དཔལ་ཐམས་ཅད་གསང་བའི་བཤད་སྦྱར་གསང་བའི་སྒྲོན་མ།
རིན་ཆེན་འབྱུང་གནས་ཞི་བ།
རྒྱ་གར་སྐད་དུ། ཤྲཱི་སརྦ་ར་ཧ་སྱ་ནི་བནྡྷ་ར་ཧ་པྲ་འདི་པོ་ནཱ་མ། བོད་སྐད་དུ། དཔལ་ཐམས་ཅད་གསང་བའི་བཤད་སྤྱར་གསང་བའི་སྒྲོན་མ། འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་ཞིག་རྣལ་འབྱོར་རྒྱུད་དུ་གསང་བྱས་པ། །རང་གི་སྐུ་གསུང་ཐུགས་དངོས་སྣ་ཚོགས་པ། །ཐམས་ཅད་གསང་བའི་རྒྱུད་ནི་དེ་བརྟེན་ནས། །གསང་བའི་སྒྲོན་མ་བཤད་སྤྱར་བརྩམ་པར་བྱ། །ལུས་ཀྱི་ཚོགས་རྒྱས་པར་གྱུར་པ་རྣམས་ནི་སྤྱིན་པ་ལ་སོགས་པ་དཀའ་བའི་སྤྱོད་པ་རྣམས་ཀྱིས་ཡུན་རིང་པོར་བྱང་ཆུབ་པར་འདོད་པ་རྣམས་ལ། ཡང་དག་པར་རྫོགས་པའི་བྱང་ཆུབ་ཏུ་སྤྲོ་བ་བསྐྱེད་པའི་ཕྱིར། མི་རྣམས་ཀྱི་ལུས་ནི་ཕྱག་དར་
གྱི་ཕུང་པོ་དང་མཚུངས་པ་ཡིན་གྱི། སེམས་ནི་ཡིད་བཞིན་གྱི་ནོར་བུ་ལྟ་བུ་དང་མཚུངས་པ་ཡིན་ནོ་ཞེས་བ་སྟན་པར་བྱ་བའི་ཕྱིར། འབྱུང་ལྔ་ཉིད་ཀྱིས་ཞེས་བྱ་བ་ལ་སོགས་པ་གསུངས་པ་ཡིན་ཏེ། འབྱུང་བ་ཞེས་བྱ་བ་ནི་ཉོན་མོངས་པ་དང་ལས་ཀྱིས་བསྐྱེད་པ་སྡུག་བསྔལ་སྣ་ཚོགས་ཀྱི་རྒྱུར་གྱུར་པ་ས་དང་ཆུ་དང་མེ་དང་རླུང་དང་ནམ་མཁའི་ཁམས་ཏེ་ལྔ་པོ་ཉིད་ཀྱིས་སོ། །ངེས་པ་ནི་བརྟག་མི་དགོས་པའོ། །མཐོང་བ་དག་ཅེས་བྱ་བ་ནི་ཚད་མར་གྲུབ་པའོ། །མི་རྣམས་ཀྱི་ལུས་དེ་ལྟ་བུ་ཡིན་དུ་ཟིན་ཀྱང་སངས་རྒྱས་སུ་འགྱུར་རོ་ཞེས་བྱ་བར་སྤྱར་རོ། །ཅི་ཞིག་བྱས་པས་ཤེ་ན། རང་སེམས་རབ་ཏུ་བསྒོམས་པ་སྟེ་རབ་ཀྱི་མཐར་ཐུག་པར་བསྒོམས་པས་སོ། །ཇི་ལྟར་བསྒོམས་པས་ཤེ་ན། དངོས་དེར་བསྒོམས་པས་ཞེས་བྱ་བ་སྟེ་དངོས་པོ་དེར་འགྱུར་བའི་ཕྱིར་ཏེ་སངས་རྒྱས་ཉིད་དུ་འགྱུར་བའི་ཕྱིར། དངོས་པོ་གང་སེམས་ཀྱི་དེ་ཁོ་ན་ཉིད་སྒོམ་པ་གང་ཡིན་པས་སོ། །ངེས་པར་ཞེས་བྱ་བ་ནི་གདོན་མི་ཟ་བར་སངས་རྒྱས་ཏེ་དེ་བཞིན་གཤེགས་པར་འགྱུར་རོ། །སེམས་ཀྱི་ཆེ་བའི་བདག་ཉིད་གཞན་དག་ཀྱང་བ་སྟན་པར་བྱ་བའི་ཕྱིར། རང་ཤེས་གསང་བཞེས་བྱ་བ་ལ་སོགས་པ་གསུངས་ཏེ། རང་གི་ཡེ་ཤེས་ཏེ་རང་གི་སེམས་ཉིད་ནི་དཔལ་གྱི་ཡོན་ཏན་དང་ལྡན་པས་ན་སངས་རྒྱས་རྣམས་ཀྱང་རབ་ཏུ་འདུད་ཅིང་ཕྱག་འཚལ་བར་མཛད་དོ། །རང་གི་སེམས་ཇི་ལྟ་བུ་ཞེ་ན། གསང་བ་ཞེས་བྱ་བ་སྟེ་འཇིག་རྟེན་ལས་འདས་པ་ཉིད་ཡིན་པའི་ཕྱིར་རོ། །དམ་པ་ནི་འཇིག་རྟེན་ལས་འདས་པ་ཐམས་ཅད་ལས་མཆོག་ཏུ་ཁྱད་པར་དུ་གྱུར་པའི་ཕྱིར་རོ། །དེའི་ཅིའི་ཕྱིར་ཞེ་ན། སངས་རྒྱས་ཡེ་ཤེས་བླ་མེད་དེ། །ཞེས་བྱ་བ་གསུངས་ཏེ། གང་གི་ཕྱིར་རང་གི་སེམས་ཉིད་དེ་བཞིན་གཤེགས་པའི་བླ་ན་མེད་པའི་ཡེ་ཤེས་ཡིན་པས་སོ། །དྲིས་པ་གཉིས་སུ་སྣང་བ་ཉིད་ཀྱིས་འཁྲུལ་ཅིང༌། ཀུན་ནས་ཉོན་མོངས་པའི་སོ་སོའི་སྐྱེ་བོའི་སེམས་ཏེ། ཇི་ལྟར་སངས་རྒྱས་ཀྱི་ཡེ་ཤེས་ཡིན་ཞེ་ན། གཉིས་མེད་གཉིས་ཀྱི་ཚུལ་ཅན་ཏེ། །ཞེས་བྱ་བ་གསུངས་ཏེ། དེ་ནི་གཉིས་སུ་མེད་པའི་ཡེ་ཤེས་ཡིན་ཏེ། གཉིས་སུ་སྣང་བ་སྟོང་པ་ཉིད་ཀྱི་
རང་གི་ངོ་བོར་གྱུར་པར་ཡང་དག་པར་རྟོགས་པའི་ཕྱིར་རོ། །དེ་ལྟ་བུ་ཡིན་དུ་ཟིན་ཀྱང་གཉིས་ཀྱི་ཚུལ་ཅན་ཏེ་ཞེས་བྱ་བ་སྟེ། བརྫུན་ཡིན་དུ་ཟིན་ཀྱང་གཟུང་བ་དང་འཛིན་པའི་ཚུལ་དུ་སོ་སོར་སྣང་བའི་ཕྱིར། དེ་ནི་མི་བདེན་པ་ཡིན། གློ་བུར་གྱི་འཁྲུལ་པ་ཅན་ཡིན་གྱི། དེ་ནི་རང་བཞིན་གྱིས་གཉིས་སུ་མེད་པའི་ཡེ་ཤེས་ཡིན་པས། རང་བཞིན་གྱིས་སངས་རྒྱས་ཀྱི་ཡེ་ཤེས་ཡིན་ནོ། །དེ་ལྟ་བུའི་ཡེ་ཤེས་ཉིད་ལ་ནི་སངས་རྒྱས་རྣམས་ཀྱང་རབ་ཏུ་འདུད་པར་མཛད་དེ། ཆོས་ཀྱི་སྐུ་ལ་སོགས་པས་གཙོ་བོར་གྱུར་བའོ་ཞེས་བྱ་བའི་ཚུལ་གྱིས་སོ། །དེ་བས་ན་རང་སེམས་ཉིད་ལ་ཕྱག་འཚལ་བ་ཡིན་ཏེ། དེ་ལྟར་ཕྱག་འཚལ་བ་ནི་རྟག་པར་རབ་ཏུ་འདུད་ཅེས་བྱ་བ་སྟེ། འདི་ནི་ཁྱད་པར་དུ་འཕགས་པ་ཉིད་དུ་གསུངས་པ་ཡིན་ཏེ། འདིས་ནི་ཤིན་ཏུ་མྱུར་དུ་བྱང་ཆུབ་མ་ཐོབ་ཅིང་བསྐལ་པ་གྲངས་མེད་པ་གསུམ་མམ། མང་པོར་རབ་ཏུ་འདུད་དོ་ཞེས་བྱ་བའི་དོན་ཏོ། །ཡང་དག་པར་ཕྱག་འཚལ་བ་རྣམས་ནི་མྱུར་བ་ཉིད་དུ་བྱང་ཆུབ་རྟོགས་པས་ཡང་ཕྱག་འཚལ་བར་མི་བྱེད་དོ་ཞེས་བྱ་བར་དགོངས་སོ། །དེ་ཉིད་ཀྱི་དབང་དུ་མཛད་ནས་གང་ཡང་ཞེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་དམིགས་པ་ལ་རང་གི་སེམས་ནི་གཉིས་སུ་སྣང་བ་ནུབ་པར་གྱུར་པ་ནི་བདག་མེད་པ་སྟེ་རྒྱུ་ཉིད་ཀྱི་སྦྱོར་བའོ། །དེ་ལས་ཡང་དག་པར་བྱུང་བ་ནི་ཡང་དག་པར་ཤེས་པས་སངས་རྒྱས་ཀྱི་ངོ་བོར་བྱུང་བ་སྟེ། འབྲས་བུ་འདི་ཁོ་ན་ཉིད་ཀྱི་སྦྱོར་བ་ལ་གནས་པ་ཞེས་བྱ་བའི་དོན་ཏོ། །རྒྱུ་དང་འབྲས་བུའི་དེ་ཁོ་ན་ཉིད་དབྱེར་མེད་པའི་ཡེ་ཤེས་ནི་གཉིས་སུ་མེད་པའི་ཡེ་ཤེས་ཏེ་སྨྲ་བསམ་ལས་འདས་པའོ། །དེ་ལས་བྱུང་བ་ནི་འདི་དག་མ་ལུས་པ་རྫོགས་པར་གྱུར་པ་ཡིན་པས་ན། གཉིས་མེད་ཡེ་ཤེས་ལས་བྱུང་བ། །ཞེས་བྱ་བ་སྟེ། དེའི་འོག་ཏུ། སྡུག་དང་མི་སྡུག་རྣམ་སྤངས་པ། །ཞེས་བྱ་བ་སྟེ། སྡུག་པ་ནི་ཐོབ་པར་བྱ་བའི་ཆོས་རྣམས་སོ། །མི་སྡུག་པ་ནི་སྤང་བར་བྱ་བའི་ཆོས་རྣམས་ཏེ་དེ་མ་ལུས་པ་རྣམ་པར་སྤངས་པ་ནི་ཐོབ་དང་སྤངས་པ་མཐར་ཐུག་པའི་བདག་ཉིད་ཐོབ་པའོ། །དེ་ལྟར་གྱུར་བའི་རྣལ་འབྱོར་པ་གང་ཡིན་པ་དེ་ནི་ཅི་ལ་
ཡང་ཕྱག་ནི་མི་འཚལ་ལོ་ཞེས་བྱ་བ་སྟེ། བྱ་བ་བྱས་པའི་སྒྲུབ་པ་ལ་སྦྱོར་བ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་ཡང་དག་པར་ཕྱག་འཚལ་བ་དེ་ཉིད་གསལ་བར་མཛད་ཅིང་དེ་ཉིད་ལ་འཇིག་རྟེན་རྣམས་ངེས་པར་སྤྱར་བའི་ཕྱིར། མ་སྐྱེས་པ་ནི་ཞེས་བྱ་བ་ལ་སོགས་པ་གསུངས་ཏེ། རང་གི་ཤེས་པ་སྟེ། རང་གི་སེམས་གཉིས་སུ་སྣང་བ་དང་བྲལ་བའི་ཚུལ་གྱིས་སྔར་མ་སྐྱེས་པ་དེའི་ཚུལ་དུ་བསྐྱེད་ལ། སྐྱེས་པར་གྱུར་པའི་ཕ་རོལ་ཏེ། །རྗེས་ལ་སངས་རྒྱས་ཀྱི་སྐུར་ནི་ཞེས་བྱ་བ་སངས་རྒྱས་ཀྱི་རྣམ་པར་རྟག་ཏུ་ཞེས་བྱ་བ་རྟག་པ་ཉིད་ཀྱིས་བསྒོམ་པར་བྱ་སྟེ། ཕྱག་འཚལ་བ་དེ་ལ་རང་ཉིད་དེ་ཉིད་ལ་རང་གི་ལུས་དང་ངག་དང་ཡིད་ཀྱིས་ཞུགས་པར་བྱའོ་ཞེས་བྱ་བའི་དོན་ཏོ། །དེ་ལ་ལུས་ཀྱིས་རབ་ཏུ་ཞུགས་པ་ནི་སངས་རྒྱས་ཀྱི་སྐུ་ལས་ཐ་དད་པའི་རང་གི་ལུས་མི་དམིགས་པའོ། །ཚིག་གིས་རབ་ཏུ་ཞུགས་པ་ནི་སངས་རྒྱས་ནི་བདག་གོ་ཞེས་སྨྲའོ། །འདི་གཉིས་ལས་གཞན་དུ་ཡིད་མི་གཡེང་བ་ནི་སེམས་ཀྱིས་རབ་ཏུ་འཇུག་པའོ། །ལུས་ལ་སོགས་པའི་རབ་ཏུ་འཇུག་པ་འདི་ཉིད་ནི་དེའི་ལུས་དང་ངག་དང་ཡིད་ཀྱིས་ཕྱག་འཚལ་བའི་མཆོག་ཡིན་ཏེ། མྱུར་བ་ཉིད་དུ་བྱང་ཆུབ་སྒྲུབ་པར་བྱེད་པ་ཡིན་ནོ་ཞེས་བྱ་བར་དགོངས་སོ། །འདིར་ཡང་སངས་རྒྱས་ཀྱི་སྒྲས་བྱང་ཆུབ་སེམས་དཔའ་ལ་སོགས་པ་རྣམས་ཀྱང་གཟུང་སྟེ། དེ་བཞིན་གཤེགས་པ་ཐམས་ཅད་བསྡུས་པ་ཉིད་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་ཚུལ་གྱིས་རྣལ་འབྱོར་གྱི་རྒྱུད་ལ་བསྒོམ་པར་བྱ་བ་ཡིན་པའི་ཕྱིར་རོ། །རྣལ་འབྱོར་འདི་ལ་ནི་འདིའི་སྐལ་བ་དང་ལྡན་པ་མ་ཡིན་ནོ་ཞེ་ན། རྣལ་འབྱོར་པ་དང་ཞེས་བྱ་བ་ལ་སོགས་པ་གསུངས་ཏེ། འདིར་རྣལ་འབྱོར་ནི་གཉིས་སུ་མེད་པའི་ཡེ་ཤེས་སོ། །དེ་ཉིད་ནི་སྔར་བཤད་པའི་ཚུལ་གྱིས་རྟག་ཏུ་ཡོད་པ་ཡིན་པས་ན་རྣལ་འབྱོར་བ་སྟེ། སེམས་ཅན་ཐམས་ཅད་དོ། །གལ་ཏེ་ཐམས་ཅད་རྣལ་འབྱོར་པ་ཡིན་ན། འདིར་སྐལ་བ་མེད་པ་ནི་འགའ་ཡང་མེད་པས་འཁོར་བར་ག་ལ་འཁོར་བར་འགྱུར་ཞེ་ན། །དེའི་ཕྱིར་ཉོན་མོངས་པ་ཞེས་བྱ་བ་ལ་སོགས་པ་གསུངས་ཏེ། ནི་ཞེས་བྱ་བའི་
སྒྲ་ནི་དགའ་བའི་དོན་ཏེ། ཉོན་མོངས་པ་དང་བག་ཆགས་ཀྱིས་སུན་ཕྱུང་བས་འགྲོ་བ་དེ་དང་དེར་འཁོར་བར་གྱུར་བའོ། །ལུས་ཅན་ཞེས་བྱ་བ་ནི་ལུས་ཐོབ་པ་རྣམས་སོ། །རྒྱུ་གང་གིས་ཉོན་མོངས་པ་དང་བག་ཆགས་ཀྱིས་ལུས་འཐོབ་ཅེ་ན། དེའི་ཕྱིར་སྡུག་དང་ཞེས་བྱ་བ་ལ་སོགས་པ་གསུངས་ཏེ། སྡུག་པ་ནི་གནས་དང་ལོངས་སྤྱོད་ལ་སོགས་པའོ། །མི་སྡུག་པ་ནི་དེ་དག་གིས་རྣམ་པར་འབྱེད་པའི་ཁྱད་པར་ལ་ཡོངས་སུ་རྟོགས་པའོ། །དེ་ལས་ནི་བག་ཆགས་ཏེ། དེ་ནས་ཡང་སྡུག་པ་དང་མི་སྡུག་པ་ནི་རྣམ་པར་འབྱེད་པའོ། །དེ་ནས་དེ་གཉིས་ཐོབ་པ་དང་སྤང་བར་སྲིད་པར་སྐྱེ་ལ། དེས་ནི་ལུས་འཐོབ་པ་ཡིན་ནོ། །དྲིས་པ་ལྷའི་ལུས་དང་ལྡན་པ་རྣམས་དགའ་བའི་ཚལ་ལ་སོགས་པར་འཁོར་བ་ན། བདེ་བ་དང་སྡུག་བསྔལ་བ་ནི་ཅི་ཞིག་ཡོད། ཇི་ལྟར་ན་འཁོར་བ་ཡིན་ཞེ་ན། སྡུག་བསྔལ་ཞེས་བྱ་བ་ལ་སོགས་པ་གསུངས་ཏེ། འདི་ནི་ཉོན་མོངས་པ་དང་ལས་ལས་བྱུང་བའི་ཟག་པ་དང་བཅས་པའི་ལུས་དང་ལོངས་སྤྱོད་དང་གནས་རྣམས་ནི། གང་གིས་སྤྱོད་པ་དང་གང་ལ་སྤྱོད་པ་དང༌། གང་དུ་སྤྱོད་པ་སྟེ། དེ་ནི་ལུས་དང་ལྷན་ཅིག་འབྱུང་བས་ན་ལུས་འབྱུང་བའོ། །གང་སེམས་དང་སེམས་ལས་བྱུང་བའི་ཚོགས་དེ་ཉིད་ནི་སྡུག་བསྔལ་ལོ། །དེ་སྐད་དུ། གང་ཞིག་ཟག་བཅས་ཉེར་ལེན་པའི། །ཕུང་པོ་དེ་དག་ཐབས་བཅས་ཀྱང༌། །སྡུག་བསྔལ་ཀུན་འབྱུང་འཇིག་རྟེན་དང༌། །ལྷ་གནས་སྲིད་པའང་དེ་དག་ཡིན། །ཞེས་བཤད་པའི་ཕྱིར་རོ། །དེ་ལྟར་ཡིན་ན་གོ། འཇིག་རྟེན་རྣམས་སྡུག་བསྔལ་བ་ཡིན་ན་ཇི་ལྟར་ཐར་བར་འགྱུར་ཞེ་ན། སེམས་དེ་ཞེས་བྱ་བ་ལ་སོགས་པ་གསུངས་ཏེ། སྡུག་བསྔལ་དེ་གནོན་ཅིང་ཤེས་པའི་འགྲོ་བ་ནི་སེམས་ཀྱིས་སོ་སོར་རྟོགས་ཤིང་ཡོངས་སུ་ཤེས་པར་བརྟེན་པ་ནི་རྟོགས་པ་ཡིན་ཏེ། གདམས་པའི་རྩ་བ་ཡིན་ནོ། །དེ་བས་ན་གདམས་པ་པོ་ནི་འཁོར་བ་ལས་སྒྲོལ་བར་བྱེད་པ་ཡིན་ནོ། །དེ་སུ་ཞིག་ཡིན་ཞེ་ན། རྣམ་པར་སྣང་མཛད་ཅེས་བྱ་བ་ལ་སོགས་པ་གསུངས་ཏེ། ཐམས་ཅད་དུ་ཐོགས་པ་མེད་ཅིང་ཤིན་ཏུ་རྣམ་པར་དག་ལ་རྟག་པ་ཉིད་ཀྱི་ཡེ་ཤེས་ཀྱི་ཚུལ་ཅན་ཡིན་པས་ན།
ཁྱབ་པ་རྣམ་པར་སྣང་མཛད་པས་ན་རྣམ་པར་སྣང་མཛད་དོ། །རྣམ་པ་ཐམས་ཅད་དུ་ཆོས་ཀྱི་ལོངས་སྤྱོད་སྐྱེད་པར་མཛད་པས་ན་རྒྱལ་བའོ། །རྣམ་པ་ཐམས་ཅད་དུ་འགྲོ་བའི་དོན་མཛད་པས་ན་མགོན་པོ་སྟེ་ངོ་བོ་ཉིད་དང་ ལོངས་སྤྱོད་རྫོགས་པ 
་དང་སྤྲུལ་པའི་སྐུ་དང་རིམ་བཞིན་དུ་སྤྱར་རོ། །དེ་ལྟར་དང་པོའི་ཚིག་ནི་བ་སྟན་པ་ཡིན་ལ་འོག་མ་གསུམ་ནི་བཤད་པ་ཡིན་ཏེ། སངས་རྒྱས་ཐམས་ཅད་ནི་སངས་རྒྱས་ཀྱི་ཆོས་ཐམས་ཅད་དེ། དེ་རྣམས་ཀྱི་རོ་གཅིག་པ་ནི་བསྡུས་པ་ཞེས་བྱ་སྟེ། དེ་ནི་རྣམ་པར་སྣང་མཛད་ཀྱི་དོན་ཡིན་ནོ། །སངས་རྒྱས་ཐམས་ཅད་ནི་སངས་རྒྱས་ཀྱི་ཆོས་རྣམས་ཏེ། དེ་ཉིད་སངས་རྒྱས་རྣམས་ལ་ལོགས་ཤིག་ཏུ་བྱས་ནས་བཤད་པ་ཡིན་ཏེ། འདིས་ན། སངས་རྒྱས་ཐམས་ཅད་རྟོགས་འགྱུར་བ། །ཞེས་བྱ་སྟེ། འདི་ནི་རྒྱལ་བའི་དོན་ཡིན་ནོ། །སངས་རྒྱས་འཁོར་བ་སྒྲོལ་བ་པོ། །ཞེས་བྱ་བ་ནི་མགོན་པོའི་དོན་ཡིན་ནོ། །དྲིས་པ་བཅོམ་ལྡན་འདས་དེ་ཉིད་ཀྱི་དོན་གྱི་མཐར་བྱོན་པ་ཡིན་ནམ། འོན་ཏེ་གཞན་དག་ཀྱང་སྒྲོལ་བར་མཛད་པ་ཡིན་ནམ། འོན་ཏེ་ལྟོས་པར་མི་མཛད་པ་ཡིན་ཞེ་ན། དེའི་ཕྱིར་སེམས་ཅན་ཀུན་ལ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཀུན་ལ་ཕན་པ་དེ་ཉིད་ནི་དོན་ཡིན་ཏེ་འདོད་པ་ཡིན་པའི་ཕྱིར་རོ། །དེ་ལ་ཐུགས་རྗེ་འབྱུང་བ་གང་ཡིན་པ་དེ་ཉིད་ནི་ཉམས་པ་ཡིན་ཏེ། རབ་ཀྱི་མཐར་ཐུག་པ་ཡིན་པའི་ཕྱིར་རོ། །དེ་དང་ཡང་དག་པར་ལྡན་པ་ནི་རྟག་ཏུ་བཅས་པ་སྟེ། དེ་བས་ན་བཏང་སྙོམས་མེད་པ་ཡིན་ནོ་ཞེས་བྱ་བར་དགོངས་སོ། །གདམས་པ་བ་སྟན་པར་བྱ་བའི་ཕྱིར་རྒྱུའི་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་མྱུར་བ་དང་ཤིན་ཏུ་བདེ་བར་བྱང་ཆུབ་སྒྲུབ་པར་བྱེད་པའི་སྦྱོར་བ་ནི་རྒྱུའི་དེ་ཁོ་ན་ཉིད་དོ། །དེའི་མཉམ་པར་སྦྱོར་བ་ནི་སྙོམས་པར་འཇུག་པའོ། །དེ་ལས་གང་དུ་ཞེས་བྱ་བ་ནི་བ་སྟན་པ་དེའི་གོང་དུ་ཞེས་བྱ་བའི་དོན་ཏོ། །འབྲས་བུའི་དེ་ཉིད་ནི་སངས་རྒྱས་ཀྱི་སྐུའོ། །དེ་སྟོན་པ་ནི་དེའི་སྦྱོར་བ་སྟོན་པར་མཛད་པའོ། ཅི་བཅོམ་ལྡན་འདས་དེ་གཞན་དག་ཀྱང་སྟོན་པར་མཛད་དམ་ཞེ་ན། འབད་དེ་ཞེས་བྱ་བ་ལ་སོགས་པ་གསུངས་ཏེ། འབྲས་བུའི་དེ་ཉིད་ཡང་དག་ཞུགས། །ཞེས་བྱ་བ་ནི་རྒྱུ་
དང་འབྲས་བུ་མི་ཕྱེད་པའི་ཡེ་ཤེས་ལ་སོགས་པ་ཡོངས་སུ་རྫོགས་པ་ལ་ཡང་དག་པར་ཞུགས་པའི་རྣལ་འབྱོར་པ་ནི་རྒྱུའི་དེ་ཁོ་ན་ཉིད་མི་འདོད་དེ། བྱ་བ་བྱས་པ་ཉིད་རྟོགས་པ་ཡིན་པའི་ཕྱིར་སླར་འདོད་པར་མི་བྱེད་དོ། །དེ་བས་ན་ཐུན་མཚམས་སུ་གཉིས་པ་ལ་སོགས་པར་ནི་འབྲས་བུའི་རྣལ་འབྱོར་ཉིད་བྱའི། །རྒྱུའི་རྣལ་འབྱོར་ནི་སོ་སོར་རབ་ཏུ་སྒོམ་པ་ཡིན་ལ་སྔར་གྲུབ་པའི་རིམ་གྱིས་འབྲས་བུའི་དེ་ཁོ་ན་ཉིད་ལ་ཡང་དག་པར་ཞུགས་པར་གྱུར་ན། དེ་ཉིད་གལ་ཏེ་ཡང་འདོད་པར་གྱུར་ན་ཅི་འགྱུར་ཞེ་ན། གང་དུ་ཞེས་བྱ་བ་ལ་སོགས་པ་གསུངས་ཏེ། གནས་སྐབས་གང་དུ་འདོད་པ་སྐྱེས་པར་གྱུར་པ་དེ་ཉིད་འཁོར་བའི་བག་ཆགས་ཡིན་ཞིང་དངོས་གྲུབ་ཀྱི་གེགས་སུ་གྱུར་པ་ཡིན་ཏེ། སླར་སྲིད་པའི་རྒྱུ་ཡིན་ནོ་ཞེས་བྱ་བའི་དོན་ཏོ། །དེ་བས་ན་འབྲས་བུའི་དེ་ཁོ་ན་ཉིད་ལ་ཡང་དག་པར་ཞུགས་པས་ནི་དངོས་གྲུབ་ཀྱི་མཐར་ཐུག་པ་བ་སྟན་པར་བྱའོ་ཞེས་བྱ་བར་དགོངས་ཏེ། འདི་ནི་གདམས་པ་གསུངས་པ་ཡིན་ནོ། །འདིར་དྲིས་པ་གལ་ཏེ་འགྲོ་བའི་དོན་ལ་གྲོགས་སུ་མཛད་པ་ཡིན་ན། དེའི་ཚེ་དེས་ཉན་ཐོས་དང་རང་སངས་རྒྱས་དང༌། ཕ་རོལ་ཏུ་ཕྱིན་པའི་སྒོ་ལ་སྤྱོད་པའི་བྱང་ཆུབ་སེམས་དཔའ་རྣམས་ཀྱི་སྒོམ་པ་ཅིའི་ཕྱིར་མ་གསུངས་ཤེ་ན། ཡིད་ལ་འདོད་པ་ཞེས་བྱ་བ་ལ་སོགས་པ་གསུངས་ཏེ། ཡིད་ལ་འདོད་པ་ནི་སེམས་ཅན་རྣམས་ཀྱི་འདོད་པ་སྟེ་དེས་ན་སྒོམ་པ་སྣ་ཚོགས་པ་བཅོམ་ལྡན་འདས་ཀྱིས་ཡོངས་སུ་རྟོགས་ཤིང་གསུངས་པ་ཡིན་ནོ། །གང་ལས་ཤེ་ན། ཐེག་པ་དེའི་ནང་ནས་གདམས་པ་གཅིག་པ་ཉིད་བ་སྟན་པ་ནི་གང་ཞིག་ཅེས་བྱ་བ་ལ་སོགས་པ་གསུངས་ཏེ། ཡང་ཞེས་བྱ་བའི་སྒྲ་ནི་ཁྱད་པར་གྱི་དོན་ཏོ། །བཤད་མ་ཐག་པའི་སྒོམ་པ་གཅིག་གིས་རྣལ་འབྱོར་གྱི་དེ་ཁོ་ན་ཉིད་ཐམས་ཅད་དང་འབྲེལ་པར་གནས་པ་གཅིག་པོ་དེ་ཉིད་ནི་རྣལ་འབྱོར་འབྱུང་བའོ། དེས་ན་གདམས་པ་གཅིག་པ་ཉིད་ཡིན་ནོ། །ད་ནི་གཙོ་བོ་སྟོན་ཏེ། དེ་ཡང་རྣལ་འབྱོར་ཉིད་ལས་སངས་རྒྱས་ཀྱི་ཡོན་ཏན་མ་ལུས་པ་འཐོབ་པར་འབྱུང་བ་འདི་ཡིན་པས་ན་རྣལ་འབྱོར་འབྱུང་བ་སྟེ། ཉན་ཐོས་དང་རང་སངས་རྒྱས་ཀྱི་ཐེག་པ་པའི་བསྒོམ་པ་གང་ཡིན་པ་དེ་ལས་
དི་སངས་རྒྱས་ཀྱི་ཡོན་ཏན་ཐམས་ཅད་འཐོབ་པ་ཡོད་པ་མ་ཡིན་ནོ། །ཕ་རོལ་ཏུ་ཕྱིན་པའི་སྒོ་ལ་སྤྱོད་པའི་སྒོམ་པ་ལས་ནི་དེ་འབྱུང་བ་ཡིན་མོང་ཀྱི། འོན་ཀྱང་རྣལ་འབྱོར་འདི་དང་འདྲ་བ་མ་ཡིན་ཏེ། དེ་ཅིའི་ཕྱིར་ཞེ་ན། བསྐལ་པ་གྲངས་མེད་པ་གསུམ་དུ་དཀའ་བའི་སྤྱོད་པ་ཡོངས་སུ་རྫོགས་པའི་ཕ་རོལ་ཏུ་ཕྱིན་པ་བཅུ་པོ་དེ་རྣམས་ལས་འབྱུང་བ་ཡིན་ཏེ་གདམས་པ་བ་སྟན་པའོ། །གདམས་པ་བ་སྟན་པ་བཤད་པ་ནི། སངས་རྒྱས་རྗེས་དྲན་ཞེས་བྱ་བ་ལ་སོགས་པ་ཡིན་ཏེ། རྗེས་སུ་དྲན་པ་གཉིས་ཀྱི་ཚོགས་གཉིས་ཡོངས་སུ་རྫོགས་པ་ལས། རྐང་གཉིས་ཏེ་ལྷ་དང་མི་དེ་རྣམས་ཀྱི་མཆོག་ཏུ་གྱུར་པ་ཡང་དག་པར་རྫོགས་པར་སངས་རྒྱས་པར་གྱུར་པའོ། །བྷ་གར་ལིངྒ་ཞེས་བྱ་བ་ནི་ཟླ་བ་དང་མཚན་མའོ། །རབ་ཏུ་གཞག་ཅེས་བྱ་བ་ནི་ལེགས་པར་བསྒོམ་པའོ། །སངས་རྒྱས་སྐུར་ཞེས་བྱ་བ་ནི་བདག་ཉིད་སངས་རྒྱས་ཀྱི་སྐུར་བསྒོམ་པ་སྟེ། །བསྒོམ་པ་འདི་ཉིད་ནི་སངས་རྒྱས་རྗེས་སུ་དྲན་པའོ། །རྣལ་འབྱོར་པ་དེས་སངས་རྒྱས་སྤྲིན་ཞེས་བྱ་བ་བསྡུས་ནས་བྱོན་པའི་རྒྱལ་བ་ཐམས་ཅད་རྣམ་པར་བསྒོམ་པར་བྱ་ཞིང༌། མངོན་པར་རྫོགས་པར་བྱང་ཆུབ་བ་སྟན་པར་བྱ་བའི་ཕྱིར་རང་གི་སྙིང་གར་གཞུག་པར་བྱའོ། དེ་ནས་སྙིང་གར་ཟླ་བ་ལ་གནས་པའི་རྡོ་རྗེ་བསམ་པར་བྱ་སྟེ། དེ་ཡང༌། སངས་རྒྱས་ཀུན་གྱི་དངོས་ཀུན་ནི། །སྙིང་གའི་རྡོ་རྗེ་རྣམ་པར་བསམ། །ཞེས་རྡོ་རྗེ་རྩེ་མོ་ལས་གསུངས་པའི་ཕྱིར་རོ། །འདི་ནི་སངས་རྒྱས་རྗེས་སུ་དྲན་པའོ། །ཆོས་རྗེས་སུ་དྲན་པ་བ་སྟན་པའི་ཕྱིར། བྷ་གར་ལིངྒ་ཞེས་བྱ་བ་ལ་སོགས་པ་གསུངས་ཏེ་བཤད་མ་ཐག་པའི་ཚུལ་དུ་སྙིང་གའི་ཟླ་བར་རྡོ་རྗེ་བསམ་པའོ། །རྡོ་རྗེ་ཆོས་ནི་ཞེས་བྱ་བ་ནི་དཀྱིལ་འཁོར་བ་རྣམས་ཀྱི་སྙིང་པོ་རྣམས་སོ། །ཆོས་ཀྱི་སྤྲིན་ཞེས་བྱ་བ་ནི་དཀྱིལ་འཁོར་པ་རྣམས་ཀྱིའོ། །ཆར་རབ་འབེབས་ཞེས་བྱ་བ་ནི་སྙིང་གའི་རྡོ་རྗེ་ཉིད་ལས་རྣམ་པར་བསྒོམ་ཞིང་བརྗོད་པ་དང་སྤྲོ་བ་བྱ་བའོ། །འདིར་ལིངྒ་ཞེས་གང་ལ་བྱ་ཞེ་ན། མཚན་མ་ལིངྒ་ཞེས་བཤད་དེ། །ཞེས་བྱ་བ་གསུངས་ཏེ། འདིར་མཚན་མ་ཉིད་ལ་ལིངྒ་ཞེས་བཤད་ཀྱི་གཞན་དག་ནི་མ་ཡིན་ནོ། །མཚན་མ་དེ་ཡང་ཇི་ལྟ་བུ་ཞེ་ན། ཕྱག་
རྒྱའི་མཚན་མ་རྣམ་པ་བཞི། །ཞེས་བྱ་བ་གསུངས་ཏེ། ཏིང་ངེ་འཛིན་བརྟན་པའི་ཁྱད་པར་གྱི་ངོ་བོ་ཉིད་དུ་གྱུར་པས་ཕྱག་རྒྱ་ཉིད་ལ་མཚན་མ་ཞེས་བཤད་དེ། དེ་ནི་ལྷའི་དེ་ཁོ་ན་ཉིད་སྟོན་པར་བྱེད་པ་ཡིན་པས་ན་ཕྱག་རྒྱའི་མཚན་མ་སྟེ། དེ་ཡང་དཔལ་རྡོ་རྗེ་རྩེ་མོ་ལས་ལིངྒའི་མཚན་མ་ཞེས་བཤད་དེ། མཚན་སྐྱེས་བློ་ལྡན་ཡིན་པར་འདོད། །བྱང་ཆུབ་སེམས་ནི་ཐེག་ཆེན་པོ། །འདི་ནི་ལིངྒ་ཞེས་བྱར་གྲགས། །ཞེས་གསུངས་པ་ཡིན་ནོ། །རྣམ་པ་བཞི་ཞེས་བྱ་བ་ནི་སངས་རྒྱས་ཀྱི་མཚན་མ་དང༌། བྱང་ཆུབ་སེམས་དཔའི་མཚན་མ་དང། ལྷ་མོའི་མཚན་མ་དང༌། ཁྲོ་བོ་རྣམས་ཀྱི་མཚན་མའོ། །སངས་རྒྱས་སྨོན་པ་ནི་ཉེ་བར་མཚན་པ་ཙམ་དུ་ཟད་དོ། །ཡང་ན་རྣམ་པར་དབྱེ་བས་དེ་རྣམ་དབྱེའི་དངོས་སུ་ནི་འདི་དག་ཐམས་ཅད་སངས་རྒྱས་ཡིན་ཏེ་གཞན་དུ་ན་བྱང་ཆུབ་སེམས་དཔའ་ལ་སོགས་པའི་རྣལ་འབྱོར་པ་རྣམས་ལ་འབྲས་བུའི་དེ་ཁོ་ན་ཉིད་བསྒོམ་པ་མེད་པར་འགྱུར་རོ། །འདིར་བྷ་ག་ཞེས་གང་ལ་བྱ་ཞེ་ན། འཇོམས་པ་ཞེས་བྱ་བ་ལ་སོགས་པ་གསུངས་ཏེ་འདིར་འཇོམས་པས་ན་བྷ་ག་ཞེས་བྱའོ། །དེ་ཉིད་གང་ཞེ་ན། ཉོན་མོངས་འཇོམས་པ་དམ་པ་ཡིན། །ཞེས་བྱ་བ་གསུངས་ཏེ། གང་ཉོན་མོངས་པ་འཇིག་ཅིང་འཇོམས་པ་མཆོག་དམ་པ་སྟེ། དེ་ཡང་རྣམ་པར་རྟོག་པའི་བྱེ་བྲག་རྣམས་ནི་ཉོན་མོངས་པ་ཡིན་ལ། དེ་ཉན་ཐོས་དང་རང་སངས་རྒྱས་ཀྱིས་འཇོམས་པ་ནི་དམན་པ་ཡིན་ལ། བྱང་ཆུབ་སེམས་དཔའ་རྣམས་ཀྱི་ནི་ཉོན་མོངས་པ་ཅན་དང༌། ཉོན་མོངས་པ་ཅན་མ་ཡིན་པའི་རྣམ་པར་རྟོག་པ་འདི་ཐམས་ཅད་ཡང་དག་པར་རྫོགས་པའི་བྱང་ཆུབ་ཀྱི་སྒྲིབ་པ་ཡིན་པས་ན་ཉོན་མོངས་པ་ཡིན་ཏེ། བཅོམ་ལྡན་འདས་ཀྱིས་ཀྱང་རྣམ་པར་རྟོག་པ་ནི་བྱང་ཆུབ་སེམས་དཔའ་རྣམས་ཀྱི་ཉོན་མོངས་པའོ་ཞེས་གསུངས་པ་ཡིན་ནོ། །དེ་བས་ན་ཉོན་མོངས་པ་ཐམས་ཅད་འཇོམས་པའི་ཟག་པ་མེད་པའི་ཡེ་ཤེས་གང་ཡིན་པ་དེ་ནི་འདིར་བྷག་ཡིན་ཏེ། ཇི་སྐད་དུ་དཔལ་རྡོ་རྗེ་རྩེ་མོ་ལས་ཀྱང༌། གང་ཞིག་ཉོན་མོངས་ངེས་འཇོམས་པ། །འཇོམས་པས་བྷ་ག་ཞེས་བཤད་དེ། །ཤེས་རབ་ཉོན་མོངས་དེ་གསོད་པས། །དེ་བས་ཤེས་རབ་
བྷ་གར་བཤད། །ཅེས་གསུངས་པ་ཡིན་ནོ། །དོན་འདི་ཉིད་ཀྱིས་ན་བྱང་ཆུབ་ཀྱི་སེམས་ཀྱི་ངོ་བོ་ཉིད་ཟླ་བའི་དཀྱིལ་འཁོར་ཉིད་ལ་འདིར་བྷ་ག་ཞེས་བཤད་དོ། །དེའི་དེ་ཁོ་ན་ཉིད་ནི་བྱང་ཆུབ་ཀྱི་སེམས་ཡིན་པས་དེ་བ་སྟན་པར་བྱ་བའི་ཕྱིར་སེམས་ཅན་ཀུན་གྱི་ཞེས་བྱ་བ་ལ་སོགས་པ་གསུངས་ཏེ། རང་གི་སེམས་ནི་བྷ་ག་ཡིན་པར་སྤྱར་རོ། །ཇི་ལྟ་བུའི་རང་གི་སེམས་ཤེ་ན། ཆོས་ནི་བསྡུས་པ་ཡིན་ཞེས་བྱ་བ་གསུངས་ཏེ། ཆོས་རྣམས་མ་ལུས་པ་འཛིན་པ་པོ་ཡིན་པ་སྟེ་ཆོས་ཐམས་ཅད་ལ་དམིགས་པ་ཞེས་བྱ་བའི་དོན་ཏོ། །གཞན་ཡང་ཇི་ལྟ་བུ་ཞེ་ན། བསད་ན་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཞེས་བྱ་བ་ནི་ལྷག་མའོ། །དེ་ཡང་གང་རང་ཉིད་ཤི་བ་ནི་བསད་པའོ། །བསད་པ་དེ་ཅི་ཞིག་ཡིན་ཞེ་ན། སེམས་ཅན་ཀུན་གྱི་དངོས་པོ་ཀུན། །ཞེས་བྱ་བ་སྟེ། ལུས་དང་གནས་དང་ལོངས་སྤྱོད་དང་སེམས་དང་སེམས་ལས་བྱུང་བར་ཆོས་ཀྱི་བསྡུ་བས་བསྡུས་པའོ། །ཅི་ལྟར་བསད་ཅེ་ན། ཆོས་བདག་མེད་པའི་སྦྱོར་བ་ཡིས། །ཞེས་བྱ་བ་གསུངས་ཏེ། ཆོས་ཐམས་ཅད་མི་བདེན་པར་ཡོངས་སུ་བརྟགས་པའི་དམིགས་པས་གཉིས་སུ་གཟུང་བའི་ངོ་བོའི་བྱེ་བྲག་ཏུ་སྣང་བ་ནུབ་པར་གྱུར་པས། གཉིས་སུ་མེད་པའི་རྣམ་པར་ཤེས་པ་ཙམ་གྱི་ཚུལ་གྱིས་སྣང་བའི་བདག་ཉིད་ཅན་སྡིག་པ་མེད་ཅིང་རོ་མཉམ་པར་གྱུར་པ་ནི་ཆོས་བདག་མེད་པ་སྟེ། རྣལ་འབྱོར་དེ་ལ་རང་གི་སེམས་མཉམ་པར་གཞག་པ་སྟེ། དེ་བསང་ན་རང་ཉིད་འཆི་བར་འགྱུར་ཏེ། རང་ཉིད་ཀྱིས་ཀྱང་ལུས་དང་གནས་དང་ལོངས་སྤྱོད་ལ་སོགས་པ་གཉིས་སུ་སྣང་བའི་ངོ་བོ་ཉིད་ནུབ་པའི་ཕྱིར་གཉིས་སུ་མེད་པ་ཡང་རང་སྣང་བའི་བདག་ཉིད་ཅན་དང༌། སེམས་ཅན་ཐམས་ཅད་ཀྱི་སྣང་བའི་བདག་ཉིད་ཅན་རོ་གཅིག་བ་ཉིད་ཡིན་ཏེ། འདིར་ཡང་ཆོས་ཐམས་ཅད་མཉམ་པ་ཉིད་དང༌། སེམས་ཅན་ཐམས་ཅད་ཀྱི་བདག་ཉིད་མཉམ་པ་ཉིད་གང་གི་ཚེ་མི་དམིགས་པར་གྱུར་བའི་ཡེ་ཤེས་དེས་རིམ་པ་བཞིན་དུ་མི་དམིགས་པའི་ཤེས་རབ་དང་སྙིང་རྗེ་དང༌། འདི་དག་གཉིས་ཀའི་མཚན་ཉིད་ཅན་བྱང་ཆུབ་ཀྱི་སེམས་ནི་ཤེས་རབ་ཀྱི་ངོ་བོ་ཉིད་ཀྱིས་རྣམ་པར་རྟོག་
པའི་ས་བོན་འབྱིན་པར་བྱེད་པ་ཡིན་པས་ན། ཉོན་མོངས་པ་འཇོམས་པར་བྱེད་པ་ཡིན་ཏེ། དེ་ནི་བྷ་གའི་དེ་ཁོ་ན་ཉིད་དོ། །ཕྱག་རྒྱའི་གཟུགས་ལྟར་ན་ཟླ་བའི་དཀྱིལ་འཁོར་ཏེ་དེ་ནི་འདིར་ཕྱག་རྒྱར་བྱས་པ་ཡིན་ནོ། །ཅིའི་ཕྱིར་ཞེ་ན། ཆོས་ཐམས་ཅད་ཀྱི་མཉམ་པ་ཉིད་དང༌། སེམས་ཅན་ཐམས་ཅད་ཀྱི་མཉམ་པ་ཉིད་དང༌། དགེ་བའི་ཆོས་ཐམས་ཅད་ཡོངས་སུ་རྫོགས་པ་ཡིན་པའི་ཕྱིར་དཀྱིལ་འཁོར་དེའི་དོན་ཏེ། དམིགས་པའི་ཡེ་ཤེས་ཀྱི་ཚུལ་ཡང་དག་པའི་སྣང་བའི་རང་བཞིན་ཡིན་པའི་དོན་ཡིན་ནོ། །ལིངྒའི་ཕྱག་རྒྱའི་གཟུགས་ཀྱང་མཚན་མ་རྣམ་པ་བཞི་ཡིན་པར་གསུངས་ལ། དེའི་དེ་ཁོ་ན་ཉིད་ནི་མདོར་ན་བྱང་ཆུབ་ཀྱི་སྤྱོད་པ་མ་ལུས་པའི་རྗེས་སུ་འགྲོ་བ་ཡིན་པས། བྱང་ཆུབ་ཀྱི་སེམས་བརྟན་པར་གྱུར་པ་ཡིན་ཏེ། དེ་བ་སྟན་པ་ནི་རང་གི་སེམས་ཉིད་ཅེས་བྱ་བ་ལ་སོགས་པ་གསུངས་ཏེ། རང་གི་སེམས་ཉིད་རྫོགས་སངས་རྒྱས། །ཞེས་བྱ་བ་ནི་བྱང་ཆུབ་ཀྱི་སེམས་ཉིད་ཀྱིས་ཤེས་བྱ་ཐམས་ཅད་ཡང་དག་པར་རྟོགས་པ་ཡིན་པའི་ཕྱིར་རོ། །དེས་ན་དེ་ཉིད་རྟོགས་པར་བྱ་བ་ཡང་ཡིན་ཏེ། དེ་ཉིད་ཀྱིས་ཤེས་བྱ་ཐམས་ཅད་བསྡུས་པ་ཡིན་པའི་ཕྱིར་རོ། །གསད་བྱ་བ་ཞེས་བྱ་བ་ནི་གསད་པ་དང་འགོག་པ་དང་མྱ་ངན་ལས་འདས་པ་དང་སྤངས་པ་ཞེས་བྱ་བ་ནི་རྣམ་གྲངས་ཡིན་ནོ། །རང་གི་སེམས་ཉིད་གཟུང་སྟེ་སྒྲིབ་པའི་ས་བོན་ཐམས་ཅད་དགག་པ་ཡིན་གྱི། ཐམས་ཅད་དུ་ཆད་པ་ནི་མ་ཡིན་ནོ། །སེམས་ཉིད་ནི་བྱང་ཆུབ་ཀྱི་སེམས་ཞེས་བྱ་བར་བཤད་དེ་སྒྲིབ་པ་རྣམས་ངེས་པར་འགོག་པར་བྱེད་དོ། །དེ་ལྟ་བུའི་ཡེ་ཤེས་དང་སྤངས་པ་ཕུན་སུམ་ཚོགས་པའི་མཚན་ཉིད་ཀྱིས་ན་འཚང་རྒྱ་བ་འདི་བྱང་ཆུབ་ཀྱི་སེམས་ཉིད་ཡིན་ནོ། །དེ་ལྟར་སྤྱོད་པ་ཡོངས་སུ་བསྡུས་པ་ནི་ལིངྒའི་དེ་ཁོ་ན་ཉིད་དོ། །དེ་ལྟར་རྗེས་སུ་དྲན་པ་གཉིས་ཀྱིས་བྷ་ག་དང་ལིངྒ་བཤད་པ་ཡིན་ཏེ་ལྷག་མ་ནི་གོ་སླའོ། །དེ་ལ་སངས་རྒྱས་རྗེས་སུ་དྲན་པའི་རྒྱུ་དང་འབྲས་བུ་སྦྱོར་བ་མདོར་བསྡུས་ནས་བ་སྟན་པ་ཡིན་ལ། དེ་བྱང་ཆུབ་སེམས་དཔའ་ལ་སོགས་པའི་རྡོ་རྗེ་དང་ཟླ་བ་ཉིད་ཀྱི་རིམ་གྱིས་སོ། །དེ་བཞིན་གཤེགས་པ་རྣམས་ཀྱི་ནི་རྣམ་
པ་ལྔ་སྟེ། ཟླ་བ་ལ་ཟླ་བ་དང༌། རྡོ་རྗེ་ལ་རྡོ་རྗེ་དང་སྐུ་སྟེ། སངས་རྒྱས་ཀྱི་སྐུ་དང་རྣམ་པ་ལྔའོ། །བསྒོམ་པ་འདི་དང་ཅི་འདོད་པར་བཟླས་པའི་རང་བཞིན་གྲུབ་པའི་སྔགས་ལྔ་པོ་དཔལ་དེ་ཁོ་ན་ཉིད་བསྡུས་པ་དང་རྡོ་རྗེ་རྩེ་མོ་དང་ཟླ་གསང་ཐིག་ལེ་དང་གསང་བའི་མཛོད་ལས་རྒྱ་ཆེར་གསུངས་པ་ཡིན་ནོ། །བསྒོམ་པའི་འབྲས་བུ་ཡང་ཟླ་གསང་ཐིག་ལེ་དང་གསང་བའི་མཛོད་དག་ལས་གསུངས་པས་དེ་བརྗོད་པར་བྱ་སྟེ། དེ་ནས་བསམ་གཏན་གྱི་ཕྱག་རྒྱས་གནས་ལ། ཆོས་ཐམས་ཅད་བདག་མེད་པའི་མཉམ་ཉིད་བསམ་པར་བྱ། ཕྱི་དང་ནང་དུ་བཅས་པ་འདི་དག་ཐམས་ཅད་ནི་སེམས་དང་སེམས་ལས་བྱུང་བ་ཡིན་གྱི། སེམས་དང་སེམས་ལས་བྱུང་བ་ལས་ཐ་དད་པ་གཞན་དག་ཡོད་པ་མ་ཡིན་ནོ་ཞེས་ཡིད་ལ་ངེས་པར་བསམས་ལ་ཆོས་ཐམས་ཅད་ནི་གདོད་མ་ནས་མ་སྐྱེས་པ་ཉིད་ཡིན་པའི་ཕྱིར། སྐྱེ་བ་མེད་ཅིང་རང་བཞིན་གྱིས་འོད་གསལ་བ་ཉིད་ཡིན་ནོ་ཞེས་ཡིད་ལ་བརྗོད་དོ། །ཆོས་ཐམས་ཅད་བདག་མེད་པ་ཉིད་ཀྱིས་ན་གཉིས་སུ་མེད་ཅིང་སྟོང་པ་ཉིད་ཀྱི་མཉམ་པ་ཉིད་དུ་དེ་བསམ་པར་བྱའོ། །ཇི་ལྟར་བསམ་པར་བྱ་ཞེ་ན། ཆོས་ཐམས་ཅད་ལ་དམིགས་པའི་སེམས་བརྟན་པར་བྱས་ལ། དེ་རྣམས་ཀྱི་གཟུང་བ་དང་འཛིན་པའི་རྣམ་པས་བསྡུས་པའི་བྱེ་བྲག་ཐ་དད་པ་བསལ་ནས་གཉིས་སུ་མེད་པའི་སྟོང་པ་ཉིད་དུ་སྣང་བའི་བདག་ཉིད་ཅན་སྡིག་པ་མེད་པར་མཐོང་བ་འདི་ནི་དེ་རྣམས་ཀྱི་གཉིས་སུ་མེད་པའི་ཡེ་ཤེས་མཐོང་བ་ཡིན་ཏེ། དེ་ལ་དམིགས་པ་ནི་མི་དམིགས་པའི་ཚུལ་གྱིས་ཡོངས་སུ་རྫོགས་པའི་ངོ་བོ་ཉིད་དེ། འདིའི་རབ་ཏུ་སྦྱོར་བ་ནི་ཡང་དག་པ་ཉིད་ལ་རབ་ཏུ་བལྟ་བའོ། །དེའི་ངོ་བོ་ཉིད་ནི་ཕྱིན་ཅི་མ་ལོག་པ་ཉིད་དུ་ངེས་པ་ཡིན་པས་དེ་བ་སྟན་པ་ནི་ཐམས་ཅད་ཅེས་བྱ་བ་ལ་སོགས་པ་གསུངས་པ་ཡིན་ཏེ། འདི་ནི་ཞེས་བྱ་བའི་ཏིང་ངེ་འཛིན་གྱི་དམིགས་པའི་ཕྱི་དང་ནང་གི་དམིགས་པའོ། །ཐམས་ཅད་ཅེས་བྱ་བ་ནི་གཟུང་བ་དང་འཛིན་པ་ཉིད་ཀྱིས་སོ་སོར་སྣང་ཞིང་སེམས་ཀྱིས་བརྟགས་པ་རྣམས་སོ། །དེ་ལྟར་ན་གཟུང་བ་དང་འཛིན་པ་གཉིས་པོ་འདི་དག་ནི་ཡང་དག་པ་མ་ཡིན་པར་ཀུན་ཏུ་བརྟགས་པ་སྟེ། ཡང་དག་
པ་མ་ཡིན་པ་ཀུན་དུ་བརྟགས་པའི་སེམས་ཉིད་ནི་ཀུན་ཏུ་བརྟགས་པ་དང༌། གཞན་དབང་དག་བ་སྟན་པར་གྱུར་པ་ལས། ཡང་དག་པར་སོ་སོར་རྟོག་པ་མཐོང་བ་ནི་གོ་རིམས་བཞིན་དུ་མེད་པ་དང༌། མེད་བཞིན་དུ་སྣང་བ་ཉིད་ཀྱིས་ན་ཡོངས་སུ་གྲུབ་པའི་ངོ་བོ་ཉིད་གཉིས་སུ་མེད་པའི་སྟོང་པ་རྣམ་པར་ཤེས་པ་ཙམ་ཉིད་དེ། དེའི་ཡང་དག་པར་སོ་སོར་རྟོག་པར་བ་སྟན་པའི་ཕྱིར། དངོས་པོ་མེད་པ་ཞེས་བྱ་བ་ལ་སོགས་པ་གསུངས་ཏེ། སེམས་ནི་རྣམ་པར་ཤེས་པ་སྟེ་དེ་ལས་ཐ་དད་ཅིང་ལྷག་པའི་གཟུང་བ་དང་འཛིན་པ་གཞན་དག་ཡོད་པ་མ་ཡིན་ཏེ། གཉིས་པོས་སྟོང་པའི་རྣམ་པར་ཤེས་པ་ནི་དོན་དམ་པ་ཡིན་ནོ་ཞེས་བྱ་བའི་དོན་ཏོ། །དེ་ལྟར་ཡིད་ཀྱིས་བརྗོད་ཅེས་བྱ་བ་ངེས་པར་བྱས་ནས་སོ། །གང་གིས་ཤེ་ན། ཡིད་ཀྱིས་ཏེ་ཡིད་ཀྱིས་བརྗོད་ནས་དེའོ་འོག་ཏུ་བསམ་པར་བྱའོ་ཞེས་སྔ་མ་དང་སྤྱར་རོ། །མཉམ་པ་ཉིད་དུ་མཐོང་བའི་རྗེས་ལ་མཉམ་པ་ཉིད་དུ་ངེས་པར་བྱ་བར་བ་སྟན་པ་ནི། སྐྱེ་བ་མེད་པ་ཞེས་བྱ་བ་ལ་སོགས་པ་ཡིན་ཏེ། ཆོས་ཐམས་ཅད་གཉིས་སུ་མེད་པའི་ཚུལ་གྱིས་སྐྱེ་བ་མེད་པ་ཉིད་ཡིན་ནོ། །དེ་ཅི་ལམ་གྱིས་ཡོངས་སུ་སྦྱངས་པས་སྐྱེ་བ་མེད་པ་ཡིན་ནམ་ཞེ་ན། དེ་མ་ཡིན་པའི་ཕྱིར་གཟོད་ནས་སྐྱེ་བ་མེད་པ་ཞེས་བྱ་བ་གསུངས་ཏེ། གཉིས་པོ་ནི་རྟག་ཏུ་མཉམ་པ་ཉིད་ཡིན་པས་ན་ངོ་བོ་ཉིད་དེས་གདོད་མ་ཉིད་ནས་སྐྱེ་བ་མེད་པ་ཞེས་བྱ་བའི་དོན་ཏོ། །རང་བཞིན་གྱིས་འོད་གསལ་བ་ཞེས་པ་ནི་རང་བཞིན་གྱིས་དེ་ཁོ་ན་ཉིད་ཅེས་བཤད་ཅིང་དྲི་མ་མེད་ཅེས་བཤད་པས། གཉིས་སུ་རྟོག་པའི་དྲི་མ་རྣམས་ནི་རྩ་བ་མི་བརྟན་པ་ཉིད་ཡིན་པས་ན་གློ་བུར་དུ་འོངས་པ་ཡིན་ནོ་ཞེས་བྱ་བའི་དོན་ཏོ། །དེ་ནས་ཨོཾ་ཙིཏྟ་བྲ་ཏི་བིདྷཾ་ཀ་རོ་མི་ཞེས་ཕྲ་བར་བཟླས་པས་དང་པོར་ཟླ་བའི་དཀྱིལ་འཁོར་དུ་བལྟའོ། །དེའི་དེ་ཁོ་ན་ཉིད་ནི་ཀུན་ནས་ཉོན་མོངས་པའི་ས་བོན་གྱི་གཞིར་གྱུར་པ་ཉིད་ཀྱིས་ན། སྔར་ཀུན་གཞི་ཞེས་བཤད་པའི་སེམས་དེའི་དེ་ཡོངས་སུ་ཟད་པས་ཟག་པ་མེད་པའི་ཆོས་ཀྱི་ས་བོན་གྱི་གཞིར་གྱུར་པ་གནས་ཡོངས་སུ་གྱུར་པ་ཟག་པ་མེད་པའི་དབྱིངས་གནས་མེད་པ་བཤད་པ་ཤིན་ཏུ་རྣམ་པར་དག་པ་སྟེ། དག་པ་དེ་ཉིད་ནི་ཟླ་བའི་དོན་
ཡིན་ནོ། །ཚོགས་ཡོངས་སུ་རྫོགས་པས་སངས་རྒྱས་པའི་ཕྱིར་སངས་རྒྱས་ཀྱི་ཡོན་ཏན་ཐམས་ཅད་ཨ་ལ་སོགས་པའི་གཟུགས་ཟླ་བ་དང་ཤེལ་ལྟ་བུར་དཀར་བའི་ཚུལ་གྱིས་འདིར་རབ་ཏུ་ཞུགས་ཏེ། ཨ་ཨཱ་ཨི་ཨཱི་ཨུ་ཨཱུ་རྀ་རཱྀ་ལྀ་ལཱྀ་ཨེ་ཨཻ་ཨོ་ཨཽ་ཨཾ་ཨཿདེའི་སྟེང་དུ་ཨོཾ་བོ་དྷི་ཙིཏྟ་ཨུཏྤ་དང་ཡཱ་མི་ཞེས་ཕྲ་བར་བཟླས་ལ། ཟླ་བའི་དཀྱིལ་འཁོར་གཉིས་པར་བསྒོམ་པར་བྱའོ། །འདིར་ཡང་སངས་རྒྱས་ཀྱི་ཡོན་ཏན་རྣམས་ཀ་ལ་སོགས་པའི་གཟུགས་ཀྱིས་གཟུགས་བརྙན་གྱི་ཚུལ་དུ་ཞུགས་ཏེ། ཀ་ཁ་ག་གྷ་དང༌། ཙ་ཚ་ཛ་དྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ་ཀྵ། འདིའི་དེ་ཁོ་ན་ཉིད་ནི་བྷ་ག་ཞེས་བཤད་པ་བྱང་ཆུབ་ཀྱི་སེམས་ཀུན་དུ་བཟང་པོའི་སེམས་བསྐྱེད་པའོ། །དེའི་སྟེང་དུ་ཏིཥྛ་བཛྲ་ཞེས་ཕྲ་བར་བཟླས་པ་ལས་བདག་ཉིད་རྡོ་རྗེ་དཀར་པོ་འོད་ཟེར་དང་བཅས་པར་བསྒོམ་པར་བྱའོ། །དེའི་དེ་ཁོ་ན་ཉིད་ནི་བྱང་ཆུབ་ཀྱི་སྤྱོད་པ་བསྡུས་པའི་བྱང་ཆུབ་ཀྱི་སེམས་བརྟན་པར་གྱུར་པའོ། །དེའི་འོག་ཏུ་ཨོཾ་བཛྲ་ཨཱཏྨ་ཀོ྅ཧཾ། ཞེས་ཕྲ་བར་བཟླས་ནས་རྡོ་རྗེ་དེ་ཉིད་ལས་རྡོ་རྗེ་དབྱིངས་རྣམས་ཀྱིས་ནམ་མཁའ་ཁྱབ་པར་སྤྲོ་བ་དང་བསྡུ་བ་བསྒོམ་པར་བྱའོ། །དེའི་དེ་ཁོ་ན་ཉིད་ནི་ཆོས་ཀྱི་སྐུ་འཐོབ་པའོ། །དེའི་འོག་ཏུ་ཨོཾ་ཡ་ཐཱ་སརྦ་ཏ་ཐཱ་ག་ཏ་ཏ་ཐཱ་ཨ་ཧཾ། ཞེས་ཕྲ་བར་བཟླས་པས་ཟླ་བ་གཉིས་དང་རྡོ་རྗེ་ཡོངས་སུ་གྱུར་པ་ལས། རྣམ་པ་ཐམས་ཅད་ཀྱི་མཆོག་དང་ལྡན་པ་སངས་རྒྱས་ཀྱི་སྐུར་བསྒོམ་པར་བྱའོ། །དེའི་དེ་ཁོ་ན་ཉིད་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་འཐོབ་པ་ཡིན་ནོ། །དེ་ཡང་རྡོ་རྗེ་རྩེ་མོ་ལས། །སྐུ་ཡི་གསང་བ་དེ་བཞིན་སྤྱོད། །སྤྱོད་ཡུལ་ཐུགས་སུ་ཆུད་པ་སྟེ། །ལྔ་པོ་དེ་དག་ཀུན་གྱི་སྤྱི། །སངས་རྒྱས་ཐམས་ཅད་མཉམ་པད་གཉིད། །མངོན་པར་བྱང་ཆུབ་རྣམ་པ་ལྔ། །སངས་རྒྱས་ཡེ་ཤེས་བླ་ན་མེད། །ཅེས་གསུངས་པ་དང༌། དཔལ་མཆོག་དང་པོ་ལས་ཀྱང༌། དེ་བཞིན་དུ་མངོན་པར་བྱང་ཆུབ་པའི་མཚན་ཉིད་ནི། རང་སེམས་སོ་སོར་རྟོག་པ་ལས། བྱང་ཆུབ་སེམས་མཆོག་རྡོ་རྗེ་ཉིད། །དེ་ཉིད་དེ་ཡི་སངས་རྒྱས་ཉིད། །བདག་ཉིད་སངས་རྒྱས་བསྒོམ་པས་སོ། །ཞེས་
གསུངས་པ་ཡིན་ནོ། །དེ་ལྟར་ན་དང་པོའི་རྣམ་པ་བཞི་ནི་རྒྱུའི་དེ་ཁོ་ན་ཉིད་ལ་ལྔ་པོ་ནི་འབྲས་བུའི་དེ་ཁོ་ན་ཉིད་ཡིན་ནོ། །དྲིས་པ། འབྲས་བུ་ནི་རྒྱུ་ལ་རག་ལས་པ་ཡིན་པས་ན་རྒྱུའི་སྦྱོར་བ་ཉིད་བྱའི་འབྲས་བུའི་སྦྱོར་བས་ཅི་ཞིག་བྱ་ཞེ་ན། དེའི་ཕྱིར་སྦྱོར་དང་ཞེས་བྱ་བ་ལ་སོགས་པ་གསུངས་ཏེ། སྦྱོར་བ་ཉིད་ནི་སངས་རྒྱས་ཀྱི་རྣལ་འབྱོར་དུ་གྱུར་པ་ཉིད་དེ། དེ་དང་གང་ཡང་དག་པར་འབྲེལ་པ་མེད་པར་ནི་རྣལ་འབྱོར་གྱི་རྒྱུད་ལས་ཀྱང་དངོས་པོ་འབྱུང་བར་མ་གསུངས་ཏེ། དེ་ཡང་འདི་ལས་བྱུང་བས་ན་སྲིད་པ་སྟེ་རྒྱུའོ། །དངོས་པོ་དེ་ཉིད་དུ་འབྱུང་བས་ན། སྲིད་པ་གང་དུ་འབྱུང་འགྱུར་བ། །ཞེས་བྱའོ། །ལ་ལས་ནི། སྲིད་པ་རུ་ནི་འབྱུང་འགྱུར་བ། །ཞེས་ཟེར་ཏེ་གཉིས་ཀ་ཡང་རྣལ་འབྱོར་རྒྱུད་གང་དུ་ཡང་རྒྱུའི་སྦྱོར་བ་འབའ་ཞིག་ལས་འབྱུང་བ་མ་ཡིན་ཞེས་སྟོན་ཏོ་ཞེས་བྱ་བའི་དོན་ཏོ། །འོ་ན་ཇི་ལྟར་འབྱུང་ཞེ་ན། གང་ཚེ་ཞེས་བྱ་བ་ལ་སོགས་པ་གསུངས་ཏེ། གང་གི་ཚེ་སངས་རྒྱས་སུ་གྱུར་པར་སྒོམ་པའི་བསྒོམ་པ་བཞིན་པ་ལ་བདག་ཉིད་སངས་རྒྱས་ཀྱི་ཚུལ་དང་ལྡན་པའི་ཕྱིར་རོ། །ཇི་ལྟར་བསྒོམ་ཞེ་ན། སངས་རྒྱས་བདག་ཅེས་བྱ་བ་སྟེ། བདག་ཉིད་སངས་རྒྱས་ཡིན་ནོ་ཞེས་བ་སྟན་པའི་ངེས་པ་བསྒོམ་པ་སྟེ། དེའི་ཚེ་ནི་སྦྱོར་ལྡན་ཞེས་པ་རྣལ་འབྱོར་པ་སངས་རྒྱས་སུ་འགྱུར་རོ་ཞེས་བྱ་བའི་དོན་ཏེ། །དེའི་ཚེ་རྣལ་འབྱོར་དེས་བྱང་ཆུབ་སྒྲུབ་པ་ཉིད་ཡིན་ནོ་ཞེས་བྱ་བར་དགོངས་ཏེ། དེ་ཡང་སངས་རྒྱས་ཉིད་སྒྲུབ་པའི་རྣལ་འབྱོར་ནི་སངས་རྒྱས་རྣལ་འབྱོར་ཏེ། གང་ཡང་རྒྱུའི་རྣལ་འབྱོར་ཉིད་ཀྱིས་འཚང་རྒྱ་བ་ནི་ཕ་རོལ་ཏུ་ཕྱིན་པའི་ཚུལ་དང་བྱ་བའི་རྒྱུད་ལ་སོགས་པ་ལས་བཤད་པ་སྟེ། དེ་ནི་དུས་ཤིན་ཏུ་རིང་བས་འབྱུང་བ་ཡིན་ནོ། །རྣལ་འབྱོར་གྱི་རྒྱུད་རྣམས་སུ་ནི་རྒྱུ་དང་འབྲས་བུའི་སྦྱོར་བ་ལ་སོགས་པས་ཐེག་པ་ཆེན་པོ་མཐའ་དག་བསྡུས་པ་ཡིན་པའི་ཕྱིར་ཤིན་ཏུ་མྱུར་བ་ཉིད་དུ་བྱང་ཆུབ་ཐོབ་པ་ཡིན་ནོ། །དེ་བས་ན་ཏིང་ངེ་འཛིན་ཞེས་བྱ་བ་ལ་སོགས་པ་གསུངས་པ་ཡིན་ཏེ། མདོར་བསྡུས་པ་ཞེས་བྱ་བ་དུས་མདོར་བསྡུས་པས་འཚང་རྒྱ་བ་གང་ཡིན་པ་དེ་ནི་ཏིང་ངེ་འཛིན་ཡེ་ཤེས་ལས་བྱུང་བ་ཞེས་བྱ་སྟེ། ཏིང་ངེ་འཛིན་ནི་མངོན་པར་བྱང་ཆུབ་པ་ལྔའི་ཏིང་ངེ་འཛིན་ཏོ། །ཡེ་
ཤེས་ནི་གཉིས་སུ་མེད་པའི་ཡེ་ཤེས་ཏེ་དེ་གཉིས་ལས་འདི་ཡང་དག་པར་བྱུང་ཞིང་སྐྱེས་པ་ཡིན་པས་དེ་སྐད་ཅེས་བྱའོ། །ཕྱིར་ཞེས་བྱ་བ་ནི་གང་གི་ཕྱིར་ཏེ་དེའི་ཕྱིར་རོ་ཞེས་ཤེས་པར་བྱའོ། །སངས་རྒྱས་རྣལ་འབྱོར་ཞེས་བྱ་བ་ལ་སོགས་པས་ནི་ཉེ་བར་བསྡུས་པ་ཡིན་ཏེ། གང་འདི་དཔལ་དེ་ཁོ་ན་ཉིད་བསྡུས་པ་ལས། རྡོ་རྗེ་སེམས་དཔའི་ཏིང་ངེ་འཛིན། །སངས་རྒྱས་རྣམས་ཀྱི་ཆོས་ཉིད་ཡིན། །འདི་ནི་སངས་རྒྱས་སངས་རྒྱས་ཉིད། །གཞན་དུ་སངས་རྒྱས་འགྱུར་མ་ཡིན། །ཞེས་གསུངས་པ་ཡིན་ནོ། །དེའི་དོན་གང་ཡིན་ཞེ་ན། །དོན་འདི་ཡིན་ཏེ་མངོན་པར་བྱང་ཆུབ་པ་རྣམ་པ་ལྔའི་ཏིང་ངེ་འཛིན་གྱི་རིམ་གྱིས་ཏིང་ངེ་འཛིན་གསུམ་བསྒོམས་ལ་ཕྱིས་རྡོ་རྗེ་སེམས་དཔའི་ཏིང་ངེ་འཛིན་གྱིས་ཡུན་རིང་དུ་གནས་པར་བྱ་སྟེ། རང་གི་སྙིང་གར་གནས་པའི་རྡོ་རྗེ་ལ་སེམས་མཉམ་པར་གཞག་ནས། ཇི་སྲིད་འདོད་ཀྱི་བར་དུ་གནས་པར་བྱའོ་ཞེས་བྱ་བའི་དོན་ཏོ། །རྒྱུ་དང་འབྲས་བུའི་སྦྱོར་བ་བ་སྟན་པའོ། །འབྲས་བུའི་སྦྱོར་བ་ལ་ཡང་དག་པར་ཞུགས་པ་ཞེས་གསུངས་པ་དེ་ལ་ཡང་དག་པར་ཞུགས་པ་ནི་གཉིས་སུ་མེད་པའི་ཡེ་ཤེས་དང༌། ངོ་བོ་ཉིད་ཀྱི་ཡེ་ཤེས་སོ། །དེ་ལས་གཉིས་སུ་མེད་པའི་ཡེ་ཤེས་བ་སྟན་པར་བྱ་བའི་ཕྱིར། ཕྲ་མོའི་ཞེས་བྱ་བ་ལ་སོགས་པ་གསུངས་པ་ཡིན་ཏེ། རང་གི་སེམས་ཉིད་ཆོས་ཐམས་ཅད་དམིགས་པ་ན་སྤྲོས་པའི་མཚན་མ་ཐམས་ཅད་ནུབ་པར་གྱུར་པས་གཉིས་སུ་མེད་པར་སྣང་བའི་བདག་ཉིད་ཀྱིས། སེམས་ཅན་ཐམས་ཅད་ཀྱི་སེམས་དང་སེམས་ལས་བྱུང་བ་རོ་གཅིག་པར་གྱུར་པ་གང་ཡིན་པ་དེ། དག་པའི་བདག་ཉིད་གང་གིས་ཇི་ལྟ་བ་བཞིན་དུ་མཐོང་བ་ནི་དང་པོ་མཐོང་བ་སྟེ། དེའི་འོག་ཏུ་རང་གི་སེམས་དེ་སྟུག་པར་གྱུར་པ་སྟེ་ཟླ་བ་དང་རྡོ་རྗེ་དང་སངས་རྒྱས་ལ་སོགས་པའི་དངོས་པོ་ཇི་ལྟ་བ་བཞིན་དུ་འགྱུར་རོ། །དེ་དག་ཀྱང་གང་ལས་ཤེ་ན། དངོས་དང་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དངོས་པོ་དང་དངོས་པོ་མེད་པའི་ཁྱད་པར་དུ་བསྒོམ་པ་དེ་ལ་ཆོས་ཐམས་ཅད་ལ་དམིགས་པའི་ཕྲ་བར་གྱུར་བ་ནི་དངོས་པོ་མེད་པའི་ཁྱད་པར་རོ། །ཕྲ་བར་གྱུར་པ་དེའི་འོག་ཏུ་སྟུག་པོར་གྱུར་པ་ནི་དངོས་པོའི་ཁྱད་པར་ཏེ་དེ་ལྟ་བུའི་དངོས་པོ་
དང། དངོས་པོ་མེད་པའི་ཁྱད་པར་སྒོམ་པ་ཀུན་དུ་བརྟགས་པ་ཡིན་ཞེས་བྱ་བ་སྟེ། རྣལ་འབྱོར་གྱི་རྒྱུད་རྣམས་སུ་བསྒོམ་པ་རྣམ་པར་གཞག་པ་ཡིན་ནོ། །དེ་དག་ཀྱང་གང་ལས་ཤེ་ན། དངོས་པོ་ཞེས་བྱ་བ་ལ་སོགས་པ་གསུངས་ཏེ། དངོས་པོ་འབའ་ཞིག་ནི་བསྒོམ་པ་མ་ཡིན་ཏེ། རྣམ་པ་བཞི་པོ་ལ་སངས་རྒྱས་ཀྱི་སྐུ་སྐྱེས་པ་ཡིན་དུ་ཟིན་ཀྱང༌། རང་བཞིན་གྱི་སྐུ་ལས་ཤིན་ཏུ་དམན་པ་ཡིན་པའི་ཕྱིར་དངོས་པོ་མེད་པ་ནི་ཕྲ་བའི་དངོས་པོ་སྟེ། སྒོམ་པ་དེ་ཡང་བསྒོམ་པ་མ་ཡིན་ཏེ་བསྒོམས་ཀྱང་བསྒོམ་པ་མ་ཡིན་ནོ་ཞེས་བྱ་བའི་དོན་ཏོ། ཇི་ལྟར་སྒོམ་པ་ཡིན་ཞེ་ན། དེས་དོན་དམ་པ་མཐོང་བའི་ཕྱིར་རོ། །ཇི་ལྟར་བསྒོམ་པ་མ་ཡིན་ཞེ་ན། མངོན་པར་བྱང་ཆུབ་པ་ལྔ་བསྒོམས་པའི་འོག་ཏུ་ཤིན་ཏུ་གྱུར་བར་བྱང་ཆུབ་འཐོབ་པའི་ཕྱིར་རོ། །དེ་ནས་ཅི་ཞིག་ཅེ་ན། བསྒོམ་པ་ཞེས་བྱ་བ་ལ་སོགས་པ་གསུངས་ཏེ། ཕྲ་བའི་དངོས་པོ་བསྒོམས་པས་ནི་དོན་དམ་པ་མཐོང་བའི་ཕྱིར་རོ། །དེ་ནས་དེའི་འོག་ཏུ་ཟླ་བ་དང་རྡོ་རྗེ་ལ་སོགས་པའི་དངོས་པོ་སྒོམ་པ་སྟེ། དངོས་པོ་དེ་བསྒོམས་པས་རང་གི་སེམས་ཡོངས་སུ་སྤྱང་བ་སྟེ། ཡོངས་སུ་དག་པའི་ལས་དག་པའི་གནས་སྐབས་སོ། །དེ་བས་ན་རྒྱུ་དང་འབྲས་བུ་ནི་རང་གི་སེམས་ཉིད་ལས་གཞན་མ་ཡིན་ནོ་ཞེས་ངེས་པར་བྱས་པ་གང་ཡིན་པ་དེ་ནི་གཉིས་སུ་མེད་པའི་ཡེ་ཤེས་སོ། །གལ་ཏེ་རྒྱུ་དང་འབྲས་བུ་རང་གི་སེམས་ཉིད་ཡིན་ན། དེའི་ཚེ་དེ་ཉིད་ནི་དེའི་རིག་པ་ཡིན་པས་རྣལ་འབྱོར་པ་དེ་སངས་རྒྱས་པར་མི་འགྱུར་ཏེ། དེ་ཐམས་ཅད་མཁྱེན་ན་བདག་ཉིད་དང་གདུལ་བྱ་རྣམས་ཀྱི་སེམས་ཀྱི་སྤྱོད་པ་མི་ཤེས་པས་ཇི་ལྟར་སངས་རྒྱས་པ་ཡིན་ཞེ་ན། དེའི་ཕྱིར་སངས་རྒྱས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཏེ་ཐམས་ཅད་མཁྱེན་པ་ནི་ཡུལ་མ་ཡིན་ཞིང་གཟུང་བར་བྱ་བ་མ་ཡིན་པས་ན་སངས་རྒྱས་ཀྱི་ཡུལ་ལོ། །སེམས་ཅན་ནི་གདུལ་བྱ་རྣམས་ཏེ་དེ་རྣམས་ནི་གཟུང་བར་བྱ་བ་མ་ཡིན་པས་དེ་སྐད་ཅེས་བྱའོ། །གལ་ཏེ་དེ་གཟུང་བར་གྱུར་ན་ནི་དེའི་ཚེ་དེ་ལ་གཉིས་ཀྱི་རྟོག་པ་ཡོད་པས་འཁྲུལ་བར་འགྱུར་གྱི་འཚང་རྒྱ་བར་ནི་མི་འགྱུར་རོ། །འོ་ན་ཇི་ལྟར་སངས་རྒྱས་པར་འགྱུར་ཞེ་ན། རང་
གི་སེམས་རྟོགས་པས་ཞེས་བྱ་བ་ལ་སོགས་པ་གསུངས་ཏེ། རང་གི་སེམས་ཉིད་ཀྱི་ཆོས་ཐམས་ཅད་རོ་གཅིག་པྲ་རྟོགས་པས་རང་རིག་པ་ཙམ་གྱི་འཁྲུལ་པ་དང་བྲལ་བའི་ཕྱིར་རོ། །སངས་རྒྱས་ཏེ་ཞེས་བྱ་བ་ནི་བྱང་ཆུབ་ཅིང་ཐམས་ཅད་མཁྱེན་པའོ། །ཉེ་བར་བསྡུ་བའི་ཕྱིར་གཉིས་མེད་སྦྱོར་བ་ཞེས་བྱ་བ་ལ་སོགས་པ་གསུངས་ཏེ། གཉིས་སུ་མེད་པའི་ཡེ་ཤེས་ལ་མཉམ་པར་གཞག་པའི་ནི་གཉིས་སུ་མེད་པའི་སྦྱོར་བའོ། །ཏིང་ངེ་འཛིན་ནི་འབྲས་བུའི་སྦྱོར་བའོ། །དེའི་ཡེ་ཤེས་ནི་ཡོངས་སུ་ཤེས་པ་སྟེ། དེ་ཁོ་ན་ཉིད་ངེས་པར་བརྟག་པའོ། །དེའི་དོན་བརྟག་པ་ནི་བསྐྱེད་པའོ། །རྒྱུའི་དེ་ཉིད་ཇི་ལྟར་ཞེས་བྱ་བ་ནི་ཡོངས་སུ་དག་པའི་སེམས་ཀྱི་ངོ་བོ་ཉིད་མཐོང་བ་གང་ཡིན་པའོ། །དེ་ཉིད་ཡིན་ཞེས་བྱ་བ་ནི་མཐོང་བ་ཞེས་བྱ་བ་དང་སྤྱར་རོ། །གཉིས་སུ་མེད་པའི་ཡེ་ཤེས་བ་སྟན་པའོ། །ངོ་བོ་ཉིད་ཀྱི་ཡེ་ཤེས་བ་སྟན་པར་བྱ་བའི་ཕྱིར། རྒྱུའི་ཞེས་བྱ་བ་ལ་སོགས་པ་གསུངས་ཏེ། རྒྱུ་ནི་ཟླ་བ་ལ་སོགས་པའོ། །འབྲས་བུ་ནི་སངས་རྒྱས་ཀྱི་སྐུ་ལ་སོགས་པ་སྟེ། དེ་གཉིས་ལ་ནི་དེ་ཁོ་ན་ཉིད་ཅུང་ཟད་ཀྱང་མེད་པ་ཡིན་པའི་ཕྱིར་རོ། །མེད་པ་ཉིད་ནི་གཅིག་དང་དུ་མ་དང་དུ་མ་བྲལ་བ་ཡིན་ནོ། །དེ་ཡང་འཕགས་པ་ལང་ཀར་གཤེགས་པ་ལས། ཇི་ལྟར་མེ་ལོང་ངག་ལ་གཟུགས། །གཅིག་དང་དུ་མ་རྣམ་སྤངས་པར། སྣང་ཡང་དེ་ལ་ཡོད་མ་ཡིན། །དེ་བཞིན་དངོས་ལ་དངོས་རྣམས་སོ། །ཞེས་གསུངས་པ་ཡིན་ནོ། །རྒྱུ་ཉིད་ནི་རྒྱུའི་ངོ་བོ་ཉིད་ཡིན་ནོ། །དེ་ཉིད་དེ་ནི་དེ་བཞིན་ཞེས་བྱ་བ་ནི་དེ་ཁོ་ན་ཉིད་དུ་སྟེ་དོན་དམ་པར་རོ། །ཡེ་ཤེས་དེ་ལ་ཞེས་བྱ་བ་ནི་དེ་བཞིན་ཉིད་ཀྱི་ཡེ་ཤེས་དེ་ལའོ། །ཀུན་དུ་སྤྱོད་ཅེས་བྱ་བ་ནི་ཡང་དག་པར་སྤྱོད་པའོ། །ཇི་ལྟར་ཡང་དག་པར་སྤྱོད་ཅེ་ན། རྒྱུ་ཡིས་ཞེས་བྱ་བ་ལ་སོགས་པ་གསུངས་ཏེ། དེ་ཡང་གཉིས་པོས་སྟོང་པའི་རྣམ་པར་ཤེས་པ་ཙམ་ནི་ཡོངས་སུ་གྲུབ་པའི་ངོ་བོ་ཉིད་དེ། ཕྱིན་ཅི་མ་ལོག་པའི་ཡེ་ཤེས་དེ་ལ་ཀུན་བརྟགས་པ་དང༌། གཞན་དབང་གི་རང་བཞིན་ཅན་གྱི་ཡོངས་སུ་ཤེས་པར་འགྱུར་པ་དེ་ལ་ནི་རྒྱུ་ལ་རྒྱུའི་ངོ་བོར་ཡོད་པ་མ་ཡིན་ལ་འབྲས་བུ་ལ་འབྲས་བུའི་རང་གི་ངོ་བོར་
ཡོད་པ་མ་ཡིན་ནོ། །བརྟག་པའི་ངོ་བོ་ཉིད་དུ་གྱུར་པའི་བརྫུན་པར་ངེས་པའི་ཡོངས་སུ་ཤེས་པ་ནི་རྒྱུ་དང་འབྲས་བུའི་ཚུལ་དུ་གཟུང་བར་བྱར་མེད་པས་སོ། །དེ་ལྟར་ན་མེད་པ་ལས་དེ་འཛིན་པ་ཉིད་དུ་རང་གི་སེམས་སྣང་བ་ཡིན་ཏེ། སོ་སོར་སྣང་བ་གཉིས་ཀ་མེད་པའི་ཤེས་པ་ནི་གཞན་གྱི་དབང་གི་ངོ་བོ་ཉིད་དུ་ཡོངས་སུ་ཤེས་པ་ཡིན་ཏེ། དེ་བས་ན་འདི་དག་ནི་རྣམ་པར་ཤེས་པ་ཙམ་ཉིད་ཡིན་ནོ། །འདི་ལྟ་སྟེ། རྒྱུ་དང་འབྲས་བུ་གཉིས་ནི་སྟོང་པ་ཉིད་ཡིན་ནོ་ཞེས་གང་ཡོངས་སུ་ཤེས་པ་དེ་ནི་དེའི་ཕྱིན་ཅི་མ་ལོག་པ་སྟེ། དེ་བཞིན་ཉིད་ཀྱི་ཡེ་ཤེས་སོ། །དེ་ལྟར་མེད་པ་ཡིན་ན་ཇི་ལྟར་ཟླ་བ་ལ་སོགས་པར་རང་ཉིད་མི་སྣང་ཞེ་ན། མེད་པ་ནི་སྣང་བའི་གཟུགས་དང་བྲལ་བའི་ཕྱིར་རོ། །རང་ཉིད་སོ་སོར་སྣང་བར་གྱུར་པ་དེ་ལ་ནི་འབྲེལ་པ་མེད་པའི་ཕྱིར། རྒྱུ་འགའ་ཡང་ཡོད་པ་མ་ཡིན་ནོ། །དེ་བས་ན་སོ་སོར་སྣང་བ་དེ་ལ་ནམ་ཡང་ཅི་ཡང་ཡོད་པ་མ་ཡིན་ཏེ། རྒྱུ་མེད་པའི་ཕྱིར་རོ། །འོ་ན་སེམས་ཇི་ལྟར་མེད་པའི་ཚུལ་གྱིས་སྣང་ཞེ་ན། གང་གི་ཕྱིར་སྣང་བའི་བདག་ཉིད་ཅན་གྱི་སེམས་དེ་ནི་གཟུགས་སུ་འཁྲུལ་ཅིང་གཟུགས་ལས་གཞན་ན་མེད་པ་ཡིན་ཏེ། དེ་བས་ན་གཟུགས་དེ་ནི་གཟུགས་ལས་གྱུར་པ་མ་ཡིན་ལ། དེ་གཟུགས་མེད་པ་ཡང་མ་ཡིན་ཏེ། སེམས་སྣང་བའི་ཚུལ་ཡིན་པའི་ཕྱིར་དེའི་བདག་ཉིད་དང་དེ་ལས་གཞན་པར་སྣང་བའི་འབྲེལ་པ་དང་ལྡན་པ་མ་ཡིན་ནོ། །དེ་བས་ན་སྣང་བ་ཉིད་དུ་ཡང་ཡོད་པ་མ་ཡིན་ཏེ། ཤེས་པ་ལས་དོན་གཞན་ཤེས་པའམ་གཟུགས་སུ་འཁྲུལ་པ་མེད་དེ། ཉམས་སུ་མྱོང་བར་གྲུབ་པ་ནི་འཁྲུལ་པ་སྟེ། དེ་ཡང་སེམས་ཉིད་གཟུགས་སུ་འཁྲུལ་པས་སྣང་བ་དང་སྣང་བ་མ་ཡིན་པའི་འཁྲུལ་པ་དང་ལྡན་པ་ཡིན་ནོ། །དེ་བས་ན་གཟུགས་ཀྱི་རང་གི་ངོ་བོ་ལྟར་གཟུགས་སུ་འཁྲུལ་པར་གྱུར་པའི་རྗེས་སུ་མྱོང་བར་གྲུབ་པས་སྣང་བ་ཡིན་ཏེ། དེ་ལ་ཡོད་པ་དང་མེད་པའི་རྒྱུ་མེད་པས་འགལ་བ་ཉིད་དུ་འཁྲུལ་པ་ཡིན་ལ། ངེས་པ་དེ་ཡང་རང་གི་རིགས་དང་མཐུན་པའི་རྣམ་པར་རྟོག་པ་ལ་ཞེན་པའི་བག་ཆགས་ལས་བྱུང་བའི་ཕྱིར་རྣམ་པར་རྟོག་པ་ཙམ་ཡིན་ལ། དེ་བས་ན་མངོན་པར་ཞེན་པ་རྣམ་པར་དག་
པའི་ཡང་དག་པ་ལ་སོ་སོར་རྟོག་པ་ལེགས་པར་བསྒོམས་པའི་རིམ་གྱིས་ཡང་དག་པའི་ཡེ་ཤེས་སྐྱེ་བ་ཡིན་ནོ། །དེ་བས་ན་འཁྲུལ་པ་ཉིད་དུ་གྲུབ་པ་འདི་དག་ངེས་པ་ཡིན་ནོ། །དེ་ཡང་འདི་ལྟར་དེའི་བདག་ཉིད་དུ་འཁྲུལ་པ་ལས་ཀྱང་སོ་སོར་སྣང་བ་འགལ་བ་ཡིན་ཏེ། རྒྱུ་ཡང་དེའི་བདག་ཉིད་ཡིན་པའི་ཕྱིར་རོ། །དེ་ནི་འཕགས་པ་ལང་ཀར་གཤེགས་པའི་མདོ་ལས་ཀྱང༌། བྱིས་པས་ཇི་ལྟར་རྣམ་བརྟགས་བཞིན། །ཕྱི་རོལ་དོན་ནི་ཡོད་མིན་ཏེ། །བག་ཆགས་ཀྱིས་ནི་བསྒོས་པའི་སེམས། །རང་གི་སེམས་ནི་ཕྱི་རོལ་སྣང༌། །ཞེས་གསུངས་པ་ཡིན་ཏེ། བསྒོམ་པ་ནི་བཅོམ་པའོ། །ཀུན་བརྟགས་པ་དང་གཞན་གྱི་དབང་ཡོངས་སུ་ཤེས་པ་དེ་ལས་ནི་དེ་བཞིན་ཡོངས་སུ་ཤེ་ལ། དེ་བཞིན་ཉིད་ནི་རང་བཞིན་གྱི་ཆོས་རྣམས་སོ། །དེ་བས་ན་དེ་ཤེས་པ་ནི་ངོ་བོ་ཉིད་ཀྱི་ཡེ་ཤེས་བ་སྟན་པའོ། །དྲིས་པ་རྒྱུ་དང་འབྲས་བུའི་སྦྱོར་བ་ནི་ཡོད་པ་མ་ཡིན་པ་ལས་སྣང་བའི་ཕྱིར་འཁྲུལ་པ་ཡིན་ལ་གཉིས་སུ་མེད་པའི་ངོ་བོ་ཉིད་ཀྱི་ཡེ་ཤེས་ཀྱང་ཤིན་ཏུ་འཁྲུལ་པ་ཡིན་ཏེ། བརྗོད་པ་དང་བཅས་པའི་ཕྱིར་འཁྲུལ་པ་ནི་དེ་ཁོ་ན་ཉིད་མ་ཡིན་ན། ཇི་ལྟར་ན་འདི་དག་བསྒོམ་པ་བྱང་ཆུབ་ཀྱི་ལམ་ཡིན་ཞེ་ན། འདིར་བརྗོད་པར་བྱ་སྟེ། གང་གི་ཕྱིར་ཆོས་ཐམས་ཅད་ལ་སྤྲོས་པ་མེད་པའི་ཡེ་ཤེས་དང་པོ་སྐྱེས་པས་ཆོས་ཀྱི་དབྱིངས་ཀུན་དུ་འགྲོ་བ་དང་ཀུན་དུ་རྟོག་པ་དང་དེའི་སྟོབས་ཀྱིས་ཡེ་ཤེས་འདི་དག་དུས་དང་རྣམ་པར་དབྱེ་བས་ཇི་ལྟ་བས་ཉེ་བར་མཚོན་པའི་ཁྱད་པར་རྣམས་འབྱུང་བར་འགྱུར་ཏེ། དེ་ནས་དེ་བཞིན་ཉིད་ཡོངས་སུ་གཅོད་པར་བྱེད་པ་རྣམ་པར་ཤེས་པའི་མཚན་ཉིད་དུ་བཤད་ན་རབ་རིབ་ཅན་གྱིས་ནམ་མཁའ་ལ་སྐྲ་ཤད་མཐོང་བ་ལྟ་བུས་ཇི་ལྟར་བརྗོད་པ་མེད་པ་ཡོངས་སུ་སྤྱོད་པར་འགྱུར་ཞེ་ན། སོ་སོར་རིག་པར་གྱུར་པ་ལ་ཤིན་ཏུ་བྱང་བར་གྱུར་པ་རང་གི་ལུས་ལ་སོགས་པ་རྗེས་སུ་མྱོང་སྟེ། བརྟག་པ་དང་བདག་ཏུ་ཡོངས་སུ་གཅོད་པ་བཞིན་ནོ། །རྣམ་པར་མི་རྟོག་པར་འཇུག་པའི་གཟུངས་ལས་ཀྱང་ཇི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་རྣམ་པར་མི་རྟོག་པའི་དབྱིངས་ལ་རབ་ཏུ་གནས་པས་ནི་ཤེས་བྱ་དང་ཁྱད་པར་
མེད་པར་རྣམ་པར་མི་རྟོག་པའི་ཡེ་ཤེས་ཀྱིས། ཆོས་ཐམས་ཅད་ནམ་མཁའི་དཀྱིལ་དང་མཚུངས་པར་མཐོང་ངོ༌། །རྣམ་པར་མི་རྟོག་པའི་འོག་ཏུ་ཐོབ་པའི་ཤེས་པས་ནི་ཆོས་ཐམས་ཅད་སྒྱུ་མ་དང༌། སྨིག་རྒྱུ་དང༌། རྨི་ལམ་དང་མི་གཡོར་དང་བྲག་ཅ་དང་གཟུགས་བརྙན་དང་ཆུ་ཟླ་དང་སྤྲུལ་པ་དང་བར་མཐོང་ངོ་ཞེས་གསུངས་སོ། །དེ་བས་ན་དག་པ་འཇིག་རྟེན་པའི་ཡེ་ཤེས་ཀྱིས་དེ་ཁོ་ན་ཉིད་ཡོངས་སུ་གཅོད་པ་ཉིད་ཀྱིས་དག་པ་དང་འཁྲུལ་པ་ཉིད་ཀྱིས་འཇིག་རྟེན་པ་ཉིད་ཡིན་ནོ། །དེ་ཉིད་ནི་འཇིག་རྟེན་ལས་འདས་པའི་ཡེ་ཤེས་ཀྱི་འབྲས་བུ་ཉིད་ཀྱིས་དེ་ཁོ་ན་ཉིད་དེ། འདི་དག་ནི་འཕགས་པའི་ཆོས་ཡོངས་སུ་ཉམས་པ་ཉིད་ཀྱིས་སྔ་མའི་ཁྱད་པར་འཐོབ་པ་ལས་གོང་མའི་ཁྱད་པར་ཕུལ་དུ་བྱུང་སྟེ། དེ་བས་ན་ཡེ་ཤེས་དེ་ནི་ཞེས་བྱ་བ་ལ་སོགས་པ་གསུངས་ཏེ། རང་གི་སེམས་དེ་ཉིད་ཟླ་བ་ལ་སོགས་པའི་ཚུལ་གྱིས་སོ་སོར་སྣང་བ་ནི་དེ་ཁོ་ན་ཉིད་ཡིན་ཏེ། རང་གི་ངོ་བོ་ཉིད་ཀྱིས་ཟླ་བ་ལ་སོགས་པའི་དེ་ཁོ་ན་ཉིད་ནི་མ་ཡིན་ཏེ་འདི་ནི་སྤྱིའི་དོན་ཏོ། །གོང་ནས་གོང་དུ་ཕུལ་དུ་བྱུང་བར་བ་སྟན་པའི་ཕྱིར་དེ་ཁོ་ན་ཉིད་དང༌། གསང་བ་དང་ཤིན་ཏུ་གསང་བ་དང་མཆོག་གི་སྒྲར་བཤད་དེ། འདིར་ཡེ་ཤེས་ནི་དེ་ཁོ་ན་ཉིད་ཀྱི་ཡེ་ཤེས་ཞེས་བྱ་བའི་དོན་ཏོ། །དེ་ལ་དེ་ཁོ་ན་ཉིད་ཀྱི་རྣལ་འབྱོར་པས་དེ་ལས་གཞན་པའི་དེ་ཁོ་ན་ཉིད་མཐོང་ངམ། འོན་ཏེ་མ་ཡིན་ཞེ་ན། དེ་ཉིད་ཅེས་བྱ་བ་ལ་སོགས་པ་གསུངས་ཏེ། དེ་ཁོ་ན་ཉིད་དང་གསང་བ་ཉིད་དང༌། ཤིན་ཏུ་གསང་བ་ཉིད་དང༌། དམ་པ་ཉིད་དོ་ཞེས་བྱ་བར་ཤེས་ཏེ་ངེས་པར་བཟུང་བའི་འབྲས་བུ་ཉིད་ཀྱིས་ན་ཤེས་པ་སྟེ་རྟོགས་པའི་དོན་ཏོ། །དེ་ཞེས་བྱ་བ་ནི་ཤེས་པ་དེའོ། །དེ་ཉིད་རྟོགས་པ་ནི་གསང་བའི་རྣམ་པ་ཤེས་ཤིང་རྟོགས་པའོ། །འདི་དག་ནི་མཆོག་ཡིན་ནོ་ཞེས་ཀྱང་སྤྱར་བར་བྱའོ། །རྒྱུ་ཙམ་དང་འབྲས་བུ་ཙམ་ནི་རྒྱུའི་སེམས་ལས་འབྲས་བུའི་སེམས་བྱེ་བྲག་མེད་པ་ཡིན་ཏེ། སྟོང་པ་ཞེས་བྱ་བ་བཞི་པ་ཉིད་བཞིར་ཤེས་པར་བྱའོ། །དེ་ལས་གཞན་མ་ཡིན་པའི་གསུམ་གསུམ་ནི་སེམས་ཙམ་སྟེ། དེ་ནི་ཐམས་ཅད་དུ་ཡོད་པར་བཤད་པས་འདི་ནི་ངེས་པར་ཆད་པ་མ་
ཡིན་ནོ། །འབྲས་བུའི་དེ་ཉིད་ཡང་དག་ཞུགས། །རྒྱུ་ཡི་དེ་ཉིད་མི་འདོད་དོ། །ཞེས་གསུངས་པ་དེ་ཡང་བཤད་པར་བྱ་བའི་ཕྱིར་སྡུག་པའི་ཞེས་བྱ་བ་ལ་སོགས་པ་གསུངས་ཏེ། ཐོབ་པ་དང་སྤྲད་པ་དག་གང་སྡུག་པ་དང་མི་སྡུག་པར་བཤད་པ་སྟེ། སངས་རྒྱས་ཀྱི་ཡེ་ཤེས་དང་ཉན་མོངས་པའོ། །དེ་གཉིས་ཀ་ལས་རྒྱལ་བར་འདོད་པའོ། །དེ་བས་ན་འབྲས་བུའི་དེ་ཁོ་ན་ཉིད་ལ་ཞུགས་པའི་རྣལ་འབྱོར་པ་རྣམས་ཀྱིས་ཐོབ་པར་འདོད་པ་དང༌། དོར་བར་འདོད་པ་སྤང་བར་བྱ་སྟེ། སངས་རྒྱས་ཀྱི་ཡེ་ཤེས་རྣམ་པར་རྟོག་པ་མ་ལུས་པར་སྤངས་པ་ཐམས་ཅད་རྟོགས་པས་བདག་ཉིད་སངས་རྒྱས་དང་འདྲ་བར་མངོན་སུམ་ཉིད་དུ་ངེས་པར་བྱའོ། །དེ་ལྟ་ན་ནི་འདིར་མྱུར་བར་སངས་རྒྱས་པར་མི་འགྱུར་གྱི། གཞན་དག་ནི་ཇི་ཙམ་དུ་འབྲས་བུ་འདོད་པ་དེ་ཙམ་དུ་རྒྱུ་འདོད་པ་ཡིན་པས་རྒྱུ་བསྒྲུབ་པར་བྱ་བ་ཡིན་པའི་ཕྱིར། སྲིད་པ་གཅིག་ནས་གཅིག་ཏུ་བརྒྱུད་པའི་བྱ་བ་ཡུན་རིང་པ་ཉིད་དུ་འགྱུར་རོ། །འདོད་པ་མེད་པ་ཉིད་དུ་བ་སྟན་པའོ། །ཕྱག་རྒྱ་བཞིས་རྒྱས་བཏབ་པ་མེད་པར་ནི་རྣལ་འབྱོར་ཡོངས་སུ་རྫོགས་པར་མི་འགྱུར་རོ། །དེ་བས་ན་དེའི་དེ་ཁོ་ན་ཉིད་བ་སྟན་པར་བྱ་བའི་ཕྱིར། རྣམ་ཤེས་ཙམ་ནི་ཞེས་བྱ་བ་ལ་སོགས་པ་གསུངས་ཏེ། གཟུང་བ་དང་འཛིན་པ་དང༌། བརྗོད་པ་དང་རྗོད་པར་བྱེད་པ་སྟོང་པ་ཉིད་ཀྱི་རྣམ་པར་ཤེས་པ་ནི་རྣམ་ཤེས་ཙམ་ཞེས་བྱ་སྟེ། དངོས་པོ་གཙོ་བོ་མ་ཡིན་པས་ན་རྣམ་པར་ཤེས་པ་ཙམ་ཞེས་བྱ་བའི་དོན་ཏེ། ཉེ་བར་གདགས་པས་དེའི་ཡེ་ཤེས་ལ་ཡང་དེ་སྐད་ཅེས་བྱའོ། །རྣམ་པར་ཤེས་པ་ཙམ་ཉིད་ཀྱིས་གལ་ཏེ་རྣལ་འབྱོར་ལ་དམིགས་པ་ཡོངས་སུ་ཤེས་པ་ཡིན་པས་དེ་མེད་པར་ནི་རྣལ་འབྱོར་ཡོངས་སུ་རྫོགས་པར་འགྱུར་བ་ཡོད་པ་མ་ཡིན་ནོ་ཞེས་བྱ་བ་ནི་ཚིག་གི་དོན་ཏོ། །གལ་ཏེ་དེ་ལྟར་ན་རྣམ་པར་ཤེས་པ་དག་ལ་ཉིད་རྣལ་འབྱོར་པ་རྣམས་ཀྱི་དངོས་གྲུབ་ཡིན་གྱི། བློ་དག་པས་ནི་མ་ཡིན་ནོ་ཞེ་ན། ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་རྣལ་འབྱོར་པ་འདིའི་ཡེ་ཤེས་མཆོག་ཏུ་ཤིན་ཏུ་དག་པར་གྱུར་པ་དེ་ལྟར་དག་པར་གྱུར་པའི་རྣལ་འབྱོར་པ་ནི་དེ་བཞིན་གཤེགས་པར་འགྱུར་ཏེ། དེ་བཞིན་གཤེགས་པ་ཡང་
ཡེ་ཤེས་ཙམ་ཉིད་ཡིན་ནོ་ཞེས་བྱ་བར་དགོངས་སོ། །དེ་བཞིན་གཤེགས་པ་ལ་སོགས་པའི་སྐུ་ཡང་ཕྱག་རྒྱ་བཞི་དང་ལྡན་པར་རྣལ་འབྱོར་གྱི་རྒྱུད་འདི་ཉིད་དུ་བསྒོམ་པར་བྱ་བ་ཡིན་པས། དེའི་ཉེ་བར་སྦྱོར་བ་བ་སྟན་པའི་ཕྱིར་རྣམ་ཤེས་ཞེས་བྱ་བ་ལ་སོགས་པ་གསུངས་ཏེ། རྣམ་པར་ཤེས་པ་ཙམ་ཞེས་བྱ་བ་ནི་དངོས་པོ་གཙོ་བོ་མ་ཡིན་པར་བ་སྟན་པ་སྟེ། ཉེ་བར་གདགས་པས་ཡེ་ཤེས་དེ་ལ་ཡང་འདི་སྐད་ཅེས་བྱའོ། །དེ་ནས་རྣམ་པར་ཤེས་པ་ཙམ་གྱི་ཡེ་ཤེས་མེད་པའི་རྣལ་འབྱོར་པས་ནི་རྣལ་འབྱོར་རྫོགས་པར་མི་འགྱུར་རོ་ཞེས་བྱ་བའི་དོན་ཏོ། །ཡང་བདག་ཉིད་ནི་དེ་བཞིན་གཤེགས་པ་སྟེ་ཇི་ལྟ་བུ་ཞེ་ན། རྣམ་པར་ཤེས་པ་ཙམ་དུ་བལྟ་བར་བྱའོ་ཞེས་བཤད་པའི་ཕྱིར་རོ། །ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཡེ་ཤེས་ནི་ཡང་དག་པའི་ཡེ་ཤེས་སོ། །མཆོག་ནི་ཤིན་ཏུ་དག་པ་སྟེ་དག་པའི་མཐར་ཐུག་པ་ཞེས་བྱ་བའི་དོན་ཏོ། །དེ་ལྟར་ཞེས་བྱ་བ་ནི་དེ་ལྟ་བུའི་རྣམ་པར་ཤེས་པ་ཙམ་གྱི་ཚུལ་གྱིས་སོ། །དག་པ་དེ་བཞིན་གཤེགས་ཞེས་བྱ་བ་ནི་ཡང་དག་པའི་བདག་ཉིད་དུ་བལྟ་བར་བྱའོ་ཞེས་བྱ་བའི་དོན་ཏོ། །དེས་ན་ཤིན་ཏུ་རྣམ་པར་དག་པའི་ཡེ་ཤེས་ཀྱི་བདག་ཉིད་ཡིན་པར་བདག་ཉིད་ལ་མོས་ལ། དེ་ཉིད་ནི་ཕྱག་རྒྱ་རྣམས་ཀྱི་དོན་ཡིན་པར་བ་སྟན་པར་བྱ་བའི་ཕྱིར། རྣམ་པར་ཤེས་པ་ཞེས་བྱ་བ་ལ་སོགས་པ་གསུངས་ཏེ། རྣམ་པར་ཤེས་པ་ནི་རྣམ་པར་ཤེས་པ་ཙམ་དུ་ལྷག་པར་མོས་པའོ། །ཕྱག་རྒྱ་ཉིད་ནི་ཆོ་གའི་ཐབས་རྣམས་སོ། །དེ་བས་ན་དེ་ནི་རྣམ་པ་བཞིའོ། །གསང་བ་ཇི་ལྟ་བུ་ཡིན་ཞེ་ན། གསང་བ་གཉིས་མེད་སྦྱོར་བ་ཡིས། །ཞེས་བྱ་བ་སྟེ་གཉིས་སུ་མེད་པའི་རྣམ་པར་ཤེས་པ་ཙམ་ཉིད་ཀྱིས་སོ། །གསང་བ་ཅི་འདྲ་བ་ཞིག་ཅེ་ན། སྐུ་གསུང་ཐུགས་སུ་ཡང་དག་འབྱུང༌། །ཞེས་བྱ་བ་སྟེ། སྐུར་བྱུང་བ་དང་གསུང་དུ་བྱུང་བ་དང་ཐུགས་སུ་བྱུང་བ་སྟེ། སྐུ་ལ་སོགས་པ་ལ་དམིགས་པ་ཞེས་བྱ་བའི་དོན་ཏོ། །ཇི་ལྟར་ན་སྐུ་ལ་སོགས་པར་བྱུང་བ་ཡིན་ཞེ་ན། ཐུགས་ཀྱིས་ཞེས་བྱ་བ་ལ་སོགས་པ་གསུངས་ཏེ། ལུས་དང་ངག་དང་ཡིད་ཀྱི་ནི། །ལུས་དང་ངག་དང་ཡིད་རྣམ་པར་ཤེས་པ་ཙམ་དུ་རིམ་པ་ཇི་ལྟ་བ་བཞིན་དུ་བ་སྟན་པ་ཡིན་ནོ། །དེས་ན་ཐུགས་དང་
སྐུ་དང་གསུང་གི་དང་ཐམས་ཅད་འགྲོ་བ་ཡིན་པར་ཤེས་པར་བྱ་སྟེ། འདི་དག་ཐམས་ཅད་ཀྱིས་ཏིང་ངེ་འཛིན་གྱི་ཡེ་ཤེས་བ་སྟན་པ་ཡིན་ནོ། །དེ་ཉེ་བར་བསྡུ་བར་བྱ་བའི་ཕྱིར། རྒྱ་ཡི་རྒྱས་བཏབ་དངོས་པོ་ནི། །ཞེས་བྱ་བ་གསུངས་པ་ཡིན་ཏེ་ཕྱག་རྒྱ་བཞིས་རྒྱས་བཏབ་པའོ། །གསང་བ་དག་ཅེས་བྱ་བ་ནི་འབྲས་བུ་ཉིད་ཀྱི་རྣལ་འབྱོར་གྱི་དོན་ཏོ། །རྣལ་འབྱོར་པ་དེ་ནི་རང་རིག་པ་མེད་པར་ཡེ་ཤེས་རིག་པར་མི་འགྱུར་ཏེ། དེ་བས་ན་དེ་རྣམས་ཀྱི་ཏིང་ངེ་འཛིན་ཡེ་ཤེས་བརྟགས་པ་ཡིན་ཞེས་བྱ་བ་སྟེ། ཏིང་ངེ་འཛིན་ནི་ཞི་གནས་དང་ལྷག་མཐོང་སྟེ། དེ་གཉིས་ཀྱིས་བརྟགས་པ་ནི་སྦྱོར་བའོ། །ཏིང་ངེ་འཛིན་གྱི་ཡེ་ཤེས་བརྟགས་པ་ཉེ་བར་བསྡུས་པའོ། །ལས་ཀྱི་རབ་ཏུ་དབྱེ་བའི་དབང་དུ་མཛད་ནས། ལུས་དང་ཞེས་བྱ་བ་ལ་སོགས་པ་གསུངས་ཏེ། ལུས་ལ་སོགས་པའི་སྒྲས་ནི་ལུས་ལ་སོགས་པའི་ལས་རྣམས་ཡིན་པར་བཤད་དེ། དབྱེར་མེད་པ་ཡིན་པའི་ཕྱིར་རོ། །དེ་ཉིད་ནི་བརྟགས་པ་སྟེ་བརྟགས་པ་ཙམ་གྱིས་བརྟན་ཅིང་ངེས་པ་ཡིན་པས་ན། ལུས་ངག་སེམས་སུ་རྣམ་བརྟགས་པ། །ཞེས་བྱའོ། །བྱ་བ་དེ་ནི་རྒྱུད་དེ། དེ་ཁོ་ན་ཉིད་བསྡུས་པ་ལ་སོགས་པར་བྱ་བ་རབ་ཏུ་བརྟགས་ཤིང་ལས་རྣམ་པར་གཞག་པ་ཡིན་ནོ། །དེ་ཡང་རྣམ་པ་འདིས་བྱ་བ་རྣམ་པ་གསུམ་གསང་བའི་དེ་ཁོ་ན་ཉིད་དུ་གྱུར་པར་བཤད་དོ། །གང་གི་ཡིན་ཞེ་ན། རྡོ་རྗེ་ལས་ཅན་སྣ་ཚོགས་བཞིན། །ཞེས་བྱ་བ་སྟེ་རྡོ་རྗེ་ལས་ཀྱིའོ། །གསང་བ་ཅི་ཞིག་ཡིན་ཞེ་ན། སྣ་ཚོགས་བཞིན་ཞེས་བྱ་བ་སྟེ་རྡོ་རྗེ་ལས་དང་འདྲ་པའོ། དེ་བས་ན་སྐལ་བ་མེད་པ་རྣམས་ལ་བ་སྟན་པར་བྱ་བ་མ་ཡིན་པའི་སྦྱོར་བ་གང་ཡིན་པས་ལས་བྱ་བ་དེ་བ་སྟན་པའི་ཕྱིར། སངས་རྒྱས་ལྔའི་ཞེས་བྱ་བ་ལ་སོགས་པ་གསུངས་ཏེ་ལས་རྣམས་སྒྲུབ་པའི་ཐབས་སོ། །དེར་ཕྱག་རྒྱ་བཞི་གསང་བའི་དབང་དུ་མཛད་ནས། འབྱུང་བ་ཆེན་པོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཇི་ལྟར་ལྷ་མོ་བཞི་དང་ཡང་དག་པར་སྦྱོར་བ་ཡིན་ཞེ་ན། ས་ནི་ཞེས་བྱ་བ་ལ་སོགས་པ་གསུངས་སོ། །འདིར་ས་ལ་སོགས་པ་དང༌། སྦྱོར་བའི་རྒྱུ་ནི་དབང་ཆེན་ཞེས་བྱ་བ་ལ་སོགས་པ་གསུངས་ཏེ། འོག་ནས་དཀྱིལ་འཁོར་རོ་ཞེས་
བཤད་པ་དང་ཐམས་ཅད་དུ་སྤྱར་བར་བྱའོ། །དབང་ཆེན་ལ་སོགས་པའི་ཁ་དོག་དང་དབྱིབས་དང་ལས་རྣམས་བ་སྟན་པར་བྱ་བའི་ཕྱིར་དབང་ཆེན་ཞེས་བྱ་བ་ལ་སོགས་པ་གསུངས་ཏེ། དབྱིབས་རྣམ་པ་གཉིས་ཏེ། ལ་ལ་ནི་དབང་དུ་བྱ་བ་ལྟ་བུའོ། །ལ་ལ་ནི་མངོན་སྤྱོད་ལྟ་བུའོ། །འབྱུང་བ་ཆེའི་བདག་ཉིད་ལས་གྲུབ་པ་ཞེས་བྱ་བ་ནི་སྤྱན་ལ་སོགས་པ་ལྷ་མོ་བཞིའི་སྦྱོར་བ་སྟེ། དེ་ནི་ཅི་རིགས་པར་ལས་ཀྱི་དངོས་གྲུབ་རྣམ་པ་བཞི་ཞེས་བྱ་བ་སྟེ། ལས་རྣམ་པ་བཞིའི་དངོས་གྲུབ་ཀྱི་རྒྱུ་ཡིན་ནོ། །གསང་བའི་ཡེ་ཤེས་བླ་མེད་ཡིན། །ཞེས་བྱ་བའི་དབང་དུ་མཛད་ནས། ལས་ཀྱི་དངོས་གྲུབ་ཅེས་བྱ་བ་ལ་སོགས་པ་གསུངས་ཏེ། ལས་ཀྱི་དངོས་གྲུབ་མཆོག་ཅེས་བྱ་བ་ནི་ལས་ཀྱི་དངོས་གྲུབ་དམ་པའི་རྒྱུ་ཡིན་པའོ། །དེ་གང་ཞིག་ཡིན་ཞེ་ན། ལས་ཀྱི་དངོས་གྲུབ་ཅེས་བྱ་བ་ལ་སོགས་པ་གསུངས་ཏེ། འཁོར་ལོས་སྒྱུར་བ་རྣམ་པ་བཞི་ཞེས་བྱ་བ་ནི་རྡོ་རྗེ་སེམས་དཔའ་དང་རྡོ་རྗེ་རིན་ཆེན་དང་རྡོ་རྗེ་ཆོས་དང་རྡོ་རྗེ་ལས་ཏེ། འཁོར་ལོས་སྒྱུར་བ་བཞིའི་སྦྱོར་བས་ཞེས་བྱ་བའི་དོན་ཏོ། །སྤྱན་གྱི་ཚུལ་ཞེས་བྱ་བ་ནི་སྤྱན་གྱི་རྣལ་འབྱོར་བྱའོ། །པདྨའི་རྡོ་རྗེ་ཅན་ཞེས་བྱ་བ་ནི་འོད་དཔག་མེད་པའོ། །རྣམ་པར་སྣང་མཛད་གནས་ཞེས་བྱ་བ་ནི་རྣམ་པར་སྣང་མཛད་ལྟ་བུར་རོ། །རྡོ་རྗེ་ཁྲོ་བོ་ཞེས་བྱ་བ་ནི་རྡོ་རྗེ་གནོད་སྤྱིན་དང་གཤིན་རྗེ་གཤེད་ལ་སོགས་པའི་ཁྲོ་བོ་དྲག་པོ་རྣམས་སོ། །བསྒོམ་པར་བྱའོ་ཞེས་བྱ་བ་ནི་གསུམ་ཆར་ལ་ཡང་ཚིག་གི་ལྷག་མ་ཡིན་ནོ། །ལས་ཀྱི་དུས་བ་སྟན་པར་བྱ་བའི་ཕྱིར། ཞི་བ་དགོངས་ཀ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལས་རྣམས་ལ་མེ་ཏོག་དང་རྙན་དང་གོས་ལ་སོགས་པའི་མདོག་བ་སྟན་པའི་ཕྱིར་གསུངས་པ་ནི། ཞི་བ་ལ་དཀར་པོ་ཞེས་བྱ་བ་ལ་སོགས་པའོ། །སངས་རྒྱས་ལྔའི་དེ་ཁོ་ན་ཉིད་ཀྱི་དབང་དུ་མཛད་ནས། ཏིང་ངེ་འཛིན་ཞེས་བྱ་བ་ལ་སོགས་པ་གསུངས་པ་སྟེ། ཏིང་ངེ་འཛིན་ཡེ་ཤེས་ཀྱི་མངོན་བར་བྱང་ཆུབ་པ་ལྔ་སྟེ། དེ་ལས་ཡང་དག་པར་འབྱུང་བའི་ལས་ཀྱི་སྒྲིབ་པ་གང་ཡིན་པ་དེ་ནི་དམ་པ་ཡིན་ནོ། །མངོན་པར་བྱང་ཆུབ་པ་ལྔ་ཉིད་བ་སྟན་པར་བྱ་བའི་ཕྱིར། སངས་རྒྱས་ཞེས་བྱ་བ་ལ་སོགས་པ་གསུངས་ཏེ། བསྒོམས་ན་
དག་པར་འགྱུར་རོ་ཞེས་བྱ་བར་སྤྱར་ཏེ། ཨོཾ་ཙིཏྟ་པྲ་ཏི་བེ་དྷཾ་ཀ་རོ་མི། ཞེས་བྱ་བ་བསྒོམས་ན་དག་པར་འགྱུར་རོ། །ཟླ་བའི་དཀྱིལ་འཁོར་གྱི་ཚུལ་དུ་རང་གི་སེམས་དག་པར་མཐོང་བྸི་ཕྱིར་རོ། །བཅོམ་ལྡན་འདས་ཞེས་བྱ་བ་ནི། ཨོཾ་བོ་དྷི་ཙིཏྟཾ་ཨུཏྤཱ་ད་ཡཱ་མི། ཞེས་པ་སྒོམས་ན་དང་པོའི་ཟླ་བའི་སྟེང་དུ་ཟླ་བ་གཉིས་པའི་རྣམ་པ་བྷ་ག་ཞེས་བཤད་པའི་བྱང་ཆུབ་ཀྱི་སེམས་དང་ལྡན་པས་ན། བཅོམ་ལྡན་འདས་སུ་འགྱུར་རོ་ཞེས་བྱ་བའི་དོན་ཏོ། །སངས་རྒྱས་འགྱུར་ཞེས་བྱ་བ་ལ་སངས་རྒྱས་ནི་ཤེས་རབ་སྟེ་ཇི་སྐད་དུ་བཤད་པའི་བྷ་གའོ། །དེ་དང་ལྡན་པའི་སངས་རྒྱས་སུ་གྱུར་པར་བསྒོམས་ན། མི་གཡོ་འགྱུར་ཞེས་བྱ་བ་ནི་འགྱུར་བ་མེད་པར་འགྱུར་བ་སྟེ། བྱང་ཆུབ་ཀྱི་སེམས་བརྟན་པར་གྱུར་པའི་ཕྱིར་རོ། །ཇི་ལྟར་ཞེ་ན། བྷ་གའི་དབུས་སུ་འང་གསང་བའི་བདག །ཅེས་བྱ་བ་གསུངས་ཏེ། ཨོཾ་ཏིཥྛ་བཛྲ། ཞེས་བསྒོམས་པས་བྱང་ཆུབ་ཀྱི་སེམས་ཟླ་བ་ལྟ་བུའི་དབུས་སུ་རྡོ་རྗེའི་རྣམ་པར་གྱུར་པའོ། །དེ་ནས་ཨོཾ་བཛྲ་ཨཱཏྨ་ཀོ྅ཧཾ། ཞེས་བྱ་བ་བསྒོམས་པ་དང༌། རྣལ་འབྱོར་པས་རྡོ་རྗེ་དེ་ཉིད་ལས་ནམ་མཁའི་ཁམས་ཁྱབ་པའི་རྡོ་རྗེ་ཕྲ་མོ་སྤྲོ་བ་དང་བསྡུ་བ་ལས་རྡོ་རྗེ་དབྱིངས་སུ་འགྱུར་རོ། །དེ་ནས་ཡང་སརྦ་ཏ་ཐཱ་ག་ཏ་ཏ་ཐཱ་ཨ་ཧཾ། ཞེས་བྱ་བ་བསྒོམས་ན་རྣམ་པ་ཐམས་ཅད་ཀྱི་མཆོག་དང་ལྡན་པའི་དེ་བཞིན་གཤེགས་པའི་སྐུ་ཕྱག་རྒྱ་ཆེན་པོ་ཐོབ་པས་དེ་བཞིན་གཤེགས་པར་འགྱུར་རོ། །དེ་ལྟར་ལྔའི་བདག་ཉིད་དུ་གྱུར་ཅིང་རྣམ་པ་ལྔས་ཡང་དག་པར་བྱུང་བའི་བདག་ཉིད་དུ་བསྒོམས་ན་གཡོ་བ་མེད་པ་སྟེ་སེམས་བརྟན་པར་གྱུར་པའོ། །དེ་ནས་རྡོ་རྗེ་དབྱིངས་ཀྱི་དབང་ཕྱུག་མའི་ཕྱག་རྒྱ་སྙིང་གར་བཅིངས་ལ་སེམས་དཔར་བྱིན་གྱིས་བརླབ་པའི་ཕྱིར་སྙིང་ལ་གནས་པ་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུམ་རྡོ་རྗེའི་ཚིག་གིས་བརྗོད་པར་བྱའོ། །ཆོས་རྣམས་ཀྱི་ངོ་བོ་ཉིད་ནི་གསུམ་སྟེ། ཀུན་བརྟགས་པ་དང༌། གཞན་གྱི་དབང་དང་ཡོངས་སུ་གྲུབ་པའོ། །དེ་ལ་ཡོངས་སུ་གྲུབ་པ་ནི་འགོག་པ་དང༌། ལམ་གྱི་བདེན་པའི་ངོ་བོ་ཉིད་དུ་ཆགས་པ་སྟེ། །དེ་རྟག་ཏུ་བསྒོམས་པར་གྱུར་པ་དང༌། གཞན་གྱི་དབང་ནི་ཀུན་ནས་ཉོན་མོངས་པའི་ངོ་བོ་ཉིད་ཀྱིས་ན་ལྡང་བ་སྟེ། དེ་ལ་རྒྱབ་ཀྱིས་ཕྱོགས་པ་དང༌། ཀུན་བརྟགས་
པ་ནི་འཁྲུལ་པའི་སྒྲོ་བཏགས་པའི་གཟུང་བ་དང་འཛིན་པའི་ཉོན་མོངས་པ་སྟེ། དེ་དམིགས་སུ་མེད་པའི་ཕྱིར་རོ། །དེ་ལྟ་བུར་གྱུར་པ་བསྒོམས་ན་ཞེས་པ་བསྒོམས་པའི་སྟོབས་ཀྱིས་ཁམས་གསུམ་པོའི་བདག་པོ་སྟེ། སངས་རྒྱས་བཅོམ་ལྡན་འདས་སུ་འགྱུར་བའོ། །ཚིགས་སུ་བཅད་པ་གསུམ་གསུངས་པ་གང་ཡིན་པ་འདི་ནི་སངས་རྒྱས་ཀྱི་བདེན་པ་སྟེ། འདིས་དུག་བཅོམ་མོ་ཞེས་བྱ་བ་སྟེ། དེ་ལྟར་བྱས་ན་དུག་ཞི་བར་འགྱུར་རོ། །དེ་ལྟར་ན་དེས་བསྐུལ་བའི་དབྱེ་བས་ལས་ཐམས་ཅད་བྱ་བ་ཡིན་ནོ། །རང་སེམས་ཞེས་བྱ་བ་ལ་སོགས་པ་ཚིགས་སུ་བཅད་པ་བཞི་ནི་ཞི་བ་ལ་སོགས་པའི་སྦྱོར་བ་གཞན་དག་གསུངས་པ་ཡིན་ཏེ། གཏི་མུག་སེམས་ནི་དེ་བཞིན་གཤེགས། །ཞེས་བྱ་བ་ནི་ཞི་བ་ལ་མངོན་པར་བང་ཆུབ་པ་རྣམ་པ་ལྔ་དང་ལྡན་པའི་རྣམ་པར་སྣང་མཛད་ཀྱི་རྣལ་འབྱོར་པས་རང་གི་སེམས་ཟླ་བའི་དཀྱིལ་འཁོར་ལྟ་བུ་དབྱངས་ཀྱི་ཡི་གེ་བཅུ་དྲུག་དང་ལྡན་པ་ནི་ཉོན་མོངས་པ་དང་ཤེས་བྱའི་སྒྲིབ་པའི་ས་བོན་ཡོངས་སུ་ཟད་པས། འོད་གསལ་བར་མཐོང་བ་ནི་རང་གི་སེམས་སོ་སོར་རྟོག་པ་ཡིན་ཏེ། དེས་ཉོན་མོངས་པ་ཉིད་ཅེས་བྱ་བ་ལུས་དང་གནས་དང་ལོངས་སྤྱོད་ཉེ་བར་མི་དམིགས་པའོ། །འཇིག་རྟེན་གྱུར་ཞེས་བྱ་བ་ནི་འཇིག་རྟེན་པ་རྣམས་ཀྱི་ཡང་ལུས་ལ་སོགས་པ་མི་དམིགས་པས་དེའི་སེམས་དང་རང་གི་སེམས་གཅིག་ཏུ་བྱས་ལ་འཇིག་རྟེན་དང་ལྷན་ཅིག་ཏུ་གྱུར་པའོ། །སེམས་ཅན་ཀུན་ལ་བལྟ་བར་བྱ། །ཞེས་བྱ་བ་ནི་བསྒྲུབ་པར་བྱ་བ་ཐམས་ཅད་ཀྱི་སེམས་རང་བཞིན་གྱིས་འོད་གསལ་བའོ། །ཞེ་སྡང་སེམས་ནི་དེ་བཞིན་གཤེགས། །ཞེས་བྱ་བ་ནི་མངོན་སྤྱོད་ལ་མངོན་པར་བྱང་ཆུབ་པ་རྣམ་པ་ལྔ་དང་ལྡན་པའི་མི་བསྐྱོད་པའི་རྣལ་འབྱོར་པས་སོ། །ཕྲ་མོའི་ཡེ་ཤེས་ཞེས་བྱ་བ་ནི་རང་གི་སྙིང་གའི་ཟླ་བ་ལ་ཡི་གེ་ཧཱུཾ་སྔོན་པོ་ཕྲ་མོའོ། །སྡང་གྱུར་ཞེས་བྱ་བ་ནི་ཁྲོས་པའི་སེམས་སུ་གྱུར་པའོ། །རྡོ་རྗེ་ཉིད་དུ་གྱུར་ཞེས་བྱ་བ་ནི་ཡི་གེ་ཧཱུཾ་ཡོངས་སུ་གྱུར་པ་ལས་རྡོ་རྗེ་ཕྲ་མོ་ལྟ་བུའི་ཡེ་ཤེས་འཐོབ་པའོ། །སེམས་ཅན་ཐམས་ཅད་གཞིག་པར་བྱ་བ་ནི་སླར་གསོ་བར་ནུས་པ་དག་གིས་རྡོ་རྗེ་ཕྲ་མོ་འབར་བ་སྤྲོས་པས་ཐམས་ཅད་ཐམས་ཅད་ཁྱབ་པར་བྱས་ནས་བསྒྲུབ་པར་
བྱ་བ་བརྒྱལ་བར་བྱའོ། །འདོད་ཆགས་སེམས་ནི་དེ་བཞིན་གཤེགས། །ཞེས་བྱ་བ་ནི་དབང་དུ་བྱ་བ་ལ་མངོན་པར་བྱང་ཆུབ་པ་རྣམ་པ་ལྔ་དང་ལྡན་པའི་འོད་དཔག་ཏུ་མེད་པའི་རྣལ་འབྱོར་པས་སོ། །བྱང་ཆུབ་སེམས་ནི་ཡང་དག་བསྐྱེད། །ཅེས་བྱ་བ་དབྱངས་ཀྱི་ཡི་གེ་བཅུ་དྲུག་དང་ལྡན་པའི་སྙིང་གའི་ཟླ་བ་ལ་ཐུན་མཚམས་བཞིའམ་གསུམ་དུ་འགྲོ་བའི་སྙིང་པོ་བྱང་ཆུབ་ཀྱི་སེམས་ཀྱི་ཟླ་བ་རྣམ་པར་བསྒོམ་པར་བྱའོ། །ཆགས་གྱུར་ཞེས་བྱ་བ་ནི་བསྒྲུབ་པར་བྱ་བ་རྣམས་ལ་ཞེན་པའི་སེམས་སུ་གྱུར་པའོ། །བཟང་པོ་ཉིད་དུ་གྱུར་པ་ཞེས་བྱ་བ་ནི་ཀུན་དུ་བཟང་པོ་ཉིད་དོ། །དབང་དུ་བྱ་བ་ལ་ནུས་པ་ཐོབ་པའོ། །སངས་རྒྱས་ཐམས་ཅད་ཆགས་པར་བྱ། །ཞེས་བྱ་བ་ནི་བསྒྲུབ་པར་བྱ་བ་ཐམས་ཅད་དབང་དུ་བྱའོ་ཞེས་བྱ་བའི་དོན་ཏོ། །བྱམས་པའི་སེམས་ནི་དེ་བཞིན་གཤེགས། །ཞེས་བྱ་བ་ནི་རྒྱས་པ་ལ་མངོན་པར་བྱང་ཆུབ་པ་རྣམ་པ་ལྔ་དང་ལྡན་པའི་རིན་ཆེན་འབྱུང་ལྡན་གྱི་རྣལ་འབྱོར་པས་སོ། །ང་རྒྱལ་ཡང་དག་བསྐྱེད་ནས་ནི། །ཞེས་བྱ་བ་ནི་སྙིང་གའི་ཟླ་བ་ལ་ཡིད་བཞིན་གྱི་ནོར་བུ་རྣམ་པར་བསམས་ལ་བདག་ནི་ཡིད་བཞིན་ནོར་བུ་ཡིན་ནོ་ཞེས་ང་རྒྱལ་བསྐྱེད་པའོ། །མཛའ་བོར་གྱུར་ཞེས་བྱ་བ་ནི་བསྒྲུབ་པར་བྱ་བ་རྣམས་ཀྱི་ལུས་རྒྱས་པའམ་ནོར་རྒྱས་པའམ་ཚེ་རྒྱས་པ་སྟེར་བར་འདོད་པར་གྱུར་པའོ། །ཀུན་ཉིད་གྱུར་ཞེས་བྱ་བ་ནི་ནོར་བུའི་རིགས་ཀྱི་ལྷ་རྣམས་སྤྲོས་པའི་གཟུགས་ཉིད་ཐོབ་པའོ། །སངས་རྒྱས་ཀུན་ལ་འཁྱུད་པར་བྱ། །ཞེས་བྱ་བ་ནི་ནོར་བུའི་རིགས་ཀྱི་ལྷ་དེ་རྣམས་ཉིད་དང་བསྒྲུབ་པར་བྱ་བ་དེ་རྣམས་གཅིག་ཏུ་བྱ་བའོ། །རྒྱུ་དང་འབྲས་བུའི་སྦྱོར་བ་དག་གིས་ནི་དང་པོ་སྟེ་ཏིང་ངེ་འཛིན་གྱི་ཡེ་ཤེས་ཡིན་པར་བཤད་པའོ། །གཉིས་སུ་མེད་པའི་སྦྱོར་བས་ནི་གཉིས་པ་སྟེ་དེ་ནི་གསང་བའོ། །ངོ་བོ་ཉིད་ཀྱི་སྦྱོར་བས་ནི་གསུམ་པ་སྟེ་དེ་ནི་མཆོག་ཡིན་ནོ། །ད་ནི་རབ་ཏུ་དབྱེ་བ་གཉིས་ཀྱིས་མཆོག་ཏུ་བཤད་པའི་ཏིང་ངེ་འཛིན་གྱི་ཡེ་ཤེས་བ་སྟན་པར་བྱ་བའི་ཕྱིར་ཆགས་པའི་ལྟ་བས་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་བདེ་བ་ཉེ་བར་བསྡུས་པ་ལས་བྱུང་བའི་དགའ་བ་ཉིད་ནི་ཆགས་པ་སྟེ། དེས་སེམས་ཅན་ཐམས་ཅད་ལ་བལྟ་བ་ནི་བྱམས་པའི་སྤྱིན་པའོ། །
སྙིང་རྗེས་དེ་རྣམས་ལ་ཆོས་བཤད་པ་ནི་ཆོས་ཀྱི་སྤྱིན་པའོ། །དེ་རྣམས་འཇིགས་པ་ཐམས་ཅད་ལས་ཐར་བར་བྱ་བ་ནི་མི་འཇིགས་པའི་སྤྱིན་པའོ། །སངས་རྒྱས་ཐམས་ཅད་ལ་ཡིད་ཀྱི་རང་བཞིན་གྱི་མཆོད་པ་རྣམས་ཀྱིས་རྗེས་སུ་མཉེས་པར་བྱ་བ་ནི་ཟང་ཟིང་གི་སྤྱིན་པའོ། །དེ་བཞིན་དུ་ཚུལ་ཁྲིམས་ལ་སོགས་པའི་རབ་ཏུ་དབྱེ་བ་ཡང་ལུང་ཇི་ལྟ་བ་བཞིན་དུ་ཤེས་པར་བྱའོ། །སྤྱིན་ལས་ཞེས་བྱ་བ་ནི་ཇི་སྐད་དུ་བཤད་པའི་སྤྱིན་པ་རྣམ་པ་བཞི་ཡོངས་སུ་རྫོགས་པར་བསྒོམས་པས་རབ་ཏུ་དགའ་སྟེ་ཞེས་བྱ་བ་རབ་ཏུ་དགའ་བའི་ས་ཐོབ་པར་ཡིད་ལ་ལྷག་པར་མོས་པའོ། །ཚུལ་ཁྲིམས་རྣམ་པ་གསུམ་ཡོངས་སུ་རྫོགས་པར་བསྒོམས་པས་ནི་ཚུལ་ཁྲིམས་དང་ལྡན་པས་དྲི་མ་མེད་པར་གྱུར་པ་སྟེ། དྲི་མ་མེད་པའི་ས་ཐོབ་པའི་བདག་ཉིད་གང་ཡིན་པའོ། །དེ་བཞིན་དུ་འོག་མ་རྣམས་དང་ཡང་ཤེས་པར་བྱའོ། །འོད་བྱེད་པ་ནི་འོད་བྱེད་པའི་ས་ཐོབ་པའོ། །བརྩོན་འགྲུས་ནི་བསོད་ནམས་དང་ལྡན་ཞིང་དམ་ཚིག་ལ་སེམས་དཔའི་དགེ་བའི་རྩ་བའོ། །འོད་འཕྲོ་ཅན་ཞེས་བྱ་བ་ནི་འོད་འཕྲོ་བ་ཐོབ་པའོ། །མངོན་གྱུར་མཐོང་ཞེས་བྱ་བ་ནི་ས་མངོན་དུ་གྱུར་པ་ཐོབ་པ་སྟེ་རང་གི་སེམས་ཀྱིས་མཐོང་བའོ། །ལྷག་མ་རྣམས་ནི་གོ་སླའོ། །རྒྱལ་བ་ཞེས་བྱ་བ་ནི་བག་ཆགས་དང་བཅས་པའི་སྒྲིབ་པ་ཐམས་ཅད་ལས་ངེས་པར་རྒྱལ་བའི་ཕྱིར་རོ། །དེ་བཞིན་གཤེགས་པ་ཞེས་བྱ་བ་ནི་ཆོས་ཐམས་ཅད་ཤིན་ཏུ་རྣམ་པར་དག་པའི་དེ་བཞིན་ཉིད་ཐུགས་སུ་ཆུད་པའི་ཕྱིར་རོ། །དེ་ལྟ་བུར་གྱུར་པ་ནི་བཅུ་གཅིག་པ་ཀུན་དུ་འོད་ཅེས་བྱ་བ་ནི་ས་བཅུ་གཅིག་པ་ཐོབ་པ་ཡིན་ནོ་ཞེས་བྱ་བའི་དོན་ཏོ། །རང་རིག་བདག་ཉིད་ཅེས་བྱ་བ་ནི་མཉམ་པར་གཞག་པའི་སེམས་ཀྱིས་དེ་ལྟར་ལྷག་པར་མོས་པ་སྟེ་དེ་ཁོ་ན་ཉིད་དུ་ནི་མ་ཡིན་ནོ། །རང་རིག་པའི་བདག་ཉིད་དུ་གྱུར་པ་ནི་ས་སྔ་མ་རྣམས་དང་ཡང་སྤྱར་བར་བྱའོ། །ཕ་རོལ་ཕྱིན་པ་བཅུ་རྣམས་དང༌། །ཞེས་བྱ་བ་ནི་སྤྱིན་པ་ལ་སོགས་པ་རྣམས་སོ། །སྟོབས་རྣམས་བཅུ་ཉིད་དོ། །དབང་རྣམས་ཀྱང་བཅུ་ཉིད་དོ། །འདས་གྱུར་ན་ཞེས་བྱ་བ་ནི་བཅུ་གཅིག་པར་རོ། །མཚན་མ་བརྟན་
པར་བྱ་བ་ནི་བྱང་ཆུབ་སེམས་དཔའི་མཚན་མར་གྱུར་པས་མཚན་མ་ནི་བྱང་ཆུབ་ཀྱི་སེམས་ཏེ། དེ་ཉེ་བར་བརྟན་པར་གྱུར་པས་འདིས་སྟོན་པས་ན་མཚན་མ་བརྟན་པའོ། །དེ་ནས་ནི་ཞེས་བྱ་བ་ནི་མཚན་མ་བརྟན་པར་གྱུར་པ་དེ་ལས་གོང་དུ་རྡོ་རྗེ་ཆུར་གྱུར་པའོ། །དེ་ཡང་ཅི་ཞིག་ཡིན་ཞེ་ན། རྫོགས་སངས་རྒྱས་ཞེས་བྱ་བ་གསུངས་ཏེ་ཡང་དག་པའི་ཡེ་ཤེས་སོ། །སུ་ཞིག་གི་ཡིན་ཞེ་ན། སངས་རྒྱས་ཀུན་གྱིའོ། །ཇི་ཙམ་ཞིག་ཅེ་ན། མཐའ་ཡས་པ་སྟེ། ནམ་མཁའ་དང་འདྲ་བའོ། །གཟུང་དང་འཛིན་པ་སྤངས་པ་ཡིན། །ཞེས་བྱ་བ་ནི་གཉིས་སུ་སྣང་བ་ནུབ་པའི་ཕྱིར་རོ། །དེ་ནི་ཆོས་ཀྱང་ཡིན་ཏེ་ཡང་དག་པའི་ཡེ་ཤེས་ཡིན་པའི་ཕྱིར་རོ། །བདུད་རྩི་ཡང་ཡིན་ཏེ་བརྟན་པ་ཉིད་ཀྱི་ཕྱིར་རོ། །བདེ་བའི་སྦྱོར་བ་ཕུལ་དུ་བྱུང་བ་ཡིན་པས་སོ། །བཅུད་ཀྱིས་ལེན་ཡང་ཡིན་ཏེ་ཉོན་མོངས་པའི་ནད་མ་ལུས་པའི་གཉེན་པོར་གྱུར་པ་ཡིན་པའི་ཕྱིར་ཏེ། དེ་ལྟར་ན་ཆོས་ཀྱི་བདུད་རྩི་བཅུད་ཀྱིས་ལེན་ཞེས་བྱ་བའོ། །དག་པ་ནི་ཉེས་པ་ཐམས་ཅད་ཟད་པ་ཡིན་པའི་ཕྱིར་རོ། །འཐུངས་པས་ཞེས་བྱ་བ་ལ་ཇི་ལྟར་འཐུང་ཞེ་ན། ཆོས་ཐམས་ཅད་ལ་དེ་བཞིན་གཤེགས་པ་ཐམས་ཅད་དུ་ལྷག་པར་མོས་ལ། དེ་རྣམས་ཀྱི་སྙིང་པོ་ས་བོན་གྱི་སྔགས་ལས་འོད་ཟེར་རྣམས་ཕྱུང་སྟེ། འགྲོ་བ་མ་ལུས་པ་ཁྱབ་པར་བྱས་ནས་འོ་མའི་རྒྱ་མཚོ་མཐའ་ཡས་པ་བཀང་ལ་དེ་ཉིད་འཐུངས་ནས་དེ་བཞིན་གཤེགས་པ་ཐམས་ཅད་དང་བདག་ཉིད་ཀྱང་དེ་བཞིན་དུ་ཞུ་བར་བྱའོ། །རྡོ་རྗེའི་སློབ་མ་ཞེས་བྱ་བ་ནི་རྡོ་རྗེའི་རང་བཞིན་གྱི་སློབ་མའོ། །གདོད་ནས་ཞེས་བྱ་བ་ནི་ཆོས་ཀྱི་དབྱིངས་སོ། །དེ་ནི་སྒྲིབ་པ་ཐམས་ཅད་ཟད་པ་ཡིན་པས་ན་དག་པ་ཡིན་པའི་ཕྱིར་གདོད་ནས་དག་པ་སྟེ། དེ་ལྟར་དེ་གདོད་ནས་དག་པར་འགྱུར་ཞིང་བྱང་ཆུབ་པར་འགྱུར་རོ། །རང་གི་སོ་སོར་རྟོགས་པས་འོ་མའི་རྒྱ་མཚོ་དེ་ཉིད་མངོན་པར་བསྡུས་ལ། དང་པོ་ཟླ་བའི་དཀྱིལ་འཁོར་དུ་མཐོང་བས་ནི། དེ་ནས་དེའི་འོག་ཏུ་བྱང་ཆུབ་ཀྱི་སེམས་སུ་འགྱུར་རོ། །ཟླ་བའི་དཀྱིལ་འཁོར་གཉིས་པ་མཐོང་བས་ན་བྱང་ཆུབ་ཀྱི་སེམས་ཀྱི་བདག་ཉིད་ཅན་དུ་གྱུར་ཞེས་བྱའོ། །ཟླ་བའི་དཀྱིལ་འཁོར་གཉིས་པའི་སྟེང་དུ་རྡོ་རྗེའི་
གཟུགས་མཐོང་བས་ནི་བྱང་ཆུབ་ཀྱི་སེམས་བརྟན་པར་བྱེད་པ་ཡིན་པས། དེ་བཞིན་དུ་བྱང་ཆུབ་སེམས་དཔའ་ཞེས་བྱའོ། །དེ་ནས་རྡོ་རྗེ་དེ་ཉིད་རྡོ་རྗེ་དབྱིངས་སུ་སྤྲོ་ཞིང་བསྡུས་པས་དེ་བཞིན་གཤེགས་པ་ཞེས་བྱའོ། །ཟླ་བ་གཉིས་དང་རྡོ་རྗེ་ཡོངས་སུ་གྱུར་པ་ལས་སངས་རྒྱས་ཀྱི་གཟུགས་ཐོབ་པས་རྣམ་པར་གྲོལ་བའི་རས་ཀྱིས་གཡོགས་ཞེས་བྱ་བའོ། །སྙིང་གར་ཟླ་བ་བསྒོམས་པས། བྱང་ཆུབ་སེམས་ནི་བླ་ན་མེད། །ཡང་དག་བསྐྱེད་འགྱུར་ཞེས་བྱའོ། །ཟླ་བ་དེར་རྡོ་རྗེ་བསྒོམས་པས་སྙིང་ལ་ཞེས་བྱ་བ་ལ་དེ་བཞིན་གཤེགས་པར་གྱུར་པའི་བདག་ཉིད་ཀྱི་སྙིང་ལའོ། །འདི་ནི་མཆོག་ཏུ་གསང་བའི་ཡེ་ཤེས་གཅིག་ཡིན་ནོ། །གཉིས་པ་བ་སྟན་པར་བྱ་བའི་ཕྱིར། སེམས་ཅན་ཁམས་ནི་ཞེས་བྱ་བ་ལ་སོགས་པ་གསུངས་པ་ཡིན་ཏེ། སེམས་ཅན་ཁམས་ནི་མཐའ་ཞེས་བྱ་བ་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིའོ། །མར་གྱུར་ཞེས་བྱ་བ་ནི་སྐྱེད་པར་བྱེད་པ་སྟེ་ཕྱོགས་བཅུ་ནས་འོངས་པའི་ཡི་གེ་བཅུ་དྲུག་གོ །དམ་ཚིག་འཛིན་བྱེད་མ་ཞེས་བྱ་བ་ནི་དེ་རྣམས་ཟླ་བའི་དཀྱིལ་འཁོར་གྱི་རྣམ་པར་ཡང་དག་པར་འདུས་པ་ནི་དམ་ཚིག་སྟེ། དེ་འཛིན་པར་བྱེད་པས་ན་དམ་ཚིག་འཛིན་བྱེད་མ་སྟེ་དེ་སྤྱད་པར་བྱའོ། །ཇི་ལྟར་སྤྱད་པར་བྱ་ཞེ་ན། རྡོ་རྗེ་དམ་ཚིག་གིས་ཞེས་བྱ་བ་གསུངས་ཏེ། རྡོ་རྗེ་འདི་ནི་དེ་བཞིན་གཤེགས་པ་རྣམས་དང་ཀ་ལ་སོགས་པའི་ཡི་གེ་སུམ་ཅུ་རྩ་བཞི་ཕྱོགས་བཅུ་ནས་འོངས་པ་རྣམས་སོ། །དེ་ཉིད་ནི་དམ་ཚིག་སྟེ་ཟླ་བའི་དཀྱིལ་འཁོར་གཉིས་པའི་རྣམ་པར་ཡང་དག་པར་འདུས་པ་སྟེ། དེ་སྤྱད་པར་བྱའོ། །དེ་ནི་བུད་མེད་དང་སྐྱེས་པའི་ཚུལ་ཡིན་པས་ན་སྤྱད་པ་ཞེས་བྱའོ། །རྟག་ཏུ་དམ་ཚིག་གནས་པར་འགྱུར། །ཞེས་བྱ་བ་ནི་ཟླ་བའི་དཀྱིལ་འཁོར་གཉིས་པའི་སྟེང་དུ་རྡོ་རྗེ་བསྒོམས་པས་བྱང་ཆུབ་ཀྱི་སེམས་དེ་ཉིད་བརྟན་པར་འགྱུར་བའི་ཕྱིར་རོ། །ཁམས་གསུམ་ལམ་ནི་ཉམས་དགའ་བར། །ཞེས་བྱ་བ་ནི་ཕྱོགས་ཐམས་ཅད་དུ་བུད་མེད་ནི་ཕྱག་རྒྱ་སྟེ། སངས་རྒྱས་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་སྐབས་སུ་བཤད་པ་རྣམས་སྤྲོས་པ་དེ་ཐམས་ཅད་ཐུགས་རྡོ་རྗེའི་
བྱེད་པ་པོས་སྤྱད་པར་བྱ་སྟེ། རྡོ་རྗེ་ནི་སྐྱེས་པ་ཡིན་པའི་ཕྱིར་རོ། །ཆོ་ག་བཞིན་ཞེས་བྱ་བ་ནི་བསྡུས་པའི་སྦྱོར་བས་སོ། །མི་སྨོད་དོ་ཞེས་བྱ་བ་ནི་མི་སྤང་བའོ། །ཟླ་བ་གཉིས་དང་རྡོ་རྗེ་ནི་རྡོ་རྗེ་གསུམ་སྟེ་དེ་ཡོངས་སུ་གྱུར་པའི་དེ་བཞིན་གཤེགས་པ་ནི་རྡོ་རྗེ་གསུམ་གྱི་སྐུ་ཞེས་བྱ་སྟེ་རྣམ་པ་ལྔ་པའོ། །རྡོ་རྗེ་གསུམ་གྱི་སྐུ་དེ་ལ་གནས་པའི་དམ་ཚིག་གི་ཕྱག་རྒྱ་སྟེ་ཐུགས་ཀྱི་ཕྱག་རྒྱ་སྙིང་གའི་ཟླ་བ་དང་རྡོ་རྗེའི་གཟུགས་སུ་གྱུར་པ་དེ་ཚིམ་པར་བྱ་ཞིང་རྒྱས་པར་བྱའོ། །གསུང་གི་རྡོ་རྗེ་ནི་སྙིང་པོ་དང་སྔགས་རྣམས་སོ། །ཇི་ལྟར་ཚིམ་པར་བྱ་ཞེ་ན། རྡོ་རྗེ་གསུམ་གྱི་དམ་ཚིག་གིས་ཏེ། རྡོ་རྗེ་གསུམ་རྫོགས་པར་བྱང་ཆུབ་པའི་རབ་ཏུ་དགའ་བའི་ཚུལ་གྱིས་སོ། །སྨད་མི་བྱ་ཞེས་བྱ་བ་ནི་སྤང་བར་མི་བྱའོ། །རྡོ་རྗེ་སེམས་དཔའ་ནི་སྙིང་པོ་དང་སྔགས་དེ་ཉིད་དེ། དེ་ལས་ཡང་དག་པར་བྱུང་བའི་ཕྱག་རྒྱ་ཆེན་པོ་ཀུན་ནོ། །བུད་མེད་བཟང་ཞེས་བྱ་བ་ནི་རབ་ཏུ་དགའ་བ་སྟེ་
ལོངས་སྤྱོད་རྫོགས་པའི་སྐུས་ཡང་དག་པར་བསྡུས་པའི་ཕྱིར་རོ། །དེ་རྣམས་བ་སྟན་པ ་ནི་བསྒོམ་པ་སྟེ་དེས་ཕྱག་རྒྱ་ཐམས་ཅད་ཅེས་བྱ་བ་ལྷ་མོ་དེ་དག་ཉིད་དབང་དུ་འགྱུར་རོ། །བུད་མེད་ཅེས་བྱ་བ་ཇི་སྙེད་པ་ཞེས་བྱ་བ་ནི་ཡེ་ཤེས་ཀྱི་དཀྱིལ་འཁོར་གྱིས་བསྡུས་པའི་ཕྱག་རྒྱ་ཆེན་པོ་དང་དམ་ཚིག་གི་དཀྱིལ་འཁོར་རྣམས་སུའོ། །སྦྱོར་བ་ཡིས་ཞེས་བྱ་བ་ནི་དངོས་པོ་གཅིག་ཏུ་གྱུར་པ་སྟེ་དེ་ལྟ་བུས་དུས་དེ་དག་ཀུན་ལ་ཉེ་བར་སྤྱད་པར་བྱའོ། །ཡང་ན་བྱུང་བ་ནི་སྤྲོས་པའོ། །བུད་མེད་བཟང་ནི་ཕུལ་དུ་བྱུང་བའི་དགའ་བའི་ཡུལ་དུ་གྱུར་པའི་ཕྱིར་རོ། །བ་སྟེན་པ་ནི་གོམས་པར་བྱེད་པ་སྟེ། ཡང་དང་ཡང་དུ་སྤྲོས་པ་སྟེ་དེས་དབང་དུ་འགྱུར་རོ། །སྤྲོ་བ་ལ་དབང་དུ་གྱུར་པ་ཉིད་ཐོབ་པས་སྤྲོ་བར་བྱའོ། ཕྱག་རྒྱ་ཆེན་པོའི་སྦྱོར་བ་ཡིས། །ཞེས་བྱ་བ་ནི་རང་གི་སྙིང་གའི་སྔགས་སུ་བསྡུ་བ་སྟེ་དེས་ཉེ་བར་ལོངས་སྤྱད་པར་བྱའོ། །སྦྱོར་བ་གཉིས་པོ་འདི་དག་ནི་མཆོག་ཏུ་གསང་བ་ཡིན་ཏེ། དང་པོ་ནི་གསང་བའི་དབང་བསྐུར་བའི་ཁྱད་པར་ཡིན་ནོ། །གཉིས་པ་ནི་ཤེས་རབ་ཡེ་ཤེས་ཀྱི་ཁྱད་པར་ཡིན་ནོ། །འདི་གཉིས་ཕུལ་དུ་བྱུང་བར་བ་སྟན་པ་ནི་གསང་བ་ཞེས་བྱ་བ་ལ་སོགས་པ་གསུངས་པ་ཡིན་ཏེ།
གཉིས་ཀ་ཡང་མཆོག་ཏུ་གསང་བའི་རྣལ་འབྱོར་ཡིན་ནོ། །ཏིང་འཛིན་ཡེ་ཤེས་དམ་པ་ཡིན། །ཞེས་བྱ་བ་ནི་འདིར་ཏིང་ངེ་འཛིན་གཙོ་བོ་ཡིན་གྱི་ང་རྒྱལ་ལ་སོགས་པ་ནི་མ་ཡིན་ནོ། །དེ་ལ་ང་རྒྱལ་ནི་བདག་ཉིད་རང་གི་ལྷར་ངེས་པ་སྟེ་དེ་ཡང་འདིར་མི་དགོས་ཏེ། རྣམ་པར་མི་རྟོག་པ་ཉིད་ཡིན་པའི་ཕྱིར་རོ། །ཧཱུཾ་ནི་བགེགས་བསྐྲད་པའི་ཕྱིར་ཏེ་དེ་ཡང་འདིར་མི་དགོས་ཏེ་བགེགས་མེད་པའི་ཕྱིར་རོ། །རིག་པ་ནི་ཕྲེང་བའི་སྔགས་སོ། །སྔགས་རིག་པ་ནི་སྔགས་ལྷག་མ་རྣམས་ཏེ། རིག་པ་དང་སྔགས་ཀྱང་འདིར་བཟླ་མི་དགོས་ཏེ། རྣལ་འབྱོར་གྱིས་སྔོན་དུ་བསྙེན་པ་རྫོགས་པའི་ཕྱིར་རོ། །འདིར་དམ་ཚིག་བ་སྟན་པ་ནི་ལག་པའི་ཞེས་བྱ་བ་ལ་སོགས་པ་གསུངས་ཏེ། སྲོག་ཆགས་ནི་རང་གི་སེམས་ཉིད་ཀྱི་སོ་སོར་སྣང་བའི་ཁྱད་པར་ཏེ། དེ་རྣམས་བསད་པ་ནི་ནུབ་ཅིང་མི་སྣང་བར་བྱ་བའོ། །བརྫུན་དུ་སྨྲ་བ་ནི་དེའི་དོན་དམིགས་སུ་མེད་པའོ། །མ་བྱིན་པར་བླང་བ་ནི་རང་གི་སེམས་སྣང་བ་དེ་ཉིད་ཤེས་པའོ། །བུད་མེད་ནི་ཕྱག་རྒྱ་རྣམས་སོ། །བསྙེ་པ་ནི་གཉིས་སུ་མེད་པའི་རྣལ་འབྱོར་གྱི་དོན་གྱི་ཕྱིར་རོ། །གཞན་མིན་སེམས་ཀྱིས་ཞེས་བྱ་བ་ནི་ཏིང་ངེ་འཛིན་གྱི་ཡེ་ཤེས་ལས་མི་གཡོ་བས་སོ། །རབ་ཏུ་གྲུབ་ཅེས་བྱ་བ་ནི་གཞན་དུ་མ་གྱུར་པའི་སེམས་ཀྱིས་ཞེས་བྱ་བ་དང་སྤྱར་རོ། །སངས་རྒྱས་ཆོས་ཉིད་ཅེས་བྱ་བ་ནི་སངས་རྒྱས་ཀྱི་ཏིང་ངེ་འཛིན་གྱི་ཡེ་ཤེས་སོ། །དང་པོའི་མཆོག་ཏུ་གསང་བའི་སྦྱོར་བ་ལས་དང་པོར་ཕ་རོལ་ཏུ་ཕྱིན་པ་རྣམས་ཀྱི་མཚན་མ་བརྟན་པར་གྱུར་པ་བ་སྟན་ནས། ཆོས་གཞན་དག་ཀྱང་བ་སྟན་པར་བྱ་བའི་ཕྱིར་མ་འདྲེས་པ་ཞེས་བྱ་བ་ལ་སོགས་པ་གསུངས་ཏེ། དེ་རྣམས་རྟག་ཏུ་བསྒོམ་པ་ནི། །ཞེས་བྱ་བ་ནི་ཉི་མ་རེ་རེ་ཞིང་དེ་རྣམས་མཚན་ཉིད་ཇི་ལྟ་བ་བཞིན་དུ་ཐོབ་པ་བསྒོམ་པའོ། །མཚན་མ་བརྟན་པར་གྱུར་པ་ཡིན་པས་ན་མཚན་མ་བ་སྟན་པ་ཡིན་ཏེ། དེའི་འོག་ཏུ་ནི་སྔ་མ་བཞིན་ནོ། །བསམ་གཏན་བཞི་དང་གཟུགས་མེད་བཞི། །འགོག་པའི་སྙོམས་འཇུག་ཅེས་བྱ་བ་ནི་མཐར་གྱིས་གནས་པའི་སྙོམས་པར་འཇུག་པ་དགུ་སྟེ། འདི་དག་འཐོབ་པར་བསྒོམས་པས་མཚན་མ་བརྟན་པ་སྟེ། ལྷག་
མ་རྣམས་ནི་སྔ་མ་བཞིན་ནོ། །བྱང་ཆུབ་ཕྱོགས་ནི་སུམ་ཅུ་བདུན། །ཞེས་བྱ་བ་ནི། དྲན་པ་ཉེ་བར་གཞག་པ་བཞི་དང༌། ཡང་དག་པར་སྤོང་བ་བཞི་དང༌། རྫུ་འཕྲུལ་གྱི་རྐང་པ་བཞི་དང༌། དབང་པོ་ལྔ་དང༌། སྟོབས་ལྔ་དང༌། བྱང་ཆུབ་ཀྱི་ཡན་ལག་བདུན་དང༌། འཕགས་པའི་ལམ་ཡན་ལག་བརྒྱང་པོ་ནི་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ནོ། །དེ་རྣམས་བསྒོམས་པས་དག་པ་ནི། །ཞེས་བྱ་བ་ནི་དེ་རྣམས་བསྒོམས་པས་མཚན་མ་བརྟན་པར་གྱུར་པའོ། །རྡོ་རྗེ་ཆུ་འཐུངས་པས་ནི་གདོད་ནས་དག་པར་གྱུར་ཏེ་དང་པོ་ཟླ་བ་མཐོང་བའི་ཕྱིར་རོ། །དེ་ནས་ཟླ་བ་གཉིས་པ་མཐོང་བས་ནི་བྱང་ཆུབ་སེམས་དཔའོ། །དེའི་དབུས་ཀྱི་རྡོ་རྗེ་མཐོང་བས་ནི་འགྲོ་བ་ལ་ཕན་པའོ། །ལྷག་མ་རྣམས་ནི་སྔ་མ་བཞིན་ནོ། །དེ་ནས་གང་ཟླ་བ་གཉིས་པའི་སྟེང་དུ་རྡོ་རྗེ་འདི་ཅི་ཞིག་ཡིན་ཞེ་ན། འགྲོ་བ་ཞེས་བྱ་བ་ལ་སོགས་པ་གསུངས་ཏེ། འགྲོ་བ་རྣམས་ལ་སྤྲོས་པ་ནི་ཁྱབ་པ་སྟེ། ཆོས་ཐམས་ཅད་ལ་དམིགས་པའི་ཕྱིར་རོ། །བརྟན་པ་ནི་མི་ཕྱེད་པའོ། །སྙིང་པོ་ནི་འཇིགས་པ་མེད་པའོ། །ཅིའི་ཕྱིར་བརྟན་པ་ཡིན་ཞེ་ན། གང་གི་ཕྱིར་རབ་བསྒོམས་པ་ཞེས་བྱ་བ་གསུངས་པས་སོ། །ཅིའི་ཕྱིར་སྙིང་པོ་ཡིན་ཞེ་ན། གང་གི་ཕྱིར། སྟོང་པའི་དེ་ཉིད་ལས་བྱུང་བ། །ཞེས་བྱ་བ་གསུངས་པའི་ཕྱིར་རོ། །དེ་ཡང་སྟོང་པ་ཉིད་དེ་ཁོ་ན་ཉིད་ནི་དེ་ཉིད་དེ། དེ་ལས་བྱུང་བ་ནི་ཤིན་ཏུ་ཕྱིན་ཅི་ལོག་མ་ཡིན་པའི་ཕྱིར་རོ། །རྡོ་རྗེ་ཡེ་ཤེས་ནི་རྡོ་རྗེ་ལྟ་བུའི་ཡེ་ཤེས་སོ། །གང་གི་ཕྱིར་དེ་ལྟ་ཡིན་པ་དེས་ན་རྡོ་རྗེ་ནི་རྡོ་རྗེ་དབྱིངས་ཀྱི་སྤྲོ་བ་ཡིན་པ་དེ་ཅི་ཞིག་ཡིན་ཞེ་ན། ཆོས་བདག་མེད་ཅེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་ཀྱི་དབྱིངས་རྣམས་ནི་ཆོས་ཏེ། དེ་རྣམས་ཀྱི་བདག་མེད་པ་ནི་གཉིས་སུ་སྣང་བ་ནུབ་པར་གྱུར་པའོ། །དེ་ལ་དམིགས་པ་ནི་ཡང་དག་པར་བྱུང་བའོ། །བདག་ཉིད་ཀྱང་གཉིས་སུ་སྣང་བ་དང་བྲལ་བས་གཉིས་སུ་མེད་པའོ། །ཤིན་ཏུ་རྣམ་པར་དག་པས་ན་རྣམ་པའོ། །ཆོས་ནི་ལམ་གྱི་བདེན་པ་སྟེ་དེ་ཉིད་ནི་སངས་རྒྱས་ཀྱི་ཆོས་རྣམས་སོ། །དེ་རྣམས་ཀྱི་རང་བཞིན་ནི་ཆོས་ཉིད་
དོ། །དེའི་མཆོག་ནི་འཇིག་རྟེན་ལས་འདས་པ་ཉིད་ཡིན་པའི་ཕྱིར་དང༌། བྱབ་པར་བྱེད་པ་ཉིད་ཀྱིས་རྟོགས་པས་ན་ཆོས་ཉིད་མཆོག་གོ །ཆོས་རྣམས་ལ་འཛིན་ཅིང་མཉམ་པར་འཇོག་པས་ཆོས་ཀྱི་དབྱིངས་སོ། །གལ་ཏེ་དེ་ལྟར་ན་དབྱིངས་དེ་རྣམས་ཀྱི་རྡོ་རྗེ་ཉེ་བར་བསྡུ་བ་དེའི་ངོ་བོ་ཉིད་ནི་གང༌། རྒྱུ་ནི་གང༌། རྒྱུའི་རྒྱུ་ནི་གང་ཞེའམ། མིང་ནི་ཅི་ཞིག་ཡིན་ཞེ་ན། དེའི་ཕྱིར་ཆོས་ཀྱི་དབྱིངས་ཞེས་བྱ་བ་ལ་སོགས་པ་གསུངས་ཏེ། ཆོས་རྣམས་བསྡུས་ནས་འཛིན་པ་ནི་ཆོས་ཀྱི་དབྱིངས་སོ། །དེའི་ངོ་བོ་ཉིད་ནི་གཉིས་སུ་མེད་པ་དང་བརྟན་པ་ཉིད་ཀྱིས་ནི་རྡོ་རྗེ་ལྟ་བུའི་ཏིང་ངེ་འཛིན་ཏེ། །ཡང་དག་པར་ཀུན་ནས་སངས་རྒྱས་ཀྱི་ཆོས་རྣམས་ལ་སེམས་འཛིན་པས་གང་འདས་མ་ཐག་པའི་ཚིགས་སུ་བཅད་པས་ཆོས་ཀྱི་དབྱིངས་ཞེས་པ་དེ་ལས་བྱུང་བས་ན་དེ་ལས་སྐྱེས་པ་ཡིན་ཏེ། དེ་ནི་འདིའི་རྒྱུ་ཡིན་ནོ་ཞེས་བྱ་བའི་དོན་ཏོ། །རྡོ་རྗེ་ཡེ་ཤེས་ནི་སྔར་གྱི་ཚིགས་སུ་བཅད་པས་བཤད་པ་ཡིན་ཏེ། དེ་ནི་དེའི་རྒྱུའི་རྒྱུ་ཡིན་ནོ། །རྡོ་རྗེ་ཡེ་ཤེས་ཀྱི་རང་བཞིན་ནི་རྡོ་རྗེ་དབྱིངས་འདི་ལས་ཡོད་པས་ན་རྡོ་རྗེ་དབྱིངས་སོ། །ད་ནི་རྣམ་པར་སྣང་མཛད་ལ་སོགས་པའི་ལྷ་རྣམས་ཀྱི་དེ་ཁོ་ན་ཉིད་བ་སྟན་པར་བྱ་བའི་ཕྱིར། སེམས་ཀྱི་སྤྲོ་བའི་ཞེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་ལ་སྤྲོས་པ་མེད་པའི་ཡེ་ཤེས་ནི་སེམས་ཀྱི་སྤྲོ་བ་སྟེ། དེའི་སྦྱོར་བ་སྟེ། དེས་དེ་ལ་གོང་དུ་སྤྲོས་པ་མེད་པའི་ཡེ་ཤེས་དེའི་བསྡུ་བས་ཟླ་བའི་དཀྱིལ་འཁོར་དུ་བྱ་བ་ནི་ཕྲ་མོའི་ཡེ་ཤེས་ཏེ། དེ་ལ་སོགས་པ་གང་ཡིན་པ་དེ་ནི་ཕྲ་མོའི་ཡེ་ཤེས་སོགས་ཞེས་བྱ་སྟེ། ཡེ་ཤེས་ལྔ་པོ་རྣམ་པ་ལྔའི་ཚུལ་ཏེ་དེའི་སྦྱོར་བས་སོ། །དེས་དེ་བཞིན་གཤེགས་པ་ཐམས་ཅད་ཀྱི་ཡེ་ཤེས་བརྙེས་པས་ན་དེ་སྐད་ཅེས་བྱ་སྟེ། དེ་ནི་བཅོམ་ལྡན་འདས་རྣམ་པར་སྣང་མཛད་དོ། །དེ་ཡང་ཡེ་ཤེས་ལྔ་ཐུགས་སུ་ཆུད་པས་སྣ་ཚོགས་བའི་མཆོག་ཏུ་གྱུར་ཅིང་ཆོས་ཐམས་ཅད་ལ་དབང་དུ་གྱུར་པ་བརྙེས་པས་ན། འདི་ནི་དཀྱིལ་འཁོར་འདིའི་བདག་པོའི་ཚུལ་ཏེ་ངོ་བོ་ཉིད་ཀྱི་སྐུ་ཡིན་ནོ། །མི་བསྐྱོད་པ་ལ་སོགས་པའི་དཀྱིལ་འཁོར་ པ་རྣམས་ནི་ལོངས་སྤྱོད་རྫོགས ་པའི་སྐུ་ཡིན་ཏེ། ཇི་ལྟར་ཐུགས་སུ་ཆུད་པའི་
སངས་རྒྱས་ཀྱི་ཆོས་ཐམས་ཅད་རྣམ་པར་ཕྱེ་སྟེ། དེ་རྣམས་ཀྱི་ཆ་རེ་རེ་ཞིང་རྒྱུ་དང་འབྲས་བུས་བསྡུས་པ་དེས་འདུལ་བའི་སྐྱེ་བོ་རྣམས་རྗེས་སུ་གཟུང་བར་བྱ་བའི་ཕྱིར། མི་བསྐྱོད་པ་ལ་སོགས་པའི་སྐུར་ཡང་དག་པར་སྟོན་པ་ཡིན་ནོ། །དེ་ལྟ་ན་ནི་དེ་རྣམས་ལས་ལ་ལ་ནི་སངས་རྒྱས་ལ། ལ་ལ་ནི་བྱང་ཆུབ་སེམས་དཔར་སྣང་བ་འདི་ཅི་ཞིག་ཡིན་ཞེ་ན། དེ་ནི་གདུལ་བྱ་རྣམས་ཀྱི་བསམ་པའི་ཁྱད་པར་ལས་རྣམ་པར་སྟོན་པར་མཛད་པ་ཡིན་ནོ། །གཞན་ཡང་འབྲས་བུའི་གནས་སྐབས་བ་སྟན་པ་ནི་མི་བསྐྱོད་པ་ལ་སོགས་པའི་སངས་རྒྱས་རྣམས་ཡིན་ལ། རྒྱུའི་གནས་སྐབས་བ་སྟན་པ་ལ་ནི་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའ་རྣམས་ཡིན་ཏེ། དེ་གཉིས་ཀས་ཀྱང་སེམས་ཅན་རྣམས་འདུན་པར་མཛད་ཅིང་འགྲོ་བ་རྣམས་ལ་ཕན་པར་བྱ་བའི་ཕྱིར་རྣམ་པ་ཐམས་ཅད་དུ་ཞུགས་པ་ཡིན་པའི་ཕྱིར་རོ། །ཡང་ན་སེམས་ཅན་ཐམས་ཅད་ལ་དགྱེས་ཤིང་མཉེས་པས་ཐུགས་རྗེས་སྨིན་པར་མཛད་པས་ན་སེམས་དཔའོ། །བྱམས་པ་ནི་གཞན་རྣམས་ལ་པན་པར་འདོད་པ་སྟེ། དེ་སྤྲོ་བ་ནི་སེམས་ཅན་ཐམས་ཅད་ལ་ཁྱབ་པར་བྱའོ། །དེའི་སྦྱོར་བ་ནི་རྒྱུ་དེས་བྱང་ཆུབ་པ་ལ་སེམས་དཔའི་བྱང་ཆུབ་ཀྱི་སྤྱོད་པ་རྣམས་ཀྱིས་སྤྱོད་པས་ན་སྤྱོད་པ་སྟེ། དེ་དང་ལྡན་པས་ན་སྤྱོད་པར་བྱེད་པའོ། །མཆོག་ཅེས་བྱ་བ་ནི་བྱང་ཆུབ་ཀྱི་རྒྱུར་གྱུར་པའི་ཕྱིར་ཏེ་དམ་པའོ། །ཟག་པ་མེད་པ་ནི་འཇིག་རྟེན་ལས་འདས་པ་ཉིད་ཡིན་པའི་ཕྱིར་རོ། །བརྟན་པར་གྱུར་པ་ནི་ཤིན་ཏུ་བསྒོམས་པའི་ཕྱིར་རོ། །དེ་བས་ན་ཉོན་མོངས་པ་དང་རྣམ་པར་རྟོག་པ་རྣམས་ཀྱིས་བསྐྱོད་པར་མི་ནུས་པས་ན་མི་བསྐྱོད་པའོ། །ཐུགས་རྗེ་ནི་ཕ་རོལ་དང་བདག་ཉིད་དུ་མཉམ་པ་ཉིད་ཀྱི་ཡེ་ཤེས་ཏེ། དེ་སྤྲོ་བ་ནི་སེམས་ཅན་ཐམས་ཅད་ལ་ཕན་འདོགས་པར་བྱེད་པའི་ཟང་ཟིང་གི་སྤྱིན་པས་འགྲོ་བའི་དོན་གྱི་ཕན་པ་སྟེ། དེ་ཡང་དག་པར་ལྡན་པ་ནི་མི་འཇིགས་པ་དང་བྱམས་པ་དང་ཆོས་ཀྱི་སྤྱིན་པས་སོ། །མཉམ་པ་ཉིད་ཀྱི་ཡེ་ཤེས་ཉིད་ནི་རིན་ཆེན་ཏེ་དེ་འབྱུང་བ་ནི་སྐྱེ་བའོ། །དགའ་བ་ནི་དེ་ཁོ་ན་ཉིད་ཡོང་སུས་གཅོད་པའི་བདག་ཉིད་ཅན་ནོ། །དེའི་སྤྲོ་བ་ནི་ཐེག་པ་ཆེན་པོ་རྣམ་
པ་གསུམ་དང༌། དེས་བྱས་པའི་རྣམ་པར་དག་པ་ཁྱབ་པའོ། །སྦྱོར་བ་དེས་མཚན་པའི་ཐེག་པ་ཆེན་པོ་རྣམ་པ་གསུམ་ནི་བྱང་ཆུབ་ཀྱི་ལམ་སྟེ། དེ་ཉིད་ནི་དྲི་མ་མེད་པ་སྟེ་སྒྲིབ་པ་གཉིས་ཀྱི་དྲི་མ་མེད་པས་ཤིན་ཏུ་དག་པ་ཡིན་ནོ། །ཐུགས་ཞེས་བྱ་བ་ནི་ཐུགས་ཀྱི་ཆོས་ཉིད་ཅེས་བྱ་བའི་དོན་ཏོ། །འོད་གསལ་བ་ཞེས་བྱ་བ་ནི་རང་བཞིན་གྱིས་དག་པའི་ཕྱིར་རོ། །དག་པ་ནི་གློ་བུར་བའི་སྒྲིབ་པའི་དྲི་མ་ཟད་པའི་ཕྱིར་རོ། །དེ་ལྟར་གསུམ་པོ་དེ་དག་གི་ལམ་དང་དེའི་འབྲས་བུའི་ངོ་བོ་ཉིད་གང་ཡིན་པ་དེ་ནི་ཐེག་པ་ཆེན་པོ་སྟེ། སོ་སོར་རྟོག་པ་དང་ལྷན་ཅིག་འདྲེས་པ་དེ་ལ་འོད་དཔག་མེད་ཅེས་བཤད་དོ་ཞེས་བྱ་བ་སྟེ། འོད་དཔག་ཏུ་མེད་པའི་འོད་དེ་ཤེས་རབ་ཀྱི་སྣང་བ་འདི་ལ་མངའ་བས་དེ་སྐད་ཅེས་བྱའོ། །བཏང་སྙོམས་ནི་གཞན་གྱི་དོན་གྱི་ཕྱིར་རང་གི་དོན་ལ་བཏང་སྙོམས་སུ་འཇུག་པའོ། །དེའི་སྤྲོ་བ་ནི་སེམས་ཅན་རྣམས་ལ་དེའི་དོན་གྱིས་ཁྱབ་པར་བྱེད་པའི་ཐུགས་ཏེ། འདིས་ནི་བསམ་པ་ཕུན་སུམ་ཚོགས་པ་བཤད་པ་ཡིན་ནོ། །སྦྱོར་བ་ཕུན་སུམ་ཚོགས་པ་ནི་སེམས་ཅན་ཐམས་ཅད་རྟོགས་པར་མཛད་པ་ཞེས་བྱ་བ་ལ་སོགས་པ་གསུངས་པ་ཡིན་ཏེ། བྱང་ཆུབ་སྒྲུབ་པར་བྱེད་པའི་ལས་རྣམས་སོ། །དོན་ཡོད་བླ་མེད་ཅེས་བྱ་བ་ནི་གཞན་རྣམས་བྱང་ཆུབ་སྒྲུབ་པའི་ལས་སོ། །གྲུབ་པ་ནི་གཞན་རྣམས་བྱང་ཆུབ་པ་སྟེ་དེའི་དོན་གྱིས་ལས་གང་ཡིན་པ་དེ་ནི་འདིར་སྒྲུབ་པ་ཞེས་བྱའོ། །དོན་ཡོད་པ་ཡང་ཡིན་ལ་གྲུབ་པ་ཡང་ཡིན་པས་ན་དོན་ཡོད་པར་གྲུབ་པ་སྟེ། དེ་བས་ན་དོན་ཡོད་གྲུབ་པར་དེ་བཤད་དོ་ཞེས་བྱའོ། །ཡང་དེའི་རྒྱུ་ནི་བཏང་སྙོམས་སྤྲོས་པའི་ཐུགས་སོ། །དེ་ལྟར་ན་མི་བསྐྱོད་པ་ལ་སོགས་པ་བཞི་པོ་རྣམས་ཀྱི་དེ་ཁོ་ན་ཉིད་ནི་རིམ་པ་བཞིན་དུ་བྱང་ཆུབ་ཀྱི་སེམས་དང༌། སྤྱིན་པའི་ཕ་རོལ་ཏུ་ཕྱིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། ཡང་བྱང་ཆུབ་ཀྱི་སེམས་དང༌། བསོད་ནམས་ཀྱི་ཚོགས་དང་ཡེ་ཤེས་ཀྱི་ཚོགས་དང༌། དོན་དམ་པའི་སྤྱོད་པ་དང༌། ཡང་འབྲས་བུའི་གནས་སྐབས་སུ་རྣམ་པ་གཉིས་ཏེ། བྱང་ཆུབ་ཆེན་པོ་དང༌།
སངས་རྒྱས་ཐམས་ཅད་དབང་སྐུར་བ་དང༌། ཆོས་ཀྱི་འཁོར་ལོ་བསྐོར་བ་དང༌། འགྲོ་བ་འདུལ་བ་དང༌། ཡང་ཆོས་ཀྱི་མཆོག་མངོན་པར་རྟོགས་པ་དང༌། ཏིང་ངེ་འཛིན་གྱི་སྒོ་དང༌། གཟུངས་ཀྱི་སྒོ་དང་ཐེག་པ་ཆེན་པོ་ཡིན་ནོ། །དཔལ་རྡོ་རྗེ་རྩེ་མོའི་རྒྱུད་དང༌། དེ་བཞིན་དུ་དཔལ་དེ་ཁོ་ན་ཉིད་བསྡུས་པ་ལས་ལྷ་སུམ་ཅུ་རྩ་བདུན་གྱི་དེ་ཁོ་ན་ཉིད་གསལ་བར་གསུངས་སོ། །དེ་ལ་མི་བསྐྱོད་པའི་དེ་ཁོ་ན་ཉིད་ནི་བྱང་ཆུབ་ཀྱི་སེམས་ཏེ། དེ་ཡང་གཞན་གྱི་དོན་གྱི་ཕྱིར་བྱང་ཆུབ་ཏུ་གོ་བགོས་པ་དང་ལྡན་པའི་བྱམས་པས་བསྡུས་པའི་སྤྱད་པ་སྤྱོད་པར་བྱེད་པའོ། །དེའི་རབ་ཏུ་དབྱེ་བའི་སེམས་དཔའ་རྣམ་པ་བཞི་སྟེ། དེ་ལ་བྱང་ཆུབ་ཏུ་གོ་བ་གོས་པ་ནི་རྡོ་རྗེ་སེམས་དཔའོ། །སྤྱོད་པ་ཡང་དག་བླངས་པ་དང༌། ཡོངས་སུ་སྨིན་པ་དང་ཡོངས་སུ་རྫོགས་པ་ལ་རྒྱལ་པོ་དང་ཆགས་པ་དང་ལེགས་པ་རྣམས་དང་རིམ་པ་བཞིན་དུ་སྤྱར་བར་བྱ་སྟེ། དེའི་དབང་དུ་མཛད་ནས་བྱང་ཆུབ་ཅེ་བྱ་བ་ལ་སོགས་པ་གསུངས་ཏེ། མཐར་བྱང་ཆུབ་ཆེན་པོའི་ངོ་བོ་ཉིད་ཀྱི་ཡེ་ཤེས་བྱང་ཆུབ་ཀྱི་སེམས་ཞེས་བཤད་པ་གང་ཡིན་པ་དེ་ནི་རྡོ་རྗེ་ཞེས་བྱའོ། །དེ་བས་ན་འབྲས་བུའི་གནས་སྐབས་སུ་ཡང་དག་པར་བྱུང་བའི་སེམས་དཔའ་ནི་རྡོ་རྗེ་སེམས་དཔའོ། །འབྲས་བུའི་བྱང་ཆུབ་ཀྱི་སེམས་དང་ལྡན་པས་ན་རྡོ་རྗེ་སྟེ་སངས་རྒྱས་སོ། །དེ་ཡང༌། བྱང་ཆུབ་སེམས་གང་དེ་རྡོ་རྗེ། ཞེས་གསུངས་པའི་ཕྱིར་རོ། །དེ་རྣམས་ཀྱི་རྒྱལ་པོ་ཡིན་པས་ན་རྡོ་རྗེ་རྒྱལ་པོའོ། །དེ་ཡང་སྤྱན་འདྲེན་པས་ན་ལྕགས་ཀྱུ་སྟེ་ལྕགས་ཀྱུ་ཡིན་པས་ན་རྒྱལ་པོའོ། །གཞན་ཡང་བྱང་ཆུབ་ཏུ་གོ་བགོས་པའི་བྱང་ཆུབ་སེམས་དཔའ་ནི་བྱང་ཆུབ་སེམས་དཔར་འགྱུར་རོ། །རྡོ་རྗེ་སེམས་དཔའ་ནི་རྒྱུའི་བྱང་ཆུབ་ཀྱི་སེམས་དང་དན་པས་ན། དེས་ནི་བྱང་ཆུབ་ཏུ་བསྡུ་བའི་དངོས་པོ་བཞིས་འདྲེན་པར་བྱེད་དེ། སྤྱིན་པ་དང་སྙན་པར་སྨྲ་བ་དང་དོན་སྤྱོད་པ་དང་དོན་མཐུན་པ་རྣམས་ཀྱིས་སོ། །དེ་ཉིད་ནི་བཅོམ་ལྡན་འདས་རྡོ་རྗེ་རྒྱལ་པོ་སྟེ། འདི་ལས་ཀྱང་རྡོ་རྗེ་རྣམས་ཀྱི་རྒྱལ་པོ་ཡིན་པས་ན་རྡོ་རྗེ་རྒྱལ་པོའོ། །འདི་ཉིད་ཀྱིས་ནི་རྡོ་རྗེ་རིགས་རྣམས་ཞེས་བྱ་བ་ལ་སོགས་པ་གསུངས་ཏེ། རྡོ་རྗེའི་རིགས་ཐམས་ཅད་ཀྱི་རྒྱལ་པོར་གྱུར་པས་ན་དེ་སྐད་ཅེས་བྱ་སྟེ། བྱང་ཆུབ་སེམས་དཔའི་ཚོགས་ཐམས་
ཅད་འགུགས་པར་བྱེད་པ་ཞེས་བྱ་བའི་དོན་ཏོ། །སངས་རྒྱས་དང་བྱང་ཆུབ་སེམས་དཔའ་རྣམས་ཆགས་པར་བྱེད་པས་ན་རྡོ་རྗེ་ཆགས་པ་སྟེ། དེ་ལ་སངས་རྒྱས་རྣམས་ཆགས་པར་བྱ་བ་ནི་མཉེས་པར་བྱས་པའོ། །བྱང་ཆུབ་སེམས་དཔའ་རྣམས་ཆགས་པར་བྱ་བ་ནི་སྨིན་པར་བྱས་པ་སྟེ། སྤྱོད་པ་ལ་མངོན་པར་བརྩོན་པར་བྱས་པའོ། །གསོད་པ་ནི་བདུན་ཏེ་དེའི་སྦྱོར་བ་ནི་ཐབས་སོ། །དེ་ཉིད་ཀྱིས་ན་ཆགས་པ་ཆེ། །ཞེས་བྱའོ། །དེ་ཉིད་ཀྱིས་ན་རྡོ་རྗེ་ཆགས་པ་སྟེ། མི་མཐུན་པའི་ཕྱོགས་རྣམས་ཤིན་ཏུ་འཇིག་པར་བྱེད་པ་ཉིད་ཀྱིས་ན་གང་ཆེན་པོར་གྱུར་པ་སྟེ་དེ་ཡང་རྡོ་རྗེའི་དོན་ཡིན་ནོ་ཞེས་བྱ་བར་དགོངས་སོ། །སྤྱོད་པ་ཡོངས་སུ་རྫོགས་པས་རྡོ་རྗེ་རྣམས་ཀྱིས་ལེགས་པ་ཡིན་པས་ན་རྡོ་རྗེ་ལེགས་པ་སྟེ། སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་རིམ་པ་བཞིན་དུ་བདག་དང་གཞན་གྱི་སྤྱོད་པ་ཡོངས་སུ་རྫོགས་པར་མཛད་པའི་བསྔགས་པ་ཡིན་པའི་ཕྱིར་རོ། །གང་བྱང་ཆུབ་སེམས་དཔའི་ཆོས་ཉིད་ལ་གནས་པ་རྣམས་ནི། བྱང་ཆུབ་ཀྱི་སེམས་ལ་བརྟེན་ནས་སྙིང་རྗེ་སྔོན་དུ་འགྲོ་བའི་སེམས་དང་ལྡན་པ་ལ་ནི་སྐུ་དང་གསུང་དང་ཐུགས་ཀྱི་ལས་རྣམས་དང་སྦྱོར་བ་ཐམས་ཅད་ཡོད་དེ། དེའི་སྤྱིན་པའི་ཕ་རོལ་ཏུ་ཕྱིན་པ་དེ་ཉིད་ནི་རིན་ཆེན་འབྱུང་ལྡན་གྱི་དེ་ཁོ་ན་ཉིད་དོ། །དེའི་རབ་ཏུ་དབྱེ་བ་ནི་སྤྱིན་པ་རྣམ་པ་བཞི་སྟེ། ཟང་ཟིང་དང་མི་འཇིགས་པ་དང༌། བྱམས་པ་དང༌། ཆོས་ཀྱི་སྤྱིན་པ་རྣམས་སོ། །དེ་ཉིད་ནི་རིམ་པ་བཞིན་དུ་སེམས་དཔའ་རྣམ་པ་བཞི་ཡིན་ཏེ། རིན་ཆེན་དང༌། ཉི་མ་དང༌། རྒྱལ་མཚན་དང༌། བཞད་པའོ། །དེ་རྣམས་ཀྱང་འཁོར་ལོས་སྒྱུར་བ་རྣམས་ཀྱི་དབང་ཕྱུག་གི་མཐུའི་ཏོག་དང༌། སྐྱེ་དགུ་རྣམས་ཆོས་ལ་འཇོག་པ་དེ་བཞིན་དུ་ཤེས་པར་བྱའོ། །དེ་དག་གི་དབང་དུ་མཛད་ནས་བྱང་ཆུབ་སེམས་དཔའི་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཐམས་ཅད་ཀྱི་རྒྱུ་དང་འབྲས་བུའི་གནས་སྐབས་ཀྱི་ཟང་ཟིང་གི་སྤྱིན་པ་གང་ཡིན་པ་དེ་ནི་ནམ་མཁའ་དང་མཉམ་པ་ཡིན་ཏེ་མཐའ་ཡས་པའི་ཕྱིར་རོ། །རྡོ་རྗེ་ལས་བྱུང་བ་ཡིན་ཏེ་བྱང་ཆུབ་ཀྱི་སེམས་ལ་བརྟེན་པ་ཡིན་པའི་ཕྱིར་རོ། །དོན་ཡོད་པ་ནི་ངེས་པ་ཁོ་ནར་བྱ་བ་བྱེད་པ་ཡིན་པའི་ཕྱིར་རོ། །རིན་
ཆེན་ཆེན་པོ་ཡང་ཡིན་ཏེ་ཕུན་སུམ་ཚོགས་པ་ཐམས་ཅད་སྐྱེད་པར་བྱེད་པ་ཡིན་པའི་ཕྱིར་རོ། །ཡིད་བཞིན་གྱི་རིན་པོ་ཆེ་དེ་ནི་བཅོམ་ལྡན་འདས་རྡོ་རྗེ་རིན་ཆེན་ཏེ། དོན་ཡོད་པ་ཉིད་དང༌། རྡོ་རྗེ་དོན་ཡོད་དང༌། ཡིད་བཞིན་གྱི་ནོར་བུ་དང་འདྲ་བའི་རིན་པོ་ཆེའི་དོན་ཡིན་ནོ་ཞེས་བྱ་བར་དགོངས་སོ། །ཡང་ན་རྡོ་རྗེ་རྣམས་ཀྱི་རྡོ་རྗེ་ལས་བྱུང་བ་ནི་རྡོ་རྗེ་རིན་ཆེན་ནོ། །ཆོས་ཀྱི་དབྱིངས་ཀུན་དུ་འགྲོ་བ་ལ་སོགས་པའི་དོན་ལ་གང་ཉོན་མོངས་པའི་མི་ཤེས་པ་གང་ཡིན་པ་དེ་ནི་མ་རིག་པ་སྟེ། དེ་དང་བྲལ་བ་ནི་དེ་བསལ་བ་སྟེ། འཁོར་བ་ལམ་གྱི་ཉོན་མོངས་པའི་ཚོགས་དེ་སྤངས་པ་ནི་དེ་ལས་ངེས་པར་བྱུང་བ་སྟེ། གང་འདི་ལྟ་བུའི་ཡེ་ཤེས་སྤྲོས་པ་མེད་ཅིང་ཟག་པ་མེད་པ་དེ་ནི་རྡོ་རྗེ་ཉི་མ་སྟེ། དེས་བྱང་ཆུབ་སེམས་དཔའ་འདུལ་བ་རྣམས་ཀྱི་མ་རིག་པ་དང༌། ཉོན་མོངས་པ་རྣམས་ལས་མི་འཇིགས་པ་སྩོལ་ཏེ། འཁོར་ལོས་སྒྱུར་བ་ལྟར་རང་གི་གཟི་བྱིན་གྱིས་སྐྱེ་དགུ་རྣམས་མི་མཐུན་པའི་ཕྱོགས་ལས་སྐྱོབ་བར་བྱེད་དེ་དེ་བས་ན་བཅོམ་ལྡན་འདས་འདི་ནི་མི་འཇིགས་པ་སྤྱིན་པ་ཡིན་ཏེ། ཉོན་མོངས་པ་དང་མ་རིག་པ་སྤངས་པ་ནི་ཐར་པ་སྟེ། དེའི་དོན་ནི་སྣང་བ་ཞེས་བྱ་སྟེ་ཡང་དག་པའི་ཡེ་ཤེས་ཅན་གྱི་སྣང་བའོ། །དེ་ཉིད་ནི་གཟི་བརྗིད་ཆེན་པོ་སྟེ་དེ་ཉིད་རྡོ་རྗེ་ཉི་མའོ། །ཆེན་པོ་ནི་རྡོ་རྗེའི་དོན་ཏོ། །གཟི་བརྗིད་ནི་ཉི་མའི་དོན་ཡིན་ནོ་ཞེས་བྱ་བར་དགོངས་སོ། །ཡང་ན་བདག་བློ་ཟླ་ལྟར་སྣང༌། །རྡོ་རྗེ་ཞེས་ནི་བྱ་བར་བཤད། །ཅེས་གསུངས་པས་རྡོ་རྗེ་ནི་བྱང་ཆུབ་ཀྱི་ལམ་མོ། །དེ་ཉིད་ནི་ཉི་མ་ཡིན་ཏེ་དེ་དང་ཆོས་མཐུན་པས་ན་རྡོ་རྗེ་ཉི་མའོ། །བྱང་ཆུབ་ཀྱི་ལམ་གྱི་རྣམ་པ་ནི་རྟགས་དང་མཚན་མ་དང༌། དོན་རྟགས་དང༌། དེ་བཞིན་ཉིད་དང༌། ཡང་དག་པའི་ཡེ་ཤེས་དང༌། སྔགས་དང་ཕྱག་རྒྱ་ལ་སོགས་པའོ། །རྣམ་པ་ཡང་ཡིན་ལ་ཀུན་ཡང་ཡིན་པས་ན་རྣམ་པ་ཀུན་ཏེ། དེ་རྣམས་ཀྱི་དངོས་པོ་གདུལ་བྱ་རྣམས་ཀྱི་སེམས་ཀྱི་རྒྱུད་ལ་སྟོན་པར་མཛད་པའི་སྟོབས་ཀྱིས་སྤྲུལ་པར་བྱེད་པའི་ཡེ་ཤེས་གང་ཡིན་པ་དེ་ནི་ཐར་པ་སྟེ་བྱང་ཆུབ་བོ། །དེའི་ལམ་ནི་སྤྲོས་པ་མེད་པའི་ཡེ་ཤེས་སོ། །དེར་འཇུག་པ་ནི་སྦྱོར་བའི་ལམ་སྟེ་དེ་ནི་ཐར་པའི་ལམ་དུ་འཇུག་པའོ། །དེ་ཐོབ་པར་མཛད་པ་ནི་གདུལ་བྱ་རྣམས་ཀྱི་རྒྱུད་ལ་སྐྱེད་པར་
མཛད་པའོ། །ཆོས་ནི་བྱང་ཆུབ་ཀྱི་ལམ་སྟེ་དེའི་རྒྱལ་མཚན་སྟོན་པར་བྱེད་པའོ། །དེ་ཉིད་ཀྱིས་ན་རྟོག་པ་ཆེན་པོ་ཞེས་བྱའོ། །ཡང་ན་རྡོ་རྗེ་ནི་བྱང་ཆུབ་ཀྱི་ལམ་སྟེ་དེའི་ཏོག་ཡིན་པས་ན་རྡོ་རྗེ་དཔལ་ལོ། །བཅོམ་ལྡན་འདས་འདི་ནི་བྱམས་པའི་རང་བཞིན་གྱི་སྤྱིན་པ་སྟེ་སངས་རྒྱས་ཀྱི་ལམ་སྟོན་པར་མཛད་པའི་ཕྱིར་རོ། །གདུལ་བྱ་རྣམས་ཀྱི་རྒྱུད་ལ་མཚན་མ་དང་བཅས་པའི་བྱང་ཆུབ་ཀྱི་ལམ་སྐྱེད་པར་མཛད་པའི་ཡེ་ཤེས་ནི་བྱམས་པའི་སྤྱིན་པའོ། །མཚན་མ་མེད་པའི་བྱང་ཆུབ་ཀྱི་ལམ་སྐྱེད་པར་མཛད་པའི་ཡེ་ཤེས་ནི་ཆོས་ཀྱི་སྤྱིན་པ་སྟེ། དེ་ནི་རྡོ་རྗེ་བཞད་པ་ཞེས་བྱ་བ་ནི་རྣལ་འབྱོར་ཆེན་པོའོ། །འདི་ལ་ཅིའི་ཕྱིར་རྡོ་རྗེ་བཞད་པ་ཞེས་བྱ་ཞེ་ན། གང་གི་ཕྱིར་སངས་རྒྱས་ཀུན་གྱི་འཛུམ་པ་རྨད་དུ་བྱུང་བའི་རྒྱུ་ཡིན་ཏེ། སངས་རྒྱས་ཀྱི་འཛུམ་པ་དེས་ཀྱང་བྱང་ཆུབ་སེམས་དཔའ་རྣམས་ལ་དབུགས་འབྱིན་པ་ཆེན་པོའི་རྒྱུ་ཡིན་ནོ། །དེ་བས་ན་རྡོ་རྗེ་བཞད་པ་ནི་དབུགས་འབྱིན་པ་ཆེན་པོ་ཡིན་ནོ། །བྱང་ཆུབ་ཀྱི་ལམ་རྣམ་པ་གསུམ་དང་དེའི་འབྲས་བུའི་ངོ་བོ་ཉིད་སོ་སོར་རྟོག་པ་དང་བཅས་པར་འདུས་པའི་ཡེ་ཤེས་ནི་བཅོམ་ལྡན་འདས་འོད་དཔག་ཏུ་མེད་པའོ། །དེའི་རབ་ཏུ་ཕྱེ་བ་ནི་རྣམ་པ་བཞི་སྟེ། འབྲས་བུར་གྱུར་པས་དག་པ་དང༌། ལམ་སྦྱོང་བར་བྱེད་པའི་རྣམ་པ་མེད་པ་དང༌། དཀྱིལ་འཁོར་གྱི་རྣམ་པ་དང༌། སྔགས་རྣམ་པར་ཡོངས་སུ་ཆད་པའོ། །དེ་ཉིད་ནི་རིམ་པ་བཞིན་དུ་སེམས་དཔའ་བཞི་སྟེ། ཆོས་དང༌། རྣོན་པོ་དང༌། རྒྱུ་དང༌། སྨྲ་བའོ། །དེ་རྣམས་ཀྱི་དབང་དུ་བྱས་ནས། སངས་རྒྱས་ཀུན་གྱི་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པའི་ཆོས་དག་པ། །ཞེས་བྱ་བ་ནི་སངས་རྒྱས་ཀྱི་ཆོས་རྣམས་ཀྱི་ཆོས་ཉིད་ནི་ངོ་བོ་ཉིད་ཀྱིས་དག་པ་དང༌། རང་བཞིན་གྱི་སྒྲིབ་པ་ཐམས་ཅད་ཟད་པ་གང་ཡིན་པ་དེ་ནི་རྡོ་རྗེ་རྣམས་ཀྱི་ཆོས་ཡིན་པས་ན་རྡོ་རྗེ་ཆོས་ཞེས་བཤད་དོ། །དེའི་ངོ་བོ་ཉིད་དག་པ་དེ་ལ་དམིགས་པའི་ཏིང་ངེ་འཛིན་ལ་ཡང་དེ་སྐད་ཅེས་བྱའོ། །དེ་ཉིད་ཀྱིས་ན་སངས་རྒྱས་ཀྱི་ཆོས་རྣམས་ལ་རྣལ་འབྱོར་ཆེན་པོ་ཡིན་ནོ། །སངས་རྒྱས་ཆོས་ནི་རྟོགས་མཛད་པ། །ཞེས་བྱ་བ་ནི་འཐོབ་པར་མཛད་པའོ། །རྡོ་རྗེ་ཡང་ཡིན་ལ་རྣོན་པོ་ཡང་ཡིན་པས་རྡོ་རྗེ་རྣོན་པོ་སྟེ། དེ་ལྟ་བུའི་
རྡོ་རྗེ་རྣོན་པོ་གང་ཡིན་པ་དེ་ནི་རྡོ་རྗེ་རྣོན་པོར་དེ་བཤད་དོ་ཞེས་བྱའོ། །དེ་ཡང་རྡོ་རྗེའི་དོན་ནི་ཐེག་པ་ཆེན་པོའི་སྤྲོས་པ་མེད་པའི་ཡེ་ཤེས་ཟླ་བ་དག་པ་ལྟར་སྣང་བའོ། །རྣོན་པོའི་དོན་ནི་སྒྲིབ་པ་གཉིས་གཅོད་པར་བྱེད་པའོ། །དེས་གཅོད་མཛད་ཅེས་བྱ་བ་ནི་གཅོད་པར་མཛད་པའོ། །གཅོད་པ་པོ་ཞེས་བྱ་བ་ནི་གཅོད་པ་པོར་གྱུར་པའོ། །སེམས་དཔའ་ཆེན་པོ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། དེའི་བདག་ཉིད་ཅན་གྱི་ཐེག་པ་ཆེན་པོ་གང་ཡིན་པ་དེ་ནི་རྡོ་རྗེ་རྒྱུ་སྟེ། རྡོ་རྗེ་ནི་སངས་རྒྱས་དང་བྱང་ཆུབ་སེམས་དཔའ་རྣམས་ཡིན་ལ་དེའི་བདག་ཉིད་ཅན་གྱི་རྒྱུ་ཡིན་པས་ན་རྡོ་རྗེ་རྒྱུ་ཞེས་བྱ་བར་དགོངས་ཏེ། ཕན་པར་བྱེད་པ་དང༌། རྒྱུ་དང་ཐེག་པ་ཞེས་བྱ་བ་ནི་རྣམ་གྲངས་ཡིན་ནོ། །གཞན་ཡང་རྡོ་རྗེ་རྣམས་ཀྱི་རྒྱུ་སྤྲུལ་པས་ན་སྤྲོས་པ་མེད་པ་ཉིད་ཀྱི་ཡེ་ཤེས་ནི་ཐེག་པ་ཆེན་པོ་སྟེ་སེམས་དཔའ་ནི་མ་ཡིན་ནོ་ཞེ་ན། ཆོས་ཀྱི་ཞེས་བྱ་བ་ལ་སོགས་པ་གསུངས་ཏེ། ཆོས་ཐམས་ཅད་ཀྱི་མཆོག་ཏུ་གྱུར་པས་ན་ཆོས་ནི་སངས་རྒྱས་ཀྱི་ཐར་པའོ། །འདིར་དེ་ཐོབ་པར་བྱེད་པའི་ལམ་ཉིད་ལ་དེའི་དོན་གྱི་ཆོས་ཞེས་བཤད་དེ། དེ་ཡང་སྤྲོས་པ་མེད་པ་ཉིད་ཀྱི་ཡེ་ཤེས་སོ། །གདུལ་བྱ་རྣམས་ཀྱི་རྒྱུད་ལ་འཕོ་བས་ན་འཁོར་ལོ་སྟེ། ཆོས་ཀྱང་ཡིན་ལ་འཁོར་ལོ་ཡང་ཡིན་པས་ཆོས་ཀྱི་འཁོར་ལོ་སྟེ་དེ་ཉིད་བསྐོར་བ་དེ་ནི་རྡོ་རྗེ་རྒྱུའོ། །དེ་ལྟར་ན་སེམས་དཔའ་རྡོ་རྗེ་ཇི་ལྟར་ཡིན་ཞེ་ན། སངས་རྒྱས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་རྣམས་ཀྱི་རོལ་མོ་ནི་རྣམ་པ་མེད་པའི་ཆོས་སེམས་དཔའི་རྣམ་པར་ཡང་དག་པར་སྟོན་པར་མཛད་པའོ། །དེ་ཉིད་ནི་འཁོར་ལོ་སྟེ་དེ་ནི་ཆོས་ཀྱི་འཁོར་ལོ་ཡིན་ནོ་ཞེས་བྱ་བ་ནི་སྒྲའི་དོན་སྟོན་ཏོ། །དེ་ཡང་དཔལ་རྡོ་རྗེ་རྩེ་མོའི་རྒྱུད་ལས། ངོ་བོ་ཉིད་ཀྱི་སྐུ་ཡིས་ནི། །རབ་ཏུ་སྣང་བ་འབྱུང་འགྱུར་ལ། །ལོངས་སྤྱོད་རྫོགས་པའི་སྐུ་ཡིས་ནི། །ཆོས་ཀྱི་ལོངས་སྤྱོད་འདི་འདྲའོ། །རྩོམ་ལ་གནས་པ་ཐམས་ཅད་ནི། །ཞི་ཞིང་ཕྲ་ལ་བལྟ་བར་དཀའ། །སངས་རྒྱས་རྣམས་ནི་ཐུགས་བརྩེ་བས། །སངས་རྒྱས་རོལ་མོ་སྟོན་པ་ཡིན། །ཞེས་གསུངས་སོ། །འཇམ་པ་ཡང་ཡིན་ལ་གསུང་ཡང་ཡིན་པས་ན་འཇམ་པའི་གསུང་སྟེ། དེའི་བདག་ཉིད་ཀྱི་
སེམས་དཔའ་ནི་རྡོ་རྗེ་སྨྲ་བའོ། །འཇམ་པའི་གསུང་དེ་སུ་ཞིག་ཡིན་ཞེ་ན། གསུང་ཞེས་བྱ་བ་གསུངས་སོ། །དེ་ཅི་སྒྲ་ཡིན་ནམ་འོན་ཏེ་མ་ཡིན་ཞེ་ན། སྒྲ་ནི་རྣམ་པར་སྤངས་པར་ཞེས་བྱ་བ་གསུངས་སོ། །དེ་ཅི་བྱིས་པ་རྣམས་ཁོང་ནས་སྨྲ་བ་ལྟ་བུ་ཡིན་ནམ་ཞེ་ན། མ་ཡིན་ཏེ་དག་པ་ཞེས་བྱ་བ་གསུངས་ཏེ། འཇིག་རྟེན་ལས་འདས་པའི་ཡེ་ཤེས་ཀྱི་རྒྱུ་མཐུན་པའོ་ཞེས་བྱ་བར་དགོངས་སོ། །དེ་ཡང་ཤེས་རབ་དང་ཡེ་ཤེས་ཀྱི་རང་བཞིན་ཏེ་དོན་དམ་པར་ངེས་པར་བརྟགས་པ་ཉིད་ཀྱིས་ན་ཤེས་རབ་ཟབ་བོ། །ཡང་དག་པའི་ཡེ་ཤེས་ཀྱི་རྒྱུ་མཐུན་པ་ཉིད་ཡིན་པས་ན་ཤེས་རབ་དང་ཡེ་ཤེས་ཏེ། དེའི་རང་བཞིན་ནི་དེའི་བདག་ཉིད་ཅན་ནོ། །དག་པ་ནི་འཇིག་རྟེན་པའི་ཡེ་ཤེས་ཞེས་བྱ་བའི་དོན་ཏོ། །དེ་ཡང་གང་གི་ཕྱིར་གསུང་ཉིད་ཀྱིས་ན་འཇམ་པའི་གསུང་སྟེ། དེ་ཉིད་ཀྱིས་ན་དག་པ་ཉིད་ནི་འཇམ་པའི་གསུང་ངོ༌། །རང་གི་དོན་ལ་བཏང་སྙོམས་སུ་འཇོག་པས་གཞན་གྱི་བྱང་ཆུབ་སྒྲུབ་པར་བྱེད་པའི་ལམ་ནི་དོན་ཡོད་པར་གྲུབ་པའོ། །དེའི་རབ་ཏུ་བྱེད་པ་ནི་རྣམ་པ་བཞི་སྟེ། རྩོམ་པ་དང༌། ཡོངས་སུ་སྤྱང་བ་དང༌། སོ་སོར་རྟོག་པ་དང༌། སྒྲུབ་པར་བྱེད་པའོ། །དེ་ཉིད་ནི་རིམ་བཞིན་དུ་སེམས་དཔའ་རྣམ་པ་བཞི་སྟེ་ལས་དང་བསྲུང་བ་དང་གནོད་སྤྱིན་དང་ཁུ་ཚུར་རོ། །དེ་དག་གི་དབང་དུ་མཛད་ནས་ཕ་རོལ་ཏུ་ཕྱིན་པ་ཞེས་བྱ་བ་ལ་སོགས་པ་གསུངས་ཏེ། ཕ་རོལ་ཏུ་ཕྱིན་པ་ཀུན་ནི་སྤྱིན་པ་ལ་སོགས་པ་རྣམ་པ་ལྔའོ། །དེ་རྣམས་ཀྱི་རྐང་པ་ནི་གཞན་རྣམས་ལ་བསྐྱེད་པའོ། །ཆོས་རྣམས་ཐམས་ཅད་སྟོན་མཛད་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྐྱེད་པར་མཛད་པའོ། །འདི་ཉིད་ཀྱི་ཚོགས་ཀྱིས་འབྲས་བུ་སྐྱེད་པ་ནི་སེམས་ཅན་ཀུན་དོན་སྒྲུབ་པ་པོ་ཞེས་བྱའོ། །རྡོ་རྗེ་ནི་གཞན་གྱི་བྱང་ཆུབ་པ་སྟེ། དེའི་ལས་ཡིན་པས་ན་རྡོ་རྗེ་ལས་ཞེས་བྱ་བར་དགོངས་ཏེ་འདི་ནི་གཞན་གྱི་དོན་གྱི་རྩོམ་པའོ། །སངས་རྒྱས་ཞེས་བྱ་བ་ལ་སོགས་པ་གསུངས་པ་ལ་སངས་རྒྱས་རྣམས་ཀྱི་རྗེས་སུ་འགྲོ་བའི་དྲན་པ་ནི་རྗེས་སུ་དྲན་པ་སྟེ། དེའི་ཡང་དག་པར་གྲུབ་པ་ནི་ཐེག་པ་དམན་པ་རྣམ་པར་སྤངས་པ་དང༌། བྱང་ཆུབ་ཀྱི་སེམས་ལ་རྟག་ཏུ་ཞུགས་པ་སྟེ། ལས་འདི་ནི་བྱང་ཆུབ་སེམས་དཔའ་རྣམས་ཀྱི་བསྲུང་བ་ཡིན་པས་ན་དེའི་ཕྱིར་རྡོ་རྗེ་བསྲུང་བ་སྟེ། འདི་ཉིད་ནི་ཡོངས་སུ་
སྤྱང་བའོ། །གཞན་རྣམས་ཀྱི་སྡིག་པ་རྣམས་ཟ་བར་བྱེད་ཅིང༌། ཉོན་མོངས་པ་རྣམས་སྲེག་པ་ནི་རྡོ་རྗེ་གནོད་སྤྱིན་ནོ། །ཇི་ལྟར་ཞེ་ན། ཉོན་མོངས་ཟད་པས་ཉེར་ལེན་པས། །ཞེས་བྱ་བ་གསུངས་ཏེ། ཉོན་མོངས་པས་ན་ཉོན་མོངས་པ་སྟེ་སྡིག་པ་ལ་སོགས་པ་དང་ཉོན་མོངས་པ་རྣམས་སོ། །རྡོ་རྗེའི་དོན་ནི་དེ་རྣམས་ཟད་པ་ལ་བརྟེན་ནས། རྡོ་རྗེ་རྣམས་ཀྱི་ཟད་པ་ཡིན་པས་ན་རྡོ་རྗེ་གནོད་སྤྱིན་ཏེ། ཡི་གེ་གཉིས་གོ་བཟློག་པ་ཞེས་བྱ་བའི་དོན་ཏོ། །གཞན་ཡང་རྡོ་རྗེ་རྣམས་ཀྱི་གནོད་སྤྱིན་ཡིན་པས་ན་རྡོ་རྗེ་གནོད་སྤྱིན་ཏེ། བྷ་གར་བྱས་པ་འདི་ནི་སོ་སོར་རྟོག་པའི་འཕགས་པའི་ལམ་གྱིས་ཟག་པ་མེད་པའི་ཚོགས་དང་ལྡན་པའི་ཉོན་མོངས་པ་ཟད་པ་ཐོབ་པའི་ཕྱིར་རོ། །སྐུ་ལ་སོགས་པའི་རྡོ་རྗེ་རྣམས་བཅིངས་པ་ནི། དེ་ཁོ་ན་ཉིད་དུ་ངེས་པར་བསྡུས་ཤིང་ཡང་དག་པར་གནས་པ་ནི་རྡོ་རྗེ་ཁུ་ཚུར་རོ། །རྣལ་འབྱོར་པའི་སྐུ་ལ་སོགས་པའི་རྡོ་རྗེ་ནི་རྡོ་རྗེ་སྟེ་དེ་རྣམས་ཀྱི་ཁུ་ཚུར་ནི་དེ་ཁོ་ན་ཉིད་དུ་བསྡུས་པའོ་ཞེས་བྱ་བར་དགོངས་པའོ། །གཞན་ཡང༌། དེ་ཉིད་དེ་ཉིད་ཡེ་ཤེས་ཏེ། །ཞེས་བྱ་བའི་ཡེ་ཤེས་འདི་ནི་རྡོ་རྗེ་ཁུ་ཚུར་ཏེ། དེ་བཞིན་ཉིད་ཀྱི་ཡེ་ཤེས་ནི་རྡོ་རྗེ་སྟེ་དེའི་ཁུ་ཚུར་རོ། །དེ་ཉིད་ཅེས་བྱ་བ་གཉིས་པས་ནི་རྣལ་འབྱོར་པ་རྣམས་ཀྱིས་བ་སྟེན་པར་བྱའོ། །དེ་ཞེས་བྱ་བ་ནི་མཆོག་ཏུ་བརྟེན་པར་བྱས་པའི་ཕྱིར་རོ་ཞེས་བྱ་བར་དགོངས་སོ། །འདི་རྣམས་ཡང་དག་པར་སྒྲུབ་པ་ནི་ལས་བཞི་པ་ཡིན་ནོ། །སེམས་དཔའི་རྡོ་རྗེ་ཁུ་ཚུར་གྱི་དེ་ཁོ་ན་ཉིད་བཤད་པའོ། །དེ་ནི་དམ་ཚིག་ཕྱག་རྒྱའི་ཡང་དེ་ཁོ་ན་ཉིད་ཡིན་ནོ་ཞེས་ཤེས་ཏེ། དེའི་ཉེ་བར་འབྱུང་བ་ཡང་གང་ཞིག་ཡིན་ཞེ་ན། དམ་ཚིག་ཕྱག་རྒྱ་ཞེས་བྱ་བ་ལ་སོགས་པ་གསུངས་སོ། །དེ་ནས་ལས་ཀྱི་ཕྱག་རྒྱ་རྣམས་ཀྱི་ཡང་དེ་དང་འདྲ་བ་ཡིན་ལ། །ཕྱག་རྒྱ་ཆེན་པོའི་ཉེ་བར་འབྱུང་བ་ཡང་གང་ཞིག་ཡིན་ཞེ་ན། རྡོ་རྗེ་ཁུ་ཚུར་ཞེས་བྱ་བ་ལ་སོགས་པ་གསུངས་ཏེ། ལས་ལྷག་མ་ཞེས་ཤུགས་ཀྱིས་ཤེས་པར་བྱ་སྟེ། མཚན་མ་ལ་སོགས་པ་དེ་ཉིད་ནི་ཕྱག་རྒྱ་ཆེན་པོ་ཡིན་ནོ་ཞེས་ཀྱང་ཤུགས་ཀྱིས་གོ་བར་བྱའོ། །དེ་ལ་རྡོ་རྗེ་ཁུ་ཚུར་གྱི་དོན་གསུངས་ནས་རྡོ་རྗེ་སེམས་དཔའི་བ་སྟན་པར་བྱ་བའི་ཕྱིར། ང་རྒྱལ་མེད་ཅིང་ཞེས་བྱ་བ་ལ་སོགས་པ་གསུངས་པ་ཡིན་ཏེ། གང་བདག་མེད་པས་ཆོས་ཐམས་ཅད་ཀྱི་མཉམ་
པ་ཉིད་ཀྱི་ཡེ་ཤེས་ནི་རྡོ་རྗེ་སེམས་དཔའ་སྟེ། བདག་མེད་པ་ནི་རྡོ་རྗེའི་དོན་ཡིན་ཏེ། སྟོང་པ་ཉིད་ནི་རྡོ་རྗེར་བཤད། །ཅེས་གསུངས་པའི་ཕྱིར་མཉམ་པ་ཉིད་ཀྱི་ཡེ་ཤེས་ཀྱང་རྡོ་རྗེའི་དོན་ཡིན་པར་དགོངས་སོ། །སྟོང་པ་ཉིད་ལ་སོགས་པ་ནི་ཆོས་རྣམས་ཀྱི་སྤྱིའི་མཚན་ཉིད་དེ། དེ་ཉིད་དེ་རྣམས་ཀྱིས་མཐོང་བས་ནི་མཉམ་པ་ཉིད་ཀྱི་ཡེ་ཤེས་སོ། །ཡེ་ཤེས་དེ་ཇི་ལྟ་བུ་ཡིན་ཞེ་ན། ཞེན་པ་མེད་པ་སྟེ་ཞེན་པ་ནི་ཁྱད་པར་གྱི་མཚན་ཉིད་རྣམས་ཏེ། དེ་རྣམས་སོ་སོར་སྣང་བ་མེད་པས་ན་ཞེན་པ་མེད་པ་སྟེ། འདི་ནི་བ་སྟན་པ་ཡིན་ལ་ལྷག་མ་རྣམས་ནི་བཤད་པ་ཡིན་ནོ། །གང་ཟག་པ་དམིགས་སུ་མེད་པས་ན་ང་རྒྱལ་མེད་པའོ། །གཟུང་བ་དང་འཛིན་པའི་སོ་སོར་སྣང་བ་ནུབ་པས་ན་སྣང་བ་མེད་པའོ། །བརྗོད་པ་དང་བརྗོད་པར་བྱ་བ་མི་དམིགས་པས་ན་མཚན་མ་མེད་པའོ། །དེ་ཉིད་ཀྱིས་ན་རྡོ་རྗེ་བསྡམས་པས་མཉམ་པ་ཉིད་ཀྱི་ཡེ་ཤེས་བ་སྟན་ནས་མཐེ་བོ་གཉིས་རིང་དུ་ཞུགས་པས་དེ་ཁོ་ན་ཉིད་ཀྱི་དོན་བཤད་ལ། དེ་རྒྱབ་ཏུ་རང་གི་མཛུབ་མོའི་སེན་མོ་བཙིར་བས་མཆོག་ཉིད་དུ་བ་སྟན་པའི་ཕྱག་རྒྱ་ནི་རྡོ་རྗེ་ཁུ་ཚུར་རོ། །རྡོ་རྗེའི་ལྷ་མོ་རྣམས་ཀྱི་དེ་ཁོ་ན་ཉིད་དུ་གསུངས་ནས། རྡོ་རྗེ་ལྷ་མོ་རྣམས་ཀྱི་དེ་ཁོ་ན་ཉིད་བ་སྟན་པར་བྱ་བའི་ཕྱིར། གསང་བའི་ཞེས་བྱ་བ་ལ་སོགས་པ་གསུངས་ཏེ། མཉམ་པར་སྦྱོར་བ་ཞེས་བྱ་བ་ནི་དེ་ཁོ་ན་ཉིད་དམ་དཀྱིལ་འཁོར་རོ། །ཡེ་ཤེས་ཕ་རོལ་ཕྱིན་པ་ནི་ཡེ་ཤེས་ཀྱི་ངོ་བོ་ཉིད་ཀྱི་ཕ་རོལ་ཏུ་ཕྱིན་པའོ། །དགེ་བ་ནི་དག་པའོ། །དེ་ཉིད་ལྷ་མོ་བཅུ་གཉིས་ཀྱི་རྣམ་པས་རྡོ་རྗེའི་ཕ་རོལ་ཏུ་ཕྱིན་པ་ཞེས་བྱ་སྟེ། འོད་ནི་འབར་བའི་མདོག་གོ །དེ་ལ་ཕ་རོལ་ཏུ་ཕྱིན་པའི་ཚུལ་ལ་ནི་ཕ་རོལ་ཏུ་ཕྱིན་པ་བཅུ་སྟེ། དེ་ཡང༌། སྤྱིན་དང་ཚུལ་ཁྲིམས་བཟོད་བརྩོན་འགྲུས། །བསམ་གཏན་ཤེས་རབ་ཐབས་དང་ནི། །སྨོན་ལམ་སྟོབས་དང་ཡེ་ཤེས་ཏེ། །འདི་དག་ཕ་རོལ་ཕྱིན་པ་བཅུ། །ཞེས་གསུངས་པ་ཡིན་ནོ། །འདིར་སྟོབས་ཀྱི་ཕ་རོལ་ཏུ་ཕྱིན་པ་དང༌། ཡེ་ཤེས་ཀྱི་ཕ་རོལ་ཏུ་ཕྱིན་པ་གཉིས་སུ་བྱས་ནས་ཕ་རོལ་ཏུ་ཕྱིན་པ་བཅུ་གཉིས་ཞེས་བཤད་དོ། །རྡོ་རྗེ་སེམས་མ་དང་རྡོ་རྗེ་རིན་ཆེན་མ་ནི་སྟོབས་སོ། །རྡོ་རྗེ་ཆོས་མ་དང་རྡོ་རྗེ་ལས་མ་ནི་ཡེ་
ཤེས་ཡིན་ནོ་ཞེས་བྱ་བར་དགོངས་སོ། །རྡོ་རྗེ་སེམས་མ་ནི་བྱང་ཆུབ་ཀྱི་སེམས་ལས་སངས་རྒྱས་ཉིད་ཐོབ་པས་རྡོ་རྗེ་སེམས་མ་སྟེ། དེ་ཉིད་གསུངས་པ་ནི་བྱང་ཆུབ་སེམས་ནི་ཞེས་བྱ་བ་ལ་སོགས་པ་ཡིན་ཏེ། ཡེ་ཤེས་ཉིད་ནི་སངས་རྒྱས་ཉིད་དུ་རྣམ་པར་དག་པའི་ཕ་རོལ་ཉིད་ཡིན་ལ། དེ་སོན་ཅིང་འཐོབ་པ་ཡིན་ཏེ་དེ་བས་ན་འདི་ནི་ཕ་རོལ་ཏུ་ཕྱིན་པ་ཞེས་བྱ་བའི་དོན་ཏོ། །ཕ་རོལ་ཕྱིན་ཐོབ་ཅེས་བྱ་བ་ནི་འདིའི་མཚན་ཉིད་ཡིན་ཏེ། གང་གི་ཕྱིར་འདིས་སངས་རྒྱས་ཉིད་འཐོབ་ཅིང་བརྙེས་པར་ཤེས་པར་བྱ་ཞིང་ཁོང་དུ་ཆུད་པར་བྱའོ། །བསྡུ་བའི་དངོས་པོ་ནི་སྤྱིན་པ་ལ་སོགས་པའོ། །ལྔ་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་སྟེ། ཆོས་བཞིའི་སྤྱིན་པས་གཅིག་ཏུ་གྱུར་པ་སྟེ། ལྔ་པར་ཡང་དག་པར་གྱུར་ཅིང་རོ་གཅིག་པར་གྱུར་པ་ནི་རྡོ་རྗེ་རིན་ཆེན་མའོ། །གཉིས་པོ་དེ་དག་ནི་རིམ་པ་ཇི་ལྟ་བ་བཞིན་དུ་བསམ་པའི་སྟོབས་དང་སྦྱོར་བའི་སྟོབས་མ་ཡིན་ནོ། །གསང་བའི་མཆོག་ནི་ཐེག་པ་ཆེན་པའོ། །དེའི་ཡེ་ཤེས་ཆེན་པོ་ནི་དོན་དམ་པའི་ཡེ་ཤེས་སོ། །དེ་ཡང་ཡང་དག་པའི་ཡེ་ཤེས་ཏེ་དེའི་ཕ་རོལ་ནི་རྣམ་པར་དག་པའི་མཐའོ། །ཤེས་རབ་ཀྱི་ཕ་རོལ་ཏུ་ཕྱིན་པའི་ངོ་བོ་ཉིད་དུ་གྱུར་པས་ཕ་རོལ་ཏུ་ཕྱིན་པ་ཆེན་པོ་སྟེ། དེ་ལས་བྱུང་བ་ཞེས་བྱ་བ་ནི་ཕྱག་རྒྱའི་གཟུགས་སུ་གྱུར་པ་སྟེ། དེ་ནི་རྡོ་རྗེ་ཆོས་མའོ། །དེ་ལ་ཆོས་ནི་ཐེག་པ་ཆེན་པོ་སྟེ་དེ་ཡང་དག་པར་མཁྱེན་པའི་ཕྱིར་རོ། །བཞི་པོ་རྣམས་ཀྱི་ནང་ན་རྒྱལ་པོར་གྱུར་ཅིང་དབང་ཐོབ་པ་ཉིད་རྡོ་རྗེ་སྟེ་དོན་ཡོད་པའི་ཕྱིར་རོ། །དེ་བས་ན་རྡོ་རྗེའི་ཕ་རོལ་ཏུ་ཕྱིན་པའོ། །དེ་ཉིད་ཀྱིས་ན་ལས་རྣམས་ལ་དབང་ཐོབ་པས་རྡོ་རྗེ་ལས་མའོ། །དེ་ཇི་ལྟར་ཡེ་ཤེས་ཡིན་ཞེ་ན། སྦྱོར་བ་ཞེས་བྱ་བ་ལ་སོགས་པ་གསུངས་ཏེ། སྦྱོར་བ་ནི་འགྲོ་བའི་དོན་གྱི་བྱ་བའོ། །དེའི་ཐབས་ནི་སངས་རྒྱས་ལ་སོགས་པའི་སྐུ་སྟེ། དེ་རྣམས་སུ་རབ་ཏུ་བརྟག་པ་ནི་སྤྲུལ་པ་མཛད་པའི་ཡེ་ཤེས་སོ། །དེ་བས་ན་གཉིས་ཀ་ཡང་ཡེ་ཤེས་ཀྱི་ངོ་བོ་ཉིད་ཡིན་ནོ། །འབར་བའི་རོལ་པ་ནི་དབང་ཕྱུག་ཆེན་པོ་སྟེ་དེ་སྤྱིན་པའི་འབྲས་བུ་ཡིན་ནོ། །ཚུལ་ཁྲིམས་ནི་ལུས་ཀྱི་རྒྱན་གྱི་མཆོག་ཡིན་ནོ། །རྟོགས་པའི་དགའ་བ་ལས་ཡང་དག་པར་བྱུང་བའི་ཚིག་ནི་ཆེད་དུ་བརྗོད་པ་སྟེ་དེ་ནི་འདིར་གླུའོ། །དེ་བས་ན་ཆོས་ལ་དམིགས་པའི་བཟོད་པ་ནི་
གླུ་ཡིན་ནོ། །གར་ནི་བརྩོན་འགྲུས་ཏེ་ཕུལ་དུ་བྱུང་བའི་ལས་ཡིན་ནོ། །མྱུར་དུ་ཞེས་བྱ་བ་ནི་བརྩོན་འགྲུས་ཀྱི་སྟོབས་ཀྱིས་མྱུར་བར་བྱང་ཆུབ་ཐོབ་པའི་ཕྱིར་རོ། །བདུག་པ་ནི་ཐམས་ཅད་དུ་སྤྲོ་བ་དང་རོ་མཉམ་པའི་ཕྱིར་རོ། །དེ་བས་ན་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ནོ། །བསམ་གཏན་ནི་འདོད་པའི་ཁམས་སུ་སྐྱེས་ཀྱང་འདོད་པའི་ཉེས་པས་གོས་པར་མི་འགྱུར་ཏེ། དེ་བཞིན་དུ་མེ་ཏོག་ཀྱང་འདམ་གྱི་དྲི་མས་གོས་པར་མི་འགྱུར་རོ། །དེ་བས་ན་བསམ་གཏན་གྱི་ཕ་རོལ་ཏུ་ཕྱིན་པ་ནི་མེ་ཏོག་མ་ཡིན་ནོ། །མར་མེ་ནི་ཕྱོགས་ཐམས་ཅད་སྣང་བར་བྱེད་པ་ཡིན་ཏེ་དེ་བཞིན་དུ་སྨོན་ལམ་གྱིས་ནི་སངས་རྒྱས་དང་བཅས་པའི་སངས་རྒྱས་ཀྱི་ཞིང་རྣམས་སུ་སྐྱེ་བའི་དགེ་བའི་རྩ་བས་སྣང་བར་བྱེད་པའི་ཕྱིར་དང༌། དགེ་བའི་རྩ་བ་ཐམས་ཅད་སངས་རྒྱས་ཉིད་དུ་ཡོངས་སུ་བསྔོ་བའོ། །ཐབས་ཀྱི་ཕ་རོལ་ཏུ་ཕྱིན་པ་ནི། དེ་ཡང་སངས་རྒྱས་དང་བྱང་ཆུབ་སེམས་དཔའ་རྣམས་དྲི་མ་མེད་པའི་ཆོས་ཀྱི་སྒོ་བ་ལ་འཇོག་པ་ནི་དྲི་སྟེ། མི་མཐུན་པའི་ཕྱོགས་ཀྱི་བག་ཆགས་ཀྱི་དྲི་ངན་པ་ཐུར་དུ་སེལ་བར་བྱེད་ཅིང་ཁ་ཐུར་དུ་ལྟ་བར་བྱེད་པས་ན་དེ་སྐད་ཅེས་བྱའོ། །སེམས་ཅན་དམ་པ་གདུལ་བར་བྱ་བའི་ཐབས་ཡིན་པས་ན་ཐབས་ཆེན་པོ་སྟེ། བྱང་ཆུབ་དམ་པ་དང་འགྲོ་བའི་དོན་ནི་ཐབས་ཞེས་བྱ་སྟེ། དེ་ལ་འདོད་པ་ནི་མངོན་པར་འདོད་པ་སྟེ་བྱང་ཆུབ་ཀྱི་སེམས་ཆེན་པོའོ། །དེ་ནི་རྡོ་རྗེ་ལྕགས་ཀྱུ་སྟེ་སངས་རྒྱས་རྣམས་སྤྱན་འདྲེན་པའི་ཕྱིར་རོ། །གཞན་གྱི་དོན་གྱི་བྱ་བ་སྤྱོད་པར་བྱེད་པ་དང༌། རང་ཉིད་བྱང་ཆུབ་པའི་ཕྱིར་སྤྱོད་པ་ནི་བྱང་ཆུབ་ཀྱི་སྤྱོད་པའོ། །དེ་གཉི་ག་ནི་རྡོ་རྗེ་ཞགས་པ་སྟེ་ས་ལ་འཇུག་པ་ཡིན་པའི་ཕྱིར་རོ། །འདོད་པ་དེ་ལ་སྤྱོད་ཅིང་བརྟེན་བ་ལ་མི་འགྱུར་བའི་དངོས་པོ་ནི་རྡོ་རྗེ་ལྕགས་སྒྲོག་སྟེ་རྡོ་རྗེས་བཅིངས་པའི་ཕྱིར་ལྕགས་སྒྲོག་གོ །ཆོས་རྣམས་ཞེས་བྱ་བ་ལ་སོགས་པ་ལ་སྐྱེ་བ་མེད་ཅིང་འབྱུང་བ་མེད་ལ་གཉིས་སུ་མེད་པར་གྱུར་པས་ཆོས་ཐམས་ཅད་མ་སྐྱེས་པ་སྟེ། དེ་ཉིད་ཀྱིས་ན། གདོད་ནས་ཞི་བ་མཁའ་དང་མཉམ། །ཞེས་བྱ་སྟེ། རང་གི་ངོ་བོ་ཉིད་ཀྱིས་སྣང་བ་ཙམ་ཉིད་ཡིན་པའི་ཕྱིར་རོ། །དེ་ལྟ་བུའི་ཚིག་ལ་འཇུག་པ་ནི་རྡོ་རྗེ་དྲིལ་བུ་སྟེ། དྲིལ་བུ་ནི་སྟོང་པ་ཉིད་ཉེ་བར་སྟོན་པས་ཤེས་རབ་ཀྱི་ཕ་རོལ་ཏུ་ཕྱིན་པ་ཡིན་ཏེ་དེའི་སྒྲས་སྨྲ་བའི་
ཕྱིར་རོ། །ཚོགས་གཉིས་ཞེས་བྱ་བ་ལ་སོགས་པ་ལ་བསོད་ནམས་དང་ཡེ་ཤེས་ཀྱི་ཚོགས་ནི་སྦྱོར་བ་སྟེ། རྒྱུ་དེས་སེམས་ཅན་ཀུན་གྱི་དོན་དམ་པ་རབ་ཏུ་སྟོན་པ་ཙམ་གྱིས་སྟོན་པའི་སྣང་བ་མེད་པའི་སེམས་དེའི་རང་བཞིན་གྱི་དྲི་མ་ནི་གློ་བུར་པ་ཡིན་པས་རང་བཞིན་གྱིས་འོད་གསལ་བ་སྟེ། དེ་ནི་ཟླ་བའི་དཀྱིལ་འཁོར་ཡིན་ཏེ་ལྷ་རྣམས་ཀྱི་གདན་དང་འོད་དོ། །ཕྱག་མཚན་བཅུ་དྲུག་གི་དེ་ཁོ་ན་ཉིད་ཚིག་རྐང་བཅུ་དྲུག་གིས་སྟོན་པ་ནི། ཤིན་ཏུ་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཡང་དག་པར་སོ་སོར་རྟོག་པ་ནི་རྡོ་རྗེའི་དེ་ཁོ་ན་ཉིད་དོ། །འཛིན་པ་ནི་ལྕགས་ཀྱུའོ། །ཕྲ་བར་འབིགས་པ་ཉིད་ནི་མདའོ། །དགྱེས་པ་ནི་ལེགས་སོ་ཞེས་བྱ་བའོ། །ཟང་ཟིང་གི་སྤྱིན་པས་གདུལ་བྱ་རྣམས་དབང་དུ་བྱ་བ་ནི་སྤྲོས་པ་སྟེ། དེ་ཁོ་ན་ཉིད་ནི་རིན་པོ་ཆེའི་སྟེ། རྩའི་སྒྲ་ནི་ཏར་བ་སྟན་པ་ཡིན་ནོ། །གཟི་བརྗིད་ནི་ཉི་མའི་དེ་ཉིན་དོ། །ཆོས་ཀྱི་ཏོག་བསྒྲེང་བ་ནི་ཏོག་གིའོ། །སེམས་རྣམ་པར་འབྱེད་པ་ནི་བཞད་པའིའོ། །ཐེག་པ་ཆེན་པོའི་རྣམ་པར་དག་པ་ནི་པདྨའིའོ། །ཉོན་མོངས་པའི་རྣམ་པར་རྟོག་པའི་དགྲ་བཅོམ་པ་ནི་རལ་གྲིའིའོ། །སེམས་དཔའི་དཀྱིལ་འཁོར་ནི་འཁོར་ལོའིའོ། །དེ་ཁོ་ན་ཉིད་བརྗོད་པ་ནི་སྨྲ་བའིའོ། །སྣ་ཚོགས་པའི་ཚུལ་ཉིད་ནི་སྣ་ཚོགས་རྡོ་རྗེའིའོ། །གཞིག་པར་དཀའ་བ་ནི་གོ་ཆའིའོ། །འཇིགས་པ་ཉིད་ནི་མཆེ་བའིའོ། །བཅིང་བ་ནི་རྡོ་རྗེ་ཁུ་ཚུར་གྱི་དེ་ཁོ་ན་ཉིད་ཡིན་ནོ། །དེ་ལྟར་དཀྱིལ་འཁོར་གྱི་བདག་པོ་རྣམས་ཀྱི་དེ་ཁོ་ན་ཉིད་གསུངས་ནས། གཞིའི་དཀྱིལ་འཁོར་གྱི་དེ་ཁོ་ན་ཉིད་བ་སྟན་པའི་ཕྱིར། དཀྱིལ་འཁོར་ཞེས་བྱ་བ་ལ་སོགས་པ་གསུངས་ཏེ། གང་བཤད་པ་ཞེས་བྱ་བ་ནི་གང་དུ་གསུངས་པ་སྟེ། དེ་ཁོ་ན་ཉིད་ནི་ཡིད་ཀྱི་དཀྱིལ་འཁོར་ཏེ། ཤིན་ཏུ་རྣམ་པར་དག་པའི་ཏིང་ངེ་འཛིན་གྱི་སྙིང་པོ་སྟེ་གཅེས་པ་གང་ཡིན་པ་དེ་དེའི་ལེན་པའོ། །གདམ་པ་ཡིན་ པ་ནི་ལོངས་སྤྱོད་རྫོགས ་པའི་སྐུས་ཡང་དག་པར་བསྡུས་པ་ཡིན་པའི་ཕྱིར་རོ། །ཡེ་ཤེས་ཞེས་བྱ་བ་ནི་ཤེས་པར་བྱ་བའོ། །ཁང་པ་ནི་སེམས་ཏེ་དེའི་བརྩེགས་པ་ནི་བསྒྲེང་བའོ། །ཕྱིའི་གནས་གང་ཡིན་པར་ཚད་ཀྱིས་ལོགས་བཞི་མཉམ་པ་ཉིད་དུ་གྱུར་པ་གང་ཡིན་པ་དེ་ཉིད་ནི་ཐིག་བཞི་ཞེས་བྱ་བ་ལ། དེ་ཁོ་ན་ཉིད་དུ་ནི་བྱམས་པ་
ལ་སོགས་པ་ཡིན་ཏེ། བྱམས་པ་དང་སྙིང་རྗེ་དང་དགའ་བ་དང་བཏང་སྙོམས་ཞེས་བྱ་བ་སྟེ། ཚད་མེད་པ་བཞི་པོ་ནི་སེམས་ཅན་ཚད་མེད་པ་ལ་དམིགས་པའི་ཕྱིར་བྱམས་པ་ལ་སོགས་པ་ལ་ཚད་མེད་པ་ཞེས་བྱའོ། །འདོད་པ་ན་སྤྱོད་པའི་སེམས་ཅན་གྱི་དམིགས་པ་ནི་ཚངས་པའི་གནས་པ་ཞེས་བཤད་དོ། །ཆོས་རྗེས་སུ་དྲན་པའི་དེ་ཁོ་ན་ཉིད་ནི་ཐིག་གོ །ལྟ་བ་ཀུན་ལས་རྣམ་པར་གྲོལ་བ་ནི་ཡེ་ཤེས་ཀྱི་ཐིག་གོ །ཚུལ་ཁྲིམས་ཀྱི་ཚོགས་ནི་རྒྱན་གྱིའོ། །དད་པ་ལ་སོགས་པ་དབང་པོ་ལྔ་པོ་ནི་ར་བ་ལྔའིའོ། །རྣམ་པར་ཐར་པ་བཞི་པོ་ནི་སྒོ་རྣམས་ཀྱིའོ། །ཡང་དག་པར་སྤོང་བ་བཞི་པོ་ནི་རྟ་བབས་དང་ཀ་བ་ཟུང་གིའོ། །དྲན་པ་ཉེ་བར་གཞག་པ་བཞི་པོ་ནི་ཁྱམས་རྣམས་ཀྱིའོ། །རྫུ་འཕྲུལ་གྱི་རྐང་པ་བཞི་པོ་ནི་སྒོ་ཁྱུད་ཟུང་གིའོ། །བྱང་ཆུབ་ཀྱི་ཡན་ལག་བདུན་པོ་ནི་ཕྲེང་བ་དང་མེ་ཏོག་གི་ཆུན་འཕྱང་གིའོ། །འཕགས་པའི་ལམ་ཡན་ལག་བརྒྱང་པ་ནི་ཀ་བ་རྣམས་ཀྱི་ཡིན་ཏེ། ཐམས་ཅད་ཀྱི་ནང་དུ་གྱུར་པའི་ཕྱིར་རོ། །བསྒོམ་པའི་ལམ་ནི་སྒྲིབ་པ་ཐམས་ཅད་ལས་ངེས་པར་གྲོལ་བ་ཡིན་པས་ན་དེ་ནི་དཀར་པོ་སྟེ། ཏིང་ངེ་འཛིན་དང་ཤེས་རབ་དག་གིས་བརྟགས་ཤིང་ཡང་དག་པར་བསྡུས་པ་ཡིན་པའི་ཕྱིར་རོ། །ལམ་ཉིད་ནི་ཡེ་ཤེས་ཏེ་ཁྱད་པར་དང་བཅས་ཤིང་ཕྲ་བ་དང་བཅས་པའི་ཕྱིར་ཏེ། དེ་ཁོ་ན་ཉིད་དེ་ནི་རྔ་ཡབ་ཀྱིའོ། །ཉོན་མོངས་པ་རྣམས་ཀྱི་ས་བོན་འབྱིན་ཅིང་ཡང་དག་པར་གཅོད་པའི་དེ་ཁོ་ན་ཉིད་དེ་ནི་དྲ་བའིའོ། །ས་བོན་ཉེ་བར་འཇིག་པ་ནི་སེལ་བ་སྟེ་དེ་ཁོ་ན་ཉིད་དེ་ནི་དྲ་བ་ཕྱེད་པའིའོ། །རྣམ་པར་བསགས་ཤིང་ཚོགས་ཉེ་བར་བསགས་པའི་ཕྱིར་ཡོངས་སུ་མྱ་ངན་ལས་འདས་པ་དང༌། ཉོན་མོངས་པ་རྣམས་ཀྱི་ཟིལ་གྱིས་གནོན་པར་མ་གྱུར་ཅིག་སྙམ་སྟེ། སངས་རྒྱས་ཀྱི་སྤྱན་ལྔ་པོ་དེས་ངེས་པར་རྟོགས་པའི་དེ་ཁོ་ན་ཉིད་ཀྱི་གནས་ལྔ་ནི་ཚོན་རྩི་ལྔའོ། །མེ་ལོང་ལྟ་བུ་ལ་སོགས་པའི་ཡེ་ཤེས་ལྔའི་དེ་ཁོ་ན་ཉིད་ནི་སངས་རྒྱས་ལྔའིའོ། །བྱང་ཆུབ་ཀྱི་སེམས་ཀྱི་དེ་ཁོ་ན་ཉིད་ནི་དཀྱིལ་འཁོར་གྱི་བདག་པོའིའོ། །རྡོ་རྗེ་འཛིན་ཆེན་པོའི་དངོས་པོ་དེ་ཁོ་ན་ཉིད་མི་གནས་པའི་མྱ་ངན་ལས་འདས་པ་སྟེ། འཁོར་བ་དང་མྱ་ངན་ལས་འདས་པ་དག་ལ་མི་གནས་པའི་ཕྱིར་ཏེ། དེ་ལ་རིམ་
པ་བཞིན་དུ་ཆགས་པ་དང་བྲལ་བ་དང༌། །ཆགས་པ་དག་གིས་ཏེ། དེ་ལ་ནམ་མཁའ་དང་མཉམ་པའི་ཆོས་ཐམས་ཅད་ཀྱི་ཡེ་ཤེས་ཀྱི་མཆོག་རྣམ་པར་དག་པའི་མཐར་ཐུག་པ་ནི་ཆགས་པ་དང་བྲལ་བའོ། །ཆགས་པ་ནི་ལྷ་ལ་སོགས་པའི་རྣམ་བར་ཉེ་བར་ཞེན་པའི་སེམས་ནི་ཆགས་པའོ། །ཆགས་པ་དང་དང་བྲལ་བར་གྱུར་ནས་ཆགས་པ་ག་ལས་བྱུང་ཞེ་ན། ཡེ་ཤེས་དེ་ཡི་རྒྱན་བཤད་པ། །ཞེས་བྱ་བ་གསུངས་ཏེ། ནམ་མཁའ་དང་མཉམ་པའི་ཡེ་ཤེས་དེ་ཉིད་ཀྱིས་ཚོགས་བསགས་པའི་སྟོབས་ཀྱིས་ལྷུན་གྱིས་གྲུབ་པའི་ཞེན་པའི་སེམས་སུ་བྱེད་པ་ནི་ཡིད་བཞིན་གྱི་ནོར་བུ་དང་འདྲའོ། །དེ་ཡང་ཅི་ཞིག་ཡིན་ཞེ་ན། ཆགས་བྲལ་ལས་ཞེས་བྱ་བ་ལ་སོགས་པ་གསུངས་ཏེ། གཞན་ཡིན་ནོ་ཞེས་བྱ་བ་ནི་ཆགས་པ་ཞེས་བྱ་བའི་དོན་ཏོ། །དེ་ལ་ཆགས་པ་དང་བྲལ་བས་བྱང་ཆུབ་པ་ནི་ཆོས་ཀྱི་སྐུའོ། །ཆགས་པས་ཞེས་པའི་སེམས་ནི་ ལོངས་སྤྱོད་རྫོགས་པ ་དང་སྤྲུལ་པའི་སྐུའོ། །དེ་བས་ན་གཉིས་ཀ་བྱང་ཆུབ་ཀྱི་སེམས་ཡིན་ཏེ་བྱང་ཆུབ་དང་སེམས་ཞེས་བྱ་བ་ཡིན་ནོ། །ཆགས་བྲལ་ལས་ཆགས་བ་ཞེས་བྱ་བ་ནི་མཚན་ཉིད་དང་མཚན་ཉིད་ཅན་གྱི་དབྱེ་བས་ལྔ་པ་འདོད་ཆགས་དང་བྲལ་བའི་མཚན་ཉིད་ཅན་ནི་བྱང་ཆུབ་བོ། །ཆགས་པའི་མཚན་ཉིད་ནི་སེམས་ཞེས་བྱ་བའི་དོན་ཏོ། །འདི་ཡང་ཞེན་པའི་སེམས་ལ་སེམས་ཀྱི་སྒྲར་བཤད་དོ། །ཐུན་མོང་གི་སྒྲ་ཡིན་ཡང་ལ་ལ་ཁྱད་བར་དུ་བ་སྟན་པའམ། སྔ་མའི་ཚིག་མི་མངོན་པར་བྱས་པའོ། །བྱང་ཆུབ་འདོད་ཆགས་དང་བྲལ་བའི་སེམས་ཡིན་ན་འདོད་ཆགས་ཞེས་གང་ལས་བཤད་ཅེ་ན། གང་གི་ཕྱིར་འཇིག་རྟེན་ཞེས་བྱ་བ་ལ་སོགས་པ་གསུངས་ཏེ། འཇིག་རྟེན་ནི་འཁོར་བར་ཡང་དག་པ་མ་ཡིན་པར་ཡོངས་སུ་བརྟགས་པ་སྟེ། ཡང་དག་མ་ཡིན་ཀུན་རྟོག་ནི། །སེམས་དང་སེམས་བྱུང་ཁམས་གསུམ་པ། །ཞེས་བཤད་པའི་ཕྱིར་རོ། །དེ་ཡང་གང་གི་ཕྱིར་ཆགས་པ་དང་བྲལ་བས་འདུལ་ཞིང་བསལ་བའི་འཇིག་རྟེན་གང་ཡིན་པ་དེ་ལ་དེ་སྐད་ཅེས་བྱའོ། །ལྷའི་སྐུ་དང་གསུང་དང་ཐུགས་ཀྱི་རྣམ་པ་ལྟ་བུ་ནི་ཕྱག་རྒྱ་སྟེ་དེའི་དངོས་གྲུབ་ནི་རྣམ་པ་དེས་རྣལ་འབྱོར་པ་རྫོགས་པ་སྟེ། དེ་ཡང་ཆགས་པ་ལས་བྱུང་བ་ཡིན་ནོ། །དེར་ནི་ཞེས་བྱ་བ་ནི་ཆགས་པ་དང་བྲལ་བའོ། །ཐབས་ནི་སྒྲུབ་པའོ། །བསྒོམ་པ་ནི་དེ་ཉིད་དུ་ཡུན་རིང་ཞིང་
གུས་པས་རྒྱུན་མི་འཆད་པར་ཡིད་ལ་བྱེད་ཅིང་བསྒོམ་པའོ། །དེ་ལ་མན་ངག་ཇི་ལྟ་བ་བཞིན་དུ་ཡོངས་སུ་བསྐྱེད་ལ། སྐུ་དང་གསུང་དང་ཐུགས་སེམས་ཙམ་དུ་ཡིད་ལ་བྱེད་པ་ནི་ཆགས་པའི་བསྒོམ་པའོ། །ཅི་ལྟ་བའི་རྣམ་པ་མེད་པས་ནམ་མཁའ་དང་འདྲ་བའི་ཚུལ་གྱིས་ཡིད་ལ་བྱེད་པ་ནི་འདོད་ཆགས་དང་བྲལ་བར་བསྒོམ་པའོ། །དངོས་གྲུབ་ཐམས་ཅད་ནི་སྐུ་གསུམ་གྲུབ་པའོ། །བསྒོམ་པ་གཉིས་ཀ་ལ་ངེས་པར་སྤྱར་བའི་ཕྱིར་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་འཁྲུལ་པའི་མཚན་ཉིད་འཇིག་རྟེན་པའི་གསལ་པ་དེ་ནི་འདོད་ཆགས་དང་བྲལ་བ་བསྒོམ་པ་ཡིན་ཏེ། འདོད་ཆགས་ཀྱི་བསྒོམ་པ་ལ་ཡང་དེ་བཞིན་དུ་སྤྱད་པར་བྱ་སྟེ། འབའ་ཞིག་པ་ནི་མ་ཡིན་ནོ། །ཡང་རྣལ་འབྱོར་པས་འདོད་ཆགས་དང་བྲལ་བའི་བསྒོམ་པས་གདུལ་བྱ་རྣམས་གདུལ་བར་མི་ནུས་པ་ལ་བསླབ་པའི་ལྷག་པར་མོས་པའི་དབང་དུ་མཛད་ནས་ཞེས་བྱ་བ་དེའི་སྦྱོར་བ་གང་ཡིན་ཞེ་ན། ཇི་ལྟར་གདུལ་བྱ་དག་གྱུར་པ། །ཞེས་བྱ་བ་གསུངས་ཏེ། ཇི་ལྟར་གྱི་སྒྲ་ནི་ངེས་པར་བ་སྟན་པའི་དོན་ཏེ། འདི་ལྟར་དག་པ་འབའ་ཞིག་སེམས་ཙམ་ལྷ་ཡིན་ནོ་ཞེས་བྱ་བ་འདི་ནི་ཆགས་པའི་བསྒོམ་པ་འབའ་ཞིག་པ་སྟེ་དེའི་སྦྱོར་བ་ཞེས་བྱ་བའི་དོན་ཏོ། །དེ་ཡང༌། དེ་ཡི་གཟུང་མིན་དེ་ཡི་འཛིན་པ་མིན། །ཡེ་ཤེས་གཞན་འཛིན་དེ་ཡང་སྟོང་པ་ཡིན། །དེ་ལྟ་མིན་ཡང་ཡེ་ཤེས་རང་བཞིན་སྣང༌། །མངོན་སུམ་དག་ནི་རྡོ་རྗེ་འཆང་བའི་བདེ། །ཞེས་གསུངས་པ་ཡིན་ནོ། །གང་ཡང་ཕ་རོལ་ཉིད་ཀྱིས་འཛིན་པར་བྱེད་པ་ཉིད་དང༌། གཟུང་བར་བྱ་བ་ཉིད་དུ་བསྒོམ་པ་དེ་ནི་དེ་ལས་ཕྱག་རྒྱའི་དངོས་གྲུབ་མི་འབྱུང་སྟེ། ཞེན་པས་ཆགས་པ་སྒོམ་པར་བྱེད་པ་ནི་ཀུན་དུ་མཆོད་པར་འགྱུར་རོ། །ཆགས་པ་དང་བྲལ་བའི་བསྒོམ་པས་བདེན་པ་དང་བདེན་པ་མ་ཡིན་པ་བསྔགས་སོ་ཞེས་བྱ་བའི་དོན་ཏོ། །ཀུན་དུ་མཆོད་པར་འགྱུར་ཞེས་བྱ་བ་མི་རིགས་ཏེ། ཆགས་པ་བསྒོམ་པ་འབའ་ཞིག་གིས་ཆོས་ཀྱི་སྐུ་འཐོབ་པར་མི་འགྱུར་ལ་ ལོངས་སྤྱོད་རྫོགས་པ ་དང༌། སྤྲུལ་པའི་སྐུ་ཡང་དེ་ལ་བརྟེན་པ་ཡིན་པས་རེ་ཞིག་དེ་ཡང་འཐོབ་པར་མི་འགྱུར་རོ། །འདིར་བརྗོད་པར་བྱ་སྟེ་སྐུ་གསུམ་གྱི་མཚན་ཉིད་འདི་ནི་སངས་རྒྱས་ཉིད་དང་བྱང་ཆུབ་སེམས་དཔའི་ཕུན་སུམ་ཚོགས་པ་དེ་ནི་
འབྱུང་བར་འགྱུར་ལ། དེའི་སྟོབས་ཀྱིས་སངས་རྒྱས་ཉིད་དུ་ཡང་ཕྱིར་འགྱུར་བ་ཡིན་ནོ། །གཞན་ཡང་མཚན་ཉིད་ཅེས་བྱ་བ་ལ་སོགས་པ་ལ། མཚན་ཉིད་ནི་ཕྱག་རྒྱ་ཆེན་པོ་ལ་སོགས་པ་གང་ཡང་དག་པར་བཤད་པ་སྟེ། བཤད་པ་དེས་མཚན་ཉིད་མཚོན་པར་འགྱུར་ཏེ་མཚན་ཉིད་དང་མཚན་གཞི་ཞེས་བྱ་བའི་དོན་ཏོ། །དེ་ནས་ཅི་ཞིག་ཡིན་ཞེ་ན། ཕྱག་རྒྱ་ཡིས་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཕྱག་རྒྱ་ཞེས་བསྒོམས་ན་དེའི་ཆོ་རྣལ་འབྱོར་པ་སྦྱོར་བ་རྫོགས་པ་ན་ཕྱག་རྒྱ་དང་གཅིག་ཏུ་འགྱུར་རོ། །རྒྱས་བཏབ་པའི་མཚན་ཉིད་ཀྱི་བདག་ཉིད་ཅན་དུ་གང་གི་ཚེ་རྒྱས་བཏབ་པ་ནི་ཉེ་བར་མཚོན་པའི་དངོས་པོ་ལྷ་ལ་སོགས་པའི་རྣམ་པར་ཤེས་པར་བྱ་ཞིང་བདག་ཉིད་མོས་པར་བྱས་ལ་བསྒོམས་ན། དེའི་ཚེ་རྒྱས་བཏབ་པར་འགྱུར་ཞིང་རྒྱས་བཏབ་པ་ནི་ལྷའི་བདག་ཉིད་ཅན་དུ་འགྱུར་རོ། །དེ་བས་ན་བྱང་ཆུབ་ཀྱི་སེམས་ཀྱི་བདག་ཉིད་ཅན་རྡོ་རྗེ་སེམས་དཔའི་ཕྱག་རྒྱ་དེ་བཞིན་དུ་ཤེས་ཤིང་བསྒོམས་ན་རྣལ་འབྱོར་པ་རྡོ་རྗེ་སེམས་དཔའི་སྐུ་གསུང་ཐུགས་ཀྱི་བདག་ཉིད་ཅན་དུ་འགྱུར་རོ། །གང་དེ་ལྟར་སྐད་ཅིག་མ་རེ་རེ་ཞིང་བྱང་ཆུབ་ཀྱི་སེམས་བསྒོམས་པས་ཆགས་པ་དང་བྲལ་བ་ལ་རབ་ཏུ་ཞེན་པར་བྱའི། ཆགས་པ་འབའ་ཞིག་གིས་ནི་མ་ཡིན་ཏེ། དེ་བས་ན་མཚན་དང་ཞེས་བྱ་བ་ལ་སོགས་པ་གསུངས་ཏེ། མི་བསྐྱོད་པ་ལ་སོགས་པའི་མཚན་ཉིད་དང་མཚན་གཞིས་འབྲེལ་པ་ཕྱེ་ནས་མཚན་ཉིད་སྣང་བཞིན་པས་མཚན་གཞི་གཟུགས་ཉིད་ཤེས་ནས་རྣལ་འབྱོར་གྱི་རྩོམ་པ་རྣམས་ལ་མོས་པ་བརྟན་པོས་ཀུན་དུ་སྤྱོད་པ་ཡིན་གྱི། ཆགས་པའི་སྒོམ་པ་འབའ་ཞིག་ནི་མ་ཡིན་ནོ། །དེས་ཅིར་འགྱུར་ཞེ་ན། ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་མཚན་ཉིད་ཀྱིས་ཡང་དག་པར་གྲུབ་པ་ཡོངས་སུ་རྫོགས་པ་མཚན་གཞི་ཡང་དེ་བཞིན་དུ་དངོས་པོ་དག་པར་འགྱུར་ཏེ། སྒྲིབ་པ་ཟད་པ་ཐོབ་པས་མྱུར་ཞིང་མགྱོགས་པར་རྡོ་རྗེ་འཆང་བའི་སྐུ་གསུམ་གྱི་བདག་ཉིད་ཅན་དུ་འགྲུབ་པར་འགྱུར་ཏེ། དེ་བས་ན། ཞེན་པ་ཀུན་དུ་མཆོད་པར་འགྱུར། །ཞེས་བྱ་བ་ནི་ལེགས་པར་གསུངས་པ་ཡིན་ནོ། །མཚན་ཉིད་དང་མཚན་མ་དང་ཕྱག་རྒྱ་དང་མིང་དང་བརྡ་ཞེས་བྱ་བ་ནི་རྣམ་གྲངས་ཡིན་ནོ། །དེ་བས་ན་མཚན་ཉིད་ཀྱི་སྐབས་སུ་བརྡ་གཞན་དག་གི་ཡང་
དོན་བཤད་པའི་ཕྱིར། གཡས་པའི་ཞེས་བྱ་བ་ལ་སོགས་པ་གསུངས་ཏེ། རྨི་ལམ་ལ་སོགས་པའི་སྲིད་པས་ཞུགས་པའི་ལྷ་ལ་སོགས་པའི་ཕྱག་གཡས་པའི་མཚན་མའི་དོན་ནི་ཤེས་རབ་བོ། །ཕྱག་གཡོན་པའི་མཚན་མའི་དོན་ནི་ཐུགས་རྗེའོ། །ཕྱག་གཉིས་ཀའི་མཚན་མ་ནི་ཏིང་ངེ་འཛིན་གཉིས་སོ། །རྐང་པ་གཉིས་ཀྱི་མཚན་མ་ནི་ཚོགས་གཉིས་སོ། །སོར་མོ་ལྔ་ལ་སོགས་པའི་སྦྱོར་བ་ནི་སངས་རྒྱས་ལྔར་མངོན་པར་བྱང་ཆུབ་པའི་ལྷ་ཉི་ཤུ་རྩ་ལྔའོ། །སོར་མོ་རེ་རེས་ནི་ནམ་མཁའ་ལ་སོགས་པའི་དཀྱིལ་འཁོར་རོ། །ལྟེ་བ་ལ་སོགས་པར་རེག་པ་ནི་ལྷ་མོ་ལྔ་སྟེ། འདི་དག་ནི་ལུས་ཀྱི་བརྡའོ། །གསུང་གི་བརྡ་བ་སྟན་པ་ནི་བྱང་ཆུབ་ལྔར་ཞེས་བྱ་བ་ལ་སོགས་པ་གསུངས་པ་ཡིན་ཏེ། སངས་རྒྱས་ལྔ་མངོན་པར་བྱང་ཆུབ་པའི་སྒྲ་ནི་ཡེ་ཤེས་ལྔའམ་དེའི་དཀྱིལ་འཁོར་གྱི་དོན་ཏོ། །སྔོན་གྱི་སྒྲ་ནི་སྔ་མའོ། །རྒྱབ་ཀྱི་སྒྲ་ནི་ཕྱི་ནས་སོ། །ཐོག་མའི་སྒྲ་ནི་རྒྱུའི་དོན་ཏོ། །ཐ་མའི་སྒྲ་ནི་འབྲས་བུའི་དོན་ཏོ། །དེ་ལ་རྒྱུ་ནི་བྱང་ཆུབ་སེམས་དཔའ་རྣམས་སོ། །འབྲས་བུ་ནི་མི་བསྐྱོད་པ་ལ་སོགས་པའོ། །འོ་ན་རྣམ་པར་སྣང་མཛད་ཅི་རྒྱུ་ཡིན་ནམ། འོན་ཏེ་འབྲས་བུ་ཡིན་ཞེ་ན། སངས་རྒྱས་ཞེས་བྱ་བ་ལ་སོགས་པ་གསུངས་ཏེ་དེ་ནི་གོ་སླའོ། །དེ་ལྟ་ན་སངས་རྒྱས་ནི་གང་ཞིག་ཡིན། རྟོགས་པར་བྱ་བ་ནི་གང་ཞིག་ཡིན། སངས་རྒྱས་ཀྱི་ཞིང་ནི་གང་ཞིག་ཡིན། །བྱང་ཆུབ་ཀྱི་སེམས་ནི་གང་ཞིག་ཡིན་ཞེ་ན། དེའི་ཕྱིར་རང་གི་སེམས་ཞེས་བྱ་བ་ལ་སོགས་པ་གསུངས་ཏེ། རང་གི་སེམས་ཉིད་སངས་རྒྱས་ཀྱི་ཞིང་དང་བྱང་ཆུབ་ཀྱི་སེམས་ཀྱང་ཡིན་ནོ་ཞེས་བྱ་བར་སྤྱར་བར་བྱ་སྟེ་ལྷག་མ་ནི་གོ་སླའོ། །དྲིས་པ་སེམས་ནི་ཐོག་མ་མེད་པ་ཡིན་ལ། བྱང་ཆུབ་པ་ནི་ཐོག་མ་དང་ལྡན་པ་ཡིན་ན། ཅིའི་ཕྱིར་སེམས་དེ་ཉིད་བྱང་ཆུབ་ཀྱི་སེམས་ཡིན་ཞེ་ན། དེའི་ཕྱིར་རང་བཞིན་ཞེས་བྱ་བ་ལ་སོགས་པ་གསུངས་ཏེ། རང་བཞིན་ནི་སེམས་ཀྱི་ཆོས་ཉིད་དོ། །དེས་འོད་གསལ་བའི་དྲི་མ་མེད་པ་ནི་སེམས་ཅན་རྣམས་སོ། །ཀུན་དུ་ཞེས་བྱ་བའི་གནས་སྐབས་ཐམས་ཅད་དུའོ། །དེ་ལྟར་ཡང་དག་པར་དྲན་པ་བཅོམ་ལྡན་འདས་ཀྱིས་གསུངས་ཏེ། ཅིའི་ཕྱིར་དེ་འོད་གསལ་བ་ཡིན་ནམ་ཞེ་ན། དྲི་མ་ལྷག་མ་རྣམས་ནི་དེའི་གློ་
བུར་བ་ཡིན་ཏེ། ནམ་མཁའ་ལ་སྤྲིན་དང་དུ་བ་ལ་སོགས་པ་དང་འདྲའོ། །དེ་བས་ན་གློ་བུར་བའི་སྒྲིབ་པའི་དྲི་མ་གང་དང་གང་ཡིན་པ་ཟད་ཅིང་ཡང་དག་པའི་མཚན་ཉིད་ཅན་ནི་ཐོག་མའི་བྱང་ཆུབ་བོ། །རང་བཞིན་གྱིས་དག་པའི་མཚན་ཉིད་ཀྱང་བྱང་ཆུབ་ཡིན་ཏེ་ཐོག་མ་མེད་པའི་རང་བཞིན་དང་འདྲའོ། །དེ་བས་ན་བྱང་ཆུབ་ནི་ཐོག་མ་དང་ཐ་མ་མེད་པ་ཡིན་ལ། སངས་རྒྱས་ཀྱང་ཐོག་མ་དང་ཐ་མ་མེད་པ་ཡིན་ལ། བྱང་ཆུབ་ཀྱི་སེམས་ཀྱང་ཐོག་མ་དང་ཐ་མ་མེད་པ་ཡིན་ཏེ། བྱང་ཆུབ་ཀྱང་ཡིན་ལ་སེམས་ཀྱང་ཡིན་པས་དེ་སྐད་ཅེས་བྱའོ། །དང་པོ་ནི་བཅོམ་ལྡན་འདས་དཔལ་མཆོག་དང་པོ་སྟེ། འདི་ནི་སྙིང་གར་རྡེ་བས་པ་ཞེས་བྱ་བར་འགྱུར་རོ། །དེ་ཅིའི་ཕྱིར་ཞེ་ན། རང་ཉིད་བརྟན་པར་གྱུར་པའི་ཕྱིར་རོ། །འོད་དཔག་ཏུ་མེད་པ་ནི་སྐྲ་འཛིན་པར་བཤད་དེ། གང་གི་ཕྱིར་རལ་པའི་དབུས་ན་བཞུགས་པ་ཡིན་ནོ། །འོ་བྱེད་པ་ནི་རྡོ་རྗེ་སྨྲ་བའོ་ཞེས་བྱ་བ་ནི་གསལ་བ་ཉིད་དོ། །མཉམ་སྦྱོར་བ་ནི་རྣམ་པར་སྣང་མཛད་ཡིན་པ་ནི་གཞི་གཉིས་སུ་མེད་པ་ཡིན་པའི་ཕྱིར་རོ། །དོན་གྱི་ཆར་ནི་དོན་གྱི་རབ་ཏུ་དབྱེ་བའོ། །བུ་མོའི་དོན་ནི་ཕ་རོལ་ཏུ་ཕྱིན་པ་རྣམས་སོ། །གཞན་དུ་མི་རྟག་ཅེས་བྱ་བ་ནི་ཕྱི་རོལ་གྱི་བུད་མེད་ནི་མ་ཡིན་ནོ་ཞེས་བྱ་བའི་དོན་ཏོ། །བུད་མེད་ཀྱི་སྒྲའི་དོན་ནི་གང་བྱང་ཆུབ་སེམས་དཔའ་རྣམས་ཀྱི་བསྒོམ་པའོ། །ལྷ་མོའི་ཞེས་བྱ་བའི་སྒྲའི་དོན་ནི་མཆོད་པའི་ལྷ་མོ་མི་བསྐྱོད་པ་ལ་སོགས་པ་ཉི་ཤུའོ། །རང་གི་ཆུང་མ་དང་རང་གི་རིག་པའི་དོན་ནི་རང་གི་རིགས་ཀྱི་རིག་མའོ། །གཞན་གྱི་ཆུང་མ་དང་གཞན་གྱི་སྡུག་པའི་སྒྲ་ནི་རིགས་གཞན་གྱི་རིག་མ་རྣམས་སོ། །གཅི་བ་དང་སྒྲའི་དོན་ནི་རྡོ་རྗེ་ཡེ་ཤེས་སོ། །བཤད་བ་དང་པདྨའི་སྒྲ་ནི་ཆོས་ཀྱི་ཡེ་ཤེས་སྒྲིབ་པ་མེད་པ་ཡིན་ནོ། །རང་གི་རྡོ་རྗེ་ཞེས་བྱ་བ་ནི་རྣམ་པར་སྣང་མཛད་དུ་གྱུར་པའི་བདག་ཉིད་ཀྱི་རྡོ་རྗེ་དང་དེའི་རིག་པའི་པདྨ་སྟེ། རང་གི་ས་བོན་ནི་དེ་ཉིད་ཀྱི་ཡེ་ཤེས་ཀྱི་ཁུ་བའོ། །མཆོད་པར་བྱ་ཞེས་བྱ་བ་ནི་བསྐྱེད་པར་བྱ་བའོ། །ཇི་ལྟར་བྱ་ཞེ་ན། ཚོགས་གཉིས་ཀྱི་ཞེས་བྱ་བ་ལ་སོགས་པ་གསུངས་ཏེ། གཉིས་མིན་གཉིས་ཉིད་ཅེས་བྱ་བ་ནི་དེ་ལྟར་གཉིས་སུ་མེད་པར་གྱུར་པ་ལས། གཉིས་ཉིད་ལ་བརྟེན་ཏེ་ཐུགས་རྗེས་གཞན་རྣམས་གོ་བར་བྱ་བའི་ཕྱིར་རོ། །ཕྱིས་
ནི་མཉམ་སྦྱོར་བ་ཞེས་བྱ་བ་སྟེ། ཡང་གཉིས་སུ་མེད་པར་གྱུར་པའོ། །བྱིན་གྱིས་བརླབ་ཅེས་བྱ་བ་ནི་ཡེ་ཤེས་ཀྱི་ཁུ་བ་དེ་ཉིད་ལས་དེ་བསྐྱེད་པར་བྱ་བ་སྟེ་འདི་ནི་དཀྱིལ་འཁོར་སྒྲུབ་པའོ། །སངས་རྒྱས་ཀྱི་རོལ་མོ་ནི་རྡོ་རྗེ་གར་རོ། །མཉམ་སྦྱོར་བས་ཞེས་བྱ་བ་ནི་བསྒོམ་བཞིན་པས་སོ། །རྒྱུ་དང་མི་རྒྱུ་རྣམས་ཀྱི་ཞེས་བྱ་བ་ནི་དཀྱིལ་འཁོར་པ་རྣམས་དང་བཅས་པས་སམ། སེམས་ཅན་ཐམས་ཅད་རང་གི་ལྷའི་གཟུགས་སུ་ལྷག་པར་མོས་པས་སོ། །རོལ་པ་ཞེས་བྱ་བ་ནི་རྣལ་འབྱོར་གྱི་རང་བཞིན་གྱིས་བྱུར་བས་སོ། །སྐུ་གསུང་ཐུགས་ནི་བསྒོམས་པས་སོ་ཞེས་བྱ་བ་ནི་རང་གི་ལྷའི་སྦྱོར་བས་ཞེས་བྱ་བའི་དོན་ཏོ། །རྟ་བབས་དང་ཀ་བ་བརྒྱང་ཀྱིས་ཉེ་བར་མཛེས་པར་བྱ་བའི་ནང་གི་ཀ་བ་བརྒྱང་ཀྱི་མདུན་གྱི་གནས་རྣམས་སུ་དཀྱིལ་འཁོར་བརྒྱང་བྱ་བར་བ་སྟན་ལ། རྡོ་རྗེ་ལྷ་མོ་ནི་རྡོ་རྗེ་སྒེག་མོ་ལ་སོགས་པ་བརྒྱང་ད་དེ་རྣམས་ཀྱི་ཚོགས་ཀྱིས་མཆོད་པའོ། །ལྷའི་སྣམ་བུ་མཚམས་ཀྱི་རེའུ་ཆ་དོར་ལ། ལྔ་པོ་རེ་ཆར་རྡོ་རྗེ་དེ་བཞིན་གཤེགས་པའི་དཀྱིལ་འཁོར་ལྔ་འདི་རྣམས་ལྷ་རེ་རེ་ཞིང་ལྷ་ལྔ་ལྔ་ཡོད་པར་བྱ་བ་དང༌། དྲ་བ་དང་རྔ་ཡབ་ལ་སོགས་པས་བརྒྱན་པ་དང༌། ཁྱམས་ཀྱི་ནང་དུ་ནི་ལྷ་ཉི་ཤུ་རྩ་ལྔ་དང་ལྡན་པར་ཅི་རིགས་པར་བྱིན་གྱིས་བརླབ་པར་བྱའོ། །དབུས་མའི་ཆ་ཞེས་བྱ་བ་ལ་ཇི་ལྟར་དབུས་མའི་ཆ་ཡིན་ཞེ་ན། ཆ་དགུ་རུ་ནི་རྣམ་དབྱེ་བ། །ཞེས་བྱ་བ་གསུངས་ཏེ། དཀྱིལ་འཁོར་གྱི་ངོས་རེ་རེ་ཞིང་ཆ་དགུར་བགོས་ལ་ཚངས་པའི་ཐིག་གི་ངོས་གཉིས་སུ་རེ་རེ་ཞིང་ཕྱེད་དང་ལྔའི་ཆར་བུའོ་ཞེས་བྱ་བའི་དོན་ཏོ། །དེ་ཞེས་བྱ་བ་ནི་སྒོར་རོ། །སྒོའི་ཚད་ཇི་ཙམ་པ་སྒོ་ཁྱུད་དང་ལྷའི་སྣམ་བུའི་ཚད་ཀྱང་དེ་ཙམ་ཡིན་ནོ། །སྒྲོའི་ཕྱེད་ཀྱི་ཚད་ནི་ཐམས་ཅད་དུ་ཁྱམས་སྒོ་འགྲམ་དུ་དེ་བཞིན་དུ་སྒོའི་ལོགས་ཀྱི་ཡིན་ནོ། །ནང་གི་དཀྱིལ་གི་དཀྱིལ་འཁོར་ནི་ནང་གི་རིམ་པ་སྟེ། དེ་དང་མཉམ་ཞེས་བྱ་བ་ནི་ཕྱིའི་རིམ་པ་དང་མཉམ་པའོ། །ཡོངས་སུ་མ་ཆད་པ་ནི་ཚད་མཐའ་ཡས་པ་ཉིད་དོ། །དེ་སྐད་དུ། །དེ་ཀུན་རྟ་བབས་མེད་པའོ། །ཞེས་བཤད་པ་ཡིན་ཏེ། རྟ་བབས་མེད་པ་ནི་རྟ་བབས་དང་ཀ་བ་ལ་སོགས་པ་མེད་པའོ། །ཚད་གསུངས་པ་ནི་སྒོ་ཁྱུད་ཅེས་བྱ་བ་ལ་སོགས་པ་གསུངས་པ་ཡིན་ཏེ། སྒོ་ཁྱུད་དང་དཀྱིལ་འཁོར་ཀུན་དང༌། སོགས་
པའི་སྒྲས་སྒོ་དང་སྒོ་འགྲམ་དང་ལོགས་དང་ཡ་ཕུགས་ནི་ཕྱིའི་རིམ་པ་ལ་ལྟོས་ནས་ཕྱེད་ཀྱི་ཚད་དུ་བྱས་པ་གང་ཡིན་པ་དེ་ནི་སྒོ་ཁྱུད་དཀྱིལ་འཁོར་ཕྱེད་དེ་ཆ་དགུ་རུ་ནི་ཞེས་བྱ་བ་ནི་དཀྱིལ་འཁོར་བརྒྱང་དབུས་མ་དང་བཅས་པ་སྟེ། དེ་རྣམས་ལ་མཚམས་སུ་དཀྱིལ་འཁོར་བརྐྱང་ནས་དཀྱིལ་འཁོར་བཞི་དོར་ལ། ལྷག་མ་ལྔ་རྣམས་སུ་རེ་རེ་ཞིང་དཀྱིལ་འཁོར་ལྔས་བརྒྱན་པར་བྱའོ། །མཐར་ནི་ཁྱམས་དང་ལྡན་པར་བྱ་སྟེ། དེ་དང་མཉམ་པར་ཞེས་བྱ་བར་སྤྱར་རོ། །དེ་བས་ན་དོན་གྱི་ཤུགས་ཀྱིས་ཕྱི་རོལ་གྱི་རིམ་པ་ཡང་མཐར་ཁྱམས་དང་ལྡན་པར་ཤེས་པར་བྱའོ། །གྲུ་བཞི་པ་ཞེས་བྱ་བ་ནི་ཕྱིའི་རིམ་པ་དང་འདྲ་བ་གྲུ་བཞི་ཉིད་དོ། །ཁ་དོག་ལྔ་དང་ཡང་དག་ལྡན། །ཞེས་བཤད་པ་དེ་ཉིད་གསལ་བར་བྱ་བའི་ཕྱིར། ལྟ་བ་ལྔ་པོ་ཞེས་བྱ་བལ་སོགས་པ་གསུངས་ཏེ་ཚོན་གྱིས་ཁ་དོག་བསྒྱུར་བར་བྱའོ་ཞེས་བྱ་བར་སྤྱར་རོ། །མཉམ་སྦྱོར་བས་ཞེས་བྱ་བ་ནི་འབྲེལ་པས་མཚོན་པ་སྟེ་དེ་དང་སྤྱར་རོ་ཞེས་བྱ་བའི་དོན་ཏོ། །ཇི་ལྟ་བུའི་ཚུལ་གྱིས་ཤེ་ན། ཁ་དོག་ལྔ་ཡིས་སོ། །དེ་བཞིན་གཤེགས་ཞེས་བྱ་བ་ནི་སངས་རྒྱས་ལྔའི་རང་བཞིན་དུ་བྱས་པ་སྟེ། དེ་ཉིད་ཀྱིས་ན་འཇིག་ཚོགས་ལ་ལྟ་བ་ལ་སོགས་པ་ཤིན་ཏུ་བགྲོད་པར་དཀའ་བ་ཆེན་པོ་རབ་ཏུ་བགྲོད་དཀའ་བས་སོ། །སངས་རྒྱས་ལྔ་ཞེས་བྱ་བ་ནི་རྣམ་པར་སྣང་མཛད་དང༌། མི་བསྐྱོད་བ་དང་རིན་ཆེན་འབྱུང་ལྡན་དང༌། འོད་དཔག་ཏུ་མེད་པ་དང༌། དོན་ཡོད་པར་གྲུབ་པ་སྟེ། དཀྱིལ་འཁོར་གྱི་དབུམ་མ་དང་ཤར་དང་ལྷོ་དང་ནུབ་དང་བྱང་དང་རིམ་བཞིན་དུའོ། །ཁ་དོག་ལྔའི་ཞེས་བྱ་བ་ནི་ཁ་དོག་ལྔ་རྣམས་ཀྱིས་སོ། །དེ་ཏིང་ངེ་འཛིན་གྱིས་ཞེས་བྱ་བ་ནི་མཉམ་པར་གཞག་པས་སོ། །ཇི་ལྟར་མཛེས་པར་བྱ་བ་ནི་མི་མཛེས་པ་ལ་སོགས་པ་མི་མཐུན་པའི་ཕྱོགས་རྣམས་སོ། །མཚམས་ཀྱི་སངས་རྒྱས་རྣམས་བསྡུས་པ་ནི་རྣམ་པར་སྣང་མཛད་དོ། །སངས་རྒྱས་ལྷག་མ་རྣམས་ནི་རང་གི་ཕྱོགས་ཀྱི་སངས་རྒྱས་རྣམས་སོ། །དཔའ་བོའི་ལྟ་བ་དང་ཞི་བའི་ལྟ་བ་དང༌། རྡོ་རྗེའི་ལྟ་བ་དང༌། ཁྲོ་བོའི་ལྟ་བ་དང༌། རབ་ཏུ་འབར་བའི་ལྟ་བ་དང༌། དྲེགས་པའི་ལྟ་བ་དང༌། ཆགས་པའི་ལྟ་བ་དང༌། ཀུན་དུ་ཞེན་པའི་ལྟ་བ་དང༌། བྱམས་པའི་ལྟ་བ་དང༌། སྡུག་པའི་ལྟ་བ་རྣམས་ལས་མི་
བསྐྱོད་པ་ནི་དེའི་ཡེ་ཤེས་ལས་བྱུང་བའོ། །འོད་དཔག་ཏུ་མེད་པའི་ནི་ཆོས་ཀྱི་ཡེ་ཤེས་ལས་སོ། །རིན་པོ་ཆེ་དང༌། དོན་ཡོད་པའི་ནི་སེམས་ཅན་གྱི་དོང་ཡི་ཕྱིར་འབྱུང་བ་ཡིན་ནོ། །ས་ནི་ཚོང་ཡིས་རབ་ཏུ་བསྒྱུར། །ཞེས་གང་གསུངས་པ་དེ་ཡང་གསལ་བར་བྱ་བའི་ཕྱིར། དབུས་མའི་ཞེས་བྱ་བ་ལ་སོགས་པ་གསུངས་ཏེ། ཀུན་དུ་ཞེས་བྱ་བ་ནི་རིམ་པ་གཉིས་ཀ་ལ་ཡང་བལྟ་བར་བྱའོ། །གང་ཞིག་དབུས་མར་ཞེས་བྱ་བ་ནི་རྣམ་པར་སྣང་མཛད་ཀྱི་དཀྱིལ་འཁོར་རོ། །གཞན་དག་ཅེས་བྱ་བ་ནི་མི་བསྐྱོད་པ་ལ་སོགས་པའི་དཀྱིལ་འཁོར་རོ། །འདིར་ཚིགས་སུ་བཅད་པ་ནི། ཐམས་ཅད་དེན་ཡིད་བསྡུས་འདྲ་ལས། །ཅུང་ཟད་ཙམ་གྱི་དབྱེ་ཡོད་དེ། །མཚམས་བརྒྱང་ཀྱི་ནི་རེའུ་ཆ་ལ། །བུམ་པ་བརྒྱང་ནི་ཡང་དག་བྲི། །རྡོ་རྗེ་རིན་ཆེན་པདྨ་ཆེ། །སྣ་ཚོགས་རྡོ་རྗེའི་དབྱིབས་གནས་པ། །རྡོ་རྗེ་སེམས་མ་རིན་ཆེན་ཆོས། །འདས་མ་ཐག་པའི་དཀྱིལ་འཁོར་དུའོ། །སེམས་དཔའ་རྒྱལ་པོ་ཆགས་པ་དང༌། །ལེགས་པ་མི་བསྐྱོད་དཀྱིལ་འཁོར་དུའོ། །རིན་ཆེན་ཉི་མེ་ཏོག་དང་ནི། །བཤད་པ་ཉི་མའི་དཀྱིལ་འཁོར་དུའོ། །ཆོས་དང་རྣོན་པོ་རྒྱུ་དང་ནི། །སྨྲ་བ་དཔག་མེད་དཀྱིལ་འཁོར་དུའོ། །ལས་དང་བསྲུང་བ་གནོད་སྤྱིན་དང༌། །ཁུ་ཚུར་དོན་ཡོད་དཀྱིལ་འཁོར་དུའོ། །ཀུན་ཀྱང་རྟག་ལ་མངོན་ཕྱོགས་ཤིང༌། །ཤར་དང་ལྷོ་དང་ནུབ་དང་བྱང༌། །བདག་པོ་སེམས་དཔའ་ལ་སོགས་འཆང༌། །ཤར་དང་དབུས་དང་བྱང་དང་ནུབ། །རྡོ་རྗེ་ལྕགས་ཀྱུ་མདའ་སེ་གོལ། །ནོར་བུ་ཉི་མ་རྒྱལ་མཚན་འཛུམ། །པདྨ་རལ་གྲི་འཁོར་ལོ་གསུང༌། །སྣ་ཚོགས་གོ་ཆ་མཆེ་བ་ཅངས་མཚོན། །དཀར་སེར་དམར་དང་ལྗང་གུ་དང༌། །སེར་དང་ཉི་མ་ཁ་དོག་དཀར། །དམར་དང་ནམ་མཁའ་གསེར་དང་ཟངས། །སྣ་ཚོགས་སེར་དང་གནག་དང་སེར། །ཕྱི་ཡི་མཚམས་དང་ཉེ་བར་ནི། །སྒེག་མོ་ཕྲེང་བ་གླུ་དང་གར། །མེ་ཏོག་བདུག་པ་ལ་སོགས་པའི། །མིང་ཅན་ཡང་དག་བྲི་བར་བྱ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །རིམ་བཞིན་སྒོ་ནི་བཞི་པོར་བྲི། །ཁ་དོག་སེམས་དཔའ་འདྲ་ལས་ཀྱང༌། །དུང་མདོག་སྣ་ཚོགས་མདོག་ཅན་གཉིས། །
གཞན་ཡང་དཀྱིལ་འཁོར་གྱི་ཕྱིའི་ཁྱམས་ལ། ཤར་དུ་བྱམས་པ་དང༌། མཐོང་བ་དོན་ཡོད་དང༌། ངན་སོང་ཐམས་ཅད་སྦྱོང་བ་དང༌། མྱ་ངན་གྱི་མུན་པ་ཐམས་ཅད་ངེས་པར་འཇོམས་པའི་བློ་གྲོས་དཀར་པོ་ལ་རྡོ་རྗེ་རྩེ་ལྔ་པ་བསྣམས་པའོ། །ལྷོར་སྤོས་ཀྱི་གླང་པོ་དང༌། །དཔའ་བར་འགྲོ་བ་དང༌། ནམ་མཁའ་མཛོད་དང༌། ཡེ་ཤེས་ཏོག་སྐུ་མདོག་སེར་པོ་རིན་པོ་ཆེ་སེར་པོ་བསྣམས་པའོ། །ནུབ་ཏུ་ནི་འོད་དཔག་མེད་དང༌། ཟླ་བའི་འོད་དང༌། བཟང་སྐྱོང་དང༌། དྲ་བ་ཅན་གྱི་འོད་སྐུ་མདོག་དམར་པོ་པདྨ་དམར་པོ་བསྣམས་པའོ། །བྱང་དུ་ནི་རྡོ་རྗེ་སྙིང་པོ་དང༌། བློ་གྲོས་མི་ཟད་པ་དང༌། སྤོབས་པ་བརྩེགས་པ་དང༌། ཀུན་དུ་བཟང་པོ་སྐུ་མདོག་ལྗང་གུ་སྣ་ཚོགས་རྡོ་རྗེ་བསྣམས་པའོ། །བཅོམ་ལྡན་འདས་རྣམ་པར་སྣང་མཛད་ནི་ཞལ་བཞི་པ་སྟེ། དེ་བཞིན་གཤེགས་པ་ལྷག་མ་རྣམས་ནི་ཞལ་གཅིག་པའོ། །གདན་ནི་སེང་གེ་དང༌། གླང་པོ་ཆེ་དང༌། རྟ་དང༌། རྨ་བྱ་དང༌། ནམ་མཁའ་ལྡིང་ལ་བརྟེན་པའི་པདྨ་དང༌། ཟླ་བའི་གདན་ཅན་ཉི་མའི་འོད་ཀྱི་དཀྱིལ་འཁོར་དང་ལྡན་པ། དར་དཔྱངས་དང་ལྡན་པའི་རིན་པོ་ཆེའི་བོད་པན་དང་དར་དཔྱངས་ཀྱིས་དབང་བསྐུར་བ་ཅན་རྒྱན་ཐམས་ཅད་ཀྱིས་བརྒྱན་པ་རྡོ་རྗེའི་སྐྱིལ་མོ་ཀྲུང་གིས་བཞུགས་པ་ཕྱག་གཉིས་རང་གི་ཕྱག་རྒྱ་འཆང་བ་སྟེ། འདི་རྣམས་ཀྱི་ཕྱག་རྒྱ་ནི་རིམ་པ་བཞིན་དུ་བྱང་ཆུབ་མཆོག་དང༌། ས་ལ་རེག་པ་དང༌། མཆོག་སྤྱིན་པ་དང༌། ཏིང་ངེ་འཛིན་དང་མི་འཇིགས་པ་ཐམས་ཅད་རབ་ཏུ་སྤྱིན་པའོ། །ལྷག་མ་རྣམས་ནི་ཟླ་བའི་གདན་དང༌། ཟླ་བའི་འོད་དང༌། ན་བཟའ་དང༌། རྒྱན་སྣ་ཚོགས་པ་མངའ་བ་སངས་རྒྱས་ལྔའི་ཅོད་པན་དང༌། དར་དཔྱངས་ཀྱིས་དབང་བསྐུར་བ་སེམས་དཔའི་སྐྱིལ་མོ་ཀྲུང་གིས་བཞུགས་པ་ཕྱག་རྒྱ་ཆེན་པོས་རང་གི་མཚན་མ་བསྣམས་པ་སྟེ་ལྷག་མ་རྣམས་ནི་རྗེས་སུ་དཔག་པར་བྱའོ། །སྤྱན་ལ་སོགས་པའི་རྣལ་འབྱོར་གྱིས་ཀྱང་ལས་ཀྱི་ཚོགས་བྱ་བར་གསུངས་ཏེ། དེ་བས་ན་དེའི་སྦྱོར་བ་བ་སྟན་པའི་ཕྱིར། ནམ་མཁའ་ཞེས་བྱ་བ་ལ་སོགས་པ་གསུངས་ཏེ། སྣང་བ་མེད་ཅིང་མཐའ་ཡས་པའི་ཡེ་ཤེས་ནི་ནམ་མཁའི་རྡོ་རྗེ་སྟེ། དེའི་དབུས་སུ་ཆུད་པའི་སངས་རྒྱས་ཀྱི་སྐུ་སྟེ། རྣམ་པར་སྣང་མཛད་དང༌། མི་བསྐྱོད་པ་དང༌། འོད་
དཔག་ཏུ་མེད་པ་དང༌། དོན་ཡོད་པར་གྲུབ་པའི་སྐུའི་རིམ་པ་ཇི་ལྟ་བ་བཞིན་དུ་རང་གི་སྐུར་བསམས་ལ། དེའི་ཐུགས་ཀར་ཟླ་བའི་དཀྱིལ་འཁོར་བསམས་ལ། དེའི་དབུས་སུ་ལཱཾ་མཱཾ་པཱཾ་ཏཱཾ་ཞེས་བྱ་བའི་ས་བོན་རྣམས་ལས་རིམ་པ་ཇི་ལྟ་བ་བཞིན་དུ་སྤྱན་ལ་སོགས་པའི་ལྷ་མོ་རྣམས་བསྒོམ་པར་བྱའོ། །ཟླ་བ་ཡིད་བཞིན་གྱི་ནོར་བུ་ནི་ནོར་བུ་ཆུ་ཤེལ་ལོ། །བུང་མེད་སྒྱུ་མ་ནི་རྣམ་པར་འགྱུར་བ་སྟེ། དེ་རྣམས་ཀྱི་མཆོག་ནི་ཚོགས་ཏེ་འཁོར་གྱི་དཔུང་གི་ཚོགས་བཞིན་ནོ། །དངོས་གྲུབ་ཀུན་ནི་རྣམ་པར་སྣང་མཛད་ཀྱི་གོ་འཕང་ངོ༌། །ནམ་མཁའི་རྡོ་རྗེ་མཆོག་ནི་མཱ་མ་ཀཱི་སྟེ་ཁྲོ་བ་དང་བཅས་པ་རྣམས་པར་འགྱུར་བ་ན་ནམ་མཁའི་སྒྱུ་མ་སྟེ། དེའི་མཆོག་དེ་དང་ལྡན་པས་ན་ནམ་མཁའི་སྒྱུ་མའི་མཆོག་གོ །སངས་རྒྱས་བྱང་ཆུབ་ནི་མི་བསྐྱོད་པའི་གོ་འཕང་ངོ༌། །མཆོག་ནི་དམ་པའོ། །གསང་བ་ནི་གསང་བ་འཛིན་པའོ། །དངོས་གྲུབ་རྡོ་རྗེ་ནི་རྡོ་རྗེའི་དངོས་གྲུབ་ལ་རྣལ་འབྱོར་པ་བརྩོན་པའོ། །རྡོ་རྗེ་ཆོས་མ་ནི་ན་བཟའ་དེ་ལས་བྱུང་བའི་དམ་ཚིག་གང་ཡིན་པ་དེ་ལ་དེ་སྐད་ཅེས་བྱའོ། །ཆོས་ཀྱི་དག་པའི་ཡེ་ཤེས་ནི་ཆགས་པའི་པདྨ་སྟེ། དེ་འཛིན་པ་ནི་འཛིན་པ་པོའི་སྒྲུབ་པ་པོ་སྟེ། དེ་ནི་སྡུད་པ་དང༌། མཉེས་པར་བྱེད་པ་གང་ཡིན་པའོ། །ཨུཏྤལ་དམར་པོ་ཞེས་བྱ་བ་ནི་པདྨ་དམར་པོ་ལ་བྱ་སྟེ། ཆགས་པའི་ཆོས་ལ་ཆགས་པའི་ཕྱིར་རོ། །དམ་ཚིག་རྡོ་རྗེ་ནི་ཐེག་པ་ཆེན་པོ་ཁོང་དུ་ཆུད་པ་སྟེ། དེ་དང་ལྡན་པའི་གསང་བ་ནི་གསང་བ་འཛིན་པའོ། །བུད་མེད་སྒྱུ་མ་ནི་རྣམ་པར་འགྱུར་བ་སྟེ། དེ་སྟོན་པ་ནི་དྲེགས་པ་བདོ་བ་ནི་ཡེ་ཤེས་འབྱུང་བར་བདོ་བ་གང་ཡིན་པའོ། །ཡེ་ཤེས་འབྱུང་བའི་ཏིང་ངེ་འཛིན་ནི་རྡོ་རྗེའི་ཏིང་ངེ་འཛིན་ཏེ། དེ་ལས་བྱུང་བའོ། །འདི་དག་ཉིད་ཀྱི་སྔགས་རིམ་པ་ཇི་ལྟ་བ་བཞིན་དུ་གསུངས་པ་ནི་ཨོཾ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྐུ་ནི་ཞེས་བྱ་བ་ལ་སོགས་པ་ལ། ཇི་སྐད་དུ་གསུངས་པའི་རྣལ་འབྱོར་ལ་གནས་ལ། བཅོམ་ལྡན་འདས་ཡུམ་གྱི་ཐུགས་ཀའི་ཟླ་བ་ལ་སྔགས་ཀྱི་ཡི་གེ་འབར་བ་ཕྲེང་བ་བརྒྱུས་བ་ལྟ་བུར་ཡིད་ཀྱིས་མངོན་པར་བྲིས་ལ། དེའི་འོད་ཟེར་རྣམས་ལས་བཅོམ་ལྡན་འདས་ཡུམ་གྱི་སྐུ་ནམ་མཁའ་ཁྱབ་པར་སྤྲོས་ལ་སྐུ་ལ་སོགས་པའི་ངོ་བོ་ཉིད་དེས་སྐུ་ལ་སོགས་པ་རབ་ཏུ་མཆོད་ལ་རྣམས་པར་སྣང་
མཛད་ལ་སོགས་པའི་རྣམ་པར་བསམས་ལ། བསྒྲུབ་པར་བྱ་བ་དང་གཅིག་ཏུ་བྱས་ན་མཆོད་པའི་བདག་ཉིད་ཅན་དུ་འགྱུར་ཏེ། སྤྱན་ལ་སོགས་པ་དང་འདྲ་བར་འགྱུར་རོ། །ལྷ་མོའི་བསྲུང་བ་དེ་དང་འདྲ་བར་དབང་དུ་གྱུར་པ་རྣམ་པ་བརྒྱང་ལ་སྒྲུབ་པ་པོ་འཇོག་པར་འགྱུར་རོ་ཞེས་བྱ་བའི་དོན་ཏོ། །སྐུ་ལ་སོགས་པའི་གསང་བ་ཉིད་ནི་གསང་བ་ཐམས་ཅད་དོ། །གང་གིས་རྒྱུད་འདི་རྣམ་པར་ཕྱེ་བ་དེ་ལ་ཇི་ལྟར་ན་གསང་བའམ། གསང་ཆེན་དུ་འགྱུར་ཞེ་ན། གང་གི་ཕྱིར་བསྲུང་བར་བྱ་བ་སྟེ། དམ་ཚིག་དང་མི་ལྡན་པ་རྣམས་ལ་ཐམས་ཅད་དུ་བ་སྟན་པར་མི་བྱ་བ་ཡིན་ནོ། །དེ་བས་ན་རྒྱུད་གཞན་དག་ཏུ་སྤངས་པ་རྣམས་སྒྲུབ་པ་པོས་བསྲུང་བར་བྱའོ། །བསྲུངས་བའི་ཕན་ཡོན་གང་ཞིག་ཡིན་ཞེ་ན། བསྲུངས་ན་ཞེས་བྱ་བ་ལ་སོགས་པ་གསུངས་ཏེ། གསང་བ་དེ་རྟག་པར་ཀུན་དུ་བསྲུངས་ན་གསང་བ་དེ་རྩལ་རྣལ་འབྱོར་པ་རྣམས་ལ་འབྱུང་བར་འགྱུར་གྱི་གཞན་དུ་ནི་མ་ཡིན་ནོ། །དེ་ལྟ་ཡིན་ན་ཅིའི་ཕྱིར་རྣམ་པར་ཕྱེ་ཞེ་ན། ཡོངས་སུ་ཤེས་པར་བྱ་བའི་ཕྱིར་རོ། །ཡོངས་སུ་ཤེས་པའི་ཕན་ཡོན་གང་ཞིག་ཡིན་ཞེ་ན། དངོས་པོ་ཞེས་བྱ་བ་ལ་སོགས་པ་གསུངས་ཏེ། ལེགས་པར་བྱས་པ་བསྡུས་པ་དེ་ནི་ཚོགས་ཡོངས་སུ་རྫོགས་པ་ཡིན་ནོ། །ཕྱིན་ཅི་མ་ལོག་པའི་ལྟ་བ་ནི་ཡང་དག་པ་མ་ཐོང་བ་སྟེ། དེ་གཉིས་མེད་པ་ནི་མ་ཡིན་གྱི་དེ་གཉིས་འབྱོར་པར་བྱེད་པ་ཉིད་ལས་འབྱུང་སྟེ། དེ་ལྟ་བས་ན་གསང་བའི་དོན་དུ་གཉེར་བ་རྣམས་ཀྱིས་ཡང་དག་པའི་ཡེ་ཤེས་མ་ལུས་པ་འདི་ལ་ཡོད་པས་ན་གསང་བའི་ཡེ་ཤེས་འབྱུང་ཞེས་བྱ་བའོ། །གསང་བའི་ཡེ་ཤེས་ལས་བྱུང་བའི་རྣལ་འབྱོར་པ་ནི་སྔ་མ་ལྟ་བུ་ཉིད་མ་ཡིན་ཏེ། དེ་ཐམས་ཅད་དུ་འགྲོ་བར་འགྱུར་ཏེ། རྣལ་འབྱོར་ཐམས་ཅད་ལ་ཐོགས་པ་མེད་པར་འགྱུར་རོ། །ཚིགས་སུ་བཅད་པས་བ་སྟན་པ་དེ་ཉིད་ལ་ཚིགས་སུ་བཅད་པ་གཉིས་ཀྱིས་བཤད་པ་བ་སྟན་པ་ནི། ཤེས་རབ་ཅེས་བྱ་བ་ལ་སོགས་པ་གསུངས་པ་ཡིན་ཏེ། ཆོས་ཐམས་ཅད་གཉིས་སུ་མེད་པའི་སྟོང་པ་ཉིད་དུ་སྣང་བ་ཙམ་དུ་ཡང་དག་པར་ཡོངས་སུ་ཤེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། སྔགས་དང་ཕྱག་རྒྱ་ལ་སོགས་པས་རྣམ་པར་བརྟགས་པའི་ལུས་ལ་མ་ལུས་པར་རྒྱུད་ཇི་ལྟ་བ་བཞིན་དུ་ཡོངས་སུ་ཤེས་
པ་ནི། ཐབས་ཀྱི་ཏིང་ངེ་འཛིན་གྱི་ཡེ་ཤེས་ཏེ། མངོན་པར་བྱང་ཆུབ་པ་ལྔ་ལ་སོགས་པ་སྦྱོར་བ་སྟེ། དེ་དག་ཏུ་བརྟགས་པ་ནི་ཤིན་ཏུ་གོམས་བ་སྟེ། དེས་དཀྱིལ་འཁོར་དུ་འཇུག་པ་ལ་སོགས་པ་ལས་ཐམས་ཅད་ལས་དེས་གང་རྣམ་པར་དག་པ་ནི་དངོས་པོ་དེ་ཉིད་ཀྱིས་དག་པར་འགྱུར་ཏེ། གསང་བའི་དེ་ཁོ་ན་ཉིད་ཀྱི་དངོས་པོ་འདིར་ཡང་དངོས་པོ་ཡོངས་སུ་ཤེས་པའི་ངོ་བོ་ཉིད་དེ། རྣལ་འབྱོར་པ་གང་དངོས་པོ་དག་པ་དེ་ཉིད་རྣལ་འབྱོར་གྱི་ཐོབ་པ་བོར་འགྱུར་ཏེ། ཐོབ་པ་ལ་འཇུག་པར་བྱེད་པ་ཡིན་ནོ། །རྣལ་འབྱོར་བརྩམས་པ་རྣམས་ནི་ལྷུན་གྱིས་གྲུབ་པར་རང་གི་རོ་རྟག་ཏུ་འབབ་པས་དཔེར་ན་ལྷའི་ནོར་བུ་རྟག་པར་རྒྱུན་དུ་རང་གི་འོད་ཀྱིས་སྣང་བར་གནས་པ་ཡིན་ལ། དེ་བཞིན་དུ་འདི་ནི་རྟག་ཏུ་རང་གི་འོད་ཀྱིས་བསྒོམ་པ་ཡིན་ནོ། །གཞན་དུ་ནི་གསང་བ་འདི་ཐམས་ཅད་སུ་ཞིག་ལ་བཤད་བར་བྱ་ཞེ་ན། རྡོ་རྗེ་དབྱིངས་ནི་ཞེས་བྱ་བ་ལ་སོགས་པ་གསུངས་པ་ཡིན་ཏེ། འདིར་སངས་རྒྱས་དང་བྱང་ཆུབ་སེམས་དཔའི་དགྱེས་པར་མཛད་པས་ན་ཉམས་དགའ་བ་སྟེ་དཀྱིལ་འཁོར་རོ། །དེ་ཡང་གང་ཞིག་དཔལ་དེ་ཁོ་ན་ཉིད་ལས་གསུངས་པའི་རྡོ་རྗེ་དབྱིངས་ཀྱི་དཀྱིལ་འཁོར་ཆེན་པོར་དབང་བསྐུར་བ་མཁས་པ་སྟེ། ཐོས་པ་མང་བ་དང༌། ཡང་དག་པར་སོ་སོར་རྟོག་པ་དང་ལྡན་པ་ལ་ཐུགས་ཀྱི་གསང་བའི་རྣལ་འབྱོར་མཆོག་ནི་ཏིང་ངེ་འཛིན་ཏེ། དེ་མཁས་པ་ཞེས་བྱ་བ་བླ་མ་རྣམས་ཀྱིས་ཇི་སྐད་དུ་གསུངས་པའི་གསང་བ་ཐམ་ཅད་དེ། བཅོམ་ལྡན་འདས་རྡོ་རྗེ་འཆང་བས་གང་དུ་ཇི་སྐད་དུ་གསུངས་པ་དེ་ལ་དེ་སྐད་ཅེས་བྱའོ། །དེ་སྟོན་པར་བྱེད་པའི་གཞུང་ལ་ཡང་ཡེ་བར་གདགས་པས་མིང་དེ་སྐད་ཅེས་བྱ་བ་ཡིན་ནོ། །བཅོམ་ལྡན་ཉིད་ཀྱི་གསང་བའི་རྒྱུད། །མི་ཟད་དེ་ནི་རྣམ་ཕྱེ་བའི། །ཚིག་ཉུང་དད་བས་ཅི་ནུས་པར། །བཤད་པས་བསོད་ནམས་གང་ཐོབ་པ། །དེས་ནི་ཞི་བའི་བདེ་བ་མཆོག །རྡོ་རྗེ་ཅན་གྱི་གནས་ཐོབ་ནས། །འགྲོ་བ་སྡུག་བསྔལ་དབའ་འཁྱིལ་པར། །དབང་མེད་འཁོར་ལས་འདོན་པར་ཤོག །ཐམས་ཅད་གསང་བའི་བཤད་སྦྱོར་བ། །རིན་ཆེན་འབྱུང་ཚིག་རིན་ཆེན་དངོས། །དོན་རྣམས་ཤིན་ཏུ་ཕྲ་བ་ཡང༌། །གསང་བའི་སྒྲོན་མས་སྣང་བར་བྱས། །དཔལ་ཐམས་ཅད་གསང་བའི་རྒྱུད་ཀྱི་བཤད་སྤྱར་གསང་བའི་སྒྲོན་མ་ཞེས་བྱ་བ། སློབ་དཔོན་རིན་ཆེན་འབྱུང་
གནས་ཞི་བས་མཛད་པ་རྫོགས་སོ།། །།རྒྱ་གར་གྱི་མཁན་པོ་པྲཛྙཱ་ཀ་ར་ཝརྨ་དང༌། ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།