས་བཅོམ་ལྡན་འདས་ལ་ཕུལ་ལ་དེ་ཉིད་ཟློས་ཤིང་གར་བྱས་ལ་རང་གི་མགོ་ལ་བཅིང་བར་བྱའོ། །དེ་ནས་དབུས་སུ་གནས་གྱུར་ནས། །རྡོ་རྗེ་སློབ་དཔོན་མཉམ་པར་གཞག །རྡོ་རྗེ་སྒོ་རྣམས་བཞི་པོ་ནི། །ཡིད་ཀྱིས་དབྱེ་བ་ཉིད་དུ་བྱ། །ཨོཾ་བཛྲ་དྷ་རོ་དྒྷ་ཊ་ས་མ་ཡ་པྲ་བེ་ཤ་ཡ་ཧཱུཾ་ཞེས་བྱ་བ་ཕྱག་རྒྱ་དང་བཅས་པར་བྱའོ། དེ་ནས་འདིའི་ཕྱག་རྒྱ་བཤད་པར་བྱ་སྟེ། རྡོ་རྗེ་མཛུབ་མོ་ཡང་དག་སྦྱར། །བཀན་ཏེ་རབ་ཏུ་བསྡམས་ནས་སུ། །རབ་ཏུ་ཁྲོས་ནས་དབྱེ་བ་ནི། སྒོ་དབྱེ་བ་ཡི་མཆོག་ཡིན་ནོ། །དེ་ནས་རྡོ་རྗེ་མེ་ལྟར་འབར་བའི་ང་རྒྱལ་གྱིས་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་པར་བྱའོ། །དེ་ནས་རྡོ་རྗེ་མེ་ལྟར་འབར་བའི་མདུན་དུ་སེམས་དཔའི་སྐྱིལ་མོ་ཀྲུང་གིས་འདུག་ལ་རྡོ་རྗེ་དྲིལ་བུ་དང་བཅས་པའི་རྡོ་རྗེ་མེ་ལྟར་འབར་བའི་ལྕགས་ཀྱུ་ཆེན་པོས་བཅོམ་ལྡན་འདས་འཁོར་དང་བཅས་པའི་སྔགས་ཀྱིས་དཀྱིལ་འཁོར་དུ་གཞུག་པར་བྱའོ། །ཨོཾ་བཛྲ་ཛྭ་ལ་ཨ་ན་ལཱ་རྐ་ས་ཧི་ཛ་སརྦ་བཛྲ་ཀུ་ལ་ནི་པྲ་བེ་ཤ་ཡ་ཧཱུཾ་སརྦ་མུ་དྲ་ག་དཾ་བནྡྷ་ན་ཏྲཊ། སརྦ་ས་མ་ཡ་ས་ཏ་ཡ་ཕཊ། སརྦ་དུཥྚཱ་ན་ཧ་ན་པ་ཙ་བྷསྨིཾ་ཀུ་རུ་མ་ཧཱ་ཀྲོ་དྷ་ཨགྣི་བཛྲ་ནི་ཧཱུཾ་ཕཊ། ཨ་ཨ་ཨ་ཨ། དེ་ནས་རྡོ་རྗེ་གནོད་སྤྱིན་གྱིས་བགེགས་བསལ་བ་ལ་སོགས་པ་བྱས་ལ། རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ། རྡོ་རྗེ་སྲུང་བས་བསྲུང་བ་ཐམས་ཅད་ཡང་དག་པར་བསྲུངས་ནས་ཧཱུཾ་གིས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ལ་རྡོ་རྗེ་མེ་ལྟར་འབར་བ་ལ་སོགས་པ་རང་གི་དམ་ཚིག་གི་ཕྱག་རྒྱ་རྣམས་རིམ་པ་འདིས་བསྒྲུབ་པར་བྱའོ། །རྡོ་རྗེ་མེ་ལྟར་འབར་བ་དམ་ཚིག་གི་ཕྱག་རྒྱ་བཅིངས་ནས་འདི་སྐད་ཅེས་བརྗོད་པར་བྱའོ། །ཨོཾ་ཧཱུཾ་དྲྀཤྱ་ས་མ་ཡ་སྟྭཾ་ཧི་ས་མ་ཡ་སྟཾ་ཨ་ཧཾ་ཛཿ་ཧཱུཾ་བཾ་ཧོཿ་ཏཾ་ཧི། དེ་བཞིན་དུ་བཛྲ་གྷཏྚེ་ཧོ་དྲྀཤྱ་ས་མ་ཡ་སྟྭ་ཨ་ཧཾ་ཛཿཧཱུཾཿབཛྲ་གྷཎྚེ་ཧོ་ཞེས་བྱ་བའི་བར་དུ་རྡོ་རྗེ་དྲིལ་བུའི་དམ་ཚིག་གི་ཕྱག་རྒྱ་བཅིངས་ནས་
སྔགས་བརྗོད་པ་རྡོ་རྗེ་དྲིལ་བུ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་ཐམས་ཅད་ཀྱིས་རྒྱས་བཏབ་ལ་སངས་རྒྱས་ལྔའི་ཅོད་པན་གྱིས་ཕྱག་རྒྱ་དང་རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱས་བཅོམ་ལྡན་འདས་འཁོར་དང་བཅས་པ་དབང་བསྐུར་ཏེ་ཕྱག་བྱས་པ་རིམ་པ་འདིས་མཆོད་པ་ཐམས་ཅད་ཀྱིས་ཡང་དག་པར་མཆོད་པར་བྱའོ། །དང་པོར་རེ་ཞིག་ཇི་སྐད་བཤད་པའི་མཚན་ཉིད་དང་ལྡན་པའི་བུམ་པ་ལ་རྡོ་རྗེ་མཚོན་ཆ་མ་ལ་སོགས་པ་དམ་ཚིག་གི་ཕྱག་རྒྱས་ཡོངས་སུ་བཟུང་བའི་མེ་ཏོག་གི་ལྕུགས་མ་ལ་རྣམས་ཀྱི་སྔགས་ལན་བརྒྱ་རྩ་བརྒྱད་བཟླས་ལ་དཀྱིལ་འཁོར་གྱི་ཕྱི་རོལ་ཀུན་དུ་གཞག་པར་བྱའོ། །དེ་བཞིན་དུ་བུམ་པ་གང་བ་ལ་ཡང་བཅོམ་ལྡན་འདས་ཀྱི་བུམ་པ་དང༌། རྡོ་རྗེ་གནོད་སྦྱིན་དང་རྡོ་རྗེ་མེ་དང་རྡོ་རྗེ་མེ་ལྟར་འབར་བ་དེ་བཞིན་དུ་བཟླས་ལ་ཡང་ཨོཾ་མ་ཧཱ་སུ་ཁ་བཛྲ་མོ་གྷ་ས་མ་ཡོང་ཀ་སིདྡྷ་ཨབྷི་ཥི་ཉྩ་སརྦ་སུ་ཁ་སོ་མ་ན་ས་སྱི་ན། ཨ་དད་ཀུ་རུ་ཛཿ་ཧཱུཾ་བཾ་ཧོཿ་ཨ་ཞེས་བྱ་བ་དམ་ཚིག་གི་ཕྱག་རྒྱ་དེ་ཉིད་ལན་ཉི་ཤུ་རྩ་བརྒྱད་བཟླས་ལ་རྡོ་རྗེ་མེ་ལྟར་འབར་བའི་མདུན་དུ་གཞག་པར་བྱའོ། །ཡང་གཉིས་པ་ཡི་གེ་ཧཱུཾ་བརྒྱ་རྩ་བརྒྱད་བཟླས་ལ་དང་པོ་འཇུག་པའི་སྒོར་བལྟས་པས་ཕྱི་རོལ་གྱི་དཀྱིལ་འཁོར་དུ་གཞག་པར་བྱའོ། །རས་ཟུང་འབུམ་མམ་ཁྲིའམ་སྟོང་ངམ་བརྒྱ་འམ་རེ་རེ་ཞིང་ཟུང་རེ་རེ་འམ། ཐམས་ཅད་ལ་ཟུང་གཅིག་དང་བླ་རེ་དང་གདུགས་དང་རྒྱལ་མཚན་དང་བ་དན་སྣ་ཚོགས་པ་རྡོ་རྗེ་རིན་ཆེན་དང་ཨོཾ་ཧཱུཾ་གཉིས་ཡོངས་སུ་བཟླས་ཏེ་དབུལ་བར་བྱའོ། །མེ་ཏོག་གི་ཤིང་བརྒྱའམ་ཤིང་བཞི་འམ། །མེ་ཏོག་ཐམས་ཅད་མེ་ཏོག་གི་རིག་པས་དབུལ་བ་དང༌། དེ་བཞིན་དུ་དྲིའི་རིག་པས་དྲི་ཐམས་ཅད། བདུག་སྤོས་ཀྱི་རིག་པས་བདུག་སྤོས་ཐམས་ཅད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱདྱ་ནུཏྤནྣ་ཏྭཱད་ཅེས་བྱ་བ་བཟླས་པའི་ཁ་ཟས་ཐམས་ཅད་དང༌། མར་མེའི་རིག་པ་བཟླས་པ་ས་མར་འབུམ་བཅོམ་ལྡན་འདས་འཁོར་དང་བཅས་པ་ལ་དབུལ་བར་བྱའོ། །ཡང་ན་བཛྲ་སྥ་ར་ཎ་ཁཾ་ཞེས་བྱ་བ་མཆོད་པའི་སྔགས་མངོན་པར་བཟླས་ལ་པི་ཝང་ལ་སོགས་པ་རོལ་མོའི་ཕྱག་རྒྱ་དང༌། ཧཱུཾ་ཟློས་ཤིང་དབུལ་བར་བྱའོ། །མཆོད་པ་ལྷག་མ་རྣམས་ནི་སྔར་བཤད་པ་ལས་ཤེས་པར་བྱའོ། །དེ་ནས་ཁྲོ་བོ་
མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཁྲོ་བོའི་ཁུ་ཚུར་ལས་ཕྱུང་བས་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་དེ། ཡིད་ཀྱིས་མཆོད་པ་ཡང་སྔ་མ་བཞིན་དུ་བྱས་ལ་ཕྱག་བཞི་བྱའོ། །དེ་ནས་ཕྱི་རོལ་དུ་གཏོར་མ་སྦྱིན་ནོ། །དེ་ནས་རྡོ་རྗེ་གནོད་སྦྱིན་དང་རྡོ་རྗེ་མེ་དང་མར་གྱི་སྤྱིན་སྲེག་སྔ་མ་བཞིན་དུ་བྱས་ལ། ཐབ་ཀྱི་དབུས་སུ་རྡོ་རྗེ་མེ་ལྟར་འབར་བའི་དཀྱིལ་འཁོར་གྱི་སྦྱོར་བ་ཡིད་ཀྱིས་བཀོད་ལ་ཡི་གེ་ཧཱུཾ་གིས་མར་གྱི་སྦྱིན་སྲེག་བརྒྱ་རྩ་བརྒྱད་དབུལ་བར་བྱའོ། །དེ་ནས་རྡོ་རྗེ་མཚོན་ཆ་འཛིན་མ་ལ་སོགས་པའི་སྙིང་པོས་སྦྱིན་སྲེག་ལན་བདུན་བྱའོ། །དེ་ནས་མེ་ཏོག་དོར་ལ་དཀྱིལ་འཁོར་དེ་ཧཱུཾ་ཟློས་ཤིང་བྲི་བའི་དཀྱིལ་འཁོར་དང་གཅིག་ཏུ་བྱའོ། །དེ་ནས་ཕྱག་འཚལ་བ་སྔོན་དུ་འགྲོ་བས་སྡོམ་པ་བཟུང་ལ། ཨོཾ་སརྦ་ཏ་ཐཱ་ག་ཏ་མ་ཧཱ་བོ་དྷི་ཙིཏྟ་ཨུཏྤཱ་ད་ཨཱ་མི་ཞེས་བྱ་བ་ལ་སོགས་པ་དེ་བཞིན་དུ་བྱང་ཆུབ་ཏུ་སེམས་ཆེན་པོ་བསྐྱེད་པ་བྱས་ལ་སུ་ར་ཏ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ་ཞེས་བྱ་བས་དེ་བཞིན་དུ་རང་གི་སྙིང་གར་རྡོ་རྗེ་བསྐྱེད་ལ་ཤར་སྒོར་བལྟས་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ་ཧཱུཾ་དང་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ཏེ་བཛྲ་བཛྲ་ཀརྨ་མུ་ཀ་ར་ཡ་ན་མཿ་ཤྲི་བཛྲ་རཱ་ག་ས་མ་ཡ་ན་མཿ་ཁ་ཊྭཱཾ་ག་བཛྲ་པྲ་ལ་པྲ་ར་ན་མཿ་ཤིར་བཛྲ་གནྷ་ཙ་ལ་ཡ་ན་མཿ་ཞེས་བརྗོད་དེ་དཀྱིལ་འཁོར་དུ་ཞུགས་ལ་རྡོ་རྗེ་ལྕགས་ཀྱུ་མའི་སྙིང་པོ་ཡང་བརྗོད་ཅིང་རྡོ་རྗེ་ལྕགས་ཀྱུ་མས་བདག་ཉིད་བཀུག་པར་བསམ་པར་བྱའོ། །ཡང་ལྷོ་སྒོ་ནས་རྡོ་རྗེ་ཞགས་པ་མའི་སྙིང་པོ་ཡང་ཟློས་ཤིང་དེ་བཞིན་དུ་ཞུགས་ལ་རྡོ་རྗེ་ཞགས་པ་མས་བདག་ཉིད་བཅུག་པར་གྱུར་པར་བསམ་པར་བྱའོ། །དེ་ནས་ནུབ་སྒོ་ནས་རྡོ་རྗེ་ལྕགས་སྒྲོག་མའི་སྙིང་པོ་ཟློས་ཤིང་དེ་བཞིན་དུ་ཞུགས་ལ་རྡོ་རྗེ་ལྕགས་སྒྲོག་མས་བདག་ཉིད་བཅིང་བར་བསམ་མོ། །ཡང་བྱང་སྒོ་ནས་རྡོ་རྗེ་དྲིལ་བུ་མའི་སྙིང་པོ་ཟློས་ཤིང་དེ་བཞིན་དུ་ཞུགས་ལ་རྡོ་རྗེ་དྲིལ་བུ་མས་བདག་ཉིད་དབང་དུ་བྱས་པར་བསམ་པར་བྱའོ། །ཡང་དེ་བཞིན་དུ་ཤར་ཕྱོགས་ཀྱི་སྒོ་ནས་ཞུགས་ལ་དེ་ནས་འདི་སྐད་ཅེས་བརྗོད་པར་བྱའོ། །མ་ཧཱ་སུ་ར་ཏ་སུ་ཏྲི་དྷ་སུ་ཏོ་ཥོ་མེ་སུ་སུ་ཁོ་བཛྲ་ས་ཏྭ་
ཨདྱ་སི་དྷྱ་མཱཾ། དེ་ནས་ཁྲོས་པས་རྡོ་རྗེ་གསོར་ཞིང་ཁྲོ་གཉེར་དང་བཅས་པས་བྱའོ། །དེ་བཞིན་ཁྲོ་བོས་གདུལ་བྱ་ལ། རྡོ་རྗེ་བསྙེམས་པ་འཆང་འགྱུར་ནས། །རྡོ་རྗེ་ཧཱུཾ་མཛད་སྡིགས་མཛུབ་ནི། །ཡི་གེ་ཧཱུཾ་གིས་རབ་ཏུ་སྤྱར། །རྡོ་རྗེ་འཆང་ཆེན་དགྱེས་གྱུར་ཅིག །གདུག་པ་གདུལ་བས་རབ་ཏུ་དགྱེས། །དེ་ནས་དཀྱིལ་འཁོར་བསྐོར་བ་ལན་གསུམ་བྱས་ལ། བཅོམ་ལྡན་འདས་ཀྱི་མདུན་དུ་འདུག་སྟེ་དེ་ཁོ་ན་ཉིད་ལན་ཅིག་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། རྡོ་རྗེ་ཆེན་པོ་ནོར་ཆེ་བ། ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་སོགས་དིང་གྲུབ་མཛོད། །ཡང་འདི་སྐད་ཅེས་བརྗོད་དོ། །ཛཿ་ཧཱུཾ་བཾ་ཧོཿ་པྲ་སིདྡྷི་མཱཾ། དེ་ནས་རྡོ་རྗེའི་ཆུ་འཐུངས་ལ་གཡོན་པ་ཁྲོ་བོའི་ཁུ་ཚུར་གྱིས་སེམས་མའི་རྡོ་རྗེ་ཕྱེ་ལ་ཧཱུཾ་ཨ་ཞེས་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་ཧཱུཾ་གིས་མེ་ཏོག་དོར་བར་བྱའོ། །དེ་ནས་ཧཱུཾ་དེ་ཉིད་ཀྱིས་བླངས་ལ་རང་གི་མགོ་ལ་བཅིང་བར་བྱའོ། །དེ་ནས་ཡི་གེ་ཧཱུཾ་ཟློས་ཤིང་གདོང་གཡོགས་བཅིངས་པ་ལས་བཀྲོལ་ལ་ཧཱུཾ་ཞེས་བརྗོད་དེ། མིག་གཉིས་སུ་རྡོ་རྗེ་བཀོད་ལ། ཧེ་བཛྲ་པཱ་ཤྱ་ཞེས་བྱ་བས་དཀྱིལ་འཁོར་བལྟ་བར་བྱའོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་འཇུག་པའི་ཕྱག་རྒྱ་རང་གི་སྙིང་གར་དགྲོལ་བར་བྱའོ། །དེ་ནས་རྡོ་རྗེ་ཐལ་མོ་བསྐོར་ཏེ་ཤིས་པ་བརྗོད་པའི་ཚུལ་དུ་སྙིང་གར་བཞག་ལ་མཚན་བརྒྱ་རྩ་བརྒྱད་པས་བཅོམ་ལྡན་འདས་འཁོར་དང་བཅས་པ་བསྟོད་ནས་དེ་ནས་འདོད་ཆགས་རྡོ་རྗེ་མ་ལ་སོགས་པ་མཆོད་པ་བཞིའི་ཁྲོ་བོ་དང་བཅས་པ་དང་གླུ་དང་གར་རོལ་མོའི་མཆོད་པས་ཀྱང་བཅོམ་ལྡན་འདས་འཁོར་དང་བཅས་པ་ཡང་དག་པར་མཆོད་ལ། ཕྱིའི་དཀྱིལ་འཁོར་གྱི་ནང་དུ་སྣ་ཚོགས་པདྨ་ཤར་སྒོར་བལྟས་པ་བྲིས་ནས་རྡོ་རྗེ་མེ་ལྟར་འབར་པའི་ཕྱག་རྒྱ་ཆེན་པོ་པདྨ་དེར་འདུག་ལ་མཆོད་ཡོན་བླངས་ཏེ་དྲི་དང་མེ་ཏོག་ལ་སོགས་པས་བདག་ཉིད་མཆོད་ལ། ཁྲོ་བོའི་ཁུ་ཚུར་གྱིས་རྣམ་པར་རྒྱལ་པའི་བུམ་པ་ལས་ཆུ་བླངས་ལ། ཧཱུཾ་ཨོཾ་བཛྲ་ཨ་བྷི་ཥིཉྩ་ཞེས་བརྗོད་ཅིང་དེས་བདག་ཉིད་དབང་བསྐུར་བར་བྱ་ཞིང་ཆུ་དེ་བཏུང་བར་ཡང་བྱའོ། །དེ་ནས་སངས་རྒྱས་ལྔའི་དབང་བསྐུར་བའི་ཕྱག་རྒྱ་དང་རྡོ་རྗེ་ཕྲེང་བའི་
དབང་བསྐུར་ལ་ཕྱི་རོལ་གྱི་སངས་རྒྱས་ལྔའི་ཅོད་པན་དང་རྡོ་རྗེ་ཕྲེང་བའི་དབང་བསྐུར་བར་བྱའོ། །དེ་ནས་ཡི་གེ་གཉིས་ཀྱི་ཆོ་གས་གོ་བགོས་ལ་རྡོ་རྗེ་ཐལ་མོས་བཅོམ་ལྡན་འདས་ལ་ཕྱག་བྱས་ནས་རྡོ་རྗེ་དང་བདག་པོ་དང་མིང་གི་དབང་བསྐུར་བ་བཅོམ་ལྡན་འདས་ལས་བླང་བར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ་མཆོད་པ་རྣམ་པ་ལྔ་དང་རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་ལ་མཆོད་དེ། དེ་ཁོ་ན་ཉིད་དང་ཆོས་དང་དྲིལ་བུ་དང༌། དམ་ཚིག་བཟུང་ལ་ཚིགས་སུ་བཅང་པ་ལྔས་རྗེས་སུ་གནང་བ་དང་གཟེངས་བསྟོད་པ་དང་ལུང་བསྟན་པ་ཐོབ་པ་དང་རང་གི་སྙིང་པོ་དང་ཕྱག་རྒྱ་བཞིའི་ཡེ་ཤེས་བཅོམ་ལྡན་འདས་ལ་ཕྱག་བྱས་ལ་དེ་ལས་དེ་དག་མནོས་ནས་ཡང་བདག་བྱིན་གྱིས་བརླབས་པ་དང༌། འདི་ལྟར་མངོན་པར་འདོད་པའི་བཟླས་བརྗོད་བྱས་ནས། བཅོམ་ལྡན་འདས་ལ་མེ་ཏོག་ལ་སོགས་པས་ཡང་དག་པར་མཆོད་དེ་ཕྱིར་དབྱུང་བར་བྱའོ། །སློབ་དཔོན་ལས་ཀྱི་ཆོ་ག་རྒྱས་པ་རྫོགས་སོ།། །།དེ་ནས་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་བཤད་དོ། །རྡོ་རྗེ་མཆོད་ཡོན་བསྐོར་བཅིངས་ལ། །བསམ་པ་གཡོས་པར་གྱུར་པ་ཡིས། །མགོ་བོ་ལེགས་པར་བཏུང་གྱུར་པས། །དངོས་གྲུབ་ཐམས་ཅད་རབ་གྲུབ་བྱེད། །ཞུགས་ནས་དཀྱིལ་འཁོར་བསྐོར་ནས་ནི། །ལན་གསུམ་བྱས་ཏེ་འདི་སྐད་བརྗོད། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ཀྱང་འགྲུབ་པར་མཛོད། །དེ་ནས་དུས་ཀྱི་མཆོད་པ་ཡིས། །བདེ་བ་ཆེན་པོ་ཡང་དག་མཆོད། །དེ་བཞིན་རྡོ་རྗེའི་དབང་བསྐུར་ལ། སློབ་མ་བླངས་ཏེ་འཇུག་པར་བྱ། །དེ་ལ་སློབ་མ་བསླབ་པའི་གཞི་ལྔ་ཡོངས་སུ་བླང་པ་འམ། །དགེ་སྦྱོང་གི་སྡོམ་པ་ཡོངས་སུ་བཟུང་བས་རིག་པའི་སྔོམ་པ་བླངས་ལ། སློབ་དཔོན་ལ་ཕྱག་བྱས་ནས་འདི་སྐད་ཅེས་བརྗོད་པར་བྱའོ། །དགའ་ཆེན་ཁྱོད་བདག་སྟོན་པ་བས། སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་སྩོལ། །དེ་ནས་གནོད་སྤྱིན་གྱི་ཁྲོ་བོ་ཡོངས་སུ་བཟླས་པའི་རས་སྔོན་
པོའི་སྟོད་གཡོགས་དང་སྨད་གཡོགས་བྱས་ནས། ཡང་རྡོ་རྗེ་གནོང་སྦྱིན་དང་སྒོ་སྲུང་བཞི་ཡོངས་སུ་བཟླས་པའི་དར་སྔོན་པོས་གདོང་གཡོགས་ལ་མེ་ཏོག་གི་ཕྲེང་བ་བཏགས་ཤིང་ཁ་དྲི་ཞིམ་པར་བྱས་ལ་ཕྱག་བཞི་སྔོན་དུ་འགྲོ་བ་དང༌། །སྡོམ་པ་འཛིན་དུ་གཞུག་གོ །དེ་ནས་སྔ་མ་བཞིན་དུ་བྱང་ཆུབ་གྱི་སེམས་ཆེན་པོ་བསྐྱེད་དུ་བཅུག་ལ་དེ་བཞིན་དུ་དེའི་སྙིང་གར་རྡོ་རྗེ་བསྐྱེད་ནས་ཕྱི་རོལ་ན་གནས་པའི་བུམ་པའི་ཆུས་བདག་ཉིད་དབང་བསྐུར་ལ་ཡོན་གྱི་མཆོག་བླངས་ཏེ་རྡོ་རྗེ་ཧཱུཾ་མཛད་དུ་བྱིན་གྱིས་བརླབས་ལ། རྡོ་རྗེ་ཧཱུཾ་མཛད་ཀྱི་ཕྱག་རྒྱས་མེ་ཏོག་གི་ཕྲེང་བ་འཛིན་དུ་བཅུག་ལ། སློབ་དཔོན་འཇུག་པའི་ཆོ་གས་རྡོ་རྗེ་ཤུགས་ཀྱིས་གཞུག་པར་བྱའོ། །དེ་ལ་རྡོ་རྗེ་ཤུགས་ནི་འདི་ཡིན་ཏེ། བདག་ཉིད་རྡོ་རྗེ་སྦྱོར་བ་ཡིས། །རྡོ་རྗེ་རྡོ་རྗེ་ཞེས་སྨྲས་པ། ཀུན་དུ་འགྲོ་བ་གྲུབ་པའི་ཕྱིར། །རྡོ་རྗེ་ཤུགས་སུ་ཡང་དག་བཤད། །དེ་ནས་བཅུག་ལ་འདི་སྐད་ཅེས་བརྗོད་པར་བྱའོ། །མ་ཧཱ་ར་ཏ་སུ་ཏྲིདྷ་སུ་ཏོ་ཥྱོ་མེ། །སུ་སུ་ཁོ་བཛྲ་སཏྭ་ཨཱདྱ་སི་དྡྷ་མཱཾ་ཞེས་སྨྲོས་ཤིག །ཡང་འདི་སྐད་ཅེས་བརྗོད་དོ། །དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱིས་ངས་ཁྱོད་ལ་ཡེ་ཤེས་གང་གིས་དེ་བཞིན་གཤེགས་པ་ཐམས་ཅད་དུ་གྲུབ་པ་ཡང་ཐོབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས་ཏེ། དེ་ལྟ་བུའི་ཡེ་ཤེས་སྐྱེད་པར་བྱ། །ཁྱོད་ཀྱིས་དཀྱིལ་འཁོར་ཆེན་པོ་མ་མཐོང་བ་རྣམས་ལ་སྨྲ་བར་མ་བྱེད་ཅིག །ཁྱོད་དམ་ཚིག་ཉམས་པར་གྱུར་ཏ་རེ། དེ་ནས་སློབ་དཔོན་རང་ཉིད་ཀྱིས་ཁྲོ་བོ་ཏི་རིནྟི་རིའི་ཕྱག་རྒྱ་ཁ་ཐུར་དུ་བསྟན་པ་དང༌། གྱེན་དུ་བསྟན་པ་བཅིངས་ལ་རྡོ་རྗེ་སློབ་མའི་སྤྱི་བོར་བཞག་སྟེ་འདི་སྐད་ཅེས་བརྗོད་པར་བྱའོ། །འདི་ནི་ཁྱོད་ཀྱི་དམ་ཚིག་ཡིན་གྱིས་གལ་ཏེ་འགའ་ཞིག་ལ་སྨྲས་ན་གླང་པ་འགས་པར་འགྱུར་རོ། །དེ་ནས་དམ་ཚིག་མཆོག་གི་ཕྱག་རྒྱ་དེ་ཉིད་མནའི་སྙིང་པོའི་ཆུ་ལ་ལན་ཅིག་བཟླས་ནས་སློབ་མ་འཐུང་དུ་བཅུག་ལ་འདི་སྐད་ཅེས་བརྗོད་པར་བྱའོ། །དེ་ལ་མནའི་སྙིང་པོ་འདི་ཡིན་ཏེ། རྡོ་རྗེ་སེམས་དཔའ་དེང་ཁྱོད་ཀྱི། །སྙིང་ལ་ཡང་དག་གཞུག་པར་མཛད། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ནས་གཤེགས། །ཨོཾ་བཛྲོད་ཀ་ཋ། དེ་ནས་སློབ་མ་ལ་འདི་སྐད་ཅེས་བརྗོད་པར་བྱ་སྟེ། དེང་
ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱིས་ངས་འདི་བྱོས་ཤིག་ཅེས་བསྒོ་བ་གང་ཡིན་པ་བྱ་དགོས་སོ། །ཁྱོད་ཀྱིས་ང་ལ་བརྙས་པར་མ་བྱེད་ཅིག །མི་བདེ་བ་མ་སྤངས་པར་ཁྱོད་དུས་བྱས་ནས་སེམས་ཅན་དམྱལ་བར་ལྟུང་བར་གྱུར་ཏ་རེ། དེ་ནས་འདི་སྐད་ཅེས་བརྗོད་པར་བྱས་ཏེ། དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབས་ལ། རྡོ་རྗེ་སེམས་དཔའ་བདག་ལ་དབབ་པར་གྱུར་ཅིག་ཅེས་སྨྲོས་ཤིག །དེ་ནས་རྡོ་རྗེ་སློབ་དཔོན་གྱིས་མྱུར་དུ་ཁྲོ་བོ་ཏི་རི་ནྟི་རིའི་ཕྱག་རྒྱ་བཅིངས་ལ་འདི་སྐད་ཅེས་བརྗོད་དུ་གཞུག་གོ །འདི་ནི་རྡོ་རྗེ་དམ་ཚིག་སྟེ། །རྡོ་རྗེ་སེམས་དཔའ་ཡིན་པར་གྲགས། །རྡོ་རྗེ་ཡེ་ཤེས་བླ་མེད་ནི། །དེ་རིང་ཉིད་དུ་དབབ་པར་ཤོག །ཨོཾ་བཛྲ་ཨཱ་ཝེ་ཤ་ཨ་ཞེས་ལན་བརྒྱའི་བར་དུ་ཟློས་སུ་གཞུག་གོ །ཡང་ཁྲོ་བོའི་ཁུ་ཚུར་བཅིངས་ལ་སེམས་མ་རྡོ་རྗེ་མའི་ཕྱག་རྒྱས་དྲལ་བར་བྱས་ཏེ། ཧཱུཾ་ཨ་ཨ་ཨ་ཨ་ཞེས་ལན་བརྒྱ་ཟློས་སུ་གཞུག་གོ །ཡང་ན་རྡོ་རྗེ་འབེབས་པའི་ཕྱག་རྒྱས་བསྒྲུབས་ཟིན་པའི་རྡོ་རྗེ་དྲིལ་བུ་དང་བཅས་པ་བཅིངས་ལ་རྐང་པ་གཡོན་པས་སློབ་མའི་རྐང་པ་གཡས་པ་མནན་ལ། བཛྲ་ཨཱ་བེ་ཤ་ཨ་ཞེས་ལན་བརྒྱ་ཟློས་ཤིང་དབབ་པར་བྱའོ། །དེ་ནས་སྲ་ཏཱི་ཙྪ་བཛྲ་ཧོ་ཞེས་བྱ་བས་མེ་ཏོག་གི་ཕྲེང་བ་དེ་དཀྱིལ་འཁོར་ཆེན་པོར་དོར་བར་བྱའོ། །དེ་ནས་ཕྲེང་བ་བླངས་ལ། ཨོཾ་བཛྲ་པྲ་ཏི་གྲྀ་ཧྞ་སྭ་མི་མཱཾ་ས་ཏྭ་མ་ཧཱ་བ་ལ་ཞེས་བྱ་བ་འདི་ཉིད་ཀྱིས་མགོ་ལ་བཅིང་བར་བྱའོ། དེ་ནས་སྙིང་པོ་འདིས་གདོང་གཡོགས་དགྲོལ་བར་བྱའོ། །དེ་ནས་པྲ་ཏཱིཙྪ་བཛྲ་ཧོ་ཞེས་བྱ་བས་མེ་ཏོག་གི་ཕྲེང་བ་དེ་དཀྱིལ་འཁོར་ཆེན་པོར་ནུཏྟ་རཾ། ཧེ་བཛྲ་པཱ་ཤྱ། དེ་ནས་རྡོ་རྗེ་ལྕགས་ཀྱུ་ནས་བརྩམས་ཏེ། རྡོ་རྗེ་མེ་ལྟར་འབར་བའི་དཀྱིལ་འཁོར་ཆེན་པོ་བསྟན་པར་བྱའོ། །རྡོ་རྗེ་མེ་ལྟར་འབར་བ་ལ་སོགས་པའི་སྙིང་པོ་སློབ་མ་ལ་བསྟན་པར་བྱའོ། །དེ་ནི་འདི་དག་ཡིན་ཏེ་ཧཱུཾ་ཧཱུཾ་བཛྲ་པྲ་ཧ་ར་ཎི་མཊ། ཨོཾ་བཛྲ་ཤཱུ་ལ་གྲི་བིནྡྷ་མཊ། ཨོཾ་བཛྲ་ཀྲོ་ཥེ་ཙྪེནྡ་མཊ། ཧཱུཾ་བཛྲ་ཨ་མ་ལ་པདྨེ་མཊ་ཅེས་བྱ་བ་ནི་རྡོ་རྗེ་མཚོན་ཆ་མ་དང༌། རྡོ་རྗེ་མདུང་དང༌། རྡོ་རྗེ་རལ་གྲི་མ་དང༌། །རྡོ་རྗེ་པདྨའོ། །དེ་ནས་འདི་རྣམས་ཀྱི་ཕྱག་རྒྱ་དོན་ཡོད་པ་ཐོགས་པ་མེད་པ། སྟོབས་དང་ཕ་རོལ་གནོན་པ་ཤིན་ཏུ་གྲུབ་པ་སེམས་ཅན་
ཐམས་ཅད་མངོན་པར་རྒྱས་འདེབས་པར་སྤྱོད་པ་བསྐུལ་བར་བྱའོ། །ཧཱུཾ་བཛྲ་གུ་ཧྱ་སིདྡྷྱ་པ་ར་མ་ཡོ་གཱི་ཤྭ་རི། ཧཱུཾ་བཛྲ་ཙཎྜེ་ཤྭ་རི་ཁ་ཊྭཱཾ་གི །མ་ཧཱ་བཛྲ་ཀ་པཱ་ལ་མཱ་ལ་མ་ཀུ་ཊེ། རུ་ལུ་རུ་ལུ་ལེ་ཧི། ཨོཾ་བཛྲ་ན་ར་ཡ་ནི་བཛི། ཧཱུཾ་བཛྲ་བ་ཏཱ་ཀཛྫི། ཨོཾ་བཛྲ་ཀྲོ་དྷ་མ་ཧཱ་ཡོ་ག་ཌཱ་ཀི་ནྱཿ་ལན་ཅིག་བཟླས་ལ་དགོད་པར་བྱའོ། །བཅོམ་ལྡན་འདས་ནི་དེ་ཁོ་ན་ཉིད་ཀྱི་སྙིང་པོས་དགོད་པར་བྱའོ། །དེ་ལྟར་འདིས་དངོས་གྲུབ་རྣམས་ལ་དོན་ཡོད་པ་འགྲུབ་པར་འགྱུར་རོ། །དེ་ནས་འདིས་འཇུག་པའི་ཕྱག་རྒྱས་སློབ་མའི་སྙིང་གར་དགྲོལ་བར་བྱའོ། །ཏིཥྛ་བཛྲ་དྲྀ་ཌྷོ་མེ་བྷ་བ་ཤའ་ཤྭ་ཏོ་མེ་བྷ་བ་ཧྲྀ་ད་ཡཾ་མེ་ཨ་དྷི་ཏིཥྛ་སརྦ་སིདྡྷི་མྨེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོ། དེ་ནས་ཡོན་གྱི་མཆོག་བླངས་ནས་སློབ་མ་སྣ་ཚོགས་པདྨའི་སྟེང་དུ་རྡོ་རྗེ་མེ་ལྟར་འབར་བའི་ཕྱག་རྒྱ་ཆེན་པོས་བཞག་ལ། མཆོད་ཡོན་བྱིན་ནས་མེ་ཏོག་ལ་སོགས་པས་མཆོད་དེ། སློབ་དཔོན་གྱིས་དབང་བསྐུར་བའི་ཆོ་གས་དབང་བསྐུར་རོ། །འདི་སྐད་ཀྱང་བརྗོད་པར་བྱ་སྟེ། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེར། །རྡོ་རྗེ་བདུད་རྩིའི་ཆུ་འཐུངས་ཤིག །རྡོ་རྗེ་དྲིལ་བུའི་ཕྱག་རྒྱ་དག །གལ་ཏེ་དཀྱིལ་འཁོར་མ་མཐོང་སྨྲས། །སྐྱེ་བོ་འདུས་ནང་བསྟན་པའམ། །དད་པ་མེད་པས་བགད་པར་འགྱུར། །དེ་ནས་སངས་རྒྱས་ལྔའི་ཅོད་པན་དང༌། རྡོ་རྗེ་དབང་བསྐུར་བའི་ཕྱག་རྒྱ་གཉིས་ཀྱིས་དེ་ལ་དབང་བསྐུར་ལ་ལུགས་མའམ། །བརྐོས་པའམ། །བྲིས་པའི་ཕྱིའི་སངས་རྒྱས་ལྔའི་རྡོ་རྗེ་དང་ལྡན་པའི་ཅོད་པན་གྱིས་དབང་བསྐུར་ལ། ཡི་གེ་གཉིས་ཀྱིས་གོ་ཆ་བཀོན་པར་བྱའོ། །དེ་ནས་རྡོ་རྗེ་སེམས་དཔའི་དཀྱིལ་འཁོར་དུ་བཤད་པའི་སྔགས་ཀྱིས་རྡོ་རྗེ་དང༌། བདག་པོ་དང་མིང་གི་དབང་བསྐུར་བ་དང༌། དངོས་གྲུབ་ཀྱི་རྡོ་རྗེ་བརྟུལ་ཞུགས་དག་སྦྱིན་པར་བྱའོ། །སློབ་མས་ཀྱང་རྡོ་རྗེ་ཐལ་མོ་བསྐོར་བས་བཏུད་ཅིང་ཕྱག་བྱས་ལ་མེ་ཏོག་ལ་སོགས་པའི་དབང་བསྐུར་བ་བླངས་བར་བྱ་ཞིང་ཡོན་ཡང་དབུལ་བར་བྱའོ། །དེ་ལྟར་ཡོན་ནི་འདི་ཡིན་ཏེ། མི་ཆེན་ཡོན་དུ་ཕུལ་ནས་ནི། །སླར་ཡང་རིན་གྱིས་བླུ་པར་བྱ། །རྡོ་རྗེ་སེམས་དཔའི་སྦྱོར་བ་ཡིས། །ཡོན་
འདི་ཡོན་གྱི་མཆོག་ཡིན་ནོ། །དེ་ནས་དེ་ལ་མཆོག་པ་ལྔ་དང༌། ཁྲོ་བོའི་རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་མཆོད་ལ། དེ་ནས་དེའི་རྡོ་རྗེ་དེ་ཁོ་ན་ཉིད་ཀྱིས་སྦྱིན་པར་བྱའོ། །དེ་ནས་ཆོས་ཀྱི་དྲིལ་བུ་དཀྲོལ་དུ་གཞུག་གོ །དེ་ནས་དམ་ཚིག་གིས་ཕྱག་རྒྱ་ཆེན་པོར་བྱིན་གྱིས་རློབས་ཤིག་ཅེས་བསྟན་པར་བྱའོ། །ཚིགས་སུ་བཅད་པ་ལྔས་རྗེས་སུ་གནང་བ་དང་སྙིང་པོ་ཡང་བྱིན་ལ་ཕྱག་རྒྱའི་ཡེ་ཤེས་ཇི་ལྟ་བ་བཞིན་དུ་བསྟན་པར་བྱའོ། །དེ་ནས་དམ་ཚིག་བསྟན་པར་བྱ་སྟེ། སེམས་ཅན་ཀུན་ལ་ཕན་འདོགས་དང༌། །བསྟན་པ་ཐམས་ཅད་གྲུབ་པའི་ཕྱིར། །གདུག་པ་བཏུལ་ནས་བསོད་ནམས་དག །ཐོབ་ཅེས་རྡོ་རྗེ་འཛིན་པས་གསུངས། །དཀྱིལ་འཁོར་དུ་ཞུགས་ལ་བཅོམ་ལྡན་འདས་ཧཱུཾ་མཛད་ཀྱི་སྡིགས་མཛུབ་སྦྱར་བར་བྱས་ཏེ། དེ་ནས་བཅོམ་ལྡན་འདས་གདུག་པ་ཐམས་ཅད་དང༌། བདུད་ཐམས་ཅད་དང་ཁམས་གསུམ་ཐམས་ཅད་འདུལ་བ་ཉིད་དུ་བྱིན་གྱིས་བརླབ་པ་མཛད་དེ། དེ་ནས་ཁྲོ་བོའི་ལས་བཞི་པོ་རྒྱས་གདབ་པ་དང༌། ཕྱག་རྒྱ་གཞིག་པ་དང༌། བསད་པ་དང༌། འཆིང་བར་བྱ་བ་སྟེ། ཁྲོ་བོའི་ལས་བཞི་བསླབ་པར་བྱའོ། །ཕྱག་རྒྱ་གང་ཞིག་ཅེས་བྱ་བ་ནས་བརྩམས་ཏེ། ཚེ་འདི་ཉིད་ལ་འགྲུབ་པར་འགྱུར། །ཞེས་བྱ་བའི་བར་དུ་བརྗོད་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་འདུ་བ་ལ་སོགས་པ་དབུགས་འབྱིན་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ལྟར་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱིས་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་ལས་ཀྱི་རྒྱུན་སྒྲུབ་པར་བྱེད་པའི་ཕྱག་རྒྱ་རྣམས་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲས་ནི་དེ་མ་ཐག་ཏུ་དོན་སྟོན་པར་བྱེད་པའི་ཚིག་ཡིན་ཏེ། སྒྲུབ་ པ་ཆེན་པོ་བྱས་ནས་གང ་གི་ཚེ་གྲུབ་པར་མ་གྱུར་ན་དེའི་རྗེས་ཐོགས་ཉིད་ལའོ། །དངོས་གྲུབ་མ་གྲུབ་ཅེས་བྱ་བ་ནི་ཆོས་ཀྱི་ཕྱག་རྒྱལ་སོགས་པ་ཕྱག་
རྒྱ་བཞིས་སྔར་བཤད་པའི་བསྒྲུབ་པའི་ཆོ་གས་བསྒྲུབས་པས་ན་དབང་དུ་བྱས་པར་མ་གྱུར་པ་དེ་ནི་མ་གྲུབ་པའོ། །དེས་དངོས་གྲུབ་བསྒྲུབ་པ་ན་འགྲུབ་པ་ཡིན་ལ་མ་བསྒྲུབས་པས་ན་མ་གྲུབ་པའོ། །ལས་ཀྱི་རྒྱུན་ཞེས་བྱ་བ་ནི་ལས་རྣམས་ཀྱི་རྒྱུན་ཏེ། ཐམས་ཅད་བསྲེག་པ་ལ་སོགས་པའི་ལས་ཀྱི་རྒྱུན་རྣམས་སོ། །ལས་ཀྱི་རྒྱུན་དེའི་དམ་པ་ནི་མཆོག་གོ །སུ་ཞིག་གི་ཞེ་ན་རྡོ་རྗེ་ཁྲོ་མཆོག་རྒྱལ་པོ་ཞེས་བྱ་བ་གསུངས་ཏེ་རྡོ་རྗེ་ཁྲོ་བོ་ནི་རྡོ་རྗེ་རིགས་ཀྱི་རང་བཞིན་ནོ། །དེ་རྣམས་ཀྱི་མཆོག་ནི་དམ་པའོ། །རྡོ་རྗེ་ཁྲོ་བོ་མཆོག་ཀྱང་ཡིན་རྒྱལ་པོ་ཡང་ཡིན་པས་ན་རྡོ་རྗེ་ཁྲོ་མཆོག་རྒྱལ་པོ་སྟེ། བཅོམ་ལྡན་འདས་རྡོ་རྗེ་མེ་ལྟར་རབ་ཏུ་འབར་བའོ། །ནི་ཞེས་བྱ་བའི་སྒྲས་ནི་ངེས་པར་གཟུང་བ་སྟེ། རྡོ་རྗེ་ཁྲོ་བོའི་རྒྱལ་པོ་ཉིད་དོ། །གོ་རིམས་བཞིན་དུ་ཞེས་བྱ་བ་ནི་ཇི་སྐད་དུ་བཤད་པའི་བསྒྲུབ་པའི་ཆོ་གས་སོ། །རབ་བཤད་ཅེས་བྱ་བ་ནི་རབ་ཏུ་ཕྱེ་སྟེ་བཤད་པའོ། །འདིས་ནི་འདི་སྐད་སྟོན་པར་འགྱུར་ཏེ་ གང་གི་ཚེ་སྔར་བཤད་པའི་སྔོན་དུ་བསྙེན་པ་བྱས ་ནས། ཟླ་བ་ཉ་ལ་མཚན་ཐོག་ཐག་བཟླས་བརྗོད་བྱས་ཏེ་ཆོས་ཀྱི་ཕྱག་རྒྱ་ལ་སོགས་པ་བསྒྲུབ་པ་ན་འགྲུབ་པར་མ་གྱུར་ན་དེའི་ཚེ་འོག་ནས་རྗེས་ཐོགས་ཉིད་ལ་འཆད་པའི་སྒྲུབ་པའི་ལས་བརྒྱ་པོ་བཀླགས་པ་ཙམ་གྱིས་འགྲུབ་པར་འགྱུར་རོ། །ཐམས་ཅད་བསྲེག་པ་ལ་ནི་ཞེས་བྱ་བ་ནི་རྒྱུ་བ་དང་མི་རྒྱུ་བ་ཐམས་ཅད་བསྲེག་པ་ནི་ཐམས་ཅད་བསྲེག་པའོ། །བསྐྲད་པ་དང་ཞེས་བྱ་བ་ལ་སོགས་པ་ནི་གོ་སླའོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་ཧཱུཾ་མཛད་ཀྱིས་སོ་ཞེས་བྱ་བ་གསུངས་ཏེ་རྡོ་རྗེ་ཧཱུཾ་མཛད་ལས་བྱུང་བས་སོ། །དེ་ཡང་སྐེ་ཚེ་དང་བཅས་པའི་ཉུངས་མར་གྱི་སྦྱིན་སྲེག་གཡས་པས་བྱ་བ་དང་དེ་ཉིད་ཀྱིས་ཐམས་ཅད་བཅིང་བ་དང་མི་འགུལ་བ་ཉིད་དང་གཉིད་ལོག་པར་སྟོན་པ་དང༌། ཁྲོ་བོའི་རྡོ་རྗེའི་ལྟ་བས་བསྡིགས་པ་དང༌། ཕྱག་རྒྱ་ལྷོད་པར་བྱ་བ་དང༌། མཛུབ་མོ་གཉིས་སྦྱར་བར་བྱ་བའི་མཚམས་དབྱེ་བ་དང༌། དེ་དག་ཉིད་ཀྱིས་གདུ་བུར་བཅིང་བ་དང༌། བཅིངས་ཏེ་བཙིར་བ་དང༌། དེ་ནས་དྲལ་བ་དང༌། གཡས་ནས་བརྡེག་པ་དང༌། མཛུབ་མོ་གཉིས་སྦྱར་བ་དང༌། གཡས་པའི་གུང་མོ་འགྱེད་པའི་
ཚུལ་དང༌། མཛུབ་མོ་འབར་བ་དང༌། བཅང་བ་དང༌། མཛུབ་མོ་གཉིས་ཀྱིས་སེན་མོ་བཅེར་ཏེ་བཅིང་བ་དང༌། ལག་པ་གཉིས་མཉེ་བ་དང༌། སོར་མོ་ཐམས་ཅད་དུ་གཏོར་བ་དང༌། མོད་ལ་ཕྱག་རྒྱ་དགྲོལ་བ་དང༌། གྲང་བས་འདར་བ་ལ་སྡིགས་མཛུབ་བྱ་བ་དང༌། གཡས་པའི་མཛུབ་མོ་གདེངས་ཀར་བྱས་ནས་སྡིགས་མཛུབ་བྱ་བ་དང༌། གཡས་པ་སོས་བཟུང་བ་དང༌། དྲ་བ་དང༌། དགོད་པ་དང༌། རྒྱུག་པ་ལ་སོགས་པར་སྟོན་པ་དང༌། མཛུབ་མོ་གཉིས་སུ་སེ་གོལ་གཏོགས་པའོ། །འདི་སྐད་སྟོན་པ་ཡིན་ཏེ། སྔ་མ་བཞིན་དུ་རྡོ་རྗེ་མེ་ལྟར་འབར་བའི་རྣལ་འབྱོར་བྱས་ལ། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །དེ་ནས་བཅོམ་ལྡན་འདས་ཇི་སྐད་བཤད་པའི་སྦྱིན་སྲེག་གི་ཐབ་ཁུང་གི་གནས་སུ་ལེགས་པར་བཞུགས་སུ་གསོལ་ཏེ་ཆོ་ག་ཐམས་ཅད་རྗེས་སུ་སྤྱད་པ་ཧི་ཧཱུཾ་ཞེས་ཟློས་ཤིང་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ་གཡས་པས་བླུགས་གཟར་བླངས་ཏེ། ཡུངས་མར་སྐྱེ་ཚེ་དང་བཅས་པའི་སྦྱིན་སྲེག་བྱ་ཞིང་བསྒྲུབ་པར་བྱ་བ་ཡང་བཅོམ་ལྡན་འདས་བསྐལ་པའི་མེ་ལྟར་འབར་བའི་ཕུང་པོ་འདྲ་བའི་ཞལ་དུ་ཡིད་ཀྱིས་གཞུག་པར་བྱས་ཏེ། དེ་ལྟ་བུས་ནི་ཐམས་ཅད་བསྲེག་པར་འགྱུར་རོ། །དེ་བཞིན་དུ་རྡོ་རྗེ་མེ་ལྟར་འབར་བའི་སྦྱོར་བ་བྱས་ལ་རྡོ་རྗེ་ཧཱུཾ་མཛད་བཅིངས་ཏེ་བསྒྲུབ་པར་བྱ་བ་བསྐྲད་པའི་བསམ་པས་མཛུབ་མོ་གཉིས་ཀྱིས་གཏོང་བ་ལྟར་བྱས་ཏེ་བསྒྲུབ་པར་བྱ་བ་ཡང་རྡོ་རྗེ་རླུང་གི་དཀྱིལ་འཁོར་གྱིས་རྩ་བཞིན་དུ་ཁྱེར་བར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་སྐྲོད་པར་འགྱུར་རོ། །དེ་བཞིན་དུ་རྡོ་རྗེ་མེ་ལྟར་འབར་བའི་སྦྱོར་བ་བྱས་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱས་བཅིངས་ཏེ་བསྒྲུབ་པར་བྱ་བའི་ལུས་ལ་ཡིད་ཀྱིས་ཞུགས་ཏེ་བསྒྲུབ་པར་བྱ་བའི་ཚིག་ཏུ་སྨྲ་མི་ནུས་པར་བྱ་བའི་ཕྱིར་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛུབ་མོ་གཉིས་ཀྱིས་བདག་ཉིད་ཁ་བཅིང་བར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་གཞིག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་བསྒྲུབ་པར་བྱ་བའི་སྟེང་དུ་དབང་ཆེན་གྱི་དཀྱིལ་འཁོར་
ལ་རྡོ་རྗེ་ཧཱུཾ་མཛད་ཀྱིས་མནན་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་རེངས་སོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་ཧཱུཾ་མཛད་བཅིངས་ཏེ་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་ཏུ་བྱས་ལ་བསྒྲུབ་པར་བྱ་བ་གཉིད་ལོག་ཏུ་གཞུག་པའི་བསམ་པས་མིག་འཛུམས་པ་བྱས་ཏེ་དེ་ལྟ་བུས་ཐམས་ཅད་གཉིད་ལོག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཁྲོ་བོའི་ལྟ་བས་བསྒྲུབ་པར་བྱ་བ་ལ་བལྟ་ཞིང་མཛུབ་མོ་གཉིས་ཀྱིས་སྡིགས་མཛུབ་བྱས་ལ་མིག་ལས་བྱུང་བའི་རྡོ་རྗེ་འབར་བས་ཀྱང༌། བསྒྲུབ་པར་བྱ་བའི་ལུས་ལ་བར་མཚམས་མེད་པར་ཁྱབ་པར་བསམ་པར་བྱས་ཏེ་དེ་ལྟ་བུས་ནི་ཐམས་ཅད་རྒྱས་འདེབས་སོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་དང་ལྷན་ཅིག་ཏུ་བྱས་ཏེ་བསྒྲུབ་པར་བྱ་བ་རྨོངས་པར་བྱ་བའི་བསམ་པས་ཕྱག་རྒྱ་ལྷོད་པར་བྱས་ཏེ་དེ་ལྟ་བུས་ནི་ཐམས་ཅད་རྨོངས་སོ། །དེ་བཞིན་དུ་ཐམས་ཅད་བྱས་ལ་བསྒྲུབ་པར་བྱ་བ་གཟིར་བའི་བསམ་བས་རྡོ་རྗེ་ཧཱུཾ་མཛད་ཀྱི་མཛུབ་མོ་གཉིས་ཕན་ཚུན་གཞིབས་ལ་དཔུང་གི་ཚོགས་ཡན་ལག་བཞི་གཞིག་པའི་བསམ་པས་སོ་སོར་བྱས་ཏེ། དེ་ལྟ་བུས་ནི་ཐམས་ཅད་འཇིག་གོ །དེ་བཞིན་དུ་ཐམས་ཅད་བྱས་ལ་བསྒྲུབ་པར་བྱ་བ་བཅིང་པའི་བསམ་པས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛུབ་མོ་གཉིས་གདུ་བུར་བཅིང་བར་བྱས་ལ་བསྒྲུབ་པར་བྱ་བ་ཡང་རྡོ་རྗེ་ལྕགས་སྒྲོག་གི་ཁྲོ་བོས་བཅིང་བར་བསམ་བར་བྱས་ཏེ། དེ་ལྟ་བུས་ནི་ཐམས་ཅད་བཅིང་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་བསྒྲུབ་པར་བྱ་བ་གཟིར་བའི་བསམ་པས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛུབ་མོ་གཉིས་གདུ་བུ་བཅིང་པའི་ཚུལ་དུ་བྱས་ལ་དེ་བཙིར་བར་བྱས་ཏེ། དེ་ལྟ་བུས་ནི་ཐམས་ཅད་བཙིར་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་བཅིངས་པ་ཐམས་ཅད་དྲལ་བའི་བསམ་པས་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ལྕགས་སྒྲོག་ཏུ་བཅིངས་ལ་དྲལ་བར་བྱས་ཏེ་དེ་ལྟ་བུས་ནི་ཐམས་ཅད་དྲལ་བར་འགྱུར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ཏེ་བསྒྲུབ་པར་བྱ་བ་ལ་བསྣུན་པའི་བསམ་པས་གཡས་པའི་མཛུབ་མོ་གཡོན་པའི་མཐེ་ཆུང་ལ་བརྡེག་པར་བྱས་
ཏེ། དེ་ལྟ་བུས་ནི་ཐམས་ཅད་བརྡེག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱི་རྩེ་མོས་གྱེན་དུ་འབར་བ་འབྱིན་པའི་ཚུལ་དུ་བྱས་ལ་བསྒྲུབ་པར་བྱ་བའི་འོག་ན་རླུང་གི་དཀྱིལ་འཁོར། དེའི་འོག་ན་མེའི་དཀྱིལ་འཁོར་ལ་མེ་སྟག་རྣམ་པར་འཁྲུག་པའི་ཡི་གེ་ཧཱུཾ་མི་ཟད་པ་བསམས་ལ་དེས་བསྒྲུབ་པར་བྱ་བ་ཤིང་སྐམ་པོ་བཞིན་དུ་འབར་བར་བསམ་པར་བྱས་ཏེ་དེ་ལྟ་བུས་ནི་ཐམས་ཅད་འབར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་ཧཱུཾ་མཛད་བཅིངས་ཏེ། བསྒྲུབ་པར་བྱ་བ་བསྒྱེལ་བའི་བསམ་པས་གཡས་པའི་མཛུབ་མོ་གཡོན་པའི་གུང་མོ་བསྒྲེང་བར་བྱ་ཞིང༌། གཡས་པའི་མཛུབ་མོ་ལས་བྱུང་བའི་རྡོ་རྗེ་འབར་བས་བསྒྲུབ་བར་བྱ་བ་བསྒྱེལ་བར་གྱུར་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་བསྒྱེལ་ཏོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་དེའི་མཛུབ་མོ་གཉིས་ཀྱིས་མེ་བྱུང་བའི་ཚུལ་དུ་བྱས་ཤིང་རང་གི་སྙིང་གནས་ཀྱང་རྡོ་རྗེ་འབར་བ་བྱུང་བས་བསྒྲུབ་པར་བྱ་བ་མཆེད་པར་བསམ་པར་བྱས་ཏེ་དེ་ལྟ་བུས་ནི་ཐམས་ཅད་གཅོད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་བཅད་པའི་བསམ་པས་དེ་གཉིས་སྦྱར་བར་བྱ་ཞིང༌། བསྒྲུབ་པར་བྱ་བ་ཡང་རྡོ་རྗེ་ཧཱུཾ་མཛད་ཀྱི་རལ་གྲིས་གཏུབ་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་གཅོད་དོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་ཀྱི་སེན་མོ་ཕན་ཚུན་བཙིར་ཏེ་རྩེ་མོར་བྱས་ཏེ་དེས་བསྒྲུབ་པར་བྱ་བ་དགས་པ་ལྟར་བྱ་ཞིང་རྩེ་མོ་ལས་བྱུང་བའི་རྡོ་རྗེ་འབར་བས་བསྒྲུབ་པར་བྱ་བ་བཀས་པར་འགྱུར་བར་བྱས་ཏེ་དེ་ལྟ་བུས་ནི་ཐམས་ཅད་བཀས་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ལག་པ་གཉིས་ཀྱིས་བསྒྲུབ་པར་བྱ་བ་ཕྱེ་མར་བྱས་པའི་བསམ་པས་གཅིག་ལ་གཅིག་མཉེ་ཞིང་བསྒྲུབ་པར་བྱ་བ་ཡང་བཅོམ་ལྡན་འདས་ཧཱུཾ་མཛད་ཀྱི་ཕྱག་གཉིས་ཀྱི་ནང་དུ་བཅུག་ནས་ཕྱེ་མར་བྱས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་ཕྱེ་མར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་སོར་མོ་ཐམས་ཅད་ཀྱིས་ཐམས་ཅད་དུ་གཏོར་བའི་ཚུལ་དུ་བྱ་ཞིང་བསྒྲུབ་པར་བྱ་བ་ཡང་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིས་གཏོར་བར་མཛད་པར་
བསམ་པར་བྱས་ཏེ། དེ་ལྟ་བུས་ནི་གཏོར་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བདུད་ཀྱི་དཔུང་ལ་སོགས་པ་རྣམས་པར་གཞིག་པའི་བསམ་པས་ཕྱག་རྒྱ་དེ་མོད་ལ་གྱ་ཚོམ་དུ་དགྲོལ་ཞིང་བཅོམ་ལྡན་འདས་རྡོ་རྗེ་འཛིན་པས་བདུད་ཀྱི་དཔུང་རྣམ་པར་འཇོམས་པར་མཛད་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་རྣམ་པར་བཅོམ་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་རྡོ་རྗེ་མཛུབ་མོ་གཉིས་ཀྱིས་དྲངས་པས་དྲང་བའི་ཚུལ་དུ་བྱས་ཤིང་བསྒྲུབ་པར་བྱ་བ་ལ་སྡིགས་མཛུབ་བྱས་ནས་སྤྱི་བོ་ནས་བརྩམས་ནས། རྐང་མཐིལ་གྱི་བར་དུ་བསྒྲུབ་པར་བྱ་བའི་ལུས་ལ་རིམས་ཀྱིས་ཀུན་དུ་གང་བར་བསམ་པར་བྱས་ཏེ་དེ་ལྟ་བུས་ནི་བསྒྲུབ་པར་བྱ་བ་རིམས་ཐམས་ཅད་ཀྱིས་གཟུང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བདག་ཉིད་རྡོ་རྗེ་ཀླུར་བསམས་ཏེ། གཡས་པའི་མཛུབ་མོ་ཀླུའི་གདེངས་ཀའི་ཚུལ་དུ་བྱས་ལ་ངེས་བསྒྲུབ་པར་བྱ་བ་ལ་སྡིགས་མཛུབ་བྱ་ཞིང་རྡོ་རྗེ་ཀླུས་བསྒྲུབ་པར་བྱ་བ་གཟུང་བར་བསམ་པར་བྱས་ཏེ་དེ་ལྟ་བུས་ནི་བསྒྲུབ་པར་བྱ་བ་དུག་ཐམས་ཅད་ཀྱིས་གཟུང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཡས་པ་སོས་བཟུང་ཞིང་བསྒྲུབ་པར་བྱ་བ་རྡོ་རྗེ་སྲིན་པོ་ལ་སོགས་པ་གདོན་གྱིས་གཟུང་བར་བསམ་པར་བྱས་ཏེ་དེ་ལྟ་བུས་ནི་བསྒྲུབ་པར་བྱ་བ་གདོན་ཐམས་ཅད་ཀྱིས་གཟུང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་དང་བདག་ཉིད་ཡིད་ཀྱིས་གཅིག་ཏུ་བྱས་ལ། བསྒྲུབ་པར་བྱ་བ་སྨྱོ་བར་བྱ་བའི་བསམ་བས་དུ་བ་དང་དགོད་པ་དང་རྒྱུག་པ་ལ་སོགས་པར་རབ་ཏུ་བསྟེན་པར་བྱས་ཏེ། དེ་ལྟ་བུས་ནི་ཐམས་ཅད་སྨྱོ་བར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་ཀྱིས་ཕན་ཚུན་སེ་གོལ་གྱི་སྒྲ་གཏོགས་པའི་ཚུལ་དུ་བྱས་ཤིང་བཅོམ་ལྡན་འདས་ཞབས་འདྲེན་པའི་ཁྲོ་བོས་ཀྱང་བསྒྲུབ་པར་བྱ་བ་བཀུག་སྟེ། ཀུན་དུ་བསྡམས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་གསོད་པར་འགྱུར་རོ། །དེ་ལྟ་བུ་རྡོ་རྗེ་ཧཱུཾ་མཛད་ཀྱིས་ཐམས་ཅད་བསྲེག་པ་ལ་སོགས་པ་ལས་རྣམ་པ་ཉི་ཤུ་རྩ་ལྔ་བསྒྲུབ་པ་གསུངས་ནས་ད་ནི་རྡོ་རྗེ་ཁྲོ་བོའི་ཆོ་གའི་
ཕྱག་རྒྱ་ལས་ཉི་ཤུ་རྩ་ལྔ་པོ་གཞན་དག་བསྒྲུབ་པ་ནི་ཐམས་ཅད་དགུག་པར་བྱ་བ་དང་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ་གཡོན་པའི་སྟེང་དུ་གཡས་པ་བཞག་པ་དང༌། ས་ལ་གཞག་པ་དང་བསྐྱོད་པ་དང་གར་བྱེད་དུ་གཞུག་པ་དང་སྒེག་པ་འབྱིན་པའི་ཚུ་དང་བ་རྒྱལ་དུ་གཞུག་པ་དང་ཐམས་ཅད་དུ་བརྒྱལ་དུ་གཞུག་པ་དང་ཧ་ཧ་ཞེས་དགོད་པ་དང་དགུག་པ་དང་འོག་ཏུ་གཞུག་པ་དང་གཏང་བ་དང༌། ཡོངས་སུ་བཟློག་ནས་བསྲུང་བ་དང༌། དེ་ནས་འཕང་བ་དང༌། མྱུར་དུ་འཕང་བ་དང་དེ་བཞིན་དུ་བསྒྱུར་བ་དང་དེ་བཞིན་དུ་དྲང་བ་དང་རང་ཉིད་ང་རོ་འདོན་དུ་གཞུག་པ་དང༌། རང་ཉིད་ལ་དེ་དག་ཏུ་ཞུགས་པ་དང་སྙིང་བརྡུང་དུ་གཞུག་པ་དང༌། རང་ཉིད་རང་གི་སྐྲ་འབལ་བ་དང༌། ཞེ་འགྲས་པར་བྱ་བ་དང་རང་གི་གོས་ཤུར་གཞུག་པ་དང༌། དེ་བཞིན་དུ་ཁྲོ་བས་འབར་བ་སྟོན་པ་པོ་འདིས་ནི་འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་མེ་ལྟར་འབར་བའི་སྦྱོར་བ་བྱས་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ཏེ་གཡོན་པའི་མཛུབ་མོ་འཕྲེད་དུ་བཞག་ལ་དེའི་སྟེང་དུ་མཛུབ་མོ་གཡས་པ་བཞག་པའི་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་ཏུ་བྱས་ལ་བསྒྲུབ་པར་བྱ་བ་འདུག་པའི་བསམ་པས་འདུག་པར་བྱ་སྟེ། དེ་ལྟ་བུས་ནི་ཐམས་ཅད་འདུག་གོ །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ས་ལ་བཞག་ཅིང་རྡོ་རྗེ་ཧཱུཾ་མཛད་ལ་སོགས་པ་བསྒྲུབ་པར་བྱ་བ་གནས་ཇི་ལྟ་བ་བཞིན་དུ་དགོད་པའི་བསམ་པས་གཞག་པར་བྱས་ཏེ། དེ་ལྟ་བུས་ནི་ཐམས་ཅད་དགོད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་བསྐྱོད་པར་བྱ་ཞིང་བཅོམ་ལྡན་འདས་རྡོ་རྗེ་མེ་ལྟར་འབར་བས་ཀྱང་དེ་རང་གི་གནས་ནས་བསྐྱོད་པར་མཛད་པས་བསམ་པར་བྱ་སྟེ། དེ་ལྟ་བུས་ནི་ཐམས་ཅད་བསྐྱོད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་ཏུ་བྱས་ལ་རང་ཉིད་གར་བྱས་ཏེ་དེ་ལྟ་བུས་ནི་ཐམས་ཅད་གར་བྱེད་དུ་འཇུག་པར་འགྱུར་རོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་ཧཱུཾ་མཛད་བཅིངས་ཏེ། བསྒྲུབ་པར་བྱ་བ་དང་ལྷན་ཅིག་
གཅིག་ཏུ་བྱས་ལ་དེ་གླུ་ལེན་དུ་གཞུག་པའི་བསམ་བས་ཕྱག་རྒྱ་ཁའི་ཕྱོགས་ནས་ཤིན་ཏུ་དྲང་བར་བྱས་ཏེ་དེ་ལྟ་བུས་ནི་ཐམས་ཅད་གླུ་ཡིད་ཀྱིས་ལེན་དུ་གཞུག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཆུ་བོ་ཆེན་པོ་བསྐྱེད་པའི་བསམ་བས་རྒྱལ་བྱེད་དུ་གཞུག་པར་བྱ་སྟེ། དེ་ལྟ་བུས་ནི་མཐའ་ན་གནས་ནས་ཀྱང་ཆུ་བོའི་དབུས་ན་གནས་པ་ལྟ་བུར་བདག་ཉིད་ཀྱིས་བདག་ཉིད་མཐོང་ནས་ལག་ངར་གཉིས་ཀྱིས་རྒྱལ་པའི་ཚུལ་དུ་བྱེད་ཅིང་འདུག་སྟེ། དེ་ལྟ་བུས་ནི་ཐམས་ཅད་འདིར་གཞུག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དེ་ཐམས་ཅད་རྒྱལ་དུ་གཞུག་པར་བྱས་ཏེ། དེས་ནི་ཕྱོགས་བཞིའི་སྐམ་སར་གཏོགས་པ་རྣམས་ཆུ་འཛིངས་སུ་ལྷུང་བ་ལྟ་བུར་བདག་ཉིད་ཀྱིས་མཐོང་ལ་དེ་ནས་ལག་ངར་གཉིས་ཀྱིས་རྒྱལ་པའི་ཚུལ་དུ་བྱེད་པར་གྱུར་ཏེ་དེ་ལྟ་བུས་ནི་ཐམས་ཅད་རྩེད་མོ་བྱེད་དུ་འཇུག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་གཅིག་ཏུ་བྱས་ནས་བསྒྲུབ་པར་བྱ་བ་དགོད་པའི་བསམ་པས་རྟག་གད་ཆེན་པོ་བྱས་ཏེ། དེ་ལྟ་བུས་ནི་ཧ་ཧ་ཞེས་དགོད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་བསྐོར་བའི་བསམ་པས། ཕྱག་རྒྱ་བསྐོར་བར་བྱ་ཞིང་བཅོམ་ལྡན་འདས་ཀྱིས་ཀྱང་བསྒྲུབ་པར་བྱ་བ་མགལ་མེའི་འཁོར་ལོ་ལྟར་བསྐོར་བར་མཛད་པས་བསམ་པར་བྱས་ཏེ། དེ་ལྟ་བུས་ནི་ཐམས་ཅད་བསྐོར་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་དྲང་བའི་བསམ་པས་དགུག་པར་བྱ་ཞིང༌། བཅོམ་ལྡན་འདས་ཀྱིས་ཀྱང༌། བསྒྲུབ་པར་བྱ་བའི་འདྲེན་པར་མཛད་པར་བསམ་པར་བྱ་སྟེ། དེ་ལྟ་བུས་ནི་དྲངས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་བཀུག་པའི་བསམ་པས་མདུན་ན་དགུག་པར་བྱ་ཞིང་བཅོམ་ལྡན་འདས་ཀྱིས་ཀྱང་བསྒྲུབ་པར་བྱ་བ་བསྡམས་ཏེ་བྱོན་པར་བསམ་སྟེ། དེ་ལྟ་བུས་དེ་འགུགས་སོ།། དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། བསྒྲུབ་པར་བྱ་བ་གཏོང་བའི་བསམ་བས་གཏོང་བར་བྱ་ཞིང༌། བཅོམ་ལྡན་འདས་ཀྱིས་ཀྱང་བསྒྲུབ་པར་བྱ་བསྒོམས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་བསྒོམ་པར་འགྱུར་རོ། །སྔ་མ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཡོངས་སུ་
ཟློས་ཏེ། དེ་ནུབ་ཏུ་གཞུག་པའི་ཚུལ་གྱིས་བསྣུབས་ཤིང་བསྒྲུབ་པར་བྱ་བ་ཡང་དི་ལ་སོགས་པའི་ཕྱོགས་ནས་ཆུ་ལ་ནུབ་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་ནུབ་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། བསྒྲུབ་པར་བྱ་བ་གདེག་པའི་བསམ་པས་གདེག་པར་བྱས་ཏེ། དེ་ལྟ་བུས་ནི་བསྒྲུབ་པར་བྱ་བ། ཆུར་ནུབ་པ་ལས་ཐམས་ཅད་འབྱིན་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དེ་མྱུར་དུ་འཕང་བར་བྱ་ཞིང་བསྒྲུབ་པར་བྱ་བ་ལ། བཅོམ་ལྡན་འདས་ཀྱིས་རིའི་སུལ་ལ་སོགས་པར་འཕངས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་འཕང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་བསྒྲུབ་པར་བྱ་བ་འོག་ནས་འདེགས་པའི་བསམ་བས་མྱུར་དུ་འདེགས་པར་བྱ་ཞིང༌། བཅོམ་ལྡན་འདས་ཀྱིས་བསྒྲུབ་པར་བྱ་བ་འདེགས་པར་མཛད་པར་བསམ་པར་བྱས་ཏེ། དེ་ལྟ་བུས་ནི་ཉེ་བར་འདེགས་སོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཐད་ཀར་བསྐྱུངས་པར་བསམས་ཤིང་བསྒྲུབ་པར་བྱ་བ། བཅོམ་ལྡན་འདས་ཀྱིས་ཐད་ཀར་འཕངས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་བསྐྱུངས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་ཏུ་བྱས་ལ་བསྒྲུབ་པར་བྱ་བ་ང་རོ་འདོན་པའི་བསམ་པས་རང་ཉིད་ང་རོ་འདོན་པར་བྱས་ཏེ། དེ་ལྟ་བུས་ནི་ཐམས་ཅད་ང་རོ་འདོན་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། བསྒྲུབ་པར་བྱ་བ་དང་ལྷན་ཅིག་ཏུ་བྱས་ནས། རང་ཉིད་དུ་བར་བྱས་ནས། དེ་ལྟ་བུས་ནི་ཐམས་ཅད་དུར་གཞུག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་གཅིག་ཏུ་བྱས་ཏེ། བསྒྲུབ་པར་བྱ་བ་རང་ཉིད་བརྡེག་པའི་བསམ་པས་བདག་ཉིད་བརྡེག་པར་བསམ་པར་བྱས་ཏེ། དེ་ལྟ་བུས་ནི་བསྒྲུབ་པར་བྱ་བ་དང༌། རང་ཉིད་བརྡེག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་དེས་རང་གི་སྙིང་གར་བརྡེག་ཅིང་བསྒྲུབ་པར་བྱ་བ་ཡང་རྡོ་རྗེ་འབར་བས་སྙིང་ལ་ཕོག་པར་བསམ་བར་བྱས་ཏེ། དེ་ལྟ་བུས་
ནི་བཅིང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་ཏུ་བྱས་ལ་རང་གི་སྐྲ་འབལ་བར་བྱས་ཏེ། དེ་ལྟ་བུས་ནི་བསྒྲུབ་པར་བྱ་བ་སྐྲ་འབལ་བར་བྱེད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་བསྒྲུབ་པར་བྱ་བ་ཕན་ཚུན་འཐབ་པ་ལ་སྦྱར་བར་བྱས་ཏེ། དེ་ལྟ་བུས་ནི་ཞེ་འགྲས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་བསྒྲུབ་པར་བྱ་བ་དང༌། ལྷན་ཅིག་ཏུ་བྱས་ཏེ། རང་གི་གོས་བཤུ་བར་བྱས་ཏེ། དེ་ལྟ་བུས་ནི། བསྒྲུབ་པར་བྱ་བ་གོས་བཤུ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་གཅིག་ཏུ་བྱས་ལ། མནར་སེམས་རིང་པོ་དགུ་ཡིད་ལ་བྱས་ནས། ཁྲོ་བས་རབ་ཏུ་འབར་བའི་ཚུལ་དུ་བྱས་ཏེ། དེ་ལྟ་བུས་ནི་ཁྲོ་བས་འབར་བར་འགྱུར་རོ། །དེ་ལྟར་རྡོ་རྗེ་ཁྲོ་བོ་མཆོག་གི་ཕྱག་རྒྱ་ལས་སྒྲུབ་པ་གསུངས་ནས། ད་ནི་ཐམས་ཅད་དགུག་པ་དང༌། །ཞེས་བྱ་བ་ལ་སོགས་པ་སྨོས་པས། རྡོ་རྗེ་ཁྲོ་བོ་ཆེན་པོ། སྣ་ཚོགས་དངོས་གྲུབ་ཀྱི་ལས་བསྒྲུབ་པར་གསུངས་པ་ཡིན་ནོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ནས། གཡས་པའི་མཛུབ་མོ་ལྕགས་ཀྱུ་དང༌། དེ་བཞིན་ཉིད་ཀྱིས་གཞུག་པ་དང༌། གཡས་པའི་སེ་གོལ་དང༌། གཡོན་པའི་སེ་གོལ་དང༌། མཛུབ་མོ་གཉིས་ཀྱིས་ལྕེ་ལ་བྱུགས་པ་དང༌། བ་སྤུ་གཡས་ནས་འཁྱིལ་བ་དང༌། བསྒྱེལ་པ་ལ་སོགས་པའི་ཚུལ་དུ་བྱ་བ་དང༌། དུས་ཚིགས་བཟློས་པར་བསྒོམ་པར་བྱ་བ་དང༌། ཁྲོ་བོའི་རྡོ་རྗེ་ལྟ་བས་ཤིང་ལ་བལྟས་ཏེ་ཡིད་ལ་འདོད་པ་འབྱུང་བ་དང༌། དེ་བཞིན་དུས་དང་ལྟ་བ་དང༌། སྨིན་མ་དང༌། སོ་དང༌། ཕུ་དང་ཕྱག་རྒྱས་བརྡེག་པ་དང༌། རྒྱལ་མཚན་བསྒྲེང་བ་དང༌། འཇིགས་བྱེད་ཀྱི་ལྟ་བ་ཁྲོ་བ་དང་བཅས་པས་མིག་མི་འཛུམས་པར་ལྟ་བ་དང་བཅས་པས་དེ་བཞིན་དུ་འབར་བའི་བཅིང་བ་དང༌། ཕྱག་རྒྱ་བསྐོར་བ་དང༌། མཛུབ་མོའི་རྡོ་རྗེ་སྤྱི་གཙུག་ཏུ་གཞག་པ་དང༌། དེ་བཞིན་དུ་སྙིང་ག་དང༌། དེ་བཞིན་དུ་རྡོ་རྗེ་དགྲོལ་བ་དང༌། ཕྱག་རྒྱ་ཐད་ཀར་བརྡེག་པ་
དང། མཛུབ་མོའི་གདོང་སྤྲད་པའོ། །འདི་སྐད་སྟོན་པ་ཡིན་ཏེ། དེ་བཞིན་དུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ། གཡས་པའི་མཛུབ་མོ་ལྕགས་ཀྱུས་བསྒྲུབ་པར་བྱ་བ་དགུག་པར་བྱ་ཞིང་བཅོམ་ལྡན་འདས་རྡོ་རྗེ་ལྕགས་ཀྱུའི་ཁྲོ་བོས་བཀུག་པར་བྱ་བ་འགུགས་པར་བསམ་པར་བྱས་ཏེ། དེ་ལྟ་བུས་ནི་ཐམས་ཅད་འགུགས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། དེ་ཉིད་ཀྱིས་བསྒྲུབ་པར་བྱ་བ་གཞུག་པའི་ཚུལ་དུ་བྱ་ཞིང༌། བཅོམ་ལྡན་འདས་རྡོ་རྗེ་ཞགས་པས་ཀྱང་བསྒྲུབ་པར་བྱ་བ་དེ་གཞུག་པར་མཛད་པར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་བཅུག་པར་འགྱུར་རོ། །དེ་བཞིན་དུ་རྡོ་རྗེ་མེ་ལྟར་འབར་བའི་སྦྱོར་བ་བྱས་ལ། རྡོ་རྗེ་ཧཱུཾ་མཛད་བཅིངས་ཏེ། གཡས་པའི་མཐེ་བོང་དང་མཛུབ་མོ་གཉིས་ཀྱིས་སེ་གོལ་གྱི་སྒྲ་གཏོགས་པར་བྱ་ཞིང་བཅོམ་ལྡན་འདས་རྡོ་རྗེ་ཧཱུཾ་མཛད་ཀྱིས་བསྒྲུབ་པར་བྱ་བ་ཀུན་བཀང་བར་བསམ་པར་བྱ་སྟེ། དེ་ལྟ་བུས་ནི་ཐམས་ཅད་བཅིང་བར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། གཡོན་པའི་མཐེ་བོང་དང༌། མཛུབ་མོ་གཉིས་ཀྱིས་སེ་གོལ་གྱི་སྒྲ་གཏོགས་པར་བྱ་ཞིང་སྔར་བཤད་པའི་ཆོ་གས་པྲ་སེ་ན་བསྒྲུབ་པར་བྱའོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་ཀྱིས་རང་གི་ལྕེ་ལ་ཡོངས་སུ་བྱུག་པར་བྱ་ཞིང་ཡིད་ཀྱིས་བསྒྲུབ་པར་བྱ་བ་དང་ལྷན་ཅིག་གཅིག་ཏུ་བྱས་ན་དེ་བདེན་པ་སྨྲ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་གཟུགས་ཐམས་ཅད་ཡང་དག་པར་སྟོན་པའམ་བསམ་པས་དེའི་བ་སྤུ་གཡས་ནས་འཁྱིལ་བའི་ཚུལ་དུ་ལུས་ལ་བསྐོར་ནས་དེ་ལྟ་བུས་ནི་སྒྱུ་མ་ཐམས་ཅད་སྟོན་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ལན་སྟོན་པའི་བསམ་པས་ལྟུང་བ་སློང་བའི་ཚུལ་དུ་བྱས་ན་དེ་ལྟ་བུས་ནི་ལན་སྟོན་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དུས་ཚིགས་ཀྱི་འཁོར་ལོ་ཡོངས་སུ་ལྡོག་པར་བསྒོམས་པས་ནི་དུས་ཚིགས་ཀྱི་འཁོར་ལོ་ཡོངས་སུ་ལྡོག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་ཁྲོ་བོ་རྡོ་རྗེ་ལྟ་བས་ཇི་སྙེད་པའི་ཤིང་ལ་བལྟས་ཏེ། དུས་མ་ཡིན་པར་ཡིད་ལ་འདོད་པའི་མེ་ཏོག་
དང། ལོ་མ་དང་འབྲས་བུ་སྨིན་པར་སྟོན་པར་བྱེད་པ་ཡིན་ནོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་ས་ལ་བཞག་ལ་འབྲུ་ཐམས་ཅད་འབྱུང་བར་སྟོན་པར་བསྒོམ་པར་བྱས་ཏེ། དེ་ལྟ་བུས་ནི་འབྲུ་ཐམས་ཅད་སྟོན་པ་ཡིན་ནོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། སྔར་བཤད་པའི་རིམས་སེལ་བའི་བསྒོམ་པ་དང་བྱམས་པའི་ལྟ་བས་རིམས་ཐམས་ཅད་བསལ་བར་བྱའོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་སྨིན་ལ་སྨིན་མ་འགྱུར་བའི་ཚུལ་གྱིས་སྦྱར་བའི་དུག་ཐམས་ཅད་བསལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་སོ་སྟོན་པར་བྱ་ཞིང་བཅོམ་ལྡན་འདས་ཁྲོ་བོ་སྟོབས་པོ་ཆེ་གདོན་མི་ཟ་བའི་ལུས་ལ་ཞུགས་ནས་གདོན་ཟ་བར་བསམ་པར་བྱས་ཏེ། དེ་ལྟ་བུས་ནི་གདོན་བསལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཕུ་ཞེས་བྱ་བ་ཟློས་ཤིང་བདག་ཉིད་ཀླུ་ཟླ་བའི་མདོག་ཏུ་བསམས་ལ་རྒྱུ་བ་དང་མི་རྒྱུ་བའི་དུག་གི་སྟེན་དུ་ཡི་གེ་ཕུ་ཟླ་བའི་མདོག་ཅན་ཉིད་བསམ་པར་བྱ་ཞིང་དེས་སེམས་ཅན་གྱི་ལུས་སམ་དུག་བདུད་རྩིར་བྱས་པར་བསམ་པར་བྱ་ཞིང༌། དེ་ལྟ་བུས་ནི་དུག་ཐམས་ཅད་ལས་ཐར་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དེས་རྒྱལ་མཚན་བསྒྲེང་བའི་ཚུལ་དུ་བྱས་ཤིང་བདག་ཉིད་དཔལ་ཧེ་རུ་ཀར་བསམས་ཏེ། དེས་མཁའ་འགྲོ་མས་ཟིན་པ་ལ་བསྣུན་པར་བྱ་ཞིང་མེ་ལྟར་འབར་བས་ཀྱང་མཁའ་འགྲོ་མའི་གདོན་ཐལ་བར་བྱས་པར་བསམས་ཏེ། དེ་ལྟ་བུས་ནི་མཁའ་འགྲོ་མའི་གདོན་ཐམས་ཅད་ལས་ཐལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དེས་རྒྱལ་མཚན་བསྒྲེང་བའི་ཚུལ་དུ་བྱས་ཤིང་ཕྱག་རྒྱ་བཅིངས་པ་ལས་དཔུང་གི་ཚོགས་ཡན་ལག་བཞི་ཕྱུང་སྟེ། དེས་རང་གི་དཔུང་ཡོངས་སུ་བསྲུངས་ན། དེ་ལྟ་བུས་ནི་གཡུལ་འགྱེད་པ་ཐམས་ཅད་ལས་ཐར་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་འཇིགས་བྱེད་ཀྱི་ལྟ་བས་ཁྲོ་བ་དང་བཅས་པས་མིག་མི་འཛུམས་པར་བལྟ་ཞིང་ཕྱག་རྒྱ་བཅིངས་པ་ལས་དཔུང་གི་ཚོགས་ཡན་ལག་བཞི་པ་ཕྱུང་སྟེ། དེས་གཞན་གྱི་དཔུང་བཅོམ་པར་བསམས་ན་དེ་ལྟ་བུས་ནི་གཞན་གྱི་དཔུང་ཐམས་ཅད་བཅོམ་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་
ལ་མིག་མི་འཛུམས་པར་བལྟ་ཞིང་ཇི་ཙམ་མངོན་པར་འདོད་པའི་ཕྱོགས་སུ་བལྟས་ལ་མཚམས་བཅིང་བར་བྱའོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་རང་གི་སྙིང་ག་ལས་རྡོ་རྗེ་འབར་བ་ཕྱུང་ནས་དེས་ཕྱོགས་བཅིང་བར་བྱའོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཕྱག་རྒྱ་དེ་བསྐོར་བར་བྱ་ཞིང་དེ་ལྟ་བུས་ནི་དཀྱིལ་འཁོར་བཅིང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་གཞིབས་ཏེ་རྩེ་མོར་བྱས་ལ་ཡོངས་སུ་བཟློག་ནས་མཛུབ་མོའི་རྡོ་རྗེ་རྩེ་མོའི་སྤྱི་གཙུག་ཏུ་གཞག་པར་བྱས་ཏེ། དེ་ལྟ་བུས་ནི་ཤིན་ཏུ་བསྲུང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་གཞིབས་ཏེ་རྩེ་མོར་བྱས་ལ་རང་གི་སྙིང་གར་གཞག་པར་བྱས་ཏེ། དེ་ལྟ་བུས་ནི་ཡོངས་སུ་སྐྱོབ་པར་བྱེད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་གཤིབས་ཏེ་རྩེ་མོར་བྱས་ནས་རང་གི་སྙིང་གར་རྡོ་རྗེ་དགྲོལ་བར་བྱས་ཏེ། དེ་ལྟ་བུས་ནི་ཐམས་ཅད་ཐར་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་ཕྱག་རྒྱ་ཐད་ཀར་བཞག་ནས་བཏེག་པར་བྱས་ཏེ། དེ་ལྟ་བུས་ནི་ཐམས་ཅད་བསླང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོའི་གདོང་ཕན་ཚུན་དམ་དུ་སྤྲད་པར་བྱས་ཏེ། དེ་ལྟ་བུས་ནི་ཐམས་ཅད་དབང་དུ་འགྱུར་རོ། །དེ་ལྟར་རྡོ་རྗེ་ཁྲོ་བོ་ཆེན་པོ་སྣ་ཚོགས་འགྲུབ་པའི་ལས་བསྒྲུབ་པར་གསུངས་ནས། ད་ནི་ལྷ་ཐམས་ཅད་ལྟུང་བར་བྱ་བ་ལ་ནི་ཞེས་བྱ་བ་ལ་སོགས་པས་རྡོ་རྗེ་ཁྲོ་བོ་ཆེན་པོ་རྒྱལ་བ་དམ་པའི་དངོས་གྲུབ་ཀྱི་ལས་བསྒྲུབ་པ་གསུངས་པ་ཡིན་ནོ།། དེ་ནས་འདིའི་མཚན་ཉིད་བཤད་པར་བྱ་སྟེ། ལྟ་བས་སྟེང་ནས་འོག་ཏུ་ལྟུང་བར་བྱ་བ་དང༌། འོག་ནས་བརྡེག་པ་དང༌། ཡི་གེ་ཧཱུཾ་གིས་ཁྲོས་པ་དང༌། འཇིགས་པས་ལྟ་བ་དང༌། ཁྲོས་པས་རྡོ་རྗེ་ཁ་ཊྭཱཾ་ག་བཅག་པ་དང༌། སྙིང་གར་རྡོ་རྗེ་བསྒོམ་པ་དང༌། རྡོ་རྗེ་རྩེ་གསུམ་པ་བཅག་པ་དང༌། ཡི་གེ་ཧཱུཾ་གིས་གདུག་པའི་དཀྱིལ་འཁོར་གཏོར་བ་དང༌། ཧི་དང་གཡས་ལོགས་ནས་དབུགས་འབྱུང་བ་དང༌། དེ་ཉིད་ཀྱིས་དོང་ཚེ་གསོར་བ་དང༌། དེ་བཞིན་དུ་ཁྲོ་བོའི་ལྟ་བས་གཡས་པའི་ཁུ་ཚུར་གྱིས་མནན་ལ། གཡོན་པའི་སོས་བཟུང་བ་ནས་དྲང་བ་དང༌། དོང་ཚེ་གཉིས་གསོར་བ་དང༌།
གཡོན་པའི་དྲིལ་བུ་བཞག་པ་དང༌། རྡོ་རྗེ་ཧཱུཾ་མཛད་ཀྱིས་དེ་བཞིན་དུ་གཡས་པའི་ཁུ་ཚུར་གཡོན་པའི་ཁྲོ་བོས་མནན་ལ་རྡོ་རྗེ་ཁུ་ཚུར་གྱི་མཐའ་བཀྲོལ་བར་བསམ་པ་དང༌། གཡས་པའི་དྲིལ་བུ་བཅག་པ་དང༌། འདོད་ཆགས་དང་བྲལ་བར་ལྟུང་བ་དང༌། ཡིད་ཀྱིས་འཁོར་ལོ་དྲལ་བ་དང་རྩེ་གསུམ་དྲལ་བ་དང༌། རྡོ་རྗེ་ཧཱུཾ་མཛད་ཀྱི་གཡོན་དང་གཡས་པའི་ཁུ་ཚུར་གྱིས་མནན་ལ་དེ་བཞིན་དུ་མཐར་གདུ་བུར་དགྲོལ་བར་བསམ་པ་དང༌། རྡོ་རྗེ་དང༌། བྱང་ཆུབ་སེམས་དཔའ་དང༌། དེ་བཞིན་གཤེགས་པ་ཐམས་ཅད་དང༌། རྡོ་རྗེ་འཆང་ཆེན་པོ་རྗེས་སུ་དྲན་པས་མདུན་དུ་བསྒྲུབ་པའོ། །འདིས་ནི་འདི་སྐད་སྟོན་པར་འགྱུར་རོ། །སྔ་མ་བཞིན་དུ་རྡོ་རྗེ་མེ་ལྟར་འབར་བའི་སྦྱོར་བ་བྱས་ལ། རྡོ་རྗེ་ཧཱུཾ་མཛད་བཅིངས་ཏེ། ཁྲོ་བོའི་ལྟ་བས་སྟེང་ནས་འོག་ཏུ་ལྟུང་བའི་ཚུལ་དུ་བྱ་ཞིང་ལྟ་བ་ལས་བྱུང་བའི་བཅོམ་ལྡན་འདས་ཀྱིས་ཀྱང་བསྒྲུབ་པར་བྱ་བ་ལྟུང་བར་བྱས་པར་བསམ་པར་བྱས་ཏེ། དེ་ལྟ་བུས་ནི་ལྷ་ཐམས་ཅད་ལྟུང་བར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། དེ་ཉིད་ཀྱིས་འོག་ནས་བརྡེག་པའི་ཚུལ་དུ་བྱ་ཞིང༌། བཅོམ་ལྡན་འདས་ཕྱག་ན་ལྕགས་ཀྱུ་བསྣམས་ཏེ། ཀླུ་རྣམས་འདྲེན་པར་མཛད་པར་བསམ་པར་བྱས་ཏེ། དེ་ལྟ་བུས་ནི་ཀླུ་ཐམས་ཅད་འབྱིན་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་གནོད་སྦྱིན་རྗེས་སུ་འབྲང་བར་བྱ་བའི་ཡི་གེ་ཧཱུཾ་ཁྲོ་བོའི་བསམ་པས་བཟླས་ཤིང་བཅོམ་ལྡན་འདས་རྡོ་རྗེ་སུ་སྤྱོད་པའི་ཁྲོ་བོས་གནོད་སྦྱིན་བཀུག་སྟེ། དེ་ལྟ་བུས་ནི་གནོད་སྦྱིན་རྗེས་སུ་འབྲང་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་དེ། སྲིན་པོ་མཐོང་བའམ། སྲིན་པོའི་གདོན་གྱིས་ཟིན་པ་ལ་ཤིན་ཏུ་འཇིགས་པའི་ལྟ་བས་ལྟ་ཞིང་བཟླས་པས་ལྟ་བ་ལས་བྱུང་བའི་རྡོ་རྗེ་འབར་བས་སྲིན་པོ་བཅོམ་པར་འགྱུར་པར་བྱས་ཏེ། དེ་ལྟ་བུས་ནི་སྲིན་པོ་སྐྲག་པར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ། བདག་ཉིད་དཔལ་ཧེ་རུ་ཀར་བསམས་ལ་ཁྲོ་བོའི་ལྟ་བས་ལྟ་ཞིང་ལྟ་བའི་ཕྱག་རྒྱ་ལས་འབར་བའི་རྡོ་རྗེ་ཕྱུང་ལ་དེས་མཁའ་འགྲོ་མ་རྣམས་ཀྱི་རྡོ་རྗེ་ཁ་ཊྭཱཾ་ག་བཅག་པར་བསམ་པར་བྱ་ཞིང་བཅོམ་ལྡན་འདས་དཔལ་ཧེ་རུ་ཀ་འཁོར་དང་བཅས་པ་མཁའ་འགྲོ་མའི་གདོན་གྱིས་ཟིན་པའི་ལུས་ལ་ཞུགས་པས་མཁའ་འགྲོ་མ་ལ་སོགས་པའི་གདོན་རྣམས་བསྲེགས་པར་གྱུར་པ་
བ་དང༌། འབྱེར་བར་གྱུར་པར་མཛད་པར་བསམ་པར་བྱས་ཏེ། དེ་ལྟ་བུས་ནི་མཁའ་འགྲོ་མ་ལ་སོགས་པའི་གདོན་ཐམས་ཅད་བཏུལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་རང་གི་སྙིང་གར་རྡོ་རྗེ་འབར་བ་བསྒོམ་ཞིང་རྡོ་རྗེ་འབར་བ་ལས་བྱུང་བའི་རྡོ་རྗེ་རིགས་ཀྱིས་དཔུང་ཐམས་ཅད་སྐྲག་པར་མཛད་པར་བྱས་ཏེ། དེ་ལྟ་བུས་ནི་བདུད་ཀྱི་དཔུང་ཐམས་ཅད་བཅོམ་པར་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དཔལ་ཧེ་རུ་ཀ་ར་བདག་ཉིད་དུ་བསམས་ཏེ། མ་མོའི་ཚོགས་མཐོང་བ་དང༌། མ་མོའི་གདོན་གྱིས་ཟིན་པ་ལ་དཔལ་ཧེ་རུ་ཀའི་ཕྱག་རྒྱ་བཅིངས་པ་ལས་བྱུང་པའི་བཅོམ་ལྡན་འདས་ཀྱིས་མ་མོའི་ཚོགས་ཀྱི་ཕྱག་རྒྱ་རང་བཞིན་རྡོ་རྗེ་རྩེ་གསུམ་པ་བཅག་པར་གྱུར་ཅིང་མ་མོའི་ཚོགས་ཁྱབ་པར་བསམ་པར་བྱས་ཏེ། དེ་ལྟ་བུས་ནི་མ་མོའི་ཚོགས་ཐམས་ཅད་བཏུལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་རང་གི་སྙིང་ག་ནས་ཁྲོ་བོ་སྟོབས་པོ་ཆེ་ཕྱུང་སྟེ། དེས་གདུག་པའི་དཀྱིལ་འཁོར་རྣམ་པར་འཐོར་བར་བསམ་པར་བྱས་ཏེ། དེ་ལྟ་བུས་ནི་གདུག་པའི་དཀྱིལ་འཁོར་རྣམ་པར་གཏོར་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཧཱུཾ་ཞེས་བྱ་བ་ལས་རྡོ་རྗེ་འབར་བ་སྤྲོས་ལ་གདུག་པ་ཐམས་ཅད་ཀྱི་སྟེང་དུ་དབབ་པར་བྱས་ཏེ། དེ་ལྟ་བུས་ནི་གདུག་པ་ཐམས་ཅད་བཏུལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཧཱུཾ་ཞེས་བྱ་བས་ཁམས་གསུམ་པ་ཐམས་ཅད་དབང་དུ་བྱས་ཏེ། དེ་ལྟ་བུས་ནི་ཐམས་ཅད་དབང་དུ་བཏུལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མི་འཇིགས་པ་སྦྱིན་པའི་ཚུལ་གྱིས་གཡས་ལོགས་སུ་བཞག་ཅིང་རང་གི་སྙིང་ལས་རྡོ་རྗེའི་རིགས་རྣམས་ཕྱུང་སྟེ། དེས་བསྒྲུབ་པར་བྱ་བ་རྒྱལ་པོའི་འཇིགས་པ་ལས་བཟློག་པར་བསམ་པར་བྱས་ཏེ། དེ་ལྟ་བུས་ནི་འཇིག་པ་མེད་པར་ཡང་དག་པར་བསྐྱོད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་དེས་དོང་ཚེ་གྱེན་དུ་འཕེན་ཞིང་གསོར་བའི་ཚུལ་དུ་བྱས་ལ་བཅོམ་ལྡན་འདས་ནོར་བུ་བཟང་པོ་ཡང་རྣལ་འབྱོར་པས་རང་དབང་དུ་བྱ་བར་བསམ་པར་བྱས་ཏེ། དེ་ལྟ་བུས་ནི་ནོར་བུ་བཟང་པོ་དབང་དུ་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ། ཁྲོ་བོའི་ལྟ་བས་ལྟ་ཞིང་ཟློས་ལ་བཅོམ་ལྡན་འདས་རྡོ་རྗེ་མེ་ལྟར་འབར་
བས་རྣམ་ཐོས་སྲས་ལས་ནོར་ཐམས་ཅད་བསྣམས་ཏེ་བྱོན་པར་བསམ་པར་བྱས་ཏེ། དེ་ལྟ་བུས་ནི་རྣམ་ཐོས་སྲས་ལས་ནོར་ཐམས་ཅད་འཕྲོག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་གཡོན་པའི་རྡོ་རྗེ་ཁུ་ཚུར་ཐད་ཀར་བཞག་ལ་གཡས་པའི་ཁྲོ་བོའི་ཁུ་ཚུར་གྱིས་བཟུང་སྟེ། ལྕགས་སྒྲོག་སྦྲེལ་བ་མ་བཀྲོལ་བར་གཡོན་པའི་མཛུབ་མོས་བཟུང་ནས་དྲང་བར་བྱ་ཞིང་རྣམ་ཐོས་སྲས་ཀྱི་གཟུགས་བརྙན་རྐང་པ་གཡོན་པས་མནན་ལ། བཅོམ་ལྡན་འདས་ཀྱིས་ཀྱང་རྣམ་ཐོས་སྲས་མནན་ནས་དཔལ་ཕྲོགས་ཏེ། རྣལ་འབྱོར་པ་ལ་སྩལ་བར་བསམ་པར་བྱས་ཏེ། དེ་ལྟ་བུས་ནི་རྣམ་ཐོས་སྲས་མནན་ནས་དཔལ་ཕྲོགས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མཛུབ་མོ་གཉིས་ཀྱིས་དོང་ཚེ་གཉིས་འཕེན་ཞིང་གསོར་བའི་ཚུལ་དུ་སྟོན་ཅིང་ཡིད་ལ་འདོད་པའི་ལྷའི་བུ་མོ་དང་ལྷན་ཅིག་ཡང་དག་པར་སྦྱོར་བར་བྱས་ཏེ། དེ་ལྟ་བུས་ནི་ལྷའི་བུ་མོ་ཐམས་ཅད་དང་རྩེ་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་གཞོན་ནུ་མའི་ལག་པ་གཡོན་ན་གནས་པའི་དྲིལ་བུ་རྡོ་རྗེ་འབར་བས་ཡིད་ཀྱིས་བཅུག་ལ་གཞོན་ནུ་མ་དང་ལྷན་ཅིག་ཡང་དག་པར་སྦྱོར་བར་བསྒོམ་པར་བྱས་ཏེ། དེ་ལྟ་བུས་ནི་གཞོན་ནུ་མ་དང་རྩེ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ཏེ་གཡས་པའི་མཛུབ་མོའི་གདོད་རང་གི་མཐེ་བོའི་སྟེང་དུ་གཞག་ལ་འོག་ཏུ་ཕབ་སྟེ་མཛུབ་མོ་གཡོན་པས་མནན་ཏེ། མཐེའུ་ཆུང་གཉིས་ཀྱིས་ལྕགས་སྐྲོག་དྲལ་བའི་ཚུལ་གྱིས་དབྲོག་པའི་ཚུལ་དུ་བྱ་ཞིང་རྐང་པ་གཡོན་པས་བརྒྱ་བྱིན་གྱི་གཟུགས་བརྙ་ཇི་སྐད་བཤད་པའི་ཚུལ་གྱིས་མནན་ལ། བཅོམ་ལྡན་འདས་རྡོ་རྗེ་མེ་ལྟར་འབར་བས་ཀྱང་བསྐལ་པ་བསྲེགས་པ་ལྟ་བུའི་རྡོ་རྗེ་ལྕགས་ཀྱུས་བདེ་སོགས་མའི་སྙིང་ཕུག་སྟེ། རླུང་གི་དཀྱིལ་འཁོར་ལ་བསྐྱོན་ནས་འགུགས་པར་མཛད་པར་བསམ་པར་བྱས་ཏེ། དེ་ལྟ་བུས་ནི་བརྒྱ་བྱིན་མནན་ནས་བདེ་སོགས་མ་ཕྲོགས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཕྱག་རྒྱ་བཅིངས་པ་ལས་རྡོ་རྗེ་འབར་བ་ཕྱུང་སྟེ། གཞོན་ནུ་མའི་ལག་པ་གཡས་པ་ན་གནས་པའི་དྲིལ་བུ་ཡིད་ཀྱིས་བཅག་པར་བྱས་ཏེ། དེ་ལྟ་བུས་ནི་གཞོན་ནུ་མཚར་བཅད་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཡིད་ཀྱིས་ཚངས་པའི་མདུན་དུ་
གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་སྤྲུལ་ལ་འདོད་པའི་ལོངས་སྤྱོད་དང་ལྡན་པར་བསམ་པར་བྱས་ཏེ། དེ་ལྟ་བུས་ནི་ཚངས་པ་ལྟུང་བ་བྱས་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཕྱག་རྒྱ་བཅིངས་པ་ལས་འབར་བའི་རྡོ་རྗེ་ཕྱུང་སྟེ། ཡིད་ཀྱིས་ཁྱབ་འཇུག་གི་འཁོར་ལོ་དྲལ་བར་བྱས་ཏེ། དེ་ལྟ་བུས་ནི་ཁྱབ་འཇུག་ཐུལ་བར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་ཕྱག་རྒྱ་བཅིངས་པ་ལས་རྡོ་རྗེ་འབར་བ་ཕྱུང་སྟེ། དེས་དབང་ཕྱུག་ཆེན་པོའི་ལག་པ་ན་གནས་པའི་རྩེ་གསུམ་པ་བཅག་པར་བྱས་ཏེ། དེ་ལྟ་བུས་ནི་དབང་ཕྱུག་ཆེན་པོ་ལས་རྣམ་པར་རྒྱལ་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་གཡས་པའི་མཛུབ་མོའི་གདོང་རང་གི་མཐེ་བོའི་སྟེང་དུ་བཞག་ལ་གཡོན་པའི་མཛུབ་མོའི་གདོང་ཡང་དེ་བཞིན་དུ་བཞག་ནས་གཡས་པའི་ཁུ་ཚུར་གྱིས་གཡོན་པའི་ཁུ་ཚུར་བཟུང་ལ་དེ་བཞིན་དུ་མཐར་གདུ་བུ་དགྲོལ་བའི་ཚུལ་གྱིས་བསལ་བར་བྱ་ཞིང༌། །འདོད་པའི་དབང་ཕྱུག་གི་གཟུགས་བརྙན་རྐང་པ་གཡོན་པས་མནན་པར་བྱ་ཞིང་བཅོམ་ལྡན་འདས་མེ་ལྟར་འབར་བ་བསྲེག་པའི་བསྐལ་པ་ལྟ་བུའི་རྡོ་རྗེ་ལྕགས་ཀྱུས་དགའ་བ་མའི་སྙིང་གར་ཕྱུང་སྟེ། རྡོ་རྗེ་རླུང་གི་དཀྱིལ་འཁོར་ལ་བསྐྱོན་ནས་འགུགས་པར་མཛད་པར་བསམ་པར་བྱས་ཏེ། དེ་ལྟ་བུས་ནི་འདོད་པའི་དབང་ཕྱུག་མནན་ནས་དགའ་བ་མོ་འཕྲོག་པར་འགྱུར་རོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མདུན་དུ་རྡོ་རྗེ་རྩེ་ལྔ་པ་བསྒོམ་པར་བྱས་ཏེ། དེ་ལྟ་བུས་ནི་རྡོ་རྗེ་འགྲུབ་བོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མདུན་དུ་ཀུན་དུ་བཟང་པོ་ལ་སོགས་པ་བྱང་ཆུབ་སེམས་དཔའ་ཆེན་པོར་བསྒོམ་པར་བྱས་ཏེ། དེ་ལྟ་བུས་ནི་བྱང་ཆུབ་སེམས་དཔའ་ཆེན་པོ་འགྲུབ་བོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ལ་མདུན་དུ་དེ་བཞིན་གཤེགས་པ་ཐམས་ཅད་བསྒོམ་པར་བྱས་ཏེ། དེ་ལྟ་བུས་ནི་དེ་བཞིན་གཤེགས་པ་ཐམས་ཅད་མཉེས་པར་བྱེད་དོ། །དེ་བཞིན་དུ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ལ་མདུན་དུ་རྡོ་རྗེ་འཛིན་པ་ཆེན་པོ་བསྒོམ་པར་བྱས་ཏེ། དེ་ལྟ་བུས་ནི་རྡོ་རྗེ་འཆང་ཆེན་པོ་རྗེས་སུ་མཉེས་པ་དང༌། དགུག་པ་དང༌། གཞུག་པ་དང༌། དམ་ཚིག་གིས་བཅིང་བ་དང༌། དབང་དུ་བྱ་བ་བསྒྲུབ་པར་འགྱུར་རོ། །ལན་ཅིག་བཟླས་པ་
གྲུབ་པ་ནི་ཞེས་བྱ་བ་ལ་སོགས་པ་ལས་རྒྱལ་པོ་འདི་དག་འགྲུབ་པར་བྱེད་པའི་ཕྱག་རྒྱ་ནི་ཡི་གེ་ཧཱུཾ་ཟློས་ཤིང་བཅིང་བར་བྱས་ལ། དེའི་འོག་ཏུ་ནི་ཧྲིཿ་ཞེས་བྱ་བ་ལྷན་ཅིག་སྦྱར་བར་བྱས་ཏེ། ཧྲཱིཿ་ཧཱུཾ་ཞེས་ཟློས་པས་དངོས་གྲུབ་ཐམས་ཅད་སྒྲུབ་པར་བྱེད་དོ་ཞེས་བྱ་བའི་ཐ་ཚིག་གོ །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པའི་འབྱུང་བ་ཞེས་བྱ་བ་ལས་རྡོ་རྗེ་མེ་དང༌། ཉི་མ་ལྟར་རབ་ཏུ་འབར་བའི་རྟོག་པ་བཤད་པ་རྫོགས་སོ།། །།དེ་ལྟར་ཁྲོ་བས་ཁྲོ་བ་སྤང་བའི་ཕྱིར་རྡོ་རྗེ་མེ་དང་ཉི་མ་ལྟར་རབ་ཏུ་འབར་བའི་དཀྱིལ་འཁོར་གྱི་རྟོག་པ་གསུངས་ནས། ད་ནི་ལོག་པར་ལྟ་བའི་གཉེན་པོར་གྱུར་པ་འཕགས་པ་སྤྱན་རས་གཟིགས་དབང་ཕྱུག་གི་རྟོག་པ་གསུངས་པ་ནི། དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཚིག་ཡིན་ཏེ། དང་པོ་སྦྱོར་བའི་རྗེས་ཐོགས་ཉིད་ལའོ། །འདིར་དང་པོར་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་དུ་གསུངས་པ་ཉིད་ཡིན་ནོ། །ཏིང་ངེ་འཛིན་ཐམས་ཅད་ནི་དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་ཐམས་ཅད་དོ། །དེ་བཞིན་གཤེགས་པ་ཐམས་ཅད་ཀྱི་འཕགས་པ་སྤྱན་རས་གཟིགས་དབང་ཕྱུག་གི་རྣམ་པར་ཐུགས་རྩེ་གཅིག་ཏུ་མཛད་པ་ཞེས་བྱ་བའི་ཐ་ཚིག་གོ །དེ་ཡང་འདི་ཉིད་ཀྱི་འོག་ནས་གང་ཞིག་ལ་གཟིགས་པས་དེ་བཞིན་གཤེགས་པ་ཁམས་གསུམ་མ་ལུས་པ་ཐམས་ཅད་ཀྱི་དབང་ཕྱུག་ཉིད་དུ་གྱུར་པ་ཞེས་གསུངས་པ་ཡིན་ནོ། །ནི་ཞེས་བྱ་བ་ནི་ངེས་པར་གཟུང་བའོ། །གང་ལས་བྱུང་ཞེ་ན། རྣམ་དག་མཆོག་གི་ཆོས་ཉིད་ལས། །ཞེས་བྱ་བ་གསུངས་ཏེ། ཐམས་ཅད་རང་བཞིན་གྱིས་རྣམ་པར་དག་པ་ལ་གཟིགས་པ་ནི་ཆོས་ཐམས་ཅད་ཀྱི་ཆོས་ཀྱི་མཆོག་གོ །རྣམ་པར་དག་པའི་ཆོས་ཀྱི་མཆོག་དེ་ལས་འབྱུང་བ་གང་ཡིན་པ་དེ་ནི་ཏིང་ངེ་འཛིན་ཐམས་ཅད་ཅེས་བྱའོ། །ཏིང་ངེ་འཛིན་གང་ཞིག་ཡིན་ཞེ་ན། སྤྱན་རས་གཟིགས་དབང་ཆེན་པོ་ནི། །ཞེས་བྱ་བ་གསུངས་ཏེ། རང་གི་སྙིང་པོ་མཆོག་སྙོམས་ཞུགས། །ཞེས་བྱ་བ་སྦྱར་རོ། །ཞེས་བྱ་བར་སྦྱར་རོ། །ཇི་ལྟར་པདྨ་དམར་པོ་འདི། །ཚོན་གྱི་ཉེས་པས་མི་གོས་པ། །དེ་བཞིན་ཁམས་གསུམ་དག་པ་ནི། །གནས་ཀྱི་ཉེས་པས་མི་གོས་སོ། །ཞེས་རྟོག་པ་མཛད་པས་ན་
སྤྱན་རས་གཟིགས་སོ། །དེ་ལ་མངའ་བརྙེས་པས་ན་དབང་ཕྱུག་གི་གཙོ་བོའི་གཟུགས་ཐམས་ཅད་སྟོན་པར་མཛད་པས་ནམ་མཁའི་ཁམས་ལ་ཁྱབ་པར་མཛད་པས་ན་ཆེན་པོའོ། །སྤྱན་རས་གཟིགས་དབང་ཡང་ཡིན་ལ། ཆེན་པོ་ཡང་ཡིན་པས་སྤྱན་རས་གཟིགས་དབང་ཆེན་པོའོ། །ནིའི་སྒྲ་ནི་ངེས་པར་གཟུང་བ་དང༌། རིམ་པ་ཐ་དད་པའོ། །རྡོ་རྗེ་སེམས་དཔའ་གཙོ་ཆེན་ཡིན། །ཞེས་བྱ་བ་ནི་རྡོ་རྗེ་སེམས་དཔའ་ཉིད་གཙོ་བོ་ཆེན་པོ་འཇིག་རྟེན་དབང་ཕྱུག་ཆེན་པོ་ཡིན་ནོ་ཞེས་པའོ། །ཅི་ཞིག་མཛད་ནས་ཁྱབ་པར་ཇི་ལྟ་བུ་ཞིག་མཁྱེན་ནས་རང་གི་སྙིང་པོ་ལ་སྙོམས་པར་ཞུགས་ཤེ་ན། གདུག་པ་ཐམས་ཅད་གདུལ་བའི་ཕྱིར། །ཞེས་བྱ་བ་ལ་སོགས་པ་གསུངས་ཏེ། གདུག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་གདུག་པ་ཐམས་ཅད་དེ་དྲག་པོ་ལ་སོགས་པའོ། །དེ་རྣམས་གདུལ་བ་ནི་ཚར་གཅད་པ་དང༌། ཕན་གདགས་པའོ། །དོན་དེའི་ཕྱིར། རང་གི་རིགས་ནི་ཆེན་པོ་བསྐྱེད། །ཅེས་བྱ་བ་སྟེ། བཅོམ་ལྡན་འདས་རྡོ་རྗེ་སེམས་དཔའི་རང་གི་རིགས་རྡོ་རྗེ་མེ་ལྟར་འབར་བའོ། །རང་གི་དཀྱིལ་འཁོར་རང་གི་རྡོ་རྗེ་ལས་ཕྱུང་བ་ནི་བསྐྱེད་པ་ཡིན་ལ། ནམ་མཁའ་ཐམས་ཅད་ཁྱབ་པས་ན་ཆེན་པོའོ། །ཅིའི་ཕྱིར་བསྐྱེད་ཅེ་ན། སངས་རྒྱས་ཀུན་གྱི་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཐམས་ཅད་ཀྱི་ཁྲོ་བོ་ཆེན་པོ་ནི་སངས་རྒྱས་ཀུན་གྱི་ཁྲོ་བོ་ཆེན་པོ་སྟེ། རྡོ་རྗེ་མེ་ལྟར་རབ་ཏུ་འབར་བའོ། །དེ་ནི་གང་གི་ཕྱིར་གདུག་ཅིང་གཏུམ་པའི་སེམས་ཅན་ཐམས་ཅད་འདུལ་བའི་ཐབས་ཏེ་རྒྱུ་ཡིན་ནོ། །འདི་ཅིའི་ཕྱིར་རྒྱུ་ཡིན་ཞེ་ན། ཐམས་ཅད་མེད་པས་ན་ཞེས་བྱ་བ་གསུངས་ཏེ། སེམས་ཅན་གདུག་ཅིང་གཏུམ་པ་འདུལ་བའི་ཐབས་ཀྱི་རྒྱུ་གཞན་མེད་པས་ན། རང་གི་རིགས་ཆེན་བསྐྱེད་པ་ཡིན། །རང་གི་སྙིང་པོ་མཆོག་སྙོམས་ཞུགས། །ཞེས་བྱ་བ་ཡིན་ནོ། །ཅིའི་ཕྱིར་དེ་ལྟར་ཞུགས་ཤེ་ན། མ་དག་པའི་ཞེས་བྱ་བ་གསུངས་ཏེ། གང་གི་ཕྱིར་སེམས་ཅན་གྱི་ཁམས་མ་དག་པ་ཡིན་པས་སོ། །རྒྱུ་ཅི་ཞིག་གིས་ཤེ་ན། འདོད་ཆགས་ལ་སོགས་ཀུན་བསགས་པས། །ཞེས་བྱ་བ་གསུངས་ཏེ། འདོད་ཆགས་ལ་སོགས་པ་ཡང་ཡིན་ལ། ཀུན་ཀྱང་ཡིན་པས་ན་འདོད་ཆགས་ལ་སོགས་པ་ཀུན་ཏེ། དེ་རྣམས་
བསགས་པའི་ཐོག་མ་མེད་པའི་དུས་ནས་བྱུང་བས་ན་ཤས་ཆེར་བསགས་པའོ། །འདོད་ཆགས་ལ་སོགས་པ་བསགས་པ་དེས་ན། གང་གི་ཕྱིར་སེམས་ཅན་གྱི་ཁམས་ནི་མ་དག་པར་གྱུར་པ་དེའི་ཕྱིར་སྙོམས་པར་ཞུགས་པར་མཛད་པ་ཡིན་ནོ། །དེ་རྣམས་ལ་ཡང་རང་ཞེན་པར། །ཞེས་བྱ་པ་ནི་འདོད་ཆགས་དང་ཞེ་སྡང་ལ་སོགས་པ་དེ་རྣམས་ལ་རབ་ཏུ་ཞེན་པར་བྱེད་ཅིང༌། །བུད་མེད་བསྙེན་པ་དང༌། སྲོག་གཅོད་པ་ལ་སོགས་པའི་ཚུལ་དུ་ཞེན་ཅིང་ཤིན་ཏུ་མི་ལྡོག་པས་རྗེས་སུ་འབྲེལ་པར་སྐྱེས་བུའི་དམ་པ་སྟེ། སྐྱེས་བུའི་མཆོག་གི་མཁྱེན་ཅིང་ཐུགས་སུ་ཆུད་པ་ཡིན་ནོ། །ཇི་ལྟར་ན་དེ་རྣམས་རབ་ཏུ་ཞེན་པ་ཡིན་ཞེ་ན། གང་གི་ཕྱིར་མི་འདུལ་བས་ན་སངས་རྒྱས་ཀྱང་མཆོག་ཏུ་མངའ་ན་མི་མཛད་དེ་ཞེས་བྱ་བ་སྨོས་ཏེ། དེ་རྣམས་གདུལ་བར་བྱ་བའི་ཕྱིར། །སངས་རྒྱས་ཀྱང་མངའ་མི་མཛད་ཅིང༌། །བདག་པོར་མ་གྱུར་པ་ཡིན་ནོ། །ཅིའི་ཕྱིར་ཞེ་ན། མི་འདུལ་བས་ན་ཞེས་བྱ་བ་སྟེ། ཞི་བའི་ཚུལ་གྱིས་མི་འདུལ་བས་རྒྱུ་དེའི་ཕྱིར་རོ། །མཆོག་ཏུ་ཞེས་བྱ་བ་ནི་ཤིན་ཏུའོ། །དེ་ལྟར་སངས་རྒྱས་ཀྱང་འདུལ་བ་མ་མངའ་མི་མཛད་པས་ན་འཇིག་རྟེན་རྣམས་ལ་ཞེས་བྱ་བ་ལ་སོགས་པ་སྨོས་ཏེ། རྨོངས་པས་ཤིན་ཏུ་ཟིལ་གྱིས་མནན་པར་གྱུར་པའི་སེམས་ཅན་རྣམས་ལ་ཕན་པར་བྱ་བའི་ཕྱིར། འཇིག་རྟེན་གྱི་མཆོག་བཅོམ་ལྡན་འདས་རྡོ་རྗེ་སེམས་དཔའ་སྙོམས་པར་ཞུགས་པ་ལ་གནས་པར་མཛད་པ་ཡིན་ནོ། །ཅི་ཞིག་ལ་སྙོམས་པར་ཞུགས་ཤེ་ན། རང་གི་སྙིང་པོ་མཆོག་ལ་ཞེས་བྱ་བ་སྨོས་ཏེ། རང་གི་བདག་ཉིད་ཀྱི་སྙིང་པོ་བཟང་པོ་མཆོག་སྟེ་དེ་ལའོ། །འདི་སྐད་སྟོན་པ་ཡིན་ཏེ། རྡོ་རྗེ་སེམས་དཔའི་ཚུལ་དང་དེ་བཞིན་གཤེགས་པ་དང༌། རྡོ་རྗེའི་རིགས་སྒེག་པ་དང༌། ཞི་བ་དང་ཁྲོ་བོའི་ཉམས་ཀྱིས་འདུལ་བའི་སེམས་ཅན་གྱི་ཁམས་འདུལ་བ་ལ་རབ་ཏུ་བཞག་ནས། སྙིང་རྗེའི་ཉམས་ཀྱིས་འདུལ་བའི་སེམས་ཅན་རྣམས་གདུལ་བར་བྱ་བའི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོའོ། །འཕགས་པ་སྤྱན་རས་གཟིགས་དབང་ཕྱུག་གི་ཏིང་ངེ་འཛིན་ལ་སྙོམས་པར་ཞུགས་པ་ཡིན་ནོ། །དེ་ལ་འདི་ནི་ཞེས་བྱ་བ་ལ་སོགས་པ་ནི་འདི་ཉིད་རྣམ་པར་འགྲེལ་པ་ཡིན་ཏེ། འདི་ནི་ཞེས་བྱ་བ་འོག་ནས་བཤད་པ་ཐུགས་ལ་བཞག་ནས་འདི་སྐད་གསུངས་པ་ཡིན་
ནོ། །དེ་བཞིན་གཤེགས་པ་ཐམས་ཅད་ཀྱི་ཏིང་ངེ་འཛིན་ནི་འཇིག་རྟེན་དབང་ཕྱུག་གི་ཚུལ་གྱིས་ཆོས་ཐམས་ཅད་རང་བཞིན་གྱིས་རྣམ་པར་དག་པར་སོ་སོར་རྟོགས་པའོ། །དེས་ཀྱང་ཏིང་ངེ་འཛིན་གཞན་ཟིལ་གྱིས་མནན་ནས་མཛེས་ཤིང་འབར་བས་ན་རྒྱལ་པོའོ། །འདི་ཉིད་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཆོས་ཉིད་ཀྱི་ཡེ་ཤེས་ཀྱི་རྡོ་རྗེ་བྱིན་གྱིས་བརླབ་པའི་ཕྱག་རྒྱ་ཞེས་བྱ་བའི་ཏིང་ངེ་འཛིན་ཏེ། ཆོས་ཐམས་ཅད་རང་བཞིན་གྱིས་རྣམ་པར་དག་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་དང༌། པདྨའི་རིགས་སོ། །དེ་རྣམས་ཀྱི་ཆོས་ཉིད་ནི་དེ་བཞིན་ཉིད་དོ། །དེའི་ཡེ་ཤེས་ནི་ངེས་པའོ། །དེ་ཉིད་ནི་རྣམ་པར་རྟོག་པ་ཐམས་ཅད་ཀྱིས་བསྐྱེད་ཅིང་གཞིག་པར་མི་ནུས་པས་ན་རྡོ་རྗེ་དང་འདྲ་བའི་ཕྱིར་རྡོ་རྗེའོ། །གང་གིས་དེ་བྱིན་གྱིས་བརླབ་ཅིང་འཇིག་རྟེན་དབང་ཕྱུག་གི་སྐུར་བྱེད་པའི་ཏིང་ངེ་འཛིན་གང་ཡིན་པ་དེ་ལ་མིང་དེ་སྐད་ཅེས་བྱའོ། །གང་གི་ཕྱིར་ཏིང་ངེ་འཛིན་གང་ཞིག་ལ་རྣམ་པར་གཟིགས་ཤིང་མངོན་སུམ་དུ་མཛད་པས་དེ་བཞིན་གཤེགས་པ་ཐམས་ཅད་ཅེས་བྱ་བ་རྣམ་པར་སྣང་མཛད་ལ་སོགས་པ་ཁམས་གསུམ་པ་མ་ལུས་པ་ཞེས་བྱ་བ་ནི། སྲིད་པ་གསུམ་མཐའ་དག་ཐམས་ཅད་ཀྱི་བདག་པོ་ཞེས་བྱ་བའོ། །འཕགས་པ་སྤྱན་རས་གཟིགས་དབང་ཕྱུག་གི་ཐུགས་སུ་ཆུད་པ་ནི་མངོན་སུམ་དུ་མཛད་པ་སྟེ། སེམས་ཅན་ཐམས་ཅད་གདུལ་བར་བྱ་བའི་ཕྱིར་འཕགས་པ་སྤྱན་རས་གཟིགས་དབང་ཕྱུག་གི་སྐུ་ཚད་མེད་པར་མཛད་དོ་ཞེས་བྱ་བའི་ཐ་ཚིག་གོ །ད་ནི་ཏིང་ངེ་འཛིན་བསྒོམ་པའི་མན་ངག་བསྟན་པར་བྱ་བའི་ཕྱིར་བསྙེམས་པས་ཞེས་བྱ་བ་ལ་སོགས་པ་གསུངས་ཏེ། གཡོན་པའི་པདྨའི་ཁུ་ཚུར་གྱིས་རྡོ་རྗེ་པདྨའི་བཟུང་སྟེ། དེས་བསྙེམས་པའི་ཚུལ་དུ་མཛད་ནས་ཕྱག་གཡས་པའི་མཐེ་བོང་དང༌། མཛུབ་མོས་རང་གི་ཐུགས་ཀའི་ཕྱོགས་དེའི་འདབ་མ་ལ་ཁ་འབྱེད་པར་མཛད་པས་རྟོག་ཅིང་གཟིགས་པར་མཛད་པ་ཡིན་ནོ། །ཅི་ཞིག་གིས་གཟིགས་ཤེ་ན། རང་བཞིན་གྱིས་ཞེས་བྱ་བ་སྨོས་ཏེ། རང་གི་ངོ་བོ་ཉིད་ནི་རང་བཞིན་ཏེ་ཆོས་ཐམས་ཅད་ཀྱི་དེ་བཞིན་ཉིད་དོ། །རང་བཞིན་དེས་གཟིགས་པ་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམ་པར་
མཛད་དོ་ཞེས་བྱ་བའི་ཐ་ཚིག་གོ །ཇི་ལྟར་གཟིགས་པར་མཛད་ཅེ་ན། ཅི་ནུས་པའི་ཏིང་ངེ་འཛིན་གྱིས་ཞེས་བྱ་བ་གསུངས་ཏེ། རང་གི་ནུས་པ་དང་རྗེས་སུ་མཐུན་པར་བསྒོམ་པ་ནི་ཅི་ནུས་པའི་ཏིང་ངེ་འཛིན་ཏེ། ཅི་ནུས་པའི་ཏིང་ངེ་འཛིན་དེས་པདྨའི་འདབ་མ་རྣམ་པར་དབྱེ་བར་མཛད་ཅིང་གཟིགས་པ་ཡིན་ནོ། །དེ་ནི་ཇི་ལྟར་ཞེས་བྱ་བ་ལ་སོགས་པ་གཟིགས་པའི་ཚུལ་རྣམ་པར་འབྲེལ་པ་ཡིན་ཏེ། ཇི་ལྟར་སྒྲུབ་པ་པོའི་ལག་ན་གནས་པའི་པདྨ་དམར་པོ་འདི་ཁ་དོག་དམར་པོ་དང་རྗེས་སུ་མཐུན་པ་ཉིད་ཀྱིས་སོ། །ཚོན་གྱི་ཉེས་པ་ནི་ཚོན་གྱི་སྐྱོན་ཏེ་རྫས་གཞན་དང་འདྲེས་པ་ཡོངས་སུ་སྤང་བར་མ་གྱུར་པའོ། །དེས་མ་གོས་པ་ནི་མ་འདྲེས་པ་སྟེ། པདྨ་དམར་དུ་ཟིན་ཀྱང་མ་འདྲེས་པའི་ཆོས་དང་ལྡན་པས་མཐེའུ་ཆུང་ལས་བྱུང་བའི་ཆུ་དང་འདབ་མ་ལ་སོགས་པའི་ཉེས་པ་རྣམ་པ་སྣ་ཚོགས་ཀྱིས་ཇི་ལྟར་པདྨ་དེ་ལ་གོས་པར་མི་འགྱུར་བ་དེ་བཞིན་དུ་ཁམས་གསུམ་དག་པ་ཐུགས་རྗེ་ཆེན་པོ་དང་ལྡན་པའི་ཆོས་བདག་མེད་པའི་ཆགས་པའི་བྱང་ཆུབ་སེམས་དཔའ་ནི་འདོད་ཆགས་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པའི་དྲི་མ་དང་བྲལ་བ་ཡིན་ནོ། །རྒྱུ་གང་གིས་ནི་ཏིང་ངེ་འཛིན་འདི་ལ་གཟིགས་ཤིང་མངོན་སུམ་དུ་མཛད་པའི་རྒྱུ་དེས་རྒྱལ་པོ་སྟེ། དེ་བཞིན་གཤེགས་པ་རྣམས་དབང་ཕྱུག་ཉིད་དུ་གྱུར་པ་སྟེ། འཇིག་རྟེན་དབང་ཕྱུག་ཉིད་དུ་གྱུར་པ་ཡིན་ནོ། །དེ་ཡིས་ཞེས་བྱ་བ་ནི་རྒྱུ་དེས་སོ། །རྡོ་རྗེ་སེམས་དཔའ་ནི་རྡོ་རྗེ་འཆང་ཆེན་པོའོ། །སྤྱན་རས་གཟིགས་ནི་ཚུལ་དེས་སོ་སོར་རྟོག་ཅིང་གཟིགས་པར་མཛད་པས་དབང་ཕྱུག་ཅེས་བྱ་བ་གཙོ་བོར་གྱུར་པ་སྟེ། དེ་ལྟ་བུར་གྱུར་ཅིང་ཉེ་བར་སྐྱེད་པའོ། །འདིས་ནི་འདི་སྐད་སྟོན་པ་ཡིན་ཏེ། འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་བཅིངས་ལ། ཡ་ཐཱ་རཀྟ་མི་དཾ་པདྨ་ད་མ་ག་ཏོ་ཤི་རྣ་ལ་ལི་བྱ་ཏེ། བ་ས་དོ་ཤེ་ཥྭ་བཱི་བཱི་ཏ་དྷེ་ཏཱ་དྷུདྡྷ་ཏྲི་དྷཱ་ཏུ་ཀཾ་ཞེས་བྱ་བའི་སྙིང་པོ་ཟློས་ཤིང་སྙིང་པོ་འདི་བསྒོམས་པའི་སྟོབས་ཀྱིས་སེམས་ཅན་གྱི་དོན་མཛད་པའི་ཕྱིར། བཅོམ་ལྡན་འདས་འཇིག་རྟེན་དབང་ཕྱུག་ཉིད་དུ་ཇི་ལྟར་འགྱུར་བ་དེ་བཞིན་དུ་སྙིང་པོ་འདི་ཉིད་བསྒོམ་ཞིང་རྣམ་པར་གཟིགས་པའི་སྟོབས་ཀྱིས་རྡོ་རྗེ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་ཏུ་གྱུར་པ་
ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། བཤད་མ་ཐག་པའི་སྒོམ་པའི་སྙིང་པོའོ། །རང་བཞིན་གྱིས་དག་པའི་ཆོས་ཉིད་ཀྱི་ཏིང་ངེ་འཛིན་སྟོན་པར་བྱེད་པའི་སྙིང་པོ་འདི་བཅོམ་ལྡན་འདས་རྡོ་རྗེ་འཆང་ཆེན་པོས་སྒོམ་པར་དག་པ་ཞེས་བྱ་སྟེ། དེ་ཁོ་ན་ཉིད་ཀྱིས་སྒོམ་པས་བསྒོམས་ཤིང་ཡང་དང་ཡང་དུ་མངོན་སུམ་དུ་མཛད་པར་གྱུར་པ་ཡིན་ནོ། །དེའི་ཚེ་རྒྱལ་པོ་རྡོ་རྗེ་འཆང་ཆེན་པོ་པདྨ་ཆེན་པོ་འཆང་བར་གྱུར་ཅིང༌། དེ་ལྟར་སྣང་བ་ཡིན་ནོ། །གསེར་སྦྱངས་པ་ནི་རིན་པོ་ཆེ་གཞན་དང་མ་འདྲེས་པ་དང༌། དྲི་མ་དང་བྲལ་བའོ། །རིའི་དབང་པོ་ནི་རི་རབ་བོ། །དེས་ཀྱང་གཞན་དག་ཟིལ་གྱིས་མནན་ནས་མཛེས་ཤིང་འབར་བས་གནས་པས་ན་མཛེས་ཤིང་འབར་རོ། །གསེར་སྦྱངས་རི་ཡི་དབང་པོ་ནི། །ཞེས་བྱའོ། །རྒྱལ་པོ་ཆེ་ཞེས་བྱ་བ་ནི་དེ་དང་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གཟི་མདངས་དང་མཉམ་ཞིང་མཚུངས་པ་གང་ཡིན་པ་དེ་ལ་དེ་སྐད་ཅེས་བྱའོ། །གཡོན་ན་བསྙེམས་བཅས་པདྨ་མཆོག །ཅེས་བྱ་བ་ལ་སོགས་པ་ལ་གཡོན་ན་ཞེས་བྱ་བ་ནི་གཡོན་པའི་པདྨའི་ཁུ་ཚུར་བསྙེམས་པ་དང་བཅས་པས་འཛིན་པས་ན། གཡོན་པ་བསྙེམས་བཅས་པདྨ་ཞེས་བྱ་བ་ལ་མཆོག་ནི་འཇིག་རྟེན་དབང་ཕྱུག་སྟེ། གཡོན་ན་བསྙེམས་པ་དང་བཅས་པའི་པདྨ་ཡང་ཡིན་ལ་མཆོག་ཀྱང་ཡིན་པས་ཞེས་མཚམས་སྦྱར་རོ། །ཕྱག་གཡས་པས་ཐུགས་ཀའི་ཕྱོགས་སུ་པདྨའི་འདབ་མ་འབྱེད་པར་མཛད་པའོ། །མཆོག་ཏུ་གཟིགས་པས་ཉེ་བར་མཚོན་པས་ན། མཆོག་གིས་རྣམ་པར་གཟིགས་ཞེས་བྱ་སྟེ། དེ་ལྟ་བུའི་ཚུལ་གྱིས་གཟིགས་པའོ། །དེ་ནས་ཞེས་བྱ་བ་ལ་སོགས་པ་ལ། དེ་ལྟར་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་པདྨའི་འདབ་མ་ལ་གཟིགས་པའི་ཚུལ་གྱིས་བཞུགས་པའི་རྗེས་ཐོགས་ཉིད་ལ་བཅོམ་ལྡན་འདས་ཀྱི་ཕྱག་ན་གནས་པའི་པདྨའི་འདབ་མ་རྣམས་ལ་པདྨ་ཆེན་པོ་འཛིན་པ་རྣམས་ཕྱུང་ངོ༌། །དེ་སུ་ཞིག་ཡིན་ཞེ་ན། སངས་རྒྱས་ལ་སོགས་ཏེ་ཇི་ལྟར་འོག་ནས་བཤད་པ་རྣམས་བྱུང་ནས་སེམས་ཅན་རྣམས་འདུལ་བའི་མཆོག་དམ་པ་དག་མཛད་པར་འགྱུར་རོ། །དེ་ནས་ཕྱོགས་བཅུར་སེམས་ཅན་རྣམས་སྐལ་བ་ཇི་ལྟ་བ་བཞིན་དུ་སངས་རྒྱས་ཉིད་བཙལ་བ་
ལ་སོགས་པ་མ་ལུས་པར་ཡང་དག་པར་སྦྱངས་ནས་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་དབྱིབས་ཀྱིས་རྡོ་རྗེ་འཇིག་རྟེན་དབང་ཕྱུག་གི་དཀྱིལ་འཁོར་དེར་བཞུགས་ཤིང་གནས་པར་མཛད་དོ། །གང་ལ་པདྨ་བཟང་པོ་འདབ་མ་བརྒྱད་པོ་ཡོད་པ་འདི་ནི་པད་བཟངས་ཏེ། པདྨ་བཟང་པོའི་དཀྱིལ་འཁོར་དེར། ཕྱོགས་བཅུ་ནས་བྱོན་པའི་སངས་རྒྱས་རྣམས་པདྨ་དེར་ཞུགས་པ་ཡིན་ནོ། །དེ་ལྟར་དེ་ནས་ཏིང་ངེ་འཛིན་ཐམས་ཅད་ནི། རྣམ་དག་མཆོག་གི་ཆོས་ཉིད་ལས། །ཞེས་བྱ་བ་ནས་བརྩམས་ཏེ། པདྨ་བཟང་པོ་དེ་ལ་བཞུགས། །ཞེས་བྱ་བའི་བར་གྱི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་དང་བྱིན་གྱིས་བརླབ་པ་ལ་སོགས་པ་ནི་གསུམ་པ་ཡིན་པར་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བ་འདིའི་དོན་བསྟན་པར་བྱ་བའི་ཕྱིར། ཇི་ལྟར་འདུལ་བའི་ཚུལ་མཆོག་གིས། །ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ལས་ཀྱི་ཆོ་ག་གསུངས་པ་ཡིན་ནོ། །དེ་ནས་ཡང་ཇི་སྐད་དུ་བཤད་པའི་ཚུལ་གྱིས་སེམས་ཅན་གྱི་ཁམས་རྣམས་སྐལ་པ་ཇི་ལྟ་བ་བཞིན་དུ། སངས་རྒྱས་ཉིད་བཙལ་བ་ལ་སོགས་པས་ཐམས་ཅད་ཡང་དག་པར་སྦྱངས་པས་དེ་བཞིན་གཤེགས་པ་དེ་རྣམས་ཀྱིས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་རང་གི་པདྨའི་རིགས་ཀྱི་དཀྱིལ་འཁོར་གྱི་རྟོག་པ་བཤད་པར་བྱ་བའི་ཕྱིར་གསོལ་བ་བཏབ་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་ཡིན་ཏེ། དེ་བཞིན་གཤེགས་པ་ཐམས་ཅད་ཀྱིས་གསོལ་བ་བཏབ་པའི་རྗེས་ཐོགས་ཉིད་ལའོ། །སེམས་ཅན་ཐམས་ཅད་ལུང་དང་རྟོགས་པ་ལ་རབ་ཏུ་འཇོག་པར་མཛད་པས་ན་ཐམས་ཅད་འདུལ་མཛད་དོ། །འདི་ཞེས་བྱ་བ་ནི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ །ཤིན་ཏུ་དག་པའི་ཆོས་འཛིན་པ། །ཞེས་བྱ་བ་ནི་བག་ཆགས་དང་བཅས་པའི་ཉོན་མོངས་པ་དང་བྲལ་བ་པདྨའི་རིགས་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ནི་ཤིན་ཏུ་དག་པའི་ཆོས་ཏེ། དེའི་བདག་ཉིད་ཀྱི་ཚུལ་གྱིས་འཛིན་པར་མཛད་པས་ན་ཤིན་ཏུ་དག་པའི་ཆོས་འཛིན་པའོ། །དེ་སུ་ཞིག་ཡིན་ཞེ་ན། རྡོ་རྗེ་ཆོས་ཏེ་འཇིག་རྟེན་དབང་
ཕྱུག་གོ །རང་ཉིད་ནི་བདག་ཉིད་དོ། །གཟུགས་ཐམས་ཅད་ཀུན་དུ་སྟོན་པས་ཕྱོགས་བཅུར་མཛེས་ཤིང་འབར་བས་ན་རྒྱལ་པོའོ། །འཇིག་རྟེན་དབང་ཕྱུག་བཀའ་སྩལ་ཏོ། །ཞེས་བྱ་བ་ནི་འཇིག་རྟེན་དབང་ཕྱུག་གིས་ཉེ་བར་མཚོན་པའི་དཀྱིལ་འཁོར་ནི་འཇིག་རྟེན་དབང་ཕྱུག་ཅེས་བྱ་སྟེ། དེ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་རྒྱལ་པོས་བཀའ་སྩལ་ཞིང་ཞེས་གསུངས་པ་ཡིན་ནོ། །དཀྱིལ་འཁོར་ཆེན་པོ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་སྟེ་དེ་དག་གི་ཕྱིའི་དཀྱིལ་འཁོར་གང་ཡིན་པ་དེ་ནི་ཕྱིའི་དཀྱིལ་འཁོར་ཆེན་པོ་སྟེ་ཞེས་བྱའོ།། ནང་གི་དཀྱིལ་འཁོར་རང་བཞིན་ཇི་ལྟ་བུར་བྲི་ཞེ་ན། པདྨ་ཞེས་བྱ་བ་གསུངས་སོ། །དེ་འདབ་མ་དུ་ཞིག་ཏུ་བྱ་ཞེ་ན། འདབ་མ་བརྒྱད་པ་ཞེས་བྱ་བ་གསུངས་ཏེ། འདབ་མ་བརྒྱད་པ་བྱའོ་ཞེས་བྱ་བའི་ཐ་ཚིག་སྟེ་ནང་གི་དཀྱིལ་འཁོར་ནི་པདྨ་འདབ་མ་བརྒྱད་པ་བྲི་པ་ཡིན་ནོ། །དེའི་ཞེས་བྱ་བ་ནི་ནང་གི་དཀྱིལ་འཁོར་གྱིའོ།། །དབུས་ཞེས་བྱ་བ་ནི་ལྟེ་བའི་ཕྱོགས་སུའོ། །སྤྱན་འཛུམ་པ་ཞེས་བྱ་འཛུམ་བག་ཅན་ནོ། །འཇིག་རྟེན་དབང་ཕྱུག་ཅེས་བྱ་བ་འཕགས་པ་སྤྱན་རས་གཟིགས་དབང་ཕྱུག་སྣ་ཚོགས་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་དགོད་པར་བྱའོ། །སྐུ་མདོག་ཇི་ལྟ་བུ་ཞེ་ན། དག་པའི་གསེར་གྱི་པདྨ་ནི། །ཞེས་བྱ་བ་གསུངས་ཏེ། གསེར་ཤིན་ཏུ་སྦྱངས་པའི་མདོག་འདྲ་ཞིང་རྡོ་རྗེའི་པདྨ་བསྣམས་པ་ཉིད་ཀྱི་ཕྱིར་དང༌། པདྨ་ལྟར་གོས་པ་མི་མངའ་བའི་ཕྱིར་དེ་ནི་པདྨའི་རང་བཞིན་ཅན་ཡིན་པས་ན་པདྨའོ། །གཡོན་བསྙེམས་ཚུལ་གྱིས་གཟིགས་མཛད་པ། །ཞེས་བྱ་བ་ནི། གཡོན་པ་པདྨའི་ཁུ་ཚུར་པདྨ་དང་བཅས་པས་བསྙེམས་ཚུལ་དུ་ཞུགས་ཤིང་ཕྱག་གཡས་པ་ཐུགས་ཀའི་ཕྱོགས་སུ་པདྨའི་འདབ་མ་འབྱེད་པ་ལ་གཟིགས་པས་ན། གཡོན་བསྙེམས་ཚུལ་གྱིས་གཟིགས་མཛད་པ། །ཞེས་བྱ་བའོ། །རྒྱན་རྣམས་ཀུན་གྱིས་རྣམ་པར་སྤྲས། །ཞེས་བྱ་བ་ནི་རྣམ་པར་བརྒྱན་པའོ། །སྤྱི་བོར་སངས་རྒྱས་ཀུན་མཆོག་བཞུགས། །ཞེས་བྱ་བ་ནི་དེ་བཞིན་གཤེགས་པ་འོད་དཔག་ཏུ་མེད་པའི་སྐུ་ནི་སངས་རྒྱས་ཀྱི་སྐུ་སྟེ། དེ་ཉིད་ནི་མཆོག་གོ །སྤྱི་བོར་བཞུགས་པ་ནི་དེའི་དབུས་སུ་བཞུགས་པ་སྟེ། འཇིག་རྟེན་དབང་ཕྱུག་གི་དབུ་ལ་སངས་
རྒྱས་ཀྱི་སྐུ་བཞུགས་པ་དགོད་པར་བྱའོ། །དེའི་ཞེས་བྱ་བ་ལ་སོགས་པ་ལ་འཇིག་རྟེན་དབང་ཕྱུག་དེའི་ཕྱོགས་དང་མཚམས་རྣམས་སུ་སངས་རྒྱས་ཀྱི་སྐུ་གཟུགས་བརྒྱད་བྲི་བར་བྱའོ། །དེ་སུ་ཞིག་ཡིན་ཞེ་ན་ཏིང་ངེ་འཛིན་བཟང་པོ་ཞེས་བྱ་བ་ལ་སོགས་པ་གསུངས་ཏེ། ཤར་ཕྱོགས་སུ་རྡོ་རྗེ་འདོད་ཆགས་མའི་གནས་སུ་ནི་ཏིང་ངེ་འཛིན་བཟང་པོ་ཞེས་བྱ་བའི་སངས་རྒྱས་ཀྱི་སྐུ་གཟུགས་བྲི་བར་བྱའོ། །ལྷོར་ཀཱི་ལི་ཀཱི་ལའི་གནས་སུ་ནི་པདྨ་ཆེན་པོ་ཞེས་བྱའོ། །ནུབ་ཏུ་རྡོ་རྗེ་དྲན་མའི་གནས་སུ་ནི་ཏིང་ངེ་འཛིན་ཞེས་བྱའོ། །བྱང་དུ་རྡོ་རྗེ་བསྙེམས་མའི་གནས་སུ་ནི་རྣམ་པར་གཟིགས་པ་ཞེས་བྱ་བའི་སངས་རྒྱས་ཀྱི་སྐུ་གཟུགས་བྲི་བར་བྱའོ། །དེ་རྣམས་ཀྱི་ཞེས་བྱ་བ་ནི་ཏིང་ངེ་འཛིན་བཟང་པོ་ལ་སོགས་པའི་གཡོན་ལོགས་སུ་ནི་རྡོ་རྗེས་བྲག་རྩི་མ་ལ་སོགས་པའི་གནས་སུ་རིགས་ཀྱི་ལྷ་ཉིད་བྲི་བར་བྱའོ་ཞེས་བྱ་བ་པདྨའི་ལྷ་ཆེན་པོ་དང༌། པདྨའི་ཁྱབ་འཇུག་དང༌། པདྨའི་ཚངས་པ་དང༌། པདྨའི་འདོད་པའི་ལྷའི་གཟུགས་ཏེ་འདི་ཉིད་བསྟན་པ་ནི་ཞི་བ་སྲེད་མེད་ཀྱི་བུ་ཚངས་པ་འདོད་པའི་གཟུགས་ཅན་ཞེས་བྱ་བ་སྨོས་པ་ཡིན་ནོ། །དེ་ལ་ཞི་བ་ནི་དབང་ཕྱུག་ཆེན་པོའི་གཟུགས་འཛིན་པའི་འཇིག་རྟེན་དབང་ཕྱུག་གོ །སྲེད་མེད་ཀྱི་བུ་ནི་སྲེད་མེད་ཀྱི་བུའི་གཟུགས་འཛིན་པའོ། །ཚངས་པ་ནི་ཚངས་པའི་གཟུགས་འཛིན་པའོ། །འདོད་པའི་གཟུགས་ཅན་ནི་འདོད་པའི་ལྷའི་གཟུགས་ཅན་ནོ། །སྤྱི་བོར་མཚེར་ཞིང་མགྲིན་འདེགས་པ། །ཞེས་བྱ་བ་ནི་རྟ་མགོ་ལྗང་གུའམ་འདིར་ཅི་འདོད་པ་རྟའི་གཟུགས་ཅན་ནོ། །འདོད་པའི་ལྷ་ཞེས་བྱ་བའོ། །ཏིང་ངེ་འཛིན་བཟང་པོ་ལ་སོགས་པ་འདི་དག་ཐམས་ཅད་ཕྱག་མཚན་པདྨ་བསྣམས་པ་བྲི་བར་བྱའོ་ཞེས་བྱ་བ་བསྟན་པར་བྱ་བའི་ཕྱིར་པདྨ་ཅན་ཞེས་བྱ་བ་སྨོས་པ་ཡིན་ནོ། །རྟ་མགྲིན་ལྕགས་ཀྱུ་བཅིངས་ནས་ནི། །ཆོས་ཀྱི་ཚིག་གི་སྤྱན་དྲང་བྱ། །ཞེས་བྱ་བ་ནི་རྟ་མགྲིན་གྱི་ལྕགས་ཀྱུའི་མཚན་ཉིད་འོག་ནས་བཤད་པ་བཅིངས་ལ། ཨོཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཤྭ་ར་ཞེས་བྱ་བ་ལ་སོགས་པ་སྤྱན་དྲང་བའི་སྔགས་འོག་ནས་བཤད་པའི་ཆོས་ཀྱི་ཚིག་གིས་བཟླས་ཤིང་བཅོམ་ལྡན་འདས་འཁོར་དང་བཅས་པ་སྤྱན་དྲངས་ལ་དཀྱིལ་འཁོར་དུ་གཞུག་པ་ནི་ཡང་དག་པར་སྤྱན་དྲངས་པ་ཡིན་ནོ། །དེ་ནས་པདྨའི་རིགས་ཞེས་བྱ་བ་ལ་སོགས་པ་
ནི་གོ་བར་ཟད་དོ། །དཀྱིལ་འཁོར་ཆེན་པོའི་ཚུལ་གྱིས་ནི། །ཆོ་ག་རྒྱས་པ་བྱ་བ་ཡིན། །ཞེས་བྱ་བ་ནི་དཔལ་རྡོ་རྗེ་སེམས་དཔའ་དཀྱིལ་འཁོར་ཆེན་པོ་ལས་བཤད་པའི་ཆོ་གས་བཅོམ་ལྡ་འདས་འཁོར་དང་བཅས་པ་དམ་ཚིག་གི་ཕྱག་རྒྱས་བསྒྲུབས་ལ། ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་སྟེ། དབང་བསྐུར་བའི་ཕྱག་རྒྱས་དབང་བསྐུར་ལ་མཆོད་ཡོན་ཕུལ་ལ་སྔོན་དུ་སོང་བའི་བུམ་པ་ལ་སོགས་པ་ཡང་དག་པར་མཆོད་ལ་སྡོམ་པ་ཇི་ལྟ་བ་བཞིན་དུ་ལེགས་པར་བླངས་ནས་རང་གི་སྙིང་གར་རྡོ་རྗེ་པདྨ་བསྐྱེད་དེ། ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་པའོ། །འདི་ནི་ཆོ་ག་རྒྱས་པ་ཡིན་ལ་དེ་བྱས་ནས་ཅི་ཞིག་བྱ་ཞེ་ན། པདྨ་ཆེན་པོའི་ཕྱག་རྒྱ་ཡིས། །པདྨའི་དཀྱིལ་འཁོར་ལ་གཞུག་བྱ། །ཞེས་བྱ་བ་གསུངས་ཏེ། པདྨ་ཆེན་པོ་པདྨ་དང་བཅས་པ་བཅིངས་ལ་དེ་ཉིད་ཀྱིས་མེ་ཏོག་ཕྲེང་བ་བླངས་ལ་རྡོ་རྗེ་ཤུགས་ཀྱིས་ཞུགས་ཏེ། འཇུག་པའི་གླུ་ལེན་པའི་པདྨའི་དཀྱིལ་འཁོར་དུ་འཇུག་པར་བྱའོ། །པདྨ་ཆེན་པོ་མེ་ཏོག་བཅས། །མ་ཡེངས་ཡིད་ཀྱིས་ཕྱག་བྱའོ། །ཞེས་བྱ་བ་ནི། པདྨ་ཆེན་པོའི་ཕྱག་རྒྱ་མེ་ཏོག་དང་བཅས་པ་བཅིངས་ལ་དཀྱིལ་འཁོར་དུ་ཞུགས་ཏེ། བཅོམ་ལྡན་འདས་ལ་ཡིད་བཞིན་དུ་མ་ཡེངས་པར་ཕྱག་བྱའོ། །དཀྱིལ་འཁོར་ཞུགས་ནས་ཏིང་ངེ་འཛིན། །བཟང་པོ་ལས་བྱུང་གཟུངས་འདི་བརྗོད་པར་བྱ། །ཞེས་བྱ་བ་ནི། དེ་ལྟར་ཇི་སྐད་དུ་བཤད་པའི་ཆོ་གས་དཀྱིལ་འཁོར་དུ་ཞུགས་ནས་རང་བཞིན་གྱིས་དག་པའི་ཏིང་ངེ་འཛིན་ལས་བྱུང་བའི་གཟུངས། ཨོཾ་ཞེས་བྱ་བ་ལ་སོགས་པས་བཅོམ་ལྡན་འདས་ཀྱི་སྤྱན་སྔར་འདུག་སྟེ་བརྗོད་པར་བྱའོ། །དེ་ནས་མཛུབ་མོ་ལྕགས་ཀྱུར་བཅིངས། །ཆོས་ཀྱི་ཚིག་གིས་ལེགས་སྤྱན་དྲངས། །ཞེས་བྱ་བ་ནི་སྔར་བཤད་པའི་ཆོགས་དཀྱིལ་འཁོར་བྲིས་ལ་སྒོ་དབྱེ་བ་བྱས་ནས་བསྡུ་བ་དང་མཚན་བརྒྱ་རྩ་བརྒྱད་པས་བསྟོད་པའི་རྗེས་ཐོགས་ཉིད་ལ་མཛུབ་མོ་གཉིས་ལྕགས་ཀྱུས་བཅིངས་ལ་རྔ་སྒྲ་ལྟར་ཟབ་པའི་དབྱངས་དང་ལྡན་པའི་མཚན་ཉིད་ཅན་གྱིས་ཆོས་ཀྱི་ཚིག་གིས་སྔགས་བརྗོད་ཅིང་བཅོམ་ལྡན་འདས་འཁོར་དང་བཅས་པ་སྤྱན་དྲངས་ཤིང་གཤེགས་པར་བྱའོ། །ཨོཾ་སརྦ་ཏ་ཐཱ་ག་ཏ་ཞེས་བྱ་བ་ལ་སོགས་པ་ནི་གོ་བར་ཟད་དོ། །འཇིག་རྟེན་
འཛིན་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ལྷའི་གཟུགས་ཐམས་ཅད་ནི་འཇིག་རྟེན་ཏེ། དེ་གཟུགས་ཐམས་ཅད་སྟོན་པའི་ཡེ་ཤེས་ཀྱིས་འཛིན་པར་མཛད་པས་ན། འཇིག་རྟེན་འཛིན་ཏེ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གོ །འཇིག་རྟེན་ཀུན་མཆོག་ཅེས་བྱ་བ་ནི་བཅོམ་ལྡན་འདས་ཀྱི་དཀྱིལ་འཁོར་དུ་འཇིག་རྟེན་དང་འཇིག་རྟེན་ལས་འདས་པའི་ལྷའི་གཟུགས་ནི་འཇིག་རྟེན་ཐམས་ཅད་དེ། དེའི་མཆོག་ནི་པདྨའི་རིགས་ཀྱི་བདག་པོའོ། །ཏིང་འཛིན་ཆོ་གས་ངེས་པར་མཛད། །ཅེས་བྱ་བ་ནི་པདྨའི་རིགས་ཀྱི་ལྷ་རྣམས་ཀྱི་སེམས་རྩེ་གཅིག་པ་ཉིད་ཏིང་ངེ་འཛིན་ཏེ། དེ་རྣམས་ཐོབ་པར་བྱེད་པའི་ཐབས་རྣམ་པ་སྣ་ཚོགས་པ་དེ་ལས་ངེས་པར་འབྱུང་བའི་ཡེ་ཤེས་མངའ་བས་ན། ཏིང་འཛིན་ཆོ་གས་ངེས་པར་མཛད། །ཅེས་བསྒྲུབ་པའི་འཇིག་རྟེན་ཐམས་ཅད་ཀྱི་མཆོག་འཇིག་རྟེན་དབང་ཕྱུག་འགྲུབ་པར་མཛད་པའོ། །དེ་ནས་དེ་བཞིན་སློབ་མ་རྣམས། །ཞེས་བྱ་བ་ལ་སོགས་པ་ལ་ཇི་ལྟར་སློབ་དཔོན་གྱིས་འཇུག་པའི་ཆོ་ག་བཤད་མ་ཐག་པ་ཉིད་ཀྱིས་སློབ་དཔོན་ཞུགས་ལ། དེ་བཞིན་དུ་སློབ་དཔོན་གྱིས་སློབ་མ་བཅུག་ལ། དེ་རྣམས་ཀྱི་ཆོ་ག་རྒྱས་པར་བྱས་ནས་སློབ་དཔོན་གྱིས་དེ་རྣམས་ལ་དངོས་གྲུབ་ཀྱི་ཡེ་ཤེས་བསླབ་པར་བྱ་བ་ཡིན་པས་ན། དངོས་གྲུབ་ཐམས་ཅད་སྦྱིན་བྱེད་པའི། །ཡེ་ཤེས་དག་ནི་བསླབ་པར་བྱ། །ཞེས་གསུངས་སོ། །ཕྱག་རྒྱ་ཆེན་པོ་ལ་སོགས་པ་སྒྲུབ་པར་བྱེད་པའི་ཡེ་ཤེས་སློབ་མ་རྣམས་ལ་བསླབ་པར་བྱའོ། །ཏིང་འཛིན་སྙིང་པོ་འདི་ཡིས་ནི། །སྒྲུབ་པ་ཆེན་པོ་གདོད་ནས་བྱུང༌། །ཞེས་བྱ་བ་ནི་ལྷ་ཐམས་ཅད་ཀྱི་ཏིང་ངེ་འཛིན་སྒྲུབ་པར་བྱེད་པའི་བཟླས་པའི་སྙིང་པོ་ནི་ཏིང་འཛིན་གྱི་སྙིང་པོའོ། །ཏིང་ངེ་འཛིན་གྱི་སྙིང་པོ་དེའི་བསྒྲུབ་པར་བྱ་བ་ཆེན་པོ་ནི་འདིའི་དངོས་གྲུབ་ཀྱི་མཆོག་སྒྲུབ་པར་བྱེད་པའི་ཆོ་གའོ། །བསྐལ་པ་བཟང་པོ་ལ་སོགས་པའི་སྔོན་དུ་ཡང་དེ་ལྟར་བྱུང་བའི་ཚུལ་གྱིས་གནས་པས་ན་གདོད་ནས་བྱུང་བའི་སྒྲུབ་པ་ཆེན་པོ་ཡིན་ནོ། །འཇིག་རྟེན་ཀུན་གྱི་དབང་ཕྱུག་ཉིད། །ཅེས་བྱ་བ་ནི། འཇིག་རྟེན་གསུམ་པོ་ཐམས་ཅད་ནི་འཇིག་རྟེན་ཀུན་ཏེ་པདྨའི་རིགས་ཀྱི་འཇིག་རྟེན་དབང་ཕྱུག་གོ །དེའི་ངོ་བོ་ཉིད་ཡིན་པས་ན་འཇིག་
རྟེན་དབང་ཕྱུག་ཉིད་དོ། །འདིས་ནི་རྒྱུ་ལས་འབྲས་བུ་ཉེ་བར་བཏགས་པའི་སྒོ་ནས་བསྒྲུབས་ལ། འཇིག་རྟེན་ཀུན་གྱི་དབང་ཕྱུག་ཉིད། །ཅེས་བྱ་བའི་སྒྲས་བཤད་དོ། །བཤད་པར་བྱ་ཞེས་བྱ་བ་ནི་བསྟན་པར་བྱའོ། །ཇི་ལྟར་ཞེ་ན། གོ་རིམས་བཞིན་དུ་ཞེས་བྱ་བ་གསུངས་ཏེ། སྒྲུབ་པའི་ཐབས་ཀྱི་རིམ་པས་སྔོན་དུ་བསྙེན་པ་བྱ་བ་ཡིན་ཀྱི་དང་པོ་ཉིད་ནི་མ་ཡིན་ནོ། །བུད་མེད་རྣམས་ཀྱི་ནང་དུ་ཞུགས། །ཞེས་བྱ་བ་ནི་མཆོད་པ་རྣམ་པ་བཅུ་གཉིས་ཀྱིས་ལྷ་མོ་དང་ཁྲོ་གཉེར་མ་ལ་སོགས་ནི་བུད་མེད་དོ། །པདྨའི་ཞི་བ་དང༌། པདྨའི་སྲེད་མེད་ཀྱི་བུ་དང༌། པདྨའི་ཚངས་པ་དང། པདྨའི་འདོད་པའི་གཟུགས་ནི་འཇིག་རྟེན་གདུག་པ་ཞེས་བྱ་བར་གྲགས་ཏེ་དེ་རྣམས་ཀྱི་ནང་དུ་ཚུད་པའོ། །གང་ཡང་རུང་བར་འདུག་ནས་ནི། །ཞེས་བྱ་བ་ནི་ཡིད་དང་རྗེས་སུ་མཐུན་ཞིང་འདུ་འཛི་མེད་པའི་གནས་སུ་འདུག་པའོ། །པདྨ་ཆེན་པོ་ཡོངས་བཟུང་སྟེ། །ཞེས་བྱ་བ་ནི་པདྨའི་འདབ་མ་ཆེན་པོ་ལྕེ་ལ་རྡོ་རྗེ་དཀར་པོ་བསམ་སྟེ། བཟླ་བར་བྱ་བའི་སྔགས་ཡིད་ཀྱིས་བྲི་བ་དང༌། རང་གི་སྙིང་གར་གནས་པའི་རྡོ་རྗེ་པདྨ་ལ་ཡང་བྲིས་ནས་བཟླས་པར་བྱ་བ་ཟློས་ཤིང་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་བསྒོམ་པར་བྱའོ། །ཉིན་རེ་ཅི་ནུས་བསྒྲུབ་པར་བྱ། །ཞེས་བྱ་བ་ནི་སྒོམ་པའི་རིམ་པ་འདིས་ཉིན་རེ་ཞིང་རང་གི་ནུས་པ་དང་རྗེས་སུ་མཐུན་པས་ཇི་སྲིད་སྐོ་བར་མ་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་བཞིན་དུས་དང་ཞེས་བྱ་བ་ནི་སྔ་དྲོ་དང༌། ཉི་མ་གུང་དང༌། ཕྱི་དྲོ་དང་མཚན་ཕྱེད་ལའོ། །སྟོབས་ཇི་བཞིན་ཞེས་བྱ་བ་ནི་རང་གི་ནུས་པ་དང་རྗེས་སུ་མཐུན་པས་སོ། །ཆོ་ག་འདི་ཡིས་ཞེས་བྱ་བ་ལ་སོགས་པ་ནི་གོ་བར་ཟད་དོ། །དེ་ནས་ཕྱག་རྒྱ་བསྒྲུབ་པ་ནི། །ཞེས་བྱ་བ་ནི་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང་ཆོས་ཀྱི་ཕྱག་རྒྱ་དང་ལས་ཀྱི་ཕྱག་རྒྱ་ལ་ནི་ཕྱག་རྒྱ་ཞེས་བྱ་སྟེ། དེའི་སྒྲུབ་པ་བཤད་པར་བྱའོ་ཞེས་བྱ་བ་དོན་གྱིས་སྦྱར་རོ། །ཕྱག་རྒྱ་བཅིངས་ཏེ་ཏིང་འཛིན་གནས། །ཞེས་བྱ་བ་ནི་འདོད་པའི་ལྷའི་ཕྱག་རྒྱ་ཆེན་པོ་བཅིངས་ནས་དེའི་རང་བཞིན་ནི་བསྒོམ་པར་བྱའོ། །དངོས་གྲུབ་ཆེན་པོ་ཉིད་ཐོབ་པར། །ཞེས་བྱ་བ་ནི། ཕྱག་རྒྱ་ཆེན་པོའི་རང་བཞིན་རྫོགས་པའི་དངོས་གྲུབ་ཚན་པོ་ཉིད་
དོ། །དེ་ཐོབ་པར་ནི་དེའི་རང་བཞིན་དུ་བསམ་པར་བྱའོ། །དམ་ཚིག་དམ་ཚིག་མཆོག་གིས་ཏེ། །ཞེས་བྱ་བ་ནི་རང་གི་ལྷའི་དམ་ཚིག་ནི་ཕྱག་རྒྱའི་དམ་ཚིག་གོ །དམ་ཚིག་ནི་དམ་ཚིག་གིས་ཞེས་བྱ་བ་དམ་ཚིག་གི་ཕྱག་རྒྱ་བཅིངས་པས་བདག་ཉིད་ཐོབ་པར་འགྱུར་བའོ། །ལས་ནི་ལས་མཆོག་ཕྱག་རྒྱས་སོ། །ཞེས་བྱ་བ་ནི་རང་གི་ལྷའི་ལས་ཀྱི་ཕྱག་རྒྱ་ནི་ལས་ཏེ། ལས་དེ་ལས་མཆོག་གིས་ཞེས་བྱ་བ་རང་གི་ལྷའི་ལས་ཀྱི་ཕྱག་རྒྱ་བཅིངས་ནས་བདག་ཉིད་ཀྱིས་ཐོབ་པར་འགྱུར། ཆོས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང༌། ལས་ཀྱི་ཕྱག་རྒྱའི་སྒྲུབ་པ་ནི་སྒྲུབ་པ་ཆེན་པོ་སྟེ་བཤད་མ་ཐག་པ་འདི་ཉིད་དོ། །དེ་སྟོན་པར་བྱེད་པ་སྒྲའི་ཚོགས་ནི་རྒྱུད་ཅེས་བྱའོ། །འདི་སྐད་སྟོན་པ་ཡིན་ཏེ། བདག་བསྲུང་བ་དང༌། གནས་བསྲུང་བ་བྱས་ལ་རང་གི་ལྷ་མདུན་དུ་བཞག་སྟེ། པདྨའི་དྲིལ་བུ་ཐོགས་ནས་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ལ་འདིར་རེ་ཞིག་དང་པོར་ཕྱག་བྱ་བ་ལ་སོགས་པ་སྔོན་དུ་འགྲོ་བས་རྡོ་རྗེ་ཐལ་མོ་དང༌། རྡོ་རྗེ་བསྡམས་པ་བཅིང་པར་བྱའོ། །དེ་ནས་རྡོ་རྗེ་བསྡམས་པ་རང་གི་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པའི་ཕྱག་རྒྱས་བདག་ཉིད་ལ་དབབ་པར་བྱས་ལ། ཕྱག་རྒྱ་དེ་ཉིད་སྙིང་གར་ཇི་ལྟ་བ་བཞིན་དུ་དགྲོལ་བར་བྱའོ། །དེ་ནས་དམ་ཚིག་གི་རྡོ་རྗེ་ཁུ་ཚུར་དེ་བཞིན་དུ་བཅིང་ངོ༌། །དེ་ནས་རང་གི་སྙིང་གར་གནས་པའི་རྡོ་རྗེ་པདྨ་ལ་བཟླས་པར་བྱ་བའི་སྔགས་བསམ་ལ། དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་རང་གི་སེམས་བཟླས་པར་བྱ་བའི་སྔགས་ཀྱི་ངོ་བོར་བསམས་ལ་དེ་དབྱངས་ཀྱི་ཡི་གེ་བཅུ་དྲུག་དང་བཅས་པ་ལ་ཟླ་བའི་དཀྱིལ་འཁོར་དུ་བདག་ཉིད་བསམ་པར་བྱའོ། །དེའི་སྟེང་དུ་ཡང་བཟླ་བར་བྱ་བའི་སྔགས་བསམས་ལ། ཀ་ལ་སོགས་པ་གསལ་བར་བྱ་བའི་ཡི་གེ་དང་བཅས་པ་ལ་ཟླ་བའི་དཀྱིལ་འཁོར་གཉིས་པ་དེ་ཡང་བཟླས་པའི་སྙིང་པོ་དང་བཅས་པ་ལས་དང་པོའི་རྡོ་རྗེ་དེ་ཉིད་འགྲོ་བ་འདུལ་བའི་རྣལ་འབྱོར་པས་རྡོ་རྗེ་པདྨར་བསམ་མོ། །གཞན་དག་གིས་རང་གི་ལྷའི་མཚན་མ་དང༌། དེའི་དབུས་སུ་བཟླས་པར་བྱ་བའི་སྔགས་ཡིད་ཀྱིས་བསམས་ལ། བདག་ཉིད་
རང་གི་ལྷའི་ཕྱག་རྒྱའི་ངོ་བོར་བསམ་ཤིང་ཕྱག་རྒྱའི་ཚུལ་ལས་པདྨའི་རིགས་ཐམས་ཅད་སྤྲོས་ལ། དེས་གདུལ་བར་བྱ་བ་ཐམས་ཅད་གདུལ་བར་བྱས་ནས། དེ་རྣམས་ཕྱག་རྒྱའི་གཟུགས་དེར་ཡིད་ཀྱིས་བཅུག་ལ། སེམས་དཔར་བྱིན་གྱིས་རློབ་པའི་སྦྱོར་བས་ཕྱག་རྒྱའི་གཟུགས་དེ་རྡོ་རྗེ་སེམས་དཔར་བདག་ཉིད་བསམས་ལ། རྡོ་རྗེ་སེམས་དཔའ་དེ་རང་གི་སྔགས་ཟློས་ཤིང་རང་གི་ལྷའི་གཟུགས་སུ་བསམ་པར་བྱ་སྟེ། །དེ་ནས་མ་ཧཱ་ས་མ་ཡ་ས་ཏྭ་ཧཾ་ཞེས་བརྗོད་དེ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས་སམ་ཡོ྅ཧཾ་ཞེས་བརྗོད་ལ་དམ་ཚིག་གི་ཕྱག་རྒྱ་དེ་ཉིད་དང༌། ས་མ་ཡ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱ་བས་སྙིང་ག་དང༌། དཔྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབ་པོ། །དེ་ནས་རང་གི་ལྷའི་ཕྱག་རྒྱ་ཆེན་པོ་བཅིངས་ཏེ། མདུན་དུ་སྣ་ཚོགས་པདྨའི་སྟེང་དུ་རང་གི་ལྷའི་སྔགས་ཀྱི་མཐར་ཡི་གེ་ཨ་དང་བཅས་པ་ལས་ལྷའི་མཚན་མ་བསམ་པར་བྱའོ། །དེ་ནས་རང་གི་ལྷའི་སྔགས་ཟློས་ཤིང་རང་གི་ལྷའི་མཚན་མ་ཕྱག་རྒྱའི་ངོ་བོར་བདག་ཉིད་བསམ་པར་བྱའོ། །དེས་ཡང་རང་གི་ལྷའི་སྔགས་ཟློས་ཤིང་ཕྱག་རྒྱ་དེས་རང་གི་ལྷའི་སྐུར་བདག་ཉིད་བསམ་པར་བྱའོ། །དེ་ནས་རྡོ་རྗེ་པདྨའི་ལྕགས་ཀྱུ་མ་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་དེ་ཉིད་དུ་རང་གི་ལྷ་དགུག་པ་དང༌། གཞུག་པ་དང༌། བཅིང་བ་དང་དབང་དུ་བྱས་ལ། རང་གི་དམ་ཚིག་གི་ཕྱག་རྒྱ་དང་རང་གི་ལྷའི་སྔགས་དང༌། དྲྀ་ཤྱ་ཞེས་ཀྱང་བརྗོད་ལ་བལྟ་བར་བྱའོ། །དེ་ནས་རྟ་མགྲིན་གྱི་ལྕགས་ཀྱུ་དང་བཟླས་པར་བྱ་བའི་སྔགས་ཀྱིས་རང་གི་ལུས་ལ་བཅུག་ལ། རང་གི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡ་སྟྭཾ་ཞེས་བརྗོད་དོ། །འོད་ཀྱི་དཀྱིལ་འཁོར་བསྐྱེད་ལ་ས་མ་ཡ་སྟྭཾ། ཨ་ཧཾ་ཛཿ་ཧཱུཾ་བཾ་ཧོཿ་ཞེས་བྱ་བ་དང༌། རང་གི་སྔགས་ལན་གསུམ་བརྗོད་ལ་རང་གི་ལུས་ཀྱི་ནང་དུ་གཏོགས་པ་དང་ལྷན་ཅིག་ཏུ་གྱུར་པར་བདག་ཉིད་བསམ་པར་བྱའོ། །དེ་ནས་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་དེ་བཞིན་གཤེགས་པ་ཐམས་ཅད་རང་གི་ལུས་ལ་བཅུག་ལ་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ནས་རང་གི་ལྷ་དང་དེ་བཞིན་གཤེགས་པ་ཐམས་ཅད་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་སྟེ། དང་པོའི་
རྡོ་རྗེ་བཅིངས་ལས་བདག་ཉིད་དེ་བཞིན་དུ་བྱིན་གྱིས་བརླབས་ལ་ཡི་གེ་བརྒྱ་པས་བརྟན་པར་བྱའོ། །དེ་ནས་དབང་བསྐུར་བའི་ཕྱག་རྒྱས་དབང་བསྐུར་ལ་རྡོ་རྗེ་པདྨ་དང༌། བདག་པོ་དང་མིང་གི་དབང་བསྐུར་བ་བླངས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ནས་པདྨའི་རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཞིས་བདག་ཉིད་མཆོད་ལ་པདྨ་ཆེན་པོའི་མེ་ཏོག་དང་བཅས་པ་བཅིངས་ཏེ་ཡིད་བསྡུས་ཏེ་ཕྱག་བྱའོ། །དེ་ནས་དེ་ཁོ་ན་ཉིད་དང༌། ཆོས་དང་དམ་ཚིག་གསུམ་བླངས་ལ་རང་གི་སྔགས་ལན་གསུམ་བཟླ་བར་བྱའོ། །དེ་ནས་དངོས་གྲུབ་ཆེན་པོ་ཀུན་ཀྱི་མཆོག །དབང་ཕྱུག་ཆེན་པོ་བདག་པོའི་མཆོག །འཇིག་རྟེན་མགོན་ཁྱོད་བདག་གྱུར་ཅིག །དེ་སྐད་ཅེས་བརྗོད་ནས་རབ་ཏུ་བསྒྲུབས་ཏེ་དེ་བཞིན་དུ་ལྕེ་དང༌། རང་གི་སྙིང་གར་གནས་པའི་རྡོ་རྗེ་པདྨ་ལ་རང་གི་སྔགས་རྣམ་པར་བསམས་ལ། ཆོས་ཀྱི་ཚིག་ཟློས་ཤིང་ཡིད་ཀྱིས་སེམས་ཅན་གྱི་ཁམས་ཐམས་ཅད་པདྨའི་རིགས་ཀྱི་རང་བཞིན་དུ་བྱས་ལ་འགྲོ་བ་ཐམས་ཅད་འདུལ་བའི་ལྷའི་དཀྱིལ་འཁོར་གྱི་དབུས་སུ་འདུག་སྟེ། ཆོས་ཐམས་ཅད་རང་བཞིན་གྱིས་དག་པར་ཉིན་རེ་ཞིང་བྱ་བའི་སྦྱོར་བ་ཟླ་བ་གཅིག་ཙམ་གྱི་བར་དུ་བསྒོམ་པར་བྱའོ། །དེ་ནས་ཡང་བཟླས་བརྗོད་འབུམ་བྱས་ལ་མཐར་མཚན་ཐོག་ཐག་བསྒོམ་པར་བྱ་སྟེ། དེ་ལྟ་བུས་ནི་འཇིག་རྟེན་དབང་ཕྱུག་ཉིད་ཐོབ་པར་འགྱུར་རོ། །ཆོས་ཀྱི་ཕྱག་རྒྱ་སྒྲུབ་པའོ། །དེ་ནས་ཕྱག་རྒྱ་ཆེན་པོ་བསྒྲུབས་ན་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་ཕྱག་རྒྱ་ཆེན་པོ་བཅིངས་ལ། ཟླ་བ་གཉིས་ཀྱི་བར་དུ་བདག་ཉིད་འཇིག་རྟེན་དབང་ཕྱུག་ཏུ་བསྒོམ་ལ་མཐར་མཚན་ཐོག་ཐག་བསྒོམས་ན་ནང་པར་འཇིག་རྟེན་དབང་ཕྱུག་དང་འདྲ་བར་འགྱུར་རོ། །དེ་བཞིན་དུ་དམ་ཚིག་གི་ཕྱག་རྒྱ་བསྒྲུབས་ན་དམ་ཚིག་གི་ཕྱག་རྒྱ་བཅིངས་ཏེ་ཆོ་ག་ཐམས་ཅད་རྗེས་སུ་སྤྱད་ནས་མཐར་མཚན་ཐོག་ཐག་བསྒོམས་ནས་དེ་བཞིན་དུ་འཇིག་རྟེན་དབང་ཕྱུག་དང་འདྲ་བར་འགྱུར་རོ། །དེ་ནས་ལས་ཀྱི་ཕྱག་རྒྱ་བཤད་པར་བྱ་སྟེ། དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རང་གི་སྙིང་གར་ཧྲི་ལས་སྣ་ཚོགས་པདྨ་བསམས་ལ། ལས་ཀྱི་ཕྱག་རྒྱ་བཅིངས་ཏེ། ཟླ་བ་གཉིས་ཀྱི་བར་དུ་བསྒོམས་ལ། མཐར་མཚན་ཐོག་ཐག་བསྒོམས་ན། ནང་པར་
འཇིག་རྟེན་དབང་ཕྱུག་དང་འདྲ་བར་འགྱུར་རོ། །ད་ནི་ཡང་དཀྱིལ་འཁོར་གྱི་ཆོ་ག་ཐམས་ཅད་བརྗོད་པར་བྱའོ། །བདག་དང་གནས་བསྲུང་བར་བྱས་ལ། རྡོ་རྗེ་འཁོར་ལོའི་ཕྱག་རྒྱས་འགྲོ་བ་འདུལ་བའི་དཀྱིལ་འཁོར་སྤྲུལ་ལ་གལ་ཏེ་འབྱོར་པ་ཡོད་ན་མེ་ཏོག་ལ་སོགས་པས་ཡང་དག་པར་མཆོད་དོ། །སྒོ་བཞི་ནས་དཀྱིལ་འཁོར་ལྔ་པས་ཕྱག་བྱས་ལ་ཕྱག་བཞི་ལ་སོགས་པ་སྔོན་དུ་འགྲོ་བས་སྔ་མ་བཞིན་དུ་སྡོམ་པ་གཟུང་བར་བྱའོ། །དེ་ནས་དེ་བཞིན་དུ་རྡོ་རྗེ་ཐལ་མོ་ལ་སོགས་པ་ནས་དམ་ཚིག་གི་ཁུ་ཚུར་བཅིང་བའི་བར་གྱི་ཕྱག་རྒྱ་བཅིངས་ལ་ཐམས་ཅད་བྱའོ། །དེ་ནས་སརྦ་ཤུདྡྷཿ་ཞེས་བརྗོད་ཅིང་འཕགས་པ་འཇིག་རྟེན་དབང་ཕྱུག་ལ་སོགས་པ་ནས། ལྷ་མོ་པདྨའི་དྲིལ་བུ་མའི་བར་གྱི་དམ་ཚིག་གི་ཕྱག་རྒྱ་བཅིངས་ལ། དེའི་སྙིང་པོ་ཡང་ལན་གསུམ་གྱི་བར་དུ་བརྗོད་ཅིང་ཨོཾ་བཛྲ་མུཿ་ཞེས་བྱ་བ་ཡང་བརྗོད་ནས་དམ་ཚིག་གི་ཕྱག་རྒྱ་རྣམས་རང་གི་སྙིང་གར་དགྲོལ་ཞིང་ལྷ་རྣམས་ཀྱི་སྐུ་དང་གསུང་དང་ཐུགས་རྡོ་རྗེ་རང་གི་སྙིང་གར་གནས་པའི་རྡོ་རྗེ་པདྨ་ལ་ཡིད་ཀྱིས་གཞུག་པར་བྱའོ། །དེ་ནས་སྡིག་པ་དྲལ་བའི་ཕྱག་རྒྱས་སྡིག་པ་ཐམས་ཅད་དྲལ་བར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་པདྨ་ལ་བཟླས་པར་བྱ་བའི་སྔགས་བསམས་ལ། དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་སྔར་གྱི་ཆོ་ག་རྣམས་རྗེས་སུ་སྤྱད་ལ་བཅོམ་ལྡན་འདས་འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ནམ་མཁའ་ཐམས་ཅད་དང་མཉམ་པའི་རང་གི་སྙིང་གའི་ཟླ་བར་ཡིད་ཀྱིས་ནམ་མཁའ་དང་མཉམ་པའི་སྦྱོར་བས་ཞུགས་ལ་རྡོ་རྗེ་འཁོར་ལོའི་ཕྱག་རྒྱས་རང་གི་དཀྱིལ་འཁོར་བསྐྱེད་ནས་འཇུག་པའི་ཕྱག་རྒྱ་བཅིངས་ཏེ་འཇུག་པར་བྱའོ། །དེ་ནས་རང་གི་སྤྱི་བོར་མེ་ཏོག་དོར་བར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་གྱི་ཆོ་ག་རྣམས་རྗེས་སུ་སྤྱད་ལ་དཀྱིལ་འཁོར་དེ། རང་གི་སྙིང་གའི་ཟླ་བའི་ནང་དུ་ཚུད་པར་བསམ་པར་བྱའོ། །དེ་ནས་སྔ་མ་བཞིན་དུ་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་རང་གི་ལུས་ལ་བཅུག་ལ་དམ་ཚིག་གི་ཕྱག་རྒྱས་རབ་ཏུ་བསྒྲུབས་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་
ལ། འཕགས་པ་དེ་ཁོ་ན་ཉིད་བསྡུས་པ་ལས་གསུངས་པའི་འགྲོ་བ་འདུལ་བའི་རྣལ་འབྱོར་ཆེན་པོ་བྱས་ལ། སྔ་མ་བཞིན་དུ་དང་པོའི་རྡོ་རྗེས་བདག་ཉིད་བྱིན་གྱིས་བརླབས་ནས་ཡི་གེ་བརྒྱ་པས་བརྟན་པར་བྱས་ལ། སྔ་མ་བཞིན་དུ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་པའི་བར་གྱི་ཆོ་ག་རྣམས་རྗེས་སུ་སྤྱད་བར་བྱའོ། །དེ་ནས་པདྨའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་མཆོད་ལ་པདྨ་ཆེན་པོ་བཅིངས་ལ། བཅོམ་ལྡན་འདས་ལ་དེ་བཞིན་དུ་ཕྱག་བྱས་ནས་ཕྱག་བཞི་བྱའོ། །དེ་ནས་དེ་ཁོ་ན་ཉིད་དང་ཆོས་དང་དམ་ཚིག་བཟུང་ནས་བཟླས་པ་བྱ་བའི་སྔགས་ལན་གསུམ་བརྗོད་པར་བྱའོ། །དེ་ནས་ཨོཾ་བཛྲ་ཨཱཏྨ་ཀོ྅ཧཾ་ཞེས་བརྗོད་དེ་ལྷ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་རང་བཞིན་དུ་བདག་ཉིད་བསམ་པར་བྱའོ། །ཨོཾ་སྭ་བྷཱ་ཝ་ཤུདྡྷོ་྅ཧཾ་ཞེས་བརྗོད་དོ། །གཟུགས་བརྙན་དང་མཚུངས་ཤིང་སྟོང་པའི་རང་བཞིན་ཅན་དུ་བསམ་པར་བྱའོ། །ཨོཾ་སརྦ་ས་མོ་྅ཧཾ་ཞེས་བརྗོད་དེ་ཆོས་བདག་མེད་པའི་ཡེ་ཤེས་ལས་བྱུང་བའི་ལྷ་ཐམས་ཅད་ཀྱི་རང་བཞིན་བདག་ཡིན་བར་བསྒོམ་པར་བྱའོ། །དེ་ནས་རང་གི་སྙིང་གར་གནས་པའི་རྡོ་རྗེ་པདྨའི་དབུས་སུ། ཡ་ཐཱ་རཀྟ་མི་དཾ་པདྨ་རཱ་ག་ཏོ་ཤེ་ནཱ་ལི་པྱ་ཏེ། བཱ་ཤ་དོ་ཤེ་ཥ་བི་བའི་དྷེ་ཏ་ཐཱ་ཤུདྡྷཾ་ཏྲི་དྷཱ་ཏུ་ཀཱཾ་ཞེས་བྱ་བ་ཡིད་ཀྱིས་བྲིས་ལ། ཆོས་ཀྱི་དམ་ཚིག་གིས་བཟླས་ཤིང་བཟླས་བརྗོད་འབུམ་བྱའོ། །དེ་ནས་དཀྱིལ་འཁོར་ཐམས་ཅད་ཀྱི། །སྔགས་རེ་རེ་ཞིང་བཟླས་བརྗོད་འབུམ་བྱའོ། །དེ་ལྟར་བྱས་ན་སྔོན་དུ་བསྙེན་པ་བྱས་པར་འགྱུར་རོ། །ཡང་ན་རང་གི་སྙིང་གར་རྡོ་རྗེ་འཁོར་ལོས་དཀྱིལ་འཁོར་སྤྲུལ་ལ། འཕགས་པ་འཇིག་རྟེན་དབང་ཕྱུག་ལ་སོགས་པ་ནས་པདྨའི་དྲིལ་བུ་མའི་བར་དུ་རང་གི་སྙིང་པོ་བཀོད་ལ། སྔ་མ་བཞིན་དུ་སྙིང་པོ་གསུམ་བརྗོད་ཅིང་དོན་གསུམ་བསྒོམས་ལ་བདག་ནི་རང་ཉིད་འགྲོ་བ་འདུལ་བའི་དཀྱིལ་འཁོར་ཆེན་པོའི་ངོ་བོ་ཉིད་ཡིན་ནོ་ཞེས་རྣམ་པར་བསམས་ལ། ཡ་ཐཱ་རཀྟ་མི་དཾ་པདྨ་ཞེས་བྱ་བའི་སྔགས་ལྷ་ཐམས་ཅད་ཀྱི་ཐུགས་ཀ་ན་གནས་པའི་རྡོ་རྗེ་པདྨ་བཀོད་དེ། ཆོས་ཀྱི་ཚིག་གིས་ཟློས་ཤིང་ཇི་སྲིད་བསྒོམ་པའི་དུས་སུ་ཉིན་རེ་ཞིང་མངོན་སུམ་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ལྟ་བུས་ནི་
སྔོན་དུ་བསྙེན་པ་ཤིན་ཏུ་ཡང་བྱས་པར་འགྱུར་རོ། །དེ་ནས་ཞག་བདུན་གྱི་བར་དུ་དཀྱིལ་འཁོར་འདིའི་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ་བསྒོམ་པར་བྱའོ། །དེ་ནས་དཀྱིལ་འཁོར་འདི་ཀུན་དུ་བྲིའོ། །དེ་ལ་དང་པོར་རེ་ཞིག་ཡོ་བྱད་ཐམས་ཅད་དང་ལྡན་པས་མངོན་པར་འདོད་པའི་དཀྱིལ་འཁོར་གྱི་སའི་དབུས་སུ་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ལ། རྡོ་རྗེ་གཙུག་ཏོར་ལ་སོགས་པ་རང་གི་ལུས་ལ་བཀོད་དེ། མི་རུས་ཀྱི་ཕྱེ་མའི་སྦྱིན་སྲེག་གིས་དཀྱིལ་འཁོར་གྱི་བགེགས་བཟློག་ལ་ཞི་བའི་སྦྱིན་སྲེག་གི་ཆོ་གས་བདག་དང་སློབ་མ་རྣམས་ཞི་བར་བྱའོ། །དེ་ནས་སྔ་མ་བཞིན་དུ་ས་ཡང་དག་པར་སྦྱོང་བའི་ཆོ་ག་དང་ས་ཡོངས་སུ་བཟུང་བའི་ཆོ་ག་རྗེས་སུ་སྤྱད་ལ་དཀྱིལ་འཁོར་གྱི་སའི་དབུས་སུ་འདུག་སྟེ། རྡོ་རྗེ་མེ་ལྟར་འབར་བའི་ཁོར་བོར་སྙོམས་པར་ཞུགས་པ་ལས་ལངས་ནས་བགེགས་བསལ་བ་ལ་སོགས་པ་ཇི་ལྟ་བ་བཞིན་དུ་བྱས་ལ། མཆོད་པ་རྣམ་པ་ལྔ་དང་མཆོད་ཡོན་དང༌། ལས་ཐམས་ཅད་པའི་ཆུ་སྣོད་ལ་སྔགས་ཡོངས་སུ་བཟླས་ཏེ་རྡོ་རྗེ་འཁོར་ལོས་འགྲོ་བ་འདུལ་བའི་དཀྱིལ་འཁོར་མདུན་དུ་སྤྲུལ་ལ་ཕྱག་བཙལ་བ་ལ་སོགས་པ་སྔོན་དུ་འགྲོ་བས་སྡོམ་པ་བཟུང་བ་བྱས་ལ་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། དེ་ནས་ཆོ་ག་ཐམས་ཅད་རྗེས་སུ་སྤྱད་ལ་དེ་ཁོ་ན་ཉིད་དང༌། ཆོས་དང་དམ་ཚིག་གཟུང་བ་སྔ་མ་བཞིན་དུ་རི་རབ་བསྐྱེད་ལ། རི་རབ་ཀྱི་སྟེང་དུ་རྡོ་རྗེ་འཁོར་ལོས་དཀྱིལ་འཁོར་བསྐྱེད་ལ་དཀྱིལ་འཁོར་གྱི་དབུས་སུ་སེམས་དཔའི་སྐྱིལ་མོ་ཀྲུང་གིས་འདུག་སྟེ་བདག་ཉིད་སྤྲོ་བ་བསྐྱེད་པ་ལ་སོགས་པ་སྔར་བཤད་པའི་ཆོ་ག་ཐམས་ཅད་བྱས་ནས་ལུས་ཐམས་ཅད་ཀྱིས་ཕྱག་བྱས་ལ་ཏིང་ངེ་འཛིན་གསུམ་བསྒོམ་པར་བྱའོ། །དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ལ་དེའི་སྙིང་པོ་བཟླ་བར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྲི་བར་བྱ་བའི་ཕྱིར། །རྡོ་རྗེ་པདྨའི་རིགས་ཆེན་པོ། །སངས་རྒྱས་ཀུན་མཆོག་བཤད་དུ་གསོལ། །ཞེས་བྱ་བས་བདག་ཉིད་ལ་གསོལ་བ་བཏབ་པར་བསམ་པར་བྱའོ། །དེ་ནས་དམ་ཚིག་གི་ཕྱག་རྒྱ་དང༌། ཡ་ཐཱ་རཀྟ་མི་དཾ་པདྨཾ་རཱ་ག་ཏོ་ཤེ་ནཱ་ལི་བྱ་ཏེ། བཱ་ས་དོ་ཤེ་ཥཱ་བི་བཱི་དྷེ་ཏ་ཐཱ་ཤུདྡྷཾ་ཏྲི་དྷཱ་ཏུ་ཀཱཾ། བཛྲོད་ཏིཥྛ་མཎྜལ་ཨུ་ཐ་པ་ཡ་ཞེས་བརྗོད་ལ་དཀྱིལ་འཁོར་བཏེག་སྟེ་བར་
སྣང་གི་ཕྱོགས་སུ་བཞག་ལ་རང་གི་སྔགས་དང༌། རང་གི་དམ་ཚིག་གི་ཕྱག་རྒྱས་སྙིང་ག་དང་དབྲལ་བ་དང་ལྐོག་མར་བདག་ཉིད་བྱིན་གྱིས་བརླབ་ལ་ཡང་ཕྱག་རྒྱ་ཆེན་པོ་བཅིངས་ཏེ། བཛྲ་དྲྀཥྚྀ་མ་ཊ་ཞེས་བྱ་བ་མིག་གཉིས་སུ་བཀོད་ལ་ཨ་ཞེས་བྱ་བས་རང་གི་རྐང་མཐིལ་གཉིས་སུ་སྣ་ཚོགས་རྡོ་རྗེ་བསམས་ལ། རྐང་མཐིལ་གཉིས་གནོན་པའི་རི་རབ་ནས་བརྩམས་ཏེ། ས་གཞི་གཏན་པ་ལ་ཐུག་པའི་བར་གྱི་ས་ཕྱོགས་ཐམས་ཅད་རྡོ་རྗེའི་རང་བཞིན་ཅན་དུ་བྱས་ཏེ། ཕྱག་རྒྱ་ལ་གནས་དེ་བཞིན་ལངས། །ཀུན་དུ་རྣམ་པར་བལྟས་ནས་ནི། །སྙིང་བོ་ཀུན་དུ་ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །རྡོ་རྗེ་ལྟ་བས་ཀྱང་ཕྱོགས་དང་མཚམས་དང་ནམ་མཁའ་དང་ས་འོག་དང་དཀྱིལ་འཁོར་བཅིང་བ་དང་རབ་དང་དྲ་བ་བྱའོ། །ཡང་རྡོ་རྗེ་མེ་ལྟར་འབར་བའི་སྙོམས་པར་ཞུགས་པས་ལངས་ལ་བགེགས་གཞོམ་པ་ལ་སོགས་པ་བྱའོ། །དེ་ནས་དཀྱིལ་འཁོར་གྱི་སྒོ་བཞི་ཕྱེ་ལ་གསང་བའི་གཟུགས་ཅན་གྱི་དཀྱིལ་འཁོར་ཇི་ལྟ་བ་བཞིན་དུ་སྤྱན་དྲངས་ནས་སྔ་མ་བཞིན་དུ་ཕུར་བུས་གདབ་པར་བྱའོ། །དེ་ནས་སྔ་མ་བཞིན་དུ་ཐམས་ཅད་བྱས་ལ་སློབ་མ་ལྷག་པར་གནས་པ་དང༌། ལྷ་ལྷག་པར་གནས་པར་བྱའོ། །དེ་ནས་ཉི་མ་གཉིས་པ་ལ་མལ་ནས་ལངས་ལ་སྔ་མ་བཞིན་དུ་རྣལ་འབྱོར་ཆེན་པོ་བྱས་ནས་ཡང་དཀྱིལ་འཁོར་ཐམས་ཅད་སྔ་མ་བཞིན་དུ་བཏེག་སྟེ། བར་སྣང་གི་ཕྱོགས་སུ་བཞག་སྟེ་སྔ་མ་བཞིན་དུ་ཐིག་གདབ་པའི་སྔགས་དང༌། ཚོན་སྣ་ལྔའི་སྲད་བུ་ལ་བདག་པོ་ལྔ་ཡོངས་སུ་བླངས་ལ་ཉི་མ་འཆང་བའི་དུས་སུ་དཀྱིལ་འཁོར་དྲིས་བྱུག་ཅིང་མེ་ཏོག་སིལ་མ་བཀྲམ་པ་བྱས་ལ། ཛ་ལས་མིག་གཡོན་དང་གཡས་སུ་ཟླ་བ་དང་ཉི་མ་སེར་པོ་སྣང་བ་བསྐྱེད་ནས། ཨོཾ་ཧཱུཾ་ཏྲཱཾ་ཧྲཱིཿ་ཨ་ཞེས་ཟློས་ཤིང་རང་གི་སྙིང་གར་གནས་པའི་རྡོ་རྗེ་པདྨ་ལས་སྒྲུབ་པའི་གྲོགས་མཆོག་པདྨའི་གར་གྱི་དབང་ཕྱུག་གི་གཟུགས་སུ་ཡིད་ཀྱིས་ཕྱུང་ལ། གཡོན་པའི་རྡོ་རྗེ་ཁུ་ཚུར་གྱིས་ཚོན་སྣ་ལྔའི་སྐུད་བ་བླངས་ལ། དང་པོར་སྔགས་ཀྱིས་སྦྱངས་ཤིང་དྲི་དང་བཅས་པའི་ཚོན་དཀར་པོའི་ནང་དུ་སྤངས་ལ། ཛཿཞེས་བྱ་བས་སྲད་བུ་གྲོགས་པོའི་ལག་ཏུ་བཏང་ལ་སྔ་མ་བཞིན་དུ་ཕྱིའི་དཀྱིལ་འཁོར་ཐིག་གདབ་པར་བྱའོ། །དེའི་དབུས་སུ་སྔ་མ་བཞིན་དུ་ཀ་བ་བརྒྱད་ཀྱི་ཚུལ་གྱིས་པདྨ་འདབ་
མ་བརྒྱད་པ་པདྨའི་ཕྲེང་བས་བསྐོར་བས་ཐིག་བཏབ་ལ་ཚོན་སྣ་ལྔའི་ཕྱེ་མས་ཕྱི་དང་ནང་གི་དཀྱིལ་འཁོར་ཐམས་ཅད་སྔ་མ་བཞིན་དུ་བྲི་བར་བྱའོ། །དེ་ནས་དཀྱིལ་འཁོར་གྱི་ལྟེ་བར་སྣ་ཚོགས་པདྨ་ལ་འཇིག་རྟེན་དབང་ཕྱུག་གི་སྐུ་ལུགས་མའམ། བརྐོས་པའམ་བྲིས་པ་སྐུ་མདོག་གསེར་བཙོ་མ་འདྲ་བ་ཕྱག་གཡོན་པ་པདྨའི་ཁུ་ཚུར་གྱིས་པདྨ་བསྣམས་ཤིང་དཀུར་བསྟེན་ནས་དེ་ལ་གཟིགས་པའི་ཚུལ་གྱིས་ཕྱག་གཡས་པའི་མཐེ་བོང་དང་དེའི་མཛུབ་མོ་ས་དེའི་འདབ་མ་ཕྱེ་བ་མཛད་པ། རྒྱན་ཐམས་ཅད་ཀྱིས་སྤྲས་པ། པདྨའི་ཕྲེང་བ་དང༌། བཅོམ་ལྡན་འདས་འོད་དཔག་ཏུ་མེད་པ་དང་ལྡན་པའི་ཅོད་པན་དང་དར་དཔྱངས་ཀྱི་དབང་བསྐུར་བས་དབང་བསྐུར་བར་འཛུམ་པར་གཟིགས་པ་སེམས་དཔའི་སྐྱིལ་ཀྲུང་གིས་བཞུགས་པ་རང་གི་སྙིང་པོས་དགོད་པར་བྱའོ། །དེའི་མདུན་དུ་འདོད་ཆགས་རྡོ་རྗེ་མའི་གནས་སུ་ཤར་གྱི་པདྨའི་དཀྱིལ་འཁོར་དུ་ཏིང་ངེ་འཛིན་བཟང་པོ་ཞེས་བྱ་བ་སངས་རྒྱས་ཀྱི་སྐུ་གཟུགས་ཅན་སྣ་ཚོགས་པདྨ་ལ་རྡོ་རྗེ་སྐྱིལ་མོ་ཀྲུང་གིས་བཞུགས་པ། ཕྱག་གཡོན་པས་རྡོ་རྗེ་པདྨ་བསྣམས་ཤིང་ཏིང་ངེ་འཛིན་ལ་སྙོམས་པར་ཞུགས་པ། དེའི་གཡས་ལོགས་སུ་ཀཱི་ལི་ཀཱི་ལའི་གནས་སུ་དེ་བཞིན་གཤེགས་པ་པདྨ་ཆེན་པོ་ཞེས་བྱ་བ་ཐུགས་ཀའི་ཕྱོགས་སུ་པདྨའི་ཁུ་ཚུར་གཉིས་ཀྱིས་རྡོ་རྗེ་པདྨ་གཉིས་བསྣམས་ནས་བཞུགས་པའོ། །དེའི་རྒྱབ་ཏུ་རྡོ་རྗེ་དྲན་མའི་གནས་སུ་དེ་བཞིན་གཤེགས་པའི་ཏིང་ངེ་འཛིན་ཞེས་བྱ་བ་ཕྱག་གཡོན་པས་རྡོ་རྗེ་པདྨ་བསྣམས་ཤིང་ཏིང་ངེ་འཛིན་ལ་སྙོམས་པར་ཞུགས་པའོ། །དེའི་གཡོན་ལོགས་སུ་རྡོ་རྗེ་བསྙེམས་མའི་གནས་སུ་དེ་བཞིན་གཤེགས་པ་ཀུན་དུ་གཟིགས་པ་ཞེས་བྱ་བ་སངས་རྒྱས་ཀྱི་ཚུལ་ཅན་པདྨའི་ཁུ་ཚུར་གཉིས་ཀྱིས་རིན་པོ་ཆེའི་པདྨ་གཉིས་པ་བསྣམས་ནས་རིན་པོ་ཆེའི་པདྨ་སྩོལ་བའི་ཕྱིར་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་མཛད་པའི་སྦྱོར་བས་བཞུགས་ཤིང༌། སྣ་ཚོགས་པདྨ་ལ་རྡོ་རྗེ་སྐྱིལ་ཀྲུང་གིས་བཞུགས་པའོ། །འདི་དག་ཐམས་ཅད་ཀྱང་འཇིག་རྟེན་དབང་ཕྱུག་གི་གཟུགས་འཛིན་པར་བྲི་བར་བྱའོ། །དེ་ཡང༌། ཡོངས་སུ་འཇིག་རྟེན་དབང་ཕྱུག་གཟུགས། །སངས་རྒྱས་ལ་སོགས་རིགས་ཀྱི་ལྷ། །ཞེས་
གསུངས་པ་ཡིན་ནོ། །དེ་ནས་འདི་རྣམས་ཀྱི་སྙིང་པོ་ནི། སརྦ་ཏ་ཐཱ་ག་ཏ་པདྨ་ཛཿ་ཧཱུཾ་བཛྲ་པདྨ་མ་ཧེ་པདྨ་མ་ཧེ་པདྨ་པདྨ་བཾ་ཧོཿ་པདྨ་མ་ནོ་ར་ཛ་ཞེས་བྱ་བ་ཡིན་ནོ། །ཡང་དཀྱིལ་འཁོར་འདི་ཉིད་ཀྱི་རྡོ་རྗེ་སྦྲང་རྩི་མའི་གནས་སུ་འཕགས་པ་དོན་ཡོད་པའི་ཞགས་པ་ལྷ་ཆེན་པོའི་གཟུགས་འཛིན་པ་སྐུ་མདོག་དཀར་པོ་ཕྱག་བཞི་པ། ཕྱག་གཡས་པ་གཉིས་ཀྱི་ས་རྩེ་གསུམ་འཆང་ཞིང་མཆོག་སྩོལ་པ། གཡོན་གཉིས་ཀྱིས་ཞགས་པ་དང་པདྨ་བསྣམས་པ། བདེན་བྲལ་གྱི་མཚམས་སུ་ཁྱབ་འཇུག་གི་གཟུགས་འཛིན་པ་སྐུ་མདོག་ནག་པོ་ཕྱག་བཞི་པ་ཕྱག་གཡས་གཉིས་ན་འཁོར་ལོ་དང་དབྱུག་པ་བསྣམས་པ། གཡོན་གཉིས་ན་པདྨ་དང་དུང་བསྣམས་པ། རླུང་གི་མཚམས་སུ་འཇིག་རྟེན་དབང་ཕྱུག་ཚངས་པའི་གཟུགས་ཅན་སྐུ་མདོག་དཀར་པོ་ཞལ་བཞི་དང་ཕྱག་བཞི་མངའ་བ་གཡས་གཉིས་ན་ཕྲེང་བ་དང་དབྱུག་བ་བསྣམས་པ། གཡོན་གཉིས་ན་པདྨ་དང་སྤྱི་བླུགས་བསྣམས་པའོ། །དབང་ལྡན་གྱི་མཚམས་སུ་འཇིག་རྟེན་དབང་ཕྱུག་འདོད་པའི་གཟུགས་འཛིན་པ་ཞལ་གཉིས་པ་ཕྱག་བཞི་པ། དེ་ལ་ཕྱག་གཡས་གཉིས་ཀྱིས་མདའ་དང་ལྕགས་ཀྱུ་བསྣམས་པ། གཡོན་གཉིས་ཀྱིས་གཞུ་དང་པདྨ་བསྣམས་པའོ། །ཞལ་དང་པོ་ནི་འདོད་པའི་ལྷའི་གདོང་འདྲ་བ། སྤྱི་བོ་ན་རྟ་མགོ་ལྗང་གུའི་མགྲིན་པ་བཏེག་སྟེ་མཚེར་བར་བྱེད་པའི་ཚུལ་ཅན་ནོ། །དེ་ནས་འདི་རྣམས་ཀྱི་སྙིང་པོ་ནི། ཧཱུཾ་པདྨ་ན་རྟེ་ཤྭ་ར་ཧཱུཾ་ཕཊ། ཧེ་མ་ཧཱ་པདྨེ་བི་ཤྭ་མུ་རྟེ་སིདྡྷྱ་ཧཱུཾ་ཕཊ། ཧྲིཿ་པདྨ་པདྨ་ཧཱུཾ་ཨཿ་ཧོ་པདྨ་ཨ་སྭཱ་གྲ་མ་ཧཱུཾ་ཛ་ཞེས་བྱའོ། །སྒེག་མོ་ལ་སོགས་པ་ནས་པདྨའི་དྲིལ་བུ་མའི་བར་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པའི་སྙིང་པོ་ཉིད་ཀྱིས་དགོད་པར་བྱའོ། །འདིར་ཁྱད་པར་ནི་འདི་ཡིན་ཏེ་འདི་ལྟ་སྟེ། ཕྱག་མཚན་རྣམས་པདྨས་མཚན་པ་ཡིན་ནོ། །དེ་ལྟར་དཀྱིལ་འཁོར་བྲིས་ནས་ཕྱི་རོལ་དུ་སྔ་མ་བཞིན་དུ་རྡོ་རྗེ་ཧཱུཾ་མཛད་ཀྱི་སྦྱོར་བས་དཀྱིལ་འཁོར་གྱི་སྒོ་ཕྱེ་ལ་དེ་བཞིན་དུ་ཐམས་ཅད་བྱས་ནས་བསྡུ་བ་བྱའོ། །དེ་ནས་མཚན་པ་རྒྱ་རྩ་བརྒྱད་པས་ཡང་དག་པར་བསྟོད་ལ་སྤྱན་འདྲེན་པའི་ཕྱག་རྒྱའི་དྲིལ་བུ་དང་བཅས་པའི་སྔགས་འདིས་བཅོམ་ལྡན་འདས་འཁོར་དང་བཅས་པ་ཐམས་ཅད་སྤྱན་དྲངས་ལ་དཀྱིལ་འཁོར་དུ་གཞུག་པར་བྱའོ། །ཨོཾ་
སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་ཤྭ་ར་པདྨ་ཧ་སྟ་ཨ་ཡ་ཏི་ཤཱི་གྷཱཾ། ཨི་མེ་བཛྲ་མུ་དྲ་པ་ཏྲི་དྷཱ་ཀྲྀ་ཥུ་ས་མ་ཡེ་བ་དྷ་བ་ཤི་ཀ་རོ་མི་ཏ། ཛཿ་ཧཱུཾ་བཾ་ཧོཿ་ཤོ་དྷ་ཡ་སརྦ་སིདྡྷྱ་ཡ་པདྨཾ་མ་ཧཱ་བཛྲ་དྷ་ར་སྟྭཾ། དེ་ནས་འདིའི་ཕྱག་རྒྱ་བཤད་པར་བྱ་སྟེ། རྡོ་རྗེ་བསྡམས་པ་བཅིངས་ལ་མཛུབ་མོ་གཉིས་གཤིབས་ཏེ། ལྕགས་ཀྱུར་བྱས་ལ་མཐེའུ་ཆུང་གཉིས་ཤིན་ཏུ་བརྐྱང་བ་ནི་རྒོད་མའི་ཁ་གདངས་པ་ཞེས་བྱ་བ་ཡིན་ཏེ། ཁ་བསྐྱོད་པའི་ཚུལ་དུ་བྱ་བ་འདི་ནི་པདྨ་ལྕགས་ཀྱུར་ཞེས་བྱ་སྟེ། འདི་མཛུབ་མོ་གཉིས་ཀྱིས་སྤྱན་དྲང་བར་བྱའོ། །དེ་ནས་པདྨའི་གནོད་སྦྱིན་གྱི་དམ་ཚིག་གི་ཕྱག་རྒྱས་བགེགས་བསྐྲད་པ་ལ་སོགས་པ་བྱས་ལ་རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ། རྡོ་རྗེ་བསྲུངས་བས་བསྲུང་བ་ཐམས་ཅད་ཡང་དག་པར་བསྲུངས་ལ་ཚིགས་སུ་བཅད་པ་དང༌། སྔགས་ཀྱིས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ནས་དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་ཨོཾ་བཛྲ་དྷརྨ་ཨ་བྷི་ཥྀཉྪཙ་ཞེས་བྱ་བ་དང༌། དེ་བཞིན་གཤེགས་ཐམས་ཅད་ཀྱི་སྐུའི་དམ་ཚིག་གི་ཕྱག་རྒྱ་དང་འོད་དཔག་ཏུ་མེད་པའི་དབང་བསྐུར་བས་དབང་བསྐུར་རོ། །དེ་ནས་མཆོད་ཡོན་ཕུལ་ལ་བུམ་པ་ལ་སོགས་པ་ཕྱིའི་མཆོད་པ་རྣམས་དང༌། པདྨའི་མཚོན་ཆ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་ལ་པདྨ་ཆེན་པོ་མེ་ཏོག་དང་བཅས་པ་བཅིངས་ལ་ཡིད་མ་ཡེངས་པར་ཨོཾ་པདྨ་སུ་ཁཾ་ཞེས་བྱ་བཟློས་ཤིང་ཕྱག་བྱའོ། །དེ་ནས་ཕྱག་བཞི་བྱས་ནས་ཕྱི་རོལ་ཏུ་གཏོར་མ་ལ་སོགས་སྦྱིན་པར་བྱའོ། །དེ་ནས་པདྨའི་གནོད་སྦྱིན་དང་རྡོ་རྗེ་མེ་ཏོག་དང་ན་བཟའ་དཀར་མོས་སྦྱིན་སྲེག་གི་ཆོ་གས་སྦྱིན་སྲེག་བྱས་ལ། བཅོམ་ལྡན་འདས་ཀྱི་དཀྱིལ་འཁོར་ཐམས་ཅད་ཀྱི་དབུས་སུ་བཅོམ་ལྡན་འདས་མེ་ཏོག་གིས་མཆོད་ལ་བཞུགས་སུ་གསོལ་ཏེ། བཅོམ་ལྡན་འདས་ཀྱི་སྔགས་ཀྱིས་མར་གྱི་སྦྱིན་སྲེག་བརྒྱ་རྩ་བརྒྱད་དབུལ་བར་བྱའོ། །ཏིང་ངེ་འཛིན་བཟང་པོ་ལ་སོགས་པ་ལ་ནི་རང་གི་སྙིང་པོས་སྦྱིན་སྲེག་བདུན་བདུན་དབུལ་བར་བྱའོ། །དེ་ནས་ཡང་ལྷ་ཐམས་ཅད་ཀྱི་སྙིང་པོ་ཟློས་ཤིང་མེ་ཏོག་གི་དཀྱིལ་འཁོར་དབྲི་བའི་དཀྱིལ་འཁོར་དང་ལྷན་ཅིག་ཏུ་
གཅིག་ཏུ་བྱའོ། །དེ་ནས་ཕྱག་བྱ་བ་ལ་སོགས་པ་སྔོན་དུ་འགྲོ་བས་སྡོམ་པ་བླངས་ལ་དེ་བཞིན་དུ་བྱང་ཆུབ་ཀྱི་སེམས་ཆེན་པོ་བསྐྱེད་ནས། སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷྱ་ཡ་ཐ་སུ་ཁཾ་ཞེས་བྱ་བ་དང༌། པདྨའི་ཁུ་ཚུར་གྱིས་རྡོ་རྗེ་པདྨ་བླངས་ལ་རང་གི་སྙིང་གར་བཞག་སྟེ། རང་གི་སྙིང་གའི་བླ་བ་ལ་རྡོ་རྗེ་པདྨ་བསྐྱེད་ནས། ཤར་ཀྱི་ཕྱོགས་ཀྱི་སྒོར་བལྟས་ཏེ་ཕྱི་རོལ་ན་གནས་པའི་བུམ་པའི་དྲུས་བདག་ཉིད་དབང་བསྐུར་ལ། རྡོ་རྗེ་ཐལ་མོ་ཁོང་སྟོང་གི་གུང་མོ་དང༌། མཐེ་བོང་དང་མཐེ་ཆུང་ཁ་ཕྱེ་ལ་འདབ་མ་བཞི་པ་མེ་ཏོག་དང་བཅས་པ་བཅིང་བར་བྱའོ། །དེ་ནས་དེས་མེ་ཏོག་གི་ཕྲེང་བ་བླངས་ལ་འཇུག་པའི་གླུའི་མཆོད་པ་བླངས་ལ་རྡོ་རྗེ་ཤུགས་ཀྱིས་དཀྱིལ་འཁོར་དུ་འཇུག་པར་བྱའོ། །དེ་ནི་འདི་ཡིན་ཏེ། ཀ་ཙི་ཏ་ཨ་ཏི་རོ་ཏྲི་དྷ་ནུ་ཨུ་གྲ་ཛཱི་ན་སུ་ཧ་རི་མ། པྲ་པ་དྱེ་སི་ཀ་པཱ་དྷི་ཏིཥྛ་ཙ་ཀྲ་དྷ་ར་མུརྟི་ས་མནྟ། ཨཱ་གཙྪ་བི་ནི་ཡ་ཏཾ། ཀ་ཙི་ཏ་ནི་སོ་མྱ་ཤཱནྟ་བཱ། པཱུ་ར་ཀ་རི་དཾ་ཀ་མི་ལས་ནི་སྱ་བེ་ཀ་ཙིཏྟེ་དི་བཏྟེ། ཀཱ་མ་ས་མ་ཡཾ་པྲ་སིདྡྷྱ་མ་ཧཱ་པདྨ་རཱ་ད་ཧོཿ་ཞེས་བྱ་བ་དང་པདྨའི་ལྕགས་ཀྱུ་མ་ཟློས་ཤིང་འཇུག་པར་བྱའོ། །ཡང་ལྷོ་ཕྱོགས་ཀྱི་སྒོ་ནས་པདྨའི་ཞགས་པ་མའི་སྙིང་པོ་ཟློས་ཤིང་འཇུག་པར་བྱའོ། །དེ་ནས་ནུབ་ཕྱོགས་ཀྱི་སྒོ་ནས་པདྨའི་ལྕགས་སྒྲོག་མའི་སྙིང་པོ་ཟློས་ཤིང་འཇུག་པར་བྱའོ། །ཡང་བྱང་ཕྱོགས་ཀྱི་སྒོ་ནས་པདྨའི་དྲིལ་བུ་མའི་སྙིང་པོ་ཟློས་ཤིང་འཇུག་པར་བྱའོ། །ཡང་ཤར་ཕྱོགས་ཀྱི་སྒོ་ནས་ཞུགས་ལ་ཡིད་ཀྱིས་མ་ཡེངས་པར་ཕྱག་བྱའོ། །དེ་ནས་དེའི་འོག་ཏུ་ཨོཾ་བི་ཤྭ་དྷ་ཡ་ཙིཏྟཾ་མེ་སརྦ་དྷརྨེ་ཤྱ་བཛྲ་ཎི་ཞེས་བརྗོད་པར་བྱའོ། །དེ་ནས་དཀྱིལ་འཁོར་ལ་བསྐོར་བ་ལན་གསུམ་བྱས་ལ་བཅོམ་ལྡན་འདས་ཀྱི་སྤྱན་སྔར་འདུག་སྟེ། འདི་སྐད་ཅེས་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་ཐོགས་བདག་གྲུབ་མཛོད། །ཡང་འདི་སྐད་ཅེས་བརྗོད་དོ། །ཛཿ་ཧཱུཾ་བཾ་ཧོཿ་བྲ་སིདྡྷྱ་མཾཿ་དེ་ནས་རྡོ་རྗེ་ཆུ་འཐུངས་ལ་བདག་ཉིད་ལ་དབབ་པར་བྱའོ། །དང་པོར་རེ་ཞིག་ས་མ་ཡ་སཏྭཾ་ཞེས་བརྗོད་དེ་དམ་ཚིག་གི་ཕྱག་རྒྱ་རྣམས་བཅིང་ངོ༌། །དེ་ནས་ཨོཾ་པདྨ་ས་ཡོ་ཏ་ཨ་ཏིཥྛ་ཡ་ཞེས་ཟློས་ཤིང་སེམས་མ་རྡོ་རྗེ་མའི་སྦྱོར་བ་བྱས་ནས་ཨ་ཞེས་བྱ་བ་ལན་བརྒྱ་བཟླ་བར་བྱའོ། །དེ་ནས་འཇིག་
རྟེན་དབང་ཕྱུག་གི་སྙིང་པོ་ལན་བརྒྱ་བཟླས་ནས་དབབ་པར་བྱའོ། །དེ་ནས་འཇིག་རྟེན་དབང་ཕྱུག་གི་སྙིང་པོས་མེ་ཏོག་དོར་རོ། །དེ་ནས་དེ་བླངས་ལ་དེ་ཉིད་ཀྱིས་རང་གི་མགོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་གདོང་གཡོགས་དགྲོལ་ལོ། །དེ་ནས་དེ་ཉིད་ཟློས་ཤིང་ཤར་ཕྱོགས་ནས་བརྩམས་ཏེ། དཀྱིལ་འཁོར་བལྟ་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ་ཏི་ཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་དགྲོལ་ལོ། །དེ་ནས་འགྲོ་བ་འདུལ་བའི་ཕྱག་རྒྱ་ཆེན་པོ་བཅིངས་ལ་བདེ་བས་བཞིན་རས་དང་བཞིན་ཡིད་ཙམ་འཛུམ་པའི་ཡེ་ཤེས་ཀྱིས་རྡོ་རྗེ་བླངས་པས་བཅོམ་ལྡན་འདས་ལ་ལྟ་ཞིང་མཆུ་མཉམ་པར་བཞག་སྟེ། ཇི་སྲིད་བཅོམ་ལྡན་འདས་ཀྱིས་མཐོང་བ་སྩལ་ནས་རང་གིས་དངོས་གྲུབ་སྩོལ་བར་མཛད་པ་དེ་ཉིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་བ་ཤིས་པ་བརྗོད་པའི་ཚུལ་དུ་རང་གི་སྙིང་གར་བཞག་སྟེ། མཚན་བརྒྱ་རྩ་བརྒྱད་ཀྱིས་བསྟོད་ནས་པདྨའི་མཚོན་ཆ་མ་ལ་སོགས་པའི་གསང་བའི་མཆོད་པ་བཞིས་བཅོམ་ལྡན་འདས་ལ་ཡང་དག་པར་མཆོད་ལ་གླུ་དང་རོལ་མོ་ལ་སོགས་པའི་མཆོད་པས་ཀྱང་ལེགས་པར་མཆོད་པར་བྱའོ། །དེ་ནས་བདག་ཉིད་ལ་དབང་བསྐུར་བ་ལ་སོགས་པའི་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་སློབ་མ་འཇུག་པ་ལ་སོགས་པའི་ཆོ་ག་བཤད་པར་བྱ་སྟེ། རྡོ་རྗེ་མཆོད་ཡོན་བསྐོར་བཅིངས་ན། །སྙིང་ནས་བསམ་གཡོས་བཞིན་གྱིས་ནི། །མགོ་བོས་ལེགས་པར་ཕྱག་བྱས་ན། །དངོས་གྲུབ་ཐམས་ཅད་རབ་གྲུབ་བྱེད། །ཞུགས་ནས་དཀྱིལ་འཁོར་ལན་གསུམ་ནི། །བསྐོར་བ་བྱས་ཏེ་འདི་བརྗོད་བྱ། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ཀྱང་འགྲུབ་བར་མཛོད། །དེ་ནས་དུས་ཀྱི་མཆོད་པ་ཡིས། །བདེ་བ་ཆེན་པོ་ཡང་དག་མཆོད། །དེ་བཞིན་པདྨའི་དབང་བསྐུར་ཞིང༌། །སློབ་མ་བླངས་ཏེ་འཇུག་པར་བྱ། །དེ་ནས་སློབ་མ་བསླབ་པའི་གཞི་ལྔ་ཡོངས་སུ་བཟུང་བའམ། དགེ་ཚུལ་ལམ་དགེ་སློང་གི་སྡོམ་པ་ཡོངས་སུ་བཟུང་ལ། རིག་པའི་སྡོམ་པ་དོན་དུ་གཉེར་བས་སློབ་དཔོན་ལ་ཕྱག་བྱས་ལ་འདི་སྐད་ཅེས་བརྗོད་པར་བྱའོ།
དགའ་ཆེན་ཁྱོད་བདག་སྟོན་པ་བས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་སེམས་དཔའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་སྩལ་དུ་གསོལ། །སྡོམ་པ་རྣམས་ཀྱང་བདག་ལ་སྩོལ། །དེ་ནས་པདྨའི་གནོད་སྦྱིན་ཡོངས་སུ་བཟླས་པའི་རས་ཀྱིས་སྨད་གཡོགས་དང་སྟོད་གཡོགས་བྱས་ལ། ཡང་པདྨའི་གནོད་སྦྱིན་དང་སྒོ་སྲུང་མ་རྣམས་བཟླས་པའི་དར་གྱིས་གདོང་གཡོགས་བཅིངས་ཏེ། མེ་ཏོག་གི་ཕྲེང་བ་བཏགས་ཤིང་གདོང་དྲི་ཞིམ་པར་བྱས་ལ་སློབ་མ་ཕྱག་བཞི་བྱེད་དུ་གཞུག་གོ །དེ་ནས་སྔ་མ་བཞིན་དུ་སྡོམ་པ་འཛིན་དུ་གཞུག་གོ །དེ་ནས་སྔར་བཞིན་དུ་རང་གི་ཆོ་གས་བྱང་ཆུབ་ཀྱི་སེམས་ཆེན་པོ་བསྐྱོད་པ་བྱེད་དུ་བཅུག་ལ། དེའི་སྙིང་གར་རྡོ་རྗེ་པདྨ་བསྐྱེད་དེ། བུམ་པའི་ཆུས་དབང་བསྐུར་ལ་ཡོན་གྱི་མཆོག་བླངས་ནས་འཇིག་རྟེན་དབང་ཕྱུག་ཏུ་བྱིན་གྱིས་བརླབས་ལ་པདྨ་ཆེན་པོ་མེ་ཏོག་དང་བཅས་པ་འཆིང་དུ་གཞུག་གོ །དེ་ནས་དེས་མེ་ཏོག་གི་ཕྲེང་བ་འཛིན་དུ་བཅུག་ལ་སློབ་དཔོན་གྱི་འཇུག་པའི་ཆོ་གའི་ཚུལ་ལྟར་རྡོ་རྗེ་ཤུགས་ཀྱིས་དཀྱིལ་འཁོར་དུ་ཞུགས་པར་བྱའོ། །དེ་ནས་ཞུགས་ནས་དེ་སྐད་ཅེས་བརྗོད་དོ། །བི་ཤྱ་ད་ཡ་ཙིཏྟ་མ་མེ་སརྦ་རྨེ་ཤྱ་ཛ་ན་ཞེས་སྨྲོས་ཤིག །དེ་ནས་འཇུག་པ་ལ་སོགས་པའི་ཆོ་ག་ཐམས་ཅད་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྒྱས་པ་རྫོགས་སོ།། །།དེ་ནས་སློབ་དཔོན་གྱི་ལས་ཀྱི་ཆོ་ག་རྒྱས་པ་གསུངས་ནས་ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ལ་སློབ་དཔོན་གྱི་དངོས་གྲུབ་ཀྱི་ཡེ་ཤེས་བསླབ་པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར། དེ་ནས་དངོས་གྲུབ་མ་གྲུབ་པའི་ཕྱིར་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཚིག་ཡིན་ཏེ། འདི་སྐད་དུ་བཤད་པའི་ཆོ་གས་ཆོས་ཀྱི་ཕྱག་རྒྱ་མ་དང་ཕྱག་རྒྱ་ཆེན་པོའི་དམ་ཚིག་གི་ཕྱག་རྒྱའམ། ལས་ཀྱི་ཕྱག་རྒྱ་མཚན་ཐོག་ཐག་བཟླས་པའམ། བསྒོམ་པའི་བར་གྱིས་བསྒྲུབས་པ་ན་གང་གི་ཚེ་འགྲུབ་པར་མ་གྱུར་ན་དེའི་རྗེས་ཐོགས་ལ་རྣལ་འབྱོར་པས་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱ་བའི་དོན་ཉིད་དུ་ལས་འདི་དག་བཤད་པར་བྱའོ་ཞེས་བྱའོ། །དངོས་གྲུབ་མ་གྲུབ་པའི་ཏིང་ངེ་འཛིན་ཞེས་བྱ་བ་ནི་ཇི་སྐད་བཤད་པའི་ཚུལ་གྱིས་ཕྱག་རྒྱ་
བཞི་བསྒྲུབས་ན། གང་གི་ཚེ་མ་གྲུབ་པ་དེའི་ཚེ་ནི་མ་གྲུབ་པ་ཡིན་ལ། སྒྲིབ་པ་ཐམས་ཅད་གཞིག་པ་ལ་སོགས་པ་ནུས་པ་གང་ཡིན་པ་དེ་ནི་གྲུབ་ཅེས་བྱའོ། །དངོས་གྲུབ་ཀྱང་ཡིན་ལ་མ་གྲུབ་པ་ཡང་ཡིན་པས་ན་དངོས་གྲུབ་མ་གྲུབ་པའོ། །དེའི་ཏིང་ངེ་འཛིན་ནི་དངོས་གྲུབ་མ་གྲུབ་པའི་ཏིང་ངེ་འཛིན་ཏོ། །ལས་འདྲེན་མ་ནི་ལས་རྣམ་པ་སྣ་ཚོགས་ཀྱི་རྒྱུན་ནོ། །དང་པོར་ནི་ཐོག་མར་རོ། །ཕྱག་རྒྱ་ཆེན་པོ་ལ་སོགས་པ་སྒྲུབ་པའོ། །ནི་ཞེས་བྱ་བ་ནི་ངེས་པར་བཟུང་སྟེ། ཕྱག་རྒྱ་ཆེན་པོ་ལ་སོགས་པ་སྒྲུབ་པ་ཉིད་དོ། །གོ་རིམས་བཞིན་དུ་ཞེས་བྱ་བ་ནི་ལྷའི་རྣལ་འབྱོར་སྔོན་དུ་འགྲོ་བས་སོ། །རབ་བཤད་བྱ་ཞེས་པ་ནི་རབ་ཏུ་ཕྱེ་སྟེ་བཤད་པར་བྱའོ་ཞེས་པའོ། །འདི་ལྟ་སྟེ་ཞེས་བྱ་བ་ནི་བཤད་ཟིན་ཏོ། །སྒྲིབ་པ་ཐམས་ཅད་ནི་ཉོན་མོངས་པ་ལ་སོགས་པ་སྒྲིབ་པ་ཐམས་ཅད་དང་སྡིག་པ་ནི་སྔར་བཤད་པའི་མཚན་ཉིད་ཅན་ནོ། །རྨི་ལམ་ངན་པ་ནི་བཤད་ཟིན་ཏོ། །ལྟས་ངན་པ་ནི་གནོད་པ་སྐྱེད་པར་བྱེད་པ་སྟེ་འུག་པའི་སྒྲ་སྒྲོགས་པ་ལ་སོགས་པའོ། །ཡམས་དང་འཚེ་བ་དང་ནད་འགོ་བ་དང༌། ཉོན་མོངས་པ་དང་དུས་མ་ཡིན་པར་འཆི་བ་ནི་བཤད་ཟིན་ཏོ། །འཇིགས་པ་ནི་ངན་སོང་དུ་འགྲོ་བ་ལ་སོགས་པ་བྱེད་པའོ། །སྐྲག་བ་ནི་རོ་ལངས་ལ་སོགས་པ་འཇིགས་པའི་གཟུགས་མཐོང་པའོ། །རྩོད་པ་ནི་ཚིག་མི་སྙན་པར་བརྗོད་པའོ། །འཐབ་པ་ནི་གཡུལ་འགྱེད་པའོ། །དིམ་པ་ནི་བྱིས་པ་ཆུང་དུ་ལ་འཚེ་བའོ། །ད་མར་ནི་རྒྱལ་ཕྲན་ནམ། བློན་པོ་རྒྱལ་པོའི་དབང་འོག་ཏུ་མ་འདུས་པའོ། །ཉོན་མོངས་པ་ནི་འདོད་ཆགས་པས་གཟིར་བའོ། །ངལ་བ་ནི་ལམ་གྱིས་དུབ་པས་ཉེན་པའོ། །སྡུག་བསྔལ་ནི་ལུས་ཀྱི་མི་བདེ་བ་ཉམས་སུ་མྱོང་བའོ། །ཡིད་མི་བདེ་བ་ནི་སེམས་ཀྱིས་མི་བདེ་བ་ཉམས་སུ་མྱོང་བའོ། །དབུལ་བ་ལ་སོགས་པ་ནི་གོ་བར་ཟད་དོ། །འདི་དག་ཞིག་བར་ཇི་ལྟར་འགྱུར་ཞེ་ན། པདྨ་ཆེན་པོ་བཞི་པས་སོ་ཞེས་བྱ་བ་གསུངས་སོ། །དེ་ནས་འདིའི་མཚན་ཉིད་བཤད་པར་བྱ་སྟེ། པདྨ་ཆེན་པོ་བཅིངས་ལ་ཡིད་ཀྱིས་སྦྱིན་སྲེག་བྱའོ། །འདིས་ནི་འདི་སྐད་སྟོན་པ་ཡིན་ཏེ་སྔ་མ་བཞིན་དུ་འཇིག་རྟེན་དབང་ཕྱུག་གི་སྦྱོར་བ་བྱས་ལ་དེ་ཁོ་ན་ཉིད་དང་ཆོས་དང་དམ་ཚིག་བཟུང་ནས་མདུན་དུ་བཅོམ་ལྡན་འདས་སྤྱན་དྲངས་ཏེ།
མཆོད་པ་ཐམས་ཅད་ཀྱིས་ཇི་ལྟ་བ་བཞིན་དུ་ཡང་དག་པར་མཆོད་ལ་ཕྱག་བྱས་ཏེ། པདྨ་ཆེན་པོའི་ཕྱག་རྒྱ་བཅིངས་ལ་ཡིད་ཀྱིས་རང་བཞིན་གྱི་མེ་ཐབ་མེ་སྟག་ཀུན་དུ་འཁྲུག་ཅིང་འབར་བའི་དབུས་ན་བཞུགས་ཤིང་ཡེ་ཤེས་ཀྱི་མེ་དཔུང་འབར་བ་དེའི་ལྗགས་ལ་ཡི་གེ་ཧཱུཾ་བསམས་ནས་པདྨ་ཆེན་པོ་དེས་ཡིད་ཀྱི་སྒྲིབ་པ་ཐམས་ཅད་དང༌། རྨི་ལམ་ངན་པ་དང༌། ལྟས་ངན་པ་དང༌། ཡམས་དང་གནོད་པ་དང་ནད་འགོ་བ་དང༌། ཉོན་མོངས་པ་དང༌། དུས་མ་ཡིན་པར་འཆི་བ་དང༌། འཇིགས་པ་དང༌། སྐྲག་པ་དང༌། རྩོད་པ་དང༌། འཐབ་པ་དང༌། དིམ་པ་དང༌། དམར་དང༌། ཉོན་མོངས་པ་དང༌། ངལ་བ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། དབུལ་བ་དང༌། བརྙས་པ་དང༌། རེག་པ་ངན་པ་དང༌། སྐལ་བ་དན་པ་དང༌། ནད་མྱོང་བ་དང༌། ནོར་བརླག་པ་རྣམས་སྦྱིན་སྲེག་བྱས་ནས་དེ་རྣམས་འཇིག་པར་གྱུར་ཏོ། །དེ་ལྟར་པདྨ་ཆེན་པོ་ཞི་བས་ལྷ་སྒྲུབ་པ་བསྟན་ནས་ད་ནི་རླུང་དང་མཁྲིས་པ་ཞེས་བྱ་བ་ལ་སོགས་པས་པདྨ་ཆེན་པོ་སྨན་གྱི་ཕྱག་རྒྱས་བཟུང་བ་ལས་བསྒྲུབ་པ་གསུངས་པ་ཡིན་ནོ། །དེའི་མཚན་ཉིད་བཤད་པར་བྱ་སྟེ། སེམས་ཀྱིས་ཞི་བར་བྱའོ་ཞེས་བྱ་བ་ཡིན་ནོ། །འདི་སྐད་སྟོན་པར་འགྱུར་ཏེ། སྔ་མ་བཞིན་དུ་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་དེ་ཁོ་ན་ཉིད་དང༌། ཆོས་དང་དམ་ཚིག་བཟུང་སྟེ་པདྨ་ཆེན་པོ་བཅིངས་ལ་བདག་དང་གཞན་གྱི་རླུང་ནད་ཐམས་ཅད་གསོ་བའི་བསམ་པས་ལུས་ལ་འཕགས་པ་འཇིག་རྟེན་དབང་ཕྱུག་སྐུ་མདོག་དཀར་པོས་ལུས་ཐམས་ཅད་ཁྱབ་པར་བཞུགས་པར་བསམ་པར་བྱས་ཏེ་དེ་ལྟ་བུས་ནི་དེ་ཞི་བར་འགྱུར་རོ། །དེ་བཞིན་དུ་དེ་བཅིངས་ལ་འཇིག་རྟེན་དབང་ཕྱུག་གིས་བསྒྲུབ་པར་བྱ་བའི་ལུས་ལ་ཁྱབ་པས་ཤིན་ཏུ་བསིལ་བར་གྱུར་པར་བསམ་པར་བྱས་ཏེ། དེ་ལྟ་བུས་ནི་མཁྲིས་པ་སེལ་ཏོ། །དེ་བཞིན་དུ་ཁྲག་ཞི་བར་བྱ་བའི་བསམ་པས་བསྒྲུབ་པར་བྱ་བའི་སྤྱི་བོ་ནས་བརྩམས་ཏེ། འཇིག་རྟེན་དབང་ཕྱུག་གིས་ཁྱབ་པར་བསམས་ནས་དེ་ལྟ་བུས་ནི་ཁྲག་སེལ་ཏོ། །དེ་བཞིན་དུ་བསྒྲུབ་པར་བྱ་བའི་སྤྱི་པོ་ནས་བརྩམས་ཏེ། འཇིག་རྟེན་དབང་ཕྱུག་འབར་བའི་གཟུགས་ཅན་བསམས་ན། དེ་ལྟ་བུས་ནི་བད་ཀན་གྱི་ནད་གསོ་བ་ཡིན་ནོ། །དེ་བཞིན་དུ་འདུས་པ་བསལ་བའི་བསམ་པས་བསྒྲུབ་པར་བྱ་
བའི་ལུས་ལ་འཇིག་རྟེན་དབང་ཕྱུག་གིས་ཁྱབ་ནས་ཀུན་དུ་འབར་ཞིང་གསལ་བར་གྱུར་པར་བསམ་པར་བྱས་ཏེ། དེ་ལྟ་བུས་ནི་འདུ་བའི་ནད་བསལ་བ་ཡིན་ནོ། །དེ་བཞིན་དུ་མ་ཞུ་བ་བསལ་བའི་བསམ་བས་འཇིག་རྟེན་དབང་ཕྱུག་མེ་ལྟ་བུས་བསྒྲུབ་པར་བྱ་བའི་ལུས་ལ་ཁྱབ་ནས་འབར་བར་གྱུར་པར་བསམ་པར་བྱས་ཏེ། དེ་ལྟ་བུས་ནི་མ་ཞུ་བ་བསལ་བར་གྱུར་ཏོ། །དེ་བཞིན་དུ་བསྒྲུབ་པར་བྱ་བའི་སྤྱི་བོ་ནས་བརྩམས་ཏེ། རྐང་བའི་མཐིལ་གྱི་བར་དུ་འཇིག་རྟེན་དབང་ཕྱུག་གིས་ཁྱབ་པར་བསམ་པར་བྱས་ཏེ། དེ་ལྟ་བུས་ནི་རིམས་གསོ་བ་ཡིན་ནོ། །དེ་བཞིན་དུ་འཇིག་རྟེན་དབང་ཕྱུག་གིས་བསྒྲུབ་པར་བྱ་བའི་ལུས་ལ་ཁྱབ་པར་བསམ་པར་བྱས་ཏེ། དེ་ལྟ་བུས་ནི་སྦྱར་བའི་དུག་གསོ་བའོ། །དེ་བཞིན་དུ་འཕགས་པ་སྤྱན་རས་གཟིགས་དབང་ཕྱུག་གིས་བསྒྲུབ་པར་བྱ་བའི་སྤྱི་བོ་ནས་བརྩམས་ཏེ། རྐང་པའི་མཐིལ་གྱི་བར་དུ་ཁྱབ་པར་བསམ་ཞིང་དུག་གི་སྐྱེས་བུ་ནག་པོར་སྐྱེས་ལ་ཞོན་པ་ལྟ་བུ་ཞིག་བསྒྲུབ་པར་བྱ་བའི་ལུས་ལས་བྲོས་པར་བསམ་པར་བྱས་ཏེ་དེ་ལྟ་བུས་ནི་དུག་གི་ནད་གསོ་བ་ཡིན་ནོ། །དེ་བཞིན་དུ་བསྒྲུབ་པར་བྱ་བའི་ལུས་ལ་འཇིག་རྟེན་དབང་ཕྱུག་བཅུག་སྟེ། བསྒྲུབ་པར་བྱ་བ་འཇིག་རྟེན་དབང་ཕྱུག་ཏུ་གྱུར་པར་བསམ་པར་བྱས་ཏེ། དེ་ལྟ་བུས་ནི་མཛེ་དང་འབྲུམ་བུ་ཕྲ་མོ་དང༌། གཡན་པ་དང༌། རྐང་ཤུ་དང༌། སྐྲན་དང༌། ཆུའི་དམུ་རྫིང་དང༌། མཚན་བར་རྡོལ་བ་དང༌། ཤ་བཀྲ་དང༌། ཟད་བྱེད་དང༌། ཁྲག་ཟད་པ་དང༌། ཁུ་བ་ཟད་པ་དང༌། ནད་ཐམས་ཅད་དང༌། གནོད་པ་དང༌། གདོན་དང༌། ཕྲ་མེན་མ་རྣམས་གསོ་བར་འགྱུར་བ་ཡིན་ནོ། །དེ་ལྟར་པདྨ་ཆེན་པོ་སྨན་གྱི་ཕྱག་རྒྱ་འཛིན་པ་ལས་སྒྲུབ་པར་གསུངས་ནས། ད་ནི་ཐམས་ཅད་རྡོ་རྗེར་བྱ་བ་དང་ཞེས་བྱ་བ་ལ་སོགས་པས་པདྨ་ཆེན་པོས་ཐམས་ཅད་བསྲུང་བའི་ལས་གསུངས་པ་ཡིན་ནོ། །དེ་ནས་འདིའི་མཚན་ཉིད་བཤད་པར་བྱ་སྟེ། བསམ་པས་བསྲུང་བར་བྱའོ་ཞེས་བྱ་བ་ནི་འདི་སྐད་སྟོན་ཏེ། སྔ་མ་བཞིན་དུ་རྡོ་རྗེ་འཇིག་རྟེན་དབང་ཕྱུག་གི་རྣལ་འབྱོར་བྱས་ལ་དེ་ཁོ་ན་ཉིད་དང་ཆོས་དང་དམ་ཚིག་བཟུང་སྟེ། པདྨ་ཆེན་པོ་བཅིངས་ལ་འཇིག་རྟེན་དབང་ཕྱུག་བསྒོམ་པའི་སྙིང་པོ་ཟློས་ཤིང་ཐམས་ཅད་རྡོ་རྗེར་བྱ་བའི་བསམ་པས་
ཐམས་ཅད་རྡོ་རྗེར་བྱས་པའི་བསྲུང་བར་འགྱུར་རོ། །སྦྱོར་བ་སྔ་མ་དང་ཕྱི་མ་ཐམས་ཅད་ལ་སྒོམ་པའི་སྙིང་པོ་བཟླས་ནས་ལས་འགྲུབ་པར་འགྱུར་པར་ཤེས་པར་བྱའོ། །དེ་བཞིན་དུ་ཐམས་ཅད་བྱས་ནས་ཆོས་སྐྱེད་པའི་བསམ་བས་ནི་ཆོས་ཀྱིས་བསྲུང་བར་འགྱུར་རོ། །ཆོ་ག་སྐྱེད་པའི་བསམ་པས་ནི་ཆོ་གའི་བསྲུང་བར་འགྱུར་རོ། །དེ་བཞིན་དུ་གཙུག་ཏོར་དང་གཙུག་ཕུད་དང༌། མཚམས་དང་ཕྱོགས་དང་དཀྱིལ་འཁོར་དང་ས་དང་ནམ་མཁའ་དང་རྡོ་རྗེའི་གདན་དང་ཁང་བ་ཆེན་པོ་དང༌། རྡོ་རྗེ་རབ་དང༌། མེ་འབར་བ་དང༌། ཐལ་བའི་ར་བ་དང༌། རྡོ་རྗེ་དང༌། རི་བོ་དོན་ཡོད་པ་ལ་སོགས་པ་དང། སྲད་བུས་ཡོངས་སུ་བསྐོར་བ་དང༌། ཕུར་བུས་གདབ་པ་དང༌། ཟས་དང་བཏུང་བ་དང་གོས་དང་རྒྱན་དང་ཕྱག་རྒྱ་དང༌། བསྲུང་བ་བསྐྱེད་པའི་བསམ་པས་དེ་དག་ཏུ་འགྱུར་རོ། །དེ་ལྟར་པདྨ་ཆེན་པོ་ཐམས་ཅད་སྲུང་བས་ལས་ཐམས་ཅད་འགྲུབ་པར་གསུངས་ནས། ད་ནི་ཚེ་དང་ཞེས་བྱ་བ་ལ་སོགས་པ་པདྨ་ཆེན་པོ་མཆོག་གྲུབ་པས་ལས་སྒྲུབ་པ་གསུངས་པ་ཡིན་ནོ། །དེ་ནས་འདིའི་མཚན་ཉིད་བཤད་པར་བྱ་སྟེ། རྣམ་པར་སྤྱང་བར་བྱའོ་ཞེས་བྱ་བས་བསྒྲུབ་པོ་ཞེས་བྱ་བ་འདིས་དོན་འདི་སྐད་སྟོན་པ་ཡིན་ཏེ། སྔ་མ་བཞིན་དུ་འཇིག་རྟེན་དབང་ཕྱུག་གི་སྦྱོར་བ་བྱས་ལ་དེ་ཁོ་ན་ཉིད་དང༌། ཆོས་དང་དམ་ཚིག་བཟུང་ནས་པདྨ་ཆེན་པོ་བཅིངས་ཏེ། བདག་ཉིད་ཀྱི་བཅིང་བའི་འཇིགས་པ་ལ་སོགས་རྣམ་པར་སྤྱང་བར་བྱའོ་ཞེས་བྱ་བས་བསམ་པ་སྐྱེད་ལ་སྒོམ་པའི་སྙིང་པོ་ཟློས་ཤིང་བདག་ཉིད་འཕགས་པ་སྤྱན་རས་གཟིགས་དབང་ཕྱུག་ལ་སོགས་པའི་ཚེ་དང་ལྡན་པའི་འཕགས་པ་སྤྱན་རས་གཟིགས་དབང་ཕྱུག་ཏུ་བསམས་ཏེ། དེ་ལྟ་བུས་ནི་ཚེ་འགྲུབ་པར་འགྱུར་རོ། །དེ་བཞིན་དུ་བདག་ཉིད་འཇིག་རྟེན་དབང་ཕྱུག་ཏུ་གྱུར་པའི་འཇིག་རྟེན་དབང་ཕྱུག་གི་ཁ་དོག་དང་ལྡན་པར་བསམས་ན་དེ་ལྟ་བུས་ནི་ཁ་དོག་འགྲུབ་བོ། །དེ་བཞིན་དུ་འཇིག་རྟེན་དབང་ཕྱུག་ཏུ་གྱུར་ཅིང༌། །དེའི་སྟོབས་དང་ལྡན་པས་བསམས་ན། དེ་ལྟ་བུས་ནི་བདེན་པའི་སྟོབས་འགྲུབ་བོ། །དེ་བཞིན་དུ་ཐམས་ཅད་བྱས་ལ། བདག་ཉིད་འཇིག་རྟེན་དབང་ཕྱུག་ཏུ་གྱུར་ཅིང་འཇིག་རྟེན་དབང་ཕྱུག་གི་གཟི་བརྗིད་དང་ལྡན་པར་བསམས་ན། གཟི་བརྗིད་གྲུབ་བོ། །དེ་
བཞིན་དུ་དེའི་མདངས་དང༌། ལང་ཚོ་དང༌། བརྩོན་འགྲུས་དང༌། སྤྲོ་བ་དང༌། ནད་མེད་པ་དང༌། དཔལ་དང༌། སྐལ་བ་བཟང་པོ་དང༌། ནོར་དང༌། འབྲུ་དང༌། དབང་ཕྱུག་དང༌། འབྱོར་བ་དང༌། དངོས་གྲུབ་དང༌། འཕེལ་བ་དང༌། བློ་དང༌། རྙེད་པ་དང༌། བཀྲ་ཤིས་དང༌། མིང་དང༌། གྲགས་པ་དང༌། སྙན་པ་དང༌། ཏིང་ངེ་འཛིན་དང༌། ཤེས་རབ་དམ་པ་འགྲུབ་པ་ལ་ཡང་ཅི་རིགས་སུ་སྦྱར་བར་བྱའོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཐམས་ཅད་དེ་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་དང་པདྨའི་རིགས་སོ། །དེ་རྣམས་ཀྱི་སྒྲིབ་པ་མེད་པའི་ཡེ་ཤེས་ནི་ཆོས་ཐམས་ཅད་རང་བཞིན་གྱིས་རྣམ་པར་དག་པའོ་ཞེས་ངེས་པར་འགྱུར་བའོ། །དེ་ལས་བྱུང་བའི་པདྨའི་རིགས་ནི་མི་ཕྱེད་པས་ན་རྡོ་རྗེ་དང་འདྲ་བས་ན་རྡོ་རྗེའོ། །དེ་སྟོན་པར་བྱེད་པའི་སྒྲའི་ཚོགས་ནི་རྟག་པའོ། །དེ་ཉིད་བསྒྲུབ་པར་བྱ་བ་དང༌། སྟོན་པར་བྱེད་པའི་ཆོ་གའོ། །དེའི་རྒྱས་པ་ནི་རྒྱུན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་དུམ་བུ་གཉིས་པའི་རྟོག་པ་ཐམས་ཅད་ཀྱི་ཕྱི་མའི་རྒྱུད་ཀྱི་རྩ་བའི་རྒྱུད་ལས་གསུངས་པའི་འགྲོ་བ་འདུལ་བའི་རྟོག་པ་བཤད་པ་རྫོགས་སོ།། །།དེ་ལྟར་ལོག་པར་ལྟ་བའི་གཉེན་པོར་གྱུར་པར་འགྲོ་བ་འདུལ་བའི་དཀྱིལ་འཁོར་གསུངས་ནས། ད་ནི། དེ་ནས་རྒྱལ་པོ་རྡོ་རྗེ་འཛིན། །ཐམས་ཅད་ནམ་མཁའ་མི་འགྱུར་ཆེ། །ཞེས་བྱ་བ་ལ་སོགས་པས་སེར་སྣའི་གཉེན་པོར་གྱུར་པ་ནོར་བུའི་རིགས་གསུངས་པ་ཡིན་ནོ།། དེ་ནས་ཞེས་བྱ་བའི་སྒྲ་ནི་འདས་མ་ཐག་པ་སྟོན་པའི་ཚིག་ཡིན་ཏེ། དང་པོར་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་པ་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་བཤད་པ་ཉིད་ཡིན་ནོ། །ཐམས་ཅད་ནམ་མཁའ་ཞེས་བྱ་བ་ནི་ཐམས་ཅད་ཀྱང་ཡིན་ལ་ནམ་མཁའ་ཡང་ཡིན་པས་ན་ཐམས་ཅད་ནམ་མཁའ་སྟེ། ནམ་མཁའ་དང་མཉམ་པའི་ཡེ་ཤེས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བ་དང་ནོར་བུའི་རིགས་སོ། །དེ་འདི་ལ་མངའ་བས་ན་ཐམས་ཅད་ནམ་མཁའོ། །ནམ་མཁའ་ཐམས་ཅད་ཡིན་པ་ཉིད་ཀྱིས་ན་མི་འགྱུར་ཆེ་སྟེ་བརྟན་
ཞིང་རྟག་པའོ། །ཐམས་ཅད་དབང་བསྐུར་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱིས་དབང་བསྐུར་བ་ཐམས་ཅད་ནི་ནོར་བུའི་རིགས་ཡིན་ཏེ། དེ་ལྟར་ན་དེ་ནི་དེ་བཞིན་གཤེགས་པ་ཐམས་ཅད་དང་གདུལ་བྱ་རྣམས་ཀྱི་དོན་དུ་གཉེར་བར་བྱ་བ་ཡིན་པས་ན་ཀུན་གྱི་དོན་ཏེ་ནོར་བུའི་རིགས་ལ་སོགས་པ་ཐམས་ཅད་ཀྱི་དོན་ཉིད་ཀྱི་རང་བཞིན་དུ་གྱུར་པས་ཀྱང་ཀུན་གྱི་དོན་ཏོ། །ཀུན་དབང་ཞེས་བྱ་བ་ནི་ནམ་མཁའ་མཛོད་ཀྱི་ཏིང་ངེ་འཛིན་གྱི་མཐུས་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ལ་དབང་ཐོབ་པས་ན་ཀུན་དབང་ངོ༌། །རིན་པོ་ཆེ་ཐམས་ཅད་འཛིན་ཞེས་བྱ་བ་ལ་རིན་པོ་ཆེ་ཐམས་ཅད་ནི་རིན་པོ་ཆེའི་རིགས་ཏེ་དེ་ཐུགས་སུ་ཆུད་པའི་ཚུལ་གྱིས་དེའི་བདག་ཉིད་ཀྱི་རང་བཞིན་གྱིས་འཛིན་པར་མཛད་པས་ན་རིན་ཆེན་ཐམས་ཅད་འཛིན་ནོ། །དེ་ལྟ་བུས་ནི་རྡོ་རྗེ་འཆང་དབང་བ་ནམ་མཁའ་ཉིད་དུ་གྱུར་ཏོ་ཞེས་བྱ་བར་སྦྱར་རོ། །ཅི་ཞིག་མཛད་ནས་ཤེ་ན་ཏིང་ངེ་འཛིན་གྱིས་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་པདྨ་དམར་པོའི་འོད། །འདམ་གྱི་ཉེས་པས་མི་གོས་པ། །དེ་བཞིན་ཁམས་གསུམ་དག་པ་ནི། །གནས་ཀྱི་ཉེས་པས་མི་གོས་སོ། །ཞེས་བྱ་བ་ནི་བསྒོམ་པའི་སྙིང་པོ་འདིའི་དོན་ཆོས་ཐམས་ཅད་རང་བཞིན་གྱིས་རྣམ་པར་དག་པའི་ཏིང་ངེ་འཛིན་གྱིས་ཤིན་ཏུ་ལྷག་པར་ཡང་བྱིན་གྱིས་བརླབས་པས་ན། རང་བྱིན་རླབས་ཞེས་བྱ་བ་སྟེ་བརྟན་པར་བྱ་བའོ། །དག་པ་ཆེན་པོས་རབ་སད་མཛད། །ཅེས་བྱ་བ་ནི་པདྨའི་འདབ་མ་དབྱེ་བ་སྒོམ་པའི་རང་བཞིན་གྱི་བདག་པོ་ཆེན་པོས་རབ་ཏུ་སད་པར་མཛད་པས་སོ། །ཆོས་རྣམས་ལ་ནི་རྣམ་གཟིགས་པས། །ཞེས་བྱ་བ་ནི་པདྨའི་རིགས་ཀྱི་རང་བཞིན་དང་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བའི་ཆོས་རྣམས་ལ་རྣམ་པར་གཟིགས་ཤིང་སོ་སོར་རྟོག་པར་མཛད་པས་སོ། །ཅིའི་ཕྱིར་ནམ་མཁའ་ཉིད་དུ་གྱུར་པ་ཡིན་ཞེ་ན་ཀུན་གྱི་དབང་དོན་ཞེས་བྱ་བ་གསུངས་ཏེ། སེམས་ཅན་གྱི་ཁམས་ཐམས་ཅད་དང་བདག་ཉིད་དང་འཇིག་རྟེན་དང་འཇིག་རྟེན་ལས་འདས་པའི་རྒྱལ་སྲིད་ཀྱི་དབང་ཕྱུག་རབ་ཏུ་གྲུབ་པའི་དོན་ནི་ཀུན་དོན་དབང་ཕྱུག་གོ །ནམ་མཁའ་ཉིད་དུ་གྱུར་པ་དེ་ཡང་ཁྱབ་པ་ཇི་ལྟ་བུ་ཞེ་ན། གདོད་ནས་བྱུང་ཞེས་བྱ་བ་གསུངས་ཏེ་སྔར་སྒྲ་
བཤད་པའི་ཚུལ་གྱིས་ད་ལྟར་བྱུང་བའི་ངོ་བོ་བཞུགས་པས་ན་གདོད་ནས་བྱུང་བའོ། །ནམ་མཁའ་ཉིད་དུ་གྱུར་པ་ཡིན་ཞེ་ན་ཞེས་བྱ་བ་ནི་ནམ་མཁའི་ངོ་བོ་ཉིད་ནི་ནམ་མཁའ་ཉིད་དེ། འཇིག་རྟེན་ན་གྲགས་པའི་ཚུལ་གྱིས་ནམ་མཁའི་འོད་ཟེར་གྱི་རང་བཞིན་ཉིད་དུ་གྱུར་པའོ། །ནམ་མཁའ་ཉིད་དེ་ཁྱབ་པར་ཇི་ལྟ་བུ་ཞེ་ན། ཉི་ཟླ་དང་ནི་གཟའ་སྐར་ཅན། །ཞེས་བྱ་བ་སྨོས་ཏེ་ནམ་མཁའ་གང་ལ་ཉི་མ་དང་ཟླ་བ་དང་གཟའ་དང་སྐར་མ་ཡོད་པར་འཇིག་རྟེན་ན་གྲགས་པའི་ནམ་མཁའ་ཉིད་དུ་གྱུར་པས་ན་ཉི་ཟླ་དང་གཟའ་སྐར་དང་བཅས་པའི་ནམ་མཁར་གྱུར་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་བཤད་མ་ཐག་པའི་སྒོམ་པའི་སྟོབས་ཀྱིས་རྡོ་རྗེ་འཆང་ཆེན་པོ་ཉི་མ་དང་ཟླ་བ་དང་སྐར་མ་ཅན་གྱི་ནམ་མཁའ་དང་གཅིག་ཏུ་གྱུར་པའི་རྗེས་ཐོགས་ཉིད་ལ་སྒོམ་པའི་རང་བཞིན་ཅན་གྱི་ཤེས་རབ་ཀྱི་མཐར་ཐུག་པ་ལས་བྱུང་བའི་ངེས་པའི་མཆོག་གིས་རྡོ་རྗེ་རིན་ཆེན་གྱི་རྣམ་པར་ཐུགས་རྩེ་གཅིག་པ་ཉིད་ཀྱིས་རྡོ་རྗེ་མཛད་ཅིང་མི་ཕྱེད་པ་ཉིད་དུ་མཛད་ནས་དེ་ནས་ཡང་ནམ་མཁའི་རྡོ་རྗེ་དེ་ལས་རིན་ཆེན་དུ་གྱུར་པའི་ཡིད་བཞིན་གྱི་ནོར་བུ་རིན་པོ་ཆེ་ལས་བཻ་ཌཱུཪྻ་སྔོན་པོ་འདྲ་བས་ཞེས་བྱ་བ་ནི་མདོག་སྔོ་ལྗང་ངོ༌། །ནམ་མཁའི་སྙིང་པོ་ནི་བྱང་ཆུབ་སེམས་དཔའ་ཆེན་པོའི་སྐུའི་ཡང་དག་འབྱུང་བ་ནི་དེ་ལྟར་འབྱུང་བའོ། །རྡོ་རྗེ་རིན་ཆེན་བསྣམས་པ་ནི་ནོར་བུ་རིན་པོ་ཆེ་བསྣམས་པའོ། །དགེ་བ་ནི་ཉོན་མོངས་པ་བག་ཆགས་དང་བཅས་པར་བྱང་བའོ། །དེ་ནས་ཞེས་བྱ་བ་ནི་དེའི་རྗེས་ཐོགས་ལའོ། །བཅོམ་ལྡན་འདས་ཐོག་མ་འདི་ཞེས་བྱ་བ་ནི་བཤད་མ་ཐག་པའི་ནམ་མཁའི་སྙིང་པོ་ནི་བདུད་བཞི་བཅོམ་པས་ན་བཅོམ་ལྡན་འདས་སོ། །ད་ལྟར་བྱུང་བའི་ཚུལ་གྱིས་རྟག་ཏུ་ཞུགས་པས་ན་ཐོག་མའོ། །མཛོད་སྤུ་ཀུན་གྱི་གནས་ན་བཞུགས། །ཞེས་བྱ་བ་ལ་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྐྱེས་བུ་ཆེན་པོའི་མཛོད་སྤུ་ནི་མཛོད་སྤུ་ཀུན་ནོ། །དེའི་གནས་ནི་ཐིག་ལེའི་ཕྱོགས་མཛོད་སྤུའི་གནས་སུ་གྱུར་པའོ། །དེར་ཡང་དག་པར་གནས་པ་ནི་དེ་ན་གནས་པའོ། །གང་གི་སྟོབས་ཀྱིས་ན་མཛོད་སྤུ་ཐམས་ཅད་ཀྱི་གནས་སུ་ཡང་དག་པར་གནས་ཤེ་ན། ཏིང་འཛིན་ལ་ནི་རྣམ་གཟིགས་པས། །འཇིག་རྟེན་དབང་ཕྱུག་བདག་པོ་ཉིད། །ཅེས་བྱ་བ་གསུངས་ཏེ་ཆོས་ཐམས་ཅད་རང་བཞིན་གྱིས་རྣམ་
པར་དག་པའོ་ཞེས་སོ་སོར་རྟོག་པ་ནི་རྣམ་པར་གཟིག་པས་སོ། །རྣམ་པར་གཟིགས་པ་དེ་ལས་ནི་སྟོང་པ་ཉིད་ཀྱི་ཏིང་ངེ་འཛིན་ངེས་པར་བསྐྱེད་པའོ། །ཏིང་ངེ་འཛིན་དེ་ལས་ནི་གཙོ་བོ་འཇིག་རྟེན་དབང་ཕྱུག་ཉིད་དེ་དེས་བདག་པོར་གྱུར་པ་ཉིད་ནི་རིགས་ཐམས་ཅད་ཀྱི་རྒྱལ་པོ་ཉིད་དོ། །དེ་བས་ན་འཇིག་རྟེན་དབང་ཕྱུག་ཉིད་ཀྱི་བདག་པོ་ཉིད་དུ་གྱུར་པས་ན་བཅོམ་ལྡན་འདས་སྤྱི་གཙུག་ཀུན་གྱི་གནས་ན་ཡང་དག་པར་ཞུགས་པ་ཡིན་ནོ། །དེར་ཞུགས་ནས་ཅི་ཞིག་མཛད་ཅེ་ན། སངས་རྒྱས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སངས་རྒྱས་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །སྲས་བཅས་ནི་བྱམས་པ་ལ་སོགས་པའོ། །རྡོ་རྗེ་འཆང་ཆེན་པོ་ནི་རྡོ་རྗེ་སེམས་དཔའ་ལ་སོགས་པའོ། །དེ་ལྟ་བུའི་སངས་རྒྱས་ཐམས་ཅད་དང་རྡོ་རྗེ་འཆང་ཆེན་པོ་ནི་མཆོག་སྟེ་དམ་པའོ། །རྡོ་རྗེ་རིན་ཆེན་དེ་ཡིས་ནི་ཕྱག་ན་གནས་པའི་རྡོ་རྗེ་རིན་ཆེན་དེས་སོ། །ནི་ཞེས་བྱ་བའི་སྒྲ་ནི་ངེས་བར་གཟུང་བ་སྟེ། རྡོ་རྗེ་རིན་ཆེན་དེ་ཉིད་ཀྱིས་སོ། །དེ་ཚེ་དེ་ལ་དབང་བསྐུར་རོ། །ཞེས་བྱ་བ་ནི་དུས་དེའི་ཚེ་དབང་བསྐུར་བར་གྱུར་པའོ། །ཅིའི་ཕྱིར་ཞེ་ན། རིགས་ཀུན་གྱིས་དབང་བསྐུར་ཕྱིར་དང༌། །ཞེས་བྱ་བ་གསུངས་ཏེ་རིགས་ཀུན་ནི་ནོར་བུའི་རིགས་རྣམས་སོ། །དེ་ནས་དབང་བསྐུར་བ་ནི་རིགས་ཀུན་གྱིས་དབང་བསྐུར་བ་སྟེ་དེའི་འོག་ཏུའོ། །དེ་ཡང་དེ་བཞིན་གཤེགས་པ་ཐམས་ཅད་ལ་སོགས་པ་རིན་པོ་ཆེའི་རིགས་ཀྱི་ངོ་བོར་སྐྱེད་པར་མཛད་དོ་ཞེས་བྱ་བའི་ཐ་ཚིག་གོ །དེ་བཞིན་གཤེགས་པ་ཐམས་ཅད་རིན་པོ་ཆེའི་རིགས་དེར་སྐྱེས་པ་ལ་དགོས་པ་ཅི་ཡོད་ཅེ་ན། བསམ་པ་ཐམས་ཅད་རྫོགས་པའི་ཕྱིར། །ཞེས་བྱ་བ་གསུངས་ཏེ། རིག་འཛིན་ལ་སོགས་པའི་དངོས་གྲུབ་ལ་སྲེད་པ་སྐྱེ་བ་ནི་གདུལ་བྱ་རྣམས་ཀྱི་བསམ་པ་ཐམས་ཅད་དེ་དེ་ཡོངས་སུ་རྫོགས་པ་ནི་རིག་འཛིན་ལ་སོགས་པའི་དངོས་གྲུབ་ཐོབ་བོ། །དོན་དེའི་ཕྱིར་དབང་བསྐུར་བ་དེས་སངས་རྒྱས་སྲས་དང་བཅས་པ་ཐམས་ཅད་དང་རྡོ་རྗེ་འཆང་ཆེན་པོའི་དབང་བསྐུར་ཞིང་རིན་པོ་ཆེའི་རིགས་ཀྱི་རང་བཞིན་དུ་མཛད་པས་ན། ཀུན་མཆོག་ཀུན་ལ་དབང་བསྐུར་ནས། །ཤི་ས་པར་བརྗོད་པ་འདི་གསུངས་སོ། །ཞེས་བྱ་བ་དང༌། ཨོཾ་སརྦ་ཞེས་བྱ་བ་ལ་སོགས་པའི་སྙིང་པོ་གསུངས་པ་ཡིན་ནོ། །དེ་ནས་བཟང་པོ་འདི་
གསུངས་ཤིང༌། །ལེགས་བར་ཤིས་བརྗོད་དབང་བསྐུར་བས། །ཞེས་བྱ་བ་ནི་སྙིང་པོ་འདི་གསུངས་པའི་རྗེས་ཐོགས་ཉིད་ལ་ཤིས་པ་བརྗོད་པའི་རང་བཞིན་ཅན་གྱི་དབང་བསྐུར་བའི་རྒྱུད་ནས་དབང་བསྐུར་བའོ། །རྡོ་རྗེ་རིན་ཆེན་དེ་ལས་ཞེས་བྱ་བ་ནི་བཅོམ་ལྡན་འདས་ནམ་མཁའི་སྙིང་པོའི་ཕྱག་ན་གནས་པ་དེ་ལས་སོ། །ཆོས་ཀྱི་གཙོ་བོ་འབྱུང་བར་འགྱུར། །ཞེས་བྱ་བ་ནི་སོ་སོར་རྟོག་པའི་ཡེ་ཤེས་ནི་ཆོས་སོ། །དེ་ལས་བྱུང་བ་དང་དེ་སྟོན་པར་བྱེད་པ་དང༌། དེ་ཐོབ་པར་བྱ་བའི་དབང་བསྐུར་བ་ལ་སོགས་པའི་སེམས་དཔའ་ནི་ཆོས་ཀྱི་གཙོ་བོ་སྟེ། དེ་དག་སྙིང་པོ་འདི་གསུངས་པའི་རྗེས་ཐོགས་ཉིད་ལ་དེ་ལས་བྱུང་བ་ཡིན་ནོ། །བྱུང་ནས་དེ་རྣམས་ཀྱིས་ཅི་ཞིག་མཛད་ཅེ་ན་བྱུང་ནས་ཞེས་བྱ་བ་ལ་སོགས་པ་སྨོས་ཏེ། ཆོས་ཀྱི་གཙོ་བོ་དེ་རྣམས་ནི་རྡོ་རྗེ་རིན་པོ་ཆེ་ཆེན་པོ་དེ་ལས་བྱུང་ནས་འགྲོ་བ་སེམས་ཅན་གྱི་ཁམས་མ་ལུས་པ་ཐམས་ཅད་དང་རིན་པོ་ཆེའི་རིགས་ཀྱི་རང་བཞིན་དུ་བསྐྱེད་པར་དབང་བསྐུར་རོ། །ཇི་ལྟར་ཞེ་ན་ཅི་རིགས་པར་ནི་ཞེས་བྱ་བ་སྨོས་ཏེ། ཕྱོགས་བཅུར་རིན་པོ་ཆེའི་རིགས་ཀྱི་དཀྱིལ་འཁོར་བསྐྱེད་ནས། དེ་རྣམས་དཀྱིལ་འཁོར་དུ་བཅུག་པའི་ཆོ་གས་བཅུག་སྟེ་ཞེས་བྱ་བའི་ཐ་ཚིག་གོ །འགྲོ་བ་ཐམས་ཅད་དབང་བསྐུར་བ་ཇི་ཙམ་གྱིས་དབང་བསྐུར་ཞེ་ན། རྡོ་རྗེ་ཀུན་གྱི་དབང་བསྐུར་བས། །ཞེས་བྱ་བ་གསུངས་ཏེ། རྡོ་རྗེ་ཀུན་ནི་འཕགས་པ་ནམ་མཁའི་སྙིང་པོ་ལ་སོགས་པའི་ནོར་བུའི་རིགས་ཀྱི་ལྷ་རྣམས་སོ། །དེ་རྣམས་ཀྱི་དབང་བསྐུར་བ་ནི་དབང་བསྐུར་བ་ཐམས་ཅད་དེ། དེ་རྣམས་རྫོགས་པར་བྱ་བ་ཉིད་དུ་གྱུར་པའོ། །སླར་ཡང་དཀྱིལ་འཁོར་ཚུལ་གྱིས་བཞུགས། །ཞེས་བྱ་བ་ནི་དེ་ལྟར་རྡོ་རྗེ་རིན་པོ་ཆེ་དེ་ལ་སོགས་པ་ཆོས་ཀྱི་གཙོ་བོ་དེ་རྣམས་བྱུང་ནས་སེམས་ཅན་གྱི་དོན་མཛད་དེ་ཕྱོགས་བཅུ་ནས་སླར་བྱོན་ཏེ་དཀྱིལ་འཁོར་གྱི་ཚུལ་གྱིས་བཅོམ་ལྡན་འདས་འཕགས་པ་ནམ་མཁའི་སྙིང་པོས་བསྐོར་ནས་ཞུགས་པ་ཡིན་ནོ། །འདི་སྐད་སྟོན་པ་ཡིན་ཏེ། བཅོམ་ལྡན་འདས་རྡོ་རྗེ་སེམས་དཔའ་ལྷ་མོའི་དཀྱིལ་འཁོར་གྱི་ཚུལ་གྱིས་འདོད་ཆགས་ཀྱིས་འདོད་ཆགས་སྤངས་པའི་གདུལ་བྱ་རྣམས་ཀྱི་དོན་མཛད་ནས་གཏི་མུག་ཟིལ་གྱིས་གནོན་པའོ། །སེམས་ཅན་གྱི་ཁམས་རྣམས་ལ་འཇིག་རྟེན་
དབང་ཕྱུག་ཏུ་གྱུར་ནས་སོ་སོར་རྟོག་བ་མཛད་པ་ཡིན་ནོ། །དེ་ནས་སེར་སྣའི་གཉེན་པོར་གྱུར་པ་ནོར་བུའི་རིགས་ནི་ཉི་མ་དང་ཟླ་བ་དང༌། སྐར་མའི་གཟུགས་ཅན་གྱི་ནམ་མཁར་གྱུར་པ་རྡོ་རྗེ་རིན་ཆེན་བསྐྱེད་དེ་དེ་ལས་བྱང་ཆུབ་སེམས་དཔའ་ཆེན་པོ་ནམ་མཁའི་སྙིང་པོའི་སྐུར་ཞུགས་ནས་དེ་ཐམས་ཅད་མཛད་དེ་རང་གི་སྙིང་པོ་གསུངས་ནས་ཉིད་ཀྱི་ཕྱག་ན་གནས་པའི་རྡོ་རྗེ་རིན་པོ་ཆེ་ལས་རང་གི་དཀྱིལ་འཁོར་གྱི་ལྷའི་ངོ་བོར་གྱུར་ནས་ངེས་སེམས་ཅན་གྱི་ཁམས་ཐམས་ཅད་ནོར་བུའི་རིགས་སུ་བཅུག་ནས། ནོར་བུའི་རིགས་ལས་ནོར་བུའི་རིགས་ཀྱི་རང་བཞིན་དུ་མཛད་ནས་སླར་བྱུང་སྟེ། དེ་བཞིན་གཤེགས་པ་ཐམས་ཅད་ཀྱི་ཐིག་ལེའི་གནས་སུ་བཞུགས་ནས་དེ་ཐམས་ཅད་མཛད་དོ། །ཡང་ནོར་བུའི་རིགས་ཀྱི་ལྷའི་ཚུལ་གྱིས་ཕྱོགས་བཅུ་ནས་བྱོན་པའི་དཀྱིལ་འཁོར་གྱི་ཚུལ་གྱིས་བཞུགས་པ་ཡིན་ནོ། །དེ་ལྟར་དེ་ནས་ཞེས་བྱ་བ་ནས་བརྩམས་ཏེ། དཀྱིལ་འཁོར་གྱིས་ཀྱང་བཞུགས་པ་ཡིན་ནོ་ཞེས་བྱ་བའི་བར་གྱི་བཤད་པས་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །དེ་ལྟར་ནོར་བུའི་རིགས་ཀྱི་ཏིང་ངེ་འཛིན་གསུམ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བའི་ཆོ་ག་བསྟན་པའི་ཕྱིར། །བདེ་གཤེགས་ཀུན་གྱིས་བྱིན་བརླབས་པས། །ཞེས་བྱ་བ་ལ་སོགས་པ་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་འཇུག་པ་ལ་སོགས་པའི་ལས་ཀྱི་ཆོ་ག་རྒྱས་པ་གསུངས་པ་ཡིན་ནོ། །རྡོ་རྗེ་རིན་ཆེན་ཞེས་བྱ་བ་ནི་རྡོ་རྗེ་རིན་ཆེན་འབྱུང་བའི་རྒྱུར་གྱུར་པ་དང༌། རྡོ་རྗེ་རིན་ཆེན་གྱིས་ཉེ་བར་མཚན་པ་ཡིན་པའི་ཕྱིར་རྡོ་རྗེ་རིན་ཆེན་ནི་འཕགས་པ་ནམ་མཁའི་སྙིང་པོའོ། །འདིའི་གོང་ན་མཆོག་ཏུ་གྱུར་པ་གཞན་མེད་པས་བླ་ན་མེད་པའོ། །བཅོམ་ལྡན་འདས་འཕགས་པ་ནམ་མཁའི་སྙིང་པོ་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབས་ཏེ། རྟོག་པ་དེ་གསུངས་པ་ཡིན་ནོ། །རྟོག་པ་དེ་གསུངས་པ་གང་ཡིན་ན་རྟོག་པ་འདིའི་ལས་ཅི་ཞིག་ཡིན་ཞེ་ན། ཤིན་ཏུ་ཞེས་བྱ་བ་ལ་སོགས་པ་སྨོས་ཏེ། ཤིན་ཏུ་ཞེས་བྱ་བ་ནི་ཐོག་མ་དང་ཐ་མ་མེད་པའོ། །དབང་ཕྱུག་ཀྱང་ཡིན་ལ་ཆེན་པོ་ཡང་ཡིན་པས་ན་དབང་ཕྱུག་ཆེན་པོ་སྟེ་ཁམས་
གསུམ་པའི་ཆོས་ཀྱི་རྒྱལ་པོ་ནོར་བུའི་རིགས་ཀྱི་རང་བཞིན་ཅན་གྱི་རྡོ་རྗེ་འཆང་བའོ། །དེའི་ངོ་བོ་ཉིད་ཡིན་པས་ན་དབང་ཕྱུག་ཆེན་པོའོ། །ཤིན་ཏུ་ཡང་ཡིན་ལ་ཆེན་པོ་ཡང་ཡིན་པས་ན་ཤིན་ཏུ་དབང་ཕྱུག་ཆེན་པོའོ། །དེ་ཡོངས་སུ་རྫོགས་པར་གྱུར་པ་ནི་དངོས་གྲུབ་མཆོག་སྟེ། དེ་སྩོལ་བར་མཛད་པས་ན་ཤིན་ཏུ་དབང་ཕྱུག་ཆེན་པོའི་དངོས་གྲུབ་མཆོག་སྩོལ་ཏོ། །ནོར་བུའི་རིགས་ཀྱི་དཀྱིལ་འཁོར་ལ་སོགས་པ་སྒྲུབ་པ་དང༌། བསྒྲུབ་པར་བྱ་བའི་རྟོག་པ་ཞེས་བྱའོ། །དེ་གསུངས་པ་ནི་རྟོག་པ་དེ་བཀའ་སྩལ་བའོ། །དཀྱིལ་འཁོར་ཆེན་པོ་ནི་རྡོ་རྗེ་སེམས་དཔའ་ཕྱིའི་དཀྱིལ་འཁོར་རོ། །གང་གི་ཕྱི་རོལ་དེ་དང་འདྲ་བ་དེ་ཕྱིའི་དཀྱིལ་འཁོར་ཆེན་པོ་སྟེ་ཞེས་བྱའོ། །ནི་ཞེས་བྱ་བའི་སྒྲ་ནི་ངེས་པར་གཟུང་པ་སྟེ། ཕྱི་རོལ་ནི་དཀྱིལ་འཁོར་ཆེན་པོ་དང་འདྲ་བ་ཉིད་ཡིན་ནོ། །ནམ་མཁའི་འཁོར་ལོར་ཞེས་བྱ་བ་ནང་གི་དཀྱིལ་འཁོར་ཆེན་པོ་ནམ་མཁའ་དང་འདྲ་བ་ལ་ནོར་བུའི་དབྱིབས་ཟུར་བརྒྱད་པ་དང་འདྲ་བར་འདུག་པའོ། །དེ་ཉིད་ཀྱི་ཕྱིར་ནམ་མཁའི་མདོག་ཅན་ཞེས་བྱ་བ་ལ་སོགས་པ་གསུངས་ཏེ། ནམ་མཁའི་མདོག་ནི་བཻ་ཌཱུཪྻའི་མདོག་སྟེ་མདོག་སྔོན་པོ་ཞེས་བྱ་བའི་ཐ་ཚིག་གོ །ཉི་མ་དང་ཟླ་བ་ནི་ཉི་མའི་དཀྱིལ་འཁོར་དང༌། ཟླ་བའི་དཀྱིལ་འཁོར་གྱིས་སོ། །སྐར་མ་དང་གཟའ་རྣམས་ཀྱིས་བརྒྱན་པར་བྲི་ཞེས་བྱ་བ་ནི་ནམ་མཁའི་ངོས་ལ་ཤར་ཞིང་འཇིག་རྟེན་ན་གྲགས་པའི་སྐར་མ་དང་གཟའ་རྣམས་ཀྱིས་ཀྱང་བརྒྱན་ཅིང་མཛེས་པར་བྱ་བའི་ནམ་མཁའི་དཀྱིལ་འཁོར་དེ་ཡང་དག་པར་བྲི་བར་བྱའོ། །དེའི་དབུས་ཞེས་བྱ་བ་ནི་དབུས་ནི་དཀྱིལ་འཁོར་གྱི་ལྟེ་བའི་དབུས་སུའོ། །ནམ་མཁའི་སྙིང་པོ་ནི་ཞེས་བྱ་བ་ནི་འཕགས་པ་ནམ་མཁའ་སྙིང་པོའོ། །ནི་ཞེས་བྱ་བའི་སྒྲ་ནི་ངེས་པར་གཟུང་བ་སྟེ་ནམ་མཁའི་སྙིང་པོ་ཉིད་དོ། །བདག་ཉིད་ཐམས་ཅད་དགྱེས་པར་གཞག །ཅེས་བྱ་བ་ནི་བདག་ཉིད་ཀྱང་ཡིན་ལ་ཐམས་ཅད་ཀྱང་ཡིན་པས་ན་བདག་ཉིད་ཐམས་ཅད་དེ། བཅོམ་ལྡན་འདས་འཕགས་པ་ནམ་མཁའི་སྙིང་པོའི་སྐུ་ཐམས་ཅད་དོ། །དེ་ལ་དགྱེས་པ་ནི་ཡིད་བདེ་བ་དང་ལྡན་པ་གང་ཡིན་པ་དེ་ལ་བདག་ཉིད་ཐམས་ཅད་དགྱེས་པ་ཞེས་བྱ་བ་སྟེ། དེ་གཞག་ཅིང་དགོད་པར་བྱའོ། །དག་པའི་བཻ་ཌཱུཪྻའི་མདོག་
འདྲ་བ། །ཞེས་བྱ་བ་ནི་རིན་པོ་ཆེ་བཻ་ཌཱུཪྻ་ནག་ནོག་གི་དྲི་མ་ཐམས་ཅད་དང་བྲལ་བ་ནི་དག་པའི་བཻ་ཌཱུཪྻ་སྟེ། དེ་དང་འདྲ་བའི་མདོག་འདི་ལ་མངལ་བས་ན། དག་པའི་བཻ་ཌཱུཪྻ་ཡི་མདོག་འདྲ་བ། །ཞེས་བྱའོ། །ཡང༌། དེ་ཡི་འོད་ཟེར་འབར་བ་སྣ་ཚོགས་འཁུག །ཅེས་བྱ་སྟེ། གང་གི་འོད་ཟེར་ཁ་དོག་སྣ་ལྔ་པས་སྣ་ཚོགས་དེ་ཉིད་ཀུན་དུ་འབྲུག་ཅིང་ཕན་ཚུན་ཁྱབ་པར་བྱེད་པ་དེ་ལ་དེ་སྐད་ཅེས་བྱའོ། །ཡང་དེ་ཉིད། གཡོན་པས་རིན་ཆེན་ཐུགས་ཀར་སྟོད། །ཅེས་བྱ་བ་ཕྱག་གཡོན་པས་རྡོ་རྗེ་རིན་ཆེན་གྱི་ཐུགས་ཀའི་ཕྱོགས་སུ་སྟོད་པའི་ཚུལ་གྱིས་བསྣམས་པ་འདི་ལ་མངའ་བས་ན། གཡོན་པས་རིན་ཆེན་ཐུགས་ཀར་སྟོད། །ཅེས་བྱ་བ་ལ། གཡས་པས་ནོར་ཆེན་རབ་སྩོལ་བ། །ཞེས་བྱ་བ་དེ་ཕྱག་གཡས་པས་ཡིད་བཞིན་གྱི་ནོར་བུ་རིན་པོ་ཆེ་ལ་སོགས་པའི་ནོར་བུ་རིན་པོ་ལ་སོགས་པའི་ནོར་འདོད་པ་རྣམས་ལ་ནམ་མཁའི་ཁྱབ་པའི་ནོར་སྩོལ་བ་འདི་ལ་མངའ་བས་ན་དེ་སྐད་ཅེས་བྱའོ། །དེའི་ཞེས་བྱ་བ་ནི་ནམ་མཁའི་སྙིང་པོའོ། །ངོས་ཞེས་བྱ་བ་ནི་ཕྱོགས་ཐམས་ཅད་དུའོ། །སེམས་ཅན་མཆོག་ཅེས་བྱ་བ་ནི་སེམས་དཔའི་དམ་པ་ཡིན་ནོ། །བཞི་པོ་གཟུངས་བཅས་དམ་པ་ཞེས་བྱ་བ་ནི་སེམས་དཔའ་མཆོག་བཞི་པོ་རང་གི་རིག་པའི་ལྷ་མོ་དང་བཅས་པ་དམ་པར་གྱུར་ཅིང་ཕུལ་དུ་བྱུང་བ་དགོད་པར་བྱའོ། །དབང་བསྐུར་བ་དང་ཞེས་བྱ་བ་ནི་གོ་བར་ཟད་དོ། །དཀྱིལ་འཁོར་ཆེན་པོའི་ཚུལ་གྱིས་ནི། །ཞེས་བྱ་བ་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པའི་ཚུལ་གྱི་ཆོ་ག་རྒྱས་པ་ཇི་བཞིན་བྱ་ཞེས་ཤུགས་ཀྱི་སྤྱང་པར་བྱ་སྟེ་དཀྱིལ་འཁོར་ཇི་ལྟ་བ་བཞིན་དུ་བྲིས་ལ་སྒོ་དབྱེ་བ་བྱས་ནས་བསྡུ་བར་བྱའོ། །དེ་ནས་མཚན་བརྒྱ་རྩ་བརྒྱད་པས་བསྟོད་པ་བྱས་ལ། སྤྱན་དྲང་པའི་ཕྱག་རྒྱས་སྤྱན་དྲངས་ནས་མཆོད་པ་ཐམས་ཅད་ཀྱིས་ཡང་དག་པར་མཆོད་ལ་ཕྱག་བྱས་ནས་སྡོམ་པ་བླངས་ཏེ། འཇུག་པའི་ཕྱག་རྒྱ་བཅིངས་ནས་བདག་ཉིད་དབང་བསྐུར་བར་བྱ་བ་འདི་ནི་འདིར་ཆོ་ག་རྒྱས་པ་ཡིན་ནོ། །ནོར་བུའི་ཁུ་ཚུར་གྱིས་ཞུགས་ཞེས་བྱ་བ་ནི་རྡོ་རྗེ་བསྡམས་པ་བཅིངས་ལ་མཐེ་བོང་གཉིས་མཉམ་པོར་གཞི་བས་ཏེ་མཐེ་བོང་གཉིས་ཀྱི་རྩེ་མོ་ལ་མཛུབ་མོ་གཉིས་ཀྱི་གདོང་གཞག་པ་འདི་ནི་ནོར་བུའི་ཁུ་ཚུར་ཏེ་དེ་ལྟ་བུའི་ནོར་བུའི་ཁུ་ཚུར་གྱིས་ཞུགས་པའོ།།
ནམ་མཁའ་ལས་བྱུང་ཞེས་བྱ་བ་ནི་ནམ་མཁའི་སྙིང་པོ་ནི་ནམ་མཁའ་སྟེ། དེ་ལས་བྱུང་བའི་དམ་ཚིག་ནི་ནམ་མཁའ་ལས་བྱུང་བའོ། །ནམ་མཁའ་ལས་བྱུང་བའི་དམ་ཚིག་དེ་མཆོག་ཡིན་པས་ན་དམ་པའོ། །ཞུགས་ནས་དམ་ཚིག་བརྗོད་པར་བྱ། །ཞེས་བྱ་བ་ནི་དཀྱིལ་འཁོར་དུ་ཞུགས་ནས་བཅོམ་ལྡན་འདས་ལ་ཕྱག་བྱས་ལ་འདི་སྐད་ཅེས་བརྗོད་པར་བྱའོ། །ཁྱོད་ནི་ནམ་མཁའ་ལས་བྱུང་བ། །ཞེས་བྱ་བ་ནི་རྡོ་རྗེ་རིན་ཆེན་ནམ་མཁའ་སྟེ་དེ་ལས་ཁྱོད་བྱུང་བ་ཡིན་ནོ་ཞེས་བྱ་བའི་ཐ་ཚིག་གོ །ཐམས་ཅད་ཀྱི་ནི་ལྔ་པ་ཡིན། །ཞེས་བྱ་བ་ནི་རྡོ་རྗེ་སེམས་དཔའ་དང་དེ་བཞིན་གཤེགས་པ་དང༌། རྡོ་རྗེ་དང་པདྨའི་རིགས་ནི་ཐམས་ཅད་དེ་དེའི་ལྔ་པ་ཞེས་བྱ་བ་ལྔ་པའི་གྲངས་བཀོད་པར་བྱེད་པའོ། །ཨོཾ་སིདྡྷི་ཧཱུཾ་བྷུ་ཞེས་བྱ་བ་ནི་སའི་འཇིག་རྟེན་གྱི་རང་བཞིན་གྱི་དངོས་གྲུབ་ཀྱི་བར་རོ། །བྷུ་བ་ཞེས་བྱ་བ་ནི་བར་སྣང་གི་དངོས་གྲུབ་ཀྱི་བར་དུའོ། །ས་ཞེས་བྱ་བ་ནི་མཐོ་རིས་ཀྱི་འཇིག་རྟེན་གྱི་ངོ་བོ་ཉིད་ཀྱི་དངོས་གྲུབ་ཀྱི་བར་རོ། །བཛྲ་རཏྣ་ཞེས་བྱ་བ་ནི་འཕགས་པ་ནམ་མཁའི་སྙིང་པོ་འདི་དབང་བསྐུར་བའི་རིན་པོ་ཆེའི་འབྱོར་བ་དང་ལྡན་པའི་ལྷ་མོའི་རང་བཞིན་གྲུབ་པས་སོ། །བཱ་བཱ་ཞེས་བྱ་བ་ནི་གཏེར་གྱི་རིན་ཆེན་དཔལ་གྱི་ལྷ་མོ་གྲུབ་པས་སོ། །ཌ་ཌ་ཞེས་བྱ་བ་ནི་རིག་པའི་རྒྱལ་པོ་ནོར་བུ་ཆེན་པོའི་ཕུན་སུམ་ཚོགས་པའི་ལྷ་མོ་གྲུབ་བོ། །ཏཾ་ཞེས་བྱ་བ་ནི་རིག་པའི་རྒྱལ་པོ་བླ་ན་མེད་པ་ཞེས་བྱ་བའི་མཆོད་པའི་ལྷ་མོའི་རང་བཞིན་གྲུབ་པས་ཀྱང་གྲུབ་པར་མཛོད་ཅེས་གསོལ་བ་འདེབས་སོ། །འདི་ནི་ཞེས་བྱ་བ་ནི་བཤད་ན་ཐག་པའི་དམ་ཚིག་གི་སྔགས་སོ། །བཟླས་པ་ཙམ་གྱིས་ཞེས་བྱ་བ་ནི་སྔོན་དུ་བསྙེན་པ་སྟེ། མཚན་ཐོག་ཐག་བཟླས་པ་མ་ཡིན་པས་སོ། །ནམ་མཁའི་སྙིང་པོ་ཞེས་བྱ་བ་ནི་ནམ་མཁའི་སྙིང་པོ་ལ་སོགས་པའི་དངོས་གྲུབ་རྣམས་ནི་དངོས་གྲུབ་ཐམས་ཅད་དེ་དངོས་གྲུབ་དེ་ཐམས་ཅད་ལའོ། །ཕུན་སུམ་ཚོགས་པ་ཀུན་ལའང་ཤིན་ཏུ་ནི། །ཞེས་བྱ་བ་ནི་རིག་པའི་ལྷ་མོ་རྣམ་པ་སྣ་ཚོགས་པའི་འཇིག་རྟེན་ལས་འདས་པའི་ཕུན་སུམ་ཚོགས་པ་རྣམས་ནི་ཕུན་སུམ་ཚོགས་པ་ཀུན་ཏེ་དེ་རྣམས་ལ་ཤིན་ཏུ་ཞེས་བྱ་བ། མཉམ་པར་གྲུབ་འགྱུར་འདི་ནི་ཐེ་ཚོམ་མེད། །
ཅེས་བྱ་བ། བཅོམ་ལྡན་འདས་ནམ་མཁའི་སྙིང་པོ་གྲུབ་པར་གྱུར་པའོ། །དེ་ནས་ནོར་བུའི་ཁུ་ཚུར་ཆེན་པོ་གཡས་པའི་ལྕགས་ཀྱུས་དགུག་པར་བྱའོ་ཞེས་བྱ་བའི་དཀྱིལ་འཁོར་བྲིས་ནས་སྒོ་དབྱེ་བ་བྱས་ལ་བསྡུ་བ་བྱ་བ་དང༌། མཚན་བརྒྱ་རྩ་བརྒྱད་པའི་རྗེས་ཐོགས་ཉིད་ལའོ། །དེ་ནས་ཞེས་བྱ་བ་ལ་སོགས་པ་དེ་ལྟར་དགུག་པར་བྱས་པའི་རྗེས་ཐོགས་ཉིད་ལ་བཅོམ་ལྡན་འདས་བྱོན་ནས་དོན་ཞེས་བྱ་བ་ནོར་བུའི་རིགས་ཆེན་པོའི་རང་བཞིན་ནམ་མཁའི་སྙིང་པོ་གྲུབ་པར་གྱུར་པ་ནི་ནོར་བུའི་རིགས་ཆེན་པོ་གྲུབ་པར་གྱུར་པའི་ཚུལ་གྱིས་འགྲུབ་པར་གྱུར་པའོ། །དེ་ཁོ་ན་ཉིད་མཆོག་གི་སྙིང་པོས་ལན་ཅིག་ཅེས་བྱ་བ་ནི། ཁྱེད་ནི་ནམ་མཁའ་ལས་བྱུང་བ། །ཐམས་ཅད་ཀྱི་ནི་ལྔ་པ་ཡིན། །ཞེས་བྱ་བ་ནས། བྷ་བ་ད་ཧ་ཏྲཾ་ཞེས་བྱ་བའི་བར་ནི་དེ་ཁོ་ན་ཉིད་ཀྱི་མཆོག་གི་སྙིང་པོ་སྟེ། དེ་སློབ་དཔོན་གྱིས་སློབ་མ་དཀྱིལ་འཁོར་དུ་ཞུགས་པ་ན་ལན་ཅིག་ཟློས་སུ་གཞུག་གོ །དེ་ནས་འབྱོར་པའི་མཆོག་ཅེས་བྱ་བ་ནི་ལྷ་མོའི་འབྱོར་བའི་རང་བཞིན་ནོ། །རྟག་པར་བརྟན་པའི་དཔལ་ནི་ལྷ་མོ་དཔལ་མོའི་རང་བཞིན་ནོ། །ཕུན་སུམ་ཚོགས་པ་ནི་ལྷ་མོ་ཤིན་ཏུ་ཕུན་སུམ་ཚོགས་པའི་རང་བཞིན་ནོ། །མཆོད་པ་ཆེན་པོ་ནི་ལྷ་མོ་མཆོད་པའི་རང་བཞིན་ནོ། །དངོས་གྲུབ་རྣམས་ནི་ནམ་མཁའི་སྙིང་པོ་ལ་སོགས་པའི་རང་བཞིན་ནོ། །མཆོག་ནི་དམ་པའོ། །ཐོབ་ཅེས་བྱ་བ་ནི་སློབ་མ་རྣམས་ཀྱིས་འཐོབ་པར་འགྱུར་བའོ། །བདེ་བར་གཤེགས་པ་ཤིན་ཏུ་ཞེས་བྱ་བ་ནི་ཇི་ལྟར་དེ་བཞིན་གཤེགས་པ་ཐམས་ཅད་ནོར་བུའི་རིགས་ཆེན་པོའི་དངོས་གྲུབ་བརྙེས་པ་དེ་བཞིན་དུ་སློབ་མ་དཀྱིལ་འཁོར་དུ་བཅུག་ནས་དམ་ཚིག་གི་སྔགས་བཟླས་ན་འཐོབ་པའོ། །ཡང་འདིའི་དོན་བརྗོད་པར་བྱ་སྟེ་གནས་དང་བདག་བསྲུང་བ་བྱས་ན་རྡོ་རྗེ་འཁོར་ལོའི་ཕྱག་རྒྱས་འཕགས་པ་ནམ་མཁའི་སྙིང་པོའི་དཀྱིལ་འཁོར་མངོན་སུམ་དང་འདྲ་བ་མདུན་དུ་བསྐྱེད་ལ། གལ་ཏེ་འབྱོར་ན་མེ་ཏོག་ལ་སོགས་པ་དངོས་སུ་མཆོད་ནས་དཀྱིལ་འཁོར་ལྔ་པས་ཕྱག་བྱས་ལ་ཕྱག་བཞི་ལ་སོགས་པ་སྔོན་དུ་འགྲོ་བས་སྡོམ་པ་གཟུང་བར་བྱའོ། །དེ་ནས་དེ་བཞིན་དུ་རྡོ་རྗེ་ཐལ་མོ་ལ་སོགས་པ་ནས་དམ་ཚིག་གི་རྡོ་རྗེ་ཁུ་ཚུར་
བཅིངས་པའི་བར་གྱི་ཕྱག་རྒྱ་བཅིང་བ་ཐམས་ཅད་བྱའོ། །དེ་ནས་སྡིག་པ་དྲལ་བའི་བར་གྱི་ཆོ་ག་ཐམས་ཅད་རྗེས་སུ་སྤྱད་ལ། རང་གི་སྙིང་གའི་ཟླ་བ་ལ་གནས་པའི་རྡོ་རྗེ་རིན་པོ་ཆེ་ལ་བཟླས་པར་བྱ་བའི་སྔགས་ཡིད་ཀྱིས་བྲིས་ནས་དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་རང་གི་ལྷའི་སྙིང་པོ་དེ་དབྱངས་ཀྱི་ཡི་གེ་བཅུ་དྲུག་དང་བཅས་པ་ལས་རང་གི་སེམས་ཟླ་བའི་དཀྱིལ་འཁོར་ལྟ་བུར་བསམ་པར་བྱའོ། །དེའི་སྟེང་དུ་ཡང་རང་གི་སྙིང་པོ་ཀ་ལ་སོགས་པ་ནས་ཀཥའི་བར་གྱི་གསལ་བའི་ཡི་གེ་དང་བཅས་པ་ལ་ཟླ་བའི་དཀྱིལ་འཁོར་གཉིས་པའོ། །ཡང་དེ་རང་གི་སྙིང་པོ་དང་བཅས་པ་ལ་དང་པོའི་རྡོ་རྗེ་དེ་ཉིད་རང་གི་ལྷའི་མཚན་མའི་ཕྱག་རྒྱའི་གཟུགས་སུ་བསམ་པར་བྱའོ། །རང་གི་ལྷའི་མཚན་མའི་ཕྱག་རྒྱའི་ནང་དུ་རང་གི་ཕྱག་རྒྱའི་ང་རྒྱལ་བསྒོམ་པར་བྱའོ། །དེ་ནས་སེམས་དཔར་བྱིན་གྱིས་རློབ་བའི་སྦྱོར་བས་རང་གི་ལྷའི་ཕྱག་རྒྱ་རྡོ་རྗེ་སེམས་དཔར་བདག་ཉིད་བསམས་ལ་ཡང་རང་གི་ལྷའི་སྙིང་པོ་ཟློས་ཤིང་རྡོ་རྗེ་སེམས་དཔར་རང་གི་ལྷའི་སྐུར་བསྒོམ་པར་བྱའོ། །དེ་ནས་ས་མ་ཡ་ཧོ་ཧཾ་ཞེས་བརྗོད་དོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་ས་མ་ཡ་ཧཾ་ཞེས་བརྗོད་དོ།། ཡང་ས་མ་ཡས་ཏྭ་ཨ་དྷི་ཏིཥྛ་སྭ་མཱཾ་ཞེས་བརྗོད་ཅིང་སྙིང་ག་དང་དབྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབ་པར་བྱའོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་རང་གི་ལྷའི་སྙིང་པོ་ཨའི་མཐའ་ཅན་བརྗོད་ནས་མདུན་དུ་སྣ་ཚོགས་པདྨ་ལ་རང་གི་ལྷའི་མཚན་མའི་ཕྱག་རྒྱ་བསམས་ལ་སྙིང་པོ་དེ་ཟློས་ཤིང་ཕྱག་རྒྱའི་ང་རྒྱལ་བསྒོམ་པར་བྱའོ། །དེ་ནས་རང་གི་སྙིང་པོ་བརྗོད་དེ། ཕྱག་རྒྱ་དེ་རང་གི་ལྷའི་སྐུར་བདག་ཉིད་བསྒོམ་པར་བྱའོ། །དེ་ནས་དེར་རིན་ཆེན་ལྕགས་ཀྱུ་མ་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱིས་རང་གི་ལྷ་དགུག་པ་དང༌། གཞུག་པ་དང་བཅིང་བ་དང་དབང་དུ་བྱས་ལ་རང་གི་དམ་ཚིག་གི་ཕྱག་རྒྱ་དང་རང་གི་སྙིང་པོ་བརྗོད་ཅིང་དྲྀ་ཤྱ་ཞེས་ཀྱང་བརྗོད་ལ་བལྟ་བར་བྱའོ། །དེ་ནས་དྲིལ་བུ་དང་སྤྱན་དྲང་བའི་ཕྱག་རྒྱས་སྤྱན་དྲངས་ལ་རང་གི་ལྷ་རང་གི་སྔགས་ཀྱིས་རང་གི་ལུས་ལ་བཅུག་ལ་རང་གི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡ་སྟྭཾ་
ཞེས་བརྗོད་ཅིང་འོད་ཀྱི་དཀྱིལ་འཁོར་བསྐྱེད་ལ་ས་མ་ཡ་སྟྭཾ་ཨ་ཧི་ཛཿཧཱུཾ་བཾ་ཧོཿཞེས་བྱ་བ་དང་རང་གི་ལྷའི་སྙིང་པོའི་མཐར་ལན་གསུམ་བརྗོད་ལ་རང་གི་ལྷར་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་རང་གི་སྙིང་གའི་ཟླ་བར་ཡིད་ཀྱིས་ཞུགས་ལ་རྡོ་རྗེ་འཁོར་ལོའི་ཕྱག་རྒྱ་ནོར་བུའི་རིགས་ཀྱི་དཀྱིལ་འཁོར་བསྐྱེད་ལ་འཇུག་པའི་ཆོ་གས་མེ་ཏོག་གི་ཕྲེང་བ་བླངས་ཏེ་ཞུགས་ནས་རང་གི་མགོ་བོར་མེ་ཏོག་གི་ཕྲེང་བ་དོར་བར་བྱའོ། །དེ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་པའི་བར་གྱི་ཆོ་ག་རྣམས་བྱས་ལ། འཕགས་པ་དེ་ཁོ་ན་ཉིད་བསྡུས་པ་ལས་གསུངས་པའི་ནོར་བུའི་རིགས་ཆེན་པོའི་རྣལ་འབྱོར་ཆེན་པོ་བསྒྲུབ་པར་བྱའོ། །དེ་ནས་དང་པོའི་རྡོ་རྗེ་སྔ་མ་བཞིན་དུ་བྱིན་གྱིས་བརླབས་ནས་ཡི་གེ་བརྒྱ་པས་བརྟན་པར་བྱས་ལ་དེ་ཁོ་ན་ཉིད་དང་ཆོས་དང་དམ་ཚིག་བཟུང་བའི་བར་གྱི་རང་གི་ཆོ་ག་རྣམས་རྗེས་སུ་སྤྱད་དེ་སྔ་མ་བཞིན་དུ་སྙིང་པོ་གསུམ་བརྗོད་ནས་དོན་གསུམ་རྣམ་པར་བསྒོམ་སྟེ། རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལ་བཟླས་པར་བྱ་བའི་སྙིང་པོ་ཡིད་ཀྱིས་བྲིས་ལ། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་བདག་པོ་མཆོག །རྡོ་རྗེ་སྙིང་ཁྱོད་བདག་གྱུར་ཅིག །ཅེས་བརྗོད་ལ་ཉིད་རེ་བྱ་བའི་སྦྱོར་བས་ལྷ་ཐམས་ཅད་ཀྱི་བཟླས་བརྗོད་འབུམ་འབུམ་བྱའོ། །དེ་ལྟར་ན་སྔོན་དུ་བསྙེན་པ་བྱས་པར་འགྱུར་རོ། །ཡང་ན་རྡོ་རྗེ་འཁོར་ལོའི་ཕྱག་རྒྱ་རང་གི་སྙིང་གར་དཀྱིལ་འཁོར་སྤྲུལ་ལ་ལྷ་ཐམས་ཅད་ཀྱི་སྙིང་པོ་ཟློས་ཤིང་ཡིད་ཀྱིས་བཀོད་ལ་སྔ་མ་བཞིན་དུ་སྙིང་པོ་གསུམ་ཟློས་ཤིང་དོན་གསུམ་བསྒོམས་ལ་བདག་ནི་འཕགས་པ་ནམ་མཁའི་སྙིང་པོའི་དཀྱིལ་འཁོར་གྱི་རང་བཞིན་ཡིན་ནོ་ཞེས་ང་རྒྱལ་བསྐྱེད་ནས་ལྷ་ཐམས་ཅད་ཀྱི་ཐུགས་ཀའི་ཟླ་བ་ལ་རྡོ་རྗེ་རིན་པོ་ཆེ་དེར་བཅོམ་ལྡན་འདས་འཕགས་པ་ནམ་མཁའི་སྙིང་པོ་ཡིད་ཀྱིས་བྲིས་ལ། དེ་ཉིད་ཟློས་ཤིང་དོན་དམ་པར་ལྷ་ཐམས་ཅད་ཀྱི་ངོ་བོ་ཉིད་དུ་ཇི་སྲིད་ཉིན་རེ་ཞིང་དཀྱིལ་འཁོར་གྱི་རང་བཞིན་དུ་བདག་ཉིད་བསྒོམ་པའི་དུས་སུ་མངོན་སུམ་ཉིད་དུ་མཐོང་བར་གྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ལྟ་བུས་ནི་ལྷག་པར་ཡང་སྔོན་རུ་བསྙེན་བ་བྱས་པར་འགྱུར་རོ། །དེ་ནས་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ་ཡང་ཞག་
བདུན་བསྒོམ་པར་བྱའོ། །དེ་ནས་ཉིན་རེའམ་ཟླ་བ་རེ་རེར་དཀྱིལ་འཁོར་བྲི་བར་བྱའོ། །དེ་ལ་དང་པོར་ཁྱེད་རེ་ཞིག་ཡོ་བྱད་ཐམས་ཅད་དང་ལྡན་པས་མངོན་པར་འདོང་པའི་དཀྱིལ་འཁོར་གྱིས་སའི་དབུས་སུ་འདུག་ལ། རྡོ་རྗེ་མེ་ལྟར་འབར་བར་སྙོམས་པར་འཇུག་ལས་ལངས་ཏེ། བགེགས་བསལ་བ་ལ་སོགས་པ་བྱས་ལ་སོགས་པ་བྱས་ལ་མཆོད་པ་རྣམས་པ་ལྔ་དང་མཆོད་ཡོན་དང་ལས་ཐམས་ཅད་པའི་ཆུ་སྣོད་ལ་བ་ཟླས་བརྗོད་བྱས་ན་རྡོ་རྗེ་ལས་ནོར་བུ་རིན་པོ་ཆེའི་རིགས་ཀྱི་དཀྱིལ་འཁོར་སྤྲུལ་ལ་ཕྱག་ཚལ་བ་ལ་སོགས་པ་སྔོན་དུ་འགྲོ་བས་དེ་བཞིན་དུ་སྡོམ་པ་བཟུང་སྟེ། སྔ་མ་བཞིན་དུ་རྣལ་འབྱོར་ཆེན་པོ་བྱས་ལ་དེ་ནས་ཆོ་ག་ཐམས་ཅད་རྗེས་སུ་སྤྱད་ལ། དེ་ཁོ་ན་ཉིད་དང་ཆོས་དང་དམ་ཚིག་བཟུང་ནས་ཇི་ལྟ་བ་བཞིན་དུ་རི་རབ་བསྐྱེད་དེ། དེའི་སྟེང་དུ་རྡོ་རྗེ་འཁོར་ལོའི་དཀྱིལ་འཁོར་བསྐྱེད་ལ་དཀྱིལ་འཁོར་གྱི་དབུས་སུ་འདུག་སྟེ་སྔར་བཤད་པའི་སྤྲོ་བ་བསྐྱེད་པ་ལ་སོགས་པའི་ཆོ་ག་རྣམས་བྱས་ལ། ལུས་ཐམས་ཅད་ཀྱིས་ཕྱག་བྱས་ནས་ཏིང་ངེ་འཛིན་གསུམ་པོ་དེ་བཞིན་དུ་བསྒོམ་པར་བྱའོ། །དེ་ནས་བཅོམ་ལྡན་འདས་ནམ་མཁའི་སྙིང་པོའི་ཕྱག་རྒྱ་ཆེན་པོ་བཅིངས་ལ་དེའི་སྙིང་པོ་ཟློས་ཤིང༌། དབང་ཕྱུག་ཆེན་པོ་དངོས་གྲུབ་མཆོག །རྟོག་པ་ཐམས་ཅད་བཤད་དུ་གསོལ། །ཞེས་བྱ་བས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་བྲི་བར་བྱ་བའི་ཕྱིར་བདག་ཉིད་ལ་གསོལ་པ་བཏབ་པར་བསམ་པར་བྱའོ། །དེ་ནས་སྔ་མ་བཞིན་དུ་རང་གི་དམ་ཚིག་གི་ཕྱག་རྒྱས་རང་གི་སྙིང་པོ་ཟློས་ཤིང་དཀྱིལ་འཁོར་བཏེག་ལ་བར་སྣང་གི་ཕྱོགས་སུ་བཞག་ནས་དེ་ཉིད་དང་རང་གི་སྙིང་པོས་སྙིང་ག་དང༌། དཔྲལ་བ་དང༌། ལྐོག་མ་དང༌། སྤྱི་བོར་བདག་ཉིད་བྱིན་གྱིས་བརླབས་ནས་ཡང་ཕྱག་རྒྱ་ཆེན་པོ་བཅིངས་ལ། བཛྲ་དྲྀཥྚ་མ་ཊ་ཞེས་བྱ་བ་མིག་གཉིས་སུ་བཀོད་ལ། ཨ་ཞེས་བྱ་བ་ལས་རང་གི་རྐང་མཐིལ་གཉིས་སུ་སྣ་ཚོགས་རྡོ་རྗེ་བསམས་ལ་རྐང་མཐིལ་གཉིས་ཀྱིས་མནན་པའི་རི་རབ་ཀྱི་སྟེང་ནས་བརྩམས་ཏེ། ས་གཞི་གཏན་པ་ལ་ཐུག་གི་བར་དུ་རྡོ་རྗེའི་རང་བཞིན་དུ་འགྱུར་རོ། །ཕྱག་རྒྱ་ལ་གནས་དེ་བཞིན་གནས། །ཀུན་དུ་རྣམ་པར་བལྟས་ནས་ནི། །སྙིང་པོ་ཀུན་ཏུ་
ཟློས་བྱེད་ཅིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །ལྷག་མ་རྣམས་ནི་སྔ་མ་བཞིན་དུ་ཤེས་པར་བྱའོ། །དེ་ནས་ནོར་བུ་མཆོད་པའི་གཟུགས་ཅན་རྡོ་རྗེ་ལས་ལྟ་བུའི་སྒྲུབ་པའི་གྲོགས་མཆོག་རང་གི་སྙིང་ག་ནས་ཡིད་ཀྱིས་ཕྱུང་ལ་སྔར་བཤད་པའི་ཆོ་གས་ཕྱིའི་དཀྱིལ་འཁོར་ཐིག་གདབ་པར་བྱའོ། །དེ་ནས་དུམ་བུ་དང་པོ་ལས་བཤད་པའི་ཐིག་གདབ་པའི་ཆོ་གས་ནང་གི་དཀྱིལ་འཁོར་ནོར་བུ་ཟུར་བརྒྱད་པའི་དབྱིབས་ཅན་ནོར་བུའི་ཀ་བ་བརྒྱད་དང་ལྡན་པ། རིན་པོ་ཆེའི་མྱུ་གུས་ཡོངས་སུ་བསྐོར་བ་རྡོ་རྗེ་རིན་པོ་ཆེའི་ར་བ་དང་རྩེ་མོ་དང་ལྡན་བའི་ཐིག་ལེགས་པར་བཏབ་ལ། དེ་བཞིན་དུ་ཁྲོ་བོའི་ལྟ་བས་སྒོ་རྣམས་བསྐྱེད་ལ་ཚོན་རྩི་དགྱེ་བར་བྱའོ། །དཀྱིལ་འཁོར་གྱི་ཕྱི་ནང་དུ་བཅས་པའམ། དེའི་ནང་གི་དཀྱིལ་འཁོར་གྱི་ས་གཞི་ཚོན་རྩི་སྔོན་པོས་ནམ་མཁའི་མེ་ཏོག་ལྟར་སྔོ་བ་བྱས་ལ་ཉི་མ་དང་ཟླ་བ་དང་སྐར་མས་བརྒྱན་པར་བྱའོ། །དེ་ནས་ནང་གི་དཀྱིལ་འཁོར་གྱི་ལྟེ་བའི་ཕྱོགས་སུ་བཅོམ་ལྡན་འདས་ནམ་མཁའི་སྙིང་པོ་བཻ་ཌཱུཪྻ་སྣ་ཚོགས་པདྨའི་སྟེང་དུ་སེམས་དཔའི་སྐྱིལ་མོ་ཀྲུང་གིས་བཞུགས་པ། གཡོན་པའི་རིན་པོ་ཆེའི་ཁུ་ཚུར་གྱིས་རང་ངི་ཐུགས་ཀའི་ཕྱོགས་སུ་རྡོ་རྗེ་རིན་པོ་ཆེ་བསྣམས་ནས་སྟོད་པའི་ཚུལ་གྱིས་འཛིན་པ་ལ་བརྩོན་པས་ཕྱག་གཡས་པས་རིན་པོ་ཆེའི་མཆོག་སྩོལ་ག་རིན་པོ་ཆེའི་ཅོད་པན་གྱིས་དབང་བསྐུར་བ། འོད་ཟེར་འབར་བ་སྣ་ཚོགས་ཀུན་དུ་འཁྲུག་པ། ཐུགས་རབ་ཏུ་དགྱེས་པའི་ཚུལ་ཅན་དགོད་པར་བྱའོ། །དེའི་མདུན་དུ་འདོད་ཆགས་རྡོ་རྗེ་མའི་གནས་སུ་དབང་བསྐུར་བའི་རིན་པོ་ཆེའི་ཅོད་པན་གྱིས་དབང་བསྐུར་བ། ཕྱག་གཡས་ཀྱིས་རིན་པོ་ཆེའི་ཅོད་པན་བསྣམས་པ། གཡོན་པས་གདན་ལ་བསྙེམས་པའི་ཚུལ་གྱིས་བཞུགས་པའོ། །དེའི་གཡས་ལོགས་སུ་ཀཱི་ལི་ཀཱི་ལའི་གནས་སུ་གཏེར་རིན་པོ་ཆེ། རིན་པོ་ཆེའི་བུམ་པ་བསྣམས་པའོ། །དེའི་རྒྱབ་ཏུ་རྡོ་རྗེ་དྲན་པའི་གནས་སུ་ནོར་བུ་ཆེན་པོ་ཕྱག་གཡས་པ་ན་རྡོ་རྗེ་རིན་པོ་ཆེ་བསྣམས་པ་གཡོན་པས་རང་གི་ཐུགས་ཀར་གླེགས་བམ་བསྣམས་པའོ། །གཡོན་དུ་རྡོ་རྗེ་བསྙེམས་པའི་གནས་སུ་བླ་ན་མེད་པ་ཞེས་བྱ་བ། ཕྱག་གཡོན་པ་ནོར་བུས་མཚན་པའི་སྣ་ཚོགས་རྡོ་རྗེ་དྲིལ་བུ་བསྣམས་ནས་དཀུར་བརྟེན་པར་བཞུགས་པ། ཕྱག་
གཡས་པས་རང་གི་ཐུགས་ཀར་སྣ་ཚོགས་ནོར་བུ་རང་གི་ཐུགས་ཀར་སྟོད་པའི་ཚུལ་གྱིས་འཛིན་ཅིང་བཞུགས་པའོ། །མེའི་མཚམས་སུ་ལྷ་མོ་རྣལ་འབྱོར་མ་ཞེས་བྱ་བ་རིན་པོ་ཆེའི་ཅོད་པན་འཆང་བའོ། །བདེན་བྲལ་གྱི་མཚམས་སུ་དཔལ་མོ་རིན་པོ་ཆེའི་བུམ་པ་བསྣམས་པའོ། །རླུང་གི་མཚམས་སུ་ལྷ་མོ་ཤིན་ཏུ་ཕུན་སུམ་ཚོགས་མ་ཞེས་བྱ་བ་ཡིད་བཞིན་གྱི་ནོར་བུའི་རྒྱལ་མཚན་དང་དབུ་རྒྱན་བསྣམས་ནས་བཞུགས་པའོ། །དབང་ལྡན་གྱི་མཚམས་སུ་ལྷ་མོ་མཆོད་མ་ཞེས་བྱ་བ་རིན་པོ་ཆེའི་གཞོང་ཟླུམ་རྒྱན་ཐམས་ཅད་ཀྱིས་ཡོངས་སུ་བརྒྱན་ཅིང་བཀང་བ་བསྣམས་ནས་བཞུགས་པ་བྲི་བར་བྱའོ། །རིན་པོ་ཆེའི་སྒེག་མོ་ལ་སོགས་པ་ནས་རིན་པོ་ཆེའི་དྲིལ་བུ་མའི་བར་དུ་ནི་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་སྙིང་པོ་རང་རང་གི་མཚན་ནོར་བུས་མཚན་པ་ཐོགས་པ་བྲི་བར་བྱའོ། །དེ་ནས་བཅོམ་ལྡན་འདས་ནམ་མཁའི་སྙིང་པོ་ལ་སོགས་པའི་སྙིང་པོ་བཤད་དོ། །ཨོཾ་སརྦ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་བྷུར་བྷུ་བ་སྭཿ། བཛྲ་སཏྭ་ཛཿ། བཛྲ་རཏྣ་ཧཱུཾ། བཛྲ་དྷརྨཱ་བཾ། བཛྲ་ཀརྨ་ཧོཿ། བཛྲ་ཨ་བྷི་ཥིཉྩ་མ་ཧཱ་བཛྲ་ནི་དྷ་རི་ཧཱུཾ། བཛྲ་མ་ཎི་རཏྣ་དྷྭ་ཛཱ་གྲ་ཀེ་ཡཱུ་རེ་བཾ་མ་ཧཱ་བཛྲ་མ་ཧེ་ཧོ། ཞེས་བྱ་བ་འདི་ནི་བཅོམ་ལྡན་འདས་ནམ་མཁའི་སྙིང་པོ་ནས་བརྩམས་ཏེ། མཆོད་པའི་ལྷ་མོའི་བར་གྱི་སྙིང་པོ་ཡིན་ནོ། །འདི་དག་ཐམས་ཅད་ཀྱང་མར་གང་དག་ཅིང་རྙོག་པ་མེད་པའི་རིགས་ཅན་རྡོ་རྗེ་རིན་ཆེན་གྱི་རང་གི་ཅོད་པན་གྱིས་དབང་བསྐུར་བ་རིན་པོ་ཆེའི་མཚན་མ་བསྣམས་པ་སྣ་ཚོགས་པདྨ་ལ་སེམས་དཔའི་སྐྱིལ་མོ་ཀྲུང་གིས་རབ་ཏུ་དགྱེས་པར་བཞུགས་མ་ནམ་མཁའི་སྙིང་པོ་ནས་བརྩམས་ཏེ། ནོར་བུའི་དྲིལ་བུའི་བར་དུ་བྲི་བར་བྱའོ། །དེ་ལྟར་དཀྱིལ་འཁོར་བྲིས་ནས་ཕྱི་དྲོའི་དུས་སུ་སྔར་བཤད་པའི་ཧཱུཾ་མཛད་ཀྱི་སྦྱོར་བས་སྒོ་དབྱེ་བ་བྱས་ལ་བསྡུ་བ་དང་མཚན་བརྒྱ་རྩ་བརྒྱད་པས་བསྟོད་པ་བྱས་ནས། བཅོམ་ལྡན་འདས་ནམ་མཁའི་སྙིང་པོའི་མདུན་དུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། ནོར་བུའི་དམ་ཚིག་གི་ཁུ་ཚུར་རིན་པོ་ཆེའི་དྲིལ་བུ་དང་བཅས་པའི་གཡས་པའི་མཛུབ་མོ་ལྕགས་ཀྱུ་དང་སྔགས་འདིས་བཅོམ་
ལྡན་འདས་འཁོར་དང་བཅས་པ་དཀྱིལ་འཁོར་དུ་གཞུག་པར་བྱའོ། །ཨོཾ་བྷུ་ཨ་ཧི་ཛ་བྷུ་བ་པྲ་ཐི་ཤ་ཧཱུཾ་སྭ་གྲི་ན་ཕཾ་བ་བཏྟ་སིདྡྷྱ་ཏྲཾ། དེ་ནས་ནོར་བུའི་གནོད་སྦྱིན་གྱི་དམ་ཚིག་གི་ཕྱག་རྒྱས་བགེགས་བསལ་བ་ལ་སོགས་པ་བྱས་ལ། རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ་རྡོ་རྗེ་གོ་ཆས་བསྲུང་བ་ཐམས་ཅད་གོ་བགོས་ལ་འཕགས་པ་ནམ་མཁའི་སྙིང་པོའི་སྔགས་ཀྱིས་བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ཏེ་རང་གི་དམ་ཚིག་གི་ཕྱག་རྒྱས་བཅོམ་ལྡན་འདས་བསྒྲུབ་པར་བྱའོ། །ཨོཾ་སརྦ་བཛྲ་ཨ་དྷི་པ་ཏི་ཏྭཾ་ཨ་བྷི་ཥིཉྩ་མི་བྷུར་བྷུ་བ་སྭཿ། དྲྀ་ཤྱ་ས་མ་ཡ་སྟྭཾ་ཧཾ་ཛཿ་ཧཱུཾ་བཾ་ཧོཿ་ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩ་མི་བྷུར་བྷུ་བ་སྭཿ་ཞེས་ལན་གསུམ་བརྗོད་པར་བྱའོ། །དེ་བཞིན་དུ་བཛྲ་གྷཎྚེ་ཧོཿ་དྲྀ་ཤྱ་ས་མ་ཡ་སྟྭཾ་ས་མ་ཡཾ་སྟྭཾ་ཨ་ཧཾ་ཛཿ་ཧཱུཾ་བཾ་ཧོཿ། བཛྲ་གྷཎྚེ་ཧོཿ། ཞེས་བྱ་བའི་བར་དུ་ལན་གསུམ་བཟླས་ལ། བཅོམ་ལྡན་འདས་ལྷ་མོ་དྲིལ་བུ་མའི་བར་དུ་རང་གི་དམ་ཚིག་གིས་བསྒྲུབ་པར་བྱའོ། །དེ་ནས་བཅོམ་ལྡན་འདས་འཁོར་དང་བཅས་པ་རྣམས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། རྡོ་རྗེ་རིན་ཆེན་གྱིས་དབང་བསྐུར་བའི་ཕྱག་རྒྱས་བཅོམ་ལྡན་འདས་འཁོར་དང་བཅས་པ་ལ་དབང་བསྐུར་ནས་ཡང་མཆོད་ཡོན་ཕུལ་ལ་བུམ་པ་གང་བ་དང༌། ཇི་སྙེད་པའི་མེ་ཏོག་ལ་སོགས་པའི་ཕྱིའི་མཆོད་པ་རྣམས་དང་རིན་པོ་ཆེའི་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་ཀྱིས་རིན་པོ་ཆེའི་ཁུ་ཚུར་གཉིས་ལས་བྱུང་བས་ཡང་དག་པར་མཆོད་ལ། ཨོཾ་པ་ར་མ་སུ་ཁ་ཨ་ཤ་ཡ་ས་སུ་ལ་ལི་ཏ་བི་ལ་ས་ན་མི་ཏེ་ར་ན་མ་མཾ་བྷ་ག་ཝའནྟཾ་ཛཿ་ཧཱུཾ་པཾ་ཧོཿ། ཧི་ཧི་ཧི་ཧི་པྲ་ཏཱི་ཙྪ་ཀུ་སུ་མཱཉྫ་ལི་ནཱ་ཐ་ཞེས་བྱ་བ་གླུ་དང་བཅས་པ་ཟློས་ཤིང་བཅོམ་ལྡན་འདས་ལ་མགོ་བོས་ཕྱག་བྱས་ལ་ཕྱག་བཞི་བྱའོ། །དེ་ནས་ཕྱི་རོལ་དུ་གཏོར་མ་བྱིན་ལ་ཉེ་རིག་བྱས་ནས་ནོར་བུའི་གནོད་སྦྱིན་དང་རྡོ་རྗེ་མེ་དང་འདོད་པའི་རྡོ་རྗེ་མས་ཆོ་ག་བཞིན་དུ་སྦྱིན་སྲེག་བྱས་ལ་ཐབ་ཀྱི་དབུས་སུ་དཀྱིལ་འཁོར་འདི་བཅོམ་ལྡན་འདས་ནམ་མཁའི་སྙིང་པོ་ཟློས་ཤིང་མེ་ཏོག་གིས་བཞུགས་སུ་གསོལ་ནས་བཅོམ་ལྡན་འདས་ཀྱི་སྙིང་
པོས་མར་གྱི་སྦྱིན་སྲེག་བརྒྱ་རྩ་བརྒྱད་དབུལ་ལོ། །ལྷག་མ་རྣམས་ལ་ནི་རང་གི་སྙིང་པོ་ཟློས་ཤིང་སྲེག་བླུགས་བདུན་བདུན་དབུལ་ལོ། །དེ་ནས་ཡང་དཀྱིལ་འཁོར་དེ་མེ་ཏོག་དང་ལྷ་ཐམས་ཅད་ཀྱི་སྙིང་པོ་ཟློས་ཤིང་བྲིས་པའི་དཀྱིལ་འཁོར་དང་གཅིག་ཏུ་གྱུར་བར་བསམ་མོ། །དེ་ནས་ཕྱག་བཙལ་བ་ལ་སོགས་པ་སྔོན་དུ་འགྲོ་བས་སྡོམ་པ་བླངས་ལ་དེ་བཞིན་དུ་བྱང་ཆུབ་ཀྱི་སེམས་ཆེན་པོ་བསྐྱེད་ནས་རང་གི་སྙིང་གར་རིན་པོ་ཆེ་བསྐྱེད་ལ་ཤར་སྒོར་བལྟས་ཏེ་ཕྱི་རོལ་ན་གནས་པའི་བུམ་པའི་ཆུས་བདག་ཉིད་ལ་དབང་བསྐུར་ལ་རྡོ་རྗེ་ནོར་བུའི་དམ་ཚིག་གི་ཁུ་ཚུར་གྱི་ཕྱག་རྒྱ་བཅིངས་ཏེ། དེ་ཉིད་ཀྱིས་མེ་ཏོག་གི་ཕྲེང་བ་བླངས་ལ་འཇུག་པའི་གླུ་ལེན་ཅིང་རྡོ་རྗེ་ནོར་བུའི་དཀྱིལ་འཁོར་དུ་འཇུག་པར་བྱའོ། །དེ་ནས་འདི་ཡིན་ཏེ། དབང་ཕྱུག་དམ་པ་དབང་བསྐུར་ཐམས་ཅད་ཉིད། །མི་ཟད་གཏེར་གྱི་དམ་པ་ལེགས་གྲུབ་མཛོད། །རྒྱལ་མཛད་ཀུན་མཆོག་རྣམ་རྒྱལ་བསྒྲེང་མཛད་པ། །རྡོ་རྗེ་རིན་ཆེན་དཔལ་མཆོག་མཆོག་བདག་མཛོད། །རིན་པོ་ཆེའི་ལྕགས་ཀྱུ་མའི་སྙིང་པོས་བདག་ཉིད་དགུག་པར་བྱའོ། །དེ་ནས་དེ་བཞིན་དུ་རིན་པོ་ཆེའི་སྙིང་པོ་ཟློས་ཤིང་ལྷོ་ཕྱོགས་ཀྱི་སྒོ་ནས་འཇུག་པར་བྱའོ། །དེ་ནས་རིན་པོ་ཆེ་ལྕགས་སྒྲོག་མའི་སྙིང་པོ་ཟློས་ཤིང་ནུབ་ཕྱོགས་ཀྱི་སྒོ་ནས་འཇུག་པར་བྱའོ། །དེ་ནས་དེ་བཞིན་དུ་རིན་པོ་ཆེ་དྲིལ་བུ་མའི་སྙིང་པོ་ཟློས་ཤིང་བྱང་ཕྱོགས་ཀྱི་སྒོ་ནས་འཇུག་པར་བྱའོ། །ཡང་ཤར་ཕྱོགས་ཀྱི་སྒོ་ནས་ཞུགས་ལ་ཨོཾ་པ་རམ་སུ་ཁ་ཨ་ཤ་ཞེས་བྱ་བ་ལ་སོགས་པ་ཟློས་ཤིང་བཅོམ་ལྡན་འདས་ལ་མགོ་བོས་ཕྱག་བྱས་ལ་དམ་ཚིག་བརྗོད་པར་བྱའོ། །ཁྱོད་ནི་ནམ་མཁའ་ལས་བྱུང་བས། །ཐམས་ཅད་ཀྱི་ནི་མཆོག་གྱུར་ཡིན། །ཨོཾ་སིདྡྷ་བྷུ་བ་སིདྡྷ་སྭ་དྷ་མ་ཧཱ་བཛྲ་རཏྣ་བྷ་བ་ཏྲཊ་ཏཾ། དེ་ནས་དཀྱིལ་འཁོར་ལ་བསྐོར་བ་ལན་གསུམ་བྱས་ལ་བཅོམ་ལྡན་འདས་ཀྱི་སྤྱན་སྔར་འདུག་སྟེ་འདི་སྐད་ཅེས་བརྗོད་པར་བྱའོ། །འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེ་བ། །རྡོ་རྗེ་སེམས་ཐོག་བདག་གྲུབ་མཛོད། །དེ་ནས་འདི་སྐད་ཅེས་བརྗོད་པར་བྱའོ། །ཛཿ་ཧཱུཾ་བཾ་ཧོཿ། པྲ་སིདྡྷ་མཾ། དེ་ནས་
རྡོ་རྗེ་ཆུ་འཐུང་ལ་ཨ་ཞེས་བྱ་བ་ལན་བརྒྱ་ཟློས་ཤིང་བདག་ཉིད་ལ་དབབ་པར་བྱའོ། །དེ་ནས་གཡས་པའི་ཁྲོ་བོ་ཁུ་ཚུར་གྱིས་རྡོ་རྗེ་ནོར་བུ་དྲལ་ཞིང་ཨཱ་ཞེས་བྱ་བ་འཕགས་པ་ནམ་མཁའི་སྙིང་པོ་དང་བཅས་པ་ལན་བརྒྱ་ཟློས་ཤིང་དབབ་པར་བྱའོ། །དེ་ལྟར་བདག་ཉིད་ལ་དབབ་པ་བྱས་ནས་རང་གི་སྙིང་པོས་མེ་ཏོག་དོར་བར་བྱའོ། །དེས་ནི་བླངས་ཏེ་ནམ་མཁའི་སྙིང་པོ་ཉིད་ཀྱིས་རང་གི་མགོ་བོ་ལ་བཅིང་བར་བྱའོ། །དེ་ནས་དེ་ཉིད་ཀྱིས་དགོང་གཡོགས་དགྲོལ་བར་བྱའོ། །དེ་ནས་དེ་ཉིད་ཟློས་ཤིང་དཀྱིལ་འཁོར་བལྟ་བར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ལ་ཏིཥྛ་བཛྲ་ཞེས་བྱ་བ་ལ་སོགས་པ་རང་གི་སྙིང་གར་དགྲོལ་བར་བྱའོ། །དེ་ནས་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ་བསྙེམས་པ་དང་བཅས་པས་དབྲལ་བར་འཇོག་པས་ལྟ་བའི་རྒྱུ་བཞིན་དུ་འཛུམ་པ་དང་བཅས་པས་བཅོམ་ལྡན་འདས་ལ་ལྟ་ཞིང་ཇི་སྲིད་བཅོམ་ལྡན་འདས་ཀྱིས་མཐོང་བར་སྩལ་ནས་རང་གི་དངོས་གྲུབ་ཐམས་ཅད་སྩལ་བར་མཛད་པ་དེ་སྲིད་ཀྱི་བར་དུ་བཟླས་བརྗོད་བྱའོ། །དེ་ནས་རྡོ་རྗེ་ཐལ་མོ་བསྐོར་ཤིས་པ་བརྗོད་པའི་ཚུལ་དུ་རང་གི་སྙིང་གར་བཞག་ལ་མཚན་བརྒྱ་རྩ་བརྒྱད་པས་བཅོམ་ལྡན་འདས་ལ་བསྟོད་པ་བྱའོ། །དེ་ནས་རིན་པོ་ཆེའི་མཚོན་ཆ་མ་ལ་སོགས་པས་གསང་བའི་མཆོད་པ་བཞིས་བཅོམ་ལྡན་འདས་ལ་ཡང་དག་པར་མཆོད་ལ། བདག་ཉིད་དབང་བསྐུར་བ་ལ་སོགས་པའི་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །སློབ་དཔོན་གྱི་ལས་ཀྱི་ཆོ་ག་རྫོགས་སོ།། །།དེ་ནས་སློབ་མ་འཇུག་པ་ལ་སོགས་པའི་ཆོ་ག་འབྱུང་སྟེ། རྡོ་རྗེ་མཆོད་ཡོན་བསྐོར་བཅིངས་ནས། །སྙིང་ནས་བསམ་པ་ཐག་པ་ཡིས། །མགོ་བོས་ཡང་དག་ཕྱག་བྱ་བ། །དངོས་གྲུབ་ཐམས་ཅད་སྒྲུབ་བྱེད་ཡིན། །ཞུགས་ནས་དཀྱིལ་འཁོར་ལན་གསུམ་ནི། །བསྐོར་བ་བྱས་ནས་བརྗོད་པར་བྱ། །འདོད་ཆགས་ཆེན་པོ་བདེ་བ་ཆེ། །འགྲོ་བ་ཀུན་ལས་འགྲུབ་པར་མཛོད། །དེ་ནས་དུས་ཀྱི་མཆོད་པ་ཡིས། །དེ་བཞིན་གཤེགས་པ་ཡང་དག་མཆོད། །དེ་བཞིན་ཉིད་
དབང་རྡོ་རྗེ་ནི། །བཟུང་སྟེ་སློབ་མ་གཞུག་པར་བྱའོ། །དེ་ནས་སློབ་མ་བསླབ་པའི་གཞི་ལྔའམ། དགེ་ཚུལ་ལམ་དགེ་སློང་གི་བསླབ་པ་དང་ལྡན་པས་སློབ་དཔོན་ལ་ཕྱག་བཙལ་ལ། དགའ་ཆེན་བདག་ཉིད་སྟོན་པ་བས། །ཞེས་བྱ་བ་ལ་སོགས་པ་བརྗོད་པར་བྱའོ། །དེ་ནས་ནོར་བུའི་གནོད་སྦྱིན་ཡོངས་སུ་བཟླས་པའི་གོས་ཀྱིས་སྟོད་གཡོགས་དང་སྨད་གཡོགས་ལ་ཡང་ནོར་བུའི་གནོད་སྦྱིན་དང་སྒོ་སྲུང་མའི་སྙིང་པོ་བཟླས་པའི་དར་གྱིས་གདོང་གཡོགས་ཏེ་མེ་ཏོག་གི་ཕྲེང་བ་བཏགས་པ་དང༌། ཁ་དྲི་ཞིམ་པོར་ཡང་བྱས་ལ་སློབ་མ་ཕྱག་བཞི་བྱེད་དུ་ཡང་གཞུག་གོ །དེ་ནས་སྔ་མ་བཞིན་དུ་རང་གི་དམ་ཚིག་འཛིན་དུ་གཞུག་གོ །དེ་ནས་དེ་བཞིན་དུ་བྱང་ཆུབ་ཆེན་པོའི་སེམས་བསྐྱེད་དུ་བཅུག་ལ། གཡས་པའི་རིན་པོ་ཆེའི་ཁུ་ཚུར་གྱིས་རྡོ་རྗེ་རིན་པོ་ཆེ་བླངས་ལ་དེའི་སྙིང་གར་བཞག་ནས། སློབ་མའི་སྙིང་གར་རྡོ་རྗེ་རིན་པོ་ཆེ་བསྐྱེད་ནས། སུ་ར་ཏེ་ས་མ་ཡ་སྟྭཾ་ཧོ། བཛྲ་སིདྡྷི་ཡ་ཐཱ་སུ་ཁཾ་ཞེས་བརྗོད་པར་བྱའོ། །དེ་ནས་ཕྱི་རོལ་ན་གནས་པའི་བུམ་པའི་ཆུས་དབང་བསྐུར་ལ། ཡོན་གྱི་མཆོག་བླངས་ཏེ། འཕགས་པ་ནམ་མཁའི་སྙིང་པོའི་དམ་ཚིག་གི་ཕྱག་རྒྱས་ཏེ་འཕགས་པ་ནམ་མཁའི་སྙིང་པོ་བསྐྱེད་དེ། དང་པོའི་རྡོ་རྗེས་བཛྲ་སཏྭ། བཛྲ་རཏྣ། བཛྲ་དྷརྨ། བཛྲ་ཀརྨ་ཞེས་བྱ་བས་བྱིན་གྱིས་བརླབས་ལ། ནོར་བུའི་ཁུ་ཚུར་གྱིས་དམ་ཚིག་གི་ཕྱག་རྒྱ་མེ་ཏོག་དང་བཅས་པ་བཅིང་དུ་གཞུག་གོ།། །དེ་ཉིད་ཀྱིས་མེ་ཏོག་གི་ཕྲེང་བ་འཛིན་དུ་བཅུག་ལ་སློབ་དཔོན་འཇུག་པའི་ཆོ་ག་དང༌། རྡོ་རྗེ་ཤུགས་ཀྱིས་འཇུག་པའོ། །དེ་ནས་བཅུག་ལ་འདི་སྐད་ཅེས་བརྗོད་པར་བྱའོ། །ཁྱེད་ནི་ནམ་མཁའ་ལས་བྱུང་བས། །ཐབས་ཀུན་གྱི་ནི་མཆོག་གྱུར་ཡིན། །ཨོཾ་སིདྡྷ་སུ་སིདྡྷྱ་མ་ཧཱ་བཛྲ་རཏྣ་བྷ་བ་ཏྲཊ་ཏྲཾ་ཞེས་སློས་ཤིང་དེ་འཇུག་བ་ལ་སོགས་བའི་ཆོ་ག་ཐམས་ཅད་འདིར་རྗེས་སུ་སྤྱད་པར་བྱའོ། །དེ་ལྟར་སློབ་མ་བཅུག་ནས་དབང་བསྐུར་ཏེ། ཆོས་ཀྱི་ཕྱག་རྒྱ་ལ་སོགས་པ་བསྒྲུབ་པར་བསླབ་པར་བྱའོ་ཞེས་བྱ་བ་འདི་བརྟན་པར་བྱ་བའི་ཕྱིར། དེ་ནས་དེ་ཕྱིར་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བའི་སྒྲ་ནི་དེ་མ་
ཐག་པ་སྟེ། དབང་བསྐུར་བའི་རྗེས་ཐོགས་ཉིད་ལའོ། །དེའི་ཕྱིར་ཞེས་བྱ་བ་ནི་རྒྱུ་སྟེ། གང་གི་ཕྱིར་སྒྲུབ་པར་བྱེད་པར་ཆོས་ཀྱི་ཕྱག་རྒྱ་ལ་སོགས་པ་འབྱུང་བར་མི་འགྱུར་བས་རྒྱུ་དེའི་ཕྱིར་སྒྲུབ་པ་བཤད་དོ་ཞེས་བྱའོ། །རྡོ་རྗེ་རིན་ཆེན་ནི་ནམ་མཁའི་སྙིང་པོ་སྟེ་དེའི་ཕྱག་རྒྱའི་མཆོག་ནི་དམ་པ་སྟེ། རྡོ་རྗེ་རིན་ཆེན་གྱི་ཕྱག་རྒྱའི་མཆོག་དེས་དཔག་ཏུ་མེད་པ་བཟླས་པས་འགྲུབ་ཅེས་བྱའོ། །ནམ་མཁའ་དང་མཉམ་པའི་ཡེ་ཤེས་ཀྱི་རང་བཞིན་ཅན་བཅོམ་ལྡན་འདས་ནམ་མཁའི་སྙིང་པོ་ཟློས་ཤིང༌། ཞེས་བྱ་བ་ཆོས་ཀྱི་ཕྱག་རྒྱ་སྒྲུབ་པ་པོས་བསྒྲུབ་པར་བྱའོ། །ཇི་སྙེད་པ་ཡིས་རབ་ཏུ་གྲུབ། །ཅེས་བྱ་བ་ནི་འཕགས་པ་ནམ་མཁའི་སྙིང་པོའི་རྒྱན་ཇི་སྙེད་པས་རྣམ་པར་བརྒྱན་པ་ལ་རབ་ཏུ་བསྒྲུབ་པའོ། །འདི་ཡིས་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་ཀུན་མཆོག་གྲུབ་པ་ཡིན། །ཞེས་བྱ་བ་ནི་བཤད་མ་ཐག་པ་ཇི་ལྟར་གྲུབ་པ་དེ་བཞིན་དུ་ཕྱག་རྒྱ་ཆེན་པོ་དང་དམ་ཚིག་གི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ལས་ཀྱི་ཕྱག་རྒྱ་སྒྲུབ་པ་རྣམས་ནི་ཆོས་ཀྱི་ཕྱག་རྒྱས་བསྒྲུབས་པས་ཀྱང༌། ཀུན་གྱི་མཆོག་དངོས་གྲུབ་ཆེན་པོ་རྣམས་འགྲུབ་པར་འགྱུར་རོ་ཞེས་སྟོན་ཏོ། །ཕྱག་རྒྱ་ཆེན་པོ་བསྒྲུབ་པར་ཇི་ལྟར་ཤེས་པར་བྱ་ཞེ་ན། ཕྱག་རྒྱ་བསྒྲུབ་པ་ནི་དགའ་བའི་བྱ་བས་སོ་ཞེས་བྱ་བ་གསུངས་ཏེ། ཕྱག་རྒྱ་ཆེན་པོ་བསྒྲུབ་པ་ནི་རབ་ཏུ་དགའ་བའི་སེམས་ཀྱིས་བྱའོ་ཞེས་བྱ་བའི་ཐ་ཚིག་གོ །དམ་ཚིག་སྒྲུབ་པ་ཡང་དེ་བཞིན་ནོ་ཞེས་བྱ་བ་ནི་ཞེས་བྱ་བ་ནི་ཇི་ལྟར་ཕྱག་རྒྱ་ཆེན་པོ་བསྒྲུབ་པར་བྱ་བའི་སེམས་ཀྱིས་བྱ་བ་དེ་བཞིན་དུ་དམ་ཚིག་གི་ཕྱག་རྒྱ་ཡང་སྒྲུབ་པ་པོ་ཞེས་བྱ་བའི་ཐ་ཚིག་གོ །དམ་ཚིག་གི་ཕྱག་རྒྱ་ཞེས་བྱ་བ་ནི་དམ་ཚིག་གི་ཕྱག་རྒྱ་བསྒྲུབ་པར་འདོད་པས་ཆོ་ག་ཐམས་ཅད་རྗེས་སུ་སྤྱད་ལ་རིན་པོ་ཆེ་དམ་ཚིག་གི་ཁུ་ཚུར་བཅིང་བར་བྱའོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་བཟླས་པ་བྱའོ་ཞེས་བྱ་བའི་ཐ་ཚིག་གོ །དེ་བཞིན་དུ་ལས་གྲུབ་ན་ཞེས་བྱ་བ་ནི་དགའ་བའི་བྱ་བ་ལས་ཀྱི་ཕྱག་རྒྱ་བཅིངས་ལ་བཟླས་བརྗོད་བྱའོ་ཞེས་བྱ་བའི་ཐ་ཚིག་གོ །རབ་ཏུ་མཆོད་ཅིང་ཞེས་བྱ་བ་ནི་རིན་པོ་ཆེ་མཚོན་ཆ་མ་ལ་སོགས་པའི་མཆོད་པའི་ཕྱག་རྒྱ་བཅུ་གཉིས་ཀྱིས་
བདག་ཉིད་དམ་མདུན་ན་བཞུགས་པའི་ལྷ་ལ་ཡང་དག་པར་མཆོད་དེ། དེ་རྣམས་ཡིད་ཀྱིས་བདག་གམ་ལྷ་ལ་རྒྱུན་དུ་མཆོད་ཅིང་བསྒྲུབ་པར་བྱས་ཏེ། དེ་ལྟར་ལས་ཀྱི་ཕྱག་རྒྱས་དངོས་གྲུབ་ཀྱི་མཆོག་འགྲུབ་བར་འགྱུར་རོ། །སྒྲུབ་པ་ཆེན་པོའི་རྒྱུད་དོ་ཞེས་བྱ་བ་ནི་ཆོས་ཀྱི་ཕྱག་རྒྱ་དང་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་དང་ལས་ཀྱི་ཕྱག་རྒྱ་ནི་ཕྱག་རྒྱ་ཆེན་པོའོ། །དེ་བསྒྲུབ་པ་ནི་སྒྲུབ་པ་ཆེན་པོའོ། །དེ་ལྟར་སྟོན་པར་བྱེད་པའི་སྒྲའི་ཚོགས་ནི་རྒྱུད་དོ། །འདིས་ནི་འདི་སྐད་སྟོན་པ་ཡིན་ཏེ་གནས་དང་བདག་བསྲུང་བ་བྱས་ནས་རྡོ་རྗེ་འཁོར་ལོའི་ཕྱག་རྒྱས་དཀྱིལ་འཁོར་སྤྲུལ་ལ་ཕྱག་བྱ་བ་ལ་སོགས་པ་རང་གི་ནུས་པ་དང་རྗེས་སུ་མཐུན་པར་བྱས་ནས་རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིང་བར་བྱའོ། །དེ་ནས་རྡོ་རྗེ་བསྡམས་པ་སྙིང་གར་དྲལ་བར་བྱའོ། །དེ་ནས་རྡོ་རྗེ་འབེབས་པ་བསྐྱེད་ལ་རང་གི་སྙིང་གར་ཕྱག་རྒྱ་དགྲོལ་བར་བྱས་ནས། དམ་ཚིག་གི་ཁུ་ཚུར་རྡོ་རྗེ་བཅིང་བར་བྱའོ། །དེ་ནས་སྡིག་བ་དྲལ་བའི་ཕྱག་རྒྱ་བཅིངས་ལ་སྡིག་པ་རྣམས་དྲལ་བར་བྱའོ། །དེ་ནས་རང་གི་སྙིང་གར་ཟླ་བ་ལ་རྡོ་རྗེ་རིན་པོ་ཆེ་དེའི་དབུས་སུ་རང་གིས་སྙིང་པོ་ཡིད་ཀྱིས་བྲིས་ལ། དེ་ཉིད་ཡིད་ལ་ཟློས་ཤིང་ཆོས་ཐམས་ཅད་བདག་མེད་པར་བསྒོམ་པར་བྱའོ། །དེ་ནས་སྙིང་པོ་འདི་ཉིད་ནམ་མཁའི་ཕྱོགས་སུ་བསམས་ལ་དེ་དབྱངས་ཀྱི་ཡི་གེ་བཅུ་དྲུག་དང་བཅས་པ་ལས་རང་གི་སེམས་ཟླ་བའི་རྣམ་པར་བསམ་པར་བྱའོ། །དེའི་སྟེང་དུ་ཡང་སྙིང་པོ་ཀ་ལ་སོགས་པ་དང་བཅས་པ་ལ་ཟླ་བའི་དཀྱིལ་འཁོར་གཉིས་བ་བསམ་མོ། །ཡང་དེའི་རང་གི་སྙིང་པོ་དང་བཅས་པ་ལས་དང་པོའི་རྡོ་རྗེ་དེ་ཉིད་རྡོ་རྗེ་རིན་ཆེན་ལ་སོགས་པ་རང་གི་ལྷའི་མཚན་མ་དེའི་དབུས་སུ་བཟླས་བར་བྱ་བའི་སྙིང་པོ་རྣམ་པར་བསམ་སྟེ། དེ་ཉིད་ཡིད་ལ་ཟློས་ཤིང་རང་གི་ལྷའི་ཕྱག་རྒྱའི་ང་རྒྱལ་བསྒོམས་ཏེ་ཕྱག་རྒྱའི་གཟུགས་ལས་ནོར་བུའི་རིགས་ཐམས་ཅད་སྤྲུལ་ལ་དེས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ནོར་བུའི་རིགས་ཀྱི་གཟུགས་སུ་བསྐྱེད་དེ་མཆོད་པ་ཐམས་ཅད་ཀྱིས་ཡང་དག་པར་མཆོད་ནས་ནོར་བུའི་རིགས་ཆེན་པོ་དཀྱིལ་འཁོར་དུ་བཅུག་ལ་དཀྱིལ་འཁོར་གྱི་ཚུལ་གྱིས་
བཀོད་དེ་རང་གི་མཚན་མ་དེར་ཡིད་ཀྱིས་བཅུག་ལ་དེ་ཡང་སེམས་དཔར་བྱིན་གྱིས་བརླབས་པའི་སྦྱོར་བས་རྡོ་རྗེ་སེམས་དཔར་བདག་ཉིད་བསམས་ལ་རྡོ་རྗེ་སེམས་དཔའ་དེ་ཉིད་དུ་རང་གི་སྙིང་པོ་ཟློས་ཤིང་རང་གི་ལྷའི་སྐུར་བསྒོམས་ལ། མ་ཧཱ་ས་མ་ཡ་ས་ཏ་ཧ་ཞེས་བརྗོད་དོ། །དེ་ནས་རང་གི་ལྷའི་དམ་ཚིག་གི་ཕྱག་རྒྱ་བཅིངས་ཏེ། ས་མ་ཡོ྅ཧཾ་ཞེས་ཀྱང་བརྗོད་དོ། །དེ་ནས་ས་མ་ཡ་སཏྭ་ཨ་དྷི་ཏིཥྛ་སྭ་མཱཾ་ཞེས་བྱ་བ་དང༌། རང་གི་དམ་ཚིག་གི་ཕྱག་རྒྱ་དེ་ཉིད་ཀྱིས་སྙིང་ག་དང་དབྲལ་བ་དང་ལྐོག་མ་དང་སྤྱི་བོར་བྱིན་གྱིས་བརླབ་པར་བྱའོ་།དེ་ནས་དེ་བཞིན་དུ་ཡེ་ཤེས་སེམས་དཔའ་རིན་པོ་ཆེའི་ལྕགས་ཀྱུ་མ་ལ་སོགས་པས་དགུག་པ་དང༌། གཞུག་པ་དང་བཅིང་བ་དང༌། དབང་དུ་བྱས་ལ་རང་གི་ལྷ་དམ་ཚིག་གི་ཕྱག་རྒྱ་བཅིངས་ཏེ་རང་གི་སྙིང་པོའི་མཐར་དྲྀ་ཤྱ་ཞེས་ཟློས་ཤིང་བལྟ་བར་བྱས་ལ་སྔར་བཤད་པའི་སྤྱན་དྲངས་བའི་ཕྱག་རྒྱ་རང་གི་སྙིང་པོ་དང་བཅས་པས་རང་གི་ལུས་ལ་བཅུག་ལ། རང་གི་ལྷའི་དམ་ཚིག་གི་ཕྱག་རྒྱ་བཅིངས་ལ་ས་མ་ཡ་སྟྭཾ་ཞེས་བརྗོད་ཅིང་འོད་ཀྱི་དཀྱིལ་འཁོར་བསྐྱེད་ལ་ས་མ་ཡ་སྟྭཾ་ཨ་ཧཾ་ཛཿ་ཧཱུཾ་བཾ་ཧོཿ། ཞེས་བྱ་བའི་མཐར་རང་གི་སྙིང་པོ་དང་བཅས་པ་བཟླ་བར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་བཅིངས་ལ་ཛཿ་ཧཱུཾ་བཾ་ཧོཿ་ཞེས་བརྗོད་ཅིང་ཡིད་ཀྱིས་ལེགས་སོ་ཞེས་བྱ་བའི་སྦྱོར་བས་འཕགས་བ་དེ་ཁོ་ན་ཉིད་བསྡུས་པ་ལས་གསུངས་པའི་ཚུལ་གྱིས་རང་གི་ལུས་ལ་སངས་རྒྱས་ཐམས་ཅད་བཅུག་སྟེ་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབས་ནས་ཆོས་དང་ལས་དང་ཕྱག་རྒྱ་ཆེན་པོས་རྒྱས་བཏབ་ལ་དང་པོའི་རྡོ་རྗེ་སེམས་དཔའ་སྔ་མ་བཞིན་དུ་བྱིན་གྱིས་བརླབས་ཏེ་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ནས་རྡོ་རྗེ་རིན་པོ་ཆེ་དང་བདག་པོ་དང་མིང་གིས་དབང་བསྐུར་བ་བླངས་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་པར་བྱའོ། །དེ་ནས་རིན་པོ་ཆེའི་མ་ཆོན་ཆ་མ་ལ་སོགས་པས་གསང་བའི་མཆོད་པ་བཞིས་བདག་ཉིད་ལ་མཆོད་ལ་དེ་ཁོ་ན་ཉིད་དང་ཆོས་དང་ལས་དང་དམ་ཚིག་བཟུང་ནས། དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་ཆེན་པོ་བདག་པོའི་མཆོག །རྡོ་རྗེ་སྙིང་ཁྱོད་བདག་གྱུར་ཅིག །ཅེས་བརྗོད་ལ། རང་
གི་ལྕེ་ལ་རྡོ་རྗེ་དཀར་པོ་བསམ་ཞིང་རང་གི་སྙིང་པོ་ཡང་རྣམ་པར་བསམས་ལ་ཡང་སྙིང་པོ་དེར་རང་གི་སྙིང་གར་གནས་པའི་རྡོ་རྗེ་རིན་པོ་ཆེ་བསམས་ནས་དེ་ཉིད་ཟློས་ཤིང་ཇི་སྲིད་ཟླ་བ་གཅིག་ཙམ་ལོན་པ་དེ་ཉིད་ཀྱི་བར་དུ་ཉིན་རེ་བསྒོམ་པར་བྱའོ། །དེ་ནས་རང་གི་ལྟའི་རྒྱན་དང་ཆ་ལུགས་དང་འདྲ་བར་བྱས་ལ་ཟླ་བ་གཅིག་ཙམ་བསྒོམས་ཏེ་མཐར་མཚན་ཐག་བསྒོམས་ན་ནང་པར་རང་གི་ལྷའི་གཟུངས་དང༌། ཇི་སྐད་དུ་བཤད་པའི་ཡོན་ཏན་རྣམས་དང་ལྡན་པར་འགྱུར་རོ། །གལ་ཏེ་ཕྱག་རྒྱ་ཆེན་པོ་བསྒྲུབ་པར་འདོད་ན། ཇི་སྐད་དུ་བཤད་པའི་ཆོ་ག་ཐམས་ཅད་རྗེས་སུ་སྤྱད་ལ། ཕྱག་རྒྱ་ཆེན་པོ་བཅིངས་ཏེ་རང་གི་སྙིང་གར་གནས་པའི་རྡོ་རྗེ་རིན་པོ་ཆེ་ལ་རང་གི་ལྷའི་སྙིང་པོ་བསམས་ལ། ཡིད་རབ་ཏུ་དགའ་བས་དེ་བཞིན་དུ་ཟླ་བ་གཅིག་ཙམ་གྱི་བར་དུ་བསྒོམས་ལ། མཐར་ཟླ་བ་ཉ་ལ་མཚན་ཐོག་ཐག་བསྒོམས་ན་ནང་བར་སྔར་བཤད་པའི་འབྲས་བུ་ཐོབ་པར་འགྱུར་རོ། །གལ་ཏེ་དམ་ཚིག་གི་ཕྱག་རྒྱ་བསྒྲུབས་ན་ནི་དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ་དམ་ཚིག་གི་ཕྱག་རྒྱ་བཅིངས་ཏེ་མཐར་མཚན་ཐོག་ཐག་བསྒོམས་ན་དེ་ལྟ་བུས་ནི་སྔར་བཤད་པའི་འབྲས་བུ་ཐོབ་བར་འགྱུར་རོ། །གལ་ཏེ་ལས་ཀྱི་ཕྱག་རྒྱ་བསྒྲུབ་པར་འདོད་ན་དེ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། རིན་པོ་ཆེའི་མཚོན་ཆ་མ་ལ་སོགས་པའི་མཆོད་པའི་ཕྱག་རྒྱ་བཅུ་གཉིས་ཀྱིས་ཡང་དག་པར་མཆོད་ནས་རང་གི་སྙིང་གར་སྣ་ཚོགས་རྡོ་རྗེ་བསྐྱེད་ནས་དེའི་སྟེང་དུ་རང་གི་ལྷའི་སྙིང་པོ་བྲིས་ལ་རང་གི་ལྷའི་ལས་ཀྱི་ཕྱག་རྒྱས་བཅིངས་ལ་ཇི་སྲིད་མཚན་མ་ཐོབ་པར་གྱུར་པ་དེ་སྲིད་ཀྱི་བར་དུ་སྔར་བཤད་པའི་ཚུལ་གྱིས་བསྒོམ་པར་བྱའོ། །དེ་ནས་དེ་བཞིན་དུ་ཟླ་བ་ཉ་བའི་དུས་སུ་མཚན་ཐོག་ཐག་བསྒོམ་པར་བྱའོ། །དེ་ནས་ནང་པར་སྔར་བཤད་པའི་ཡོན་ཏན་རྣམས་དང་ལྡན་པའི་རྡོ་རྗེ་སྙིང་པོ་དང་འདྲ་བར་འགྱུར་རོ། །དེ་ལྟར་སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྣམས་བསྟན་ནས་ད་ནི་དམ་ཚིག་དང་དབང་བསྐུར་བ་ཐོབ་པ་ཉིད་ལ་སློབ་དཔོན་གྱི་ལས་ཀྱི་བསྒྲུབ་པའི་ཡེ་ཤེས་བསླབ་པར་བྱའོ་ཞེས་བྱ་བའི་ཆོ་ག་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེ་
ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཚིག་ཡིན་ཏེ་སྔོན་དུ་བསྙེན་ པ་བྱས་ནས་མཚན་ཐོག་ཐག་བཟླས་པས་ཇི་ལྟར་མངོན་པར་འདོད་པའི་དོན་བསྒྲུབ་པས་ན། གང ་གི་ཚེ་འགྲུབ་པར་མ་གྱུར་པ་དེའི་ཚེ་རྗེས་ཐོགས་ཉིད་ལ་འབྱོར་པ་ཐམས་ཅད་དགུག་པ་ལ་སོགས་པའི་ལས་འདི་དག་ཐམས་ཅད་རྣལ་འབྱོར་པས་བསྒྲུབ་པར་བྱ་བ་ཡང་ཡིན་ནོ། །གང་གི་ཕྱིར་ཞེས་བྱ་བ་ནི་རྒྱུ་སྟེ་གང་གི་ཕྱིར་ལས་ཀྱི་བསྒྲུབ་པ་འདིས་འཕགས་པ་ནམ་མཁའི་སྙིང་པོ་ཉིད་དུ་གྱུར་པའི་རྒྱུ་དེས་ན་འབྱོར་བ་ཐམས་ཅད་དགུག་པ་དང་བསྒྲུབ་པ་ལ་སོགས་པའི་ལས་རྣམས་ཀྱི་རྒྱུན་ཏེ་རབ་འབྱམས་དག་པ་སྟེ། མཆོག་ཏུ་གྱུར་པ་རབ་ཏུ་ཕྱེ་སྟེ་བཤད་པར་བྱའོ་ཞེས་བྱའོ། །དངོས་གྲུབ་ཆེན་པོ་ཀུན་གྲུབ་བ། །གོ་རིམས་ཇི་བཞིན་རབ་བཤད་བྱ། །ཞེས་བྱ་བ་ནི་བཤད་ཟིན་ཏོ། །འདི་ལྟ་སྟེ་ཞེས་བྱ་བ་ནི་ཉེ་བར་སྟོན་པའི་དོན་ཏོ། །འབྱོར་བ་ཐམས་ཅད་དགུག་པ་དང༌། །ཞེས་བྱ་བ་ལ་སོགས་པ་ལ་དབང་བསྐུར་བ་ཐམས་ཅད་དགུག་པ་ནི་སྦྱོར་བ་ཐམས་ཅད་དགུག་པའོ། །དབང་བསྐུར་བ་ནི་བྱང་ཆུབ་སེམས་དཔའ་ཆེན་བོ་དང་ལྷ་མོ་ཆེན་མོ་སྤྱན་དྲང་བ་ཞེས་བྱ་བའི་ཐ་ཚིག་གོ །དེ་ཡང་འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་བའི་དབྱེ་བས་རྣམ་པ་སྣ་ཚོགས་པ་ཡོད་བས་ན་དེའི་ཕྱིར་ཐམས་ཅད་ཅེས་བཤད་དོ། །གཞུག་པ་ཞེས་བྱ་བ་ལ་སོགས་པ་ནི་གོ་སླའོ། །འདི་དག་ཐམས་ཅད་ནི་ཇི་ལྟར་འགྱུར་ཞེ་ན། རྡོ་རྗེ་རིན་ཆེན་གྱིས་དབང་བསྐུར་བས་སོ་ཞེས་བྱ་བ་གསུངས་ཏེ། དེ་ནས་འདིའི་མཚན་ཉིད་བཤད་པར་བྱ་སྟེ། རྡོ་རྗེ་ཐལ་མོ་ལས་བྱུང་བའི་རྡོ་རྗེ་རིན་པོ་ཆེ་དབང་བསྐུར་བའི་གནས་སུ་བཞག་པས་ནམ་མཁའ་ལས་ཐམས་ཅད་བསྒོམས་པས་སོ། །འདི་ནི་འདི་སྐད་སྟོན་པ་ཡིན་ཏེ་དེ་བཞིན་དུ་དེ་ཁོ་ན་ཉིད་དང་ཆོས་དང་དམ་ཚིག་བཟུང་བའི་མཐར་ཐུག་པའི་ཆོ་ག་རྣམས་རྗེས་སུ་སྤྱད་ལ་ཏྲཾ་ཞེས་བྱ་བ་ཟློས་ཤིང༌། རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ་འབྱོར་བ་ཐམས་ཅད་དགུག་པའི་བསམ་པས་མཛོད་སྤུའི་གནས་སུ་བཞག་ནས་བཅོམ་ལྡན་འདས་ཀྱི་སྙིང་པོ་བཟླས་པར་བྱས་ཏེ་དེ་ལྟ་བུས་ནི་འབྱོར་པ་ཐམས་ཅད་དགུག་པ་སྒྲུབ་པའོ། །དེ་བཞིན་དུ་ཐམས་ཅད་བྱས་ལ་སྦྱོར་བ་མ་ཐམས་ཅད་
དགུག་པའི་བསམ་པས་བཟླས་བརྗོད་བྱས་ཏེ། དེ་ལྟ་བུས་ནི་སྦྱོར་བ་ཐམས་ཅད་གཞུག་པ་བསྒྲུབ་བོ། །དེ་བཞིན་དུ་ཐམས་ཅད་བྱས་ལ་འབྱོར་བ་ཐམས་ཅད་བཅིང་བའི་བསམ་པས་བཟླས་ཤིང་དེ་ལྟ་བུས་ནི་འབྱོར་པ་ཐམས་ཅད་འགྲུབ་པའོ། །དབང་དུ་བྱ་བའི་བསམ་པས་ནི་དབང་དུ་བྱེད་དོ། །དབྲོག་པའི་བསམ་པས་ནི་དབྲོག་པའོ། །ཉེ་བར་སོགས་པའི་བསམ་པས་ནི་བསགས་པའོ། །ལེན་པའི་བསམ་པས་ནི་ལེན་ཏོ། །འདྲེན་པའི་བསམ་པས་ནི་འདྲེན་ཏོ། །དགུག་པའི་བསམ་པས་ནི་འགུགས་སོ། །གཏོང་བའི་བསམ་པས་ནི་གཏོང་ངོ༌། །འཇིག་པའི་བསམ་པས་ནི་འཇིག་གོ །འཕེན་པའི་བསམ་པས་ནི་འཕེན་ཏོ། །འདེགས་པའི་བསམ་པས་ནི་འདེགས་སོ། །འབེབས་པའི་བསམ་པས་ནི་འབེབས་སོ། །བརྡེག་པའི་བསམ་པས་ནི་བརྡེག་གོ །སྦྱང་བའི་བསམ་པས་ནི་སྦྱང་ངོ༌། །རྙེད་པའི་བསམ་བས་ནི་རྙེད་པ་བསྒྲུབ་བོ། །རིམ་གྱིས་སྒྲུབ་པའི་བསམ་པས་ནི་རིམ་གྱིས་སྒྲུབ་བོ། །འཚོ་བ་སྒྲུབ་པའི་བསམ་པས་འཚོ་བ་སྒྲུབ་བོ། །ཀུན་དུ་འགྱེད་པའི་བསམ་པས་འགྱེད་པ་སྒྲུབ་བོ། །འབྱོར་པ་དགོད་པའི་བསམ་པས་ནི་ཉེ་བར་དགོད་པ་སྒྲུབ་བོ། །བརྟན་པར་བྱ་བའི་བསམ་པས་ནི་བརྟན་པར་བྱེད་པར་སྒྲུབ་བོ། །རྡོ་རྗེར་བྱེད་པའི་བསམ་པས་ནི་རྡོ་རྗེར་བྱེད་དོ། །འབྱོར་པ་ཐམས་ཅད་སྒྲུབ་པའི་བསམ་པས་ནི་འབྱོར་པ་ཐམས་ཅད་སྒྲུབ་བོ། །འབྱོར་པ་ཐམས་ཅད་ཀྱི་མཆོག་སྒྲུབ་པའི་བསམ་པས་ནི་འབྱོར་པ་ཐམས་ཅད་ཀྱི་མཆོག་སྒྲུབ་པར་འགྱུར་རོ། །དཔལ་ཐམས་ཅད་དགུག་བ་དང་ཞེས་བྱ་བ་ལ་སོགས་པ་ལྷ་མོ་གཏེར་གྱི་རིན་པོ་ཆེ་ནི་དཔལ་ཏེ། ད་ཡང་གདུལ་བྱའི་བསམ་པའི་ཁྱད་པར་གྱིས་དབྱེ་བ་མཐའ་ཡས་པས་ན་དཔལ་ཐམས་ཅད་ཅེས་བྱའོ། །དེ་དགུག་པ་ལ་སོགས་པ་ནི་སྔ་མ་བཞིན་དུའོ། །དེ་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་རིན་ཆེན་དཔལ་གྱིས་སོ་ཞེས་བྱ་བ་གསུངས་ཏེ། བདག་ལ་བྱིན་གྱིས་བརླབས་པ་ལ་སོགས་པའི་ཆོ་ག་ཐམས་ཅད་དེ་བཞིན་དུ་རྗེས་སུ་སྤྱད་ལ་རྡོ་རྗེ་ཐལ་མོ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ཡི་གེ་ཏྲཾ་གིས་རང་གིས་དབང་བསྐུར་བའི་གནས་སུ་ཡང་དག་པར་བཞག་ལ་ཡང་དཔལ་
ཐམས་ཅད་དགུག་པའི་བསམ་པས་ནི་དཔལ་ཐམས་ཅད་འགུགས་པ་བསྒྲུབ་པར་འགྱུར་རོ། །དཔལ་ཐམས་ཅད་གཞུག་པའི་བསམ་པས་ནི་དཔལ་ཐམས་ཅད་འཇུག་པ་འགྲུབ་བོ། །འཆིང་བའི་བསམ་པས་ནི་འཆིང་བའོ། །དབང་དུ་བྱ་བའི་བསམ་པས་ནི་དབང་དུ་བྱེད་དོ། །འཕྲོག་བའི་བསམ་པས་ནི་འཕྲོག་གོ །ཉེ་བར་སོགས་པའི་བསམ་པས་ནི་ཉེ་བར་སོག་གོ །ལེན་པའི་བསམ་པས་ནི་ལེན་ཏོ། །འདྲེན་པའི་བསམ་པས་ནི་འདྲེན་ཏོ། །འོད་དུ་གཞུག་པའི་བསམ་པས་ནི་འོད་དུ་གཞུག་གོ །ཁྱེར་དུ་གཞུག་པའི་བསམ་བས་ནི་ཁྱེར་དུ་གཞུག་གོ །འཇིག་པའི་བསམ་པས་ནི་འཇིག་གོ །བཏང་སྙོམས་སུ་འཇོག་པའི་བསམ་པས་ནི་བཏང་སྙོམས་སུ་འཇོག་གོ །འཛུད་པའི་བསམ་པས་ནི་འཛུད་དོ། །ཀུན་དུ་བསྣུན་པའི་བསམ་པས་ནི་བརྡེག་གོ །སྦྱོང་བའི་བསམ་བས་ནི་སྦྱོང་ངོ༌། །རྙེད་པའི་བསམ་པས་ནི་རྙེད་པ་གྲུབ་བོ། །འཚོང་བའི་སྒྲུབ་པའི་བསམ་པས་ནི་འཚོང་པ་སྒྲུབ་བོ། །དགོད་པའི་བསམ་པས་ནི་ཡང་དག་པར་དགོད་དོ། །ཉེ་བར་སྦྱོར་བའི་བསམ་པས་ནི་ཉེ་བར་སྦྱོར་རོ། །བརྟན་པར་བྱེད་པའི་བསམ་པས་ནི་བརྟན་པར་བྱེད་དོ། །རྡོ་རྗེར་བྱ་བའི་བསམ་པས་ནི་རྡོ་རྗེར་བྱེད་དོ། །བསྒྲུབ་པའི་བསམ་པས་ནི་སྒྲུབ་བོ། །མཆོག་སྒྲུབ་པའི་བསམ་པས་ནི་མཆོག་སྒྲུབ་པར་འགྱུར་རོ། །ཕུན་སུམ་ཚོགས་པ་ཐམས་ཅད་དགུག་པ་དང་ཞེས་བྱ་བ་ལ་སོགས་པ་ལ་ལྷ་མོ་ནོར་བུ་ཆེན་མོ་ནི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ཀྱི་རང་བཞིན་ཡིན་པས་ན་ཕུན་སུམ་ཚོགས་པ་ཐམས་ཅད་དོ། །དེ་ནས་དགུག་པ་ལ་སོགས་པ་ཇི་ལྟར་འགྱུར་ཞེ་ན། རྡོ་རྗེ་རིན་ཆེན་ཕུན་སུམ་ཚོགས་པ་ཞེས་བྱ་བ་གསུངས་ཏེ། དེ་བཞིན་དུ་རྡོ་རྗེ་རིན་ཆེན་གྱི་ཕྱག་རྒྱ་བཅིངས་ལ། མཛོད་སྤུའི་གནས་སུ་བཞག་སྟེ། ཕུན་སུམ་ཚོགས་པ་ཐམས་ཅད་དགུག་པའི་བསམ་པས་བཅོམ་ལྡན་འདས་ཀྱི་སྙིང་པོ་བཟླས་པར་བྱས་ཏེ། དེ་ལྟ་བུས་ནི་ཕུན་སུམ་ཚོགས་པ་ཐམས་ཅད་དགུག་པར་བསྒྲུབ་པར་འགྱུར་རོ། །
ཕུན་སུམ་ཚོགས་པ་ཐམས་ཅད་གཞུག་པའི་བསམ་བས་ནི་གཞུག་པའོ། །བཅིང་བའི་བསམ་པས་ནི་བཅིང་བའོ། །དབང་དུ་བྱ་བའི་བསམ་པས་ནི་དབང་དུ་བྱེད་དོ། །དེ་བཞིན་དུ་ཕུན་སུམ་ཚོགས་པ་ཐམས་ཅད་ཀྱི་དམ་པར་བསྒྲུབ་པའི་བསམ་པས་ནི་དམ་བར་བསྒྲུབ་པའི་བར་དུ་འགྱུར་རོ། །མཆོད་པ་ཐམས་ཅད་དགུག་པ་དང༌། ཞེས་བྱ་བ་ལ་སོགས་པ་ལ་བཅོམ་ལྡན་འདས་རིག་པའི་རྒྱལ་བོ། །བླ་ན་མེད་པའི་ལྷ་མོ་ནི། འཇིག་རྟེན་ལས་འདས་པའི་མཆོད་པ་ཐམས་ཅད་ཀྱི་རང་བཞིན་ཡིན་པས། མཆོད་པ་ཐམས་ཅད་དེ། དེ་དགུག་པ་ལ་སོགས་པ་ནི་དེ་བཞིན་ནོ། །འདི་དག་ཐམས་ཅད་ཇི་ལྟར་འགྱུར་ཞེ་ན། རྡོ་རྗེ་རིན་ཆེན་མཆོད་པས་སོ། །ཞེས་བྱ་བ་གསུངས་ཏེ། དེ་བཞིན་དུ་ཐམས་ཅད་བྱས་ལ་ཡི་གེ་ཏྲཾ་ཟློས་ཤིང་རྡོ་རྗེ་ཐལ་མོ་ལས་བྱུང་བའི་རྡོ་རྗེ་རིན་ཆེན་གྱི་ཕྱག་རྒྱ་བཅིངས་ནས་མཆོད་པ་ཐམས་ཅད་དགུག་པ་ལ་སོགས་པ་ཐམས་ཅད་སྔ་མ་བཞིན་དུ་བསྒྲུབ་པར་བྱའོ། །རང་གི་རྒྱལ་མཆོག་ལན་ཅིག་གྲུབ། །ཅེས་བྱ་བ་ནི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་ནི་རང་གི་ཕྱག་རྒྱའི་མཆོག་སྟེ། དེ་ཡང་ཡི་གེ་ཏྲཾ་ཟློས་ཤིང༌། །བཅོམ་ལྡན་འདས་རྡོ་རྗེ་སེམས་དཔའ་འཕགས་པ་ནམ་མཁའི་སྙིང་པོའི་ཚུལ་འཛིན་པར་མཛད་པ། རང་དབང་དུ་བྱས་ལ་འབྱོར་པ་ཐམས་ཅད་དགུག་པ་ལ་སོགས་པའི་ལས་བརྒྱབ་པ་བསྒྲུབ་པ་ལ་ངེས་པར་སྦྱར་བར་བྱའོ། །འཇིག་རྟེན་དང་འཇིག་རྟེན་ལས་འདས་པའི་འབྱོར་པ་དང༌། དཔལ་དང་ཕུན་སུམ་ཚོགས་པ་དང༌། མཆོད་པ་རྣམས་ཐོབ་པར་འདུན་པ་ནི་བསམ་པ་ཐམས་ཅད་དོ། །དེའི་རྫོགས་པ་ནི་མངོན་སུམ་དུ་བྱས་པའོ། །དེའི་དོན་གྱིས་བཅོམ་ལྡན་འདས་ནམ་མཁའི་སྙིང་པོ་རྡོ་རྗེ་རིན་ཆེན་རྟོག་པ་ཡང་ཡིན་ལ་ཆོ་ག་ཡང་ཡིན་པས་ན། བསམ་པ་ཐམས་ཅད་ཡོངས་སུ་རྫོགས་པར་བྱེད་པའི་རྟོག་པའི་ཆོ་ག་སྟེ། དེའི་རྒྱས་པ་ནི་སྒྲུབ་པ་དང་བསྒྲུབ་བར་བྱ་བ་སྣ་ཚོགས་ཀྱི་རྒྱུན་ནོ། །དཔལ་མཆོག་དང་པོའི་རྒྱ་ཆེར་བཤད་པ། ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས། འཕགས་པ་ནམ་མཁའི་སྙིང་པོའི་རྟོག་པའི་བཤད་པ་རྫོགས་སོ།། །།