དཔལ་མཆོག་དང་པོའི་རྒྱ་ཆེར་བཤད་པ།
ཀུན་དགའ་སྙིང་པོ།
དེ་ལྟར་འདོད་ཆགས་ལ་སོགས་པའི་གཉེན་པོར་གྱུར་པ་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་རྣམས་བཤད་ནས། ད་ནི་འཇིག་རྟེན་པའི་ལྷ་རྣམས་ཀྱི་ཚུལ་གྱིས་འདུལ་བའི་སེམས་ཅན་གྱི་ཁམས་ནས་བརྩམས་ཏེ། དེ་ནས་རྒྱལ་པོ་རྡོ་རྗེ་འཛིན། །ཞེས་བྱ་བ་ལ་སོགས་པས་མིང་པོ་གསུམ་གྱི་རྟོགས་པ་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་བཤད་པ་ཉིད་ཡིན་ནོ། །རྒྱལ་པོ་རྡོ་རྗེ་འཛིན་ཅེས་བྱ་བ་ནི་གོ་བར་ཟད་དོ། །འཇིག་རྟེན་གསུམ་པོ་ཞེས་བྱ་བ་ནི་སེམས་ཅན་རྣམས་འདུལ་བའི་ཕྱིར་སའི་འཇིག་རྟེན་དང། བར་སྣང་གི་འཇིག་རྟེན་དང༌། མཐོ་རིས་ཀྱི་འཇིག་རྟེན་དུ་མིང་པོ་གསུམ་གྱི་ཚུལ་གྱིས་བཞུགས་ཤིང་དེའི་ཆོས་ཉིད་ཡིན་པས་ན་འཇིག་རྟེན་གསུམ་མོ། །ཁམས་གསུམ་པ་ཞེས་བྱ་བ་
ནི་སེམས་ཅན་གྱི་དོན་དང༌། ཆོས་ཉིད་ཀྱིས་འདོད་པ་དང་གཟུགས་དང་གཟུགས་མེད་པའི་ཚུལ་གྱིས་བཞུགས་པའོ། །བདག་པོ་ཞེས་བྱ་བ་ནི་ཁམས་གསུམ་པའི་ཆོས་ཀྱི་རྒྱལ་སྲིད་ཀྱི་དབང་བསྐུར་བ་བརྙེས་པས་ན་ཁམས་གསུམ་པའི་བདག་པོའོ། །རྒྱུ་བ་དང་མི་རྒྱུ་བ་དང་དངོས་པོ་ཐམས་ཅད་ཀྱི་ངོ་བོ་ཡིན་བས་ན་ཐམས་ཅད་དོ། །ལྷ་ཆེན་པོ་ལ་སོགས་པ་འཇིག་རྟེན་པ་གསུམ་པོ་ལ་ཚར་གཅོད་པ་དང༌། ཕན་འདོགས་པར་མཛད་པས་ན་གསུམ་གྱི་སྟོན་པའོ། །ཆོ་ག་བཞིན་དུ་སྒོམ་གྱུར་ཅིང༌། །ཞེས་བྱ་བ་ནི་མིང་པོ་གསུམ་གྱི་དཀྱིལ་འཁོར་གྱི་ཚུལ་གྱིས་སེམས་ཅན་ཐམས་ཅད་ཀྱི་དོན་བྱ་བ་དེ་སྒོམ་ཞིང་མངོན་སུམ་དུ་མཛད་པའོ།། སེམས་ཅན་དོན་ཕྱིར་ཆོ་གས་བཞུགས། །ཞེས་བྱ་བ་ནི་མིང་པོ་གསུམ་གྱི་བག་ཆགས་དང་ལྡན་པའི་སེམས་ཅན་གྱི་ཁམས་རྣམས་ལ་མིང་པོ་གསུམ་རྟོགས་པ་བསྐྱེད་པར་བྱ་བའི་ཕྱིར་ཆོ་ག་བཞིན་དུ་བཞུགས་པ་ནི་སེམས་ཅན་གྱི་དོན་དེ་སྒོམ་པར་མཛད་པའོ། །ཇི་ལྟར་སྒོམ་པར་མཛད་ཅེ་ན། འདོད་ཆགས་ཞེས་བྱ་བ་གསུངས་ཏེ། སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་འདོད་ཆགས་དང༌། ཞེ་སྡང་དང་གཏི་མུག་རྣམས་ནི་རྣམ་པ་ཐམས་
ཅད་དུ་གཟུང་བ་དང་འཛིན་པའི་རྣམ་པར་རྟོག་པའི་ངོ་བོས་གནས་པས་ན་རྣམ་པར་གནས་ཞེས་བྱའོ། །མི་མཉམ་པའི་རྟེན་གྱུར་ན་ཞེས་བྱ་བ་ནི་དངོས་པོར་འཛིན་པ་ལ་མངོན་པར་ཞེན་པ་ཉིད་ཀྱིས་མངོན་སུམ་དུ་བྱས་པའོ། །དུག་ཉིད་དུ་འགྲོ་ཞེས་བྱ་བ་ལ་རྒྱུ་བ་དང་མི་རྒྱུ་བའི་དུག་དང་འདྲ་བར་སེམས་ཅན་ཐམས་ཅད་ཀྱི་དགེ་བའི་རྩ་བའི་སྲོག་འཕྲོག་པར་བྱེད་པས་ན་དུག་གོ །དེའི་ངོ་བོ་ཉིད་ཡིན་པ་ན་དུག་ཉིད་དོ། །ཉེ་བར་འགྲོ་ཞེས་བྱ་བ་ནི་དུག་གི་རང་བཞིན་མ་ཡིན་པར་ཡང་འདི་དག་དུག་གི་བྱ་བ་བྱེད་པའི་ཐ་ཚིག་གོ །བདུད་རྩི་ཉིད་དུ་འགྱུར་བ་ཡིན། །ཞེས་བྱ་བ་ལ་བདུད་ནི་འཆི་བའོ། །དེ་འདི་ལ་མེད་པས་ན་འཆི་བ་མེད་པ་སྟེ་མྱ་ངན་ལས་འདས་པ་བདུད་རྩིའོ། །དེའི་ངོ་བོ་ཉིད་ཡིན་པས་ནི་བདུད་རྩི་ཉིད་ཡིན་ནོ། །འང་ཞེས་བྱ་བའི་སྒྲ་ནི་ཁྱད་པར་གྱི་དོན་ཏོ། །འགྱུར་བ་ཡིན་ཞེས་བྱ་བ་ནི་འགྲོ་བའོ་ཞེས་བྱ་བའི་ཐ་ཚིག་གོ །ཇི་ལྟར་འགྱུར་ཞེ་ན། བདུད་རྩི་ཉིད་ཀྱིས་བསྟེན་འགྱུར་ན། །ཞེས་བྱ་བ་གསུངས་ཏེ་མྱ་ངན་ལས་འདས་པའི་དོན་དུ་རང་བཞིན་མེད་པའི་ངོ་བོ་ཉིད་ཀྱིས་མངོན་སུམ་དུ་བྱས་པས་ན་བདུད་རྩི་ཉིད་དུ་བསྟེན་པ་ཡིན་ནོ། །འདི་སྐད་སྟོན་པ་ཡིན་ཏེ། འདོད་ཆགས་དང༌། ཞེ་སྡང་དང་གཏི་མུག་རྒྱལ་བར་བྱེད་བ་དང༌། དོན་ཐམས་ཅད་གྲུབ་པར་བྱེད་པའི་ཚུལ་དུ་ཡོངས་སུ་རྟོག་ཅིང་དངོས་པོ་ལ་མངོན་པར་ཞེན་པས་བསྟེན་ན་ནི་ངན་སོང་གསུམ་གྱི་རྒྱུར་གྱུར་པ་ཡིན་ལ། རང་བཞིན་གྱིས་རྣམ་པར་དག་པར་བསྒོམས་པས་མངོན་སུམ་དུ་བྱས་ནས་ཐར་པ་ཆེན་པོ་བསྐྱེད་པར་གྱུར་པ་ཡིན་ནོ། །འདོད་ཆགས་ཚངས་པ་འབྱིན་པའི་མཆོག །ཅེས་བྱ་བ་ནི་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་འདོད་ཆགས་ནི་ཏིང་ངེ་འཛིན་གྱིས་ཚངས་པ་ཡིན་ཞིང་འཇིག་རྟེན་ཐམས་ཅད་ཀྱི་དམ་པ་ཡིན་པས་མཆོག་ཡིན་ལ་སྐྱེ་བས་ན་འབྱིན་པའོ། །དེ་གདུལ་བྱ་རྣམས་ལ་ཕན་གདགས་བར་བྱ་བའི་ཕྱིར་བཅོམ་ལྡན་འདས་རྡོ་རྗེ་སེམས་དཔའ་ཚངས་པ་ཡིན་པར་གསུངས་སོ། །ཞེ་སྡང་དྲག་པོ་ཞེས་བྱ་བ་ནི་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་ཞེ་སྡང་ནི་ཏིང་ངེ་འཛིན་གྱིས་ན་དྲག་པོ་ཡིན་ནོ། །ཏིང་ངེ་འཛིན་གྱིས་བྱ་བ་ནི་སྒོམ་པའི་སྟོབས་ཀྱིས་སོ། །གཏི་མུག་
ཁྱབ་འཇུག་ཅེས་བྱ་བ་ནི་སེམས་ཅན་ཐམས་ཅད་ཀྱི་རྒྱུད་ལ་ཡོད་པའི་གཏི་མུག་ནི་ཁྱབ་འཇུག་གི་ཚུལ་དུ་བསྐྱེད་པ་ཡིན་ནོ། །བརྟན་མཛད་ནས། འཇིག་རྟེན་གསུམ་པོ་བྱིན་གྱིས་བརླབས། །ཞེས་བྱ་བ་ནི་དེ་ལྟར་འདོད་ཆགས་དང་ཞེ་སྡང་དང་གཏི་མུག་ཚངས་པ་ལ་སོགས་པའི་ཚུལ་དུ་བསྐྱེད་ནས། དེ་ལ་མོས་པའི་སེམས་ཅན་རྣམས་མགུ་བར་བྱ་བའི་ཕྱིར་འཁོར་བ་ཇི་སྲིད་བར་དུ་བརྟན་པར་མཛད་ནས་དེའི་རྗེས་ལ་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པའི་ཚུལ་གྱིས་འདོད་ཆགས་ལ་སོགས་འཇིག་རྟེན་གསུམ་པོ་ཡང་དག་པར་གྱིན་གྱིས་བརླབས་ཤིང་སྐྱེད་པར་མཛད་པ་ཡིན་ནོ། །ཅིའི་ཕྱིར་ཞེ་ན། འདོད་ཆགས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་འདོད་ཆགས་དང་ཞེ་སྡང་དང་གཏི་མུག་གི་རང་བཞིན་འཇིག་རྟེན་གསུམ་པོ་ནི་རྟག་པར་གནས་ཤིང་རྒྱུན་མི་འཆད་པ་ཉིད་དུ་གནས་པ་དང༌། སྲིད་པ་གསུམ་སྟེ་འདོད་པ་དང་གཟུགས་དང་གཟུགས་མེད་པའི་སྲིད་པ་རྣམ་པ་གསུམ་སྟེ། ཆོས་རྣམ་པ་གསུམ་གྱི་ཚུལ་གྱིས་བསྟེན་ཅིང་རང་བཞིན་དག་པས་མངོན་དུ་བྱས་ནས། མཆོག་གསུམ་སྟེ་རྒྱལ་བར་བྱ་བ་དང༌། སྦྲང་རྩིར་བྱ་བ་དང༌། དོན་ཐམས་ཅད་གྲུབ་པར་བྱེད་པའི་རང་བཞིན་དུ་འགྱུར་རོ། །ཆོས་མིན་བསྟེན་པས་ངན་སོང་གསུམ། །ཞེས་བྱ་བ་ནི་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པའི་རང་བཞིན་འདོད་ཆགས་དང་ཞེ་སྡང་དང་གཏི་མུག་དངོས་པོར་འཛིན་པ་ལ་མངོན་པར་ཞེན་པས་བསྟེན་ན་དམྱལ་བ་དང༌། ཡི་དགས་དང༌། དུད་འགྲོའི་མཚན་ཉིད་ཅན་གྱི་ངན་སོང་གསུམ་དུ་འགྱུར་རོ། །འདོད་ཆགས་སྦྲང་རྩིར་བྱེད་པར་བཤད། །ཅེས་བྱ་བ་ནི་འདོད་པའི་ལྷའི་གཟུགས་འཛིན་པའི་ཚངས་པ་ལ་ནི་སྦྲང་རྩིར་བྱེད་པ་ཞེས་བྱའོ། །ཞེ་སྡང་རྒྱལ་བར་བྱེད་ཅེས་གྲགས། །ཞེས་བྱ་བའི་སྟོབས་བཟངས་ཀྱི་གཟུགས་འཛིན་པའི་དྲག་པོ་ནི་རྒྱལ་བར་བྱེད་པ་ཞེས་བྱའོ། །གཏི་མུག་དེར་ནི་སྒྲུབ་བྱེད་ཡིན། །ཞེས་བྱ་བ་ནི་དཔྱིད་ཀྱི་གཟུགས་འཛིན་པའི་ཁྱབ་འཇུག་གི་དོན་ཐམས་ཅད་གྲུབ་པ་ཞེས་བྱའོ། །ཀུན་དུ་གསང་བའི་མིང་ཡིན་
ནོ། །ཞེས་བྱ་བ་ནི་སྐྱེ་བོ་ཐམས་ཅད་ཀྱི་ཐུན་མོང་མ་ཡིན་གྱི་ཕྱོགས་བཅུ་ཐམས་ཅད་དུ་རྣལ་འབྱོར་པ་ཉིད་ལ་མིང་འདི་དག་གྲགས་པ་ཡིན་ནོ། །ང་ནི་འཇིག་རྟེན་གཅིག་པུ་ཉིད། །ཅེས་བྱ་བ་ནི་སེམས་ཙམ་གྱི་ཚུལ་གྱིས་འདོད་ཆགས་དང་ཞེ་སྡང་དང་གཏི་མུག་ཉིད་འཇིག་རྟེན་ཡིན་ནོ། །འཇིག་རྟེན་གསུམ་དུ་རབ་ཏུ་བཤད། ཅེས་བྱ་བ་ནི་རྣམ་པར་དབྱེ་བའི་ཚུལ་གྱིས་ནི་འདོད་ཆགས་ནི་ཚང་བ་ཞེ་སྡང་ནི་དྲག་པོ་གཏི་མུག་ནི་ཁྱབ་འཇུག་ཡིན་ནོ་ཞེས་རབ་ཏུ་བཤད་ཅིང་ངས་ཏིང་ངེ་འཛིན་གྱི་སྟོབས་ཀྱིས་བསྐྱེད་དེ་བཤད་པ་ཡིན་ནོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཡང་དེ་ལྟར་རྣམ་པར་ཤེས་པ་ཙམ་དུ་ནི་གཅིག་ཏུ་ཟད་ལ། དེ་དབྱེ་བའི་ཚུལ་གྱིས་ནི་རྣམ་པར་གཞག་པ་ཇི་ལྟར་ཤེས་ཤེ་ན། ང་ནི་འདོད་པ་གཅིག་པུ་ཉིད། །ཅེས་བྱ་བ་གསུངས་ཏེ། གང་གི་ཕྱིར་ང་ནི་ཆོས་ཀྱི་དབྱིངས་ཐོག་མ་དང་ཐ་མ་མེད་པའི་ངོ་བོ་ཉིད་ཀྱིས་ནི་དོན་དམ་པར་གཅིག་པུ་ཉིད་ཡིན་ཞིང་བྱང་ཆུབ་ཀྱི་མཚན་མ་མིང་ཅན་གྱི་སེམས་ཀྱི་ངོ་བོ་ཡིན་པས་ན་འདོད་པ་ཡིན་ལ། འདིའི་རྒྱུ་མཐུན་པ་ལས་བྱུང་བའི་འདོད་པའི་ལྷའི་གཟུགས་ཅན་གྱི་ཚངས་པ་ཡིན་པས་ན་འདོད་པའོ། །དྲག་པོ་ནི་སྟོབས་བཟངས་ཀྱི་གཟུགས་ཅན་ནོ། །གཡུང་དྲུང་ནི་དཔྱིད་ཀྱི་གཟུགས་ཅན་ཁྱབ་འཇུག་གོ །དེ་བས་ན་རྒྱུ་གཅིག་གི་རྒྱུ་མཐུན་ལས་བྱུང་བ་ཉིད་ཀྱིས་ན་འཇིག་རྟེན་གསུམ་པོ་འདི་དག་གཅིག་པུ་ཉིད་ཡིན་ནོ་ཞེས་རྡོ་རྗེ་འཆང་ཆེན་པོས་རབ་ཏུ་བཤད་ཅིང་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་ཡིན་ཏེ། དེ་ལྟར་འཇིག་རྟེན་གསུམ་གྱི་དེ་ཁོ་ན་ཉིད་བཤད་ནས་དེའི་རྗེས་ཐོགས་ཉིད་ལ། མིང་པོ་གསུམ་པོ་འདིའི་མཆོག་རྡོ་རྗེ་འཆང་དངོས་པོར་འཛིན་པ་ལ་མངོན་པར་ཞེན་པ་ཡང་སྤང་པས་བྱང་ཆུབ་ཀྱི་མཚན་ཅན་གྱི་སེམས་རྟོགས་པ་ནི་སྦྱངས་པ་སྟེ། དོན་དེའི་ཕྱིར་རྡོ་རྗེ་བཟང་པོ་ཞེས་བྱ་བ་སྟོང་པ་ཉིད་ཀྱི་རྡོ་རྗེ་ཤིན་ཏུ་རྫོགས་པར་མཛད་པས་ན་རྡོ་རྗེ་བཟང་པོ་འཛིན་པའོ། །གཟུགས་ནི་གསུམ་པོ་འདི་དག་ཉིད། །ཅེས་བྱ་བ་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པའི་ལུས་གསུམ་པོ་སྟེ་དེ་དག་སྐྱེད་པར་མཛད་པའོ། །ཉིད་ཅེས་བྱ་བ་
ནི་ངེས་པར་བཟུང་སྟེ། གཟུགས་གསུམ་པོ་འདི་དག་ཁོ་ནའོ། །བདག་ཉིད་ཁོ་ན་བྱུང་བ་ཡིན། །ཞེས་བྱ་བ་ནི་བདག་ཉིད་ཀྱི་རང་གི་རྒྱུད་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པའི་གཟུགས་སུ་བཅོམ་ལྡན་འདས་རྡོ་རྗེ་འཆང་ཆེན་པོར་བྱིན་གྱིས་བརླབས་ཤིང་ཕྱུང་ལ་སྐྱེད་པར་མཛད་པ་ཡིན་ནོ། །ཅིའི་ཕྱིར་གཟུགས་གསུམ་པོ་དེར་བདག་ཉིད་ཀྱིས་བདག་ཉིད་བྱིན་གྱིས་རློབ་པར་མཛད་ཅེ་ན། གང་ཕྱིར་འཇིག་རྟེན་འདི་དག་ནི། །རྟག་ཏུ་ཡང་ནི་འདི་སྐད་སྨྲས། །ཞེས་བྱ་བ་གསུངས་ཏེ། གང་གི་ཕྱིར་ས་འོག་ས་བླ་མཐོ་རིས་པའི་རང་བཞིན་ཅན་གྱི་མིང་པོ་གསུམ་ལ་འཁོར་བ་ཐོག་མ་མེད་པ་ནས་རྟག་པར་ལྷག་པར་དད་པ་འདི་དག་གོ །ཡང་ཞེས་བྱ་བའི་སྒྲ་ནི་ཁྱད་པར་དུ་བྱ་བའི་དོན་ཏོ། །དེ་བཞིན་གཤེགས་པ་ལ་སོགས་པ་ལ་ལྷག་པར་མོས་པའི་སེམས་ལ་ལྟོས་པ་ཡིན་ནོ། །ཚངས་པ་སོགས་ཀྱིས་འདུལ་ཞེས་བྱ་བ་ནི། ཚངས་པ་ལ་སོགས་པ་གང་ཡིན་པ་དེ་ནི་ཚངས་པ་སོགས་ཀྱིས་འདུལ་ཏེ། དྲག་པོ་དང་ཁྱབ་འཇུག་ལ་སོགས་པས་འདུལ་ཞིང་དེ་ལ་མོས་པའི་སེམས་ཅན་གང་ཡིན་པའོ། །ཡང་དག་སངས་རྒྱས་བྱང་ཆུབ་སྣོད་མ་ཡིན། །ཞེས་བྱ་བ་ནི་གཞན་དག་གིས་འདུལ་བའི་འཇིག་རྟེན་འདི་ནི་ཡང་དག་ཅིང་ཕྱིན་ཅི་མ་ལོག་པའི་སངས་རྒྱས་ཀྱི་བྱང་ཆུབ་མངོན་སུམ་དུ་བྱེད་པའི་སྣོད་མ་ཡིན་ཞིང་སྐལ་བ་མེད་པ་ཡིན་ལ་དེ་བས་ན་གཟུགས་གསུམ་པོར་བདག་ཉིད་བྱིན་གྱིས་རློབ་པར་མཛད་པ་ཡིན་ནོ། །དེ་རྣམས་སྦྱང་པའི་ཕྱིར་ཞེས་བྱ་བའི་གཟུགས་གསུམ་པོར་བདག་ཉིད་ཀྱིས་བྱིན་གྱིས་བརླབས་པས་སེམས་ཅན་དེ་རྣམས་ཀྱི་དངོས་པོ་ལ་མངོན་པར་ཞེན་པའི་སེམས་རྣམ་པར་བསམ་པར་མཛད་ནས་སངས་རྒྱས་པ་ཐོབ་པའི་ཕྱིར་བཅོམ་ལྡན་འདས་རྡོ་རྗེ་འཆང་ཆེན་པོ་རང་ཉིད་རྒྱལ་བར་བྱེད་པ་དང༌། སྦྲང་རྩིར་བྱེད་པ་དང༌། དོན་ཐམས་ཅད་གྲུབ་པར་བྱེད་པའི་གཟུགས་མཛད་པར་བྱེད་པའི་རྒྱུ་དེས་གཟུགས་གསུམ་ཉིད་ཀྱིས་ཚངས་པ་ལ་སོགས་པ་འདུལ་བ་དེ་རྣམས་ཀྱི་སེམས་རྣམ་པར་སྦྱངས་ནས་བཅོམ་ལྡན་འདས་ཅི་ཞིག་མཛད་ཅེ་ན། ཕྱིས་ནི་སངས་རྒྱས་ཉིད་མི་འགྱུར། །
ཞེས་བྱ་བ་གསུངས་ཏེ། ཚངས་པ་ལ་སོགས་པ་དེ་རྣམས་དེ་བཞིན་ཉིད་རྟོགས་པས་ས་བརྒྱད་པའི་རང་བཞིན་ཅན་གྱི་སེམས་སུ་སྐྱེད་པར་མཛད་ནས། ཕྱིས་ནས་སངས་རྒྱས་ཉིད་དུ་རྟག་ཅིང་མི་འགྱུར་བས་སྐྱེད་པར་མཛད་པ་ཡིན་ནོ། །འདི་སྐད་སྟོན་ཏེ། ཚངས་པ་དང༌། ཁྱབ་འཇུག་དང༌། དབང་ཕྱུང་ཆེན་པོ་དང༌། དེ་ལ་མོས་པའི་སེམས་ཅན་རྣམས་མིང་པོ་གསུམ་གྱི་ཚུལ་གྱིས་རང་བཞིན་གྱིས་དག་པའི་ཏིང་ངེ་འཛིན་གྱིས་སངས་རྒྱས་ཉིད་ལ་ངེས་པར་སྦྱར་བའི་ཕྱིར་བཅོམ་ལྡན་འདས་རྡོ་རྗེ་འཆང་བ་གཟུགས་གསུམ་པར་བདག་ཉིད་ཀྱིས་བྱིན་གྱིས་རློབ་པར་མཛད་པ་ཡིན་ནོ། །དེ་ནས་སེམས་ཅན་དེ་རྣམས་གཟུགས་གསུམ་པོར་འཛིན་པར་མཛད་པའོ། །རྡོ་རྗེ་སེམས་དཔའ་ལས་ཆོས་ཐོས་ནས་དེ་བཞིན་གཤེགས་པར་འགྱུར་བ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དེ་ལྟར་བཤད་མ་ཐག་པའི་ཚུལ་གྱིས་བཅོམ་ལྡན་འདས་རྡོ་རྗེ་འཆང་ཆེན་པོས་ཚངས་པ་ལ་སོགས་པའི་ལྷ་རྣམས་སངས་རྒྱས་ཉིད་ལ་རབ་ཏུ་གཞག་པའི་རྗེས་ཐོགས་ཉིད་ལའོ། །འཇིག་རྟེན་གསུམ་གྱི་མཆོག་ཀྱང་ཡིན་ལ་དབང་ཕྱུག་ཆེན་པོ་ཡང་ཡིན་པས་ན་འཇིག་རྟེན་གསུམ་གྱི་མཆོག་དབང་ཕྱུག་ཆེན་པོའོ། །དཀྱིལ་འཁོར་ཞེས་བྱ་བ་ནི་འཇིག་རྟེན་གསུམ་གྱི་གསང་བའི་དཀྱིལ་འཁོར་དུའོ། །དེར་ཞེས་བྱ་བ་ནི་དཀྱིལ་འཁོར་དེར་རོ། །རང་གི་ཞེས་བྱ་བ་ནི་བདག་ཉིད་ཀྱིའོ། །གསང་བའི་སྙིང་པོ་ཞེས་བྱ་བ་ནི་གསང་བ་སྟོན་པར་བྱེད་པའམ། །གསང་བ་སྐྱེད་པར་བྱེད་པའི་སྙིང་པོའོ། །རང་གི་རབ་གྲུབ་ཕྱིར་རབ་ཕུལ། །ཞེས་བྱ་བ་ནི་རང་ཉིད་གྲུབ་པར་བྱེད་པའི་ཕྱིར་སྙིང་པོ་ཕུལ་བ་སྟེ། མིང་པོ་གསུམ་གྱི་ཚུལ་གྱིས་གདུལ་བྱ་རྣམས་སངས་རྒྱས་ཀྱི་བྱང་ཆུབ་ཏུ་གྲུབ་ཅིང་མངོན་པར་བྱང་ཆུབ་པ་ཐོབ་པར་བྱ་བའི་ཕྱིར་ཚངས་པ་ལ་སོགས་པས་རང་གི་སྙིང་པོ་ཕུལ་ལོ་ཞེས་བྱ་བའི་ཐ་ཚིག་གོ །དེ་ལྟར་ན། དེ་ནས་རྒྱལ་པོ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ། ཨོཾ་བྷུར་བྷུ་བ་སྭཿ་ཞེས་བྱ་བའི་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །བསྡུ་བ་སྔོན་དུ་འགྲོ་བ་ནས་བརྩམས་ཏེ། གསུམ་པ་ཡང་ཡིན་པར་ཤེས་པར་བྱའོ། །དེ་ལྟར་ཏིང་ངེ་
འཛིན་གསུམ་གསུངས་ནས་ད་ནི་དམ་ཚིག་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པ་བྱའོ་ཞེས་བྱ་བ་བསྟན་པའི་ཕྱིར། ཟུར་བཞི་པ་ལ་སྒོ་བཞི་པ། །ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་རྒྱས་པ་གསུངས་པ་ཡིན་ནོ། །ཟུར་བཞི་པ་ལ་ཞེས་བྱ་བ་ནི་གོ་བར་ཟད་དོ། །དེ་ཁོ་ན་ཉིད་ནི། སྙིང་སྟོབས་རྡུལ་དང་མུན་པ་ཉིད། །ཚངས་པ་དྲག་པོ་གཡུང་དྲུག་སྟེ། །མིང་པོ་གསུམ་པོ་འདི་ཉིད་ནི། །ནམ་ཡང་བརྙས་པར་མི་བྱའོ། །ཞེས་བྱ་བ་འདི་ཉིད་ནི་གསང་བ་ཡིན་ནོ། །གལ་ཏེ་ཁྱོད་ཀྱིས་རྩེ་གསུམ་བཅག །སྙིང་པོ་སྣོད་མིན་ལ་སྨྲས་པས། །ཇི་སྐད་སྨྲས་པའི་ཆོས་རྣམས་ནི། །གལ་ཏེ་འདི་ནི་མ་སྤྱད་དམ། །ཞེས་བྱ་བའི་དམ་ཚིག་བྱིན་ལ་སློབ་མ་རྣམས་ལ་དེ་ཁོ་ན་ཉིད་གསང་བ་བརྗོད་པ་འདི་བྱ་ཞིང༌། བྷུར་བྷུ་བ་སྭཿ་ཞེས་བྱ་བ་འཇུག་པའི་གླུ་དང་ཟློས་ཤིང་རྡོ་རྗེ་ཤུགས་ཀྱིས་འདིར་འཇུག་པར་བྱའོ། །ཆོ་ག་ལྷག་མ་རྣམས་ནི་སྔར་མིང་པོ་གསུམ་གྱི་ནང་དུ་བཤད་ཟིན་པས་དེ་ཉིད་ལས་ཁོང་དུ་ཆུད་པར་བྱའོ། །འཇིག་རྟེན་གསུམ་འབྱིན་པའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་འཇིག་རྟེན་གསུམ་འབྱིན་པའི་རྒྱུད་གསུངས་ནས། ད་ནི་དེ་ནས་ཞེས་བྱ་བ་ལ་སོགས་པ་སྲིང་མོ་བཞི་འབྱིན་པའི་རྒྱུད་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟེ། དང་པོའི་སྦྱོར་བའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་མིང་པོ་གསུམ་གྱི་དཀྱིལ་འཁོར་ལས་བཤད་པ་ཉིད་ཡིན་ནོ། །ཀུན་དུ་ཆགས་དང་ཞེ་སྡང་རྨོངས། །བརྟན་པར་བྱེད་པའི་རྒྱུ་ཡིན་ནོ། །ཞེས་བྱ་བ་ནི་མིང་པོ་གསུམ་གྱི་རྣལ་འབྱོར་བ་རྣམས་ཀྱིས་ཡང་དག་པར་སྦྱོར་བའི་སྒོམ་པས་འདི་དག་སྒྲུབ་པའོ། །དེ་ལྟར་ཀུན་དུ་ཆགས་པ་དང་ཞེ་སྡང་དང་གཏི་མུག་སྟེ་མིང་པོ་གསུམ་གྱི་རང་བཞིན་འདི་རྣམས་ཀྱིས་བརྟན་པར་བྱེད་པའི་རྒྱུ་ཡིན་ནོ། །དཀྱིལ་འཁོར་ཞེས་བྱ་བ་ནི་གོ་བར་ཟད་དོ། །གལ་ཏེ་གསང་ཞིང་མ་བསྲུངས་ན། །གང་ཞིག་སེམས་ཅན་དོན་ཞུགས་དང༌། །གང་ཡང་དཀྱིལ་འཁོར་སྒྲུབ་བྱེད་པ། །དེ་རྣམས་ཁྱེད་ཀྱིས་གསང་བར་འགྱུར། །ཞེས་བྱ་བ་
ནི་དམ་ཚིག་གོ །དཀྱིལ་འཁོར་འདིའི་བཤད་པ་ནི་སྔར་བཤད་ཟིན་ལ་འདིར་ཁྱད་པར་ནི་འདི་ཙམ་དུ་ཟད་དོ། །འདི་ལྟ་སྟེ་ཧྲི་ཧཱུཾ་ཤཱི་བྷྱོ་ཞེས་བྱ་བ་ནི་འཇུག་པའི་གླུ་ཡིན་ནོ། །ད་ནི་དེ་ནས་ཞེས་བྱ་བ་ལ་སོགས་པས་གླུའི་དཀྱིལ་འཁོར་གསུངས་པ་ཡིན་ཏེ། དེ་ནས་ཞེས་བྱ་བའི་སྒྲ་ནི་སྔར་བཤད་པ་ཡིན་ནོ། །འདོད་ཆགས་ལ་སོགས་དུག་གཞིག་ཕྱིར། །ཞེས་བྱ་བའི་འདོད་ཆགས་ལ་སོགས་པའི་དུག་བསལ་བ་ནི་དུག་གཞིག་པ་སྟེ་དེའི་ཕྱིར་རོ། །ཀུན་ནས་བདུད་རྩི་ཉིད་བྱའི་ཕྱིར། །ཞེས་བྱ་བ་ནི་ཕྱོགས་བཅུའི་གདུལ་བྱ་རྣམས་ཀུན་ནས་རང་བཞིན་གྱིས་དག་པར་བསྒོམས་པས་ཐར་པ་མངོན་སུམ་དུ་བྱས་པ་ནི་བདུད་རྩིའོ། །དེའི་ངོ་བོ་ཉིད་ཡིན་པས་ན་བདུད་རྩི་ཉིད་དེ་དེའི་དོན་དུའོ། །ཞེ་སྡང་ལས་བྱུང་གླུ་ཡིས་ནི། །དཀྱིལ་འཁོར་དམ་པ་ཕྱུང་བར་འགྱུར། །ཞེས་བྱ་བ་ནི་འདི་ཡང་སྔར་བཤད་པའི་དེ་ཉིད་ལས་ཤེས་པར་བྱའོ། །འདིའི་ཁྱད་པར་ནི་འདི་ཡིན་ཏེ། འདི་ལྟ་སྟེ་ཕུ་ཕུ་ཞེས་བྱ་བ་འཇུག་པའི་གླུའི་མཆོད་པ་ཡིན་ནོ། །དེ་ལྟར་གླུའི་དཀྱིལ་འཁོར་གསུངས་ནས་ད་ནི། །དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ལ་སོགས་པས་བགེགས་ཐམས་ཅད་རྣམ་པར་གཞོམ་པའི་ཕྱིར་གདོན་གྱི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་སྔ་མ་བཞིན་དུ་ལོག་འདྲེན་ལ་སོགས་པ་གདོན་ཐམས་ཅད་ལས་བྱུང་བའི་སྡུག་བསྔལ་ཐམས་ཅད་དེ། དེ་རྣམ་པར་བསལ་ཞིང་མེད་པར་མཛད་པས་ན་སྡུག་བསྔལ་ཐམས་ཅད་བསལ་བ་སྟེ། བཅོམ་ལྡན་འདས་རྡོ་རྗེ་འཆང་བའོ། །སེམས་ཅན་ཀུན་ནི་བདེ་བའི་ཕྱིར། །ཞེས་བྱ་བ་ནི་གདོན་ལ་སོགས་པ་ལས་བྱུང་བའི་སྡུག་བསྔལ་དང་བྲལ་བས་སེམས་ཅན་ཐམས་ཅད་བདེ་བ་ཉམས་སུ་མྱོང་བའི་ཕྱིར་རོ། །ནི་ཞེས་བྱ་བ་ནི་ངེས་པར་གཟུང་བ་སྟེ། བདེ་བ་ཁོ་ནའི་ཕྱིར་རོ། །གདོན་གྱི་དཀྱིལ་འཁོར་ཕྱུང་བ་ཡིན། །ཞེས་བྱ་བ་ནི་རིམས་ལ་སོགས་པས་ཡོངས་སུ་གང་བའི་དཀྱིལ་འཁོར་སྐྱེད་པར་མཛད་པས་སོ། །དེ་ཅིའི་ཕྱིར་ཞེ་ན། འདོད་ཆགས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དམིགས་པ་ལ་སྤྱོད་པའི་སེམས་ཅན་ཐམས་ཅད་ནི་འདོད་ཆགས་ལ་སོགས་པའི་དུག་གིས་གསོ་བ་མ་བྱས་པའི་ཉེས་བྱས་ཀྱིས་དུག་ཉིད་དུ་གྱུར་
བ་ཡིན་ཞིང་སྔར་བཤད་པའི་ཚུལ་གྱིས། །གདོན་དང་རིམས་དང་སྡིག་པ་དང༌། །དམྱལ་བར་ཡང་ནི་འགྱུར་བ་ཡིན། །ཞེས་བྱ་བ་ཡང་དེ་ཉིད་ཡིན་གྱིས་ཕྱི་རོལ་གཞན་དག་མ་ཡིན་ནོ། །དེ་བས་ན་རྣམ་པར་རྟོག་པ་དང་བཅས་པ་ལས་བྱུང་བའི་སྲིན་མོ་ལ་སོགས་པའི་གདོན་གྱི་ཚུལ་ཅན་སྡུག་བསྔལ་ཐམས་ཅད་སྐྱེད་པར་བྱེད་པའི་རྣམ་པར་རྟོག་པ་དེ་རྣམས་གཞིག་པར་བྱ་བའི་ཕྱིར། བཅོམ་ལྡན་འདས་ཀྱིས་གདོན་གྱི་དཀྱིལ་འཁོར་ཕྱུང་བ་ཡིན་ནོ། །དེ་ནས་ཞེས་བྱ་བའི་སྒྲ་ནི་གནས་སྐབས་ཏེ། གདུག་པ་སྐྱེད་པར་བྱེད་པ་ཡི་གེ་ཧྲིཾ་ངོ༌། །དེ་ལྟར། དེ་ནས་སྟོན་པ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ་ཧྲིཾ་ཞེས་བྱ་བའི་བར་གྱིས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བས་གསུམ་པ་ཡིན་པར་ཤེས་པར་བྱའོ། །དེ་ལྟར་བསྡུས་པ་སྲིན་པོ་ལ་སོགས་པའི་གདོན་རྣམས་བཀུག་སྟེ། རྡོ་རྗེ་ལྕགས་ཀྱུས་ཁྲོ་བོ་ལ་སོགས་པ་དགུག་པ་དང་གཞུག་པ་དང༌། བཅིང་བ་དང༌། དབང་དུ་བྱས་ལ་སློབ་དཔོན་གྱིས་སྲིན་པོ་ལ་སོགས་པའི་གདོན་གཞོམ་པར་བྱ་བའི་ཕྱིར་དཀྱིལ་འཁོར་བྲིས་ལ། སྲིན་པོ་ལ་སོགས་པའི་གདོན་གཞོམ་པར་བྱའོ་ཞེས་བྱ་བའི་ཆོ་ག་འདི་བསྟན་པར་བྱ་བའི་ཕྱིར་ཟུར་བཞི་བ་ཞེས་བྱ་བ་ལ་སོགས་པས་གདོན་གཞོམ་པའི་སློབ་དཔོན་གྱི་ལས་ཀྱི་ཆོ་ག་གསུངས་པ་ཡིན་ནོ། །ཟུར་བཞི་པ་ལ་ཞེས་བྱ་བ་ལ་སོགས་པ་ལ་ནི་གོ་བར་ཟད་དོ། །དེ་ནས་ཞེས་བྱ་བ་བཤད་མ་ཐག་པའི་དཀྱིལ་འཁོར་དེའི་དབུས་དང་པོར་ཞེས་བྱ་བ་ལས་ཀྱི་དཀྱིལ་འཁོར་དུ་འཇུག་པའི་ཐོག་མར་དཀྱིལ་འཁོར་དུ་འབྱུང་པོ་དང༌། ཡི་དགས་དང༌། ཤ་ཟ་དང༌། གནོད་སྦྱིན་དང༌། སྲིན་པོ་དང༌། གྲུལ་བུམ་དང༌། ཀླུ་ལ་སོགས་པའི་རིག་པ་མཆོག་གི་རྒྱུད་ལས་གསུངས་པའི་གདོན་བཅོ་བརྒྱད་དང༌། སོགས་པའི་ཞེས་བྱ་བའི་སྒྲས་རིམ་པ་བརྒྱད་པོ་སྐྱེས་བུ་གཅེར་བུ་གདོང་གནག་པ་སྐྲ་གྱེན་དུ་བརྫེས་པ། སྡིག་པ་ཞེས་བྱ་བ་ཡི་དགས་ཀྱི་ཁྱད་པར་རྣམས་དང༌། མནར་མེད་པ་ལ་སོགས་པའི་དམྱལ་བ་བརྒྱད་དང༌། ཉེ་འཁོར་བའི་དམྱལ་བ་རྣམས་སོ། །དེ་རྣམས་ཀྱི་ཆོ་ག་རྒྱས་པ་ནི་ཡུལ་དང་གྲོང་དང་འཇིག་རྟེན་གྱི་བཀོང་པའི་དབྱིབས་རྣམས་བྲི་བར་བྱའོ། །དེ་ལྟར་
དཀྱིལ་འཁོར་དེ་བྲིས་པའི་རྫེས་ཐོགས་ཉིད་ལ་རྡོ་རྗེ་མེ་ལྟར་འབར་བའི་རྣལ་འབྱོར་པས་རྣལ་འབྱོར་ཆེན་པོ་བྱས་ལ། གཙུག་ཏོར་ལ་སོགས་པ་ཡང་རང་གི་ལུས་ལ་བཀོད་དེ། དེའི་རྗེས་ཐོགས་ཉིད་ལ་དཀྱིལ་འཁོར་འདིར་སློབ་དཔོན་གྱི་འཇུག་པ་བཅོམ་ལྡན་འདས་རྡོ་རྗེ་སེམས་དཔས་བཤད་ཅིང་གསུངས་པ་ཡིན་ནོ། །ཇི་ལྟར་འཇུག་པར་བྱ་ཞེ་ན། མྱུར་དུ་ཞེས་བྱ་བ་གསུངས་སོ། །མྱུར་དུ་ཅི་ཞིག་བྱ་ཞེ་ན། རྡོ་རྗེ་འཛིན་པ་ཞུགས་ནས་ནི། །ཁྲོས་པས་རྐང་པ་གཡོན་པས་མཉེ། །ཞེས་བྱ་བ་གསུངས་ཏེ། གཡས་པའི་རྡོ་རྗེ་ཁུ་ཚུར་གྱིས་ཁྲོ་བོའི་རྡོ་རྗེ་ཐོགས་ཏེ། གཡོན་པའི་ཁྲོ་བོའི་ཁུ་ཚུར་སྡིགས་མཛུབ་བྱེད་པ་ལ་བརྩོན་པས་དཀྱིལ་འཁོར་དེ་རྐང་པ་གཡོན་པས་མཉེ་བར་བྱའོ། །དེ་ནས་ཞེས་བྱ་བ་ལ་སོགས་པ་ནི་གོ་བར་ཟད་དོ། །འདིས་ནི་འདི་སྐད་སྟོན་པར་འགྱུར་ཏེ། གང་གི་ཚེ་རྣལ་འབྱོར་པ་ལོག་འདྲེན་ལ་སོགས་པ་ཉེ་བར་འཚེ་བར་འགྱུར་བ་དེའི་ཚེ་རྡོ་རྗེ་མེ་ལྟར་འབར་བའི་སྦྱོར་བས་རྣལ་འབྱོར་ཆེན་པོར་བྱས་པ་ནི་རྡོ་རྗེ་གཙུག་ཏོར་ལ་སོགས་པ་ནས། རྡོ་རྗེ་ཤུགས་ཀྱི་བར་དུ་རང་གི་ལུས་ལ་བཀོད་ནས། རྡོ་རྗེ་སེམས་དཔའི་ལྷ་མོའི་དཀྱིལ་འཁོར་གྱི་ཚུལ་གྱིས་བདག་ཉིད་རྡོ་རྗེ་སེམས་དཔའ་རྣམ་པར་བསྒོམས་ལ་དེའི་རྗེས་ཐོགས་ཉིད་ལ་བདག་ཉིད་རྡོ་རྗེ་མེ་ལྟར་འབར་བ་སླར་ཡང་བསམས་ཏེ། དཀྱིལ་འཁོར་འདི་རི་རབ་ཀྱི་སྟེང་དུ་ཧཱུཾ་ལས་སྤྲུལ་པ་བསྡུ་བར་བྱའོ། །དེ་ནས་རྡོ་རྗེ་ལྕགས་ཀྱུའི་ཁྲོ་བོ་ལ་སོགས་པ་ལས་ཀྱི་ཕྱག་རྒྱ་བཞིས་གདོན་ལ་སོགས་པའི་ཆོ་ག་རྒྱས་པས་བཀུག་ནས་བཅུག་སྟེ་བཅིངས་ལ་འཇུག་པའི་ཕྱག་རྒྱས་བཅིངས་ནས་ཧྲིཾ་བཛྲ་ཏིཥྛ་མཎྜལ་ཨུདྠ་པ་ལ་ཞེས་བྱ་བས་དཀྱིལ་འཁོར་དེ་བར་སྣང་གི་ཕྱོགས་སུ་བཞག་ལ་རྡོ་རྗེ་མེ་ལྟར་འབར་བའི་དམ་ཚིག་གི་ཕྱག་རྒྱ་དང༌། ཡི་གེ་ཧཱུཾ་གིས་བདག་ཉིད་བྱིན་གྱིས་བརླབས་ལ་ཧཱུཾ་ཟློས་ཤིང་ཡོངས་སུ་བསྐོར་ནས་ཐིག་གདབ་པ་དང་ཚོན་དགྱེ་བ་བྱས་ཏེ། རིག་པ་མཆོག་ལས་གསུངས་པའི་གདོན་བཅོ་བརྒྱད་དང༌། འཕགས་པ་དཔུང་བཟངས་ལས་བཤད་པའི་ལོག་འདྲེན་རྣམས་དང༌། སྔར་བཤད་པའི་རིམས་བརྒྱད་དང༌། སྡིག་པ་དང་དམྱལ་བ་རྣམས་ཡི་གེ་ཧཱིཾ་ཟློས་ཤིང་བྲི་བར་བྱའོ། །དེ་ནས་
སྒོ་དབྱེ་བ་དང་བསྡུ་བ་བྱས་ལ། རྡོ་རྗེ་ལྕགས་ཀྱུའི་ཁྲོ་བོ་ལ་སོགས་པས་དེ་དག་དགུག་པ་དང་བཅིང་བ་བྱས་ལ། གཡས་པའི་རྡོ་རྗེ་ཁུ་ཚུར་གྱིས་ཁྲོ་བོའི་རྡོ་རྗེ་ཐོགས་ཏེ། གཡོན་པའི་ཁྲོ་བོའི་ཁུ་ཚུར་གྱིས་སྡིགས་མཛུབ་བྱེད་པ་ལ་བརྩོན་པ་དང༌། གླུའི་ཚིག་ཟློས་ཤིང་རབ་ཏུ་དགོད་པ་དང༌། དཀྱིལ་འཁོར་དེར་ཞུགས་ལ་ཁྲོས་པ་དང༌། རྐང་པ་གཡོན་པས་མཉེ་བར་བྱའོ། །དེ་ལ་གླུ་ནི་འདི་ཡིན་ཏེ། སརྦ་ཨ་གྷ་མཎྜལ་མི་དམ་བཛྲ་དྷ་ར་ཨ་ཀྲ་མ་བི་ཀི་ར་བི་ཀི་ར་བཛྲོ་ད་ཡ་ནཱ་ཤ་ཡ་ཧ་ན་ད་ཧ་ན་པ་ཙ་བྷ་སྨི་ཀུ་རུ་ཀྲུ་དྷ་ཧཱུཾ་ཀ་ར་མ་དེ་ན། དེ་ནས་རྡོ་རྗེ་གནོད་སྦྱིན་དང༌། རྡོ་རྗེ་ཁུ་ཚུར་དང་རྡོ་རྗེ་གཙུག་ཏོར་གྱིས་བདག་ཉིད་བསྲུང་བ་བྱས་ལ་རང་གི་ལྷའི་སྦྱོར་བས་གནས་པར་བྱའོ། །སྡུག་བསྔལ་ཐམས་ཅད་ལས་འདོན་པའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་རྣམས་བཤད་ནས། ད་ནི་འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ཀྱི་དཀྱིལ་འཁོར་ལ་ལྷག་པར་མོས་པའི་སེམས་ཅན་རྣམས་རྗེས་སུ་གཟུང་བའི་ཕྱིར། དེ་ནས་ཞེས་བྱ་བ་ལ་སོགས་པ་བསྡུས་པའི་དཀྱིལ་འཁོར་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པའི་ཚིག་ཡིན་ཏེ། དང་པོའི་སྦྱོར་པའི་རྗེས་ཐོགས་ཉིད་ལའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོར་གསུངས་པ་ཡིན་ནོ། །ཀུན་མཆོག་དམ་པའི་དབང་ཕྱུག་སྟེ། །ཞེས་བྱ་བ་ནི་ཀུན་གྱི་མཆོག་ཀྱང་ཡིན་ལ་དམ་པའི་དབང་ཕྱུག་ཀྱང་ཡིན་པས་ན་ཀུན་མཆོག་དབང་ཕྱུག་སྟེ་དཔལ་རྡོ་རྗེ་སེམས་དཔའོ། །དེ་ཡང་ཐམས་ཅད་ཀྱི་མཆོག་ཡིན་པས་ན་ཀུན་མཆོག་གོ །དེ་ཉིད་ནི་དམ་པ་སྟེ་ཕུལ་དུ་བྱུང་བ་ཡིན་ཞིང་ཁམས་གསུམ་པ་མ་ལུས་པའི་ཆོས་ཀྱི་རྒྱལ་སྲིད་ལ་མངའ་བརྙེས་པས་ན་དབང་ཕྱུག་གོ །སེམས་ཅན་དོན་ཀུན་རབ་སྒྲུབ་བྱེད། །ཅེས་བྱ་བ་ནི་རིགས་ལྔའི་ལྷ་རྣམས་ཀྱིས་འདུལ་པའི་སེམས་ཅན་ཀུན་ཡིན་ཏེ། དེ་རྣམས་ཀྱི་རབ་ཏུ་སྒྲུབ་པ་ནི་རིགས་ལྔ་རྟོགས་པར་གྱུར་པ་སྟེ་དེའི་དོན་དུའོ། །དཀྱིལ་འཁོར་ཐམས་ཅད་གསུངས་པ་ཡིན། །ཞེས་བྱ་བ་ནི་བཅོམ་
ལྡན་འདས་རྡོ་རྗེ་འཆང་བས་བསྡུས་པའི་དཀྱིལ་འཁོར་བཀའ་སྩལ་པའོ། །གཟུགས་ཀུན་གྱིས་ཞེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་ལྷ་རྣམས་ཀྱི་གཟུགས་སོ། །དུས་གང་གི་ཚེ་ཞེ་ན། གང་ཚེ་གསང་བ་ཆེན་པོ་ལྔའོ། །དེ་ཉིད་ཀྱིས་ནི་མི་འདུལ་འགྱུར་ཞེས་བྱ་བ་གསུངས་ཏེ། གསང་བ་ཆེན་པོའི་དེ་ཁོ་ན་ཉིད་ལྔ་ནི་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་རྣམས་ཀྱིས་གང་གི་ཚེ་འདུལ་བར་མ་གྱུར་པའི་སངས་རྒྱས་ཉིད་དམ་རྡོ་རྗེ་འཛིན་པ་ཉིད་ལ་འཇོག་པར་མི་ནུས་པ་དེའི་ཚེ་སྣ་ཚོགས་ཆེན་པོ་བསྡུས་པའི་དཀྱིལ་འཁོར་གྱིས་འདུལ་བའི་སྐྱེ་བོ་སྐལ་པ་དང་ལྡན་པ་རྣམས་ལ་དམ་པ་སྟེ། མཆོག་འདི་མཛད་པ་ཡིན་ནོ། །དེ་ལྟར་ན། དེ་ནས་རྒྱལ་པོ་རྡོ་རྗེ་འཛིན། །ཞེས་བྱ་བ་ནས་བརྩམས་ཏེ། སྣ་ཚོགས་ཆེན་པོ། འགྲོ་བ་འདུལ་བའི་དམ་པ་ཡིན། །ཞེས་བྱ་བ་ནི་བར་གྱིས་བཤད་པས་ནི་ཏིང་ངེ་འཛིན་གཉིས་པ་གསུངས་པ་ཡིན་ནོ། །དེ་ནས་བསྡུ་བ་སྔོན་དུ་འགྲོ་བ་ནི་གསུམ་པ་ཡིན་པར་ཤེས་པར་བྱའོ། །དེ་ལྟར་བསྡུས་པའི་དཀྱིལ་འཁོར་གྱི་ཏིང་ངེ་འཛིན་གསུམ་གསུངས་ནས། ད་ནི་དམ་ཚིག་དང་དབང་བསྐུར་བ་ཐོབ་པ་རྣམས་ཀྱིས་བཟླས་བརྗོད་དང་བསྒོམ་པར་བྱའོ་ཞེས་བྱ་བའི་ཕྱིར། དེ་ནས་གང་གི་ཕྱིར་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང་སློབ་མ་འཇུག་པ་ལ་སོགས་པའི་ཆོ་ག་གསུངས་པ་ཡིན་ནོ། །དེ་ནས་ཞེས་བྱ་བའི་སྒྲ་ནི་དེ་མ་ཐག་པ་སྟོན་པར་བྱེད་པའི་ཚིག་སྟེ། ལས་ཀྱི་ཆོ་གའི་ཏིང་ངེ་འཛིན་གྱི་རྗེས་ཐོགས་ཉིད་ལའོ། །གང་གི་ཕྱིར་ཞེས་བྱ་བ་ནི་རྒྱུ་སྟེ་གང་གི་ཕྱིར་བསྡུས་པའི་དཀྱིལ་འཁོར་དུ་འཇུག་པར་བྱེད་པ་དེས་འདུལ་པའི་སེམས་ཅན་རྣམས་ཀྱི་དོན་དུ་མི་འགྱུར་བས་དེའི་ཕྱིར་དཀྱིལ་འཁོར་ཆེན་པོ་སྟེ། བསྡུས་པའི་དཀྱིལ་འཁོར་དམ་པ་སྟེ་མཆོག་ཏུ་གྱུར་པས་རབ་ཏུ་ཕྱེ་སྟེ་བཤད་པར་བྱའོ་ཞེས་པའོ། །ཀུན་མཆོག་ནི་འཇིག་རྟེན་དང་འཇིག་རྟེན་ལས་འདས་པའི་ཚུལ་ཡང་དག་པར་སྟོན་པ་ཡིན་ཞེས་གང་དུ་འདུལ་བའི་སེམས་ཅན་གྱི་ཁམས་རྣམས་ལས་རྣམ་བར་རྒྱལ་བ་ཡིན་བས་ན་ཀུན་མཆོག་རྣམ་རྒྱལ་ལོ། །ལྷ་ཐམས་ཅད་ཀྱི་
དཀྱིལ་འཁོར་གྱིས་འདུལ་བའི་སེམས་ཅན་སྐལ་བ་དང་ལྡན་པ་རྣམས་ལ་འཇིག་རྟེན་དང་འཇིག་རྟེན་ལས་འདས་པའི་དཀྱིལ་འཁོར་གྱི་ལྷ་ཐམས་ཅད་ཀྱི་གཟུགས་ནི་སྣ་ཚོགས་སོ། །དེ་ཉིད་ཀྱིས་ན་བསྡུས་པའི་དཀྱིལ་འཁོར་འདི་ནི་ཀུན་མཆོག་དམ་པའི་དབང་ཕྱུག་ཡིན་ནོ་ཞེས་བྱ་བ་ནི་འཇིག་རྟེན་པའི་དཀྱིལ་འཁོར་ཆེན་པོ་བྲིས་ནས་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་བྲིས་ལ། དེའི་དབུས་སུ་ཞེས་བྱ་བའི་དཀྱིལ་འཁོར་དབུས་མའི་ལྟེ་བའི་ཕྱོགས་སུ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ཐིག་བཏབ་ཅིང་ཀུན་དུ་བྲིས་ལ་མིང་དེ་སྐད་ཅེས་བྱ་བའི་དཀྱིལ་འཁོར་དེའི་ལྟེ་བའི་ཕྱོགས་སུ་སྔར་བཤད་པའི་ཚུལ་གྱིས་རྡོ་རྗེ་སེམས་དཔའ་རབ་ཏུ་གཞག་པར་བྱས་ཏེ། འདི་ནི་ཆོ་ག་བཞིན་ཞེས་བྱ་བའི་སྒྲའི་དོན་ཡིན་ནོ། །ཅི་དེ་འབའ་ཞིག་གམ་ཞེ་ན། རྡོ་རྗེ་ལྷ་མོ་ཞེས་བྱ་བ་གསུངས་ཏེ། འདོད་ཆགས་རྡོ་རྗེ་དང༌། ཀི་ལི་ཀི་ལ་དང༌། རྡོ་རྗེ་དྲན་མ་དང༌། རྡོ་རྗེ་འདོད་པའི་དབང་ཕྱུག་མ་ནི་རྡོ་རྗེ་ལྷ་མོའོ། །སོགས་པའི་སྒྲ་ནི་དུས་ཀྱི་མཆོད་པ་དང༌། རྡོ་རྗེ་སྒེག་མོ་རྣམས་དང༌། སྒོ་སྲུང་རྣམས་གཟུང་ངོ༌། །རྡོ་རྗེ་ལྷ་མོ་ལ་སོགས་པས་ཡོངས་སུ་གང་བའི་དཀྱིལ་འཁོར་རམ། དེས་ཉེ་བར་མཚོན་པའི་དཀྱིལ་འཁོར་ནི་རྡོ་རྗེ་ལྷ་མོ་ལ་སོགས་པའི་དཀྱིལ་འཁོར་ཏེ་དེར་རོ། །དེ་ཡི་ངོས་ནི་ཐམས་ཅད་དུ། །ཞེས་བྱ་བ་ནི་རེའུ་ཆ་དབུས་མར་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་བྲིས་པ་དེའི་ཕྱོགས་བཞིར་དེ་བཞིན་གཤེགས་པ་དང༌། རྡོ་རྗེ་འཛིན་པ་དང༌། འཇིག་རྟེན་དབང་ཕྱུག་དང༌། ནམ་མཁའི་སྙིང་པོ་ཀུན་མཆོག་ལྷག་པའི་སྐུ་རྣམས་ཀྱིས་མཚན་པའི་མཆོག་རྡོ་རྗེ་དང་བཅས་པ་འཁོར་ལོ་ལ་སོགས་པ་གང་ཡིན་པ་དེ་ནི་རྡོ་རྗེ་མཆོག་བཅས་མཚན་མ་རྣམས་རྡོ་རྗེས་མཚན་པའི་འཁོར་ལོ་ལ་སོགས་པའོ་ཞེས་བྱ་བའི་ཐ་ཚིག་གོ །མ་ཞེས་བྱ་བའི་སྒྲ་ནི་ངེས་པར་གཟུང་བ་སྟེ་རྡོ་རྗེས་མཚན་པའི་མཚན་ཉིད་དོ། །སྐུ་གཟུགས་ལ་སོགས་གཞག་པར་བྱ། །ཞེས་བྱ་བ་ནི་མི་བསྐྱོད་པ་ལ་སོགས་པ་རང་གི་རིགས་ཀྱི་ལྷའི་ཚུལ་གྱིས་ཡོངས་སུ་བསྐོར་བ་ནི་རང་གི་རིགས་ཀྱིས་བསྐོར་བ་ཞེས་བྱའོ། །རྒྱལ་པོ་རྡོ་རྗེ་སྲེད་མེད་བུའི། །གཟུགས་འཛིན་འཁོར་ལོ་བསྣམས་
པ་བྲི། །ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་སྲེད་མེད་ཀྱི་བུའི་གཟུགས་འཛིན་པ་ཕྱག་ན་འཁོར་ལོ་བསྣམས་པ་གཞག་པར་བྱའོ། །ཁྱབ་བདག་རྡོ་རྗེ་ཅན་རྡོ་རྗེ། །གཏུམ་དབང་རྡོ་རྗེ་གདུང་བསྣམས་པ། །ཞེས་པ་ནི་བཅོམ་ལྡན་འདས་རྡོ་རྗེ་མེ་ལྟར་རབ་ཏུ་འབར་བའི་རྡོ་རྗེ་གཏུམ་པའི་དབང་ཕྱུག་གི་གཟུགས་འཛིན་པ་རྡོ་རྗེ་གདུང་བསྣམས་པ་བྲི་བར་བྱའོ། །རྡོ་རྗེ་པད་འབྱུང་པདྨ་ཅན། །རྡོ་རྗེ་འཛིན་པ་ཚངས་གཟུགས་ལྡན། །ཞེས་བྱ་བ་ནི་འཕགས་པ་སྤྱན་རས་གཟིགས་དབང་ཕྱུག་གི་གཟུགས་འཛིན་པའི་རྡོ་རྗེ་འཆང་རྡོ་རྗེ་འཛིན་པ་ནི་ཚངས་པའི་གཟུགས་སུ་བྲི་བར་བྱའོ། །ནམ་མཁའི་སྙིང་པོ་འདོད་གཟུགས་ཅན། །རྡོ་རྗེ་དང་བཅས་མེ་ཏོག་མཆོག །ཅེས་བྱ་བ་ནི་བཅོམ་ལྡན་འདས་འཕགས་པ་ནམ་མཁའི་སྙིང་པོ་ནི་འདོད་པའི་ལྷའི་གཟུགས་འཛིན་པ་ལ་རྡོ་རྗེས་མཚན་པའི་གཞུ་བསྣམས་ཏེ་བཞུགས་པ་བྲི་བར་བྱའོ།། གཞིའི་དཀྱིལ་འཁོར་གྱི་མེའི་མཚམས་སུ་རྡོ་རྗེ་དཔལ་མོ། བདེན་བྲལ་གྱི་མཚམས་སུ་རྡོ་རྗེ་དཀར་མོ། རླུང་གི་མཚམས་སུ་རྡོ་རྗེ་སྒྲོལ་མ། །དབང་ལྡན་གྱི་མཚམས་སུ་ནམ་མཁའི་རྡོ་རྗེ་མ་བྲི་བར་བྱའོ། །དེ་ནས་འདི་རྣམས་ཀྱིས་ཞེས་བྱ་བ་ནི་གོ་བར་ཟད་དོ། །ཕྱི་ཡི་དཀྱིལ་འཁོར་གནས་རྣམས་སུ། །ཞེས་བྱ་བ་ནི་ལྷའི་སྣམ་བུའོ། །རྡོ་རྗེ་མཚན་མ་རང་ཕྱོགས་གནས། །ཞེས་བྱ་བ་ནི་དྲག་པོ་ལ་སོགས་པའི་མཚན་མ་རྡོ་རྗེས་མཚན་པའི་ཏྲི་ཤཱུ་ལ་ལ་སོགས་པ་གང་ཡིན་པ་དེ་ནི་རྡོ་རྗེ་མཚན་མ་སྟེ། དེ་ཤར་ཕྱོགས་ལ་སོགས་པའི་ཕྱོགས་སུ་གནས་པ་ནི་རང་གི་ཕྱོགས་སུ་གནས་པ་བྲི་བ་ཡིན་ནོ། །རྡོ་རྗེའི་མཚན་མ་རང་གི་ཕྱོགས་སུ་གནས་པར་བྲི་བ་དེ་གང་ཞིག་ཡིན་ཞེ་ན། ལྷ་དབང་དང་ནི་མ་མོ་ཉིད། །ཅེས་བྱ་བ་གསུངས་ཏེ། ལྷའི་དབང་པོ་ནི་དྲག་པོ་ལ་སོགས་པ་ནས་ཆུ་ལྷའི་མཐར་ཐུག་པའོ། །དེ་རྣམས་ཀྱི་ཆུང་མ་ནི་མ་མོའོ། །དེ་ཉིད་ནི་ལྷའི་དབང་པོ་མ་མོ་དང་བཅས་པའི་འཇིག་རྟེན་སྐྱོང་བ་རྣམས་ཡིན་ཏེ་དེ་རྣམས་དགོད་པར་བྱའོ། །ཚོགས་ཀྱི་དབང་ཕྱུག་རྡོ་རྗེ་ཡི། །རོལ་མོའི་ཆེ་བཅུ་རྡུང་བྱེད་ལ། །ཕྱི་ཡི་དཀྱིལ་འཁོར་ཁ་ཁྱེར་དང༌། །སྒོ་དང་མཚམས་སུའང་དེ་བྲིའོ། །ཞེས་བྱ་བ་ནི་ཕྱིའི་དཀྱིལ་འཁོར་གྱི་མཚམས་བཞིར་སྒེག་མོ་ལ་སོགས་པ་དང༌། སྒོ་རྣམས་
སུ་ལྕགས་ཀྱུ་མ་ལ་སོགས་པ་བྲི་བར་བྱའོ། །སྒོ་རྣམས་ཀུན་དུ་འཇུག་པ་ནི། །རང་གི་ཕྱག་རྒྱས་རབ་ཏུ་འཇུག །ཅེས་བྱ་བ་ནི་སྔར་བཤད་པའི་འཇུག་པའི་ཆོ་གས་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ཀྱི་དཀྱིལ་འཁོར་དུ་འཇུག་པར་བྱའོ། །དང་པོའི་སྦྱོར་བས་དཀྱིལ་འཁོར་ནི། །དམ་པ་ལྔ་རུ་ཞེས་བྱ་བ་ནི་གཞིའི་དཀྱིལ་འཁོར་དུ་དང་པོར་དཀྱིལ་འཁོར་དུ་འཇུག་པའི་ཆོ་གས་འཇུག་པར་བྱའོ། །དེ་ནས་དབུས་སུ་གནས་གྱུར་ནས། །དགུག་པ་འདི་ནི་བྱ་བ་ཡིན། །ཞེས་བྱ་བ་ནི་དེ་ལྟར་དཀྱིལ་འཁོར་བྲིས་ནས་རྡོ་རྗེ་ཧཱུཾ་མཛད་ཀྱི་སྦྱོར་བ་བྱས་ཏེ་ཇི་ལྟ་བ་བཞིན་དུ་ཞུགས་ཏེ། དེའི་རྗེས་ཐོགས་ཉིད་ལ་དཀྱིལ་འཁོར་གྱི་དབུས་སུ་འདུག་པར་བསམས་པས་སྒོ་དབྱེ་བའི་ཕྱག་རྒྱས་དཀྱིལ་འཁོར་གྱི་སྒོ་རྣམས་ཕྱེ་ནས། དེ་རྗེས་ལ་འོག་ནས་བཤད་པའི་དགུག་པར་བྱའོ། །གསང་བའི་ལྕགས་ཀྱུ་དྲིལ་བཅས་པས། །འདིར་ནི་ཞེས་བྱ་བ་ལ་སོགས་པ་གོ་བར་ཟད་དོ། །དེ་དག་གོ་རིམས་ཇི་བཞིན་དུ། དཀྱིལ་འཁོར་ཐམས་ཅད་བསྒྲུབ་པར་བྱ། །ཞེས་བྱ་བ་ནི་རེ་ཞིག་དང་པོར་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ལྷ་རྣམས་རང་གི་དམ་ཚིག་གི་ཕྱག་རྒྱ་རྣམས་ཀྱིས་དེ་བཞིན་ཉིད་དུ་བསྒྲུབ་པར་བྱའོ། །དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ཀྱི་ལྷ་རྣམས་བསྒྲུབ་པར་བྱ་སྟེ། འདི་ནི་འདིར་གོ་རིམས་ཇི་བཞིན་བསྒྲུབ་པར་བྱ་བའི་སྒྲའི་དོན་ཡིན་ནོ། །སྒྲུབ་པ་དག་ནི་ཐམས་ཅད་དང༌། །དངོས་གྲུབ་རྣམས་ཀྱང་དེ་བཞིན་ནོ། །ཞེས་བྱ་བ་ནི་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ཀྱི་དཀྱིལ་འཁོར་རྣམས་སུ་ལྷ་ཐམས་ཅད་ཀྱི་སྒྲུབ་པ་གསུངས་པ་དང༌། ལྷ་ཐམས་ཅད་ཀྱི་དངོས་གྲུབ་གསུངས་པ་དེ་ཐམས་ཅད་ཀྱི་དཀྱིལ་འཁོར་ཐམས་ཅད་བསྒྲུབ་པ་སྒྲུབ་པ་པོ་ལ་འགྲུབ་པར་འགྱུར་རོ། །ཅིའི་ཕྱིར་ཞེ་ན་ཡང༌། བདེ་བ་ཐམས་ཅད་མི་འགྱུར་གནས། །ཞེས་བྱ་བ་ལ་སོགས་པ་གསུངས་ཏེ། བདེ་བ་ཡང་ཡིན་ལ་ཐམས་ཅད་ཀྱང་ཡིན་པས་བདེ་བ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པ་ལྷ་ཐམས་ཅད་ཀྱི་བདེ་བ་
གཉིས་སུ་མེད་པ་སེམས་དང་སེམས་ལས་བྱུང་བའི་མཚན་ཉིད་ཅན་ནོ། །དེ་ཉིད་ནི་མི་འགྱུར་བའི་གནས་ཏེ་ཆོས་ཀྱི་དབྱིངས་ཐོག་མ་ཐ་མ་མེད་པའི་རང་བཞིན་སེམས་ཅན་གྱི་ཁམས་ཐམས་ཅད་དང༌། རྡོ་རྗེ་སེམས་དཔའ་ལ་སོགས་པའི་བདེ་བ་མངོན་སུམ་དུ་བྱེད་པའི་གཞིར་གྱུར་པའོ། །བདེ་བ་ཆེན་པོ་ཞེས་བཤད་དོ། །ཞེས་བྱ་བ་ནི་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་པའོ། །རྡོ་རྗེ་འདི་ནི་བསྒྲུབ་ལ་སོགས། །འདི་ནི་ཚེ་འདིར་འགྲུབ་པར་འགྱུར། །ཞེས་བྱ་བ་ནི་དེ་བཞིན་ཉིད་ཀྱི་རྡོ་རྗེའི་རང་བཞིན་ཡིན་པས་བདེ་བ་ཆེན་པོ་དེ་ནི་རྡོ་རྗེ་ཡིན་པ་དང༌། དེ་ལས་བྱུང་བའི་དཀྱིལ་འཁོར་འདི་ལ་ཡང་ཉེ་བར་བརྟགས་པས་དེ་སྐད་ཅེས་བྱ་སྟེ། སྒྲུབ་པ་འདི་ལ་སོགས་པའི་དཀྱིལ་འཁོར་སྒྲུབ་པར་བྱེད་པར་བསྒྲུབས་ནས་སྒྲུབ་པ་པོ། ཚེ་འདི་ཉིད་ལ་མངོན་པར་འདོད་པའི་དངོས་གྲུབ་འདི་དག་ཐམས་ཅད་འགྲུབ་པར་འགྱུར་རོ། །དེ་ལྟར་བཤད་པའི་ཚུལ་གྱིས་འགྲུབ་པར་འགྱུར་བར་བཤད་དོ་ཞེས་སྦྱར་རོ། །སྣ་ཚོགས་པ་ཡང་ཡིན་ལ་དོན་དམ་པ་ཡང་ཡིན་པས་སྣ་ཚོགས་པའི་དོན་ཏེ། བསྡུས་པའི་དཀྱིལ་འཁོར་དུ་རྡོ་རྗེ་སེམས་དཔའ་ལ་སོགས་པའི་ཚུལ་ལོ། །དེས་རྣམ་པར་སྦྱང་བ་ནི་ལྷ་ཚོགས་པ་ལ་མོས་པའི་སེམས་ཅད་ཀྱི་ཁམས་རྣམས་རིགས་ལྔ་པོ་རྟོགས་པས་འདོད་ཆགས་ལ་སོགས་པ་དང་བྲལ་བའོ། །དེའི་དོན་གྱི་ཆོ་ག་ནི་ལྷག་པར་གནས་པ་དང༌། ཕྱག་འཚལ་བ་དང་དཀྱིལ་འཁོར་དུ་འཇུག་པ་ལ་སོགས་པའོ། །དེ་ལྟར་འགྲོ་བ་དཔག་ཏུ་མེད་པ་སྟེ། སེམས་ཅན་གྱི་ཁམས་ཚད་མེད་པ་དེས་འདུལ་ཞིང་ལམ་རྟོགས་པ་ལ་གཞག་པ་ནི་འགྲོ་བ་དཔག་ཏུ་མེད་པ་ཀུན་བཏུལ་བ་སྟེ། དེ་ཉིད་ནི་མཐའ་མེད་པ་ཡང་ཡིན་ལ་སྣ་ཚོགས་པ་ཡང་ཡིན་པས་ན་མཐའ་མེད་པའི་སྣ་ཚོགས་པ་སྟེ། མཉམ་པ་མེད་པ་ནི་མཚུངས་པ་མེད་པའོ། །གསུངས་པ་ནི་བཤད་པའོ། །ཕུལ་དུ་གྱུར་པ་ནི་མཆོག་གུ་གྱུར་པའོ། །ཇི་ལྟར་ན་ཕུལ་དུ་བྱུང་བ་ཡིན་ཞེན། གང་གི་ཕྱིར་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་འཛིན་པས་ན། དེ་བཞིན་གཤེགས་པ་ཐམས་ཅད་ཀྱི་རིགས་འཛིན་པའོ། །དེ་བྱེད་པ་ཡང་ཡིན་ལ་བདེ་བའི་མཆོག་ཀྱང་ཡིན་པས་ན་དེ་བྱེད་པའི་
བདེ་བའི་མཆོག་གོ །རྒྱལ་བ་ཐམས་ཅད་དེ་དེ་བཞིན་གཤེགས་པ་ཐམས་ཅད་ཀྱིས་བསྡུས་པའི་དཀྱིལ་འཁོར་འདི་བྱིན་གྱིས་བརླབས་ཤིང་བརྟན་པར་མཛད་པས་ན་སྲིད་པ་བའི་བདེ་བའི་མཆོག་བྱེད་པ་སྟེ། གདུལ་བྱ་རྣམས་ཀྱིས་མི་གནས་པའི་མྱ་ངན་ལས་འདས་པའི་བདེ་བ་སྐྱེད་པར་བྱེད་པ་ཉིད་ཡིན་པའི་ཕྱིར་རོ། །ཡང་འདིའི་དོན་བརྗོད་པར་བྱ་སྟེ། དཔལ་རྡོ་རྗེ་སེམས་དཔའི་སྦྱོར་བས་རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་རྣལ་འབྱོར་ཇི་ལྟ་བ་བཞིན་དུ་བྱས་ལ་འདི་ལས་བཤད་པའི་བྱིན་གྱིས་བརླབས་པ་དང༌། དབང་བསྐུར་བ་དང་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱང་བླངས་ནས་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ་རྣམ་པར་སྒེག་པའི་དགའ་བའི་རྡོ་རྗེ་དང་ཕྱག་བཞིས་ཀྱང་ཕྱག་བྱས་ལ་དེ་ཁོ་ན་ཉིད་དང་ཆོས་དང་དམ་ཚིག་བཟུང་ནས་ཧཱུཾ་ཞེས་ལན་གསུམ་བཟླས་ལ། དམ་ཚིག་གསུམ་གྱི་གླུའི་མཆོད་པ་བྱས་ནས་རང་གི་སྙིང་གའི་ཟླ་བར་ཡིད་ཀྱིས་ཞུགས་ལ། རྡོ་རྗེ་སེམས་དཔའི་ཕྱག་རྒྱ་བཅིངས་ཏེ་ཧཱུཾ་ཨ་ཧཱུཾ་ཧྲཱིཾ་ཏྲཾ་ཞེས་བརྗོད་དོ། །དེར་བསྡུས་པའི་དཀྱིལ་འཁོར་སྤྲུལ་ལ་ལྷ་ཐམས་ཅད་ཀྱི་རང་རང་གི་གནས་སུ་རང་རང་གི་སྙིང་པོས་ལྷ་ཐམས་ཅད་རང་རང་གི་གཟུགས་སུ་བཀོད་ལ། ཨོཾ་བཛྲ་ཨཱཏྨ་ཀོ྅ཧཾ་ཞེས་བྱ་བ་ལ་སོགས་པའི་སྙིང་པོ་གསུམ་བཟླས་ལ་སྔ་མ་བཞིན་དུ་དོན་གསུམ་བསྒོམས་ཏེ། བདག་ནི་རང་ཉིད་བསྡུས་པའི་དཀྱིལ་འཁོར་ཡིན་ནོ་ཞེས་ང་རྒྱལ་བསྐྱེད་ལ་བསྡུས་པའི་དཀྱིལ་འཁོར་གྱི་སྙིང་པོ་ཟློས་ཤིང༌། དུས་ཇི་སྲིད་ཀྱིས་བདག་ཉིད་བསྡུས་པའི་དཀྱིལ་འཁོར་གྱི་ངོ་བོ་ཉིད་དུ་མངོན་སུམ་ལྟར་མཐོང་བར་གྱུར་པ་དེ་སྲིད་ཀྱི་བར་དུ་ཉིན་རེའི་སྦྱོར་བས་བསྒོམ་པར་བྱའོ། །དེ་ནས་ཉིན་ཞག་བདུན་གྱི་བར་དུ་སྔར་བཤད་པའི་ཚུལ་གྱིས་ཏིང་ངེ་འཛིན་གསུམ་བསྒོམ་པ་ནས་བརྩམས་ཏེ་བསྡུས་པའི་དཀྱིལ་འཁོར་བརྩམ་པར་བྱའོ། །དེ་ནས་ཇི་སྐད་དུ་བཤད་པའི་དཀྱིལ་འཁོར་གྱི་དབུས་སུ་སྔ་མ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ལ། སློབ་མ་ལྷག་པར་གནས་པ་དང༌། ལྷ་ལྷག་པར་གནས་པར་བྱས་ནས་ཉི་མ་འཆར་
བའི་དུས་སུ་དཀྱིལ་འཁོར་ཐིག་གདབ་པར་བྱའོ། །དེ་ལ་རེ་ཞིག་དང་པོར་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་གྱི་ཐིག་གདབ་པར་བྱའོ། །དེ་ལ་དཀྱིལ་འཁོར་དབུས་ཀྱི་རེའུ་ཆ་ལ་ཡང་རྡོ་རྗེ་སེམས་དཔའི་དཀྱིལ་འཁོར་གཉིས་པ་འདོད་ཆགས་རྡོ་རྗེ་མའི་གནས་སུ་རྣམ་པར་སྣང་མཛད་ཀྱི་དཀྱིལ་འཁོར་རོ། །ཀི་ལི་ཀི་ལའི་གནས་སུ་རྡོ་རྗེ་མེ་ལྟར་འབར་བའི་དཀྱིལ་འཁོར་རོ། །རྡོ་རྗེ་དྲན་མའི་གནས་སུ་འཇིག་རྟེན་དབང་ཕྱུག་གི་དཀྱིལ་འཁོར་རོ། །རྡོ་རྗེ་འདོད་པའི་དབང་ཕྱུག་མའི་གནས་སུ་འཕགས་པ་ནམ་མཁའི་སྙིང་པོའི་དཀྱིལ་འཁོར་ཐིག་གདབ་པར་བྱའོ། །དེ་ནས་ཚོན་སྣ་ལྔའི་ཕྱེ་མས་རྟེན་དང་བརྟེན་པའི་དཀྱིལ་འཁོར་ཐམས་ཅད་བྲིས་ནས་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་རང་གི་དཀྱིལ་འཁོར་དུ་དགོད་པར་བྱའོ། །དེ་ནས་བཅོམ་ལྡན་འདས་རྣམ་པར་སྣང་མཛད་སྐུ་མདོག་ནག་པོ་ཁྱབ་འཇུག་གི་གཟུགས་ཅན། ཕྱག་བཞི་པ་ཕྱག་གཡས་པ་གཉིས་ན་རྡོ་རྗེ་འཁོར་ལོ་དང་དབྱུག་བ་བསྣམས་པ། གཡོན་གཉིས་ན་གཅིག་གིས་མདུད་བསྣམས་པ། གཉིས་པས་གདན་ལ་སྙེམས་པའི་ཚུལ་གྱིས་གནས་པ་དཀྱིལ་འཁོར་གྱི་དབུས་ནས་ཤར་ཕྱོགས་སུ་གཟིགས་ཏེ་བཞུགས་པར་བྱའོ། །ཨོཾ་བཛྲ་ག་དྷ་ཡན་ཚིནད་ཨ་པྲ་ཏི་ཧ་ཏ་བཛྲ་ཙ་ཀྲེ་ན་ཧོ་བྷ་ག་བཱན་བཛྲ་ཏ་ཐཱ་ག་ཏ་ཛཿ་ཧཱུཾ་བཾ་ཧོཿ་བཛྲ་དྷ་ར་སྟཾ། མི་བསྐྱོད་པ་ལ་སོགས་པ་ནི་སྔར་བཤད་པའི་སྙིང་པོས་རང་གི་གནས་སུ་དགོད་པར་བྱའོ། །བཅོམ་ལྡན་འདས་རྡོ་རྗེ་མེ་ལྟར་འབར་བ་གཏུམ་པའི་དབང་ཕྱུག་གི་གཟུགས་འཛིན་པ། སྐུ་མདོག་སྔོ་བ། སྤྱན་གསུམ་པ་ཕྱག་བཞི་པ། གཡས་རྡོ་རྗེ་རྩེ་གསུམ་དང་རྡོ་རྗེ་འབར་བ་བསྣམས་པ། གཡོན་གྱི་གཅིག་གིས་ཐོད་པ་བསྣམས་པ། གཉིས་པས་རལ་གྲི་བསྣམས་པ་སྙིང་པོ་འདིས་དགོད་པར་བྱའོ། །ཧཱུཾ་བཛྲ་ཀྲོ་དྷ་མ་ཧཱ་ཡོ་གི་ནཱི། ག་ཎེ་ཤྭ་ར་མ་ཧཱ་བཛྲ་ཤཱུ་ལོ་གྲ་བྲ་ནེ་ཧོ་བྷ་ག་བཱན་བཛྲ་ཙིནྡྷ་ཤྭ་རཱ་ཡ་ཧ་ཧ་ཧ་ཧ་ཧོ། །རྡོ་རྗེ་མཚོན་ཆ་མ་ལ་སོགས་པ་ལྷག་མ་རྣམས་ནི་སྔ་མ་བཞིན་དུ་བྲི་བར་བྱའོ། །རྡོ་རྗེ་གཙུག་ཏོར་ལ་སོགས་པ་ཡང་ཐིག་བདུན་གྱི་ནང་དུ་བྱའོ། །དེ་ནས་འཇིག་རྟེན་དབང་ཕྱུག་ཚངས་
པའི་གཟུགས་འཛིན་པ། སྐུ་མདོག་དཀར་པོ་ཞལ་བཞི་པ་ཕྱག་གཡས་པ་གཉིས་ན་ཕྲེང་བ་དང་དབྱུག་པ་བསྣམས་པ། གཡོན་གཉིས་ན་སྤྱི་བླུགས་དང་པདྨ་བསྣམས་པ། རང་གི་དཀྱིལ་འཁོར་གྱི་དབུས་སུ་སྙིང་པོ་འདིས་དགོད་པར་བྱའོ། །ཧྲཱི་བཛྲ། པདྨོད་བྷ་ག་བཱ་ན་བཛྲ་ཨ་བ་ལོ་ཀི་ཏེ་ཤྭ་རཱ་ཡ་མ་ཧཱ་བྲཧྨ་སིདྡྷ་ཨོཾ་བྷུར་བྷུ་བ་སྭཿ་རི་ན་མཿ་སྭཱ་ཧཱ། པདྨའི་ཏིང་ངེ་འཛིན་བཟང་པོ་ལ་སོགས་པ་སྔ་མ་ཁོ་ན་ལྟར་བྲི་བར་བྱའོ། །དེ་ལྟར་འཇིག་རྟེན་དབང་ཕྱུག་གི་དཀྱིལ་འཁོར་བྲིས་ནས། འཕགས་པ་ནམ་མཁའི་སྙིང་པོ་རང་གི་དཀྱིལ་འཁོར་གྱི་དབུས་ན་འདོད་པའི་དབང་ཕྱུག་གི་གཟུགས་འཛིན་པ་སྐུ་མདོག་དམར་པོ་ཕྱག་མཚན་རྡོ་རྗེ་མེ་ཏོག་དང་བཅས་པ་སྙིང་པོ་འདིས་བྲི་བར་བྱའོ། །ཧེ་བཛྲ་ཀུ་སུ་མེ་ཨ་སུ་དྷ་སརྦ་ཀརྨ་ན་མེ་ས་དཱ་ཡ་ཧི་བྷ་ག་བཱན་བཛྲ་ཨཱ་ཀཱ་ཤ་གརྦྷ་བ་ཌ་ཌ་ཏྲཱཾ། དབང་བསྐུར་པའི་རིན་པོ་ཆེ་ལ་སོགས་པ་གཞན་དག་ནི་དེ་བཞིན་དུ་བྲི་བར་བྱའོ། །ཡང་གཞིའི་དཀྱིལ་འཁོར་གྱི་མེའི་མཚམས་སུ་བཅོམ་ལྡན་འདས་ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་པ་དཔལ་མོའི་གཟུགས་འཛིན་པ། སྐུ་མདོག་གསེར་བཙོ་མའི་མདོག་འདྲ་བ་ཕྱག་གཡས་ན་འཁོར་ལོ་གཡོན་པ་ན་པདྨ་བསྣམས་པ་སྙིང་པོ་འདིས་བྲི་བར་བྱའོ། །ན་མོ་ཡེ་ན་ས་ཏྱེ་ན་བྷ་ག་ཝ་ཏི་པྲ་ཛྙཱ་པཱ་ར་མི་ཏ་སྤུ་ཏ་ཚིནྡྷ་བཛྲ་ནི་ཙ་ཀྲེ་ན། ཏེ་ན་ས་ཏྱེ་ན་བ་བ་ཀ་ན་ཨོཾ་དྷཱི་ཤྲཱི་ཤུདྡྷི་བི་ཛ་ཡེ་སྭཱ་ཧཱ། དེ་ནས་བདེན་བྲལ་གྱི་མཚམས་སུ་རྡོ་རྗེ་འཛིན་མ་ཨུ་མའི་གཟུགས་འཛིན་མ་གསེར་གྱི་མདོག་ཅན་ཕྱག་གཡས་ན་རྡོ་རྗེ་རྩེ་གསུམ་བསྣམས་པ། གཡོན་ན་མདུང་རྩེ་གསུམ་པ་བསྣམས་པའི་སྙིང་པོ་འདིས་བྲིས་བར་བྱའོ། །ཨོཾ་བཛྲ་གཽ་རཱི་མ་ཧི་བ་དྷེ་ཏྲཻ་ལོ་ཀྱ་བཛྲཱ་ཡ་ཤྭ་རི་བཛྲ་ཀྲོ་དྷ་ཨགྣི་ས་མ་ཡེ་བཛྲ་དྷ་རིན་མ་སྟུ་ཏེ། ཏདྱ་ཐཱ། ཧི་ལི་མི་ལི། ལེ་ལི་ལ་ལོ་བཛྲ་ཀཱ་མ་ཀ་ཡེ་སྭཱ་ཧཱ། རླུང་གི་མཚམས་སུ་སྒྲོལ་མ་སྐུ་མདོག་ལྗང་གུ་ཕྱག་གཡོན་གྱིས་པདྨ་བསྣམས་པ། ཕྱག་གཡས་ཀྱིས་མཆོག་སྩོལ་བ། སྙིང་པོ་འདིས་བྲི་བར་བྱའོ། །ན་མོ་ཡེ་ན་སཏྱེ་ན་མ་བྷ་ག་ཝ་ཏི་བུདྡྷ་བོ་དྷི་ར་ནུཏྟ་ར་བཛྲ་དྷརྨ་པྲ་ཡོ་གེ་ན་ཏེ་ན་ས་ཏྱེ་ན་སི་དྡྷ་མཾ་ཨོཾ་ཏཱ་རེ་ཏུ་ཏྟཱ་རེ་ཏུ་རེ་
སྭཱ་ཧཱ། དེ་ནས་དབང་ལྡན་གྱི་མཚམས་སུ་ནམ་མཁའ་རྡོ་རྗེ་མ་དགའ་བའི་གཟུགས་འཛིན་པ། སྐུ་མདོག་དམར་པོ་རྡོ་རྗེ་དང་བཅས་པས་མཚོན་ཆ་བསྣམས་པ་སྙིང་པོ་འདིས་བྲི་པར་བྱའོ། །ཨོཾ་ཀརྨ་བཛྲ་ནི་སི་ད་སི་བི་ཤུདྡྷ་སི་སྭཱ་བྷཱ་བ་ཏ། ག་གནོད་བྷ་བ་ཡོ་གེ་ན་སིདྡྷ་མཾ་པར་མ་ཀཥ་རེ། ཏདྱ་ཐཱ། ག་ག་ན་བི་ཤུདྡྷི་སརྦ་ཨ་བྷི་པྲཱ་ཡ་པ་རི་པཱུ་ར་ནི་སྭཱ་ཧཱ། དེ་བཞིན་དུ་གཞིའི་དཀྱིལ་འཁོར་ཕྱིའི་མཚམས་བཞིར་སྒེག་མོ་ལ་སོགས་པ་ཡང་དག་པར་བྲི་བར་བྱའོ། །ཕྱི་དང་ནང་གི་སྒོ་རྣམས་སུ་རྡོ་རྗེ་ལྕགས་ཀྱུ་མ་ལ་སོགས་པ་དགོད་པར་བྱའོ། །ཕྱིའི་དཀྱིལ་འཁོར་གྱི་སྣམ་བུ་ལ་འདོད་པའི་ལྷ་དང༌། ཚངས་པའི་བདག་པོ་དང༌། བདེ་བྱེད་ལ་སོགས་པ་ཆུང་མ་དང་བཅས་པ་དུམ་བུ་དང་པོའི་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་ཚུལ་དུ་བྲི་བར་བྱའོ། །དེ་ནས་ཕྱིའི་དཀྱིལ་འཁོར་གྱི་ཁ་ཁྱེར་ལ་རྡོ་རྗེ་ཚོགས་ཀྱི་དབང་ཕྱུག་མ་པི་ཝང་ལེན་པ་ལ་བརྩོན་པ་བཅུ། གླིང་བུ་ལེན་པ་ལ་བརྩོན་པ་བཅུ། མུ་རཉྫ་ལེན་པ་བཅུ། ཆ་ལང་འཁྲོལ་བ་བཅུ། རྔ་བོ་ཆེ་བརྡུང་བ་བཅུ། རྫ་རྔ་བརྡུང་བའི་སྦྱོར་བས་གནས་པ་བཅུ། གླུ་རིང་ལེན་པས་གནས་པ་བཅུ། མུཉྫ་ལེན་པས་གནས་པ་བཅུ། ཏི་མི་ལ་ལེན་པ་བཅུ་སྟེ། རྡོ་རྗེ་ཚོགས་ཀྱི་དབང་ཕྱུག་བཅུ་ཧཱུཾ་ཞེས་བྱ་བས་གནས་པ་བཅུ་བྲི་བར་བྱའོ། །དེ་ནས་ཇི་ལྟ་བ་བཞིན་དུ་སྒོ་ཕྱེ་ལ་བསྡུ་བ་བྱས་ལ་མཚན་བརྒྱ་རྩ་བརྒྱད་པས་བསྟོད་ལ་དཀྱིལ་འཁོར་གྱི་དབུས་སུ་འདུག་སྟེ། གསང་བའི་ལྕགས་ཀྱུ་མ་རྡོ་རྗེ་དྲི་ལ་བུ་དང་བཅས་པས་དཀྱིལ་འཁོར་གྱི་ལྷ་ཐམས་ཅད་བཀུག་སྟེ། སྙིང་པོ་འདིས་དཀྱིལ་འཁོར་དུ་ཞུགས་པར་བྱའོ། །ཨོཾ་མ་ཧཱ་སུ་ཁ་བཛྲ་སཏྱེ་ཏ་སིདྡྷ་ཧཱུཾ་སརྦ་ཏ་ཐཱ་ག་ཏ་ན་ས་མཱ་ཀཪྵ་ཡ་ཛཿ། སརྦ་བཛྲ་ཀུ་ལ་ཨ་དྷི་པཾ་ད་མ་ཡི་ཏ་པྲ་བེ་ཤ་ཡ་ཧཱུཾ། སརྦ་ལོ་ཀེ་ཤྭ་རཾ། པྲ་བེ་ཤ་ཡ་ས་མ་ཡ་བ་ར་བནྡྷ་ནཿ། སརྦ་རཏྣ་ཨ་དྷི་བཾ་མ་ནི་རོ་ཛམ་བ་ཤི་ཀུ་རུ་ཧོ་ཧཱུཾ་ཨ་ཧཱུཾ་ཧྲཱི་ཏྲཱཾ། དེ་ནས་རྡོ་རྗེ་གནོད་སྦྱིན་གྱིས་བགེགས་བསལ་བ་ལ་སོགས་པ་བྱས་ལ་རྡོ་རྗེ་ཁུ་ཚུར་གྱིས་སྒོ་རྣམས་བཅད་དེ། རྡོ་རྗེ་གོ་ཆས་སྲུང་བ་ཐམས་ཅད་ཡང་དག་བར་བསྲུངས་ལ་བསྡུས་པའི་དཀྱིལ་འཁོར་ལས་བཤད་པའི་སྙིང་པོས་མཆོད་ཡོན་ཕུལ་
ཏེ། རང་གི་དམ་ཚིག་གི་ཕྱག་རྒྱ་རྣམས་ཀྱིས་རྡོ་རྗེ་སེམས་དཔའ་ལ་སོགས་པ་ནས་ཆུ་ལྷའི་བར་དུ་བསྒྲུབ་པར་བྱའོ། །རྡོ་རྗེ་སེམས་དཔའ་ལ་སོགས་པ་ནི་རང་རང་གི་དཀྱིལ་འཁོར་ལས་བཤད་པ་ལྟར་བསྒྲུབ་པར་བྱའོ། །འདོད་པའི་ལྷ་དང་ཚངས་པ་ལ་སོགས་པ་ནི་ཧཱུཾ་དྲྀ་ཤྱ་ས་མ་ཡ་སྟྭཾ་ས་མ་ཡ་ཧོ་དྷཾ་ཛཿ་ཧཱུཾ་བཾ་ཧོཿ་ཞེས་ལན་གསུམ་ཟློས་ཤིང་དང་པོའི་རྡོ་རྗེས་བཅིངས་ལ་ཚོགས་ཀྱི་དབང་ཕྱུག་གི་བར་དུ་བསྒྲུབ་པར་བྱའོ། །དེ་ནས་རྡོ་རྗེ་སེམས་དཔའ་ལ་སོགས་པ་ཆོས་དང་ལས་དང༌། ཕྱག་རྒྱ་ཆེན་པོས་རྒྱས་གདབ་པར་བྱའོ། །དེ་ནས་རྡོ་རྗེ་སེམས་དཔའ་ལ་སོགས་པ་ནི་རང་གི་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་རོ། །རྡོ་རྗེ་སྲེད་མེད་ཀྱི་བུ་ལ་སོགས་པ་བཞི་ནི་རྡོ་རྗེ་རིན་ཆེན་གྱི་ཕྱག་རྒྱས་དབང་བསྐུར་རོ། །དེ་ནས་སློབ་དཔོན་གྱི་ཆོ་ག་ཐམས་ཅད་སྔ་མ་བཞིན་དུ་རྗེས་སུ་སྤྱད་པར་བྱའོ། །རིགས་ལྔའི་དཀྱིལ་འཁོར་དུ་བཤད་པ་ལས་ཁྱད་པར་ནི་འདི་ཡིན་ཏེ། ཇི་ལྟར་བཞིའི་དཀྱིལ་འཁོར་དུ་རྡོ་རྗེ་སེམས་དཔའི་དཀྱིལ་འཁོར་ལས་བཤད་པའི་ཆོ་གས་བསྡུས་པའི་དཀྱིལ་འཁོར་དུ་འཇུག་པའི་གླུའི་མཆོད་པ་ཟློས་ཤིང་འཇུག་པར་བྱའོ། །དེའི་རྗེས་ལ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་དུ་རང་གི་ཆོ་གས་སོ། །སློབ་དཔོན་གྱི་ལས་ཀྱི་ཆོ་ག་རྒྱས་པའོ། །དེ་ནས་སློབ་མ་བསྡུས་པའི་དཀྱིལ་འཁོར་དུ་བཤད་པའི་ཀླུའི་མཆོད་པ་བཞིའི་དཀྱིལ་འཁོར་དུ་བཅུག་ལ། དེའི་འོག་ཏུ་རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་གྱི་ཆོ་གས་རིགས་ལྔའི་དཀྱིལ་འཁོར་དུ་གཞུག་པའི་ཆོ་ག་ཐམས་ཅད་རྗེས་སུ་སྤྱད་པར་བྱའོ། །སློབ་མ་འཇུག་པ་ལ་སོགས་པའི་ཆོ་ག་རྫོགས་སོ། །བསྡུས་པའི་དཀྱིལ་འཁོར་བཤད་པར་རྫོགས་སོ།། །།རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་དེ། རྡོ་རྗེ་སེམས་དཔའ་ལ་སོགས་པའི་དཀྱིལ་འཁོར་བཅུ་པོ་བཤད་མ་ཐག་པ་ཉིད་དོ། །དེ་ཉིད་ནི་རྒྱུད་ཕྱི་མ་ཡིན་ལ་དེ་བས་ན་རྩ་བའི་རྒྱུད་ཡོངས་སུ་རྫོགས་པ་ཡིན་ནོ། །དེ་ལྟར་རྟོག་པ་ཐམས་ཅད་ཀྱི་རྒྱུད་ཕྱི་མ་དང༌། རྩ་བའི་རྒྱུད་བཤད་ནས་ད་ནི་དེ་ལས་ཀྱི་སྒྲིབ་པའི་དབང་གིས་རྣལ་འབྱོར་
པས་མ་གྲུབ་ན། གསང་བའི་ལེའུའི་དཀྱིལ་འཁོར་འདོད་པའི་དངོས་གྲུབ་ཐམས་ཅད་སྒྲུབ་པར་བྱེད་པའི་ཁྱད་པར་གྱི་རང་བཞིན་བསྟན་པའི་ཕྱིར། སངས་རྒྱས་ཀུན་གྱི་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཀུན་ནི་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པ་སྟེ། དེ་རྣམས་ཀྱི་གསང་བ་ཡང་ཡིན་ལ་ཆེན་པོ་ཡང་དེ་ཉིད་ཡིན་པས་གསང་བ་ཆེ་སྟེ། སྐྱེ་བོ་ཐམས་ཅད་དང་ཐུན་མོང་མ་ཡིན་པའི་ལྷ་མོ་བཞི་དང་ལྷན་ཅིག་ཏུ་བཞུགས་པའི་བཅོམ་ལྡན་འདས་རྡོ་རྗེ་སེམས་དཔའོ། །དམ་ཚིག་མཆོག་ཅེས་བྱ་བ་ནི་དེ་ཉིད་དམ་ཚིག་ཀྱང་ཡིན་ལ་མཆོག་ཀྱང་ཡིན་པས་ན་དམ་ཚིག་མཆོག་གོ །དེའི་སྒྲུབ་པ་ནི་དཔལ་དགྱེས་པ་ཆེན་པོའི་གནས་ཏེ་དེར་བཞུགས་པའོ། །དེ་གང་ཡིན་ཞེ་ན། རྒྱལ་པོ་མཆོག་ཅེས་བྱ་བ་དང་སྦྱར་རོ། །སླར་ཡང་གནས་ཀྱི་ཁྱད་པར་བསྟན་པར་བྱ་བའི་ཕྱིར་བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། བདེ་བ་ཆེན་པོ་ནི་རྡོ་རྗེ་སེམས་དཔའོ། །དེའི་གཞལ་ཡས་ཁང་པ་ནི་བདེ་བ་ཆེན་པོའི་གཞལ་ཡས་ཁང་པའོ། །དངོས་གྲུབ་ཀུན་གྱི་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ཏེ། དེ་དག་གིས་མངོན་པར་འདུ་བྱས་པ་ནི་རྫོགས་པའམ། དེའི་དོན་དུ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་འདུས་ཏེ་བྱོན་པ་ནི། དེ་བཞིན་གཤེགས་མཆོག་ཆེན་པོའི་རིན་ཆེན་རྒྱལ་པོའོ། །སོགས་པའི་སྒྲས་ནི་གཟུངས་དང༌། རིག་པ་དང༌། རྡོ་རྗེ་འཆང་ཆེན་པོ་དང༌། བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ཀྱང་གཟུང་བར་བྱའོ། །དེ་བཞིན་གཤེགས་མཆོག་ཆེན་པོ་ཡི། །རིན་ཆེན་རྒྱལ་པོ་ལ་སོགས་པ་དེ་རྣམས་ཀྱིས་བརྒྱན་པ་དེ་ཡིན་ནོ། །བདེ་བ་ཆེན་པོ་ཆགས་པ་ཆེ། །ཞེས་བྱ་བ་ལ་བདེ་བ་ཆེན་པོ་ཡང་ཡིན་ལ་ཆགས་པ་ཆེན་པོ་ཡང་ཡིན་པས་ན། བདེ་བ་ཆེན་པོ་ཆགས་པ་ཆེ་སྟེ། ལྷ་མོའི་དཀྱིལ་འཁོར་གྱི་དབུས་ན་བཞུགས་པའི་དཔལ་རྡོ་རྗེ་སེམས་དཔའོ། །དངོས་གྲུབ་ཀུན་ལ་རྗེས་ཆགས་ཕྱིར། །བཅོམ་ལྡན་འདས་ནི་ཆགས་པ་ཆེ། །དམར་
དང་སྣ་ཚོགས་མཛེས་པའི་འོད། །དཔལ་རྡོར་སེམས་དཔའི་ཕྱག་རྒྱ་འདི། །ཞེས་འོག་ནས་གསུངས་པའི་ཕྱིར་རོ། །རྡོ་རྗེ་སེམས་དཔའ་དེའི་གླུ་ནི་འོག་ནས་འཆད་པར་འགྱུར་བའི་མཚན་ཉིད་ཅན་ཡི་གེ་ཧཱུཾ་གི་གླུ་དང་རོལ་མོ་སྟེ། དེ་དག་གི་རྗེས་སུ་ཆགས་པ་ནི་རྗེས་སུ་སྒྲུབ་པ་བདེ་བ་ཆེན་པོ་ཆགས་པ་ཆེན་པོའི་གླུ་དང་རོལ་མོ་རྗེས་སུ་ཆགས་པ་གང་ལ་ཡོད་པ་དེ་ལ་འདི་སྐད་ཅེས་བྱའོ། །བླ་མེད་དགའ་བ་ཆེན་པོ་ཡི། །མཆོད་པ་ཀུན་གྱིས་རབ་ཏུ་མཆོད། །ཅེས་བྱ་བ་ལ་བླ་ན་མེད་པའི་དགའ་བ་ཆེན་པོའི་ཡིད་བདེ་བས་འདོད་ཆགས་རྡོ་རྗེ་མ་ལ་སོགས་པའི་མཆོད་པ་བཅུ་གཉིས་དང༌། ཕྱིའི་མེ་ཏོག་ལ་སོགས་པའི་མཆོད་པ་ཐམས་ཅད་ཀྱིས་རབ་ཏུ་མཆོད་པ་གང་ཡིན་པ་དེར་རོ། །དགའ་བ་ཆེན་པོ་ཞེས་བྱ་བ་ལ། ཆེན་པོ་ནི་བྱང་ཆུབ་ཀྱི་མཚན་ཉིད་ཅན་གྱི་ཐུགས་དང་སེམས་ཅན་གྱི་དོན་ལ་ཆགས་པས་ནི་དགའ་བ་ཆེན་པོས་རྡོ་རྗེ་སེམས་དཔའོ། །དེའི་དཔལ་གྱི་གནས་ནི་འདོད་ཆགས་རྡོ་རྗེ་མ་ལ་སོགས་པའི་ལྷ་མོའི་ཚོགས་དང་ལྡན་པའི་གཞལ་ཡས་ཁང་པའོ། །དེ་ལྟ་བུའི་གནས་ཀྱི་མཆོག་དེ་ལ་བཅོམ་ལྡན་འདས་བཞུགས་པ་ཡིན་ནོ། །རབ་ཏུ་དགའ་བའི་རྒྱལ་པོ་མཆོག །ཅེས་བྱ་བ་ནི་ཇི་ལྟར་བཤད་པ་བཞིན་དུའོ། །མི་འགྱུར་མཆོག་ནི་རྟག་པའོ། །དེ་གང་ཞེ་ན། རྡོ་རྗེ་སེམས་དཔའ་བདག་རང་ཉིད། །རབ་ཏུ་དགའ་བ་མི་འགྱུར་མཆོག །ཀུན་དུ་བཟང་པོ་འཁོར་བ་དང༌། །བྱང་ཆུབ་སེམས་དཔའ་དེ་བཞིན་གཤེགས། །ཞེས་བྱ་བའོ། །དངོས་གྲུབ་ཆེན་པོ་ཀུན་གྱི་མཆོག །ཅེས་བྱ་བ་ལ་དངོས་གྲུབ་ཀྱང་ཡིན་ལ་ཆེན་པོ་ཡང་ཡིན་པས་དངོས་གྲུབ་ཆེན་པོ་སྟེ། དེ་ཉིད་ཐམས་ཅད་ཀྱི་མཆོག་ཡིན་པས་ན། དངོས་གྲུབ་ཀུན་གྱི་མཆོག་ནི་དཔལ་རྡོ་རྗེ་སེམས་དཔའི་དངོས་གྲུབ་བོ། །དེས་རྡོ་རྗེ་སྙེམས་པ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་དང་ལྷ་མོ་རྡོ་རྗེ་སྙེམས་མའི་བདག་པོ་ནི་བཅོམ་ལྡན་འདས་བྱང་ཆུབ་ཆེན་པོའི་ཐུགས་ཀྱི་རང་བཞིན་རྡོ་རྗེ་འཆང་ཆེན་པོའོ། །དེ་ཉིད་རིགས་ཀྱི་ལྷ་མོ་ཐམས་ཅད་བྱང་ཆུབ་སེམས་ལས་བྱུང་བའི་ཕྱིར། དེ་རྣམས་ཀྱི་ཡང་བདག་པོ་ཡིན་ནོ་ཞེས་བྱ་བ་བདག་པོའི་སྒྲ་གཉིས་པས་བསྟན་པ་
ཡིན་ནོ། །དེ་ལྟར་ན་ཐམས་ཅད་ཅེས་བྱ་བ་ནས་བདག་པོའི་བདག་ཅེས་བྱ་བའི་བར་དུ་བཤད་པས་ཏིང་ངེ་འཛིན་དང་པོ་བསྟན་པ་ཡིན་ནོ། །འཇིག་རྟེན་དང་འཇིག་རྟེན་ལས་འདས་པའི་ལྷ་ཐམས་ཅད་ཀྱི་མཆོག་ཡིན་པས་ན་ཀུན་མཆོག་གོ །ཀུན་མཆོག་ཀྱང་ཡིན་ལ་ཆགས་པ་ཆེན་པོ་ཡང་དེ་ཉིད་ཡིན་པས་ཀུན་མཆོག་ཆགས་པ་ཆེན་པོའོ། །དེའི་དངོས་གྲུབ་ནི་གདུལ་བྱའི་སྐྱེ་བོའི་རྒྱུད་ལ་རྫོགས་པའོ། །དེས་གདུལ་བྱ་དེ་མ་ལུས་ཤིང་ལུས་བ་མེད་པའི་ཁམས་གསུམ་གྱི་བདག་པོ་ཉིད་དོ། །དེའི་རྗེས་སུ་སྒྲུབ་པ་ནི་རྫོགས་པར་མཛད་པའོ། །གླུ་དང་རོལ་མོ་ཞེས་བྱ་བའི་ཡི་གེ་ཧཱུཾ་གི་གླུ་གསུངས་པ་དང༌། པི་ཝང་ལ་སོགས་པའི་རོལ་མོ་སྟོན་པར་བྱེད་པའི་ཧཱུཾ་སྟེ་དེ་ཉིད་རོལ་མོའོ། །དེ་ཉིད་ནི་དོན་དམ་པར་དབུས་དང་མཐའ་མེད་པའི་ཐོག་མཐའ་མེད་པ་སྟེ། སྔར་གསུངས་པ་ཡིན་ཡང་སྦྱོར་བའི་ཁྱད་པར་གྱིས་སླར་ཡང་གསུངས་པ་ཡིན་ནོ།། དེ་གང་ཡིན་ཞེ་ན་ཧཱུཾ་ཞེས་པའོ། །དེ་ཐམས་ཅད་འཛིན་པ་ཞེས་བྱ་བ་ལ། རྡོ་རྗེ་སེམས་དཔའ་དང༌། ཆགས་པའི་རྡོ་རྗེ་མ་དང༌། ཀཱི་ལི་ཀཱི་ལ་དང༌། རྡོ་རྗེ་དྲན་མ་དང༌། རྡོ་རྗེ་འདོད་པའི་དབང་ཕྱུག་མ་རྣམས་ཀྱི་དེ་བཞིན་ཉིད་དང་རོ་གཅིག་པའི་ཡེ་ཤེས་རྣམས་ནི་རྡོ་རྗེ་ཐམས་ཅད་དོ། །དེ་རྣམས་དང་རྒྱུ་མཐུན་པའི་དང་པོའི་རྡོ་རྗེ་ནི་རྡོ་རྗེ་ཐམས་ཅད་དོ། །དེ་འཛིན་པར་མཛད་པས་ན་རྡོ་རྗེ་འཛིན་པས་ཏེ། རྡོ་རྗེ་ཐམས་ཅད་འཛིན་པ་དེ་ཡིན་ནོ། །ནིའི་སྒྲ་ནི་ངེས་པར་གཟུང་བ་སྟེ། རྡོ་རྗེ་ཐམས་ཅད་འཛིན་པ་ཁོ་ནའོ་ཞེས་བྱའོ། །གསང་བ་ལྔ་ཡི་དེ་ཉིད་ཆེ། །ཞེས་བྱ་བ་ནི་བྱང་ཆུབ་ཀྱི་སེམས་དང༌། དེ་སོ་སོར་རྟོག་པ་དང༌། མངོན་དུ་བྱ་བ་དང༌། ཡོངས་སུ་མི་སྤང་བ་དང༌། ཐོབ་པའི་མཚན་ཉིད་ཅན་གྱི་ཡེ་ཤེས་རྣམས་སོ། །དེ་ལས་བྱུང་བའི་དགའ་བ་ཆེན་པོ་དཔལ་རྡོ་རྗེ་དོན་ཡོད་པའི་ཆགས་པའི་དམ་ཚིག་གིས་འདོད་པའི་རྡོ་རྗེ་མལ་སོགས་པ་ལྷ་མོ་བཞི་པའོ། །རྡོ་རྗེ་མདའ་ལ་སོགས་པ་ཉེ་བར་མཚོན་པ་རྣམས་ནི་གསང་བ་ལྔའི་དེ་ཁོ་ན་ཉིད་ཆེན་པོའི་ཕྱག་རྒྱའི་ལྷ་མོ་རྣམས་སོ། །དེ་དག་རྡོ་རྗེ་ཐམས་ཅད་འཛིན་པའི་སྐུ་གསུང་ཐུགས་ཀྱི་རྡོ་རྗེ་རྣམས་ལས་བྱུང་བ་ཡིན་ནོ། །ཇི་སྐད་དུ། རྡོ་རྗེ་འཆང་ནི་ཆེན་པོ་
ཡི། །སྐུ་གསུང་ཐུགས་ཀྱི་རྡོ་རྗེ་ལས། །དེ་ཉིད་ཕྱག་རྒྱ་བྱུང་བ་ཡིན། །ཞེས་འོག་ནས་གསུངས་པའི་ཕྱིར་རོ། །རྟག་པ་ཡང་ཡིན་ལ་ཆགས་པ་ཡང་དེ་ཉིད་ཡིན་པས་རྟག་ཏུ་ཆགས་པས་ཏེ། དེ་ལྟར་བྱུང་བའི་རང་བཞིན་གྱིས་རྟག་ཏུ་བཞུགས་པ་ཀུན་མཆོག་སོ་སོར་རྟོག་པའི་ལྷ་མོའི་གཟུགས་ཅན་གྱི་རྡོ་རྗེ་སེམས་དཔའོ། །དངོས་གྲུབ་ཀྱང་ཡིན་ལ་ཆེན་པོ་ཡང་དེ་ཉིད་ཡིན་པས་ན་དངོས་གྲུབ་ཆེན་པོ་སྟེ། བྱང་ཆུབ་ཆེན་པོའི་མཚན་ཉིད་ཅན་གྱི་སེམས་དང་སེམས་ལས་བྱུང་བ་མངོན་དུ་བྱ་བའི་དངོས་གྲུབ་ཐམས་ཅད་ཀྱི་བདེ་བ་དམ་པའི་གཟུགས་ཅན་གྱི་རྡོ་རྗེ་སེམས་དཔའོ། །རྣམ་རྒྱལ་ནི་ལྟ་བ་དྲུག་ཅུ་རྩ་གཉིས་ཀྱི་རང་བཞིན་དག་པའི་སོ་སོར་རྟོགས་ནས་སྤང་བའམ་མི་གནས་པའི་མྱ་ངན་ལས་འདས་པས་འཆི་བདག་གི་བདུད་ལས་རྣམ་པར་རྒྱལ་བ་སྟེ། ཀུན་མཆོག་རྣམ་པར་རྒྱལ་བ་མཐོང་བའི་ལྷ་མོའི་གཟུགས་ཅན་སེམས་དཔའོ། །དབང་ཕྱུག་ནི་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་བདག་པོ་ཉིད་དེ། ཐམས་ཅད་ཀྱི་དབང་ཕྱུག་མཆོད་པ་ཆེན་པོའི་ལྷ་མོའི་གཟུགས་ཅན་བཅོམ་ལྡན་འདས་ཡིན་ནོ། །རྟག་ཏུ་ཆགས་པ་དང༌། དངོས་གྲུབ་ཆེན་པོ་དང་རྣམ་པར་རྒྱལ་བ་དང་དབང་ཕྱུག་ནི། རྟག་ཏུ་ཆགས་དང་དངོས་གྲུབ་ཆེ། །རྣམ་རྒྱལ་དབང་ཕྱུག་ཆེ་རྣམས་སོ། །དེ་རྣམས་ཀྱི་ལྷག་པའི་ལྷ་ནི་ལྷག་པའི་ལྷའོ། །དེ་དག་གང་ཡིན་ཞེ་ན་བཞི་པོ་རྣམས་སོ། །ཕྱག་རྒྱ་དམ་པ་ཞེས་བྱ་བ་ནི་ཕུལ་དུ་བྱུང་བའོ། །ཕྱག་རྒྱ་དམ་པ་བཞི་པོ་དེ་དག་ཇི་ལྟ་བུ་ཡིན་ཞེ་ན། སེམས་དཔས་བྱིན་གྱིས་བརླབས་པའི་སྐུ་ཞེས་བྱ་བ་སྨོས་ཏེ། རྡོ་རྗེ་སེམས་དཔའ་ནི་རྡོ་རྗེ་སེམས་དཔའ་སྟེ། དེས་བྱིན་གྱིས་བརླབས་པ་ནི་བརྟན་པར་བྱ་བ་སྟེ། དེའི་དོན་དུ་རིག་པའི་ལྷ་མོ་སྐུ་གཟུགས་ཅན་ཡིན་པས་ན་སེམས་དཔས་བྱིན་གྱིས་བརླབས་པའི་སྐུ་གཟུགས་ཡིན་ནོ། །འདིས་ནི་འདི་ལྟར་བཤད་པར་འགྱུར་ཏེ། འདི་རྣམས་དཔལ་རྡོ་རྗེ་སེམས་དཔའི་ཡན་ལག་ཡིན་ནོ་ཞེས་བྱའོ། །ཀུན་མཆོག་སོ་སོར་རྟོག་པ་དང༌། །ཞེས་བྱ་བ་ལ་ཐམས་ཅད་ཀྱི་མཆོག་ནི་ཀུན་མཆོག་སྟེ། ཐོག་མ་དང་ཐ་མ་མེད་པ་ཆོས་ཀྱི་དབྱིངས་བྱང་ཆུབ་ཆེན་པོའི་ཐུགས་ཀྱི་རང་བཞིན་ཅན་རྡོ་རྗེ་
སེམས་དཔའོ། །དེའི་སོ་སོར་རྟོག་པ་ནི་དེའི་རང་བཞིན་མངོན་དུ་བྱེད་པའི་གཟུགས་ཅན་ཆོས་བདག་མེད་པ་བསྒོམ་པའི་རང་བཞིན་ཅན་འདོད་ཆགས་རྡོ་རྗེ་མའོ་ཞེས་བྱ་བའི་ཐ་ཚིག་གོ །དངོས་གྲུབ་ཀུན་གྱི་བདེ་བའི་མཆོག །ཅེས་བྱ་བ་ལ་དཔལ་རྡོ་རྗེ་སེམས་དཔའི་གཉིས་སུ་མེད་པའི་སེམས་དང་སེམས་ལས་བྱུང་བའི་རྣལ་འབྱོར་པ་རྣམས་ཀྱིས་མངོན་སུམ་དུ་བྱ་བ་གང་ཡིན་པ་དེ་ནི་དངོས་གྲུབ་ཀུན་ཏེ་དེ་ཉིད་བདེ་བའོ། །གཟུགས་དེས་མཆོག་ནི་བཅོམ་ལྡན་འདས་མ་ཀཱི་ལི་ཀཱི་ལའོ། །ཀུན་མཆོག་རྣམ་རྒྱལ་མཐོང་བ་མ། །ཞེས་བྱ་བ་ལ་དེ་ཉིད་དཔལ་རྡོ་རྗེ་སེམས་དཔའི་གཉིས་སུ་མེད་པའི་སེམས་དང་སེམས་ལས་བྱུང་བའི་རང་བཞིན་གང་རྣལ་འབྱོར་པས་རྟོགས་པར་འགྱུར་བ་དེ་ནི་ཀུན་མཆོག་སྟེ། འཇིག་རྟེན་དང་འཇིག་རྟེན་ལས་འདས་པའི་ཡེ་ཤེས་ཐམས་ཅད་ལས་ཕུལ་དུ་བྱུང་བའི་ཕྱིར་རོ། །དེས་རྣམ་པར་རྒྱལ་བ་ནི་འདོད་ཆགས་ལ་སོགས་པའི་བག་ཆགས་དང་བཅས་པ་སྤངས་པ་དང༌། འཆི་བདག་གི་བདུད་ལས་རྣམ་པར་རྒྱལ་བ་སྟེ། དེའི་མཐོ་བའི་ཡང་མཐོ་བ་སྟེ། དེ་ལས་བྱུང་བའི་རྒྱལ་བའི་བ་དན་གྱིས་ཉེ་བར་མཚོན་པ། བཅོམ་ལྡན་འདས་མ་རྡོ་རྗེ་དྲན་པའོ། །ཐམས་ཅད་དབང་ཕྱུག་མཆོད་པ་ཆེ། །ཞེས་བྱ་བ་ལ་ཐམས་ཅད་ཀྱང་ཡིན་ལ་དབང་ཕྱུག་ཀྱང་དེ་ཉིད་ཡིན་པས་ན་ཐམས་ཅད་དབང་ཕྱུག་སྟེ། སངས་རྒྱས་སྤྲུལ་པ་དང༌། སེམས་ཅན་གྱི་དོན་མཛད་པ་ལ་བདག་པོ་ཉིད་དོ། །དེ་ཡི་མཆོད་པ་ཆེན་པོ་ནི། །ཐམས་ཅད་དབང་ཕྱུག་མཆོད་པ་ཆེ་བ་སྟེ། བཅོམ་ལྡན་འདས་མ་རྡོ་རྗེ་འདོད་པའི་དབང་ཕྱུག་མའོ། །དངོས་གྲུབ་ཅེས་བྱ་བ་ནི་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་འདོད་ཆགས་རྡོ་རྗེ་མའི་གཟུགས་ཀྱིས་སོ། །བདེ་བ་དང་ཡིད་བདེ་བ་ཉམས་སུ་མྱོང་བའི་རང་བཞིན་ཅན་གྱི་ཕུན་སུམ་ཚོགས་པ་ཐམས་ཅད་ནི་ཀཱི་ལི་ཀཱི་ལ་མའི་གཟུགས་ཀྱིས་སོ། །འདོད་ཆགས་ལ་སོགས་པ་ལས་རྣམ་པར་རྒྱལ་བ་ལས་འདོད་པའི་འབྱུང་བའི་དགའ་བ་ཐམས་ཅད་ནི་རྡོ་རྗེ་དྲན་པ་མའི་གཟུགས་ཀྱིས་སོ། །ཐམས་ཅད་ཀྱི་བདག་པོ་ཉིད་ཀྱི་རང་
བཞིན་ཅན་གྱི་བདག་པོ་ནི་རྡོ་རྗེ་འདོད་པའི་དབང་ཕྱུག་མའི་གཟུགས་ཀྱིས་སོ། །རྡོ་རྗེ་ལྷ་མོ་ཐོག་མཐའ་མེད། །ཅེས་པ་ནི་དབུས་དང་མཐའ་དང་བྲལ་བ་ད་ལྟར་བྱུང་བའི་རང་བཞིན་གྱིས་རྟག་ཏུ་བཞུགས་པ་སྟེ། བཅོམ་ལྡན་འདས་རྡོ་རྗེ་སེམས་དཔའི་མཆོག་གི་སྐུ་དེ་རྣམས་ཡིན་ནོ། །སླར་ཡང་དེ་དག་གསང་བའི་མཆོག་གི་མཚན་རྣམས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དགའ་བ་ཆེན་པོ་ཡང་ཡིན་ལ་དཔལ་རྡོ་རྗེ་དོན་ཡོད་ཀྱང་དེ་ཉིད་ཡིན་པས་ན་དགའ་བ་ཆེན་པོ་དཔལ་རྡོ་རྗེ་དོན་ཡོད་དེ་རྡོ་རྗེ་སེམས་དཔའོ། །དེ་ལ་ཆགས་པ་ནི་དགའ་བ་སྟེ། དེའི་དམ་ཚིག་ནི་འདོད་པའི་རྡོ་རྗེ་མའོ། །རྡོ་རྗེ་སེམས་དཔའི་ཐུགས་ཀྱི་དགྱེས་པ་སྐྱེད་པར་བྱེད་པས་རྒྱུར་གྱུར་པ་བྱང་ཆུབ་སེམས་བསྒོམ་པའི་རང་བཞིན་ཅན་དུ་ཐུགས་གཞན་དུ་འགྱུར་བ་མེད་པ་བཅོམ་ལྡན་འདས་མ་འདོད་ཆགས་རྡོ་རྗེའོ། །དགའ་བ་ཆེན་པོ་དཔལ་རྡོ་རྗེ་དོན་ཡོད་པ་ལ་ཆགས་པ་སྐྱེད་པའི་ཕྱིར་རྒྱུའི་དམ་ཚིག་རྣམ་པར་གྲོལ་བའི་ལས་ཀྱི་རང་བཞིན་ཅན་བཅོམ་ལྡན་འདས་མ་རྡོ་རྗེ་ཀཱི་ལི་ཀཱི་ལ་སྟེ། བཅོམ་ལྡན་འདས་དཔལ་རྡོ་རྗེ་སེམས་དཔའི་ཡིད་བདེ་བ་དང་ཡིད་བདེ་བར་མི་ཕྱེད་པའི་རང་བཞིན་ཡིན་ནོ་ཞེས་བྱ་བའི་དོན་ཏོ། །དགའ་བ་ཆེན་པོ་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེའི་དགའ་བའི་དམ་ཚིག་ནི་དགའ་བའི་རྒྱུ་སྟེ། རྣམ་པར་རྒྱལ་བའི་རྡོ་རྗེ་མ་སྟེ་འདོད་ཆགས་ལ་སོགས་པ་ལས་རྣམ་པར་རྒྱལ་བས་མི་ཕྱེད་པ་རྡོ་རྗེ་དྲན་པ་མའོ། །དགའ་བ་ཆེན་པོ་ཞེས་བྱ་བ་ལ་སོགས་པ་ནི་དེ་བཞིན་ནོ། །རྡོ་རྗེ་འདོད་པ་ནི་ཐམས་ཅད་ལས་སུ་རུང་བའི་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱ་རྣམས་གང་དག་བཅོམ་ལྡན་འདས་རྡོ་རྗེ་སེམས་དཔས་སྤྲུལ་པ་དེ་རྣམས་ཀྱི་དབང་ཕྱུག་མ་གང་ཡིན་པ་དེ་ནི་རྡོ་རྗེ་འདོད་པའི་དབང་ཕྱུག་མ་སྟེ། དགའ་བ་ཆེན་པོ་དཔལ་རྡོ་རྗེ་དོན་ཡོད་ལ་ནི་རྡོ་རྗེ་སེམས་དཔའ་དང༌། གདུལ་བྱ་རྣམས་ཀྱི་དགའ་བ་སྐྱེད་པའི་ཕྱིར་རྒྱུ་ཡིན་ནོ་ཞེས་བྱ་བའོ། །འདི་རྣམས་ཞེས་བྱ་བ་ལ་སོགས་པ་ལ་འདོད་ཆགས་རྡོ་རྗེ་ལ་སོགས་པའི་ལྷ་མོ་རྣམས་ཀྱི་འདས་མ་ཐག་ཏུ་བཤད་པའི་མཚན་རྣམས་ལ་དད་ཅིང་ལྷག་པར་མོས་ནས་མཚན་གྱི་དོན་གང་ཞིག་བུད་མེད་
དམ། སྐྱེས་པའམ། ཁྱེའུའམ། བུ་མོའམ། གང་ཟག་མཁས་པ་གང༌། མཚན་གྱི་དོན་ཤེས་པས་ཀློག་པ་དེ་ནི་དེ་ཉིད་དོ། །གཞན་མ་ཡིན་པའི་ཕྱག་རྒྱ་ཐམས་ཅད་ནི་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཀྱི་བདག་པོ་རྡོ་རྗེ་སེམས་དཔར་འགྱུར་རོ། །དེ་ལྟར་ན་ཀུན་མཆོག་ཆགས་པ་ཆེན་པོ་ཞེས་བྱ་བ་ནས་བརྩམས་ཏེ། གསང་བའི་མཆོག་ཅེས་བྱ་བ་ནི་བར་དུ་བསྟན་པས། ཏིང་ངེ་འཛིན་གཉིས་པ་བསྟན་ཏོ། །དེ་ནས་འདུས་པ་སྔོན་དུ་འགྲོ་བས་གསུམ་པ་ཤེས་པར་བྱའོ། །དེ་ལྟར་ཏིང་ངེ་འཛིན་གསུམ་བསྟན་ནས། ད་ནི་དམ་ཚིག་དང་དབང་བསྐུར་བ་ཐོབ་པས་བཟླས་པ་དང༌། བསྒོམ་པ་བྱ་བ་ཡིན་ནོ་ཞེས་བྱ་བའི་ཆོ་ག་འདིས་རབ་ཏུ་བསྟན་པར་བྱ་བའི་ཕྱིར་དེ་ནས་འདིར་ནི་བསྒྲུབ་ཅེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པར་གསུངས་པ་ཡིན་ནོ། །དེ་ནས་ཀྱི་སྒྲ་དེ་མ་ཐག་པར་རྗོད་པར་བྱེད་པ་སྟེ། སྔོན་དུ་བསྙེན་པ་འདས་མ་ཐག་པ་ཁོ་ན་ཡིན་ནོ། །འདིར་ཞེས་བྱ་བ་ནི་གསང་བའི་དཀྱིལ་འཁོར་དུའོ། །གང་གིས་བསྒྲུབ་པར་བྱ་བ་དེ་ནི་སྒྲུབ་པ་སྟེ་དཀྱིལ་འཁོར་གྱི་ཆོ་གའོ། །སྒྲུབ་པ་གང་གིས་དཔལ་རྡོ་རྗེ་སེམས་དཔའ་ཉིད་རྟོགས་པར་འགྱུར་བ་དེ་བཤད་པར་བྱའོ། །དངོས་གྲུབ་ཅེས་བྱ་བ་ལ་སོགས་པ་ནི་བཤད་ཟིན་ཏོ། །ཉིན་རེ་ཞེས་བྱ་བ་ནི་སྔོན་དུ་བསྙེན་པ་བྱས་པའི་རྣལ་འབྱོར་པས་དཀྱིལ་འཁོར་བྲིས་ལ་ཉིན་རེ་བཞིན་དུ་ཇི་སྲིད་དཀྱིལ་འཁོར་སྒྲུབ་པ་དེ་སྲིད་སྒྲུབ་པ་བདུན་གྱི་བར་དུ་བྱས་ན་དེ་ནས་འགྲུབ་པར་འགྱུར་རོ། །ཟླ་བ་རེ་རེའམ་ཞེས་བྱ་བ་སྔ་མ་བཞིན་དུ་སྔོན་དུ་བསྙེན་པ་བྱས་ཀྱང་གལ་ཏེ་དང་པོའི་སྒྲུབ་པས་གྲུབ་པར་མ་གྱུར་ན་ཡང་དང་ཡང་དུ་ཟླ་བའི་བར་བསྙེན་པ་བྱས་ལ་ཉ་དང་ཉ་ལ་དཀྱིལ་འཁོར་འདི་བྲིས་ཏེ། མཚན་ཐོག་ཐག་བསྒོམ་པར་བྱ་སྟེ། དེ་ལྟར་ན་སྒྲུབ་པ་བདུན་ལ་ངེས་པར་འགྲུབ་པར་འགྱུར་རོ། །དེ་བཞིན་ལོ་ནི་རེ་རེ་ལ། །ཞེས་བྱ་བ་ལ་ཡང་ལོ་གཅིག་གི་སྔོན་དུ་བསྙེན་པ་བྱ་སྟེ། གལ་ཏེ་དང་པོ་ལ་སོགས་པའི་སྒྲུབ་པས་གྲུབ་པར་མ་གྱུར་ན། སླར་ཡང་ལོ་གཅིག་གི་བར་དུ་བསྙེན་པ་བྱས་ཏེ། དེ་སྲིད་སྒྲུབ་པ་བྱས་ན། ཇི་སྲིད་
སྒྲུབ་བ་བདུན་པ་ལས་ཡོངས་སུ་རྫོགས་བར་འགྱུར་རོ། །ཇི་སྲིད་མངོན་པར་འདོད་པ་བསྒྲུབ་པར་བྱ་ཞེས་བྱ་བ་ལ། ཕྱག་རྒྱ་ཆེན་པོ་ལ་སོགས་པའི་བསྒྲུབ་བྱའི་དངོས་པོ་རྣམས་ཀྱི་ནང་རྣལ་འབྱོར་པས་གང་ཞིག་མངོན་པར་འདོད་པ་དེ་ཉིད་བསྒྲུབ་བར་བྱ་བ་ཡིན་ནོ། །ཇི་སྙེད་པ་ཞེས་བྱ་བ་ནི་ཕྱིའི་ཕུན་སུམ་ཚོགས་པ་ཇི་ལྟར་འཐོབ་པ་སྟེ། ཆུང་དུ་འམ་འབྲིང་ངམ། མང་པོའི་ཕྱིའི་ཕུན་སུམ་ཚོགས་བས་མཆོད་པར་བྱས་ནས་བསྒྲུབ་པར་བྱའོ། །ཅི་བདེ་བ་ཞེས་བྱ་བ་ལ་དཀའ་ཐུབ་མ་ཡིན་པ་དང་ངེས་པ་མེད་པས་བསྒྲུབ་པར་བྱའོ། །རས་ལ་བཅོམ་ལྡན་འདས་བྲི་བར་བྱ་ཞེས་བྱ་བ་ནི་རས་རིས་ལ་བཅོམ་ལྡན་འདས་རྡོ་རྗེ་སེམས་དཔའ་བྲི་བར་བྱའོ། །ཀུན་བདག་དམ་ཚིག་དབང་ཕྱུག་གོ །ཞེས་བྱ་བ་ལ། ཀུན་ནི་བརྟན་པ་དང་གཡོ་བའི་དངོས་པོ་རྣམས་སོ། །དེའི་བདག་ཉིད་རང་བཞིན་ཏེ། ཀུན་བདག་ཉིད་དོ། །དེ་ཡང་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་སོ། །དེའི་དམ་ཚིག་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རང་བཞིན་ཏེ་དེ་ལས་བྱུང་བའི་ཕྱིར་རོ། །ཀུན་བདག་དམ་ཚིག་ཀྱང་ཡིན་ལ་དེ་ཉིད་དབང་ཕྱུག་ཀྱང་ཡིན་པ་སྟེ། ཀུན་བདག་དམ་ཚིག་དབང་ཕྱུག་གོ །གང་ཞིག་ཅེས་བྱ་བ་ལ་གང་ཞིག་བྲིས་ནས་བརྟག་པ་དང་མཆོག་ཏུ་འགྱུར་བའི་ཐར་པར་འགྱུར་རོ། །བཞད་པ་དང་བཅས་པ་ཞེས་བྱ་བ་ལ་སོགས་པ་ནི་གོ་སླའོ། །རབ་ཏུ་དགའ་དང་བདེ་བའི་སྐུ། །ཞེས་བྱ་བ་ལ་རབ་ཏུ་དགའ་བ་ནི་ཡིད་བདེ་བའོ། །བདེ་བའི་ལུས་ཀྱི་ཚོར་བ་བདེ་བ་ཆེན་པོའི་བདེ་བ་ཡང་ངོ༌། །རབ་ཏུ་དགའ་བ་དང་བདེ་བ་དག་ནི་རབ་ཏུ་དགའ་བ་དང་བདེ་བ་དག་གོ །དེ་སྟོན་པར་བྱེད་པ་དང༌། དེ་ལས་བྱུང་བ་དང༌། དེ་ཐོབ་པར་བྱེད་པའི་སྐུ་ནི་རབ་ཏུ་དགའ་བ་དང་བདེ་བའི་སྐུའོ། །དང་པོ་ཞེས་བྱ་བ་ནི་འདོད་ཆགས་རྡོ་རྗེ་མའོ། །གཞན་ཞེས་བྱ་བ་ནི་ཀཱི་ལི་ཀཱི་ལའོ། །གཞན་ནི་རྡོ་རྗེ་དྲན་པ་མའོ། །རྡོ་རྗེ་སྙེམས་པ་འཛིན་པ་ནི་རྡོ་རྗེ་འདོད་པའི་དབང་ཕྱུག་མའོ། །དང་པོ་ནི་འདོད་ཆགས་རྡོ་རྗེ་མའོ། །གཉིས་པ་ནི་ཀཱི་ལི་ཀཱི་ལའོ། །གསུམ་པ་ནི་རྡོ་རྗེ་དྲན་པ་མའོ། །བཞི་པ་ནི་རྡོ་རྗེ་འདོད་པའི་དབང་ཕྱུག་མའོ། །དབུས་ཀྱི་རང་ལྷ་དགྱེས་པས་སྤྲོ། །ཞེས་བྱ་བ་ལ་དབུས་ཀྱི་རང་གི་ལྷ་ནི་རྡོ་རྗེ་
སེམས་དཔའ་སྟེ། དེ་ལས་འཁྱུད་པ་དགྱེས་ཤིང་སྤྲོ་བ་གང་ལ་ཡོད་པ་དེ་ནི་དབུས་ཀྱི་རང་ལྷ་དགྱེས་པར་སྤྲོ་བ་སྟེ་རྡོ་རྗེ་ཀཱི་ལི་ཀཱི་ལ་དགོད་པར་བྱའོ། །དེའི་ཞེས་བྱ་བ་ལ་སོགས་པ་ལ་རྡོ་རྗེ་ཀཱི་ལི་ཀཱི་ལ་དེའི་ལྷོའི་ལོགས་ལ་རྡོ་རྗེ་ཆེ་བའི་མདའ་ནི་གསོར་བ་ལ་བརྩོན་པ་ཞེས་པ་ལ། རྡོ་རྗེ་རྩེ་གཅིག་པའི་མདེའུ་ཅན་གྱི་མདའ་ནི་རྡོ་རྗེ་ཆེན་པོའི་མདའ་སྟེ། དེ་གྱེན་དུ་བསྟོད་པས་གསོར་བར་མཛད་ཅིང་དེ་ལ་སོགས་པ་གང་ཡིན་པ་དེ་ནི་རྡོ་རྗེ་ཆེན་པོའི་མདའ་གསོར་བ་ལ་བརྩོན་པ་སྟེ། འདོད་ཆགས་རྡོ་རྗེ་མའོ། །དེ་ཀཱི་ལི་ཀཱི་ལའི་ལྷོ་ཕྱོགས་ལ་དགོད་པར་བྱའོ། །བསྙེམས་པའི་ཕྱག་གིས་ཡོངས་འཁྱུད་པའི། །ཆུ་སྲིན་རྒྱལ་མཚན་བསྒྲེང་དང་བཅས། །ཞེས་བྱ་བ་ལ་ཆུ་སྲིན་གྱི་རྒྱལ་མཚན་བསྒྲེང་བ་དང་བཅས་པའི་སྐུ་གང་ལ་མངའ་བ་དེ་ནི་ཆུ་སྲིན་གྱི་རྒྱལ་མཚན་བསྒྲེང་བའི་སྐུ་ཅན་ནོ། །བཅོམ་ལྡན་འདས་རྡོ་རྗེ་སེམས་དཔའི་བསྙེམས་པའི་ཕྱག་གིས་ཡོངས་སུ་འཁྱུད་པ་གང་ཡིན་པ་དེའོ། །བསྙེམས་པའི་ཕྱག་གིས་ཡོངས་སུ་འཁྱུད་པ་ཡང་དེ་ཡིན་ལ་ཆུ་སྲིན་རྒྱལ་མཚན་བ་སྒྲེང་བ་དང་བཅས་པ་ཡང་དེ་ཡིན་པས་ན། བསྙེམས་པའི་ཕྱག་གིས་ཡོངས་སུ་འཁྱུད་པའི་ཆུ་སྲིན་རྒྱལ་མཚན་བསྒྲེང་བ་དང་བཅས་པ་སྟེ་བཅོམ་ལྡན་འདས་མ་རྡོ་རྗེ་དྲན་པ་མའོ།། དེ་ཡི་ལོགས་ལ་བཞད་དང་བཅས། །མཆོད་པས་བདག་པོ་ལ་རྡེག་པ། །ཞེས་བྱ་བ་ལ། རྡོ་རྗེ་དྲན་པ་མ་དེའི་གཡོན་གྱི་ལོགས་ནི་དེའི་ལོགས་ཏེ། དེའི་ལོགས་དེར་བཅོམ་ལྡན་འདས་མ་རྡོ་རྗེ་འདོད་པའི་དབང་ཕྱུག་མ་རྡོ་རྗེ་དྲིལ་བུ་དང་བཅས་པའི་གཡོན་པའི་རྡོ་རྗེ་ཁུ་ཚུར་གྱིས་བསྙེན་པ་མཛད་ཅིང་གཡས་པ་ནི་ཕྱག་ན་བསྣམས་པའི་མཆོད་པའི་མེ་ཏོག་གི་ཕྲེང་བས་བདག་པོ་བཅོམ་ལྡན་འདས་རྡོ་རྗེ་སེམས་དཔའ་ལ་རྡེག་པ་དགོད་པར་བྱའོ། །སངས་རྒྱས་རིན་ཆེན་དབང་བསྐུར་གྱིས། །མཚན་མ་ཐམས་ཅད་ཅེས་བྱ་བ་ལ། འདོད་ཆགས་རྡོ་རྗེ་མ་ནི་དེ་བཞིན་གཤེགས་པ་མི་བསྐྱོད་པ་དང་ལྡན་པ་དང༌། ཀཱི་ལི་ཀཱི་ལ་ནི་དེ་བཞིན་གཤེགས་པ་རིན་ཆེན་འབྱུང་ལྡན་དང༌། རྡོ་རྗེ་དྲན་པ་མ་ནི་དེ་བཞིན་གཤེགས་པ་སྣང་བ་མཐའ་ཡས་དང་ལྡན་པ་དང༌། རྡོ་རྗེ་འདོད་པའི་དབང་ཕྱུག་མ་ནི་དེ་བཞིན་གཤེགས་པ་དོན་ཡོད་གྲུབ་པ་དང་ལྡན་པའི་ཅོད་པན་གྱི་དབང་
བསྐུར་བ་ཡིན་ནོ། །སྤྱན་གྱིས་ཕྱག་རྒྱ་ལ་གཟིགས་པ། །ཞེས་བྱ་བ་འདི་རྣམས་རྡོ་རྗེ་མདའ་ལ་སོགས་པའི་ཕྱག་རྒྱ་ལ་གཟིགས་པའི་སྤྱན་གང་ལ་མངའ་བ་དེ་ནི་སྤྱན་གྱིས་ཕྱག་རྒྱ་ལ་གཟིགས་པའོ། །རང་བདག་ལ་ནི་ཐུགས་གཏད་པ། །ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའ་ལ་ཐུགས་གཏད་པའོ། །ཟུར་དུ་ལྟ་ཞིང་བཞུགས་པའོ། །ཞེས་བྱ་བ་ལ། དེ་ལ་མིག་ལྟ་ཞིང་དེ་ཤིན་ཏུ་ཆགས་པ་བསྐྱེད་པའི་ཕྱིར་ལུགས་སུ་ལྟ་ཞིང་བཞུགས་པ་སྟེ། རང་གི་ཕྱག་རྒྱ་ལ་སྤྱན་གཏད་ནས་བཞུགས་པ་ཡིན་ནོ། །རས་རིས་འདི་ནི་མཐོང་བ་ཡིས། །ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་འདས་མ་ཐག་ཏུ་བཤད་པའི་ཆོ་གས་རས་རིས་འདི་ཐམས་ཅད་གཟིགས་པ་རྣམས་ཀྱི་རས་རིས་འདི་མཆོད་པ་ཆེན་པོའི་དཔལ་གྱིས་རོལ་བར་བྱེད་ཅེས་སྦྱར་རོ། །མཆོག་ཅེས་བྱ་བ་ལ་སོགས་པས་དེ་ཉིད་ཀྱི་ཁྱད་པར་བསྟན་པ་ཡིན་ཏེ། མཆོག་ཀྱང་ཡིན་ལ་དགའ་བ་ཡང་དེ་ཉིད་ཡིན་པས་ན་མཆོག་གི་དགའ་བ་སྟེ། དཔལ་རྡོ་རྗེ་སེམས་དཔའི་དགའ་བའོ། །དེ་ཉིད་ཕུལ་དུ་བྱུང་བའི་འདོད་པ་ནི་ཀུན་མཆོག་སོ་སོར་རྟོག་པའི་མཚན་ཉིད་ཅན་གྱི་རྡོ་རྗེ་སེམས་དཔའ་འདོད་པ་གང་ལ་ཡོད་པ་དེ་ནི་མཆོག་ཏུ་དགའ་བ་ཕུལ་དུ་བྱུང་བའི་འདོད་པ་ཅན་ནོ། །ཡང་ན་མཆོག་ཏུ་དགའ་བས་བསྐྱེད་པའི་ཕུལ་དུ་བྱུང་བའི་འདོད་པ་ནི་ཀུན་མཆོག་སོ་སོར་རྟོག་པའི་རང་བཞིན་ཅན་གྱི་རྡོ་རྗེ་སེམས་དཔའི་འདོད་པ་གང་ལ་ཡོད་པ་དེ་ནི་མཆོག་ཏུ་དགའ་བ་ཕུལ་དུ་བྱུང་བའི་འདོད་པ་ཅན་ཏེ། དེ་སྟོན་པར་བྱེད་པ་ཉིད་ཀྱི་ཕྱིར་རོ། །མཆོག་ནི་ཆོས་ཀྱི་དབྱིངས་དང༌། སེམས་ཅན་ཡོངས་སུ་སྨིན་པ་ལ་ཆགས་པས་ན་མཆོག་ལ་ཆགས་པ་སྟེ། ཀཱི་ལི་ཀཱི་ལའི་རང་བཞིན་ཅན་གྱི་དཔལ་རྡོ་རྗེ་སེམས་དཔའོ། །དེའི་དགའ་བ་མཆོག་ནི་བག་ཆགས་དང་བཅས་པའི་ཉོན་མོངས་པའི་དྲི་མ་བསལ་བའོ། །དེའི་དངོས་གྲུབ་ནི་རྫོགས་པ་སྟེ། དེས་གྲུབ་པ་ནི་རྫོགས་པར་གྱུར་པའོ། །ཀཱི་ལི་ཀཱི་ལའི་རང་བཞིན་གྱི་དཔལ་རྡོ་རྗེ་སེམས་དཔའི་དགའ་བ་མཆོག་གི་དངོས་གྲུབ་ཀྱི་གདུལ་བྱ་རྣམས་ལ་རྫོགས་པའོ་ཞེས་བྱ་བའི་ཐ་ཚིག་གོ །གསལ་བར་ནི་དངོས་པོ་ཐམས་ཅད་འཛིན་པའི་མངོན་པར་ཞེན་པ་དང་བྲལ་བས་འདོད་ཆགས་ལ་སོགས་
པའི་ཉོན་མོངས་པ་ལས་རྣམ་པར་རྒྱལ་བ་དང༌། འཆི་བདག་གི་བདུད་ལས་རྣམ་པར་རྒྱལ་བ་རྡོ་རྗེ་དྲན་པ་མའི་རང་བཞིན་གྱི་རས་རིས་ཆེན་པོ་གང་ལ་ཡོད་པ་དེ་ནི་གསལ་ཞིང་རྣམ་པར་རྒྱལ་བའི་རས་རིས་ཆེན་པོའོ། །རས་རིས་འདིས་ཞེས་བྱ་བ་འདས་མ་ཐག་ཏུ་བཤད་པའི་མཚན་ཉིད་ཅན་གྱི་རས་རིས་གཙོ་བོར་གཟུང་བ་ཉིད་ཀྱིས་བསྟན་པ་ཡིན་ཏེ། རས་རིས་འདི་ཁོ་ནས་རོལ་བར་བྱེད་པ་ཡིན་ཏེ་གཞན་ནི་མ་ཡིན་ནོ། །ཐམས་ཅད་གཟིགས་པའི་མཆོད་པ་ཆེན་པོའི་དཔལ། །ཞེས་བྱ་བ་ལ། ཐམས་ཅད་གཟིགས་པས་ན་ཐམས་ཅད་གཟིགས་པ་སྟེ། དེ་བཞིན་གཤེགས་པ་རྣམས་སོ། །དེ་དག་རང་གི་རས་རིས་འདི་རོལ་བར་བྱེད་པ་ནི་སྒྲུབ་པར་བྱེད་པའོ། །ཅི་སྒྲུབ་པར་བྱེད་ཅེ་ན། མཆོད་པ་ཆེན་པོའི་དཔལ་ཞེས་བྱ་བ་ལ། མཆོད་པ་ཡང་ཡིན་ལ་ཆེན་པོ་ཡང་དེ་ཉིད་ཡིན་པས་ན་མཆོད་བ་ཆེན་པོ་སྟེ། བརྩོན་འགྲུས་ཀྱི་ཕ་རོལ་ཏུ་ཕྱིན་པ་སོ་སོར་རྟོག་པའི་རང་བཞིན་ཅན་འདོད་པའི་དབང་ཕྱུག་མའི་ངོ་བོ་བཅོམ་ལྡན་འདས་རྡོ་རྗེ་འཆང་ངོ༌། །དེའི་དཔལ་ནི་དེ་རྣམས་ཏེ་ཕུན་སུམ་ཚོགས་པ་གང་ཡིན་པ་དེ་དག་སྒྲུབ་པར་བྱེད་པའོ། །ལྷ་མོ་བཞི་དང་འདུས་པའི་སྦྱོར་བས་བཅོམ་ལྡན་འདས་གནས་གང་དུ་རས་རིས་ལ་བྲི་བར་བྱ་ཞེ་ན། འཁོར་ལོ་དེ་ནི་བརྟགས་བྱས་ནས། །ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ལྷ་མོའི་དཀྱིལ་འཁོར་གང་བཤད་པ་དེ་ཉིད་ཇི་ལྟ་བ་བཞིན་དུ་ཐིག་གདབ་པ་ཡང་དག་པར་བྲིས་ལ། སྐྱེ་བོ་ཐམས་ཅད་ཀྱི་ཐུན་མོང་མ་ཡིན་པའི་གསང་བའི་དཀྱིལ་འཁོར་མཆོག་ཏུ་ཕུལ་དུ་བྱུང་བ་གང་ཡིན་པ་དེ་བརྟགས་ནས་བཅོམ་ལྡན་འདས་འདི་དབུས་ཀྱི་དཀྱིལ་འཁོར་གྱི་ཕྱོགས་སུ་ལྷ་མོ་བཞི་དང་ཡང་དག་པར་འདུས་པའི་སྦྱོར་པས་རས་རིས་ལ་བྲི་བར་བྱའོ། །འཁོར་ལོ་དེ་ཡང་གནས་གང་དུ་བརྟག་པར་བྱ་ཞེ་ན། རྣམ་པར་དབེན་པའི་ཁང་པའམ། །ཞེས་བྱ་བ་ལ་སོགས་པ་ལ་དམ་ཚིག་མི་ཤེས་པ་ལ་སོགས་པའི་སེམས་ཅན་དང་བྲལ་བ་ནི་རྣམ་པར་དབེན་པ་སྟ། ཁང་པ་སུམ་བརྩེགས་ཀྱི་ཁང་བཟངས་དེར་རོ། །ཡང་ན་སྐྱེད་མོས་ཚལ་ལ་སོགས་སུ་ཞེས་བྱ་བ་ལ་སྐྱེད་མོས་ཚལ་ཐོག་མར་གང་ལ་ཡོད་པ་དེ་ནི་སྐྱེད་མོས་ཚལ་ལ་སོགས་པའོ། །སྐྱེད་མོས་ཚལ་ལ་སོགས་
པ་དང་བཅས་པའི་ས་ཕྱོགས་གང་ཡིན་པ་དེ་ནི་སྐྱེད་མོས་ཚལ་དང་བཅས་པའི་ཕྱོགས་སོ། །སོགས་པའི་སྒྲས་ནི་གཙུག་ལག་ཁང་དང༌། ཀུན་དགའ་ར་བ་དང༌། རི་བོ་དང༌། ཆུའི་འགྲམ་དང༌། རྒྱ་མཚོ་དང༌། རྒྱལ་བོའི་ནགས་ཚལ་ལ་སོགས་པ་ཁང་བ་མེད་བ་རྣམས་གཟུང་བར་བྱའོ། །ཡང་གི་སྒྲས་ནི་སྔ་མ་ལས་ཁྱད་པར་དུ་བསྟན་པའི་དོན་དུའོ། །དེ་བཞིན་གཤེགས་པ་ལ་སོགས་པ་ནི་བཤད་ཟིན་ཏོ། །རྡོ་རྗེ་གླུ་ཞེས་བྱ་བ་ལ་སོགས་བ་ནི་དེ་ལ། ཐམས་ཅད་རྗེས་སུ་ཆགས་པའི་བདེ་པ་དམ་པའི་ཐུགས། །རྡོ་རྗེ་སེམས་དཔའ་ཁྱོད་ནི་རབ་ཏུ་བྱུང་བ་ཡིན། །རབ་ཏུ་དགའ་བ་འགྲོ་བ་འགྲོ་བ་ཀུན་གྱི་བདེ་ཆེན་པོ། །བརྟན་མཐོ་དེ་རིང་བདག་ལ་མྱུར་གྲུབ་མངོན་ཕྱོགས་མཛོད། །ཅེས་བྱ་བའི་རྡོ་རྗེའི་གླུ་རྒྱུད་འདི་ཉིད་ལས་གསུངས་པ་དང༌། སངས་རྒྱས་ཐམས་ཅད་འདུས་བའི་རྒྱུད་ལས་ཀྱང་གསུངས་པ་ཡིན་ཏེ། དེ་དག་གིས་མཆོད་པར་བྱའོ། །གླུ་ནི་འཇིག་རྟེན་པའི་གླུའོ། །རོལ་མོ་ནི་པི་ཝང་ལ་སོགས་པའི་རོལ་མོའོ། །རྣམ་འཕྲུལ་ནི་གར་ཏེ། རྣམ་འཕྲུལ་གར་དུ་རབ་ཏུ་བཤད། །ཅེས་བྱ་བ་གསུངས་པའི་ཕྱིར་རོ། །གླུ་དང་རོལ་མོ་དང་རྣམ་པར་འཕྲུལ་པ་ནི་གླུ་དང་རོལ་མོ་རྣམས་བར་འཕྲུལ་པ་རྣམས་སོ། །རྡོ་རྗེ་གླུའི་མཆོད་པ་ལ་སོགས་པ་དང༌། གླུ་དང་རོལ་མོ་དང་རྣམ་པར་འཕྲུལ་པ་ནི་རྡོ་རྗེའི་གླུའི་མཆོད་སོགས་དང༌། གླུ་དང་རོལ་མོ་རྣམ་པར་འཕྲུལ་པ་རྣམས་སོ། །དེ་དག་ཁང་བཟངས་གང་ལ་ཡོད་པ་དེ་ལ་དེ་སྐད་ཅེས་བྱའོ། །མེ་ཏོག་དང་སྤོས་དག་གིས་ཕུལ་དུ་བྱུང་བའི་སྦྱོར་བ་ནི་རབ་ཏུ་སྦྱོར་བའོ། །མེ་ཏོག་དང་སྤོས་ཀྱི་རབ་ཏུ་སྦྱོར་བ་དེ་དག་གི་མཆོད་པ་ཐོག་མར་གང་ལ་ཡོང་བ་དེ་ནི་མེ་ཏོག་དང་སྤོས་དང༌། །རབ་ཏུ་སྦྱོར་བ་ལ་སོགས་པ་མར་མེའི་སྦྱོར་བའོ། །དེ་ཡིས་ཡང་དག་པར་མཆོད་པ་གང་ཡིན་པ་དེ་ནི། །མེ་ཏོག་སྤོས་དང་རབ་སྦྱར་སོགས། །མར་མེའི་སྦྱོར་བས་ཡང་དག་མཆོད་དེ། དེ་ལྟ་བུའི་དཀྱིལ་འཁོར་གྱི་ཁང་པ་སུམ་བརྩེགས་དེར། མཆོག་སྟེ་ཕུལ་དུ་བྱུང་བའི་གསང་བའི་དཀྱིལ་འཁོར་མདུན་དུ་བྲི་བར་བྱས་ལ་མཚན་ཐོག་ཐག་སྒོམ་པའི་སྦྱོར་བས་རབ་ཏུ་བསྒྲུབ་པར་བྱ་བ་ནི་རང་ལ་རག་ལས་པར་བྱའོ། །ཡང་ན་བདག་
ཉིད་མཆོག་གྱུར་པས། །རང་གི་ལྷ་ཉིད་བསྒོམ་བྱ་ཞིང༌། །ཞེས་བྱ་བ་ལ། ཡང་ན་ཞེས་བྱ་བ་ཕྱོགས་གཞན་བསྟན་པ་ཡིན་ནོ། །བདག་ཉིད་མཆོག་ནི་ཕུལ་དུ་བྱུང་བ་སྟེ་དཔལ་རྡོ་རྗེ་སེམས་དཔའོ། །དེ་ཉིད་རང་གི་ལྷ་དེ་འདོད་པའི་ལྷ་བསྒོམ་ཞིང་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་ཁང་པ་སུམ་བརྩེགས་སུ་གསང་བའི་དཀྱིལ་འཁོར་རབ་ཏུ་བསྒྲུབ་པར་བྱའོ། །འདིས་ནི་འདི་ལྟར་བཤད་པར་འགྱུར་ཏེ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་ཚོགས་ཀྱི་དཀྱིལ་འཁོར་གྱི་རབ་ཏུ་སྦྱོར་བས་སྔོན་དུ་བསྙེན་པ་བྱ་སྟེ། མཚན་མ་ཐོབ་པའི་རྣལ་འབྱོར་པས་ཇི་ལྟར་བཤད་པའི་མཚན་ཉིད་ཅན་གྱི་ཁང་པ་སུམ་བརྩེགས་སུ་གསང་བའི་དཀྱིལ་འཁོར་བྲིས་ནས་རང་ཉིད་ཀྱིས་ལྷ་མོ་བཞི་དང༌། ཡང་དག་པར་འདུས་པའི་སྦྱོར་པས་རབ་ཏུ་བསྒྲུབ་པའི་རབ་མྱོས་མ་རྣམས་དང་ལྷན་ཅིག་ཏུ་དཀྱིལ་འཁོར་གྱི་དབུས་སུ་ཞུགས་ཏེ། དུས་ཀྱི་མཆོད་པ་ལ་སོགས་པའི་སྦྱོར་བ་དང་ལྡན་པའི་གཟུངས་མ་རྣམས་སམ། སློབ་མའི་ཚོགས་རང་རང་གི་གནས་སུ་བཀོད་ལ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །འཇུག་པའི་དུས་ནི་རང་གི་སློབ་དཔོན་རྡོ་རྗེ་སེམས་དཔའི་གནས་སུ་བཀོད་ལ། བདག་ཉིད་འཇུག་པ་ལ་སོགས་པའི་ཆོ་ག་རྫོགས་པར་བྱས་ཏེ། ཕྱི་ནས་དེར་འདུག་ལ་བསྒོམ་པར་བྱ་བ་ཡིན་ནོ། །དེ་ནས་འཁོར་ལོ་མ་ཞུགས་ཀྱང༌། །རང་ཉིད་ཀྱིས་ནི་རབ་ཞུགས་ནས། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །མཆོག་ཏུ་གསང་བ་དམ་པ་ཞེས་བྱ་བ་ལ། མཆོག་ནི་ཐོག་མ་མེད་པའི་སངས་རྒྱས་འབྱུང་བ་དམ་པ་ལ་བཞུགས་པའི་ཕྱིར་རོ། །གསང་བ་ནི་རྡོ་རྗེ་ལྷ་མོའི་ཚོགས་ནང་བཞུགས་པའི་བཅོམ་ལྡན་འདས་ཀྱི་སྐུའོ། །མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བ་སྟེ། དེའི་དམ་པ་ནི་དཔལ་དམ་ཚིག་གསུམ་གྱི་གསང་བའི་དཀྱིལ་འཁོར་ཏེ། དེར་བཅོམ་ལྡན་འདས་རྡོ་རྗེ་སེམས་དཔའ་ལྷ་མོ་བཞིའི་དབུས་ན་བཞུགས་པའོ། །དེ་ཉིད་ཀྱི་སྐུ་གསུང་ཐུགས་ཀྱི་རྡོ་རྗེ་རྣམས་ནི་དམ་ཚིག་སྟེ། དེས་ཉེ་བར་མཚོན་པའི་གསང་བའི་དཀྱིལ་འཁོར་ནི་མཆོག་ཏུ་གསང་བ་དམ་པའི་དམ་ཚིག་གསུམ་མོ། །དེར་ཞུགས་པའི་
ཕྱིར་མཆོག་ཏུ་གསང་བ་སྟོན་པར་བྱེད་པའི་རྡོ་རྗེའི་གླུའི་མཆོད་པའོ། །དེ་ཁྱད་པར་ཇི་ལྟ་བུ་དང་ལྡན་ཞེ་ན། མཆོག་ཏུ་གྲུབ་པ་ཞེས་བྱ་བ་ལ། ཇི་ལྟ་བ་བཞིན་དུ་རྡོ་རྗེ་བསྙེམས་པས་གླུ་ལེན་ཅིང་འཇུག་པའི་ཕྱག་རྒྱས་མེ་ཏོག་རྣམས་བླངས་ལ་གསང་བའི་དཀྱིལ་འཁོར་དུ་འཇུག་པར་བྱའོ། །བཅོམ་ལྡན་བདེ་ཆེན་ཁྱོད་ནི་རབ་ཏུ་འཇུག །ཅེས་བྱ་བ་ལ་རྡོ་རྗེ་སེམས་དཔར་བྱས་པའི་རང་གི་རྒྱུད་བཅོམ་ལྡན་འདས་དཔལ་རྡོ་རྗེ་སེམས་དཔའི་དཀྱིལ་འཁོར་དུ་འཇུག་པའི་བདག་ཉིད་ལ་བོད་པ་ཡིན་ཏེ། ཐར་པའི་གྲོང་ཁྱེར་གསང་བའི་དཀྱིལ་འཁོར་དུ་ཞུགས་ཤིག་པའོ། །ཐར་པའི་གྲོང་ཁྱེར་དེ་ཉིད་ཀྱི་ཁྱད་པར་བསྟན་པར་བྱ་བའི་ཕྱིར། དངོས་གྲུབ་ཀུན་གྱི་བདེ་བ་ཉམས་དགའ་བ། །ཞེས་བྱ་བ་ལ། དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་རྟོགས་པ་ནི་དངོས་གྲུབ་ཡིན་ནོ། །དེ་ལས་བྱུང་བའི་བདེ་བ་ནི་དངོས་གྲུབ་ཀུན་གྱི་བདེ་བའོ། །དེས་དགའ་བར་བྱེད་པས་ན་ཉམས་དགའ་བ་སྟེ་ཡིད་དང་རྗེས་སུ་མཐུན་པའོ། །མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཞེས་བྱ་བ་ལ་ཕྱི་མའི་མཐའ་བར་དུ་སྐད་ཅིག་མ་རེ་རེ་ལ་སྤྲུལ་པའི་སྤྲིན་རྣམས་ཀྱིས་དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་དེ་བཞིན་གཤེགས་པ་ཐམས་ཅད་ལ་མཆོད་པ་དང༌། སེམས་ཅན་ཐམས་ཅད་ཀྱི་དོན་དུ་བྱ་བ་ནན་ཏན་སྒྲུབ་པའི་ཡེ་ཤེས་མཆོག་ཏུ་བདེ་བ་དམ་པའི་དངོས་གྲུབ་བསྒྲུབ་བོ། །དེ་ཉིད་རྒྱུར་གྱུར་པས་དེར་བཞུགས་ཤིག་ཅེས་བྱའོ། །ཀུན་གྱི་མཆོག་སོ་སོར་རྟོག་པའི་རང་བཞིན་ཉིད་ཀྱིས་དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་རྣམས་མངོན་དུ་བྱས་ན་རིགས་པ་ཡིན་ནོ། །ཀཱི་ལི་ཀཱི་ལའི་རང་བཞིན་བདེ་བ་ཆེན་པོའོ། །རྡོ་རྗེ་དྲན་པ་མའི་རང་བཞིན་གྱི་དངོས་གྲུབ་ཀུན་བདེ་བ་ཉམས་དགའ་བའོ། །རྡོ་རྗེ་བསྙེམས་མའི་རང་བཞིན་གྱི་མཆོག་ཏུ་བདེ་བ་དམ་པའི་དངོས་གྲུབ་བོ། །ཛཿ་ཧཱུཾ་བཾ་ཧཾཿཁྱེད་ཀྱིས་རབ་བསྒྲུབ་མཛོད། །ཅེས་བྱ་བ་ལ་འདོད་ཆགས་རྡོ་རྗེ་མ་དང༌། ཀཱི་ལི་ཀཱི་ལ་དང༌། རྡོ་རྗེ་དྲན་མ་དང༌། རྡོ་རྗེ་འདོད་པའི་དབང་ཕྱུག་མའི་རང་བཞིན་རྣམས་ཀྱིས་དཔལ་རྡོ་རྗེ་སེམས་དཔའ་ལ་སོགས་པའི་སྐུ་
གསུང་ཐུགས་རྡོ་རྗེ་རྣམས་དགུག་ཅིང་བཅུག་ལ་བཅིངས་ནས་དབང་དུ་བྱ་སྟེ། ཛཿ་ཧཱུཾ་པམ་ཧོཿ་རྣམས་ཀྱིས་མཆོག་ཏུ་གྲུབ་པར་གྱུར་པ་ནི་རབ་ཏུ་གྲུབ་པ་རྫོད་ཅིག་ཅེས་བྱའོ། །ཞུགས་ཏེ་ཞེས་བྱ་པ་ལ་སོགས་པ་ལ་དེར་འདས་མ་ཐག་ཏུ་བཤད་པའི་ཆོ་ག་སྟེ་མགོན་པོ་རྡོ་རྗེ་སེམས་དཔའ་ལ་ཕྱག་བྱའོ། །གཡོན་པའི་མིག་གི་རྡོ་རྗེས་སོ། །ཞེས་བྱ་བ་ལ། གཡོན་པའི་རྡོ་རྗེ་ལྟ་བས་སོ། །དེ་ཁྱད་པར་ཇི་ལྟ་བུ་དང་ལྡན་པ་ཞེ་ན། གཡོན་པ་བསྙེམས་པས་ཞེས་བྱ་བ་ལ་སོགས་པ་ལ། གཡོན་བསྙེམས་པ་ནི་གོ་སླ་སྟེ་དེ་དང་བཅས་པའི་ཅུང་ཟད་བཞད་པ་གང་ཡིན་པ་དེ་དང་ལྡན་པར་བསྟོད་ཅིང་མཛེས་པ་སྟེ། སྒེག་པ་དང་བཅས་པའི་མིག་བཙུམས་པ་གང་ལ་ཡོད་པ་དེ་ནི། གཡོན་པ་བསྙེམས་པས་ཅུང་ཟད་བཞད། །བསྟོད་ཅིང་མཛེས་པའི་མིག་བཙུམས་པའོ། །དེ་དག་གང་ཡིན་ཞེ་ན། གཡོན་པའི་མིག་གི་རྡོ་རྗེ་སྟེ། ལྟ་བ་དེ་དང་ལྡན་པའི་རྣལ་འབྱོར་པས་བཅོམ་ལྡན་འདས་ལ་ཕྱག་བྱའོ། །ཅི་བརྗོད་ཅིང་བྱ་བ་ཡིན་ཞེ་ན། དེ་ལ་འདི་ཞེས་བྱ་བ་ལ་སོགས་པ་ལ། ཕྱག་དེ་ལ་བར་མཆོད་པར་འོག་ནས་འཆད་པར་འགྱུར་བ་འདི་ཡིན་ཏེ། མཆོག་ཏུ་གསང་བ་དམ་པའི་དཔལ་དམ་ཚིག་གསུམ་ནི་གསང་བའི་དཀྱིལ་འཁོར་གྱི་ཕྱག་རྒྱའོ། །དེ་ཉིད་དུ་མེ་ཏོག་གི་སིལ་མ་གཏོར་མ་ནི་མ་བརྒྱུས་པའི་མེ་ཏོག་དོར་བའོ། །ཕྱག་བྱ་བ་དང་མེ་ཏོག་སིལ་མ་དོར་བ་དེ་དག་གི་མཆོག་ནི་ཐོག་མ་དང་ཐ་མ་མེད་པའི་གསང་བ་སྟེ། སྐྱེ་བོ་གཞན་གྱི་མངོན་དུ་མ་གྱུར་པས་རྡོ་རྗེ་སེམས་དཔའ་ལ་སོགས་པ་སྟོན་པར་བྱེད་པ་དང༌། མི་ཕྱེད་པའི་གླུའི་མཆོད་པའོ། །མཆོག་ཏུ་གྲུབ་པ་ནི་ཐོག་མ་དང་ཐ་མ་མེད་པ་ཉིད་དུ་རྫོགས་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ་ཞེས་བྱ་བའི་སྒྲས་ནི་ཡོངས་སུ་བཅད་པའོ། །མཆོག་ཏུ་བདེ་བ་ནི་བྱང་ཆུབ་ཆེན་པོའི་མཚན་ཉིད་ཅན་རྡོ་རྗེ་སེམས་དཔའ་ལ་སོགས་པའི་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་དང༌། དེ་དང་རྒྱུ་མཐུན་པའི་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་ཕྱག་རྒྱ་རྣམས་ཏེ། དེ་ལ་སེམས་དཔའ་ནི་ཐོབ་པའི་འདུན་པའོ། །མཆོག་ཏུ་བདེ་བའི་བསམ་དེས་མཛེས་པ་
དང་བཅས་སྒེག་པ་དང་བཅས་པའི་གར་ལས་བྱུང་བའི་ཕྱག་བྱ་བ་དེ་དག་གིས་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་ཕྱག་བྱའོ། །ཛཿ་ཧཱུཾ་བཾ་ཧོཿ་ཞེས་བྱ་བ་ནི་བཤད་ཟིན་ཏོ། །ཧི་ཧི་ཧི་ཧི་ཧེ་ཞེས་བྱ་བ་ནི་ཡི་གེ་ཧི་བཞི་པོས་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་བཅོམ་ལྡན་འདས་བསྟན་པ་ཡིན་ནོ། །ཧེ་ཞེས་བྱ་བ་རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོའི་རང་བཞིན་ཅན་བདུད་བཞི་ལས་རྣམ་པར་རྒྱལ་བ་དེ་ཉིད་བསྟན་པའོ། །མགོན་པོ་སྙིམ་པའི་མེ་ཏོག་བཞེས། །ཞེས་བྱ་བ་ལ་འདིར་སྙིམ་པའི་མེ་ཏོག་ནི་ཕྱག་བྱ་བའོ། །མེ་ཏོག་དོར་བའི་དབུས་ནི་སྙིམ་པའི་མེ་ཏོག་ཁོ་ན་མེ་ཏོག་གི་སྙིམ་པ་སྟེ། དེ་བཞེས་པ་ནི་བླང་བར་མཛོད་ཅིག་པའོ། །སེམས་ཅན་ཐམས་ཅད་སྐྱོབ་པར་མཛད་པ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་སྩོལ་བས་ན་མགོན་པོའོ། །དེ་ལ་མཆོག་ཏུ་བདེ་བ་དང་ཧཱུཾ་ཞེས་བྱ་བ་འདིས་ཀཱི་ལི་ཀཱི་ལའི་རང་བཞིན་ཅན་ནོ། །སེམས་དཔའ་ཞེས་བྱ་བ་དང་ཛཿ་ཞེས་བྱ་བས་འདོད་ཆགས་རྡོ་རྗེ་མའི་རང་བཞིན་བསྟན་ཏོ། །མཛེས་པ་དང་བཾ་ཞེས་བྱ་བས་རྡོ་རྗེ་དྲན་མའི་རང་བཞིན་བསྟན་ཏོ། །རྣམ་པར་རོལ་པའི་ཕྱག་གིས་ཕྱག་བྱའོ་ཞེས་བསྟན་པ་འདི་དང༌། ཧི་ཧི་ཧི་ཧི་ཧེ་ཞེས་བྱ་བས་རྡོ་རྗེ་འདོད་པའི་དབང་ཕྱུག་མའི་རང་བཞིན་ཉིད་དུ་བཅོམ་ལྡན་འདས་ཚིག་གི་ཟུར་གྱིས་བསྟན་ཏོ། །དེ་ནས་ཞེས་བྱ་བ་ལ་སོགས་པ་ལ་དེ་ལྟར་སྒེག་མོ་དགའ་བའི་རྡོ་རྗེ་མས་ཕྱག་བྱས་ལ། དེ་ཉིད་ཕྱག་བྱས་པའི་གླུའི་མཆོད་པ་བརྗོད་ཅིང་མེ་ཏོག་དོར་བར་བྱའོ། །དེ་ནས་དེ་དག་བླངས་ཏེ་རང་གི་མགོ་ལ་ཇི་ལྟ་བ་བཞིན་དུ་བཅིངས་ཏེ། དཀྱིལ་འཁོར་བལྟས་ལ་འཇུག་པའི་ཕྱག་རྒྱ་རང་གི་སྙིང་གར་དགྲོལ་བར་བྱའོ། །དེ་ནས་ཆུ་དང༌། ཕྱག་རྒྱ་དང༌། ཅོད་པན་དང༌། རྡོ་རྗེ་དང༌། བདག་པོ་དང༌། མིང་གི་དབང་བསྐུར་བ་བླང་བར་བྱ་བའི་ཕྱིར་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བར་བྱའོ། །དེ་ནས་མེ་ཏོག་ལ་སོགས་པ་དང༌། རྡོ་རྗེ་མཚོན་ཆ་མ་ལ་སོགས་པའི་མཆོད་པའི་ཕྱག་རྒྱ་རྣམ་པ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ། དེ་ཁོ་ན་ཉིད་དང༌། ཆོས་དང༌། དམ་
ཚིག་རྣམས་བླངས་ལ། རང་གི་སྙིང་གར་ལན་གསུམ་བསྐོར་བར་བྱའོ། །དེ་ཁོ་ན་ཉིད་ལ་སོགས་པ་གསུམ་པོ་ནི་འོག་ནས་གསུངས་པ་ཡིན་ནོ། །རྡོ་རྗེ་ལ་སོགས་ཐོབ་པ་བཟུང༌། །ཞེས་བྱ་བ་ལ་རྡོ་རྗེ་ཐོབ་པ་ནི་རྙེད་པའོ། །སོགས་པའི་སྒྲས་ནི་དྲི་འཁུ་དང་ཕྱག་རྒྱ་བཤད་པ་ཡིན་ནོ། །རྡོ་རྗེ་ལ་སོགས་པ་ཐོབ་པ་ཉིད་གཟུང་བ་ཡིན་ནོ། །རྡོ་རྗེ་ལ་སོགས་པའི་གཟུང་བ་དེས་ཅིར་འགྱུར་ཞེ་ན། རྡོ་རྗེ་སེམས་དཔའ་གཉིས་པ་འདྲ། །ཞེས་བྱ་བ་ནི་རྣལ་འབྱོར་པ་རྡོ་རྗེ་སེམས་དཔའ་གཉིས་པ་དང་འདྲ་བར་འགྱུར་རོ། །རྡོ་རྗེ་ཐམས་ཅད་འཛིན་པ་ནི་དང་པོའི་རྡོ་རྗེ་འཛིན་པའོ། །རྒྱལ་པོ་ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་འཁོར་ལོས་སྒྱུར་བ་དང་རིགས་ཐམས་ཅད་ཀྱི་འཁོར་ལོས་སྒྱུར་བའོ། །རྡོ་རྗེ་ཅན་གྱིས་བྱིན་བརླབ་འགྱུར། །ཞེས་བྱ་བ་ལ་རྡོ་རྗེ་ཅན་ནི་རྡོ་རྗེ་སེམས་དཔའ་སྟེ་དེས་དེ་མ་ཐག་ཏུ་བྱིན་གྱིས་བརླབ་པར་འགྱུར་རོ། །འདིས་ནི་འདི་ལྟར་འཆད་པར་འགྱུར་ཏེ། དེ་ཁོ་ན་ཉིད་དང༌། ཆོས་དང་དམ་ཚིག་ཐོབ་མ་ཐག་ཏུ་སྐུ་གསུང་ཐུགས་ཀྱི་རྡོ་རྗེ་རྣམས་ཀྱི་རྡོ་རྗེ་སེམས་དཔའ་དང་འདྲ་བར་འགྱུར་བའི་རྣལ་འབྱོར་པ། བཅོམ་ལྡན་འདས་རྡོ་རྗེ་སེམས་དཔར་བྱིན་གྱིས་བརླབས་ནས་བརྟན་པར་མཛད་པར་འགྱུར་རོ། །མཆོག་ཏུ་གསང་བ་དམ་པའི་དཔལ་དམ་ཚིག་གསུམ་ནི་གསང་བའི་དཀྱིལ་འཁོར་ཏེ། དེར་བདག་བྱིན་གྱིས་བརླབ་པ་ནི་འདས་མ་ཐག་ཏུ་བཤད་པའི་རྡོ་རྗེ་སློབ་དཔོན་རན་གཉིད་རྡོ་རྗེ་སེམས་དཔའ་ཉིད་དུ་བྱའོ། །སྒྲུབ་པ་གཅིག་བུ་ཞེས་བྱ་བ་ནི་སློབ་མ་གཞན་དུ་གཞུག་པ་ལ་སོགས་པའི་ཆོ་ག་དང་བྲལ་བའོ། །དེ་ཉིད་ཀྱི་ཆོ་ག་ནི་ཆོ་གའི་ཚིག་གོ །མཆོག་ཏུ་གྲུབ་པ་ནི་ཐོག་མ་དང་ཐ་མ་མེད་པ་སྟེ། དངོས་གྲུབ་ཀྱི་རྒྱུ་ཉིད་ཡིན་པའི་ཕྱིར་རོ། །དེ་ནས་ཀྱི་སྒྲ་ནི་སྐབས་སུ་བབ་པ་སྟེ། གསང་བའི་དཀྱིལ་འཁོར་དུ་བདག་ལ་བྱིན་གྱིས་བརླབ་པའི་ཆོ་ག་གཅིག་པུའི་སྐབས་ལའོ་ཞེས་བྱ་བའི་ཐ་ཚིག་གོ །འདིར་ཞེས་བྱ་བ་ནི་གསང་བའི་དཀྱིལ་འཁོར་དུའོ། གང་གིས་བསྒྲུབ་པར་བྱ་བ་ནི་སྒྲུབ་པས་ཏེ་བཅོམ་ལྡན་འདས་ཀྱི་མདུན་དུ་བདག་ལ་བྱིན་གྱིས་བརླབ་པ་ལ་སོགས་པ་གང་ཡིན་པ་དེ་བཤད་པར་བྱ་སྟེ་བརྗོད་པར་བྱའོ།།
དངོས་གྲུབ་ཤིན་ཏུ་རྟག་པ་ཡང༌། །ཞེས་བྱ་བ་ལ་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་དངོས་གྲུབ་ཐོག་མ་དང་ཐ་མ་མེད་པ་བཤད་པར་བྱའོ། །སྒྲུབ་པ་དེ་ཁྱད་པར་ཇི་ལྟ་བུ་དང་ལྡན་ཞེ་ན། གང་གི་ཞེས་བྱ་བ་ལ་སོགས་པ་ལ་བདག་ལ་བྱིན་གྱིས་བརླབ་པ་ལ་སོགས་པའི་རང་བཞིན་གྱི་སྒྲུབ་པ་གང་གིས་སྲིད་པས་ཏེ་སྐྱེ་བ་འདི་ཉིད་ལ་ཐོག་མ་དང་ཐ་མ་མེད་པའི་དཔལ་རྡོ་རྗེ་སེམས་དཔའ་གསང་བའི་དཀྱིལ་འཁོར་གྱི་དངོས་གྲུབ་ཤིན་ཏུ་རྟག་པ་ཐོབ་པར་འགྱུར་ཏེ། དེ་ལྟར་གྱུར་པའི་སྒྲུབ་པ་དེ་བཤད་པར་བྱའོ། །སླར་ཡང་སྒྲུབ་པ་དེ་ཉིད་ཁྱད་པར་དུ་བསྟན་པར་བྱ་བའི་ཕྱིར་གང་གིས་ཞེས་བྱ་བ་ལ་སོགས་པ་གསུངས་ཏེ། སྒྲུབ་པ་གང་གིས་དཔལ་རྡོ་རྗེ་སེམས་དཔས་གསུངས་པའི་དཀྱིལ་འཁོར་གྱི་སྒྲུབ་པ་པོ། མཆོག་ནི་བསོད་ནམས་དང་ལྡན་པའི་སྒྲུབ་པ་པོ་རྣམས་མྱུར་བ་ཁོ་ནར་འགྲུབ་པར་འགྱུར་རོ། །སྡིག་ཆེན་བྱེད་པ་རྣམས་ཀྱང་ནི། །ཞེས་བྱ་བ་ནི་མཚམས་མེད་པ་ལྔ་དང་དམ་པའི་ཆོས་སྤོང་བར་བྱེད་པ་ལ་སོགས་པ་རྣམས་སོ། །ཀྱང་གི་སྒྲས་ནི་གང་ཞིག་བསོད་ནམས་དང་ལྡན་ཞིང་སྡིག་པ་ཆེན་པོ་བྱེད་པ་མ་ཡིན་པ་དེ་རྣམས་ནི་ཤིན་ཏུ་ཡང་འགྲུབ་པར་འགྱུར་བར་བསྟན་པ་ཡིན་ནོ། །ནིའི་སྒྲས་ནི་ངེས་པར་གཟུང་བའོ། །མ་གྲུབ་རྣམས་ཀྱང་འགྲུབ་པར་འགྱུར། །ཞེས་བྱ་བ་ལ་ཤེས་རབ་ཀྱི་ཕ་རོལ་ཏུ་ཕྱིན་པའི་དུམ་བུ་དང༌། དུམ་བུ་གཉིས་པ་རྩ་བའི་རྒྱུད་དང༌། རྒྱུད་ཕྱི་མ་དང༌། རྟོག་པ་ཐམས་ཅད་ཀྱི་རྩ་བའི་རྒྱུད་དང༌། རྒྱུད་ཕྱི་མ་ལས་གསུངས་པའི་སྒྲུབ་པ་ཇི་ལྟ་བ་བཞིན་དུ་བཤད་པ་དེས་གལ་ཏེ་གྲུབ་པར་མ་གྱུར་ན་དེའི་ཚེ་མ་གྲུབ་པའོ། །ཀྱང་གི་སྒྲ་ནི་སྒྲུབ་པ་སྟེ་ཤིན་ཏུ་གྲུབ་པར་འགྱུར་རོ་ཞེས་བྱ་བའོ། །འདིས་ནི་འདི་སྐད་སྟོན་པར་འགྱུར་ཏེ། སྔར་བཤད་པའི་སྒྲུབ་པས་ནི་རྡོ་རྗེ་སེམས་དཔའ་དང་འདྲ་བར་འགྱུར་ཏེ། གསང་བའི་དཀྱིལ་འཁོར་གྱི་སྒྲུབ་པས་ནི་རྡོ་རྗེ་སེམས་དཔའ་ཉིད་དུ་འགྱུར་བ་ཡིན་ནོ་ཞེས་བྱ་བ་བསྟན་ཏོ། །ཇི་ལྟར་སྒྲུབ་པར་འགྱུར་ཞེ་ན། རྡོ་རྗེ་སེམས་དཔས་གསུངས་པ་བཞིན། །ཞེས་བྱ་བ་ལ་ཇི་ལྟར་བཅོམ་ལྡན་འདས་རྡོ་རྗེ་སེམས་
དཔས་གསུངས་པ་བཞིན་དུའོ། །ལུགས་མའམ་ནི་བརྡུངས་མའམ། །འདུས་བྱས་པའམ་བྲིས་པའམ། །དང་པོའི་སེམས་དཔའ་བཞུགས་གསོལ་ནས། །དེ་ཡི་མདུན་དུ་ཆོ་ག་བཞིན། །ཞེས་བྱ་བ་ལ་སོགས་པའི་སྒྲུབ་པའོ། །མ་གྲུབ་པ་རྣམས་ཀྱང་འདིས་གྲུབ་པ་ཡིན་གྱི་གཞན་གྱིས་ནི་མ་ཡིན་ནོ། །ད་ནི་སྒྲུབ་པ་རྣམ་པར་བཤད་པའི་ཕྱིར། རྟག་ཏུ་རྡོ་རྗེ་དྲིལ་འཆང་ཞིང༌། །ཞེས་བྱ་བ་ལ་སོགས་པ་གསུངས་ཏེ། འདིར་དང་པོའི་རྡོ་རྗེ་ནི་རྡོ་རྗེ་སྟེ། དང་པོའི་རྡོ་རྗེ་དང་ལྡན་པའི་དྲིལ་བུ་ནི་དྲིལ་བུའོ། །འདི་གཉིས་འཛིན་པས་ན་རྡོ་རྗེ་དང་དྲིལ་བུ་འཆང་བའོ། །རྟག་ཏུ་ཞེས་བྱ་བ་ནི་བདག་དང་གནས་བསྲུངས་པ་ནས་བརྩམས་ཏེ་ལྷ་གཤེགས་སུ་གསོལ་བ་ལ་ཐུག་གི་བར་གྱི་དུས་སུའོ། །གཞན་དུ་ནི་རང་གི་རིགས་ཀྱི་ཕྱག་རྒྱས་མཚན་པ་འཛིན་ཅིང་དེ་ཡིས་མཚན་པའི་དྲིལ་བུ་འཛིན་པའི་རྟག་ཏུའོ། །དངོས་གྲུབ་མཆོག་ནི་བསྒྲུབ་པར་བྱ། །ཞེས་བྱ་བ་ལ་རང་གི་ལྷའི་ཕྱག་རྒྱ་ཆེན་པོ་ལ་སོགས་པ་སྒྲུབ་པ་ནི་རང་ལ་རག་ལས་པར་བྱ་བ་ཡིན་ནོ། །བྱེད་པར་འགྱུར་བ་གང་དག་གིས་བསྒྲུབ་པར་བྱ་ཞེ་ན། ཐམས་ཅད་དགུག་པ་བྱ་ཞེས་བྱ་བ་ལ་སོགས་པ་ལ་ཐམས་ཅད་དགུག་པ་ནི་ཐམས་ཅད་འགུགས་པས་ཏེ། འདོད་པའི་ལྷའི་རང་བཞིན་ཅན་གྱི་ཡེ་ཤེས་སེམས་དཔའ་རང་གི་ལུས་ལ་གཞུག་པའོ་ཞེས་བྱ་བའི་དོན་ཏོ། །མཆོད་པ་ཆེ་ཞེས་བྱ་བ་ནི་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་བཅུ་གཉིས་ཀྱི་མཆོད་པ་སྟེ་མཆོད་པ་ཆེན་པོའོ། །དེ་ཁོ་ན་ཉིད་དང༌། །ཆོས་དང༌། དམ་ཚིག་རྣམས་ཀྱིས་བདག་ལ་བྱིན་གྱིས་བརླབ་པ་ནི་བདག་བྱིན་གྱིས་བརླབ་པའོ། །སོགས་པའི་སྒྲས་ནི་སྒྲུབ་པ་ཆེན་པོ་དང༌། རྗེས་སུ་སྒྲུབ་པ་དང༌། ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང༌། ལས་ཀྱི་ཕྱག་རྒྱ་དང༌། དབང་བསྐུར་བ་དང༌། དངོས་གྲུབ་ཀྱི་རྡོ་རྗེ་བརྟུལ་ཞུགས་དང༌། ཕྱག་བྱ་བ་རྣམས་གཟུང་བར་བྱའོ། །ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་ལ་བྱིན་གྱིས་བརླབ་པ་ནི་ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་བྱིན་གྱིས་བརླབ་པ་རྣམས་སོ། །དེ་ལ་ཐོག་མར་
གང་ལ་ཡོད་པ་དེ་ནི། །ཐམས་ཅད་དགུག་དང་མཆོད་པ་ཆེ། །བདག་བྱིན་བརླབ་སོགས་སྒྲུབ་པ་རྣམས་སོ། །དེ་དག་གིས་མཆོག་གི་སྒྲུབ་པ་བསྒྲུབ་པར་བྱའོ། །ད་ནི་ཐམས་ཅད་དགུག་པ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཞེས་བྱ་བ་ནི་དགར་བའོ། །ཇི་ལྟར་ཞེས་བྱ་བ་ནི་དྲི་བའོ། །མཆོག་ཏུ་གསང་བའི་དཔལ་དམ་ཚིག་གསུམ་ནི་གསང་བའི་དཀྱིལ་འཁོར་ཏེ། དེའི་དངོས་གྲུབ་ཐམས་ཅད་ནི་ཡེ་ཤེས་སེམས་དཔའ་དགུག་པ་སྟེ་སྤྱན་དྲང་བའོ། །དེ་སྟོན་པར་བྱེད་པའི་སྒྲའི་ཚོགས་ནི་རྒྱུའོ། དེ་ཇི་ལྟར་ཤེས་པར་བྱ་ཞེས་ཁ་བསྐང་ངོ༌། །རང་གི་ལྷག་པའི་ལྷ་ནི་འདོད་པའི་ལྷ་སྟེ། དེའི་སྐུ་གསུང་ཐུགས་ཀྱི་རྡོ་རྗེ་བདག་ཉིད་ཅན་གྱི་ལྷག་པར་མོས་བ་ནི་ཇི་ལྟ་བ་བཞིན་དུ་སྦྱོར་བ་སྟེ་རྣལ་འབྱོར་ཞེས་བྱ་བའི་དོན་ཏོ། །ཐམས་ཅད་དགུག་པའི་ཕྱག་རྒྱ་ནི་དྲིལ་བུ་དང་བཅས་པའི་གསང་བའི་ལྕགས་ཀྱུ་སྟེ། ཐམས་ཅད་དགུག་པའི་ཕྱག་རྒྱ་དེ་རང་གི་ལྷའི་རྣལ་འབྱོར་གྱི་སྤྱི་བོར་སྐེག་པའི་གར་བྱ་ཞིང་སྤྱན་དྲང་བའི་གླུ་བརྗོད་ནས་ཡེ་ཤེས་སེམས་དཔའ་བཀུག་ལ་རང་གི་ལུས་ལ་གཞུག་པར་བྱའོ། །དེ་ནས་ཀྱི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་ཀྱི་དོན་དུ་དགུག་པ་ནི་སྤྱན་དྲངས་པ་སྟེ། དེའི་དོན་དུ་མཆོག་ཏུ་གསང་བ་ནི་སྐུ་གསུང་ཐུགས་ཀྱི་རྡོ་རྗེ་སྟོན་པར་བྱེད་པས་འདའ་བར་དཀའ་བ་དང༌། མི་ཕྱེད་པའི་གླུའི་མཆོད་པ་འདི་ཡིན་ཏེ། ཛཿ་མཆོག་དང་པོ་ཞེས་བྱ་བ་ནས་བརྩམས་ཏེ། ཇི་སྲིད་བར་དུ་དགའ་བ་ཁྱོད་བདག་མཆོག་དང་པོ་ཞེས་བྱ་བའི་བར་དུའོ། །དེ་ལ་ཛཿ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་ཀུན་མཆོག་སོ་སོར་རྟོག་པའི་མཚན་ཉིད་ཅན་གྱི་ལམ་བསྟན་པ་ཡིན་ནོ། །མཆོག་ནི་ཐོག་མ་དང་ཐ་མ་མེད་པའོ། །དང་པོ་ཞེས་བྱ་བ་ནི་བསྐལ་པ་བཟང་པོ་ལ་སོགས་པ་ནས་སྔོན་དུ་ཡང་ད་ལྟར་བྱུང་བའི་རང་བཞིན་དུ་བཞུགས་པའོ། །ལམ་དེ་ཉིད་ཀྱི་རང་བཞིན་གྱི་དེ་བཞིན་ཉིད་ཀྱི་རྡོ་རྗེ་འཛིན་པས་ན་རྡོ་རྗེ་འཆང་ངོ༌། །གཟུང་བ་དང་འཛིན་པའི་རྣམ་པར་རྟོག་པས་
བསྐྱོད་པར་མི་ནུས་པའི་ཕྱིར་རྡོ་རྗེ་སེམས་དཔའོ། །མཆོག་དང་པོའི་རྡོ་རྗེ་འཆང་ཡང་དེ་ཡིན་ལ་རྡོ་རྗེ་སེམས་དཔའ་ཡང་དེ་ཉིད་ཡིན་པས་ན་མཆོག་དང་པོའི་རྡོ་རྗེ་འཆང་གི་རྡོ་རྗེ་སེམས་དཔའོ། །བདེ་བ་ནི་ཀུན་ནས་ཉོན་མོངས་པ་མེད་པ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཐམས་ཅད་ལས་མཆོག་ཏུ་གྱུར་པ་རབ་ཏུ་རྟོགས་པར་མཛོད་ཅིག་ཅེས་སངས་རྒྱས་བཅོམ་ལྡན་འདས་རྡོ་རྗེ་སེམས་དཔའ་ལ་བོད་པའོ། །འདིར་སངས་རྒྱས་ནི་རྡོ་རྗེ་འཆང་བསྟན་པ་ཡིན་ཏེ། འདིར་འདོད་ཆགས་རྡོ་རྗེའི་རང་བཞིན་ཅན་གྱི་རྡོ་རྗེ་སེམས་དཔའ་ཡིན་ནོ། །ཧཱུཾ་ཞེས་བྱ་བའི་འདོད་ཆགས་རྡོ་རྗེ་མའི་རང་བཞིན་གྱི་སྐུ་མཆོག་སོ་སོར་རྟོག་པའི་མཚན་ཅན་གྱི་ལམ་གྱི་ཡུལ་དུ་བྱས་པའི་ཟག་པ་མེད་པའི་བདེ་བ་དང་ཡིད་བདེ་བའི་ངོ་བོར་རྟོགས་པའོ། །དེ་ཉིད་མཆོག་སྟེ་ཕུལ་དུ་བྱུང་བའི་རྡོ་རྗེ་ནི་འདོད་ཆགས་རྡོ་རྗེ་མའི་རང་བཞིན་ཅན་གྱི་ལས་མངོན་དུ་བྱ་བའི་རང་བཞིན་ནོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེས་བྱ་བ་བསྟན་པའི་ཕྱིར་མཆོག་ཅེས་བྱ་བ་ལ་སོགས་པའི་ཁྱད་པར་གསུངས་ཏེ། མཆོག་ཀྱང་ཡིན་ལ་མི་འགྱུར་བ་ཡང་དེ་ཉིད་ཡིན་པས་ན་མཆོག་ཏུ་མི་འགྱུར་བ་སྟེ་ཐོག་མ་དང་ཐ་མ་མེད་པའོ།། དེ་ཟག་པ་མེད་པའི་སྲིད་པ་རབ་ཏུ་བསྒྲུབ་པ་ནི་མི་གནས་པའི་མྱ་ངན་ལས་འདས་པ་གྲུབ་པའོ། །ཟག་པ་མེད་པའི་སྲིད་པ་རབ་ཏུ་བསྒྲུབ་པ་དེའི་དོན་དུ་ཟག་པ་མེད་པའི་བདེ་བའི་རང་བཞིན་ཅན་གྱི་དམ་ཚིག་དང་པོ་ནི་ཐོག་མ་དང་ཐ་མ་མེད་པ་སྟེ་དེའི་ལས་སོ། །དེའི་ཕྱིར་གསོལ་བ་བཏབ་པ་ནི་བདག་ལ་སྒྲུབས་ཤིག་ཅེས་བྱ་བ་སྟེ། ཀཱི་ལི་ཀཱི་ལའི་རང་བཞིན་གྱི་རྡོ་རྗེ་འཆང་བསྟན་ཏོ། །བཾ་ཞེས་བྱ་བ་ནི་མི་གནས་པའི་མྱ་ངན་ལས་འདས་པ་སྲིད་པ་ཕྱི་མའི་མཐའི་མུར་ཐུག་པའི་སེམས་ཅན་ལ་ལྟོས་པའི་རང་བཞིན་གྱི་དམིགས་པ་མེད་པའི་ཐུགས་རྗེ་ཆེན་པོའི་བཅིང་བས་འཆིང་བར་མཛོད་ཅིག །པདྨའི་རྒྱལ་པོ་སྐྱེ་ཞེས་བྱ་བ་དང་སྦྱར་རོ། །དེ་ཉིད་ཁྱད་པར་དུ་བསྟན་པར་བྱ་བའི་ཕྱིར་མཆོག་ཏུ་བདག་ཅེས་བྱ་བ་ལ་སོགས་པ་གསུངས་ཏེ། དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཅན་གྱིས་ཆོས་ཀྱི་དབྱིངས་
ནི་མཆོག་ཏུ་བདག་སྟེ་དེའི་སྐུ་ནི་དེ་ལས་བྱུང་བའི་ལོངས་སྤྱོད་རྫོགས་པའི་སྐུ་སྟེ་དེ་འཛིན་པར་བྱེད་པས་ན་མཆོག་ཏུ་བདག་གི་སྐུ་འཛིན་པའོ། །ཐམས་ཅད་རྣལ་འབྱོར་ནི་རྡོ་རྗེ་འཆང་ཆེན་པོས་ཏེ། དེ་རྣམ་པར་རྒྱལ་བ་ནི་རང་བཞིན་གྱིས་དག་པའི་ཏིང་ངེ་འཛིན་གྱིས་ཉོན་མོངས་པ་ལ་སོགས་པའི་བདུད་ལས་རྣམ་པར་རྒྱལ་བའོ། །དེ་བསྒྲེང་བ་ནི་རྡོ་རྗེ་ཆུ་སྲིན་གྱི་རྒྱལ་མཚན་གྱིས་ཉེ་བར་མཚན་པའི་རྡོ་རྗེ་དྲན་པའི་རང་བཞིན་ཅན་གྱི་རྡོ་རྗེ་སེམས་དཔའི་སྐུའོ། །མཆོག་ཏུ་བདག་གི་སྐུ་འཛིན་པ་ཡང་དེ་ཡིན་ལ་རྣལ་འབྱོར་ཐམས་ཅད་རྣམ་པར་བསྒྲང་བ་ཡང་དེ་ཉིད་ཡིན་པས་མཆོག་ཏུ་བདག་གི་སྐུ་འཛིན་པའི་རྣལ་འབྱོར་ཐམས་ཅད་རྣམ་པར་རྒྱལ་བའི་བསྒྲེང་བའོ། །དེ་ཉིད་ཀྱི་ཉོན་མོངས་པའི་དྲི་མའི་བག་ཆགས་དང་བྲལ་བས་རང་བཞིན་གྱིས་དག་པའི་ཏིང་ངེ་འཛིན་གྱི་ངོ་བོས་རབ་ཏུ་མཆོག་གིས་དག་པ་ནི་རབ་མཆོག་གིས་དག་པ་སྟེ། དེས་བདེ་བ་གང་ལ་ཡོད་པ་དེ་ནི་བདེ་བ་དང་ལྡན་པ་སྟེ། དེ་ལྟར་གྱུར་པ་ནི། ཁྱོད་ནི་པདྨའི་རྒྱལ་པོ་སྟེ། །གྱུར་ཅིག་ཅེས་བྱ་བ་ནི་སྒྲུབ་པར་གྱུར་ཅིག་ཅེས་བོད་པའོ། །པདྨ་བཞིན་དུ་འཇིག་རྟེན་གྱི་ཆོས་ཀྱི་དྲི་མ་རྣམས་ཀྱིས་མགོས་པས་མཛེས་པ་སྟེ། འདིས་ནི་རྡོ་རྗེ་དྲན་པ་མའི་རང་བཞིན་གྱི་རྡོ་རྗེ་འཆང་བསྟན་ཏོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་བསྙེམས་པས་སེམས་ཅན་གྱི་དོན་མཛད་པའི་ངོ་བོ་དང་སངས་རྒྱས་སྦྲུལ་པའི་མཆོད་པའི་རང་བཞིན་ཅན་གྱི་ལས་དབང་དུ་མཛད་པས་ཡི་གེ་ཧོཿ་ཡིན་ནོ། །དེ་ཉིད་ཁྱད་པར་དུ་བསྟན་པར་བྱ་བའི་ཕྱིར་རབ་མཆོག་ཅེས་བྱ་བ་ལ་སོགས་པ་གསུངས་ཏེ། རབ་མཆོག་ནི་ཕུལ་དུ་བྱུང་བའོ། །རབ་མཆོག་ལས་ཀྱང་ཕུལ་དུ་བྱུང་བས་ན་མཆོག་གི་མཆོག་གོ །དངོས་གྲུབ་ཀྱང་དེ་ཡིན་ལ་ཐམས་ཅད་ཀྱང་དེ་ཡིན་པས་དངོས་གྲུབ་ཐམས་ཅད་དེ། །སེམས་ཅན་གྱི་དོན་བྱེད་པའི་སངས་རྒྱས་ལ་མཆོད་པ་སངས་རྒྱས་ཀྱི་སྤྲུལ་པ་རྫོགས་པའི་རང་བཞིན་ཅན་ནོ། །དེས་མཆོག་ཀྱང་ཡིན་ལ་དབང་ཕྱུག་ཀྱང་ཡིན་པས་ན་དངོས་གྲུབ་ཐམས་ཅད་ཀྱི་དབང་ཕྱུག་གོ །དངོས་གྲུབ་ཐམས་ཅད་ཀྱི་དབང་ཕྱུག་དམ་པའི་རང་བཞིན་ཅན་ནམ་མཁའི་སྙིང་པོ་ཀྱེ་བདག་
ལ་གྱུར་ཅིག་ཅེས་བྱ་བ་ནི་བོད་པའོ། །ནམ་མཁའ་ནི་རང་བཞིན་གྱིས་འོད་གསལ་བ་ནམ་མཁའ་དང་མཉམ་པའི་བྱ་བ་ནན་ཏན་གྲུབ་པའི་ཡེ་ཤེས་ཏེ་དེ་ཉིད་སྙིང་པོ་སྟེ། སྐྱེ་བའི་གནས་གང་ལ་ཡོད་པ་དེ་ནི་ནམ་མཁའི་སྙིང་པོ་སྟེ། སྤྲུལ་པའི་སྐུའི་རང་བཞིན་འཛིན་པའི་རྡོ་རྗེ་འཆང་ངོ༌།། རྟག་ཏུ་ཞེས་བྱ་བ་ནི་སྐད་ཅིག་མ་རེ་རེ་ཉིད་དུ་བདག་ལ་གྲུབ་གྱུར་ཅིག་བའོ། །དེ་ཡང་ཇི་ལྟར་ཞ་ན། དངོས་གྲུབ་ཐམས་ཅད་ཀྱི་དབང་ཕྱུག་དམ་པའི་གཟུགས་ཀྱིས་བདག་ལ་གྲུབ་པར་གྱུར་ཅིག་ཅེས་བྱ་བ་སློབ་དཔོན་གྱིས་བོད་པ་ཡིན་ཏེ། འདིས་རྡོ་རྗེ་འདོད་པའི་དབང་ཕྱུག་གི་རང་བཞིན་རྡོ་རྗེ་འཆང་བསྟན་ཏོ། །འདོར་བསྡུས་ན་འདོད་ཆགས་རྡོ་རྗེ་མའི་རང་བཞིན་ཛཿ་ཞེས་བྱ་བ་དང༌། ཀཱི་ལི་ཀཱི་ལའི་རང་བཞིན་ཧཱུཾ་ཞེས་བྱ་བ་དང༌། རྡོ་རྗེ་དྲན་པ་མའི་རང་བཞིན་བཾ་ཞེས་བྱ་བ་དང༌། རྡོ་རྗེ་འདོད་པའི་དབང་ཕྱུག་གི་རང་བཞིན་ཅན་གྱི་རྡོ་རྗེ་འཆང་རྒྱས་པར་བསྟན་པ་སྟེ། མདོར་བསྡུས་ན་ཧོཿ་ཞེས་བྱ་བའོ། །ལྷ་མོ་བཞིའི་རང་བཞིན་དེ་ཉིད་འབབ་པར་མཛོད་ཅིག་ཅེས་བྱ་བ་གསུངས་ཏེ། ཧུ་ལུ་ཧུ་ལུ་ཞེས་བྱ་བ་དང༌། སྒྲུབས་ཤིག་ཅེས་བྱ་བ་ཐམས་ཅད་དགུག་པའི་གྲུབ་པས་བདག་ལ་སྒྲུབས་ཤིག་ཅེས་བྱའོ། །དེ་ཉིད་བསྟན་པར་བྱ་བའི་ཕྱིར་དམ་ཚིག་ཆེན་པོ་རྣམས་ཀྱིས་ཡང་དག་དགུག་ཅེས་བྱ་བ་གསུངས་ཏེ། འདོད་ཆགས་རྡོ་རྗེ་མ་ལ་སོགས་པའི་རང་བཞིན་སྟོན་པའི་ཡི་གེ་རྣམས་ནི་དམ་ཚིག་ཆེན་པོ་རྣམས་སོ། །དམ་ཚིག་ཆེན་པོའི་དེ་དག་གི་ཕྱོགས་བཅུ་ནས་འདྲེན་ཅིང་ཡང་དག་པར་དགུག་པ་ནི་བཅོམ་ལྡན་འདས་ཀྱེ་བདག་ལ་གྲུབ་པར་གྱུར་ཅིག་ཅེས་བྱ་བ་ལ་སློབ་དཔོན་གྱིས་གསོལ་བ་བཏབ་པ་ཡིན་ནོ། །བདག་རང་བཞིན་ཇི་ལྟ་བུ་དང་ལྡན་པ་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཅེས་བྱ་བ་ལ་བྱང་ཆུབ་ཀྱི་སེམས་དང༌། སྦྱིན་པའི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང། བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་རྣམས་ཀྱི་དམ་ཚིག་ནི་རྡོ་རྗེ་སེམས་དཔའ་ལ་སོགས་པའི་སྐུའི་གསང་བའི་རང་བཞིན་ཅན་གྱི་རྡོ་རྗེ་འཆང་ངོ༌། །རབ་ཏུ་དགའ་བ་ཁྱོད་
ནི་བདག་ལ་ཞེས་བྱ་བ་ཟག་པ་མེད་པའི་བདེ་བ་དང་ཡིད་བདེ་བ་ལས་བྱུང་བའི་རྡོ་རྗེ་སེམས་དཔའ་ལ་སོགས་པའི་སྐུའི་གསང་བའི་རང་བཞིན་ཅན་ཁྱོད་གང་ཡིན་པ་དེ་ཉིད་བདག་ཡིན་ནོ་ཞེས་བྱ་བ་འདིས་དེ་དང་ལྷན་ཅིག་ཏུ་གྱུར་པ་ཉིད་དུ་བསྟན་པ་ཡིན་ནོ། །མཆོག་དང་པོ་ཞེས་བྱ་བས་བཅོམ་ལྡན་འདས་རྡོ་རྗེ་སེམས་དཔའ་ལ་བོད་པའོ། །དེ་ལྟར་ཐམས་ཅད་དགུག་པ་བསྟན་ནས་ད་ནི་མཆོད་པ་ཆེན་པོ་བཤད་པར་བྱ་བའི་ཕྱིར་ཞེས་བྱ་བ་ལ་སོགས་པ་གསུངས་ཏེ། དཔལ་དམ་ཚིག་གསུམ་གྱི་གསང་བའི་དཀྱིལ་འཁོར་དུ་དངོས་གྲུབ་ཐམས་ཅད་ཀྱི་དོན་དུ་མཆོད་པ་ཆེན་པོ་ནི་འདོད་ཆགས་རྡོ་རྗེ་མ་ལ་སོགས་པ་ཕྱག་རྒྱ་བཅུ་གཉིས་ཀྱིས་མཆོད་པ་སྟེ། དེའི་ཆོ་ག་ནི་རྣམ་པ་བཅུ་གཉིས་ཀྱི་ཕྱག་རྒྱའི་མཆོད་པ་ལ་བྱའོ། །རང་ལྷའི་རྣལ་འབྱོར་ཇི་ལྟ་བ་བཞིན་དུ་ཞེས་བྱ་བ་ལ་རྣལ་འབྱོར་དང་རྗེས་སུ་རྣལ་འབྱོར་དག་གིས་འདོད་པའི་ལྷའི་རང་བཞིན་ཅན་དུ་བདག་ཉིད་སྒོམ་པ་ནི་འདིར་ལྟའི་རྣལ་འབྱོར་ཇི་བཞིན་དུ་བྱའོ། །ཐམས་ཅད་ཀྱང་ཡིན་ལ་མཆོད་པ་ཡང་དེ་ཉིད་ཡིན་པས་ན་མཆོད་པ་ཐམས་ཅད་དེ། རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱ་བཅུ་གཉིས་ཀྱིས་མཆོད་བའོ། །དེ་དག་གི་མཆོག་གི་སྐུ་ནི་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་ཆེན་པོ་བཅུ་གཉིས་སོ། །དེ་རྣམས་ཀྱིས་རང་གི་ལྷའི་རྣལ་འབྱོར་དང་ལྡན་པའི་བདག་ཉིད་ཡང་དག་པར་མཆོད་ལ་སླར་ཡང་གླུ་དང་རོལ་མོ་རྣམ་པར་འཕྲུལ་པ་ནི་འོག་མ་ནས་འཆད་པར་འགྱུར་བའི་མཚན་ཉིད་ཅན་རྣམས་ཀྱིས་མཆོད་པར་བྱའོ། །དེ་ནས་ཞེས་བྱ་བ་ལ་སོགས་པ་ལ། དེ་ནས་ཀྱི་སྒྲ་ནི་སྐབས་སུ་བབ་པ་སྟེ་མཆོད་པའི་སྐབས་འདི་ལ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་ནི་དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་སྟེ། དེའི་དོན་དུ་མཆོད་པ་ཆེན་པོ་ནི་འདས་མ་ཐག་ཏུ་བཤད་པའི་ཕྱག་རྒྱའི་མཆོད་པའོ། །དེའི་མཆོག་ནི་ཕྱག་རྒྱའི་མཆོད་པའོ། །དེར་མཆོག་ཏུ་གསང་བ་དང༌། འདའ་བར་དཀའ་བ་དང༌། མི་ཕྱེད་པའི་གླུའི་མཆོད་པ་ཞེས་བྱ་བའི་དོན་ཏོ། །ཐམས་ཅད་ཀྱང་ཡིན་ལ་རྗེས་སུ་ཆགས་པ་ཡང་དེ་ཉིད་ཡིན་
པས་ན་ཐམས་ཅད་རྗེས་སུ་ཆགས་པས་རྡོ་རྗེ་སེམས་དཔའ་ལ་སོགས་པ་སྒོམ་པའོ། །དེ་ཉིད་བདེ་བས་ཏེ་རྡོ་རྗེ་སེམས་དཔའ་ལ་མཆོད་པའི་རང་བཞིན་ཅན་གྱི་བདེ་བ་མངོན་དུ་གྱུར་པའི་རྒྱུ་ཉིད་ཡིན་པའི་ཕྱིར་དེས་རྡོ་རྗེ་སེམས་དཔའ་ཉིད་ལ་བོད་པའོ། །ཐམས་ཅད་རྗེས་སུ་ཆགས་པའི་བདེ་བདེ་གང་ཡིན་ཞེ་ན། དམ་པའི་ཐུགས་ཞེས་བྱ་བ་སྟེ། ཐམས་དང་ཤེས་རབ་ཀྱི་རང་བཞིན་ཅན་གྱི་མཆོག་ཏུ་གྱུར་པའི་ཐུགས་གང་ལ་མངའ་བ་དེ་ནི་དམ་པའི་ཐུགས་ཏེ་དེ་བཞིན་གཤེགས་པ་རྣམས་སོ། །དེ་རྣམས་ཀྱི་རྡོ་རྗེ་སེམས་དཔའ་ཁྱོད་ནི་བདག་ལ་གྱུར་ཅིག་ཅེས་བྱ་བ་འདིས་ཀུན་མཆོག་སོ་སོར་རྟོག་པའི་རང་བཞིན་ཅན་ལ་སློབ་དཔོན་གྱིས་གསོལ་བ་བཏབ་པ་ཡིན་ནོ། །རབ་ཏུ་དགའ་བ་ཞེས་བྱ་བ་ཀཱི་ལི་ཀཱི་ལའི་རང་བཞིན་ཅན་ཏེ། དེ་ཉིད་འདའ་བར་མི་བྱ་བའི་ཕྱིར་དམ་ཚིག་གོ །བདེ་བ་ཆེན་པོ་བདག་ལ་གྱུར་ཅིག་ཅེས་བྱ་བ་ནི་བོད་པའོ། །བརྟན་མཐོ་ཞེས་བྱ་བ་ནི་མི་ཕྱེད་པའི་སྐུ་བདག་ལ་གསོལ་བར་མཛོད་ཅིག་པ་སྟེ། འདིས་མི་གནས་པའི་མྱ་ངན་ལས་འདས་པའི་རང་བཞིན་རྡོ་རྗེ་དྲན་མ་བདག་ལ་གསོལ་ཅིག་པའོ་ཞེས་གསོལ་བ་བཏབ་པ་སྟེ། བརྟན་པ་དང་མཐོ་བ་ལ་སོགས་པ་ལ་གསོལ་བ་མངོན་པར་ཕྱོགས་པར་མཛོད་ཅིག་པའོ། །བརྟན་པ་དང་མཐོ་བ་ལ་སོགས་པའི་དངོས་གྲུབ་ཀྱིས་མྱུར་དུ་སངས་རྒྱས་ཀྱི་སྤྲུལ་པས་སེམས་ཅན་གྱི་ལས་ལ་རབ་ཏུ་འདུད་པ་ནི་མཆོག་ཏུ་འདུད་པར་མཛད་པ་སྟེ། འདིས་རྡོ་རྗེ་འདོད་པའི་དབང་ཕྱུག་མའི་རང་བཞིན་ཅན་གྱི་དངོས་གྲུབ་ཀྱི་ཕྱིར་གསོལ་བ་བཏབ་པའོ། །དེ་ལྟར་མཆོད་པ་ཆེན་པོ་བསྟན་ནས་བདག་ལ་བྱིན་གྱིས་བརླབ་པ་རྣམ་པར་འགྲེལ་བར་བྱ་བའི་ཕྱིར་དེ་ལ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། མཆོག་ཏུ་གསང་བ་དམ་པའི་དཔལ་དམ་ཚིག་གསུམ་ནི་དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་རྡོ་རྗེ་རྣམས་ཀྱིས་བདག་ལ་བྱིན་གྱིས་བརླབ་པ་ནི་དངོས་གྲུབ་ཐམས་ཅད་ཀྱི་བྱིན་གྱིས་བརླབ་པ་སྟེ། དེ་སྟོན་པར་བྱེད་པའི་སྒྲུབ་པ་ཆེན་པོའི་རྒྱུད་ཇི་ལྟར་ཤེས་པར་བྱ་ཞེ་ན། རང་ལྷའི་སྦྱོར་བ་ཇི་བཞིན་དུ་ཞེས་བྱ་བ་ལ་རྣལ་འབྱོར་དང༌། རྗེས་སུ་རྣལ་འབྱོར་གྱི་མཚན་ཉིད་དང༌། རྣལ་འབྱོར་
ཆེན་པོའི་མཚན་ཉིད་ཅན་ནོ། །དེ་ཉིད་ཆོས་དང་ལས་དང་དམ་ཚིག་གི་ཕྱག་རྒྱ་རྣམས་ཀྱིས་བྱིན་གྱིས་བརླབས་ཏེ། བསྟན་པར་བྱ་བ་གང་ཡིན་པ་དེ་ནི་ཕྱག་རྒྱ་ཀུན་གྱིས་བྱིན་གྱིས་བརླབ་པའོ། །དེ་ཉིད་ཆེན་པོའི་མཆོག་གིས་ནི། །རང་ཉིད་བསྒྲུབས་ཏེ་སྙིང་པོ་ཟླ་ཞེས་བྱ་བ་ལ་རང་གི་ལྷའི་སྦྱོར་བ་ཇི་ལྟ་བ་བཞིན་དུ་ཕྱག་རྒྱ་ཀུན་གྱིས་བྱིན་གྱིས་བརླབས་པའི་རང་གི་བདག་ཉིད་གང་ཡིན་པ་དེ་ཉིད། དེ་ཁོ་ན་ཉིད་དང༌། ཆོས་དང༌། དམ་ཚིག་གི་མཚན་ཉིད་ཅན་གྱི་མཆོག་གི་དེ་ཁོ་ན་ཉིད་ཆེན་པོས་རབ་ཏུ་བསྒྲུབས་པ་ནི་ཡོངས་སུ་རྫོགས་ཤིང་མཐར་ཐུག་པར་བྱས་ནས་རང་གི་ལྷའི་སྙིང་པོ་ཧཱུཾ་ལ་སོགས་པའི་རང་བཞིན་གྱི་བཟླས་པ་ནི་མངོན་པར་བསྔགས་པར་བྱའོ། །དེ་ཡང༌། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བའི་དོན་ཏོ།། དེ་ལྟར་དེ་ཁོ་ན་ཉིད་དང༌། ཆོས་དང༌། དམ་ཚིག་རྣམས་ཀྱིས་བདག་ཉིད་རབ་ཏུ་བསྒྲུབས་ལ་དམ་ཚིག་གསུམ་གྱི་གླུའི་མཆོད་པ་བྱའོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་མཆོག་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་མཆོག་གི་དངོས་གྲུབ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་རྫོགས་པའོ། །དེའི་དོན་དུ་བྱིན་གྱིས་བརླབ་པ་ནི་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེའི་ནུས་པ་བསྐྱེད་དེ། དེའི་མཆོག་གི་དེ་ཁོ་ན་ཉིད་སྟོན་པར་བྱེད་པའི་མཆོག་གི་གསང་བ་གང་ཡིན་པ་དེ་དམ་ཚིག་གི་རྡོ་རྗེའི་གླུའི་མཆོད་པ་ཡིན་ནོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། མཆོག་ཏུ་གྲུབ་པ་ཞེས་བྱའོ། །ཨོཾ་ཞེས་བྱ་བ་ནི་འདོད་ཆགས་རྡོ་རྗེ་མ་ལ་སོགས་པའི་མདངས་ཀྱི་དཔལ་ཞེས་བྱ་བའི་དོན་ཏོ། །ནམ་མཁའ་སྐྱེ་བ་མཚན་ལྡན་ཕྱིར། །ཞེས་བྱ་བ་ལ་སོགས་པ་ལ། ཇི་ལྟར་ནམ་མཁའ་ནི་རྫས་ཐམས་ཅད་དང་བྲལ་བའི་རང་བཞིན། རྩིག་པ་ལ་སོགས་པའི་རྫས་ཞིག་པས་སྐྱེ་བོ་ཞེས་འདོགས་པ་དེ་བཞིན་དུ། དེ་བཞིན་ཉིད་ཀྱི་རྡོ་རྗེའི་རང་བཞིན་གྱི་རྡོ་རྗེ་སེམས་དཔའ་ནི་ཡང་དག་
པ་མ་ཡིན་པའི་ཀུན་དུ་རྟོག་པའི་དྲི་མ་དང་བྲལ་བས་སེམས་ཅན་རྣམས་ཀྱི་རྒྱུད་ལ་སྐྱེ་བའོ་ཞེས་འདོགས་པ་ཡིན་ཏེ། དེས་ན་ནམ་མཁའ་སྐྱེ་བའི་མཚན་མ་དང་ལྡན་པའི་བཅོམ་ལྡན་འདས་ཡིན་ནོ། །ནམ་མཁའ་སྐྱེ་བའི་མཚན་ཉིད་དང་ལྡན་པ་དེ་ཉིད་ཀྱིས་ཐོག་མ་དང་ཐ་མ་མེད་པའོ། །འཇིག་རྟེན་ལ་གྲགས་པ་གཞན་དག་ཀྱང་ཐོག་མ་དང་ཐ་མ་མེད་པར་ཡོངས་སུ་བརྟག་པའི་ཚུལ་གྱིས་ཐོག་མ་དང་ཐ་མ་མེད་པ་ཡིན་གྱི་དོན་དམ་པར་ནི་མ་ཡིན་ཏེ། དེའི་ཕྱིར་དེ་རྣམས་ལས་ཁྱད་པར་དུ་བསྟན་པའི་ཕྱིར་མཆོག་ཅེས་བྱ་བ་གསུངས་ཏེ། དོན་དམ་པར་ཐོག་མ་ཐ་མ་མེད་པའི་མཆོག །ཅེས་བྱ་བ་ཡིན་ནོ། །དེ་ལྟ་བུ་གང་ཡིན་ཞེ་ན། སེམས་དཔའི་རྡོ་རྗེ་ཆེ་རང་བཞིན། །ཞེས་བྱ་བ་དེ་བཞིན་ཉིད་ཀྱི་རྡོ་རྗེའི་རང་བཞིན་ཅན་གྱི་སེམས་དཔའ་ནི་སེམས་དཔའི་རྡོ་རྗེ་ཆེན་པོའི་རང་བཞིན་ཏེ། དེ་བཞིན་ཉིད་དང་རོ་གཅིག་པའི་སེམས་དང་སེམས་ལས་བྱུང་བའི་རང་བཞིན་ཅན་ནོ་ཞེས་བྱ་བ་བསྟན་པ་ཡིན་ནོ། །རྡོ་རྗེ་སེམས་དཔའ་བདག་གྲུབ་མཛོད། །ཅེས་བྱ་བ་ནི་སྒྲུབ་པ་པོས་གསོལ་བ་བཏབ་པོ། །གཞུང་འདི་ཙམ་གྱིས་ནི། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་ཞེས་བྱ་བའི་དོན་བཤད་པ་ཡིན་ནོ། །ད་ནི་དགའ་བ་ཆེ་ཞེས་བྱ་བའི་དོན་བསྟན་པར་བྱ་བའི་ཕྱིར་ཀུན་མཆོག་ཅེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱི་མཆོག་ནི་ཀུན་མཆོག་སྟེ། འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་མཆོག་ཏུ་གྱུར་པ་བྱང་ཆུབ་ཆེན་པོའི་རང་བཞིན་ཅན་གྱི་དངོས་གྲུབ་ཀུན་མཆོག་ཀྱང་ཡིན་ལ་དངོས་གྲུབ་ཆེན་པོ་ཡང་དེ་ཉིད་ཡིན་པས་ན། ཀུན་མཆོག་དངོས་གྲུབ་ཆེན་པོའོ། །བག་ཆགས་དང་བཅས་པའི་ཉོན་མོངས་པ་དང་བྲལ་བ་ཉིད་ཀྱིས་གཞན་གྱི་དབང་དུ་མ་གྱུར་པ་དེ་ཉིད་ཀྱི་ཕྱིར་དབང་ཕྱུག་ཆེན་པོ་སྟེ། སྐུ་ཐམས་ཅད་བསྟན་པས་སེམས་ཅན་གྱི་དོན་མཛད་པའི་ཕྱིར་གཙོ་བོ་ཉིད་ཡིན་ནོ་ཞེས་བྱ་བའི་དོན་ཏོ། །དེ་དང་རྒྱུ་མཐུན་པའི་ལྷ་ནི་ལྷག་པའི་ལྷ་སྟེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་རང་བཞིན་ཅན་གྱི་ལྷག་པའི་ལྷའོ། །གསང་བ་ལྔའི་དེ་ཁོ་ན་ཉིད་ཆེན་པོའི་རང་བཞིན་དང་པོ་རྡོ་རྗེ་ནི་རྡོ་རྗེ་ཐམས་ཅད་དེ། དེ་འཛིན་པས་ན་
རྡོ་རྗེ་ཐམས་ཅད་འཛིན་པའོ། །དེ་ཡང་རིགས་ཐམས་ཅད་ཀྱི་བདག་པོའི་ཚུལ་གྱིས་ཐམས་ཅད་ལས་རྒྱལ་བས་ན་རྒྱལ་བའོ། །འདིར་རྒྱུ་ལ་འབྲས་བུ་ཉེ་བར་བཏགས་པར་བྱས་ནས་ཕྱག་རྒྱ་ཆེན་པོའི་གཟུགས་སུ་བཅོམ་ལྡན་འདས་དེ་ཁོ་ན་ཉིད་ཀྱི་གླུས་བསྟན་པ་ཡིན་ནོ། །མི་འགྱུར་མཆོག་ཏུ་བདག་གྲུབ་མཛོད། །ཅེས་བྱ་བ་བོད་པའོ། །དེ་ནི། ཀུན་དུ་བཟང་པོ་ཀུན་བདག་ཉིད། །རྡོ་རྗེ་བསྙེམས་པ་བདག་པོ་བདག །ཅེས་བྱ་བ་འདིའི་དོན་དང་དྲན་པར་བྱ་བའི་ཕྱིར། ཉེས་པ་མི་མངའ་ཞེས་བྱ་བ་ལ་སོགས་པ་གསུངས་ཏེ། བག་ཆགས་དང་བཅས་པའི་ཉོན་མོངས་པ་དང་བྲལ་བས་ན་སྐྱོན་མེད་པ་སྟེ་རང་བཞིན་དེས་བརྟག་པ་ཁྱོད་ཡིན་ནོ། །འདིས་ནི་ཀུན་དུ་བཟང་པོའི་དོན་བསྟན་པ་ཡིན་ནོ། །ཚུལ་གང་གིས་སེམས་ཅན་རྣམས་འདུལ་བར་འགྱུར་བ་དེ་ཉིད་ཀྱིས་འདུལ་བའི་ཕྱིར། འདོད་ཆགས་ཀུན་གྱི་རྗེས་ཆགས་ཏེ། །འདིས་ནི་ཐམས་ཅད་བདག་ཅེས་བྱ་བ་ལ་སོགས་པའི་དོན་ཏོ། །ཆགས་པ་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཅེས་བྱ་བས་བོད་བ་དང་བཅས་པའི་དངོས་གྲུབ་ཀྱི་ཕྱིར་གསོལ་བ་བཏབ་པའི་དོན་ཏོ། །དེ་ལྟར་དེ་ཁོ་ན་ཉིད་ཀྱི་གླུའི་མཆོད་པ་བསྟན་ནས། ད་ནི་ཆོས་ཀྱི་གླུའི་མཆོད་པ་བསྟན་པར་བྱ་བའི་ཕྱིར་ཤིན་ཏུ་ཞེས་བྱ་བ་ལ་སོགས་པ་གསུངས་ཏེ། ཕྱི་མའི་མཐའི་བར་དུ་གཟུང་བ་དང་འཛིན་པའི་རྣམ་པར་རྟོག་པའི་དྲི་མ་དང་བྲལ་བའི་ཕྱིར་ཤིན་ཏུ་དག་པའོ། །ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལས་མཆོག་ཏུ་གྱུར་པས་ན་ཀུན་མཆོག་གོ །གདོད་ནས་གྲོལ་བ་དེ་བཞིན་གཤེགས། །ཞེས་བྱ་བ་ལ་ཐོག་མ་དང་ཐ་མ་མེད་པ་ཆོས་ཀྱི་དབྱིངས་ཀྱི་རང་བཞིན་གྱིས་རྟག་ཏུ་འཆིང་བ་ཐམས་ཅད་དང་བྲལ་བ་ཉིད་ཀྱི་ཕྱིར་གདོད་ནས་གྲོལ་བའོ། །དངོས་པོའི་རང་བཞིན་ཇི་ལྟ་བ་བཞིན་དུ་ཆོས་ཀྱི་དབྱིངས་ཀྱི་རང་བཞིན་དང་ཐབས་ཀྱི་རང་བཞིན་དུ་དངོས་པོ་རྣམས་མཁྱེན་པས་ན་དེ་བཞིན་གཤེགས་པའོ། །གཞན་ཡང་གཞན་དག་ལ་དེ་བཞིན་དུ་གསུངས་པ་རབ་ཏུ་སྟོན་པར་མཛད་པས་ན་དེ་བཞིན་གཤེགས་པའོ། །ཀུན་དུ་བཟང་པོ་ཞེས་བྱ་བ་ནི་སེམས་ཅན་རྣམས་ལ་ཀུན་ནས་
བཟང་པོའི་དགའ་བ་གང་ལས་བྱུང་བ་དེ་ནི་ཀུན་དུ་བཟང་པོའོ། །བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་དུ་ཞུགས་པས་ན་ཀུན་བདག་ཉིད་དོ། །བྱང་ཆུབ་ཀྱི་རང་བཞིན་གྱི་སེམས་དཔའ་ནི་བྱང་ཆུབ་སེམས་དཔའོ། །རབ་ཏུ་བསྒྲུབས་ཞེས་བྱ་བས་གསོལ་བ་བཏབ་པ་ཡིན་ནོ། །དེ་ལྟར་ཆོས་ཀྱི་གླུའི་མཆོད་པ་བསྟན་ནས། ད་ནི་དམ་ཚིག་གི་གླུའི་མཆོད་པ་བསྟན་པར་བྱ་བ་ནི་ཀུན་མཆོག་ཅེས་བྱ་བ་ལ་སོགས་པ་གསུངས་ཏེ། ཀུན་གྱི་མཆོག་ཀྱང་དེ་ཡིན་ལ་དངོས་གྲུབ་ཆེན་པོ་ཡང་དེ་ཉིད་ཡིན་པས་ན། ཀུན་མཆོག་དངོས་གྲུབ་ཆེན་པོ་སྟེ། །ཐབས་དང་ཤེས་རབ་ཀྱི་བདག་ཉིད་ཅན་རྡོ་རྗེ་འཆང་ཆེན་པོ་རྟོགས་པའོ། །དེ་ཉིད་དབང་ཕྱུག་ཆེན་པོ་སྟེ་དེ་ཡོད་པས་ཕྱག་རྒྱའི་མཆོག་གང་ཡིན་པ་དེ་ནི། ཀུན་མཆོག་དངོས་གྲུབ་ཆེན་པོ་ཡི། །དབང་ཕྱུག་ཆེན་པོའི་ཕྱག་རྒྱའི་མཆོག་སྟེ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའོ། །དེ་ཉིད་ཀྱིས་གྲུབ་པར་གྱུར་ཅིག་པའོ། །དེ་ཇི་ལྟར་ཞེ་ན། རྡོ་རྗེ་ཆེར་བསྟོད་པ་ཞེས་བྱ་བ་ལ་ཇི་ལྟ་བ་བཞིན་དུ་བཤད་པའི་དངོས་པོའི་རྡོ་རྗེ་ཆེར་བསྟོད་པ་ནི་རྡོ་རྗེ་ཆེར་བསྟོད་པའོ། །ལག་པ་གཡས་པའི་སོར་མོ་དབུས་མའི་ཁ་ཊྭཱཾ་ག་རང་གི་སྙིང་གར་བསྟོད་པའི་ཚུལ་འཛིན་པ་ནི་རྡོ་རྗེ་ཆེར་བསྟོད་པ་སྟེ། རྡོ་རྗེ་ཆེར་བསྟོད་པ་དེས་སྒྲུབས་ཤིག་པ་ནི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་དངོས་གྲུབ་ཀྱིས་རྡོ་རྗེ་བསྙེམས་པའི་བདག་པོ་ཀྱེ་བདག་ལ་སྒྲུབས་ཤིག་ཅེས་བྱ་བ་ལ་བོད་པ་དང་བཅས་པས་བཅོམ་ལྡན་འདས་ལ་སྒྲུབ་པ་པོས་གསོལ་བ་བཏབ་པ་ཡིན་ནོ། །དེ་ལྟར་དམ་ཚིག་གསུམ་གྱི་གླུའི་མཆོད་པ་བསྟན་ནས། ད་ནི་དེ་ཉིད་ཀྱི་ཕན་ཡོན་བསྟན་པར་བྱ་བའི་ཕྱིར། དཔལ་མཆོག་དང་པོ་ཞེས་བྱ་བ་ལ་སོགས་པ་གསུངས་ཏེ། དཔལ་མཆོག་དང་པོ་ནི་ཇི་ལྟ་བ་བཞིན་དུ་བཤད་པའི་བཅོམ་ལྡན་འདས་རྡོ་རྗེ་སེམས་དཔའ་སྟེ། དེའི་གླུ་ནི། ཨོཾ་ནམ་མཁའ་སྐྱེ་མེད་མཚན་ལྡན་ཕྱིར། །ཞེས་བྱ་བ་ལ་སོགས་པའི་གླུ་སྒྲུབ་པ་པོས་བཅོམ་ལྡན་འདས་ཀྱི་ཡང་དག་པར་གྱུར་པའི་ཡོན་ཏན་བརྗོད་ཅིང༌། དོན་དམ་པར་དེ་ཁོ་ན་ཉིད་དང༌། ཆོས་དང་དམ་ཚིག་གི་དོན་ལ་ལྷག་པར་མོས་པས་གླུ་བླངས་ན་དེ་ཇི་ལྟར་འགྱུར་ཞེས་བྱ་
བ་བཤད་པར་བྱ་བའི་ཕྱིར། དེ་ནི་དངོས་གྲུབ་ཀུན་མཆོག་འགྱུར། །ཞེས་བྱ་བ་གསུངས་ཏེ། དེ་ཞེས་བྱ་བ་ནི་སྒྲུབ་པ་པོའོ། །ནི་ཞེས་བྱ་བ་ནི་སྒྲ་ངེས་པར་གཟུང་བ་ལ་བྱ་སྟེ། དེ་ཉིད་ཁོ་ནར་གྱུར་པ་ཡིན་ནོ། །དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་རང་བཞིན་གྱི་དངོས་གྲུབ་ཀུན་གྱི་མཆོག་སྟེ། དེའི་དབང་ཕྱུག་ཆེན་པོའི་སྐུ་ཐམས་ཅད་སྟོན་པར་བྱེད་པས་སེམས་ཅན་གྱི་དོན་ཏོ། །དབང་ཕྱུག་ཆེན་པོ་དེ་དང་ལྡན་ཞིང་དབང་ཕྱུག་ཆེན་པོ་ཉིད་དུ་འགྱུར་རོ་ཞེས་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ།། མཆོག་ཀྱང་ཡིན་ལ་དེ་ཁོ་ན་ཉིད་ཀྱང་དེ་ཉིད་ཡིན་པས་ན་མཆོག་གི་དེ་ཉིད་དེ། རྡོ་རྗེ་འཆང་ཆེན་པོའི་སྐུ་གསུང་ཐུགས་ཀྱི་རྡོ་རྗེ་རྣམས་སོ། །དེ་ཉིད་གསང་བའི་མཆོག་ནི་འཇིག་རྟེན་ཐམས་ཅད་དང་ཐུན་མོང་བ་མ་ཡིན་ནོ། །དེའི་གླུ་ཆེན་པོ་ནི་དམ་ཚིག་གསུམ་གྱི་གླུའི་མཆོད་པའོ། །མཆོག་ཏུ་གྲུབ་པ་ནི་རྡོ་རྗེ་སེམས་དཔའ་སྟེ། དེ་སྟོན་པར་བྱེད་པ་ཉིད་ཀྱི་ཕྱིར་འདི་ཡང་མཆོག་ཏུ་གྲུབ་པའོ། །མཆོག་ཏུ་གྲུབ་པ་ཡང་མངོན་དུ་བྱེད་པའི་རྒྱུ་ཉིད་ཡིན་པའི་ཕྱིར་མཆོག་གི་གླུ་འདི་ཡང་མཆོག་ཏུ་གྲུབ་པ་ཞེས་བྱ་བ་ཡིན་ནོ། །དངོས་གྲུབ་ཆོ་ག་འདི་ཡིས་ནི། ཞེས་བྱ་བ་ལ་དངོས་གྲུབ་ཀྱི་དོན་གྱི་ཆོ་ག་ནི་དངོས་གྲུབ་ཀྱི་ཆོ་ག་སྟེ་གླུའི་མཆོད་པའོ། །མཆོག་གི་དངོས་གྲུབ་ཀྱི་ཆོ་ག་འདིས་རྡོ་རྗེ་སེམས་དཔའ་ཡང་དག་པར་རྗེས་སུ་རྣལ་འབྱོར་རང་གི་མཚན་ཉིད་ཅན་ནི་དངོས་གྲུབ་ཆེན་པོ་ཀུན་གྱི་མཆོག་ནི་རྡོ་རྗེ་སེམས་དཔའི་དངོས་གྲུབ་སྟེ། དེས་དབང་ཕྱུག་ཆེན་པོ་ནི་བག་ཆགས་དང་བཅས་པའི་ཉོན་མོངས་པ་དང་བྲལ་བས་ཁམས་གསུམ་ཐམས་ཅད་དུ་གཟུགས་ཐམས་ཅད་སྟོན་པས་སེམས་ཅན་བྱེད་པའོ། །ཡུལ་དེར་རྡོ་རྗེ་སེམས་དཔའ་དང་ཡང་དག་པར་འདུས་པའི་སྒྲུབ་པ་པོས་བསྒྲུབ་པར་བྱ་བ་ཡིན་ནོ། །དེ་བཞིན་དུ་དམ་ཚིག་གསུམ་གྱི་གླུའི་མཆོད་པ་འདིས། ཀུན་ནས་འོད་ཟེར་སྟོན་སོགས་དང༌། །ཞེས་བྱ་བ་ལ་ཆོ་འཕྲུལ་བརྒྱ་རྩ་བརྒྱད་ཀྱི་རྣམ་པ་ཅན་དང༌། སོ་སོར་སྟོན་པའི་རྨད་དུ་བྱུང་བ་རྣམས་ནི་ངོ་མཚར་བར་གྱུར་པ་རྣམས་སྒྲུབ་པ་པོའི་རྡོ་རྗེ་སློབ་དཔོན་གྱི་རང་གི་ལྷ་དཔལ་རྡོ་རྗེ་
སེམས་དཔའ་ལས་མཐོང་བར་འགྱུར་རོ། །རྟོག་པ་ཀུན་ཞེས་བྱ་བ་ནི་གསང་བའི་དཀྱིལ་འཁོར་གྱི་རྟོག་པ་སྣ་ཚོགས་ཆེན་པོའོ། །དངོས་གྲུབ་ནི་གསང་བ་ལྔའི་དེ་ཁོ་ན་ཉིད་ཆེན་པོའི་དངོས་གྲུབ་བོ། །དེའི་དབང་ཕྱུག་ནི་ཇི་ལྟ་བ་བཞིན་དུ་བཤད་པ་སྟེ། དེ་ལས་བྱུང་བའི་བདེ་བ་ནི། རྟོག་པ་ཀུན་གྱི་སྣ་ཚོགས་ཆེ། །དངོས་གྲུབ་དབང་ཕྱུག་བདེ་བ་རྣམས། །ནིའི་སྒྲ་ནི་ངེས་པར་གཟུང་བས་ཏེ། དམ་ཚིག་གསུམ་གྱི་གླུའི་མཆོད་པ་ཉིད་ཀྱིས་རྟོག་པ་ཐམས་ཅད་ཀྱི་སྣ་ཚོགས་པའི་དངོས་གྲུབ་ཀྱི་བདེ་བ་རྣམས་དཔལ་རྡོ་རྗེ་སེམས་དཔས་ལེགས་པར་བྱིན་གྱིས་བརླབས་པས་རྡོ་རྗེ་སློབ་དཔོན་གྱིས་རྟག་ཏུ་འཐོབ་པ་ཡིན་ནོ། །དེ་ལྟར་བདག་ལ་བྱིན་གྱིས་བརླབ་པ་བསྟན་ནས། ད་ནི་རྣལ་འབྱོར་ཆེན་པོ་སྒྲུབ་པའི་རང་བཞིན་ཅན་སྒྲུབ་པ་ཆེན་པོའི་རྒྱུད་བསྟན་པར་བྱ་བའི་ཕྱིར། དེ་ལ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱང་ཡིན་ལ་བདག་ལ་བྱིན་གྱིས་བརླབ་པ་ཡང་དེ་ཉིད་ཡིན་པས་ན་ཐམས་ཅད་བདག་ལ་བྱིན་གྱིས་བརླབ་པ་སྟེ། རང་གི་རིགས་ཀྱི་ལྷ་ཐམས་ཅད་སྒྲུབ་པ་པོའི་ལུས་ལ་དགོད་པའོ། །དེའི་དོན་དུ་ལྷ་རྣམས་ཀྱི་སྒྲུབ་པ་ཆེན་པོ་ནི་རང་གི་དམ་ཚིག་གི་ཕྱག་རྒྱ་རྣམས་ཀྱིས་རང་ལ་རག་ལས་པར་བྱ་བ་དེ་ནི་ཐམས་ཅད་བདག་ལ་བྱིན་གྱིས་བརླབ་པའི་ལྷའི་སྒྲུབ་པ་ཆེན་པོའོ། །དེ་སྟོན་པར་བྱེད་པའི་རྒྱུད་ཇི་ལྟར་ཤེས་པར་བྱ་ཞེ་ན། རང་ལྷའི་རྣལ་འབྱོར་ཇི་བཞིན་དུ། །ཞེས་བྱ་བ་ལ་བདག་ཉིད་ཀྱི་རང་གི་ལྷ་ནི་འདོད་པའི་ལྷའོ། །རྡོ་རྗེ་ཐལ་མོ་དང་རྡོ་རྗེ་བསྡམས་པ་བཅིངས་ནས་སྙིང་གར་དྲལ་བར་བྱའོ། །དེ་ནས་རྡོ་རྗེ་དབབ་པ་བསྐྱེད་ནས་རང་གི་སྙིང་གར་རྡོ་རྗེ་དབབ་པའི་ཕྱག་རྒྱས་དགྲོལ་བར་བྱས་ལ། དམ་ཚིག་གི་རྡོ་རྗེ་ཁུ་ཚུར་བཅིངས་ཏེ། ཕྱག་རྒྱ་ཐམས་ཅད་གདེག་པར་བྱའོ། །དེ་ནས་སྡིག་པ་དྲལ་བའི་ཕྱག་རྒྱས་སྡིག་པ་རྣམས་དྲལ་བར་བྱའོ། །དེ་ནས་དཔལ་རྡོ་རྗེ་སེམས་དཔའི་རྣལ་འབྱོར་པས་རང་གི་སྙིང་གར་གནས་པའི་རྡོ་རྗེ་ལ་ཡི་གེ་ཧཱུཾ་ཡིད་ཀྱིས་བྲིས་ལ། དེ་ཉིད་ཡིད་ཀྱིས་བརྗོད་ཅིང་ཆོས་ཐམས་ཅད་རང་བཞིན་གྱིས་འོད་གསལ་བ་དང་ནམ་མཁའ་དེང་མཉམ་པར་བསྒོམ་པར་བྱའོ། །དེ་
ནས་ནམ་མཁའི་ཕྱོགས་སུ་རང་གི་སེམས་ཡི་གེ་ཧཱུཾ་གི་རྣམ་པར་བསམས་ལ་དབྱངས་བཅུ་དྲུག་དང་བཅས་པའི་ཡི་གེ་ཧཱུཾ་གིས་རང་གི་སེམས་ཟླ་བའི་དཀྱིལ་འཁོར་གྱི་རང་བཞིན་དུ་བསམ་པར་བྱའོ། །དེའི་སྟེང་དུ་ཀ་ལ་སོགས་པའི་ཡི་གེ་དང་བཅས་པའི་ཡི་གེ་ཧཱུཾ་ལས་ཟླ་བའི་དཀྱིལ་འཁོར་གཉིས་པ་དེ་ཉིད་ཡི་གེ་ཧཱུཾ་དང་བཅས་པའི་རྡོ་རྗེ་སྟེ། རྡོ་རྗེའི་དབུས་སུ་ཡི་གེ་ཧཱུཾ་ཡིད་ཀྱིས་བྲི་སྟེ། གསང་བ་ལྔའི་དེ་ཁོ་ན་ཆེན་པོ་དང་པོའི་རྡོ་རྗེ་ཞེས་བྱ་བ་བསྒོམ་ཞིང༌། རྡོ་རྗེ་ལས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་གསང་བའི་དཀྱིལ་འཁོར་རྣམས་སྤྲོས་ཏེ། དེ་དག་གིས་སེམས་ཅན་གྱི་ཁམས་ཐམས་ཅད་གསང་བའི་དཀྱིལ་འཁོར་རྟོགས་པས་རྡོ་རྗེ་འཆང་ཆེན་པོ་ཉིད་དུ་བྱས་ལ་དེ་རྣམས་རྡོ་རྗེ་ལ་གཞུག་པར་བྱའོ། །དེ་ནས་སེམས་དཔའ་བྱིན་གྱིས་བརླབ་པའི་སྦྱོར་བས་བདག་ཉིད་རྡོ་རྗེ་སེམས་དཔར་བསྒོམས་ལ། མ་ཧཱ་ས་མ་ཡ་སཏྭ་ཨ་ཧཾ་ཞེས་བཟླ་བར་བྱའོ། །དེ་ནས་དང་པོའི་རྡོ་རྗེ་བཅིངས་ལ་སླར་ཡང་ས་མ་ཡ་ཨ་ཧཾ་ཞེས་བྱ་བ་བཟླ་བར་བྱའོ། །དེ་ནས་སླར་དང་པོའི་རྡོ་རྗེས་སྙིང་ག་དང༌། སྨིན་མཚམས་དང༌། མགྲིན་པ་དང༌། སྤྱི་པོ་རྣམས་སུ་ས་མ་ཡ་སཏྭ་ཨ་དྷི་ཏིཥྛ་སྭ་མཾ་ཞེས་བྱ་བས་བྱིན་གྱིས་བརླབ་པར་བྱའོ། །དེ་ནས་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་རྡོ་རྗེ་སེམས་དཔའི་རྣལ་འབྱོར་པའི་རང་གི་ལྷའི་སྦྱོར་བ་ཇི་ལྟ་བ་བཞིན་ཡིན་ནོ། །གཞན་ལ་ནི་རང་གི་ཆོ་གས་རང་གི་ལྷའི་ཕྱག་རྒྱ་ཆེན་པོ་བཅིང་བར་བྱ་སྟེ། འདིས་རང་གི་ལྷའི་སྐུའི་གསང་བསྒོམ་པ་ཇི་ལྟ་བ་བཞིན་དུ་སྐུ་མདོག་དང༌། དབྱིབས་དང༌། གཟུགས་དང་ལྡན་པའི་རང་གི་ལྷའི་སྦྱོར་བ་ཇི་ལྟ་བ་བཞིན་དུ་བསྟན་པ་ཡིན་ནོ། །ལྷ་ཡང་ཡིན་ལ་ཀུན་ཡང་དེ་ཉིད་ཡིན་པས་ན་ལྷ་ཀུན་ཏེ་རྡོ་རྗེ་སེམས་དཔའ་ལ་སོགས་པའོ། །དེ་རྣམས་ཀྱི་བདག་ཉིད་ཀྱི་སྐུ་ནི་སྐུའི་གསང་བ་རྣམས་སོ། །རང་གི་ལྷའི་སྦྱོར་བ་ཇི་བཞིན་པ་དང༌། ལྷ་ཀུན་གྱི་བདག་ཉིད་ཀྱི་སྐུ་རྣམས་ནི་རང་གི་ལྷའི་སྦྱོར་བ་ཇི་བཞིན་པའི་ལྷ་ཀུན་གྱི་བདག་ཉིད་ཀྱི་སྐུ་རྣམས་ཏེ། དེ་དག་གིས་རང་གི་ལྷའི་སྦྱོར་བའི་བདག་ཉིད་ཅན་གྱི་རྣལ་འབྱོར་བ་དེ་རང་གི་ལྷའི་
དཀྱིལ་འཁོར་དུ་བསྒྲུབ་པར་བྱ་བ་ཡིན་ཏེ་གཞན་གྱིས་ནི་མ་ཡིན་ནོ་ཞེས་བྱ་བའོ། །འདི་ལྟར་བཤད་པར་འགྱུར་ཏེ། རང་གི་ལྷའི་རྣལ་འབྱོར་ཙམ་བྱས་ལ་ནམ་མཁའ་དང་མཉམ་པ་ཉིད་ཀྱི་སྦྱོར་བས་ནམ་མཁའ་དང་མཉམ་པའི་རང་གི་སྙིང་གའི་ཟླ་བ་ལ་ཞུགས་ཏེ། ཡི་གེ་ཧཱུཾ་གིས་དང་པོའི་རྡོ་རྗེ་བཅིངས་ནས། ཨ་ནུ་ར་ག་ཡ་མི་ཧཱུཾ་ཞེས་བྱ་བ་བརྗོད་ཅིངས་ལ་རབ་ཏུ་བཞག་པར་བྱས་ནས་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་སྙིང་གར་རྫོགས་པར་བྱའོ། །དེ་ནས་འཇུག་པའི་ཕྱག་རྒྱ་བཅིངས་ནས་དེར་ཞུགས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླང་བའི་བར་དུ་རང་གི་ཆོ་ག་རྫོགས་པར་བྱ་སྟེ། སྔར་བཤད་པའི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་རྣལ་འབྱོར་ཆེན་པོའི་གནས་རྣམས་སུ་གསང་བའི་ལྕགས་ཀྱུ་མས་དཔལ་མཆོག་དང་པོ་ཞེས་བྱ་བ་ལ་སོགས་པའི་གླུ་བརྗོད་ཅིང༌། རང་གི་ལུས་ལ་རྡོ་རྗེ་སེམས་དཔའ་ལ་སོགས་པ་བཅུག་ལ་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། དེ་བཞིན་གཤེགས་པ་ཐམས་ཅད་རང་གི་ལུས་དང་རྡོ་རྗེ་སེམས་དཔའ་ལ་སོགས་པའི་སྐུ་ལ་སྔ་མ་བཞིན་དུ་བཅུག་སྟེ་དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། དང་པོའི་རྡོ་རྗེ་དེ་བཞིན་དུ་བདག་ལ་བྱིན་གྱིས་བརླབས་ཏེ། བརྟན་པར་བྱེད་པའི་སྙིང་པོས་བརྟན་པར་བྱས་ལ་དབང་བསྐུར་བའི་ཕྱག་རྒྱ་རྣམས་ཀྱིས་དབང་བསྐུར་ཏེ་རྡོ་རྗེ་དང༌། བདག་པོ་དང༌། མིང་གི་དབང་བསྐུར་བ་དང༌། དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ། འདོད་ཆགས་རྡོ་རྗེ་མ་ལ་སོགས་པའི་མཆོད་པའི་ཕྱག་རྒྱ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ། སྒེག་མོ་དགའ་བའི་རྡོ་རྗེ་མའི་ཕྱག་བཞིས་ཕྱག་བཙལ་བར་བྱས་ནས་དེ་ཁོ་ན་ཉིད་དང༌། ཆོས་དང་དམ་ཚིག་རྣམས་ལ་ཡི་གེ་ཧཱུཾ་ལན་གསུམ་བརྗོད་དེ། དམ་ཚིག་གསུམ་གྱི་མཆོད་པ་བྱས་ལ་རྡོ་རྗེའི་བདག་ཉིད་དང༌། རང་བཞིན་དག་པ་དང༌། ཐམས་ཅད་མཉམ་པའི་བདག་ཉིད་རྣམ་པར་
བསྒོམས་ལ། ཇི་ལྟ་བ་བཞིན་དུ་རང་གི་སྙིང་གར་གནས་པའི་རྡོ་རྗེ་ལ་ཡི་གེ་ཧཱུཾ་ཡིད་ཀྱིས་བྲིས་ནས་རབ་ཏུ་དགའ་བའི་ངག་གིས་བརྗོད་ཅིང་བསྒོམ་པར་བྱ་བ་ཡིན་ནོ། །དེ་དག་ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་ལ་བྱིན་གྱིས་བརླབ་པ་དང༌། སྒྲུབ་པ་ཆེན་པོ་རྣམས་བསྟན་ནས། ད་ནི་བརྟ་དང༌། བེ་ཤ་ཁི་ལ་ལ་མཁས་པའི་རྗེས་སུ་སྒྲུབ་པ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པའོ། །གསང་བ་དམ་པའི་མཆོག་གི་དཔལ་དམ་ཚིག་གསུམ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་བརྟན་པར་བྱེད་པའི་གསང་བའི་དཀྱིལ་འཁོར་དེར་མཆོག་གི་དངོས་གྲུབ་ཐམས་ཅད་ཀྱི་དབང་ཕྱུག་ནི་ཁམས་གསུམ་པའི་ཆོས་ཀྱི་རྒྱལ་སྲིད་ཐོབ་པའོ། །དེ་ཉིད་བདག་པོ་ཉིད་དངོས་གྲུབ་ཐམས་ཅད་ཀྱི་ལས་ཀྱི་ཚོགས་པའི་གང་གི་དང་པོར་ཡོད་པ་དེ་ལ་དེ་སྐད་ཅེས་བྱའོ། །དངོས་གྲུབ་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་དང༌། དམ་ཚིག་དང་ཆོས་དང་ལས་ཀྱི་ཕྱག་རྒྱའི་དཀྱིལ་འཁོར་གྱི་དངོས་གྲུབ་རྣམས་སོ། །ལས་རྣམས་ཀྱི་ཚོགས་ནི་ལས་ཀྱི་ཚོགས་ཏེ་གསང་བའི་དཀྱིལ་འཁོར་དང་འབྲེལ་བའི་འོག་ནས་འཆད་པར་འགྱུར་བའི་ལས་རྒྱའི་རྒྱུན་ནོ། །མི་འགྱུར་བ་ཡང་ཡིན་ལ་མཆོག་ཀྱང་དེ་ཉིད་ཡིན་པས་ན་མི་འགྱུར་མཆོག་སྟེ། ཐོག་མ་དང་ཐ་མ་མེད་པའོ། །དེ་ཉིད་ཀྱི་ཕྱིར་དམ་པ་ནི་ཕུལ་དུ་བྱུང་བའོ། །འདི་ལ་གོང་ན་མེད་པས་བླ་ན་མེད་པའོ། །དགའ་བ་དང་རབ་ཏུ་དགའ་བ་ཞེས་བྱ་བ་ལ་དགའ་བ་ནི་ཡིད་བདེ་བའོ། །རབ་ཏུ་དགའ་བ་ནི་དགའ་བའོ། །བདེ་བ་ཐམས་ཅད་ནི་འཇིག་རྟེན་ལས་འདས་པའིའོ། །དེ་ཡང་དམ་པ་དང༌། བར་མ་དང༌། མཆོག་གི་དབྱེ་བས་ཕྱེ་བ་ཡིན་ནོ། །ཡིད་བདེ་བ་ཡང་དེ་བཞིན་དུ་ཤེས་པར་བྱའོ། །བླ་ན་མེད་པའི་དགའ་བ་དང་རབ་ཏུ་དགའ་བ་ལས་ཁྱད་པར་ཅི་ཡོད་ཅེ་ན། འདི་ནི་དམན་པ་དང༌། བར་མ་དང༌། མཆོག་གི་དབྱེ་བ་རྣམ་པ་གསུམ་སྟེ། དེ་ནི་བླ་ན་མེད་པ་ཁོ་ན་ཡིན་ནོ་ཞེས་བྱ་བ་ནི་འདིའི་ཁྱད་པར་ཡིན་ནོ། །མཆོག་གི་དངོས་གྲུབ་ནི་རྡོ་རྗེ་འཆང་ཆེན་པོ་
ལ་སོགས་པའི་རང་བཞིན་ཅན་ནོ། །ཇི་ལྟ་བ་བཞིན་དུ་བཤད་པའི་དངོས་གྲུབ་ཐམས་ཅད་དང་ལས་ཀྱི་ཚོགས་དང༌། མི་འགྱུར་བ་མཆོག་གི་དམ་པ་བླ་ན་མེད་པའི་དགའ་བ་དང་རབ་ཏུ་དགའ་བ་དང༌། ཡིད་བདེ་བ་དང་མཆོག་གི་དངོས་གྲུབ་རྣམས་ནི་ཇི་ལྟ་བ་བཞིན་དུ་བཤད་པའི་བདག་པོ་ཉིད་ལ་སོགས་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཀྱིས་མི་འགྱུར་བ་མཆོག་གི་དམ་པ་བླ་ན་མེད་པའི་དགའ་བ་དང་རབ་ཏུ་དགའ་བ་དང༌། བདེ་བ་ཐམས་ཅད་དང༌། ཡིད་བདེ་བ་མཆོག་གི་དངོས་གྲུབ་རྣམས་སོ། །དེ་དག་གི་ཆོ་ག་རྒྱས་པ་ནི་རྡོ་རྗེས་སུ་ཆགས་པ་ལ་སོགས་པའི་གླུ་དང་རོལ་མོའི་ཆོ་ག་རྣམ་པ་གསུམ་མོ། །དེ་ཉིད་རྗེས་སུ་སྒྲུབ་པ་ནི་ཕྱི་ནས་བསྒྲུབས་པས་ན་རྗེས་སུ་བསྒྲུབ་པ་སྟེ་ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་ལ་བྱིན་གྱིས་བརླབ་པ་དང༌། སྒྲུབ་པ་ཆེན་པོ་ལས་ཕྱིས་བྱ་པའི་ཕྱིར་རོ། །དེ་ཉིད་མཆོག་གི་དངོས་གྲུབ་ཀྱི་རྒྱུར་གྱུར་པའི་ཕྱིར་མཆོག་ཏུ་གྲུབ་པ་ཡིན་ནོ། །ཇི་ལྟ་བ་བཞིན་དུ་བཤད་པའི་རྣལ་འབྱོར་ཆེན་པོ་བྱས་ལ་རང་གི་ལྷའི་དཀྱིལ་འཁོར་ཆོ་ག་བཞིན་དུ་མདུན་དུ་བཞག་ལ་དེ་ཉིད་བསྒོམ་པ་ནི་འདི་རང་གི་ལྷའི་སྦྱོར་བ་ཇི་ལྟ་བ་བཞིན་གང་ཡིན་པ་དང༌། ཚོགས་ཀྱི་དཀྱིལ་འཁོར་བསྒོམ་པའོ། །རྡོ་རྗེ་ཀུན་ནི་རྡོ་རྗེ་སེམས་དཔའ་ལ་སོགས་པ་རྣམས་ཏེ། དེ་དག་གི་མཆོག་གི་སྐུ་ནི་མཚན་མོའི་ཕྱག་རྒྱའོ། །དེ་ཡང་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་སྟོན་པར་བྱེད་པའི་ཕྱིར་རོ། །རང་གི་ལྷའི་སྦྱོར་བ་ཇི་བཞིན་པ་དང་རྡོ་རྗེ་ཀུན་གྱི་མཆོག་གི་སྐུ་ནི་རང་ལྷའི་སྦྱོར་བ་ཇི་བཞིན་དང་རྡོ་རྗེ་ཀུན་གྱི་མཆོག་སྐུའོ། །བྱེད་པར་གྱུར་པ་དེ་རྣམས་ཀྱིས་གླུ་དང་རོལ་མོའི་ཆོ་ག་གང་ཞིག་རྣལ་འབྱོར་བས་བྱ་བ་དེ་ནི་དེ་ལ་རྡོ་རྗེ་རྗེས་སུ་ཆགས་པ་ཡིན་ཏེ། ཤིན་ཏུ་རྣལ་འབྱོར་གྱི་སྦྱོར་བས་མངོན་དུ་གྱུར་པ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་བཤད་པར་འགྱུར་ཏེ་ཇི་ལྟར་བཤད་པའི་ཆོ་གས་མདུན་དུ་དཀྱིལ་འཁོར་བཞག་པའམ། ཚོགས་ཀྱི་དཀྱིལ་འཁོར་གྱི་སྦྱོར་བས་དབུས་སུ་འདུག་སྟེ། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་པོ་ཀུན་
བདག་ཉིད། །རྡོ་རྗེ་བསྙེམས་པ་བདག་པོའི་བདག །ཅེས་བྱ་བ་དཔལ་རྡོ་རྗེ་སེམས་དཔའི་རྣལ་འབྱོར་པས་ཡི་གེ་ཧཱུཾ་གི་གླུ་བརྗོད་ཅིང་བསྒོམ་པར་བྱའོ། །དྲིལ་བུ་དང་བཅས་པའི་པི་ཝང་ལ་སོགས་པའི་རོལ་མོ་ཉིད་ཐོག་མ་དང་ཐ་མ་མེད་པའི་གཟུགས་ཅན་གྱི་རྡོ་རྗེ་དེས་རྗེས་སུ་ཆགས་པར་འགྱུར་རོ། །གཞན་གྱི་རྣལ་འབྱོར་པས་ནི་རང་གི་ལྷའི་ཡི་གེ་བརྗོད་ཅིང་རང་གི་རིགས་ཀྱི་དེ་ཁོ་ན་ཉིད་བསྒོམ་པར་བྱ་བ་ཡིན་ནོ། །དེ་ལྟར་རྡོ་རྗེའི་རྗེས་སུ་སྒྲུབ་པ་བསྟན་ནས། ད་ནི་དྲིལ་བུའི་རྗེས་སུ་སྒྲུབ་པ་བསྟན་པར་བྱ་བའི་ཕྱིར། རང་གི་ལྷའི་སྦྱོར་བ་ཇི་བཞིན་དུ། དབྱངས་ཀྱི་རྩ་བ་རྣམས་སད་པས། །ཞེས་བྱ་བ་ལ་སོགས་པ་གསུངས་ཏེ། རང་ལྷའི་སྦྱོར་བ་ནི་བཤད་ཟིན་ཏོ། །ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ། ཨཱདྱ་ནུ་ཏྤནྣ་ཏྭཱ་ཏ་ཅེས་བྱ་བ་ནི་ལྷག་པར་མོས་པ་རྣམས་ནི་དབྱངས་ཀྱི་རྩ་བ་རྣམ་པར་སད་པ་སྟེ། དབྱངས་ཀྱི་རྩ་བ་རྣམ་པར་སད་པ་དེ་དག་དང་བཅས་པའི་གླུ་དང་རོལ་མོའི་ཆོ་ག་རྣལ་འབྱོར་པས་གད་བྱེད་པ་དེ་དག་དྲིལ་བུ་ཉིད་ཀྱིས་རྗེས་སུ་བླངས་ཏེ་དྲིལ་བུའི་སྒྲ་དང་ལྷན་ཅིག་ཏུ་གླུ་ལེན་པའོ། །ཐམས་ཅད་ནམ་མཁའི་མཚན་ཉིད་དེ། །ནམ་མཁའ་དང་མཉམ་སྦྱོར་བ་ཡིན། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་བསྟན་པ་ཡིན་ཏེ་དེ་བསྒོམ་པར་བྱའོ་ཞེས་བྱ་བའི་དོན་ཏོ། །འདིས་ནི་འདི་ལྟར་སྔར་བཤད་པར་འགྱུར་ཏེ། སྔ་མ་བཞིན་དུ་རང་གི་དཀྱིལ་འཁོར་མདུན་དུ་བཞག་པའམ། ཚོགས་ཀྱི་དཀྱིལ་འཁོར་གྱི་ཚུལ་གྱིས་འདུག་སྟེ། དཔལ་རྡོ་རྗེ་སེམས་དཔའི་རྣལ་འབྱོར་པས། ཡི་གེ་ཧཱུཾ་བརྗོད་ཅིང་དྲིལ་བུ་དཀྲོལ་བ་ལ་བརྩོན་པས་སྒྲའི་རྗེས་སུ་འབྲང་བའི་ཤེས་རབ་བསྒོམ་པར་བྱ་བ་དང༌། པི་ཝང་ལ་སོགས་པ་རོལ་མོའི་སྒྲ་རྣམས་ཀྱིས་དེ་ཉིད་མངོན་དུ་བྱ་བ་ཡིན་ནོ། །དེ་ལྟར་དྲིལ་བུའི་སྒྲུབ་པ་བསྟན་ནས་ད་ནི་དམ་ཚིག་གི་རྗེས་སུ་སྒྲུབ་པ་བསྟན་པར་བྱ་བའི་ཕྱིར་རང་ལྷའི་ཞེས་བྱ་བ་ལ་སོགས་པ་གསུངས་ཏེ། རང་ལྷའི་སྦྱོར་བ་ཇི་བཞིན་དུ། །ཞེས་བྱ་བ་ནི་སྔ་མ་བཞིན་ནོ། །སྣ་ཚོགས་ནི་རྡོ་རྗེ་སེམས་དཔའ་སྟེ་ཕྱག་རྒྱ་ནི་ཕྱག་རྒྱ་ཆེན་པོའོ། །དེའི་བདག་པོ་ནི་སྣ་ཚོགས་ཕྱག་རྒྱའི་བདག་པོ་སྟེ་ཕྱག་རྒྱ་ཆེན་པོའི་བདག་
པོ་ཕྱག་རྒྱ་ཆེན་པོ་རྫོགས་པར་བྱེད་པའི་བདག་པོ་ཞེས་བྱ་བའི་དོན་ཏོ། །དེ་གང་ཡིན་ཞེ་ན། མཆོག་ཏུ་རོལ་མོའི་ཆོ་ག་ཞེས་བྱ་བ་ལ། མཆོག་ནི་ཕུལ་དུ་བྱུང་བ་སྟེ་ཕྱག་རྒྱ་ཆེན་པོ་སྟོན་པར་བྱེད་པའི་ཡི་གེ་ཧཱུཾ་གི་གླུ་དང༌། རྡོ་རྗེ་དྲིལ་བུ་དང་བཅས་པའི་པི་ཝང་ལ་སོགས་པའི་རོལ་མོ་ནི་གླུ་དང་རོལ་མོའི་ཆོ་གའོ། །དེ་ཡང་སློབ་མའི་ཚོགས་དང་བཅས་པའི་རྣལ་འབྱོར་པས་བྱ་བ་ཡིན་ནོ། །དམ་ཚིག་གིས་ནི་རྗེས་སུ་བསྒྲུབ། །ཅེས་བྱ་བ་ལ་དེ་ཉིད་རྣལ་འབྱོར་པས་དམ་ཚིག་གི་གཟུགས་བརྙན་དང་འདྲ་བའི་སྐུའི་གསང་བའི་སྒོམ་པས་རྗེས་སུ་བསྒྲུབ་པར་བྱའོ། །འདི་ལྟར་བཤད་པར་འགྱུར་ཏེ། དེ་བཞིན་དུ་མདུན་དུ་དཀྱིལ་འཁོར་ཡོངས་སུ་བརྟག་པའམ། ཡང་ན་ཚོགས་ཀྱི་དཀྱིལ་འཁོར་གྱི་ཚུལ་གྱིས་དཀྱིལ་འཁོར་གྱི་དབུས་སུ་འདུག་སྟེ་རང་གི་ཕྱག་རྒྱ་ཆེན་པོ་བཅིངས་ལ་ཡི་གེ་ཧཱུཾ་བརྗོད་ཅིང་ཆོས་དབྱིངས་ཀྱི་རྒྱུ་མཐུན་པ་གཟུགས་བརྙན་དང་མཚུངས་པའི་ཕྱག་རྒྱ་ཆེན་པོ་ཐམས་ཅད་ཀྱི་གཟུགས་བསྒོམ་པ་དང༌། དྲིལ་བུའི་སྒྲ་དང་བཅས་པའི་པི་ཝང་ལ་སོགས་པའི་རོལ་མོས་དོན་དེ་ཉིད་བསྟན་པར་བྱའོ། །གླུ་དང་རོལ་མོའི་ཆོ་ག་ཉིད་ཀྱི་མཚན་ཉིད་ནི་འོག་ནས་འཆད་པར་འགྱུར་རོ། །ད་ནི་རྗེས་སུ་བསྒྲུབ་པའི་ཕན་ཡོན་བསྟན་པར་བྱ་བའི་ཕྱིར་འདིས་ཞེས་བྱ་བ་ལ་སོགས་པ་གསུངས་ཏེ། རྣམ་པ་གསུམ་གྱི་རྗེས་སུ་བསྒྲུབ་པ་འདིས་རྟོག་པ་ཐམས་ཅད་ནི་རིགས་ལྔའི་རང་བཞིན་གྱི་དམིགས་པའི་རྐྱེན་རྣམས་སོ། །རྡོ་རྗེ་འབེབས་པས་རབ་ཏུ་སད། །ཅེས་བྱ་བ་ནི་དེ་ཁོ་ན་ཉིད་དང༌། ཆོས་དང༌། དམ་ཚིག་དང༌། ཡེ་ཤེས་རྣམས་ཀྱིས་བསྐུལ་ཞིང་མངོན་དུ་གྱུར་པའོ། །རང་གི་ལྷ་ཡི་དམ་ཚིག་ནི། ཐམས་ཅད་བཞིར་འགྱུར་འགྲུབ་པར་འགྱུར། །ཞེས་བྱ་བ་ལ་གྲུབ་པ་ནི་སྒྲུབ་པ་པོ་ལ་རག་ལས་པ་ཡིན་ནོ། །དེ་ཡང་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱའི་རང་བཞིན་ཅན་གྱི་དམ་ཚིག་གོ །རང་གི་ལྷ་ནི་རྡོ་རྗེ་སེམས་དཔའ་ལ་སོགས་པ་ཐམས་ཅད་རྣལ་འབྱོར་བསྒྲུབ་པར་བྱ་བ་ཉིད་དུ་འདོད་པ་རྣམས་སོ། །རྗེས་སུ་བསྒྲུབ་པ་གང་ཞིག་དང་བྲལ་བས་ཟླ་བ་བཞིས་འགྲུབ་པར་འགྱུར་བ་དེས་རྗེས་སུ་བསྒྲུབ་པ་དེ་ཉིད་ཀྱིས་ཟླ་བ་གཅིག་
གིས་འགྲུབ་པར་འགྱུར་ཏེ། དེ་བས་ནི་མི་འགྱུར་རོ་ཞེས་བྱ་བ་གསུངས་སོ། །མཆོག་ཏུ་གསང་བ་དམ་པའི་དཔལ། །དམ་ཚིག་གསུམ་གྱི་དཀྱིལ་འཁོར་དུ་གླུ་དང་རོལ་མོ་སྟེ། ཇི་སྐད་དུ་བཤད་པའི་མཚན་ཉིད་ཅན་དེ་བཞིན་དུ་རྫོགས་པ་ནི་ཆོ་ག་སྟེ། འདིར་མཆོག་ཏུ་གསང་བ་ནི་སྐུ་གསུང་ཐུགས་ཀྱི་རྡོ་རྗེ་སྒྲུབ་པར་བྱེད་པས། མཆོག་ཏུ་གསང་བ་དམ་པའི་དཔལ་དམ་ཚིག་གསུམ་གྱི་དངོས་གྲུབ་ཀྱི་རྒྱུ་ཉིད་རྫོགས་པ་ཡིན་པས་ན་མཆོག་ཏུ་གྲུབ་པའོ། །དེ་ལྟར་ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་ལ་བྱིན་གྱིས་བརླབ་པ་དང༌། སྒྲུབ་པ་ཆེན་པོ་དང༌། རྗེས་སུ་བསྒྲུབ་པ་རྣམས་ཀྱིས་བདག་ཉིད་དང་དཀྱིལ་འཁོར་རྫོགས་པར་བྱས་ལ། ཉིན་རེ་དེ་སྲིད་དུ་བསྒོམ་པར་བྱ་སྟེ། ཇི་སྲིད་མངོན་དུ་གྱུར་པ་ལྟ་བུར་ཉིན་རེ་སྒོམ་པའི་དུས་སུ་མཐོང་བར་འགྱུར་རོ། །དེ་ནས་དཀྱིལ་འཁོར་འདི་བྲི་བར་བྱའོ་ཞེས་བྱ་པའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཞེས་བྱ་བ་ནི་མཚན་མ་ཐོབ་མ་ཐག་པ་ཁོ་ནའོ། །དེ་ཞེས་བྱ་བ་ནི་ཇི་སྲིད་མ་ཐོབ་པའི་གོང་དུ་མ་ཡིན་པའོ། །གསང་བ་མཆོག་གི་དགྱེས་པ་ན། །སངས་རྒྱས་ཀུན་གྱིས་རྗེས་བསྟེན་པའི།། རྡོ་རྗེ་སེམས་དཔའི་རང་གནས་སུ། །ཐམས་ཅད་བདག་ཉིད་རྟག་ཏུ་བཞུགས། །ཞེས་བྱ་བའི་གནས་འདི་འོག་ནས་འཆད་པར་འགྱུར་རོ། །དེ་ལྟ་བུ་ཇི་བཞིན་པའི་གནས་སུ་ཇི་སྙེད་པ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །བདག་ཉིད་ཅེས་བྱ་བ་ལ་སོགས་པ་ལ་དཔལ་རྡོ་རྗེ་སེམས་དཔའི་རྒྱན་རྣམས་ཀྱིས་བདག་ཉིད་ཡང་དག་པར་བརྒྱན་ལ། ཇི་ལྟར་འདོད་པའམ་ཇི་ལྟར་ཐོབ་པའི་སྣ་ཚོགས་པའི་གོས་གྱོན་པ་དང༌། མེ་ཏོག་གི་ཕྲེང་བ་དང་ལྡན་ཞིང་ཁ་དྲི་ཞིམ་པོ་བསྒོས་པས་ལུགས་མའམ། བརྡུངས་མ་ལ་སོགས་པའི་རང་བཞིན་ཅན་གྱི་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པ་ཇི་སྐད་བཤད་པའི་ཁང་པ་སུམ་བརྩེགས་སུ་དཀྱིལ་འཁོར་བྲིས་ལེ་དེའི་དབུས་སུ་རྡོ་རྗེ་བཞག་ནས་དེ་ཉིད་ཀྱི་མདུན་དུ་ཇི་ལྟ་བ་བཞིན་བཤད་པའི་སྒྲུབ་པའི་ཆོ་གས་དཔལ་རྡོ་རྗེ་སེམས་དཔའི་སྦྱོར་བས་རྣལ་འབྱོར་ཆེན་པོ་བྱས་ལ། བརླ་གཉིས་ལ་
དྲིལ་བུ་སྟེ་བརླ་གཉིས་པོ་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་རྡོ་རྗེ་འབེབས་བ་སྐྱེད་པར་བྱེད་པའི་དྲིལ་བུའི་སྒྲ་སྒྲོགས་པར་བྱེད་ཅིང༌། ཐམས་ཅད་དགུག་པ་དང༌། མཆོད་པ་ཆེན་པོ་དང༌། བདག་ལ་བྱིན་གྱིས་བརླབ་པ་ལ་སོགས་པ་སྔར་བཤད་པའི་མཚན་ཉིད་ཅན་བསྒྲུབ་པར་བྱའོ། །སྔོན་དུ་ཞེས་བྱ་བ་ལ་སོགས་པ་དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་བདག་ཉིད་དང་དཀྱིལ་འཁོར་དང་པོར་ལྷན་ཅིག་ཏུ་སྒྲུབ་པ་བྱས་ནས་བསྒོམས་པས་ལ་ལ་དེའི་རྗེས་ལ་ཁྲུས་ལ་སོགས་པར་རང་གི་ལྷའི་ང་རྒྱལ་གྱིས་རྫོགས་པར་བྱས་ནས། སླར་ཡང་ཞུགས་ཏེ་ཉིན་རེ་བཞིན་དུ་མཆོད་པ་ཐམས་ཅད་ཀྱིས་དཀྱིལ་འཁོར་ཡང་དག་པར་མཆོད་ལ་དེ་སྲིད་དུ་བསྒོམ་པར་བྱ་སྟེ། ཇི་སྲིད་ཟླ་བ་གཅིག་གི་བར་དུའོ། །མཐར་ཉ་ལ་མཚན་ཐོག་ཐག་བསྒོམ་པར་བྱ་སྟེ། ཉི་མ་འཆར་ཀའི་དུས་སུ་རྡོ་རྗེ་འཆང་ཆེན་པོ་ཉིད་ཐོབ་པར་འགྱུར་རོ།། དོན་དེ་ཉིད་བསྟན་པར་བྱ་བའི་ཕྱིར། །འདིས་ནི་འདོད་པ་ཀུན་དབང་ཕྱུག །འགྲོ་དང་འོང་དང་འདོད་ན་འཕུར། །ཞེས་བྱ་བ་ལ་སོགས་པ་གསུངས་སོ། །དེ་ལྟར་ཞེས་བྱ་བ་ལ་སོགས་པ་ལ་འདས་མ་ཐག་ཏུ་བཤད་པའི་སྒྲུབ་པའི་ཆོ་གས། དེ་ལྟར་མཆོག་ཏུ་རྗེས་ཆགས་དགའ་བ་པདྨའི་ར་བ་ཆེ། །མཆོག་གི་རྒྱལ་མཚན་བསྒྲེང་བས་གང་ཞིག་རྗེས་སུ་བསྟེན་པ་སྟེ། །མཆོག་གི་དངོས་གྲུབ་དབང་ཕྱུག་ཆེན་པོ་ཉིད་དེས་ཉམས་མྱོང་བ། །ཞེས་བྱ་བ་དང་སྦྱར་རོ། །མཆོག་ཀྱང་ཡིན་ལ་རྗེས་སུ་ཆགས་པ་ཡང་དེ་ཉིད་ཡིན་པས་ན་མཆོག་ཏུ་རྗེས་སུ་ཆགས་པ་སྟེ། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་བསྒོམ་པའོ། །འདིས་ནི་འདོད་ཆགས་རྡོ་རྗེ་མའི་རང་བཞིན་ཅན་གྱི་དཔལ་རྡོ་རྗེ་སེམས་དཔའ་བསྟན་པ་སྟེ། དེས་བསྐྱེད་པའི་དགའ་བ་ནི་མཆོག་ཏུ་རྗེས་སུ་ཆགས་པའི་དགའ་བའོ། །དེ་ཉིད་བག་ཆགས་དང་བཅས་པའི་ཉོན་མོངས་པ་ཐམས་ཅད་ཀྱི་དྲི་མ་དང་བྲལ་བས་པདྨ་ལྟ་བུ་ཡིན་པས་ན་པདྨའོ། །དེས་ནམ་མཁའི་ཁམས་ཐམས་ཅད་ཁྱབ་པར་བྱེད་པའི་ནམ་མཁའ་དང་མཉམ་པའི་ཡེ་ཤེས་ཀྱི་རིན་པོ་ཆེའི་ས་གཞི་ཁྱབ་པས་ན་དགའ་བའི་པདྨའི་ར་བ་ཆེན་པོའོ། །དགའ་བའི་པདྨའི་ར་བ་ཆེན་པོ་ནི་དགའ་བའི་
པདྨའི་ར་བ་ཆེན་པོའོ། །དེ་ཉིད་མཆོག་ཏུ་གསང་བ་གྲུབ་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་དངོས་གྲུབ་ལ་ཆགས་པས་ན་བླ་ན་མེད་པའི་དངོས་གྲུབ་ལ་ཆགས་པ་སྟེ། ཀཱི་ལི་ཀཱི་ལའི་རང་བཞིན་ཅན་གྱིས་རྡོ་རྗེ་སེམས་དཔའ་བསྟན་ཏོ། །མཆོག་གི་རྒྱལ་མཚན་བསྒྲེང་བས་གང་ཞིག་རྗེས་སུ་བསྟན་པ་སྟེ། །ཞེས་བྱ་བ་ལ། དེ་ལྟ་བུའི་ཡོན་ཏན་གྱི་ཁྱད་པར་དང་ལྡན་པའི་སྒྲུབ་པ་རྣལ་འབྱོར་པ་གང་གིས་ཕྱིན་ཅི་མ་ལོག་པར་བརྟེན་པ་ནི་སྒོམ་པར་བྱེད་པས་ཏེ། མཆོག་ཀྱང་ཡིན་ལ་རྒྱལ་མཚན་ཡང་དེ་ཉིད་ཡིན་པས་ན་མཆོག་གི་རྒྱལ་མཚན་ཏེ་དཔལ་རྡོ་རྗེ་སེམས་དཔའི་སྐུའོ། །དེ་ཉིད་དེའི་རྣལ་འབྱོར་གྱིས་བསྒྲེང་བས་ཏེ། མཐོན་པའི་སྐུ་གང་ལ་ཡོད་པ་དེ་ནི་མཆོག་གི་རྒྱལ་མཚན་བསྒྲེང་བ་རྣམས་ཏེ། འདིས་རྡོ་རྗེ་དྲན་མའི་རང་བཞིན་ཅན་གྱི་རྡོ་རྗེ་སེམས་དཔའ་ཚིག་གི་ཟུར་གྱིས་བསྟན་པ་ཡིན་ནོ། །རྡོ་རྗེ་སེམས་དཔའི་རྣལ་འབྱོར་གྱིས་ཇི་ལྟ་བ་བཞིན་དུ་བཤད་པའི་སྒྲུབ་པ་མངོན་དུ་བྱེད་པ་དེ་རྣམས་ཅིར་འགྱུར་ཞེ་ན། མཆོག་གི་དངོས་གྲུབ་དབང་ཕྱུག་ཆེན་པོ་ཉིད་དེས་ཉམས་མྱོང་བ། །ཞེས་བྱ་བ་ལ་སོ་སོ་རང་རིག་པའི་ཡེ་ཤེས་ཀྱིས་ཉམས་སུ་མྱོང་བའི་རྣལ་འབྱོར་པ་རྣམས་ཀྱིས་རིག་པ་ཡིན་ནོ། །མཆོག་ཀྱང་ཡིན་ལ་དངོས་གྲུབ་ཀྱང་དེ་ཉིད་ཡིན་པས་ན་མཆོག་གི་དངོས་གྲུབ་སྟེ་རྡོ་རྗེ་འཆང་ཆེན་པོའི་རང་བཞིན་གྱི་གསང་བའི་དཀྱིལ་འཁོར་གྱི་དངོས་གྲུབ་པོ། །དེས་དབང་ཕྱུག་ཆེན་པོ་ནི་མཆོག་གི་དངོས་གྲུབ་ཀྱི་དབང་ཕྱུག་ཆེན་པོའོ། །དེས་དངོས་པོ་ནི་དབང་ཕྱུག་ཆེན་པོ་དེ་ཉིད་དེ་དེ་དག་གིས་ཉམས་སུ་མྱོང་བ་ཡིན་ནོ། །བྱ་བ་ནན་ཏན་གྲུབ་པའི་ཡེ་ཤེས་ཀྱིས་སངས་རྒྱས་སྤྲུལ་པ་དང་སེམས་ཅན་གྱི་དོན་བྱེད་པ་ཡིན་ནོ་ཞེས་བྱ་བའི་དོན་ཏེ། འདིས་རྡོ་རྗེ་འདོད་པའི་དབང་ཕྱུག་མའི་རང་བཞིན་ཅན་གྱི་རྡོ་རྗེ་སེམས་དཔའ་བསྟན་ཏོ། །དཔལ་མཆོག་དང་པོ་ཞེས་བྱ་བ་ལ་སོགས་པ་ནི་གོ་སླའོ། །གནས་གང་དུ་གསང་བའི་དཀྱིལ་འཁོར་བྲི་ན་རྣལ་འབྱོར་པས་དངོས་གྲུབ་བསྒྲུབ་པ་དེ་བསྟན་པའི་ཕྱིར། གསང་བ་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་རྡོ་རྗེ་མ་ལ་སོགས་པའི་དཔལ་གྱི་ཚོགས་དང་ལྡན་
པས་ན་གསང་བ་སྟེ་བཅོམ་ལྡན་འདས་རྡོ་རྗེ་སེམས་དཔའ་རང་ཉིད་ཀྱིས་བཞུགས་སོ། །མཆོག་ནི་ཕུལ་དུ་བྱུང་བའོ། །ཡིད་དང་རྗེས་སུ་མཐུན་པར་སྤྱད་ན་དགྱེས་པའོ། །འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་བསྟེན་པས་ན་སངས་རྒྱས་ཀུན་གྱིས་བསྟེན་པའོ། །རྡོ་རྗེ་སེམས་དཔའི་རང་གི་ཡེ་ཤེས་ལས་བྱུང་བའི་ཞུགས་པ་ནི་རྡོ་རྗེ་སེམས་དཔའི་རང་གི་གནས་སོ། །ཐམས་ཅད་ནི་རིགས་ལྔའི་ལྷ་རྣམས་ཀྱི་བདག་ཉིད་ནི་ཐམས་ཅད་ཀྱི་བདག་ཉིད་དེ། བྱང་ཆུབ་ཆེན་པོའི་སེམས་ལ་སོགས་པ་ལས་བྱུང་བ་ཉིད་ཀྱིས་བྱང་ཆུབ་ཆེན་པོའི་སེམས་ལ་སོགས་པའི་ངོ་བོ་ཉིད་འདི་ཡིན་ནོ་ཞེས་བསྟན་པར་འགྱུར་རོ། །ཐམས་ཅད་བདག་ཉིད་དེར་ད་ལྟར་བྱུང་བའི་ངོ་བོས་རྟག་ཏུ་སྟེ་དུས་ཐམས་ཅད་དུ་བཞུགས་པས་ན་རྟག་ཏུ་བཞུགས་པ་ཡིན་ནོ། །ཐོག་མཐའ་མེད་པ་ཞེས་བྱ་བ་ནི་བཤད་ཟིན་ཏོ། །འདི་ཞེས་བྱ་བ་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་ནོ། །རང་བྱུང་ཞེས་བྱ་བ་ནི་བསྒོམ་པ་ལས་རང་ཉིད་ཁོ་ན་བྱུང་བ་ཡིན་གྱི་གཞན་ལས་མ་སྐྱེས་པ་ན་རང་བྱུང་ངོ༌། །བདུད་བཞི་བཅོམ་པས་ན་བཅོམ་ལྡན་འདས་སོ། །ལྷག་པའི་ལྷ་ནི་གཅིག་པུ་ཉིད། །ཅེས་བྱ་བ་ལ་འདི་ལས་མཆོག་ཏུ་གྱུར་པ་གཞན་མེད་པས་ན་ལྷག་པའི་ལྷའོ། །དེ་བཞིན་ཉིད་དང་རོ་གཅིག་པའི་སེམས་དང་སེམས་ལས་བྱུང་བའི་རང་བཞིན་ཉིད་ཀྱིས་རྒྱུད་ཐ་མི་དད་པས་ན་གཅིག་པུ་ཉིད་ཡིན་ནོ། །འདི་ལྟར་འཆད་པར་འགྱུར་ཏེ། གང་གི་ཕྱིར་བཅོམ་ལྡན་འདས་འདི་ཇི་ལྟར་བཤད་པའི་ཡོན་ཏན་དང་ལྡན་པ་ཇི་ལྟ་བ་བཞིན་དུ་བཤད་པའི་གསང་བ་དང༌། ཐམས་ཅད་ཀྱི་བདག་ཉིད་རྡོ་རྗེ་སེམས་དཔའི་རང་གི་གནས་སུ་རྟག་ཏུ་ཞུགས་པ་གྲུབ་པར་འགྱུར་བ་དེའི་ཕྱིར་ཇི་སྐད་དུ་བཤད་པའི་ཁང་པ་སུམ་བརྩེགས་སུ་གསང་བའི་དཀྱིལ་འཁོར་བྲིས་ལ། རྣལ་འབྱོར་པས་བཅོམ་ལྡན་འདས་བསྒྲུབ་པར་བྱ་སྟེ་གཞན་དུ་མ་ཡིན་ནོ་ཞེས་བྱ་བའོ། །རབ་ཏུ་དེ་ལྟར་མཆོག་ཏུ་རྗེས་ཆགས་དགའ་བ་པདྨའི་ར་བ་ཆེ། །མཆོག་ཏུ་གསང་བ་སྒྲུབ་པ་ཞེས་བྱ་བ་ནི་བཤད་ཟིན་ཏོ། །སྒྲུབ་པ་དེ་ཉིད་བླ་ན་མེད་པ་ཡང་དག་པར་
རྫོགས་པའི་བྱང་ཆུབ་རྫོགས་པའི་རྒྱུ་ཉིད་ཡིན་པའི་ཕྱིར་བླ་ན་མེད་པའི་དངོས་གྲུབ་སྟེ་དེ་ཉི་བདེ་བའོ། །གང་ཞིག་རྗེས་སུ་བརྟེན་པ་ཞེས་བྱ་བ་ནི་སྔ་མ་བཞིན་ནོ། །རབ་ཏུ་དགའ་བ་ནི་རྡོ་རྗེ་སེམས་དཔའ་སྟེ་ལྷ་མོ་བཞི་ཕྲེང་གི་དབུས་ན་བཞུགས་པའོ། །དེ་ཉིད་འདོད་ཆགས་ཀྱིས་འདོད་ཆགས་སྤོང་བའི་ཕྱིར་རྣལ་འབྱོར་པ་རྣམས་ཀྱི་རྟགས་སུ་གྱུར་པས་ན་རྒྱལ་མཚན་ཏེ། དེ་བསྒྲེང་བ་ནི་དེའི་སྐུ་གང་ལ་ཡོད་པ་དེ་ནི་རབ་ཏུ་དགའ་བའི་རྒྱལ་མཚན་བསྒྲེང་བའི་རྣལ་འབྱོར་པ་རྣམས་སོ། །དཔལ་རྡོ་རྗེ་སེམས་དཔའི་ལྷ་མོ་བཞི་ཡང་དག་པར་འདུས་པའི་རྣལ་འབྱོར་ལས་བྱུང་བའི་བདེ་བ་ནི་དངོས་གྲུབ་མཆོག་གི་བདེ་བ་ཆེན་པོ་སྟེ། དེའི་དངོས་པོ་ནི་བདེ་བ་ཆེན་པོ་དེ་ཉིད་དོ། །དངོས་གྲུབ་མཆོག་གི་བདེ་བ་ཆེན་པོ་དེ་ཉིད་རྣལ་འབྱོར་པ་དེ་རྣམས་ཀྱིས་ཉམས་སུ་མྱོང་བ་ཡིན་ནོ། །འདི་ལྟར་འཆད་པར་འགྱུར་ཏེ་ཇི་ལྟ་བ་བཞིན་དུ་བཤད་པའི་ཁང་པ་སུམ་བརྩེགས་སུ་གསང་བའི་དཀྱིལ་འཁོར་བྲིས་ལ། ཆོ་ག་ཐམས་ཅད་རྗེས་སུ་སྤྱད་ནས་ལྷ་མོ་བཞི་དང་ཀུན་ནས་འདུས་པའི་རྣལ་འབྱོར་གྱིས་མདུན་དུ་བཅོམ་ལྡན་འདས་བཞུགས་སུ་གསོལ་ལ། གསང་བའི་དཀྱིལ་འཁོར་དབུས་སུ་དེའི་རྣལ་འབྱོར་གྱིས་དེའི་རང་བཞིན་ཅན་གྱི་བདག་ཉིད་གང་གིས་བསྒོམ་པ་དེ་ནི་དེའི་རང་བཞིན་ཅན་དུ་འགྱུར་རོ། །དགའ་བ་ཆེན་པོ་ཡང་ཡིན་ལ་རྡོ་རྗེ་དང་ཡོད་པ་ཡང་དེ་ཉིད་ཡིན་པས་ན་དགའ་བ་ཆེན་པོ་རྡོ་རྗེ་དོན་ཡོད་པ་སྟེ། གསང་བའི་དཀྱིལ་འཁོར་གྱི་དབུས་ན་བཞུགས་པའི་དཔལ་རྡོ་རྗེ་སེམས་དཔའོ། །དེའི་དགའ་བ་གང་ཡིན་པ་དེས་དམ་ཚིག་ཅན་ནི་རིགས་ལ་སྐྱེད་པའི་རྒྱུའོ། །རྣལ་འབྱོར་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པ་རྣལ་འབྱོར་ཐམས་ཅད་དེ། རྣལ་འབྱོར་དང་རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་ནི་རྣལ་འབྱོར་ཐམས་ཅད་དོ། །དེ་རྣམས་ཀྱི་དབང་ཕྱུག་ནི་གཙོ་བོས་ཏེ་དེ་སྐྱེད་པར་བྱེད་པའི་ཕྱིར་རོ། །དགའ་བ་ཆེན་པོ་རྡོ་རྗེ་དོན་ཡོད་པའི་དགའ་བའི་དམ་ཚིག་ཐམས་ཅད་ཀྱང་དེ་ཡིན་ལ་རྣལ་འབྱོར་ཐམས་ཅད་ཀྱི་དབང་ཕྱུག་ཀྱང་དེ་ཡིན་པས་ན་དགའ་བ་ཆེན་པོའོ། །རྡོ་རྗེ་དོན་ཡོད་པའི་དགའ་བའི་དམ་ཚིག་དང༌། རྣལ་འབྱོར་
ཐམས་ཅད་ཀྱི་དབང་ཕྱུག་གོ །དེ་གང་ཞེ་ན། དེ་བཞིན་གཤེགས་པ་ཐམས་ཅད་ཀྱི་དཔལ་རང་གི་དམ་ཚིག་གི་དཀྱིལ་འཁོར་ཞེས་བྱ་བ་ལ། དེ་བཞིན་གཤེགས་པ་ཐམས་ཅད་ཀྱི་དཔལ་ནི་ལྷ་མོ་བཞི་ཕྲེང་གི་དབུས་ན་བཞུགས་པ་ལྷ་མོ་ཐམས་ཅད་ཀྱི་ཚོགས་ཀྱིས་ཡོངས་སུ་བསྐོར་བའི་རྡོ་རྗེ་སེམས་དཔའི་སྐུའོ། །དེ་ཉིད་ཀྱི་རང་གི་དམ་ཚིག་གི་དཀྱིལ་འཁོར་མཆོག་ཏུ་གསང་བ་ཡིན་ནོ། །དེ་ལྟར་སློབ་དཔོན་གྱི་ལས་ཀྱི་ཆོ་ག་བསྟན་ནས། ད་ནི་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་བཤད་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པའོ། །འདིར་ཡང་དོན་འདི་བཤད་པ་ཡིན་ཏེ། གལ་ཏེ་སློབ་མ་གཞུག་པའི་དོན་དུ་རྣལ་འབྱོར་བས་དཀྱིལ་འཁོར་བརྟགས་པ་ཡིན་ལ། དངོས་གྲུབ་ཀྱི་དོན་དུ་ནི་མ་ཡིན་ན། དེའི་ཚོ་ཆོག་པ་འདིས་རྣལ་འབྱོར་པས་སློབ་མ་གཞུག་པར་བྱའོ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་ནི་དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་སྟེ། གསང་བའི་དཀྱིལ་འཁོར་འདི་བྱང་ཆུབ་ཆེན་པོའི་སེམས་ཀྱི་རང་བཞིན་ཉིད་ཀྱི་ཕྱིར་དམ་ཚིག་ཆེན་པོ་དང་ཤིན་ཏུ་རྣལ་འབྱོར་རོ། །དེ་ལྟར་སློབ་མ་རྣམས་གཞུག་པ་ལ་སོགས་པའི་ཆོ་ག་སྟེ། དེ་རྒྱས་པ་ནི་བྱང་ཆུབ་ཆེན་པོའི་སེམས་བསྐྱེད་པ་ལ་སོགས་པའི་རྒྱུན་ཏེ། དེ་བཤད་པར་བྱའོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །དེ་ལ་དང་པོ་ཁོ་ན་ཞེས་བྱ་བ་ལ་སོགས་པ་ནི་གོ་སླའོ། །རིགས་ལྔའི་མཚན་མ་རྣམས་ནི་འདོད་པ་ཀུན་ཏེ་འདོད་པ་དེ་རྣམས་ལ་བྱང་ཆུབ་ཀྱི་མཚན་ཅན་གྱི་རྡོ་རྗེ་གྲུབ་པ་ཡིན་ཏེ། དང་པོའི་རྡོ་རྗེ་ལ་སོགས་པའི་རང་བཞིན་གྱི་རིགས་ཀྱི་སློབ་མ་ཐམས་ཅད་ཀྱི་སྙིང་གའི་ཟླ་བའི་རྣམ་པར་བྱ་བ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་སེམས་དཔའ་ཉིད་དུ་འགྱུར།། ཞེས་བྱ་བ་ལ་དང་པོའི་རྡོ་རྗེ་དང་དེ་བཞིན་གཤེགས་པ་དང༌། ཁྲོ་བོའི་རྡོ་རྗེ་དང༌། པདྨའི་རྡོ་རྗེ་དང༌། རིན་པོ་ཆེའི་རང་བཞིན་དུ་འཛིན་པ་ཡིན་ནོ། །གར་ཞེས་བྱ་བ་ནི། བ་དན་གསུམ་མཆོག་སྦྱོར་བ་ཡིས། །སྒེག་བཅས་མཐའ་མ་ལ་སོགས་བཀྲོལ། །གློག་འགྱུར་མཆོག་ཏུ་བསྐོར་བ་ནི།
རྡོ་རྗེ་གར་ཞེས་དེ་བཤད་དོ། །ཞེས་བྱ་བ་འདིས་རང་གི་ལུས་ལ་བསྐོར་བའི་གར་ཕྱོགས་བཞིར་ཕྱག་བྱ་བའི་ཐལ་མོ་དེ་གང་ལ་ཡོད་པ་དེ་ནི་གར་གྱི་ཐལ་མོ་རྣམས་སོ། །དེ་གན་གང་དུ་བྱ་ཞེ་ན། སྤྱི་བོ་ཞེས་བྱ་སྟེ། གར་གྱི་ཐལ་མོ་སྦྱར་བ་དེ་དག་རང་གི་སྤྱི་བོར་བཅིང་བའི་རྡོ་རྗེ་གར་ལས་བྱུང་བའི་ཕྱག་བྱ་བའི་ཐལ་མོ་རྣམས་སོ་ཞེས་བྱ་བའི་ཐ་ཚིག་གོ །གོས་ཀྱིས་གདོང་ནི་གཡོགས་པ་རྣམས། །ཞེས་བྱ་བ་ལ་ཇི་ལྟ་བ་བཞིན་དུ་བཤད་པའི་རས་ཀྱིས་གདོང་གཡོགས་པ་སྟེ། དེ་ལྟར་གྱུར་པ་དེ་རྣམས་དཔལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་དངོས་གྲུབ་འདོད་པ་ཇི་ལྟར་འདོད་པའི་དངོས་གྲུབ་འདོད་པས་ཏེ། སློབ་མ་དེ་རྣམས་ཐམས་ཅད་རང་གི་ཆོ་གས་གཞུག་པར་བྱའོ། །གང་གིས་དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་གང་འདོད་པ་ནི་འདིར་ཅི་འདོད་པ་སྟེ། དེ་ལྟ་བུའི་འདོད་པའི་དངོས་གྲུབ་སློབ་མའི་ཚོགས་ལ་བསམ་ཞིང༌། སློབ་དཔོན་གྱིས་སློབ་མ་རྣམས་མེ་ཏོག་དོར་དུ་གཞུག་པར་བྱའོ། །སངས་རྒྱས་རིན་ཆེན་དབང་བསྐུར་གྱིས། །དམ་ཚིག་གསུམ་ནི་གསལ་བར་སྦྱིན། །ཞེས་བྱ་བ་ལ་སངས་རྒྱས་ཉིད་ནི་རིན་པོ་ཆེ་སྟེ་སངས་རྒྱས་རིན་ཆེན་ནོ། །དེ་དག་གིས་དབང་བསྐུར་བ་ནི་སངས་རྒྱས་རིན་ཆེན་དབང་བསྐུར་བའོ། །སངས་རྒྱས་ལྔའི་ཕྱག་རྒྱའི་དབང་བསྐུར་བ་དང༌། ཅོད་པན་ལ་སོགས་པའི་དབང་བསྐུར་བས་སངས་རྒྱས་རིན་ཆེན་དབང་བསྐུར་བས་ཏེ་དེ་དང་བཅས་པའི་དེ་ཁོ་ན་ཉིད་དང༌། ཆོས་དང༌། དམ་ཚིག་སྐུ་གསུང་ཐུགས་ཀྱི་རྡོ་རྗེ་སྟོན་པར་བྱེད་པ་རྣམས་ཐོག་མཐའ་མེད་པ་ཞེས་བྱ་བ་ལ་སོགས་པ་འོག་ནས་འཆད་པར་འགྱུར་བའི་དམ་ཚིག་གསུམ་གྱི་བཤད་པའི་གཞུང་གིས་དེ་དག་སྦྱིན་པར་བྱའོ། །དེ་ལྟར་དམ་ཚིག་གསུམ་ནི་གསལ་བར་སྦྱིན་པར་འགྱུར་རོ། །འདི་ཞེས་བྱ་བ་ལ་སོགས་པ་ལ། འདི་ནི་དམྱལ་བའི་ཆུ་ཡིན་ཏེ། །ཁྱོད་དམ་ཚིག་ལས་འདས་པའི་རྒྱུས་དམྱལ་བ་ཁྱོད་ལ་སྲེག་པར་བྱེད་དོ། །དེ་ཡང་ཟངས་འབར་ཞིང་ཞུ་བའི་ཆུར་འགྱུར་རོ། །དམ་ཚིག་བསྲུངས་ན་ཞེས་བྱ་བ་ལ་དམ་ཚིག་དང་མི་ཤེས་པ་རྣམས་ལ་རྡོ་རྗེ་ལ་སོགས་པ་མ་བསྟན་པས་སྐུ་གསུང་ཐུགས་ཀྱི་རྡོ་རྗེ་དངོས་
གྲུབ་རྫོགས་པའི་ཕྱིར་དངོས་གྲུབ་རྡོ་རྗེའི་བདུད་རྩིའི་ཆུ་ནི་ཐར་པ་ཆེན་པོའི་བདུད་རྩིའི་ཆུ་སྟེ། དམ་ཚིག་བསྲུངས་ན་ཁྱོད་ལ་འགྲུབ་པ་ཡིན་ནོ། །དམ་ཚིག་དེ་གང་ཞིག་ལས་འདས་པས་བདག་ལ་སྐྱོན་ཅིར་འགྱུར་ཞེ་ན། རྡོ་རྗེ་ཞེས་བྱ་བ་ལ་སོགས་པ་ལ་ལྷ་ཐམས་ཅད་ཀྱི་རྡོ་རྗེ་ཕྱག་མཚན་རྣམས་ནི་རྡོ་རྗེའོ། །རིགས་ཐམས་ཅད་ཀྱི་མཚན་མས་མཚན་པ་ནི་དྲིལ་བུའོ། །ཆོས་དང་ལས་དང་དམ་ཚིག་དང་ཕྱག་རྒྱ་ཆེན་པོ་རྣམས་ཏེ། ཁྱད་པར་དུ་ལྷ་ཐམས་ཅད་ཀྱི་སྐུའི་གསང་བ་ནི་ཕྱག་རྒྱར་བརྗོད་པ་ཡིན་ནོ། །དམ་ཚིག་དེ་གང་ཞིག་ལས་འདས་པས་བདག་ལ་སྐྱོན་ཅིར་འགྱུར་ཞེ་ན། ཕྱག་རྒྱ་ལ་སོགས་པ་རྣམ་པ་གསུམ་པོ་འདི་དག་གལ་ཏེ་དཀྱིལ་འཁོར་དུ་མ་ཞུགས་པ་ལ་ཁྱོད་ཀྱིས་སྨྲས་སམ། དད་པ་མེད་པས་གཞན་བཞད་གད་བྱེད་ཅེས་བྱ་བ་ལ། རྡོ་རྗེ་ལ་སོགས་པ་འདིས་ཅི་ཞིག་བྱ། །སྒོམ་པ་ཁོ་ན་གཙོ་བོར་འགྱུར་བ་ཡིན་ཏེ། ལག་པ་རྣམ་པར་འགྱུར་བ་ལ་སོགས་པ་ནི་མ་ཡིན་ནོ་ཞེས་སྐྱེ་བོའི་ཚོགས་ཀྱི་ནང་དུ་གནས་ནས་སྨོད་པ་གང་ཡིན་པ་འདི་ནི་དམ་ཚིག་ལས་འདས་པའོ་ཞེས་བྱ་བས་མནའ་བསྒག་གོ །དེ་ལྟར་དབང་བསྐུར་བའི་ཆུས་ཆུ་བླུད་ལ་དམ་ཚིག་རབ་ཏུ་བསྟན་ནས། ཕྱག་རྒྱའི་དབང་བསྐུར་བ་ལ་སོགས་པ་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་བར་དུ་སྦྱིན་པར་བྱའོ་ཞེས་བྱ་བར་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ཡང་གོ་སླའོ། །དེ་ལྟར་དབང་བསྐུར་བ་ལ་སོགས་པ་བྱིན་ནས་དེ་ཁོ་ན་ཉིད་དང༌། ཆོས་དང་དམ་ཚིག་རྣམས་སྦྱིན་པར་བྱའོ་ཞེས་བྱ་བ་ནི་ཆོ་ག་འདིར་རབ་ཏུ་བསྟན་པར་བྱ་བའི་ཕྱིར་དེ་ལ་འདི་ཞེས་བྱ་བ་ལ་སོགས་པ་གསུངས་ཏེ། དེ་ལ་ཞེས་བྱ་བ་ནི་དེ་དག་ཉེ་བར་དགོད་པ་ལའོ། །འདི་ཞེས་བྱ་བ་ནི་དེ་མ་ཐག་ཏུ་འོག་ནས་འཆད་པར་འགྱུར་བ་ཐུགས་ལ་བཞག་པར་མཛད་ནས་འདི་ལྟར་གསུངས་སོ། །མཆོག་ནི་ཐོག་མ་དང་ཐ་མ་མེད་པའོ། །གསང་བར་གྱུར་པས་ན་གསང་བས་ཏེ་དམིགས་པ་མེད་པའི་ཐུགས་རྗེ་ཆེན་པོ་ལས་བྱུང་ངོ་ཞེས་བྱ་བའི་དོན་ཏོ། །མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བའོ། །དེ་ཉིད་ཀྱི་ཕྱིར་དམ་པ་སྟེ་ཕུལ་དུ་བྱུང་བའོ། །དེ་གང་ཡིན་ཞེ་ན། དཔལ་དམ་
ཚིག་གསུམ་ནི་སྦྱིན་པ་ཞེས་བྱ་བ་ལ་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་གསང་བ་ནི་དཔལ་དམ་ཚིག་གསུམ་སྟེ། དེ་སྦྱིན་པ་ནི་ཐོག་མཐའ་མེད་པ་ཞེས་བྱ་བ་ལ་སོགས་པ་བཤད་པའི་ཚིག་གིས་སློབ་མའི་རྒྱུད་ལ་གཏད་པའོ། །ཐོག་མ་ནི་དང་པོ་སྐྱེ་བའོ། །ཐ་མ་ནི་བར་མཆོད་པའི་འཇིག་པའོ། །ཐོག་མ་དང་ཐ་མ་དེ་དག་གང་ལ་མེད་པ་དེ་ནི་ཐོག་མ་དན་ཐ་མ་མེད་པའོ། །དེ་གང་ཡིན་ཞེ་ན། སེམས་དཔའ་ཞེས་བྱ་བ་ལ་དེ་བཞིན་ཉིད་དང་རོ་གཅིག་པའི་སེམས་དང་སེམས་ལས་བྱུང་བ་རྣམས་ནི་སེམས་དཔའ་སྟེ། གཟུང་བ་དང་འཛིན་པའི་རྣམ་པར་རྟོག་པས་མི་བསྐྱོད་པའི་ཕྱིར་རོ། །དེ་ཉིད་བསྟན་པར་བྱ་བའི་ཕྱིར་རྡོ་རྗེ་སེམས་དཔའ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ནི་དེ་བཞིན་ཉིད་དོ། །དེ་བཞིན་ཉིད་དང་རོ་གཅིག་པའི་སེམས་དང་སེམས་ལས་བྱུང་བ་རྣམས་ནི་སེམས་དཔའོ། །རྡོ་རྗེ་ལ་སེམས་དཔས་ན་རྡོ་རྗེ་སེམས་དཔའོ། །དེ་ཉིད་དམིགས་པ་མེད་པའི་ཐུགས་རྗེའི་རང་བཞིན་ཉིད་ཀྱི་སེམས་ཅན་གྱི་དོན་ཆེན་པོ་ལ་ཆགས་པས་ན་དགའ་བ་ཆེན་པོའོ། །ཇི་སྐད་དུ། རྟག་ཏུ་དྲི་མེད་ཐུགས་རྗེའི་ཤུགས་ལས་བྱུང༌། །སྨོན་ལམ་གྲུབ་པ་མི་འགག་ཆོས་ཉིད་ཅན། །འགྲོ་བའི་དོན་ནི་ཡང་དག་སྒྲུབ་བྱེད་མཆོག །ཐུགས་རྗེའི་བདག་ཉིད་རྟག་ཏུ་རྣམ་པར་མཛེས། །ཞེས་བྱ་བ་འབྱུང་ངོ༌། །འདིས་ནི་བཅོམ་ལྡན་འདས་གཞན་གྱི་དོན་གྱི་ཐབས་ཀྱི་རང་བཞིན་ཅན་དུ་བསྟན་ཏོ། །དགའ་བ་ཆེན་པོའི་དོན་ཉིད་བསྟན་པའི་ཕྱིར་ཀུན་དུ་བཟང་པོ་ཞེས་བྱ་བ་གསུངས་ཏེ། ཀུན་ནས་བཟང་པོའི་དགེ་བ་གང་ལས་བྱུང་བ་དེ་ནི་ཀུན་དུ་བཟང་པོའོ། །ཐམས་ཅད་ཀྱི་བདག་ཉིད་ཡིན་པས་ན་ཀུན་བདག་ཉིད་དོ། །རིགས་ལྔའི་ལྷ་རྣམས་ཀྱི་རང་བཞིན་གྱིས་འོད་གསལ་བའི་སེམས་དང་སེམས་ལས་བྱུང་བའི་རང་བཞིན་ཉིད་ཡིན་པའི་ཕྱིར་རོ། །དཔལ་རྡོ་རྗེ་སེམས་དཔའ་ཕྱག་རྒྱ་ཆེན་པོ་དང༌། བཅོམ་ལྡན་འདས་མ་དཔལ་རྡོ་རྗེ་སེམས་དཔའི་རིག་པའི་ལྷ་མོ་ནི་རྡོ་རྗེ་བསྙེམས་མ་སྟེ། དེའི་བདག་པོ་ནི་ཆོས་ཀྱི་དབྱིངས་ཀྱི་རང་བཞིན་གྱི་དཔལ་རྡོ་རྗེ་སེམས་དཔའོ། །བདག་ཅེས་བྱ་བ་ནི་བདག་པོའོ།།
འདི་ལྟར་འཆད་པར་འགྱུར་ཏེ། ཆོས་ཀྱི་དབྱིངས་ཀྱི་རང་བཞིན་གྱི་རྡོ་རྗེ་སེམས་དཔའ་ནི་ཕྱག་རྒྱ་ཆེན་པོ་བསྐྱེད་པའི་རྒྱུ་ཉིད་ཡིན་པས་བདག་པོ་ཞེས་བྱའོ། །མཆོད་དན་པོའི་སྐྱེས་བུ་བཅོམ་ལྡན་འདས་ཞེས་བྱ་བ་ལ། རྒྱུ་ལ་འབྲས་བུ་ཉེ་བར་བཏགས་པ་བྱས་ནས་ཆོས་ཀྱི་དབྱིངས་ཉིད་མཆོག་དང་པོའི་སྐྱེས་བུ་བཅོམ་ལྡན་འདས་རྡོ་རྗེ་འཆང་ཆེན་པོ་ཉིད་དུ་བསྟན་ཏོ། །རྡོ་རྗེ་ཞེས་བྱ་བ་ལ་དང་པོའི་རྡོ་རྗེ་བརྗོད་དོ་ཞེས་བྱ་བ་དང་སྦྱར་རོ། །གང་གིས་བརྗོད་པར་བྱ་ཞེ་ན། མཆོག་གི་དེ་ཁོ་ན་ཉིད་ཀྱིས་ཞེས་བྱ་བ་ལ་གང་ཞིག་ཐོག་མཐའ་མེད་པ་ཞེས་བྱ་བ་ནས་བརྩམས་ཏེ། ཇི་སྲིད་མཆོག་དང་པོའི་སྐྱེས་བུ་བཅོམ་ལྡན་འདས་སོ་ཞེས་བྱ་བའི་བར་གྱིས་བསྟན་པ་འདི་ནི་མཆོག་གི་དེ་ཁོ་ན་ཉིད་དེ། དེས་སློབ་མ་རྣམས་ལ་རྡོ་རྗེ་སྦྱིན་པར་བྱའོ། །ཅི་བྱས་ནས་ཤེ་ན། གསང་བ་ལྔའི་དེ་ཁོ་ན་ཉིད་བཤད་ནས་ཞེས་བྱ་བ་ལ་རྡོ་རྗེ་སེམས་དཔའ་དང༌། འདོད་ཆགས་རྡོ་རྗེ་མ་དང༌། རྡོ་རྗེ་ཀཱི་ལི་ཀཱི་ལ་དང༌། རྡོ་རྗེ་དྲན་མ་དང༌། རྡོ་རྗེ་འདོད་པའི་དབང་ཕྱུག་མའི་རང་བཞིན་ཅན་གྱི་གསང་བ་ལྔའི་དེ་ཁོ་ན་ཉིད་ཆེན་པོ་འདི་འོག་ནས་འཆད་བར་འགྱུར་བའི་ཚིག་གིས་སློབ་མ་རྣམས་ལ་ཡང་དག་པར་བསྟན་ལ། དེ་ནས་མཆོག་གི་དེ་ཁོ་ན་ཉིད་ཀྱིས་རྡོ་རྗེ་སྦྱིན་པར་བྱའོ། །དེ་ལྟར་མཆོག་གི་དེ་ཁོ་ན་ཉིད་ཀྱིས་རྡོ་རྗེ་བྱིན་ནས། ཆོས་ཀྱི་དྲིལ་བུ་སློབ་མ་རྣམས་དཀྲོལ་དུ་གཞུག་གོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། འདི་དེ་ཞེས་བྱ་བ་ལ་སོགས་པ་གསུངས་ཏེ། འདས་མ་ཐག་ཏུ་བཤད་པའི་ཐོག་མ་དང་ཐ་མ་མེད་པ་གང་ཡིན་པ་དེ་ནི་འདི་སྟེ་མཆོག་དང་པོའི་སྐྱེས་བུ་བཅོམ་ལྡན་འདས་སོ། །མཆོག་གི་ཐོག་མ་དང་ཐ་མ་མེད་པའོ། །སྲིད་པའི་བདག་པོ་ཞེས་བྱ་བ་ནི་ཁམས་གསུམ་མ་ལུས་པའི་ཆོས་ཀྱི་རྒྱལ་སྲིད་ཐོབ་པའི་ཕྱིར་རོ། །ཐམས་ཅད་ཀྱི་མཆོག་ཀྱང་ཡིན་ལ་དབང་ཕྱུག་དམ་པ་ཡང་དེ་ཉིད་ཡིན་པས་ན་ཐམས་ཅད་ཀྱི་མཆོག་གི་དབང་ཕྱུག་དམ་པའོ། །ཉན་ཐོས་པ་དང་རང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལས་ཕུལ་དུ་བྱུང་བས་ན། ཐམས་ཅད་ལས་ཕུལ་དུ་བྱུང་བ་ཐམས་ཅད་ཀྱི་མཆོག་གོ །ཁམས་གསུམ་པ་མ་ལུས་པའི་བདག་པོ་ཉིད་
ཐོབ་པས་དབང་ཕྱུག་དམ་པའོ། །དེས་ཅི་མཛད་ཅེ་ན། མཆོག་ཆོས་ལ་བཀའ་སྩོལ་བ་ཡིན་ནོ་ཞེས་བྱ་བ་ལ་མཆོག་ཀྱང་ཡིན་ལ་ཆོས་ཀྱང་དེ་ཉིད་ཡིན་པས་ན་མཆོག་ཆོས་ཞེས་ཏེ་རིགས་ལྔའི་སྐུ་གསུང་ཐུགས་ཀྱི་རྡོ་རྗེ་རྣམས་སོ། །དེ་ཕྱོགས་བཅུ་ཀུན་དུ་གདུལ་བྱ་རྣམས་ལ་བཀའ་སྩལ་པ་ནི་རྟོག་པར་མཛད་པའོ། །དེ་ཡང་ཐོག་མ་མེད་པ་ཆོས་ཀྱི་དབྱིངས་སོ། །དེས་མཆོག་གི་ཆོས་ཇི་ལྟར་བཀའ་སྩལ་པ་ཡིན་ཞེ་ན། དེ་བཞིན་གཤེགས་པ་ཞེས་བྱ་བ་ལ། གང་གི་ཕྱིར་དེ་ནི་ཇི་ལྟར་རིགས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ཐམས་ཅད་དང༌། ཆོས་ཀྱི་དབྱིངས་ཀྱི་བདག་པོ་ཉིད་དུ་ཞུགས་པ་དེ་བཞིན་དུ་མཁྱེན་ཅིང་གཞན་དག་ལ་ཡང་དེ་བཞིན་དུ་སྟོན་པར་མཛད་པའི་ཕྱིར་རོ། །ཕྱིན་ཅི་ལོག་གི་ཆོས་ཅིའི་ཕྱིར་གསུང་བ་མ་ཡིན་ཞེ་ན། རང་བཞིན་དག་པ་ཞེས་བྱ་བ་ལ་ཆོས་ཀྱི་སེར་སྣ་ལ་སོགས་པའི་བག་ཆགས་དང་བཅས་པའི་ཉོན་མོངས་པ་དང་བྲལ་བས་ན་རང་བཞིན་གྱིས་དག་པའོ། །ནིའི་སྒྲ་ནི་གང་གི་ཕྱིར་གྱི་དོན་ཏོ། །སྲིད་པ་ནི། ངོ་བོ་ཉིད་ཀྱིས་སྲིད་བྲལ་བྱས། །ཞེས་བྱ་བ་ལ་འདོད་པ་དང་གཟུགས་དང་གཟུགས་མེད་པའི་སྲིད་པ་ནི་སྲིད་པ་རྣམས་སོ། །དེ་དག་གི་ངོ་བོ་ཉིད་རྣམས་ནི་ཡང་དག་པ་མ་ཡིན་པའི་ཀུན་དུ་རྟོག་པའི་རང་བཞིན་ཅན་གྱི་སེམས་དང་སེམས་ལས་བྱུང་བས་ཏེ། དེ་དག་དང་བྲལ་བའོ། །དེ་ལྟར་འཆད་པར་འགྱུར་ཏེ། གང་གི་ཕྱིར་མཆོག་དང་པོའི་སྐྱེས་བུ་བཅོམ་ལྡན་འདས་དེ་རང་བཞིན་གྱིས་དག་པ་དང༌། སྲིད་པའི་རང་བཞིན་རྣམས་དང་བྲལ་བ་དེའི་ཕྱིར་མཆོག་གི་ཆོས་བཀའ་སྩལ་པ་ཡིན་ནོ། །སྐྱོན་ཟད་པ་ནི་བརྫུན་གྱི་ཚིག་བརྗོད་པའི་རྒྱུ་མེད་པའི་ཕྱིར་རོ། །མཆོག་དང་པོའི་སྐྱེས་བུ་བཅོམ་ལྡན་འདས་ཡོན་ཏན་དེ་ལྟ་བུ་དང་ལྡན་པ་གང་གིས་སྲིད་པ་མཆོག་མཛད་པ་ཡིན་ཞེ་ན། རང་བཞིན་དག་པའི་སེམས་དཔའ་མཆོག ། སྲིད་པ་མཆོག་ནི་མཛད་པ་ཡིན། །ཞེས་བྱ་བ་ལ་དོན་དམ་པར་ཡང་དག་པ་མ་ཡིན་པའི་ཀུན་དུ་རྟོག་པ་དང་བྲལ་བའི་ཕྱིར་རང་བཞིན་གྱིས་དག་པའི་སེམས་དཔའ་མཆོག་ནི་བྱང་ཆུབ་སེམས་དཔའ་རྣམས་སོ། །སེམས་དཔའ་མཆོག་དེ་དག་གིས་སྲིད་པ་མཆོག་ཏུ་ཟད་པ་ཡིན་ཞེས་བྱའོ།།
སྲིད་པ་ནི་མཆོག་དང་པོའི་སྐྱེས་བུ་མི་གནས་པའི་མྱ་ངན་ལས་འདས་པའི་རང་བཞིན་དུ་མཛད་པ་ནི་རྟོགས་པར་མཛད་པ་ཡིན་ཏེ། དངོས་པོ་ལ་མངོན་པར་ཞེན་པའི་ཉན་ཐོས་དང་རང་སངས་རྒྱས་རྣམས་ཀྱིས་ནི་མ་ཡིན་ནོ། །མཆོག་ཏུ་གསང་བའི་ཆོས་ཉིད་འབེབས་པ་ཞེས་བྱ་བ་གང་ཡིན་ཞེ་ན་དྲིལ་བུ་སྟེ། སྒྲའི་རྗེས་སུ་འགྲོ་བའི་ཤེས་རབ་སྟོན་པར་བྱེད་པའི་རྡོ་རྗེ་དྲིལ་བུའོ། །ཇི་སྐད་དུ། རྡོ་རྗེ་དེས་རྟོགས་ཤེས་རབ་ནི། །དྲིལ་བུ་དབྱངས་ཀྱི་རྗེས་འགྲོར་བཤད། །བདག་གཞན་དོན་ནི་རབ་བསྒྲུབ་པའི། །སངས་རྒྱས་མཆོག་ཉིད་འདི་ཡིན་ནོ། །ཞེས་གསུངས་སོ།། དེ་དུས་གང་གི་ཚེ་དཀྲོལ་བར་བྱ་ཞེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་རིགས་ལྔའི་ལྷ་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་རྣམས་ལ་མེ་ཏོག་ལ་སོགས་པ་དང༌། རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱ་བཅུ་གཉིས་ཀྱིས་མཆོད་པ་རྣམས་ཀྱིས་ཡང་དག་པར་མཆོད་པའམ། རྗེས་སུ་རྣལ་འབྱོར་གྱི་སྦྱོར་བས་རང་གི་ལུས་ལ་ཡེ་ཤེས་སེམས་དཔའ་བཅུག་ལ་དམ་ཚིག་གི་ཕྱག་རྒྱས་རབ་ཏུ་བསྒྲུབས་ཏེ། ཇི་སྐད་བཤད་པའི་དབྱངས་ཀྱི་རྗེས་སུ་འགྲོ་བའི་ཤེས་རབ་ཀྱི་མཚན་ཉིད་ཅན་གྱི་ཆོས་ཀྱི་དྲིལ་བུ་དཀྲོལ་བར་བྱ་སྟེ། སློབ་མ་རྣམས་ལ་བསྟན་པར་བྱའོ། །དེ་ལྟར་ཆོས་ཀྱི་དྲིལ་བུ་དཀྲོལ་བས་ཅི་བྱེད་ཅེ་ན། ཆོས་ཐམས་ཅད་ཀྱི་དེ་ཁོ་ན་ཉིད་སད་པའི་འབེབས་པ་རྣམས་ཀྱིས་དྲིལ་བུ་དེས་རྣལ་འབྱོར་པའི་སྒྲིབ་པ་ཐམས་ཅད་རྣམ་པར་དག་པར་བྱེད་པ་ཡིན་ནོ། །ཆོས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ཆོས་ཐམས་ཅད་དེ། རིགས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་རྣམས་སོ། །དེ་དག་གི་དེ་ཁོ་ན་ཉིད་ནི་གསང་བ་ལྔའི་དེ་ཁོ་ན་ཉིད་ཆེན་པོ་སྟེ། དེ་ཐོག་མ་མེད་པ་ལ་ཞེས་བྱ་བ་ལ་སོགས་པ་འོག་ནས་གསུངས་པ་ཡིན་ནོ། །གདུལ་བྱའི་སྐྱེ་བོའི་རྒྱུད་ལ་དེ་བཞིན་ཉིད་དུ་ཕུལ་དུ་བྱུང་བས་རབ་ཏུ་སད་པ་ནི་གདུལ་བྱ་རྣམས་ཀྱི་དེའི་རང་བཞིན་མངོན་དུ་བྱེད་པའི་ཕྱིར་འབེབས་པ་ནི་ཡེ་ཤེས་བསྐྱེད་པའོ། །བྱེད་པར་འགྱུར་བའི་འབེབས་པ་རྣམས་ཀྱི་དེ་ཁོ་ན་ཉིད་རྟོགས་པའི་གེགས་བྱེད་པའི་སྒྲིབ་པ་ཐམས་ཅད་རྣམ་པར་དག་པ་ནི་དྲིལ་བུ་དེའི་
སྒྲུབ་པ་པོའི་སྒྲིབ་པ་སྤོང་བར་བྱེད་པ་ཡིན་ནོ། །འདི་ཡང་ཇི་ལྟར་འགྱུར་ཞེ་ན། ཐམས་ཅད་ཅེས་བྱ་བ་ལ་སོགས་པ་གང་གི་ཕྱིར་དེ་དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རང་བཞིན་ཅན་གྱི་རྡོ་རྗེ་ཐམས་ཅད་རྣལ་འབྱོར་པའི་རྒྱུད་ལ་འབེབས་པར་བྱེད་པའི་ཕྱིར་དེ་ཉིད་དུ་རྡོ་རྗེ་ཐམས་ཅད་རབ་ཏུ་སྒྲུབ་པར་བྱེད་པའོ། །དབང་དུ་བྱེད་པ་ནི་རང་ལ་རག་ལས་པར་བྱེད་པའོ། །རབ་ཏུ་དང་བར་བྱེད་པ་ནི་རྡོ་རྗེ་ཐམས་ཅད་ཀྱི་སྤྱོད་ཡུལ་དེ་རྣལ་འབྱོར་པའི་སེམས་དང་བར་བྱེད་པ་དེ་ཉིད་ཡིན་ནོ་ཞེས་བྱ་བ་ནི་སྒྲ་ནི་ངེས་པ་ལ་དེ་ལྟར་ངེས་པར་བསྐྱེད་ནས་སྒྲུབ་པ་པོ་གྲུབ་པར་འགྱུར་རོ། །དེ་ལྟར་ཆོས་ཀྱི་དྲིལ་བུ་དཀྲོལ་བ་བསྟན་ནས། དམ་ཚིག་གི་ཕྱག་རྒྱ་ཆེན་པོ་བྱིན་གྱིས་བརླབ་པ་བསྟན་པར་བྱ་བའི་ཕྱིར་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། ཆོས་ཀྱི་དྲིལ་བུ་གཅིག་ཅེས་བྱ་བ་བསྟན་ནས། དེའི་རྗེས་ཐོགས་ཉིད་དུ་སྲིད་པ་རྣམ་པར་དག་པ་མི་གནས་པའི་མྱ་ངན་ལས་འདས་པའི་མཆོག་གི་ཐབས་ཞེས་བྱ་བ་ནི་མཆོག་ཀྱང་ཡིན་ལ་ཐབས་ཀྱང་དེ་ཉིད་ཡིན་པས་ན་མཆོག་གི་ཐབས་སོ། །དེ་ཇི་ལྟ་བུ་ཞེ་ན། རྟོག་པ་ཐམས་ཅད་ཅེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པ་ཐམས་ཅད་ཀྱི་གསང་བ་ཆེན་པོའི་དམ་ཚིག་ནི། གསང་བ་ཆེན་པོ་ཡང་ཡིན་ལ་དམ་ཚིག་ཀྱང་ཡིན་པས་ན་གསང་བའི་ཆེན་པོའི་དམ་ཚིག་གོ །རྟོག་པ་ཐམས་ཅད་ཀྱི་གསང་བའི་དམ་ཚིག་ནི་རྟོག་པ་ཐམས་ཅད་ཀྱི་གསང་བ་ཆེན་པོའི་དམ་ཚིག་སྟེ། དཔལ་རྡོ་རྗེ་སེམས་དཔའ་ལ་སོགས་པའི་སྐུའི་གསང་བའི་རང་བཞིན་ཅན་ནོ། །དེ་ཉིད་རྟག་ཏུ་རྣལ་འབྱོར་གྱི་བསྒོམ་པས་བར་མཆོད་པར་བསྟེན་པར་བྱ་སྟེ། ཤིན་ཏུ་མཉམ་པར་བཞག་པ་དང་མཉམ་པར་མ་བཞག་པའི་རྣལ་འབྱོར་དག་གིས་མངོན་དུ་བྱའོ་ཞེས་བྱ་བ་སློབ་ཏུ་གཞུག་གོ །འདི་ལ་འདི་ཞེས་བྱ་བ་ནི་སྔ་མ་བཞིན་ནོ། །ཁྱོད་ལ་ཞེས་བྱ་བ་ནི་ཁྱོད་ཀྱི་དམ་ཚིག་གོ་ཞེས་བྱ་བའི་ཐ་ཚིག་གོ །དེ་གང་ཡིན་ཞེ་ན། སྲིད་པ་ཞེས་བྱ་བ་ལ་སོགས་པ་འབྱུང་བས་ན་སྲིད་པས་ཏེ་མི་གནས་པའི་མྱ་ངན་ལས་འདས་པའི་མཚན་ཉིད་ཅན་གྱི་སྐུའི་གསང་བའི་རང་
བཞིན་ནོ། །ཤིན་ཏུ་མྱུར་བ་ནི་མྱུར་བ་ཁོ་ནར་དཔལ་རྡོ་རྗེ་སེམས་དཔའ་ལ་སོགས་པའི་བདེ་བའི་རྒྱུ་ཡིན་པས་ན་ཤིན་ཏུ་མྱུར་བར་བདེ་བའོ། །ནིའི་སྒྲ་ནི་ངེས་པར་གཟུང་བ་སྟེ་མྱུར་བ་ཁོ་ནར་བདེ་བའོ། །སྡུག་བསྔལ་ཆེན་པོ་དག་པར་བྱ་བའི་ཕྱིར་ཞེས་བྱ་བ་ལ་སོགས་པ་ལ་གོང་ནས་གོང་དུ་རྣམ་པ་བཅུའི་སྡུག་བསྔལ་ཐོག་མ་མེད་པའི་འཇིག་རྟེན་ལས་བྱུང་བ་གང་ཡིན་པ་དེ་སྒྲུབ་པ་པོའི་རྒྱུད་ལ་སྤོང་བའི་ཕྱིར་རྣམ་པར་དག་པའོ། །གང་གི་ཕྱིར་ཤིན་ཏུ་བདེ་བ་དམ་པ་ནི་གཉིས་སུ་མེད་པའི་ཡེ་ཤེས་ཀྱི་ཐབས་ནི་རྒྱུའོ། །དེ་ཡང་དམ་ཚིག་འདི་ཞེས་བྱ་བ་ནི་མི་གནས་བའི་མྱ་ངན་ལས་འདས་པའི་རང་བཞིན་ཅན་གྱི་སྲིད་པ་འདི་ཡིན་ཏེ། དེ་ཡི་ཕྱིར་འདི་རྟག་ཏུ་གཟུང༌། །ཞེས་བྱ་བ་ནི་རྟག་ཏུ་རྣལ་འབྱོར་གྱི་བར་མཆོད་བ་ཉིད་དུ་སྒོམས་ཤིག་པའོ། །དེ་ཇི་ལྟར་ཞེ་ན། འདོད་པའི་ལོངས་སྤྱོད་ཐམས་ཅད་ནི། །ཞེས་བྱ་བ་ལ་སོགས་པ་ལ་འདོད་པའི་ལོངས་སྤྱོད་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་འདོད་པ་ཐམས་ཅད་ལ་ལོངས་སྤྱོད་པ་སྟེ། འདོད་ཆགས་རྡོ་རྗེ་མ་ལ་སོགས་པའི་མཆོད་པའི་ལྷ་མོ་བཅུ་གཉིས་དང༌། དཔལ་རྡོ་རྗེ་སེམས་དཔའ་སྒྲུབ་པ་དང་རྗེས་སུ་མཐུན་པའི་རྒྱན་དང༌། དབྱིབས་དང༌། མེ་ཏོག་དང༌། སྤོས་དང༌། དྲི་ལ་སོགས་པའོ། །དེ་ལ་འདོད་པ་ནི་རྡོ་རྗེ་སེམས་དཔའ་སྟེ། མངོན་པར་འདོད་པར་བྱ་བས་ན་འདོད་པའོ། །ཇི་སྐད་དུ། སེམས་དཔའ་འདོད་པ་བཅོམ་ལྡན་འདས། །ཞེས་གསུངས་སོ། །གཞན་ཡང༌། ཁམས་གསུམ་པ་ནི་མ་ལུས་པ།། ཐམས་ཅད་དེ་ཡི་ལོངས་སྤྱོད་ཡིན། །ཞེས་གསུངས་སོ། །ཅིའི་འདོད་པ་ནི་བརྟེན་བཞིན་དུ། །ཞེས་བྱ་བ་ལ། དེ་ལ་དཔལ་རྡོ་རྗེ་སེམས་དཔའི་རྒྱན་རྣམས་ཀྱིས་བདག་ཉིད་བརྒྱན་ཅིང༌། རྣལ་འབྱོར་དང་རྗེས་སུ་མཐུན་པའི་གོས་ལ་སོགས་པ་ལ་ལོངས་སྤྱོད་པ་དང༌། རང་གི་ལྷ་མོའི་ཚོགས་ལ་ཡང་ཤིན་ཏུ་རྣལ་འབྱོར་གྱི་བསྒོམ་པས་རོལ་ཅིང་བསྟན་པའོ། །དེ་ཡང་ཇི་ལྟར་བསྟེན་པར་བྱ་ཞེ་ན། ཅི་འདོད་པ་ཞེས་བྱ་བ་ལ་འདོད་བ་མ་ལུས་པའི་ལོངས་སྤྱོད་ཐམས་ཅད་བསྟེན་པའམ། ཕྱོགས་གཅིག་གི་ནུས་པ་དང་རྗེས་སུ་མཐུན་བར་བྱེད་པར་གྱུར་པ་དེ་
རྣམས་ཀྱིས་མཆོད་པར་བྱའོ་ཞེས་བྱ་བ་དང་སྦྱར་རོ། །རྣལ་འབྱོར་གང་གིས་དེ་རྣམས་ལ་བསྟེན་པས། རང་གི་ལྷ་ཡི་སྦྱོར་བ་ཡིས། །ཞེས་བྱ་བ་ལ་རང་གི་ལྷའི་སྦྱོར་བ་ནི་རྣལ་འབྱོར་ཆེན་པོའམ། རྣལ་འབྱོར་གཅིག་གིས་བྱས་ནས་དེའི་རྗེས་ལ་རང་གི་བདག་ཉིད་དམ་གཞན་རྣམས་སངས་རྒྱས་དང་བྱང་ཆུབ་སེམས་དཔའ་དང་སློབ་མའི་ཚོགས་དེ་དག་གིས་མཆོད་པར་བྱའོ། །འདི་ལྟར་འཆད་པར་འགྱུར་ཏེ། རང་གི་ལྷའི་རྣལ་འབྱོར་གྱིས་ཡེ་ཤེས་སེམས་དཔའ་གཅིག་པུ་རང་གི་ལུས་ལ་གཞུག་པའམ། རྣལ་འབྱོར་ཆེན་པོ་བྱས་ལ་རང་གི་རིགས་ཀྱི་དཀྱིལ་འཁོར་པ་ཐམས་ཅད་སྤྱན་དྲངས་ནས་ཆོ་ག་ཐམས་ཅད་རྗེས་སུ་སྤྱད་ལ། མཆོད་པ་ཐམས་ཅད་ཀྱིས་ཡང་དག་པར་མཆོད་དེ་ཕྱག་བྱས་ནས་རང་གི་ལྷ་མོའི་ཚོགས་ཐམས་ཅད་དང༌། བདག་ཉིད་གཟུགས་བརྙན་དང་མཉམ་པར་བསམས་ལ་དེ་དང་རང་ལྷན་ཅིག་ཏུ་ཡང་དག་པར་སྦྱོར་བར་བསྒོམ་ཞིང་བདག་ཉིད་དང་དེ་བཞིན་གཤེགས་པ་ལ་སོགས་པ་རྣམས་སོ་སོར་རྟོག་པའི་མཆོད་པས་མཆོད་པར་བྱའོ། །དམ་ཚིག་གང་གིས་རང་དང་གཞན་གྱི་མཆོད་པ་བདག་གི་བྱ་བའི་དམ་ཚིག་དེ་གང་ཡིན་ཞེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་དེ་བཞིན་གཤེགས་པ་ཐམས་ཅད་དེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པ་རྣམས་སོ། །དེ་རྣམས་ཀྱི་ཐོག་མ་དང་ཐ་མ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཐབས་ཀྱི་ཡེ་ཤེས་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་ངོ་བོ་ཉིད་ནི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའོ། །མཆོག་ཏུ་གསང་བ་ཡང་ཡིན་ལ་བླ་ན་མེད་པའི་ཐེག་བ་ཆེན་པོ་ཡང་དེ་ཉིད་ཡིན་པས་ན། མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོའོ། །དེ་ལས་ཀྱང་ཕུལ་དུ་བྱུང་བས་ན་ཐེག་པ་ཆེན་པོའི་ཡང་ཆེན་པོས་ཏེ། དེ་གང་གི་ཕྱིར་ཐེག་པ་ཆེན་པོ་དེས་བསྐལ་བ་གྲངས་མེད་པ་གསུམ་གྱིས་སངས་རྒྱས་ཉིད་ཐོབ་བོ་ཞེས་བཅོམ་ལྡན་འདས་ཀྱིས་གསུངས་སོ། །རྡོ་རྗེ་ཐེག་པ་འདིས་
ནི་སྐྱེ་བ་འདི་ཉིད་ལའོ་ཞེས་བྱ་བ་གསུངས་པ་ཡིན་ནོ། །དེ་ལ་ཡང་རིགས་ལྔའི་དེ་བཞིན་ནི་རྡོ་རྗེ་སྟེ། དེ་སྟོན་པར་བྱེད་པའི་རྩེ་ལྔ་པ་ནི་འདིར་རྡོ་རྗེ་ཡིན་ནོ། །དེ་ལས་བྱུང་བའི་རྣམ་པར་སྣང་མཛད་ལ་སོགས་པའི་ཐེག་པའོ། །དེ་ཉིད་ནམ་མཁའི་ཁམས་ཐམས་ཅད་དུ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རང་བཞིན་དང༌། དེ་བཞིན་ཉིད་ཀྱི་ངོ་བོ་ཉིད་ཐམས་ཅད་དུ་འགྲོ་བས་ན་དམ་ཚིག་ཆེན་པོའོ། །དེའི་རྣལ་འབྱོར་ནི་རྒྱུ་མཐུན་པའི་འབྲས་བུས་ཏེ། རྡོ་རྗེ་དང་དྲིལ་བུ་འཛིན་པའི་བཅོམ་ལྡན་འདས་རྡོ་རྗེ་སེམས་དཔའ་ཇི་ལྟ་བ་བཞིན་དུ་བཤད་པའི་མཚན་ཉིད་དང་ལྡན་པའོ། །དམ་ཚིག་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ལས་བྱུང་བའི་བཅོམ་ལྡན་འདས་རྡོ་རྗེ་སེམས་དཔའི་སྐུའི་གསང་བ་གཟུགས་བརྙན་དང་མཚུངས་པར་སོ་སོར་སྣང་བ་ཙམ་དམ་ཚིག་ཡིན་ཏེ། ཀུན་གཞིའི་རྣམ་པར་ཤེས་པའི་རང་བཞིན་ཅན་གྱི་འཁོར་བའི་ངོ་བོ་ནི་མ་ཡིན་ནོ། །དེ་ཅིའི་ཕྱིར་ཞེ་ན་ཞེས་བྱ་བ་ལ་རྒྱུ་གང་གི་ཕྱིར་ཆོས་ཀྱི་དབྱིངས་ལས་བྱུང་བའི་ངོ་བོ་ཁོ་ན་དམ་ཚིག་ཡིན་གྱི་འཁོར་བ་ལས་བྱུང་བ་ནི་མ་ཡིན་ནོ་ཞེ་ན། འདི་ལྟར་ཞེས་བྱ་བ་ལ་སོགས་པ་ལ་འདི་ལྟར་ཞེས་བྱ་བའི་སྒྲ་ནི་གང་གི་ཕྱིར་ཞེས་བྱ་བའི་ཐ་ཚིག་གོ །དེའི་ཕྱིར་འདའ་བར་དཀའ་བ་ཉིད་ཀྱི་ཕྱིར་ཞེས་བྱ་བ་གསུངས་སོ། །གང་གིས་འདའ་བར་དཀའ་ཞེ་ན། དེ་བཞིན་གཤེགས་པ་ཀུན་གྱིས་ཀྱང༌། །ཞེས་བྱ་བ་ལ་དེ་བཞིན་གཤེགས་པ་ཡང་ཡིན་ལ་ཀུན་ཀྱང་དེ་ཉིད་ཡིན་པས་ན་དེ་བཞིན་གཤེགས་པ་ཀུན་ཏེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་རྣམ་པར་སྣང་མཛད་ལ་སོགས་པའོ། །དེ་དག་གིས་ཀྱང་བཅོམ་ལྡན་འདས་རྡོ་རྗེ་སེམས་དཔའི་ཐོག་མ་དང་ཐ་མ་མེད་པ་ཆོས་ཀྱི་དབྱིངས་ལས་བྱུང་བའི་སྐུའི་གསང་བའི་ཕྱག་རྒྱ་ནི་འདའ་བར་དཀའ་བ་ཡིན་ནོ། །ཀྱང་གི་སྒྲས་ནི་རྡོ་རྗེ་རྒྱལ་པོ་ལ་སོགས་པའི་རྣལ་འབྱོར་གྱི་དབང་ཕྱུག་ཐམས་ཅད་གཟུང་ངོ༌། །འདིས་ནི་དོན་འདི་འཆད་པར་འགྱུར་ཏེ། གང་གི་ཕྱིར་ཆོས་ཀྱི་དབྱིངས་ལས་བྱུང་བའི་རྡོ་རྗེ་སེམས་དཔའ་ནི་དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་དཀའ་བ་དེའི་ཕྱིར་དམ་ཚིག་ཅེས་བྱ་བ་ཡིན་ནོ། །ཅིའི་ཕྱིར་དེ་བཞིན་
གཤེགས་པ་རྣམས་ཀྱིས་ཀྱང་དེ་འདའ་བར་དཀའ་བ་ཡིན་ཞེ་ན། ཕྱག་རྒྱ་ཞེས་བྱ་བ་ལ་སོགས་པ་ལ་ནིའི་སྒྲ་ནི་ཅིའི་ཕྱིར་གྱི་དོན་དུའོ། །གང་གི་ཕྱིར་ཡིད་ཀྱིས་གཟུགས་བསྟན་པ་ཉིད་ཀྱི་ཕྱིར་ཕྱག་རྒྱ་ཁོ་ན་དམ་ཚིག་ཏུ་བརྗོད་པ་དེའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་དཀའ་བ་ཡིན་ནོ། །དེ་ལ་རང་གི་ཕྱག་རྒྱ་ཆེན་པོར་བསྐྱེད་པས་དངོས་པོ་ཐམས་ཅད་ལ་རྒྱས་འདེབས་པ་ནི་རྡོ་རྗེ་སེམས་དཔའ་ཉིད་དུ་མཛད་པའི་ཕྱིར་ཕྱག་རྒྱ་སྟེ། དཔལ་རྡོ་རྗེ་སེམས་དཔའི་སྐུའི་གསང་བའི་རང་བཞིན་གྱི་ཕྱག་རྒྱ་ཆེན་པོའོ། །དེ་ལྟར་གཞན་དུ་ཡང་ཤེས་པར་བྱའོ། །དམ་ཚིག་ནི་བཤད་ཟིན་ཏོ། །དེ་ཉིད་རབ་ཏུ་བརྗོད་པ་མཐར་ཐུག་པའི་དོན་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །ཡིད་ཅེས་བྱ་བ་ནི་དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཅན་གྱི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ནི་འདིར་ཡིད་དོ།། དེའི་གཟུགས་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ་དེ་ནི་དེ་ལས་བྱུང་ངོ༌། །བསྟན་པ་ནི་སེམས་ཅན་དང་སེམས་ཅན་མ་ཡིན་པ་རྣམས་ཀྱིས་མི་ཕྱེད་པ་ཉིད་དེ། ཡིད་ཀྱིས་གཟུགས་བསྟན་པའི་རྒྱུ་དེ་ཉིད་ཀྱི་ཕྱིར་རོ། །འདིས་ནི་འདི་སྐད་འཆད་པར་འགྱུར་ཏེ། དེ་བཞིན་གཤེགས་པ་ཐམས་ཅད་དང་རིགས་རྣམས་དམིགས་པ་མེད་པའི་ཐུགས་རྗེ་ཆེན་པོ་ལས་བྱུང་བས་ཏེ། དེའི་ཕྱིར་རྡོ་རྗེ་སེམས་དཔའི་ཕྱག་རྒྱ་ཆེན་པོའི་གཟུགས་ཀྱིས་འདུལ་བྱ་སེམས་ཅན་རྣམས་འདུལ་བར་མཛད་པའི་ཕྱིར། ངེས་པ་ཉིད་དུ་དེ་བཞིན་གཤེགས་པ་དང༌། རིགས་ཐམས་ཅད་ཀྱིས་དེའི་གཟུགས་སུ་གཞུག་པ་ཡིན་ནོ། །དེ་ཁོ་ན་ཉིད་བསྒོམས་པ་ཙམ་ཉིད་ཀྱིས་ཆོས་བདག་མེད་པའི་ཡེ་ཤེས་སྐྱེ་བ་ཡིན་ཏེ། དེ་ཉིད་ཀྱིས་བག་ཆགས་དང་བཅས་པའི་ཉོན་མོངས་པ་ཐམས་ཅད་ཀྱི་བུད་ཤིང་སྲེག་པར་འགྱུར་ཏེ། དེ་བས་ན་ཆོས་དང་དམ་ཚིག་གི་སྒོམ་པ་དོན་མེད་པ་ཡིན་ནོ་ཞེས་རྣམ་པར་བརྟག་པ་དེའི་ལན་གདབ་པར་བྱ་བའི་ཕྱིར་དེ་ལ་འདི་བརྗོད་པར་བྱའོ་ཞེས་བྱ་བ་གསུངས་སོ། །འདི་ཅི་བརྗོད་པར་བྱ་ཞེ་ན། ཇི་སྲིད་འཁོར་བའི་ཞེས་བྱ་བ་ལ་སོགས་པ་གསུངས་ཏེ། དེ་ཡང་སྔར་བཤད་ཟིན་ཏོ། །འདི་ལྟར་འཆད་པར་འགྱུར་ཏེ་ཤེས་རབ་ཀྱི་ཕ་རོལ་ཏུ་ཕྱིན་པའི་
སྒོམ་པས་ནི་ཆོས་ཐམས་ཅད་ཀྱི་དངོས་པོའི་རང་བཞིན་རྟོགས་པར་འགྱུར་བ་ཡིན་ཏེ། དེས་ཀྱང་ཤིན་ཏུ་ཡོངས་སུ་མྱ་ངན་ལས་འདས་པར་འགྱུར་རོ་ཞེས་བྱ་བའི་སྐྱོན་དུ་འགྱུར་བའི་ཕྱིར་གཞན་གྱི་དོན་གྱི་ཐབས་སུ་འབྱུང་བ་དང༌། མི་གནས་པའི་མྱ་ངན་ལས་འདས་པ་སྒྲུབ་བར་བྱེད་པ་ཆོས་དང་དམ་ཚིག་ཀྱང་སྒོམ་པར་བྱེད་པ་ཡིན་ནོ། །བྱང་ཆུབ་སེམས་དཔའ་ཤེས་རབ་ཀྱིས་འཆིང་བ་ཡིན་ཏེ། ཡོངས་སུ་མྱ་ངན་ལས་འདས་པའི་མཐར་ཐུག་པ་ཉིད་ཀྱི་ཕྱིར་རོ། །འཁོར་བར་ཡོངས་སུ་མཐར་ཐུག་པ་ཉིད་ཀྱི་ཕྱིར་ཐབས་ཀྱིས་ཀྱང་འཆིང་བ་ཡིན་ཏེ། བྱང་ཆུབ་སེམས་དཔའ་ནི་འཁོར་བ་ལ་གནས་པར་མི་བྱ། མྱ་ངན་ལས་འདས་པ་ལ་ཡང་གནས་པར་མི་བྱའོ་ཞེས་བྱ་བས་ཤེས་རབ་དང་ཐབས་ཟུང་དུ་འཇུག་པར་བྱེད་དེ། ལམ་བསྒོམ་པར་བྱའོ་ཞེས་བྱ་བ་དང༌། འཕགས་པ་འཇིག་རྟེན་ལས་འདས་པའི་རྡོ་རྗེ་ལས་ཀྱང༌། ཀྱེ་འཕགས་པ་དག་སྟོང་པ་ཉིད་གཅིག་པུའི་ཏིང་ངེ་འཛིན་གྱིས་ནི་ཉན་ཐོས་དང་རང་སངས་རྒྱས་ཀྱི་ཡོངས་སུ་མྱ་ངན་ལས་འདའ་བསྒྲུབ་པར་བྱེད་ཅིང་སྡུག་བསྔལ་མི་ཟད་པ་སྐྱེད་པར་བྱེད་ལ། སངས་རྒྱས་འབྱུང་བ་རྙེད་པར་དཀའ་བར་བྱེད་པ་ཡིན་ཏེ། དེ་བས་ན་ཤེས་རབ་དང་ཐབས་ཟུང་དུ་འཇུག་པར་བྱེད་པའི་ལམ་ཡིན་ནོ་ཞེས་བྱ་བའི་ཆོས་དེ་བཞིན་གཤེགས་པས་གསུངས་པ་ཡིན་ནོ། །དེ་མ་རྟོགས་པའི་སེམས་ཅན་དེ་རྣམས་ཀྱི་ཆོས་བསྟན་པ་འདི་ཐོས་ནས་མི་བཟད་པའི་སྡུག་བསྔལ་དེ་ལས་གྲོལ་བར་འགྱུར་བ་ཡིན་ནོ། །དམ་ཚིག་འདིས་ནི་མཆོག་བསྒྲུབ་ཅིང། །ཞེས་བྱ་བ་ལ་གཟུགས་བརྙན་དང་མཚུངས་པའི་དཔལ་རྡོ་རྗེ་སེམས་དཔའ་བསྒོམ་པའི་མཚན་ཉིད་ཅན་གྱི་དམ་ཚིག་འདི་སྟེ་འདས་མ་ཐག་ཏུ་བཤད་པས། མཆོག་ནི་ཕུལ་དུ་བྱུང་བ་དཔལ་རྡོ་རྗེ་སེམས་དཔའ་སྒྲུབ་པ་ནི་རང་ལ་རག་ལས་པར་བྱ་བའོ། །ནིའི་སྒྲ་ནི་ངེས་པར་གཟུང་བ་ལ་སྟེ་བསྒྲུབ་པར་བྱ་བ་ཁོ་ན་ཡིན་ནོ་ཞེས་བྱའོ། །ཅི་བདེ་བ་ནི་སྡུག་བསྔལ་དང་ཡིད་མི་བདེ་བ་ཐམས་ཅད་ཀྱི་སྐབས་མེད་པ་ཞེས་བྱའོ། །དེ་ལྟར་ཅིར་འགྱུར་ཞེ་ན། ཉེས་པར་སྤྱད་པ་དང༌། སྡིག་པ་ཞེས་བྱ་བ་ལ་སོགས་པ་ལ་མི་རིགས་པར་ཡོངས་སུ་སྤྱོད་པ་ནི་ཉེས་པར་སྤྱོད་
བ་སྟེ་ངན་པར་སྤྱོད་པའོ། །ཇི་སྐད་དུ་ཤཱ་རིའི་བུ་ཁྱོད་ཀྱིས་ཉེས་པར་སྤྱད་དོ་ཞེས་བྱ་བ་གསུངས་སོ། །ལུས་ལ་སོགས་པའི་ཉེས་པར་སྤྱོད་པ་ནི་སྡིག་པ་སྟེ་དེ་དག་ཐམས་ཅད་ཀྱིས་གནོད་པར་མི་འགྱུར་རོ། །ཕྱག་རྒྱ་ཆེན་པོ་བསྒོམས་པའི་སྟོབས་ཀྱིས་སྡིག་མ་ཐམས་ཅད་ལས་གྲོལ་བར་འགྱུར་རོ་ཞེས་བྱ་བའི་དོན་ཏོ། །བྱས་པ་དང་བྱེད་དུ་བཅུག་པ་དང༌། རྗེས་སུ་ཡི་རང་བའི་སྡིག་པ་ཐམས་ཅད་གྲོལ་བར་འགྱུར་བ་གཅིག་པུར་མ་ཟད་ཀྱི། འདོད་པ་ཆེན་པོ་གྲུབ་པར་འགྱུར། །ཞེས་བྱ་བ་ལ་བྱང་ཆུབ་ཆེན་པོའི་མཚན་ཉིད་ཅན་གྱི་དཔལ་རྡོ་རྗེ་སེམས་དཔའ་ནི་འདོད་པ་ཆེན་པོ་སྟེ། དེ་ཡང་རྣལ་འབྱོར་པས་འགྲུབ་པར་འགྱུར་རོ། །ཇི་ལྟ་བུ་ཞེ་ན། ཀུན་བདག་དམ་ཚིག་དབང་ཕྱུག་ཅེས་བྱ་བ་ནི་ཀུན་བདག་ཉིད་ཀྱང་ཡིན་ལ་དམ་ཚིག་དབང་ཕྱུག་ཀྱང་ཡིན་པས་ཀུན་བདག་དམ་ཚིག་དབང་ཕྱུག་སྟེ། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་དང་ཕྱག་རྒྱ་ཐམས་ཅད་བསྐྱེད་པའི་རྒྱུའི་དབང་ཕྱུག་གཙོ་བོ་ཞེས་བྱ་བའི་དོན་ཏོ། །ཐམས་ཅད་རྡོ་རྗེ་འཛིན་རྒྱལ་པོ། །ཞེས་བྱ་བ་ནི་བཤད་ཟིན་ཏོ། །ཀུན་མཆོག་དབང་ཕྱུག་དམ་པ་ཞེས་བྱ་བ་ནི་ཀུན་མཆོག་ཀྱང་ཡིན་ལ་དབང་ཕྱུག་དམ་པ་ཡང་དེ་ཉིད་ཡིན་པས་ན་ཀུན་མཆོག་དབང་ཕྱུག་དམ་པ་སྟེ། མ་ལུས་སྒྲུབ་པ་གྲུབ་འགྱུར་ཏེ། །ཞེས་བྱ་བ་ལས་ཀྱི་ཚོགས་ཀྱི་དངོས་གྲུབ་ཀྱིས་ཏེ་ལས་རྒྱའི་དངོས་གྲུབ་ཀྱིས་གྲུབ་པར་འགྱུར་རོ། །ཇི་ལྟར་ཞེ་ན། བདག་གཞན་ཐམས་ཅད་རྒྱས་བཏབ་པས། །ཞེས་བྱ་བ་ལ་འདས་མ་ཐག་ཏུ་བཤད་པའི་དམ་ཚིག་དེས་རང་གི་རྒྱུད་ལ་རྒྱས་བཏབ་པ་དང༌། དེ་བཞིན་གཤེགས་པ་ལ་སོགས་པ་གཞན་རྣམས་ལ་རྒྱས་བཏབ་པས་ལས་ཀྱི་ཚོགས་ཀྱི་དངོས་གྲུབ་རྣམས་ཀྱིས་བཅོམ་ལྡན་འདས་སྒྲུབ་པ་པོ་ལ་མྱུར་དུ་འགྲུབ་པར་འགྱུར་རོ། །ཡང་ན་བསྒྲུབ་བྱ་ཀུན་ལ་ཡང༌། །ཞེས་བྱ་བ་ལ་ཡིད་བཞིན་གྱི་ནོར་བུ་དང༌། བུམ་པ་བཟང་པོ་དང༌། རལ་གྲི་དང་ཏྲི་ཤཱུ་ལ་དང་འཁོར་ལོ་དང་རྡོ་རྗེ་དང༌། པདྨ་དང༌། བསྒྲུབ་བྱ་ལ་སོགས་པའི་བསྒྲུབ་བྱ་རྣམས་ལ་ཇི་ལྟ་བ་བཞིན་དུ་བཤད་པའི་བཅོམ་ལྡན་འདས་བསམས་ན་བསྒྲུབ་བྱ་དེ་རྣམས་འགྲུབ་
པར་འགྱུར་རོ། །རྒྱུ་གང་གིས་དེ་རྣམས་འགྲུབ་པར་འགྱུར་ཞེ་ན། དོན་ཡོད་ཅེས་བྱ་བ་ལ་སོགས་པ་ལ་གང་གི་ཕྱིར་དེ་དོན་ཡོད་ཅིང་མཆོག་སྟེ་ཐོག་མ་དང་ཐ་མ་མེད་པའོ། །གྲུབ་པ་ཞེས་བྱ་བ་ནི་མངོན་པར་འདོད་པའི་འབྲས་བུ་རྫོགས་བར་མཛད་པའི་ཕྱིར་རྫོགས་པའོ། །རྣལ་འབྱོར་ཐམས་ཅད་རྗེས་སུ་སྒྲུབ། །ཅེས་བྱ་བ་ནི་རྣལ་འབྱོར་དང་རྗེས་སུ་རྣལ་འབྱོར་དང༌། ཤིན་ཏུ་རྣལ་འབྱོར་རྫོགས་པར་མཛད་པའོ། །དཔལ་ལྡན་ཞེས་བྱ་བ་ནི་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ཅན་གྱི་དཔལ་རྡོ་རྗེ་སེམས་དཔའི་ཕུན་སུམ་ཚོགས་པ་དང་ལྡན་པའོ། །སྡུག་བསྔལ་ཀུན་འཕྲོག་ཅེས་བྱ་བ་ནི་འཆིང་བ་ལ་སོགས་པའི་སྡུག་བསྔལ་ཐམས་ཅད་འཕྲོག་པར་མཛད་པའོ། །དམ་ཚིག་འདའ་བར་དཀའ་བའོ། །ཞེས་བྱ་བ་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་དམ་ཚིག་དངོས་གྲུབ་ཐམས་ཅད་རྫོགས་པར་བྱེད་པ་ལ་འདའ་བར་དཀའ་བ་ཡིན་ནོ། །རྡོ་རྗེ་ལ་སོགས་ཐོབ་པ་འཛིན། །ཞེས་བྱ་བ་ཇི་ལྟ་བ་བཞིན་དུ་བཤད་པའི་དམ་ཚིག་གསུམ་གྱི་རྡོ་རྗེ་ལ་སོགས་པ་ཐོབ་པ་གང་ཡིན་པ་དེ་ཉིད་འཛིན་པ་སྟེ། རྡོ་རྗེ་ལ་སོགས་པ་ཐོབ་པ་འཛིན་པ་དེ་ཉིད་ལས་ཕྱག་རྒྱ་ཆེན་པོའི་དངོས་གྲུབ་ཐམས་ཅད་ལས་བྱུང་བའི་བདེ་བ་རྣམས་རྡོ་རྗེ་སློབ་མས་དཀྱིལ་འཁོར་དུ་ཉམས་སུ་མྱོང་བ་ཡིན་ནོ། །ནིའི་སྒྲས་ནི་ངེས་པར་གཟུང་བ་ལ་བརྟན་པ་ལ་སོགས་པ་ཐོབ་ཅིང་གཟུང་བ་ཁོ་ན་ཞེས་བྱ་བའོ། །ཀུན་དུ་འབེབས་པ་ཞེས་བྱ་བ་ནི་ཀུན་ནས་འབེབས་པ་ནི་ཀུན་ནས་འབེབས་པ་སྟེ། རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་རྣམས་རྡོ་རྗེ་སློབ་མའི་རྒྱུད་ལ་འཇུག་པའོ། །ཀུན་ནས་འབེབས་པའི་རྒྱུད་དེ་ཉིད་ལས་དངོས་གྲུབ་ཐམས་ཅད་ཀྱི་བདེ་བ་རྣམས་དཀྱིལ་འཁོར་དུ་ཉམས་སུ་མྱོང་བ་ནི་མྱོང་བ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་རྡོ་རྗེ་སློབ་མ་རྣམས་ཀུན་དུ་འབེབས་པས་དངོས་གྲུབ་ཐམས་ཅད་ཀྱི་བདེ་བ་རྣམས་དཀྱིལ་འཁོར་དུ་ཉམས་སུ་མྱོང་བ་དེའི་ཕྱིར། གཟེངས་བསྟོད་པས་དེ་བཞིན་གཤེགས་པ་ཐམས་ཅད་ལ་ལུང་བསྟན་པར་བྱའོ་ཞེས་བྱ་བ་དང་སྦྱར་རོ། །ཀྱང་གི་སྒྲ་ནི་བསྡུ་བ་སྟེ། དམ་ཚིག་གསུམ་སྦྱིན་པར་བྱ་བ་དང༌།
གཟེངས་བསྟོད་པ་དང་ལུང་བསྟན་པར་བྱའོ། །དེ་ཡང་ཇི་ལྟར་བྱ་ཞེ་ན། ཀུན་ཞེས་བྱ་བ་ལ་སོགས་པ་ལ་རིན་ཆེན་འབྱུང་ལྡན་གྱི་ང་རྒྱལ་གྱིས་དེ་བཞིན་གཤེགས་པ་རིན་ཆེན་འབྱུང་ལྡན་གྱི་ལས་ཀྱི་ཕྱག་རྒྱ་བཅིངས་ལ། རྡོ་རྗེ་མིང་གི་མིང་དབང་བསྐུར་བ་རྣམས་ཀྱིས་དེ་བཞིན་གཤེགས་པ་རྣམས་ལ་ལུང་བསྟན་པར་བྱའོ། །ནིའི་སྒྲ་ནི་ངེས་པར་བཟུང་བ་ལ་བྱ་སྟེ། རྡོ་རྗེ་སློབ་མ་དེ་རྣམས་དེ་བཞིན་གཤེགས་པ་ཁོ་ནར་ལུང་བསྟན་པར་བྱ་སྟེ། དེ་བཞིན་གཤེགས་པ་མ་ཡིན་པར་ནི་མ་ཡིན་ནོ་ཞེས་བྱ་བའོ། །དེ་ལ་འདི་ཞེས་བྱ་བ་ལ་སོགས་པ་ནི་གོ་སླའོ། །མཆོག་ཏུ་གསང་བའི་ཆོ་ག་ནི་དཀྱིལ་འཁོར་ཏེ། དེར་སློབ་མ་གང་ལ་སློབ་དཔོན་གྱིས་གཟེངས་བསྟོད་པས་ལུང་བསྟན་པར་བྱས་ན། དེ་ལ་རྡོ་རྗེ་སེམས་དཔའ་ལ་སོགས་པ་རྣམས་ཀྱིས་ལུང་སྟོན་པར་མཛད་དོ་ཞེས་བྱ་བ་དང་སྦྱར་རོ། །རྡོ་རྗེ་སེམས་དཔའ་ཐོག་མ་གང་ལ་ཡོད་པ་དེ་ནི་རྡོ་རྗེ་སེམས་དཔའ་ལ་སོགས་པའོ། །དེ་དག་ཀྱང་གང་ཡིན་ཞེ་ན། དེ་བཞིན་གཤེགས་པ་ཐམས་ཅད་ཅེས་བྱ་བ་ནི་རྣམ་པར་སྣང་མཛད་ལ་སོགས་པའོ། །རྡོ་རྗེ་འཆང་དང་བཅས་པ་ཞེས་བྱ་བ་ལ་སོགས་པ་ལ་དེ་དང་ལྷན་ཅིག་པས་ན་རྡོ་རྗེ་འཆང་དང་བཅས་པའོ། །བྱང་ཆུབ་སེམས་དཔའ་ཆེན་པོའི་འཁོར་གྱི་དཀྱིལ་འཁོར་དང་བཅས་པའི་ཞེས་བྱ་བ་ནི་འཕགས་པ་བྱམས་པ་དང་ལྷན་ཅིག་ཏུ་བཞུགས་པས་ན་བྱང་ཆུབ་སེམས་དཔའི་འཁོར་གྱི་དཀྱིལ་འཁོར་དང་བཅས་པའོ། །དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་ནི་རིགས་ལྔའི་དཀྱིལ་འཁོར་རྣམས་ཏེ། དེ་དག་གི་སློབ་དཔོན་རྣམས་ནི་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་གི་སློབ་དཔོན་རྣམས་སོ། །རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་དེ་རྣམས་ཇི་ལྟ་བ་བཞིན་དུ་བཤད་པ། རིགས་ཐམས་ཅད་ཀྱི་དཀྱིལ་འཁོར་བྱེད་པའོ་ཞེས་བྱ་བའི་དོན་ཏོ། །མཉམ་པར་ཞེས་བྱ་བ་ནི་དུས་གཅིག་ཏུའོ། །དེ་ཉིད་བཤད་པར་བྱ་བའི་ཕྱིར་མགྲིན་གཅིག་ཏུ་ཞེས་བྱ་བ་གསུངས་པ་ཡིན་ནོ། །ཇི་སྐད་བཤད་པའི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱིས་
གཅིག་པ་ཉིད་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དོ་ཞེས་བྱ་བ་དད་པར་བྱ་བའོ་ཞེས་བྱ་བ་དང་སྦྱར་རོ། །གང་གི་སྟོབས་ཀྱིས་ཤེ་ན་ཇི་ལྟ་བ་བཞིན་དུ་བཤད་པའི་གཟེངས་བསྟོད་པ་དང་ཕྱག་རྒྱ་ཆེན་པོའི་སྟོབས་ཀྱིས་སོ། །མཆོག་ཏུ་གསང་བ་དམ་པའི་དངོས་གྲུབ་ཀྱིས་བྱིན་གྱིས་བརླབས་སོ་ཞེས་བྱ་བ་ལ། མཆོག་ཏུ་གསང་བ་ནི་ཇི་ལྟ་བ་བཞིན་དུ་བཤད་པའི་དཀྱིལ་འཁོར་འདི་ལྟ་སྟེ། དེར་དཔལ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་སློབ་མའི་རྒྱུད་ལ་རྫོགས་པ་གང་ཡིན་པ་དེ་ནི་དངོས་གྲུབ་དམ་པ་སྟེ། གཟེངས་བསྟོད་པའི་ཕྱག་རྒྱ་ཆེན་པོ་དེ་ཉིད་ཀྱིས་འདི་བྱིན་གྱིས་བརླབས་པ་ཡིན་ཏེ། བྱིན་གྱིས་བརླབས་པ་དེའི་སྟོབས་ཀྱིས་ཞེས་བྱ་བ་དང་སྦྱར་རོ། །ཨོཾ་འདི་ནི་ངས་ཁྱོད་ལུང་བསྟན་ཡིན། །ཞེས་བྱ་བ་ལ་སོགས་པའི་སྔགས་འདི་ཉིད་ཀྱིས་དད་པར་བྱ་བ་ནི་རྡོ་རྗེ་སློབ་མ་ཐམས་ཅད་ཀྱིས་རྟོགས་པར་བྱ་བ་ཡིན་ནོ། །དེ་ནས་ཞེས་བྱ་བ་ལ་འདས་མ་ཐག་ཏུ་གང་དག་དཔལ་རྡོ་རྗེ་སེམས་དཔའ་ལ་སོགས་པའི་ཆོ་གས་ཇི་ལྟ་བ་བཞིན་དུ་བཞུགས་པ་དེ་རྣམས་ལ། དེ་བཞིན་གཤེགས་པ་ཐམས་ཅད་འདུས་པ་སྟེ་དེ་འཇུག་པ་ལ་སོགས་པའི་ཐོག་མར་གང་ཡོད་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་འདུས་པ་ལ་སོགས་པ་སྟེ། དེ་ཡང་དབུགས་དབྱུང་བ་ནི་གདུལ་བྱ་རྣམས་ལ་གང་གིས་དགའ་བ་སྐྱེད་པར་བྱེད་པས་ན་དབུགས་དབྱུང་བ་སྟེ། དེ་ཉིད་སློབ་མ་རྣམས་ལ་སློབ་དཔོན་གྱིས་གསལ་བར་བསྟན་པར་བྱའོ་ཞེས་བྱའོ། །རང་གི་དམ་ཚིག་ནི་ཡི་གེ་ཧཱུཾ་སྟེ། དེས་རྗེས་སུ་ཆགས་པ་ནི་དཀྱིལ་འཁོར་ལ་མངོན་དུ་ཕྱོགས་པར་བྱས་པའོ། །དེ་ཉིད་ཀྱི་དཀྱིལ་འཁོར་གྱི་ཕྱོགས་བཞིར་དགུག་པ་ནི་དྲངས་པའོ། །དེ་ཉིད་ཀྱི་སྟོབས་ཀྱིས་གསང་བའི་དཀྱིལ་འཁོར་འདིར་དེ་རྣམས་སྒོ་བཞི་ནས་འཇུག་པའོ། །དབང་དུ་བྱས་པ་ནི་དེ་ཉིད་ཀྱི་སྟོབས་ཀྱིས་སློབ་དཔོན་གྱིས་རང་ལ་རག་ལས་པར་བྱས་པའོ། །སྒྲུབ་པ་ནི་དམ་ཚིག་གི་ཕྱག་རྒྱ་ལ་སོགས་པས་སྒྲུབ་པའོ། །རྗེས་སུ་སྒྲུབ་པ་ནི་གླུ་དང་རོལ་མོའི་ཆོ་གས་སོ། །རྡོ་རྗེ་དབྱིངས་ཐམས་ཅད་ནི་དཔལ་རྡོ་རྗེ་སེམས་དཔའ་ལ་སོགས་པའི་
སྐུ་གསུང་ཐུགས་ཀྱི་རྡོ་རྗེ་རྣམས་སོ། །དེ་རྣམས་ཀྱི་བསྟན་པ་ཉིད་ནི་མི་ཕྱེད་པས་ཏེ། ཕྱེད་པར་བྱ་བ་དང་ཕྱེད་པར་བྱེད་པའི་ངོ་བོ་ཉིད་མེད་པ་དེས་དཔལ་གསང་བའི་དཀྱིལ་འཁོར་འདིར་བསྟན་པར་གྱུར་པ་སྟེ། དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་རང་བཞིན་རྣམས་ཀྱིས་འདིར་མི་ཕྱེད་པར་འགྱུར་བ་ཡིན་ནོ། །ཆོས་ཀྱི་དབྱིངས་ཐམས་ཅད་ཅེས་བྱ་བ་ལ། ཆོས་ཀྱི་དབྱིངས་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ཆོས་ཀྱི་དབྱིངས་ཐམས་ཅད་དེ་དེ་ཉིད་དོ། །དེ་ཀུན་དུ་སྟེ་ཕྱོགས་བཅུར་ཀུན་དུ་འགྲོ་ཞིང་བཞུགས་པའོ། །དེའི་དངོས་པོ་ནི་ཀུན་དུ་བཞུགས་པ་ཉིད་དེ། དེ་གསང་བའི་དཀྱིལ་འཁོར་འདིར་མཐའ་ཡས་པའི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་ཀུན་ནས་བཞུགས་པ་ནི་ཁྱབ་པ་ཡིན་ནོ། །འདིས་ནི་འདི་ལྟར་འཆད་པར་འགྱུར་ཏེ། ཆོས་བདག་མེད་པའི་ཡེ་ཤེས་དང༌། དེའི་འབྲས་བུ་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་རང་བཞིན་ཅན་གང་ཡིན་པ་དེས་ནི་ཐམས་ཅད་དུ་ཁྱབ་པ་ཡིན་པས་མཐའ་ཡས་པའི་རྒྱུད་ལས་བྱུང་བའི་ཕྱིར་མཐའ་ཡས་པར་གྱུར་པ་ཡིན་ནོ་ཞེས་བྱ་བའོ། །དེ་ལྟར་འཇིག་རྟེན་ལས་འདས་པ་ལ་རབ་ཏུ་གྲགས་པའི་ཆོས་ཀྱི་དབྱིངས་ཀུན་དུ་བཞུགས་པ་ཉིད་ཀྱིས་དེ་བཞིན་གཤེགས་པ་རྣམས་ཀྱི་ཚད་མེད་པ་ཉིད་བསྟན་ནས། ད་ནི་འཇིག་རྟེན་ལས་རབ་ཏུ་གྲགས་པའི་མཐའ་ཡས་པ་ཉིད་བསྟན་པར་བྱ་བའི་ཕྱིར་ནམ་མཁའི་ཁམས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། ནམ་མཁའི་ཁམས་ཀྱང་ཡིན་ལ་ཐམས་ཅད་ཀྱང་དེ་ཡིན་པས་ན་ནམ་མཁའི་ཁམས་ཐམས་ཅད་དེ། འཇིག་རྟེན་ལ་རབ་ཏུ་གྲགས་པའོ། །དེའི་རྒྱ་ཆེན་པོ་ཉིད་གང་ཡིན་པ་དེ་ནི་ནམ་མཁའི་ཁམས་ཐམས་ཅད་ཀྱི་རྒྱ་ཆེན་པོ་ཉིད་དེ་ཕྱོགས་བཅུ་ནམ་མཁའི་མཐའ་ཡས་པའི་དངོས་པོ་ཉིད་དོ། །རྒྱ་ཆེན་པོ་དེ་ཉིད་ཀྱིས་གསང་བའི་དཀྱིལ་འཁོར་འདིར་དཔག་ཏུ་མེད་པའི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་བཞུགས་ཤིང༌། རབ་ཏུ་བཞུགས་པ་ནི་ཤིན་ཏུ་བཞུགས་པའོ། །དེ་རྣམས་ཀྱིས་ཁྱེད་ཅག་ལ་དབུགས་དབྱུང་བ་མཛད་པ་ཡིན་ཏེ། དེ་ལ་དང་
པར་བྱའོ་ཞེས་བྱ་བ་དང་སྦྱར་རོ། །ཅི་མཛད་ནས་ཤེ་ན་དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་དེ་བཞིན་གཤེགས་པ་ཐམས་ཅད་ཀྱི་རང་གི་དམ་ཚིག་ནི་བཤད་ཟིན་ཏོ། །དེ་ལྟར་སློབ་དཔོན་ནི་དཀྱིལ་འཁོར་གྱི་སློབ་དཔོན་དེ་ལ་རག་ལས་པ་ནི་དེའི་དབང་དུ་གྱུར་པ་སྟེ། དེ་བཞིན་གཤེགས་པ་ཐམས་ཅད་ཉིད་གདུལ་བྱ་རྣམས་ལ་མངོན་དུ་མཛད་ནས། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་སློབ་དཔོན་འདི་ཉིད་དེ་བཞིན་གཤེགས་པ་ཡིན་ནོ་ཞེས་བྱིན་གྱིས་བརླབས་པ་ནི་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཅན་གྱི་དཀྱིལ་འཁོར་བསྟན་པར་མཛད་ནས། དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་གྱི་སློབ་དཔོན་ནི་རང་གི་དམ་ཚིག་གི་སློབ་དཔོན་དང་མགྲིན་གཅིག་ཏུ་འདའ་བར་དཀའ་བའི་སློབ་དཔོན་གྱི་ཞལ་གྱིས་ཁྱེད་རྣམས་ལ་དབུགས་དབྱུང་བར་མཛད་པ་ཡིན་ཏེ། ཁྱེད་ཀྱིས་དད་པར་བྱ་བ་ནི་ཐེ་ཚོམ་མི་བྱའོ། །མཐོང་བ་ཞེས་བྱ་བ་ནི་རྡོ་རྗེ་ལྕགས་ཀྱུ་མ་ནས་རྡོ་རྗེ་སེམས་དཔའི་བར་དུ་ཁ་དོག་དང་དབྱིབས་ཀྱི་བདག་ཉིད་ཅན་གྱི་རྟེན་དང་བརྟེན་པའི་དཀྱིལ་འཁོར་བལྟའོ། །རབ་ཏུ་ཞུགས་པ་ཞེས་བྱ་བ་ནི་ཕྱི་དང་གསང་བའི་འཇུག་པས་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་དུ་ཞུགས་པར་བྱའོ། །དེ་གང་ཡིན་ཞེ་ན། གསང་བ་དམ་པའི་དཀྱིལ་འཁོར་རོ། །སྲོག་གཅོད་པ་ལ་སོགས་པའི་སྡིག་པ་ཐམས་ཅད་དང་བྲལ་བས་ཁྱེད་ལེགས་པར་གནས་ཏེ། དུས་འདི་ནས་བཟུང་ནས་བྱང་ཆུབ་སྙིང་པོ་ཐོབ་ཀྱི་བར་དུ་སྡུག་བསྔལ་གྱི་རྒྱུ་ཐམས་ཅད་དང་བྲལ་ཞིང་བདེ་བ་དང་ཡིད་བདེ་བ་ཐམས་ཅད་དང་རྗེས་སུ་མཐུན་པའི་ལྷ་དང་མིའི་སྲིད་པ་ལ་ཡིད་དགའ་བས་གནས་པས་ལེགས་པར་གནས་པའོ། །དེ་ཅིའི་ཕྱིར་ཞེ་ན། ཁྱེད་རྣམས་སླར་ཡང་འཆི་བ་མེད། །ཅེས་བྱ་བ་ལ་སོགས་པ་ལ་དཀྱིལ་འཁོར་མཐོང་བ་དང་དེ་ཉིད་དུ་ཞུགས་པའི་ཕྱིར་ཁྱེད་རྣམས་ལ་སླར་ཡང་ཤི་བ་ཡོད་པ་མ་ཡིན་ནོ། །བདེ་ཆེན་ཐེག་པ་འདིར་ཞུགས་པས། །ཞེས་བྱ་བ་ནི་ཐར་པ་ཆེན་པོའི་རང་བཞིན་གྱི་རྡོ་རྗེ་ཐེག་པ་ཆེན་པོ་འདི་ལ་ཞུགས་པའི་ཕྱིར་རོ། །དེ་ལྟར་ཡིན་པ་དེའི་ཕྱིར་མི་ཚུགས་པ་ནི་ཐེག་པ་གཞན་ལ་
འདོད་པའི་བསམ་པས་མི་མཐུན་པའི་ཕྱིར་རོ། །མི་སོད་པ་ཞེས་བྱ་བ་ནི་དེ་ཉིད་ཀྱིས་བདེ་བ་ཆེན་པོའི་ཐེག་པ་འདི་ལས་ལྟུང་བར་མི་འགྱུར་བའོ། །རོལ་བར་གྱིས་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བསྒྲུབ་པར་གྱིས་ཤིག་པའོ། །ཅིས་ཀྱང་འཇིགས་པ་མེད་པ་ནི་སྲིད་པའི་སྡུག་བསྔལ་ཉིད་མེད་པའི་ཕྱིར་རོ། །དེ་ཅིའི་ཕྱིར་ཞེ་ན། སྲིད་པའི་སྡུག་བསྔལ་ལྡོག་པ་ནི། །ཞེས་བྱ་བ་ལ་སོགས་པ་ལ་མཐོང་བ་དང་ཞུགས་པ་འདིས་འདོད་པའི་སྲིད་པ་ལ་སོགས་པའི་སྡུག་བསྔལ་མཐའ་མེད་པ་འདི་ཁྱེད་རྣམས་ལ་ལྡོག་པ་མེད་པའི་ཕྱིར་རོ། །སྲིད་པ་ཤིན་ཏུ་གྲུབ་པའི་ཕྱིར། །ཞེས་བྱ་བ་ནི་མི་གནས་པའི་མྱ་ངན་ལས་འདས་པ་གྲུབ་པའི་ཕྱིར་རོ། །སྟོན་པ་མཆོག་ཏུ་གྱུར་པ་ཡིན། །ཞེས་བྱ་བ་ནི་དེ་བཞིན་གཤེགས་པ་རྣམས་ཀྱི་ཕུལ་དུ་བྱུང་བ་བྱེད་པ་ཡིན་ནོ། །ཤིན་ཏུ་ནི་ཕྱི་མའི་མཐར་གནས་པའོ།། དེ་གང་ཡིན་ཞེ་ན། སྲིད་པ་གྲུབ་པ་ཞེས་བྱ་བ་ནི་མི་གནས་པའི་མྱ་ངན་ལས་འདས་པའི་རང་བཞིན་ཏེ་ ལོངས་སྤྱོད་རྫོགས་པ 
་ནི་སྲིད་པའི་དངོས་གྲུབ་རྣམས་སོ། །འདི་ལྟར་འཆད་པར་འགྱུར་ཏེ་གསང་བའི་དཀྱིལ་འཁོར་མཐོང་པ་དང་ཞུགས་པ་དག་གིས་སྡིག་པ་ཐམས་ཅད་དང་བྲལ་ཞིང་མི་གནས་པའི་མྱ་ངན་ལས་འདས་པ་ཐོབ་པའི་སྣོད་དུ་གྱུར་པ་འཁོར་བའི་སྡུག་བསྔལ་ཐམས་ཅད་དང་བྲལ་ཞིང་ཕྱིར་མི་ལྡོག་པར་ཁྱེད་རྣམས་རྫོགས་པ་ཡིན་ནོ་ཞེས་བྱ་བའོ། །འདི་ཞེས་བྱ་བ་ནི་འཆད་པར་འགྱུར་བའི་དམ་ཚིག་དང་སྔོམ་པ་ཐུགས་ལ་གནས་པ་གསུངས་པ་ཡིན་ནོ། །ཁྱེད་ཀྱིས་རྟག་ཏུ་དེ་སྐད་ཅིག་མ་རེ་རེ་ལ་བསྲུང་བ་ནི་ཡོངས་སུ་བསྐྱང་བའོ། །གྲུབ་པ་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་སྩོལ་བས་ནི་རྫོགས་པའོ། །དམ་ཚིག་དང་སྔོམ་པ་དེ་ཡང་སངས་རྒྱས་ཀུན་ཏེ་ཇི་ལྟ་བ་བཞིན་དུ་བཤད་པ་རྣམས་ཀྱིས་མཐུན་པ་ནི་དུས་གཅིག་ཏུ་མགྲིན་གཅིག་གིས་གསུངས་ཏེ་བསྟན་པ་ཡིན་ནོ། །བཀའ་ནི་བཀའ་སྩལ་པའོ། །མཆོག་ཏུ་རྟག་པ་ནི་ངེས་པའི་དོན་ཡིན་གྱི་དྲང་བའི་དོན་མ་ཡིན་ནོ། །འདི་ལྟར་འཆད་པར་འགྱུར་ཏེ། བྱང་ཆུབ་སེམས་ནི་གཏང་མི་བྱ། །ཞེས་བྱ་བ་ལ་སོགས་པ་གང་ཞིག་དེ་
བཞིན་གཤེགས་པ་ཐམས་ཅད་ཀྱིས་མཆོག་ཏུ་རྟག་པའི་བཀའ་གསུངས་པ་དེ་ཉིད་དམ་ཚིག་དང་སྔོམ་པ་ཁྱེད་ལ་རྟག་ཏུ་གྲུབ་པས་བསྲུང་བར་བྱ་བ་ཡིན་ནོ། །བྱང་ཆུབ་ནི་རང་གི་སེམས་ཇི་ལྟ་བ་བཞིན་དུ་ཡོངས་སུ་ཤེས་པའོ། །དེ་ཉིད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་སྟེ། དེའི་རང་བཞིན་ཅན་དང་དེ་ཐོབ་པའི་རྒྱུ་བྱང་ཆུབ་ཀྱི་སེམས་ཏེ་སྨོན་པ་བྱང་ཆུབ་ཀྱི་སེམས་དང༌། འཇུག་པ་བྱང་ཆུབ་ཀྱི་སེམས་སོ། །དེ་སྤང་བར་མི་བྱའོ། །ཕྱག་རྒྱ་རྡོ་རྗེ་གང་ཡིན་པའོ། །ཞེས་བྱ་བ་ནི་གང་ཞིག་སྟོང་པ་ཉིད་ཀྱི་རྡོ་རྗེ་རྩེ་ལྔ་པའི་ཕྱག་རྒྱས་ཡོངས་སུ་བརྟགས་ནས་ཟླ་བའི་དཀྱིལ་འཁོར་གྱི་སྟེང་དུ་ཏིཥྛ་བཛྲ་ཞེས་བྱ་བས་བསྐྱེད་པར་བྱ་བ་ཡིན་ནོ། །གང་ཞིག་བསྐྱེད་པ་ཙམ་གྱིས་ནི། །ཞེས་བྱ་བ་ལ་ཟླ་བའི་དཀྱིལ་འཁོར་གྱི་སྟེང་དུ་ཡོངས་སུ་བརྟགས་པ་ཙམ་གྱིས་ཕྱིར་མི་ལྡོག་པའི་བག་ཆགས་སྐྱེད་པས་དུས་གསུམ་ན་བཞུགས་པའི་དེ་བཞིན་གཤེགས་པ་ཐམས་ཅད་དང་མཉམ་པ་ཉིད་ཀྱིས་ད་ལྟར་བྱུང་བའི་སངས་རྒྱས་ཉིད་དུ་རྣལ་འབྱོར་པས་ཤེས་པར་བྱའོ། །འདི་ལ་ཐེ་ཚོམ་མི་བྱའོ་ཞེས་བྱ་བའི་ཐ་ཚིག་གོ །དེ་ལྟར་གྱུར་པའི་བྱང་ཆུབ་ཀྱི་སེམས་དེ་རྣལ་འབྱོར་པས་སྤང་པར་མི་བྱའོ། །དམ་པ་རྣམས་ཀྱི་ཆོས་ནི་དམ་པའི་ཆོས་ཏེ་ཐེག་པ་གསུམ་དུ་བསྟན་པའི་ཆོས་སོ། །དེ་སྨད་པར་མི་བྱ་བ་ནི་འདི་ཆོས་མ་ཡིན་ཏེ། འདིས་ཅི་ཞིག་བྱ་ཞེས་བརྗོད་པར་མི་བྱའོ། །ནམ་ཡང་སྤང་བར་མི་བྱའོ། །ཞེས་བྱ་བ་ནི་བདག་ལ་འདི་དགོས་པ་མེད་པས་འདི་བདག་གིས་སྤང་བར་བྱ་ཞེས་པའི་ངག་གམ་ཡིད་ཀྱི་རྣམ་གྲངས་གང་གིས་ཀྱང་ཡོངས་སུ་སྤང་ཕར་མི་བྱའོ། །ཐེག་པ་གསུམ་གྱི་ཆོས་ཡོངས་སུ་སྤང་བར་མི་བྱའོ་ཞེས་བྱ་བ་ཇི་ལྟར་ཤེས་པར་འགྱུར་ཞེ་ན། ཉན་ཐོས་ཀྱི་ཐེག་པ་ལས་གསུངས་པའམ། རང་སངས་རྒྱས་ཀྱི་ཐེག་པ་ལས་གསུངས་པའམ། ཐེག་པ་ཆེན་པོ་ལས་གསུངས་པའི་དམ་པའི་ཆོས་སུན་འབྱིན་ན་དགེ་བའི་རྩ་བ་ཐམས་ཅད་འཇིག་པར་བྱེད་ཅིང༌། ཕམ་པར་གྱུར་ཅིང་མནར་མེད་པ་ལ་སོགས་པ་ཡིན་ནོ་ཞེས་འཕགས་པ་ནམ་མཁའི་སྙིང་པོའི་མདོ་ལས་གསུངས་པའི་ཕྱིར་རོ། །མི་ཤེས་པ་ཞེས་བྱ་བ་ནི་ཐོས་པའི་ཤེས་པས་
མ་ངེས་པའོ། །རྨོངས་པ་ནི་ཐོས་པ་དང་བསམ་པ་དང་སྒོམ་པའི་རང་བཞིན་གྱི་ཤེས་རབ་མེད་པས་རྟེན་ཅིང་འབྲེལ་བར་འབྱུང་བའི་བདག་ཉིད་ཐམས་ཅད་ཡོངས་སུ་མ་ཤེས་པས་ཐེག་པ་གསུམ་གྱི་ཆོས་ལ་ཇི་ལྟར་བཤད་པའི་སྒྲུབ་པ་པོ་དེས་སྨད་པར་མི་བྱའོ། །རང་ཞེས་བྱ་བ་ལ་ཕྱིའི་དངོས་པོ་ཡང་རང་གི་སྒྲས་བརྗོད་པས་དེ་རྣམ་པར་སྤྱད་པའི་ཕྱིར་བདག་ཉིད་ཅེས་བྱ་བ་གསུངས་ཏེ། ཕུང་པོ་ལྔའི་རང་བཞིན་གྱི་བདག་ཉིད་ལུས་དང་སྲོག་ལ་ལྟོས་པ་མེད་པ་ཉིད་ཀྱིས་བྱ་བའི་རྒྱུད་ལས་གསུངས་པའི་མི་ཟད་པའི་དཀའ་ཐུབ་བཅོ་བརྒྱད་པོ་དང༌། རླུང་གི་ཡལ་ག་དང་ལྕེ་བའི་ཟས་དང༌། རྣལ་འབྱོར་གྱི་གཉེན་པོར་གྱུར་པའི་བཟའ་བ་ལ་སོགས་པའི་དཀའ་ཐུབ་རྣམས་ཀྱིས་ཡོངས་སུ་སྤངས་ནས་གདུང་བར་མི་བྱའོ། །འོ་ན་བདག་ཉིད་ཇི་ལྟར་གཟུང་བར་བྱ་ཞེ་ན། ཅི་བདེ་བར་བྱ་ཞེས་བྱ་བ་ལ་སོགས་པ་ལ། དཀའ་ཐུབ་དང་དཀའ་བ་སྤྱོད་པ་མེད་པ་ནི་ཅི་བདེ་བ་སྟེ། དེས་བཟུང་བའི་རྣལ་འབྱོར་པ་དང་རྗེས་སུ་མཐུན་པའི་མལ་དང་གནས་དང༌། བཟའ་བ་དང་བཏུང་བ་ལ་སོགས་པ་རྣམས་ཀྱིས་བདེ་བར་བཟུང་སྟེ་ཡང་དག་པར་འཕེལ་བར་བྱའོ། །འདི་ནི་མ་བྱོན་རྫོགས་སངས་རྒྱས། །ཞེས་བྱ་བ་ལ་འདི་ནི་བཅོམ་ལྡན་འདས་རྣམས་ཀྱིས་བདག་ཉིད་དེ་ཇི་ལྟ་བ་བཞིན་དུ་བཤད་པའི་རིགས་པས་ཕྱིར་མི་ལྡོག་པ་ངེས་པའི་ཕུང་པོ་ལ་རྣམ་པར་གནས་པའི་ཕྱིར་མ་བྱོན་པའི་ཡང་དག་པར་རྫོགས་པའི་སངས་རྒྱས་ཡིན་པས་ཡང་དག་པར་འཕེལ་བར་བྱའོ། །བྱང་ཆུབ་ཀྱི་སེམས་སྟོན་པར་བྱེད་པའི་དང་པོའི་རྡོ་རྗེའི་རང་བཞིན་ཅན་གྱི་ཕྱག་མཚན་ནི་རྡོ་རྗེའོ། །དང་པོའི་རྡོ་རྗེས་མཚན་པའི་དྲིལ་བུ་ཤེས་རབ་སྟོན་པར་བྱེད་པའི་སྒྲ་རྗེས་སུ་འགྲོ་བའི་ཕྱག་མཚན་ནི་དྲིལ་བུའོ། །དམ་ཚིག་དང༌། ཆོས་དང༌། ལས་དང་ཕྱག་རྒྱ་ཆེན་པོ་ནི་ཕྱག་རྒྱ་སྟེ། ཕྱག་རྒྱལ་སོགས་པ་གསུམ་པོ་འདི་དག་སྤང་བར་མི་བྱའོ། །བསམས་པ་ཙམ་གྱིས་འདི་དག་ཐམས་ཅད་འགྲུབ་པ་ཡིན་ཏེ། ཕྱག་རྒྱ་ལ་སོགས་པ་འདི་དག་གིས་ཅི་ཞིག་བྱ་ཞེས་བྱ་བ་འདི་ཡོངས་སུ་སྤངས་ན་ཕམ་པར་འགྱུར་རོ་ཞེས་གསུངས་པའི་ཕྱིར་རོ། །གང་གིས་རྣལ་
འབྱོར་པ་དཀྱིལ་འཁོར་དུ་འཇུག་པར་བྱེད་པའི་སློབ་དཔོན་དེ་ལ་ཁྱོད་ཚུལ་ཁྲིམས་འཆལ་བ་དང་བརྩོན་འགྲུས་ཞན་པ་དང་རྨོངས་པ་ཡིན་ནོ་ཞེས་སྨོད་པར་མི་བྱའོ། །དེ་ཅིའི་ཕྱིར་ཞེ་ན། དེ་ནི་སངས་རྒྱས་ཀུན་དང་མཉམ། །ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་ཡོན་ཏན་སྐྱེད་པའི་རྒྱུ་ཉིད་ཀྱི་ཕྱིར་སྒྲུབ་པ་པོས་ཇི་ལྟར་དེ་བཞིན་གཤེགས་པ་ཐམས་ཅད་མཉེས་པར་བྱ་བ་དེ་བཞིན་དུ་རང་གི་དམ་ཚིག་གི་སློབ་དཔོན་ཡང་མཉེས་པར་བྱ་བ་ཡིན་ནོ། །དེ་ཅིའི་ཕྱིར་ཞེ་ན། སངས་རྒྱས་ཉིད་ཀྱང་བཅོམ་ལྡན་ལ། །ཚེ་འདི་ཉིད་ལ་སྟེར་བར་བྱེད། །ཅེས་བྱ་བས་དེ་ནི་སངས་རྒྱས་ཐམས་ཅད་དང་མཉམ་པ་ཡིན་ནོ། །སློབ་དཔོན་ལ་ནི་གང་སྨོད་པ། །ཞེས་བྱ་བ་ལ་སོགས་པ་ལ། གང་གིས་སློབ་དཔོན་ལ་བརྙས་པར་བྱེད་པ། །དེས་ནི་རྟག་ཏུ་སྡུག་བསྔལ་འཐོབ། །ཅེས་བྱ་བ་འདིས་ཀྱང་སློབ་དཔོན་ལ་བརྙས་པ་གང་ཡིན་པ་དེ་ལ་ཡང་མི་བྱའོ། །བག་མེད་པས་གལ་ཏེ་བྱས་ན་དེའི་ཚེ་སློབ་དཔོན་ལ་ཞལ་ཟས་བསྟབས་ལ་གང་དང་གང་ཡིད་དུ་འོང་བ་དེ་དང་དེ་སློབ་དཔོན་ལ་དབུལ་བར་བྱའོ། །དེ་ལྟར་ན་རིམས་ལ་སོགས་པའི་སྡུག་བསྔལ་རྣམས་དེ་ལ་སླར་ཡང་འབྱུང་བར་མི་འགྱུར་རོ། །རྟག་ཏུ་རང་གི་དམ་ཚིག་བསྲུང༌། །ཞེས་བྱ་བ་ནི་རང་གི་ལྷག་པའི་ལྷའི་སྐུ་གསུང་ཐུགས་ཀྱི་རྡོ་རྗེ་ནི་རང་གི་དམ་ཚིག་སྟེ། དེ་རྟག་ཏུ་རྣལ་འབྱོར་པས་རང་ལ་རག་ལས་པར་བྱ་བ་ཡིན་ནོ། །རྟག་ཏུ་དེ་བཞིན་གཤེགས་པ་མཆོད། །ཅེས་བྱ་བ་ནི་རྡོ་རྗེ་མཚོན་ཆ་མ་ལ་སོགས་པ་དང༌། ཕྱིའི་མེ་ཏོག་ལ་སོགས་པ་རྣམས་ཀྱིས་ནམ་མཁའ་ཁྱབ་པར་བྱས་པ་ལ་ཚོགས་ཡོངས་སུ་རྫོགས་པར་བྱ་བའི་ཕྱིར་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་ཡང་དག་པར་མཆོད་པར་བྱའོ། །ཚོགས་ལས་དངོས་གྲུབ་མཆོག་ཏུ་འགྱུར། །ཞེས་འོག་ནས་གསུངས་པའི་ཕྱིར་རོ། །མཉམ་པ་ཞེས་བྱ་བ་ནི་མཚུངས་པའོ། །གང་དང་མཉམ་ཞེ་ན། དམ་ཚིག་ལྷ་ཞེས་བྱ་བ་ནི་དམ་ཚིག་ཀྱང་ཡིན་ལ་ལྷ་ཡང་ཡིན་པས་ན་དམ་ཚིག་ལྷ་སྟེ་རིགས་ལྔའི་གསང་བའི་ཕྱག་རྒྱའི་རང་བཞིན་ནོ། །དམ་ཚིག་གི་ལྷ་དེ་དག་དང་མཉམ་པའོ། །དི་རིང་
སྐྱེ་བ་ནི་དཀྱིལ་འཁོར་མཐོང་བ་དང་དེར་འཇུག་པའི་དུས་ནས་བརྩམས་ཏེ་རང་བྱུང་སངས་རྒྱས་བཅོམ་ལྡན་འདས་རྣམས་ཀྱི་དམ་ཚིག་གི་ལྷ་གང་ཡིན་པ་དེ་དག་དང་ལྷན་ཅིག་ཏུ་ཁྱེད་རྣམས་མཉམ་པར་འགྱུར་བ་ཡིན་ནོ། །དི་རིང་ཁྱེད་རྣམས་ལ་གསང་བའི་དབང་བསྐུར་བས་དབང་བསྐུར་བ་འཛིན་པ་ཡིན་ནོ། །གང་གིས་ཤེ་ན། སངས་རྒྱས་རྡོ་རྗེ་འཛིན་བཅས་པས། །ཞེས་བྱ་བ་ནི་རྡོ་རྗེ་སེམས་དཔའ་དང༌། རྡོ་རྗེ་འཆང་ཆེན་པོ་དང་བཅས་པ་སངས་རྒྱས་ཐམས་ཅད་ཀྱིས་སོ། །འདོད་པ་དང༌། གཟུགས་དང༌། གཟུགས་མེད་པའི་ཁམས་ཀྱི་རང་བཞིན་གྱི་ཁམས་གསུམ་པའི་རྒྱལ་སྲིད་ཆེན་པོ་ཐོབ་པའི་ཕྱིར་རྒྱལ་པོའི་བདག་པོ་སྟེ། འདོད་པའི་ཁམས་ཀྱི་དབང་ཕྱུག་གི་རྒྱལ་པོའི་བདག་པོ་རྣམས་སོ། །བརྟན་པ་ནི་རྟག་པས་ཏེ་དཀྱིལ་འཁོར་འདིར་ཞུགས་ནས་ཕྱིར་མི་ལྡོག་པའི་ས་བོན་བསྐྱེད་པས་ཡང་དག་པར་རྫོགས་པའི་བྱང་ཆུབ་མངོན་དུ་བྱེད་པའི་ཕྱིར་རོ། །དེ་བས་ན། དེ་ནི་བདུད་ལས་རྣམ་རྒྱལ་ཏེ། །ཞེས་བྱ་སྟེ་བདུད་ལས་རྣམ་པར་རྒྱལ་ཞིང་གསང་བའི་དཀྱིལ་འཁོར་གྱི་གྲོང་ཁྱེར་མཆོག་ཏུ་རབ་ཏུ་ཞུགས་པས་ཁྱེད་རྣམས་ཀྱིས་དི་རིང་ཁོ་ན་སངས་རྒྱས་ཉིད་ཐོབ་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་རང་གི་དཔལ་དམ་ཚིག་གི་གསང་བའི་དཀྱིལ་འཁོར་ནི་འདི་ཉིད་དོ། །དེ་ལ་སློབ་དཔོན་སློབ་མའི་མཆོག་དག་ནི་སློབ་དཔོན་དང་སློབ་མའི་མཆོག་སྟེ། དེ་དག་གི་དབུགས་དབྱུང་བ་ནི་འདི་ཡིན་ཏེ། ཨོཾ་སརྦ་ཡོ་ག་ཙིཏྟཾ་ཨུ་པཱ་ད་ཡཱ་མི་ཞེས་བྱ་བ་སྨོན་པ་བྱང་ཆུབ་ཀྱི་སེམས་སྐྱེད་པའི་རྗེས་ཐོགས་ཉིད་བྱང་ཆུབ་ཀྱི་སེམས་དང་ལྷན་ཅིག་ཏུ་བསྐྱེད་པ་ཡིན་ནོ། །གང་དང་ལྷན་ཅིག་ཏུ་ཞེ་ན། བྱང་ཆུབ་ཀྱི་སེམས་བསྐྱེད་པའི་མཚན་ཉིད་ཅན་གྱི་ཕྱིར་མི་ལྡོག་པའི་ཕྱག་རྒྱ་དང་ལྷན་ཅིག་ཏུ་སངས་རྒྱས་ཉིད་རྟོགས་པར་བྱ་བ་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏོ། །རྟོགས་པར་བྱ་བ་ནི་ཤེས་པར་བྱ་བའོ། །དེ་ཇི་ལྟ་བུ་ཡིན་ཞེ་ན། མཁས་ཤིང་མཆོག་ཏུ་རྟག་པའོ། །ཞེས་བྱ་བ་ནི་བུདྡྷ་ནི་རྟོགས་པ་ལ་བྱ་སྟེ་ཐབས་དང་ཤེས་རབ་ཀྱི་རང་བཞིན་ཅན་གྱི་བྱང་ཆུབ་ཆེན་པོ་རྟོགས་པ་ཉིད་ཀྱི་ཕྱིར་མཁས་
པའོ། །མཆོག་ཏུ་རྟག་པ་ཞེས་བྱ་བ་ནི་ཐོག་མ་དང་ཐ་མ་མེད་པའོ། །དེའི་རྒྱུ་གང་ཡིན་ཞེ་ན་ཞེས་བྱ་བ་ལ་རྒྱུ་གང་གིས་བདག་ཅག་གི་བདག་ཉིད་ཐམས་ཅད་བྱང་ཆུབ་ཏུ་སེམས་བསྐྱེད་པ་ཉིད་ཀྱིས་མཆོག་ཏུ་རྟག་པའི་སངས་རྒྱས་ཉིད་དུ་རྟོགས་པར་བགྱི་ཞེས་བྱ་བའོ། །དེའི་ཕྱིར་ཁྱེད་རྣམས་ཀྱི་ཕུང་པོ་ལྔའི་རང་བཞིན་ཅན་གྱི་བདག་ཉིད་ཐམས་ཅད། ཨོཾ་སརྦ་ཡོ་ག་ཙིཏྟྭཾ་ཨུ་པཱ་ད་ཡཱ་མི་ཞེས་བྱ་བ་འདིས་དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་སེམས་བསྐྱེད་པ་ཙམ་གྱི་མཐུས་བསམ་པ་དང་བསྒོམ་པ་དང་བྲལ་བར་བྱ་བའི་ཕྱིར་མི་ལྡོག་པར་འགྱུར་རོ།། དེའི་ཕྱིར་ངེས་པའི་ཕུང་པོ་ལ་གནས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པ་ཉིད་ཀྱིས་མ་བྱོན་པའི་སངས་རྒྱས་དུས་གསུམ་གྱི་དེ་བཞིན་གཤེགས་པ་དང་མཉམ་པ་ཉིད་ཀྱིས་ཁྱེད་རྣམས་ཀྱིས་བདག་ཉིད་ཐམས་ཅད་འདི་ལྟར་བྱུང་བའི་དེ་བཞིན་གཤེགས་པ་ཉིད་དུ་རྟོགས་པར་བྱ་བ་ཡིན་ནོ། །ཇི་ལྟར་བྱང་ཆུབ་ཆེན་པོའི་སེམས་བསྐྱེད་པའི་མཐུས་དུས་གསུམ་གྱི་དེ་བཞིན་གཤེགས་པ་དང་མཉམ་པ་ཉིད་ཀྱིས་ད་ལྟར་བྱུང་བའི་དེ་བཞིན་གཤེགས་པ་ཉིད་དུ་རྗེས་སུ་རྟོགས་པར་བྱ་བ་དེ་བཞིན་དུ། ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའི་བདག་ཉིད་བསྒྲུབས་པས་ད་ལྟར་བྱུང་བ་ཉིད་དུ་དེ་བཞིན་གཤེགས་པ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་སངས་རྒྱས་ཉིད་དུ་རང་གི་བདག་ཉིད་ཐམས་ཅད་ཁྱེད་རྣམས་ཀྱིས་རྟོགས་པར་བྱ་བ་ཡིན་ནོ།། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོ་ཡང་ཐེག་པ་ཆེན་པོ་ནི་བཤད་ཟིན་ཏོ། །དེ་ཉིད་དམ་ཚིག་ཆེན་པོ་སྟེ་དེ་ལས་བྱུང་བའི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་ལྷ་ཚོགས་རྣལ་འབྱོར་ཆེན་པོའི་དཀྱིལ་འཁོར་གྱི་རྣལ་འབྱོར་གྱི་རང་བཞིན་གྱི་ཚུལ་སོ་སོར་རྟོག་པའི་ངོ་བོས་ཡང་དག་པར་མཆོད་ལ། རང་གི་བདག་ཉིད་ཐམས་ཅད་བདེ་བར་གཟུང་ཞིང་འཕེལ་བར་བྱ་སྟེ། བར་མ་ཆོད་པར་ཤིན་ཏུ་རྣལ་འབྱོར་བ་བསྒོམས་པའི་སྟོབས་ཀྱིས་རྒྱུན་གོང་ནས་གོང་དུ་རང་གི་རྒྱུད་ལ་བྱ་བ་ཡིན་ནོ། །
རང་གི་དམ་ཚིག་གི་སྦྱོར་བ་གང་གིས་ཁྱེད་རྣམས་ལ་སྐུ་གསུང་ཐུགས་ཀྱི་རྡོ་རྗེའི་རང་བཞིན་ཅན་དཔལ་རང་གི་དམ་ཚིག་བླ་ན་མེད་པའི་དངོས་གྲུབ་འགྲུབ་པར་འགྱུར་ཏེ། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ལས་གསུངས་པའི་ལྷ་མོ་བཞི་ཕྲེང་གི་དབུས་ན་བཞུགས་པའི་སྐུ་གསུང་ཐུགས་ཀྱི་རྡོ་རྗེ་རྫོགས་པའོ། །དེ་ཇི་ལྟ་བུ་ཡིན་ཞེ་ན། མཆོག་ཏུ་རྟག་པ་ཞེས་བྱ་བ་ལ་ཐོག་མ་དང་ཐ་མ་མེད་པའི་འདའ་བར་དཀའ་བའི་དམ་ཚིག་གང་ལ་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་རྡོ་རྗེའི་ཕྱག་རྒྱ་བསྒོམ་པའི་རྣལ་འབྱོར་གྱི་རང་བཞིན་ཅན་གྱི་དམ་ཚིག་གང་ཡིན་པ་དེ་ཉིད་འདའ་བར་དཀའ་བ་ཡིན་ནོ། །དེ་མངོན་དུ་བྱས་ན་ངེས་པ་ཉིད་དུ་དེ་བཞིན་གཤེགས་པ་ཐམས་ཅད་ཀྱི་དཔལ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་རྡོ་རྗེ་རྫོགས་པའི་ངོ་བོས་སྒྲུབ་པ་པོའི་རྒྱུད་ལ་མངོན་སུམ་དུ་འགྱུར་བ་ཡིན་ཏེ། འཁོར་བའི་ཡང་དག་པ་མ་ཡིན་པའི་ཀུན་དུ་རྟོག་པའི་ངོ་བོ་ནི་མ་ཡིན་ནོ། །དེའི་ཕྱིར་ན་དམ་ཚིག་འདི་འདའ་བར་དཀའ་བ་ཞེས་བྱ་བའོ། །དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་དཀྱིལ་འཁོར་མཐོང་བ་དང་དེར་ཞུགས་པ་དང༌། བྱང་ཆུབ་ཀྱི་སེམས་བསྐྱེད་པ་དང་རང་གི་ལྷའི་རྣལ་འབྱོར་བསྒོམས་པ་རྣམས་ཀྱིས་ངེས་པ་ཁོ་ནར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྟོགས་པར་འགྱུར་རོ། །དེའི་ཕྱིར་ད་ལྟར་གྱི་ཞེས་བྱ་བ་གསུངས་སོ། །ཅི་ཞིག་བྱ་ཞེ་ན། ཡིད་ནི་རབ་དང་རྡོ་རྗེ་ཞེས་བྱ་བ་ལ་མ་དད་པའི་དྲི་མ་དང་བྲལ་བའི་སེམས་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་རྡོ་རྗེའི་རང་བཞིན་ཅན་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའི་དངོས་གྲུབ་རྫོགས་པར་བྱེད་པའི་རང་གི་ཡིད་རྣམ་པར་རྟོག་པ་ཐམས་ཅད་ཀྱིས་མི་ཕྱེད་པར་གྱིས་ཤིག་པའོ། །རང་གི་དམ་ཚིག་ནི་ལྷ་མོ་ཐམས་ཅད་ཀྱི་ཚོགས་དང་བཅས་པས་རྡོ་རྗེ་སེམས་དཔའོ། །མི་ཟད་བདེ་གསོལ་ཞེས་བྱ་བ་ནི་ཐོག་མ་དང་ཐ་མ་མེད་པའི་བདེ་བ་གསོལ་བའོ། །བསྟེན་པ་ནི་སྒོམས་ཤིག་པའོ། །འགྲོ་བའི་བདེ་བ་ཆུང་བ་ནི་
སེམས་ཅན་གྱི་ཁམས་ལ་བདེ་བ་ཆུང་བའོ། །དེང་ནི་དེ་ལྟ་ཁོ་ནར་སངས་རྒྱས་ཐམས་ཅད་མཚུངས་པས་ཏེ་སངས་རྒྱས་ཐམས་ཅད་དང་འདྲ་བའོ། །སངས་རྒྱས་ཐམས་ཅད་དང་མཚུངས་པ་ཡང་དེ་ཡིན་ལ་རྟག་པ་ཡང་དེ་ཡིན་པས་སངས་རྒྱས་ཐམས་ཅད་དང་མཚུངས་པར་རྟག་པས་ཏེ། དེ་དག་གི་དངོས་པོ་ནི་རྟག་པ་ཉིད་དོ། །དེ་ཁྱེད་རྣམས་ཀྱིས་ཐོབ་པ་ཡིན་ནོ། །དེ་ནས་ཞེས་བྱ་བ་ལ་སོགས་པ་ལ་རོ་ནི་ཕྱིའི་རོ་དང་སྒེག་པ་ལ་སོགས་པའི་ཉམས་རྣམས་སོ། །བཟའ་བ་ནི་བཟའ་བ་དང་བཏུང་བ་ལ་སོགས་པའོ། །སྤྱོད་པ་ནི་རྡོ་རྗེ་གར་ལ་སོགས་པའི་རང་བཞིན་ཅན་གྱི་འདུག་སྟངས་དང་ཡིད་ལས་བྱུང་བ་རྣམས་སོ། །གླུ་ནི་ཡི་གེ་ཧཱུཾ་གི་གླུ་ལ་སོགས་པའི་གླུ་སྟི། རྡོ་རྗེ་དང་དྲིལ་བུ་ལ་སོགས་པ་དང་བཅས་པའོ། །རོལ་མོའི་མཆོད་པ་ནི་རོལ་མོའི་ཆ་བྱད་བཞིའི་མཆོད་པ་རྡོ་རྗེ་དང་དྲིལ་བུ་མ་གཏོགས་པ་རྣམས་སོ། །སོགས་པའི་སྒྲས་ནི་ཕྱག་རྒྱའི་མཆོད་པ་སྣ་ཚོགས་པ་གཟུང་བར་བྱའོ། །རོ་དང་བཟའ་བ་དང་སྤྱོད་པ་དང་གླུ་དང༌། རོལ་མོའི་མཆོད་པ་ལ་སོགས་པ་ནི་རོ་དང་བཟའ་བ་དང་སྤྱོད་པ་དང་གླུ་དང་རོལ་མོའི་མཆོད་པ་ལ་སོགས་པ་དེ་རྣམས་ཀྱིས་མགོན་པོ་སྟེ་དཔལ་རྡོ་རྗེ་སེམས་དཔའ་ཡང་དག་པར་མཆོད་ལ། བཅོམ་ལྡན་འདས་འཁོར་དང་བཅས་པ་ལ་དེ་རྣམས་ཕུལ་ནས་རྡོ་རྗེ་སློབ་དཔོན་ཆེན་པོ་ནི། རྡོ་རྗེ་སློབ་དཔོན་གྱིས་རྡོ་རྗེ་སེམས་དཔའི་ང་རྒྱལ་ལ་གནས་པའི་རང་གི་བདག་ཉིད་དང་གཞན་ཏེ་སློབ་མ་རྣམས་ཀྱང་ཡང་དག་པར་མཆོད་པར་བྱའོ། །མྱོས་བྱེད་ཅེས་བྱ་བ་ལ་སོགས་པ་ནི་གོ་སླའོ། །ཅི་བཞིན་རྗེས་འགྲོ་བཟླས་པ་བཟླ། །ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་བཟླས་པའི་དོན་བསྒོམ་པའོ། །རྒྱུ་གང་གིས་རོ་དང་བཟའ་བ་ལ་སོགས་པས་མཆོད་ཅིང་བཟླས་པ་བྱ་བ་ཡིན་ཞེ་ན། རང་གསང་ཆོ་གས་བླངས་པ་ཡི། །ཞེས་བྱ་བ་ལ་སོགས་པ་ལ་རང་གི་གསང་བའི་ཆོ་གས་བླངས་པའི་གླུ་ལ་སོགས་པ་དང༌། ཇི་སྲིད་འདོད་པའི་ལོངས་སྤྱོད་རྣམས་ཀྱིས་མཆོད་པ་བྱས་ནས་རབ་ཏུ་འགྲུབ་པར་འགྱུར་བའི་ཕྱིར་རོ། །ད་ནི་རང་གི་གསང་བའི་ཆོ་གའི་གླུ་བསྟན་པ་ཡིན་ཏེ། ཧཱུཾ་ཞེས་
བྱ་བ་ནི་དཔལ་རྡོ་རྗེ་སེམས་དཔའི་རིགས་ཀྱི་རྣལ་འབྱོར་པ་རྣམས་ཀྱིའོ། །ཨ་ཞེས་བྱ་བ་ནི་དེ་བཞིན་གཤེགས་པའི་རིགས་ཀྱི་རྣལ་འབྱོར་པ་རྣམས་ཀྱིའོ། །ཧི་ཞེས་བྱ་བ་ནི་རྡོ་རྗེའི་རིགས་ཀྱི་རྣལ་འབྱོར་པ་རྣམས་ཀྱིའོ། །ཨོཾ་ཞེས་བྱ་བ་ནི་པདྨའི་རིགས་ཀྱི་རྣལ་འབྱོར་པ་རྣམས་ཀྱིའོ། །ཧ་ཞེས་བྱ་བ་ནི་ནོར་བུའི་རིགས་ཀྱི་རྣལ་འབྱོར་པ་རྣམས་ཀྱི་སྟེ་དེ་དག་གིས་དེ་ལྟ་བུའི་གླུ་བྱ་བ་ཡིན་ནོ། །རྣལ་འབྱོར་གང་ལ་ལ་བར་ཏ་དང༌། ཝེ་ཤ་ཁི་ལ་ལ་མཁས་པའི་སློབ་མའི་ཚོགས་སམ། བུད་མེད་ཀྱི་ཚོགས་ཡོད་ན། དེ་གཡས་པའི་རོལ་མོས་འགྲུབ་པར་འགྱུར་རོ། །ཅི་བྱས་ནས་འགྲུབ་པར་འགྱུར་ཞེ་ན། རྡོ་རྗེ་དྲིལ་བུ་མཉམ་སོགས་ཞེས་བྱ་བ་ལ་མཉམ་པ་ནི་དུས་གཅིག་སྟེ། རྡོ་རྗེ་དྲིལ་བུ་ལ་སོགས་པ་དང་བཅས་པས་རྣམ་པར་དབེན་པའི་ཁང་བུ་སུམ་བརྩེགས་སུ་བྷར་ཏིའི་མཚན་ཉིད་དག་པས་རྣམ་པར་དབེན་པར་དག་པའི་པི་ཝང་ལ་སོགས་པའི་རང་བཞིན་ཅན་གྱི་རོལ་མོ་བརྡུང་བར་བྱ་སྟེ། བྱེད་པར་གྱུར་པ་དེ་རྣམས་ཀྱིས་ཡི་གེ་ཧཱུཾ་གི་གླུ་ལ་སོགས་པའི་རང་བཞིན་ཅན་གྱི་རོལ་མོ་བརྡུང་བར་བྱ་སྟེ། བྱེད་པར་གྱུར་པ་དེ་རྣམས་ཀྱིས་ཡི་གེ་ཧཱུཾ་གི་གླུ་ལ་སོགས་པའི་རང་གི་གསང་བའི་ཆོ་གའི་གླུ་ལེན་པར་བྱེད་ཅིང་གཡས་པའི་རོལ་མོས་རྣལ་འབྱོར་པ་གྲུབ་པར་འགྱུར་རོ། །དེ་ཡང་རང་གི་གསང་བའི་ཆོ་གའི་གླུ་རང་གི་དམ་ཚིག་གྲུབ་པས་སོ། །དེ་ལྟར་གླུ་དང་རོལ་མོའི་མཆོད་པའི་རང་བཞིན་ཅན་གྱི་རྗེས་སུ་གྲུབ་པ་བསྟན་ནས། ད་ནི་རྡོ་རྗེ་གར་གྱི་རང་བཞིན་ཅན་གྱི་ཕྱག་རྒྱ་སྣ་ཚོགས་ཀྱིས་མཆོད་པའི་ངོ་བོ་སོ་སོར་རྗེས་སུ་སྒྲུབ་པ་བསྟན་པར་བྱ་བའི་ཕྱིར། རྡོ་རྗེ་གར་ཞེས་བྱ་བ་ལ་སོགས་པས་བྷ་ར་ཏ་དང༌། ཝེ་ཤ་ཁི་ལ་ལ་མཁས་པའི་སློབ་མའི་ཚོགས་དང་བཅས་པའི་རྣལ་འབྱོར་པ་གསུངས་ཏེ། བ་དན་གསུམ་མཆོག་ཚུལ་གྱིས་ནི། །སྒེག་བཅས་མཐའ་མ་ལ་སོགས་དཀྲོལ། །གློག་འགྱུ་རྩེ་མོ་བསྐོར་བ་ཡིས། །རྡོ་རྗེ་གར་ཞེས་དེ་བཤད་དོ། །ཞེས་བྱ་བ་འདི་རྡོ་རྗེ་གར་གྱི་མཚན་ཉིད་ཡིན་ནོ། །རྡོ་རྗེ་གར་གྱི་མཚན་ཉིད་འདིར་རང་གི་ལྷའི་རྣལ་འབྱོར་གྱིས་རྡོ་རྗེ་གར་རབ་ཏུ་བྱ་ཞིང་རབ་ཏུ་མཆོད་པར་བྱ་ཞེས་བྱ་བ་དང་སྦྱར་རོ། །འཛིན་པ་
དང་བཅས་གཟུང་བ་ཆེ། །ཞེས་བྱ་བ་ལ་རང་གི་ལྷའི་ང་རྒྱལ་གྱིས་གར་བྱས་ཤིང་བསམ་པ་དང༌། གར་གྱི་ཉམས་དང༌། ལྟ་བ་དང༌། སྨིན་མ་དང༌། སོ་དང༌། དགོད་པ་དང༌། མཆུ་དང་ལག་པའི་རིམ་པ་ལ་སོགས་པ་དང་ལྡན་པའོ། །འཛིན་པ་དང་བཅས་པའི་གཟུང་བ་ཆེན་པོ་གང་ལ་ཡོད་པ་དེ་ནི་འཛིན་པ་དང་བཅས་པའི་གཟུང་བ་ཆེན་པོ་སྟེ། དེས་ཡོངས་སུ་བསྐོར་ནས་རབ་ཏུ་མཆོད་པར་བྱ་བ་ཡིན་ནོ། །ཇི་ལྟར་ཞེ་ན། དཀྱིལ་འཁོར་འདྲ་བའི་གར་བྱས་ནས། །ཞེས་བྱ་བ་ལ་དཀྱིལ་འཁོར་དང་འདྲ་བའི་གར་ནི་མན་ངག་ལས་ཤེས་པར་བྱ་སྟེ། དེ་བྱས་ནས་ཡོངས་སུ་བསྐོར་ལ། དཀྱིལ་འཁོར་ལ་མངོན་དུ་ཕྱོགས་པར་འགྱུར་བར་བྱས་ནས་ལྷ་ཐམས་ཅད་ཀྱི་ཕྱག་རྒྱ་རྣམས་བཅིང་བར་བྱའོ། །དེ་ལྟར་ན་རྡོ་རྗེ་གར་གྱི་མཆོད་པས་དཀྱིལ་འཁོར་མཆོད་པར་འགྱུར་རོ། །ཚོགས་ཀྱི་དཀྱིལ་འཁོར་གྱི་སྦྱོར་བས་ཕྱག་རྒྱ་སྣ་ཚོགས་ཀྱི་མཆོད་པ་གཏམ་རྒྱུད་དང༌། ཕྱག་མཚན་དང༌། ཕྱག་རྒྱ་དག་གིས་བྱ་ཞིང༌། མཚན་ཐོག་ཐག་བསྒྲུབ་པར་བྱའོ། །ལུགས་མའམ། བརྡུངས་མ་ལ་སོགས་པའི་རང་བཞིན་ཅན་གྱི་དངོས་པོ་དང་བཅས་པའི་རང་རང་གི་ལྷའི་དཀྱིལ་འཁོར་བྲི་བར་བྱའོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བའི་ཕྱག་རྒྱ་སྣ་ཚོགས་པའི་མཆོད་པ་ཞེས་བྱ་བ་གསུངས་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་ནས་བརྩམས་ནས། ཇི་སྲིད་ལྷ་མོ་རིན་ཆེན་དྲིལ་བུ་མའི་མཐར་ཐུག་པའི་བར་གྱི་རིགས་ཐམས་ཅད་ཀྱི་ལྷ་མོ་རྣམས་ཀྱི་སྣ་ཚོགས་པའི་ངོ་བོ་ཕྱག་རྒྱ་ཆེན་པོ་ལ་སོགས་པའི་སྣ་ཚོགས་པའི་དབྱེ་བས་ཕྱེ་བར་གྱུར་པའི་ཕྱག་རྒྱའི་མཆོད་པ་ནི་ཕྱག་རྒྱ་སྣ་ཚོགས་ཀྱི་མཆོད་པའོ། །རྡོ་རྗེ་སེམས་དཔའ་ལ་སོགས་ལྷ། །ཞེས་བྱ་བ་ལ་སོགས་པས་འདི་ཉིད་རྣམ་པར་འགྲེལ་པ་ཡིན་ཏེ། རྡོ་རྗེ་སེམས་དཔའ་རིགས་ལྔའི་རང་བཞིན་ཅན་གྱི་ལྷ་རྣམས་ཀྱི་ཐོག་མ་གང་ལ་ཡོད་པ་དེ་ནི་རྡོ་རྗེ་སེམས་དཔའ་ལ་སོགས་པའི་ལྷ་རྣམས་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་ནས་བརྩམས་ཏེ། ཇི་སྲིད་ལྷ་མོ་རིན་ཆེན་དྲིལ་བུ་མའི་ཕྱག་རྒྱ་ཆེན་པོའི་བར་རོ། །དེ་རྣམས་ཀྱི་རྟོགས་
པ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་རྟོགས་པ་ཐམས་ཅད་དེ། ཕྱག་རྒྱ་ཆེན་པོ་དང༌། དམ་ཚིག་དང༌། ཆོས་དང་ལས་ཀྱི་ཕྱག་རྒྱ་རྣམས་སོ། །དེ་དག་གི་རྣམ་པར་འཕྲུལ་པ་ནི་གཟུགས་ཐམས་ཅད་སྟོན་པས་སེམས་ཅན་གྱི་དོན་མཛད་པའོ། །རྟོགས་པ་ཐམས་ཅད་རྣམ་པར་འཕྲུལ་པ་དེ་རྣམས་ཀྱིས་གར་བྱས་པ་གང་ཡིན་པ་དེ་རོལ་མོ་ཞེས་བྱ་བ་དང་སྦྱར་རོ། །བྱེད་པར་གྱུར་པ་གང་གིས་དེ་བྱ་ཞེ་ན། གཏམ་རྒྱུད་ཕྱག་མཚན་ཕྱག་རྒྱ་ཡིས། །ཞེས་བྱ་བ་ལ་དེ་ལ་གཏམ་རྒྱུད་ནི་སྔོན་གྱི་ལོ་རྒྱུས་བསྟན་པའི་རང་བཞིན་ཅན་ནོ། །དང་པོའི་རྡོ་རྗེ་ལ་སོགས་པ་རང་གི་ལྷའི་མཚོན་ཆ་ནི་ཕྱག་མཚན་ནོ། །རང་གི་ལྷའི་ཕྱག་རྒྱ་ཆེན་པོ་བཅིངས་པའི་མཐར་ཐུག་པའི་སྔོན་གྱི་ལོ་རྒྱུས་ཀྱི་ཚུལ་བསྟན་པ་ནི་ཕྱག་རྒྱའོ། །གཏམ་རྒྱུད་དེ་དང་ཕྱག་མཚན་དང༌། ཕྱག་རྒྱ་དག་གིས་རང་གི་ལྷའི་གར་གྱི་ཉམས་དང༌། བསམ་པ་དང༌། ལྟ་བ་དང༌། དགོད་པ་དང༌། མཆུ་དང༌། སོ་དང༌། སྨིན་མ་དང༌། གདོང་དང༌། དགའ་བ་ལ་སོགས་པའི་ཕྱག་རྒྱ་དང་བཅས་པའི་ཡན་ལག་རྣམ་པར་འགྱུར་བ་གང་ཡིན་པ་དེ་འདིར་རོལ་མོ་ཞེས་བྱ་བར་འདོད་པ་ཡིན་ནོ། །དེ་ཡང་སངས་རྒྱས་ཀྱི་བྱང་ཆུབ་སྒྲུབ་པར་བྱེད་པ་ཡིན་ཏེ། སོ་སོར་རྗེས་སུ་སྒྲུབ་པ་འདིས་རང་གི་དངོས་གྲུབ་བསྒྲུབ་པར་བྱའོ། །དབྱིབས་གང་གིས་ཕྱག་རྒྱ་སྣ་ཚོགས་ཀྱིས་མཆོད་པར་བྱ་ཞེན། གསེར་ཞེས་བྱ་བ་ལ་སོགས་པ་གསུངས་ཏེ། གང་དག་གི་ལྷ་གསེར་གྱི་ཁ་དོག་ཅན་ཡིན་ལ། དེ་དག་གིས་རང་གི་ལྷའི་གསེར་གྱི་གདོང་བརྙན་དུ་བྱས་ལ་རང་གི་གདོང་གཡོགས་ལ་ཕྱག་རྒྱ་སྣ་ཚོགས་ཀྱིས་མཆོད་པར་བྱ་བ་ཡིན་ནོ། །གང་དག་གིས་ཁ་དོག་དཀར་པོ་ཅན་ཡིན་ན་དེ་དག་གིས་དངུལ་གྱི་བྱ་བ་ཡིན་ཏེ། དེ་ལྟར་གཞན་དག་ལ་ཡང་ཤེས་པར་བྱའོ། །ཡང་ན་རང་གི་ལྷའི་གདོང་བརྙན་ཤིང་གི་དངོས་པོ་ལ་དཀར་པོ་ལ་སོགས་པའི་ཚོན་གྱིས་བསྒྱུར་ལ་རང་གི་གདོང་ལ་བགོས་ལ་རང་གི་ལྷའི་ཞལ་གྱི་རྣམ་པ་ཅན་དེ་དག་གི་དངོས་གྲུབ་ཀྱི་དོན་དུ་ཕྱག་རྒྱའི་གར་བྱའོ། །དཀྱིལ་འཁོར་གང་ལ་ཞེ་ན། དཀྱིལ་འཁོར་གང་དང་གང་ཞེས་བྱ་བ་ལ་རིགས་ལྔའི་ལྷ་རྣམས་ཀྱི་དཀྱིལ་
འཁོར་གང་དང་གང་ལ་བརྟེན་པ་ནི་བསྒོམ་པ་སྟེ། ཕྱག་རྒྱ་སྣ་ཚོགས་ཀྱི་མཆོད་པས་དཀྱིལ་འཁོར་དེ་དང་དེར་གཏམ་རྒྱུད་དང༌། ཕྱག་མཚན་དང་ཕྱག་རྒྱ་དག་གི་མཐར་རང་གི་ལྷའི་སྙིང་པོ་བཟླས་ཤིང་སློབ་མའི་ཚོགས་ཐམས་ཅད་ཀྱིས་མཆོད་པར་བྱ་བ་ཡིན་ནོ། །དེ་ཡང་དངོས་གྲུབ་ཀྱི་ཕྱག་རྒྱའི་གར་གྱི་དངོས་པོ་སོ་སོར་རྟོག་པའི་མཆོད་པ་འདིས་མཆོད་པར་བྱ་བ་ཡིན་ནོ། །དངོས་གྲུབ་ནི་ཀུན་མཆོག་སོ་སོར་རྟོག་པའི་རང་བཞིན་ཅན་ནོ། །ཕུན་སུམ་ཚོགས་པ་ནི་དངོས་གྲུབ་ཐམས་ཅད་བདེ་བ་ཆེན་པོའི་ངོ་བོའོ། །དགའ་བ་ནི་ཀུན་མཆོག་རྣམ་པར་རྒྱལ་བ་བསྒྲེང་བའི་རང་བཞིན་ཅན་ནོ། །བདག་པོ་ནི་ཕུན་སུམ་ཚོགས་པ་ཆེན་པོ་ཐམས་ཅད་ཀྱི་དངོས་པོ་འདིས་ཐོབ་པར་འགྱུར་རོ། །དེ་ལྟར་ན་དཔལ་རྡོ་རྗེ་སེམས་དཔའ་ལ་སོགས་པའི་སངས་རྒྱས་ཐམས་ཅད་ཀྱི་མཆོག་སྟེ། ཀུན་མཆོག་སོ་སོར་རྟོག་པ་ལ་སོགས་པ་བསྡུ་བའི་རང་བཞིན་ཅན་གྱི་རྣལ་འབྱོར་མཆོག་སྒྲུབ་པ་པོས་ཐོབ་པས་ཏེ་མངོན་དུ་བྱ་བ་ཡིན་ནོ། །དེ་ནས་ཀྱི་སྒྲ་ནི་སྐབས་སུ་བབ་པ་སྟེ། ཕྱག་རྒྱ་སྣ་ཚོགས་ཀྱི་མཆོད་པ་རྫོགས་པར་བྱ་བ་འདི་ལའོ། །རིགས་ཐམས་ཅད་ཀྱི་འདོད་པའི་ལྷ་རྣམས་ནི་དཔལ་རྡོ་རྗེ་སེམས་དཔའ་ལ་སོགས་པ་སྟེ། སོ་སོ་རང་གི་དཀྱིལ་འཁོར་དུ་ཞུགས་པའི་དེ་དག་གི་གླུའི་མཆོད་པའི་ཆོ་ག་རྒྱས་པ་མངོན་དུ་བརྗོད་པ་ནི་མངོན་པར་ཕྱོགས་པར་བླངས་ནས་དེའི་འོག་ཏུ་རྡོ་རྗེ་སློབ་དཔོན་གྱིས་མཛད་པའམ། སངས་རྒྱས་ཐམས་ཅད་དང་མཉམ་པའི་སྦྱོར་བ་ལ་སོགས་པའི་རྒྱུད་ལས་གསུངས་པའི་གླུ་དང༌། རོལ་མོའི་ཆོ་ག་བདག་ཉིད་ཀྱིས་ཇི་ལྟར་འདོད་པ་རྒྱུར་གྱུར་པ་རྣམས་ཀྱིས་དཔལ་རྡོ་རྗེ་སེམས་དཔའ་ལ་སོགས་པའི་རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་ཆེན་པོའི་མཆོད་པ་ནི་སྣ་ཚོགས་པའི་ཕྱག་རྒྱའི་མཆོད་པ་སྟེ་མཆོག་ཏུ་གྲུབ་པ་ཡིན་ནོ།། རྟོག་པ་ཐམས་ཅད་ཀྱི་དཀྱིལ་འཁོར་དུ་ཞུགས་པའི་གླུའི་མཆོད་པ་ཇི་ལྟ་བུ་ཡིན་ཕྱག་རྒྱ་སྣ་ཚོགས་ཀྱི་མཆོད་པའི་དུས་སུ་གང་མངོན་པར་རྫོགས་ནས་དེའི་འོག་ཏུ་རྡོ་རྗེ་སློབ་དཔོན་གྱིས་བརྩམས་པའམ། རྟོག་པ་གཞན་ལས་གསུངས་པ་མངོན་པར་བརྗོད་པར་བྱ་ཞེ་ན། དེ་ལ་
རེ་ཞིག་ཐོག་མ་ཁོ་ནར་ཞེས་བྱ་བ་ལ་སོགས་པ་ལ། མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་མཆོག་ཏུ་གསང་བ་སྟེ་དཀྱིལ་འཁོར་རོ། །དེ་ཉིད་དམ་ཚིག་སྟེ་དེར་འཇུག་པ་ནི་ཕྱི་དང་གསང་བའི་འཇུག་པའོ། །དེའི་དོན་དུ་རྡོ་རྗེའི་གླུའི་མཆོད་པ་འདི་ཡིན་ནོ། །འདི་ལྟར་བཤད་པར་འགྱུར་ཏེ། རང་གི་དཀྱིལ་འཁོར་དུ་འཇུག་པའི་གླུ་བརྗོད་ཅིང་འཇུག་པའི་ཕྱག་རྒྱ་བཅིངས་ལ་གླུ་དེ་ཉིད་ལེན་ཅིང་དཀྱིལ་འཁོར་དུ་འཇུག་པར་བྱའོ། །ཡང་གླུ་དེ་ཉིད་བརྗོད་ནས་དེའི་འོག་ཏུ་རྡོ་རྗེ་སློབ་དཔོན་གྱིས་བརྩམས་པའོ། །སངས་རྒྱས་ཐམས་ཅད་དང་མཉམ་པར་སྦྱོར་བ་ལ་སོགས་པའི་རྒྱུད་ལས་གསུངས་པའི་གླུ་བརྗོད་ནས་གཏམ་རྒྱུད་དང་ཕྱག་མཚན་དང་ཕྱག་དག་གིས་ཕྱག་རྒྱ་སྣ་ཚོགས་པའི་མཆོད་པ་སློབ་མའི་ཚོགས་དང་བཅས་པའི་སློབ་དཔོན་གྱི་བྱ་བ་ཡིན་ནོ། །ཐམས་ཅད་རྗེས་སུ་ཆགས་པ་ནི་དཔལ་རྡོ་རྗེ་སེམས་དཔའ་ལ་སོགས་པ་སྒོམ་པ་སྟེ། དེ་ལས་བྱུང་བའི་བདེ་བ་ནི་རྣལ་འབྱོར་གྱི་བདེ་པའོ། །དེ་གང་ཡིན་ཞེ་ན། དམ་པའི་ཐུགས་ཏེ་དེ་བཞིན་གཤེགས་པ་རྣམས་ཀྱིའོ། །རྡོ་རྗེ་སེམས་དཔའ་ལས་གཞན་པ་ཡིན་ནམ་ཞེ་ན། །རྡོ་རྗེ་སེམས་དཔའ་ཁྱོད་ཅེས་བྱ་སྟེ། གང་ཞིག་སངས་རྒྱས་བཅོམ་ལྡན་འདས་རྣམས་ཀྱི་ཐམས་ཅད་རྗེས་སུ་ཆགས་པའི་བདེ་བ་ཉིད་རྡོ་རྗེ་སེམས་དཔའ་ཁྱོད་ཡིན་གྱི་གཞན་ནི་མ་ཡིན་ནོ། །རབ་ཏུ་དགའ་བ་ཞེས་བྱ་བ་ནི་ཟག་པ་མེད་པའི་བདེ་བ་དང་ཡིད་བདེ་བའི་རང་བཞིན་ཅན་གྱི་བླ་ན་མེད་པའི་བྱང་ཆུབ་ཀྱི་ངོ་བོའོ། །དེ་བཞིན་གཤེགས་པ་ཀུན་གྱིས་ཀྱང༌། །འདའ་བ་རུ་ནི་མི་མཛད་པས། །ཞེས་བྱ་བ་འདིས་ཀྱང་དེ་ཉིད་དམ་ཚིག་ཡིན་ནོ། །བདག་གྱུར་ཅིག་ཅེས་བྱ་བ་ནི་ཐམས་ཅད་རྗེས་སུ་ཆགས་པ་དང༌། རབ་ཏུ་དགའ་བ་དང༌། བརྟན་ཞིང་མཐོ་བ་དག་ལ་གྱུར་ཅིག་ཅེས་བྱ་བ་དང་སྦྱར་རོ། །བདེ་བ་ཆེན་པོ་ཞེས་བྱ་བ་ནི་བོད་པའོ། །བརྟན་ཞིང་མཐོ་བ་ནི་མི་དམིགས་པའི་མྱ་ངན་ལས་འདས་པ་སྟེ། དེ་གསོལ་བས་ན་བརྟན་ཞིང་མཐོ་བ་གསོལ་བའོ། །སོ་སོར་རྟོག་པ་ནི་སེམས་ཅན་གྱི་དོན་མཛད་པ་སངས་རྒྱས་ཀྱི་མཆོད་པ་ལའོ། །སྒྲུབ་ཤིག་ཅེས་བྱ་བ་ནི་འདས་
མ་ཐག་ཏུ་བཤད་པའི་དངོས་གྲུབ་ཀྱིས་མྱུར་དུ་སྒྲུབས་ཤིག་པའོ། །ཕྱག་འཚལ་བ་ནི་མངོན་དུ་གྱུར་པའོ། །དེ་ལ་ཐམས་ཅད་རྗེས་སུ་ཆགས་པ་ཞེས་བྱ་བ་ནི་འདོད་ཆགས་རྡོ་རྗེ་མའི་རང་བཞིན་ཅན་གྱི་བཅོམ་ལྡན་འདས་བསྟན་ཏོ། །བདེ་བ་ཆེན་པོ་ཞེས་བྱ་བ་ལ་སོགས་པས། ཀཱི་ལི་ཀཱི་ལའི་རང་བཞིན་ཅན་བསྟན་ཏོ། །བརྟན་ཞིང་མཐོ་བ་ཞེས་བྱ་བས་རྡོ་རྗེ་དྲན་མའི་རང་བཞིན་ཅན་བསྟན་ཏོ། །སོ་སོར་རྟོག་པས་མྱུར་དུ་སྒྲུབས་ཤིག་ཅེས་བྱ་བ་དང་ཕྱག་འཚལ་བས་རྡོ་རྗེ་འདོད་པའི་དབང་ཕྱུག་མའི་རང་བཞིན་བསྟན་ཏོ། །དེ་ལྟར་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལ་འཇུག་པའི་གླུའི་མཆོད་པ་བསྟན་ནས། དེ་ནས་དེ་བཞིན་གཤེགས་པའི་རིགས། །ཞེས་བྱ་བ་ལ་སོགས་པས་དེ་བཞིན་གཤེགས་པའི་རིགས་ལ་འཇུག་པའི་གླུའི་མཆོད་པ་གསུངས་པ་ཡིན་ཏེ། རྡོ་རྗེ་སེམས་དཔའི་བསྡུས་པ་ནི་རྡོ་རྗེ་སེམས་དཔའ་བསྡུས་པ་སྟེ། བྱང་ཆུབ་ཆེན་པོའི་སེམས་བསྐྱེད་པའོ། །རྡོ་རྗེ་རིན་ཆེན་བླ་ན་མེད། །ཅེས་བྱ་བ་ནི་དེ་ལ་སྦྱིན་པའི་ཕ་རོལ་ཏུ་ཕྱིན་པ་བསྐྱེད་པར་འགྱུར་རོ་ཞེས་བྱ་བ་ལྷག་མའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་ནི་རྡོ་རྗེ་ཆོས་ཏེ། དེ་དག་གི་གླུ་བླངས་པ་ནི་ཆོས་ཐམས་ཅད་རང་བཞིན་གྱིས་དག་པའོ་ཞེས་བྱ་བ་སོ་སོར་རྟོག་པའི་ངོ་བོའོ། །རྡོ་རྗེ་ཆོས་ཀྱི་གླུ་བླངས་པ། །དེ་དག་གིས། རྡོ་རྗེ་ལས་ནི་བྱེད་པ་ཡིན། །ཞེས་བྱ་བ་ནི་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་ལས་རྫོགས་པར་མཛོད་ཅིག་ཅེས་བྱ་བ་སྒྲུབ་པ་པོ་རང་གི་ལ་བོད་པ་ཡིན་ནོ། །རྡོ་རྗེ་སེམས་དཔའ་བསྡུས་པ་ལ་སོགས་པའི་ཚིག་རྣམས་ཀྱིས་དེ་བཞིན་གཤེགས་པ་མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་མེད་དང༌། དོན་ཡོད་གྲུབ་པ་རྣམས་ལ་དེའི་རིགས་ཀྱང་བསྟན་པ་ཡིན་ནོ། །དེ་ལྟར་དེ་བཞིན་གཤེགས་པའི་རིགས་ཀྱི་གླུ་བསྟན་ནས། རྡོ་རྗེ་རིགས་ལ་འཇུག་པའི་གླུ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ་རྡོ་རྗེའི་གཞུ་ནི་གཞུའོ། །མངའ་ནི་གོ་སླའོ། །དེ་དག་གིས་ཉེ་བར་མཚོན་པའི་རྡོ་རྗེ་གཞུ་དང་མངའ་དང་ལྡན་པའི་
བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་སྟེ། རྡོ་རྗེ་འདོད་པ་མེ་ལྟར་འབར་བའི་གཟུགས་ཅན་ནོ། །དངོས་པོ་ཐམས་ཅད་ཐལ་བར་རློག་པར་མཛད་པ་དེ་ལ་ཕྱག་འཚལ་བ་ནི། ཧཱུཾ་བཛྲ་ཀརྨ་ཀ་ཤཱ་ར་ཡ་ན་མཿ། བསྒོམ་པའི་ལམ་གྱི་རང་བཞིན་རྡོ་རྗེ་འདོད་པ་མེ་ལྟར་འབར་བས་ཡུལ་དུ་བྱས་པའི་རྡོ་རྗེ་ཉི་མ་མེ་ལྟར་འབར་བའི་རང་བཞིན་ཅན་གྱི་རྡོ་རྗེ་འདོད་པ་ཆེན་པོ་མེ་ལྟར་འབར་བའི་དམ་ཚིག་གི་ཕྱག་རྒྱའི་རལ་གྲིའི་ཕྱག་གཉིས་ཀྱིས་སྐུ་དབུས་ནས་གཟུང་སྟེ་བསྟོད་པ་ནི་དཔལ་རྡོ་རྗེ་ཆགས་པ་སྟེ། དེས་ཉེ་བར་མཚོན་པའི་དམ་ཚིག་ནི་རྡོ་རྗེ་ཉི་མ་མེ་ལྟར་འབར་བ་སྟེ། དཔལ་རྡོ་རྗེ་སེམས་དཔའི་དམ་ཚིག་ཡིན་ཏེ་དེ་ལ་ཕྱག་འཚལ་བའོ། །རྡོ་རྗེ་འདོད་པ་ཆེན་པོ་མེ་ལྟར་འབར་བ་ཐལ་བར་རློག་པའི་མཚན་དང་ལྡན་པའི་ལྷ་མོ་ཆེན་མོས་བཅོམ་ལྡན་འདས་ཀྱི་རྡོ་རྗེ་ཆེན་པོས་ཁ་ཊྭཱཾ་ག་བཟུང་བ་དེས་གདུག་བ་ཅན་དང་དྲག་པོ་རྣམས་སངས་རྒྱས་ཉིད་ཐོབ་པར་བྱེད་པ་ལ་གེགས་སུ་གྱུར་པ་གང་ཡིན་པ་དང༌། དངོས་པོ་ཐམས་ཅད་ཐལ་བར་མཛད་པ་ནི་ཁ་ཊྭཱཾ་ག་དང་རྡོ་རྗེ་གློག་པ་སྟེ། དེས་ཉེ་བར་མཚོན་པའི་བཅོམ་ལྡན་འདས་ཁ་ཊྭཱཾ་ག་དང་རྡོ་རྗེ་འཇིགས་པས་ཏེ་དེ་ལ་ཕྱག་འཚལ་བའོ། །རྡོ་རྗེ་འདོད་པ་ཆེན་པོ་མེ་ལྟར་འབར་བའི་ཐལ་བར་རློག་པའི་འཆི་བ་གསོ་བར་མཛད་པའི་མིང་དང་ལྷ་མོ་གཡོན་བསྙེམས་ནས་ཕྱག་གཡས་པས་རང་གི་སྤྱི་བོར་རྡོ་རྗེ་དྲིལ་བུ་དཀྲོལ་བ་ལ་བརྩོན་པ་ནི་དཔལ་རྡོ་རྗེ་དྲིལ་བུ་བསྐྱོད་པས་ཏེ། དེས་ཉེ་བར་མཚོན་པའི་རྡོ་རྗེ་ཉི་མ་མེ་ལྟར་འབར་བ་དཔལ་རྡོ་རྗེ་དྲིལ་བུ་བསྐྱོད་པས་ཏེ། དཔལ་རྡོ་རྗེ་དྲིལ་བུ་བསྐྱོད་པ་དེ་ལ་ཕྱག་འཚལ་བའོ། །དེ་ལྟར་རྡོ་རྗེའི་རིགས་ལ་འཇུག་པའི་གླུ་བསྟན་ནས་ད་ནི་པདྨའི་རིགས་ལ་འཇུག་པའི་གླུ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་དྲག་པོའི་སྐུ་ཞེས་བྱ་བ་ནི་ཞི་བའི་གཟུགས་འཛིན་པའི་དོན་ཡོད་ཞགས་པའོ། །སྐྱེ་བོ་མ་རུངས་པའི་སྲོག་འཕྲོག་པ་ཞེས་བྱ་བ་ལ་གཞན་ལ་གནོད་པ་བྱེད་པ་ལ་བརྩོན་པའོ། །དེ་དག་གི་སྲོག་འཕྲོག་པའི་ཤིན་ཏུ་དྲག་པོའི་སྐུ་ཁ་ཅིག་ཏུ་
མཛད་པ་དེ་དབང་ཕྱུག་ཆེན་པོའི་གཟུགས་སུ་བདག་ཉིད་ཀྱི་སྐུ་མཛད་པ་ཡིན་ནོ་ཞེས་བྱ་བའི་དོན་ཏོ། །འདིས་ནི་ཞི་བའི་གཟུགས་འཛིན་པའི་དོན་ཡོད་ཞགས་པའི་རང་བཞིན་ཅན་གྱི་འཇིག་རྟེན་དབང་ཕྱུག་བསྟན་པ་ཡིན་ནོ། །ཁ་ཅིག་ཏུ་ནི་འགྲོ་བ་མཐའ་ཡས་པ་འདུལ་བར་མཛད་པའི་ཕྱིར་རོ། །ཤིན་ཏུ་རྣོ་བའི་འཁོར་ལོ་འཛིན་པའི་སྐུ་ཞེས་བྱ་བ་ལ། ཁྱབ་འཇུག་གི་གཟུགས་འཛིན་པའི་འཇིག་རྟེན་དབང་ཕྱུག་ཤིན་ཏུ་རྣོ་བའི་འཁོར་ལོ་འཛིན་པའི་སྐུ་སྟེ་ཁ་ཅིག་ཏུ་སྐུ་དེ་འཛིན་པར་མཛད་པའོ། །དེ་ཡང་ཁྱབ་འཇུག་གི་གཟུགས་ཀྱིས་འདུལ་བའི་སེམས་ཅན་གྱི་ཁམས་མཐའ་ཡས་པ་འདུལ་བར་མཛད་པའི་ཕྱིར་རོ། །འདིས་ནི་ཁྱབ་འཇུག་གི་གཟུགས་འཛིན་པའི་འཇིག་རྟེན་དབང་ཕྱུག་བསྟན་པ་ཡིན་ནོ། །ཁ་ཅིག་ཏུ་ནི་པདྨའི་གདན་གྱི་ནི་ཤིན་ཏུ་ཞི་བའི་སྐུ་སྟེ་འགྱུར་བ་མེད་པ་སྟེར་ཞེས་བྱ་བ་ལ། ཚངས་པའི་གཟུགས་འཛིན་པའི་འཇིག་རྟེན་དབང་ཕྱུག་ཞི་བའི་སྐུ་སྟེ་འགྱུར་བ་མེད་པའི་ཐར་པ་གསོལ་བའོ། །པདྨའི་གདན་ནི་ཚངས་པ་སྟེ། དེའི་གཟུགས་འགྱུར་བ་མེད་པ་སྟེར་བ་ཁ་ཅིག་ཏུ་མཛད་པ་ཡིན་ནོ། །འདིས་ནི་ཚངས་པའི་གཟུགས་འཛིན་པའི་འཇིག་རྟེན་དབང་ཕྱུག་བསྟན་ཏོ། །ཁ་ཅིག་ཏུ་ནི་ཤིན་ཏུ་འབར་བའི་འདོད་པའི་དམ་ཚིག་ཅེས་བྱ་བ་འདོད་པའི་ཁམས་ཀྱི་དབང་ཕྱུག་མའི་གཟུགས་འཛིན་པའི་འཇིག་རྟེན་དབང་ཕྱུག་ཤིན་ཏུ་འབར་བའི་དམ་ཚིག་གི་གཟུགས་ཏེ། ཁ་ཅིག་ཏུ་སྟེ་སེམས་ཅན་གྱི་ཁམས་མཐའ་ཡས་བ་འདུལ་བར་མཛད་པའི་ཕྱིར་མཛད་བ་ཡིན་ནོ། །པདྨའི་རྒྱལ་པོ་བདག་སྒྲུབས་ཤིག །ཅེས་བྱ་བ་འདིས་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་ལ་སློབ་དཔོན་གྱིས་བོས་ནས་གསོལ་བ་བཏབ་པ་ཡིན་ནོ། །དེ་ལྟར་པདྨའི་རིགས་ཀྱིས་འཇུག་པའི་གླུ་བསྟན་ནས་ད་ནི་ནོར་བུའི་རིགས་ཀྱིས་འཇུག་པའི་གླུ་བསྟན་པར་བྱ་བའི་ཕྱིར། དེ་ནས་ནོར་བུའི་རིགས་ཞེས་བྱ་བ་ལ་སོགས་པ་གསུངས་ཏེ། དབང་བསྐུར་ཐམས་ཅད་དབང་ཕྱུག་དམ་པ་ལས། །ཞེས་བྱ་བ་ལས་དབང་བསྐུར་བ་ཡང་དེ་ཉིད་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་དབང་
བསྐུར་བ་ཐམས་ཅད་དེ་འཇིག་རྟེན་དང་འཇིག་རྟེན་ལས་འདས་པའི་དབང་བསྐུར་བའི་ལྷ་མོའོ། །དེ་ཡིས་དབང་ཕྱུག་ཀྱང་ཡིན་ལ་དམ་པ་ཡང་དེ་ཉིད་ཡིན་པས་ན་དབང་ཕྱུག་དམ་པ་སྟེ། དབང་ཕྱུག་ཐམས་ཅད་ཀྱི་དབང་ཕྱུག་དམ་པ་ནི་ནམ་མཁའི་སྙིང་པོའོ།། ཁམས་གསུམ་པའི་ཆོས་ཀྱི་རྒྱལ་སྲིད་ཀྱི་དབང་བསྐུར་བ་ཐོབ་པས་ཁམས་གསུམ་པའི་བདག་པོ་ཞེས་བྱ་བའི་ཐ་ཚིག་གོ །རྒྱུ་དེའི་ཕྱིར། ཡང་དབང་སྒྲུབས་ཤིག་མི་ཟད་གཏེར་གྱི་མཆོག་ཅེས་བྱ་བ་ནི་གཏེར་གྱི་ལྷ་མོའི་གཟུགས་ཀྱིས་སོ། །མཆོག་ནི་ཕུལ་དུ་བྱུང་བའོ། །ནོར་གྱི་ཕུང་པོ་ཐམས་ཅད་མཐའ་ཡས་པ་ནི་མི་ཟད་པའོ། །ཀུན་མཆོག་རྒྱལ་མཚན་རྣམ་རྒྱལ་མཐོ་བ་ལས། །ཞེས་བྱ་བ་ལས་ཀུན་མཆོག་རྒྱལ་མཚན་ནི་ཡིད་བཞིན་ནོར་བུའི་རྒྱལ་མཚན་ནོ། །དེས་རྣམ་པར་རྒྱལ་བའི་དབུལ་བའི་སྡུག་བསྔལ་ཐམས་ཅད་རྣམ་པར་སྤང་བའོ།། དེས་ཉེ་བར་མཚན་པའི་སྐུ་མཐོ་བའི་སྐུ་གང་ལ་ཡོད་པ་དེ་ནི་ཀུན་མཆོག་རྒྱལ་མཚན་རྣམ་རྒྱལ་མཐོ་བ་སྟེ་རྒྱལ་མཚན་མཆོག་མའི་གཟུགས་འཛིན་པའི་ནམ་མཁའི་སྙིང་པོའོ། །རྒྱུ་དེ་ཉིད་ཀྱི་ཕྱིར། རྡོ་རྗེ་རིན་ཆེན་དཔལ་བདག་ལེགས་མཆོད་འགྱུར། །ཞེས་བྱ་བ་ལ་དབང་བསྐུར་བ་ལ་སོགས་པའི་ལྷ་མོའི་ཚོགས་ཀྱི་མདངས་དང་ལྡན་པ་འཕགས་པ་ནམ་མཁའི་སྙིང་པོའི་སྐུ་ནི་དཔལ་རྡོ་རྗེ་རིན་ཆེན་ཏེ། བདག་གིས་ལེགས་པར་མཆོད་པར་གྱུར་ཅིག་ཅེས་བྱ་བ་ནི་སློབ་དཔོན་གྱིས་བོད་པ་དང་བཅས་པས་དེ་ལ་གསོལ་བ་བཏབ་པ་ཡིན་ནོ། །དེ་ཡང་མཆོད་པ་ཆེན་པོའི་རང་བཞིན་གྱི་ལྷ་མོས་ལེགས་པར་མཆོད་པ་ཡིན་ཏེ། བདག་ལ་དེའི་ངོ་བོར་གྱུར་ཅིག་བའོ་ཞེས་བྱའོ། །དེ་ལྟར་རིན་པོ་ཆེའི་རིགས་ཀྱིས་འཇུག་པའི་གླུ་བསྟན་ནས། ད་ནི་མིང་པོ་གསུམ་ལ་འཇུག་པའི་གླུ་བསྟན་པར་བྱ་བའི་ཕྱིར་བྷུརྦྷུ་ཝ་སྭཿ་ཞེས་བྱ་བ་གསུངས་སོ། །སྲིང་མོ་རྣམས་ཀྱི་གླུ་བསྟན་པར་བྱ་བའི་ཕྱིར་ཧྲི་ཧཱུཾ་ཤྲཱི་བྷྱོ་ཞེས་བྱ་བ་གསུངས་སོ། །ཀླུའི་དཀྱིལ་འཁོར་གྱི་གླུ་ནི་ཕུ་ཕུ་ཞེས་བྱ་བར་གསུངས་སོ། །སྡིག་པ་ཐམས་ཅད་ཅེས་བྱ་བ་ནི་སྡིག་པ་ཐམས་ཅད་ལས་བྱུང་བའི་རིམས་ལ་སོགས་ཏེ། བཛྲ་དྷ་ར་ཨ་ཀྲ་མ་
ཞེས་བྱ་བ་ནི་ཟུང་ཤིག་པའོ། །ཝེ་མརྡྷ་ཞེས་བྱ་བ་ནི་ཚིར་ཅིག་པའོ། །བི་ཀི་ཛི་བི་ཀི་ར་ཞེས་བྱ་བ་ནི་དེ་དང་དེར་དོར་ཅིག་པའོ། །བཉྫ་ཞེས་བྱ་བ་ནི་ཁ་དོག་དང་དབྱིབས་ཆོམས་ཤིག་པའོ། །ཨུཚ་ད་ཞེས་བྱ་བ་ནི་སླར་ཡང་མི་འབྱུང་བར་མཛོད་ཅིག་པའོ། །ན་ཤ་ཡ་ཞེས་བྱ་བ་ནི་དམིགས་པ་མེད་པར་མཛོད་ཅིག་པའོ། །ཧ་ན་ཞེས་བྱ་བ་ནི་ཚོགས་པར་མཛོད་ཅིག་པའོ། །ད་ཧ་ཞེས་བྱ་བ་ནི་ཁྲོས་པའི་མེས་ཐལ་བར་མཛོད་ཅིག་པའོ། །པ་ཙ་ཞེས་བྱ་བ་ནི་འཚེད་ཅིག་པའོ། །ཇི་ལྟར་ཞེ་ན། ཁྲོས་པ་ཞེས་བྱ་བ་ནི་དཔལ་རྡོ་རྗེ་ཉི་མ་མེ་ལྟར་འབར་བའི་ཁྲོ་བོས་སྙོམས་བར་ཞུགས་པའི་ཡི་གེ་ཧཱུཾ་ཙམ་གྱིས་སོ། །དེ་ལྟར་རིགས་ཐམས་ཅད་ཀྱི་དཀྱིལ་འཁོར་དུ་ཞུགས་པའི་གླུ་བསྟན་ནས་ད་ནི་བསྡུས་པའི་དཀྱིལ་འཁོར་དུ་འཇུག་པའི་གླུ་བསྟན་པར་བྱ་བའི་ཕྱིར། དེ་ནས་ཐམས་ཅད་ཀྱི་མཆོག་ཅེས་བྱ་བ་གསུངས་པ་ཡིན་ནོ། །ལ་ལར་ཞེས་བྱ་བ་ལ་སོགས་པ། ལ་ལར་དྲི་མེད་ཟླ་བའི་དཀྱིལ་འཁོར་སྟོང་གི་འོད་ཀྱིས་སྐུ་ནི་རྣམ་པར་མཛེས། །ཞེས་བྱ་བ་ནི་ཕྱོགས་ལ་ལར་དྲི་མ་མེད་པའི་ཟླ་བའི་དཀྱིལ་འཁོར་སྟོང་རྣམས་ཀྱི་ཟླ་བའི་ཁ་དོག་དང་འདྲ་བའི་མདངས་དང་ལྡན་པའི་དཔལ་རྡོ་རྗེ་སེམས་དཔའི་སྐུ་རྣམ་པར་མཛེས་པ་སྟེ་གསལ་ཞིང་མཛེས་པའོ། །ལ་ལར་འཇིག་དུས་ཉི་མ་འཆར་ཀར་བྱེད་པའི་འོད་ཟེར་ཚོགས་ནི་འཇིགས་ཆེན་འབར། །ཞེས་བྱ་བ་ནི་འཇིག་པའི་དུས་ཀྱི་རིང་པོར་མི་ཐོགས་པར་ཤར་བའི་ཉི་མ་བྱེ་བ་རྣམས་ཀྱི་འོད་ཟེར་ཚོགས་གང་ཡིན་པ་དེ་དང་དེ་འདྲ་བ་འབར་བ་སྔོན་པོའི་ངོ་བོ་ནི་འཇིག་རྟེན་གསུམ་སྲེག་པར་ནུས་པ་དང༌། རྡོ་རྗེ་ཏྲི་ཤཱུ་ལ་འཛིན་པའི་རྡོ་རྗེ་ཉི་མ་མེ་ལྟར་འབར་བའི་སྐུས་ཕྱོགས་ལ་ལར་རྣམ་པར་མཛེས་པ་ཡིན་ནོ། །ཕྱོགས་ལ་ལར་བལྟ་བས་ཆོག་མི་ཤེས་པའི་སྐུའི་རང་བཞིན་གྱི་འོད་ཟེར་དང་ལྡན་པའི་འབར་བའི་མདངས་ཀྱིས་མཛེས་པའི་འཁོར་ལོ་འཛིན་པའི་སྐུ་འཆང་བ། ཟག་པ་མེད་པའི་བདེ་བ་ལྡན་པ་བག་ཆགས་དང་བཅས་པའི་ཉོན་མོངས་པ་ཐམས་ཅད་ཞི་བའི་སྐུ་རྡོ་རྗེ་སེམས་དཔའ་ཁྱོད་རྣམ་པར་མཛེས་པ་ཡིན་ནོ་ཞེས་བྱ་བ་དང་སྦྱར་བར་བྱའོ། །མཛེས་པའི་གཟུགས་
འཛིན་པས་ན་གཟུགས་མཛེས་པ་འཆང་བ་སྟེ་འདོད་པའི་ལྷའོ། །མཛེས་པའི་གཟུགས་འཆང་བ་དེ་ཉིད་མཆོག་གི་མདངས་དང་ལྡན་པས་ཏེ་དེས་ལ་ལར་རྣམ་པར་མཛེས་པ་ཡིན་ནོ། །ལ་ལར་རྡོ་རྗེ་དང་པདྨ་ལས་བྱུང་བའི་གཟུགས་ཀྱིས་ནམ་མཁའ་བཞིན་དུ་ཐམས་ཅད་བཞུགས་པའོ། །གཟུགས་ཐམས་ཅད་བསྟན་ནས་འགྲོ་བའི་སེམས་ཅན་འདུལ་བར་མཛད་པའི་བརྩོན་འགྲུས་དང་ལྡན་པ་ཡིན་ནོ། །སེམས་ཅན་དེ་རྣམས་ཀྱི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ལས་སེམས་རྣམ་པར་སྦྱང་བའི་དོན་དུ་བཅོམ་ལྡན་འདས་རྡོ་རྗེ་སེམས་དཔའ་ཁྱོད་བཞུགས་པ་ཡིན་པའི་ཕྱིར་རོ། །བདག་ཀྱང་སེམས་ཅན་གྱི་ཁོངས་སུ་གཏོགས་པས་མ་ལུས་པ་འདུལ་བ་ལ་མཁས་པ་བདེ་བ་དམ་པ་རྣམས་ཐོབ་པར་བྱ་བའི་ཕྱིར་བདག་སྒྲུབས་ཞེས་བྱ་བ་སློབ་དཔོན་གྱིས་བཅོམ་ལྡན་འདས་ལ་གསོལ་བ་བཏབ་པ་ཡིན་ནོ། །དེ་ཡང་སེམས་ཅན་གྱི་ཁམས་ཐམས་ཅད་འདུལ་བར་མཛད་པ་ལ་མཁས་པ་ནི། དཔལ་རྡོ་རྗེ་སེམས་དཔའ་ལ་སོགས་ཏེ། མ་ལུས་པ་འདུལ་བ་ལ་མཁས་པ་དེ་རྣམས་ཀྱི་བདེ་བ་དམ་པ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་སོ། །དེ་རྫོགས་པའི་དོན་དུ་བཅོམ་ལྡན་འདས་ཁྱོད་བདག་ལ་སྒྲུབས་ཤིག་ཅེས་བྱའོ། །དེ་ལྟར་བསྡུས་པའི་དཀྱིལ་འཁོར་གྱི་གླུ་བསྟན་ནས། ད་ནི་གླུ་དེ་ཉིད་ཀྱིས་རས་རིས་ཀྱི་དཀྱིལ་འཁོར་འདིར་འཇུག་པ་ནི་ཐམས་ཅད་རྗེས་སུ་ཆགས་པ་ཞེས་བྱ་བ་ལ་སོགས་པ་ངེས་པར་གཟུང་བའི་དོན་དུ་སླར་ཡང་གསང་བའི་དཀྱིལ་འཁོར་དུ་འཇུག་པའི་གླུ་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བའི་ཆོ་ག་དམ་པ་ཞེས་བྱ་བ་ལ་སོགས་པ་གསུངས་ཏེ་དེ་ཡང་བཤད་ཟིན་ཏོ། །དེ་ལྟར་རིགས་ཐམས་ཅད་ཀྱིས་དཀྱིལ་འཁོར་དུ་འཇུག་པའི་གླུའི་མཆོད་པ་བསྟན་ནས། ད་ནི་དུས་ཀྱི་ངེས་པ་བསྟན་པར་བྱ་བའི་ཕྱིར། དུས་གང་ལ་གླུའི་མཆོད་པ་འདི་ལྟ་སྟེ། གཏམ་རྒྱུད་ཕྱག་མཚན་ཕྱག་རྒྱ་ཡིས། །ཞེས་བྱ་བ་ལ་སོགས་པ་སྣ་ཚོགས་པའི་ཕྱག་རྒྱས་མཆོད་པར་བྱ་བ་གང་ཡིན་པ་
དེ་ཉིད་ནི་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྐབས་སུ་བབ་བས་ཏེ། ཕྱག་རྒྱ་སྣ་ཚོགས་པའི་མཆོད་པའི་སྐབས་འདིར་རོ། །མཆོག་ཏུ་གསང་བའི་ཆོ་ག་ནི་གསང་བའི་དཀྱིལ་འཁོར་ཏེ་དེར་མཆོག་ཏུ་གསང་བ་ཡིན་ལ། བླ་མ་དམ་པ་ཡང་དེ་ཉིད་ཡིན་པས་ན་མཆོག་ཏུ་གསང་བ་བླ་མ་དམ་པའོ། །དེ་ཡང་གང་ཡིན་ཞེ་ན། དཔལ་རང་གི་དམ་ཚིག་ནི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ཏེ། དེ་བླ་ན་མེད་པ་མཆོག་ཏུ་གསང་བ་རྡོ་རྗེ་གླུའི་མཆོད་པ་དེ་ནི་བཅོམ་ལྡན་འདས་བདེ་ཆེན་ཐར་པའི་གྲོང་ཁྱེར་དུ་ཞེས་བྱ་བ་ལ་སོགས་པས་ཇི་ལྟ་བ་བཞིན་དུ་གསུངས་པའོ། །དེ་ཡང་ཤིན་ཏུ་མཆོག་ཏུ་གྲུབ་པ་ཞེས་བྱ་བ་ནི་ཐོག་མ་དང་ཐ་མ་མེད་པའི་དཔལ་རྡོ་རྗེ་སེམས་དཔའ་གསང་བའི་དཀྱིལ་འཁོར་གྱི་དངོས་གྲུབ་སྟེར་བའི་ཕྱིར་རོ། །གླུ་དེ་བླངས་ལ་ཕྱག་རྒྱ་སྣ་ཚོགས་པའི་མཆོད་པ་བྱ་བ་ཡིན་ནོ། །ཅི་བྱས་ནས་ཤེ་ན། མཆོག་གི་དེ་ཁོ་ན་ཉིད་ཅེས་བྱ་བ་ལ་སོགས་པ་ལ་མཆོག་གི་དེ་ཁོ་ན་ཉིད་དམ་པ་ཡང་དེ་ཉིད་ཡིན་ལ་རྡོ་རྗེ་གླུའི་མཆོད་པ་ཡང་དེ་ཉིད་ཡིན་པས་ན། མཆོག་གི་དེ་ཁོ་ན་ཉིད་དམ་པའི་རྡོ་རྗེ་གླུའི་མཆོད་པས་ཏེ། ཨོཾ་ནམ་མཁའི་སྐྱེ་བ་མཚན་ལྡན་ཕྱིར། །ཞེས་བྱ་བ་ལ་སོགས་པས་ཇི་ལྟ་བ་བཞིན་དུ་བསྟན་པའོ། །དེ་དང་བཅས་པའི་ཇི་ལྟ་བ་བཞིན་དུ་བཤད་པའི་གླུ་དང་རོལ་མོའི་ཆོ་ག་ནི་མཆོག་གི་དེ་ཁོ་ན་ཉིད་དམ་པའི་རྡོ་རྗེའི་གླུའི་མཆོད་པ་དང་རོལ་མོའི་ཆོ་ག་སྟེ། སྔར་བཤད་པའི་ཚུལ་དེ་ཉིད་ཀྱིས་རྗེས་སུ་བསྒྲུབ་པར་བྱས་ནས་ཇི་ལྟ་བ་བཞིན་དུ་རྗེས་སུ་བསྒྲུབ་པར་བྱ་སྟེ། དེའི་འོག་ཏུ་སྔར་བཤད་པའི་དཀྱིལ་འཁོར་བསྐོར་བའི་གར་དང༌། ཕྱག་རྒྱ་སྣ་ཚོགས་པའི་མཆོད་པས་སོ་སོར་བསྒྲུབ་པར་བྱའོ། །འདི་ལྟར་འཆད་པར་འགྱུར་ཏེ། ཇི་ལྟ་བ་བཞིན་དུ་གསང་བའི་དཀྱིལ་འཁོར་གྱི་སྒོམ་པས་སྔོན་དུ་བསྙེན་པར་བྱས་ནས་གསང་བའི་དཀྱིལ་འཁོར་བྲིས་ཏེ་རབ་ཏུ་འཇུག་པ་ལ་སོགས་པའི་ཆོ་ག་རྗེས་སུ་སྦྱང་ལ། སློབ་མ་གཞུག་པ་ལ་སོགས་པའི་ཆོ་ག་རྫོགས་པར་བྱས་ནས་སློབ་མའི་ཚོགས་དང་བཅས་པའི་སྔོན་དུ་སྤྱོད་པ་བྱས་ནས་ཤིན་ཏུ་བརླབས་པའི་སྐྱེས་པ་དང་བུད་མེད་ཀྱི་ཚོགས་དང་བཅས་
པས་ཡི་གེ་ཧཱུཾ་གི་གླུའི་ཆོ་ག་དང་རོལ་མོའི་ཆོ་ག་དེ་ཁོ་ན་ཉིད་གླུ་དང་བཅས་པས་རྗེས་སུ་སྤྱད་པར་བྱའོ། །དེ་ནས་རྡོ་རྗེ་གླུའི་མཆོད་པ་དཀྱིལ་འཁོར་བསྐོར་བའི་གར་གྱིས་བྱས་ལ། བཅོམ་ལྡན་འདས་བདེ་ཆེན་ཞེས་བྱ་བ་ལ་སོགས་པའི་གླུ་བླངས་ཏེ་ཕྱག་རྒྱ་སྣ་ཚོགས་པའི་མཆོད་པ་བྱ་བ་ཡིན་ནོ། །དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་དེ་བཞིན་གཤེགས་པ་ཐམས་ཅད་དེ། དེ་རྣམས་ཀྱི་ཆོ་ག་ནི་ཤིན་ཏུ་གསང་བ་བླ་ན་མེད་པའི་རྟོགས་པ་ཐམས་ཅད་ཀྱི་རྡོ་རྗེ་སེམས་དཔའི་ལྷ་ཐམས་ཅད་ཀྱི་གཟུགས་ཐམས་ཅད་སྟོན་པའོ། །རང་བཞིན་ཅན་གྱི་སྣ་ཚོགས་པའི་དམ་ཚིག་ཆེན་པོ་རྣམས་ཀྱི་ཆོ་ག་ནི་ཕྱག་རྒྱ་སྒྲུབ་པའི་ཆོ་ག་འདི་ཡིན་ནོ་ཞེས་བྱ་བ་འདིས་དཔེ་ཙམ་དུ་བསྟན་པ་ཡིན་ཏེ། རིགས་ཐམས་ཅད་ཀྱི་དཀྱིལ་འཁོར་ཡང་དངོས་པོ་འདི་ཐུན་མོང་ཡིན་པའི་ཕྱིར་རོ། །སྣ་ཚོགས་ཆོ་ག་འདི་ཡིས་ནི། །ཞེས་བྱ་བ་ནི་ཕྱག་རྒྱ་སྣ་ཚོགས་པའི་མཆོད་པས་སོ། །རྡོ་རྗེ་སེམས་དཔའ་བསྡུས་པ་ཡིན། །ཞེས་བྱ་བ་ནི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་རྣལ་འབྱོར་རོ། །ཀུན་མཆོག་སྣ་ཚོགས་ཆེན་པོའོ། །རྣལ་འབྱོར་དབང་ཕྱུག་རབ་བསྒྲུབས་པ། །ཞེས་བྱ་བ་ལ་ཀུན་མཆོག་ཀྱང་ཡིན་ལ་དབང་ཕྱུག་ཀྱང་ཡིན་པས་ན་ཀུན་མཆོག་སྣ་ཚོགས་ཆེན་པོའོ། །དེའི་རྣལ་འབྱོར་ནི་ཤིན་ཏུ་རྣལ་འབྱོར་གྱི་ཏིང་ངེ་འཛིན་གྱི་ངོ་བོ་སྟེ། དེས་ནི་དབང་ཕྱུག་ནི་གཟུགས་ཐམས་ཅད་སྟོན་པར་བྱེད་པས་སེམས་ཅན་གྱི་དོན་ཏེ་སྒྲུབ་པར་འགྱུར་རོ། །ད་ནི་བསྡུ་བའི་ཚིགས་སུ་བཅད་པས་འདས་མ་ཐག་ཏུ་བཤད་པའི་རྟོགས་པ་རྒྱས་པའི་དོན་བསྟན་པར་བྱ་བའི་ཕྱིར། དེ་ལྟར་ཞེས་བྱ་བ་ལ་སོགས་པ་གསུངས་ཏེ། དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་ཐམས་ཅད་དགུག་པ་ལ་སོགས་པ་དང༌། མཆོད་པ་ཆེན་པོ་ལ་སོགས་པའི་རང་བཞིན་ཅན་གྱི་དཔལ་མཆོག་དང་པོའི་རྟོགས་པའི་ཆོ་ག་རྒྱས་པ་སྟེ། དེས་སྣ་ཚོགས་པ་ནི་རྣམ་པ་སྣ་ཚོགས་པའི་གཏམ་རྒྱུད་ཅན་ནོ། །སྣ་ཚོགས་པའི་གཏམ་རྒྱུད་ཅན་གྱི་ཆོ་ག་རྒྱས་པ་ཉིད་མཆོག་ཏུ་གསང་བའི་རོལ་མོ་སྟེ། ཕྱག་རྒྱ་སྣ་ཚོགས་པའི་མཆོད་པའི་རང་བཞིན་ཅན་ནོ། །དེ་ཉིད་
དཔལ་རྡོ་རྗེ་སེམས་དཔའོ། །དངོས་གྲུབ་ཀྱི་ཉམས་དང་ལྡན་པའོ། །དེ་ལྟ་བུ་དེ་ཇི་ལྟ་བ་བཞིན་དུ་བཤད་པའི་སྒྲུབ་པ་དང༌། རྗེས་སུ་སྒྲུབ་པ་དང༌། སོ་སོར་རྗེས་སུ་སྒྲུབ་པ་རྣམས་ཀྱི་རྣལ་འབྱོར་པ་གང་གིས་མངོན་དུ་བྱེད་པ་ནི་བསྟེན་པ་སྟེ། དེ་དག་ལ་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བའི་རང་བཞིན་ཅན་གྱི་དངོས་གྲུབ་ཀྱི་བདེ་བ་ཆེན་པོ་ཉིད་ཐོབ་པ་ཡིན་ནོ་ཞེས་བྱ་བ་དང་སྦྱར་རོ། །དེ་ཡང་ཇི་ལྟ་བུ་ཞེ་ན། སྣ་ཚོགས་པའི་རྒྱལ་མཚན་མཐོ་བ་དང་ལྡན་པ་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་མཚན་དང་བཅས་པའི་སྣ་ཚོགས་པའི་སྐུ་མཐོ་བ་དང་ལྡན་པ་གང་ཡིན་པ་དེ་དག་གིས་མཆོག་གི་དངོས་གྲུབ་ཀྱི་བདེ་བ་ཆེན་པོ་ཉིད་ཉམས་སུ་མྱོང་བ་ཡིན་ནོ། །དོན་ཡོད་ཅེས་བྱ་བ་ནི་དོན་ཡོད་པ་ཡིན་ཏེ། འདོད་པའི་འབྲས་བུ་སྒྲུབ་པར་བྱེད་པའོ། །མཆོག་གི་ཇི་ལྟ་བ་བཞིན་དུ་བཤད་པའི་ཐོག་མ་དང་ཐ་མ་མེད་པའོ། །བསོད་ནམས་ལྡན་ཞེས་བྱ་བ་ནི་སྡིག་པ་ཐམས་ཅད་ཀྱི་དྲི་མ་སྦྱོང་བར་བྱེད་པའོ། །དེ་གང་ཞེ་ན། ཆོ་ག་ཞེས་བྱ་བ་ནི་ཐམས་ཅད་དགུག་པ་ལ་སོགས་པའི་ངོ་བོའོ། །མཆོག་ཏུ་རྟག་པ་ནི་ཤིན་ཏུ་ཐོག་མ་དང་ཐ་མ་མེད་པའོ། །མཆོག་ཏུ་རྟག་པ་དེ་གང་གིས་སྒྲུབ་པར་བྱེད་པ་དེ་དག་གིས་ཤིན་ཏུ་དམ་པ་འདོད་པའི་དངོས་གྲུབ་དབང་ཕྱུག་ཅི་བདེར་ཐོབ་ཅེས་བྱ་བ་དང་སྦྱར་རོ། །ཀུན་མཆོག་གསང་བ་ཆེན་པོ་ཞེས་བྱ་བ་ནི་གསང་བའི་དཀྱིལ་འཁོར་རོ། །དེ་ཉིད་དངོས་གྲུབ་ཐམས་ཅད་མྱུར་སྒྲུབ་ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་མྱུར་དུ་སྒྲུབ་པར་བྱེད་པའོ། །དེ་ལྟ་བུའི་གྲོང་ཁྱེར་མཆོག་ཏུ་ཞུགས་ན་སྒྲུབ་པ་པོ་གང་གིས་སྒྲུབ་པར་བྱེད་པ་དེ་དག་གིས་ཐོག་མ་དང་ཐ་མ་མེད་པའི་དངོས་གྲུབ་ཀྱི་དབང་ཕྱུག་གི་བདེ་བ་རྣམས་ཐོབ་པ་ཡིན་ནོ། །ནིའི་སྒྲ་ནི་ངེས་པར་གཟུང་བ་སྟེ་དེ་རྣམས་ཁོ་ནས་ཐོབ་ཀྱི་གཞན་གྱིས་ནི་མ་ཡིན་ནོ།། སྒྲུབ་པ་པོ་གང་ལ་སྒྲུབ་པའི་ཆོ་ག་གཞན་དག་དང་སྒྲུབ་པ་བདུན་གྱིས་ཀྱང་འགྲུབ་པར་མ་གྱུར་པ་དང༌། དངོས་གྲུབ་རྫོགས་པར་བྱེད་པའི་བསོད་ནམས་དང་མི་ལྡན་པ་དང༌། ཡོ་བྱད་ལ་སོགས་པ་ཕུན་སུམ་ཚོགས་པ་ཡང་མེད་པས་དཔལ་རྡོ་རྗེ་སེམས་དཔའི་མཆོག་གི་དཀྱིལ་
འཁོར་དུ་ཞུགས་ཀྱང་གྲུབ་པར་མ་གྱུར་པ་དང༌། བསོད་ནམས་མེད་པ་དང༌། ཕུན་སུམ་ཚོགས་པ་དང་མི་ལྡན་པའི་སྒྲུབ་པ་པོ་གསང་བའི་དཀྱིལ་འཁོར་འདིར་མངོན་པར་འདོད་པའི་དངོས་གྲུབ་བསྒྲུབས་ན་རབ་ཏུ་འགྲུབ་པར་འགྱུར་རོ། །དེའི་ཕྱིར་མ་ཞུགས་ཀྱང་འགྲུབ་པར་འགྱུར་རོ་ཞེས་བྱ་བ་ཀྱང་གི་སྒྲས་བསྟན་ཏོ། །གལ་ཏེ་རྡོ་རྗེ་སེམས་དཔའ་མཆོག །སྙིང་པོ་སོགས་ཀྱིས་མ་གྲུབ་ན། །ཞེས་བྱ་བ་ལ་གལ་ཏེ་བཅོམ་ལྡན་འདས་རྡོ་རྗེ་སེམས་དཔའ་དང༌། ཕྱག་རྒྱ་དང༌། སྔགས་དང༌། རིག་པ་རྣམས་ཀྱིས་མཆོག་སྟེ་ཕུལ་དུ་བྱུང་བ་གྲུབ་པར་མ་གྱུར་པ་དང༌། ཨ་ནུ་ར་ག་ཡ་མི་ཧཱུཾ་ཞེས་བྱ་བ་ཉེ་བའི་སྙིང་པོ་དང་བཅས་པ་བསྒྲུབ་པར་བྱ་བ་སྒྲུབ་པ་པོ་ལ་གལ་ཏེ་གྲུབ་པར་མ་གྱུར་ན་གསང་བའི་དཀྱིལ་འཁོར་འདིར་སྒྲུབ་པ་པོ་ཞུགས་ཏེ། ཉེ་བའི་སྙིང་པོ་མེད་ན་ཡང་དེ་འགྲུབ་པར་འགྱུར་རོ། །དཔལ་མཆོག་དང་པོའི་རྩ་རྒྱུད་དུ། །དེ་ལྟར་མྱུར་དུ་གྲུབ་པ་ཡིན། །ཞེས་བྱ་བ་ལ་སོགས་པ་ལ། དཔལ་མཆོག་དང་པོའི་རྩ་བའི་རྒྱུད་ལས་ཇི་ལྟ་བ་བཞིན་དུ་བཤད་པའི་སྒྲུབ་པའི་རྣམ་པ་རྩ་བའི་རྒྱུད་ལས་གསུངས་པ་གང་ཡིན་པ་དེས་མྱུར་དུ་གྲུབ་པ་མ་ཡིན་ཏེ། ཇི་ལྟར་དང་པོའི་ཁང་པར་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་སྒྲུབ་པ་པོ་ཇི་ལྟར་གྲུབ་པ་དེ་ལྟར་དཔལ་མཆོག་དང་པོའི་རྩ་བའི་རྒྱུད་ལ་གྲུབ་པ་མ་ཡིན་ནོ། །དཀྱིལ་འཁོར་ཐམས་ཅད་སྒྲུབ་པ་ཡིས། །དེ་ལྟར་ཐམས་ཅད་གྲུབ་པ་མིན། །ཞེས་བྱ་བ་ལ་གསང་བའི་དཀྱིལ་འཁོར་མ་གཏོགས་པའི་དཀྱིལ་འཁོར་ཐམས་ཅད་སྒྲུབ་པའི་དངོས་གྲུབ་ཀྱི་ཆོ་ག་གཞན་དག་གིས་ཕྱག་རྒྱ་ཆེན་པོ་ལ་སོགས་པ་དེ་ལྟར་གྲུབ་པར་འགྱུར་བ་མ་ཡིན་ཏེ། ཇི་ལྟར་མཆོག་ཏུ་གསང་བའི་དཀྱིལ་འཁོར་གྱི་ཁང་པ་མཆོག་འདི་མཐོང་བ་ཉིད་ཀྱིས་སོ། །དཀྱིལ་འཁོར་དུ་མ་ཞུགས་པ་རྣམས་ལ་རྡོ་རྗེ་དང་དྲིལ་བུའི་ཕྱག་རྒྱ་བསྟན་པ་དང༌། སློབ་དཔོན་ལ་བརྙས་པ་ལ་སོགས་པའི་རང་བཞིན་ཅན་གྱི་དམ་ཚིག་ཉམས་པའི་རྒྱུས་སྤངས་པ་ནི་དམ་ཚིག་ཉམས་པའོ། །དེ་ཉིད་ཀྱི་ཕྱིར་ཉོན་མོངས་པའི་སྒྲིབ་པ་ལ་སོགས་པ་སྨོད་པ་ནི་སྒྲིབ་པ་
ཐམས་ཅད་ཀྱིས་སྨད་པའོ། །བདུད་སོགས་གདོན་གྱིས་རེག་པ་ཞེས་བྱ་བ་ལ། རིག་པ་མཆོག་ལས་གསུངས་པའི་གདོན་བཅོ་བརྒྱད་ཀྱིས་རེག་པ་གང་ཡིན་པ་དེ་དག་ཀྱང༌། གལ་ཏེ་གསང་བའི་དཀྱིལ་འཁོར་དུ་ཞུགས་ནས་སྒྲུབ་པར་བྱེད་ན་ངེས་པ་ཁོ་ནར་གྲོལ་བར་འགྱུར་རོ། །ཐོག་མ་དང་ཐ་མ་མེད་པའི་རྟག་པའོ། །དཀྱིལ་འཁོར་དུ་ནི་མ་ཞུགས་པའམ། །ཞེས་བྱ་བ་ལ་སོགས་པ་ལ་དཀྱིལ་འཁོར་གཞན་དུ་མ་བསྒྲུབས་པའམ། དཀྱིལ་འཁོར་མ་གྲུབ་པ་གང་ཡིན་པ་དེ་རྣམས་ཀྱང་གསང་བའི་དཀྱིལ་འཁོར་དུ་ཞུགས་པ་སྟེ། གལ་ཏེ་སྒྲུབ་པར་བྱེད་ན་མྱུར་དུ་དངོས་གྲུབ་ཐོབ་པར་འགྱུར་རོ། །དེ་རྒྱུ་གང་གི་ཕྱིར་ཞེ་ན། བསྒྲུབ་བྱ་མིན་འདིར་ཅུང་ཟད་མེད། །ཅེས་བྱ་བ་ལ་སོགས་པ་ལ་གང་གི་ཕྱིར་གསང་བའི་དཀྱིལ་འཁོར་འདིར་ཕྱག་རྒྱ་ཆེན་པོ་ལ་སོགས་པ་བསྒྲུབ་པར་བྱ་བ་མ་ཡིན་པ་གང་ཡང་མེད་པའི་ཕྱིར་རོ། །ལས་ནི་རྣམ་པ་སྣ་ཚོགས་པའོ། །བདེ་བ་ནི་འཇིག་རྟེན་དང་འཇིག་རྟེན་ལས་འདས་པའི་སྟེ་བསྒྲུབ་པར་བྱ་བ་མ་ཡིན་པ་ཡོད་པ་མ་ཡིན་ནོ། །དེའི་ཕྱིར་གྲུབ་པའི་ལས་ཀྱི་བདེ་བ་རྣམས། རྟོགས་པ་ཐམས་ཅད་ལས་ཉེ་བར་ཐོབ་པས་ན་བསྒྲུབ་པར་བྱའོ། །དེ་ལྟར་སྒྲུབ་པར་བྱེད་པ་པོ་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་བཞི་འགྱུར་འགྲུབ་པ་ཡིན་ནོ། །དེ་ལྟར་འཆད་པར་འགྱུར་ཏེ། རྟོགས་པ་གཞན་རྣམས་ལ་གང་ཞིག་ཕྱག་རྒྱ་ཆེན་པོའི་དངོས་གྲུབ་ཟླ་བ་བཞིས་འགྲུབ་པར་འགྱུར་བ་དེ་ཉིད་གསང་བའི་དཀྱིལ་འཁོར་དུ་ཞུགས་ན་ཟླ་བ་གཅིག་གིས་འགྲུབ་པར་འགྱུར་རོ། །སློབ་མ་གཞུག་པ་ལ་སོགས་པའི་ལས་ཀྱི་ཆོ་ག་རྒྱས་པ་རྫོགས་སོ།། །།སླར་ཡང་གསལ་བར་བྱ་བའི་ཕྱིར་ཆོ་ག་ཐམས་ཅད་བརྗོད་པར་བྱ་སྟེ། ཇི་ལྟ་བ་བཞིན་དུ་བདག་བསྲུང་བ་དང༌། གནས་བསྲུང་བ་དང༌། ཁྲུས་དང་ཇི་སྐད་བཤད་པའི་གོས་དང་རྒྱན་རྣམས་ཀྱིས་བརྒྱན་པར་བྱས་ལ། རྡོ་རྗེ་དང་དྲིལ་བུ་འཆང་བས་ཡིད་དང་རྗེས་སུ་མཐུན་པའི་གནས་སུ་བཅོམ་ལྡན་འདས་རྡོ་རྗེ་སེམས་དཔའ་འཁོར་དང་བཅས་པའམ། གཅིག་པུ་ལུགས་མའམ་བརྡུངས་མ་ལ་སོགས་པའི་དངོས་པོ་བཞུགས་
སུ་གསོལ་ལ་སླར་ཡང་བདག་བསྲུང་བ་བྱས་ལ། རྡོ་རྗེ་གནོད་སྦྱིན་ཡོངས་སུ་བཟླས་པའི་དྲི་བཟངས་ཀྱི་ཆུ་ལྷའི་མཆོད་པ་ལྔས་ཡོངས་སུ་བསངས་ལ། རྡོ་རྗེ་མེ་ལན་གསུམ་ཡོངས་སུ་བཟླས་ལ། མེ་ཏོག་ལ་སོགས་པའི་རིག་པ་རྣམས་ཀྱིས་སླར་ཡང་ཡོངས་སུ་བཟླས་ཏེ། ཨརྒྷའི་ཕྱག་རྒྱས་ཡི་གེ་ཧཱུཾ་ལན་བདུན་བཟླས་པ་ཨརྒྷ་ལ་སོགས་པ་ལ་ཡོངས་སུ་བཟླས་ནས་བཞག་སྟེ། རྡོ་རྗེ་གནོད་སྦྱིན་ཡོངས་སུ་བཟླས་པའི་དྲི་བཟངས་ཀྱི་ཆུ་ལྷའི་ཁང་པའི་སྒོར་ཡོངས་སུ་བསང་བའི་ཕྱིར་བཞག་སྟེ། རྟག་ཏུ་རྡོ་རྗེ་དྲིལ་འཆང་ཞིང༌། །ཐམས་ཅད་དགུག་དང་མཆོད་པ་ཆེ། །བདག་བྱིན་བརླབ་སོགས་བསྒྲུབ་པ་ཡིས། །མཆོག་གི་དངོས་གྲུབ་བསྒྲུབ་པར་བྱ། །དེ་ལ་དང་པོ་ཡི་གེ་ཧཱུཾ་བརྗོད་ཅིང་དང་པོའི་རྡོ་རྗེ་བཅིངས་ཏེ་ས་ལ་བཞག་ལ། ཨ་ནུ་ར་ག་ཡ་མི་ཧཱུཾ་ཞེས་བྱ་བ་བརྗོད་ཅིང་གསང་བའི་དཀྱིལ་འཁོར་རྫོགས་པར་བྱས་ནས། ཕུན་སུམ་ཚོགས་པ་ཡོད་ན་མེ་ཏོག་ལ་སོགས་པས་ཡང་དག་པར་མཆོད་ཅིང་འཚལ་ཏེ། སྔོམ་པ་གཟུང་བའི་བར་མཐར་ཐུག་པའི་ཆོ་ག་རྗེས་སུ་སྤྱད་ནས་དམ་ཚིག་རྡོ་རྗེ་ཁུ་ཚུར་གྱི་ཕྱག་རྒྱ་བཅིང་བའི་མཐར་ཐུག་པའི་ཕྱག་རྒྱ་བཅིང་བར་བྱས་ལ། དཀྱིལ་འཁོར་ཐམས་ཅད་ཀྱི་ཕྱག་རྒྱ་བསྟོད་པ་སྔ་མ་བཞིན་རྗེས་སུ་སྤྱད་ལ། ཇི་ལྟ་བ་བཞིན་དུ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ཡིད་ཀྱིས་ནམ་མཁའ་དང་མཉམ་པའི་རང་གི་སྙིང་གའི་ཟླ་བ་ལ་ནམ་མཁའ་དང་མཉམ་པ་ཉིད་ཀྱི་ཚུལ་གྱིས་བཞུགས་ཏེ། དང་པོའི་རྡོ་རྗེས་དེར་གསང་བའི་དཀྱིལ་འཁོར་རྫོགས་པར་བྱས་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་ཆོ་ག་རྫོགས་ནས། དཀྱིལ་འཁོར་དེ་རང་གི་སྙིང་ག་ན་གནས་པ་ཟླ་བའི་དཀྱིལ་འཁོར་གྱི་ཁོངས་སུ་ཆུད་པར་བསམས་ལ། རང་གི་ལུས་ལ་ལྷ་ཐམས་ཅད་ཀྱི་གནས་སྐབས་སུ་ཡི་གེ་ཧྲཱིཿ་ལས་བྱུང་བའི་སྣ་ཚོགས་པདྨ་རྣམས་རྫོགས་པར་བྱས་ཏེ། བརྟེན་པའི་ལུས་པོའི་ཕྱི་རོལ་གྱི་མདུན་དུ་སྣ་ཚོགས་པདྨའི་གདན་གྱི་སྟེང་དུ་དཔལ་རྡོ་རྗེ་སེམས་དཔའ་ལ་སོགས་པ་ཇི་སྐད་བཤད་པ་བཞིན་དུ་སྤྲུལ་ཏེ། རྡོ་རྗེ་ལྕགས་ཀྱུ་ལ་སོགས་པའི་ལས་ཀྱི་
ཕྱག་རྒྱ་རྣམས་ཀྱིས་དགུག་པ་དང་གཞུག་པ་དང༌། བཅིང་བ་དང་དབང་དུ་བྱས་ནས། རང་གི་དམ་ཚིག་གི་ཕྱག་རྒྱ་རྣམས་ཀྱིས་བལྟ་བར་བྱས་ལ། གསང་བའི་ལྕགས་ཀྱུ་མ་བཅིངས་ནས། ཛཿ་དཔའ་མཆོག་དང་པོ་རྡོ་རྗེ་འཆང༌། །ཞེས་བྱ་བའི་གླུས་འཁོར་དང་བཅས་པའི་རྡོ་རྗེ་སེམས་དཔའ་རང་གི་ལུས་ལ་རང་གི་གནས་སུ་བཅུག་ལ། རང་གི་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ལ། ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ནས་སྔ་མ་བཞིན་དུ་དེ་བཞིན་གཤེགས་པ་ཐམས་ཅད་བརྟེན་པའི་ལུས་དང་རྡོ་རྗེ་སེམས་དཔའ་ལ་སོགས་པའི་སྐུ་ལ་རབ་ཏུ་བཅུག་སྟེ། ཕྱག་རྒྱ་བཞིས་རྒྱས་བཏབ་ནས་དང་པོའི་ཡི་གེ་རྡོ་རྗེས་སྙིང་ག་དང༌། སྨིན་མཚམས་དང༌། མགྲིན་པ་དང་སྤྱི་བོར་རང་གི་བདག་ཉིད་དེ་བཞིན་དུ་བྱིན་གྱིས་བརླབས་ནས་ཡི་གེ་བརྒྱ་པས་བརྟན་པར་བྱས་ནས། དབང་བསྐུར་བའི་ཕྱག་རྒྱས་སངས་རྒྱས་ལྔའི་ཅོད་པན་གྱི་དབང་བསྐུར་བ་བླངས་ཏེ། ཡི་གེ་གཉིས་ཀྱི་གོ་ཆས་བདག་ཉིད་གོ་བགོས་ནས་དེ་ཁོ་ན་ཉིད་དང༌། ཆོས་དང་དམ་ཚིག་རྣམས་བླངས་ཏེ་དམ་ཚིག་གསུམ་གྱི་གླུའི་མཆོད་པ་དང༌། རྗེས་སུ་སྒྲུབ་པ་བྱས་ནས་རང་གི་སྙིང་གར་སྔ་མ་བཞིན་དུ་དཀྱིལ་འཁོར་རྫོགས་པར་བྱས་ལ་ལྷ་དགོད་པའི་ཆོ་གས་རྡོ་རྗེ་སེམས་དཔའ་ལ་སོགས་པ་རྡོ་རྗེ་དྲིལ་བུ་མའི་བར་རྣམས་རང་གི་ཕྱག་རྒྱ་རྣམས་ཀྱིས་དགོད་པར་བྱས་ནས་དེ་བཞིན་དུ། བཛྲ་ཨཱཏྨ་ཀོ་ལ་སོགས་པའི་སྙིང་པོ་གསུམ་བརྗོད་ཅིང་དེའི་དོན་གསུམ་རྣམ་པར་བསྒོམས་ལ། དེ་བཞིན་གཤེགས་པ་ཐམས་ཅད་ཀྱི་དཔལ་དམ་ཚིག་ཆེན་པོའི་དཀྱིལ་འཁོར་བདག་ཡིན་ནོ་ཞེས་བྱ་བ་རང་ཉིད་ཀྱིས་བརྗོད་ཅིང་རྡོ་རྗེ་སེམས་དཔའ་གསང་བའི་དཀྱིལ་འཁོར་གྱི་རང་བཞིན་དུ་བདག་ཉིད་ངེས་པར་བྱས་ནས་ལྷ་མོ་ཐམས་ཅད་ཀྱི་སྙིང་གར་གནས་པའི་རྡོ་རྗེའི་དབུས་སུ་ཡི་གེ་ཧཱུཾ་རྣམ་པར་བསམས་ཏེ། དེ་ཉིད་ཡིད་ཀྱིས་རྡོ་རྗེའི་ངག་གམ་རབ་ཏུ་དགའ་བའི་རྡོ་རྗེའི་ངག་གིས་བརྗོད་ཅིང༌། ཇི་སྲིད་དུ་ཉིན་རེ་ལན་ཅིག་བདག་ལ་བྱིན་གྱིས་བརླབ་པ་ལ་སོགས་པ་སྔོན་དུ་འགྲོ་བས་བསྒོམ་པར་བྱ་སྟེ། ཇི་སྲིད་མངོན་དུ་གྱུར་པ་བཞིན་དུ་ཉིན་རེ་
བསྒོམ་པའི་དུས་སུ་དཀྱིལ་འཁོར་མཐོང་བར་འགྱུར་རོ། །དེ་ནས་དེ་ཁོ་ན་ཉིད་བསྡུས་པ་ལས་གསུངས་པའི་ཚུལ་གྱིས་མངོན་པར་ཤེས་པ་བསྒྲུབ་པར་བྱ་སྟེ། དེ་ལྟར་མཆོག་ཏུ་བསྙེན་པ་བྱས་པར་འགྱུར་བ་ཡིན་ནོ། །ཡང་ན་ཏིང་ངེ་འཛིན་གསུམ་གྱི་སྒོམ་པ་ནས་བརྩམས་ལ་དེ་ཇི་སྲིད་དུ་དཀྱིལ་འཁོར་འདི་བསྒོམ་པར་བྱས་ཏེ་ཇི་སྲིད་མངོན་དུ་མཐོང་བར་འགྱུར་པའོ། །དེ་ནས་དེ་བཞིན་དུ་མངོན་པར་ཤེས་པ་བསྒྲུབ་པར་བྱ་བ་ཡིན་ནོ། །ཡང་ན་ཚོགས་ཀྱི་འཁོར་ལོའི་ཚུལ་གྱིས་སྔོན་དུ་བསྙེན་པ་བྱས་ལ་མངོན་པར་ཤེས་པ་བསྒྲུབ་པར་བྱའོ། །དེ་ནས་ཇི་སྐད་བཤད་པའི་ཁང་པ་སུམ་བརྩེགས་སུ་དཔལ་རྡོ་རྗེ་སེམས་དཔའི་རྒྱན་རྣམས་ཀྱིས་བདག་ཉིད་བརྒྱན་པར་བྱས་ལ། སྡོམ་པ་བཟུང་བའི་མཐར་ཐུག་པའི་ཆོ་ག་རྗེས་སུ་སྤྱད་ནས་ཇི་ལྟ་བ་བཞིན་དུ་རྣལ་འབྱོར་ཆེན་པོ་དང༌། གཞལ་ཡས་ཁང་པ་དང༌། གདན་རྣམས་རྫོགས་པར་བྱས་ལ་བརླ་གཉིས་ལ་དྲིལ་བུ་གཉིས་བཅིངས་ཏེ། དབུས་སུ་སེམས་དཔའི་སྐྱིལ་མོ་ཀྲུང་གིས་ཉེ་བར་འདུག་ལ་བདག་ཉིད་སྤྲོ་བ་བསྐྱེད་པར་བྱའོ། །དེ་བཞིན་དུ་དེ་བཞིན་གཤེགས་པ་ཐམས་ཅད་སྤྱན་དྲང་བར་བྱས་ལ་ཡན་ལག་གིས་ཕྱག་བྱས་ལ་དཀྱིལ་འཁོར་གྱི་རྒྱལ་པོ་མཆོག་དང། ལས་ཀྱི་རྒྱལ་པོ་མཆོག་རྣམ་པར་བསྒོམ་པར་བྱའོ། །དེ་ནས་ཕྱག་རྒྱ་ཆེན་པོ་བཅིངས་ལ་ཡི་གེ་ཧཱུཾ་བརྗོད་ཅིང་དེ་ལ་བརྩོན་པས་གསང་བའི་དཀྱིལ་འཁོར་བསྒོམ་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་གསང་བའི་དཀྱིལ་འཁོར་བྲི་བའི་ཕྱིར། བདག་ཉིད་ལ་གསོལ་བ་གདབ་པར་བསམ་པར་བྱའོ། །འདོད་ཆགས་ཆེན་པོ་བདེ་བ་ཆེ། །བཅོམ་ལྡན་ཁྱོད་ལ་གསོལ་བ་ནི། །སྙིང་པོ་འདི་ཡི་རྟོགས་པས་ནི། །བདེ་བ་ཆེན་པོ་མྱུར་སྒྲུབ་བྱེད། །ཅེས་བྱ་བའི་ཚིག་འདིས་སོ། །དེ་ནས་ལངས་ཏེ་དེ་བཞིན་གཤེགས་པ་ཐམས་ཅད་ཀྱི་ཞབས་ལ་ཕྱག་འཚལ་བར་བྱས་ནས། བདག་ནི་རང་ཉིད་རྡོ་རྗེ་ཅན། །ཞེས་བྱ་བ་ལ་སོགས་པ་ནས། བདག་པོ་རྡོ་རྗེ་ཆེན་པོ་བདག །ཅེས་བྱ་བའི་བར་དུ་བརྗོད་པར་བྱའོ། །དེ་ལ་དང་པོའི་རྡོ་རྗེས། ཧཱུཾ་བཛྲ་ཏིཥྛ་སརྦ་ཏ་ཐཱ་ག་ཏ་ཤྲཱི་མ་ཧཱ་ས་མ་ཡ་མཎྜལ་ཨུ་ད་ཐ་པ་ཡ་ཞེས་བརྗོད་ཅིང་གསང་བའི་དཀྱིལ་འཁོར་བཏེག་ལ། ནམ་
མཁའི་ཕྱོགས་སུ་བཞུགས་སུ་གསོལ་ཏེ་སྔ་མ་བཞིན་དུ་དང་པོའི་རྡོ་རྗེས་གནས་བཞིར་ཡི་གེ་ཧཱུཾ་དང་རྡོ་རྗེ་སེམས་དཔའ་ལ་སོགས་པས་བྱིན་གྱིས་བརླབས་ལ། སླར་ཡང་ཕྱག་རྒྱ་ཆེན་པོ་བཅིངས་ཏེ། བཛྲ་ཏིཥྛ་མ་ཊ་ཅེས་བྱ་བ་མིག་གཉིས་སུ་རྣམ་པར་བསམས་ལ། ཕྱག་རྒྱ་ལ་གནས་དེ་བཞིན་ལས། །ཀུན་དུ་རྣམ་པར་བལྟས་ནས་ནི། །ཡི་གེ་ཧཱུཾ་ནི་བརྗོད་བྱ་ཞིང༌། །བསྒྱིངས་པའི་ཚུལ་གྱིས་ཡོངས་སུ་བསྐོར། །དེ་ནས་ཇི་ལྟ་བ་བཞིན་དུ་བཤད་པའི་ཚུལ་གྱིས་གསང་བའི་དངོས་པོའི་དཀྱིལ་འཁོར་བཀུག་ལ། བྱིན་གྱིས་བརླབ་པའི་ཕྱག་རྒྱས་བྱིན་གྱིས་བརླབས་ཏེ། སྔ་མ་བཞིན་དུ་ཕུར་བུས་གདབ་པར་བྱའོ། །དེ་ནས་བགེགས་བསྐྲད་པ་ལ་སོགས་པ་དང༌། སྒོ་བཅད་པ་དང༌། དཀྱིལ་འཁོར་གྱི་སྲུང་བ་ཐམས་ཅད་བྱས་ལ། རྡོ་རྗེ་གནོད་སྦྱིན་ཡོངས་སུ་བཟླས་པའི་བུམ་པ་དཀྱིལ་འཁོར་གྱི་སྒོ་ཡོངས་སུ་བསང་བའི་དོན་དུ་བཞག་ལ། རྡོ་རྗེ་གནོད་སྦྱིན་ཡོངས་སུ་བཟླས་པའི་དྲི་ཞིམ་པོའི་ཆུས་དཀྱིལ་འཁོར་གྱིས་གཞི་བྱུག་པར་བྱའོ། །དེ་ནས་དཔལ་རྡོ་རྗེ་སེམས་དཔའ་ལ་སོགས་པའི་སྙིང་པོ་རྣམས་ཀྱིས་ལན་བདུན་གྱིས་མངོན་པར་བསྔགས་པའི་དྲིའི་མཎྜལ་རྣམས་ལྷ་ཐམས་ཅད་ཀྱི་གནས་རྣམས་སུ་བྱའོ། །མཎྜལ་དེ་རྣམས་ལ་དཔལ་རྡོ་རྗེ་སེམས་དཔའ་ལ་སོགས་པ་རྣམས་རང་རང་གི་སྙིད་པོ་བཀོད་ལ། མཆོད་པ་ལྔས་ཡང་དག་པར་མཆོད་ལ་ཕྱི་རོལ་དུ་གཏོར་མ་བྱིན་ལ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་རྣམ་པར་རྒྱལ་བའི་བུམ་པ་རྡོ་རྗེ་གནོད་སྦྱིན་དང་རྡོ་རྗེ་མེ་དང༌། རྡོ་རྗེ་སེམས་དཔའ་རྣམས་སོ་སོར་ལན་བརྒྱ་རྩ་བརྒྱད་བཟླས་པ་དེའི་ཆོ་གས་ལྷག་པར་གནས་པར་བྱས་ལ་དཔལ་རྡོ་རྗེ་སེམས་དཔའི་མདུན་དུ་བཞག་ནས་རྡོ་རྗེ་གནོད་སྦྱིན་དང༌། རྡོ་རྗེ་སེམས་དཔའ་དང༌། སངས་རྒྱས་སྤྱན་རྣམས་ཀྱི་རེ་རེ་ཞིང་ཡང་མར་ལ་སོགས་པ་བརྒྱ་རྩ་བརྒྱད་ཀྱིས་སྦྱིན་སྲེག་བྱའོ། །དེ་ནས་མཚན་བརྒྱ་རྩ་བརྒྱད་ཀྱིས་བསྟོད་ནས་རྣམ་པ་བཅུ་གཉིས་ཀྱི་ཕྱག་རྒྱའི་མཆོད་པས་བཅོམ་ལྡན་འདས་འཁོར་དང་བཅས་པ་མཆོད་ཅིང་ཕྱག་བྱས་ནས། བཅོམ་ལྡན་འདས་ལ་མཆོད་ཡོན་ཕུལ་ལ་སློབ་མ་རྣམས་ལྷག་པར་གནས་པར་བྱའོ། །དེ་བཞིན་དུ་ལྷག་པར་གནས་པར་བྱའོ། །སླར་ཡང་
བཅོམ་ལྡན་འདས་ལ་ཕྱག་བྱས་ནས་མཚན་བརྒྱ་རྩ་བརྒྱད་ཀྱིས་བསྟོད་ལ། མཆོད་ཡོན་ཕུལ་བ་སྔོན་དུ་འགྲོ་བས་ཡང་དག་པར་མཆོད་ཅིང་ཕྱག་བྱས་ཏེ། ཟབ་པ་དང་རྒྱ་ཆེན་པོའི་ཆོས་སློབ་མ་རྣམས་ལ་བསྟན་པར་བྱས་ལ། སློབ་མའི་ཚོགས་དང་བཅས་པའི་སློབ་དཔོན་གྱིས་དཀྱིལ་འཁོར་གྱིས་གཞིའི་མཐར་རྨི་ལམ་བརྟག་པར་བྱའོ། །དེ་ནས་སྐྱ་རེངས་འཆར་བའི་དུས་སུ་མལ་ནས་ལངས་ཏེ་སྔ་མ་བཞིན་དུ་རྣལ་འབྱོར་ཆེན་པོ་བྱས་ལ། ཉི་མ་འཆར་ཀའི་དུས་སུ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཆོ་གས་དེ་བཞིན་དུ་ནམ་མཁའི་ཕྱོགས་སུ་དཀྱིལ་འཁོར་བཞག་ལ་ཐིག་གདབ་པར་བྱའོ། །དེ་ནས་དེ་བཞིན་དུ་རྡུལ་ཚོན་བཀྱེ་བར་བྱ་སྟེ། དཀྱིལ་འཁོར་གྱི་དབུས་ཀྱི་ལྟེ་བ་ལ་ལྷ་མོ་བཞི་ཡང་དག་པར་འདུས་པའི་སྦྱོར་བས་བྲིས་ལ། དཔལ་རྡོ་རྗེ་སེམས་དཔའི་རས་རིས་དེ་ཤར་ཕྱོགས་སུ་མངོན་པར་ཕྱོགས་པར་བཞག་ལ། ཨོཾ་སུ་ར་ཏ་སྟྭཾ་ཧཱུཾ་ཞེས་བྱ་བཟློས་ཤིང་ནམ་མཁའི་ཕྱོགས་ནས་ཕབ་སྟེ། དཔལ་རྡོ་རྗེ་སེམས་དཔའ་རས་རིས་དེ་ལ་དགོད་པར་བྱའོ། །འདོད་ཆགས་རྡོ་རྗེ་མ་ལ་སོགས་པ་རྣམས་ཀྱང་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་སྙིང་པོ་རྣམས་ཀྱིས་སོ། །དེ་ལ་གཡས་ཕྱོགས་ན་བཞུགས་པའི་ཀཱི་ལི་ཀཱི་ལས་བཅོམ་ལྡན་འདས་རྡོ་རྗེ་སེམས་དཔའ་ལ་འཁྱུད་ནས་སྤྲོ་བ་བསྐྱེད་པར་འགྱུར་བར་བྲི་བར་བྱའོ། །ཀཱི་ལི་ཀཱི་ལའི་གཡས་ཕྱོགས་ན་འདོད་ཆགས་རྡོ་རྗེ་མ་སྟེ། གཡོན་པ་རྡོ་རྗེ་ཁུ་ཚུར་གྱིས་རྡོ་རྗེའི་གཞུ་བླངས་ཏེ། ཕྱག་གཡས་པས་རྡོ་རྗེ་རྩེ་གཅིག་པའི་མདེའུ་དང་ལྡན་པའི་མདའ་གསོར་བ་ལ་བརྩོན་པའོ། །རྡོ་རྗེ་དྲན་མ་ནི་ཕྱག་གཡོན་པས་ཆུ་སྲིན་གྱི་རྒྱལ་མཚན་འཆང་བ་སྟེ། བཅོམ་ལྡན་འདས་ཀྱི་གཡོན་ལོགས་སུ་བཅོམ་ལྡན་འདས་ཀྱི་བསྙེམས་པའི་ཕྱག་གིས་ཡོངས་སུ་འཁྱུད་པའོ། །རྡོ་རྗེ་དྲན་མའི་གཡོན་ལོགས་སུ་རྡོ་རྗེ་འདོད་པའི་དབང་ཕྱུག་མ་སྟེ། གཡོན་པའི་རྡོ་རྗེ་ཁུ་ཚུར་རྡོ་རྗེ་དྲིལ་བུ་དང་བཅས་པས་བསྙེམས་པ་མཛད་ནས་ཕྱག་གཡས་པས་མེ་ཏོག་གི་ཕྲེང་བ་བླངས་ཏེ་དེས་བཅོམ་ལྡན་འདས་བསྣུན་པར་མཛད་པར་བྲི་བར་བྱའོ། །རྡོ་རྗེ་སེམས་དཔའི་མཚམས་རྣམས་སུ། །དུས་ཀྱི་མཆོད་པ་དགོད་པར་བྱ། །རབ་ཏུ་དགའ་མའི་དགའ་བ་དང༌། །སྤྱན་དང་
དེ་བཞིན་དཔལ་ཆེན་མོ། །མེ་ཏོག་སྤོས་དང་མར་མེ་ཆེ། །དྲི་རྣམས་སྟེང་དུ་ཀ་པུ་ཏས། །ལྷ་མོ་རྡོ་རྗེ་རྒྱལ་མོ་རྣམས། །དེ་ཡི་ཕྱག་རྒྱ་བཤད་པར་བྱའོ། །ཧེ་བཛྲ་ར་ཏི་མ་ཧཱ་ར་ཏི་བཛྲ་ཧོ། །ཨོཾ་བཛྲ་ལོ་ཙ་ནེ། མ་ཧཱ་ཤྲཱི་བཛྲ་ཧཱ། སྒེག་མོ་བཞད་མ་གླུ་མ་ཆེ། །གར་མ་ལྷ་ཡི་བུ་མོའི་ཚོགས། །འདི་དག་སྒེག་མའི་རྡོ་རྗེ་མ། །ཕྱི་ཡི་མཚམས་སུ་དགོད་པར་བྱ། །ཧེ་ར་ཏི་བཛྲ་བི་ལ་སི་ན་ཏྲ་ཊ། བི་ག་བ་ཏི་བཛྲ་ཧ་ས་ཧ་ཧ། ཧེ་ར་ཏི་བཛྲ་གི་ཏེ་ཏེ་ཏེ། ཧེ་ར་ཏི་བཛྲ་ནི་ཏི་པེ་པ་པེ་པ། རྡོ་རྗེ་ལྕགས་ཀྱུ་ཞགས་པ་མ། །རྡོ་རྗེ་ལྕགས་སྒྲོག་དྲིལ་པུ་མ། །སྒོ་སྲུང་མ་ནི་བཞི་པོ་དག །སྒོ་རྣམས་ལ་ནི་བཞུགས་པ་ཡིན། །བཛྲ་ཨཾ་ཀུ་ཤ་ཛཿ། བཛྲ་པཱ་ཤ་ཧཱུཾ། བཛྲ་ཤཾ་ཀ་ལེ་བཾ། བཛྲ་གྷ་ཎྚེ་ཧོཿ་ཞེས་བྱ་བའོ། །རྡོ་རྗེ་སེམས་དཔའི་དཀྱིལ་འཁོར་ལས་གསུངས་པ་ཁོ་ནའི་ཕྱག་རྒྱ་ཆེན་པོ་རྣམས་ཀྱིས་བྲི་བར་བྱ་སྟེ། དེ་ལ་དཔལ་རྡོ་རྗེ་སེམས་དཔའ་དང་ལྷ་མོ་བཞི་པོ་ནི་རབ་ཏུ་གྲགས་པ་ཡིན་ནོ། །རབ་ཏུ་དགའ་མ་དང༌། སྒེག་མོ་དང༌། ལྕགས་ཀྱུ་མ་རྣམས་ནི་སྐུ་མདོག་དཀར་དམར་རོ། །དགའ་མ་དང༌། བཞད་མ་དང༌། ཞགས་པ་མ་ལ་སོགས་པ་རྣམས་ནི་པླ་ཀྴ་ལྟར་དཀར་བའོ། །སྤྱན་མ་དང༌། གླུ་མ་དང༌། ལྕགས་སྒྲོག་མ་རྣམས་ནི་ཨུཏྤལ་སྔོན་པོའི་འདབ་མ་དང་མཚུངས་པའི་མདོག་ཅན་ནོ། །དཔལ་ཆེན་མོ་དང༌། གར་མ་དང༌། དྲིལ་བུ་མའི་སྐུ་མདོག་སེར་མོའོ། །དེ་ལྟར་དཀྱིལ་འཁོར་བྲིས་ལ། རྡོ་རྗེ་ཧཱུཾ་མཛད་ཀྱི་རྣལ་འབྱོར་བྱས་ལ་ཇི་ལྟ་བ་བཞིན་དུ་ཞུགས་ཏེ་སྒོ་དབྱེ་བར་བྱ་སྟེ། སླར་ཡང་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་བདག་ཉིད་རྡོ་རྗེ་སེམས་དཔའ་རྣམ་པར་བསྒོམས་ཏེ། འདུད་པ་བྱས་ནས་མཚན་བརྒྱ་རྩས་བསྟོད་པར་བྱའོ། །དེ་ནས་བཅོམ་ལྡན་འདས་རྡོ་རྗེ་སེམས་དཔའི་མདུན་དུ་སེམས་དཔའི་སྐྱིལ་མོ་ཀྲུང་གིས་འདུག་སྟེ། རྡོ་རྗེ་དྲིལ་བུ་དང་བཅས་པའི་གསང་བའི་ལྕགས་ཀྱུ་མ་བཅིངས་ཏེ། ཛ་མཆོག་དང་པོ་ཞེས་བྱ་བ་ལ་སོགས་པའི་སྤྱན་འདྲེན་པའི་གླུས་བཅོམ་ལྡན་འདས་འཁོར་དང་བཅས་པ་བཀུག་ལ་དཀྱིལ་འཁོར་དུ་བཅུག་སྟེ། རྡོ་རྗེ་གནོད་སྦྱིན་གྱིས་བགེགས་བསྐྲད་པ་ལ་སོགས་པ་བྱས་ནས་རྡོ་རྗེ་ཁུ་ཚུར་གཉིས་ཀྱིས་སྒོ་རྣམས་བཅད་ལ། རྡོ་རྗེ་གོ་ཆས་གོ་བཀོན་ནས་ཡི་གེ་ཧཱུཾ་བརྗོད་ཅིང་
བཅོམ་ལྡན་འདས་འཁོར་དང་བཅས་པ་ལ་མཆོད་ཡོན་ཕུལ་ཏེ། དམ་ཚིག་གི་ཕྱག་རྒྱ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ་དབང་བསྐུར་བའི་ཕྱག་རྒྱས་དབང་བསྐུར་ཏེ། དེ་ལ་བཅོམ་ལྡན་འདས་དང༌། འདོད་ཆགས་རྡོ་རྗེ་མ་དང༌། རབ་ཏུ་དགའ་མ་དང༌། སྒེག་མོ་དང༌། ལྕགས་ཀྱུ་མ་ནི་དེ་བཞིན་གཤེགས་པ་མི་བསྐྱོད་པའི་ཅོད་པན་གྱི་ཕྱག་རྒྱས་དབང་བསྐུར་བའོ། །ཀཱི་ལི་ཀཱི་ལ་དང༌། དགའ་མ་དང༌། བཞད་མ་དང༌། ཞགས་པ་མ་ནི་དེ་བཞིན་གཤེགས་པ་རིན་ཆེན་འབྱུང་ལྡན་གྱི་ཅོད་པན་གྱི་ཕྱག་རྒྱས་དབང་བསྐུར་བའོ། །རྡོ་རྗེ་དྲན་མ་དང༌། སྤྱན་མ་དང༌། གླུ་མ་དང༌། ལྕགས་སྒྲོག་མ་ནི་དེ་བཞིན་གཤེགས་པ་འོད་དཔག་མེད་ཀྱི་ཅོད་པན་གྱི་ཕྱག་རྒྱས་དབང་བསྐུར་བའོ། །རྡོ་རྗེ་འདོད་པའི་དབང་ཕྱུག་མ་དང༌། དཔལ་ཆེན་མོ་དང༌། གར་མ་དང༌། རྡོ་རྗེ་དྲིལ་བུ་མ་ནི་དེ་བཞིན་གཤེགས་པ་དོན་ཡོད་པར་གྲུབ་པའི་ཅོད་པན་གྱི་ཕྱག་རྒྱས་དབང་བསྐུར་བར་བྱའོ། །དེ་ནས་མཆོད་ཡོན་ཕུལ་བ་བུམ་པ་གང་བ་ལ་སོགས་པའི་མཆོད་པ་ཐམས་ཅད་ཀྱིས་བཅོམ་ལྡན་འདས་འཁོར་དང་བཅས་པ་དེ་བཞིན་དུ་ཡང་དག་པར་མཆོད་ལ། ཕྱི་རོལ་དུ་གཏོར་མ་གཏང་བར་བྱའོ། །དེ་ནས་རྡོ་རྗེ་གནོད་སྦྱིན་དང༌། རྡོ་རྗེ་མེ་དང༌། སངས་རྒྱས་སྤྱན་རྣམས་ཀྱིས་དེ་བཞིན་དུ་སྦྱིན་སྲེག་བྱས་ཏེ། ཐབ་ཁུང་གི་དབུས་སུ་དཔལ་རྡོ་རྗེ་སེམས་དཔའ་འཁོར་དང་བཅས་པ་ཡི་གེ་ཧཱུཾ་ལ་སོགས་པ་བརྗོད་ཅིང་མེ་ཏོག་གི་དཀྱིལ་འཁོར་གྱི་ཚུལ་དུ་བཀོད་ལ། མར་ལ་སོགས་པའི་རྫས་རྣམས་རེ་རེ་ཞིང་ཡང་ཡི་གེ་ཧཱུཾ་གིས་བརྒྱ་རྩ་བརྒྱད་དུ་སྦྱིན་སྲེག་བྱའོ། །འདོད་ཆགས་རྡོ་རྗེ་མ་སོགས་ཀྱི། །སྙིང་པོ་རྣམས་ཀྱིས་བདུན་བདུན་བསྲེག །དེ་ནས་ཡི་གེ་ཧཱུཾ་ལ་སོགས་པ་བརྗོད་ཅིང་མེ་ཏོག་དག་ཁོ་ནས་དཔལ་རྡོ་རྗེ་སེམས་དཔའ་ལ་སོགས་པ་རྣམས་བྲིས་པའི་དཀྱིལ་འཁོར་དང་གཅིག་ཏུ་བྱས་ཏེ། ཇི་ལྟ་བ་བཞིན་དུ་རང་གི་གདོང་གཡོགས་བཅིང་བ་ལ་སོགས་པ་བྱས་ལ། ཕྱག་འཚལ་བ་ལ་སོགས་པ་སྔོན་དུ་འགྲོ་བའི་སྔོམ་པ་སྔ་མ་བཞིན་དུ་བླངས་ནས། ཨོཾ་སརྦ་ཡོ་གཙི་ཏྟ་ཨུ་པཱ་ད་ཡཱ་མི་ཞེས་བྱ་བས་བྱང་ཆུབ་ཆེན་པོའི་སེམས་བསྐྱེད་ནས། གཡས་
པའི་རྡོ་རྗེ་ཁུ་ཚུར་གྱིས་དང་པོའི་རྡོ་རྗེ་བླངས་ཏེ། རང་གི་སྙིང་གར་ཡི་གེ་ཧཱུཾ་གིས་བཀོད་ལ་འདི་ལྟར་བརྗོད་པར་བྱ་སྟེ། སུ་ར་ཏེ་ས་མ་ཡ་སྟྭཾ་ཧོ། །བཛྲ་སིདྡྷེ་ཡ་ཐཱ་སུ་ཁཾ་ཞེས་བྱའོ། །དེ་ནས་སྒོའི་ཕྱི་རོལ་ན་གནས་པའི་བུམ་པའི་ཆུ་གཡས་པའི་རྡོ་རྗེ་ཁུ་ཚུར་གྱིས་བླངས་པ་དེས་ཡི་གེ་ཧཱུཾ་བརྗོད་ཅིང་བདག་ཉིད་ལ་དབང་བསྐུར་ཏེ། ཇི་ལྟར་བཤད་པའི་མཚན་ཅན་གྱི་རྡོ་རྗེ་ཤུགས་ཀྱིས། རྡོ་རྗེའི་གར་གྱི་སྦྱོར་བ་ཡིས། །སྤྱི་བོར་མེ་ཏོག་ཀ་སུ་ཏ། །རྡོ་རྗེ་གླུ་ཡིས་གར་བྱ་ཞིང༌། །གྲོང་ཁྱེར་དུ་ནི་རབ་འཇུག་བྱ། །དངོས་གྲུབ་ཀུན་གྱི་བདེ་བ་ཉམས་དགའ་བའི། །ཐར་པའི་གྲོང་དུ་བཅོམ་ལྡན་བདེ་ཆེན་འཇུག །མཆོག་ཏུ་བདེ་བ་དམ་པའི་དངོས་གྲུབ་ཀྱིས། །ཛཿ་ཧཱུཾ་བཾ་ཧོཿ་རབ་ཏུ་གྲུབ་པར་མཛོད། །ཅེས་བྱ་བ་དང༌། ཤར་གྱི་སྒོ་ནས་རྡོ་རྗེ་ལྕགས་ཀྱུ་མའི་སྙིང་པོ་བརྗོད་ཅིང་རྡོ་རྗེ་ལྕགས་ཀྱུ་མས་བདག་ཉིད་བཀུག་པར་བསམ་པར་བྱའོ། །དེ་ནས་ལྷོའི་སྒོ་ནས་དེ་བཞིན་དུ་འཇུག་པ་དང༌། རྡོ་རྗེ་ཞགས་པ་མའི་སྙིང་པོ་ཡང་བརྗོད་པར་བྱའོ། །དེ་ནས་དེ་བཞིན་དུ་ནུབ་ཀྱི་སྒོ་ནས་འཇུག་པ་དང༌། རྡོ་རྗེ་ལུ་གུ་རྒྱུད་མའི་སྙིང་པོ་ཡང་བརྗོད་པར་བྱའོ། །དེ་ནས་སླར་ཡང་བྱང་གི་སྒོ་ནས་དེ་བཞིན་དུ་འཇུག་པ་དང༌། རྡོ་རྗེ་དྲིལ་བུ་མའི་སྙིང་པོ་ཡང་བརྗོད་པར་བྱའོ། །སླར་ཡང་ཤར་གྱི་སྒོ་ནས་དེ་བཞིན་དུ་ཞུགས་ནས་འདི་ལྟར་བརྗོད་པར་བྱ་སྟེ། མ་ཧཱ་ར་སུ་ཏྲི་ཏ་སུ་ཏྲོ་ཤ་སུ་སུ་ཁོ་བཛྲ་ས་ཏྭ་ཨ་དྱ་སིདྡྷ་མཾ་ཞེས་བྱ་བའོ། །དེ་ནས་རྡོ་རྗེ་གར་ལས་བྱུང་བའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་བཅིངས་ལ། གཡོན་པའི་རྡོ་རྗེ་མིག་གིས་ནི། །དེ་ཡི་མགོན་པོ་ལ་ཕྱག་བྱ། །གཡོན་བསྙེམས་བཞིན་པས་བསྟོད་པ་ཡིས། །སྒེག་མའི་མིག་ནི་བཙུམས་པའོ། །ཨོཾ་མཆོག་ཏུ་བདེ་བའི་སེམས་ནི་རོལ་བར་ལྡན། །སྒེག་པའི་ཕྱག་གིས་བཅོམ་ལྡན་འདས་ལ་འདུད། །ཛཿ་ཧཱུཾ་བཾ་ཧོཿ་ཧི་ཧི་ཧི་ཧི་ཧེ། །མགོན་པོ་སྙིམ་པའི་མེ་ཏོག་བཞེས་སུ་གསོལ། །སླར་ཡང་འཇུག་པའི་ཕྱག་རྒྱ་བཅིངས་ལ་དཀྱིལ་འཁོར་ལ་ལན་གསུམ་བསྐོར་བ་བྱས་ཏེ། བཅོམ་ལྡན་འདས་ཀྱི་མདུན་དུ་འདུག་ལ་དེ་ཁོ་ན་ཉིད་འདི་ལན་ཅིག་བརྗོད་པར་བྱ་སྟེ། འདོད་ཆགས་ཆེན་པོ་བདེ་བ་ཆེ། །རྡོ་རྗེ་ཆེན་པོ་ནོར་ཆེ་བ། །ཡེ་ཤེས་ཆེན་པོ་ལས་ཆེན་པོ། །རྡོ་རྗེ་སེམས་དཔའ་དེང་བདག་གྲུབ། །ཅེས་བྱའོ། །འདི་ཡང་བརྗོད་པར་བྱ་སྟེ། ཛཿ་ཧཱུཾ་
བཾ་ཧོཿ། པྲ་ཏི་སིདྡྷི་མཾ་ཞེས་བྱའོ། །དེ་ནས་རྡོ་རྗེའི་ཆུ་འཐུངས་ལ། གཡོན་པའི་ཁྲོ་བོའི་ཁུ་ཚུར་གྱིས་སེམས་དཔའ་རྡོ་རྗེ་མའི་ཕྱག་རྒྱ་དྲལ་ཞིང་ཧཱུཾ་ཨ་ཞེས་བྱ་བས་ལན་བརྒྱ་བརྗོད་ཅིང་བདག་ཉིད་ལ་དབབ་པར་བྱའོ། །དེ་ནས་མེ་ཏོག་སིལ་མ་གཏོར་བར་བྱ་སྟེ། །ཀ་པུ་ཏ་ཡི་ཐལ་མོ་ནི། །སྤྱི་བོར་བཞག་སྟེ་ཕབ་ནས་ཀྱང༌། །སྒེག་བཅས་མཐེ་བོང་མཐེ་ཆུང་བར། །བཀྲོལ་ནས་རྡོ་རྗེ་འཛིན་ལ་དབུལ། །དེ་ནས་ཕྱག་འཚལ་བའི་སྔགས་བརྗོད་ཅིང་བྱའོ། །དེ་ནས་ཕྲེང་བ་དེ་སྔགས་འདིས་རང་གི་སྤྱི་བོར་བཅིང་བར་བྱ་སྟེ། །འདོད་པ་ཀུན་གྱི་དབང་ཕྱུག་ཉིད། །སེམས་ཅན་ཀུན་ལ་བདེ་སྩོལ་བ། །ཐམས་ཅད་གྲུབ་ཕྱིར་རྡོར་འཛིན་གྱི། །དེ་རིང་ཁྱེད་ལ་དབང་བསྐུར་མཛད། །ཨོཾ་མ་ཧཱ་སུ་ཁ་བཛྲ་ས་ཏྭ་སྟྭཾ་ཨ་བྷི་ཥིཉྩ་སུ་ར་ཏ་སྟྭཾ་ཞེས་བྱ་བའོ། །དེ་ནས་བཛྲ་ཙ་ཀྵུ་ས་མ་ཡ་སརྦཾ་སུ་ར་ཏ་སྟྭཾ་ཞེས་བྱ་བ་འདིས་གདོང་གཡོགས་དགྲོལ་བར་བྱའོ། །དེ་ནས་ཡི་གེ་ཧཱུཾ་ལས་མིག་གཉིས་སུ་རྡོ་རྗེ་རྣམ་པར་བསམས་ལ་ཧེ་བཛྲ་པཱ་ཤྱ་ཞེས་བརྗོད་ཅིང༌། རྡོ་རྗེ་ལྕགས་ཀྱུ་མ་ནས་བརྩམས་ཏེ་དཔལ་རྡོ་རྗེ་སེམས་དཔའི་མཐར་ཐུག་པའི་བར་གྱི་དཀྱིལ་འཁོར་ལ་བལྟ་བར་བྱའོ། །དེ་ནས་ཏིཥྛ་བཛྲ་ཞེས་བྱ་བ་ལ་སོགས་པས་རང་གི་སྙིང་གར་འཇུག་པའི་ཕྱག་རྒྱ་བཅིངས་ཏེ་དགྲོལ་བར་བྱའོ། །རྡོ་རྗེ་ཐལ་མོ་བསྐོར་བཤིས་པར་བརྗོད་པ་སྦྱིན་པའི་ཚུལ་གྱིས་སྙིང་གའི་ཕྱོགས་སུ་བཟུང་ཞིང་མཚན་བརྒྱ་རྩས་བཅོམ་ལྡན་འདས་ལ་བསྟོད་དེ། འདོད་ཆགས་རྡོ་རྗེ་མ་ལ་སོགས་པ་གསང་བའི་མཆོད་པ་བཞི་དང་གླུ་དང་གར་གྱི་མཆོད་པས་ཡང་དག་པར་མཆོད་ལ། རང་གི་བདག་ཉིད་རྡོ་རྗེ་སེམས་དཔར་བྱིན་གྱིས་བརླབས་ཏེ། དཀྱིལ་འཁོར་གྱི་ལྷ་ཐམས་ཅད་རང་གི་དམ་ཚིག་གི་ཕྱག་རྒྱ་རྣམས་ཀྱིས་རང་གི་ལུས་ལ་གནས་ཇི་ལྟ་བ་བཞིན་དུ་རྣམ་པར་བཀོད་ནས། དེ་བཞིན་གཤེགས་པ་ཐམས་ཅད་ལེགས་སོའི་སྦྱོར་བས་དེ་བཞིན་དུ་ལུས་ཀུན་ལ་ཡང་དག་པར་བཅུག་ལ་བཞག་སྟེ། ཕྱིའི་དཀྱིལ་འཁོར་གྱི་ནང་དུ་ཤར་གྱི་སྒོར་མངོན་པར་ཕྱོགས་པར་སྣ་ཚོགས་པདྨ་བྲིས་ཏེ། དེའི་སྟེང་དུ་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོས་ཉེ་བར་འདུག་པའམ། ཡང་ན་དབང་བསྐུར་བའི་དཀྱིལ་འཁོར་དུ་སྣ་ཚོགས་པདྨ་བྲིས་
པའི་རས་རིས་ཀྱིས་བཀབ་པའི་སེང་གེའི་གདན་ལ་འདུག་སྟེ། མཆོད་ཡོན་ཕུལ་ལ་སྔོན་དུ་འགྲོ་བའི་མཆོད་པ་ལྔས་བདག་ཉིད་ཡང་དག་པར་མཆོད་ལ། རྣམ་པར་རྒྱལ་བའི་བུམ་པ་ལས་རྡོ་རྗེ་ཁུ་ཚུར་གྱིས་ཆུ་བླངས་ཏེ་དབང་བསྐུར་བར་བྱ་ཞིང༌། ཆུ་དེ་བཏུང་བར་ཡང་བྱའོ། །དེ་ཡང་ཨོཾ་བཛྲ་ཨ་བྷི་ཥི་ཉྩ་ཧཱུཾ་ཞེས་བྱ་བ་བརྗོད་ཅིང༌། །འདི་ནི་ཁྱོད་ཀྱི་དམྱལ་པའི་ཆུ། །ཞེས་བྱ་བ་ལ་སོགས་པ་མནའ་བསྒག་པའི་སྙིང་པོ་ཡང་བརྗོད་ཅིང་བྱའོ། །དེ་ནས་གོས་དང་རྒྱན་རྣམས་ཀྱིས་བདག་ཉིད་བརྒྱན་ལ། སངས་རྒྱས་ལྔའི་ཅོད་པན་གྱི་ཕྱག་རྒྱའི་དབང་བསྐུར་བ་དང༌། ཕྱིའི་ཡང་དེ་བཞིན་གཤེགས་པ་ལྔའི་ཅོད་པན་དང་དར་དཔྱངས་ཀྱིས་དབང་བསྐུར་བ་བླངས་ནས། རྡོ་རྗེ་དང་བདག་པོ་དང༌། མིང་གི་དབང་བསྐུར་བ་དང༌། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱང་གཟུང་བར་བྱའོ། །དེ་ནས་ཕྱིའི་མེ་ཏོག་ལ་སོགས་པས་བདག་ཉིད་ཡང་དག་པར་མཆོད་ལ། འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་ཀྱིས་ཡང་དག་པར་མཆོད་པར་བྱའོ། །དེ་ནས་དེ་ཁོ་ན་ཉིད་ཆོས་དང་དམ་ཚིག་རྣམས་བླངས་ལ་དྲིལ་བུ་དཀྲོལ་ཞིང་དམ་ཚིག་གསུམ་གྱི་གླུའི་མཆོད་པ་བྱ་བ་ཡིན་ནོ། །དེ་ནས་བཅོམ་ལྡན་འདས་ལ་ཕྱག་བྱས་ནས་སྙིང་པོ་དང་ཕྱག་རྒྱ་བཞིའི་ཡེ་ཤེས་བཅོམ་ལྡན་འདས་ལས་བླངས་ལ་ཚིགས་སུ་བཅད་པ་ལྔས་རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་བླངས་ཏེ། སླར་ཡང་བདག་བྱིན་གྱིས་བརླབ་པ་ལ་སོགས་པ་དང༌། ཇི་ལྟར་མངོན་པར་འདོད་པའི་བཟླས་པ་བྱས་ཏེ་འབྱུང་བར་བྱའོ། །སློབ་དཔོན་གྱི་ལས་ཀྱི་ཆོ་ག་ཡོངས་སུ་རྫོགས་པར་བྱ་བའོ།། །།དེ་ནས་སློབ་མ་གཞུག་པ་ལ་སོགས་པའི་ཆོ་ག་བྱ་སྟེ། རྡོ་རྗེ་མཆོད་ཡོན་བསྐོར་ཞིང་གནས། །སྙིང་གར་བཞག་སྟེ་གདོང་བསྐྱོད་པའི། །སྤྱི་བོས་ཡང་དག་ཕྱག་བྱས་ནས། །དངོས་གྲུབ་ཐམས་ཅད་རབ་གྲུབ་པའོ། །བདེ་བ་ཆེན་པོ་ཆགས་པ་ཆེ།། འགྲོ་ཀུན་ལ་ཡང་འགྲུབ་འགྱུར་ཞེས། །ལན་གསུམ་བསྐོར་བ་བྱས་ནས་ནི། །བསྟོད་དེ་དཀྱིལ་འཁོར་དུ་གཞུག་བྱ། །དེ་ནས་དུས་ཀྱི་མཆོད་པ་ཡིས། །བདེ་ཆེན་ཡང་དག་མཆོད་ནས་ནི། །རྡོ་རྗེ་བཟུང་ནས་དབང་བསྐུར་ཕྱིར། །དེ་བཞིན་སློབ་མ་འཇུག་པར་བྱ། །དེ་ལ་བསླབ་པའི་གཞི་
ལྔ་ཡོངས་སུ་གཟུང་བའམ། དགེ་ཚུལ་ལམ། དགེ་སློང་གི་སྡོམ་པ་ཡོངས་སུ་བཟུང་པའི་སློབ་མ་ཇི་ལྟ་བ་བཞིན་དུ་ལྷག་པར་གནས་པར་བྱས་པས་སྡོམ་པ་གཟུང་བར་བྱ་བ་ཡིན་ནོ། །དེས་ཀྱང་སློབ་དཔོན་ལ་ཕྱག་བྱས་ནས། །དགའ་ཆེན་ཁྱོད་བདག་སྟོན་པ་པས། །སློབ་དཔོན་ཁྱོད་ནི་དགོངས་སུ་གསོལ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་ཉིད་དེ་བདག་ལ་སྩོལ། །སྡོམ་པ་ཡང་ནི་བདག་ལ་སྩོལ། །ཞེས་བྱའོ། །དེ་ནས་རྡོ་རྗེ་གནོད་སྦྱིན་ཡོངས་སུ་བཟླས་པའི་སྣ་ཚོགས་པའི་གོས་ཀྱིས་སྟོད་གཡོགས་བྱས་ཤིང༌། རྡོ་རྗེ་ལྕགས་ཀྱུ་མ་ལ་སོགས་པ་ཡོངས་སུ་བཟླས་པའི་སྣ་ཚོགས་པའི་གོས་ཀྱི་གདོང་གཡོགས་དང་ལྡན་ཞིང༌། མེ་ཏོག་གི་ཕྲེང་བ་དང་བཅས་པའི་དྲི་ཞིམ་པོར་བྱས་པའི་སློབ་མ་ཕྱག་བཞི་ལ་སོགས་པ་སྔོན་དུ་འགྲོ་བས་སྡོམ་པ་འཛིན་དུ་གཞུག་པར་བྱའོ། །དེའི་རྗེས་ལ། ཨོཾ་སརྦ་ཡོ་ག་ཙི་ཏྟ་ཨུ་པཱ་ད་ཡཱ་མི་ཞེས་བྱ་བས་བྱང་ཆུབ་ཏུ་སེམས་བསྐྱེད་དུ་གཞུག་གོ །དེ་བཞིན་དུ་དེའི་སྙིང་གར་སུ་ར་ཏེ་ས་མ་ཡ་སྟྭཾ་ཧོ་བཛྲ་སིདྡྷི་ཡ་ཐཱ་སུ་ཁཾ་ཞེས་བྱ་བས་རྡོ་རྗེ་བསྐྱེད་ལ། དེ་རྡོ་རྗེ་སེམས་དཔར་བྱིན་གྱིས་བརླབས་ཏེ། དྲི་དང་མེ་ཏོག་ལ་སོགས་པས་མཆོད་ནས་ཡོན་གྱི་མཆོག་བླངས་ལ་རྡོ་རྗེ་ཤུགས་ཀྱིས་རང་འཇུག་པའི་ཚུལ་དུ་བཅུག་ནས། དགའ་བ་ཆེན་པོ་ནི་ཞེས་བྱ་བ་བརྗོད་དུ་གཞུག་གོ །དེ་ནས་དེ་ལ་ཇི་ལྟ་བ་བཞིན་དུ་དབབ་པ་བསྐྱེད་ལ། དེ་བཞིན་དུ་སློབ་མ་མེད་ཏོག་དོར་དུ་གཞུག་གོ །དེ་ནས་ཕྲེང་བའི་དབང་བསྐུར་བ་དེ་ལ་བྱིན་ནས་དེའི་གདོང་གཡོགས་དགྲོལ་བར་བྱས་ལ་དཀྱིལ་འཁོར་བསྟན་པར་བྱའོ། །དེ་ནས་སླར་ཡང་འཇུག་པའི་ཕྱག་རྒྱ་བཅིང་དུ་བཅུག་ནས་དེ་ཉིད་ཀྱི་སྙིང་གར་དགྲོལ་བར་བྱའོ། །དེ་ནས་དེ་བཞིན་དུ་དེ་ཉིད་རྡོ་རྗེ་སེམས་དཔར་བྱིན་གྱིས་བརླབས་ཏེ། དེའི་ལུས་ལ་རྡོ་རྗེ་སེམས་དཔའ་ལ་སོགས་པ་རྣམས་གནས་ཇི་ལྟ་བ་བཞིན་དུ་དམ་ཚིག་གི་ཕྱག་རྒྱ་རྣམས་ཀྱི་ས་བཀོད་ལ། དེ་བཞིན་གཤེགས་པ་རྣམས་ཀྱང་ཇི་ལྟ་བ་བཞིན་དུ་བཀོད་དེ། སློབ་དཔོན་དབང་བསྐུར་བའི་ཆོ་གས་ཡོན་གྱི་མཆོག་བླངས་ཏེ། ཆུའི་དབང་བསྐུར་བ་དང༌། ཕྱག་རྒྱ་དང༌། ཅོད་པན་དང༌། དར་དབྱངས་དང༌། རྡོ་རྗེ་དང༌། བདག་པོ་དང༌། མིང་གི་དབང་བསྐུར་བ་རྣམས་ཀྱིས་
དབང་བསྐུར་བར་བྱའོ། །དེ་ནས་དེ་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་སྦྱིན་པར་བྱའོ། །དེ་ནས་མེ་ཏོག་ལ་སོགས་པ་དང༌། འདོད་ཆགས་རྡོ་རྗེ་མ་ལ་སོགས་པས་དེ་ཡང་དག་པར་མཆོད་ལ། གསང་བ་ལྔའི་དེ་ཁོ་ན་ཉིད་ཆེན་པོའི་བཤད་པ་བྱས་ལ། དེ་ཁོ་ན་ཉིད་དང༌། ཆོས་དང༌། དམ་ཚིག་རྣམས་དེ་ལ་སྦྱིན་ཏེ། དམ་ཚིག་གསུམ་གྱི་རྡོ་རྗེའི་གླུའི་མཆོད་པ་སློབ་ཏུ་གཞུག་གོ །དེ་ནས་ཚིགས་བཅད་ལྔས་རྗེས་སུ་གནང་བ་དང༌། མནའ་སྔོན་དུ་སོང་བའི་སྙིང་པོ་དང༌། ཕྱག་རྒྱ་བཞིའི་ཡེ་ཤེས་བྱིན་ལ། གཟེངས་བསྟོད་པ་དང༌། ལུང་བསྟན་པས་ལུང་བསྟན་པར་བྱའོ། །དེ་ནས་ཇི་ལྟར་ཞུགས་པ་རྣམས་ལ་དེ་བཞིན་གཤེགས་པ་ཐམས་ཅད་ལ་སོགས་པའི་དབུགས་དབྱུང་བ་དང༌། སྔོན་དུ་སྤྱོད་པ་བྱས་པའི་སློབ་མའི་ཆོ་ག་དང་བཅས་པས་རྗེས་སུ་བསྒྲུབ་པ་དང༌། སོ་སོར་རྗེས་སུ་བསྒྲུབ་པ་བྱིན་ལ། ཚོགས་ཀྱི་དཀྱིལ་འཁོར་བྲིས་པའི་དཀྱིལ་འཁོར་རམ། ལུགས་མའམ། བརྡུངས་པའི་ལྷའི་སྐུ་དང་ལྡན་པའི་དཀྱིལ་འཁོར་དུ་ཞུགས་ཏེ། རྡོ་རྗེ་དང་དྲིལ་བུ་གཉིས་བརླ་གཉིས་ལ་བཅིངས་ཏེ། དེས་དེ་རྒྱུན་མཆད་པར་དཀྲོལ་ཞིང་སྐུ་གསུང་ཐུགས་ཀྱི་རྡོ་རྗེའི་དོན་བསྒོམ་པར་བྱའོ། །སླར་ཡང་གཡས་པའི་རོལ་མོ་དང་བཅས་པའི་རྡོ་རྗེ་དང་དྲིལ་བུ་དང་ལྡན་པའི་བི་ཝང་ལ་སོགས་པ་དང། དེ་ཁོ་ན་ཉིད་ཀྱི་གླུ་དང་བཅས་པའི་ཡི་གེ་ཧཱུཾ་གི་གླུས་རྗེས་སུ་བསྒྲུབ་པར་བྱས་པའི་སྣོད་དུ་གྱུར་པའི་སློབ་མའི་ཆོ་གས་རྗེས་སུ་བསྒྲུབ་པའི་རྣལ་འབྱོར་གྱིས་གཞག་པར་བྱས་ལ། སློབ་མའི་ཚོགས་དང་ལྷན་ཅིག་ཏུ་དཀྱིལ་འཁོར་བསྐོར་བ་ལྟ་བུའི་གར་བྱས་ལ། རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བས་རྡོ་རྗེ་སེམས་དཔའ་ལ་སོགས་པའི་གདོང་བརྙན་རང་གི་གདོང་ལ་བགོས་ལ། རྡོ་རྗེ་སེམས་དཔའ་ལ་སོགས་པའི་རྒྱན་རྣམས་ཀྱིས་བདག་ཉིད་ཡང་དག་པར་བརྒྱན་ལ། དེའི་རྣལ་འབྱོར་དང་ལྡན་པའི་ཕྱག་རྒྱ་སྣ་ཚོགས་ཀྱིས་མཆོད་པར་བྱ་བ་ཡིན་ནོ། །དང་པོར་རེ་ཞིག་རྒྱལ་མཚན་གྱི་མིང་ཅན་གྱི་རྗེས་སུ་སྒྲུབ་པ་པོས་གནས་གང་དུ་རྡོ་རྗེ་སེམས་དཔའ་བཞུགས་པ་དང༌། ཇི་ལྟ་བུ་ཡིན། ཅི་མཛད་ཅེས་བྱ་བ་དྲི་བར་བྱའོ། །དེ་ནས་སྒྲུབ་པ་པོས། དངོས་གྲུབ་ཀུན་གྱི་བདེ་བ་ཉམས་དགའ་བའི། །ཐར་པའི་གྲོང་དུ་བཅོམ་ལྡན་བདེ་ཆེན་འཇུག །མཆོག་ཏུ་བདེ་བ་དམ་པའི་
དངོས་གྲུབ་ཀྱིས། །ཛཿ་ཧཱུཾ་བཾ་ཧོཿ་རབ་ཏུ་གྲུབ་པར་མཛོད། །ཅེས་བྱ་བའི་འཇུག་པའི་གླུའི་མཆོད་པ་དང་བཅས་པས་བྱ་བ་ཡིན་ནོ། །དེ་ནས་རྡོ་རྗེ་སློབ་དཔོན་གྱིས་བརྩམས་པ་དང༌། རྒྱུད་གཞན་ལས་གསུངས་པའི་ཇི་ལྟར་རྟོགས་པའི་ཕྱག་རྒྱ་སྣ་ཚོགས་པའི་མཆོད་པ་དང༌། རྗེས་སུ་མཐུན་པའི་གླུའི་མཆོད་པ་བྱའོ། །དེ་ནས་སློབ་དཔོན་གྱིས། སངས་རྒྱས་ཀུན་གྱི་གསང་བ་ཆེ། །དམ་ཚིག་མཆོད་ནི་སྒྲུབ་པའོ། །ཞེས་བྱ་བ་ནས། ཇི་སྲིད་གསང་བ་མཆོག་ཅེས་བྱ་བའི་བར་གྱིས་གསང་བའི་དཀྱིལ་འཁོར་གྱི་གཏམ་བྱ་བ་ཡིན་ནོ། །དཀྱིལ་འཁོར་གཞན་དུ་རབ་ཏུ་འཇུག་པའི་གླུའི་མཆོད་པ་བྱས་ལ། དང་པོ་སྦྱོར་བ་དང༌། དཀྱིལ་འཁོར་རྒྱལ་པོ་མཆོག་གི་ཏིང་ངེ་འཛིན་སྟོན་པར་བྱེད་པའོ། །དེ་ནས་དང་པོའི་གནས་ཉམས་དགའ། །ཞེས་བྱ་བ་ལ་སོགས་པའི་གཏམ་བྱ་བ་ཡིན་ནོ། །རང་གི་མཚན་མ་བཟུང་སྟེ། དོན་གྱི་ཚུལ་གྱིས་ལྷའི་ཕྱག་རྒྱ་ཆེན་པོ་བཅིངས་ལ་སྙིང་པོ་བརྗོད་པར་བྱའོ། །དེ་ལྟར་འདོད་ཆགས་རྡོ་རྗེ་མ་ལ་སོགས་པས་རང་གི་ལྷའི་གཏམ་གྱིས་ཕྱག་མཚན་བླངས་ཏེ་དོན་གྱི་ཚུལ་སྦྱིན་པར་བྱའོ། །ཕྱི་ནས་རང་གི་ཕྱག་རྒྱ་ཆེན་པོ་བཅིངས་ཏེ། རང་གི་ལྷའི་སྙིང་པོ་བཟླས་ལ་དེ་ནས་སློབ་དཔོན་གྱིས་དཀྱིལ་འཁོར་བསྒོམ་པར་བྱའོ། །དེ་ནས་བསྒོམས་པས་ངལ་ན་སླར་ཡང་ཕྱག་རྒྱ་སྣ་ཚོགས་པའི་མཆོད་པ་བྱའོ། །དེ་ནས་དཀྱིལ་འཁོར་བསྒོམ་པར་བྱའོ། །དེ་ནས་ངལ་བསོས་ལ་ཡི་གེ་ཧཱུཾ་གི་གླུ་དེ་ཉིད་དེ་ཁོ་ན་ཉིད་ཀྱི་གླུ་དང་བཅས་པ་བརྗོད་ཅིང༌། ཕྱག་རྒྱ་སྣ་ཚོགས་པའི་མཆོད་པ་བྱས་ན། ཉི་མ་འཆར་བའི་དུས་སུ་རང་གི་ཕྱག་རྒྱ་ཆེན་པོའི་དངོས་གྲུབ་ཀྱིས་ཐམས་ཅད་འགྲུབ་པར་འགྱུར་རོ། །གལ་ཏེ་གྲུབ་པར་མ་གྱུར་ན་ངལ་བསོ་ཞིང་ཁྲུས་ལ་སོགས་པ་བྱས་ལ་ཟླ་བ་གཅིག་གི་བར་དུ་བསྒོམ་པར་བྱའོ། །མཐར་ཉ་ལ་མཚན་ཐོག་ཐག་ངལ་བསོ་ཞིང་ཕྱག་རྒྱ་སྣ་ཚོགས་པའི་མཆོད་པའི་སྦྱོར་བས་བསྒྲུབ་པར་བྱའོ། །དེ་ནས་ཉི་མ་འཆར་བའི་དུས་སུ་བཅོམ་ལྡན་འདས་འཁོར་དང་བཅས་པ་བྱོན་ཏེ་ཚོགས་དང་བཅས་པའི་སྒྲུབ་པ་པོའི་ལུས་དང་ངག་དང་ཡིད་ཀྱི་རྡོ་རྗེ་ལ་ཞུགས་པ་ཡིན་ནོ། །དེ་ནས་དཔལ་རྡོ་རྗེ་སེམས་དཔའ་ཉིད་དུ་འགྱུར་བ་ཡིན་ནོ། །དཔལ་མཆོག་དང་པོ་ནི་བཤད་ཟིན་ཏོ། །དེ་ལ་དེ་བཞིན་
གཤེགས་པ་ཐམས་ཅད་ནི་བྱང་ཆུབ་ཀྱི་སེམས་ལ་སོགས་པའི་རང་བཞིན་ཅན་ཏེ། དེ་དག་གི་དཔལ་དམ་ཚིག་ཆེན་པོའི་དཀྱིལ་འཁོར་ནི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ལྷ་མོ་བཞི་དང་ཡང་དག་པར་སྦྱོར་བ་ཉེ་བར་མཚོན་པ་གང་ཡིན་པ་དེའི་ཆོ་ག་ནི་རྟོགས་པ་སྟེ་དེའི་གྲུབ་པར་བྱ་བ་དང༌། སྒྲུབ་པར་བྱེད་པ་སྟོན་པའི་ངོ་བོ་ཡོངས་སུ་རྫོགས་པ་ནི་མཐར་ཐུག་པ་གསང་བ་ཞེས་བྱའོ། །དཔལ་མཆོག་དང་པོའི་རྒྱ་ཆེར་འགྲེལ་བཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དེ་བཞིན་གཤེགས་པ་ཐམས་ཅད་ཀྱི་དཔལ་དམ་ཚིག་ཆེན་པོའི་དཀྱིལ་འཁོར་གྱི་ཆོ་གའི་བཤད་བ་རྫོགས་སོ།། །།དེ་ནས་འདོད་ཆགས་ཀྱིས་འདོད་ཆགས་སྤང་བའི་ཕྱིར་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ཆེན་པོའི་རང་བཞིན་ཅན་གྱི་དེ་བཞིན་གཤེགས་པ་ཐམས་ཅད་ཀྱི་དཔལ་ཆེན་པོའི་དཀྱིལ་འཁོར་བསྟན་ནས་ད་ནི་དེ་བཞིན་གཤེགས་པའི་རྣལ་འབྱོར་པ་རྣམས་ལ་མྱུར་དུ་དངོས་གྲུབ་སྒྲུབ་པར་བྱེད་པ་དེའི་དེ་བཞིན་གཤེགས་པའི་གསང་བའི་དཀྱིལ་འཁོར་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པ་རྗོད་པར་བྱེད་པ་སྟེ། དང་པོ་སྦྱོར་བ་འདས་མ་ཐག་པ་ཉིད་དུའོ། །དང་ལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པ་ཉིད་འདིར་དང་པོའི་སྦྱོར་བའི་ཏིང་ངེ་འཛིན་ཡིན་ནོ། །དེའི་ཕྱིར་ཞེས་བྱ་བ་ནི་རྒྱུ་ལའོ། །གང་གི་ཕྱིར་མཆོག་ཏུ་གསང་བའི་ཆོ་ག་འདིས་དེ་བཞིན་གཤེགས་པའི་ཟློས་པ་པོས་སུམ་འགྱུར་གྱི་དངོས་གྲུབ་གྲུབ་པར་འགྱུར་བའི་རྒྱུ་དེའི་ཕྱིར། མཆོག་སྟེ་ཕུལ་དུ་བྱུང་བ་ཡིན་ནོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པ་རྣམས་ཏེ། དེ་དག་གི་དམ་ཚིག་ཆེན་པོ་གསུམ་ནི་ནམ་མཁའི་ཁམས་ཐམས་ཅད་དུ་བཞུགས་པའི་སྐུ་གསུང་ཐུགས་ཀྱི་རྡོ་རྗེ་སེམས་དཔའ་དང༌། འཇིག་རྟེན་དབང་ཕྱུག་དང༌། ནམ་མཁའི་སྙིང་པོའི་གཟུགས་ཀྱིས་བྱིན་གྱིས་བརླབས་པ་གང་ཡིན་པ་དེའི་དངོས་གྲུབ་ཀྱི་དོན་དུ་གསང་བའི་ཆོ་གར་གྱུར་པ་ནི་དེ་བཞིན་གཤེགས་པའི་གསང་བའི་དཀྱིལ་འཁོར་གྱི་རྟོགས་པ་སྐབས་སུ་བབ་པར་འགྱུར་རོ་ཞེས་བྱ་བའི་དོན་ཏོ། །དམ་ཚིག་ཆེན་པོ་གསུམ་
གང་ཡིན་ཞེ་ན། སངས་རྒྱས་དང་ཆོས་དང་ཞེས་བྱ་བ་ལ་སོགས་པ་ལ། དེ་ལ་དེ་བཞིན་གཤེགས་པ་ཐམས་ཅད་ཀྱིས་རྟོགས་པར་གྱུར་པས་ན་སངས་རྒྱས་ཏེ། བྱང་ཆུབ་ཆེན་པོའི་སེམས་ཀྱི་མཚན་ཉིད་ཅན་གྱི་རྡོ་རྗེ་འཆང་ངོ༌། །ཤེས་རབ་ཀྱི་ཕ་རོལ་ཏུ་ཕྱིན་པ་ལ་ཞུགས་པའི་རང་བཞིན་ཅན་གྱི་འཇིག་རྟེན་གྱི་དབང་ཕྱུག་སོ་སོ་ཡང་དག་པར་རིག་པ་བཞིའི་ངོ་བོ་ཉིད་ནི་ཆོས་སོ། །རང་བཞིན་གྱིས་འོད་གསལ་བའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བྱ་བ་ནན་ཏན་སྒྲུབ་པའི་ཡེ་ཤེས་ལས་བྱུང་བ་གཟུགས་ཐམས་ཅད་སྟོན་པའི་སྤྲུལ་པའི་སྐུའི་རང་བཞིན་ནི་དགེ་འདུན་ནོ། །གསུམ་པོ་དེ་དག་ནམ་མཁའི་ཁམས་ཐམས་ཅད་ལ་ཁྱབ་ནས་བཞུགས་ཏེ། དེའི་ཕྱིར་དམ་ཚིག་ཆེན་པོ་གསུམ་པོ་འདི་ཡིན་ནོ། །དཀོན་མཆོག་གསུམ་པོ་འདི་དག་གཟུགས་གང་གིས་གང་དུ་བྲི་བར་བྱ་ཞེ་ན། རས་ཞེས་བྱ་བ་ལ་སོགས་པ་ལ། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་རྣམས་ཀྱི་མཆོག་གི་གཟུགས་ཅན་གྱི་དཀོན་མཆོག་གསུམ་པོ་འདི་ནི་རས་ལ་བྲི་བར་བྱའོ། །ཇི་ལྟ་བུ་ཞེ་ན། གོ་ཆ་བཅས་ཏེ་གོ་ཆ་དང་ལྡན་པའོ། །རྡོ་རྗེ་མཆོག་གི་གོ་ཆ་མཆོག་ལ་སོགས་པ་རྒྱན་ཐམས་ཅད་ཀྱིས་རབ་ཏུ་མཛེས་ཤིང་ལེགས་པར་བརྒྱན་པ་བྲི་བར་བྱའོ། །དེའང་ཕྱག་མཚན་ཇི་ལྟ་བུ་དང་ལྡན་པ་ཡིན་ཞེ་ན། རྡོ་རྗེ་མཚོན་ཆ་བསྟོད་པ་ཞེས་བྱ་བ་ལ་སོགས་པ་ལ། རྡོ་རྗེ་རྩེ་གཅིག་པའི་མདེའུ་དང་ལྡན་པའི་མདའ་ནི་རྡོ་རྗེ་མཚོན་ཆ་སྟེ། དེ་བསྟོད་པ་ནི་གྱེན་དུ་འདེགས་པའོ། །རྡོ་རྗེ་མཚོན་ཆ་བསྟོད་པ་དང༌། པདྨ་དམ་པ་དང༌། རིན་པོ་ཆེ་ཆེན་པོ་འཆང་བ་ནི། །རྡོ་རྗེ་མཚོན་ཆ་བསྟོད་པ་དང༌། པདྨ་རིན་ཆེན་འཆང་བའོ། །མཆོག་ནི་ཕུལ་དུ་བྱུང་བའོ། །འདིར་བཤད་པར་འགྱུར་ཏེ། རས་ཀྱི་དབུས་སུ་སྣ་ཚོགས་པདྨའི་སྟེང་དུ་གཡོན་པའི་དེ་བཞིན་གཤེགས་པའི་ཁུ་ཚུར་གྱིས་གཞུ་བཟུང་ནས། ཕྱག་གཡས་པས་མདའ་བསྟོད་པ་ལ་སོགས་པ་བརྩོན་པའི་རྡོ་རྗེ་སེམས་དཔའི་གཟུགས་ཅན་གྱི་དེ་བཞིན་གཤེགས་པ་བྲི་བར་བྱའོ། །པདྨ་དེ་ཉིད་དུ་རྡོ་རྗེ་སེམས་དཔའི་གཡས་ལོགས་སུ་པདྨ་ཁ་འབྱེད་པའི་ཚུལ་གྱིས་འཕགས་པ་སྤྱན་རས་གཟིགས་དབང་ཕྱུག་གི་གཟུགས་འཛིན་པའི་ཆོས་བྲི་བར་བྱའོ། །པདྨ་དེ་ཉིད་དུ་རྡོ་རྗེ་སེམས་དཔའི་གཡོན་ལོགས་སུ་
རྡོ་རྗེ་རིན་པོ་ཆེ་འཛིན་པའི་ནམ་མཁའི་སྙིང་པོའི་གཟུགས་འཛིན་པའི་དགེ་འདུན་བྲི་བར་བྱའོ། །དེ་དག་ཐམས་ཅད་འོད་ཀྱི་འཁོར་ལོ་གཅིག་དང༌། རིན་པོ་ཆེའི་ཅོད་པན་གྱིས་དབང་བསྐུར་བ་དང་ལྡན་པ་སེམས་དཔའི་སྐྱིལ་མོ་ཀྲུང་གིས་བཞུགས་སོ། །གནས་གང་དུ་རས་ལ་དཀོན་མཆོག་གསུམ་འདི་བྲི་བར་བྱ་བ་ཡིན་ཞེ་ན། འཁོར་ལོ་དེ་ནི་བརྟགས་ནས་སུ། །གསང་བའི་དཀྱིལ་འཁོར་དམ་པའོ། །ཞེས་བྱ་བ་ལ་འདས་མ་ཐག་ཏུ་བཤད་པའི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་དམ་པ་སྟེ་ཕུལ་དུ་བྱུང་བ་ཡང་དག་པར་བྲིས་ལ། དེའི་དབུས་ཀྱི་རེའུ་མིག་ལ་དཀོན་མཆོག་གསུམ་གྱི་རས་རིས་བྲི་བར་བྱའི་གཞན་དུ་ནི་མ་ཡིན་ནོ་ཞེས་བྱ་བའོ། །དེ་བྲིས་ནས་དེའི་རྗེས་ལ་ཇི་ལྟར་བྱ་ཞེ་ན། ཅི་རིགས་པར་ནི་བསྒྲུབས་བྱས་ན། །སུམ་འགྱུར་དུ་ནི་འགྲུབ་པར་འགྱུར། །ཞེས་བྱ་བ་ལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་ཆོ་ག་ནི་ཅི་རིགས་པ་སྟེ། དེ་ལས་མི་འདའ་པར་དཀོན་མཆོག་གསུམ་འདི་བསྒྲུབ་པར་བྱ་སྟེ། དེ་ལྟར་བསྒྲུབས་ན་སུམ་འགྱུར་དུ་འགྲུབ་པ་སྟེ། རྫོགས་ཤིང་མངོན་དུ་འགྱུར་བ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་གསང་བ་ནི་སུམ་འགྱུར་ཏེ། དེ་དང་ལྡན་པའི་རྡོ་རྗེ་འཆད་ལ་སོགས་པའི་གཟུགས་འཛིན་པའི་དཀོན་མཆོག་གསུམ་སུམ་འགྱུར་རོ། །རྡོ་རྗེ་སེམས་དཔའི་གསང་བའི་དཀྱིལ་འཁོར་བསྒྲུབ་པའི་ཆོ་ག་དེས་རྣལ་འབྱོར་པ་ལ་གྲུབ་པར་འགྱུར་རོ། །སྙིང་པོ་གང་གིས་དེ་བཞིན་གཤེགས་པའི་གསང་བའི་དཀྱིལ་འཁོར་འདི་སྤྲུལ་ནས་བྲི་བར་བྱ་ཞེ་ན། དེ་ལ་འདི་ཞེས་བྱ་བ་ལ་སོགས་པ་ལ་དེ་ལ་ཞེས་བྱ་བའི་སྒྲ་ནི་དགྲ་ཉེ་བར་དགོད་པ་ལའོ། །འདི་ཞེས་བྱ་བ་ནི་ཐུགས་ཀ་ལ་གནས་པའོ། །དེ་བཞིན་གཤེགས་པ་ཐམས་ཅད་ཀྱི་དམ་ཚིག་ཆེན་པོ་གསུམ་རྫོགས་པར་བྱེད་པའི་ངེས་པའི་ཤེས་བཞི་དམ་ཚིག་ཆེན་པོ་ཞེས་བྱ་བའི་མཆོག་གི་སྙིང་པོ་སྟེ། དེ་སྟོན་པར་བྱེད་པའི་སྒྲ་ཡང་ཉེ་བར་བཏགས་ནས་དེ་ཉིད་ཡིན་ནོ། །དེ་ཡང་ལས་ཇི་ལྟ་བུ་དང་ལྡན་པ་ཡིན་ཞེ་ན། མཆོག་གི་དངོས་གྲུབ་མ་ལུས་པར་སྩོལ་བའོ་ཞེས་བྱ་བ་ལ། དཀོན་མཆོག་གསུམ་གྱི་དངོས་གྲུབ་བཟུང་བས་རིགས་ཐམས་ཅད་ཀྱིས་དངོས་གྲུབ་སྟེར་བས་ནམ་ཆོག་གི་དངོས་གྲུབ་མ་ལུས་པར་སྩོལ་བའི་སྙིང་
པོ་དེ་ཡིན་ནོ། །ཨོཾ་བྷཱུ་ཁཾ་ཞེས་བྱ་བ་ལ། ཡི་གེ་ཨོཾ་ནི་རྡོ་རྗེ་འཆང་ངོ༌། །ཡི་གེ་བྷཱུ་ནི་རྡོ་རྗེ་དབང་ཕྱུག་གོ །ཡི་གེ་ཁཾ་ནི་ནམ་མཁའ་སྟེ་འཕགས་པ་ནམ་མཁའི་སྙིང་པོའོ། །ཇི་སྐད་དུ། རྡོ་རྗེ་དྲིལ་བུ་ཕྱག་རྒྱ་དང༌། །དམ་ཚིག་གསུམ་པོ་མཆོག་ཡིན་ཏེ། །ཨོཾ་བྷཱུ་ཁམ་དུ་ཡང་དག་བཤད། །སངས་རྒྱས་ཕྱག་རྒྱ་བརྡ་རུ་བྱས། །ཞེས་བྱ་བ་གསུངས་སོ། །དེ་ལྟར་ན་དེ་ནས་ཞེས་བྱ་བ་ནས་བརྩམས་ཏེ་ཇི་སྲིད་ཨོཾ་བྷཱུ་ཁཾ་ཞེས་བྱ་བའི་བར་དུ་བསྟན་པས་ཏིང་ངེ་འཛིན་གཉིས་བསྟན་པ་ཡིན་ནོ། །དེ་ནས་འདུས་པ་སྔོན་དུ་འགྲོ་བས་གསུམ་པ་ཤེས་པར་བྱའོ། །དམ་ཚིག་དང་དབང་བསྐུར་བ་ཐོབ་པས་འདིར་བཟླས་པ་དང༌། བསྒོམ་པ་བྱ་བ་ཡིན་ནོ་ཞེས་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། ཁྱིམ་མམ་ཞེས་བྱ་བ་ལ་སོགས་པས་སློབ་དཔོན་གྱིས་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་གསུངས་ཏེ། ཁྱིམ་ཞེས་བྱ་བ་ནི་རབ་ཏུ་གྲགས་པའོ། །ནགས་ཚལ་ཞེས་བྱ་བ་ནི་སྣ་ཚོགས་པའི་རིགས་ཅན་གྱི་ཤིང་དྲུང་གི་ཚོགས་སོ། །དེ་དག་འདིར་དཔལ་རྡོ་རྗེ་སེམས་དཔའ་གསང་བའི་དཀྱིལ་འཁོར་གྱི་ཆོ་གས་ཉེ་བར་མཛེས་ཤིང་ཡང་དག་པར་བརྒྱན་ལ། སྔ་མ་བཞིན་དུ་དཔལ་རྡོ་རྗེ་སེམས་དཔའི་རས་རིས་ཀྱི་ཆོ་གས་རང་འཇུག་པའི་ཆོ་ག་ཐམས་ཅད་དང༌། སློབ་མ་གཞུག་པའི་ཆོ་ག་རྗེས་སུ་སྤྱད་ལ། མཆོག་གི་མཚོན་ཆའི་ཆོ་གས་ཐམས་ཅད་བྱས་ནས། དེ་བཞིན་གཤེགས་པ་ཐམས་ཅད་ཀྱིས་རིགས་ལྔའི་བཤད་པ་བྱས་ལ། འདི་བརྗོད་པས་ཏེ་སློབ་མ་རྣམས་ལ་བསྟན་པར་བྱའོ། །དེ་ཉིད་ཅེས་བྱ་བ་ལ་སོགས་པ་ལ་དེ་ཉིད་ནི་དངོས་པོའི་རིགས་པས་བདུད་བཞི་ལས་རྣམ་པར་རྒྱལ་བའི་བཅོམ་ལྡན་འདས་རྣམས་ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་དུའོ། །བྱང་ཆུབ་སེམས་དཔའ་ནི་རྡོ་རྗེ་སེམས་དཔའ་དང༌། འཇིག་རྟེན་དབང་ཕྱུག་དང༌། ནམ་མཁའི་སྙིང་པོ་རྣམས་ཏེ། སངས་རྒྱས་བཅོམ་ལྡན་འདས་དེ་བཞིན་གཤེགས་པ་རྣམས་ནི་རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། སྣང་བ་མཐའ་ཡས་དང༌། དོན་ཡོད་གྲུབ་པའི་རང་བཞིན་ཅན་ནོ། །འདི་ལྟར་བཤད་པར་འགྱུར་ཏེ། གང་གི་ཕྱིར་དེ་བཞིན་གཤེགས་པ་རྣམས་ཉོན་
མོངས་པ་དང༌། ལྷའི་བུ་དང༌། ཕུང་པོ་དང༌། འཆི་བ་དག་གི་བདུད་བཅོམ་པར་མཛད་ན་བཅོམ་ལྡན་འདས་ཏེ། དེའི་ཕྱིར་འཆི་བདག་གི་བདུད་ལ་སོགས་པ་དང་བྲལ་བས་འཁོར་བའི་ཕྱི་མའི་མཐར་ཐུག་གི་བར་དུ་རྟག་ཏུ་རྡོ་རྗེ་འཆང་དང༌། འཇིག་རྟེན་དབང་ཕྱུག་དང༌། བྱང་ཆུབ་སེམས་དཔའ་ནམ་མཁའི་སྙིང་པོའི་གཟུགས་འཛིན་པ་ཡིན་ནོ་ཞེས་བྱ་བ་ཡིན་ནོ། །དེ་དག་ཅི་མཛད་ཅེ་ན། ལྟ་ངན་ཞེས་བྱ་བ་ལ་སོགས་པ་ལ། འཁོར་བ་ལ་རྟག་པའི་འདུ་ཤེས་ཅན་གང་ཡིན་པ་དེ་ནི་ལྟ་བ་ངན་པ་དང་ལྡན་པའི་སེམས་ཅན་རྣམས་སོ། །དེ་དག་གི་རྟག་པའི་འདུ་ཤེས་དང་བྲལ་བར་མཛད་པའི་ཕྱིར། ཤཱཀྱའི་རིགས་ལ་སོགས་པའི་སྐྱེ་བ་ཡོངས་སུ་བཞེས་པ་མཛད་ནས་སྤྲུལ་བའི་སྐུ་ཡོངས་སུ་མྱ་ངན་ལས་འདས་པ་ཆེན་པོས་ཏོན་པར་མཛད་དོ། །ལོངས་སྤྱོད་རྫོགས་པའི་སྐུས་ནི་མ་ཡིན་ནོ། །རྡོ་རྗེ་འཆང་ལ་སོགས་པའི་བྱང་ཆུབ་སེམས་དཔའི་གཟུགས་ཀྱིས་ལྟ་བ་ངན་པ་དང་ལྡན་བ་རྣམས་ལ་ཕན་པའི་དོན་དུ་རྡོ་རྗེ་འཆང་ལ་སོགས་པའི་གཟུགས་འཛིན་ཅིང་མྱ་ངན་ལས་འདས་པ་སྟོན་པར་མཛད་པ་ཡིན་ནོ། །མ་ལུས་པ་ནི་སེམས་ཅན་གྱི་ཁམས་ཐམས་ཅད་དེ། དེ་འདུལ་བ་དང་ལུང་དང་རྟོགས་པ་ལ་རབ་ཏུ་བཞག་པའོ། །དེའི་དོན་དུ་བརྩོན་པ་ནི་སྤྲོ་བའི་བརྩོན་འགྲུས་ཏེ། དེར་བརྟན་པའི་ངེས་པ་ནི་མི་ཕྱེད་པའི་ཡེ་ཤེས་ཏེ། དེས་གོ་ཆ་དང་བཅས་པ་ནི་སེམས་ཅན་གྱི་དོན་དུ་གོ་ཆ་དང་ལྡན་པའོ། །ཤིན་ཏུ་སྲིད་པ་ལ་གནས་པ་ནི་མི་གནས་པའི་མྱ་ངན་ལས་འདས་པ་སྟེ། དེ་ཉིད་མཆོག་སྟེ་ཕུལ་དུ་བྱུང་བའི་གོ་ཆ་ལ་སོགས་པ་གང་ཡིན་པ་བགོས་པ་དེ་ནི་ཤིན་ཏུ་སྲིད་པའི་གནས་མཆོག་གི་གོ་ཆ་ལ་སོགས་པ་བགོས་པའོ། །སོགས་པའི་སྒྲ་ནི་ཅོད་པན་དང༌། རྣ་རྒྱན་དང༌། གདུ་བུ་དང༌། དཔུང་རྒྱན་ལ་སོགས་པ་གཟུང་བར་བྱའོ། །དཀོན་མཆོག་གསུམ་ཉིད་ཉེ་བར་འགྲོ་བ་ནི་ཐོབ་པའོ། །དཀོན་མཆོག་གསུམ་ཉིད་ཉེ་བར་འགྲོ་བདེ་གང་ཡིན་ཞེ་ན། སངས་རྒྱས་ཆོས་དང་དགེ་འདུན་རྣམས། །ཞེས་བྱ་བའོ། །དེ་དག་ལ་ཇི་ལྟ་བུ་དང་ལྡན་པ་ཡིན་ཞེ་ན། ཤིན་ཏུ་ཞེས་བྱ་བ་ལ་སོགས་པ་ལ། གདུལ་བྱའི་སྐྱེ་བོའི་རྒྱུད་ལ་ཐོག་མ་དང་ཐ་མ་མེད་པའི་མི་གནས་པའི་མྱ་ངན་ལས་འདས་པ་བསྐྱེད་པ་ནི་ཤིན་ཏུ་སྲིད་པ་གྲུབ་པས་ཏེ། དེ་ཉིད་རྣམ་པར་དག་པའི་
དཔལ་ནི་བག་ཆགས་དང་བཅས་པའི་ཉོན་མོངས་པའི་དྲི་མ་དང་བྲལ་བའི་དཀོན་མཆོག་གསུམ་གྱི་རང་བཞིན་ཅན་གྱི་མདངས་གང་ཡིན་པ་དེ་དག་གདུལ་བྱའི་སྐྱེ་བོའི་རྒྱུད་ལ་རྫོགས་པར་བྱེད་པའོ། །རྣམ་པར་དག་པའི་དཔལ་མཛད་པ་ཡིན་ནོ། །མཆོག་ནི་ཕུལ་དུ་བྱུང་བ་སྟེ་རྡོ་རྗེ་འཆང་ལ་སོགས་པའི་རང་བཞིན་ཅན་གྱི་དེ་བཞིན་གཤེགས་པ་དེ་དག་ཡིན་ནོ་ཞེས་བྱའོ། །དེ་ཁོ་ན་ཉིད་འདི་བརྗོད་པ་གང་ཡིན་ཞེ་ན། དེ་བཞིན་གཤེགས་པ་ཐམས་ཅད་ཀྱི་མཆོག་ནི་གསང་བའི་རྡོ་རྗེའོ་ཞེས་བྱ་བ་ལ་རྣམ་པར་སྣང་མཛད་དང༌། མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་མེད་དང༌། དོན་ཡོད་གྲུབ་པ་རྣམས་ནི་དེ་བཞིན་གཤེགས་པ་ཐམས་ཅད་དེ། དེ་རྣམས་ཀྱི་མཆོག་ནི་ཕུལ་དུ་བྱུང་བའོ། །ཐོག་མ་དང་ཐ་མ་མེད་པ་གཉིས་སུ་མེད་པའི་ཐུགས་རང་རིག་པའི་རང་བཞིན་གྱི་ཕྱིར་གསང་བའི་རྡོ་རྗེ་དེ་ཉིད་ཡིན་ནོ། །འདིས་ནི་འདི་ལྟར་བཤད་པར་འགྱུར་རོ། །རྡོ་རྗེའི་དོན་འདི་མངོན་དུ་བྱས་ཤིང་དེ་བཞིན་གཤེགས་པའི་རིགས་ཀྱི་རྣལ་འབྱོར་པས་དེ་བཞིན་གཤེགས་པའི་རྡོ་རྗེ་བླངས་ཏེ་གཟུང་བར་བྱའོ། །དེ་ལྟར་དེ་བཞིན་གཤེགས་པའི་རྡོ་རྗེ་དེ་ཁོ་ན་ཉིད་ཀྱིས་གཟུང་སྟེ། དེ་བཞིན་གཤེགས་པའི་དྲིལ་བུ་ཆོས་ཀྱི་དྲིལ་བུ་དཀྲོལ་ཅིག་ཅེས་བྱ་བའི་ཆོ་གས་འདི་རབ་ཏུ་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བའི་ཆོས་ཉིད་ཀྱི་དྲིལ་བུའོ་ཞེས་བྱ་བ་གསུངས་ཏེ། དེ་ནས་ཀྱི་སྒྲས་ནི་སྐབས་ལ་བབ་པའོ། །མཆོག་ཏུ་གསང་བའི་ཆོས་ཉིད་ནི་སྒྲའི་རྗེས་སུ་འགྲོ་བའི་ཤེས་རབ་པོ། །དེ་སྟོན་པར་བྱེད་པའི་ཕྱག་རྒྱ་ནི་དྲིལ་བུའོ། །ཐམས་ཅད་ནམ་མཁའི་མཚན་ཉིད་ཅན། །ཞེས་བྱ་བ་ལ་འདུས་བྱས་དང་འདུས་མ་བྱས་ཀྱི་དངོས་པོ་ཐམས་ཅད་དོན་དམ་པར་ནམ་མཁའི་རང་བཞིན་ཅན་ནོ། །ནམ་མཁའི་རང་བཞིན་འདི་ལྟ་བུ་དང་ལྡན་པ་ཡིན་ཞེ་ན། ནམ་མཁའ་ཡང་ནི་མཚན་ཉིད་མེད། །ཅེས་བྱ་བ་ལ་རྫས་ཐམས་ཅད་མེད་པའི་མཚན་ཉིད་ཅན་ནི་ནམ་མཁའི་མཚན་ཉིད་ཅན་ནོ། །ཇི་ལྟར་ནམ་མཁའི་མཚན་ཉིད་མེད་པ་དེ་བཞིན་དུ་དངོས་པོ་ཐམས་ཅད་ཀྱང་མཚན་ཉིད་མེད་པ་ཡིན་ནོ་ཞེས་བྱ་བ་ཡང་གི་སྒྲས་ནི་སྟོན་པ་ཡིན་ཏེ། དོན་དམ་པར་ཆོས་ཐམས་ཅད་གདོང་མ་ནས་མ་སྐྱེས་པའི་རང་བཞིན་ཉིད་ཡིན་པའི་ཕྱིར་
རོ་ཞེས་བྱ་བར་དགོངས་སོ། །ནམ་མཁའ་དང་མཉམ་པ་ཉིད་ནི་དེ་བཞིན་ཉིད་དེ། དེའི་སྦྱོར་བ་ནི་རྣལ་འབྱོར་པའི་སེམས་དང་སེམས་ལས་བྱུང་བ་དེ་བཞིན་ཉིད་རོ་གཅིག་པའོ། །རྒྱུ་དེ་ཉིད་ཀྱི་ཕྱིར་རྣལ་འབྱོར་པ་དེས་ཀུན་མཆོག་མཉམ་པ་ཉིད་ནི་དེ་བཞིན་ཉིད་དེ། དེ་ལ་གསལ་ནི་ཁྱབ་པར་གྱུར་པ་ཡིན་ནོ། །ཤེས་རབ་ཀྱི་ཕ་རོལ་ཏུ་ཕྱིན་པའོ་ཞེས་བྱ་བ་ལ། སྒྲའི་རྗེས་སུ་འགྲོ་བའི་ཤེས་རབ་ཀྱིས་ནམ་མཁའི་དང་མཉམ་པ་ཉིད་དུ་ཁྱབ་པར་རྣལ་འབྱོར་པས་ཐོབ་པ་དེ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། ལྷག་པར་མོས་པ་འདིས་རྣལ་འབྱོར་བས་དྲིལ་བུ་དཀྲོལ་བར་བྱ་བའོ། །འདི་ལྟར་བཤད་པར་འགྱུར་ཏེ། ཐམས་ཅད་ནམ་མཁའི་མཚན་ཉིད་ཅན། །ནམ་མཁའ་ཡང་ནི་མཚན་ཉིད་མེད། །ནམ་མཁའ་དང་མཉམ་སྦྱོར་བ་ཡིས། །ཀུན་མཆོག་མཉམ་པ་ཉིད་དུ་གསལ། །ཞེས་བྱ་བ་དེ་ལྟ་བུའི་སྒྲ་ནི་དྲིལ་བུ་སྒྲོགས་པ་ཡིན་ནོ་ཞེས་བྱ་བས་དྲིལ་བུ་དཀྲོལ་བར་བྱ་ཞིང༌། །དེའི་སྒྲ་ལ་ལྷག་པར་མོས་པར་བྱ་པ་ཡིན་ནོ། །དེ་ལྟར་ཆོས་ཀྱི་དྲིལ་བུ་དཀྲོལ། །ཞེས་བྱ་བ་བསྟན་ནས། དམ་ཚིག་གི་ཕྱག་རྒྱ་ཆེན་པོ་བྱིན་གྱིས་རློབས་ཤིག་ཅེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར། དེ་ནས་དམ་ཚིག་ཆེན་པོ་གསུམ་གྱི་སྡོམ་པ་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །ཆེན་པོ་ཡང་དེ་ཡིན་ལ་དམ་ཚིག་གསུམ་ཡང་དེ་ཡིན་པས་ན་དམ་ཚིག་ཆེན་པོ་གསུམ་སྟེ། དཀོན་མཆོག་གསུམ་གྱི་སྐུའི་གསང་བའོ། །དེའི་རང་བཞིན་གྱི་བསྒོམ་པ་ནི་སྡོམ་པས་ཏེ་དེ་བརྗོད་པར་བྱའོ་ཞེས་བྱ་བའི་དམ་ཚིག་གི་ལྷག་མའོ། །ལོངས་སྤྱོད་ཀྱང་ཡིན་ལ་ཀུན་ཀྱང་ཡིན་པས་ན་ལོངས་སྤྱོད་ཀུན་ཏེ། རིགས་ཀྱི་ལྷ་ཐམས་ཅད་ཀྱི་གཟུགས་ཀྱི་རང་བཞིན་ཡིན་ནོ། །དེ་རྣམས་ལོངས་སྤྱོད་པ་ནི་དེའི་རང་བཞིན་ལ་ལྷག་པར་མོས་པའོ། །ནིའི་སྒྲ་ནི་ངེས་པར་གཟུང་བའོ། །ལོངས་སྤྱོད་ཐམས་ཅད་ལ་ལོངས་སྤྱོད་པར་བྱེད་པར་འགྱུར་བ་ཁོ་ནས་ཞེས་བྱ་བའོ། །དེ་དག་གིས་དཀོན་མཆོག་གསུམ་ལ་མཆོད་པར་བྱའོ་ཞེས་བྱ་བ་བརྗོད་ཅིང་རང་ཉིད་མཆོད་པར་བྱའོ་ཞེས་བྱ་བ་དང་སྦྱར་རོ། །དེ་དག་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། བསྟེན་པ་སྟེ་བསྒོམ་པར་བྱ་བ་རྣམས་ཀྱིས་སོ། །རང་གི་བདག་ཉིད་ལས་སུ་གྱུར་པའོ། །བདག་
ཉིད་ནི་བྱེད་པར་གྱུར་པས་སོ། །སངས་རྒྱས་དང་ཆོས་དང་དགེ་འདུན་ལ་མཆོད་པ་ནི་དཀོན་མཆོག་གསུམ་ལ་མཆོད་པའོ། །མཆོག་ནི་དམ་པས་ཏེ་ནང་དུ་བརྗོད་པའི་རྣམ་པས་བརྗོད་པ་ནི་བསམ་ཞིང་བསྒོམ་པའི་མཚན་ཉིད་ཅན་གྱི་སོ་སོར་རྟོག་པའི་མཆོད་པ་འདིས་བདག་ཉིད་མཆོད་པར་བྱའོ། །དམ་ཚིག་ཆེན་པོ་གསུམ་གྱི་སྔོམ་པ་འདི་ལས་ཇི་ལྟ་བུ་དང་ལྡན་པ་ཡིན་ཞེ་ན། དེ་བཞིན་གཤེགས་པའི་རྣལ་འབྱོར་བསྒྲུབ་པའོ་ཞེས་བྱ་བ་ལ། རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་ཀྱིས་ཕྱག་རྒྱ་ཆེན་པོ་ནི་རྣལ་འབྱོར་ཏེ། དེ་སྒྲུབ་པ་ནི་རྫོགས་པའི་རྒྱུའོ། །འདིས་ནི་འདི་ལྟར་བཤད་པར་འགྱུར་ཏེ། དེ་བཞིན་གཤེགས་པའི་རྣལ་འབྱོར་པ་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བསྒྲུབ་པར་འདོད་པས། ཇི་ལྟ་བ་བཞིན་དུ་དེ་ཁོ་ན་ཉིད་ཀྱིས་རྡོ་རྗེ་བཟུང་ལ། ཆོས་ཀྱི་དྲིལ་བུ་དཀྲོལ་བར་བྱའོ། །དེ་ནས་རང་གི་དེ་བཞིན་གཤེགས་པའི་ཕྱག་རྒྱ་ཆེན་པོ་བཅིངས་ལ། གཟུགས་གང་དང་གང་གིས་སེམས་ཅན་གདུལ་བར་འགྱུར་པའི་གཟུགས་དེ་དང་དེ་རྣམས་ཀྱིས་རྣམ་པར་སྦྱར་བར་བྱའོ། །དེ་ནས་བདག་ཉིད་ཀྱིས་བྱ་བ་བྱས་པ་ལྟ་བུའི་དེ་བཞིན་གཤེགས་པར་བསམས་ལ་བཟླས་པའམ་བསྒོམ་པར་བྱ་བ་ཡིན་ནོ། །ཐབས་ཀྱི་ཆོ་ག་འདི་ཡིས་ནི། །ཞེས་བྱ་བ་ལ་དེ་ཁོ་ན་ཉིད་དང༌། ཆོས་དང༌། དམ་ཚིག་གཟུང་བའི་རང་བཞིན་ཅན་གྱི་ཐབས་ཀྱི་ཆོ་གས་འདོད་པའི་ཡོན་ཏན་ལྔ་ནི་རྣམ་པར་སྣང་མཛད་དང་མི་བསྐྱོད་པ་དང༌། རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་གྲུབ་པ་རིགས་དང་བཅས་པ་རྣམས་འདོད་པའི་ཡོན་ཏན་ལྔ་གསང་བ་སྲ་ཞིང་མཐོ་བའི་རྒྱུད་དུ་གསུངས་པའི་འདོད་པའི་ཡོན་ཏན་ལྔ་ལ་སྤྱད་ཀྱང་འགྲུབ་པར་འགྱུར་རོ། །ཀྱང་གི་སྒྲས་ནི་གཅིག་ལ་ཡང་ངོ་ཞེས་བསྟན་ཏོ། །བཟའ་མིན་པ་ཡང་བཟའ་བྱས་ན། །ཞེས་བྱ་བ་ལ་བའི་བར་བྱ་བས་ན་བཟའ་བ་སྟེ། རྣལ་འབྱོར་པས་རང་གི་རིགས་ཀྱི་དཀྱིལ་འཁོར་གྱི་ལྷའི་གཟུགས་ཀྱིས་ནམ་མཁའི་ཁམས་གང་བར་བྱས་ལ། དེའི་སེམས་ཅན་གྱི་ཁམས་མ་ལུས་པར་རང་རང་གི་རིགས་ཀྱི་ལྷའི་དཀྱིལ་འཁོར་གྱི་གཟུགས་སུ་བྱས་ཏེ། རང་གི་རང་བཞིན་དུ་བསྒོམ་པར་བྱའོ་ཞེས་བྱ་བའི་དོན་ཏོ། །བཟའ་བར་བྱ་བ་མ་ཡིན་
པས་ན་བཟའ་བར་མི་བྱ་བ་སྟེ། རིགས་གཞན་གྱི་དཀྱིལ་འཁོར་གྱི་ལྷའི་གཟུགས་རྣམས་སོ། །བཟའ་བར་མི་བྱ་བ་དེ་རྣམས་ཀྱང་བཟའ་ཞིང་རིགས་ལྔའི་དཀྱིལ་འཁོར་གྱི་ལྷའི་རང་བཞིན་གྱི་བདག་ཉིད་རྣམ་པར་བསྒོམ་པར་བྱ་སྟེ། དེ་བཞིན་གཤེགས་པའི་དངོས་གྲུབ་སངས་རྒྱས་ཉིད་ཀྱི་མཚན་ཉིད་ཅན་རྟག་པ་ནི་ཐོག་མ་དང་ཐ་མ་མེད་པ་སྟེ་དེ་རྣལ་འབྱོར་པ་རྣམས་ཀྱིས་ཐོབ་པར་འགྱུར་རོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་གང་ཞིག་དེ་ཁོ་ན་ཉིད་ལ་སོགས་པ་གསུམ་པོ་འདི་ནི་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དམ་ཚིག་ཆེན་པོ་གསུམ་ནི་དེ་ཡིན་ནོ་ཞེས་བྱ་བའོ། །དེ་ལྟར་བརྗོད་ནས་ཞེས་བྱ་བ་ནི་སློབ་དཔོན་གྱིས་སློབ་མ་རྣམས་ལ་བསྟན་ནས། སྙིང་པོ་བྱིན་པ་དེ་དག་ཕྱག་རྒྱ་ཆེན་པོ་བཅིང་བ་ལ་སོགས་པ་སློབ་ཏུ་བཅུག་ནས། དེའི་རྗེས་ལ་རྡོ་རྗེ་སེམས་དཔའི་གསང་བའི་དཀྱིལ་འཁོར་བསྒྲུབ་པའི་ཆོ་གས་ཇི་ལྟར་མངོན་པར་འདོད་པའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་སློབ་མའི་ཚོགས་དང་བཅས་པའི་སློབ་དཔོན་གྱིས་བསྒྲུབ་པར་བྱའོ། །དེ་ནས་ཞེས་བྱ་བ་ལ་སོགས་པ་རྣམས་ལ་སྙིང་པོ་བྱིན་ནས་ཕྱག་རྒྱ་བཞིའི་ཡེ་ཤེས་ཚིགས་སུ་བཅད་པ་གཞན་ཉིད་དེ་བཞིན་གཤེགས་པའི་རྣལ་འབྱོར་གྱིས་དེ་བཞིན་གཤེགས་པའི་རྡོ་རྗེ་འཆང་གི་སློབ་དཔོན་ཏེ་དེས་སྦྱིན་པར་བྱའོ། །ཇི་ལྟར་ཞེ་ན། རྡོ་རྗེ་མཆོད་པས་མཆོད་ནས་ནི། །ཞེས་བྱ་བ་ལ་རོ་དང་བཟའ་བ་དང་རྣམ་པར་རོལ་པ་དང༌། གླུ་དང་རོལ་མོའི་མཆོད་པ་ལ་སོགས་པ་རྣམས་ཀྱིས་དཀྱིལ་འཁོར་ཡང་དག་པར་བྱས་ནའོ། །དེ་ནས་ཇི་ལྟར་བྱ་ཞེ་ན། ཅི་འདོད་སྤྱོད་པའི་མཆོད་པ་ཡིས། །སློབ་མ་ཐམས་ཅད་མཆོད་དུ་གཞུག །ཅེས་བྱ་བ་ལ་ཕྱིའི་མེ་ཏོག་ལ་སོགས་པ་རྣམས་དང༌། འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་སློབ་མའི་ཚོགས་ཐམས་ཅད་མཆོད་པ་བྱད་དུ་གཞུག་གོ་ཞེས་བྱ་བའི་དོན་ཏོ། །ལོངས་སྤྱོད་ཀུན་ལ་ལོངས་སྤྱོད་ཀྱང༌། །ཞེས་བྱ་བ་ནི་བཤད་ཟིན་ཏོ། །ཀྱང་གི་སྒྲ་ནི་བསྡུ་པ་ལའོ། །ཁྱད་པར་ཇི་ལྟ་བུ་དང་ལྡན་པས་ཤེ་ན། དཀོན་མཆོག་གསུམ་ལ་ཕུལ་བ་ཞེས་བྱ་བ་ལ། མཛེས་པའི་དཀོན་མཆོག་གསུམ་ནི་དཀོན་མཆོག་
སྟེ། སངས་རྒྱས་དང༌། ཆོས་དང༌། དགེ་འདུན་གྱི་རང་བཞིན་ནོ། །དེ་ཅིའི་ཕྱིར་ཞེ་ན། དཀོན་མཆོག་གཞན་ཐམས་ཅད་ལས་ཕུལ་དུ་བྱུང་བ་ཉིད་ཀྱི་ཕྱིར་རོ། །དེ་ལས་སྤྲུལ་པའི་ལོངས་སྤྱོད་ལ་ལོངས་སྤྱོད་པ་རྣམས་ནི་ཕྱིའི་རིན་པོ་ཆེ་ལ་སོགས་པ་ཐམས་ཅད་ཀྱི་རང་གི་བདག་ཉིད་དང༌། གཞན་རྣམས་འདོད་པས་ཏེ། གལ་ཏེ་མངོན་པར་འདོད་ན་ཡང་དག་པར་མཆོད་ན་སློབ་དཔོན་དེ་ཇི་ལྟར་མངོན་པར་འདོད་པའི་དངོས་གྲུབ་སྒྲུབ་ཅིང་གྲུབ་པར་འགྱུར་རོ། །འདིས་ནི་འདི་ལྟར་བཤད་པར་འགྱུར་ཏེ། སྔ་མ་བཞིན་དུ་སྡིག་པ་བྲལ་བའི་མཐར་ཐུག་པའི་ཆོ་གས་ཐམས་ཅད་རྗེས་སུ་སྤྱད་ནས། རང་གི་སྙིང་གར་གནས་པའི་རྡོ་རྗེ་ལ། ཨོཾ་བྷཱུ་ཁཾ་ཞེས་བྱ་བ་རྣམ་པར་བསམས་ལ། རྡོ་རྗེ་སྐྱིལ་མོ་ཀྲུང་གིས་འདུག་སྟེ། རྡོ་རྗེ་བསྡམས་པ་ཁ་གྱེན་དུ་བལྟ་བ་སྐྱིལ་མོ་ཀྲུང་གི་སྟེང་དུ་ཡང་དག་པར་བཞག་ལ། རྡོ་རྗེའི་དབུས་སུ་བཀོད་པའི་སྙིང་པོ་དེ་ཉིད་ཡིད་ཀྱིས་བརྗོད་ཅིང་ཆོས་ཐམས་ཅད་བདག་མེད་པ་བསྒོམ་པར་བྱ་སྟེ། དབྱངས་བཅུ་དྲུག་དང་བཅས་བའི་དེ་ཉིད་ལས་ཟླ་བའི་དཀྱིལ་འཁོར་གྱི་བདག་ཉིད་ཅན་དུ་རང་གི་སེམས་བསམ་པར་བྱའོ། །སླར་ཡང་དེའི་སྟེང་དུ་སྙིང་པོ་དེ་ཉིད་ཀྱིས་མངོན་པར་བྲིས་ལ། ཡི་གེ་ཀ་ལ་སོགས་པ་དང་བཅས་པའི་དེ་ལས་ཟླ་བའི་དཀྱིལ་འཁོར་གཉིས་པ་སྟེ། སླར་ཡང་སྙིང་པོ་དེ་དང་བཅས་པའི་དེ་བཞིན་གཤེགས་པའི་རྡོ་རྗེ་སྟེ། སླར་ཡང་སྙིང་པོ་དེ་རྡོ་རྗེའི་དབུས་སུ་རྣམ་པར་བསམས་ལ་རྡོ་རྗེའི་ང་རྒྱལ་བསྒོམ་ཞིང་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེའི་ཁམས་དེ་རྣམས་རྡོ་རྗེ་ལས་སྤྲོས་ཏེ། དེ་དག་གིས་སེམས་ཅན་གྱི་དོན་བྱ་བ་ལ་སླར་ཡང་རྡོ་རྗེའི་ཡིད་ཀྱིས་གཞུག་པར་བྱའོ། །དེ་ནས་རྡོ་རྗེ་དེ་ལ་ཨོཾ་བྷཱུཾ་ཁཾ་ཞེས་བྱ་བ་བཟློས་ཤིང༌། སངས་རྒྱས་དང༌། ཆོས་དང༌། དགེ་འདུན་གྱི་རང་བཞིན་དུ་བདག་ཉིད་བསམས་ལ། མ་ཧཱ་ས་མ་ཡ་ས་ཏྭ་ཧཾ་ཞེས་བརྗོད་པར་བྱའོ། །དེ་ནས་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་བཅིངས་ནས་ས་མ་ཡ་ཧཾ་ཞེས་བྱ་བ་བརྗོད་པར་བྱའོ། །དེ་ཉིད་ཀྱི་སྙིང་ག་དང༌། མཛོད་སྤུ་དང༌། མགྲིན་པ་དང༌། སྤྱི་བོ་རྣམས་སུ་ས་མ་ཡ་སྟྭཾ་ཨ་དྷི་ཏིཥྛ་སྭ་མཾ་ཞེས་བྱ་བ་རང་གི་བདག་ཉིད་ལ་བྱིན་གྱིས་བརླབ་
པར་བྱའོ། །དེ་ནས་སངས་རྒྱས་དང༌། ཆོས་དང༌། དགེ་འདུན་གྱི་ཕྱག་རྒྱ་ཆེན་པོ། ཨོཾ་བྷཱུ་ཁཾ་ཞེས་བྱ་བ་བཟླས་ཤིང་བཅིང་པར་བྱའོ། །དེ་ནས་རང་གི་སྙིང་གའི་ཟླ་བ་ལ་སངས་རྒྱས་དང༌། ཆོས་དང༌། དགེ་འདུན་གྱི་གསང་བའི་དཀྱིལ་འཁོར་རྡོ་རྗེ་འཁོར་ལོའི་ཕྱག་རྒྱ་བསྐྱེད་ལ། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པར་རང་འཇུག་པ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ། དེ་བཞིན་གཤེགས་པའི་དཀྱིལ་འཁོར་ཆེན་པོ་ལས་གསུངས་པའི་རྣལ་འབྱོར་ཆེན་པོ་བསྒྲུབ་པར་བྱའོ། །དེ་ནས་རྡོ་རྗེ་མཚོན་ཆ་མ་ལ་སོགས་པའི་ཕྱག་རྒྱ་བཅུ་གཉིས་ཀྱི་མཆོད་པ་རྣམས་ཀྱིས་བདག་ཉིད་ཡང་དག་པར་མཆོད་ལ། དེ་བཞིན་གཤེགས་པའི་དཀྱིལ་འཁོར་ཆེན་པོ་ལས་གསུངས་པའི་ཕྱག་འཚལ་བ་སྔོན་དུ་བྱ་སྟེ། དེ་ཁོ་ན་ཉིད་དང༌། ཆོས་དང༌། དམ་ཚིག་རྣམས་ལ་ཏིང་ངེ་འཛིན་གསུམ་རྣམ་པར་བསྒོམ་སྟེ། སླར་ཡང་འདུས་པ་ལ་སོགས་པའི་ཆོ་ག་རྗེས་སུ་སྤྱད་ལ། གསང་བའི་དཀྱིལ་འཁོར་འདི་ཉིན་རེ་ཞིང་དེ་སྲིད་དུ་བསྒོམ་པར་བྱ་སྟེ། ཇི་སྲིད་དུ་ཉིན་རེ་ཞིང་དེ་བཞིན་དུ་མངོན་དུ་གྱུར་པ་དེ་བཞིན་དུ་མཐོང་བར་འགྱུར་རོ། །དེ་ནས་ཇི་ལྟ་བ་བཞིན་དུ་རྡོ་རྗེ་སེམས་དཔའི་དཀྱིལ་འཁོར་བྲིས་ལ། དེའི་དབུས་སུ་རྡོ་རྗེ་རྩེ་གསུམ་པའི་ཕྲེང་བའི་འཁོར་ལོ་ཟླུམ་པོ་ཀ་བ་བརྒྱད་ཀྱིས་ཉེ་བར་མཛེས་པ་བྲིས་ཏེ། རས་ལ་དབུས་ཀྱི་དཀྱིལ་འཁོར་གྱི་ལྟེ་བར་སྣ་ཚོགས་པའི་པདྨའི་གདན་ལ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་དཀོན་མཆོག་གསུམ་བྲི་བར་བྱའོ། །དེ་ཉིད་ཀྱི་ནང་གི་དཀྱིལ་འཁོར་གྱི་མཚམས་བཞི་རུ་རྡོ་རྗེ་དང༌། རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་སྔར་བཤད་པའི་སྙིང་པོ་བཞིས་བྲི་བར་བྱའོ། །ཕྱིའི་དཀྱིལ་འཁོར་གྱི་ལྷའི་རྣམ་བུའི་མཚམས་བཞི་པོ་ལ་སྔ་མ་བཞིན་དུ་སྒེག་མོ་ལ་སོགས་པ་བཞི་བྲི་བར་བྱའོ། །སྒོ་རྣམས་སུ་ལྕགས་ཀྱུ་མ་ལ་སོགས་པ་བཞི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པའི་སྙིང་པོ་རྣམས་བྲི་བར་བྱའོ། །དེ་ནས་རྡོ་རྗེ་སེམས་དཔའི་གསང་བའི་དཀྱིལ་འཁོར་ལས་གསུངས་པའི་ཚུལ་གྱིས་དེ་བཞིན་གཤེགས་པ་ཐམས་ཅད་ཀྱི་དཀྱིལ་འཁོར་ཆེན་པོ་ལས་གསུངས་པའི་འདུས་པ་དང༌། མཚན་བརྒྱ་རྩ་བརྒྱད་དང༌། དགུག་པ་ལ་
སོགས་པའི་ཆོ་ག་བྱས་ལ་རང་འཇུག་པའི་ཆོ་ག་དང༌། སློབ་མ་གཞུག་པ་ལ་སོགས་པའི་ཆོ་ག་རྒྱས་པར་བྱའོ། །མཆོག་ཏུ་གསང་བའི་ཆོ་ག་ཞེས་བྱ་བ་ལ་དེ་བཞིན་གཤེགས་པ་ཐམས་ཅད་ཀྱི་སངས་རྒྱས་དང༌། ཆོས་དང༌། དགེ་འདུན་གྱི་རང་བཞིན་ནི་མཆོག་ཏུ་གསང་བའོ། །དེའི་ཆོ་ག་ནི་བསྒྲུབ་པར་བྱ་བ་དང༌། སྒྲུབ་པའི་རྟོགས་པ་སྟེ། དེ་ཡང་ཡོངས་སུ་རྫོགས་པ་ཡིན་ནོ་ཞེས་ཤེས་པར་བྱའོ། །དཔལ་མཆོག་དང་པོའི་རྒྱ་ཆེར་འགྲེལ་བ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དཀོན་མཆོག་གསུམ་གྱི་གསང་བའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་མྱུར་དུ་དངོས་གྲུབ་སྒྲུབ་པར་བྱེད་པ་ལ། དེ་བཞིན་གཤེགས་པའི་རས་རིས་ཀྱི་དཀྱིལ་འཁོར་བསྟན་ནས། ད་ནི་རྡོ་རྗེ་རིགས་ཀྱི་རྣལ་འབྱོར་པ་ལ་མྱུར་དུ་དངོས་གྲུབ་སྒྲུབ་པར་བྱེད་པའི་རྡོ་རྗེ་ཉི་མ་མེ་ལྟར་འབར་བའི་གསང་བའི་དཀྱིལ་འཁོར་བཤད་པར་བྱ་བའི་ཕྱིར། དེ་ནས་རྡོ་རྗེ་ཆེན་པོའི་ཁྲོ་བོའི་རྒྱལ་པོ་མཆོག་གི་ཆོ་ག་ཞེས་བྱ་བ་གསུངས་ཏེ། དེ་ནས་ཀྱི་སྒྲ་ནི་འདས་མ་ཐག་པ་སྟེ། དང་པོ་སྦྱོར་བའི་རྗེས་ཐོགས་ཁོ་ན་ལ་ཞེས་བྱ་བའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ལས་གསུངས་པ་ཁོ་ནའོ། །ཆེན་པོ་ཡང་དེ་ཡིན་ལ་ཁྲོ་བོའི་རྒྱལ་པོ་ཡང་དེ་ཉིད་ཡིན་པས་ན། རྡོ་རྗེ་ཆེན་པོའི་ཁྲོ་བོའི་རྒྱལ་པོ་སྟེ། བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའོ། །དེའི་མཆོག་ཀྱང་དེ་ཡིན་ལ་གསང་བའི་ཆོ་ག་ཡང་དེ་ཉིད་ཡིན་པས་ན་མཆོག་ཏུ་གསང་བའི་ཆོ་ག་སྟེ་བསྒྲུབ་པར་བྱ་བ་དང༌། སྒྲུབ་པའི་ངོ་བོར་གསང་བའི་དཀྱིལ་འཁོར་རོ། །འདི་ལྟར་བཤད་པར་འགྱུར་ཏེ། ཡི་གེ་ཧཱུཾ་བརྗོད་ཅིང་གསང་བའི་དཀྱིལ་འཁོར་འདི་རྫོགས་པར་བྱས་ལ། ལྷ་ཐམས་ཅད་ཀྱི་སྙིང་པོ་བརྗོད་ཅིང་རང་རང་གི་གནས་སུ་ལྷ་ཐམས་ཅད་ཀྱི་གཟུགས་དགོད་ཅིང་དྲངས་ཏེ། འདི་ནི་འདིར་ཏིང་ངེ་འཛིན་གཉིས་པའོ། །དེ་ནས་འདུས་པ་སྔོན་དུ་འགྲོ་བས་གསུང་པ་ཤེས་པར་བྱའོ། །དེ་ལྟར་ཏིང་ངེ་འཛིན་གསུམ་བསྟན་ནས། ད་ནི་རས་ལ་བཅོམ་ལྡན་འདས་བྲི་བར་བྱ་ཞེས་བྱ་བ་ལ་སོགས་པས་སློབ་དཔོན་གྱི་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་
པའི་ཆོ་ག་བཤད་པར་བྱ་སྟེ། ཆོ་ག་ཇི་ལྟ་བ་བཞིན་དུ་དཀྱིལ་འཁོར་བྲིས་ལ་དབུས་ཀྱི་དཀྱིལ་འཁོར་གྱི་ལྟེ་བའི་ཕྱོགས་སུ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་རས་ལ་བྲི་པར་བྱའོ། །མཆོག་ཅེས་བྱ་བ་འདི་ཕུལ་དུ་བྱུང་བའོ། །ཅིའི་ཕྱིར་ཞེ་ན། གང་གི་ཕྱིར་གསང་བའི་ཆོ་ག་འདི་རྒྱ་ཆེ་བའི་འཇིགས་པས་འཇིགས་པ་རྣམས་ལ་མདོར་བསྡུས་པས་རྡོ་རྗེའི་རིགས་ཐམས་ཅད་ཀྱི་དངོས་གྲུབ་རྫོགས་པར་བྱེད་པ་དེའི་ཕྱིར་མཆོག་སྟེ་ཕུལ་དུ་བྱུང་བ་ཡིན་ནོ། །རྡོ་རྗེ་ཉི་མ་མེ་ལྟར་འབར་བ་དེའི་སྣ་ཚོགས་པདྨའི་གདན་གཅིག་ཁོ་ནའི་གཡས་དང་གཡོན་གྱི་ལོགས་དག་ལ་བཞུགས་པའི་རྡོ་རྗེ་མཁའ་འགྲོ་མ་རྣམས་དེའི་འོད་ཀྱི་དཀྱིལ་འཁོར་ལ་བརྟེན་པར་བྲི་པར་བྱའོ། །དེ་ལ་རྡོ་རྗེ་ཉི་མ་མེ་ལྟར་འབར་བ་ནི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་ཆེན་པོ་བྲི་བར་བྱའོ། །དེའི་ལྷ་མོ་དང་པོ་ནི་དམར་བ་དང་དཀར་པའོ། །གཉིས་པ་ནི་ཐལ་བ་ལྟར་དཀར་པའོ། །གསུམ་པ་ནི་དཀར་པ་དང་ལྗང་བའོ། །བཞི་པ་ནི་གསེར་ལྟར་དྲི་མ་མེད་པའི་སྐུ་མཆོག་ཅན་བྲི་བར་བྱའོ། །རྡོ་རྗེ་གཏུམ་པའི་དབང་ཕྱུག་གྲུབ། །ཅེས་བྱ་བ་ལ་ཁ་ཊྭཱཾ་ག་འཛིན་པའི་རྡོ་རྗེ་གཏུམ་པའི་དབང་ཕྱུག་མ་སྟེ་དེ་གྲུབ་པ་ནི་རྫོགས་པའོ། །དེ་ཉིད་རྡོ་རྗེ་ཁ་ཊྭཱཾ་ག་བསྒྲེང་བ་དང་བཅས་པ་བྲི་བར་བྱ་སྟེ། རྡོ་རྗེ་ཁ་ཊྭཱཾ་ག་བསྒྲེང་བ་དང་བཅས་པའི་སྐུ་གང་ལ་མངའ་བ་དེ་ནི་ཁ་ཊྭཱཾ་ག་བསྒྲེང་བ་དང་བཅས་པའོ། །དེ་ནི་ཐལ་བ་ལྟར་སྐུ་མདོག་དཀར་བ་བཅོམ་ལྡན་འདས་ཀྱི་གཡས་ལོགས་སུ་བྲི་བར་བྱའོ། །དེའི་ཡང་གཡས་ལོགས་སུ་དམར་བ་དང་དཀར་བའི་སྐུ་མདོག་ཅན་མདའ་འཛིན་པ་རྡོ་རྗེ་འདོད་པ་མེ་འབར་བ་ཞེས་བྱ་བའི་མིང་ཅན། གཡོན་པའི་ཕྱག་གིས་གཞུ་འཛིན་ཅིང་གཡས་པ་རྡོ་རྗེ་རྩེ་གཅིག་པའི་མདེའུ་དང་ལྡན་པའི་མདའ་བསྟོད་པ་ལ་བརྩོན་པ་བྲི་བར་བྱའོ། །བཅོམ་ལྡན་འདས་ཀྱི་གཡོན་ལོགས་སུ་རྡོ་རྗེ་ཁྱབ་འཇུག་མ་སྟེ། སྐུ་མདོག་དཀར་བ་དང་ལྗང་བ་དང། ཕྱག་གཡོན་གྱི་སོར་མོ་དབུས་མའི་རྩེ་མོས་རྡོ་རྗེ་འཁོར་ལོ་བསྟོད་པ་ལ་བརྩོན་པ། ཕྱག་གཡས་བས་གདེན་ལ་བརྟེན་པ་དང་བཅས་པས་བཞུགས་པའོ། །དེའི་གཡོན་ལོགས་སུ་དྲི་མ་མེད་པའི་གསེར་གྱི་སྐུ་མདོག་ཅན། རྡོ་རྗེ་དྲིལ་བུའི་བ་དན་ཞེས་བྱ་བའི་ལྷ་མོ་རྡོ་རྗེ་དྲིལ་བུ་
དང་བཅས་པའི་གཡོན་པའི་རྡོ་རྗེ་ཁུ་ཚུར་གྱིས་བསྙེམས་པས་བཞུགས་པ། ཕྱག་གཡས་པས་དྲིལ་བུ་དང་བཅས་པའི་བ་དན་འཛིན་པ་བྲི་བར་བྱའོ། །དེ་དག་ཐམས་ཅད་ཀྱང་སེམས་དཔའི་སྐྱིལ་མོ་ཁྲུང་གིས་བཞུགས་པའོ། །ཅུང་ཟད་མ་ཆེ་བ་གཙིགས་པའོ། །ཁྲོ་དང་བཅས་པའི་ཞལ་བཤད་པ། །རང་བདག་ལ་ནི་ཐུགས་གཏད་ཅིང༌། །སྐུ་ནི་ཟུར་གྱིས་ཕྱོགས་པར་བཞུགས། །གསང་བའི་དཀྱིལ་འཁོར་འདིར་སྤྲུལ་པ་ལ་སོགས་པའི་ལས་ཐམས་ཅད་རྫོགས་པར་བྱེད་པའི་སྙིང་པོ་ནི་ཡི་གེ་ཧཱུཾ་ངོ༌། །ཉེ་བའི་སྙིང་པོ་ནི་ཧི་སྟེ་ལྷ་ཐམས་ཅད་ཀྱིའོ། །དེ་ལ་ཡ་གེ་ཧཱུཾ་གིས་བསྒྲུབ་པ་ནི་ཕྲ་མོའི་ཆོ་ག་གཉིས་པ་ལས་འོག་ནས་འཆད་པར་འགྱུར་བ་དེ་ཉིད་འདིར་ཤེས་པར་བྱའོ། །ཉེ་བའི་སྙིང་པོའི་སྒྲུབ་པ་བཤད་པར་བྱ་བའི་ཕྱིར་མཉམ་པོ་ཞེས་བྱ་བ་ལ་སོགས་པ་གསུངས་ཏེ། དེ་ལ་མཉམ་པོ་ནི་དུས་གཅིག་ཏུ་རྡོ་རྗེ་དང་བཅས་པའི་དྲིལ་བུ་ལ་སོགས་པའི་རོལ་མོ་བརྡུངས་ཤིང༌། སློབ་མའི་ཚོགས་མཁས་པ་དང་བཅས་པས་ཡི་གེ་ཧཱུཾ་གི་གླུ་དང་རོལ་མོ་བྱ་ཞིང་ཟུར་བཞི་པའི་གླུའི་སྦྱོར་བ་ཉེ་བར་མཚོན་པའི་རྣལ་འབྱོར་པ་ནི་ཟུར་བཞི་པ་སྟེ་རབ་ཏུ་གྲུབ་པར་འགྱུར་རོ། །དེ་ལྟར་ཡང་རྡོ་རྗེ་ཉི་མ་མེ་ལྟར་འབར་བའི་དངོས་གྲུབ་ཀྱིས་ཏེ། རྡོ་རྗེ་ཉི་མ་མེ་ལྟར་འབར་བའི་གསང་བའི་དཀྱིལ་འཁོར་འདིར་བཟླས་པའི་ཆོ་ག་ཡིན་ནོ། །གནས་གང་དུ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་རས་ལ་བྲི་བར་བྱ་སྟེ། འཁོར་ལོ་དེ་ནི་བརྟགས་བྱས་ནས། །ཞེས་བྱ་བ་ལ་སོགས་པ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་ཇི་ལྟ་བ་བཞིན་དུ་བཤད་པའི་འབར་བའི་འཁོར་ལོ་དེ་ནི་གསང་བའི་དཀྱིལ་འཁོར་རོ། །དེ་ཉིད་དམ་པ་ནི་ཕུལ་དུ་བྱུང་བས་ཏེ། བརྟགས་པ་ནི་ཡང་དག་པར་བརྟགས་ནས་གསང་བའི་དཀྱིལ་འཁོར་བྲིས་ཏེ། དཀྱིལ་འཁོར་གྱི་ལྟེ་བའི་ཕྱོགས་སུ་བཅོམ་ལྡན་འདས་བྲི་བར་བྱའོ་ཞེས་བྱ་བའི་དོན་ཏོ། །འདིར་དཀྱིལ་འཁོར་གྱི་ཆོ་ག་ཇི་ལྟ་བ་བཞིན་དུ་ཤེས་པར་བྱ་ཞེ་ན། མཚོན་ཆ་མཆོག་ཅེས་བྱ་བ་ལ་སོགས་པ་ལ། བཅོམ་ལྡན་འདས་རྡོ་རྗེ་སེམས་དཔའ་གསང་བའི་དཀྱིལ་འཁོར་གྱི་ཆོ་ག་ནི་མཚོན་ཆ་དམ་པའི་ཆོ་ག་སྟེ། བསྒྲུབ་པར་བྱ་བ་དང་སྒྲུབ་པའི་རིམ་པའི་ཆོ་ག་
དེས་རྡོ་རྗེའི་རིགས་དགུག་པ་ལ་སོགས་པའི་ཆོ་ག་རྒྱས་པ་ཐམས་ཅད་འདིར་ཤེས་པར་བྱའོ། །དེ་ལྟར་རྡོ་རྗེ་སེམས་དཔའི་གསང་བའི་དཀྱིལ་འཁོར་ལས་གསུངས་པའི་ཚུལ་གྱིས་རྡོ་རྗེའི་རིགས་ལས་གསུངས་པ་རང་འཇུག་པ་ལ་སོགས་པའི་ཆོ་ག་ཐམས་ཅད་དང༌། སློབ་མ་གཞུག་པ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ནས་དེ་ཁོ་ན་ཉིད་ལ་སོགས་པ་གསུམ་བོ་རྡོ་རྗེ་སློབ་དཔོན་གྱིས་སློབ་མ་རྣམས་ལ་བཤད་པར་བྱ་བ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པའོ། །དེ་ཁོ་ན་ཉིད་དང༌། ཆོས་དང༌། དམ་ཚིགས་ནི་དེ་ཁོ་ན་ཉིད་དང་ཆོས་དང་དམ་ཚིག་རྣམས་སོ། །དེ་རྣམས་ཀྱི་ཆོ་གས་སྦྱིན་པ་ནི་ཆོ་ག་རབ་ཏུ་སྦྱིན་པས་ཏེ་སློབ་མ་རྣམས་ལ་མན་ངག་སྦྱིན་པའོ། །དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཀྱི་ཐོག་མ་དང་ཐ་མ་མེད་པའི་མཚན་ཉིད་ཅན་གྱི་ཆོས་ཀྱི་དབྱིངས་ནི་རྟག་ཏུ་ཆགས་པ་སྟེ། དེ་ལས་བྱུང་བ་སྟེ་སྐྱེ་བ་གང་ལ་ཡོད་པ་དེ་རྟག་ཏུ་ཆགས་པ་ལས་བྱུང་བའི་ཁྲོ་བོ་ནི་རྡོ་རྗེ་ཉི་མ་མེ་ལྟར་འབར་བའོ། །དེའི་རྡོ་རྗེ་མེའི་ཕུང་བོ་ནི་རྡོ་རྗེ་འབར་བ་འབར་བའི་ཚོགས་ཏེ། དེའི་རང་བཞིན་ཅན་གྱི་སྐུ་ནི་སྐུ་རྣམས་ཉིད་དེ། དེ་དག་གང་ཡིན་ཞེ་ན། །རྡོ་རྗེ་འབར་བ་ཞེས་བྱ་བ་ལ་སོགས་པ་རྡོ་རྗེ་ཉི་མ་མེ་ལྟར་འབར་བའི་རྡོ་རྗེ་ནི་རྡོ་རྗེ་མེ་ལྟར་འབར་བ་སྟེ། དེའི་རྣལ་འབྱོར་ཆེན་པོའི་མཁའ་འགྲོ་མ་ནི་དེ་ལས་བྱུང་པའི་རྡོ་རྗེ་ཉི་མ་མེ་ལྟར་འབར་བ་ལ་སོགས་པའི་རྡོ་རྗེ་རིགས་ཀྱི་ཕྱག་རྒྱ་ཆེན་པོ་ཐམས་ཅད་ཕྱོགས་བཅུ་དང་ནམ་མཁའི་ཁམས་ལ་བཞུགས་པའོ། །འབར་བ་ཞེས་བྱ་བ་ནི་གདུག་པ་རྣམས་འདུལ་བའི་གཟུགས་ཀྱིས་ཐོགས་པ་མེད་པའོ། །དེ་ནི་རྡོ་རྗེའི་རིགས་ཞེས་བྱ་བ་ལ་དེ་ལྟར་རྡོ་རྗེའི་དེ་ཁོ་ན་ཉིད་ཤེས་པར་བྱ་སྟེ། ལྷག་པར་མོས་པ་འདིས་དེ་གཟུང་བར་བྱའོ་ཞེས་བྱ་བའི་དོན་ཏོ། །དེ་ལྟར་དེ་ཁོ་ན་ཉིད་ཀྱིས་རྡོ་རྗེ་གཟུང་བར་བྱའོ་ཞེས་བསྟན་ནས་ཆོས་ཀྱི་དྲིལ་བུ་དཀྲོལ་བར་བྱའོ་ཞེས་བྱ་བའི་དོན་ཏོ། །དེ་ནས་ཆོས་ཞེས་བྱ་བ་གསུངས་ཏེ། ཐམས་ཅད་ནམ་མཁའི་མཚན་ཉིད་ཅན། །ནམ་མཁའི་ཡང་ནི་མཚན་ཉིད་མེད། །ཅེས་བྱ་བ་ནི་བཤད་ཟིན་ཏོ། །ནམ་མཁའ་དང་མཉམ་པ་ཉིད་ནི་ཆོས་ཐམས་ཅད་
དངོས་པོ་མེད་པའི་ངོ་བོ་ཉིད་ཀྱི་དེ་བཞིན་ཉིད་དོ། །དེ་བཞིན་ཉིད་རོ་གཅིག་པའི་སེམས་དང་སེམས་ལས་བྱུང་བ་རྣམས་ནི་ནམ་མཁའ་དང་མཉམ་པ་ཉིད་ཀྱི་སྦྱོར་བའོ། །དེ་གང་ལ་ཡོད་པ་དེ་ནི་ནམ་མཁའ་དང་མཉམ་པ་ཉིད་ཀྱི་སྦྱོར་བ་དང་ལྡན་པ་ཡིན་ནོ། །དེས་ཐམས་ཅད་ནི་ཕྱག་རྒྱ་ཆེན་པོ་ལ་སོགས་པའོ། །མྱུར་བ་ནི་མྱུར་བ་ཉིད་དུ་སྒྲུབ་པར་བྱེད་པའི་ཡིན་ཏེ། དེ་ལྟར་དྲིལ་བུ་སྒྲ་བསྒོམ་ཞིང་དྲིལ་བུ་དཀྲོལ་བར་བྱའོ། །དེ་ལྟར་ཆོས་ཀྱི་དྲིལ་བུ་དཀྲོལ། །ཞེས་བྱ་བས་བསྟན་ནས། དམ་ཚིག་གིས་ནི་ཕྱག་རྒྱ་ཆེར་བྱིན་གྱིས་བརླབས་ཞེས་བསྟན་པར་བྱ་བའི་ཕྱིར། ནམ་མཁའ་ཀུན་མཆོག་ཅེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱང་དེ་ཡིན་ལ་ནམ་མཁའ་ཡང་དེ་ཉིད་ཡིན་པས་ན་ཐམས་ཅད་ནམ་མཁའ་སྟེ། རྫས་ཐམས་ཅད་ཀྱི་དངོས་པོ་མེད་པའི་རང་བཞིན་ཅན་གྱི་ནམ་མཁའ་དང་མཉམ་པའི་རང་བཞིན་གྱིས་འོད་གསལ་བའི་སེམས་སོ། །དེའི་རྣམ་པ་ཅན་གྱི་ཏིང་ངེ་འཛིན་ནི་ཐམས་ཅད་ནམ་མཁའི་མཆོག་གི་སྦྱོར་བའོ། །ཐམས་ཅད་ནམ་མཁའི་ཞེས་བྱ་བ་ལ་ཐམས་ཅད་ནམ་མཁའི་མཆོག་གི་སྦྱོར་བ་དེས་འདུས་བྱས་དང་འདུས་མ་བྱས་ཀྱི་དངོས་པོ་ཐམས་ཅད་ནམ་མཁའ་དང་མཉམ་པའོ་ཞེས་བྱ་བ་ནང་དུ་བརྗོད་པའི་རྣམ་པས་མངོན་དུ་བྱ་ཞིང༌། རྡོ་རྗེ་ཉི་མ་མེ་ལྟར་འབར་བ་ལ་སོགས་པའི་ཆོས་དང༌། ལས་དང་དམ་ཚིག་དང༌། ཕྱག་རྒྱ་ཆེན་པོའི་རྡོ་རྗེའི་རིགས་ཀྱི་རང་བཞིན་གྱི་རྡོ་རྗེའི་ཕྱག་རྒྱ་རྣམས་ཀྱིས་རྒྱས་བཏབ་པ་ནི་རང་གི་རང་བཞིན་དུ་བྱས་པའི་འཇིག་རྟེན་གསུམ་ཡང་ས་འོག་ས་སྟེང་ས་བླའི་རང་བཞིན་ཅན་ཟ་བ་ནི་སྣང་བར་བྱེད་པ་ཡིན་ནོ། །ཡང་གི་སྒྲས་ནི་ཕྱོགས་གཅིག་གི་དངོས་པོ་ཤིན་ཏུ་ཟ་བར་བྱེད་པ་ཡིན་ནོ། །རྡོ་རྗེ་རྣལ་འབྱོར་གྱི་མཁའ་འགྲོ་མ་རྣམས་ནི་རྡོ་རྗེ་རིགས་ཀྱི་ཕྱག་རྒྱ་ཆེན་པོ་རྣམས་ཏེ། དེ་དག་གི་མཆོག་ཏུ་གསང་བའི་དམ་ཚིག་ནི་འདའ་བར་དཀའ་བའི་ཉེ་པར་སྦྱོར་བའོ། །འདིས་ནི་དོན་འདི་འཆད་པར་འགྱུར་ཏེ། ཇི་ལྟ་བ་བཞིན་དུ་དེ་ཁོ་ན་ཉིད་ཀྱིས་རྡོ་རྗེ་བཟུང་ལ་ཆོས་ཀྱི་དྲིལ་བུ་དཀྲོལ་བར་བྱའོ། །དེ་ནས་རྡོ་རྗེ་ཉི་མ་མེ་ལྟར་འབར་བ་ལ་སོགས་པའི་ཕྱག་རྒྱ་ཆེན་པོ་བཅིངས་ནས་འདུས་བྱས་དང་འདུས་མ་བྱས་
ཀྱི་དངོས་པོ་ཐམས་ཅད་ནམ་མཁའ་དང་མཚུངས་པར་རྣམ་པར་བསམས་ལ་འཇིག་རྟེན་གྱི་ཁམས་ཐམས་ཅད་རྡོ་རྗེའི་རིགས་ཀྱི་རང་བཞིན་ཅན་བདག་ཉིད་ཀྱི་གཟུགས་སུ་བསམས་ཏེ་བསྒོམ་པར་བྱའོ། །ཆོ་ག་འདི་ཞེས་བྱ་བ་ནི་དེ་ཁོ་ན་ཉིད་དང་ཆོས་དང༌། དམ་ཚིག་གཟུང་བའི་མཚན་ཉིད་ཀྱི་མཆོག་ཐམས་ཅད་དེ། མ་ལུས་པ་བསྒྲུབ་པར་བྱ་བ་ནི་རྫོགས་པར་བྱའོ། །ཤིན་ཏུ་མཉམ་པར་གཞག་པ་ནི་སེམས་རྩེ་གཅིག་བའོ། །བསྒྲུབ་པར་བྱ་བ་དེ་གང་ཡིན་ཞེ་ན། ཀུན་མཆོག་ཅེས་བྱ་བ་ལ་སོགས་པ་ལ། རྡོ་རྗེ་རིགས་ཀྱི་ཆོས་དང༌། ལས་དང་དམ་ཚིག་དང༌། ཕྱག་རྒྱ་ཆེན་པོའི་དངོས་གྲུབ་རྣམས་ནི་ཀུན་མཆོག་དངོས་གྲུབ་ཆེན་པོ་རྣམས་སོ། །རྡོ་རྗེ་ཉི་མ་མེ་ལྟར་འབར་བའི་ལས་བརྒྱ་ལ་སོགས་པའི་རྒྱུན་ནི་ལས་ཀྱི་ཚོགས་སོ། །ཀུན་མཆོག་དངོས་གྲུབ་ཆེན་པོ་རྣམས་དང༌། ལས་ཀྱི་ཚོགས་ནི་ཀུན་མཆོག་དངོས་གྲུབ་ཆེན་པོའི་ལས་ཀྱི་ཚོགས་སོ། །དེ་ཡང་མི་ཟད་པ་ཞེས་བྱ་བ་ནི་ཐོག་མ་དང་ཐ་མ་མེད་པར་བསྒྲུབ་པར་བྱའོ། །དེ་ནས་ཇི་ལྟ་བ་བཞིན་དུ་དེ་བཞིན་གཤེགས་པའི་ཆོ་གས་རང་ཕྱག་རྒྱ་རྣམས་ཀྱི་གོང་དུ་ཉེ་བར་བསྡུ་བའི་མཆོད་པ་བྱས་ནས། རབ་ཏུ་འགྲུབ་པར་འགྱུར་ཞེས་བྱ་བ་ལ། འདིས་ནི་དོན་འདི་འཆད་པར་འགྱུར་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་ཐམས་ཅད་རྗེས་སུ་སྤྱད་ནས་རྡོ་རྗེ་ཉི་མ་མེད་ལྟར་འབར་བ་རྣམ་པར་བསྒོམས་ལ། དམ་ཚིག་སེམས་དཔའ་བྱིན་གྱིས་བརླབ་པ་བྱས་ལ། རྡོ་རྗེ་ཉི་མ་མེ་ལྟར་འབར་པའི་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ཇི་ལྟ་བ་བཞིན་དུ་རང་གི་སྙིང་གར་རྡོ་རྗེ་ཉི་མ་མེ་ལྟར་འབར་བའི་གསང་བའི་དཀྱིལ་འཁོར་རྡོ་རྗེ་འཁོར་ལོའི་ཕྱག་རྒྱ་རྫོགས་པར་བྱས་ནས་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པའི་རང་འཇུག་པའི་ཆོ་ག་སྔ་མ་བཞིན་དུ་བྱས་ལ། འཕགས་པ་དེ་ཁོ་ན་ཉིད་བསྡུས་པའི་འཇིག་རྟེན་གསུམ་ལས་རྣམ་པར་རྒྱལ་བའི་དཀྱིལ་འཁོར་ཆེན་པོ་ལས་གསུངས་པའི་ལྷ་རྣམས་ཀྱིས་རྣལ་འབྱོར་ཆེན་པོ་བྱས་ལ་དེ་བཞིན་གཤེགས་པ་ཐམས་ཅད་ཀྱི་སྐུ་རང་གི་ལུས་ལ་བཅུག་སྟེ། ཕྱག་རྒྱ་བཞིས་རྒྱས་བཏབ་པར་བྱས་ལ་འཇིག་གསུམ་ལས་རྣམ་པར་རྒྱལ་བའི་ཕྱག་རྒྱ་དང༌། དང་པོའི་རྡོ་རྗེ་སེམས་དཔའ་ལ་སོགས་
པ་རྣམས་ཀྱིས་སྔ་མ་བཞིན་དུ་བདག་ཉིད་ལ་བྱིན་གྱིས་བརླབས་ཏེ་དབང་བསྐུར་བ་ཐམས་ཅད་བཟུང་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་བླངས་ལ། ཁྲོ་བོ་རྡོ་རྗེ་མཚོན་ཆ་མ་ལ་སོགས་པའི་མཆོད་པའི་ཕྱག་རྒྱ་བཅུ་གཉིས་ཀྱིས་བདག་ཉིད་ཡང་དག་པར་མཆོད་ལ། ཕྱག་བཞི་དང་རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་བཙལ་བ་བྱས་ནས། དང་པོ་སྦྱོར་བ་དང༌། དཀྱིལ་འཁོར་རྒྱལ་པོ་མཆོག་དང་ལས་ཀྱི་རྒྱལ་པོ་མཆོག་རྣམ་པར་བསྒོམ་པར་བྱའོ། །དེ་ནས་བསྡུ་བ་དང༌། མཚན་བརྒྱ་རྩ་བརྒྱད་ཀྱིས་བསྟོད་པར་བྱས་ལ་རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཆེན་པོ་ལས་གསུངས་པའི་ལྕགས་ཀྱུས་འཁོར་དང་བཅས་པའི་བཅོམ་ལྡན་འདས་དཀྱིལ་འཁོར་དུ་བཅུག་སྟེ། ཇི་ལྟ་བ་བཞིན་དུ་ཕྱག་རྒྱ་བཞིས་རྒྱས་བཏབ་པར་བྱས་ལ། དབང་བསྐུར་བའི་ཕྱག་རྒྱས་དབང་བསྐུར་ཏེ་མཆོད་པའི་ཕྱག་རྒྱ་བཅུ་གཉིས་ཀྱིས་ཡང་དག་པར་མཆོད་ཅིང་ཕྱག་འཚལ་ཏེ། དེ་ལྟར་ཉིན་རེ་བཞིན་དུ་བསྒོམ་པར་བྱས་ན་ཇི་སྲིད་དཀྱིལ་འཁོར་མཐོང་བར་འགྱུར་རོ། །ཡི་གེ་ཧིའམ། ཡི་གེ་ཧཱུཾ་བརྗོད་ཅིང༌། རྡོ་རྗེ་དྲིལ་བུ་སོགས་མཉམ་བཅས། །རྣམ་དབེན་རོལ་མོ་བརྡུངས་པ་ཡིས། །ཡི་གེ་ཧི་ཡི་གླུ་རོལ་མོ། །བྱ་ཞིང་ཟུར་བཞི་འགྲུབ་པར་འགྱུར། །ཞེས་བྱ་བ་འདི་ནི་བཟླས་པའི་ཆོ་གའོ། །དེ་ནས་ཇི་ལྟ་བ་བཞིན་དུ་ལྷག་པར་གནས་པར་བྱས་ལ་ཉི་མ་འཆར་ཀའི་དུས་སུ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཚུལ་དུ་ཕྱིའི་དཀྱིལ་འཁོར་ཐིག་བཏབ་ནས། དེ་ནང་དུ་དེའི་ཕྱེད་ཀྱི་ཚད་རྡོ་རྗེ་རྩེ་གསུམ་པའི་ཐིག་ཟླུམ་པོ་འབར་བ་དང་བཅས་པ་དང༌། ཀ་བ་བརྒྱད་དང་ལྡན་པར་ཐིག་གདབ་པར་བྱའོ། །དེ་ནས་ཇི་ལྟ་བ་བཞིན་དུ་ཡང་དག་པར་བྲིས་ལ། དབུས་ཀྱི་དཀྱིལ་འཁོར་གྱི་ལྟེ་བའི་ཕྱོགས་སུ་ལྷ་མོ་བཞི་དང་ཡང་དག་པར་འདུས་པའི་སྦྱོར་བས་ཧཱུཾ་ཧི་ཞེས་བྱ་བ་བརྗོད་ཅིང༌། བཅོམ་ལྡན་འདས་རས་རིས་ལ་བྲི་བར་བྱའོ། །དཀྱིལ་འཁོར་ཆེན་པོ་ལས་གསུངས་པའི་སྙིང་པོ་བཞི་པོས་ལྷ་མོ་བཞི་བྲི་བར་བྱའོ། །ཕྱི་རོལ་གྱི་དཀྱིལ་འཁོར་གྱི་མཚམས་བཞི་དང་སྒོ་བཞི་ལ་རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཆེན་པོ་ལས་གསུངས་པའི་ཚོགས་ཁྲོ་བོ་སྒེག་མོ་ལ་སོགས་པ་དང་ཁྲོ་བོ་རྡོ་རྗེ་ལྕགས་ཀྱུ་མ་
ལ་སོགས་པ་བཞི་བྲི་བར་བྱའོ། །དེ་ལ་རྡོ་རྗེ་མ་མེ་ལྟར་འབར་བའི་དཀྱིལ་འཁོར་ཆེན་པོ་ལས་གསུངས་པའི་ཕྱག་རྒྱ་དང་སྔགས་ཀྱིས་དེ་བཞིན་གཤེགས་པའི་གསང་བའི་དཀྱིལ་འཁོར་གྱི་ཆོ་གས་དཀྱིལ་འཁོར་བསྒྲུབ་པ་ཐམས་ཅད་དང༌། རང་འཇུག་པ་ལ་སོགས་པའི་ཆོ་ག་དང་སློབ་མ་གཞུག་པ་ལ་སོགས་པའི་ཆོ་ག་ཐམས་ཅད་བྱའོ། །རྡོ་རྗེ་རྣལ་འབྱོར་གྱི་ཆོ་གའོ་ཞེས་བྱ་བ་ལ། ལྷ་མོ་བཞི་དང་ཡང་དག་པར་འདུས་པའི་སྦྱོར་བས་རྡོ་རྗེ་ཉི་མ་མེ་ལྟར་འབར་བའི་སྐུའི་གསང་བ་གང་ཡིན་པ་དེ་གནས་པ་ནི་རྡོ་རྗེ་རྣལ་འབྱོར་རོ། །དེའི་ཆོ་ག་ནི་བསྒྲུབ་པར་བྱ་བ་དང༌། སྒྲུབ་པའི་རྟོག་པ་བསྟན་པའོ། དཔལ་མཆོག་དང་པོའི་རྒྱ་ཆེར་འགྲེལ་པ་ཤེས་རབ་ཀྱི་ཕ་རོལ་ཏུ་ཕྱིར་པ་འབྱུང་བ་ཞེས་བྱ་བ་ལས་རྡོ་རྗེ་ཉི་མ་མེ་ལྟར་འབར་བའི་གསང་བའི་རས་རིས་ཀྱི་དཀྱིལ་འཁོར་གྱིས་བཤད་པ་རྫོགས་སོ།། །།དེ་ལྟར་རྡོ་རྗེ་ཉི་མ་མེ་ལྟར་འབར་བའི་གསང་བའི་རས་རིས་ཀྱི་དཀྱིལ་འཁོར་གྱི་ཆོ་བསྟན་ནས། ད་ནི་རྡོ་རྗེ་ཉི་མ་མེ་ལྟར་འབར་བའི་རས་རིས་ཀྱི་དཀྱིལ་འཁོར་ཉིད་ཀྱི་ཆོ་ག་གཉིས་པ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་དེ་མ་ཐག་པ་རྗོད་པར་བྱེད་པ་སྟེ། དང་པོའི་སྦྱོར་བའི་རྗེས་ཐོགས་ཉིད་དུའོ། །འདིར་དང་པོའི་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པ་ཉིད་དོ། །ཡི་གེ་ཧཱུཾ་གིས་དཀྱིལ་འཁོར་སྤྲུལ་ཏེ། གནས་ཇི་ལྟ་བ་བཞིན་དུ་རང་གི་སྙིང་པོ་རྣམས་ཀྱིས་ལྷ་ཐམས་ཅད་དགོད་པར་བྱ་སྟེ། ཏིང་ངེ་འཛིན་གཉིས་པ་ཤེས་པར་བྱའོ། །དེ་ནས་ཇི་ལྟ་བ་བཞིན་དུ་འདུས་པ་སྔོན་དུ་འགྲོ་བས་གསུམ་པ་ཤེས་པར་བྱའོ། །དེ་ལྟར་ཏིང་ངེ་འཛིན་གསུམ་བསྟན་ནས། ད་ནི་དམ་ཚིག་དང་དབང་བསྐུར་བ་ཐོབ་ནས་བཟླས་པ་དང་བསྒོམ་པར་བྱ་བ་ཡིན་ནོ་ཞེས་བྱ་བའི་ཆོ་ག་འདི་རབ་ཏུ་བསྟན་པར་བྱ་བའི་ཕྱིར་ཤིན་ཏུ་ཕྲ་བ་ལ་སོགས་པས་སློབ་དཔོན་གྱི་ལས་ལ་སོགས་པའི་ཆོ་ག་དང༌། སློབ་མ་གཞུག་པ་ལ་སོགས་པའི་ཆོ་ག་གསུངས་ཏེ། འདས་མ་ཐག་ཏུ་བཤད་པའི་དཀྱིལ་འཁོར་ཕྲ་བ་ལས་ཀྱང་ཤིན་ཏུ་ཕྲ་བ་ཡིན་ནོ། །དེ་བཤད་པ་ནི་བསྟན་པར་བྱའོ། །འདིར་ཤིན་ཏུ་ཁྲོ་བ་སྒེག་པ་སྟོན་པར་བྱེད་པས་ན་ཤིན་ཏུ་གསང་བ་ཡིན་ནོ། །རྡོ་རྗེ་ནི་རྡོ་རྗེ་ཉི་མ་མེ་
ལྟར་འབར་བའི་རྡོ་རྗེ་སྟེ། དེའི་གསང་བའི་རྣལ་འབྱོར་ཆེན་པོའི་མཁའ་འགྲོ་མ་རྣམས་ཀྱི་དཀྱིལ་འཁོར་ནི་ནམ་མཁའ་ཐམས་ཅད་ཁྱབ་པའི་ཕྱིར་ཆེན་པོ་དེ་ཉིད་ཡིན་ནོ། །ཇི་བཞིན་ཞེས་བྱ་བ་ལ་སོགས་པ་ལ། དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ཆེན་པོ་ལས་གསུངས་པའི་ཆོ་གས་གྲོང་ཁྱེར་སུམ་བརྩེགས་དང་སྐྱེད་མོས་ཚལ་ལ་སོགས་པས་ཡང་དག་པར་བརྒྱན་ལ། རྡོ་རྗེ་འཆང་ཐམས་ཅད་ཀྱི་སློབ་དཔོན་རྡོ་རྗེ་ཉི་མ་མེ་ལྟར་འབར་བའི་གསང་བའི་དཀྱིལ་འཁོར་ལས་གསུངས་པའི་ཚུལ་གྱིས་རྣལ་འབྱོར་ཆེན་པོ་བྱས་ལ། དེའི་རྡོ་རྗེ་འཛིན་པས་མཚན་མ་ཐོབ་ནས་གསང་བའི་དཀྱིལ་འཁོར་ཇི་ལྟ་བ་བཞིན་དུ་བསྒྲུབས་པས་ཡང་དག་པར་བྲིས་ལ་རྡོ་རྗེ་ཆེན་པོ་འདོད་པའི་མེ་འབར་བ་ལ་སོགས་པའི་གསང་བའི་ལྷ་མོ་བཞིའི་རྣལ་འབྱོར་དང་ལྡན་པ་དང༌། དེའི་རིགས་དང་རྒྱན་དང་ལྡན་པའི་བུ་མོ་བཞི་དང་ལྡན་པ་དང༌། རང་ཉིད་རྡོ་རྗེ་དྲག་པོའི་རྣལ་འབྱོར་དང་ལྡན་པ་དང༌། དེའི་དབྱིབས་དང་རྒྱན་དང་ལྡན་པས་གར་ལས་བྱུང་བའི་མེ་ཏོག་དང་བཅས་པའི་ཕྱག་འཚལ་བའི་ཐལ་མོ་རང་གི་སྤྱི་བོར་བཅིངས་ལ། ཧཱུཾ་རྡོ་རྗེ་གཞུ་དང་མདའ་བཅས་ཕྱག་འཚལ་ལོ། །ཞེས་བྱ་བ་ལ་སོགས་པའི་འཇུག་པའི་གླུ་བརྗོད་ཅིང་ལྷ་མོ་བཞིའི་ཕྲེང་བའི་དབུས་ན་བཞུགས་པའི་སློབ་དཔོན་གྱིས་རང་གི་ལྷའི་མེ་ཏོག་གི་ཕྲེང་བ་བླངས་ཏེ། འཇུག་པའི་གླུ་དང༌། རང་གི་ལྷའི་སྙིང་པོ་རྗོད་པར་བྱེད་པའི་བུ་མོ་དེ་རྣམས་དང་བཅས་པར་དཀྱིལ་འཁོར་དུ་འཇུག་པར་བྱའོ། །དེ་ནས་གཡོན་པའི་ཁ་ནི་གྱེན་དུ་བསྟོད། །རྡོ་རྗེ་དྲག་པོ་བཞད་པ་ཆེན་པོའི་སྒྲ་སྒྲོགས་མཆོག་གི་མིང་ཅན་གྱི་ཕྱག་རྒྱས་ཧ་ཧ་ཧ་ཧ། ཨོཾ་བཛྲ་རུ་ལུ་རུ་ལུ་ལཾ་ཞེས་བརྗོད་ཅིང་དགའ་བ་ཆེན་པོའི་དབུགས་ཀྱི་རླུང་གིས་རུ་ལུ་ནི་དྲུག་དང་ལྡན་པར་བར་མ་དག་གིས་བཅོམ་ལྡན་འདས་ལ་མཆོད་པར་བྱའོ། །འདི་ནི་འདིར་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་བུ་མོ་དེ་རྣམས་དང་ལྷན་ཅིག་ཏུ་བཅོམ་ལྡན་འདས་ལ་ཕྱག་བྱས་ནས་མེ་ཏོག་དོར་བའི་སྔགས་ཀྱིས་མེ་ཏོག་གི་ཚོགས་གཏོར་བར་བྱའོ། །དེ་ནས་ཇི་ལྟ་བ་བཞིན་དུ་ཕྲེང་བའི་དབང་བསྐུར་བ་བླངས་ཏེ། གདོང་གཡོགས་དཀྲོལ་ཏེ་དཀྱིལ་འཁོར་མཐོང་ནས་འཇུག་
པའི་ཕྱག་རྒྱ་དགྲོལ་བར་བྱས་ནས། ཆུའི་དབང་བསྐུར་བས་དབང་བསྐུར་ལ་ཕྱག་རྒྱའི་དབང་བསྐུར་བ་ལ་སོགས་པ་ནས། དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ཐུག་པ་གཟུང་བར་བྱའོ། །དང་པོ་རེ་ཞིག་ཐོད་པའི་ཕྲེང་བའི་ཅོད་པན་གྱིས་དབང་བསྐུར་བའི་ཕྱག་རྒྱས་སོ། །དེ་ནས་སངས་རྒྱས་ལྔའི་ཅོད་ཕན་གྱིས་དབང་བསྐུར་བའི་ཕྱག་རྒྱས་སོ། །དེ་ནས་ཐོད་པའི་ཕྲེང་བ་དེ་བཞིན་གཤེགས་པ་ལྔ་དང་ལྷན་ཅིག་པའི་གསང་བའམ་བརྡུངས་པ་ལ་སོགས་པའི་རང་བཞིན་ཅན་རྡོ་རྗེ་རིན་པོ་ཆེ་དང་ཅོད་པན་གྱི་སྔགས་དག་གིས་ཡོངས་སུ་བཟླས་པའི་ཕྱིའི་ཅོད་པན་གྱིས་ཀྱང་དབང་བསྐུར་བར་བྱའོ། །དེ་ལ་གཙུགས་ཏོར་དང་མདུན་དང་ལོགས་གཉིས་དང༌། རྒྱབ་ཏུ་རྡོ་རྗེ་རྩེ་ལྔ་པས་མཚན་པའི་ཐོད་པ་རྣམས་ཏེ་དེ་རྣམས་ཀྱི་སྟེང་དུ་དེ་བཞིན་གཤེགས་པ་རྣམས་ཅོད་པན་དུ་བྱའོ། །དེ་ལྟར་ཐོད་པའི་ཕྲེང་བའི་དབང་བསྐུར་གྱིས་བདག་ཉིད་ལ་དབང་བསྐུར་ཏེ། ཆོ་ག་ཐམས་ཅད་རྫོགས་པར་བྱས་ནས་བདག་ཉིད་དང་བུ་མོ་རྣམས་ལ་དམ་ཚིག་གསུམ་སྦྱིན་པར་བྱའོ་ཞེས་བྱ་བ་བསྟན་པའི་ཕྱིར། རྡོ་རྗེ་པདྨའི་དབང་བསྐུར་གྱིས། །དམ་ཚིག་འདི་ནི་གསལ་པར་སྦྱིན། །ཞེས་བྱ་བ་གསུངས་ཏེ། གསང་བ་ནི་གསལ་བའོ། །ད་ནི་རྡོ་རྗེ་པདྨའི་ཕྱག་རྒྱ་བསྟན་པའི་ཕྱིར། དེ་ལ་འདི་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་བསྡམས་པ་ནང་དུ་བྱས་པའི་སོར་མོའི་རྩེ་མོ་ཐམས་ཅད་ཕན་ཚུན་དུ་ཡང་དག་པར་སྦྱར་བ་བྱས་ལ་མཐེ་བོང་གཉིས་རྩེ་མོ་ཡང་དག་པར་སྦྱར་བའི་རྩེ་མོ་བྱས་ཏེ། དེས་སོར་མོའི་རྩེ་མོ་རྣམས་དགབ་པར་བྱས་ཏེ། འདི་རྡོ་རྗེ་པདྨས་ཏེ་དབང་བསྐུར་བའི་ཕྱག་རྒྱའོ། །དེ་ནས་ཧཱུཾ་ཨ་བྷི་ཥིཉྩ་མཾ་ཞེས་བྱ་བ་བརྗོད་ཅིང་གཙུག་ཏོར་གྱི་ཕྱག་རྒྱ་དང༌། སླར་ཡང་སྤྱི་བོ་དང༌། རྣ་བ་གཉིས་ཀྱི་སྟེང་དང༌། སྤྱི་བོའི་རྒྱབ་ཏུ་དབང་བསྐུར་བར་བྱའོ། །འདིས་དབང་བསྐུར་བ་ཙམ་གྱིས་ཞེས་བྱ་བ་ལ་སོགས་པ་ལ། རྡོ་རྗེ་པདྨའི་དབང་བསྐུར་བ་འདིས་སྒྲུབ་པ་པོ་དབང་བསྐུར་བ་ཙམ་གྱིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་དེ། དེ་དེ་དག་གིས་བྱིན་གྱིས་བརླབ་པ་དང་ཞེས་བྱ་བ་སྦྱར་རོ། །སྒྲུབ་པ་པོ་དེ་ལ་ཇི་ལྟར་བྱིན་གྱིས་བརླབ་པ་མཛད་ཅེ་ན། ཤིན་ཏུ་གདུག་པ་དང༌། དྲག་པ་དང༌། རབ་ཏུ་གཏུམ་པོ་དང༌། མ་རུངས་པའི་སེམས་ཅན་རྣམས་ཐལ་བར་རབ་ཏུ་
འཇིག་པའི་རྒྱུར་གྱུར་པའི་ཕྱིར་ཐལ་བར་རབ་ཏུ་རློག་པའོ། །དབང་ཕྱུག་ཆེན་པོ་ལ་སོགས་པའི་འཇིག་རྟེན་གསུམ་ལས་རྣམ་པར་རྒྱལ་བས་ན་ཐམས་ཅད་ལས་རྣམ་པར་རྒྱལ་བའོ། །ཁམས་གསུམ་མ་ལུས་པའི་རྡོ་རྗེ་ཆེན་པོའི་འཁོར་ལོས་སྒྱུར་བ་ཞེས་བྱ་བར་ཡང་བྱིན་གྱིས་བརླབ་པར་འགྱུར་རོ། །དེ་ཉིད་ཀྱིས་རྡོ་རྗེ་ཞེས་བྱ་བ་ལ་སོགས་པ་ནི་གོ་སླའོ། །བུད་མེད་རྣམས་ཀྱང་འབེབས་གྱུར་ན། །ཞེས་བྱ་བ་ལ་སོགས་པ་ལ། དཀྱིལ་འཁོར་དུ་ཞུགས་པའི་བུ་མོ་རྣམས་གང་ཡིན་པ་དེ་དག་ཀྱང་འབེབས་ན། བདག་ཉིད་མངའ་འཛིན་པ་ལ་སོགས་པའི་རང་གི་ལྷ་མོའི་རྣལ་འབྱོར་གྱི་སྒོམ་པའི་རང་བཞིན་གྱིས་རྡོ་རྗེ་འབེབས་པས་ཕབ་སྟེ། སྟོན་པ་ནི་དེ་བཞིན་གཤེགས་པ་རྣམས་ཀྱི་རྡོ་རྗེ་པདྨའི་དབང་བསྐུར་བས་དབང་བསྐུར་ཏེ། དེ་ཁོ་ན་ཉིད་དང་ཆོས་དང༌། དམ་ཚིག་བླངས་ལ་རྡོ་རྗེ་མདའ་ལ་སོགས་པའི་རྡོ་རྗེས་མཚན་པའི་ཕྱག་མཚན་འཛིན་པའི་རྣལ་འབྱོར་རྣམས་དབང་དུ་འགྱུར་རོ། །རྡོ་རྗེ་འདོད་པའི་མེ་ལ་སོགས་པའི་ལྷ་མོའི་གཟུགས་སུ་ཡང་དག་པར་འགྱུར་རོ། །འདིས་ནི་འདི་ལྟར་འཆད་པར་འགྱུར་ཏེ་ཇི་ལྟར་སློབ་དཔོན་གྱིས་རང་ཉིད་རྡོ་རྗེ་ཉི་མ་མེ་ལྟར་འབར་བའི་རྡོ་རྗེ་དྲག་པོའི་གཟུགས་སུ་བྱིན་གྱིས་བརླབས་ནས་དབང་བསྐུར་ཏེ། དེ་ཁོ་ན་ཉིད་དང༌། ཆོས་དང༌། དམ་ཚིག་བླངས་ནས་དཀྱིལ་འཁོར་དུ་ཞུགས་ཏེ། ཁམས་གསུམ་མ་ལུས་པའི་སྟོབས་ཆེན་པོའི་འཁོར་ལོས་སྒྱུར་བར་འགྱུར་རོ། །དེ་བཞིན་དུ་བུ་མོ་རྣམས་ཀྱང་རང་གི་ལྷའི་རྣལ་འབྱོར་གྱིས་བདག་ཉིད་ལ་དབང་བསྐུར་བྱས་ནས་དེ་ཁོ་ན་ཉིད་དང༌། ཆོས་དང༌། དམ་ཚིག་བླངས་ཏེ། རྡོ་རྗེ་འདོད་པའི་མེ་ལ་སོགས་པའི་ལྷ་མོའི་གཟུགས་སུ་འགྱུར་བ་ཡིན་ནོ། །ད་ནི་བུ་མོ་དང་བཅས་པའི་སློབ་དཔོན་ལ་རྡོ་རྗེ་ཉི་མ་མེ་ལྟར་འབར་བ་ལ་སོགས་པ་འབེབས་པ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཞེས་བྱ་བའི་སྒྲ་ནི་དགར་བ་ལའོ། །ཐོག་མ་ཁོ་ནར་ཞེས་བྱ་བ་ནི་ཤིན་ཏུ་དང་པོ་ཁོ་ནའོ། །རེ་ཞིག་གི་སྒྲ་ནི་རིམ་པ་ལ་ལྟོས་པའོ། །རྡོ་རྗེ་ཉི་མ་མེ་ལྟར་འབར་བ་ཆེན་པོ་ནི་ཉི་མ་དང་འདྲ་བས་ན་ཉི་མའོ། །གདུག་པ་དང་དྲག་པོ་རྣམས་ཐལ་བར་རབ་ཏུ་འཇིག་པའི་རྒྱུར་གྱུར་པའི་ཕྱིར་ཐལ་བར་རབ་ཏུ་རློག་གོ །རྡོ་རྗེ་ཉི་མ་
མེ་ལྟར་འབར་བ་ཆེན་པོ་ཡང་ཡིན་ལ་ཐལ་བར་རབ་ཏུ་རློག་པ་ཡང་དེ་ཉིད་ཡིན་པས་ན། རྡོ་རྗེ་ཉི་མ་མེ་ལྟར་འབར་བ་ཆེན་པོ་ཐལ་བར་རབ་ཏུ་རློག་པས་ཏེ་དེའི་མིང་དང་ལྡན་པ་ཞེས་བྱ་བའོ། །དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་ཆེན་པོའི་ཁྲོ་བོ་ཐམས་ཅད་ཀྱི་བདག་ཉིད་དོ། །མཆོག་དང་པོ་ནི་ཐོག་མ་དང་ཐ་མ་མེད་པའོ། །ཡང་དག་པར་འབེབས་པའོ་ཞེས་བྱ་བ་ནི་སྒྲུབ་པ་པོའི་རྒྱུད་ལ་རབ་ཏུ་ཞུགས་པའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོ་ནི་དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོ་སྟེ། དེས་ཐབས་ཀྱི་ངོ་བོར་བསྐྱེད་པའི་ཞེ་སྡང་གི་ཁྲོ་བོ་མེ་ལྟར་འབར་བའི་འོད་ཟེར་གྱིས་ཉེ་བར་མཚོན་ལ། མི་ཕྱེད་པའི་ཁོན་དུ་འཛིན་པའི་ཁྲོ་བོའི་མེ་ལྟར་འབར་བའི་རྡོ་རྗེ་ནི་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་ཁྲོ་བོའི་རྡོ་རྗེ་ཁ་ཊྭཱཾ་གའི་རྒྱལ་མཚན་དང་བཅས་པས་བཞུགས་པ་ནི་རྡོ་རྗེ་ཁ་ཊྭཱཾ་གའི་རྒྱལ་མཚན་དང་བཅས་པའོ། །དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་ཐབས་ཀྱི་ཁོན་དུ་འཛིན་པའི་ཁྲོ་བོའི་མེ་འབར་བའི་རྡོ་རྗེ་ཡང་དེ་ཉིད་ཡིན་ལ་རྡོ་རྗེ་ཁ་ཊྭཱཾ་གའི་རྒྱལ་མཚན་དང་བཅས་པ་ཡང་དེ་ཉིད་ཡིན་པས་ན་དེ་བཞིན་གཤེགས་པ་ཐམས་ཅད་ཀྱི་ཐུགས་རྗེ་ཆེན་པོའི་ཐབས་ཀྱིས་ཁོ་ན་དུ་འཛིན་པའི་ཁྲོ་བོ་མེ་འབར་བའི་རྡོ་རྗེའི་ཁ་ཊྭཱཾ་གའི་རྒྱལ་མཚན་དང་བཅས་པའོ། །ངེས་པར་སྦྱོར་བ་ནི་གཙོ་བོ་ཉིད་དུ་ངེས་པར་སྦྱོར་བའོ། །བ་དན་དང་བཅས་པའི་དྲིལ་བུ་ནི་བ་དན་གྱི་དྲིལ་བུ་སྟེ་དེ་འཛིན་པར་མཛད་པས་ན་བ་དན་གྱི་དྲིལ་བུ་འཛིན་པའོ། །རྡོ་རྗེ་སྙེམས་མ་ནི་ཇི་ལྟ་བ་བཞིན་དུ་བཤད་པའོ། །དེའི་བདག་པོ་ནི་རྡོ་རྗེ་སྙེམས་མའི་བདག་པོའོ། །འབེབས་པའི་ཁྱད་པར་ཇི་ལྟ་བུ་དང་ལྡན་པས་འབེབས་པ་ནི་ཤིན་ཏུ་ཁྲོ་བོའི་འབེབས་པ་སྟེ། བཅོམ་ལྡན་འདས་དེ་འབེབས་པར་འགྱུར་རོ། །དེ་ལྟ་བུའི་ཕྱག་རྒྱ་གང་དང་ལྡན་པ་ཡིན་ཞེ་ན། སྒེག་པ་དང་བཅས་པ་ཞེས་བྱ་བ་ལ་སོགས་པ་ལ། སྒེག་པ་དང་ཁྲོ་བོ་སྟོན་པར་བྱེད་པའི་སྨིན་མཚམས་ཀྱི་དབྲལ་བའི་རི་མོ་ནི་སྒེག་པ་དང་བཅས་པའི་སྨིན་མཚམས་ཀྱི་ཁྲོ་གཉེར་ཏེ། དེ་དང་བཅས་པའི་སྤྱན་སེར་པོ་ནི་དམར་སེར་ཏེ། འཇིགས་པ་ཆེན་པོས་འཇིགས་པར་བྱེད་པའི་སྤྱན་དམར་སེར་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ལྟ་བུའི་ལྟ་བ་དང་ལྡན་པའི་
བཅོམ་ལྡན་འདས་ཡང་དག་པར་ཕབ་ནས་དེས་ཇི་ལྟར་མཛད་ཅེ་ན། འདིས་ཞེས་བྱ་བ་ལ་སོགས་པ་ལ་དེ་ལྟར་གྱུར་པའི་ལྟ་བའི་ཕྱག་རྒྱ་འདིས་སྒྲུབ་པ་པོའི་རྒྱུད་ལ་བཅོམ་ལྡན་འདས་བཞུགས་ནས་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཐམས་ཅད་ཀྱི་དཀྱིལ་འཁོར་དུ་སྟོང་ཕྲག་བརྒྱ་བཟླས་པས་སྒྲུབ་པ་པོ་ལ་སྒྲུབ་པར་མཛད་པ་ཡིན་ནོ། །དཀྱིལ་འཁོར་དུ་སྟོང་ཕྲག་བརྒྱའི་བཟླས་པས་མ་གྲུབ་ན་དེ་ནས་དུས་ཕྱི་མ་ལ་ཡི་གེ་ཧཱུཾ་ལན་ཅིག་བཟླས་པས་རྗེས་སུ་ཆགས་པ་ལ་སོགས་པ་སྒྲུབ་པར་བྱེད་པ་ཡིན་ནོ་ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་ཞེས་བྱ་བ་ལ་སོགས་པ་གསུངས་སོ། །ཏིང་ངེ་འཛིན་གང་གིས་ཡི་གེ་ཧཱུཾ་ལན་ཅིག་བཟླས་པས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་དང༌། དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པ་དང༌། འབེབས་པར་ནུས་ཤེ་ན། ཐམས་ཅད་ནམ་མཁར་སྦྱོར་བའི་ཏིང་ངེ་འཛིན་གྱིས་ཞེས་བྱ་བ་ལ། ཡི་གེ་ཧཱུཾ་ལན་ཅིག་བརྗོད་པ་ཙམ་གྱིས་གདོད་མ་ནས་མ་སྐྱེས་པའི་རྡོ་རྗེ་ཉི་མ་མེ་ལྟར་འབར་བའི་བསྒོམ་པ་ཐམས་ཅད་ནམ་མཁའི་སྦྱོར་བའི་ཏིང་ངེ་འཛིན་དང་ལྷན་ཅིག་བརྗོད་པ་ཙམ་གྱིས་དེ་བཞིན་གཤེགས་པ་ཐམས་ཅད་རྗེས་སུ་ཆགས་པ་ལ་སོགས་པའི་ལས་བྱེད་པའོ་ཞེས་བྱ་བའི་དོན་ཏོ། །གང་ཞིག་ཁམས་གསུམ་པ་ཐམས་ཅད་ཀྱི་ཁོངས་སུ་ཆུད་པའི་རྡོ་རྗེའི་བདུད་ལ་སོགས་པའི་བདུད་ཐམས་ཅད་དང༌། གང་ཞིག་དེ་བཞིན་གཤེགས་པ་ཐམས་ཅད་ནི་དེ་བཞིན་གཤེགས་པ་རྣམས་ཀྱི་བསྟན་པ་རྣམས་ཤིན་ཏུ་གདུག་པ་དང་དྲག་པོ་དང༌། རབ་ཏུ་གཏུམ་པའི་མ་རུངས་པའི་སེམས་ཅན་རྣམས་དང༌། གང་ཞིག་སེམས་ཅན་ཉེ་བར་འཚེ་བ་ལ་རབ་ཏུ་འཇུག་པའི་མཁའ་འགྲོ་མ་དྲག་པོ་རྣམས་དང༌། གང་ཞིག་ཉན་ཐོས་དང་རང་སངས་རྒྱས་རྣམས་ཏེ་དེ་དག་ཀྱང་སྒྲུབ་པ་པོའི་འདོད་པས་ཐལ་བར་རབ་ཏུ་འཇིག་པར་འགྱུར་ཏེ། དམྱལ་བར་སྐྱེ་བའི་རྒྱུར་གྱུར་པ་སྤྱོད་པ་ངན་པའི་རང་བཞིན་ཅན་གྱི་ཕན་པ་མ་ཡིན་པ་ལ་སོགས་པ་གཞན་རྣམས་ལ་སྨོས་ཀྱང་ཅི་དགོས། རྣལ་འབྱོར་འདིས་བཅོམ་ལྡན་འདས་འདི་ཇི་ལྟ་བ་བཞིན་དུ་ཅིའི་ཕྱིར་བསྒྲུབ་པ་མཛད་པ་ཡིན་ཞེ་ན། དོན་ཡོད་ཅེས་བྱ་བ་
ལ་སོགས་པ་ལ་གང་གི་ཕྱིར་བཅོམ་ལྡན་འདས་འདི་ཇི་ལྟ་བ་བཞིན་དུ་བཤད་པའི་རྣལ་འབྱོར་གྱིས་དོན་ཡོད་པ་ནི་འབྲས་བུ་མེད་པ་མ་ཡིན་པ་དང༌། ཐོག་མ་མེད་པ་ནི་བཟློག་པར་མི་ནུས་པ་དང༌། ཇི་ལྟ་བ་བཞིན་དུ་བཤད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་ཉེ་བར་སྦྱོར་བ་ནི་སྒྲུབ་པ་པོས་མངོན་པར་སྦྱོར་བ་མཆོག་ཏུ་སྒྲུབ་པར་འགྱུར་བའི་ཕྱིར་རོ། །ཇི་ལྟ་བ་བཞིན་དུ་བཤད་པའི་བཅོམ་ལྡན་འདས་འདི་བསྒྲུབ་པའི་སྙིང་པོའི་བཟླས་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་སོ། །འདིས་ནི་འདི་ལྟར་འཆད་པར་འགྱུར་ཏེ། སྣའི་དབུགས་ཕྲ་མོ་ཉིད་ཀྱིས་ཐུང་དུའི་གཟུགས་སུ་ཡོངས་སུ་བརྟགས་ནས་སྣའི་དབུགས་ཀྱི་སྦྱོར་བ་ཁོ་ནས་བཟླས་པ་བྱས་ན་ཇི་ལྟ་བ་བཞིན་དུ་བཤད་པའི་དངོས་གྲུབ་སྒྲུབ་པར་བྱེད་པ་ཡིན་ནོ་ཞེས་བྱའོ། །དེ་ལྟར་བཅོམ་ལྡན་འདས་དབབ་པའི་བསྒྲུབ་པ་བསྟན་ནས། །ད་ནི་ལྷ་མོ་བཞི་དབབ་པའི་སྒྲུབ་པ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཉི་མ་མེ་ལྟར་འབར་བ་ལ་སོགས་པའི་སྒོམ་པའི་ལམ་སྟོན་པར་བྱེད་པའི་བཅོམ་ལྡན་འདས་ཡུམ་མདའ་འཛིན་པས་ཏེ། རྡོ་རྗེ་ཆེན་པོ་འདོད་པའི་མེ་འབར་བ་ཞེས་བྱ་བའི་ལྷ་མོ་ཆེན་མོ་དེ་ཡང་ཕྱག་གཡོན་པས་གཞུ་འཛིན་ཅིང་ཕྱག་གཡས་པས་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་མདའ་བླངས་ཏེ་སྟོད་པར་མཛད་པ། སྒེག་པ་དང་བཅས་ཤིང་གཡོན་པའི་སྤྱན་གྱི་ཟུར་གྱིས་ལྟ་བའི་ཕྱག་གཡོན་པའི་མིང་ཅན་གྱིས་ལྟ་བའི་ཕྱག་རྒྱས་ཉེ་བར་མཚན་པ། གཡོན་པའི་སྤྱན་བཅོམ་ལྡན་འདས་མ་རྡོ་རྗེ་འདོད་པ་མེ་འབར་བའོ། །ལྟ་བའི་ཕྱག་རྒྱ་འདིས་དེ་ཅི་མཛད་ཅི་ན། ཐམས་ཅད་སྒྲུབ་པར་མཛད་པ་ཞེས་བྱ་བ་ནི་གཟིགས་པ་ཙམ་གྱིས་ཐམས་ཅད་ལ་རྒྱས་གདབ་པའོ་ཞེས་བྱ་བ་ལ་སོགས་པ་ནི་དེའི་ལས་བསྟན་ཏོ། །སྙིང་པོ་གང་གིས་ཇི་ལྟ་བ་བཞིན་དུ་བཤད་པའི་ལས་རྣམས་འདིས་སྒྲུབ་པ་མཛད་ཅེ་ན། དེ་ནས་འདི་ཞེས་བྱ་བ་ལ་སོགས་པ་ལ་འདི་ལྟར་འཆད་པར་འགྱུར་ཏེ། ཧྞི་ཞེས་བྱ་བའི་ཕྲ་བའི་རྡོ་རྗེ་ཁྲོ་བོའི་བཟླས་པས་ཇི་ལྟ་བ་བཞིན་དུ་བཤད་པའི་ལྟ་བས་འདི་ལས་ཐམས་ཅད་སྒྲུབ་པར་མཛད་པ་ཡིན་ནོ། །དེ་ལྟར་དང་པོ་དབབ་པའི་སྒྲུབ་པ་བསྟན་ནས་ད་ནི་གཉིས་པ་དབབ་པའི་སྒྲུབ་པ་བསྟན་
པར་བྱ་བའི་ཕྱིར་གཉིས་པ་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་ཆེན་པོ་འདོད་པའི་མེ་འབར་བའི་མཚན་ཉིད་ཅན་གྱི་སྒོམ་པའི་ལམ་གྱི་ཡུལ་དུ་བྱས་པས་དོན་མངོན་དུ་བྱེད་པ་ནི་ལྷ་མོ་ཆེན་མོ་གཉིས་པ་སྟེ། ཀཱི་ལི་ཀཱི་ལའི་གཟུགས་འཛིན་པ་རྡོ་རྗེ་ཆེན་པོ་འདོད་པའི་མེ་འབར་བ་ལྟར་བཤད་པའོ། །དེ་ཉིད་དམ་ཚིག་ནི་རྒྱུ་སྟེ། རྡོ་རྗེ་ཉི་མ་མེ་ལྟར་འབར་བ་ལ་སོགས་པ་རེ་རེ་མངོན་དུ་བྱེད་པའི་རང་བཞིན་ཅན་གང་དང་གང་གི་ཕྱག་རྒྱ་དེ་ནི་རེ་རེའི་དམ་ཚིག་གི་ཕྱག་རྒྱའོ། །དེའི་མིང་སྟོན་པ་མཛད་པའི་ལྷ་མོ་ཆེན་མོ་ཕྱག་གཉིས་ཀྱི་དབུས་སུ་རང་གི་འདོད་པའི་ལྷ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་བསྟོད་ནས་གང་གིས་འཁྱུད་པ་དེ་ནི་དབུས་སུ་བསྟོད་པའི་རང་གི་ལྷག་པའི་ལྷའོ། །འཛུམ་པ་ནི་ཅུང་ཟད་བཞད་པ་དང་བཅས་ཤིང་འཛུམ་པ་སྟེ། ཅུང་ཟད་ཕྱེ་བའི་སྤྱན་གང་ལ་ཡོད་པ་དེ་ནི་སྤྱན་འཛུམ་པའོ། །ལྟ་བའི་ཕྱག་རྒྱ་འདིས་རྡོ་རྗེ་ཉི་མ་མེ་ལྟར་འབར་བ་ལ་སོགས་པ་ཐམས་ཅད་སྒྲུབ་པར་མཛད་པའི་བཅོམ་ལྡན་འདས་ཡུམ་སོ་སོའི་དམ་ཚིག་གི་ཕྱག་རྒྱ་རྡོ་རྗེ་ཀཱི་ལི་ཀཱི་ལའི་རང་བཞིན་ཅན་ནོ། །ཡི་གེ་ཧཱུཾ་འབུམ་བཟླས་པས་འདིའི་སྦྱོར་བ་མ་གྲུབ་ན་ཡི་གེ་ཧཱུཾ་ལན་ཅིག་ཏུ་སྒྲུབ་པ་པོས་བརྗོད་ཅིང་ཡིད་ཀྱིས་སམ་མངོན་དུ་བསྒྲུབ་པར་བྱ་ལ་ཙུམ་པ་ན་དང་འཁྱུད་པ་ལ་སོགས་པ་བྱ་ཞིང༌། །ཙུམ་པ་ན་དང་འཁྱུད་པ་ལ་སོགས་པའི་རེག་བྱ་འདིས་རྒྱས་བཏབ་པ་ཙམ་གྱིས་བསམ་པའི་དབང་གིས་བསྒྲུབ་བྱ་རྒྱས་བཏབ་པ་དང༌། མཁའ་འགྲོ་མ་ལ་སོགས་པ་ཐམས་ཅད་ཀྱི་ཕྱག་རྒྱ་གཞིག་པར་མཛད་པ་དང༌། བསྒྲུབ་བྱ་ཐམས་ཅད་གསད་པའི་བསམ་པའི་དབང་གིས་གསོད་པར་མཛད་པ་དང༌། འཆི་བ་བསླང་བའི་བསམ་པས་འཆི་བ་ཐམས་ཅད་སློང་བར་མཛད་པ་དང༌། འཕགས་པ་རྡོ་རྗེ་ཉི་མ་མེ་ལྟར་འབར་བའི་ལས་བརྒྱ་སྒྲུབ་པར་མཛད་པས་ན་དངོས་གྲུབ་ཐམས་ཅད་ཀྱི་ཚོགས་རྣམས་ལ་ཉེ་བར་སྦྱོར་བ་དང༌། ཡི་གེ་ཧཱུཾ་ལན་ཅིག་ཏུ་བཟླས་པས་མཆོག་ཏུ་སྒྲུབ་པའོ། །དེ་ནས་འདི་ཞེས་བྱ་བ་ལ་སོགས་པ་ནི་གོ་སླའོ། །ད་ནི་གསུམ་པ་བསྟན་པར་བྱ་བའི་ཕྱིར་གསུམ་པ་ཞེས་བྱ་བ་ལ་སོགས་པ་གསུངས་ཏེ། ཇི་ལྟ་བ་བཞིན་དུ་བཤད་པའི་རྡོ་རྗེ་ཆེན་པོ་འདོད་པའི་མེ་འབར་བསྒོམ་པའི་ལམ་གྱི་
རང་བཞིན་ཅན་གྱི་ཁམས་གསུམ་མ་ལུས་པར་ཐལ་བར་མཛད་པར་ནུས་པ་བསྐྱེད་པ་ནི། རྡོ་རྗེ་ཆེན་པོ་འདོད་པའི་མེ་འབར་བ་ཐལ་བར་རབ་ཏུ་འཇིག་པ་ཞེས་བྱ་བའི་ལྷ་མོ་ཆེན་མོ་གསུམ་པ་སྟེ། བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའིའོ། །དེ་ཡང་རྡོ་རྗེ་དང་ཁ་ཊྭཱཾ་གའི་རྒྱལ་མཚན་འཛིན་པའོ། །ཁྲོ་ཞིང་སྒེག་པ་དང་བཅས་པའི་འཛུམ་པ་ནི་སྒེག་པ་དང་བཅས་པའི་འཛུམ་པ་སྟེ། དེས་སྨིན་མའི་དབུས་སུ་ཁྲོ་བ་སྟོན་པར་བྱེད་པའི་དཔྲལ་བའི་རི་མོ་ནི་ཁྲོ་གཉར་ཏེ། སྒེག་པ་དང་བཅས་པའི་འཛུམ་པའི་སྨིན་མའི་ཁྲོ་གཉེར་དེ་ལས་ཁྲོ་བའི་སྤྱན་ནི་ཁྲོ་བོའི་ལྟ་བ་སྟེ། དེས་ཉེ་བར་མཚོན་པའི་བཅོམ་ལྡན་འདས་མ་གང་ཡིན་པ་དེ་ནི་དེ་བཞིན་ཏེ། རྡོ་རྗེ་ཆེན་པོ་འདོད་པའི་མེ་འབར་བས་ཐལ་བར་རབ་ཏུ་འཇུག་པར་ཞེས་བྱ་བའོ། །ཨོཾ་བཛྲ་རུ་ལུ་རུ་ལུ་ཧྞི་ཞེས་བྱ་བ་དཀྱིལ་འཁོར་དུ་སྟོང་ཕྲག་བརྒྱ་བཟླས་པས་རང་གི་དངོས་གྲུབ་གསོལ་བ་ཡིན་ནོ། །སྒྲུབ་པ་མ་གྲུབ་ན་ལན་ཅིག་བཟླས་པས་ཡིད་ཀྱི་འདོད་པའི་ལས་ཐམས་ཅད་སྒྲུབ་པར་མཛད་པ་ཡིན་ནོ། །ཆེན་པོ་ཡང་ཡིན་ལ་རྡོ་རྗེ་འདོད་པ་ཡང་དེ་ཉིད་ཡིན་པས་ན་རྡོ་རྗེ་འདོད་པ་ཆེན་པོ་ཡིན་པས་ཏེ། རྡོ་རྗེ་ཉི་མ་མེ་ལྟར་འབར་བ་ལ་སོགས་པའི་བསྒོམ་པའི་ལམ་གྱི་རང་བཞིན་གྱི་བྱང་ཆུབ་ཆེན་པོའི་སེམས་ཀྱི་སྒོམ་པའི་ཞེས་བྱ་བའི་དོན་ཏོ། །ཉོན་མོངས་པའི་བུད་ཤིང་སྲེག་པའི་རང་བཞིན་ཅན་ནི་མེ་འབར་བའོ། །རྡོ་རྗེ་ཆེན་པོ་འདོད་པ་ཡང་དེ་ཡིན་ལ་མེ་འབར་བ་ཡང་དེ་ཉིད་ཡིན་པས་ན་རྡོ་རྗེ་ཆེན་པོ་འདོད་པའི་མེ་འབར་བའོ། །དེས་ཐལ་བར་རབ་ཏུ་རློག་པ་ནི་ཁམས་གསུམ་པའི་སེམས་ཅན་གྱི་ཁམས་དང་སེམས་ལས་བྱུང་བ་རྣམས་མི་སྣང་བར་མཛད་པའོ། །སྲེག་པའི་བསྐལ་བའི་རང་བཞིན་ཅན་གྱིས་ཀྱང་ཀུན་ནས་ཉོན་མོངས་པ་ཅན་གྱི་སེམས་ཅན་གྱི་ཁམས་རྣམ་པར་སྦྱོང་བའི་ཕྱིར་སྲེག་པ་གང་ཡིན་པ་དེས་ཤི་བའི་སེམས་ཅན་གྱི་ཁམས་རྣམ་པར་དག་པའི་སངས་རྒྱས་ཀྱི་ཞིང་དུ་སྐྱེ་བར་སྟོན་པ་ནི་སློང་བ་སྟེ་ནན་ཏན་སྒྲུབ་པའི་ཡེ་ཤེས་ཀྱི་ངོ་བོ་འདིས་གང་གིས་བསྒྲུབ་པར་འགྱུར་བ་དེའི་མཚན་ཉིད་དང་ལྡན་པ་བཞི་པ་སྟེ། བཅོམ་ལྡན་འདས་མ་རྡོ་རྗེ་འདོད་པའི་མེ་འབར་བ་ཐལ་བར་རབ་ཏུ་རློག་པ་འཇིགས་པའི་འཆི་བ་སློང་བར་མཛད་
པ་ཞེས་བྱ་བའི་ལྷ་མོ་ཆེན་མོའོ། །གཡོན་པའི་རྡོ་རྗེ་ཁུ་ཚུར་གྱིས་སྙེམས་པར་མཛད་ནས་ཕྱག་གཡས་པས་རྡོ་རྗེ་དྲིལ་བུ་རང་གི་སྤྱི་བོར་བསྐྱོད་པར་མཛད་ཅིང་ཁྲོ་བ་དང་སྒེག་པ་དང་བཅས་པའི་སྤྱན་ཤིན་ཏུ་གདངས་པ་དེའི་རྣལ་འབྱོར་དང་ལྡན་མ་ལ་དབབ་པའོ། །དེ་ཉིད་ལ་ཕྱག་རྒྱ་ཆེན་པོ་ལ་སོགས་པ་རྫོགས་པར་མཛད་པས་ན་ཐམས་ཅད་སྒྲུབ་པར་མཛད་པའོ། །དེ་བཞིན་དུ་ཥྞཻ་ཞེས་བྱ་བ་དཀྱིལ་འཁོར་དུ་སྟོང་ཕྲག་བརྒྱ་བཟླས་པས་མ་གྲུབ་ན་ལན་ཅིག་བཟླས་པས་ཁུ་ཚུར་དང་ཐལ་ལྕག་ལ་སོགས་པ་དང༌། བཞད་གད་དང༌། རྡེག་པ་དང༌། ཕྱག་རྒྱས་བཏབ་པ་ཙམ་གྱིས་འཆི་བ་ཐམས་ཅད་སློང་བར་མཛད་པ་དང༌། བསམ་པ་ཙམ་གྱིས་ལས་ཐམས་ཅད་ཀྱི་ཚོགས་སྒྲུབ་པར་མཛད་པའོ། །དེ་ལ་སོགས་པ་ཞེས་བྱ་བ་ནི་རྡོ་རྗེ་འདོད་པའི་མེའི་ལྷ་མོ་བཞི་པོ་གཙོ་བོར་གྱུར་པ་རྣམས་སོ། །མཐའ་ཡས་མཆོག་ནི་ཐོག་མ་དང་ཐ་མ་མེད་པའོ། །ཆོས་ཀྱི་དབྱིངས་དང་མཉམ་པ་ནི། ཐོག་མ་དང་ཐ་མ་མེད་པའི་ཆོས་ཀྱི་དབྱིངས་དང་མཚུངས་པའོ། །མི་མཉམ་པ་ནི་མཚུངས་པ་མེད་པའོ། །ནམ་མཁའི་ཁམས་བཞིན་དུ་ཚད་མེད་པས་ན་ནམ་མཁའི་ཁམས་བཞིན་དུ་གྲངས་མེད་པ་སྟེ། འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའོ་ཞེས་བྱ་བའི་དོན་ཏོ། །རྡོ་རྗེ་ཉི་མ་མེ་ལྟར་འབར་བ་ལས་བྱུང་བས་ན། རྡོ་རྗེ་ཉི་མ་ལས་བྱུང་བའོ། །ནམ་མཁའ་ཡང་དེ་ཡིན་ལ་ཐམས་ཅད་ཀྱང་དེ་ཡིན་པས་ན་ནམ་མཁའ་ཐམས་ཅད་དེ་ཕྱོགས་བཅུ་ན་གནས་པ་ཐམས་ཅད་དང་བྲལ་བའི་ངོ་བོ་ཇི་ལྟ་བ་བཞིན་རབ་ཏུ་གྲགས་པའོ། །ནམ་མཁའ་ཐམས་ཅད་བཞིན་དུ་ལྷ་མོ་ཐམས་ཅད་ལ་གནས་སྐབས་སྟེར་བའི་ཕྱིར་ནམ་མཁའ་ཐམས་ཅད་གནས་སྐབས་སྟེར་བ་དཀྱིལ་འཁོར་འདི་ཡིན་ནོ། །ནམ་མཁའ་ཐམས་ཅད་གནས་སྐབས་ཀྱི་གསང་བའི་དཀྱིལ་འཁོར་འདི་ལ་རབ་ཏུ་ཞུགས་པ་ནི་ལེགས་པར་ཞུགས་པའོ། །ཀུན་ནས་འབེབས་པ་ནི་དཀྱིལ་འཁོར་དུ་སྒོམ་པ་ལ་མངོན་པར་ཆགས་པའི་རྒྱུད་ལ་རབ་ཏུ་ཞུགས་པའོ། །རྡོ་རྗེ་མཆོག་གི་རྣལ་འབྱོར་གྱི་དབང་ཕྱུག་ནི་གཙོ་མོ་སྟེ། རྡོ་རྗེ་མཆོག་གི་རྣལ་འབྱོར་གྱི་དབང་ཕྱུག་མའོ། །
དུ་མ་ནི་སྣ་ཚོགས་པའི་གཟུགས་དང་ལྡན་པའོ། །དེ་ནས་ཞེས་བྱ་བ་ནི་རྣལ་འབྱོར་བསྒོམ་པའི་དུས་ཕྱིས་དཀྱིལ་འཁོར་སྒྲུབ་པར་བྱེད་པ་རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་ལ་དབང་ཐོབ་པ་ཉིད་དང༌། མཚན་མ་ཐོབ་པའི་རྣལ་འབྱོར་གྱི་དབང་ཕྱུག་དེས། རྣལ་འབྱོར་མས་ཏེ་ལྷ་མོ་བཞིའི་རྣལ་འབྱོར་དང་ལྡན་པའི་ཇི་ལྟ་བ་བཞིན་དུ་ཞུགས་པའི་བུ་མོ་དེ་རྣམས་རང་གི་གཡས་པ་དང་གཡོན་པའི་ལོགས་དག་ལ་ཟླ་བ་ཚེས་པའི་དཀྱིལ་འཁོར་གྱི་རྣམ་པའི་དཀྱིལ་འཁོར་གྱི་རྣམ་པའི་དཀྱིལ་འཁོར་ནི་ཟླ་བ་ཕྱེད་པའི་དབྱིབས་ཅན་གྱི་རླུང་གི་དཀྱིལ་འཁོར་དུ་དགོད་པར་བྱའོ། །དེ་ནས་ཇི་ལྟར་ཞེ་ན། བཀོད་ནས་ཞེས་བྱ་བ་ལ་སོགས་པ་ལ། དེ་ལྟར་རྣལ་འབྱོར་མ་དེ་རྣམས་བཀོད་དང་ལྡན་པར་བྱས་ལ་དེ་ཁོ་ན་ཉིད་དང༌། ཆོས་དང༌། དམ་ཚིག་ཐམས་ཅད་མཆོག་ནི་བཅོམ་ལྡན་འདས་ཀྱི་གསང་བའི་དཀྱིལ་འཁོར་གྱི་དངོས་གྲུབ་མཆོག་སྟེ་སྒྲུབ་པ་ནི་རྫོགས་པར་བྱའོ། །བྱེད་པར་གྱུར་པ་གང་གིས་ཤེ་ན། ཐམས་ཅད་དགུག་དང་མཆོད་པ་ཆེ། །བདག་བྱིན་བརླབ་སོགས་སྒྲུབ་པ་ཡིས། །ཞེས་བྱ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་རྣམས་ཀྱིས་སོ། །དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་དཀྱིལ་འཁོར་དེ་བརྟག་པ་དང་སྒྲུབ་པར་བྱས་ནས་ཕྱི་ནས་བཅོམ་ལྡན་འདས་ཀྱི་རྡོ་རྗེ་བླང་ལ་སློབ་མ་ཐམས་ཅད་གཞུག་པར་བྱའོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པ་ལའོ། །རེ་ཞིག་གི་སྒྲ་ནི་རིམ་པ་ལ་ལྟོས་པའོ། །གལ་ཏེ་དཀྱིལ་འཁོར་འདི་ཚོགས་ཀྱི་དཀྱིལ་འཁོར་གྱི་ཚུལ་དུ་བྲི་བར་གྱུར་ན། དེའི་ཚེ་བུད་མེད་རྣམས་གཞུག་སྟེ། རྡོ་རྗེ་འདོད་པའི་མེ་འབར་བ་ལ་སོགས་པའི་ལྷ་མོ་བཞིའི་རྣལ་འབྱོར་དང་ལྡན་པར་བྱས་ལ་དེ་ཁོ་ན་ཉིད་དང༌། ཆོས་དང༌། དམ་ཚིག་གི་མཚན་ཉིད་ཅན་གྱི་དམ་ཚིག་གསུམ་བྱིན་གྱིས་བརླབས་ནས་རང་གི་ལོགས་གཉིས་སུ་སྔོན་དུ་བསྙེན་པ་བྱས་པ་ཡང་དག་པར་གཞག་པར་བྱའོ། །སྐྱེས་བ་རྣམས་ཀྱང་སྔོན་དུ་བསྙེན་པ་བྱས་པ་རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་དང་ལྡན་པ། དམ་ཚིག་གསུམ་གྱིས་བྱིན་གྱིས་བརླབས་པ་དེ་རྣམས་ལྷ་མོ་བཞིའི་ཕྲེང་བའི་དབུས་སུ་བཀོད་པ་དེའི་རྣལ་འབྱོར་སྒྲུབ་པ་ཡང་དག་པར་འཛིན་དུ་གཞུག་པར་བྱའོ། །རྡོ་རྗེ་ཆེན་པོའི་
ཁྲོ་བོའི་རྒྱལ་པོ་ཆེན་པོའི་དམ་ཚིག་དང་སྔོམ་པ་དག་ཀྱང་ལེན་དུ་གཞུག་པར་བྱའོ། །བུ་མོ་དང་ཁྱེའུ་ནི་བྱིས་པའི་བློའི་རང་བཞིན་ཅན་རྣམས་དཀྱིལ་འཁོར་དུ་བཅུག་སྟེ། ཚོགས་དང་བཅས་པའི་སློབ་དཔོན་རང་ཉིད་ཀྱིས་ཡང་དྲག་པར་བསྲུང་བར་བྱའོ། །དུས་གཞན་དུ་དེ་རྣམས་ཀྱང་སྔ་མ་བཞིན་དུ་སྒྲུབ་པ་ལ་ངེས་པར་སྦྱར་པར་བྱའོ། །དེ་ལྟར་སློབ་དཔོན་གྱི་ལས་ཀྱི་ཆོག་རྒྱས་པར་བསྟན་ནས་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་ནི་བླ་ན་མེད་པར་བསྐྱེད་ནས་ཞེས་བྱ་བ་ནི་གོ་སླའོ། །མི་ཕྱེད་པ་ཞེས་བྱ་བ་ནི་སྲོག་ཆགས་དང་སྲོག་ཆགས་མ་ཐམས་ཅད་ཀྱིས་དབྱེ་བར་མི་ནུས་པས་ན་མི་ཕྱེད་པའོ། །དངོས་པོ་ཐམས་ཅད་ཀྱི་དེ་ཁོ་ན་ཉིད་མངོན་དུ་བྱེད་པའི་རང་བཞིན་ཅན་ཡིན་པས་སོ་སོར་རྟོགས་པའོ། །འདོད་ཆགས་ལ་སོགས་བའི་ཉོན་མོངས་པ་དང་ཉེ་བའི་ཉོན་མོངས་པ་རྣམས་དང༌། ཕྱི་རོལ་གྱི་ལྷ་ཆེན་པོ་ལ་སོགས་པ་ནི་གདུག་པ་རྣམས་ཏེ། དེ་དག་གནོད་པས་ན་གདུག་པ་ཐམས་ཅད་གནོད་བ་སྟེ་དེ་ལྟ་བུའི་བྱང་ཆུབ་ཀྱི་སེམས་སོ། །སྦྱིན་བའི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་ནི་སངས་རྒྱས་ཀུན་ཏེ་དེའི་རང་བཞིན་ཡིན་པས་ན་སངས་རྒྱས་ཀུན་དངོས་སོ། །དེ་ནི་བཅོམ་ལྡན་འདས་ཀྱི་འབར་བའི་རྡོ་རྗེ་བྱང་ཆུབ་ཀྱི་མཚན་ཉིད་ཅན་གྱི་སེམས་ནི་སྨོས་པ་བྱང་ཆུབ་ཀྱི་སེམས་ཏེ། བརྟན་པ་ནི་མི་ཕྱེད་པ་སྟེ་དེ་ཉིད་ཡིན་ནོ། །རྡོ་རྗེ་རྩེ་ལྔ་པའི་གཟུགས་སུ་གདུལ་བྱ་རྣམས་ཀྱིས་ཡོངས་སུ་བརྟག་པ་དེ་ཉིད་མཚོན་ཆ་སྟེ། དེ་རྒྱལ་པ་དེ་བཞིན་གཤེགས་པ་རྣམས་བདེ་བ་ཆེན་པོའི་རྡོ་རྗེ་དཀྱིལ་འཁོར་ལ་སོགས་པའི་དོན་དུ་ཀུན་དུ་བཟང་པོའི་ལག་ཏུ་ཕྱིན་པ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱིས་བསྟན་པ་ནི་བཀའ་སྟེ། དེའི་དངོས་གྲུབ་ནི་དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་བོ། །དེའི་དོན་དུ་མཚོན་ཆ་དེ་དེ་བཞིན་གཤེགས་པ་ཐམས་ཅད་དེའི་ལག་ཏུ་ཕྱིན་པ་ཡིན་ནོ། །རྡོ་རྗེས་ཉེ་བར་མཚན་པའི་ཕྱག་གང་ལ་མངའ་བ་དེ་ནི་ཕྱག་ན་རྡོ་རྗེ་སྟེ་བྱང་ཆུབ་སེམས་དཔའ་ཀུན་དུ་བཟང་
པོའོ། །དེ་ལྟར་སྒེག་པ་དང་ཁྲོ་བོའི་གཟུགས་ཅན་རྡོ་རྗེས་རྡོ་རྗེ་འཆང་བ་བསྟན་ནས་ད་ནི་ཐུན་མོང་མ་ཡིན་པའི་ཁྲོ་བོའི་རྡོ་རྗེ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། རྟག་ཏུ་ཆགས་པ་ལས་བྱུང་བའི་ཁྲོ་བོ་ནི་བཤད་ཟིན་ཏོ། །དེ་གང་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་ནི་རྡོ་རྗེ་དང་དྲིལ་བུ་འཆང་བའི་རྡོ་རྗེ་སེམས་དཔའ་ཉིད་ཁྲོ་བོར་འགྱུར་རོ། །ཅིའི་ཕྱིར་ཞི་ན་གདུལ་བྱའི་ཕྱིར་ཞེས་བྱ་བ་ནི་དྲག་པོ་ལ་སོགས་པ་གདུག་པ་དང༌། དྲག་པོ་རྣམས་ནི་ཁྲོ་བོས་གདུལ་བར་འགྱུར་བས་ཏེ། དེའི་ཕྱིར་ཁྲོ་བོས་གདུལ་བའི་རྒྱུ་དེའི་ཕྱིར་རྡོ་རྗེ་སེམས་དབའ་ཉིད་ཁྲོ་བོར་འགྱུར་ཏེ། ཉོན་མོངས་པའི་དབང་གིས་ནི་མ་ཡིན་ནོ། །ཁྱད་པར་ཇི་ལྟ་བུ་དང་ལྡན་པའི་ཁྲོ་བོར་གྱུར་ཞེ་ན། རྡོ་རྗེ་ལྟར་འབར་བ་ནི་ཞེས་བྱ་བ་ལ། ནིའི་སྒྲ་ནི་ངེས་པར་གཟུང་བ་ལ་སྟེ། ཁྲོ་བོ་རྡོ་རྗེ་ཉི་མ་མེ་ལྟར་འབར་བ་ཉིད་དེ་གཞན་ནི་མ་ཡིན་ནོ། །རྡོ་རྗེ་ནི་བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ཏེ། དེའི་འབར་བ་ནི་ནམ་མཁའི་ཁམས་ཐམས་ཅད་ལ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེ་སྔོན་པོ་འབར་བའི་ངོ་བོ་སེམས་དཔའི་སྟེ་འོད་ཀྱི་འཁོར་ལོ་དམར་པོ་འབར་བའོ། །དེ་ཉིད་རྡོ་རྗེ་ཉི་མ་མེ་ལྟར་འབར་བ་སྟེ། ཀུན་ནས་ཉོན་མོངས་པ་ཅན་བསྲེགས་ནས། སངས་རྒྱས་ཀྱི་ཞིང་དུ་སངས་རྒྱས་ཀྱི་རང་བཞིན་མཛད་པས་ན་ཉི་མ་དང་མཚུངས་པས་ཉི་མའོ། །དེ་ཉིད་ཀྱི་ཕྱིར་རབ་ཏུ་འཇིགས་པ་ལས་ཀྱང་འཇིགས་པར་བྱེད་པའི་མཆོག་ཏུ་འཇིགས་པ་ནི་ང་ཡིན་ནོ། །དེ་ལྟར་བཅོམ་ལྡན་འདས་ཀྱིས་དེ་ཁོ་ན་ཉིད་ཀྱིས་རྡོ་རྗེ་གཟུང་བ་བསྟན་ནས། ད་ནི་ལྷ་མོ་རྣམས་ཀྱི་གསུངས་པ་ཡིན་ཏེ། རྡོ་རྗེ་ཉི་མ་མེ་ལྟར་འབར་བ་ནི་ཇི་ལྟ་བ་བཞིན་དུ་བཤད་པའོ། །དེ་ལས་བྱུང་བ་ནི་སྐྱེས་པས་ཏེ་དེའི་འོད་ཀྱི་འཁོར་ལོ་ལས་བྱུང་བའོ་ཞེས་བྱ་བའི་དོན་ཏོ། །གྲིབ་མ་ཞེས་བྱ་བ་ནི་དེ་དང་རྗེས་སུ་མཐུན་ཞིང་མཚུངས་པས་ཏེ་དེ་དག་དེ་བཞིན་གཤེགས་པ་རྣམས་ཀྱིས་སྤྲུལ་པ་ནི་སྐྱེད་པར་མཛད་པའོ། །ལས་དེ་ལྟ་བུ་དང་ལྡན་པ་ཞེ་ན། མ་ལུས་བདུད་སོགས་གདུག་པ་ཡི། །ཁྲག་གསོལ་བར་ནི་ནུས་པའོ། །ཞེས་བྱ་བ་ལ་ལུས་པ་མེད་པའི་བདུད་ལ་སོགས་པའི་གདུག་པ་རྣམས་ཀྱི་ཁྲག་གསོལ་པའི་
ནུས་པ་དང་བཅས་པའོ། །ཤིན་ཏུ་ཉལ་དུ་བཅུག་པ་ནི་ཤིན་ཏུ་གསོད་པའོ། །དེས་དག་པ་ནི་དག་པར་གྱུར་པས་ཏེ་རྗེས་སུ་བརྩེ་བས་ནི་མ་ཡིན་ནོ་ཞེས་བསྟན་ཏོ། །མིའི་ཁྲག་སྔགས་ཀྱི་སྟོབས་ཀྱིས་དགུག་པ་འགྲུབ་པ་གང་ཡིན་པ་དེ་ནི་ཁྲག་ཆེན་པོའོ། །ལྷག་མ་ནི་གོ་སླའོ། །སླར་ཡང་འདིའི་དོན་བཤད་པར་བྱ་སྟེ། སྔ་མ་བཞིན་དུ་རྡོ་རྗེ་མེ་ལྟར་འབར་བའི་རྣལ་འབྱོར་གྱིས་རྣལ་འབྱོར་ཆེན་པོ་བྱས་ལ། ལྷ་མོ་བཞིའི་རྣལ་འབྱོར་དང་ལྡན་པའི་བུ་མོ་རྣམས་དང་ལྷན་ཅིག་ཏུ་ལྷ་མོ་བཞི་དང་ཡང་དག་པར་སྦྱོར་བའི་རྣལ་འབྱོར་གྱིས་ཉེ་བར་འདུག་ལ་དཀྱིལ་འཁོར་ཐམས་ཅད་ཇི་ལྟ་བ་བཞིན་དུ་ཡོངས་སུ་རྫོགས་པར་བྱས་ལ། ཇི་སྲིད་མཚན་མ་ཐོག་པར་འགྱུར་པ་དེ་སྲིད་ཀྱི་བར་དུ་བསྒོམ་པར་བྱའོ། །དེ་ནས་ཇི་ལྟ་བ་བཞིན་དུ་སློབ་མ་ལྷག་པར་གནས་པ་དང༌། ལྷ་ལྷག་པར་གནས་པར་བྱས་ལ། ཉི་མ་འཆར་ཀའི་དུས་སུ་དཀྱིལ་འཁོར་ལ་ཐིག་བཏབ་ནས་ཕྱིའི་དཀྱིལ་འཁོར་དེ་ཉིད་དུ་བྲིས་ལ་དེའི་ཕྱེད་ཀྱི་ཚད་ཀྱིས་ནང་དུ་རླུང་གི་དཀྱིལ་འཁོར་ཟླ་པ་ཕྱེད་པའི་དབྱིབས་ཅན་དེའི་སྟེང་དུ་འབར་བའི་འཁོར་ལོ་ཀ་བ་བརྒྱད་ཀྱིས་ཉེ་བར་མཛེས་པ་སྟེ། ལྕགས་ཀྱི་ཕྱེ་མས་འབར་བར་བྲིས་ལ། ནང་གི་དཀྱིལ་འཁོར་གྱི་ལྟེ་བར་པདྨའི་རས་རིས་ཀྱིས་བཀབ་པའི་གདན་ལ། ལྷ་མོ་བཞི་ཡང་དག་པར་འདུས་པའི་རྣལ་འབྱོར་གྱིས་རང་གི་ལྷའི་རྣལ་འབྱོར་དང་ལྡན་པའི་བུ་མོ་བཞི་དང་ལྷན་ཅིག་ཏུ་སློབ་དཔོན་གྱིས་འདུག་པར་བྱའོ། །ཕྱིའི་དཀྱིལ་འཁོར་གྱི་མཚམས་བཞི་པོ་ལ་ཁྲོ་བོའི་སྒེག་མོ་ལ་སོགས་པའི་རྣལ་འབྱོར་མ་རྣམས་དགོད་པར་བྱའོ། །སྒོ་བཞི་པོ་ལ་ཁྲོ་མོ་རྡོ་རྗེ་ལྕགས་ཀྱུ་མ་ལ་སོགས་པའི་རྣལ་འབྱོར་མ་བཞིའམ། དེའི་རྣལ་འབྱོར་དང་ལྡན་པའི་སློབ་མ་རྣམས་དགོད་པར་བྱའོ། །དེ་ལྟར་སྔོན་དུ་བསྙེན་པ་བྱས་པས་ཚོགས་ཡོད་ན་ཚོགས་ཀྱི་འཁོར་ལོ་བརྟགས་ཏེ། གོ་ཆ་ཐམས་ཅད་རྗེས་སུ་སྤྱད་པར་བྱའོ། །རང་འཇུག་པའི་དུས་དང༌། སློབ་ལ་གཞུག་པའི་དུས་སུ་རང་གི་སློབ་དཔོན་ནམ་དེའི་ཡོན་ཏན་དང་ལྡན་པ་གཞན་དབུས་སུ་དགོད་པར་བྱའོ། །གང་ལ་ཚོགས་མེད་ན་དེའི་དབུས་ཀྱི་དཀྱིལ་འཁོར་གྱི་ཕྱོགས་སུ་ལྷ་མོ་བཞི་ཕྲེང་གི་དབུས་ན་བཞུགས་པའི་བཅོམ་ལྡན་འདས་
སྙིང་པོ་འདིས་རས་རིས་ལ་བྲི་བར་བྱའོ། །ཧཱུཾ་ཞེས་བྱ་བའོ། །རྡོ་རྗེ་ཆེན་པོའི་འདོད་པ་མེ་ལྟར་འབར་བའི་སྙིང་པོ་ནི་ཧྞི་ཞེས་བྱའོ། །གཉིས་པ་ནི་ཧཱུཾ་ཞེས་བྱ་བའོ། །གསུམ་པ་ནི་ཨོཾ་བཛྲ་རུ་ལུ་ལུ་ལཾ་ཧྞི་ཞེས་བྱ་བའོ། བཞི་པ་ནི་ཥྞེ་ཞེས་བྱ་བའོ། །ཁྲོ་བོའི་སྒེག་མོ་ལ་སོགས་པའི་ལྷ་མོ་རྣམས་ནི་སྔར་བཤད་པའི་སྙིང་པོ་རྣམས་ཀྱིས་དགོད་པར་བྱའོ། །དེ་ནས་དཀྱིལ་འཁོར་གྱི་སྒོ་བཞི་ཕྱི་ལ་བསྡུ་པར་བྱས་ནས་མཚན་བརྒྱས་བསྟོད་ནས། རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཆེན་པོ་ལས་གསུངས་པའི་སྤྱན་དྲང་བའི་ཕྱག་རྒྱ་དང་སྔགས་དག་གིས་བཅོམ་ལྡན་འདས་འཁོར་དང་བཅས་པ་དཀྱིལ་འཁོར་དུ་བཅུག་སྟེ་བགེགས་བསྐྲད་པ་ལ་སོགས་པ་བྱས་ནས། ཡི་གེ་ཧཱུཾ་གིས་མཆོད་ཡོན་ཕུལ་ཏེ། དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་བཅོམ་ལྡན་འདས་འཁོར་དང་བཅས་པ་ལ་རྒྱས་བཏབ་སྟེ་ཐོད་པའི་ཕྲེང་བའི་དབང་བསྐུར་བའི་ཕྱག་རྒྱ་དང༌། དེ་བཞིན་གཤེགས་པའི་སྐུ་མཆོག་གི་ཕྱག་རྒྱས་དབང་བསྐུར་ལ། མཆོད་ཡོན་བུ་ལ་བ་སྔོན་དུ་འགྲོ་བའི་མཆོད་པའི་ཡན་ལག་ཐམས་ཅད་ཀྱིས་མཆོད་པ་བྱའོ། །དེ་ལ་རེ་ཞིག་པདྨའི་སྣོད་དུ་ཁྲག་ཆེན་དང་ག་བུར་དང་ཙནྡན་དམར་པོ་ཡི་གེ་ཧཱུཾ་གིས་མངོན་པར་བསྔགས་བ། བཅོམ་ལྡན་འདས་ཀྱི་དམ་ཚིག་གི་ཕྱག་རྒྱས་ཡོངས་སུ་གཟུང་བའི་རྡོ་རྗེ་མེ་ཏོག་གི་ཡལ་ག་བཅོམ་ལྡན་འདས་ཉིད་ཀྱི་མདུན་དུ་བཞག་སྟེ། བུམ་པ་དང་བུམ་པ་གང་བ་རྣམས་དབུལ་བར་བྱའོ། །དེ་ནས་མཆོད་བ་ཐམས་ཅད་བྱའོ། །དེ་ནས་བཅོམ་ལྡན་འདས་ཀྱི་རྣལ་འབྱོར་གྱིས་རྣལ་འབྱོར་ཆེན་པོ་དང་ལྡན་ཞིང༌། རྡོ་རྗེ་ཆེན་པོ་འདོད་པའི་མེ་ལ་སོགས་པའི་ལྷ་མོ་བཞིའི་རྣལ་འབྱོར་དང་ལྡན་པ་དང༌། སྔོན་དུ་བསྙེན་པ་བྱས་པའི་བུ་མོ་བཞི་དང་ལྷན་ཅིག་ཏུ་ཕྱག་བཞི་སྔོན་དུ་འགྲོ་བས་གར་ལས་བྱུང་བའི་ཕྱག་འཚལ་བའི་ཐལ་མོ་མེ་ཏོག་དང་བཅས་པ་སྤྱི་བོར་བཅིངས་ཏེ། དེ་བཞིན་དུ་མེ་ཏོག་གི་ཕྲེང་བ་བླངས་ལ། རྡོ་རྗེ་ཤུགས་ཀྱིས་རྡོ་རྗེ་མདའ་གཞུ་ཅན་ཁྱོད་ལ་ཕྱག་འཚལ་ཞེས་བྱ་བ་ལ་སོགས་པའི་འཇུག་པའི་གླུ་བརྗོད་ཅིང་འཇུག་པར་བྱའོ། །བུ་མོ་བཞི་པོས་ཀྱང་རང་གི་ལྷའི་དམ་ཚིག་གི་ཕྱག་རྒྱ་ལག་པ་གཉིས་
ཀྱིས་འཆིང་ཞིང་མེ་ཏོག་ཕྲེང་བ་བླངས་ཏེ་འཇུག་པའི་གླུ་དང༌། རང་གི་ལྷའི་སྙིང་པོ་བཟླ་ཞིང་འཇུག་པར་བྱའོ། །དེ་ནས་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་གྱི་ཆོག་དངོས་གྲུབ་ཀྱི་རྡོ་རྗེ་བརྟུལ་ཞུགས་ཀྱི་མཐར་ས་ཐམས་ཅད་རྗེས་སུ་སྦྱངས་ནས། མེ་ཏོག་ལ་སོགས་པ་དང༌། རྡོ་རྗེ་མཚོན་ཆ་མ་ལ་སོགས་པ་ཕྱག་རྒྱའི་མཆོད་པ་བཅུ་གཉིས་བུ་མོ་བཞི་དང་བཅས་པའི་བདག་ཉིད་ཡང་དག་པར་མཆོད་ནས་དེ་ཁོ་ན་ཉིད་དང༌། ཆོས་དང༌། དམ་ཚིག་རྣམས་བཟུང་ལ། སྙིང་པོ་དང༌། ཕྱག་རྒྱ་བཞིའི་ཡེ་ཤེས་བཅོམ་ལྡན་འདས་ཀྱི་དྲུང་ནས་བླངས་ཏེ། ཚིགས་སུ་བཅད་པ་ལྔ་བོས་རྗེས་སུ་གནང་བ་དང༌། གཟེངས་བསྟོད་པ་དང༌། ལུང་བསྟན་པ་མནོས་ལ། རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་བྱའོ། །བུ་མོ་བཞི་ཡང་རང་གི་ལྷའི་རྣལ་འབྱོར་དང་ལྡན་པས་བླངས་ཏེ། དཀྱིལ་འཁོར་གྱི་དབུས་སུ་ལྷ་མོ་བཞི་དང་ཡང་དག་པར་སྦྱོར་བའི་རྣལ་འབྱོར་གྱིས་ཟླ་བ་ཚེས་པའི་དཀྱིལ་འཁོར་དང་ལྷན་ཅིག་ཏུ་བདག་ཉིད་ལ་གཞུག་པར་བྱའོ། །དེ་ནས་ཐམས་ཅད་དགུག་དང་མཆོད་པ་དང༌། བདག་བྱིན་གྱིས་བརླབ་པ་སོགས་བསྒྲུབ་པའི་བདག་ཉིད་འཁོར་དང་བཅས་པ་རྫོགས་པར་བྱས་ནས། ཉིན་རེའི་སྦྱོར་བས་ཡི་གེ་ཧཱུཾ་གི་བཟླས་པ་འབུམ་བྱའོ། །བུ་མོ་རྣམས་ཀྱིས་ཀྱང་རང་གི་ལྷ་མོ་རྣམས་ཀྱི་བ་བཟླས་པ་འབུམ་བྱའོ། །དེ་ནས་ཁྲག་ཆེན་ག་བུར་བཅས། ཙནྡན་དམར་པོ་དང་བཅས་པ་རྡོ་རྗེ་འབར་བ་དང་བཅས་པ་ཇི་ལྟ་བ་བཞིན་དུ་བཤད་པའི་པདྨའི་སྣོད་ན་གནས་པར་སྦྱར་བར་བྱ་སྟེ། སྲིན་ལག་དང་མཐེ་བོང་གི་རྩེ་མོས་བླངས་ཏེ་བཟའ་བར་བྱའོ། །བུ་མོ་དེ་རྣམས་ཀྱིས་རང་གི་ལྷའི་སྙིང་པོས་བཟའ་བར་བྱའོ། །དེ་ནས་ཐམས་ཅད་མཁའ་སྤྱོད་དུ་འགྱུར་རོ། །རྣལ་འབྱོར་བ་ནི་རྡོ་རྗེ་རྣལ་འབྱོར་པའི་དབང་ཕྱུག་དང༌། བུ་མོ་རྣམས་ནི་རྡོ་རྗེ་ཆེན་པོའི་འདོད་པའི་མེ་ལ་སོགས་པའི་གཟུགས་ཅན་གྱི་རྣལ་འབྱོར་མ་རྣམས་སུ་འགྱུར་རོ། །དེ་ནས་འབར་བའི་སྦྱོར་བ་འདི་ཡིན་ཏེ། པདྨའི་འདབ་མའི་དབུས་སུ་ཡི་གེ་ཧ་ལས་རླུང་གི་དཀྱིལ་འཁོར་ཏེ། དེའི་སྟེང་དུ་ཐིག་ལེ་དང་བཅས་པའི་ཡི་གེ་རཾ་ལས་མེའི་དཀྱིལ་འཁོར་དེའི་སྟེང་དུ་མེ་སྟག་འཕྲོ་ཞིང་འབར་བའི་ཡི་གེ་ཧཱུཾ་རྣམས་བར་བསམས་
ལ། རྫས་དེ་དེས་རབ་ཏུ་འབར་བར་གྱུར་པ་རྣམས་པར་བསྒོམ་པར་བྱའོ། །གང་ཞིག་ལ་རབ་ཏུ་འབར་བའི་ནུས་པ་མེད་དེ་བཟའ་བར་མི་བྱའོ། །འོ་ན་ཀྱང་རྗེས་སུ་བསྒྲུབ་པ་དང༌། སོ་སོར་རྗེས་སུ་བསྒྲུབ་པའི་རྣལ་འབྱོར་གྱི་ཚོགས་དང་བཅས་པས་མཚན་མ་མ་ལུས་པར་བསྒྲུབ་པར་བྱའོ། །དེ་ནས་ཉི་མ་འཆར་ཀའི་དུས་སུ་ཕྱག་རྒྱ་ཆེན་པོ་ཇི་ལྟ་བ་བཞིན་འདུན་པར་འདོད་པའི་དངོས་གྲུབ་ཐོབ་པར་འགྱུར་རོ། །གལ་ཏེ་སློབ་མ་རྣམས་གཞུག་པར་འདོད་ན། དེའི་ཚེ་བུ་མོ་རྣམས་མེད་པར་འཇུག་པ་གཉིས་པས་འཇུག་པར་བྱ་སྟེ། ཆོ་ག་ཐམས་ཅད་ཀྱང་རྗེས་སུ་སྤྱད་ལ་རྡོ་རྗེ་བཟུང་སྟེ་བ་ཞིན་དུ་ཉི་མ་མེ་ལྔར་འབར་བའི་དཀྱིལ་འཁོར་དུ་འཇུག་པའི་ཆོགས་ཕྱག་བཞི་བྱེད་དུ་གཞུག་གོ །དེ་ནས་བྱང་ཆུབ་ཆེན་པོར་སེམས་བསྐྱེད་དུ་གཞུག་གོ །དེ་ནས་དེ་རྣམས་རྡོ་རྗེ་ཉི་མ་མེ་ལྟར་འབར་བའི་གཟུགས་སུ་བྱས་ལ་ཡང་དག་པར་མཆོད་དེ། གར་ལས་བྱུང་བའི་མེ་ཏོག་དང་བཅས་པའི་ཕྱག་འཚལ་བའི་ཐལ་མོ་འཆིང་དུ་གཞུག་པར་བྱའོ། །དེ་ཉིད་ཀྱིས་མེ་ཏོག་གི་ཕྲེང་བ་འཛིན་དུ་བཅུག་ནས་གཞུག་སྟེ། ཐམས་ཅད་བྱས་ལ་རྡོ་རྗེ་ལ་སོགས་པ་གསུམ་པོ་དེ་རྣམས་ལ་སྦྱིན་པར་བྱའོ། །རྟག་ཏུ་འདོད་ཆགས་ལས་བྱུང་ཁྲོད། །རྡོ་རྗེ་སེམས་པའི་གདུལ་བྱའི་ཕྱིར། །རྡོ་རྗེ་ཉི་མ་མེ་ལྟར་འབར། །མཆོག་ཏུ་རབ་འཇིགས་འདི་ཡིན་ནོ། །ཞེས་བྱ་བའི་དེ་ཁོ་ན་ཉིད་འདིས་གསང་བ་ལྔའི་བཤད་པ་བྱས་ནས་རྡོ་རྗེ་སྦྱིན་པར་བྱ་བ་ནི་རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་ལ་ལའོ། །རྡོ་རྗེ་རྣལ་འབྱོར་མ་རྣམས་ནི། །རྡོ་རྗེ་ཉི་མ་འབར་འབྱུང་བའི། །གྲིབ་མ་འདི་དག་བདུད་ལ་སོགས། །གདུག་པ་མ་ལུས་ཁྲག་ཟ་ནུས། །དེ་བཞིན་གཤེགས་པ་རྣམས་ཀྱིས་སྤྲུལ། །ཞེས་པའི་དེ་ཁོ་ན་ཉིད་འདིས་སྦྱིན་པར་བྱའོ། །རྡོ་རྗེ་ཁ་ཊྭཱཾ་ག་ངེས་པར་སྦྱོར་བའི་བ་དན་དང་བཅས་པའི་རྡོ་རྗེ་དྲིལ་བུ་ཆོས་འདིས་དགྲོལ་བར་བྱའོ་ཞེས་བསྟན་པར་བྱའོ། །དེ་ལ་ཆོས་ནི་འདི་ཡིན་ཏེ། ཤིན་ཏུ་མ་རུངས་དྲག་པོ་དང༌། །བདག་པོ་གྲོགས་བོ་བུ་རྣམས་དང༌། །ཤིན་ཏུ་ཉལ་དུ་བཅུག་ནས་བརྟག །རྡོ་རྗེ་མཆོག་ནི་འཛིན་པས་གསུངས། །ཞེས་བྱ་བ་ནི་མཆོག་ཏུ་གསང་བའི་ཆོས་ཉིད་འབེབས་པའི་རྡོ་རྗེ་ཁ་ཊྭཱཾ་གའི་རྒྱལ་མཚན་དང་ངེས་
པར་སྦྱར་བའི་བ་དན་དང་བཅས་པའི་དྲིལ་བུ་ནི་ཐམས་ཅད་འབེབས་པར་བྱེད་པ་དང༌། རབ་ཏུ་སྒྲུབ་པར་བྱེད་པ་དང༌། ཐམས་ཅད་ལྷུང་བར་བྱེད་པ་དང༌། སློང་བར་བྱེད་པའོ། །དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་རློབས་ཤིག་ཅེས་བྱ་བ་ཡང་སློབ་ཏུ་གཞུག་གོ །དེ་ལ་དམ་ཚིག་གི་ནི་འདི་ཡིན་ཏེ། ཁྲག་ཆེན་ག་བུར་དང་བཅས་པ། །ཙནྡན་དམར་པོས་སྦྱར་བྱས་ཏེ། །ཚོགས་ཀྱི་ནང་དུ་རབ་ཞུགས་ནས། །རྡོ་རྗེ་དང་བཅས་རྡོར་འཛིན་ཉིད། །སྲིན་ལག་མཐེ་བོའི་རྩེ་མོ་ཡིས། །ནམ་མཁའ་ཐམས་ཅད་མཆོག་སྦྱོར་ལྡན། །ཟླ་བའི་བཏུང་བ་བཞིན་མྱངས་ན། །རྟག་པའི་དངོས་གྲུབ་ཐོབ་པར་འགྱུར། །འདོད་པ་ཀུན་ལ་ལོངས་སྤྱོད་ཅིང༌། །ཅི་འདོད་པར་ནི་བསྟེན་བཞིན་དུ། །ནམ་མཁའ་ཀུན་མཆོག་སྦྱོར་བ་ཡིས། །དངོས་གྲུབ་ཐམས་ཅད་ཐོབ་པར་འགྱུར། །ཞེས་བྱ་བ་འདི་ཚོགས་ཀྱི་འཁོར་ལོར་ཤེས་བར་བྱའོ། །སྔོན་དུ་བསྙེན་པའི་དུས་སུ་ནི། །ནམ་མཁའ་ཀུན་མཆོག་སྦྱོར་བ་ཡིས། །ཐམས་ཅད་ནམ་མཁའ་ཞེས་བརྗོད་ཅིང༌། །རྡོ་རྗེའི་ཕྱག་རྒྱས་བཏབ་པ་ཡི། །འཇིག་རྟེན་གསུམ་ཡང་བཟའ་བར་བྱ། །ཞེས་བྱ་བའི་དམ་ཚིག་འདིས་ཕྱག་རྒྱ་ཆེན་པོར་བྱིན་གྱིས་བརླབ་པར་བྱའོ། །དེ་ནས་མནའ་བསྒགས་ལ་སྙིང་པོ་དང་ཕྱག་རྒྱ་བཞིའི་ཡེ་ཤེས་བསྟན་པར་བྱའོ། །དེ་ཡང་སྒེག་པ་དང་བཅས་པའི་སྨིན་མའི་ཁྲོ་གཉེར་ཅན་སྤྱན་དམར་སེར་གྱིས་ཤིན་ཏུ་འཇིགས་པར་བྱེད་པ། །ཕྱག་གཡས་པས་འབར་བའི་རྡོ་རྗེ་རྩེ་ལྔ་པ་གསོར་བ་ལ་བརྩོན་པ། སྔོ་ལ་འབར་བའི་རང་བཞིན་ཅན་འོད་ཀྱི་དཀྱིལ་འཁོར་འབར་ཞིང་འབར་བ། གཡོན་པའི་རྡོ་རྗེ་ཁུ་ཚུར་རྡོ་རྗེ་དྲིལ་བུ་དང་བཅས་པས་རྡོ་རྗེ་བསྙེམས་པ་འཛིན་པ་དཀུ་གཡོན་པར་མཆོད་ཕྱིར་ཐོགས་ཀྱི་ཚུལ་དུ་རྡོ་རྗེ་ཁ་ཊྭཱཾ་གའི་ཕྱག་མཚན་དང་ངེས་པར་སྦྱར་བའི་བ་དན་དང་བཅས་པའི་དྲིལ་བུ་འཆང་བ། དེ་བཞིན་གཤེགས་པ་རྣམས་པར་སྣང་མཛད་ཀྱི་རང་བཞིན་གྱིས་སངས་རྒྱས་ཀྱི་གཙུག་གི་ནོར་བུ་དང་བཅས་པའི་ཐོད་པའི་ཕྲེང་བའི་ཅོད་པན་ཅན། སྣ་ཚོགས་པདྨ་ལ་སེམས་དཔའི་སྐྱི་ལ་མོ་ཀྲུང་གིས་བཞུགས་པ། རྡོ་རྗེ་དྲག་པོའི་གཟུགས་ཅན་གྱི་རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱ་ཆེན་པོའོ། །ལྷ་མོ་བཞི་པོ་ནི་གོ་སླའོ། །རྡོ་རྗེ་ཉི་མ་མེ་ལྟར་
བ་དང༌། མདའ་འཛིན་པ་དང༌། ཁ་ཊྭཱཾ་ག་འཛིན་པ་དང་བ་དན་སྣ་ཚོགས་འཛིན་མ་རྣམས་ཀྱི་དམ་ཚིག་གི་ཕྱག་རྒྱ་འོག་ནས་སྟོན་པར་འགྱུར་པ་ཡིན་ནོ། །ལྷ་མོ་གཉིས་པའི་དམ་ཚིག་གི་ཕྱག་རྒྱ་ནི་རབ་ཏུ་དགའ་བའི་རྡོ་རྗེ་ཁྲོ་བོའི་དཀྱིལ་འཁོར་ཆེན་པོ་ལས་གསུངས་པའི་ཀའི་ལི་ཀའི་པའི་དམ་ཚིག་གི་ཕྱག་རྒྱ་གཟུང་བར་བྱའོ། །ཆོས་ཀྱི་ཕྱག་རྒྱ་རྣམས་ནི་རང་རང་གི་སྙིང་བོ་ཁོ་ནའོ། །ལས་ཀྱི་ཕྱག་རྒྱ་ནི་རྡོ་རྗེ་ཉི་མ་མེ་ལྟར་འབར་བ་དང༌། མདའ་འཛིན་མ་དང༌། ཀའི་ལ་མ་དང༌། ཁ་ཊྭཾ་ག་འཛིན་མ་དང༌། བ་དན་འཛིན་མ་རྣམས་ཀྱིས་ཤེས་པར་བྱའོ། །དེ་ནས་ཇི་ལྟར་བ་བཞིན་དུ་གཟིངས་བསྟོད་པས་ལུང་བསྟན་པ་བྱིན་ལ། དེ་བཞིན་གཤེགས་པ་ཐམས་ཅད་ལ་སོགས་པའི་དབུགས་དབྱུང་བ་སྦྱིན་པར་བྱའོ། །དེའི་རྗེས་ལ་ཆོག་ཐམས་ཅད་རྗེས་སུ་སྤྱད་པར་བྱའོ། །དཔལ་མཆོག་དང་པོའི་རྒྱ་ཆེར་འགྲེལ་བ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས། རྡོ་རྗེ་ཉི་མ་མེ་ལྟར་འབར་བའི་ཕྲ་མོའི་ཆོ་གའི་གསང་བའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་བཅོམ་ལྡན་འདས་ཉི་མ་མེ་ལྟར་འབར་བ་གསང་བའི་དཀྱིལ་འཁོར་གཉིས་པ་བསྟན་ནས་རེ་ཞིག་བཅོམ་ལྡན་འདས་འཕགས་པ་སྤྱན་རས་གཟིགས་ཀྱི་བསྟན་པར་བྱ་བའི་ཕྱིར། དེ་ནས་འཕགས་པ་སྤྱན་རས་གཟིགས། །ཞེས་བྱ་བ་ལ་སོགས་པ་གསུངས་ཏེ། འདིར་དང་པོ་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པ་ཁོ་ནའོ། །སྔ་མ་བཞིན་དུ་ཚིགས་སུ་བཅད་པའི་སྔགས་ཀྱིས་རས་རིས་ཀྱི་དཀྱིལ་འཁོར་རྫོགས་པར་བྱའོ། །དེ་ནས་གནས་ཇི་ལྟ་བ་བཞིན་དུ་རང་རང་གི་སྙིང་པོས་དགོད་པར་བྱ་སྟེ་འདི་ནི་ཏིང་ངེ་འཛིན་གཉིས་པའོ། །དེ་ནས་གདུལ་བ་སྔོན་དུ་འགྲོ་བས་ཏིང་ངེ་འཛིན་གསུམ་པ་ཤེས་པར་བྱའོ། །དེ་ནས་ཀྱི་སྒྲ་ནི་དེ་མ་ཐག་པ་རྗོད་པར་བྱེད་པས་ཏེ་ཏིང་ངེ་འཛིན་འདས་མ་ཐག་པ་ཁོ་ན་ཞེས་བྱའོ། །འཕགས་པ་སྤྱན་རས་གཟིགས་དབང་ཕྱུག་གི་མཆོག་ཀྱང་དེ་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བས་ཏེ་རས་རིས་ཀྱི་དཀྱིལ་འཁོར་རོ། །སེམས་ཅན་གདུལ་བར་བྱ་བའི་ཕྱིར་དེའི་ཆོག་ག་ནི་བསྒྲུབ་པར་བྱ་བ་དང་སྒྲུབ་པ་
བསྟན་པ་ཡིན་པའོ། །རས་ལ་བཅོམ་ལྡན་འདས་བྲི་བར་བྱ་ཞེས་བྱ་བ་ནི་རས་ཁོ་ན་ལ་བྲི་བར་བྱའོ། །དེ་གང་ཡིན་ཞེ་ན་པདྨ་གར་གྱི་དབང་ཕྱུག་གཙོ། །ཞེས་བྱ་བ་ལ་པདྨའི་ཞི་བའི་གཟུགས་དོན་ཡོད་རྒྱལ་པོས་ཏེ་དོན་ཡོད་ཞགས་པའོ་ཞེས་བྱ་བའི་དོན་ཏོ། །དེ་ཡང་མཆོག་སྩོལ་བྲི་བར་བྱའོ། །འཇིག་རྟེན་དབང་ཕྱུག་ཉིད་དབང་ཕྱུག་ཆེན་པོའི་གཟུགས་འཆང་བ་ནི་འཇིག་རྟེན་དབང་ཕྱུག་ཆེན་པོའོ། །གློག་གི་འཁོར་ལོ་ཞེས་བྱ་བ་ལ་སོགས་པ་ལ་རྣམ་པར་འཕྲུལ་བ་ནི་སྒེག་པའི་ཉམས་ཀྱི་དངོས་པོ་སྟོན་པར་བྱེད་པའི་བཞིན་འཛུམ་པ་དང་མཆུ་དང་སོ་དང༌། སྨིན་མ་དང་མིག་ལ་སོགས་པའི་ཕྱག་རྒྱའི་རང་བཞིན་ཅན་ཏེ་དེ་དང་བཅས་པས་གར་མཛད་པའི་ཕྱག་རྒྱ་གང་ཡིན་པ་དེ་ལ་དེ་སྐད་ཅེས་བྱའོ། །གློག་འགྱུར་བ་ལྟར་གར་མཛད་པས་འཁོར་ལོ་བཞིན་དུ་སྐུའི་ཕྱི་རོལ་ཏུ་བསྐོར་བའི་ཚུལ་གྱིས་འགྱུ་བ་དང་དེ་ཡིན་པས་ཡོངས་སུ་བསྐོར་བ་ཡང་དེ་ཉིད་ཡིན་པས་ན་གློག་གི་འཁོར་ལོ་འགྱུར་བ་ལྟར་བསྐོར་པའོ། །གློ་ག་གི་འཁོར་ལོས་འགྱུ་བ་ལྟར་ཡོངས་སུ་བསྐོར་བ་ཡང་དེ་དག་ཡིན་ལ་རྣམ་པར་འཕྲུལ་བས་གར་མཛད་པ་ཡང་དེ་ཉིད་ཡིན་ནོ་ཞེས་བྱ་བ་ནི་སླར་ཡང་གཞི་མཐུན་པའི་བསྡུ་པའོ། །དེའི་ཕྱིར་ཕྱག་དེ་དག་གི་པདྨ་ལ་སོགས་པའི་ཕྱག་མཚན་ཡང་དེ་དག་ཉིད་ཡིན་པས་ན་པདྨ་ལ་སོགས་པའི་ཕྱག་མཚན་ཏེ་དེ་རྣམས་འཆང་བ་ནི་འཛིན་པའོ། །ཕྱག་རྒྱ་ནི་ཕྱག་རྒྱ་སྟེ་ཕྱག་རྒྱ་ཆེན་པོ་དེ་གང་གིས་འཁོར་ལོ་ལྟར་མཛད་པ་དེ་ནི་ཕྱག་རྒྱ་འཁོར་ལོ་ལྟར་མཛད་པས་ཏེ་སྤྱན་རས་གཟིགས་ཀྱི་དབང་ཕྱུག་བྲི་བར་བྱའོ། །འདི་ལྟར་བཤད་པར་འགྱུར་ཏེ་པདྨ་དང༌། རལ་གྲི་དང༌། འཁོར་ལོ་དང༌། ལྕེ་དང་སྒོ་ཚོགས་རྡོ་རྗེ་དང་གོ་ཆ་དང་མཆེ་བ་དང་ཁུ་ཚུལ་དང་རྡོ་རྗེ་ལྕགས་ཀྱུ་དང༌། མདའ་དང༌། ལེགས་པར་སྦྱིན་པ་དང༌། རིན་པོ་ཆེ་དང༌། ཉི་མ་དང་རྒྱལ་མཚན་དང༌། འཇུམ་པ་དང༌། ལྕགས་ཀྱུ་དང༌། ཞགས་པ་དང༌། ལྕགས་སྒྲོག་དང༌། དྲིལ་བུ་དང༌། ཏི་ཤཱུ་ལ་དང༌། ད་བྱུག་པ་དང༌། དགྲ་སྟ་དང༌། མདུང་དང༌། གཞུ་དང༌། མ་དུང་ལ་སོགས་པའི་ཕྱག་མཚན་རྣམས་ཏེ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་གར་གྱི་ཚུལ་གྱིས་ཕྱག་རྒྱ་འཁོར་ལོ་ལྟར་མཛད་ཅིང་སྣ་ཚོགས་པདྨའི་གདན་ལ་
སེམས་དཔའི་སྐྱིལ་མོ་ཀྲུང་གིས་བཞུགས་བ་ཟླ་བ་ལྟ་བུའི་འོད་དང་ལྡན་པ། སྤྱན་གསུམ་པ་སངས་རྒྱས་སྐུའི་མཆོག་གིས་དབུ་ལ་མཚན་པ། མཆོག་སྩོལ་བའི་དོན་ཡོད་ཞགས་པ་འཇིག་རྟེན་དབང་ཕྱུག་བྲི་བར་བྱའོ། །དེའི་ཞེས་བྱ་བ་ལ་སོགས་པ་འཇིག་རྟེན་དབང་ཕྱུག་དེའི་ལོགས་ཐམས་ཅད་དེ་ཕྱོགས་བཞིར་ཁྲོ་གཉེར་མ་ལ་སོགས་པ་བྲི་བར་བྱ་སྟེ་དྲག་མོ་ལ་སོགས་པའི་གཟུགས་དང་ཕྱག་མཚན་གང་ལ་ཡོད་པ་དེ་ནི་དྲག་མོ་ལ་སོགས་པའི་གཟུགས་དང་ཕྱག་མཚན་ཅན་ནོ། །པདྨ་དང་བཅས་པར་བཞུགས་པས་ན་པདྨ་དང་བཅས་པ་སྟེ་པདྨ་རིགས་ཀྱི་ལྷ་མོ་རྣམས་པདྨ་དང་བཅས་པ་བྲི་བར་བྱའོ། །འདི་ལྟར་འཆད་པར་འགྱུར་ཏེ། ཧཱུཾ་པདྨ་ཙཎྜི་ཤྭ་ར་ཧཱུཾ་ཕཊ་ཅེས་བྱ་བའི་སྙིང་པོ་འདིས་ཇི་ལྟ་བ་བཞིན་དུ་བཤད་པའི་སྐུ་མདོག་དང་དབྱིབས་དང་ལྡན་པའི་དོན་ཡོད་ཞགས་པ་འཇིག་རྟེན་དབང་ཕྱུག་བྲི་བར་བྱ་སྟེ། དེ་ནི་པདྨ་གཅིག་ལ་བཞུགས། །དེ་ཡི་འོད་ཀྱིས་འཁོར་ལོར་བརྟེན། །དྲག་མོ་སོགས་གཟུགས་ཕྱག་མཚན་ལྡན། །ཁྲོ་གཉེར་མ་སོགས་བྲི་བར་བྱ། །དེ་ལ་གཡས་ལོགས་སུ་པདྨ་ཁྱབ་འཇུག་མ་སྟེ་ཕྱག་གཡས་པདྨ་འཛིན་པ། གཡོན་པས་འཁོར་ལོ་འཛིན་པའོ། །དེ་ཉིད་ཀྱི་གཡས་ལོགས་སུ་ཁྲོ་གཉེར་མ་སྟེ་ཕྱག་གཡས་པས་པདྨ་འཛིན་པ། གཡོན་པས་རྩེ་གསུམ་འཛིན་པའོ། །སླར་ཡང་བཅོམ་ལྡན་འདས་ཀྱི་གཡོན་ལོགས་སུ་གོས་དཀར་མོ་སྟེ་ཕྱག་གཡོན་པས་ཕྲེང་བ་འཛིན་པ། ཕྱག་གཡས་པས་པདྨ་འཛིན་པའོ། །དེ་ཉིད་ཀྱི་གཡོན་ལོགས་སུ་པདྨ་ལ་ཆགས་པ་སྟེ་པདྨ་མདའ་གཞུ་འཛིན་པ་སྟེ། ཧྲཱིཿ་ཞེས་བྱ་བའི་སྙིང་པོ་འདི་བྲི་པར་བྱའོ། །གནས་གང་དུ་རས་རིས་འདི་བྲི་བར་བྱ་ཞེ་ན། འཁོར་ལོ་དེ་ནི་བརྟན་གནས་སུ། །ཞེས་བྱ་བ་ལ་སོགས་པ་ལ་པདྨའི་རིགས་ཀྱི་དཀྱིལ་འཁོར་དེ་བརྟགས་ཏེ་བྲི་བར་བྱས་ནས་གསང་བའི་དཀྱིལ་འཁོར་བྲི་བར་བྱའོ། །དམ་པ་ནི་ཕུལ་དུ་བྱུང་བའོ། །རས་རིས་འདི་ནི་དབུས་ཀྱི་དཀྱིལ་འཁོར་གྱི་ལྟེ་བའི་ཕྱོགས་སུ་བྲི་བར་བྱའོ། །དེ་ནས་པདྨའི་སྒེག་མོ་ལ་སོགས་པ་རྣམས་ནི་འགྲོ་བ་འདུལ་བའི་དཀྱིལ་འཁོར་ཆེན་པོ་ལས་གསུངས་པའི་ཆོགས་ཕྱིའི་དཀྱིལ་འཁོར་གྱི་མཚམས་རྣམས་སུ་བྲི་བའོ། །སྒོ་བ་ནི་ལ་ནི་ལྕགས་ཀྱུ་མ་ལ་སོགས་པ་རྣམས་བྲི་བར་བྱའོ། །རྡོ་རྗེ་
སེམས་དཔའི་རས་རིས་ཀྱི་ཆོ་ག་ནི་མཚོན་ཆ་མཆོག་གི་གོ་ཆ་སྟེ་གོ་ཆ་དེ་ཐམས་ཅད་ནི་རང་གི་ཆོ་ག་རྒྱས་པ་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པ་བྱས་པ་དེ་ཁོ་ན་ཉིད་དང༌། ཆོས་དང་དམ་ཚིག་རྣམས་སྦྱིན་པར་བྱའོ། །དེ་བཞིན་ཉིད་ནི་དོན་དམ་པ་སྟེ་དེ་ནས་སངས་རྒྱས་བཅོམ་ལྡན་འདས་ནི་སྤྱན་རས་གཟིགས་ཏེ་དེ་བཞིན་གཤེགས་པ་རྣམས་ཀྱིས་སོ་སོར་གཟིགས་པ་ཡིན་ནོ། །བག་ཆགས་དང་བཅས་པའི་ཉོན་མོངས་པ་གཞན་གྱི་དབང་དུ་མ་གྱུར་བས་ན་དེ་ཉིད་དབང་ཕྱུག་གོ །དེ་ཉིད་ཀྱི་ཕྱིར་ན་དོན་དམ་པའི་འཕགས་པ་སྤྱན་རས་གཟིགས་དབང་ཕྱུག་སྟེ་ས་འོག་མ་ལ་གནས་པའི་བྱང་ཆུབ་སེམས་དཔའ་ནི་མ་ཡིན་ནོ་ཞེས་བྱ་བའི་དོན་ཏོ། །གར་མཛད་པ་ཞེས་བྱ་བ་དང་སྦྱར་རོ། །ཁྱད་པར་ཇི་ལྟ་བུ་དང་ལྡན་པ་ཞེ་ན་འདུལ་བའི་ཐབས་ཞེས་བྱ་བ་ལ་སོགས་པ་ལ་སེམས་ཅན་རྣམས་འདིས་འདུལ་བ་སྟེ། འདུལ་བ་ཡང་དེ་ཡིན་ལ་ཐབས་ཀྱང་དེ་ཉིད་ཡིན་པས་ན་འདུལ་བའི་ཐབས་སོ། །དེ་གང་ཡིན་ཞེ་ན་འདོད་ཆགས་ལ་སོགས་པའི་དྲི་མ་དང་བྲལ་བའི་རོལ་པས་གར་ནི་རོལ་པའི་གར་ཏེ་འཇིག་རྟེན་དབང་ཕྱུག་གི་གཟུགས་འཛིན་པའི་སངས་རྒྱས་བཅོམ་ལྡན་འདས་གར་མཛད་པ་ཡིན་ནོ། །མཆོག་ཀྱང་ཡིན་ལ་རྡོ་རྗེ་ཡང་ཡིན་པས་ན་རོལ་པའི་རྡོ་རྗེའོ། །གང་ཞིག་དེ་ཁོ་ན་ཉིད་དེ་ནི་མཆོག་གི་རྡོ་རྗེ་སྟེ་ངེས་པར་འབྱིན་པའི་ཤེས་རབ་ཅེས་བྱ་བའི་དོན་ཏོ། །འདིས་པདྨའི་རིགས་ཀྱི་རྣལ་འབྱོར་པས་པདྨ་རྡོ་རྗེ་བླང་པར་བྱའོ། །དེ་ལྟར་དེ་ཁོ་ན་ཉིད་ཀྱིས་པདྨ་བླངས་ཏེ། ཆོས་ཀྱི་དྲིལ་བུ་དཀྲོལ་པར་བྱ། །ཞེས་བྱ་བའི་དོན་འདི་བསྟན་པར་བྱ་བའི་ཕྱིར། ཇི་ལྟར་པདྨ་དམར་པོ་ནི། །ཞེས་བྱ་བ་ལ་སོགས་ཏེ་ཇི་ལྟར་པདྨ་རང་གི་རང་བཞིན་གྱི་ཁ་དོག་དམར་པོས་དམར་བས་ཏེ་ཇི་ལྟ་བ་བཞིན་དུ་བཤད་པའི་འདོད་ཆགས་ཀྱི་སྐྱོན་རྣམས་དང༌། སྣ་ཚོགས་པའི་གནས་ཀྱི་ཉེས་པ་རྣམས་འདམ་དང་ཆུ་ལ་སོགས་པའི་སྐྱོན་རྣམས་ཀྱིས་གོས་པར་མི་འགྱུར་བ་དེ་བཞིན་དུ་དོན་དམ་པར་གཟུང་བ་དང་འཛིན་པའི་རྣམ་པར་རྟོག་པའི་དྲི་མ་དང་བྲལ་བའི་ཁམས་གསུམ་པ་ཡིན་ནོ་ཞེས་བྱ་བ་དྲིལ་བུའི་སྒྲ་དཀྲོལ་བ་བསྐྱེད་ཅིང༌། ཆོས་བདག་མེད་པ་ལ་ཆགས་པར་བྱེད་པས་དམར་བ་དང་སེམས་ཅན་གྱི་དོན་མཛད་པ་ལ་ཆགས་པའི་
བྱང་ཆུབ་སེམས་དཔའ་བསྒོམ་པར་བྱ་བ་ཡིན་ནོ། །འདིས་འདི་ལྟར་བཤད་པར་འགྱུར་ཏེ། ཆོས་བདག་མེད་པའི་ཆགས་པ་ལ་ཆགས་པ་དང་སེམས་ཅན་སྨིན་པ་དང་གྲོལ་བའི་ཆགས་པ་ལ་ཆགས་པའི་བྱང་ཆུབ་སེམས་དཔའ་པདྨ་ལྟར་སྲིད་པའི་སྐྱོན་གྱིས་གོས་པར་མི་འགྱུར་ཞེས་བྱ་བའོ།། ད་ནི། དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབས་ནས་སྙིང་པོ་བཟླ། །ཞེས་བྱ་བའི་དོན་འདི་རབ་ཏུ་བསྟན་པར་བྱ་བའི་ཕྱིར། ཆོ་ག་གང་དང་གང་དག་གིས། །ཞེས་བྱ་བ་ལ་གང་དང་གང་གི་རང་བཞིན་གྱི་ཆོ་གས་འགྲོ་བས་སེམས་ཅང་ཡི་ཁམས་འདུལ་བར་གྱུར་པ་དེ་དང་དེས་སྤྱད་པར་བྱའོ་ཞེས་བྱ་བ་དང་སྦྱར་རོ། །ཆོས་ཐམས་ཅད་རང་བཞིན་གྱིས་དག་པའོ་ཞེས་བྱ་བར་སོ་སོར་རྟོག་པ་ནི་པདྨ་ཐམས་ཅད་དག་པའི་མཆོག་གི་རྣལ་འབྱོར་ཏེ་དེའི་བདག་ཉིད་ནི་དེའི་རང་བཞིན་ནོ། །གཟུགས་དེ་ཉིད་ཀྱིས་སྐུའི་ཕྱག་རྒྱའི་རང་བཞིན་གྱི་བཅོམ་ལྡན་འདས་སྤྱན་རས་གཟིགས་དབང་ཕྱུག་གིས་འདིར་འགྲོ་བ་སྦྱངས་ཏེ་འདུལ་བ་ལ་རབ་ཏུ་འགོད་པར་མཛད་པ་ཡིན་ནོ་ཞེས་བྱ་བའི་སྒོམ་པ་རྣལ་འབྱོར་པས་བྱའོ། །རྡོ་རྗེ་ཐམས་ཅད་ཀྱི་ཆོས་ཀྱི་དམ་ཚིག་གི་ཞེས་བྱ་བ་ལ་ཐམས་ཅད་ཀྱང་ཡིན་ལ། རྡོ་རྗེ་ཆོས་ཀྱང་ཡིན་པས་ན་ཐམས་ཅད་ཀྱི་རྡོ་རྗེ་ཆོས་ཏེ་པདྨའི་རིགས་ཀྱི་ལྷ་རྣམས་ཀྱི་སྐུའི་གསང་བའི་རང་བཞིན་ཅན་ནོ། །དེ་རྣམས་ཀྱི་དམ་ཚིག་ནི་འདས་མ་ཐག་ཏུ་བཤད་པའི་སྒོམ་པའོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་སྒོམ་པ་ནི་འདིས་པདྨའི་རིགས་ཐམས་ཅད་ཀྱི་རྣལ་འབྱོར་པ་རྣམས་ཀྱིས་རང་གི་ལྷའི་ཕྱག་རྒྱ་ཆེན་པོས་བྱིན་གྱིས་བརླབ་པར་བྱའོ་ཞེས་བསྟན་པར་འགྱུར་རོ། །དེ་ནས་ཇི་ལྟ་བ་བཞིན་དུ་པདྨ་གར་གྱི་མཆོད་པས་ཞེས་བྱ་བ་ལ་སོགས་པ་ལ། དེ་ལྟར་སློབ་མ་གཞུག་པ་ལ་སོགས་པའི་ཆོ་ག་རྒྱས་པར་རྗེས་སུ་སྤྱད་ནས་གླུ་དང་རོལ་མོའི་ཆོ་གས་དཀྱིལ་འཁོར་ཡང་དག་པར་མཆོད་ལ་དཀྱིལ་འཁོར་པའི་གར་གྱིས་མཆོད་པ་དང༌། སྣ་ཚོགས་པའི་མཆོད་པའི་ཕྱག་རྒྱས་མཆོད་ལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པའི་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དཔལ་མཆོག་དང་པོའི་རྒྱ་ཆེར་འགྲེལ་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་འགྲོ་བ་འདུལ་བའི་རས་རིས་ཀྱི་
དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་འགྲོ་བ་འདུལ་བའི་གསང་བའི་དཀྱིལ་འཁོར་བསྟན་ནས་ད་ནི་འཕགས་པ་ནམ་མཁའི་སྙིང་པོའི་དོན་དུ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་ནམ་མཁའི་སྙིང་པོའི་དོན་ཐམས་ཅད་གྲུབ་པའི་ཆོ་ག་ཞེས་བྱ་བ་གསུངས་ཏེ་དེ་ནས་ཀྱི་སྒྲ་ནི་འདས་མ་ཐག་པ་ལ་སྟེ་དང་པོའི་སྦྱོར་བ་དང་དཀྱིལ་འཁོར་རྒྱལ་པོ་མཆོག་དང༌། ལས་རྒྱལ་པོ་མཆོག་གི་ཏིང་ངེ་འཛིན་འདས་མ་ཐག་པ་ཁོ་ནའོ། །དེ་ལ་དང་པོ་སྦྱོར་བའི་ཏིང་ངེ་འཛིན་ནི་དཔལ་རྡོ་རྗེ་སེམས་དཔའི་རས་རིས་ཀྱི་དཀྱིལ་འཁོར་ལས་གསུངས་པ་ཁོ་ནའོ། །དེ་ནས་ཇི་ལྟེ་བ་བཞིན་དུ་འཕགས་པ་ནམ་མཁའི་སྙིང་པོའི་རྣལ་འབྱོར་གྱིས་བཅོམ་ལྡན་འདས་ཀྱི་རས་རིས་ཀྱི་དཀྱིལ་འཁོར་སྤྲུལ་ཏེ། རང་གི་སྙིང་པོ་རྣམས་ཀྱིས་གནས་ཇི་ལྟ་བ་བཞིན་དུ་དགོད་པར་བྱ་སྟེ་འདི་ནི་ཏིང་ངེ་འཛིན་གཉིས་སོ། །དེ་ནས་འདུས་པ་སྔོན་དུ་འགྲོ་བས་གསུམ་པ་ཤེས་པར་བྱས་ཏེ། དམ་ཚིག་དང་དབང་བསྐུར་བ་ཐོབ་པས་བཟླས་པ་དང་བསྒོམ་པ་བྱ་བ་ཡིན་ནོ་ཞེས་བྱ་བའི་ཆོ་ག་རབ་ཏུ་བསྟན་པར་བྱ་བའི་ཕྱིར་སློབ་དཔོན་གྱི་ལས་ཀྱི་ཆོ་ག་སློབ་མ་གཞུག་པ་ལ་སོགས་པ་གསུངས་ཏེ། རྡོ་རྗེ་སེམས་དཔའ་གསང་བའི་དཀྱིལ་འཁོར་བཞིན་དུ་ཕྱིའི་དཀྱིལ་འཁོར་བྲིས་ལ། དེའི་ཕྱེད་ཀྱི་ཚད་ཀྱིས་དེའི་དབུས་སུ་ཉི་མའི་དཀྱིལ་འཁོར་བྲིས་ལ་དེའི་སྟེང་དུ་ཆ་བརྒྱད་པའི་ནོར་བུའི་དབྱིབས་ཅན་གྱི་རིན་པོ་ཆེའི་དཀྱིལ་འཁོར་དེ་བཞིན་དུ་བྲིས་ནས་ནང་གི་དཀྱིལ་འཁོར་གྱི་རེའུ་མིག་གི་ས་ལ་བཅོམ་ལྡན་འདས་འཕགས་པ་ནམ་མཁའི་སྙིང་པོ་སྔར་བཤད་པའི་ཕྱག་རྒྱ་ཆེན་པོས་སྣ་ཚོགས་པདྨའི་གདན་ལ་སེམས་དཔའི་སྐྱིལ་མོ་ཀྲུང་གིས་བཞུགས་པ་བཻ་ཌཱུཪྻ་སྔོན་པོ་དང་མཚུངས་པ། ཨོཾ་སརྦ་བཛྲཱ་དྷི་པ་ཏི་སྟྭཾ་ཨ་བྷི་ཤིཉྩཱ་མི་བྷུར་བྷཱུ་བ་སྭཿ་ཞེས་བྱ་བའི་སྙིང་པོ་འདིས་བྲི་བར་བྱའོ། །དེ་ཡི་པདྨ་གཅིག་ལ་བཞུགས། །དེ་ཡི་འོད་ཀྱི་དཀྱིལ་འཁོར་བརྟེན། །དབང་བསྐུར་བ་དང་གཏོར་མ་ཉིད། །རྒྱལ་མཚན་མཆོག་མ་མཆོད་ཆེན་མོ། །ཞེས་བྱ་བ་འདི་བྲི་བར་བྱ་སྟེ་དེ་ལ་དེའི་གཡས་ལོགས་སུ་ལྷ་མོ་གཏེར་མ། མ་ཧཱ་བཛྲ་ནི་དྷ་ནེ་ཧཱུཾ་ཞེས་བྱ་བ་སྙིང་པོ་འདིས་བྲི་བར་བྱའོ། །དེའི་ཡང་གཡས་ལོགས་སུ་ལྷ་མོ་
དབང་བསྐུར་མ། བཛྲ་ཨ་བྷི་ཥི་ཀ་ཛཾ་ཞེས་བྱའོ། །སླར་ཡང་བཅོམ་ལྡན་འདས་ཀྱི་གཡོན་ལོགས་སུ་རྒྱལ་མཚན་ཐོགས་མཆོག་མ་སྟེ། ཨོཾ་བཛྲ་མ་ནི་དྷྭ་ཛཱ་གྲ་ཀེ་ཡུ་རེ་བཾ་ཞེས་བྱ་བའི་སྙིང་པོ་འདིས་སོ། །དེའི་ཡང་གཡོན་ལོགས་སུ་མཆོད་ཆེན་མ་སྟེ། མ་ཧཱ་བཛྲ་མ་ཧཱ་ཧེ་ཧེ་ཧོ་ཞེས་བྱ་བའི་སྙིང་པོ་འདིས་བྲི་བར་བྱའོ། །དབང་བསྐུར་བ་ནི་རིན་པོ་ཆེའི་ཅོད་པན་འཛིན་པའོ། །གཏེར་གྱི་ལྷ་མོ་ནི་གཏེར་གྱི་བུམ་པ་འཛིན་པའོ། །རྒྱལ་མཚན་མཆོག་མ་ནི་རིན་པོ་ཆེའི་རྒྱལ་མཚན་འཛིན་པའོ། །མཆོད་ཆེན་མ་ནི་དྲ་བ་དང་དྲ་བ་ཕྱེད་པ་དང་གདུ་བུ་དང༌། རྣ་ཆ་དང༌། དཔུང་རྒྱན་དང༌། རིན་པོ་ཆེ་དང༌། ན་བཟའ་ལ་སོགས་པའི་རྒྱན་ཐམས་ཅད་ཀྱིས་ཡོངས་སུ་གང་བའི་རིན་པོ་ཆེའི་སྣོད་འཛིན་མའོ། །ཕྱིའི་དཀྱིལ་འཁོར་གྱི་མཚམས་རྣམས་ལ་རིན་པོ་ཆེའི་སྒྲེག་མོ་ལ་སོགས་པ་དང༌། སྒོ་རྣམས་ལ་སྔར་བཤད་པའི་སྙིང་པོ་རྣམས་ཀྱིས་ལྕགས་ཀྱུ་མ་ལ་སོགས་པ་རྣམས་བྲི་བར་བྱའོ། །དེ་ནས་དཔལ་རྡོ་རྗེ་སེམས་དཔའི་དཀྱིལ་འཁོར་གྱི་ཆོ་གས་རང་གི་ཆོ་ག་ཐམས་ཅད་དང༌། སློབ་མ་གཞུག་པ་ལ་སོགས་པའི་ཆོ་ག་ཐམས་ཅད་རྗེས་སུ་སྤྱད་ལ། སློབ་མ་རྣམས་ལ་རྡོ་རྗེ་རིན་པོ་ཆེ་དེ་ཁོ་ན་ཉིད་སྦྱིན་པར་བྱའོ། །དེ་ལ་དེ་ཁོ་ན་ཉིད་ནི་འདི་ཡིན་ཏེ་ཉི་མ་འདི་ནི་ཞེས་བྱ་བ་ལ་སོགས་པ་ལ་གང་ཞིག་སྔར་བསྟན་པའི་འཕགས་པ་ནམ་མཁའི་སྙིང་པོ་སེམས་ཅན་ཐམས་ཅད་ཀྱི་བསམ་པ་ཡོངས་སུ་རྫོགས་པར་མཛད་པ་ཡིན་ནོ། །འདིས་ནི་འདི་ལྟར་བཤད་པར་འགྱུར་ཏེ། དེ་བཞིན་གཤེགས་པ་ཁོ་ན་འཕགས་པ་ནམ་མཁའི་སྙིང་པོའི་གཟུགས་ཀྱིས་སེམས་ཅན་ཐམས་ཅད་ལ་འཁོར་བ་ཇི་སྲིད་ཀྱི་བར་དུ་བསམ་པ་ཡོངས་སུ་རྫོགས་པར་མཛད་པའི་ཕྱིར་བཞུགས་སོ་ཞེས་བྱ་བའི་དོན་ནོར་བུའི་རིགས་ཀྱི་ཕྱག་མཚན་རྡོ་རྗེ་རིན་པོ་ཆེས་བསྟན་པ་ཡིན་ནོ་ཞེས་བྱའོ། །ད་ནི་ཆོས་ཀྱི་དྲིལ་བུ་དཀྲོལ་བ་ཞེས་བྱ་བ་བསྟན་པར་བྱ་བའི་ཕྱིར་བསམ་པ་ཀུན་ཞེས་བྱ་བ་ལ་སོགས་པ་གསུངས་ཏེ། བསམ་པ་གྲུབ་པ་ཡང་དེ་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་བསམ་པ་གྲུབ་པ་ཐམས་ཅད་དེ། ནོར་བུའི་རིགས་དང་ཐ་མི་དད་པའི་དངོས་གྲུབ་ཐམས་ཅད་དོ། །དེ་རྣམས་ཀྱི་ནང་ན་ནོར་གྱི་
བསམ་བ་གྲུབ་པ་གང་ཡིན་པ་དེ་ནི་མཆོག་སྟེ་སེར་སྣའི་དྲི་མ་བསལ་བས་གཉིས་སུ་མེད་པ་ཉིད་ཀྱི་ཕྱིར་ནོར་བུའི་རིགས་ཀྱི་དངོས་གྲུབ་བོ་ཞེས་བྱ་བའི་ཐ་ཚིག་གོ །དེ་ཞེས་བྱ་བ་ནོར་བུའི་རིགས་ཀྱི་དངོས་གྲུབ་དེ་ཡང་འདོད་པ་རབ་ཏུ་གྲུབ་པར་བྱ་བའི་ཕྱིར་བསྒྲུབ་པར་སྟེ། བྱང་ཆུབ་ཆེན་པོའི་སེམས་རྫོགས་པའི་ཕྱིར་ཞེས་བྱ་བའི་དོན་ཏོ། །དེ་ཅིའི་ཕྱིར་འདོད་པས་རབ་ཏུ་གྲུབ་པའི་ཕྱིར་བསྒྲུབ་པར་བྱ་ཞེ་ན། འདོད་ལས་ཐར་བ་ཞེས་བྱ་བ་ལ་སོགས་པ་ལ། གང་གི་ཕྱིར་བྱང་ཆུབ་ཆེན་པོའི་སེམས་མངོན་དུ་བྱ་བའི་རང་བཞིན་གྱི་འདོད་པ་ལས་ཐོགས་དང་ཐ་མ་མེད་པའི་ཆོས་ཀྱི་དབྱིངས་ཀྱི་ཐར་པ་མངོན་དུ་བྱེད་པར་འགྱུར་བ་དེའི་ཕྱིར་རོ། །གང་ཞིག་ཐར་པ་དེ་ཉིད་ནི་ཟག་པ་མེད་པའི་བདེ་བ་དང་ཡིད་བདེ་བ་རང་གི་ངོ་བོ་མ་སྤངས་པའི་རང་བཞིན་ཡིན་ནོ། །ད་ནི། དམ་ཚིག་གིས་ནི་ཕྱག་རྒྱ་ཆེར། །བྱིན་གྱིས་བརླབ་པ་ཞེས་བྱ་བ་བསྟན་པའི་ཕྱིར། དམན་མིན་རྣམས་ཀྱང་ཞེས་བྱ་བ་ལ་སོགས་པ་གསུངས་ཏེ་དེ་ལ་དམན་ནི་མི་རྟག་པ་དང༌། སྡུག་བསྔལ་བ་དང་སྟོང་པ་དང་བདག་མེད་པ་ལ་སོགས་པ་སྒོམ་པའི་རང་བཞིན་ཏེ་མདོ་སྡེ་པ་ལ་རབ་ཏུ་གྲགས་པ་བརྗོད་པ་ཡིན་ནོ། །དམན་མ་ཡིན་པ་ནི་དམན་མིན་ཏེ་ཡང་དག་པའི་སྦྱོར་བའི་སྒོམ་པའི་རང་བཞིན་ཅན་རྣམས་ཏེ། དེའི་དངོས་བོ་ལས་བྱུང་བའི་བདེ་བ་རྣམས་ནི་འདོད་པ་ཀུན་གྱི་བདེ་བ་རྣམས་ཏེ་རྡོ་རྗེ་ཐེག་པ་ལམ་མོས་པའི་བདེ་བ་ལ་རབ་ཏུ་གྲགས་པ་ཉིད་ཀྱིས་དེ་རྣམས་འདོད་ཆགས་སྤངས་པའི་ཕྱིར་མན་ངག་དང་སྒོམ་པ་དག་གིས་རྣལ་འབྱོར་པ་རྣམས་ལ་སྦྱིན་པར་བྱའོ། །དེ་རྣམ་པ་གང་དག་ལ་སྦྱིན་པར་བྱ་ཞེ་ན། བདག་ཉིད་དང་ནི་ཞེས་བྱ་བ་ལ་སོགས་པ་ལ་བདག་ཉིད་ལ་སྒོམ་པའི་དུས་དང་གཞན་རྣམས་ལ་སེམས་ཅན་གྱི་ཁམས་མ་ལུས་པ་ལ་ནོར་བུའི་རིགས་གྲུབ་ནས་བསམ་པ་ཐམས་ཅད་ཡོངས་སུ་རྫོགས་པའི་དོན་དུའོ། །འདི་ལྟར་བཤད་པར་འགྱུར་ཏེ་ནོར་བུའི་རིགས་ཀྱི་རྣལ་འབྱོར་པས་རང་གི་ལྷའི་ཕྱག་རྒྱ་ཆེན་པོ་བཅིངས་ལ་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་ནོར་བུའི་རིགས་ཀྱི་དཀྱིལ་འཁོར་རྫོགས་པར་བྱས་ནས་དེས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སེམས་
ཅན་གྱི་ཁམས་ཡང་དག་པར་སྦྱོར་བའི་བསྒོམ་པས་ནོར་བུའི་རིགས་ཀྱི་རང་བཞིན་དུ་རྫོགས་པར་བྱས་ལ། བྱ་བ་བྱས་པ་ལྟར་དེའི་རང་བཞིན་ཅན་དུ་དེ་དག་ཉིད་རྣམ་པར་བསམས་ཏེ་བསྒོམ་པར་བྱའོ་ཞེས་བྱ་བའོ། །དེ་ལྟར་ཞེས་བྱ་བ་དེ་ནི་དེ་ལྟ་བུའོ། །མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བས་ཏེ་ནོར་བུའི་རིགས་ཀྱི་གསང་བའི་དཀྱིལ་འཁོར་རོ། །དེའི་ཚུལ་ནི་ཇི་ལྟ་བ་བཞིན་དུ་བཤད་པའི་བསྒྲུབ་པར་བྱ་བ་དང་སྒྲུབ་བའི་ཆོ་གའོ། །མཆོག་ནི་ནམ་མཁའི་སྙིང་པོ་སྟེ་དེའི་ཆོ་ག་རྒྱས་པ་ནི་བསྒྲུབ་པར་བྱ་བ་དང་སྒྲུབ་པའི་རྒྱུད་འདས་མ་ཐག་ཏུ་དེ་ལྟར་བཤད་པ་བསྟན་ནས། བཅོམ་ལྡན་འདས་ཀྱིས་ཚུལ་གྱི་ཆོ་ག་རྒྱས་པར་གསུངས་པ་ཡིན་གྱི་གཞན་གྱིས་ནི་མ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །ཅིའི་དོན་དུ་ཞེ་ན་མཆོག་འདི་ཞེས་བྱ་བ་ནི་གང་གི་ཕྱིར་ཚུལ་འདི་མཆོག་ཡིན་པས་ན་དེའི་ཕྱིར་རོ། །འདི་ཉིད་ཀྱང་ཅིའི་ཕྱིར་ཞེ་ན། །དེ་ནི་ཞེས་བྱ་བ་ལ་གང་གི་ཕྱིར་སྒྲུབ་པ་པོ་དེ་ནོར་བུའི་རིགས་ཀྱི་རྟོག་པའི་མཆོག་ཏུ་གྱུར་པའི་དངོས་གྲུབ་ཀྱི་ཚུལ་འདི་ཉིད་ཀྱིས་ཁྱད་པར་དུ་ཐོབ་པར་འགྱུར་བའི་ཕྱིར་རོ། །རྟོག་པ་ཡང་ཡིན་ལ་ཐམས་ཅད་ཀྱང་ཡིན་པས་ན་རྟོག་པ་ཐམས་ཅད་དེ་རྡོ་རྗེ་སེམས་དཔའ་ལ་སོགས་པའི་གསང་བའི་དཀྱིལ་འཁོར་གྱི་རང་བཞིན་ནོ། །དེ་རྣམས་ཀྱི་སྒྲུབ་པའི་ཆོ་ག་ནི་སློབ་དཔོན་གྱི་ལས་དང་སློབ་མ་གཞུག་པ་ལ་སོགས་པའི་ཆོ་ག་རྒྱས་པའོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་པ་ལས་ནོར་བུའི་རིགས་ཀྱི་རས་རིས་ཀྱི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་རྟོག་པ་ཐམས་ཅད་ཀྱི་རྒྱུད་ཕྱི་མའི་རྩ་བའི་རྒྱུད་དང༌། རྟོག་པ་ཐམས་ཅད་ཀྱི་སྒྲུབ་པའི་ཆོ་ག་བསྟན་ནས་ད་ནི་བདག་བྱིན་གྱིས་བརླབ་པའི་རྣལ་འབྱོར་གྱི་ཕྱག་རྒྱ་ཐབས་ཀྱི་རང་བཞིན་ཅན་རྣམས་ཀྱིས་རྟོག་པ་ཐམས་ཅད་ཀྱི་དངོས་གྲུབ་ཐོབ་བ་ཡིན་ནོ་ཞེས་པའི་དོན་འདི་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྐབས་སུ་བབ་པ་སྟེ། བདག་བྱིན་གྱིས་བརླབ་པ་ལ་སོགས་པའི་རྣལ་འབྱོར་གྱི་ཕྱག་རྒྱའི་སྐབས་སུ་བབ་པའོ་ཞེས་བྱ་བའི་དོན་ཏོ། །དངོས་གྲུབ་ཆེན་པོ་ཡང་དེ་
ཉིད་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་དངོས་གྲུབ་ཆེན་པོ་ཐམས་ཅད་དེ། དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་ལ་སོགས་པ་རྣམས་ཐོབ་བའོ། །དེ་རྣམས་སྒྲུབ་པ་ནི་ཕྱག་རྒྱ་ཆེན་པོ་ལ་སོགས་པ་བཅིང་བ་དང་རྣལ་འབྱོར་སྒོམ་པ་དང༌། བདག་ལ་བྱིན་གྱིས་བརླབ་པ་ལ་སོགས་པ་སྟེ། དེས་མཆོག་ནི་འཇིག་རྟེན་དང་འཇིག་རྟེན་ལས་འདས་པའི་ཐབས་རྣམས་ཀྱི་དམ་པའོ། །དངོས་གྲུབ་ཐམས་ཅད་ཀྱིས་མི་འགྱུར་བའི་བདེ་བ་དང་ལྡན་པས་ན་བདེ་བ་ཆེན་པོའོ། །རྡོ་རྗེ་སེམས་དཔའ་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་ནོ། །ནམ་མཁའི་ཁམས་ཐམས་ཅད་ལ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེའི་རང་བཞིན་ཅན་གྱི་ཕྱག་རྒྱ་ཆེན་པོ་གང་ལ་མངའ་བ་དེ་ནི་ཕྱག་རྒྱ་ཆེའོ། །དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཆེན་པོ་དང༌། དམ་ཚིག་དང༌། །ཆོས་དང་ལས་ཀྱི་ཕྱག་རྒྱ་རྣམས་ནི་རྟོག་པ་ཐམས་ཅད་དེ་མཆོག་ཏུ་གྱུར་པ་དེ་རྣམས་ཀྱི་དངོས་གྲུབ་ནི་དེའི་རང་བཞིན་རྣལ་འབྱོར་པ་རྣམས་ཀྱིས་ཐོབ་པའི་དོན་གྱིས་ན། རྟོག་པ་ཀུན་མཆོག་གྲུབ་པའི་ཕྱིར། །ཕྱག་རྒྱ་དེ་རྣམས་གྲུབ་པར་མཛད་པའོ་ཞེས་བྱ་བ་དང་སྦྱར་རོ། །རྒྱུ་གང་གི་ཕྱིར་ཞེ་ན་སྣོད་མ་ཡིན་པ་ཞེས་བྱ་བ་ལ་སོགས་ལ་དཔལ་རྡོ་རྗེ་སེམས་དཔའ་ལ་སོགས་པ་མ་ཐོབ་པའི་བག་ཆགས་དང་བཅས་པ་དང་བྲལ་བའི་སེམས་ཅན་རྣམས་ནི་སྣོད་མ་ཡིན་པ་སྟེ་སྣོད་མ་ཡིན་པའི་སེམས་ཅན་དེ་རྣམས་ལའོ། །སྲོག་གཅོད་པ་དང་མ་བྱིན་པར་ལེན་པ་ལ་སོགས་པའི་མི་དགེ་བའི་ལས་ཀྱི་ལམ་བཅུ་ལ་རབ་ཏུ་ཞུགས་པ་ནི་སྡིག་པ་ཐམས་ཅད་བྱེད་པའོ། །སྡིག་པ་ཐམས་ཅད་བྱེད་པ་དེ་རྣམས་ཉེ་བར་སྤྱོད་པའི་མུན་པས་བསྒྲིབས་པས་མུན་པ་ལ་གནས་པའི་མེ་ལོང་གི་དཀྱིལ་འཁོར་བཞིན་དུ་རང་གི་གཟུགས་བརྙན་མཐོང་བ་ལ་སོགས་པས་དཔལ་རྡོ་རྗེ་སེམས་དཔའ་བ་ལ་སོགས་པའི་སེམས་དཔའ་ཆེན་པོ་རྣམས་ཕྱག་རྒྱ་ཆེན་པོ་ལ་སོགས་པའི་རང་བཞིན་གྱི་དོན་མཛད་པ་མ་ཡིན་པའི་ཕྱིར་རོ། །ལྷག་པར་མོས་པའི་མིག་དང་བྲལ་བས་ན་མི་མཐོང་བ་ནི་ལོང་བའོ། །མི་མཐོང་བའི་ལོང་བ་དེ་རྣམས་དང་བར་བྱེད་བས་ན་བསོད་ནམས་ཏེ་དཔལ་རྡོ་རྗེ་སེམས་དཔའ་ལ་སོགས་
བའི་སྒོམ་པ་དང་བྱམས་པ་ལ་སོགས་པའི་སྒོམ་པའོ། །ཡང་དང་ཡང་དུ་རྣམ་པར་སྦྱོང་ཞིང་ངེས་པར་ལེགས་པར་སྦྱོང་བར་བྱེད་པས་ན་བསོད་ནམས་སོ་ཞེས་བྱ་བའི་དོན་ཏོ། །བསོད་ནམས་མ་ཡིན་པ་ནི་བསོད་ནམས་མིན་པ་སྟེ། མི་དགེ་བའི་ལས་ཀྱི་ལམ་བཅུའོ། །དེ་རྣམས་ཉིད་བར་མཚམས་མེད་པར་བཞུགས་པས་ན་ཚོགས་ཏེ་གྲོང་ཁྱེར་གྱི་ཆུའི་ཚོགས་བཞིན་ནོ། །དེ་གང་ལ་ཡོད་པ་དེ་ནི་བསོད་ནམས་མ་ཡིན་པའི་ཚོགས་དང་ལྡན་པའོ། །བསོད་ནམས་མ་ཡིན་པའི་ཆོགས་དང་ལྡན་པ་དེ་རྣམས་ལ་རྟག་ཏུ་དུས་ཐམས་ཅད་དུ། རྡོ་རྗེ་སེམས་སོགས་སེམས་དཔའ་མཆོག །མཐོང་བ་ཐབས་ཀྱི་རྒྱུར་གྱུར་པ། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པ་ཡང་དེ་རྣམས་ཡིན་ལ་སེམས་དཔའ་མཆོག་ཀྱང་དེ་ཉིད་ཡིན་པས་ན་རྡོ་རྗེ་སེམས་དཔའ་ལ་སོགས་པའི་སེམས་དཔའི་མཆོག་སྟེར་རིགས་ལྔའི་ལྷ་རྣམས་ཀྱི་སྐུ་གསུང་ཐུགས་ཀྱི་རང་བཞིན་ཅན་ནོ། །དེ་རྣམས་མཐོང་བ་ནི་གདུལ་བྱ་རྣམས་ཀྱིས་དམིགས་པའོ། །དེའི་ཐབས་ཀྱི་རྒྱུ་ཡིན་པས་མཐོང་བའི་ཐབས་ཀྱི་རྒྱུའོ། །རྡོ་རྗེ་སེམས་དཔའ་ལ་སོགས་པའི་སེམས་དཔའ་མཆོག་རྣམས་མཐོང་བའི་ཐབས་ཀྱི་རྒྱུའོ། །རྡོ་རྗེ་སེམས་སོགས་སེམས་དཔའ་མཆོག ། མཐོང་བའི་ཐབས་ཀྱི་རྒྱུར་གྱུར་པའོ། །རྡོ་རྗེ་སེམས་དཔའ་ལ་སོགས་པའི་སེམས་དཔའ་མཆོག་ནི་ཇི་ལྟ་བ་བཞིན་དུ་བཤད་པ་སྟེ། དེ་རྣམས་ཀྱི་སྐུ་དང་གསུང་དང་ཐུགས་ཀྱི་རྡོ་རྗེ་ནི་རྡོ་རྗེ་སྟེ་དེ་ཉིད་སྐུ་གསུང་ཐུགས་ཀྱི་རྡོ་རྗེའོ། །སྐུ་གསུང་ཐུགས་ཀྱི་རྡོ་རྗེ་དེ་ཉིད་ཀྱིས་བཅིང་བ་ནི་ཕྱག་རྒྱ་བཅིང་བའོ།། དམ་ཚིག་ཀྱང་དེ་ཡིན་ལ་མཆོག་ཀྱང་དེ་ཉིད་ཡིན་པས་ན་དམ་ཚིག་མཆོག་སྟེ་ཕྱག་རྒྱ་ཆེན་པོ་ལ་སོགས་པའི་དམ་ཚིག་གི་ཕྱག་རྒྱའོ། །ཅིའི་ཕྱིར་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་འཆིང་བ་དམ་ཚིག་མཆོག་རྣམས་ཀྱི་དམ་ཚིག་ཡིན་ཞེ་ན། འདའ་བར་དཀའ་བའོ་ཞེས་བྱ་བ་ལ་གང་གི་ཕྱིར་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་བཅིང་བ་འདི་ནི་དམ་ཚིག་ཡིན་ནོ། །འདི་ལྟར་འཆད་པར་འགྱུར་ཏེ་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་ལ་ལྷག་པར་མོས་བས་རྡོ་རྗེ་སེམས་དཔའ་ལ་སོགས་པའི་སྐུ་ལ་སོགས་པའི་ཕྱག་
རྒྱ་རྣམས་བཅིང་བ་གང་ཡིན་པ་དེ་ཉིད་རྡོ་རྗེ་སེམས་དཔའ་ལ་སོགས་པའི་སེམས་དཔའ་མཆོག་མཐོང་བའི་ཐབས་ཀྱི་རྒྱུ་ཡིན་ནོ། །གསང་བའི་དབྱེ་བས་རྒྱུ་རྣམས་ཞེས་གསུངས་སོ། །གང་གི་ཕྱིར་དེ་རྣམས་ཕྱག་རྒྱ་ཞེས་བྱ་བ་བརྗོད་པ་ཡིན་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་ལ་ཇི་ལྟ་བ་བཞིན་དུ་བཤད་པའི་རྡོ་རྗེ་སེམས་དཔའ་ལ་སོགས་པ་རྣམས་ཀྱི་སྐུ་ཞེས་བྱ་བའི་སྐུ་གསུང་ཐུགས་ཀྱི་རྡོ་རྗེ་སྟེ་དེ་རྣམས་རྡོ་རྗེ་བཞིན་དུ་མི་ཕྱེད་པས་ཤིན་ཏུ་བརྟན་པ་སྟེ། རྒྱུ་དེའི་ཕྱིར་སྐུ་གསུང་ཐུགས་ཀྱི་རྡོ་རྗེ་དེའི་རང་བཞིན་ཅན་གྱི་ཕྱག་རྒྱ་ཞེས་བྱ་བ་ཀུན་དུ་བཤད་པ་ནི་བསྟན་པ་སྟེ། ལུས་ཅན་རྣམས་ཀྱིས་ཕྱག་རྒྱ་ཆེན་པོ་ལ་སོགས་པ་ཐམས་ཅད་གྲུབ་པའི་ཕྱིར་དེ་ལྟར་གྱུར་པའི་ཕྱག་རྒྱ་དེ་རྣམས་སྤྲུལ་པ་ནི་སྤྲོ་བར་མཛད་པ་ཡིན་ནོ། །སླར་ཡང་ཕྱག་རྒྱ་དེ་རྣམས་ཀྱི་ཁྱད་པར་བསྟན་པར་བྱ་བའི་ཕྱིར། གང་ཞིག་ཅེས་བྱ་བ་ལ་སོགས་པ་གསུངས་ཏེ། ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་རྡོ་རྗེ་སེམས་དཔའ་ལ་སོགས་པའི་སྐུ་གསུང་ཐུགས་ཀྱི་རྡོ་རྗེ་ལ་ལྷག་པར་མོས་པས་བཟུང་བ་ཙམ་གྱི་སྒྲུབ་པ་པོ་རྣམས་ཀྱིས་བཅིངས་ནས་མངོན་དུ་བྱས་ན་རྡོ་རྗེ་སེམས་དཔའ་ལ་སོགས་བ་ནི་མཆོག་སྟེ་ཕུལ་དུ་བྱུང་བ་རྣམས་བསྡུས་པར་འགྱུར་རོ། །མཆོག་ནི་དམ་པའོ། །མཐོང་ཞིང་མངོན་པར་མཐོང་བ་ཉིད། །ཅེས་བྱ་བ་ནི་སྐུ་གསུང་ཐུགས་ཀྱི་རྡོ་རྗེའི་ཕྱག་རྒྱ་རྣམས་གཟུགས་བརྙན་གྱི་ཚུལ་དུ་བཅིངས་བ་ཙམ་ཉིད་ཀྱིས་དེ་དག་བསྡུས་པར་འགྱུར་རོ། །ནིའི་སྒྲ་ནི་གང་གི་ཕྱིར་གྱི་དོན་ཏེ་གང་གི་ཕྱིར་ཕྱག་རྒྱ་བཅིངས་བ་ཙམ་གྱིས་དེ་དག་བསྡུས་པར་འགྱུར་བ་དེའི་ཕྱིར་རྡོ་རྗེ་སེམས་དཔའ་ལ་སོགས་པའི་སེམས་དཔའ་རྣམས་སྒྲུབ་པ་པོ་ལ་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན། ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཉམས་པས་འཇིགས་པ་ནི་དམ་ཚིག་ཉམས་པས་འཇིགས་པའོ། །དེ་དག་ཅིའི་ཕྱིར་དམ་ཚིག་ཉམས་པས་འཇིགས་ཤེ་ན། ཇི་ལྟར་འཁོར་ལོས་སྒྱུར་བ་རྣམས་ཀྱི་གདུ་བུའི་ཕྱག་རྒྱས་རྒྱས་བཏབ་པའི་རྟགས་ཀྱི་ཕྱག་རྒྱ་དེའི་ཡུལ་ན་གནས་པ་རྣམས་ཀྱིས་འདའ་བར་དཀའ་བས་ཏེ། འདའ་བར་མི་ནུས་པ་དེ་བཞིན་དུ། སྐུ་གསུང་ཐུགས་
ཀྱི་རྡོ་རྗེ་སྟོན་པར་བྱེད་པའི་ཕྱག་རྒྱ་དེའི་སྒོམ་པས་རྣལ་འབྱོར་པ་རྣམས་ཀྱིས་བཅིངས་པ་དེ་བཞིན་གཤེགས་པ་རྣམས་ཀྱིས་ཀྱང་འདའ་བར་མི་སྤྱོད་དོ། །གལ་ཏེ་སྐུ་གསུང་ཐུགས་ཀྱི་རྡོ་རྗེའི་སྒོམ་པས་ཕྱག་རྒྱ་ཆེན་པོ་ལ་སོགས་པ་བཅིང་བ་རྒྱལ་བ་ཐམས་ཅད་ཀྱིས་ཀྱང་འདའ་བར་མི་སྤྱོད་པ་དེ་ལྟར་ཡིན་པས་ན་སྒོམ་པ་ཁོ་ན་གཙོ་བོར་གྱུར་པ་ཡིན་གྱི་ཕྱག་རྒྱའི་བཅིང་བ་ཅི་ཞེས་བྱ་བའི་རྣམ་པར་རྟོག་པ་འདི་ཡིན་པས་སངས་རྒྱས་ཉིད་ཅེས་བྱ་བ་ལ་སོགས་པ་གསུངས་སོ། །གང་ལ་ཇི་ལྟ་བུའི་དངོས་གྲུབ་གྲུབ་པར་འགྱུར་ཞེས་བྱ་བའི་རྣམ་པར་རྟོག་པ་འདི་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། འདོད་ཆགས་ལ་སྤྱོད་པའི་སེམས་ཅན་གང་ཡིན་པ་དེ་ནི་དཔལ་རྡོ་རྗེ་སེམས་དཔའི་སྒེག་པའི་སྤྱོད་པ་གང་ཡིན་པས་འདུལ་བ་དེ་ལྟར་གང་ཞིག་ཇི་སྲིད་སེར་སྣས་ཟིལ་གྱིས་མནན་པ་དེ་ནི་འཕགས་པ་ནམ་མཁའི་སྙིང་པོས་འདུལ་བ་འདིས་འདུལ་བར་མཛད་པའི་ཕྱིར་རོ། །དེ་གང་ལ་ཡོད་པ་དེ་ནི་ཇི་ལྟར་འཇིག་རྟེན་འདུལ་བ་དང་ལྡན་པའོ། །འཇིག་རྟེན་ནི་སེམས་ཅན་གྱི་ཁམས་སོ། །དེ་ལྟར་དངོས་གྲུབ་གསུངས་པ་ཡིན། །ཞེས་བྱ་བ་བཅོམ་ལྡན་འདས་ཀྱིས་གསུངས་པ་ཡིན་ནོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ནི་དངོས་གྲུབ་དེའི་ཐབས་དེ་ཐོབ་པའི་རྒྱུའོ། །དེ་ཡང་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་སྒྲུབ་པར་བྱེད་པས་ན་དངོས་གྲུབ་ཐམས་ཅད་བྱེད་པའོ། །མཆོག་ཏུ་ཕུལ་དུ་བྱུང་བའོ། །ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་གང་ཞིག་བཅིངས་པ་ཙམ་གྱིས་བསྡུས་པ་སྟེ། བདེ་བ་ཆེན་པོ་ནི་གཉིས་སུ་མེད་པའི་རང་བཞིན་ཅན་གྱི་རྡོ་རྗེ་སེམས་དཔའ་ལ་སོགས་པའི་སངས་རྒྱས་དང་བྱང་ཆུབ་སེམས་དཔའ་བྱོན་ཏེ་རང་གི་སྐུ་གསུང་ཐུགས་ཀྱི་རྡོ་རྗེར་བྱིན་གྱིས་བརླབས་པ་བརྟག་པ་མཛད་པ་ཡིན་ནོ། །སྐད་ཅིག་མས་ཞེས་བྱ་བ་སྐད་ཅིག་མ་ཉིད་དུ་སྟེ་ཡུན་རིང་པོས་ནི་མ་ཡིན་ནོ། །དེ་ཉིད་ཀྱི་ཕྱིར་དེ་དག་མཆོག་གི་ཐབས་ཡིན་ནོ། །དེ་ནས་འདི་གསུངས་ནས་བཅོམ་ལྡན་འདས་ཀྱིས་མཆོག་གི་རྒྱུད་ཕྱི་མ་བྱིན་གྱིས་བརླབ་པ་མཛད་པ་ཡིན་ནོ་ཞེས་བྱ་བ་དང་སྦྱར་རོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེས་བྱ་བ་དེའི་ཁྱད་པར་བསྟན་པར་བྱ་བའི་ཕྱིར་མཆོག་ཏུ་ཞེས་བྱ་
བ་ལ་སོགས་ཏེ་མཆོག་ནི་བཤད་ཟིན་ཏོ། །འདོད་ཆགས་ལ་སོགས་པའི་ཉོན་མོངས་པ་དང་ཉེ་བའི་ཉོན་མོངས་པ་འགོག་པ་ལ་རབ་ཏུ་ཞུགས་པས་ན་མཁས་པའོ། །ཉན་ཐོས་དང་རང་སངས་རྒྱས་ཐམས་ཅད་དང་འཇིག་རྟེན་པའི་ལམ་རྣམས་ཀྱི་སྤྱོད་ཡུལ་མ་ཡིན་པས་ན་ཕྲ་བའོ། །ནམ་མཁའི་ཁམས་ཐམས་ཅད་དུ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེ་ནི་རྒྱ་ཆེ་བའོ། །ངེས་པར་འབྱིན་པའི་ཡེ་ཤེས་ཀྱི་རང་བཞིན་ཉིད་ཀྱིས་བསམ་པར་མི་ནུས་པས་ན་བསམ་གྱིས་མི་ཁྱབ་པའོ། །མཆོག་ཀྱང་དེ་ཡིན་ལ་མཁས་ཤིང་ཕྲ་བ་ཡང་དེ་ཉིད་ཡིན་ཞིང་རྒྱ་ཆེ་བ་དང་ཟབ་པ་དང༌། བསམ་གྱིས་མི་ཁྱབ་པ་དེ་ཡིན་པས་ན་མཆོག་ཏུ་མཁས་ཤིང་ཕྲ་ལ་རྒྱ་ཆེ་ཞིང་ཟབ་ལ་བསམ་གྱིས་མི་ཁྱབ་པའོ། །བག་ཆགས་དང་བཅས་པའི་ཉོ་མོངས་པ་དང་བྲལ་བས་ན་མཆོག་ཏུ་རྣམ་པར་དག་པའོ། །ཐོག་མ་དང་ཐ་མ་མེད་པ་ནི་བཤད་ཟིན་ཏོ། །ཐོག་མ་དང་ཐམ་མེད་པ་ཉིད་ཀྱི་ཕྱིར་མི་ཟད་པའོ། །དེ་ཉིད་མི་འཇིག་པའོ། །འདོད་པའི་དངོས་གྲུབ་ངེས་པར་སྟེར་བས་ན་གདོན་མི་ཟ་བའོ། །དེ་ཉིད་ཀྱི་ཕྱིར་ཐོགས་པ་མེད་པའོ། །དེ་ནི་དེ་ལྟར་གྱུར་པ་གཅིག་པུར་མ་ཟད་ཀྱི་ཤིན་ཏུ་ཕུལ་དུ་བྱུང་བས་མཆོག་གི་ཆོས་ཀྱི་དབྱིངས་ལ་ཆགས་པ་ཉིད་དོ། །མ་ལུས་པ་ནི་རིགས་ལྔའི་ལྷ་རྣམས་ཀྱི་བདེ་བ་ཆེན་པོ་དང་ཡིད་བདེ་བ་ཐམས་ཅད་ཀྱི་མཆོག་ཏུ་རྟག་པ་དང་ཐོག་མ་དང་ཐ་མ་མེད་པའོ། །ཅི་མཛད་ནས་བཅོམ་ལྡན་འདས་ཀྱིས་བྱིན་གྱིས་བརླབ་པ་མཛད་པ་ཡིན་ཞེ་ན་མ་ལུས་ཤིང་ལུས་པ་མེད་པ་ལ་སོགས་པ་ལ། རྡོ་རྗེ་དབབ་པ་རྣམས་ཀྱིས་རབ་ཏུ་སད་པར་མཛད་ཅིང་ཞེས་བྱ་བ་དང་སྦྱར་རོ། །མ་ལུས་ཤིང་ལུས་པ་མེད་པའི་སྒྲ་ནི་བཤད་ཟིན་ཏོ། །མ་ལུས་ཤིང་ལུས་པ་མེད་པ་ཡང་དེ་ཡིན་ལ་སེམས་ཅན་གྱི་ཁམས་ཐམས་ཅད་ཀྱང་དེ་ཉིད་ཡིན་པས་ན་མ་ལུས་ཤིང་ལུས་པ་མེད་པའི་སེམས་ཅན་གྱི་ཁམས་ཐམས་ཅད་དོ། །དེའི་མཆོག་ཏུ་ཕུལ་དུ་བྱུང་བ་ནི་ཐམས་ཅད་ཀྱི་དམ་པ་དཔལ་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཆེན་པོ་རྫོགས་པ་སྟེ། དེའི་དབང་ཕྱུག་ཆེན་པོ་ཉིད་ནི་མ་ལུས་ཤིང་ལུས་པ་མེད་པའི་ཁམས་གསུམ་པའི་ཆོས་ཀྱི་རྒྱལ་སྲིད་དེ། དེ་རྫོགས་པའི་ཕྱིར་མཆོག་ཏུ་མི་འགྱུར་བ་
ནི་ཐོག་མ་དང་ཐ་མ་མེད་པའི་རིགས་ཀྱི་ལྷ་ཐམས་ཅད་ཀྱི་བདེ་བ་དང་ཡིད་བདེ་བ་ཐམས་ཅད་ཀྱི་རང་བཞིན་ཅན་གྱི་བྱང་ཆུབ་ཆེན་པོའི་སེམས་དང་སྦྱིན་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་གྱི་མཆོག་གི་དངོས་གྲུབ་ཐམས་ཅད་ཀྱི་ཡང་མཆོག་ནི་དམ་པའོ། །རྡོ་རྗེ་འབེབས་པ་ནི་རིགས་ཀྱི་ལྷ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་རྣམས་སྒྲུབ་པ་པོའི་རྒྱུད་ལ་ཞུགས་པ་གང་ཡིན་པ་དེ་དག་གིས་དེ་བཞིན་གཤེགས་པ་ཐམས་ཅད་ལ་སོགས་པའི་སེམས་ཅན་གྱི་ཁམས་རབ་ཏུ་སད་པར་མཛད་ཅིང་མཆོག་གི་རྒྱུད་ཕྱི་མ་བྱིན་གྱིས་བརླབ་པ་ཡིན་ནོ། །དེ་མིང་ཇི་ལྟ་བུ་དང་ལྡན་པ་ཡིན་ཞེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་ལ་བདེ་བ་ཡང་ཡིན་ལ་ཆེན་པོ་ཡང་དེ་ཉིད་ཡིན་པས་བདེ་བ་ཆེན་པོ་སྟེ་རིགས་ཀྱི་ལྷ་ཐམས་ཅད་ཀྱི་གཉིས་སུ་མེད་པའི་ཡེ་ཤེས་སོ། །དེ་ལས་བྱུང་བའི་རིགས་ཐམས་ཅད་ཀྱི་ཕྱག་མཚན་ནི་རྡོ་རྗེའོ། །གདུལ་བྱ་རྣམས་ཀྱིས་མངོན་པར་འདོད་པའི་དངོས་གྲུབ་ངེས་པར་རྫོགས་པར་མཛད་ནས་དེའི་ཕྱིར་དོན་ཡོད་པ་ཡིན་ནོ། །སྐྱེ་བོ་ཐམས་ཅད་ཀྱི་ཐུན་མོང་མ་ཡིན་པའི་ཕྱིར་དེ་མཆོག་ཏུ་གསང་བ་ཡིན་ནོ། །བདེ་བ་ཆེན་པོའི་རྡོ་རྗེ་གསང་བ་ཡང་དེ་ཉིད་ཡིན་ལ་མཆོག་ཏུ་གསང་བ་ཡང་དེ་ཉིད་ཡིན་པས་ན་བདེ་བ་ཆེན་པོའང་རྡོ་རྗེ་གསང་བའི་དོན་ཡོད་པ་མཆོག་ཏུ་གསང་བས་དེའི་མིང་དང་ལྡན་པའོ། །མཆོག་ཏུ་ཡང་ཡིན་ལ་མཚོན་ཆ་ཡང་དེ་ཉིད་ཡིན་པས་ན་མཆོག་གི་མཚོན་ཆ་སྟེ་ཤེས་རབ་དང་ཐབས་ཀྱི་རང་བཞིན་ཅན་གྱི་མཚོན་ཆའོ། །མཆོག་ཏུ་གསང་བ་ནི་འདས་མ་ཐག་ཏུ་བཤད་པ་སྟེ་དེའི་ཆོ་ག་ནི་སྒྲུབ་པའོ། །མཆོག་ཀྱང་ཡིན་ལ་རྒྱུད་ཕྱི་མ་ཡང་དེ་ཉིད་ཡིན་པས་མཆོག་གི་རྒྱུད་ཕྱི་མ་སྟེ། བདག་ལ་བྱིན་གྱིས་བརླབ་པ་ལ་སོགས་པའི་རྒྱུན་གྱི་རང་བཞིན་ཅན་གང་ཡིན་པ་དེ་བྱིན་གྱིས་བརླབ་པར་མཛད་པ་ནི་ཕྱི་མའི་མུའི་མཐར་ཐུག་པར་བརྟན་པར་མཛད་པ་ཡིན་ནོ་ཞེས་བྱ་བའི་དོན་ཏོ། །དེ་ནས་ཞེས་བྱ་བ་ལ་སོགས་པ་ལ་དེ་ནས་ཀྱི་སྒྲ་ནི་སྐབས་སུ་བབ་པའོ། །དེ་བཞིན་གཤེགས་པ་ཐམས་ཅད་ནི་གཉིས་སུ་མེད་པའི་སེམས་དང་སེམས་ལས་བྱུང་བ་རྣམས་སོ། །དེ་དག་གི་དམ་ཚིག་ཐམས་
ཅད་ནི་རིགས་ཐམས་ཅད་ཀྱི་རང་བཞིན་ཅན་གྱི་སྐུ་གསུང་ཐུགས་ཀྱི་རྡོ་རྗེའི་ཕྱག་རྒྱའོ། །དེ་རྣམས་ཀྱི་བདག་ཉིད་ཀྱི་བྱིན་གྱིས་བརླབ་པ་ནི་སྒྲུབ་པའི་རྒྱུད་ལ་རང་གི་རིགས་ཀྱི་ལྷའི་སྐུ་གསུང་ཐུགས་ཀྱི་རྡོ་རྗེ་རྫོགས་པར་མཛད་པ་སྟེ་དེ་ལ་སྒྲུབ་པ་གཅིག་པུ་ནི་རྫོགས་པའི་རྒྱུའོ། །དེའི་ཆོ་ག་ནི་རྗེས་སུ་སྤྱད་པར་བྱ་བའི་དངོས་པོ་རབ་ཏུ་བསྟན་པའོ། །མཆོག་ཏུ་གསང་བ་ནི་སྐྱེ་བོ་ཐམས་ཅད་ལ་རབ་ཏུ་མ་གྲགས་པའོ། །བཤད་པར་བྱ་བ་ནི་འོག་ནས་རྒྱས་པར་བཤད་པར་བྱ་སྟེ་བཅོམ་ལྡན་འདས་རྡོ་རྗེ་སེམས་དཔས་དེ་སྐད་གསུངས་སོ། །ཉིན་རེ་ཞེས་བྱ་བ་ནི་ཞག་རེ་རེ་ལའོ། །སྔོན་དུ་ནི་ཐམས་ཅད་དགུག་པ་ལ་སོགས་པའི་ཐོག་མར་རོ། །ལན་ཅིག་ཏུ་ནི་ལན་ཅིག་ཁོ་ནར་རོ། །ཕྱག་རྒྱ་ཆེན་པོ་ནི་རང་གི་ལྷའི་སྐུའི་གསང་བའི་རང་བཞིན་ཅན་ནོ། །སྙིང་པོ་བཟླས་ཞེས་བྱ་བ་ནི་རང་གི་ལྷའི་སྙིང་པོས་མངོན་པར་བསྔགས་པར་བྱའོ། །ཕྱག་རྒྱ་ཀུན་གྱིས་རབ་གྲུབ་པ། །ཞེས་བྱ་བ་ལ་རིགས་ཐམས་ཅད་ཀྱི་དམ་ཚིག་དང༌། ཆོས་དང་ལས་དང་ཕྱག་རྒྱ་ཆེན་པོ་རྣམས་ནི་ཕྱག་རྒྱ་ཐམས་ཅད་དེ། དེ་དག་རབ་ཏུ་གྲུབ་པ་ནི་ཤིན་ཏུ་རབ་ཏུ་གྲུབ་པའོ། །དེ་གང་ཡིན་ཞེ་ན། ཇི་ལྟ་བ་བཞིན་དུ་བཤད་པའི་བདག་ལ་བྱིན་གྱིས་བརླབ་པའི་སྒྲུབ་པ་གཅིག་པུའོ། །དེ་ལྟར་རྣལ་འབྱོར་ཙམ་བྱས་ལ་དམ་ཚིག་སེམས་དཔའི་བྱིན་རླབས་སྔོན་དུ་འགྲོ་བའི་ཕྱག་རྒྱ་ཆེན་པོ་འཆིང་བའི་མཚན་ཉིད་ཅན་གྱི་བདག་ལ་བྱིན་གྱིས་བརླབ་པ་གཅིག་པུ་བསྟན་ནས། ད་ནི་རྗེས་སུ་རྣལ་འབྱོར་སྟོན་པར་བྱེད་པའི་ཐམས་ཅད་དགུག་པ་ལ་སོགས་པའི་རང་བཞིན་ཅན་གྱི་དམ་ཚིག་གསུམ་བླང་བའི་མཐར་ཐུག་པའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པ་གཉིས་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྔ་མ་བཞིན་ནོ། །མཆོག་ཀྱང་ཡིན་ལ་གསང་བ་ཡང་ཡིན་པས་མཆོག་ཏུ་གསང་བ་སྟེ་ཐམས་ཅད་ཀྱང་དགུག་པ་ལ་སོགས་པའི་རང་བཞིན་ཅན་གྱིས་བདག་ལ་བྱིན་གྱིས་བརླབ་པའི་ཆོ་ག་སྟེ། སྔར་བཤད་པའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པ་ལས་ཀྱང་འདི་མཆོག་ཏུ་གྲུབ་པས་ན་ཤིན་ཏུ་མཆོག་ཏུ་གྲུབ་པའོ། །ལན་ཅིག་ནི་ལན་ཅིག་ཏུ་ཕྱིའི་དཀྱིལ་འཁོར་
གྱི་ཁང་པ་དང་སྔགས་དང་ཕྱག་རྒྱ་དག་གིས་ཡོངས་སུ་བརྟགས་པའི་རང་གི་ལྷའི་དཀྱིལ་འཁོར་གང་ཡིན་པ་དེ་ནི་དམ་ཚིག་གསུམ་གྱི་ཤིན་ཏུ་གསང་བའི་མཆོག་གི་ཁང་པ་སྟེ། མདུན་དུ་གནས་པ་དེ་ལྟར་རྡོ་རྗེ་སོགས་ཐོབ་བཟུང་བ་ཡིས། །རྡོ་རྗེ་ཅན་རང་གི་ལྷའི་རང་བཞིན་གྱིས་ཡང་དག་པར་བྱིན་གྱིས་བརླབ་པར་འགྱུར་ཏེ་རང་གིས་སྐུ་གསུང་ཐུགས་ཀྱི་རྡོ་རྗེའི་རང་བཞིན་ཅན་དུ་མཛད་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་རྗེས་སུ་རྣལ་འབྱོར་སྟོན་པར་བྱེད་པའི་ཐམས་ཅད་དགུག་པ་ལ་སོགས་པའི་རང་བཞིན་ཅན་གྱི་ཡེ་ཤེས་སེམས་དཔའ་གཅིག་པུ་སྒྲུབ་པར་བྱེད་པའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པ་གསུམ་པ་བསྟན་ནས། །ད་ནི་རང་གི་རིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་རང་གི་ལྷག་པའི་ལྷའི་རྣལ་འབྱོར་སྔོན་དུ་འགྲོ་བའི་ཐམས་ཅད་ཀྱིས་ཇི་ལྟ་བ་བཞིན་དུ་བཤད་པའི་རྣལ་འབྱོར་ཆེན་པོའི་མཚན་ཉིད་ཅན་གྱིས་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པ་གསུམ་པ་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བ་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྔ་མ་ཡིན་ནོ། །མཆོག་ཀྱང་ཡིན་ལ་གསང་བ་ཡང་དེ་ཉིད་ཡིན་པས་ན་མཆོག་ཏུ་གསང་བ་སྟེ་འདས་མ་ཐག་ཏུ་བཤད་པའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པའི་ཁྱད་པར་རོ། །དེ་ལས་ཀྱང་འདི་དམ་པ་ཡིན་པས་ན་ཤིན་ཏུ་མཆོག་ཏུ་གསང་བའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པའི་ཆོ་ག་རྒྱས་པའི་ཁྱད་པར་རོ། །དེ་ཅིའི་ཕྱིར་ཞེ་ན། མཆོག་ཏུ་ཤིན་ཏུ་གྲུབ་པ་ཞེས་བྱ་བ་ལ་བདག་ལ་བྱིན་གྱིས་བརླབ་པའི་ཁྱད་པར་སྔ་མ་ནི་མཆོག་ཏུ་གྲུབ་པ་སྟེ། དེ་ལས་ཀྱང་འདི་མཆོག་ཏུ་གྲུབ་པས་ན་མཆོག་ཏུ་ཤིན་ཏུ་གྲུབ་པའི་བདག་ལ་བྱིན་གྱིས་བརླབ་པ་གཅིག་པུའི་སྒྲུབ་པའི་ཁྱད་པར་ཞེས་བྱ་བའོ། །རྡོ་རྗེ་དྲིལ་བུ་ཞེས་བྱ་བ་ལ་སོགས་པ་ནི་འགྱུར་ཞེས་བྱ་བ་དང་སྦྱར་རོ། །ཀུན་གྱི་བདག་ཉིད་ནི་ཀུན་བདག་སྟེ་ཐོག་མ་དང་ཐ་མ་མེད་པའི་ཆས་ཀྱི་དབྱིངས་ཀྱི་རང་བཞིན་ཅན་གྱི་སེམས་དང་སེམས་ལས་བྱུང་བའི་རང་བཞིན་ཅན་གྱི་ཚོགས་སོ། །དེ་ལས་བྱུང་བའི་རང་གི་རིགས་ཀྱི་དཀྱིལ་འཁོར་གྱི་ལྷ་རྣམས་ཀྱི་སྐུ་གསུང་ཐུགས་ཀྱི་རྡོ་རྗེའི་ཕྱག་རྒྱ་ནི་ཀུན་བདག་
སྣ་ཚོགས་ཕྱག་རྒྱ་རྣམས་སོ། །རྡོ་རྗེ་དང་དྲིལ་བུ་དང་བཅས་པའི་ཀུན་བདག་སྣ་ཚོགས་ཕྱག་རྒྱ་ནི་ཡེ་ཤེས་སེམས་དཔའི་རང་བཞིན་གྱི་བདག་ཉིད་ཀྱི་སྐུ་སྟེ་བདག་ལ་བྱིན་གྱིས་བརླབ་པ་གཅིག་པུ་སྒྲུབ་པ་དང་པོས་རྫོགས་པའི་སྐུ་རྣལ་འབྱོར་པ་གང་ལ་ཡོད་པ་དེ་ནི་རྡོ་རྗེ་དྲིལ་བུ་དང་བཅས་ཀུན་བདག་སྣ་ཚོགས་ཕྱག་རྒྱའི་སྐུར་ལྡན་པའི་རྣལ་འབྱོར་རོ། །ཅིའི་ཕྱིར་འདི་ལྟར་འགྱུར་ཞེ་ན་ཀུན་བདག་ཅེས་པ་ལ་སོགས་པ་ལ་ཀུན་བདག་ནི་བཤད་ཟིན་ཏོ། །དེའི་ཕྱག་རྒྱ་ནི་དེ་ལས་བྱུང་བའི་རང་གི་ལྷ་རྣམས་ཀྱི་ཕྱག་རྒྱ་ཆེན་པོ་ལ་སོགས་པ་ཡེ་ཤེས་སེམས་དཔའི་རང་བཞིན་ཅན་གྱི་ཕྱག་རྒྱ་རྣམས་སོ། །དེ་དག་སྦྱོར་བ་ནི་ཡང་དག་པར་འདུས་པ་སྟེ་ཆུ་དང་འོ་མ་བཞིན་དུ་རྣལ་འབྱོར་པ་དང་གཅིག་ཏུ་གྱུར་པའོ། །དེ་ཉིད་ཀྱི་བདག་ཉིད་ནི་རང་བཞིན་གང་ལ་ཡོད་པ་དེ་ནི་ཀུན་བདག་ཕྱག་རྒྱའི་སྦྱོར་བའི་བདག་ཉིད་དང་ལྡན་པའི་རྣལ་འབྱོར་པའོ། །དེའི་འབྲས་བུ་བསྟན་པར་བྱ་བའི་ཕྱིར། རྡོ་རྗེ་སེམས་དཔའ་ཉིད་དུ་འགྱུར། །ཞེས་གསུངས་པ་ཡིན་ནོ། །འདི་ལྟར་བཤད་པར་འགྱུར་ཏེ་གང་གི་ཕྱིར་རྣལ་འབྱོར་པས་རྣལ་འབྱོར་ཆེན་པོ་བྱས་ན་རྡོ་རྗེ་སེམས་དཔའ་ཉིད་དུ་གྱུར་པ་དེ་ནི་རྣལ་འབྱོར་ཆེན་པོ་བྱ་བ་ཡིན་ནོ། །བདག་ལ་བྱིན་གྱིས་བརླབ་པ་གཅིག་པུ་སྒྲུབ་པ་འདིས་རྣལ་འབྱོར་པ་ཇི་ལྟར་རྡོ་རྗེ་སེམས་དཔའ་ཉིད་དུ་འགྱུར་ཞེ་ན། གྲུབ་པའི་ཆོ་ག་འདི་ཡིས་ནི། །ཞེས་བྱ་བ་ལ་སོགས་པ་ལ་འདས་མ་ཐག་ཏུ་བཤད་པའི་ཆོ་ག་འདིས་རྡོ་རྗེ་སེམས་དཔའ་ཡང་དག་པར་བསྡུས་པ་ནི་རང་གི་རིགས་ཀྱི་ལྷའི་རྣལ་འབྱོར་ཆེན་པོ་ཀུན་གྱི་མཆོག་ཀྱང་དེ་ཡིན་ལ་དངོས་གྲུབ་ཆེན་པོ་ཡང་དེ་ཉིད་ཡིན་པས་ན། ཀུན་མཆོག་དངོས་གྲུབ་ཆེན་པོ་སྟེ། རང་གི་ལྷའི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་བོ། །དེས་དབང་ཕྱུག་ཆེན་པོ་ནི་ཁམས་གསུམ་པའི་ཆོས་ཀྱི་རྒྱལ་སྲིད་དེ་དེར་བྱིན་གྱིས་བརླབ་པ་ནི། གང་གི་ཕྱིར་བརྟན་པར་འགྱུར་བ་དེའི་ཕྱིར་བདག་ལ་བྱིན་གྱིས་བརླབ་པ་འདིས་རྡོ་རྗེ་སེམས་དཔའ་ཉིད་དུ་འགྱུར་བ་ཡིན་ནོ། །རབ་ཏུ་ནི་ཤིན་ཏུའོ། །འབྲས་བུ་མེད་པ་མ་ཡིན་པའི་ཕྱིར་དོན་ཡོད་པའོ། །འདས་མ་ཐག་ཏུ་བཤད་པའི་བདག་ལ་བྱིན་གྱིས་བརླབ་པར་མཛད་པ་དེ་ཉིད་ཀྱི་མཐུ་རིགས་
ཐམས་ཅད་ལས་བྱུང་བ་སྟེ། རང་ཉིད་ཀྱི་བདག་ཉིད་བཅིངས་ཏེ་གྲུབ་པར་འགྱུར་བ་ནི་སྒྲུབ་པ་པོ་ལ་རག་ལས་པར་འགྱུར་བའོ། །དེ་གང་ཡིན་ཞེ་ན། མདོར་ན་ཕྱག་རྒྱ་ཐམས་ཅད་ནི། །ཞེས་བྱ་བ་ནི་རིགས་ཐམས་ཅད་ཀྱི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་རྣམས་མདོར་བསྡུས་པས་གྲུབ་པར་འགྱུར་རོ། །བྱིན་གྱིས་བརླབ་པ་འདི་དོན་སྐྱོད་པའི་ཕྱིར། ཕྱག་རྒྱ་ཐམས་ཅད་རང་གིས་རང་བཅིངས་ཏེ་གྲུབ་པར་འགྱུར་བ་ཡིན་ཏེ་གཅིག་པུར་མ་ཟད་ཀྱི་འབད་པ་མེད་པར་ཤིན་ཏུ་མྱུར་བ་ཉིད་དུ་ཕྱག་རྒྱ་ཆེན་པོ་ལ་སོགས་པའི་རང་བཞིན་ཅན་གྱི་དངོས་གྲུབ་རྣམས་ཀྱང་གྲུབ་པར་འགྱུར་རོ། །སྒྲུབ་པ་གང་གིས་ཤེ་ན་ལས་ཀྱི་ཚོགས་ཀྱི་སྒྲུབ་པ་ཡིས། །དངོས་གྲུབ་མྱུར་ཞེས་བྱ་བ་ལ་ཕྱག་རྒྱ་ཐམས་ཅད་ཀྱི་སྒྲུབ་པའི་བྱེད་པར་འགྱུར་བ་དེས་ཇི་ལྟ་བ་བཞིན་དུ་བཤད་པ་ཐམས་ཅད་རྗེས་སུ་ཆགས་པ་ལ་སོགས་པའི་ལས་ཀྱི་དངོས་གྲུབ་རྣམས་དེ་དག་གིས་མྱུར་དུ་གྲུབ་པར་འགྱུར་རོ། །རྒྱུ་གང་གི་ཕྱིར་ཞེ་ན། འདིའི་ཞེས་བྱ་བ་ལ་སོགས་པ་ལ། བདག་ལ་བྱིན་གྱིས་བརླབ་པ་གཅིག་པུ་སྒྲུབ་པ་འདིས་བསྒྲུབ་པར་བྱ་བ་མ་ཡིན་པ་ཅུང་ཟད་ཀྱང་མེད་དོ། །བསྒྲུབ་པར་བྱ་བ་མ་ཡིན་པ་མེད་པ་མ་ཡིན་པ་དེ་དག་གང་ཡིན་ཞེ་ན། དངོས་གྲུབ་ལས་དང་དེ་བཞིན་བདེ། །ཞེས་བྱ་བ་ལ་དེ་ལ་རིགས་ཐམས་ཅད་ཀྱི་དཀྱིལ་འཁོར་ལ་སོགས་པའི་དངོས་གྲུབ་སྟེ་དེ་མངོན་དུ་བྱེད་པའོ། །རིགས་ཐམས་ཅད་ཀྱི་ལས་ཀྱི་ཚོགས་ཀྱི་བྱ་བ་དང་འབྲས་བུ་ཐོབ་པ་ནི་ལས་ཏེ། དངོས་གྲུབ་དང་ལས་དེ་དག་གིས་འཇིག་རྟེན་དང་འཇིག་རྟེན་ལས་འདས་པའི་བདེ་བ་ཉམས་སུ་མྱོང་བ་ནི་བདེ་བ་སྟེ། གསུམ་པོ་འདི་དག་ལ་བསྒྲུབ་པར་བྱ་བ་མ་ཡིན་པ་ཡོད་པ་མ་ཡིན་ནོ། །འདི་དག་ཐམས་ཅད་མི་འགྱུར་བ་ནི་ཐོག་མ་དང་ཐ་མ་མེད་པར་སྒྲུབ་པར་བྱེད་པ་ཡིན་ནོ། །དེ་གང་གི་ཕྱིར་ཞེ་ན། བདག་བྱིན་བརླབ་ཀུན་སྒྲུབ་པ་བོས། །ཞེས་བྱ་བ་ལ་རིགས་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་བྱིན་གྱིས་བརླབ་པ་ནི་ནུས་པ་སྟེ། མངོན་པར་འདོད་པའི་འབྲས་བུ་རྫོགས་པའི་རྒྱུ་དེ་རྣམས་ཡིན་པས་ན་སྒྲུབ་པའོ། །བྱེད་པར་འགྱུར་བ་དེ་དག་ནི་འདས་མ་ཐག་ཏུ་བཤད་པའི་བདག་ལ་བྱིན་གྱིས་
བརླབ་པ་གཅིག་པུའི་སྒྲུབ་པའི་ཁྱད་པར་གྱི་དངོས་གྲུབ་དང་ལས་དང་བདེ་བ་རྟག་པ་རྣམས་སྒྲུབ་པར་བྱེད་པ་ཡིན་ནོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལྟར་མངོན་པར་འདོད་པའི་དངོས་གྲུབ་ཀྱི་ཐབས་སུ་གྱུར་པའི་བདག་ལ་བྱིན་གྱིས་བརླབ་པའི་སྒྲུབ་པ་གཅིག་པུ་བསྟན་ནས། ད་ནི་མངོན་པར་འདོད་པའི་དངོས་གྲུབ་ཀྱི་ཐབས་ཉིད་ཀྱི་རྣལ་འབྱོར་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བའི་རྣལ་འབྱོར་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །མཆོག་ནི་དམ་པའོ། །གསང་བ་ནི་ཐུན་མོང་མ་ཡིན་པའོ། །རྣལ་འབྱོར་ཐམས་ཅད་ཀྱི་ཆོ་ག་ནི་སྒོམ་པ་བསྟན་པ་སྟེ་དེ་བཤད་པར་བྱ་སྟེ་བསྟན་པར་བྱའོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་རེ་ཞིག་དང་པོ་ཁོ་ནར་ཞེས་བྱ་བ་ལ་དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པ་ལའོ། །དང་པོ་ནི་ཐོག་མར་ཏེ་རྣལ་འབྱོར་གྱི་སྒྲ་རེ་ཞིག་བསྒྲུབ་པར་བྱ་སྟེ། ཡོ་ཟེར་ནི་རྣལ་འབྱོར་ལས་ཏེ་སྐད་ཀྱི་བྱིངས་སོ། །འདིས་རྣལ་འབྱོར་གྱི་སྒྲ་སྒྲུབ་པ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །རྣལ་འབྱོར་སྒྲ་དེ་ཡང་རིག་པ་དང་འབྲེལ་པ་ལ་འཇུག་པར་མཐོང་བ་ཡིན་ཏེ་དེ་རྣམ་པར་བཅད་པའི་ཕྱིར་སྐད་ཀྱི་བྱིངས་ཀྱི་དོན་འདི་ཡང་བརྩོན་པའོ་ཞེས་བྱ་བ་གསུངས་ཏེ། རྣམ་པ་འདི་ལྟ་བུའི་སྐད་ཀྱི་དོན་ནི་བརྩོན་པ་ཡིན་ནོ་ཞེས་བྱ་བའི་དོན་ཏོ། །ཡོ་ཟེར་ནི་ཏིང་ངེ་འཛིན་ལའོ་ཞེས་བྱ་བའི་སྐད་ཀྱི་བྱིངས་གཞན་འདིའི་དོན་ནི་ཏིང་ངེ་འཛིན་ནོ། །གང་གིས་བརྩོན་པ་ཞེས་བྱ་བ་ནི་ཡུལ་གང་གིས་བརྩོན་པ་ཞེས་བྱ་བའི་དོན་ཏོ། །འབྲེལ་པ་ཙམ་གསུང་བར་འདོད་པའི་ཕྱིར་རང་གི་ལྷག་པའི་ལྷ་རྗེས་སུ་དྲན་པའི་བརྩོན་པ་ནི་རྣལ་འབྱོར་ཡིན་ནོ། །རང་གི་ལྷག་པའི་ལྷ་རྗེས་སུ་དྲན་པའི་ཡུལ་ཅན་གྱི་སེམས་བསྐྱེད་པ་ནི་རྣལ་འབྱོར་པ་ཡིན་ནོ་ཞེས་བྱ་བའི་དོན་ཏོ། །འདི་བཤད་པར་འགྱུར་ཏེ་ཕྱག་རྒྱ་བཏེག་པའི་མཐར་ཐུག་པའི་ཆོ་ག་རྗེས་སུ་སྤྱད་ནས་དེའི་རྗེས་ལ་ནམ་མཁའ་དང་མཉམ་པའི་ཟླ་བའི་དཀྱིལ་འཁོར་གྱི་རྣམ་པ་སྟེ། དེའི་སྟེང་དུ་ཟླ་བའི་དཀྱིལ་འཁོར་གཉིས་པའོ། །སླར་ཡང་ཟླ་བའི་དཀྱིལ་འཁོར་གཉིས་པ་དེ་ཉིད་རང་གི་ལྷའི་སྙིང་པོ་དང་བཅས་པའི་རྡོ་རྗེ་རྩེ་ལྔ་པ་
གང་ལ་ཡོད་པ་དེ་ལའོ། །གཞན་ལ་ནི་རྡོ་རྗེ་ལས་བྱུང་བའི་རང་གི་དམ་ཚིག་གི་ཕྱག་རྒྱ་སྟེ། དེ་ནས་ཕྱག་རྒྱའི་ང་རྒྱལ་རྣམ་པར་བསྒོམས་ལ་སེམས་དཔའ་བྱིན་གྱིས་བརླབ་པའི་སྦྱོར་བས་བདག་ཉིད་རྡོ་རྗེ་སེམས་དཔར་བསྒོམས་ནས་དམ་ཚིག་སེམས་དཔའ་ཆེན་པོའི་ང་རྒྱལ་རྡོ་རྗེ་སེམས་དཔའི་རྣལ་འབྱོར་པས་བསྒོམ་པར་བྱའོ། །རྡོ་རྗེ་མཚོན་ཆ་མ་ལ་སོགས་པའི་རྣལ་འབྱོར་པས་ནི་རྡོ་རྗེ་སེམས་དཔའ་ལས་བྱུང་བའི་རང་གི་ལྷའི་རང་བཞིན་ཅན་གྱི་བདག་ཉིད་རང་གི་སྙིང་པོ་བརྗོད་ཅིང་བསྒོམ་པར་བྱའོ། །དེ་ནས་མ་ཧཱ་ས་མ་ཡ་སཏྭ་ཧཾ་ཞེས་བྱ་བ་བརྗོད་དོ། །དེ་བཞིན་གཤེགས་པའི་རྣལ་འབྱོར་པས་ཀྱང་དེ་བཞིན་གཤེགས་པའི་རྡོ་རྗེ་ལས་བྱུང་བའི་རང་གི་དེ་བཞིན་གཤེགས་པར་བསམ་པར་བྱའོ། །དེ་ནས་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་པ་ཐམས་ཅད་ཀྱིས་ནི་རང་གི་ལྷའི་དམ་ཚིག་གི་ཕྱག་རྒྱ་བཅིངས་ནས་སམ་ཡོ྅ཧཾ་ཞེས་བྱ་བའི་སྤྱིའི་སྙིང་པོ་བརྗོད་ཅིང༌། རང་གི་ལྷའི་སྐུ་གསུང་ཐུགས་ཀྱི་རྡོ་རྗེའི་རང་བཞིན་ཅན་གྱི་ང་རྒྱལ་བྱའོ། །དེ་ནས་ས་མ་ཡ་སྟྭཾ་ཨད་ཧི་ཏིཥྛ་སྭ་མཾ་ཞེས་བྱ་བས་རང་གི་ལྷའི་དམ་ཚིག་གི་ཕྱག་རྒྱས་སྙིང་ག་དང་མཛོད་སྤུ་དན་མགྲིན་པ་དང་སྤྱི་བོ་རྣམས་སུ་བདག་ཉིད་ལ་བྱིན་གྱིས་བརླབས་ནས་ཕྱག་རྒྱ་ཆེན་པོ་བཅིངས་ཏེ། སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་རང་གི་ལྷའི་རང་བཞིན་ཅན་གྱི་བདག་ཉིད་བསྒོམ་པར་བྱ་སྟེ་འདི་ནི་འདིར་ཡེ་ཤེས་སེམས་དཔའ་གཞུག་པ་དང་བྲལ་བའི་རང་གི་ལྷའི་སྒོམ་པའི་རང་བཞིན་ཅན་གྱི་རྣལ་འབྱོར་རོ། །དེ་ལྟར་འཁོར་བའི་བདག་ཉིད་ཀྱི་གཉེན་པོར་གྱུར་པའི་རྣལ་འབྱོར་བསྟན་ནས་ད་ནི་ཡེ་ཤེས་སེམས་དཔའ་བཅུག་ནས་གཅིག་ཏུ་གྱུར་པ་ལྷག་པར་མོས་པས་གསེར་འགྱུར་རྩི་བླངས་ནས་ཟངས་མ་ལ་སོགས་པའི་ཁམས་དངུལ་ལ་སོགས་པར་བྱེད་པ་བཞིན་དུ་རྫོགས་པར་འགྱུར་བ་ཡིན་ནོ་ཞེས་བྱ་བ་རབ་ཏུ་བརྟན་པར་བྱ་བའི་ཕྱིར་རྗེས་སུ་རྣལ་འབྱོར་གསུངས་པ་དང༌། བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་གྱི་གཟུགས་ཀྱི་རང་གི་ལྷའི་བསྒོམ་པས་ཀྱང་ཤེས་རབ་དང་ཐབས་ཀྱི་ཡེ་ཤེས་ཐམས་ཅད་དུ་ཐོགས་པ་མེད་པར་འགྱུར་རོ་ཞེས་བྱ་བ་རབ་ཏུ་བརྟན་པར་བྱ་བའི་ཕྱིར་ཐམས་ཅད་ཀྱི་རྣལ་འབྱོར་དང་རྣལ་འབྱོར་ཆེན་པོ་གསུངས་པ་དང༌།
ཤིན་ཏུ་ཆགས་པའི་བསྒོམ་པས་ཀྱང་རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་རྣལ་འབྱོར་དང༌། རྣལ་འབྱོར་ཆེན་པོ་ཤིན་ཏུ་རྫོགས་པར་འགྱུར་བ་ཉི་ཡིན་ནོ་ཞེས་བྱ་བའི་ཕྱིར་ཤིན་ཏུ་རྣལ་འབྱོར་ཡང་གསུངས་པ་ཡིན་པ་ནི། སླར་ཡང་གཞན་ཞེས་བྱ་བ་ལ་འདས་མ་ཐག་ཏུ་བཤད་པའི་རྣལ་འབྱོར་ལས་སླར་ཡང་གཞན་ནི་རྣལ་འབྱོར་གྱི་རང་བཞིན་ཅན་གྱི་དངོས་པོ་གཞན་ཏེ་རྗེས་སུ་རྣལ་འབྱོར་དང༌། ཐམས་ཅད་རྣལ་འབྱོར་དང༌། རྣལ་འབྱོར་ཆེན་པོ་དང༌། ཤིན་ཏུ་རྣལ་འབྱོར་སྒོམ་པའི་རང་བཞིན་ཅན་ནོ་ཞེས་བྱ་བའི་དོན་ཏོ། །དངོ་པོ་འདི་གང་ལས་ཤེས་པར་བྱ་ཞེ་ན། ཡང་དག་པར་བསྡུ་བ་དང༌། ཡང་དག་པར་ཀུན་དུ་སྤྱོད་པ་དང༌། ཡང་དག་པར་སྦྱོར་བ་ཞེས་བྱ་བའི་སྒྲ་རྣམས་ཡོད་པ་སྟེ་དེ་རྣམས་ལས་འདིར་ཤེས་པར་བྱའོ་ཞེས་བྱ་བའི་དོན་ཏོ། །དེ་ལ་འདས་མ་ཐག་ཏུ་བཤད་པའི་རྣལ་འབྱོར་བྱས་ལ་ཇི་ལྟ་བ་བཞིན་དུ་རང་གི་ལུས་ལ་ཡེ་ཤེས་སེམས་དཔའ་བཅུག་སྟེ་ས་མ་ཡ་སྟྭཾ་ཞེས་བྱ་བ་བརྗོད་ཅིང་འོད་ཀྱི་དཀྱིལ་འཁོར་རྫོགས་པར་བྱས་ལ་ས་མ་ཡ་སྟྭཾ་ཨ་ཧཾ་ཞེས་བྱ་བ་དང་མཐར་རང་གི་ལྷའི་སྙིང་པོ་ལན་གསུམ་ཟློས་ཤིང་བཅུག་པའི་ཡེ་ཤེས་སེམས་དཔའ་དང་ཆུ་དང་འོ་མ་བཞིན་དུ་ལྷན་ཅིག་གྱུར་པར་ལྷག་པར་མོས་པར་བྱས་ཏེ། དེ་ནི་འདི་རྗེས་སུ་རྣལ་འབྱོར་གྱི་མཚན་ཉིད་ཅན་གྱི་ཡང་དག་པར་བསྡུ་བ་ཡིན་ནོ། །རྣལ་འབྱོར་རམ་རྗེས་སུ་རྣལ་འབྱོར་རམ་རྣལ་འབྱོར་ཆེན་པོ་བྱས་ལ་ཐམས་ཅད་བདག་ཡིན་ནོ་ཞེས་བྱ་བའི་སྒོམ་པ་ནི་ཐམས་ཅད་རྣལ་འབྱོར་གྱི་མཚན་ཉིད་ཅན་གྱི་ཡང་དག་པར་ཀུན་དུ་སྦྱོར་བ་སྟེ་དེས་ཕྱོགས་དང་དུས་ཐམས་ཅད་ལ་ཁྱབ་པའི་ཕྱིར་རོ། །ཡང་དག་པར་ཀུན་དུ་སྦྱོར་བས་ན་ཀུན་དུ་སྦྱོར་བ་སྟེ། འདི་ལྟར་སྒྲ་སྒྲུབ་བའོ། །ལྷ་མོ་ཐམས་ཅད་དང་ཡང་དག་པར་སྦྱོར་བའི་སྒོམ་པ་དན། བསྒོམས་པའི་འབྲས་བུ་ནི་ཤིན་ཏུ་རྣལ་འབྱོར་གྱི་མཚན་ཉིད་ཅན་གྱི་ཡང་དག་པར་སྦྱོར་བའོ། །དེ་ལྟར་མདོར་བསྟན་པའི་ཚིག་རྣམས་ཀྱིས་རྗེས་སུ་རྣལ་འབྱོར་དང་ཐམས་ཅད་རྣལ་འབྱོར་དང་རྣལ་འབྱོར་ཆེན་པོ་དང་ཤིན་ཏུ་རྣལ་འབྱོར་རྣམས་བསྟན་ནས། ད་ནི་རེ་ཞིག་རྗེ་སུ་རྣལ་འབྱོར་རྒྱས་པར་བསྟན་པ་བྱ་བའི་ཕྱི་གང་དག་སྦྱོར་ཞེ་ན་ཞེས་བྱ་བ་གསུངས་ཏེ།
རྗེས་སུ་རྣལ་འབྱོར་གྱི་སྒོམ་པའི་འདི་ལྷའི་ཁྱད་པར་གང་གི་ཡིན་ཞེས་བྱ་བའི་ཐ་ཚིག་གོ །དེ་ལྟར་རང་ཉིད་ཀྱིས་དྲིས་ནས་སློབ་མ་རྣམས་ཀྱི་ཁོང་དུ་ཆུད་པར་བྱ་བའི་ཕྱིར། གང་གི་ལྷག་པའི་ལྷ་ཞེས་བྱ་བ་ལ་སོགས་པས་རྒྱས་པ་གསུངས་ཏེ་བསྒྲུབ་པར་བྱ་བ་ཉིད་དུ་རང་གི་འདོད་ཅིང་བྱིན་གྱིས་བརླབ་པར་མཛད་པ་གང་ཡིན་པ་དེ་ནི་རང་གི་ལྷག་པའི་ལྷའོ། །རྗེས་སུ་དྲན་པ་བསྒོམ་པ་སྟེ་དེ་ཉིད་རྣལ་འབྱོར་ཏེ་ཡེ་ཤེས་སེམས་དཔའ་དང་གཅིག་ཏུ་གྱུར་པའི་ལྷག་པར་མོས་པའོ་ཞེས་བྱ་བའི་དོན་ཏོ། །རྗེས་སུ་སྒྲུབ་པ་ནི། ལྷག་པའི་ལྷ་ནི་གང་གང་གི །ཕྱག་རྒྱ་གང་དང་གང་བཅིངས་པ། །དེ་དང་དེ་ཡི་སྦྱོར་བ་ཡིས། །ཕྱག་རྒྱ་དེ་དེ་ངེས་པར་སྦྱར། །ཞེས་བྱ་བ་དེ་མ་ཐག་ཏུ་འོག་ནས་གསུང་བར་འགྱུར་བ་གང་ཡིན་པ་རྗེས་སུ་སྒྲུབ་པ་དེ་ལས་རང་གི་ལྷག་པའི་ལྷ་དང་ཡང་དག་པར་སྦྱོར་བ་ནི་རྗེས་སུ་རྣལ་འབྱོར་གྱི་མཚན་ཉིད་ཅན་ནོ། །གྲུབ་པ་ནི་རྫོགས་པའོ། །དེ་ལྟར་རྗེས་སུ་རྣལ་འབྱོར་བསྟན་ནས་ད་ནི་ཡང་དག་པར་ཀུན་དུ་སྦྱར་བའི་རང་བཞིན་ཅན་གྱི་ཐམས་ཅད་རྣལ་འབྱོར་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ་དེ་ལ་ཞེས་བྱ་བའི་སྒྲ་ནི་དག་ཉེ་བར་དགོད་པ་ལའོ། །ཇི་ལྟར་ཞེས་བྱ་བ་ནི་དྲི་བའོ། །ཐམས་ཅད་ཀྱང་དེ་ཡིན་ལ་རྣལ་འབྱོར་ཡང་དེ་ཡིན་པས་ན་ཐམས་ཅད་རྣལ་འབྱོར་ཏེ་ཐམས་ཅད་ཀྱི་ཐམས་ཅད་ཉིད་བདག་ཉིད་ཡིན་ནོ་ཞེས་བྱ་བ་ནི་སྒོམ་པའོ། །བརྟན་པ་དང་གཡོ་བའི་དངོས་པོ་ཐམས་ཅད་ཀྱང་གཟུགས་འཛིན་པའི་རང་གི་ལྷ་ནི་དམ་ཚིག་སྟེ། གང་ཕྱིར་ཕྱག་རྒྱ་དམ་ཚིག་བཤད། །ཅེས་བྱ་བ་རྒྱས་པར་བཤད་པ་ལས་གསུངས་པའི་ཕྱིར་རོ། །ཐམས་ཅད་ཀྱི་རང་བཞིན་ཅན་གྱི་ཀུན་རྫོབ་ཀྱི་བདེན་པའི་ངོ་བོ་རང་གི་ལྷ་ནི་དམ་ཚིག་སྟེ། དེའི་རང་བཞིན་ཅན་གྱི་སྒོམ་པ་ནི་དམ་ཚིག་གི་སྦྱོར་བ་ཐམས་ཅད་ཀྱི་རྣལ་འབྱོར་ཞེས་བྱ་བའོ། །རྒྱུ་གང་གིས་སྒོམ་པ་དེ་དམ་ཚིག་གི་སྦྱོར་བ་ཡིན་ཞེ་ན། དེ་བཞིན་གཤེགས་པ་ཀུན་གྱིས་ཀྱང༌། །འདའ་བར་དཀའ་བ་ཉིད་ཀྱི་ཕྱིར། །ཞེས་བྱ་བ་ནི་དེ་དག་གིས་ཀྱང་འདའ་བར་མི་མཛད་པའི་ཕྱིར་ཀུན་རྫོབ་ཀྱི་བདེན་པའི་རང་བཞིན་ཅན་གྱི་ཕྱག་རྒྱ་དེ་གང་གི་ཕྱིར་རྡོ་རྗེ་འཆང་ཆེན་པོས་དམ་ཚིག་ཅེས་བྱ་བར་གསུངས་པ་དེའི་ཕྱིར་རོ། །ཅིའི་ཕྱིར་
བརྟན་པ་དང་གཡོ་བའི་དངོས་པོ་ཐམས་ཅད་ཀྱང་གཟུགས་འཛིན་པའི་རང་གི་ལྷའི་རང་བཞིན་ཅན་གྱི་ཕྱག་རྒྱ་དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་མི་མཛད་ཅེ་ན། ཡིད་ཀྱི་ལུས་ནི་བརྟན་ཕྱིར་རོ། །ཞེས་བྱ་བ་ལ་ཡིད་ནི་ཐོག་མ་དང་ཐ་མ་མེད་པ་དམིགས་པ་མེད་པའི་ཐུགས་རྗེ་ཆེན་པོའི་མཚན་ཉིད་ཅན་གྱི་ཆོས་ཀྱི་དབྱིངས་སོ། །དེའི་ལུས་ནི་དེ་བཞིན་གཤེགས་པ་ལ་སོགས་པའི་སྐུ་དང་རི་བོ་ལ་སོགས་པ་བརྟན་པའི་གཟུགས་སོ། །དེ་ཉིད་རྡོ་རྗེ་བཞིན་དུ་མི་ཕྱེད་པས་ན་དེའི་དངོས་པོ་ནི་བརྟན་པ་ཉིད་དོ། །ཡིད་ཀྱི་ལུས་བརྟན་པ་ཉིད་ཀྱི་རྒྱུ་དེའི་ཕྱིར། དེ་བཞིན་གཤེགས་པ་ཐམས་ཅད་ཀྱིས་ཀྱང་དེ་འདའ་བར་མི་མཛད་པ་ཡིན་ནོ། །འདི་ལྟར་བཤད་པར་འགྱུར་ཏེ། ཇི་ལྟ་བ་བཞིན་དུ་བཤད་པའི་ཆོས་ཀྱི་དབྱིངས་སྲོག་ཆགས་དང་སྲོག་ཆགས་མ་ཡིན་པ་རྣམས་ཀྱིས་བྱེད་པར་མི་འགྱུར་ཏེ་རྣམ་པར་མི་རྟོག་པའི་ཕྱིར་རོ།། བདག་ཉིད་དེ་ལས་བྱུང་བའི་སེམས་ཅན་ཐམས་ཅད་ཀྱི་དོན་རྫོགས་པར་མཛད་པའི་སངས་རྒྱས་ལ་སོགས་པའི་གཟུགས་སྔོན་གྱི་སྨོན་ལམ་གྱི་དབང་གིས་འཇུག་པའི་ཕྱིར་དེ་བཞིན་གཤེགས་པ་རྣམས་ཀྱིས་ཀྱང་ཕྱེད་པར་མི་འགྱུར་ཏེ་དེ་དག་ཀྱང་དེའི་རང་བཞིན་ཅན་ཉིད་ཀྱི་ཕྱིར་རོ། །དེའི་ཕྱིར་འདའ་བར་མི་མཛད་པ་ཞེས་བྱ་བ་ནི་དམ་ཚིག་གི་དོན་ཡིན་ནོ། །ཇི་ལྟ་བ་བཞིན་དུ་བཤད་པའི་ཆོས་ཀྱི་དབྱིངས་ཀྱི་རྒྱུ་མཐུན་པ་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་གྱི་རང་གི་ལྷའི་གཟུགས་དེ་རྗེས་སུ་སྒྲུབ་པ་ནི་ལྷག་པའི་ལྷ་ནི་གང་གི་ཞེས་བྱ་བ་ལ་སོགས་པ་ཇི་ལྟ་བ་བཞིན་དུ་རྒྱས་པར་བཤད་པས་བསྟན་པ་དེ་ནི་དམ་ཚིག་གི་སྦྱོར་བ་སྟེ་དེ་ཉིད་ཐམས་ཅད་ཀྱི་རྣལ་འབྱོར་ཡིན་ནོ། །ད་ནི་དཔེས་ཐམས་ཅད་ཀྱི་རྣལ་འབྱོར་གསལ་བར་བསྟན་པའི་ཕྱིར། འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ་དཔེར་ན་ཀུ་མུ་ཏ་དང༌། ཨུཏྤལ་དང༌། རུ་རྟ་ལ་སོགས་པའི་རྫས་མང་པོ་གཅིག་ཏུ་སྦྱར་བས། འཇིག་རྟེན་ན་སྦྱོར་བ་ཞེས་གྲགས་པ་དེ་བཞིན་དུ། ཇི་ལྟ་བ་བཞིན་དུ་བཤད་པའི་ཐམས་ཅད་ཀྱི་བདག་ཉིད་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ཅན་གྱི་ཕྱག་རྒྱ་རྣམས་དང༌། གཅིག་ཏུ་གྱུར་པའི་ལྷག་པར་མོས་པའི་རྣལ་འབྱོར་
གྱིས་ཕྱོགས་བཅུར་སྦྱོར་པ་ནི་ཡང་དག་པར་ཀུན་དུ་སྦྱོར་པ་སྟེ། ཡང་དག་པར་ཀུན་དུ་སྦྱོར་བའི་རྒྱུ་དེས་ཇི་ལྟ་བ་བཞིན་དུ་བཤད་པའི་ཐམས་ཅད་ཀྱི་རྣལ་འབྱོར་གྱི་དམ་ཚིག་གི་སྦྱོར་བ་ཞེས་བྱ་བར་བརྗོད་པ་ཡིན་ནོ། །ད་ནི་ཐམས་ཅད་ཀྱི་བདག་ཉིད་ཀྱི་ཕྱག་རྒྱའི་སྦྱོར་བའི་རང་བཞིན་བསྟན་པར་བྱ་བའི་ཕྱིར། དེ་ལ་ཇི་ལྟར་ཐམས་ཅད་ཀྱི་བདག་ཉིད་ཀྱི་ཕྱག་རྒྱའི་སྦྱོར་བ་ཡིན་ན་ཞེས་བྱ་བ་གསུངས་ཏེ་ཐམས་ཅད་ཀྱི་བདག་ཉིད་ནི་ཆོས་ཀྱི་དབྱིངས་ཏེ། དེའི་ཕྱག་རྒྱ་ནི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོའོ། །རིགས་ཐམས་ཅད་ཀྱི་ཕྱག་རྒྱ་དེ་དག་དང་སྦྱོར་པས་གཅིག་ཏུ་གྱུར་པར་ལྷག་པར་མོས་པའོ། །དེ་ཉིད་བསྟན་པར་བྱ་བའི་ཕྱིར། སངས་རྒྱས་ཐམས་ཅད་ཀྱི་བདག་ཉིད་ཅེས་བྱ་བ་ལ་སོགས་པ་གསུངས་ཏེ་སངས་རྒྱས་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་སངས་རྒྱས་ཐམས་ཅད་དེ་ལྷ་མ་ལུས་པའི་སྐུ་གསུང་ཐུགས་ཀྱི་རྡོ་རྗེའི་རང་བཞིན་ནོ། །དི་དང་བདག་ཉིད་ཡང་དག་པར་སྦྱོར་བ་ནི་ཡེ་ཤེས་སེམས་དཔའ་རྣམས་དང་ལྷན་ཅིག་ཏུ་གཉིས་སུ་མེད་པར་ལྷག་པར་མོས་པས་གཅིག་ཏུ་གྱུར་པའི་རྣལ་འབྱོར་བསྒོམ་པའོ། །དེ་ཡང་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། ཇི་ལྟའི་དབྱིབས་དང་སྐུ་དང་ལྡན། །ཞེས་བྱ་བ་ལ་སངས་རྒྱས་ཐམས་ཅད་ལ་སོགས་པ་དེའི་དབྱིབས་རྒྱུད་ལས་བསྟན་པ་གང་ཡིན་པ་དང༌། སྐུའི་གསང་བ་གང་ཡིན་པ་དེ་གཉིས་པོ་གང་ལ་ཡོད་པ་དེ་ནི་ཇི་ལྟའི་དབྱིབས་དང་སྐུ་དང་ལྡན་པའི་སངས་རྒྱས་ཐམས་ཅད་ཀྱི་བདག་ཉིད་ཀྱི་སྦྱོར་བའོ། །དེ་ལྟར་གྱུར་པའི་སངས་རྒྱས་ཐམས་ཅད་ཀྱི་བདག་ཉིད་ཀྱི་སྦྱོར་བ་དང་ལྡན་པ་ནི་ལས་སུ་གྱུར་པའི་བདག་ཉིད་དེ་རྣལ་འབྱོར་བཞིར་གྱུར་པའི་བདག་ཉིད་ལ་ཡང་དག་པར་བཀོད་དེ། ཕྱི་ནས་རྗེས་སུ་བསྒྲུབ་པར་བྱ་བ་ནི་རང་གི་ལྷའི་ཕྱག་རྒྱ་བཅིངས་ནས་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་གྱི་རང་གི་ལྷའི་གཟུགས་སུ་བདག་ཉིད་བསྒོམ་པར་བྱའོ། །ནིའི་སྒྲ་ནི་ངེས་པར་གཟུང་བ་སྟེ། བདག་ཉིད་ཁོ་ནའོ། །འདི་ལྟར་བཤད་པར་འགྱུར་ཏེ། ཇི་ལྟ་བ་བཞིན་དུ་བཤད་པའི་སྐུ་མདོག་དང་དབྱིབས་དང་གདན་དང་ཕྱག་མཚན་ལ་སོགས་པ་དང་ལྡན་པའི་རང་གི་ལྷའི་གཟུགས་སུ་བདག་ཉིད་རྣལ་
འབྱོར་ཙམ་གྱིས་དེ་བཞིན་དུ་ངེས་པར་བྱས་ལ་ཕྱི་ནས་ཡེ་ཤེས་སེམས་དཔའ་རང་གི་ལུས་ལ་བཅུག་སྟེ། དེ་དང་ལྷན་ཅིག་ཏུ་གྱུར་པར་ལྷག་པར་མོས་པར་བྱས་ལ་རང་གི་ལྷའི་ཕྱག་རྒྱ་བཅིངས་ནས་དངོས་པོ་ཐམས་ཅད་ཀྱི་བདག་ཉིད་ཀྱི་ལྷའི་གཟུགས་སུ་བདག་ཉིད་བསྒོམ་པར་བྱའོ་ཞེས་བྱ་བའོ། །དོན་འདི་ཉིད་བསྟན་པར་བྱ་བའི་ཕྱིར་རང་གི་དམ་ཚིག་གི་སྦྱོར་བ་ནི་ཐམས་ཅད་ཀྱི་སྦྱོར་བའོ་ཞེས་བྱ་པ་གསུངས་ཏེ། རྗེས་སུ་བསྒྲུབ་པར་བྱ་ཞེས་བྱ་བའི་འདས་མ་ཐག་ཏུ་བཤད་པའི་རྗེས་སུ་སྒྲུབ་པ་སྟེ་དེ་ཉིད་བསྟན་པའི་ཕྱིར། དེ་ལ་འདི་ཞེས་བྱ་བ་ལ་སོགས་པ་གསུངས་ཏེ་བསྒྲུབ་པར་བྱ་བའི་འདོད་པའི་ལྷ་ནི་ལྷག་པའི་ལྷ་སྟེ། དེའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་དང་དེ་ལྷའི་ཁྱད་པར་དེ་དང་དེའི་རྣལ་འབྱོར་ནི་དེའི་གཟུགས་ལ་སོགས་པའི་ལྷག་པར་མོས་བས་རྣལ་འབྱོར་པས་བཅིངས་ཤིང་ཕྱག་རྒྱ་ཆེན་པོ་ལ་སོགས་པའི་རང་བཞིན་ཅན་གྱི་ཕྱག་རྒྱ་དེ་དང་དེ་རང་གི་ལས་ལ་རབ་ཏུ་སྦྱར་བར་བྱ་སྟེ་གཞན་གྱིས་ནི་མ་ཡིན་ནོ་ཞེས་བྱའོ། །དེ་ལྟར་ཐམས་ཅད་ཀྱི་རྣལ་འབྱོར་བསྟན་ནས་ད་ནི་རྣལ་འབྱོར་དང་རྗེས་སུ་རྣལ་འབྱོར་དག་གིས་མཉམ་པར་གཞག་པ་དང༌། མཉམ་པར་མ་བཞག་པའི་རྣལ་འབྱོར་གྱི་ཚུལ་དུ་སྒོམ་པར་བསྟན་པར་བྱ་བའི་ཕྱིར། དེ་ནས་མཆོག་ཏུ་གསང་བའི་མཆོག་གི་རྗེས་སུ་སྒྲུབ་པའི་ཆོ་ག་རྒྱས་པ་མཆོག་ཏུ་གྲུབ་པའོ་ཞེས་བྱ་བ་གསུངས་ཏེ་རྣལ་འབྱོར་གྱི་དུས་དང་རྗེས་སུ་རྣལ་འབྱོར་གྱི་དུས་སུ་ལུས་ཀྱི་ཡན་ལག་ལ་སོགས་པ་ཐམས་ཅད་ཡོངས་སུ་རྫོགས་པའི་རང་གི་ལྷའི་བསྒོམ་པའི་སྒོམ་པ་ནི་མཆོག་ཏུ་གསང་བའི་མཆོག་གི་རྗེས་སུ་སྒྲུབ་པའི་ཆོ་ག་སྟེ། དེའི་མཉམ་པར་གཞག་པ་དང༌། མཉམ་པར་མ་བཞག་པའི་དབྱེ་བ་སྣ་ཚོགས་ཉིད་ནི་རྒྱས་པའོ། །བདག་ཉིད་ཅེས་པ་ནི་ཕུང་པོ་ལྔའི་རང་བཞིན་གྱི་བདག་ཉིད་ཀྱི་དངོས་པོའོ། །ནིའི་སྒྲ་ནི་ངེས་པར་གཟུང་བ་སྟེ། བདག་ཉིད་ཁོ་ན་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རང་བཞིན་ཅན་གྱི་སངས་རྒྱས་ཐམས་ཅད་དོ། །དཔལ་རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའི་གཟུགས་ནི་བྱང་ཆུབ་སེམས་དཔའ་ཉིད་དོ། །འདོད་པའི་ལྷའི་རྣལ་འབྱོར་ནི་རང་གི་ལྷག་པའི་ལྷའི་རྣལ་འབྱོར་རོ། །རང་གི་ལྷའི་བརྟན་པ་
དང་གཡོ་བའི་དངོས་པོ་ཐམས་ཅད་ཀྱི་བདག་ཉིད་ཀྱི་གཟུགས་གང་ཡིན་པ་དེ་ནི་རང་གི་དམ་ཚིག་སྟེ། དེ་དང་སྦྱོར་བ་ནི་དེ་དང་ལྷན་ཅིག་ཏུ་རྣལ་འབྱོར་པ་ཐ་མི་དད་པའི་རང་བཞིན་ཅན་གྱིས་སྒོམ་པ་གང་ཡིན་པ་དེ་ནི་རང་དམ་ཚིག་གི་སྦྱོར་པ་སྟེ། དེ་ཉིད་ཐམས་ཅད་ཀྱི་སྦྱོར་བ་ཡིན་ནོ་ཞེས་བྱའོ། །བདག་ཉེད་ནི་བདག་ཉིད་ལ་འཇུག་སྟེ། དོན་དམ་པར་བདག་ཉིད་ལས་ཐ་དད་པའི་སངས་རྒྱས་དང་བྱང་ཆུབ་སེམས་དཔའ་ཉིད་ནི་མི་དམིགས་པ་དེའི་ཕྱིར། བདག་ནི་སངས་རྒྱས་ཉིད་དང་ནི། །བྱང་ཆུབ་སེམས་དཔའ་ཉིད་ཀྱང་ཡིན། །ཞེས་བྱ་བ་བདག་ཉིད་ཁོ་ནས་སངས་རྒྱས་དང་བྱང་ཆུབ་སེམས་དཔའི་གཟུགས་སུ་བརྟག་པར་བྱ་སྟེ་ཕྱིའི་དངོས་པོ་ནི་མ་ཡིན་ནོ་ཞེས་བྱ་བའོ། །འདི་ལྟར་འཆད་པར་འགྱུར་ཏེ། གང་གི་ཕྱིར་ཇི་ལྟ་བ་བཞིན་དུ་བཤད་པའི་ཚུལ་གྱིས་ཕྱི་རོལ་གྱི་དངོས་པོ་སངས་རྒྱས་ཀྱི་གཟུགས་སམ་བྱང་ཆུབ་སེམས་དཔའི་གཟུགས་སུ་དོན་དམ་པར་མི་དམིགས་པ་དེའི་ཕྱིར་བདག་ཉིད་ཁོ་ནའི་ཡན་ལག་ཐམས་ཅད་ཡོངས་སུ་གང་བའི་སངས་རྒྱས་ཀྱི་གཟུགས་སམ་བྱང་ཆུབ་སེམས་དཔའི་གཟུགས་སུ་རྣལ་འབྱོར་པས་བསྒོམ་པར་བྱ་བ་ཡིན་ནོ་ཞེས་བྱ་བའོ། །ཕྱག་རྒྱ་ཆེན་པོ་ལ་སོགས་པའི་རང་བཞིན་གྱི་རིགས་ཐམས་ཅད་ཀྱི་ཕྱག་རྒྱ་ནི་ཕྱག་རྒྱ་ཐམས་ཅད་དེ། དེ་དག་གི་རང་བཞིན་རྣལ་འབྱོར་ཡང་ཡིན་ལ་ཆེན་པོ་ཡང་དེ་ཉིད་ཡིན་པས་ཕྱག་རྒྱ་ཐམས་ཅད་ཀྱི་རྣལ་འབྱོར་ཆེན་པོའོ། །འདས་མ་ཐག་ཏུ་བཤད་པ་གང་ཡིན་པ་དེ་ཉིད་མཆོག་ཏུ་གསང་བ་ཡིན་ནོ་ཞེས་བྱ་བའོ། །འདིས་ནི་འདི་ལྟར་བཤད་པར་འགྱུར་ཏེ་ཤིན་ཏུ་མཉམ་པར་གཞག་པའི་སྒོམ་པས་སྐྱོན་གཅིག་གི་རང་བཞིན་ཀུན་དུ་འགྲོ་བའི་རང་གི་ལྷའི་གཟུགས་གསལ་བའི་དབྱེ་བས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པར་བསྒོམ་པར་བྱ་སྟེ། དེའི་ཕྱིར་ཕྱག་རྒྱ་ཐམས་ཅད་ཀྱི་རྣལ་འབྱོར་ཆེན་པོ་འདི་ཡིན་ཏེ་ཀུན་དུ་ཁྱབ་པ་ཉིད་ཀྱི་ཕྱིར་རོ་ཞེས་བྱ་བའོ། །དེ་ལྟར་རྣལ་འབྱོར་དང་རྗེས་སུ་རྣལ་འབྱོར་སྒོམ་པར་བྱེད་པའི་མཆོག་ཏུ་གསང་བའི་རྡུལ་ཕྲ་རབ་ཀྱི་སྒྲུབ་པའི་ཆོ་ག་རྒྱས་པར་བསྟན་ནས། ད་ནི་རྣལ་འབྱོར་ཐམས་ཅད་སྒོམ་པར་བྱེད་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། རྣལ་
འབྱོར་དང་རྗེས་སུ་རྣལ་འབྱོར་བྱས་ལ་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ཅན་གྱི་རང་གི་ལྷའི་གཟུགས་ཀྱི་བདག་ཉིད་སྒོམ་པ་ནི་མཆོག་ཏུ་གསང་བའི་མཆོག་གི་རྗེས་སུ་སྒྲུབ་པའི་ཆོ་ག་རྒྱ་ས་བའི་ཁྱད་པར་འདིར་མཆོག་ཏུ་གྲུབ་པར་ཤེས་པར་བྱའོ། རང་གི་ལྷའི་སྦྱོར་བ་ཞེས་བྱ་བ་ནི་འདོད་པའི་ལྷའི་རྣལ་འབྱོར་ཏེ། རྣལ་འབྱོར་དང་རྗེས་སུ་རྣལ་འབྱོར་གྱི་རང་བཞིན་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་ནོ། །དེས་སྣ་ཚོགས་ནི་བརྟན་པ་དང་གཡོ་བའི་རང་བཞིན་ཅན་གྱི་བདག་ཉིད་སྐུ་གང་ལ་ཡོད་པ་དེ་ནི་སྣ་ཚོགས་ཕྱག་རྒྱའི་བདག་ཉིད་སྐུ་དང་ལྡན་པ་སྟེ། ཐམས་ཅད་རྣལ་འབྱོར་དང་ལྡན་པའོ་ཞེས་བྱ་བའི་དོན་ཏོ། །དེ་ལྟ་བུ་ཅིར་འགྱུར་ཞེ་ན་ཀུན་བདག་ཅེས་བྱ་བ་ལ་སོགས་པ་ལ་ཀུན་བདག་བཤད་ཟིན་ཏོ། །དེའི་ཕྱག་རྒྱ་རྣམས་ཀྱང་བཤད་ཟིན་ཏེ། དེ་དང་ལྷན་ཅིག་ཏུ་གཅིག་ཏུ་གྱུར་པའི་ལྷག་པར་མོས་པ་ནི་རྣལ་འབྱོར་རོ། །དེ་ཉིད་ཀྱི་བདག་ཉིད་ནི་རང་བཞིན་གང་ལ་ཡོད་པ་དེ་ནི་ཀུན་བདག་ཕྱག་རྒྱའི་རྣལ་འབྱོར་བདག་གོ །མི་འགྱུར་མཆོག་ཅེས་བྱ་བ་ནི་ཐོག་མ་དང་ཐ་མ་མེད་པའོ། །གྲུབ་པར་གྱུར་པ་ནི་རྫོགས་པར་གྱུར་པའོ། །འདི་ཇི་ལྟ་བུར་བརྗོད་ཅེ་ན། ཐམས་ཅད་ཅེས་བྱ་བ་ལ་སོགས་པའི་རྟོག་པ་ཡང་ཡིན་ལ། ཐམས་ཅད་ཀྱང་དེ་ཉིད་ཡིན་པས་ན་རྟོག་པ་ཐམས་ཅད་ནི་རྡོ་རྗེ་སེམས་དཔའ་ལ་སོགས་པ་སྟེ་བརྟན་པ་དང་གཡོ་བ་ལ་སོགས་པའི་དངོས་པོ་ཐམས་ཅད་ཀྱི་ཕྱག་རྒྱའི་གཟུགས་སུ་བཞུགས་པའོ། །ཐམས་ཅད་དུ་ཤེས་པའི་སྣ་ཚོགས་པའི་དམ་ཚིག་ཆེན་པོའོ། །རྟོག་པ་ཐམས་ཅད་ཀྱང་དེ་ཡིན་ལ་སྣ་ཚོགས་པའི་དམ་ཚིག་ཆེན་པོ་ཡང་དེ་ཉིད་ཡིན་པས་ན་རྟོག་པ་ཐམས་ཅད་ཀྱི་སྣ་ཚོགས་པའི་དམ་ཚིག་ཆེན་པོའོ། །དེ་དག་དང་ལྷན་ཅིག་ཏུ་གྱུར་པའི་ལྷག་པར་མོས་པས་རྣལ་འབྱོར་པ་དེའི་རང་བཞིན་དུ་རྫོགས་པ་ནི་མཆོག་གི་རྣལ་འབྱོར་ཏེ་དེ་ཉིད་ཀྱང་འདིར་ཐམས་ཅད་ཀྱི་རྣལ་འབྱོར་རོ། །འདིས་ནི་ཐམས་ཅད་ཀྱི་རྣལ་འབྱོར་སྒོམ་བའི་རྣལ་འབྱོར་བ་ལ་བརྟན་པ་དང་གཡོ་བའི་དངོས་པོ་ཐམས་ཅད་ཀྱི་རང་བཞིན་ཁོ་ན་རང་དང་གཞན་གྱི་དོན་ཕུན་སུམ་ཚོགས་པའི་རང་བཞིན་གྱི་འབྲས་བུ་འཐོབ་པར་འགྱུར་རོ་ཞེས་བྱ་བའི་དོན་ཏོ། །
དེ་ལྟར་ཐམས་ཅད་རྣལ་འབྱོར་བསྟན་ནས་ད་ནི་དཀྱིལ་འཁོར་ལ་སོགས་པ་སྒྲུབ་པར་བྱེད་པའི་རྣལ་འབྱོར་ཆེན་པོ་ཡང་དག་པར་ཀུན་དུ་སྦྱོར་བ་བསྟན་པར་བྱ་བའི་ཕྱིར་དེ་ནས་སླར་ཡང་གཞན་ཞེས་བྱ་བ་ལ་སོགས་པ་གསུངས་ཏེ། རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་ཀྱི་རྣལ་འབྱོར་རྣམས་ལས་སླར་ཡང་སྒོམ་པའི་རང་བཞིན་གྱི་དངོས་པོ་གཞན་འདི་ཡིན་ནོ་ཞེས་བྱ་བའི་དོན་ཏོ། །ཇི་ལྟ་བ་བཞིན་དུ་བཤད་པའི་རྣལ་འབྱོར་ཆེན་པོའི་མཚན་ཉིད་ཅན་ནི་འདིར་མཆོག་ཏུ་གསང་བ་ཤིན་ཏུ་མཆོག་ཏུ་ཆོ་ག་རྒྱས་པའི་ཁྱད་པར་ཤིན་ཏུ་མཆོག་ཏུ་གྲུབ་པ་ལས་ཀྱང་གཞན་ནི་རྗེས་སུ་སྒྲུབ་པ་ལས་ཀྱང་ཤིན་ཏུ་མཆོག་ཏུ་གྲུབ་བ་སྟེ་དངོས་གྲུབ་ཐམས་ཅད་སྒྲུབ་པར་བྱེད་པ་ཉིད་ཀྱི་ཕྱིར་ཞེས་བྱ་བའོ། །རྡོ་རྗེ་སེམས་དཔའ་ནི་རང་གི་རིགས་ཀྱི་དཀྱིལ་འཁོར་གྱི་བདག་པོ་ཡེ་ཤེས་སེམས་དཔའོ། །ཡེ་ཤེས་སེམས་དཔའ་དེ་དང་རྣལ་འབྱོར་གྱི་རང་བཞིན་བདག་ཉིད་ཡང་དག་པར་སྦྱོར་བ་ནི་གཅིག་ཏུ་གྱུར་པ་སྟེ་རྡོ་རྗེ་སེམས་དཔའི་བདག་ཉིད་སྦྱོར་བའོ། །དབྱིབས་ཇི་ལྟ་བ་བཞིན་དུ་རྡོ་རྗེ་སེམས་དཔའི་སྐུ་ཡང་ཇི་ལྟ་བུ་གང་ལ་ཡོད་པ་དེ་ནི་དབྱིབས་དང་སྐུ་ནི་ཇི་ལྟར་ལྡན་པའོ། །རྡོ་རྗེ་སེམས་དཔའི་བདག་ཉིད་ཀྱི་སྦྱོར་བ་ཡང་དེ་ཡིན་ལ་དབྱིབས་དང་སྐུ་ཇི་ལྟ་བུ་ཡང་དེ་ཉིད་ཡིན་པས་ན། །རྡོ་རྗེ་སེམས་དཔའི་བདག་ཉིད་སྦྱོར། །དབྱིབས་དང་སྐུ་ནི་ཇི་ལྟར་ལྡན་པ་སྟེ། །མི་འགྱུར་མཆོག་ནི་གྲུབ་པར་འགྱུར། །ཞེས་བྱ་བ་དང་སྦྱར་རོ། །དེ་གཅིག་པུ་ཡིན་ནམ་ཞེ་ན་ཀུན་གྱི་བདག་པོ་ནི་ཇི་ལྟ་བུ་བཞིན་དུ་བཤད་པ་སྟེ། དེའི་ཕྱག་རྒྱ་ནི་རང་གི་རིགས་ཀྱི་དཀྱིལ་འཁོར་ཆེན་པོའི་ལྷ་རྣམས་ཀྱི་ཕྱག་རྒྱ་རྣམ་པ་བཞི་སྟེ། དེ་དང་ལྷན་ཅིག་ཏུ་སྦྱོར་བ་ནི་ཀུན་བདག་ཕྱག་རྒྱའི་སྦྱོར་བའོ། །དེ་ཉིད་ཀྱི་བདག་ཉིད་ནི་རང་བཞིན་གང་ལ་ཡོད་པ་དེ་ནི་ཀུན་བདག་ཕྱག་རྒྱའི་སྦྱོར་བའི་བདག་གོ །གྲུབ་པར་གྱུར་པ་ནི་རྫོགས་པར་འགྱུར་བའོ། །མི་འགྱུར་མཆོག་ནི་རྟག་པ་སྟེ་ཐོག་མ་དང་ཐ་མ་མེད་པའོ། །འདི་ཅི་ཞེས་བྱ་བ་བརྗོད་པ་ཡིན་ཞེ་ན། །འདི་ནི་ཞེས་བྱ་བལ་སོགས་པ་ལ་ཐམས་ཅད་རྣལ་འབྱོར་གྱི་བདག་པོ་ཞེས་བྱ་བ་དང་སྦྱོར་རོ། །འདི་ཞེས་བྱ་བ་ནི་རྣལ་འབྱོར་ཆེན་པོའི་མཚན་ཉིད་
ཡིན་ནོ། །ནིའི་སྒྲ་ནི་གང་གི་ཕྱིར་གྱི་དོན་ཏེ་གང་གི་ཕྱིར་སངས་རྒྱས་ཐམས་ཅད་ཀྱི་རང་གི་བདག་ཉིད་དམ་ཚིག་གསལ་བ་ནི་རང་གི་རིགས་ཀྱི་ཡེ་ཤེས་སེམས་དཔའ་རྣམས་ཏེ་དེ་རྣམས་ཀྱི་རྗེས་སུ་འབྲང་པས་རང་གི་དམ་ཚིག་གི་རྗེས་སུ་འགྲོ་བ་སྟེ། རང་གི་རིགས་ཀྱི་ཡེ་ཤེས་སེམས་དཔའ་རྣམས་དང་ལྷན་ཅིག་ཏུ་གྱུར་པས་སོང་བའོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་ཐམས་ཅད་ཀྱི་རྣལ་འབྱོར་རྣམས་ཀྱི་བདག་པོ་ནི་གཙོ་བོ་སྟེ་གྲུབ་པ་ནི་རྫོགས་པའོ། །ཐམས་ཅད་ཀྱི་རྣལ་འབྱོར་གྱི་བདག་པོ་ནི་རང་བཞིན་གྱིས་གསལ་བའོ། །ཤིན་ཏུ་གྲུབ་པའི་རྣལ་འབྱོར་གཞན་ལས་ཀྱང་མཆོག་གི་མཆོག་ཡིན་པས་ན་ཤིན་ཏུ་གྲུབ་པའི་མཆོག་གོ །རྣལ་འབྱོར་ཆེན་པོ་འདི་ཡང་རྫོགས་པའི་ཆོ་ག་སྔར་བཤད་པ་ཉིད་དེ། སླར་ཡང་བཤད་པར་མི་བྱའོ། །ཅིའི་ཕྱིར་འདི་ཤིན་ཏུ་གྲུབ་པ་མཆོག་ཡིན་ཞེ་ན། འདི་ལ་ཞེས་བྱ་བལ་སོགས་པ་གང་གི་ཕྱིར། རྣལ་འབྱོར་ཆེན་པོ་འདིས་དཀྱིལ་འཁོར་སྒྲུབ་པ་ནས་བརྩམས་ཏེ། འཇིག་རྟེན་དང་འཇིག་རྟེན་ལས་འདས་པའི་དངོས་པོ་བསྒྲུབ་པར་བྱ་བ་མ་ཡིན་པའི་དངོས་པོ་ཅུང་ཟད་ཡོད་པ་མ་ཡིན་པའི་ཕྱིར་རོ། །དངོས་གྲུབ་ལས་དང་དེ་བཞིན་བདེ། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །དེ་ལྟར་དངོས་གྲུབ་ཐམས་ཅད་སྒྲུབ་པར་བྱེད་པའི་རྣལ་འབྱོར་ཆེན་པོ་བསྟན་ནས་ད་ནི་ཤིན་ཏུ་ཆགས་པའི་སྒོམ་པས་ཐམས་ཅད་གྲུབ་པར་འགྱུར་རོ་ཞེས་བྱ་བའི་དོན་འདི་བསྟན་པར་བྱ་བའི་ཕྱིར་ཡང་དག་པར་སྦྱོར་བའི་མཚན་ཉིད་ཅན་གྱི་ཤིན་ཏུ་རྣལ་འབྱོར་གྱི་སྒོམ་པ་བསྟན་པར་བྱ་བའི་ཕྱིར། འདོད་པ་ཀུན་ལ་ལོངས་སྤྱོད་པ། །ཞེས་བྱ་བ་ལ་སོགས་པ་གསུངས་ཏེ། འདོད་པ་ཀུན་ནི་རྡོ་རྗེ་སེམས་དཔའ་སྟེ་ཤད་ཟིན་ཏོ། །དེའི་ལོངས་སྤྱོད་པ་ནི་བརྟན་པ་དང་གཡོ་བའི་དངོས་པོ་ཐམས་ཅད་དོ། །འདོད་པ་ཀུན་ཡང་ཡིན་ལ་དེ་ལ་ལོངས་སྤྱོད་པ་ཡང་ཡིན་པས་ན་འདོད་པ་ཀུན་ལ་ལོངས་སྤྱོད་པའོ། །ནའི་སྒྲ་ནི་ངེས་པར་གཟུང་བ་སྟེ། འདོད་པ་ཀུན་ལ་ལོངས་སྤྱོད་པར་བྱེད་པར་བྱེད་པར་གྱུར་པ་དེ་རྣམས་ཉིད་བསྟེན་པ་ནི་ཤིན་ཏུ་རྣལ་འབྱོར་གྱི་སྒོམ་པ་ཉམས་སུ་མྱོང་བ་ཁོ་ནའོ། །ཅི་འདོད་པ་ཞེས་བྱ་བ་ནི་རང་གི་འདོད་པ་མ་ལུས་པའོ། །ཁ་ཅིག་ཙམ་
དག་གིས་སོ། །འདི་དག་གིས་ཅི་བྱ་ཞེ་ན། རྣལ་འབྱོར་འདི་ཞེས་བྱ་བ་ལ་སོགས་པ་ལ། ཤིན་ཏུ་རྣལ་འབྱོར་གྱི་སྙོམ་པའི་ཚུལ་འདི་རང་གི་བདག་ཉིད་ལ་རབ་ཏུ་མཆོད་པར་བྱའོ། །འདི་ལྟར་བཤད་པར་འགྱུར་ཏེ། རང་གི་དཀྱིལ་འཁོར་གྱི་ཚུལ་དུ་གནས་པའི་རྣལ་འབྱོར་པས་རྡོ་རྗེ་མཚོན་ཆ་མ་ལ་སོགས་པའི་མཆོད་པའི་ཕྱག་རྒྱ་བཅུ་གཉིས་ཀྱིས་ཡང་དག་པར་མཆོད་ལ། རང་གི་རིགས་ཀྱི་དཀྱིལ་འཁོར་ལས་གསུངས་པའི་བརྟན་པ་དང་གཡོ་བའི་རང་བཞིན་ཅན་གྱི་མཆོད་པ་བཅུ་དྲུག་གིས་ཀྱང་མཆོད་ནས། ཐམས་ཅད་དུ་ཁྱད་པར་གྱི་མཆོད་པའི་ལྷ་མོ་ཐམས་ཅད་དང་ལྷན་ཅིག་ཏུ་ཡང་དག་པར་སྦྱོར་བ་བསྒོམ་བར་བྱའོ། །དེ་ཡང་ཤིན་ཏུ་རྣལ་འབྱོར་གྱི་རང་བཞིན་ཅན་གྱི་ཚུལ་དེས་སོ། །རྡོ་རྗེ་སེམས་དཔའི་སྦྱོར་བ་ཡི། །མཐུ་ཉིད་ཀྱིས་ནི་ཐམས་ཅད་དུ། །ལྷ་མོ་ཐམས་ཅད་བདེ་ཆེན་ལྡན། །རང་ཉིད་སོ་སོར་རྗེས་སྒྲུབ་པའོ། །རྡོ་རྗེ་སེམས་དཔའི་སྦྱོར་བ་ཡི། །མཐུ་ཉིད་ཀྱིས་ནི་ཐམས་ཅད་དུ། །རྣལ་འབྱོར་ཐམས་ཅད་དགའ་སྟོན་བདེ། །རང་ཉིད་སོ་སོར་རྗེས་སྒྲུབ་པའོ། །རྡོ་རྗེ་སེམས་དཔའི་སྦྱོར་བ་ཡི། །མཐུ་ཉིད་ཀྱིས་ནི་ཐམས་ཅད་དུ། །དངོས་གྲུབ་ཐམས་ཅད་དགའ་སྟོན་བདེ། །རང་ཉིད་སོ་སོར་རྗེས་སྒྲུབ་པའོ། །རྡོ་རྗེ་སེམས་དཔའི་སྦྱོར་བ་ཡི། །མཐུ་ཉིད་ཀྱིས་ནི་ཐམས་ཅད་དུ། །དབང་ཕྱུག་ཀུན་གྱི་དགའ་སྟོན་བདེ། །རང་ཉིད་སོ་སོར་རྗེས་སྒྲུབ་པའོ། །ནམ་མཁའི་ཁམས་ནི་མཐའ་ཡས་པ། །བུད་མེད་མཆོག་ནི་འབྱུང་བར་འགྱུར། །དམ་ཚིག་ལས་བྱུང་དེ་དག་དེའི། །ཡིད་འོང་དམ་ཚིག་རྗེས་འགྲོ་བའོ། །ཤིན་ཏུ་རྣལ་འབྱོར་རྣལ་འབྱོར་ཆེ། །ཐམས་ཅད་བདག་ཉིད་དམ་ཚིག་མཆོག །གཅིག་ཉིད་དང་ནི་སྤྱོད་པ་གཅིག །ཡིད་འོང་རྗེས་སྤྱོད་ལྷན་ཅིག་སྤྱོད། །སངས་རྒྱས་ཀུན་དང་མཉམ་སྦྱོར་བའི། །མཁའ་འགྲོ་མ་རྣམས་མཆོག་ཏུ་མཇེས། །ཀུན་དུ་སྣ་ཚོགས་རོལ་པ་ཡི། །ཕྱག་རྒྱ་ཐམས་ཅད་བདེ་ཆེན་ལྡན། །བཀའ་མཉན་མཆོག་གི་མཆོད་པ་ཀུན། །ལྷ་མོ་མཆོག་ཏུ་རྟག་བའོ། །རྡོ་རྗེ་སེམས་དང་སྦྱོར་བ་ཡི། །ལྷ་མོ་ཐམས་ཅད་ཀུན་བསྡུས་པས། །ཀུན་ནས་སྣ་ཚོགས་སྐལ་བཟང་པོ། །རང་ཉིད་སོ་སོར་རྗེས་སྒྲུབ་འགྱུར། །ཕྱག་རྒྱ་འདི་ནི་བཏབ་ཙམ་གྱིས། །
རྡོ་རྗེ་སེམས་དཔའ་ལ་སོགས་ལྷ། །ནམ་མཁའི་ཁམས་ལྟར་མཐའ་ཡས་པའི། །ལྷ་མོ་ཐམས་ཅད་བདེ་ཆེན་ལྡན། །རྣལ་འབྱོར་ཐམས་ཅད་བདེ་པས་མྱོས། །སྟོབས་ཀྱིས་གནོན་ཅིང་ཉེས་པ་མེད། །ཕན་ཚུན་རབ་ཏུ་དགའ་གྱུར་ནས། །སྐྱེས་བུ་བྱད་བཞིན་རོལ་བར་འགྱུར། ཀུན་བདག་དབང་པོ་ཐམས་ཅད་ལས། །འབྱུང་བའི་མཆོད་བ་ཐམས་ཅད་ཀྱི། །སྤྲིན་ཆེན་སྤྲོས་པའི་ཚོགས་རྣམས་ཀྱིས། །དེ་དག་མཆོད་པར་མཛད་པ་ཡིན། །ཀྱེ་མ་བདེ་བ་ལས་བྱུང་བའི། །ཀུན་སྦྱོར་བདེ་བའི་དབང་ཕྱུག་དང༌། །རིན་ཆེན་ཀུན་གྱི་རྣམ་པ་ཡིས། །རབ་ཏུ་མྱོས་ཤིང་བསྟེན་པ་ཡིན། །ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །འདི་ཞེས་བྱ་བ་ནི་འདས་མ་ཐག་ཏུ་བཤད་པ་སྟེ་ཤིན་ཏུ་རྣལ་འབྱོར་གྱི་མཚན་ཉིད་དོ། །དེ་ཡང་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་རྣལ་འབྱོར་གཞན་ལས་དམ་པ་སྟེ་མཆོག་ཏུ་ཤིན་ཏུ་གསང་བའོ། །འདི་ལས་གོང་ན་གཞན་མེད་པས་ན་བླ་ན་མེད་པའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ཚུལ་གྱི་རང་བཞིན་གྱི་མདོ་སྡེའི་སྤྱོད་པ་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་རང་བཞིན་ཅན་ལས་ཀྱང་རྡོ་རྗེ་ཐེག་པ་ལས་ཆེན་པོའི་ཆེན་པོའོ། །དེ་ཉིད་དམ་ཚིག་ཆེན་པོ་ནི་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ཀྱི་རང་བཞིན་གྱི་ཐམས་ཅད་དུ་འགྲོ་བའི་ཕྱིར་རོ། །དེའི་ཕྱིར་རྣལ་འབྱོར་ནི་དེ་ལས་བྱུང་བའི་ཤིན་ཏུ་རྣལ་འབྱོར་ཏེ། དེ་བཞིན་གཤེགས་པ་ཐམས་ཅད་ལྷ་མོ་དང་ཡང་དག་པར་སྦྱོར་བའི་ཕུན་སུམ་ཚོགས་པ་གསལ་བར་འབར་བ་བསྟན་པ་ནི་དཔལ་རང་གི་དམ་ཚིག་སྟེ་དེའི་སྦྱོར་བ་ནི་སྦྱོར་བའོ། །དགའ་བ་ཆེན་པོའི་དཔལ་རྡོ་རྗེ་དོན་ཡོད་ནི་རྡོ་རྗེ་སེམས་དཔའ་སྟེ། དེ་དགའ་བའི་དམ་ཚིག་ནི་ཐུགས་བདེ་བ་སྐྱེད་པའི་རྒྱུའོ། །རྣལ་འབྱོར་ཐམས་ཅད་བསྐྱེད་པ་ཉིད་ཀྱི་ཕྱིར་རྣལ་འབྱོར་ཐམས་ཅད་དོ། །བཅུད་ཀྱིས་ལེན་ཐམས་ཅད་ཀྱི་མཆོག་ཡིན་པའི་ཕྱིར་བླ་ན་མེད་པའི་བཅུད་ཀྱིས་ལེན་ཏེ་གང་གི་ཕྱིར་དེ་ཐོབ་ན་རྣལ་འབྱོར་པ་ནི་ཐོག་མ་དང་ཐ་མ་མེད་པར་འགྱུར་རོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་རྣམས་ཟིལ་གྱིས་མནན་ནས་མཛེས་བས་ན་མཆོག་གི་དངོས་གྲུབ་ཀྱི་རྒྱལ་
པོའོ། །བཅོམ་ལྡན་འདས་དེ་བཞིན་གཤེགས་པ་དཔལ་རྡོ་རྗེ་སེམས་དཔའ་ནི་རྣལ་འབྱོར་འདི་ཡིན་ནོ། །མཆོག་ནི་དམ་པའོ། །རྡོ་རྗེ་སེམས་དཔའི་སྐུ་ཚེ་ནི་སྲོག་གོ །ན་ཚོད་གཞོན་པ་ནི་དེ་ཉིད་ཀྱིའོ། །ནད་མེད་པ་ནི་གོ་སླའོ། །སྐྱེས་བུ་ཆེན་བོའི་མཚན་སུམ་ཅུ་རྩ་གཉིས་དང་དཔེ་བྱད་བརྒྱད་ཅུ་ནི་གཟུགས་སོ། །ཁ་དོག་ནི་མདངས་སོ། །གཟི་བརྗིད་ནི་འོད་ཟེར་རོ། །མཐུ་ནི་ནུས་པའོ། །སྟོབས་ནི་སྐུ་དང་ཡེ་ཤེས་ཀྱི་སྟོབས་སོ། །སྤྲོ་བ་ནི་བརྩོན་འགྲུས་སོ། །སངས་རྒྱས་དང་བྱང་ཆུབ་སེམས་དཔའ་ཉིད་ཐོབ་བ་ནི་མཆོག་གི་དངོས་གྲུབ་ཆེན་པོ་ཐམས་ཅད་དོ། །རྡོ་རྗེ་ལྷ་མོ་ཚོགས་ཀྱི་ཕུན་སུམ་ཚོགས་པ་ནི་དཔལ་ལོ། །སྐལ་བ་བཟང་པོ་ནི་གོ་སླའོ། །ཀཱི་ལི་ཀཱི་ལའི་རང་བཞིན་ཅན་ནི་དགའ་བ་ཆེན་པོ་དང་ཤིན་ཏུ་བདེ་བ་དང་ཡིད་བདེ་བ་ཐམས་ཅད་དོ། །འདི་རྣམས་ལ་མཆོག་ཏུ་གྲུབ་པ་ཞེས་བྱ་བ་ནི་ཤིན་ཏུ་རྣལ་འབྱོར་གྱི་མཚན་ཉིད་ཅན་གྱི་བཅོམ་ལྡན་འདས་དཔལ་རྡོ་རྗེ་སེམས་དཔའ་ཞེས་བྱའོ། །ཇི་སྲིད་ཀྱི་སྒྲས་ས་དང་ཕ་རོལ་ཏུ་ཕྱིན་པ་རྣམས་གཟུང་བར་བྱའོ། །མ་ལུས་ཤིང་ལུས་པ་མེད་པའི་སྒྲ་ནི་བཤད་ཟིན་ཏོ། །མ་ལུས་པ་ནི་ལུས་པ་མེད་པ་སྟེ། མཆོག་གི་དངོས་གྲུབ་ཆེན་པོ་ཐམས་ཅད་ནི་སངས་རྒྱས་རྒྱས་ཉི་དེ་རྡོ་རྗེ་སེམས་དཔའ་ཉིད་ཐོབ་པའོ། །དེ་ལས་དབང་ཕྱུག་ཆེན་པོ་ཉིད་ནི་ཁམས་གསུམ་པའི་ཆོས་ཀྱི་རྒྱལ་སྲིད་ཐོབ་པའོ། །དེའི་བདག་པོ་ཉིད་ནི་གཙོ་བོ་ཉིད་དོ། །དེར་ཚིགས་ཐམས་ཅད་ལས་གསུངས་པའི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པའི་ལས་ཀྱི་ཚོགས་གང་གི་ཐོག་མར་ཡོད་པ་གང་ཡིན་པ་དེ་གྲུབ་པ་ནི་རྫོགས་པའི་རྒྱུ་ཉིད་དུ་གྲུབ་པའོ། །རྒྱུ་གང་གི་ཕྱིར་ཞེ་ན་རབ་ཏུ་གྲུབ་པར་འགྱུར་ཞེས་གསུངས་ཏེ། ཕྱག་རྒྱ་ཆེན་པོ་ལ་སོགས་པ་དང་བཅས་པའི་རྣལ་འབྱོར་འདིས་གང་གི་ཕྱིར་ཕྱག་རྒྱས་བཏབ་པ་ཙམ་གྱིས་སྐད་ཅིག་མས་གྲུབ་པར་འགྱུར་རོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་རྒྱུ་གང་གི་ཕྱིར་ཞེས་བྱ་བ་ལ་རྒྱུ་གང་གི་ཕྱིར་རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་རྣལ་འབྱོར་དང་རྣལ་འབྱོར་ཆེན་པོ་དང་ཤིན་ཏུ་རྣལ་འབྱོར་ཕྱག་རྒྱ་དང་བཅས་པ་རྣམས་ཀྱིས་རྣལ་འབྱོར་རྣམས་དེ་བཞིན་གཤེགས་པར་འགྱུར་ཞེས་བྱ་བའི་ཕྱོགས་སྔ་མ་འདི་ཡོད་པས་
འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་ཀྱིས་བཅིངས་པའི་མི་གནས་པའི་མྱ་ངན་ལས་འདས་པའི་སྲིད་པའི་རང་བཞིན་དང་སྦྲུལ་པའི་སྐུའི་གཟུགས་ཀྱིས་སངས་རྒྱས་རྣམས་ཀྱི་སྤྱོད་པ་སྟེ། དེའི་ཕྱིར་རེ་ཞིག་ཕྱག་རྒྱ་ཁས་བླང་བར་བྱའོ། །གཟུགས་བརྙན་དང་མཚུངས་པའི་དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་ཀྱི་རྡོ་རྗེ་ལ་ལྷག་པར་མོས་ནས་རྣལ་འབྱོར་པ་རྣམས་ཀྱིས་ཕྱག་རྒྱ་བཅིངས་ན། ཕྱག་རྒྱ་ཆེན་པོ་ལ་སོགས་པའི་རང་བཞིན་ཅན་དུ་འགྱུར་ཏེ། གཞན་དུ་མ་ཡིན་ནོ།། དེའི་ཕྱིར་ན་ཕྱག་རྒྱ་ནི་རྣལ་འབྱོར་ལ་རྟག་ཏུ་འབྲས་བུའི་ཚུལ་གྱིས་རབ་ཏུ་གནས་པ་ཡིན་ཏེ། རྣལ་འབྱོར་དང་རྗེས་སུ་རྣལ་འབྱོར་དང་ཐམས་ཅད་རྣལ་འབྱོར་དང་ཤིན་ཏུ་རྣལ་འབྱོར་དང་རྣལ་འབྱོར་ཆེན་པོ་རྣམས་ནི་ཕྱག་རྒྱ་སྐྱེད་པའི་རྒྱུར་གྱུར་པ་ཁས་བླང་བར་བྱའོ། །རྣལ་འབྱོར་གྱི་ཕྱག་རྒྱ་འགྲུབ་པར་འགྱུར་ན། རྣལ་འབྱོར་གང་གིས་འགྲུབ་པར་འགྱུར་ཞེ་ན། རྣལ་འབྱོར་ཁྱད་པར་ཅན་གྱིས་བསྒྲུབ་པར་བྱ་ཞེས་བྱ་བའོ། །གང་གི་རྣལ་འབྱོར་སྒྲུབ་པར་བྱེད་པའི་ཁྱད་པར་གང་ཡིན་ཞེ་ན། རྣལ་འབྱོར་དམ་ཚིག་གིས་སྒྲུབ་བྱེད། །ཅེས་བྱ་བ་ལ་དམ་ཚིག་ནི་རིགས་ཐམས་ཅད་ཀྱི་ཕྱག་རྒྱ་རྣམ་པ་བཞི་སྟེ་དེ་ཉིད་སྒྲུབ་པ་ནི་གྲུབ་པའི་གང་ལ་ཡོད་པ་དེ་ནི་དམ་ཚིག་གིས་སྒྲུབ་པར་བྱེད་པ་སྟེ། ཕྱག་རྒྱ་རྣམས་ཁོ་ན་རྣལ་འབྱོར་ཐམས་ཅད་སྐྱེད་པར་བྱེད་པའི་རྒྱུ་ཡིན་ནོ་ཞེས་བྱ་བའི་ཐ་ཚིག་གོ །ཇི་ལྟར་རྣལ་འབྱོར་གྱི་ཕྱག་རྒྱ་གྲུབ་པར་འགྱུར་བ་དང༌། གཟུགས་མི་མཐུན་པའི་ཕྱག་རྒྱས་ཀྱང་རྣལ་འབྱོར་འགྲུབ་པར་འགྱུར་ཞེ་ན། སེམས་ཞེས་བྱ་བ་ལ་སོགས་པ་ལ། ཇི་ལྟར་སེམས་ནི་རྣམ་པར་ཤེས་པའི་སྒྱུ་མ་ལྟ་བུ་དོན་དམ་སྟོང་པས་ཏེ་དེ་མ་གྲུབ་པ་ནི་སྐྱེ་བ་མེད་པའོ། །ལུས་དང་བྲལ་བ་ནི་རང་རིག་པ་ཙམ་མོ། །ལུས་ཀྱང་དོན་དམ་པར་རང་རིག་པ་དང་བྲལ་བ་སྟེ། རང་རིག་པ་དང་ལུས་རང་གི་རང་བཞིན་དུ་མཐར་ཐུག་པ་ཉིད་ཀྱི་ཕྱིར་རོ། །དེའི་ཕྱིར་ལུས་དེ་རྩིག་པ་དང་འདྲ་བའོ། །དེ་གལ་ཏེ་རྩིག་པ་དང་འདྲ་བར་བྱ་བ་མེད་ཅིང་སེམས་དང་བྲལ་བ་ཡིན་ན་ཡང་ཇི་ལྟར་མེད་ན་མི་འབྱུང་བ་དེ་བཞིན་དུ་ཕྱག་རྒྱ་དང་རྣལ་འབྱོར་
དག་ཕན་ཚུན་ཐ་དད་པའི་རང་བཞིན་ན་ཡང་འདས་མ་ཐག་ཏུ་བཤད་པའི་མ་བརྟགས་ན་ཉམས་དགའ་བ་མེད་ན་མི་འབྱུང་བའི་ཆོ་ག་འདིས་བཅོམ་ལྡན་འདས་རྡོ་རྗེ་འཆང་ཆེན་པོས་བརྗོད་པ་ནི་གསུངས་པ་ཡིན་ནོ། །ཇི་ལྟར་བརྗོད་ཅེ་ན། །ཇི་ལྟར་ཞེས་བྱ་བ་ལ་སོགས་པས་རྒྱས་པར་བཤད་པ་གསུངས་ཏེ་འདས་མ་ཐག་ཏུ་བཤད་པའི་རིགས་པས། ལུས་སེམས་ཀྱིས་འགྲུབ་པར་འགྱུར་བ་དང༌། སེམས་ཀྱང་ལུས་ཁོ་ནས་འགྲུབ་པར་འགྱུར་བ་དེ་བཞིན་དུ་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་རང་བཞིན་རྣམས་བདག་ཉིད་ཀྱི་རྣལ་འབྱོར་ནི་རང་གི་ཕྱག་རྒྱའི་ལྷའི་ལྷག་པར་མོས་པས་གྲུབ་པ་དང༌། རྣལ་འབྱོར་ལ་ལྷག་པར་མོས་པ་ཡང་ཇི་ལྟ་བ་བཞིན་དུ་བཤད་པ་རྣམ་པ་བཞིའི་རང་བཞིན་ཏེ། དེ་ཡང་དམ་ཚིག་སྒྲུབ་པ་ཡིས། །ཞེས་བྱ་བ་ནི་རང་གི་ལྷའི་ཕྱག་རྒྱ་ལ་སོགས་པའི་རང་བཞིན་ཅན་གྱི་སྒྲུབ་པ་རྣམས་ཀྱིས་སྒྲུབ་པ་པོ་ལ་འགྲུབ་པར་འགྱུར་རོ། །དམ་ཚིག་དང་རྣལ་འབྱོར་དེ་དག་གིས་རྣལ་འབྱོར་པ་རྣམས་ལ་ཅིར་འགྱུར་ཞེ་ན་དེ་ལྟར་ཞེས་བྱ་བ་ལ་སོགས་པ་ལ། དེ་ལྟར་སྒྲུབ་པ་པོ་ལ་རྣལ་འབྱོར་གྱིས་ཕྱག་རྒྱ་སྐྱེད་པར་འགྱུར་བ་དང༌། ཕྱག་རྒྱས་ཀྱང་རྣལ་འབྱོར་སྐྱེད་པར་འགྱུར་ཏེ་ཕན་ཚུན་དུ་བསྒྲུབ་པའི་ཕྱིར་རོ། །དེ་བས་ན་བྱེད་པར་འགྱུར་བའི་དམ་ཚིག་དང༌། རྣལ་འབྱོར་དག་གི་རྟེན་ཅིང་འབྲེལ་པར་འབྱུང་བའི་ཆོས་ཉིད་ཀྱི་སྟོབས་ཀྱིས་བདག་མེད་པའི་རྣལ་འབྱོར་པ་རྣམས་ཀྱང་འགྲུབ་པར་འགྱུར་རོ། །དེ་ཡང་ན་དོན་དམ་པར་མེད་པའི་རང་བཞིན་ཅན་རྟག་པའི་བདག་ཉིད་ཅན་གྱི་དེ་བཞིན་གཤེགས་པ་རྣམས་སོ་ཞེས་བྱ་བའོ། །ད་ནི་ཕྱག་རྒྱ་དང་རྣལ་འབྱོར་དག་གི་རྗེས་སུ་བསྟན་པ་བསྒྲུབ་པའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། སྐུ་གསུང་ཐུགས་ཀྱི་རྡོ་རྗེ་རྣམས་ཀྱི་སྐུ་ཐམས་ཅད་དུ་བསྟན་པ་ཡིན་པའི་ཕྱིར་ཕྱག་རྒྱ་སྟེ། ཕྱག་རྒྱ་རྣམ་པ་བཞི་པོར་བརྗོད་པ་ཡིན་ནོ། །ནིའི་སྒྲ་ནི་ངེས་བར་གཟུང་བ་ལའོ། །སྐུ་དེ་ཡང་བདེ་བ་རྣམས་ཀྱིས་བསྟན་པར་འགྱུར་བ་ཡིན་ནོ། །དེ་ཅིའི་ཕྱིར་ཞེ་ན། སྡུག་བསྔལ་དང་ལྡན་པའི་རྣལ་འབྱོར་པ་སེམས་གཡེང་བར་འགྱུར་ཞིང་གཡོ་བར་འགྱུར་རོ། །ཡང་ན་འཁོར་བས་ཅི་ཞིག་བྱ་ཞེས་བྱ་བའི་སྡུག་བསྔལ་གྱི་ཟིལ་གྱིས་མནན་པས་བདག་ཉིད་གསོད་པར་བྱེད་པའོ། །ད་ནི་
རྣལ་འབྱོར་སེམས་ལས་བྱུང་བ་ཞེས་བྱ་བ་ལ། སྐུ་བརྟན་པར་གྱུར་བ་གང་ཡིན་པ་དེ་ནི་རྣལ་འབྱོར་སེམས་ལས་བྱུང་བ་སྟེ། རྣལ་འབྱོར་གྱི་རྗེས་སུ་རྣལ་འབྱོར་ལས་བྱུང་བའོ། །དེ་ཡང་རྣལ་འབྱོར་པའི་ཡིད་དགའ་བ་རྣམས་ཀྱིས་འགྲུབ་པར་འགྱུར་རོ། །དེ་ཅིའི་ཕྱིར་ཞེ་ན་ཡིད་མི་དགའ་བ་ཞེས་བྱ་བ་ལ། གང་གི་ཕྱིར་ཡིད་མི་དགའ་བ་རྣམས་ཀྱིས་སེམས་གཡོ་ཞིང་རྣལ་འབྱོར་པ་གཡེང་བ་ཐོབ་པའི་ཕྱིར་རོ། །ཡང་ན་ཉན་ཐོས་དང་རང་སངས་རྒྱས་ཀྱི་ཕུང་པོ་ལྷག་མ་མེད་པའི་མྱ་ངན་ལས་འདས་པ་ཐོབ་པ་ནི་མངོན་དུ་བྱེད་བ་ཡིན་ནོ། །དེ་བས་ན་ཉེས་པ་འདིར་མི་འགྱུར་བའི་ཕྱིར་འབད་པ་ཐམས་ཅད་དེ་བརྩོན་འགྲུས་ཀྱི་ཕྱག་རྒྱ་དང༌། རྣལ་འབྱོར་དག་རྗེས་སུ་སྒྲུབ་པ་ཡོངས་སུ་རྫོགས་པར་བྱེད་པའི་རྣལ་འབྱོར་པས། དཀའ་ཐུབ་མེད་ཅིང་ངེས་པ་མེད། །བདེ་དང་དགའ་བས་བསྒྲུབ་པར་བྱ། །ཞེས་བྱ་བ་ནི་དེ་ལ་བྱ་བའི་རྒྱུད་ལས་གསུངས་པའི་སྐྱིལ་མོ་ཀྲུང་གི་ངེས་པ་ནི་དཀའ་ཐུབ་བོ། །བྱ་བའི་རྒྱུད་ཁོ་ནར་གསུངས་པའི་ལོ་མ་དང་ལྕི་བ་ལས་བྱུང་བའི་ནས་དང༌། སློང་མོ་ཟ་བ་ལ་སོགས་པའི་ངེས་པའི་རང་བཞིན་ཅན་ནི་ངེས་པ་རྣམས་སོ། །ཤིན་ཏུ་རྣལ་འབྱོར་གྱི་ངེས་པ་ནི་བདེ་བའོ། །དེ་ལས་བྱུང་བའི་ཡིད་བདེ་བས་སྦྲུལ་བ་ལ་སོགས་པ་ནི་དགའ་བའོ། །བདེ་བ་བསྒྲུབ་བར་བྱའོ་ཞེས་བྱ་བ་གང་གསུངས་པའི་བདེ་བ་དེ་གང་ཡིན་པ་མི་ཤེས་པ་དེ་བསྟན་པའི་ཕྱིར། འདོད་པ་ཀུན་ལ་ལོངས་སྤྱོད་ཅིང༌། །ཞེས་བྱ་བ་ལ་སོགས་པ་གསུངས་ཏེ་དེ་ཡང་བཤད་ཟིན་ཏོ། །འདོད་པ་ཀུན་ལ་ལོངས་སྤྱོད་པ་ནི་ཕྱི་རོལ་གྱི་ཡང་ཡོད་པར་རྟོག་པ་དེ་བསལ་བར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བ་བླ་ན་མེད་པའི་ཐེག་པ་ཆེན་པོ་དམ་ཚིག་ཆེན་པོའི་རྣལ་འབྱོར་ནི་བཤད་ཟིན་ཏོ། །ཤིན་ཏུ་རྣལ་འབྱོར་གྱི་སྒོམ་པའི་རང་བཞིན་ཅན་ནི་བཅོམ་ལྡན་འདས་རྡོ་རྗེ་སེམས་དཔའ་སྟེ་དེ་ཉིད་མཆོག་ཏུ་བདེ་བ་ཞེས་བྱའོ། །འདིས་ནི་འདི་ལྟར་བཤད་པར་འགྱུར་ཏེ། ཤིན་ཏུ་རྣལ་འབྱོར་གྱི་སྒོམ་པའི་རང་བཞིན་ཅན་རྡོ་རྗེ་སེམས་དཔའ་ནི་འདིར་འདོད་པ་ཀུན་གྱི་ལོངས་སྤྱོད་པ་ལ་བརྟེན་པའོ། །དེ་ཉིད་བདེ་བའོ། །དེས་ཕྱག་རྒྱ་དང་རྣལ་འབྱོར་དག་སྒྲུབ་པ་པོའི་རྒྱུད་ལ་
རྫོགས་པར་འགྱུར་གྱི་ཕྱིའི་ཡུལ་གྱི་བདེ་བ་ནི་མ་ཡིན་ཏེ། དེ་རྣམ་པར་གཡེང་བའི་རང་བཞིན་ཅན་ཉིད་ཡིན་པའི་ཕྱིར་རོ། །དེ་ལྟར་ཤིན་ཏུ་རྣལ་འབྱོར་སྒོམ་པའི་མཚན་ཉིད་ཅན་བསྒོམ་པའི་ཕྱག་རྒྱ་དང་རྣལ་འབྱོར་དག་གིས་རྗེས་སུ་སྒྲུབ་པ་བསྟན་ནས། ད་ནི་ཤིན་ཏུ་རྣལ་འབྱོར་ཁོ་ན་ལས་བྱུང་བའི་དགའ་བ་དང་ཡིད་བདེ་བ་དེ་དག་ཉིད་རྗེས་སུ་སྒྲུབ་པ་བསྟན་པའི་ཕྱིར། དེ་ལ་འགའ་ཞིག་ཅེས་བྱ་བ་ལ་སོགས་པ་གསུངས་ཏེ། ཐམས་ཅད་ཀྱི་དམ་ཚིག་ནི་རིགས་ཐམས་ཅད་ཀྱི་ཕྱག་རྒྱ་རྣམས་སོ། །རྣལ་འབྱོར་ནི་ཇི་ལྟ་བ་བཞིན་དུ་བཤད་པའི་རྣམ་པ་བཞིའོ། །དེ་དག་རྗེས་སུ་སྒྲུབ་པ་ནི་རྫོགས་པའི་རྒྱུའོ། །དཀའ་ཐུབ་ལ་སོགས་པ་རྣམས་ཀྱིས་རྣལ་འབྱོར་པའི་སེམས་གཡེང་བར་འགྱུར་བ་དང༌། ཇི་ལྟ་བ་བཞིན་དུ་བཤད་པའི་རྣལ་འབྱོར་ལ་སྦྱོར་བར་མི་འགྱུར་བ་ནི་མཉམ་པར་གཞག་པར་མི་འགྱུར་བའོ། །དེའི་ཕྱིར་སྐྱིལ་མོ་ཀྲུང་ལ་སོགས་པའི་ངེས་པ་དང་བྲལ་བས་ཕྱག་རྒྱ་བཅིངས་ཏེ་བདག་ལ་བྱིན་གྱིས་བརླབ་པ་བྱས་ནས། དེའི་འོག་ཏུ་ཅི་འདོད་པའི་ལས་དང་ལྡན་པ་དང༌། ཀུན་ཟ་བ་ནི་རྣལ་འབྱོར་དང་རྗེས་སུ་མཐུན་པའི་ཟས་ཟ་བ་སྟེ་ཁ་ན་མ་ཐོ་བ་དང་བཅས་པའི་ཉན་ཐོས་ལ་སོགས་པ་ནི་བཟའ་བ་མ་ཡིན་པ་སྟེ། ངེས་པར་གཟུང་བ་རྣམས་ལ་དེ་དག་སོ་སོར་བཀག་པའི་ཕྱིར་རོ། །གསང་བ་སྲ་ཞིང་མཐོ་བའི་ཐུན་མོང་གི་ཏིང་ངེ་འཛིན་གྱི་ལེའུ་ལས་གསུང་པའི་ཕྱིར་རོ། །ཕྱག་རྒྱ་ཆེན་པོ་ལ་སོགས་པའི་སྒོམ་པ་བྱེད་པས་ན་ཀུན་བྱེད་པའོ། །ཅི་འདོད་བྱ་བ་ལ་སྤྱོད་པ། །ཞེས་བྱ་བ་འདིའི་རྒྱས་པར་བཤད་པ་ནི་ཅི་འདོད་པར་ནི་སྤྱོད་པའོ་ཞེས་བྱ་བའོ། །དེ་དག་གི་ཕྱིར་སྤྱོད་པ་ནི་སྤྱོད་ལམ་དུ་བརྗོད་པའི་ཕྱིར་སླར་སྤྱོད་པ་དེ་ཉིད་རྣམ་པར་བཤད་པར་བྱ་བའི་ཕྱིར། ལྡང་བའམ་ཞེས་བྱ་བ་ལ་སོགས་པ་གསུངས་ཏེ། གང་དང་དེར་ཞེས་བྱ་བས་གནས་ཀྱི་ངེས་པ་མེད་པ་བསྟན་ཏོ། །སྤྱོད་ལམ་གང་དང་གང་གིས་སྒོམ་པར་བྱེད་པ་འདོད་པ་དེ་དང་དེས་བྱ་བ་ཡིན་པས་ན་ཇི་བཞིན་དེའོ། །ཐམས་ཅད་བདག་ཉིད་སྒྲུབ་པར་བྱེད། །ཅེས་བྱ་བ་ནི་བརྟན་པ་དང་གཡོ་བའི་དངོས་པོ་ཐམས་ཅད་དོ། །དཔལ་ལྡན་སྡུག་བསྔལ་ཀུན་འཕྲོག་པའི། །རྣལ་འབྱོར་འདི་ཞེས་བྱ་བ་ནི། །ཤིན་ཏུ་རྣལ་འབྱོར་འདི་སྡུག་བསྔལ་ལ་སོགས་
དང་བྲལ་བ་སྟེ། ཤིན་ཏུ་རྣལ་འབྱོར་ལས་བྱུང་བའི་ཡིད་བདེ་བ་ཐམས་ཅད་ཀྱི་རང་བཞིན་ཅན་གྱི་བཅོམ་ལྡན་འདས་རྡོ་རྗེ་སེམས་དཔའ་དེ་ཉིད་འདིར་མཆོག་ཏུ་ཡིད་བདེ་བའི་ཡིན་ཏེ་ཤིན་ཏུ་རྣལ་འབྱོར་གྱི་ཏིང་ངེ་འཛིན་ཞེས་བྱ་བར་བརྗོད་དོ། །ཕྱིའི་བུད་མེད་ལ་སོགས་པ་བསྟེན་པ་ལས་བྱུང་བའི་བདེ་བ་ནི་མ་ཡིན་ཏེ་ཤིན་ཏུ་གཡེང་བའི་རང་བཞིན་ཅན་ཡིན་པའི་ཕྱིར་རོ། །དེ་ལྟར་ཕྱག་རྒྱ་དང་རྣལ་འབྱོར་དག་གི་རྗེས་སུ་སྒྲུབ་པ་བསྟན་ནས་ད་ནི་རིགས་ཐམས་ཅད་ཀྱི་རྣལ་འབྱོར་ཙམ་འཆིང་བ་ཇི་ལྟར་བྱ་བ་དེ་བསྟན་པར་བྱ་བའི་ཕྱིར། དེ་ལ་རྣལ་འབྱོར་ཐམས་ཅད་བཅིང་བ་ཇི་ལྟར་ཡིན་ཞེ་ན་ཞེས་བྱ་བ་གསུངས་ཏེ་རྣལ་འབྱོར་ཀྱང་ཡིན་ལ་ཐམས་ཅད་ཀྱང་ཡིན་པས་ན་རྣལ་འབྱོར་ཐམས་ཅད་དེ་ཇི་ལྟ་བ་བཞིན་དུ་བཤད་པའི་རིགས་ཀྱི་རྣལ་འབྱོར་རོ། །དེ་སྒྲུབ་པ་པོས་ཇི་ལྟར་བཅིང་བར་བྱ་ཞེས་བྱ་བའི་དོན་བསྟན་ཏོ། །ཐམས་ཅད་བྱེད་ཅིང་ཞེས་བྱ་བ་ལ་ཤིན་ཏུ་མཉམ་པར་གཞག་པའི་རྣལ་འབྱོར་གྱི་གནས་སྐབས་སུ་ཕྱག་རྒྱ་ཆེན་པོ་ལ་སོགས་པ་བཅིང་བ་ཐམས་ཅད་བྱེད་པ་དང་མཉམ་པར་མ་བཞག་པའི་རྣལ་འབྱོར་གྱི་གནས་སྐབས་སུ་ཁྲུས་ལ་སོགས་པ་ལྷ་ཐམས་ཅད་ཀྱི་བྱ་བ་དང་རང་གི་ལྷའི་སྙིང་པོ་དང༌། དེ་དང་རྗེས་སུ་མཐུན་པར་བརྗོད་པའི་གླུ་བླངས་པ་སྟེ། མཉམ་པར་མ་བཞག་པའི་རྣལ་འབྱོར་གྱི་གནས་སྐབས་ཁོ་ནར་གཞན་གང་རུང་བ་བརྗོད་པའོ། །ཤིན་ཏུ་མཉམ་པར་བཞག་པ་དང༌། ཤིན་ཏུ་མཉམ་པར་མ་བཞག་པའི་གནས་སྐབས་སུ་ཕྱག་རྒྱ་ཆེན་པོ་ལ་སོགས་པ་བསམ་པའོ། །དེ་བཞིན་དུ་ཕྱག་རྒྱ་ཆེན་པོ་ལ་སོགས་པ་རྫོགས་པར་བྱེད་པའི་རྣམ་པ་དང་དེས་ཕྱག་རྒྱ་ཆེན་པོ་ལ་སོགས་པ་སྒྲུབ་པར་བྱེད་པའོ། །ཡེ་ཤེས་ཙམ་ལ་སྙོམས་པར་འཇུག་པ་ཞེས་བྱ་བ་ལ་ཡེ་ཤེས་དང་བྲལ་བའི་རང་གི་ལྷའི་རྣམ་པ་རང་གི་རྒྱུད་ཀྱི་སེམས་དང་སེམས་ལས་བྱུང་བ་རྣམས་དམིགས་པ་གཅིག་པའི་རང་བཞིན་ཅན་ནི་ཡེ་ཤེས་ཙམ་ལ་སྙོམས་པར་ཞུགས་པའོ། །དེ་ལ་སྙོམས་པར་འཇུག་པའི་རྣལ་འབྱོར་ཡང་ཡང་མངོན་དུ་བྱ་བའོ། །རང་བཞིན་ཞེས་བྱ་བ་ནི་ཀུན་གཞིའི་རྣམ་པར་ཤེས་པ་རྣམས་དང་ཉོན་མོངས་པ་ཅན་གྱི་ཡིད་དང་ཡིད་ཀྱི་རྣམ་པར་ཤེས་པ་དང་མིག་དང་རྣ་བ་དང་སྣ་དང་ལྕེ་དང་ལུས་ཀྱི་རྣམ་པར་ཤེས་པ་རྣམས་སོ། །རང་བཞིན་
འདིས་ཡེ་ཤེས་ཙམ་ལ་སྙོམས་པར་འཇུག་པས་རྣལ་འབྱོར་པས་སྙོམས་པར་ཞུགས་པར་བྱའོ། །འདིས་ནི་འདི་ལྟར་བཤད་པར་འགྱུར་ཏེ་རང་གི་སྙིང་གར་གནས་པའི་སེམས་དཔའི་རྡོ་རྗེ་ལ་རང་གི་ལྷའི་སྙིང་པོ་རྣམ་པར་བསམས་ནས་དེ་ཉིད་ཡིད་ཀྱིས་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱ་སྟེ། དེའི་རྗེས་ལ་དེ་ཉིད་དབྱངས་བཅུ་དྲུག་དང་བཅས་པའི་ཟླ་བའི་དཀྱིལ་འཁོར་གྱི་རྣམ་པ་སྟེ། སླར་ཡང་དེའི་སྟེང་དུ་ཡི་གེ་ཀལ་སོགས་པ་དང་ལྡན་པའི་རང་གི་ལྷའི་སྙིང་པོ་ལས་ཟླ་བའི་དཀྱིལ་འཁོར་གཉིས་པའོ། །དེ་ལས་སླར་ཡང་རང་གི་ལྷའི་སྙིང་པོ་དང་བཅས་པའི་དང་པོའི་རྡོ་རྗེ་རྩེ་ལྔ་པ་དེའི་དབུས་སུ་རང་གི་ལྷའི་སྙིང་པོ་དེ་བཞིན་དུ་བསམས་ལ་ཕྱག་རྒྱའི་ང་རྒྱལ་བསྒོམ་པར་བྱའོ། །ཕྱག་རྒྱའི་ངོ་བོ་དེ་ཡང་སེམས་དཔའི་བྱིན་གྱིས་བརླབ་པའི་སྦྱོར་བས་རྡོ་རྗེ་སེམས་དཔའི་རྣལ་འབྱོར་པས་བདག་ཉིད་རྡོ་རྗེ་སེམས་དཔར་བསྒོམ་པར་བྱའོ། །གཞན་དག་གི་རྣལ་འབྱོར་བས་ནི་སྔར་བཤད་པའི་ཚུལ་གྱིས་རང་གི་ལྷའི་གཟུགས་སུ་བསྒོམ་པར་བྱ་སྟེ། དེ་ལྟར་རང་གི་རང་བཞིན་སོ་སོར་རྟོགས་པས་རང་བཞིན་གྱི་ཡེ་ཤེས་ཙམ་གྱིས་སྙོམས་པར་འཇུག་པ་ལ་སྙོམས་པར་ཞུགས་པར་འགྱུར་རོ། །དེ་ལྟར་རྣལ་འབྱོར་ཙམ་བཅིང་བ་བསྟན་ནས། ད་ནི་རྗེས་སུ་རྣལ་འབྱོར་བཅིང་བ་དང་དེའི་རང་བཞིན་རྒྱས་པར་བཤད་པ་བསྟན་པར་བྱ་བའི་ཕྱིར། དེ་ལ་ཇི་ལྟར་རྣལ་འབྱོར་ཐམས་ཅད་བཅིང་བ་དང་ལུང་བསྟན་པ་ཇི་ལྟར་ཡིན་ཞེས་བྱ་བ་གསུངས་ཏེ། ཐམས་ཅད་ཀྱང་ཡིན་ལ་རྣལ་འབྱོར་ཡང་ཡིན་པས་ན་ཐམས་ཅད་རྣལ་འབྱོར་ཏེ་རིགས་ཀྱི་ལྷ་ཐམས་ཅད་ཀྱི་རྗེས་སུ་རྣལ་འབྱོར་རོ། །དེའི་བཅིང་བ་ནི་སྒྲུབ་པ་པོས་ཇི་ལྟར་བྱ་བ་ཡིན་ཞེས་བྱ་བའི་དོན་ཏོ། །དེའི་རང་བཞིན་བསྟན་པ་ནི་ལུང་བསྟན་པ་ཡང་ངོ༌། །ཇི་ལྟ་བ་བཞིན་དུ་བཤད་པའི་རྗེས་སུ་རྣལ་འབྱོར་ནི་རང་གི་ལྷའི་སྦྱོར་བའོ། །རང་གི་ལྷའི་སྦྱོར་བ་དེ་ལས། དངོས་གྲུབ་ཐམས་ཅད་རབ་སྦྱོར་བས། །ཞེས་བྱ་བ་ལ་དངོས་གྲུབ་ཀྱང་ཡིན་ལ་ཐམས་ཅད་ཀྱང་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་རང་བཞིན་སྣ་ཚོགས་པའི་རྣམ་པ་ཅན་ནོ། །དེ་རྣམས་རབ་ཏུ་སྦྱོར་བ་ནི་རང་གི་སྒྲུབ་པའི་ཆོ་གའོ། །དངོས་གྲུབ་ཐམས་ཅད་རབ་ཏུ་སྦྱོར་བའི་རྒྱུ་དེ་ལས། ཡེ་ཤེས་ཙམ་ལས་རབ་སྦྱོར་བས། །ཞེས་བྱ་བ་ནི་རང་གི་ལྷའི་སྒོམ་
པས་ཏེ་རྗེས་སུ་རྣལ་འབྱོར་གྱིས་བསྒོམ་པ་འདིར་རྣལ་འབྱོར་ཞེས་བྱ་བ་བརྗོད་པ་ནི་རྒྱས་པར་བཤད་ཅིང་བསྟན་པ་ཡིན་ནོ་ཞེས་བྱ་བའི་དོན་ཏོ། །རྗེས་སུ་རྣལ་འབྱོར་འདི་ཐམས་ཅད་དགུག་པ་ལ་སོགས་པའི་ཆོ་ག་ནི་སྔར་བཤད་པ་ཡིན་ཏེ་ལར་ཡང་བཤད་པར་མི་བྱའོ། །དེ་ལྟར་རྗེས་སུ་རྣལ་འབྱོར་བཅིང་བ་དང་ལུང་བསྟན་པ་བསྟན་ནས་ད་ནི་ཐམས་ཅད་རྣལ་འབྱོར་དང་རྣལ་འབྱོར་ཆེན་པོ་དང༌། ཤིན་ཏུ་རྣལ་འབྱོར་རྣམས་ཀྱི་བཅིང་བ་དང༌། ལུང་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་རྡོ་རྗེ་སེམས་དཔའ་བདག་ཉིད་སྦྱོར་བས་ན་རྡོ་རྗེ་སེམས་དཔའ་བདག་ཉིད་སྦྱོར་བ་སྟེ། འདོད་པའི་ལྷའི་རྣལ་འབྱོར་སྔོན་དུ་འགྲོ་བའི་ཐམས་ཅད་རྣལ་འབྱོར་ཏེ་རྣལ་འབྱོར་ཆེན་པོ་དང༌། ཤིན་ཏུ་རྣལ་འབྱོར་རོ། །རྡོ་རྗེ་སེམས་དཔའ་བདག་ཉིད་སྦྱོར་བ་དེ་ལས་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱའི་མཆོད་པ་བཅུ་གཉིས་དང༌། རང་གི་རིགས་ཀྱི་དཀྱིལ་འཁོར་ལས་གསུངས་པའི་མཆོད་པ་བཅུ་དྲུག་གི་ཕྱི་ནས་སྦྱོར་བ་ནི་མཆོད་པ་ཀུན་གྱི་རྗེས་སུ་སྦྱོར་བའོ། །རྗེས་སུ་སྦྱོར་བ་དེས་རྣལ་འབྱོར་ཐམས་ཅད་རབ་སྦྱོར་བ་ནི་ཐམས་ཅད་རྣལ་འབྱོར་དང་ཤིན་ཏུ་རྣལ་འབྱོར་རྣམས་བསྒོམས་པ་གང་ཡིན་པ་དེ་ནི་སྐབས་འདིར་རྣལ་འབྱོར་ཞེས་བྱ་བར་བརྗོད་པ་ཡིན་ནོ། །འདི་རྣམས་ཀྱི་ཆོ་ག་རྒྱས་པར་ཡང་སྔར་བཤད་པ་ཡིན་ཏེ་དེ་ཉིད་ལས་རྟོགས་པར་བྱའོ། །ཐམས་ཅད་རྣལ་འབྱོར་གྱི་ཆོ་ག་འདི་ཡང་ཐམས་ཅད་ལ་སྦྱིན་པར་མི་བྱའོ་ཞེས་བྱ་བ་བསྟན་པར་བྱ་བའི་ཕྱིར་དེ་ལ་འདི་ལྟར་བརྗོད་པར་བྱའོ་ཞེས་བྱ་བ་གསུངས་ཏེ་རྣལ་འབྱོར་རམ་རྗེས་སུ་རྣལ་འབྱོར་རམ་ཀུན་གྱི་ཐུན་མོང་ཐམས་ཅད་རྣལ་འབྱོར་དང༌། རྣལ་འབྱོར་ཆེན་པོ་དང་ཤིན་ཏུ་རྣལ་འབྱོར་ནི་ཤིན་ཏུ་གསང་བ་ལས་ཀྱང་མཆོག་ཡིན་པས་ན་དེའི་ཕྱིར་སོ་སོའི་སྐྱེ་བོ་ལ་བསྟན་པར་མི་བྱའོ། །ནིའི་སྒྲ་ནི་ངེས་པར་གཟུང་བ་སྟེ། སོ་སོའི་སྐྱེ་བོ་ལ་བཤད་པར་མི་བྱ་བ་དེ་ཁོ་ནའོ། །དེ་ལ་དེ་ཁོ་ན་ཉིད་དང་ཆོས་དང་དམ་ཚིག་རྣམས་མི་ཤེས་ཤིང་ལྷག་པར་མི་མོས་པ་ནི་འདིར་སོ་སོའི་སྐྱེ་བོར་མངོན་པར་འདོད་པའོ། །དེ་ཅིའི་ཕྱིར་ཞེ་ན། རྡོ་རྗེ་སློབ་དཔོན་སློབ་མ་མཆོག །དེ་ཉིད་དད་པའི་རྗེས་འབྲངས་ལ། །ཐམས་ཅད་རྣལ་འབྱོར་ཆོ་ག་སྦྱོར། །གཞན་རྣམས་ལ་ནི་རིམ་གྱིས་སོ། །ཞེས་བྱ་
བ་ལ་རྡོ་རྗེ་སློབ་དཔོན་དང་སློབ་མ་མཆོག་ནི་རྡོ་རྗེ་སློབ་དཔོན་དང་སློབ་མ་མཆོག་སྟེ། རིགས་ཐམས་ཅད་ཀྱི་དཀྱིལ་འཁོར་སྒྲུབ་པར་བྱེད་པ་ནི་རྡོ་རྗེ་སློབ་དཔོན་རྣམས་སོ། །རྒྱལ་བུ་རྒྱལ་ཚབ་གཞོན་ནུ་མིང་ཅན་གྱི་ཕྱིར་སྒྲུབ་པར་བྱེད་པ་ནི་སློབ་མ་མཆོག་གོ །རྡོ་རྗེ་སློབ་དཔོན་དང་སློབ་མ་མཆོག་དེ་རྣམས་ལ་ཐམས་ཅད་རྣལ་འབྱོར་གྱི་ཆོ་ག་སྦྱར་བར་བྱའོ། །ཇི་ལྟ་བ་བཞིན་དུ་བཤད་པའི་སྐུ་གསུང་ཐུགས་ཀྱི་གསང་བ་རྡོ་རྗེ་དང་དྲིལ་བུ་དང་དམ་ཚིག་གི་མིང་དང་ལྡན་པ་རྣམས་ནི་དེ་ཁོ་ན་ཉིད་དོ། །དད་པས་དེའི་རྗེས་སུ་འབྲང་བ་ནི་སྔོན་དུ་བྱེད་པའི་ལྷག་པར་མོས་པས་ན་དེ་ཉིད་དད་པའི་རྗེས་སུ་འབྲང་བ་སྟེ། དེ་ཉིད་དད་པའི་རྗེས་སུ་འབྲང་བ་དེ་རྣམས་ལ་ཇི་ལྟ་བ་བཞིན་དུ་བཤད་པའི་ཐམས་ཅད་རྣལ་འབྱོར་གྱི་ཆོ་ག་སྦྱར་བར་བྱ་བ་ནི་བསྒོམ་པར་བྱ་བའི་ཕྱིར་བསྟན་པར་བྱའོ། །གཞན་རྣམས་ནི་བྱང་ཆུབ་སེམས་དཔའི་མིང་དང་ལྡན་པ་མཆོག་དང་འབྲིང་དང་ཐ་མའི་སློབ་མ་རྣམས་ལ་དེ་ཁོ་ན་ཉིད་ལ་དད་པའི་སྟོབས་དང་ཐོས་པའི་སྟོབས་ཤེས་ནས་རིམ་གྱིས་སྦྱིན་པར་བྱ་སྟེ་ཅིག་ཅར་དུ་ནི་མ་ཡིན་ནོ་ཞེས་བྱ་བའོ། །ཐམས་ཅད་རྣལ་འབྱོར་གྱི་ཆོ་ག་འདི་དེ་ལྟར་སྦྱར་ན་ཅིར་འགྱུར་ཞེ་ན། འདི་ལ་སྒྲུབ་མིན་ཅུང་ཟད་མེད། །ཅེས་བྱ་བ་ལ་སོགས་པ་ལ། གང་གི་ཕྱིར་ཐམས་ཅད་རྣལ་འབྱོར་གྱི་ཆོ་ག་འདིས་རབ་ཏུ་སྦྱར་ན་བསྒྲུབ་པར་བྱ་བ་མ་ཡིན་ཏེ། དེའི་ཕྱིར་ཚུལ་ཉིད་ཀྱིས་འདི་རབ་ཏུ་སྦྱོར་བར་བྱ་བ་ཡིན་ཏེ་གཞན་དུ་དམ་ཚིག་ཉམས་པས་དངོས་གྲུབ་ཉམས་པར་འགྱུར་བ་ཡིན་ནོ་ཞེས་བྱ་བའོ། །དངོས་གྲུབ་ལས་ཞེས་བྱ་བ་ནི་གོ་སླའོ། །དེ་ལྟར་རྣལ་འབྱོར་གྱི་མཚན་ཉིད་བསྟན་ནས་ད་ནི་ཕྱག་རྒྱ་རྣམས་ཀྱི་མཚན་ཉིད་བསྟན་པར་བྱ་བའི་ཕྱིར་དེ་ནས། རྟོག་པ་ཐམས་ཅད་དོན་ཡོད་པ། །ཞེས་བྱ་བ་ལ་སོགས་པ་གསུངས་ཏེ་དཔལ་རྡོ་རྗེ་སེམས་དཔའ་ལ་སོགས་པའི་རིགས་ཀྱི་ལྷ་ཐམས་ཅད་ནི་རྟོག་པ་ཐམས་ཅད་དེ། དེ་རྣམས་ཀྱི་ཕྱག་རྒྱའི་རྒྱུད་བཤད་པར་བྱའོ་ཞེས་བྱ་བ་དང་སྦྱར་རོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན་ཞེས་བྱ་བ་ནི་དེའི་ཁྱད་པར་བསྟན་པར་བྱ་བའི་ཕྱིར། དོན་ཡོད་པ་ཞེས་བྱ་བ་ལ་སོགས་པ་གསུངས་ཏེ་དོན་ཡོད་པ་ནི་འབྲས་བུ་མེད་པ་མ་ཡིན་ནོ། །དེ་ཉིད་ཀྱིས་ན་ཐོགས་པ་མེད་པའོ། །ཕུལ་དུ་བྱུང་བས་ན་
མཆོག་གོ །དངོས་གྲུབ་མ་ཡིན་པའི་རྒྱུར་གྱུར་པའི་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ལ་གླགས་སྟེར་བ་དང་བྲལ་བས་ན་མཁས་པའོ། །ཆོས་ཀྱི་དབྱིངས་ཀྱི་རང་བཞིན་གྱིས་མཐོང་བར་དཀའ་བས་ན་ཕྲ་བའོ། །ནམ་མཁའ་ཐམས་ཅད་ཁྱབ་པས་ན་རྒྱ་ཆེ་བའོ།། རྒྱ་མཚོ་ཆེན་པོ་བཞིན་དུ་ཐ་མལ་མའི་ཤེས་པས་རྟོགས་པར་མི་ནུས་པའི་ཕྱིར་ན་ཟབ་པའོ། །རང་རིག་པའི་རང་བཞིན་གྱིས་བསམ་པར་མི་ནུས་པས་ན་བསམ་གྱིས་མི་ཁྱབ་པའོ། །ནམ་མཁའ་ཐམས་ཅད་དུ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེའི་རང་བཞིན་གྱིས་ཐམས་ཅད་དུ་འགྲོ་བས་ན་ཤིན་ཏུ་ཚད་མེད་པའོ། །ཕྱག་རྒྱ་ཆེན་པོ་ལ་སོགས་པའི་མཆོག་གི་དངོས་གྲུབ་ཐམས་ཅད་དང་བར་མ་དང་ཐ་མའི་དངོས་གྲུབ་ཐམས་ཅད་ཁྱད་པར་དུ་སྒྲུབ་པར་བྱེད་པས་ན་མ་ལུས་ཤིང་ལུས་པ་མེད་པའི་མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་རབ་ཏུ་སྒྲུབ་བར་བྱེད་པའོ། །དོན་ཡོད་པ་ཡང་དེ་ཡིན་ལ་ཐོགས་པ་མེད་ཅིང་མཆོག་ཏུ་མཁས་པ་དང༌། ཕྲ་བ་དང༌། རྒྱ་ཆེ་བ་དང༌། ཟབ་པ་དང༌། བསམ་གྱིས་མི་ཁྱབ་པ་དང༌། ཤིན་ཏུ་ཚད་མེད་པ་དང་མ་ལུས་ཤིང་ལུས་པ་མེད་པའི་མཆོག་གི་དངོས་གྲུབ་ལ་སོགས་པའི་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་ཡང་དེ་ཉིད་ཡིན་པས་ན་དོན་ཡོད་ཅིང་ཐོགས་པ་མེད་པ་ལ་སོགས་པ་དེ་ཡིན་ནོ། །སྐྱོན་ཐམས་ཅད་དང་བྲལ་བའི་ཕྱིར་ཐོག་མ་དང་ཐ་མ་མེད་པའི་རིགས་ཐམས་ཅད་རྫོགས་པར་བྱེད་པའི་རྒྱུ་ཡིན་པས་ན་མཆོག་ཏུ་གྲུབ་པའོ། །དེ་ལྟ་བུར་གྱུར་པའི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་ཀྱི་རྒྱུ་ནི་རྒྱུན་ཏེ་བཤད་པར་བྱ་བ་ནི་བསྟན་པར་བྱ་བ་ཡིན་ནོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། ཐམས་ཅད་ཅེས་བྱ་བ་ལ་སོགས་པ་ཕྱག་རྒྱ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ཕྱག་རྒྱ་ཐམས་ཅད་དེ་ལྷ་ཐམས་ཅད་ཀྱི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་རྣམས་སོ། །དེ་དག་མཁྱེན་པའི་ངེས་པ་སྟེ། དེས་རྡོ་རྗེ་ལྟར་བརྟན་པ་ནི་མི་ཕྱེད་པའི་སེམས་དེ་ཐུགས་གང་ལ་མངའ་བ་དེ་ལ་དེ་སྐད་ཅེས་བྱ་སྟེ། རྡོ་རྗེ་དང་དྲིལ་བུ་འཆང་བའི་རྡོ་རྗེ་སེམས་དཔའོ། །གཡོན་པའི་པདྨ་ཞེས་བྱ་བ་ལ་
སོགས་པ་ལ་དཔལ་རྡོ་རྗེ་སེམས་དཔའི་རྣལ་འབྱོར་པས་སྔ་མ་བཞིན་དུ་དམ་ཚིག་སེམས་དཔའ་བྱིན་གྱིས་བརླབ་པ་ལ་སོགས་པ་མཐར་ཐུག་པ་ཅན་གྱི་རང་གི་ཆོ་ག་རྗེས་སུ་སྤྱད་ནས། རྐང་པ་གཡོན་པའི་རྡོ་རྗེའི་ཕྱེད་སྟན་གྱི་ཚུལ་དུ་བཞག་ནས་དེའི་སྟེང་དུ་རྐང་པ་གཡས་པ་གྱེན་དུ་ཁ་བལྟ་བར་བྱས་ལ་པདྨའི་ཕྱོགས་སུ་གཟུང་བ་བྱ་སྟེ། དེ་ལྟར་རྐང་པ་གཡོན་པ་ལ་དེ་དགོད་པར་འགྱུར་རོ། །ཇི་ལྟར་བག་ཆགས་དང་བཅས་པའི་ཉོན་མོངས་པ་དང་བྲལ་བའི་གཉིས་སུ་མེད་པའི་ཡེ་ཤེས་ནི་ཐར་པའི་བདེ་བ་སྟེ། དེ་བཞིན་དུ་ཅི་བདེ་བར་ནི་བཅོམ་ལྡན་འདས་རྡོ་རྗེ་སེམས་དཔའི་བྱང་ཆུབ་ཆེན་པོའི་ཐུགས་ཀྱི་རང་བཞིན་སྟོན་པར་བྱེད་པའི་སྐྱིལ་ཀྲུང་ནི་སེམས་དཔའི་སྐྱིལ་མོ་ཀྲུང་སྟེ། དེ་བཅིང་བ་ནི་གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་བྱང་ཆུབ་ཆེན་པོའི་ཐུགས་ཀྱི་རང་བཞིན་མངོན་དུ་བྱེད་པའོ། །འདི་ལྟར་བཤད་པར་འགྱུར་ཏེ། གང་ཞིག་པང་བ་གཡོན་པ་ལ་རྣམ་པར་བཞག་པའི་ཞབས་ཀྱི་པདྨ་གང་ཡིན་པ་དེ་ཉིད་ཐར་པའི་རང་བཞིན་གྱི་བྱང་ཆུབ་ཆེན་པོའི་ཐུགས་སུ་རྣམ་པར་བསམ་པར་བྱ་བ་ཡིན་ནོ་ཞེས་བྱ་བའོ། །བྱང་ཆུབ་ཆེན་པོའི་སེམས་སྟོན་པར་བྱེད་པའི་སྐྱིལ་མོ་ཀྲུང་འདིས་ཀྱང་རྣལ་འབྱོར་པའི་བདུད་བཞི་བཅོམ་པ་ཡང་བསྟན་པ་ཡིན་ནོ། །ཇི་སྐད་དུ། སེམས་དཔའི་སྐྱིལ་མོ་ཀྲུང་བཅིངས་ནས། །བདུད་ཀུན་རབ་ཏུ་འཇོམས་པར་བྱེད། །ཅེས་བྱ་བ་གསུངས་སོ། །རང་ཉིད་ལུས་ནི་དྲང་པོར་འཛིན། །ཞེས་བྱ་བ་ནི་གོ་སླའོ། །རྡོ་རྗེ་དྲིལ་བུ་དང་བཅས་པའི་གཡོན་པའི་རྡོ་རྗེ་ཁུ་ཚུར་གྱིས་བསྙེམས་པར་བྱས་ནས། ལག་པ་གཡས་པས་དང་པོའི་རྡོ་རྗེ་སྟེང་དུ་གསོར་ཞིང་གསོར་ཏེ། གསང་བ་ལྔའི་དེ་ཁོ་ན་ཉིད་སྔོན་དུ་བྱེད་པ་སྟོན་པར་བྱེད་པའི་རྡོ་རྗེ་གསོར་བ་འདིས་བདུད་བཞི་པོ་ཐམས་ཅད་ལས་རྒྱལ་བས་རང་གི་སྙིང་གར་བསྟོད་པའི་ཚུལ་གྱིས་རྡོ་རྗེ་འཛིན་ཅིང་རྡོ་རྗེ་སེམས་དཔའི་ཕྱག་རྒྱ་ཆེན་པོ་རྫོགས་པ་ནི་ཀུན་མཆོག་གྲུབ་པ་སྟེ། དེའི་ཕྱིར་དཔལ་རྡོ་རྗེ་སེམས་དཔའི་སྐུའི་གསང་བའི་ང་རྒྱལ་མངོན་དུ་བྱེད་པ་ནི་སྐུའི་རྡོ་རྗེ་དང༌། དེའི་སྙིང་པོའི་ཟླ་བ་ནི་གསུང་གི་རྡོ་རྗེ་དང༌། རང་གི་སྙིང་གར་གནས་པའི་ཟླ་བ་ལ་དང་པོའི་རྡོ་རྗེ་རྩེ་ལྔ་པ་བསྒོམ་པ་ནི་ཐུགས་ཀྱི་རྡོ་རྗེ་སྟེ་བྱེད་པར་གྱུར་པ་དེ་དག་གིས་སྒྲུབ་པ་པོ་རྡོ་རྗེ་སེམས་དཔའ་ཉིད་དུ་འགྱུར་བ་
ཡིན་ནོ་ཞེས་བྱ་བ་འདི་ནི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་ཡིན་ནོ། །འདིའི་འབྲས་བུ་བསྟན་པར་བྱ་བའི་ཕྱིར། འདི་ཡིས་རྡོ་རྗེ་སེམས་དཔའ་ཉིད། །ཅེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་འདི་བཅིངས་པས་སྒོམ་པར་བྱེད་ཅིང་སྒྲུབ་པ་པོ་རྡོ་རྗེ་སེམས་དཔའ་ཉིད་ནི་རྡོ་རྗེ་སེམས་དཔའི་རིགས་ཀྱི་དངོས་གྲུབ་དང༌། སངས་རྒྱས་ཉིད་ནི་དེ་བཞིན་གཤེགས་པའི་རིགས་ཀྱི་དངོས་གྲུབ་དང༌། བྱང་ཆུབ་སེམས་དཔའ་ནི་རྡོ་རྗེ་རིགས་ལ་སོགས་པའི་རིགས་ཐམས་ཅད་ཀྱི་དངོས་གྲུབ་དང༌། བསྡུས་པའི་དཀྱིལ་འཁོར་ལས་གསུངས་པའི་རིགས་ཐམས་ཅད་ཀྱི་དངོས་གྲུབ་དབང་དུ་བྱེད་པ་ནི་དངོས་གྲུབ་ཀུན་གྱི་དབང་ཕྱུག་ཉིད་དོ། །འདི་དག་ཐམས་ཅད་བཅོམ་ལྡན་འདས་ཀྱི་ཕྱག་རྒྱ་ཆེན་པོ་འདིས་སྒྲུབ་པ་པོ་ལ་ཚེ་འདི་ཉིད་ལ་འགྲུབ་པར་འགྱུར་རོ། །ཐམས་ཅད་ཀྱི་བདག་ཉིད་ནི་ཆོས་ཀྱི་དབྱིངས་ཏེ་དེ་བསྟན་པ་ནི་མི་ཕྱེད་པའི་བསམ་པ་སྟེ་འགྱུར་བ་མེད་པའི་རྒྱུ་ལས་བྱུང་བ་ཉིད་ཀྱི་མི་ཕྱེད་པའི་བཅོམ་ལྡན་འདས་རྡོ་རྗེ་དང་དྲིལ་བུ་འཛིན་པའོ་ཞེས་བྱ་བའི་ཐ་ཚིག་གོ །དཀྱིལ་འཁོར་དུ་ནི་མ་ཞུགས་དང༌། །ཞེས་བྱ་བ་ལ་སོགས་པ་ནི་གོ་སླའོ། །ཕྱག་རྒྱ་ཆེན་པོ་ལ་སོགས་པའི་རིགས་ཐམས་ཅད་ཀྱི་དངོས་གྲུབ་ནི་དངོས་གྲུབ་ཀུན་ཏེ་དེ་དག་གི་ཆགས་པ་ཆེན་པོ་ནི་རྡོ་རྗེ་སེམས་དཔའ་སྟེ་དངོས་གྲུབ་ཐམས་ཅད་ཀྱི་རྗེས་སུ་ཆགས་པའི་ཕྱིར་རོ། །ཇི་སྐད་དུ། བཅོམ་ལྡན་འདས་ནི་ཆགས་ཆེན་པོ། །དངོས་གྲུབ་ཀུན་གྱི་རྗེས་ཆགས་ཕྱིར། །རྡོ་རྗེ་སེམས་དཔའི་ཕྱག་རྒྱ་འདི། །དམར་ཞིང་སྣ་ཚོགས་འབར་བའི་འོད། །ཅེས་བྱ་བ་འོག་ནས་གསུངས་པའི་ཕྱིར་རོ། །འདི་ལྟར་བཤད་པར་འགྱུར་ཏེ། དངོས་གྲུབ་ཐམས་ཅད་སྒྲུབ་པར་བྱེད་པའི་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་དངོས་གྲུབ་ཀུན་གྱི་ཆགས་པ་ཆེན་པོ་ཞེས་བྱ་བའོ། །ཆགས་པ་ཆེན་པོ་དེས་བདེ་བ་ནི་རྡོ་རྗེ་སེམས་དཔའ་ལ་སོགས་པའི་རང་བཞིན་མངོན་དུ་བྱེད་པའོ། །བདེ་བ་ལས་བྱུང་བའི་
ལོངས་སྤྱོད་རྫོགས་པའི་སྐུའི་རང་བཞིན་ཅན་ཕུན་སུམ་ཚོགས་པ ་ནི་ཕུན་སུམ་ཚོགས་པ་སྟེ། དེ་ཡི་དབང་ཕྱུག་ཆེན་པོ་ནི་དེ་ལས་བྱུང་བའི་སྤྲུལ་པའི་སྐུས་སྐད་ཅིག་མ་རེ་རེ་ཉིད་དུ་ཕྱི་མའི་མཐར་
ཐུག་པའི་བར་གྱི་འཁོར་བའི་སེམས་ཅན་འདུལ་བ་ལ་བརྩོན་པའོ། །དེ་ལ་ཆགས་པ་ཆེན་པོ་ཞེས་བྱ་བ་འདིས་འདོད་ཆགས་རྡོ་རྗེ་མའི་རང་བཞིན་ཅན་གྱི་རྡོ་རྗེ་འཆང་བསྟན་ཏོ། །བདེ་བ་ཞེས་བྱ་བས་ཀཱི་ལི་ཀཱི་ལའི་རང་བཞིན་ཅན་ནོ། །ཕུན་སུམ་ཚོགས་པ་ཞེས་བྱ་བས་རྡོ་རྗེ་དྲན་མའི་རང་བཞིན་ཅན་ནོ།། དབང་ཕྱུག་ཆེན་པོ་ཞེས་བྱ་བས་རྡོ་རྗེ་འདོད་མའི་དབང་ཕྱུག་མའི་རང་བཞིན་ཅན་དུ་བསྟན་ཏོ། །དེ་ལྟ་བུའི་རང་བཞིན་ཅན་གྱི་དབང་ཕྱུག་ཆེན་པོའི་རྣལ་འབྱོར་པ་དེ་ཉིད་ཕྱག་རྒྱ་ཆེན་པོར་གྱུར་ཏེ་ཕྱག་རྒྱ་ཆེན་པོ་གང་དག་ཡོད་པ་དེ་ནི་ཕྱག་རྒྱ་ཆེན་པོ་ཅན་ཏེ། རྡོ་རྗེ་སེམས་དཔའ་གཞན་ལྟ་བུ་ནི་རྡོ་རྗེ་སེམས་དཔའ་དང་འདྲ་བར་འགྱུར་ཞིང་འགྲུབ་པར་འགྱུར་རོ། །ལྷ་ལ་སོགས་པ་ཞེས་བྱ་བ་ནི་བྱ་བའི་རྒྱུད་ལས་གསུངས་པའི་དེ་བཞིན་གཤེགས་པ་དང༌། པདྨ་དང་རྡོ་རྗེའི་རིགས་ཀྱི་དངོས་གྲུབ་རྣམས་ནི་ལྷ་ལ་སོགས་པའི་དངོས་གྲུབ་ཏུ་བརྗོད་པ་ཡིན་ཏེ། དེ་དག་ཐམས་ཅད་དང་རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་ལས་གསུངས་པའི་བདེ་བ་གང་ཡིན་པའི་ལས་ཐམས་ཅད་ཀྱི་བདེ་བ་དེ་རྣམས་ཀྱང་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་མཛེས་པས་བྱིན་གྱིས་བརླབས་པའི་རྒྱུས་ཁྱད་པར་དུ་རབ་ཏུ་འཇུག་པ་ནི་འབྱུང་བར་འགྱུར་རོ། །དེ་ལས་སྒྲུབ་མིན་ཡོད་པ་མིན།། ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ཕན་ཡོན་དང་བཅས་པ་བསྟན་ནས། ད་ནི་ལྷ་དགུག་པའི་ཕྱག་རྒྱ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །ཐོག་མ་དང་ཐ་མ་མེད་པ་ཡང་དེ་ཡིན་ལ་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཆེན་པོ་ཐམས་ཅད་ཀྱང་དེ་ཡིན་པས་ན་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ལ་སོགས་པའི་སེམས་དཔའ་ཆེན་པོ་ཐམས་ཅད་དེ་རྡོ་རྗེ་སེམས་དཔའི་དཀྱིལ་འཁོར་གྱི་ལྷ་ཐམས་ཅད་དོ། །དེ་རྣམས་ཀྱི་དཀྱིལ་འཁོར་ཐམས་ཅད་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའོ། །དམ་ཚིག་ནི་ཕྱག་རྒྱ་ཆེན་པོ་དང་དམ་ཚིག་གི་ཕྱག་རྒྱའོ། །ཆོས་ནི་ཆོས་ཀྱི་ཕྱག་རྒྱའོ། །ལས་ནི་ལས་ཀྱི་ཕྱག་རྒྱའོ། །དཀྱིལ་འཁོར་ཐམས་ཅད་དང་དམ་ཚིག་དང་ཆོས་དང་ལས་དེ་དག་གི་དོན་ཡོད་པ་ནི་འབྲས་བུ་ཡོད་པ་མ་ཡིན་
ཏེ། དགུག་པ་དང༌། གཞུག་པ་དང༌། དབབ་པ་དང༌། རྗེས་སུ་ཆགས་པ་དང༌། དབང་དུ་བྱེད་པ་དང༌། ཕྱག་རྒྱ་ཆེན་པོ་ལ་སོགས་པ་ཐམས་ཅད་སྒྲུབ་པ་དང༌། སངས་རྒྱས་ཉིད་དང་རྡོ་རྗེ་འཆང་ཉིད་མཆོག་ཏུ་སྒྲུབ་པ་ཐམས་ཅད་ལ་དམ་ཚིག་ཆེན་པོའི་ཕྱག་རྒྱ་སྟེ་བྱང་ཆུབ་ཆེན་པོའི་སེམས་སྟོན་པར་བྱེད་པའི་ཕྱག་རྒྱའོ། །དེ་མིང་ཇི་ལྟ་བུ་དང་ལྡན་པ་ཡིན་ཞེ་ན། བདེ་བ་ཆེན་པོའི་རྡོ་རྗེ་གསང་བའི་དམ་ཚིག་གོ་ཞེས་བྱ་བ་ལ་བདེ་བ་ཆེན་པོའི་རྡོ་རྗེ་ནི་དང་པོའི་རྡོ་རྗེ་སྟེ། དེའི་གསང་བའི་དམ་ཚིག་ནི་སྐྱེ་བོ་ཐམས་ཅད་ལ་རབ་ཏུ་མ་གྲུབ་པའི་ཚུལ་ལོ། །དེ་ཉིད་ཀྱི་མིང་གང་ལ་ཡོད་པ་དེ་ནི་བདེ་བ་ཆེན་པོའི་རྡོ་རྗེ་གསང་བའི་དམ་ཚིག་ཅེས་བྱ་བའི་ཕྱག་རྒྱ་ཆེན་པོའོ། །དེ་བཅིངས་པ་འདི་ཡིན་ཞེས་བྱ་བ་ལ་དེ་བཅིངས་པ་ནི་མཚན་ཉིད་འདི་ཡིན་ཞེས་བྱ་བའི་དོན་ཏོ། །སོར་མོ་ཐམས་ཅད་ཡང་དག་སྦྱོར་བ་ནི་ལག་པ་གཉིས་ཀྱི་ཁ་སྦྱོར་གྱི་ཐལ་མོ་བཅིངས་ཏེ་སོར་མོ་དང་ཕན་ཚུན་དུ་བཅིང་བར་བྱའོ། །འདིས་ཅིར་འགྱུར་ཞེ་ན། རྡོ་རྗེ་ཐལ་མོ་ཞེས་བརྗོད་དོ། །ཞེས་བྱ་བ་ནི་ཡང་དག་པར་སྦྱར་བ་དེ་ལས་རྡོ་རྗེ་ཐལ་མོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །རྡོ་རྗེ་ཐལ་མོ་དེ་ཉིད་ཀྱི། །ཀུན་མཆོག་ནང་དུ་བཅིངས་པ་ཡིས། །རྡོ་རྗེ་བསྡམས་པ་ཡང་དག་བཤད། །ཅེས་བྱ་བ་ཡིན་ནོ། །འདས་མ་ཐག་ཏུ་བཤད་པའི་རྡོ་རྗེ་བསྡམས་པ་འདིའི་ནང་གི་བུ་གའོ། །བུ་ག་དེ་གང་ཡིན་ཞེ་ན་མཛུབ་མོ་ཞེས་བྱ་བ་ལ་སོགས་པ་ལ། མཛུབ་མོ་དང་མཐེ་བོ་དག་གིས་སྐྱེ་གནས་བྱས་ལ། གཡས་པའི་མཐེ་བོང་རྩེ་མོ་སྐྱེ་གནས་དེ་ལ་བཅུག་ནས་བཙིར་བར་བྱ་སྟེ། འདི་ནི་མདའ་ལྔ་བསྡུས་པ་ཞེས་བྱ་བ་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱ་སྟེ། གསང་བ་ལྔའི་དེ་ཁོ་ན་ཉིད་ཆེན་པོའི་མདའ་ལྔ་བསྡུས་བ་སྟོན་པར་བྱེད་པ་ཡིན་ནོ། །མདའ་ལྔ་བསྡུས་པ་འདི་བཅིངས་ནས་སོར་མོ་དབུས་མ་གཉིས་ཀྱི་རྩེ་མོ་ཡང་དག་པར་སྦྱར་བ་བྱས་ནས་རྡོ་རྗེ་བསྡམས་པའི་ནང་དུ་བཞག་ནས། མཐེ་བོང་གཉིས་ཀྱི་རྩེ་མོ་དང༌། མཐེའུ་ཆུང་གཉིས་ཀྱི་རྩེ་མོ་ཟུར་དུ་སྦྱར་བར་བྱ་སྟེ་དཔལ་རྡོ་རྗེ་སེམས་དཔའི་དང་པོའི་རྡོ་རྗེ་འདི་འགྱུར་བ་ཡིན་ནོ། །དང་པོའི་རྡོ་རྗེ་འདི་ཉིད་བཅིངས་ཏེ་ནང་ན་གནས་པའི་སོར་མོ་དབུས་མ་གཉིས་ཀྱི་ལྕགས་ཀྱུས་རང་གི་སྙིང་གར་བྲུད་
ཅིང་དགུག་པར་བྱའོ་ཞེས་བྱ་བའི་དོན་ཏོ། །དེ་ལྟར་བྱས་ན་ཅིར་འགྱུར་ཞེ་ན། ལྕགས་ཀྱུ་འདི་དང་དགུག་པའི་སྔགས་ཀྱིས་བཅོམ་ལྡན་འདས་རྡོ་རྗེ་སེམས་དཔའི་དགའ་བ་ཆེན་པོ་མྱུར་དུ་བྱོན་ནས་གྲུབ་པར་འགྱུར་རོ་ཞེས་བྱ་བ་དང་སྦྱར་རོ། །དགེས་པ་ནི་དགའ་བའོ། །དེ་ཉིད་རྡོ་རྗེ་སྟེ་མི་ཕྱེད་པའི་ཕྱིར་རོ། །དགྱེས་པའི་རྡོ་རྗེ་ཡང་དེ་ཡིན་ལ་ལྕགས་ཀྱུ་ཡང་དེ་ཉིད་ཡིན་པས་ན་དགྱེས་པའི་རྡོ་རྗེའི་ལྕགས་ཀྱུ་སྟེ་ལྕགས་ཀྱུའི་བྱ་བ་བྱེད་པའི་ཕྱིར་ཏེ་དེས་དགུག་པའོ། །ཨ་ནུ་ར་ག་ཡ་མི་ཞེས་བྱ་བའི་སྒྲ་འདི་ནི་ཉེ་བའི་སྙིང་པོ་སྟེ་ཉེ་བའི་སྙིང་པོ་དེས་སྒྲུབ་པ་ནི་རག་ལུས་པར་བྱ་བའོ། །སླར་ཡང་སྙིང་གར་བྲུད་པ་ནི་སྙིང་གར་དགུག་པ་ཤིན་ཏུ་དྲག་པོའི་རྗེས་སུ་ཆགས་པའི་མེ་ནི་སྒྲུབ་པ་པོས་ཤིན་ཏུ་ཆགས་པའི་སྒོམ་པའི་རང་བཞིན་གྱིས་གདུང་བར་འགྱུར་ཞིང་སྙིང་པོས་འཕྲོག་ཅིང་དབང་དུ་གྱུར་པས་དགྱེས་ཤིང་མྱུར་བར་སྐད་ཅིག་མ་ཉིད་དུ་བྱིན་ནས་གྲུབ་པར་འགྱུར་བ་ཡིན་ནོ། །འདིས་ནི་འདི་ལྟར་བཤད་པར་འགྱུར་ཏེ། སྔ་མ་བཞིན་དུ་ཡེ་ཤེས་སེམས་དཔའ་མདུན་དུ་བཞག་ལ། རྡོ་རྗེ་དྲིལ་བུ་དང་བཅས་པའི་གསང་བའི་ལྕགས་ཀྱུ་བཅིངས་ཏེ། དགུག་པའི་སྙིང་པོའམ་གླུས་ཇི་ལྟ་བ་བཞིན་དུ་རང་གི་ལུས་ལ་ཡེ་ཤེས་སེམས་དཔའ་གཅིག་པུའམ་འཁོར་དང་བཅས་པ་གཞུག་པར་བྱའོ། །དཀྱིལ་འཁོར་རམ་གཟུགས་སྐུ་ལ་སོགས་པ་ལ་དགུག་པའི་སྔགས་གླུས་སོ། །དེ་ནས་རང་གི་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབ་པ་ལ་སླར་ཡང་གསང་བའི་ལྕགས་ཀྱུའི་བཅིངས་ཏེ། ཨ་ནུ་ར་ག་ཡ་ཧཱུཾ་ཞེས་བྱ་བ་ཤིན་ཏུ་དགའ་བའི་སྒོམ་པ་ལན་གསུམ་བཟླ་བར་བྱ་སྟེ། དེ་ལྟར་ན་སླར་ཡང་ཉེ་བའི་སྙིང་པོས་འགྲུབ་པར་འགྱུར་བ་ཡིན་ནོ། །གང་ཞིག་གསང་བའི་ལྕགས་ཀྱུ་སྒྲུབ་པར་བྱེད་པ་དེས་ནི་ཆོག་ཐམས་ཅད་རྗེས་སུ་སྤྱད་ལ། དེ་ཉིད་ཀྱིས་ནི་རྡོ་རྗེ་གཟུང༌། །ཆོས་ཀྱི་དྲིལ་བུ་དཀྲོལ་བར་བྱ། །དེའི་འོག་ཏུ། དམ་ཚིག་གི་ནི་ཕྱག་རྒྱ་ཆེར། །བྱིན་གྱིས་བརླབས་ཏེ་སྙིང་པོ་བཟླ་བར་བྱའོ། །དེ་ནས་དམ་ཚིག་གསུམ་གྱི་གླུའི་མཆོད་པ་དང༌། རྗེས་སུ་སྒྲུབ་པར་བྱས་ལ། སླར་ཡང་གསང་བའི་ལྕགས་ཀྱུ་བཅིངས་ཏེ་ཨ་ནུ་ར་ག་ཡ་མི་ཧཱུཾ་ཞེས་བྱ་བ་བརྗོད་ཅིང་དེ་སྲིད་དུ་བསྒོམ་པར་བྱ་སྟེ། ཇི་སྲིད་བཅོམ་ལྡན་འདས་
བྱོན་ནས་མངོན་དུ་ཁོ་ནར་གྲུབ་པར་འགྱུར་རོ་ཞེས་བྱ་བའི་དོན་ཏོ། །དེ་ལྟར་ཞེས་བྱ་བ་ལ་སོགས་པ་ལ་ཇི་ལྟར་སྒྲུབ་པ་འདིས་བཅོམ་ལྡན་འདས་བྱོན་ཏེ་མངོན་དུ་གྲུབ་པར་འགྱུར་བ་དེ་བཞིན་དུ་དེ་བཞིན་གཤེགས་པ་ཐམས་ཅད་ལ་སོགས་པའི་དངོས་པོ་ཐམས་ཅད་ནི་བརྟན་པ་དང་གཡོ་བ་སྟེ། དེ་དག་རྒྱས་བཏབ་པ་ནི། རྡོ་རྗེ་སེམས་དཔའ་ཉིད་དུ་བྱས་པས་བྱོན་ཏེ། མྱུར་དུ་འགྲུབ་པར་འགྱུར་བ་ཡིན་ནོ། །ཕྱག་རྒྱ་འདི་མིང་ཇི་ལྟ་བུ་དང་ལྡན་པ་ཡིན་ཞེ་ན། བདེ་བ་ཆེན་པོ་ཞེས་བྱ་བ་ལ་སོགས་པ་ལ་བདེ་བ་ཆེན་པོའི་རྡོ་རྗེ་བཤད་ཟིན་ཏོ། །དེའི་དོན་ཡོད་དམ་ཚིག་ནི་རྡོ་རྗེ་སེམས་དཔའ་སྟེ་དེ་སྟོན་པར་བྱེད་ཅིང་དེའི་མིང་དང་ལྡན་པ་གང་ཡིན་པ་དེ་ནི་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་ཉེ་བའི་སྙིང་པོ་རྗེས་སུ་ཆགས་པའི་ཕྱག་རྒྱའོ། །རྡོ་རྗེ་མཆོད་ཡོན་རྡོ་རྗེ་ཆེན་པོ་རབ་ཏུ་བརྐྱང་བའི་ཐལ་མོ་ཞེས་བྱ་བ་ལ། རྡོ་རྗེ་ཐལ་མོ་བཅིངས་ནས་སོར་མོ་ཐམས་ཅད་བསྡམས་ཏེ་ཕན་ཚུན་དུ་ཡང་དག་པར་སྦྱར་བ་གཟུང་བར་བྱ་སྟེ་བརྟན་པའི་ཐལ་མོའི་ཚུལ་གྱིས་ལག་པའི་མཐིལ་གཉིས་རབ་ཏུ་བརྐྱང་ལ་མཐེ་བོང་གཉིས་ཀྱང་རང་གི་མཛུབ་མོའི་ལོགས་དག་ལས་བརྐྱང་སྟེ་འདི་ནི་རྡོ་རེ་མཆོད་ཡོན་ཞེས་བྱ་བའི་ཕྱག་རྒྱའོ། །འདི་དང་རང་གི་ལྷའི་སྙིང་པོས་ལན་གསུམ་མམ་བདུན་ནམ་ཉི་ཤུ་རྩ་གཅིག་མཆོད་ཡོན་གྱི་སྣོད་ལ་ཡོངས་སུ་བཟུང་སྟེ་ཕྱིན་ནས་རང་གི་ལྷའི་སྙིང་པོ་ཁོ་ནས་མཆོད་ཡོན་དབུལ་བར་བྱའོ། །མེད་ན་ཕྱག་རྒྱ་ཙམ་ཉིད་རང་གི་ལྷའི་སྙིང་པོ་དང་ལྡན་པས་མཆོད་ཡོན་དབུལ་བར་བྱའོ། །གང་གི་ཕྱིར་རྒྱུད་འདིར་རང་གི་ལྷའི་སྙིང་པོ་ཁོ་ན་ལས་ཐམས་ཅད་པར་བརྗོད་དེ། འདིར་ཁྱད་པར་གྱི་གནོད་པ་མ་ཡིན་པའི་ཕྱིར་རོ། །དེ་ནས་དང་པོའི་རྡོ་རྗེའི་ཕྱག་རྒྱས་ཞེས་བྱ་བ་ལ་སོགས་པ་ལ་ཇི་ལྟ་བ་བཞིན་དུ་དཀྱིལ་འཁོར་བྲིས་ལ་ལྷ་སྤྱན་དྲང་བར་བྱ་སྟེ་དམ་ཚིག་གི་ཕྱག་རྒྱ་རྣམས་ཀྱིས་རབ་ཏུ་བསྒྲུབས་ཏེ། ཆོས་དང་ལས་དང་ཕྱག་རྒྱ་ཆེན་པོ་དག་གིས་རྒྱས་བཏབ་ལ། དབང་བསྐུར་བའི་ཕྱག་རྒྱས་དབང་བསྐུར་ནས། དཔལ་རྡོ་རྗེ་སེམས་དཔའ་ལ་སོགས་པ་རྣམས་ལ་མཆོད་ཡོན་ཕུལ་ལ། དེ་མ་ཐག་པ་ཉིད་དུ་དང་པོའི་རྡོ་རྗེའི་ཕྱག་རྒྱའི་དབུས་མའི་རྡོ་རྗེས་རྡོ་རྗེ་མེ་ཏོག་གི་ཡལ་ག་བླངས་ཏེ། རྣམ་པར་རྒྱལ་བའི་བུམ་པའི་སྔགས་ཀྱིས་ལན་ཉི་ཤུ་རྩ་གཅིག་ཡོངས་
སུ་བཟླས་ཏེ། དཔལ་རྡོ་རྗེ་སེམས་དཔའི་མདུན་དུ་བཞག་ནས་ཇི་ལྟ་བ་བཞིན་དུ་བཤད་པའི་མཆོད་ཡོན་ཐམས་ཅད་བྱའོ། །རྣམ་པར་རྒྱལ་བའི་བུམ་པའི་ཆུ་དེས་ཅིར་འགྱུར་ཞེ་ན། དེས་ཞེས་བྱ་བ་ལ་སོགས་པ་ལ་རྣམ་པར་རྒྱལ་བའི་བུམ་པའི་ཆུ་དེ་རྡོ་རྗེ་ཁུ་ཚུར་གྱིས་བླངས་ཏེ་བདག་ཉིད་སློབ་མ་རྣམས་ལ་དབང་བསྐུར་བར་བྱའོ། །ཆུ་དེ་ཡང་བཏུང་བར་བྱས་ནས་ཇི་ལྟ་བ་བཞིན་དུ་བཤད་པའི་ཡོན་ཏན་རྣམས་སོ་སོར་ཐོབ་པར་འགྱུར་རོ་ཞེས་བྱའོ། །དེ་ལྟར་བུམ་པའི་ཕྱག་རྒྱ་བསྟན་ནས་ད་ནི་དང་པོའི་དཀྱིལ་འཁོར་དུ་འཇུག་པའི་ཕྱག་རྒྱ་བསྟན་པར་བྱ་བའི་ཕྱིར། དེ་ནས་དང་པོའི་དཀྱིལ་འཁོར་དུ་འཇུག་པའི་ཕྱག་རྒྱ་ཞེས་བྱ་བ་གསུངས་ཏེ། དང་པོའི་དཀྱིལ་འཁོར་ནི་རྡོ་རྗེ་སེམས་དཔའི་དཀྱིལ་འཁོར་ཆེན་པོའོ། །དེར་ཞུགས་པ་ནི་ཕྱི་དང་གསང་བའི་རང་བཞིན་ཅན་ཏེ་དེ་ཁོ་ནའི་དོན་དུ་ཕྱག་རྒྱའོ། །དེ་ཡང་བ་དན་གསུམ་ཞེས་བྱ་བ་ལ་སོགས་པ་ལ། ལག་པ་གཡས་པས་བ་དན་གསུམ་བྱས་ལ་གཡོན་པས་ཁ་ཊྭཱཾ་ག་སྟེ་བ་དན་གསུམ་དང་ཁ་ཊྭཱཾ་ག་བཅིངས་ནས། རང་གི་ནུས་པ་དང་རྗེས་སུ་མཐུན་པའི་དགའ་བས་རབ་ཏུ་དགའ་བ་ནི་ཅི་ནུས་པར་ནི་རབ་ཏུ་དགའ་བས་ཏེ་ཡིད་བདེ་བ་སྐྱེད་པ་ཞེས་བྱ་བའི་ཐ་ཚིག་གོ །སྒེག་པ་དང་བཅས་པས་མཐེའུ་ཆུང་ལ་སོགས་པའི་སོར་མོ་རྣམས་བཀྲོལ་བས་བསྐོར་ཞིང་གློག་འགྱུར་བའི་ཚུལ་གྱིས་མཆོག་ཏུ་བསྐོར་བས་རྡོ་རྗེ་གར་ཡང་ཡིན་པ་དེ་ཉིད་བསྐོར་བ་སྟེ་དེས་བཀྲོལ་བ་ནི་བ་དན་གསུམ་དང་ཁ་ཊྭཱཾ་ག་བཅིང་བ་བསྟན་པའོ། །རྡོ་རྗེ་གར་བསྐོར་བཀྲོལ་བར་བྱེད་པའི་གྱུར་པ་དེས་ཡོངས་སུ་བསྐོར་བ་ན་དབྱིབས་གཞན་དུ་གྱུར་པ་སྟེ་ཕྱག་འཚལ་བའི་མེ་ཏོག་གི་ཐལ་མོ་སྤྱི་བོར་བཅིང་བ་ནི་འཛིན་པ་ཆེན་པོའོ། །རྡོ་རྗེ་གར་བཀྲོལ་ནས་ཡོངས་སུ་བསྐོར་བ་ཡང་དེ་ཡིན་ལ་འཛིན་པ་ཆེན་པོ་ཡང་དེ་ཉིད་ཡིན་པས་ན་རྡོ་རྗེ་གར་བསྐོར་བཀྲོལ་བའི་ཡོངས་སུ་བསྐོར་བ་འཛིན་པ་ཆེན་པོའོ། །དེ་གང་ཡིན་ཞེ་ན་ཀ་པུ་ཏ་ནི་ཁ་སྦྱོར་ཞེས་བྱ་བ་ལ་ཀ་པུ་ཏ་ནི་ཐལ་མོ་སྟེ། ཀཔུ་ཏའི་ཐལ་མོ་ཡང་དེ་ཡིན་ལ་ཁ་སྦྱོར་ཡང་དེ་ཉིད་ཡིན་པས་ན་ཀ་པུ་ཏའི་ཁ་སྦྱོར་རོ། །ཀ་པུ་ཏའི་ཁ་སྦྱོར་དེ་སྤྱི་བོར་བཞག་ལ་དེ་ཉིད་ཀྱིས་མེ་ཏོག་གི་ཕྲེང་བ་བླངས་ཏེ་འཇུག་པའི་གླུ་བརྗོད་ཅིང་སྔར་བཤད་པའི་ཚུལ་གྱིས་དཀྱིལ་འཁོར་དུ་འཇུག་
པར་བྱའོ། །དེ་ནས་ཆོ་ག་ཐམས་ཅད་རྗེས་སུ་སྤྱད་ལ་མེ་ཏོག་གཏོར་བའི་དུས་སུ་སྤྱི་བོའི་ཕྱོགས་དེ་ལས་ཕབ་ལ་རྡོ་རྗེ་ཅན་ཏེ་རྡོ་རྗེ་སེམས་དཔའ་ལ་ཕུལ་ཏེ་སྦྱིན་པར་བྱའོ། །ཇི་ལྟར་ཞེ་ན། སྒེག་བཅས་མཛུབ་མོ་མཐེའུ་ཆུང་ལ་སོགས་རྣམ་པར་བཀྲོལ་བ་ཞེས་བྱ་བ་ལ་སྒེག་པ་དང་བཅས་པས་ལག་པ་དང་འབྲེལ་བའི་མཛུབ་མོ་ལ་སོགས་པ་དང་ལག་པ་གཡོན་པ་དང་འབྲེལ་བའི་མཐེའུ་ཆུང་ལ་སོགས་པ་རྣམ་པར་བཀྲོལ་བ་ནི། སྒེག་བཅས་མཛུབ་མོ་མཐེའུ་ཆུང་ལ་སོགས་པ་རྣམ་པར་བཀྲོལ་བ་སྟེ། རྣམ་པར་བཀྲོལ་བ་དེ་རྣམས་ཀྱིས་ཨོཾ་མཆོག་ཏུ་བདེ་བའི་ཐུགས་ཞེས་བྱ་བ་ལ་སོགས་པའི་གླུ་བརྗོད་ཅིང་བཅོམ་ལྡན་འདས་དཔལ་རྡོ་རྗེ་སེམས་དཔའ་ལ་དེ་དབུལ་བར་བྱའོ། །འདི་ཉིད་ཀྱི་འབྲས་བུ་བསྟན་པར་བྱ་བའི་ཕྱིར། འདི་ཞེས་བྱ་བ་ལ་སོགས་པ་གསུངས་ཏེ། དང་པོའི་དཀྱིལ་འཁོར་དུ་འཇུག་པའི་ཕྱག་རྒྱ་འདིས་འཁོར་ལོར་མ་ཞུགས་པ་ཡང་ཞེས་བྱ་བ་སྟེ། རྡོ་རྗེའི་དཀྱིལ་འཁོར་ཆེན་པོར་ཞུགས་པར་མ་གྱུར་ན་ཡང་རྡོ་རྗེ་སློབ་དཔོན་ཉིད་ཐོབ་པར་འགྱུར་རོ། །ཇི་ལྟར་ཞེ་ན། རང་ཉིད་ཞུགས་དཔོན་ཉིད་ཐོབ་པར་འགྱུར་རོ། །ཇི་ལྟར་ཞེ་ན། རང་ཉིད་ཞུགས་བྲིས་ནས་ཞུགས་ཏེ་ཞུགས་པ་ཙམ་དེ་ཉིད་ཀྱིས་བྱེད་པར་གྱུར་པ་སྟེ་རྡོ་རྗེ་གར་གྱི་མཆོད་པས་དོན་ཡོད་པ་ནི་འབྲས་བུ་མེད་པ་མ་ཡིན་པ་ནི་དང་པོའི་དཀྱིལ་འཁོར་དུ་ཞུགས་པས་རྡོ་རྗེ་སློབ་དཔོན་ཉིད་གྲུབ་པ་ནི་རྫོགས་པ་སྟེ་དོན་ཡོད་པའོ། །རྒྱུད་དེའི་ཕྱིར་མཆོད་པ་ནི་དོན་ཡོད་པར་གྲུབ་པར་གྲུབ་པའི་མཆོད་པ་སྟེ་དེས་རྡོ་རྗེ་སློབ་དཔོན་ཉིད་ཐོབ་པར་འགྱུར་རོ། །ཇི་ལྟར་རྡོ་རྗེ་གར་གྱི་མཆོད་པ་དཀྱིལ་འཁོར་དུ་ཞུགས་པའི་དངོས་གྲུབ་སྟེར་བར་བྱེད་པ་དེ་བཞིན་དུ་མེ་ཏོག་ལ་སོགས་པའི་མཆོད་པའི་དངོས་གྲུབ་ཀྱང་སྟེར་བར་བྱེད་པ་ཡིན་ནོ་ཞེས་བསྟན་པར་བྱ་བའི་ཕྱིར་ཡོངས་སུ་རྫོགས་པའམ་མ་ཚད་པ་ཞེས་བྱ་བ་ལ་སོགས་པ་གསུངས་ཏེ་མེ་ཏོག་དང་སྤོས་དང་མར་མེ་དང་དྲི་སྟེ་ཕྱིའི་མཆོད་པ་རྣམས་དང་ལྡན་པ་ནི་ཡོངས་སུ་རྫོགས་པའོ། །དེ་དང་འབྲེལ་པ་ནི་ཚང་བའོ། །དེ་རྣམས་ཕྱོགས་གཅིག་ཐོབ་པ་ཇི་སྙེད་པས་ཏེ་མེ་ཏོག་ལ་སོགས་པས་ཕྱོགས་གཅིག་ཐོབ་པའི་རང་བཞིན་ཅན་ཇི་སྙེད་པ་དེས་ཐུན་མོང་དངོས་གྲུབ་ཀུན་སྩོལ་བའོ། །མེ་ཏོག་ལ་སོགས་མཆོད་མཚན་མས། །
ཞེས་བྱ་བ་ལ་དགའ་བ་དང་རབ་ཏུ་དགའ་མ་དང་སྤྱན་དང༌། དཔལ་ཆེན་མོ་རྣམས་ནི་མེ་ཏོག་ལ་སོགས་པའི་མཆོད་པར་བརྗོད་པ་ཡིན་ནོ། །དེ་རྣམས་ཀྱི་མཚན་མ་ནི་མེ་ཏོག་ལ་སོགས་པའི་ཚུལ་གྱི་རང་བཞིན་ཅན་གྱི་ལས་ཀྱི་ཕྱག་རྒྱ་རྣམས་སོ། །ནིའི་སྒྲ་ནི་ངེས་པར་གཟུང་བ་སྟེ་མེ་ཏོག་ལ་སོགས་པའི་མཆོད་པའི་མཚན་མ་རྣམས་ཁོ་ནས་རྡོ་རྗེ་གར་གྱི་མཆོད་པ་ཐམས་ཅད་ཐུན་མོང་གི་དངོས་གྲུབ་སྟེར་བ་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའོ། །ད་ནི་རྡོ་རྗེ་གར་གྱི་མཚན་ཉིད་བསྟན་པར་བྱ་བའི་ཕྱིར། བ་དན་གསུམ་མཆོག་ཅེས་བྱ་བ་སོགས་པ་གསུངས་ཏེ། ལག་པ་གཡས་པས་བ་དན་གསུམ་པ་བྱས་ལ་གཡོན་པ་ཁ་ཊྭཱཾ་ག་སྟེ་འདི་ནི་བ་དན་གསུམ་མཆོག་གི་ཁ་ཊྭཱཾ་ཞེས་བྱ་བའོ། །བྱེད་པར་གྱུར་པ་དེས་སྒེག་པ་དང་བཅས་པའི་མཐེའུ་ཆུང་ལ་སོགས་པའི་སོར་མོ་ཐམས་ཅད་བཀྲོལ་བ་དང་བཅས་པས་གློག་འགྱུ་བའི་གར་བྱས་ནས་མདུན་དུ་བསྐོར་བ་ནི་ལག་པ་བཞིས་གཡས་སུ་བསྐོར་བ་སྟེ། དེ་རྣམས་ཀྱི་གར་ཞེས་བྱ་བ་ནི་མཆོད་པའི་ཕྱག་རྒྱར་བརྗོད་པ་ནི་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །སྒེག་མོ་དགའ་བའི་རྡོ་རྗེ་མས་ཕྱག་འཚལ་བར་བྱའོ་ཞེས་བྱ་བ་གང་གསུངས་པ་དེའི་མཚན་ཉིད་བསྟན་པར་བྱ་བའི་ཕྱིར། སྒེག་མོ་དགའ་བའི་རྡོ་རྗེ་མ། །ལ་སོགས་པ་གསུངས་ཏེ། རྡོ་རྗེ་གར་གྱི་མཆོད་པ་ནི་བཤད་ཟིན་ཏེ་དེས་སྒེག་པ་དང་བཅས་ཤིང་བཞིན་འཛུམ་པའི་མིག་གིས་ཕྱག་འཚལ་བའི་སྒེག་པའི་ལྟ་བ་དང་བཅས་པའི་སྤྱི་བོས་ཕྱག་འཚལ་པའོ། །ཨོཾ་མཆོག་ཏུ་བདེ་བའི་ཐུགས་ཞེས་བྱ་བ་ལ་སོགས་པའི་གླུ་བརྗོད་ཅིང་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་དང་ལྷན་ཅིག་ཏུ་ཡིད་ཀྱིས་གཅིག་ཏུ་གྱུར་ཏེ། ཕྱག་བཙལ་བ་འདིས་རྡོ་རྗེ་སེམས་དཔའ་དང་དེ་བཞིན་གཤེགས་པ་རྣམས་ཀྱིས་རྗེས་སུ་ཆགས་པར་བྱས་ནས་ཕྱག་འཚལ་བར་མཛད་དོ་ཞེས་བྱ་བའི་བསམ་པ་བསྐྱེད་ནས་ཕྱག་འཚལ་བར་བྱ་སྟེ། དེ་ལྟར་དེ་རྣམས་བྱེད་དུ་བཅུག་ནས་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་སྒྲུབ་པ་པོ་ལ་རག་ལུས་པར་འགྱུར་རོ། །དེ་ནས་མཚན་བརྒྱས་བཅོམ་ལྡན་འདས་ལ་བསྟོད་པར་བྱ་བ་གསུངས་པའི་བསྟོད་པ་ཡང་ཕྱག་རྒྱ་བཅིངས་ནས་བྱ་བ་ཡིན་ཏེ། དེའི་ཕྱིར་བསྟོད་པའི་ཕྱག་རྒྱའི་
མཚན་ཉིད་བསྟན་པའི་ཕྱིར། རྡོ་རྗེ་ཐལ་མོ་བསྐོར་བ་མ་ལུས་པ་བྱས་ནས་ཐམས་ཅད་བསྐོར་བའི་ཕྱག་རྒྱའི་ཞེས་བྱ་བ་གསུངས་ཏེ། རང་གི་སྙིང་གའི་ཕྱོགས་སུ་རྡོ་རྗེ་ཐལ་མོ་གཡོན་དུ་བསྐོར་ནས་ཤིས་པར་བརྗོད་པ་སྦྱིན་པའི་ཚུལ་དུ་བཟུང་ཞིང་མཚན་བརྒྱ་ལ་སོགས་པའི་བསྟོད་པ་ཐམས་ཅད་ཀྱིས་མཆོད་པ་བྱ་སྟེ། འདི་ནི་ཐམས་ཅད་ཀྱིས་བསྟོད་པའི་ཕྱག་རྒྱའོ། །དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་བཅིངས་ནས་དབང་བསྐུར་བར་བྱའོ་ཞེས་བྱ་བ་གསུངས་པ་དེའི་མཚན་ཉིད་བསྟན་པར་བྱ་བའི་ཕྱིར། དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཡང་ཡིན་ལ་ཐམས་ཅད་ཀྱང་ཡིན་པས་ན་དེ་བཞིན་གཤེགས་པ་ཐམས་ཅད་དེ་བྱང་ཆུབ་ཆེན་པོའི་སེམས་ལ་སོགས་པའི་རང་བཞིན་ཅན་གྱི་སེམས་དང་སེམས་ལས་བྱུང་བ་རྣམས་སོ། །དེ་དག་གི་སྐུ་ནི་དེ་ལས་བྱུང་བའི་རྣམ་པར་སྣང་མཛད་དང་མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་སྟེ། དེ་བཞིན་གཤེགས་པ་དེ་རྣམས་ཀྱི་སྐུའི་གསང་བའོ། །དེ་དག་གི་མཆོག་ནི་ཕུལ་དུ་བྱུང་བ་གང་ཡིན་པ་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་སྟེ། དེ་སྟོན་པར་བྱེད་པ་དང་དེ་རྫོགས་པར་བྱེད་པའི་ཕྱག་རྒྱ་གནག་ཡིན་པ་དེའི་རྡོ་རྗེ་བསྡམས་པ་མཐེ་བོང་གཉིས་ཀྱིས་བསྟེན་པའི་སྐྱིལ་ཀྲུང་ནི་སྐྱིལ་མོ་ཀྲུང་སྟེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །གཉིས་ཀྱང་ཡིན་ལ་མཛུབ་མོ་ཡང་དེ་ཉིད་ཡིན་པས་ན་མཛུབ་མོ་གཉིས་སོ། །དེ་དག་ཉིད་བཀུག་པ་ལུས་གང་ལ་ཡོད་པ་དེ་ནི་མཛུབ་མོ་ཉིད་བཀུག་པའི་ལུས་ཅན་ནོ། །དབུས་མ་ཡང་དེ་ཉིད་ཡིན་ལ་མཉམ་པ་ཡང་དེ་ཉིད་ཡིན་པས་ན་དབུས་མ་མཉམ་པ་སྟེ་དབུས་མཉམ་པ་དེ་ཉིད་ཁ་འབུས་པ་ནི་ཚིགས་གསུམ་པ་བཀུག་པའི་མཆོག་གི་ཡན་ལག་གི་མགོ་བོ་གང་ལ་ཡོད་པ་དེ་ནི་དབུས་མ་མཉམ་པའི་ཁ་འབུས་པའི་མཆོག་གི་ཡན་ལག་ཅན་ནོ། །འདི་ལྟར་བཤད་པར་འགྱུར་ཏེ། རྡོ་རྗེ་བསྡམས་པ་བཅིངས་ནས་མཐེ་བོང་གཉིས་ཀྱིས་རྡོ་རྗེ་སྐྱིལ་མོ་ཀྲུང་གི་རྣམ་པར་བྱས་ལ་སོར་མོ་གཉིས་ཀྱི་རྩེ་མོ་ཡང་དག་པར་སྦྱར་ཏེ་ཚིགས་གསུམ་པ་བཀུག་པར་བྱས་ནས། དེའི་ཚིགས་དབུས་མའི་སྟེང་དུ་མཛུབ་མོ་གཉིས་ལྕགས་
ཀྱུའི་རྣམ་པར་བཀུག་པ་ཡང་དག་པར་གཟུང་བར་བྱ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་ཅེས་བྱ་བ་སངས་རྒྱས་ལྔའི་ཅོད་པན་གྱི་དབང་བསྐུར་བ་རྫོགས་པར་བྱེད་པའི་ཕྱག་རྒྱའོ། །འདི་སྤྱི་བོར་བཞག་ལ། ཨོཾ་བྷུ་ཁཾ་ཞེས་བྱ་བས་རྣམ་པར་སྣང་མཛད་བསམ་པར་བྱའོ།། དཔྲལ་བའི་སྟེང་དུ་བཛྲ་ཏྣ་ཞེས་བྱ་བས་མི་བསྐྱོད་པའོ། །རྣ་བ་གཡས་པའི་སྟེང་དུ་བཛྲ་རཏྣ་ཞེས་བྱ་བས་རིན་ཆེན་འབྱུང་ལྡན་ནོ། །སྤྱི་བོའི་རྒྱབ་ཏུ་བཛྲ་དྷརྨ་ཞེས་བྱ་བས་སྣང་བས་སྣང་བ་མཐའ་ཡས་སོ། །རྣ་བ་གཡོན་པའི་སྟེང་དུ་བ་ཛྲ་ཀརྨ་ཞེས་བྱ་བ་བརྗོད་ཅིང་དེ་བཞིན་གཤེགས་པ་དོན་ཡོད་གྲུབ་པ་བསམ་པར་བྱའོ། །རེ་རེའི་དབང་བསྐུར་བའི་གླུ་ནི་དང་པོར་གསུངས་པ་དེ་ནི་འདི་ཡིན་ཏེ། ཨོཾ་སངས་རྒྱས་ཀུན་གྱི་རིན་ཆེན་མཆོག་ཚོགས་ཀྱིས། །སྤྲས་པའི་ལྷ་ཡི་ཅོད་པན་ཁྱོད་ལ་འདུད། །རབ་མཆོག་རྡོ་རྗེ་ཅན་གྱིས་བདག་དབང་བསྐུར། །རྡོ་རྗེ་སེམས་དཔའ་ཁྱོད་བདག་དམ་ཚིག་ཡིན། །ཞེས་བྱ་བའོ་དེ་ལྟར་ཕྱོགས་ཐམས་ཅད་དུ་ཅོད་པན་བཅིངས་ལ་དེའི་རྗེས་ལ་བཛྲ་ཀརྨ་ཞེས་བྱ་བ་བརྗོད་ཅིང་རྡོ་རྗེ་ཁུ་ཚུར་གཉིས་ཀྱིས་མདུད་པའི་ཚུལ་གྱིས་ཕྲེང་བ་འཆིང་བའི་ཚུལ་བྱས་ལ་སླར་ཡང་སྤྱི་བོའི་རྒྱབ་ཏུ་དེ་བཞིན་དུ་མདུད་པའི་ཚུལ་བྱས་ལ་ལོགས་དག་ལ་སྒེག་པ་དང་བཅས་པའི་མཐེའུ་ཆུང་ལ་སོགས་པའི་སོར་མོ་བཀྲོལ་བས་དར་དཔྱངས་ཀྱི་ཚུལ་བྱས་ནས་མཐར་མཉམ་པའི་ཐལ་མོ་དང་བཛྲ་ཏུཥྱ་ཧོ་ཞེས་བྱ་བས་མཉེས་པར་བྱའོ། །དེ་ནས་བདེ་བ་ཆེན་པོ་ཞེས་བྱ་བ་ལ་སོགས་པ་ལ། དེ་ནས་དཀྱིལ་འཁོར་དུ་ཞུགས་ནས་ཇི་ལྟ་བ་བཞིན་དུ་མེ་ཏོག་རྣམས་དོར་ལ་ཕྲེང་བའི་དབང་བསྐུར་བླངས་ཏེ་གདོང་གཡོགས་བཀྲོལ་ལ་དཀྱིལ་འཁོར་བལྟས་ནས་འཇུག་པའི་ཕྱག་རྒྱས་རང་གི་སྙིང་གར་བཀྲོལ་ལ་རང་གི་ལྷའི་རྣལ་འབྱོར་བྱས་ཏེ། དེ་མ་ཐག་ཁོ་ནར་སྣ་ཚོགས་པདྨ་བྲིས་ཏེ་དེའི་སྟེང་དུ་ཕྱག་རྒྱ་ཆེན་པོ་བཅིངས་ལ་ཉེ་བར་འདུག་སྟེ། ཨོཾ་བཛྲ་ཨ་བྷི་ཥིཉྩ་ཧཱུཾ་ཞེས་བྱ་བ་བརྗོད་ཅིང་རྡོ་རྗེ་ཁུ་ཚུར་གཉིས་ཀྱིས་རྣམ་པར་རྒྱལ་བའི་བུམ་པ་ལས་ཆུ་བླངས་ཏེ་བདག་ཉིད་ལ་དབང་བསྐུར་བར་བྱའོ། །ཆུ་དེ་ཡང་འཐུངས་ན་ཇི་ལྟ་བ་བཞིན་དུ་བཤད་པའི་འབྲས་བུ་ཐོབ་པར་འགྱུར་ཏེ་སློབ་མ་རྣམས་ལ་ཡང་དེ་བཞིན་དུ་དབང་བསྐུར་བར་བྱའོ། །རྡོ་རྗེ་ཁུ་ཚུར་གྱིས་ཞེས་བྱ་བ་
ལ་སོགས་པ་ལ་ཆུའི་དབང་བསྐུར་བའི་རྗེས་ལ་སངས་རྒྱས་ལྔའི་ཅོད་པན་གྱི་དབང་བསྐུར་བ་བྱིན་ནས་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་རྩེ་ལྔ་པ་རྩེ་མོ་ལས་འོད་ཟེར་འབར་བ་ཁ་དོག་དམར་པོའི་རྡོ་རྗེ་སྔར་བཤད་པའི་སྔགས་ཀྱིས་སྦྱིན་པར་བྱའོ། །དེ་ལ་རྩེ་གཅིག་པའི་རྡོ་རྗེའི་རྣམ་པ་ཅན་གྱི་འོད་ཟེར་གྱིས་དེ་ཉིད་འབར་བའོ། །དེས་ཉེ་བར་མཚོན་པའི་རྩེ་མོ་གང་ལ་ཡོད་པ་དེ་ནི་རྡོ་རྗེའི་འོད་ཟེར་འབར་བ་ཅན་གྱི་རྩེ་མོ་ཅན་གྱི་རྡོ་རྗེ་སྟེ་དེ་སྦྱིན་པར་བྱའོ། །སློབ་མས་ཀྱང་ཞེས་བྱ་བ་ལ་སོགས་པ་ལ་རྡོ་རྗེ་སློབ་མས་སློབ་དཔོན་ལ་ཕྱག་བྱས་ནས་རྡོ་རྗེ་ཐལ་མོ་བསྐོར་ཏེ་མེ་ཏོག་ལ་སོགས་པས་དབང་བསྐུར་བ་ཐམས་ཅད་བླང་བར་བྱའོ། །དཔལ་རྡོ་རྗེ་སེམས་དཔའི་དཀྱིལ་འཁོར་དུ་འཇུག་པ་ལ་སོགས་པའི་ཆོ་ག་བསྟན་པ་དེ་ཉིད་དེ་བཞིན་གཤེགས་པ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་རྣམས་སུ་དབང་དུ་བྱེད་པ་ཉིད་དུ་འཇུག་པ་ཡིན་ནོ་ཞེས་བྱ་བ་ཤེས་པར་བྱ་སྟེ། གང་དུ་ཁྱད་པར་གྱི་གནོད་པ་མ་ཡིན་པའི་ཕྱིར་རོ། །དེ་ལྟར་དཀྱིལ་འཁོར་གྱི་ཐབས་བསྟན་ནས། ད་ནི་སྒྲུབ་པའི་ཐབས་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །དངོས་གྲུབ་ཀྱང་ཡིན་ལ་ཐམས་ཅད་དེ་ཉིད་ཡིན་པས་ན་དངོས་གྲུབ་ཐམས་ཅད་དེ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་སོ། །དེ་རྣམས་ཀྱི་དབང་ཕྱུག་ནི་གཙོ་བོའོ། །གྲུབ་པ་ནི་རྫོགས་པ་སྟེ། སེམས་དཔའ་བྱིན་གྱིས་བརླབས་པའི་སྦྱོར་བ་ལས་བྱུང་བའོ། །སྟོང་པ་ཉིད་དང་རོ་གཅིག་པའི་སེམས་དང་སེམས་ལས་བྱུང་བའི་རྡོ་རྗེ་སེམས་ནི་རྡོ་རྗེ་འཆང་ཆེན་པོའོ། །དངོས་གྲུབ་ཐམས་ཅད་ཀྱི་དབང་ཕྱུག་ཀྱང་ཡིན་ལ་རྡོ་རྗེ་འཆང་ཆེན་པོ་ཡང་དེ་ཉིད་ཡིན་པས་ན་དངོས་གྲུབ་ཐམས་ཅད་ཀྱི་དབང་ཕྱུག་གྲུབ་པའི་རྡོ་རྗེ་འཆང་ཆེན་པོའོ། །དེ་ཉིད་དངོས་པོ་ཐམས་ཅད་ཀྱི་བདག་ཉིད་རང་བཞིན་དུ་མཛེས་ཤིང་གསལ་བར་འགྱུར་བས་ན་རྒྱལ་པོའོ། །དེ་སྒྲུབ་པའི་དོན་དུ་ཕྱག་རྒྱ་སྟོན་པར་བྱེད་པའི་རྒྱུ་ནི་འདི་ཞེས་བྱ་བ་སྟོན་པ་ནི་ཚིག་གི་ལྷག་མའོ། །བདེ་བ་ཆེན་པོའི་རྡོ་རྗེ་གསང་བའི་ལྕགས་ཀྱུ་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་ཉེ་བའི་ཕྱག་རྒྱའོ། །དེས་རྡོ་རྗེ་སེམས་དཔའ་སྤྱན་དྲང་བ་ནི་རང་གི་སྙིང་པོའི་སྔགས་ལན་ཅིག་ཏུ་སྔ་དྲོའི་དུས་སུ་
བཅོམ་ལྡན་འདས་ཡི་གེ་ཧཱུཾ་གིས་བཀུག་ལ་རང་གི་ལུས་ལ་གཞུག་པར་བྱ་སྟེ་རྗེས་སུ་རྣལ་འབྱོར་གྱི་དུས་སུའོ་ཞེས་བྱ་བའི་དོན་ཏོ། །སེམས་དཔའི་སྐྱིལ་མོ་ཀྲུང་ནི་བཤད་ཟིན་ཏོ། །དེ་གང་ལ་ཡོད་པ་དེ་ནི་སེམས་དཔའི་སྐྱིལ་མོ་ཀྲུང་དང་ལྡན་པའོ། །རྡོ་རྗེ་གར་ནི་བཤད་ཟིན་ཏོ། །དེས་མཆོད་པ་རྣམས་ཕུལ་བ་ནི་མེ་ཏོག་དང་སྤོས་དང༌། མར་མེ་དང་དྲི་དབུལ་བའི་ཚུལ་ཏེ་མཆོད་པ་དབུལ་བ་དེ་དག་གིས་རྡོ་རྗེ་མཚོན་ཆ་མ་ལ་སོགས་པ་བསྒྲང་བར་བྱས་ལ་ཕྱག་བཙལ་བར་བྱའོ་ཞེས་བྱ་བ་དང་སྦྱར་རོ། །རྡོ་རྗེ་གར་གྱིས་མཆོད་པ་དབུལ་བར་བྱ་ཞེ་ན་གློག་འགྱུ་བའི་གར་གྱིས་ཞེས་བྱ་བ་ལ་གློག་འགྱུ་བའི་གར་ནི་བཤད་ཟིན་ཏོ། །དེ་ཉིད་ཀྱིས་བྱའི་གཞན་གྱིས་ནི་མ་ཡིན་ནོ། །རྡོ་རྗེ་ཁུ་ཚུར་ཡོངས་སུ་བཟུང་བ་ཞེས་བྱ་བ་ལ་དེ་ལྟར་གློག་འགྱུར་བའི་གར་གྱིས་མེ་ཏོག་ལ་སོགས་པ་དབུལ་བ་བྱས་ནས། དེའི་རྗེས་ལ་རྡོ་རྗེ་ཁུ་ཚུར་གཉིས་བཅིངས་ཏེ་དེས་བསྙེམས་པ་དང་བཅས་པ་ཡང་དེ་ཡིན་ལ་རྡོ་རྗེ་བསྙེམས་པ་ཡང་དེ་ཉིད་ཡིན་པས་ན་བསྙེམས་པ་དང་བཅས་པའི་རྡོ་རྗེ་བསྙེམས་མས་ཏེ་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱའོ། །རྒྱུར་གྱུར་པ་དེས་རྡོ་རྗེ་མཚོན་ཆ་མ་ལ་སོགས་པ་བསྒྲེང་བ་ནི་འདོད་ཆགས་རྡོ་རྗེ་མ་ལ་སོགས་པའི་ལས་ཀྱི་ཕྱག་རྒྱ་བཞི་པོ་བཅིངས་ལ་འདོད་ཆགས་རྡོ་རྗེ་མ་ལ་སོགས་པ་རང་བཞིན་ལ་ལྷག་པར་མོས་པ་གང་ཡིན་པ་དེ་བྱས་ལ། དེའི་འོག་ཏུ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་སྒེག་མོ་དགའ་བའི་རྡོ་རྗེ་མས་རས་རིས་ལ་སོགས་པར་བཞུགས་པའི་བཅོམ་ལྡན་འདས་ཀྱི་སྐུ་ལ་ཕྱག་འཚལ་བར་བྱའོ། །མཆོད་པ་དང་གར་གྱི་མཆོད་པ་རྣལ་འབྱོར་པས་ཇི་ལྟར་བྱ་ཞེ་ན་རྡོ་རྗེ་གླུས་ཞེས་བྱ་བ་ལ་སོགས་པ་ལ། ཐམས་ཅད་རྗེས་སུ་ཆགས་པ་ཞེས་བྱ་བ་ལ་སོགས་པའི་རྡོ་རྗེའི་གླུ་གླུར་བླངས་པས་སོ། །ནིའི་སྒྲ་ནི་ངེས་པར་བཟུང་བ་སྟེ་རྡོ་རྗེ་གླུ་ཁོ་ནས་བྱ་བའོ། །བཟླས་པའི་དོན་གྱིས་ཞེས་བྱ་བ་ནི་རྡོ་རྗེའི་གླུའི་བཟླས་པ་ནི་འདིའི་དོན་གང་ཡིན་པ་དེ་ལྷག་པར་མོས་པ་ནི་བཟླས་པའི་དོན་དང་དགའ་མ་ལ་སོགས་པའི་སྙིང་པོའི་དོན་ཏོ། །བཟླས་པའི་དོན་དེ་ཅི་བདེ་བར་ནི་དཀའ་ཐུབ་མེད་པ་ལ་སོགས་པས་རྡོ་རྗེ་གར་གྱི་མཆོད་པ་ནི་རྡོ་རྗེ་གར་གྱི་རང་བཞིན་ཅན་གྱི་མཆོད་པ་དང་ཡང་དག་པར་སྦྱར་ཞིང་བྱས་ན་མྱུར་དུ་འགྲུབ་པར་འགྱུར་རོ། །དེ་ལ་འདི་ཞེས་བྱ་བ་ལ་སོགས་པ་གླུ་གསུངས་པ་ཡིན་ཏེ།
དང་པོ་ལ་སོགས་པ་རྣམས་ཀྱིས་གླུ་བླང་བར་བྱའོ་ཞེས་བྱ་བ་དྲུག་ལྡན་དང་བར་མ་ལ་སོགས་པའི་དབྱངས་རྣམས་དང་རོལ་མོ་རྣམས་ཀྱིས་གླུ་བླང་བར་བྱའོ། །ཐམས་ཅད་རྗེས་སུ་ཆགས་པ་ཞེས་བྱ་བ་ལ་སོགས་པ་ནི་རྡོ་རྗེའི་གླུའོ། །རྗེས་སུ་ཆགས་པ་ཆེན་པོ་ནི་ཤིན་ཏུ་ཆགས་པའོ། །རབ་ཏུ་དགའ་བ་ནི་ཟག་པ་མེད་པའི་བདེ་བ་དང་བདེ་བའི་རང་བཞིན་ཅན་ནོ། །བརྟན་པར་འགྱུར་བ་ནི་དེ་བཞིན་ཉིད་དང་རོ་གཅིག་པའི་ཐུགས་མངའ་བས་རྣམ་པར་རྟོག་པ་ཐམས་ཅད་ཀྱིས་མི་བསྐྱོད་པའོ། །འཕེལ་བར་འགྱུར་ཞེས་བྱ་བ་ནི་རྫོགས་པར་གྱུར་ནས་མངོན་དུ་གྱུར་བ་ཡིན་ནོ་ཞེས་བྱ་པའི་ཐ་ཚིག་གོ །ཕྱག་རྒྱ་ཆེན་པོ་ལན་ཅིག་ཏུ་སྙིང་པོས་བདག་ཉིད་ལ་བྱིན་གྱིས་བརླབ་པར་བྱའོ་ཞེས་བྱ་བ་ལ། ཇི་ལྟ་བ་བཞིན་དུ་བཤད་པའི་རྣམ་པ་གསུམ་གྱིས་བདག་ལ་བྱིན་གྱིས་བརླབས་པའི་དུས་སུ་ཕྱག་རྒྱ་ཆེན་པོ་བཅིངས་ནས་ཡི་གེ་ཧཱུཾ་གིས་བདག་ཉིད་ལན་ཅིག་བྱིན་གྱིས་བརླབ་པར་བྱའོ། །དེའི་རྗེས་ལ་དམ་ཚིག་དང་ཆོས་དང་ལས་ལ་སོགས་པའི་ཕྱག་རྒྱ་རྣམས་བསྒྲུབ་པར་བྱའོ། །ཤིན་ཏུ་གཡོ་བ་ནི་ཤིན་ཏུ་གཡོ་བ་ཉིད་དོ། །ཤིན་ཏུ་གཡོ་བ་མེད་པ་ནི་ཤིན་ཏུ་གཡོ་བ་མེད་པའོ། །ལྕེའི་རྩེ་མོ་ནི་ལྕེའི་རྩེ་མོའོ། །ཤིན་ཏུ་གཡོ་བ་མེད་པའི་ལྕེའི་རྩེ་མོ་གང་ལ་ཡོད་པ་དེ་ནི་ཤིན་ཏུ་གཡོ་བ་མེད་པའི་ལྕེའི་རྩེ་མོའོ། །ཤིན་ཏུ་གཡོ་བ་མེད་པའི་ལྕེའི་རྩེ་མོ་ཡང་དེ་ཡིན་ལ་སོ་དང་མཆུ་གཉིས་དང་ལྡན་པ་ཡང་དེ་ཉིད་ཡིན་པས་ན་ཤིན་ཏུ་གཡོ་མེད་ལྕེ་རྩེ་དང་མཆུ་དང་སོ་གཉིས་ལྡན་པའོ། །ཤིན་ཏུའི་སྒྲ་ནི་སོ་དང་མཆུ་གཉིས་ལ་རྗེས་སུ་འཇུག་པ་ཡིན་ནོ།། དེ་བས་ན་དོན་ནི་འདི་ལྟར་བཤད་པར་འགྱུར་ཏེ། ཅུང་ཟད་རྩེ་མོ་གཡོ་བ་དང༌། ཅུང་ཟད་མཆུ་དང་སོ་གཉིས་ཡང་དག་པར་ལྡན་པ་གང་ཡིན་པ་དེ་ནི་རྡོ་རྗེའི་ངག་གོ །དབྱངས་དང་བྲལ་བ་ཞེས་བྱ་བ་ནི་རྣ་བའི་རྣམ་པར་ཤེས་པས་གཟུང་བའི་སྒྲ་དང་བྲལ་བ་ཞེས་བྱ་བའི་དོན་ཏོ། །རིགས་ཀུན་གྲུབ་པར་བྱེད་ཅེས་བྱ་བ་ལ་རྡོ་རྗེ་སེམས་དཔའི་རིགས་ནས་བཟུང་སྟེ་དེ་བཞིན་གཤེགས་པ་དང་རྡོ་རྗེ་དང་པདྨ་དང་ནོར་བུའི་རིགས་རྣམས་ཀྱི་དངོས་གྲུབ་ཐམས་ཅད་རབ་ཏུ་གྲུབ་པར་བྱེད་པའོ། །འདིས་ནི་ངག་འདིའི་ཐུན་མོང་ཡིན་ནོ་ཞེས་བྱ་བའི་དོན་བསྟན་ཏོ། །ཡི་གེ་ཧཱུཾ་གི་གླུ་ཞེས་བྱ་བ་ལ་སོགས་
པ་ནི་བཤད་ཟིན་ཏོ། །ཇི་སྲིད་མངོན་པར་འདོད་པའི་བཟླས་པས་ཞེས་བྱ་བ་ནི་གྲངས་ཀྱི་ངེས་པ་མེད་པར་བསྟན་པ་ཡིན་ཏེ། འདིར་སྒོམ་པ་ཁོ་ན་གཙོ་བོ་ཡིན་པའི་ཕྱིར་རོ། །བཟླས་པའི་དོན་གྱིས་ཀྱང་ཡི་གེ་ཧཱུཾ་གི་གླུའི་བཟླས་པ་བྱ་བ་ཡིན་ནོ་ཞེས་བྱ་བའི་ཕྱིར་བཟླས་པའི་དོན་དུ་ཉེ་བའི་སྙིང་པོ་ཤེས་པ་ཡིན་ནོ་ཞེས་བྱ་བ་གསུངས་ཏེ། ཨ་ནུ་ར་ག་ཡ་མི་ཞེས་བྱ་བ་མངོན་དུ་བྱ་ཞིང་རྣལ་འབྱོར་པས་ཡི་གེ་ཧཱུཾ་གི་གླུའི་བཟླས་པ་བྱ་བ་ཡིན་ཏེ། འདི་ནི་ཉེ་བའི་སྙིང་པོ་ཤེས་པའོ། །ཉེ་བའི་སྙིང་པོ་ཤེས་པ་འདི་དག་གང་ཡིན་ཞེ་ན་རྡོ་རྗེ་སེམས་དཔའ་སྒྲུབ་པའོ་ཞེས་བྱ་བའོ། །ཅི་བྱས་ནས་ཉེ་བའི་སྙིང་པོ་འདི་ཤེས་པས་རྡོ་རྗེ་སེམས་དཔའ་འདི་བསྒྲུབ་པར་བྱ་བ་ཡིན་ཞེ་ན། ཕྱག་རྒྱ་ཆེན་པོར་བྱིན་གྱིས་བརླབས་ནས་ཞེས་བྱ་བ་སྟེ་བྱིན་གྱིས་བརླབས་པ་དེ་ཡང་བཤད་ཟིན་ཏོ། །ཅི་བྱ་ཞིང་བསྒྲུབ་པར་བྱ་ཞེ་ན། དེ་བཞིན་དུ་བལྟ་ཞིང་ཞེས་བྱ་བ་ལ་སོགས་པ་ལ། ཇི་ལྟར་དཀྱིལ་འཁོར་ཆེན་པོ་སྒྲུབ་པ་ལ་བཅོམ་ལྡན་འདས་རྡོ་རྗེ་ལྟ་བས་བལྟ་ཞིང་བསྒྲུབ་པར་བྱའོ་ཞེས་བྱ་བ་དེ་བཞིན་དུ་སྒྲུབ་པའི་ཐབས་ཀྱིས་བསྒྲུབ་པ་ལ་ཡང་རྡོ་རྗེ་ལྟ་བས་བལྟ་ཞིང་བསྒྲུབ་པར་བྱའོ། །ལན་ཅིག་སྒྲུབ་པ་ནི་ཇི་ལྟ་བ་བཞིན་དུ་མངོན་པར་འདོད་པའི་བཟླས་པ་སོ་ཞེས་བྱ་བ་ལ། ཉིན་རེ་ཐུན་མཚམས་སྔ་མའི་དུས་སུ་དཔག་ཏུ་མེད་པའི་བཟླས་པས་སྒྲུབ་པ་ལན་ཅིག་བྱའོ། །དེ་ཞེས་བྱ་བ་ལ་སོགས་པ་ལ་དེ་ལྟར་ཤིན་ཏུ་མཉམ་པར་གཞག་པའི་རྣལ་འབྱོར་གྱིས་ཅི་ནུས་པར་སྒྲུབ་པ་ལན་ཅིག་ཏུ་བྱས་ནས། དེའི་དུས་ཕྱི་མ་ལ་ཇི་ལྟར་མངོན་པར་བརྩོན་པ་ནི་མཉམ་པར་མ་བཞག་པ་དང་ཤིན་ཏུ་མཉམ་པར་གཞག་པའི་རྣལ་འབྱོར་བདག་གིས་སོ། །ཇི་ལྟར་འདོད་པ་ནི་ཇི་ལྟར་མོས་པའོ། །ཇི་ལྟར་མངོན་པར་འདོད་པ་ནི་ཇི་ཙམ་དུ་སྒོམ་པར་འདོད་པ་ཡིན་ནོ། །ཇི་ལྟར་བྱིན་གྱིས་བརླབས་པས་ཞེས་བྱ་བ་ནི་ལྷ་བསྒོམས་པ་ལས་བྱུང་བའི་བ་སྦུ་ལྡང་བ་ལ་སོགས་པའོ། །དེ་ལྟར་ཇི་ལྟ་བཞིན་དུ་བཤད་པའི་ཡི་གེ་ཧཱུཾ་གི་གླུའི་བཟླས་པས་དགའ་བ་ཆེན་པོ་རྡོ་རྗེ་དོན་ཡོད་ནི་རྡོ་རྗེ་སེམས་དཔའི་དགའ་བའི་ཤུགས་ཀྱིས་བསྒྲུབས་ཏེ་མངོན་དུ་བྱ་བ་ཡིན་ནོ། །གང་ཡིན་ཞེ་ན། རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་ཅེས་བྱ་བའོ། །ཇི་ལྟ་བ་བཞིན་དུ་འདོད་པ་ཞེས་བྱ་བ་ནི་ཇི་ལྟར་འདོད་
པའོ། །འདིས་ནི་འདི་བཤད་པར་འགྱུར་ཏེ། སྔ་མ་བཞིན་དུ་དམ་ཚིག་སེམས་དཔའི་བྱིན་གྱིས་བརླབ་པ་མཐར་ཐུག་པའི་ཆོ་ག་རྗེས་སུ་སྤྱད་ནས་ཕྱག་རྒྱ་ཆེན་པོ་བཅིང་བར་བྱའོ། །དེ་ནས་ཡི་གེ་ཧྲཱིཿལས་མདུན་དུ་སྣ་ཚོགས་པ། དེའི་སྟེང་དུ་ཡི་གེ་ཧཱུཾ་ཨ་ཞེས་བརྗོད་པས་དང་པོའི་རྡོ་རྗེའི་དབུས་སུ་ཡི་གེ་ཧཱུཾ་རྣམ་པར་བསམས་ལ། བཛྲ་ཧཾ་ཞེས་བྱ་བ་བསྒོམ་པར་བྱའོ། །དེ་ནས་ཧཱུཾ་བཛྲ་སཏྭ་ཧཾ་ཞེས་བྱ་བ་བརྗོད་ཅིང་རྡོ་རྗེ་དེ་རྡོ་རྗེ་སེམས་དཔར་བདག་ཉིད་རྣམ་པར་བསམས་ལ། རྡོ་རྗེ་ལྕགས་ཀྱུ་མ་ལ་སོགས་པའི་ལས་བྱ་ཕྱག་རྒྱ་བཞི་པོས་བཅོམ་ལྡན་འདས་དེ་ཉིད་བཀུག་ཅིང་བཅུག་སྟེ་བཅིང་ལ་དབང་དུ་བྱས་ནས། དང་པོའི་རྡོ་རྗེའི་ཕྱག་རྒྱས་དྲྀ་ཤྱ་ཞེས་བྱ་བས་བལྟ་བར་བྱས་ལ། དྲིལ་བུ་དང་བཅས་པའི་གསང་བ་ལྕགས་ཀྱུ་མ་དང་ཡི་གེ་ཧཱུཾ་གིས་རང་གི་ལུས་ལ་བཅུག་སྟེ་སླར་ཡང་དང་པོའི་རྡོ་རྗེ་བཅིངས་ནས་ས་མ་ཡ་ཧཾ་ཞེས་བྱ་བ་བརྗོད་ཅིང་འོད་ཀྱི་དཀྱིལ་འཁོར་ཕམ་པར་བྱས་ནས། ས་མ་ཡ་ཧཾ་སྟྭཾ་ཨ་ཧཾ་ཛཿཧཱུཾ་བཾ་ཧོཿ། ཞེས་བྱ་བ་ལན་གསུམ་བརྗོད་ཅིང་བཅོམ་ལྡན་འདས་དང་ལྷན་ཅིག་ཏུ་བདག་ཉིད་དུ་གྱུར་པར་བསམ་པའོ། །སླར་ཡང་གསང་བའི་ལྕགས་ཀྱུ་མ་བཅིངས་ནས་ཨ་ནུ་བག་ཡ་མི་ཧཱུཾ་ཞེས་བྱ་བ་ལན་གསུམ་དུ་བརྗོད་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་རྒྱས་བཏབ་ལ། ཛཿཧཱུཾ་བཾ་ཧོཿ། ཞེས་བརྗོད་ཅིང་ཡིད་ཀྱིས་ལེགས་པའི་སྦྱོར་བས་སངས་རྒྱས་ཐམས་ཅད་བཅུག་སྟེ། དམ་ཚིག་གི་ཕྱག་རྒྱ་རྣམས་ཀྱིས་བསྒྲུབ་པར་བྱའོ། །དེ་ནས་ཆོས་དང་ལས་དང་ཕྱག་རྒྱ་ཆེན་པོ་རྣམས་ཀྱིས་དེ་དག་ལ་རྒྱས་བཏབ་ནས་སྔ་མ་བཞིན་དུ་དང་པོའི་རྡོ་རྗེས་བདག་ཉིད་ཀྱི་གནས་བཞིར་བྱིན་གྱིས་བརླབས་ཏེ། ཡི་གེ་བརྒྱ་པས་བརྟན་པར་བྱས་ལ་སངས་རྒྱས་ལྔའི་ཅོད་པན་གྱི་དབང་བསྐུར་བའི་ཕྱག་རྒྱས་དབང་བསྐུར་ཏེ། རྡོ་རྗེ་དང་བདག་པོ་དང་མིང་གི་དབང་བསྐུར་བ་བླངས་ལ་དངོས་གྲུབ་ཀྱི་རྡོ་རྗེ་བརྟུལ་ཞུགས་གཟུང་བར་བྱའོ། །དེ་ནས་ཐམས་ཅད་རྗེས་སུ་ཆགས་པ་ཞེས་བྱ་བ་ལ་སོགས་པའི་རྡོ་རྗེའི་གླུ་བརྗོད་ཅིང་རྡོ་རྗེའི་གར་བྱས་ཏེ་རབ་ཏུ་དགའ་བའི་ཕྱག་རྒྱ་བཅིངས་ནས་དེའི་སྙིང་པོ་བརྗོད་ཅིང་མེ་ཏོག་དབུལ་བའི་ཚུལ་བྱས་ནས་རྡོ་རྗེ་ཁུ་ཚུར་གཉིས་བཅིང་བར་བྱའོ། །དེ་ནས་ཡི་གེ་ཧཱུཾ་བརྗོད་ཅིང་རྡོ་རྗེ་སེམས་དཔའི་ལས་ཀྱི་
ཕྱག་རྒྱ་བཅིངས་ནས་འདོད་ཆགས་རྡོ་རྗེ་མའི་སྙིང་པོ་བརྗོད་ཅིང༌། རྡོ་རྗེ་མཚོན་ཆ་མའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་དེ་བཞིན་དུ་གར་ལས་བྱུང་བའི་དགའ་མའི་ལས་ཀྱི་ཕྱག་རྒྱ་བཅིངས་ཏེ། དེའི་སྙིང་པོས་སྤོས་འབུལ་བའི་ཚུལ་བྱས་ལ་སྔ་མ་བཞིན་དུ་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་དེ་བཞིན་དུ་ཀཱི་ལི་ཀཱི་ལའི་ལས་ཀྱི་ཕྱག་རྒྱ་བཅིང་བར་བྱའོ། །དེ་བཞིན་དུ་ཞེས་བྱ་བ་ལ་སླར་ཡང་དེ་བཞིན་དུ་གར་བྱས་ལ་སྤྱན་གྱི་ལས་ཀྱི་ཕྱག་རྒྱ་བཅིང་བར་བྱའོ། །དེ་ནས་རྡོ་རྗེ་སེམས་དཔའི་ཕྱག་རྒྱ་དང༌། དེ་ནས་རྡོ་རྗེ་དྲན་མའི་ལས་ཀྱི་ཕྱག་རྒྱ་བཅིང་བར་བྱའོ། །སླར་ཡང་དེ་བཞིན་དུ་གར་བྱས་ལ་དཔལ་ཆེན་མོའི་ལས་ཀྱི་ཕྱག་རྒྱ་བཅིང་བར་བྱའོ། །རྡོ་རྗེ་སེམས་དཔའི་ལས་ཀྱི་ཕྱག་རྒྱ་དང༌། དེ་ནས་རྡོ་རྗེ་ཆགས་པའི་དབང་ཕྱུག་མའི་ལས་ཀྱི་ཕྱག་རྒྱ་དེ་བཞིན་དུ་བཅིང་བར་བྱའོ་འདི་ནི་གསང་པའི་མཆོད་པ་རྣམ་པ་བཞིའོ། །དེ་ནས་བདག་ཉིད་ཡང་དག་པར་མཆོད་ལ་སྒེག་མོ་དང་དགའ་བའི་རྡོ་རྗེ་མས་བཅོམ་ལྡན་འདས་ལ་ཕྱག་བྱས་ལ་དེ་ཁོ་ན་ཉིད་དང༌། ཆོས་དང་ལས་དང་དམ་ཚིག་རྣམས་བླངས་ཏེ། དམ་ཚིག་གསུམ་གྱི་གླུའི་མཆོད་པ་བྱས་ནས། རང་གི་སྙིང་ག་ན་གནས་པའི་རྡོ་རྗེ་ལ་ཡི་གེ་ཧཱུཾ་རྣམ་པར་བསམས་ཏེ། དེ་བཞིན་དུ་བདག་ཉིད་རྡོ་རྗེ་སེམས་དཔར་གྱུར་ཅིག །སྨོན་ལམ་བྱས་ལ་ཨ་ནུ་ར་ག་ཡ་མི་ཞེས་བྱ་བ་བཟླས་པའི་དོན་དུ་ཡི་གེ་ཧཱུཾ་གི་གླུའི་བཟླས་པ་བྱ་བ་ཡིན་ནོ། །དེ་ལྟར་རྡོ་རྗེ་སེམས་དཔའི་སྒྲུབ་པ་བྱས་ནས་ད་ནི་འདོད་ཆགས་རྡོ་རྗེ་མ་ལ་སོགས་པའི་སྒྲུབ་པ་བསྟན་པར་བྱ་བའི་ཕྱིར་དེ་ནས་ཕྱག་རྒྱ་ཆེན་པོ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །འདོད་ཆགས་རྡོ་རྗེ་མ་ལ་སོགས་པའི་སྐུའི་གསང་བ་བྱིན་གྱིས་རློབ་པར་བྱེད་པའི་ཕྱག་རྒྱ་ཆེན་པོ་སྟེ་དེ་དག་གི་སྐུའི་གསང་བའི་ཚུལ་གྱིས་རང་བཞིན་ཅན་ནོ། །སྐུ་ཞེས་བྱ་བ་ནི་བཤད་ཟིན་ཏོ། །འདི་དག་གི་སྒྲུབ་པ་ཐམས་ཅད་ནི་རྡོ་རྗེ་སེམས་དཔའི་སྒྲུབ་པ་བཞིན་དུ་ཤེས་པར་བྱའོ། །ཁྱད་པར་ནི་འདི་ཡིན་ཏེ་འདོད་ཆགས་རྡོ་རྗེ་མ་ལ་སོགས་པའི་སྙིང་པོ་ཟླ་བའི་དཀྱིལ་འཁོར་དང་བཅས་པའི་དང་པོའི་རྡོ་རྗེའི་རྣམ་པར་བསམས་ལ་རྣལ་འབྱོར་གྱི་རྡོ་རྗེ་དེ་ཉིད་དེ་རྣམས་ཀྱི་སྙིང་པོ་ལས་རང་གི་ཕྱག་མཚན་རྣམ་པར་བསམས་ཏེ། ཕྱག་མཚན་
གྱི་ང་རྒྱལ་བསྐྱེད་ལ་ཕྱག་མཚན་དེ་ཉིད་སེམས་དཔར་བྱིན་གྱིས་བརླབ་པའི་སྦྱོར་བས་རྡོ་རྗེ་སེམས་དཔའ་སྟེ། རྡོ་རྗེ་སེམས་དཔའ་ཡང་འདོད་ཆགས་རྡོ་རྗེ་མ་ལ་སོགས་པའི་སྙིང་པོ་བརྗོད་ཅིང་བདག་ཉིད་འདོད་ཆགས་རྡོ་རྗེ་མ་ལ་སོགས་པའི་རང་བཞིན་དུ་མོས་པར་བྱའོ། །དེ་ནས་ཆོག་ཐམས་ཅད་རྗེས་སུ་སྤྱད་ནས་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་ཆེན་པོ་བཅིངས་ལ། ཇི་ལྟ་བ་བཞིན་དུ་འདོད་ཆགས་རྡོ་རྗེ་མ་ལ་སོགས་པའི་སྐུ་མདུན་དུ་བསྐྱེད་ལ། རྡོ་རྗེ་ལྕགས་ཀྱུ་མ་ལ་སོགས་པས་འདོད་ཆགས་རྡོ་རྗེ་མ་ལ་སོགས་པའི་ལྷ་མོ་རྣམས་བཀུག་ཅིང་བཅུག་ལ་བཅིངས་ཏེ་དབང་དུ་བྱས་ནས། རང་གི་དམ་ཚིག་གི་ཕྱག་རྒྱ་རྣམས་བལྟ་བར་བྱས་ལ། འདོད་ཆགས་རྡོ་རྗེ་མ་ལ་སོགས་པའི་སྙིང་པོ་དང་གསང་བའི་ལྕགས་ཀྱུ་མས་རང་གི་ལུས་ལ་བཅུག་ལ་ཆོ་ག་ཐམས་ཅད་རྗེས་སུ་སྤྱད་པར་བྱའོ། །དེ་ལྟར་ཕྱག་རྒྱ་ཆེན་པོའི་མཚན་ཉིད་དང་སྒྲུབ་པ་བསྟན་ནས། ད་ནི་དམ་ཚིག་གི་ཕྱག་རྒྱ་རྣམས་ཀྱི་མཚན་ཉིད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །དམ་ཚིག་འཛིན་པར་བྱེད་པའི་ཕྱག་རྒྱ་ནི་དམ་ཚིག་གི་ཕྱག་རྒྱ་རྣམས་སོ། །བདེ་བ་ཆེན་པོའི་རྡོ་རྗེ་བཤད་པའོ་ཞེས་བྱ་བ་ལ། བཅོམ་ལྡན་འདས་རྡོ་རྗེ་སེམས་དཔའ་དང་པོའི་རྡོ་རྗེ་ནི་བདེ་བ་ཆེན་པོའི་རྡོ་རྗེ་སྟེ། དེ་ཉིད་ཀྱི་དམ་ཚིག་འཛིན་པ་གང་ཡིན་པ་དེ་བཤད་ཟིན་ཏོ། །རྡོ་རྗེ་མདའ་ལ་སོགས་པ་ནི་འདི་ལས་བྱུང་བའོ། །བདེ་བ་ཆེན་པོ་རྡོ་རྗེ་སེམས་དཔའ་འདི་ལས་འདོད་ཆགས་རྡོ་རྗེ་སེམས་དཔའ་མ་ལ་སོགས་པ་བཞི་པོ་དམ་ཚིག་འཛིན་བའི་ཕྱག་རྒྱ་རྣམས་འབྱུང་ངོ༌། །འདི་ལྟ་སྟེ་ཞེས་བྱ་བ་ལ་སོགས་པ་དང་པོའི་རྡོ་རྗེ་བཅིངས་ཏེ། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ནས་མཛུབ་མོ་གཉིས་ཀྱི་རྩེ་མོ་ཅི་ནུས་པར་མདའི་ཚུལ་དུ་ཕྱི་རོལ་དུ་དྲང་བར་བྱ་སྟེ་འདི་ནི་འདོད་ཆགས་རྡོ་རྗེ་མའི་རྡོ་རྗེ་མདའ་ཞེས་བྱ་བའི་དམ་ཚིག་གི་ཕྱག་རྒྱ་ཡིན་ནོ། །དང་པོའི་རྡོ་རྗེ་བཅིངས་ལ་རྡོ་རྗེ་བསྡམས་པའི་ཚུལ་གྱིས་མཐེ་བོང་གཉིས་གཟུང་བར་བྱ་སྟེ་འདི་ནི་ཀཱི་ལི་ཀཱི་ལ་མའོ། །དང་པོའི་རྡོ་རྗེ་བཅིངས་ཏེ་མཐེ་བོང་གཉིས་བསླང་སྟེ་མ་འབྱོར་བར་བྱས་ལ་གཡས་པའི་མཛུབ་མོ་ལྕགས་ཀྱུའི་རྣམ་པ་གཡོན་པའི་དབུས་མའི་
ཚིགས་གསུམ་པར་བཙུགས་ལ་གཡོན་པའི་མཛུབ་མོ་དེ་བཞིན་དུ་གཡས་པའི་དབུས་མའི་ཚིགས་གསུམ་པར་བཙུགས་ཏེ་སྲིན་ལག་གཉིས་ཡང་དག་པར་སྦྱར་བའི་རྩེ་མོ་དང༌། མཐེའུ་ཆུང་གཉིས་ཀྱི་རྩེ་མོ་སྦྱར་ནས་རྩེ་མོ་འདིས་བྱས་པ་འདི་ནི་རྡོ་རྗེ་དྲན་མའོ། །དང་པོའི་རྡོ་རྗེ་བཅིངས་ལ་བརླ་གཡས་པ་དང་གཡོན་པ་ལ་གཟུང་བར་བྱ་སྟེ་འདི་ནི་རྡོ་རྗེ་འདོད་པའི་དབང་ཕྱུག་མའི་དམ་ཚིག་གི་ཕྱག་རྒྱའོ། །རྡོ་རྗེ་ཐལ་མོ་བསྐོར་བ་རང་གི་སྙིང་གའི་ཕྱོགས་སུ་བཅིངས་ལ་ལྷག་པར་དད་པའི་ཁྱད་པར་གྱིས་སྒེག་པ་དང་བཅས་པའི་མིག་གིས་བལྟས་ཞིང་སྤྱི་བོས་བཅོམ་ལྡན་འདས་ལ་ཕྱག་བྱས་ནས་སྤྱི་བོར་གཟུང་བར་བྱ་སྟེ་དེ་ནས་དེ་ལས་ཕབ་ནས་མེ་ཏོག་འབུལ་བའི་ཚུལ་གྱིས་གྱེན་དུ་གཏོར་བར་བྱ་སྟེ་འདི་ནི་རབ་ཏུ་དགའ་བ་མའིའོ། །དེ་བཞིན་དུ་རྡོ་རྗེ་ཐལ་མོ་བསྐོར་བ་བཅིངས་ལ་སྤྱི་བོར་བཞག་ནས་ཕབ་སྟེ་སྤོས་འབུལ་བའི་ཚུལ་གྱིས་འོག་ཏུ་དོར་བར་བྱས་ཏེ་འདི་ནི་དགའ་མའིའོ། །དེ་བཞིན་དུ་རྡོ་རྗེ་ཐལ་མོས་སྐོར་བ་བཅིངས་ལ་སྤྱི་བོར་བཞག་ནས་ཕབ་སྟེ་མར་མེ་འབུལ་བའི་ཚུལ་དུ་མཐེ་བོང་སྦྱར་བ་བསྐོར་ནས་གཟུང་བར་བྱ་སྟེ་སྤྱན་གྱིའོ། །དེ་བཞིན་དུ་ཐམས་ཅད་བྱས་ལ་རྡོ་རྗེ་ཐལ་མོ་སྤྱི་བོར་བཞག་ནས་ཕབ་སྟེ་རང་གི་སྙིང་གའི་ཕྱོགས་སུ་བརྐྱང་སྟེ་དྲི་བྱུག་པའི་ཚུལ་གྱིས་གཟུང་བར་བྱ་སྟེ་འདིས་ནི་རྡོ་རྗེ་དྲི་མའིའོ། །རྡོ་རྗེ་ཐལ་མོ་བཅིངས་ཏེ་དེས་ལྷག་པར་དད་པའི་ཁྱད་པར་རྣམ་པར་འཕྲུལ་པའི་ཚུལ་བསྟན་པར་བྱ་སྟེ་འདི་ནི་སྒེག་མའིའོ། །རྡོ་རྗེ་ཐལ་མོ་བཅིངས་ཏེ་དགོད་པའི་ཚུལ་གྱིས་ཁར་ཡོངས་སུ་བསྐོར་ལ་སྤྱི་བོར་གཟུང་བར་བྱ་སྟེ་འདི་ནི་བཞད་མའིའོ། །རྡོ་རྗེ་ཐལ་མོ་བཅིངས་ཏེ་གཡོན་པའི་མཛུབ་མོ་པི་ཝང་གི་ཚུལ་དུ་གཟུང་བར་བྱས་ལ་གཡས་པའི་མཛུབ་མོ་བཀུག་པས་རྡོ་རྗེ་པི་ཝང་བརྡུང་བའི་རྡོ་རྗེ་གླུ་མའི་སྙིང་པོའི་གླུས་མངོན་པར་བསྟོད་ཅིང་རྣལ་འབྱོར་པས་ཕྱག་རྒྱ་བཅིང་བར་བྱ་སྟེ་འདི་ནི་རྡོ་རྗེ་གླུ་མའིའོ། །རྡོ་རྗེ་ཁུ་ཚུར་གཉིས་ཀྱིས་གར་བྱས་ལ་སྤྱི་བོར་རྡོ་རྗེ་ཐལ་མོ་བཅིང་བར་བྱས་ཏེ་འདི་ནི་རྡོ་རྗེ་གར་མའིའོ། །རྡོ་རྗེ་བསྡམས་པ་ནང་དུ་བཅིངས་ལ་བཅིངས་པ་གཡས་པའི་མཛུབ་མོ་བརྐྱང་སྟེ་བཀུག་ལ་ལྕགས་ཀྱུའུ་རྣམ་པར་གཟུང་བར་བྱ་སྟེ་འདི་ནི་རྡོ་རྗེ་ལྕགས་ཀྱུ་མའིའོ། །རྡོ་རྗེ་བསྣམས་པ་ནང་དུ་བཅིངས་ལ་མཐེ་བོང་གཉིས་ཕན་ཚུན་དུ་
མདུད་པ་བྱས་ལ་འདི་ནི་རྡོ་རྗེ་ཞགས་བ་མིའོ། །རྡོ་རྗེ་བསྡམས་པ་ནང་དུ་བཅིངས་ལ་མཛུབ་མོ་དང་མཐེ་བོང་དག་གིས་ལྕགས་ཀྱི་ལུ་གུ་རྒྱུད་བཅིང་བར་བྱ་སྟེ་འདི་ནི་རྡོ་རྗེ་ལྕགས་སྤྲོག་མའིའོ། །རྡོ་རྗེ་བསྡམས་པ་ནང་དུ་བཅིངས་ལ། རང་གི་མཐེའུ་ཆུད་དང་སྲིན་ལག་གི་ནང་དུ་མཐེ་བོང་གཉིས་གཟུང་བར་བྱ་སྟེ། འདི་ནི་རྡོ་རྗེ་དྲིལ་བུ་མའིའོ། །གསང་བའི་དམ་ཚིག་གི་ཕྱག་རྒྱ་བཤད་ཟིན་ཏོ། །གཞན་རྣམས་ཐམས་ཅད་ཇི་བཞིན་བཤད། །ཅེས་བྱ་བ་ལ་ཤིན་ཏུ་དགའ་མ་ལ་སོགས་པའི་དམ་ཚིག་ཕྱག་རྒྱ་རྣམས་ཁོ་ན་རབ་ཏུ་དགའ་མ་ལ་སོགས་པ་རྡོ་རྗེ་དྲིལ་བུ་མའི་མཐར་ཐུག་པའི་བར་གྱི་གསང་བའི་དམ་ཚིག་གི་ཕྱག་རྒྱ་རྣམས་རབ་ཏུ་སྦྱོར་བའི་ཁྱད་པར་གྱིས་འགྱུར་བ་ཡིན་ནོ། །དེ་ལ་སྦྱོར་བའི་ཁྱད་པར་ནི་འདི་ཡིན་ཏེ་གང་ཞིག་ཉེ་བའི་སྙིང་པོ་དང་བཅས་པའི་རང་གི་ལྷའི་སྙིང་པོ་བཟླས་པ་ཞེས་བྱའོ། །འདི་ལྟར་བཤད་པར་གྱུར་ཏེ། ཨ་ནུ་ར་ག་ཡ་མི་ཧཱུཾ་ཞེས་བྱ་བ་ནས་ཇི་སྲིད་དུ་ཨ་ནུ་ར་ག་ཡ་མི་བཛྲ་གྷནྡྷེ་ཧོཿ། ཞེས་བྱ་བའི་བར་གྱིས་རང་གི་ལྷའི་གསང་བའི་དམ་ཚིག་གི་ཕྱག་རྒྱ་བཅིངས་ལ་ཉེ་བའི་སྙིང་པོ་དང་བཅས་པས་རང་གི་ལྷའི་སྙིང་པོ་བཟླ་བར་བྱའོ། །དམ་ཚིག་རྡོ་རྗེ་འབེབས་པ་ལ། །ཞེས་བྱ་བ་ལ་སོགས་པ་ལ་རྡོ་རྗེ་དྲིལ་བུ་མའི་དམ་ཚིག་གི་ཕྱག་རྒྱ་ནི་དམ་ཚིག་རྡོར་ཇེ་འབབས་པ་སྟེ་དེ་བཅིངས་ནས་མཛུབ་མོ་གཉིས་ཀྱི་རྩེ་མོ་རང་གི་མཐེ་བོང་གཉིས་ཀྱི་སྟེང་དུ་ཡང་དག་པར་སྦྱར་ཞིང་གཟུང་བར་བྱ་བ་འདི་ནི་རྡོ་རྗེ་ཁུ་ཚུར་གྱི་ཕྱག་རྒྱ་སྟེ་རྡོ་རྗེ་ཁུ་ཚུར་གཉིས་བསྐྱེད་པའི་རྒྱུར་གྱུར་པ་ཡིན་ནོ། །དེ་ནས་ཀྱི་སྐ་ནི་དེ་མ་ཐག་པའོ། །ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་རྡོ་རྗེ་ཁུ་ཚུར་གྱི་ཕྱག་རྒྱ་བཅིངས་ལ། དེ་མ་ཐག་པ་ཉིད་དུ་གཉིས་སུ་བྱས་ཏེ་ཕྱག་མཚན་མེད་པའི་རྡོ་རྗེ་ཁུ་ཚུར་གཉིས་ཀྱིས་དཔལ་རྡོ་རྗེ་སེམས་དཔའ་ལ་སོགས་པ་ནས་རྡོ་རྗེ་དྲིལ་བུ་མའི་མཐར་ཐུག་པའི་བར་གྱི་དམ་ཚིག་གི་ཕྱག་རྒྱ་དང་ལས་ཀྱི་ཕྱག་རྒྱ་རྣམས་བཅིང་བར་བྱའོ་ཞེས་བྱ་བའི་ཐ་ཚིག་གོ །དེ་དག་ཇི་ལྟར་བཅིང་བར་བྱ་ཞེ་ན། འདི་ལྟ་སྟེ་ཞེས་བྱ་བ་སོགས་པ་ལ། གཡོན་པའི་རྡོ་རྗེ་ཁུ་ཚུར་གྱིས་བསྙེམས་པར་བྱས་ནས་གཡས་པའི་རྡོ་རྗེ་ཁུ་ཚུར་བསྐོར་བ་བྱས་ལ་རང་གི་སྙིང་གའི་ཕྱོགས་སུ་བསྟོད་པའི་ཚུལ་དུ་གཟུང་བར་བྱ་སྟེ། འདི་ནི་རྡོ་རྗེ་མཚོན་ཆ་མ་ཞེས་བྱ་བ་འདོད་ཆགས་རྡོ་རྗེ་
མའིའོ། །རྡོ་རྗེ་ཁུ་ཚུར་གཉིས་ཀྱི་རྡོ་རྗེ་གཉིས་ཏེ་ངེས་བསྟོད་པའི་ཚུལ་ནི་གྱེན་དུ་བསྟོད་པའོ། །དེ་བསྟོད་པར་བྱེད་པའི་ཕྱག་རྒྱ་ནི་རྡོ་རྗེ་གཉི་བསྟོད་པའི་ཚུལ་ཅན་ཏེ། རྡོ་རྗེ་ཀཱི་ལི་ཀཱི་ལ་ཞེས་བྱ་བ་རྡོ་རྗེ་ཀཱི་ལི་ཀཱི་ལའི་ལས་ཀྱི་ཕྱག་རྒྱའོ། །འདི་ལྟར་བཤད་པར་འགྱུར་ཏེ་རང་གི་སྙིང་གར་རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་སེམས་དཔའ་ལ་འཁྱུད་པའི་ཚུལ་གྱིས་འཁྱུད་དེ་བསྟོད་པ་ལ་སོགས་པ་རྡོ་རྗེ་ཁུ་ཚུར་གཉིས་གཟུང་བར་བྱའོ་ཞེས་བྱ་བའོ། །རྡོ་རྗེ་ཁུ་ཚུག་གཉིས་ཀྱིས་རྒྱལ་མཚན་བསྒྲེང་བའི་ཚུལ་དུ་བྱ་སྟེ་རྡོ་རྗེ་དྲན་མའིའོ། །རྡོ་རྗེ་ཁུ་ཚུར་གཉིས་ཀྱིས་བསྙེམས་པ་གཉིས་བྱ་སྟེ་རྡོ་རྗེ་འདོད་པའི་དབང་ཕྱུག་མའིའོ། །མཚམས་རྣམས་སུ་རྡོ་རྗེ་གར་བཤད་པའོ་ཞེས་བྱ་བ་ལ། ནང་གི་དཀྱིལ་འཁོར་གྱི་མཚམས་བཞི་བཞི་པོ་ལ་རབ་ཏུ་དགའ་མ་ལ་སོགས་པའི་རྡོ་རྗེ་གར་ལས་བྱུང་བའི་དམ་ཚིག་ཕྱག་རྒྱ་ཉིད་ནི་ལས་ཀྱི་ཕྱག་རྒྱ་ཞེས་བྱ་བའི་དོན་ཏོ། །སྒེག་མོ་ལ་སོགས་པ་ཡང་དེ་བཞིན་ནོ་ཞེས་བྱ་བ་ལ་སྒེག་མོ་དང་བཞད་མ་དང་གླུ་ལེན་མ་དང་གར་མ་རྣམས་ཀྱི་གར་ལས་བྱུང་བའི་དམ་ཚིག་གི་ཕྱག་རྒྱ་ཉིད་ལས་ཀྱི་ཕྱག་རྒྱ་རྣམས་ཡིན་ནོ། །རྡོ་རྗེ་སྒོ་མ་རྣམས་ཀྱི་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གཉིས་བཅིངས་ཏེ་མཁྲིག་མ་གཉིས་མདུད་པ་བྱས་ལ་གཡས་པའི་མཛུབ་མོ་བཀའ་བསྒོ་བའི་ཚུལ་གྱིས་ཡང་དག་པར་བཟུང་ཞིང་བཀུག་ལ་ལྕགས་ཀྱུའི་རྣམ་པས་གཟུང་བར་བྱ་སྟེ་འདི་ནི་རྡོ་རྗེ་ལྕགས་ཀྱུ་མའིའོ། །རྡོ་རྗེ་ཁུ་ཚུར་གཉིས་བཅིངས་ལ་དེས་མཁྲིག་མར་མདུད་པ་བྱས་ཏེ་འདི་ནི་རྡོ་རྗེ་ཞགས་པ་མའིའོ། །རྡོ་རྗེ་ཁུ་ཚུར་གཉིས་ཀྱིས་མཁྲིག་མ་མདུད་པ་བྱས་ལ་མནན་པར་བྱ་སྟེ་འདི་ནི་རྡོ་རྗེ་ལྕགས་སྒྲོག་མའིའོ། །རྡོ་རྗེ་ལྕགས་སྒྲོག་མའི་ཕྱག་རྒྱ་ཉིད་རང་གི་སྙིང་གར་དྲིལ་བུ་ཕྲ་བར་དཀྲོལ་བའི་ཚུལ་གྱིས་བསྐྱོད་པར་བྱས་ཏེ་འདི་ནི་རྡོ་རྗེ་དྲིལ་བུ་མའི་ལས་ཀྱི་ཕྱག་རྒྱའོ། །འདི་རྣམས་ཀྱི་ཞེས་བྱ་བ་ལ་སོགས་པ་ནི་གོ་སླའོ། །ཅི་བཞིན་འགྲུབ་ཅེས་བྱ་བ་ལ་སོགས་པ་ལ། དཔལ་རྡོ་རྗེ་སེམས་དཔའ་ལ་སོགས་པ་རྡོ་རྗེ་དྲིལ་བུ་མའི་མཐར་ཐུག་པའི་བར་གྱི་དངོས་གྲུབ་ནི་ཇི་བཞིན་དངོས་གྲུབ་སྟེ། རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་རྣམས་གྲུབ་པ་གང་ཡིན་པ་དེ་ནི་ཅི་བཞིན་གྲུབ་པའོ། །བྱེད་པར་འགྱུར་བ་ཅི་ཞིག་ཏུ་གྲུབ་བ་དེས་མཆོག་ནི་རང་བཞིན་གྱིས་
འོད་གསལ་བའི་རྣམ་པར་ཐར་བའི་སྒོའི་རང་བཞིན་གྱི་བྱ་བ་ནན་ཏན་གྲུབ་པའི་ཡེ་ཤེས་ཀྱི་མཚན་མ་ནི་སྙིང་གར་གནས་པའི་སྣ་ཚོགས་རྡོ་རྗེ་དང་བཅས་པའི་རྡོ་རྗེ་སེམས་དཔའི་སྐུའི་གསང་བ་རྣམས་སོ། །ཡུལ་དུ་གྱུར་པའི་མཆོག་གི་ཕྱག་མཚན་དེ་རྣམས་ལས་རྡོ་རྗེ་སེམས་དཔའ་ལ་སོགས་པའི་རང་བཞིན་གྱི་དངོས་གྲུབ་ཆེན་པོ་མྱུར་དུ་སྟེར་བས་ན་དངོས་གྲུབ་ཆེན་པོ་མྱུར་དུ་སྩོལ་བའོ། །ཐོག་མ་དང་ཐ་མ་མེད་པའི་ཕྱག་རྒྱ་ནི་དང་པོའི་ཕྱག་རྒྱའོ། །དགེ་བ་ནི་ཟག་པ་མེད་པའོ། །འདེ་དག་ཅེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་འདི་རྣམས་ལ་དཀྱིལ་འཁོར་དུ་མ་ཞུགས་པ་རྣམས་ཀྱང་གྲུབ་པར་འགྱུར་རོ། །དེ་ལྟར་དཀྱིལ་འཁོར་གྱི་ཕྱག་རྒྱ་བསྟན་ནས། ད་ནི་ལས་ཀྱི་ཚོགས་གྲུབ་པར་བྱེད་པའི་ཕྱག་རྒྱ་རྣམས་བསྟན་པར་བྱ་བའི་ཕྱིར། དེ་ནས་དངོས་གྲུབ་མེད་པ་སྒྲུབ་པའི་ཕྱག་རྒྱ་ཆེན་པོ་བཅིང་བ་ཞེས་བྱ་བ་གསུངས་ཏེ་དེ་ནས་ཀྱི་སྒྲ་ནི་སྐབས་སུ་བབ་པའོ། །ཕྱག་རྒྱ་ཆེན་པོ་རྫོགས་པ་ནི་དངོས་གྲུབ་སྟེ་དེ་མེད་པ་ནི་དངོས་གྲུབ་མ་ཐོབ་པའོ། །དངོས་གྲུབ་མ་ཐོབ་པ་དེ་སྒྲུབ་པ་ནི་དངོས་གྲུབ་མ་ཐོབ་པ་སྒྲུབ་པ་སྟེ་རྗེས་སུ་ཆགས་པ་ལ་སོགས་པའོ། །དེའི་དོན་དུ་ཕྱག་རྒྱ་ཆེན་པོའི་ལས་གྲུབ་པར་བྱེད་པའི་ཕྱག་རྒྱ་རྣམས་སོ། །དེ་རྣམས་འཆིང་བ་ནི་དེ་དག་འཆིང་བའི་མཚན་ཉིད་འདི་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །རྗེས་སུ་ཆགས་པ་ལ་སོགས་པ་རྣམས་ནི་ཇི་ལྟར་བསྒྲུབ་པར་བྱ་ཞེ་ན། དང་པོའི་རྡོ་རྗེ་ཞེས་བྱ་བ་ལ་སོགས་པ་ལ་དང་པོའི་རྡོ་རྗེ་བཅིངས་ཏེ་དེ་ཉིད་ཀྱིས་ཀྱང་ཕྱག་རྒྱ་བཞིའི་ཚོགས་ཀྱི་རྗེས་སུ་ཆགས་པ་ལ་སོགས་པའི་ཚུལ་གྱིས་བསྒྲུབ་པར་བྱའོ། །དགོད་པ་དང་དགུག་པ་དང་བརྟན་པ་དང་ལས་བསྟན་པས་སོ་ཞེས་བྱ་བ་ལ་དགོད་པ་དང་དགུག་པ་དང་བརྟན་པ་དང་ལས་རྣམས་ཏེ་དེ་དག་ལྟ་བས་བསྒྲུབ་པར་བྱའོ། །འདིས་འདི་ལྟར་བཤད་པར་འགྱུར་ཏེ། དང་པོའི་རྡོ་རྗེ་བཅིངས་ཏེ་དགོད་པའི་གདོང་གིས་རྡོ་རྗེའི་ལྟ་བས་རྗེས་སུ་ཆགས་པ་བསྒྲུབ་པར་བྱའོ། །འབར་བའི་ལྟ་བས་བསྒྲུབ་བྱ་དགུག་པར་བྱ་བ་སྟེ་དེ་ལྟར་བསྒྲུབ་བྱ་དགུག་པར་བྱའོ། །བརྟན་པའི་ལྟ་བ་དང་འཆིང་བའི་ལྟ་བའི་བསམ་པ་ལ་བལྟ་ཞིང་བཟླས་པ་བྱ་སྟེ་དེ་ལྟར་ན་བརྟན་པར་འཆིང་བར་འགྱུར་རོ། །རྡོ་རྗེ་ལྟ་བས་བསྒྲུབ་བྱ་དབང་དུ་བྱེད་པ་
རྫོགས་པའི་བསམ་པས་བལྟ་ཞིང་བཟླ་བར་བྱ་སྟེ་དེ་ལྟར་ན་དབང་དུ་བྱ་པའི་ལས་ལྟ་བས་གྲུབ་པ་ཡིན་ནོ། །དེ་ལྟར་ན་དང་པོའི་རྡོ་རྗེ་ལྟ་བས་ལས་བཞི་པོ་སྒྲུབ་པ་ཡིན་ནོ། །རྟགས་དང་སྙིང་ག་དང་དབང་བསྐུར་བ་དང་སྤྱི་བོར་གཞག་པར་བྱའོ་ཞེས་བྱ་བ་ལ། དང་པོའི་རྡོ་རྗེ་རང་གི་རྟགས་ལ་གཟུང་བར་བྱ་སྟེ་དེ་ལྟར་ན་བདེ་བ་ཐམས་ཅད་མངོན་པར་འཕེལ་བར་འགྱུར་རོ། །རང་གི་སྙིང་གར་གཟང་བར་བྱ་སྟེ་དེ་ལྟར་ན་ཡིད་བདེ་བ་ཐམས་ཅད་མངོན་པར་འཕེལ་བར་འགྱུར་རོ། །དབང་བསྐུར་བའི་གནས་སུ་གཟུང་བར་བྱ་སྟེ་དེ་ལྟར་ན་ཕུན་སུམ་ཚོགས་པ་ཐམས་ཅད་མངོན་པར་འཕེལ་བར་འགྱུར་རོ། །སྤྱི་བོར་གཟུང་བར་བྱ་སྟེ་དེ་ལྟར་ན་དངོས་གྲུབ་ཐམས་ཅད་མངོན་པར་འཕེལ་བར་འགྱུར་རོ། །དབུས་མའི་རྡོ་རྗེ་སྙིང་ག་དང་རྟགས་དང༌། ཁ་དང་དབང་བསྐུར་དུ་བཞག་ནས་བཏུང་བར་བྱའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ཏེ་དབུས་མའི་རྡོ་རྗེ་རང་གི་སྙིང་གར་བཞག་ནས་ཕྱི་ནས་རང་གི་ཁ་ལ་བཟུང་ཞིང་བཏུང་བར་བྱ་སྟེ་དེ་ལྟར་ན་ཚེ་ཆེན་པོ་མངོན་པར་འཕེལ་བར་འགྱུར་རོ། །རང་གི་རྟགས་ལ་བཞག་ནས་ཁར་བཟུང་ཞིང་བཏུང་བར་བྱ་སྟེ། དེ་ལྟར་ན་ན་ཚོད་མངོན་པར་འཕེལ་བར་འགྱུར་རོ། །རང་གི་ཁར་བཟུང་ཞིང་བཏུང་བར་བྱ་སྟེ། དེ་ལྟར་ན་གཟུགས་མངོན་པར་འཕེལ་ལོ། །དབང་བསྐུར་བའི་གནས་སུ་བཞག་སྟེ་རྗེས་ལ་ཁར་བཟུང་ཞིང་བཏུང་བར་བྱ་སྟེ་དེས་ནི་གཟི་བརྗིད་འཕེལ་བར་འགྱུར་བ་ཡིན་ནོ། །མཛུབ་མོ་དང་དབུས་མ་དང་སྲིན་ལག་དང་མཐེ་ཆུང་གི་རྡོ་རྗེ་ཞེས་བྱ་བ་ལ་དང་པོའི་རྡོ་རྗེའི་མཛུབ་མོ་གཉིས་ཡང་དག་པར་སྦྱར་བའི་རྩེ་མོ་བྱ་སྟེ་དེ་ལྟར་ན་དཔལ་ཆེན་པོ་མངོན་པར་འཕེལ་བར་འགྱུར་རོ། །དང་པོའི་རྡོ་རྗེ་དབུས་མའི་རྩེ་མོར་ཕྱིར་གཟུང་བར་བྱ་སྟེ་དེ་ལྟར་ན་བདེ་བ་ཆེན་པོ་མངོན་པར་འཕེལ་བར་འགྱུར་རོ། །དང་པོའི་རྡོ་རྗེ་སྲིན་ལག་གཉིས་ཀྱི་རྩེ་མོར་བྱ་སྟེ། འདིས་སྒྲ་སྙན་ཆེན་པོ་མངོན་པར་འཕེལ་བར་འགྱུར་རོ། །དང་པོའི་མཐེའུ་ཆུང་གཉིས་ཀྱི་རྩེ་མོ་བསླང་ལ་གཟུང་བར་བྱ་སྟེ་དེ་ལྟར་ན་གྲགས་པ་ཆེན་པོ་མངོན་པར་འཕེལ་བར་འགྱུར་རོ། །དཔུང་པ་དང་སྙིང་ག་དང་ལྕེ་དང་སྤྱི་བོར་བསྟོད་པའོ་ཞེས་བྱ་བ་ལ་དང་པོའི་རྡོ་རྗེ་རང་གི་དཔུང་པར་བསྟོད་པའི་ཚུལ་བྱ་སྟེ་འདིས་སྟོབས་ཆེན་པོའི་དངོས་གྲུབ་ཐོབ་པར་འགྱུར་རོ། །དང་པོའི་
རྡོ་རྗེ་རང་གི་སྙིང་གར་བསྟོད་པས་ཡེ་ཤེས་ཆེན་པོ་འགྲུབ་པའོ། །རང་གི་ལྕེར་བསྟོད་པས་ཆོས་འགྲུབ་པའོ། །དང་པོའི་རྡོ་རྗེ་སྤྱི་བོར་བསྟོད་པ་ལས་འགྲུབ་པར་འགྱུར་རོ། །ནམ་མཁའ་བསྐྱེད་པ་དང༌། མཛུབ་མོ་དང་སྲིན་ལག་འབར་བ་དང༌། སྙིང་གར་དགའ་བ་དང༌། རང་གི་ལུས་ལ་བསྐོར་བ་ཞེས་བྱ་བ་ལ་དང་པོའི་རྡོ་རྗེ་བཅིངས་ལ། དེའི་ནམ་མཁའ་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་བསྐྱེད་ནས་ལྟ་བའི་ཚུལ་བྱ་སྟེ་དེ་ལྟར་ན་དངོས་གྲུབ་ཐམས་ཅད་མཐོང་བར་འགྱུར་རོ། །དང་པོའི་མཛུབ་མོ་གཉིས་དང་སྲིན་ལག་གཉིས་ཀྱིས་འབར་བའི་ཚུལ་བྱ་སྟེ་དེ་ལྟར་ན་ཆོ་འཕྲུལ་ཐམས་ཅད་མཐོང་བ་ཡིན་ནོ། །དང་པོའི་རྡོ་རྗེ་བཅིངས་ལ་རང་གི་སྙིང་གར་དགའ་བ་བསྐྱེད་པའི་ཚུལ་གྱིས་གཟུང་བར་བྱ་སྟེ་དེ་ལྟར་ན་རྨད་དུ་བྱུང་བ་ཐམས་ཅད་མཐོང་བ་ཡིན་ནོ། །དང་པོའི་རྡོ་རྗེ་བཅིངས་ལ་རང་གི་ལུས་ལ་བསྐོར་བར་བྱ་སྟེ་དེ་ལྟར་ན་རྣམ་པར་འཕྲུལ་པ་ཐམས་ཅད་མཐོང་བར་འགྱུར་རོ། །ཐམས་ཅད་དུ་བསྐོར་ནས་དབང་པོ་ཀུན་ལ་གཞག་པར་བྱའོ་ཞེས་བྱ་བ་ནི་དང་པོའི་རྡོ་རྗེ་བཅིངས་ལ་ཐམས་ཅད་དུ་བསྐོར་ནས་མིག་ལ་གཟུང་བར་བྱ་སྟེ་དེ་ལྟར་ན་བདེན་པ་ཐམས་ཅད་མཐོང་བར་འགྱུར་རོ། །དང་པོའི་རྡོ་རྗེ་ཐམས་ཅད་དུ་བསྐོར་ནས་རྣ་བ་གཉིས་ལ་གཟུང་བར་བྱ་སྟེ་དེ་ལྟར་ན་བདེན་པ་ཐམས་ཅད་ཐོས་པ་ཡིན་ནོ། །དང་པོའི་རྡོ་རྗེ་བཅིངས་ལ་ཐམས་ཅད་དུ་བསྐོར་ནས་ལྕེ་ལ་གཟུང་བར་བྱ་སྟེ་དེ་ལྟར་ན་ཐམས་ཅད་སྨྲ་བའོ། །དང་པོའི་རྡོ་རྗེ་བཅིངས་ལ་ལུས་ཐམས་ཅད་ལ་གཟུང་བར་བྱ་སྟེ་དེ་ལྟར་ན་ལུས་ཀུན་གྱིས་འཁྱུད་པ་འགྲུབ་པར་འགྱུར་རོ། །དབུས་མའི་རྡོ་རྗེ་དབང་པོ་ཐམས་ཅད་ལ་རེག་པའོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེས་མིག་གཉིས་ལ་རེག་པས་བདེན་པ་ཐམས་ཅད་མཐོང་བའོ། །རྣ་བ་གཉིས་ལ་རེག་པས་ཐམས་ཅད་ཐོས་པའོ། །རང་གི་ལྕེ་ལ་རེག་པས་ཐམས་ཅད་སྨྲ་བའོ། །ལུས་ལ་རེག་པས་ན་ཚོད་བཞོན་པ་ཐོབ་པར་འགྱུར་རོ། །རང་གི་ལས་བྱེད་པས་སོ་ཞེས་བྱ་བ་ལ་དང་པོའི་རྡོ་རྗེའི་དབུས་མའི་རྡོ་རྗེ་སྒྱུ་མ་ལྟ་བུའི་ཚུལ་བྱ་སྟེ་དེ་ལྟར་ན་སྒྱུ་མ་ཐམས་ཅད་མཐོང་བར་འགྱུར་རོ། །དེ་ཉིད་ཀྱིས་ངོ་མཚར་བར་མཐོང་བའི་ཚུལ་བྱ་སྟེ་དེ་ལྟར་ན་ངོ་མཚར་བ་ཐམས་ཅད་མཐོང་བའོ། །དེ་ཉིད་ཀྱིས་སོ་སོར་བསྟན་པ་མཐོང་བའི་ཚུལ་བྱ་སྟེ་དེ་ལྟར་སོ་སོར་
བསྟན་པ་ཐམས་ཅད་མཐོང་བ་ཡིན་ནོ། །དབང་བསྐུར་བར་བཞག་ནས་དེ་བཞིན་དུ་དངོས་གྲུབ་བྱེད་པའོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེ་མཛོད་སྤྲུའི་ཕྱོགས་སུ་གཏེར་སྟོན་པའི་ཚུལ་གྱིས་གཟུང་བར་བྱ་སྟེ་ད་ལྟར་ན་གཏེར་ཐམས་ཅད་སྟོན་པར་འགྱུར་རོ། །གཏེར་ལ་སོགས་པ་དགུག་པའི་ཚུལ་གྱིས་གཟུང་བར་བྱ་སྟེ་དེ་ལྟར་ན་ནོར་བུ་ཐམས་ཅད་འཕྲོག་པའོ། །རྒྱལ་སྲིད་ཐོབ་པའི་ཚུལ་གྱིས་གཟུང་བར་བྱ་སྟེ་དེ་ལྟར་ན་རྒྱལ་སྲིད་འཐོབ་པའོ། །སྐྱེ་བོའི་ཚོགས་ཐམས་ཅད་རང་ལ་རག་ལུས་པའི་བསམ་པས་གཟུང་བར་བྱས་ནས་གཞི་ཐམས་ཅད་ཉེ་བར་ལོངས་སྤྱོད་པར་འགྱུར་རོ། །ས་ལ་བཞག་ནས་བྱའོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེ་ལ་བཞག་ནས། དེ་ཡུལ་ཐམས་ཅད་སྤྲུལ་པའི་ཚུལ་བྱ་སྟེ། དེ་ལྟར་ན་ཡུལ་ཐམས་ཅད་སྤྲུལ་པ་ལ་ཉེ་བར་ལོངས་སྤྱོད་པར་འགྱུར་རོ། །སྐྱེ་བོ་སྤྲུལ་པའི་ཚུལ་བྱ་སྟེ་དེ་ལྟར་ན་འདོད་པའི་སྐྱེ་བོ་སྤྲུལ་པར་འགྱུར་རོ། །གྲོང་ཁྱེར་སྤྲུལ་པའི་ཚུལ་བྱ་སྟེ་དེ་ལྟར་ན་གྲོང་ཁྱེར་སྤྲུལ་པའོ། །ནགས་ཚལ་དང་ཆུ་བོ་སྤྲུལ་པའི་ཚུལ་བྱ་སྟེ་དེ་ལྟར་ན་ནགས་ཚལ་དང་ཆུ་བོ་སྤྲུལ་བར་འགྱུར་རོ། །ཐམས་ཅད་དུ་བསྐོར་ནས་ཡིད་ཀྱིས་སྤྲུལ་པར་བྱའོ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྡོ་རྗེ་ཐམས་ཅད་དུ་བསྐྱེར་བར་བྱ་སྟེ་དེ་ལྟར་ན་མཆོག་ཏུ་གྱུར་པའི་ཡུལ་སྤྲུལ་པར་བྱའོ། །རིན་པོ་ཆེ་སྤྲུལ་པའི་བསམ་པས་ཐམས་ཅད་དུ་བསྐོར་བར་བྱ་སྟེ་དེ་ལྟར་ན་ལྷའི་རིན་པོ་ཆེ་སྤྲུལ་པར་འགྱུར་རོ། །མཆོག་ཏུ་གྱུར་པའི་གྲོགས་པོ་དང་འཁོར་སྤྲུལ་པའི་བསམ་པ་ཐམས་ཅད་དུ་བསྐོར་བར་བྱ་སྟེ་དེ་ལྟར་ན་དེ་དག་སྤྲུལ་པར་འགྱུར་རོ། །ལྷའི་ཡུལ་ལ་སོགས་པ་ཇི་ལྟར་སྤྲུལ་པ་ལ་ཡོངས་སུ་ལོངས་སྤྱོད་པའི་བསམ་པས་ཐམས་ཅད་དུ་བསྐོར་བར་བྱ་སྟེ། དེ་ལྟར་ན་ལྷའི་ཡུལ་ལ་སོགས་པ་ལ་ཡོངས་སུ་ལོངས་སྤྱོད་པར་འགྱུར་རོ། །བཙུམས་པ་མེད་པའི་ཁྲོ་ཞིང་འབར་ལ་གཡོ་བའི་ལྟ་བས་བལྟའོ་ཞེས་བྱ་བ་ལ་དང་པོའི་རྡོ་རྗེའི་དབུས་མའི་རྡོ་རྗེ་བཅུམས་པ་མེད་པའི་ལྟ་བས་བལྟ་ཞིང་ཅི་འདོད་པའི་སྨིན་པའི་འབྲུ་སྐྱེད་པའི་ཚུལ་བྱ་སྟེ་དེ་ལྟར་ན་སྐད་ཅིག་མས་ས་འོག་ཐམས་ཅད་ནས་སྨིན་པའི་འབྲུལ་སོགས་པ་སྐྱེ་བར་འགྱུར་རོ། །ཁྲོ་བོའི་ལྟ་བས་བལྟ་ཞིང་ཆུ་མེད་པའི་ཕྱོགས་སུ་ཆུ་སྐྱེ་ཚུལ་བྱ་སྟེ་དེ་ལྟར་ན་ཆུ་མེད་པའི་ཕྱོགས་སུ་ཆུའི་ཕུང་པོ་ཆེན་པོ་
འབྱུང་བར་འགྱུར་རོ། །འབར་བའི་ལྟ་བས་བལྟ་ཞིང་སྣང་བ་ཆེན་པོ་སྐྱེད་པའི་ཚུལ་བྱ་སྟེ། དེ་ལྟར་ན་མུན་པར་སྣང་བ་ཆེན་པོ་ཡང་དག་པར་སྐྱེ་བར་འགྱུར་རོ། །གཡོ་བའི་ལྟ་བས་ཀླུ་ཐམས་ཅད་དབང་དུ་བྱེད་པར་འགྱུར་རོ། །བཟའ་བ་དང་བཏུང་བ་དང་རྐེད་པ་བསྐྱོད་པ་དང༌། སྤྱི་བོས་བཀའ་བསྒོ་བ་ཞེས་བྱ་བ་ལ་དང་པོའི་རྡོ་རྗེའི་དབུས་མའི་རྡོ་རྗེས་དངོས་པོ་ཐམས་ཅད་ཟ་བའི་ཚུལ་བསྟན་ཞིང་བཟའ་བར་བྱ་སྟེ་དེ་ལྟར་ན་བརྟན་པ་དང་གཡོ་བའི་དངོས་པོ་ཐམས་ཅད་ཟ་བར་འགྱུར་རོ། །འཐུང་བའི་ཚུལ་བསྟན་ཞིང་བཟླ་པར་བྱ་སྟེ་དེ་ལྟར་ན་ཐམས་ཅད་འཐུང་པའོ། །རོལ་དུ་བཅུག་ཚུལ་བྱས་ཤིང་རྐེད་པ་བསྐྱོད་ལ་བཟླ་བའི་ཚུལ་བྱ་སྟེ་དེ་ལྟར་ན་གནོད་སྦྱིན་མོ་ལ་སོགས་པ་རོལ་དུ་འཇུག་པའོ། །དབུས་མའི་རྡོ་རྗེ་དེ་ཉིད་ཀྱི་སྤྱི་བོས་བཀའ་བསྒོ་བའི་ཚུལ་བྱ་ཞིང་བཟླ་བར་བྱ་སྟེ། དེ་ལྟར་ན་ལས་ལ་ངེས་པར་སྦར་བར་འགྱུར་རོ། །ཐམས་ཅད་དུ་བསྐོར་ཞིང་ཐམས་ཅད་དུ་དྲན་པས་སོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་བཅིངས་ལ། གཡས་པའི་རྡོ་རྗེ་ཁུ་ཚུར་གྱི་དང་པོའི་རྡོ་རྗེ་བཟུང་སྟེ་དེ་བཞིན་གཤེགས་པ་ཐམས་ཅད་རྗེས་སུ་དྲན་པས་ཐམས་ཅད་དུ་བསྐོར་བར་བྱ་སྟེ། དེ་ལྟར་ན་དེ་བཞིན་གཤེགས་པ་ཐམས་ཅད་མཐོང་བར་འགྱུར་རོ། བྱམས་པ་ལ་སོགས་པའི་བྱང་ཆུབ་སེམས་དཔའ་ཐམས་ཅད་རྗེས་སུ་དྲན་པས་བྱམས་པ་ལ་སོགས་པ་མཐོང་བའོ། །རྡོ་རྗེ་སེམས་དཔའ་ལ་སོགས་པའི་རྡོ་རྗེ་འཆང་ཐམས་ཅད་རྗེས་སུ་དྲན་པས་རྡོ་རྗེ་སེམས་དཔའ་ལ་སོགས་པའི་རྡོ་རྗེ་འཆང་ཐམས་ཅད་མཐོང་བ་ཡིན་ནོ། །དང་པོའི་རྡོ་རྗེ་ལ་སོགས་པའི་ཕྱག་མཚན་ཐམས་ཅད་རྗེས་སུ་དྲན་པས་དང་པོའི་རྡོ་རྗེ་ལ་སོགས་པ་མཐོང་བར་འགྱུར་རོ། །མཐེའུ་ཆུང་དང་མཐེ་བོ་དང་དབུས་མའི་རྡོ་རྗེ་བཞི་སྙིང་གར་བྱའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ལ་མཐེའུ་ཆུང་གཉིས་ཀྱི་རྩེ་མོ་དང༌། མཐེ་བོང་གཉིས་ཀྱི་རྩེ་མོ་དབུས་མའི་རྩེ་མོ་དང་ཡང་དག་པར་སྦྱར་བར་བྱས་ལ་སྙིང་གར་བཟུང་ཞིང་བདག་ཉིད་ཀྱི་ལུས་ལ་དཔལ་རྡོ་རྗེ་སེམས་དཔའ་ལ་སོགས་པའི་སྤྲུལ་པ་མཐོང་བའི་བསམ་པས་བཟླ་བར་བྱ་སྟེ་དེ་ལྟར་ན་རྡོ་རྗེ་སེམས་དཔའ་ལ་སོགས་པ་སྤྲུལ་པ་འགྲུབ་པར་འགྱུར་རོ། །མི་སྣང་བའི་བསམ་པས་བཟླ་བར་བྱ་སྟེ་མི་སྣང་བར་འགྱུར་རོ། །ནམ་མཁར་འགྲོ་
བའི་བསམ་པས་བསྒོམས་ན་ནམ་མཁར་འགྲོ་བར་འགྱུར་རོ། །ཤིན་ཏུ་ཕྲ་བ་དང་རགས་པ་དུ་མ་ལ་ཞུགས་པ་དང་མཐོང་བ་བསྒོམས་པས་དེར་ཞུགས་པ་དང་མཐོང་བར་འགྱུར་རོ། །མཛུབ་མོ་གཉིས་ཀྱི་ཡི་གེ་ཧཱུཾ་དང་བཅས་པར་དགུག་པར་བྱའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས་མཛུབ་མོ་གཉིས་ཀྱི་སོར་མོ་བསྒྲེངས་ནས་འོག་ཏུ་བཏུང་བར་བྱས་པའི་བསམ་པས། ཨ་ནུ་ར་ག་ཡ་མི་ཧཱུཾ་ཧཱུཾ་ཞེས་བྱ་བ་བརྗོད་ཅིང་སྡིགས་མཛུབ་བྱས་ཏེ་དེ་ལྟར་ན་འཇིག་རྟེན་གསུམ་གྱི་བདག་པོ་ཐམས་ཅད་འཇུག་པར་འགྱུར་རོ། །དབང་དུ་བྱ་བའི་ཚུལ་གྱིས་སྡིགས་མཛུབ་བྱས་ནས་དབང་དུ་བྱེད་པ་ཡིན་ནོ། །བཅིང་བའི་ཚུལ་གྱིས་སྡིགས་མཛུབ་བྱས་ན་བཅིང་བའོ། །ལས་ཐམས་ཅད་ལ་ངེས་པར་སྦྱོར་བའི་ཚུལ་གྱིས་སྡིགས་མཛུབ་བྱས་ཏེ་དེ་ལྟར་ན་འཇིག་རྟེན་གྱི་བདག་པོ་ཐམས་ཅད་ལས་ཐམས་ཅད་ལ་ངེས་པར་སྦྱར་བར་འགྱུར་བ་ཡིན་ནོ། །དབུས་མའི་རྡོ་རྗེ་དཔྲལ་བར་འཕྲེད་ཀྱིས་མིག་བྱེད་པས་སོ་ཞེས་བྱ་བ་ལ། དང་པོའི་རྡོ་རྗེ་དབུས་མའི་རྡོ་རྗེས་ལྷ་ཐམས་ཅད་གཞུག་པའི་བསྒོམ་པ་དཔྲལ་བར་འཕྲེད་དུ་མིག་གི་ཚུལ་དུ་བྱ་སྟེ་དེ་ལྟར་ན་ཐམས་ཅད་འཇུག་པའོ། །ལྷ་ཐམས་ཅད་འཆིང་བའི་བསམ་པས་ལྷ་ཐམས་ཅད་འཆིང་བའོ། །ལྷ་ཐམས་ཅད་དབང་དུ་བྱེད་པར་བསྒོམས་པས་དབང་དུ་བྱེད་པའོ། །ལྷ་ཐམས་ཅད་ལས་ཐམས་ཅད་ལ་ངེས་པར་བསྒོམས་པས་ལྷ་ཐམས་ཅད་ལས་ཐམས་ཅད་ལ་ངེས་པར་སྦྱོར་བར་འགྱུར་བ་ཡིན་ནོ། །རང་གི་སྙིང་གར་ཅིངས་ལ་གཡོ་བ་མེད་ཅིང་མ་བཙུམས་པའི་ལྟ་བས་ས་འོག་ཏུ་བལྟ་ཞིང་ཧ་ཧཱུཾ་ཧོ་དྷི་ཞེས་བྱ་བ་བརྗོད་པར་བྱའོ་ཞེས་བྱ་བ་ལ་དང་པོའི་རྡོ་རྗེ་རང་གི་སྙིང་གར་བཅིངས་ལ་གཡོ་བ་མེད་ཅིང་མ་བཙུམས་པའི་ལྟ་བས་ས་འོག་ཏུ་བལྟ་ཞིང༌། ཨ་ནུ་ར་ག་ཡ་མི་ཧཱུཾ་ཧ་ཞེས་བྱ་བ་བརྗོད་པར་བྱ་སྟེ། དེ་ལྟར་ན་ཀླུ་ཐམས་ཅད་གནོན་པའོ། །བཀུག་པའི་ཀླུ་ཐམས་ཅད་ལ་བལྟ་ཞིང༌། ཨ་ནུ་ར་ག་ཡ་མི་ཧཱུཾ་ཧཱུཾ་ཞེས་བཟླ་བར་བྱ་སྟེ་དེ་ལྟར་ཀླུ་ཐམས་ཅད་འདུལ་བའོ། །ཨ་ནུ་ར་ག་ཡ་མི་ཧཱུཾ་ཧོ་ཞེས་བྱ་བ་བཟླ་བར་བྱས་ན་ཀླུ་ཐམས་ཅད་དབང་དུ་བྱེད་པའོ། །ལས་ཐམས་ཅད་ལ་ངེས་པར་སྦྱོར་བའི་བསམ་པས་དེ་བཞིན་དུ་བལྟ་ཞིང་ཨ་ནུ་ར་ག་ཡ་མི་ཧཱུཾ་ཧི་ཞེས་བྱ་བ་བཟླ་བར་བྱ་སྟེ། དེ་ལྟར་ན་ཀླུ་ཐམས་ཅད་ངེས་པར་སྦྱོར་བར་འགྱུར་རོ། །གནོད་སྦྱིན་པ་སོགས་པའི་གདོང་པ་བྲིས་
ནས་རྡོ་རྗེས་དགུག་པར་བྱའོ་ཞེས་བྱ་བ་ལ་གནོད་སྦྱིན་ལ་སོགས་པའི་གདོང་པ་བྲིས་ནས་དང་པོའི་རྡོ་རྗེ་བཅིངས་ཏེ། གནོད་སྦྱིན་ལ་སོགས་པའི་གདོང་པ་དང་པོའི་རྡོ་རྗེའི་དབུས་མའི་རྡོ་རྗེས་གཡོ་ཞིང་བཙུམས་པའི་ལྟ་བས་དགུག་པའི་ཚུལ་གྱིས་བལྟ་ཞིང་གཟུང་བར་བྱ་སྟེ། དེ་ལྟར་ན་གནོད་སྦྱིན་ཐམས་ཅད་ལ་སོགས་པ་དགུག་པར་འགྱུར་རོ། །དབང་དུ་བྱེད་པའི་ཚུལ་གྱིས་གཟུང་བར་བྱ་སྟེ་དེ་ལྟར་ན་དབང་དུ་བྱེད་པའོ། །བཅིང་བའི་ཚུལ་གྱིས་གཟུང་བར་བྱ་སྟེ་དེ་ལྟར་བཅིང་བའོ། །ལས་ཐམས་ཅད་ལ་ངེས་པར་སྦྱོར་བའི་ཚུལ་གྱིས་གཟུང་བར་བྱ་སྟེ་དེ་ལྟར་ན་གནོད་སྦྱིན་ལ་སོགས་པ་ལས་ཐམས་ཅད་ལ་ངེས་པར་སྦྱོར་བར་འགྱུར་རོ། །འོག་གི་ཕྱོགས་སུ་བཞག་ནས་བརྟག་པར་འགྱུར་རོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེ་དབུས་མའི་རྡོ་རྗེས་ལ་བཞག་ནས་ཨ་ནུ་ར་ག་ཡ་མི་ཧཱུཾ་ཞེས་བྱ་བ་བཟླ་བར་བྱ་སྟེ། དེ་ལྟར་ན་དཀྱིལ་འཁོར་སྤྲུལ་པར་འགྱུར་རོ། །རང་གི་ཁ་ལ་བཞག་ནས་བཟླ་བར་བྱ་སྟེ་དེ་ལྟར་ན་དཀྱིལ་འཁོར་དུ་ཞུགས་པར་འགྱུར་རོ། །དང་པོའི་རྡོ་རྗེ་དབུས་མའི་རྡོ་རྗེ་ལ་ཕྱག་བྱས་ན་དཀྱིལ་འཁོར་མཐོང་བར་འགྱུར་རོ། །རང་གི་སྙིང་གར་བཞག་ན་དཀྱིལ་འཁོར་གྲུབ་པར་འགྱུར་རོ། །ཅིག་ཅར་དུ་སོར་མོ་ཐམས་ཅད་དྲལ་བ་ནི་ཡིད་ཀྱི་ལས་སོ་ཞེས་བྱ་བ་ལ་དང་པོའི་རྡོ་རྗེ་བཅིངས་ཏེ་བསྡམས་པ་དྲལ་བའི་ཚུལ་གྱིས་མྱུར་དུ་རང་གི་སྙིང་གར་དྲལ་བར་བྱ་སྟེ་དེ་ལྟར་ན་ཕྱག་རྒྱ་ཐམས་ཅད་དགུག་པ་དང་བཅིང་བ་དང་བརྟན་པར་བྱ་བ་དང་ཕྱག་རྒྱ་ཐམས་ཅད་དགུག་པར་འགྱུར་བ་ཡིན་ནོ། །དེ་ཡང་བསྒོམ་པའི་དབྱེ་བས་སོ། །བཅིངས་ནས་ཛཿ་ཧཱུཾ་བཾ་ཧོཿ། ཞེས་བྱ་བ་དང་པོའི་རྡོ་རྗེ་བཅིངས་ནས། ཡི་གེ་ཛཿ་ས་སེམས་ཅན་ཐམས་ཅད་ལ་སོགས་པའི་དམ་ཚིག་དགུག་པའོ། །ཡི་གེ་ཧཱུཾ་གིས་གཞུག་པའོ། །ཡི་གེ་བཾ་གྱིས་བཅིང་བའོ། །ཡི་གེ་ཧོཿ་ས་དབང་དུ་བྱེད་པའོ། །དབུས་མའི་ཕྱི་རོལ་དུ་བཅིངས་པ་སྤྱི་བོ་དང༌། སྙིང་ག་དང༌། ཁ་དང་ཕྱོགས་ཐམས་ཅད་དུ་བསྐོར་བའོ་ཞེས་བྱ་བ་ལ་དང་པོའི་རྡོ་རྗེ་དབུས་མའི་རྡོ་རྗེའི་ཕྱིར་བྱས་ནས་སྤྱི་བོར་གཟུང་བར་བྱ་སྟེ་དེ་ལྟར་ན་ལས་ཐམས་ཅད་སྒྲུབ་པའོ། །རང་གི་སྙིང་གར་གཟུང་བར་བྱ་སྟེ་དེ་ལྟར་ན་ལས་ཐམས་ཅད་འཇིག་པར་མི་འགྱུར་རོ། །རང་གི་ཁ་ལ་གཟུང་བར་བྱ་སྟེ་དེ་ལྟར་ན་ཐམས་ཅད་བརྟན་པར་
འགྱུར་རོ། །ཕྱོགས་ཐམས་ཅད་ལ་བསྐོར་བར་བྱ་སྟེ་དེ་ལྟར་ན་སྙན་པ་ཆེན་པོ་རབ་ཏུ་གསལ་བར་འགྱུར་བ་ཡིན་ནོ། །སྙིང་གར་བཞག་ནས་རང་གི་བདག་ཉིད་རྡོ་རྗེ་བསྒོམ་པའོ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས་རང་གི་སྙིང་གར་བཞག་ལ་བདག་ཉིད་རྡོ་རེ་རྩེ་ལྔ་པའི་གཟུགས་སུ་བསྒོམ་པར་བྱ་སྟེ། དེ་ལྟར་ན་རྡོ་རྗེ་ཐམས་ཅད་དགུག་པ་དང༌། གཞུག་པ་དང་བཅིང་བ་དང་དབང་དུ་བྱེད་པའོ། །རང་ཉིད་བྱང་ཆུབ་སེམས་དཔར་བསྒོམ་པར་བྱ་ཞེས་བྱ་བ་ལ་དང་པོའི་རྡོ་རྗེ་བཅིངས་ནས་རང་གི་སྙིང་གར་བཞག་ལ་རྡོ་རྗེ་སེམས་དཔའ་དང༌། ཡིད་ལས་བྱུང་བ་ལ་སོགས་པའི་རང་གི་བྱང་ཆུབ་སེམས་དཔའི་གཟུགས་སུ་བདག་ཉིད་བསྒོམ་པར་བྱ་སྟེ། དེ་ལྟར་ན་བྱང་ཆུབ་སེམས་དཔའ་ཐམས་ཅད་དགུག་པ་དང༌། གཞུག་པ་དང་བཅིང་བ་དང་དབང་དུ་བྱེད་པའོ། །རང་དང་དེ་བཞིན་གཤེགས་པ་རྗེས་སུ་དྲན་པའོ་ཞེས་བྱ་བ་ལ་དང་པོའི་རྡོ་རྗེ་བཅིང་ནས་རང་གི་སྙིང་གར་ཟུང་ཞིང་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པའི་གཟུགས་སུ་བདག་ཉིད་བསྒོམ་པར་བྱ་སྟེ། དེ་ལྟར་ན་དེ་བཞིན་གཤེགས་པ་ཐམས་ཅད་དགུག་པ་དང༌། གཞུག་པ་དང་བཅིང་བ་དང་དབང་དུ་བྱེད་པའོ། །རང་རྡོ་རྗེ་འཆང་ཆེན་པོར་རྗེས་སུ་དྲན་པར་བྱའོ་ཞེས་བྱ་བ་ལ་དང་པོའི་རྡོ་རྗེས་བཅིངས་ནས་རང་གི་སྙིང་གར་གཟུང་པར་བྱ་ཞིང༌། བདག་ཉིད་རྡོ་རྗེ་འཆང་ཆེན་པོར་བསྒོམ་པར་བྱ་སྟེ། དེ་ལྟར་ན་རྡོ་རྗེ་ཆེན་པོ་དགུག་པ་དང༌། གཞུག་པ་དང་བཅིང་བ་དང་དབང་དུ་བྱེད་པར་འགྱུར་བ་ཡིན་ནོ། །དེ་ལྟར་ཕྱག་རྒྱ་བཞིའི་ཕྲེང་བའི་སྦྱོར་བས་ལས་བརྒྱ་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་མཚན་ཉིད་བསྟན་ནས། ད་ནི་གར་ལས་བྱུང་བའི་ལས་གཞན་བརྒྱ་པོ་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་ཕྱག་རྒྱ་ལྔའི་ཕྲེང་བའི་སྦྱོར་བའི་མཚན་ཉིད་བསྟན་པར་བྱ་བའི་ཕྱིར། དེ་ནས་ལས་ཀྱི་ཚོགས་ཐམས་ཅད་སྒྲུབ་པར་བྱེད་པའི་ཕྱག་རྒྱའི་རྒྱུད་ཅེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །ལས་ཀྱང་ཡིན་ལ་ཐམས་ཅད་ཀྱང་ཡིན་པས་ན་ལས་ཐམས་ཅད་དེ་ཐམས་ཅད་ཤིན་ཏུ་བསྲུང་བ་ལ་སོགས་པའོ། །དེ་རྣམས་ཀྱི་ཆོ་ག་ནི་རྒྱུད་ཡིན་ནོ། །དེ་སྒྲུབ་པ་ནི་རྫོགས་པ་སྟེ། དེའི་དོན་ཕྱག་རྒྱ་རྣམས་ཏེ་དེ་དག་གི་རྒྱུད་ནི་དེ་སྟོན་པར་བྱེད་པའི་སྒྲའི་ཚོགས་སོ། །རྡོ་རྗེ་གར་ནི་བཤད་ཟིན་ཏོ། །དེ་ལས་བྱུང་བའི་
ཕྱག་རྒྱ་ནི་དེ་མ་ཐག་ཏུ་འོག་ནས་འཆད་པར་འགྱུར་བའོ། །དེ་ཡང་ཐམས་ཅད་ཤིན་ཏུ་བསྲུངས་པ་ལ་སོགས་པ་རྫོགས་པས་འབྲས་བུ་མེད་པ་མ་ཡིན་ཏེ་ཉིད་ཀྱི་ཕྱིར་དོན་ཡོད་པའོ། །དགག་པར་མི་ནུས་པ་ཉིད་ཀྱི་ཕྱིར་ཐོགས་པ་མེད་པའོ། །ངག་གིས་དགག་པར་ནུས་ཤེ་ན་བདག་རྡོ་རྗེ་འཆང་ཆེན་པོ་དང་དེ་བཞིན་གཤེགས་པ་ཐམས་ཅད་ཀྱིས་ཀྱང་དོ་ཞེས་བྱ་བའོ། །རྡོ་རྗེ་མཆོག་གི་གཙུག་ཏོར་ཞེས་བྱ་བ་ལ་ཐམས་ཅད་ཤིན་ཏུ་བསྲུངས་པ་ལ་སོགས་པའི་ལས་ལྔ་པོ་སྒྲུབ་པར་བྱེད་པ་གང་ཞིག་སྔར་བཤད་པའི་རྡོ་རྗེ་གར་གྱི་རྡོ་རྗེ་སེམས་དཔའི་གཙུག་ཏོར་ཞེས་བྱ་བ་དེ་ཉིད་འདིར་རྡོ་རྗེ་སྐུ་མཆོག་གི་གཙུག་ཏོར་ཏེ་ལས་ལྔ་སྒྲུབ་པར་བྱེད་པ་འདིར་གཟུང་བར་བྱའོ། །འདི་ཡང་མཚན་ཉིད་འོག་ནས་འཆད་པར་འགྱུར་བ་ཡིན་ནོ། །ལས་ཞེས་བྱ་བ་ནི་རྡོ་རྗེ་སྐུ་མཆོག་གཙུག་ཏོར་དེ་ཉིད་ཀྱི་ལས་ནི་འདི་ཡིན་ནོ་ཞེས་བྱ་བ་ཚིག་གི་ལྷག་མའོ། །དེ་ཇི་ལྟ་བུ་ཡིན་ཞེ་ན། རྡོ་རྗེ་བསྡམས་པ་མནན་པ་དང༌། དབུས་མའི་ནོར་བུ་དང༌། བསྐོར་བ་དང་སོར་མོ་ཐམས་ཅད་ཀྱི་རྡོ་རྗེ་དང༌། སོར་མོ་ལྷག་མའི་འོད་ཟེར་གྱི་འཁོར་ལོ་ཞེས་བྱ་བ་ལ་འདི་ལྟར་བཤད་པར་འགྱུར་ཏེ། རྡོ་རྗེ་ཐལ་མོའི་མཛུབ་མོ་གཉིས་ཡང་དག་པར་སྦྱར་ཞིང་རྩེ་མོ་བྱས་པ་མཐེ་བོང་གཡོན་པའི་སྟེང་དུ་མཐེ་བོང་གཡས་པ་སེམས་དཔའི་སྐྱིལ་ཀྲུང་གི་ཚུལ་གྱིས་གཟུང་བར་བྱ་སྟེ་རྡོ་རྗེ་སྐུ་མཆོག་གོ །འདི་གཙུག་ཏོར་དུ་བཞག་ནས་མནན་པར་བྱ་སྟེ་དེ་ལྟར་ན་ཐམས་ཅད་ཤིན་ཏུ་བསྲུངས་པར་འགྱུར་རོ། །ཕྱག་རྒྱ་འདི་ཉིད་ཀྱི་དབུས་མའི་སོར་མོ་གཉིས་ཀྱི་སྟེང་དུ་བཀུག་པའི་ནོར་བུ་བྱས་ཏེ། དེ་ལྟར་ན་ཐམས་ཅད་ཡོངས་སུ་སྐྱོང་བ་ཡིན་ནོ། །གཙུག་ཏོར་གྱི་ཕྱག་རྒྱ་དེ་ཉིད་ཐམས་ཅད་དུ་བསྐོར་བར་བྱ་སྟེ། དེ་ལྟར་ན་ཞི་བ་གྲུབ་པར་འགྱུར་རོ། །གཙུག་ཏོར་གྱི་ཕྱག་རྒྱ་ཉིད་ཀྱི་མཐེ་བོང་གཉིས་ཀྱི་རྩེ་མོ་དང་མཛུབ་མོ་གཉིས་ཀྱི་རྩེ་མོ་དང་དབུས་མ་གཉིས་ཀྱི་རྩེ་མོ་དང་སྲིན་ལག་གཉིས་ཀྱི་རྩེ་མོ་དང་མཐེའུ་ཆུང་གཉིས་ཀྱི་རྩེ་མོ་བྱས་ཏེ། དེ་ལྟར་ན་སོར་མོ་ཐམས་ཅད་ཀྱི་རྡོ་རྗེར་འགྱུར་ཏེ། འདིས་དགེ་ཞིང་བཀྲ་ཤིས་པར་འགྱུར་རོ། །གཙུག་ཏོར་གྱི་ཕྱག་རྒྱ་དེ་ཉིད་བཅིངས་ལ་སྲིན་ལག་དང་མཐེའུ་ཆུང་དག་གིས་ཁ་ཕྱེ་བའི་རྡོ་རྗེ་ཐལ་མོ་བཅིངས་པས་འོད་ཀྱི་འཁོར་ལོ་བྱ་སྟེ་འདིས་ཚེ་འཕེལ་བར་འགྱུར་རོ། །ཁྲོ་བོའི་རྡོ་རྗེ་ཁུ་ཚུར་གཉིས་ཀྱིས་
ཕྱོགས་ཀྱི་འཁོར་ལོ་བསྐོར་ཞིང་བསྐོར་བའོ་ཞེས་བྱ་བ་ལ། དཀྱིལ་འཁོར་བཅིང་བའི་ཚུལ་གྱིས་ཁྲོ་བོའི་ཁུ་ཚུར་གཉིས་བསྐོར་ཞིང་བསྐོར་བར་བྱ་སྟེ་དེ་ལྟར་ན་དཀྱིལ་འཁོར་བཅིང་བར་འགྱུར་རོ། །ཁར་བསྐོར་ཞེས་བྱ་བ་ནི་ཁྲོ་བོའི་ཁུ་ཚུར་གཉིས་པོ་དེ་ཉིད་མཚན་བཅིང་བའི་ཚུལ་གྱིས་རང་གི་ཁར་བསྐོར་བར་བྱ་སྟེ་དེ་ལྟར་ན་མཚམས་བཅིང་བར་འགྱུར་རོ། །སྙིང་གར་ཕབ་ཅིང་འབར་བར་བྱེད་པ་ཞེས་བྱ་བ་ནི་ཁྲོ་བོའི་ཁུ་ཚུར་གཉིས་བཅིངས་ཏེ་རང་གི་སྙིང་གར་བཞག་ནས་དེས་དབབ་པར་བྱ་ལ་རང་གི་སྙིང་ག་ལས་རྡོ་རྗེ་འབར་བ་སྤྲོས་ཏེ་ཕྱོགས་བཅིང་བར་བྱ་སྟེ་དེ་ལྟར་ན་ཕྱོགས་ཐམས་ཅད་དུ་རྡོ་རྗེའི་མེ་འབར་བའི་རབ་འབྱུང་བར་འགྱུར་ཏེ། ཁྲོ་བོ་ཆེན་པོ་འབར་བའི་རྡོ་རྗེ་བདག་ཉིད་ཀྱིས་ཀྱང་འཇུག་པར་མི་ནུས་སོ་ཞེས་བྱ་བ་བཅོམ་ལྡན་འདས་རྡོ་རྗེ་འཆང་གིས་གསུངས་སོ། །དམ་ཚིག་བརྗོད་པར་བྱའོ་ཞེས་བྱ་བ་ནི། ཁྲོ་བོའི་ཁུ་ཚུར་གཉིས་པོ་དེ་ཉིད་བཅིང་སྟེ་ཨ་ནུ་རཱ་ཀ་ཡ་མི་ཧཱུཾ་བཾ་ཞེས་བྱ་བ་བརྗོད་ཅིང་རྡོ་རྗེ་སེམས་དཔའ་ལ་སོགས་པ་རྣམས་དམ་ཚིག་ལ་རབ་ཏུ་གཞག་པར་བྱའོ། །གྲུབ་པ་ལ་བཾ་ཞེས་བྱ་བ་ནི་ཁྲོ་བོའི་ཁུ་ཚུར་གཉིས་པོ་དེ་ཉིད་བཅིངས་ལ་ཨ་ནུ་ར་ག་ཡ་མི་ཧཱུཾ་བཾ་ཞེས་བྱ་བ་བཟླ་བར་བྱ་སྟེ། དེ་ལྟར་ན་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐོབ་པར་འགྱུར་རོ། །སེམས་དཔའ་རྡོ་རྗེ་ལྟ་བ་འཕྲོག་བ་རྣམས་ཀྱིས་གསུམ་དང་བཞི་དང་ཕྱིར་མི་ལྡོག་པ་དང་རྟག་ཏུ་འབྱུང་བ་དང༌། དཔག་ཏུ་མེད་པ་ནི་བསྐོར་ཞིང་བཙུམས་པ་མེད་པའི་མིག་གིས་རབ་ཏུ་ཞི་བའོ་ཞེས་བྱ་བ་ལ། རྡོ་རྗེ་བསྡམས་པའི་དབུས་མ་བསླང་བ་མཉམ་པའི་ལྕགས་ཀྱུ་ནི་སེམས་དཔའ་རྡོ་རྗེ་མ་སྟེ། འདིས་རིམས་ཀྱིས་བཟུང་བ་བྱམས་པའི་ལྟ་བ་དག་གིས་བྱ་བ་པར་བྱ་སྟེ་དེ་ལྟར་ཉིན་ཞག་གསུམ་པ་དང་བཞི་པ་དང་སླར་ཡང་ཕྱིར་མི་ལྡོག་པ་དང༌། རྟག་ཏུ་འབྱུང་བའི་རིམས་འཇིག་པར་འགྱུར་རོ། །ཁྱབ་འཇུག་གི་རིམས་ནི་དཔག་ཏུ་མེད་པ་བསྐོར་བས་ལྡོག་པར་འགྱུར་རོ། །རྡོ་རྗེ་ཁུ་ཚུར་གཉིས་ཀྱིས་མཐེའུ་ཆུང་ལྕགས་ཀྱུའི་མདུད་པ་དང༌། མཛུབ་མོ་གཉིས་མཉམ་པ་ཞེས་བྱ་བ་ལ། རྡོ་རྗེ་ཁུ་ཚུར་གཉིས་བཅིངས་ནས་ལྕགས་ཀྱུའི་རྣམ་པ་ཅན་གྱི་མཐེའུ་ཆུང་གཉིས་ཕན་ཚུན་བཅིངས་བས་གདུ་བུར་བྱས་ལ་མཛུབ་མོ་གཉིས་ཡང་དག་པར་སྦྱར་ནས་དེ་ལྟར་ན་ལས་ཞེས་བྱ་བ་ནི་ལས་ཀྱི་ཕྱག་རྒྱའོ། །ཇི་ལྟར་ཞེ་ན་སྙིང་གར་རབ་ཏུ་གཞག་པ་
ཞེས་བྱ་བ་ནི་རང་དང་གཞན་གྱི་སྙིང་གའི་ཕྱོགས་སུ་བཟུང་བས་ཡིད་མི་བདེ་བའི་ལས་ཐམས་ཅད་འཇིག་པར་བྱེད་པ་ཡིན་ནོ། །བྱབ་པ་ཞེས་བྱ་བ་ནི་ཕྱག་རྒྱ་འདི་ཉིད་ཀྱིས་བསྒྲུབ་བྱ་ལ་བྱབ་པ་སྟེ་དེ་ལྟར་ན་ཐམས་ཅད་འཇིག་པར་འགྱུར་རོ། །མཛུབ་མོའི་རྩེ་མོ་མནན་པར་བྱའོ་ཞེས་བྱ་བ་ལ་ཕྱག་རྒྱ་འདི་ཉིད་ཀྱིས་མཛུབ་མོ་གཉིས་ཀྱི་རྩེ་མོས་ནད་པ་ལ་མནན་པར་བྱ་སྟེ་དེ་ལྟར་ན་ནད་འཇིག་པར་འགྱུར་རོ། །དགོད་པས་རབ་ཏུ་བཞག་པ་ཞེས་བྱ་བ་ནི་ཕྱག་རྒྱ་དེ་ཉིད་དགོད་པའི་ཚུལ་གྱིས་ཁལ་གཟུང་བར་བྱ་སྟེ། དེ་ལྟར་ན་མྱ་ངན་ཐམས་ཅད་འཇིག་པའོ། །ཡོངས་སུ་བསྐོར་བས་དེ་བཞིན་དུ་མཛོད་སྤུར་གཞག་པར་བྱའོ་ཞེས་བྱ་བ་ནི་ཕྱག་རྒྱ་དེ་ཉིད་བཅིངས་ཏེ་ཡོངས་སུ་བསྐོར་ལ་མཛོད་སྤུར་གཟུང་བར་བྱ་སྟེ་དེ་ལྟར་ན་སྡུག་བསྔལ་ཐམས་ཅད་འཇིག་པར་འགྱུར་རོ། །ཁ་ཊྭཱཾ་ག་གཉིས་ཀྱི་རྡོ་རྗེ་བཅིང་པ་ཞེས་བྱ་བ་ལ་ལག་པ་གཉིས་ཀྱིས་ཁ་ཊྭཱཾ་ག་གཉིས་བཅིངས་པ་ནི་ཁ་ཊྭཱཾ་ག་གཉིས་ཀྱི་རྡོ་རྗེ་བཅིང་བ་ཞེས་བྱ་སྟེ། དེས་དགའ་བའི་ཚུལ་དུ་མཐེའུ་ཆུང་གཉིས་ཀྱིས་ལེགས་པར་བྱེད་པ་སྦྱིན་པའི་ཚུལ་བྱ་སྟེ་དེ་ལྟར་ན་དུག་དང་སྦྱར་དུག་ཐམས་ཅད་འབར་བར་འགྱུར་རོ། །མཐེའུ་ཆུང་གཉིས་པོ་དེ་ཉིད་ཀྱིས་ཀུན་ནས་བསྡུ་བའི་ཚུལ་བྱ་སྟེ་དེ་ལྟར་ན་དུག་དང་སྦྱར་བའི་དུག་ཐམས་ཅད་འབེབས་པར་འགྱུར་རོ། །དེ་ལྟར་ན་དུག་དང་སྦྱར་བའི་དུག་ཐམས་ཅད་འཆིང་བའོ། །ཁ་ཊྭཱཾ་ག་གཉིས་ཀྱིས་ཐལ་མོ་བྱས་ཏེ་དུག་དང་སྦྱར་བའི་དུག་ཐམས་ཅད་འཕྲོག་པའི་ཚུལ་དུ་བྱ་སྟེ་དེ་ལྟར་ན་དུག་ཐམས་ཅད་ཟ་བའོ། །ཁ་ཊྭཱཾ་ག་གཉིས་ཀྱིས་ཐལ་མོ་བྱ་སྟེ་སྤྲོ་བའི་ཚུལ་དུ་བྱ་སྟེ། དེ་ལྟར་ན་དུག་ཐམས་ཅད་བདུད་རྩིར་བྱེད་པར་འགྱུར་རོ། །རྡོ་རྗེ་བསྡམས་པའི་མཛུབ་མོ་གཉིས་བཀུག་ཅིང་བསྡམས་ལ་ནང་དུ་བཞག་སྟེ་མཐེ་བོང་གཉིས་ཁ་འབྱེད་པའི་མཆེ་བ་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ་ཞེས་བྱ་བ་ལ། རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་བཀུག་ཅིང་ནང་དུ་བཅུག་སྟེ་མཐེ་བོང་གཉིས་ཁ་བྱེ་བར་བྱས་ལ་མཆེ་བའི་ཚུལ་གྱིས་རང་གི་ཁར་གཟུང་བར་བྱ་སྟེ་འདི་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །དེས་མཐིལ་ཕྲ་མོར་བརྡབ་པ་ཞེས་བྱ་བ་ལ་རྡོ་རྗེ་གནོད་སྦྱིན་གྱི་ཕྱག་རྒྱ་དེས་ལག་པའི་མཐིལ་གཉིས་ཅུང་ཟད་བརྡབ་པར་བྱ་སྟེ་དེ་ལྟར་ན་གདོན་ཐམས་ཅད་འབེབས་པར་འགྱུར་རོ། །མཛུབ་མོའི་སེན་མོ་བཏུང་བའོ་ཞེས་བྱ་བ་ལ་རྡོ་རྗེ་གནོད་
སྦྱིན་གྱི་ཕྱག་རྒྱའི་མཛུབ་མོ་གཉིས་ཀྱི་སེན་མོ་ཕན་ཚུན་དུ་བདར་བར་བྱ་སྟེ། དེ་ལྟར་ན་གདོན་ཐམས་ཅད་འཆིང་བའོ། །དབུས་མའི་རྡོ་རྗེ་བསྟན་པའོ་ཞེས་བྱ་བ་ལ་རྡོ་རྗེ་གནོད་སྦྱིན་གྱི་ཕྱག་རྒྱའི་དབུས་མ་གཉིས་ཀྱི་རྩེ་མོ་བྱས་ལ་བསྟན་པར་བྱ་སྟེ་དེ་ལྟར་གདོན་ཐམས་ཅད་ཀྱི་དམ་ཚིག་གཟུང་པའོ། །བྱབས་ནས་མྱུར་དུ་ཕྱག་རྒྱ་བཀྲོལ་བའོ་ཞེས་བྱ་བ་ལ་རྡོ་རྗེ་གནོད་སྦྱིན་གྱི་ཕྱག་རྒྱས་གདོན་གྱིས་བཟུང་བ་ལ་བྱབས་ལ་ཕྱག་རྒྱ་དེ་ཤིན་ཏུ་མྱུར་བར་དགྲོལ་བར་བྱ་སྟེ་དེ་ལྟར་ན་གདོན་ཐམས་ཅད་རབ་ཏུ་ཞི་བར་འགྱུར་རོ། །སོར་མོ་སྦྱར་བས་རྡོ་རྗེ་གཙུག་ཏོར་ཏོ་ཞེས་བྱ་བ་ལ་རྡོ་རྗེ་གནོད་སྦྱིན་གྱི་ཕྱག་རྒྱའི་མཛུབ་མོ་དང་མཐེ་བོའི་རྩེ་མོ་རྣམས་ཡང་དག་པར་སྦྱར་བར་བྱས་ལ་ཕྱག་རྒྱ་དེ་བསྒྲུབ་བྱའི་གཙུག་ཏོར་གྱི་ཕྱོགས་སུ་གཟུང་བར་བྱ་སྟེ་དེ་ལྟར་ན་གདོན་ཐམས་ཅད་ཀྱིས་བཟུང་བ་རྣམས་བསྲུང་བར་འགྱུར་རོ། །བ་དན་གསུམ་པ་གཉིས་གྱེན་དུ་ཁ་བལྟ་བ་དང༌། འོག་ཏུ་ཁ་བལྟ་བ་དང་དབུས་མའི་མདུད་པ་བྱས་ལ་མཛུབ་མོ་དང་དབུས་མའི་རྩེ་མོ་དེ་དག་འདུས་པའོ་ཞེས་བྱ་བ་ལ་བ་དན་གསུམ་པ་གཉིས་གྱེན་དུ་ཁ་བལྟ་བར་བྱས་ནས་དེའི་འོག་ཏུ་དེ་ཉིད་ཀྱི་ཁ་ཐུར་དུ་བསྟན་ལ་མཛུབ་མོ་གཉིས་དང་དབུས་མ་གཉིས་ཀྱིས་མདུད་པ་བཅིངས་ལ་མཛུབ་མོའི་རྩེ་མོ་དག་དང་དབུས་མའི་རྩེ་མོ་འདུས་པར་བྱའོ། །རྡོ་རྗེ་ཧཱུཾ་མཛད་ཀྱི་ལས་སོ་ཞེས་བྱ་བ་ལ། ཨ་ནུ་ར་ག་ཡ་མི་ཧཱུཾ་ཧཱུཾ་ཞེས་བྱ་བ་དང་བཅས་པའི་རྡོ་རྗེ་ཧཱུཾ་མཛད་ཀྱི་ཕྱག་རྒྱ་འདིའི་ལས་ནི་འདི་ཡིན་ཏེ་མདུད་པ་མནན་པའོ་ཞེས་བྱ་བ་ལ་ཕྱག་རྒྱ་འདི་བཅིང་བ་མནན་པར་བྱ་སྟེ་དེ་ལྟར་ན་ཐམས་ཅད་བཅིང་བའོ། །ཅིག་ཅར་དུ་ཕྱག་རྒྱ་བཀྲོལ་བའོ་ཞེས་བྱ་བ་ལ་ཕྱག་རྒྱ་དེ་ཉིད་ཅིག་ཅར་དུ་དགྲོལ་བར་བྱ་སྟེ་དེ་ལྟར་ན་བཅིངས་པ་ཐམས་ཅད་དགྲོལ་བ་ཡིན་ནོ། །མནན་ནས་ཡང་དག་པར་དྲལ་བའོ་ཞེས་བྱ་བ་ལ་ཕྱག་རྒྱ་དེ་ཉིད་ཡང་དག་པར་མནན་ནས་དྲལ་བར་བྱ་སྟེ། དེ་ལྟར་ན་ཐམས་ཅད་དྲལ་བ་ཡིན་ནོ། །དབུས་མས་བསྣུན་ཏེ་ནམ་མཁའ་ལས་ལྟུང་བའི་ཚུལ་ལོ་ཞེས་བྱ་བ་ལ་ཕྱག་རྒྱ་དེ་ཉིད་བཅིངས་ནས་དབུས་མ་གཉིས་ཀྱི་རྩེ་མོ་སྦྱར་ལ་རྩེ་མོ་དེས་ནམ་མཁའ་ལ་བརྡེག་པར་བྱ་སྟེ། དེའི་རྗེས་ལ་ནམ་མཁའ་ལས་ལྷ་ལ་སོགས་པ་ལྟུང་བའི་ཚུལ་བསྟན་པར་བྱ་སྟེ་དེ་ལྟར་ན་ཐམས་ཅད་ལྟུང་བའོ། །ལྡང་བའི་ཚུལ་ཡང་ངོ་བོ་ཞེས་བྱ་བ་ལ་ཕྱག་རྒྱ་དེ་ཉིད་
དབུས་མ་གཉིས་སྔ་མ་བཞིན་དུ་བཅིངས་ནས་ཐམས་ཅད་ལྟུང་བ་བསླང་བའི་ཚུལ་བྱ་སྟེ་དེ་ལྟར་ན་ལྟུང་བ་ཐམས་ཅད་བསླང་བར་འགྱུར་རོ། །བ་དན་གསུམ་པ་མཉམ་པའི་མཐེའུ་ཆུང་དང་མཛུབ་མོའི་རྡོ་རྗེ་དབུས་མ་མདུད་པས་ཡོངས་སུ་བསྐོར་ལ་དབང་བསྐུར་བའི་གནས་སུ་མཛུབ་མོ་གཞག་པའོ་ཞེས་བྱ་བ་ལ། བ་དན་གསུམ་པ་གཉིས་བཅིངས་ནས་དབུས་མའི་སོར་མོ་གཉིས་ཕན་ཚུན་དུ་མདུད་པ་བཅིངས་ཏེ་མཛུབ་མོ་གཉིས་དང་མཐེའུ་ཆུང་གཉིས་ཀྱི་རྩེ་མོ་གཉིས་སྦྱར་ཏེ་ཡོངས་སུ་བསྐོར་བའི་མཛུབ་མོ་གཉིས་ཀྱི་རྩེ་མོ་མཛོད་སྤུའི་ཕྱོགས་སུ་ཡོངས་སུ་གཟུང་བར་བྱའོ། །དེས་ཅིར་འགྱུར་ཞེ་ན་ཡི་གེ་ཧཱུཾ་གིས་ཕྱེ་བའོ་ཞེས་བྱ་བ་ལ་ཕྱག་རྒྱ་འདིས་ཨ་ནུ་ར་ག་ཡ་མི་ཧཱུཾ་ཧཾ་ཞེས་བྱ་བ་བཟླས་ན་མཁའ་འགྲོ་མ་ཐམས་ཅད་ཀྱི་ཕྱག་རྒྱ་དབྱེ་བར་བྱས་པ་ཡིན་ནོ། །ཕྱག་རྒྱ་དེ་ཉིད་བཅིངས་ནས་ཨ་ནུ་རཱ་ག་ཡ་མི་ཧཱུཾ་མུཿ་ཞེས་བྱ་བ་བཟླ་བར་བྱ་སྟེ། དེ་ལྟར་ན་མཁའ་འགྲོ་མ་ལ་སོགས་པའི་གདོན་ཐམས་ཅད་ཡི་གེ་མུས་བཀྲོལ་བར་འགྱུར་རོ། །ཕྱག་རྒྱ་དེ་ཉིད་བཅིངས་ནས་ཨ་ནུ་ར་ག་ཡ་མི་ཧཱུཾ་ཨ་ཞེས་བྱ་བ་བཟླ་བར་བྱ་སྟེ་དེ་ལྟར་ན་ཡི་གེ་ཨས་ཤི་བ་སློང་བ་ཡིན་ནོ། །ཕྱག་རྒྱ་དེ་ཉིད་བཅིངས་ནས་ཨ་ནུ་རཱ་ག་ཡ་མི་ཧཱུཾ་ཧཱུཾ་ཞེས་བྱ་བ་བཟླ་བར་བྱ་སྟེ་དེ་ལྟར་ན་ཡི་གེ་ཧཱུཾ་གི་གླུ་བཟླས་པས་ཚེ་འཕེལ་བར་འགྱུར་རོ། །ཕྱག་རྒྱ་དེ་ཉིད་བཅིངས་ནས་ཆོས་ཀྱི་དག་གིས་ཨ་ནུ་ར་ག་ཡ་ནི་ཧཱུཾ་ཧཾ་ཞེས་བྱ་བ་ལ་བཟླ་བར་བྱ་སྟེ་དེ་ལྟར་ན་ཡི་གེ་ཧཾ་གི་ཆོས་ཀྱི་ངག་རྣམས་ཀྱིས་ཤིན་ཏུ་བསྲུང་བར་འགྱུར་རོ། །པདྨ་ཆེན་པོ་བཅིངས་ནས་ཇི་སྲིད་འདོད་པའི་བཟླས་པ་ཞེས་བྱ་བ་ལ་འོག་ནས་འཆད་པར་འགྱུར་བའི་རིག་པ་རྣམས་ཀྱི་བཟླས་པས་སྒྲིབ་པ་ལ་སོགས་པ་ཐམས་ཅད་འཇིག་པར་འགྱུར་རོ། །དེ་ལས་ཁ་འབུས་བའི་རྡོ་རྗེ་ཐལ་མོའི་དབུས་མ་དང་མཐེ་བོང་དང་མཐེའུ་ཆུང་ཁ་ཕྱེ་བས་འདབ་མ་བཞི་སྟེ་པདྨ་ཆེན་པོའི་མཚན་ཉིད་དོ། །ཡང་ན་པདྨའི་ཁུ་ཚུར་གཡོན་པ་བསྙེམས་པས་མར་དང་ཏིལ་མར་དང་འབྲས་ཁམས་ཀྱི་ཕྱེ་མའི་སྦྱིན་སྲེག་མཆོག་ཏུ་གྲུབ་པ་སྟེ་སྒྲིབ་པ་ཐམས་ཅད་ལ་སོགས་པ་འཇིག་པའི་སྦྱིན་སྲེག་གི་ཆོ་ག་བྱ་བ་ཡིན་ནོ། །དེ་ཡང་སྔར་བཤད་ཟིན་པས་འདིར་བཤད་པར་མི་བྱའོ། །ཁ་ཊྭཱཾ་ག་གཉིས་ཀྱི་རྡོ་རྗེ་བསྡམས་པ་ཞེས་བྱ་བ་ནི་ཁ་ཊྭཱཾ་ག་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་
པའི་ཕྱག་རྒྱ་བཅིངས་ནས་དགའ་བའི་ཚུལ་ཏེ་ལེགས་པར་བྱེད་པ་སྦྱིན་པའི་ཚུལ་གྱིས་མཛུབ་མོ་དང་མཐེ་བོང་དག་གི་སེན་མོ་ཕན་ཚུན་བྲུད་པར་བྱ་སྟེ། དེ་ཁ་ཊྭཱཾ་ག་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་བཅིངས་ནས་དགའ་བའི་ཚུལ་གྱིས་མཛུབ་མོ་དང་མཐེ་བོང་དག་གི་སེན་མོ་བྲུད་པས་ཐམས་ཅད་འབེབས་པར་འགྱུར་རོ། །འོག་དང་སྟེང་དུ་རྡོ་རྗེ་བསྡམས་པ་བསྐྱོད་པའི་ཞེས་བྱ་བ་ལ་ཁ་ཊྭཱཾ་ག་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་འོག་དང་སྟེང་དུ་བསྐྱོད་པས་ཐམས་ཅད་གཡོ་བར་འགྱུར་རོ། །རྡོ་རྗེ་བསྡམས་པའི་མཐེའུ་ཆུང་ལ་སོགས་པ་བཀྲོལ་བས་གར་རོ་ཞེས་བྱ་བ་ལ། ཁ་ཊྭཱཾ་ག་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་བཅིངས་ཏེ་མཐེའུ་ཆུང་ལ་སོགས་པ་བཀྲོལ་བའི་གར་བྱ་སྟེ། དེ་ལྟར་ན་གར་བྱེད་པར་འགྱུར་རོ། །རྡོ་རྗེ་བསྡམས་པའི་མཛུབ་མོའི་རྡོ་རྗེས་ངག་འབྱིན་པའོ་ཞེས་བྱ་བ་ལ་ཁ་ཊྭཱཾ་ག་གཉིས་ཀྱི་རང་བཞིན་ཅན་གྱི་རྡོ་རྗེ་བསྡམས་པ་བཅིངས་ནས། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་ནས་ངག་འབྱིན་པའི་ཚུལ་གྱིས་ཁའི་ཕྱོགས་ལས་གྱེན་དུ་དྲང་བར་བྱ་སྟེ། དེ་ལྟར་ན་ཐམས་ཅད་བབ་པས་སེམས་ཅན་ཐམས་ཅད་སྨྲ་བར་འགྱུར་རོ། །བདེ་བ་ཆེན་པོའི་རྡོ་རྗེ་དོན་ཡོད་ཅེས་བྱ་བ་ལ་སོགས་པ་ལ་གསང་བའི་ལྕགས་ཀྱུ་མ་བཅིངས་ནས་དངོས་པོ་ཐམས་ཅད་གཟུགས་བརྙན་གྱི་ཚུལ་དུ་བསྒོམས་པས་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་རང་ཉིད་ཀྱིས་མཐོང་བ་དང་གཞན་དག་ལ་སྟོན་པར་བྱེད་པ་ཡིན་ནོ། །སྒྲ་ཐམས་ཅད་སྒྲ་བརྙན་གྱི་ཚུལ་དུ་རང་ཉིད་ཀྱིས་མཉན་པ་དང་གཞན་དག་ཀྱང་ཉན་དུ་གཞུག་པ་ཡིན་ནོ། །རྡོ་རྗེ་ཁྲོ་བོའི་ཁུ་ཚུར་གཉིས་བཅིངས་ལ་རྡོ་རྗེ་ལྟ་བའི་བལྟ་བས་སོ་ཞེས་བྱ་བ་ལ་ལྟ་བ་དང་བཅས་པའི་ཁྲོ་བོའི་ཁུ་ཚུར་གཉིས་ཀྱིས་ཐམས་ཅད་ལ་རྒྱས་གདབ་བ་ལ་སོགས་པ་བྱ་སྟེ་ཇི་ལྟར་བྱ་ཞེ་ན་འདི་ལྟ་སྟེ་ཞེས་བྱ་བ་ལ་སོགས་པ་ལ་འདིས་ནི་འདི་སྐད་བཤད་པར་འགྱུར་ཏེ། ཁྲོ་བོའི་ཁུ་ཚུར་གཉིས་བཅིངས་ནས་བཙུམས་པའི་ལྟ་བས་བསྒྲུབ་བྱ་ལ་བལྟ་བར་བྱ་སྟེ་དེ་ལྟར་ན་ཐམས་ཅད་ལ་རྒྱས་བཏབ་པར་འགྱུར་རོ། །མིག་འབྲས་སྟེང་དུ་ཡོངས་སུ་བསྐོར་བར་བྱ་སྟེ་དེ་ལྟར་ན་ཐམས་ཅད་གསོད་པའོ། །བཙུམས་པས་མྱུར་དུ་ལྟུང་བར་བྱ་སྟེ་དེ་ལྟར་ན་ཐམས་ཅད་ལྟུང་བའོ། །འོག་ནས་བསླང་བར་བྱ་སྟེ་དེ་ལྟར་ན་
ཐམས་ཅད་སློད་བའོ། །ཁྲོ་བོའི་ཁུ་ཚུར་གཉིས་པོ་དེ་ཉིད་དང་ལྡན་པས་བསྒྲུབ་པར་བྱ་བ་སྟེ་དེ་ལྟར་ན་ཕྱིར་བཟློག་པར་འགྱུར་རོ། །ཁྲོ་བོའི་ཁུ་ཚུར་གཉིས་ཞེས་བྱ་བ་ལ་སོགས་པ་ལ་བདག་ཉིད་རྡོ་རྗེ་གནོད་སྦྱིན་དུ་རྣམ་པར་བསམས་ལ་རྡོ་རྗེ་ཁུ་ཚུར་གཉིས་བཅིངས་ལ། མཛུབ་མོ་གཉིས་ཀྱིས་ལྕགས་ཀྱུ་གཉིས་བྱས་ལ་ཡོངས་སུ་བསྐོར་ནས་ཁའི་མཐའ་གཉིས་སུ་མཆེ་བ་བཞིན་དུ་གཟུང་བར་བྱ་སྟེ་མཐེའུ་ཆུང་གཉིས་འཇིགས་པར་བྱེད་པ་ཁའི་སོ་དག་གིས་གཟུང་བར་བྱ་སྟེ། དེ་ལྟར་ན་གཡོ་བར་མི་འགྱུར་རོ་ཞེས་བྱ་བ་ནི་ཐམས་ཅད་རེངས་པའོ་ཞེས་བྱ་བའི་དོན་ཏོ། །ཕྱག་རྒྱ་དེ་ཉིད་བཅིངས་ནས་ཡན་ལག་ཐམས་ཅད་དགོད་པར་བྱ་སྟེ་དེ་ལྟར་ན་ཐམས་ཅད་རྨོངས་པར་འགྱུར་རོ། །དེ་ཉིད་བཅིངས་ནས་ཉལ་ཞིང་གླལ་བས་ཏེ་གཉིད་ལོག་པ་སྟོན་པའི་ཚུལ་གྱིས་མིག་གཉིས་བཙུམ་པར་བྱ་ཞིང་གླལ་བར་བྱ་སྟེ་དེ་ལྟར་ན་ཐམས་ཅད་ཉལ་དུ་བཅུག་པའོ། །ཕྱག་རྒྱ་དེ་ཉིད་བཅིངས་ནས་རང་གི་སྙིང་གར་དྲལ་བར་བྱ་སྟེ་དེ་ལྟར་ན་ཐམས་ཅད་ཉལ་བར་འགྱུར་རོ། །དེ་ཉིད་བཅིངས་ནས་མྱུར་དུ་ཟ་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་ཟ་བར་འགྱུར་བ་ཡིན་ནོ། །རྡོ་རྗེ་ཁུ་ཚུར་གཉིས་བཅིངས་ནས་ཞེས་བྱ་བ་ནི་གོ་སླའོ། །ཁ་ཕྱེ་བ་གང་ཡིན་པ་ངེས་འཇིགས་པར་བྱེད་པ་ནི་འཇིགས་སུ་རུང་བའི་ཁ་གང་ལ་ཡོད་པ་དེ་ན་ཁ་ཕྱེ་བ་འཇིགས་པར་བྱེད་པའི་ཁ་དང་ལྡན་པའོ། །ཁ་ཕྱེ་བ་འཇིགས་པར་བྱེད་པའི་ཁ་དང་ལྡན་པ་ཡང་དེ་ཡིན་ལ་སྐྲ་གྱེན་དུ་བརྫེས་པ་དེ་ཉིད་ཡིན་པས་ན་ཁ་ཕྱེ་བ་འཇིགས་པར་བྱེད་པའི་ཁ་དང་ལྡན་པའི་སྐྲ་གྱེན་དུ་བརྫེས་པའོ། །སྤྱི་བོ་ཞེས་བྱ་བ་ནི་རང་གི་སྤྱི་བོས་སོ། །རང་གི་སྤྱི་བོ་འོག་ཏུ་བསྟན་པ་ལ་ཕྱི་ནས་སྟེང་དུ་བསླང་བར་བྱ་སྟེ་དེ་ལྟར་ན་སྤྱི་བོས་འོག་ནས་སློང་བའི་ལས་སུ་འགྱུར་རོ། །ཇི་ལྟ་བུ་ཞེ་ན་ཡི་གེ་བྷྱོ་དང༌། རྡོ་རྗེ་ཁུ་ཚུར་དོར་བ་དང༌། ཁུ་ཚུར་མནན་པ་དང༌། ཡི་གེ་ཧཱུཾ་དང་བཅས་པའི་ཡན་ལག་གི་མཆོག་གི་སྡིགས་མཛུབ་དང་རང་ཉིད་མྱུར་དུ་ཁྲོ་བས་ལྟུང་བའོ་ཞེས་བྱ་བ་ལ་འདིས་ནི་འདི་ལྟར་བཤད་པར་འགྱུར་བ་སྟེ། རྡོ་རྗེ་ཁུ་ཚུར་གཉིས་བཅིངས་ནས་ཁ་ཕྱེ་བའི་འཇིགས་པར་བྱེད་པའི་ཁ་དང་ལྡན་ཞིང་སྐྲ་གྱེན་དུ་བརྫེས་པའི་རྣལ་འབྱོར་པས་རང་གི་སྤྱི་བོ་འོག་ཏུ་བསྟན་ལ་གྱེན་དུ་བསླང་བར་བྱས་ནས་ཨ་ནུ་ར་ག་ཡ་མི་ཧཱུཾ་བྷྱོ་ཞེས་བྱ་བ་
བཟླས་པར་བྱ་སྟེ། དེ་ལྟར་ན་གཞན་གྱི་དཔུང་ཐམས་ཅད་སྐྲག་པར་འགྱུར་བ་ཡིན་ནོ། །རྡོ་རྗེ་ཁུ་ཚུར་བཅིངས་ནས་དེ་བཞིན་དུ་བཟླ་ཞིང་གཞན་གྱི་དབུང་མངོན་དུ་ཕྱོགས་པར་དོར་བར་བྱ་སྟེ། དེ་ལྟར་ན་གཞན་གྱི་དཔུང་ཐམས་ཅད་འཇོམས་པའོ། །དེ་བཞིན་དུ་བཟླ་ཞིང་རྡོ་རྗེ་ཁུར་ཚུར་གཉིས་མནན་པར་བྱ་སྟེ་དེ་ལྟར་ན་གཞན་གྱི་དཔུང་དབང་དུ་བྱེད་པའོ། །དེ་བཞིན་དུ་རྡོ་རྗེ་ཁུ་ཚུར་གཉིས་བཅིངས་ནས་ཨ་ནུ་ར་ག་ཡ་མི་ཧཱུཾ་ཧཱུཾ་ཞེས་བྱ་བའི་ཁྲོ་བོ་ཧཱུཾ་མཛད་ཀྱི་སྤྱི་བོས་བསྒྲུབ་བྱ་ལ་སྡིགས་མཛུབ་བྱས་ཏེ། དེ་ལྟར་ན་གཞན་གྱི་དཔུང་ཐམས་ཅད་ལྟུང་བའོ། །དེ་བཞིན་དུ་རྡོ་རྗེ་ཁུ་ཚུར་གཉིས་བཅིངས་ནས་ཨ་ནུ་ར་ག་ཡ་མི་ཧཱུཾ་ཞེས་བྱ་བ་བཟླ་ཞིང་ཁྲོ་བོ་ཆེན་པོ་འབབ་པར་གྱུར་ནས་རང་ཉིད་ལ་ལྟུང་བར་བྱ་སྟེ་དེ་ལྟར་ན་གཞན་གྱི་དཔུང་ཐམས་ཅད་གསོད་པར་འགྱུར་བ་ཡིན་ནོ། །རྡོ་རྗེ་གནོད་སྦྱིན་གྱི་ཕྱག་རྒྱ་ནི་རྡོ་རྗེ་བསྡམས་པའི་མཛུབ་མོ་གཉིས་བཀུག་ལ་མཉམ་པོར་བྱ་སྟེ་ནང་དུ་བཞག་ལ་མཐེ་བོང་གཉིས་ཁ་ཕྱེ་བ་མཆེ་བའི་མཚན་ཉིད་ཅན་གད་ཡིན་པ་དེ་ཉིད་སྲིན་ལག་དང་མཐེའུ་ཆུང་མཉམ་པར་ཁ་ཕྱེ་བའི་བ་དན་གྱི་རྒྱལ་མཚན་མཆོག་གི་དཔུང་རྒྱན་ཞེས་བྱ་བའི་ཕྱག་རྒྱའོ། །ལས་ཞེས་བྱ་བ་ནི་འདི་ལས་ཞེས་བྱ་བ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ཞེ་ན། ཕྱག་འཚལ་བ་དང༌། དགོད་པ་དང༌། ལྕེ་བསྐྱོད་པ་དང་དཔུང་པ་གཉིས་བསྙེམས་པས་བསྟོད་པ་དང༌། རྒྱལ་མཚན་བསྒྲེང་བའོ་ཞེས་བྱ་བ་ལ་འདིས་འདི་ལྟར་བཤད་པར་འགྱུར་ཏེ། འདས་མ་ཐག་ཏུ་བཤད་པའི་རྒྱལ་མཚན་མཆོག་གི་དཔུང་རྒྱན་དེ་བཅིངས་ནས་བསྒྲུབ་བྱ་དེ་ཕྱག་རྒྱ་འཚལ་དུ་གཞུག་པའི་བསམ་པས་ཕྱག་བྱ་བ་ཡིན་ཏེ་དེ་ལྟར་ན་ཁྲོ་བོ་ཐམས་ཅད་འཕྲོག་པའོ། །དེ་བཅིངས་ནས་དགོད་པར་བྱ་སྟེ་དེ་ལྟར་ན་འདོད་རབ་ཏུ་དད་པའོ། །དེ་ཉིད་བཅིངས་ནས་ལྕེ་བསྐྱོད་པས་རྩོད་པ་ལས་རྒྱལ་བའོ། །དེ་ཉིད་རང་གི་དཔུང་པ་ལ་བཅིངས་ཏེ་བསྙེམས་པའི་ཚུལ་བྱ་སྟེ་དེ་ལྟར་ན་འཇིགས་པ་ཐམས་ཅད་ལས་ཐར་བར་འགྱུར་རོ། །དེ་ཉིད་བཅིངས་ནས་ལག་པ་གཉིས་རབ་ཏུ་བརྐྱང་ལ་སྤྱི་བོར་གཟུང་བར་བྱ་སྟེ་དེ་ལྟར་ན་འཐབ་མོ་ལས་རྒྱལ་བར་འགྱུར་རོ། །སེམས་དཔའི་སྐྱིལ་མོ་ཀྲུང་གིས་གནས་པ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ལ་རྡོ་རྗེ་གསོར་བར་བྱེད་པར་འགྱུར་བས་ལས་བྱའོ། །ཇི་ལྟ་བུ་ཞེན་ནམ་མཁར་
དབུགས་གཏོང་བ་དང་ཀུན་དུ་གཡོ་ཞིང་བཙུམས་པའི་ལྟ་བས་ཆར་འབེབས་པའི་ཚུལ་དང་རྡོ་རྗེ་ཁྲོ་བོ་ཉི་མ་མེ་ལྟར་འབར་བའི་བཟླས་པ་དང༌། ལྟ་བ་འཕྲོག་བ་དང་དྲངས་པས་ཡན་ལག་བསྐོར་ཞིང་ཐམས་ཅད་དུ་འབར་བར་བྱེད་པ་འབེབས་པ་ཞེས་བྱ་བ་ལ། འདི་ལྟར་བཤད་པར་འགྱུར་ཏེ་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིངས་ཏེ་ལག་ཕ་གཡས་པས་རྡོ་རྗེ་གསོར་ཞིང་ནམ་མཁའ་ལ་དབུགས་གཏོང་ཞིང་བཟླས་པ་བྱ་སྟེ་དེ་ལྟར་ན་སྤྲིན་ཐམས་ཅད་འགེགས་པར་འགྱུར་རོ། །སྔ་མ་བཞིན་དུ་རྡོ་རྗེ་གསོར་ཞིང་ཐམས་ཅད་དུ་གཡོ་ཞིང་བཙུམས་པའི་ལྟ་བས་ཆར་འབེབས་པའི་ཚུལ་དུ་བྱ་སྟེ་དེ་ལྟར་ན་ཆར་འབེབས་པའོ། །དེ་བཞིན་དུ་རྡོ་རྗེ་གསོར་ཞིང་བདག་ཉིད་རྡོ་རྗེ་ཉི་མ་མེ་ལྟར་འབར་བར་བསམས་ལ། ཨ་ནུ་རཱ་ག་ཡ་མི་ཧཱུཾ་ཞེས་བྱ་བ་བཟླ་བར་བྱ་ཞིང་ཁྲོ་བོའི་ལྟ་བས་འཕྲོག་པར་བྱ་སྟེ་དེ་ལྟར་ན་རླུང་དང་ཐོག་དང་སྤྲིན་འཇིག་པར་འགྱུར་རོ། །དེ་བཞིན་དུ་རྡོ་རྗེ་གསོར་ཞིང་དྲངས་པས་ཡན་ལག་བསྐོར་བའི་སྦྱོར་བ་བྱ་སྟེ་དེ་ལྟར་ན་དྲོ་བ་ཐམས་ཅད་འཇིག་པའོ། །དེ་བཞིན་དུ་རྡོ་རྗེ་ཉི་མ་མེ་ལྟར་འབར་བ་བསམས་ལ་རྡོ་རྗེ་གསོར་ཞིང་མེ་འབར་བ་རྫོགས་པའི་ཚུལ་བྱ་སྟེ་དེ་ལྟར་ན་གྲང་བ་འཇིག་པར་འགྱུར་རོ། །རྡོ་རྗེ་བསྡམས་པའི་རྡོ་རྗེ་དྲན་མའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཛུབ་མོ་གཡས་པས་གཡོན་པའི་དབུས་མའི་ཚིགས་པ་བཟུང་སྟེ། གཡོན་པའི་མཛུབ་མོས་གཡས་པའི་དབུ་མའི་ཚིགས་གསུམ་པ་ཡང་བཟུང་ལ་མཐེ་བོང་གཉིས་ཀྱི་རྩེ་མོ་ཡང་དག་པར་སྦྱར་བར་བྱ་སྟེ་འདི་ནི་རྡོ་རྗེ་འདྲེན་མ་ཞེས་བྱ་བའི་ཕྱག་རྒྱའོ། །འདི་བཅིངས་ནས་བཟླ་བར་བྱ་སྟེ་དེ་ལྟར་ན་གཟུགས་ཐམས་ཅད་འགྲུབ་པར་འགྱུར་རོ། །རྡོ་རྗེ་བསྡམས་པའི་གཡོན་པའི་མཛུབ་མོ་བཀུག་པའི་ཤིང་བུ་གཡས་པའི་མཛུབ་མོས་བཏུད་པ་ནི་རྡོ་རྗེ་པི་ཝང་ངོ་ཞེས་བྱ་བ་ལ་འདི་བཅིངས་ནས་བཟླ་བར་བྱ་སྟེ་དེ་ལྟར་ན་རྡོ་རྗེའི་སྒྲ་འགྲུབ་པར་འགྱུར་རོ། །རྡོ་རྗེ་བསྡམས་པའི་མཐིལ་དག་མཉེ་བའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ཏེ་ལག་པའི་མཐིལ་གཉིས་ཕན་ཚུན་མཉེ་བར་བྱ་སྟེ་དེ་ལྟར་ན་རྡོ་རྗེ་དྲི་འགྲུབ་པར་འགྱུར་རོ། །ཁ་འབུས་མཉམ་པའི་དབུས་མ་ལྕེའི་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་ཁ་འབུས་པ་མཉམ་པའི་དབུས་མ་དང་ལྕེར་སྦྱར་བར་བྱ་སྟེ་དེ་ལྟར་ན་དངོས་གྲུབ་ཐམས་ཅད་འགྲུབ་པར་འགྱུར་རོ། །རབ་ཏུ་དགའ་བའི་རྡོ་རྗེའི་
ཕྱག་རྒྱ་ཡང་ང་ཞེས་བྱ་བ་ལ་མདའ་ལྔ་བསྡུས་པའི་ཕྱག་རྒྱ་ནི་རབ་ཏུ་དགའ་བའི་རྡོ་རྗེའི་ཕྱག་རྒྱ་སྟེ་དེ་བཅིངས་ན་རེག་བྱའི་དངོས་གྲུབ་ཤིན་ཏུ་ཐོབ་པར་འགྱུར་རོ། །བདེ་བ་ཆེན་པོའི་རྡོ་རྗེའི་མཆོད་པ་ནི་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་རྡོ་རྗེ་གར་མ་སྟེ་དེའི་ལས་ནི་འདི་ཡིན་ཏེ། དེ་ཡང་གང་ཡིན་ཞེ་ན། དང་པོའི་གླུའི་བཟླས་པ་ཇི་སྲིད་མངོན་པར་འདོད་པའོ་ཞེས་བྱ་བ་ལ་གར་གྱི་ཚུལ་གྱིས་ཡི་གེ་ཧཱུཾ་གི་གླུའི་བཟླས་པ་བྱ་སྟེ། དེ་ལྟར་ན་རྒྱུ་བ་དང་མི་རྒྱུ་བ་ཐམས་ཅད་རྗེས་སུ་ཆགས་པའོ། །གཡོ་བ་མེད་ཅིང་དགོད་པ་དང་དགུག་པ་དང་རབ་ཏུ་དགའ་བའི་རྡོ་རྗེ་ལྟ་བའི་ལྕགས་ཀྱུ་མས་སོ་ཞེས་བྱ་བ་ལ་སྐྱེ་བོ་ཐམས་ཅད་ཀྱི་ལྐོག་ཏུ་གྱུར་པའི་དགོད་པ་ནི་གཡོ་བ་མེད་པའི་དགོད་པ་སྟེ་དེ་དང་བཅས་པའི་དགོད་པ་ནི་བཀུག་པའོ། །རྡོ་རྗེ་ལྟ་བའི་འོད་ཟེར་གྱི་ལྕགས་ཀྱུ་མ་ནི་རབ་ཏུ་དགའ་བའི་རྡོ་རྗེ་ལྕགས་ཀྱུ་མས་ཏེ་དེས་བསྒྲུབ་བྱ་དགུག་ཅིང་གར་གྱི་ཚུལ་གྱིས་ཡི་གེ་ཧཱུཾ་བཟླ་བར་བྱ་སྟེ། དེ་ལྟར་ན་དངོས་པོ་ཐམས་ཅད་འགུགས་པར་བྱེད་པའོ། །རང་གི་མ་མཆུ་སོ་དག་གིས་ཡོངས་སུ་གཟུང་བར་བྱའོ་ཞེས་བྱ་བ་ལ་དེ་བཞིན་དུ་གར་གྱི་ཚུལ་གྱིས་ཡི་གེ་ཧཱུཾ་གི་གླུའི་བཟླས་པ་བྱ་ཞིང་བསྒྲུབ་བྱ་ལ་འོ་བྱེད་པའི་ཚུལ་གྱིས་རང་གི་མ་མཆུ་ནང་དུ་བཅུག་ནས་སོ་རྣམས་ཀྱིས་ཡོངས་སུ་གསུང་བར་བྱ་སྟེ། དེ་ལྟར་ན་ཐམས་ཅད་དབང་དུ་བྱེད་པའོ། །རང་གི་དབང་པོ་བསྐྱེད་པའོ་ཞེས་བྱ་བ་ལ་དེ་བཞིན་དུ་གར་གྱི་ཚུལ་གྱིས་ཡི་གེ་ཧཱུཾ་གི་གླུའི་བཟླས་པ་བྱ་ཞིང་གནོད་སྦྱིན་མ་ལ་སོགས་པའི་བསྒྲུབ་བྱ་དང་ཡང་དག་པར་སྦྱོར་བའི་སྒོམ་པས་རང་གི་དབང་པོ་བསྐྱེད་པར་བྱ་སྟེ། དེ་ལྟར་ན་ཐམས་ཅད་རོལ་དུ་བཅུག་པའོ། །རབ་ཏུ་དགའ་བ་རྡོ་རྗེའི་ངག་གི་ཡིད་ཀྱིས་འདོད་པའི་བཀའ་བསྒོ་བ་ཡང་ངོ་ཞེས་བྱ་བ་ལ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས་གར་བྱ་ཞིང་རྡོ་རྗེ་སེམས་དཔའ་ལ་སོགས་པའི་དངོས་པོ་ཐམས་ཅད་ལ་ཡིད་ཀྱིས་འདོད་པའི་བཀའ་བསྒོ་བའི་ཚུལ་གྱིས་ཡི་གེ་ཧཱུཾ་གི་གླུའི་བཟླས་པ་བྱ་སྟེ་དེ་ལྟར་ན་ལས་ཐམས་ཅད་ལ་ངེས་པར་སྦྱར་བར་འགྱུར་རོ། །བཅོམ་ལྡན་འདས་དཔལ་རྡོ་རྗེ་སེམས་དཔའ་ཡང་ཕྱག་རྒྱ་འདི་རྣམས་སྒྲུབ་པ་པོ་དག་གིས་སྦྱོར་ན་དེས་ཀྱང་འདའ་བར་མི་མཛད་ན་བརྟན་པ་དང་གཡོ་བ་གཞན་དག་ལ་སྨོས་ཀྱང་ཅི་དགོས་ཞེས་བྱ་བ་འདིས་ནི་ཕྱག་རྒྱ་འདི་རྣམས་ཀྱིས་ཁྱད་
པར་ཅན་དུ་གྲུབ་པ་ཡིན་ནོ་ཞེས་བྱ་བར་བསྟན་པ་ཡིན་ནོ། །རྡོ་རྗེ་ཐལ་མོ་ཞེས་བྱ་བ་ལ་སོགས་པ་ལ་རྡོ་རྗེ་སྐུ་མཆོག་གི་མཚན་ཉིད་ཕན་ཡོན་དང་བཅས་པ་ནི་གོ་སླའོ། །སྤྱི་བོར་བཞག་སྟེ་སྟེང་ནས་གཡས་སུ་ཕབ་པར་བྱའོ་ཞེས་བྱ་བ་ནི་རྡོ་རྗེ་སྐུ་མཆོག་སྤྱི་བོར་བཞག་ཅིང་སྟེང་གི་ཕྱོགས་ནས་ལྷ་འབེབས་པའི་ཚུལ་གྱིས་གཡས་ཕྱོགས་སུ་ཕབ་པར་བྱ་སྟེ་དེ་ལྟར་ན་ཐམས་ཅད་འབེབས་པར་འགྱུར་རོ། །ས་ལ་བཞག་ནས་ཁྲོ་གཉེར་གྱིས་གྱེན་དུ་དྲང་བར་བྱའོ་ཞེས་བྱ་བ་ལ་རྡོ་རྗེ་སྐུ་མཆོག་བཅིངས་ནས་ས་ལ་བཞག་སྟེ་ཀླུ་ཐམས་ཅད་དབང་དུ་བྱེད་པའི་བསམ་པས་ཁྲོ་གཉེར་བྱས་ནས་གྱེན་དུ་དྲང་བར་བྱ་སྟེ་དེ་ལྟར་ན་ཀླུ་ཐམས་ཅད་དབང་དུ་བྱེད་པར་འགྱུར་རོ། །གནོད་སྦྱིན་གྱི་གཟུགས་བརྙན་བྲིས་ལ་དེའི་སྙིང་གར་གཞག་པར་བྱའོ་ཞེས་བྱ་བ་ལ་རྡོ་རྗེ་སྐུ་མཆོག་བཅིངས་ནས་གནོད་སྦྱིན་གྱི་གཟུགས་བརྙན་བྲིས་ཏེ་དེའི་སྙིང་གའི་ཕྱོགས་སུ་གཟུང་བར་བྱ་སྟེ་དེ་ལྟར་ན་གནོད་སྦྱིན་ཐམས་ཅད་མངག་གཞུག་བྱེད་པར་འགྱུར་རོ། །ལྷ་ཆེན་པོའི་གནས་སུ་རྡོ་རྗེ་སྐུ་མཆོག་བཅིངས་ཏེ་ཁྲོ་ཞིང་བཟླ་བར་བྱ་སྟེ་དེ་ལྟར་ན་འབྱུང་པོ་ཐམས་ཅད་མངག་གཞུག་པར་འགྱུར་རོ། །རྡོ་རྗེ་སྐུ་མཆོག་བཅིངས་ཏེ་མ་མོ་རྣམས་ཀྱི་གནས་སུ་བདག་ཉིད་དཔལ་ཧེ་རུ་ཀའི་རྣམ་པར་བསམས་ཏེ་ཡི་གེ་བྷྱོ་བཟླ་བར་བྱ་སྟེ། དེ་ལྟར་ན་མ་མོ་ཐམས་ཅད་བསྙེན་བཀུར་དང་རོལ་པ་ལ་སོགས་པའི་བཀའ་བསྒོ་བ་ཐམས་ཅད་བྱེད་པར་འགྱུར་རོ། །རྡོ་རྗེ་གསོར་བའི་ཕྱག་རྒྱས་ལུས་ངན་པོའི་གཟུགས་བརྙན་རྐང་པ་གཡོན་པས་མནན་ཏེ་ཁྲོ་ཞིང་རྒོད་པ་དང་བཅས་པའི་གདོང་གིས་བཟླ་བར་བྱ་སྟེ་དེ་ལྟར་ན་དཔལ་འགུགས་པར་འགྱུར་རོ། །དེ་བཞིན་དུ་ཁྲོ་ཞིང་རྒོད་པ་དང་བཅས་པའི་གདོང་དང་ལྡན་པས་རྡོ་རྗེ་གསོར་བའི་ཕྱག་རྒྱས་གཞོན་ནུ་མའི་གཟུགས་བརྙན་གྱི་མདུན་དུ་མིག་གཉིས་ཀྱིས་འཕྲོག་པར་བྱ་ཞིང་བསླ་བར་བྱ་སྟེ་དེ་ལྟར་ན་ལྷའི་བུ་མོ་ཐམས་ཅད་འཕྲོག་པའོ། །བྷ་ག་ནི་བུད་མེད་ཀྱི་གཟུགས་རས་སམ་རྩིག་པ་ལ་སོགས་པ་ལ་བྲིས་ཏེ་དེ་དང་ཡང་དག་པར་སྦྱོར་བར་བསྒོམ་ཞིང་རྡོ་རྗེ་གསོར་ཏེ་ཁྲོ་ཞིང་རྒོད་པ་དང་བཅས་པའི་ཁས་བཟླ་བར་བྱ་སྟེ། དེ་ལྟར་ན་ལྷ་དང་ལྷ་མ་ཡིན་པའི་བུ་མོ་ཐམས་ཅད་རོལ་དུ་བཅུག་པ་ཡིན་ནོ། །ལྷ་ཆེན་པོའི་གཟུགས་བརྙན་རྐང་པ་གཡོན་པས་མནན་ཏེ་རྡོ་རྗེ་
གསོར་བའི་ཕྱག་རྒྱ་ཁྲོ་ཞིང་རྒོད་པ་དང་བཅས་པའི་ཁས་ཨ་ནུ་ར་ག་ཡ་མི་ཧཱུཾ་ཧཱུཾ་ཞེས་བྱ་བ་བཟླ་བར་བྱ་སྟེ། དེ་ལྟར་ན་ཁམས་གསུམ་པ་ལས་རྣམ་པར་རྒྱལ་བར་འགྱུར་རོ། །འདོད་པའི་དབང་ཕྱུག་གི་གཟུགས་བརྙན་སྔར་བཤད་པའི་མཚན་ཉིད་ཅན་གྱི་མདའ་འཕེན་པའི་ཕྱག་རྒྱས་བསྣུན་ལ་འོག་ཏུ་ཁ་བལྟ་བར་བྱས་ནས་དེའི་རྗེས་ལ་རྡོ་རྗེ་གསོར་བའི་ཕྱག་རྒྱ་དང༌། རྐང་པ་གཡོན་པས་གནན་ཏེ་ཁྲོ་ཞིང་རྒོད་པ་དང་བཅས་པའི་ཁས་བཟླ་བར་བྱ་སྟེ། དེ་ལྟར་ན་དབང་ཕྱུག་ཆེན་པོ་ཐམས་ཅད་འཕྲོག་པར་འགྱུར་རོ། །རྡོ་རྗེ་གསང་བའི་མཆོད་པས་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་ཅེས་བྱ་བ་ནི་བཤད་པའོ་ཞེས་བྱ་བ་ནི་དང་པོའི་རྡོ་རྗེའོ་ཞེས་བྱ་བའི་དོན་ཏོ། །འདི་ལྟར་བཤད་པར་འགྱུར་ཏེ། དང་པོའི་རྡོ་རྗེ་བཅིངས་ཏེ་འདོད་ཆགས་རྡོ་རྗེ་མ་ལ་སོགས་པའི་ལྷ་མོའི་ཚོགས་བསྐྱེད་ལ་དེ་རྣམས་ཀྱིས་བཅོམ་ལྡན་འདས་ལ་ཡིད་ཀྱིས་མཆོད་པར་བྱ་སྟེ། དེ་ལྟར་ན་མཆོད་པ་ཐམས་ཅད་འགྲུབ་པར་འགྱུར་རོ། །ཐམས་ཅད་རྡོ་རྗེར་བྱེད་པ་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གཉིས་བཅིངས་ནས་སྙིང་ག་དང་མགྲིན་པ་དང༌། སླར་ཡང་སྙིང་ག་དང་ནུ་མའི་བར་དང༌། དེ་ནས་སྙིང་ག་དང༌། སླར་ཡང་མགྲིན་པ་དང་དབང་བསྐུར་བའི་གནས་སུ་མདུད་པའི་ཚུལ་གྱིས་གོ་ཆ་བགོ་པར་བྱས་ལ་སླར་ཡང་སྤྱི་བོ་དང་དབང་བསྐུར་བའི་སར་མདུད་པ་བཅིང་བའི་ཚུལ་དང༌། མགོའི་ལོགས་གཡས་པ་དང་གཡོན་པ་དག་ལ་མདུད་པ་འཆིང་བའི་ཚུལ་དུ་བྱ་སྟེ་ཕྱག་རྒྱ་འདིས་ཐམས་ཅད་རྡོ་རྗེ་ཉིད་དུ་བྱེད་པར་འགྱུར་རོ། །གཡོན་དུ་རྡོ་རྗེའི་མདའ་འཕང་བའོ་ཞེས་བྱ་བ་ལ་རྡོ་རྗེ་ཁུ་ཚུར་གཉིས་བཅིངས་ལ་གཡོན་གྱིས་འདའ་འཕང་བའི་ཚུལ་དུ་བྱ་སྟེ། ད་ལྟར་ན་བདུད་ལ་སོགས་པའི་འཇིགས་པ་ཐམས་ཅད་རབ་ཏུ་འཇོམས་པར་འགྱུར་རོ། །རྡོ་རྗེ་བསྙེམས་མ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ནི་རྡོ་རྗེ་བསྙེམས་མ་སྟེ་ངེས་ཕྱག་རྒྱ་ཐམས་ཅད་བཅིང་བར་འགྱུར་རོ། །ཕྱག་རྒྱ་ཆེན་པོ་ཡང་ངོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་གང་ཡིན་པ་དེས་མ་ལུས་ཤིང་ལུས་པ་མེད་པའི་མཆོག་གི་དངོས་གྲུབ་ཀྱི་འདོད་པ་འགྲུབ་པར་འགྱུར་རོ། །དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་ནི་ཕྱག་རྒྱ་ཐམས་ཅད་དེ་དག་གི་རྒྱུད་ནི་དེ་དག་སྟོན་པར་བྱེད་པ་སྒྲའི་ཚོགས་སོ། །དེ་ཉིད་
ནི་ཆོ་ག་རྒྱས་པའོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་ཕྱག་རྒྱའི་རྒྱུད་ཀྱི་ཆོག་རྒྱས་པ་རྫོགས་སོ།། །།དེ་ནས་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་རྒྱུད་བསྟན་ནས། ད་ནི་དེ་བཞིན་གཤེགས་པའི་དཀྱིལ་འཁོར་ཆེན་པོའི་ཕྱག་རྒྱའི་རྒྱུད་བསྟན་པར་བྱ་བའི་ཕྱིར། དེ་ནས་དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱའི་རྒྱུད་ཅེས་བྱ་བ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་རྣམས་ནི་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོ་རྣམས་ཏེ་དེ་དག་གི་རྒྱུ་ནི་འདི་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །དེ་གང་ཡིན་ཞེ་ན། སེམས་དཔའ་རྡོ་རྗེ་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པའི་དབུས་མ་གཉིས་ཀྱི་རྩེ་མོ་ཡང་དག་པར་སྦྱར་བ་ནི་སེམས་མ་རྡོ་རྗེ་མའི་སྟེ་མི་བསྐྱོད་པའི་དམ་ཚིག་གི་ཕྱག་རྒྱའོ། །འདིས་དབང་བསྐུར་བའི་དུས་སུ་རང་དང་གཞན་དག་བྱིན་གྱིས་བརླབ་པར་བྱའོ། །དེ་ཡང་བཛྲ་སཏྭ་ཞེས་བྱ་བའི་སྙིང་པོ་འདིས་བྱའོ། །དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཞེས་བྱ་བ་ནི་བཅོམ་ལྡན་འདས་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །འདིས་ནི་འདི་ལྟར་བཤད་པར་འགྱུར་ཏེ། དབང་བསྐུར་གཞན་རྣམ་པར་སྣང་མཛད་དུ་བསམས་ལ། བཛྲ་སཏྭ་ཨ་དྷི་ཏིཥྛ་ཞེས་བྱ་བས་སེམས་མ་རྡོ་རྗེ་མ་བཅིངས་ཏེ། སྙིང་ག་དང་མཛོད་སྤུ་དང་མགྲིན་པ་དང་སྤྱི་བོར་བྱིན་གྱིས་བརླབ་ཅིང་སེམས་མ་རྡོ་རྗེ་མ་བཅིངས་ནས་ལྡང་བར་བྱའོ། །དེ་ནས་རྡོ་རྗེ་ཁུ་ཚུར་གཉིས་ཀྱིས་ཨོཾ་བྷུ་ཁཾ་ཞེས་བྱ་བ་བཟླ་བར་བྱ་ཞིང་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་རང་ཉིད་འཆིང་ངམ་གཞན་འཆིང་དུ་གཞུག་པར་བྱའོ། །རྡོ་རྗེ་རིན་ཆེན་གྱི་དབང་བསྐུར་བས་དབང་བསྐུར་བས་དབང་བསྐུར་བ་བྱས་ནས་ཞེས་བྱ་བ་ལ་རྡོ་རྗེ་ཐལ་མོ་འོག་ཏུ་བརྐྱང་ནས་མཐེ་བོད་དང་མཛུབ་མོའི་རྩེ་མོ་མཉམ་པར་སྦྱར་བ་སྙིང་ག་ལ་གྱེན་དུ་བསླངས་ཏེ་དབང་བསྐུར་བའི་གནས་སུ་རྩེ་མོ་བཞག་པ་ནི་རྡོ་རྗེ་རིན་ཆེན་ཞེས་བྱའོ། །དེ་བཅིངས་པས་བཛྲ་རཏྣ་ཨ་བྷི་ཥི་ཉྩ་ཞེས་བྱ་བ་བཟླ་ཞིང་རང་ངམ་གཞན་ལ་དབང་བསྐུར་བར་བྱའོ། །དེ་ལྟར་རྡོ་རྗེ་རིན་ཆེན་གྱི་དབང་བསྐུར་བས་རང་དང་གཞན་དག་ལ་སློབ་དཔོན་གྱི་དབང་བསྐུར་ཏེ།
རྡོ་རྗེ་རྩེ་ལྔ་འོད་ཟེར་དང་བཅས་པས་ཇི་སྐད་བཤད་པའི་སྔགས་ཀྱིས་སྦྱིན་པར་བྱའོ། །མཆོད་པ་ནི་མཉམ་པའི་ཐལ་མོས་ཇི་ལྟ་བ་བཞིན་དུ་གཏོར་བ་ལ་སོགས་པ་རྣམས་སོ་ཞེས་བྱ་བ་ལ་དཔལ་རྡོ་རྗེ་སེམས་དཔའི་དཀྱིལ་འཁོར་དུ་རྡོ་རྗེ་ཐལ་མོས་མེ་ཏོག་ལ་སོགས་པའི་མཆོད་པའི་ཕྱག་རྒྱ་གང་བསྟན་པ་དེ་ཉིད་འདིར་མཉམ་པའི་ཐལ་མོས་འདིར་ཤེས་པར་བྱའོ། །འདི་ལྟར་བཤད་པར་འགྱུར་ཏེ། རྡོ་རྗེ་སེམས་དཔའ་བསྡུས་པ་ཡིས། །རྡོ་རྗེ་རིན་ཆེན་བླ་ན་མེད། །རྡོ་རྗེ་ཆོས་ནི་གླུ་བླངས་པས། །རྡོ་རྗེ་ལས་ནི་བྱེད་པར་འགྱུར། །ཞེས་བྱ་བའི་རྡོ་རྗེའི་གླུ་བརྗོད་ཅིང་སྔ་མ་བཞིན་དུ་གར་བྱས་ལ་མཉམ་པའི་ཐལ་མོ་བསྐོར་བས་རང་གི་སྙིང་གར་བསམ་པ་སྤྲོ་བས་མགོ་བོས་ཕྱག་བྱས་ཏེ་སྤྱི་བོར་བཞག་སྟེ་ཕབ་ནས་སྟེང་དུ་གཏོར་བ་དང་འོག་ཏུ་དོར་བ་དང་མཐེ་བོང་སྦྱར་བས་བསྐོར་བ་དང༌། རབ་ཏུ་བརྐྱང་ཞིང་བྱུག་པའི་ཚུལ་རྣམས་ཀྱིས་སྦྱང་བར་བྱ་སྟེ་དེ་ལྟར་ན་མེ་ཏོག་དང་སྤོས་དང་མར་མེ་དང༌། དྲིའི་མཆོད་པའི་ཕྱག་རྒྱ་རྣམས་ཡིན་ནོ། །དེ་བཞིན་དུ་གར་བྱས་ལ་མཉམ་པའི་ཐལ་མོ་བསྐོར་བས་སྙིང་གར་རྣམ་པར་འཕྲུལ་པ་བསྟན་པར་བྱའོ། །མཉམ་པའི་ཐལ་མོ་ཁར་ཡོངས་སུ་བསྐོར་ཏེ་སྤྱི་བོར་གཟུང་བར་བྱའོ། །མཉམ་པའི་ཐལ་མོ་གཡོན་པའི་མཛུབ་མོ་བཀུག་པ་དབྱུག་པའི་རྣམ་པར་བྱས་ལ་གཡས་པའི་མཛུབ་མོ་བཀུག་པས་རྡོ་རྗེ་པི་ཝང་བརྡུང་བའི་ཚུལ་བྱའོ། །དེ་བཞིན་གཤེགས་པའི་ཁུ་ཚུར་གཉིས་ཀྱིས་གར་བྱས་ལ་མཉམ་པའི་ཐལ་མོ་སྤྱི་བོར་བཅིང་བ་བྱ་སྟེ་སྒེག་མོ་ལ་སོགས་པ་རྡོ་རྗེ་གར་མའི་མཐར་ཐུག་པའི་ཕྱག་རྒྱ་འདི་རྣམས་ཡིན་ནོ། །ཕྱག་རྒྱ་རྣམ་པ་བརྒྱད་པོ་འདི་དག་གིས་དེ་བཞིན་གཤེགས་པའི་རིགས་ལ་མཆོད་པར་བྱའོ། །དེ་ལྟར་མཆོད་པ་རྣམ་པ་བརྒྱད་ཀྱི་ཕྱག་རྒྱ་རྣམས་བསྟན་ནས་ད་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱི་མཚན་ཉིད་བཤད་པར་བྱ་བའི་ཕྱིར་དེ་བཞིན་གཤེགས་པའི་ཁུ་ཚུར་གཉིས་བཅིང་བའོ་ཞེས་བྱ་བ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ནི་དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་བཅིང་བར་བྱ་ཞེས་བྱ་བའི་དོན་ཏོ། །ཇི་ལྟར་ཞེ་ན་གཡོན་པའི་ཞེས་བྱ་བ་ལ་སོགས་པ་ལ། གཡོན་པའི་དེ་བཞིན་གཤེགས་པའི་ཁུ་ཚུར་རང་གི་སྙིང་གར་བཞག་
ལ། དེའི་མཛུབ་མོ་གཡས་པའི་དེ་བཞིན་གཤེགས་པའི་ཁུ་ཚུར་གྱིས་བྱང་ཆུབ་མཆོག་གི་ཚུལ་དུ་བསྒྲེང་བ་གཟུད་བར་བྱ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཞེས་བྱ་བའི་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །ལྷག་མའི་དོན་ནི་གོ་སླའོ། །དེ་ལ་ཕྱག་རྒྱ་ཆེན་པོའི་བདག་ཉིད་ཐམས་ཅད་ཀྱི་ཆོ་ག་རྒྱས་པའོ་ཞེས་བྱ་བ་ལ། རྣམ་པར་སྣང་མཛད་ལ་སོགས་པའི་ཕྱག་རྒྱ་ཆེན་པོ་ནི་ཇི་ལྟར་བྲིས་པའི་རྗེས་སུ་འབྲངས་པས་རྣམ་པར་སྣང་མཛད་ལ་སོགས་པའི་རང་བཞིན་ཅན་གྱི་བདག་ཉིད་རྣམ་བར་བསྒོམས་ནས་བཅིང་བར་བྱའོ་ཞེས་བྱ་བའི་ཐ་ཚིག་གོ །འདིས་ནི་འདི་ལྟར་བཤད་པར་འགྱུར་ཏེ། དེ་བཞིན་གཤེགས་པའི་རྡོ་རྗེ་བླངས་ནས་རྡོ་རྗེ་ཁུ་ཚུར་གཉིས་བཅིངས་ཏེ། རྡོ་རྗེའི་སྐྱིལ་མོ་ཀྲུང་གིས་འདུག་ལ། གཡོན་པའི་རྡོ་རྗེ་མཛུབ་མོ་ནི། །གཡས་པའི་ནང་དུ་བསྒྲེང་བར་བྱ། །བྱང་ཆུབ་མཆོག་གི་ཕྱག་རྒྱ་འདི། །སངས་རྒྱས་བྱང་ཆུབ་སྦྱིན་བྱེད་པའོ།། ཞེས་བྱ་བ་འདི་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱ་ཆེན་པོའོ། །པང་བར་ལག་པ་གཡོན་པ་གྱེན་དུ་འཛིན་པའི་ཚུལ་དུ་བཞག་ལ་ལག་པ་གཡས་པ་ས་ལ་རེག་པའི་ཚུལ་གྱིས་དེ་བཞིན་གཤེགས་པའི་རྡོ་རྗེ་དང་བཅས་པ་གང་ཡིན་པ་དེ་ནི་མི་བསྐྱོད་པའི་ཕྱག་རྒྱ་ཆེན་པོའོ། །མི་བསྐྱོད་པའི་ཕྱག་རྒྱ་ཉིད་རིན་པོ་ཆེ་དང་བཅས་པའི་ལག་པ་གཡས་པས་མཆོག་སྦྱིན་པའི་ཚུལ་དུ་གཞག་པ་གང་ཡིན་པ་དེ་ནི་རིན་ཆེན་འབྱུང་ལྡན་གྱིའོ། །ལག་པ་གཡོན་པས་རྡོ་རྗེའི་པདྨ་བླངས་ཏེ་ཆོས་བསྟན་པ་གང་ཡིན་པ་དེ་ནི་འོད་དཔག་མེད་ཀྱིའོ། །མི་བསྐྱོད་པའི་ཕྱག་རྒྱ་ཆེན་པོ་ཉིད་སྣ་ཚོགས་རྡོ་རྗེ་དང་བཅས་པའི་ལག་པ་གཡས་པས་མི་འཇིགས་པ་སྦྱིན་པའི་ཚུལ་དུ་གཞག་པ་གང་ཡིན་པ་དེ་ནི་དོན་ཡོད་གྲུབ་པའི་ཕྱག་རྒྱ་ཆེན་པོའོ། །རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་སེམས་དཔའི་རྡོ་རྗེ་མའིའོ། །རྡོ་རྗེ་བསྙེམས་པའི་ཕྱག་རྒྱ་ཆེན་པོ་ནི་རྡོ་རྗེ་རིན་ཆེན་མའིའོ། །འཇིག་རྟེན་དབང་ཕྱུག་གི་ཕྱག་རྒྱ་ཆེན་པོ་ནི་ཆོས་ཀྱི་རྡོ་རྗེ་མའིའོ། །རྡོ་རྗེ་ལས་ཀྱི་ཕྱག་རྒྱ་ཆེན་པོ་ནི་ལས་ཀྱི་རྡོ་རྗེ་མའིའོ། །དེ་བཞིན་གཤེགས་པའི་ཁུ་ཚུར་གཉིས་ཀྱི་དེ་བཞིན་གཤེགས་པའི་རྡོ་རྗེ་གཉིས་བསྙེམས་པ་གཉིས་ཀྱིས་གནས་པ་གང་ཡིན་པ་དེ་ནི་སྒེག་མོའིའོ། །རྡོ་རྗེ་རྩེ་གསུམ་
པས་མཚན་པའི་ལག་པ་གཉིས་འདེགས་ཤིང་གར་གྱི་ཚུལ་གྱིས་གནས་པ་ནི་གར་མའིའོ། །ལག་པ་གཉིས་ཀྱིས་རྡོ་རྗེའི་ལྕགས་ཀྱུ་བླངས་ཏེ་དེས་དེ་བཞིན་གཤེགས་པ་ཐམས་ཅད་འགུགས་པར་བྱེད་པ་ནི་རྡོ་རྗེ་ལྕགས་ཀྱུའིའོ། །ལག་པ་གཉིས་ཀྱིས་རྡོ་རྗེ་ཞགས་པ་བླངས་ཏེ་དེ་བཞིན་གཤེགས་པ་ཐམས་ཅད་གཞུག་པར་བྱེད་པ་ནི་རྡོ་རྗེ་ཞགས་པ་མའིའོ། །ལག་པ་གཉིས་ཀྱིས་རྡོ་རྗེ་ལུ་གུ་རྒྱུད་བླངས་ནས་དེ་བཞིན་གཤེགས་པ་ཐམས་ཅད་འཆིང་བར་བྱེད་པའོ། །ལག་པ་གཡོན་པ་སྟན་ལ་བསྟེན་པའི་ཚུལ་ལ་གནས་པས་གཡས་པའི་དེ་བཞིན་གཤེགས་པའི་ཁུ་ཚུར་གྱིས་རྡོ་རྗེ་དྲིལ་བུ་དཀྲོལ་བར་བྱེད་པ་ནི་རྡོ་རྗེ་དྲིལ་བུའི་ཕྱག་རྒྱ་ཆེན་པོའོ། །དམ་ཚིག་གི་ཕྱག་རྒྱ་པདྨ་ཆེན་པོ་ཞེས་བྱ་བ་ལ་འཕགས་པ་སྤྱན་རས་གཟིགས་ཀྱི་དབང་ཕྱུག་གི་དཀྱིལ་འཁོར་ཆེན་པོ་ལ་པདྨ་ཆེན་པོ་ཞེས་བྱ་བའི་དམ་ཚིག་གི་ཕྱག་རྒྱ་གང་ཡིན་པ་དེ་བཅིངས་པ་ཙམ་གྱིས་བཅོམ་ལྡན་འདས་འོད་དཔག་མེད་ཀྱི་དམ་ཚིག་གི་ཕྱག་རྒྱ་ཡིན་ནོ་ཞེས་བྱ་བའི་དོན་ཏོ། །དེ་ཡང་འདི་ཡིན་ཏེ་རྡོ་རྗེ་ཐལ་མོ་ཁ་འབུས་པའི་དབུས་མ་མཉམ་པའི་མཐེ་བོད་དང་མཐེའུ་ཆུང་ཁ་ཕྱེ་བས་འདབ་མ་བཞི་པ་ཞེས་བྱ་བའོ། །རྡོ་རྗེ་ཕྱག་རྒྱ་ཞེས་བྱ་བ་ནི་རྡོ་རྗེ་བསྡམས་པ་ལས་བྱུང་བའི་དང་པོའི་རྡོ་རྗེའི་ཕྱག་རྒྱ་གང་ཡིན་པ་དེ་ཉིད་བཅོམ་ལྡན་འདས་དོན་ཡོད་གྲུབ་པའི་དམ་ཚིག་གི་ཕྱག་རྒྱར་ཤེས་པར་བྱའོ། །དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་ནི་རྡོ་རྗེ་སེམས་དཔའི་དབང་བསྐུར་བའི་ཕྱག་རྒྱར་གང་བཤད་པ་དེ་ཉིད་རྣམ་པར་སྣད་མཛད་ཀྱི་དམ་ཚིག་གི་ཕྱག་རྒྱ་ཡིན་ནོ། །རྡོ་རྗེ་ལས་ཀྱི་ཕྱག་རྒྱ་བཤད་པའོ་ཞེས་བྱ་བ་ལ་དུམ་བུ་དང་པོ་ལས་བཅོམ་ལྡན་འདས་ནམ་མཁའ་མཛོད་ཀྱི་ཕྱག་རྒྱར་གང་བཤད་པ་དེ་ཉིད་རྡོ་རྗེ་ལས་མར་ཤེས་པར་བྱའོ། །དེ་ཡང་རྡོ་རྗེ་བསྡམས་པ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིངས་ལ་སྲིན་ལག་དང་མཐེའུ་ཆུང་གཉིས་མཉམ་པའི་རྒྱལ་མཚན་འཕྱར་བའི་མཛུབ་མོས་བྱ་བའོ། །རྡོ་རྗེ་ཐལ་མོ་འོག་ཏུའོ། །ཞེས་བྱ་བ་ལ་སོགས་བ་ལ་རྡོ་རྗེ་ཐལ་མོ་འོག་ཏུ་ཁ་བལྟས་པར་བཅིངས་ལ་མཛུབ་མོ་དང་མཐེ་བོང་དག་གིས་རྡོ་རྗེ་རིན་པོ་ཆེར་བྱས་ལ་སྙིང་གའི་ཕྱོགས་སུ་བཞག་སྟེ། མཛོད་སྤུའི་ཕྱོགས་སུ་མཛུབ་མོ་དང་མཐེ་བོའི་
རྩེ་མོ་གཟུང་བར་བྱ་སྟེ་འདི་ནི་བཅོམ་ལྡན་འདས་རིན་ཆེན་འབྱུང་ལྡན་དང་བཅོམ་ལྡན་འདས་མ་རྡོ་རྗེ་རིན་ཆེན་མའི་རྡོ་རྗེ་རིན་པོ་ཆེ་ཞེས་བྱ་བའི་དམ་ཚིག་གི་ཕྱག་རྒྱ་ཡིན་ནོ། །དེ་ཉིད་གྱེན་དུ་ཁ་བལྟ་བའི་མཛུབ་མོ་གཉིས་བཀུག་པས་རྡོ་རྗེ་པདྨའོ་ཞེས་བྱ་བ་ལ་འདས་མ་ཐག་དུ་བཤད་པའི་རྡོ་རྗེ་རིན་པོ་ཆེའི་ཕྱག་རྒྱ་ཉིད་གྱེན་དུ་ཁ་བལྟ་བར་བྱས་པའི་མཛུབ་མོ་གཉིས་པདྨའི་རྣམ་བ་ཅན་དུ་བྱ་སྟེ་འདི་ནི་རྡོ་རྗེ་པདྨ་ཞེས་བྱ་བའི་རྡོ་རྗེ་ཆོས་མའིའོ། །སེམས་མ་རྡོ་རྗེ་མ་ནི་ཕྱི་རོལ་དུ་དབུས་མ་བཅིངས་བའོ་ཞེས་བྱ་བ་ལ་རྡོ་རྗེ་བསྡམས་པའི་དབུས་མ་བསྒྲེང་བའི་ལུ་གུ་མཉམ་པ་ཞེས་བྱ་བའི་དོན་ཏེ་འདི་ནི་རྡོ་རྗེ་སེམས་མའི་དམ་ཚིག་གི་ཕྱག་རྒྱའོ། །མཉམ་པའི་ཐལ་མོ་བསྐོར་བས་སྙིང་གར་རྣམ་པར་འཕྲུལ་པ་བསྟན་པར་བྱ་སྟེ། འདི་ནི་སྒེག་མོའི་ཕྱག་རྒྱའོ། །མཉམ་པའི་ཐལ་མོ་དགོད་ཅིང་ཡོངས་སུ་བསྐོར་བས་སྤྱི་བོར་གཟུང་བར་བྱ་སྟེ་འདི་ནི་བཞད་མའིའོ། །མཉམ་པའི་ཐལ་མོ་གྱོན་པའི་མཛུབ་མོ་དབྱུག་པའི་ཚུལ་དུ་བཀུག་ལ་གཡས་པའི་མཛུབ་མོ་བཀུག་པས་པི་ཝང་བརྡུང་བའི་ཚུལ་དུ་བྱས་ཏེ་འདི་ནི་གླུ་ཆེན་མའིའོ། །དེ་བཞིན་གཤེགས་པའི་ཁུ་ཚུར་གཉིས་ཀྱིས་གར་བྱ་ཞིང་སྤྱི་བོར་མཉམ་པའི་ཐལ་མོ་བཅིང་བར་བྱ་སྟེ་འདི་ནི་གར་མའི་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པའི་མཛུབ་མོ་གཉིས་ཀྱིས་ལྕགས་ཀྱུ་ནི་རྡོ་རྗེ་ལྕགས་ཀྱུ་མའིའོ། །རྡོ་རྗེ་བསྡམས་པའི་གཡོན་པའི་མཛུབ་མོ་ལྕགས་ཀྱུས་གཟུང་བར་བྱས་ལ་རྡོ་རྗེ་ཞགས་པ་མའིའོ། །རྡོ་རྗེ་བསྡམས་པ་བཅིངས་ནས་མཛུབ་མོ་དང་མཐེ་བོང་མདུད་པ་ནི་རྡོ་རྗེ་ལྕགས་སྒྲོག་གིའོ།། རྡོ་རྗེ་བསྡམས་པ་བཅིངས་ནས་མཐེ་བོང་གཉིས་ནང་དུ་བཅུག་སྟེ་རང་གི་མཐེའུ་ཆུང་དང་སྲིན་ལག་གི་ནང་དུ་གཟུང་བར་བྱས་ཏེ་འདི་ནི་རྡོ་རྗེ་དྲིལ་བུ་མའི་དམ་ཚིག་གི་ཕྱག་རྒྱའོ། །ཆོས་ཀྱི་ཕྱག་རྒྱ་ཞེས་བྱ་བ་ལ་རང་བཞིན་གྱིས་དག་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་སྟོན་པར་བྱེད་པའི་ཡི་གེ་རྣམས་ནི་ཆོས་ཀྱི་ཕྱག་རྒྱ་སྟེ་ཡི་གེ་ཨ་ནི་རྣམ་པར་སྣང་མཛད་ཀྱིའོ། །ཡི་གེ་ཧོ་ནི་མི་བསྐྱོད་པའིའོ། །ཏྲཾ་ནི་རིན་ཆེན་འབྱུང་ལྡན་གྱིའོ། །ཡི་གེ་ཧྲཱིཿ་ནི་འོད་དཔག་ཏུ་མེད་པའིའོ། །ཡི་གེ་ཧཱུཾ་ནི་དོན་ཡོད་གྲུབ་པའོ། །ལྷག་མ་རྣམས་ཀྱི་ནི་རང་གི་སྙིང་པོ་ཁོ་ནའོ། །དེ་ནས་ཀྱི་
སྒྲ་ནི་སྔ་མ་བཞིན་ནོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་མཚན་ཉིད་ཅན་གྱི་ལས་སྟོན་པར་བྱེད་པའི་ཕྱག་རྒྱ་ནི་ལས་ཀྱི་ཕྱག་རྒྱ་སྟེ། དེའི་མཚན་ཉིད་འདི་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །རྡོ་རྗེ་ཁུ་ཚུར་མཐེ་བོར་བཞག་པས་དེ་བཞིན་གཤེགས་པའི་ཁུ་ཚུར་རོ་ཞེས་བྱ་བ་ནི་རྡོ་རྗེ་བསྡམས་པ་ནང་དུ་བཅིངས་ལ་མཐེ་བོད་གཉིས་བཞག་ལ་མཛུབ་མོ་གཉིས་ཀྱི་རྩེ་མོས་རང་གི་མཐེ་བོང་མནན་པར་བྱ་སྟེ་འདི་ནི་འདིར་རྡོ་རྗེ་ཁུ་ཚུར་ཡིན་ནོ། །འདི་བཅིངས་ནས་མཐེ་བོང་གཉིས་ཕྱིར་ཕྱུང་སྟེ། ཡང་དག་པར་སྦྱར་བར་བྱས་ལ་རྩེ་མོའི་ཚུལ་དུ་གཟུང་བར་བྱ་སྟེ། འདི་ནི་རྡོ་རྗེ་ཁུ་ཚུར་མཐེ་བོང་བཞག་པས་དེ་བཞིན་གཤེགས་པའི་ཁུ་ཚུར་རོ་ཞེས་བྱའོ། །དེ་གཉིས་སུ་བྱས་པས་དེ་བཞིན་གཤེགས་པའི་ཁུ་ཚུར་གཉིས་སུ་འགྱུར་རོ། །གཡོན་པ་དེ་བཞིན་གཤེགས་པའི་ཁུ་ཚུར་གྱིས་མཛུབ་མོ་སྙིང་གའི་ཕྱོགས་སུ་བསྒྲེང་པ་གཡས་པའི་དེ་བཞིན་གཤེགས་པའི་ཁུ་ཚུར་གྱིས་བྱང་ཆུབ་མཆོག་གི་ཚུལ་དུ་གཟུང་བར་བྱ་སྟེ། དེ་ལྟར་ན་དེ་བཞིན་གཤེགས་པའི་ཁུ་ཚུར་བཅིང་བ་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་ཏེ། དེ་བཞིན་གཤེགས་པའི་ཁུ་ཚུར་གཉིས་ཞེས་བྱ་བ་ལ་སོགས་པ་བཤད་པ་ཡིན་ནོ། །དེ་ནི་བཅོམ་ལྡན་འདས་རྣམ་པར་སྣང་མཛད་ཀྱི་ལས་ཀྱི་ཕྱག་རྒྱའོ། །གཡོན་ཆོས་གོས་དང་བཅས་པ་ཞེས་བྱ་བ་ལ་གཡོན་པའི་དེ་བཞིན་གཤེགས་པའི་ཁུ་ཚུར་ཆོས་གོས་ཀྱི་མཐའ་མ་འཛིན་པའི་ཚུལ་གྱིས་རང་གི་སྙིང་གར་བསྟོད་པའི་ཚུལ་གྱིས་གཟུང་བར་བྱའོ། །གཡས་པའི་དེ་བཞིན་གཤེགས་པའི་ཁུ་ཚུར་གྱི་སོར་མོ་ཐམས་ཅད་རབ་ཏུ་བརྐྱང་བས་ས་ལ་རེག་པའི་ཚུལ་གྱིས་གཟུང་བར་བྱ་སྟེ་འདི་ནི་རབ་ཏུ་རྒྱལ་བར་བྱེད་པ་ཞེས་བྱ་བ་བཅོམ་ལྡན་འདས་མི་བསྐྱོད་པའི་ལས་ཀྱི་ཕྱག་རྒྱའོ། །དེས་བདུད་ཐམས་ཅད་ཀྱི་སྟོབས་འཇོམས་པའོ་ཞེས་བྱ་བ་ལ་ཇི་སྐད་དུ། །མཚན་ཕྱེད་ཀྱི་དུས་སུ་བདུད་ཐམས་ཅད་ཀྱི་སྟོབས་བལྟས་ཏེ་དེས་ན་བདུད་ཐམས་ཅད་རབ་ཏུ་འཛོམས་པར་བྱེད་པས་བདུད་གཞོམ་པར་བྱའོ་ཞེས་བྱ་བ་གསུངས་ཏེ་དེ་ཡིས་དེ་བྱ་བ་ཡིན་ནོ། །འདས་མ་ཐག་ཏུ་བཤད་པའི་མི་བསྐྱོད་པའི་ལས་ཀྱི་དེ་ཉིད་བཅིངས་པ་ཡོངས་སུ་བསྐོར་ཏེ་ཁ་གྱེན་དུ་བལྟ་བར་བྱས་ན་འདོན་པར་བྱེད་ཅིང་གཟེངས་སྟོད་པར་བྱེད་ཅེས་བྱ་བ་རིན་ཆེན་
འབྱུང་ལྡན་གྱི་ལས་ཀྱི་ཕྱག་རྒྱ་སྟེ། དེ་ཉིད་ལྷ་ལ་སོགས་པའི་སེམས་ཅན་རྣམས་སློང་བར་བྱེད་པས་ན་ལྟུང་བ་འདོན་པ་དང༌། རིགས་ཐམས་ཅད་ཀྱི་དཀྱིལ་འཁོར་རྣམས་སུ་སློབ་དཔོན་དང་སློབ་མ་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་བྱེད་པ་ཡིན་ནོ། །འདིས་ནི་འདི་ལྟར་བཤད་པར་འགྱུར་ཏེ། མི་བསྐྱོད་པའི་ཕྱག་རྒྱ་ཉིད་བཅིངས་ནས་ལག་པ་གཡས་པ་ཁ་གྱེན་དུ་བལྟ་བར་བྱས་ཏེ་མཆོག་སྤྱིན་གྱི་ཚུལ་དུ་གཟུང་བར་བྱ་སྟེ། འདི་ནི་གཟེངས་བསྟོད་པ་ཞེས་བྱ་བ་ནི་རིན་ཆེན་འབྱུང་ལྡན་གྱི་ལས་ཀྱི་ཕྱག་རྒྱ་ཡིན་ནོ། །མི་བསྐྱོད་པའི་ལས་ཀྱི་ཕྱག་རྒྱ་དེ་ཉིད་བཅིངས་ནས་པདྨའི་འདབ་མ་ཁ་ཕྱེ་བའི་ཚུལ་དུ་གཡས་པའི་མཐེ་བོང་དང་མཛུབ་མོ་དག་གིས་གཡོན་པའི་དེ་བཞིན་གཤེགས་པའི་ཁུ་ཚུར་གྱི་རང་བཞིན་གྱི་ཆོས་གོས་ཀྱི་མཐའ་མ་འཛིན་པའི་ཚུལ་ཁ་འབྱེད་པར་བྱེད་པའོ། །དེ་ཉིད་ཤེས་རབ་ཀྱི་ཕ་རོལ་ཏུ་ཕྱིན་པར་བྱེད་པའི་ཆོས་སྟོན་པར་བྱེད་པས་ན་ཆོས་འབྱུང་ཞེས་བྱ་བའོ། །ལས་གང་དང་ལྡན་པ་ཡིན་ཞེན། ཆོས་ཐམས་ཅད་རྣམ་པར་སྦྱོང་བར་བྱེད་པའོ་ཞེས་བྱ་བ་ལ་ཆོས་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ཆོས་ཐམས་ཅད་དོ། །དེ་བཞིན་གཤེགས་པ་འོད་དཔག་ཏུ་མེད་པ་ལ་དམིགས་པའི་སེམས་དང་སེམས་ལས་བྱུང་བ་རྣམས་སོ། །དེ་དག་རྣམ་པར་སྤྱོད་བར་བྱེད་པ་ནི་དེ་རྟོགས་ཤིང་སྐྱེད་པར་བྱེད་པའོ། །འདིས་འདི་ལྟར་བཤད་པར་འགྱུར་ཏེ། མི་བསྐྱོད་པའི་ལས་ཀྱི་ཕྱག་རྒྱ་དེ་ཉིད་བཅིངས་ནས་ལག་པ་གཡས་པའི་མཛུབ་མོ་དང་མཐེ་བོང་ངག་གིས་གཡོན་པའི་ཁུ་ཚུར་པདྨ་ཁ་ཕྱེ་བའི་ཚུལ་དུ་མཐེའུ་ཆུང་ནས་བརྩམས་ཏེ་སོར་མོ་ཐམས་ཅད་ཁ་ཕྱེ་བར་བྱས་ཏེ་འདི་ནི་འོད་དཔག་ཏུ་མེད་པའི་ལས་ཀྱི་ཕྱག་རྒྱ་ཆོས་འབྱུང་བ་ཞེས་བྱ་བ་ཡིན་ནོ། །མི་བསྐྱོད་པའི་ལས་ཀྱི་ཕྱག་རྒྱ་དེ་ཉིད་བཅིངས་ནས་ལག་པ་གཡས་པས་བ་དན་གསུམ་བྱས་ལ་མི་འཇིགས་པ་སྦྱིན་པའི་ཚུལ་གྱིས་གཟུང་བར་བྱ་སྟེ་འདི་ནི་སློད་བར་བྱེད་པ་ཞེས་བྱ་བ་དོན་ཡོད་གྲུབ་པའི་ཕྱག་རྒྱ་ཡིན་ཏེ་སྒྲུབ་པ་པོ་ལ་གདོན་མི་ཟ་བར་དངོས་གྲུབ་སྩོལ་བ་ཡིན་ནོ། །རྣམ་པར་སྣད་མཛད་ལ་སོགས་པའི་ལས་ཀྱི་ཕྱག་རྒྱ་འདི་རྣམས་ལག་པ་གཡས་པས་རང་གི་ལུས་རྫོགས་པར་བྱེད་པ་ན་གཡས་པས་ལས་བྱེད་པ་ཡིན་ནོ། །གདོན་མི་
ཟ་བ་ནི་འབྲས་བུ་མེད་པ་མ་ཡིན་པའོ། །བཅིངས་པ་ཙམ་གྱིས་གྲུབ་པའོ། །ཞེས་བྱ་བ་ནི་ཕྱིར་མི་ལྡོག་པའི་ས་བོན་སྐྱེད་པར་བྱེད་པའི་ཕྱིར་རོ། །ལྷག་མ་ནི་ཇི་ལྟ་བ་བཞིན་དུ་བཟུང་བས་སོ་ཞེས་བྱ་བ་ལ་སོགས་པ་སེམས་མ་རྡོ་རྗེ་མ་ལ་སོགས་པ་ནས་རྡོ་རྗེ་དྲིལ་བུའི་མཐར་ཐུག་པའི་བར་དུ་ཇི་ལྟ་བ་བཞིན་དུ་རང་གི་ཕྱག་མཚན་གཟུང་བ་བཤད་པ་དེ་བཞིན་དུ་དེ་བཞིན་གཤེགས་པའི་ཁུ་ཚུར་གཉིས་ཀྱིས་ལས་ཀྱི་ཕྱག་རྒྱ་བཅིང་བར་བྱའོ། །འདི་ལྟར་འཆད་པར་འགྱུར་ཏེ། དེ་བཞིན་གཤེགས་པའི་ཁུ་ཚུར་གཉིས་ཀྱིས་སེམས་དཔའི་ལས་ཀྱི་ཕྱག་རྒྱ་བཅིང་བ་ནི་སེམས་མ་རྡོ་རྗེ་མའིའོ། །ནམ་མཁའི་སྙིང་པོའི་ལས་ཀྱི་ཕྱག་རྒྱ་བཅིང་པ་ནི་ཆོས་ཀྱི་རྡོ་རྗེ་མའིའོ། །སྣ་ཚོགས་རྡོ་རྗེ་ལས་ཀྱི་ཕྱག་རྒྱ་ནི་ལས་ཀྱི་རྡོ་རྗེ་མའི་ལས་ཀྱི་ཕྱག་རྒྱ་ཡིན་ནོ། །དེ་བཞིན་གཤེགས་པའི་ཁུ་ཚུར་གཉིས་བསྐོར་བས་སྙིང་གར་རྣམ་པར་འཕྲུལ་པ་བསྟན་པར་བྱ་སྟེ་སྒེག་མོའི་ཕྱག་རྒྱའོ། །དེ་བཞིན་གཤེགས་པའི་ཁུ་ཚུར་གཉིས་དགོད་པའི་ཚུལ་གྱི་ཁར་ཡོངས་སུ་བསྐོར་ནས་སྤྱི་བོར་གཟུང་བར་བྱ་སྟེ། འདི་ནི་བཞད་མའིའོ། །གཡོན་པའི་དེ་བཞིན་གཤེགས་པའི་ཁུ་ཚུར་གྱི་མཛུབ་མོ་རབ་ཏུ་བརྐྱང་ནས་བཀུག་སྟེ་དབྱུག་པའི་ཚུལ་དུ་གཟུང་བར་བྱས་ལ་གཡས་པའི་དེ་བཞིན་གཤེགས་པའི་ཁུ་ཚུར་གྱིས་མཛུབ་མོས་པི་ཝང་བརྡུང་བའི་ཚུལ་དུ་བྱས་ཏེ་འདི་ནི་གླུ་ཆེན་མོའིའོ། །དེ་བཞིན་གཤེགས་པའི་ཁུ་ཚུར་གཉིས་ཀྱིས་གར་བྱས་ལ་སྤྱི་བོར་མཉམ་པའི་ཐལ་མོ་བཅིང་བ་བྱ་སྟེ་འདི་ནི་གར་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ལ་མཛུབ་མོ་གཉིས་ཀྱིས་ལྕགས་ཀྱུ་གཉིས་བྱ་སྟེ་འདི་ནི་རྡོ་རྗེ་ལྕགས་ཀྱུ་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ཏེ་གཡས་པའི་མཛུབ་མོའི་ལྕགས་ཀྱུ་གཡོན་པའི་མཛུབ་མོ་བསྒྲེང་བས་གཟུང་བར་བྱ་སྟེ་འདི་ནི་རྡོ་རྗེ་ཞགས་པ་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་མཛུབ་མོ་དང་མཐེ་བོང་དག་གིས་མདུད་པ་བཅིང་པར་བྱ་སྟེ་འདི་ནི་རྡོ་རྗེ་ལྕགས་སྒྲོག་མའིའོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ནས་ཕན་ཚུན་དུ་ཡང་དག་པར་སྦྱར་བ་གཟུང་བར་བྱ་སྟེ་འདི་ནི་རྡོ་རྗེ་དྲིལ་བུའི་ལས་ཀྱི་ཕྱག་རྒྱའོ། །དེ་ནས་ལས་ཀྱི་ཕྱག་རྒྱ་ཞེས་བྱ་བ་ལ། དེ་ནས་ཀྱི་སྒྲ་ནི་
སྔ་མ་བཞིན་ནོ། །ནད་འཇིག་པ་ལ་སོགས་པའི་ལས་རྫོགས་པར་བྱེད་པའི་ཕྱག་རྒྱ་ནི་ལས་ཀྱི་ཕྱག་རྒྱའོ། །དེ་རྣམས་ཀྱི་མཚན་ཉིད་བཤད་པར་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་གྱིས་ནད་གཟིར་བ་ལ་སོགས་པ་གསུངས་ཏེ། དེ་བཞིན་གཤེགས་པའི་ཁུ་ཚུར་བཅིངས་གཡོན་པའི་རྡོ་རྗེ་སོར་མོ་བསྒྲེང་བ་གཡས་པས་གཟུང་བར་བྱ་སྟེ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ཀྱི་ཁུ་ཚུར་རོ། །འདིས་ནད་གཟིར་བར་བྱ་སྟེ་དེ་ལྟར་ན་ནད་ཐམས་ཅད་འཇིག་པར་འགྱུར་རོ། །དེ་ཉིད་བཅིངས་ནས་དེའི་རང་གི་མིག་ཡོངས་སུ་སྦྱང་བར་བྱ་སྟེ་དེ་ལྟར་ན་མྱ་ངན་འཇིག་པར་འགྱུར་རོ།། དེ་ཉིད་སྙིང་གར་གཞག་པར་བྱ་སྟེ་དེ་ལྟར་ན་ཡིད་མི་བདེ་བ་ཐམས་ཅད་འཇིག་པར་འགྱུར་ཏེ་དེ་ཉིད་ཀྱིས་བྱབ་པར་བྱ་སྟེ་དེ་ལྟར་ན་ནད་ཐམས་ཅད་འཇིག་པར་འགྱུར་རོ། །དེ་ཉིད་ཀྱི་ཁུ་ཚུར་གྱིས་བླངས་ཏེ་དུག་འཕྲོག་པར་བྱ་སྟེ་དེ་ལྟར་ན་དུག་ཐམས་ཅད་འཇིག་པའོ། །དེ་ཉིད་བཅིངས་ནས་བཟའ་བ་ལ་མངོན་པར་བསྔགས་ནས་བཟའ་བར་བྱ་སྟེ། དེ་ལྟར་ན་སྦྱར་བའི་དུག་འཇིག་པའོ། །དེ་ཉིད་བཅིངས་ནས་ཁྲོ་ཞིང་བྱུར་ལ་མངོན་པར་ཕྱོགས་གཏོར་བར་བྱ་སྟེ་དེ་ལྟར་ན་བྱུར་འཇིག་པར་བྱེད་པའོ། །དེ་ཉིད་ཀྱིས་ཕུར་བུ་བླངས་ནས་སྟོན་པར་བྱ་སྟེ། དེ་ལྟར་བྱད་འཇིག་པར་བྱེད་པའོ། །དེ་ཉིད་ཀྱིས་རྟིང་པ་ལ་རྡེག་པའི་ཚུལ་བྱ་སྟེ་དེ་ལྟར་རོ་ལངས་ཐམས་ཅད་འཇིག་པར་བྱེད་པའོ། །ཡི་གེ་ཨོཾ་བྲིས་ནས་ཕྱི་བར་བྱའོ་ཞེས་བྱ་བ་ལ་དེ་ཉིད་ཨོཾ་བྲིས་ནས་ཕྱི་བར་བྱ་སྟེ། དེ་ལྟར་ན་སྔགས་ཐམས་ཅད་འཇིག་པའོ། །སོང་མོ་རྣམས་ཀྱིས་གཟུང་བར་བྱ་སྟེ་དེ་ལྟར་ན་སྨན་ཐམས་ཅད་འཇིག་པའོ། །ཡེ་གེ་ཧཱུཾ་དང་བཅས་པས་བརྡེག་པར་བྱའོ་ཞེས་བྱ་བ་དེ་ཉིད་བཅིངས་ནས། ཨོཾ་བྷུ་ཁཾ་ཞེས་བྱ་བའི་ཡི་གེ་ཧཱུཾ་དང་བཅས་པའི་སྙིང་པོ་བཟླ་ཞིང་བགེགས་ལ་བརྡེག་པར་བྱ་སྟེ་དེ་ལྟར་ན་བགེགས་ཐམས་ཅད་འཇིག་པའོ། །ལོག་འདྲེན་ལ་བརྡེག་པར་བྱའོ་ཞེས་བྱ་བ་ལ་དེ་ཉིད་ཁྲོ་བ་དང་བཅས་པས་ལོག་འདྲེན་ལ་བརྡེག་པར་བྱ་སྟེ་དེ་ལྟར་ན་ལོག་འདྲེན་ཐམས་ཅད་འཇིག་པར་བྱེད་པ་ཡིན་ནོ། །མཚོན་ཆ་བྲིས་ནས་ཕྱི་བར་བྱའོ་ཞེས་བྱ་བ་ལ་དེ་ཉིད་ཀྱིས་རལ་གྲི་བྲིས་ནས་ཕྱི་བར་བྱ་སྟེ། དེ་ལྟར་ན་སྡིག་པ་ཐམས་ཅད་འཇིག་པའོ། །ཀུན་དུ་སྦྱིན་སྲེག་བྱའོ་ཞེས་བྱ་བ་ལ་དེ་ཉིད་ཀྱིས་སྦྱིན་སྲེག་གི་ཚུལ་བྱས་ཏེ། དེ་ལྟར་ན་རྨི་
ལམ་ངན་པ་ཐམས་ཅད་འཇིག་པའོ། །དཱུར་བའི་སྦྱིན་སྲེག་བྱའོ་ཞེས་བྱ་བ་ལ་དེ་ཉིད་ཀྱི་སྤྱིན་སྲེག་གི་ཆོགས་དཱུར་བའི་སྦྱིན་སྲེག་བྱ་སྟེ། དེ་ལྟར་ན་དུས་མ་ཡིན་པའི་འཆི་བའི་འཇིགས་པ་མེད་དོ། །སྤྱི་བོར་བཞག་ནས་བལྟ་བར་བྱབ་པར་བྱའོ་ཞེས་བྱ་བ་ལ་དེ་བཅིངས་ནས་ནད་མེད་པའི་སྤྱི་བོར་བཞག་ལ་བྱབ་པར་བྱ་སྟེ་དེ་ལྟར་ན་རིམས་ཐམས་ཅད་འཇིག་པར་འགྱུར་རོ། །སྐྲ་ནས་བཟུང་ཞིང་བསྐྱོད་པར་བྱའོ་ཞེས་བྱ་བ་ལ་དེ་ཉིད་ཀྱིས་ནད་པའི་སྐྲ་ལ་བཟུང་ཞིང་བསྐྱོད་པར་བྱ་སྟེ། དེ་ལྟར་ན་གདོན་འཇིག་པར་འགྱུར་རོ། །སྟེང་དུ་ཁ་ཊྭཱཾ་ག་གཟུང་བའོ་ཞེས་བྱ་བ་ལ་དེ་ཉིད་བཅིངས་ནས་སྟེང་དུ་ཁ་ཊྭཱཾ་ག་འཛིན་པའི་ཚུལ་དུ་གཟུང་བར་བྱ་སྟེ་དེ་ལྟར་ན་མཁའ་འགྲོ་མ་ཐམས་ཅད་འཇིག་པར་འགྱུར་རོ། །རང་གི་ཁྱིམ་དུ་བསྐོར་བར་བྱའོ་ཞེས་བྱ་བ་ལ་དེ་ཉིད་བཅིངས་ནས་རང་གི་ཁྱིམ་དུ་བསྐོར་བར་བྱ་སྟེ་དེ་ལྟར་ན་ཐམས་ཅད་འཇིག་པར་འགྱུར་རོ། །རང་གི་ཁྱིམ་དུ་གཞག་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་རང་གི་ཁྱིམ་དུ་རྡོ་རྗེའི་རིགས་དགོད་པའི་ཚུལ་གྱིས་གཞག་པར་བྱ་སྟེ་དེ་ལྟར་ན་ཉེ་བར་འཚེ་བ་ཐམས་ཅད་འཇིག་པར་འགྱུར་རོ། །འཇུག་པ་ཞེས་བྱ་བ་ནི་རེ་ཉིད་བཅིངས་ནས་ཁྱིམ་དུ་ཞུགས་ན་ལྟས་ངན་པ་ཐམས་ཅད་འཇིག་པར་འགྱུར་རོ། །སྙིང་ག་ལ་གདོན་པར་བྱའོ་ཞེས་བྱ་བ་ལ་དེ་ཉིད་ལ་བཅིང་ནས་སྙིང་གའི་ཕྱོགས་ནས་གདོན་པར་བྱ་སྟེ། དེ་ལྟར་ན་གདོན་ཐམས་ཅད་འཇིག་པར་འགྱུར་རོ། །ལུས་ལ་བསྐོར་བར་བྱའོ་ཞེས་བྱ་བ་ལ་དེ་ཉིད་བཅིངས་ནས་ལུས་ལ་བསྐོར་བར་བྱ་སྟེ་དེ་ལྟར་ན་ལུས་ཀྱི་སྡུག་བསྔལ་ཐམས་ཅད་འཇིག་པར་འགྱུར་རོ། །དག་འབྱིན་པའོ་ཞེས་བྱ་བ་ལ་དེ་ཉིད་ཀྱིས་སྔགས་འབྱིན་པའི་ཚུལ་བྱ་སྟེ་དེ་ལྟར་ན་ངག་གི་སྡུག་བསྔལ་ཐམས་ཅད་འཇིག་པར་འགྱུར་རོ། །སྙིང་གར་བཙིར་བར་བྱའོ་ཞེས་བྱ་བ་ལ་དེ་ཉིད་བཅིངས་ནས་སྙིང་གའི་ཕྱོགས་སུ་བཙིར་བར་བྱ་སྟེ་དེ་ལྟར་ན་སེམས་ཀྱི་སྡུག་བསྔལ་ཐམས་ཅད་འཇིག་པར་འགྱུར་རོ། །དེ་ལྟར་བཅོམ་ལྡན་འདས་རྣམ་པར་སྣང་མཛད་ཀྱི་ཕྱག་རྒྱས་ལས་སྦྲུབ་པ་བསྟན་ནས་ད་ནི་དེ་ཉིད་དམ་ཚིག་གི་ཕྱག་རྒྱས་ལས་སྒྲུབ་པ་བཤད་པར་བྱ་བའི་ཕྱིར་དེ་བཞིན་གཤེགས་པའི་ཕྱག་རྒྱ་ཆེན་པོའོ་ཞེས་བྱ་བ་གསུངས་ཏེ། འདིར་བཅོམ་ལྡན་འདས་རྣམ་པར་སྣང་མཛད་ནི་དེ་བཞིན་གཤེགས་
པ་སྟེ། དེའི་ཕྱག་རྒྱ་ཆེན་པོ་ནི་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་ཅེས་བྱ་བ་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་བཅོམ་ལྡན་འདས་ཀྱི་དམ་ཚིག་གི་ཕྱག་རྒྱའོ། །དེ་བཅིངས་ནས་རང་གི་སྙིང་གར་བརྟན་པར་བྱ་སྟེ་དེ་ལྟར་ན་ཚེ་རིང་པོར་འཕེལ་བར་འགྱུར་རོ། དབང་པོ་ལ་གཞག་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་དབང་པོ་ཐམས་ཅད་ལ་གཞག་པར་བྱ་སྟེ་དེ་ལྟར་ན་ཚོད་ཆེན་པོ་འཕེལ་བར་འགྱུར་རོ། །ཁ་ལ་ཞེས་བྱ་བ་ནི་དེ་ཉིད་བཅིངས་ནས་རང་གི་སྙིང་གར་གཟུང་བར་བྱ་སྟེ་དེ་ལྟར་ན་གཟུགས་ཆེན་པོ་འཕེལ་བར་འགྱུར་རོ། །དེ་ཉིད་ལ་བསྐོར་བར་བྱའོ་ཞེས་བྱ་བ་ལ་དེ་བཅིངས་ནས་རང་གི་སྙིང་གར་བསྐོར་བར་བྱ་སྟེ་དེ་ལྟར་ན་ཁ་དོག་ཆེན་པོ་འཕེལ་བར་འགྱུར་རོ། །དཔྲལ་བར་གཞག་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་དཔྲལ་བར་གཟུང་བར་བྱ་སྟེ་དེ་ལྟར་ན་གཟི་བརྗིད་ཆེན་པོ་འཕེལ་བར་འགྱུར་རོ། །སྙིང་གར་ཞེས་བྱ་བ་ལ་དེ་ཉིད་བཅིངས་ནས་སྙིང་གར་གཟུང་བར་བྱ་སྟེ་དེ་ལྟར་ན་གཟི་བརྗིད་མངོན་པར་འཕེལ་བར་འགྱུར་རོ། །དཔུང་པ་གཉིས་ལ་ཞེས་བྱ་བ་ནི་དེ་ཉིད་དཔུང་པ་གཉིས་ལ་གཟུང་བར་བྱ་སྟེ་དེ་ལྟར་ན་སྟོབས་འཕེལ་བར་འགྱུར་རོ། །བརླ་གཉིས་ལ་ཞེས་བྱ་བ་ནི་དེ་ཉིད་བརླ་གཉིས་སུ་གཟུང་བར་བྱ་སྟེ་དེ་ལྟར་ན་སྤྲོ་བ་འཕེལ་བར་འགྱུར་རོ། །ཕྲེང་བ་འཆིང་བ་ཞེས་བྱ་བ་ནི་དེ་ཉིད་ཀྱིས་ཕྲེང་བ་འཆིང་བའི་ཚུལ་བྱ་སྟེ་དེ་ལྟར་ན་བརྩོན་འགྲུས་འཕེལ་བར་འགྱུར་རོ། །དབང་པོ་རྣམས་ལ་ཞེས་བྱ་བ་ནི་དེ་ཉིད་མིག་དང་རྣ་བ་དང་སྣ་དང་ལྕེ་དང་ལུས་ཀྱི་དབང་པོ་རྣམས་ལ་གཟུང་བར་བྱ་སྟེ་དེ་ལྟར་ན་དཔལ་ཆེན་པོ་འཕེལ་བར་འགྱུར་རོ། །སྤྱི་བོ་ལ་ཞེས་བྱ་བ་ནི་དེ་ཉིད་སྤྱི་བོར་གཟུང་བར་བྱ་སྟེ། དེ་ལྟར་ན་དཔལ་དང་སྐལ་པ་བཟང་པོ་འཕེལ་བར་འགྱུར་རོ། །ཁ་ལ་ཞེས་བྱ་བ་ནི་དེ་ཉིད་ཁར་གཟུང་བར་བྱ་སྟེ་དེ་ལྟར་ན་བསོད་ནམས་འཕེལ་བར་འགྱུར་རོ། །ཁ་ལས་བཏོན་ནས་ཞེས་བྱ་བ་ལ་དེ་ཉིད་ཁའི་ཕྱོགས་ལས་གྱེན་དུ་དྲང་བར་བྱ་སྟེ་དེ་ལྟར་ན་མིང་འཕེལ་བར་འགྱུར་རོ། །ཐམས་ཅད་དུ་བསྐོར་བར་བྱའོ་ཞེས་བྱ་བ་ནི་དེ་ཉིད་ཕྱོགས་བཅུར་བསྐོར་བར་བྱ་སྟེ་དེ་ལྟར་ན་སྙན་པའི་སྒྲ་འཕེལ་བར་འགྱུར་རོ། །ཕྱོགས་སུ་བསྐོར་བར་བྱའོ་ཞེས་བྱ་བ་ལ་དེ་ཉིད་གྲགས་པ་འཕེལ་བའི་བསམ་པས་ཕྱོགས་བཅུར་བསྐོར་བ་བྱ་སྟེ་དེ་ལྟར་ན་གྲགས་པ་འཕེལ་བར་འགྱུར་རོ། །
རང་དང་གཞན་དག་དེ་བཞིན་གཤེགས་པ་རྗེས་སུ་དྲན་པའོ་ཞེས་བྱ་བ་ལ་དེ་ཉིད་བཅིངས་ནས་སངས་རྒྱས་ཀྱི་གཟུགས་སུ་བདག་ཉིད་དམ་མདུན་དུ་བསྒོམ་པར་བྱ་སྟེ་དེ་ལྟར་ན་དྲན་པ་འཕེལ་བར་འགྱུར་རོ། །སྙིང་ག་ལས་གདོན་པའོ་ཞེས་བྱ་བ་ལ་དེ་ཉིད་བཅིངས་ནས་སྙིང་ག་ལས་སྟེང་དུ་དྲང་བར་བྱའོ། །དེ་ལྟར་ན་བློ་གྲོས་འཕེལ་བར་འགྱུར་རོ། །སྙིང་གར་བཞག་ནས་དགའ་བ་བསྐྱེད་པར་བྱའོ་ཞེས་བྱ་བ་ལ་དེ་ཉིད་སྙིང་གའི་ཕྱོགས་སུ་བཟུང་ཞིང་དགའ་བ་མངོན་དུ་བྱ་བ་སྟེ། དེ་ལྟར་ན་བརྟན་པ་འཕེལ་བར་འགྱུར་རོ། །སངས་རྒྱས་ཉིད་བསྐྱེད་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་བདག་ཉིད་སངས་རྒྱས་ཀྱི་གཟུགས་སུ་བསྒོམ་པར་བྱ་སྟེ་དེ་ལྟར་ན་དེ་བཞིན་གཤེགས་པ་འཕེལ་བར་འགྱུར་རོ། །སངས་རྒྱས་ཐམས་ཅད་བདག་ཉིད་བསྒོམ་པའོ་ཞེས་བྱ་བ་ལ་དེ་ཉིད་བཅིངས་ནས་ཆོས་ཀྱི་འཁོར་ལོ་ལས་བསྟན་པའི་ཏིང་ངེ་འཛིན་ལ་སྙོམས་པར་ཞུགས་པའི་སངས་རྒྱས་ཀྱི་ངོ་བོར་བདག་ཉིད་བསྒོམ་པར་བྱ་སྟེ་དེ་ལྟར་ན་ཏིང་ངེ་འཛིན་འཕེལ་བར་འགྱུར་རོ། །ཕུང་པོ་ལྔ་ལ་གཞག་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པའི་ཕུང་པོ་རྣམས་ལ་རྣམ་པར་སྣང་མཛད་ལ་སོགས་པ་རྣམས་དེ་བཞིན་གཤེགས་པའི་སྒོམ་པས་གཟུང་བར་བྱ་སྟེ་དེ་ལྟར་ན་ཆོ་ག་འཕེལ་བར་འགྱུར་རོ། །རྫ་མཁན་གྱི་འཁོར་ལོ་ལྟར་བསྐོར་བར་བྱའོ་ཞེས་བྱ་བ་ལ་དེ་ཉིད་རྫ་མཁན་གྱི་འཁོར་ལོའི་ཚུལ་གྱིས་བསྐོར་བར་བྱ་སྟེ་དེ་ལྟར་ན་འདུ་བྱེད་འཕེལ་བར་འགྱུར་རོ། །ལུས་དྲན་པའོ་ཞེས་བྱ་བ་ལ་དེ་ཉིད་བཅིངས་ནས་བདག་ཉིད་རྣམ་པར་སྣང་མཛད་ཀྱི་སྐུར་བསྒོམ་པར་བྱ་སྟེ་དེ་ལྟར་ན་ལུས་འཕེལ་བར་འགྱུར་རོ། །ལྕེ་ལ་གཞག་པར་བྱ་སྟེ་ཞེས་བྱ་བ་ནི་དེ་ཉིད་ལྕེར་གཞག་པར་བྱ་སྟེ་དེ་ལྟར་ན་ངག་འཕེལ་བར་འགྱུར་རོ། །ཡིད་ཀྱིས་མངོན་པར་འདུད་པར་བྱའོ་ཞེས་བྱ་བ་ལ་དེ་ཉིད་བཅིངས་ནས་སེམས་ཀྱིས་དེ་བཞིན་གཤེགས་པ་ཐམས་ཅད་ལ་ཕྱག་བྱ་སྟེ། དེ་ལྟར་ན་ཡིད་འཕེལ་བར་འགྱུར་རོ། །གཏོང་བ་རྗེས་སུ་དྲན་པའོ་ཞེས་བྱ་བ་ལ་དེ་བཞིན་གཤེགས་པའི་སྐུ་མཆོག་དེ་ཉིད་བཅིངས་ནས་གཏོང་བ་རྗེས་སུ་དྲན་པ་བསྒོམ་པར་བྱ་སྟེ། དེ་ལྟར་ན་སྦྱིན་པའི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །ཚུལ་ཁྲིམས་ཞེས་བྱ་བ་ནི་དེ་ཉིད་བཅིངས་ནས་
ཚུལ་ཁྲིམས་རྗེས་སུ་དྲན་པར་བསྒོམ་པར་བྱ་སྟེ་དེ་ལྟར་ན་ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །བྱམས་པ་ཞེས་བྱ་བ་ལ་དེ་ཉིད་བཅིངས་ནས་བྱམས་པ་བསྒོམ་པར་བྱ་སྟེ་དེ་ལྟར་ན་བཟོད་པའི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །བརྩོན་འགྲུས་ཞེས་བྱ་བ་ནི་དེ་ཉིད་བཅིངས་ནས་བརྩོན་འགྲུས་བརྩམ་པར་བྱ་སྟེ་དེ་ལྟར་ན་བརྩོན་འགྲུས་ཀྱི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །ཏིང་ངེ་འཛིན་ཞེས་བྱ་བ་ནི་དེ་ཉིད་བཅིངས་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ་དེ་ལྟར་ན་ཡེ་ཤེས་ཀྱི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །སྟོབས་ཞེས་བྱ་བ་ལ་དེ་ཉིད་བཅིངས་ནས་སྟོབས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ། དེ་ལྟར་ན་སྟོབས་ཀྱི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །ཐབས་ཞེས་བྱ་བ་ནི་དེ་ཉིད་བཅིངས་ནས་ཐབས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ། དེ་ལྟར་ན་ཐབས་ཀྱི་ཕ་རོལ་ཏུ་ཕྱིན་པ་འགྲུབ་པར་འགྱུར་རོ། །རྡོ་རྗེ་ཞེས་བྱ་བ་ནི་དེ་ཉིད་བཅིངས་ནས་མདུན་དུ་རྡོ་རྗེ་བསྒོམ་པར་བྱ་སྟེ་དེ་ལྟར་ན་རྡོ་རྗེ་འགྲུབ་པར་འགྱུར་རོ། །ངེས་པར་བརྗོད་པར་བྱ་བ་ནི་དེ་ཉིད་བཅིངས་ནས་རྡོ་རྗེ་དབྱིངས་ཀྱི་དབང་ཕྱུག་མ་ལ་སོགས་པའི་གཟུངས་ངེས་པར་མངོན་དུ་བརྗོད་པའི་སྒོམ་པས་བསྒོམས་ན་དེ་ངེས་པར་བརྗོད་པ་འགྲུབ་པར་འགྱུར་རོ། །གཟུངས་ཞེས་བྱ་བ་ནི་དེ་ཉིད་ངེས་པར་བཅིངས་ནས། དྲན་པ་དང་ཤེས་རབ་ཡང་དག་པར་ལྡན་པའི་དེ་བཞིན་གཤེགས་པའི་ཐུགས་བསྒོམས་པས་གཟུངས་འགྲུབ་པར་འགྱུར་རོ། །ས་ཞེས་བྱ་བ་ནི་དེ་ཉིད་བཅིངས་ནས་སངས་རྒྱས་ཀྱིས་བསྒོམས་ན་དེ་ཉིད་འགྲུབ་བོ། །སྤྱོད་པ་ཞེས་བྱ་བ་ནི་དེ་ཉིད་བཅིངས་ནས་ཕ་རོལ་ཏུ་ཕྱིན་པ་བཅུའི་སྤྱོད་པ་བསྒོམས་པས་ཕ་རོལ་ཏུ་ཕྱིན་པ་བཅུའི་སྤྱོད་པ་འགྲུབ་པའོ། །སོ་སོ་ཡང་དག་པར་རིག་པ་བཞི་གྲུབ་པ་ཐོབ་པའོ། །མ་འདྲེས་པ་ཞེས་བྱ་བ་ནི་དེ་ཉིད་བཅིངས་ནས་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་བསྒོམས་པས་དེ་ཁོ་ན་ཉིད་འགྲུབ་པར་འགྱུར་རོ། །ཆོས་ཞེས་བྱ་བ་ནི་དེ་ཉིད་བཅིངས་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་ཆོས་བསྒོམས་པས་བྱང་ཆུབ་སེམས་དཔའ་རྡོ་རྗེ་ཆོས་འགྲུབ་པར་འགྱུར་རོ། །ལས་ཞེས་བྱ་བ་དེ་ཉིད་བཅིངས་ནས་བྱང་ཆུབ་སེམས་དཔའ་རྡོ་རྗེ་ལས་བསྒོམས་པས་དེ་འགྲུབ་པའོ། །སྣ་ཚོགས་ལུས་ཞེས་བྱ་བ་ནི་དེ་ཉིད་བཅིངས་ནས་གཟུགས་ཐམས་ཅད་
སྟོན་པའི་ཏིང་ངེ་འཛིན་བསྒོམས་ན་དེ་འགྲུབ་པ་ཡིན་ནོ། །སེམས་ཅན་གྱི་དོན་ཞེས་བྱ་བ་ལ་དེ་ཉིད་བཅིངས་ནས་སེམས་ཅན་གྱི་དོན་བསྒོམས་པས་དེ་འགྲུབ་པ་ཡིན་ནོ། །སངས་རྒྱས་ཀྱི་དོན་ཞེས་བྱ་བ་ལ་དེ་ཉིད་བཅིངས་ནས་སངས་རྒྱས་ཀྱི་དོན་བསྒོམས་པས་དེ་འགྲུབ་པ་ཡིན་ནོ། །ལུས་ཞེས་བྱ་བ་ལ་དེ་ཉིད་བཅིངས་ནས་རྣམ་པར་སྣང་མཛད་ཀྱི་སྐུ་བསྒོམས་ནས་ལུས་འགྲུབ་པའོ། །ངག་ཅེས་བྱ་བ་དེ་ཉིད་བཅིངས་ནས་སྔ་མ་བཞིན་དུ་བསྒོམ་པར་བྱ་སྟེ་དེ་ལྟར་ན་ངག་འགྲུབ་པའོ། །ཡིད་ཅེས་བྱ་བ་ནི་དེ་ཉིད་བཅིངས་ནས་རྡོ་རྗེ་དམ་པ་དེ་ཉིད་དུ་བསྒོམ་པར་བྱ་སྟེ་དེ་ལྟར་ན་ཡིད་འགྲུབ་པའོ། །རྡོ་རྗེ་ཆེན་པོ་ཞེས་བྱ་བ་ནི་དེ་ཉིད་བཅིངས་ནས་བདག་ཉིད་དེ་བཞིན་གཤེགས་པའི་རྡོ་རྗེར་བསྒོམ་པར་བྱ་སྟེ་དེ་ལྟར་ན་རྡོ་རྗེ་ཆེན་པོ་གྲུབ་པར་འགྱུར་རོ། །སླར་ཡང་དེ་ཉིད་བཅིངས་ནས། ཨོཾ་བོ་དྷི་ཙིཏྟ་བཛྲ་ཞེས་བྱ་བ་ལ་སོགས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོ་ཉི་ཤུ་རྩ་ལྔ་སྔ་མ་བཞིན་བསྒོམ་པར་བྱའོ།། དེ་བཞིན་གཤེགས་པའི་རིགས་འདིར་ཆོས་ཀྱི་ངག་གི་བཟླ་བར་བྱ་བ་ཡིན་ནོ་ཞེས་རབ་ཏུ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ལ་བཟླས་པ་ནི་དེ་བཞིན་གཤེགས་པ་རྗེས་སུ་དྲན་པས་སོ་ཞེས་བྱ་བ་ལ་ཨོཾ་སརྦ་ཏ་ཐཱ་ག་ཏ་ཞེས་བྱ་བ་ལ་དེ་ཉིད་བཅིངས་ལ་རྡོ་རྗེ་སེམས་དཔའི་བཟླས་པས་དེ་བཞིན་གཤེགས་པར་བདག་ཉིད་དམ་མདུན་དུ་བསྒོམ་པར་བྱ་ཞིང་བཟླས་པར་བྱའོ། །སྒྲུབ་པ་དེ་བཞིན་ནོ་ཞེས་བྱ་བ་ལ་དེ་བཞིན་གཤེགས་པ་ཟློས་པ་པོས་བུམ་པ་བཟང་པོ་ལ་སོགས་པའི་སྒྲུབ་པ་ནི་དེ་བཞིན་གཤེགས་པའི་རང་བཞིན་དུ་བསྒོམ་པར་བྱ་བ་ཡིན་ནོ། །ལས་ལ་ཉེ་བར་སྦྱོར་བ་ནི་དེ་བཞིན་གཤེགས་པ་ཐམས་ཅད་རྗེས་སུ་དྲན་པས་སོ་ཞེས་བྱ་བ་ནི་ལས་བརྒྱ་སྒྲུབ་པ་དེ་བཞིན་གཤེགས་པའི་བདག་ཉིད་དུ་རྣམ་པར་བསམ་པར་བྱ་བ་ཡིན་ནོ། །དེ་བཞིན་གཤེགས་པ་ཐམས་ཅད་ཀྱི་ཕྱག་རྒྱ་བཅིངས་ལ་ཞེས་བྱ་བ་ནི་འདས་མ་ཐག་ཏུ་བཤད་པའི་ཕྱག་རྒྱ་བཅིངས་པ་གང་ཡིན་པ་དེ་ནི་དེ་བཞིན་གཤེགས་པ་ཐམས་ཅད་ཀྱི་ཡིན་གྱི་གཞན་གྱིས་ནི་མ་ཡིན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དེ་བཞིན་གཤེགས་པའི་རིགས་ཀྱི་ཕྱག་རྒྱའི་རྟོག་པའི་བཤད་པ་རྫོགས་སོ།། །།
དེ་ལྟར་དེ་བཞིན་གཤེགས་པའི་ཕྱག་རྒྱའི་རྟོག་པ་བསྟན་ནས་ད་ནི་རྡོ་རྗེ་རིགས་ཀྱི་ཕྱག་རྒྱའི་རྟོག་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱ་བཅིངས་པ་ཞེས་བྱ་བ་ནི་ཕྱག་རྒྱ་བཅིང་བའི་མཚན་ཉིད་ཡིན་ནོ། །དེ་ལ་ཕྱག་རྒྱ་ཆེན་པོ་ནི་བདག་ཉིད་ཐམས་ཅད་རྡོ་རྗེ་ལས་སོ་ཞེས་བྱ་བ་ལ་སྔར་བཤད་པའི་ཚུལ་གྱིས་དམ་ཚིག་སེམས་དཔའ་བྱིན་གྱིས་བརླབ་པའི་ཆོག་རྗེས་སུ་སྤྱད་ལ། སྐུ་གསུང་ཐུགས་རྡོ་རྗེ་ཉི་མ་མེ་ལྟར་འབར་བ་ལ་སོགས་པ་རང་ཉིད་དུ་འགྱུར་རོ་ཞེས་བྱ་བ་འདི་དག་ཉིད་ཐམས་ཅད་ཀྱི་རྡོ་རྗེའོ། །བདག་ཉིད་ཐམས་ཅད་ཀྱི་རྡོ་རྗེ་དེ་ལས་ཕྱག་རྒྱ་ཆེན་པོ་བཅིངས་ནས་བྱའོ། །ཕྱག་རྒྱ་ཆེན་པོ་རྣམས་མཚན་ཉིད་དེ་ཡང་བྲི་བའི་ཕྱོགས་བསྟན་པ་ཡིན་ཏེ་དེ་ཉིད་ལས་ཤེས་པར་བྱའོ། །དམ་ཚིག་གཟུང་བའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །དེ་རྣམས་ཀྱི་རྒྱུད་ནི་འདི་ཡིན་ཏེ་རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ། རྡོ་རྗེ་བསྡམས་པ་ནང་དུ་བཅིངས་ནས་གྱེན་དུ་ཁ་བལྟ་བར་བྱས་ཏེ་མཐེའུ་ཆུང་དང་སྲིན་ལག་དང་གུང་མོ་དང་མཛུབ་མོའི་སོར་མོ་བརྒྱད་ཅུང་ཟད་ཟུར་དུ་ཁ་ལྟ་བར་བཞག་པ་རྣམས་ཀྱིས་འབར་བའི་དཀྱིལ་འཁོར་བྱ་སྟེ་གུང་མོ་དང་སྲིན་ལག་དག་གི་ནང་དུ་མཐེ་བོང་གཉིས་ཡང་དག་པར་བཞག་སྟེ་རྩེ་མོ་སྟེང་དུ་ཁ་བལྟ་བར་བྱས་ནས་གཟུང་བར་བྱ་སྟེ་འདི་ནི་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་དམ་ཚིག་གི་ཕྱག་རྒྱ་ཡིན་ནོ། །དེ་ཉིད་ཀྱི་འབྲས་བུ་བསྟན་པར་བྱ་བའི་ཕྱིར་ཁམས་གསུམ་པ་ཐམས་ཅད་ཅེས་བྱ་བ་ལ་སོགས་པ་གསུངས་སོ། །དེ་ཉིད་ཀྱིས་ཞེས་བྱ་བ་ལ་སོགས་པ་ལ་རྡོ་རྗེ་ཉི་མ་མེ་ལྟར་འབར་བའི་དམ་ཚིག་གི་ཕྱག་རྒྱ་དེ་ཉིད་ཀྱིས་གཡོན་པའི་མཛུབ་མོ་བསྒྲེང་བས་སྡིགས་མཛུབ་བྱེད་ཅིང་གཡས་པའི་མཛུབ་མོ་བཀུག་ལ་ལྕགས་ཀྱུའི་རྣམ་པ་ཅན་གྱི་དཀྱིལ་འཁོར་རམ་རང་གི་ལུས་ལ་གཞན་དུ་སྤྱན་འདྲེན་པའི་སྔགས་ཀྱིས་བཅོམ་ལྡན་འདས་འཁོར་དང་བཅས་པ་དགུག་པར་བྱ་སྟེ་དེ་ལྟར་ན་ཐམས་ཅད་བཀུག་པར་འགྱུར་རོ། །རྡོ་རྗེ་ཧཱུཾ་མཛད་ཀྱི་ཕྱག་རྒྱ་ཞེས་བྱ་བ་ལ་སོགས་པ་ལ། རྡོ་རྗེ་ཁུ་ཚུར་གཉིས་བཅིངས་ནས་གཡོན་པའི་ཁུ་ཚུར་གྱིས་ནོར་བུ་འཆིང་བའི་སྟེང་དུ་གཡས་པའི་ཁུ་ཚུར་གྱི་ནོར་བུ་བཅིངས་པ་བཞག་སྟེ་མཐེའུ་ཆུང་གཉིས་
ཀྱི་ལྕགས་ཀྱུ་ཕན་ཚུན་དུ་བཅིང་བར་བྱས་ལ་མཛུབ་མོ་གཉིས་བསྒྲེང་བས་སྡིགས་མཛུབ་བྱེད་ཅིང་སྙིང་གའི་ཕྱོགས་སུ་སོ་སོར་གཟུང་བར་བྱ་སྟེ་འདི་ནི་རྡོ་རྗེ་ཧཱུཾ་མཛད་ཅེས་བྱ་བ་བཅོམ་ལྡན་འདས་ཀྱི་ལས་ཐམས་ཅད་ཀྱི་ཕྱག་རྒྱ་ཡིན་ནོ། །འདིས་དཀྱིལ་འཁོར་དུ་ཞུགས་ནས་ཡི་གེ་ཧཱུཾ་བརྗོད་ཅིང་བཅོམ་ལྡན་འདས་ལ་སྡིགས་མཛུབ་བྱས་ན་ལས་ཐམས་ཅད་དང་དངོས་གྲུབ་ཐམས་ཅད་ཉམས་སུ་མྱོང་བ་ཡིན་ནོ། །ཡང་བསྒྲུབ་བྱའི་དངོས་པོ་གཞན་ལ་སྡིགས་མཛུབ་བྱ་སྟེ་དེ་ལྟར་ན་ཡང་ཇི་ལྟར་འདོད་པའི་དངོས་གྲུབ་སྒྲུབ་པར་འགྱུར་རོ། །རྡོ་རྗེ་ཐལ་མོ་ཞེས་བྱ་བ་ལ་སོགས་པ་ལ་རྡོ་རྗེ་ཐལ་མོ་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ལ་དེ་ཉིད་ཐུར་དུ་ཁ་བསྟན་པ་དཔྲལ་བའི་ཕྱོགས་སུ་གཟུང་བར་བྱ་སྟེ། སོར་མོ་ལྷག་མ་རྣམས་ཀྱིས་མེ་ཏོག་གཏོར་བའི་ཚུལ་བྱ་སྟེ་འདི་ནི་ཡི་གེ་ཧོའི་རང་བཞིན་གྱིས་ཉེ་བའི་སྙིང་པོའི་ཕྱག་རྒྱ་རྡོ་རྗེ་ཁྲོ་གཉེར་ཞེས་བྱ་བའི་མིང་ཅན་ནོ། །ཐམས་ཅད་སྲེག་པར་བྱེད་པའོ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེ་ཐལ་མོ་ལེགས་པར་བསྐོར་བས་གཡོན་པའི་མཛུབ་མོའི་ལྕགས་ཀྱུའོ་ཞེས་པ་ལ་རང་གི་སྙིང་གའི་ཕྱོགས་སུ་རྡོ་རྗེ་ཐལ་མོ་བཅིངས་ནས་གཡོན་དུ་བསྐོར་བར་བྱས་ནས་གཡོན་པའི་མཛུབ་མོ་ལྕགས་ཀྱུའི་རྣམ་པ་ཅན་གང་ཡིན་པ་དེ་ནི་རྡོ་རྗེ་མཚོན་ཆ་འཛིན་པའི་དམ་ཚིག་གི་ཕྱག་རྒྱ་སྟེ། དགུག་པ་དང་གཞུག་པ་སྒྲུབ་པ་ཐམས་ཅད་ལ་དོན་ཡོད་པའོ། །རྡོ་རྗེ་པདྨ་དབུས་མ་མཉམ་པའི་ཁ་འབུས་ཀྱི་མཛོད་དོ་ཞེས་བྱ་བ་ལ་རྡོ་རྗེ་ཐལ་མོ་འོག་ཏུ་རབ་ཏུ་བརྐྱང་བའི་མཐེ་བོང་དང་མཛུབ་མོའི་རྩེ་མོ་མཉམ་པར་སྦྱར་བ་སྙིང་ག་ལ་བསྟོད་ནས་དབང་བསྐུར་བའི་གནས་སུ་རྩེ་མོ་རབ་ཏུ་བཞག་པ་ནི་རྡོ་རྗེ་རིན་ཆེན་ནོ། །དེའི་སྟེང་དུ་ལྟ་བའི་མཛུབ་མོ་གཉིས་སྤྱི་བོར་བཞག་པ་རྡོ་རྗེ་པདྨ་ཞེས་བྱ་བ་སྟེ་དེ་བཞིན་གཤེགས་པའི་རྡོ་རྗེའི་རྟོག་པ་ལས་རྡོ་རྗེ་པདྨའི་མཚན་ཉིད་བཤད་པ་ཡིན་ནོ། །དེ་བཅིངས་ནས་སོར་མོ་དབུས་མ་གཉིས་ཀྱི་རྩེ་མོའི་ཚིགས་གསུམ་པ་བཅག་པ་རལ་གྲིའི་ཚུལ་དུ་གཟུང་བར་བྱ་བ་འདི་ནི་མཛོད་འཛིན་མའི་དམ་ཚིག་གི་ཕྱག་རྒྱ་སྟེ་ཐམས་ཅད་གཅོད་པར་བྱེད་པའོ། །རྡོ་རྗེ་བསྡམས་པ་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་བཅིངས་ནས་གཡས་པའི་མཛུབ་མོ་བསྒྲེངས་པ་གཡོན་པའི་མཐེ་བོང་དང་
མཛུབ་མོ་དག་ཕན་ཚུན་ཁ་ཡང་དག་པར་སྦྱར་བས་གཟུང་བར་བྱ་སྟེ་འདི་ནི་ཞགས་པ་འཛིན་མའིའོ། །ཐམས་ཅད་དགུག་པ་དང༌། གཞུག་པ་དང༌། མཆོག་ཏུ་གྲུབ་པའོ་ཞེས་བྱ་བས་ནི་དེའི་ལས་བཤད་པའོ། །རྡོ་རྗེ་ཧཱུཾ་མཛད་ལས་བྱུང་བའོ་ཞེས་བྱ་བ་ལ་སོགས་པ་ལ་ཇི་ལྟ་བ་བཞིན་དུ་བཤད་པའི་རྡོ་རྗེ་ཧཱུཾ་མཛད་བཅིངས་ནས་དེ་ཉིད་ཀྱི་གཡས་པའི་མཛུབ་མོའི་ལྕགས་ཀྱུས་གཡོན་པའི་མཛུབ་མོ་བསླངས་ནས་དགུག་པར་བྱ་སྟེ་འདི་ནི་མདའ་འཛིན་པའི་གཞུ་རྒྱུད་འགུགས་པའི་དམ་ཚིག་གི་ཕྱག་རྒྱའོ། །ཐམས་ཅད་རྗེས་སུ་ཆགས་པར་བྱེད་པ་དང༌། འབིགས་པར་བྱེད་པ་ཞེས་བྱ་བ་ནི་དེའི་ལས་བསྟན་ཏོ། །རྡོ་རྗེ་ཧཱུཾ་མཛད་ཀྱི་མཆོག་གོ་ཞེས་བྱ་བ་ནི་རྡོ་རྗེ་བསྡམས་པ་བཅིངས་ནས་མཛུབ་མོ་བསྒྲེང་བ་ཕན་ཚུན་དུ་ཡང་དག་པར་སྦྱར་ཞིང་གཟུང་བར་བྱའོ་ཞེས་བྱ་བའི་ཐ་ཚིག་གོ །རྡོ་རྗེ་བསྡམས་པ་གཡོན་པའི་རྡོ་རྗེ་ཁུ་ཚུར་གཡས་པའི་རྩེ་གསུམ་གྱིས་མཚན་པས་ཡོངས་སུ་བཟུང་སྟེ་ཐམས་ཅད་དྲལ་བར་བྱེད་པའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་ལག་པ་གཡོན་པའི་རྡོ་རྗེ་ཁུ་ཚུར་བཅིངས་ལ་གཡས་པའི་མཐེའུ་ཆུང་དང་མཐེ་བོང་དག་གིས་གཡོན་པའི་མཐེའུ་ཆུང་བཟུང་སྟེ་སོར་མོ་ལྷག་མ་རྣམས་ཀྱིས་རྩེ་གསུམ་པ་ཡིན་ནོ། །འདི་ནི་རྩེ་གསུམ་ཆེན་པོ་འཛིན་པའི་དམ་ཚིག་གི་ཕྱག་རྒྱ་ཐམས་ཅད་དྲལ་བར་བྱེད་པའོ། །རྡོ་རྗེ་ཧཱུཾ་མཛད་ཀྱི་གཡས་པའི་ཁུ་ཚུར་གྱི་མཐེའུ་ཆུང་ཡང་དག་པར་བརྐྱང་བ་གཡོན་པའི་སྟེང་དུ་བཞག་པ་ནི་ཁ་ཊྭཱཾ་ག་བསྒྲེང་བའི་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ནས་གཡས་པའི་སྡིགས་མཛུབ་ཀྱི་རྩེ་མོ་རང་གི་མཐེའུའི་སྟེང་དུ་ཡང་དག་པར་སྦྱར་བར་བྱས་ལ་གཡས་པའི་མཐེའུ་ཆུང་གི་ལུ་གུ་རྒྱུད་ཡང་དག་པར་སྦྱར་བ་ཉིད་ཟུར་དུ་བརྐྱང་སྟེ། ལག་པ་གཡོན་པའི་སྟེང་དུ་བཞག་ལ་གཟུང་བར་བྱ་སྟེ་འདི་ནི་ཁ་ཊྭཱཾ་ག་འཛིན་པ་དམ་ཚིག་གི་ཕྱག་རྒྱ་སྟེ། ཁ་ཊྭཱཾ་ག་བསྒྲེང་བ་ཞེས་བྱ་བའི་མིང་ཅན་ནོ། །མཁའ་འགྲོ་མ་ལ་སོགས་པའི་གདུག་པ་ཐམས་ཅད་ཀྱི་ཕྱག་རྒྱ་ཕྱེ་ཞིང་དྲལ་བར་བྱེད་པ་དང༌། མཁའ་འགྲོ་མ་ལ་སོགས་པ་ཐམས་ཅད་རྒྱས་འདེབས་པ་དང༌། མཁའ་འགྲོ་མ་ལ་སོགས་པ་ཐམས་ཅད་འཕྲོག་པར་བྱེད་པ་ཞེས་བྱ་བ་ནི་གོ་སླའོ། །གཡས་པས་འཁོར་ལོ་བཟུང་བའི་ཚུལ་གྱིས་བསྟོད་
ཅིང་དོར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ནས་གཡས་པའི་མཛུབ་མོས་འཁོར་ལོ་བཟུང་བའི་ཚུལ་དང་བསྟོད་པའི་ཚུལ་བྱས་ནས་འཁོར་ལོ་འཕང་བ་སྟོན་པར་བྱེད་པ་འདི་ནི་འཁོར་ལོ་འཛིན་མའི་དམ་ཚིག་གི་ཕྱག་རྒྱ་སྟེ་ཐམས་ཅད་གཅོད་པ་དང་གསོད་པར་བྱེད་པའོ། །འདིའི་མིང་བསྟན་པར་བྱ་བའི་ཕྱིར་རྡོ་རྗེ་ཆེན་པོའི་ཁྲོ་མོ་ཆེན་པོ་ཞེས་གསུངས་སོ། །གཡས་པའི་རྡོ་རྗེ་འབེབས་པ་དང་སྦྱར་བ་སྤྲོ་ཞིང་གཡོ་བའི་པདྨ་འདབ་མ་ཅན་གྱི་བ་དན་གསུམ་མོ་ཞེས་བྱ་བ་ལ་ལག་པ་གཡས་པ་ཁུ་ཚུར་བཅིངས་ནས་མཐེའུ་ཆུང་དང་སྲིན་ལག་གི་ནང་དུ་མཐེ་བོང་གཟུང་བར་བྱ་སྟེ། འདི་ནི་གཡས་པའི་རྡོ་རྗེ་འབེབས་པའི་ཕྱག་རྒྱའོ། །ལག་པ་གཡོན་པ་བ་དན་གསུམ་པ་བྱས་ལ་བ་དན་གསུམ་པའི་མཚན་ཉིད་ཅན་གྱི་ཕྱག་རྒྱ་གློག་ལྟར་སྤྲོ་ཞིང་གཡོན་པའི་བ་དན་གྱི་བ་དན་གསུམ་གྱི་ཕྱག་རྒྱ་དེ་ཉིད་གཡས་པའི་རྡོ་རྗེ་འབེབས་པའི་ཕྱག་རྒྱ་དེ་ཡང་དག་པར་སྦྱར་ཞིང་གཟུང་བར་བྱ་སྟེ་འདི་ནི་སྣ་ཚོགས་བ་དན་འཛིན་མའིའོ། །སླར་ཡང་སྣ་ཚོགས་པ་དང་འཛིན་མའི་དམ་ཚིག་གི་ཕྱག་རྒྱ་གཉིས་བཤད་པར་བྱ་བའི་ཕྱིར། རྡོ་རྗེ་བསྡམས་པའི་མཐེ་བོང་དང་མཛུབ་མོ་གཉིས་ཀྱི་རྡོ་རྗེ་ལས་བྱུང་བའི་སྲིན་ལག་མཉམ་པར་སྦྱར་ཞིང་མཐེའུ་ཆུང་ཁ་ཕྱེ་བ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཐེའུ་ཆུང་དང་མཛུབ་མོ་དང་སྲིན་ལག་གི་སོར་མོ་རྣམས་ཀྱིས་རྩེ་མོ་གསུམ་བྱས་ལ་མཐེའུ་ཆུང་གཉིས་རབ་ཏུ་བརྐྱང་ནས་རྩེ་མོ་གཉིས་བྱས་ཏེ་འདི་དང་སྔར་བཤད་པའི་དཔལ་རྡོ་རྗེ་བ་དན་ཞེས་བྱ་བ་དཔལ་ཐམས་ཅད་བྱེད་པ་དང་རྣམ་པར་རྒྱལ་བར་བྱེད་ལ་དགུག་པ་ཐམས་ཅད་རབ་ཏུ་འཇོམས་པར་བྱེད་པ་དང་ཐམས་ཅད་འབེབས་པར་བྱེད་པར་ཤེས་པར་བྱའོ། །འདིར་གང་དང་གང་དུ་དམ་ཚིག་གི་ཕྱག་རྒྱ་གཉིས་བཤད་པ་དེ་དང་དེར་དང་པོར་རྩ་བའི་ཕྱག་རྒྱ་དང་གཉིས་པ་ཉེ་བའི་སྙིང་པོའི་ཕྱག་རྒྱར་ཤེས་པར་བྱའོ། །སྒེག་མོ་ལ་སོགས་པ་ནས་རྡོ་རྗེ་དྲིལ་བུ་མའི་མཐར་ཐུག་པའི་བར་གྱི་ནི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཁོ་ནའི་དམ་ཚིག་གི་ཕྱག་རྒྱ་རྣམས་སུ་གཟུང་བར་བྱའོ། །ད་ནི་དཔལ་རྡོ་རྗེ་འཇིག་རྟེན་གསུམ་ལས་མཆོག་ཏུ་རྣམ་པར་རྒྱལ་བ་ལས་གསུངས་པའི་རྡོ་རྗེ་གཙུག་ཏོར་ལ་སོགས་པའི་དམ་ཚིག་གི་ཕྱག་རྒྱ་རྣམས་བཤད་པར་བྱ་སྟེ། རྡོ་རྗེ་
ཁུ་ཚུར་གཉིས་བཅིངས་ནས་གྱེན་དུ་ཁ་བལྟ་བར་བྱས་ཏེ་མཐེའུ་ཆུང་གཉིས་ལུ་གུ་རྒྱུད་དུ་བཅིང་བར་བྱ་སྟེ་མཛུབ་མོ་གཉིས་ཀྱིས་ཡང་དག་པར་སྦྱར་བར་བྱ་སྟེ། འདི་ནི་ཐུན་མོང་གི་སློང་བའི་ཕྱག་རྒྱའོ། །འདི་ཉིད་བཟློག་ནས་མཛུབ་མོ་གཉིས་གཙུག་ཏོར་གྱི་ཕྱོགས་སུ་གཟུང་བར་བྱ་སྟེ། །འདི་ནི་རྡོ་རྗེ་གཙུག་ཏོར་གྱི་ཐུན་མོང་གི་དམ་ཚིག་གི་ཕྱག་རྒྱ་རྣམས་སོ། །སློང་བའི་དམ་ཚིག་ཕྱག་རྒྱ་དེ་ཉིད་སྙིང་གར་གཏད་དེ་ཡོངས་སུ་བཟློག་ལ་དཔྲལ་བར་མཛུབ་མོའི་རྩེ་མོ་བཞག་སྟེ་རྡོ་རྗེ་མཛོད་སྤུ་རྣམས་ཀྱིའོ། །དེ་ཉིད་ཁ་ལས་འབྱིན་པ་ནི་ཁ་ལས་བྱུང་པ་རིག་པ་མཆོག་གིའོ། །དེ་ཉིད་སྙིང་གར་རྡོ་རྗེ་ལྕགས་ཀྱུ་སྟེ་ཁྲོ་བོ་ཏི་ཀིའོ། །དེ་དག་གི་ཁར་མཛུབ་མོ་བཞག་པ་གཤིན་རྗེ་མཐར་བྱེད་ཀྱིའོ། །མཛུབ་མོའི་ཚིགས་གསུམ་པ་བཀུག་པའི་རལ་གྲི་བྱ་སྟེ་ཁྲོ་བོ་ཏ་ཀིའོ། །མཛུབ་མོ་གཉིས་ཀྱིས་དཔུང་པ་གཡས་པར་ལྕགས་ཀྱུ་གཉིས་བྱ་སྟེ་རྡོ་རྗེ་ལྕགས་ཀྱུའིའོ། །གཡས་པའི་མཛུབ་མོ་ལྕགས་ཀྱུ་གཡོན་པའི་མཛུབ་མོའི་དབུས་མ་དང་སྦྱར་བར་བྱས་ཏེ་འདི་ནི་ཁྲོ་བོ་རྡོ་རྗེ་ཞགས་པའི་སྟེ། དཔུང་པ་གཡོན་པར་རོ། །མཛུབ་མོ་གཉིས་ཀྱི་རྩེ་མོ་རང་གི་སྙིང་གར་སྦྱར་བར་བྱ་སྟེ་འདི་ནི་རྡོ་རྗེ་ཀཱི་ལི་ཀཱི་ལིའིའོ། །མཛུབ་མོ་གཉིས་བརླ་གཡོན་པར་གཞག་པར་བྱ་སྟེ་འདི་ནི་རྡོ་རྗེ་བསྙེམས་པའིའོ། །སྙིང་གའི་ཕྱོགས་སུ་མཛུབ་མོ་གཉིས་ཀྱིས་ལུ་གུ་རྒྱུད་བཅིང་བར་བྱ་སྟེ་འདི་ནི་རྡོ་རྗེ་བསྡམས་པའིའོ། །མཛུབ་མོ་གཉིས་ཀྱི་རྩེ་མོ་རང་གི་མཐེ་བོའི་སྟེང་དུ་ཡང་དག་པར་སྦྱར་བ་བྱས་ལ་བཙིར་བར་བྱ་སྟེ་འདི་ནི་རྡོ་རྗེ་ཁུ་ཚུར་གྱིའོ། །མཛུབ་མོ་གཉིས་པདྨའི་འདབ་མའི་རྣམ་པ་ཅན་དུ་བྱ་སྟེ་རྡོ་རྗེ་སྡེའིའོ། །གཡས་པའི་མཛུབ་མོས་གཡོན་པའི་མཛུབ་མོ་བཟུང་ཞིང་དགུག་པར་བྱ་སྟེ་འདི་ནི་མུརད་ཏ་ཀའི་གཞུ་རྒྱུད་འདྲེན་པའོ། །བ་དན་གསུམ་པ་བྱས་ནས་དེས་ཕྱག་འཚལ་བར་བྱ་སྟེ་འདི་ནི་རྡོ་རྗེ་ཕྱག་གིའོ། །ལྟུང་བའི་ཚུལ་དུ་བྱས་ཏེ་འདི་ནི་རྡོ་རྗེ་ལྟུང་བའིའོ། །མཛུབ་མོ་མཐའ་ཕན་ཚུན་གྱི་རྩེ་མོ་རྡོ་རྗེ་བསྡམས་པ་ནི་རྐང་གདུབ་ཀྱིའོ། །མཛུབ་མོ་མདུད་པ་ནི་རྡོ་རྗེ་ལྕགས་སྒྲོག་གིའོ། །མཛུབ་མོས་རྡོ་རྗེ་འབེབས་པ་ནི་རྡོ་རྗེ་རྣོན་པོའིའོ། །གཡོན་པ་ཁྲོ་བོའི་ཁུ་ཚུར་གྱིས་སྡིགས་མཛུབ་བྱེད་ཅིང་གཡས་པས་རྡོ་རྗེ་བསོར་ནས་མནན་པར་བྱ་སྟེ་འདི་ནི་རྡོ་རྗེ་ཤུགས་ཀྱིའོ། །ཕྱག་རྒྱ་ལྔ་
པོ་འདི་ནི་སློང་བའི་ཕྱག་རྒྱ་ལས་བྱུང་བ་སྟེ། ཐིག་སྐུད་དང་པོའི་བར་མཚམས་སུ་གསུངས་པའི་རྡོ་རྗེ་གཙུག་ཏོར་ལ་སོགས་ནས་རྡོ་རྗེ་ཤུགས་ཀྱི་མཐར་ཐུག་པ་རྣམས་ཀྱི་ཤེས་པར་བྱའོ། །རྡོ་རྗེ་ཁུ་ཚུར་གཉིས་བཅིངས་ནས་མཐེའུ་ཆུང་གཉིས་ཀྱིས་ལུ་གུ་རྒྱུད་དུ་བཅིང་བ་བྱས་ལ་ཁུ་ཚུར་གཉིས་ཕན་ཚུན་དུ་བཙིར་བར་བྱ་སྟེ་འདི་ནི་སྔགས་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་གྱེན་དུ་ཁ་བལྟ་བར་བཞག་སྟེ། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ནས་སྙིང་གའི་ཕྱོགས་ནས་གྱེན་དུ་དྲང་བར་བྱ་སྟེ་འདི་ནི་ལྷ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་གཡས་པའི་ཁུ་ཚུར་གྱིས་རང་ལ་དར་དཔྱངས་འཆིང་བའི་ཚུལ་བྱ་སྟེ་འདི་ནི་རྡོ་རྗེ་མགོན་པོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་གཡོན་པས་རང་ལ་དར་དཔྱངས་འཆིང་བའི་ཚུལ་བྱ་སྟེ་འདི་ནི་ལྷ་མོ་རྣམས་ཀྱི་དམ་ཚིག་གི་ཕྱག་རྒྱའོ། །འདི་རྣམས་ནི་ཐིག་སྐུད་གཉིས་པའི་བར་མཚམས་སུ་བྲིས་པ་རྣམས་ཀྱིའོ། །རྡོ་རྗེའི་ཁུ་ཚུར་གཉིས་བཅིངས་ནས་གཡོན་པའི་ཁུ་ཚུར་གྱིས་བསྙེམས་པར་བྱ་སྟེ་འདི་ནི་གསུམ་པའི་རྡོ་རྗེ་རྒྱལ་ཐེབ་རྣམས་དང་ལྷ་མོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་དེའི་ལག་པའི་སོར་མོ་རྣམས་ཀྱིས་པི་ཝང་དང་གླིང་བུ་དང་རྫ་རྔ་དང་ཀུ་མུ་ད་དང༌། ཆ་ལང་དང༌། རྔ་བོ་ཆེ་དང༌། རྔ་ཟླུམ་དང༌། རྔ་དང་ཏི་མི་ལ་བརྡུང་བའི་ཚུལ་རྣམས་བསྟན་པར་བྱ་སྟེ་འདི་དག་ནི་ཐིག་སྐུད་བཞི་པའི་པར་མཚམས་སུ་རོལ་མོའི་ཕྱག་རྒྱ་རྣམས་སོ། །སྒེག་མོ་དང་བཞད་མ་དང་གླུ་ཆེན་མ་དང་གར་མ་རྣམས་ཀྱི་རང་གི་དམ་ཚིག་གི་ཕྱག་རྒྱ་རྣམས་གཟུང་བར་བྱའོ། །ཐིག་སྐུད་ཀྱི་བར་མཚམས་ལྔ་པ་ལ་རྒྱལ་ཐོབ་རྣམས་ཀྱི་ཕྱག་རྒྱ་ནི་སྔར་བཤད་པ་ཁོ་ན་གཟུང་བར་བྱའོ། །རྡོ་རྗེ་ཁུ་ཚུར་གཉིས་བཅིངས་ནས་གཡོན་པ་བསྙེམས་པར་བྱས་ལ་གཡས་པའི་ཁུ་ཚུར་གྱིས་མཛུབ་མོ་བསྒྲེང་བ་འོད་མའི་ཡལ་གམ་དུད་པའི་ཚུལ་གྱིས་གཟུང་བར་བྱ་སྟེ་རྡོ་རྗེ་ཁུ་ཚུར་གཉིས་བཅིངས་ནས་དེས་རྡོ་རྗེ་ཕར་འཕང་པ་དང༌། ཚུར་འདྲེན་པའི་ཚུལ་བྱ་སྟེ་འདི་ནི་རྡོ་རྗེ་ཚོགས་རྣམས་ཀྱིའོ། །གཡོན་པའི་ཁུ་ཚུར་གྱིས་བསྙེམས་པར་བྱས་ནས་གཡས་པའི་ཁྲོ་བོའི་ཁུ་ཚུར་གྱིས་སྡིགས་མཛུབ་ཏུ་བྱ་སྟེ་འདི་ནི་ཁྲོ་བོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་ཀྱི་འོད་མའི་ཡལ་ག་
མདུད་པའི་ཚུལ་བྱ་སྟེ་འདི་ནི་ཐིག་སྐུད་དྲུག་པར་རྡོ་རྗེ་ཕོ་ཉ་རྣམས་ཀྱིའོ། །རྡོ་རྗེ་ཁུ་ཚུར་གཉིས་དྲིལ་བུ་དཀྲོལ་བར་བྱ་སྟེ། འདི་ནི་རྡོ་རྗེ་གནོད་སྦྱིན་རྣམས་ཀྱིའོ། །ཁུ་ཚུར་བཅིངས་ནས་མཐེའུ་ཆུང་གི་སོར་མོ་གཉིས་བྱས་ལ་ཁའི་མཐའ་གཉིས་སུ་གཟུང་བར་བྱ་སྟེ་འདི་ནི་རྡོ་རྗེ་སྲིན་པོ་རྣམས་ཀྱི་མཆེ་བའི་ཕྱག་རྒྱའོ། །རྡོ་རྗེ་ཁུ་ཚུར་གཉིས་བཅིངས་ནས་དེས་བཀའ་ནོད་པའི་ཚུལ་དུ་བྱ་སྟེ། འདི་ནི་མངག་གཞུག་རྣམས་ཀྱིའོ། །ཐིག་སྐུད་ཀྱི་བར་མཚམས་བདུན་པ་ལ་ནི་རྡོ་རྗེ་གཙུག་ཏོར་ལ་སོགས་པའི་ཕྱག་རྒྱ་དང་སྔགས་སྔར་བཤད་པས་གཟུང་བར་བྱའོ། །རྡོ་རྗེ་རྣལ་འབྱོར་གྱི་མཁའ་འགྲོ་མ་དང་ཕོ་ཉ་མོ་དང༌། ཚོགས་བརྒྱད་ཀྱི་བཤད་པར་བྱ་སྟེ། དེ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་ནས་གཡོན་པའི་རྩེ་གསུམ་གྱིས་མཚན་པའི་རྡོ་རྗེ་མཁའ་འགྲོ་མའི་ཕྱག་རྒྱ་དང་པོའོ། །དེ་ཉིད་བཅིངས་ནས་གཡས་པའི་མཐེའུ་ཆུང་རབ་ཏུ་བརྐྱང་བ་ནི་གཉིས་པའོ། །དེ་ཉིད་བཅིངས་ནས་གཡོན་པའི་མཛུབ་མོ་དབྱུག་པའི་ཁུ་ཚུར་ནི་གསུམ་པའོ། །དེ་ཉིད་བཅིངས་ནས་སྟེང་དུ་དབྱུག་པ་དང་འོག་ཏུ་རྒྱལ་མཚན་ལྟ་བུ་ནི་རྡོ་རྗེ་མཁའ་འགྲོ་མའི་ཕྱག་རྒྱ་བཞི་པའོ། །ཕོ་ཉའི་དམ་ཚིག་གི་ཕྱག་རྒྱ་ཉིད་ནི་ཕོ་ཉ་མོ་རྣམས་ཀྱིའོ། །ཁྲོ་བོའི་ཁུ་ཚུར་གཉིས་རྡོ་རྗེ་ཁ་ཊྭཱཾ་ག་དང་རྡོ་རྗེ་རྩེ་གསུམ་པ་དང་རྡོ་རྗེ་མཛོད་དང་རྡོ་རྗེ་ཞགས་པ་དང་རྡོ་རྗེ་དབྱུག་པ་དང་རྡོ་རྗེ་མདུང་ཐུང་དང་རྡོ་རྗེ་མདའ་དང་རྡོ་རྗེ་འཁོར་ལོ་ཞེས་བྱ་བ་ནི་ཚོགས་བརྒྱད་ཀྱི་དམ་ཚིག་གི་ཕྱག་རྒྱའོ། །རྒྱུད་འདི་ཐམས་ཅད་དུ་གང་དུ་ཁྱད་པར་མེད་པ་དེ་རང་གི་སྙིང་པོ་ཉིད་ཆོས་ཀྱི་ཕྱག་རྒྱར་ཤེས་པར་བྱའོ། །རྡོ་རྗེ་སེམས་དཔའི་དབང་བསྐུར་བཤད་པའོ་ཞེས་བྱ་བ་ལ་རྡོ་རྗེ་སེམས་དཔའི་དཀྱིལ་འཁོར་དུ་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་སངས་རྒྱས་ལྔའི་ཅོད་པན་གྱི་དབང་བསྐུར་བའི་ཕྱག་རྒྱ་གཟུང་བར་བྱའོ། །དེ་ལྟར་ན་སངས་རྒྱས་ལྔའི་ཅོད་པན་གྱི་དབང་བསྐུར་བའི་ཕྱག་རྒྱ་བསྟན་ནས་ད་ནི་རྡོ་རྗེ་ཕྲེང་བའི་དབང་བསྐུར་བའི་ཕྱག་རྒྱ་བསྟན་པར་བྱ་བའི་ཕྱིར། རྡོ་རྗེའི་རིགས་ཐམས་ཅད་ཅེས་བྱ་བ་གསུངས་ཏེ་རྡོ་རྗེའི་རིགས་ཀྱང་ཡིན་ལ་ཐམས་ཅད་ཀྱང་ཡིན་པས་ན་རྡོ་རྗེའི་རིགས་ཐམས་ཅད་དེ་འཇིག་རྟེན་དང་འཇིག་རྟེན་ལས་འདས་པའོ། །རྡོ་རྗེའི་རིགས་ཐམས་ཅད་
ཀྱི་དབང་བསྐུར་བ་སྦྱིན་པའི་ཕྱག་རྒྱ་འདི་ཞེས་བྱ་བ་ནི་ཚིག་གི་ལྷག་མའོ། །ཇི་ལྟར་ཞེ་ན། རྡོ་རྗེ་ཐལ་མོ་ཞེས་བྱ་བ་ལ་སོགས་པ་ལ་རྡོ་རྗེ་ཐལ་མོ་བཅིངས་ནས་མཛུབ་མོ་གཉིས་ཀྱིས་ཕན་ཚུན་མདུད་པ་བཅིང་པར་བྱས་ལ་མཐེ་བོང་དང་སྲིན་ལག་གི་སོར་མོ་དག་གིས་རྩེ་མོ་གཉིས་བྱས་ཏེ་དེ་ནས་ཡངས་སུ་བསྐོར་ལ་གཙུག་ཏོར་གྱི་ཕྱོགས་ནས་བརྩམས་ཏེ་ལོགས་བཞིར་ཕྲེང་བ་འཆིང་བའི་ཚུལ་བྱས་ཏེ་ཧཱུཾ་ཨ་བྷི་ཤིཉྩ་ཞེས་བྱ་བ་བརྗོད་ཅིང་དཔྲལ་བའི་སྟེང་དུ་གཟུང་བར་བྱ་སྟེ་དེ་ལྟར་ན་རྡོ་རྗེའི་རིགས་ཐམས་ཅད་ལ་འབར་བའི་རྡོ་རྗེ་རྩེ་ལྔ་པའི་ཕྲེང་བའི་དབང་བསྐུར་བར་བྱའོ། །འབར་བའི་རྡོ་རྗེ་རྩེ་ལྔ་པ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེའི་ཕྱག་རྒྱ་ཁྲོ་བོ་ཏི་རཱིནྟི་རི་ལས་བྱུང་བའོ་ཞེས་བྱ་བ་ལ། བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་དམ་ཚིག་གི་བྱག་རྒྱར་གང་བཤད་པ་དེ་ནི་རྡོ་རྗེ་ཁྲོ་བོ་ཏི་རཱིཎྚི་རི་ཞེས་བྱ་བ་སྟེ་དེ་བཅིངས་ནས་མཛུབ་མོ་གཉིས་བསྒྲེང་པས་ཡི་གེ་ཧཱུཾ་བརྗོད་ཅིང་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བ་དམ་ཚིག་གི་ཕྱག་རྒྱས་རབ་ཏུ་བསྒྲུབས་ནས་སྡིགས་མཛུབ་བྱ་སྟེ་དེ་ལྟར་ན་རྡོ་རྗེའི་ཕྱག་རྒྱའི་ཁྲོ་བོ་ཏི་རཱིནྟི་རི་ལས་བྱུང་བ་ཡིན་ནོ། །དོན་ཐམས་ཅད་སྒྲུབ་པར་བྱེད་པའོ་ཞེས་བྱ་བ་འདིའི་ལས་བསྟན་པ་ཡིན་ཏེ་དེ་ལྟར་རྡོ་རྗེའི་ཕྱག་རྒྱ་འདི་རབ་ཏུ་སྦྱོར་ན་ངེས་པ་ཁོ་ནར་དངོས་གྲུབ་ཐམས་ཅད་རབ་ཏུ་སྒྲུབ་པར་བྱེད་པ་ཡིན་ནོ། །དེ་ནས་ཀྱི་སྒྲ་ནི་སྐབས་ལ་བབ་པ་ལའོ། །ལས་ཀྱི་ཕྱག་རྒྱ་བཞི་ཞེས་བྱ་བ་ནི་རྒྱས་བཏབ་པ་དང་ཕྱག་རྒྱ་ཕྱེ་བར་བྱེད་པ་དང༌། བསོར་བར་བྱེད་པ་དང་སླར་ཡང་སྲོག་སྟེར་བར་བྱེད་པ་ཞེས་བྱ་བ་རྣམས་སོ། །དེ་དག་གང་ཡིན་ཞེ་ན། དམ་ཚིག་གི་ཕྱག་རྒྱའི་ལྷ་མོ་རྣམས་སོ་ཞེས་བྱ་བ་ནི་མདའ་འཛིན་པ་ལ་སོགས་པའི་དམ་ཚིག་གི་ཕྱག་རྒྱ་རྣམས་སོ་ཞེས་བྱ་བའི་དོན་ཏོ། །འདི་ལྟར་བཤད་པར་འགྱུར་ཏེ། མདའ་འཛིན་མའི་དམ་ཚིག་གི་ཕྱག་རྒྱས་ནི་རྒྱས་འདེབས་པའོ། །ཁ་ཊྭཱཾ་ག་འཛིན་པའི་དམ་ཚིག་གི་ཕྱག་རྒྱས་ནི་ཕྱེ་བའོ། །འཁོར་ལོ་འཛིན་པའི་དམ་ཚིག་གི་ཕྱག་རྒྱས་གསོད་པར་བྱེད་པའོ། །སྣ་ཚོགས་པའི་བ་དན་འཛིན་པའི་དམ་ཚིག་གི་ཕྱག་རྒྱས་སླར་ཡང་དམ་ཚིག་གི་སྲོག་འབྱིན་པར་འགྱུར་རོ། །དེ་ནས་བཅོམ་ལྡན་འདས་ཀྱི་ལས་ཀྱི་དམ་ཚིག་གོ་ཞེས་བྱ་བ་ལ་དེ་ནས་ཀྱི་སྒྲ་ནི་སྔ་མ་བཞིན་ནོ། །
བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱ་བྱ་བ་ནན་ཏན་སྒྲུབ་པའི་ཡེ་ཤེས་རྫོགས་པའི་རྒྱུར་གྱུར་བའི་ལས་ཀྱི་དམ་ཚིག་ཅེས་བྱ་བ་ནི་ལས་ཀྱི་ཕྱག་རྒྱ་ཡིན་ནོ་ཞེས་བྱ་བའི་དོན་ཏོ། །དེ་ཇི་ལྟར་ཡིན་ཞེ་ན། རྡོ་རྗེ་ཁུ་ཚུར་གྱིས་ཞེས་བྱ་བ་ལ་སོགས་པ་ལ་རྡོ་རྗེ་ཁུ་ཚུར་གྱིས་བསྙེམས་པ་བྱས་ནས་གཡས་པའི་རྡོ་རྗེ་ཁུ་ཚུར་གྱིས་རྡོ་རྗེ་གསོར་བའི་ཚུལ་བྱ་སྟེ་འདི་ནི་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་ལས་ཀྱི་ཕྱག་རྒྱའོ། །འདི་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་བཅོམ་ལྡན་འདས་ཀྱི་ཕྱག་རྒྱའི་མཛད་པ་ཉིད་བཤད་ནས་ད་ནི་རྡོ་རྗེ་མཚོན་ཆ་འཛིན་མ་ལ་སོགས་པ་རྣམས་ཀྱི་བཤད་པར་བྱ་བའི་ཕྱིར་དེ་ནས་ལས་ཀྱི་ཕྱག་རྒྱ་ཞེས་བྱ་བ་གསུངས་སོ། །རྡོ་རྗེ་ཁུ་ཚུར་སྡིགས་མཛུབ་དང་བཅས་པའི་མཛུབ་མོ་ནི་རྡོ་རྗེ་ཁྲོ་བོའི་ཁུ་ཚུར་རོ་ཞེས་བྱ་བ་ལ། རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་གཉིས་བསྒྲེང་བ་སྡིགས་མཛུབ་ཀྱི་ཚུལ་དུ་གཟུང་བར་བྱ་སྟེ་འདི་ནི་རྡོ་རྗེ་ཁུ་ཚུར་ཞེས་བྱ་བའི་ཕྱག་རྒྱའོ། །དེ་དག་གི་ལས་ཀྱི་དམ་ཚིག་གི་ཕྱག་རྒྱའོ་ཞེས་བྱ་བ་ལ་ཁྲོ་བོའི་ཁུ་ཚུར་དེ་དག་གི་ལས་ཀྱི་ཕྱག་རྒྱ་རྣམས་ཀྱི་རྒྱུར་གྱུར་པའི་ཕྱག་རྒྱ་ནི་ལས་ཀྱི་དམ་ཚིག་གི་ཕྱག་རྒྱ་སྟེ་དེ་གཉིས་སུ་བྱས་ནས་ལས་ཀྱི་ཕྱག་རྒྱ་བཅིང་བར་བྱའོ། །ཁྲོ་བོའི་ཁུ་ཚུར་གཉིས་ཕན་ཚུན་དུ་ཡང་དག་པར་སྦྱོར་བ་བཅིངས་ཏེ་གཉིས་སུ་བྱས་ནས་བྱའོ་ཞེས་བྱ་བའི་དོན་ཏོ། །སོར་མོ་གཉིས་ཀྱིས་ཐམས་ཅད་བཀུག་པའོ་ཞེས་བྱ་བ་ཁྲོ་བོའི་ཁུ་ཚུར་གཉིས་བཅིངས་ནས་མཛུབ་མོ་གཉིས་ཀྱིས་དགུག་པའི་ཚུལ་བྱ་སྟེ་འདི་ནི་རྡོ་རྗེ་མཚོན་ཆ་འཛིན་མའི་ཐམས་ཅད་དགུག་པའི་ལས་ཀྱི་ཕྱག་རྒྱ་ཡིན་ནོ། །སྙིང་གར་ཅིག་ཤོས་དང་གཡས་པས་གདུག་པ་ཐམས་ཅད་གཅོད་པའོ་ཞེས་བྱ་བ་ལ་གཡོན་པའི་ཁྲོ་བོའི་ཁུ་ཚུར་རང་གི་སྙིང་གར་བཞག་སྟེ་གཡས་པས་རལ་གྲི་འདེབས་པའི་ཚུལ་བུ་བྱ་སྟེ་འདི་ནི་མཛོད་འཛིན་མའི་གདུག་པ་ཐམས་ཅད་གཅོད་པར་བྱེད་པའོ། །ལག་པའི་མདུད་པས་གཡས་པས་གདུག་པ་ཐམས་ཅད་འགུགས་པ་དང་རབ་ཏུ་གཞུག་པའོ་ཞེས་བྱ་བ་ལ་ཁྲོ་བོའི་ཁུ་ཚུར་གཉིས་བཅིངས་ཏེ་དེས་ལག་པའི་མདུད་པ་བྱས་ཏེ། གཡས་པའི་ཁྲོ་བོའི་ཁུ་ཚུར་གྱིས་གཡོན་པའི་ཁྲོ་བོའི་ཁུ་ཚུར་དགུག་པར་བྱ་སྟེ་འདི་ནི་ཞགས་པ་འཛིན་པའི་ལས་ཐམས་ཅད་དགུག་པ་དང་ཐམས་ཅད་གཞུག་པར་བྱེད་པའོ། །
བསྟོད་པ་དང་བཅས་པའི་མདའ་འཕང་ངོ་ཞེས་བྱ་བ་ལ་གཡོན་པའི་ཁྲོ་བོའི་ཁུ་ཚུར་གྱིས་གཞུ་འཛིན་པའི་ཚུལ་བྱས་ལ་གཡས་པས་མདའ་བསྟོད་པའི་ཚུལ་བྱས་ནས་དེ་ནས་འཕང་བའི་ཚུལ་བྱ་སྟེ་འདི་ནི་མདའ་འཛིན་མའིའོ། །དེ་བ་ཞིན་དུ་རྡོ་རྗེ་རྩེ་གསུམ་པ་ལ་སོགས་པའི་རྡོ་རྗེ་གར་གྱི་སྦྱོར་བས་རང་གི་དམ་ཚིག་གི་ཕྱག་རྒྱ་གྱེན་དུ་འཕང་བའོ་ཞེས་བྱ་བ་ལ་རྩེ་གསུམ་དང་ཁ་ཊྭཱཾ་ག་དང་འཁོར་ལོ་དང་སྣ་ཚོགས་པ་དང་འཛིན་པ་རྣམས་ཀྱི་གར་ལས་བྱུང་བའི་དམ་ཚིག་གི་ཕྱག་རྒྱ་རྣམས་གྱེན་དུ་འཕངས་པས་ལས་ཀྱི་ཕྱག་རྒྱར་འགྱུར་རོ། །ཐམས་ཅད་ལ་རྒྱས་བཏབ་པ་ཞེས་བྱ་བ་ལ་སོགས་པ་ནི་གོ་སླའོ། །སྒེག་མོ་ལ་སོགས་པ་རྣམས་ཀྱི་ལས་ཀྱི་ཕྱག་རྒྱ་ནི་ཁྲོ་བོའི་ཁུ་ཚུར་གཉིས་ཀྱིས་བཅིངས་བར་བྱ་སྟེ་ཁྲོ་བོའི་ཁུ་ཚུར་གཉིས་བཅིངས་ནས་བསྐོར་ཏེ་རང་གི་སྙིང་གའི་ཕྱོགས་སུ་སྒེག་པ་དང་བཅས་པས་གཟུང་བར་བྱ་སྟེ་འདི་ནི་སྒེག་མོའིའོ། །ཁྲོ་བོའི་ཁུ་ཚུར་གཉིས་དགོད་པའི་ཚུལ་དུ་ཁར་ཡོངས་སུ་བསྐོར་ནས་སྤྱི་བོར་ཡོངས་སུ་གཟུང་བར་བྱ་སྟེ་འདི་ནི་བཞད་མའིའོ། །གཡོན་པའི་ཁྲོ་བོའི་ཁུ་ཚུར་གྱི་མཛུབ་མོ་བཀུག་པ་དབྱུག་པའི་ཚུལ་ལ་གནས་པའི་མཛུབ་མོ་པི་ཝང་བརྡུང་པའི་ཚུལ་དུ་གཟུང་བར་བྱ་སྟེ་འདི་ནི་གླུ་ཆེན་མོའིའོ། །ཁྲོ་བོའི་ཁུ་ཚུར་གཉིས་ཀྱིས་གར་བྱས་ལ་རྡོ་རྗེ་ཐལ་མོ་སྤྱི་བོར་བཅིང་བར་བྱ་སྟེ་འདི་ནི་རྡོ་རྗེ་གར་མའིའོ། །ཁྲོ་བོའི་ཁུ་ཚུར་གཉིས་བཅིངས་ནས་ལག་པ་མདུད་པ་བྱས་ཏེ་ལག་པ་གཡས་པ་གྱེན་དུ་བྱུང་བས་རྡོ་རྗེ་བཀའ་བསྒོ་བའི་སྒོ་སྲུང་མ་རྣམས་ཀྱིའོ། །དེ་ཡང་གཡས་པ་ལས་ཏེ་མཛུབ་མོའི་ལྕགས་ཀྱུ་དང་ལག་པ་བཟུང་བ་དང་མདུད་པ་བཙིར་བ་དང་རང་གི་སྙིང་གར་དྲིལ་ཆུང་དཀྲོལ་བའི་ཚུལ་ཞེས་བྱ་བའོ། །རྡོ་རྗེ་གཙུག་ཏོར་ལ་སོགས་པ་རྣམས་ཀྱི་ཡང་རྡོ་རྗེ་ཁུ་ཚུར་གཉིས་ཀྱིས་དམ་ཚིག་གི་ཕྱག་རྒྱའི་སྦྱོར་བས་གཙུག་ཏོར་ལ་སོགས་པའི་ཚུལ་སྦྱིན་པའི་ལས་ཀྱི་ཕྱག་རྒྱའོ། །འདི་ལྟར་བཤད་པར་འགྱུར་ཏེ་རྡོ་རྗེ་ཁུ་ཚུར་གཉིས་རང་གི་སྙིང་གའི་ཕྱོགས་སུ་བཅིངས་ཏེ། གྱེན་དུ་བསྟན་པས་ཡོངས་སུ་བསྐོར་ནས་གཙུག་གི་ཕྱོགས་སུ་གཟུང་བར་བྱ་སྟེ་འདི་ནི་གཙུག་ཏོར་རྣམས་ཀྱི་ལས་ཀྱི་ཕྱག་རྒྱའོ། །སྙིང་ག་ལས་གྱེན་དུ་བཏེག་སྟེ་ཡོངས་སུ་བསྐོར་ནས་མཛོད་སྤུའི་ཕྱོགས་སུ་གཟུང་བར་བྱ་སྟེ་འདི་ནི་རྡོ་རྗེ་མཛོད་སྤུ་རྣམས་ཀྱིའོ། །ཁ་ལས་བྱུང་
བར་བྱ་སྟེ་འདི་ནི་རིག་པ་ཆོག་གིའོ། །རང་གི་སྙིང་གར་ལྕགས་ཀྱུའི་ཚུལ་དུ་གཟུང་བར་བྱ་སྟེ་འདི་ནི་ཁྲོ་བོ་ཏ་ཀི་ནིའིའོ། །ལྟེ་བར་མཛུབ་མོ་གཞག་པའི་ཚུལ་དུ་གཟུང་བར་བྱ་སྟེ་འདི་ནི་གཤིན་རྗེ་མཐར་བྱེད་ཀྱིའོ། །རལ་གྲིའི་ཚུལ་དུ་གཟུང་བར་བྱ་སྟེ་འདི་ནི་ཁྲོ་བོ་ཏ་ཀི་ནིའིའོ། །དཔུང་པ་གཡས་པར་རྡོ་རྗེ་ལྕགས་ཀྱུ་འཛིན་པའི་ཚུལ་གྱིས་གཟུང་བར་བྱ་སྟེ་འདི་ནི་རྡོ་རྗེ་ལྕགས་ཀྱུའིའོ། །དཔུང་པ་གཡོན་པར་ཞགས་པའི་ཚུལ་དུ་གཟུང་བར་བྱ་སྟེ་འདི་ནི་རྡོ་རྗེ་ཞགས་པའིའོ། །རྡོ་རྗེ་ཁུ་ཚུར་གཉིས་ཀྱི་རྩེ་མོ་རང་གི་སྙིང་གར་སྦྱར་བར་བྱ་སྟེ་འདི་ནི་རྡོ་རྗེ་ཀཱི་ལི་ཀཱི་ལའིའོ། །རྡོ་རྗེ་ཁུ་ཚུར་གྱི་རྩེ་མོ་བརླ་གཡོན་པར་གཟུང་བར་བྱ་སྟེ། འདི་ནི་རྡོ་རྗེ་བསྙེམས་མའིའོ། །རང་གི་སྙིང་གར་གཟུང་བར་བྱ་སྟེ་འདི་ནི་རྡོ་རྗེ་བསྡམས་པའིའོ། །ཕན་ཚུན་དུ་བཙིར་བར་བྱ་སྟེ་འདི་ནི་རྡོ་རྗེ་ཁུ་ཚུར་ངོ༌། །པདྨ་འཛིན་པའི་བསམ་པས་བརླ་གཡས་པ་ལ་གཟུང་བར་བྱ་སྟེ་འདི་ནི་རྡོ་རྗེ་སྡེའིའོ། །གཡོན་པ་དང་གཡས་པའི་ཁུ་ཚུར་གཉིས་མདའ་འཕང་བའི་ཚུལ་དུ་བྱ་སྟེ་འདི་ནི་མུརྡྷ་ཏ་ཀིའིའོ། །ཕྱག་འཚལ་བའི་ཚུལ་དུ་བྱས་ཏེ་འདི་ནི་རྡོ་རྗེ་ཕྱག་གིའོ། །དེ་ཉིད་ཀྱིས་ལྟུང་བའི་ཚུལ་བྱས་ཏེ་འདི་ནི་རྡོ་རྗེ་ལྟུང་བའོ། །རྐང་གདུབ་གཟུང་བའི་བསམ་པས་བཅིང་པར་བྱ་སྟེ་འདི་ནི་རྡོ་རྗེ་ལྕགས་སྒྲོག་གིའོ། །བདམས་པའི་བསམ་པས་བཅིང་བར་བྱ་སྟེ་འདི་ནི་རྡོ་རྗེ་ལུ་གུ་རྒྱུད་ཀྱིའོ། །རྡོ་རྗེ་ཤུགས་ཀྱི་སྒོམ་པས་བཅིང་བར་བྱ་སྟེ་འདི་ནི་རྡོ་རྗེ་ཤུགས་ཀྱིའོ། །གཡོན་པའི་རྡོ་རྗེ་ཁུ་ཚུར་རང་གི་སྙིང་གར་གཟུང་བར་བྱ་སྟེ་གཡས་པའི་རྡོ་རྗེ་ཁུ་ཚུར་རྡོ་རྗེ་གསོར་བའི་ཚུལ་དུ་གསོར་ཞིང་བསྒྲུབ་པར་བྱ་སྟེ་འདི་ནི་རྡོ་རྗེ་ཤུགས་ཀྱིའོ།། རྡོ་རྗེ་ཁུ་ཚུར་གཉིས་བཙིར་བར་བྱ་སྟེ་འདི་ནི་སྔགས་རྣམས་ཀྱིའོ། །རྡོ་རྗེ་ཁུ་ཚུར་གཉིས་གྱེན་དུ་ཁ་བལྟ་བར་བཞག་ལ་སྙིང་ག་ལ་གྱེན་དུ་དྲང་བར་བྱ་སྟེ་འདི་ནི་ལྷ་རྣམས་ཀྱིའོ། །རྡོ་རྗེ་ཁུ་ཚུར་བཅིངས་ལ་གཡས་པས་རང་ལ་དར་དབྱངས་ཀྱི་ཚུལ་དུ་བྱ་སྟེ་འདི་ནི་རྡོ་རྗེ་མགོན་པོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་གཡོན་པས་རང་ལ་དར་དབྱངས་འཆིང་བའི་ཚུལ་དུ་བྱ་སྟེ་འདི་ནི་ལྷ་མོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཅིངས་ནས་གཡོན་པས་བསྙེམས་པར་བྱ་སྟེ་འདི་ནི་རྡོ་རྗེ་རྒྱལ་ཐེབ་རྣམས་དང་དེའི་ལྷ་མོ་རྣམས་ཀྱིའོ། །ཐིག་སྐུད་བཞི་པོའི་བར་མཚམས་སུ་རོལ་མོའི་ཕྱག་རྒྱ་དེ་
བཞིན་དུ་ཤེས་པར་བྱའོ། །སྒེག་མོ་ལ་སོགས་པ་ཡང་རང་གི་ལས་ཀྱི་ཕྱག་རྒྱ་རྣམས་གཟུང་བར་བྱའོ། །ཐིག་སྐུད་ལྔ་པའི་བར་མཚམས་སུ་རྒྱལ་ཐེབ་རྣམས་ཀྱི་ཕྱག་རྒྱ་སྔར་བཤད་པ་ཁོ་ནས་ཤེས་པར་བྱའོ། །གཡོན་པའི་རྡོ་རྗེ་ཁུ་ཚུར་གྱིས་བསྙེམས་པར་བྱས་ནས་གསང་བའི་ཁུ་ཚུར་གྱིས་རྡོ་རྗེ་འོད་མའི་ཡལ་ག་མདུད་པའི་ཚུལ་དུ་བྱ་སྟེ་འདི་ནི་སྒོ་སྲུང་རྣམས་ཀྱིའོ། །རྡོ་རྗེ་ཁུ་ཚུར་གཉིས་ཀྱིས་རྡོ་རྗེ་མདུན་དུ་དྲང་བ་དང་ཕྱིར་དྲང་བའི་ཚུལ་དུ་བྱ་བ་སྟེ་འདི་ནི་ཚོགས་རྣམས་ཀྱིའོ། །གཡོན་པའི་རྡོ་རྗེ་ཁུ་ཚུར་གྱིས་བསྙེམས་པར་བྱས་ལ་གཡས་པས་སྡིགས་མཛུབ་ཀྱི་ཚུལ་དུ་བྱ་སྟེ་འདི་ནི་ཁྲོ་བོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་ཀྱིས་འོད་མའི་ཡལ་ག་འགུགས་པའི་ཚུལ་དུ་བྱ་སྟེ་འདི་ནི་ཕོ་ཉ་རྣམས་ཀྱིའོ། །རྡོ་རྗེ་ཁུ་ཚུར་གཉིས་དྲིལ་བུ་དཀྲོལ་བའི་ཚུལ་དུ་གཟུང་བར་བྱ་སྟེ་འདི་ནི་རྡོ་རྗེ་གནོད་སྦྱིན་རྣམས་ཀྱིའོ། །རྡོ་རྗེ་ཁུ་ཚུར་གཉིས་ཁའི་མཐའ་གཉིས་སུ་གཟུང་བར་བྱ་སྟེ་འདི་ནི་རྡོ་རྗེ་སྲིན་པོ་རྣམས་ཀྱིའོ། །རྡོ་རྗེ་ཁུ་ཚུར་གཉིས་བཀའ་བསྒོ་བའི་ཚུལ་དུ་གཟུང་བར་བྱ་སྟེ་འདི་ནི་མངག་གཞུག་པ་དང་མངག་གཞུག་མ་རྣམས་ཀྱིའོ། །རྡོ་རྗེ་ཁུ་ཚུར་གཉིས་རྡོ་རྗེ་ཁ་ཊྭཱཾ་ག་དང༌། རྡོ་རྗེ་རྩེ་གསུམ་དང༌། རྡོ་རྗེ་ཞགས་པ་དང༌། རྡོ་རྗེ་དབྱུག་པ་དང༌། རྡོ་རྗེ་མདུང་ཐུང་དང༌། རྡོ་རྗེ་མདའ་དང༌། རྡོ་རྗེ་འཁོར་ལོ་འཛིན་པའི་བསམ་པས་བཅིང་བ་བྱ་སྟེ་འདི་རྣམས་ནི་ཚོགས་བརྒྱད་ལས་ཀྱི་ཕྱག་རྒྱ་ཡིན་ནོ། །རྡོ་རྗེ་རྣལ་འབྱོར་གྱི་མཁའ་འགྲོ་མ་རྣམས་ཀྱི་ནི་གར་ལས་བྱུང་བའི་རང་གི་དམ་ཚིག་གི་ཕྱག་རྒྱའོ། །ཁྲོ་བོའི་ངག་གིས་རྡོ་རྗེའི་རིགས་ལ་བཟླས་པ་བྱའོ་ཞེས་བྱ་བ་ཁྲོ་བོའི་མཚན་ཉིད་བསྟན་པར་བྱ་བའི་ཕྱིར། དེ་ནས་ངག་གི་ཕྱག་རྒྱ་ཞེས་བྱ་བ་ལ་སོགས་པ་གསུངས་ཏེ། སྤྲིན་བཞིན་དུ་ཡི་གེ་ཧཱུཾ་གི་སྒྲ་སྒྲོགས་པ་གང་ལ་ཡོད་པ་དེ་ནི་སྤྲིན་གྱི་སྒྲ་སྒྲོགས་པའི་ཡི་གེ་ཧཱུཾ་དང་ལྡན་པའོ། །སྤྲིན་གྱི་སྒྲ་སྒྲོགས་པའི་ཡི་གེ་ཧཱུཾ་དང་ལྡན་པ་ཡང་དེ་ཡིན་ལ་ཕྲ་བའི་སྒྲ་དང་བཅས་པ་ཡང་དེ་ཡིན་པས་ན་སྤྲིན་གྱི་སྒྲ་སྒྲོགས་པའི་ཡི་གེ་ཧཱུཾ་དང་ལྡན་པའི་ཕྲ་མོའི་སྒྲའོ། །དེ་ལྟར་གྱུར་པ་གཅིག་པུར་མ་ཟད་ཀྱི་ཁྲོ་ཞིང་གསལ་བའོ་ཞེས་བྱ་བ་ལ་ཁྲོ་བས་གསལ་བ་སྟེ་ཁྲོ་བོའི་ཉམས་ཀྱིས་ཁྱབ་ཅིང་དེ་དང་ལྡན་པའོ་ཞེས་བྱ་བའི་དོན་ཏོ། །དེ་ལྟར་གྱུར་པའི་ཁྲོ་བོ་ཆེན་པོའི་རྡོ་རྗེའི་ངག་ཡིན་ནོ། །གང་གི་དོན་དུ་ལྡན་པའི་བསམ་པ་གང་གིས་འདི་སྦྱར་བར་བྱ་ཞེ་ན། སྒྲུབ་པའི་དོན་དུ་བསྒྲུབ་པར་
བྱ་བའོ་ཞེས་བྱ་བ་ལ་ཕྱག་རྒྱ་ཆེན་པོ་ལ་སོགས་པ་བ་སྒྲུབ་པའི་ཕྱིར་འདིས་བདག་ཉིད་དང་ཁམས་གསུམ་པའི་རྡོ་རྗེའི་རིགས་ཀྱི་གཟུགས་རྫོགས་པ་བསྒྲུབ་པར་བྱའོ་ཞེས་བྱ་བའི་བསམ་པས་རབ་ཏུ་སྦྱར་བར་བྱ་བ་ཡིན་ནོ། །ད་ནི་ལས་བརྒྱ་སྒྲུབ་པར་བྱེད་པའི་ཕྱག་རྒྱ་རྣམས་ཀྱི་མཚན་ཉིད་བསྟན་པར་བྱ་བའི་ཕྱིར་། དེ་ནས་མ་གྲུབ་ན་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་བཤད་པའི་ཚུལ་གྱིས་སྔོན་དུ་བསྙེན་པ་བྱས་ནས་མཚན་ཐོག་ཐག་བསྒོམས་པས་གང་གི་ཚེ་ཆོས་ཀྱི་ཕྱག་རྒྱ་ལ་སོགས་པ་གྲུབ་པར་མ་གྱུར་ན་དེའི་ཚེ་ཆོས་ཀྱི་ཕྱག་རྒྱ་ལ་སོགས་པ་མ་གྲུབ་པའི་རྗེས་ཐོགས་ཉིད་དུ་སྲེག་པ་ལ་སོགས་པའི་ལས་ཐམས་ཅད་སྒྲུབ་པར་བྱེད་པའི་ཕྱག་རྒྱ་རྣམས་འཆིང་བ་སྟེ་འཆིང་བའི་མཚན་ཉིད་འདི་ཡིན་ནོ་ཞེས་བྱ་བའི་དོན་ཏོ། །སྒྲུབ་པ་ནི་དེ་བཞིན་དུ་ཕྱག་རྒྱ་ཆེན་པོས་ལན་ཅིག་ཏུ་བྱའོ་ཞེས་བྱ་བ་ལ་ཇི་ལྟར་ཆོས་ཀྱི་ཕྱག་རྒྱ་ལ་སོགས་པ་བསྒྲུབ་པའི་ཕྱིར་ཐམས་ཅད་དགུག་པ་དང་མཆོད་པ་ཆེན་པོ་དང་བདག་ལ་བྱིན་གྱིས་བརླབ་པ་ལ་སོགས་པ་སྒྲུབ་པ་སྔོན་དུ་འགྲོ་བའི་ཕྱག་རྒྱ་ཆེན་པོས་བདག་ལ་བྱིན་གྱིས་བརླབ་པའི་སྒྲུབ་པ་གཅིག་པུ་ལན་ཅིག་བསྟན་བ་དེ་བཞིན་དུ་ཐམས་ཅད་སྲེག་པ་ལ་སོགས་པའི་ལས་སྒྲུབ་པ་འདིར་ཡང་ཤེས་པར་བྱའོ། །ལས་ལ་ངེས་པར་སྦྱར་བ་ནི་ཁྲོ་གཉེར་གྱིས་སོ་ཞེས་བྱ་བ་ལ། འདིར་ཡི་གེ་ཧི་ནི་ཁྲོ་གཉེར་ཏེ་དེ་དང་བཅས་པས་ལས་ཐམས་ཅད་སྒྲུབ་པར་བྱེད་པའོ། །ཕྱག་རྒྱ་རྣམས་ལ་ངེས་པར་སྦྱར་བར་བྱའོ། །འདི་ལྟར་བཤད་པར་འགྱུར་ཏེ། བདག་ལ་བྱིན་གྱིས་བརླབ་པ་ལ་སོགས་པ་དང་ཕྱག་རྒྱ་བཞིན་བྱས་ནས་ཁྲོ་གཉེར་གྱིས་ཀྱང་དགོད་པ་བཅས་པས་ཕྱག་བྱས་ཏེ་ལས་གྲུབ་པར་བྱེད་པའི་ཕྱག་རྒྱ་བཅིངས་ཏེ་ཧི་ཧཱུཾ་ཞེས་བྱ་བ་བཟླས་ཞིང་ལས་ཐམས་ཅད་བསྒྲུབ་པར་བྱ་སྟེ། དེ་ལྟར་ན་ལས་ཐམས་ཅད་ལ་ངེས་པར་སྦྱོར་བ་ཁྲོ་གཉེར་གྱིས་གྲུབ་པ་ཡིན་ནོ། །རྡོ་རྗེ་ཧཱུཾ་མཛད་ལས་བྱུང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ལས་སྒྲུབ་པར་བྱེད་པའི་ཕྱག་རྒྱ་བཅིང་བར་བྱ་སྟེ་དེ་ལྟར་ན་རྡོ་རྗེ་ཧཱུཾ་མཛད་ལས་བྱུང་བ་དེ་ཡིན་ནོ། །ཇི་ལྟར་ཞེ་ན། སྐེ་ཚེ་དང་བཅས་པའི་ཏིལ་མར་ལ་སོགས་པའི་སྦྱིན་སྲེག་ནི་གཡས་པས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱས་གཡས་པའི་རྡོ་རྗེ་ཁུ་ཚུར་གྱིས་བླུགས་གཟར་བླངས་ཏེ། དེས་སྐེ་ཚེ་དང་བཅས་
པའི་ཏིལ་མར་ལ་ཞི་བའི་སྦྱིན་སྲེག་བྱ་སྟེ་དེ་ལྟར་ན་ཐམས་ཅད་སྲེག་པར་འགྱུར་རོ། །དེ་ཉིད་ཀྱིས་གཏང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བསྒྲུབ་པར་བྱ་བ་བསྐྲད་པའི་བསམ་པས་སྡིགས་མཛུབ་ཀྱིས་གཏད་པར་བྱ་སྟེ་དེ་ལྟར་ན་ཐམས་ཅད་བསྐྲད་པའོ། །དེ་ཉིད་ཀྱིས་ཐམས་ཅད་འཆིང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོས་བསྒྲུབ་བྱའི་གདོང་བཅིང་བར་བྱ་སྟེ་དེ་ལྟར་ན་ཐམས་ཅད་རྨུགས་པར་བྱེད་པར་འགྱུར་རོ། །གཡོ་བ་མེད་པ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱས་བསྒྲུབ་བྱ་གཡོ་བ་མེད་པར་བསམ་པར་བྱ་སྟེ། དེ་ལྟར་ན་ཐམས་ཅད་རངས་པའོ། །གཉིས་ལོག་པ་སྟོན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མིག་གཉིས་བཙུམ་པར་བྱ་སྟེ་དེ་ལྟར་ན་ཐམས་ཅད་གཉིད་ལོག་ཏུ་འཇུག་པའོ། །ཁྲོ་བོའི་རྡོ་རྗེའི་ལྟ་བས་སྡིགས་མཛུབ་པོ་ཞེས་བྱ་བ་ལ་ཁྲོ་བོའི་ལྟ་བས་བསྒྲུབ་བྱ་ལ་བལྟ་ཞིང་རྡོ་རྗེ་ཧཱུཾ་མཛད་ཀྱི་ཕྱག་རྒྱས་སྡིགས་མཛུབ་བྱ་སྟེ་དེ་ལྟར་ན་ཐམས་ཅད་ལ་རྒྱས་བཏབ་པའོ། །ཕྱག་རྒྱ་གློད་པར་འགྱུར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གློད་པར་བྱ་སྟེ་དེ་ལྟར་ན་ཐམས་ཅད་རྨོངས་པར་འགྱུར་བའོ། །མཛུབ་མོ་གཉིས་ཡང་དག་པར་སྦྱར་ནས་ཕྱེ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཕན་ཚུངས་བྱར་བར་བྱས་ལ་སོ་སོར་ཕྱེ་བར་བྱ་སྟེ་དེ་ལྟར་ན་ཐམས་ཅད་འཇོམས་པའོ། །དེ་དག་ཉིད་ཡིས་སྡུག་འཆིང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱི་ལུ་གུ་རྒྱུད་བཅིངས་པར་བྱ་སྟེ་དེ་ལྟར་ན་ཐམས་ཅད་འཆིང་བའོ། །འཆིང་བས་བཙིར་བའོ་ཞེས་བྱ་བ་ནི་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱིས་ལུ་གུ་རྒྱུད་བཅིངས་ནས་བཙིར་བར་བྱ་སྟེ་དེ་ལྟར་ན་ཐམས་ཅད་བཙིར་བའོ། །དེ་ནས་དྲལ་བར་བྱའོ་ཞེས་བྱ་བ་ལ་འདས་མ་ཐག་པའི་ལུ་གུ་རྒྱུད་བཅིངས་པར་བྱས་ལ་མཛུབ་མོ་གཉིས་བཅིངས་ལ་དྲལ་བར་བྱ་སྟེ་དེ་ལྟར་ན་ཐམས་ཅད་དྲལ་བའོ། །གཡས་པས་རྡེག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་གཡས་པའི་མཛུབ་མོས་གཡོན་པའི་མཛུབ་མོ་ལ་བརྡེག་པར་བྱ་སྟེ་དེ་ལྟར་ན་ཐམས་ཅད་གསོད་པའོ། །མཛུབ་མོ་གཉིས་ཀྱིས་འབར་བའི་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱིས་གྱེན་དུ་འབར་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་འབར་བའོ། །གཡས་པའི་མཛུབ་མོ་དབུས་མ་
ལྟུང་པའི་ཚུལ་ལོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་གཡས་པའི་མཛུབ་མོ་ལ་གཡོན་པའི་དབུས་མའི་སོར་མོ་བསྒྲེང་བ་བསྒྲུབ་བྱ་ལྟུང་བའི་ཚུལ་གྱིས་དབབ་པར་བྱ་སྟེ་དེ་ལྟར་ན་ཐམས་ཅད་ལྟུང་དུ་འཇུག་པའོ། །མཛུབ་མོ་གཉིས་ཀྱིས་མེར་བྱེད་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱིས་འབར་བའི་ཚུལ་བསྟན་པར་བྱ་སྟེ་དེ་ལྟར་ན་ཐམས་ཅད་འཚོད་པའོ། །གཅོད་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱ་གཅོད་པའི་ཚུལ་དུ་སྦྱར་བར་བྱ་སྟེ་དེ་ལྟར་ན་ཐམས་ཅད་གཅོད་པའོ། །མཛུབ་མོ་གཉིས་ཀྱི་སེན་མོ་སྦྱར་བའི་རྩེ་མོས་གཅོད་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་སེན་མོ་གཉིས་ཀྱིས་ཕན་ཚུན་སེན་མོ་ཡང་དག་པར་སྦྱར་བའི་རྩེ་མོར་བྱས་ལ་དེས་བསྒྲུབ་བྱ་རྣམས་དྲལ་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་དྲལ་བར་འགྱུར་རོ། །ལག་པ་གཉིས་དྲག་ཏུ་མཉེ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ལག་པ་གཉིས་ཕན་ཚུན་དུ་དྲག་ཏུ་མཉེ་བར་བྱ་སྟེ་དེ་ལྟར་ན་ཐམས་ཅད་ཕྱེ་མར་འགྱུར་རོ། །ཐམས་ཅད་དུ་སོར་མོ་ཐམས་ཅད་དོར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ཏེ་ཕྱོགས་བཅུར་སོར་མོ་ཐམས་ཅད་དོར་བར་བྱ་སྟེ་དེ་ལྟར་ན་ཐམས་ཅད་དོར་བར་འགྱུར་རོ། །ཅིག་ཅང་དུ་ཕྱག་རྒྱ་དགྲོལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་མྱུར་བ་ཉིད་དུ་དགྲོལ་བར་བྱས། ཏེ་དེ་ལྟར་ན་ཐམས་ཅད་རྣམ་པར་འཇོམས་པར་འགྱུར་རོ། །དྲང་ཞིང་གཡོ་བས་སྡིགས་མཛུབ་པོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གང་ཞིག་གཡོ་བའི་ཚུལ་གྱིས་བདག་ཉིད་འདར་བར་བྱ་ཞིང་བསྒྲུབ་བྱ་ལ་སྡིགས་མཛུབ་བྱ་སྟེ་དེ་ལྟར་ན་རིམས་ཐམས་ཅད་ཀྱིས་བསྒྲུབ་བྱ་འཛིན་དུ་གཞུག་པའོ། །གཡས་པའི་མཛུབ་མོའི་གདེངས་ཀ་བསྐྱོད་པས་སྡིགས་མཛུབ་མོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་གཡས་པའི་མཛུབ་མོས་ཀླུ་ལྟོ་འཕྱེའི་ཚུལ་དུ་བྱས་ལ་དེའི་བསྒྲུབ་བྱ་ལ་སྡིགས་མཛུབ་བྱ་སྟེ་དེ་ལྟར་ན་དུག་ཐམས་ཅད་ཀྱིས་བསྒྲུབ་བྱ་ཟིན་པར་འགྱུར་རོ། །གཡས་པའི་མཛུབ་མོ་མཆེ་བས་བཟུང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་གཡས་པའི་མཛུབ་མོ་སོ་རྣམས་ཀྱིས་གཟུང་བར་བྱ་སྟེ། དེ་ལྟར་ན་བསྒྲུབ་བྱ་གདོན་གྱིས་འཛིན་དུ་གཞུག་པ་ཡིན་ནོ། །དུ་བ་དང་དགོད་པ་དང་རྨུགས་པ་ལ་སོགས་པ་བསྟན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་དུ་བ་དང་དགོད་
བ་དང་རྨུགས་པ་ལ་སོགས་པ་བདག་ཉིད་ཀྱིས་བསྟན་པར་བྱ་སྟེ་དེ་ལྟར་ན་བསྒྲུབ་བྱ་སྨྱོ་བར་བྱེད་པ་ཡིན་ནོ། །མཛུབ་མོ་གཉིས་ཀྱིས་སེ་གོལ་རྡེབ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་མཛུབ་མོ་གཉིས་ཀྱིས་ཕན་ཚུན་དུ་སེ་གོལ་གྱི་སྒྲ་བྱུང་ཞིང་བསྒྲུབ་བྱ་ལ་བརྡེག་པར་བྱ་སྟེ་དེ་ལྟར་ན་ཐམས་ཅད་གསོད་པར་འགྱུར་རོ། །གཡོན་པའི་སྟེང་དུ་གཡས་པ་ཉེ་བར་གཞག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་གཡོན་པའི་སྡིགས་མཛུབ་དང་ཟུར་དུ་བཞག་སྟེ་དེའི་སྟེང་དུ་གཡས་པའི་མཛུབ་མོ་གཉིས་གཞག་པར་བྱ་སྟེ། དེ་ལྟར་ན་ལངས་པ་ཐམས་ཅད་ཉེ་བར་འདུག་པར་འགྱུར་རོ། །ས་ལ་རབ་ཏུ་གཞག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ས་ལ་རབ་ཏུ་གཞག་པར་བྱ་སྟེ་དེ་ལྟར་ན་ཐམས་ཅད་འཁོར་བར་འགྱུར་རོ། །བསྐྱོད་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བསྒྲུབ་བྱ་གཡོ་བའི་བསམ་པས་བསྐྱོད་པར་བྱ་སྟེ་དེ་ལྟར་ན་ཐམས་ཅད་གཡོ་བར་འགྱུར་རོ། །ས་ལ་རབ་ཏུ་གཞག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་རང་གི་གར་བྱ་སྟེ་དེ་ལྟར་ན་ཐམས་ཅད་དག་བྱེད་དུ་འཇུག་པ་ཡིན་ནོ། །འབྱིན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཁའི་ཕྱོགས་ལས་གྱེན་དུ་དྲང་བར་བྱ་སྟེ་དེ་ལྟར་ན་ཐམས་ཅད་གླུ་ལེན་དུ་འཇུག་པར་འགྱུར་རོ། །བརླབ་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཆུ་བོའི་ཚོགས་ཆེན་པོ་བསྐྱོད་པའི་ཚུལ་དུ་བརླབ་པར་བྱ་སྟེ་དེ་ལྟར་ན་ཐམས་ཅད་བརྩེར་གཞུག་པ་ཡིན་ནོ། །ཐམས་ཅད་བརླབ་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཕྱོགས་བཞི་རུ་ཆུའི་ཚོགས་བསྐྱེད་པའི་ཚུལ་དུ་བརླབ་པར་བྱ་སྟེ། དེ་ལྟར་ན་ཐམས་ཅད་རོལ་དུ་བཅུག་པར་འགྱུར་རོ། །ཧ་ཧར་དགོད་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཧ་ཧར་དགོད་པར་བྱ་སྟེ་དེ་ལྟར་ན་ཧ་ཧར་དགོད་པར་བྱེད་དུ་བཅུག་པར་འགྱུར་རོ། །བསྐོར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བསྐོར་བར་བྱ་སྟེ་དེ་ལྟར་ན་ཐམས་ཅད་བསྐོར་དུ་བཅུག་པའོ། །དགུག་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་དགུག་པར་བྱ་སྟེ་དེ་ལྟར་ན་ཐམས་ཅད་འགུགས་པར་འགྱུར་རོ། །དྲང་བར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མདུན་དུ་དེ་དྲང་བར་བྱ་སྟེ་དེ་ལྟར་ན་འདྲེན་པའོ། །གཏང་བར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་མདུན་དུ་དྲང་བར་བྱ་སྟེ་དེ་ལྟར་ན་ཐམས་ཅད་གཏད་
བར་འགྱུར་རོ། །ཡོངས་སུ་བསྐོར་ནས་ནུབ་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཡོངས་སུ་བསྐོར་ནས་ནུབ་པའི་ཚུལ་དུ་གཟུང་བར་བྱ་སྟེ་དེ་ལྟར་ན་ཐམས་ཅད་ནུབ་པར་འགྱུར་རོ། །དེ་ནས་དོར་བར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་གྱེན་དུ་དྲང་བར་བྱ་སྟེ་དེ་ལྟར་ན་ཐམས་ཅད་གྱེན་དུ་འབྱུང་བར་འགྱུར་རོ། །མྱུར་དུ་དོར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་མྱུར་དུ་དོར་བར་བྱ་སྟེ་དེ་ལྟར་ན་ཐམས་ཅད་དོར་བའོ། །དེ་བཞིན་དུ་ཀུན་ནས་འདྲེན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་མྱུར་དུ་དྲང་བར་བྱ་སྟེ་དེ་ལྟར་ན་ཐམས་ཅད་གྱེན་དུ་འདྲེན་པར་འགྱུར་རོ། །དེ་བཞིན་དུ་གྱེན་དུ་དྲང་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཟུར་དུ་དྲང་བར་བྱ་སྟེ་དེ་ལྟར་ན་ཐམས་ཅད་གྱེན་དུ་དྲང་བར་འགྱུར་རོ། །རང་གིས་ངོར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་རང་ཉིད་ཀྱིས་ང་རོ་བྱ་སྟེ་དེ་ལྟར་ན་ཐམས་ཅད་ཀྱིས་ང་རོ་འདོན་པར་བྱེད་པའོ། །དུ་བར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་རང་གིས་དུ་བར་བྱ་སྟེ་དེ་ལྟར་ན་ཐམས་ཅད་དུ་བའོ། །བདག་ཉིད་ལ་བརྡེག་པར་བྱ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བདག་ཉིད་ལ་བརྡེག་པར་བྱ་སྟེ་དེ་ལྟར་ན་བསྒྲུབ་བྱ་ཐམས་ཅད་ཀྱིས་བདག་ཉིད་ལ་བརྡེག་པའོ། །སྙིང་གར་བརྡེག་པར་སྦྱིན་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་དེས་རང་གི་སྙིང་གར་བརྡེག་པར་བྱ་སྟེ་དེ་ལྟར་ན་ཐམས་ཅད་གསོད་པའོ། །རང་ཉིད་ཀྱིས་རང་གི་སྒྲ་འདོན་པར་བྱའོ་ཞེས་བྱ་བ་ལ་གཞན་གྱི་སྒྲ་ཡང་རང་ཉིད་ཀྱིས་འདོན་པ་ཡིན་པས་དེ་རྣམ་པར་གཅད་པར་བྱ་བའི་ཕྱིར་རང་ཉིད་འདོན་ཞེས་བྱ་བ་འདིས་འདི་ལྟར་འཆད་པར་འགྱུར་ཏེ་རྡོ་རྗེ་ཧཱུཾ་མཛད་ཀྱི་བར་གྱི་སྒྲ་འདོན་པར་བྱ་སྟེ་དེ་ལྟར་ན་ཐམས་ཅད་བསྒྲུབ་བྱ་སྒྲ་འདོན་པར་བྱེད་པ་ཡིན་ནོ། །སྡང་བ་བསྡམས་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡིད་ཀྱིས་བསྒྲུབ་བྱ་དབྲལ་བར་བྱ་སྟེ་དེ་ལྟར་ན་རྣམ་པར་སྡང་བའོ། །རང་གི་གོས་སྟོད་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱིས་རང་གི་གོས་སྟོད་པར་བྱ་སྟེ་དེ་ལྟར་ན་གོས་སྟོད་པའོ།། ཁྲོ་བོ་དེ་བཞིན་དུ་འབར་བ་བསྟན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཁྲོ་ཞིང་རབ་ཏུ་གཡོ་བས་མཛུབ་མོ་གཉིས་ཀྱིས་གྱེན་དུ་འབར་བ་སྐྱེད་པའི་ཚུལ་དུ་བྱ་སྟེ་དེ་ལྟར་ན་ཁྲོ་བ་འབར་བར་འགྱུར་རོ། །གཡས་པའི་མཛུབ་མོའི་ལྕགས་ཀྱུའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་གཡས་པའི་མཛུབ་
མོ་ལྕགས་ཀྱུའི་རྣམ་པར་བྱ་སྟེ་འདིས་ཐམས་ཅད་འགུགས་པར་འགྱུར་རོ། །དེ་ཉིད་ཀྱིས་རབ་ཏུ་གཞུག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱིས་བསྒྲུབ་བྱ་རབ་ཏུ་གཞུག་པའི་ཚུལ་དུ་བྱ་སྟེ་དེ་ལྟར་ན་ཐམས་ཅད་རབ་ཏུ་གཞུག་པར་འགྱུར་རོ། །གཡས་པའི་སེ་གོལ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་གཡས་པའི་སྡིགས་མཛུབ་དང་མཐེ་བོང་དག་གིས་སེ་གོལ་གྱི་སྒྲ་བྱ་སྟེ་དེ་ལྟར་ན་ཐམས་ཅད་འབེབས་པའོ། །གཡོན་པའི་སེ་གོལ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱས་གཡོན་པའི་སྡིགས་མཛུབ་དང་མཐེ་བོང་དག་གིས་སེ་གོལ་གྱི་སྒྲ་བྱ་སྟེ་དེ་ལྟར་ན་པྲ་དབབ་པ་ཐམས་ཅད་བསྒྲུབ་པའོ། །ལྕེ་རེག་པ་ནི་མཛུབ་མོ་གཉིས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱིས་ལྕེ་ལ་རེག་པར་བྱ་སྟེ་དེ་ལྟར་ན་ཐམས་ཅད་སྨྲ་བར་འགྱུར་རོ། །ཡན་ལག་ལ་སྤུ་གཡས་སུ་འཁྱིལ་བ་བསྐོར་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གཡས་སུ་འཁྱིལ་པའི་བ་སྤུ་སྟོན་པའི་ཚུལ་དུ་ཡན་ལག་ཐམས་ཅད་བསྐོར་བར་བྱ་སྟེ་དེ་ལྟར་ན་སྒྱུ་མ་ཐམས་ཅད་སྟོན་པར་འགྱུར་རོ། །ལྷུང་དུ་གཞུག་པ་ལ་སོགས་པ་བྱེད་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱིས་ལྷུང་དུ་གཞུག་པ་དང་སློང་བར་བྱེད་པའི་ཚུལ་སྟོན་པར་བྱེད་དེ་དེ་ལྟར་ན་ཐམས་ཅད་སོ་སོར་སྟོན་པ་མཐོང་བའོ། །དུས་བསྒོམ་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་དུས་ཀྱི་འཁོར་ལོ་ཡོངས་སུ་བསྐོར་བར་བྱ་སྟེ་དེ་ལྟར་ན་དུས་ཀྱི་འཁོར་ལོ་ཡོངས་སུ་བསྐོར་བའོ། །ཁྲོ་བོའི་ལྟ་བས་ཤིང་དྲུང་རྣམས་ལ་ཡིད་ཀྱིས་འདོད་པའོ་ཞེས་བྱ་བ་རྣམས་ལ་རྡོ་རྗེ་ཧཱུཾ་མཛད་བཅིངས་ནས་ཁྲོ་བའི་ལྟ་བ་བསྐྱེད་ནས་དེས་ཤིང་དྲུང་རྣམས་ཀྱི་འདབ་དང་མེ་ཏོག་དང་འབྲས་བུ་དང་ཅི་འདོད་པའི་ཤིང་དྲུང་དེ་དག་མཐོང་ཞིང་བསྟན་པའོ། །དེ་བཞིན་དུ་ས་ལ་བལྟ་བ་ནི་རྡོ་རྗེ་ཧཱུཾ་མཛད་བཅིངས་ནས་ཁྲོ་བོའི་ལྟ་བས་ས་ལ་བལྟ་ཞིང་ས་ལ་བཞག་སྟེ་འབྲུ་ཐམས་ཅད་སྐྱེ་བར་བསྒོམ་པར་བྱ་སྟེ་དེ་ལྟར་ན་འབྲུ་ཐམས་ཅད་སྟོན་པར་བྱེད་པའོ། །ལྟ་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བྱམས་པའི་ལྟ་བ་བྱ་སྟེ་དེས་བསྒྲུབ་བྱ་ལ་བལྟ་ཞིང་རིམས་དང་བྲལ་བར་བྱེད་པའོ། །སྨིན་མ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་སྨིན་མ་འགྱུ་བས་འཕྲོག་པར་བྱ་སྟེ་དེ་ལྟར་ན་སྦྱར་བའི་དུག་ཐམས་ཅད་དང་བྲལ་བར་བྱེད་དོ། །སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་སོ་བསྟན་པར་བྱ་སྟེ་དེ་ལྟར་ན་གདོན་ཐམས་ཅད་
ལས་གྲོལ་བར་འགྱུར་རོ། །ཕུ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡི་གེ་ཕུ་བརྗེད་པར་བྱ་སྟེ་དེ་ལྟར་ན་དུག་ཐམས་ཅད་ལས་ཐར་པའོ། །ཕྱག་རྒྱས་བརྡེག་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་མཁའ་འགྲོ་མས་བཟུང་བ་ལ་བརྡེག་པར་བྱ་སྟེ་དེ་ལྟར་ན་མཁའ་འགྲོ་མ་ཐམས་ཅད་ཀྱིས་བཟུང་བ་དགྲོལ་བའོ། །རྒྱལ་མཚན་བསྒྲེང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་རྒྱལ་མཚན་བསྒྲེང་བའི་ཚུལ་གྱིས་གྱེན་དུ་གཟུང་བར་བྱ་སྟེ་དེ་ལྟར་ན་འཐབ་མོ་ཐམས་ཅད་ལས་ཐར་པའོ། །འཇགས་བྱེད་ཀྱི་ལྟ་བ་ཁྲོ་བ་དང་བཅས་པས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཁྲོ་བ་དང་བཅས་པའི་འཇིགས་བྱེད་ཀྱི་ལྟ་བས་གཞན་གྱི་དཔུང་ལ་བལྟ་ཞིང་བཟླས་པར་བྱ་སྟེ་དེ་ལྟར་ན་གཞན་གྱི་དཔུང་ཐམས་ཅད་འཇོམས་པར་འགྱུར་རོ། །འཛུམ་པ་མེད་པས་བལྟའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་འཛུམ་པ་མེད་པའི་ལྟ་བས་བལྟ་ཞིང་བཟླ་བར་བྱ་སྟེ་དེ་ལྟར་ན་མཚམས་བཅིང་བར་འགྱུར་རོ། །དེ་བཞིན་དུ་འབར་བས་འཆིང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་སྙིང་ག་ལས་རྡོ་རྗེ་འབར་བ་སྤྲོ་སྟེ་དེས་ཕྱོགས་བཅིང་བར་བྱ་སྟེ་དེ་ལྟར་ན་ཕྱོགས་ཐམས་ཅད་བཅིང་བར་འགྱུར་རོ། །ཕྱག་རྒྱ་བསྐོར་བར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བསྐོར་བར་བྱ་སྟེ་དེ་ལྟར་ན་དཀྱིལ་འཁོར་བཅིང་བར་འགྱུར་རོ། །གཙུག་ཏོར་ལས་མཛུབ་མོའི་རྡོ་རྗེ་ཞགས་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བའི་རྩེ་མོ་བྱ་སྟེ། ཡོངས་སུ་བསྐོར་ལ་གཙུག་ཏོར་དུ་མཛུབ་མོ་གཉིས་ཀྱིས་གཟུང་བར་བྱ་སྟེ་དེ་ལྟར་ན་ཤིན་ཏུ་བསྲུང་པར་འགྱུར་རོ། །དེ་བཞིན་དུ་སྙིང་གར་རོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ནས་རང་གི་སྙིང་གར་གཟུང་བར་བྱ་སྟེ་དེ་ལྟར་ན་ཡོངས་སུ་སྐྱོང་བར་བྱེད་པར་འགྱུར་རོ། །རྡོ་རྗེ་དགྲོལ་བའོ་ཞེས་བྱ་བ་ལ་འདས་མ་ཐག་ཏུ་བཤད་པའི་ཕྱག་རྒྱ་རང་གི་སྙིང་གར་དགྲོལ་བར་བྱ་སྟེ་དེ་ལྟར་ཐམས་ཅད་དགྲོལ་བར་འགྱུར་རོ། །ཕྱག་རྒྱ་ཟུར་དུ་བསླང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཟུར་དུ་གཞག་ལ་བསླང་བར་བྱ་སྟེ་དེ་ལྟར་ན་ཐམས་ཅད་བསླང་བར་འགྱུར་རོ། །མཛུབ་མོའི་རྩེ་མོ་བརྟན་པར་སྦྱར་ལ་བྱའོ་ཞེས་བྱ་བ་ལ་
རྡོ་རྗེ་ཧཱུཾ་མཛད་ཀྱི་ཕྱག་རྒྱའི་མཛུབ་མོ་གཉིས་ཀྱི་རྩེ་མོ་ཕན་ཚུན་དུ་ཡང་དག་པར་སྦྱར་བར་བྱ་སྟེ་དེ་ལྟར་ན་ཐམས་ཅད་དབང་དུ་བྱེད་པར་འགྱུར་རོ། །ལྟ་བ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱི་ཁྲོ་བའི་ལྟ་བས་བལྟ་ཞིང་ལས་བྱའོ། །ཅི་ལྟར་ཞེ་ན། སྟེང་ནས་འོག་ཏུ་ལྟུང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཁྲོ་བོའི་ལྟ་བས་བལྟ་ཞིང་སྟེང་གི་ཕྱོགས་ནས་འོག་ཏུ་ལྟུང་བའི་ཚུལ་དུ་བྱ་སྟེ་དེ་ལྟར་ན་ལྷ་ཐམས་ཅད་ལྟུང་བར་འགྱུར་རོ། །འོག་ནས་སྟེང་དུ་འདྲེན་པའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ལྟ་བ་དང་བཅས་པ་དེ་ཉིད་ཀྱིས་འོག་ནས་གྱེན་དུ་དྲང་བའི་ཚུལ་དུ་བྱ་སྟེ་དེ་ལྟར་ན་ཀླུ་ཐམས་ཅད་སྟོན་པར་འགྱུར་རོ། །ཡི་གེ་ཧཱུཾ་ཁྲོས་པའོ་ཞེས་བྱ་བ་ལ་ལྟ་བ་དེ་ཉིད་ཀྱིས་བལྟ་ཞིང་རྡོ་རྗེ་ཧཱུཾ་མཛད་བཅིངས་ཏེ་ཁྲོས་པས་ཡི་གེ་ཧཱུཾ་བཟླ་བར་བྱ་སྟེ་དེ་ལྟར་ན་གནོད་སྦྱིན་ཐམས་ཅད་རྗེས་སུ་འབྲང་བར་བྱེད་པའོ། །འཇིགས་བྱེད་ལྟ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་འཇིགས་བྱེད་ཀྱི་ལྟ་བས་བལྟ་ཞིང་བཟླ་བར་བྱ་སྟེ་དེ་ལྟར་ན་སྲིན་པོ་ཐམས་ཅད་འཇིགས་སུ་གཞུག་གོ །རྡོ་རྗེ་ཁ་ཊྭཱཾ་ག་དྲལ་བ་ཁྲོ་བོས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཁྲོ་བོའི་ལྟ་བས་འབར་བའི་རྡོ་རྗེ་རྣམས་ཁ་ཊྭཱཾ་གའི་སྟེང་དུ་ཡིད་ཀྱིས་དབབ་པར་བྱ་སྟེ། དེ་ལྟར་ནག་པོ་ཆེན་པོའི་རྡོ་རྗེ་ཁ་ཊྭཱཾ་ག་དྲལ་བས་མཁའ་འགྲོ་མ་ལ་སོགས་པའི་གདོན་ཐམས་ཅད་ཞི་བར་འགྱུར་རོ། །སྙིང་གར་རྡོ་རྗེ་བསྒོམས་པའོ། །ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་རང་གི་སྙིང་གར་རྡོ་རྗེ་འབར་བ་བསྒོམ་པར་བྱ་སྟེ་དེ་ལྟར་ན་བདུད་ཀྱི་དཔུང་ཐམས་ཅད་འཇོམས་པར་འགྱུར་རོ། །རྡོ་རྗེ་རྩེ་གསུམ་དྲལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡིད་ཀྱིས་རྩེ་གསུམ་དྲལ་བར་བྱ་སྟེ་དེ་ལྟར་ན་མ་མོ་ཐམས་ཅད་ཞི་བར་འགྱུར་རོ། །གདུག་པའི་དཀྱིལ་འཁོར་གཞིག་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་བཟླ་བར་བྱ་སྟེ་དེ་ལྟར་ན་གདུག་པ་ཐམས་ཅད་ཀྱི་དཀྱིལ་འཁོར་གཏོར་བར་འགྱུར་རོ། །ཡི་གེ་ཧཱུཾ་གིས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡི་གེ་ཧཱུཾ་བཟླ་བར་བྱ་སྟེ་དེ་ལྟར་ན་གདུག་པ་ཅན་ཐམས་ཅད་ཚར་གཅོད་པར་འགྱུར་རོ། །ཧི་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡི་གེ་ཧི་བཟླ་བར་བྱ་སྟེ་དེ་ལྟར་ན་ཐམས་ཅད་འདུལ་བར་འགྱུར་རོ། །གཡས་པས་དབུགས་དབྱུང་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་
བཅིངས་ནས་གཡས་ཕྱོགས་སུ་མི་འཇིགས་པ་སྦྱིན་པའི་ཚུལ་དུ་གཟུང་བར་བྱ་སྟེ་དེ་ལྟར་ན་འཇིགས་པ་མེད་པར་འགྱུར་རོ། །དེ་ཉིད་ཀྱིས་དོད་ཙེ་སྩོལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་ཀྱིས་དོང་ཙེ་སྩོལ་བའི་ཚུལ་བྱ་སྟེ་དེ་ལྟར་ན་ནོར་བུ་བཟང་པོ་དབང་དུ་བྱེད་དོ། །ཁྲོ་བོའི་ལྟ་བས་དེ་བཞིན་དུ་བྱེད་དོ་ཞེས་བྱ་བ་ལ་ཇི་ལྟར་དོང་ཙེ་སྩོལ་བའི་ཚུལ་གྱིས་ནོར་བུ་བཟང་པོ་དབང་དུ་བྱེད་པར་འགྱུར་བ་དེ་བཞིན་དུ་ཧཱུཾ་མཛད་བཅིངས་ནས་ཁྲོ་བོའི་ལྟ་བས་ནོར་སྦྱིན་གྱི་གཟུགས་བརྙན་ལ་བལྟ་ཞིང་བཟླ་བར་བྱ་སྟེ་དེ་ལྟར་ན་གནོད་སྦྱིན་གྱི་ནོར་ཐམས་ཅད་འཕྲོག་པར་འགྱུར་རོ། །རྡོ་རྗེ་ཁུ་ཚུར་གཡས་པས་མནན་ཏེ་གཡོན་པའི་སོར་མོ་རྣམས་ཀྱིས་བཟུང་ནས་དགུག་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གཡོན་པའི་རྡོ་རྗེ་ཁུ་ཚུར་ཟུར་དུ་བཞག་སྟེ་གཡས་པའི་ཁྲོ་བོའི་ཁུ་ཚུར་གྱིས་བཟུང་ལ་ལུ་གུ་རྒྱུད་བཅིངས་པ་མ་བཀྲོལ་ཞིང་གཡོན་པའི་མཛུབ་མོ་རྣམས་ཀྱིས་གཟུང་བར་བྱས་ལ་དགུག་པར་བྱ་སྟེ་དེ་ལྟར་ན་རྣམ་པར་འཕྲུལ་པའི་གཟུགས་བརྙན་གནས་པས་དཔལ་ཐམས་ཅད་འདྲེན་པར་འགྱུར་རོ། །དོང་ཙེ་སྩོལ་བ་ནི་གཉིས་ཀྱིས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མཛུབ་མོ་གཉིས་ཀྱིས་དོང་ཙེ་སྩོལ་བའི་ཚུལ་བསྟན་ཏེ་དེ་ལྟར་ན་ལྷའི་བུ་མོ་ཐམས་ཅད་འཕྲོག་པར་འགྱུར་རོ། །གཡོན་པའི་དྲིལ་བུ་དྲལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གཞོན་ནུ་མའི་ལག་པ་གཡོན་པ་ལ་གནས་པའི་དྲིལ་བུ་ཡིད་ཀྱིས་དྲལ་བར་བྱ་ཞིང་གཞོན་ནུ་མ་དང་ལྷན་ཅིག་ཏུ་ཡང་དག་པར་སྦྱོར་བས་བསམ་པར་བྱ་སྟེ་དེ་ལྟར་ན་གཞོན་ནུ་མ་དང་རོལ་པར་འགྱུར་རོ། །དེ་བཞིན་རྡོ་རྗེ་ཧཱུཾ་མཛད་ཀྱི་གཡས་པའི་ཁུ་ཚུར་གཡོན་པའི་རྡོ་རྗེ་ཁྲོ་བོས་མནན་ཏེ་མཐེའུ་ཆུང་གི་གདུ་བུ་བཀྲོལ་བའི་རྡོ་རྗེ་ཁུ་ཚུར་གྱིས་འཕྲོག་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གཡས་པའི་མཛུབ་མོའི་རྩེ་མོ་རང་གི་མཐེ་བོང་གི་སྟེང་དུ་བཞག་ནས་ཐུར་དུ་བསྟན་ལ་གཡོན་པའི་མཛུབ་མོས་མནན་ཏེ་མཐེའུ་ཆུང་གི་ལུ་གུ་རྒྱུད་བཀྲོལ་བས་འཕྲོག་པར་བྱ་སྟེ་དེ་ལྟར་ན་རྐང་པ་གཡོན་པ་བརྒྱ་བྱིན་གྱི་གཟུགས་བརྙན་མནན་ན་ཤ་ཙི་འཕྲོག་པར་འགྱུར་རོ། །གཡས་པའི་དྲིལ་བུ་དྲལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་གཞོན་ནུ་མའི་ལག་པ་གཡས་པ་ལ་གནས་པའི་དྲིལ་བུ་ཡིད་ཀྱིས་དྲལ་
བར་བྱ་སྟེ་དེ་ལྟར་ན་གཞོན་ནུ་རྣམ་པར་སྤྱོད་པར་འགྱུར་རོ། །ཆགས་པ་དྲལ་བས་ལྟུང་བ་ནི་ཡིད་ཀྱིས་སོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་སེམས་ཀྱིས་ལྟུང་བར་བྱ་སྟེ་དེ་ལྟར་ན་ཚངས་པ་ལྟུང་དུ་བཅུག་པར་འགྱུར་རོ། །འཁོར་ལོ་དྲལ་བའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་ཡིད་ཀྱིས་ཁྱབ་འཇུག་གི་འཁོར་ལོ་དྲལ་བར་བྱ་སྟེ་དེ་ལྟར་ན་ཁྱབ་འཇུག་འདུལ་བའོ། །རྩེ་གསུམ་དྲལ་བའོ་ཞེས་བྱ་བ་ལ་ཡིད་ཀྱིས་ལྷ་ཆེན་པོའི་རྩེ་གསུམ་དྲལ་བར་བྱ་སྟེ་དེ་ལྟར་ན་ལྷ་ཆེན་པོ་རྣམས་ལས་རྣམ་པར་རྒྱལ་བར་འགྱུར་རོ། །རྡོ་རྗེ་ཧཱུཾ་མཛད་ཀྱི་གཡོན་པ་གཡས་པའི་རྡོ་རྗེ་ཁུ་ཚུར་གྱིས་མནན་ཏེ་དེ་བཞིན་དུ་གདུ་བུ་བཀྲོལ་བས་འཕྲོག་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མཛུབ་མོ་རང་གི་མཐེ་བོའི་སྟེང་དུ་བཞག་ལ་གཡོན་པའི་མཛུབ་མོ་ཡང་དེ་བཞིན་དུ་བཞག་སྟེ་གཡས་པའི་རྡོ་རྗེ་ཁུ་ཚུར་གྱིས་གཡོན་པ་བཟུང་སྟེ་མཐེའུ་ཆུང་གི་གདུ་བུ་བཀྲོལ་བ་དེ་ལྟར་ན་འདོད་པའི་དབང་ཕྱུག་མནན་ནས་དགའ་བ་མ་འཕྲོག་པར་འགྱུར་རོ། །རྡོ་རྗེ་དང་བྱང་ཆུབ་སེམས་དཔའ་དང་དེ་བཞིན་གཤེགས་པ་ཐམས་ཅད་དང༌། རྡོ་རྗེ་འཆང་ཆན་པོ་རྗེས་སུ་དྲན་པས་བསྒྲུབ་པར་བྱའོ་ཞེས་བྱ་བ་ལ་རྡོ་རྗེ་ཧཱུཾ་མཛད་བཅིངས་ནས་མདུན་དུ་རྡོ་རྗེ་བསྒོམ་པར་བྱ་སྟེ་དེ་ལྟར་ན་རྡོ་རྗེ་སྒྲུབ་པའོ། །མདུན་དུ་བྱམས་པ་ལ་སོགས་པའི་བྱང་ཆུབ་སེམས་དཔའ་བསྒོམ་པར་བྱ་སྟེ་དེ་ལྟར་ན་བྱང་ཆུབ་སེམས་དཔའ་ཆེན་པོ་གྲུབ་པའོ། །མདུན་དུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་ཐམས་ཅད་བསྒོམ་པར་བྱ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་རྗེས་སུ་ཆགས་པའོ། །དེ་བཞིན་དུ་རྡོ་རྗེ་ཧཱུཾ་མཛད་བཅིངས་ནས་མདུན་དུ་རྡོ་རྗེ་འཆང་ཆེན་པོ་བསྒོམ་པར་བྱ་སྟེ་དེ་ལྟར་ན་རྡོ་རྗེ་འཆང་ཆེན་པོ་རྗེས་སུ་ཆགས་པ་དང་འཇུག་པ་དང་དམ་ཚིག་བཅིང་བ་དང་དབང་དུ་བྱེད་བསྒྲུབ་པར་འགྱུར་རོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་རྡོ་རྗེ་ཁྲོ་བོའི་རྒྱལ་པོ་ཆེན་པོའི་ཕྱག་རྒྱའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་ན་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་ཕྱག་རྒྱའི་རྟོག་པ་བསྟན་ནས། ད་ནི་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་ཀྱི་རྟོག་པ་བསྟན་པར་བྱ་བའི་ཕྱིར། དེ་ནས་
འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་ཅེས་བྱ་བ་གསུངས་ཏེ། པདྨ་ཆེན་པོ་ཞེས་བྱ་བ་ནི་མདོར་བསྟན་པའོ། །རྡོ་རྗེ་ཐལ་མོ་ཁ་འབུས་པ། །ཞེས་བྱ་བ་ལ་སོགས་པ་ནི་རྒྱས་པར་བཤད་པའོ། །འདིས་ནི་འདི་ལྟར་བཤད་པར་འགྱུར་ཏེ། ཁ་འབུས་པའི་ཚུལ་གྱིས་རྡོ་རྗེ་ཐལ་མོ་བཅིངས་ལ་སོར་མོ་དབུས་མ་གཉིས་ཀྱི་རྩེ་མོ་ཡང་དག་པར་སྦྱར་བར་བྱ་སྟེ། མཐེའུ་ཆུང་དང་མཐེ་བོང་རྣམས་ཀྱིས་པདྨའི་འདབ་མ་བཞི་ཤིན་ཏུ་ཁ་ཕྱེ་བར་བྱ་སྟེ། འདི་ནི་འཕགས་པ་འཇིག་རྟེན་དབང་ཕྱུག་གི་དཀྱིལ་འཁོར་དུ་འཇུག་པའི་ཕྱག་རྒྱ་པདྨ་ཆེན་པོ་ཞེས་བྱའོ། །ཆོས་ཐམས་ཅད་འཐོབ་པའོ་ཞེས་བྱ་བ་ལ་པདྨའི་རིགས་དང་རང་བཞིན་གྱིས་དག་པའི་ཏིང་ངེ་འཛིན་ནི་ཐམས་ཅད་དེ། དེ་ཐོབ་པས་ཏེ་པདྨ་ཆེན་པོའོ། །དེ་ཐོབ་པའི་རྒྱུར་གྱུར་པ་ཉིད་ཀྱི་ཕྱིར་ཕྱག་རྒྱ་ཐོབ་པ་ཞེས་བརྗོད་པ་ཡིན་ནོ། །ཐམས་ཅད་རྗེས་སུ་ཆགས་པར་བྱེད་པ་ཡང་ངོ་ཞེས་བྱ་བ་ལ་དེ་ཉིད་པདྨའི་རིགས་ཐམས་ཅད་རྗེས་སུ་ཆགས་པར་བྱེད་པས་ཐམས་ཅད་རྗེས་སུ་ཆགས་པར་བྱེད་པའོ། །ཕྱག་རྒྱ་ཆེན་པོ་དེ་བཞིན་ནོ། །ཞེས་བྱ་བ་ལ་ཇི་ལྟར་པདྨའི་རིགས་ཀྱི་ལྷ་རྣམས་ཀྱི་དཀྱིལ་འཁོར་དུ་ཕྱག་རྒྱ་ཆེན་པོ་བསྟན་པ་དེ་བཞིན་དུ་ཕྱག་མཚན་དང་སྒྲུབ་པ་པོས་བཅིང་བར་བྱའོ་ཞེས་བྱ་བའི་དོན་ཏོ། །དམ་ཚིག་གི་ཕྱག་རྒྱ་རྡོ་རྗེ་པདྨ་བཤད་པའོ་ཞེས་བྱ་བ་ལ་དེ་བཞིན་གཤེགས་པའི་དཀྱིལ་འཁོར་དུ་རྡོ་རྗེ་པདྨ་ཞེས་བྱ་བའི་ཕྱག་རྒྱར་གང་བཤད་པ་དེ་ཉིད་འདིར་འཕགས་པ་སྤྱན་རས་གཟིགས་ཀྱི་དབང་ཕྱུག་གི་དམ་ཚིག་གི་ཕྱག་རྒྱར་ཤེས་པར་བྱའོ། །དེའི་མཚན་ཉིད་འདི་ཡིན་ཏེ་རྡོ་རྗེ་ཐལ་མོ་འོག་ཏུ་བརྐྱང་ལ་མཐེ་བོང་དང་མཛུབ་མོ་མཉམ་པར་སྦྱར་ནས་སྙིང་གར་བཏེག་སྟེ་དབང་བསྐུར་བའི་གནས་སུ་རྩེ་མོ་གཞག་པ་ནི་རྡོ་རྗེ་རིན་ཆེན་ཏེ། དེ་ཉིད་སྟེང་དུ་ཁ་བལྟ་བའི་མཛུབ་མོ་གཉིས་ཕྱི་རོལ་དུ་བཀུག་པ་ནི་རྡོ་རྗེ་པདྨའོ། །པདྨའི་རིགས་ཀྱི་རྡོ་རྗེ་བསྡམས་པ་ལས་བྱུང་བའོ་ཞེས་བྱ་བ་ལ་མཛེས་པའི་ཏིང་ངེ་འཛིན་གྱི་པདྨ་ལ་སོགས་པ་ནི་པདྨའི་རིགས་རྣམས་ཏེ་དེ་ལ་དམ་ཚིག་གི་ཕྱག་རྒྱ་རྣམས་རྡོ་རྗེ་བསྡམས་པ་བཅིངས་ལ་བཅིང་བར་བྱའོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པའམ་དགར་བ་ལའོ། །པདྨའི་དེ་བཞིན་གཤེགས་པ་ནི་མཛེས་པའི་ཏིང་ངེ་འཛིན་གྱི་མིང་
ཅན་ནོ། །སོགས་པའི་སྒྲས་ནི་པདྨ་ཆེན་པོ་དང་ཏིང་ངེ་འཛིན་དང་རྣམ་པར་གཟིགས་པ་རྣམ་པར་གཟུང་བ་སྟེ་བཞི་པོ་དེ་དག་ནི་ནང་དུ་རྡོ་རྗེ་བསྡམས་པ་ལས་བྱུང་བའི་དམ་ཚིག་གི་ཕྱག་རྒྱ་རྣམས་ཤེས་པར་བྱའོ། །ཇི་ལྟར་ཞེ་ན་དེ་བཞིན་གཤེགས་པའི་པདྨ་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་ནང་དུ་བཅིངས་ནས་གྱེན་དུ་བལྟ་བས་པང་པར་གཟུང་བར་བྱ་སྟེ་འདི་ནི་མཛེས་པའི་ཏིང་ངེ་འཛིན་གྱི་མིང་ཅན་དེ་བཞིན་གཤེགས་པའི་པདྨའི་དམ་ཚིག་གི་ཕྱག་རྒྱ་སྟེ་པདྨའི་སྤྱན་ཞེས་བྱ་བའོ། །རྡོ་རྗེ་བསྡམས་པ་ནང་དུ་བཅིངས་ནས་མཐེ་བོང་གཉིས་ཡང་དག་པར་སྦྱར་བའི་རྩེ་མོ་དང་མཛུབ་མོ་གཉིས་སྦྱར་བ་པདྨའི་འདབ་མའི་རྣམ་པ་ཅན་དུ་བྱས་ལ་རང་གི་སྙིང་གར་གཟུང་བར་བྱ་སྟེ། འདི་ནི་པདྨ་ཆེན་པོའི་མིང་ཅན་གྱི་དམ་ཚིག་གི་ཕྱག་རྒྱ་སྟེ་རྡོ་རྗེ་ཆེན་པོ་པདྨའི་ཆགས་པ་ཞེས་བྱ་བའོ། །རྡོ་རྗེ་བསྡམས་པ་ནང་དུ་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ལ་ཁ་ཐུར་དུ་བལྟ་བ་པང་པར་གཟུང་བར་བྱ་སྟེ། འདི་ནི་ཏིང་ངེ་འཛིན་གྱི་མིང་ཅན་པདྨ་ཆེན་པོའི་དམ་ཚིག་གི་ཕྱག་རྒྱ་སྟེ་པདྨའི་སྒྲོལ་མ་ཞེས་བྱའོ། །རྡོ་རྗེ་བསྡམས་པ་ནང་དུ་བཅིངས་ཏེ་མཐེ་བོང་གཉིས་ཀྱི་རྩེ་མོའི་ཐོག་ཏུ་མཛུབ་མོའི་རྩེ་མོ་གཟུང་བར་བྱས་ཏེ་དེ་ནས་རིན་པོ་ཆེ་དང་པདྨ་གཉིས་སྦྱིན་པའི་ཚུལ་དུ་བྱ་སྟེ་འདི་ནི་རྣམ་པར་གཟིགས་པའི་མིང་ཅན་པདྨ་ཆེན་པོའི་ནོར་བུའི་དམ་ཚིག་གི་ཕྱག་རྒྱའོ། །པདྨའི་དེ་བཞིན་གཤེགས་པ་ལ་སོགས་པའི་དམ་ཚིག་གི་ཕྱག་རྒྱ་རྣམས་ཀྱི་འབྲས་བུ་བསྟན་པར་བྱ་བའི་ཕྱིར་འདི་རྣམས་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་ལ་པདྨའི་དེ་བཞིན་གཤེགས་པའི་དམ་ཚིག་གི་ཕྱག་རྒྱས་པདྨའི་རིགས་ཐམས་ཅད་རང་བཞིན་གྱིས་དག་པའོ་ཞེས་བྱ་བར་རྟོགས་པ་ནི་ཆོས་ཉིད་ཐམས་ཅད་ཐོབ་པའོ། །རྡོ་རྗེ་པདྨ་ཆེན་པོའི་དམ་ཚིག་གི་ཕྱག་རྒྱས་པདྨའི་རིགས་ཐམས་ཅད་རྗེས་སུ་ཆགས་པའོ། །པདྨ་ཆེན་པོའི་དམ་ཚིག་གི་ཕྱག་རྒྱས་རང་དང་གཞན་དག་སྡུག་བསྔལ་ཐམས་ཅད་ལས་སྒྲོལ་བའོ། །པདྨ་ཆེན་པོའི་ནོར་བུའི་དམ་ཚིག་གི་ཕྱག་རྒྱས་རང་དང་གཞན་དག་གི་བསམ་པ་ཐམས་ཅད་ཡོངས་སུ་རྫོགས་པ་ཤིན་ཏུ་གྲུབ་པར་འགྱུར་རོ། །དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །པདྨའི་ལྷའི་བདག་པོ་ནི་ཞི་བ་དང་ཁྱབ་འཇུག་ལ་སོགས་པ་
རྣམས་ཏེ་དེ་དག་གི་དམ་ཚིག་གི་ཕྱག་རྒྱ་ནི་ཕྱིའི་རྡོ་རྗེ་བསྡམས་པ་ལས་བྱུང་བ་ཡིན་ནོ། །དབང་ཕྱུག་ཆེན་པོའི་གཟུགས་འཛིན་པའི་འཇིག་རྟེན་དབང་ཕྱུག་ནི་དོན་ཡོད་རྒྱལ་པོ་སྟེ། དོན་ཡོད་རྒྱལ་པོ་ནི་དོན་ཡོད་ཞགས་པ་སྟེ་དེའི་དམ་ཚིག་གི་ཕྱག་རྒྱ་ནི་འདི་ཡིན་ཏེ་འོག་ཏུ་མཛུབ་མོ་གཉིས་ཀྱིས་ཁ་འབུས་པ་ཁྲོ་གཉེར་ཅན་ལ་གཞག་པར་བྱའོ་ཞེས་བྱ་བ་ལ་རྡོ་རྗེ་བསྡམས་པ་ཕྱིར་བཅིངས་ལ་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་ལ་ཚིགས་གསུམ་པ་བཀུག་པར་བྱས་ཏེ་འོག་ཏུ་ཁ་བལྟ་བ་མཛོད་སྤུའི་ཕྱོགས་སུ་གཟུང་བར་བྱ་སྟེ་འདི་ནི་དབང་ཕྱུག་ཆེན་པོའི་གཟུགས་འཛིན་པའི་དོན་ཡོད་ཞགས་པ་པདྨའི་ཁྲོ་གཉེར་གྱི་སྤྱན་ཞེས་བྱ་བ་དམ་ཚིག་གི་ཕྱག་རྒྱའོ། །རྡོ་རྗེ་བསྡམས་པ་གྱེན་དུ་འབར་བ་ནི་མགྲིན་སྔོན་ཅན་གྱིའོ་ཞེས་བྱ་བ་ལ་པདྨའི་ཁྱབ་འཇུག་ནི་མགྲིན་སྔོན་ཅན་ཏེ། རྡོ་རྗེ་བསྡམས་པ་བཅིངས་ནས་གྱེན་དུ་འབར་བར་སྟོན་པའི་ཚུལ་གྱིས་དེའི་དམ་ཚིག་གི་ཕྱག་རྒྱ་ཡིན་ནོ། །རྡོ་རྗེ་བསྡམས་བ་གྱེན་དུ་འབར་བ་དེ་ཉིད་རྣམ་པར་གྲོལ་བར་བྱ་བའི་ཕྱིར་གཡོན་པའི་མཛུབ་མོ་ཞེས་བྱ་བ་ལ་སོགས་པ་གསུངས་ཏེ་རྡོ་རྗེ་བསྡམས་པ་ཕྱིར་བཅིངས་ནས་གཡོན་པའི་མཛུབ་མོ་བཀུག་པ་གཡོན་པའི་མཐེ་བོས་བཟུང་སྟེ་དུང་གི་དབྱིབས་སུ་བྱས་ནས་གཡས་པའི་མཐེ་བོང་བསྒྲེང་ལ་རྟག་པའི་ཚུལ་གྱིས་མཐེའུ་ཆུང་གཉིས་པའི་རྣམ་པ་ཅན་དུ་བྱས་ཏེ་སོར་མོ་ལྷག་མ་རྣམས་ལག་པའི་རྒྱབ་ནས་ཅུང་ཟད་བཏེག་ལ་འཁོར་ལོའི་ཚུལ་དུ་གཟུང་བར་བྱ་སྟེ་འདི་ནི་པདྨའི་ཁྱབ་འཇུག་གི་དམ་ཚིག་གི་ཕྱག་རྒྱ་པདྨ་ཁྱབ་འཇུག་མ་ཞེས་བྱ་བའོ། །པདྨ་ལས་བྱུང་བ་ནི་ཚངས་པའི་ཆ་ལུགས་འཛིན་པའི་འཇིག་རྟེན་དབང་ཕྱུག་སྟེ་དེའི་དམ་ཚིག་གི་ཕྱག་རྒྱ་ནི་རྡོ་རྗེ་བསྡམས་པ་ཕྱིར་བཅིངས་ལ་མཛུབ་མོ་གཉིས་བསྒྲེང་བ་བཀུག་སྟེ་ལྕགས་ཀྱུའི་རྣམ་པར་སོར་མོ་བཟུང་ནས་སོར་མོ་ལྷག་མ་རྣམས་ཀྱིས་ཤིན་ཏུ་ཁ་བྱེ་བའི་པདྨའི་ཚུལ་དུ་བྱ་སྟེ་འདི་ནི་པདྨ་འབྱུང་བ་ཞེས་བྱ་བ་ཚང་པའི་དམ་ཚིག་གི་ཕྱག་རྒྱའོ། །རྟ་མགྲིན་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་ཕྱིར་བཅིངས་པ་ལ་མཛུབ་མོ་གཉིས་ཀྱི་རྩེ་མོ་རྟའི་མགྲིན་པའི་ཚུལ་དུ་བཀུག་པ་རྒོད་པའི་ཁ་ལྟ་བུར་བྱས་ཏེ་སྲིན་ལག་གཉིས་ཀྱི་རྩེ་མོ་རབ་ཏུ་བརྐྱང་ལ་མཐེའུ་ཆུང་གཉིས་ཀྱང་རབ་ཏུ་བརྐྱང་ལ་སོ་སོར་གཡོ་བར་གཟུང་
བར་བྱ་སྟེ་འདི་ནི་རྟ་མགྲིན་གྱི་དམ་ཚིག་གི་ཕྱག་རྒྱ་པདྨའི་ལྕགས་ཀྱུ་ཞེས་བྱ་བ་ཡིན་ནོ། །པདྨའི་ཁྲོ་གཉེར་ལ་སོགས་པའི་ཕྱག་རྒྱ་རྣམས་ཀྱི་འབྲས་བུ་བསྟན་པའི་ཕྱིར་འདི་རྣམས་ཀྱི་ཞེས་བྱ་བ་ལ་སོགས་པ་གསུངས་ཏེ། དེ་ལ་པདྨའི་ཁྲོ་གཉེར་གྱི་ཕྱག་རྒྱས་པདྨའི་རིགས་ཐམས་ཅད་ཀྱི་དབང་བསྐུར་བ་གྲུབ་པར་འགྱུར་རོ། །པདྨའི་ཁྱབ་འཇུག་གི་ཕྱག་རྒྱས་པདྨའི་རིགས་ཐམས་ཅད་གྲུབ་པའོ། །པདྨ་འབྱུང་བ་པདྨའི་རིགས་ཀྱི་གཉིས་སུ་མེད་པའི་སེམས་དང་སེམས་ལས་བྱུང་བ་གྲུབ་པས་ནི་ཐར་པ་ཐམས་ཅད་གྲུབ་པའོ། །པདྨའི་ལྕགས་ཀྱུའི་ཕྱག་རྒྱ་པདྨའི་རིགས་ཐམས་ཅད་འགུགས་པ་གདོན་མི་ཟ་བར་གྲུབ་པར་འགྱུར་རོ། །སྒེག་མོ་ལ་སོགས་པ་ནས་པདྨའི་དྲིལ་བུ་མའི་མཐར་ཐུག་པའི་རྣམས་ཀྱི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཡིན་ནོ། །དམ་ཚིག་གི་ཕྱག་རྒྱ་རྣམས་ཤེས་པར་བྱའོ། །དེ་བཞིན་གཤེགས་པའི་སྐུ་མཆོག་གི་དབང་བསྐུར་བ་ལ་ཏིང་ངེ་འཛིན་གྱི་ཕྱག་རྒྱ་བཤད་པའོ་ཞེས་བྱ་བ་ལ་བཅོམ་ལྡན་འདས་རྣམ་སྣང་མཛད་ཀྱི་དམ་ཚིག་གི་ཕྱག་རྒྱ་ནི་དེ་བཞིན་གཤེགས་པའི་སྐུ་མཆོག་སྟེ། དེ་དང་བཅས་པའི་དབང་བསྐུར་བའི་དོན་དུ་ཏིང་ངེ་འཛིན་གྱི་ཕྱག་རྒྱ་ནི་འོད་དཔག་ཏུ་མེད་པའི་ཏིང་ངེ་འཛིན་ཏེ་དེ་སྟོན་པར་བྱེད་པའི་ཕྱག་རྒྱ་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ལས་གསུངས་པ་ཡིན་ནོ། །འདི་ལྟར་འཆད་པར་འགྱུར་ཏེ། དེ་བཞིན་གཤེགས་པའི་སྐུ་མཆོག་བཅིངས་ནས། ཨོཾ་སངས་རྒྱས་ཀུན་གྱི་རིན་ཆེན་མཆོག་ཚོགས་ཀྱིས། །སྦྲས་པའི་ལྷ་ཡི་ཅོད་པན་ཅན་ལ་འདུད། །རབ་མཆོག་རྡོ་རྗེ་འཛིན་བདག་དབང་བསྐུར་གསོལ། །རྡོ་རྗེ་སེམས་དཔའ་དམ་ཚིག་ཁྱོད་ཉིད་བདག །ཅེས་བྱ་བའི་དབང་བསྐུར་བའི་གླུ་བརྗོད་ཅིང་དེ་བཞིན་གཤེགས་པ་ཐམས་ཅད་ཀྱི་སྐུ་མཆོག་མདུན་དུ་རང་དང་གཞན་དག་གི་སྤྱི་བོར་བཞག་སྟེ། བཛྲ་དྷརྨ་ཨ་བྷི་ཥིཉྩ་ཞེས་བྱ་བ་བརྗོད་པར་མ་བྱས་ནས་ན་བདག་དང་གཞན་ལ་འོད་དཔག་ཏུ་མེད་པའི་ཅོད་པན་གྱི་དབང་བསྐུར་བར་འགྱུར་བ་ཡིན་ནོ། །དེ་ནས་ལས་ཀྱི་ཕྱག་རྒྱ་ཞེས་བྱ་བ་ལ་དེ་ནས་ཀྱི་སྒྲ་ནི་སྐབས་སུ་བབ་པ་ལའོ། །ལས་སྟོན་པར་བྱེད་པ་དང་ལས་སྒྲུབ་པར་བྱེད་པའི་རྒྱུ་གང་ཡིན་པ་དེ་ལ་ནི་ལས་ཀྱི་ཕྱག་རྒྱ་སྟེ་དེ་བཅིངས་པའི་མཚན་ཉིད་འདི་ཡིན་ནོ་ཞེས་བྱ་བ་ནི་ཚིག་གི་
ལྷག་མའོ། །ཁ་ཊྭཱཾ་ག་ཞེས་བྱ་བ་ལ་སོགས་པ་ལ་ལག་པ་གཡས་པ་དང་གཡོན་པས་ཁ་ཊྭཱཾ་ག་བཅིངས་ལ་རང་གི་མཐེ་བོའི་རྩེ་མོ་གཉིས་ལས་དབུས་མའི་རྩེ་མོ་གཉིས་གཟུང་བར་བྱ་སྟེ་འདི་ནི་པདྨའི་ཁུ་ཚུར་གཉིས་ཀྱི་ཕྱག་རྒྱའོ། །གཡོན་པའི་པདྨའི་ཁུ་ཚུར་རང་གི་སྙིང་གའི་ཕྱོགས་སུ་པདྨ་ཁ་ཕྱེ་བའི་ཚུལ་དུ་བྱ་སྟེ་འདི་ནི་འཕགས་པ་སྤྱན་རས་གཟིགས་ཀྱི་དབང་ཕྱུག་གི་ལས་ཀྱི་ཕྱག་རྒྱའོ། །པདྨའི་རིགས་ཐམས་ཅད་ཀྱི་དམ་ཚིག་གི་ཕྱག་རྒྱ་ཇི་ལྟ་བ་བཞིན་དུ་གཟུང་བས་སོ་ཞེས་བྱ་བ་ལ་མཛེས་པའི་ཏིང་ངེ་འཛིན་ལ་སོགས་པ་ནས་པདྨའི་དྲིལ་བུའི་མཐར་ཐུག་པ་རྣམས་ཀྱི་ནི་དམ་ཚིག་གི་ཕྱག་རྒྱ་བཅིངས་པའི་རྗེས་སུ་འབྲངས་པས་པདྨའི་ཁུ་ཚུར་བྱེད་པར་འགྱུར་བ་དག་གིས་ལས་ཀྱི་ཕྱག་རྒྱ་བཅིང་བར་བྱའོ། །འདི་ལྟར་བཤད་པར་འགྱུར་ཏེ། པདྨའི་ཁུ་ཚུར་གཉིས་གཉིས་བཅིངས་ཏེ་པང་པར་ཁ་གྱེན་དུ་བལྟ་བར་གཟུང་བར་བྱ་སྟེ་འདི་ནི་དེ་བཞིན་གཤེགས་པའི་ལས་ཀྱི་ཕྱག་རྒྱའོ། །པདྨའི་ཁུ་ཚུར་གཉིས་བཅིངས་ནས་མཐེ་བོང་གཉིས་ཀྱི་རྩེ་མོ་ཡང་དག་པར་སྦྱར་ནས་མཛུབ་མོ་གཉིས་ཀྱིས་པདྨའི་རྣམ་པ་ཅན་དུ་བྱས་ལ་སྙིང་གར་གཟུང་བར་བྱ་སྟེ་འདི་ནི་པདྨ་ཆེན་པོའོ། །པདྨའི་ཁུ་ཚུར་བཅིངས་ནས་མཛུབ་མོའི་རྩེ་མོ་ཡང་དག་པར་སྦྱར་བར་བྱས་ལ་འོག་ཏུ་ཁ་བལྟ་བར་པད་པར་གཟུང་བར་བྱ་སྟེ། འདི་ནི་ཏིང་ངེ་འཛིན་གྱི་མིང་སྟེ་པདྨའི་སྒྲོལ་མའོ། །པདྨའི་ཁུ་ཚུར་གཉིས་བཅིངས་ནས་མཐེ་བོང་གཉིས་ཀྱི་རྩེ་མོའི་མཐར་མཛུབ་མོ་གཟུང་བར་བྱས་ལ་དེ་ནས་རིན་པོ་ཆེ་དང་པདྨ་གཉིས་སྦྱིན་པའི་ཚུལ་དུ་བྱ་སྟེ་འདི་ནི་རྣམ་པར་གཟིགས་པའི་པདྨའོ། །པདྨའི་ཁུ་ཚུར་གཉིས་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བའི་ཚིགས་གསུམ་པ་བཀུག་པར་བྱས་ལ་འོག་ཏུ་ཁ་བལྟ་བ་མཛོད་སྤུའི་ཕྱོགས་སུ་གཟུང་བར་བྱ་སྟེ་འདི་ནི་པདྨ་ཞི་བའིའོ། །པདྨའི་ཁུ་ཚུར་བཅིངས་ནས་གཡོན་པའི་མཛུབ་མོ་བཀུག་པ་གཡོན་པའི་མཐེ་བོས་བཟུང་ལ་དུང་གི་དབྱིབས་ཅན་དུ་བྱས་ཤིང་གཡས་པའི་མཐེ་བོང་དང་པོའི་ཚུལ་དུ་བསྒྲེང་ལ་མཐེའུ་ཆུང་གཉིས་པདྨའི་རྣམ་པ་ཅན་དུ་བྱས་ཏེ་སོར་མོ་ལྷག་མ་རྣམས་ཀྱིས་རྡོ་རྗེ་བསྡམས་པ་བཅིངས་ནས་སྔ་མ་བཞིན་དུ་འཁོར་ལོའི་ཚུལ་དུ་བྱ་སྟེ་འདི་ནི་པདྨའི་ཁྱབ་འཇུག་གིའོ། །པདྨའི་ཁུ་ཚུར་གཉིས་
བཅིངས་ནས་མཛུབ་མོ་གཉིས་བསྒྲེང་བ་བཀུག་ལ་ལྕགས་ཀྱུའི་རྣམ་པར་སོ་སོར་གཟུང་བར་བྱས་ལ་སོར་མོ་ལྷག་མ་རྣམས་ཀྱིས་ཤིན་ཏུ་རྒྱས་པའི་པདྨའི་ཚུལ་དུ་བྱ་སྟེ་འདི་ནི་པདྨའི་ཚངས་བའོ། །པདྨའི་ཁུ་ཚུར་གཉིས་བཅིངས་ནས་མཛུབ་མོ་གཉིས་ཀྱི་རྩེ་མོའི་མཐའ་མགྲིན་པའི་ཚུལ་དུ་བཀུག་ལ་རྒོད་མའི་ཁ་ལྟ་བུའི་སྲིན་ལག་གཉིས་ཀྱི་རྩེ་མོའི་མཐའ་རབ་ཏུ་བརྐྱང་ལ་མཐེའུ་ཆུང་གཉིས་ཀྱི་རྩེ་མོ་གཉིས་སོ་སོར་རབ་ཏུ་བརྐྱང་སྟེ་གཡོ་བར་གཟུང་བར་བྱ་སྟེ་འདི་ནི་མགྲིན་གྱིའོ། །པདྨའི་ཁུ་ཚུར་གཉིས་ཁར་སྒེག་པ་དང་བཅས་པས་གཟུང་བར་བྱ་སྟེ་འདི་ནི་པདྨའི་སྒེག་མོའིའོ། །པདྨོའི་ཁུ་ཚུར་གཉིས་རང་གི་འཁོར་ལོ་དགོད་པའི་ཚུལ་གྱིས་ཡོངས་སུ་བསྐོར་ལ་སྤྱི་བོར་གཟུང་བར་བྱ་སྟེ། འདི་ནི་པདྨ་བཞད་མའིའོ། །གཡོན་པ་པདྨའི་ཁུ་ཚུར་གྱི་མཛུབ་མོ་རབ་ཏུ་བརྐྱང་ལ་པི་ཝང་གི་དབྱུག་པའི་ཚུལ་དུ་བྱས་ལ་གཡས་པའི་ཁུ་ཚུར་གྱི་མཛུབ་མེས་པི་ཝང་བརྡུང་བའི་ཚུལ་དུ་བྱ་སྟེ་འདི་ནི་པདྨ་གླུ་མའིའོ། །པདྨའི་ཁུ་ཚུར་གཉིས་གར་བྱས་ལ་པདྨའི་ཐལ་མོ་བཅིང་བར་བྱ་སྟེ་འདི་ནི་པདྨ་གར་མའིའོ། །པདྨའི་ཁུ་ཚུར་གཉིས་བཅིངས་ནས་ལག་པ་གཉིས་མདུད་དེ་ལག་པ་གཡས་སྟེང་དུ་བྱུང་བས་རྡོ་རྗེ་བཀའ་བསྒོ་བར་བྱེད་དེ་མཛུབ་མོས་ལྕགས་ཀྱུའི་ལས་དང་ལག་པ་མདུད་པ་དང་མདུད་པ་བཅིང་བ་དང༌། རང་གི་སྙིང་གར་དྲིལ་བུ་ཕྲག་པར་དཀྲོལ་བའི་ཚུལ་བྱ་སྟེ་སྒོ་སྲུང་རྣམས་ཀྱིའོ། །དེ་ལྟར་ལས་ཀྱི་ཕྱག་རྒྱས་རྣམས་ཀྱི་མཚན་ཉིད་བསྟན་ནས་ད་ནི་རང་གི་ལྷའི་སྙིང་པོ་བཟླ་ཞིང་བཟླས་པའི་དོན་ཤེས་པའི་ཕྱག་རྒྱ་ཐམས་ཅད་སྒྲུབ་པ་ཡིན་ཞེས་བྱ་བ་ཡིན་ནོ་ཞེས་བྱ་བའི་ཆོག་འདིར་བསྟན་པའི་ཕྱིར། ངག་གི་ཏིང་ངེ་འཛིན་གྱིས་ཞེས་བྱ་བ་ལ་སོགས་པ་གསུངས་ཏེ་དེ་ལ་སྤྲིན་དང་རྔ་པོ་ཆེའི་སྒྲ་ལྟ་བུ་ནི་འདིར་ཆོས་ཀྱི་ངག་ཏུ་བརྗོད་པ་ཡིན་ནོ། །བཟླས་པའི་དོན་གྱི་རྣམ་པ་ཅན་གྱི་སེམས་རྩེ་གཅིག་པ་ཉིད་ནི་ཏིང་ངེ་འཛིན་ཏེ་ངག་གི་ཏིང་ངེ་འཛིན་དེ་པདྨའི་རིགས་ཐམས་ཅད་ཀྱི་རང་བཞིན་གྱིས་དག་པའི་དྲན་པ་དང༌། ཤེས་རབ་ཡང་དག་པར་རབ་ཏུ་སྦྱོར་བ་ནི་གཟུངས་ཏེ་དེ་དགུག་པ་ནི་རང་གི་རྒྱུད་ལ་རྫོགས་པ་སྟེ། དེའི་དོན་དུ་ཇི་ལྟ་བ་བཞིན་དུ་བཤད་པའི་ཆོས་ཀྱི་ངག་གིས་བཟླ་བར་བྱ་ཞིང་བཟླས་པའི་
དོན་གྱི་ཡེ་ཤེས་མངོན་དུ་བྱ་བ་ཡིན་ནོ། །དེ་ལྟར་དཀྱིལ་འཁོར་གྱི་ཕྱག་རྒྱ་རྣམས་སྦྱོར་བ་དང་བཅས་པ་བསྟན་ནས་ད་ནི་ལས་བརྒྱ་བསྒྲུབ་བྱར་བྱེད་པའི་ཕྱག་རྒྱ་རྣམས་ཀྱི་མཚན་ཉིད་གསུངས་པ་ཡིན་ཏེ། པདྨ་ཆེན་པོ་བཅིངས་ནས་ཡིད་ཀྱིས་སྦྱིན་སྲེག་བྱའོ། །སེམས་ཀྱིས་ནི་བར་བྱའོ། །དངོས་པོས་བསྲུང་བར་བྱའོ། །རྣམ་པར་སྦྱང་བར་བྱའོ་ཞེས་བྱ་བ་ལ་བསྒྲུབ་པར་བྱ་སྟེ། ལས་ཐམས་ཅད་ཕྱག་རྒྱའི་ཚོགས་སོ་ཞེས་བྱ་བ་ལ་ལས་ཀྱི་ཚོགས་འདི་ཡང་སྔར་བཤད་པ་ཡིན་ཏེ། སླར་ཡང་འདིར་བཤད་པར་མི་བྱའོ། །དཔལ་མཆོག་དང་པོའི་རྒྱ་ཆེར་འགྲེལ་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་འཕགས་པ་སྤྱན་རས་གཟིགས་དབང་ཕྱུག་གི་ཕྱག་རྒྱའི་རྒྱུད་བསྟན་ནས་ད་ནི་འཕགས་པ་ནམ་མཁའི་སྙིང་པོའི་ཕྱག་རྒྱ་བཤད་པར་བྱ་བའི་ཕྱིར། དེ་ནས་ནམ་མཁའི་སྙིང་པོའི་ཕྱག་རྒྱ་ཆེན་པོ་ཞེས་བྱ་བ་གསུངས་ཏེ་དེ་ནས་ཀྱི་སྒྲ་ནི་སྔ་མ་བཞིན་ནོ། །འཕགས་པ་ནམ་མཁའི་སྙིང་པོ་ནོར་བུ་ཆེན་པོའི་རིགས་ཏེ་དེའི་ཕྱག་རྒྱ་ཆེན་པོའི་སྐུའི་གསང་བའི་རང་བཞིན་ཅན་དེ་ཇི་ལྟར་དཀྱིལ་འཁོར་བྲི་བའི་ཆོ་གར་བསྟན་པ་བཞིན་དུ་དམ་ཚིག་སེམས་དཔར་བྱིན་གྱིས་བརླབས་མ་ཐག་ཁོ་ནར་བཅིང་བར་བྱའོ། །དམ་ཚིག་གི་ཕྱག་རྒྱ་ཞེས་བྱ་བ་ལ་དམ་ཚིག་འཛིན་པར་བྱེད་པའི་ཕྱག་རྒྱ་ནི་དམ་ཚིག་གི་ཕྱག་རྒྱའོ། །དེ་ཡང་ཇི་ལྟར་ཡིན་ཞེ་ན་རྡོ་རྗེ་རིན་ཆེན་ཞེས་བྱ་བ་ལ་སོགས་པ་ལ། རྡོ་རྗེ་ཐལ་མོ་ལས་བྱུང་བའི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་བཅིང་བར་བྱ་སྟེ་འདི་ནི་འཕགས་པ་ནམ་མཁའི་སྙིང་པོ་དང་དབང་བསྐུར་བའི་རིན་པོ་ཆེའི་དམ་ཚིག་གི་ཕྱག་རྒྱའོ། །ཅིའི་སླད་དུ་ཞེ་ན། དབང་བསྐུར་བ་ཐམས་ཅད་ཐོབ་པའི་ཕྱིར་རོ་ཞེས་བྱ་བ་ནོར་བུའི་རིགས་ཐམས་ཅད་རྟོགས་པ་ནི་འདིར་དབང་བསྐུར་བ་ཐམས་ཅད་ཐོབ་པར་བྱ་སྟེ། དེའི་དོན་དུ་དམ་ཚིག་གི་ཕྱག་རྒྱ་འདིའོ། །དེ་དབང་བསྐུར་བ་ཇི་ལྟ་བ་བཞིན་དུའོ་ཞེས་བྱ་བ་ལ་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱའི་གཟུགས་ཏེ་དེས་རང་དང་གཞན་དག་ལ། ཨོཾ་སརྦ་བཛྲ་ཨ་དྷི་པ་ཏི་སྟྭཾ་ཨ་བྷི་ཥི་ཉྩཱ་མི་བྷུར་བྷུ་བ་སྭཱཿ་ཞེས་བྱ་བའི་སྔགས་འདིས་རྡོ་རྗེ་རིན་ཆེན་གྱི་ཅོད་པན་གྱིས་དབང་བསྐུར་
བར་བྱའོ། །འདི་ཉིད་སྙིང་གར་ཞེས་བྱ་བ་ལ་རྡོ་རྗེ་རིན་ཆེན་གྱི་ཕྱག་རྒྱ་བཅིངས་ནས་རང་གི་སྙིང་གར་གཟུང་བར་བྱ་སྟེ་འདི་ནི་གཏེར་གྱི་རིན་ཆེན་གྱིའོ། །གྱེན་དུ་ཁ་བལྟའོ་ཞེས་བྱ་བ་ལ་རྡོ་རྗེ་རིན་ཆེན་གྱི་ཕྱག་རྒྱ་པང་བར་ཏིང་ངེ་འཛིན་གྱི་ཚུལ་དུ་གྱེན་དུ་ཁ་བལྟ་བར་གཟུང་བར་བྱ་སྟེ་འདི་ནི་བླ་ན་མེད་པའོ། །ཁུ་ཚུར་སྤྱི་བོར་བཞག་སྟེ་ཕྱིའི་མེ་ཏོག་ལ་སོགས་པས་མཆོད་པ་དབུལ་བར་བྱའོ་ཞེས་བྱ་བ་ལ་འདས་མ་ཐག་ཏུ་བཤད་པའི་བླ་ན་མེད་པའི་རིན་ཆེན་ཁུ་ཚུར་སྤྱི་བོར་བཞག་སྟེ་ཕྱི་ནས་མེ་ཏོག་ལ་སོགས་པ་དབུལ་བའི་མཆོད་པ་བརྒྱད་བྱ་བ་ཡིན་ནོ། །འདི་ལྟར་བཤད་པར་འགྱུར་ཏེ། བླ་ན་མེད་པའི་རིན་ཆེན་གྱི་དམ་ཚིག་གི་ཕྱག་རྒྱ་སྤྱི་བོར་བཞག་ནས་ཕབ་སྟེ་གྱེན་དུ་གཏོར་བ་ནི་རིན་ཆེན་མེ་ཏོག་མའིའོ། །དེ་ཉིད་སྤྱི་བོར་བཞག་ནས་ཕབ་སྟེ་ཐུར་དུ་བླུགས་པ་ནི་སྤོས་མའིའོ། །དེ་ཉིད་དེ་བཞིན་དུ་ཕབ་ནས་མཐེ་བོང་སྦྱར་ནས་བསྐོར་བ་ནི་མར་མེའིའོ། །དེ་ཉིད་དེ་བཞིན་ཉིད་དུ་ཕབ་ནས་རབ་ཏུ་བརྐྱང་ཞིང་བྱུང་བའི་ཚུལ་གྱིས་རབ་ཏུ་སྦྱར་བར་བྱ་སྟེ་འདི་ནི་དྲི་མའིའོ། །དེ་ཉིད་ཕབ་ནས་རང་གི་སྙིང་གར་སྒེག་པ་རྣམ་པར་སྤྲུལ་པའི་ཚུལ་དུ་གཟུང་བར་བྱ་སྟེ་འདི་ནི་རིན་ཆེན་སྒེག་མའིའོ། །དེ་བཞིན་དུ་ཕབ་སྟེ་ཁང་ཡོངས་སུ་བསྐོར་བ་ལ་སྤྱི་བོར་གཟུང་བར་བྱ་སྟེ་འདི་ནི་རིན་ཆེན་བཞད་མའིའོ། །དེ་བཞིན་དུ་ཡོངས་སུ་ཕབ་ལ་གཡོན་པ་བཀུག་པའི་དབྱུག་པ་བྱས་ལ། གཡས་པ་བཀུག་པས་པི་ཝང་བརྡུང་བའི་ཚུལ་དུ་བྱས་ཏེ་འདི་ནི་རིན་ཆེན་གླུ་མའིའོ། །དེ་བཞིན་དུ་ཕབ་སྟེ་གཉིས་སུ་བྱས་ལ་གར་བྱས་ནས་སྤྱི་བོར་རིན་པོ་ཆེའི་ཐལ་མོ་བཅིང་བར་བྱ་སྟེ་འདི་ནི་རིན་ཆེན་གར་མའིའོ། །དེ་ཉིད་དེ་བཞིན་དུ་ཕབ་ནས་གཡས་པའི་མཛུབ་མོ་ལྕགས་ཀྱུ་བྱ་སྟེ་འདི་ནི་རིན་ཆེན་ལྕགས་ཀྱུ་མའིའོ། །དེ་བཞིན་དུ་མཐེ་བོང་གཉིས་ཀྱིས་མདུད་པ་བྱ་སྟེ་འདི་ནི་རིན་ཆེན་ཞགས་པ་མའིའོ། །དེ་བཞིན་དུ་མཛུབ་མོ་དང་མཐེ་བོ་ལུ་གུ་རྒྱུད་དུ་བྱ་སྟེ་འདི་ནི་རིན་ཆེན་ལྕགས་སྒྲོག་མའིའོ། །དེ་བཞིན་དུ་དེ་ཉིད་ཕབ་ལ་གཉིས་ཀྱི་ནང་དུ་མཐེ་བོང་སྦྱར་བར་བྱ་སྟེ། འདི་ནི་རིན་ཆེན་དྲིལ་བུ་མའིའོ། །དམ་ཚིག་གི་ཕྱག་རྒྱའོ། །འབྱོར་བ་ཡང་དག་པར་རྒྱལ་མའི་དམ་ཚིག་གི་ཕྱག་རྒྱ་ནི་དབང་བསྐུར་བའི་རིན་པོ་ཆེའིའོ། །དཔལ་གྱི་ལྷ་མོའི་དམ་ཚིག་གི་ཕྱག་རྒྱ་ནི་
གཏེར་གྱི་རིན་པོ་ཆེའིའོ། །རབ་ཏུ་ཕུན་སུམ་ཚོགས་པའི་ལྷ་མོའི་དམ་ཚིག་གི་ཕྱག་རྒྱ་ནི་ནོར་བུ་རིན་པོ་ཆེའི་རིན་ཆེན་གྱིའོ། །མཆོད་པའི་མིང་ཅན་གྱི་ལྷ་མོའི་དམ་ཚིག་གི་ཕྱག་རྒྱ་ནི་བླ་ན་མེད་པའི་རིན་པོ་ཆེ་ཡོངས་སུ་གཟུང་བར་བྱའོ། །འདི་ཉིད་གཉིས་སུ་བྱས་ལ་ལས་ཀྱི་ཕྱག་རྒྱ་གཟུང་བར་བྱའོ་ཞེས་བྱ་བ་ལ་འདི་ཉིད་གཉིས་སུ་བྱས་ན་ལས་ཀྱི་ཕྱག་རྒྱའོ། །དབང་བསྐུར་བ་ཐམས་ཅད་ཀྱི་རིན་པོ་ཆེའི་གཏེར་གྱི་མཆོད་པ་ཐོབ་པའི་དོན་དུ་ཡང་དག་པར་རྫོགས་པའོ་ཞེས་བྱ་བ་ལ་བླ་ན་མེད་པ་ཡང་དག་པའི་རིན་པོ་ཆེའི་དམ་ཚིག་གི་ཕྱག་རྒྱ་གཉིས་སུ་བྱས་ནས་ནོར་བུའི་ཁུ་ཚུར་གཉིས་སུ་འགྱུར་ཏེ་དེས་ནི་འཕགས་པ་ནམ་མཁའི་སྙིང་པོ་ལ་སོགས་པ་ནས་ནོར་བུ་དྲིལ་བུའི་མཐར་ཐུག་པའི་ལས་ཀྱི་ཕྱག་རྒྱ་བཅིངས་ནས་སྒྲུབ་པ་པོ་ལ་དབང་བསྐུར་བ་ཐམས་ཅད་ཐོབ་པའི་ཕྱིར་རྫོགས་པར་འགྱུར་བ་ཡིན་ནོ། །བཅོམ་ལྡན་འདས་འཕགས་པ་ནམ་མཁའི་སྙིང་པོའི་ལས་ཀྱི་དམ་ཚིག་ནི་ལས་རྫོགས་པར་བྱེད་པའི་ཕྱག་རྒྱ་སྒྲུབ་པ་པོ་ལས་ཀུན་གྱི་བསམ་པ་ཐམས་ཅད་ཡོངས་སུ་རྫོགས་པར་བྱེད་པ་ཡིན་ནོ། །དེ་ཉིད་ཀྱི་མཚན་ཉིད་བསྟན་པར་བྱ་བའི་ཕྱིར། གཡོན་པའི་ཁུ་ཚུར་སྙིང་གར་བསྟོད་ནས་གཡས་པ་ནོར་བུ་སྦྱིན་པ་བཀྲོལ་བའོ་ཞེས་བྱ་བ་ལ་གཡོན་པ་ནོར་བུའི་ཁུ་ཚུར་རང་གི་སྙིང་གའི་ཕྱོགས་སུ་བསྟོད་པའི་ཚུལ་གྱིས་གཟུང་བར་བྱས་ལ་གཡས་པ་རིན་པོ་ཆེའི་ཁུ་ཚུར་ཐམས་ཅད་སྦྱིན་པའི་ཚུལ་དུ་ཕྲལ་བར་བྱ་སྟེ་འདི་ནི་འཕགས་པ་ནམ་མཁའི་སྙིང་པོའི་ལས་ཀྱི་ཕྱག་རྒྱའོ། །ནོར་བུའི་ཁུ་ཚུར་གཉིས་ཀྱིས་ཞེས་བྱ་བ་ལ་དབང་བསྐུར་བའི་རིན་པོ་ཆེ་ལ་སོགས་པ་ནས་ནོར་བུའི་དྲིལ་བུའི་མཐར་ཐུག་པའི་བར་རྣམས་ཀྱིས་ནོར་བུའི་ཁུ་ཚུར་གཉིས་ཁོ་ནས་ལས་ཀྱི་ཕྱག་རྒྱ་རྣམས་བཅིང་བར་བྱའོ། །འདིས་ནི་འདི་ལྟར་བཤད་པར་འགྱུར་ཏེ། ནོར་བུའི་ཁུ་ཚུར་གཉིས་བཅིངས་ནས་དཔྲལ་བར་གཟུང་བར་བྱ་སྟེ་འདི་ནི་དབང་བསྐུར་བའི་རིན་པོ་ཆེའི་ལས་ཀྱི་ཕྱག་རྒྱའོ། །རང་གི་སྙིང་གའི་ཕྱོགས་སུ་གཟུང་བར་བྱ་སྟེ་འདི་ནི་གཏེར་གྱི་རིན་པོ་ཆེའོ། །པང་བར་གྱེན་དུ་ཁ་བལྟ་བར་བཟུང་བར་བྱ་སྟེ་འདི་ནི་ནོར་བུ་རིན་པོ་ཆེའིའོ། །སྙིང་གའི་ཕྱོགས་སུ་ནོར་བུ་ཕན་ཚུན་གཟུང་བར་བྱ་སྟེ་འདི་ནི་བླ་ན་མེད་པའིའོ། །དབང་བསྐུར་བའི་རིན་པོ་ཆེའི་ཕྱག་རྒྱ་ཉིད་ནི་འབྱོར་པའིའོ། །གཏེར་རིན་པོ་
ཆེའི་ཕྱག་རྒྱ་ནི་དཔལ་གྱི་ལྷ་མོའིའོ། །ནོར་བུ་རིན་པོ་ཆེའི་ཕྱག་རྒྱ་ནི་རབ་ཏུ་ཕུན་སུམ་ཚོགས་པའི་ལྷ་མོའིའོ། །བླ་ན་མེད་པའི་ཕྱག་རྒྱ་ནི་མཆོད་པའི་ཤེས་པར་བྱའོ། །རང་གི་སྤྱི་བོར་བཞག་ལ་ཕབ་ནས་རང་གི་སྙིང་གར་སྒེག་པའི་རྣམ་པར་ཕྲལ་དུ་གཟུང་བར་བྱ་སྟེ་འདི་ནི་རིན་ཆེན་སྒེག་མོའིའོ། །དེ་བཞིན་དུ་ཕབ་ནས་གཉིས་ཀྱི་ནང་དུ་མཐེ་བོ་སྦྱར་ཏེ་ཁར་ཡོངས་སུ་བསྐོར་ནས་སྤྱི་བོར་གཟུང་བར་བྱ་སྟེ་འདི་ནི་རིན་ཆེན་བཞད་མའིའོ། །དེ་བཞིན་དུ་ཕབ་ནས་གཡོན་པའི་མཛུབ་མོ་བཀུག་པའི་དབྱུག་པ་བྱས་ལ་གཡས་པ་བཀུག་ནས་པི་ཝང་བརྡུང་བའི་ཚུལ་དུ་བྱ་སྟེ་འདི་ནི་རིན་ཆེན་གླུ་མའིའོ། །དེ་བཞིན་དུ་ཕབ་ནས་གར་བྱས་ལ་སྤྱི་བོར་རིན་པོ་ཆེའི་ཐལ་མོ་ཆེ་བཅིང་བར་བྱ་སྟེ་འདི་ནི་རིན་ཆེན་གར་མའིའོ། །དེ་བཞིན་དུ་ཕབ་ནས་གཡས་པའི་མཛུབ་མོ་ལྕགས་ཀྱུ་བྱ་སྟེ་འདི་ནི་རིན་ཆེན་ལྕགས་ཀྱུ་མའིའོ། །དེ་བཞིན་དུ་ཕབ་ལ་མཐེ་བོང་གཉིས་ཀྱིས་མདུད་པ་བྱས་ལ་འདི་ནི་རིན་ཆེན་ཞགས་པ་མའིའོ། །དེ་བཞིན་དུ་ཕབ་ལ་མཛུབ་མོ་དང་མཐེ་བོ་མདུད་པ་བྱས་ཏེ་འདི་ནི་རིན་ཆེན་ལྕགས་སྒྲོག་མའིའོ། །དེ་བཞིན་དུ་ཕབ་ལ་གཉིས་ཀྱི་ནང་དུ་མཐེ་བོང་སྦྱར་བར་བྱ་སྟེ་འདི་ནི་རིན་ཆེན་དྲིལ་བུ་མའི་ལས་ཀྱི་ཕྱག་རྒྱའོ། །དེ་ལྟར་ཕྱག་རྒྱ་རྣམས་ཀྱི་མཚན་ཉིད་བསྟན་ནས་ད་ནི་རང་གི་ལྷའི་སྙིང་པོ་གྲོང་ཁྱེར་ཆགས་པའི་གླུ་དང་བཅས་པའི་བཟླས་པ་རྗེས་སུ་གནང་བ་སྦྱིན་ཞིང་རང་གི་ཕྱག་རྒྱ་བསྒྲུབ་པར་བྱའོ་ཞེས་བྱ་བའི་ཆོ་ག་འདིར་རབ་ཏུ་བསྟན་པར་བྱ་བའི་ཕྱིར། སྙིང་པོའི་ངག་ཅེས་བྱ་བ་ལ་སོགས་པ་གསུངས་ཏེ་རང་གི་ལྷའི་བཟླ་བར་བྱ་བའི་སྙིང་པོ་ནི་སྙིང་པོའི་ངག་གོ། སྙིང་པོའི་ངག་རང་གི་ལྷའི་སྙིང་པོ་དེ་གླུའི་བསྟན་བཅོས་ལས་བཤད་པའི་གྲོང་ཁྱེར་བའི་ཆགས་པའི་གླུ་དང་བཅས་པ། ཨོཾ་སརྦ་བཛྲ་ཨ་དྷི་པ་ཏི་སྟྭཾ་ཨ་བྷི་ཥི་ཉྩཱ་མི་བྷུར་བྷུ་ཝ་སྭཿ་ཞེས་བྱ་བ་ལ་སོགས་པའི་བཟླས་པ་བྱ་ཞིང་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རིན་པོ་ཆེ་ཀྱེ་བདག་ལ་སྩོལ་ཅིག །ཅེས་བྱ་བའི་ཚིག་གིས་རྣལ་འབྱོར་པས་གསོལ་བ་གདབ་ཅིང་ཕྱག་རྒྱ་ཆེན་པོ་ལ་སོགས་པ་ཐམས་ཅད་བསྒྲུབ་པར་བྱའོ་ཞེས་བྱ་བ་ནི་ཚིག་གི་ལྷག་མའོ། །ལས་ལ་སྦྱོར་བ་ནི་དེ་བཞིན་དུའོ་ཞེས་བྱ་བ་མདོར་བསྟན་པའི་ཚིག་རྣམས་ཀྱི་ལས་ཀྱི་ཕྱག་རྒྱ་སྒྲུབ་པ་ལ་ངེས་པར་
སྦྱོར་བ་ཇི་ལྟ་བ་བཞིན་དུ་བསྟན་པ་དེ་བཞིན་དུ་འདིར་ཡང་ཤེས་པར་བྱའོ་ཞེས་བྱ་བའི་དོན་ཏོ། །འདི་ལྟར་བཤད་པར་འགྱུར་ཏེ་ལས་ཀྱི་ཕྱག་རྒྱ་ཐམས་ཅད་ཡེ་གེ་ཏྲཱཾ་བརྗོད་ཅིང་བཅིངས་ནས་ལས་ལ་ངེས་པར་སྦྱར་བར་བྱའོ། །ད་ནི་ལས་བརྒྱ་གྲུབ་པར་བྱེད་པའི་ཕྱག་རྒྱ་དེ་རྣམས་ཀྱི་མཚན་ཉིད་བཤད་པར་བྱ་བའི་ཕྱིར་དེ་མ་གྲུབ་ན་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྔ་མ་བཞིན་ནོ། །ནམ་མཁའི་སྙིང་པོ་མ་གྲུབ་ན་ཇི་ལྟ་བ་བཞིན་དུ་བཤད་པའི་མཚན་ཉིད་ཅན་གྱི་རྡོ་རྗེ་རིན་ཆེན་གྱི་དམ་ཚིག་གི་ཕྱག་རྒྱ་མཛོད་སྤུའི་ཕྱོགས་སུ་བཞག་ནས་དབང་བསྐུར་བ་ནི་ནམ་མཁའི་སྙིང་པོ་ལ་འབྱོར་བ་ཐམས་ཅད་དགུག་པ་ལ་སོགས་པའི་ཚིག་གིས་གསོལ་བ་གདབ་པ་ནི་སྒྲུབ་པ་པོ་བྱ་བ་ཡིན་ནོ། །ཆོས་ཀྱི་ཕྱག་རྒྱ་ཐམས་ཅད་ཀྱི་ཚོགས་ནི་རྒྱུན་ཏེ་སྔར་བཤད་པ་བཞིན་དུ་ཚིག་གི་བསྒོ་བས་ཤེས་པར་བྱའོ། །འདིའི་བཤད་པ་ཡང་སྔར་བཤད་པ་སྟེ་ཁྱད་པར་མེད་པས་སླར་ཡང་མ་བཤད་དོ། །དོན་ཡོད་ཅེས་བྱ་བ་ལ་སོགས་པ་བཤད་ཟིན་ཏོ། །ངག་གི་ཕྱག་རྒྱ་ནི་སྙིང་པོའི་བཟླས་པ་སྟེ། ངེས་ཚིག་བསྒྲུབ་པ་ནི་འདོད་པའི་དངོས་གྲུབ་བསྒྲུབ་པའི་ཕྱིར་ཡིད་ཀྱིས་ཚིག་བསྒོ་བ་སྟེ། དེ་ནས་མཁའ་ནི་ནམ་མཁའི་སྙིང་པོ་ལས་འབྱོར་བ་ཐམས་ཅད་དགུག་པ་ལ་སོགས་པ་ཡང་དག་པར་འབྱུང་བ་སྟེ་སྐྱེ་བར་འགྱུར་རོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་འཕགས་པ་ནམ་མཁའི་སྙིང་པོའི་ཕྱག་རྒྱའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་རིགས་ལྔའི་ཕྱག་རྒྱའི་རྒྱུད་བསྟན་ནས། ད་ནི་ཕྱིའི་ཕྱག་རྒྱའི་རྒྱུད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྔ་མ་བཞིན་ནོ། །རྡོ་རྗེ་འཆང་ཆེན་པོའི་རང་བཞིན་ཅན་གྱི་རིགས་ལྔ་ནི་ནང་སྟེ། དེ་རྣམས་ཀྱི་ཕྱག་རྒྱའི་རྒྱུ་ནི་ནང་གིའོ། །དེའི་ཕྱི་རོལ་པ་ནི་མིང་པོ་གསུམ་ལ་སོགས་པའི་དཀྱིལ་འཁོར་བཞིའོ། །དེའི་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་རང་བཞིན་ཏེ། དེ་སྟོན་པར་བྱེད་པའི་རྒྱུ་ནི་འདི་ཡིན་ཏེ། ཕྱག་རྒྱ་ཆེན་པོ་ནི་གཡོན་པར་ཁམ་ཕོར་དང༌། གཡས་ན་མདའ་སྟོད་པའོ་ཞེས་བྱ་བ་ལ་ལག་པ་གཡོན་པས་ཁམ་ཕོར་འཛིན་ཅིང་ལག་པ་གཡས་པས་མདའ་སྟོད་
པས་ཏེ། འདི་ཉིད་གར་གྱི་ཚུལ་གྱིས་དེ་རྣམས་ལས་ཀྱི་ཕྱག་རྒྱར་འགྱུར་རོ། །དམ་ཚིག་ནི་འཇུག་པ་ལའོ་ཞེས་བྱ་བ་ལ་སོགས་པ་ལ་མཐེའུ་ཆུང་མཐེ་བོང་དག་གིས་ལུ་གུ་རྒྱུད་དུ་བཅིངས་ལ་སོར་མོ་ལྷག་མ་རྣམས་ཀྱིས་རྩེ་གསུམ་པའི་རྣམ་པ་བྱས་ཏེ། འདི་ནི་དེ་རྣམས་ཀྱི་དཀྱིལ་འཁོར་དུ་འཇུག་པའི་ཕྱག་རྒྱ་སྟེ་དམ་ཚིག་གི་ཕྱག་རྒྱའོ། །ཇི་ལྟ་བ་བཞིན་དུ་བཟུང་བས་ལྷ་མོ་རྣམས་ཀྱིའོ་ཞེས་བྱ་བ་ལ་བྲི་བའི་ཆོ་གས་ཇི་ལྟ་བ་བཞིན་དུ་དགའ་མ་ལ་སོགས་པའི་སྐུའི་གསང་བ་བཤད་པ་དེ་བཞིན་དུ་ཕྱག་རྒྱ་བཅིང་བར་བྱའོ། །འདི་ལྟར་འཆད་པར་འགྱུར་ཏེ། ལག་པ་གཡོན་པས་གཞུ་བཟུང་ལ། ལག་པ་གཡས་པས་མདའ་སྟོད་པ་ནི་དགའ་མའི་ཕྱག་རྒྱ་ཆེན་པོའོ། །ལག་པ་གཡོན་པས་ཁ་ཊྭཱཾ་ག་བཟུང་ལ་གཡས་པས་རལ་གྲིའི་སོ་ནི་སྲིན་མོའིའོ། །ལག་པ་ལ་གཏེར་གྱི་བུམ་པས་ནི་ཕག་མོའིའོ། །གཡོན་པའི་ཁུ་ཚུར་གྱིས་བསྙེམས་པ་བྱས་ནས་ལག་པ་གཡས་པས་ཆུ་གྲི་འཛིན་པ་ནི་གྲུབ་པ་མོའི་ཕྱག་རྒྱ་ཆེན་པོའོ། །དབུས་མ་དང་མཐེའུ་ཆུང་ཞེས་བྱ་བ་ལ་སོགས་པ་ལ་རྡོ་རྗེ་བསྡམས་པ་བཅིངས་ནས་དབུས་མ་དང་སྲིན་ལག་གི་སོར་མོ་བཞི་ལ་མཛུབ་མོ་དང་མཐེའུ་ཆུང་རྣམས་ཀྱི་རྩེ་མོ་བཞི་སྦྱར་བར་བྱ་སྟེ་འདི་ནི་འདིར་འདུས་པའོ། །འདིས་ནི་འདི་ལྟར་བཤད་པར་འགྱུར་ཏེ། རྡོ་རྗེ་བསྡམས་པ་ཕྱིར་བཅིངས་ནས་མཛུབ་མོ་དང་དབུས་མ་དང་སྲིན་ལག་དང་མཐེའུ་ཆུང་གི་སོར་མོ་རྣམས་བསྒྲེང་བར་བྱས་ལ། གཡས་པའི་དབུས་མ་གཡོན་པའི་མཛུབ་མོའི་རྩེ་མོ་དང་སྦྱར་ལ། གཡོན་པའི་དབུས་མའི་རྩེ་མོ་གཡས་པའི་མཛུབ་མོའི་རྩེ་མོ་དང་ཡང་དག་པར་སྦྱར་ཞིང་གཡས་པའི་སྲིན་ལག་གི་རྩེ་མོ་གཡོན་པའི་མཐེའུ་ཆུང་གི་རྩེ་མོ་དང་ཡང་དག་པར་སྦྱར་ཏེ། གཡོན་པའི་སྲིན་ལག་གི་རྩེ་མོ་གཡས་པའི་མཐེའུ་ཆུང་གི་རྩེ་མོ་དང་ཡང་དག་པར་སྦྱར་བ་བྱས་ནས་གཟུང་བར་བྱ་སྟེ་འདི་ནི་སྲིན་མོ་རྣམས་ཀྱི་དམ་ཚིག་གི་ཕྱག་རྒྱའོ། །དམ་ཚིག་ཅེས་བྱ་བ་ལ་སོགས་པ་ནི་གོ་སླའོ། །ཀླུའི་དཀྱིལ་འཁོར་གྱི་ཕྱག་རྒྱ་བཤད་པར་བྱ་བའི་ཕྱིར་གདེངས་ཀ་ཅན་གྱི་དབང་པོ་རྣམས་ཀྱིའོ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཕྱག་རྒྱ་ཆེན་པོ་ནི་བྲི་བའི་ཕྱག་རྒྱར་བསྟན་པའོ། །ལག་པ་གཉིས་ཀྱི་མཐེ་བོང་གཉིས་ཕན་ཚུན་
མདུད་པ་བྱས་ནས་མཐེ་བོང་དང་སོར་མོའི་གདེངས་ཀ་བསྒྲེང་བའི་རང་བཞིན་ཅན་གྱི་ལྟོ་འཕྱེ་ཆེན་པོའི་ལག་པ་ཞེས་བྱ་བ་སྟེ། ཀླུ་ཐམས་ཅད་འགུགས་པར་བྱེད་པའི་ཕྱག་རྒྱ་སྔར་བཤད་པའོ། །འགུགས་པའི་སྔགས་ཀྱིས་དེ་ཉིད་གཉིས་སུ་བྱས་ན་ལྟོ་འཕྱེའི་ལག་པ་ཞེས་བྱ་སྟེ། ལྟོ་འཕྱེ་ཆེན་པོའི་ལག་པ་གཉིས་སུ་བྱས་ནས་ལག་པ་གཅིག་གི་སོར་མོ་ལྔའི་གདེངས་ཀ་བསྒྲེང་བའི་རང་བཞིན་ཅན་གྱིས་གདེངས་ཀའི་ལག་པ་ཞེས་བྱ་བ་ཀླུ་རྣམས་ཀྱི་དམ་ཚིག་འཛིན་པའི་ཕྱག་རྒྱའོ། །དབུས་མ་སྲིན་ལག་ཅེས་བྱ་བ་ལ་སོགས་པ་ལ་དབུས་མ་དང་སྲིན་ལག་གི་སོར་མོ་བཞི་པོས་རྡོ་རྗེ་བསྡམས་པ་ནང་དུ་བཅིངས་ལ་མཐེའུ་ཆུང་གཉིས་ཀྱི་རྩེ་མོ་ཡང་དག་པར་སྦྱར་ནས་མཛུབ་མོ་དང་མཐེ་བོ་དག་གིས་དགའ་བར་སྦྱོར་བའི་ཚུལ་དུ་བྱས་ཏེ་འདིས་ནི་དུག་ཐམས་ཅད་འབར་བའོ། །ལྕགས་ཀྱུའི་རྣམ་པ་ཅན་གྱི་མཛུབ་མོ་གཉིས་ཀྱིས་དུག་བཀུག་ལ་མཛུབ་མོ་གཉིས་ཀྱི་རྩེ་མོ་མཐེ་བོ་གཉིས་ཀྱི་རྩེ་མོ་དང་ཡང་དག་པར་སྦྱར་ལ་གཟུང་བར་བྱ་སྟེ་འདིས་དུག་ཐམས་ཅད་འཆི་བའོ། །འདི་གཉིས་ཀྱི་རྩེ་མོས་དུག་གཞོམ་པར་བྱས་ཏེ་དེ་ལྟར་ན་དུག་ཐམས་ཅད་འཇིག་པའོ། །འདི་ཉིད་ཀྱིས་དུག་ཐམས་ཅད་ཟ་བ་དང༌། འཕོ་བ་དང༌། དུག་མེད་པར་བྱེད་པ་ཡིན་ནོ། །གདུག་པའི་དཀྱིལ་འཁོར་ནི་རྡོ་རྗེ་ཁུ་ཚུར་གྱིས་གཟུང་བའི་རྡོ་རྗེ་ཁྲོས་ནས་མྱུར་དུ་གཞིག་པར་བྱའོ་ཞེས་བྱ་བ་ལ་རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་བྱས་ལ་གཡས་པའི་རྡོ་རྗེ་ཁུ་ཚུར་གྱིས་ཁྲོ་བོའི་རྡོ་རེ་བླངས་ཏེ། ཁྲོ་བོའི་ཁུ་ཚུར་གྱིས་སྡིགས་མཛུབ་ལ་བརྩོན་པས་ཁྲོ་ཞིང་ཇི་ལྟ་བ་བཞིན་དུ་བཤད་པའི་གླུ་བརྗོད་ཅིང་མྱུར་དུ་རྐང་པས་མཉེ་བར་བྱའོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་ཕྱིའི་དཀྱིལ་འཁོར་གྱི་ཕྱག་རྒྱའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་ཕྱིའི་དཀྱིལ་འཁོར་གྱི་ཕྱག་རྒྱའི་རྒྱུད་བསྟན་ནས། ད་ནི་བསྡུས་པའི་དཀྱིལ་འཁོར་གྱི་ཕྱག་རྒྱའི་རྒྱུད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །བཅོམ་ལྡན་འདས་ཞེས་བྱ་བ་ནི་དཔལ་རྡོ་རྗེ་སེམས་དཔའོ། །ཐམས་ཅད་ཀྱི་མཆོག་དབང་ཕྱུག་དམ་པ་ཞེས་བྱ་བ་ལ་བྱང་ཆུབ་
ཆེན་པོའི་རང་བཞིན་ཅན་གྱིས་ཐམས་ཅད་ཀྱི་མཆོག་གོ །གཟུང་བ་དང་འཛིན་པའི་རྣམ་པར་རྟོག་པའི་གཞན་དབང་དུ་མ་གྱུར་པའི་ཕྱིར་དབང་ཕྱུག་གོ །དམ་པ་ཞེས་བྱ་བ་ནི་ཐོག་མ་དང་ཐ་མ་མེད་པའོ། །ཐམས་ཅད་ཀྱི་མཆོག་ཀྱང་དེ་ཉིད་ཡིན་ལ་དབང་ཕྱུག་ཀྱང་དེ་ཉིད་ཡིན་ཏེ་དམ་པ་ཡང་དེ་ཉིད་ཡིན་པས་ན་ཐམས་ཅད་ཀྱི་མཆོག་གི་དབང་ཕྱུག་དམ་པའོ། །བཅོམ་ལྡན་འདས་ཐམས་ཅད་ཀྱི་དབང་ཕྱུག་དམ་པ་དེའི་ཕྱག་རྒྱ་འདི་ཡིན་ནོ་ཞེས་བྱ་བ་དང་སྦྱར་བར་བྱའོ། །དེ་ཡང་སྐུ་ཡི་ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན། ནམ་མཁའ་ཐམས་ཅད་ཁྱབ་པར་བྱེད་ཅིང་རིགས་ཅན་གྱི་རང་བཞིན་གྱི་གཟུགས་སྣ་ཚོགས་པའི་སྐུ་གང་ལ་མངའ་བ་དེ་ནི་སྣ་ཚོགས་པའི་སྐུ་ཆེན་པོས་ཏེ་བསྡུས་པའི་དཀྱིལ་འཁོར་གྱི་རིགས་ཐམས་ཅད་ཀྱི་ལྟ་སྐུའི་གཟུགས་འཛིན་པའི་རྡོ་ཇེ་འཆང་ཆེན་པོའོ། །སྣ་ཚོགས་པའི་སྐུ་ཆེན་པོ་དེ་ཉིད་ཡི་ཕྱག་རྒྱ་ནི་ཕྱག་རྒྱ་བཅིང་བའི་མཚན་ཉིད་ཀྱི་སྐབས་སུ་བབ་པ་ཡིན་ནོ། །དེ་ལ་ཕྱག་རྒྱ་ཆེན་པོ་བཅིང་བའི་མཚན་ཉིད་ནི་བསྡུས་པའི་དཀྱིལ་འཁོར་དྲི་བའི་ཆོ་གར་བསྟན་པའི་དཔལ་རྡོ་རྗེ་སེམས་དཔའ་ལ་སོགས་པ་རྣམས་ཀྱིས་གཟུང་བར་བྱའོ། །རྡོ་རྗེ་ཐལ་མོ་སྦྱར་ནས་ནི། །ཞེས་པ་ལ་རྡོ་རྗེ་ཐལ་མོ་བཅིངས་ནས་བ་དན་གསུམ་ནི་ཡོངས་སུ་གཟུང་བ་ཞེས་བྱ་བ་ལ། རྡོ་རྗེ་ཐལ་མོ་མ་བཀྲོལ་བར་ལག་པ་གཉིས་ཀྱིས་བ་དན་གསུམ་བྱའོ། །འདི་ལྟར་བཤད་པར་འགྱུར་ཏེ། རྡོ་རྗེ་ཐལ་མོ་བཅིངས་ནས་སྲིན་ལག་གཉིས་ནང་དུ་བཅུག་ལ་མཐེ་བོང་གཉིས་སོ་སོར་ཕྱེ་ལ་མཛུབ་མོ་གཉིས་ཀྱི་ངོས་ལ་ཡང་དག་པར་སྦྱར་བར་གཟུང་བར་བྱ་སྟེ་འདི་ནི་ཁྱབ་འཇུག་གི་གཟུགས་འཛིན་པའི་རྣམ་བར་སྣད་མཛད་དང༌། རྡོ་རྗེ་དཔལ་གྱི་ལྷ་མོའི་དམ་ཚིག་གི་ཕྱག་རྒྱ་རྡོ་རྗེ་ཁྱབ་འཇུག་མ་ཞེས་བྱ་བ་ཡིན་ནོ། །འདི་ལ་སྦྱོར་བ་དང་བཅས་པ་བསྟན་པའི་ཕྱིར། དོར་ན་ཐམས་ཅད་གཅོད་བྱེད་པ། །ཞེས་བྱ་བ་གསུངས་ཏེ་འདི་བཅིངས་ནས་བདུད་ལ་སོགས་པ་ཐམས་ཅད་ཀྱི་སྟེང་དུ་དོར་བར་བྱས་ན་བདུད་ལ་སོགས་པ་ཐམས་ཅད་གཅོད་པར་བྱེད་པ་ཡིན་ནོ། །རྡོ་རྗེ་འཁོར་ལོའི་ཕྱག་རྒྱ་ཞེས་བྱ་བ་ལ་སོགས་པ་ནི་གོ་སླའོ། །མཐེའུ་ཆུང་མཐེ་བོ་ཞེས་བྱ་བ་ལ་སོགས་པ་ལ་ལག་པ་གཡོན་པའི་འོག་ཏུ་ཁ་བལྟ་བར་བྱས་ལ་དེའི་སྟེང་དུ་ཁ་བལྟ་བ་བཞག་ནས་གཡས་པའི་མཐེ་བོང་དང་
གཡོན་པའི་མཐེའུ་ཆུང་དང་གཡོན་པའི་མཐེ་བོ་དང༌། གཡས་པའི་མཐེའུ་ཆུང་དག་གིས་ལུ་གུ་རྒྱུད་དུ་བཅིངས་ཏེ། དབུས་མ་གསུམ་པ་དག་གི་རྩེ་མོ་གསུམ་པ་བྱས་ཏེ་འདི་ནི་རྡོ་རྗེ་འཛིན་མ་ཞེས་བྱ་བ་གཏུམ་པའི་དབང་ཕྱུག་གི་གཟུགས་འཛིན་པ་དང་རྡོ་རྗེ་དཀར་མོའི་དམ་ཚིག་གི་ཕྱག་རྒྱའོ། །རྡོ་རྗེ་པདྨ་ཁ་སྦྱར་ནི། །ཞེས་བྱ་བ་ལ་སོགས་པ་ལ་སྔར་བཤད་པའི་རྡོ་རྗེ་ཐལ་མོ་ལས་བྱུང་བའི་འཇིག་རྟེན་དབང་ཕྱུག་གི་ཕྱག་རྒྱ་ནི་རྡོ་རྗེ་པདྨས་ཏེ། དེ་བཅིངས་ནས་གང་དང་གང་གི་ཡུལ་དུ་གནས་པ་དེ་དང་དེའི་སྤྱོད་ལམ་གྱིས་ཚངས་པའི་གཟུགས་འཛིན་པའི་བཅོམ་ལྡན་འདས་འཇིག་རྟེན་དབང་ཕྱུག་དང་པདྨའི་སྒྲོལ་མ་བསྒྲུབ་པར་བྱ་སྟེ། འདི་ནི་ཚངས་པའི་གཟུགས་འཛིན་པའི་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་དང༌། པདྨའི་སྒྲོལ་མའི་དམ་ཚིག་གི་ཕྱག་རྒྱའོ། །རྡོ་རྗེ་ཐལ་མོ་སྦྱར་ནས་ནི། །ཞེས་བྱ་བ་ལ་སོགས་པ་རྡོ་རྗེ་ཐལ་མོ་བཅིངས་ནས་མཐེ་བོང་གཉིས་ཀྱི་རྩེ་མོ་ཡང་དག་པར་སྦྱར་ལ་དེའི་སྟེང་དུ་མཛུབ་མོ་གཉིས་རྩེ་མོ་བཀུག་པའི་རིན་པོ་ཆེ་གཟུང་བར་བྱ་སྟེ་འདི་ནི་ལྷའི་གཟུགས་འཛིན་པའིའོ། །ནམ་མཁའི་སྙིང་པོ་དང་ནམ་མཁའི་རྡོ་རྗེ་མ་ནི་དམ་ཚིག་གི་ཕྱག་རྒྱའོ། །དཔལ་རྡོ་རྗེ་སེམས་དཔའ་ལ་སོགས་པ་རྣམས་ཀྱིས་ནི་སྔར་བཤད་པ་ཁོ་ནས་དམ་ཚིག་གི་ཕྱག་རྒྱར་གཟུང་བར་བྱ་སྟེ། ལས་ཀྱི་ཕྱག་རྒྱ་རྣམས་ནི་རང་གི་རིགས་ཀྱི་དཀྱིལ་འཁོར་དུ་གསུངས་པར་ཤེས་པར་བྱའོ། །ད་ནི་བསྡུས་པའི་དཀྱིལ་འཁོར་གྱི་ལས་ཀྱི་ཚོགས་ཀྱི་ཕྱག་རྒྱའི་རྒྱུད་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྔ་མ་བཞིན་ནོ། །ཀྱེ་ཞེས་བྱ་བ་ནི་དེ་བཞིན་གཤེགས་པ་ཐམས་ཅད་ལ་བོད་པའོ། །ཐམས་ཅད་ཀྱི་མཆོག་གི་དབང་ཕྱུག་དམ་པ་ནི་ཇི་ལྟ་བ་བཞིན་དུ་བཤད་པའི་དཔལ་རྡོ་རྗེ་སེམས་དཔའ་སྣ་ཚོགས་ཀྱི་སྐུ་སྟེ། དེའི་ལས་ཀྱི་ཕྱག་རྒྱའི་རྒྱུད་ནི་འདི་ཡིན་ཏེ་དེ་ལ་ཞེས་བྱ་བ་ལ་སོགས་པ་ལ་དེ་ལ་ཞེས་བྱ་བའི་སྒྲ་ནི་དག་ཉེ་བར་དགོད་པ་ལའོ། །དང་པོ་ནི་ཐོག་མ་ཉིད་དུའོ། །རེ་ཞིག་གི་སྒྲ་ནི་རིམ་པ་ལ་ལྟོས་པའོ། །དང་པོའི་དངོས་གྲུབ་ཀྱི་ཕྱག་རྒྱ་ནི་དང་པོའི་དངོས་གྲུབ་ཀྱི་ཕྱག་རྒྱ་སྟེ། དེ་རབ་ཏུ་གྲུབ་པར་བྱེད་པའི་ཕྱག་རྒྱ་ཆེན་པོ་རྣམས་ཀྱི་སྟོང་འགྱུར་དུ་འགྱུར་བ་ཡིན་ནོ། །ཇི་ལྟ་བ་བཞིན་དུ་དམ་ཚིག་གི་
ཕྱག་མཚན་རྣམས་ཀྱིས་ཞེས་བྱ་བ་ལ་སོགས་པ་ལ་དང་པོའི་རྡོ་རྗེ་དང་རྡོ་རྗེ་ཁྱབ་འཇུག་མ་དང་རྡོ་རྗེ་འཛིན་པ་དང་རྡོ་རྗེ་པདྨའི་མིང་ཅན་དང་རྡོ་རྗེ་རིན་པོ་ཆེའི་དམ་ཚིག་གི་ཕྱག་རྒྱ་དང་རྡོ་རྗེ་མྱུ་གུའི་མིང་ཅན་གྱི་ཇི་ལྟ་བ་བཞིན་དུ་བཤད་པའི་དམ་ཚིག་གི་ཕྱག་མཚན་རྣམས་སོ། །ཇི་ལྟ་བ་བཞིན་གྱི་དམ་ཚིག་གི་ཕྱག་མཚན་དེ་རྣམས་ཀྱི་ལག་པ་གཡས་པ་དང་གཡོན་པའི་བྱ་བར་གྱུར་པ་དེ་དག་གི་རྡོ་རྗེ་ཆེན་པོ་རབ་ཏུ་སྦྱོར་བ་ནི་རྗེས་སུ་ཆགས་པ་ལ་སོགས་པ་བསྒོམ་པ་སྟེ་དེས་ངེས་པར་སྦྱོར་བའི་ཚུལ་སྦྱིན་པས་ཏེ། དེ་ལ་རྡོ་རྗེ་སེམས་དཔའ་ལ་སོགས་པའི་རིགས་ཐམས་ཅད་ཀྱི་དངོས་གྲུབ་རབ་ཏུ་སྒྲུབ་པར་བྱེད་པའི་ཕྱག་རྒྱ་ཆེན་པོ་སྟོང་འགྱུར་དུ་འགྱུར་རོ། །འདི་ལྟར་བཤད་པར་འགྱུར་ཏེ། དང་པོའི་རྡོ་རྗེ་བཅིངས་ནས་གཉིས་སུ་བྱས་ལ་ལག་པ་གཡས་པའི་དང་པོའི་རྡོ་རྗེ་བཞིན་བཟླུམ་ཞིང་རྡོ་རྗེའི་ལྟ་བས་རྗེས་སུ་ཆགས་པར་བྱའོ། །འབར་བའི་ལྟ་བས་དགུག་པར་བྱའོ། །བརྟན་པའི་ལྟ་པས་ཐམས་ཅད་བཅིང་བའོ། །རྡོ་རྗེའི་ལྟ་བས་ཐམས་ཅད་དབང་དུ་བྱེད་པའོ། །ལག་པ་གཡས་པའི་དང་པོའི་རྡོ་རྗེ་དེ་ཉིད་རང་གི་རྟགས་ལ་གཟུང་བར་བྱ་སྟེ། དེ་ལྟར་ན་བདེ་བ་ཐམས་ཅད་འཕེལ་བར་འགྱུར་རོ། །རང་གི་སྙིང་གང་གཟུང་བར་བྱས་ན་ཡིད་འདེ་བ་ཐམས་ཅད་འཕེལ་བར་འགྱུར་རོ། །དབང་བསྐུར་བ་ཐམས་ཅད་གཟུང་བར་བྱས་ན། ཕུན་སུམ་ཚོགས་པ་ཐམས་ཅད་འཕེལ་བར་འགྱུར་རོ། །ལག་པ་གཡས་པའི་དང་པོའི་རྡོ་རྗེ་དེ་ཉིད་ཀྱི་དབུས་མའི་རྡོ་རྗེ་རང་གི་སྙིང་གར་བཞག་ལ་དེའི་འོག་ཏུ་རང་གི་སྙིང་གར་བཟུང་ཞིང་བཏུང་བར་བྱས་ནི་ཚེ་རིང་བ་ཐམས་ཅད་འཕེལ་བར་འགྱུར་རོ། །རང་གི་རྟགས་སུ་བཞག་ནས་རང་གི་ཁར་བཟུང་ཞིང་བཏུང་བར་བྱས་ན་ན་ཚོད་འཕེལ་བར་འགྱུར་རོ། །རང་གི་སྙིང་གར་བཟུང་ཞིང་བཏུང་བར་བྱས་ན་གཟུགས་འཕེལ་བར་འགྱུར་རོ། །དབང་བསྐུར་པའི་གནས་སུ་བཞག་ལ་དེའི་རྗེས་ལ་ཁར་བཟུང་ཞིང་འཐུངས་ན་གཟི་བརྗིད་འཕལ་བར་འགྱུར་རོ། །ལག་པ་གཡས་པའི་དང་པོའི་རྡོ་རྗེའི་མཛུབ་མོ་བསྒྲེང་བ་གཟུང་བར་བྱས་ན། དཔལ་ཆེན་པོ་འཕེལ་བར་འགྱུར་རོ། །དེ་ཉིད་ཀྱི་སོར་མོ་དབུས་མ་བསྒྲེང་བ་གཟུང་བར་བྱས་ན་སྒྲ་སྙན་པ་ཆེན་པོ་འཕེལ་བར་འགྱུར་རོ། །དེ་ཉིད་མཐེའུ་ཆུང་བསྒྲེང་བས་བཟུང་ན་
གྲགས་པ་ཆེན་པོ་འཕེལ་བར་འགྱུར་རོ། །དེ་ཉིད་ཀྱི་དབུང་པར་སྟོད་པའི་ཚུལ་བྱས་ཏེ་སྟོབས་ཆེན་པོ་འགྲུབ་པོ། །རང་གི་སྙིང་གར་སྟོད་པར་བྱས་ན་ཡེ་ཤེས་ཆེན་པོ་འགྲུབ་པོ། །སྤྱི་བོར་སྟོད་པར་བྱས་ན་ལས་འགྲུབ་པར་འགྱུར་པ་ཡིན་ནོ། །དེ་བཞིན་དུ་ནམ་མཁའི་དངོས་པོ་ཐམས་ཅད་སྐྱེད་པའི་ཚུལ་བྱས་ན་རྫུ་འཕྲུལ་ཐམས་ཅད་མཐོང་བར་འགྱུར་རོ། །མཛུབ་མོ་དང་སྲིན་ལག་གིས་འབར་བའི་ཚུལ་དུ་བྱས་ན་ཆོ་འཕྲུལ་ཐམས་ཅད་སྟོན་པའོ། །དེ་ཉིད་བཅིངས་ནས་རང་གི་སྙིང་གར་དགའ་བ་སྐྱེད་པའི་ཚུལ་བྱས་ནས་འཛིན་ན་རྨད་དུ་བྱུང་བ་ཐམས་ཅད་སྟོན་པའོ། །དེ་ཉིད་བཅིངས་ནས་རང་གི་ལུས་ལ་བསྐོར་བ་བྱས་ན་རྣམ་པར་འཕྲུལ་པ་ཐམས་ཅད་སྟོན་པར་འགྱུར་རོ། །དེ་ཉིད་ཐམས་ཅད་དུ་བསྐོར་ནས་མིག་ཏུ་གཟུང་བར་བྱས་ན་བདེན་པ་ཐམས་ཅད་མཐོང་བའོ། །དེ་བཞིན་དུ་བསྐོར་ནས་རྣ་བ་གཉིས་སུ་འཛིན་ན་བདེན་པ་ཐམས་ཅད་ཐོས་པའོ། །དེ་བཞིན་དུ་བསྐོར་ནས་ལྕེར་གཟུང་བར་བྱས་ན་ཐམས་ཅད་སྨྲ་བའོ། །དེ་བཞིན་དུ་བསྐོར་ནས་རང་གི་ལུས་ལ་འཛིན་ན་ཐམས་ཅད་ལུས་ཀྱིས་འཁྱུད་པའོ། །དེ་ཉིད་བཅིངས་ནས་སོར་མོ་དབུས་མས་མིག་ལ་རེག་ན་བདེ་བའི་མཆོག་ཐམས་ཅད་མཐོང་བའོ། །བཀའ་སྩལ་བའི་ཚུལ་བྱས་ན་བཀའ་བསྒོ་བ་ཐམས་ཅད་སྟོན་པའོ། །བཀའ་སྩོལ་པའི་ལན་སྟོན་པའི་ཚུལ་བྱས་ན་བཀའ་སྩོལ་བ་ཐམས་ཅད་ཀྱི་ལན་སྟོན་པའོ། །དེ་ཉིད་དབུས་མའི་རྡོ་རྗེ་གཏེར་འདོན་པའི་ཚུལ་གྱིས་མཛོད་སྤུའི་ཕྱོགས་སུ་འཛིན་ན་གཏེར་ཐམས་ཅད་འདོན་པའོ། །ནོར་དགུག་པའི་ཚུལ་དུ་གཟུང་བར་བྱས་ན་ནོར་ཐམས་ཅད་འཕྲོག་པའོ། །རྒྱལ་སྲིད་ཐོབ་པའི་ཚུལ་བཟུང་ན་རྒྱལ་སྲིད་ཐམས་ཅད་ཐོབ་པོ། །སྐྱེ་བོའི་ཚོགས་ཐམས་ཅད་ལ་རག་ལས་བར་བྱ་བའི་བསམ་པས་བཞག་ན་གྲོང་ཁྱེར་སྤྲུལ་པའོ། །ནགས་ཚལ་དང་ཆུ་བོ་སྤྲུལ་པའི་བསམ་པས་བཞག་ན་ནགས་དང་ཆུ་བོ་སྤྲུལ་པར་འགྱུར་རོ། །ལག་པ་གཡས་པའི་དང་པོའི་རྡོ་རྗེ་ཉིད་ཀྱི་དབུས་མའི་རྡོ་རྗེ་ཐམས་ཅད་བསྐོར་བར་བྱས་ན་ལྷའི་ཡུལ་སྤྲུལ་པར་འགྱུར་རོ། །དཀོན་མཆོག་གསུམ་སྤྲུལ་པའི་བསམ་པས་ཐམས་ཅད་དུ་བསྐོར་བར་བྱས་ན་ལྷའི་རིན་པོ་ཆེ་སྤྲུལ་པར་འགྱུར་རོ། །ལྷའི་གྲོགས་དང་བྲན་སྤྲུལ་པའི་བསམ་པས་བསྐོར་བ་བྱས་
ཏེ་དེ་ལྟར་ན་དེ་སྤྲུལ་པར་འགྱུར་རོ། །ལྷ་ཡུལ་ལ་སོགས་པ་ཇི་ལྟ་བ་བཞིན་དུ་སྤྲུལ་པ་ལ་ཡོངས་སུ་ལོངས་སྤྱོད་པའི་བསམ་པས་ཐམས་ཅད་དུ་བསྐོར་བ་བྱས་ཏེ། དེ་ལྟར་ན་ལྷའི་ཡུལ་ལ་སོགས་པ་ཐམས་ཅད་ལ་ཡོངས་སུ་ལོངས་སྤྱོད་པར་འགྱུར་རོ། །མཚུངས་པ་མེད་པའི་ལྟ་བས་བ་ལྟ་ཞིང་དེ་ཉིད་ཀྱི་དབུས་མའི་རྡོ་རྗེའི་ལྟ་བས་བལྟ་བཞིན་དུ་འདོད་པའི་འབྲས་བུ་སྨིན་པར་སྐྱེད་པའི་ཚུལ་དུ་བྱ་སྟེ། དེ་ལྟར་ན་སྐད་ཅིག་མས་སའི་སྟེང་ཐམས་ཅད་ནས་འབྲུ་སྨིན་པ་ལ་སོགས་པ་བསྐྱེད་པར་འགྱུར་རོ། །ཁྲོ་བོའི་ལྟ་བས་ཆུ་མེད་པའི་ཕྱོགས་སུ་ཆུ་སྐྱེད་པའི་ཚུལ་གྱིས་ཆུའི་ཕུང་པོ་ཆེན་པོ་འབྱུང་བ་ཡིན་ནོ། །འབར་བའི་ལྟ་བས་མུན་པ་ཆེན་པོ་བསྐྱེད་པར་འགྱུར་རོ། །དེ་ཉིད་དབུས་མའི་རྡོ་རྗེ་མྱང་པའི་ཚུལ་དུ་བྱས་ན་དངོས་པོ་ཐམས་ཅད་ཟ་བའོ། །བཏུང་པའི་ཚུལ་དུ་བྱས་ན་ཐམས་ཅད་བཏུང་བའོ། །རོལ་དུ་བཅུག་པའི་ཚུལ་བསྟན་ཞིང་བསྐྱེད་པ་བསྐྱོད་པར་བྱས་ན་ཐམས་ཅད་རོལ་དུ་བཅུག་པའོ། །སྤྱི་བོས་བཀའ་བསྒོ་པའི་ཚུལ་དུ་བྱས་ན་ལས་ཐམས་ཅད་ལ་ངེས་པར་སྦྱོར་བར་འགྱུར་རོ། །གཡས་པའི་དང་པོའི་རྡོ་རྗེ་དེ་ཉིད་དེ་བཞིན་གཤེགས་པ་ཐམས་ཅད་རྗེས་སུ་དྲན་པས་ཐམས་ཅད་དུ་བསྐོར་བར་བྱས་ན་དེ་བཞིན་གཤེགས་པ་ཐམས་ཅད་མཐོང་པའོ། །བྱང་ཆུབ་སེམས་དཔའ་ཐམས་ཅད་རྗེས་སུ་དྲན་པས་བྱང་ཆུབ་སེམས་དཔའ་ཐམས་ཅད་མཐོང་བའོ། །རྡོ་རྗེ་འཆང་ཐམས་ཅད་དྲན་པས་རྡོ་རྗེ་འཆང་ཐམས་ཅད་མཐོང་པའོ། །རྡོ་རྗེ་རྗེས་སུ་དྲན་པས་རྡོ་རྗེ་མཐོང་བར་འགྱུར་རོ། །ལག་པ་གཡས་པའི་དང་པོའི་རྡོ་རྗེ་དེ་ཉིད་ཀྱིས་མཐེའུ་ཆུང་དང་མཐེ་བོང་དང༌། དབུས་མའི་རྡོ་རྗེ་ཡང་དག་པར་སྦྱར་ལ་སྙིང་གར་བཟུང་ན་བདག་ཉིད་ཀྱི་ལུས་ལ་རྡོ་རྗེ་སེམས་དཔའ་ལ་སོགས་པའི་སྤྲུལ་པ་གྲུབ་པར་འགྱུར་རོ། །མི་སྣང་པའི་བསམ་པས་མི་སྣང་བ་གྲུབ་པའོ། །ནམ་མཁར་འགྲོ་བའི་བསམ་པས་ནམ་མཁར་འགྲོ་བར་འགྱུར་ཏེ། ཤིན་ཏུ་ཕྲ་བ་དང་རགས་པ་དུ་མ་ལ་རབ་ཏུ་འཇུག་པ་སྟོན་པར་འགྱུར་རོ། །དེ་ཉིད་བཅིངས་ནས་མཛུབ་མོ་བསྒྲེང་སྟེ་འོག་ཏུ་ལྟུང་བའི་ཚུལ་དུ་ཡི་གེ་ཧཱུཾ་གིས་སྡིགས་མཛུབ་བྱས་ཏེ། དེ་ལྟར་ན་འཇིག་རྟེན་གསུམ་གྱི་བདག་པོ་ཐམས་ཅད་འཇུག་པར་འགྱུར་རོ། །དབང་དུ་བྱ་
བའི་བསམ་པས་སྡིགས་མཛུབ་བྱས་ཏེ་དེ་ལྟར་འཇིག་རྟེན་གསུམ་གྱི་བདག་པོ་ཐམས་ཅད་དབང་དུ་བྱེད་པའོ། །བཅིངས་པའི་ཚུལ་གྱི་སྡིགས་མཛུབ་བྱས་ན་འཆིར་བའོ། །ལས་ཐམས་ཅད་དེས་པར་སྦྱོར་བའི་སྡིགས་མཛུབ་བྱས་ཏེ་དེ་ལྟར་ན་འཇིག་རྟེན་གསུམ་གྱི་བདག་པོ་ཐམས་ཅད་ལ་ངེས་པར་སྦྱོར་བར་འགྱུར་རོ། །དེ་ཉིད་བཅིངས་ནས་དེའི་དབུས་མའི་རྡོ་རྗེ་ཕྲལ་བ་ཕྱེད་མིག་གི་ཚུལ་དུ་བྱས་ན་ལྷ་ཐམས་ཅད་གཞུག་པ་དང༌། བཅིང་བ་དང༌། དབང་དུ་བྱ་བ་དང༌། ལས་ཐམས་ཅད་ལ་སྦྱོར་བར་འགྱུར་རོ། །དེ་ཉིད་བཅིངས་ནས་རང་གི་སྙིང་གར་བཞག་ལ་གཡོ་ཞིང་བཙུམ་པའི་ལྟ་བས་འོག་ཏུ་བལྟ་ཞིང་ཡི་གེ་ཧ་བཟླས་ན་ཀླུ་ཐམས་ཅད་འབྱིན་པའོ། །ཡི་གེ་ཧཱུཾ་གིས་ཀླུ་ཐམས་ཅད་འདུལ་པའོ། །ཡི་གེ་ཧོ་ཡིས་ཀླུ་ཐམས་ཅད་དབང་དུ་བྱེད་པའོ། །དྷྲྀཀ་ཅེས་བྱ་བ་བཟླས་པར་བྱ་སྟེ། དེ་ལྟར་ན་ཀླུ་ཐམས་ཅད་ལ་ངེས་པར་སྦྱོར་བར་འགྱུར་རོ། །ས་ལ་གནོད་སྦྱིན་ལ་སོགས་པའི་གདོང་བྲིས་ལ་ལག་པ་གཡས་པའི་དང་པོའི་རྡོ་རྗེས་དབུས་མའི་རྡོ་རྗེ་གཡོ་ཞིང་བཙུམ་པའི་ལྟ་བས་བལྟ་ཞིང་གནོད་སྦྱིན་ལ་སོགས་པ་དགུག་པའི་ཚུལ་བྱས་ཏེ་དེ་ལྟར་ན་དེ་དག་གུག་པར་འགྱུར་རོ། །དབང་དུ་བྱ་བའི་ཚུལ་དུ་བྱས་ན་དབང་དུ་བྱེད་པའོ། །འཆིང་བའི་ཚུལ་དུ་བྱས་ན་འཆིང་པའོ། །ལས་ཐམས་ཅད་ལ་སྦྱར་བའི་ཚུལ་དུ་བྱས་ཏེ། དེ་ལྟར་ན་ལས་ཐམས་ཅད་ལ་སྦྱོར་བར་འགྱུར་ཏེ། དེ་ཐམས་ཅད་དུ་དབུས་མའི་རྡོ་རྗེ་གནོད་སྦྱིན་ལ་སོགས་པའི་ཁར་བཞག་ནས་ཞེས་ཤེས་པར་བྱའོ། །ལག་པ་གཡས་པའི་དབུས་མའི་རྡོ་རྗེ་ལ་བཞག་ན་དཀྱིལ་འཁོར་བརྟག་པའོ། །རང་གི་ཁར་བཞག་ན་དཀྱིལ་འཁོར་དུ་ཞུགས་པར་འགྱུར་རོ། །ཕྱག་བྱས་ན་མཆོད་པར་འགྱུར་རོ། །རང་གི་སྙིང་གར་བཞག་ན་དཀྱིལ་འཁོར་གྲུབ་པར་འགྱུར་རོ། །ལག་པ་གཡས་པའི་དང་པོའི་རྡོ་རྗེ་དེ་ཉིད་བཅིངས་ནས་མྱུར་དུ་རང་གི་སྙིང་གར་དྲལ་བར་བྱས་ན་ཕྱག་རྒྱ་ཐམས་ཅད་དགུག་པ་དང་བཅིང་བ་དང༌། བརྟན་པར་བྱེད་པ་དང༌། ཕྱག་རྒྱ་ཐམས་ཅད་འགྲུབ་པར་འགྱུར་རོ། །དེ་ཉིད་བཅིངས་ནས་ཡི་གེ་ཛཿ་ས་རྡོ་རྗེ་སེམས་དཔའ་ལ་སོགས་པ་ཐམས་ཅད་དགུག་པའོ། །ཡི་གེ་ཧཱུཾ་གིས་གཞུག་པའོ། །ཡི་གེ་བཾ་གྱིས་བཅིངས་པའོ། །
ཡི་གེ་ཧོཿ་ས་དབང་དུ་བྱེད་པར་འགྱུར་རོ། །དེ་ཉིད་བཅིངས་ནས་དབུས་མའི་རྡོ་རྗེ་བསྒྲེང་བར་བྱས་ལ་སྤྱི་བོར་གཟུང་བར་བྱས་ཏེ་དེ་ལྟར་ན་ལས་ཐམས་ཅད་རབ་ཏུ་སྒྲུབ་པའོ། །རང་གི་སྙིང་གར་གཟུང་བར་བྱས་ན་ལས་ཐམས་ཅད་རྣམ་པར་འཇིག་པར་མི་འགྱུར་རོ། །རང་གི་སྙིང་གར་གཟུང་བར་བྱས་ན་ལས་ཐམས་ཅད་བརྟན་པར་བྱེད་པའོ། །ཕྱོགས་ཐམས་ཅད་དུ་བསྐོར་བར་བྱས་ཏེ་དེ་ལྟར་ན་སྒྲ་སྙན་པ་ཐམས་ཅད་རབ་ཏུ་གསལ་བར་འགྱུར་རོ། །དེ་ཉིད་བཅིངས་ནས་རང་གི་སྙིང་གར་བཞག་ལ་དག་ཉིད་རྡོ་རྗེའི་རང་བཞིན་ཅན་དུ་བསྒོམ་པར་བྱ་སྟེ། དེ་ལྟར་ན་རྡོ་རྗེ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པར་འགྱུར་རོ། །བདག་ཉིད་བྱང་ཆུབ་སེམས་དཔར་བསྒོམ་པར་བྱ་སྟེ། དེ་ལྟར་བྱང་ཆུབ་སེམས་དཔའ་ཐམས་ཅད་དགུག་པར་དང༌། གཞུག་པ་དང༌། བཅིང་བ་དང༌། དབང་དུ་བྱེད་པར་འགྱུར་རོ། །བདག་ཉིད་དེ་བཞིན་གཤེགས་པར་བསྒོམ་པར་བྱ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པར་འགྱུར་རོ། །བདག་ཉིད་རྡོ་རྗེ་སེམས་དཔའ་བསྒོམ་པར་བྱ་སྟེ་དེ་ལྟར་ན་རྡོ་རྗེ་འཆང་ཆེན་པོ་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པར་འགྱུར་རོ། །དེ་ལྟར་ན་ལག་པ་གཡས་པའི་དང་པོའི་རྡོ་རྗེས་ལས་བརྒྱ་སྒྲུབ་པ་ཡིན་ནོ། །ཇི་ལྟར་ལག་པ་གཡས་པའི་རྡོ་རྗེས་ལས་བརྒྱ་བསྒྲུབ་པར་འགྱུར་པ་དེ་བཞིན་དུ་ལག་པ་གཡོན་པའི་དང་པོའི་རྡོ་རྗེས་ཀྱང་འདས་མ་ཐག་ཏུ་བཤད་པའི་ལས་བརྒྱ་པོ་དེ་ཉིད་སྒྲུབ་པ་ཡིན་ཏེ། དེ་ལྟར་ན་ལས་བརྒྱ་ཕྲག་གཉིས་སུ་འགྱུར་རོ། །ལས་ཉིས་བརྒྱ་པོ་འདི་དག་དཔལ་རྡོ་རྗེ་སེམས་དཔའི་ཨོཾ་ཨཱ་:་ཧཱུཾ་ཧྲཱིཿ་ཏྲཾ་ཞེས་བྱ་བ་བསྡུས་པའི་དཀྱིལ་འཁོར་དུ་གསུངས་པའི་སྙིང་པོ་བརྗོད་ཅིང་རྣལ་འབྱོར་བས་རབ་ཏུ་བསྒྲུབ་པར་བྱ་བ་ཡིན་ནོ། །དེ་ནས་རྡོ་རྗེ་ཁྱབ་འཇུག་གི་དེ་བཞིན་གཤེགས་པའི་རྣལ་འབྱོར་ལ་རྡོ་རྗེ་ཁྱབ་འཇུག་མ་ཞེས་བྱ་བའི་དམ་ཚིག་གི་ཕྱག་རྒྱ་བཅིངས་ལ། གཉིས་སུ་བྱས་ཏེ་ལག་པ་གཡས་པའི་རྡོ་རྗེ་ཁྱབ་འཇུག་གི་ཕྱག་རྒྱས་དེ་བཞིན་གཤེགས་པ་རྣམ་པར་སྣང་མཛད་ཀྱི་དཀྱིལ་འཁོར་ཆེན་པོ་ལས་གསུངས་པའི་ལས་བརྒྱའི་སྙིང་པོའི་སྔགས་འདི་བསྒྲུབ་པར་བྱ་སྟེ། ཨོཾ་བཛྲ་ན་ར་ཡཱ་ན་ཚིནྡྷ་བི་ནྡྷ་ཨ་པྲ་ཏི་ཧ་ཏ་བཛྲ་ཙཀྵ་ན་ཧོ་བྷ་ག་བཱ་ན་བཛྲ་ཐཱ་ག་ཏ་
ཛཿ་ཧཱུཾ་བཾ་ཧོཿ་བཛྲ་དྷ་ར་ཡ་སྟྭཾ་ཞེས་བྱའོ། །དེ་ལ་ལས་བརྒྱ་བསྒྲུབ་པའི་ཕྱག་རྒྱ་བཅིང་བ་ནི་འདི་ཡིན་ཏེ། ལག་པ་གཡས་པ་རྡོ་རྗེ་ཁྱབ་འཇུག་བཅིངས་ལ་ནད་བཅིང་བས་ནད་འཇིག་པར་འགྱུར་རོ། །རང་གི་མིག་ཡོངས་སུ་སྦྱངས་པས་མྱ་ངན་འཇིག་པའོ། །རང་གི་སྙིང་གར་གཞག་པར་བྱས་ན་ཡིད་མི་བདེ་བ་ཐམས་ཅད་འཇིག་པའོ། །དེ་ཉིད་ཀྱིས་ནད་པའི་ལུས་ལ་བྱ་བ་པར་བྱས་ན་ནད་ཐམས་ཅད་འཇིག་པའོ། །དེ་ཉིད་ཀྱིས་ཀུན་དུ་བསྐོར་ཞིང་ཟས་ལ་མངོན་པར་བསྔགས་ན་སྦྱར་དུག་ཟོས་པ་འཇིག་པའོ། །དེ་ཉིད་ཀྱིས་བྱུར་ལ་མངོན་དུ་ཕྱོགས་བར་ཁྲོས་ནས་དོར་བར་བྱས་ན་བྱུར་འཇིག་པའོ། །དེ་ཉིད་ཀྱིས་ཕུར་བུ་བླངས་ཏེ་ཡིད་ཀྱིས་གདོན་པར་བྱས་ཏེ་དེ་ལྟར་ན་བྱད་འཇིག་པའོ། །དེ་ཉིད་ཀྱིས་རྟིང་པས་བརྡེག་པའི་ཚུལ་བྱས་ན་རོ་ལྔས་ཐམས་ཅད་འཇིག་པའོ། །དེ་ཉིད་ཀྱིས་ཡི་གེ་ཨོཾ་བྲིས་ཏེ་ཕྱིས་ན་སྔགས་ཐམས་ཅད་རྣམ་པར་འཇིག་པའོ། །དེ་ཉིད་ཀྱིས་སོ་རྣམས་ཀྱིས་གཟུང་བར་བྱས་ན་སྨན་ཐམས་ཅད་རྣམ་པར་འཇིག་པའོ། །དེ་ཉིད་ཁྲོ་བ་དང་བཅས་པས་བགེགས་ལ་བསྣུན་པར་བྱས་ན་བགེགས་ཐམས་ཅད་འཇིག་པའོ། །དེ་ཉིད་ཀྱིས་ལོག་འདྲེན་གྱི་སྟེང་དུ་འཁོར་ལོ་དག་དབབ་པར་བྱས་ན་ལོག་འདྲེན་ཐམས་ཅད་འཇིག་པའོ། །དེ་ཉིད་ཀྱིས་རལ་གྲི་བྲིས་ནས་ཕྱིས་ན་སྡིག་པ་ཐམས་ཅད་རྣམ་པར་འཇིག་པའོ། །དེ་ཉིད་ཀྱིས་སྦྱིན་སྲེག་གི་ཚུལ་དུ་བྱས་ན་རྨི་ལམ་ངན་པ་ཐམས་ཅད་འཇིག་པའོ། །དེ་ཉིད་ཀྱིས་དཱུར་བའི་སྦྱིན་སྲེག་བྱས་ན་དུས་མ་ཡིན་པའི་འཆི་བ་འཇིག་པའོ། །དེ་ཉིད་ཀྱིས་རིམས་ཀྱིས་གཟུང་བ་ལ་བྱམས་པའི་ལྟ་བས་བྱ་བས་ན་རིམས་པ་ཐམས་ཅད་རྣམ་པར་འཇིག་པའོ། །དེ་ཉིད་ཀྱིས་གདོན་གྱིས་གཟུང་བའི་སྐྲ་ལ་བཟུང་བས་བསྐྱོད་ན་གདོན་ཐམས་ཅད་རྣམ་པར་འཇིག་པའོ། །དེ་ཉིད་ཀྱིས་སྟེང་དུ་ཁ་ཊྭཱཾ་ག་འཛིན་པའི་ཚུལ་དུ་བྱས་ན་ནམ་མཁའ་ལ་འགྲོ་བ་ཐམས་ཅད་འཇིག་པའོ། །དེ་ཉིད་རང་གི་ཁྱིམ་དུ་བསྐོར་བར་བྱ་བ་སྟེ་དེ་ལྟར་ན་ཡམས་ཐམས་ཅད་འཇིག་པའོ། །དེ་ཉིད་རང་གི་ཁྱིམ་དུ་གཞག་པར་བྱས་ན་ཉེ་བར་འཚེ་བ་ཐམས་ཅད་རབ་ཏུ་འཇིག་པའོ། །དེ་ཉིད་ཁྱིམ་དུ་རབ་ཏུ་གཞུག་པར་བྱས་ན་ལྟས་ངན་འཇིག་པའོ། །དེ་ཉིད་སྙིང་གའི་ཕྱོགས་ལས་བཏོན་ན་གནོད་པ་འཇིག་པའོ། །
དེ་ཉིད་ལུས་ལ་བསྐོར་བ་བྱས་ན་ལུས་ཀྱི་སྡུག་བསྔལ་ཐམས་ཅད་རབ་ཏུ་འཇིག་པའོ། །དེ་ཉིད་ཀྱིས་དེ་དག་འབྱིན་པའི་ཚུལ་བྱས་ན་ངག་གི་སྡུག་བསྔལ་ཐམས་ཅད་རབ་ཏུ་འཇུག་པའོ། །དེ་ཉིད་སྙིང་གའི་ཕྱོགས་སུ་བསྡམས་པར་བྱས་ཏེ་དེ་ལྟར་ན་སེམས་ཀྱི་སྡུག་བསྔལ་འཇིག་པར་འགྱུར་རོ། །དེ་ཉིད་རང་གི་སྙིང་གར་བསྟན་པར་བྱས་ཏེ་དེ་ལྟར་ན་ཚེ་ཆེན་པོ་འཕེལ་བར་འགྱུར་རོ། །དེ་ཉིད་དབང་པོ་ཐམས་ཅད་ལ་གཞག་པར་བྱས་ཏེ་དེ་ལྟར་ན་ན་ཚོད་ཆེན་པོ་འཕེལ་བར་འགྱུར་རོ། །དེ་ཉིད་ཁར་བསྐོར་བར་བྱས་ན་མདངས་ཆེན་པོ་འཕེལ་བར་འགྱུར་རོ། །དེ་ཉིད་དཔྲལ་བར་བཞག་ན་གཟི་བརྗིད་ཆེན་པོ་འཕེལ་བར་འགྱུར་རོ། །དེ་ཉིད་སྙིང་གར་གཞག་པར་བྱ་སྟེ་དེ་ལྟར་ན་གཟི་བརྗིད་འཕེལ་བར་འགྱུར་རོ། །དེ་ཉིད་ཕྲག་པ་གཉིས་ལ་གཞག་པར་བྱས་ན་སྟོབས་འཕེལ་བར་འགྱུར་རོ། །དེ་ཉིད་འོག་ཏུ་གཞག་པར་བྱས་ན་སྤྲོ་བ་འཕེལ་བར་འགྱུར་པོ། །དེ་ཉིད་ཀྱིས་ཕྲེང་བ་འཆིང་པའི་ཚུལ་བྱས་ན་བརྩོན་འགྲུས་འཕེལ་བར་འགྱུར་རོ། །དེ་ཉིད་དབང་པོ་ཐམས་ཅད་ལ་གཞག་པར་བྱས་ན་དཔལ་ཆེན་པོ་འཕེལ་བར་འགྱུར་རོ། །དེ་ཉིད་སྤྱི་པོར་གཞག་པར་བྱས་ན་སྐལ་བ་བཟང་པོ་འཕེལ་པར་འགྱུར་རོ། །དེ་ཉིད་ཁར་གཞག་པར་བྱས་ན་བསོད་ནམས་གྲུབ་པར་འགྱུར་རོ། །དེ་ཉིད་ཁ་ལས་གདོན་པར་བྱས་ན་མིང་འཕེལ་བར་འགྱུར་རོ། །དེ་ཉིད་ཐམས་ཅད་དུ་བསྐོར་བ་བྱས་ན་སྒྲ་སྙན་པར་འགྱུར་རོ། །དེ་ཉིད་ཕྱོགས་ཐམས་ཅད་དུ་བསྐོར་བ་བྱས་ན་གྲགས་པ་འཕེལ་བར་འགྱུར་རོ། །དེ་ཉིད་བཅིངས་ནས་དེ་བཞིན་གཤེགས་པ་རྗེས་སུ་དྲན་པ་བསྒོམ་པར་བྱས་ན་དྲན་པ་འཕེལ་བར་འགྱུར་རོ། །དེ་ཉིད་སྙིང་ལས་འབྱིན་པའི་ཚུལ་བྱས་ན་བློ་གྲོས་འཕེལ་བར་འགྱུར་རོ། །དེ་ཉིད་སྙིང་གར་བཞག་ནས་དགའ་བ་སྐྱེད་པར་བྱས་ན་བསྟན་པ་འཕེལ་བར་འགྱུར་རོ། །དེ་ཉིད་བཅིངས་ནས་བདག་ཉིད་སངས་རྒྱས་ཀྱི་སྐུར་བསྒོམ་པར་བྱ་སྟེ་དེ་ལྟར་ན་དེ་བཞིན་གཤེགས་པ་འཕེལ་བར་འགྱུར་རོ། །དེ་ཉིད་བཅིངས་ནས་སངས་རྒྱས་ཐམས་ཅད་བསྒོམས་པས་དེ་བཞིན་གཤེགས་པའི་ཏིང་ངེ་འཛིན་འཕེལ་བར་འགྱུར་རོ། །དེ་ཉིད་ཕུང་པོ་ལྔ་རྣམས་ལ་གཞག་པར་བྱས་ན་ཚོགས་འཕེལ་བར་འགྱུར་རོ། །དེ་ཉིད་ལྕེར་གཞག་པར་བྱས་ན་དེ་བཞིན་གཤེགས་
པའི་གསུང་འཕེལ་བར་འགྱུར་རོ། །དེ་ཉིད་བཅིངས་ལ་ཡིད་ཀྱིས་དེ་བཞིན་གཤེགས་པ་ཐམས་ཅད་ལ་ཕྱག་འཚལ་བར་བྱ་སྟེ་དེ་ལྟར་ན་ཡིད་འཕེལ་བར་འགྱུར་པ་ཡིན་ནོ། །དེ་ཉིད་བཅིངས་ནས་གཏོང་བ་རྗེས་སུ་དྲན་པ་བསྒོམ་པར་བྱ་སྟེ་དེ་ལྟར་ན་སྦྱིན་པའི་ཕ་རོལ་ཏུ་ཕྱིན་པ་གྲུབ་པའོ།། དེ་ཉིད་བཅིངས་ནས་ཚུལ་ཁྲིམས་རྗེས་སུ་པ་བསྒོམ་པར་བྱ་སྟེ་དེ་ལྟར་ན་ཚུལ་ཁྲིམས་ཀྱི་ཕ་རོལ་རུ་ཕྱིན་པ་གྲུབ་པའོ། །དེ་ཉིད་བཅིངས་ནས་བཟོད་པའི་ཕ་རོལ་ཏུ་ཕྱིན་པ་བསྒོམ་པར་བྱ་ཏེ། དེ་ལྟར་ན་བཟོད་པའི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱས་ཏེ་དེ་ལྟར་ན་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་བསམ་གཏན་གྱི་ཕ་རོལ་ཏུ་ཕྱིན་པ་བསྒོམ་པར་བྱས་ཏེ་དེ་ལྟར་ན་བསམ་གཏན་གྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་ཤེས་རབ་ཀྱི་ཕ་རོལ་ཏུ་ཕྱིན་པ་བསྒོམ་པར་བྱས་ཏེ་དེ་ལྟར་ན་ཤེས་རབ་ཀྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་ཡེ་ཤེས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ་དེ་ལྟར་ན་ཡེ་ཤེས་ཀྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་སྟོབས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ། དེ་ལྟར་ན་སྟོབས་ཀྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་ཐབས་ཀྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ་དེ་ལྟར་ན་ཐབས་ཀྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་སྨོན་ལམ་གྱི་ཕ་རོལ་ཏུ་ཕྱིན་པ་བསྒོམ་པར་བྱ་སྟེ། དེ་ལྟར་ན་སྨོན་ལམ་གྱི་ཕ་རོལ་ཏུ་ཕྱིན་པ་གྲུབ་པའོ། །དེ་ཉིད་བཅིངས་ནས་མདུན་དུ་རྡོ་རྗེ་བསྒོམ་པར་བྱས་ཏེ་དེ་ལྟར་ན་རྡོ་རྗེ་གྲུབ་པའོ། །དེ་ཉིད་བཅིངས་ནས་གཟུངས་ལ་སོགས་པ་མངོན་པར་བརྗོད་ནས་ངེས་པར་བསྒོམ་པར་བྱ་སྟེ་དེ་ལྟར་ན་གཟུངས་གྲུབ་པའོ། །དེ་ཉིད་བཅིངས་ནས་སངས་རྒྱས་ཀྱིས་བསྒོམ་པར་བྱ་སྟེ་དེ་ལྟར་ན་དེ་དག་གྲུབ་པའོ། །དེ་ཉིད་བཅིངས་ནས་ཕ་རོལ་ཏུ་ཕྱིན་པ་བཅུའི་སྤྱོད་པ་བསྒོམ་པར་བྱ་སྟེ་ལྟར་ན་དེ་གྲུབ་པའོ། །དེ་ཉིད་བཅིངས་ནས་སོ་སོ་ཡང་དག་པར་བཞི་བསྒོམ་པར་བྱ་སྟེ་དེ་ལྟར་སོ་སོར་ཡང་དག་པར་རིག་པ་གྲུབ་པའོ། །དེ་ཉིད་བཅིངས་ན་སངས་རྒྱས་ཀྱི་ཆོས་མ་འདྲེས་པ་བཅོ་བརྒྱད་བསྒོམ་པར་བྱ་སྟེ་དེ་ལྟར་ན་དེ་དག་གྲུབ་པའོ།
དེ་ཉིད་བཅིངས་ནས་ཆོས་བསྒོམ་པར་བྱ་སྟེ་དེ་ལྟར་ན་ཆོས་གྲུབ་པའོ། །དེ་ཉིད་བཅིངས་ནས་ལས་བསྒོམས་པས་དེ་གྲུབ་པའོ། །དེ་ཉིད་བཅིངས་ནས་སེམས་ཅན་གྱི་དོན་བསྒོམས་པས་སེམས་ཅན་གྱི་དོན་གྲུབ་པའོ། །དེ་ཉིད་བཅིངས་ནས་སངས་རྒྱས་ཀྱི་དོན་བསྒོམ་པས་སངས་རྒྱས་ཀྱི་དོན་གྲུབ་པའོ། །དེ་ཉིད་བཅིངས་ནས་དེ་བཞིན་གཤེགས་པའི་སྐུ་བསྒོམས་པས་ལུས་གྲུབ་པའོ། །དེ་ཉིད་བཅིངས་ནས་གསུང་བསྒོམས་པས་ངག་གྲུབ་པའོ། །དེ་ཉིད་བཅིངས་ནས་སེམས་དཔའི་རྡོ་རྗེ་བསྒོམ་པར་བྱ་སྟེ་དེ་ལྟར་ཡིད་གྲུབ་པའོ། །དེ་ཉིད་བཅིངས་ནས་བདག་ཉིད་རྡོ་རྗེ་བསྒོམ་པར་བྱ་སྟེ་དེ་ལྟར་ན་རྡོ་རྗེ་ཆེན་པོ་གྲུབ་པ་ཡིན་ནོ། །དེ་ཉིད་བཅིངས་ནས་ཨོཾ་བོ་དྷི་ཙི་ཏྟ་བཛྲ་ཞེས་བཟླ་བར་བྱ་སྟེ་དེ་ལྟར་ན་བྱང་ཆུབ་ཆེན་པོའི་སེམས་སྐྱེ་བ་གྲུབ་པར་འགྱུར་རོ། །ཨོཾ་ས་མནྟ་བྷ་དྲ་ཙ་ཪྻ་ཡི་ནི་ཏྱ་ཞེས་བཟླས་པར་བྱ་སྟེ་དེ་ལྟར་ན་ཀུན་དུ་བཟང་པོའི་སྤྱོད་པ་སྣ་ཚོགས་རྫོགས་པའོ། །ཨོཾ་ཙིནད་མ་ནི་ཞེས་བྱ་བ་བཟླ་བར་བྱ་སྟེ་དེ་ལྟར་ན་སེམས་ཅན་གྱི་དོན་གྲུབ་པའོ། །ཨོཾ་ཨ་ནི་རུ་ཐ་ནི་ཞེས་བཟླ་བར་བྱ་སྟེ་དེ་ལྟར་ན་ལྷུམས་སུ་འཇུག་པར་སྒུབ་པའོ། །ཨོཾ་ཛ་ཏི་བི་བརྟི་ཞེས་བྱ་བ་བཟླ་བར་བྱ་སྟེ་དེ་ལྟར་ན་བལྟམས་པའི་སྟོན་པའོ། །ཨོཾ་སརྦ་བི་ག་ཛྙ་ནི་ཞེས་བྱ་བ་བཟླ་བར་བྱ་སྟེ་དེ་ལྟར་ན་གཞོན་ནུ་རོལ་བསྒྲུབ་པའོ། །ཨོཾ་མ་ཧཱ་བི་ར་ག་དྷརྨཱ་ཞེས་བྱ་བ་བཟླ་བར་བྱ་སྟེ་དེ་ལྟར་ན་མངོན་པར་འབྱུང་བ་སྒྲུབ་པའོ། །ཨོཾ་བྲྱ་བ་ཀ་ཅེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་དཀའ་ཐུབ་ཀྱི་སྤྱོད་པ་གྲུབ་པའོ། །ཨོཾ་ས་དྷ་ན་ག་མི་ནི་ཞེས་བྱ་བ་བཟླ་བར་བྱ་སྟེ་དེ་ལྟར་ན་བྱང་ཆུབ་ཆེན་པོའི་སྙིང་པོ་ལ་འདུག་པ་སྒྲུབ་པའོ།། ཨོཾ་བཛྲ་དྲི་དྷྲ་ཙིདྡྷི་ཧཱུཾ་ཞེས་བཟླ་བར་བྱ་སྟེ་དེ་ལྟར་ན་བདུད་འདུལ་པའོ། །ཨོཾ་སརྦ་ཏ་ཐཱ་ག་ཏ་ཞེས་བྱ་བ་བཟླ་བར་བྱ་སྟེ་དེ་ལྟར་ན་མངོན་པར་རྫོགས་པའི་བྱང་ཆུབ་སྒྲུབ་པའོ། །ཨོཾ་སྭ་བྷཱ་བ་ཤུདྡྷ་དྷརྨཱ་ཏེ་ཛྙཱ་ན་བི་ཤུ་ཤུདྡྷེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་ཆོས་ཀྱི་འཁོར་ལོ་རབ་ཏུ་བསྐོར་བའོ། །ཨོཾ་ཀརྨ་བི་ཤུདྡྷ་ན་ཞེས་བྱ་བ་བཟླ་བར་བྱ་སྟེ་དེ་ལྟར་ན་མུ་སྟེགས་ཅན་ཐམས་ཅད་ཚར་གཅོད་པའོ། །ཧཱུཾ་ནི་སུམྦྷཱ་བཛྲེ་ནི་ཕཊ་ཅེས་བྱ་བ་བཟླ་བར་བྱ་སྟེ་དེ་ལྟར་ན་འཇིག་རྟེན་གསུམ་པོ་ཐམས་ཅད་ལས་རྣམ་པར་རྒྱལ་བར་འགྱུར་རོ། །ཨོཾ་ཀརྨཱ་ར་གེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་ལྷ་ལས་བབ་བསྒྲུབ་
པའོ། །ཨོཾ་བཛྲེ་བཛྲེ་ནི་ཞེས་བྱ་བ་བཟླ་བར་བྱ་སྟེ་དེ་ལྟར་ན་འདུས་པ་ཆེན་པོ་བྱིན་གྱིས་བརླབ་པའོ། །ཨོཾ་སརྦ་དྷརྨ་མི་ནི་ཞེས་བྱ་བ་བཟླ་བར་བྱ་སྟེ་དེ་ལྟར་ན་དུག་ཐམས་ཅད་འདུལ་བ་སྒྲུབ་པའོ། །ཨོཾ་ཧེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་འདུལ་བ་ལྩ་རབ་ཏུ་གཞག་པའོ། །ཨོཾ་ཨཀཱ་རོ་མུ་ཁཾ་ཞེས་བྱ་བ་བཟླ་བར་བྱ་སྟེ་དེ་ལྟར་ན་ངན་སོང་ཐམས་ཅད་ལས་སོན་པའོ། །ཨོཾ་པྲཛྙཱ་པཱ་ར་མི་ཏ་ཞེས་བྱ་བ་བཟླ་བར་བྱ་སྟེ་དེ་ལྟར་ན་མདོ་སྟེ་ཐམས་ཅད་བཏོན་པའོ། །ཨོཾ་བཾ་ཧཱུཾ་ཞེས་བྱ་བ་བཟླ་བར་བྱ་སྟེ་དེ་ལྟར་ན་རྟོག་པ་ཐམས་ཅད་བྱིན་གྱིས་བརླབ་པའོ། །ཨོཾ་ཨཱ་ཞེས་བྱ་བ་བཟླ་བར་བྱ་སྟེ་དེ་ལྟར་ན་དངོས་གྲུབ་ཐམས་ཅད་སྩོལ་བའོ། །ཨོཾ་སརྦ་ཏ་ཐཱ་ག་ཏ་ཀཱ་ཡ་གྲ་ཞེས་བྱ་བ་བཟླ་བར་བྱ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་ཀྱི་སྐུ་སོ་སོར་ཐོབ་པའོ། །ཨོཾ་སརྦ་ཐཱ་ག་ཏ་བཱ་ཀ་བི་ཤུདྡྷེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་ཀྱི་གསུང་ཐོབ་པའོ། །ཨོཾ་སརྦ་ཏ་ཐཱ་ག་ཏེ་ཙིཏྟ་བཛྲེ་ཞེས་བྱ་བ་བཟླ་བར་བྱ་སྟེ་དེ་ལྟར་ན་དེ་བཞིན་གཤེགས་པ་ཐམས་ཅད་ཀྱི་ཐུགས་སོ་སོར་ཐོབ་པའི་རྣམ་པར་འཕྲུལ་པ་སྒྲུབ་པར་འགྱུར་རོ། །དེ་ལྟར་ལག་པ་གཡས་པའི་རྡོ་རྗེ་ཁྱབ་འཇུག་གི་ཕྱག་རྒྱས་ལས་བརྒྱ་སྒྲུབ་པ་ཡིན་ནོ། །ཇི་ལྟར་ལག་པ་གཡས་པའི་རྡོ་རྗེ་ཁྱབ་འཇུག་གི་ལས་བརྒྱ་པོ་འདི་སྒྲུབ་པ་དེ་བཞིན་དུ་ལག་པ་གཡོན་པའི་རྡོ་རྗེ་ཁྱབ་འཇུག་གི་ཡང་འདས་མ་ཐག་ཏུ་བཤད་པའི་ལས་བརྒྱ་པོ་འདི་དག་ཡིན་ཏེ་དེ་བཞིན་གཤེགས་པའི་ལས་བརྒྱ་གཉིས་པ་ཡིན་ནོ། །རྡོ་རྗེ་རྩེ་གསུམ་འཛིན་པའི་རྡོ་རྗེ་གཏུམ་པའི་དབང་ཕྱུག་གི་གཟུགས་འཛིན་པའི་རྡོ་རྗེ་ཉི་མ་མེ་ལྟར་འབར་བའི་རྣལ་འབྱོར་བྱས་ལ་རྡོ་རྗེ་འཛིན་པ་ཞེས་བྱ་བའི་ཕྱག་རྒྱ་བཅིངས་ནས་གཉིས་སུ་བྱས་ནས་ལག་པ་གཡས་པའི་རྡོ་རྗེ་འཛིན་པའི་ཕྱག་རྒྱས་ཨོཾ་བཛྲ་ཀྲོ་དྷ་ཡོ་གི་ནི་ཤྭ་ར་མ་ཧཱ་བཛྲ་ཤུ་ལོ་གྲ་བ་ནེ་ཧོ་བྷ་ག་བཱ་ན་བཛྲ་ཙཎྜེ་ཤྭ་ཥ་ཨཿ་ཧ་ཧ་ཧ་ཧ་ཧི་ཞེས་བྱ་བ་བརྗོད་ཅིང༌། བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་ལས་བརྒྱའི་ཆོག་འདི་བསྒྲུབ་པར་བྱ་སྟེ། ཕྱག་རྒྱ་དེ་ཉིད་ཀྱིས་བླུགས་གཟར་བླངས་ལ་ཀེ་ཚེ་དང་ཏིལ་མར་ཚ་བའི་སྦྱིན་སྲེག་བྱས་ཏེ་དེ་ལྟར་ན་དེ་ཐམས་ཅད་སྲེག་པར་འགྱུར་རོ། །ཕྱག་རྒྱ་དེ་ཉིད་ཀྱིས་བསྒྲུབ་པར་
བྱ་བ་ལ་གཏང་བར་བྱ་སྟེ་དེ་ལྟར་ན་ཐམས་ཅད་བསྐྲད་པར་འགྱུར་རོ། །དེ་ཉིད་ཀྱིས་བཅིངས་པའི་ཚུལ་དུ་བྱས་ཏེ་དེ་ལྟར་ན་ཐམས་ཅད་རྨུགས་པའོ། །དེ་ཉིད་ཀྱིས་ཐམས་ཅད་རེངས་པའི་ཚུལ་དུ་བྱས་ན་ཐམས་ཅད་རེངས་པའོ། །དེ་ཉིད་བཅིངས་ནས་མིག་གཉིས་བཙུམ་པར་བྱ་སྟེ་དེ་ལྟར་ན་ཐམས་ཅད་གཉིད་ལོག་ཏུ་བཅུག་པའོ། །ཁྲོ་བོའི་ལྟ་བས་བསྒྲུབ་བྱ་ལ་བལྟ་ཞིང་ཕྱག་རྒྱ་འདི་ཉིད་ཀྱིས་སྡིགས་མཛུབ་བྱས་ཏེ་དེ་ལྟར་ན་ཐམས་ཅད་ལ་རྒྱས་བཏབ་པའོ། །དེ་ཉིད་བཅིངས་ནས་གློད་པར་བྱས་ཏེ་དེ་ལྟར་ན་ཐམས་ཅད་རྨོངས་པའོ། །དེ་ཉིད་བཅིངས་ནས་སྡིགས་མཛུབ་ཀྱིས་བསྒྲུབ་བྱ་བྱིང་བའི་ཚུལ་དུ་བྱས་ཏེ་དེ་ལྟར་ན་ཐམས་ཅད་རྨུགས་པའོ། །སྡིགས་མཛུབ་ཀྱིས་སྐྱེ་བ་ལ་འཆིང་བའི་ཚུལ་ཏེ་དེ་ལྟར་ན་ཐམས་ཅད་རྒྱས་བཏབ་པའོ། །སྡིགས་མཛུབ་ཀྱིས་ལུ་གུ་རྒྱུད་འཆིང་བའི་ཚུལ་དུ་བྱས་ནས་དེ་བཙིར་བར་བྱ་སྟེ་དེ་ལྟར་ན་ཐམས་ཅད་བཙིར་བའོ། །སྡིགས་མཛུབ་ཀྱིས་ལུ་གུ་རྒྱུད་བཙིར་བར་བྱས་ལ་དེ་ཉིད་ཀྱིས་དྲལ་བའི་ཚུལ་དུ་བྱས་ན་ཐམས་ཅད་དྲལ་བའོ། །སྡིགས་མཛུབ་ཀྱིས་བསྒྲུབ་བྱ་ལ་བརྡེག་པའི་ཚུལ་བྱ་སྟེ་དེ་ལྟར་ན་ཐམས་ཅད་ལ་རྡེག་པའོ། །དེ་ཉིད་བཅིངས་ནས་སྡིགས་མཛུབ་ཀྱིས་གྱེན་དུ་འབར་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་འབར་བའོ། །དེ་ཉིད་ཀྱི་སྡིགས་མཛུབ་དང་ཡིད་ཀྱིས་སོར་མོ་དབུས་མ་བསྒྲེང་བ་བསྒྲུབ་བྱ་ལྟུང་བའི་ཚུལ་གྱིས་དབབ་པར་བྱ་སྟེ་དེ་ལྟར་ན་ཐམས་ཅད་ལྟུང་བའོ། །དེ་ཉིད་བཅིངས་ནས་མཛུབ་མོ་འབར་བའི་ཚུལ་དུ་བྱ་སྟེ་དེ་ལྟར་ན་འཚེད་པའོ། །དེ་ཉིད་བཅིངས་ནས་གཅོད་པའི་ཚུལ་དུ་དེ་ཉིད་སྦྱར་བར་བྱ་སྟེ་དེ་ལྟར་ན་ཐམས་ཅད་གཅོད་པའོ། །དེ་ཉིད་བཅིངས་ནས་མཛུབ་མོས་བསྒྲུབ་བྱ་རྣམ་པར་དྲལ་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་དྲལ་བའོ། །དེ་ཉིད་བསྒྲུབ་བྱ་ཕྱེ་མར་རློག་པའི་ཚུལ་རབ་ཏུ་སྦྱར་བར་བྱ་སྟེ་དེ་ལྟར་ན་ཐམས་ཅད་ཕྱེ་མར་རློག་པའོ། །དེ་ཉིད་བཅིངས་ནས་སོར་མོ་ཐམས་ཅད་ཕྱོགས་བཅུར་དོར་བར་བྱ་སྟེ་དེ་ལྟར་ན་ཐམས་ཅད་དོར་བའོ། །དེ་ཉིད་མྱུར་དུ་གྲོལ་བར་བྱ་སྟེ་དེ་ལྟར་ན་ཐམས་ཅད་རྣམ་པར་འཇོམས་པའོ། །དེ་ཉིད་ཀྱིས་དྲང་ཞིང་གཡོ་བས་སྡིགས་མཛུབ་བྱས་ཏེ་དེ་ལྟར་ན་རིམས་ཐམས་ཅད་བསྐྱེད་པའོ། །དེ་ཉིད་བཅིངས་ནས་མཛུབ་མོ་གདེངས་ཀའི་རྣམ་པ་ཅན་དུ་བྱས་ལ་དེའི་བསྒྲུབ་བྱ་ལ་སྡིགས་མཛུབ་
བྱ་སྟེ་དེ་ལྟར་ན་དུག་ལྡང་བའོ། །དེ་ཉིད་བཅིངས་ནས་མཛུབ་མོ་སོ་རྣམས་ཀྱིས་གཟུང་བར་བྱ་སྟེ་དེ་ལྟར་ན་བསྒྲུབ་བྱ་གདོན་གྱིས་འཛིན་དུ་གཞུག་པ་ཡིན་ནོ། །དེ་ཉིད་བཅིངས་ནས་སྨྱོ་བ་དང་རྒྱུག་པ་བསྟན་པར་བྱ་སྟེ་དེ་ལྟར་ན་ཐམས་ཅད་སྨྱོར་གཞུག་པའོ། །དེ་ཉིད་བཅིངས་ནས་མཛུབ་མོས་སེ་གོལ་གཏོགས་པའི་སྒྲ་འབྱིན་པའི་ཚུལ་དུ་བྱ་ཞིང་བསྒྲུབ་བྱ་བཀུག་ལ་ཡིད་ཀྱིས་རྟོག་པར་བྱ་སྟེ་དེ་ལྟར་ན་ཐམས་ཅད་གསོད་པར་འགྱུར་རོ། །དེ་ཉིད་བཅིངས་ནས་བསྒྲུབ་བྱ་ཉེ་བར་འདུག་པའི་ཚུལ་དུ་སྦྱར་བར་བྱ་སྟེ་དེ་ལྟར་ན་ཐམས་ཅད་ཉེ་བར་འདུག་པར་འགྱུར་རོ། །དེ་ཉིད་ས་ལ་རབ་ཏུ་གཞག་པར་བྱ་སྟེ་དེ་ལྟར་ན་ཐམས་ཅད་དགོད་པའོ། །དེ་ཉིད་བསྐྱོད་པར་བྱ་སྟེ་དེ་ལྟར་ན་ཐམས་ཅད་གཡོར་གཞུག་པའོ། །དེ་ཉིད་བཅིངས་ནས་རང་གིས་གར་བྱས་ཏེ་དེ་ལྟར་ན་ཐམས་ཅད་གར་བྱེད་དུ་གཞུག་པའོ། །དེ་ཉིད་ཁ་ལས་གྱེན་དུ་དྲང་བར་བྱ་སྟེ་དེ་ལྟར་ན་ཐམས་ཅད་གླུ་ལེན་དུ་གཞུག་པའོ། །དེ་ཉིད་རླབས་ཀྱི་ཚུལ་དུ་སྦྱར་བར་བྱ་སྟེ་དེ་ལྟར་ན་ཐམས་ཅད་རྩེར་གཞུག་པའོ། །དེ་ཉིད་ཐམས་ཅད་དུ་བརླབ་པར་བྱ་སྟེ་དེ་ལྟར་ན་ཐམས་ཅད་རྩེད་འཇོ་བྱེད་དུ་གཞུག་པའོ། །དེ་ཉིད་བཅིངས་ནས་ཧ་ཧར་དགོད་པར་བྱ་སྟེ་དེ་ལྟར་ན་ཧ་ཧར་དགོད་དུ་གཞུག་པའོ། །དེ་ཉིད་བསྐོར་བར་བྱ་སྟེ་དེ་ལྟར་ན་ཐམས་ཅད་བསྐོར་དུ་གཞུག་པའོ། །དེ་ཉིད་དགུག་པར་བྱ་སྟེ་དེ་ལྟར་ན་ཐམས་ཅད་དགུག་པའོ། །དེ་ཉིད་མདུན་དུ་ཚུར་དྲང་བར་བྱ་སྟེ་དེ་ལྟར་ན་ཐམས་ཅད་ཚུར་འདྲེན་པའོ། །དེ་ཉིད་མདུན་དུ་གཏང་བར་བྱ་སྟེ་དེ་ལྟར་ན་ཐམས་ཅད་གཏོང་བའོ། །དེ་ཉིད་ཡོངས་སུ་བསྐོར་ནས་ནུབ་པའི་ཚུལ་དུ་གཟུང་བར་བྱ་སྟེ་དེ་ལྟར་ན་ཐམས་ཅད་ནུབ་པའོ། །དེ་ཉིད་གྱེན་དུ་དྲང་བར་བྱ་སྟེ་དེ་ལྟར་ན་ཐམས་ཅད་གྱེན་དུ་འབྱུང་བའོ། །དེ་ཉིད་མྱུར་དུ་དོར་བར་བྱ་སྟེ་དེ་ལྟར་ན་ཐམས་ཅད་དོར་བའོ། །དེ་ཉིད་མྱུར་དུ་བཏེག་པར་བྱ་སྟེ་དེ་ལྟར་ན་ཐམས་ཅད་འདེགས་པའོ། །དེ་ཉིད་ཟུར་དུ་ཚུར་དྲང་བར་བྱ་སྟེ་དེ་ལྟར་ན་ཐམས་ཅད་ཚུར་དྲང་བའོ། །དེ་ཉིད་བཅིངས་ནས་རང་གི་ང་རོ་བྱས་ཏེ་དེ་ལྟར་ན་ཐམས་ཅད་ངོར་འདོན་པ་ཡིན་ནོ། །དེ་ཉིད་བཅིངས་ནས་རང་ཉིད་དུ་བར་བྱ་སྟེ་དེ་ལྟར་ན་ཐམས་ཅད་དུ་བའོ། །དེ་ཉིད་ཀྱིས་བདག་ཉིད་ལ་བརྡུང་བར་བྱ་སྟེ་དེ་ལྟར་ན་ཐམས་ཅད་
བརྡུང་བར་འགྱུར་རོ། །དེ་ཉིད་ཀྱིས་སྙིང་གར་བརྡེག་པར་བྱ་སྟེ་དེ་ལྟར་ན་ཐམས་ཅད་གསོད་པར་འགྱུར་རོ། །དེ་ཉིད་ཀྱིས་རང་གི་སྐྲ་འབལ་བར་བྱ་སྟེ་དེ་ལྟར་ན་ཐམས་ཅད་ཀྱིས་རང་གི་སྐྲ་འབལ་བའོ། །དེ་ཉིད་བཅིངས་ནས་བསྒྲུབ་བྱ་ཕན་ཚུན་རྣམ་པར་སྡང་བར་བྱ་སྟེ་དེ་ལྟར་ན་ཐམས་ཅད་རྣམ་པར་སྡང་བའོ། །དེ་ཉིད་ཀྱིས་རང་གི་གོས་བརྗེ་པར་བྱ་སྟེ་དེ་ལྟར་ན་གོས་བརྗེ་བར་འགྱུར་རོ། །དེ་ཉིད་ཀྱིས་གྱེན་དུ་འབར་བ་སྐྱེད་བའི་ཚུལ་གྱིས་ཁྲོ་བས་རབ་ཏུ་གཡོ་བ་མཛུབ་མོས་བྱས་ཏེ་དེ་ལྟར་ན་ཁྲོ་བ་འབར་བར་འགྱུར་རོ། །དེ་ཉིད་ཀྱིས་མཛུབ་མོའི་ལྕགས་ཀྱུས་ཐམས་ཅད་དགུག་པའོ། །དེ་ཉིད་ཀྱིས་བསྒྲུབ་བྱ་གཞུག་པའི་ཚུལ་གྱིས་ཐམས་ཅད་འཇུག་པའོ། །དེ་ཉིད་ཀྱིས་མཛུབ་མོ་དང་མཐེ་བོང་དག་གིས་སེ་གོལ་གཏོགས་པར་བྱ་སྟེ་དེ་ལྟར་ན་ཐམས་ཅད་འབེབས་པའོ། །དེ་ཉིད་བཅིངས་ནས་དེ་བཞིན་དུ་སེ་གོལ་གཏོགས་པའི་སྒྲས་པྲ་དབབ་པ་ཐམས་ཅད་སྒྲུབ་པའོ། །དེ་ཉིད་བཅིངས་ནས་མཛུབ་མོ་ལྕེ་ལ་རེག་པར་བྱ་སྟེ་དེ་ལྟར་ན་ཐམས་ཅད་སྨྲ་བའོ། །དེ་ཉིད་གཡས་སུ་འཁྱིལ་བའི་བ་སྤུ་སྟོན་པའི་ཚུལ་གྱིས་བསྐོར་བར་བྱ་སྟེ་དེ་ལྟར་ན་སྒྱུ་མ་ཐམས་ཅད་སྟོན་པའོ། །དེ་ཉིད་ཀྱིས་ལྟུང་བ་སློང་བའི་ཚུལ་དུ་བྱ་སྟེ་དེ་ལྟར་ན་ཐམས་ཅད་སོ་སོར་བཏོན་པའོ། །དེ་ཉིད་བཅིངས་ནས་དུས་ཀྱི་འཁོར་ལོ་རབ་ཏུ་བསྒོམ་པར་བྱ་སྟེ་དེ་ལྟར་ན་དུས་ཀྱི་འཁོར་ལོ་རབ་ཏུ་ཡོངས་སུ་བསྐོར་བའོ། །དེ་ཉིད་བཅིངས་ནས་ཁྲོ་བོའི་ལྟ་བས་ཡིད་ཀྱིས་འདོད་པའི་ཤིང་དྲུང་རྣམས་ཀྱི་འདབ་མ་དང་མེ་ཏོག་དང་འབྲས་བུ་རྣམས་སྟོན་པའོ། །དེ་ཉིད་བཅིངས་ནས་ཁྲོ་བོའི་ལྟ་བས་བལྟ་ཞིང་འབྲུ་ཐམས་ཅད་སྟོན་པར་བྱེད་པའོ། །དེ་ཉིད་བཅིངས་ནས་བྱམས་པའི་ལྟ་བས་རིམས་ལྡོག་པར་བྱེད་པའོ། །དེ་ལྟར་བཅིངས་ནས་སྨིན་མ་བསྐྱོད་པའི་འཕྲོག་པ་དག་གིས་སྦྱར་བའི་དུག་འཕྲོག་པར་བྱེད་པའོ། །དེ་ཉིད་བཅིངས་ནས་རྣམས་བསྟན་པར་བྱ་སྟེ་དེ་ལྟར་ན་གདོན་ཐམས་ཅད་ལས་གྲོལ་བའོ། །དེ་ཉིད་བཅིང་ནས་ཡི་གེ་ཕུ་བརྗོད་པར་བྱ་སྟེ་དེ་ལྟར་ན་དུག་ཐམས་ཅད་ལྡོག་པའོ། །དེ་ཉིད་ཀྱིས་མཁའ་འགྲོ་མ་རྣམས་ཀྱིས་བཟུང་བ་ལ་བརྡེག་པར་བྱ་སྟེ་དེ་ལྟར་ན་མཁའ་འགྲོ་མ་དང་གདོན་ཐམས་ཅད་ལས་གྲོལ་བའོ། །དེ་ཉིད་རྒྱལ་མཚན་བསྒྲེང་བའི་ཚུལ་གྱིས་སྟེང་དུ་གཟུང་
བར་བྱ་སྟེ་དེ་ལྟར་ན་སངས་རྒྱས་ཐམས་ཅད་འབྱོན་པའོ། །དེ་ཉིད་བཅིངས་ནས་ཁྲོ་བ་དང་བཅས་པའི་འཇིགས་བྱེད་ཀྱི་ལྟ་བས་གཞན་གྱི་དཔུང་ཐམས་ཅད་འཇོམས་པའོ། །དེ་ཉིད་བཅིངས་ནས་བཙུམ་པ་མེད་པའི་ལྟ་བས་མཚམས་བཅིང་བའོ། །དེ་ཉིད་བཅིངས་ནས་རང་གི་སྙིང་ག་ལས་རྡོ་རྗེ་འབར་བའི་ཡིད་ཀྱིས་སྤྲོས་ནས་ཕྱོགས་བཅིངས་བར་བྱའོ། །དེ་ཉིད་བཅིངས་ནས་བསྐོར་བར་བྱ་སྟེ་དེ་ལྟར་ན་དཀྱིལ་འཁོར་བཅིང་པའོ། །དེ་ཉིད་བཅིངས་ནས་མཛུབ་མོ་བསྒྲེང་བ་བྱས་ནས་ཡོངས་སུ་བསྐོར་ལ་གཙུག་ཏོར་དུ་གཟུང་བར་བྱས་ན་ཤིན་ཏུ་སྲུང་བའོ། །དེ་ཉིད་བཅིངས་ནས་མཛུབ་མོ་བརྐྱང་བ་ལ་རང་གི་སྙིང་གར་གཟུང་བར་བྱ་སྟེ་དེ་ལྟར་ན་ཐམས་ཅད་དེ་ཉིད་བྱེད་པའོ། །ཕྱག་རྒྱ་དེ་ཉིད་རང་གི་སྙིང་གར་དགྲོལ་བར་བྱ་སྟེ་དེ་ལྟར་ན་ཐམས་ཅད་དགྲོལ་བའོ། །གཡས་པའི་རྡོ་རྗེ་འཛིན་མ་དེ་ཉིད་ཟུར་དུ་བཞག་ལ་བསྒྲེང་བར་བྱ་སྟེ་དེ་ལྟར་ན་ཐམས་ཅད་བསྒྲེང་པའོ། །དེ་ཉིད་བཅིངས་ནས་མཛུབ་མོའི་རྩེ་མོས་དབང་དུ་བྱེད་པའི་ཚུལ་བྱ་སྟེ་དེ་ལྟར་ན་ཐམས་ཅད་དབང་དུ་བྱེད་པར་འགྱུར་རོ། །དེ་ཉིད་བཅིངས་ནས་ཁྲོ་བོའི་ལྟ་བས་སྟེང་ནས་འོག་ཏུ་ལྟུང་བའི་ཚུལ་དུ་བྱ་སྟེ་དེ་ལྟར་ན་ལྟུང་བ་ཐམས་ཅད་ལྟུང་བའོ། །འོག་ནས་སྟེང་དུ་དྲངས་པའི་ཚུལ་བྱས་ན་ཀླུ་ཐམས་ཅད་གནོན་པའོ། །དེ་ཉིད་བཅིངས་ཏེ་ཁྲོས་པས་ཡི་གེ་ཧཱུཾ་བཟླ་བར་བྱ་སྟེ་དེ་ལྟར་རྣ་གནོད་སྦྱིན་ཐམས་ཅད་ཕྱི་བཞིན་དུ་འབྲང་བར་བྱེད་པའོ། །དེ་ཉིད་བཅིངས་ནས་འཇིགས་བྱེད་ཀྱི་ལྟ་བས་སྲིན་པོ་ཐམས་ཅད་འཇིགས་སུ་བཅུག་པའོ། །དེ་ཉིད་བཅིངས་ནས་ཁྲོ་བོའི་ལྟ་བས་ཁ་ཊྭཱཾ་ག་ཡིད་ཀྱིས་དྲལ་བར་བྱ་སྟེ་དེ་ལྟར་ན་མཁའ་འགྲོ་མ་ཐམས་ཅད་ལ་སོགས་པའི་གདོན་ཐམས་ཅད་ཞི་བའོ། །དེ་ཉིད་བཅིངས་ནས་རང་གི་སྙིང་གར་འབར་བའི་རྡོ་རྗེ་བསྒོམ་པར་བྱ་སྟེ་དེ་ལྟར་ན་བདུད་ཐམས་ཅད་ཅིད་ཀྱི་སྟོབས་འཇོམས་པའོ། །དེ་ཉིད་བཅིངས་ནས་ཁྲོ་བོའི་ལྟ་བས་ཡིད་ཀྱིས་རྩེ་གསུམ་དྲལ་བར་བྱ་སྟེ་དེ་ལྟར་ན་མ་མོ་ཐམས་ཅད་ཞི་བར་འགྱུར་རོ། །དེ་ཉིད་བཅིངས་ནས་གདུག་པའི་དཀྱིལ་འཁོར་གཞུག་པར་བྱ་སྟེ་དེ་ལྟར་ན་གདུག་པའི་དཀྱིལ་འཁོར་ཐམས་ཅད་འཐོར་བའོ། །དེ་ཉིད་བཅིངས་ནས་ཡི་གེ་ཧཱུཾ་བཟླ་བར་བྱ་སྟེ་དེ་ལྟར་ན་གདུག་པ་ཐམས་ཅད་ཚར་གཅོད་པའོ། །དེ་ཉིད་བཅིངས་ནས་ཡི་གེ་ཧི་བཟླ་
བར་བྱས་ཏེ་དེ་ལྟར་ན་ཐམས་ཅད་འདུལ་བའོ། །དེ་ཉིད་བཅིངས་ནས་མི་འཇིགས་པ་སྦྱིན་པའི་ཚུལ་གྱིས་གཡས་ཕྱོགས་སུ་གཟུང་བར་བྱ་སྟེ་དེ་ལྟར་ན་མི་འཇིགས་པ་སྐྱེད་པའོ། །དེ་ཉིད་དོང་རྩེ་བསོར་བའི་ཚུལ་དུ་བྱ་སྟེ་དེ་ལྟར་ན་ནོར་བུ་བཟང་པོ་དབང་དུ་བྱེད་པའོ། །དེ་ཉིད་བཅིངས་ནས་ནོར་སྦྱིན་ལ་ཁྲོ་བའི་ལྟ་བས་བལྟ་ཞིང་བཟླ་བར་བྱ་སྟེ་དེ་ལྟར་ན་ནོར་སྦྱིན་ལས་ནོར་ཐམས་ཅད་འཕྲོག་པའོ། །དེ་ཉིད་བཅིངས་ནས་མཛུབ་མོ་སོ་དག་གིས་བཟུང་སྟེ་རྣམ་ཐོས་སྲས་རྐང་པ་གཡོན་པས་མནན་ནས་བཀུག་ཅིང་བཟླ་བར་བྱ་སྟེ་དེ་ལྟར་ན་དཔལ་དགུག་པའོ། །དེ་ཉིད་བཅིངས་ནས་མཛུབ་མོས་དོང་རྩེ་གཉིས་བསོར་བའི་ཚུལ་བྱས་ཏེ་དེ་ལྟར་ན་ལྷའི་བུ་མོ་ཐམས་ཅད་འཕྲོག་པའོ། །དེ་ཉིད་ཀྱིས་གཞོན་ནུ་མའི་ལག་པ་གཡོན་པ་ལ་གནས་པའི་དྲིལ་བུ་ཡིད་ཀྱིས་དྲལ་བར་བྱ་སྟེ་དེ་ལྟར་ན་གཞོན་ནུ་མ་རོལ་དུ་བཅུག་པའོ། །དེ་ཉིད་བཅིངས་ནས་མཛུབ་མོའི་རྩེ་མོ་མཐེ་བོང་གི་སྟེང་དུ་བཞག་ནས་འོག་ཏུ་བྱས་ལ་རྐང་པ་གཡོན་པས་བརྒྱ་བྱིན་གྱི་གཟུགས་བརྙན་མནན་ཏེ་ལུ་གུ་རྒྱུད་དང་བཀྲོལ་བའི་ཚུལ་གྱིས་འཕྲོག་པར་བྱ་སྟེ་དེ་ལྟར་ན་ཤ་ཙི་འཕྲོག་པའོ། །དེ་ཉིད་བཅིངས་ཏེ་གཞོན་ནུ་མའི་ལག་པ་གཡས་པ་ལ་གནས་པའི་དྲིལ་བུ་ཡིད་ཀྱིས་དྲལ་བར་བྱ་སྟེ་དེ་ལྟར་ན་གཞོན་ནུ་རྣམ་པར་གཅོད་པའོ། །དེ་ཉིད་བཅིངས་ནས་མཛུབ་མོས་ཆགས་པ་དང་བྲལ་བའི་ཡིད་ཀྱིས་ལྟུང་བར་བྱ་སྟེ་དེ་ལྟར་ན་ཚངས་པ་ལྟུང་བའོ། །དེ་ཉིད་བཅིངས་ནས་ཡིད་ཀྱིས་ཁྱབ་འཇུག་གི་འཁོར་ལོ་དྲལ་བར་བྱ་སྟེ་དེ་ལྟར་ན་ཁྱབ་འཇུག་འདུལ་བར་འགྱུར་རོ། །དེ་ཉིད་བཅིངས་ནས་རྩེ་གསུམ་དྲལ་བར་བྱས་ཏེ་དེ་ལྟར་ན་ལྷ་ཆེན་པོ་ལས་རྣམ་པར་རྒྱལ་བར་འགྱུར་རོ། །དེ་ཉིད་བཅིངས་ནས་མཛུབ་མོའི་རྩེ་མོ་མཐེ་བོའི་སྟེང་དུ་བཞག་ནས་འདོད་པའི་དབང་ཕྱུག་རྐང་པ་གཡོན་པས་མནན་ཏེ་ལུ་གུ་རྒྱུད་དགྲོལ་བའི་ཚུལ་དུ་དབྲོག་པར་བྱ་སྟེ་དེ་ལྟར་ན་དགའ་མ་འཕྲོག་པའོ། །དེ་ཉིད་བཅིངས་ནས་མདུན་དུ་རྡོ་རྗེ་བསྒོམ་པར་བྱ་སྟེ་དེ་ལྟར་ན་རྡོ་རྗེ་གྲུབ་པའོ། །དེ་ཉིད་བཅིངས་ནས་མདུན་དུ་བྱང་ཆུབ་སེམས་དཔའ་བསྒོམ་པར་བྱ་སྟེ་དེ་ལྟར་ན་བྱང་ཆུབ་སེམས་དཔའ་སྒྲུབ་པའོ། །དེ་ཉིད་བཅིངས་ནས་མདུན་དུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པ་རྣམས་བསྒོམ་པར་བྱ་སྟེ་དེ་ལྟར་ན་དེ་བཞིན་གཤེགས་པ་རྗེས་སུ་
ཆགས་པའོ། །དེ་ཉིད་བཅིངས་ནས་མདུན་དུ་རྡོ་རྗེ་འཆང་ཆེན་པོ་བསྒོམ་པར་བྱ་སྟེ་དེ་ལྟར་ན་མདུན་དུ་རྡོ་རྗེ་འཆང་ཆེན་པོ་རྗེས་སུ་ཆགས་པ་དང་དགུག་པ་དང་གཞུག་པ་དང་བཅིང་བ་དང་དབང་དུ་བྱེད་པ་སྒྲུབ་པར་འགྱུར་རོ། །ཇི་ལྟར་ལས་བརྒྱ་སྒྲུབ་པ་འདི་ལག་པ་གཡས་པའི་རྡོ་རྗེ་འཛིན་མའི་ཕྱག་རྒྱས་འགྲུབ་པར་འགྱུར་བ་དེ་བཞིན་དུ་ལག་པ་གཡོན་པའི་རྡོ་རྗེ་འཛིན་མའི་ཕྱག་རྒྱས་ཀྱང་ལས་བརྒྱ་འདི་ཉིད་སྒྲུབ་པ་ཡིན་ནོ། །བསྡུས་པའི་དཀྱིལ་འཁོར་ལས་གསུངས་པའི་རྡོ་རྗེ་དབང་ཕྱུག་གི་གཟུགས་འཛིན་པའི་འཕགས་པ་སྤྱན་རས་གཟིགས་དབང་ཕྱུག་གི་རྣལ་འབྱོར་བྱས་ལ་དེའི་དམ་ཚིག་གི་ཕྱག་རྒྱ་དེ་ཉིད་ཆོས་ཉིད་ཅེས་བྱ་བའི་མིང་ཅན་བཅིངས་ནས་གཉིས་སུ་བྱ་སྟེ། ལག་པ་གཡས་པའི་རྡོ་རྗེ་ཉིད་ཀྱི་ཕྱག་རྒྱས་འཕགས་པ་སྤྱན་རས་གཟིགས་ཀྱི་དཀྱིལ་འཁོར་ཆེན་པོ་ལས་གསུངས་པའི་ལས་བརྒྱ་སྔགས་འདིས་བསྒྲུབ་པར་བྱ་སྟེ། ཧྲི་བཛྲ་པདྨོ་དྷ་བྷ་ཧོ་བྷ་ག་ཝཱན་བཛྲ་ཨ་བ་ལོ་ཀི་ཏེ་ཤྭ་ར་མ་ཧཱ་པྲ་མི་སིདྡྷ། ཨོཾ་བྷུར་བྷུ་བ་སྭ་སྭ་སྟི་ན་མ་སྭཱ་ཧཱ་ཞེས་བྱ་བས་སོ། །འདིས་ནི་འདི་ལྟར་བཤད་པར་འགྱུར་ཏེ། མེ་ཏོག་གིས་ཁྱབ་ཅིང་འབར་བའི་ཡིད་ཀྱིས་རང་བཞིན་གྱི་མེ་ཐབ་ཀྱི་ནང་དུ་ཚངས་པའི་གཟུགས་ཀྱི་བཅོམ་ལྡན་འདས་འཇིག་རྟེན་དབང་ཕྱུག་མདུན་དུ་རྣམ་པར་བསམས་ལ། ལག་པ་གཡས་པས་ཇི་ལྟ་བ་བཞིན་དུ་བཤད་པའི་རྡོ་རྗེ་ཆོས་ཉིད་ཅེས་བྱ་བའི་འཇིག་རྟེན་དབང་ཕྱུག་གི་དམ་ཚིག་གི་ཕྱག་རྒྱ་བཅིངས་ལ་ངེས་ཡིད་ཀྱི་སྒྲིབ་པ་ཐམས་ཅད་དང༌། སྡིག་པ་ཐམས་ཅད་དང་རྨི་ལམ་ངན་པ་དང་མཚན་མ་ངན་པ་དང༌། འཚེ་བ་དང༌། ཉེ་བར་འཚེ་བ་དང༌། གནོད་པ་དང༌། དུས་མ་ཡིན་པར་འཆི་བ་དང༌། འཇིགས་བྱེད་ཀྱིས་འཇིགས་པ་དང༌། རྩོད་པ་དང༌། འགྱེད་པ་དང༌། འཐབ་པ་དང༌། བརླག་པ་དང༌། ཉོན་མོངས་པ་དང༌། ངལ་བ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། དབུལ་བ་དང༌། ཕ་རོལ་གྱི་གནོད་པ་དང༌། རེག་བྱ་ངན་པ་དང༌། སྐལ་པ་ངན་པ་དང༌། ནད་དང་བཅས་པ་དང༌། དོན་མེད་པ་རྣམས་བསྲེག་པར་བྱ་སྟེ་དེ་ལྟར་ན་དེ་རྣམས་འཇིག་པར་འགྱུར་རོ། །དེ་ཉིད་བཅིངས་ནས་རང་དང་གཞན་དག་ལ་རླུང་གིས་གསོ་དཔྱད་བྱའོ། །དེ་ཉིད་བཅིངས་ནས་མཁྲིས་པ་དང༌། ཁྲག་དང༌། བད་ཀན་དང༌། འདུས་པ་དང༌། མ་ཞུ་བ་དང༌། རིམས་དང༌། སྦྱར་བའི་དུག་
དང༌། དུག་དང༌། མཛེ་དང་འབྲུམ་བུ་ཕྲ་མོ་དང༌། གཡའ་བ་དང་རྐང་ཤུ་དང༌། སྐྲན་དང༌། དམུ་ཆུ་དང༌། མཚན་པར་རྡོལ་བ་དང༌། ཤ་བཀྲ་དང༌། གཅོང་ཆེན་དང༌། ཁྲག་ཟད་པ་དང༌། ནད་ཐམས་ཅད་དང༌། ཡིད་མི་བདེ་བ་དང༌། ནད་དང༌། གདོན་དང༌། མཁའ་འགྲོ་མ་རྣམས་ཀྱིས་གསོ་དཔྱད་བྱ་བ་ཡིན་ནོ། །དེ་ཉིད་བཅིངས་ནས་ཁྲབ་དང༌། གོ་ཆ་དང༌། གཙུག་ཏོར་དང༌། གཙུག་ཕུད་དང༌། མཚམས་དང༌། ཕྱོགས་དང༌། དཀྱིལ་འཁོར་དང༌། ས་དང༌། ནམ་མཁའ་དང༌། ཁང་བཟངས་དང༌། རྡོ་རྗེའི་རབ་དང༌། མེ་འབར་བ་དང༌། ཐལ་བའི་རབ་དང༌། རྡོ་རྗེའི་རི་བོ་དང༌། དོ་ཉོད་པའི་ཆུ་བོ་དང༌། ཐིག་སྐུད་ཡོངས་སུ་དགོད་པ་དང༌། ཕུར་བུ་དང༌། བཟའ་བ་དང༌། བཏུང་བ་དང༌། གསོ་དང༌། དགུག་པའི་ཕྱག་རྒྱས་སྲུང་བ་རྣམས་བྱ་བ་ཡིན་ནོ། །དེ་ཉིད་བཅིངས་ནས་འཆི་བའི་འཇིགས་པ་ལ་སོགས་པ་ལས་བདག་ཉིད་རྣམ་པར་སྦྱང་བར་བྱའོ་ཞེས་བྱ་བའི་བསམ་པ་བསྐྱེད་པར་བྱས་ན། ཚེ་དང་ཁ་དོག་དང༌། སྟོབས་དང༌། གཟི་བརྗིད་དང༌། ན་ཚོད་དང༌། བརྩོན་འགྲུས་དང༌། ནད་མེད་པ་དང༌། དཔལ་དང༌། སྐལ་བ་བཟང་པོ་དང༌། ནོར་དང༌། འབྲུ་དང༌། དབང་ཕྱུག་དང༌། ཕུན་སུམ་ཚོགས་པ་དང༌། འཕེལ་བ་དང༌། གྲུབ་པ་དང༌། བློ་དང༌། རྙེད་པ་དང༌། དཔལ་མོ་དང༌། མིང་དང༌། སྒྲ་སྙན་པ་དང༌། གྲགས་པ་དང༌། ཏིང་ངེ་འཛིན་དང༌། ཤེས་རབ་དང༌། མཆོག་གི་དངོས་གྲུབ་རྣམས་བསྒོམ་པར་བྱ་སྟེ་དེ་ལྟར་ན་དེ་དག་བསྒོམ་པས་གྲུབ་པར་འགྱུར་རོ། །ཇི་ལྟར་ལས་བརྒྱ་སྒྲུབ་པ་འདི་ལག་པ་གཡས་པའི་རྡོ་རྗེ་ཆོས་ཉིད་ཅེས་བྱ་བའི་འཇིག་རྟེན་དབང་ཕྱུག་གི་དམ་ཚིག་གི་ཕྱག་རྒྱ་བཅིངས་ནས་བྱ་བར་བཤད་པ་དང༌། དེ་བཞིན་དུ་ལག་པ་གཡོན་པས་ཀྱང་འདི་ཉིད་ཤེས་པར་བྱ་སྟེ་འདོད་པའི་གཟུགས་འཛིན་པའི་འཕགས་པ་ནམ་མཁའི་སྙིང་པོའི་རྣལ་འབྱོར་བྱས་ལ་རྡོ་རྗེ་རིན་ཆེན་དེ་ཉིད་བཅིངས་ནས་གཉིས་སུ་བྱས་ཏེ། ལག་པ་གཡས་པའི་རིན་པོ་ཆེའི་མྱུ་གུས་འཕགས་པ་ནམ་མཁའི་སྙིང་པོའི་རྣལ་འབྱོར་ལས་གསུངས་པའི་ལས་བརྒྱ་སྔགས་འདིས་བསྒྲུབ་པར་བྱ་སྟེ། ཧེ་བཛྲ་ཀརྨ་ཨ་ཡུར་དང་སརྦ་ཀ་མན་མེ་ས་ད་ཡ་ཧོ་བྷ་ག་བཱན་བཛྲ་ཨ་ཀ་ཤ་སརྦ་པ་ཏྲ་ཏ་ཏྲཾ་ཞེས་བྱ་བའོ། །འདིས་ནི་འདི་ལྟར་འཆད་པར་འགྱུར་ཏེ། ལག་པ་གཡས་པས་ཇི་ལྟ་བ་བཞིན་དུ་བཤད་པའི་རིན་པོ་ཆེའི་མྱུ་གུ་བཅིངས་ལ་
དེ་མཛོད་སྤུའི་ཕྱོགས་སུ་གཟུང་བར་བྱས་ན་འབྱོར་པ་ཐམས་ཅད་དགུག་པ་དང་གཞུག་པ་དང་བཅིང་བ་དང་དབང་དུ་བྱ་བ་དང༌། ཚུར་དྲང་བ་དང༌། བསགས་པ་དང༌། ལེན་པ་དང༌། ཀུན་དུ་འདྲེན་པ་དང༌། ཚུར་ཁྱེར་བ་དང༌། ཕར་གཏོང་བ་དང༌། གཞིག་པ་དང༌། གྱེན་དུ་གཏོར་བ་དང༌། ཚུར་འཁོར་བ་དང༌། ཀུན་དུ་བརྡེག་པ་དང༌། སྦྱར་བ་དང༌། རྙེད་པ་དང༌། ཉོ་བ་དང༌། འཚོང་བ་དང༌། ཡང་དག་པར་འགྱེད་པ་དང༌། དགོས་པ་ཉེ་བར་སྦྱོར་བ་དང༌། བརྟན་པར་བྱེད་པ་དང༌། རྡོ་རྗེར་བྱེད་པ་དང༌། སྒྲུབ་པ་དང༌། སྒྲུབ་པ་མཆོག་རྣམས་བསྒྲུབ་པར་བྱའོ། །དེ་བཞིན་དུ་བཅིངས་ནས་དཔྲལ་བའི་ཕྱོགས་སུ་གཟུང་ཞིང་དཔལ་ཆེན་པོ་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པ་དང༌། འཕྲོག་པ་དང༌། ཉེ་བར་སོགས་པ་དང༌། ལེན་པ་དང༌། ཚུར་དྲང་བ་དང༌། བསགས་པ་དང༌། ལེན་པ་དང༌། ཀུན་དུ་འདྲེན་པ་དང༌། ཚུར་ཁྱེར་བ་དང༌། ཕར་གཏོང་བ་དང༌། གཞིག་པ་དང༌། དོར་བ་དང༌། གྱེན་དུ་གཏོར་བ་དང༌། ཀུན་དུ་བརྡེག་པ་དང༌། སྦྱར་བ་དང༌། རྙེད་པ་དང༌། ཉོ་བ་དང༌། འཚོང་བ་དང༌། ཡང་དག་པར་འགྱེད་པ་དང༌། དགོས་པ་ཉེ་བར་སྦྱོར་བ་དང༌། བརྟན་པར་བྱེད་པ་དང༌། རྡོ་རྗེར་བྱེད་པ་དང༌། སྒྲུབ་པ་དང༌། སྒྲུབ་པ་མཆོག་རྣམས་བསྒྲུབ་པར་བྱའོ། །སླར་ཡང་དེ་ཉིད་བཅིངས་ནས་མཛོད་སྤུའི་ཕྱོགས་སུ་བཟུང་ན་ཕུན་སུམ་ཚོགས་པ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པ་དང༌། འཕྲོག་པ་དང༌། ཉེ་བར་སོགས་པ་དང༌། ལེན་པ་དང༌། ཚུར་དྲང་བ་དང༌། བསགས་པ་དང༌། ལེན་པ་དང༌། ཀུན་དུ་འདྲེན་པ་དང༌། ཚུར་ཁྱེར་བ་དང༌། ཕར་གཏོང་བ་དང༌། གཞིག་པ་དང༌། དོར་བ་དང༌། གྱེན་དུ་གཏོར་བ་དང༌། ཚུར་འཁོར་བ་དང༌། ཀུན་དུ་བརྡེག་པ་དང༌། སྦྱར་བ་དང༌། རྙེད་པ་དང༌། ཉོ་བ་དང༌། འཚོར་བ་དང༌། ཡང་དག་པར་འགྱེད་པ་དང༌། དགོས་པ་ཉེ་བར་སྦྱོར་བ་དང༌། བརྟན་པར་བྱེད་པ་དང༌། རྡོ་རྗེར་བྱེད་པ་དང༌། སྒྲུབ་པ་དང༌། སྒྲུབ་བ་མཆོག་རྣམས་བསྒྲུབ་བར་བྱའོ། །སླར་ཡང་དེ་ཉིད་བཅིངས་ནས་མཛོད་སྤུའི་ཕྱོགས་སུ་གཟུང་བར་བྱ་སྟེ་མཆོད་པ་ཐམས་ཅད་དགུག་པ་དང༌། གཞུག་པ་དང༌། བཅིང་བ་དང༌། དབང་དུ་བྱེད་པ་དང༌། འཕྲོག་པ་དང༌། ཉེ་བར་སོགས་པ་དང༌། ལེན་པ་དང༌། ཚུར་དྲང་བ་དང༌། བསགས་པ་དང༌།
ལེན་པ་དང༌། ཀུན་དུ་འདྲེན་པ་དང༌། ཚུར་ཁྱེར་བ་དང༌། ཕར་གཏོང་བ་དང༌། གཞིག་པ་དང༌། དོར་བ་དང༌། གྱེན་དུ་གཏོར་བ་དང༌། ཚུར་འཁོར་བ་དང༌། ཀུན་དུ་བརྡེག་པ་དང༌། སྦྱར་བ་དང༌། རྙེད་པ་དང༌། ཉོ་བ་དང༌། འཚོང་བ་དང༌། ཡང་དག་པར་འགྱེད་པ་དང༌། དགོས་པ་ཉེ་བར་སྦྱོར་བ་དང༌། བརྟན་པར་བྱེད་བ་དང༌། རྡོ་རྗེར་བྱེད་པ་དང༌། སྒྲུབ་པ་དང༌། སྒྲུབ་པ་མཆོག་རྣམས་བསྒྲུབ་པར་བྱའོ། །ཇི་ལྟར་ལག་པ་གཡས་པའི་རྡོ་རྗེ་རིན་པོ་ཆེའི་མྱུ་གུས་འཕགས་པ་ནམ་མཁའི་སྙིང་པོའི་དཀྱིལ་འཁོར་ལས་གསུངས་པའི་ལས་བརྒྱ་པོའི་སྒྲུབ་པ་ཡིན་པ་དེ་བཞིན་དུ་ལག་པ་གཡོན་པའི་རྡོ་རྗེ་རིན་པོ་ཆེའི་མྱུ་གུས་ཀྱང་ལས་བརྒྱ་པོ་འདི་ཉིད་སྒྲུབ་པ་ཡིན་ནོ། །དེ་ལྟར་ན་ཚུལ་འདིས་ཇི་ལྟ་བ་བཞིན་དུ་དམ་ཚིག་གི་མཚན་མ་རྣམས་ཀྱི་ལག་པ་གཡས་པ་དང་གཡོན་པ་དང་གིས་རྡོ་རྗེ་ཆེན་པོའི་སྦྱོར་བ་ངེས་པར་སྦྱར་བས་རིགས་ཐམས་ཅད་དངོས་གྲུབ་ཐམས་ཅད་ཀྱི་ཕྱག་རྒྱ་ཆེན་པོ་སྟོང་འགྱུར་དུ་འགྱུར་རོ། །དེ་ལྟར་ཕྱག་རྒྱ་ཆེན་པོའི་སྟོང་ཕྲག་དང་པོ་བསྟན་ནས། ད་ནི་དངོས་གྲུབ་ཐམས་ཅད་ཀྱི་ཕྱག་རྒྱ་ཆེན་པོའི་སྟོང་ཕྲག་གཉིས་པ་བསྟན་པར་བྱ་བའི་ཕྱིར། དེ་ལྟར་རང་གི་དམ་ཚིག་གི་ཕྱག་རྒྱ་བཅིང་བའི་རྡོ་རྗེ་བསྡམས་པ་ནང་དུ་བཅིངས་པས་སོ་ཞེས་བྱ་བ་གསུངས་ཏེ། རྡོ་རྗེ་བསྡམས་པ་ནང་དུ་བཅིངས་ནས་གཉིས་སུ་བྱ་སྟེ། གཡས་པ་དང་གཡོན་པའི་ཁུ་ཚུར་དག་གིས་དཔལ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པ་དང་དེ་བཞིན་གཤེགས་པ་དང༌། རྡོ་རྗེ་ཉི་མ་མེ་ལྟར་འབར་བ་དང༌། འཕགས་པ་སྤྱན་རས་གཟིགས་དབང་ཕྱུག་དང༌། འཕགས་པ་ནམ་མཁའི་སྙིང་པོའི་དཀྱིལ་འཁོར་ལས་གསུངས་པ་འདས་མ་ཐག་ཏུ་བཤད་པའི་ཚུལ་གྱིས་ལས་ཉིས་བརྒྱ་པོ་འདི་ཉིད་བསྒྲུབ་པར་བྱ་སྟེ། འདི་ནི་དངོས་གྲུབ་ཐམས་ཅད་ཀྱི་ཕྱག་རྒྱ་ཆེན་པོའི་སྟོང་གཉིས་པ་ཡིན་ནོ། །དེ་ལྟར་སྟོང་གཉིས་པ་བསྟན་ནས། ད་ནི་གསུམ་པ་བསྟན་པར་བྱ་བའི་ཕྱིར་དེ་ལྟར་རང་གི་ཕྱག་མཚན་གྱི་ཁུ་ཚུར་རྡོ་རྗེ་གར་ལས་བྱུང་བའི་ཕྱག་རྒྱ་སྟོང་དང་པོའི་ལས་ཀྱི་ཚོགས་བརྒྱ་སྒྲུབ་པར་བྱེད་པའི་རྡོ་རྗེའི་ལས་བྱེད་པ་གསུམ་པའོ་ཞེས་བྱ་བ་གསུངས་སོ། །འདིས་ནི་འདི་ལྟར་བཤད་པར་འགྱུར་ཏེ། ཇི་ལྟ་བ་བཞིན་དུ་གར་བྱས་ནས་རྡོ་རྗེ་ཁུ་ཚུར་གཉིས་བཅིངས་ལ་གཡས་པའི་རྡོ་རྗེ་ཁུ་ཚུར་
གྱིས་འདས་མ་ཐག་ཏུ་བཤད་པའི་ཚུལ་དུ་དཔལ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་ལས་བརྒྱ་བསྒྲུབ་པར་བྱ་སྟེ། ལག་པ་གཡོན་པས་ཀྱང་དེ་བཞིན་ནོ། །དེ་བཞིན་གཤེགས་པའི་ཁུ་ཚུར་གཉིས་བཅིངས་ནས། ལག་པ་གཡས་པས་དེ་བཞིན་གཤེགས་པའི་དཀྱིལ་འཁོར་ལས་གསུངས་པའི་ལས་བརྒྱ་བསྒྲུབ་པར་བྱ་སྟེ་གཡོན་པས་ཀྱང་དེ་བཞིན་ནོ། །ཁྲོ་བོའི་ཁུ་ཚུར་བཅིངས་ནས་རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ལས་གསུངས་པའི་ལས་ཉིས་བརྒྱ་བསྒྲུབ་པར་བྱའོ། །པདྨའི་ཁུ་ཚུར་གཉིས་བཅིངས་ཏེ་འཕགས་པ་སྤྱན་རས་གཟིགས་ཀྱི་དབང་ཕྱུག་གི་དཀྱིལ་འཁོར་ལས་གསུངས་པའི་ལས་ཉིས་བརྒྱ་བསྒྲུབ་པར་བྱའོ། །རིན་པོ་ཆེའི་ཁུ་ཚུར་གཉིས་བཅིངས་ནས་འཕགས་པ་ནམ་མཁའི་སྙིང་པོའི་དཀྱིལ་འཁོར་ལས་གསུངས་བའི་ལས་ཉིས་བརྒྱ་བསྒྲུབ་བར་བྱ་སྟེ། དེ་ལྟར་ན་ཚུལ་འདིས་གར་ལས་བྱུང་བའི་ཕྱག་རྒྱ་སྟོང་གསུམ་པ་ཡིན་ནོ། །དེ་ལྟར་རང་གི་མཚན་མའི་ཁུ་ཚུར་གྱི་རྡོ་རྗེ་གར་ལས་བྱུང་བའི་སྟོང་གསུམ་པ་བསྟན་ནས། ལས་ཀྱི་ཕྱག་རྒྱ་སྟོང་བཞི་པ་བསྟན་པར་བྱ་བའི་ཕྱིར་དེ་ལྟར་ལག་པ་གཡས་པ་དང་གཡོན་པ་ཅིག་ཤོས་ཀྱིས་ལས་ཐམས་ཅད་རབ་ཏུ་སྒྲུབ་པར་བྱེད་པའི་ལས་ཀྱི་ཕྱག་རྒྱ་སྟོང་བཞི་པོ་ཞེས་བྱ་བ་གསུངས་ཏེ། འདས་མ་ཐག་ཏུ་བཤད་པའི་ཚུལ་གྱིས་དཔལ་རྡོ་རྗེ་སེམས་དཔའ་དང༌། དེ་བཞིན་གཤེགས་པ་དང༌། རྡོ་རྗེ་དང༌། པདྨ་དང༌། ནོར་བུའི་རིགས་ལས་གསུངས་པའི་ལས་རྣམས་བསྒྲུབ་པར་བྱ་སྟེ། དེ་བཞིན་དུ་ལག་པ་གཡོན་པས་ཀྱང་ངོ༌། །དེས་ན་ཚུལ་འདིས་ལས་ཀྱི་ཕྱག་རྒྱ་སྟོང་བཞི་པ་དང་པོའི་ལས་རབ་ཏུ་སྒྲུབ་པར་བྱེད་པ་ཡིན་ནོ། །དེ་ལྟར་མ་ལུས་པའི་ཕྱག་རྒྱ་བཅིང་བ་ནི་ལག་པ་གཅིག་གིས་ཕྱག་རྒྱ་ཐམས་ཅད་བཅིང་བ་རབ་ཏུ་སྒྲུབ་པའོ་ཞེས་བྱ་བ་ལ། དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་འདོད་ཆགས་རྡོ་རྗེ་མ་ལ་སོགས་པ་ནས་རྡོ་རྗེ་དྲིལ་བུ་མའི་མཐར་ཐུག་པ་རྣམས་ཀྱི་དམ་ཚིག་གི་ཕྱག་རྒྱ་ཐམས་ཅད་བཅིངས་པ་གང་ཡིན་པ་མ་ལུས་པའི་ཕྱག་རྒྱ་བཅིངས་པས་ཏེ་གཡས་པ་དང་གཡོན་པའི་ལག་པ་གཅིག་གིས་ཕྱག་རྒྱ་བཅིང་བ་རབ་ཏུ་གྲུབ་བ་ནི་རྫོགས་པའོ། །འདིས་ནི་འདི་ལྟར་བཤད་པར་འགྱུར་ཏེ། འདོད་ཆགས་
རྡོ་རྗེ་མའི་དམ་ཚིག་གི་ཕྱག་རྒྱ་བཅིངས་ནས་གཉིས་སུ་བྱ་སྟེ། ལག་པ་གཡས་པའི་འདོད་ཆགས་རྡོ་རྗེ་མའི་དམ་ཚིག་གི་ཕྱག་རྒྱས་དཔལ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པའི་ལས་བརྒྱ་དང༌། ལག་པ་གཡོན་པའི་འདོད་ཆགས་རྡོ་རྗེ་མའི་དམ་ཚིག་གི་ཕྱག་རྒྱས་དེ་ཉིད་ཀྱི་སྙིང་པོ་བརྗོད་ཅིང་བསྒྲུབ་བར་བྱ་སྟེ། དེ་ལྟར་ཇི་སྲིད་ལྷ་མོ་རྡོ་རྗེ་དྲིལ་བུ་མའི་དམ་ཚིག་གི་ཕྱག་རྒྱ་དེ་ཉིད་ཀྱི་སྙིང་པོས་ལས་ཉིས་བརྒྱ་པོ་དེ་ཉིད་བསྒྲུབ་པར་བྱ་བ་ཡིན་ནོ། །དེ་ལྟར་རྡོ་རྗེ་བསྡམས་པ་ནང་དུ་བཅིངས་ནས་གཉིས་སུ་བྱས་ལ་འདོད་ཆགས་རྡོ་རྗེ་མ་ལ་སོགས་པའི་སྙིང་པོ་རྣམས་བརྗོད་ཅིང་རང་གི་རིགས་ཀྱི་ལས་བརྒྱ་ལག་པ་གཡས་པ་དང་གཡོན་པ་དག་གིས་བསྒྲུབ་པར་བྱའོ། །དེ་ལྟར་ན་མཚན་མ་དང༌། རྡོ་རྗེ་ཁུ་ཚུར་ལས་བྱུང་བའི་འདོད་ཆགས་རྡོ་རྗེ་མ་ལ་སོགས་པའི་སྙིང་པོས་རང་གི་རིགས་ཀྱི་ལས་བརྒྱ་དག་ལག་པ་གཡས་པ་དང་གཡོན་པ་དག་གིས་བསྒྲུབ་པར་བྱའོ། །དེ་ལྟར་ལག་པ་གཡས་པ་དང་གཡོན་པའི་ཅིག་ཤོས་ཀྱི་རང་གི་རིགས་ཀྱི་ལས་བརྒྱ་འདོད་ཆགས་རྡོ་རྗེ་མ་ལ་སོགས་པའི་སྙིང་པོ་བརྗོད་ཅིང་བསྒྲུབ་པར་བྱ་བ་ཡིན་ཏེ་བཅོམ་ལྡན་འདས་ཀྱིས་འདི་ནི་འདི་ལྟར་གསུངས་པ་ཡིན་ཏེ་སྒོམ་པ་ཁོ་ན་གཙོ་བོར་གྱུར་པ་ཡིན་གྱི་ཕྱག་རྒྱ་ནི་མ་ཡིན་ཏེ། དེའི་ཕྱིར་རྣལ་འབྱོར་གྱི་རྒྱུད་འདིར་སྒོམ་པ་ཁོ་ན་ལ་འབད་པར་བྱ་བ་ཡིན་གྱི། ཕྱག་རྒྱ་བཅིང་བ་ལ་ནི་མ་ཡིན་ནོ་ཞེས་བྱ་བའོ། །དེ་ལྟར་ཞེས་བྱ་བ་ལ་སེམས་ཅན་ཐམས་ཅད་ཀྱི་དོན་དུ་འཁོར་ལོས་བསྡུས་པའི་དཀྱིལ་འཁོར་རོ། །དམ་ཚིག་གི་ལས་ནི་ཕྱག་རྒྱའི་ལས་དང་བཅས་པར་བཅོམ་ལྡན་འདས་རྡོ་རྗེ་སེམས་དཔར་བསྒྲུབ་སྟེ་ཏིང་ངེ་འཛིན་གྱིས་རྫོགས་པར་མཛད་པའོ། །བསྡུས་པའི་དཀྱིལ་འཁོར་ཉིད་རྟེན་དང་བརྟེན་པའི་འཁོར་ལོའོ། །ཀུན་མཆོག་དབང་ཕྱུག་ཆེན་པོ་ཞེས་བྱ་བ་ནི་རྡོ་རྗེ་འཆང་ཆེན་པོ་སྟེ་སེམས་ཅན་ཐམས་ཅད་ལ་ཕན་པ་དང༌། བདེ་བ་དམ་པའི་དངོས་གྲུབ་ཀྱི་ཕྱིར་བཅོམ་ལྡན་འདས་རྡོ་རྗེ་སེམས་དཔའ་རྟེན་དང་བརྟེན་པའི་ཚུལ་གྱིས་རང་བཞིན་གྱི་རྡོ་རྗེ་འཆང་ཆེན་པོ་ཕྱག་རྒྱ་ཆེན་པོའི་ལས་དང་བཅས་པར་སྤྲུལ་པར་མཛད་པ་ཡིན་ནོ་ཞེས་བྱ་བའི་དོན་ཏོ། །བསྡུས་པའི་དཀྱིལ་འཁོར་གྱི་བཤད་པ་རྫོགས་སོ།། །།དེ་ལྟར་ཞེས་བྱ་བ་ལ་དེ་ལྟར་ནི་
འདི་ལྟར་རོ། །གསང་བ་ནི་སྐྱེ་བོ་ཐམས་ཅད་ཀྱིས་མངོན་སུམ་དུ་མ་གྱུར་པའོ། །རྒྱ་ཆེ་བ་ནི་ནམ་མཁའི་ཁམས་ཐམས་ཅད་སྤྲོས་ནས་གནས་པའོ། །རྨད་དུ་བྱུང་བ་ནི་གཞན་དག་ལ་སྔོན་ཆད་མ་བྱུང་བའོ། །མཆོག་ནི་དམ་པའོ། །འགྲོ་བ་ཀུན་རྣམ་པར་སྦྱོར་བ་ཞེས་བྱ་བ་ནི་རྡོ་རྗེ་སེམས་དཔའ་ལ་སོགས་པའི་སྐུས་སེམས་ཅན་གྱི་ཁམས་ཁྱབ་པ་ཐམས་ཅད་ལ་རྡོ་རྗེ་སེམས་དཔའ་ལ་སོགས་པའི་ཏིང་ངེ་འཛིན་རྫོགས་པར་བྱེད་པའོ། །དཔལ་མཆོག་དང་པོ་ཞེས་བྱ་བ་ནི་ཇི་ལྟ་བ་བཞིན་དུ་བཤད་པའོ། །བླ་ན་མེད་པ་ཉིད་ཀྱི་ཕྱིར་བླ་ན་མེད་པའི་བླ་མའོ། །གསལ་བའི་རྒྱུད་ཅེས་བྱ་བ་ནི་རྒྱུད་ཤིན་ཏུ་གསལ་བའོ། །བདག་གིས་ཡང་དག་པར་བཤད་ཅེས་བྱ་བ་ནི་བཅོམ་ལྡན་འདས་རྡོ་རྗེ་འཆང་ཆེན་པོས་ཡང་དག་པར་བསྟན་པ་ཡིན་ནོ་ཞེས་བྱ་བ་ཡིན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་རིགས་ཐམས་ཅད་ཀྱི་ཕྱག་རྒྱའི་རྒྱུད་ཀྱི་བཤད་པ་རྫོགས་སོ།། །།དེ་ལྟར་རྟོག་པ་ཐམས་ཅད་ཀྱི་རྒྱུད་ཕྱི་མ་རྩ་བའི་རྒྱུད་རིགས་ཐམས་ཅད་ཀྱི་ཕྱག་རྒྱའི་རྒྱུད་བསྟན་ནས་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་ཀྱི་སྒྲ་ནི་སྐབས་སུ་བབ་པའོ། །རྡོ་རྗེ་འཆང་ནི་རྡོ་རྗེ་སེམས་དཔའོ། །སྟོན་པར་མཛད་པ་ནི་སྟོན་པའོ། །གསང་བ་ཀུན་གྱི་བདག་པོ་ཞེས་བྱ་བ་ནི། རིགས་ལྔའི་གསང་བའི་དཀྱིལ་འཁོར་རྣམས་ཀྱི་བདག་པོའོ། །བརྟན་པ་ཞེས་བྱ་བ་ནི་རྟག་པའོ། །དེ་ཉིད་ཀྱི་ཕྱག་རྒྱ་ཞེས་བྱ་བ་ནི་གསང་བའི་དཀྱིལ་འཁོར་གྱི་ཕྱག་རྒྱ་རྣམས་རིགས་ལྔའི་སྐུའི་གསང་བའི་རང་བཞིན་ཅན་ནོ། །དེ་རྣམས་ཀྱི་རྒྱུད་ཀྱང་ཡིན་ལ་ཆེན་པོ་ཡང་དེ་ཡིན་པས་རྒྱུད་ཆེན་པོ་སྟེ་དེ་ཁོ་ན་ཉིད་ཀྱི་ཕྱག་རྒྱའི་རྒྱུད་ཆེན་པོའོ། །མཚོན་ཆ་ཡང་ཡིན་ལ་མཆོག་ཀྱང་དེ་ཉིད་ཡིན་པས་ན་མཚོན་ཆ་མཆོག་སྟེ། མཆོག་གི་མཆོག་ཏུ་གྱུར་པའི་ཤེས་རབ་དང་ཐབས་ཀྱི་མདའ་ཞེས་བྱ་བའི་དོན་ཏོ། །འདི་ཞེས་བྱ་བ་ནི་ཐུགས་ལ་གནས་པས་ཏེ་འོག་ནས་འཆད་པར་འགྱུར་བའོ། །གསུངས་སོ་ཞེས་བྱ་བ་ནི་སྤྲུལ་པར་མཛད་པའོ་ཞེས་བྱ་བའི་དོན་ཏོ། །དེ་ནས་ཀྱི་སྒྲ་ནི་སྔ་མ་བཞིན་ནོ། །བཅོམ་ལྡན་འདས་རྡོ་རྗེ་སེམས་དཔའི་དངོས་གྲུབ་ཀྱི་གསང་བ་རྗེས་སུ་བཤད་པར་བྱའོ་ཞེས་པ་དང་སྦྱར་རོ། །རྟོག་
བ་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་རྟོག་པ་ཐམས་ཅད་དེ། དཔལ་རྡོ་རྗེ་སེམས་དཔའ་ལ་སོགས་པ་ནས་འཕགས་བ་ནམ་མཁའི་སྙིང་པོའི་མཐར་ཐུག་པའི་བར་གྱི་གསང་བའི་དཀྱིལ་འཁོར་གྱི་རྟོག་པ་རྣམས་སོ། །དེ་དག་གི་ཆོ་ག་ནི་རྒྱུན་ནོ། །མཆོག་ནི་དམ་པའོ། །མཁས་པ་ནི་ཉོན་མོངས་པ་དང་ཉེ་བའི་ཉོན་མོངས་པས་མི་ཐུབ་པའོ། །ཕྲ་བ་ཞེས་བྱ་བ་ནི་སོ་སོར་ངེས་པས་འབིགས་པར་བྱེད་པའི་ཤེས་རབ་སྟོན་པར་བྱེད་པའོ། །རྒྱ་ཆེ་བ་ནི་ནམ་མཁའི་ཁམས་ཐམས་ཅད་ཁྱབ་པར་བྱེད་པའོ། །ཟབ་མོ་ནི་རྒྱ་མཚོ་ཆེན་པོ་ལྟར་འཇུག་པར་དཀའ་བའོ། །བསམ་དུ་མེད་བས་ན་བསམ་གྱིས་མི་ཁྱབ་པའོ། །ནམ་མཁའ་བཞིན་དུ་མཐའ་ཡས་པས་ན་ཚད་མེད་པའོ། །ཉོན་མོངས་པ་དང་ཉེ་བའི་ཉོན་མོངས་པའི་མུན་པ་དང་བྲལ་བས་ན་གསལ་བའོ། །མཚུངས་པ་མེད་པས་ན་མི་མཉམ་པའོ། །བླ་ན་མེད་པའི་བླ་མ་མཐར་ཐུག་པ་མེད་པའི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཀྱི་དོན་དུ་གསང་བས་ན་བླ་ན་མེད་པའི་བླ་མ་མཐར་ཐུག་པ་མེད་པའི་དངོས་གྲུབ་ཀྱི་གསང་བའོ། །རྟོག་པ་ཐམས་ཅད་ཀྱི་ཚོགས་ཀྱང་ཡིན་ལ་མཆོག་དང་མཁས་པ་དང་ཕྲ་བ་དང་རྒྱ་ཆེ་བ་དང་ཟབ་མོ་དང་བསམ་གྱིས་མི་ཁྱབ་པ་དང་ཚད་མེད་པ་དང་གསལ་བ་དང་མཉམ་པ་མེད་པ་དང༌། བླ་ན་མེད་པའི་བླ་མ་མཐར་ཐུག་པ་མེད་པའི་དངོས་གྲུབ་ཀྱི་གསང་བ་རྣམས་ཀྱང་དེ་ཉིད་ཡིན་པས་ན་རྟོག་པ་ཐམས་ཅད་དུ་མཆོག་ཏུ་མཁས་ཤིང་ཕྲ་བརྒྱ་ཆེ་བ་ཟབ་མོ་བསམ་གྱིས་མི་ཁྱབ་པ་ཚད་མེད་པ་གསལ་བ་མཉམ་པ་མེད་པ་བླ་ན་མེད་པའི་མཐར་ཐུག་པ་མེད་པའི་དངོས་གྲུབ་ཀྱི་གསང་བས་ཏེ། རྡོ་རྗེ་སྤྱན་ལ་སོགས་པའི་ཕྱག་རྒྱའི་གཟུགས་སྒྲུབ་བའི་མཆོག་ཏུ་གསང་བ་ཞེས་བྱ་བའོ། །མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཅེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་གསང་བའི་དཀྱིལ་འཁོར་གྱི་དངོས་གྲུབ་ཐམས་ཅད་ཀྱི་ལས་རྣམས་སྒྲུབ་པ་ལ་གདོན་མི་ཟ་ཞིང་ཐོགས་པ་མེད་པ་སྒྲུབ་པ་གང་ཡིན་པ་དེ་རྗེས་སུ་བཤད་པར་བྱ་བ་ནི་བརྗོད་པར་བྱ་སྟེ། བཅོམ་ལྡན་འདས་མཆོག་ཏུ་གསང་བའི་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔས་གསུངས་སོ། །མ་མཆུ་ཞེས་བྱ་བ་ལ་སོགས་པ་ལ་ཇི་ལྟ་བ་བཞིན་དུ་ལྷའི་རྣལ་འབྱོར་བྱས་ནས་སྒེག་མོའི་དགའ་བའི་རྡོ་རྗེ་མའི་ཕྱག་རྒྱའི་མཐར་ཐུག་པའི་ཆོག་
ཐམས་ཅད་རྗེས་སུ་སྤྱད་ནས་དེ་ཁོ་ན་ཉིད་དང༌། ཆོས་དང་དམ་ཚིག་བླངས་ལ་བཅོམ་ལྡན་འདས་མདུན་དུ་བཞག་སྟེ། རང་གི་མ་མཆུ་ནང་དུ་བཅུག་ནས་སོ་རྣམས་གཟུང་བར་བྱ་སྟེ། འཛུམ་པ་དང་བཅས་པའི་རྣལ་འབྱོར་པས་དཔལ་རྡོ་རྗེ་སེམས་དཔའ་ལ་སོགས་པའི་མཆུ་ཡིད་ཀྱིས་གཟུང་བར་བྱས་ལ་དགའ་བ་ཆེན་པོས་དང་པོའི་རྡོ་རྗེའི་ལྟ་བས་བལྟ་ཞིང་ཞེས་བྱ་བ་ནི་ཤིན་ཏུ་ཆགས་ཤིང་རབ་ཏུ་དགའ་བས་ཕྱེ་བའི་ལྟ་བ་ནི་དང་པོའི་རྡོ་རྗེའི་ལྟ་བས་ཏེ། དང་པོའི་རྡོ་རྗེ་ལྟ་བའི་བྱེད་པར་གྱུར་པ་དེ་ཉིད་ཀྱིས་འདོད་བའི་དངོས་གྲུབ་སྒྲུབ་པའི་ཚུལ་རྣམས་ནི་བྱེད་པས་ཏེ་དེ་དག་གིས་མ་ལུས་ཤིང་ལུས་པ་མེད་པའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་རྣམས་སྒྲུབ་པར་བྱེད་པ་ཡིན་ནོ། །དེ་ལ་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྣམས་ནི་དངོས་གྲུབ་ཐམས་ཅད་དོ། །འོག་ནས་འཆད་པར་འགྱུར་བའི་ལས་སྟོང་དང་བརྒྱ་ལྷག་པ་དེ་ལས་ཀྱི་ཚོགས་ཏེ་དེ་དག་སྒྲུབ་པར་བྱེད་པའོ། །བདེ་བ་ཆེན་པོ་གསང་བ་ཆེན་པོའི་རྡོ་རྗེ་ཞེས་བྱ་བ་ལ་འདས་མ་ཐག་ཏུ་བཤད་པའི་ལྟ་བ་ཕྱག་རྒྱ་གང་ཡིན་པ་དེ་ནི་བཅོམ་ལྡན་འདས་བདེ་བ་ཆེན་པོའི་རྡོ་རྗེ་སེམས་དཔའི་གསང་བ་ཆེན་པོའི་རྡོ་རྗེའོ། །འདིའི་མིང་བསྟན་པར་བྱ་བའི་ཕྱིར་རྡོ་རྗེ་སྤྱན་ཞེས་བྱ་བའི་ཕྱག་རྒྱའོ་ཞེས་བྱ་བ་གསུངས་ཏེ། དེ་ལྟར་བཅོམ་ལྡན་འདས་རྡོ་རྗེ་སེམས་དཔའི་ལྟ་བའི་ཕྱག་རྒྱ་ཐམས་ཅད་སྒྲུབ་པར་བྱེད་པ་བསྟན་ནས་ད་ནི་དེ་བཞིན་གཤེགས་པ་བསྟན་པར་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཅེས་བྱ་བ་གསུངས་སོ། །དེ་བཞིན་གཤེགས་པ་ཐམས་ཅད་ནི་རྣམ་པར་སྣང་མཛད་ལ་སོགས་པའོ། །ཐམས་ཅད་ཁྱབ་པའི་བཞིན་འཛུམ་པ་ནི་བཞད་པའི་རྣལ་འབྱོར་པ་བཞད་པ་ཆེན་པོ་དེས་དགོད་ཅིང་ཙུམ་པ་བྱེད་པ་བསྟན་པའི་རྡོ་རྗེའི་ལྟ་བས་འདོམ་གང་ཙམ་དུ་བལྟ་ཞིང་ཕྱག་རྒྱ་ཆེན་པོ་ལ་སོགས་པའི་དེ་བཞིན་གཤེགས་པའི་དངོས་གྲུབ་ཀྱི་ཚུལ་བྱ་སྟེ། དེ་ལྟར་ན་མངོན་པར་རྫོགས་པའི་བྱང་ཆུབ་ལ་སོགས་པའི་དེ་བཞིན་གཤེགས་པ་ཐམས་ཅད་ཀྱི་ལས་རྣམས་སྒྲུབ་པར་བྱེད་པ་ཡིན་ནོ། །ལྟ་བའི་ཕྱག་རྒྱ་འདིའི་མིང་བསྟན་པར་བྱ་བའི་ཕྱིར་དེ་བཞིན་གཤེགས་པ་ཐམས་ཅད་ཀྱི་སྤྱན་ཞེས་བྱ་བའི་ཕྱག་རྒྱའོ་ཞེས་བྱ་བ་གསུངས་སོ། །དེ་ལྟར་ལྟ་བའི་ཕྱག་རྒྱ་བསྟན་ནས། ད་ནི་ཁྲོ་གཉེར་དང་བཅས་པ་ཞེས་བྱ་བ་ལ་སོགས་པའི་རྡོ་རྗེ་ཉི་མ་མེ་ལྟར་འབར་བའི་
གསུངས་པ་ཡིན་ཏེ་ཁྲོ་གཉེར་དང་བཅས་པའི་རྡོ་རྗེ་ཁྲོ་བོའི་ལྟ་བ་ནི་ཁྲོ་གཉེར་དང་བཅས་པའི་ཁྲོ་བོའི་རྡོ་རྗེའི་ལྟ་བས་ཏེ། ཁྲོས་པའི་མིག་བཙུམས་པའི་མཚན་ཉིད་ཅན་ནོ། །དེའི་བྱེད་པ་རྣམས་ནི་མངོན་པར་འདོད་པའི་ཚུལ་ཏེ། དེ་དང་བཅས་པར་སྣའི་དབུགས་ཡི་གེ་ཧཱུཾ་བྱེད་པར་གྱུར་པས། རྡོ་རྗེ་ཐམས་ཅད་ཀྱི་དངོས་གྲུབ་རྣམས་རྣལ་འབྱོར་པས་སྒྲུབ་པར་བྱེད་པ་ཡིན་ནོ། །ལྟ་བའི་ཕྱག་རྒྱ་འདི་ཉིད་ཀྱི་མིང་བསྟན་པར་བྱ་བའི་ཕྱིར། རྡོ་རྗེ་ཉི་མ་མེ་ལྟར་འབར་བ་ཆེན་པོའི་ལྟ་བའི་སྤྱན་ཞེས་བྱ་བའི་ཕྱག་རྒྱའོ་ཞེས་བྱ་བ་གསུངས་སོ། །དེ་ལྟར་རྡོ་རྗེའི་རིགས་ཀྱི་ལྟ་བའི་ཕྱག་རྒྱ་བསྟན་ནས་ད་ནི་པདྨའི་རིགས་ཀྱི་བསྟན་པར་བྱ་བའི་ཕྱིར། བདེ་བ་ཞེས་བྱ་བ་ལ་སོགས་པ་གསུངས་ཏེ། ཏིང་ངེ་འཛིན་ལས་བྱུང་བའི་བདེ་བ་ནི་འདིར་བདེ་བ་སྟེ། དེས་སྤྱན་ཅུང་ཞིག་ཕྱེ་བ་ནི་རྒྱས་པའོ། །འདིས་མངོན་པར་འདོད་པའི་དངོས་གྲུབ་ཐམས་ཅད་ཀྱི་ལས་ཐུགས་ཀྱིས་མངོན་དུ་གྱུར་པའི་ཡེ་ཤེས་ཀྱི་རྡོ་རྗེའི་ལྟ་བས་ཕྱེ་བ་རྣམས་གང་ཡིན་པ་དེ་དག་དང་བཅས་པས་མཆུ་མཉམ་པའི་ཏིང་ངེ་འཛིན་རྡོ་རྗེ་ལ་སོགས་པའི་རང་བཞིན་གྱི་འཇིག་རྟེན་དབང་ཕྱུག་གི་དངོས་གྲུབ་ཐམས་ཅད་ཀྱི་ལས་ཚོགས་རྣལ་འབྱོར་པས་སྒྲུབ་པར་བྱེད་པ་ཡིན་ནོ། །དེའི་མིང་བསྟན་པར་བྱ་བའི་ཕྱིར་པདྨ་ཆེན་པོའི་སྤྱན་གྱི་ཕྱག་རྒྱའོ་ཞེས་བྱ་བ་གསུངས་སོ། །དེ་ལྟར་པདྨའི་རིགས་ཀྱི་ལྟ་བའི་ཕྱག་རྒྱ་བསྟན་ནས་ད་ནི་ནོར་བུའི་རིགས་ཀྱི་བསྟན་པར་བྱ་བའི་ཕྱིར་བསྙེམས་པ་དང་བཅས་པའི་འཛིན་པ་ཉིད་ཀྱིས་ཞེས་བྱ་བ་གསུངས་ཏེ། ནོར་བུའི་རིགས་ཀྱི་ལྷའི་ང་རྒྱལ་སྒོམ་བ་ནི་བསྙེམས་པའོ། །བསྙེམས་པ་དང་བཅས་པས་གཟུང་བས་ཏེ་བྱེད་པ་སྐྱེད་བའོ། །དེའི་དངོས་པོ་ནི་བསྙེམས་པ་དང་བཅས་པའི་འཛིན་པ་ཉིད་དོ། །དེ་དང་བཅས་པར་ཕྲ་བར་འཛུམ་པའི་ལྟ་བ་གང་ཡིན་པ་དེའི་བྱེད་པར་གྱུར་པ་དེས་བྱེད་པ་རྣམས་ནི་ཡིད་ཀྱིས་འདོད་བའི་དངོས་གྲུབ་ཀྱི་ཚུལ་རྣམས་ཏེ་དེ་དག་གིས་བཞིན་ཅུང་ཟད་འཛུམ་པའི་རྣལ་འབྱོར་པས་ནམ་མཁའ་སྟེ། འཕགས་པ་ནམ་མཁའི་སྙིང་པོ་ལས་བཅོམ་ལྡན་འདས་འཕགས་པ་ནམ་མཁའི་སྙིང་པོའི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་སྒྲུབ་པ་ཡིན་ནོ། །ལྟ་བའི་ཕྱག་རྒྱ་འདི་ཉིད་ཀྱི་མིང་བསྟན་པར་བྱ་བའི་ཕྱིར་རྡོ་རྗེ་ཆེན་པོ་ནོར་བུའི་སྤྱན་ཞེས་བྱ་བའི་ཕྱག་རྒྱའོ་ཞེས་བྱ་བ་གསུངས་སོ། །དེ་ལྟར་ལྟ་བའི་ཕྱག་རྒྱ་རྣམ་པ་ལྔ་བསྟན་
ནས་ད་ནི་དེ་རྣམས་ཀྱི་ནུས་པ་བསྟན་པར་བྱ་བའི་ཕྱིར་དོན་ཡོད་ཅེས་བྱ་བ་ལ་སོགས་པ་གསུངས་ཏེ། དོན་ཡོད་པ་ནི་དོན་ཡོད་ཅིང་ཐོགས་པ་མེད་པའོ། །རྫོགས་བས་ན་གྲུབ་པའོ། །གཞུག་པར་མི་ནུས་པས་ན་འཇིགས་པ་མེད་པའོ། །དེ་གང་གིས་ཤན། བསྟན་པའི་བདག་ཉིད་ཅེས་བྱ་བ་གསུངས་ཏེ། རྡོ་རྗེའི་སྐུ་མངའ་བའི་སངས་རྒྱས་ཐམས་ཅད་རྡོ་རྗེ་འཆང་ཆེན་པོ་དག་གིས་ཀྱང་ངོ༌། །གསང་བའི་ཕྱག་རྒྱ་འདི་དག་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་དགེ་བ་རྣམས་སྩོལ་བས་ན་དངོས་གྲུབ་དགེ་བ་སྩོལ་བའོ། །དཀྱིལ་འཁོར་དུ་མ་ཞུགས་པ་ཞེས་བྱ་བ་ལ་སོགས་པ་ནི་གོ་སླའོ། །དེ་ནས་དེའི་ཕྱིར་ཞེས་བྱ་བ་ལ་སྔར་བཤད་པའི་སྒྲུབ་པོས་རྣལ་འབྱོར་མ་གྲུབ་ན་དེ་མ་ཐག་ཏུ་འཛུམ་པའི་ཕྱག་རྒྱས་བཅོམ་ལྡན་འདས་མ་བདག་ཉིད་ལ་རྒྱས་བཏབ་ན་རེས་པར་འགྲུབ་པར་འགྱུར་རོ། །རྒྱུ་དེའི་ཕྱིར་མཆོག་དང་པོའི་བཅོམ་ལྡན་འདས་རྡོ་རྗེ་སེམས་དཔའི་མཆོག་དང་པོ་ཐོག་མ་དང་ཐ་མ་མེད་པའི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ་ཞེས་བྱ་བ་དང་སྦྱར་རོ། །དེ་ཡང་ཇི་ལྟ་བུ་ཡིན་ཞེ་ན། མཁས་པ་ལས་ཀྱང་མཁས་པས་ན་ཤིན་ཏུ་མཁས་པའོ། །ཕྲ་ཞིང་རྒྱ་ཆེ་བ་དང་ཟབ་ཅིང་བསམ་གྱིས་མི་ཁྱབ་པ་ཞེས་བྱ་བ་ནི་བཤད་ཟིན་ཏོ། །མཆོག་དང་པོ་ཞེས་བྱ་བ་ནི་སྔར་བཤད་པའི་མཆོག་དང་པོའོ། །ལས་ཀྱང་དམ་པ་ཡིན་པས་ན་མཆོག་གི་མཆོག་དང་པོའོ། །ནིའི་སྒྲ་ནི་ངེས་པར་གཟུང་བ་ལ་སྟེ་མཆོག་དང་པོ་ལས་ཀྱང་མཆོག་ཁོ་ན་ཡིན་ནོ། །མཆོག་ཏུ་གསང་བ་ནི་སྔར་བཤད་པའི་གསང་བ་ལས་ཀྱང་གསང་བའོ། །ཕུལ་དུ་བྱུང་བས་ན་དམ་པའོ། །དེ་གང་ཡིན་ཞེ་ན། འཛུམ་པའི་ཕྱག་རྒྱ་ལ་སོགས་ཚོགས། །ཞེས་བྱ་བ་ལ་འཛུམ་པའི་ཕྱག་རྒྱའི་ཚོགས་འདིས་ཅི་ཞིག་བྱ། གང་གི་ཕྱིར་འདིའི་ཁྱད་པར་དུ་བསྟན་པ་ཡིན་ཞེ་ན། རྡོ་རྗེ་འཆང་ཆེན་ཞེས་བྱ་བ་ལ་སོགས་པ་ལ་རྡོ་རྗེ་འཆང་ཆེན་པོའི་རྣལ་འབྱོར་དང་ལྡན་པའི་སློབ་དཔོན་ནི་རྡོ་རྗེ་འཆང་ཆེན་པོའི་སློབ་དཔོན་ནོ། །མཆོག་དང་པོ་ནི་བཅོམ་ལྡན་འདས་རྡོ་རྗེ་སེམས་དཔའོ། །དེ་རབ་ཏུ་དགྱེས་པ་ནི་ཐུགས་བདེ་བས་ཏེ་དེ་སྟོན་བར་བྱེད་པའི་འཛུམ་པའི་ཕྱག་རྒྱ་ནི་མཆོག་དང་པོ་རབ་ཏུ་དགྱེས་པའོ། །མཆོག་དང་པོ་རབ་ཏུ་དགྱེས་པ་དེས་ཕྱག་རྒྱ་ཆེན་པོ་ལ་སོགས་པ་ཐམས་ཅད་མྱུར་དུ་བསྒྲུབ་པར་བྱ་བ་
ནི་རྫོགས་པར་བྱ་བའོ། །སྙིང་པོ་ལ་སོགས་པ་རྣམས་མེད་ཀྱང་གི་སྒྲ་ནི་སྙིང་པོ་ལ་སོགས་པ་རྣམས་ཀྱིས་ནི་ཤིན་ཏུ་སྒྲུབ་པར་བྱེད་པ་ཡིན་ནོ་ཞེས་བྱ་བ་བསྟན་ཏོ། །སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་བཤད་ཟིན་ཏོ། །དེ་རྣམས་སྒྲུབ་པ་ན་རྫོགས་པའི་རྒྱུ་འོག་ནས་འཆད་པར་འགྱུར་བའི་འཛུམ་པའི་ཕྱག་རྒྱའི་རང་བཞིན་ཅན་རྨད་དུ་བྱུང་བ་ནི་ངོ་མཚར་བར་བྱེད་པའོ། །དེ་ཅིའི་ཕྱིར་ཞེ་ན། དངོས་གྲུབ་ཐམས་ཅད་རབ་སྒྲུབ་པས། །མ་གྲུབ་རྣམས་ཀྱང་གྲུབ་བར་འགྱུར། །བྱེད་པར་གྱུར་པ་དེ་རྣམས་ཡིན་པས་རྒྱུ་དེའི་ཕྱིར་སྔར་བཤད་པའི་སྒྲུབ་པས་བསྒྲུབ་པ་གང་གྲུབ་པར་མ་གྱུར་བ་དང༌། བསོད་ནམས་མེད་པ་དང༌། ཕྱིའི་ཡོ་བྱད་ཀྱི་ཕུན་སུམ་ཚོགས་པ་མེད་པའི་སྒྲུབ་པའོ། །དེ་འཛུམ་པའི་ཕྱག་རྒྱ་བདག་ཉིད་དམ་མདུན་དུ་བཞག་པའི་བཅོམ་ལྡན་འདས་རྡོ་རྗེ་སེམས་དཔའ་རབ་ཏུ་བསྒྲུབས་ན་མྱུར་བ་ཉིད་དུ་འགྲུབ་པར་འགྱུར་རོ། །དུས་གང་ལ་རྣལ་འབྱོར་པས་བདག་ཉིད་དམ་རྡོ་རྗེ་སེམས་དཔའ་རབ་ཏུ་བསྒྲུབས་ན་མྱུར་དུ་འགྲུབ་པར་འགྱུར་ཞེ་ན། རྡོ་རྗེ་སེམས་དཔའ་ཞེས་བྱ་བ་ལ་སོགས་པ་ལ་གལ་ཏེ་བཅོམ་ལྡན་འདས་རྡོ་རྗེ་སེམས་དཔའ་མཆོག་ཕུལ་དུ་བྱུང་བ་སྒྲུབ་པ་པོས་སྙིང་པོ་དང་ཕྱག་རྒྱ་དང་སྔགས་དང་རིག་པ་རྣམས་ཉེ་བའི་སྙིང་པོས་རབ་ཏུ་བསྒྲུབས་ཀྱང་གྲུབ་པར་མ་གྱུར་ན། དེའི་ཚེ་སྒྲུབ་པ་པོས་འཛུམ་པའི་ཕྱག་རྒྱས་བཅོམ་ལྡན་འདས་བསྒྲུབ་པར་བྱའོ། །གང་གི་ཕྱིར་འཛུམ་པའི་ཕྱག་རྒྱ་འདིས་བཅོམ་ལྡན་འདས་རྡོ་རྗེ་སེམས་དཔའི་རང་རིག་པའི་ཚུལ་གྱི་རང་གི་གསང་བའི་བཙུན་མོ་སྟེ། རྡོ་རྗེ་སེམས་དཔའ་དང་འདོད་ཆགས་རྡོ་རྗེ་མ་ལ་སོགས་པའི་རང་བཞིན་ཅན་གྱི་ཆགས་པ་ཐམས་ཅད་ཀྱི་སྒྲུབ་པའོ། །དགའ་བར་བྱེད་པས་ན་ཆགས་པ་ཐམས་ཅད་ཀྱིས་རབ་ཏུ་དགའ་བར་བྱེད་པའོ། །རྡོ་རྗེ་སེམས་དཔའི་དགའ་བ་གང་ཡིན་པ་དེས་སྒྲུབ་པ་པོ་གྲུབ་པར་འགྱུར་རོ། །དེ་ཉིད་ཆེན་པོ་ཞེས་བྱ་བ་ནི་འཇུམ་པའི་ཕྱག་རྒྱའི་རང་བཞིན་ཅན་གྱི་དེ་ཁོ་ན་ཉིད་ཆེན་པོ་འདི་གྲུབ་པ་ནི་རྫོགས་པའོ། །མཆོག་ནི་དམ་པའོ། །མཆོག་གི་དེ་ཉིད་ནི་རྡོ་རྗེ་སེམས་དཔའ། །སྐྱེ་བོ་ཐམས་ཅད་ཀྱི་ཐུན་མོང་མ་ཡིན་པས་གསང་བའོ། །མཆོག་ཏུ་བསོད་ནམས་མི་ལྡན་པའི། །སོ་སོ་སྐྱེ་བོ་ལ་བརྗོད་མིན། །ཞེས་བྱ་བ་ནི་བཤད་ཟིན་ཏོ། །རང་གི་བདག་ཉིད་བྱིན་
གྱིས་བརླབ་པ་ནི་རང་ལ་བྱིན་གྱིས་བརླབ་པ་སྟེ་རང་གི་ཡིད་བདེ་བའི་ནུས་པ་གང་ཡིན་པ་དེས་རྣལ་འབྱོར་པ་གྲུབ་པར་འགྱུར་རོ། །ཉོན་མོངས་པ་དང་ཉེ་བའི་ཉོན་མོངས་པ་དང་བྲལ་བས་ན་དགའ་བའོ། །མཆོག་ཏུ་གསང་བའི་ཕྱི་མ་ལས་ཀྱང༌། དམ་པ་དཔལ་རང་གི་དམ་ཚིག་ཅེས་བྱ་བ་ནི་གསང་བའི་ལྷ་མོ་བཞི་ཕྲེང་གི་དབུས་ན་བཞུགས་པའི་དཔལ་རྡོ་རྗེ་སེམས་དཔའོ། །དེའི་བླ་ན་མེད་པའི་མཆོག་ཏུ་གསང་བའི་ཕྱག་རྒྱ་ནི་འཛུམ་པའི་ཕྱག་རྒྱའོ། །དེའི་ཆོ་ག་ནི་བསྒོམ་པ་བརྟན་པ་ཡིན་ནོ། །དེ་ལྟར་ཐམས་ཅད་སྒྲུབ་པར་བྱེད་པའི་འཛུམ་པའི་ཕྱག་རྒྱ་བསྟན་ནས། ད་ནི་ལས་ཐམས་ཅད་སྒྲུབ་པར་བྱེད་པའི་ཙུམ་པ་ན་ལ་སོགས་པའི་ཕྱག་རྒྱ་རྣམས་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། དེ་ནས་དེའི་ཕྱིར་ཞེས་བྱ་བ་བཤད་ཟིན་ཏོ། །མཆོག་དང་པོ་ནི་བཅོམ་ལྡན་འདས་རྡོ་རྗེ་སེམས་དཔའི་མཆོག་དང་པོ་མཆོག་ཏུ་གསང་བ་ཞེས་བྱ་བའི་ཕྱག་རྒྱའི་རྒྱུད་རྗེས་སུ་བསྟན་པར་བྱའོ་ཞེས་བྱ་བ་དང་སྦྱར་རོ། །མཆོག་ཏུ་མཁས་ཤིང་ཕྲལ་རྒྱ་ཆེ་བ་དང་བསམ་གྱིས་མི་ཁྱབ་པ་ཞེས་བྱ་བ་ནི་བཤད་ཟིན་ཏོ། །ཤིན་ཏུ་མཐའ་ཡས་པ་ཞེས་བྱ་བ་ནི་མདོར་བསྟན་པའོ། །ལྷག་མ་ནི་རྒྱས་པར་བཤད་པའོ། །དེ་ལ་ཆོས་ཀྱི་བཞིན་དུ་ཐམས་ཅད་འགྲོ་བའི་ཕྱིར་ཤིན་ཏུ་མཐའ་ཡས་པ་དང༌། མཐར་ཐུག་པ་མེད་པ་དང༌། ཚད་མེད་ཅིང་གཞལ་དུ་མེད་པའོ། །བླ་མ་ལས་ཀྱང་བླ་མར་གྱུར་པས་ན་བླ་ན་མེད་པའོ། །དོན་ཡོད་ཅིང་ཐོགས་པ་མེད་པའོ་ཞེས་བྱ་བ་ནི་གོ་སླའོ། །མཆོག་དང་པོ་ཡིན་ལ་སྙིང་པོ་ཡང་དེ་ཉིད་ཡིན་པས་ན་མཆོག་གི་སྙིང་པོ་སྟེ་སྙིང་པོ་སྟོན་པར་བྱེད་པའི་ཕྱིར། ཙུམ་པ་ལ་སོགས་པའི་ཕྱག་རྒྱའི་རང་བཞིན་ནི་སྙིང་པོར་བརྗོད་པ་ཡིན་ནོ། །མཆོག་ཀྱང་ཡིན་ལ་དེ་ཁོ་ན་ཉིད་ཀྱང་དེ་ཉིད་ཡིན་པས་ན་མཆོག་གི་དེ་ཁོ་ན་ཉིད་དེ་ཐོག་མ་དང་ཐ་མ་མེད་པ་ཆོས་ཀྱི་དབྱིངས་སོ། །དེའི་སྙིང་པོ་ནི་དེ་ལས་བྱུང་བའི་ཕྱིར་དང༌། དེ་མངོན་དུ་བྱེད་པའི་རྒྱུ་ཉིད་ཀྱི་ཕྱིར་རོ། །དོན་འདི་ཉིད་བསྟན་པར་བྱ་བའི་ཕྱིར་མཆོག་ཏུ་གསང་བའི་སྙིང་པོ་ཞེས་བྱ་བ་གསུངས་ཏེ། མཆོག་ཀྱང་ཡིན་ལ་ཕྲ་བ་དང་མཆོག་ཏུ་གསང་བ་ཡང་དེ་ཉིད་ཡིན་པས་ན་མཆོག་ཏུ་ཕྲ་ཞིང་གསང་བའི་སྙིང་པོའོ། །འདིའི་མིང་བསྟན་པར་བྱ་བའི་
ཕྱིར་མཆོག་ཏུ་གསང་བ་ཞེས་བྱ་བ་གསུངས་སོ། །འདི་ལས་ཇི་ལྟ་བུ་དང་ལྡན་པ་ཡིན་ཞེ་ན། ཐམས་ཅད་ཅས་བྱ་བ་ལ་སོགས་པ་ལ་འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ཀྱི་མཆོག་ཏུ་གྱུར་པས་ན་ཐམས་ཅད་ཀྱི་མཆོག་གོ །ཐམས་ཅད་ཀྱི་མཆོག་ཀྱང་དེ་ཡིན་ལ་དངོས་གྲུབ་ཆེན་པོ་ཡང་དེ་ཉིད་ཡིན་པས་ན་ཐམས་ཅད་ཀྱི་མཆོག་གོ །དངོས་གྲུབ་ཆེན་པོ་སྟེ་དཔལ་རྡོ་རྗེ་སེམས་དཔའ་ཐོབ་པའོ། །དེས་དང་ཕྱུག་ཆེན་པོ་ནི་ཁམས་གསུམ་པའི་ཆོས་ཀྱི་རྒྱལ་སྲིད་དེ་དེ་ཉིད་ཀྱི་བདག་པོ་ཉིད་དོ། །སོགས་པའི་སྒྲ་ནི་ས་དང་ཕ་རོལ་ཏུ་ཕྱིན་པ་ལ་སོགས་པ་གཟུང་བའོ། །དངོས་གྲུབ་ཐམས་ཅད་ཀྱི་ལས་ཀྱི་ཚོགས་ནི་དངོས་གྲུབ་ཐམས་ཅད་ཀྱི་ལས་ཀྱི་ཚོགས་ཏེ་སྟོང་ཆིག་བརྒྱའི་གྲངས་ཀྱིས་ཡོངས་སུ་བཅད་པ་དམ་ཐག་ཏུ་འོག་ནས་འཆད་པར་འགྱུར་བ་གང་ཡིན་པ་དེའི་ཐམས་ཅད་ཀྱི་དངོས་གྲུབ་ཆེན་པོའི་དབང་ཕྱུག་ཆེན་པོའི་བདག་ཉིད་ལ་སོགས་པ་དང༌། དངོས་གྲུབ་ཐམས་ཅད་ཀྱི་ལས་ཀྱི་མཆོག་ཏུ་མི་འགྱུར་བ་ནི་མཆོག་ཏུ་རྟག་པའོ། །འཇིག་རྟེན་དང་འཇིག་རྟེན་ལས་འདས་པ་རྣམས་ཀྱི་མཆོག་ཏུ་གྱུར་པས་ན་དམ་པའོ། །དམ་པ་ཡང་ཡིན་ལ་བླ་ན་མེད་པ་ཡང་དེ་ཉིད་ཡིན་པས་ན་དམ་པ་བླ་ན་མེད་པས་ཏེ། དཔལ་རྡོ་རྗེ་སེམས་དཔའི་དགའ་བ་དང་རབ་ཏུ་དགའ་བ་དང་ཡིན་པ་དེས་ཀྱང་སྒྲུབ་པ་པོ་རྣམས་ལ་བདེ་བ་དང་ཡིད་བདེ་བ་ཐམས་ཅད་ཀྱི་རང་བཞིན་གྱི་མཆོག་གི་དངོས་གྲུབ་སྒྲུབ་པར་བྱེད་པ་ནི་རྫོགས་པར་བྱེད་པ་སྟེ། མཆོག་ཕྱག་རྒྱའི་རྒྱུད་འདི་གང་ཡིན་པ་དེ་རྗེས་སུ་བཤད་པར་བྱ་སྟེ་དེ་བརྗོད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །ཙུམ་པ་ན་དང་འཁྱུད་པ་ཞེས་བྱ་བ་ལ་སོགས་པ་ལ་ལྷའི་རྣལ་འབྱོར་བྱས་ལ། དཀྱིལ་འཁོར་གྱི་ཚུལ་ལམ་དཔའ་བོ་གཅིག་བུའི་བཅོམ་ལྡན་འདས་མདུན་དུ་བཞག་ལ་སྤྱན་དྲང་བ་ལ་སོགས་པའི་ཚོག་ཐམས་ཅད་རྗེས་སུ་སྤྱད་ནས་ཡིད་ཀྱིས་ཙུམ་པ་ན་དང་འཁྱུད་པ་ལ་སོགས་པ་བཅོམ་ལྡན་འདས་དང་ལྷན་ཅིག་ཏུ་བྱ་ཞིང་བཅོམ་ལྡན་འདས་བསྒྲུབ་པར་བྱ་སྟེ། ཇི་ལྟ་བ་བཞིན་དུ་བཤད་པའི་བཅོམ་ལྡན་འདས་རྡོ་རྗེ་སེམས་དཔའི་ཙུམ་པ་ན་དང་འཁྱུད་པ་ལ་སོགས་པའི་ཕྱག་རྒྱ་འདི་ཡིན་ནོ། །དགའ་བ་ཆེན་པོ་དཔལ་རྡོ་རྗེ་དོན་ཡོད་པ་བཤད་ཟིན་ཏོ། །དེའི་དགའ་བ་ནི་དགྱེས་པས་ཏེ།
དེའི་དམ་ཚིག་གི་སྦྱོར་བ་ནི་དེ་སྐྱེད་པར་བྱེད་པའི་རྒྱུ་ཤིན་ཏུ་རྣལ་འབྱོར་རོ། །དེའི་མིང་ཅན་གྱི་ཕྱག་རྒྱའི་དགའ་བའི་དམ་ཚིག་གི་སྦྱོར་བ་ཞེས་བྱ་བ་སྟེ། དེ་ཉིད་རྒྱུད་འདིར་ཐམས་ཅད་རྣལ་འབྱོར་ཞེས་བྱ་བར་བརྗོད་པ་ཡིན་ནོ། །དེ་དག་དང་གང་དུ་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་རེག་བྱའི་ཕྱག་རྒྱ་བསྟན་ནས་ད་ནི་འདོད་ཆགས་རྡོ་རྗེ་མའི་ལྟ་བའི་ཕྱག་རྒྱ་བསྟན་པར་བྱ་བའི་ཕྱིར་རྣམ་པར་འཕྲུལ་པ་དང་བཅས་པ་ཞེས་བྱ་བ་ལ་སོགས་པ་གསུངས་ཏེ་སྒེག་པའི་ཉམས་ཀྱིས་རྣམ་པར་འཕྲུལ་པ་ནི་རྣམ་པར་འཕྲུལ་པའོ། །རྣམ་པར་འཕྲུལ་པ་དེ་དང་བཅས་པའི་འཛུམ་པས་ནི་རྣམ་པར་འཕྲུལ་པ་དང་བཅས་པའི་འཛུམ་པའོ། །དེ་དང་ལྷན་ཅིག་ཏུ་གཡོ་བའི་མིག་ཟུར་གྱིས་བལྟ་ཞིང་ལྷའི་ཕྱག་རྒྱ་གང་ལ་ཡོད་པ་དེ་ནི་རྣམ་པར་འཕྲུལ་པ་དང་བཅས་པའི་འཛུམ་ཞིང་གཡོ་བའི་མིག་ཟུར་གྱིས་ལྟ་བའི་ཕྱག་རྒྱའོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་གོ་སླའོ། །འཛུམ་ཞིང་ཅུང་ཟད་ཕྱེ་བའི་མིག་གིས་ལྟ་བ་ནི་ཀཱི་ལི་ཀཱི་ལའི་སྟེ། འདིས་བལྟ་ཞིང་དཔལ་རྡོ་རྗེ་སེམས་དཔའ་ལ་སོགས་པ་རྣམས་བཏུང་བར་བྱའོ་ཞེས་བྱ་བ་ལ་སོགས་པ་དང་སྦྱར་རོ། །མཆོག་ཏུ་ཞེས་བྱ་བ་ལ་སོགས་པ་ནི་གོ་སླའོ། །རྡོ་རྗེ་དྲན་མའི་ཕྱག་རྒྱ་བསྟན་པར་བྱ་བའི་ཕྱིར་བསྙེམས་པ་དང་བཅས་པ་ཞེས་བྱ་བ་ལ་སོགས་པ་གསུངས་ཏེ། རང་གི་ལྷའི་ང་རྒྱལ་མངོན་དུ་བྱ་བ་ནི་འདིར་བསྙེམས་མ་ཡིན་ནོ། །བསྙེམས་པ་དང་ལྷན་ཅིག་ཏུ་ཡང་དག་པར་བསྟོད་པ་ནི་གྱེན་དུ་བསྟོད་ནས་དགོད་པའི་གཡོ་བའི་མིག་གིས་ལྟ་བའི་ཕྱག་རྒྱ་གང་ལ་ཡོད་པ་དེ་ནི་བསྙེམས་པ་དང་བཅས་པས་བསྟོད་ཅིང་བཞད་པའི་གཡོ་བའི་སྤྱན་ནོ། །བཅོམ་ལྡན་འདས་ཞེས་བྱ་བ་ལ་སོགས་པ་ནི་གོ་སླའོ། །ད་ནི་རྡོ་རྗེ་འདོད་པའི་དབང་ཕྱུག་མའི་ལྟ་བའི་ཕྱག་རྒྱ་བསྟན་པར་བྱ་བའི་ཕྱིར། སྒེག་པ་དང་བཅས་པའི་ལྟ་བ་དང་འཛུམ་པ་དང་གཡོ་ཞིང་ཕྱག་འཚལ་བ་དང་ལྡན་པའོ་ཞེས་བྱ་བ་གསུངས་ཏེ། སྒེག་པ་དང་བཅས་པའི་ལྟ་བ་དང་འཛུམ་པ་དང་གཡོ་བ་ནི་སྒེག་པའི་ལྟ་བ་དང་འཛུམ་པ་དང་གཡོ་བ་རྣམས་སོ། །དེ་དང་བཅས་པའི་ཕྱག་འཚལ་བའི་ལྟ་བའི་ཕྱག་རྒྱ་གང་ལ་ཡོད་པ་དེ་ནི་སྒེག་པའི་ལྟ་བ་དང་གཡོ་བ་དང་ཕྱག་འཚལ་བ་དང་ལྡན་པའོ། །བཅོམ་
ལྡན་འདས་ཀྱི་ཞེས་བྱ་བ་ལ་སོགས་པ་ནི་གོ་སླའོ། །རྣམ་པར་འཕྲུལ་པ་དང་སྒེག་པ་དང་བཅས་པའི་འཛུམ་པའི་ཞལ་ཞེས་བྱ་བ་ལ་སྒེག་པའི་རྣམ་པར་འཕྲུལ་པ་དང་བཅས་པའི་མཛེས་པ་ཉིད་ནི་རྣམ་པར་འཕྲུལ་པའི་སྒེག་པའོ། །རྣམ་པར་འཕྲུལ་པའི་སྒེག་པ་དང་ལྷན་ཅིག་ཏུ་ཞལ་འཇུམ་པའི་ལྟ་བའི་ཕྱག་རྒྱ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེའི་དངོས་བོ་ནི་འཛུམ་པའི་ཞལ་ཉིད་དོ། །བཅོམ་ལྡན་འདས་ཀྱི་ཞེས་བྱ་བ་ལ་སོགས་པ་ནི་གོ་སླའོ། །འདི་ཞེས་བྱ་བ་ལ་རྡོ་རྗེ་འཛུམ་པའི་ཕྱག་རྒྱ་འདིས་བཅོམ་ལྡན་འདས་རྡོ་རྗེ་ཐམས་ཅད་ཀྱི་སློབ་དཔོན་དེ་སྒྲུབ་པ་པོས་མཆོད་པའི་གླུ་སྟེ། ཡི་གེ་ཧཱུཾ་གི་གླུས་ཐམས་ཅད་ཀྱི་མཆོག་གི་དངོས་གྲུབ་ཆེན་པོ་རྡོ་རྗེ་སེམས་དཔའི་དངོས་གྲུབ་གང་ཡིན་པ་དེས་དབང་ཕྱུག་ཆེན་པོ་ནི་ཇི་ལྟ་བ་བཞིན་དུ་བཤད་པར་བྱ་སྟེ། དེའི་བདག་པོ་ནི་གཙོ་བོ་གྲུབ་པར་འགྱུར་ཏེ། སྒྲུབ་པ་པོ་རྡོ་རྗེ་འཆང་ཆེན་པོ་ཉིད་དུ་འགྱུར་བ་ཡིན་ནོ་ཞེས་བྱ་བའི་དོན་ཏོ། །འདིས་ཀྱང་བདག་ཉིད་ལ་རྒྱས་བཏབ་པ་ཙམ་གྱིས་མ་གྲུབ་ན་ཡང་ཡིད་ཀྱིས་འདོད་པའི་ལས་ཐམས་ཅད་ཀྱི་ཚོགས་སྒྲུབ་པར་བྱེད་པ་ཡིན་ནོ། །ད་ནི་དེ་བཞིན་གཤེགས་པའི་རིགས་ཀྱི་ཕྱག་རྒྱ་བསྟན་པར་བྱ་བའི་ཕྱིར། སརྦ་ཀུ་རུ་ཡ་ཐ་སུ་ཁཾ་ཞེས་བྱ་བ་བརྗོད་པར་བྱའོ་ཞེས་བྱ་བ་ལ་རང་བཞིན་གྱིས་འོད་གསལ་བའི་རྣམ་པར་ཐར་བའི་སྒོའི་རང་བཞིན་ཉིད་ཀྱིས་ཀྱི་བཅོམ་ལྡན་འདས་སངས་རྒྱས་དང༌། ཆོས་དང༌། དགེ་འདུན་གྱི་སྐུ་འཛིན་པའི་དེ་བཞིན་གཤེགས་པ་སངས་རྒྱས་དང་ཆོས་དང་དགེ་འདུན་གྱི་རང་བཞིན་ཅན་དུ་ཐམས་ཅད་མཛོད་ཅིག་སྟེ། རྫོགས་པར་མཛོད་ཅིག་པའོ། །དེ་ཡང་བདེ་བ་དེ་དཀའ་ཐུབ་ཀྱི་ཉེས་པ་དང་བྲལ་བའི་ཤིན་ཏུ་མཉམ་པར་གཞག་པའི་ཏིང་ངེ་འཛིན་གྱིས་སོ། །དེ་ལྟར་བརྗོད་པའི་དེ་བཞིན་གཤེགས་པའི་ཕྱག་རྒྱ་བཅིངས་ནས་རྣལ་འབྱོར་པས་བཟླ་བར་བྱའོ། །དེ་བཞིན་གཤེགས་པ་ཐམས་ཅད་ཀྱི་གསང་བ་ནི་དཀོན་མཆོག་གསུམ་གྱི་གཟུགས་འཛིན་པའི་དེ་བཞིན་གཤེགས་པའོ། །མཆོག་ནི་ཕུལ་དུ་བྱུང་བའོ། །དེ་སྟོན་པར་བྱེད་པའི་ཐེག་པ་ཆེན་པོའི་མདོ་སྡེའི་དབང་པོའི་རྒྱལ་པོ་ནི་སརྦ་ཀུ་རུ་ཡ་ཐ་སུ་ཁཾ་ཞེས་བྱ་བའི་སྔགས་གང་ཡིན་པ་འདི་ཉིད་སངས་རྒྱས་དང་ཆོས་དང་དགེ་འདུན་གྱི་གཟུགས་འཛིན་པའི་བཅོམ་ལྡན་འདས་
ཕྱག་ན་རྡོ་རྗེའི་དེ་བཞིན་གཤེགས་པ་ཐམས་ཅད་ཀྱི་ཐེག་པ་ཆེན་པོ་མངོན་པར་རྟོགས་པའི་གསང་བའི་རྡོ་རྗེའི་བྱིན་གྱིས་རློབ་པ་ཞེས་བྱ་བའི་ངག་གི་ཕྱག་རྒྱ་སྟེ། འདི་ནི་དེ་བཞིན་གཤེགས་པ་ཐམས་ཅད་ཀྱི་ལས་ཀྱི་ཚོགས་སྒྲུབ་པར་བྱེད་པ་ཡིན་ནོ། །དེ་ཅིའི་ཕྱིར་ཞེ་ན། རང་བཞིན་གྱིས་འོད་གསལ་བའི་ངོ་བོ་ཉིད་ཀྱི་ཕྱིར་རོ་ཞེས་བྱ་བ་ལ་གང་གི་ཕྱིར་ངག་གི་ཕྱག་རྒྱ་འདི་རང་བཞིན་གྱིས་འོད་གསལ་བར་བརྗོད་པ་དེའི་ཕྱིར་རང་བཞིན་གྱིས་འོད་གསལ་བ་ཉིད་ཀྱི་རྒྱུ་དེས་དཀོན་མཆོག་གསུམ་གྱི་རང་བཞིན་ཅན་གྱི་ཆོས་ཐམས་ཅད་རྣམ་པར་དག་པས་ཆོས་ཐམས་ཅད་རྣམ་པར་དག་པ་སྟེ། དོན་དམ་པར་དཀོན་མཆོག་གསུམ་མི་དམིགས་པའི་ཕྱིར་རོ། །ཆོས་རྣམ་པར་དག་པ་དེ་ཉིད་མ་ལུས་ཤིང་ལུས་པ་མེད་པའི་དེ་བཞིན་གཤེགས་པ་ཐམས་ཅད་ཀྱི་ཆོས་ཉིད་ཐོབ་པ་དང༌། ཡེ་ཤེས་དང་མངོན་པར་ཤེས་པ་དང༌། མཆོག་གི་དངོས་གྲུབ་ལ་སོགས་པ་དང༌། ལས་ཐམས་ཅད་ཀྱི་ཚོགས་གང་ཡིན་པ་དེ་ཉིད་སྒྲུབ་པར་བྱེད་པ་ཡིན་ནོ། །དེ་ལྟར་དེ་བཞིན་གཤེགས་པའི་ཕྱག་རྒྱ་བསྟན་ནས་ད་ནི་རྡོ་རྗེའི་རིགས་ཀྱི་ཕྱག་རྒྱ་བསྟན་པར་བྱ་བའི་ཕྱིར། རྣམ་པར་འཕྲུལ་པ་དང་བཅས་པས་འཛུམ་ཞིང་སྨིན་མའི་ཁྲོ་གཉེར་གྱིས་ཁྲོ་བོ་རྡོ་རྗེའི་ལྟ་བའི་ཕྱག་རྒྱའོ་ཞེས་བྱ་བ་གསུངས་ཏེ། ཁྲོ་བ་དང་སྒེག་པའི་རྣམ་པར་འཕྲུལ་པས་བསྐྱེད་པའི་འཛུམ་པ་དང་རྣམ་པར་འཕྲུལ་པ་དང་བཅས་པའོ། །དེ་དང་བཅས་པའི་སྨིན་མའི་བར་གྱི་ཁྲོ་གཉེར་ནི་ཁྲོ་བ་སྟོན་པར་བྱེད་པའི་དཔྲལ་བའི་རི་མོའོ། །དེས་ཉེ་བར་མཚོན་པའི་ཁྲོ་བོའི་རྡོ་རྗེའི་ལྟ་བའི་ཕྱག་རྒྱ་སྟེ། རྡོ་རྗེ་ཆེན་པོའི་ཁྲོ་བོ་ཀཱི་ལི་ཀཱི་ལི་ཞེས་བྱ་བའོ། །འདིས་ཇི་ལྟ་བ་བཞིན་དུ་བཤད་པའི་ལས་ཐམས་ཅད་རྣལ་འབྱོར་པས་སྒྲུབ་པར་བྱེད་པ་ཡིན་ནོ། །དེ་ལྟར་རྡོ་རྗེའི་རིགས་ཀྱི་དངོས་གྲུབ་ཐམས་ཅད་སྒྲུབ་པར་བྱེད་པའི་ཕྱག་རྒྱ་བསྟན་ནས། ད་ནི་པདྨའི་རིགས་ཀྱི་ཕྱག་རྒྱ་བསྟན་པར་བྱ་བའི་ཕྱིར་ཐམས་ཅད་དག་པའི་ཏིང་ངེ་འཛིན་གྱིས་ཞེས་བྱ་བ་གསུངས་ཏེ། པདྨའི་རིགས་ནི་རང་བཞིན་གྱིས་དག་པའོ་ཞེས་བྱ་བའི་སྒོམ་པ་ནི་ཐམས་ཅད་དག་པའི་ཏིང་ངེ་འཛིན་ཏེ། ཏིང་ངེ་འཛིན་དེས་གཟུགས་སྣ་ཚོགས་པའི་བྱ་བ་ལ་རབ་ཏུ་འཇུག་པ་སྟེ། རྫོགས་པར་བྱེད་ཅིང་པདྨའི་རིགས་ཀྱི་ལས་ཀྱི་ཚོགས་ཐམས་
ཅད་བསྒྲུབ་པར་བྱའོ། །དེ་ལྟར་པདྨའི་རིགས་ཀྱི་ཕྱག་རྒྱ་བསྟན་ནས་ད་ནི་ནོར་བུའི་རིགས་ཀྱི་ཕྱག་རྒྱ་བསྟན་པར་བྱ་བའི་ཕྱིར་ནམ་མཁའ་ཕྲ་བར་བསྐྱོད་པ་དག་གིས་རོལ་ཅིང་ཐམས་ཅད་ཀྱི་རྗེས་སུ་ཆགས་པར་བྱའོ་ཞེས་བྱ་བ་གསུངས་ཏེ། འཕགས་པ་ནམ་མཁའི་སྙིང་པོའི་གསང་བའི་དཀྱིལ་འཁོར་ནམ་མཁའི་ཁམས་ཐམས་ཅད་ཀུན་དུ་ཁྱབ་པར་ནམ་མཁའ་མཉམ་པ་ཉིད་ཀྱི་ཡེ་ཤེས་སྟོན་པར་བྱེད་ཅིང་ཐོབ་པར་བྱེད་པ་ནི་ནམ་མཁར་བརྗོད་པ་ཡིན་ནོ། །དེ་ལ་ཤིན་ཏུ་རྣལ་འབྱོར་གྱི་བསྒོམ་པས་ཙུམ་པ་ན་དང་འཁྱུད་པ་ལ་སོགས་པའི་ཕྱག་རྒྱ་རྣམས་ཀྱིས་རྒྱས་བཏབ་ཅིང་ཕྲ་བར་བསྐྱེད་པ་བསྐྱོད་པ་རྣམས་ཀྱིས་བཅོམ་ལྡན་འདས་དང་དེའི་ལྷ་མོའི་ཚོགས་དང་ལྷན་ཅིག་ཏུ་ཡང་དག་པར་སྦྱོར་བར་བསྒོམ་ཞིང་རོལ་དུ་གཞུག་པར་བྱའོ། །དེ་ཉིད་རྣལ་འབྱོར་ཐམས་ཅད་ནམ་མཁའ་ལ་འགྲོ་བས་རྗེས་སུ་ཆགས་པར་བྱ་ཞིང་མངོན་དུ་བྱའོ། །འདི་ཞེས་བྱ་བ་ལ་སོགས་པ་ནི་གོ་སླའོ། །ནམ་མཁའ་ཐམས་ཅད་ཀྱི་བདག་ཉིད་ཀུན་གྱི་དངོས་པོ་ཉིད་ཀྱི་ཕྱིར་རོ་ཞེས་བྱ་བ་ལ་ནམ་མཁའ་ཡང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ནམ་མཁའ་ཐམས་ཅད་དེ། ཕྱོགས་བཅུར་རྫས་ཐམས་ཅད་མེད་པའི་རང་བཞིན་ཅན་ནོ། །དེ་དང་འདྲ་བའི་གཟུགས་ཐམས་ཅད་སྟོན་པས་ཀུན་དུ་འགྲོ་བའི་བདག་ཉིད་ཀྱི་དངོས་པོའི་སྐུ་གང་ལ་མངའ་བ་དེ་ནི་ནམ་མཁའ་ཐམས་ཅད་ཀྱི་བདག་ཉིད་ཀུན་གྱི་དངོས་པོ་སྟེ། དེའི་དངོས་པོ་ནི་ནམ་མཁའ་ཐམས་ཅད་ཀྱི་བདག་ཉིད་ཀུན་གྱི་དངོས་པོ་ཉིད་དོ། །ནམ་མཁའ་ཐམས་ཅད་ཀྱི་བདག་ཉིད་ཀུན་གྱི་དངོས་པོ་ཉིད་ཀྱི་རྒྱུ་དེའི་ཕྱིར་བཅོམ་ལྡན་འདས་ནམ་མཁའི་སྙིང་པོ་སྟེ། དེས་སྒྲུབ་པ་པོའི་ལས་ཐམས་ཅད་ཇི་ལྟ་བ་བཞིན་དུ་བཤད་པའི་ཚུལ་གྱིས་ནམ་མཁའ་ལས་སྒྲུབ་པར་མཛད་པ་ཡིན་ནོ་ཞེས་བྱ་བ་ཡང་གསུངས་སོ། །མཆོག་དང་པོའི་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་མཆོག་ཏུ་གསང་བའི་ཙུམ་པ་ན་དང་འཁྱུད་པ་ལ་སོགས་པའི་ཕྱག་རྒྱ་བཅུ་པོའི་ཕྱག་རྒྱའི་རྒྱུད་བསྟན་ནས། ད་ནི་ཕྱག་རྒྱ་བཅུའི་ཚུལ་གྱིས་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་སྒྲུབ་པར་བྱེད་པ་ཉིད་ཀྱི་ཕྱག་རྒྱ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། མཆོག་ཏུ་ཞེས་བྱ་
བ་ལ་སོགས་པ་ནི་བཤད་ཟིན་ཏོ། །ཤིན་ཏུ་གཞལ་དུ་མེད་ཅིང་ཚད་མེད་པ་གྲངས་མེད་ཅིང་བརྗོད་དུ་མེད་ཅིང་བརྗོད་ཀྱིས་མི་ལང་བ་ཞེས་བྱ་བས་ནི་དངོས་པོའི་ཕྱི་མ་ཕྱི་མ་རྒྱ་ཆེ་བར་སྟོན་པར་བྱེད་པའི་གྲངས་ཀྱི་ཁྱད་པར་ཏེ། དེ་དང་དེ་ནི་མདོ་སྡེའི་ནང་ནས་ཤེས་པར་བྱའོ། །འདས་མ་ཐག་ཏུ་བཤད་པ་དེའི་ཚོགས་ནི་མཆོག་ཏུ་གྲུབ་པ་ཞེས་བྱ་བའི་མིང་ཅན་གྱི་རྒྱུན་དེ་ཕྱག་རྒྱ་རྣམས་སྟོན་པར་བྱེད་པའི་སྒྲའི་ཚོགས་རྗེས་སུ་སྤྱད་པར་བྱའོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པ་ལའོ། །ཕྱག་རྒྱ་བཅུའི་བདག་ཉིད་ཐམས་ཅད་སྐྱེད་པར་བྱེད་པའོ་ཞེས་བྱ་བ་ལ་དཔལ་རྡོ་རྗེ་སེམས་དཔའ་ལ་སོགས་པའི་སྐུའི་གསང་བ་ནི་བདག་ཉིད་ཐམས་ཅད་དེ་དེ་སྟོན་པར་བྱེད་ཅིང་མངོན་དུ་བྱེད་པས་ན་བདག་ཉིད་ཐམས་ཅད་སྐྱེད་པར་བྱེད་པ་ཞེས་བྱ་བར་བརྗོད་དོ། །དེ་གང་ཡིན་ཞེ་ན། རྡོ་རྗེ་སེམས་དཔའི་ཕྱག་རྒྱ་ཆེན་པོ་ཞེས་བྱ་བ་ལ་རྡོ་རྗེ་སེམས་དཔའི་ཕྱག་རྒྱ་ཆེན་པོ་ནི་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། རྡོ་རྗེ་བསྙེམས་མ་ལ་སོགས་པས་བཞི་འགྱུར་གྱི་དངོས་གྲུབ་སྟེར་བའོ། །དེ་དག་ཀྱང་གང་ལས་བྱུང་ཞེ་ན། བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ལས་བྱུང་བའོ་ཞེས་བྱ་བ་ལས་དང་པོའི་རྡོ་རྗེ་ནི་བདེ་བ་ཆེན་པོའི་རྡོ་རྗེའོ། །དེ་ཉིད་དོན་ཡོད་པའི་དམ་ཚིག་སྟེ་བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གོ །དེ་ལས་དེ་དག་བྱུང་བ་ཡིན་ནོ། །དེ་དག་ལས་ཇི་ལྟ་བུ་དང་ལྡན་པ་ཡིན་ཞེ་ན། སྔོན་དུ་ཞེས་བྱ་བ་ལ་སོགས་པ་ལ་སྔོན་ནི་ཐོག་མ་སྟེ་གདོད་མ་ནས་གྲུབ་པའོ། །གདོད་མ་ནས་གྲུབ་པ་ཡང་དེ་ཡིན་ལ་ཐམས་ཅད་ཀྱི་མཆོག་གི་དངོས་གྲུབ་ཀྱང་དེ་ཉིད་ཡིན་པས་ན་གདོད་མ་ནས་གྲུབ་པ་ཐམས་ཅད་མཆོག་གི་དངོས་གྲུབ་སྟེ། དཔལ་རྡོ་རྗེ་སེམས་དཔའི་ཕྱག་རྒྱ་ཆེན་པོའི་དངོས་གྲུབ་རྫོགས་པའོ། །དེ་ཉིད་ཐོག་མར་གང་ལ་ཡོད་པ་དེ་དག་མྱུར་བར་མཆོག་ཏུ་སྒྲུབ་པར་བྱེད་པ་ཡིན་ནོ། །དེ་དག་ཇི་ལྟར་བསྒྲུབ་པར་བྱ་ཞེ་ན་བདག་ཉིད་ཐམས་ཅད་ཀྱིས་སོ། །རྣམ་པ་ཐམས་ཅད་ཀྱི་མཆོག་དང་ལྡན་པའི་དཔལ་རྡོ་རྗེ་སེམས་དཔའ་ལ་སོགས་པའི་རང་བཞིན་ལ་ལྷག་པར་མོས་པ་ནི་བདག་ཉིད་ཐམས་ཅད་དེ་བདག་ཉིད་ཐམས་ཅད་དེས་དེ་དག་
བསྒྲུབ་པར་བྱའོ། །དེ་ལ་སྐུའི་ཕྱག་རྒྱ་ནི་འདི་ཞེས་བྱ་བ་ནི་དཔལ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱ་ཡིན་ནོ་ཞེས་བྱ་བའི་དོན་ཏོ། །བ་དན་གསུམ་པ་དང༌། ཁ་ཊྭཱཾ་གའི་ཕྱག་རྒྱ་བཅིང་བའོ་ཞེས་བྱ་བ་ལ་ལག་པ་གཡས་པས་བ་དན་གསུམ་པ་བྱས་ལ། གཡོན་པས་ཁ་ཊྭཱཾ་གའི་ཕྱག་རྒྱ་བཅིང་བར་བྱའོ། །གཡོན་པའི་དྲིལ་བུ་དང་བཅས་པ་ཞེས་བྱ་བ་ལ་གཡོན་པའི་ཁ་ཊྭཱཾ་གས་རྡོ་རྗེ་དྲིལ་བུ་བླངས་ནས་ལག་པ་གཡོན་པའི་བ་དན་གསུམ་པས་སློང་བའི་ཚུལ་བྱས་ནས་སྒེག་པ་དང་དཀྲོལ་ཞིང་གར་བྱས་ནས་རྡོ་རྗེ་འདོང་པའི་དབང་ཕྱུག་མ་སྟེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་བསྟོད་པ་ནི་སྐྱེད་པའི་རྒྱུའོ། །དེས་རྡོ་རྗེ་བསྙེམས་པ་ཡོངས་སུ་བསྐོར་ཏེ་དགྲོལ་བར་བྱའོ། །འདི་ལྟར་འཆད་པར་འགྱུར་ཏེ་དང་པོའི་རྡོ་རྗེ་བཅིངས་ནས་གཉིས་སུ་བྱས་ལ་ལག་པ་གཡས་པས་བ་ད་ན་གསུམ་པ་བྱས་ཏེ། སྟོད་པའི་ཚུལ་གྱིས་གཟུང་བར་བྱའོ། །རྡོ་རྗེ་དྲིལ་བུ་དང་བཅས་པའི་ལག་པ་གཡོན་པས་ཀྱང་ཁ་ཊྭཱཾ་ག་བཅིངས་ནས་ལག་པ་གཡོན་པ་དང་གཡས་པ་དག་གི་མཛུབ་མོ་ལ་སོགས་པ་དང་བཅས་པ་དཀྲོལ་ཞིང་གར་བྱས་ལ། བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིང་བར་བྱ་སྟེ། དེ་ལྟར་ན་བཞི་འགྱུར་གྱི་དངོས་གྲུབ་གྲུབ་པར་འགྱུར་རོ། །མངའ་སྟོད་པ་ཞེས་བྱ་བ་ལ་སོགས་པ་ལ་དེ་བཞིན་དུ་དང་པོའི་རྡོ་རྗེ་གཉིས་སུ་བྱས་ལ་ཇི་ལྟ་བ་བཞིན་དུ་གར་ལས་བྱུང་བའི་འདོད་ཆགས་རྡོ་རྗེ་མའི་ཕྱག་རྒྱ་ཆེན་པོ་བཅིང་བར་བྱའོ། །དེ་བཞིན་དུ་གར་བྱས་ལ་ཀཱི་ལི་ཀཱི་ལིའི་ཕྱག་རྒྱ་ཆེན་པོ་བཅིང་བར་བྱའོ། །དེ་བཞིན་དུ་གར་བྱས་ལ་རྡོ་རྗེ་དྲན་པ་མའི་ཕྱག་རྒྱ་ཆེན་པོ་བཅིང་བར་བྱའོ། །དེ་བཞིན་དུ་གར་བྱས་ལ་རྡོ་རྗེ་དྲན་མའི་ཕྱག་རྒྱ་ཆེན་པོ་བཅིང་བར་བྱའོ། །དེ་བཞིན་དུ་གར་བྱས་ལ་རྡོ་རྗེ་འདོད་མའི་དབང་ཕྱུག་མའི་ཕྱག་རྒྱ་ཆེན་པོ་བཅིང་བར་བྱ་སྟེ་དེ་ལྟར་ན་བཞི་འགྱུར་གྱི་དངོས་གྲུབ་གྲུབ་པར་འགྱུར་རོ། །རྣམ་པ་ལྔ་པོ་དེ་དག་མཆོག་ཏུ་གསང་བའི་རས་རིས་ཀྱི་ཕྱག་རྒྱ་སྟེ། བཅོམ་ལྡན་འདས་རྡོ་རྗེ་སེམས་དཔའི་ཡིན་ནོ། །བདེ་བ་ཆེན་པོའི་རྡོ་རྗེ་དོན་ཡོད་པའི་དམ་ཚིག་གི་མཆོད་པས་རབ་ཏུ་དགའ་མ་ལ་སོགས་པའི་མཆོད་པ་ཐམས་ཅད་ཐོབ་པ་མི་ཟད་པའོ་ཞེས་བྱ་བ་ལ་རབ་ཏུ་དགའ་མ་དང་སྤྱན་དང་དཔལ་ཆེན་མོ་རྣམས་ནི་བདེ་བ་ཆེན་པོ་
རྡོ་རྗེ་དོན་ཡོད་པ་སྟེ། རྡོ་རྗེ་སེམས་དཔའི་དམ་ཚིག་གི་མཆོད་པའོ། །རབ་ཏུ་དགའ་མ་ལ་སོགས་པའི་མཆོད་པ་ཐམས་ཅད་དེ་རྡོ་རྗེ་སེམས་དཔའ་ལ་སོགས་པའི་བདེ་བ་དང་ཡིད་བདེ་བའི་རང་བཞིན་ཅན་ཐོབ་པ་ནི་མངོན་དུ་བྱེད་པའོ། །མི་ཟད་པའོ་ཞེས་བྱ་བ་ནི་རྟག་པའོ། །འདིས་འདི་ལྟར་འཆད་པར་འགྱུར་ཏེ་དེ་བཞིན་དུ་དང་པོའི་རྡོ་རྗེ་གཉིས་སུ་བྱས་ལ། བ་དན་གསུམ་མཆོད་པ་དང་ཁ་ཊྭཱཾ་གས་གར་བྱས་ཏེ་མཆོད་པའི་ལྷ་མོ་བཞི་པོའི་མཆོད་པའི་ཕྱག་རྒྱ་བཅིངས་ནས་མཆོད་པར་བྱའོ། །རྡོ་རྗེ་བསྟོད་པའི་ཕྱག་རྒྱས་སྲིད་པ་གསུམ་ཐམས་ཅད་བསྐྱོད་པ་དང་དབང་བུ་བྱེད་པའོ་ཞེས་བྱ་བ་ལ་དེ་བཞིན་དུ་གར་བྱས་ལ་སྲིད་པ་གསུམ་ཐམས་ཅད་རྡོ་རྗེའི་དབུས་སུ་ཡིད་ཀྱིས་བཅུག་ལ་བསྙེམས་པ་དང་བཅས་པས་རྡོ་རྗེ་གསོར་ནས་སྲིད་པ་གསུམ་བསྐྱོད་པ་དང༌། དབང་དུ་བྱ་བའི་བསམ་པས་རང་གི་སྙིང་གར་བསྟོད་པའི་ཚུལ་གྱིས་གཟུང་བར་བྱ་སྟེ། དེ་ལྟར་དེ་དག་ཐམས་ཅད་གྲུབ་པར་འགྱུར་རོ། །རྡོ་རྗེ་ཧཱུཾ་མཛད་ཅེས་བྱ་བ་ལ་སོགས་པ་ལ། དཔལ་རྡོ་རྗེ་སེམས་དཔའི་རྣལ་འབྱོར་བྱས་ཏེ། ལྷ་ཆེན་པོ་ལ་སོགས་པའི་གཟུགས་བརྙན་མདུན་དུ་བྱས་ཏེ། དེ་བཞིན་དུ་གར་བྱས་ཏེ་རྡོ་རྗེ་ཧཱུཾ་མཛད་བརྗོད་ཅིང་རྡོ་རྗེ་ཧཱུཾ་མཛད་དུ་བདག་ཉིད་རྣམ་པར་བསམས་ཏེ་གཡོན་བརྐྱང་བའི་སྟང་སྟབས་ཀྱིས་གནས་ནས་ལྷ་ཆེན་པོ་ལ་སོགས་པའི་གཟུགས་བརྙན་ལ་གཞུག་ཅིང་བཅུག་སྟེ། བཅིངས་ནས་དབང་དུ་བྱས་ལ་རྐང་པ་གཡོན་པས་གཟུགས་བརྙན་དེ་མནན་ནས་བཟླ་བར་བྱ་སྟེ། དེ་ལྟར་ན་རིང་པོ་མི་ཐོགས་པར་དེ་གྲུབ་པར་འགྱུར་བ་ཡིན་ནོ། །མཐོན་པོའི་སྟན་ཞེས་བྱ་བ་ལ་སོགས་པ་ལ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་སུ་སྤྱད་ནས་བསྒྲུབ་བྱའི་གཟུགས་བརྙན་མདུན་དུ་བཞག་སྟེ། སྟན་མཐོན་པོ་ལ་སྐྱིལ་མོ་ཀྲུང་ཕྱེད་པས་འདུག་སྟེ། དེ་བཞིན་དུ་གར་བྱས་ལ་བསྙེམས་པ་དང་བཅས་པས་རྡོ་རྗེ་གསོར་ཞིང་ཡི་གེ་ཧཱུཾ་གིས་བསྒྲུབ་བྱ་གཟུགས་བརྙན་ལ་གཞུག་ཅིང་བཅུག་སྟེ་བཅིངས་ནས་དབང་དུ་བྱའོ། །དེ་ནས་བསྒྲུབ་བྱའི་གཟུགས་བརྙན་དེ་ཉིད་རྐང་པ་གཡོན་པས་མནན་ཏེ་བསྙེམས་པ་དང་བཅས་པས་རྡོ་རྗེ་གསོར་ཞིང་ཡི་གེ་ཧཱུཾ་བཟླ་བར་བྱ་སྟེ། དེ་ལྟར་ན་རིང་པོར་མི་ཐོགས་པར་
སེམས་ཅན་དེ་དང་དེ་འགྲུབ་པར་འགྱུར་རོ། །གཡོན་པའི་རྡོ་རྗེ་ཁུ་ཚུར་གྱིས་ཞེས་བྱ་བ་ལ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས་ཆོ་ག་ཐམས་ཅད་རྗེས་སུ་སྤྱད་ལ། དེ་བཞིན་དུ་དང་པོའི་རྡོ་རྗེ་བཅིངས་ནས་གཉིས་སུ་བྱས་ཏེ། སྔ་མ་བཞིན་དུ་གར་བྱས་ལ་ལྷའི་བུ་མོ་གང་དགོས་པའི་ཚུལ་དུ་སྒྲུབ་པར་འདོད་པ་དེ་དང་ལྷན་ཅིག་ཏུ་དབང་པོ་གཉིས་སྙོམས་པར་ཞུགས་པ་ཡིད་ཀྱིས་བྱ་ཞིང་གཡོན་པའི་རྡོ་རྗེ་ཁུ་ཚུར་གྱིས་རང་གི་རྟགས་བཟུང་ལ། ཡི་གེ་ཧཱུཾ་བཟླ་བར་བྱས་ཏེ་དེ་ལྟར་ན་དེ་བཙུན་མོའི་རང་བཞིན་དུ་གྲུབ་པར་འགྱུར་རོ། །དེ་ལྟར་དང་པོའི་རྡོ་རྗེ་གཉིས་སུ་བྱས་ནས་བ་དན་གསུམ་དང་ཁ་ཊྭཱཾ་གའི་ཕྱག་རྒྱས་གར་བྱས་ཏེ། རྡོ་རྗེ་སེམས་དཔའི་ཕྱག་རྒྱ་ཆེན་པོ་བཅིང་བ་རྣམ་པ་བཅུ་ཕན་ཡོན་དང་བཅས་པ་བསྟན་ནས་ད་ནི་དམ་ཚིག་ལས་ཀྱི་ཕྱག་རྒྱ་བཅིང་བ་རྣམ་པ་བཅུ་བསྟན་པར་བྱ་བའི་ཕྱིར་དེ་ནས་དམ་ཚིག་གི་ཕྱག་རྒྱ་ཞེས་བྱ་བ་གསུངས་ཏེ། བདེ་བ་ཆེན་པོའི་རྡོ་རྗེ་དོན་ཡོད་པ་ནི་རྡོ་རྗེ་སེམས་དཔའ་སྟེ། དེའི་དམ་ཚིག་ནི་གསང་བའི་ལྕགས་ཀྱུ་བཅིངས་ལ་ཕུན་སུམ་ཚོགས་པ་བསྒྲུབ་པའི་བསམ་པས་རང་གི་སྙིང་གར་ཕྱག་རྒྱ་རྣམས་སོ། །སྙིང་གར་སེན་མོ་དྲུད་པ་ཞེས་བྱ་བ་ལ་གསང་བའི་ལྕགས་ཀྱུ་བཅིངས་ནས་རང་གི་སྙིང་གར་ལྕགས་ཀྱུའི་སེན་མོ་ཕན་ཚུན་དྲུད་པར་བྱས་ཏེ་དེ་ལྟར་ན་ཅི་ལྟར་མངོན་པར་འདོད་པའི་དངོས་གྲུབ་ཐམས་ཅད་གྲུབ་པར་འགྱུར་རོ། །ལྕགས་ཀྱུ་བརྡེག་པ་ཞེས་བྱ་བ་ལ་གསང་བའི་ལྕགས་ཀྱུ་བཅིངས་ནས་ཕུན་སུམ་ཚོགས་པ་སྒྲུབ་པའི་བསམ་པས་རང་གི་སྙིང་གར་ལྕགས་ཀྱུ་བརྡེག་པར་བྱ་སྟེ། དེ་ལྟར་ན་ཕུན་སུམ་ཚོགས་པ་ཐམས་ཅད་གྲུབ་པར་འགྱུར་རོ། །གཡོན་པའི་ལྕགས་ཀྱུ་ལ་གཡས་པའོ་ཞེས་བྱ་བ་ལ་གསང་བའི་ལྕགས་ཀྱུ་བཅིངས་ནས་གཡོན་པའི་ལྕགས་ཀྱུ་གཡས་པའི་དབུས་མར་གཞུག་པར་བྱས་ཏེ། དེ་ལྟར་ན་བདེ་བ་ཐམས་ཅད་འགྲུབ་པར་འགྱུར་རོ། །ལྕགས་ཀྱུའི་རྩེ་མོ་བཙིར་བའོ་ཞེས་བྱ་བ་ལ་གསང་བའི་ལྕགས་ཀྱུའི་དབུས་མའི་རྩེ་མོ་དག་ཕན་ཚུན་དུ་བཙིར་བར་བྱ་སྟེ་དེ་ལྟར་ན་ཕྱག་རྒྱ་ཐམས་ཅད་གྲུབ་པར་འགྱུར་རོ། །ཕན་ཚུན་སེན་མོས་དྲུད་པའོ་ཞེས་བྱ་བ་ལ་དེ་ཉིད་ཀྱི་ལྕགས་ཀྱུའི་སེན་མོ་ཕན་ཚུན་དུ་དྲུད་པར་བྱས་ཏེ། དེ་ལྟར་ན་དམ་ཚིག་ཐམས་ཅད་
གྲུབ་པར་འགྱུར་ཏེ་ཕྱག་རྒྱ་ཐམས་ཅད་གྲུབ་པར་འགྱུར་རོ་ཞེས་བྱ་བའི་དོན་ཏོ། །སྙིང་གར་བྱ་བ་པར་བྱའོ་ཞེས་བྱ་བ་ལ་དེ་ཉིད་ཀྱི་ལྕགས་ཀྱུས་རང་གི་སྙིང་གར་བྱབ་བར་བྱ་སྟེ། དེ་ལྟར་ན་དཀྱིལ་འཁོར་ཐམས་ཅད་གྲུབ་པར་འགྱུར་རོ། །ལྕེ་མཉམ་པར་འབྱིན་པའོ་ཞེས་བྱ་བ་ལ་དེ་ཉིད་ཀྱི་དབུས་མའི་ལྕགས་ཀྱུ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ལ་ངག་འབྱིན་པའི་ཚུལ་གྱིས་ཁའི་ཕྱོགས་ནས་གྱེན་དུ་དྲང་བར་བྱ་སྟེ་དེ་ལྟར་ན་བསྟན་བཅོས་གྲུབ་པར་འགྱུར་རོ། །སྙིང་གར་རྡོ་རྗེ་བརྟན་པར་རབ་ཏུ་གཞག་པའོ་ཞེས་བྱ་བ་ལ་ལྕགས་ཀྱུས་རང་གི་སྙིང་གར་སེམས་དཔའི་རྡོ་རྗེ་རྫོགས་པའི་ཚུལ་བྱས་ཏེ་དེ་ལྟར་ན་ཡེ་ཤེས་ཐམས་ཅད་གྲུབ་པར་འགྱུར་རོ། །རྡོ་རྗེ་བྱབ་པའོ་ཞེས་བྱ་བ་ལ་རང་གི་སྙིང་ག་ན་གནས་པའི་རྡོ་རྗེ་སེམས་དཔའི་རྡོ་རྗེ་ལྕགས་ཀྱུས་བྱབ་པར་བྱ་སྟེ་དེ་ལྟར་ན་ལས་ཐམས་ཅད་གྲུབ་པར་འགྱུར་རོ། །རྩ་བའི་ཕྱག་རྒྱ་ཡང་ངོ་ཞེས་བྱ་བ་ལ་གསང་བའི་ལྕགས་ཀྱུ་ནི་རྩ་བའི་ཕྱག་རྒྱ་སྟེ། དེས་རང་གི་སྙིང་གར་ཕྲུགས་ན་བདེ་བ་ཆེན་པོ་འགྲུབ་པར་འགྱུར་རོ། །དེ་ལྟར་གསང་བའི་ལྕགས་ཀྱུས་ལས་བསྒྲུབ་པ་བསྟན་ནས། ད་ནི་རྡོ་རྗེ་སེམས་དཔའ་ལས་བྱུང་བའི་ལས་ཀྱི་ཕྱག་རྒྱ་བསྟན་པའི་ཕྱིར་དེ་ནས་གསང་བའི་དམ་ཚིག་གི་རྡོ་རྗེ་བསྡམས་པ་ལས་བྱུང་བའོ་ཞེས་བྱ་བ་གསུངས་སོ། །ཁ་སྦྱོར་གྱི་ནང་དུ་སོར་མོ་ཐམས་ཅད་ཀྱི་ལས་སོ་ཞེས་བྱ་བ་ལ་རྡོ་རྗེ་བསྡམས་པའི་ནང་དུ་སོར་མོ་ཐམས་ཅད་ཀྱི་ལས་ཀྱི་ཚུལ་བྱའོ་ཞེས་བྱ་བའི་དོན་ཏོ། །མཐེ་བོང་རྡོ་རྗེ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཐེ་བོའི་རྩེ་མོ་རྡོ་རྗེ་བསྡམས་པ་ལ་འཇུག་པ་སྟེ། དེ་ལྟར་ན་དངོས་པོ་ཐམས་ཅད་གྲུབ་པའོ། །དེ་ཉིད་ཀྱི་མཐིལ་གཉིས་སུ་ཕྲུགས་པའོ་ཞེས་བྱ་བ་ལ་ནང་དུ་གནས་པའི་མཐེ་བོ་གཉིས་པོ་དེ་ཉིད་ཀྱིས་ཕྱག་མཐིལ་གཉིས་འཕྲུག་པར་བྱ་སྟེ་དེ་ལྟར་ན་ཐམས་ཅད་རྗེས་སུ་ཆགས་པར་འགྱུར་རོ། །མཛུབ་མོའི་རྡོ་རྗེའོ་ཞེས་བྱ་བ་ལ་རྡོ་རྗེ་བསྡམས་པ་བཅིངས་ནས་མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བར་བྱས་ལ་རྡོ་རྗེ་བསྡམས་པར་གཞུག་པར་བྱ་སྟེ་དེ་ལྟར་ན་ཐམས་ཅད་ཆགས་ཤིང་འཆིང་བར་གྱུར་རོ། །སྲིན་ལག་གི་རྡོ་རྗེའོ་ཞེས་བྱ་བ་ལ་རྡོ་རྗེ་བསྡམས་པ་ལ་སྲིན་ལག་གཉིས་ཀྱི་རྩེ་མོ་བཅུག་ནས་གཟུང་བར་བྱ་སྟེ་དེ་ལྟར་ན་ཐམས་ཅད་
སྨྲ་བའོ། །དེ་ཉིད་ཀྱི་སོར་མོའི་རྩེ་མོ་དག་ནི་རོལ་མོའོ་ཞེས་བྱ་བ་ལ་ནང་ན་གནས་པའི་སྲིན་ལག་གི་རྩེ་མོ་དེ་ཉིད་ཀྱི་སོར་མོའི་རྩེ་མོ་དག་གིས་ཕན་ཚུན་རོལ་མོའི་ཚུལ་དུ་བྱ་སྟེ་དེ་ལྟར་ན་གར་བྱེད་དུ་གཞུག་པའོ། །མཐེའུ་ཆུང་གི་རྡོ་རྗེའོ་ཞེས་བྱ་བ་ལ་རྡོ་རྗེ་བསྡམས་པའི་མཐེའུ་ཆུང་གཉིས་ཀྱི་རྩེ་མོ་ནང་དུ་གཞུག་པར་བྱ་སྟེ་དེ་ལྟར་ན་ཐམས་ཅད་དགོད་པའོ། །དེ་ཉིད་ཀྱི་མཐེ་བོ་གཉིས་ཀྱི་རྩེ་མོ་སེན་མོས་བཙིར་བའོ་ཞེས་བྱ་བ་ལ་འདས་མ་ཐག་ཏུ་བཤད་པའི་མཐེའུ་ཆུང་གཉིས་ཀྱི་རྡོ་རྗེ་ནང་དུ་གནས་པ་དེ་ཉིད་ཀྱི་མཐེ་བོ་གཉིས་ཀྱི་སེན་མོ་བཙིར་བར་བྱ་སྟེ་དེ་ལྟར་ན་ཐམས་ཅད་གསོད་པར་འགྱུར་རོ། །རྡོ་རྗེ་གར་གྱི་མཆོད་པས་ཞེས་བྱ་བ་ལ་སོགས་པ་ལ་བ་དན་གསུམ་མཆོག་དང་ཁ་ཊྭཱཾ་ག་སྒེག་པ་དང་བཅས་པར་མཐེའུ་ཆུང་ལ་སོགས་པ་བསྐོར་བའི་ཚུལ་གྱིས་བར་དུ་མཆོད་པ་ཉིད་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་ཡི་གེ་ཧཱུཾ་བརྗོད་ཅིང་རྡོ་རྗེའི་ལྟ་བས་བལྟས་ཤིང་གར་བྱ་སྟེ་དེ་ལྟར་ན་ལྷ་དང་ལྷ་མ་ཡིན་པའི་བུ་མོ་ཐམས་ཅད་དང༌། གཞོན་ནུ་མའི་བུ་མོ་ཐམས་ཅད་བསྟན་ནས་ཏེ་རྗེས་སུ་ཆགས་པར་འགྱུར་རོ། །རབ་ཏུ་དགའ་བ་ཞེས་བྱ་བ་ན་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བའི་རང་བཞིན་ནོ། །དེ་ཡང་དེ་བཞིན་དུ་གར་གྱི་ཚུལ་གྱིས་རང་གི་མ་མཆུ་ནང་དུ་གཡོ་བ་མེད་པར་མྱང་བ་དང་བཏུང་བའི་ཚུལ་གྱིས་གྲུབ་པ་ཡིན་ནོ། །དེ་བཞིན་དུ་གར་བྱ་ཞིང་དབུགས་རིང་པོ་བཏང་བར་ཡི་གེ་ཧཱུཾ་བརྗོད་པར་བྱ་སྟེ་དེ་ལྟར་ན་ཆགས་པ་བརྟན་པར་འཆིང་ཞིང་མཐོང་བར་འགྱུར་རོ། །དེ་བཞིན་དུ་གར་བྱ་ཞིང་དཔུང་པ་གཉིས་བསྟོད་ཅིང་བཟླ་བར་བྱ་སྟེ་དེ་ལྟར་ན་དབང་ཕྱུག་ཐམས་ཅད་ཐོབ་པར་འགྱུར་རོ། །དེ་བཞིན་དུ་གར་བྱ་ཞིང་གར་གྱི་ཚུལ་གྱིས་སྙིང་ག་བསྐྱོད་པར་བྱ་སྟེ་དེ་ལྟར་ན་ཐམས་ཅད་ཀྱིས་མཆོད་པར་འགྱུར་རོ། །དེ་བཞིན་དུ་གར་བྱ་ཞིང་མིག་གཉིས་ཀྱིས་བསྒྲུབ་བྱ་དགུག་པའི་ཚུལ་བྱས་ཏེ། །དེ་ལྟར་ན་འདོད་པ་ཐམས་ཅད་སྙེད་པར་འགྱུར་རོ། །དེ་བཞིན་དུ་གར་བྱ་ཞིང་དབུགས་གཏོང་བ་དང་དམན་པའི་གདོང་གིས་བལྟ་བའི་ཚུལ་བྱ་སྟེ་དེ་ལྟར་ན་འདོད་པའི་འདོད་ཆགས་སྐྱེད་པར་བྱེད་པ་ཡིན་ནོ། དེ་བཞིན་དུ་གར་བྱ་ཞིང་རང་གི་སྙིང་གའི་དབྲལ་བར་བསྐྱོད་པར་སྟེ་དེ་ལྟར་ན་ཐམས་ཅད་འབེབས་པར་བྱེད་དོ། །དེ་བཞིན་དུ་གར་
བྱས་ཤིང་དབུགས་བཏང་བས་རང་ཉིད་ལྟུང་བར་འགྱུར་ཏེ་དེ་ལྟར་འདོད་པའི་ཆགས་པས་གསོད་པར་འགྱུར་རོ། །དེ་བཞིན་དུ་གར་བྱས་ཤིང་བཀའ་བསྒོ་བའི་ཚུལ་དུ་བྱ་སྟེ་དེ་ལྟར་ན་འདོད་པ་ཐམས་ཅད་ཀྱི་རྗེས་སུ་སྤྱོད་པ་ལ་སོགས་པའི་ལས་ཐམས་ཅད་ལ་ངེས་པར་སྦྱོར་བར་འགྱུར་རོ། །དེ་ལྟར་རྡོ་རྗེ་གར་གྱི་སྦྱོར་བས་ལས་བཅུའི་སྒྲུབ་པ་བསྟན་ནས། ད་ནི་རྡོ་རྗེ་སེམས་དཔའ་ལ་སོགས་པའི་ལས་ཀྱི་ཕྱག་རྒྱ་རྣམས་ཀྱི་ལས་སྒྲུབ་པ་བསྟན་པར་བྱ་བའི་ཕྱིར། དེ་ནས་རྡོ་རྗེ་ལས་ཀྱི་ཕྱག་རྒྱ་བཅུ་པོ་ཞེས་བྱ་བ་གསུངས་སོ། །རྡོ་རྗེ་བསྙེམས་མའི་ཕྱག་རྒྱས་ཐམས་ཅད་སྒྲུབ་པའོ་ཞེས་བྱ་བ་ལ་བཅོམ་ལྡན་འདས་རྡོ་རྗེ་སེམས་དཔའི་ལས་ཀྱི་ཕྱག་རྒྱ་ནི་རྡོ་རྗེ་བསྙེམས་པས་ཏེ་དེས་བརྟན་པ་དང་གཡོ་བའི་དངོས་པོ་ཐམས་ཅད་སྒྲུབ་པའོ། །འདོད་ཆགས་རྡོ་རྗེ་མའི་ཕྱག་རྒྱ་ནི་རྡོ་རྗེ་མཚོན་ཆ་མ་སྟེ། དེས་བདུད་ལ་སོགས་པ་ཐམས་ཅད་ལས་རྣམ་པར་རྒྱལ་བ་དང་རྡོ་རྗེ་སེམས་དཔའ་ལ་སོགས་པ་ཐམས་ཅད་རྗེས་སུ་ཆགས་པ་དང༌། གདུག་པའི་དཀྱིལ་འཁོར་ལ་སོགས་པ་གསོད་པར་འགྱུར་རོ། །རྡོ་རྗེ་ཀཱི་ལི་ཀཱི་ལའི་ལས་ཀྱི་ཕྱག་རྒྱ་ནི་རྡོ་རྗེ་ཀཱི་ལི་ཀཱི་ལ་སྟེ་དེས་རབ་ཏུ་དགའ་བའི་རེག་བྱ་ནི་རྡོ་རྗེ་སེམས་དཔའི་བདེ་བ་དང་ཡིད་བདེ་བ་མངོན་དུ་བྱ་བའོ། །རེག་བྱ་དེས་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཐམས་ཅད་བདེ་བས་ཏེ་ཉོན་མོངས་པ་མེད་པར་སྒྲུབ་པ་པོ་རྣམས་ལ་འགྲུབ་པར་འགྱུར་རོ། །རྡོ་རྗེ་དྲན་མའི་ལས་ཀྱི་ཕྱག་རྒྱ་ནི་རྒྱལ་མཚན་བསྒྲེང་བས་ཏེ་ངེས་འཐབ་མོ་ལས་རྣམ་པར་རྒྱལ་བར་འགྱུར་རོ། །རྡོ་རྗེ་འདོད་པའི་དབང་ཕྱུག་མའི་ལས་ཀྱི་ཕྱག་རྒྱ་ནི་རྡོ་རྗེ་འདོད་པའི་དབང་ཕྱུག་མས་ཏེ་དེས་རྒྱལ་སྲིད་ཐམས་ཅད་ཀྱི་དབང་ཕྱུག་གི་བདག་པོ་ཉིད་དུ་འགྱུར་རོ། །མེ་ཏོག་ལ་སོགས་པའི་ལས་ཀྱི་ཕྱག་རྒྱ་བཞི་ནི་དུས་ཀྱི་མཆོད་པས་ཏེ་དེས་ཐམས་ཅད་ཀྱིས་མཆོད་པར་འགྱུར་རོ། །བཅོམ་ལྡན་འདས་རྡོ་རྗེ་སེམས་དཔའི་བསྙེམས་པ་དང་བཅས་པའི་རྡོ་རྗེ་གསོར་པའི་ཕྱག་རྒྱས་བདུད་ལ་སོགས་པ་ཐམས་ཅད་འདུལ་བར་འགྱུར་རོ། །གཡས་པའི་རྡོ་རྗེ་ཁུ་ཚུར་གྱིས་འབར་བའི་རྡོ་རྗེ་ཡིད་ཀྱིས་བླངས་ཏེ་ཡི་གེ་ཧཱུཾ་བརྗོད་ཅིང་བསྒྲུབ་བྱའི་སྟེང་དུ་དབབ་པར་བྱ་སྟེ་དེ་ལྟར་ན་ཐམས་ཅད་གསོད་པར་འགྱུར་རོ། །དེ་བཞིན་དུ་གཡས་པའི་རྡོ་རྗེ་ཁུ་ཚུར་གྱིས་འབར་བའི་རྡོ་རྗེ་
རྣམས་ཡང་ནས་ཡང་དུ་ཡིད་ཀྱིས་བསྒྲུབ་བྱའི་སྟེང་དུ་དབབ་པར་བྱ་སྟེ་དེ་ལྟར་ན་རྡོ་རྗེ་ཕབ་པས་ཐམས་ཅད་གསོད་པ་དང་ཐམས་ཅད་འཕྲོག་པར་འགྱུར་རོ། །གཡོན་པ་བསྙེམས་པ་དང་བཅས་པས་ཞེས་བྱ་བ་ལ་སོགས་པ་ལ་གཡོན་པའི་ཁུ་ཚུར་གཉིས་ཀྱིས་བསྙེམས་པར་བྱས་ལ་གཡས་པའི་རྡོ་རྗེ་ཁུ་ཚུར་གྱིས་སྒྱུ་མ་ཐམས་ཅད་སྟོན་པའི་ཚུལ་གྱིས་སྒྱུ་མ་ཐམས་ཅད་སྟོན་པའོ། །རྫུ་འཕྲུལ་ཐམས་ཅད་སྟོན་པའི་ཚུལ་གྱིས་རྫུ་འཕྲུལ་ཐམས་ཅད་སྟོན་པའོ། །སོ་སོར་བསྟན་པ་ཐམས་ཅད་སྟོན་པའི་ཚུལ་གྱིས་བསྟན་པ་ཐམས་ཅད་སྟོན་པའོ། །ཐམས་ཅད་འཛོམས་པའི་ཚུལ་གྱིས་ཐམས་ཅད་འཇོམས་པའོ། །དེ་བཞིན་དུ་རེངས་པ་དང་གཉིད་ལོག་ཏུ་གཞུག་པ་དང༌། བསྐོར་བ་དང༌། བསྐྲད་པ་དང༌། འབྲུ་དང༌། བཏུང་བ་འཕོ་བ་དང༌། དབང་དུ་བྱེད་པ་རྣམས་ནི་དེ་དག་གི་ཚུལ་གྱིས་ལས་ཐམས་ཅད་སྒྲུབ་པར་བྱེད་པ་ཡིན་ནོ། །ད་ནི་རྡོ་རྗེ་ཐལ་མོ་ལས་བྱུང་བའི་ཕྱག་རྒྱ་བཅུ་བསྟན་པར་བྱ་བའི་ཕྱིར། རྡོ་རྗེ་དམ་ཚིག་གི་ཕྱག་རྒྱ་བཅུ་ཞེས་བྱ་བ་གསུངས་ཏེ། རྡོ་རྗེ་ཐལ་མོ་ལས་བྱུང་བས་ན་རྡོ་རྗེ་ཐལ་མོ་ལས་བྱུང་བའོ། །རྡོ་རྗེ་སྐུ་མཆོག་གི་དངོས་གྲུབ་ཐམས་ཅད་དོ་ཞེས་བྱ་བ་ལ་རྡོ་རྗེ་ཐལ་མོ་བཅིངས་ནས་མཐེ་བོ་གཉིས་ཀྱིས་སེམས་དཔའི་སྐྱིལ་ཀྲུང་དུ་བྱས་ལ། མཛུབ་མོ་གཉིས་ཀྱི་རྩེ་མོ་ཡང་དག་པར་སྦྱར་བ་ནི་རྡོ་རྗེ་སྐུ་མཆོག་གོ །འདིས་རྡོ་རྗེ་སེམས་དཔའ་ལ་སོགས་པའི་མཆོག་གི་དངོས་གྲུབ་ཐམས་ཅད་སྒྲུབ་པ་ཡིན་ནོ། །མཛུབ་མོ་གཉིས་ཀྱི་ལྕགས་ཀྱུས་དངོས་གྲུབ་ཐམས་ཅད་དོ་ཞེས་བྱ་བ་ལ་རྡོ་རྗེ་ཐལ་མོ་བཅིངས་ནས་མཛུབ་མོ་གཉིས་ཀྱི་ལྕགས་ཀྱུ་གཉིས་བྱ་སྟེ་འདིས་ཀྱང་རྡོ་རྗེ་སེམས་དཔའ་ལ་སོགས་པའི་མཆོག་གི་དངོས་གྲུབ་ཐམས་ཅད་བསྒྲུབ་པར་བྱའོ། །རྡོ་རྗེ་གནོད་སྦྱིན་གྱི་བདུད་ཐམས་ཅད་ལ་སོགས་པའི་གདུག་པ་འདུལ་བའོ་ཞེས་བྱ་བ་ལ་རྡོ་རྗེ་ཐལ་མོའི་མཛུབ་མོ་གཉིས་བཀུག་ལ་ཕན་ཚུན་སྟེང་དུ་ཡང་དག་པར་སྦྱར་བར་བྱས་ལ་མཐེ་བོང་གཉིས་བསྒྲེང་བ་སོ་སོར་ཡང་དག་པར་རབ་ཏུ་བརྐྱང་བ་ཁར་གཟུང་བར་བྱ་སྟེ་འདི་ནི་རྡོ་རྗེ་གནོད་སྦྱིན་གྱི་ཕྱག་རྒྱའོ། །འདིས་ཡི་གེ་ཧཱུཾ་བཟླས་ཤིང་གདུག་པ་ཐམས་ཅད་གདུལ་བར་བྱའོ། །གང་དུ་ཁྱད་པར་གྱིས་འགལ་བ་མེད་པ་དེ་ཐམས་ཅད་དུ་ཡི་གེ་ཧཱུཾ་གི་བཟླས་པས་རྟོགས་པར་བྱའོ། །དེ་ཉིད་མཐེ་བ་མོ་
གཉིས་ཀྱིས་བཀབ་པས་ཐམས་ཅད་རྙེད་པའོ་ཞེས་བྱ་བ་ལ་འདས་མ་ཐག་ཏུ་བཤད་པའི་རྡོ་རྗེ་གནོད་སྦྱིན་གྱི་ཕྱག་རྒྱའི་མཐེ་བོང་གཉིས་ཀྱི་རྩེ་མོས་མཛུབ་མོ་གཉིས་ཀྱི་ལྕགས་ཀྱུ་དགབ་པར་བྱ་སྟེ་འདིས་རྡོ་རྗེ་སེམས་དཔའི་དངོས་གྲུབ་ཐམས་ཅད་ཐོབ་པར་འགྱུར་རོ། །དེ་ཉིད་ཀྱིས་མཐེ་པོ་གཉིས་བཅུག་ལ་གཙུག་ཏོར་རྡོ་རྗེ་ཐམས་ཅད་བསྲུང་བར་བྱའོ་ཞེས་བྱ་བ་ལ་འདས་མ་ཐག་ཏུ་བཤད་པའི་ཕྱག་རྒྱའི་མཐེ་བོ་གཉིས་ནང་དུ་བཅུག་ལ་གཙུག་ཏོར་དུ་གཟུང་བར་བྱ་སྟེ་དེ་ལྟར་ན་ཐམས་ཅད་སྲུང་བར་འགྱུར་རོ། །མཐེ་བོང་རྡོ་རྗེ་ནང་དུ་བཅུག་ལ་དེ་ཉིད་ཀྱིས་རྡོ་རྗེ་སེམས་དཔའ་ལ་སོགས་པའི་སེམས་ཅན་ཐམས་ཅད་རྗེས་སུ་ཆགས་པ་དང༌། དགུག་པ་དང་དབང་དུ་བྱེད་པ་སྒྲུབ་པོ་ཞེས་བྱ་བ་ལ་འདས་མ་ཐག་ཏུ་བཤད་པའི་གཙུག་ཏོར་ཕྱག་རྒྱ་རང་གི་སྙིང་གའི་ཕྱོགས་སུ་གཟུང་བར་བྱ་སྟེ་དེ་ལྟར་ན་ཇི་ལྟར་བཤད་པ་བཞིན་དུ་གྲུབ་པ་ཡིན་ནོ། །མཐེ་ཆུང་རྡོ་རྗེ་སོར་མོ་གཉིས་ཀྱི་རྩེ་མོ་མཛུབ་མོ་གཉིས་ཀྱིས་ལེགས་པར་བཟུང་བས་མཐོ་བ་ནི་དཔལ་དགུག་པ་དང་དབང་དུ་བྱེད་པའོ་ཞེས་བྱ་བ་ལ་མཐེའུ་ཆུང་རྡོ་རྗེའི་སོར་མོ་གཉིས་ནི་མཐེའུ་ཆུང་གཉིས་ཏེ། དེའི་རྩེ་མོ་གཉིས་མཛུབ་མོ་གཉིས་ཀྱིས་ལེགས་པར་གཟུང་བ་གང་ཡིན་པ་དེ་ཉིད་མཐོ་བའི་ཕྱག་རྒྱ་གང་ལ་ཡོད་པ་དེ་ཉིད་ལ་དེ་སྐད་ཅེས་བྱའོ། །འདིས་ནི་འདི་ལྟར་བཤད་པར་འགྱུར་ཏེ། རྡོ་རྗེ་གནོད་སྦྱིན་གྱི་ཕྱག་རྒྱའི་མཐེའུ་ཆུང་གཉིས་ནང་དུ་བཅུག་ལ་མཛུབ་མོ་གཉིས་ཀྱི་ལྕགས་ཀྱུས་དེའི་རྩེ་མོ་གཟུང་བར་བྱའོ། །རྡོ་རྗེ་གནོད་སྦྱིན་གྱི་ཕྱག་རྒྱ་དེ་ཉིད་ཀྱིས་ནོར་སྦྱིན་ལས་ནོར་ཐམས་ཅད་དང་དཔལ་འཕྲོག་པའོ་ཞེས་བྱ་བ་ལ་རྡོ་རྗེ་གནོད་སྦྱིན་གྱི་ཕྱག་རྒྱ་ཉིད་ནི་རྡོ་རྗེ་གནོད་སྦྱིན་གྱི་རྒྱལ་མོས་ཏེ་དེས་ནོར་སྦྱིན་ལས་དཔལ་དགུག་པ་དང་ནོར་དབྲོག་པའི་བསམ་པའི་དབང་གིས་གྲུབ་པ་ཡིན་ནོ། །དེ་ཉིད་ཀྱིས་དབུས་མ་གཉིས་ཞེས་བྱ་བ་ལ་སོགས་པ་ལ་རྡོ་རྗེ་གནོད་སྦྱིན་གྱི་ཕྱག་རྒྱའི་སྲིན་ལག་གཉིས་ཀྱི་རྩེ་མོའི་མཐའ་དབུས་མ་གཉིས་ཀྱིས་བཟུང་སྟེ་བཙིར་བར་བྱས་ན་འདིས་ནི་བདུད་ལ་སོགས་པའི་གདོན་ཐམས་ཅད་ལས་གྲོལ་བ་ལ་སོགས་པར་འགྱུར་བ་ཡིན་ནོ། །རབ་ཏུ་དགའ་བའི་རྡོ་རྗེས་ཡུལ་ཐམས་ཅད་ཀྱི་མཆོག་སྒྲུབ་པའོ་ཞེས་བྱ་བ་ལ་རྡོ་རྗེ་ཐལ་མོ་ལས་བྱུང་བའི་མདའ་ལྔ་བསྡུས་པ་ནི་རབ་ཏུ་དགའ་
བའི་རྡོ་རྗེ་སྟེ། དེས་ཡུལ་ཐམས་ཅད་ཀྱི་མཆོག་ནི་རྡོ་རྗེ་སེམས་དཔའ་སྟེ་ཐམས་ཅད་དུ་གྲུབ་པར་འགྱུར་རོ། །དེ་ལྟར་རྡོ་རྗེ་ཐལ་མོ་ལས་བྱུང་བའི་ཕྱག་རྒྱ་བཅུ་བསྟན་ནས་ད་ནི་མདའ་ལྔ་བསྡུས་པ་ལས་བྱུང་བའི་ཕྱག་རྒྱ་རྣམས་བསྟན་པར་བྱ་བའི་ཕྱིར། དེ་ནས་གསང་བའི་ཕྱག་རྒྱ་བཅུ་རབ་ཏུ་དགའ་བའི་རྡོ་རྗེ་ལས་བྱུང་བའོ་ཞེས་བྱ་བ་གསུངས་ཏེ་མདའ་ལྔ་བསྡུས་པ་ཉིད་འདི་རུ་དགའ་བའི་རྡོ་རྗེའོ། །རྡོ་རྗེ་སེམས་དཔའ་ཞེས་བྱ་བ་ལ་སོགས་པ་ལ་ཡེ་ཤེས་སེམས་དཔའི་རང་བཞིན་གྱི་དཔལ་རྡོ་རྗེ་སེམས་དཔའ་དང་ཤིན་ཏུ་རྣལ་འབྱོར་གྱི་སྦྱོར་བས་ལྷག་པར་མོས་པར་བྱས་ལ། རྡོ་རྗེ་སེམས་དཔའ་མནན་ནས་བཅོམ་ལྡན་འདས་རྡོ་རྗེ་བསྙེམས་མའི་ཕྱག་རྒྱ་ཆེན་པོ་དང་རྡོ་རྗེ་བསྙེམས་མ་དང་བཅས་པའི་རིག་པའི་ལྷ་མོ་སྟེ། དེ་རོལ་དུ་བཅུག་པ་ནི་སྒྲུབ་ཅིང་མངོན་དུ་བྱེད་པའོ། །འདི་ཇི་ལྟར་འགྱུར་ཞེ་ན། རབ་ཏུ་དགའ་བའི་རྡོ་རྗེ་ཆེན་པོས་རྒྱས་བཏབ་ཅེས་བྱ་བ་གསུངས་སོ། །རབ་ཏུ་དགའ་བའི་རྡོ་རྗེ་ཆེན་པོ་དེ་གང་ཡིན་ཞེ་ན། རྡོ་རྗེ་དང་བཅས་པའི་རབ་ཏུ་དགའ་བའི་རྡོ་རྗེའོ་ཞེས་བྱའོ། །དང་པོའི་རྡོ་རྗེ་དང་བཅས་པའི་མདའ་ལྔ་བསྡུས་པ་ནི་རྡོ་རྗེ་དང་བཅས་པའི་རབ་ཏུ་དགའ་བའི་རྡོ་རྗེའོ། །འདི་ལྟར་འཆད་པར་འགྱུར་ཏེ། དང་པོའི་རྡོ་རྗེ་བླངས་ནས་མདའ་ལྔ་བསྡུས་པས་བཅིངས་ནས་རབ་ཏུ་དགའ་བའི་རྡོ་རྗེ་ཆེན་པོར་བརྗོད་པ་ཡིན་ནོ། །དེ་བཅིངས་ནས་རྡོ་རྗེ་སེམས་དཔའ་དང་ལྷན་ཅིག་ཏུ་གྱུར་པའི་ལྷག་པར་མོས་པར་བྱས་ཏེ། དེ་ལྟར་ན་རྡོ་རྗེ་སེམས་དཔའ་མནན་ནས་རྡོ་རྗེ་ཐལ་མོ་དང་རོལ་པར་འགྱུར་ཏེ། རྣལ་འབྱོར་པས་རྡོ་རྗེ་སེམས་དཔའ་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ་ཞེས་བྱ་བའི་དོན་ཏོ། །དེ་བཞིན་གཤེགས་པ་ཐམས་ཅད་ཅེས་བྱ་བ་ལ་སོགས་པ་ལ་བྱང་ཆུབ་ཏུ་སེམས་བསྐྱེད་པའི་ལས་དང་པོ་བ་རྣམས་ནི་དེ་བཞིན་གཤེགས་པ་ཐམས་ཅད་དེ་དེ་རྣམས་ཀྱི་ཉན་ཐོས་དང་རང་སངས་རྒྱས་ཀྱི་བྱང་ཆུབ་དོན་དུ་གཉེར་བའི་སེམས་ནི་ཆགས་པ་དང་བྲལ་བའི་འཁོར་ལོ་སྟེ། དེ་བྲལ་བ་ནི་བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཀྱི་སེམས་ཀྱི་བཀག་པའོ། །དེ་ཇི་ལྟར་ཞེ་ན། མཛུབ་མོ་ཞེས་བྱ་བ་ལ་སོགས་པ་ལ་མདའ་ལྔ་བསྡུས་པ་བཅིངས་ནས་མཛུབ་མོ་དང་དབུས་མ་དང་སྲིན་ལག་གི་
སོར་མོ་རྣམས་ལག་པའི་རྒྱབ་གཉིས་ནས་ཅུང་ཟད་བཏེག་ལ་མཐེ་བོང་དང་མཐེའུ་ཆུང་གཉིས་མཉམ་པའི་སོར་མོ་རྣམས་ཀྱི་རྩེ་མོ་གཉིས་བྱས་ལ་རྡོ་རྗེ་བསྡམས་པ་དྲལ་བའི་ཚུལ་གྱིས་ཁྲོས་ཤིང་རང་གི་སྙིང་གར་དྲལ་བར་བྱ་སྟེ་དེ་ལྟར་ན་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བའི་རང་བཞིན་ཅན་གྱི་རབ་ཏུ་དགའ་བའི་རྡོ་རྗེ་རྣལ་འབྱོར་པ་གྲུབ་པར་འགྱུར་རོ། །དེ་ཡང་དེ་ཁོ་ན་ཉིད་ཀྱིས་རྒྱས་བཏབ་པས་ན་དེ་ཁོ་ན་ཉིད་ཀྱིས་རྒྱས་བཏབ་པ་སྟེ་དམིགས་པ་མེད་པའི་ཐུགས་རྗེ་ཆེན་པོའི་སྒྲུབ་པ་པོའི་རྒྱུད་ལ་སྐྱེས་པའི་རབ་ཏུ་དགའ་བའི་རྡོ་རྗེ་སྒྲུབ་པ་པོ་ལ་འགྲུབ་པར་འགྱུར་རོ། །བཙིར་ན་འདོད་པ་ཐམས་ཅད་བརྟན་པར་བྱེད་པའོ་ཞེས་བྱ་བ་ལ་མདའ་ལྔ་བསྡུས་པ་བཅིངས་ནས་བཙིར་བར་བྱ་སྟེ། དེ་ལྟར་ན་སེམས་དཔའ་དང་འདོད་ཆགས་རྡོ་རྗེ་མ་ལ་སོགས་པའི་འདོད་པ་ཐམས་ཅད་བརྟན་པར་བྱེད་པར་འགྱུར་རོ། །མཛུབ་མོ་ལྕགས་ཀྱུས་འདོད་པ་ཐམས་ཅད་ཀྱི་བདེ་བ་དགུག་པའོ་ཞེས་བྱ་བ་ལ་མདའ་ལྔ་བསྡུས་པ་བཅིངས་ཏེ་མཛུབ་མོ་གཉིས་ཀྱི་ལྕགས་ཀྱུ་བྱས་ནས་རྡོ་རྗེ་སེམས་དཔའ་ལ་སོགས་པའི་འདོད་པ་ཐམས་ཅད་ཀྱི་བདེ་བ་རང་གི་རྒྱུད་ལ་སྐྱེ་བར་འགྱུར་རོ། །མཛུབ་མོས་ཕྲག་དོག་ལ་སོགས་པའི་འདོད་པ་ཐམས་ཅད་ཀྱི་སྡུག་བསྔལ་རབ་ཏུ་ཞི་བའོ་ཞེས་བྱ་བ་ལ་མདའ་ལྔ་བསྡུས་པ་བཅིངས་ནས་གཡོན་པའི་མཛུབ་མོས་བདག་ཉིད་དམ་བསྒྲུབ་བྱ་སྡིགས་མཛུབ་བྱས་ཏེ་དེ་ལྟར་ན་ཕྲག་དོག་ལ་སོགས་པའི་འདོད་པ་ཐམས་ཅད་ཀྱི་སྡུག་བསྔལ་ཞི་བར་འགྱུར་རོ། །རྟགས་བསྐྱོད་པས་རབ་ཏུ་དགའ་བ་འབེབས་པ་དང་དེ་ཡང་སྒྲུབ་པའོ་ཞེས་བྱ་བ་ལ་མདའ་ལྔ་བསྡུས་པས་རང་གི་རྟགས་བསྐྱོད་པར་བྱ་སྟེ་དེ་ལྟར་ན་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བའི་རང་བཞིན་ཅན་གྱི་རབ་ཏུ་དགའ་བ་འབེབས་པ་དང་དེ་གྲུབ་པའོ། །སྐྱེ་གནས་གཡོ་བའོ་ཞེས་བྱ་བ་ལ་མདའ་ལྔ་བསྡུས་པས་རང་གི་རྟགས་བསྐྱོད་པས་ཤིན་ཏུ་བདེ་བའོ་ཞེས་བྱ་བ་དང་སྦྱར་རོ། །དེ་ཡང་ཁྱད་པར་ཇི་ལྟ་བུ་དང་ལྡན་པ་ཡིན་ནོ་ཞེ་ན་བུད་མེད་དང་སྐྱེས་པ་དག་གི་རབ་ཏུ་དགའ་བའོ་ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་བདེ་བ་དང་ཡིད་བདེ་བ་རྫོགས་པའི་ཕྱིར་བུད་མེད་དང་སྐྱེས་པ་དཔལ་རྡོ་རྗེ་སེམས་དཔའ་དང་གཅིག་ཏུ་གྱུར་པར་
ཡིད་ཀྱིས་རྫོགས་པར་བྱ་ཞིང་མདའ་བསྡུས་བའི་ཕྱག་རྒྱ་དེས་རྣལ་འབྱོར་པས་རང་གི་རྟགས་བསྐྱོད་པར་བྱ་སྟེ། དེ་ལྟར་ན་དེ་ལ་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བ་གྲུབ་པ་ཡིན་ནོ། །ཁ་སྦྱོར་བཙིར་བས་ཞེས་བྱ་བ་ལ་སོགས་པ་ལ་མདའ་ལྔ་བསྡུས་པ་བཅིངས་ནས་ཕན་ཚུན་ལག་པ་གཉིས་བཙིར་ཞིང་མངོན་པར་འདོད་པའི་གང་ཟག་དང་ལྷན་ཅིག་ཏུ་འདུས་པ་དང་བྲལ་བ་བསམ་པར་བྱ་སྟེ་དེ་ལྟར་ན་འདི་གཉིས་གྲུབ་པ་ཡིན་ནོ། །རྟགས་ཀྱི་སེན་མོ་ཞེས་བྱ་བ་ལ་མདའ་ལྔ་བསྡུས་པ་བཅིངས་ནས་དེའི་གཡས་པའི་མཐེ་བོའི་རྟགས་ཀྱི་སེན་མོས་ལག་པ་གཡོན་པའི་མཐིལ་དྲུད་པས་ཤིན་ཏུ་བརྟན་པའི་འདོད་པ་ལ་ཆགས་པ་ཉིད་དུ་འགྱུར་རོ། །འདིས་ནི་འདི་ལྟར་བཤད་པར་འགྱུར་ཏེ། མཚན་མ་ཐོབ་པའི་རྣལ་འབྱོར་པས་དངོས་གྲུབ་ཆེན་པོ་བསྒྲུབ་པར་བྱས་ནས་གལ་ཏེ་གྲུབ་པར་མ་གྱུར་ན་དེའི་ཚེ་འདི་བཅིངས་ལ་འདོད་ཆགས་རྡོ་རྗེ་མ་ལ་སོགས་པ་དང་ཡང་དག་པར་སྦྱོར་བ་བསྒོམ་པར་བྱ་སྟེ། དེ་ལྟར་ན་དེ་དག་གཞན་མི་འདོད་པར་ཤིན་ཏུ་བདེ་བ་དང་ཡིད་བདེ་བ་སྟེར་བའི་བུད་མེད་ཐམས་ཅད་རང་ལ་གྲུབ་པ་ཡིན་ནོ། །མདའ་ལྔ་བསྡུས་པ་བཅིངས་ནས་གཡོན་པའི་མཐེབ་མོའི་སེན་མོ་ལག་པ་གཡས་པའི་མཐིལ་དུ་དྲུད་པར་བྱ་ཞིང་རྡོ་རྗེ་སེམས་དཔའ་ལ་སོགས་པའི་སྐྱེས་བུ་རྣམས་དང་ཙུམ་པ་ན་དང་འཁྱུད་པ་ལ་སོགས་པ་བསྒོམ་པར་བྱ་སྟེ་དེ་ལྟར་ན་དེ་དག་གྲུབ་པར་འགྱུར་རོ། །རྡོ་རྗེ་ཁུ་ཚུར་གཉིས་ཀྱིས་ཞེས་བྱ་བ་ལ་རྡོ་རྗེ་སེམས་དཔའི་རྣལ་འབྱོར་སྔ་མ་བཞིན་དུ་བྱས་ནས་ཆོ་ག་ཐམས་ཅད་རྗེས་སུ་སྤྱད་ལ་བཅོམ་ལྡན་འདས་མདུན་དུ་སྤྱན་དྲངས་ཏེ། །རྡོ་རྗེ་ཁུ་ཚུར་གཉིས་བཅིངས་ནས་རྡོ་རྗེ་སེམས་དཔའ་ལ་འཁྱུད་པའི་བསམ་པས་བདག་ཉིད་འཁྱུད་པར་བྱ་ཞིང་མ་མཆུ་བཟུང་བའི་བསམ་པས་རང་གི་མ་མཆུ་སོ་རྣམས་ཀྱིས་གཟུང་བར་བྱ་སྟེ་དེ་ཉིད་ཀྱིས་བདེ་བ་དང་ཤིན་ཏུ་རོ་གཅིག་པར་འགྱུར་པར་བདག་ཉིད་བསམ་ཞིང་ཨ་ནུ་ར་ག་ཡ་མི་ཧཱུཾ་ཞེས་བྱ་བ་ཉེ་བའི་སྙིང་པོ་དང་བཅས་པའི་ཡི་གེ་ཧཱུཾ་བཟླ་བར་བྱ་སྟེ། དེ་ལྟར་ན་བཅོམ་ལྡན་འདས་རྡོ་རྗེ་སེམས་དཔའ་རབ་ཏུ་དགའ་བའི་དངོས་གྲུབ་ཤིན་ཏུ་གྲུབ་པར་འགྱུར་རོ། །ཐོག་མ་དང་ཐ་མ་མེད་པའི་དངོས་གྲུབ་ནི་མཆོག་དང་པོའི་དངོས་གྲུབ་སྟེ། སུ་ར་ཏ་སྟྭཾ་ཞེས་བྱ་བས་བཅོམ་ལྡན་འདས་བསྐུལ་ཏེ་དེ་ཁོ་ན་ཉིད་
བསྐུལ་བ་དེས་དེ་གྲུབ་པར་འགྱུར་རོ། །འདས་མ་ཐག་ཏུ་བཤད་པའི་བསྒོམ་པ་བྱ་ཞིང་གལ་ཏེ་ཡིད་བདེ་བ་སྐྱེས་པར་འགྱུར་ན། དེའི་ཚེ་གཞན་དང་གཞན་དུ་སུ་ར་ཏ་སྟྭཾ་ཞེས་པས་བཅོམ་ལྡན་འདས་བསྐུལ་བར་བྱས་ན་དེ་ཁོ་ན་ཉིད་བསྐུལ་བས་འདིས་དེ་གྲུབ་པར་འགྱུར་རོ། །རབ་ཏུ་དགའ་བའི་ཡེ་ཤེས་ཀྱིས་ཐམས་ཅད་སྒྲུབ་པའོ་ཞེས་བྱ་བ་ལ་དེ་བཞིན་དུ་འཁྱུད་ནས་དཔལ་རྡོ་རྗེ་སེམས་དཔའི་བདེ་བ་དང་ཡིད་བདེ་བ་མངོན་དུ་བྱས་ཏེ། དེ་ལྟར་ན་ཡིད་ཀྱི་འདོད་པ་ཐམས་ཅད་གྲུབ་པར་འགྱུར་རོ། །ལག་པ་གཡོན་པའི་རྡོ་རྗེ་ཁུ་ཚུར་བཀབ་ནས་སྒྲུབ་པོ་ཞེས་བྱ་བ་ལ་དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ནས་གཡོན་པའི་རྡོ་རྗེ་ཁུ་ཚུར་གོས་ཀྱིས་བཀབ་པར་བྱས་ལ་ལངས་པའམ། འདུག་པའམ། མཉམ་པར་གཞག་པའམ་མཉམ་པར་མ་བཞག་པའི་རྣལ་འབྱོར་གྱིས་རྟོག་པའི་རྣལ་འབྱོར་བསྒོམ་པར་བྱ་སྟེ་དེ་ལྟར་ན་ཐམས་ཅད་གྲུབ་པར་འགྱུར་རོ། །བདེ་བ་ཆེན་པོའི་རྡོ་རྗེ་ལས་བྱུང་བའི་རྡོ་རྗེ་ཆེན་པོའི་ལྟ་བས་ཐམས་ཅད་པའོ་ཞེས་བྱ་བ་ལ་རྣམ་པར་འཕྲུལ་པ་དང་བཅས་པའི་འཛུམ་པའི་སྤྱན་དང་ལྡན་པ་བདེ་བ་ཆེན་པོའི་རྡོ་རྗེ་ལས་བྱུང་བའི་རྡོ་རྗེ་ཆེན་པོའི་ལྟ་བ་སྟེ་དེས་ཐམས་ཅད་གྲུབ་པར་འགྱུར་རོ། །སྨིན་མ་གྱེན་དུ་བཏེག་པས་ལྟུང་བ་སློང་པའོ་ཞེས་བྱ་བ་ལ་ལྷ་ཆེན་པོ་ལ་སོགས་པའི་སེམས་ཅན་རྣམས་དང་རི་བོ་ལ་སོགས་པའི་སྨིན་མ་གྱེན་དུ་བཏེག་པས་བསླང་བར་བྱའོ། །དཔལ་རྡོ་རྗེ་སེམས་དཔའི་མ་མཆུ་ནང་དུ་མྱང་བའི་ཚུལ་གྱིས་རང་གི་མཆུ་ནང་དུ་བཅུག་ནས་མྱང་བར་བྱ་སེ་དེ་ལྟར་ན་སྐལ་བ་བཟང་པོ་ཆེན་པོ་གྲུབ་པར་འགྱུར་རོ། །རང་གི་ལྕེ་ལ་ཡི་གེ་ཧཱུཾ་རྣམས་པར་བསམས་ལ་ཚིག་ཐམས་ཅད་སྤོར་བའི་བསམ་པས་ལྕེ་བསྐྱོད་ཅིང་བཟླས་པ་བྱ་སྟེ། དེ་ལྟར་ན་རང་གི་བདེན་པ་ཐམས་ཅད་ཀྱི་དེ་ཁོ་ན་ཉིད་གསལ་བར་མི་སླུ་བར་སྨྲ་བར་འགྱུར་རོ། །རང་གི་ལུས་ཞེས་བྱ་བ་ལ་སོགས་པ་ལ་དེ་བཞིན་དུ་ཐམས་ཅད་བྱས་ནས་གཟུགས་ཐམས་ཅད་ཡོངས་སུ་སྤོང་བའི་བསམ་པ་དང༌། འབེབས་པའི་སྦྱོར་བ་བསྒོམས་པས་བདག་ཉིད་ལ་དབབ་པར་བྱས་ཏེ་དེ་ལྟར་ན་གཟུགས་ཐམས་ཅད་ཡོངས་སུ་སྤོང་བར་འགྱུར་རོ། །དེ་བཞིན་དུ་དཔལ་རྡོ་རྗེ་སེམས་དཔའི་རྣལ་འབྱོར་བྱས་ལ་ཆོ་ག་ཐམས་ཅད་
རྗེས་སུ་སྤྱད་ནས་ཟླ་བའི་གཞལ་ཡས་ཁང་ལ་སོགས་པར་འགྲོ་བའི་ཕྱིར་རང་གི་གནས་ནས་བརྩམས་ཏེ་ཟླ་བ་ལ་སོགས་པའི་གཞལ་ཡས་ཁང་གི་མཐར་ཐུག་པའི་བར་དུ་རྡོ་རྗེའི་སྐས་ཀྱི་རིམ་པའི་ཕྲེང་བ་རྣམ་པར་བསམས་ལ་བདག་ཉིད་རྡོ་རྗེ་རྩེ་ལྔ་བར་བསམ་ཞིང་རྡོ་རྗེའི་སྐས་ཀྱི་རིམ་པའི་ཕྲེང་བ་དེས་ཟླ་བ་ལ་སོགས་པའི་གཞལ་ཡས་ཁང་དེར་འགྲོ་བར་འགྱུར་རོ། །རྡོ་རྗེ་ཐལ་མོའི་ཁ་ཊྭཱཾ་ག་ཞེས་བྱ་བ་ལ་རྡོ་རྗེ་ཐལ་མོ་བཅིངས་ནས་བདག་ཉིད་ཀྱི་སྲིན་ལག་དང་མཐེའུ་ཆུང་རྣམས་ཀྱི་རྡོ་རྗེ་ཐལ་མོ་མ་བཀྲོལ་བར་སོར་མོ་ལྷག་མ་རྣམས་ཀྱིས་ཁ་ཊྭཱཾ་ག་བྱའོ། །དེ་ནས་གཉིས་སུ་བྱས་ནས་ཁ་ཊྭཱཾ་ག་གཉིས་ཀྱི་རྡོ་རྗེ་ཁུ་ཚུར་ཞེས་བྱ་བའི་ཕྱག་རྒྱར་འགྱུར་རོ། །དངོས་གྲུབ་ཐམས་ཅད་རྡོ་རྗེ་ཁུ་ཚུར་དག་གིས་སོ་ཞེས་བྱ་བ་ལ་འདས་མ་ཐག་ཏུ་བཤད་པའི་ཁ་ཊྭཱཾ་ག་གཉིས་ཀྱིས་དཔལ་རྡོ་རྗེ་སེམས་དཔས་གསུངས་པའི་དངོས་གྲུབ་ཐམས་ཅད་གྲུབ་པ་ཡིན་ནོ། །དེ་བཞིན་གཤེགས་པའི་ཁུ་ཚུར་དག་གིས་དངོས་གྲུབ་ཐམས་ཅད་དོ་ཞེས་བྱ་བ་ལ་དེ་བཞིན་དུ་ཁ་ཊྭཱཾ་ག་གཉིས་བཅིངས་ནས་མཛུབ་མོ་གཉིས་ཀྱི་སེན་མོའི་ལོགས་སུ་མཐེ་བོང་གཉིས་ཀྱི་རྩ་བ་གཟུང་བར་བྱ་སྟེ་འདི་ནི་དེ་བཞིན་གཤེགས་པའི་ཁུ་ཚུར་གཉིས་སོ། །འདི་དག་གཉིས་དེ་བཞིན་གཤེགས་པས་གསུངས་པ་ཐམས་ཅད་གྲུབ་པར་འགྱུར་རོ། །ཐམས་ཅད་གསང་བའི་ནི་ཁྲོ་བོའི་རྡོ་རྗེ་ཁུ་ཚུར་གྱིས་སོ་ཞེས་བྱ་བ་ལ་དེ་བཞིན་དུ་ཁ་ཊྭཱཾ་ག་གཉིས་བྱས་ལ་མཛུབ་མོ་གཉིས་བསྒྲེངས་པ་སྡིགས་མཛུབ་ཀྱི་ཚུལ་དུ་གཟུང་བར་བྱ་སྟེ་འདི་ནི་ཁྲོ་བོའི་ཁུ་ཚུར་གཉིས་ཏེ་ཁྲོ་བོའི་ཁུ་ཚུར་གཉིས་པོ་འདིས་རྡོ་རྗེའི་རིགས་ལས་གསུངས་པའི་ཐམས་ཅད་གསོད་པའི་ལས་གྲུབ་པར་འགྱུར་རོ། །ཐམས་ཅད་སྦྱང་བ་ནི་པདྨའི་ཁུ་ཚུར་དག་གིས་སོ་ཞེས་བྱ་བ་ལ་དེ་བཞིན་དུ་ཁ་ཊྭཱཾ་ག་གཉིས་བྱས་ནས་མཐེ་བོ་གཉིས་ཀྱི་རྩེ་མོ་དབུས་མ་དང༌། མཛུབ་མོའི་རྩེ་མོ་གཉིས་གཟུང་བར་བྱས་ཏེ་འདིས་ཐམས་ཅད་སྦྱང་བ་ནི་པདྨའི་རིགས་གཏོགས་པས་སེམས་ཅན་ཐམས་ཅད་སྦྱང་བའོ་ཞེས་བྱ་བའི་དོན་ཏོ། །ནོར་ཐམས་ཅད་འཕྲོག་མ་ནི་ནོར་བུའི་ཁུ་ཚུར་དག་གིས་སོ་ཞེས་བྱ་བ་ལ་ཁ་ཊྭཱཾ་ག་གཉིས་བྱས་ལ་མཐེ་བོང་གི་རྩེ་མོ་དང་མཛུབ་མོའི་རྩེ་མོ་སྦྱར་བ་ནི་ནོར་བུའི་ཁུ་ཚུར་ཡིན་ནོ། །ཐམས་ཅད་འབེབས་པ་ནི་ཐམས་ཅད་འབེབས་པའི་ཁུ་ཚུར་དག་གིས་སོ་
ཞེས་བྱ་བ་ནི་ཁ་ཊྭཱཾ་ག་གཉིས་བྱས་ལ་མཐོ་བོང་གཉིས་དབུས་མ་དང་སྲིན་ལག་གི་རྩ་བར་གཟུང་བར་བྱ་སྟེ་འདི་ནི་འབེབས་པའི་ཁུ་ཚུར་རོ། །ཐམས་ཅད་གར་བྱེད་དུ་བཅུག་པ་ནི་ཁ་ཊྭཱཾ་ག་གཏོར་བའི་ཁུ་ཚུར་དག་གིས་སོ་ཞེས་བྱ་བ་ལ་དེ་བཞིན་དུ་ཁ་ཊྭཱཾ་ག་གཉིས་ཀྱི་ཁུ་ཚུར་གཉིས་དོར་བར་བྱས་ཏེ་འདིས་གར་གྱི་ཚུལ་གྱིས་ཐམས་ཅད་གར་བྱེད་དུ་གཞུག་པ་ཡིན་ནོ། །དེ་བཞིན་དུ་ཁ་ཊྭཱཾ་ག་གཉིས་བྱས་ལ་མཛུབ་མོ་གཉིས་ཀྱི་ཡང་དག་པར་སྦྱར་བའི་རྩེ་མོ་བྱས་ལ་ཁའི་ཕྱོགས་ལས་གྱེན་དུ་དག་འབྱིན་པའི་ཚུལ་དུ་དྲང་བར་བྱ་སྟེ་དེ་ལྟར་ཐམས་ཅད་སྨྲས་བཅུག་པའོ། །དེ་བཞིན་དུ་ཁ་ཊྭཱཾ་ག་གཉིས་བྱས་ལ་རང་གི་མཐེའུ་ཆུང་དང་སྲིན་ལག་གི་ནང་དུ་མཐེ་བོ་གཉིས་བཞག་ལ་མཛུབ་མོ་གཉིས་ཀྱི་རྩེ་མོ་རང་གི་མཐེ་བོང་གི་སྟེང་དུ་ཡང་དག་པར་སྦྱར་བས་གཟུང་བར་བྱ་སྟེ་འདི་ནི་བསྟན་པའི་ཁུ་ཚུར་གཉིས་ཏེ། འདིས་ཐམས་ཅད་བསྐྱོད་པར་བྱའོ། །དེ་བཞིན་དུ་ཁ་ཊྭཱཾ་ག་གཉིས་བྱས་ལ་མཛུབ་མོ་གཉིས་ཀྱི་ལྕགས་ཀྱུ་གཉིས་བྱས་ཏེ་འདིས་ཐམས་ཅད་གཞུག་པར་བྱས་པར་འགྱུར་རོ། །དེ་ནས་རྡོ་རྗེ་ཁུ་ཚུར་གཉིས་ཀྱི་ཞེས་བྱ་བ་ལ་སོགས་པ་ལ་དཀྱིལ་འཁོར་གྱི་ཕྱག་རྒྱའི་དབང་དུ་བྱས་པ་ལས་གསུངས་པའི་རྡོ་རྗེ་ཁུ་ཚུར་གཉིས་བཅིངས་ནས་ལག་པའི་སོར་མོ་རྣམས་ཀྱིས་པི་ཝང་རྡུང་བའི་ཚུལ་བྱས་ན་ཐམས་ཅད་རྗེས་སུ་ཆགས་པར་བྱའོ། །གླིང་བུ་འབུད་པའི་ཚུལ་གྱིས་ཐམས་ཅད་དབང་དུ་བྱེད་པའོ། །རྫ་རྔ་རྡུང་བའི་ཚུལ་གྱིས་ཐམས་ཅད་འབེབས་པའོ། །མུ་ཀུ་ད་རྡུང་བའི་ཚུལ་གྱིས་རིམས་ཐམས་ཅད་ལྡོག་པའོ། །ཆ་ལང་རྡུང་བའི་ཚུལ་གྱིས་དུག་ཐམས་ཅད་ལྡོག་པའོ། །རྔ་བོ་ཆེ་རྡུང་བའི་ཚུལ་གྱིས་སྦྱར་བའི་དུག་ཐམས་ཅད་བཟློག་པའོ། །རྔ་ཟླུམ་རྡུང་བའི་ཚུལ་གྱིས་གདོན་ཐམས་ཅད་ལས་གྲོལ་བའོ། །རྔ་པ་ཏ་ཧ་རྡུང་བའི་ཚུལ་གྱིས་ཐམས་ཅད་གསོད་པའོ། །འགུན་ཛ་རུང་བའི་ཚུལ་གྱིས་འཐབ་མོ་ལས་རྣམ་པར་རྒྱལ་བའོ། །ཏི་མ་ལ་རྡུང་བའི་ཚུལ་གྱིས་ཕུན་སུམ་ཚོགས་པ་ཐམས་ཅད་གྲུབ་པར་འགྱུར་རོ། །དེ་ལྟར་རས་རིས་དཀྱིལ་འཁོར་གྱི་ལས་བརྒྱ་སྒྲུབ་པར་བྱེད་པའི་ཕྱག་རྒྱ་བསྟན་ནས། ད་ནི་དེ་ཉིད་ཀྱིས་ལས་སྟོང་སྒྲུབ་པར་བྱེད་པའི་ཕྱག་རྒྱ་སྟོང་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་
གསུངས་སོ། །ཕྱག་རྒྱ་ཆེན་པོ་མཉམ་གཞག་ནས། །ཞེས་བྱ་བ་ལ་སོགས་པ་ལ་བཅོམ་ལྡན་འདས་རྡོ་རྗེ་སེམས་པའི་ཕྱག་རྒྱ་ཆེན་པོ་བཅིང་ནས་ལག་པ་གཡས་པས་བ་དན་གསུམ་པ་དང༌། གཡོན་པས་ཁ་ཊྭཱཾ་བཅིངས་ནས་འདས་མ་ཐག་ཏུ་བཤད་པའི་ལས་བརྒྱ་པོ་དེ་བསྒྲུབ་པར་བྱའོ། །དེ་ལྟར་གར་ལས་བྱུང་བའི་ལས་ཀྱི་ཕྱག་རྒྱ་བརྒྱ་པོ་བསྟན་ནས་ད་ནི་གསང་བའི་ལྕགས་ཀྱུའི་ལས་བརྒྱ་བསྒྲུབ་པ་བསྟན་པའི་ཕྱིར་བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་ཏེ། གསང་བའི་ལྕགས་ཀྱུ་བཅིངས་ནས་འདས་མ་ཐག་ཏུ་བཤད་པའི་ལས་བརྒྱ་པོ་དེ་ཉིད་བསྒྲུབ་པར་བྱའོ། །རྡོ་རྗེ་བསྡམས་པ་བཅིངས་ནས་རྡོ་རྗེ་བསྡམས་པའི་ནང་དུ་ཅི་འདོད་པའི་སོར་མོ་ཐམས་ཅད་བསྐྱོད་ཅིང་ལས་བརྒྱ་སྒྲུབ་པར་བྱེད་དེ་གསུམ་པའོ། །རྡོ་རྗེ་གར་ལས་བྱུང་བའི་ཁ་སྦྱོར་གྱི་ཐལ་མོ་སྤྱི་བོར་གཟུང་ཞིང་ལས་བརྒྱ་པོ་དེ་ཉིད་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་ཀྱི་དབང་པོ་རྣམས་ཀྱི་དེའི་ཚུལ་བཟུང་ཞིང་བསྒྲུབ་པར་བྱ་སྟེ་བཞི་པའོ། །བཅོམ་ལྡན་འདས་རྡོ་རྗེ་སེམས་པའི་ལས་ཀྱི་ཕྱག་རྒྱ་རྡོ་རྗེ་བསྙེམས་པ་སྟེ། དེ་བཅིངས་ནས་ལག་པ་གཡས་པས་གར་བྱ་ཞིང་ལས་བརྒྱ་པོ་དེ་ཉིད་བསྒྲུབ་པར་བྱ་སྟེ་འདི་ནི་ལྔ་པའོ། །དེ་བཞིན་དུ་བཅོམ་ལྡན་འདས་ཀྱི་རྣལ་འབྱོར་བྱས་ལ་རྡོ་རྗེ་ཐལ་མོ་བཅིངས་ནས་ལས་བརྒྱ་བསྒྲུབ་པར་བྱས་ཏེ་འདི་ནི་དྲུག་པའོ། །མདའ་ལྔ་བསྡུས་པ་བཅིང་ལས་རྣམ་པར་འགྱུར་བ་མེད་པར་དེས་གཟུང་ཞིང་ལས་བརྒྱ་བསྒྲུབ་པར་བྱ་སྟེ། ཕྱག་རྒྱ་བཅིངས་པ་མེད་པ་སྐུ་གསུང་ཐུགས་ཀྱིར་དོ་རྗེ་རྣམས་ཀྱི་ལས་བརྒྱ་པོ་དེ་ཉིད་བསྒྲུབ་པར་བྱ་སྟེ་འདི་ནི་ལས་བརྒྱ་པོ་བརྒྱད་པའོ། །འདིས་ནི་འདི་ལྟར་བཤད་པར་འགྱུར་ཏེ། བསྒོམ་པ་ཁོ་ན་གཙོ་བོར་གྱུར་པ་ཡིན་གྱི་ཕྱག་རྒྱ་ནི་མ་ཡིན་ནོ་ཞེས་བྱ་བའོ། །རྡོ་རྗེ་ཐལ་མོ་བཅིངས་ནས་ཁ་ཊྭཱཾ་ག་གཉིས་བྱས་ཏེ། གར་བྱ་ཞིང་ཡི་གེ་ཧཱུཾ་གི་གླུའི་བཟླས་པ་བྱས་ཏེ་འདིས་ཀྱང་ལས་བརྒྱ་པོ་དེ་ཉིད་བསྒྲུབ་པར་བྱ་སྟེ་འདི་ནི་དགུ་པའོ། །རྡོ་རྗེ་ཁུ་ཚུར་གཉིས་ཀྱི་ལག་པའི་སོར་མོ་རྣམས་ཀྱི་པི་ཝང་རྡུང་བའི་ཚུལ་གྱིས་ལས་བཅུ་པའོ། །གླིང་བུ་རྡུང་བའི་ཚུལ་གྱིས་བཅུའོ། །རྫ་རྔ་རྡུང་བའི་ཚུལ་གྱིས་བཅུའོ། །ཀུ་མུ་ད་རྡུང་བའི་ཚུལ་གྱིས་བཅུའོ། །ཆ་ལང་རྡུང་བའི་ཚུལ་གྱིས་བཅུའོ། །རྔ་བོ་ཆ་རྡུང་བའི་ཚུལ་གྱིས་བཅུའོ། །རྔ་ཟླུམ་
རྡུང་བའི་ཚུལ་གྱིས་བཅུའོ། །རྔ་བ་ཊ་ཧ་རྡུང་བའི་ཚུལ་གྱིས་བཅུའོ། །འགུན་རྫ་རྡུང་བའི་ཚུལ་གྱིས་བཅུའོ། །ཏི་མི་ལ་རྡུང་བའི་ཚུལ་གྱིས་སྔར་བཤད་པའི་ལས་བཅུ་པོ་ད་རྣམས་ཉིད་བསྒྲུབ་པར་བྱ་སྟེ་འདི་ནི་བརྒྱད་ཅུ་པ་ཡིན་ནོ། །དེ་ལྟར་ན་ཕྱག་རྒྱ་སྟོང་དུ་འགྱུར་བ་ཡིན་ནོ། །གསང་བའི་དཀྱིལ་འཁོར་གྱི་ཕྱག་རྒྱ་རྫོགས་སོ།། །།དེ་ལྟར་ཞེས་བྱ་བ་ལ་དེ་ལྟར་འདས་མ་ཐག་ཏུ་བཤད་པའི་ཚུལ་གྱིས་རྟོགས་པའི་ཚུལ་ཡོངས་སུ་སྤྱད་པ་ཞེས་བྱ་བ་དང་སྦྱར་རོ། །དེ་ཇི་ལྟ་བུ་ཞེ་ན། མཆོག་ཏུ་མི་འགྱུར་རོ་ཞེས་བྱ་བ་ནི་རྟག་པའོ། །མཆོག་ཏུ་ནི་དམ་པ་སྟེ། རྡོ་རྗེ་སེམས་དཔ་ལ་སོགས་པའི་དངོས་གྲུབ་ཀྱི་བདེ་བ་རྣམས་ཀྱི་བདག་པོ་སྟེ་ཁྱབ་བདག་རྟོག་པའི་ཚུལ་འདི་ནི་ཡིན་ནོ། །མཆོག་ནི་དམ་པ་སྟེ། བག་ཆགས་དང་བཅས་པའི་ཉོན་མོངས་པ་དང་བྲལ་བས་ན་རྣམ་པར་དག་པ་སྟེ། དམིགས་པ་མེད་པའི་ཐུགས་རྗེ་ཆེན་པོའི་རྡོ་རྗེའི་བདེ་བ་ལས་བྱུང་བས་ན་གྲུབ་པའོ། །རྡུལ་ཕྲ་རབ་དང་མཉམ་པའི་འཇིག་རྟེན་གྱི་ཁམས་ཐམས་ཅད་དང་མཚུངས་པའི་རིགས་ལྔའི་དངོས་གྲུབ་སྟེར་བས་ན་མཐའ་ཡས་པའི་འབྲས་བུ་དང་ལྡན་པའོ། །བསལ་བ་ནི་སྙིགས་མ་ལྔ་ཐམས་ཅད་དང་བྲལ་བའི་མཆོག་དང་པོའི་རྡོ་རྗེ་སེམས་དཔའི་མཆོག་དམ་པ་སྟེ་ཕུལ་དུ་བྱུང་བའི་སྐུ་གང་ཡིན་པ་དེའི་ཚུལ་ནི་ཐོབ་པར་བྱེད་པའི་རྒྱུའོ། །གསལ་བའི་རང་བཞིན་དུ་ཡོངས་སུ་རྫོགས་པས་ན་གསལ་བ་ཡོངས་སུ་སྤྱད་པའོ། །མཆོག་ཏུ་རྟག་པ་ཞེས་བྱ་བ་ནི་ཐོག་མ་དང་ཐ་མ་མེད་པའི་རྟོག་པའི་ཚུལ་དེ་ཉིད་ཡིན་ནོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་གསང་བའི་དཀྱིལ་འཁོར་གྱི་ཕྱག་རྒྱའི་རྒྱུད་ཐམས་ཅད་ཀྱི་རྟོག་པ་རྫོགས་སོ།། །།དེ་ལྟར་དངོས་གྲུབ་ཐམས་ཅད་ཀྱི་ཐབས་སུ་གྱུར་པའི་བདག་ལ་བྱིན་གྱིས་བརླབ་པའི་རྣལ་འབྱོར་གྱི་ཕྱག་རྒྱ་ཐམས་ཅད་སྒྲུབ་པའི་ཕྱག་རྒྱ་ཐམས་ཅད་ཀྱི་རྒྱུད་རྣམས་ཀྱི་རྟོག་པ་ཐམས་ཅད་ཀུན་ནས་བསྡུས་པའི་དྲི་བ་སྔོན་དུ་འགྲོ་བས་བསྟན་པར་བྱ་བའི་ཕྱིར། དེ་ནས་སེམས་དཔའ་ཆེན་པོ་ཀུན་ཞེས་བྱ་བ་ལ་སོགས་པ་གསུངས་ཏེ་དེ་ལ་དེ་ནས་ཞེས་བྱ་བ་ནས་བརྩམས་ཏེ། ཇི་སྲིད་མཆོག་གི་མདོ་ཞེས་བྱ་བའི་བར་གྱིས་དྲི་བའི་ཚུལ་གྱི་མདོར་བསྟན་པ་གསུངས་པ་ཡིན་ནོ། །དེ་ནས་སྟོན་པ་རྡོ་རྗེ་འཆང༌།།
ཞེས་བྱ་བ་ནས་བརྩམས་ཏེ། ཇི་སྲིད་མཆོག་ཏུ་གསང་བའི་ཆོ་གའོ། །ཞེས་བྱ་བའི་བར་དུ་གསུངས་པས་རྟོག་པ་ཐམས་ཅད་ཀུན་ནས་བསྡུས་པ་དྲིས་པའི་ལན་བཏབ་པའི་ཚུལ་གྱིས་རྒྱས་པར་བསྟན་པའོ། །དེ་ལ་ཕྱག་རྒྱ་ཆེན་པོ་ལ་སོགས་པའི་རྟོག་པའི་ངེས་པ་ཤེས་པས་སྒྲུབ་པ་པོ་རྣམས་ཀྱི་དངོས་གྲུབ་གྲུབ་པ་ཡིན་ནོ་ཞེས་བྱ་བ་བསྟན་པའི་ཕྱིར། རྣམ་རྟོག་མེད་པ་ཞེས་བྱ་བ་ལ་སོགས་པ་གསུངས་ཏེ། གཟུང་བ་དང་འཛིན་པའི་རྣམ་པར་རྟོག་པ་དང་བྲལ་བའི་དཔལ་རྡོ་རྗེ་སེམས་དཔའ་ལ་སོགས་པ་རྣམས་ནི་རྣམ་པར་རྟོག་པ་མེད་པའི་ཆོས་རྣམས་སོ། །རྣམ་པར་རྟོག་པ་མེད་པའི་ཆོས་དེ་དག་ལས་སེམས་ཅན་རྣམས་ཀྱི་རྡོ་རྗེ་སེམས་དཔའ་ལ་སོགས་པའི་དངོས་གྲུབ་ཀྱི་དོན་དུ་ཕྱོགས་བཅུ་ཀུན་དུ་བརྟག་པ་ནི་སེམས་ཅན་དོན་ནི་ཡོངས་སུ་བརྟག་པ་སྟེ། རྟག་ཏུ་རྡོ་རྗེ་དྲིལ་འཆང་ཞིང༌། །དངོས་གྲུབ་མཆོག་ནི་བསྒྲུབ་བྱ་སྟེ། །བདག་བྱིན་བརླབ་སོགས་སྒྲུབ་པ་པོས། །ཞེས་བྱ་བའི་རྣམ་པར་རྟོག་པའོ་ཞེས་བྱ་བའི་དོན་ཏོ། །དེ་ནས་རྟོག་པ་ཀུན་བཤད་དེ། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་སྤྱོད་ཡུལ་དུ་སེམས་ཅན་གྱི་དོན་ཡོངས་སུ་རྟོགས་པ་སྟེ་ཐམས་ཅད་དགུག་པ་ལ་སོགས་པ་སྟོན་པར་བྱེད་པའི་སྒྲའི་ཚོགས་དཔལ་རྡོ་རྗེ་སེམས་དཔའ་ཡང་དག་པར་གསུངས་པ་ནི་ཀུན་དུ་རབ་ཏུ་གསུངས་པ་ནི་ཡིན་ནོ། །དེ་ཅིའི་ཕྱིར་ཞེ་ན། རྟོག་པ་ཐམས་ཅད་ཡོངས་སུ་དག་ཕྱིར་རོ་ཞེས་བྱ་བ་ལ་སྒྲུབ་པ་པོའི་གཟུང་བ་དང་འཛིན་པ་ལ་སོགས་པའི་རྣམ་པར་རྟོག་པ་རྣམས་སྦྱང་བའི་ཕྱིར་རོ། །དེ་ལྟར་ན་རྟོག་པའི་དོན་གྱི་རྒྱུད་བསྟན་ནས་ད་ནི་རྒྱུད་ཕྱི་མ་ཤེས་པས་དངོས་གྲུབ་ཐོབ་པ་ཡིན་ནོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ནས་རྒྱུད་ཕྱི་མ་ཇི་ལྟར་ཡིན་ཞེས་བྱ་བ་གསུངས་ཏེ་དང་པོའི་སྦྱོར་བ་ལ་སོགས་པ་སྟོན་པར་བྱེད་པའི་སྒྲའི་ཚོགས་ནི་རྒྱུད་དོ། །སྐལ་བ་བཟང་པོ་ལ་སོགས་པ་ལས་སྔར་དང་ད་ལྟར་བྱུང་བའི་རྒྱུད་རང་བཞིན་དུ་རྟག་ཏུ་གནས་པས་ན་ཕྱི་མ་སྔ་མར་ཡང་དག་འབྱུང་བའོ། །རྡོ་རྗེ་དང་དྲིལ་བུ་དང་ཕྱག་རྒྱ་ནི་དེ་ཁོ་ན་ཉིད་དོ། །ལྷ་མོ་བཞི་ཕྲེང་གི་དབུས་ན་བཞུགས་པའི་རྡོ་རྗེ་སེམས་དཔའི་སྐུའི་གསང་བ་ནི་གསང་བའོ། །དེ་ཉིད་ཤིན་ཏུ་རྣལ་འབྱོར་གྱི་ཚུལ་གྱིས་གསང་བའོ། །ཕྱི་མ་དང་བཅས་ཞེས་བྱ་བ་ནི་ཕུལ་དུ་བྱུང་བའི་རྒྱུད་ཅེས་བྱ་བའི་དོན་ཏེ་དེ་ཉིད་བདག་གི་འདོད་པ་
ཡིན་གྱི་གཞན་ནི་མ་ཡིན་ནོ་ཞེས་བྱ་བ་ཚིག་གི་ལྷག་མའོ། །དེ་ལྟར་རྒྱུད་ཕྱི་མ་བསྟན་ནས། ད་ནི་དང་པོའི་གནས་ཞེས་པ་བསྟན་པར་བྱ་བའི་ཕྱིར་དང་པོའི་གནས་ཤེས་པ་ཞེས་བྱ་བ་གསུངས་ཏེ་ད་ལྟར་བྱུང་བའི་རང་བཞིན་གྱི་ཕུལ་དུ་བྱུང་བ་དང་དཔག་ཏུ་མེད་པའི་གཟུགས་ཀྱི་གནས་པས་ན་རབ་ཏུ་གནས་པའོ། །དེ་ཡང་གང་དུ་གནས་ཤེ་ན། ནམ་མཁའ་ཀུན་ལ་ཞེས་བྱ་བ་གསུངས་སོ། །དང་པོའི་རྡོ་རྗེ་དང་རིན་པོ་ཆེ་དང༌། པདྨ་དང༌། སྣ་ཚོགས་རྡོ་རྗེ་རྣམས་ཀྱི་རྫོགས་པ་ནི་རྡོ་རྗེ་ཀུན་དངོས་གྲོང་ཁྱེར་རོ། །བདེ་བ་ཡང་ཡིན་ལ་ཆེན་པོ་ཡང་དེ་ཉིད་ཡིན་པས་ན་བདེ་བ་ཆེན་པོ་སྟེ། དེས་ཉམས་དགའ་བ་ཆེན་པོ་ནི་ཡིད་དང་རྗེས་སུ་མཐུན་པའོ། །གྲོང་ཁྱེར་ནི་དཀྱིལ་འཁོར་རོ། །དེ་ཉིད་མཆོག་སྟེ་ཐོག་མ་དང་ཐ་མ་མེད་པའོ། །ད་ནི་ཐོག་མ་དང་ཐ་མ་མེད་པ་ཤེས་པས་དངོས་གྲུབ་ཐོབ་པ་ཡིན་ཞེས་བྱ་བ་བསྟན་པར་བྱ་བའི་ཕྱིར། དེ་ལ་ཐོག་མ་དང་ཐ་མ་མེད་པའི་རྡོ་རྗེ་སེམས་དཔའ་ཇི་ལྟར་ཡིན་ཞེས་བྱ་བ་གསུངས་སོ། །ནམ་མཁའ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །རྡོ་རྗེ་ཆེན་པོའི་དེ་བཞིན་ཉིད་དང་རོ་གཅིག་པར་ཤེས་པ་ཡང་རྡོ་རྗེ་ཆེན་པོའོ། །དེའི་བཞིན་ནི་དེའི་དངོས་པོ་སྟེ་ཐོག་མ་དང་ཐ་མ་མེད་པའི་ཞེས་བྱ་བ་བརྗོད་པ་ཡིན་ནོ། །ད་ནི་རྡོ་རྗེ་སེམས་དཔའ་ཤེས་པས་དངོས་གྲུབ་ཐོབ་པ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། དེ་ནས་བཅོམ་ལྡན་འདས་དེ་གང་ཡིན་ཞེས་བྱ་བ་གསུངས་སོ། །ཀུན་གྱི་དམ་པ་དངོས་གྲུབ་ཆེ་བ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་བོ། །དེ་ཉིད་དབང་ཕྱུག་དམ་པ་སྟེ་བག་ཆགས་དང་བཅས་པའི་ཉོན་མོངས་པ་དང་བྲལ་བའི་ཐུགས་བྱིན་གྱིས་བརླབ་པའོ། །དེའི་སྐུའི་རང་བཞིན་ཅན་གྱི་ལྷ་ནི་ལྷག་པའི་ལྷའོ། །ལྷག་པའི་ལྷ་ཉིད་ནི་ལྷག་པའི་ལྷ་ཁོ་ན་སྟེ་དམིགས་པ་མེད་པའི་ཐུགས་རྗེ་ཆེན་པོ་ལས་བྱུང་བའི་བཅོམ་ལྡན་འདས་རྡོ་རྗེ་སེམས་དཔའི་སྐུའི་གསང་བའོ་ཞེས་བྱ་བའི་དོན་ཏོ། །རྒྱལ་པོ་རྡོ་རྗེ་འཆང་ཆེན་པོ། རབ་ཏུ་དགའ་བ་མི་འགྱུར་མཆོག །ཅེས་བྱ་བ་ལ་དེ་ལྟར་འདས་མ་ཐག་ཏུ་བཤད་པའི་མཚན་ཉིད་ཅན་ནི་བཅོམ་ལྡན་འདས་རྡོ་རྗེ་འཆང་ཆེན་པོ་ཡིན་ཏེ། ས་དམའ་བ་ལ་གནས་པའི་བྱང་ཆུབ་སེམས་དཔའ་ནི་མ་ཡིན་ནོ། །བྱང་ཆུབ་སེམས་དཔའ་
ཐམས་ཅད་ཟིལ་གྱིས་མནན་ནས་ནམ་མཁའི་ཁམས་ཐམས་ཅད་ལ་རྟག་ཏུ་གནས་པའི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱི་མཛེས་པས་ན་རྒྱལ་པོའོ། །ཟག་པ་མེད་པའི་བདེ་བ་དང་ཡིད་བདེ་བའི་རང་བཞིན་ཡིན་པས་ན་རབ་ཏུ་དགའ་བའོ། །རྟག་པས་ན་མི་འགྱུར་མཆོག་སྟེ་དེ་ལྟ་བུ་རྡོ་རྗེ་སེམས་དཔར་བརྗོད་པ་ཡིན་ནོ། །ད་ནི་དགའ་བ་ཆེན་པོ་ཉིད་ཤེས་པས་དངོས་གྲུབ་ཐོབ་པ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། དེ་ལ་བཅོམ་ལྡན་འདས་དགའ་བ་ཆེན་པོ་ཉིད་ཇི་ལྟར་ཡིན་ཞེས་བྱ་བ་གསུངས་ཏེ། བག་ཆགས་དང་བཅས་པའི་ཉོན་མོངས་པ་དང་བྲལ་བས་སྐྱོན་མེད་པའོ། །རང་བཞིན་ལས་གཡོ་བར་མི་འགྱུར་བས་ན་རྟག་པའོ། །ཕྱི་མའི་མཐར་ཐུག་གི་བར་དུ་གཟུགས་ཐམས་ཅད་སྟོན་པས་སེམས་ཅན་གྱི་དོན་མཛད་པའི་ཕྱིར་ན་ཤིན་ཏུ་ཆགས་པས་ཐམས་ཅད་རྗེས་སུ་ཆགས་པར་མཛད་པའོ། །དེ་ཁོ་ན་ཉིད་འདིའི་གསང་བ་ནི་ཐུན་མོང་མ་ཡིན་པའི་བཅོམ་ལྡན་འདས་རྡོ་རྗེ་སེམས་དཔའ་ནི་ཆགས་པ་ཆེན་པོའོ། །ཆེན་པོ་ནི་ཆོས་ཀྱི་དབྱིངས་དང་སེམས་ཅན་གྱི་དོན་ཏེ་དེ་ལ་དགྱེས་པས་ན་དགའ་བ་ཆེའོ། །ཀུན་དུ་བཟང་པོ་ཉིད་ཤེས་པས་ཀྱང་གྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། དུས་ཐམས་ཅད་དུ་ཆགས་པ་དང་བཅས་པ་བྲལ་བས་ན་ཤིན་ཏུ་དག་པའོ། །བྱང་ཆུབ་སེམས་དཔའ་ཐམས་ཅད་ལ་སོགས་པ་རྣམས་ཀྱི་བྱང་ཆུབ་ཆེན་པོའི་རང་བཞིན་གྱི་མཆོག་ཡིན་པས་ན་ཀུན་གྱིས་མཆོག་གོ །སྐལ་བཟང་པོ་ལ་སོགས་པ་ལས་ཀྱང་སྔར་རྟག་ཏུ་གཟུང་བ་དང་འཛིན་པའི་རྣམ་པ་རྟོག་པ་དང་བྲལ་བས་ན་འདོད་ཆགས་གདོད་ནས་གྲོལ་བའོ། །དངོས་པོ་ཐམས་ཅད་ཇི་ལྟ་བ་བཞིན་གནས་པ་དེ་བཞིན་དུ་མཁྱེན་པ་དང་དེ་བཞིན་དུ་གཞན་རྣམས་ལའང་སྟོན་པས་ན་དེ་བཞིན་གཤེགས་པའོ། །གདུལ་བྱ་རྣམས་ལ་ཀུན་ནས་བཟང་པོ་འདི་ལས་བྱུང་བས་ན་ཀུན་དུ་བཟང་པོའོ། །བྱང་ཆུབ་ཀྱི་རང་བཞིན་གྱིས་སེམས་ནི་བྱང་ཆུབ་སེམས་དཔའོ། །ཆོ་ག་མཆོག་ཅེས་བྱ་བ་ནི་མཆོག་གི་རང་བཞིན་གྱི་ཀུན་དུ་བཟང་པོ་ཞེས་བྱ་བར་བརྗོད་པ་ཡིན་ནོ། །རྡོ་རྗེ་བསྙེམས་པའི་བདག་པོ་ཉིད། །ཅེས་པས་ཀྱང་གྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར། དེ་ལ་རྡོ་རྗེ་བསྙེམས་པའི་བདག་པོ་
བཅོམ་ལྡན་འདས་ཇི་ལྟར་ཡིན་ཞེས་བྱ་བ་གསུངས་ཏེ། ཀུན་མཆོག་དངོས་གྲུབ་ཆེན་པོའོ། །དབང་ཕྱུག་ཆེན་པོའི་ཕྱག་རྒྱའི་མཆོག །ཅེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔའི་སྐུའི་ཕྱག་རྒྱ་སྟེ། བྱེད་པ་པོར་གྱུར་པ་དེ་དང་བྱེད་པར་འགྱུར་བའི་རྡོ་རྗེ་དབང་ཕྱུག་སྟེ་བག་ཆགས་དང་བཅས་པའི་ཉོན་མོངས་པ་དང་བྲལ་བའི་དེ་བཞིན་གཤེགས་པ་ཐམས་ཅད་ཀྱི་བདེ་བ་དང་ཡིད་བདེ་བའི་རང་བཞིན་ཅན་གྱི་གསང་བ་ལྔ་ཤེས་པའི་ཕྱི་མའི་མཐར་ཐུག་པའི་བར་དུ་བར་མཆོད་པས་སྐྱེད་ཅིང་མངོན་དུ་བྱེད་པ་ནི་རྡོ་རྗེ་དབང་ཕྱུག་ཆེར་བསྟོད་པའོ། །རྒྱུད་དེ་ཉིད་ཀྱི་ཕྱིར་རྡོ་རྗེ་བསྙེམས་པ་ནི་བཅོམ་ལྡན་འདས་རྡོ་རྗེ་སེམས་དཔའི་ཕྱག་རྒྱ་ཆེན་པོ་སྟེ། དེའི་བདག་པོ་ནི་གཉིས་སུ་མེད་པའི་ཡེ་ཤེས་ཀྱི་རང་བཞིན་ཅན་གྱི་རྡོ་རྗེ་སེམས་དཔའོ། །བཅོམ་ལྡན་རྡོ་རྗེ་བསྙེམས་མའི་རང་བཞིན་གྱི་རིག་པའི་ལྷ་མོའི་བདག་པོ་ཡིན་ནོ་ཞེས་བྱ་བ་ལ་བདག་པོའི་སྒྲའི་གཉིས་པ་བསྟན་ཏོ། །ད་ནི་སེམས་ལ་སོགས་པ་ཤེས་པས་གྲུབ་པ་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར། དེ་ནས་མཆོག་ཏུ་ཞེས་བྱ་བ་གསུངས་ཏེ་རང་རིག་པའི་རང་བཞིན་ཉིད་ཀྱིས་བསམ་པར་མི་ནུས་པའི་ཕྱིར་བསམ་གྱིས་མི་ཁྱབ་པ་སྟེ། བྱང་ཆུབ་སེམས་ནི་རྟག་བརྟན་པ། །ཞེས་བྱ་བ་དང་སྦྱར་རོ། །དེ་བཞིན་ཉིད་དང་རོ་གཅིག་པ་ཉིད་ཀྱིས་ཐམས་ཅད་དུ་འགྲོ་བས་ན་རྒྱ་ཆེ་བའོ། །རྒྱ་མཚོ་ཆེན་པོ་བཞིན་དུ་ཤེས་པས་གཞན་གྱི་ཤེས་རབ་ཀྱིས་འདུག་པར་མི་ནུས་པས་ན་ཟབ་མོའོ། །རྡོ་རྗེ་སེམས་དཔའ་ལ་སོགས་པའི་དངོས་གྲུབ་རྣམས་ནི་དངོས་གྲུབ་ཐམས་ཅད་དེ། དེ་དག་གིས་གདུལ་བྱ་རྣམས་ལ་བདེ་བ་གང་འབྱུང་བ་དེ་ནི་དངོས་གྲུབ་ཐམས་ཅད་ཀྱི་བདེ་བ་རྣམས་སོ། །དེ་རྣམས་ཀྱི་མི་འགྱུར་བ་ནི་རང་གི་སྐྱེ་བའི་རྒྱུའོ། །སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་འབྲང་བས་ན་ཐམས་ཅད་ལ་ཁྱབ་པའོ། །གསེར་དང་ནམ་མཁའ་དང་ཆུའི་ཁམས་བཞིན་དུ་རང་བཞིན་གྱིས་དག་པས་དྲི་མ་མེད་པའོ། །བྱང་ཆུབ་ཀྱི་མཚན་ཉིད་ཅན་གྱི་སེམས་ནི་བྱང་ཆུབ་ཀྱི་སེམས་སོ། །བདག་ཉིད་བརྟན་པ་ནི་མི་ཕྱེད་པའོ་ཞེས་བྱ་བ་ནི་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དེ་ནས་འདིའི་ལས་ཀྱི་ཁྱད་པར་ཞེས་བྱ་བ་ལ་སེམས་ཅན་ཐམས་ཅད་ཀྱི་རྒྱུད་ཀྱི་རྗེས་སུ་འབྲང་
པའི་བྱང་ཆུབ་ཆེན་པོའི་མཚན་ཉིད་ཅན་གྱི་བྱང་ཆུབ་སེམས་འདི་མངོན་དུ་བྱ་བའི་ཕྱིར། བསྒོམ་པའི་ཁྱད་པར་འདི་ཡིན་ནོ། །ཞེས་བྱ་བའི་དོན་ཏོ། །སེམས་ཉིད་བརྟན་པ་ཉིད་སེམས་དཔའ། །ཞེས་བྱ་བ་ལ། སེམས་ཅན་ཐམས་ཅད་ཀྱི་རང་རིག་པའི་རང་བཞིན་ཅན་གྱི་སེམས་གང་ཡིན་པ་དེ་ཉིད་ནི་གཟུང་བ་དང་འཛིན་པའི་རྣམ་པར་རྟོག་པས་མི་གཡོ་བ་ཉིད་ཀྱི་ཕྱིར་སེམས་དཔའ་ནི་རྡོ་རྗེ་སེམས་དཔའ་སྟེ། དེ་བཞིན་ཉིད་དང་རོ་གཅིག་པའི་སེམས་སོ་ཞེས་བྱ་བའི་དོན་ཏོ། །ཏིང་ངེ་འཛིན་དེ་ལ་མཉམ་པར་གཞག་ཅེས་བྱ་བ་དེ་ལ་མཉམ་པར་གཞག་པ་ནི་ཏིང་ངེ་འཛིན་ཏེ་སེམས་རྩེ་གཅིག་པ་ཉིད་དོ། །སེམས་ཅན་ཐམས་ཅད་ཀྱི་སེམས་དེ་ཉིད་མཉམ་པར་གཞག་པའི་ཕྱིར། དེ་བཞིན་ཉིད་ཀྱི་རྣམ་པ་ཅན་གྱི་སེམས་རྩེ་གཅིག་པ་ཉིད་ཀྱི་རྣལ་འབྱོར་ནི་ཏིང་ངེ་འཛིན་དུ་བརྗོད་པ་ཡིན་ནོ། །རྣམ་ཤེས་ལས་ནི་རྡོ་རྗེ་ཀུན། །ཞེས་བྱ་བ་ལ་རྣམ་པར་ཤེས་པས་ན་རྣམ་ཤེས་ཏེ། ཟླ་བའི་དཀྱིལ་འཁོར་དང༌། སེམས་དཔའི་རྡོ་རྗེ་དང༌། རྡོ་རྗེའི་བདག་ཉིད་དང་ཡོངས་སུ་གཅོད་པའི་རྣམ་པ་ཅན་གྱི་ཡིད་ཀྱི་རྣམ་པར་ཤེས་པའོ། །དེ་རྣམ་པར་ཤེས་པ་ལས་སེམས་དཔའི་རྡོ་རྗེའི་དངོས་པོ་ནི་སེམས་དཔའ་རྡོ་རྗེ་ཉིད་དེ་སེམས་ཅན་ཐམས་ཅད་ཀྱི་སེམས་དེ་སེམས་དཔའི་རྡོ་རྗེའི་དེ་ཉིད་དུ་གྱུར་པ་ཡིན་ནོ། །རྡོ་རྗེ་ལས་ནི་རྡོར་འཛིན་བྱུང༌། །ཞེས་བྱ་བ་ལ་རྡོ་རྗེ་དང་དྲིལ་བུ་འཛིན་པའི་སེམས་དཔའི་སྐུ་བསྐྱེད་པར་འགྱུར་རོ། །འདིས་ནི་འདི་ལྟར་འཆད་པར་འགྱུར་ཏེ། སྔ་མ་བཞིན་དུ་སྡིག་པ་དྲལ་བའི་མཐར་ཐུག་པའི་ཆོ་ག་རྗེས་སུ་སྤྱད་ནས་རང་གི་སྙིང་གར་གནས་པའི་རྡོ་རྗེའི་དབུས་སུ་རྡོ་རྗེ་རྣམ་པར་བསམས་ལ་དེ་ཉིད་ཡིད་ཀྱིས་བརྗོད་ཅིང་ཆོས་ཐམས་ཅད་བདག་མེད་པར་བསྒོམ་པར་བྱ་སྟེ། དེའི་རྗེས་ལ་ནམ་མཁའི་ཕྱོགས་སུ་དབྱངས་བཅུ་དྲུག་དང་བཅས་པའི་ཡི་གེ་ཧཱུཾ་ལས་རང་གི་སེམས་ཟླ་བའི་དཀྱིལ་འཁོར་གྱི་རྣམ་པ་ཅན་དུ་བསམ་པར་བྱའོ། །དེའི་སྟེང་དུ་ཀ་ལ་སོགས་པ་གསལ་བྱེད་ཀྱི་ཡི་གེ་དང་བཅས་པའི་ཡི་གེ་ཧཱུཾ་ལས་ཟླ་བའི་དཀྱིལ་འཁོར་གཉིས་པའོ། །དེ་ཡང་ཡི་གེ་ཧཱུཾ་དང་བཅས་པའི་དང་པོའི་རྡོ་རྗེ་རྩེ་ལྔ་པ་སྟེ་རྡོ་རྗེ་ལ་ཡི་གེ་ཧཱུཾ་རྣམ་པར་བསམས་ལ། བཛྲོད་ཧཱུཾ་ཞེས་བྱ་བ་བརྗོད་ཅིང་བསྒོམ་པར་བྱའོ། །དེ་ནས་སེམས་དཔའ་བྱིན་གྱིས་
བརླབ་པའི་སྦྱོར་བས་རྡོ་རྗེ་དེ་ཉིད་རྡོ་རྗེ་སེམས་དཔའི་བདག་ཉིད་དུ་བསྒོམ་པར་བྱ་སྟེ། དེ་ལྟར་ན་སེམས་ཅན་གྱི་སེམས་དེ་རྡོ་རྗེ་སེམས་དཔའ་ཉིད་དུ་འགྱུར་བ་ཡིན་ནོ། །དེ་ལྟར་ན་སེམས་དང་སེམས་དཔའ་དང་ཏིང་ངེ་འཛིན་དང་རྡོ་རྗེ་དང་རྡོ་རྗེ་འཆང་ཞེས་བྱ་བ་རྣམས་བསྟན་ནས་ད་ནི་རྡོ་རྗེ་འཆང་ཆེན་པོ་ཤེས་པས་གྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར། དེ་ལ་ཇི་ལྟར་ན་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་སེམས་དཔའ་བྱིན་གྱིས་བརླབ་པའི་སྦྱོར་བ་བཤད་ཟིན་ཏོ། །ནིའི་སྒྲ་ནི་ངེས་པར་གཟུང་བ་སྟེ་སེམས་དཔའ་བྱིན་གྱི་བརླབ་པའི་སྦྱོར་བ་ཁོ་ནའོ། །བདག་ལ་བྱིན་བརླབ་མཆོག་སྒྲུབ་པ། །ཞེས་བྱ་བ་ལ་སེམས་དཔའ་བྱིན་གྱིས་བརླབ་པའི་སྦྱོར་བ་གང་ཡིན་པ་དེ་ཉིད་བདག་ལ་བྱིན་གྱིས་བརླབ་པའི་མཆོག་སྒྲུབ་པ་དེ་རྫོགས་པར་བྱེད་ཅིང་བདག་ཉིད་རྡོ་རྗེ་འཆང་ཆེན་པོ་སྟེ་ཉིན་རེ་ནི་ཉིན་ཞག་རེ་རེ་སེམས་དཔའ་བྱིན་གྱིས་བརླབ་པའི་སྦྱོར་བ་དེས་རྡོ་རྗེ་སེམས་དཔའ་ཉིད་ཐོབ་པ་ཡིན་ནོ། །སེམས་དཔའ་འབྱིན་གྱིས་བརླབ་པའི་སྦྱོར་བ་འདིས་རྟག་ཏུ་བདག་ཉིད་རྡོ་རྗེ་སེམས་དཔའ་ཉིད་དུ་རྫོགས་པར་བྱེད་པ་གང་ཡིན་པ་འདི་ནི་རྡོ་རྗེ་འཆང་ཆེན་པོ་ཉིད་ཡིན་ནོ་ཞེས་འཆད་བར་འགྱུར་རོ། །ཀུན་དུ་བཟང་པོའི་སྤྱོད་པ་ཤེས་པ་གྲུབ་པར་འགྱུར། །ཞེས་བྱ་བ་བསྟན་པར་བྱ་བའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་པས་ཏེ་སྙིང་སྟོབས་ཞེས་བྱ་བ་ནི་སྟོབས་ཀྱི་ལྷའི་གཟུགས་ཅན་དྲག་པོའོ། །རྡུལ་ཞེས་བྱ་བ་ནི་འདོད་པའི་གཟུགས་ཅན་ཚངས་པའོ། །མུན་པ་ཞེས་བྱ་བ་ནི་དཔྱིད་ཀྱི་ལྷའི་གཟུགས་འཛིན་པའི་ཁྱབ་འཇུག་གོ །གསུམ་པོ་དེ་དག་གི་གཟུགས་འཛིན་པས་དེ་དག་གིས་འདུལ་བའི་སེམས་ཅན་གྱི་དོན་མཛད་པའི་ཕྱིར་ཀུན་དུ་བཟང་པོ་ཡིན་ཏེ། རྒྱུ་དེའི་ཕྱིར་བདག་ནི་རྡོ་རྗེ་འཆང་ཆེན་པོ་བྱང་ཆུབ་ཀྱི་སྤྱོད་པ་ཡིན་ནོ། །སེམས་ཅན་རྣམས་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྫོགས་པའི་ཕྱིར་སྤྱོད་པ་ནི་བྱང་ཆུབ་ཀྱི་སྤྱོད་པ་སྟེ་ཇི་ལྟ་བ་བཞིན་དུ་སྐལ་པ་དང་ལྡན་པའི་སེམས་ཅན་འདུལ་བའི་རྗེས་སུ་འགྲོ་བ་ནི་རྗེས་སུ་མཐུན་པ་སྟེ་བཅོམ་ལྡན་འདས་རྡོ་རྗེ་འཆང་ཆེན་པོའི་རྗེས་སུ་མཐུན་པའི་སྤྱོད་པ་ཡིན་ནོ། །བཅོམ་ལྡན་འདས་རྡོ་རྗེ་འཆང་ཆེན་པོ་བདུད་ཉིད་དང༌། བདུད་ལས་རྣམ་པར་རྒྱལ་བ་ཉིད་ཤེས་
པ་དག་གིས་ཀྱང་གྲུབ་པར་འགྱུར་རོ་ཞེས་བྱ་བ་གཉིས་པོ་དེ་དག་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། སེམས་ཉིད་ཁོ་ན་བདུད་ཉིད་དེ། །ཞེས་བྱ་བ་ལ་འདིར་དོན་དམ་པར་ཕྱིའི་བགེགས་རྣམས་འདོད་པ་མ་ཡིན་ཏེ། གང་གི་ཕྱིར་དེ་རང་རིག་པ་ཙམ་དུ་ཡོད་པས་བདུད་ཀྱི་རྣམ་པར་རྟོག་པ་དང༌། འདོད་ཆགས་ལ་སོགས་པའི་རྣམ་པར་རྟོག་པ་ནི་བདུད་དེ་བདུད་ཀྱི་དངོས་པོ་ནི་བདུད་ཉིད་དེ། སེམས་ཉིད་དེ་བཞིན་གཤེགས་པའོ། །ཞེས་བྱ་བ་ལ་སེམས་ཅན་ཐམས་ཅད་ཀྱི་སེམས་དེ་ཉིད་ཆོས་བདག་མེད་པར་རྟོགས་པས་དེ་བཞིན་གཤེགས་པ་སྟེ་འདིས་བདུད་ལས་རྣམ་པར་རྒྱལ་བར་བསྟན་ཏོ། །སླར་ཡང་རྣམ་གྲངས་གཞན་གྱིས་བདག་ཉིད་བདུད་ཉིད་དུ་བསྟན་པར་བྱ་བའི་ཕྱིར། རང་སེམས་གདུལ་བར་བྱ་བའི་ཕྱིར། །བདག་ནི་བདུད་ཉིད་གྱུར་པ་ཡིན། །ཞེས་བྱ་བ་གསུངས་ཏེ། རང་གི་སེམས་ནི་རང་གི་སེམས་ཏེ་རྡོ་རྗེ་སེམས་དཔའ་ལ་སོགས་པའི་རྣལ་འབྱོར་བསྒོམ་པ་ལ་རབ་ཏུ་སྦྱོར་བའི་རྣལ་འབྱོར་སེམས་སོ། །དེ་འདུལ་བ་ནི་རྡོ་རྗེ་སེམས་དཔའ་ལ་སོགས་པའི་ཏིང་ངེ་འཛིན་རྫོགས་པས་དེའི་དོན་དུ་ཇི་ལྟ་བ་བཞིན་དུ་རབ་ཏུ་གྲགས་པའི་ལྷའི་བུའི་བདུད་ཀྱི་གཟུགས་ཉིད་བདག་གིས་ཉེ་བར་བླངས་པར་གྱུར་ན་བདག་ཉིད་བདུད་དུ་གྱུར་པ་ཡིན་ནོ། །འདིས་ནི་འདི་ལྟར་འཆད་པར་འགྱུར་ཏེ་གང་དག་བགེགས་ཀྱི་ཉེ་བར་མཚོན་པའི་དངོས་གྲུབ་འདོད་པ་དེ་རྣམས་བདུད་ཀྱི་གཟུགས་སུ་བདག་ཉེ་བར་འགྲོ་བ་ཡིན་ནོ། །ད་ནི་བྱང་ཆུབ་དང་སངས་རྒྱས་ཤེས་པ་དག་གིས་ཀྱང་གྲུབ་པར་འགྱུར་རོ་ཞེས་བྱ་བ་གཉིས་པོ་དེ་བསྟན་པར་བྱ་བའི་ཕྱིར། དེ་ལ་ཇི་ལྟར་བཅོམ་ལྡན་འདས་མངོན་པར་རྫོགས་པར་བྱང་ཆུབ་དང་སངས་རྒྱས་ཞེས་བྱ་བ་གསུངས་ཏེ། ནམ་མཁའི་དང་མཚུངས་པའི་ཆོས་ཐམས་ཅད་བསྒོམ་པ་ནི་རང་གི་སེམས་སོ་སོར་རྟོགས་པ་སྟེ། རང་གི་སེམས་སོ་སོར་རྟོགས་པ་དེ་ཁོ་ན་ཉིད་ཀྱིས་གང་ཞིག་བྱང་ཆུབ་སེམས་ཀྱི་མཆོག་གི་རྡོ་རྗེ་ཉིད་ནི་རྣམ་པར་གྲོལ་བའི་ལམ་གྱི་རང་བཞིན་ཉིད་གང་ཡིན་པ་དེ་ཉིད་བྱང་ཆུབ་ཡིན་ནོ། །དེ་ཉིད་ཉིད་ཕྱིར་སངས་རྒྱས་ཉིད། །ཅེས་བྱ་བ་ལ་གང་ཞིག་བྱང་ཆུབ་ཀྱི་སེམས་རང་གི་སེམས་སུ་སོ་སོར་རྟོགས་པས་དེ་བཞིན་ཉིད་རང་བཞིན་གཅིག་པ་ཉིད་དེ་
ནི་དེའི་རང་བཞིན་ཉིད་དོ། །དེ་ཁོ་ན་ཉིད་ཡིན་པའི་ཕྱིར་དེ་སངས་རྒྱས་ཉིད་ཡིན་ནོ། །དེ་ཁོ་ན་ཉིད་ཀྱི་ཕྱིར་སངས་རྒྱས་ཉིད་ཇི་ལྟར་ཡིན་ཞེ་ན། བདག་བྱིན་བརླབ་མཆོག་བསྒྲུབ་ཕྱིར་རོ། །ཞེས་བྱ་བ་ཟླ་བའི་དཀྱིལ་འཁོར་ལ་སོགས་པའི་བསྒོམ་པའི་རིམ་པས་བྱང་ཆུབ་ཀྱི་སེམས་ཀྱི་མཆོག་གི་རྡོ་རྗེ་སངས་རྒྱས་ཀྱི་གཟུགས་སུ་རྫོགས་པ་གང་ཡིན་པ་དེ་ནི་བདག་ལ་བྱིན་གྱིས་བརླབ་པ་མཆོག་གི་སྒྲུབ་པ་སྟེ། བྱང་ཆུབ་སེམས་ཀྱི་མཆོག་གི་རྡོ་རྗེ་དེ་ཉིད་དེའི་སངས་རྒྱས་ཉིད་ཡིན་ནོ། །ཕྱག་ན་རྡོ་རྗེ་ཉིད་ཤེས་པས་ཀྱང་གྲུབ་པ་ཡིན་ནོ་ཞེས་བྱ་བ་བསྟན་པར་བྱ་བའི་ཕྱིར། དེ་ལ་ཇི་ལྟར་བཅོམ་ལྡན་འདས་ཕྱག་ན་རྡོ་རྗེ་ཡིན་ཞེས་བྱ་བ་གསུངས་ཏེ་སྲོག་ཆགས་དང་སྲོག་ཆགས་མ་ཡིན་པ་དང་གཟུང་བ་དང་འཛིན་པའི་རྣམ་པར་རྟོག་པ་རྣམས་ཀྱིས་ཕྱེད་པར་མི་ནུས་པས་ན་མི་ཕྱེད་པའོ། །རྡོ་རྗེ་སེམས་དཔའ་ལ་སོགས་པ་རེ་རེ་བསྒོམ་པའི་ལམ་གྱི་རང་བཞིན་ཅན་ཤེས་རབ་ཀྱི་ཕ་རོལ་ཏུ་ཕྱིན་པའི་མདས་དངོས་པོ་མེད་པའི་རང་བཞིན་དུ་མངོན་དུ་བྱེད་པ་ནི་འབིགས་ཤིང་སོ་སོར་རྟོག་པའོ། །གདུག་པ་ཡང་ཡིན་ལ་ཐམས་ཅད་དེ་ཉིད་ཡིན་པས་ན་གདུག་པ་ཐམས་ཅད་དེ་འདོད་ཆགས་ལ་སོགས་པའི་ཉོན་མོངས་པ་རྣམས་དན། ལྷ་ཆེན་པོ་ལ་སོགས་པའི་སེམས་ཅན་གདུག་པ་རྣམས་སོ། །དེ་དག་གནོན་པ་ནི་ལྟུང་བར་བྱེད་པའོ། །སངས་རྒྱས་ཀུན་གྱི་དངོས་པོ་ཞེས་བྱ་བ་ནི་ཡེ་ཤེས་ལྔའི་རང་བཞིན་ནོ། །རྡོ་རྗེ་ནི་རྩེ་ལྔ་པ་སྟེ་དང་པོའི་རྡོ་རྗེའོ། །བྱང་ཆུབ་ཀྱི་སེམས་ཀྱི་ཞེས་བྱ་བ་ནི་བྱང་ཆུབ་སེམས་ཀྱི་སེམས་ཀྱི་རང་བཞིན་དང་བྱང་ཆུབ་ཀྱི་སེམས་ལས་བྱུང་བ་དང་དེ་སྟོན་པར་བྱེད་པ་དང་དེ་སྐྱེད་པའི་རྒྱུར་བདག་ཉིད་བརྟན་པ་ནི་མི་ཕྱེད་པའོ་ཞེས་བྱ་བ་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་སོ། །ཀུན་དུ་བཟང་པོ་ནི་བཤད་ཟིན་ཏོ། །ཀུན་དུ་བཟང་པོ་དེ་ལ་དུམ་བུ་གཉིས་པ་རྩ་བའི་རྒྱུད་དུ་རྒྱལ་བ་སྟེ། དེ་བཞིན་གཤེགས་པ་རྣམས་ཀྱིས་མཚོན་ཆ་དེ་ལག་ཏུ་བྱིན་པ་ཡིན་ནོ། །མཚོན་ཆ་དེ་ཅིའི་དོན་དུ་བྱིན་པ་ཡིན་ཞེ་ན། བསྟན་པ་ཐམས་ཅད་གྲུབ་པའི་ཕྱིར། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པ་མངོན་དུ་བྱ་བའི་ཕྱིར་སེམས་ཅན་རྣམས་ལ་སངས་རྒྱས་ཀྱིས་བཀའ་སྩལ་པ་ནི་བསྟན་པ་ཐམས་
ཅད་དོ། །དེ་གྲུབ་པ་ནི་རྡོ་རྗེ་སེམས་དཔའ་ལ་སོགས་པ་སྒྲུབ་པ་པོ་རྣམས་ཀྱིས་མངོན་དུ་བྱ་བ་སྟེ། དེའི་དོན་ལག་ཏུ་སྦྱིན་པ་དེའི་ཕྱིར་ཀུན་དུ་བཟང་པོ་དེ་ཉིད་ཕྱག་ན་རྡོ་རྗེ་ཞེས་བྱ་བར་བརྗོད་པ་ཡིན་ནོ། །དེ་ལྟར་ཀུན་དུ་བཟང་པོ་བསྟན་ནས་ད་ནི་དང་པོའི་རིགས་ལ་སོགས་པ་བྱུང་བ་ཤེས་པས་གྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་བཤད་ཟིན་ཏོ། །དེ་ཉིད་རིགས་རྣམས་ཀྱི་ཡུམ་མོ། །ཡབ་ནི་ཐབས་ལ་མཁས་པའོ། །ཞེས་བྱ་བ་ནི་ཐབས་ཀྱི་ཕ་རོལ་ཏུ་ཕྱིན་པའོ། །ཐབས་ཀྱི་ཕ་རོལ་ཏུ་ཕྱིན་པ་ཡབ་ཏུ་གྱུར་པ་དེ་གང་ཞེ་ན་རྡོ་རྗེ་སེམས་དཔའ་ཞེས་བྱ་བ་སྟེ་བྱང་ཆུབ་ཀྱི་སེམས་ནི་ཡབ་ཏུ་གྱུར་པ་ཡིན་ནོ་ཞེས་བྱ་བའི་དོན་ཏོ། །སེམས་ཅན་འདུལ་བའི་རྒྱུས་དེ་བཞིན་གཤེགས་པ་དང་རྡོ་རྗེ་དང་པདྨ་དང་ནོར་བུ་དང་རྡོ་རྗེ་སེམས་དཔའི་རིགས་རྣམས་བྱུང་བ་ནི་རབ་ཏུ་འབྱུང་བ་གང་ཡིན་པ་ནི་རིགས་རྣམས་སུ་བརྗོད་པ་ཡིན་ནོ། །དེ་ལྟར་རིགས་རྣམས་འབྱུང་བ་བསྟན་ནས་ད་ནི་བཅོམ་ལྡན་འདས་འདོད་པ་དང་ཐར་པའི་རང་བཞིན་དུ་ཤེས་པས་ཀྱང་དངོས་གྲུབ་ཐོབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར། དེ་ལ་ཞེས་བྱ་བ་ལ་སོགས་པ་གསུངས་ཏེ་འདོད་ཆགས་ཀྱང་ཡིན་ལ་ཆེན་པོ་ཡང་ཡིན་པས་ན་འདོད་ཆགས་ཆེན་པོའོ། །ནིའི་སྒྲ་ནི་གང་གི་ཕྱིར་གྱི་དོན་དུ་སྟེ་ཅིའི་ཕྱིར་བཅོམ་ལྡན་འདས་འདོད་ཆགས་ཆེན་པོ་ཡིན་ཞེས་བྱ་བའོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ནི་དངོས་གྲུབ་ཐམས་ཅད་དོ། །དེ་དག་རྗེས་སུ་གྲུབ་པ་ནི་རྗེས་སུ་ཆགས་པ་སྟེ་དངོས་གྲུབ་ཐམས་ཅད་རྗེས་སུ་ཆགས་པ་གང་ཡིན་པ་དེའི་ཕྱིར་བཅོམ་ལྡན་འདས་ཆགས་པ་ཆེན་པོ་ཡིན་པས་ན་འདོད་པ་ཞེས་བྱ་བའོ། །ཐར་པའི་རང་བཞིན་གྱི་བཅོམ་ལྡན་འདས་བསྟན་པར་བྱ་བའི་ཕྱིར། དངོས་གྲུབ་ཐམས་ཅད་མི་འགྱུར་བ་དེ། །བདེ་བ་ཆེན་པོ་ཞེས་བརྗོད་དོ། །ཞེས་བྱ་བ་གསུངས་སོ། །རྡོ་རྗེ་སེམས་དཔའ་ལ་སོགས་པའི་དངོས་གྲུབ་ནི་དངོས་གྲུབ་ཐམས་ཅད་དོ། །དེ་རྣམས་ཀྱི་ཐོག་པ་དང་ཐ་མ་མེད་པའི་ཆོས་ཀྱི་དབྱིངས་མངོན་དུ་བྱ་བ་གང་ཡིན་པ་དེ་ནི་མི་འགྱུར་བདེ་བའོ། །དེ་ཉི་བདེ་བ་ཆེན་པོ་ཞེས་བྱ་བར་བཅོམ་ལྡན་འདས་རྡོ་རྗེ་སེམས་དཔས་བརྗོད་པ་ནི་གསུངས་པ་ཡིན་ནོ། །དེ་ལྟར་ཐར་པའི་
རང་བཞིན་བསྟན་ནས་ད་ནི་རྣམ་པ་གསུམ་གྱི་རང་བཞིན་ཅན་གྱི་རྡོ་རྗེ་འཆང་ཆེན་པོ་ཤེས་པས་ཀྱང་གྲུབ་པར་འགྱུར་རོ་ཞེས་བྱ་བ་རབ་ཏུ་བསྟན་པར་བྱ་བའི་ཕྱིར། དེ་ལ་ཇི་ལྟར་བཅོམ་ལྡན་འདས་རྣམ་པ་གསུམ་ཞེས་བྱ་བ་གསུངས་ཏེ་འདས་པ་དང་མ་འོངས་པ་དང་ད་ལྟར་བྱུང་བའི་དུས་གསུམ་ནི་ང་ཡིན་ནོ་ཞེས་བདག་ཉིད་སྟོན་པར་མཛད་པ་ཡིན་ནོ། །ཅིའི་ཕྱིར་ཁྱེད་དུས་གསུམ་ཡིན་ཞེན་མཐའ་ཡས་ཕྱིར་ཞེས་བྱ་བ་ལ་འདས་པ་དང་མ་འོངས་པ་དང་ད་ལྟར་བྱུང་བའི་དུས་རྣམས་ཀྱི་དེ་བཞིན་ཉིད་ནི་མཐའ་ཡས་པ་ཉིད་དོ། །གང་གི་ཕྱིར་དེའི་རང་བཞིན་རྡོ་རྗེ་འཆང་ཆེན་པོ་བདག་ཡིན་པ་སྟེ་མཐའ་ཡས་པའི་རྒྱུ་དེ་ཉིད་ཀྱི་ཕྱིར་ད་ནི་དུས་གསུམ་ཡིན་ནོ། །འདས་པ་དང་མ་འོངས་པ་དང་ད་ལྟར་བྱུང་བའི་ཆོས་ཉིད་ཀྱིས་བདག་དུས་གསུམ་གྱི་དངོས་པོ་ཡིན་ནོ་ཞེས་བྱ་བའི་དོན་ཏོ། །ང་ནི་སྲིད་གསུམ་གདུལ་བྱའི་ཕྱིར། །ཞེས་བྱ་བ་ལ་འདོད་པ་དང༌། གཟུགས་དང་གཟུགས་མེད་པའི་རང་བཞིན་ཅན་གྱི་གདུལ་བྱའི་སེམས་ཅན་གདུལ་བའི་རྒྱུས་འདོད་པ་དང་གཟུགས་དང་གཟུགས་མེད་པའི་སྲིད་པའི་རང་བཞིན་དུ་བདག་ཉིད་ཀྱི་དངོས་པོ་རྫོགས་པའི་ཕྱིར་བདག་སྲིད་གསུམ་ཡིན་ནོ། །མིང་པོ་གསུམ་གྱི་གཟུགས་ཀྱིས་འདུལ་བའི་སེམས་ཅན་གྱི་དོན་དུ་མིང་པོ་གསུམ་གྱི་གཟུགས་སུ་བདག་ཉིད་ཀྱི་དངོས་པོ་རྫོགས་པར་མཛད་པས་ན་གསུམ་མཆོག་གོ །སངས་རྒྱས་དང་ཆོས་དང་དགེ་འདུན་གྱིས་སེམས་ཅན་གདུལ་བའི་ཕྱིར་དཀོན་མཆོག་གསུམ་གྱི་གཟུགས་རྫོགས་པར་མཛད་པས་ན་དཀོན་མཆོག་གསུམ་མོ། །ས་འོག་ས་སྟེངས་ས་བླའི་རང་བཞིན་དུ་བདག་ཉིད་ཀྱི་དངོས་པོ་སྟོན་བའི་ཕྱིར་དེའི་ཆོས་ཉིད་ཀྱིས་ཐམས་ཅད་དོ། །ཐམས་ཅད་ཡིན་པའི་རྒྱུ་དེ་ཉིད་ཀྱིས་འཇིག་རྟེན་གསུམ་པ་ཡིན་ནོ། །འདོད་པ་དང་གཟུགས་དང་གཟུགས་མེད་པའི་ཁམས་ཀྱི་རང་བཞིན་བདག་ཉིད་ཀྱི་དངོས་པོ་སྟོན་པའི་ཕྱིར། དེའི་ཆོས་ཉིད་ཀྱིས་ཁམས་གསུམ་པ་ཡང་པ་ཡིན་ནོ། །དེ་ལྟར་དུས་གསུམ་ལ་སོགས་པའི་དབྱེ་བས་རྣམ་པ་གསུམ་དུ་བདག་ཉིད་བསྟན་ནས་ད་ནི་དངོས་གྲུབ་ཁོ་ནའི་དོན་དུ་ཐམས་ཅད་ཉིད་ཤེས་པ་བསྟན་པའི་ཕྱིར། དེ་ལ་ཇི་ལྟར་བཅོམ་ལྡན་འདས་ཐམས་ཅད་ཇི་ལྟར་ཡིན་ཞེས་བྱ་བ་གསུངས་ཏེ། རི་བོ་ལ་སོགས་པ་སེམས་མེད་པའི་དངོས་པོ་ནི་མི་རྒྱུ་བ་
སྟེ་དེའི་རང་བཞིན་ནི་ང་ཡིན་ནོ། །དེ་ཅིའི་ཕྱིར་ཞེ་ན། བསོད་ནམས་ཀུན་མཐོ་ཆེ་བའི་ཕྱིར། །ཞེས་བྱའོ། །རྒྱུ་བ་སེམས་ཀྱི་འདུས་བྱས་ཕྱིར། །ཞེས་བྱ་བ་ལ་སོགས་པ་ནི་བཤད་ཟིན་ཏོ། །སེམས་དང་སེམས་ལ་སོགས་པའི་ཤེས་པ་སེམས་ཀྱི་འདུས་བྱས་པ་ཞེས་བྱ་བའི་མཐར་ཐུག་པ་དེ་དག་ཐམས་ཅད་རྣལ་འབྱོར་བས་བསྒོམ་པར་བྱ་བ་ཡིན་པ་དེའི་ཕྱིར། རང་གི་སེམས་ཀྱི་ལས་ཀྱི་བྱ་བ་དེ་ཁོ་ན་ཉིད་དོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་པ་ཡིན་ནོ། །དང་པོའི་གླུ་འབྱུང་བ་དང༌། དང་པོའི་གླུའི་རང་བཞིན་དང༌། ཉེ་བའི་སྙིང་པོ་དེ་ཁོ་ན་ཉིད་ཤེས་པ་རྣམས་ཀྱིས་གྲུབ་པར་འགྱུར་རོ་ཞེས་བྱ་བ་དེའི་ཕྱིར། གསུམ་པོ་དེ་དག་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། སྲིད་པ་ཤིན་ཏུ་གྲུབ་པ་ཞེས་བྱ་བ་ནི་མི་གནས་པའི་མྱ་ངན་ལས་འདས་པ་རྫོགས་པའོ། །ལོངས་སྤྱོད་རྫོགས་པའི་སྐུས་ཀུན་དུ་བཟང་པོ་ལ་སོགས་པའི་བྱང་ཆུབ་སེམས་དཔའ་ཆེན་པོ་རྣམས་ཀྱི་མངོན་པར་འདོད་པའི་དངོས་གྲུབ་རྫོགས་པ་ནི་དབང་ཕྱུག་ཆེན་པོའི་མཆོག་གི་དངོས་གྲུབ་བོ། །སྲིད་པ་ཤིན་ཏུ་གྲུབ་པ་དང་དབང་ཕྱུག་ཆེན་པོའི་མཆོག་དེ་དག་གྲུབ་པའི་ཕྱིར་མཁས་པ་སྟེ། བྱང་ཆུབ་སེམས་དཔའ་རྣམས་ཀྱིས་སེམས་ཅན་གྱི་དོན་མཛད་པས་ན་བསྐལ་པ་བཟང་པོའི་སྔོན་རོལ་དུ་དེ་རྣམས་ཉིད་ལ་བཅོམ་ལྡན་འདས་རྡོ་རྗེ་འཆང་ཆེན་པོས་གསུངས་པ་ནི་གསུངས་པར་གྱུར་པའོ། །དེ་ལྟར་དང་པོའི་གླུ་འབྱུང་བ་བསྟན་ནས་ད་ནི་དང་པོའི་གླུའི་རང་བཞིན་བསྟན་པར་བྱ་བའི་ཕྱིར། དེ་ནས་དེ་གང་ཡིན་ཞེས་བྱ་བ་གསུངས་ཏེ། འདོད་ཆགས་ཆེན་པོ་བཅོམ་ལྡན་འདས། །ཞེས་བྱ་བ་ནི་བཤད་ཟིན་ཏོ། །ཟག་པ་མེད་པའི་བདེ་བ་དང་ཡིད་བདེ་བ་སྟོན་པར་བྱེད་པའི་སྒྲའི་ཚོགས་ནི་རབ་ཏུ་དགའ་བའོ། །ཤིན་ཏུ་རྟག་པས་ན་མི་འགྱུར་བ་མཆོག་གོ །སྐྱེ་བོ་ཀུན་གྱིས་མངོན་སུམ་མ་ཡིན་པས་ན་གསང་བ་སྟེ་གསང་བ་དེ་ཉིད་ཀྱི་ཕྱིར་སྙིང་པོ་སྟེ་ངེས་པའི་ཤེས་པས་གསུངས་པ་ནི་ཡི་གེ་ཧཱུཾ་གི་རང་བཞིན་ཅན་གསུངས་པར་གྱུར་པ་སྟེ་དེ་ཉིད་མི་འགྱུར་མཆོག་སྟེ་ཡི་གེ་ཧཱུཾ་མི་འགྱུར་བའི་མཆོག་ཡིན་ནོ། །དེ་ལྟར་དང་པོའི་གླུའི་རང་བཞིན་བསྟན་ནས་ད་ནི་ཉེ་བའི་སྙིང་པོ་དེ་ཁོ་ན་ཉིད་ཤེས་པ་བསྟན་པར་བྱ་བའི་ཕྱིར། དེ་ནས་ཉེ་བའི་སྙིང་པོའི་དེ་ཁོ་ན་ཉིད་ཤེས་པ་ཞེས་བྱ་བ་གསུངས་ཏེ། དེ་ཉིད་གསང་ཞིང་གསང་བ་དང༌། །སྙིང་པོ་རབ་ཏུ་བརྗོད་
པའོ། །ཞེས་བྱ་བ་ལ་ངེས་པར་འབིགས་པའི་ཤེས་རབ་ནི་དེ་ཁོ་ན་ཉིད་དོ། །དེ་བཞིན་གཤེགས་པ་ལ་སོགས་པའི་རང་བཞིན་ཅན་གང་ཡིན་པ་དེ་ནི་རྡོ་རྗེ་ལ་སོགས་པའི་གཟུགས་ཀྱིས་བཀབ་པ་ནི་གསང་བའོ། །བཙུན་མོའི་འཁོར་དང་ཤིན་ཏུ་རྣལ་འབྱོར་གྱི་བསྒོམ་པས་དེ་ལོངས་སྤྱོད་པ་ནི་གསང་བའོ། །གསུམ་པོ་འདི་དག་ནི་སྙིང་པོ་ཞེས་བརྗོད་པ་ཡིན་ནོ། །སྙིང་པོ་འདི་རྗེས་སུ་གྲུབ་པ་ནི་བསྒོམ་པ་སྟེ། དེ་གྲུབ་པ་ནི་སྙིང་པོ་རྗེས་སུ་སྒྲུབ་པའི་ཚུལ་དུ་རྫོགས་པ་གང་ཡིན་པ་དེ་ནི་ཉེ་བའི་སྙིང་པོ་སྟེ་ཉེ་བའི་སྙིང་པོའི་དངོས་པོ་ནི་ཉེ་བའི་སྙིང་པོ་ཉིད་དུ་བཅོམ་ལྡན་འདས་རྡོ་རྗེ་འཆང་གིས་རབ་ཏུ་བརྗོད་ཅིང་གསུངས་པ་ཡིན་ནོ། །ད་ནི་བདེ་བ་ཆེན་པོའི་རྡོ་རྗེ་དོན་ཡོད་པ་ཤེས་པས་གྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། དངོས་གྲུབ་ཀུན་གྱི་མི་འགྱུར་བ་དེ་བདེ་བ་ཆེན་པོ་ཞེས་བརྗོད་དོ་ཞེས་བྱ་བ་ནི་བཤད་ཟིན་ཏོ། །དངོས་གྲུབ་ཐམས་ཅད་མི་འགྱུར་བའི་བདེ་བ་དེ་ཉིད་རྡོ་རྗེ་ནི་རྡོ་རྗེ་སེམས་དཔའ་བསྒྲུབ་པ་སྟེ་རྫོགས་པའི་ཕྱིར་འབྲས་བུ་མེད་པ་མ་ཡིན་པའི་རྒྱ་ཡིན་པས་དོན་ཡོད་པའོ། །དེ་ཉིད་མི་འདའ་བས་ན་འདའ་བར་དཀའ་བའི་དམ་ཚིག་གོ །འདི་ལྟར་འཆད་པར་འགྱུར་ཏེ་གཉིས་སུ་མེད་པའི་ཡེ་ཤེས་ཀྱི་རང་བཞིན་ཅན་གྱི་ཐར་པའི་ངོ་བོ་གང་ཡིན་པ་དེ་ནི་བཅོམ་ལྡན་འདས་རྡོ་རྗེ་སེམས་དཔའི་སྐུའི་གསང་པའི་རང་བཞིན་བསྐྱེད་པའི་རྒྱུ་ཡིན་ནོ་ཞེས་བྱ་བའོ། །དཀྱིལ་འཁོར་གྱི་དེ་ཁོ་ན་ཉིད་བསྟན་པར་བྱ་བའི་ཕྱིར་དེ་ལ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་གནས་ཞེས་བྱ་བ་ནི་ནམ་མཁའ་ཐམས་ཅད་དང་རི་རབ་ལ་སོགས་པའོ། །ཇི་ལྟར་འཁོར་ལོ་ཞེས་བྱ་བ་ནི་ཟུར་བཞི་པ་དང་སྒོ་བཞི་པ་ཞེས་བྱ་བ་ལ་སོགས་པའོ། །ཇི་ལྟར་དགོད་པ་ཞེས་བྱ་བ་ནི་སྤྲས་པ་ལ་སོགས་པའི་ཁྱད་པར་རོ། །ཇི་ལྟར་འགྲོ་བ་ཞེས་པ་ནི་རྡོ་རྗེ་སེམས་དཔའ་དང་འདོད་ཆགས་རྡོ་རྗེ་མ་ལ་སོགས་པའི་རང་བཞིན་ཅན་གྱི་འཁོར་ལོ་དགོད་པར་གྱུར་པ་གང་ཡིན་པ་དེ་དང༌། རྡོ་རྗེ་སེམས་དཔའ་ལ་སོགས་པའི་སོ་སོར་ངེས་པའི་གནས་དཀྱིལ་འཁོར་གྱི་ལྟེ་བ་ལ་སོགས་པའི་གནས་བརྟག་པར་འགྱུར་བ་གང་ཡིན་པ་དེ་བཞིན་དུ་བྲི་བའི་དབང་དུ་བྱས་པ་སྟེ་འདིར་ཡང་དེ་བཞིན་གཤེགས་
པ་རྣམས་ཀྱིས་དཀྱིལ་འཁོར་སྤྲུལ་པར་མཛད་པ་ཡིན་ནོ། །དཀྱིལ་འཁོར་དུ་ཞུགས་པ་དང་མཐོང་བའི་འབྲས་བུ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་དེ་ཡང་གོ་སླའོ། །ཐིག་གདབ་པའི་ཆོ་ག་བཤད་པར་བྱ་སྟེ། དཀྱིལ་འཁོར་བྲི་བར་བྱ་བ་ནི་ཐིག་གདབ་བར་བྱ་བའོ། །ཤེས་རབ་ཅན་ཞེས་བྱ་བ་ནི་གཟུགས་ཅན་དང་གཟུགས་ཅན་མ་ཡིན་པའི་དཀྱིལ་འཁོར་གྱི་དེ་ཁོ་ན་ཉིད་ཤེས་པ་དང༌། རེག་པ་ལ་སོགས་པའི་བཟོ་ལ་མཁས་པའོ། །ཕྱོགས་ཐམས་ཅད་མཉམ་པ་ཉིད་ནི་སྟོང་པ་ཉིད་དེ་ལ་དམིགས་པ་ནི་མངོན་དུ་བྱེད་པའོ། །ཤར་དང་ནུབ་དང་བྱང་དང་ལྷོ། །ཞེས་བྱ་བ་ལ་ཕྱོགས་ཞེས་བྱ་བ་རེ་རེ་དང་སྦྱར་རོ། །ཚངས་ཐིག་གཉིས་པ་དང་མཚམས་ཀྱི་ཐིག་གཉིས་པ་ནི་ཐིག་བཞི་སྟེ་ཀ་བ་བརྒྱད་ཀྱི་ཚུལ་གྱིས་དཀྱིལ་འཁོར་བརྒྱད་དེ་དཀྱིལ་འཁོར་བརྟག་པའི་ཆོ་གའོ། །དཀྱིལ་འཁོར་ཞེས་བྱ་བ་ལ་སོགས་པ་ལ་དཀྱིལ་འཁོར་གང་དང་གང་གི་བདག་པོ་གང་དང་གང་ཡིན་པ་དེ་དང་དེར་དེའི་རྣལ་འབྱོར་དང་ལྡན་པའི་དཀྱིལ་འཁོར་གྱི་ཆོ་ག་ལ་རབ་ཏུ་གོམས་པར་བྱས་ནས་དཀྱིལ་འཁོར་དེ་དག་དེར་བྲི་བར་བྱ་སྟེ། དེ་ལྟར་ན་གལ་ཏེ་དཀྱིལ་འཁོར་དེ་བག་མེད་པས་མ་ཚང་བའམ་ལྷག་པར་འགྱུར་ན་ཡང་དཀྱིལ་འཁོར་བརྟག་པ་གྲུབ་པ་ཡིན་ནོ་ཞེས་བྱ་བའོ། །ད་ནི་གསང་བ་ལྔའི་དེ་ཁོ་ན་ཉིད་ཤེས་པ་བསྟན་པར་བྱ་བའི་ཕྱིར། དེ་ནས་ཞེས་བྱ་བ་ལ་སོགས་པ་གསུངས་ཏེ། ཐོག་མ་དང་ཐ་མ་མེད་པ་ཞེས་བྱ་བ་ལ་སོགས་པ་གསུངས་པ་ནི་བཤད་ཟིན་ཏོ། །ཐོག་མ་མེད་པ་མཆོག་ཉིད་ནི། །ཞེས་བྱ་བ་ལ་དེ་ལྟར་བྱུང་བའི་རང་བཞིན་གྱིས་རྟག་ཏུ་དམ་ཚིག་པ་ཡིན་པས་ན་ཐོག་མ་མེད་པའི་མཆོག་གོ །ནིའི་སྒྲ་ནི་ངེས་པར་གཟུང་བ་སྟེ། ཐོག་མ་མེད་པ་མཆོག་ཉིད་ཁོ་ནའོ། །དཔལ་མཆོག་དང་པོའོ་ཞེས་བརྗོད་དོ། །ཞེས་བྱ་བ་ལ་བརྗོད་པ་ནི་བསྟན་པ་ཡིན་ནོ། རིགས་ལྔའི་དཀྱིལ་འཁོར་རྣམས་ནི་དཀྱིལ་འཁོར་ཐམས་ཅད་དེ་དེའི་བདག་པོ་ནི་གཙོ་བོའོ། །མཆོག་ནི་དམ་པའོ། །དབང་ཕྱུག་མཆོག་ཅེས་བྱ་བ་ནི་ཁམས་གསུམ་པའི་ཆོས་ཀྱི་རྒྱལ་པོའོ། །དེའི་རང་བཞིན་བསྟན་པར་བྱ་བའི་ཕྱིར་ཀུན་མཆོག་ཅེས་བྱ་བ་ལ་སོགས་པ་གསུངས་ཏེ། ཀུན་མཆོག་འདོད་པ་ཆེན་པོ་ཞེས་བྱ་བ་ནི་བྱང་ཆུབ་ཆེན་པོའི་མཚན་ཉིད་ཀྱི་ཐུགས་རྟོགས་པས་ཏེ་དེ་ལས་བྱུང་བའི་ཡིད་བདེ་བ་ནི་ཀུན་མཆོག་འདོད་པ་ཆེན་པོའི་ཡིད་འོང་བདེ་བའོ། །དེ་སྟོན་པར་བྱེད་པའི་
ཐམས་ཅད་དུ་ཁྱབ་པའི་འཛུམ་པ་ནི་འཛུམ་པ་ཆེན་པོའོ། །དེ་ལྟར་གྱུར་པའི་འཛུམ་པ་ངེས་བཅོམ་ལྡན་འདས་སྲིད་པ་མཆོག་ཏུ་རྟག་ཏུ་བཞིན་འཛུམ་པ་ཡིན་ནོ། །མཆོག་ཏུ་མི་འགྱུར་བའི་རྡོ་རྗེ་སེམས་དཔའི་སྐུའི་གསང་བ་རྫོགས་པ་ནི་མཆོག་ཏུ་མི་འགྱུར་བའི་དངོས་གྲུབ་སྟེ་དེའི་དངོས་བོ་ནི་དེ་ཉིད་དོ། །དེའི་ཕྱིར་ཆོས་ཀྱང་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ཆོས་ཐམས་ཅད་དེ་ཀུན་གཞི་རྣམ་པར་ཤེས་པ་དང་མི་བསྐྱོད་པ་དང༌། བྱང་ཆུབ་ཀྱི་སེམས་དང་རང་བཞིན་གྱི་སྐུ་དང་དེ་བཞིན་གཤེགས་པའི་རིགས་དང་སྟོང་པ་ཉིད་ཀྱི་རྡོ་རྗེ་རྣམས་སོ། །དེ་དག་གི་རྣམ་པར་དག་པ་ནི་དེ་བཞིན་ཉིད་རྟོག་པ་སྟེ་རྒྱུ་དེའི་ཕྱིར་རོ། །རྡོ་རྗེ་འཆང་ང་ཟླ་བའི་འོད་ཡིན་ནོ། །ཆོས་ཐམས་ཅད་རྣམ་པར་དག་པའི་རྒྱུ་འབའ་ཞིག་གིས་བཅོམ་ལྡན་འདས་རྡོ་རྗེ་སེམས་དཔའ་ཟླ་བའི་འོད་ལྟ་བུ་ཡིན་པ་གཅིག་པུར་མ་ཟད་ཀྱི་གསང་བའི་དེ་ཉིད་ཉིད་ཕྱིར་དཀར། །ཞེས་བྱ་བ་ལ་ལྷ་མོ་བཞི་ཕྲེང་གི་དབུས་ན་བཞུགས་པའི་ཕྱག་རྒྱ་ཆེན་པོ་ནི་གསང་བའི་དེ་ཁོ་ན་ཉིད་དང༌། དེ་ཉིད་འདོད་ཆགས་དང་ཞེ་སྡང་དང་གཏི་མུག་ལ་སོགས་པའི་དྲི་མ་དང་བྲལ་བའི་རྒྱུ་འདིས་ཀྱང་དཀར་པོའོ། །འདིས་ནི་འདི་ལྟར་འཆད་པར་འགྱུར་ཏེ། གང་གི་ཕྱིར་བག་ཆགས་དང་བཅས་པའི་ཉོན་མོངས་པ་ཐམས་ཅད་དང་བྲལ་བའི་ཀུན་གཞི་རྣམ་པར་དག་པ་ལ་སོགས་པའི་ཆོས་ཐམས་ཅད་ལས་བྱུང་བའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་འདོད་ཆགས་དང་ཞེ་སྡང་དང་གཏི་མུག་མི་མངའ་བ་དེའི་ཕྱིར་སྐུ་མདོག་དཀར་པོ་སྟེ་རང་གི་རང་བཞིན་སྟོན་པར་མཛད་ཅིང་བཞུགས་པ་ཡིན་ནོ། །གཟུགས་ཐམས་ཅད་སྟོན་པས་སེམས་ཅན་གྱི་དོན་མཛད་པའི་ཕྱིར་འདོད་ཆགས་ཆེན་པོའི་ཉོན་མོངས་པའི་རང་བཞིན་སྟོན་པར་མཛད་པས་ན་བཅོམ་ལྡན་འདས་ཀྱི་འཁོར་ལོ་དམར་ཞིང་སྣ་ཚོགས་འབར་བ་ཡིན་ནོ། །རྟག་པ་དང་མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པའི་ཡེ་ཤེས་ཀྱི་བདུད་རྩིའི་ཆུའི་བུམ་པས་དབང་བསྐུར་བས་འདོད་ཆགས་ལ་སོགས་པའི་བག་ཆགས་དང་བཅས་པའི་ཉོན་མོངས་པའི་དྲི་མ་འཁྲུད་པར་འགྱུར་བ་ཡིན་ནོ་ཞེས་བྱ་བའི་ཡོན་ཏན་འདི་བསྟན་པར་བྱ་བའི་ཕྱིར། སངས་རྒྱས་ལྔའི་ཅོད་པན་གྱིས་དབང་བསྐུར་བ་དང་ལྡན་པའི་བཅོམ་ལྡན་
འདས་རྡོ་རྗེ་སེམས་དཔའ་ཡིན་ནོ། །ཤེས་རབ་དང་ཐབས་ཀྱི་རང་བཞིན་གྱི་ཞབས་གཡས་པས་ཉེ་བར་མཚོན་པའི་སྐུས་བདུད་བཞིའི་རང་བཞིན་ཅན་གཡོན་པའི་སྐུ་ལས་མཐོ་བ་དང་བརླ་དང་བྱིན་པ་དང༌། ཞབས་ཀྱི་ཉེ་བར་མཚོན་པའི་འཁོར་བའི་ཡན་ལག་ཡང་དག་པར་གནོན་ཅིང་འཛིན་པ་སྟེ་འཛིན་པ་དེས་རྒྱལ་བ་ལ་ནི་ཕྱི་རོལ་པ་ལས་རྒྱལ་བ་སྟེ་མི་སྣང་བར་མཛད་པ་ཡིན་ནོ་ཞེས་བྱ་བ་བསྟན་པའི་ཕྱིར་སེམས་དཔའི་སྐྱིལ་མོ་ཀྲུང་དང་ལྡན་པའི་བཅོམ་ལྡན་འདས་རྡོ་རྗེ་སེམས་དཔའི་ཡིན་ནོ། །རྒྱུ་དེས་རྡོ་རྗེ་སེམས་དཔའ་ནི་ཐམས་ཅད་ཀྱི་མཆོག་སྟེ་དེའི་རང་བཞིན་གྱི་བསྒོམ་པ་སོ་སོར་རྟོགས་པར་མཛད་པས་ཏེ། དེ་སྟོན་པར་མཛད་པ་བཅོམ་ལྡན་འདས་མ་འདོད་ཆགས་རྡོ་རྗེ་མ་ཡིན་ནོ། །ཐམས་ཅད་ཀྱི་མཆོག་སོ་སོར་རྟོགས་པས་ཡུལ་དུ་བྱས་པའི་དོན་མངོན་དུ་བྱ་བ་ནི་དངོས་གྲུབ་ཐམས་ཅད་ཀྱི་བདེ་བ་དམ་པ་སྟེ། དེ་སྟོན་པར་བྱེད་པ་ནི་བཅོམ་ལྡན་འདས་མ་ཀཱི་ལི་ཀཱི་ལ་ཡིན་ནོ། །དངོས་གྲུབ་ཐམས་ཅད་ཀྱི་བདེ་བ་དམ་པ་ནི་ཐམས་ཅད་ཀྱི་མཆོག་སྟེ་དེ་བདུད་བཞི་ལས་རྒྱལ་བ་ནི་རྣམ་པར་རྒྱལ་བ་སྟེ་དེ་མཐོང་བ་ནི་དེ་ལས་བྱུང་བའི་ལོངས་སྤྱོད་རྫོགས་པའི་སྐུ་སྟེ། དེ་སྟོན་པར་བྱེད་པས་ཀུན་མཆོག་རྣམ་པར་རྒྱལ་བའི་མཐོ་བ་ནི་བཅོམ་ལྡན་འདས་མ་རྡོ་རྗེ་དྲན་མ་ཡིན་ནོ། །སངས་རྒྱས་སྤྲུལ་པ་དང་སེམས་ཅན་གྱི་དོན་སྤྲུལ་པའི་སྐུས་མཛད་པས་ན་དབང་ཕྱུག་ཐམས་ཅད་དེ་དེས་མཆོད་པ་ཆེན་པོ་ནི་ཐམས་ཅད་དུ་ཁྱབ་པའི་སོ་སོར་རྟོག་པའི་མཆོད་པ་ནི་བཅོམ་ལྡན་འདས་མ་རྡོ་རྗེ་འདོད་མའི་དབང་ཕྱུག་མ་ཡིན་ནོ། །འཇིག་རྟེན་དང་འཇིག་རྟེན་ལས་འདས་པའི་དངོས་གྲུབ་ཐམས་ཅད་ནི་འདོད་ཆགས་རྡོ་རྗེ་མའི་གཟུགས་ཀྱིས་སོ། །འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པ་ཐམས་ཅད་ནི་ཀཱི་ལི་ཀཱི་ལའི་གཟུགས་ཀྱིས་སོ། །འཇིག་རྟེན་དང་འཇིག་རྟེན་ལས་འདས་པའི་དགའ་བ་ཐམས་ཅད་ནི་རྡོ་རྗེ་དྲན་མའི་གཟུགས་ཀྱིས་སོ། །འཇིག་རྟེན་དང་འཇིག་རྟེན་ལས་འདས་པའི་བདག་པོ་ཐམས་ཅད་ནི་རྡོ་རྗེ་འདོད་པའི་དབང་ཕྱུག་མའི་གཟུགས་ཀྱིས་བྱིན་གྱིས་བརླབས་པ་སྟེ་རྡོ་རྗེ་སེམས་དཔའི་མཆོག་གི་སྐུའི་ཡན་ལག་ནི་དེ་དག་གི་སྐུ་ཡིན་ནོ་ཞེས་བྱ་པའི་དོན་ཏོ། །དེ་ལྟར་ན་བཅོམ་ལྡན་འདས་རྡོ་རྗེ་སེམས་དཔའི་གསང་བ་ལྔ་འདི་ཁོ་ན་ཉིད་བསྟན་ནས། ད་ནི་དེ་བཞིན་གཤེགས་པ་དང་དེ་རྣམས་ཀྱི་རིགས་བསྟན་པར་བྱ་བའི་ཕྱིར་དེ་ལ་ཇི་ལྟར་ཞེས་བྱ་བ་ལ་
སོགས་པ་གསུངས་ཏེ་རྟག་པ་ནི་རྣམ་པར་སྣང་མཛད་དོ། །མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང༌། དོན་ཡོད་གྲུབ་པ་རྣམས་ནི་གོ་སླའོ། །ལྔ་པོ་འདི་དག་ནི་དེ་བཞིན་གཤེགས་པ་ཐམས་ཅད་ཅེས་བྱ་བ་བརྗོད་པ་ཡིན་ནོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ཐམས་ཅད་ཀྱི་ཕྱིར་རོ་ཞེས་བྱ་བ་ལ་དོན་དམ་པར་འདི་རྣམས་དེ་བཞིན་གཤེགས་པ་ཐམས་ཅད་ཀྱི་རང་བཞིན་ཉིད་ཡིན་པ་དེའི་ཕྱིར་འདི་རྣམས་ཁོ་ན་དེ་བཞིན་གཤེགས་པ་ཐམས་ཅད་དུ་བརྗོད་པ་ཡིན་གྱི་གཞན་དག་ནི་མ་ཡིན་ནོ། །མི་བསྐྱོད་པ་ནི་རྡོ་རྗེ་སེམས་དཔའོ་ཞེས་བྱ་བ་ལ་དེ་བཞིན་གཤེགས་པ་མི་བསྐྱོད་པ་ཉིད་རྡོ་རྗེ་སེམས་དཔའི་རང་བཞིན་དུ་བཞུགས་པ་ཡིན་ནོ། །དེ་བཞིན་དུ་རིན་ཆེན་འབྱུང་ལྡན་ལ་སོགས་པ་ཁོ་ན་རིམ་པ་ཇི་ལྟ་བ་བཞིན་དུ་རྡོ་རྗེ་རིན་པོ་ཆེ་དང༌། ཆོས་དང་རྡོ་རྗེ་ལས་ཀྱི་གཟུགས་སུ་བཞུགས་པ་ཡིན་ནོ། །དེ་ལྟར་ན་དེ་བཞིན་གཤེགས་པའི་རིགས་ཀྱི་དེ་ཁོ་ན་ཉིད་བསྟན་ནས་ད་ནི་རྡོ་རྗེ་ཉི་མ་མེ་ལྟར་འབར་བ་དང་དེའི་རིགས་ཀྱི་དེ་ཁོ་ན་ཉིད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ་ཤིན་ཏུ་གདུག་པ་དྲག་པོ་ནི་ཚོགས་དང་བཅས་པའི་འཇིགས་བྱེད་ལ་སོགས་པ་སྟེ་དེ་རྣམས་འདུལ་བ་ལ་ཞི་བ་ཉིད་དགོས་པ་མ་ཡིན་ཏེ། དེ་ལྟ་བས་ན་དེ་དག་གདུལ་བའི་ཕྱིར་ཤེས་རབ་དང་ཐབས་ཀྱི་ངོ་བོ་ནི་ཤེས་རབ་དང་ཐབས་ཀྱི་རང་བཞིན་ཅན། འཇིག་པའི་དུས་ཀྱི་ཉི་མ་འཆར་ཀའི་འོད་བཞིན་དུ་གདུག་པ་ཐམས་ཅད་ཀྱི་བུད་ཤིང་སྲེག་པར་ནུས་པས་ན་ཉི་མའི་འོད་ལྟ་བུའོ། །དེ་གང་ཡིན་ཞེ་ན་རྡོ་རྗེ་འཛིན་ཞེས་བྱ་བ་སྟེ་རྡོ་རྗེ་སེམས་དཔའོ། །རང་ཉིད་ཅེས་བྱ་བ་ནི་རང་ཉིད་ཀྱིས་བྱུང་བ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །གདུག་པ་དང་དྲག་པོའི་སེམས་ཅན་གདུལ་བའི་ཕྱིར་སྒེག་པའི་གཟུགས་དང་ལྡན་པའི་དཔལ་རྡོ་རྗེ་སེམས་དཔའ་ཉིད་རྡོ་རྗེ་ཉི་མ་མེ་ལྟར་འབར་བར་གྱུར་པ་ཡིན་གྱི་གཞན་ནི་མ་ཡིན་ནོ་ཞེས་བྱ་བའི་དོན་ཏོ།། རྡོ་རྗེ་མཚོན་ཆ་འཛིན་མ་ལ་སོགས་པ་ནས་རྡོ་རྗེ་དྲིལ་བུ་མ་ལ་སོགས་པ་མཐར་ཐུག་པའི་བར་གྱི་རྡོ་རྗེའི་རིགས་ཐམས་ཅད་ཇི་ལྟ་བ་བཞིན་དུ་བཤད་པའི་དེ་བཞིན་གཤེགས་པ་ཐམས་ཅད་ཀྱི་བསྟན་པ་གྲུབ་པའི་དོན་དུ་དེའི་ཐབས་ཀྱི་ཁོར་བའི་གཟུགས་སུ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བས་རང་གི་རྡོ་རྗེ་
ལས་སྤྲུལ་པར་མཛད་པ་ཡིན་ནོ། །དེ་ལྟར་རྡོ་རྗེའི་རིགས་ཀྱི་བདག་པོ་དང་རིགས་ཀྱི་དེ་ཁོ་ན་ཉིད་བསྟན་ནས་ད་ནི་པདྨའི་རིགས་ཀྱི་བདག་པོ་དང་རིགས་ཀྱི་དེ་ཁོ་ན་ཉིད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་སོ། །པདྨ་དམར་པོ་བཞིན་དུ་ཉོན་མོངས་པའི་དྲི་མ་ཐམས་ཅད་ཀྱིས་མ་གོས་པའི་རང་བཞིན་གྱིས་དག་པའི་ཏིང་ངེ་འཛིན་དང་ཐུགས་རྗེ་ཆེན་པོ་ནི་པདྨར་རཱ་གའོ། །ངེས་ཐམས་ཅད་དག་པ་ནི་པདྨའི་རིགས་རྟོགས་པའོ། །ཁྱད་པར་ཇི་ལྟ་བུ་དང་ལྡན་པ་ཡིན་ཞེ་ན་བླ་ན་མེད་པ་ཞེས་བྱ་བའོ། །རྡོ་རྗེ་སེམས་དཔའི་རང་ཉིད་བདག །ཅེས་བྱ་བ་ནི་ཐམས་ཅད་དག་པའི་རང་བཞིན་ཅན་འཇིག་རྟེན་དབང་ཕྱུག་གཞན་ནི་མ་ཡིན་ནོ་ཞེས་བྱ་བའོ། །རྡོ་རྗེ་ཆོས་ནི་སྟོང་པ་ཉིད་ཀྱི་ཏིང་ངེ་འཛིན་ནོ། །དེ་རབ་ཏུ་སྒྲུབ་པ་ནི་རྟོག་པའོ། །དེས་སེམས་ཅན་ཐམས་ཅད་རྣམ་པར་དག་པ་ནི་ལོག་པར་ལྟ་བ་སྤོང་པ་སྟེ། དེའི་དོན་དུ་པདྨ་ཆེན་པོའི་རིགས་ནི་སྐྱོན་ཐམས་ཅད་དང་བྲལ་བས་ན་དག་པའོ། །དེ་ཉིད་ཏིང་ངེ་འཛིན་གྱི་ཡེ་ཤེས་བསགས་པ་བཅོམ་ལྡན་འདས་འཇིག་རྟེན་དབང་ཕྱུག་གི་རྫོགས་པར་མཛད་པ་ཡིན་ནོ། །དེ་ལྟར་པདྨའི་རིགས་ཀྱི་བདག་པོ་དང༌། དེའི་རིགས་ཀྱི་དེ་ཁོ་ན་ཉིད་བསྟན་ནས་ད་ནི་ནོར་བུའི་རིགས་ཀྱི་བདག་པོ་དང་དེའི་རིགས་ཀྱི་དེ་ཁོ་ན་ཉིད་བསྟན་པར་བྱ་བའི་ཕྱིར། དེ་ལ་ཇི་ལྟར་ནམ་མཁའི་སྙིང་པོ་ཡིན་ཞེས་བྱ་བ་གསུངས་ཏེ་ནམ་མཁའི་ཡིན་ལ་ཐམས་ཅད་ཀྱང་དེ་ཉིད་ཡིན་པས་ན་ནམ་མཁའ་ཐམས་ཅད་དེ་ནོར་བུའི་རིགས་དེའིའོ། །ཐམས་ཅད་ནམ་མཁའ་བཅོམ་ལྡན་འདས། །ཞེས་བྱ་བ་ནི་ནམ་མཁའི་སྙིང་པོའོ། །དེ་ཡང་སེམས་ཅན་རྣམས་ཀྱི་བསོད་ནམས་ཀྱིས་མཐོ་བ་ཆེ་བ་ཡིན་པས་ན་སེམས་ཅན་བསོད་ནམས་མཐོ་བ་ཆེ་བ་སྟེ་ནམ་མཁའ་ཐམས་ཅད་ཁྱབ་ཅིང་ཐམས་ཅད་སྟེར་བའི་བཅོམ་ལྡན་འདས་ནམ་མཁའི་སྙིང་པོའི་སྐུའོ། །སེམས་ཅན་བསོད་ནམས་མཐོ་བ་ཆེ་བའི་སྐུ་དེ་ཉིད་ཀྱི་ཕྱིར་བདག་ཉིད་ནམ་མཁའི་སྙིང་པོ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་དབང་བསྐུར་བ་ཡིན་གྱི་གཞན་ནི་མ་ཡིན་ནོ་ཞེས་བྱ་བ་བཅོམ་ལྡན་འདས་རྡོ་རྗེ་སེམས་དཔས་གསུངས་སོ། །དབང་བསྐུར་དང་ནི་གཏེར་དང་ནི། །རྡོ་རྗེ་རྒྱལ་མཚན་མཆོད་པ་ཆེ། །ཞེས་བྱ་བ་ལ་སེམས་ཅན་ཐམས་ཅད་ཀྱི་བསམ་པ་ཐམས་ཅད་ཡོངས་སུ་རྫོགས་པར་མཛད་པའི་ཕྱིར། དེ་དག་བཅོམ་
ལྡན་འདས་འཕགས་པ་ནམ་མཁའི་སྙིང་པོས་བསགས་པར་མཛད་ནས་བཞུགས་པ་ཡིན་ནོ། །དེ་ལྟར་དཀྱིལ་འཁོར་ཐམས་ཅད་ཀྱི་དེ་ཁོ་ན་ཉིད་ཆེན་པོ་བསྟན་ནས་ད་ནི་དབང་བསྐུར་བ་ཤེས་པས་འགྲུབ་པར་འགྱུར་རོ་ཞེས་བྱ་བ་བསྟན་པར་བྱ་བའི་ཕྱིར། །དེ་ནས་རིགས་ཐམས་ཅད་ཀྱི་དབང་བསྐུར་བ་ཤེས་པའོ་ཞེས་བྱ་བ་གསུངས་ཏེ་སངས་རྒྱས་ནི་དེ་བཞིན་གཤེགས་པ་ཐམས་ཅད་དེ་དེ་རྣམས་ལ་རྡོ་རྗེ་རྩེ་ལྔ་པ་ཕྱེད་པའི་རྩེ་མོ་ཅན་གྱི་ཡིད་བཞིན་གྱི་ནོར་བུར་ནི་པོ་ཆེ་ཅོད་པན་དེ་རིན་པོ་ཆེའི་ཅོད་པན་གྱིས་དབང་བསྐུར་བ་དེའི་རྣལ་འབྱོར་པ་རྣམས་ཀྱིས་བྱའོ། །ཁྲོ་བོའི་རྡོ་རྗེ་རྩེ་ལྔ་པའི་ཕྲེང་བ་དང་ལྡན་པའི་ཅོད་པན་གྱིས་རྡོ་རྗེ་ཆེན་པོའི་རིགས་ཀྱི་དབང་བསྐུར་བའོ། །དེ་བཞིན་གཤེགས་པ་སྣང་བ་མཐའ་ཡས་དང་ལྡན་པའི་ཅོད་པན་གྱིས་པདྨའི་རིགས་ལའོ། །ཡིད་བཞིན་གྱི་ནོར་བུ་དང་ལྡན་པས་ནོར་བུ་ཆེན་པོའི་རིགས་ཀྱིས་བདག་དང་གཞན་ལ་དབང་བསྐུར་བར་བྱའོ། །དཔལ་རྡོ་རྗེ་སེམས་དཔའི་ཕྱག་མཚན་གྱི་དེ་ཁོ་ན་ཉིད་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། ཐམས་ཅད་མཆོག་གི་དངོས་གྲུབ་ཆེ། །དབང་ཕྱུག་ཆེན་པོ་ཞེས་བྱ་བ་ནི་བཤད་ཟིན་ཏོ། །དེའི་དོན་དུ་མཚོན་ཆ་ཆེན་པོ་རྡོ་རྗེ་རྩེ་ལྔ་པ་ཞེས་བྱ་བ་དང་སྦྱར་རོ། །དེ་ཉིད་ཀྱི་ཁྱད་པར་བསྟན་པར་བྱ་བའི་ཕྱིར། གསང་བ་ལྔ་ཡི་དེ་ཉིད་ཆེ། །ཞེས་བྱ་བ་གསུངས་ཏེ་རྡོ་རྗེ་སེམས་དཔའ་དང་འདོད་ཆགས་རྡོ་རྗེ་མ་དང༌། ཀཱི་ལི་ཀཱི་ལ་དང༌། རྡོ་རྗེ་དྲན་མ་དང༌། རྡོ་རྗེ་འདོད་པའི་དབང་ཕྱུག་མ་ཅན་དུ་ཤེས་པར་བྱའོ། །དེའི་རང་བཞིན་ཅན་ནི་གསང་བ་ལྔ་སྟེ་དེ་རྣམས་ཀྱི་དེ་ཁོ་ན་ཉིད་ཆེན་པོ་ནི་གཉིས་སུ་མེད་པའི་ཡེ་ཤེས་སོ། །དེ་སྟོན་པར་བྱེད་པའི་དང་པོ་རྩེ་ལྔ་པ་ནི་རྡོ་རྗེ་རྩེ་ལྔ་པ་ཞེས་བརྗོད་པ་ཡིན་ནོ། །དེ་ལྟར་མཆོག་དང་པོའི་ཕྱག་མཚན་གྱི་དེ་ཁོ་ན་ཉིད་བསྟན་ནས་ད་ནི་རིགས་ཐམས་ཅད་ཀྱི་དེ་ཁོ་ན་ཉིད་བསྟན་པར་བྱ་བའི་ཕྱིར་དེ་ནས་རིགས་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སངས་རྒྱས་ཐམས་ཅད་སངས་རྒྱས་ཉིད། །ཅེས་བྱ་བ་ལ་གང་ཞིག་སངས་རྒྱས་བཅོམ་ལྡན་རྣམས་རྡོ་རྗེ་རྩེ་ལྔ་པ་དེ་ནི་སངས་རྒྱས་ཐམས་ཅད་ཀྱི་རང་བཞིན་དུ་ཤེས་པར་བྱའོ། །མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་དང་རྣམ་པར་སྣང་མཛད་ཀྱི་ཡེ་
ཤེས་རྣམས་ནི་སངས་རྒྱས་ཐམས་ཅད་དེ་དེ་རྣམས་ཀྱི་དངོས་པོ་ནི་སངས་རྒྱས་ཐམས་ཅད་ཉིད་དོ། །དེ་བཞིན་གཤེགས་པ་ལྔའི་ཡེ་ཤེས་སྟོན་པར་བྱེད་པའི་དེ་བཞིན་གཤེགས་པའི་རྡོ་རྗེ་རྩེ་ལྔ་པ་ནི་སངས་རྒྱས་ཐམས་ཅད་དུ་བརྗོད་པ་ཡིན་ནོ། །སྣ་ཚོགས་བྱ་བ་རྡོ་རྗེ་ཅན། །ཞེས་བྱ་བ་ལ་རིགས་ཀྱི་བདག་པོ་དང་བཅས་པའི་རྡོ་རྗེའི་རིགས་ཐམས་ཅད་ནི་རྡོ་རྗེ་ཅན་ཏེ་དེ་རྣམས་ཀྱི་ཡང་རིགས་ཀྱི་ཕྱག་མཚན་འབར་བའི་རྡོ་རྗེ་རྩེ་ལྔ་པ་གང་ཡིན་པ་དེ་སྣ་ཚོགས་བྱ་བའི་རང་བཞིན་དུ་ཤེས་པར་བྱའོ། །རྡོ་རྗེའི་རིགས་ཐམས་ཅད་ཀྱི་དངོས་པོ་ནི་སྣ་ཚོགས་ཏེ་དེའི་བྱ་བ་ནི་གདུག་པ་དང་དྲག་པོའི་སེམས་ཅན་འདུལ་བ་དང་ཞི་བའི་སེམས་ཅན་ཀུན་ནས་བསྡུ་བའོ། །འཇིག་རྟེན་དབང་ཕྱུག་རྡོ་རྗེ་ཆོས། །ཞེས་བྱ་བ་ལ་པདྨའི་རིགས་ཀྱི་ཕྱག་མཚན་ནི་རང་བཞིན་གྱིས་དག་པའི་ཏིང་ངེ་འཛིན་སྟོན་པར་བྱེད་པ་དང་པདྨའི་རིགས་སྟོན་པར་བྱེད་པ་ཤེས་པར་བྱའོ། །ནོར་བུ་ཆེན་པོའི་ཕྱག་མཚན་ནི་ནོར་བུ་སྟེ་དེ་ལ་རིན་པོ་ཆེའི་མཆོད་པ་ནི་མཆོད་པ་ཆེན་པོ་བྱས་ནས་རབ་ཏུ་དགའ་བ་སྟེ་ཡིད་བྱ་བའི་དོན་ཏོ། །ད་ནི་ཐམས་ཅད་དགུག་པར་བྱ་བ་བསྟན་པར་བྱ་བའི་ཕྱིར་རྟོག་པ་ཀུན་ཞེས་བྱ་བ་ལ་སོགས་པ་གསུངས་ཏེ། རང་གི་ལྷའི་རྟོག་པ་ལས་དགུག་པའི་ཕྱག་རྒྱར་གང་བསྟན་པ་དེ་ནི་རྟོག་པ་ཀུན་གྱི་གསང་བའི་རྡོ་རྗེ་ལྕགས་ཀྱུ་སྟེ་དྲིལ་བུ་དང་བཅས་པ་དེ་དང་འགུག་པའི་སྔགས་ཀྱིས་རང་གི་ལྷ་གཅིག་པུའམ་འཁོར་དང་བཅས་པ་སྤྱན་དྲངས་ནས་དེའི་རྗེས་ལ་ཇི་ལྟ་བ་བཞིན་དུ་བཤད་པའི་རྗེས་སུ་བསྒྲུབ་པར་བྱ་སྟེ་བརླ་གཡས་པ་དང་གཡོན་པ་དག་གིས་དྲིལ་བུ་དཀྲོལ་ཞིང་བྱ་བ་ཡིན་ནོ། །ད་ནི་མཆོད་པ་ཐམས་ཅད་ཀྱི་དེ་ཁོ་ན་ཉིད་ཤེས་པར་བསྟན་པར་བྱ་བའི་ཕྱིར། དེ་ལ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ་རྟོག་པ་ཡང་ཡིན་ལ་ཀུན་ཡང་དེ་ཉིད་ཡིན་པས་ན་རྟོག་པ་ཀུན་ཏེ་རིགས་ལྔའི་ལྷའི་རྟོག་པ་རྣམས་སོ། །དེ་རྣམས་ཀྱི་གསང་བ་ཆེན་པོའི་མཆོད་པ་ནི་འདོད་ཆགས་རྡོ་རྗེ་མ་ལ་སོགས་པའི་ཕྱག་རྒྱ་བཞིའོ། །དེས་མཆོད་པ་ནི་མཆོད་པ་ཆེན་པོ་བྱས་ནས་རབ་ཏུ་དགའ་བ་སྟེ་ཡིད་བདེ་བ་སྐྱེས་ནས་མཆོད་པར་བྱས་ནི་བསྒྲུབ་པར་བྱ་བའི་ལྷའི་བུའི་གཟུགས་མདུན་དུ་མཆོད་པར་བྱ་སྟེ། སླར་ཡང་གླུ་དང་རོལ་མོའི་མཆོད་པ་རྣམས་ཀྱིས་མཆོད་པར་བྱའོ། །འདིར་འདི་ལྟར་འཆད་པར་འགྱུར་ཏེ། རྗེས་སུ་
རྣལ་འབྱོར་བྱས་ལ་གསང་བའི་མཆོད་པ་བཞིས་བདག་ཉིད་ཡང་དག་པར་མཆོད་དེ་ཆོ་ག་ཐམས་ཅད་རྗེས་སུ་སྤྱད་ནས། བཅོམ་ལྡན་འདས་བསྒྲུབ་པར་བྱ་བའི་ལྷའི་གཟུགས་དཀྱིལ་འཁོར་གྱི་ཚུལ་དུའམ། དཔའ་བོ་གཅིག་པུ་ཇི་ལྟ་བ་བཞིན་དུ་བཞག་ནས་རྣམ་པ་བཅུ་གཉིས་ཀྱི་ཕྱག་རྒྱའི་མཆོད་པ་རྣམས་ཀྱིས་ཡང་དག་པར་མཆོད་ལ་སླར་ཡང་ཇི་ལྟ་བ་བཞིན་དུ་བཤད་པའི་གླུ་དང་རོལ་མོའི་རྣམ་པར་འཕྲུལ་པ་རྣམས་ཀྱིས་ཡང་དག་པར་མཆོད་པར་བྱའོ། །དེ་ལ་མཆོད་པའི་ཕྱག་རྒྱ་བཅུ་གཉིས་ཀྱི་སྙིང་པོ་རྣམས་དཔལ་རྡོ་རྗེ་སེམས་དཔའི་དཀྱིལ་འཁོར་ལས་གསུངས་པ་ཉིད་རིགས་དང་རིགས་ལས་གཟུང་བར་བྱའོ། །གླུ་ཡང་རང་གི་རིགས་ལས་གསུངས་པའོ། །གསང་བའི་མཆོད་པ་བཞིའི་རང་བཞིན་རང་གི་རིགས་ཀྱི་ཁུ་ཚུར་གཉིས་ཀྱིས་ཕྱག་རྒྱ་བཅིང་བར་བྱའོ། །རྡོ་རྗེ་སེམས་དཔའི་རིགས་ལས་གསུངས་པའི་རབ་ཏུ་དགའ་མ་ལ་སོགས་པའི་མཆོད་པ་རྣམ་པ་བརྒྱད་པོ་ཁོ་ན་རྡོ་རྗེའི་རིགས་ལ་ཁྲོ་བ་དང་བཅས་པ་ཤེས་བར་བྱའོ། །དེ་བཞིན་གཤེགས་པའི་རིགས་ལ་མཉམ་པའི་ཐལ་མོས་ཞི་པ་རྣམས་སོ། །པདྨའི་རིགས་ལ་པདྨའི་ཐལ་མོས་སོ། །ནོར་བུའི་རིགས་ལ་ནོར་བུའི་ཁུ་ཚུར་གྱིས་མཆོད་པ་རྣམ་པ་བརྒྱད་ཀྱི་ཕྱག་རྒྱ་བཅིང་བར་བྱ་བ་ཡིན་ནོ། །དེ་ལྟར་མཆོད་པའི་དེ་ཁོ་ན་ཉིད་བསྟན་ནས་ད་ནི་དངོས་གྲུབ་ཐམས་ཅད་ཀྱི་བྱིན་གྱིས་བརླབ་པ་བསྟན་པར་བྱ་བའི་ཕྱིར། དེ་ལ་ཇི་ལྟར་ཞེས་བྱ་བ་ལ་སོགས་པ་གསུངས་ཏེ་རྟོག་པ་ཡང་ཡིན་ལ་ཀུན་ཡང་ཡིན་པས་ན་རྟོག་པ་ཀུན་ཏེ། དེ་རྣམས་ཀྱི་གསང་བ་ཆེན་པོའི་ཕྱག་རྒྱ་ཐམས་ཅད་ནི་ཕྱག་རྒྱ་ཆེན་པོ་རྣམས་ཏེ་དེ་དག་གིས་ཇི་ལྟ་བ་བཞིན་དུ་བཤད་པའི་ཚུལ་གྱིས་ལེགས་ཤིང་མཛེས་པར་བྱིན་གྱིས་བརླབ་པའོ། །དེའི་རྗེས་ལ་དམ་ཚིག་ཆེན་པོའི་དེ་ཁོ་ན་ཉིད་ཀྱི་བདག་ཉིད་རབ་ཏུ་བསྒྲུབས་ལ་སྙིང་པོ་སྟེ་རང་གི་ལྷའི་བཟླས་པ་བྱ་བའི་སྔགས་ཀྱིས་བཟླ་བ་ནི་བདག་ཉིད་ལ་མངོན་པར་བསྔགས་པར་བྱའོ། །དམ་ཚིག་ཆེན་པོ་དེ་ཁོ་ན་ཉིད་ཀྱི་བདག་ཉིད་རབ་ཏུ་སྒྲུབ་པར་བྱེད་པ་དེ་གོང་ཡིན་ཞེ་ན། དེ་ནས་ཞེས་བྱ་བ་ལ་སོགས་པ་དེ་ཉིད་གསུངས་པ་ཡིན་ཏེ་དེ་ཡང་བཤད་ཟིན་པས་སླར་ཡང་བཤད་བར་མི་བྱའོ། །འདིས་ནི་རིགས་ཐམས་ཅད་ཀྱི་རྣལ་འབྱོར་བ་རྣམས་ཀྱི་དམ་ཚིག་ཆེན་པོའི་དེ་ཁོ་ན་ཉིད་ཀྱི་དོན་
བསྒོམས་པས་བདག་ལ་བྱིན་གྱིས་བརླབ་པར་བྱ་བ་ཡིན་ནོ་ཞེས་བསྟན་པར་འགྱུར་རོ། །ད་ནི་རང་གི་ལྷག་པའི་ལྷ་ཐམས་ཅད་ཀྱི་སྒྲུབ་པ་ཆེན་པོའི་རྒྱུ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། རྟོག་པ་ཀུན་ནི་རྡོ་རྗེ་སེམས་དཔའ་ལ་སོགས་པའི་རིགས་ཐམས་ཅད་ཀྱི་དཀྱིལ་འཁོར་གྱི་རྟོག་པ་སྟེ་ང་རྣམས་ལ་བརྟན་པ་དང་གཡོ་བའི་དངོས་པོ་བསྒྲུབ་པར་བྱ་བ་གང་ཡིན་པ་དེ་དག་ཐམས་ཅད་རང་གི་རྣལ་འབྱོར་བྱས་ཏེ་རང་གི་ལྷའི་བཟླ་བའི་སྙིང་པོས་ལྷའི་གཟུགས་རྣམ་པར་བསམས་ལ་རང་གི་ལྷའི་གཟུགས་ཉིད་ཇི་སྲིད་བསྒྲུབ་པར་བྱ་སྟེ་དེ་སྲིད་ཀྱི་མིག་སྨན་ལ་སོགས་པ་ཐམས་ཅད་འགྲུབ་པར་འགྱུར་རོ། །ད་ནི་ཐམས་ཅད་རྗེས་སུ་སྒྲུབ་པ་བསྟན་པར་བྱ་བའི་ཕྱིར་དེ་ནས་ཞེས་བྱ་བ་ལ་སོགས་པ་གསུངས་ཏེ། རྡོ་རྗེ་དང་དྲིལ་བུ་ནི་འདིར་རང་གི་རིགས་ཀྱི་ཕྱག་མཚན་ཏེ་གཉིས་པོ་དེ་འཛིན་པར་བྱེད་པས་ན་རྡོ་རྗེ་དང་དྲིལ་བུ་འཆང་བའོ། །རྡོ་རྗེ་དང་དྲིལ་བུ་འཛིན་པར་གྱུར་པས་བདག་ཉིད་རང་གི་ལྷའི་རྣལ་འབྱོར་དང་ལྡན་པར་བྱས་ལ་བརྟན་པ་དང་གཡོ་བའི་རང་བཞིན་ཅན་གྱི་འགྲོ་བ་ཐམས་ཅད་གདོང་ནས་མ་སྐྱེ་ས་པའི་ཕྱིར་ནམ་མཁའི་མཚན་ཉིད་ཅན་དུ་རྟོགས་པར་བྱའོ། །རྡོ་རྗེ་དྲིལ་བུས་རབ་སད་པས། །ཞེས་བྱ་བ་ནི་སྒྲའི་རྗེས་སུ་འགྲོ་བའི་ཤེས་རབ་ཀྱི་ཡེ་ཤེས་རྣམས་ཀྱིས་དེ་མངོན་དུ་བྱེད་བ་ནི་རབ་ཏུ་སད་པ་སྟེ། རབ་ཏུ་སད་པ་དེ་དག་གིས་དཔལ་མཆོག་དང་པོ་ལ་སོགས་འགྲུབ་ཅེས་བྱ་བ་ནི་ཇི་ལྟ་བ་བཞིན་དུ་བཤད་པའི་རྟོག་པ་ཐམས་ཅད་རྗེས་སུ་སྒྲུབ་པ་དེ་རྣམས་ཀྱིས་བཅོམ་ལྡན་འདས་གྲུབ་པར་འགྱུར་རོ། །ད་ནི་འབད་པ་མེད་པ་ཤེས་པ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། བསྒྲུབ་བྱ་བ་ནི་ཇི་ལྟར་རང་གི་ལྷའི་གཟུགས་ཏེ་དེ་ཐམས་ཅད་དགུག་པ་དང༌། མཆོད་པ་ཆེན་པོ་དང་བདག་ལ་བྱིན་གྱིས་བརླབ་པ་ལ་སོགས་པའི་སྒྲུབ་པ་རྣམས་ཀྱིས་རྫོགས་པར་བྱའོ། །དེ་ཇི་ལྟར་ཞེ་ན་ཅི་འདོད་ཅེས་བྱ་བ་སྟེ། ཇི་ལྟར་འདོད་པའི་རྣལ་འབྱོར་གྱིས་སོ། །ཅི་འདོད་པ་ནི་ཇི་ལྟ་བ་བཞིན་དུ་མངོན་པར་འདོད་པའོ། །ཅི་འདོད་པའི་སྤྱོད་པ་ནི་ཇི་ལྟར་འདོད་པའི་སྤྱོད་ལམ་དང་ལྡན་པའོ། །ཅི་འདོད་པའི་ལས་ནི་མཆོད་རྟེན་གྱི་ལས་དང་གླེགས་བམ་བཀླག་པ་ལ་སོགས་པའི་དགེ་བའི་སྤྱོད་པའོ། །ཅི་འདོད་པའི་སྤྱོད་པ་དང་ལས་ནི་ཅི་འདོད་པའི་སྤྱོད་
པ་དད་ལས་སོ། །དེ་གང་ལ་ཡོད་པ་དེ་ནི་ཅི་འདོད་པའི་སྤྱོད་པའི་ལས་དང་ལྡན་པའོ། །བྱ་བའི་རྒྱུད་ལ་བཀག་པའི་རྣལ་འབྱོར་དང་རྗེས་སུ་མཐུན་པའི་ཐུག་པ་ནག་པོ་ལ་སོགས་པ་ཟ་བས་ན་ཐམས་ཅད་ཟ་བའོ། །གར་གྱི་ཚུལ་གྱིས་རྗེས་སུ་སྒྲུབ་པར་བྱེད་པས་ན་ཐམས་ཅད་བྱེད་བའོ། །ལངས་པའམ་ནི་འདུག་པའམ། །འཆག་པའམ་ནི་ཇི་ལྟར་གནས། །ཞེས་བྱ་བ་འདིས་འདུག་པའི་ངེས་པ་མེད་པ་སྟོན་པ་ཡིན་ནོ། །རབ་ཏུ་དགོད་དམ་རབ་ཏུ་སྨྲ། །ཞེས་བྱ་བ་འདིས་འདུག་པའི་ངེས་པ་མེད་པར་བསྟན་པ་ཡིན་ནོ། །གང་དེར་ཇི་ལྟ་བ་དེ་བཞིན་དུ་ཞེས་བྱ་བ་འདིས་གནས་ཀྱི་ངེས་པ་མེད་པ་ཉིད་བསྟན་པ་ཡིན་ནོ། །གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ཀྱི་རང་བཞིན་གྱིས་དངོས་པོ་གང་དང་གང་མིག་ལ་སོགས་པའི་དབང་པོའི་སྤྱོད་ཡུལ་དུ་གྱུར་པས་ན་དབང་པོའི་ལམ་དུ་གྱུར་པ་སྟེ་དངོས་པོ་ད་དང་དེའི་རང་བཞིན་ཏེ། རྡོ་རྗེ་སེམས་དཔའ་ལ་སོགས་པའི་གཟུགས་ཀྱི་རང་བཞིན་དང་གཅིག་ཏུ་བྱའོ། །སྒྲ་ནི་རྡོ་རྗེ་སེམས་དཔའ་ལ་སོགས་པའི་སྒྲ་དང་དྲི་ནི་རྡོ་རྗེ་སེམས་དཔའ་ལ་སོགས་པའི་དྲི་དང་རོ་ནི་རྡོ་རྗེ་སེམས་དཔའ་ལ་སོགས་པའི་རོ་དང་རེག་བྱ་ནི་རྡོ་རྗེ་སེམས་དཔའ་ལ་སོགས་པའི་རེག་བྱ་དང་ཆོས་ནི་རྡོ་རྗེ་སེམས་དཔའ་ལ་སོགས་པའི་ཆོས་དང་གཅིག་ཏུ་བྱའོ། །དེ་ལྟར་ན་དངོས་པོ་དེ་རང་བཞིན་དང་གཅིག་ཏུ་བྱ་བ་ཡིན་ནོ། །རྣལ་འབྱོར་གང་གིས་གཅིག་ཏུ་བྱ་ཞེ་ན། མཉམ་པར་མ་བཞག་རྣལ་འབྱོར་གྱིས་ཏེ་བྱེད་པར་འགྱུར་བ་དེས་སོ། །རང་གི་ལྷག་པའི་ལྷ་ནི་རང་གི་ཡིད་ཀྱི་ལྷ་སྟེ། རྡོ་རྗེ་སེམས་དཔའ་ལ་སོགས་པའི་རང་བཞིན་ཅན་གྱི་ཡིད་ང་ཉིད་ཀུན་དུ་བསྒོམ་སྟེ་བསམ་པར་བྱ་བ་ཡིན་ནོ། །མཉམ་པར་མ་བཞག་པའི་རྣལ་འབྱོར་བསྒོམ་པའི་རང་བཞིན་ཅན་གྱི་དེ་ཁོ་ན་ཉིད་ཀྱི་རྣལ་འབྱོར་འདིས་ཐམས་ཅད་ཀྱི་ལྷའི་རང་བཞིན་བསྒྲུབ་པ་སྟེ་རྫོགས་པར་བྱས་ན་ཐམས་ཅད་ཉིད་རབ་ཏུ་འགྲུབ་པར་འགྱུར་རོ་ཞེས་བྱ་བ་དང་སྦྱར་རོ། །དེ་གང་གི་ཕྱིར་ཞེ་ན། སངས་རྒྱས་ཀུན་དངོས་ཐམས་ཅད་ལ། །ཞེས་བྱ་བ་ལ་རང་གིས་ལྷའི་རང་བཞིན་དུ་གཟུགས་ལ་སོགས་པ་ཐམས་ཅད་རྟག་ཏུ་བརྟན་ཞིང་རབ་ཏུ་འགྲུབ་པར་འགྱུར་རོ། །དམ་ཚིག་ཆེན་པོ་ཞེས་བྱ་བ་ལ་སོགས་པ་ནི་གོ་སླའོ། །དེ་ལྟར་ཞེས་བྱ་བ་ནི་འདས་མ་ཐག་ཏུ་བཤད་པའི་ཚུལ་གྱིས་དཔལ་
མཆོག་དང་པོའི་རྒྱུད་ཀྱི་ཆོ་ག་ནི་བསྒྲུབ་པར་བྱ་བ་དང༌། སྒྲུབ་པའི་རྣམ་པ་ཅན་བྱིན་བརླབས། །ཞེས་བྱ་བ་དང་སྦྱར་རོ། །བྱིན་གྱིས་བརླབ་པ་དེ་ཉིད་ཀྱི་ཁྱད་པར་བསྟན་པར་བྱ་བའི་ཕྱིར། མ་ཉམས་པ་ཞེས་བྱ་བ་ལ་སོགས་པ་གསུངས་ཏེ་གང་གིས་ཀྱང་མ་ཉམས་པས་ན་མ་ཉམས་པའོ། །མཆོག་ཀྱང་ཡིན་ལ་བླ་མ་ཡང་དེ་ཉིད་ཡིན་པས་མཆོག་གི་བླ་མའོ། །གསལ་བ་ནི་གསལ་བ་ཉིད་དོ། །དཔལ་རྡོ་རྗེ་སེམས་དཔའ་ལ་སོགས་པའི་རིགས་ལྔའི་དངོས་གྲུབ་ནི་མཆོག་ཏུ་གསང་བའི་དངོས་གྲུབ་སྟེ། དེའི་ཆོ་ག་ནི་སྔར་བཤད་པ་སྟེ་དེས་ལྷའི་བདེ་བ་རབ་ཏུ་སྟེར་བའོ། །ཅིའི་དོན་དུ་བྱིན་གྱིས་བརླབ་ཅེ་ན་མྱུར་དུ་གྲུབ་པའི་ཕྱིར་ཞེས་བྱ་བ་སྟེ། མྱུར་དུ་དངོས་གྲུབ་ཐོབ་པའི་ཕྱིར་རོ། །སུས་བྱིན་གྱིས་བརླབ་ཅེ་ན་དེ་བཞིན་གཤེགས་པ་ཀུན་གྱིས་ཞེས་བྱའོ། །དེ་དག་ཇི་ལྟ་བུ་ཞེ་ན་སྟོང་པ་ཉིད་བཅུ་དྲུག་ནི་རྡོ་རྗེ་མཆོག་སྟེ་དེས་འཛིན་པར་མཛད་པས་ན་རྡོ་རྗེ་མཆོག་འཛིན་པའི་རྡོ་རྗེ་སེམས་དཔའ་ལ་སོགས་པའི་རིགས་ཀྱི་ལྷ་རྣམས་ཏེ་དེ་དག་གི་ཕྱིར་རོ། །བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ནི་སྲས་ཏེ་དེ་དང་བཅས་པའི་དེ་བཞིན་གཤེགས་པ་ཐམས་ཅད་ཀྱིས་དཔལ་མཆོག་དང་པོའི་རྒྱུད་ཀྱི་ཆོ་ག་འདི་བྱིན་གྱིས་བརླབས་པ་ཡིན་ནོ། །དེ་ལྟར་གང་གིས་གསུངས་པ་ཡིན་ཞེ་ན་མཆོག་ཏུ་བདེ་བ་དམ་པ་ཞེས་བྱ་བ་ལ་སོགས་པ་ལ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་བདེ་བ་ནི་མཆོག་ཏུ་བདེ་བའོ། །དེས་དམ་པ་སྟེ་མཆོག་ཏུ་བདེ་བ་དམ་པའོ། །གསང་བ་ལྔའི་དེ་ཁོ་ན་ཉིད་ཆེན་པོའི་རང་བཞིན་ཅན་གྱི་དང་པོའི་རྡོ་རྗེ་ནི་མཆོག་གི་རྡོ་རྗེ་སྟེ་དེ་འཛིན་པར་མཛད་པས་ན་མཆོག་གི་རྡོ་རྗེ་འཛིན་པའི་རྡོ་རྗེ་སེམས་དཔས་གསུངས་པ་ཡིན་ནོ། །དེ་ཡང་ཆེན་པོ་སྟེ་ཐམས་ཅད་ཁྱབ་པ་དང་དགའ་བ་ཆེན་པོ་ཞེས་བྱ་བའོ། །དཔལ་མཆོག་དམ་པོའི་རྒྱ་ཆེར་བཤད་པ་ལས་མཆོག་ཏུ་གསང་བའི་ཆོ་གའི་བཤད་པ་རྫོགས་སོ།། །།ད་ནི་ཇི་ལྟ་བ་བཞིན་དུ་བཤད་པའི་ཆོ་གས་སློབ་དཔོན་ལས་ཀྱི་ཆོ་ག་དང༌། སློབ་མ་གཞུག་པ་ལ་སོགས་པའི་ཆོ་ག་རྒྱས་པ་རྗེས་སུ་སྤྱད་ནས་རིགས་ཐམས་ཅད་ཀྱི་དཀྱིལ་འཁོར་རྣམས་ཇི་ལྟ་བ་བཞིན་དུ་གཤེགས་སུ་གསོལ་ནས་རང་གི་ལུས་ལ་སྤྲུལ་པ་ཉེ་པར་བསྡུ་བ་དང་བདག་ཉིད་སྲུང་བ་བྱ་སྟེ། དེ་བཞིན་གཤེགས་པ་ཐམས་ཅད་ཀྱི་བདག་ཉིད་ལ་ལེགས་པར་མཛད་པ་དག་གིས་
ཡང་དག་པར་མགུ་སྟེ། སློབ་དཔོན་ལྡང་བར་བྱའོ་ཞེས་བྱ་བའི་དོན་འདི་ཟུར་གྱི་ཚིག་གིས་རབ་ཏུ་བསྟན་པར་བྱ་བའི་ཕྱིར། །དེ་ནས་སྟོན་པ་རྡོ་རྗེ་འཆང༌། །ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་དེ་མ་ཐག་ཏུ་བརྗོད་པ་སྟེ་སློབ་མ་གཞུག་པ་ལ་སོགས་པའི་ཆོ་ག་རྒྱས་པའི་རྗེས་ཐོགས་ཉིད་ལ་ཞེས་བྱའོ། །རྡོ་རྗེ་འཆང་ནི་རྡོ་རྗེ་སེམས་དཔའོ། །སེམས་ཅན་གྱི་ཁམས་ལུང་དང་རྟོགས་པ་རབ་ཏུ་འཇུག་ཅིང་སྟོན་པར་མཛད་པས་ན་སྟོན་པའོ། །ནམ་མཁའ་བཞིན་དུ་མཐར་ཐུག་པ་མེད་པ་ནི་མཐའ་ཡས་པའོ། །ཕྱོགས་བཅུར་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་འགྲོ་བས་ན་ཀུན་དུ་འགྲོ་བའོ། །དཔལ་མཆོག་ཅེས་བྱ་བ་ལ་སོགས་པས་འཇིག་རྟེན་གྱི་ཁམས་ཐམས་ཅད་ཀྱི་རྡུལ་ཕྲ་རབ་དང་མཉམ་པའི་སངས་རྒྱས་ཀུན་ཏེ་དེ་བཞིན་གཤེགས་པ་རྣམས་ཀྱིས་ཡང་དག་བར་བསྟོད་པའོ། །ནིའི་སྒྲ་ནི་ངེས་པར་གཟུང་བ་བྱ་སྟེ་སངས་རྒྱས་ཐམས་ཅད་ཁོ་ན་ཞེས་བྱ་བའོ། །རྟོག་པ་ཡོངས་སུ་རྫོགས་པ་ནི་མཐར་ཐུག་པ་དེའི་དོན་དུ་ཡང་གསུང་བ་ཡིན་ནོ། །ཅི་གསུང་བ་ཡིན་ཞེ་ན་དང་པོ་ཞེས་བྱ་བ་ལ་སོགས་པ་སྟེ་དང་པོ་ཞེས་བྱ་བ་བཤད་ཟིན་ཏོ། །དཔལ་མཆོག་དང་པོའི་རྒྱུད་ཀྱི་རྣམ་པ་ཅན་གྱི་བདག་གི་ངེས་པའི་ཤེས་པ་འདི་ནི་སྙིང་པོ་ཡིན་ནོ། །མཆོག་ཀྱང་ཡིན་ལ་ཆེན་པོ་ཡང་ཡིན་པས་མཆོག་ཆེན་པོའོ། །བདེ་བ་ཆེན་པོའི་མཆོག་གི་རྗེས་སུ་ཆགས་པ་ཆེན་པོ་སྟེ་ཐམས་ཅད་དུ་ཁྱབ་པའི་རིགས་ལྔའི་གཟུགས་བསྟན་པས་སེམས་ཅན་གྱི་ཁམས་ཐམས་ཅད་ལ་རིགས་ལྔའི་ལྷའི་ཏིང་ངེ་འཛིན་རྫོགས་པར་བྱེད་པའོ། །ཐམས་ཅད་ཀྱི་མཆོག་ཀྱང་དེ་ཡིན་ལ་སེམས་དཔའ་ཡང་དེ་ཡིན་པས་ན་ཐམས་ཅད་ཀྱི་མཆོག་གི་སེམས་དཔའ་སྟེ་རིགས་ལྔའི་ལྷའི་རྣམ་པ་ཅན་ནོ། །དེ་དག་གི་འབྱུང་གནས་ནི་དེ་དག་སྐྱེད་པར་བྱེད་པའི་རྒྱུའོ། །ཅིའི་ཕྱིར་རྒྱུད་འདི་ཐམས་ཅད་ཀྱི་མཆོག་གི་འབྱུང་གནས་ཡིན་ཞེ་ན། རྟག་ཏུ་ནི་ཞེས་བྱ་བ་ལ་སོགས་པ་སྟེ་ནིའི་སྒྲ་ནི་གང་གི་ཕྱིར་གྱི་དོན་ཏེ། གང་གི་ཕྱིར་འདི་དུས་ཐམས་ཅད་དུ་སེམས་ཅན་གྱི་ཁམས་ཐམས་ཅད་ལ་ཐམས་ཅད་ཀྱི་མཆོག་གི་དབང་ཕྱུག་ཉིད་སྩོལ་བར་བྱེད་པའི་ཕྱིར་རོ། །ཐམས་ཅད་ཀྱི་མཆོག་ཀྱང་དེ་ཡིན་ལ་འབྱོར་པ་ཡང་དེ་ཡིན་པས་ཐམས་ཅད་ཀྱི་འབྱོར་པ་སྟེ་རིགས་ལྔའི་ཕུན་སུམ་ཚོགས་པའོ། །དེས་དབང་ཕྱུག་
སྟེ་ཐམས་ཅད་ཀྱི་མཆོག་གི་དབང་ཕྱུག་ནི་རྡོ་རྗེ་འཆང་ངོ༌། །དེའི་དངོས་པོ་ནི་ཐམས་ཅད་ཀྱི་མཆོག་གི་དབང་ཕྱུག་ཉིད་དེ་དེ་སྒྲུབ་པ་པོ་རྣམས་ལ་སྩོལ་བའོ། །འདི་ཡོན་ཏན་འདི་ལྟ་བུ་དང་ལྡན་པ་གཅིག་པུར་མ་ཟད་ཀྱི་གང་གིས་ཀྱང་འདི་ཡོངས་སུ་རྫོགས་པར་ནུས་པ་མ་ཡིན་ནོ་ཞེས་བྱ་བ་བསྟན་པར་བྱ་པའི་ཕྱིར་མཐའ་ཡས་ཞེས་བྱ་བ་ལ་སོགས་པ་གསུངས་ཏེ། དཱི་ལ་མཐའ་མེད་པ་ན་མཐའ་ཡས་པའོ། །མཐའ་ཡས་བ་ཉིད་ཀྱི་ཕྱིར་གང་གིས་ཀྱང་འདིའི་མཐར་ཐུག་པ་མེད་པས་མ་ཐོབ་པའོ། །ཐོབ་པ་མེད་པ་ཉིད་ཀྱི་ཕྱིར་མཐར་ཐུག་པ་མེད་པ་སྟེ་ཡོངས་སུ་རྫོགས་པ་མེད་པའོ། །ནིའི་སྒྲ་ནི་ངེས་པར་གཟུང་བར་བྱ་བ་སྟེ་མཐར་ཐུག་པ་མེད་པ་ཁོ་ནའོ། །ཚུལ་ཡང་དེ་ཡིན་ལ་ཆེན་པོ་ཡང་དེ་ཡིན་བས་ཚུལ་ཆེན་པོ་སྟེ་བྱང་ཆུབ་སེམས་དཔའི་ལམ་འབྲས་བུ་དང་བཅས་པའི་རང་བཞིན་ཉིད་ཀྱི་ཆོས་ཀྱི་དབྱིངས་ཀྱི་དམ་ཚིག་གོ་ཞེས་བྱ་བའི་དོན་ཏོ། །འདི་གང་གིས་ཤེ་ན་མཆོད་པ་ཆེན་པོ་ཐམས་ཅད་ཅེས་བྱ་བ་ལ་རིགས་ལྔའི་ལྷ་མོ་རྣམས་ནི་མཆོད་པ་ཆེན་པོ་ཐམས་ཅད་དེ་དེ་རྣམས་ཀྱི་དམ་ཚིག་ནི་དེ་ཡིན་ནོ། །ནམ་མཁའ་བཞིན་དུ་ཐམས་ཅད་དུ་འགྲོ་བས་ནམ་མཁའ་དང་མཚུངས་པའོ། །འདི་ལས་ཇི་ལྟ་བུ་དང་ལྡན་པ་ཡིན་ཞེ་ན། མཆོག་གི་དངོས་གྲུབ་འཕེལ་བར་སྟེར། །ཞེས་བྱ་བ་ལ་རིགས་ལྔའི་དངོས་གྲུབ་ནི་མཆོག་གི་དངོས་གྲུབ་སྟེ་དེ་ཉིད་གོང་ནས་གོང་དུ་འཇུག་པས་ན་འཕེལ་བའོ། །དེ་སྟེར་བས་ན་མཆོག་གི་དངོས་གྲུབ་འཕེལ་བ་སྟེར་བ་སྟེ་དེ་ལྟ་བུ་གང་ཡིན་པ་དེ་གང་གིས་ཀྱང་ཡོངས་སུ་རྫོགས་པར་ནུས་པ་མ་ཡིན་ནོ་ཞེས་བྱ་བ་ནི་ཚིག་གི་ལྷག་མའོ། །ཐོག་མ་མཐར་ཐུག་མེད་པའོ། །ཞེས་བྱ་བ་ལ་ཐོག་མ་ནི་དང་བོ་བསྐྱེད་པའོ། །མཐར་ཐུག་པ་ནི་ཡོངས་སུ་རྫོགས་པ་སྟེ་ཉིད་མཚམས་སྦྱོར་བ་མེད་པ་འཇོག་པའོ། །གང་མ་ཐོག་མ་དང་མཐར་ཐུག་པ་གཉིས་མེད་པ་སྟེ་ཐོག་མ་དང་ཐ་མ་མེད་པའོ། །འདི་ལྟར་འཆད་པར་འགྱུར་ཏེ། དཱི་ཐོག་མ་དང་ཐ་མ་མེད་བ་ཡིན་ཏེ་ཇི་སྐད་དུ་ད་ལྟར་བྱུང་བའི་རང་བཞིན་གྱིས་ནམ་མཁའི་ཁམས་ཐམས་ཅད་དུ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་ཐམས་ཅད་དུ་འགྲོ་བ་སྟེ། དེའི་ཕྱིར་འདི་ཡོངས་སུ་རྫོགས་པར་བྱེད་པར་སུས་ཀྱང་ནུས་པ་མ་ཡིན་ནོ་ཞེས་བྱ་བ་གསུངས་སོ། །གལ་ཏེ་འདི་ཡོངས་སུ་རྫོགས་པར་
བྱེད་པར་ནུས་པ་མ་ཡིན་ན། འོན་ཡོངས་སུ་རྫོགས་པའོ་ཞེས་བྱ་བ་ཇི་ལྟར་བརྗོད་ཅེ་ན། སེམས་ཅན་ཞེས་བྱ་བ་ལ་སོགས་པ་ལ་གང་གི་ཕྱིར་སེམས་ཅན་རྣམས་ནི་ངན་པ་ལ་ཞེན་ཅིང་གཞུང་ཉུང་བ་ལ་མངོན་པར་དགའ་བ་རྒྱ་ཆེ་བའི་འཇིགས་པས་འཇིགས་པའི་ཕྱིར་རོ། །ནམ་མཁའི་ཁམས་ཐམས་ཅད་ལ་རྟག་ཏུ་བཞུགས་པའི་སྐུ་གསུང་ཐུགས་ཀྱི་རྡོ་རྗེ་རྣམས་ཀྱིས་དེ་བཞིན་གཤེགས་པ་ཐམས་ཅད་ནི་ཐམས་ཅད་དུ་གཤེགས་པ་ཡིན་ནོ་ཞེས་བྱ་བ་འདི་ཡང་མི་མོས་ཤིང་དེ་བཞིན་གཤེགས་པའི་ཡོན་ཏན་རྣམས་ལ་དད་པ་མེད་པའོ། །བསྒྲུབ་པར་བྱ་བའི་སྦྱོར་བས་གཞན་དུ་སྨྲ་ཞིང་གཞན་བྱེད་པས་ན་གཡོ་སྒྱུ་ཅན་ནོ་ཞེས་བྱ་བའི་དོན་ཏོ། །དེ་དག་ཅིའི་ཕྱིར་གཡོ་སྒྱུ་ཅན་ཡིན་ཞེ་ན། མ་སྦྱངས་པ་ཞེས་བྱ་བ་ནི་དེ་བཞིན་གཤེགས་པ་ལ་སོགས་པས་མ་ཐུལ་བས་ན་མ་སྦྱངས་པའོ། །རྟག་ཏུ་དུས་ཐམས་ཅད་དུ་འདོད་པའི་ཡོན་ཏན་ལྔ་ལ་ཞེན་པས་ཏེ་རྟག་ཏུ་རྗེས་སུ་ཆགས་པའོ། །སྡོམ་པའི་ཚུལ་ཁྲིམས་ཙམ་ལ་ཆགས་པས་ན་ཆགས་པ་དང་བྲལ་བ་ལ་ཆགས་པའོ། །དེ་ལྟར་གྱུར་བའི་སེམས་ཅན་ཡོངས་སུ་མ་སྦྱངས་པ་དེ་རྣམས་རྒྱས་པར་བཤད་པ་མཐའ་ཡས་པ་ཐོས་ནས་སུན་འབྱིན་པས་མནར་མེད་པའི་དམྱལ་བ་ཆེན་པོར་ལྟུང་བར་མ་གྱུར་ཅིག་ཅེས་བྱ་བའི་ཕན་གདགས་པར་བྱ་བའི་ཕྱིར་རྒྱུད་ཀྱི་རྒྱལ་པོ་འདི་ཡོངས་སུ་རྫོགས་པ་སྟེ་མདོར་བསྡུས་པ་ཡོངས་སུ་མཐར་ཐུག་པར་བྱས་པའོ། །གང་གི་ཁྱིམ་ན་ཡོད་པ་ཞེས་བྱ་བ་ལ་སོགས་པ་ནི་བཤད་ཟིན་ཏོ། །འདིས་འདི་ལྟར་འཆད་པར་འགྱུར་ཏེ། སློབ་མ་གཞུག་པ་ལ་སོགས་པ་རྫོགས་པར་བྱས་ནས་རིགས་ཐམས་ཅད་ཀྱི་ལྷའི་མཆོད་པ་དང་ཕྱག་རྒྱ་དགྲོལ་བ་དང༌། དབང་བསྐུར་བ་དང༌། གོ་ཆ་བཅིང་པ་དང་མཉེས་པ་བྱ་བ་བྱས་ནས། དེའི་རྗེས་ལ་ཡེ་ཤེས་སེམས་དཔའ་གཤེགས་སུ་གསོལ་བར་བྱ་སྟེ་ཕུར་བུ་བཏོན་པ་དང༌། དཀྱིལ་འཁོར་གྱི་ལྷ་གཤེགས་སུ་གསོལ་བ་བྱས་ལ་དེའི་འོག་ཏུ་སྤྲུལ་པ་ཡིད་ཀྱིས་རང་གི་ལུས་ལ་བཅུག་སྟེ་རྡོ་རྗེ་སྲུང་བ་དང༌། རྡོ་རྗེ་གནོད་སྦྱིན་དང་རྡོ་རྗེ་སེམས་དཔའ་དང༌། གཙུག་ཏོར་དང༌། རྡོ་རྗེ་ཁུ་ཚུར་རྣམས་ཀྱིས་བདག་ཉིད་སྲུང་བ་བྱས་ནས་དེ་བཞིན་གཤེགས་པ་ཐམས་ཅད་འདུས་པས། བྱ་མཆོག་སངས་རྒྱས་སྲས་རྣམས་ལེགས་སོ་ཞེས་བྱ་བ་ནས་བརྩམས་ཏེ་ཇི་སྲིད་བདེ་བ་ཐམས་ཅད་ཅེས་བྱ་བའི་མཐར་ཐུག་པའི་བར་དུ་བསྟན་པའི་
ལེགས་པར་མཛད་པ་རྣམས་ཀྱིས་བདག་ཉིད་དགའ་བར་གྱུར་པར་བསམ་པར་བྱའོ། །དེ་ནས་ཇི་ལྟ་བ་བཞིན་དུ་རྡུལ་ཚོན་ཉེ་བར་བསྡུས་པར་བྱས་ལ་ལངས་ཏེ། ཇི་ལྟར་དགེ་བའི་ཕྱོགས་དང་མཐུན་པར་རྗེས་སུ་སྤྱད་པར་བྱའོ། །དེ་ནས་ཕུར་བུ་གདོན་པའི་སྔགས་དང་ཕྱག་རྒྱ་ནི་འདི་ཡིན་ཏེ། ཨོཾ་བཛྲོད་ཀཱི་ལི་ཀཱི་ལ་ཡ་སརྦ་ཀི་ལ་ཡ་སརྦ་ཀི་ལན་བྷུ་དྡྷ་སཏྟེ་ན་བཛྲ་ཨཛྙཱ་ཡཾ་ཧཱུཾ་ཕཊ། །ཕུར་བུ་ཐམས་ཅད་གདོན་པའི་སྔགས་སོ། །དེ་ནས་འདིའི་ཕྱག་རྒྱ་ནི་འདི་ཡིན་ཏེ་ལས་པ་གཉིས་ཀྱིས་ཁ་སྦྱོར་གྱི་ཐལ་མོ་བྱས་ལ་སྲིན་ལག་གཉིས་ནང་དུ་བཅུག་སྟེ། དབུས་མ་གཉིས་ཀྱི་རྩེ་མོ་ཡང་དག་པར་སྦྱར་བ་བྱས་ལ་དེའི་ཚིགས་གསུམ་པའི་དྲུང་དུ་མཛུབ་མོ་གཉིས་རྡོ་རྗེའི་རྣམ་པ་ཅན་ནས་གང་ཙམ་གྱི་བར་ཡོད་པར་གཟུང་ཞིང༌། མཐེའུ་ཆུང་གཉི་དང་མཐེ་བོང་གཉིས་ཀྱི་རྩེ་མོ་བྱས་ཏེ་འདི་ནི་རྡོ་རྗེ་ཕུར་བུའི་སྔགས་དང་ཕྱག་རྒྱའོ། །འདི་ནི་དབུས་མའི་རྩེ་མོས་ཕུར་བུ་བཟུང་སྟེ། མངོན་སུམ་དུ་འམ་ཡིད་ཀྱིས་གདོན་པར་བྱའོ། །དེ་ནས་ཕུར་བུ་དེ་ཉིད་ཡིད་ཀྱིས་རྡོ་རྗེ་རྩེ་ལྔ་པའི་དབུས་སུའམ་དགྲ་བའི་ལུས་ལ་གཞུག་པར་བྱའོ། །དེ་ནས་ཞི་བའི་རིག་པས་བའི་འོ་མ་ལ་ཡོངས་སུ་བཟླས་ཏེ་ཕུར་བུའི་བུ་གུ་དེ་ཡོངས་སུ་དགང་བར་བྱའོ། །སྦྱིན་པའི་ཕ་རོལ་ཕྱིན་དམ་ཚིག ། ཕྱག་རྒྱའི་དོན་ནི་རབ་སྟོན་བྱེད། །རྒྱུད་འདིའི་བཤད་པ་བྱས་པ་ཡི། །བདག་གིས་དགེ་བ་གང་བསགས་པ། །དེས་ནི་འཇིག་རྟེན་མ་ལུས་པ། །སྦྱིན་པའི་ཕ་རོལ་ཏུ་ཕྱིན་ཀུན་དགའི། །སྙིང་པོ་བསམ་མི་ཁྱབ་དགེ་འབྱུང༌། །ཁྱབ་བདག་རྡོ་རྗེ་རིན་ཆེན་གྱུར། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དུམ་བུ་གཉིས་པའི་བཤད་པ་རྫོགས་སོ།། །།དེ་ལྟར་ཉོན་མོངས་པ་ཅན་གྱི་ཡིད་ཀྱི་གཉེན་པོ་ནམ་མཁའ་དང་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་ཆོས་ཐམས་ཅད་ཀྱི་མཚན་ཉིད་ལ་མངོན་པར་ཞེན་པ་སྟོང་པའི་དངོས་པོས་སྦྱིན་པའི་ཕ་རོལ་ཏུ་ཕྱིན་པ་དང་དམ་ཚིག་གི་ཕྱག་རྒྱའི་མཚན་ཉིད་ཅན་གྱི་དབལ་མཆོག་དང་པོ་རྡོ་རྗེ་འཆང་ཆེན་པོ་དེའི་རང་བཞིན་གདུལ་བྱ་རྣམས་ཀྱིས་མངོན་དུ་བྱེད་པའི་ཕྱིར་དུམ་བུ་གཉིས་པ་བསྟན་ནས་ད་ནི་རང་བཞིན་གྱིས་དག་པའི་སོ་སོར་རྟོག་པའི་ཡེ་ཤེས་ཡིད་ཀྱི་རྣམ་པར་ཤེས་
པའི་གཉེན་པོར་གྱུར་པ་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། ཆོས་ཀྱི་ཕྱག་རྒྱའི་རང་བཞིན་གྱི་རྡོ་རྗེ་འཆང་ཆེན་པོ་དེའི་རང་བཞིན་གདུལ་བྱ་རྣམས་ཀྱིས་རྟོགས་པར་བྱ་བའི་ཕྱིར། དེ་ནས་དང་པོའི་གནས་དགྱེས་པ། །ཞེས་བྱ་བ་ལ་སོགས་པས་དུམ་བུ་གསུམ་པ་གསུངས་པ་ཡིན་ཏེ། དེ་ལྟར་ན་འདི་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་དུ་བསྟན་ནས་སླར་ཡང་བྱ་བ་ནན་ཏན་སྒྲུབ་པའི་ཡེ་ཤེས་བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང་ལས་ཀྱི་ཕྱག་རྒྱའི་རང་བཞིན་ཅན་མིག་དང་རྣ་བ་དང་སྣ་དང་ལྕེ་དང་ལུས་ཀྱི་རྣམ་པར་ཤེས་པ་རྣམས་རྣམ་པར་དག་པའི་རྒྱུར་གྱུར་པ་རྡོ་རྗེ་འཆང་ཆེན་པོའི་རང་བཞིན་གདུལ་བྱ་རྣམས་མངོན་དུ་བྱེད་པའི་ཕྱིར། དེ་ནས་དང་པོའི་གནས་དགྱེས་ནས། །ཐམས་ཅད་ནམ་མཁའ་ཞེས་བྱ་བ་ལ་སོགས་པ་ང་ཉིད་ཀྱིས་དུམ་བུ་བཞི་པ་བསྟན་པར་གསུངས་པ་དེ་ཡིན་ནོ། །དུམ་བུ་བཞི་པོ་དེ་རྣམས་ཀྱི་རིམ་པ་ཇི་ལྟ་བ་བཞིན་དུ་སྟོང་བ་ཉིད་དང་མཚན་མ་མེད་པ་དང་སྨོན་པ་མེད་པ་དང་རང་བཞིན་གྱིས་འོད་གསལ་བའི་རྣམ་པར་ཐར་པའི་སྒོ་རྣམས་ཏེ་མེ་ལོང་ལྟ་བུ་དང་མཉམ་པ་ཉིད་དང་སོ་སོར་རྟོག་པ་དང་བྱ་བ་ནན་ཏན་གྱི་ཡེ་ཤེས་སྒྲུབ་པར་བྱེད་པ་བསྟན་པ་ཡིན་ཏེ། དེའི་ཕྱིར་གཉིས་སུ་ཟློས་པའི་ཉེས་པར་དོགས་པར་མི་བྱའོ། །གལ་ཏེ་གཉིས་སུ་ཟློས་པ་ཡོད་ཀྱང་སྒྲ་གཅིག་གིས་དོན་དུ་མ་སོ་སོར་སྟོན་པར་བྱེད་པ་ཡིན་ནོ་ཞེས་བྱ་བའི་ཕྱིར་སྒྲ་དེ་ཉིད་ཀྱི་དགོངས་པའི་དབང་གིས་དོན་གཞན་བསྟན་པར་བྱ་བ་ཡིན་ཏེ་སྐྱོན་ཡོད་པ་མ་ཡིན་ནོ། །དུམ་བུ་གཉིས་པོ་འདི་ལས་གཞན་ཡང་ཁྱད་པར་ཅི་ཡོད་པ་བསྟན་པར་བྱ་བའི་ཕྱིར་དེ་ལ་དུམ་བུ་གསུམ་པར་དུམ་བུ་གཉིས་པའི་རྟོག་པ་ཐམས་ཅད་ཀྱི་རྒྱུད་ཕྱི་མ་རྩ་བའི་རྒྱུད་ཁོ་ན་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ཡིན་ཏེ་འདིའི་ཁྱད་པར་ནི་འདི་ཡིན་ཏེ། རབ་ཏུ་དགའ་བ་དང༌། དགའ་མ་དང་སྤྱན་མ་དང་དཔལ་ཆེན་མོ་རྣམས་ཀྱི་སྒྲས་དབྱངས་རྡོ་རྗེ་མ་དང་རྡོ་རྗེ་སྤྲིན་མ་དང་རྡོ་རྗེ་སྟོན་མ་དང་རྡོ་རྗེ་དགུན་མ་རྣམས་བརྗོད་པ་ཡིན་ནོ། །དེ་རྣམས་ཀྱི་ཡང་རིམ་པ་བཞིན་དུ་འདིར་ནི་སྙིང་པོ་འདི་རྣམས་ཡིན་ཏེ། ཨོཾ་མ་དུ་བཛྲ་གྷུཾ་གྷུཾ། ཨོཾ་བཛྲ་མེ་གྷ་གུ་ལུ་གུ་ལུ། ཨོཾ་ཤ་ར་ཏ་བཛྲེ། ཨོཾ་བཛྲེ་ཤྲི་རི་ཧཱུཾ་ཧཱུཾ་ཞེས་བྱའོ། །དུམ་བུ་གཉིས་པ་ལ་ནི་ཧེ་བཛྲ་ཏེ། མ་ཧཱ་ཏ་རེ་བཛྲེ་ཧོ། །ཨོཾ་བཛྲ་ལོ་ཙ་
ནི་མ་ཤྲཱི་བཛྲ་ཧི་ཞེས་བྱ་བ་ལ་སོགས་པ་གསུངས་པ་ནི་ཧེ་མ་ཧཱ་སུ་ཁ་ཞེས་བྱ་བ་ལ་སོགས་པ་ནི་དུམ་བུ་གཉིས་པར་སྦྱན་འདྲེན་པའི་སྔགས་སོ། །ཧཱུཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ནི་གསུམ་པར་སྤྱན་འདྲེན་པའི་སྔགས་སོ། །ཨོཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ནི་གཉིས་པར་བུམ་པའི་སྔགས་སོ། །ཧཱུཾ་མ་ཧཱ་སུ་ཁ་ཞེས་བྱ་བ་ལ་སོགས་པ་ནི་གསུམ་པར་རོ། །གཉིས་པ་སྣ་ཚོགས་པའི་གོས་ཀྱིས་རབ་ཏུ་གཡོགས་པའི་གསུམ་པ་ཤིན་ཏུ་དམར་པའི་གོས་ཀྱིས་གཡོགས་པའོ། །སློབ་དཔོན་གྱིས་དཀྱིལ་འཁོར་དུ་འཇུག་པར་བྱའོ། །གསུམ་པར་ཛཿ་ཧཱུཾ་བཾ་ཧོཿ་མ་ཧཱ་སུ་ཁ་ཞེས་བྱ་བ་ལ་སོགས་པ་ནི་རྡོ་རྗེ་སྲུང་བའི་སྔགས་སོ། །གསུམ་པར་ཡི་གེ་ཧཱུཾ་ལ་སོགས་པའོ། །གསུམ་པ་ནི་འདིར་དུམ་བུ་བཞི་པ་སྟེ་ཁྱད་པར་གྱི་གནོད་པ་ཡོད་པ་མ་ཡིན་ནོ། །ཐམས་ཅད་དུ་ནི་དུམ་བུ་གཉིས་པ་ལས་གསུངས་པའི་རྒྱས་པར་བསྟན་པ་དབང་དུ་བྱེད་པ་ཉིད་དུ་གཟུང་བར་བྱའོ། །དུམ་བུ་གཉིས་པོ་འདིར་ཡང་ཁྱད་པར་ནི་སོ་སོ་དང་བསྟུན་པ་བསྟན་པས་སྐབས་ཁ་ཅིག་ཏུ་ཚིག་གཞན་གྱིས་དངོས་པོ་དེ་ཉིད་བསྟན་པར་བྱ་བ་ཡིན་ཏེ་ཞེས་བྱ་བའོ། །དུམ་བུ་གསུམ་པའི་དཔལ་རྡོ་རྗེ་སེམས་དཔའི་དཀྱིལ་འཁོར་ཆེན་པོའི་རྣམ་པར་འགྲེལ་པ་རྫོགས་སོ།། །།དེ་བཞིན་གཤེགས་པའི་དཀྱིལ་འཁོར་ཆེན་པོ་ཡང་དུམ་བུ་གཉིས་པ་ལས་གསུངས་པའི་དཀྱིལ་འཁོར་དང་འདྲ་བ་སྟེ་སླར་ཡང་བཤད་པར་མི་བྱའོ། །རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཡང་དུམ་བུ་གཉིས་བ་ལས་གསུངས་པའི་རྡོ་རྗེའི་རིགས་ཀྱི་དཀྱིལ་འཁོར་ཆེན་པོ་དང་འདྲ་བ་སྟེ། འདིར་ཁྱད་པར་ནི་འདི་ཡིན་ཏེ་ཐིག་སྐུད་གསུམ་པའི་དཀྱིལ་འཁོར་གྱི་དཀྱིལ་གྱི་ཐིག་སྐུད་བདུན་པའི་བར་མཚམས་བསྐོར་བར་བྱ་སྟེ། དེའི་རྗེས་ལ་སླར་ཡང་ཐིག་སྐུད་བདུན་པའི་མཚམས་ཀྱི་ཕྱི་རོལ་དུ་མེའི་ཕྱོགས་ཀྱི་ཆར་འཁོར་གྱི་དཀྱིལ་འཁོར་གྱི་ནང་དུ་མིད་པོ་གསུམ་པོའི་དཀྱིལ་འཁོར་རོ།། བདེན་བྲལ་དུ་སྲིད་མོ་བཞིའི་དཀྱིལ་འཁོར་རོ། །རླུང་དུ་ཀླུའི་དཀྱིལ་འཁོར་རོ། །དབང་ལྡན་གྱི་ཕྱོགས་ཀྱི་ཆར་སྡུག་བསྔལ་གདོན་པའི་དཀྱིལ་འཁོར་རོ། །སླར་ཡང་འཁོར་གྱི་དཀྱིལ་འཁོར་གྱི་ཕྱི་རོལ་དུ་ཕྱོགས་དང་མཚམས་རྣམས་སུ་འཇིག་རྟེན་གྱི་ཁམས་བརྒྱད་དེ། དེ་རྣམས་སུ་
ཡང་དེ་བཞིན་གཤེགས་པར་རེ་རེ་ལོགས་གཡས་པ་དང་གཡོན་པ་ན་བཞུགས་པའི་བྱང་ཆུབ་སེམས་དཔའ་གཉིས་གཉིས་ཀྱིས་ཡོངས་སུ་བསྐོར་བ་བྲི་བར་བྱའོ། །དེ་ལ་ཤར་གྱི་ཕྱོགས་སུ་བཅོམ་ལྡན་འདས་ཤཱཀྱ་ཐུབ་པའོ། །ནུབ་ཀྱི་ཕྱོགས་སུ་འོད་དཔག་ཏུ་མེད་པའོ། །ལྷོར་མི་བསྐྱོད་པའོ། །བྱང་ཆུབ་རྡོ་རྗེ་སྙིང་པོས་རབ་ཏུ་འཇོམས་པར་མཛད་པའོ། །མེའི་ཕྱོགས་སུ་ཡེ་ཤེས་ཏ་ལ་ལའོ། །བདེན་བྲལ་དུ་འཇིགས་དབྱངས་འབྲུག་སྒྲའོ། །རླུང་དུ་གསེར་འོད་བརྩེགས་པར་སྣང་བའོ། །དབང་ལྡན་གྱི་ཕྱོགས་ཆར་དེ་བཞིན་གཤེགས་པ་བདེན་པར་གསུང་བ་བྲི་བར་བྱའོ། །ཐམས་ཅད་ཀྱང་རྒྱན་ཐམས་ཅད་ཀྱིས་རྣམ་པར་བརྒྱན་ཞིང་པདྨའི་སྙིང་པོ་ཅན་གྱི་སེང་གེའི་ཁྲིའི་གདན་ལ་བཞུགས་ནས་ཆོས་སྟོན་པ་བྲི་བར་བྱའོ། །དེ་ལ་བཅོམ་ལྡན་འདས་ཤཱཀྱ་ཐུབ་པའི་གཡས་ལོགས་སུ་འཇིག་རྟེན་དབང་ཕྱུག་གཡོན་པར་རྡོ་རྗེ་འཆང་བའོ། །མི་བསྐྱོད་པའི་གཡས་ལོགས་སུ་སྦོས་ཀྱི་གླང་པོ་གཡོན་པར་རྡོ་རྗེ་སྙིང་པོ། འོད་དཔག་ཏུ་མེད་པའི་གཡས་ལོགས་སུ་སྒྲིབ་པ་ཐམས་ཅད་རྣམ་པར་སེལ་བ་གཡོན་དུ་མཐུ་ཆེན་ཐོབ་པའོ། །ཡེ་ཤེས་ཏ་ལ་ལའི་གཡས་ཕྱོགས་སུ་འཇམ་དཔལ་གཡོན་དུ་གཟུངས་ཀྱི་དབང་ཕྱུག་རྒྱལ་པོའོ། །བདེན་པར་གསུངས་པའི་གཡས་ལོགས་སུ་བྱང་ཆུབ་སེམས་དཔའ་བཟང་པོའི་དཔལ་གཡོན་དུ་རིན་ཆེན་དྲ་བ་ཅན་ནོ། །གསེར་འོད་བརྩེགས་པར་སྣང་བའི་གཡས་ལོགས་སུ་དྲི་མ་མེད་པའི་གཟི་བརྗིད་གཡོན་དུ་རྒྱལ་བའི་བློ་གྲོས་སོ། །འཇིགས་དབྱངས་འབྲུག་སྒྲའི་གཡས་ལོགས་སུ་ནམ་མཁའི་སྙིང་པོ་གཡོན་དུ་སའི་སྙིང་པོའོ། །རྡོ་རྗེ་སྙིང་པོས་རབ་ཏུ་འཇོམས་པར་མཛད་པའི་གཡས་ལོགས་སུ་བློ་གྲོས་མི་ཟད་པ་གཡོན་དུ་ཀུན་དུ་བཟང་པོའོ། །དེ་བཞིན་གཤེགས་པ་དང་བྱང་ཆུབ་སེམས་དཔའ་དེ་རྣམས་ཀྱི་ཕྱག་རྒྱ་དང་སྔགས་ལ་སོགས་པ་ནི་འཕགས་པ་རྣམ་པར་སྣང་མཛད་ཀྱི་སྙིང་པོ་མཛད་ཅེས་བྱ་བའི་རྒྱུད་ཆེན་པོ་ལས་ཤེས་པར་བྱའོ། །འདི་ཁྱད་པར་ཡང་འདི་ཡིན་ཏེ། རྡོ་རྗེ་མཚོན་ཆ་འཛིན་མ་ལ་སོགས་པ་ནས་རྡོ་རྗེ་དྲིལ་བུ་ལ་མཐར་ཐུག་གི་བར་གྱི་ལྷ་མོ་བཅུ་དྲུག་ནི་གཡོན་བརྐྱང་བའི་གནས་པས་བཞུགས་ཤིང༌། དབུ་སྐྲ་འཁྲུགས་ཤིང་གྱེན་
དུ་བརྫེས་ཤིང་གཡོ་བའོ། །དུམ་བུ་གསུམ་པར་རྡོ་རྗེ་ཉི་མ་མེ་ལྟར་འབར་བའི་དཀྱིལ་འཁོར་ཆེན་པོའི་བཤད་པ་རྫོགས་སོ།། །།པདྨའི་རིགས་ཀྱི་དཀྱིལ་འཁོར་ཆེན་པོ་ནི་སྔར་བཤད་པ་དང་མཚུངས་པ་ཡིན་པས་སླར་ཡང་བཤད་པར་མི་བྱའོ། །རིན་པོ་ཆེའི་རིགས་ཀྱི་དཀྱིལ་འཁོར་ཆེན་པོ་ཡང་སྔར་བཤད་པ་དང་མཚུངས་པ་ཡིན་པ་ལས་ཁྱད་པར་ནི་འདི་ཡིན་ཏེ་གང་ཞིག་ཡིད་དུ་འོང་བའི་སྙིང་པོའི་ཁྱད་པར་རོ། །དེ་ལ་གཉིས་པར་བཛྲ་ཨ་བྷི་ཤི་ཀ་ཛྭ་མ་ཧཱ་བཛྲེ་ནི་ཌྜ་ཎེ་ཧཱུཾ། མ་ནི་དྷ་ཛཱ་གྲ་ཀེ་ཡུ་རེ་བཾ་མ་ཧཱ་བཛྲ་མ་ཧེ་ཧོ། ཞེས་བྱ་བ་ནི་དུམ་བུ་གཉིས་པ་ཡིད་དུ་འོང་བའི་སྙིང་པོ་རྣམས་སོ། །གསུམ་པ་ལ་ཨོཾ་ར་ཏི་བཛྲི་ནི་མཌྜ་ཨོཾ་ཙིཎྚ་ཏ་མ་ནི་ཧོ། །ཨོཾ་བཛྲ་མ་ཧཱ་མ་ཧེ་ཧཾ་ཞེས་བྱ་བའོ། །འཇིག་རྟེན་པའི་དཀྱིལ་འཁོར་བཞི་པོ་ནི་སྔ་མ་བཞིན་ཁོ་ནའོ། །བསྡུས་པའི་དཀྱིལ་འཁོར་ཡང་དུམ་བུ་གཉིས་པ་ལས་གསུངས་པ་ཡིན་ནོ། །འདིར་ཁྱད་པར་ནི་འདི་ཡིན་ཏེ་གང་ཞིག་མདོར་བསྟན་པ་ནི་སྔར་བཤད་པ་འདི་ཁོ་ན་འདིར་རྗེས་སུ་འཇུག་པའོ། །གང་གི་ཕྱིར་དེ་རྒྱས་པར་བཤད་པའི་ཆོ་ག་དེ་ཉིད་འདིར་དབང་དུ་བྱས་ལ་ཉིད་ཀྱི་རྗེས་སུ་འཇུག་པར་བྱེད་པའི་ཕྱིར་རོ། །དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་ཡང་དུམ་བུ་གཉིས་པ་ལས་གསུངས་པའི་གསང་བའི་དཀྱིལ་འཁོར་དང་འདྲ་བ་ཡིན་ནོ། །འདིར་ཁྱད་པར་ནི་འདི་ཡིན་ཏེ་འདོད་ཆགས་རྡོ་རྗེ་མ་ནི་དམར་བ་དང་དཀར་པའོ། །ཀི་ལི་ཀི་ལི་ནི་དཀར་པོ་དང་སེར་པོའོ། །རྡོ་རྗེ་དྲན་མ་ནི་སྔོ་བ་དང་དཀར་པོའོ། །རྡོ་རྗེ་འདོད་པའི་དབང་ཕྱུག་མ་ནི་ལྗང་བ་དང་དཀར་བའོ། །ཨོཾ་མ་དུ་བཛྲི་གྷུཾ་གྷུཾ་ཞེས་བྱ་བ་ལ་སོགས་པ་ནི་དུས་ཀྱི་མཆོད་པ་རྣམས་ཀྱི་སྙིང་པོ་བཞིའོ། །དུས་མཉམ་དུ་རྡོ་རྗེ་དང་བཅས་པའི་དྲིལ་བུ་དང་ཝང་ལ་སོགས་པའི་རོལ་མོ་ལ་འཁྲུག་པའི་དབྱངས་ཀྱིས་རྡོ་རེ་གར་གྱི་མཆོད་པ་བྱས་ལ། གསང་བའི་ལྕགས་ཀྱུ་དྲི་བུ་དང་བཅས་པ་དང༌། ཨོཾ་ཨཱཿ་ཧཱུཾ་གི་གླུའི་བཟླས་པ་ཟུར་བཞིའི་ཚུལ་གྱིས་བཅོམ་ལྡན་འདས་འཁོར་དང་བཅས་པ་སྤྱན་དྲང་བར་བྱའོ། །དུམ་བུ་གསུམ་པ་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་གྱི་བཤད་པ་རྫོགས་སོ།། །།དེ་བཞིན་གཤེགས་པའི་གསང་བའི་དཀྱིལ་འཁོར་ནི་དུམ་བུ་གཉིས་པ་ལས་གསུངས་པ་དེ་ཁོ་ན་ཡིན་ནོ། །ཁྱད་པར་ནི་
འདི་ཡིན་ཏེ་མཆོད་པ་ཐམས་ཅད་ཀྱིས་ཡོངས་སུ་གང་པའི་སྣོད་ནམ་མཁའི་སྙིང་པོའི་ཕྱག་ཏུ་བྲི་བར་བྱའོ། །རྡོ་རྗེ་ཉི་མ་མེ་ལྟར་འབར་བའི་གསང་བའི་དཀྱིལ་འཁོར་ཡང་དུམ་བུ་གཉིས་པ་ལས་གསུངས་པའི་དང་པོའི་གསང་བའི་དཀྱིལ་འཁོར་དུ་བྲི་བར་བྱའོ། །འདིར་ཁྱད་པར་ནི་འདི་ཡིན་ཏེ་རྡོ་རྗེ་མཚོན་ཆ་དང་རྩེ་གསུམ་པ་ཆེན་པོ་དང་ལྕགས་ཀྱུ་དང་ཞགས་པ་འཛིན་མ་རྣམས་དང་ལྷན་ཅིག་ཏུ་གདན་གཅིག་ལ་བཞུགས་པའི་བཅོམ་ལྡན་འདས་བྲི་བར་བྱའོ། །མཚམས་བཞིར་ནི་མདའ་འཛིན་མ་ལ་སོགས་པ་བཞི་བྲི་བར་བྱའོ། །ཧྲི་ཨ་ར་ལླི་ཧཱུཾ་ཞེས་བཅོམ་ལྡན་འདས་ཀྱི་བསྒྲུབ་པར་བྱ་བའི་སྙིང་པོའོ། །ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲིཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་བཱ་ན་བཛྲ་ཧཱུཾ་ཕཊ་ཅེས་བྱ་བས་རྡོ་རྗེ་འབར་བ་ལྕགས་ཀྱུ་ཆེན་པོ་དང་གར་གྱི་ཚུལ་གྱིས་བཅོམ་ལྡན་འདས་འཁོར་དང་བཅས་པ་སྤྱན་དྲང་བར་བྱའོ། །འཕགས་པ་སྤྱན་རས་གཟིགས་ཀྱི་དབང་ཕྱུག་དང་འཕགས་པ་ནམ་མཁའི་སྙིང་པོ་དག་གི་གསང་བའི་དཀྱིལ་འཁོར་ཡང་སྔ་མ་བཞིན་ཁོ་ནའོ། །བདག་ལ་བྱིན་གྱིས་བརླབ་པའི་སྒྲུབ་པ་དང་རྣལ་འབྱོར་སྒྲུབ་པ་སྔར་བཤད་པ་གཟུང་བར་བྱའོ། །ཕྱག་རྒྱའི་རྒྱུད་ཀྱང་དེ་བཞིན་ཏེ། ཁྱད་པར་ནི་འདི་ཡིན་ནོ། །བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་རྡོ་རྗེ་དྲིལ་བུ་བ་དན་འཛིན་པའི་དམ་ཚིག་གི་ཕྱག་རྒྱ་གཉིས་གཞན་ནོ། །དེ་དག་ནི་འདི་ཡིན་ཏེ་གཡས་པའི་རྡོ་རྗེ་ཁུ་ཚུར་བཅིངས་ནས་ལག་པ་གཡོན་པ་བ་དན་གསུམ་གཡོ་བར་བྱ་སྟེ། འདི་ནི་སྣ་ཚོགས་པའི་བ་དན་འཛིན་པའི་དམ་ཚིག་གི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་གཅིངས་ནས་དྲིལ་བུའི་རྣམ་པ་བྱས་ནས་གཡས་པའི་རྡོ་རྗེ་ཁུ་ཚུར་དེའི་སྟེང་དུ་གཟུང་བར་བྱ་སྟེ་འདི་ནི་དམ་ཚིག་གི་ཕྱག་རྒྱ་གཞན་ཡིན་ནོ། །འདིར་དང་པོ་ནི་རྟོག་པ་ཐམས་ཅད་ཀུན་ལས་བཏུས་པའི་དཀྱིལ་འཁོར་ཆེན་པོའི་བཤད་པའི་དོན་སྟོན་པར་བྱེད་པ་ཡིན་ནོ། །གཉིས་པ་ནི་གསང་བའི་དཀྱིལ་འཁོར་ལྔ་པོའི་དོན་སྟོན་པར་བྱེད་པའོ། །དེ་ལ་རྟོག་པ་ཐམས་ཅད་ཀུན་ལས་བསྡུས་པའི་ཁྱད་པར་གང་ཡིན་པ་དེ་བཤད་པར་བྱ་སྟེ་དེ་ལ་ཆགས་པ་ཆེན་པོ་ནི་རྡོ་རྗེ་སེམས་དཔའི་བདག་པོ་ཁོ་ནར་བཤད་པ་ཡིན་ནོ། །བསྙེམས་པའི་བདག་པོ་ཉིད་དེ་བཤད་ཟིན་ནོ། །ཐིག་གདབ་པའི་ཆོ་
གས་ཆ་གསུམ་པ་མ་ལུས་པའི་ཐིག་གདབ་པར་བྱས་ལ་དཀྱིལ་འཁོར་བྲི་བར་བྱའོ་ཞེས་བྱ་བ་འདི་གསུངས་པའི་དངོས་པོ་རྒྱུད་ཐམས་ཅད་དུ་ཡང་གཟུང་བར་བྱའོ། །དཀྱིལ་འཁོར་དུ་ཞུགས་ཏེ་ནང་གི་རིམ་པར་གནས་ནས་ཛཿ་ཧཱུཾ་བཾ་ཧོཿ། པྲ་སིདྷ་མྨཾ་ཞེས་བྱ་བ་དཀྱིལ་འཁོར་གྱི་བདག་པོ་ལ་སློབ་དཔོན་གྱིས་བརྗོད་པར་བྱ་བ་ཡིན་ནོ་ཞེས་བྱ་བ་གང་གསུངས་པ་དེ་གཉིས་པ་འདིར་ཤེས་པར་བྱའོ། །གང་ལ་བསོད་ནམས་མ་ཚང་བས་ཕྱིའི་ཡོ་བྱད་ཀྱི་ཕུན་སུམ་ཚོགས་པ་མེད་ན་དེས་ཐལ་བ་བཟང་པོས་དཀྱིལ་འཁོར་རེ་ག་གཅིག་པ་བྲིས་ཏེ་ཇི་ལྟ་བ་བཞིན་དུ་ཆོ་ག་ཐམས་ཅད་རྗེས་སུ་སྤྱད་ནས་ཆོ་གས་འཇུག་པ་ལ་སོགས་པ་བྱས་ཏེ་ཉིན་ཞག་བཞིའི་བར་དུ་བཟླས་པ་དང་བསྒོམ་པས་བསྒྲུབ་པར་བྱས་ན་དེའི་རྗེས་ལ་སྒྲིབ་པ་ཐམས་ཅད་སྤོང་བར་འགྱུར་རོ། །མེ་ཏོག་དང་སྤོས་དང་མར་མེ་དང་དྲི་རྣམ་པ་སྣ་ཚོགས་པ་ནི་དཔལ་རྡོ་རྗེ་སེམས་དཔའི་རིགས་ལའོ། །མེ་ཏོག་དང་སྤོས་དང་མར་མེ་དང་དྲིའི་ལྷ་མོ་རྣམས་ཀྱང་སྐུ་མདོག་སྣ་ཚོགས་པའོ། །དེ་བཞིན་གཤེགས་པའི་རིགས་ལ་མེ་ཏོག་ལ་སོགས་པ་ཕྱིའི་མཆོད་པ་དང་མེ་ཏོག་ལ་སོགས་པའི་ལྷ་མོ་རྣམས་ཀྱང་སྐུ་མདོག་དཀར་བའོ། །རྡོ་རྗེའི་རིགས་ལ་ཁ་དོག་སྔོན་པོ། པདྨའི་རིགས་ཀྱི་ཁ་དོག་དམར་པོ། །ནོར་བུའི་རིགས་ལ་ཁ་དོག་སེར་པོའོ། །ལྷག་མ་ནི་གོ་སླ་བས་བཤད་པར་མི་བྱའོ། །དུམ་བུ་གཉིས་པ་ལས་གསུངས་པའི་རྟོག་པ་ཐམས་ཅད་ཀུན་ནས་བསྡུས་པ་དང༌། རྟོག་པ་ཐམས་ཅད་ཀུན་བསྡུས་པ་གཉིས་པ་འདྲ་བ་ཡིན་ཏེ། བཤད་པ་དེ་ཉིད་གཟུང་བར་བྱའོ། །དུམ་བུ་གསུམ་པའི་གསང་བའི་དཀྱིལ་འཁོར་གྱི་ཆོ་གས་རྣལ་འབྱོར་པ་མ་གྲུབ་ན་སྒྲུབ་པའི་ཁྱད་པར་གྱིས་མྱུར་དུ་དངོས་གྲུབ་སྒྲུབ་པར་བྱེད་པའི་དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་དུམ་བུ་གཉིས་པ་ལས་གསུངས་པའི་གསང་བའི་དཀྱིལ་འཁོར་དང་འདྲ་བར་གསུངས་པ་ཡིན་ནོ། །འདིའི་ཁྱད་པར་ནི་འདི་ཡིན་ཏེ། རྡོ་རྗེ་སེམས་དཔའི་རྡོ་རྗེ་ལས་འདི་བསྐྱེད་པ་ཡིན་ཏེ། རྡོ་རྗེ་རིན་པོ་ཆེའི་ཅོད་པན་གྱིས་ལྷ་མོ་རྣམས་ལ་དབང་བསྐུར་བའོ། །དེ་ཉིད་ཀྱིས་སྤྱན་དྲངས་ཏེ། མཉམ་པའི་ཐལ་མོ་དྲིལ་བཅས་མཆོད། །རྩ་བའི་དབྱངས་ཀྱིས་རྣམ་སད་པས། ཧཱུཾ་གི་གླུ་ནི་བཟླས་པ་ཡིས། །ཤིན་ཏུ་གྲུབ་པར་འགྱུར་བ་ཡིན། །ཞེས་བྱ་བས་
སོ། །གཞན་ཡང་ཁྱད་པར་འདི་ཡིན་ཏེ། །གཡས་དང་གཡོན་པའི་བརླ་དག་གིས། །དྲིལ་བུ་རབ་སད་བཟླས་བྱས་ཏེ། །རྟོག་པ་ཐམས་ཅད་རྗེས་སད་པས། །དཔལ་མཆོག་དང་པོ་སོགས་འགྲུབ་འགྱུར། །ཞེས་བྱ་བའོ། །དེ་བཞིན་གཤེགས་པའི་གསང་བའི་དཀྱིལ་འཁོར་ཡང་དུམ་བུ་གཉིས་པའི་དེ་བཞིན་གཤེགས་པའི་དཀྱིལ་འཁོར་དང་མཚུངས་ཏེ་སླར་ཡང་བཤད་པར་མི་བྱའོ། །རྡོ་རྗེ་ཉི་མ་མེ་ལྟར་འབར་བའི་ཅོ་ག་ཡང་དུམ་བུ་གཉིས་པའི་དང་པོའི་གསང་བའི་དཀྱིལ་འཁོར་དང་འདྲའོ། །འདིར་ཁྱད་པར་ནི་འདི་ཡིན་ཏེ་ཡི་གེ་ཧིས་བཅོམ་ལྡན་འདས་དགོད་པར་བྱའོ། །དེའི་རྗེས་ལ་དང་པོའི་དམར་པོ་དང་དཀར་པོས་ཏེ་མདའ་འཛིན་པའི་སྙིང་པོས་སོ། །གཉིས་པ་ནི་ཟླ་བ་ལྟར་དཀར་པོས་ཏེ་ཁ་ཊྭཱཾ་ག་འཛིན་མའི་སྙིང་པོས་སོ། །གསུམ་པ་ནི་དཀར་བ་དང་ལྗང་བ་སྟེ་རྡོ་རྗེ་ཁྱབ་འཇུག་མའི་སྙིང་པོས་སོ། །བཞི་པ་ནི་གསེར་བཞིན་དུ་དྲི་མ་མེད་པ་སྟེ་རྡོ་རྗེ་དྲིལ་བུ་བ་དན་མའི་སྙིང་པོས་དགོད་པར་བྱའོ། །རྟག་ཏུ་ཆགས་པ་ལས་བྱུང་ཁྲོ། །རྡོ་རེ་མེ་ཡི་ཕུང་པོའི་སྐུ། །འབར་བའི་རྡོ་རྗེ་རྣལ་འབྱོར་ཆེ། །མཁའ་འགྲོ་མ་རྣམས་ཀུན་དུ་འབར། །ཞེས་བྱ་བའོ། །དེ་ཁོ་ན་ཉིད་ཀྱི་རྡོ་རྗེ་གཟུང་བའི་སྔགས་སོ། །དེའི་རྗེས་ལ་ཆོ་ག་ཐམས་ཅད་རྗེས་སུ་སྤྱད་ནས། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀཧྞ་ཧཱུཾ། གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཕཊ། ཨཱ་ན་ཡ་ཧོ་བྷ་ག་བཱ་ན། བཛྲ་ཧཱུཾ་ཕཊ་ཅེས་བྱ་བ་ནི། མཉམ་པ་དྲིལ་བཅས་གླིང་བུ་སོགས། །རྣམ་དཔེན་རོལ་མོ་དཀྲོལ་བ་ཡིས། །ཡི་གེ་ཧཱུཾ་བཞིའི་གླུ་ཉིད་ནི། །ཟུར་བཞི་པ་ནི་འགྲུབ་པར་འགྱུར། །ཞེས་བྱ་བ་འདིར་བཟླས་པའི་ཆོ་ག་ཡིན་ནོ། །འཕགས་པ་སྤྱན་རས་གཟིགས་ཀྱི་དབང་ཕྱུག་གི་གསང་བའི་ཆོ་ག་ནི་དུམ་བུ་གཉིས་པ་ལས་གསུངས་པ་ཁོ་ན་ཡིན་ནོ། །ཁྱད་པར་ནི་འདི་ཡིན་ཏེ། ཕྱག་གཡོན་པ་ལ་རང་གི་ཕྱག་མཚན་པདྨ་དང་བཅས་པའི་པདྨའི་ལྷ་མོ་རྣམས་སོ། །འཕགས་པ་ནམ་མཁའི་སྙིང་པོའི་གསང་བའི་ཆོ་ག་ཡང་དུམ་དུ་གཉིས་པ་ལས་གསུངས་པ་དང་འདྲ་བའོ། །དཔལ་རྡོ་རྗེ་སེམས་དཔའ་རས་རིས་ཀྱི་དཀྱིལ་འཁོར་ལ་གཞན་ཡང་སྒྲུབ་པའི་ཁྱད་པར་འདི་ཡིན་ཏེ། ཨོཾ་སརྦ་ཏ་ཐཱ་ག་ཏ་པཱ་ར་མི་སམྦྷོ་དྷི་ཙིཏྟ་ཨུ་པ་ཡཱ་མི་ཞེས་བྱ་བ་ལ། ཀུན་མཆོག་དངོས་གྲུབ་ཆེན་པོ་ཡིས། །དབང་ཕྱུག་
ཆེན་པོ་ལྷག་པའི་བདག །ཅེས་བྱ་བས་བྱང་ཆུབ་ཆེན་པོར་སེམས་བསྐྱེད་དོ། །འདིར་རྡོ་རྗེ་ཐལ་མོ་ཁ་སྦྱོར་གྱི་མཆོད་པས་སློབ་མ་ཐམས་ཅད་གཞུག་པའོ། །ཨོཾ་འདི་ནི་སངས་རྒྱས་ཐམས་ཅད་ཉིད། །རྡོ་རྗེ་འཆང་གི་རྡོ་རྗེ་སྟེ། །རྡོ་རྗེ་འཆང་ཆེན་བརྟུལ་ཞུགས་ནི། ཁྱོད་ཀྱིས་ཀྱང་ནི་རྟག་ཏུ་གཟུང༌། །ས་མ་ཡ་སྟྭཾ། དེ་བཞིན་གཤེགས་པ་ཐམས་ཅད་ཀྱི་བྱང་ཆུབ་ཀྱི་མཆོག་གི་སེམས་ཆེན་པོ་ནི་འདི་ཡིན་ཏེ་འདི་མ་སྤངས་པར་རྟག་ཏུ་གཟུང་བ་གསང་བ་འདི་ཡིན་ཏེ། དངོས་གྲུབ་ཀྱི་ཕྱིར་རྡོ་རྗེ་བརྟུལ་ཞུགས་ཀྱི་སྔགས་འདི་ཡིན་ནོ། །བསྡུས་པའི་དཀྱིལ་འཁོར་ཡང་དུམ་བུ་གཉིས་པ་ལས་གསུངས་པའི་དཀྱིལ་འཁོར་དང་འདྲ་བས་ཏེ་སླར་ཡང་བཤད་པར་མི་བྱའོ། །ཉེ་བའི་སྙིང་པོའི་ཕྱག་རྒྱས་འགྲུབ་པར་འགྱུར་པས་དེ་བཤད་པར་བྱ་བའི་ཕྱིར། ཨ་ནུ་རཱ་ག་ཡ་མི་ཞེས་བྱ་བ་གསུངས་སོ། །ཇི་ལྟར་ཕབ་པའི་ཡེ་ཤེས་རབ་ཏུ་བཞུགས་པ་ཞེས་བྱ་བ་ལ་འདི་ནི་དཔལ་མཆོག་དང་པོའི་བཅོམ་ལྡན་འདས་རྡོ་རྗེ་སེམས་དཔའ་མཆོག་གི་དེ་ཁོ་ན་ཉིད་དེ། མཆོག་ཀྱང་ཡིན་ལ་དེ་ཁོ་ན་ཉིད་ཀྱང་དེ་ཡིན་པས་མཆོག་གི་དེ་ཁོ་ན་ཉིད་དེ་སྐུ་གསུང་ཐུགས་ཀྱི་རྡོ་རྗེ་སྟོང་པ་ཉིད་དོ། །དེའི་ངེས་པའི་གསང་བའི་ཤེས་པ་ནི་དེའི་སྒོམ་པའི་ཕྱག་རྒྱ་དང་དེ་སྟོན་པར་བྱེད་པའི་སྐུའོ། །འདིའི་མིང་སྟོན་པར་བྱ་བའི་ཕྱིར། །བདེ་བ་ཆེན་པོ་ཞེས་བྱ་བ་ལ་སོགས་པ་གསུངས་པ་སྟེ། བདེ་བ་ཆེན་པོ་རྡོ་རྗེ་དོན་ཡོད་པའི་དམ་ཚིག་ནི་བཤད་ཟིན་ཏོ། །དེ་ནི་མཆོག་ཀྱང་ཡིན་ལ་དེ་ཁོ་ན་ཉིད་ཀྱང་དེ་ཉིད་ཡིན་པས་མཆོག་གི་དེ་ཁོ་ན་ཉིད་སྔར་བཤད་པའོ། །དེ་ལ་དམིགས་པ་དང་དེ་སྟོན་པར་བྱེད་པ་གང་ཡིན་པ་དེ་ནི་དེའི་མིང་ཅན་ནོ། །དེ་ཡང་རྣལ་འབྱོར་པ་རྣམས་ལ་རྡོ་རྗེ་སེམས་དཔའི་བྱིན་གྱིས་བརླབས་པ་ཁོ་ནས་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན་ཞེས་བྱ་བ་ལ་རྒྱུ་གང་གི་ཕྱིར་སྐུ་གསུང་ཐུགས་ཀྱི་རྡོ་རྗེའི་ངེས་པའི་ཤེས་པ་ལ་དམིགས་པ་དང༌། དེ་སྟེན་པར་བྱེད་པའི་ཕྱག་རྒྱ་དཔལ་རྡོ་རྗེ་སེམས་དཔའི་བྱིན་གྱིས་བརླབས་པ་འབེབས་པ་ཁོ་ནས་སྐྱེ་བར་འགྱུར་གྱི་རྒྱུ་གཞན་གྱིས་མ་ཡིན་ནོ་ཞེས་བྱ་བ་རྣམ་པར་རྟོག་པ་འདི་ཡོད་པས་དེ་བསལ་བའི་ཕྱིར་འདི་ལྟ་སྟེ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བཅོམ་ལྡན་འདས་རྡོ་རྗེ་སེམས་དཔའི་དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་གྱི་མཆོག་གི་ཕྱག་རྒྱ་ཆེན་པོ་ལ་སོགས་པའི་
སྒོམ་པ་དང༌། དེ་གསལ་བར་བྱེད་པའི་ལྷ་མོ་རྟག་ཏུ་ངེས་པའི་ཤེས་པ་ལ་ཞུགས་པས་ན་རྟག་ཏུ་ཐུགས་ལ་གནས་པ་སྟེ་ངེས་པ་སྐུའི་གཟུགས་ཀྱི་རྟག་ཏུ་བཞུགས་པའོ་ཞེས་བྱ་བའོ་དོན་ཏོ། །དེའི་ཕྱིར་རྡོ་རྗེ་སེམས་དཔའི་བྱིན་གྱིས་བརླབས་པའི་དེ་ཁོ་ནས་དེ་བསྐྱེད་པ་ཡིན་ནོ། །མཆོག་ནི་དམ་པའོ། །སྐུ་གསུང་ཐུགས་ཀྱི་རྡོ་རྗེ་ཐམས་ཅད་བཤད་ཟིན་ཏེ་དེ་རྣམས་སྐྱེད་པར་བྱེད་པའི་རྒྱུར་གྱུར་པའི་ལྷ་མོ་རྣམས་ནི་སྐུ་གསུང་ཐུགས་ཀྱི་རྡོ་རྗེ་ཐམས་ཅད་ཀྱི་བྱིན་གྱིས་བརླབས་པའི་ལྷ་མོ་ཡིན་ནོ། །འདས་མ་ཐག་ཏུ་བཤད་པ་དེ་ཉིད་ཁོ་ན་འདི་ནི་ལས་ཐམས་ཅད་ཐོག་མར་བྱས་ལ་ལས་ཀྱི་ཚོགས་ཀྱི་དངོས་གྲུབ་ཐམས་ཅད་མྱུར་དུ་སྒྲུབ་པ་པོ་རྣམས་ལ་སྟེར་བ་ཡིན་ནོ། །འདིའི་སྒྲུབ་པ་བསྟན་པར་བྱ་བའི་ཕྱིར་དེ་ལ་ཞེས་བྱ་བ་ལ་སོགས་པ་གསུངས་ཏེ། དེ་ལ་ཞེས་བྱ་བའི་སྒྲ་ནི་ངག་ཉེ་བར་དགོད་པའོ། །འདི་ཞེས་བྱ་བ་ནི་དེ་མ་ཐག་པར་འགྱུར་བའོ། །ཇི་ལྟ་བ་བཞིན་དུ་བཤད་པའི་བཅོམ་ལྡན་འདས་མའི་སྙིང་པོའི་ཕྱག་རྒྱ་འདི་ཉིད་ཀྱིའོ། །ཐམས་ཅད་ཀྱི་མཆོག་ཅེས་བྱ་བ་ལ་སོགས་པ་ནི་བཤད་ཟིན་ཏོ། །བཅོམ་ལྡན་འདས་མའི་ཐམས་ཅད་ཀྱི་མཆོག་གི་དངོས་གྲུབ་ཆེན་པོ་དབང་ཕྱུག་ཆེན་པོའི་བདག་པོ་ལ་སོགས་པའི་དངོས་གྲུབ་ཐམས་ཅད་ཀྱི་ཚོགས་གང་ཡིན་པ་དེ་རྣམས་མི་འགྱུར་མཆོག་གོ །དོན་ཡོད་པ་ནི་ཐོགས་པ་མེད་པའོ། །མྱུར་དུ་ནི་མཆོག་ཏུ་མྱུར་བ་ཉིད་དོ། །མཆོག་གི་དེ་ཁོ་ན་ཉིད་ནི་བསྒྲུབ་པར་བྱ་བ་ཐམས་ཅད་རྗེས་སུ་ཆགས་པའི་རང་བཞིན་ཅན་ནོ། །འདིས་སྒྲུབ་པར་བྱེད་པས་ན་སྒྲུབ་པ་སྟེ་དེ་ཉིད་ཆོ་ག་རྒྱས་པའི་ཁྱད་པར་ཏེ་སྒྲུབ་པའི་ཆོ་ག་རྒྱས་པའི་ཁྱད་པར་དེ་ལྟ་བུ་ཡིན་ནོ། །དེ་ལྟར་རྟོག་པ་ཐམས་ཅད་ཀྱི་གསང་བ་ཆེན་པོའི་དམ་ཚིག་ནི་བསྡུས་པའི་དཀྱིལ་འཁོར་དང་དེ་སྒོམ་པར་བྱེད་པ་ནི་རྣལ་འབྱོར་དམ་པས་ཏེ། གསང་བ་ཆེན་པོ་ཡི་དམ་ཚིག་མཆོག་གི་རྣལ་འབྱོར་པའོ། །དེའི་ཉེ་བའི་སྙིང་པོའི་ཕྱག་རྒྱའི་སྒྲུབ་པའི་ཁྱད་པར་འདི་ཡིན་ཏེ། བསྒྲུབ་པར་བྱ་བ་ཡང་ཡིན་ལ་ཐམས་ཅད་ཀྱང་དེ་ཡིན་པས་ན་བསྒྲུབ་པར་བྱ་བ་ཐམས་ཅད་དེ་དམ་ཚིག་དང་ཆོས་དང་ལས་དང་ཕྱག་རྒྱ་ཆེན་པོའི་རང་བཞིན་རྣམས་སོ། །དེ་རྣམས་ཀྱི་རྗེས་སུ་ཆགས་པ་ནི་ཕྱག་རྒྱ་ཆེན་པོ་ཐམས་ཅད་བསྒོམ་པའོ། །ཇི་སྐད་དུ། །ཕྱག་རྒྱ་ཆེན་པོ་བསྒོམ་བྱ་ཞིང༌། །དངོས་གྲུབ་ཐམས་ཅད་བསྒྲུབ་པར་བྱ། །ཞེས་
གསུངས་སོ། །ཐམས་ཅད་སྒྲུབ་པར་བྱེད་པའི་རྗེས་སུ་ཆགས་པར་བྱེད་པར་བྱེད་པར་འགྱུར་པ་དེ་དག་གིས་མི་འགྱུར་མཆོག་ནི་གྲུབ་པར་འགྱུར་ཏེ། བསྡུས་པའི་དཀྱིལ་འཁོར་གྱི་རང་བཞིན་རྡོ་རྗེ་འཆང་ཆེན་པོ་རྫོགས་པར་འགྱུར་རོ། །ནིའི་སྒྲ་ནི་ངེས་པར་གཟུང་བ་སྟེ་དེ་དག་ཁོ་ནས་འགྲུབ་པར་འགྱུར་རོ། །དེ་ལྟར་ན་ཕྱག་རྒྱ་ཐམས་ཅད་ཀྱི་ཆོ་ག་རྒྱས་པ་རྣམས་སུ་འདི་དགོས་པ་ཡིན་པས་བསྡུས་པའི་དཀྱིལ་འཁོར་དུ་གསུངས་པ་ལས་གཞན་རིགས་ལྔའི་ལས་ཀྱི་ཚོགས་རྣམས་སུ་ཡང་ཐམས་ཅད་བསྒྲུབ་པའི་རྗེས་སུ་ཆགས་པ་དགོས་པ་ཡིན་ནོ། །དེ་ཅིའི་ཕྱིར་ཞེས་བྱ་བ་ལ་རྒྱུ་གང་གིས་བསྒྲུབ་བྱ་ཐམས་ཅད་ལ་རྗེས་སུ་ཆགས་པས་བཅོམ་ལྡན་འདས་མ་འདི་འགྲུབ་པར་འགྱུར་ཞེ་ན། འདི་ལྟ་སྟེ་ཞེས་བྱ་བ་ལ་སོགས་པ་ལ་གང་གི་ཕྱིར་ངེས་པའི་ཤེས་པ་འདི་དང༌། དེ་སྟོན་པར་བྱེད་པའི་སྒྲ་རྣམས་ཀྱིས་རྡོ་རྗེ་སེམས་དཔའ་ལ་སོགས་པའི་ཕྱག་རྒྱའི་རང་བཞིན་ཅན་གྱི་ལྷ་རྣམས་རབ་ཏུ་འགྲུབ་པར་འགྱུར་བ་དེའི་ཕྱིར་ངེས་པའི་ཤེས་རབ་རྣམས་དང་དེ་སྟོན་པར་བྱེད་པའི་སྒྲའི་དངོས་པོ་རྣམས་བྱེད་པར་གྱུར་པའི་སྐུ་རྣམས་ཀྱིས་རབ་ཏུ་གྲུབ་པ་ཡིན་ནོ། །དེ་རྣམས་ཀྱི་ཕྱག་རྒྱ་ཆེན་པོ་ལ་སོགས་པ་བཅིང་བ་གང་གིས་སྒྲུབ་པ་ཡིན་ཞེ་ན། བསྒོམ་པའི་རང་བཞིན་ཅན་གྱི་ཕྱག་རྒྱའི་སྦྱོར་བ་རྣམས་ཀྱིས་སོ། །རྣལ་འབྱོར་དམ་ཚིག་སྒྲུབ་པ་པོས། །ཞེས་བྱ་བ་ལ་དམ་ཚིག་ནི་སྒྲུབ་པ་སྟེ་དམ་ཚིག་སྒྲུབ་པ་རྣམས་སོ། །བྱེད་པར་གྱུར་པའི་དམ་ཚིག་སྒྲུབ་པ་དེ་དག་གིས་རྣལ་འབྱོར་རྣམས་གྲུབ་པར་འགྱུར་ཏེ། དེའི་ཕྱིར་བཅོམ་ལྡན་འདས་མ་འདིས་བསྒྲུབ་བྱ་ཐམས་ཅད་རྗེས་སུ་ཆགས་པས་འགྲུབ་པར་འགྱུར་རོ། །ད་ནི་དེ་ཉིད་སྙིང་པོ་ལ་སོགས་པའི་རབ་བཞིན་ཉིད་དུ་བསྟན་པར་བྱ་བའི་ཕྱིར། འདི་ཉིད་སྙིང་གར་གནས་པའི་ཕྱིར། །ཞེས་བྱ་བ་ལ་སོགས་པ་གསུངས་ཏེ། ཉེ་བའི་སྙིང་པོའི་ཕྱག་རྒྱ་འདི་ཉིད་སྙིང་པོ་ངེས་པའི་ཤེས་པར་རྟག་ཏུ་འབྲས་བུའི་ཚུལ་དུ་གནས་པ་ནི་སྙིང་གར་གནས་པའོ། །དེའི་དངོས་པོ་ནི་དེ་ཉིད་དེའི་ཕྱིར་སྙིང་པོའོ། །དམ་ཚིག་སྒྲུབ་པ་ཕྱག་རྒྱ་ཡི། །ཞེས་བྱ་བ་ལ་རྡོ་རྗེ་སེམས་དཔའ་ལ་སོགས་པའི་སྐུ་རྫོགས་པ་ནི་དམ་ཚིག་སྒྲུབ་པ་སྟེ་དམ་ཚིག་སྒྲུབ་པའི་རྒྱུད་དེ་ཉིད་ཀྱི་ཕྱིར་འདི་ཉིད་ཕྱག་རྒྱ་ཞེས་བྱ་བར་བརྗོད་པ་ཡིན་ནོ། །ཡེ་ཤེས་སྦྱོར་བའི་རྣལ་འབྱོར་པ། །ཞེས་བ་བ་ལ་རྣལ་འབྱོར་དང་
རྗེས་སུ་རྣལ་འབྱོར་དང་ཤིན་ཏུ་རྣལ་འབྱོར་དང་ཐམས་ཅད་རྣལ་འབྱོར་གྱི་རང་བཞིན་གྱི་བདག་གང་ཡིན་པ་དེ་ནི་འདི་ཉིད་ཡིན་ནོ། །རྒྱུ་གང་གིས་ཤེ་ན་ཡེ་ཤེས་སྦྱོར་བ་ཞེས་བྱ་སྟེ་ཕྱག་རྒྱ་ཆེན་པོ་ལ་སོགས་པའི་ཡེ་ཤེས་ཀྱི་རྣལ་འབྱོར་གྱི་རང་བཞིན་གྱི་ཕྱག་རྒྱ་འདི་ཉིད་ང་ཡིན་ནོ། །ཐམས་ཅད་སྒྲུབ་པའི་ཕྱིར་དམ་ཚིག་གོ་ཞེས་བྱ་བ་ལ་ཕྱག་རྒྱ་ཆེན་པོ་ལ་སོགས་པ་བསྒྲུབ་པ་ནི་ཐམས་ཅད་བསྒྲུབ་པ་སྟེ་རྫོགས་པའོ། །ཕྱག་རྒྱ་ཆེན་པོ་ལ་སོགས་པའི་དངོས་གྲུབ་རྫོགས་པའི་རྒྱུ་ཉིད་ཀྱི་དམ་ཚིག་བདག་ཡིན་པ་དེ་ནི་འདི་ཉིད་ཡིན་ནོ། །སྙིང་པོ་ནི་ཇི་ལྟ་བ་བཞིན་དུ་བཤད་པའི་སྙིང་པོ་དང་ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་དང་རྣལ་འབྱོར་ནི་རྣམ་པ་བཞི་དང་དམ་ཚིག་ནི་རྡོ་རྗེ་སེམས་དཔའ་ལ་སོགས་པ་སྐྱེད་པར་བྱེད་པའི་རྒྱུ་སྟེ་ཉེ་བའི་སྙིང་པོའི་ཕྱག་རྒྱ་འདི་ཉིད་ཡིན་ནོ། །སྙིང་པོ་ནི་ཇི་ལྟ་བ་བཞིན་དུ་བཤད་པའོ། །ཕྱག་རྒྱ་ནི་ཕྱག་རྒྱ་ཆེན་པོ་ལ་སོགས་པའི་རང་བཞིན་ནོ། །རྣལ་འབྱོར་ནི་རྣམ་པ་བཞིའོ། །དམ་ཚིག་ནི་ཕྱག་རྒྱ་ཆེན་པོ་ལ་སོགས་པའི་དངོས་གྲུབ་ཀྱི་རྒྱུ་སྟེ་ཉེ་བའི་སྙིང་པོའི་ཕྱག་རྒྱ་འདི་ཉིད་སྙིང་པོ་དང་ཕྱག་རྒྱ་དང་རྣལ་འབྱོར་དང་དམ་ཚིག་རྫོགས་པར་བྱེད་པས་ན་ཐམས་ཅད་སྒྲུབ་པར་བྱེད་པའོ། །སྙིང་པོ་ལ་སོགས་པའི་རང་བཞིན་ཅན་འདི་ཉིད་སྒྲུབ་པ་པོའི་རྒྱུད་ལ་རྫོགས་པར་བྱེད་པ་ཡིན་ནོ། །འདི་ཞེས་བྱ་བ་ལ་སོགས་པ་ནི་གོ་སླའོ། །འདིས་ནི་འདི་ལྟར་འཆད་པར་འགྱུར་ཏེ། ངེས་པའི་ཤེས་པ་སྐྱེད་པར་བྱེད་པའི་བཅོམ་ལྡན་འདས་མའི་སྙིང་པོ་སྟེ་དེ་ལས་བྱུང་བའི་ཤེས་པ་ལ་སོགས་པ་ནི་ཉེ་བར་བརྟགས་ནས་ཉེ་བའི་སྙིང་པོ་ཞེས་བྱ་བ་ཡིན་ནོ། །དེ་ནས་དེ་ཉིད་ལུང་བསྟན་པ། །ཞེས་བྱ་བ་ལ་རང་བཞིན་སྟོན་པ་ནི་ལུང་སྟོན་པའོ། །འདོད་ཆགས་དམ་ཚིག་བརྗོད་པ་སྟེ། །ཞེས་བྱ་བ་ལ་འདོད་ཆགས་ནི་རྡོ་རྗེ་སེམས་དཔའ་སྟེ། དེ་ཉིད་དེ་བཞིན་གཤེགས་པ་ཐམས་ཅད་ཀྱིས་ཀྱང་འདའ་བར་མི་མཛད་པས་ན་དམ་ཚིག་ཡིན་ལ་དེ་བརྗོད་པ་ནི་བསྟན་པའོ། །ཆོས་འདོད་ཡིན་གྱིས་བརྣག་པའོ། །ཞེས་བྱ་བ་ལ་ཐོག་མ་དང་ཐ་མ་མེད་པའི་ཆོས་ཀྱི་དབྱིངས་ནི་ཆོས་སོ། །བྱང་ཆུབ་ཆེན་པོའི་མཚན་ཉིད་ཅན་གྱི་སེམས་ནི་འདོད་པའོ། །ཆོས་ཀྱང་དེ་ཡིན་ལ་འདོད་པ་ཡང་དེ་ཡིན་པས་ན་ཆོས་འདོད་པའོ། །དམིགས་པ་མེད་པའི་ཐུགས་རྗེ་ཆེན་པོའི་རང་བཞིན་ནི་ཡིད་ལ་བརྣག་པ་སྟེ།
གང་གི་ཕྱིར་དེ་བཞིན་གཤེགས་པ་ཐམས་ཅད་ཀྱི་ཡུན་རིང་པོ་ནས་དོན་དུ་གཉེར་བའི་སེམས་ཅན་ཐམས་ཅད་ཀྱི་དོན་མཛད་པར་མངོན་པར་ཞེན་པས་ཡོངས་སུ་རྫོགས་པར་འགྱུར་བའི་ཕྱིར་རོ། །འདིའི་རྗེས་སུ་སྒྲུབ་པ་ནི་རྣལ་འབྱོར་རྣམ་པ་བཞིའོ། །དེ་སྒོམ་པའི་ཆོ་ག་ནི་རྗེས་སུ་ཆགས་པ་སྟེ་དེ་བརྗོད་པ་ནི་བསྟན་པ་ཡིན་ནོ། །ཅིའི་ཕྱིར་ཆོས་འདོད་པའི་ཡིད་ལ་བརྣག་པ་རྗེས་སུ་སྒྲུབ་པའི་ཆོ་ག་རྗེས་སུ་ཆགས་པར་བརྗོད་ཀྱི་ཆོས་འདོད་པ་ཁོ་ན་ཅིའི་ཕྱིར་མ་ཡིན་ཞེ་ན། བྱང་ཆུབ་སེམས་ནི་བཅོམ་ལྡན་འདས། །འདོད་ཆགས་ཆེན་པོ་དེ་ཡི་ལྷ། །ཞེས་བྱ་བ་ལ་གང་གི་ཕྱིར་འདོད་པ་ནི་བྱང་ཆུབ་ཀྱི་སེམས་ཀྱི་རང་བཞིན་གྱི་བཅོམ་ལྡན་འདས་བདུད་བཞི་བཅོམ་པས་ན་བཅོམ་ལྡན་འདས་རྡོ་རྗེ་སེམས་དཔར་བརྗོད་པ་ཡིན་ནོ། །དེ་ལས་བྱུང་བའི་བཅོམ་ལྡན་འདས་ཀྱི་ཕྱག་རྒྱ་ཆེན་པོ་གང་ཡིན་པ་དེ་ནི་ལྷ་ཡིན་ནོ། །འདིས་ནི་ངེས་པར་འབྱིན་པའི་ཤེས་རབ་ཀྱི་རང་བཞིན་གྱི་བཅོམ་ལྡན་འདས་རྗེས་སུ་བརྗོད་ལ་ཐབས་ཀྱི་ཕ་རོལ་ཏུ་ཕྱིན་པའི་རང་བཞིན་ཅན་ཕྱག་རྒྱ་ཆེན་པོ་ལ་སོགས་པའི་ཕྱག་རྒྱ་ཉེ་བའི་སྙིང་པོ་དེ་ཉིད་ལྷ་ཞེས་བརྗོད་པ་ཡིན་ནོ། །རྗེས་སུ་ཆགས་པའི་ཕྱག་རྒྱ་འདི་ལས་ཇི་ལྟ་བུ་དང་ལྡན་པ་ཡིན་ཞེ་ན། འདི་ནི་ཐམས་ཅད་རྗེས་སུ་སྒྲུབ། །ཅེས་བྱ་བ་ལ་འདས་མ་ཐག་ཏུ་བཤད་པའི་ཉེ་བའི་སྙིང་པོའི་ཕྱག་རྒྱ་ནི་བསྒྲུབ་པར་བྱ་བ་ཐམས་ཅད་སྒྲུབ་པར་བྱེད་པ་སྟེ་དེའི་ཕྱིར་རྗེས་སུ་སྒྲུབ་པར་བྱེད་པ་འདི་ཡིན་ནོ། །དེ་ལྟར་རྣལ་འབྱོར་པ་རྣམ་པ་བཞི་སྟོན་པར་བྱེད་པའི་རྒྱུད་བསྟན་ནས་ད་ནི་ཕྱིའི་སྦྱོར་བའི་རྒྱུད་བསྟན་པར་བྱ་བའི་ཕྱིར། དེ་ནས་རྡོ་རྗེ་འཆང་ཞེས་བྱ་བ་ལ་སོགས་པ་གསུངས་ཏེ་དེ་ནས་ཀྱི་སྒྲ་ནི་སྐབས་སུ་བབས་པ་སྟེ། སྒོམ་པའི་སྦྱོར་བའི་རྒྱུད་གསུངས་པ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་ཞེས་བྱ་བ་ལ་སོགས་པ་ལ་རྡོ་རྗེ་ནི་བི་ལི་ཀའོ། །རྡོ་རྗེ་ནོར་བུ་ནི་ཆུ་སྲིན་སེན་མོའོ། །དྲི་ནི་པྲི་ཀའོ། །གུར་གུམ་དང་ཙནྡན་ནི་གོ་སླ་བ་སྟེ་ཆ་མཉམ་པའི་རྫས་དེ་རྣམས་ཀྱིས་རྡོ་རྗེ་རྩེ་ལྔ་པ་བྱས་ཏེ་ལག་པས་བཟུང་ནས་ཡི་གེ་ཧཱུཾ་གིས་སྟོང་ཕྲག་བརྒྱར་མངོན་པར་བསྔགས་ལ། དེ་དང་དེའི་ཚུལ་གྱིས་དཔལ་རྡོ་རྗེ་སེམས་དཔར་གསུངས་པའི་ལས་བརྒྱ་པོ་རྣམས་དེས་བསྒྲུབ་པར་བྱས་ན་བཀླགས་པ་ཙམ་གྱིས་འགྲུབ་པར་འགྱུར་རོ། །བ་ལི་ཀ་དང་ཙནྡན་དཀར་པོ་དང༌། ཙནྡན་དམར་པོ་དང༌། པྲིཀ་དང་ནོར་བུ་དང་མུ་ཏིག་ཆ་མཉམ་པ་རྣམས་
ཀྱིས་སྨན་བྱས་ལ་སྔ་མ་བཞིན་དུ་སྟོང་ཕྲག་མངོན་བར་བསྔགས་ནས་ནོར་བུ་འཆིང་བར་གཟུང་བར་བྱས་ཏེ། འདི་ཡང་ཚུལ་དེ་དང་དེས་ལས་བརྒྱ་བསྒྲུབ་པར་བྱས་ན་བཀླགས་པ་ཙམ་གྱིས་འགྲུབ་པར་འགྱུར་རོ། །ཙནྡན་དཀར་པོ་དང༌། རྒྱ་སྤོས་དང༌། པྲི་ཀ་དང༌། ག་བུར་དང༌། བ་ལི། ཀ་ཆ་མཉམ་པ་རྣམས་ཀྱིས་རྡོ་རྗེའི་གནས་བྱས་ལ་དེ་ཉིད་ལ་དེ་བཞིན་གཤེགས་པའི་སྙིང་པོ་འབུམ་བཟླས་པར་བྱས་ལ་དེ་བཞིན་གཤེགས་པར་གསུངས་པའི་ལས་བརྒྱ་བསམ་པའི་དབང་གིས་ཕྱེ་མར་བྱས་པ་ཙམ་གྱིས་འགྲུབ་བར་བྱེད་པ་ཡིན་ནོ། །བ་ལི་ཀ་དང༌། ཏུ་རུཥྐ་དང་ཙནྡན་དཀར་པོ་དང༌། །ལ་ཆ་དང༌། །བུ་རམ་ཆ་མཉམ་པ་དང་ལྡན་པ་རྣམས་ལ་བཅོམ་ལྡན་འདས་རྡོ་རྗེ་ཉི་མ་མེ་ལྟར་འབར་བའི་སྙིང་པོ་སྟོང་ཕྲག་བརྒྱ་མངོན་བར་བསྔགས་པ་རྣམས་ཀྱིས་རྡོ་རྗེ་འཆང་དུ་གསུངས་པའི་ལས་བརྒྱ་བསྒྲུབ་པར་བྱའོ། །རྡོ་དྲེག་དང་སརྫ་ས་དང་ཏིལ་རྣམས་ཆ་མཉམ་པ་ལ་གུ་གུལ་བཅུག་སྟེ་འཕགས་པ་སྤྱན་རས་གཟིགས་དབང་ཕྱུག་གི་སྔགས་སྟོང་ཕྲག་བརྒྱ་ཡོངས་སུ་བཟླས་པ་བྱས་ནས་མར་མེ་སྤར་བར་བྱ་སྟེ། མར་མེ་འདིས་འཕགས་པ་སྤྱན་རས་གཟིགས་དབང་ཕྱུག་ཏུ་གསུངས་པའི་ལས་བརྒྱ་བསྒྲུབ་པར་བྱའོ། །བ་ལི་ཀ་དང༌། ཙནྡན་དཀར་པོ་དང༌། གུར་གུམ་དང༌། ག་བུར་ཆ་མཉམ་རྣམས་ཀྱིས་སྤོས་ཀྱི་སྦྱོར་བ་བྱས་ལ་འཕགས་པ་ནམ་མཁའི་སྙིང་པོའི་སྙིང་པོ་ལན་འབུམ་ཡོངས་སུ་བཟླས་པ་བྱས་ན་དེས་བདག་ཉིད་ལ་ཡང་དག་པར་བྱུགས་ལ་སྤོས་གཏུལ་བར་བྱ་སྟེ་དེ་ལྟར་འཕགས་པ་ནམ་མཁའི་སྙིང་པོས་གསུངས་པའི་ལས་བརྒྱ་བསྒྲུབ་པར་བྱ་བ་ཡིན་ནོ། །དུམ་བུ་གསུམ་པའི་བཤད་པ་རྫོགས་སོ།། །།དུམ་བུ་བཞི་པ་ལ་ཡང་རྡོ་རྗེ་སེམས་དཔའི་དཀྱིལ་འཁོར་ཆེན་པོ་ནི་དུམ་བུ་གསུམ་པ་ལས་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ཆེན་པོ་དང་ཐམས་ཅད་འདྲ་བ་ཡིན་ནོ། །འདིར་ཁྱད་པར་ནི་འདི་ཡིན་ཏེ་སྣ་ཚོགས་པའི་གོས་ཀྱིས་གཡོགས་པར་གྱུར་པའི་སློབ་དཔོན་གྱིས་རྡོ་རྗེ་མཆོད་པའི་ཐལ་མོ་སྦྱར་རོ། །སློབ་མ་ཐམས་ཅད་གཞུག་པར་བྱ། །ཞེས་བྱ་བའོ། །དེ་བཞིན་གཤེགས་པ་རང་རྡོ་རྗེ་ཉི་མ་མེ་ལྟར་འབར་བ་དང༌། འཕགས་པ་སྤྱན་རས་གཟིགས་དབང་ཕྱུག་དང༌། འཕགས་པ་ནམ་མཁའི་སྙིང་པོ་དང་མིང་པོ་གསུམ་དང་
སྲིང་མོ་བཞི་དང༌། ཀླུ་དང་སྡུག་བསྔལ་ལས་གདོན་པའི་དཀྱིལ་འཁོར་རྣམས་ཀྱང་དུམ་བུ་གཉིས་པ་ལས་གསུངས་པའི་དཀྱིལ་འཁོར་རྣམས་དང་འདྲ་བ་ཡིན་ནོ། །འདིར་ཁྱད་པར་ནི་འདི་ཡིན་ཏེ་ཐིག་སྐུད་བདུན་བའི་བར་མཚམས་ཀྱི་ཕྱི་རོལ་གྱི་མཚམས་རྣམས་སུ་མིང་པོ་གསུམ་དང་སྲིང་མོ་བཞི་དང༌། ཀླུ་དང་སྡུག་བསྔལ་ལས་གདོན་པའི་དཀྱིལ་འཁོར་སྔ་མའི་རྗེས་སུ་འབྲངས་ནས་བྲི་བར་བྱའོ། །བསྡུས་པའི་དཀྱིལ་འཁོར་ཡང་དུམ་བུ་གཉིས་པ་ལས་གསུངས་པའི་དཀྱིལ་འཁོར་དང་འདྲ་བའོ། །དཔལ་རྡོ་རྗེ་སེམས་དཔའི་གསང་བའི་དཀྱིལ་འཁོར་དང་འདྲ་བ་སྟེ། འདིར་ཁྱད་པར་ནི་འདི་ཡིན་ཏེ། ཨོཾ་ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །ཅེས་བྱ་བ་ལ་སོགས་པའི་དེ་ཁོ་ན་ཉིད་ཀྱི་གླུས་སྤྱན་དྲང་བ་དང་ལྷ་མོ་རྣམས་ཀྱང་འདིར་རྡོ་རྗེ་རིན་པོ་ཆེས་དབང་བསྐུར་བས་མཚན་པའོ། །དེ་བཞིན་གཤེགས་པ་དང་རྡོ་རྗེ་ཉི་མ་མེ་ལྟར་འབར་བ་དང་འཕགས་པ་སྤྱན་རས་གཟིགས་དབང་ཕྱུག་དང༌། འཕགས་བ་ནམ་མཁའི་སྙིང་པོའི་གསང་བའི་དཀྱིལ་འཁོར་རྣམས་ཀྱང་དུམ་བུ་གཉིས་པ་ལས་གསུངས་པའི་གསང་བའི་དཀྱིལ་འཁོར་དང་འདྲའོ་ཞེས་བྱ་བའོ། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་ལས་དཔལ་མཆོག་དང་བོའི་དུམ་བུ་བཞི་པའི་བཤད་པ་རྫོགས་སོ།། །།ཡང་འདི་སྨྲས་པ། བྱང་ཆུབ་སེམས་ཀྱི་ཕྱག་རྒྱ་ཆེ། །ལུས་ཅན་ཀུན་གྱིས་ཐོབ་པའི་ཕྱིར། །འཇིག་རྟེན་སྣང་བྱེད་དགེ་བ་ཡི། །དུམ་བུ་དང་པོ་གསུངས་པ་ཡིན། །སྦྱིན་པའི་ཕ་རོལ་ཕྱིན་ཕྱག་རྒྱ། །དམ་ཚིག་ཅེས་གྲགས་རྟག་ཏུ་དགེ །བསམ་པ་ཐམས་ཅད་ཡོངས་རྫོགས་པ། །དུམ་བུ་གཉིས་པ་གསུངས་པ་ཡིན། །ཤེས་རབ་ཕ་རོལ་ཕྱིན་ཆོས་ཀྱི། །ཕྱག་རྒྱ་ཀུན་འགྲོ་རྟག་པ་སྟེ། །ལྟས་ངན་ཐམས་ཅད་འཇིག་བྱེད་པའི། །དུམ་བུ་གསུམ་པ་གསུངས་པ་ཡིན། །བརྩོན་འགྲུས་ཕ་རོལ་ཕྱིན་ལས་ཀྱི། །ཕྱག་རྒྱ་ཀུན་ཡང་ཡང་དག་གནས། །བློ་ལྡན་རྡོ་རྗེ་སེམས་དཔའ་ཡིས། །བསམ་མི་ཁྱབ་པ་བཞི་པར་གསུངས། །ལྷ་ཡི་དབང་པོའི་གནས་དང་མཚུངས། །རྒྱལ་པོ་མུ་རྒྱའི་གནས་ཀྱིས་མཛེས། །སྔགས་ཞེས་རིན་ཆེན་ཚོགས་པའི་ས། །སྣ་ཚོགས་བརྩེགས་པ་ཉམས་དགའི་རི། །དེར་གནས་
དཔལ་ལྡན་ཕྱོགས་དང་པོ། །ཤེས་རབ་ཕ་རོལ་ཕྱིན་འབྱུང་བ། །བཤད་པ་བདག་གིས་བྱས་པ་ལས། །དགེ་བ་བསགས་པ་གང་ཡིན་དེས། །སངས་རྒྱས་ཀུན་གྱི་ཀུན་དགའ་ཆེ། །སྙིང་པོ་ཁྱབ་བདག་བསམ་མི་ཁྱབ། །དེ་ཡིས་འཇིག་རྟེན་མ་ལུས་པ། །རྡོ་རྗེ་འཆང་ཆེན་རྒྱལ་གྱུར་ཅིག །ལུས་ཅན་ཀུན་གྱིས་རྒྱལ་བ་ཡི། །ཡེ་ཤེས་ཐོབ་ཕྱིར་གཞུང་གི་གྲངས། །འདི་ཡི་ཚད་དུ་བཤད་པ་ནི། །སྟོང་ཕྲག་ཉི་ཤུ་རྩ་བཞི་ཡིན། །དཔལ་མཆོག་དང་པོའི་རྒྱ་ཆེར་བཤད་པ་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་བ་ཞེས་བྱ་བ་སློབ་དཔོན་ཀུན་དགའ་སྙིང་བོས་མཛད་པ་རྫོགས་སོ།། །། གུག་གེའི་ཡུལ་གྱི་དབུས་བྱང་ཆུབ་སེམས་དཔའི་ཐུགས་དམ་སའི་སྙིང་པོ་དཔལ་དཔེ་མེད་ལྷུན་གྱིས་གྲུབ་པའི་གཙུག་ལག་ཁང་དུ་རྒྱ་གར་གྱི་མཁན་པོ་ཆེན་པོ་མནྟྲ་ཀ་ལ་ཤ་དང༌། སྒྲ་བསྒྱུར་གྱི་ལོ་ཙཱ་བ་ཆེན་པོ་བོད་ཀྱི་དཔལ་ལྷ་བཙན་པོ་བྱང་ཆུབ་སེམས་དཔའི་གདུང་རྒྱུད་ལྷ་བླ་མ་དགེ་སློང་ཞི་བ་འོད་ཀྱི་ཞལ་སྔ་ནས་བསྒྱུར་ཞིང་གཏན་ལ་ཕབ་པའོ། །སྔོན་གྱི་སྨོན་ལམ་ཐུགས་རྗེའི་དབང་གིས་ནི། །ལྷ་རིགས་བྱང་ཆུབ་སེམས་དཔའི་སྤྲུལ་བ་ནི། །ས་སྟེངས་རྒྱལ་བའི་རྒྱལ་པོར་སྐུ་འཁྲུངས་པ། །བླ་མ་བྱང་ཆུབ་སེམས་དཔའི་ཡེ་ཤེས་འོད། །མངའ་རིས་སྟོད་འདི་གདུལ་བའི་དོན་དུ་བྱུང༌། །གསང་སྔགས་སྤྱོད་པའི་ཆོས་ལུགས་ཀུན་ཉམས་དང༌། །དཀྱིལ་འཁོར་སྦྱིན་སྲེག་ཆོ་ག་ནུབ་གྱུར་པས། །དཀྱིལ་འཁོར་ཆོ་ག་པདྨ་སྟོང་ལྡན་ཏེ། །དེ་བཞིན་སྦྱིན་སྲེག་ཤག་ཏི་ཤུག་ཏིས་བྱེད། །གཞན་ཡང་གསང་སྔགས་སྦས་དོན་ནུབ་གྱུར་ཅིང༌། །སྦྱོར་སྒྲོལ་དང་ནི་ཚོགས་ལ་སོགས་པས་བསླད། །འདི་རྣམས་དོན་ངེས་བཙལ་ཕྱིར་བཀས་གཉེར་ཏེ། །ལོ་ཙཱ་རིན་ཆེན་བཟང་པོ་ཁ་ཆེར་བརྫངས། །ཤྲདྡྷ་ཀ་ར་ཞེས་བྱ་སྤྱན་དྲངས་ནས། །སྒྲོན་གསལ་སྤྱོད་པ་བསྡུས་པའི་སྒྲོན་མ་སོགས། །བསྒྱུར་ཅིང་བཤད་ནས་སྔགས་ལོག་གཞུང་བསལ་ཞིང༌། །སྔོན་གྱི་མཁས་པ་ཆེན་པོའི་ལུགས་ལ་བཙུད། །དེ་བཞིན་དཀྱིལ་འཁོར་སྦྱིན་སྲེག་ཆོ་ག་དང༌། །སྒོམ་སྒྲུབ་ལ་སོགས་བྱེ་བྲག་སྣ་ཚོགས་པའི། །སྐྱོན་མེད་གཞུང་ལུགས་ཀུན་ལ་འགྲོ་ཀུན་སྦྱར། །སྐལ་ལྡན་རྣམས་ལ་དབང་སོགས་རིམ་བཞིན་སྩལ། །དེང་སང་བར་དུ་སྔགས་ཀྱི་གཞུང་
དར་བ། །ལོ་ཙཱ་སྐྱེས་མཆོག་དེ་ཡི་དྲིན་ཡིན་གྲང༌། །ཤྲདྡྷ་ཀ་ར་ཞེས་བྱའི་མཁས་པ་དང༌། །རིན་ཆེན་སྒྲོན་འདྲ་རིན་ཆེན་བཟང་པོ་ཡིས། །རྣལ་འབྱོར་རྒྱུད་དོན་ཚུལ་བཞིན་བཤད་མོད་ཀྱིས། །དེ་ཡི་གང་མས་ངག་ནུབ་པར་གྱུར་པ་ནས། །རྣལ་འབྱོར་རྒྱུད་ཀྱི་ཇི་བཞིན་དོན་མ་རྟོགས། །ཡང་དག་དོན་ལ་ནོར་པའི་དྲི་མས་བསླད། །འཁྲུལ་པ་དེ་དག་བསལ་བར་བྱ་བའི་ཕྱིར། །རྒྱལ་སའི་དམ་པ་གུག་གེའི་ཡུལ་དབུས་ཀྱི། །ཐུགས་དམ་ས་ཡི་སྙིང་པོ་ཐོ་ལིང་དུ། །བླ་མ་ཞི་བ་འོད་ཀྱི་ཞམ་རིང་ལ། །རིག་པའི་འབྱུང་གནས་གྲོང་ཁྱེར་དཔེ་མེད་ཀྱི། །རྗེའུ་རིགས་མཆོག་གི་ནང་དུ་སྐུ་ལ་བྲུངས་པ། །ཐོས་པ་མང་ཞིང་མཁྱེན་པར་ལྡན་པ་ཡི། །མཁས་པ་མཆོག་གྱུར་སྔགས་ཀྱི་བུམ་པ་ལ། །གསོལ་བ་བཏབ་ནས་བདག་གིས་བསྒྱུར་བ་ལས། །སྒྲ་དོན་ཐ་སྙད་ལ་མཁས་བྱུང་གྱུར་ན། །ཚིག་དོན་བརྟགས་ནས་རིགས་པས་བཅོས་པར་གྱིས། །སྒྲ་ཡི་བསྟན་བཅོས་མཐའ་དག་མ་བསླབས་ཤིང༌།། བོད་ཀྱི་ཐ་སྙད་ཀུན་ལ་མ་བྱང་པས། །རྒྱ་གར་སྐད་ཙམ་ཉི་ཚེ་ཤེས་གྱུར་ཀྱང༌། །ང་རྒྱལ་འབའ་ཞིག་ཙམ་གྱིས་བཅོས་མི་བྱ། །དོན་འདི་རྣམ་པར་ཕྱེ་བའི་བསོད་ནམས་ཀྱིས། །འཁོར་བའི་ཁོངས་ཆུད་འགྲོ་བ་རིགས་ལྔ་པོ། །རྣལ་འབྱོར་ལྔ་བསྒོམས་ལས་ལྔ་མཐར་ཕྱིན་ནས། །ཡེ་ཤེས་ལྔ་རྫོགས་རིགས་ལྔའི་སྐུ་ཐོབ་ཤོག །