མཚན་ཡང་དག་པར་བརྗོད་པའི་རྣལ་འབྱོར་པས་ཤེས་པ་དུག་གསུམ་ལས་བཟློག་པའི་མན་ངག།
འཇམ་དཔལ་བཤེས་གཉེན།
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །མཚན་ཡང་དག་པར་བརྗོད་པའི་རྣལ་འབྱོར་པས་ཤེས་པ་དུག་གསུམ་ལས་བཟློག་པའི་མན་ངག་ནི། དེ་ཡང་རིག་པ་བྱང་ཆུབ་ཀྱི་སེམས་འོད་གསལ་སྟོང་པ་གཉིས་མེད་དེ་མ་རིག་སྟེ་མ་ཤེས་པའོ། །སེམས་ཅན་སངས་རྒྱས་ཀྱི་སྙིང་པོ་ཅན་ཡིན་པ་ལ་སངས་རྒྱས་ཀྱི་རྒྱུ་བོར་ཏེ་ངན་སོང་གི་རྒྱུ་བསགས་པ་ནི་གཏི་མུག་གོ །དེ་ལྟར་ཁམས་གསུམ་གྱི་འཁོར་བ་སྡུག་བསྔལ་ཡིན་པར་མ་ཤེས་པས། སྡུག་བསྔལ་དེ་ལ་མངོན་པར་སྲེད་ཅིང་ཆགས་པ་ནི་འདོད་ཆགས་སོ། །དེ་ལྟར་ཆགས་པའི་དབང་གིས་སེམས་ཅན་རྣམས་ཀྱི་ཉིད་སྲོག་ཉིང་གིས་བཅད་དེ་ཉིད་ཤ་ཉིད་གིས་ཟོས་ནས་གནོད་པ་བྱས་པ་ནི་ཞེ་སྡང་ངོ༌། །དེ་ལྟར་རྒྱུ་དུག་གསུམ་ལས་འབྲས་བུ་ངན་སོང་གསུམ་དུ་སྨིན་ནོ། །དེའི་དབང་གིས་ཉོན་མོངས་པའི་ཆུ་བོ་བཞི་འཁོར་བའི་རྒྱ་མཚོར་འབབ་པ་ནི་འདི་ལྟ་སྟེ། རྟོག་པའི་ཆུ་པོ་དང༌། ལས་ཀྱི་ཆུ་བོ་དང༌། འཁོར་བའི་ཆུ་པོ་དང༌། སྡུག་བསྔལ་གྱི་ཆུ་བོའོ། །དེ་ལ་རྟོག་པའི་ཆུ་བོ་གང་ཞེ་ན། རྟོག་པའི་ཆུ་བོ་སྔ་མ་ལ་བརྟེན་ནས། ཕྱི་མ་བྱེད་པ་འཆད་པའོ། །ལས་ཀྱི་ཆུ་བོ་གང་ཞེ་ན། རྟོག་པ་སྔ་མ་དེའི་དབང་གིས་ལས་དགེ་སྡིག་ཡོད་པས་སྡིག་པ་སྤྱད་པའི་དབང་གིས་ལས་ཀྱི་རྣམ་སྨིན་གྱི་འབྲས་བུ་ཟད་པ་མེད་པར་འབྱུང་བའོ། །འཁོར་བའི་ཆུ་བོ་གང་ཞེ་ན། ལས་དེ་མ་ཟད་པའི་བར་དུ་སྲེག་པ་ཡང་རྒྱུན་མི་ཆད་པར་འབྱུང་བས་སོ། །སྡུག་བསྔལ་གྱི་ཆུ་བོ་ཞེ་ན། དེ་ལྟར་སྲིད་
པ་གསུམ་དུ་འཁོར་བས་ འབྲས་བུ་སྡུག་བསྔལ་གསུམ་དང་རྒྱུན་མི 
་འཆད་པར་ཉམས་སུ་མྱོང་བའོ། །དེ་བས་ན་དེ་ལྟར་སྨིན་པར་བྱེད་པའི་རྒྱུ་དུག་གསུམ་ལས་བཟློག་ན་ཆུ་བོ་བཞི་ཡང་རང་ལོག་ཏུ་འགྱུར་རོ། །མཚན་ཡང་དག་པར་བརྗོད་པའི་ཤེས་པ་དུག་གསུམ་ལས་བཟློག་པའི་མན་ངག་སློབ་དཔོན་འཇམ་དཔལ་བཤེས་གཉེན་གྱིས་མཛད་པ་རྫོགས་སོ།།