རྡོ་རྗེ་སློབ་དཔོན་གྱི་བྱ་བ་ཀུན་ལས་བཏུས་པ།
འགྲོ་བའི་མེ་ལོང་།
རྒྱ་གར་སྐད་དུ། བཛྲ་ཙཱ་ཪྻ་ཀྲྀ་ཡ་ས་མུ་ཙྪ་ཡ། བོད་སྐད་དུ། རྡོ་རྗེ་སློབ་དཔོན་གྱི་བྱ་བ་ཀུན་ལས་བཏུས་པ། བཅོམ་ལྡན་འདས་རྡོ་རྗེ་སེམས་དཔའ་ལ་ཕྱག་འཚལ་ལོ། །བསམ་གཏན་གར་མཛད་རྔ་ཟླུམ་ལ་སོགས་སྒྲ་ཡིས་བོས་པའི་ལྷ་རྣམས་ཀྱིས་ནི་ཞབས་ལ་ཕྱག་བྱས་པ། །འཁྱོག་ཅིང་གཡོ་བའི་སྐུ་དེ་ཡི་ནི་ཞབས་ཀྱི་བཀོད་པ་རྣམ་པར་བསྐྱོད་ཅིང་ངེས་པར་འདུག་པ་ཅན། །སྨིན་མ་འཁྱོག་པོ་བྲིས་ཤིང་མིག་ནི་རྗེས་འགྲོ་དཔུང་པའི་ཀོར་པ་གཡོ་བའི་ལག་པའི་སོར་མོ་ཡིས། །ཕྱག་རྒྱ་འཆིང་བར་བ་འཇུག་རིམ་གཡོའི་གདོང་ལྡན་ཧེ་རུ་ཀ་ཡིས་ཁྱོད་ཀྱི་སྡིག་པ་འཇོམས་གྱུར་ཅིག །འགྲོ་མང་མྱ་ངན་ཤིན་ཏུ་སྡུག་བསྔལ་བས། །མང་པོ་ཀུན་ནས་བལྟ་བར་མི་ནུས་པ། །དེ་ཕྱིར་ཡང་དག་བསྡུས་པའི་ཆོ་ག་འདི། །མཁའ་འགྲོའི་ལམ་གྱུར་བདག་གིས་ནུས་བཞིན་བྱ། །བདག་གིས་བྱ་བ་ཀུན་ལས་བཏུས། །ང་རྒྱལ་གྱིས་ནི་བྱས་པ་མིན། །གང་འདིར་ཚིག་གི་སྐྱོན་རྣམས་ནི། །མཁས་པ་ཀུན་གྱིས་བཟོད་པར་མཛོད། །སྣ་ཚོགས་རྒྱུད་རྣམས་ཀུན་ནས་བླངས། །སྣ་ཚོགས་སློབ་དཔོན་ལུགས་རྣམས་ཀྱང༌། །མེ་ལོང་གིས་འདིར་བྲི་བྱ་སྟེ། །ཀུན་ནས་གསོལ་འདེབས་དབང་གིས་སོ། །རབ་གནས་ལ་སོགས་བྱ་བ་ཀུན། །རྡོ་རྗེ་སློབ་དཔོན་སྔོན་འགྲོ་བ། །དེ་ཕྱིར་འཇིག་རྟེན་ཕན་དོན་དུ། །དེ་ཡི་མཚན་ཉིད་བརྗོད་པར་བྱ།།
དེ་ལ་རེ་ཞིག་དང་པོར་རྡོ་རྗེ་སློབ་དཔོན་གྱི་མཚན་ཉིད་བརྗོད་པར་བྱ་སྟེ། འཇིག་རྟེན་དང་འཇིག་རྟེན་ལས་འདས་པའི་ཀུན་དུ་སྤྱོད་པ་སྟོན་པ་ནི་སློབ་དཔོན་ནོ། །གཞན་ཡང་སྡིག་བ་ལས་རིང་དུ་སོང་ཞིང་ཆོས་ལ་སྤྱོད་པ་དང༌། ངེས་པའི་ཚིག་གིས་ཆོ་ག་བསྒྲུབ་པ་ནི་སློབ་དཔོན་ནོ། །གང་ཡང་རྡོ་རྗེའི་ལམ་སྟོན་པ་པོའི་སློབ་དཔོན་ནི་རྡོ་རྗེ་སློབ་དཔོན་ནོ། །རྡོ་རྗེའི་སྒྲའི་ཁྱད་པར་གྱིས་ནི་རྡོ་རྗེ་གསུམ་མི་ཕྱེད་པ་ཉིད་དུ་རབ་ཏུ་རིག་པར་བྱའོ། །དེ་འང་ཅི་ལྟར་གྱུར་པ་ཞེ་ན། རྙེད་དང་མ་རྙེད་གྲགས་དང་མ་གྲགས་རྣམ་པར་བྲལ་ཞིང་སྨོད་པ་དང་ནི་བསྟོད་པ་སྤངས། །བདེ་བ་དང་ནི་མི་བདེ་འགོག་ཅིང་འཕེལ་བའི་བློ་གྲོས་སྤྲོ་བ་དང་ལྡན་རབ་ཏུ་མཁས། །སྙིང་རྗེས་ཀུན་ནས་བསྐོར་ཞིང་སྔགས་ཀྱི་ཚུལ་ལ་རོ་མྱང་སེར་སྣ་མེད་ཅིང་འདོད་པའང་མེད། །དེ་ཉིད་ཤེས་པ་ཐོབ་ཅིང་རབ་ཏུ་བརྟན་པའི་བློ་ལྡན་རྟག་ཏུ་སློབ་དཔོན་རྒྱལ་པོའོ། །དེ་ཡང་མཆོག་ལ་སོགས་པའི་དབྱེ་བས་རྣམ་པ་གསུམ་དུ་འགྱུར་བ་འདི་ལྟ་སྟེ། །བདེ་མཆོག་རྒྱ་མཚོའི་རྒྱུད་ལས་ནི། །ཇི་བཞིན་གསུངས་པའི་སློབ་དཔོན་གསུམ། །ཁྱིམ་གནས་དགེ་ཚུལ་ཞེས་བྱ་དང༌། །དགེ་སློང་ཞེས་པ་རྣམ་གསུམ་འགྱུར། །སློབ་དཔོན་མཆོག་ནི་དགེ་སློང་སྟེ། །གང་ཕྱིར་དེ་བཞིན་གཤེགས་པས་གསུངས། །འབྲིང་ནི་དགེ་ཚུལ་ཞེས་བྱ་སྟེ། །ཁྱིམ་ན་གནས་པ་ཐ་མའི་ལུགས། །དབང་བསྐུར་རྣམ་པ་ལྔ་ཐོབ་པ། །ཁྱིམ་ན་གནས་པ་ཐ་མའི་ལུགས། །དབང་བསྐུར་བཅུ་རྣམས་ཐོབ་པ་ནི། །དགེ་ཚུལ་ཞེས་བྱ་འབྲིང་པོ་ཡིན། །མཆོག་གི་དབང་བསྐུར་ཐོབ་པ་ནི། །དགེ་སློང་མཆོག་ཡིན་རྡོ་རྗེ་འཛིན། །བསླབ་པའི་གནས་ལྔ་ཐོབ་པ་དང༌། །བསླབ་པའི་གནས་བཅུ་ལྡན་པ་དང༌། །མཐའ་ཡི་བསླབ་པའི་གནས་ཐོབ་པ། །དེ་གསུམ་མཉམ་པར་བརྗོད་མ་ཡིན། །མཐའ་ཡི་བསླབ་པ་ཞེས་པ་ནི། །མཐར་ཐུག་གནས་ལ་སློབ་ཕྱིར་དང༌། །ཟུང་འཇུག་ཏིང་འཛིན་ལ་འབད་ཕྱིར། །མཆོག་ནི་མངོན་སུམ་ཡོད་བཞིན་དུ། །སྔགས་པ་གཞན་ལ་བསྙེན་བཀུར་མིན། །གནས་གཅིག་གསུམ་ནི་ཡོད་པ་ལས། །གང་ཚེ་ཁྱིམ་གནས་མཆོད་བྱེད་པ། །དེ་ཚེ་སངས་རྒྱས་ཆོས་དང་ནི། །དགེ་འདུན་ལ་ཡང་གུས་མེད་འགྱུར། །དེ་ཉིད་ཀྱི་ཕྱིར་སངས་རྒྱས་ལ་སོགས་པ་རྣམས་ཀྱིས་ཀྱང་འདི་ལ་མཆོད་པ་མཛད་
དེ་དེ་གསུངས་པ། །དབང་བསྐུར་མཆོག་ཐོབ་རྡོ་རྗེ་ཡི། །སློབ་དཔོན་ལ་ནི་དེ་བཞིན་གཤེགས། །ཕྱོགས་བཅུའི་འཇིག་རྟེན་ཁམས་བཞུགས་རྣམས། །དུས་གསུམ་བྱོན་ནས་ཕྱག་མཛད་དོ། །ཞེས་སོ། །གང་ལས་མཆོག་གི་དབང་བསྐུར་བ་ཐོབ་པ་དེ་ལས་ནི་དགེ་སློང་བཅུ་དང་མཉམ་པར་དོན་དམ་པའི་བསྙེན་པ་ལས་གསུངས་པ། དགེ་ཚུལ་བཅུ་ལས་ལྷག་པའི་ཡོན་ཏན་དགེ་སློང་མཆོག །དགེ་སློང་བཅུ་ལས་ལྷག་པའི་ཡོན་ཏན་སྔགས་པ་མཆོག །དཔལ་ལྡན་ཚངས་བར་སྤྱོད་པ་དང་ནི་ཏིང་འཛིན་དང༌། །བྱམས་པ་ལ་སོགས་དེ་ཉིད་ཤིན་ཏུ་རིག་པའོ། །དཔལ་ལྡན་ཚངས་བར་སྤྱོད་པ་ཞེས་པ་ལ་དཔལ་ལྡན་ཚངས་པར་སྤྱོད་པ་ནི་ལང་ཚོ་ཅན་དང་རབ་ཏུ་སྦྱོར་བ་ན་འཕོ་བ་མི་འོང་ཞིང་བདེ་བ་སྦྱིན་པ་སྟེ། དུག་གི་དབང་པོ་ཟོས་པ་ན་དུག་གི་དེ་ཁོ་ན་ཉིད་གྲུབ་པ་ཡིན་གྱི། མ་ཟོས་ན་ཡང་རབ་ཏུ་འགྲུབ་པར་འགྱུར་བ་ནི་མ་ཡིན་ནོ། །དེའི་ཕྱིར་ཐེག་པ་ཆེན་པོ་ལས་མཆོག་གི་དབང་བསྐུར་བ་ཐོབ་པ་ནི་དགེ་སློང་དུ་མངོན་པར་བརྗོད་པར་བྱའོ། །གང་གི་ཕྱིར་ཤེས་རབ་དང་ཐབས་ཀྱི་རྣལ་འབྱོར་གྱིས་བླ་མའི་མན་ངག་ལས་དགའ་བ་ལ་སོགས་པའི་རིམ་པས་འདོད་ཆགས་ལ་སོགས་པའི་ཉོན་མོངས་པ་བཅོམ་པ་འདི་ནི་དོན་དམ་པའི་དགེ་སློང་ངོ༌། །དེ་ཉིད་ཀྱི་ཕྱིར་ཐེག་པ་ཆེན་པོ་ལས་དགེ་སློང་རྣམ་པ་ལྔ་གསུངས་ཏེ། མིང་གི་དགེ་སློང་དང༌། ཚུལ་ཁྲིམས་ལས་སློང་བའི་དགེ་སློང་དང༌། གོས་ཙམ་འཛིན་པས་ཕྱེ་བའི་དགེ་སློང་དང༌། གསོལ་བ་དང་བཞིས་བསྙེན་པར་རྫོགས་འདི་དགེ་སློང་དང༌། ཉོན་མོངས་པ་བཅོམ་པའི་དགེ་སློང་ངོ་ཞེས་པའོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་གསུངས་པ། དགེ་སློང་རྡོ་རྗེ་འཛིན་པ་བྱ། །གདུག་པ་འདུལ་བ་དེ་ནི་མཆོག །ཅེས་སོ། །ཉོན་མོངས་པ་བཅོམ་པ་ཁོ་ནས་གདུག་པ་འདུལ་བར་ནུས་པར་འགྱུར་གྱི་གཞན་གྱིས་ནི་མ་ཡིན་ནོ། །གང་ཞིག་གསོལ་བ་དང་བཞིས་བསྙེན་པར་རྫོགས་པའི་དགེ་སློང་དེ་རྣམས་ནི་ཉན་ཐོས་ཀྱི་མདོ་སྡེའི་སྤྱོད་པ་ཀུན་དུ་སྤྱོད་དོ། །དེ་རྣམས་འདིར་ནི་དབང་དུ་བྱ་བ་ཉིད་མེད་དེ། གང་གིས་དམན་པ་ལ་མོས་པ་ཉིད་ཀྱི་ཕྱིར་དང་སྐལ་བ་མེད་པའི་ཕྱིར་རོ། །དེ་ཉིད་ཀྱི་ཕྱིར་དངུལ་ཆུའི་འདུ་པ་ལས་གསུངས་པ། དེ་ལས་བདེན་པ་གཉིས་ཀྱི་ལུས་ཡོངས་སུ་གཟུང་རྣམས་དང༌། ཚིག་མཐའ་དག་གི་དོན་ཡོངས་སུ་དཔྱད་པ་བྱས་པ་རྣམས་
དང༌། མཆོག་གི་བདེ་བ་ཆེན་པོའི་འབྲས་བུ་ལ་མངོན་པར་དགའ་བ་རྣམས་ནི་ཉན་ཐོས་བའི་མདོ་སྡེའི་སྤྱོད་པ་དང་ལྡན་པ་མ་ཡིན་ནོ། །གང་གི་ཕྱིར་ཉན་ཐོས་ལ་སོགས་པ་དམན་པ་ལ་མོས་པ་རྣམ་པར་རྟོག་པ་ལ་སྤྱོད་པ། བདག་ཉིད་སྒྲུབ་པ་དང་བྲལ་བ་སྦྱིན་པ་དང་ཚུལ་ཁྲིམས་ལ་སོགས་པ་བྱ་བའི་ལམ་ལ་མི་གནས་པ། དེ་ཁོ་ན་ཉིད་ཤེས་པ་རྣམས་ལ་དད་པ་མེད་པ། ཐར་པ་ལ་རིང་བའི་འདུ་ཤེས་ཅན། བདེ་བའི་ཐབས་ལྷག་པར་མ་ཐོབ་པ། སྦྱངས་པའི་ཡོན་ཏན་བཅུ་གཉིས་ལ་སོགས་པ་དཀའ་བའི་སྤྱོད་པས་དུས་རིང་པོར་བྱང་ཆུབ་ཚོལ་བ་རྣམས་ཀྱིས་ནི། དེ་ལྟར་ཡང་ཐོབ་པར་འགྱུར་བ་མ་ཡིན་ཏེ། རྫོགས་པའི་རིམ་པས་ལྷག་པར་འགྲོ་བ་དང་བྲལ་བའི་ཕྱིར་རོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་གསུངས་པ། དགེ་སློང་དངོས་པོར་གནས་པ་གང༌། །གང་ཞིག་རྒན་པོར་གནས་གྱུར་ཀྱང༌། །གང་ཡང་རྟོག་གེ་དགའ་བའི་མི། །དེ་ལ་དེ་ཉིད་བསྟན་མི་བྱ། །རྣམ་བར་སྣང་མཛད་མངོན་པར་བྱང་ཆུབ་པའི་རྒྱུད་ལས་ཀྱང༌། །ཐབས་དང་བྲལ་བའི་ཡེ་ཤེས་ཀྱི། །བསླབ་པ་ཡང་ནི་བསྟན་བྱ་སྟེ། །ཉན་ཐོས་དེ་རྣམས་དཔའ་ཆེན་ལ། །བཞུགས་པའི་དོན་དུ་ངེས་པའོ། །མཆོག་གི་དང་པོའི་རྣལ་འབྱོར་ཆེན་པོའི་ཆེན་པོའི་རྒྱུད་ལས་ཀྱང༌། །དཀའ་བའི་བརྟུལ་ཞུགས་མི་བཟད་པས། །ལུས་ནི་སྐམས་གྱུར་སྡུག་བསྔལ་ཅན། །སྡུག་བསྔལ་རྣམ་པར་གཡེང་བའི་སེམས། །གཡེང་ཕྱིར་དངོས་གྲུབ་གཞན་དུ་འགྱུར། །དོན་དམ་པའི་བསྙེན་པ་ལས་ཀྱང༌། གོས་དམར་ལུས་ལ་དཀྲིས་པ་དཔལ་ལྡན་བླ་མ་མིན། །འཁར་གསིལ་ལྷུང་བཟེད་ལག་ཐོགས་དཔལ་ལྡན་བླ་མ་མིན། །ཕྱག་དར་ཁྲོད་བས་སྡུག་བསྔལ་དཔལ་ལྡན་བླ་མ་མིན། །ལྗོན་ཤིང་རྩ་བར་གནས་པ་དཔལ་ལྡན་བླ་མ་མིན། །ཞེས་པ་ལ་སོགས་པ་རྒྱ་ཆེར་རོ། །གཞན་ལས་ཀྱང་གསུངས་པ། ཟས་མི་ཟ་བར་སྒོར་ཉལ་ཏེ་བྱིན་པ་ལ་ནི་དབང་དུ་བྱ་བ་མེད་དོ་ཞེས་སོ། །དེ་ཇི་ལྟར་ཞེ་ན། ཐམས་ཅད་དུ་དགེ་སློང་ལ་ནི་དེ་ལྟར་དབང་དུ་བྱ་བ་མེད་དོ། །རྣམ་པ་འདིས་ནི་ཡོད་དེ། ཇི་ལྟར་སེམས་ཅན་གྱི་དོན་ཆེན་པོ་མཐར་ཐུག་པ་གཟིགས་ནས། བཅོམ་ལྡན་འདས་དཔལ་ཤཱཀྱ་ཐུབ་པས་འཁོར་ལོ་སྒྱུར་བའི་གཟུགས་ཀྱིས་སྔགས་ཀྱི་ཚུལ་གྱི་སྤྱོད་པ་ལ་རབ་ཏུ་ཞུགས་བ་དེ་བཞིན་དུ། དགེ་སློང་ཚུལ་ཁྲིམས་འཛིན་པའི་བརྟུལ་ཞུགས་
ལ་སྤྱོད་པ་ཡང་ཆོས་ཐམས་ཅད་སྐྱུ་མ་ལྟ་བུར་ལྷག་པར་རྟོགས་པས་དུར་སྨྲིག་ཡོངས་སུ་དོར་ཏེ། གཙུག་ཏོར་ལ་སོགས་པ་བྱས་ནས་རིམ་པ་ཇི་ལྟ་བར་ཕྲེང་བ་དང༌། ཆུའི་དབང་གིས་མངོན་པར་དབང་བསྐུར་ཞིང༌། རིག་པ་དང༌། རྡོ་རྗེ་དང༌། སྤྱོད་པ་དང༌། བརྟུལ་ཞུགས་དང༌། ལུང་བསྟན་པ་དང༌། རྗེས་སུ་གནང་བ་དང༌། དབུགས་དབྱུང་བ་ཇི་སྲིད་བ་བྱིན་ནས་རྡོ་རྗེ་འཛིན་པ་བྱས་པ་ནའོ། །དེ་ཅི་ལྟར་འདིའི་སྔར་གྱི་སྔོམ་པ་ལས་ཉམས་པར་མི་འགྱུར་རམ་ཞེན་མ་ཡིན་ཏེ། མཆོག་ལས་ཀྱང་མཆོག་གི་བསླབ་པ་ཡིན་པའི་ཕྱིར་རོ། །ཇི་ལྟར་དགེ་བསྙེན་ལས་དགེ་ཚུལ་དུ་བྱས་པ་དང༌། དགེ་ཚུལ་ལས་དགེ་སློང་དུ་བྱས་པ་བཞིན་ནོ། །དེ་ཡང་ཇི་ལྟར་སྙམ་ན་དགེ་སློང་གི་དངོས་པོར་ཡོད་པ་ན་ནི་དགེ་བསྙེན་ལ་སོགས་པའི་སྔོམ་པའི་དངོས་པོ་ཡོད་པའི་ཕྱིར་རོ། །འདི་ལས་གལ་ཏེ་དེ་བཞིན་དུ་མི་འགྱུར་བ་དེ་ལྟ་ན་ནི་འདོད་ཆགས་དང་བྲལ་བའི་གཟུགས་སྤངས་ནས་མཆོག་ཏུ་སྒེག་པ་ལ་སོགས་པའི་ཉམས་དང་ལྡན་པས་འཁོར་ལོས་སྒྱུར་བའི་གཟུགས་སུ་མངོན་པར་སྤྲུལ་ཏེ། འདོད་ཆགས་ཀྱིས་ནི་དེ་དང་འདྲ་བའི་འདོད་ཆགས་རབ་ཏུ་ཉམས་པའི་དོན་དུ་བདག་གིས་སྔགས་ཀྱི་ཚུལ་གྱི་སྤྱོད་པ་བསྟན་པར་བྱའོ་ཞེས་པའི་བཅོམ་ལྡན་འདས་ཀྱི་གསུང་སྙིང་ལ་འབབ་པར་མི་འགྱུར་རོ། །དེའི་ཕྱིར་དགེ་སློང་གི་གཟུགས་ཀྱིས་ནི་རྡོ་རྗེ་དང་དྲིལ་བུ་འཛིན་པར་མི་རིགས་ཏེ། གང་ཞིག་མཆོག་གི་འདོད་ཆགས་ཆེན་པོའི་སྤྱོད་པ་ཡིན་པའི་ཕྱིར་རོ། །དགེ་སློང་གི་གཟུགས་ཉིད་ཀྱང་འདོད་ཆགས་དང་བྲལ་བའི་སྤྱོད་པ་དང་ལྡན་པ་སྟེ། རྣམ་པ་འདི་ཉིད་སྔགས་ཀྱི་ཚུལ་གྱི་སྤྱོད་པ་ལ་ནི་རིགས་པས་མ་ཡིན་ནོ། །དེ་ཉིད་ཀྱི་ཕྱིར་བཅོམ་ལྡན་འདས་ཀྱིས་དེ་བཞིན་གཤེགས་པ་ཐམས་ཅད་རབ་ཏུ་གནས་པ་རྣལ་འབྱོར་ཆེན་པོའི་རྒྱུད་ལས་གསུངས་པ། སོར་བརྒྱད་ལ་སོགས་སྐྲ་དང་ནི། །གོས་དང་རྒྱན་གྱིས་བརྒྱན་བྱས་ཏེ། །རྡོ་རྗེ་འཛིན་པའི་བྱ་བ་བྱ། །དགེ་སློང་རྡོ་རྗེ་འཛིན་པར་འགྱུར། །གཞན་རྣམས་སུ་ནི་ངེས་པ་མེད། །ཅེས་པ་ལ་སོགས་པའོ། །གལ་ཏེ་འདོད་ཆགས་དང་བྲལ་བའི་གཟུགས་ཀྱིས་ཀྱང་དེ་བཞིན་དུ་འདིར་དབང་དུ་བྱ་བ་ཐོབ་པ་དེ་ལྟ་ན་ནི་བཅོམ་ལྡན་འདས་ཀྱིས་ཅིའི་དོན་དུ་དེ་ལྟ་བུའི་རྣམ་པའི་གཟུགས་ཀྱི་སྤྲུལ་པ་བསྟན། གཞན་
ཡང་ཀྱེ་རྡོ་རྗེ་ལས་བྱུང་བ་ཀུ་རུ་ཀུ་ལླེའི་རྟོག་པ་ལས་ཀྱང་གསུངས་པ། གོས་མེད་གཙུག་ཏོར་མེད་པའི་ལུས། །དེ་འདྲ་བླ་མར་མི་བྱ་སྟེ། །ཕྱག་རྒྱའི་དངོས་གྲུབ་རྣམས་ཉམས་འགྱུར། །ཞེས་སོ། །དེའི་ཕྱིར་གང་ཇི་སྲིད་དགེ་སློང་གི་གཟུགས་ཀྱིས་སྔགས་ཀྱི་ཚུལ་གྱི་སྤྱོད་པ་ལ་རབ་ཏུ་ཞུགས་པར་གྱུར་བ་དེ་རྣམས་ཀྱིས་ནི་ཉན་ཐོས་ལ་སོགས་པའི་སྤྱོད་པ་ལེགས་པར་མ་བསྲུང་ཤིང༌། སྔགས་ཀྱི་ཚུལ་གྱི་སྤྱོད་པ་ལའང་མ་ཡིན་ནོ། །དེ་ཉིད་ཀྱི་ཕྱིར་དེ་རྣམས་གཉིས་ཀའི་སྔོམ་པ་ལས་ཉམས་པར་འགྱུར་ཏེ། ཆགས་ལྡན་རྣམས་ཀྱིས་ཤིན་ཏུ་བདེ་བ་ལ་རབ་ཏུ་འཁྱུད་པ་བཞིན་དུ་དབང་པོ་འབའ་ཞིག་གི་འདོད་པ་ཆེན་པོས་ཡུམ་གྱི་བདེ་བ་ལ་སྲེད་པར་གྱུར་ནས་བཟའ་བ་དང་བཏུང་པ་ལ་སོགས་པ་བྱས་པར་གྱུར་ན་དམྱལ་བར་འགྲོ་བར་འགྱུར་རོ། །དེ་ལྟར་ཡང༌། གང་ཞིག་བརྟུལ་ཞུགས་བཟང་མ་ནོས་ནས། །ལེགས་པར་སྲུང་བར་མི་བྱེད་པ། །དེ་ནི་ངེས་པར་ཤ་དང་རུས། །འཇིགས་པའི་མེ་མ་མུར་དུ་འགྱུར། །གཞན་ཡང་གཟུགས་གཞན་ཡིད་ལ་བྱ་བ་གཞན་དང་འདྲ་བ་ནི་མ་འབྲེལ་བ་སྟེ། གཟུགས་གང་དང་འདྲ་བ་ཡིན་པ་དེ་དང་འདྲ་བར་བྱ་བ་མཆོག་ཏུ་མཛེས་པའོ། །དེ་ལྟར་ཡང༌། རང་ངམ་གཞན་གྱི་དབང་ཡང་རུང༌། །གནས་སྐབས་གང་དུ་ཅི་སྤྱོད་ཀྱང༌། །བསླབ་པར་གསུངས་པ་གང་ཡིན་པའི། གནས་སྐབས་དེ་ལ་འབད་དེ་བསླབ། །ཅེས་པའོ། །རབ་ཏུ་དང་བའི་མཚན་གྱིས་ཕྱུག །དེ་ཉིད་བཅུ་ལ་རྣམ་པར་མཁས། །དེ་ནི་ཞི་རྒྱས་ལ་སོགས་ལ། །སློབ་དཔོན་དུ་ནི་རྣམ་ཤེས་བྱ། །བརྡ་ཤེས་དང་བའི་བདག་ཉིད་ཅན། །དམ་ཚིག་ཐམས་ཅད་སྐྱོང་བར་བྱེད། །བཟོ་ཡི་ཆ་ནི་ཐམས་ཅད་དང༌། །སྔགས་ཀྱི་བསྟན་བཅོས་རབ་འབྱམ་ཤེས། །གཟའ་དང་སྐར་མ་དུས་སྦྱོར་ཤེས། །འཇིག་རྟེན་སྨོད་ལས་གཞན་དུ་འགྱུར། །རབ་ཏུ་གནས་པ་རབ་ཏུ་མཛད། །གྲོང་ཁྱེར་གང་དེར་ངེས་པར་ནི། །འདི་ཡིས་སངས་རྒྱས་བཞུགས་གསོལ་བས། །གང་དུ་ཞི་དང་བཟླས་འཕེལ་ཞིང༌། །ནད་མེད་ཆོས་ཀྱང་འཕེལ་བར་འགྱུར། །ནོར་དང་ཚེ་དང་བདེ་བ་སྟེར། །བྱེད་པ་པོ་ལ་གྲགས་པ་དང༌། །ཕུན་ཚོགས་བུ་དང་བུ་མོ་འཕེལ། །དེ་ཡི་ཕ་ཡང་དགའ་བར་འགྱུར། །ཇི་སྲིད་ལྷ་ཉིད་གནས་གྱུར་བ། །དེ་སྲིད་དུས་སུ་སྟོང་ཕྲག་གས། །དགའ་ལྡན་དུ་ནི་དེ་ལ་མཆོད། །ལྷ་ཉིད་གནས་པར་གྱུར་པ་ན། །
རིང་དུ་འཕེལ་ཞིང་སྐྱེ་བར་འགྱུར། །དེ་ནས་ཞི་རྒྱས་ལ་སོགས་ལ། །གཞན་གང་ཞིག་ནི་རྣམ་པར་སྨད། །རྒན་པོ་དམ་ཚིག་ཉམས་པ་དང༌། །བྱ་རོག་སྒྲ་དང་རྣ་ལྡན་ཅན། །སྐམས་པ་ཡན་ལག་མ་ཚང་ལྷག །སྒུར་པོ་མི་ཐུང་འཐིང་པོ་དང༌། །རྣམ་འགྱུར་ཤ་བཀྲ་ཅན་དྲག་པོ། །གཡོན་ཅན་མ་རུངས་ངན་པར་ཞུགས། །སྡིག་ཅན་ནད་པ་ཅུང་ཟད་ཤེས། །ལྷ་ཡི་གྲིབ་ནས་ཉེ་བར་འཚོ། །མགྲིན་ངན་འོན་པ་སྒོམ་པ་དང༌། །སེན་ཁྱོན་སྐྲ་ནི་ངན་པ་དང༌། །ཕྲ་མ་བྱེད་དང་རྟོག་གེ་པ། །མི་ཤིས་དམངས་རིགས་ཞིང་ལས་པ། །དེ་བཞིན་སོ་སྟོ་རྐང་ཉེག་དང༌། །ཐམས་ཅད་ཆུ་བུར་ཝ་བ་ཅན། །འདི་ཡིས་སངས་རྒྱས་བཞུགས་གསོལ་ན། །ནོར་དང་ཚེ་དང་བུ་རྣམས་ཉམས། །གྲོང་ཁྱེར་དང་ནི་རྒྱལ་པོ་དང༌། །དེ་བཞིན་བྱེད་པོ་སྐྱོན་བཅས་འགྱུར། །འཆི་བ་རབ་ཏུ་སྟེར་བར་བྱེད། །དེ་ལྟར་བྱེད་པོ་ངན་པར་བཤད། །དེས་ནི་ཀུན་དུ་མ་རུངས་པའི། །ལས་རྣམས་ཐམས་ཅད་རབ་ཏུ་བྱ། །ཞེས་པ་པཎྜི་ཏ་ཆེན་པོ་དཀྱིལ་འཁོར་གྱི་སློབ་དཔོན་མེ་ལོང་གིས་མཛད་པ་བྱ་བ་ཀུན་ལས་བཏུས་པ་ལས་སློབ་དཔོན་གྱི་མཚན་ཉིད་ཀྱི་ཆོ་གའོ།། །།འདིར་བཤད་པའི་མཚན་ཉིད་རྣམས་དང་ལྡན་པའི་སློབ་དཔོན་སྙིང་རྗེ་དང་བྱམས་པའི་སེམས་དང་ལྡན་པ་སྲིད་པའི་རྒྱ་མཚོའི་ནང་དུ་འཁོར་ཞིང་ལྷུང་བའི་སེམས་ཅན་གྱི་ཁམས་རྣམས་རྗེས་སུ་འཛིན་ཞིང་འདོད་པའི་དོན་ལ་སྦྱོར་བ། སྔགས་ཀྱི་ཚུལ་མང་དུ་ཐོས་ཤིང་མཁས་པ། བློ་བརྟན་ཞིང་སེར་སྣ་མེད་པ། སྤྲོ་བའི་དང་ཚུལ་ཅན་རྣམས་ཀྱིས་ཀྱིས་ས་ཡོངས་སུ་བརྟག་པ་དང༌། ས་བདག་དང་ཀླུ་ཡོངས་སུ་བརྟག་པ་དང༌། སའི་སེལ་དབྱུང་བ་དང༌། ས་སེལ་ལ་ཐིག་གདབ་པའི་མཚན་མ་དང༌། མཆོད་ཡོན་གྱི་ཆོ་ག་དང༌། རྙིང་པ་གསོ་བ་དང༌། མཆོད་ཡོན་ལ་སོགས་པའི་སྦྱིན་པའི་ངེས་པ་དང༌། སྔོན་དུ་བསྙེན་པའི་ངེས་པའི་དགོས་པ་དང༌། སློབ་མ་བསྡུ་བ་དང༌། དཀྱིལ་འཁོར་གྱི་ཁང་པ་བྱ་བ་དང༌། ས་ཡོངས་སུ་གཟུང་བ་དང༌། བགེགས་ལ་ཕུར་བུས་གདབ་བ་དང༌། ནོར་འཛིན་མ་ལྷག་པར་གནས་པ་དང༌། བུམ་པ་ལྷག་པར་གནས་པ་དང༌། ལྷ་ལྷག་པར་གནས་པ་དང༌། ཐིག་སྐུད་ལྷག་པར་གནས་པ་དང༌། ནམ་མཁའ་ལ་ཐིག་གདབ་པ་དང༌། དཀར་པོས་ཐིག་གདབ་པ་དང༌། དཀྱིལ་འཁོར་ལ་ཐིག་གདབ་པ་དང༌། ཚོན་གྱི་བཟླས་པ་དང༌།
ཚོན་དགྱེ་བ་དང༌། བུམ་པ་དགོད་པ་དང༌། དཀྱིལ་འཁོར་བསྒྲུབ་པ་དང༌། དཀྱིལ་འཁོར་གྱི་ལྷ་ཐམས་ཅད་བསྡུས་ཏེ་བསྒོམ་པ་དང༌། སྐུ་གཟུགས་ལ་སོགས་པའི་རབ་ཏུ་གནས་པ་དང༌། བགྲང་ཕྲེང་རབ་ཏུ་གནས་པ་དང༌། བགྲང་ཕྲེང་གི་མཚན་ཉིད་དང༌། རྒྱལ་མཚན་གཟུགས་པ་དང༌། རྫིང་ལ་སོགས་པའི་རབ་ཏུ་གནས་པ་དང༌། ཨ་མྲའི་སྐྱེད་མོས་ཚལ་ལ་སོགས་པའི་རབ་ཏུ་གནས་པ་དང༌། དགེ་བསྙེན་གྱི་སྡོམ་པ་ལ་གནས་པ་དང༌། དབང་བསྐུར་བ་དང༌། རང་གིས་དབང་བླང་བ་དང༌། རྩ་བའི་ལྟུང་བ་དང༌། སྦོམ་པོའི་ལྟུང་བ་དང༌། སྦྱིན་སྲེག་དང༌། ཡིད་ཀྱི་སྦྱིན་སྲེག་དང༌། ནང་གི་སྦྱིན་སྲེག་དང༌། ཚོགས་ཀྱི་བཟའ་བ་དང༌། དཀྱིལ་འཁོར་ཉེ་བར་བསྡུ་བ་དང༌། ཡིད་ཀྱི་དཀྱིལ་འཁོར་དང༌། གཏོར་མ་དང༌། གཟའ་ཡུམ་ལ་སོགས་པས་བདེ་ལེགས་སུ་བྱེད་པ་དང༌། བགེགས་བསལ་བ་དང༌། སྐུ་གཟུགས་ཀྱི་མཚན་ཉིད་དང༌། ཁམས་ཀྱི་ཡོན་ཏན་དང༌། ཤིང་ལ་སོགས་པའི་སེལ་དབྱུང་བ་དང༌། མཆོད་རྟེན་གྱི་མཚན་ཉིད་དང༌། རྡོ་རྗེ་དང་རྡོ་རྗེ་དྲིལ་བུའི་མཚན་ཉིད་དང༌། དྲིལ་བུ་དང་རྡོ་རྗེ་གཟུང་བ་དང༌། ཁ་ཊྭཱཾ་ག་དང་ཌ་མ་རུ་ལ་སོགས་པ་སྣ་ཚོགས་པའི་མཚོན་ཆའི་མཚན་ཉིད་དང༌། ནགས་ཚལ་གྱི་ལྟད་མོ་དང༌། ཁྲུའི་ཚད་དང༌། གཎྜཱིའི་མཚན་ཉིད་དང༌། མཆོད་རྟེན་ལ་སོགས་པའི་སྲོག་ཤིང་གཟུགས་པ་དང༌། སྒོའི་ཤིང་གཟུགས་པ་དང༌། ཀ་བ་གཟུགས་པ་དང༌། གཙུག་ལག་ཁང་ལ་སོགས་པའི་སྟེང་དུ་ཤིང་དགོད་པ་དང༌། དྲིའི་གཙང་ཁང་ལ་སོགས་པའི་མཚན་ཉིད་དང༌། ཁང་བ་བརྩེགས་མའི་མཚན་ཉིད་དང༌། རྒྱ་ཕུབས་ལ་སོགས་པའི་མཚན་ཉིད་དང༌། བསམ་གཏན་གྱི་ཁང་པ་ལ་སོགས་པའི་མཚན་ཉིད་དང༌། ཤི་བའི་རུས་བུ་དག་བར་བྱ་བའི་ཆོ་ག་སྟེ། ཆོ་ག་དྲུག་ཅུ་རྩ་བཞི་བསྒྲུབ་པར་བྱ་བའོ། །དེ་ལ་དགེ་བའི་ཉིན་པར་གཏོར་མ་སྦྱིན་པ་སྔོན་དུ་འགྲོ་བས་གཙུག་ལག་ཁང་ལ་སོགས་པའི་ས་ཡོངས་སུ་བརྟག་པར་བྱའོ། །དེ་ལ་དཀར་པོ་དང་དམར་པོ་དང་སེར་པོ་དང་ནག་པོའི་ཁ་དོག་རྣམས་དང༌། ཁུ་བ་དང༌། རྡུལ་དང༌། གཅི་བ་དང༌། བཤད་བའི་དྲི་རྣམས་དང༌། མངར་བ་དང༌། བསྐ་བ་དང༌། སྒྱུར་བ་དང༌། ཚ་བའི་རོ་རྣམས་རིམ་པ་བཞིན་དུ་བྲམ་ཟེ་ལ་སོགས་པའི་སར་འགྱུར་རོ། །དཀར་པོའི་ས་ལས་ནི་ཞི་བའི་འབྲས་བུ་སྟེར་ཞིང༌། དམར་པོའི་ཁ་དོག་ལས་ནི་དབང་
དུ་བྱ་བའོ། །དེ་ལས་ཕྱི་མའི་ས་གཉིས་ནི་རྒྱས་པ་དང་དྲག་པོ་དག་སེར་པོ་དང་དཀར་ནག་གི་ཁ་དོག་ལས་ཏེ་གཞན་ཉིད་ནི་མ་ཡིན་ནོ། །འཕེལ་བ་དང༌། ན་བ་དང༌། འཆི་བ་དང༌། མྱ་ངན་དང༌། ནོར་ཉམས་པ་དང༌། འཇིགས་པ་རྣམས་དང༌། གྲོལ་བ་དང༌། གྲུབ་པར་བྱེད་པ་དག་ནི་བརྒྱད་པོ་དག་གཞོལ་བའི་ས་ལས་ཏེ་རིམ་པས་ཤར་ལ་སོགས་པར་ཤེས་པར་བྱའོ། །གལ་ཏེ་གཞོལ་བ་དག་པར་བྱས་པའི་ས་ནི་དགེ་བར་བྱེད་པར་བཤད་ཅིང༌། དེ་ལས་ཀྱང་ཤར་དང་བྱང་གཞོལ་བའི་ས་ནི་ཤིན་ཏུ་བཟང་བར་འགྱུར་རོ། །གྲོག་མའི་མཁར་ཡོད་པ་ལས་ནི་ནང་དང༌། རྩུབ་མོའི་ས་ལས་ནི་ནོར་ཟད་པ་དང༌། གས་པ་ལས་ནི་མཆོག་གི་འབྲས་བུ་མེད་པ་དང༌། དམའ་བའི་ས་ལས་ནི་ཡང་ཞིང་མི་འདོད་པ་རྣམས་བྱེད་དོ། །གཞུའི་རྣམ་པ་དང་གྲུ་གསུམ་དང་ཆུ་ཡོད་པ་དང༌། ཡོན་པོ་རྣམས་སྤང་བར་བྱ་ཞིང་རུས་སྦལ་གྱི་རྒྱབ་ལ་སོགས་པའི་མཚན་ཉིད་ཅན་གྱིས་ཡང་སྤང་བར་བྱའོ། །དེ་ནས་གཞན་ཡང༌། ཤར་དུ་ཨ་ཤྭདྠ་དང་ནི། དེ་བཞིན་མེར་ནི་ཨརྫུ་ན། །ལྷོ་ཡི་ཕྱོགས་སུ་པླཀྵ། །སྲིན་པོར་པ་ལཱ་ཤ་རྣམས་སྤང༌། །ནུབ་ཀྱི་ཕྱོགས་སུ་ནྱ་གྲོ་དྷ། །རླུང་དུ་ཤལ་མ་ལི་དང་ནི། །བྱང་གི་ཕྱོགས་སུ་བ་ཀུ་ལ། །བྱང་ཤར་ཨུ་དུམྦཱ་ར་སྤང༌། །ཞེས་སོ། །དེ་ནས་མཐོ་གང་ཙམ་བརྐོས་ནས། །ས་དེས་མྱུར་དུ་བཀང་བ་དང༌། །གལ་ཏེ་ས་དེ་ལྷག་གྱུར་ན། །དགེ་བར་བྱེད་པ་ཉིད་ཡིན་ནོ། །གལ་ཏེ་ཉུང་བར་གྱུར་ན་དེས། །སྐྱོན་བཅས་རིག་ནས་སྤང་བར་བྱ། །སླར་ཡང་དོང་དེར་སོང་བའི་ས། །བླངས་ནས་མཐོ་གང་ཙམ་ཆུས་བཀང༌། །བཀང་སྟེ་གོམ་པ་བརྒྱར་ཕྱིན་ནས། །སླར་ཡང་འོངས་ཏེ་བརྟག་པར་བྱ། །ཆུ་ཡིས་གང་ན་ས་བཟང་སྟེ། །དམའ་ན་སྔགས་པས་སྤང་བར་བྱ། །གལ་ཏེ་ཆུ་དེ་སྒྲ་བཅས་ན། །ཀླུ་རྣམས་འཇིགས་པ་ཡང་དག་སྟོན། །ཕྱི་ནས་ཆོ་ག་མཐོང་བ་ཡིས། །བཟང་བའི་ལས་ཅན་ཡོངས་སུ་གཟུང༌། །དེ་ལྟར་སའི་མཚན་ཉིད་ཤེས་པའི་སློབ་དཔོན་ཁྲུས་བྱས་ཞིང་གཙང་བའི་ལུས་ལ་དྲི་བཟང་པོ་བྱུགས་ཏེ། །མཆོད་པའི་ཡོ་བྱད་རྣམས་ཡང་དག་པར་བཤམས་ནས། །ཇི་ལྟར་རྙེད་པའི་གོས་དང་རྒྱན་ལ་སོགས་པས་ཆས་སུ་ཞུགས་ལ་ལྷའི་རྣལ་འབྱོར་ལེགས་པར་བསྒོམ་པར་བྱའོ། །དཀྱིལ་འཁོར་ཁྲུ་བཞིའི་ཚད་དང་ལྡན་པ་གྲུ་བཞི་པའི་ས་དེར་བ་ལས་བྱུང་བ་
ལ་སོགས་པས་ཉེ་བར་བྱུག་པ་བྱས་ལ། དེར་དཀྱིལ་འཁོར་གྱི་འཁོར་ལོ་བསྒོམས་ཏེ་ཡང་དག་པར་མཆོད་ཅིང་ཕྱོགས་ཀྱི་གཏོར་མ་བྱིན་ནས་པུས་མོ་གཡས་པའི་ལྷ་ང་སར་བཙུགས་ཏེ་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་ནས་ཕྱོགས་དང་ཕྱོགས་བྲལ་རྣམས་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་དང་འཇིག་རྟེན་སྐྱོང་བ་ལ་སོགས་པ་རྣམས་ལས་བླང་བར་བྱ་བའོ། །ཁམས་གསུམ་གང་དུ་མགོན་པོ་དག །ཆེན་པོས་མཆོད་པ་བཞུགས་རྣམས་དང༌། །ལྷ་དང་ཀླུ་དང་གནོད་སྦྱིན་དང༌། །དྲི་ཟ་དང་ནི་ལྷ་མིན་སོགས། །དེ་དང་དེ་ལ་འདི་གསོལ་གྱི། །སེམས་ཅན་ཀུན་གྱི་དོན་བསྒྲུབ་ཕྱིར། །ས་ཡི་ཆ་ནི་བཟང་པོ་འདིར། །གཙུག་ལག་ཁང་ནི་བཞེངས་གྱུར་ནས། །ཐོས་བསམ་ལ་སོགས་མཆོག་བཞུགས་པས། །ཆོས་ཉིད་རྟོགས་པར་བྱ་བའི་ཕྱིར། །ཆེ་གེ་བདག་ནི་ཆེ་གེ་མོའི། །གྲགས་པ་དམ་པ་བྱ་བར་བརྩོན། །གལ་ཏེ་ཁྱེད་ཀྱིས་བཟོད་གནང་ན། །བགྱི་སྟེ་གཞན་དུ་མ་ཡིན་ནོ། །རྨི་ལམ་ལ་སོགས་མཚན་མ་ཡིས། །ས་བཟང་འདི་ནི་བདག་ལ་སྩོལ། །ཞེས་ལན་གསུམ་བརྗོད་པར་བྱའོ། །དེའི་རྗེས་སུ། ཨོཾ་མུ་ཙི་ལི་སྭཱ་ཧཱ། ཨོཾ་མོ་ཧ་ནི་སྭ་ཧ། ཨོཾ་དིཏྟ་ལི་སྭཱ་ཧཱ། །ཞེས་པ་རྨི་ལམ་བརྟག་པ་འདིས་ལག་པ་གཡོན་པའི་སོར་མོ་རྣམས་ཁར་ལན་ཉི་ཤུ་རྩ་གཅིག་བསྔགས་ལ་བཅོམ་ལྡན་འདས་འཇིག་རྟེན་དབང་ཕྱུག་གི་མདུན་དུ་མཆོད་པ་སྔོན་དུ་འགྲོ་བས་མགོ་ལྷོར་བསྟན་ཅིང་གདོང་ཤར་དུ་ཕྱོགས་ལ་གོས་གཙང་མས་བརྒྱན་ཏེ་ཇི་ལྟར་འདོད་པར་ཉལ་བར་བྱ་སྟེ། རྨི་ལམ་ངན་ན་བདུད་རྩི་འཁྱིལ་པའི་སྔགས་བཟླས་པའམ་དོན་དམ་པར་ཆོས་ཐམས་ཅད་རང་བཞིན་མེད་པར་མོས་པར་བྱའོ། །སླར་ཡང་རྨི་ལམ་བརྟག་པ་བྱས་ནས་ལྷ་རྣམས་ཀྱིས་གནང་བའམ་མ་བཀག་པའི་ས་ལ་འོག་ནས་འཆད་པ་རྣམས་བྱའོ། །བཀག་པ་ལ་ནི་མ་ཡིན་པ་ཁོ་ནའོ། །རྨི་ལམ་བཟང་ན་ཉི་མ་བཟང་པོ་གཉིས་པ་ལ་སྔ་དྲོའི་དུས་སུ་ས་གནོན་གྱི་ཕྱག་རྒྱ་དང་རྡོ་རྗེའི་སྐྱིལ་ཀྲུང་བཅས་ཏེ་རྡོ་རྗེ་སེམས་དཔའི་རྣལ་འབྱོར་དང་ལྡན་པས་ཨོཾ་བྷུ་ཁཾ་ཞེས་པའི་སྔགས་ཀྱིས་སྟོང་པ་ཉིད་དང༌། ཧཱུཾ་ལཾ་ཧཱུཾ་ཞེས་པའི་སྔགས་ཀྱིས་རྡོ་རྗེའི་རྡུལ་ཕྲ་རབ་ཀྱི་རང་བཞིན་དུ་བསྒོམས་ལ། ཨོཾ་མེ་དི་ནཱི་བཛྲི་བྷ་བ་བཛྲ་བནྡྷ་ཧཱུཾ་ཞེས་པ་དང༌། རྡོ་རྗེ་བསྡམས་པའི་ཕྱག་རྒྱས་བྱིན་
གྱིས་བརླབ་པར་བྱའོ། །ལག་པ་གཡས་པར་ཟླ་བལ་ཧཱུཾ་བསམས་ཏེ། ལན་གསུམ་བརྗོད་ཅིང་དེའི་འོད་ཟེར་དང་སོར་མོའི་རྩེ་མོས་བསྣུན་པས་དེ་དག་གི་སྒྲ་རྣམས་ཀྱིས་བསྐུལ་བར་གྱུར་པ་ལས་སའི་ལྷ་མོ་སེར་མོ་ལུས་ཕྱེད་དམ་ཐམས་ཅད་འཐོན་པ། ཕྱག་གཉིས་ན་གསེར་གྱི་བུམ་པ་དང༌། མི་འཇིགས་པའི་ཕྱག་རྒྱ་ཅན། མཛེས་པའི་རྒྱན་གྱིས་བརྒྱན་པ་ལ་ཞབས་བསིལ་དང༌། ཞལ་བསིལ་དང༌། མཆོད་ཡོན་སྔོན་དུ་འགྲོ་བའི་མེ་ཏོག་ལ་སོགས་པས་ཡང་དག་པར་མཆོད་ནས། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་དང༌། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དབང་དུ་གྱུར། །སྐྱོབ་པ་ཤཱཀྱ་སེང་གེ་ཡིས། །ཇི་ལྟར་བདུད་ཀྱི་དཔུང་བཅོམ་པ། །བཅོམ་ནས་གཙུག་ལག་ཁང་སོགས་བགྱི། །ཞེས་ལན་གསུམ་གསོལ་བ་བཏབ་པས་ཀྱིས་ཤིག་ཅེས་གསུངས་ནས་དེ་ཉིད་དུ་ཐིམ་སྟེ་སའི་ལྷ་མོ་སའི་ངོ་བོར་གནས་བར་བསམ་མོ། །དེ་ནས་དེར་བྷྲཱུཾ་ལས་བྱུང་བའི་འཁོར་ལོ་དང་བྷཱུཾ་ལས་བྱུང་བའི་ཁང་པ་བརྩེགས་པ་བསྒོམ་པར་བྱའོ། །དེ་ནས་ཁང་པ་བརྩེགས་པར་དྲིའི་མཎྜལ་བྱས་པར་རང་གི་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་ཀྱི་དཀྱིལ་འཁོར་དང་ཕྱོགས་སྐྱོང་ལ་སོགས་པ་སྤྱན་དྲངས་ལ་ཞབས་བསིལ་ལ་སོགས་པའི་མཆོད་པ་དང་གཏོར་མ་དབུལ་བ་སྔོན་དུ་འགྲོ་བས་ལྕེ་ཧཱུཾ་ལས་རྡོ་རྗེར་བྱས་ནས་སྤོས་ཕོར་བཟུང་སྟེ་དྲིལ་བུ་དཀྲོལ་ཞིང༌། བཅོམ་ལྡན་རྡོ་རྗེ་ཆེ་གེ་མཆོག །རིག་པའི་རྒྱལ་པོ་ཁྱེད་ལ་འདུད། །ཡང་དག་ཐུགས་རྗེའི་བདག་ཉིད་ཅན། །ཁྱེད་ལ་མཆོད་ཡོན་འབུལ་བར་འཚལ། །སློབ་མ་རྣམས་ལ་བརྩེ་དོན་དང༌། །ཁྱེད་རྣམས་ལ་ཡང་མཆོད་ཕྱིར་དང༌། །སེམས་ཅན་བསོད་ནམས་འཕེལ་དོན་དང༌། །བྱང་ཆུབ་སེམས་ནི་བསྐྱེད་པའི་ཕྱིར། །དེ་བས་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པར་རིགས། །སངས་རྒྱས་འགྲོ་འཁོར་བྱ་དོན་བརྩོན། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང༌། །འབྱུང་པོ་བྱང་ཆུབ་བརྟན་གནས་དང༌། །སེམས་ཅན་བསྟན་ལ་མངོན་དགའ་དང༌། །གང་གཞན་ལྷ་ཡི་སྤྱན་ལྡན་རྣམས། །བདག་ལ་ཡང་དག་
དགོངས་སུ་གསོལ། །རྡོ་རྗེ་ཅན་ཆེན་ཆེ་གེ་བདག །ཆེ་གེའི་མཆོད་ཡོན་དབུལ་བ་ནི། །བགྱིའོ་དེས་ན་ཁྱེད་རྣམས་ཀྱིས། །ཉེ་བར་གནས་པར་མཛད་པའི་རིགས། །ཞེས་ལན་གསུམ་བརྗོད་པར་བྱའོ། །དེ་ནས་འཆད་པར་འགྱུར་བའི་རྣམ་པར་རྒྱལ་བ་ལ་སོགས་པའི་བུམ་པའམ་དེ་དག་མེད་ན་གཞན་གྱི་ཡང་ཉ་གསོན་པོ་ནང་དུ་བཅུག་པ་རྣམས་རིམ་པ་བཞིན་དུ་བཞག་ནས་ལྷག་པར་གནས་པར་བྱའོ། །ལས་བྱེད་པ་རྣམས་བགེགས་མཐར་བྱེད་ལ་སོགས་པ་ལས་ཐམས་ཅད་པའི་ལྷའི་རྣམ་པར་སྤྲུལ་ཏེ། དེ་དག་གི་ཁུང་བུ་གྲུ་བཞི་པ་རྒྱར་ཁྲུ་དོ་པ་ཟབས་སུ་དེའི་ཕྱེད་ཁྲུ་གང་པ་བརྐོ་བར་བྱའོ། །དེའི་དབང་ལྡན་དུ་ཟླུམ་པོ་དེའི་ཚད་དམ་དེའི་ཕྱེད་པ་ཡང་ངོ༌། །དེ་གཉིས་ཀ་ཡང་ས་དང་བ་ལས་བྱུང་བས་བྱུག་པར་བྱའོ། །དེ་ནས་ཁུང་བུ་གྲུ་བཞི་པར་མཆོད་ཡོན་གྱི་སྣོད་ནས་མེ་ཏོག་དཀར་པོའི་སྙིང་པོར་དཱུར་བ་དང་བཅས་པ་ཉིད་མཛུབ་མོ་དང་མཐེ་བོང་གི་རྩེ་མོས་མཐོང་བར་བླངས་ཏེ་ཡོངས་སུ་བསྐོར་ཞིང་འགྱིང་བའི་ཚུལ་གྱིས་མཛུབ་མོ་དང་གུང་མོ་དང་མིང་མེད་དང་མཐེ་ཆུང་རྣམས་རིམ་གྱིས་དགྲོལ་ལ། ཨོཾ་ཨཱཿཧྲཱིཿཔྲ་ཝ་ར་སཏྐཱ་ཨརྒྷཾ་པྲ་ཏཱི་ཙྪ་ཧཱུཾ་སྭ་ཧཱ། ཞེས་མཆོད་ཡོན་ཕུལ་ནས། ཨོཾ་བྷྲཱུཾ་ཧཿ་ཧྲིཿ་པྲ་ཏཱི་ཙྪ་བྷུ་ཝ་སྭཿ། ཞེས་པའི་སྔགས་ཀྱིས་རིམ་པ་བཞིན་དུ་རྣམ་པར་རྒྱལ་བ་ལ་སོགས་པའི་བུམ་པའི་ཆུ་བླུགས་པས་གྲུ་བཞི་པ་ཇི་ལྟ་བ་བཞིན་དུ་བཀང་ལ་དེའི་རྒྱུན་གྱིས་ཟླུམ་པོ་དགང་བར་བྱ་སྟེ། དེའི་རྗེས་སུ་ཉ་ལྕིབས་དང་ཉ་གསོན་པོ་བཅུག་ལ་གཡས་སུ་འཁྱིལ་བར་བལྟ་ཞིང་ཤིང་འོ་མ་ཅན་གྱི་འདབ་མ་བཅུག་ནས་བདག་ཉིད་ཛཾ་ལས་སྐྱེས་པའི་རྡོ་རྗེ་དང་ཛཾ་ལས་ཛཾ་གུ་ལི་སེར་མོ་རྩ་བ་དང་གཡས་པ་དང་གཡོན་པའི་ཞལ་གསུམ་སེར་བ་དང་གནག་པ་དང་དཀར་བ་གདེངས་ཀ་བདུན་དང་ལྡན་པ་རིན་པོ་ཆེའི་ཅོད་པན་ཅན་ཕྱག་དྲུག་གི་གཡས་པ་གཉིས་ཀྱིས་རྡོ་རྗེ་དང་མདའ་དང༌། གཡོན་པ་དག་གིས་གཞུ་དང་ཞགས་པ་དང་བཅས་པའི་སྡིགས་མཛུབ་འཛིན་པ་ཕྱག་ལྷག་མ་དག་གིས་རང་འོད་ཀྱི་ཐབས་ལ་འཁྱུད་པ་སྣ་ཚོགས་པའི་ན་བཟའ་དང་སྦྲུལ་གྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མའི་གདན་ལ་བཞུགས་པ། ཉི་མ་འོད་ཅན་དུ་བསྒོམས་ཏེ་པད་ཀོར་ལན་ལྔ་བྱས་ལ་དབང་ཆེན་གྱི་མཐར་ཐུག་པར་བལྟས་པས་གཞི་སྣ་ཚོགས་རྡོ་རྗེའི་
རང་བཞིན་དུ་བསམ་མོ། །ལྟད་མོ་པའི་འཇིག་རྟེན་པ་རྣམས་ཀྱང་སོ་རྩི་དང་མེ་ཏོག་གི་ཕྲེང་བ་དང་ཙནྡན་ལ་སོགས་པས་ཡང་དག་པར་ཚིམ་པར་བྱའོ་ཞེས་པ་གཙུག་ལག་ཁང་ལ་སོགས་པ་བྱ་བའི་དོན་དུ་ས་ཡོངས་སུ་བརྟག་པའི་ཆོ་གའོ།། །།དེ་ནས་ཕུན་སུམ་ཚོགས་པ་མ་ཡིན་པའི་སྐྱོན་ཐམས་ཅད་དང་བྲལ་བར་ཤེས་པའི་སའི་དུམ་བུ་དེར་ནས་བཏབ་སྟེ་སྐྱེས་ནས་སྔོན་པོར་གྱུར་པ་ལ་བ་ལང་རྣམས་ལོངས་སྤྱོད་དུ་གཞུག་པར་བྱ་ཞིང༌། དེ་ནས་དེ་རྣམས་ཀྱི་ཆུ་དང་ལྕི་བ་དང་འོ་མ་རྣམས་བསྲེས་ནས་གཏོར་བས་ཞི་བའི་བདག་ཉིད་ཅན་གཙང་མར་གྱུར་པའི་སའི་འོག་གི་སྐབས་མཐའ་དག་ཏུ་ཀླུ་ལ་སོགས་པ་བལྟ་བར་བྱའོ། །དེའི་རྗེས་ལ་གཙུག་ལག་ཁང་དང་མཆོད་རྟེན་སྤོང་ཁང་ཁང་བཟངས་ཁད་བརྩེགས་ལྷ་ཁང་ལ་སོགས་བྱེད་འདོད་པ། །དེ་ཡིས་ས་བདག་ཀླུ་ནི་བརྟག་པར་བྱ་སྟེ་ས་ཡི་དུམ་བུ་གང་དེ་གྲུ་བཞིར་བྱ། །ཕྱོགས་ཀྱི་ས་ཡི་ཆ་རྣམས་སོ་སོར་ཟླ་བ་གསུམ་དང་ཉི་མ་ཡི་ནི་གྲངས་རྣམས་འདིར། །དབང་ལྡན་ནས་ནི་མེ་ཡི་མཐར་ཐུག་ཤར་གྱི་ས་ཡི་ཆ་ནི་དགུ་བཅུར་རྣམ་པར་དབྱེ། །དེ་བཞིན་མེ་ནས་བདེན་བྲལ་ཕྱོགས་ཀྱི་མཐར་ཐུག་བདེན་བྲལ་ནས་ནི་རླུང་གི་ཕྱོགས་ཀྱི་མཐར་ཐུག་དང༌། །རླུང་ནས་འབྱུང་པོའི་བདག་པོའི་ཕྱོགས་ཀྱི་མཐར་ཐུག་རྣམས། །དེ་བཞིན་དུ་ནི་ཆ་ནི་དགུ་བཅུ་ཉིད་དུ་བྱ། །སྟོན་ཟླ་ར་བ་འབྲིང་དང་ཐ་མའི་བར། །ཇི་སྲིད་དབང་ལྡན་ཟུར་གྱི་ཕྱོགས་སུ་མགོ །བདེན་བྲལ་ཟུར་གྱི་ཕྱོགས་ཆར་མཇུག་མ་སྟེ། ས་ཡི་དུམ་བུའི་དབུས་སུ་གསང་གནས་གཞག །ལྟེ་བའི་འོག་གི་ཆ་ནི་ལག་འགྲོའི་ལུས། །སྟེང་དུ་གདེངས་ཀ་དང་ལྡན་མི་ཡི་ལུས། །གཤིན་རྗེའི་གདོང་ལྡན་ལག་གཡོན་རྣ་བ་གཡོན། །གཡས་པའང་རིན་ཆེན་དང་བཅས་རྐེད་པར་གཞག །ས་ཡི་ཆ་དགུ་རྣམས་སུ་ཁྱབ་པར་ཉལ། །ཕྱོགས་དེར་ཀླུ་ཡི་མགོན་པོ་ཉིད་དེ་གནས། །ས་ཡི་དུམ་བུའི་སྙིང་པོའི་ཚད་ཇི་བཞིན། །སྲོག་ཤིང་ཤར་ནས་ནུབ་མཐའ་སོགས་འགྲོའི་ལུས། །ཚེས་གཅིག་གི་ནི་ཉི་མ་ལ་སོགས་པ། །ཉིན་མཚན་རེ་རེ་ལ་ནི་ཆ་རེ་འགྲོ། །ཤར་ནས་ཇི་ལྟར་རིགས་པར་ཆ་རེ་སྤྱོད། །ལྷོ་དང་ནུབ་དང་བྱང་ཕྱོགས་དེ་བཞིན་ནོ། །དགུན་ཟླ་རབ་འབྲིང་མཐའི་དཀར་ཕྱོགས་སོགས། །ཆུ་བདག་ཕྱོགས་སུ་ཁ་བལྟས་ཡང་དག་གནས། །མེ་ཡི་ཕྱོགས་སུ་ཡན་ལག་
མཆོག་འགྲོ་ཞིང༌། །རླུང་གི་ཟུར་ལ་སོགས་པར་མཇུག་མ་འགྲོ། །དཔྱིད་ཟླ་ར་བ་འབྲིད་དང་ཐ་མར་དེ། །གནོད་སྦྱིན་བདག་པོའི་ཕྱོགས་སུ་ཁ་བལྟས་ནས། །བདེན་བྲལ་ཟུར་སོགས་ཡན་ལག་མཆོག་འགྲོ་ཞིང༌། །དབང་ལྡན་ཟུར་སོགས་ཆར་ནི་མཇུག་མ་འགྲོ། །དབྱར་ཟླ་ར་བ་འབྲིང་དང་ཐ་མའི་དུས། །དེ་ནི་ཤར་གྱི་ཕྱོགས་སུ་ཁ་བལྟས་གནས། །རླུང་གི་ཟུར་སོགས་ཡན་ལག་མཆོག་འགྲོ་ཞིང༌། །མེ་ཡི་ཕྱོགས་ཆ་རུ་ནི་མཇུག་མ་འགྲོ། །ལོ་རེ་ན་ནི་ས་ཀུན་ཁྱབ་པ་སྟེ། །ལན་གཅིག་ཙམ་གྱིས་ལེགས་པར་འཁོར་བ་ཡིན། །ཁྱད་པར་ཤེས་ན་ཟླ་བ་ཟླ་བ་ཡི། །དབྱེ་བས་ལག་འགྲོའི་བདག་པོ་ཡང་དག་རྒྱུ། །ཀླུ་ཡི་བདག་ཉིད་དཀར་པོ་མཛེས་པའི་གཟུགས། །བསྒོམས་ནས་མཇུག་མ་སོགས་ལ་རིམ་པ་བཞིན། །དེ་ལུས་གནས་པའི་ཀླུ་བདག་རྒྱལ་པོ་ལ། །འོ་མའི་རོ་སོགས་ཉེར་སྤྱོད་རྣམས་ཀྱིས་མཆོད། །མཇུག་མའི་ཆ་ལ་རིགས་ལྡན་ཤིན་ཏུ་སྔོ། །གསང་གནས་སྔོ་བསངས་མདོག་ཅན་སྟོབས་ཀྱི་རྒྱུ། །ལྟེ་བར་དུང་སྐྱོད་པདྨའི་སྡོང་བུ་འདྲ། །དཔུང་པར་པདྨ་ཆེན་པོ་གསེར་གྱི་མདོག །དཱུར་བ་དང་མཚུངས་ནོར་རྒྱས་སྙིང་གར་གནས། །འཇོག་པོ་ཞེས་བྱ་དམར་པོ་མགྲིན་པར་གནས། །རྣ་བར་པདྨ་དཀར་པོ་འོད་དཀར་ཅན། །སྤྱི་བོར་ཀླུ་ནི་མཐའ་ཡས་སྔོན་པོའོ། །ལས་བྱེད་བགེགས་མཐར་བྱེད་པ་རྣམས་བསྒོམས་ནས། །རྡོ་རྗེས་མཚན་པའི་ཏོག་རྩེ་བརྟན་པོས་གཟུང༌། །ཚིམ་པར་བྱས་ནས་བདུད་སྡེ་སྐྲོད་བྱེད་པ། །དེ་ཡིས་དང་པོར་ལག་གཡོན་བཟུང་ནས་ནི། །ལྷ་དབང་ནོར་དབང་ཕྱོགས་སུ་ཁ་བལྟས་ལ། །ཡང་དག་བསྐོར་ནས་ཁམ་བཞི་བརྐོ་བར་བྱ། །ས་དེ་ཞིང་བར་སྙིང་པོའི་སར་གནས་པས། །མེ་སོགས་ཟུར་དུའང་ཕྱི་རོལ་ངོར་བར་བྱ། །དེ་ནས་འབད་པས་ས་ནི་ཁམ་ལྔ་བརྐོ། །ས་ཡི་དུམ་བུའི་དབུས་སུ་མེ་ཏོག་དགྲམ། །ལྔ་པོ་དེ་དག་ལས་རྣམས་བྱེད་པ་ཡིས། །ཕྱོགས་དང་ཕྱོགས་བྲལ་རྣམས་སུ་དུ་མར་གཏོར། །ཡང་དག་གནས་པའི་ས་ནས་ཆ་ནི་ཉི་ཤུ་གཅིག །དོར་བའི་མཐར་ནི་ཆ་དགུ་འབའ་ཞིག་བརྐོ་བར་བྱ། །དེ་ནི་མཆན་ཁུང་མདུན་གྱི་ཆ་ཡིན་དགེ་བའི་ས། །ཆོས་དོན་འདོད་པ་ཡོན་ཏན་འཕེལ་ཞིང་དངོས་གྲུར་སྟེར། །གལ་ཏེ་ཆ་དགུའི་རེ་མིག་རྣམས་སུ་ངེས་པར་གནས་པའོ། །ལག་འགྲོའི་ས་ལ་
བརྐོས་ན་ཕ་མ་དང༌། །བུ་མོ་བུ་དང་སྦུན་ཟླ་ཆུང་མ་མནའ་མ་དང༌། །ཕ་ཚན་གཉེན་དང་གྲོགས་པོའི་སྐྱེ་པོ་འཆི་བར་འགྱུར། །གལ་ཏེ་རྒྱབ་ཏུ་བརྐོས་ན་རང་ཉིད་ཉམས་པའམ། །རང་གི་གནས་ལས་གཡོ་བའམ་ཉུང་མིན་ནོར་ཟད་འགྱུར། །མཇུག་མ་ལ་ནི་གླང་བོ་རྟ་དང་མ་ཧེ་ར། །བ་ལ་ད་ཕྱུགས་དང་འཁོར་དང་འབངས་དང་སྟོབས་ཉམས་འགྱུར། །གལ་ཏེ་ཁམ་ལྔ་བརྐོས་སར་ཤིང་དང་གྲོག་སྦུར་དང༌། །སྐྲ་དང་སེན་མོ་ཐལ་བ་བྱུང་ན་འཚེ་བ་བྱེད། །རྡོ་ལས་རླུང་འཇིགས་སྦུན་པ་དང་ནི་མགལ་དུམ་ལས། །སྣ་ཚོགས་རིམས་འབྱུང་རུས་པ་ལ་ནི་ཟུག་ནད་དོ། །དགེ་དང་མི་དགེ་མཚན་མ་དུ་མའི་གཟུགས་ཤེས་ནས། །སློབ་དཔོན་བཟོ་བོའི་སྦྱིན་བདག་གི་ནི་སྐྱེ་བོ་ཡིས། །སེལ་མེད་བྱས་པ་བཞི་ཡི་ཁུང་བུ་ཐམས་ཅད་ནི། །དག་པའི་ས་ཡིས་ཀུན་ནས་མྱུར་དུ་དགད་བར་བྱ། །དེ་ཕྱིར་གང་ཞིག་ས་བདག་ཀླུ་དབུས་ཀྱི་ཚངས་ཐིག་དེ་སྲིད་དུ་ཉལ་བར་འཛིན་པ་དེ་རྣམས་ནི་གསུང་རབ་ཀྱི་དོན་མ་རྟོགས་པས་རྒོལ་བར་བྱེད་པའོ། །དབང་ལྡན་གྱི་ཟུར་ནས་བརྩམས་ཏེ་སྟོན་ཟླར་བ་ལ་སོགས་པ་ཟླ་བ་གསུམ་གསུམ་ཉི་མའི་རིམ་པས་སེལ་ཡོད་པས་བདག་པོས་བསྐྲད་ནས་རྟག་ཏུ་ཁང་པ་དེ་སྟོང་པར་རིག་པ་རྣམས་ཀྱིའོ་ཞེས་པ་ས་བདག་ཀླུ་ཡོངས་སུ་བརྟག་པའི་ཆོ་གའོ།། །།སེལ་དང་བཅས་པའི་ས་ལ་གཙུག་ལག་ཁང་ལ་སོགས་པ་བྱས་ན་སྐྱོན་དུ་འགྱུར་བའི་ཕྱིར་ས་སེལ་དབྱུང་བ་བརྗོད་པར་བྱའོ། །དང་པོར་རེ་ཞིག་སློབ་དཔོན་གྱིས་མཚན་ཉིད་དང་ལྡན་པའི་གཞོན་ནུ་མ་རིགས་ལྡན་ལས་བྱུང་བའམ། དེ་མེད་ན་རིགས་གཞན་ལས་བྱུང་བ་ཡང་རུང༌། རེ་མིག་དགུ་བྱས་པའི་དབུས་ཀྱི་ཆ་ལ་ཤིན་ཏུ་འཇམ་པའི་སྟན་ལ་བཞག་ནས་མཉམ་པར་གཞག་པའི་སེམས་ཀྱིས་དེ་རྣམས་བཅོམ་ལྡན་འདས་ཀྱི་གཟུགས་སུ་འབད་པས་བསྒོམས་ཏེ་ཡང་དག་པར་མཆོད་ནས་རིམ་པ་ལ་ཚིག་གང་དྲིས་པའི་ལན་གྱི་ཡི་གེ་བྱིན་པ་རྣམས་ངེས་པར་བརྟག་པར་བྱའོ། །འདི་ལྟ་སྟེ། བ་ཀ་ཙ་ཏ་ཨེ་ཧཱ་ཤ་ཡ་ཡཱ། གང་དུ་དྲིས་པར་གྱུར་པ་ན་ཡི་གེ་འདི་རྣམས་སོ། །ས་གཞི་ཆ་དགུར་བྱས་པ་དེར་ཤར་ལ་སོགས་པའི་སེལ་རིག་པར་བྱ་སྟེ། དྲིས་པའི་ཚེ་བ་ཞེས་པ་ན་དབང་པོའི་ཕྱོགས་ཀྱི་ཁྲུ་ཕྱེད་དང་གཉིས་ན་མིའི་སེལ་ཡོད་པས་དེར་གནས་པའི་མི་རྣམས་ངེས་པར་འཆི་བར་བྱེད་དོ། །དྲིས་པའི་ཚེ་ཀ་
ཞེས་པ་ན་མེའི་ཕྱོགས་ཀྱི་རྐེད་པ་ཙམ་ན་བོང་བུའི་སེལ་ཡོད་པས་ས་དེར་གནས་པ་རྣམས་ལ་རྒྱལ་པོའི་ཆད་པ་དང་བྲད་འགྲོའི་འཇིགས་པ་དང་མི་མཉམ་པ་བྱེད་དོ། །དྲིས་པའི་ཚེ་ཙ་ཞེས་པ་ན་ལྷོ་ཕྱོགས་ཀྱི་རྐེད་པ་ཙམ་ན་མིའི་སེལ་ཡོད་པས་ས་དེར་གནས་པ་རྣམས་ཀྱི་ཁྱིམ་བདག་འཆི་བ་དེས་པར་བྱེད་དོ། །དྲིས་པའི་ཚེ་ཏ་ཞེས་པ་ན་སྲིན་པོའི་ཕྱོགས་ཀྱི་ཁྲུ་ཕྱེད་དང་དོ་ཙམ་ན་རུས་པ་ཡོད་པས་ཁང་པ་དེར་གནས་པ་རྣམས་ཀྱི་བྱིས་པ་ཟད་པར་ངེས་པར་བྱེད་དོ། །དྲིས་པའི་ཚེ་ཨི་ཞེས་པ་ཆུ་བདག་གི་ཕྱོགས་ཀྱི་ཁྲུ་ཕྱེད་དང་དོན་གྱིས་པའི་སེལ་ཡོད་པས་བདག་པོས་བསྐྲད་ནས་རྟག་ཏུ་ཁང་པ་དེ་སྟོང་བར་བྱེད་དོ། །དྲིས་པའི་ཚེ་ཧཱ་ཞེས་པ་ན་རླུང་གི་ཕྱོགས་ཀྱི་ཁྲུ་བཞི་ན་སྐྱེས་པའི་སེལ་ཡོད་པར་རིག་པས་རྨི་ལམ་ངན་པ་རབ་ཏུ་མཐོང་བ་དང་དེའི་གྲོགས་པོ་རྣམ་པར་ཉམས་པར་བྱེད་དོ། །དྲིས་པའི་ཚེ་ཤ་ཞེས་པ་ན་ལུས་དན་པོའི་ཕྱོགས་ཀྱི་རྐེད་པ་ཙམ་དེ་ན་གཉིས་སྐྱེས་ཀྱི་སེལ་ཡོད་པས་ཁྱིམ་དེར་གནས་པ་རྣམས་ནི་ནོར་སྦྱིན་ལྟ་བུའང་ངེས་པར་མྱུར་དུ་ནོར་མེད་པར་བྱེད་དོ། །དྲིས་པའི་ཚེ་ཡ་ཞེས་པ་ན་མེའི་མཚམས་ཀྱི་ཁྲུ་ཕྱེད་དང་དོ་ན་བ་ལང་གི་སེལ་ཡོད་པས་ས་དེར་གནས་པ་རྣམས་ཀྱི་བ་ལང་དང་ནོར་ཉམས་པར་བྱེད་པར་ཐེ་ཚོམ་མེད་དོ། །དྲིས་པའི་ཚེ་ན་ཡཱ་ཞེས་པ་ན། དབུས་ན་མིའི་སྐྲ་དང་ཐོད་པ་དང་ཐལ་བ་དང་ལྕགས་ཀྱི་སེལ་ཏེ་འདི་རྣམས་ཡོད་པས་གང་ཁྱིམ་དེར་གནས་པ་རྣམས་ཀྱི་སོ་སོའི་རིགས་ཟད་པར་བྱེད་པར་ཤེས་པར་བྱའོ། །དེ་ལྟར་སེལ་རྣམས་སྐྱོན་དང་ལྡན་པར་ཤེས་ནས་རབ་ཏུ་འབད་པས་བཏོན་ཏེ་སླར་ཡང་དག་པའི་ས་གཞི་དགའ་བ་དེར་ཕུར་བུས་གདབ་པར་བྱའོ། །དངུལ་དང་ཟངས་དང་ཞ་ཉེ་ནག་པོ་དང་ཞ་ཉེ་དཀར་བོ་དང་ལྕགས་རྣམས་ལས་བརྡུངས་པ་དང་རྡོ་བ་དང་ཤིང་དང་རུས་པ་རྣམས་ཀྱིས་ནི་མ་བསྟན་ཏེ། རིགས་ངེས་པ་མེད་པ་དང༌། མཐུ་དང་བརྟན་པ་དང་ཕུན་སུམ་ཚོགས་པ་རྣམས་ཟད་པ་དང་ནད་སྟེར་བར་བྱེད་པའི་ཕྱིར་རོ། །གསེར་གྱི་ཐུར་མ་ནི་སྐྱེ་བོ་དང་སྟོབས་དང་བདེ་བ་དང་ནོར་དང་གྲུབ་པ་རབ་ཏུ་སྟེར་བར་བྱེད་པའོ། །ཕུར་བུ་ནི་རྒུན་འབྲུམ་གྱི་ཤིང་ལས་བྱས་པ་སྟེ་ལྕགས་ཀྱིས་བརྡུང་བར་བྱའོ་ཞེས་པས་སེལ་དབྱུང་བའི་ཆོ་གའོ།། །།དེ་ལ་ཐིག་ནི་གདབ་པར་བྱ་སྟེ་ཆོ་ག་བཟང་པོས་མཉམ་པར་བྱས་པའི་ས་གཞི་ལ། །ཡེ་ཤེས་ལྔ་ཡི་བདག་ཉིད་རྣམ་དག་
བསྒྲིལ་བ་མདུད་མེད་ལྟེ་བའི་སྟེང་དུ་གནས་པ་དང༌། །བརྟན་པའི་བསམ་གཏན་དང་ལྡན་བླ་མ་དམ་པའི་སྣ་རྩེའི་དབུས་སུ་མིག་ནི་བལྟ་བ་དང༌། །བཀྲ་ཤིས་གླུ་དང་དྲིལ་བུ་དང་ནི་དུང་དང་གླིང་བུའི་སྒྲ་རྣམས་སྒྲོགས་ཤིང་བསྟོད་པས་སོ། །བུད་མེད་བཟོ་མོའི་ལག་པའི་འདབ་མས་བླངས་པའི་ཆུ་དང་བསྲེས་ཤིང་རབ་རྒྱས་འབར་བ་ཡི། །མེ་ཏོག་གསེར་བཟང་དང་མཚུངས་དྲི་ལྡན་མཆོད་ཡོན་སྦྱིན་བདག་གིས་ནི་ཡང་དག་དབུལ་བར་བྱ། །མཚན་མ་ཡང་ནི་ངེས་པར་བརྟག་པར་བྱ་སྟེ་ཐིག་སྐུད་ཆད་པར་གྱུར་ན་བླ་མ་འཆི། །ཅེ་སྤྱང་དང་ནི་བྱ་རྒོད་བྱ་བང་ངུ་བར་གྱུར་ན་རྗེ་བོ་ངེས་པར་འཆི་བར་འགྱུར། །གང་གིས་རིགས་ཀྱི་ཁྱད་པར་ལས་སྐྱེས་སེམས་ཅན་རྣམས་ཀྱིས་ཐིག་སྐུད་ལས་ནི་འགོམས་གྱུར་ན། །དེ་ཡི་རིགས་ཀྱི་རུས་པ་དེར་ནི་ངེས་པར་ཐིག་སྐུད་ཀྱི་ནི་འོག་གི་ས་ལ་སྟེ། །ཐིག་བྱེད་པ་ནི་སྦྱིན་བདག་གཞོགས་སུ་འོངས་ནས་གང་གི་མིང་ནི་ཡང་དག་སྒྲོགས་བྱེད་པ། །དེ་ཡི་མིང་དང་རྗེས་འགྲོའི་སེམས་ཅན་ཀེང་རུས་སྦྱིན་བདག་གནས་པའི་ས་ཡི་དུམ་བུ་ལའོ། །རང་གི་ལུས་ལ་རེག་ན་ཆོ་གའི་དབང་ལས་དེ་ཡི་ཚད་ཀྱིས་མྱུར་དུ་བརྐོ་བར་བྱ། །དེ་ནས་སེལ་ཡོད་རྣམ་མང་པོ་ཡི་མཚན་མ་གསུངས་པ་འདིར་ནི་ཡང་དག་བསྡུས་པ་ཙམ། །རེ་ཞིག་བ་ལང་འོངས་ནས་ལྕི་བ་གཏོང་བར་བྱེད་ན་དེ་ཡི་ཚད་ཀྱི་གསེར་གནས་ཤིང༌། བྱིས་པ་དང་ནི་གཞོན་ནུ་མ་གང་ཕྱིས་གཏོང་ན་དེ་ཡི་ཚད་ཀྱི་དངུལ་ཡོད་དོ། །སྦལ་པའི་སྒྲ་ལས་ཁྱིམ་ལ་ཆུ་ཡིས་འཇིགས་བྱེད་དུ་བ་ལས་ནི་སེམས་ལ་སྡུག་བསྔལ་ཏེ། །ནད་པ་ལུས་ཉམས་མཛེ་བོ་ལས་ནི་རང་དབང་མེད་པ་བུད་མེད་མཐོང་ན་ནད་དང་ལྡན། །ཤང་ཤང་དང་ནི་རྨ་བྱ་ཁུ་བྱུག་ནེ་ཙོ་དག་དང་ངུར་བ་དང་ནི་ངང་པའི་སྒྲ། །དེ་རྣམས་མགྲིན་པ་སྒྲོག་པ་མཐོང་ན་དགེ་བ་འཕེལ་བར་བྱེད་ཅིང་ཕུན་སུམ་ཚོགས་པར་བྱེད། །སེང་གེ་དང་ནི་ཆུ་འཛིན་རྒྱལ་པོ་གླང་པོའི་སྒྲ་ལས་ནོར་ཐོབ་འབྲུ་ནི་འཕེལ་བ་སྟེ། །བྱིས་པ་རྩེ་བ་ལ་ནི་དུང་དང་བཀྲ་ཤིས་སྒྲ་ལས་དེ་ཡི་ཁྱིམ་དུ་རྫས་རྣམས་འོང༌། །གདུགས་དང་ཆུ་སྐྱེས་མཁའ་དང་སྙེ་མ་རྒྱལ་མཚན་བུམ་པ་རྒྱན་དང་རྒྱལ་པོའི་ཆུང་མ་དང༌། །ཉ་དང་འོ་མ་ཞོ་ཡི་དབང་པོ་ཆང་དང་མེ་འབར་འབྲས་བུ་རྣམས་ལས་རྒྱལ་བའོ། །འབྲུ་དང་ནོར་དང་བུ་སོགས་འཕེལ་ཏེ་མཉམ་མེད་བྱ་བ་ཡོངས་སུ་རྫོགས་པ་དེ་ཡི་ཚེ། །དགེ་སློང་བྲམ་ཟེ་བློ་ལྡན་ཕྱུག་པོ་དམ་
བའི་སྐྱེ་བོ་ཡང་དག་མཐོང་ན་ཆོས་དང་ལྡན། །ས་ལ་ཐིག་རྣམས་གདབ་པའི་ཆོ་ག་རབ་ཏུ་བརྩམས་ནས་ལྷ་རྣམས་ཡང་དག་བཀོད་པ་ན། །དེ་ཚེ་མཆོག་གི་རྟགས་ནི་འདི་དག་ཕན་པ་འཕེལ་བར་བྱེད་པས་ཡོངས་སུ་བརྟག་པར་བྱ། །བཟོ་བོ་སློབ་དཔོན་རྣམ་དཔྱོད་དང་ལྡན་མཛེས་ཤིང་མཁས་བས་མི་དགེ་བ་རྣམས་ཀུན་དུ་སྤངས། །གང་ཞིག་གནས་རྣམས་ཀུན་དུ་གནས་པའི་སྐྱེ་བོ་རྒྱལ་པོ་སྦྱིན་བདག་རྣམས་ལ་ཇི་ལྟ་བར། །བཀྲ་ཤིས་དང་ནི་དགེ་འཕེལ་བ་ཡི་ཆེད་དུ་དང་པོར་ཤིན་ཏུ་རྣམ་པར་སྤྱད་ནས་དེས། །དམ་པའི་སྐར་མ་གཟའ་དང་སྦྱོར་བ་ཉི་མ་དགེ་བ་དག་ལ་བྱ་བ་ཡང་དག་བརྩམ། །ཞེས་པས་སེལ་ལ་ཐིག་གདབ་པའི་མཚན་མའི་ཆོ་གའོ།། །།མཆོད་རྟེན་ལ་སོགས་ས་ཡི་གཞི་ལ་གནས་པའི་མཐའ་དག་ལྷ་རྣམས་དང༌། །ཕྱོགས་སྐྱོང་བ་དང་ཀླུ་དང་ནོར་འཛིན་རྒྱལ་དང་བྱང་ཆུབ་སེམས་དཔའ་རྣམས། །ཕྱི་ཡི་ཆོགས་མཆོད་པར་བྱ་སྟེ་ཡིད་ཆོས་ཤེས་པ་ཡིས། །ས་ཡི་དུམ་བུའི་སྙིང་པོ་ཡོངས་སུ་དག་པའི་དབུས་སུ་གནས་པས་སོ། །ས་དང་ཆུ་དང་མེ་དང་རླུང་རྣམས་ཀྱི་ནི་དཀྱིལ་འཁོར་མཐའ་དག་ལས། །ཡང་དག་བྱུང་བའི་རི་རབ་སྟེང་གི་རྩེ་མོར་སྣ་ཚོགས་རྡོ་རྗེ་སྟེ། །དེ་ཡི་འོད་ཟེར་དྲ་བའི་ཚོགས་རྣམས་ཀྱིས་ནི་མདའ་ཡི་དྲ་བ་དང༌། །རྡོ་རྗེའི་ར་བ་གུར་དང་བླ་རེས་མཐའ་དག་ལེགས་པར་བསྲུང་བར་བྱ། །དཔལ་ལྡན་སེང་གེ་རྣམ་པར་གནོན་བའི་ཏིང་ངེ་འཛིན་གྱིས་བར་སྣང་དུ། །བྷཱུཾ་ཡིག་དང་ནི་འཁོར་ལོ་རྒྱལ་བའི་འོད་ཟེར་ལས་བྱུང་གཞལ་ཡས་ཁང༌། །གཙུག་ལག་ཁང་དང་ཁང་བཟངས་ཁྱིམ་དང་འགྲོན་ཁང་དང་ནི་ལྷ་ཁང་རྣམས། །མཐའ་དག་དགེ་འདུན་གྱིས་ནི་ལེགས་པར་ཡོངས་སུ་གང་བ་སེམས་ཀྱིས་བསམ། །བྷྲཱུཾ་ཡིག་འོད་ཀྱིས་ཕྲ་རབ་རྡུལ་གྱི་ཚོགས་གྱུར་སོ་ཕག་ལ་སོགས་པ། །མཐའ་དག་པདྨའི་དབུས་སུ་གནས་པ་རྣམས་ནི་ཡང་དག་མཆོད་བྱ་ཞིང༌། །ཡོངས་སུ་རྫོགས་ཤིང་ཆོས་ལ་མཆོག་ཏུ་འབར་བས་མཛེས་ཤིང་ཟུར་ལྡན་རྣམས། །དྲི་ཡི་ཆུ་དང་ཙནྡན་དམར་པོ་གུར་གུམ་གྱིས་ནི་བྱུག་པར་བྱ། །གྲོག་ཚང་ཅན་དང་འབུ་ཡི་ཚོགས་ཀྱིས་ཟོས་པ་དང་ནི་ཆག་པ་དང༌། །ཟུར་ཉམས་པ་དང་མཐའ་དག་ཕྱུགས་ཀྱི་རྐང་རྗེས་ཅན་དང་ཡོན་པོར་གྱུར། །འདི་རྣམས་སྤངས་ཏེ་ཕྲི་ཡང་ཀུ་དང་མེ་ཏོག་རྣམས་དང་ལེ་བརྒན་རྩི། །སིནྡྷུ་ར་དང་འཁུར་བ་དཀར་
པོའི་ཚངས་སྐུད་ཏིལ་ལ་སོགས་པས་ཀྱང༌། །ཡང་དག་ཚིམ་པར་བྱ་སྟེ་རྩིག་མཁན་བཟོ་བོའི་ཚོགས་ནི་མཁས་པ་རྣམས། །གསེར་གྱི་གདུ་བུ་རྣམས་དང་རྣ་རྒྱན་ལག་པ་ཡི་ནི་སོར་གདུབ་དང༌། །གོས་དང་གསེར་དང་བཟའ་བ་བཏུང་བ་གོ་ཡུ་དང་ནི་མེ་ཏོག་གིས། །ལྟད་མོ་བ་དང་མི་ཡི་བདག་པོའང་ཡང་དག་ཡོངས་སུ་ཚིམ་པར་བྱ། །ཤར་དང་བྱང་དུ་ཁ་ཕྱོགས་དེ་བཞིན་གཤེགས་དང་ཟླ་བ་ཉི་མ་དག །བལྟས་ནས་རྒྱས་པའི་སེམས་ཀྱིས་བླ་མ་དང་ནི་བཟོ་བོའི་གཙོ་བོ་ཡིས། །ཟླ་བ་དང་ནི་ཉི་མའི་ལམ་ནས་འཛིན་མའི་རླུང་ནི་རྒྱུ་བ་ན། །བརྩམས་པས་ཕ་གུ་དངུལ་དང་གསེར་གྱི་རུས་སྦལ་སྟེང་དུ་གཞག་པར་བྱ། །དབང་པོ་དང་ནི་བྱང་དུ་གནས་པས་དང་པོར་བརྟན་པའི་ཡིད་ཀྱིས་ནི། །དེ་རྣམས་མེ་ཡི་ཟུར་གྱི་ཕྱོགས་ལ་སོགས་པར་རིམ་པ་ཇི་བཞིན་དུ། །གཡས་སུ་བསྐོར་བའི་རིམ་པས་ངེས་པར་སྦྱར་ན་རྫོགས་པར་འགྱུར་བ་སྟེ། །སྟོང་ཕྲག་ཕྱོགས་ཀྱི་ཁོར་ཡུག་དག་ཏུ་ཕ་གུ་རྣམས་ནི་བཞག་པས་སོ། །ཡིད་བཟང་གིས་ནི་དྲིལ་བུ་དཀྲོལ་ཞིང་གཡས་པའི་ཕྱག་ཏུ་རྡོ་རྗེ་ནི། །ལེགས་པར་གནས་པས་དེ་ནས་ཡོངས་སུ་བཟླས་ཏེ་སྔོན་ལ་ཕྱོགས་བྲལ་རྣམས། །རྣམ་པར་སྣང་མཛད་ལ་སོགས་བུམ་པ་ཆུ་ཡིས་མངོན་པར་གཏོར་བྱ་ཞིང༌། །ཉེ་བར་སྤྱོད་པ་ལྔ་ཡི་ཆོ་ག་སློབ་མས་ཡོངས་སུ་གཟུང་བར་བྱ། །བདེ་གཤེགས་སྲས་ཀྱི་ཚོགས་ཀྱིས་གང་བར་དམ་པའི་ཆོས་ནི་བཀླག་བྱ་ཞིང༌། །སྐྱེ་བོ་རབ་ཏུ་དགའ་བས་འདུས་ཤིང་ཀུན་ནས་དགའ་བ་ཚོགས་པའི་དུས། །གོས་མེད་པ་དང་ལུས་དམན་གྱུར་པའི་སྡུག་བསྔལ་རབ་ཏུ་གྲོལ་བ་ན། །དགེ་བའི་ཚེས་དང་དུས་སྦྱོར་ལ་ནི་དང་པོར་རོལ་མོ་གླུ་དབྱངས་བྱ། །ཕ་གུ་ལ་སོགས་པ་བཞག་པ་རྣམས་ལ་སྦྱིན་བདག་དང་མཁས་པ་ལ་སོགས་པ་རྣམས་ཀྱིས་ཡང་དག་པར་སྤྲོ་བ་དང་བཅས་པས་དགེ་བའི་ཆུའི་རྒྱུན་སྦྲེངས་ཏེ་ཕྱོགས་མཐའ་དག་ཏུ་གྲམ་པར་བྱའོ། །གཙུག་ལག་ཁང་མིག་གི་རིངས་སུ་ཕྱེད་ལྷག་པའི་ཚད་དེ་ཞིང་དུ་ཆེ་བ་ནི་མཆོག་གོ །ཞིང་གི་བཞི་ཆ་གསུམ་དང་མཉམ་པ་ནི་སྟེགས་བུ་དང་མྱོས་པ་བསྲུང་བའི་རྩེ་མོའོ། །དོང་དགང་བ་ནི་དེ་བཞིན་དུ་སྐ་རགས་ཙམ་མེ་དང་མདའ་དང་ཐུབ་པར་གསུངས་ཤིང་གང་ཡང་ཆུ་དང་རྡོའི་མཐར་ཐུག་པར་བྱ་སྟེ། རྩིག་པ་ནི་གྲོས་སུ་བྱའོ། །མ་ཐེམ་གྱི་ནི་གདུང་གི་མཐར་ཐུག་པའི་ཚད་གང་ཡིན་པ་སྟེ་དེ་བཞིན་
དུ་རྩེ་མོའི་མཐར་ཐུག་པའི་རིངས་སུ་ནི་ཆ་གསུམ་གྱི་ཚད་དུ་འགྱུར་ཞིང༌། ཆ་རེ་རེ་ནི་ཆ་ཆེན་པོའོ། །ཀ་བ་དང་ནང་གི་དྲ་བ་ནི་ཆ་ལྔའི་ཆ་གསུམ་དུ་གསུངས་སོ། །ཆ་དང་ཆའི་དུམ་བུ་ཡོངས་སུ་རྫོགས་པའི་ཁོར་ཡུག་གི་ཕྲེང་བར་ཤིང་གི་ལས་ཀ་མཉམ་པའོ། །སྟེགས་བུ་ལ་ལྔ་ཆའི་ཆ་གཉིས་ནི་རྩིག་པ་ཆེན་པོའི་ཞེང་ངོ༌། །རྩིག་པ་དེ་ལ་ཆ་ལྔའི་ཆ་གཉིས་ནི་ཕ་གུའི་རིངས་ཀྱི་ཚད་དོ། །དེའི་རིངས་སུ་ཡང་ཆ་ལྔ་སྟེ། ཞིང་དུ་ནི་ཆ་གསུམ་དང་ལྡན་པ་ཕ་གུར་བསྟན་ཏོ། །དེའི་ཆ་གསུམ་གྱི་ཆ་གཅིག་ནི་དཔངས་ཏེ་ཁང་བཟངས་ཀྱི་ཆ་ཐམས་ཅད་དུའོ། །ཨོཾ་བྷྲཱུཾ་སརྦ་ཏ་ཐཱ་ག་ཏཱ་སརྦ་བུདྡྷ་ཨཱ་ལ་ཡཾ་ཨ་དྷི་ཏིཥྛ་ནྟུ་སྭཱ་ཧཱ། ཞེས་པ་སོ་སོའི་ཟུར་ལ་ལན་བདུན་གྱིས་ཕ་གུ་བྱིན་གྱིས་བརླབ་པར་བྱའོ། །དེ་ནས་ཞི་བའི་སྦྱིན་སྲེག་གིས་ཕྱོགས་སྐྱོང་ལ་སོགས་པ་རྣམས་ཀྱང་ཡང་དག་པར་མཉེས་པར་བྱས་ནས་སའི་བདག་པོ་དང་སྦྱིན་པའི་བདག་པོ་ལ་ཡང་ཞི་བར་བྱ་ཞིང་ལྷག་མའི་གཏོར་མ་སྦྱིན་པར་བྱའོ། །སྔ་མ་དང་འདིར་ཡང་ཆོ་ག་རྣམས་སྤྲོ་བས་ནུས་པ་བཞིན་བྱས་ཏེ་དགེ་འདུན་གྱི་སྟོན་མོ་དང་བླ་མ་ལ་ཡོན་དབུལ་བར་བྱའོ་ཞེས་པ་གཙུག་ལག་ཁང་དང་མཆོད་རྟེན་དང་དྲིའི་གཙང་ཁང་དང་གྲོང་ཁང་སྤོང་ཁང་གི་མཆོད་ཡོན་གྱི་ཆོ་གའོ།། །།རྫིང་དང་ཆུ་མིག་དང་ཁྲོན་པ་ལ་སོགས་པ་བྱེད་པ་ན་གཏོར་མ་དང་མཆོད་པ་སྔོན་དུ་འགྲོ་བས་མཆོད་ཡོན་ལ་སོགས་པ་བྱས་ལ་རྣམ་པར་སྣང་མཛད་ཉིད་ཨོཾ་བཾ་བཛྲ་བ་རུ་ཎ་ཧཱུཾ་ཞེས་པ་འདིས་རྡོ་རྗེ་ཆུ་བདག་གི་གཟུགས་སུ་བསམས་ནས་དེ་ཡོངས་སུ་གྱུར་པ་ལས་སྐྱེས་ཏེ་ཀླུ་རིགས་བརྒྱད་ཀྱི་གནས་ཡེ་ཤེས་ཀྱི་བདུད་རྩིའི་ཆུས་བཀང་ལ་ཨོཾ་བཛྲ་སཏྭ་ས་མ་ཡ་སྟྭཾ། ཞེས་བརྗོད་ཅིང་མེ་ཏོག་གཏོར་ནས་དབང་ཆེན་གྱིས་གཞི་ལ་ཐུག་པར་ཡན་ལག་བརྒྱད་དང་ལྡན་པའི་ཆུས་གང་བར་བལྟའོ་ཞེས་པ་རྫིང་ལ་སོགས་པའི་མཆོད་ཡོན་གྱི་ཆོ་གའོ།། །།ལུགས་མ་དང་བརྡུངས་མ་དང་བྲིས་མ་ལ་སོགས་པའི་སྐུ་གཟུགས་བྱེད་པ་ན་མཆོད་པ་དང་གཏོར་མ་སྔོན་དུ་འགྲོ་བས་བཟོ་བོ་རྣམས་བྱེད་པར་འགྱུར་བའི་ལྷའི་རིགས་ཀྱི་བདག་པོའི་གཟུགས་སུ་བྱས་ཏེ། སྙིང་ག་དང་མགྲིན་པ་དང་མགོ་བོ་རྣམས་ལ་རིམ་པ་ཇི་ལྟ་བ་བཞིན་དུ་རྡོ་རྗེ་དང་པདྨ་དང་འཁོར་ལོ་ལ་གནས་པའི་ཧཱུཾ་དང་ཨཱཿ་དང་ཨོཾ་གྱི་ཡི་གེ་རྣམས་དང༌། གཡོན་པ་དང་ཅིག་ཤོས་ཀྱི་ལག་པ་དག་ལ་ཟླ་བ་དང་རྡོ་རྗེ་དག་དང་ལྡན་པར་སྐད་
ཅིག་གིས་རྣམ་པར་བསྒོམས་ལ། དེ་རྣམས་ཀྱི་སྙིང་ག་ལ་སོགས་པ་རྣམས་སུ་རྡོ་རྗེ་དང་བཅས་པའི་ལག་པ་གཡས་པས་རེག་ཅིང༌། ཧཱུཾ་ཨཱཿ་ཨོཾ་ཞེས་པས་བྱིན་གྱིས་བརླབ་པར་བྱའོ། །འཆད་པར་འགྱུར་བའི་སྦྱང་བའི་ཆོ་གས་ཤིང་དང་འཇིམ་པ་དང་རྡོ་བ་ལ་སོགས་པའི་རྫས་ཀྱི་དངོས་པོ་གཙང་མ་རྣམས་སྟོང་པ་ཉིད་དང༌། ཕྱི་ནས་སྙིང་གའི་ས་བོན་གྱིས་བྱེད་པར་འགྱུར་བའི་ལྷའི་གཟུགས་སུ་སྐད་ཅིག་གིས་རྣམ་པར་བསམས་ལ། བཅོམ་ལྡན་ཞེས་པ་ལ་སོགས་པ་ནས། ཉེ་བར་གནས་པར་མཛད་པའི་རིགས། །ཞེས་པའི་མཐར་ཐུག་བ་འཆད་པར་འགྱུར་བ་རྣམས་བརྗོད་པར་བྱའོ། །ཐམས་ཅད་དུའང་འདིར་བསྒོམས་པའི་ལྷ་རྣམས་གཤེགས་སུ་གསོལ་བར་བྱའོ་ཞེས་པ་སྐུ་གཟུགས་ལ་སོགས་པའི་མཆོད་ཡོན་གྱི་ཆོ་གའོ།། །།དམ་པའི་ཆོས་འདྲི་བར་བྱེད་པ་ན་མཆོད་པ་དང་གཏོར་མ་སྔོན་དུ་འགྲོ་བས་ཡེ་ཤེས་ལྔའི་བདག་ཉིད་ཀྱི་ཤོག་བུ་རྣམས་དྷིཿ་ཡིག་ཏུ་རྣམ་པར་བསྒོམས་ཏེ་དེའི་འོད་ཟེར་གྱིས་སྤྱན་དྲངས་པའི་རྫོགས་པའི་སངས་རྒྱས་རྡོ་རྗེ་ཆོས་ཀྱི་བདག་ཉིད་དུའོ། །ཡན་ལག་དགུའི་དམ་པའི་ཆོས་རྣམས་ནི་སོ་སོའི་སྒྲའི་བདག་ཉིད་ཕན་ཚུན་རྗེས་སུ་ཆགས་པ་སྟེ་སྔ་མ་ལས་མི་འགྱུར་བའི་ཨཱཿ་ཡིག་ཡོངས་སུ་གྱུར་བའོ། །བྲིས་མཁན་རྣམས་ནི་སྔ་བར་རྣམ་པར་སྦྱངས་ཏེ་འོད་དཔག་མེད་ཀྱི་གཟུགས་སུ་རྣམ་པར་བསྒོམ་མོ། །རང་ཉིད་ཀྱིས་ཀྱང་ཨོཾ་བཛྲ་སཏྭ་ཧཱུཾ་ཞེས་པ་འདིས་སྨྱུ་གུ་དང༌། ཨོཾ་ཨཱཿ་བིགྷྣཱ་ནྟ་ཀྲྀ་ཏ་ཧཱུཾ། ཞེས་པ་འདིས་སྣག་ཚའི་སྣོད་ལན་ཉི་ཤུ་རྩ་གཅིག་ཏུ་བྱིན་གྱིས་བརླབ་ཅིང་བྲིས་མཁན་གྱི་ལག་པ་གཡོན་པར་སྣག་ཆའི་སྣོད་ཆོས་ཀྱི་འབྱུང་གནས་དང་གཡས་པར་མྱུ་གུ་རྡོ་རྗེའི་རང་བཞིན་ཅན་བྱིན་ལ། ཨོཾ་དྷཱིཿ་ཤྲུ་ཏི་སྨྲྀ་ཏི་བི་ཛ་ཡེ་སརྦ་ཨཛྙཱ་ན་པ་ཊ་ལ་ཨ་པ་ཧཱ་རི་ཎི་ཧྲཱིཿ་སྭཱ་ཧཱ། ཞེས་པའི་སྔགས་ཀྱིས་རབ་ཏུ་གཞག་སྟེ། སྣག་ཚའི་སྣོད་དང་སྨྱུ་གུ་དག་སྦྱར་ནས་གང་ཞིག་ཤེས་རབ་དང་ཡེ་ཤེས་རྣམ་པར་འཕྲོ་བས་གང་བྲིས་པ་དེ་རྣམས་དེ་ཡོངས་སུ་རྫོགས་པའོ་ཞེས་བསམ་པར་བྱའོ། །བསྒོམས་པའི་ལྷ་རྣམས་ཀྱང་གཤེགས་སུ་གསོལ་བར་བྱའོ་ཞེས་པའོ། །རྐེད་གསོག་ཅན་དང་ཚངས་སྐུད་ཅན། །སྣག་ཚ་སྐུ་དང་རལ་པ་ཅན། །ངན་པས་འཚོ་དང་གྱ་གྱུའི་བདག །དམ་ཆོས་དོན་ལ་ཡོངས་སུ་སྤང༌། །བརྩམས་ཏེ་དང་པོའི་འདབ་མ་
ལ། །རྩ་བའི་ཆ་ཡིས་ལེགས་བྲི་ཞིང༌། །ཕྱི་ནས་རྩེ་མོས་ཡང་དག་བྲི། །བྲིས་མཁན་ཕན་པར་གཏོགས་པས་སོ། །ཀུ་ལའི་རྒྱབ་ཀྱི་རིམ་པ་ལྟར། །དེ་བཞིན་ཕྲེང་བ་དེ་ཡིས་བྱ། །ཆ་ལྔ་མཉམ་པར་བྱས་ནས་ནི། །གཡས་པ་ལ་ནི་ཆ་གསུམ་དོར། །གཡོན་ལ་ཆ་གཉིས་དོར་བ་ཡི། །དབུས་སུ་བུག་པ་དགེ་བ་ཐོབ། །ཅེས་པ་ནི་བུག་པ་གཅིག་པ་ནི་མཚན་ཉིད་དོ། །ཆ་གསུམ་མཉམ་པར་བྱས་ནས་ནི། །བུག་པ་གཉིས་པ་དགེ་བ་འཕེལ། །ཞེས་པ་དམ་པའི་ཆོས་འདྲི་བའི་མཆོད་ཡོན་གྱི་ཆོ་གའོ།། །།གཙུག་ལག་ཁང་དང་ཁང་བརྩེགས་ཁང་མིག་གནས་པ་གང༌། །མཆོད་རྟེན་ལ་སོགས་སྐུ་གཟུགས་རྙིང་པ་ཤིང་རུལ་དང༌། །ཆག་དང་ཚིག་དང་དུམ་བུར་སོང་དང་ཆ་ཤས་གས། །དེ་རྣམས་སྦྱིན་བདག་རྒྱལ་པོ་རྣམས་ལ་ཤིས་པ་མིན། །དེ་ཕྱིར་སྐྱེ་དགུའི་སྦྱིན་བདག་རྒྱལ་པོ་རྣམས། །མཆོག་གི་དོན་དང་བསོད་ནམས་གྲོལ་དོན་དུ། །ཡང་དག་རྙིངས་པར་གྱུར་རྣམས་གསོ་ཞིང་བསྒྲུབ་བྱ་སྟེ། །གཙོ་བོའི་སློབ་དཔོན་མཆོག་རྣམས་ཀྱིས་ནི་འབད་པས་སོ། །ཐུབ་པའི་དབང་པོའི་ཚོགས་ལ་མེ་ཏོག་ལ་སོགས་པའི། །ཉེར་སྤྱོད་རྣམས་ཀྱིས་མཆོད་ནས་གསོལ་བ་གདབ་བྱ་ཞིང༌། །དཔང་དུ་བྱས་ནས་ཕྱོགས་སྐྱོང་རྣམས་དང་ལྷ་ཀུན་དང༌། །གནས་ཀྱི་བདག་པོར་སྦྱིན་སྲེག་གཏོར་མ་རབ་ཏུ་སྤྱད། །ཚིམ་པར་བྱས་ནས་སྐར་མ་གཟའ་དང་དུས་ཚིགས་ནི། །དགེ་བ་ཉིད་དང་གཙང་བ་ཉིད་ལ་ངེས་པར་བརྟག །དཔལ་ལྡན་རྡོ་རྗེ་སེམས་སོགས་རྣམ་བསྒོམས་བདག་ཉིད་ཅན། །སློབ་དཔོན་ནང་གི་སྡེ་དང་བཅས་པས་ལས་རྣམས་བསྒྲུབ། །རང་གི་གསང་སྔགས་བརྒྱ་དང་རྩ་བརྒྱད་བཟླས་ནས་ནི། །རྡོ་རྗེས་ཕྱག་མཚན་བརྟན་ཞིང་དཔའ་བའི་སློབ་དཔོན་གྱིས། །ཕྲེང་བ་དང་ནི་སྐུད་པ་ལྔ་ལ་རྣམ་བཅིངས་ཏེ། །སྐུ་གཟུགས་ཡེ་ཤེས་རིགས་དེའི་སྙིང་ནས་མྱུར་བ་ཡིས། །བཀུག་ནས་ས་བོན་ཡི་གེའི་ཕྲེང་སྐྱེས་གནས་པ་རྣམས། །ཧོ་ཡིག་སྙིང་པོར་བྱས་ནས་འོད་ཀྱི་ཕྲེང་བ་ནི། །ཉེར་སྤྱོད་ལ་སོགས་སྔོན་དུ་འགྲོ་བའི་ཆོ་ག་ཡིས། །གནས་ལས་རྗེས་སུ་མཐུན་པ་མིན་པ་བསྒོམ་པར་བྱ། །མཚན་མས་རབ་བརྒྱན་མཛེས་ཤིང་གསར་པ་རྣམ་དག་པའི། །བུམ་པར་བདུད་རྩི་ལྔ་ལ་སོགས་པས་རབ་རྫོགས་བྱ། །བུམ་པའི་ནང་དུ་གནས་པ་
རྣམ་པར་དག་པའི་སྐུ། །བརྟན་པའི་བདག་ཉིད་ཅན་གྱིས་རྟག་ཏུ་ཡང་དག་མཆོད། །འཁྲུལ་འཁོར་རྣམས་ཀྱིས་བཟོ་བོའི་སྐྱེ་བོས་རྣམ་བསྐྱེད་དེ། །རྡོ་བ་དང་ནི་ས་ཡི་རང་བཞིན་རྙིང་པའི་གཟུགས། །འདི་རྣམས་མུ་སྟེགས་ཅན་གྱི་ཆུ་བོ་རུ་ནི་དོར་བྱ་ཞིང༌། །ཅི་སྟེ་ན་ཡང་རི་ཕུག་ཟབ་མོའི་ནང་སོགས་སུའོ། །གལ་ཏེ་ཤིང་གི་བདག་ཉིད་ཡིན་ན་གོས་གསར་བཅིང༌། །ཏིལ་མར་བསྐུས་ཏེ་ཆོ་ག་ཤེས་བར་བསྲེག་པར་བྱ། །རྫས་ཀྱི་བདག་ཉིད་ཅན་རྣམས་བཞུ་བར་བྱས་ནས་ནི། །དེ་ཡང་བདག་ཉིད་ཡོངས་སུ་རྫོགས་པར་བླུགས་པར་བྱ། །སྔར་གྱི་ཚད་ལ་མྱུར་དུ་གཟུགས་ནི་མཛེས་པའམ། །སྔར་བས་ལྷག་པའི་ཡོངས་རྫོགས་སྐུ་ནི་བཞེངས་བྱ་སྟེ། །སྙིང་སྟོབས་ལྡན་པའི་བདག་ཉིད་ཀྱིས་ནི་འབད་པ་ཡིས། །མཆོད་ཡོན་སྔོན་དུ་འགྲོ་བའི་མཆོད་པ་བསྒྲུབ་པར་བྱ། །བུམ་པའི་ལྟོ་ནས་རང་གི་ས་བོན་ཕྱུང་ནས་ནི། །ཡེ་ཤེས་རིགས་ནི་སྐུ་གཟུགས་ལ་གནས་རབ་ཏུ་བྱ། །མཆོད་འགྱུར་མཆོད་པ་དམ་པ་དེ་ལ་རིམ་པ་སྟེ། །མྱུར་བས་ཆོ་ག་ཇི་བཞིན་རབ་ཏུ་གནས་པའོ། །སོ་ཕག་རང་བཞིན་དང་ནི་རྡོ་རྗེའི་རང་བཞིན་རྙིང་གྱུར་པའི། །མཐའ་དག་མཆོད་རྟེན་དངོས་རྣམས་དེ་བཞིན་ཡོངས་དག་བྱས་ནས་ནི། །སྙིང་པོར་བྱས་ཏེ་མཆོག་གི་དངོས་གྲུབ་བྱེད་པའི་སྐྱེ་བོ་ཡིས། །ཤིང་ཡང་དེ་བཞིན་ཉིད་དེ་གསེར་སོགས་བླུགས་པར་བྱ། །གཙུག་ལག་ཁང་དང་ཁང་བཟང་ཁྱིམ་དང་འགྲོན་ཁང་ལྷ་ཁང་རྣམས། །རྣམ་པར་སྣང་མཛད་རང་བཞིན་དུ་ནི་ངེས་པར་རབ་བསྒོམས་ནས། །ཡང་དག་གནས་ནས་ལེགས་པར་བཀུག་སྟེ་བུམ་པའི་ནང་དུ་ནི། །གཞག་ནས་སྔར་གྱི་ཆོ་ག་བཞིན་དུ་ཡང་དག་སྤྱད་པར་བྱ། །སྦྱིན་སྲེག་ཉེར་སྤྱོད་གཏོར་མ་བཟའ་བ་བཀྲ་ཤིས་བྱས་ནས་ནི། །རབ་འབྱམས་ཐུབ་པའི་གང་ཟག་རྣམས་ནི་ཤིན་ཏུ་མཉེས་བྱས་ཏེ། །བསྙེན་བཀུར་དང་ནི་མཆོད་པའི་རྒྱན་རྣམས་རྣམ་པར་བསྒྲུབ། །དེ་ལྟར་བྱས་ན་མཐའ་དག་འཇིག་རྟེན་ཕན་པ་ཐོབ་པར་འགྱུར། །ཞེས་པ་རྙིང་པ་གསོ་བའི་མཆོད་ཡོན་གྱི་ཆོ་གའོ།། །།འདིར་ཇི་ལྟར་རིགས་པར་འཆད་བཞིན་པའི་ཆོ་ག་རྣམས་སུ། གསེར་དང་དངུལ་དང་ཟངས་དང་རྡོ་དང་ཤིང༌། །ས་བྱ་ཉ་ལྕིབས་དུང་དང་ནི། །འདབ་མའི་ཀྱོང་བུ་ཞབས་བསིལ་དང༌། །བསང་གཏོར་ཞལ་
བསིལ་མཆོད་ཡོན་སྣོད། །དེ་ལ་སྣོད་གཅིག་ཏུ་ནས་དང་འོ་མ་དང་མེ་ཏོག་དཀར་པོ་དང༌། ཀུ་ཤ་དང་ཏིལ་དང་འབྲས་ཡོས་བདུད་རྩི་དང་བཅས་པའི་དྲི་དཀར་པོའི་ཆུ་བླུགས་ལ། ཨོཾ་ཨཱཿ་ཧཱུཾ་ཞེས་པའི་སྔགས་དང་རང་གི་བདག་པོའི་སྔགས་དང་འཁྱིལ་པའི་སྔགས་རྣམས་ཀྱིས་ལན་བདུན་ནམ་བརྒྱ་རྩ་བརྒྱད་དུ་བསྔགས་པར་བྱ་སྟེ་ཞི་བའི་དོན་དུའོ། །རྒྱས་པའི་དོན་དུ་ནི་ཏིལ་དང་ཞོ་དང་མེ་ཏོག་སེར་པོ་དང་དཱུར་བ་དང་བདུད་རྩི་དང་བཅས་པའི་དྲི་སེར་པོའི་ཆུ་བླུགས་ལ་དེ་བཞིན་དུ་བཟླས་པར་བྱའོ། །དེ་ནས་རང་གི་གཡོན་ལོགས་སུ་མཆོད་ཡོན་གྱི་སྣོད་དང་ཞབས་བསིལ་གྱི་སྣོད་དང༌། ཞལ་བསིལ་གྱི་སྣོད་དང༌། བསང་གཏོར་གྱི་སྣོད་རྣམས་གཞག་པར་བྱའོ། །དེ་རྣམས་ཀྱི་མདུན་དུ་བཟེད་ཞལ་གྱི་སྣོད་འབའ་ཞིག་པ་གསུམ་ཡང་ངོ༌། །དེ་ལ་ཞབས་བསིལ་གྱི་སྣོད་ནས་ཁུ་ཚུར་གཡས་པའི་མཐེ་བོང་དང་མཛུབ་མོའི་སྐམ་པས་འགྱིང་བའི་ཚུལ་གྱིས་སོ་རྣམས་བསྐོར་ཞིང་ཆུ་དང་མེ་ཏོག་བླངས་ལ་འཆད་པར་འགྱུར་བའི་སྔགས་ཀྱིས་མཛུབ་མོ་དང་གུང་མོ་དང་མིང་མེད་དང་མཐེའུ་ཆུང་རྣམས་རིམ་གྱིས་དགྲོལ་ཞིང་སྣོད་དུ་ལན་གསུམ་དབུལ་བར་བྱའོ། །སྣོད་གཉིས་པའི་ཆུ་ལག་པ་གཡས་པར་གནས་པའི་ཀུ་ཤའི་ཆུན་པོའི་རྩེ་མོས་བླངས་ནས་བཟེད་ཞལ་གྱི་སྣོད་གཉིས་པར་ལན་གསུམ་བསང་གཏོར་བྱ་སྟེ་ལས་ཐམས་ཅད་པའི་བུམ་པའི་ཆུ་ཡིས་བསང་གཏོར་བྱ་སྟེ་ཡང་དེ་བཞིན་ནོ། །སྣོད་གཉིས་པ་ཉིད་ནས་གཡས་པའི་ཁུ་ཚུར་གྱིས་མཐེ་བོང་དང་མཛུབ་མོའི་སྐམ་པས་ཆུ་དང་མེ་ཏོག་བཟུང་ལ་ཞལ་བསིལ་གྱི་ཕྱིར་བཟེད་ཞལ་གཉིས་པ་ཉིད་དུ་འཆད་པར་འགྱུར་བའི་སྔགས་བརྗོད་ཅིང༌། ཁ་འོག་ཏུ་ཕྱོགས་པའི་ཁུ་ཚུར་གྱིས་མཐེ་ཆུང་དང་མིང་མེད་དང་གུང་མོ་དང་མཛུབ་མོ་རྣམས་རིམ་གྱིས་དགྲོལ་ཞིང་ལན་གསུམ་དུ་དབུལ་བར་བྱའོ། །གསུམ་བ་མཆོད་ཡོན་གྱི་སྣོད་ཀྱི་ཆུ་ལ་སོགས་པ་རྣམས་སྙིམ་པར་བཟུང་ལ། ཨོཾ་ཨཱཿ་ཧྲཱིཿ་པྲ་ཝ་ར་སཏྐཱ་ར་ཨརྒྷཾ་པྲ་ཏཱིཙྪ་ཧཱུཾ་སྭཱ་ཧཱ། ཞེས་བརྗོད་ཅིང་རྡོ་རྗེ་ཐལ་མོ་ཁ་ཕྱེ་བས་སྣོད་གསུམ་པར་ལན་གསུམ་དུ་སོ་སོར་དབུལ་བར་བྱའོ། །སྔར་གྱི་ལས་གསུམ་ལ་ནི་ཨརྒྷཾ་གྱི་གནས་སུ་པཱ་དྱཾ་དང་པྲོཀྵ་དང་ཨཱཉྩ་མ་ནཾ་རྣམས་བརྗོད་པར་བྱའོ་ཞེས་པ་མཆོད་ཡོན་ལ་སོགས་པའི་མཚན་ཉིད་ཀྱི་ཆོ་གའོ།། །།དེ་ནས་གཙུག་ལག་
ཁང་ལ་སོགས་པ་རྫོགས་པའི་རབ་ཏུ་གནས་པའི་དོན་དམ་དབང་བསྐུར་བའི་དོན་དུ་གསོལ་པ་བཏབ་པས་སམ། རང་ངམ་གཞན་གྱི་དངོས་གྲུབ་བསྒྲུབ་པ་ལ་སོགས་པ་དོན་དུ་གཉེར་བས་སམ། སེམས་ཅན་གྱི་དོན་ཆེན་པོ་མཐོང་བས་སམ། གཞན་གྱིས་བསྐུལ་བས་ཀྱང་རུང་སྟེ་དཀྱིལ་འཁོར་བྲི་བའི་ཕྱིར་དང་ཚོགས་བསག་པའི་ཕྱིར་དང༌། བགེགས་ཉམས་པར་བྱ་བའི་ཕྱིར་དང༌། བདུད་གཞོམ་པར་བྱ་བའི་ཕྱིར་སྔོན་དུ་བསྙེན་པ་བྱའོ། །གལ་ཏེ་ཀུན་མཁྱེན་ལམ་ཤེས་ནི། །བསྙེན་པ་མེད་ན་འགྲུབ་པ་མི་འགྱུར། །དེ་ཕྱིར་གཉིས་མེད་གནས་ནས་ནི། །རིམ་གཉིས་དེ་ཉིད་རིག་པ་ཡིས། །ལྷ་ཡི་འཁོར་ལོ་ཡང་དག་བསྒོམ། །སྐྱོན་དེ་ཡི་གསང་སྔགས་བཟླས། །འཁོར་ལོའི་གཙོ་བོ་འབུམ་བཟླས་ཤིང༌། །ཡང་ན་རང་གི་ལྷ་ཡི་འབུམ། །དཀྱིལ་འཁོར་བ་ཡི་ཁྲི་ཉིད་དེ། །འདི་ནི་སྔོན་དུ་བསྙེན་པར་བརྗོད། །དེ་ལྟར་ཏིང་ངེ་འཛིན་གསུམ་ལ་མཁས་པའི་རྣལ་འབྱོར་པས་ཇི་ལྟ་བར་དཀྱིལ་འཁོར་དང་རྗེས་སུ་མཐུན་པའི་སྔོན་དུ་བསྙེན་པའི་བཅུའི་ཆ་ཤས་ཀྱི་སྦྱིན་སྲེག་ཀྱང་བྱའོ་ཞེས་པ་སྔོན་དུ་བསྙེན་པའི་ངེས་པ་དང་དགོས་པའི་ཆོ་གའོ།། །།དེའི་རྗེས་ལ་རབ་གནས་ཀྱི་དོན་དུ་ཟླ་བ་ལ་སོགས་པ་གསུངས་པ། མཆུ་དང་དབོ་ཡི་ཟླ་བ་དེ་བཞིན་ངེས་པར་ས་ག་སྣྲོན་དང་ཆུ་སྟོད་ཟླ་བ་དང༌། །མགོ་སྟེ་དེ་སྲིད་འདི་རྣམས་དགེ་བ་གཅིག་པུའི་འབྲས་བུ་སྟེར་བའི་ཟླ་བ་དྲུག་ཏུ་གསུངས། །གཟའ་ཡི་མཆོག་གྱུར་བཞི་སྟེ་གཟའ་ལྷག་བླ་མ་པས་ཟླ་བ་རྣམས་དང་ལྡན་གྱུར་ན། །གཟའ་རྣམས་ཐམས་ཅད་བདེ་དང་རྗེས་ཆགས་ནོར་རྣམས་སྟེར་བར་གསུངས་ཏེ་རབ་གནས་དོན་དུའོ། །དང་པོར་བཤད་པའི་གཉིས་པ་ལ་ནི་རྗེས་སུ་དགེ་བའི་འབྲས་བུར་གསུངས་ཏེ་གང་ཞིག་གསུམ་པ་དང༌། །དེ་ལས་དཔལ་ལྡན་ལྔ་པར་འགྱུར་བ་གང་ཡིན་ངེས་པར་བཅུ་པ་བདུན་པ་ཟླ་བ་ཉ་བ་དང༌། །གང་ཞིག་ཐམས་ཅད་གྲུབ་པ་ལ་ནི་འཐབ་མོ་སྡིག་པ་ཉམས་པར་གསུངས་ཏེ་ཚེས་ཀྱི་གྲངས་རྣམས་བདུན། །བཤད་པ་ལ་ནི་དོན་ཀུན་གྲུབ་པར་ཐུབ་པས་བསྟན་ཏེ་སངས་རྒྱས་བྱ་བ་ལ་ནི་སྤྲོ་བར་བྱ། །རྒྱལ་དང་མེ་བཞི་ལྷ་མཚམས་དེ་ཡི་རྗེས་སུ་མགོ་དང་སྣར་མ་དག་དང་དབོ་དང་ལག་རྣམས་དང༌། །སྣྲོན་དང་སྣྲུབས་དང་རྗེས་མཐུན་གྲོ་བཞིན་རྐང་
པར་ལྡན་པའི་ཁྲུམས་དང་ཆུ་སྟོད་ཆུ་སྨད་ཅེས་བྱ་བ། །བུ་ལ་སོགས་པ་འཕེལ་བར་འགྱུར་ཏེ་ངེས་པ་ཉིད་དུ་དབོ་ལ་འདོད་པའི་དངོས་གྲུབ་འགྱུར། །མེ་བཞི་ལ་ནི་ཡེ་ཤེས་འཐོབ་ཅིང་ནམ་མཁར་དབང་དུ་བྱ་བ་དག་སྟེ་ལག་ལ་དེ་བཞིན་ཉིད། །སྣར་མ་ལ་ནི་ནོར་རྣམས་འཕེལ་ཞིང་རྗེས་སུ་མགོ་ལ་ཞི་བའོ། །ཆུ་སྟོད་ཆུ་སྨད་རྒྱལ་པོ་ལ། །ཚེ་རིང་བ་དང་བུ་དང་རབ་གསལ་མཁས་པ་དག་དང་བློ་སྟེ་ཁྲུམས་ལ་དངོས་གྲུབ་འཕེལ། །རྒྱལ་ལ་རྟག་ཏུ་རྒྱལ་བ་ཉིད་དུ་འགྱུར་ཞིང་བདེ་བ་དང་ནི་མཐུ་སྟེ་སྣོན་ལ་དོན་རྣམས་འགྲུབ། །ལྷ་མཚམས་ལ་ནི་བདེ་བའོ་རྗེས་སུ་མཐུན་པའི་གཟའ་ཚོགས་མཐའ་དག་ལ་ནི་མཆོད་སྦྱིན་བྱ་བ་བསྒྲུབ། །མྱུར་དུ་རྫོགས་པ་ཙམ་ཉིད་ལ། །རབ་ཏུ་གནས་པ་མཆོག་ཏུ་འགྱུར། །འཁོར་ལོས་སྒྱུར་རྒྱལ་དབང་ཕྱུག་ནི། །ཐོབ་པ་འདི་ལ་ཐེ་ཚོམ་མེད། །ཚེས་དང་གཟའ་དང་སྐར་མ་མེད། །བགེགས་དང་ལོག་པར་འདྲེན་པའང་མེད། །བགེགས་དང་སྐར་མ་ལྷ་རྣམས་དང༌། །གཟའ་རྣམས་ཐམས་ཅད་རྗེས་སུ་མཐུན། །ཞེས་གལ་ཏེ་ཡང་གསུངས་པ་དེ་ལྟ་ནའང་འཇིག་རྟེན་པའི་ཀུན་རྫོབ་ལ་བརྟེན་ནས་བྱེད་པ་པོ་ལ་རྗེས་སུ་མཐུན་ཞིང་དགེ་བའི་དུས་སྦྱོར་ལ་སོགས་པ་ཐམས་ཅད་བསྒྲུབ་པར་བྱའོ། །དེ་བས་ན་ཟླ་བ་བཅུ་གཉིས་པོ་རྣམས་ལ་ཡང་རྟེན་ཅིང་འབྲེལ་པར་འབྱུང་བའི་རིམ་པས་ཡུད་ཙམ་བཟང་པོ་ལ་སོགས་པ་ཐམས་ཅད་ལ་བྱ་བ་རྣམས་བྱའོ། །དེའི་རྗེས་སུ་གང་གི་ཚེ་སློབ་མས་ལན་གསུམ་དུ་གསོལ་བ་བཏབ་པར་གྱུར་པ་དང༌། དཀྱིལ་འཁོར་བྲི་བའི་དོན་དུ་གལ་ཏེ་དེ་ལ་ཉེ་བར་མཁོ་བའི་ཡོ་བྱད་རྣམས་ཚོགས་ནས་དེའི་ཚེ་སློབ་མ་མདུན་དུ་བཞག་ལ། དེའི་ལྟེ་བར་ཉི་མ་ལ་ཧཱུཾ་ཡིག་གི་རྣམ་པར་བསྒོམས་ཏེ་དེའི་འོད་ཟེར་གྱིས་སྙིང་གར་གནས་པའི་ཀཾ་ཡིག་ལས་བྱུང་བའི་སྡིག་པ་གནག་ཅིང་རྣམ་པར་འགྱུར་བའི་གཟུགས་ཅན་གཅེར་བུ་འབྲས་བུ་འཕྱང་བ་སྐྲ་སེར་པོ་གྱེན་དུ་བགྲེང་བ་རྐང་པ་གསུམ་པ་སྣ་རྩེ་ནས་ཕྱུང་ལ་ཧཱུཾ་ཡིག་དེ་ཡང་སྙིང་གར་འོངས་ཤིང་ཡོངས་སུ་གྱུར་པ་ལས་འཆད་པར་འགྱུར་བའི་ཁྲོ་བོ་ཆེན་པོ་རྡོ་རྗེ་ཧཱུཾ་མཛད་དུ་རྣམ་པར་བསྒོམས་ནས་ཕྱིར་འཐོན་ཏེ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོཿ་བྷ་ག་ཝཱ་ན་བི་དྱཱ་རཱ་ཛ་ཆེ་གེ་མོའི་སརྦ་པཱ་པཾ་ནཱ་
ཤ་ཡ་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ཅིང་ཕྱག་ན་གནས་པའི་རྡོ་རྗེ་འབར་བས་ཕྱུང་བའི་སྡིག་པ་རྣམས་སྟོང་པར་མཛད་པར་བསམ། སློབ་མའི་སེམས་ཀྱི་བགེགས་རྣམས་བདུད་རྩི་འཁྱིལ་པའི་ལྟེ་བའི་འོག་ཕུར་བུའི་རྣམ་པ་ཅན་ལ་ཨོཾ་བཛྲ་ཀཱི་ལ་ཡ་ཨ་སྱ་སརྦ་བིགྷྣ་ན་བནྡྷ་བནྡྷ་ཧཱུཾ་ཕཊ། ཅེས་བརྗོད་དེ་ཧཱུཾ་མཛད་ཀྱིས་བཀའ་བསྒོ་བ་དང་རང་གིས་ཀྱང་བརྗོད་ཅིང་ཕུར་བུས་གདབ་པར་བྱ་སྟེ། ཕུར་བུའི་འོད་ཟེར་དྲག་པོ་རྣམས་ཀྱིས་གདུག་པ་ཅན་རྣམས་བསྲེག་པར་ཡང་བྱའོ། །སློབ་མ་དེ་ཡང་པཾ་ཡིག་ལས་ཀུན་དུ་བཟང་པོའི་གཟུགས་སུ་བསམས་ཏེ། སྲུང་བའི་དོན་དུ་སྙིང་གར་ཨ་ཡིག་ལས་སྐྱེས་པའི་ཟླ་བའི་དཀྱིལ་འཁོར་དང་ཨཿཡིག་ལས་སྐྱེས་པའི་སྣ་ཚོགས་རྡོ་རྗེས་བྱིན་གྱིས་བརླབ་པར་བསྒོམ་ཞིང་མགོ་བོར་ཟླ་བ་ལ་གནས་པའི་ཧཱུཾ་ལས་བྱུང་བའི་རྡོ་རྗེ་རྩེ་ལྔ་པ་གྱེན་དུ་འགྲེང་བའི་དབུས་སུ་མཱ་མ་ཀཱི་བཞུགས་པར་བསྒོམས་ལ་ཡེ་ཤེས་ཀྱི་ལྷ་མོ་དེའི་ཐུགས་ཀར་ཟླ་བ་ལ་གནས་པའི་རྡོ་རྗེའི་ལྟེ་བའི་ནང་དུ་ཆུད་པའི་སྔགས་ཀྱི་ཕྲེང་བ་ལས་བྱུང་བ་རྡོ་རྗེ་སེར་པོ་ཕྲ་མོའི་འོད་ཟེར་འཕྲོས་པས་ལུས་ཐམས་ཅད་ལ་གོ་ཆ་བགོས་པར་བསམས་ཏེ། ཨོཾ་ཨཱཿཤཾ་ཀ་རེ་ཤཱནྟི་ཀ་རེ་གྷུ་ཊ་གྷུ་ཊ་གྷུ་ཊི་ནི་གྷཱ་ཊ་ཡ་གྷཱ་ཊ་ཡ་གྷཱུ་ཊ་ནི་ཆེ་གེ་མོ་ལ་རཀྵ་སྭཱ་ཧཱ། ཞེས་བརྗོད་པའི་སྔགས་ཀྱིས་བསྲུང་བར་བྱའོ། །འཁྱིལ་པའི་སྔགས་ཀྱང་བཟླས་པའི་ཆེད་དུ་འདི་ལ་སྦྱིན་ནོ། །དེ་ལྟར་བྱས་ན་འདི་ལ་བགེགས་རྣམས་ཀྱིས་ནི་མི་ཚུགས་ཤིང་ཉེ་བར་མཁོ་བའི་ཡོ་བྱད་རྣམས་ཀྱང་བདེ་བར་རྙེད་པར་འགྱུར་རོ་ཞེས་པ་སློབ་མ་ཡང་དག་པར་བསྡུ་བའི་ཆོ་གའོ། །། །དེ་ནས་ཉེ་བར་མཁོ་བ་རྣམས་ཡང་དག་པར་ཚོགས་པ་དང་གྲོགས་ཤིན་ཏུ་ཡིད་གཞུངས་པ་དང་ལྡན་པས་དགེ་བའི་ཚེས་དང་དུས་སྦྱོར་ལ་སོགས་པའི་སྔ་དྲོའི་དུས་སུ་རིག་མ་དང་བཅས་པའི་ཤིན་ཏུ་ཕན་པ་བྱེད་པས་འཁོར་ལོའི་དབང་ཕྱུག་གི་ལྷའི་རྣལ་འབྱོར་དང་སྔོན་དུ་བསྙེན་པ་བྱས་ཏེ། གྲོང་རྡལ་དང་གྲོང་ཁྱེར་དང་གྲོད་དང་སྐྱེད་མོས་ཚལ་དང་གཙུག་ལག་ཁང་དང་ཁྱིམ་རྣམས་ཀྱི་དབང་ལྡན་གྱི་ཕྱོགས་སམ་གང་དུ་ཡིད་ལ་འཐད་པར་གྱུར་པ་དེར་དཀྱིལ་འཁོར་གྱི་ཁང་པ་བྱའོ། །ཤར་ཕྱོགས་སུ་དཀྱིལ་འཁོར་བྱས་ན་སའི་བདག་པོ་འཆི་བ་དང༌། སྐྱེ་བོ་རྣམས་ལ་ཉེ་བར་འཚེ་
བ་སྣ་ཚོགས་འབྱུང་ངོ༌། །ལྷོ་ཕྱོགས་སུ་ནི་གང་གི་དོན་དུ་དཀྱིལ་འཁོར་བྱེད་པ་དེ་འཆིའོ། །ཆུར་ནི་སློབ་དཔོན་ནོ། །ལུས་ངན་པོར་ནི་དེར་ཞུགས་པའོ། །མེར་ནི་ཆར་རོ། །བདེན་བྲལ་དུ་ནི་མུ་གེའོ། །རླུང་དུ་ནི་ཆར་རླུང་ངོ༌། །ཕལ་པའི་རིང་བསྲེལ་ཅན་གྱི་མཆོད་རྟེན་དང་ཉེ་བར་ནི་འཆིའོ། །ཀླུ་གནས་པའི་ཆུ་དང་ཉེ་བར་ནི་ཆུ་འབྱུང་ངོ༌། །ཤིང་གི་གྲིབ་མ་ཅན་དུ་ནི་བྱིས་པ་འཆིའོ་ཞེས་ཤེས་པར་བྱས་ནས་ཐམས་ཅད་ཡོངས་སུ་དོར་ཏེ་ཤར་དང་བྱང་གཞོལ་བ་རབ་ཏུ་ཤིས་པའི་དཀྱིལ་འཁོར་གྱི་ས་གཞི་ངེས་པར་བརྟགས་ནས་དེར་དྲི་བཟང་པོ་ལ་སོགས་པས་མཎྜལ་བྱའོ། །དཀྱིལ་འཁོར་གྱི་ལྷ་རྣམས་ཡང་དག་པར་མཆོད་ཅིང་གཏོར་མ་ཕུལ་ནས་ནམ་མཁའ་ལ་བཏེག་སྟེ། དེར་གནས་པའི་ཞིང་སྐྱོང་ལ་སོགས་པ་རྣམས་གཏོར་མ་དང་ཉེ་བར་སྤྱོད་པས་མཆོད་ལ། གང་དག་འདིར་གནས་ལྷ་དང་ཀླུ། །གནོད་སྦྱིན་སྲིན་པོའམ་གཞན་དག་ལ། །ས་འདི་བདག་གིས་བསླང་བར་བགྱི། །དཀྱིལ་འཁོར་དོན་དུ་ཁྱེད་ཀྱིས་སྩོལ། །ཞེས་ལན་གསུམ་དུ་གསོལ་བ་གདབ་པར་བྱའོ། །རྨི་ལམ་ལ་སོགས་པར་གནང་བའམ་མ་བཀག་པར་ཤེས་ནས་ཉི་མ་གཞན་གྱི་སྔ་དྲོ་ནམ་མཁའི་དཀྱིལ་ན་བཞུགས་པའི་དཔལ་ལྡན་རྡོ་རྗེ་འཆང་ལ་སོགས་པ་རྣམས་ལ་ཡིད་ཀྱིས་གསོལ་བ་གདབ་ཅིང་རྗེས་སུ་གནང་བ་ཞུས་ཏེ། ཉི་མའི་གུང་ལ་བསྲུང་བའི་འཁོར་ལོ་དང་བགེགས་ལ་ཕུར་བུས་གདབ་པར་བསྒོམས་པས་སམ། དྲག་པོའི་སྦྱིན་སྲེག་གིས་བགེགས་བསྐྲད་པར་བྱའོ། །སྦྱིན་སྲེག་གི་ཕྱོགས་ལ་སློབ་མ་སྲུང་བའི་དོན་དུ་ཕྱི་དྲོའི་ཚེ་མེའི་ཕྱོགས་ལ་གནས་པའི་ཐབ་ཁུང་དུ་ཞི་བའི་སྦྱིན་སྲེག་ཀྱང་བྱས་ལ་ས་དེ་ཡང་ཨོཾ་ཨཱཿབིགྷྣཱནྟ་ཀྲྀ་ཏ་ཧཱུཾ་ཞེས་པ་འདིས་ལས་ཐམས་ཅད་པ་བཟླས་པའི་ཡུངས་ཀར་དང་ཆུ་དང་ཐལ་བ་རྣམས་ཀྱིས་བསང་བར་བྱའོ། །དེར་རྡོ་རྗེ་སྐྱིལ་ཀྲུང་བཅས་ཏེ་སའི་ལྷ་མོ་འཆད་པར་འགྱུར་བའི་མཚན་ཉིད་ཅན་བསམས་ལ་ཞབས་བསིལ་དང་ཞལ་བསིལ་དང་མཆོད་ཡོན་དང་མཆོད་པ་རྣམས་སྔོན་དུ་འགྲོ་བས། ལྷ་མོ་ཁྱོད་ནི་ཞེས་པ་ལ་སོགས་པ་གསུངས་པའི་ཚིགས་སུ་བཅད་པས་ལན་གསུམ་དུ་གསོལ་བ་བཏབ་པ་དང༌། དེ་ལྟར་གྱིས་ཤིག་ཅེས་བརྗོད་པ་ཅན་ཡིད་ཀྱི་བཏེགས་ནས་ནམ་མཁའ་ལ་བཞུགས་སུ་གསོལ་ལོ། །
དེ་ནས་ས་གཞི་བགེགས་མེད་པར་རིག་ནས་གཏོར་མ་བྱིན་ཏེ་སྔ་མ་བཞིན་དུ་ས་བདག་ཀླུའི་མཆན་ཁུང་དུ་མགྲིན་པ་ཙམ་མཆུ་ལ་ཐུག་པར་རམ་རྡོལ་ཐུག་པར་དངོས་གྲུབ་དམན་པ་དང་འབྲིང་དང་མཆོག་གི་དབྱེ་བས་བུས་མོ་འམ་དཀུ་འམ་ལྟེ་བ་ཙམ་དུ་བརྐོ་བར་བྱའོ། །དེ་ནས་རྡོ་བ་དང་རུས་པ་དང་སྐྲ་དང་སོལ་བ་ལ་སོགས་པ་སྐྱོན་གྱི་ཕྱོགས་སུ་གྱུར་པ་ཐམས་ཅད་མེད་པར་བྱས་ནས་ས་དེ་ཉིད་དྲི་བཟང་པོའི་ཆུས་གཏོར་ཏེ། ཁུང་བུ་དགང་བར་བྱ་ཞིང་མ་ཁེངས་ན་གཞན་གྱིས་ཀྱང་ངོ༌། །ཧཱུཾ་མཛད་ཀྱི་བདུད་རྩི་འཁྱིལ་པའི་སྔགས་བཟླས་པའི་དྲིའི་ཆུས་གཏོར་ལ་བརྡུང་བར་བྱ་ཞིང་ཁྲུ་ཕྱེད་ཀྱི་དཔངས་དང་ལྡན་པ་གྲུ་བཞི་པ་ཁྲུ་བཅུ་དྲུག་གི་ཚད་དང་ལྡན་པ་འམ། ཡང་ན་ཁྲུ་བཅུ་གཉིས་ཀྱི་ཚད་དང་ལྡན་པ་མཉམ་པའི་ས་ལ་འཆད་པར་འགྱུར་བའི་ཐིག་གདབ་པའི་ཆོ་གས་ཐིག་གདབ་པར་བྱའོ། །དེའི་དབུས་སུ་ཁྲུ་བཅུ་གཉིས་སམ་ཁྲུ་བརྒྱད་པའི་ཟླ་བའི་གདན་ཟླུམ་པོ་མཐོ་གང་གི་ཚད་ཀྱི་དཔངས་དང་ལྡན་པ་དབུས་ཅུང་ཟད་མཐོ་བ་ཤར་དང་བྱང་གཞོལ་བའོ། །དེའི་འོག་ཏུ་སོར་བརྒྱད་པའི་ཚད་དང་སོར་བཞི་པའི་དཔངས་དང་ལྡན་པ་པདྨའི་འདབ་མའི་རྣམ་པ་གེ་སར་དང་བཅས་པའི་སྐ་རགས་བྱ་ཞིང༌། འོད་ཟེར་ཕྲེང་བའི་མཐར་ཐུག་པར་ཁྲུ་བཅུ་གཉིས་པའི་དཀྱིལ་འཁོར་དེ་ཁྲུ་ཉི་ཤུ་རྩ་བཞིའི་ཚང་དང་ལྡན་པའི་གྲུ་བཞིར་ཐིག་བཞི་གདབ་བར་བྱ་ཞིང༌། དེ་ལས་ཁྲུ་བཞི་བཞི་ཡོངས་སུ་དོར་བར་སླར་ཡང་ཐིག་བཞི་གདབ་པར་བྱའོ། །དབང་ལྡན་གྱི་ཕྱོགས་ནས་བཟུང་ནས་ཉི་ཤུ་རྩ་བཞིའི་ཐིག་ལ་ཀ་བ་རྣམས་ཏེ། སྟེགས་བུ་ལ་ཀ་བ་བཅུ་གཉིས་སོ། །དེའི་སྟེང་དུ་ཐོག་བཞི་པོ་རྣམས་ཏེ་ཟུར་བཞི་པའི་ཐོག་བྱས་ལ། ཀ་བ་ཆུད་དུ་བཞི་གཞག་ཅིད་ཟུར་གྱི་མཐར་ཐུག་པར་གདུང་བཞི་གཞག་པར་བྱའོ། །དེ་འམ་གཞན་གྱི་ལུགས་ལ་ཡང་རལ་པ་ལ་སོགས་པའི་སྐྱོན་མེད་ཅིང་ལེགས་པར་གནས་པར་བྱ་སྟེ། ཡན་ལག་བརྒྱད་ཀྱི་སྒོ་བཞི་དང་ལྡན་པ་བུམ་པ་བཟང་པོ་དང༌། ཕྱོགས་སྐྱོང་བའི་མདོག་ཅན་གྱི་རྒྱལ་མཚན་དང་ལྡན་བ་གཙུག་ཏོར་དུ་རྣམ་པར་རྒྱལ་བའི་རྒྱལ་མཚན་དཀར་པོ་ཅན་ཆུ་ཤིང་གི་ཀ་བས་ཉེ་བར་མཛེས་པར་བྱས་པ། མཆོད་སྦྱིན་གྱི་ཤིང་གི་རིགས་ཀྱིས་སྒོ་བཞིའི་རྒྱན་བྱས་ལ། མཐར་ཟླ་བའི་གདུགས་ཀྱིས་མཛེས་པ། ཕྲེང་
བ་དང་རྔ་ཡབ་ལ་སོགས་པས་བརྒྱན་པའི་དཀྱིལ་འཁོར་གྱི་ཁང་པ་བྱའོ། །དེ་ནས་ཡང༌། ས་སེལ་ཉེས་པ་ཐམས་ཅད་ནི། །གལ་ཏེ་དབྱུང་བར་མི་ནུས་ན། །ལག་པས་རེག་ལ་སྔགས་བཟླས་བྱ། །དེ་ཉིད་དག་པ་ཆེན་པོ་ཡིན། །ཁང་བཟངས་བྲག་སྟེང་བ་ལང་ལྷས། །གཙུག་ལག་ཁང་སོགས་ཆུ་འགྲམ་མམ། །སྔོན་དུ་བྱས་པའི་གནས་དག་ཏུ། །མ་བརྐོས་ན་ཡང་དག་པ་ཡིན། །དེའི་ཕྱིར་ས་འདི་རྣམས་དང་བརྐོས་ཤིང་བརྡུང་བ་བྱས་པ་རྣམས་ལ་ཡང༌། ཨོཾ་བྷུ་ཁཾ་ཞེས་བརྗོད་པས་ནམ་མཁའ་བྱ་ཞིང༌། དེ་ནས་ཧཱུཾ་ལཾ་ཞེས་པ་འདིས་རྡོ་རྗེའི་རང་བཞིན་དུ་རྣམ་པར་བསྒོམས་ཏེ། ཨོཾ་མེ་དི་ནཱི་བཛྲི་བྷ་ཝ་བནྡྷ་ཧཱུཾ། ཨོཾ་ཧ་ན་ཧ་ན་བཛྲ་ཀྲོ་དྷ་ཧཱུཾ་ཕཊ། ཨོཾ་ཨཱཿ་ཧཱུཾ་ཤོ་དྷ་ཡ་ཤོ་དྷ་ཡ་རཀྵ་རཀྵ་ཧཱུཾ། ཞེས་པའི་སྔགས་འདི་བཟླས་ལ། ལག་པས་རེག་ཅིང་ས་གཞི་བྱིན་གྱིས་བརླབ་པར་བྱའོ། །ས་དེའི་དབུས་སུ་ཇི་ལྟར་འོས་པར་འཁྱིལ་པ་བཟླས་པའི་རིན་པོ་ཆེ་དང་སྨན་དང་འབྲུ་ལྔ་རྣམས་བཅུག་ལ། དེ་བཟླས་པའི་དྲིའི་ཆུ་ཡིས་བྱུག་པར་ནམ་མཁའ་ལ་གནས་པའི་སའི་ལྷ་མོ་ལ་གཏོར་མ་དང་ཞབས་བསིལ་ལ་སོགས་པ་ཕུལ་ནས་བསྟིམ་སྟེ། ཨོཾ་ཨཱཿ་ཧཱུཾ་ཞེས་བརྗོད་ཅིང་པད་ཀོར་བྱས་ལ་ཡི་གེ་བརྒྱ་པ་བརྗོད་པར་བྱའོ། །སྣ་ཚོགས་སྟོང་པ་ཉིད་དང་རོ་གཅིག་པའོ་ཞེས་ལྷག་པར་མོས་པས་ས་གཞི་ཤིན་ཏུ་རྣམ་པར་དག་པའི་དེ་བཞིན་ཉིད་ཀྱི་རང་བཞིན་དུ་མོས་པར་བྱ་བ་ནི་བླ་ན་མེད་པའི་རྣམ་པར་དག་པའོ་ཞེས་པ་དཀྱིལ་འཁོར་གྱི་ཁང་པ་ལ་སོགས་པའི་ཆོ་གའོ།། །།དེའི་རྗེས་སུ། རྔ་དང་ཏིང་ཤགས་ལ་སོགས་པ། །སྙན་པའི་སྒྲ་ལྡན་རབ་ཏུ་བྱ། །དེ་ནས་མཉམ་པའི་གླུ་བླང་ཞིང༌། །རྡོ་རྗེ་ཅན་དེས་གར་བརྩམ་མོ། །སློབ་དཔོན་ལྔ་དང་ལྷ་མོ་བཞི། །མི་གཡོའི་བདག་ཉིད་བཞད་གད་མཁན། །དཀྱིལ་འཁོར་ཁང་པར་ངེས་གནས་ནས། །གར་བྱ་སངས་རྒྱས་ཟློས་གར་བྱ། །ཞེས་པ་འདིའི་རྗེས་སུ་རིམ་པས་བྲི་བར་བྱའོ། །དེ་ལ་ཆོ་ག་ཇི་ལྟ་བ་བཞིན་དུ་བྱ་སྟེ། དཀྱིལ་འཁོར་ཁང་པ་ལ་སོགས་པ་གླུ་དང་རོལ་མོ་ལ་སོགས་པ་ཡང་དག་པར་ལྡན་པར་དཀྱིལ་འཁོར་ལ་ཉེ་བར་མཁོ་བ་དང༌། བཟའ་བ་དང་བཅའ་བ་ལ་སོགས་པ་ན། །འདྲི་བར་འགྱུར་བའི་དཀྱིལ་འཁོར་གྱི་རྣལ་འབྱོར་དང་ལྡན་པའི་རྡོ་རྗེ་ཅན་གྱིས། དམ་
ཚིག་འགོངས་པར་དོགས་པ་ཡིས། །སློབ་མ་མ་ཡིན་གཞུག་མི་བྱ། །ཞེས་པའི་གསུང་གི་ཕྱིར་རང་གི་སློབ་མ་མེད་པར་གྱུར་ནའང༌། གཞན་གྱི་སློབ་མ་ལ་ཡང་རྡོ་རྗེ་འཛིན་པའི་སྔོམ་པ་སྦྱིན་ཞིང་གསོལ་བ་བརྗོད་པ་སྔོན་དུ་འགྲོ་བ་ལྷག་པར་གནས་པར་བྱས་ནས་རབ་ཏུ་གཞུག་པར་བྱ་སྟེ། དེ་ལྟར་སློབ་མ་བཞི་རང་རང་གི་འཁོར་ལོས་སྒྱུར་བའི་རྣལ་འབྱོར་དང་ལྡན་པ་དང༌། དེ་བཞིན་དུ་རྣལ་འབྱོར་མ་བཞི་རང་རང་གི་འཁོར་ལོས་སྒྱུར་བའི་དཀྱིལ་འཁོར་ཉིད་ཀུན་ནས་བསམས་པ་དང་བུད་མེད་མེད་ན་སྐྱེས་པ་ཉིད་བུད་མེད་ཀྱི་ཆ་ལུགས་དང་ཡང་དག་པར་ལྡན་པ་དང༌། དེ་བཞིན་དུ་མི་གཡོ་བ་བདུད་ཐམས་ཅད་སྡིགས་པར་བྱེད་པའི་མཆོག་རྣམས་སོ། །དེ་ལ་དཀྱིལ་འཁོར་གྱི་དབང་ལྡན་གྱི་མཚམས་གཞན་གྱི་ཕྱོགས་ནས་ཀྱང་རུང༌། ཡོལ་བའི་ནང་དུ་རང་རང་གི་ལྷའི་མདོག་དང་མཚུངས་པར་གདོང་ལུས་ལ་སྣག་ཚ་ལ་སོགས་པའི་ཁ་དོག་གིས་བྱུགས་ལ། ཧཱུཾ་ཡིག་ལས་བྱས་པའི་མིག་འབྲས་འབར་བའི་ལྟ་བ་ཅན་ཁྲོ་བོ་ཆེན་པོ་ཁྲོ་གཉེར་གཡོ་ཞིང་རྣམ་པར་འགྱུར་བའི་སྤྱན་དང་ལྡན་པ་འཇིག་པའི་དུས་ཀྱི་བསྐལ་པའི་མེ་དང་འདྲ་བར་བཟོད་པར་དཀའ་བའི་ལྟ་བས་བདུད་རྣམས་བསྐྲད་པར་བྱ་བ་དང༌། སེམས་ཅན་ཐམས་ཅད་གཉིས་སུ་མེད་པའི་དེ་བཞིན་ཉིད་དུ་རོ་གཅིག་པའི་བདེ་བ་ཆེན་པོ་ལ་རབ་ཏུ་གཞག་པར་བྱ་བའི་ཆེད་དུ་བྱས་པའི་རྡོ་རྗེ་འཛིན་པའི་རྡོ་རྗེ་ཅན་ནག་པོ་ནི་དབུས་སུའོ། །དེ་བཞིན་དུ་རི་རབ་ལྟར་བརྟན་ཅིང་མི་འགུལ་བའི་སྤྱན་གྱིས་བྱམས་པར་ལྟ་བ་ཅན་ཨོཾ་ཡིག་ལས་མིག་འབྲས་བྱས་པ་བསིལ་བའི་བདུད་རྩིའི་འོད་ཟེར་དཀར་པོའི་ཕྲེང་བའི་ལྟ་བས་ཕུན་སུམ་ཚོགས་པ་དང་བྲལ་བ་རྣམས་དང་མེད་པའི་བརྟུལ་ཞུགས་འཛིན་པ་རྣམས་སངས་རྒྱས་གཏི་མུག་མི་གནས་པའི་མྱ་ངན་ལས་འདས་པ་ལ་རབ་ཏུ་གཞག་པའི་ཆེད་དུ་བྱས་པའི་འཁོར་ལོ་འཛིན་པའི་རྟག་པ་དཀར་པོ་ནི་ཤར་གྱི་སྒོ་རུའོ། །དེ་བཞིན་དུ་གཡོན་པར་བརྟེན་ཅིང་གཡོན་དུ་རྗེས་སུ་སོང་བའི་ལྟ་བ་ཅན་ཧྲཱིཿཡིག་ལས་མིག་འབྲས་བྱས་པའི་འོད་ཟེར་གྱི་ལྕགས་ཀྱུས་རྫོགས་པའི་བྱང་ཆུབ་ཏུ་བསྒྱུར་བར་བྱ་བའི་ཉན་ཐོས་ལ་སོགས་པ་རྣམས་འདོད་ཆགས་ཆེན་པོའི་བྱང་ཆུབ་ལ་རྣམ་པར་གཞག་པའི་ཆེད་དུ་རྗེས་སུ་ཆགས་པ་དམར་པོའི་མདོག་ཅན་བྱས་པའི་པདྨ་འཛིན་
པའི་གར་གྱི་དབང་ཕྱུག་ནི་ནུབ་ཀྱི་སྒོ་རུའོ། །དེ་བཞིན་དུ་ཇི་ལྟ་བར་ཁཾ་ཡིག་ལས་མིག་འབྲས་བྱས་པ་འབར་བའི་ལྕགས་ཀྱུས་ཐམས་ཅད་མཁྱེན་པའི་ལམ་ལ་བརྟེན་ནས་བྱང་ཆུབ་སེམས་དཔའི་ས་ཐོབ་པའི་དངོས་གྲུབ་མཐོང་བ་རྣམས་དང༌། ཉན་ཐོས་ལ་སོགས་པའི་ལམ་ལ་མོས་པས་སྣ་ཚོགས་པའི་མྱ་ངན་ལས་འདས་པ་མཐོང་བ་རྣམས་ཡང་དག་པར་རྫོགས་པའི་བྱང་ཆུབ་ལ་ངེས་པར་བྱ་བའི་ཆེད་དུ་བྱས་པའི་རལ་གྲི་འཛིན་བའི་རྟ་མཆོག་ལྗང་གུ་ནི་བྱང་གི་སྒོ་རུའོ། །དེ་བཞིན་དུ་ཛ་ཡིག་ལས་སྐྱེས་པ་སེར་པོའི་མིག་གཡས་སུ་བཏེག་ཅིང་སྟེང་དུ་ལྟ་བའི་ལྕགས་ཀྱུས་ང་རྒྱལ་དང་གདུག་པ་ཅན་རྣམས་སེར་སྣ་མེད་པར་བྱ་བའི་ཕྱིར་དང་མཉམ་པ་ཉིད་ཀྱི་ཡེ་ཤེས་ལ་ངེས་པར་སྦྱར་བའི་ཆེད་དུ་བྱས་པའི་རིན་པོ་ཆེ་འཛིན་པའི་རྡོ་རྗེ་ཉི་མ་སེར་པོ་ནི་ལྷོའི་སྒོ་རུ་སྟེ། ཤར་དང་ནུབ་དང་བྱང་དང་ལྷོ་ཡི་ཕྱོགས། །ཞེས་བའི་གསུང་གི་ཕྱིར་རོ། །འདི་རྣམས་ཐམས་ཅད་ཕྱག་གཡོན་པ་ན་མཆོད་ཕྱིར་ཐོགས་པ་དང་འདྲ་བའི་ཁ་ཊྭཱཾ་ག་དང་རྡོ་རྗེ་དྲིལ་བུའམ་ཀ་པཱ་ལ་འཛིན་པ། སྟག་ལས་བྱས་པའི་ཤམ་ཐབས་ཅན་མིའི་རུས་པ་ལ་སོགས་པས་བརྒྱན་པར་བྱས་ཤིང་སྐྲ་སེར་པོ་གྱེན་དུ་བཅིངས་པ་ཐོད་པའི་ཕྲེང་བ་དང་སངས་རྒྱས་ལྔའི་ཅོད་པན་སྐྱིལ་ཀྲུང་ཕྱེད་པའི་གར་རམ་གཡས་བརྐྱང་གིས་གནས་པ། མིག་གསུམ་བྱས་ཤིང་སྣ་ཚོགས་པདྨ་དང་ཉི་མ་ལ་གནས་པ་སྟེ། རྟག་པ་ནི་པདྨ་དང་ཟླ་བའི་འོད་ཅན་ནོ། །དེ་ཁོ་ན་བཞིན་དུ་བྱམས་པའི་ལྟ་བས་སེམས་ཅན་རྣམས་ཀྱི་ཉེ་བར་འཚེ་བ་ཞི་བར་བྱ་བའི་ཆེད་དུ་བྱས་པའི་འཁོར་ལོ་འཛིན་པའི་སྤྱན་མ་དཀར་མོ་ཡང་དབང་ལྡན་གྱི་ཟུར་དུ་སྟེ། ཀྱེ་རྡོ་རྗེའི་དཀྱིལ་འཁོར་ལ་ནི་གཞན་མེའི་ཟུར་དུའོ། །དེ་ཁོ་ན་བཞིན་དུ་སྙིང་རྗེའི་ལྟ་བས་གཞན་གྱི་གནོད་པ་མེད་པར་བྱ་བའི་ཆེད་དུ་བྱས་པའི་རྡོ་རྗེ་བཅུ་སྐྱེས་ཀྱི་ལག་པ་མཱ་མ་ཀཱི་སྔོན་མོ་ཡང་མེའི་ཟུར་དུའོ། །དེ་ཁོ་ན་བཞིན་དུ་རྗེས་སུ་ཆགས་ཤིང་དམར་བའི་ལྟ་བས་སྐྱེ་བོ་རྣམས་རྗེས་སུ་ཆགས་པར་བྱ་བའི་ཆེད་དུ་བྱས་པའི་པདྨ་འཛིན་པའི་གོས་དཀར་མོ་དམར་མོ་ནི་བདེན་བྲལ་གྱི་ཟུར་དུའོ། །དེ་བཞིན་དུ་དགུག་པའི་ལྟ་བས་གདུལ་བྱ་རྣམས་དགུག་པར་བྱ་བའི་ཆེད་དུ་བྱས་པའི་ཨུཏྤལ་སྔོན་པོ་འཛིན་པའི་སྒྲོལ་མ་ལྗང་གུའི་མདོག་ཅན་ནི་རླུང་གི་ཟུར་དུའོ། །ཐམས་ཅད་ངེས་པར་
སྔ་མ་བཞིན་དུ་མགོ་སྐྱེས་སེར་པོ་གྱེན་དུ་འཁྱིལ་བར་བྱས་པའི་མུག་གསུམ་ལ་སོགས་པ་དང་སོ་སོའི་བཞིན་དང་ལྡན་པ། སྙིང་གར་ཁུ་ཚུར་གཡོན་པའི་མཛུབ་མོ་ཡོད་པར་བྱས་པ་གོས་སྣ་ཚོགས་ཅན་སྣ་ཚོགས་ཆུ་སྐྱེས་དང་ཉི་མ་ལ་གནས་པར་བྱས་པ་སྐྱིལ་ཀྲུང་ཕྱེད་བའི་གར་རམ་གཡོན་བརྐྱང་གིས་གནས་པའོ། །དེ་ཁོ་ན་བཞིན་དུ་མི་གཡོ་བའི་གསེར་གྱིས་བསྐུས་པའི་རལ་གྲི་དང༌། ལུས་ཅན་སྦྱིན་བདག་གིས་བྱིན་པ་ཇི་ལྟ་བ་བཞིན་དུ་ཐོབ་པའི་གོས་དང་རྒྱན་ཡོད་པ་འཁོར་བ་དང་མྱ་ངན་ལས་འདས་པ་དག་ལ་འོག་དང་སྟེང་དུ་བལྟ་བའི་མིག་ཅན་མཆོག་ཉིད་ཀྱི་ཕྱིར་སེར་པོ་མི་གཡོ་བ། སོར་མོ་ལ་དཀྲིས་པའི་སྤྲུལ་གྱི་ཞགས་པ་འཛིན་པ། འཁོར་ལོས་སྒྱུར་བའི་ལྷ་མོ་རྣམས་ལ་བཞད་གད་བྱེད་པའི་མཆོག་གཡོན་བརྐྱང་གིས་སྣ་ཚོགས་ཆུ་སྐྱེས་དང་ཉི་མ་ལ་གནས་བའམ། ཡང་ན་འཁོར་ལོས་སྒྱུར་བའི་རྐང་སྟབས་ཀྱིས་གནས་པ་འཁོར་ལོས་སྒྱུར་བ་སོ་སོའི་ལྷ་མོ་རྣམས་ལ་ཉེ་བར་བསྐོར་ཞིང་སྣ་ཚོགས་པའི་རིན་པོ་ཆེ་ལ་སོགས་པས་བརྒྱན་པ། གོས་བཟད་པོ་ཅན་ཐུགས་ཀྱི་དབང་ཕྱུག་གིས་བརྒྱན་པའི་རིན་པོ་ཆེའི་ཅོད་པན་ཅན་ནོ། །ཐམས་ཅད་ནས་རྡོ་རྗེའི་རྐང་སྟབས་དང༌། རིམ་པ་ཇི་ལྟ་བ་བཞིན་དུ་རྡོ་རྗེའི་གླུ་བླང་བ་དང་པད་ཀོར་ལ་སོགས་པ་དང༌། རྡོ་རྗེའི་རྐང་སྟབས་ལྔའི་གར་གྱིས་སྒོ་རྣམས་སུ་གར་བྱའོ། །དེའི་རྗེས་ལ་ཡོལ་བའི་ནང་དུ་གཞུག་པའི་དོན་དུ་གླུ་བླང་བར་བྱ་སྟེ། ཧཱུཾ་ཧཱུཾ་དེ་ཧ་དཱ་རུ་སཾ་སཱ་ར་དཱ་རུ་དྭནྡྭཱ་ལིང་ག་ཎ་ཡོ་ག་བ་རུ། ཧེ་བཛྫ་དུ་ཧཱུཾ་ཏེནྣཱ་ཧཱུཾ་ཏེནྣཱ་ཧཱུཾ། སུ་ར་ན་རེ་བིནད་ཏ་ཙ་ར་ཎ་བ་རཱུ་ཀུ་སུ་མ་པི་ཎི་རྨྨཱ་ཡ་རོ་ཥ་རཱུ་ཧེ་བཛྫ་ཏུ་ཧཱུཾ་ཏེནྣཱ་ཏེ་ཏེ་ཧཱུཾ། བྷ་ཝ་བི་མུཀྟི་བི་ཤེ་ཥ་ཀུ་ཎ་ཀུཊྚི་ཨ་ཨི་ནཱ་མ་ནཱ་མ་ཧེ་ཧེ་བཛྫ་ཏུ་ཧཱུཾ་གུ་ཎ་པཱི་ཊི་ཨ་ཨི། དེའི་རྗེས་སུ། ཀོལླ་ཨི་རེ་ཊྠི་ཨ་ལོ་ལཱ། མུཾ་མུ་ཎི་རེ་གཀྐོ་ལཱ། གྷ་ཎེ་ཀྲྀ་པི་ཊ་ཧོ་བཱ་ཛྫ་ཨི། ཀཱ་རུ་ཎེ་ཀི་ཨ་ཨི། ན་རོ་ལཱ་མཱ་ལ་ཡ་ཛེཾ་ཀུནྡུ་རུ་བཱཊྚ་ཨི། ཌིཎྜི་མ་ཏ་ཧིཾ་ན་བཱཛྫ་ཨ་ཨི་དྷུའོ། །ཏ་ཧིཾ་བ་ལུ་ཁཛྫ་ཨི་གྷ་ཌྷེཾ་མ་ཨ་ནཱ་མིཚྟྫ་ཨི། ཧ་ལི་ཀཱ་ལིཉྫ་ར་པ་ཎི་ཨ་ཨི། དུནྡུ་ར་ཏི་ཧིཾ་བཛྫ་ཨ་ཨི་དྷུའོ། །ཙ་ཨུ་ས་མ་ཀཙྪུ་རི་སིཧླ། ཀཱི་རྤུར་ལཱ་ཨི་ཨ་ཨི། མཱ་ལ་ཨིནྡྷ་ན་ཤཱ་ལི་ཉྫ། ཏ་ཧིཾ་བཱ་རུ་ཁཱ་ཨི་ཨ་ཨི་དྷུ། ཕྲཻཾ་ཁ་ཎ་ཁེ་ཊ་ཀ་རནྟེ་ཤུདྡྷ་ཨ་ཤུདྡྷ་ན་མུ་ཎི་ཨ་ཨི། ནི་རཾ་ཤུ་ཨཾ་གེ་ཙྜཱ་ཝི་ཨ་
ཨི། ཏ་ཧིཾ་ཛ་ཤ་ར་ཨི་པ་ཎ་ཨ་ཨི་དྷུ། ཞེས་པ་ལ་སོགས་པའི་གླུ་དབྱངས་ཇི་ལྟ་བ་བཞིན་དུ་ཤེས་པར་བྱའོ། །ཛཿཧཱུཾ་བཾ་ཧོཿརུ་ཊ་མ་ཊ། མ་ར་རི་ཌ་བཞིའོ། །ཧུ་ལུ་ཧུ་ལུ་ཧུ་ལུ་བཞིའོ། །ཨ་ལ་ལ་ལ་ལ་ཧོཿདྲུག་གོ །སིདྷྱ་སིདྷྱ་བུདྒྱ་བུདྷྱ་དཪྴ་ཡ་སརྦཾ་གཉིས་སོ། །ཀ་ཎི་ཀ་ཎི་དྷུ་ནི་དྷུ་ནི་ཧཱུཾ་གཅིག་གོ །རོལ་པའོ། །ཀ་ཊི་ཧཱུཾ་ཛཿབྮིའོ། །གྷེ་གྷེ་ན་དོ་མ་གཉིས་སོ། །ཌྐྐི་ཧཱུཾ་ཧཱུཾ་བཞིའོ། །ཊཀྐི་ཧཱུཾ་ཛ་བཞིའོ། །ཧུ་ལུ་ཧུ་ལུ་བཞིའོ། །ཨ་ལ་ལ་ལ་ལ་ཧོཿདྲུག་གོ །རུ་ཊ་མ་ཊ་བཞིའོ། །བརྟན་པར་ཏིང་ཏིང་ཤགས་ཀྱི་རོལ་མོའོ། །ཊ་གྷཻ་གྷཻ་གཉིས་སོ། །ཊ་གྷཻ་གྷཻ་གྷཻ་གྷཻ་བཞིའོ། ཊ་གྷཻ་གྷཻ་གཉིས་སོ། །གྷཻཾ་གཅིག་གོ །ཊ་གྷཻཾ་གྷཻཾ་གཉིས་སོ། །གྷཻཾ་ཊ་གྷཻཾ་གཉིས་སོ། །གཡོ་བའི་རིལ་མོའོ། །ཨཾ་ཨཾ་ཨཾ་གསུམ་མོ། །བཾ་བཾ་བཾ་གསུམ་མོ། །དྷཾ་དྷཾ་དྷཾ་གསུམ་མོ། །དམ་ཚིག་གསུམ་གྱི་རོལ་མོའོ། །བཻ་ཀཽཾ་ཀཽཾ་ཀཽཾ་ཀཽཾ་ཀཽཾ་ཀཽཾ་དྲུག་གོ །བཻ་བ་ཛ་བཻ་བ་ཛ་དྲུག་གོ །བཻ་བ་ཛ་བ་ཛ་ལྔའོ། །བཻ་ཀཽཾ་ཀཽཾ་ཀཽཾ་ཀཽཾ་ཀཽཾ་དྲུག་གོ །བཻ་ཧཱུཾ་བྷྱོ་གསུམ་མོ། །ཧཱུཾ་བྷྱོ་ཧཱུཾ་བྷྱོ་བཞིའོ། །བཻ་རུ་ལུ་རུ་ལུ་ཧཱུཾ་བྷྱོ་དྲུག་གོ །བཻ་ཀཽཾ་ཀཽཾ་ཀཽཾ་ཀཽཾ་ཀཽཾ་དྲུག་གོ །དཔལ་ཧེ་རུ་ཀ་རྡོ་རྗེའི་རོལ་མོའོ། །པདྨ་པདྨ་ཧྲཾ་ལྔའོ། །པདྨ་སྟིཾ་པདྨ་སྟིཾ་ལྔའོ། །པདྨ་པདྨའི་དྷཾ་ལྔའོ། །པདྨ་པདྨི་ཧྲཾ་ལྔའོ། །པདྨ་པདྨ་ཤྲཱིཾ་ལྔའོ། །དཔལ་ལྡན་པདྨའི་ཏིང་ཏིང་ཤགས་ཀྱི་རོལ་མོའོ། །ཏྲཱཾ་ཏྲཱཾ་ཏྲཱཾ་ཏྲཱཾ་བཞིའོ། །བཿབཿབཿབཿབྮིའོ། །ཊཿཊཿཊཿཊཿབྮིའོ། །ཏྲ་ཏྲ་ཏྲ་ཏྲ་ཊ་ལྔའོ། །རྒྱལ་པོའོ་རོལ་མོའོ། །ཊིཀྐི་ཧཱུཾ་ཛཿའྒྱིང་བས་འགྲོ་བའོ། །ཏྲཿཏྲཿཏྲཿཏྲཿབྮིའོ། །མགྱོགས་པས་རབ་ཏུ་མགྱོགས་པའོ། །ཏ་ཌ་བ་ཏ་ཌ་བ་ཧྨཻཾ་བདུན་ནོ། །ཏ་ཌ་བ་ཏ་ཌ་བ་ཏ་ཌ་བ་ཏ་ཌ་བ་བཅུ་གཉིས་སོ། །ཤིན་ཏུ་མགྱོགས་པའི་རོལ་མོའི་ཕྱག་རྒྱའོ་ཞེས་པ་ལ་སོགས་པའི་རོལ་མོ་རྣམས་དང་པོར་ཏེ། མུ་ར་ཛ་ལ་སོགས་པ་ཚད་ཇི་ལྟ་བ་བཞིན་དུ་དཀྲོལ་བར་བྱའོ། །དེའི་རྗེས་ལ་བཞད་གད་མཁན་གྱིས་ཧ་ཡིག་བརྒྱད་ཀྱིས་བཞད་གད་བྱ་བ་བརྗོད་པར་བྱའོ། །མཛེས་པའི་རྒྱན་ལྡན་དཀྱིལ་འཁོར་འཁོར་ལོར་ནི། །བླ་རེ་གདུགས་དག་བ་དན་བསྒྲེང་བྱ་ཞིང༌། །སྙན་པའི་སྒྲ་སོགས་རོལ་མོ་དུ་མ་དང༌། །དེ་ཡི་རྗེས་སུ་གླུ་མཆོག་ཡིད་འོང་བྱ། །འགྲོ་ཀུན་
སངས་རྒྱས་ལྔ་ཡི་བདག་ཉིད་འདིར། །བལྟས་ནས་སྣ་ཚོགས་ལྷ་ཡི་ཟློས་གར་བྱ། །གང་དུ་བདེ་ཆེན་གཅིག་པུ་ཞེས་བྱ་བ། །དུ་མའི་སྡེ་ལ་གར་མཛད་གཅིག་པུ་ཉིད། །ཉན་ཐོས་ཐེག་པར་མི་སློབ་དགེ་སྦྱོང་གིས། །དོན་དམ་སྤྱོད་པ་དེ་ནས་དེར་སྤྱད་དོ། །བྱང་ཆུབ་སྤྱོད་སྤྱད་སངས་རྒྱས་ཡོན་ཏན་ནི། །འདི་རྣམས་ངེས་པར་སྟེར་འགྱུར་རང་འབྱུང་དུའོ། །རྨོངས་པ་གང་གིས་བཅིངས་གྱུར་པ། །དེ་ཡོངས་གྲོལ་ན་སངས་རྒྱས་ཏེ། །ཕྱིན་ཅི་ལོག་འདི་མཐའ་དག་ལ། །བྱང་ཆུབ་རྣམ་པར་བསྒོམ་པར་བྱ། །ཞེས་བརྗོད་པའི་མཐར་ཡོལ་བ་བསལ་ནས་རིམ་པ་བཞིན་དུ་དབུ་རྒྱན་དང༌། །མིག་དང་ཀོ་སྐོ་དང་མགྲིན་པ་དང་ཕྲག་པ་དང་དཔུང་པ་དང་སྙིང་ག་དང་ལྟེ་བ་དང་པུས་མོ་དང་རྐང་པ་རྣམས་བསྟན་ལ། ས་རབ་ཏུ་དགའ་བ་ལ་སོགས་པའི་སྒྲིབ་པ་དང་བྲལ་བ་མཚོན་པར་བྱེད་པ་རྡོ་རྗེ་ཅན་གྱིས་ངེས་པར་སྤྲོ་བར་བྱ་ཞིང༌། རྡོ་རྗེ་སེམས་དཔའི་ཕྱག་རྒྱས་མེ་ཏོག་གི་སྙིམ་པ་སྙིང་གར་བཟུང་སྟེ། ལག་པ་དག་ལ་ཨོཾ་ཡིག་ལས་ཟླ་བའི་དཀྱིལ་འཁོར་དང་དེར་ཧཱུཾ་ཡིག་ལས་སྐྱེས་པའི་རྡོ་རྗེ་མེ་ཏོག་དཀར་པོ་དང༌། སོར་མོ་རྣམས་ཀྱང་རྡོ་རྗེའི་རྣམ་པར་བསྒོམ་པར་བྱའོ། །དེ་བཞིན་དུ་གཙོ་བོ་གཞན་རྣམས་ཀྱི་རིམ་པ་བཞིན་ནོ། །དེ་ནས་སྐྱིལ་ཀྲུང་ཕྱེད་པ་བཀུག་ལ་རྐང་པ་གཡས་པ་མཉམ་པའི་རྐང་སྟབས་སུ་གནས་པར་བྱ་ཞིང་གཡས་བརྐྱང་ལ་སོགས་པའི་རྣམ་པས་སྒོ་རྣམས་ནས་དཀྱིལ་འཁོར་གྱི་དབུས་སུ་རབ་ཏུ་འཇུག་པར་བྱའོ། །དེ་ནས་མཉམ་པའི་རྐང་སྟབས་བྱས་ལ་གཡོ་བས་རྣ་པར་བསྐོར་ཞིང་དེའི་རྗེས་སུ། ན་མ་སྟེ་ཧཱུཾ། ཨོཾ་ན་མཱ་མི་ཧཱུཾ། ཨོཾ་ན་མོ་ན་མཿཧཱུཾ་སྭཱ་ཧཱ། ཞེས་པས་རིམ་གྱིས་ལོངས་ནས་སྤྱི་བོར་དཀྲོལ་ཏེ། པྲ་ན་མཱ་མི་སརྦ་ཏ་ཐཱ་ག་ཏཱ་ན། སརྦྦ་ཏ་ཐཱ་ག་ཏེ་བྷྱཿཨཱཏྨ་ནཾ་ནི་ཪྻ་ཏ་ཡཱ་མི། ཞེས་པ་འདྲི་པར་འགྱུར་བའི་དཀྱིལ་འཁོར་གྱི་གཙོ་བོ་ལ་འབུལ་བའི་ཚུལ་བྱ་ཞིང་ཤིས་པ་བརྗོད་པའི་ཚིགས་སུ་བཅད་པ་གདོན་པར་བྱའོ། །དེའི་རྗེས་ལ། ཡཱ་ཝནྟ་སརྦ་སཏྭཱཿསཏྭ་སཾ་གྲྭ་ཧི་ན་སཾ་གྲ་ཧི་ཏྭཱཾ། ཨཎྜ་ཛཱ་ཝཱ། ཛ་ར་ཡུ་ཛཱ་བཱ། སཾ་སྭེ་ཏ་ཛཱ་བཱ། ཨཽ་པ་པཱ་རུ་ཀཱ་བཱ་རཱུ་པི་ཎོ་བཱ། ཨ་རཱུ་པི་ཎོ་བཱ། སཾ་ཛྙཱིཾ་ཎོ་བཱ། ཨ་བ་ཛྙཱི་ནོ་བཱ། ནཻ་བ་སཾ་ཛྙཱ་ཎོ་བཱ། ན་སཾ་ཛྙཱི་ཎོ་བཱ། སརྦ་ཏེ་སཏྭ་མཱ་ཡ། མཧཱ་
མུ་དྲཱ། མནྟྲ་པ་དེཿཔྲ་ཏིཥྛ་པ་ཡི་ཏ་བྱཿ། ཞེས་པ་ལན་གསུམ་དུ་བརྗོད་པར་བྱའོ། །དེའི་རྗེས་སུ་དམ་ཚིག་ཆེན་པོའི་གླུ་བླང་ཞིང་ཐམས་ཅད་དུ་གར་བྱའོ། །དེ་ལ་གླུ་ནི་འདི་ཡིན་ཏེ། །སྟོང་ཉིད་དྲི་མེད་དམ་པའི་གནས། །རྨི་ལམ་སྒྱུ་མའི་རང་བཞིན་ཉིད། །ཇི་སྲིད་མ་ཞིག་བར་དུ་ནི། །སེམས་ཀྱི་རང་བཞིན་བསྒོམ་པར་གྱིས། །སྤྱན་མའིའོ། །སྲེད་མེད་མྱ་ངན་འདས་པ་མེད། །འདི་ནི་བདེ་ཆེན་རྡོ་རྗེ་སྟེ། །གང་ཞིག་ཡིད་ཀྱིས་མི་བསྒོམ་བསྒོམ། །དེས་ནི་མཆོག་གི་འབྲས་བུ་འགྲུབ། །མཱ་མ་ཀཱིའིའོ། །སྔགས་དང་ཡི་གེ་རྣམ་པར་སྤངས། །དེ་ལ་སེམས་མེད་ཐིག་ལེ་མེད། །འདི་དེ་དམ་པའི་བདེ་ཆེན་ཏེ། །བྲི་བ་མེད་ཅིང་གང་བ་མེད། །གོས་དཀར་མོའིའོ། །གཟུགས་བརྙན་རང་བཞིན་ཇི་ལྟ་བ། །དེ་ལྟར་དངོས་པོ་བསྒོམ་པར་བྱའོ། །སྟོང་ཉིད་དྲི་མེད་མཆོག་གི་གནས། །དེ་ལ་བསོད་ནམས་སྡིག་པ་མེད། །སྒྲོལ་མའིའོ། །ཇི་ལྟར་ཆུ་ནད་ཟླ་བ་དེ། །བདེན་མིན་བརྫུན་པ་མིན་པ་ལྟར། །དེ་བཞིན་དཀྱིལ་འཁོར་འཁོར་ལོ་ཡི། །གཟུགས་བརྙན་རང་བཞིན་རྙོག་པ་མེད། །རྡོ་རྗེ་འཛིན་པའིའོ། །དེ་ལྟར་འཁོར་ཐམས་ཅད་ལ་གསུངས་སོ། །དེ་ནས། དམ་ཚིག་ཆེན་པོ་གསུངས་པ་དང༌། །མིག་ཡོན་མི་གཡོ་རྣམ་བཞད་དེ། །མི་བསྐྱོད་ཡེ་ཤེས་བརྙེས་ལྡན་པའི། །སྟོན་པ་ལ་ནི་བཞད་གད་བྱས། །བཅོམ་ལྡན་ཁྱོད་ཀྱི་དམ་ཚིག་ཅི། །ཧཱུཾ་གི་ཡི་གེ་ཡི་གེའོ། །ཐུབ་པ་ཆེན་པོ་གཞུ་ཅན་ནམ། །མིན་ད་དཔལ་ལྡན་སྙིང་རྗེའི་སྟོབས་དང༌། །བསྣུན་པའི་བདག་སྟོབས་མིན་ནམ་ཅི། །སླར་ཡང་གཞན་རྣམས་སུ་ཕྱིན་ནས་ཞུས་པ། ཅི་ཁྱོད་དམ་ཚིག་ཨོཾ་ཡིག་ཡིན། །གང་ཟག་ཐུབ་ཁྱོད་ཚངས་བའམ། །མིན་ང་དཔལ་ལྡན་རྣམ་སྣང་མཛད། །མེ་བཅོམ་ཁྱོད་ནི་འདོད་པ་བྲལ། །ཅི་ཁྱོད་དམ་ཚིག་ཨཿཡིག་ཡིན། །ཁྱབ་བདག་མཁའ་ལྡིང་མཁྱེན་ནམ་ཅི། །མིན་ང་དཔལ་ལྡན་གར་དབང་ཕྱུག །ཁྱོད་ནི་ཟློས་གར་བཞད་གར་མཁན། །ཅི་ཁྱོད་དམ་ཚིག་ཏྲཾ་ཡིག་ཡིན། །ཚ་བ་འཕྲོག་ཁྱོད་གདུགས་ཡིན་ན། །མིན་ང་རྡོ་རྗེ་ཉི་མ་དཔལ། །འཁོར་ལོའི་རྣམ་པ་ཇི་ལྟར་མིན། །ཅི་ཁྱོད་དམ་ཚིག་ཁཾ་ཡིག་ཡིན། །མཁའ་ཁྱོད་སྟོང་པའི་རང་བཞིན་ནམ།།
མིན་ང་རྡོ་རྗེ་འཁྱོག་འགྲོ་ཡིན། །རྟ་ཁྱོད་སྔོན་ལ་འགྲོ་བའོ། །ཅི་ཁྱོད་དམ་ཚིག་ཞི་བ་ཉིད། །བུད་མེད་གཡོ་སྒྱུ་འཛིན་ནམ་ཅི། །མ་ཡིན་བདག་ནི་ལྷ་མོ་སྤྱན། །གལ་ཏེ་སྤྱན་ནི་གཡོ་བར་བཅས། །ཅི་ཁྱོད་དམ་ཚིག་སྙིང་རྗེ་འཆང༌། །ཨ་མ་ཆང་འཚོང་མཛེས་མ་འམ། །མིན་ང་བདག་མའོ་མ་གཡོ་བ། །གཉེན་ལྡན་བུད་མེད་བདག་མ་འམ། །ཅི་ཁྱོད་དམ་ཚིག་འདོད་ཆགས་ཆེ། །སྨད་འཚོང་མ་ལ་སྨྲར་ཅི་ཡོད། །མིན་ང་ལྷ་མོ་གོས་དཀར་མོ། །ཅི་ལྟར་དཀར་མོ་འཛིན་མ་ཡིན། །ཅི་ཁྱོད་དམ་ཚིག་དབང་བྱེད་ཆེ། །བཙུན་མོའི་ཕོ་ཉ་ཡིན་ནམ་ཅི། །མིན་ང་སྒྲོལ་མ་མི་གཡོན་པོ། །སྒྲོལ་མ་མིག་ནི་བཅོམ་པ་ཡིན། །དཔལ་ལྡན་མིག་ཡོ་ནོར་ལྡན་བདག །ངོ་ཚ་མེད་པ་ཉིད་ནི་ལེགས། །ངོ་ཚ་མེད་ན་སངས་རྒྱས་མེད། །མཐོང་དང་མི་མཐུན་མྱུར་དུ་སྨོས། །དེ་ནས་རྡོ་རྗེ་བཞད་གད་པས་སྨྲས་པ། །རྡོ་རྗེ་སེམས་དཔའ་ཞེ་སྡང་ཆེ། །ཐུབ་པ་རྣམ་པར་སྣང་མཛད་རྨོངས། །འཇིག་རྟེན་དབང་པོ་འདོད་ལ་ཞེན། །རྡོ་རྗེ་སྣང་བྱེད་ཕྲ་བ་བྱེད། །དོན་ཡོད་སྐྱོན་ཀུན་བྱེད་པ་སྟེ། །འདྲེན་པ་ལྔ་ནི་སྐྱོན་ལྡན་ནོ། །སེམས་ཅན་སྒོ་ང་སྐྱེས་མངལ་སྐྱེས་སམ། །དྲོད་གཤེར་སྐྱེས་དང་ད་བཞིན་དུ། །གཟུགས་ཅན་རྣམས་སམ་གཟུགས་མེད་དམ། །རྫུས་ནས་སྐྱེས་པར་གྱུར་པ་རྣམས། །ཐམས་ཅད་སངས་རྒྱས་བྱའོ་ཞེས། །ཁྱོད་ཀྱིས་དང་པོར་གསུངས་པ་ཉིད། །ཁྱོད་ནི་སངས་རྒྱས་མཆོག་གྱུར་ནས། །དེ་ལྟར་ཇི་ལྟར་རྒྱལ་མ་མཛད། །དེ་ཉིད་ཕྱིར་ན་བརྫུན་གསུང་ངམ། །མངའ་བདག་ཅི་ལྟར་འདི་མ་གསུངས། །སེམས་ཅན་བསླུས་ན་སངས་རྒྱས་ཉིད། །གང་ཁྱོད་འདི་དེ་ངོ་མཚར་རྨད། །མིག་ཡོན་ཉོན་ཅིག །འཆི་དང་ཉེར་འཚེ་མུ་གེ་དང༌། །ཕས་ཀྱི་འཁོར་ལོའི་གནོད་པ་དང༌། །ཆར་མེད་པ་ནི་ཞི་བ་དང༌། །རབ་གནས་དཀྱིལ་འཁོར་སྦྱིན་སྲེག་ལ། །གང་ངས་རྟག་ཏུ་གར་བྱས་སོ། །སྔགས་དང་བསྒོམ་པར་ལྡན་གྱུར་པ། །གང་ཞིག་བདག་ནི་རྟག་རོལ་པ། །དེ་ཡི་མདུན་ན་ང་གནས་ཏེ། །དེ་ལ་བརྫུན་དུ་འགྱུར་བ་མེད། །ཞེས་སངས་རྒྱས་བཅོམ་ལྡན་འདས་ཀྱིས་མཁའ་འགྲོ་མ་གུར་དུ་གསུངས་པའོ། །འདྲི་བར་འགྱུར་བའི་དཀྱིལ་འཁོར་དང་རྗེས་སུ་མཐུན་པའི་མིང་བཅུག་ནས། བརྗོད་པར་བྱའོ་
ཞེས་པ་མན་ངག་གོ །བཅོམ་ལྡན་འདས་སྔགས་དང་ཕྱག་རྒྱལ་སོགས་པའི་བསྒོམ་པ་གང་ལགས། མིག་ཡོན་ཉོན་ཅིག་དེ་ཉེ་བར་བསྟན་པར་བྱའོ། །དེ་ཉེ་བར་བསྟན་པ་ནི་དཀྱིལ་འཁོར་གྱི་སའི་དབུས་སུ་འདུག་ལ་མེ་ཏོག་ལ་སོགས་པ་དང་པོར་ཕུལ་ནས་འདྲི་བར་འགྱུར་བའི་དཀྱིལ་འཁོར་གྱི་རྣལ་འབྱོར་དང་ལྡན་པས་རྡོ་རྗེ་དང་དྲིལ་བུ་བཟུང་སྟེ། སྲུང་བའི་འཁོར་ལོ་ལ་སོགས་པས་བགེགས་བསལ་བར་བྱའོ། །གཡས་པས་སྤོས་ཕོར་བཟུང་ཞིང་གཡོན་པས་རྡོ་རྗེ་དྲིལ་བུ་དཀྲོལ་སྟེ་། པུས་མོ་གཡས་པ་ས་ལ་བཙུགས་ནས་ལྕེ་ལ་ཧཱུཾ་ལས་སྐྱེས་པའི་རྡོ་རྗེ་བྱས་ནས། མ་ལུས་ཕྱོགས་ན་བཞུགས་པ་ཡི། །སངས་རྒྱས་རྣམས་ནི་བདག་ལ་དགོངས། །འདིར་བདག་ཆེ་གེ་རྡོ་རྗེ་ཡིས། །དཀྱིལ་འཁོར་དུ་ནི་འཇུག་པར་བགྱི། །སངས་རྒྱས་ལ་སོགས་ཀུན་བྱོན་འཚལ། །དངོས་གྲུབ་འདིར་ནི་ཡང་དག་སྩོལ། །ཞེས་པས་རྫོགས་པའི་སངས་རྒྱས་ལ་སོགས་པ་སྙན་གསན་དབབ་ཅིང་མཆོད་ལ་སླར་ཡང་མཉམ་པར་གཞག་པར་བྱའོ། །དེའི་རྗེས་སུ་སློབ་མ་བཞི་ཤར་ལ་སོགས་པའི་ཕྱོགས་སུ་གནས་ཤིང་ཇི་རིགས་པར་རྣམ་པར་སྣང་མཛད་ལ་སོགས་པའི་རྣལ་འབྱོར་དང་ལྡན་པས་འཁོར་ལོ་ལ་སོགས་པ་དང་དྲིལ་བུ་འཛིན་པ་འམ། སློབ་མ་གཅིག་གིས་ཀྱང་རིམ་པ་བཞིན་དེ་དང་ངེར་སོང་བས། །དེ་བཞིན་གཤེགས་པ་ཀུན་ཞི་བ། །དེ་བཞིན་གཤེགས་པ་ཀུན་གྱི་གནས། །ཆོས་ཀུན་བདག་མེད་པ་ཡི་མཆོག །དཀྱིལ་འཁོར་དམ་པ་བསྟན་དུ་གསོལ། །མཚན་ཉིད་ཐམས་ཅད་ཡང་དག་རྫོགས། །མཚན་ཉིད་མིན་པ་ཐམས་ཅད་སྤངས། །ཀུན་དུ་བཟང་པོ་སྐུ་ཡི་མཆོག །དཀྱིལ་འཁོར་དམ་པ་བསྟན་དུ་གསོལ། །ཞི་བའི་ཆོས་མཆོག་ལས་བྱུང་བ། །ཡེ་ཤེས་སྤྱོད་པ་རྣམ་སྤྱོད་མཛད། །ཀུན་དུ་བཟང་པོ་གསུང་གི་མཆོག །དཀྱིལ་འཁོར་དམ་པ་བཤད་དུ་གསོལ། །སེམས་ཅན་ཀུན་གྱི་སེམས་ཆེན་པོ། །རང་བཞིན་དག་ཅིང་དྲི་མ་མེད། །ཀུན་བཟང་ཐུགས་མཆོག་ཁ་ལོ་སྒྱུར། །དཀྱིལ་འཁོར་དམ་པ་བཤད་དུ་གསོལ། །ཞེས་པའི་ཚིགས་སུ་བཅད་པ་བཞི་པོས་སོ་སོ་ནས་བདག་ཉིད་ལ་གསོལ་བ་འདེབས་སུ་གཞུག་པར་བྱའོ། །དངོས་སུ་གསོལ་བ་འདེབས་པ་པོ་མེད་ན་བསམ་གཏན་གྱིས་ཀྱང་དེ་ལྟར་བྱའོ་ཞེས་པ་མན་ངག་གོ།
དེ་བཞིན་དུ་ཕྱོགས་བྲལ་རྣམས་ན་གནས་པའི་རྣལ་འབྱོར་མ་བཞི་པོས་ཀྱང་རྒྱུད་ཇི་ལྟ་བ་བཞིན་དུ་བསྐུལ་བར་བྱ་བ་སྟེ། བཞེངས་པའི་ཆེད་དུ། རྡོ་རྗེའི་གླུ་རྣམས་ཀྱིས་ཡང་དག་པར་བསྐུལ་བར་བྱའོ། །དེ་ནས་དཀྱིལ་འཁོར་གྱི་འཁོར་ལོ་སྤྲོ་བ་ལ་སོགས་པས་བསྒོམས་པའི་དཀྱིལ་འཁོར་རྡོ་རྗེ་ཁུ་ཚུར་གྱི་མཛུབ་མོ་བརྐྱང་ལ་རྩེ་མོ་སྦྱོར་བ་འོག་ཏུ་ཕྱོགས་པས་སྤྱི་བོར་གསུང་ཞིང་ཧཱུཾ་བཛྲོད་ཏིཥྛ་ཞེས་པས་ནམ་མཁའ་ལ་གདེག་པར་བྱའོ། །སྐྱིལ་ཀྲུང་བཤིག་ནས་ལངས་ཏེ་ཁ་ཤར་དུ་ཕྱོགས་པས་མཉམ་པའི་རྐང་སྟབས་བྱས་ལ་མགོ་བོར་ཐལ་མོ་སྦྱར་བས་དེ་བཞིན་གཤེགས་པ་ཐམས་ཅད་ལ་ཕྱག་བྱ་ཞིང༌། སེམས་ཅན་མ་རིག་པའི་མུན་པར་སོང་ཞིང་བདུད་ཀྱིས་བྱིན་གྱིས་བརླབས་པ་རྣམས་ལ་མངོན་པར་བལྟས་ལ་བདུད་བསལ་བར་བྱ་བའི་ཕྱིར། སྐད་ཅིག་གིས་དཀྱིལ་འཁོར་གྱི་དབང་ཕྱུག་གི་སྐུ་ཁྲོ་བོའི་ཆ་བྱད་ཅན་སྨིན་མ་བསྙེར་ཞིང་མཆི་བ་གཙིགས་པ་ཤིན་ཏུ་ཁྲོས་པས་གཡོ་བ་ལ་སོགས་པ་དང་ལྡན་པ་སྟེ། གཡོན་པའི་མིག་ནི་ཊ་ཡི་ཡི་གེས་ཟླ་བར་བྱ། །གཡས་པའི་མིག་ནི་མ་ཡི་ཡི་གེས་ཉི་མར་གནས། །ཞབས་ཀྱི་རྡོ་རྗེའི་འོད་ཟེར་དྲ་བ་འཕྲོས་པ་ཡིས། །བྲང་འགྲོའི་དབང་པོ་སོགས་དང་བདུད་ཀྱི་ཚོགས་རྣམས་བསྲེག །དེ་ལྟར་བདུད་ལས་རྣམ་བལྟས་ནས། །གང་གང་བགེགས་ཀྱི་དཀྱིལ་འཁོར་དང༌། །གདུག་པ་ཅན་སོགས་བསྐྲད་པར་བྱ། །འབར་བའི་ཧཱུཾ་ཡིག་ལས་བྱུང་བའི། །རྡོ་རྗེ་རྐང་པའི་འོག་ཏུ་འང་གཞག །རྡོ་རྗེ་དྲིལ་བུ་གཟུང་བྱ་སྟེ། །གཡས་པས་རྡོ་རྗེ་ཡང་དག་ལྡན། །བློ་ལྡན་གྱིས་ནི་ཕྱོགས་སུ་བལྟ། །མ་རུངས་སེམས་ཅན་དོན་བརྩོན་པས། །དེར་གནས་གང་ཞིག་གདུག་ཅན་དང༌། །བདུད་དང་བགེགས་དང་ལོག་པར་འདྲེན། །དེ་རྣམས་བསྐྲད་པའི་དོན་དུ་ནི། །ང་རྒྱལ་ངེས་པར་བསྐྱེད་པར་བྱ། །ཨ་ཧཾ་མེ་ག །སྭ་ཡཾ་བཛྲི། བཛྲི་སཏྭ་སྨྱ་ཧཾ་སྭ་ཡཾ། ཨ་ཧཾ་བུ་དྡྷོ། མ་ཧཱ་རཱ་ཛཱ། ཨ་ཧཾ་བཛྲཱི། མ་ཧཱ་བ་ལ། ཨ་ཧཾ་ཡོ་གཱི་ཤྭ་ར་རཱ་ཛཱཿ། བཛྲ་པཱ་ཎིར་ཨ་ཧཾ་དྲྀཾ་དྷཾ། ཞེས་བརྗོད་ཅིང་ང་རྒྱལ་དང་བཅས་པའི་ཚུལ་བྱའོ། །དེ་ནས་འཁོར་ལོ་ལྟར་བསྐོར་ཞིང་འདི་བརྗོད་པར་བྱ་སྟེ། གང་སུ་དག་ལྷ་དང་ལྷ་མ་ཡིན་དང་གནོད་སྦྱིན་དང་སྲིན་པོ་དང་ཡི་དགས་དང་ཤ་ཟ་དང་བརྗེད་བྱེད་དང་འབྱུང་པོ་དང་མཁའ་འགྲོ་མ་དང་གྲིབ་གནོན་དང་རྒན་པོ་དང་
རྒན་མོ་དང་གཡོག་དང་འཁོར་དང་ནམ་མཁའ་ལྡིང་དང་མི་འམ་ཅི་དང་རིག་སྔགས་གྲུབ་པ་ཁྱེད་རྣམས་དེངས་ཤིག །སའི་ཕྱོགས་འདིར་རྡོ་རྗེ་སློབ་དཔོན་ཆེ་གེ་མོ་ཞེས་བྱ་བས་སློབ་མ་ཆེ་གེ་མོའི་མངོན་པར་རྫོགས་པར་བྱ་བའི་དོན་དང་སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཐོབ་པར་བྱ་བའི་ཆེད་དུ་དཔལ་ཆེ་གེ་མོ་འབྱུང་བའི་དཀྱིལ་འཁོར་གྱི་རྒྱལ་པོ་བྲི་བར་བྱའོ། །དེའི་ཕྱིར་རྡོ་རྗེ་འཆང་ཆེན་པོའི་བཀའ་འདི་ཐོས་ནས་མྱུར་དུ་དེངས་ཤིག །གང་དག་མི་འགྲོ་བ་དེ་དག་གི་མགོ་བདག་རྡོ་རྗེ་ཧཱུཾ་མཛད་ཀྱི་རྡོ་རྗེ་རབ་ཏུ་འབར་ཞིང་གསལ་ལ་རབ་ཏུ་གསལ་བའི་ཡེ་ཤེས་ཀྱི་རྡོ་རྗེ་ཆེན་པོ་འདིས་རྣམ་པ་བརྒྱར་འགས་པར་བྱའོ་ཞེས་ལན་གསུམ་བརྗོད་ཅིང༌། ཁྲོ་བོ་མཐའ་ཡས་པ་སྤྲོས་པས་བགེགས་རྣམས་བསལ་བར་བྱའོ། །འདིར་བསྐོར་བའི་དུས་སུ་སྒོ་སོ་སོར་བདག་ཉིད་ཀྱི་གཡོན་དུ་གནས་པའི་སློབ་མའི་དྲིལ་བུའི་ནང་དུ་བདག་ཉིད་ཀྱི་རྡོ་རྗེ་རབ་ཏུ་གཞུག་པར་བྱ་ཞིང༌། དེའི་འཁོར་ལོ་ལ་སོགས་པ་ཡང་བདག་ཉིད་ཀྱི་དྲིལ་བུའོ། །དེ་ལྟར་ཡང༌། རབ་འབེབས་འཛིན་པའི་བྱ་བ་ལ། །དབུས་སུ་གཡོ་བས་རྣམ་བསྐོར་ཞིང༌། །མཆོད་སོགས་ཕྱི་ནས་མྱུར་བས་ནི། །ང་རྒྱལ་བྱས་ཏེ་དེ་ནས་བརྗོད། །བདུད་རྣམས་སྐྲག་པར་བྱས་ནས་དེས། །རྡོ་རྗེ་དྲིལ་བུས་དབབ་བྱ་ཞིང༌། །དབང་ལྡན་ཕྱོགས་ནས་འགྲོ་བ་ཡིས། །རྩེ་གཅིག་ལ་སོགས་བསྐོར་བར་བྱ། །རིམ་གྱིས་མ་རུངས་དཔའ་བོ་ཆེ། །བསྐལ་པའི་མེ་ལྟར་བཞེངས་བྱ་ཞིང༌། །དེ་ལས་བྱུང་བའི་འོད་ཚོགས་ཀྱིས། །བདུད་རྣམས་མཐའ་དག་བསྲེག་པར་བྱ། །ཞེས་པ་ལེགས་བསམ་རྣལ་འབྱོར་བདག །གར་བྱ་ཧཱུཾ་གི་སྒྲ་དབྱངས་བྱ། །སྒེག་པ་དཔའ་བ་མི་སྡུག་པ། །དྲག་ཤུལ་རྒོད་དང་འཇིགས་སུ་རུང༌། །སྙིང་རྗེ་རྔམ་པ་ཞི་བ་སྟེ། །གར་དགུའི་རོ་དང་ལྡན་པའོ། །ཞེས་པའི་གསུང་ནི་འདི་ཉིད་ལས། །རིམ་པ་བཞིན་དུ་གར་བྱའོ། །ཞེས་སོ། །དེ་ལྟར་ཐམས་ཅད་དུ་ཡང་སྒྲུབ་པ་པོ་ཕྱི་མ་རྣམས་ཀྱིས་ཀྱང་ཡོངས་སུ་བསྐོར་བར་བྱ་སྟེ། ཅི་ལྟར་ཞེ་ན། ཤར་དང་ལྷོ་དང་ནུབ་དང་བྱང་གི་ཕྱོགས་སུ་གནས་པའི་སློབ་དཔོན་རྣམས་ཀྱིས་ཀུན་དུ་བསྐྱོད་པ་དང་བཅས་པས་རིམ་པ་ཇི་ལྟ་བ་བཞིན་དུ་འདི་དག་བརྗོད་པར་བྱའོ། །ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་ཀུན་ཡང་དག་ཉོན། །ང་ནི་དཔལ་ལྡན་
རྡོ་རྗེ་འཆང༌། །བཀའ་ཡི་འཁོར་ལོ་སྦྱོར་བ་པོ། །འཁོར་ལོ་འབར་བའི་གཟུགས་ཀྱིས་ནི། །ལུས་གསུམ་ལས་བྱུང་དག་བྱས་ཏེ། །ཁ་ཅིག་གལ་ཏེ་བདག་ལས་འདས། །འདིར་ནི་འཇིག་འགྱུར་གཞན་དུ་མིན། །གང་སུ་ལུས་སྲུལ་པོ་རྣམས་དང༌། །ཆེན་པོའི་བགེགས་རྣམས་གཞན་དུ་དེངས། །བདེ་ཆེན་ཡེ་ཤེས་ཡང་དག་བྱུང༌། །རྡོ་རྗེ་སེམས་དཔའ་རང་བཞིན་སྐྱེས། །ང་ནི་དཔལ་ལྡན་སྙིང་རྗེའི་སྟོབས། །བཀའ་ཡི་འཁོར་ལོ་སྦྱོར་བ་པོ། །རིན་ཆེན་འབར་བའི་གཟུགས་ཀྱིས་ནི། །ལུས་གསུམ་ལས་བྱུང་དག་བྱ་སྟེ། །གལ་ཏེ་ཁ་ཅིག་བདག་ལས་འདའ། །འདིར་ནི་འཇིག་འགྱུར་གཞན་དུ་མིན། །གང་སུ་གནས་སུ་གནས་པ་ཡི། །ཀླུ་དང་གནོད་སྦྱིན་ལ་སོགས་དང༌། །དྲི་ཟ་འབྱུང་པོ་འབྱུང་མོ་དང༌། །མཁའ་འགྲོ་ཁྱེད་རྣམས་གཞན་དུ་དེངས། །སེམས་ཅན་དོན་དུ་བྱ་བ་བརྩམ། །མྱུར་བ་ཉིད་དུ་འགྲོ་བར་བགྱི། །ལུས་ངག་སེམས་ལ་གནས་པ་ཡི། །བགེགས་ཀྱི་ཚོགས་ཀུན་ཡང་དག་ཉོན། །དེ་ནི་དཔལ་ལྡན་རྡོ་རྗེ་འཆང༌། །བཀའ་ཡི་འཁོར་ལོ་སྦྱོར་བ་པོ། །པདྨ་འབར་བའི་གཟུགས་ཀྱིས་ནི། །ལུས་གསུམ་ལས་བྱུང་དག་བྱས་ཏེ། །གལ་ཏེ་ཁ་ཅིག་བདག་ལས་འདའ། །འདིར་ནི་འཇིག་འགྱུར་གཞན་དུ་མིན། །གང་སུ་དག་ལྷ་དང་ལྷ་མ་ཡིན་དང༌། ཀླུ་དང་གནོད་སྦྱིན་དང༌། ལྟོ་འཕྱེ་ཆེན་པོ་དང༌། བརྗེད་བྱེད་དང༌། འབྱུང་པོ་དང༌། འབྱུང་མོ་དང༌། ཤ་ཟ་དང༌། གསང་བ་དང༌། དྲི་ཟ་དང༌། མི་འམ་ཅི་དང༌། གྲིབ་གནོན་དང༌། ལུས་སྲུལ་པོ་དང༌། གཡོག་དང་རྒན་པོ་དང་རྒན་མོ་ལ་སོགས་པ་ཁྱེད་རྣམས་དེངས་ཤིག །གཞན་ཡང་གང་སུ་དག་སའི་གཞི་འདིར་གནས་པ་ཁྱེད་རྣམས་ཉོན་ཅིག །བདག་སློབ་དཔོན་ཆེ་གེ་མོ་ཞེས་བྱ་བས་ཆེ་གེ་མོའི་མངོན་པར་རྫོགས་པར་བྱང་ཆུབ་ཡོངས་སུ་རྫོགས་པའི་དོན་དུ་ཆེ་གེ་མོ་ཞེས་བྱ་བའི་དཀྱིལ་འཁོར་དུ་འཇུག་པར་བགྱིའོ། །དེའི་ཕྱིར་བདག་གི་བཀའ་འདི་ཐོས་ནས་མྱུར་བ་ཉིད་དུ་དེངས་ཤིག །གང་དག་མི་འགྲོ་བ་དེ་དག་གི་མགོ་བདག་ཕྱག་ན་རྡོ་རྗེའི་སྣ་ཚོགས་རྡོ་རྗེ་འམ་རལ་གྲི་འོད་ཟེར་བརྒྱ་ཕྲག་འབར་བས་རྣམ་པ་བརྒྱར་འགས་པར་བྱའོ། །ཞེས་ལན་གསུམ་ང་རྒྱལ་དང་བཅས་པས་ཐམས་ཅད་དུ་བརྗོད་པར་བྱའོ། །དེ་ལ་དབང་ལྡན་གྱི་ཕྱོགས་ནས་བརྩམས་ཏེ་དང་པོར་
རྡོ་རྗེའི་རྐང་སྟབས་རྣམ་པ་བཞི་རབ་ཏུ་སྦྱར་བར་བྱའོ། །ཧཱུཾ་ཡིག་ལས་རྡོ་རྗེ་རྩེ་གཅིག་པ་རྐང་པའི་མཐིལ་དུ་བསམས་ནས། ས་ལ་ཡང་རྣམ་པ་བྱ་ཞིང་ཧཱུཾ་ཡིག་གི་སྔགས་བརྗོད་དེ་རྡོ་རྗེ་དང་རྡོ་རྗེ་དྲིལ་བུ་དཀུར་གནས་པའི་གར་རམ་པད་ཀོར་ལ་སོགས་པ་རྣམས་ཀྱིས་བསྐོར་བར་བྱའོ། །དེའི་རྗེས་སུ་རྩེ་གསུམ་པ་འང་དེ་བཞིན་ནོ། །དེའི་རྗེས་ནས་དེ་བཞིན་དུ་རྩེ་ལྔ་པའོ། །དེའི་རྗེས་ནས་དེ་བཞིན་དུ་སྣ་ཚོགས་རྡོ་རྗེ་སྟེ་འོན་ཀྱང་ཕྱིར་ལོག་ནས་བསྐོར་ཞིང་རྣམ་པ་བྱའོ། །བཞི་པོ་འདི་རྣམས་རྡོ་རྗེས་མཚན་པ་དང་རྡོ་རྗེའི་རྣམ་པ་བྱེད་པས་རྡོ་རྗེའི་རྐང་སྟབས་ཏེ། སླར་ཡང་སོ་སོར་གཡས་བརྐྱང་ལ་སོགས་པ་བྱེད་པ་ན་ལན་རེ་བྱའོ། །དེ་ལ་གཡོན་པའི་བྱིན་པ་བསྐུམ་ནས་རྐང་པ་གཡས་པ་མཐོ་ལྔའི་བར་དུ་འགྱིང་བ་དང་བཅས་པས་བརྐྱང་སྟེ་གནས་པར་བྱའོ་ཞེས་པ་ནི། གཡས་བརྐྱང་གི་གནས་པའོ། །གཡས་པའི་བྱིན་པ་བསྐུམ་ནས་གཡོན་པ་དེ་བཞིན་ནོ་ཞེས་པ་ནི་གཡོན་བརྐྱང་ངོ། །སོར་ཉི་ཤུ་རྩ་དྲུག་གི་རྒྱར་རྐང་པའི་སོར་མོ་ལོགས་སུ་བསྟན་ཅིང་པུས་མོ་གཉིས་དྲང་པོར་བྱས་པ་ནི་ས་གའི་སྟབས་ཞེས་བྱ་བའི་གནས་པའོ། །ས་གའི་སྟབས་ཉིད་ཁྲུ་དོའི་བར་དུ་ངང་པའི་གཤོག་པ་ལྟར་བྱས་པའི་ཟླུམ་པོའི་རྐང་སྟབས་སོ། །རྐང་པ་གཉིས་ཀྱི་སོར་མོ་ཕན་ཚུན་སྦྱར་བ་ནི་མཉམ་པའི་རྐང་སྟབས་སོ། །ལྔ་པོ་འདི་རྣམས་བྱེད་པ་ན་སོ་སོར་བསྐོར་བ་ལན་རེ་རྫོགས་པར་བྱའོ། །རྟིང་པ་གཉིས་ཀྱི་བར་དུ་སོར་མོ་བཞི་བྱས་ཤིང་རྐང་པ་གཡོན་དྲང་པོར་བྱས་ཏེ་གཡས་པ་མཐོ་གང་གི་བར་དུ་འགྱིང་པ་དང་བཅས་པས་ལོགས་སུ་གནས་ནས་ཡངས་པ་ཅན་གྱི་སྒྲོལ་མའི་རྐང་སྟབས་ལྟར་བྱས་པ་ནི་སྐྱེས་པའི་རྐང་སྟབས་སོ། །དེ་ཁོ་ན་བཞིན་དུ་གཡས་པ་བསྲང་ཞིང་གཡོན་པ་ལོགས་སུ་གནས་པ་ནི་སྐྱེས་པའི་རྐང་སྟབས་ཀྱི་ཟླའོ། །མཉམ་པའི་རྐང་སྟབས་བྱས་ཏེ་མཐོ་གསུམ་གྱི་བར་དུ་རྐང་པ་གཡས་པ་གཡོན་པའི་མདུན་དུ་གཟུང་བ་ནི་རྣམ་པར་གཙིགས་པའི་རྐང་སྟབས་སོ། །དེ་ཁོ་ན་བཞིན་དུ་གཡས་པ་དྲང་པོར་བྱས་ཏེ་གཡོན་པ་གཡས་པའི་མདུན་དུ་མཐོ་གསུམ་གྱི་བར་དུ་གཟུང་བ་ནི་རྣམ་པར་གཙིགས་པའི་རྐང་སྟབས་ཀྱི་ཟླའོ། །སླད་ནས་ཀྱང་རྐང་པའི་མཐིལ་གཉིས་ཁ་སྦྱར་བ་ནི་ཁ་སྦྱོར་གྱི་རྐང་སྟབས་སོ། །རྐང་པ་གཡས་པས་རྐང་
པ་གཡོན་པའི་བོལ་གནན་པ་ནི་རུས་སྦལ་གྱི་རྐང་སྟབས་སོ། །རྐང་པ་གཅིག་བཏེག་སྟེ་རྐང་པ་གཅིག་གིས་བསྐོར་བ་ནི་རྐང་གཅིག་གི་རྐང་སྟབས་སོ། །རྐང་སྟབས་བདུན་པོ་འདི་ནི་གནས་ངེས་པ་མེད་པར་བྱ་སྟེ་བུང་བའི་དྲ་བ་ཡང་ངོ༌། །རང་རང་གི་གཡས་པ་དང་གཡོན་པ་དག་གི་ལག་པའི་སོར་མོ་དང་བཅས་པ་ཀུན་ནས་གཡོ་བ་ནི་བུང་བའི་རྐང་སྟབས་སོ། །གཡས་བརྐྱང་ལ་སོགས་པ་བཅུ་གསུམ་པོ་འདི་དག་བྱེད་པ་ན། ཇི་ལྟར་རིགས་པར་རྒྱ་མཚོའི་རླབས་དང་རི་བོ་བསྐྱོད་པ་དང༌། རོལ་བའི་བསྐྱོད་པ་དང༌། ཁྲོ་བོའི་བསྐྱོད་པ་སྟེ་གོམ་པ་བགྲོད་པའི་ཚུལ་བཞི་དང༌། ཀུན་དུ་བསྐྱོད་པ་དགུ་དང༌། རྡོ་རྗེ་བསྒྲེང་བ་ལ་སོགས་དྲུག་དང༌། རལ་གྲི་ལ་སོགས་པའི་ཚུལ་ཉི་ཤུ་རྩ་བརྒྱད་བྱའོ། །དེའི་རྗེས་སུ་གཡས་བརྐྱང་གིས་གར་བྱས་ལ། ཁ་ལྷོར་མངོན་པར་ཕྱོགས་ཏེ་གཡོན་པའི་སྡིགས་མཛུབ་སྙིང་གར་བཟུང་ནས་གཞོགས་གཡོན་དུ་ས་ལ་འགྱེལ་བར་བྱ་ཞིང་ནམ་མཁར་བལྟས་ལ་རྡོ་རྗེ་དང་བཅས་པའི་ལག་པ་གཡས་པས་བདུད་ཐམས་ཅད་འཕང་བར་བྱའོ་ཞེས་པ། སངས་རྒྱས་ཀྱི་སྟོབས་ཀྱི་ཀུན་བསྐྱོད་དོ། །པད་ཀོར་སྔོན་དུ་འགྲོ་བའི་གར་བྱས་ལ་རྡོ་རྗེ་བསླང་ནས་གཡོན་པའི་སྡིགས་མཛུབ་ཀྱིས་བསྡིགས་ཤིང་ལག་པ་གཡས་པ་རྡོ་རྗེ་དང་བཅས་པའི་དབྱུག་པའི་ཕྱག་རྒྱས་འཕང་བར་བྱའོ། །མཉམ་པའི་རྐང་སྟབས་ཀྱིས་གནས་ཤིང་འགྱིང་བ་དང་བཅས་པའི་རྡོ་རྗེའི་རྐང་སྟབས་ཀྱིས་བསྐུམ་ལ་རྐང་པ་གཡས་པ་མཐོ་ཕྱེད་དང་གསུམ་དུ་འཕངས་ནས་གཡོན་པ་བརྟན་པར་བྱས་ཏེ་རྐང་པ་དག་གཤོག་པ་ལྟར་གནས་པར་བྱའོ། །དེ་ནས་པུས་མོ་གཡས་པ་བསྐུམ་ལ་དབྱུག་པའི་ཕྱག་རྒྱས་འཕང་བར་བྱའོ། །གཡོན་པའི་སྡིགས་མཛུབ་ཀྱིས་བསྡིགས་ནས་ལྟོ་བ་སྨད་ལ་མིག་གཡོན་པ་བཙུམས་ཏེ་གདོང་བསྐོར་ཞིང་དཀྱིལ་འཁོར་ལ་བལྟས་ནས་ཁྲོ་གཉེར་བྱའོ་ཞེས་པ། འདར་བར་བྱེད་པའི་ཀུན་དུ་བསྐྱོད་པ་སྟེ། དཀུ་གཡས་པའི་ཆར་བསྡུའོ། །དེ་ཁོ་ན་བཞིན་དུ་རྡོ་རྗེ་བསླང་ནས་མཉམ་པའི་རྐང་སྟབས་ཀྱིས་གནས་ཏེ། རྐང་པ་མཉམ་པར་མཐོ་ཕྱེད་དང་གསུམ་དུ་བརྐྱང་ལ་རྐང་པ་དག་ཟུར་གསུམ་དུ་བྱ་ཞིང༌། མདུན་དུ་ལག་པ་བརྡབས་ནས་དབྱུག་པའི་ཕྱག་རྒྱ་ཕྱིར་བས་འཕངས་ལ་སྡིགས་མཛུབ་ནུ་མ་
གཡོན་པར་གཟུང་བར་བྱའོ་ཞེས་པ། སྐྲག་པར་བྱེད་བ་ཀུན་བསྐྱོད་དེ་དཀུ་གཡོན་པའི་ཕྱོགས་སུ་བསྡུའོ། །དེ་བཞིན་དུ་རྡོ་རྗེ་བསླང་བའི་ཕྱག་རྒྱ་བཅས་ནས་མཉམ་པའི་རྐང་སྟབས་ཀྱིས་གནས་ཏེ་དབྱུག་པའི་ཕྱག་རྒྱ་ཕྱར་ལ་མིག་གཡས་པ་བཙུམས་ཤིང་གཡོན་པ་ནུ་མར་སྡིགས་མཛུབ་ལ་བལྟའོ། །གཡོན་པ་རྡོ་རྗེའི་རྐང་སྟབས་བྱས་ནས་པུས་མོ་གཡས་པ་བསྐུམ་ལ་རྐང་པ་བཏེག་སྟེ་ཁྲོ་བ་དང་བཅས་པས་ཅིག་ཅར་གཡོན་པས་འཁོར་ལོ་ལྟར་བསྐོར་བར་བྱའོ། །སླར་ཡང་རྐང་པ་དེ་བསྐུམ་ལ་གཡོན་བརྐྱང་ཕྱེད་མར་བཞག་སྟེ་རྐང་པ་དག་གཤོག་པ་ལྟར་བརྟན་པར་གནས་པར་བྱའོ་ཞེས་པ་ཡང་དག་པར་དཀྲུགས་པའི་ཀུན་དུ་བསྐྱོད་པ་སྟེ་རྡོ་རྗེ་གར་གྱི་སྦྱོར་བས་དཀུ་གཡས་པའི་ཆར་བལྟའོ། །དེ་བཞིན་དུ་རྡོ་རྗེ་བསླང་བར་བྱས་ནས་མཉམ་པའི་རྐང་སྟབས་ཀྱིས་གནས་ཏེ་དབྱུག་པའི་ཕྱག་རྒྱ་ཕྱིར་ལ་མིག་གཡོན་པས་ནུ་མར་སྡིགས་མཛུབ་ལ་བལྟའོ། །པུས་མོ་གཡོན་པ་བསྐུམ་སྟེ་གཡས་པ་རྡོ་རྗེའི་རྐང་སྟབས་བྱས་ནས་གཡོན་དུ་འཕངས་ཤིང་ཅིག་ཅར་ཉིད་དུ་གཡས་སུ་བསྐོར་བར་བྱའོ། །དེ་ནས་བཞག་སྟེ་ལྟུང་བའི་རྐང་པ་བསྐུམ་ནས་གནས་པ་ཟུར་གསུམ་དུ་བྱས་པ་གཡས་པ་གཤོག་པ་ལྟར་གནས་པར་བྱ་ཞིང་གཡས་བརྐྱང་དུ་གཞག་པར་བྱའོ་ཞེས་པ་རྣམ་པར་རྨོངས་པའི་ཀུན་དུ་བསྐྱོད་པ་སྟེ་གར་བྱས་ལ་དཀུ་གཡོན་པའི་ཕྱོགས་སུ་བསྡུའོ། །འདི་ཉིད་རྐང་པ་གཡོན་པས་ཡོངས་སུ་བསྐོར་ནས་སླར་ཡང་མདུན་དུ་ལག་པ་བརྡབ་པར་བྱ་སྟེ། ཡང་དབྱུག་པ་ལྟར་ཕྱར་བར་བྱའོ་ཞེས་པ་ཁྱད་པར་མྱུར་བའི་ཀུན་དུ་བསྐྱོད་པའོ། །རྣམ་པར་རྨོངས་པ་ཀུན་དུ་བསྐྱོད་པ་དེ་བཞིན་དུ་རྣམ་པར་བཟློག་པའི་ཀུན་དུ་བསྐྱོད་པ་སྟེ། འོན་ཀྱང་ཁ་གདངས་ནས་ལྕེ་དྲིལ་བུ་འཁྲོལ་བའི་རྣམ་པར་གནས་པས་འཁོར་ལོ་བཞིན་དུ་བསྐོར་བར་བྱའོ། །དེ་བཞིན་དུ་རྡོ་རྗེ་བསླང་ནས་རྐང་པ་གཉིས་མཐོ་གང་ཙམ་གྱི་བར་དུ་བྱས་ཏེ་གྲུ་གསུམ་བྱ་ཞིང་གུས་མོ་གཡས་པ་ཅུང་ཟད་བསྐུམ་ལ་པུས་མོ་གཡོན་པ་སྨད་པར་བྱའོ། །ནུ་མ་ལྟོ་བ་གཡོན་གྱི་ཆར་སྨད་དེ་ནུ་མར་སྡིགས་མཛུབ་བྱ་ཞིང་དཔུང་པའི་དབྱུག་བ་རྣམ་པར་འཕངས་ལ་མཐར་དབྱུག་པ་ལ་བལྟས་ནས་བརྡབ་ཅིང་གདོང་བསྐོར་བར་བྱའོ། །ཀི་ལཱི་ཀི་ལི་ཀུན་དུ་བསྐྱོད་པ་
སྟེ་དཀུ་གཡས་པའི་ཆར་བསྡུའོ། །དེ་ཉིད་ཀི་ལཱི་ཀི་ལ་ཆེན་པོ་སྟེ་གང་གི་ཚེ་དབྱུག་པ་གནས་པ་ལ་བལྟ་བ་ན་དབྱུག་པ་ཕྲག་པ་གཡས་པའི་ཕྱོགས་ནས་རང་གི་རྒྱབ་ཏུ་དགྱེད་པར་བྱ་ཞིང་མིག་གཡོན་པ་བཙུམས་ཏེ་ཁྲོས་པས་རྐང་པ་རྣམ་པར་བསྐྱོད་པར་བྱའོ། །བསྡུ་མ་ནི་སྔ་མ་བཞིན་ནོ། །གཡོན་པ་ལྟེ་བར་གནས་ནས་གཡས་པས་རྡོ་རྗེ་སྙིང་གར་བསྒྲེང་བ་ནི་རྡོ་རྗེ་བསྒྲེང་བའོ། གཡོན་པའི་རྡོ་རྗེ་ཁུ་ཚུར་གྱིས་མཛུབ་མོ་བསླང་བས་སྙིང་གར་སྡིགས་མཛུབ་བྱས་ཏེ་གཡས་པའི་རྡོ་རྗེ་ཁུ་ཚུར་གྱིས་བཟུང་བའི་རྡོ་རྗེ་རྡེག་པའི་ཚུལ་བྱ་བ་ནི་རྡོ་རྗེ་འཕེན་པའོ། །སོར་མོ་བཞིའི་རྩེ་མོ་ཡང་དག་པར་བསྐུམ་པས་མཐེ་བོང་མནན་པ་ནི་རྡོ་རྗེ་ཁུ་ཚུར་རོ། །ཁ་ལས་སྟེང་དང་འོག་ཏུ་ལག་པ་བརྐྱང་བའི་རྣམ་འགྱུར་དང་སྣ་བུག་དང་འགྲམ་པ་དང་མིག་རྣམས་ཀྱིས་བསྡིགས་པའི་ཚུལ་བྱས་པ་ནི་རྡོ་རྗེ་འཇིགས་བྱེད་དོ། །ལག་པ་གཡས་པའི་རྡོ་རྗེ་གཡས་སྐོར་དུ་ཡོངས་སུ་བསྐོར་ནས་རིམ་གྱིས་རྐང་པ་གཉིས་ས་ལ་འཇོག་པ་ནི་རྡོ་རྗེ་འཁྱིལ་པའོ། །ལག་པ་གཡོན་པ་བརྐྱང་ལ་ལག་པ་དེའི་རྩ་བར་རྡོ་རྗེ་དང་བཅས་པའི་ལག་པ་གཡས་པའི་རྩ་བཟུང་ནས་གར་བྱེད་པ་ནི་རྡོ་རྗེའི་གར་རོ། །རྡོ་རྗེའི་གར་སྔོན་དུ་འགྲོ་བས་དཀུ་གཉིས་སུ་བཙུགས་ཏེ་མགོ་གཡོན་དུ་སྨད་པ་ནི་བུད་མེད་སྒྱུ་མ་བྱེད་པའོ། །དཀུར་བཙུགས་པ་ནི་རྡོ་རྗེ་སྒེག་མོའི་ཕྱག་རྒྱའོ། །གཡོན་པའི་རྡོ་རྗེ་ཁུ་ཚུར་གྱི་སྦུབས་ལས་གཡས་པའི་གོང་མཛུབ་ཕྱུང་ནས་རལ་གྲིའི་ཚུལ་དུ་གཟུར་བ་ནི་རལ་གྲིའི་ཚུལ་ལོ། །སྙིང་གར་སྡིགས་མཛུབ་བྱས་ཏེ་རྡོ་རྗེ་རྩེ་གསུམ་པ་ཀུན་དུ་བསྐྱོད་པའི་ཚུལ་དུ་བྱས་པ་ནི་རྡོ་རྗེའི་ཚུལ་ལོ། །རྡོ་རྗེ་བསྡམས་པས་གཟུང་བའི་གཏུན་ཤིང་གིས་བགེགས་རྡུང་བར་བྱེད་པ་ནི་གཏུན་ཤིང་གི་ཚུལ་ལོ། །ཐལ་མོ་སྦྱར་བ་བཅིངས་ནས་སོར་མོའི་རྩེ་མོ་ཕན་ཚུན་སྦྱར་བ་ནི་རྡོ་རྗེའི་ཐལ་མོའོ། །དེ་བཞིན་དུ་རྩ་བར་ཡང་དག་པར་བསྡམས་པ་ནི་རྡོ་རྗེ་བསྡམས་པའོ། །སྙིང་གར་རྡོ་རྗེ་ཁུ་ཚུར་གཉིས་ཀྱི་མཐེ་ཆུང་དང་མཛུབ་མོ་དག་རྡོ་རྗེ་བསྡམས་པ་བྱས་ན་འཁོར་ལོ་བཞིན་བསྐོར་བ་ནི་འཁོར་ལོའི་ཚུལ་ལོ། །གཡས་པའི་རྡོ་རྗེ་ཁུ་ཚུར་གྱི་མཛུབ་མོ་དང་གུང་མོ་དག་འགྱིང་བ་དང་བཅས་པས་བརྐྱང་ནས་སྟེང་དུ་བཟུང་བ་ནི་བ་དན་
གྱི་ཚུལ་ལོ། །ཐལ་མོ་སྦྱར་བ་པདྨ་བཞིན་དུ་ཁ་ཕྱེ་བ་ནི་པདྨའི་ཚུལ་ལོ། །ཁུ་ཚུར་གཡས་པའི་མཐེ་བོང་ནང་དུ་བཅུག་སྟེ་མཛུབ་མོ་བརྐྱང་ནས་དཔུང་པའི་སྟེང་དུ་དབྱུག་པ་ལྟར་བསྒྲེང་བ་ནི་དབྱུག་པའི་ཚུལ་ལོ། །གཡས་པའི་མཛུབ་མོ་འགུགས་པའི་ཚུལ་གྱིས་གཟུང་བ་ནི་ལྕགས་ཀྱུའི་ཚུལ་ལོ། །ལག་པ་གཡས་པའི་སོར་མོ་རྣམས་བརྐྱང་ལ་བསྐུམ་པ་ནི་གདེངས་ཀའི་ཚུལ་ལོ། །ལག་པ་གཡོན་པ་གཡས་པས་རྣ་བའི་བར་དུ་རྒྱུད་དྲང་ཞིང་རླུང་གཟུང་བར་བྱ་བ་ནི་གཞུའི་ཚུལ་ལོ། །གཡས་པའི་མཛུབ་མོ་དང་གུང་མོ་དག་གི་རྒྱབ་ནས་མདའ་དྲང་བར་བྱ་བ་ནི་མདའ་དྲང་བའི་ཚུལ་ལོ། །དེ་དག་ཉིད་ཀྱིས་མདའ་འཕེན་པའི་ཚུལ་བྱ་བ་ན་མདའ་འཕེན་པའི་ཚུལ་ལོ། །རྡོ་རྗེ་གཉིས་བཅིངས་ཏེ་བསྐུམ་ལ་མདུན་དུ་ངེས་པར་བསྒྲིལ་བར་བྱའོ། །བསྒྲིལ་ཞིང་ངེས་པར་བསྒྲིལ་བ་ནི་ལྷ་དགུག་པའི་མཆོག་གོ་ཞེས་པ་ལ། བསྒྲིལ་ཞིང་ངེས་པར་བསྒྲིལ་བ་ནི་རྡོ་རྗེ་ངེས་པར་བསྒྲིལ་བའི་ཕྱག་རྒྱ་བཅིངས་ནས་རྡོ་རྗེ་ངེས་པར་བསྒྲིལ་བའོ། །རྡོ་རྗེ་ངེས་པར་བསྒྲིལ་བར་བྱས་པའི་འོག་ཏུ་རྡོ་རྗེ་ངེས་པར་བསྐོར་ནས་འགྱིང་བ་དང་བཅས་པས་སྟེང་དུ་རྡོ་རྗེ་གཡོ་བར་བྱའོ་ཞེས་པ་ནི་ཁ་ཅིག་གིའོ། །རང་གི་གདོང་འོག་ཏུ་ཕྱོགས་པས་ལག་པ་གཡོན་པ་དེའི་འོག་ཏུ་རབ་ཏུ་བརྐྱང་སྟེ། ལག་པ་གཡས་པ་རྒྱབ་ཀྱི་སྟེང་དུ་རབ་ཏུ་ཕྱར་བ་ནི་སེང་གེའི་རྐང་སྟབས་སོ། །ང་རྒྱལ་དང་བཅས་པས་ཀུན་དུ་བལྟ་བར་བྱ་ཞིང་འདི་ཉིད་ལྕེ་གཡོ་བ་དང་ལྡན་པ་ནི་སེང་གེ་གཡལ་འཛུམ་པའོ། །དཔུང་པ་གཡོན་པའི་རྒྱུད་ས་ལ་ཕབ་སྟེ་ལག་པ་གཡས་པས་འགྲམ་པར་ཐལ་ལྕག་རྡེག་པའི་ཚུ་བྱས་ནས་སྟེང་དུ་ང་རྒྱལ་གཟུང་བ་ནི་སེང་གེས་གནོན་པའོ། །འདི་གསུམ་ནི་རིག་པ་འཛིན་པའི་རྐང་སྟབས་ཀྱིས་བཅིང་བར་བྱའོ། །ཙོག་པུའི་འདུག་སྟངས་ཀྱིས་གནས་པས་ལག་པ་དང་འགྲམ་པར་བརྡེག་པའི་ཚུལ་བྱ་ཞིང་ལྕེ་ཡིས་ཀྱང་ནམ་མཁའ་ལྡིང་གི་ཕྱག་རྒྱ་བྱས་ལ་རྡོ་རྗེའི་ལྟ་བས་འོག་ཏུ་ཀླུ་ལ་མངོན་པར་བལྟས་ཏེ་དེས་བསྐྱོད་པ་གཅིག་གམ་གཉིས་བྱ་བ་ནི་ནམ་མཁའ་ལྡིང་གི་འདུག་སྟངས་སོ། །གཡོན་པའི་རྡོ་རྗེ་ཁུ་ཚུར་གྱིས་སྙིང་གར་སྡིགས་མཛུབ་བྱས་ཏེ་གཡས་པས་འདུར་རྡོ་བསྐོར་བའི་ཚུལ་བྱ་བ་ནི་འུར་རྡོའིའོ། །ལག་པ་གཡོན་པ་དཔུང་པར་གན་རྐྱལ་དུ་བཞག་ལ་གཡས་པ་
མཆོག་སྦྱིན་གྱི་ཚུལ་བྱས་པ་ནི་མཆོག་སྦྱིན་ནོ། །གཡོན་པའི་རྡོ་རྗེ་ཁུ་ཚུར་གྱིས་སྙིང་གར་སྡིགས་མཛུབ་བྱས་ཏེ་ལག་པ་གཡས་པས་གསོར་བ་སྔོན་དུ་འགྲོ་བས་མདུད་ཐུང་འཕེན་པའི་ཚུལ་བྱ་བ་ནི་མདུང་ཐུང་གི་ཚུལ་ལོ། །དེ་ཁོ་ན་བཞིན་དུ་འཕྲུལ་ཞིང་འཕེན་པའི་ཚུལ་བྱ་བ་ནི་འཕྲུལ་ཤིང་གི་ཚུལ་ལོ། །རྡོ་རྗེ་ཁུ་ཚུར་གཉིས་ཀྱིས་མདུང་གིས་འབིགས་པའི་ཚུལ་བྱ་བ་ནི་མདུང་གི་ཚུལ་ལོ། །ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པ་རྣམས་ཀྱིས་བྱང་ཆུབ་མཆོག་ལ་སོགས་པའི་ཕྱག་རྒྱ་བཅིངས་པས་སྟོང་པ་ཉིད་དང་མཚན་མ་མེད་པ་དང་སྨོན་པ་མེད་པ་པ་དང་མངོན་པར་འདུས་མ་བྱས་པ་སྟེ་རྣམ་པར་ཐར་བ་བཞིན་རྣམ་པར་དག་པའི་སྒོ་བཞིས་བྱིན་གྱིས་བརླབ་པར་བྱའོ། །ས་གཞི་ལ་རིག་པ་འཛིན་པའི་རྐང་སྟབས་ཀྱིས་ལྷུང་ནས་གཡོན་པ་དང་གཡས་པ་དག་གི་ལག་པས་ཀ་པཱ་ལ་ངང་རྡོ་རྗེ་འཛིན་པའི་ཚུལ་བྱ་བ་ནི་རྡོ་རྗེ་རིག་པ་འཛིན་པའོ། །དེ་ཁོ་ན་བཞིན་དུ་རིམ་གྱིས་ལག་བདག་གིས་རྡོ་རྗེའི་ཕྲེང་བ་འཛིན་པའི་ཚུལ་བྱ་བ་ནི་རྡོ་རྗེ་ཕྲེང་བ་འཛིན་པའོ། །རྐང་བ་གཡས་པས་ཏཱ་ཎྜ་བ་བྱས་ལ་རྐང་བ་གཡོན་པ་ཕྱིན་ཅི་ལོག་གི་སྟེང་དུ་དབུང་བ་གཡོན་པར་སླེབ་པར་བྱ་ཞིང་ལག་པ་གཉིས་ཀྱི་རྡོ་རྗེ་ཁུ་ཚུར་བཅིངས་ཏེ་མཐེའུ་ཆུང་གཉིས་ལྕགས་སྒྲོག་ལྟར་བྱས་ནས་མཛུབ་མོ་གཉིས་ཀྱི་རྩེ་མོ་ཕྱིན་ཅི་ལོག་ཏུ་བྱས་ནས་སྤྱི་བོར་གཟུང་བ་ནི་ཛ་ལནྡྷ་རའོ། །དེ་བཞིན་དུ་རྐང་པ་གཡོན་པས་བརྐྱང་ངོ༌། །སྟོད་པ་བྱེད་པའི་ཚུལ་གྱིས་ཐལ་མོ་སྦྱར་བ་སྙིང་གར་བཟུང་བ་ནི་ཕྱག་འཚལ་པའི་ཚུལ་ལོ། །དཔལ་ཀྱེ་རྡོ་རྗེ་ལ་སོགས་པ་རྣལ་འབྱོར་མའི་རྒྱུད་དུ་ནི་ཧཱུཾ་ཡིག་གི་སྔགས་བརྗོད་པ་ཉིད་ཀྱིས་བགེགས་ཐམས་ཅད་ཉེ་བར་ཞི་བར་འགྱུར་རོ་ཞེས་ཏེ། སྔགས་གཞན་གསུངས་པ་ནི་མེད་དོ། །དཔལ་འདུས་པ་ལ་སོགས་པ་རྣལ་འབྱོར་ཆེན་པོའི་རྒྱུད་དུ་ནི་ཉུང་བ་ལ་དགའ་བ་རྣམས་ལ་སོ་སོ་རེ་རེ་ཞིང་རྡོ་རྗེའི་རྐང་སྟབས་ཀྱི་སྔགས་རྣམས་གསུངས་པས་དེ་ཡང་འདིར་བརྗོད་པར་བྱའོ། །དེའི་ཕྱིར་གཉིས་ཀ་ཡང་བདག་གིས་བཤད་པར་བྱ་སྟེ་ཇི་ལྟར་མངོན་པར་བྲི་བར་བྱའོ། །འདི་ལྟ་སྟེ། ཨོཾ་ཨེ་ཀ་སཱུ་ཙི་ཀ་བཛྲ་པཱ་ད་མ་ཧཱ་བཛྲ་ཀྲོ་དྷ་བྷཉྗ་བྷཉྗ་སརྦ་དུཥྚ་སུ་རཱ་ན་ཧཱུཾ་ཕཊ། ཨོཾ་ཏྲི་སཱུ་ཙི་ཀ་བཛྲ་པཱ་ད་མ་ཧཱ་ཀྲོ་དྷ་བྷཉྫ་བྷཉྫ་སརྦ་དུཥྚ་སུ་རཱ་ན་ཧཱུཾ་ཕཊ། ཨོཾ་པཉྩ་
སཱུ་ཙི་ཀ་བཛྲ་པཱ་ད་བཛྲ་མ་ཧཱ་ཀྲོ་དྷ་བྷ་ཉྫ་བྷ་ཉྫ་སརྦ་དུ་ཥྚ་སུ་རཱ་ན་ཧཱུཾ་ཕཊ། ཨོཾ་བི་ཤྭ་སཱུ་ཙི་ཀ་པཱ་ད་བཛྲ་མ་ཧཱ་ཀྲོ་དྷ་ཀྲོ་དྷ་བྷཉྫ་བྟྙྫ་སརྦ་དུ་ཥྚ་སུ་རཱ་ན་ཧཱུཾ་ཕཊ། ཨོཾ་ཨཱ་ལཱི་ཌྷ་པཱ་ད་བཛྲ་མ་ཧཱ་ཀྲོ་དྷ་བི་གྷུ་རྞ་ཡ་བི་གྷུ་རྞ་ཡ་སརྦ་དུ་ཥྚ་དེ་བ་ཨཱ་དི་མཱ་རཱ་ན་ཧཱུཾ་ཕཊ། ཨོཾ་པྲ་ཏྱཱ་ལཱི་ཌྷ་པཱ་ད་བཛྲ་མ་ཧཱ་ཀྲོ་དྷ་བི་གྷུ་རྞ་ཡ་བི་གྷུ་རྞ་ཡ་སརྦ་དུ་ཥྚ་ཡ་མ་ཨཱ་དི་མཱ་རཱ་ན་ཧཱུཾ་ཕཊ། ཨོཾ་བི་ཤེ་ཥ་པཱ་ད་བཛྲ་མ་ཧཱ་ཀྲོ་དྷ་བི་གྷུ་རྞ་ཡ་བི་གྷུ་རྞ་ཡ་སརྦ་དུ་ཥྚ་ནཱ་གཱ་ན་ཧཱུཾ་ཕཊ། ཨོཾ་མེཎྜ་ལ་པཱ་ད་བཛྲ་མ་ཧཱ་ཀྲོ་དྷ་བི་གྷུ་རྞ་ཡ་བི་གྷུ་རྞ་ཡ་སརྦ་དུ་ཥྚ་ཡཀྵཱ་ན་ཧཱུཾ་ཕཊ། ཨོཾ་ས་མ་པཱ་ད་བཛྲ་མ་ཧཱ་ཀྲོ་དྷ་བི་གྷུ་རྞ་ཡ་བི་གྷུརྞ་ཡ་སརྦ་དུ་ཥྚ་ཨནྟ་རི་ཀྵཱ་མཱ་རཱ་ན་ཧཱུཾ་ཕཊ། ཨོཾ་ཛཱ་ཏ་པཱ་ད་བཛྲ་མ་ཧཱ་ཀྲོ་དྷ་ཨཱ་བེ་ཤ་ཡ་ཨཱ་བེ་ཤ་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་པྲ་ཏི་ཛཱ་ཏ་པཱ་ད་བཛྲ་མ་ཧཱ་ཀྲོ་དྷ་ཨ་བཛྲ་ཡ་ཨ་བཛྲ་ཡ་སརྦ་པྲ་སནྣཱ་ན་ཧཱུཾ་ཕཊ། ཨོཾ་བི་ཀ་ཊ་པཱ་ད་བཛྲ་མ་ཧཱ་ཀྲོ་དྷ་བི་ཥ་ཡ་བི་ཥ་ཡ་སརྦ་དུ་ཥྚཱ་ན་ཧཱུཾ་ཕཊ། ཨོཾ་པྲ་ཏི་བི་ཀ་ཊ་པཱ་ད་བཛྲ་མ་ཧཱ་ཀྲོ་དྷ་བི་གྷུརྞ་ཡ་བི་གྷུརྞ་ཡ་སརྦ་དུཥྚཱན་ཧཱུཾ་ཕཊ། ཨོཾ་སཾ་པུ་ཊ་པཱ་ད་བཛྲ་མ་དྷཱ་ཀྲོ་དྷ་སཱི་ཊ་ཡ་སཱི་ཊ་ཡ་སརྦ་བི་ནཱ་ཡ་ཀཱ་ན་ཧཱུཾ་ཕཊ། ཨོཾ་ཀུརྨ་པཱ་ད་བཛྲ་མ་ཧཱ་ཀྲོ་དྷ་ནཱ་ཤ་ཡ་ནཱ་ཤ་ཡ་སརྦ་བིགྷྣ་ན་ཧཱུཾ་ཕཊ། ཨོཾ་ཨེ་ཀ་པཱ་ད་བཛྲ་མ་ཧཱ་ཀྲོ་དྷ་ཨཱ་ཀམྤ་ཡ་ཨཱ་ཀམྤ་ཡ་སརྦ་ཀླེ་ཤཱན་ཧཱུཾ་ཕཊ། ཨོཾ་བྷ་མ་ཎཱི་ཛཱ་ལ་པཱ་ད་བཛྲ་མ་ཧཱ་ཀྲོ་དྷ་ཛམྦྷ་ཡ་ཛྨྦྷ་ཡ་སརྦ་ཏིརྠ་ཀཱན་ཧཱུཾ་ཕཊ། ཨོཾ་བུདྡྷ་བ་ལ་བཛྲ་མ་ཧཱ་ཀྲོ་དྷ་ཨཱ་ཀྵེ་པ་ཡ་ཨ་ཀྵེ་པ་ཡ་སརྦ་མཱ་རཱན་ཧཱུཾ་ཕཊ། ཨོཾ་ཨཱཿ་ཧཱུཾ་ལ་ལ་ལ་ལ་ལ་ལ་ཧེ་ཧེ་གྲ་ས་གྲ་ས་ཀ་རཱ་ལ་བ་ད་ན་མ་ཧཱ་ཀྲོ་དྷ་ཙ་ལ་ཡ་ཙ་ལ་ཡ་ཧཱུཾ་ཀཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲས་ཀ་རཱ་ལ་བ་དན་མ་ཧཱ་ཀྲོ་དྷ་ས་ཡ་ཏྲཱ་ས་ཡ་ཧཱུཾ་གཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་དན་མ་ཧཱ་ཀྲོ་དྷ་ཀྵོ་བྷ་ཡ་ཀྵོ་བྷ་ཡ་ཧཱུཾ་ཙཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་ད་ན་མ་ཧཱ་ཀྲོ་དྷ་བི་མོ་ཧ་ཡ་བི་མོ་ཧ་ཡ་ཧཱུཾ་ཚཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་དན་མ་ཧཱ་ཀྲོ་དྷ་ག་རྫྫ་ཡ་གརྫྫ་ཡ་ཧཱུཾ་ཛཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་ད་ན་མ་ཧཱ་ཀྲོ་དྷ་ཧྲིཿ་ཥྚཱྀཿ་ཧཱུཾ་ཛྷཿ་། །ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་དན་མ་ཧཱ་ཀྲོ་དྷ་གྷཱ་ཏ་ཡ་གྷཱ་ཏ་ཡ་ཧཱུཾ་སཿ། ཨོཾ་ཨཱཿ་ཧཱུཾ་ལ་ཨཱ་ཧེ་ཧེ་གྲ་ས་གྲ་ས་ཀ་རཱ་ལ་བ་ད་ན་མ་ཧཱ་ཀྲོ་དྷ་ཨཱ་བེ་ཤ་ཡ་ཨཱ་བེ་ཤ་ཡ་ཧཱུཾ་ཧཿ། ཨོཾ་མ་ཧཱ་བ་ལ་བཛྲ་ཨུ་དཱ་ཀ་ཪྵ་ཎ་བཛྲ་མ་ཧཱ་ཀྲོ་དྷ་མ་རྔ་ཡ་མརད་ཡ་སརྦ་བི་གྷྣཱན་ཧཱུཾ་ཕཊ། ཨོཾ་བཛྲ་ཨ་ཀྵེ་པ་བཛྲ་མ་ཧཱ་
ཀྲོ་དྷ་ཨཀྵེ་པ་ཡ་ཨ་ཀྵེ་པ་ཡ་སརྦ་བྷཱུ་ཏཱ་ན་ཧཱུཾ་ཕཊ། ཨོཾ་བཛྲ་བྷཻ་ར་བ་བཛྲ་མ་ཧཱ་ཀྲོ་དྷ་ཤོ་དྷ་ཡ་ཤོ་དྷ་ཡ་སརྦ་ཏྲཻ་དྷ་ཏུ་ཀཱ་ན་ཧཱུཾ་ཕཊ། ཨོཾ་བཛྲ་ཀུ་ཎྜ་ལི་བཛྲ་མ་ཧཱ་ཀྲོ་དྷ་གྲྀ་ཧྞ་བནྡྷ་ཧ་ན་བི་དྷྭ་ནས་ཡ་བཛྲེ་ཎ་མཱ་རཱ་ན་ཧཱུཾ་ཕཊ། ཡ་བྷི་ནྡ་ཡ་ཧྲྀ་ད་ཡཾ་ཧཱུཾ་ཕཊ། ཨོཾ་བཛྲ་བྲྀ་ནྲ་ཏྱ་བཛྲ་མ་ཧཱ་ཀྲོ་དྷ་གྷ་ཏ་ཡ་གྷ་ཏ་ཡ་སརྦ་དུ་ཥྚ་གཱ་ན་ཧཱུཾ་ཕཊ། ཨོཾ་སྟེ་མཱ་ཡཱ་ཀ་ར་ཎ་བཛྲ་མ་ཧཱ་ཀྲོ་དྷ་ཨཱ་ན་ཡ་ཨཱ་ན་ཡ་བི་མྲྡ་ཡ་བི་མྲྡ་ཡ་སརྦ་ཀིནྣ་ར་ཨཱ་དཱི་ན་ཧཱུཾ་ཕཊ། ཨོཾ་ཁཌྒ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཚིནྡྷ་ཚིནྡྷ་སརྦ་དུཥྚ་བི་ནཱ་ཡ་ཀཱ་ན་ཧཱུཾ་ཕཊ། ཨོཾ་བཛྲ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་པྲ་མྲྡ་ཡ་པྲ་མྲྡ་ཡ་སརྦ་དེ་བཱ་ན་ཧཱུཾ་ཕཊ། ཨོཾ་བཛྲ་མུ་ཁ་ལ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཀུ་ཊྚ་ཀུ་ཊྚ་སརྦ་དུཥྚ་བི་གྷ་བི་ནཱ་ཡ་ཀཱ་ན་ཧཱུཾ་ཕཊ། ཨོཾ་ཙ་ཀྲ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཨཱ་ནཱ་ཡ་ཨཱ་ནཱ་ཡ་སརྦ་མ་ཎྜ་ལཱ་ན་ཧཱུཾ་ཕཊ། ཨོཾ་པཱ་ཏཱ་ཀ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་པྲ་སཱར་ཡ་སརྦ་པྲ་ཏཱ་ན་ཧཱུཾ་ཕཊ། ཨོཾ་པདྨ་ཨ་བྷི་ནཱ་ཡ་བཛྲ་མ་ཧཱ་ཀྲོ་བྷ་ཨཱ་བེ་ཤ་ཡ་ཨཱ་བེ་ཤ་ཡ་སརྦ་དུཥྚ་ས་ཏྲཱ་ན་ཧཱུཾ་ཕཊ། ཨོཾ་དཎྜ་ཨི་བྷི་ནཱ་ཡ་བཛྲ་མ་ཧཱ་ཀྲོ་དྷ་ཏཱ་ཊ་ཡ་ཏཱ་ཊ་ཡ་སརྦ་ཤ་ཧཱུཾ་ཧཱུཾ་ཕཊ། ཨོཾ་ཨཾ་ཀུ་ཤ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཀ་ཪྵ་ཡ་ཨཱ་ཀ་ཪྵ་ཡ་སྲབ་ཥྚ་སྲྭཱ་ན་ཧཱུཾ་ཕཊ། ཨོཾ་ཕ་ལ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་པྲ་ཧླ་ལ་ཡ་པྲ་ཧླ་ད་ཡ་སརྦ་ཏ་ཐཱ་ག་ཏཱ་ན་ཧཱུཾ་ཕཊ། ཨོཾ་ཙཱ་པ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཏ་རྫ་ཡ་ཏ་རྫ་ཡ་སརྦ་དུ་ཥྚཱ་ན་ཧཱུཾ་ཕཊ། ཨོཾ་ཤ་ར་ཨཱ་ཀཪྵ་ཎ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་ཨཱ་ཀྲྵ་ཡ་ཨཱ་ཀ་ཪྵ་ཡ་སརྦ་མཱ་ར་པཪྵ་དོ་ཧཱུཾ་ཕཊ། ཨོཾ་ཤར་ཨུ་དཀྴེ་པ་ཎ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་དེ་ཧི་དེ་ཧི་པ་རཾ་སརྦ་ས་ཏྭ་ན་ཧཱ་ཧཱུཾ་ཕཊ། ཨོཾ་བཛྲ་ཨུཏ་བ་ལི་ནྟ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བནྡྷ་ཡ་བནྡྷ་ཡ་སརྦ་ས་མ་ཡཱ་ན་ཧཱུཾ་ཕཊ། ཨོཾ་སིཾ་ཧ་པ་ད་བཛྲ་མ་ཧཱ་ཀྲོ་དྷ་སྟཾ་བྷ་ཡ་ས་ཡ་སརྦ་མ་ཧལླ་ཀ་ཨཱ་དཱི་ན་ཧཱུཾ་ཕཊ། ཨོཾ་སིཾ་ཧ་བི་ཨ་བྷི་ཛྲི་མབྷི་ཏ་པ་ད་བཛྲ་མ་ཧཱ་ཀྲོ་དྷ་ཏྲཱ་ས་ཡ་སརྦ་མ་ཧ་ལླ་ཀ་མ་ཧལླ་ཀ་ཨཱ་དཱི་ན་ཧཱུཾ་ཕཊ། ཨོཾ་སིཾ་ཧ་ཀྲཱ་ནྟ་པ་ད་བཛྲ་མ་ཧཱ་ཀྲོ་དྷ་ཨཱ་ཀྲཱ་མ་ཡ་སརྦ་མ་ཧལླ་ཀ་མ་ཧ་ལླ་ཀ་ཨཱ་དཱི་ན་ཧཱུཾ་ཕཊ། ཨོཾ་ག་ར་ཊ་ཨཱ་སཱ་ན་བཛྲ་མ་ཧཱ་ཀྲོ་དྷ་ཏྲཱ་ས་ཡ་ཏྲཱ་ཡ་སརྦ་ནཱ་གཱ་ན་ཧཱུཾ་ཕཊ། ཨོཾ་བྷིནྡ་པཱ་ལ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བྷྲ་མ་ཡ་བྷྲ་མ་ཡ་བྷྲ་མ་ཡ་སརྦ་དུ་ཥྜཱ་ན་ཧཱུཾ་ཕཊ། ཨོཾ་བ་ར་ད་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བ་ར་དབར་ད་སརྦ་སིདྡྷིཾ་ཀུརཿ་ཧཱུཾ་ཕཊ། ཨོཾ་ཤ་ཀྟི་
ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་མཱ་ར་ཡ་མཱ་ར་ཡ་སརྦ་མཱ་ར་ཡ་ཨ་ནུ་རྩ་རཱ་ན་ཧཱུཾ་ཕཊ། ཨོཾ་ཀ་ཎ་ཡཀྵེ་པ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བ་དནྷ་ཡ་བནྡྷ་ཡ་སརྦ་དུ་ཥྚ་ཧཱུཾ་ཕཊ། ཨོཾ་ཀུནྟ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་མཱ་ར་ཡ་མཱ་ར་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་ཙ་ཏུ་རྨུ་ཁ་ཨ་དྷི་ཥ་ན་བཛྲ་མ་ཧཱ་ཀྲོ་དྷ་ཨ་དྷི་ཥྚྷ་ན་ཨ་དྷི་ཥྛཱ་ན་སརྦ་དེ་ཤ་ཨོཾ་ཏྲཱཾ་ཏྲཱཾཿ་ཨཱཿ་ཧཱུཾ་ཧཱུཾ་ཕཊ། ཨོཾ་བཛྲ་བི་དྱཱ་དྷ་ར་པ་ད་བཛྲ་མ་ཧཱ་ཀྲོ་དྷ་ཀ་ཪྵ་ཡ་ཨཱ་ཀྲྵ་ཡ་སརྦ་ཤྲ་བ་ཀཱ་ན་ཧཱུཾ་ཕཊ། ཨོཾ་ཛྲ་མཱ་ལཱ་དྷར་པ་ད་བཛྲ་མ་ཧཱ་ཀྲོ་དྷ་ཨ་བརྫ་ཨ་བརྫ་སརྦ་པྲ་ཏྱེ་ཀ་ཙ་ཪྻ་ཙ་རའི་ཎི་ཧཱུཾ་ཕཊ། ཨོཾ་ཛཱ་ལ་ནྡྷ་ར་པ་ད་བཛྲ་མ་ཧཱ་ཀྲོ་དྷ་པྲ་སཱ་ད་ཡ་པྲ་སཱ་ད་ཡི་སརྦ་བོ་དྷི་སཏྭཱ་ན་ཧཱུཾ་ཕཊ། ཨོཾ་པྲ་ཎ་མ་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་པྲ་སཱ་ད་ཡ་པྲ་སཱ་ད་ཡ་སརྦ་ཏ་ཐཱ་ག་ཏཱ་ན་ཧཱུཾ་ཕཊ། དེའི་རྗེས་ལ་ཕྱག་འཚལ་བའི་ཚུལ་དང་པད་ཀོར་ཡང་བྱས་ནས་དུར་ཁྲོད་ན་བཞུགས་པའི་དཀྱིལ་འཁོར་གྱི་དབང་ཕྱུག་ལ་དུར་ཁྲོད་ཀྱི་ཚུལ་གྱིས་གར་བྱ་ཞིང༌། དམ་ཚིག་ཀྱང་འདི་རྣམས་ཏེ་དམ་ཚིག་གི་ངེས་པ་འབའ་ཞིག་བྱའོ། །དེ་ཐམས་ཅད་ཚིགས་སུ་བཅད་པས་བརྗོད་པར་བྱ་སྟེ། ཚིགས་སུ་བཅད་པའི་དོན་གྱི་ཚུལ་རྣམས་ནི་གར་དུ་བྱའོ། །དེ་ལྟར་ཡང༌། ཤར་དུ་གཏུམ་དྲག་འཇིགས་པར་བྱེད་པར་ལྷ་ཡི་བདག་པོ་ཕྱོགས་ཀྱི་གླང་པོ་ལ་གནས་ཤིང༌། རྡོ་རྗེ་དང་ནི་སྡིགས་མཛུབ་ཀུན་ནས་གསལ་ལྡན་རྟག་ཏུ་སེར་པོའོ་དེ་ནས་ནོར་རྒྱས་ནི། །དཀར་པོ་གདེངས་ཀ་བདུན་དང་ལྡན་པའོ་ཆུ་འཛིན་སྟུག་པོ་གཏུམ་དྲག་ཅེས་བྱ་ཆེན་པོ་ནི། །དྲག་པོའི་རྫུ་འཕྲུལ་ཆེ་ལྡན་དཀར་པོ་གླང་པོའི་གདོང་ཅན་ཤི་རི་ཥ་ཡི་ཤིང་ལ་གནས། །བྱང་དུ་གནོད་སྦྱིན་དབང་པོ་སེར་བོ་རྟ་ལ་ཡང་དག་གནས་ཤིང་མི་འཇིགས་སྦྱིན་པ་དང༌། །དབྱུག་པ་ཡང་དག་ལྡན་པའོ་འཇོག་པོ་དམར་པོ་དེ་བཞིན་འུར་འུར་བྱེད་པའི་འཁོར་བྱེད་དེ། །དཔལ་ལྡན་བྱང་ཆུབ་ཤིང་ལ་མཆེ་གཅིག་མི་ཡི་གདོང་ཅན་བསིལ་བ་ཉིད་འདིར་ཚང་ཚིང་ལ་ཁྲིགས། །རྟག་ཏུ་འཕེལ་བྱེད་འཇིགས་པ་ཆེ་ལྡན་ཤིན་ཏུ་ཚང་ཚིང་འཁྲིགས་པའི་དུར་ཁྲོད་ཆེན་པོའོ། །ནུབ་ཏུ་ཆུ་ཡི་བདག་པོ་དཀར་པོ་ཆུ་སྲིན་ལ་ཞོན་འཇིགས་པ་མེད་པར་བྱེད་པ་དང༌། །སྦྲུལ་ཆེན་ཞགས་པ་ལྡན་པའོ་དེ་བཞིན་གདེངས་ཀའི་བདག་པོ་ལྗང་གུའི་ཀླུ་ནི་སྟོབས་ཀྱི་རྒྱུ། །སྤྲིན་ནི་ཟབ་མོ་སྒྲོགས་
པར་བྱེད་པའོ་དགའ་བ་དང་བཅས་འབར་བས་ཀུན་ནས་ཁྱབ་པ་དེར། །མྱ་ངན་མེད་པའི་ཤིང་ལ་ཆུ་སྲིན་གདོང་ཅན་ཤིན་ཏུ་དམར་བའི་རང་བཞིན་འོད་འཕྲོ་བ། །ལྷོར་ནི་གཤིན་རྗེ་ནག་པོ་འཁྲིགས་པའི་དབྱུག་པ་རྣམ་པར་འཛིན་ཞིང་ཞགས་པ་དང་བྲལ་བ། རྟག་ཏུ་མ་ཧེ་ལ་ཞོན་དེ་ནས་ཤིན་ཏུ་དཀར་པའི་པདྨ་ལྕེ་གཉིས་བདག་པོ་སྟེ། །ཉི་མ་སོ་སོར་ཆར་པ་འབེབས་བྱེད་ལྡོག་པར་བྱེད་པའོ་ཙུ་ཏའི་ཤིང་ལ་འཇིགས་བྱེད་ཆེ། །ནག་པོ་མ་ཧེ་ཁྲོས་པའི་གདོང་པ་དང་ལྡན་སྲིན་པོའི་དེ་ལྟར་འཇིགས་པར་བྱེད་པའོ། །མེ་ཡི་མཚམས་སུ་མེ་ལྟ་དམར་པོ་སྤྱི་བླུགས་འཛིན་ཞིང་སྔགས་ཀྱི་བགྲང་ཕྲེང་དང་ལྡན་པ། །ར་ལ་གནས་པའོ་པདྨའི་སྡོང་བུ་ལྟ་བུར་དཀར་བའི་ཀླུ་ནི་པདྨ་ཆེན་པོ་སྟེ། །ཆུ་འཛིན་འཇིགས་པར་བྱེད་པའོ་དེ་ནས་ར་ཡི་གདོང་ཅན་དྲག་ཏུ་དགོད་པ་ཆེན་པོ་ནི། །དམར་པོ་མཛེས་པ་ཀ་ར་ཉྫ་ཡི་ཤིང་ལ་གནས་པའོ་རྒྱ་ཆེན་དྲག་ཏུ་དགོད་པའོ། །བདེན་བྲལ་དུ་ནི་སྲིན་པོ་ནག་པོ་མགོ་དང་སྡིག་མཛུབ་འཛིན་པ་རོལ་གནས་པ་སྟེ། །རློན་ཞིང་འཐོར་བར་བྱེད་པ་འགེངས་བྱེད་དུག་འཛིན་མཐའ་ཡས་ཀྱང་ནི་སྔོན་པོའི་རང་བཞིན་ཉིད། །ཆེན་པོའི་ཤིང་ལ་ཧུ་ལུ་ཧུ་ལུ་ནག་པོ་དོམ་གྱི་གདོང་པ་ཅན་དང་ལྡན་པ་ཆེན་པོ་སྟེ། །ཡང་དག་འཕེལ་བྱེད་ཤིན་ཏུ་ཀའི་ལི་ཀའི་ལིའི་སྒྲ་རྣམས་སྒྲོགས་པའི་དུར་ཁྲོད་རྟག་ཏུའོ། །རླུང་དུ་རླུང་ལྷ་དཀར་པོ་མཛེས་པའི་རླུང་གི་བ་དན་འཛིན་པ་ཤ་བའི་གདོང་ཅན་ཏེ། །ལྷོ་འཕྱེ་ཆེན་པོ་ཡི་ནི་བདག་པོ་རིགས་ལྡན་ཡིན་ཏེ་དྲག་པོ་ཆེན་པོ་སྣ་ཆོགས་ཉིད། །སྤྲིན་ནི་རྟག་ཏུ་འཁོར་བྱེད་དེ་ནས་མི་བཟད་ལྗང་གུ་རི་དགས་གདོང་ཅན་ཆེན་པོ་ནི། །འཇིགས་པའང་འཇིགས་བྱེད་ཨུ་རྫུ་ན་ཡི་ཤིང་ལ་གནས་པ་མུན་པ་མི་བཟད་དུར་ཁྲོད་དུའོ། །དབང་ལྡན་དུ་ནི་དབང་ལྡན་དཀར་སེར་གླང་ལ་གནས་ཤིང་མ་དུང་དང་ཐོད་པ་འཛིན་པ་སྟེ། །དེ་ནས་མཁྲེགས་པའི་ལུས་ཅན་དཀར་སེར་ནོར་བུ་ཆེན་པོ་འཛིན་པའི་དཔལ་ལྡན་དུང་སྐྱོང་ཉིད། །བདེ་འབྱུང་ངེས་པར་རྫུ་འཕྲུལ་ཆེ་ལྡན་གླང་གི་གདོང་ཅན་དཀར་པོ་འཁྲི་ཤིང་ལ་གནས་ཤིང༌། །སྤྲིན་ནི་གཏུམ་ཞིང་གཏུམ་པོ་རྒྱ་ཆེན་ཆུང་དང་ལྡན་པས་དབང་ཕྱུག་ནགས་ཚལ་ལོ། །བརྒྱད་པོ་འདི་རྣམས་སུ་ནི་བརྒྱད་ཀྱི་སྐུ་ལྡན་དྲག་པོའི་དུར་ཁྲོད་རྣམས་སུ་ཀླུ་རྣམས་ནི། །གདེངས་ཀ་བདུན་
གྱིས་བརྒྱན་ཅིང་མི་ཡི་གདོང་ཅན་ཐམས་ཅད་ཀྱང་ནི་ཕྱོགས་ཀྱི་འདྲེན་པ་སྟེ། ཤིང་རྣམས་མེ་ཏོག་དང་ནི་འབྲས་བུར་ལྡན་ཞིང་ཆུ་འཛིན་སྣ་ཚོགས་ཁ་དོག་འབར་བ་ཉིད། །ཤིང་དེ་རྣམས་ལ་རྫུ་འཕྲུལ་ཆེ་ལྡན་ཀི་ལི་ཀི་ལི་བྱེད་པ་དེ་བཞིན་བརྒྱ་བྱིན་ནོ། །དུར་ཁྲོད་ཀྱི་དཀྱིལ་འཁོར་བརྗོད་པར་བྱ་སྟེ། བསྲེགས་དང་ཀུན་ནས་བསྲེགས་ཤིང་དུ་མ་བུར་བྱས་སོགས་རོ་རྣམས་མདུང་གིས་ཕུག་དང་བཅིངས་གྱུར་པ། །བྱ་རྒོད་འཇིགས་པའི་སྒྲ་ལྡན་གཡོ་བའི་གར་བྱེད་ཅེ་སྤྱང་རྣམས་ཀྱིས་ཤ་ནི་ཟ་བ་དང༌། །སྒྲ་སྒྲོགས་རྣམ་པར་བགྲོད་པའི་བྱ་རྒོད་རྣམས་ཀྱིས་རྒྱུ་མ་ཕྱུང་ནས་གནས་པ་འགའ་ཞིག་ནི། །མཆོག་གི་རྣལ་འབྱོར་མ་རྣམས་ཀྱིས་ནི་ངེས་པར་བཅད་ནས་རང་གི་མེ་ལ་འཚེད་པར་བྱེད། །རོ་ཡི་མགོ་བོ་བཅད་དེ་འཛག་པའི་ཁྲག་ལྡན་མགོ་ནི་བཟུང་བའི་སྲིན་པོ་དང༌། །མཁྲེགས་པའི་དབྱིག་པ་དགའ་བའི་མཚོན་ཆ་རྣམས་ཀྱིས་འགའ་ཞིག་ཕན་ཚུན་འཐབ་པར་བྱེད་པ་ཡོད། །ཨེ་མའོ་འུག་པའི་གདོང་ཅན་རྣམས་ཀྱིས་ལག་པའི་ཕེག་རྡོ་བ་སྒྲ་ཡིས་ལམ་ནི་འགོག་བྱེད་ཅིང༌། །རོ་ལངས་དང་ནི་ལུས་སྲུལ་རྣམས་ཀྱིས་ཡོངས་སུ་བསྐོར་ནས་འགའ་ཞིག་གར་ནི་བྱེད་པ་མཐོང༌། །འགའ་ཞིག་རང་གི་མགོ་པོ་བཅད་ནས་ཕྲག་པ་དག་ལས་འཛག་པའི་ཁྲག་ནི་འཐུང་པར་བྱེད། །འགའ་ཞིག་རྩེད་མོ་བྱེད་ཅིང་ཨེ་མའོ་འགའ་ཞིག་ཤུགས་བཅས་ལུས་ནི་གསུམ་དུ་སྤྲུལ་བར་བྱེད། །འགའ་ཞིག་འགུགས་པར་བྱེད་ཅིང་རབ་ཏུ་གསལ་བས་ཧཱུཾ་ཡིག་དང་ནི་ཕཊ་ཡིག་སྒྲོགས་པར་བྱེད། །རྣལ་འབྱོར་མ་ནི་འགའ་ཞིག་མགོ་བོའི་ཕྲེང་བ་ཁ་ཊཱ་ངྒ་དང་ལྡན་པས་རྒྱུ་པར་བྱེད། །དུར་ཁྲོད་ན་གནས་པའི་གྲུབ་ཐོབ་རྣལ་འབྱོར་གྱི་དབང་ཕྱུག་རྣམས་ཀྱི་དམ་ཚིག་གི་ཚུལ་ཅུང་ཟད་བརྗོད་པར་བྱ་སྟེ། ལཱུ་ཡི་ཞབས་ཀྱི་མཐའ་རྣམས་གཅོད་པའོ་ཤ་བ་རི་འདིར་རྟགས་ཏུ་མདའ་དང་གཞུ་དག་ཕྱག་ན་བསྣམས། །ཉལ་བ་དང་ནི་ཟ་བ་ཉིད་འདོད་གྲུབ་པ་ཞི་པའི་ལྷ་ཡང་མཆོག་གི་བདེ་བའི་རོ་དང་ལྡན། །པི་ཝང་ཞབས་ནི་སྙིང་རྗེ་དང་བཅས་དགའ་བའི་སྒྲ་དབྱངས་དང་ལྡན་པ་ཝང་སྒྲ་རྣམས་སྒྲོགས་པ་སྟེ། ཌེདྷི་པ་ནི་འབྲུ་རྣམས་རྣམ་བརྡུང་གོས་མེད་ཀ་རྞཱ་པ་ནི་ལྟན་སྐྱེས་གཙང་མའི་ཡིད་ཅན་ནོ། །ཏོག་ཙེ་འཛིན་པོ་པོ་ནི་སྲིད་གསུམ་མི་
མཉམ་མཉམ་པ་ཉིད་དུ་ཡང་དག་མཛད་ནས་བཞུགས་པ་སྟེ། །བི་རཱུ་བ་ནི་ཆང་མ་རྣམས་ལ་ཉི་མ་འད་གཏིང་བར་བྱིན་ནས་ཆད་རྣམས་མཐུད་པར་མཛད་པ་ཉིད། །ཌོ་མྦི་པ་ནི་སྟག་ལ་ཞོན་ཞིང་རང་རིག་བུད་མེད་དག་དད་ལྟན་ཅིག་ཀུན་ནས་འཁྱུད་པར་ལྡན། །བདེ་བའི་སྟོབས་ལྡན་ཀཾ་བ་ལི་ཡང་བསམ་དང་མི་བསམ་རབ་ཏུ་ཉམས་ཤིང་ལུས་ནི་རྣམ་པར་རྒྱས་པའོ། །དཱ་རི་ཀ་པ་ལ་ཡང་བཟའ་བ་དག་དང་གྲོལ་བར་འདོད་ཅིང་ཅན་ཆུང་དགའ་བའི་ཤུགས་དང་བཅས། །གུ་ཌ་རཱི་པའང་རྐེད་པའི་འཁྲུལ་འཁོར་དག་ལ་མཉམ་པར་གཞག་ཅིང་རླུང་ཡང་གུ་ཌ་གུ་རིར་སྒྲོགས། །རྒྱལ་པོ་ཨིནྡྲ་བྷཱུ་ཏི་བསམ་གཏན་མཆོག་གི་བདེ་བའི་རང་བཞིན་ནམ་མཁར་སེང་གེའི་ཁྲི་ལ་བཞུགས། །རང་གིས་མཁའ་ལ་གཤེགས་ནས་རལ་གྲི་གྲུབ་པ་མཛད་དེ་དབང་པོ་དུལ་བ་དེ་ཚེ་འོད་མཛད་པའོ། །ཀུ་ཀུ་རི་བའི་ཞབས་འདིར་རང་ཉིད་ཁྱི་མོ་རྣམས་དང་ལྷན་ཅིག་བྱིས་པ་བཞིན་དུ་རྩེ་བ་སྟེ། །ནག་པོ་པ་ནི་ཕྱག་རྒྱ་བཅིངས་ནས་ཌ་མ་རུ་ཡི་ཅ་ཅོའི་སྒྲ་ཡིས་བར་སྣང་དགང་པར་བྱེད། །སུ་ཡང་སུ་ཡི་དོན་བྱེད་པ་ན་གང་འདིའི་སྙིང་རྗེ་ཉིད་ཀྱིས་ཀུན་ནས་བསྐོར་བའི་དབྱངས་ལྡན་པ། །དེ་ནི་འཕགས་པ་ཀླུ་སྒྲུབ་དབང་ཕྱུག་བརྒྱད་ལ་སོགས་པ་སྟེར་བས་འགྲོ་ལ་ཕན་པར་མཛད་པའོ། །རྣམ་མང་རོ་ལྡན་རྣམས་སུ་འགའ་ཞིག་ཤེས་རབ་དང་བཅས་སྙོམས་པར་འཇུག་པའི་དགའ་བས་གནས། །འདི་དག་ཤ་ཆེན་ཟ་ཞིང་ཆང་རྣམས་འཐུངས་ཏེ་དམ་པའི་ཀུན་དུ་རུ་དག་མཛད་པ་ཉིད། །རྡོ་རྗེའི་རྐང་སྟབས་དུམ་བུས་གར་བྱེད་ཤིན་ཏུ་སྒེག་པས་དེ་ཉིད་ལྡན་པའི་གླུ་ལེན་ཞིང༌། །རྣལ་འབྱོར་དབང་ཕྱུག་འདི་རྣམས་དགའ་བ་དང་བཅས་སྒྲ་ཡིས་འཁོར་ལོ་མཉམ་པར་བསྐོར་བར་མཛད། །དགའ་བས་པོ་ལ་ཀཀོལ་སྦྱར་པ་དེ་བའི་ཀུན་དགའ་སྤྲོ་བྱེད་ཀུན་དུ་རུ་དང་ལྡན། །གསར་དུ་བསྒྲུབས་པའི་ཤ་ཆེན་རྣམས་ཀྱིས་ལག་བརྒྱན་པ་ཡི་སྐལ་བ་དང་ལྡན་འཁོར་ལོ་ཅན། །འོད་ལྡན་ལྷ་མོ་རྣམས་ཀྱི་ཆུ་སྐྱེས་འདབ་མའི་ཆུ་ཡིས་སོ་ཡི་སྒྲིབ་བྱེད་རྣམ་པར་བྱུགས། །རོ་ཡི་གནས་ཀྱི་གནས་སུ་དམ་བཅས་རོ་མྱང་བ་ནི་འགའ་ཞིག་རྣལ་འབྱོར་བ་སུ་དག །ཆུ་སྐྱེས་སྣོད་དུ་ཀུན་ནས་བཞག་པའི་ཆང་དང་དེ་ནས་ཤ་ཆེན་རྣམས་དང་ཚོད་མ་འཐུང་བྱེད་པའི། །དཔལ་ལྡན་སྐལ་བར་ལྡན་པ་
རྣམས་ནི་འདུ་བ་ཡོངས་སུ་སྤངས་མིན་དམ་པའི་རེག་མིན་རྣམས་དང་ལྡན། །འགའ་ཞིག་སྲད་བུ་དག་དང་སྣོད་ལྡན་པང་བར་གནས་པའི་རྒྱུད་མངས་རོལ་མོ་ལ་བརྟེན་རོ་མྱང་ཞིང༌། །རང་གི་འདུན་པས་དཔལ་ཀུན་དུ་རུ་ནི་ཡོངས་སུ་བསགས་ཀྱང་ངོམས་པ་མེད་པས་གླུ་དབྱངས་ལེན། །གང་ཞིག་སྣ་ཚོགས་རྣམས་ནི་རྟག་ཏུ་མེ་ལོང་ལ་གནས་གཟུགས་བརྙན་འདྲ་བར་གཟུང་དུ་མེད། །དེ་དང་མཚུངས་པར་དཀྱིལ་འཁོར་ལོ་གཉིས་མེད་དེ་ཡང་མཐའ་གསུམ་སྤངས་པར་མངོན་སུམ་དུ། །དེ་ཡིས་ཡང་དག་རིག་ཅིང་དབུ་མར་ཆགས་པ་ལས་བྱུང་རྟག་ཏུ་དཔལ་ལྡན་དཔའ་བོར་བཅས། །སྟོན་པ་གང་ཞིག་ནམ་མཁའ་དག་དང་མཉམ་ཡང་སྙིང་རྗེ་དང་བཅས་དེ་ལ་ཀུན་དུ་འདུད། །དེའི་རྗེས་སུ་དཀྱིལ་འཁོར་གྱི་དབུས་སུ་ཤིན་ཏུ་འཇམ་ཞིང་མཐོ་བའི་གདན་ལ་བསྡད་དེ། ཧཱུཾ་ཡིག་བརྗོད་པ་སྔོན་དུ་འགྲོ་བས་གདན་བཅུ་བཅིང་བར་བྱའོ། །དེ་ལ་རྡོ་རྗེའི་སྐྱིལ་ཀྲུང་དང་ས་གནོན་གྱི་ཕྱག་རྒྱ་བཅིངས་པ་ནི་རྡོ་རྗེའི་གདན་ནོ། །ཏིང་ངེ་འཛིན་གྱི་ཕྱག་རྒྱ་བཅིངས་པ་ནི་བསམས་གཏན་གྱིའོ། །གཡས་པའི་བརླ་དང་བྱིན་པའི་དབུས་སུ་རྐང་པ་གཡོན་པ་བཞག་ནས་དེའི་སྟེང་དུ་གཡོན་པའི་བརླ་དང་བྱིན་པའི་དབུས་སུ་གཡས་པ་གཞག་པ་ནི་རྡོ་རྗེའི་སྐྱིལ་ཀྲུང་ངོ༌། །བྱིན་པ་གཡོན་པར་བྱིན་པ་གཡས་པ་བཞག་སྟེ་པུས་མོ་གཉིས་སྨད་པ་ནི་པདྨའི་གདན་ནོ། །བརླ་གཡོན་པའི་སྟེང་དུ་རྐང་པ་གཡས་པ་བཞག་ནས་གཡོན་པ་བརླ་གཡས་པའི་འོག་ཏུ་བཞག་པ་ནི་སེམས་དཔའི་སྐྱིལ་ཀྲུང་ངོ༌། །རྐང་པ་གཡོན་པ་སྐྱིལ་ཀྲུང་ཕྱེད་པར་བྱས་ཏེ་དེ་དང་ཉེ་བར་པུས་མོ་གཡས་པ་སྟེང་དུ་དྲང་པོར་བཞག་པ་ནི་དཔའ་བོའི་འདུག་སྟངས་སོ། །གཡོན་པ་སྐྱིལ་ཀྲུང་ཕྱེད་པར་བྱས་ནས་དེའི་སྟེང་དུ་པུས་མོ་གཡས་པ་བསྙལ་ཏེ་བཞག་ལ་རྐང་བ་གཡས་པ་བརླ་གཡོན་པའི་མཐིལ་དུ་གན་རྒྱལ་དུ་བཞག་པ་ནི་དཔའ་བོའི་འདུག་སྟངས་སོ་ཞེས་ཁ་ཅིག་གོ །སྟན་མཐོན་པོ་ལ་གནས་ཏེ་རྐང་བ་གཉིས་དྲང་པོར་གཟུང་བཟང་པོའི་འདུག་སྟངས་སོ། །རྐང་པ་གཉིས་མཐོ་གང་གི་བར་དུ་སྟན་ལ་བཀོད་ནས་ཙོ་པུར་གནས་པ་ནི་ཙོག་པུའི་འདུ་སྟངས་སོ། །རྐང་བ་གཡས་པ་སེམས་དཔའི་སྐྱིལ་ཀྲུང་གིས་ཡང་དག་པར་གནས་
ཤིང་གཡོན་པ་འགྱིང་བ་དང་བཅས་པས་རབ་ཏུ་བརྐྱང་པ་ནི་རལ་བའི་འདུག་སྟངས་སོ། །རྐང་བ་གཉིས་ཁ་སྦྱར་ཏེ་སྡོད་པ་བདེ་ལེགས་ཅན་ནོ། རྡོ་རྗེའི་རྐང་སྟབས་ལ་སོགས་པ་འདི་རྣམས་སུ་ཇི་ལྟར་རིགས་པར་རྡོ་རྗེའི་ལྟ་བ་དག་སྟེ། མདུན་དུ་ལྟ་བ་ནི་མངོན་དུ་ཕྱོགས་པ་དང་རྒྱབ་ཏུ་ནི། ཕྱིར་ཕྱོགས་པ་སྟེ་ཞེས་ལྟ་བ་རྣམ་གཉིས་གསུངས་སོ། །དེ་ལ་སྔགས་ནི་འདི་ཡིན་ཏེ། ཨོཾ་བཛྲ་ཨཱ་ས་ན་བཛྲ་མ་ཧཱ་ཀྲོ་དྷ་པྲ་མ་རྡ་ཡ་བྲརད་ཡ་སརྦ་བི་གྷྣཱ་ན་ཧཱུཾ་ཕཊ། ཨོཾ་དྷྱཱ་ན་ཨཱ་ས་ན་བཛྲ་མ་ཧཱ་ཀྲོ་དྷ་སྠི་ར་ཡ་སྠིར་ཡ་སརྦ་རྩེ་ཏཱ་ན་སི་ཧཱུཾ་ཕཊ། ཨོཾ་བཛྲ་པ་ཪྻཾ་ཀ་བཛྲ་མ་ཧཱ་ཀྲོ་དྷ་ནཱ་ཤ་ཡ་ནཱ་ཤ་ཡ་སརྦ་བི་གྷ་ན་ཧཱུཾ་ཕཊ། ཨོཾ་པདྨ་ཨཱ་ས་ན་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་བི་དྷྭ་ནྶ་ཡ་སརྦ་ཤ་ཏྲཱུཾ་ཧཱུཾ་ཕཊ། ཨོཾ་སཏྭ་པརྣ་ཀ་ཨཱ་སཱ་ན་བཛྲ་མ་ཧཱ་ཀྲོ་དྷ་ཏ་རྫ་ཡ་ཏ་རྫ་ཡ་སརྦ་མ་ཧོ་རཱ་གཱ་ན་ཧཱུཾ་ཕཊ། ཨོཾ་བཱི་ར་ཨཱ་ས་ན་བཛྲ་མ་ཧཱ་ཀྲོ་དྷ་ཏྲཱ་ས་ཡ་ཏྲཱ་ས་ཡ་སརྦ་དུཥྜཱཎ་ཧཱུཾ་ཕཊ། ཨོཾ་བྷ་དྲ་ཨཱ་ས་ན་ཨ་བྷི་ནཱ་ཡ་བཛྲ་མ་ཧཱ་ཀྲོ་དྷ་སུ་ག་ཏ་སུ་ག་ཏ་སུ་ག་ཏ་སརྦ་སཏྭཱ་ན་ཧཱུཾ། ཨོཾ་ཨུདྐུ་ཊུ་ཀ་ཨཱ་ས་ན་བཛྲ་མ་ཧཱ་ཀྲོ་དྷ་ཨུདྐུ་ཊུ་ཊ་ཡ་ཨུདྐུ་ཏ་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་ས་ལཱི་ལ་ཨཱ་ས་ན་བཛྲ་མ་ཧཱ་ཀྲོ་དྷ་ཨཱ་བེ་ཤ་ཡ་ཨཱ་བེ་ཤ་ཡ་སརྦ་མཱ་རཱ་ན་ཧཱུཾ་ཕཊ། ཨོཾ་སྭ་སྟི་ཀ་ཨཱ་ས་ན་བཛྲ་མཧཱ་ཀྲོ་ཀྲོ་དྷ་སྭ་སྟི་སྭ་སྟི་སརྦ་སཏྭཱ་ནཱཾ་ཧཱུཾ་ཕཊ། ཨོཾ་ཨཱ་བྷི་མུ་ཁ་བཛྲ་མ་ཧཱ་ཀྲོ་དྷ་ཨཱ་བེ་ཤ་ཡ་སརྦ་དུ་ཥྚ་ཧཱུཾ་ཕཊ། ཨོཾ་པ་རཾ་ནུ་ཁུ་བཛྲ་མ་ཧཱ་ཀྲོ་དྷ་བ་རམ་མུ་ཁ་ཡ་བ་རམ་མུ་ཁ་ཡ་སརྦ་བི་གྷ་ན་ཧཱུཾ་ཕཊ། དེ་ལ་རྡོ་རྗེ་སྐྱིལ་ཀྲུང་ལ་ཕྱག་རྒྱ་འདི་རྣམས་བཅིངས་བར་བྱའོ། །འདི་ལྟ་སྟེ་རྡོ་རྗེ་ཁུ་ཚུར་གཉིས་བཅིངས་ནས་ལག་པ་གཡོན་པ་ལྟེ་པར་བྱས་ཏེ་གཡས་པས་སྙིང་གར་གསོར་བའི་སྦྱོར་བས་རྡོ་རྗེ་འཛིན་པའི་ཚུལ་བྱ་བ་ནི་རྡོ་རྗེ་སེམས་དཔའི་ཕྱག་རྒྱའོ། །སྙིང་གར་གཡོན་པའི་རྡོ་རྗེ་ཁུ་ཚུར་གྱི་སྡིགས་མཛུབ་རབ་ཏུ་བརྐྱང་བ་གཡས་པའི་ཁུ་ཚུར་གྱིས་ཀུན་ནས་གཟུང་བ་ནི་རྣམ་པར་སྣང་མཛད་ཀྱིའོ། །ལག་པ་གཡོན་པ་བང་བར་ཡང་དག་པར་བཞག་སྟེ་ལག་པ་གཡས་པ་ས་ལ་རེག་པར་གཟུང་བ་ནི་མི་བསྐྱོད་པའིའོ། །དེ་ཁོ་ན་བཞིན་ལ་གཡས་པ་མཆོག་སྦྱིན་བྱས་པ་ནི་རིན་ཆེན་འབྱུང་ལྡན་གྱིའོ། །དེ་ཁོ་ན་བཞིན་ལ་ལག་པ་གཡས་བང་བར་བཅིངས་ཏེ་
བསམ་གཏན་གྱི་ཚུལ་དུ་གཟུང་བ་ནི་འོད་དཔག་མེད་ཀྱིའོ། །དེ་ཁོ་ན་བཞིན་ལ་གཡས་བ་མི་འཇིགས་པ་བྱེད་པ་ནི་དོན་ཡོད་གྲུབ་པའི་འོ། །ཨོཾ་བཛྲ་སྟྭ་ཧཱུཾ། ཨོཾ་ཨོཾ་ཨོཾ། ཨོཾ་ཧཱུཾ། ཨོཾ་ཧྲཱཾ། ཨོཾ་ཧྲཱིཿ་།ཨོཾ་ཁཾ་ཞེས་པ་ནི་རིམ་པ་ཇི་ལྟ་བ་བཞིན་དུ་རྡོ་རྗེ་སེམས་དཔའ་ལ་སོགས་པའི་ཕྱག་རྒྱའི་སྔགས་སོ། །པདྨའི་གདན་ལ་སྒེག་མོ་ལ་སོགས་པའི་ཕྱག་རྒྱ་བཅིང་བར་བྱ་སྟེ། ཧཱུཾ་གི་ཡི་གེ་དང་གླུ་བླང་བ་དང་གར་བྱ་བ་སྔོན་དུ་འགྲོ་བས་དཀུའི་གནས་སུ་གཡོན་པ་དང་གཡས་པའི་རྡོ་རྗེ་ཁུ་ཚུར་གཉིས་བཞག་ནས་འགྱིང་བ་དང་བཅས་པས་གཡོན་དུ་མགོ་ཅུང་ཟད་སྨད་པར་བྱ་པ་ནི་རྡོ་རྗེ་སྒེག་མོའིའོ། །དེ་ཁོ་ན་བཞིན་དུ་ཕྲེང་བ་འཆིང་བ་ནི་ཕྲེང་བ་མའིའོ། །གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་དབྱུག་པ་ལྟར་བླང་བ་དང་གཡས་བའི་མཛུབ་མོས་གར་གྱི་རྣམ་པར་བྱས་ནས་གླུ་བླངས་ཏེ་སྒེག་ཅིང་རྣམ་པར་གཡོ་བས་བི་ཝང་དཀྲོལ་པ་ནི་གླུ་མའིའོ། ལག་པ་གཉིས་བསྐོར་ཞིང་བཀྲོལ་ནས་གཞོགས་གཉིས་སུ་བསྐོར་ཏེ་སྒེག་ཅིང་སྤྲོ་བ་དང་བཅས་པ་ཉིད་ཀྱིས་སྤྱི་བོའི་གནས་སུ་གར་གྱི་སྦྱོར་བ་བྱས་བ་ནི་གར་མའིའོ། །དེ་ལ་ཕྱག་རྒྱའི་སྔགས་ནི་འདི་རྣམས་ཏེ། ཨོཾ་བཛྲ་ལཱ་སྱེ་ཧཱུཾ། ཨོཾ་བཛྲ་མཱ་ལེ་ཧཱུཾ། ཨོཾ་བཛྲ་གཱི་རྟི་ཧཱུཾ། ཨོཾ་བཛྲཾ་ནྲྀ་དྱི་ཧཱུཾ། སེམས་དཔའི་སྐྱིལ་ཀྲུང་ལ་རྡོ་རྗེ་སེམས་དཔའ་ལ་སོགས་པ་བྱང་ཆུབ་སེམས་དཔའི་རྣམས་ཀྱི་སྟེ། སྙིང་པོར་བཅས་པ་འགུགས་པ་དང༌། །གཉིས་ཀས་ལྕགས་ཀྱུ་འཛིན་པར་གནས། །མདའ་འགེངས་པ་ཡི་སྦྱོར་བ་དང༌། །ལེགས་པར་བྱེད་པ་ཐུགས་ཀར་གནས། །རྡོ་རྗེ་གཉིས་ཀྱི་དབང་བསྐུར་དང༌། །སྙིང་གར་ཉི་མ་བཏོན་པ་སྟེ། །གཡོན་གནས་དཔུང་བར་དབྱུག་བ་དང༌། །དེ་བཞིན་གདོང་དུ་ཡོངས་བསྐོར་བའོ། །གཡས་གཡོན་རྣམ་པར་གྱེས་པ་དང༌། །སྙིང་གར་གཡོན་བ་རལ་གྲི་གཡས། །མགལ་མེའི་འཁོར་ལོ་བཞིན་དུ་བསྐོར། །རྡོ་རྗེ་གཉིས་ནི་གདོང་དུ་བསླང༌། །རྡོ་རྗེ་གར་གྱིས་བསྐོར་ནི། །བཀྲོལ་བའི་ཐལ་མོ་གཙུག་ཏོར་གནས། །གོ་ཆ་མཐེ་ཆུང་བའི་རྩེ། །ཁུ་ཚུར་གཉིས་ནི་ངེས་བཙིར་བའོ། །ཨོཾ་བཛྲ་ས་ཏྭཱ་ཧཱུཾ། ཨོཾ་བཛྲ་རཱ་ཛ་ཛཿ། ཨོཾ་བཛྲ་རཱ་ག་ཧོཿ། ཨོཾ་བཛྲ་སཱ་དྷུསཿ། ཨོཾ་བཛྲ་རཏྣ་ཧཱུཾ། ཨོཾ་
བཛྲ་ཏེ་ཛ་ཨཱཿ། ཨོཾ་བཛྲ་ཀེ་ཏུ་ཏྲཾ། ཨོཾ་བཛྲ་ཧཱ་ས་ཧཿ། ཨོཾ་བཛྲ་དྷརྨ་ཧྲཱིཿ། ཨོཾ་བཛྲ་ཏའི་ཀྵྞ་དྷཾ། ཨོཾ་བཛྲ་ཧེ་ཏུ་མཾ། ཨོཾ་བཛྲ་བྷཱ་ཥ་རཾ། ཨོཾ་བཛྲ་ཀརྨ་ཀཾ། ཨོཾ་བཛྲ་རཀྵ་ཧཾ། ཨོཾ་བཛྲ་ཡཀྵ་ཧཱུཾ། ཨོཾ་བཛྲ་སནྡྷི་བཾ། ཞེས་པ་ནི་རིམ་པ་ཇི་ལྟ་བ་བཞིན་དུ་རྡོ་རྗེ་སེམས་དཔའ་ལ་སོགས་པ་རྣམས་ཀྱི་སྔགས་སོ། །དཔའ་བོའི་འདུག་སྟངས་ལ་རྡོ་རྗེ་ཁྲོ་བོ་ལ་སོགས་པ་རྣམས་ཀྱི་ཕྱག་རྒྱ་བྱས་ཏེ། ལག་པ་གཉིས་ཀྱིས་ཁུ་ཚུར་བྱས་ནས། གུང་མོའི་རྩེ་མོ་དང་མིང་མེད་ཀྱང་དེ་བཞིན་དུ་རྡོ་རྗེ་བསྡམས་པ་ལ་གནས་པ་དང༌། མཛུབ་མོ་དག་འཁྱིལ་པའི་རྣམ་པས་བཅིངས་པ་མཐེ་བོང་ལ་མངོན་པར་ཕྱོགས་པས་ཅུང་ཟད་ཡོན་པོའི་རྣམ་པར་བཀུག་པ་ནི་གཤིན་རྗེ་མཐར་བྱེད་ཀྱིའོ། །གཡོན་པ་ཁྲོ་བོའི་ཁུ་ཚུར་སྙིང་གར་བཞག་སྟེ། གཡས་པའི་འགྲམ་པ་ལག་པར་བརྡེག་པའི་རྣམ་པར་བསླང་བ་ནི་གཞན་གྱིས་མི་ཐུབ་པའིའོ། །ལག་པ་གཉིས་ཀྱིས་རྡོ་རྗེ་ཁུ་ཚུར་བྱས་ལ་མཐེ་ཆུང་དག་ལྕགས་སྒྲོག་གི་མདུད་པར་བཅིངས་ཏེ་མཛུབ་མོ་དག་གི་རྩེ་མོ་སྦྱར་བ་ཡོངས་སུ་བསྐོར་ནས་སྨིན་ཕྲག་དུ་གཟུང་བ་ནི་རྟ་མགྲིན་གྱིའོ། །མཐེ་བོང་དག་གིས་མཐེ་ཆུང་གི་སེན་མོ་མནན་ཏེ་སོར་མོ་ལྷག་མ་རྣམས་རྡོ་རྗེའི་མཚན་ཉིད་ཅན་དཔུང་པར་རྡོ་རྗེ་བསྡམས་པས་མཆན་ཁུང་གི་རྩ་བར་གཟུང་བ་ནི་བདུད་རྩི་འཁྱིལ་པའིའོ། །ཨོཾ་ཡ་མཱནྟ་ཀྲྀ་ཏ་ཧཱུཾ། ཨོཾ་པྲཛྙཱནྟ་ཀྲྀ་ཏ་ཧཱུཾ། ཨོཾ་པདྨཱནྟ་ཀྲྀ་ཏ་ཧཱུཾ། ཨོཾ་ཨ་མྲྀ་ཏ་ཀུཎྜ་ལི་བིགྷྣཱནྟ་ཀྲྀ་ཏ་ཧཱུཾ། ཞེས་པ་ནི་གཤིན་རྗེ་མཐར་བྱེད་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། བཟང་པོའི་འདུག་སྟངས་ལ་ནི་བྱམས་པ་ལ་སོགས་པ་རྣམས་ཀྱི་ཕྱག་རྒྱ་བཅའ་སྟེ། རྡོ་རྗེ་ཁུ་ཚུར་གཉིས་བཅིངས་ནས་མཛུབ་མོ་དང་མཐེ་བོང་གུང་མོ་རྣམས་སོ་སོར་ཕན་ཚུན་མངོན་དུ་ཕྱོགས་པས་ནཱ་ག་གེ་སར་གྱི་མེ་ཏོག་དང་འདྲ་བར་གཟུང་བ་ནི་བྱམས་པའིའོ། །ཐལ་མོ་ཡང་དག་པར་སྦྱར་བ་བྱས་ནས་མཛུབ་མོ་དག་གིས་མིང་མེད་མནན་ཏེ་རྣམ་པར་རྒྱས་པའི་ཨུཏྤལའི་རྣམ་པར་གཟུང་བ་ནི་འཇམ་དཔལ་གྱིའོ། །ལག་པ་གཡོན་པ་པང་པར་གན་རྐྱལ་དུ་གཞག་སྟེ་ལག་པ་གཡས་པ་རབ་ཏུ་བརྐྱང་པས་བླང་པོ་ཆེའི་སྣའི་ཚུལ་དུ་བྱས་པ་ནི་སྤོས་ཀྱི་གླང་པོའིའོ། །
གཡོན་པའི་རྡོ་རྗེ་ཁུ་ཚུར་སྟེང་དུ་བཀུག་ལ་དེའི་འོག་ཏུ་ལག་པ་གཡས་པས་བ་དང་འཛིན་པའི་ཚུལ་བྱས་པ་ནི་ཡེ་ཤེས་ཏོག་གིའོ། །ཐལ་མོ་ཡང་དག་པར་སྦྱར་བ་སྙིང་གར་བཟང་སྐྱོང་གིའོ། །ལག་པ་གཉིས་རབ་ཏུ་བརྐྱང་ནས་སོར་མོ་ཐམས་ཅད་རིམ་པས་དགུག་པའི་ཚུལ་བྱ་བ་ནི་རྒྱ་མཚོའི་བློ་གྲོས་ཀྱིའོ། །གཡོན་པའི་རྡོ་རྗེ་ཁུ་ཚུར་སྙིང་གར་བཞག་སྟེ་ལག་པ་གཡས་པས་མཆོག་སྦྱིན་བྱ་བ་ནི་བློ་གྲོས་མི་ཟད་པའིའོ། །གཡོན་པའི་རྡོ་རྗེ་ཁུ་ཚུར་པད་པར་བཞག་ནས་ལག་པ་གཡས་པས་རྡོ་རྗེ་ཁུ་ཚུར་བྱས་ཏེ་མཐེ་བོང་དང་མཛུབ་མོ་དག་གིས་སེ་གོལ་སྦྱིན་པར་བྱ་བ་ནི་སྤོབས་པ་བརྩེགས་པའིའོ། །ལག་པ་གཉིས་ཅུང་ཟད་རྣམས་པར་ཕྱེ་ནས་པདྨའི་ཚུལ་བྱ་བ་ནི་མཐུ་ཆེན་ཐོབ་ཀྱིའོ། །ལག་པ་གཉིས་ཀྱིས་སྡིག་པ་རབ་ཏུ་བསྐྱོད་པའི་ཚུལ་བྱ་བ་ནི་དྲ་བ་ཅན་གྱིའོ། །ལག་པ་གཡས་མཆོག་སྦྱིན་བྱས་ཏེ་གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་དང་མཐེ་བོང་རབ་ཏུ་བརྐྱང་བའི་བར་ཟླ་ཚེས་ཀྱི་རྣམ་པར་བྱས་པ་ནི་ཟླ་འོད་ཀྱིའོ། །ལག་པ་གཉིས་ཀྱིས་བུམ་པའི་ཚུལ་བྱས་ནས་དབང་བསྐུར་བའི་གནས་སུ་གཟུང་བ་ནི་འོད་དཔག་མེད་ཀྱིའོ། །གཡོན་པའི་རྡོ་རྗེ་ཁུ་ཚུར་བསྙེམས་པའི་ཚུལ་གྱིས་དཀུར་བཞག་སྟེ་གཡས་པའི་རྡོ་རྗེ་ཁུ་ཚུར་ནམ་མཁར་ཡོངས་སུ་བསྐོར་བ་ནི་ནམ་མཁའི་མཛོད་ཀྱིའོ། །ལག་པ་གཡོན་པས་ལ་རེག་པའི་རྣམ་པར་བཞག་ནས་གཡས་པའི་རྡོ་རྗེ་ཁུ་ཚུར་གྱི་མཛུབ་མོ་དང་མཐེ་བོང་སྦྱར་བས་འདྲི་བའི་རྣམ་པར་གཟུང་བ་ནི་སྒྲིབ་པ་ཐམས་ཅད་རྣམ་པར་སེལ་བའིའོ། །ཨོཾ་མཻཿ། ཨོཾ་མུཿ། ཨོཾ་གནྡྷ་ཧ་སྟི་ནེ་ཧཱུཾ། ཨོཾ་ཛྙཱ་ན་ཀེ་ཏུ་ཛྙཱ་ན་བ་ཏི་ཧཱུཾ། ཨོཾ་བྷ་དྲ་བ་ཏི་བྷ་དྲ་པཱ་ལེ་ཧཱུཾ། ཨོཾ་སཱ་ག་རེ་མ་ཧཱ་སཱ་ག་རེ་ཧཱུཾ། ཨོཾ་ཀྵ་ཡེ་ཧཱུཾ། ཨཀྵ་ཡ་ཀརྨ་ཨཱ་བ་ར་ཎ་པ་རི་ཤོ་དྷ་ནེ་སྭཱ་ཧཱ། ཨོཾ་པྲ་ཏེ་བྷཱ་ནེ་པྲ་ཏི་བྷཱ་ན་ཀུ་ཊྚེ་ཧཱུཾ། ཨོཾ་སྠཱ་མེ་མ་ཡྷཱ་སྠཱ་མ་ར་ཏི་སྭཱ་ཧཱ། ཨོཾ་སརྦ་ཨ་བཱ་ཡ་ཛི་ཏ་སརྦ་ཨ་པཱ་ཡ་བི་ཤོ་དྷ་ནེ་ཧཱུཾ། ཨོཾ་སརྦ་ཤོ་ཀ་ཏ་མོ་ནི་རྒྷཱ་ན་མ་ཏི་ཧཱུཾ། ཨོཾ་ཛྭ་ལི་ནི་མ་ཧཱ་ཛཱ་ལི་ནེ་ཧཱུཾ། ཨོཾ་ཙནྡྲེ་ཙམྡྲ་བྱ་བ་ལོ་ཀི་ནི་ཏེ་སྭཱ་ཧཱ། ཨོཾ་ཨ་མི་ཏ་པྲ་བྷེ་ཨ་མི་ཏ་མ་ཏི་ཧཱུཾ། ཨོཾ་ག་ག་ནེ་ག་ག་ན་པ་ར་ལོ་ཙ་ནེ་ཧཱུཾ། ཨོཾ་སརྦ་ནི་བ་ར་ཎ་བིཥྐཾ་བྷི་ནི་ཧཱུཾ། ཞེས་པ་ནི་རིམ་པ་ཇི་ལྟ་བ་བཞིན་དུ་བྱམས་པ་ལ་སོགས་པའི་ཕྱག་རྒྱའི་
སྔགས་སོ། །ཙོག་པུའི་འདུག་སྟངས་ལ་ཕོ་ཉ་དང་ཕོ་ཉ་མོ་དང་བྲན་པོ་དང་བྲན་མོའི་ཕྱག་རྒྱ་བཅིང་བར་བྱ་སྟེ། རྡོ་རྗེ་ཁུ་ཚུར་གཉིས་ཀྱི་མཛུབ་མོ་ལྕགས་ཀྱུ་བཅིངས་ནས་མཐེ་ཆུང་ལྕགས་ཀྱུ་ཆེན་པོ་དང༌། ལག་པ་དག་མདུད་པ་དང་གྲི་གུག་གི་རྩེ་མོ་དག་དང་རྒྱབ་དག་ཀྱང་བསྡམ་པར་བྱའོ། །ཨོཾ་བཛྲ་ཨངྐུ་ཤ་ཧཱུཾ་ཛཿ། ཨོཾ་བཛྲ་པཱ་ཤ་ཧཱུཾ་ཧཱུཾ། ཨོཾ་བཛྲ་སྥོ་ཊ་ཧཱུཾ་བཾ། ཨོཾ་བཛྲ་ཨཱ་བེ་ཤ་ཧཱུཾ་ཧོཿ་ཞེས་པ་ནི་ཕྱོ་ཉ་རྡོ་རྗེ་ལྕགས་ཀྱུ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །ཐལ་མོ་སྦྱར་བ་བྱས་ནས་མཛུབ་མོ་དང་གུང་མོའི་ཚིགས་དབུ་མར་གདུབ་བུའི་རྣམ་པར་བཞག་སྟེ་མཐེ་བོ་མཛུབ་མོའི་ལོགས་ཀྱི་རྩ་བར་གཟུང་བ་ནི་སྐུལ་བྱེད་མའིའོ། །རྡོ་རྗེ་བསྡམས་པར་བྱས་ནས་མཛུབ་མོ་གཉིས་སྦྱར་བ་བསྒྲེངས་ཏེ་མཐེ་བོང་གཉིས་སྟེང་དུ་རིན་པོ་ཆེའི་རྣམ་པར་གཟུང་བ་ནི་རིན་ཆེན་སྐར་མདའ་མའིའོ། །ལག་པ་གཉིས་རབ་ཏུ་བརྐྱང་ནས་ཐལ་མོ་སྦྱར་བར་བྱས་པའི་བར་དུ་རང་རང་གི་མཐེ་ཆུང་གི་སེན་མོ་མཐེ་བོང་དག་གིས་བསྒྲིབས་ཤིང་སོར་མོ་ལྷག་མ་རྣམས་སོ་སོར་རྩེ་མོ་སྦྱར་བར་བྱ་སྟེ་གཟུང་བ་ནི་ཁྲོ་གཉེར་ཅན་གྱིའོ། །ལག་པ་གཉིས་སོ་སོ་རེ་རེར་བརྐྱང་ཞིང་རྡོ་རྗེ་ཁུ་ཚུར་བྱས་ནས་མཐེ་ཆུང་དང་མཛུབ་མོ་དག་ལྕགས་སྒྲོག་ལྟར་བཅིངས་ཏེ་ཁྱེར་པ་ནི་རྡོ་རྗེ་ལྕགས་སྒྲོག་མའིའོ། །ཨོཾ་ཙ་ལེ་ཙུ་ལེ་ཙུནྡེ་སྭཱ་ཧཱ། ཨོཾ་རཏྣོ་ལྐེ་རཏྣ་ཛྭཱ་ལི་ནི་སྭཱ་ཧཱ། ཨོཾ་བྷྲྀ་ཀུ་ཊི་བྷྲྀཿསྭཱ་ཧཱ། ཨོཾ་བཛྲ་ཤྀངྑ་ལེ་ཧཱུཾ་ཕཊ་སྭཱ་ཧཱ། ཞེས་པ་ཕོ་ཉ་མོ་རྣམས་ཀྱི་ཕྱག་རྒྱའི་སྔགས་སོ། །ལག་པ་དག་རབ་ཏུ་བརྐྱང་ནས་མཐེ་བོང་གིས་རང་གི་མཐེ་ཆུང་དང་མིང་མེད་ཀྱི་སེན་མོ་མནན་པ་ལག་པ་གཡོན་པའི་དབུས་སུ་ལག་པ་གཡས་པའི་གུང་མོ་དང་མཛུབ་མོ་དག་བཞག་ཅིང་སྙིང་གར་བཟུང་ནས་གཡོན་པའི་ཁུ་ཚུར་གྱི་སྦུབས་ནས་ལག་པ་གཡས་པས་རལ་གྲི་འབྱིན་པའི་ཚུལ་གྱིས་འདྲེན་ཅིང་བཟུང་བ་ནི་མི་གཡོ་བའིའོ། །རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྦྱར་བར་བྱས་ནས་མཐེ་ཆུང་ལྕགས་སྒྲོག་ལྟར་མདུད་མཛུབ་མོ་དག་རབ་ཏུ་བརྐྱང་བས་ཞགས་པ་བྱ་བ་ནི་འདོད་པའི་རྒྱལ་པོའིའོ། །གཡོན་པ་ཁྲོ་བོའི་སོར་མོ་སྙིང་གར་བཞག་སྟེ་གཡས་པ་ཁྲོ་བོའི་ཁུ་ཚུར་དབྱུག་པའི་རྣམ་པས་བསླང་ནས་གཟུང་བ་ནི་དབྱུག་པ་སྔོན་པོའིའོ།།
གཡོན་པའི་རྡོ་རྗེ་ཁུ་ཚུར་སྙིང་གར་བཞག་པའི་རྡོ་རྗེ་ཁུ་ཚུར་རབ་ཏུ་བསྣུན་པའི་ཚུལ་གྱིས་བསླང་བ་ནི་སྟོབས་པོ་ཆེའིའོ། །འདོད་པའི་རྒྱལ་པོའི་ཕྱག་རྒྱ་བཞིན་ལ་མཛུབ་མོ་གཉིས་བསླང་བ་ནི་གནོད་མཛེས་རྒྱལ་པོའིའོ། །ལག་པ་གཉིས་པོ་དག་གི་མཐེ་ཆུང་དང་མཐེ་བོང་ཕན་ཚུན་ལྕགས་སྒྲོག་ལྟར་བྱས་ནས་སོར་མོ་ལྷག་མ་རྣམས་བ་དན་གསུམ་པའི་རྣམ་པས་སྟེང་དུ་བརྐྱང་སྟེ་གཡོ་བ་དང་བཅས་པས་ཧཱུཾ་ཞེས་བྱ་བ་ནི་རྡོ་རྗེ་ས་འོག་གིའོ། །བྲན་པོ་དེ་རྣམས་ཀྱི་ཕྱག་རྒྱའི་སྔགས་ཀྱི་ཚིག་རྣམས་ནི་འདི་དག་སྟེ། ཨོཾ་ཨ་ཙ་ལ་ཧཱུཾ་ཧཱུཾ། ཨོཾ་ཊཀྐི་ཧཱུཾ་ཛཿ། ཨོཾ་ནའི་ལ་ད་ཎྜ་མ་ཧཱ་ད་ཎྜ་ཧཱུཾ། ཨོཾ་ཀྲོ་དྷ་ཛཱུཾ་ཛཿ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲི་ཧྞཱ་པ་ཡ་ཧཱུཾ། ཨཱ་ནཱ་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུཾ་ཕཊ། ཨོཾ་བཛྲ་པཱ་ཏཱ་ལ་བྷཉྫ་བྷཉྫ་ཧཱུཾ། པད་ཀོར་གྱི་གར་སྔོན་དུ་འགྲོ་བས་རྡོ་རྗེ་ཐལ་མོ་སྤྱི་བོར་བཟུང་ཞིང་སྙིང་གར་བླངས་ཏེ་མེ་ཏོག་འབུལ་བའི་ཚུལ་བྱ་བ་ནི་མེ་ཏོག་མའིའོ། །དེ་ཁོ་ན་བཞིན་དུ་རྡོ་རྗེ་ཁུ་ཚུར་གཉིས་རྒྱབ་བསྟན་ཏེ་གུང་མོའི་སོར་མོ་བླངས་ནས་སྤོས་འབུལ་བའི་ཚུལ་བྱ་ཞིང་ལག་པ་བསྐོར་བ་ནི་བདུག་སྤོས་མའིའོ། །དེ་ཁོ་ན་བཞིན་དུ་རྡོ་རྗེ་བསྡམས་པ་ལས་བྱུང་བའི་མཐེ་བོད་གཉིས་བསླང་སྟེ་སྣང་གསལ་འབུལ་བའི་ཚུལ་བྱ་ཞིང་གར་བསྐོར་བ་ནི་སྣང་གསལ་མའིའོ། །རྡོ་རྗེ་བསྡམས་པའི་མཐིལ་བསྟན་ཞིང་མཐེ་བོང་གདུ་བུ་ལྟར་བྱ་ཞིང་མཐེ་ཆུང་རབ་ཏུ་བརྐྱང་བའི་རྩེ་བའི་སྦྱར་བས་ཡོངས་སུ་བསྐོར་ཞིང་དྲི་ཆབ་འབུལ་བའི་ཚུལ་གྱི་གར་སྔོན་དུ་འགྲོ་བའི་ལག་པ་གཉིས་ཀྱིས་བྱུག་པར་བྱ་བ་ནི་དྲི་ཆབ་མིའིའོ། །བྲན་མོ་དེ་རྣམས་ཀྱི་ཕྱག་རྒྱའི་སྔགས་ཀྱི་ཚིག་རྣམས་ནི་འདི་དག་ཏུ་འགྱུར་རོ། །ཨོཾ་བཛྲ་པུ་ཥྤེ་ཧཱུཾ། ཨོཾ་བཛྲ་དྷཱུ་པེ་ཧཱུཾ། ཨོཾ་བཛྲ་དའི་པེ་ཧཱུཾ། ཨོཾ་བཛྲ་གནྡྷེ་ཧཱུཾ། རོལ་པའི་འདུག་སྟངས་ལ་འཇིག་རྟེན་སྐྱོང་བ་ལ་སོགས་པ་རྣམས་ཀྱི་ཕྱག་རྒྱ་བྱ་སྟེ། ལག་པ་གཡོན་པའི་རྡོ་རྗེ་ཡང་དག་པར་བསྟན་ནས་ལག་པ་གཡས་པའི་རྡོ་རྗེ་དཀུའི་གནས་སུ་བཟུང་སྟེ་བསྟན་པ་ནི་བརྒྱ་བྱིན་གྱིའོ། །ལག་པ་གཡས་པའི་མཛུབ་མོ་ཐབ་ཀྱི་རྣམ་པས་བཀུག་ནས་གུང་མོའི་རྩེ་མོའི་ཚིགས་གསུམ་པར་བཟུང་སྟེ་མཐེ་བོང་མཛུབ་མོའི་ལོགས་ལ་བརྟེན་ནས་བསྟན་པ་ནི་མེ་ལྷའིའོ། །ལག་པ་
དག་ཁ་ནང་དུ་མངོན་པར་ཕྱོགས་པའི་རྡོ་རྗེ་བསྡམས་པ་བྱས་ནས་ནང་དུ་མཐེ་བོང་ཟུང་དང་ཕྱི་རོལ་དུ་མིང་མེད་ཀྱི་རྩེ་མོ་བྱས་ཏེ་སྙིང་གར་བཟུང་བ་ནི་གཤིན་རྗེའིའོ། །ལག་པ་གཡས་པ་ཁུ་ཚུར་བྱས་ལ་གུང་མོ་དང་མཛུབ་མོ་བཀུག་ནས་ལག་པ་གཡོན་པ་དཀུའི་གནས་སུ་བཞག་སྟེ་རལ་གྲིའི་རྣམ་པར་གཟུང་བ་ནི་བདེན་བྲལ་གྱིའོ། །ལག་པ་གཡས་པའི་མཛུབ་མོ་དང་མཐེ་བོང་སྦྱར་ནས་གཡོན་པའི་ཁུ་ཚུར་སྙིང་གར་བཟུང་སྟེ་ཞགས་པའི་ཕྱག་རྒྱ་བ་ནི་ཆུ་ལྷའི་འོ། །གཡོན་པའི་ཁུ་ཚུར་གུང་མོའི་རྩེ་མོ་དང་ལྡན་པ་ལ་མཛུབ་མོ་འཁྱིལ་བའི་རྣམ་པས་ཚིགས་གསུམ་པར་གཟུང་སྟེ་མངོན་དུ་ཕྱོགས་པས་རབ་ཏུ་བརྐྱང་སྟེ་དཀུའི་གནས་སུ་ལག་པ་གཡས་པ་བཞག་ནས་བསྟན་པ་ནི་རླུང་ལྷའིའོ། །ལག་པ་གཉིས་ནང་དུ་མངོན་པར་ཕྱོགས་པའི་རྡོ་རྗེ་བསྡམས་པ་བྱས་ལ་དེའི་རྒྱབ་ཏུ་མཐེ་ཆུང་གཉིས་ཀྱི་རྩེ་མོ་མིང་མེད་སོ་སོ་ལ་ཡང་དག་པར་སྦྱར་བ་ནི་ལུས་ངན་པོའིའོ། །ལག་པ་གཉིས་གཅིག་ཏུ་སྦྱར་ཏེ་ཐལ་མོ་སྦྱར་བ་བྱས་ལ་མཐེ་ཆུང་དང་མིང་མེད་མཐིལ་དུ་རྡོ་རྗེ་བསྡམས་པ་བྱ་ཞིང་མཐེ་བོང་ཟུང་གུང་མོ་ལ་བརྟེན་ནས་གུང་མོའི་རྩེ་མོ་མཛུབ་མོ་གཉིས་རྡོ་རྗེའི་རྣམ་པས་བཀུག་སྟེ་གཟུང་བ་ནི་དབང་ལྡན་གྱིའོ། །ལག་པ་ཐལ་མོ་སྦྱར་བའི་རྣམ་པས་ཡང་དག་པར་བཟུང་སྟེ་སྟེང་དུ་བལྟ་བ་ནི་ཚངས་པ་ལ་སོགས་པ་རྣམས་ཀྱིའོ། །ལག་པ་གཉིས་གཅིག་ཏུ་སྦྱར་ནས་རྣམ་པར་ཕྱེ་ལ་སོར་མོའི་རྩེ་མོ་རྣམས་ཕན་ཚུན་ཡང་དག་པར་སྦྱར་ནས་མཐེ་བོང་ཟླུམ་པོའི་རྣམ་པར་བྱ་ཞིང་འོག་ཏུ་བལྟ་བ་ནི་སའི་ལྷ་མོ་ལ་སོགས་པ་རྣམས་ཀྱི་ཕྱག་རྒྱའོ། །དེ་ནས་ཕྱག་རྒྱའི་སྔགས་ཀྱི་ཚིག་རྣམས་སུ་འགྱུར་ཏེ། ན་མོ་བཛྲ་ལཱ་སྱ་དེ་ཤི་དེ་ཤི་བཛྲ་པཱ་ཎི་ར་ཀྵ་ར་ཀྵ་སྭཱ་ཧཱ། ཨོཾ་ཨ་གནེ་ཨེ་ཧྱེ་ཧི་ཀ་པི་ལ་ཨཱ་ཀ་པི་ལ་ཛྭ་ལ་ཨཱ་ཀ་པི་ལ་ཛྭ་ལ་ཧ་ཧ་ཤི་ཁི་ཏོ་ལི་བི་རཱུ་པ་ཨཱ་ཀྵ་སྭཱ་ཧཱ། ཨོཾ་ཡ་མཱ་ཡ་སྭཱ་ཧཱ། ཨོཾ་སརྦ་བྷཱུ་ཏ་བྷ་ཡངྐ་ར་ཀུ་རུ་ཀུ་རུ་སྭཱ་ཧཱ། ཨོཾ་ཏྲི་ཏྲི་པུ་ཊ་དྲི་དྲི་ཤི་ཁི་ཏོ་ལི་བི་རཱུ་པ་ཨ་ཀྵ་སྭཱ་ཧཱ། ཨོཾ་སུ་ས་ཁཱ་ཁ་ཁུ་ཁཿ་སྭཱ་ཧཱ། ཨོཾ་ཀུ་བཻ་རཱ་ཡ་སྭཱ་ཧཱ། ཨོཾ་ཥྫྷུཾ་ཥྫྷུཾ་ཤི་བ་སྭཱ་ཧཱ། ཞེས་པ་ནི་བརྒྱ་བྱིན་ལ་སོགས་པ་བརྒྱད་པོ་རྣམས་ཀྱི་ཕྱག་རྒྱའི་སྔགས་སོ། །ཨོཾ་ཨཱུ་རྡྷ་པྲ་ཏྨ་ཎེ་སྭཱ་ཧཱ། ཨོཾ་སཱུ་ཪྻ་གྲ་ཧ་ཨ་དྷི་
པ་ཏ་ཡེ་སྭཱ་ཧཱ། ཨོཾ་ཙནྡྲ་ན་ཀྵ་ཏྲ་ཨ་དྷི་པ་ཏ་ཡེ་སྭཱ་ཧཱ། ཞེས་པ་ནི་ཆངས་པ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །ཨོཾ་ཨ་དྷྭཱཿ་པྲྀ་ཐི་བྱཻ་སྭཱ་ཧཱ། ཨོཾ་ཨ་སུ་རེ་བྷྱཿ་སྭཱ་ཧཱ། ཨོཾ་ནཱ་གེ་བྷྱ་སྭཱ་ཧཱ། ཞེས་པ་ནི་སའི་ལྷ་མོ་ལ་སོགས་པ་རྣམས་ཀྱི་ཕྱག་རྒྱའི་སྔགས་སོ། །དེ་ལྟར་སྒྱུ་འཕྲུལ་དྲ་བ་ལས་གསུངས་པ་སྟེ་དཀྱིལ་འཁོར་ཐམས་ཅད་ཀྱི་ཐུན་མོང་པའི་འདུག་སྟངས་དང་ཕྱག་རྒྱ་དང་སྔགས་ཀྱི་ཚིག་རྣམས་ཀྱིས་ངེས་པ་ཉིད་བཅིངས་པའོ། །དེ་ནས་དཀྱིལ་འཁོར་གྱི་ས་གཞི་དྲིའི་ཆུས་བྱུགས་ལ་མེ་ཏོག་དང་སྤོས་ལ་སོགས་པ་དང༌། ཟུར་བཞི་དང་སྒོ་བཞིར་སྤོས་ཕོར་ལ་སོགས་པ་དང་གར་དང་གླུ་ལ་སོགས་པས་ཡང་དག་པར་མཆོད་ནས་ལག་པས་རེག་ཅིང་དཀྱིལ་འཁོར་གྱི་བདག་པོའི་སྔགས་བརྒྱ་རྩ་བརྒྱད་དང་ཡི་གེ་བརྒྱ་པ་ལན་བདུན་ཡོངས་སུ་བཟླས་ཏེ་དེ་ཉིད་དུ་ལྷའི་འཁོར་ལོ་སྤྲོ་ཞིང་བསྡུ་བས་ཉལ་བར་བྱའོ་ཞེས་པས་ཡོངས་སུ་གཟུང་བའི་ཆོ་གའོ།། །།དེ་ནས་སྔ་བར་ལངས་ལ་རྡོ་རྗེ་འཆང་གི་གོ་འཕང་ལ་དགོད་པའི་ཆེད་དུ་སླར་ཡང་བགེགས་མེད་པར་བྱའོ་ཞེས་རྣམ་པར་བསམ་སྟེ་སྐད་ཅིག་གིས་སྟོང་པ་ཉིད་ཀྱི་རྗེས་ལ། རེ་ཕས་སྔོན་དུ་ཉི་མ་རྣམས་པར་བསྒོམས་ནས། །ཉི་དེར་ཧཱུཾ་བྱུང་སྣ་ཚོགས་རྡོ་རྗེ་སྟེ། །རྡོ་རྗེ་དེ་ཉིད་ལས་ནི་ར་བ་དང༌། །གུར་བཅིང་བ་ཡང་རྣམ་པར་བསྒོམ་པ་ཉིད། །ཅེས་པ་འདིས་རྡོ་རྗེའི་གྲུལ་སོགས་པ་བསྒོམས་ཏེ། དེའི་དབུས་སུ་རང་ཉིད་དཀྱིལ་འཁོར་གྱི་དབང་ཕྱུག་གི་རྣལ་འབྱོར་དང་ལྡན་པས་སྙིང་གར་གནས་པའི་ཧཱུཾ་ཡིག་ལས་རྣམ་པར་སྤྲོས་པའི་འོད་ཟེར་གྱིས་ཕྱོགས་བཅུའི་བགེགས་ཐམས་ཅད་བཀུག་ནས་ཧཱུཾ་ཡིག་ལས་སྤྲོས་པའི་ཁྲོ་བོ་བཅུ་ལ་གཏད་པར་བྱའོ། །ཁྲོ་བོ་དེ་རྣམས་ཀྱང་སྲིད་དུ་སོར་བཅོ་བརྒྱད་པའམ། སོར་བཅུ་གཉིས་པའམ། སོར་བརྒྱད་པ་རིམ་པ་ཇི་ལྟ་བ་བཞིན་སྦོམས་སུ་སོར་དྲུག་པ་དང༌། བཞི་པ་དང་གསུམ་པ་སེང་ལྡེང་ངམ་རུས་པའམ་ལྕགས་ལས་བྱས་པའི་ཕུར་བུ་སྣོད་གསར་པར་གནས་ཤིང་ཡུངས་ཀར་དང་ཙནྡན་དཀར་པོ་བྱུགས་པ་ཚོན་སྣ་ལྔའི་སྲད་བུས་དཀྲིས་ཤིང་ཡང་དག་པར་མཆོད་པ་ཡི་གེ་གསུམ་གྱིས་སྔགས་ཤིང༌། མེ་ཏོག་དམར་པོའི་ཕྲེང་བ་བཅིངས་པའི་ཕུར་བུ་བཅུ་པོ་དེ་རྣམས་ལྟེ་བའི་
འོག་མན་ཆད་རྩེ་གཅིག་པའི་རྣམ་པར་རྣོ་བ་དང༌། སྟེང་དུ་བདག་ཉིད་ཀྱི་གཟུགས་བརྙན་ཁྲོ་བོའི་རྣམ་པ་བསྐལ་པའི་མཐའི་མེ་ལྟར་འབར་བ་རྣམ་པར་བསྒོམས་ཏེ། གཡོན་པའི་རྡོ་རྗེ་ཁུ་ཚུར་གྱིས་བཟུང་ཞིང་ཕྱག་གཡས་པས་གཙོ་བོའི་མཚན་མ་ཡོངས་སུ་གྱུར་པའི་རྡོ་རྗེའི་ཐོབ་མེ་ཏོག་དམར་པོའི་ཕྲེང་བས་སྤྲས་པ་བཟུང་སྟེ། སྒྲ་རིང་པོར་བརྗོད་པའི་ཧཱུཾ་ལས་བྱུང་བའི་ཁྲོན་པ་བཅུར་དབང་པོ་ལ་སོགས་པ་བཅུའི་གཟུགས་བརྙན་གྱི་བགེགས་འཁོར་དང་བཅས་བ་རྣམས་རབ་ཏུ་བཅུག་ལ་སྤྱི་བོར་ཕུར་བུས་གདབ་པར་བྱའོ། །སྔགས་ནི་འདི་ཡིན་ཏེ། ཨོཾ་ཨཱཿ་ཧཱུཾ་ཡ་མཱ་ནྟ་ཀྲྀ་ཏ་སརྦ་དུཥྚ་ཨིནྡྲ་ཨུ་པེནྡྲའ་ན། ས་པ་རི་ཝཱ་རཱ་ན་ཀའི་ལ་ཡ་ཧཱུཾ་ཕཊ། ཨོཾ་ཨཱཿ་ཧཱུཾ་པྲ་ཛྙཱ་ནྟ་ཀྲྀ་ཏ་སརྦ་དུ་ཥྚ་ཡ་མཱ་ན་ས་པ་རི་ཝཱ་རཱ་ན་ཀའི་ལ་ཡ་ཧཱུཾ་ཕཊ། ཨོཾ་ཨཱཿ་ཧཱུཾ་པདྨཱ་ནྟ་ཀྲྀ་ཏ་སརྦ་དུཥྚ་ནཱ་གཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་བིགྷྣཱནྟ་ཀྲྀ་ཏ་སརྦ་དུཥྚ་ཀུ་བེ་རཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཨ་ཙི་ལ་སརྦ་དུཥྚ་ཨཱི་ཤ་ནཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ཊཀྐི་རཱ་ཛ་སརྦ་དུཥྚ་ཨགྣི་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་ནཱི་ལ་དནྜ་སརྦ་དུཥྟ་ནཻ་རི་ཏྱཱ་ན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿཧཱུཾ་མ་ཧཱ་བ་ལ་སརྦ་དུ་ཥྚ་བཱ་ཡུན་ས་པ་རི་ཝཱ་རཱ་ན་ཀཱི་ལ་ཡ་ཧཱུཾ་ཕཊ། ཨོཾ་ཨཱཿ་ཧཱུཾ་ཨུཥྞའི་ཥ་ཙཀྲ་བརྟིན་སརྦ་དུ་ཥྚ་ཨ་རྐ་ཙནྡྲ་པ་ཏི་མ་ཧཱ་ན་ས་པ་རི་ཝཱ་རཱ་ན་ཀའི་ལ་ཡ་ཧཱུཾ་ཕཊ། ཨོཾ་ཨཱཿ་ཧཱུཾ་སུ་མྦྷ་རཱ་ཛ་སརྦ་དུཥྚ་བེ་མ་ཙི་པྲྀ་ཐི་བི་དེ་བ་ཏཱཿས་པ་རི་ཝཱ་རཱ་ན་ཀའི་ལ་ཡ་ཧཱུཾ་ཕཊ། ཅེས་པའི་སྔགས་རྣམས་ཀྱིས་དཀྱིལ་འཁོར་གྱི་ཁང་པའི་ཕྱིའི་ཕྱོགས་བཅུ་པོ་རྣམས་སུ་འཇིམ་པའི་གོང་བུ་བྱས་པར་སློབ་དཔོན་གྱིས་གདབ་ཅིང་བརྡུང་བར་བྱ་སྟེ། མི་ནུས་ན་སྒོའི་སློབ་དཔོན་རྣམས་ཀྱིས་སོ། །གཙུག་ཏོར་གྱི་ནི་ཤར་གྱི་ཕུར་བུ་ལས་ཤར་དུ་སྟེ། གནོད་མཛེས་ཀྱི་ནི་ནུབ་ཀྱི་ཕུར་བུ་ལས་ནུབ་ཏུ་གདབ་ཅིང་བརྡུང་བར་བྱའོ། །ཕུར་བུའི་གཟུགས་བརྙན་གྱི་ཁྲོ་བོ་རྣམས་གདུགས་དང་རྒྱལ་མཚན་དང་བ་དན་ལ་སོགས་པས་མཉེས་པར་བྱ་ཞིང༌། ཉི་མ་སོ་སོ་ལ་ཐུན་གསུམ་དུ་གཏོར་མ་དང་ལྷ་བ་ཤོས་དང་རོལ་མོ་དང་མེ་ཏོག་དང་བདུག་སྤོས་ལ་སོགས་པ་རྣམས་ཀྱིས་མཆོད་པར་བྱའོ། །
ཡང་ན་སེང་ལྡེང་ལ་སོགས་པའི་ཕུར་བུ་མེད་ན་ཡང་ཇི་ལྟར་བརྗོད་པའི་བསྒོམ་པ་ཁོ་ནས་ཕུར་བུ་གདབ་པ་དང་བརྡུང་བར་བྱ་སྟེ་ལག་པ་གནས་རྐྱལ་དུ་གནས་པ་བསྒྱུར་ནས་ཨོཾ་བཛྲ་ཧཱུཾ་ཞེས་བརྗོད་ཅིང་ས་གཞིར་བགེགས་ལ་བསྣུན་ཏེ་དེ་ལྟར་ལྷག་པར་མོས་པར་བྱའོ་ཞེས་པ་བགེགས་ལ་ཕུར་བུས་གདབ་པའི་ཆོ་གའོ།། །།དེའི་རྗེས་ལ་དཀྱིལ་འཁོར་ལ་འཆད་པར་འགྱུར་བའི་ཆོ་གས་དཀྱིལ་འཁོར་ཇི་ལྟ་བའི་རྗེས་སུ་འབྲངས་ཏེ་ཐིག་འདེབས་པ་དང་འབྲི་བའི་དཀྱིལ་འཁོར་གྱིས་གཞིར་བསྡད་ལ་དབས་སུ་དྲིའི་མཎྜལ་བྱས་པར་པཾ་ལས་བྱུང་བའི་སའི་ལྷ་མོ་རྣམ་པར་བསྒོམས་ནས་ལག་པ་གཡས་པར་ཟླ་བ་ལ་ཧཱུཾ་གསུམ་བསམས་ཏེ། སོར་མོའི་རྩེ་མོ་ས་ལ་ལན་གསུམ་བསྣུན་པ་དང་དེའི་སྒྲ་དང་ཧཱུཾ་གི་འོད་ཟེར་རྣམས་ཀྱིས་ཡང་དག་པར་བསྐུལ་བ་ལས་འཐོན་པའི་སའི་ལྷ་མོ་ཡེ་ཤེས་སེམས་དཔའ་དང་གཅིག་ཏུ་གྱུར་པ་དགྱེས་པའི་ཐུགས་ཅན་སེར་མོ་ཞི་ཞིང་གོས་དཀར་མོ་མནབས་པ་རྒྱན་ཐམས་ཅད་དང་ལྡན་པ། ཞལ་གཅིག་ཕྱག་གཉིས་མ་གཡོན་པས་བུམ་པ་བཟང་པོ་འཛིན་ཅིང་ཅིག་ཤོས་ཀྱིས་མི་འཇིགས་པ་མཛད་པ་མདུན་དུ་གནས་པ་ལ་མཆོད་ཡོན་ལ་སོགས་པ་སྔོན་དུ་འགྲོ་བས་ཡང་དག་པར་མཆོད་པས་དེ་མ་ཐག་ཏུ། ཨོཾ་ཚུར་བྱོན་ཚུར་བྱོན་ས་ཡི་ནི། །ལྷ་མོ་ཆེན་མོ་འཇིག་རྟེན་ཡུམ། །རིན་ཆེན་ཀུན་གྱིས་རབ་གང་མ། །བཟང་པོའི་རྒྱན་གྱིས་རྣམ་བརྒྱན་མ། །དོ་ཤལ་རྐང་གདུབ་སྒྲ་ལྡན་མ། །རྡོ་རྗེ་སེམས་དཔའ་རབ་མཆོད་མ། །མཆོད་ཡོན་འདི་ནི་བཞེས་ནས་སུ། །དཀྱིལ་འཁོར་འདི་ནི་ལེགས་གྲུབ་མཛོད། །ཧྲི་ཧཱི་ཧཱི་ཧཱི་ཧཾ་སྭཱ་ཧཱ། ཞེས་ལན་གསུམ་བརྗོད་ལ་ལྷག་པར་གནས་པར་བྱའོ། །དེ་ཡང་དེ་བཞིན་དུ་གྱིས་ཤིག་ཅེས་གསུངས་ནས་དེ་ཉིད་དུ་ཐིམ་པར་བསམ་མོ་ཞེས་པ་ནོར་འཛིན་མ་ལྷག་པར་གནས་པའི་ཆོ་གའོ།། །།དེ་ནས་དཀྱིལ་འཁོར་གྱི་ས་གཞིར་བདུད་རྩི་ལྔ་དང་བཅས་པའི་དྲི་བཟངས་ལ་ཨོཾ་ཨཱཿཧཱུཾ་གིས་སྔགས་པས་ཉེ་བར་བྱུགས་ཅིང་མེ་ཏོག་བཟང་པོ་གཅལ་དུ་བཀྲམ་དུ་བཅུག་སྟེ། ཕྱི་དྲོའི་དུས་སུ། ཁྲུས་དང་གཙང་སྤྲ་དྲི་ཞིམ་ལུས། །སྣ་ཚོགས་རྒྱན་གྱིས་རྣམ་པར་བརྒྱན། །དཀར་པོ་གསར་བའི་གོས་འཛིན་པ། །
དེ་ཡི་གཙུག་ཏོར་རྣམ་པར་བརྒྱན། །ཞེས་པའི་གསུང་གི་ཕྱིར་སྦྱིན་པའི་བདག་པོས་ཕུལ་བའི་དོ་ཤལ་དང་རྐང་གདུབ་དང་དཔུང་རྒྱན་དང་ལག་གདུབ་དང༌། རྐེད་རྒྱན་དང༌། སོར་གདུབ་ལ་སོགས་པའི་རྒྱན་གྱིས་བརྒྱན་ནས། རིམ་པ་ཇི་ལྟ་བ་བཞིན་དུ་ཨོཾ་ཨཱཿ་ཧཱུཾ་སྭཱ་ཧཱ། ཨོཾ་བཛྲ་ཨུ་ཥྞཱི་ཥ་ཧཱུཾ་ཕཊ། ཅེས་པ་དག་ལན་བདུན་བཟླས་པའི་གསེར་གྱི་དབུ་རྒྱན་དག་གོས་ལ་སོགས་པས་བརྒྱན་ཅིང༌། དཀྱིལ་འཁོར་གྱི་སའི་དབུས་སུ་འདུག་ལ་ཤར་དུ་མངོན་པར་ཕྱོགས་པའམ་ཕྱོགས་གཞན་ལ་ནི་དཀྱིལ་འཁོར་གྱི་ཤར་ནུབ་ཏུ་མངོན་པར་ཕྱོགས་པས་འདུག་སྟེ། འཁོར་ལོའི་དབང་ཕྱུག་གི་རྣལ་འབྱོར་དང་ལྡན་པས་ལྷ་རྣམས་ཀྱི་གནས་སུ་ཙནྡན་ལ་སོགས་པའི་མཎྜལ་བྱས་ལ། ཇི་ལྟ་བར་དམ་ཚིག་གི་འཁོར་ལོ་རྣམ་པར་བསྒོམས་ནས། དེར་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་ཡེ་ཤེས་ཀྱི་དཀྱིལ་འཁོར་རབ་ཏུ་བཅུག་སྟེ། མཆོད་པ་དང་བསྟོད་པ་དང་བདུད་རྩི་མྱང་བ་ཇི་སྙེད་པ་བྱའོ། །བསྒོམས་པའི་དཀྱིལ་འཁོར་གྱི་ཕྱི་རོལ་དུ་ཤར་ལ་སོགས་པའི་ཕྱོགས་སུ་གནས་པའི་བུམ་པ་རྣམས་སམ། ཕྱོགས་གཞན་ལ་ནི་བྱང་དུ་ཕྱོགས་པས་དབང་ལྡན་གྱི་མཚམས་ན་གནས་པའི་བུམ་པ་རྣམས་ལྷག་པར་གནས་པར་བྱའོ། །དེ་ལ་ཞི་བ་ལ་སོགས་པའི་དབྱེ་བས་དེ་རྣམས་ཀྱི་མཚན་ཉིད་བརྗོད་པར་བྱ་སྟེ། དེ་ལྟར་ཡང་ཞི་བ་དང་རྒྱས་པ་དག་གི་བུམ་པའི་ལྟོ་བའི་ཟླུམས་སུ་ནི་སོར་བཅུ་དྲུག་གོ །ལྟོ་བའི་འོག་ནས་ཁ་དང་མཆུའི་བར་ཇི་སྲིད་པར་དཔངས་སུ་ནི་སོར་ཉི་ཤུའོ། །འོག་ཏུ་འཕྱར་བའི་མཆུའི་ཚད་ནི་སོར་གཉིས་སོ། །མགྲིན་པ་ནི་སོར་དྲུག་གོ །མཆུའི་མཐའ་ནས་མཆུའི་མཐའི་བར་ཇི་སྲིད་པའི་ཁ་ནི་སོར་བརྒྱད་དོ། །སོར་བརྒྱད་ཀྱི་ཆ་གཉིས་ནི་ཁའི་བུག་པའོ། །ཆ་གཅིག་གིས་ནི་མཆུ་གཉིས་ཀྱི་ཞེང་ངོ༌། །དབྱེ་བ་དང་བསྐྲད་པ་དག་གི་བུམ་པའི་ལྟོ་བའི་ཟླུམ་པོ་ནི་སོར་བཅུ་གཉིས་སོ། །དཔངས་སུ་ནི་སོར་ཉི་ཤུ་རྩ་བཞིའོ། །མགྲིན་པ་ཡོན་པོ་སྟེ་སོར་བརྒྱད་དོ། །ཁ་ནི་སོར་དྲུག་གོ །མཆུ་དག་ནི་སོར་རེ་རེའོ། །དབང་དང་དགུག་པ་དག་གི་བུམ་པ་ནི། བཟོ་
པོས་ཇི་ལྟར་བྱས་པའོ། །རེངས་པའི་བུམ་པ་ནི་ཐུང་བ་སྟེ་ཟླུམས་དང་དཔངས་སུ་སོར་བཅུ་དྲུག་གོ །མགྲིན་པ་ནི་སོར་བཞིའོ། །ཁ་ནི་སོར་དྲུག་གོ །མཆུ་ནི་སྦོམ་ཞིང་སོར་གཉིས་པའོ། །ལས་ཐམས་ཅད་པ་ལ་ནི་ཞི་བ་ལ་སོགས་པའི་ལས་ལ་བརྗོད་པའི་བུམ་པ་རྣམས་གཟུང་བར་བྱའོ། །རྩ་བ་དང་ནི་ནག་པོ་མེད། །མཆུ་འཕྱང་མགྲིན་རིངས་ལྟོ་བ་ཆེ། །ཞེས་རྒྱུད་གཞན་ལས་གསུངས་པ་ཡང་སོར་བཅུ་དྲུག་པ་ལ་སོགས་པ་རྣམས་ལ་རིག་པར་བྱའོ། །དེའི་ཕྱིར་མཚན་ཉིད་དང་ལྡན་པ་གསུངས་པ། གསེར་རམ་དངུལ་ལམ་ཟངས་མ་འམ། །ཡང་ན་ས་ལས་བྱས་པ་ཉིད། །ཇི་ལྟར་རྙེད་པའི་བུམ་པ་ནི། །བརྟུལ་ཞུགས་ཅན་གྱིས་དཀྱིལ་འཁོར་དགོད། །བྱི་རུ་དང་ནི་གསེར་དང་དངུལ། །པདྨ་རཱ་ག་མུ་ཏིག་སྟེ། །རིན་ཆེན་ལྔར་ནི་ལྡན་པ་རྣམས། །བུམ་པའི་ལྟོ་བར་རབ་ཏུ་གཞུག །ནས་དང་གྲོ་དང་མོན་སྲན་དང༌། །ཏིལ་དང་དེ་བཞིན་སོ་བ་སྟེ། །འབྲུ་ལྔ་རྣམས་སུ་བསྟན་པ་ནི། །བུམ་པའི་ལྟོ་བར་གཞག་པར་བྱ། །བྲྀ་ཧ་ཏི་དང་ཀཎྜ་ཀ་རི། །ཧ་ས་དེ་བ་ཨ་པ་ར་ཛི་ཏ། །དཎྜོ་ད་པ་ལའི་རྩ་བ་སྟེ། །སྨན་ལྔ་རྣམས་ཀྱང་གཞུག་པར་བྱ། །ཨ་མྲ་ཨུ་དུམྦཱ་ར་དང༌། །ཨ་ཤོ་ཀ་དང་ཨ་ཤྭ་དྠ། །དེ་བཞིན་ནཱ་ག་གེ་སར་ཏེ། །ཡལ་འདབ་ལྔ་རྣམས་བྱིན་པ་ཡིས། །བུམ་པའི་ཁ་ནི་བརྒྱན་པར་བྱ། །བུམ་པ་རྣམས་ཀྱི་མགྲིན་པ་ནི། །གོས་དཀར་ཆེན་པོས་བཅིངས་བར་བྱ། །ཆོ་ག་མཁས་པས་གོས་སྟེང་དུ། །སྲད་བུ་ལྔ་རྣམས་དགོད་པར་བྱ། །དཀྱིལ་འཁོར་པ་ནི་ཐམས་ཅད་ཀྱི། །ས་བོན་ཡང་ན་མཚན་མ་འང་རུང༌། །མངོན་པར་འདུས་བྱས་ཙནྡན་སོགས། །མཁས་པས་བུམ་པའི་ལོགས་ལ་བྲི། །རིན་ཆེན་ལ་སོགས་ལྡན་པར་འདིར། །རང་རང་རྒྱུད་ལས་མངོན་བསྔགས་པའོ། །ཆུ་དང་ལྡན་པ་བློ་ལྡན་གྱིས། །ལྷ་ཡི་གྲང་བཞིན་དགོད་པར་བྱ། །ཞེས་པ་དེ་ལྟ་བུའི་རང་བཞིན་ཅན་གྱི་བུམ་པ་རྣམས་བླ་རེའི་འོག་ཏུ་འཆད་པར་འགྱུར་བའི་རྡུལ་ཚོན་གྱི་དཀྱིལ་འཁོར་ལ་མཚན་མ་དགོད་པའི་རིམ་པས་སོ་སོར་རེ་རེར་དྲི་བཟང་པོ་ལ་སོགས་པའི་མཎྜལ་གྱི་སྟེང་དུ་རྗེས་སུ་མཐུན་པའི་གདན་ལ་དཀྱིལ་འཁོར་གྱི་རྣམ་པའམ་
གྲལ་དུ་དངར་ཏེ། ཨོཾ་བཛྲ་ཤི་ཁ་ར་རུ་ཊ་མ་ཊ་དི་ཤཾ་བནྡྷ་ཧཱུཾ་ཞེས་ལན་བདུན་བཟླས་པའི་སྲད་བུ་དཀར་པོ་སོགས་ཀྱིས་མགྲིན་པར་དཀྲིས་ནས་མདུན་དུ་དགོད་པར་བྱ་ཞིང༌། དང་པོར་སྟོང་པ་ཉིད་དུ་བྱས་པའི་མཐར་བཾ་གྱི་ཡི་གེ་ལས་རིན་པོ་ཆེའི་རང་བཞིན་དུ་བསྒོམ་པར་བྱའོ། །ཇི་སྐད་གསུངས་པའི་རིན་པོ་ཆེ་ལྔ་རྣམས་མེད་ན་རིན་པོ་ཆེ་གཞན་རབ་ཏུ་གཞུག་པར་བྱའོ། །ཁ་ཅིག་ཏུ་ནི་སོ་བའི་གནས་སུ་སྲན་མ་སྟེ་ཡལ་འདབ་ལྔ་རྣམས་མེད་ན་ཆོ་ག་རྗེས་སུ་ཤེས་པ་རྣམས་ཀྱིས་བྱང་ཆུབ་ཀྱི་ཤིང་གི་ཡལ་འདབ་གཅིག་པུས་ཀྱང་ངོ་ཞེས་བཅོམ་ལྡན་འདས་ཀྱིས་གསུངས་སོ། །ཇི་སྐད་གསུངས་པའི་སྨན་རྣམས་མེད་ན་སྨན་གཞན་དག་རབ་ཏུ་གཞུག་པར་བྱའོ། །འབྱོར་པ་ཆུང་ན་རྣམ་པར་རྒྱལ་བ་དང་ལས་ཐམས་ཅད་པ་དག་ལ་རིན་པོ་ཆེའི་སྙིང་པོར་བྱའོ། །དེར་ཡང་རྣམ་པར་རྒྱལ་བའི་བུམ་པ་ལ་ནི་ངེས་པར་རིན་པོ་ཆེའི་སྙིང་པོར་བྱའོ། །རྣམ་པར་རྒྱལ་བའི་བུམ་པ་ལ་ནི་ཆོས་ཀྱི་འབྱུང་གནས་ཀྱི་དབུས་སུ་སྣ་ཚོགས་ཆུ་སྐྱེས་ལ་གནས་པའི་ཟླ་བ་འམ་ཉི་མ་ལ་ཇི་ལྟར་རིགས་པར་བདག་པོའི་མཚན་མའམ་ས་བོན། དེ་ལས་གཞན་བའི་བུམ་པ་རྣམས་ལ་ནི་སྣ་ཚོགས་ཆུ་སྐྱེས་ལ་གནས་པའི་ཟླ་བའམ་ཉི་མར་རང་གི་མཚན་མའམ་ས་བོན་ནམ། ལྷ་རྣམས་ཇི་ལྟ་བར་བྲི་བར་བྱའོ། །དཀྱིལ་འཁོར་གང་དུ་ལྷ་ཇི་སྙེད་པ་དེ་སྲིད་དེ་རྣམས་ཀྱི་བུམ་པའོ། །ཡང་ན་ཕོ་བྲང་གི་སྙིང་པོར་གནས་རྣམས་ཁོ་ནའིའོ། །དེ་ལ་རིགས་ཀྱི་ཡུམ་རྣམས་ཀྱི་ནི་བཞིའོ། །དེ་བཞིན་གཤེགས་པ་རྣམས་ཀྱི་ནི་ལྔའོ། །ཡང་ན་དེ་བཞིན་གཤེགས་པ་རྣམས་ཁོ་ནའི་ལྔའོ། །ཡང་ན་བདག་པོའི་གཅིག་དང་དེ་བཞིན་གཤེགས་པ་བཞིའི་གཅིག་དང༌། རིགས་ཀྱི་ཡུམ་བཞིའི་གཅིག་དང༌། གཟུགས་རྡོ་རྗེ་མ་ལ་སོགས་པ་དྲུག་གི་གཅིག་དང༌། ཁྲོ་བོ་བཞིའི་གཅིག་སྟེ་ལྔའོ། །ཡང་ན་གཙོ་བོ་ཁོ་ནའི་གཅིག་གོ །ཕྱོགས་འདི་རྣམས་ལ་ནི་ལས་ཐམས་ཅད་པའི་བུམ་པར་ལྷག་པོར་བྱ་སྟེ་སློབ་མ་ལ་སོགས་པ་བསང་བའི་དོན་དུའོ། །ཁ་ཅིག་ནི་འདི་མི་འདོད་ཅིང་བུམ་པ་གཉིས་ཡང་མེད་ན། རྣམ་པར་རྒྱལ་བའི་བུམ་པ་ལ་གཙོ་བོའི་མཆན་མའི་གཡོན་དུ་ལས་ཐམས་ཅད་པའི་
མཚན་མ་བྲི་བར་བྱའོ་ཞེས་པ་ནི་ཕྱོགས་གཞན་ཏེ། །དེའི་མཚན་མ་ནི་བགེགས་མཐར་བྱེད་ཀྱིའོ། །རྣམ་པར་སྣང་མཛད་ལ་སོགས་པའི་ཡང་མཚན་མ་བཞི་ཕྱོགས་བཞིར་བྲིའོ་ཞེས་པའི་ཕྱོགས་ལ་ནི་གཙོ་བོའི་མཚན་མ་རྣམ་པར་སྣང་མཛད་ཀྱི་མཚན་མའི་སྟེང་དུའོ། །ཁ་ཅིག་ཏུ་ནི་དེར་གནས་པ་ཉིད་མཆུའི་སྟེང་དུའོ་ཞེས་བཤད་དོ། །སྤྱན་མ་ལ་སོགས་པ་རྣམས་ཀྱིའང་ཕྱོགས་བྲལ་བཞིན་དུའོ་ཞེས་པ་ནི་ཕྱོགས་གཞན་ནོ། །ཡང་ན། སངས་རྒྱས་ལྔ་དང་ལྷ་མོ་བཞི། །ཁྲོ་བོ་བཞི་ཡི་བུམ་པ་རྣམས། །སོ་སོའི་འཁྱིལ་པའི་གཅིག་དང་ནི། །གཟུགས་ཀྱི་རྡོ་རྗེ་སོགས་དྲུག་ལ། །གཅིག་སྟེ་མཚན་མ་ལྡན་པའོ། །ཞེས་པས་བཅོ་ལྔའོ། །དེ་ལྟར་བརྗོད་པའི་ཕྱོགས་རྣམས་ལས་ཕྱོགས་གཞན་དུ་འགའ་ཞིག་བརྗོད་པ་དེ་དག་ནི་རིག་པ་མ་ཡིན་ནོ། །དེ་ལྟར་འཇམ་པའི་རྡོ་རྗེ་ལ་དཀྱིལ་འཁོར་ཉི་ཤུ་དང༌། བཅུ་དང༌། དྲུག་དང༌། གཉིས་དང༌། གཅིག་དང་བཅོ་ལྔ་སྟེ་བུམ་པའི་གྲངས་རྣམ་པར་གཞག་པའོ། །བསྡུས་པའི་རིམ་པའི་དཀྱིལ་འཁོར་དུ་ལྔ་པ་གཉིས་ཀྱི་ཕྱོགས་ལ་ནི་དེ་བཞིན་གཤེགས་པ་རྣམས་ཀྱི་གཅིག་དང༌། ཡུམ་རྣམས་ཀྱི་གཅིག་དང༌། གཟུགས་རྡོ་རྗེ་མ་ལ་སོགས་པ་བཞིའི་གཅིག་དང༌། བྱང་ཆུབ་སེམས་དཔའ་བརྒྱད་ཀྱི་གཅིག་དང༌། ཁྲོ་བོ་བཅུའི་གཅིག་གོ་ཞེས་པ་ནི་ཁྱད་པར་རོ། །ཡང་ན། རང་ཕྱོགས་སྲས་གཉིས་དག་གི་གཅིག །ཁྲོ་དྲུག་བཙུན་མོ་རྣམས་ཀྱི་ཡང༌། །སྙིང་པོར་གནས་དང་སྒོ་སྐྱོང་དང༌། །བགེགས་དགྲའི་རེ་རེ་ཉི་ཤུའོ། །ཞེས་པ་ཁ་ཅིག་གིའོ། །ཁ་སྦྱོར་ལས་གསུངས་པའི་རྡོ་རྗེ་དབྱིངས་ཀྱི་དཀྱིལ་འཁོར་དུ་ཕྱོགས་གཉིས་པའི་ལྔ་པ་ནི། ཕོ་བྲང་གི་སྙིང་པོར་གནས་པ་རྣམས་ཀྱི་གཅིག་དང༌། ཕོ་བྲང་གཉིས་པར་གནས་པ་རྣམས་ཀྱི་གཅིག་དང༌། ཕྱོགས་བརྒྱད་ཀྱི་ལྷ་མོ་རྣམས་ཀྱི་གཅིག་དང༌། ཟུར་གྱི་ལྷ་མོ་རྣམས་ཀྱི་གཅིག་དང༌། སྒོ་སྐྱོང་རྣམས་ཀྱི་གཅིག་གོ་ཞེས་པ་ནི་ཁྱད་པར་རོ། །ཡང་ན་དེ་བཞིན་གཤེགས་པ་རྣམས་དང༌། རིགས་ཀྱི་ཡུམ་རྣམས་དང་སྒོ་སྐྱོང་རྣམས་ཀྱི་བུམ་པ་རེ་རེ་དང༌། རིམ་པ་གཉིས་པའི་ཕྱོགས་ཀྱི་ལྷ་མོ་རྣམས་ཀྱི་གཅིག་དང༌། ཕྱོགས་བྲལ་གྱི་ལྷ་མོ་རྣམས་
ཀྱི་གཅིག་དང༌། རིམ་པ་གསུམ་པའི་ཕྱོགས་ཀྱི་གཡོན་ན་གནས་པ་རྣམས་ཀྱི་གཅིག་དང༌། གཡས་ན་གནས་པ་རྣམས་ཀྱི་གཅིག་དང༌། ཟུར་ན་གནས་པ་རྣམས་ཀྱི་གཅིག་དང༌། དེའི་ཕྱི་རོལ་གྱི་ཟུར་ན་གནས་པ་རྣམས་ཀྱི་གཅིག་དང༌། ལས་ཐམས་ཅད་པའི་གཅིག་སྟེ། དེ་ལྟར་ཉི་ཤུའོ་ཞེས་པ་ནི་ཁ་ཅིག་གིའོ། །དཔལ་བདེ་མཆོག་གི་དཀྱིལ་འཁོར་ལ་ནི་འཁོར་ལོ་ལྔ་ལ་སོ་སོར་རེ་རེ་སྟེ་ལྔའོ། །ཡང་ན་སྙིང་པོའི་ཕོ་བྲང་དུ་གནས་པ་ཁོ་ནའི་ལྔའོ། །ཡང་ན་འདི་རྣམས་ཀྱི་རྣམ་པ་ལྔ་དང༌། འཁོར་ལོ་བཞིའི་བཞི་སྟེ་དགུའོ། །ཡང་ན་དབུས་ཀྱི་ཕོ་བྲང་དང་དམ་ཚིག་གི་འཁོར་ལོ་ལ་གནས་པ་རྣམས་ཀྱི་གཅིག་སྟེ་བཅུ་གསུམ་མོ། །ཐུགས་ཀྱི་འཁོར་ལོ་ལ་ཕྱོགས་སུ་གནས་པ་རྣམས་ཀྱི་གཅིག་དང༌། ཕྱོགས་བྲལ་དུ་གནས་པ་རྣམས་ཀྱི་གཅིག་གོ །དེ་བཞིན་དུ་གསུང་གི་འཁོར་ལོ་དང་སྐུའི་འཁོར་ལོ་ལ་ཡང་སྟེ་བཅུ་དགུའོ། །ཕྱོགས་འདི་རྣམས་སུ་ལྷ་སོ་སོའི་དགོད་པ་ཡང་ལས་ཐམས་ཅད་པ་དུམ་སྐྱེས་མའི་ལྷག་པར་དགོད་པར་བྱའོ། །འདིའི་རྗེས་སུ་འབྲངས་ནས་དཀྱིལ་འཁོར་གཞན་རྣམས་ལ་ཡང་ཇི་ལྟར་རིགས་པར་བུམ་པའི་གྲངས་རིགས་པར་བྱའོ། །དེ་ལ་གཙོ་བོ་ཡིན་པའི་ཕྱིར་དང༌། བྱ་བ་མང་བའི་ཕྱིར་རྣམ་རྒྱལ་བུམ་པའི་སྟེང་དུ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཧཱུཾ་ཞེས་པ་འདི་དང་ཡི་གེ་གསུམ་གྱིས་ཀྱང་ལན་བདུན་བསྔགས་པས་ཡེ་ཤེས་ཀྱི་བདུད་རྩིར་བྱ་ཞིང༌། རྡོ་རྗེའི་རྡུལ་ཕྲ་རབ་ཀྱི་རང་བཞིན་དང༌། ཇི་ལྟར་རྙེད་པའི་བདུད་རྩི་ལྔ་དང༌། དྲི་བཟང་པོའི་ཆུ་དང་ལྡན་པ་ཧཱུཾ་གྱིས་བསྔགས་ནས་དུད་ཆོས་སམ་པདྨའི་སྣོད་དུ་མེ་ཏོག་གི་ཕྲེང་བ་བཅིངས་པའི་རྡོ་རྗེ་དང་བཅས་པ་བཞག་ལ་ནང་དུ། ཨོཾ་ཏ་པྟེ་མ་ཧཱ་ཏཔྟེ་སྭཱ་ཧཱ། ཞེས་པས་བཀུག་པའི་གོང་གི་ལྷའི་ཆུའི་ངོ་བོ་ལས་ལྷའི་འཁོར་ལོ་གདན་དང་བཅས་པ་སྐད་ཅིག་གིས་རྣམ་པར་བསམས་ཏེ་རང་གི་སྙིང་གའི་ས་བོན་གྱིས་ཡེ་ཤེས་ཀྱི་བདུད་རྩི་སྤྱན་དྲངས་པའི་མདུན་དུ་ཞབས་བསིལ་དང༌། ཞལ་བསིལ་དང་མཆོད་ཡོན་རྣམས་དབུལ་བར་བྱའོ། །དེ་ནས་དམ་ཚིག་གི་འཁོར་ལོ་ལ་རབ་ཏུ་བཅུག་སྟེ། ཆགས་པ་ཆེན་པོས་ཞུ་བར་གྱུར་ནས་སྔར་བླུགས་པའི་ཆུ་དང་བྱང་ཆུབ་ཀྱི་སེམས་ཀྱི་ངོ་བོར་རོ་གཅིག་ཏུ་གྱུར་པར་བསྒོམ་མོ། །མཚན་མ་ཡང་དམ་ཚིག་གི་
ལྷ་ཡེ་ཤེས་ཀྱི་ལྷ་དང་གཅིག་ཏུ་གྱུར་པར་བསམ་མོ། །དེ་ནས་རྡོ་རྗེ་དང་འབྲེལ་བའི་མེ་ཏོག་གི་མཐར་གཡོན་པའི་ཁུ་ཚུར་གྱིས་བཟུང་ནས་ཧཱུཾ་གིས་བསྔགས་ཏེ་འཁོར་ལོའི་དབང་ཕྱུག་གི་སྙིང་པོ་བརྒྱ་རྩ་བརྒྱད་དམ། ཨོཾ་བཛྲ་ཨུ་ད་ཀ་ཧཱུཾ། ཞེས་པ་འདིས་ཆུ་ལ་མངོན་པར་བསྔགས་ལ་དེར་འཁྱིལ་པས་བསྔགས་པའི་མེ་ཏོག་དཀར་པོ་གསུམ་གཞུག་པར་བྱའོ། །གཞན་ཡང་བུམ་པ་གང་ཞིག་ལྷ་གང་གི་ཡིན་པ་དེ་ལ་ནི། དེའི་སྔགས་བརྒྱ་རྩ་བརྒྱད་དམ་ཉི་ཤུ་རྩ་གཅིག་གམ་བདུན་གྱིས་བསྔགས་པར་བྱ་སྟེ། རྡོ་རྗེའི་མེ་ཏོག་གི་ཕྲེང་བའི་མཐར་བཟུང་ནས་སོ། །དེ་བཞིན་དུ་མེ་ཏོག་ཀྱང་གཞུག་པར་བྱའོ། །དེ་ནས་རྣམ་པར་རྒྱལ་བ་ལ་སོགས་པའི་བུམ་པ་རྣམས་མེ་ཏོག་ལ་སོགས་པས་ཡང་དག་པར་མཆོད་ལ། སྲུང་བའི་དོན་དུ་ལས་ཐམས་ཅད་པའི་ཆུས་དེའི་ཡལ་འདབ་ཀྱིས་བསངས་ཏེ། འདིར་ཇི་སྲིད་དཀྱིལ་འཁོར་གྱི་བྱ་བ་མ་རྫོགས་པ་དེ་སྲིད་དུ་བགེགས་རྣམས་བཟློག་པར་མཛོད་ཅིག་ཅེས་བརྗོད་ཅིང་གཏོར་མ་ཕུལ་ནས་ཉེ་བར་རེག་ལ། མི་བསྐྱོད་རྡོ་རྗེ་ཞེས་པ་ལ་སོགས་པའི་བསྟོད་པ་སྔོན་དུ་འགྲོ་བས་དྲིལ་བུ་དཀྲོལ་བར་བྱའོ། །བུམ་པ་དེ་རྣམས་ལས་ཆུ་ཉུང་ཟད་ཉུང་ཟད་བླངས་ལ་དཀྱིལ་འཁོར་གྱི་ཁང་པའི་ཤར་སྒོའི་བྱང་གི་ཆར་མན་འཇི་ལ་གནས་པའི་དུང་ཆོས་ལ་སོགས་པ་གཞག་པར་བྱ་སྟེ། བདག་ཉིད་དང་སློབ་མ་རྣམས་ལ་བསང་གཏོར་བྱ་བའི་དོན་དུའོ། །ལས་ཐམས་ཅད་པའི་བུམ་པ་ཉིད་ཀུ་ཤའི་ཆུན་པོ་དང་ལྡན་པ་དེའི་དོན་དུ་དེར་གཞག་པར་བྱའོ་ཞེས་པ་ནི་གཞན་ལས་སོ། །བུམ་པ་རྣམས་ལ་མངོན་པར་བསྔགས་པ་དང་མཆོད་པ་ལ་སོགས་པ་རྣམས་ནི་ཉི་མ་སོ་སོར་ཐུན་གསུམ་མམ་གཅིག་ཏུ་བྱའོ། །འཁོར་ལོའི་དབང་ཕྱུག་ལ་སོགས་པའི་སྔགས་ནི་དཀྱིལ་འཁོར་སོ་སོའི་སྒྲུབ་ཐབས་ལ་སོགས་པ་རྣམས་སུ་བལྟ་བར་བྱའོ། །མདོར་བསྡུས་པ་ནི་སླར་ཡང་འདི་ཉིད་དུ་འཆད་པར་འགྱུར་བ་སྟེ། དཀྱིལ་འཁོར་གྱི་ལྷའི་གཟུགས་དང་ཁ་དོག་དང་མཚན་མ་ལ་སོགས་པ་བརྗོད་པའི་དུས་སུའོ། །འདི་དཀྱིལ་འཁོར་ལ་སོགས་པའི་ལས་ལ་ཉེ་བར་མཁོ་བའི་དོན་དུ་དང་པོར་རྡུལ་ཚོན་དཀར་པོ་ལ་སོགས་པས་པདྨ་འདབ་མ་བརྒྱད་པ་བྲིས་པའི་ལྟེ་བ་ལ་རྣམ་པར་
རྒྱལ་བའི་བུམ་པའམ་ལས་ཐམས་ཅད་པའི་བུམ་པ་གཞག་པར་བྱའོ། །ཤར་གྱི་འདབ་མ་ལ་འཆད་པར་འགྱུར་བའི་ཆོ་གས་ལྷག་པར་གནས་པ་བྱས་པའི་ཚོན་སྣ་ལྔའི་ཐིག་སྐུད་གསེར་ལ་སོགས་པའི་སྣོད་དུ་གནས་པའོ། །ལྷོར་རྡོ་རྗེའོ། །བྱང་དུ་རྡོ་རྗེའི་དྲིལ་བུའོ། །ནུབ་དང་ཟུར་གྱི་འདབ་མ་རྣམས་ལ་ཇི་ལྟར་རིགས་པར་རྡུལ་ཚོན་ལྔའི་སྣོད་རྣམས་སོ། །དེར་འཁྱིལ་པའི་སྔགས་བཟླས་ཏེ་བུམ་པའི་ཆུས་རྡུལ་ཚོན་དང་ཐིག་སྐུད་རྣམས་བསང་གཏོར་བྱའོ་ཞེས་པ་བུམ་པ་ལྷག་པར་གནས་པའི་ཆོ་གའོ།། །།དེ་ནས་དཀྱིལ་འཁོར་གྱིས་གཞི་དྲི་བཟངས་ལ་སོགས་པས་བྱུགས་ཤིང་མེ་ཏོག་གཅལ་དུ་འགྲེམས་སུ་བཅུག་སྟེ། དེར་ཇི་ལྟར་འབྱུང་བའི་བདག་པོ་ལྔའི་ལེ་ཚེ་རྣམས་སུ་མཎྜལ་གྲུ་བཞི་པ་བྱ་ཞིང་ལྷ་གཞན་རྣམས་ལ་ཟླུམ་པོ་སྟེ། བདུད་རྩི་ལྔ་དང་བཅས་པའི་དྲི་བཟང་པོ་རྣམས་ཀྱིས་བྱའོ། །ནུབ་ཏུ་ཕྱོགས་པས་མཎྜལ་དེ་རྣམས་སུ་རང་གི་སྙིང་གའི་ས་བོན་གྱི་འོད་ཟེར་གྱིས་འདྲི་བར་འགྱུར་བའི་དཀྱིལ་འཁོར་གྱི་འཁོར་ལོ་ཇི་ལྟར་རིགས་པར་ཆུ་སྐྱེས་ལ་གནས་པའི་ཟླ་བའམ་ཉི་མ་ལ་བཞུགས་སུ་གསོལ་ལ། ཞབས་བསིལ་ལ་སོགས་པ་སྔོན་དུ་འགྲོ་བའི་མཆོད་པ་དང༌། བསྟོད་པ་དང་བདུད་རྩི་མྱང་བ་བྱས་ཏེ། བུས་མོ་གཡས་པ་ས་ལ་བཙུགས་ཤིང་ལྕེ་ཧཱུཾ་ལས་སྐྱེས་པའི་རྡོ་རྗེ་རྩེ་གཅིག་པར་བྱས་པ་ཧཱུཾ་བཀོད་ནས་ལག་པ་གཡས་པས་སྦོས་ཕོར་ཐོགས་ཏེ། གཡོན་པས་རྡོ་རྗེ་དྲིལ་བུ་དཀྲོལ་ཞིང༌། བཅོམ་ལྡན་རྡོ་རྗེ་ཆེ་གེ་མཆོག །རིག་པའི་རྒྱལ་པོ་ཁྱོད་ལ་འདུད། །མགོན་པོ་ཐུགས་རྗེའི་བདག་ཉིད་ཅན། །དཀྱིལ་འཁོར་བྲི་བར་བདག་འཚལ་ལོ། །སློབ་མ་རྣམས་ལ་བརྩེ་དོན་དང༌། །ཁྱེད་རྣམས་ལ་ཡང་མཆོད་ཕྱིར་དང༌། །སེམས་ཅན་བསོད་ནམས་སྤེལ་དོན་དང༌། །བྱང་ཆུབ་སེམས་ནི་བསྐྱེད་པའི་ཕྱིར། །དེ་པས་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་སྩོལ། །བྱང་ཆུབ་སེམས་དཔའ་འབྲས་གནས་དང༌། །གཞན་ཡང་གང་དག་གསང་སྔགས་ལྷ། །ལྷ་དང་འཇིག་རྟེན་སྐྱོང་བ་དང༌། །འབྱུང་པོ་བྱང་ཆུབ་བསྟན་གནས་དང༌། །སེམས་ཅན་བསྟན་ལ་མངོན་དགའ་དང༌།
གང་སུ་རྡོ་རྗེའི་སྤྱན་ལྡན་རྣམས། །བདག་ལ་ཡང་དག་དགོངས་སུ་གསོལ། །བདག་ནི་ཆེ་གེ་རྡོ་རྗེ་ཆེ། །ཆོ་ག་འབྱུང་བའི་དཀྱིལ་འཁོར་ནི། །ཇི་ལྟར་ནུས་པར་ཉེར་སྤྱོད་པས། །འགྲོ་བ་སྦྱང་ཕྱིར་བྲི་བར་བྱ། །ཞེས་དོན་མངོན་དུ་བྱེད་ཅིང་ལན་གསུམ་བརྗོད་པས་གསོལ་བ་གདབ་པར་བྱའོ། །ཞེས་པ་ལྷ་ལྷག་པར་གནས་པའི་ཆོ་གའོ།། །།དེའི་རྗེས་ལ་ཡེ་ཤེས་ཀྱི་ཐིག་ལ་སོགས་པའི་དོན་དུ་དཀྱིལ་འཁོར་གྱི་ས་གཞིའི་སྟེང་གི་ནམ་མཁར་དཀྱིལ་འཁོར་གྱི་འཁོར་ལོ་བློས་བཀོད་ནས་ཡང་དག་པར་མཆོད་དེ་ཤར་དུ་མངོན་པར་ཕྱོགས་ཤིང་དཀྱིལ་འཁོར་གྱི་དབང་ཕྱུག་གི་རྣལ་འབྱོར་དང་ལྡན་པས་གཞོན་ནུ་མ་མ་ཉམས་པས་བཀལ་བའམ་དཔའ་བོའི་རིན་གྱིས་ཉོས་པའི་སྐུད་པ་ལྔ་པ་ལྔ་སྣོད་ལྔར་གནས་པ་རྣམས་དྲི་ཞིམ་པོ་དང་ལྡན་པའི་ཁ་དོག་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོ་རྣམས་དང་ཡུངས་ཀར་གྱི་ཕྱེ་མ་དང་བདུད་རྩི་ལྔ་བསྲེས་པ་རྣམས་ཀྱིས་སོ་སོར་ཁ་བསྒྱུར་ལ་ལག་པ་གཡོན་པའི་མཐིལ་དུ་སོར་མོའི་རྩེ་མོ་ནས་བརྩམས་ཏེ་མཐེ་བོང་གི་བར་ཇི་སྲིད་པར་རྣམ་པར་བཀོད་ལ། བྷྲཱུཾ་ཨཱཾ་ཛྲཱྀཾ་ཁཾ་ཧཱུཾ་གི་ཡི་གེ་རྣམས་ལས་བསྐྱེད་པའི་དེ་བཞིན་གཤེགས་པ་ལྔའི་ངོ་བོར་གྱུར་པར་བསྒོམས་ཏེ། ནམ་མཁའ་ལ་བཞུགས་སུ་གསོལ་བའི་རང་རང་གི་ཕྱོགས་ཀྱི་དེ་བཞིན་གཤེགས་པ་བསྡུས་པར་གྱུར་པ་དེ་བཞིན་གཤེགས་པ་ལྔའི་ཐུགས་ཀར་བྷྲཱུཾ་ཡིག་ལ་སོགས་པ་ལས་གྲུབ་པའི་ཡེ་ཤེས་ཀྱི་སྐུད་པ་འོད་ཟེར་དང་བཅས་པར་བལྟ་ཞིང༌། ཨོཾ་ཨཱཿ་ཤཱ་ཤྭ་ཏ་བཛྲ་སཱུ་ཏྲ་མྨེ་པྲ་ཡ་ཙྪ་མ་ཧཱ་མཎྜལ་སཱུ་ཏྲ་ཎཱ་ཡ་ཧཱུཾ། ཞེས་པ་འདིས་རྣམ་པར་སྣང་མཛད་ལ་གསོལ་བ་གདབ་པར་བྱ་སྟེ། མིང་ཡོངས་སུ་བསྒྱུར་ནས་རིན་ཆེན་འབྱུང་ལྡན་ལ་སོགས་པ་ལ་ཡོད་དོ། །མིག་གཉིས་ཛཿ་ཡིག་ལས་སྐྱེས་པའི་ཟླ་བ་དང་ཉི་མ་སེར་པོའི་རང་བཞིན་དུ་བྱས་ཏེ། ཨོཾ་དཱི་པྟ་དྲྀཥྚྀ་ཨཾ་ཀུ་ཤ་ཛཿ་ཞེས་བརྗོད་ཅིང་རབ་ཏུ་མྱུར་བར་གཡོ་བའི་མིག་གི་རྫི་མ་འདེགས་ཤིང་འགུགས་པ་འབར་བའི་ལྟ་སྟངས་ལྕགས་ཀྱུ་ལྟ་བུས་རྣམ་པར་སྣང་མཛད་ལ་སོགས་པ་བསྐུལ་བས་དེ་རྣམས་རང་གི་ཁ་དོག་ཅན་གྱི་ཐིག་སྐུད་ལག་པར་གནས་པ་རྣམས་ལ་ཐིམ་པར་བསྒོམ་མོ། །དེ་ཉིད་ཀྱི་ཕྱིར་དེ་རྣམས་ནི་མེ་ལོང་ལྟ་བུ་ལ་
སོགས་པ་ཡེ་ཤེས་ལྔའི་རང་བཞིན་ཅན་ནོ་ཞེས། རྣམ་པ་བརྒྱའི་དབྱེ་བས་ཕྱེ་བར་གྱུར་པའི་ཐིག་སྐུད་རྣམས་སོ། །དེ་ནས་རྣམ་པར་སྣང་མཛད་ལ་སོགས་པའི་གཟུགས་སམ་བགེགས་མཐར་བྱེད་ལ་སོགས་པའི་གཟུགས་ཀྱིས་སློབ་མ་ཐིག་སྐུད་འཛིན་པ་དང་ལྷན་ཅིག་དང་པོར་སྐུད་པ་ལྔ་ལྔ་རེ་རེ་བསྒྲིལ་བའི་ཐིག་སྐུད་བྱ་ཞིང༌། དེའི་རྗེས་ལ་དེ་བཞིན་དུ་ལྔ་རྣམས་གཅིག་ཏུ་བསྒྲིལ་བའི་ཐིག་སྐུད་བྱ་སྟེ། ཨོཾ་ཨཱཿ་ཨ་ནྱོ་ནྱ་ཨ་ནུ་ག་ཏཱཿ་སརྦ་དྷརྨཱཿ་བར་སྤཱ་ར། ཨ་ནུ་པྲ་བིཥྚ་སརྦ་དྷརྨཿ་ཨ་དི་ཨནྟ་ཨ་ནུ་པྲ་བིཥྚཿ་སརྦ་དྷརྨཱཿ་ཨོཾ་ཨཱཿ་ཧཱུཾ་ཞེས་བརྗོད་ཅིང་བསྒྲིལ་བའི་ཐིག་སྐུད་སློབ་དཔོན་དང་སློབ་མའི་ལག་པ་གཡོན་པ་དག་གི་མཛུབ་མོ་ནས་བརྩམས་ཏེ་སོར་མོ་བཞིའི་ནང་དུ་བཅུག་ཅིང་རྒྱབ་ནས་དཀྲིས་ལ་སླར་ཡང་བཅུག་ཅིང་དཀྲིས་ནས་རྡོ་རྗེ་ཁུ་ཚུར་བྱས་པའི་མཐེ་བོང་དང་མཛུབ་མོའི་རྒྱབ་ཀྱིས་ས་ལ་སྦྱར་ཏེ། མནན་པའི་བར་གྱི་ལྷག་མ་མ་གཏོགས་པ་ཇི་ལྟ་བར་སྲིད་དུ་དཀྱིལ་འཁོར་གྱི་ཉིས་འགྱུར་དང་སྦོམས་སུ་ནས་ཉི་ཤུ་ཆས་ལྷག་པའི་སློབ་དཔོན་གྱི་ནས་ཀྱི་ཚད་དུ་འགྱུར་རོ། །ནས་བདུན་གྱིས་སོར་ཚིགས་སོ་ཞེས་ཆོས་མངོན་པ་ལས་བཤད་པའོ། །སྦོམས་སུ་འཁོར་ལོའི་བརྒྱད་ཆའི་ཉི་ཤུ་ཆར་བཤད་པ་ནི་སོར་ཉི་ཤུ་རྩ་བཞིའི་བདག་ཉིད་ཁྲུ་གང་བའི་དཀྱིལ་འཁོར་ཁོ་ནའི་ཡིན་ཏེ། ཁྲུ་གཉིས་ལ་སོགས་པའི་དཀྱིལ་འཁོར་གྱི་ཚད་ཀྱང་དེས་ཉེ་བར་མཚོན་ནས་ཚད་དང་ལྡན་པར་རིག་པར་བྱའོ། །དེ་བཞིན་དུ་ཁྲུ་དྲུག་པའི་ཚད་ཅན་གྱི་དཀྱིལ་འཁོར་ལ་ནི་ཐིག་སྐུད་སྦོམས་སུ་མཐེའུ་ཆུང་གི་ཚད་དུ་བྱ་ཞིང་གཞན་དུ་རྗེས་སུ་མཐུན་པ་བྱའོ་ཞེས་པ་ནི་ཀུན་དགའ་སྙིང་པོ་ལ་སོགས་པའིའོ། །ཐིག་སྐུད་བསྒྲིལ་བའི་མཐར་དཀྱིལ་འཁོར་གྱིས་གཞིར་དྲིའི་ཆུ་དང་བདུད་རྩི་ལྔ་དང་ཙནྡན་ལ་སོགས་པའི་དྲི་བཟངས་ཀྱིས་བྱུགས་ལ་ཡི་གེ་གསུམ་གྱིས་བྱིན་གྱིས་བརླབས་ཏེ། གསེར་ལ་སོགས་པའི་སྣོད་གཙང་མར་བཞག་ཅིང༌། མེ་ཏོག་དང་བདུག་སྤོས་ལ་སོགས་པ་རྣམས་ཀྱིས་ཡང་དག་པར་མཆོད་ནས་ལག་པས་རེག་ལ་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ། །གཡས་པ་དང་ཅིག་ཤོས་ཀྱི་མིག་དག་མ་དང་ཊའི་ཡི་གེ་དག་ལས་ཉི་མ་དང་ཟླ་བ་དག་ཏུ་བལྟས་ཏེ། སྔར་གསུངས་པའི་བཛྲ་དྲྀཥྚི་མ་ཞེས་པས་བརྟན་པར་
བྱས་ལ། འཁྱིལ་པ་བཟླས་པའི་བདུད་རྩིའི་ཆུ་དང་ཡུངས་ཀར་དང་དྲིའི་ཆུས་གཏོར་ནས་རྡོ་རྗེ་དང་བསམ་པའི་ལག་པ་གཡས་པས་ཡང་དག་པར་རེག་ཅིང༌། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཞེས་པ་འདིས་ལན་ཉི་ཤུ་རྩ་གཅིག་བཟླས་ཏེ་ལྷག་པར་གནས་པ་བྱའོ་ཞེས་པ། ཐིག་སྐུད་ལྷག་པར་གནས་པའི་ཆོ་གའོ།། །།སླར་ཡང་དཀྱིལ་འཁོར་གྱིས་ལ་ཨོཾ་སརྦ་སཾ་ཤོ་དྷ་ནི་ཧཱུཾ་ཕཊ། ཅེས་པའི་སྔགས་ཀྱིས་བུམ་པ་ཐམས་ཅད་ཀྱི་ཆུས་བསང་གཏོར་བྱས་པའི་གཙང་མར་དྲིས་བྱུགས་ནས་མེ་ཏོག་གཅལ་དུ་བཀྲམ་ལ། ནམ་མཁའི་མཐིལ་དུ་གནས་པར་ཡང་འདྲི་བར་འགྱུར་བའི་དཀྱིལ་འཁོར་ཡང་དག་པར་དམིགས་ཏེ་མཆོད་ཡོན་དབུལ་བ་སྔོན་དུ་འགྲོ་བས་ཡང་དག་པར་མཆོད་ཅིང་བསྟོད་ནས་རང་ཉིད་དེའི་རྣལ་འབྱོར་དང་ལྡན་པས་བསྒྲུབ་པའི་གྲོགས་པོ་རྣམ་པར་སྣང་མཛད་ལ་སོགས་པའི་གཟུགས་སུ་བསྒོམ་ཞིང༌། རང་དང་དེའི་གཡས་པ་དང་ཅིག་ཤོས་ཀྱི་མིག་དག་ཛྫཿཡིག་ལས་སྐྱེས་པའི་ཟླ་བ་དང་ཉི་མ་འོད་ཟེར་སེར་པོ་ཅན་དུ་བསམ་མོ། །མཉམ་པའི་རྐང་སྟབས་ཀྱིས་ཐིག་སྐུད་དེ་གཡོན་པའི་རྡོ་རྗེ་ཁུ་ཚུར་གྱིས་གཟུང་བ་ལྟེ་བར་གཟུང་ཞིང༌། བསྒྲུབ་པའི་གྲོགས་པོ་དེ་དེ་ལྟར་ཐིག་སྐུད་གཟུང་བ་ལ་ཛྫཿ་ཛྫཿ་ཛྫཿ་ཞེས་པའི་ཛྫཿ་ཡིག་གསུམ་གྱིས་བསྐུལ་ཏེ། སྒྲུབ་པའི་གྲོགས་པོས་ཀྱང་ཛྫཿ་ཛྫཿ་ཛྫཿ་ཞེས་པའི་ཛྫཿ་ཡིག་གསུམ་གྱིས་དྲངས་ནས་དེ་ཁོ་ན་བཞིན་དུ་མངོན་དུ་ཕྱོགས་ཤིང་གནས་པས་ནུབ་ཕྱོགས་སུ་གནས་ཏེ་ཁ་ཤར་དུ་བལྟ་བ་དང་ལྷོར་གནས་ཏེ་བྱང་དུ་ཁ་བལྟ་བས་ཚངས་ཐིག་གཉིས་ལྟེ་བ་དང་མཉམ་པའི་པར་སྣང་ལ་བརྐྱང་སྟེ། རྡོ་རྗེ་དང་བཅས་པའི་ལག་པ་གཡས་པའི་མཐེ་བོང་དང་སོར་མོ་ངག་གིས་ཐིག་སྐུད་གཟུང་བ་འདེབས་ཤིང་སེ་གོལ་གྱི་སྒྲ་བྱའོ། །ཐིག་གདབ་པ་ཐམས་ཅད་དུ་ཡང༌། ཨོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ་ཧཱུཾ་ཨོཾ་སྭཱ་ཧཱ་ཨཱ་ཞེས་བརྗོད་པར་བྱའོ། །སྒྲ་འདི་ནི། སེམས་ཅན་དོན་དུ་ཁྱེད་རྣམས་ཀྱི། །དུས་ཡིན་དེ་ཕྱིར་འདིར་བྱོན་ཅིག །ཅེས་པ་ལ་སོགས་པ་སྟེ། ཐིག་གི་སྒྲས་སྤྱན་དྲངས་པའི་དེ་བཞིན་གཤེགས་པ་ཐམས་ཅད་མཉམ་པར་བྱོན་ནས་ཐིག་རྣམས་ལ་ཐིམ་པར་བསྒོམ་མོ་ཞེས་པའི་བརྡ་དོན་ནོ། །ཐམས་ཅད་དུ་ཡང་སློབ་དཔོན་དང་སྒྲུབ་པའི་གྲོགས་པོ་གཡས་སྐོར་གྱིས་འགྲོ་ཞིང་དཔལ་
བདེ་མཆོག་གི་དཀྱིལ་འཁོར་དང་དཔལ་རྡོ་རྗེ་ཕག་མོའི་དཀྱིལ་འཁོར་ལ་ནི་གཡོན་སྐོར་གྱིས་ཏེ་ཕྱོགས་ཐམས་ཅད་མཉམ་པ་ཉིད་དུ་ལྷག་པར་མོས་པར་བྱའོ་ཞེས་པ་ནམ་མཁའ་ལ་ཐིག་གདབ་པའི་ཆོ་གའོ།། །།དེ་ལ་དང་པོ་དཀྱིལ་འཁོར་གྱི་ཁང་པ་བྱ་བ་བརྩམ་པའི་དུས་སུ་ཡོངས་སུ་དག་པའི་ས་ལ་ཚངས་པའི་ཐིག་གཉིས་པོ་ཆོ་ག་འདིས་བརྟན་པར་བྱས་ཏེ་བཏབ་ལ་ཕྱི་ནས་ཟླ་བའི་གདན་ལ་མཚན་མ་བྱ་ཞིང༌། མཚན་མའི་རྗེས་སུ་འབྲངས་ནས་དཀྱིལ་འཁོར་ལ་ཚངས་པའི་ཐིག་གཉིས་གདབ་པར་བྱའོ། །དེ་ལ་འདི་ནི་རིམ་པ་སྟེ། དང་པོ་ཕུར་བུ་མཉམ་པར་གཟུགས། །མཐོ་གང་བ་ཡི་ཟླུམ་པོ་གཅིག །བྱས་ནས་ཉི་མའི་རིམ་པ་ཡིས། །གྲིབ་མ་འགྲོ་དང་འོང་བ་ཉིད། །དེར་ནི་ཐིག་ལེ་གཉིས་སྦྱིན་ཞིང༌། །ཚད་དེ་དེ་བཞིན་གཞན་དུ་ཡང༌། །ཐིག་ལེར་བཟུང་ནས་ཐིག་གདབ་སྟེ། །བྱ་རོག་རྗེས་དེར་མཚན་མ་བྱ། །དང་པོར་ནུབ་དང་ཤར་དག་སྟེ། །སླར་ཡང་ལྟོ་དང་བྱང་དག་ཏུ། །མཁའ་ཡི་ཐིག་ལེ་བཞིན་དུ་དེར། །ཚངས་པའི་ཐིག་གཉིས་འགྲོ་བར་བྱ། །དེ་དག་མཉམ་པར་སྨད་པ་ཡི། །ལག་པ་དག་གིས་རབ་ཏུ་གདབ། །སླར་ཡང་ཚངས་ཐིག་ལག་བཟུང་ནས། །བྱ་རོག་རྗེས་དེར་མཚན་མ་བྱ། །དེར་ནི་ཟུར་གྱི་ཐིག་གཉིས་ཏེ། །རྩ་བའི་ཐིག་ཀྱང་རིམ་པས་གདབ། །གཡོན་པ་སྐྱིལ་ཀྲུང་ཕྱེད་པ་དང༌། །རྐང་པ་གཡས་པ་འདུས་པས་སོ། །དེ་ལས་བཟློག་སྟེ་འདུག་པ་ཡི། །སློབ་མ་ལྷན་ཅིག་བློ་ལྡན་གྱིས། །དཀྱིལ་འཁོར་ཐིག་གདབ་རྡོ་རྗེ་ཅན། །ནམ་མཁའི་ཐིག་གི་མོས་པ་བྱ། །དེ་བཞིན་ཐིག་གདབ་གཞན་རྣམས་ལ་ཡང་ངོ༌། །མཚན་མ་མེད་པས་འགྲུབ་མི་འགྱུར། །ཐིག་སྐུད་ཆད་ན་བླ་མ་ཟད། །དམན་དང་ལྷག་པ་ལས་ནི་ནད། །ཕྱོགས་རྨོངས་ན་ནི་སློབ་མ་འཁྲུལ། །ཞེས་པ་དེ་ལྟར་ཤེས་ནས་འབད་པར་བྱ་ཞིང༌། གལ་ཏེ་ཐིག་འདེབས་པ་ན་འགའ་ཞིག་ཏུ་འབྱོར་པ་མེད་པ་དང༌། །གྲོགས་པོ་མེད་པ་དང་མི་དགའ་བར་གྱུར་ན་དེའི་ཚེ་ཕུར་བུ་ལ་བཅིངས་ནས་རང་ཉིད་ཀྱིས་ཐིག་གདབ་པར་བྱའོ། །དེར་ཡང་ཤིན་ཏུ་མཉམ་གཞག་པའི། །སློབ་དཔོན་སློབ་མ་ལྷན་ཅིག་ཏུ། །རིམ་འདིས་བློ་དང་ལྡན་པ་ཡིས། །དཀར་པོའི་ཐིག་ནི་གདབ་པར་བྱ། །ཆུ་
བདག་གནས་པའི་སློབ་དཔོན་དང༌། །མངོན་པར་ཕྱོགས་པའི་སློབ་མ་ནི། །དབང་པོའི་ཕྱོགས་སུ་གནས་པས་ཀྱང༌། །འདིར་ནི་ཚངས་པའི་ཐིག་གདབ་བྱ། །གཤིན་རྗེའི་ཕྱོགས་དང་ལུས་ངན་པོར། །གནས་པའི་གསང་སྔགས་རིག་པ་དང༌། །ལྷན་ཅིག་པ་ཡི་སློབ་མ་ཡིས། །ཡང་དག་ཚངས་ཐིག་གཉིས་པ་གདབ། །མེ་མཚམས་གནས་པའི་སློབ་དཔོན་དང༌། །རླུང་དུ་གནས་ཤིང་རང་གི་ནི། །ལྷག་པའི་ལྷ་ཡི་སྦྱོར་ལྡན་པས། །ཟུར་གྱི་ཐིག་ནི་གདབ་པར་བྱ། །དབང་ལྡན་ཕྱོགས་ནས་བླ་མ་དང༌། །བདེན་བྲལ་སོང་བའི་སློབ་མ་ཡིས། །ཟུར་གྱི་ཐིག་ནི་གཉིས་པ་ཡང༌། །ཡང་དག་པ་ནི་གདབ་པར་བྱ། །མེ་མཚམས་གནས་པའི་སློབ་མ་དང༌། །ངེས་པར་མངོན་ཕྱོགས་སློབ་མ་ནི། །དབང་ལྷན་མཚམས་སུ་གནས་པ་ཡིས། །རྩ་བའི་ཐིག་གཉིས་གདབ་པར་བྱ། །དེ་ཉིད་དུ་ནི་རྡོ་རྗེ་ཅན། །བདེན་བྲལ་དུ་ནི་གནས་པའི་བུ། །མཁས་པ་ཐིག་རྣམས་ཤེས་པ་ཡིས། །ལྷོ་ཡི་ཐིག་ནི་གདབ་པར་བྱ། །དེ་ཉིད་དུ་གནས་སློབ་མ་དང༌། །རླུང་དུ་གནས་པའི་སྔགས་པ་དག །བདེན་བྲལ་རླུང་དུ་གནས་པ་ཡི། །གསུམ་པའི་ཐིག་ནི་གདབ་པར་བྱ། །དེ་ཉིད་དུ་གནས་རྡོ་རྗེ་ཅན། །ཞི་བའི་ཕྱོགས་སུ་གནས་པའི་བུ། །ལས་རྣམས་ཤེས་པས་ཕྱིན་ནས་ནི། །རྩ་ཐིག་བཞི་པ་གདབ་པར་བྱ། །བཅོམ་ལྡན་འདས་ཀྱིས་མཁའ་འགྲོ་མ་རྡོ་རྗེ་གུར་ལས་ཇི་ལྟ་བ་བཞིན་དུ་གསུངས་པ། དང་པོར་ཚངས་པའི་ཐིག་ཡིན་ཏེ། །གཉིས་པ་ཟུར་གྱི་ཐིག་ཡིན་ནོ། །གསུམ་པ་ལ་ནི་ངོས་བཞི་རུ། །ཐིག་བཞི་རབ་ཏུ་གདབ་པར་བྱ། །ཞེས་སོ། །དེ་ལ་འདིར་རྩ་བའི་ཐིག་གི་བརྒྱད་ཆ་ནི་སྒོའོ། །སྒོའི་ཆ་ནི་ཆ་ཆུང་སྟེ་ཆ་ཆུང་དང་པོ་དང་ཀྲྀ་ཤ་དང་ཆ་ཤས་ཞེས་རྣམ་གྲངས་སོ། །ཆ་ཆུང་གཉིས་ཀྱི་བདག་ཉིད་ནི་ཆ་སྟེ་ཆ་ཆུང་བཞི་ནི་ཆ་ཆེན་ནོ། །ཞི་བ་ཞེས་པ་ནི་ཆ་ཆུང་ཕྱེད་ལ་རྣམ་པར་བལྟ་བར་བྱའོ་ཞེས་པ་དཀར་པོས་ཐིགས་གདབ་པའི་ཆོ་གའོ། །ད་ནི་དཀྱིལ་འཁོར་ཐམས་ཅད་ལ་ཐུན་མོང་བའི་དཀྱིལ་འཁོར་གྱི་ཐིག་བརྗོད་པར་བྱ་སྟེ། ཆ་གཅིག་དང་ནི་ཆ་ཆུང་བདུན། །གསུམ་པའི་མཐར་ནི་བཞི་པ་ལ། །ཆ་ཆུང་ཆ་ཆུང་ཆ། །ཆ་ཆུང་རེ་རེ་མཉམ་པར་བྲི། །ར་ཡི་རྩེ་མོའི་མཐར་ཐུག་པ། །དེ་ནས་གསེར་ཟླུམ་པོའི་ཐིག །པདྨའི་ཕྲེང་བའི་ཆ་ཆུང་
གཉིས། །རྡོ་རྗེ་ཕྲེང་བའི་ཆ་ཆུང་གཉིས། །འོད་ཟེར་ཕྲེང་བའི་ཆ་ཆུང་བཞི། །ཐམས་ཅད་ཀྱང་ནི་ཟླུམ་པོར་བྱ། །དེ་ལྟར་བརྐྱང་བའི་ཐིག་བར་ཆ། །དཀྱིལ་འཁོར་ཀུན་ལ་ཡང་དག་འགྲོ། །ལྷ་ཡི་དབྱེ་བ་ཅུང་ཟད་ཀྱིས། །རྩ་བའི་དཀྱིལ་འཁོར་ནང་དུ་ནི། །ཐིག་གི་དབྱེ་དང་ཕྱི་རོལ་དུ། །དབྱེར་མེད་བློ་ལྡན་གྱིས་རེག་བྱ། །ང་ནི་རིམ་པ་ཇི་ལྟ་བར། །སྒོ་སོགས་དབྱེ་བ་བརྗོད་པར་བྱ། །སྟེང་དུ་བདུན་ཏེ་གཉིས་ངོས་སུ། །གཉིས་ནི་སྟེང་དུ་ངོས་གཉིས་སུའོ། །སྟེང་དུ་གསུམ་གསུམ་སྟོང་པ་ལ། །བཞི་ནི་སྟེང་དུ་དེ་བཞིན་སླར། །སྟེགས་བུར་དྲུག་ཀྱང་དེ་བཞིན་དབྱི། །གོས་དང་ཀ་བར་གསུམ་གསུམ་མོ། །ཚངས་པའི་གཉིས་སུ་རེ་ཁཱ་བཞི། །ཕྱོགས་སུ་ཡང་ནི་གཉིས་གཉིས་དབྱི། །གོས་ཀྱི་མཐར་ཡང་དེ་བཞིན་དབྱི། །རིན་ཆེན་དྲ་ཕྱེད་དབུས་གནས་དང༌། །ཤར་བུ་དང་ནི་མདའ་ཡབ་དང༌། །ཚོན་དང་སྟེགས་བུའི་སར་དེ་བཞིན། །ཟུར་ལས་ལྷག་པའི་རེ་ཁཱ་ཡི། །ཐིག་རྣམས་ཐམས་ཅད་ཀུན་ནས་དབྱི། །འདིས་ནི། སྒོ་ནི་འཁོར་ལོའི་བརྒྱད་ཆ་སྟེ། །སྟེགས་བུ་དང་ནི་བྲལ་བར་འདོད། །སྒོ་ཡི་ཚད་ཀྱིས་སྒོ་ཁྱུད་རེ། །དེ་བཞིན་ལྷ་ཡི་སྣམ་བུའོ། །སྟེགས་བུ་ཀུན་ནས་སྒོ་ཡི་ཕྱེད། །དེ་བཞིན་འགྲམ་དང་ལོགས་དང་ནི། །དྲ་བར་དྲ་ཕྱེད་ཉི་ཟླ་དང༌། །མེ་ཏོག་ཕྲེང་བའི་སྣམ་བུའོ། །ཚོན་གྱི་ས་ནི་དེ་ཕྱེད་དེ། །རྩ་ཐིག་ས་ལས་ཕྱི་རོལ་དུའོ། །ཞེས་པ་འདི་བཤད་པ་ཡིན་ནོ། །ལྷའི་སྣམ་བུ་ནི་རྩ་བའི་ཐིག་གི་ནང་དུའོ། །སྟེགས་བུ་ལ་ནི་གཟུངས་ཀྱི་སྣམ་བུ་དང་བར་གྱི་སྣམ་བུ་ཞེས་ཀྱང་བརྗོད་དོ། །འཕགས་པ་ཀླུའི་བློའི་ཞབས་ནི་མིག་སྨན་གྱི་སྣམ་བུ་བར་གྱི་སྣམ་བུ་དང་ཡ་ཕུབས་ཀྱི་སྣམ་བུ་ཡང་མི་བཞེད་དེ། དེ་ཡང༌། སྒོ་ནི་འཁོར་ལོའི་བརྒྱད་ཆ་སྟེ། །ལྷ་ཡི་སྣམ་བུ་དེ་བཞིན་ནོ། །སྒོ་ཡི་ཚད་ཀྱི་སྒོ་ཁྱུད་དེ། །འགྲམ་དང་ལོགས་ཀྱང་དེ་བཞིན་ནོ། །ཞེས་པའི་ལུང་ལས་སོ། །འདིར་ནི་སྒོ་དང་རྟ་བབས་དག་གི་དབུས་སུ་བར་གྱི་ས་ལ་བར་གྱི་སྣམ་བུ་དང་མུན་པའི་སྣམ་བུ་དང་སྟོང་པ་ཞེས་ཀྱང་བརྗོད་དོ། །རྟ་བབས་སྒོ་ལས་སུམ་འགྱུར་ཏེ། །དེ་ཡང་སྣམ་བུ་བཅུ་གཅིག་པ། །བྲེ་ཕུལ་ཤར་བུ་རིན་ཆེན་དང༌། །རྨིག་པ་རྣམས་ནི་ཆ་ཆུང་བཞི། །མུན་པའི་ཆ་ཆུང་ཕྱེད་དང་གཉིས། །བ་རན་ལ་ནི་ཆ་ཆུང་གཅིག །དེ་
བཞིན་སླར་ཡང་མུན་པ་སྟེ། །ཤར་བུ་དེ་བཞིན་ནོར་བུ་དང༌། །རྨིག་པ་ཆ་ཆུང་རེ་རེར་འགྱུར། །མངའ་ཡབ་ཀྱང་ནི་དེ་བཞིན་ནོ། །འདི་རྣམས་དཔངས་ཀྱི་ཚད་དུ་ནི། །བཤད་དེ་རྒྱར་ཡང་བརྗོད་པར་བྱ། །བཅུ་དྲུག་བྲེ་ཕུལ་ཚད་དུ་འགྱུར། །ཤར་བུ་ལ་ནི་བཅོ་བརྒྱད་བཤད། །རིན་ཆེན་རྨིག་པ་དེ་བཞིན་བྱ། །མུན་པ་ལ་ནི་བཅུ་བཞིར་འགྱུར། །བ་རན་ལ་ནི་བཅུ་དྲུག་ཡིན། །སླར་ཡང་མུན་པ་བཅུ་གཉིས་ཡིན། །ཤར་བུ་ལ་ནི་བཅུ་བཞི་དང༌། །ནོར་བུ་རྨིག་པ་དེ་བཞིན་ཉིད། །མདའ་ཡབ་ལ་ནི་བཅུར་འགྱུར་ཏེ། །ཆོས་ཀྱི་འཁོར་ལོ་ཆ་ཆུང་གཉིས། །ར་ལ་ཆ་ཆུང་གཉིས་དེ་རྣམས། །དཀྱིལ་འཁོར་ཀུན་ལ་ཀུན་དུ་འགྲོ། །ཆ་ཆུང་ཕྱེད་དང་བཞི་པའི་ཐིག །ཚངས་པ་ལ་ནི་གཟུང་བྱས་ནས། །ཆ་ཆུང་བདུན་པའི་ཟླུམ་པོ་དེར། །འཁྱོག་པོའི་དོན་དུ་རབ་མཛེས་བྱ། །ཚངས་པའི་གཡས་དང་གཡོན་དག་ཏུ། །སླར་ཡང་ཆ་ཆུང་གསུམ་གྱི་བར། །དེ་བཞིན་ཉིད་དུ་ཟླུམ་པོ་བསྐོར། །ཟླ་ཕྱེད་ལྟ་བུར་མཛེས་པ་བྱ། །དེ་ཉིད་ནང་དུ་ཟླུམ་པོ་ནི། །སླར་ཡང་ཆ་ཆུང་ཕྱེད་ཀྱི་བར། །རིན་ཆེན་ལ་སོགས་བྲི་དོན་དུ། །བློ་བཟང་ཀྱིས་ནི་དེ་བཞིན་བསྐོར། །ནང་དུ་ལྷག་པའི་རེ་ཁཱ་ཀུན། །ཀུན་ནས་རབ་ཏུ་དབྱི་བར་བྱ། །སྣམ་བུ་རྣམས་ཀྱི་སྟེང་འོག་ཏུ། །ཐིག་ནི་སྦྱིན་བྱ་གཉིས་པ་ལས། །མཛེས་པའི་དོན་དུ་འབད་པས་དེར། །འཁྱོག་པོ་ཡི་ནི་ནང་དུ་ཡང༌། །ཚངས་པ་ལ་ནི་ཆ་ཆུང་བཞིར། །བཟུང་ནས་སླར་ཡང་སྒོ་གསུམ་བར། །རྭ་ཡི་དོན་དུ་མཛེས་བའི་ཐིག །ཟླ་བ་ཕྱེད་པ་ལྟ་བུར་བསྐོར། །དེ་ཉིད་གཡས་དང་གཡོན་དག་ཏུ། །ཆ་ཆུང་གསུམ་གྱི་བར་དུ་ཡང༌། །དེ་བཞིན་ཉིད་དུ་ཟླུམ་པོ་བསྐོར། །རྡོ་རྗེ་སློབ་དཔོན་མཁས་པས་སོ། །ཆུ་སྲིན་ཁ་ལས་ཐོན་པའི་རྭ། །འབར་བའི་ཕྲེང་བས་བརྒྱན་པར་བྱ། །རྟ་བབས་སྟེང་དུ་འཁོར་ལོའི་ངོས། །གཉིས་སུ་རི་དགས་རི་དགས་མོ། །ཆ་ཆུང་ཕྱེད་ལས་རིང་བར་ནི། །མགྲིན་པ་གྱེན་དུ་འགྲེང་བ་བྲི། །དེ་དག་གི་ནི་མཇུག་མ་རུ། །མཛེས་པའི་གདུགས་གཉིས་བྲི་བར་བྱ། །རྟ་བབས་འོག་ཏུ་བླ་རེ་ནི། །དྲིལ་བུར་བཅས་ཤིང་རྔ་ཡབ་ལྡན། །གྲུབ་པ་རིག་པ་འཛིན་པའམ། །སྙིང་པོར་མཁའ་འགྲོ་མ་ཉིད་གཉིས། །ལག་པར་མཆོད་རྫས་འཛིན་པ་དག །སླར་ཡང་དཀྱིལ་འཁོར་འཇུག་པར་བྱ། །དད་པ་བྱ་ཁྱུང་མི་
འམ་ཅི། །སེང་གེ་ལ་སོགས་རབ་མཛེས་བྱ། །སྣམ་བུ་རྣམས་ཀྱི་མཐར་བྲི་ཞིང༌། །དེ་བཞིན་བ་དན་ཕྲ་མོ་རྣམས། །རྭ་ཡི་གཡས་དང་གཡོན་དུ་ཡང༌། །བུམ་པར་གནས་པའི་དཔག་བསམ་ཤིང༌། །རིན་ཆེན་བརྒྱད་དང་མཉམ་པར་ལྡན། །འཁྲི་ཤིང་རྣམས་ཀྱིས་ཡོངས་སུ་གང༌། །སྣ་ཚོགས་མེ་ཏོག་འབྲས་བུ་དང༌། །སྣ་ཚོགས་བྱ་ཀུན་སྒྲ་སྒྲོགས་དང༌། །གྲུབ་པ་རིག་པ་འཛིན་རྣམས་ཀྱིས། །ཀུན་ནས་ཡོངས་སུ་བསྐོར་བ་དང༌། །སྤྲིན་ལ་ངེས་པར་གནས་པའི་གཟུགས། །དེ་རྣམས་ཐམས་ཅད་བྲི་བྱ་ཞིང༌། །སྒོ་རྣམས་སུ་ནི་རྒྱལ་མཚན་བྱ། །བུམ་པ་གནས་པའི་གཡས་གཡོན་དུ། །སེང་གེ་དད་པ་རྨ་བྱ་དང༌། །ཆུ་སྲིན་ཉ་རྣམས་ཀྱིས་མཚན་ཅིང༌། །བ་དན་སྣ་ཚོགས་གཡོ་བ་ཅན། །དྲིལ་བུ་སིལ་སིལ་སྒྲོགས་པའོ། །ཟུར་རྣམས་སུ་ནི་གདུགས་བྱ་ཞིང༌། །གཞན་ཡང་བ་དན་ཕྲ་མོ་རྣམས། །མཚན་མ་སོགས་དང་བྲལ་བ་སྟེ། །སྣ་ཚོགས་མདོག་ཅན་ཀུན་ནས་བྱ། །གཞན་ཡང་དུར་ཁྲོད་རྣམས་ཀྱི་ནི། །ཁྱད་པར་དཀྱིལ་འཁོར་རྣམས་ལ་ཡང༌། །འོད་ཟེར་ཕྲེང་བ་ཆ་ཆུང་གཉིས། །རྡོ་རྗེ་ཕྲེང་བ་ཆ་ཆུང་གཅིག །པདྨའི་ཕྲེང་བ་དེ་བཞིན་བྱ། །དུར་ཁྲོད་ལ་ནི་ཆ་ཆུང་བཞི། །སྐལ་ལྡན་མཉམ་པར་འོངས་པ་ན། །རབ་ཏུ་འབད་པས་བྲི་བྱ་སྟེ། །སྐལ་མེད་ཡང་དག་འོངས་པ་ན། །དམ་ཚིག་བསྲུང་བས་མི་བྱ་ཉིད། །དེ་ནི་རྡོ་རྗེ་མཁའ་འགྲོའི་རྒྱུད་ལས་ཀྱང་གསུངས་ཏེ། །ཚོན་གྱི་ས་ཡི་ཉིས་འགྱུར་ཚད། །ཕྱི་རོལ་འོད་ཀྱི་དཀྱིལ་འཁོར་ཏེ། །འཁོར་ས་དེ་ཡི་ཕྱི་རོལ་དུ། །ཤིང་སོགས་དུར་ཁྲོད་བརྒྱད་པོའོ། །ཞེས་པའི་གསུང་གིས་སོ། །གཞན་ཡང་ཀུན་དགའ་སྙིང་པོའི་རྟ་བབས་ཀྱང་བརྗོད་པར་བྱ་སྟེ། མི་བདག་ཉེས་པ་གསུམ་ཉི་མ། །མི་བདག་ཕྱོགས་དང་མི་བདག་གསུམ། །ཕྱོགས་ཏེ་ཐད་ཀར་ཆ་ཆུང་རྣམས། །རྟ་བབས་སྣམ་བུའི་རིམ་པ་ཡིན། །ཞེས་པའང་ཀུན་དུ་གྲོལ་བའོ། །གཞན་ཡང་ཕྱོགས་གང་ལ་སྒོ་འཁོར་ལོའི་བཅུ་ཆའམ་འཁོར་ལོའི་དགུ་ཆར་འགྱུར་བ་ལ་ནི། དཀྱིལ་འཁོར་ལ་ཡང་མདའ་ཡབ་ཀྱི་མཐར་ཐུག་པ་ལ་ཆ་ཆུང་དྲུག་ཅུ་རྩ་བཞི་སྟེ། །ཕྱོགས་དེ་ལ་ནི་རྟ་བབས་ཀྱི་རྒྱར་ཆ་ཆུང་བཅུ་གཉིས་དང༌། དཔངས་སུ་ཆ་ཆུང་བཞིར་འགྱུར་རོ། །འོན་ཀྱང་སྣམ་བུ་ནི་བཅུ་
གཅིག་སྟེ། དེ་ལྟར་ཡང༌། །ཤར་བུ་རིན་ཆེན་གནས་དང་གསེར། །ཆུ་སྲིན་དེ་ནས་གསེར་དང་ནི། །གནས་དང་རིན་ཆེན་ཡང་དག་གནས། །གསེར་དང་མདའ་ཡབ་དེ་དག་གོ །གནས་ཞེས་བྱ་བ་ནི་རྨིག་པའི་རྣམ་གྲངས་སོ། །ཆ་ཆེན་ཆ་ཡི་དབྱེ་བ་ཡིས། །དཔངས་ཀྱི་ཚད་རྣམས་ཞེས་བྱ་སྟེ། །ནོར་དང་ནོར་དད་ཉི་མ་དང༌། །རྒྱལ་བ་ནོར་དང་རྒྱལ་བ་དང༌། །ཉི་མ་ནོར་དང་ཉི་མ་དང༌། །རྒྱལ་བ་ནོར་རྣམས་རིམ་པ་བཞིན། །དཔངས་ཀྱི་ཚད་དུ་བཤད་པ་སྟེ། །རྒྱར་ནི་འདི་རྣམས་བརྗོད་པར་བྱ། །ཚངས་པའི་གཡས་དང་གཡོན་དག་ཏུ། །ཆ་ཆུང་ཕྱེད་བཅས་ཆུ་གཏེར་མཐར། །ཆ་ཆུང་ཕྱེད་དང་གཉིས་པའི་ཐིག །དེ་བཞིན་ཆ་ཆུང་གཉིས་ནས་ནི། །སྣམ་བུ་གཉིས་པ་གསུམ་པ་དག །ཆ་ཆུང་གཉིས་དང་ཆ་ཆུང་བཞི། །ཆ་ཆུང་བཞི་དང་བཞི་པ་ནི། །ཆ་ཆུང་གཉིས་ཏེ་ཕྱེད་དང་ནི། །བཞི་ནས་ཕྱེད་དང་གསུམ་པ་དང༌། །གསུམ་ནས་དྲུག་པ་ཆ་ཆུང་གསུམ། །དེ་ནས་ཆ་ཆུང་བརྒྱད་པ་གསུམ། །བདུན་པ་གཅིག་དང་མཐར་དྲུག་པའོ། །དེའི་ཕྱིར་ཆ་ཆུང་རིག་བྱེད་མཐར། །ཟླུམ་པོ་ཆ་ཆུང་གཉིས་དེ་བཞིན། །ཆ་ཆུང་གཉིས་པ་ཟླུམ་པོའི་ཐིག །དེ་ནི་ཆ་ཆུང་བཞི་པའི་མཐར། །ཞེས་པ་རྒྱར་རྟ་བབས་སྒོ་ལས་སུམ་འགྱུར་གྱི་ཕྱོགས་ཀྱང་ངོ༌། །དེ་ལྟར་ཕྱོགས་གཉིས་ཀ་ཡང་བདག་གིས་བརྗོད་དོ། །ཕྱོགས་གཉིས་པ་ལ་སྙིང་པོའི་དཀྱིལ་འཁོར་ལས་ཉིས་འགྱུར་དུ་ཕྱིའི་དཀྱིལ་འཁོར་གསུངས་པ་ནི། །པདྨའི་གེ་སར་གྱི་ཟླུམ་པོའི་ཐིག་ཚུན་ཆད་དོ། །ཕྱོགས་དང་པོ་ལས་ནི་འཁོར་དང་བཅས་པའི་སྙིང་པོའི་དཀྱིལ་འཁོར་ལས་འོད་ཟེར་ཕྲེང་བའི་བར་ཇི་སྲིད་པའོ། །རྟ་བབས་ཀྱི་ཀ་བ་ལས་ཕ་རོལ་པདྨའི་གེ་སར་ཟླུམ་པོའི་ཐིག་ལས་ཚུ་རོལ་དུ་ཆ་ཆུང་བཞི་པའི་རྟ་བབས་སོ་ཞེས་པ་ནི་ཕྱོགས་གཉི་ག་དང་ཡང་མི་མཐུན་པས་སྤངས་སོ། །འདིར་སྒོ་དང་སྒོ་ཁྱུད་ཀྱི་མཚམས་སུ་ཆ་ཆུང་གཅིག་ལ་ཟླ་ཚེས་ལ་གནས་པའི་རིན་པོ་ཆེ་དམར་པོ་འམ་སེར་པོ་འམ་ལྗང་གུ་འམ་ནག་པོ་ཡང་རུང་སྟེ། །སྟེང་དུ་རྡོ་རྗེ་ཕྱེད་པས་མཚན་པ་འམ་ཡོངས་སུ་རྫོགས་པའི་རྡོ་རྗེས་མཚན་པ་བྲིའོ། །དེ་ལྟར་ཡང༌། །ཚོན་གྱི་ས་ལས་ཕྱི་ཡི་ཟུར། །སྒོ་དང་སྒོ་ཁྱུད་མཚམས་རྣམས་སུ། །ཟླ་བ་རིན་ཆེན་རྡོ་རྗེས་མཚན། །ཀུན་ནས་ཡོངས་སུ་འབར་བ་ཡིན། །
ཞེས་གསུངས་པའི་ཕྱིར་རོ། །རྟ་བབས་ཀྱི་ཀ་བ་རྣམས་ནི་སྟེགས་བུ་གྲུ་བཞི་པ་ལ་གནས་པའི་བུམ་པ་ལ་གནས་པའོ། །དེ་ལྟར་ཡང༌། ཆུ་སྲིན་ཁ་ནས་ར་ཡི་བར། །རྟ་བབས་སྒོ་ལས་སུམ་འགྱུར་ཏེ། །སྟེགས་བུ་བུམ་པ་ལས་བྱུང་བའི། །རྟ་བབས་ཀ་བ་ངེས་པར་གནས། །ཞེས་གསུངས་སོ། །དེ་རྣམས་ཀྱི་རྩ་བ་དང་རྩེ་མོ་ལ་ནོར་བུས་སྤྲས་པའོ། །དབུས་སུ་གླང་པོ་ཆེའི་སྟེང་དུ་དཔུང་པས་བཏེག་པའི་སེང་གེའོ། །རྟ་བབས་ཀྱི་གདུང་ལས་འཕྱང་བའི་རིན་པོ་ཆེའི་པ་ཏྲ་འཕྲོ་བ་ལས་ཇི་ལྟར་མཛེས་པར་དཔྱངས་པའི་ཁ་དོག་དམར་པོ་དང་སེར་པོ་ལ་སོགས་པའམ། སྣ་ཚོགས་པའི་གོས་དང་རིན་པོ་ཆེའི་ཡུ་བ་ཅན་གྱི་རྔ་ཡབ་རྣམས་སོ། །ཁ་ཅིག་ཏུ་ནི་དར་དཔྱངས་ཀྱི་སྣམ་བུ་ལ་གླང་པོ་ཆེའི་སྟེང་དུ་སེང་གེའི་ཁ་ནས་འཕྱང་བའི་དོ་ཤལ་དང་ཀ་བའི་དབུས་སུ་མེ་ལོང་ཉིད་དོ་ཞེས་གསུངས་སོ། །རིན་པོ་ཆེའི་སྣམ་བུ་ལ་ནི་ཟུར་ལ་གྲུ་གསུམ་དང༌། གྲུ་བཞི་དང༌། ཐིག་ལེ་དང༌། ཟླུམ་པོ་རྣམས་གོ་རིམས་བཞིན་དུ་རིན་པོ་ཆེས་སྤྲས་པ་ནི་ཀ་བ་སོ་སོའི་གཞོགས་སུའོ། །དྲ་བ་དང་དྲ་བ་ཕྱེད་པའི་སྣམ་བུ་ལ་ནི་གསེར་གྱི་སྐ་རགས་ཀྱི་ཕྱི་ངོས་སུ་ཆུ་སྲིན་གྱི་ཁ་ནས་བྱུང་བའི་མུ་ཏིག་གི་དོ་ཤལ་སྐུད་པ་དམར་པོས་བརྒྱུས་ཤིང་ངོས་གཉིས་དང་སྟེང་དང་འོག་ཏུ་གསེར་གྱིས་སྦྲས་པའི་ནོར་བུ་དབུས་ན་ཡོད་པ་དང༌། དོ་ཤལ་གྱི་ངོས་དག་ཏུ་ཅུང་ཟད་འཕྱང་བའི་རིན་པོ་ཆེའི་ཕྲེང་བ་འཕྱང་ཞིང་རྩེ་མོ་ལ་གསེར་གྱིས་བཅིངས་པའི་ནོར་བུ་སྦོམ་པོ་དང་ལྡན་ཞིང་མཛེས་པའི་དྲ་བ་ཕྱེད་པའོ། །ཁ་ཅིག་ཏུ་ནི་རིན་པོ་ཆེའི་ཡུ་བ་ཅན་གྱི་རྔ་ཡབ་དང་དྲིལ་བུའི་མཐར་རྔ་ཡབ་འཕྱང་བའོ། །ཁ་ཅིག་ཏུ་ནི་དྲ་བ་ཕྱེད་པའི་དོས་དག་ཏུ་ཡིད་དུ་འོང་བའི་མེ་ཏོག་གི་ཕྲེང་བའི་དྲ་བ་ཕྱེད་པ་འཕྱང་ཞིང༌། དེའི་ངོས་སུ་སྣ་ཚོགས་པའི་གོས་ཀྱི་དྲ་བ་ཕྱེད་པའོ་ཞེས་གསུངས་སོ། །གཞན་ནི་ཟུར་རྣམས་སུ་ཡིད་དུ་འོང་བའི་མེ་ཏོག་གི་ཕྲེང་བའི་དོ་ཤལ་ཕྱེད་པ་དང༌། དར་གྱི་ཆུན་པོའི་དོ་ཤལ་རྣམས་སོ། །ཁ་ཅིག་ཏུ་ནི་དོ་ཤལ་གྱི་ནང་དུ་པདྨ་ལ་ཟླ་ཚེས་དང་རྡོ་རྗེ་ཕྱེད་པས་མཚན་པའི་ཉི་མའི་དཀྱིལ་འཁོར་རོ། །ཁ་ཅིག་ཏུ་ནི་རིན་པོ་ཆེའོ། །ཁ་ཅིག་ཏུ་ནི་པདྨ་ལ་གནས་པའི་རྡོ་རྗེའོ། །དེ་ལྟ་བུ་འདི་ནི་རྩ་བའི་དཀྱིལ་འཁོར་ལས་ཕྱི་རོལ་དུ་ཐིག་གདབ་ཅིང་བྲི་བའི་རིམ་པ་སྟེ། དཀྱིལ་འཁོར་ཐམས་ཅད་ཀྱི་ཐུན་མོང་བའོ། །ད་ནི་
ནང་གི་ཁྱད་པར་རྣམས་བརྗོད་པར་བྱ་སྟེ། སྔར་གྱི་ཐིག་རྣམས་རབ་བརྐྱང་ལ། །ཚངས་ལས་ཆ་ཆུང་ཐུབ་པ་ནས། །ཟླུམ་པོ་ཅིག་ནི་སྦྱིན་བྱ་སྟེ། །དེ་ནས་ཆ་ཆུང་ནོར་མཐར་ཡང༌། །དེར་ནི་རྡོ་རྗེའི་ཕྲེང་བ་བྱ། །འོད་ཟེར་མཐར་ནི་ཆ་ཆུང་ཉིད། །ཚངས་པའི་གཡས་དང་གཡོན་དག་ཏུ། །ཆ་ཆུང་གཉིས་གཉིས་བར་དུ་སླར། །ཀ་བའི་སྣམ་བུ་ཆ་ཆུང་རེ། །ཡང་དག་བསྲུངས་ནས་གཞན་རྣམས་དབྱི། །རེ་མིག་རྣམས་ཀྱི་སྙིང་པོ་ནི། །གྲུ་བཞིའོ་ཕྱོགས་རྣམས་དེ་ཉིད་ནི། །ཕྱོགས་བྲལ་སྤྱན་མ་ལ་སོགས་པའི། །གྲུ་གསུམ་དུ་ཡང་འགྱུར་བ་ཡིན། །གང་ཞིག་མཐར་ནི་ལྷ་སྣམ་ལ། །གཟུགས་ཀྱི་རྡོ་རྗེ་མ་ལ་སོགས། །ལྷག་པའི་རེ་ཁཱ་གང་ཡིན་པ། །དེ་རྣམས་ཐམས་ཅད་ཀུན་ནས་དབྱི། །དེ་ལྟ་བུ་ཡི་རིམ་པ་ཡིས། །འཇམ་པའི་རྡོ་རྗེ་དཀྱིལ་འཁོར་གྱུར། །གཙོ་བོ་གཞན་དུ་འགོད་པའི་ཐིག་ཀྱང་འདིའོ། །འདིས་ནི། གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་སྟེ། །ཐིག་བཞི་དང་ནི་མཉམ་པར་ལྡན། །ཕྱི་ཡི་དཀྱིལ་འཁོར་ཐིག་གདབ་བྱ། །དེ་ཡི་ནང་དུ་འཁོར་ལོ་ནི། །དཀྱིལ་འཁོར་བརྒྱད་པ་ལྟ་བུ་ཡིན། །ཕྱི་ཡི་འཁོར་ལོའི་ཕྱེད་དུ་ནི། །ཀུན་ནས་ཡོངས་སུ་ཟླུམ་པོ་སྟེ། །འཁོར་ལོའི་ཀ་བ་སོགས་ཀྱིས་བརྒྱན། །རྡོ་རྗེ་ཕྲེང་བས་བསྐོར་ཞིང་མཛེས། །འཁོར་ལོའི་ཀ་སོགས་ཐིག་རྣམས་ཀྱི། །ས་ནི་ཚོན་གྱི་ས་དང་མཉམ། །ཞེས་པའང་བཤད་པ་ཡིན་ནོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ་ཡང་ཐིག་གི་ཚུལ་འདི་ཉིད་དོ། །སླར་ཡང་ཁྱད་པར་བརྗོད་པར་བྱ་སྟེ། །སྙིང་པོར་ཟླུམ་པོ་གཉིས་བྱིན་ནས། །ཚངས་དང་ཟུར་གྱི་ཐིག་དག་གི །བར་དུ་ཀ་བ་ཆ་ཆུང་རེ། །ནམ་མཁའི་ཐིག་གིས་བརྒྱད་དུ་འགྱུར། །ཕྱོགས་དང་མཚམས་སུ་གྲུ་གསུམ་མོ། །བར་གྱི་ཟླུམ་པོ་གཉིས་ལ་ཡང༌། །གཟུགས་ཀྱི་རྡོ་རྗེ་མ་སོགས་དང༌། །རིན་ཆེན་བྱང་ཆུབ་སེམས་གནས་རྣམས། །ནང་ན་གནས་པའི་རེ་ཁཱ་དང༌། །སྣམ་བུར་གནས་པའི་རེ་ཁཱ་དབྱི། །ཞེས་པའོ། །དཔལ་ལྡན་ཁ་སྦྱོར་རྒྱུད་གསུངས་པའི། །རྡོ་རྗེ་སེམས་དཔའི་དཀྱིལ་འཁོར་ནི། །སོ་བདུན་བདག་ཉིད་འཁོར་ལོ་ལ། །ཚངས་པའི་གཡས་དང་གཡོན་དག་ཏུ། །ཕྱེད་བཅས་ཆ་ཆུང་བར་དོར་ནས། །ཆ་ཆུང་ཕྱེད་པའི་ཐིག་གཉིས་གདབ། །ཆ་ཆུང་གསུམ་དོར་ཟླུམ་པོ་ནི། །ཆ་ཆུང་ཕྱེད་པར་རྡོ་རྗེའི་ཕྲེང༌། །
ཕྱེད་ལ་འོད་ཟེར་ཕྲེང་བར་འགྱུར། །ཆ་ཆུང་གསུམ་གྱི་བར་ནས་སླར། །ཆ་ཆུང་ཕྱེད་པར་ཟླུམ་པོ་དེའི། །དབུས་སུ་པདྨའི་ཕྲེང་བ་ཡང༌། །ཆ་ཆུང་གསུམ་ནས་ཟླུམ་པོ་སྟེ། །སླར་ཡང་ཆ་ཆུང་ཕྱེད་པར་དེའི། །དབུས་སུ་འཁོར་ལོའི་ཕྲེང་བའོ། །གཞན་གྱི་ས་ལ་ཆ་ཆུང་གསུམ། །དཔལ་ལྡན་ཡེ་ཤེས་མཁའ་འགྲོ་མའི། །འཁོར་ལོ་བཅུ་གསུམ་བདག་ཉིད་མཛེས། །ཚངས་པའི་ཐིག་ལས་ཆ་ཆུང་ནི། །གསུམ་ལས་ཐིག་གཉིས་ཆ་ཆུང་འགྱུར། །སླར་ཡང་ཆ་ཆུང་དྲུག་དོར་ནས། །ཟླུམ་པོ་གཅིག་ནི་བསྐོར་བར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེའི་ཕྲེང་བའི་མཚན་མ་སྟེ། །འོད་ཟེར་ཕྲེང་བའི་དོན་དུ་གཞན། །ཆ་ཆུང་བར་ནས་སླར་ཡང་ངོ༌། །གཞན་གྱི་ས་ལ་ཆ་ཆུང་བཞི། །ལྷག་པའི་རེ་ཁཱ་དབྱི་བར་བྱ། །གང་ཞིག་བཅུ་བདུན་གྱི་ནི་བདག་ཉིད་ཅན། །ཀྱེ་ཡི་རྡོ་རྗེ་རྒྱལ་པོ་རྣམ་བཞི་དང༌། །རྡོ་རྗེ་བདུད་རྩི་བཞི་དང་དཔག་མེད་མ། །ཀུ་རུ་ཀུ་ལླེའི་དཀྱིལ་འཁོར་རྣམས་ལ་ནི། །ཚངས་པའི་ཐིག་ལས་ཕྱི་ངོས་སུ། །ཟླུམ་པོའི་ཐིག་བཞི་སྦྱིན་བྱ་སྟེ། །ཆ་ཆུང་བརྒྱད་ཆ་དང་བཅས་པའི། །ཆ་ཆུང་ཕྱེད་དང་གསུམ་མཐའ་དང༌། །རྐང་པར་བཅས་པའི་ཆ་ཆུང་ལྔར། །འདབ་མའི་དོན་དུ་གཉིས་པ་དང༌། །གསུམ་པ་རྡོ་རྗེའི་ཕྲེང་བ་ནི། །བརྒྱད་ཆར་བཅས་པའི་ཆ་ཆུང་དང༌། །བཞི་པ་འོད་ཕྲེང་ཆ་ཆུང་ངོ༌། །ལྷག་མའི་ས་ནི་ཆ་ཆུང་དྲུག །ནང་དུ་ཚངས་པའི་ཐིག་དང་ནི། །ཟུར་གྱི་ཐིག་རྣམས་དབྱི་བར་བྱ། །ཀྱེ་ཡི་རྡོ་རྗེ་དགུ་ཡི་བདག་ཉིད་ཅན། །རྣམ་བཞི་འདི་ཡི་སྐུ་ཡི་དཀྱིལ་འཁོར་ལ། །ཚངས་པ་དོར་ནས་ཀྱང་ནི་ཆ་ཆུང་ལྔར། །ཟླུམ་པོའོ་གཞན་ནི་ཉིས་འགྱུར་ཚད་ཡིན་ནོ། །དེ་ཡི་ཕྱི་རོལ་ཆ་ཆུད་ཟླུམ་པོ་ལ། །རྡོ་རྗེ་ཕྲེང་བ་ཡིས་ནི་མཚན་པ་སྟེ། །དེ་ཉིད་ལ་ནི་བུམ་པའི་ཕྲེང་བའོ། །ཞེས་སོ། །གསང་སྔགས་རིག་པ་འགའ་ཞིག་སྨྲ་བར་བྱེད། །སངས་རྒྱས་ཐོད་པའི་སྐུ་དང་ནི། །སྒྱུ་མ་ཆེན་མོ་ཞེས་བྱ་ལའང༌། །དེ་མཉམ་དཀྱིལ་འཁོར་རབ་གསུངས་ཏེ། །ཚད་འདི་ལ་ནི་ལྷག་ཆད་མེད། །མགོན་པོ་རྡོ་རྗེ་ཧཱུཾ་མཛད་ཀྱི། །དཀྱིལ་འཁོར་ཐིག་ལ་ངེས་པར་ནི། །ཚངས་པའི་ཐིག་གི་ངོས་གཉིས་སུ། །ཆ་ཆུང་ཕྱེད་དང་གསུམ་དོར་ནས། །གེ་སར་གྱི་ནི་ཟླུམ་པོར་འགྱུར། །ཆ་ཆུང་ལྔ་ནས་འདབ་མའིའོ། །དེ་ནས་ཆ་ཆུང་ཡོངས་དོར་ཏེ། །ཕྱོགས་དང་
ཕྱོགས་བྲལ་རྣམས་སུ་ཡང༌། །ཆ་ཆུང་ཕྱེད་དང་བརྒྱད་པ་ཡི། །པདྨ་བརྒྱད་དུའང་འགྱུར་བ་ཡིན། །ཤར་དང་ནུབ་ཀྱི་སྒོ་ཉིད་དུ། །ཆ་ཆུང་གསུམ་པའི་པདྨ་བྱ། །འཁོར་ལོ་བདེ་མཆོག་ཕག་མོ་ཡི། །དཀྱིལ་འཁོར་ཐིག་ནི་ཇི་ལྟ་བར། །རྩ་ཐིག་ནས་ཕྱེད་ཕྱེད་དང་བཞི། །ཕྱེད་ཕྱེད་ཕྱེད་དང་བཞི་དང་ཕྱེད། །ཕྱེད་དང་བཞི་དང་བཞི་ཆ་དང༌། །འདབ་མའི་ཕྱེད་དང་གསུམ་ནས་ནི། །དེར་ནི་བླ་མའི་ཟླུམ་པོ་རྣམས། །བསྐོར་བར་བྱ་ཞིང་དེ་ནས་ནི། །རྩི་བས་ཀྱི་དོན་དུ་ཐིག་བཏབ་སྟེ། །ཚངས་པའི་གཡས་དང་གཡོན་དག་ཏུ། །ཆ་ཆུང་ཕྱེད་དང་གཉིས་ཀྱི་བར། །སྤངས་ནས་ཐིག་ནི་རབ་སྦྱིན་བྱ། །རྩ་ཐིག་དག་གི་བར་དུའོ། །ཆ་ཆུང་ཕྱེད་ཀྱི་བར་དོར་ནས། །སླར་ཡང་ཐིག་ནི་དེ་བཞིན་གདབ། །ཟུར་དུ་ཡང་ནི་དེ་བཞིན་ཉིད། །སྔགས་པས་ཐིག་བཞི་སྦྱིན་པར་བྱ། །ཚངས་པ་ལས་ནི་ངེས་སོང་ཐིག །ཇི་སྲིད་ཆ་ཆུང་གཉིས་ཀྱི་ཕྱིར། །སླར་ཡང་དེ་ལས་རྣམ་སོང་སྟེ། །དེ་ཉིད་དུ་ནི་དེ་བཞིན་འཇུག །དེ་ལས་ཀྱང་ནི་ངེས་སོང་ཐིག །སླར་ཡང་ཆ་ཆུང་གཉིས་ཀྱི་བར། །དེ་ལས་སླར་ཡང་རྣམ་སོང་ནས། །ཐིག་དེ་ལ་ནི་རབ་ཏུ་འཇུག །སླར་ཡང་དེ་ལས་དེ་སོང་ནས། །ཇི་སྲིད་ཆ་ཆུང་གཉིས་ཀྱི་བར། །སླར་ཡང་དེ་ལས་རྣམ་སོང་སྟེ། །ཚངས་པ་དེར་ནི་རབ་ཏུ་འཇུག །ཇི་ལྟར་གཡས་སུ་དེ་བཞིན་གཡོན། །ཕྱོགས་སུ་དེ་བཞིན་མཚམས་སུ་ཡང༌། །དེ་ཡི་ཡང་ནི་ནང་དུ་ཐིག །ཆ་ཆུང་ཕྱེད་ཀྱི་བར་དེ་བཞིན། །དེ་ཉིད་རིམ་པའི་སྦྱོར་བ་ཡིས། །གཡས་དང་གཡོན་མིན་དག་ལ་བྱ། །ཐིག་ལེའི་དཀྱིལ་འཁོར་དགའ་བ་ཅན། །བདེ་མཆོག་རྒྱ་མཚོ་ལས་འབྱུང་བའོ། །རྩིབས་ཀྱི་ངོས་སུ་ཤིན་ཏུ་ནི། །མི་བཟད་རྡོ་རྗེ་བཞི་ཡིས་བསྐོར། །ལྷག་མ་པདྨ་འདབ་བརྒྱད་དེ། །ཚད་འདི་ལས་ནི་ལྷག་ཆད་མེད། །ཐུགས་སོགས་འཁོར་ལོའི་མུ་ཁྱུད་ལ། །རྡོ་རྗེ་པདྨ་འཁོར་ལོ་ཕྲེང༌། །ཟླུམ་པོའི་ཐིག་དང་རྩིབས་ཀྱིས་བསྐོར། །ཡང་དག་བསྲུངས་ནས་གཞན་རྣམས་དབྱི། །ཉི་ཤུ་རྩ་ལྔའི་བདག་ཉིད་ཅན། །མགོན་པོ་སངས་རྒྱས་ཐོད་པ་ལ། །དེ་རྣམས་དཀྱིལ་འཁོར་རབ་བསྲུངས་ཏེ། །སླར་ཡང་ཁྱད་པར་ཅུང་ཟད་ནི། །ཟླུམ་པོ་དྲུག་པའི་ནང་དོར་ནས། །འདབ་མའི་དེན་དུ་ཆ་ཆུང་ལྔའི། །ཟླུམ་པོ་
གཅིག་ནི་སྦྱིན་བྱ་སྟེ། །གེ་སར་དོན་དུ་རབ་མཛེས་པའོ། །དཔལ་ལྡན་རྣལ་འབྱོར་ནམ་མཁའ་ཡི། །འཁོར་ལོར་རྩ་ཐིག་ནང་དུ་ཡང༌། །ཆ་ཆུང་ཕྱེད་དང་བཞི་དོར་ནས། །ཟླུམ་པོ་གཅིག་ནི་བསྐོར་བར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེ་ཕྲེང་བ་རབ་མཛེས་པའོ། །དེ་ནས་ཆ་ཆུང་གསུམ་དོར་ནས། །ཟླུམ་པོ་གཅིག་ནི་སྦྱིན་བྱ་སྟེ། །བསྡུས་པའི་རིམ་པའི་དཀྱིལ་འཁོར་ལ། །ཐིག་རྣམས་བཤད་པ་ཇི་བཞིན་ནོ། །གཞན་གྱི་ཐིག་རྣམས་ཐམས་ཅད་ནི། །དཀྱིལ་འཁོར་འདིར་ཡང་དེ་བཞིན་ཉིད། །རྩ་བའི་ཐིག་གི་ནང་དུ་གཞལ་ཡས་ཁང་གཉིས་པའི་ཐིག་ཀྱང་འཆད་པར་འགྱུར་བའི་བཞི་བཅུ་རྩ་གསུམ་གྱི་བདག་ཉིད་འཇམ་པའི་རྡོ་རྗེའི་དཀྱིལ་འཁོར་ལྟ་བུའོ་ཞེས་པ་ནི་གཞན་དག་གོ །སྙིང་པོའི་གཞལ་ཡས་ཁང་ལས་གཞལ་ཡས་ཁང་གཉིས་པ་ནི་ཟླུམ་པོའོ་ཞེས་པ་ཁ་ཅིག་གིའོ། །གཞན་དག་ནི་འདིར་གཞལ་ཡང་ཁང་མེད་དེ། །རྡོ་རྗེའི་ཕྲེང་བ་སྔར་བཞིན་ནོ། །ཞེས་པའོ། །བཅུ་གསུམ་གྱི་ནི་བདག་ཉིད་ཅན། །ཁྲོ་རྒྱལ་གཤིན་རྗེ་གཤེད་ལ་ཡང༌། །ཚངས་ལས་ཆ་ཆུང་བདུན་མཐའ་དང༌། །བརྒྱད་ཀྱི་མཐར་ཡང་རིག་གདབ་སྟེ། །ཀུན་ནས་ཟུར་གྱི་ཐིག་ལའོ། །རྡོ་རྗེ་ཕྲེང་བའི་མཚན་མ་སྟེ། །ཕྱོགས་སུ་རྡོ་རྗེའི་ར་ལྔ་སྟེ། །ཀུན་ནས་ཆ་ཆུད་བརྒྱད་པའོ། །དཔལ་ལྡན་རྡོ་རྗེ་སྒྲོལ་མའི་ལྷའི། །དཀྱིལ་འཁོར་ཐིག་གི་ངེས་པ་ནི། །ཚངས་ལས་ཆ་ཆུང་གསུམ་གྱི་མཐར། །གེ་སར་རྩེ་མོའི་ཟླུམ་པོ་སྟེ། །དེའི་ཕྱིར་ཆ་ཆུང་དྲུག་ནས་བསྐོར། །འདབ་མའི་ཕྲེང་བའི་མཚན་མའོ། །དེར་གནས་ཚངས་དང་དེ་བཞིན་སླར། །ཟུར་གྱི་ཐིག་ཀྱང་དབྱི་བར་བྱ། །དཔལ་ལྡན་འཇམ་པའི་རྡོ་རྗེ་ཡི། །དཀྱིལ་འཁོར་ཐིག་ནི་ཇི་བཞིན་སླར། །ཉེར་ལྔའི་བདག་ཉིད་འོད་ཟེར་ཅན། །དཀྱིལ་འཁོར་ལ་ཡང་དེ་བཞིན་ནོ། །བཅུ་གསུམ་གྱི་ནི་བདག་ཉིད་ཅན། །སྲུང་བ་ལྔ་ཡི་དཀྱིལ་འཁོར་ཡང༌། །ཚངས་པའི་ཐིག་ལས་ཆ་ཆུང་གཉིས། །གེ་སར་རྩེ་མོའི་ཟླུམ་པོ་སྟེ། །དེ་ནས་ཆ་ཆུང་བཞི་ནས་བསྐོར། །འདབ་མའི་དོན་དུ་རབ་མཛེས་པའོ། །དེ་ནས་ཆ་ཆུང་བར་ཕྱོགས་སུ། །ཆ་ཆུང་བརྒྱད་པའི་པདྨ་སྟེ། །ཐིག་དེ་རྣམས་ཀྱི་ཕྱི་རོལ་དུ། །ཀུན་ནས་གྲུ་བཞི་སྦྱིན་པར་བྱ། །ཚངས་པའི་ཐིག་དང་དེ་བཞིན་
དུ། །སླར་ཡང་ཟུར་གྱི་ཐིག་རྣམས་དབྱི། །གསུམ་ལྷག་པ་ཡི་བརྒྱ་ཕྱེད་ཅན། །རྡོ་རྗེ་དབྱིངས་ཀྱི་དཀྱིལ་འཁོར་ལའང༌། །རྩ་བ་ཡི་ནི་ནང་དུ་ཐིག །ཆ་ཆུང་བརྒྱད་དུ་སྦྱིན་པར་བྱ། །དེ་ཉིད་གཉིས་པ་ནང་མ་ཡི། །དཀྱིལ་འཁོར་གྱི་ནི་རྩ་ཐིག་ཡིན། །རྟ་བབས་མེད་ཅིང་སྒོ་ཁྱུད་བཅས། །སྒོ་རྣམས་དང་ནི་མཉམ་པར་ལྡན། །རྩ་བའི་ནང་གི་མཐར་ཐུག་པར། །ཀུན་ནས་ཟླུམ་པོ་སྦྱིན་པར་བྱ། །སླར་ཡང་ཆ་ཆུང་ཟླུམ་པོ་ལ། །རྡོ་རྗེ་ཡི་ནི་མཚན་མ་སྟེ། །ཚངས་པའི་གཡས་དང་གཡོན་དག་ཏུ། །ཆ་ཆུང་གཉིས་གཉིས་ཀྱི་ནི་བར། །སྤངས་ནས་ཐིག་ནི་རབ་སྦྱིན་བྱ། །ཟླུམ་པོའི་ཐིག་གཉིས་བར་དུའོ། །ཆ་ཆུང་བར་ནས་སླར་ཡང་ཐིག །ཀ་བའི་དོན་དུ་དེ་བཞིན་སྦྱིན། །རེ་མིག་དགུར་ནི་འགྱུར་བ་ཡིན། །ཚངས་པའི་ཐིག་ལ་སོགས་པ་དབྱི། །དེ་ཉིད་བསྡུས་ལས་ཁམས་གསུམ་རྣམ་རྒྱལ་གྱི་དཀྱིལ་འཁོར་ལ་ནི་ནང་གི་གཞལ་ཡས་ཁང་རྟ་བབས་དང་བཅས་པའོ་ཞེས་གསུངས་སོ། །བཞི་བཅུ་རྩ་གསུམ་བདག་ཉིད་ཅན། །འཇམ་པའི་རྡོ་རྗེའི་དཀྱིལ་འཁོར་ལ། །རྩ་བའི་ཐིག་གི་ནང་དུ་ཐིག །རང་གི་སྒོ་ཚད་གཉིས་ཀྱི་བར། །དེར་ཡང་སྔགས་པས་སྦྱིན་པར་བྱ། །ཟུར་ཐིག་གཉིས་ཀྱི་བར་དུའོ། །ད་ཉིད་གཉིས་པ་ནང་གི་ནི། །དཀྱིལ་འཁོར་གྱི་ཡང་རྩ་ཐིག་ཡིན། །རྟ་བབས་མེད་ཅིང་སྒོ་དང་ནི། །སྒོ་འགྲམ་སོགས་དང་ཡང་དག་ལྡན། །དཀྱིལ་འཁོར་གསུམ་པའང་དེ་བཞིན་དུ། །དེ་ཡི་ཡང་ནི་ནང་དུ་བྱ། །ཇི་ལྟར་རྡོ་རྗེ་དབྱིངས་བཞིན་ནང༌། །དེ་བཞིན་འདིར་ཡང་རེའུ་མིག་དགུ། །དེ་ཉིད་སྔགས་པ་རྣམས་ཀྱིས་བྱ། །རྡོ་རྗེ་ཕྲེང་བས་ལེགས་པར་བསྐོར། །གསུང་གི་དབང་ཕྱུག་དཀྱིལ་འཁོར་ལའང༌། །འཁོར་ལོ་ཐམས་ཅད་མཚུངས་པར་ཕྱིའི། །ཐིག་གདབ་པ་ནི་ཤེས་བྱ་སྟེ། །ཁྱད་པར་སླར་ཡང་བརྗོད་པར་བྱ། །ཀུན་ནས་ཟླུམ་པོ་བཟང་པོ་ཡིས། །ཕྱི་རོལ་གྱི་ནི་འཁོར་ལོ་བྱ། །གོས་འོག་རྩ་པ་ནས་བཟུང་སྟེ། །ཕ་རོལ་གོས་ཀྱི་འོག་ནས་ཐིག །ཐིག་གི་རིམ་པ་མ་འདས་པར། །ཟླུམ་པོ་བདུན་ནི་བསྐོར་བར་བྱ། །རྩ་བའི་ཐིག་གི་ནང་དག་ཏུ། །སྒོ་གཉིས་ཀྱི་ནི་བར་སྤངས་ནས། །ཐིག་གཅིག་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ།།
ཐིག་དེ་ཡང་ནི་དཀྱིལ་འཁོར་ནི། །གཉིས་པ་ཡི་ཡང་རྩ་བ་ཡིན། །རྟ་བབས་མེད་ཅིང་སྒོ་ཁྱུད་བཅས། །སྒོ་རྣམས་དང་ནི་མཉམ་པར་ལྡན། །དེ་ཡི་ནང་དུ་གསུམ་པ་ཡི། །དཀྱིལ་འཁོར་གྱི་ནི་རྩ་བ་སྟེ། །སྒོ་གཉིས་ཡོངས་སུ་དོར་བས་ན། །ཐིག་ཀྱང་དེ་བཞིན་གདབ་པར་བྱ། །རྟ་བབས་མེད་ཅིང་སྒོ་འགྲམ་དང༌། །སྒོ་དང་སྒོ་ཁྱུད་སོགས་ཀྱིས་བརྒྱན། །དེ་ཡི་ཡང་ནི་ནང་དག་ཏུ། །དཀྱིལ་འཁོར་བཞི་པའང་དེ་བཞིན་ཉིད། །རྡོ་རྗེ་དབྱིངས་ཀྱི་ནང་ཇི་བཞིན། །དེ་བཞིན་འདིར་ཡང་རེ་མིག་དགུའོ། །རྭ་ཡི་ཕྱི་རོལ་གྱུར་པ་འདིར། །གསེར་གྱི་ས་ལ་སོར་བཞི་སྟེ། །རྡོ་རྗེའི་ཕྲེང་བ་དེ་བཞིན་བྱ། །རིན་ཆེན་ཕྲེང་བ་དེ་བཞིན་སླར། །པདྨའི་ཕྲེང་བའང་དེ་བཞིན་ཉིད། །འཁོར་ལོའི་ཕྲེང་བ་སླར་དེ་བཞིན། །ལྷག་མའི་གནས་ལ་དེ་བཞིན་དུ། །ཕྱི་རོལ་འོད་ཟེར་སོར་བཅུ་གཉིས། །ཞེས་པ་ནི་འཁོར་དང་བཅས་པ་འོད་ཟེར་གྱི་མཐར་ཐུག་པ་ལ་ཁྲུ་བཅུ་དྲུག་གི་ཚད་དང་ལྡན་པའི་དཀྱིལ་འཁོར་གྱི་ཐིག་བརྗོད་པར་བྱ་སྟེ། གཞན་དུ་ཡང་འདིའི་རྗེས་སུ་འབྲངས་ནས་རྟོགས་བར་བྱའོ། །སུམ་ཅུ་གཉིས་བདག་ཉིད་ལྷ། །འཕགས་ལུགས་འཁོར་ལོ་ཇི་ལྟ་བར། །དེ་ཉིད་རིམ་པའི་སྦྱོར་བ་ཡིས། །ངན་སོང་སྦྱོང་བའི་འཁོར་ལོའོ། །ཁྱད་བར་རྡོ་རྗེའི་ཕྲེང་བ་ཡི། །ནང་དུ་རིག་པར་བྱ་བ་ནི། །རྡོ་རྗེ་ཕྲེང་བ་སོགས་སྤངས་ནས། །འཁོར་ལོ་སེར་པོ་རྩིབས་བརྒྱད་བའོ། །རྩ་བའི་ཐིག་གི་ནང་དག་ཏུ། །འདི་ནི་སྒོ་ཡི་བར་སྤངས་ནས། །ཐིག་གསུམ་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །ཆ་ཆུང་རིག་བྱེད་སྤངས་ནས་ཀྱང༌། །ཐིག་གཅིག་སླར་ཡང་བྲི་བར་བྱ། །སླར་ཡང་ཆ་ཆུང་བཞི་སྤངས་ནས། །དེ་བཞིན་དུ་ཡང་ཐིག་སྦྱིན་ནོ། །དབུས་སུ་རེ་ཁ་དགུ་པ་སྟེ། །འཇམ་པའི་རྡོ་རྗེའི་ཟླུམ་པོ་ཡི། །ཕོ་བྲང་བཞིན་ནི་ཤེས་པར་བྱ། །འབྱུང་པོ་འདུལ་བའི་དཀྱིལ་འཁོར་རོ། །ད་ནི་མཁའ་འགྲོ་ལྔ་རྣམས་ཀྱི། །དཀྱིལ་འཁོར་ཐིག་ནི་བརྗོད་པར་བྱ། །སོ་སོའི་དོས་སུ་ཚངས་པ་ལས། །ཆ་ཆུང་ཕྱེད་དང་ལྔ་སྤངས་པར། །བྱ་སྟེ་དེ་ལ་ཆ་ཆུང་གཉིས། །ཆ་ནི་གཉིས་གཉིས་ངོས་དག་ཏུ། །སྤངས་པར་རྩ་བའི་ཐིག་བྱ་ཞིང༌། །ནང་གི་ཆ་ཡི་
བརྒྱད་ཆ་ཡི། །ཚད་དེས་སྒོ་དང་སྒོ་ལོགས་སོགས། །བྱ་སྟེ་རྟ་བབས་མེད་པའོ། །ཆ་ཆུང་སྤངས་ནས་ཕྱོགས་རྣམས་སུ། །དཀྱིལ་འཁོར་བཞི་བོ་རྣམས་ལ་ཡང༌། །རིམ་པ་འདི་ཡི་སྦྱོར་བ་ཡིས། །མཁས་པས་ཐིག་རྣམས་སྦྱིན་པར་བྱ། །ཕྱོགས་སུ་དཀྱིལ་འཁོར་ཕྱི་ཡི་ས། །ཆ་ཆུང་ཕྱེད་དང་གཉིས་པར་ཤེས། །རྡོ་རྗེ་མཁའ་འགྲོ་འཁོར་ལོར་ཡང༌། །རྩ་བའི་དཀྱིལ་འཁོར་ནང་དུ་ནི། །ཐིག་གཅིག་རབ་ཏུ་སྦྱིན་བྱ་སྟེ། །ཀུན་ནས་གྲུ་བཞི་པ་ཉིད་དོ། །སླར་ཡང་ཆ་ཆུང་གཅིག་ནས་ཐིག །རྡོ་རྗེ་ཕྲེང་བའི་མཚན་མ་སྟེ། །ཟླ་ཕྱེད་མཉམ་པའི་རྣམ་པ་ཡིས། །དབུས་སུ་ལེགས་པར་མཛེས་པར་བྱ། །སངས་རྒྱས་མཁའ་འགྲོའི་འཁོར་ལོ་ནི། །འཁོར་ལོའི་ཕྲེང་བར་ཟླུམ་པོ་ཉིད། །རིན་ཆེན་མཁའ་འགྲོའི་རིན་ཆེན་གྱིས། །ཀུན་ནས་ལེགས་པར་བསྐོར་བ་ནི། །རིན་ཆེན་ཆ་བརྒྱད་ལྟ་བུ་སྟེ། །དེ་ཡི་དབུས་སུ་སླར་ཡང་བྱ། །པདྨ་མཁའ་འགྲོའི་འཁོར་ལོར་ནི། །ཆ་ཆུང་དག་ལ་པདྨའི་ཕྲེང༌། །གྲུ་བཞི་པ་དང་པདྨ་ཡི། །རྣམ་པ་དེ་ཡི་དབུས་སུ་བྱ། །སྣ་ཚོགས་མཁའ་འགྲོའི་འཁོར་ལོར་ཡང༌། །རལ་གྲིའི་ཕྲེང་བ་ཆ་ཆུང་སྟེ། །དེ་ཡི་དབུས་སུ་གྲུ་གསུམ་བྱ། །རྡོ་རྗེ་སློབ་དཔོན་མཁས་པས་སོ། །རང་རང་དཀྱིལ་འཁོར་ཚད་ཀྱིས་ནི། །སྒོ་ལ་སོགས་པ་རབ་ཏུ་བརྟག །འཁོར་ལོས་སྒྱུར་དྲུག་དཀྱིལ་འཁོར་ལ། །མཁས་པས་རིག་རྣམས་སྦྱིན་བྱ་སྟེ། །ཚངས་ལས་གཡས་དང་གཡོན་དག་ཏུ། །ཆ་ཆུང་བཞི་བཞི་སྤངས་ནས་སུ། །ཆ་ཆུང་བརྒྱད་པོ་འདི་རྣམས་ལ། །དཀྱིལ་འཁོར་རྣམ་པར་རྫོགས་པར་བྱ། །བཅུ་གཉིས་ཆར་ནི་མཉམ་བྱས་ནས། །ཆ་ནི་གཉིས་ངོས་དག་ཏུ། །སྤངས་ཏེ་སྒོ་ལ་སོགས་པ་བྱ། །སླར་ཡང་རྟ་བབས་མེད་པའོ། །དཀྱིལ་འཁོར་ཆེན་པོའི་ཚད་ཀྱིས་ནི། །ཆ་ཆུང་གཉིས་ཉིད་སྤངས་པར་ཡང༌། །ཚད་ཀྱི་དོན་དུ་སྒྲུབ་པ་པོས། །ཟླུམ་པོའི་ཐིག་ཀྱང་བསྐོར་བར་བྱ། །སླར་ཡང་དེ་བཞིན་ཕྱི་རོལ་དུ། །ཆ་ཆུང་བཅུ་ཡི་བར་ནས་བསྐོར། །ཆ་ལྔ་རྣམས་སུ་བྱས་པ་ལ། །དཀྱིལ་འཁོར་ལྔ་པོ་དེ་བཞིན་བྱ། །ཕྱི་ནས་ཟླུམ་པོ་དག་དང་ནི། །གཞན་ཡང་ལྷག་པའི་རེ་ཁཱ་དབྱི། །ནང་མ་དང་ནི་ལྷན་ཅིག་ཏུ། །དཀྱིལ་
འཁོར་དྲུག་ཏུ་འགྱུར་བ་ཡིན། །དཀྱིལ་འཁོར་རྣམས་ཀྱི་ནང་ཉིད་དུ། །ལྟེ་བའི་དོན་དུ་ཆ་ཆུང་གསུམ། །དེ་ཕྱིར་འདབ་མའི་དོན་དུ་ཡང༌། །ཆ་ཆུང་དྲུག་གིས་ཟླུམ་པོ་བྱ། །ཕྱི་རོལ་ཕྱོགས་དང་ཕྱོགས་བྲལ་དུ། །ཆ་ཆུང་དྲུག་པའི་པདྨ་བརྒྱད། །དེ་ཡི་ཕྱི་ནས་ཟླུམ་པོ་གཅིག །ཆ་ཆུང་བར་ནས་སླར་དེ་བཞིན། །རང་རང་དཀྱིལ་འཁོར་ཚད་ཀྱིས་ནི། །སྒོ་སོགས་མཚན་ཉིད་ཤེས་པར་བྱ། །གཞན་ཕོ་བྲང་བདུན་པའི་དཀྱིལ་འཁོར་ལ་སོགས་པའི་གཞན་ཡས་ཁང་གི་ཁྱད་པར་རྣམས་ཀྱང་བཤད་བའི་རྗེས་སུ་འབྲངས་ཏེ་དཔགས་ལ་མཁས་པ་རྣམས་ཀྱིས་ཐིག་གདབ་པར་བྱའོ། །སླར་ཡང་དཔལ་དུས་ཀྱི་འཁོར་ལོར་གསུངས་པའི་དཀྱིལ་འཁོར་ནི་འདིར་བརྗོད་པའི་རྒྱུད་གཞན་མཐའ་དག་ཏུ་གསུངས་པའི་ཆོ་ག་རྣམས་ལས་ཉི་མའི་ཤིང་རྟ་ལ་སོགས་པ་གདུལ་བར་བྱ་བའི་དོན་དུ་བྱ་པ་མི་འདྲ་བར་གསུངས་པའོ། །དེའི་ཕྱིར་རྫོགས་པའི་རིམ་པའི་རྣལ་འབྱོར་བ་རྣམས་ཀྱིས་ནི་བཅོམ་ལྡན་འདས་དཔལ་རྡོ་རྗེ་འཆང་ཉིད་སྣ་ཚོགས་བའི་སྐུས་དཀྱིལ་འཁོར་མ་ལུས་པའི་དབང་ཕྱུག་ཡིན་པས་མངོན་པར་འདོད་བ་ཐམས་ཅད་བསྐྱེད་ཅིང་འབྱུང་བའོ་ཞེས་བརྟན་པར་ལྷག་པར་མོས་པ་བྱས་ན་རྒྱུད་གཞན་གྱི་ཚོགས་ཀྱང་རབ་ཏུ་གནས་པ་ལ་སོགས་བ་རྗེས་སུ་གནང་ཞིང་མི་འགལ་བས་མངོན་པར་འདོད་པ་སྒྲུབ་བར་བྱེད་དོ། །དེས་ན་དུས་ཀྱི་འཁོར་ལོའི་བྱ་བ་རབ་ཏུ་སྤྲོས་པ་རྣམས་ཡོངས་སུ་དོར་ནས་དཀྱིལ་འཁོར་གྱི་ཐིག་གདབ་པ་ཙམ་བརྗོད་པར་བྱའོ། །རྡུལ་ཚོན་དགྱེ་བ་ཙམ་ཡང་འཆད་པར་འགྱུར་བའི་རྡུལ་ཚོན་དགྱེ་བའི་སྐབས་སུ་བརྗོད་པར་བྱའོ། །འདིར་སློབ་དཔོན་གྱི་མཐེབ་སོར་ཉི་ཤུ་རྩ་བཞི་ནི་ཁྲུ་སྟེ་ཁྲུ་བཞི་ནི་དཀྱིལ་འཁོར་རོ། །དེ་ཉིས་འགྱུར་སྲིད་དུ་ཁྲུ་བརྒྱད་པའི་ཚངས་ཐིག་གཉིས་གདབ་པར་བྱའོ། །དེའི་རྗེས་ལ་དེ་བཞིན་དུ་ཟུར་ཐིག་གཉིས་སོ། །ཐིག་སྐུད་ཀྱི་སྦོམས་སུ་ནི་སློབ་དཔོན་གྱི་ནས་ཀྱི་ཚད་དོ། །དེ་ལ་ཐུགས་ཀྱི་དཀྱིལ་འཁོར་གྱི་སྒོའི་དྲུག་ཆ་ནི་མཐེབ་སོར་ཕྱེད་ཀྱི་ཚད་དེ་ཆ་ཆུང་དུ་ཐ་སྙད་གདགས་པར་བྱའོ། །སྙིང་པོ་ཉིད་དུ་ཐིག་གཟུང་ནས། །ལྟེ་བའི་དོན་དུ་ཆ་ཆུང་གཉིས། །དེ་ནས་
འདབ་མའི་ཆ་ཆུང་བཞིར། །རྡོ་རྗེ་ཅན་གྱིས་ཟླུམ་པོ་བྱ། །དེ་ནས་བར་མེད་པར་ནི་ཐིག །ཀུན་ནས་གྲུ་བཞི་པ་ཡིན་ཏེ། །ཆ་ཆུང་བར་ནས་སླར་ཡང་སྦྱིན། །རྡོ་རྗེ་ཕྲེང་བས་མཚན་པའོ། །ཆ་ཆུང་བཞི་ཡི་བར་སྤངས་ནས། །ཟུར་གཉིས་དག་ལ་ཐུག་བའི་ཐིག །སླར་ཡང་ཆ་ཆུང་བར་དོར་ནས། །རྡོ་རྗེ་ཕྲེང་བའི་ཐིག་གདབ་པོ། །འདི་ཡི་དབུས་སུ་པདྨ་ནི། །རབ་མཛེས་ཆ་ཆུང་བཞི་བ་སྟེ། །དོས་ནི་གཉིས་པོ་དག་ཏུ་ཡང༌། །ཆ་ཆུང་རེ་རེའི་ཀ་བ་བྱ། །དེ་དག་གི་ནི་ངོས་སུ་རྒྱར། །ཆ་ཆུང་གསུམ་བའི་བུམ་པ་སྟེ། །སླར་ཡང་ཀ་བ་ཆ་ཆུང་ཉིད། །སྲིད་དུ་ཆ་ཆུང་བཞི་པའོ། །ཕྱི་ནས་དེ་ཡི་མཐའ་མ་ཡི། །ཕྱི་རོལ་ཏུ་ནི་ཐིག་གདབ་སྟེ། །ཆ་ཆུང་ཐུབ་པ་ཡོངས་དོར་ནས། །ཟུར་ཐིག་གཉིས་ཀྱི་བར་དུའོ། །དེ་ཡི་ཕྱི་རོལ་ལྷ་སྣམ་ལ། །ཆ་ཆུང་བཞི་ནི་སྤངས་པར་ཏེ། །དེ་ནས་ཆ་ཆུང་བར་སྤངས་ནས། །རྩ་ཐིག་རབ་ཏུ་གདབ་པར་བྱ། །རྩ་བའི་ཐིག་གི་མཐར་ཐུག་པ། །ཐུགས་ཀྱི་དཀྱིལ་འཁོར་མཆོག་ཡིན་ཞིང༌། །འཁོར་ལོའི་བརྒྱད་ཆ་སྒོ་ཡིན་ཏེ། །དེ་ཡི་དྲུག་ཆ་ཆ་ཆུང་ངོ༌། །དེ་ལ་ཐ་སྙད་བྱས་པ་ནི། །དུས་ཀྱི་འཁོར་ལོའི་དཀྱིལ་འཁོར་ལའོ། །སྒོ་ཡི་ཚད་ཀྱིས་སྒོ་ཁྱུད་དེ། །འགྲམ་དང་ལོགས་ཀྱང་དེ་བཞིན་ནོ། །དེ་ཡི་ཕྱེད་ཀྱིས་སྟེགས་བུར་འགྱུར། །སྟེགས་བུའི་ཕྱེད་ཀྱིས་ཚོན་གྱིས། །དྲ་བ་སྟེགས་བུའི་ཚད་དུ་འགྱུར། །རིན་ཆེན་ས་ནི་དེ་ཡི་ཕྱེད། །ཤར་བུ་དང་ནི་མདའ་ཡབ་ས། །ཚོན་གྱི་ས་དང་མཉམ་པ་སྟེ། །ཀ་བ་ཆ་ཆུང་ཕྱེད་དང་གཉིས། །བར་ནི་རིན་ཆེན་ལ་སོགས་བདུན། །ཆ་ཆུང་ཕྱེད་དང་བརྒྱད་པ་ཡི། །དཔངས་སུ་ཡང་དག་གནས་པ་སྟེ། །དེ་ཡི་སྟེང་དུ་གནས་པ་ཡི། །རྟ་བབས་བརྩེགས་མ་གསུམ་པར་འགྱུར། །སྟེང་དུ་སྒོ་ལས་སུམ་འགྱུར་གྱི། །ཚད་ལྡན་མཛེས་པར་གྱུར་བ་དེར། །བརྩེགས་མ་དང་བོ་ཆ་ཆུང་དྲུག །གཉིས་པ་ལ་ནི་ཕྱེད་དང་ལྔ། །གསུམ་པ་ཆ་ཆུང་ཕྱེད་དང་བཞི། །རྒྱ་ཕུབས་ཆ་ཆུང་གཉིས་པར་བརྗོད། །དེ་ཉིད་སྟེང་དུ་གནས་པ་ཡི། །བུམ་པ་ཆ་ཆུང་གཉིས་པར་འགྱུར། །དེ་ལ་བརྩེགས་མ་དང་པོར་ནི། །སྣམ་བུ་དང་པོ་ཆ་ཆུང་གཅིག །ཉི་ཤུ་རྩ་བཞི་རིང་བའོ། །དེ་ཡི་སྟེང་
དུ་ཆ་ཆུང་གཅིག །མྱོས་པ་བསྲུང་བའི་སྣམ་བུ་སྟེ། །རིངས་སུ་ཆ་ཆུང་བཅུ་དྲུག་པའོ། །དེ་ཡི་སྟེང་གི་དབུས་སུ་ནི། །མཆོད་བའི་ལྷ་མོའི་གནས་ཉིད་ཀྱང༌། །ཆ་ཆུང་བཞི་པ་རབ་མཛེས་པ། །རྡོ་རྗེ་སློབ་དཔོན་མཁས་པས་བྱ། །དེ་ཡི་ཡང་ནི་ངོས་དག་ཏུ། །ཆ་ཆུང་རེ་རེའི་ཀ་བ་བྱ། །སླར་ཡང་མཆོད་པའི་ལྷ་མོའི་གནས། །ངོས་གཉིས་དག་ཏུ་དེ་བཞིན་ཏེ། །ཕྱིར་ཞིང་ཆ་ཆུང་ཀ་བ་དག །ངོས་དག་ཏུ་ཡང་དེ་བཞིན་ཉིད། །ངོས་གཉིས་དག་ཏུ་སོ་ལྡན་གྱི། །དབང་པོ་གནན་པའི་སེང་གེ་སྟེ། །སེང་གེའི་མགོ་བོའི་སྟེང་དུ་འདེགས། །དེ་དག་སྤྱི་བོར་དེ་བཞིན་སླར། །སྣམ་བུ་ཆ་ཆུང་ཕྱེད་པར་འགྱུར། །བཅོ་བརྒྱད་དུ་ཡང་རིང་བའོ། །དེ་སྟེང་སྣམ་བུར་གྱུར་པ་ནི། །མྱོས་པ་བསྲུང་བ་ཞེས་བྱ་བ། །པར་ནི་ཆ་ཆུང་གཅིག་པར་འགྱུར། །རིངས་སུ་ཆ་ཆུང་བཅུ་གཉིས་པའོ། །དེ་སྟེང་དེ་བཞིན་རིང་བ་ཡི། །སྣམ་བུའི་བར་ལ་ཆ་ཆུང་གསུམ། །དེར་ནི་རྐང་པས་དམན་པ་ཡི། །ཆ་ཆུང་གིས་ཀྱང་ཀ་བཞི་བྱ། །ལྷ་མོ་རྣམས་ཀྱི་གནས་རྣམས་ཀྱང༌། །ཀ་བའི་བར་དུ་ཡང་དག་གནས། །ཆ་ཆུང་གསུམ་དང་ལྡན་པ་ཡི། །གནས་གསུམ་སླར་ཡང་སྔགས་པས་བྱ། །ཀ་བའི་ཕྱིར་རོལ་ངོས་དག་ཏུ། །གདུང་འདེགས་པ་ཡི་ལྷ་མོ་བྱ། །དེ་ཡི་སྤྱི་བོར་སླར་ཡང་དཔངས། །ཆ་ཆུང་ཕྱེད་པའི་སྣམ་བུར་འགྱུར། །དེ་ཉིད་ཆ་ཆུང་བཅོ་ལྔ་ཡི། །རིངས་སུ་ཡང་དག་གནས་པ་ཡིན། །དེ་སྟེང་མྱོས་པ་བསྲུང་བ་ཡི། །སྣམ་བུ་ལ་ནི་ཆ་ཆུང་སྟེ། །རིངས་སུ་ཆ་ཆ་ཆུང་བརྒྱད་པར་འགྱུར། །དེ་སྟེང་ཆ་ཆུང་གཉིས་པ་སྟེ། །དེ་ཡང་རིངས་སུ་དེ་བཞིན་ཉིད། །འདི་ལ་ཡང་ནི་ཀ་བ་བཞི། །ཆ་ཆུང་ཕྱེད་པའི་ཚད་དང་ལྡན། །རིངས་སུ་ཆ་ཆུང་གཉིས་པར་ལྡན། །གནས་གསུམ་ཆ་ཆུང་གཉིས་པ་ཡང༌། །ཀ་བའི་བར་དུ་ཡང་དག་གནས། །ཕྱི་རོལ་ཀ་བའི་ངོས་དག་ཏུ། །སྔར་བཞིན་གདུང་འདེགས་ལྷ་མོའོ། །དེ་སྟེང་ཆ་ཆུང་ཕྱེད་པ་ཡི། །སྣམ་བུ་ཆ་ཆུང་བཅུ་གཉིས་སུ། །དེ་ནི་རིང་བར་གྱུར་བ་ཡིན། །དེ་སྟེང་རྒྱ་ཕུབས་ཡང་དག་གནས། །ཆ་ཆུང་བརྒྱད་དུ་རིང་བ་སྟེ། །དེ་ཡི་སྟེང་དུ་བུམ་པའི་གནས། །དེ་ཡི་གཡས་དང་གཡས་མིན་དུ། །རྒྱལ་མཚན་དང་ནི་པ་དན་བྱ། །སྣམ་བུ་ཀུན་གྱི་
རྩེ་མོ་ལ། །དྲིལ་བུ་མེ་ལོང་རྔ་ཡབ་དང༌། །རྒྱལ་མཚན་ལ་སོགས་ཁྱད་པར་གྱིས། །དེར་ཡང་བརྒྱད་པར་བྱ་བ་ཡིན། །ཐུགས་ཀྱི་དཀྱིལ་འཁོར་ཕྱི་རོལ་དུ། །གསུང་གི་དཀྱིལ་འཁོར་བྱ་བ་སྟེ། །ཐུགས་ཀྱི་ཉིས་འགྱུར་ཚད་ཀྱིས་ནི། །དེ་ཡི་ཚད་རྣམས་རབ་ཏུ་བརྟག། སོ་སོའི་ཕྱོགས་ཀྱི་ཆ་རྣམས་སུ། །དེ་ལ་ཆ་ཆུང་བཅུ་གཉིས་ནི། །ཐུགས་ཀྱི་དཀྱིལ་འཁོར་རྩིག་སོགས་དང༌། །མདའ་ཡབ་རྣམས་ཀྱིས་བསྒྲིབས་པའོ། །དེ་ཡི་ཕྱི་རོལ་ཐིག་གཅིག་ནི། །ཆ་ཆུང་བདུན་གྱི་བར་དུ་སླར། །ཆ་ཆུང་དག་ནི་བཞི་རྣམས་ཀྱིས། །སླར་ཡང་ལྷ་ཡི་སྣམ་བུའོ། །ཆ་ཆུང་བཞི་པའི་པདྨར་འགྱུར། །དེ་ཡི་ཕྱོགས་སུ་གྱུར་པ་ཡང༌། །ཐུགས་ཀྱི་རྟ་བབས་འོག་རྣམས་སུ། །ཤེས་པར་བྱ་སྟེ་མདོར་བསྡུ་ན། །མྱོས་པ་བསྲུང་བའི་སྣམ་བུ་སོགས། །བརྩེགས་མ་གཉིས་པ་དག་ལ་ཡང༌། །ཆ་ཆུང་བཞི་ཡི་བར་དུ་ནི། །ཀུན་ནས་འབད་པས་བྲི་བར་བྱ། །ཀ་བ་གཉིས་ཀྱི་བར་ལ་ཡང༌། །ཆ་ཆུང་ཕྱེད་དག་བསྣུར་ནས་སོ། །ལྷ་ཡི་སྣམ་བུའི་ཐིག་ལས་ནི། །ཕྱི་རོལ་ཆ་ཆུང་བར་རྣམས་སུ། །རྩ་ཐིག་རབ་ཏུ་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །སྒོ་དང་རྟ་བབས་དག་ཀྱང་དེར། །སྔར་གྱི་རིམ་པས་བྲི་བར་བྱ། །འོན་ཀྱང་ཐུགས་ཀྱི་དཀྱིལ་འཁོར་ཚད། །ཉིས་འགྱུར་གྱི་ནི་ཚད་ཀྱིས་སོ། །གསུང་གི་དཀྱིལ་འཁོར་རྩ་བ་ལས། །ཕྱི་རོལ་སྒྲ་ཡི་དཀྱིལ་འཁོར་མཆོག །དེ་ལ་གཉིས་འགྱུར་ཚད་ཀྱིས་ནི། །དེ་ཡི་ཚད་རྣམས་རབ་གཞལ་བྱ། །སོ་སོའི་ཕྱོགས་ཀྱི་ཆ་རྣམས་སུ། །ཆ་ཆུང་ཉི་ཤུ་རྩ་བཞི་ནི། །གསུང་གི་དཀྱིལ་འཁོར་ཐིག་སོགས་དང༌། །མདའ་ཡབ་རྣམས་ཀྱིས་བསྒྲིབས་པའོ། །ཆ་ཆུང་དྲག་པོ་དེར་སྤངས་ནས། །ཐིག་ནི་ཟུར་གཉིས་བར་དུ་སྟེ། །སླར་ཡང་ཆ་ཆུང་ཉི་མ་ནི། །སྤངས་ནས་ལྷ་རྣམས་དེ་བཞིན་ནོ། །སྣམ་བུ་འདི་དེ་ཉིད་ལ་ནི། །པདྨ་ཡང་ནི་བཅུ་གཉིས་ཏེ། །དེ་རྣམས་ཆ་ཆུང་བཅུ་གཉིས་པའོ། །དེ་ལས་ཡང་ནི་ཆ་ཆུང་གི །དབུས་ཀྱི་ཆ་ཡི་ལྟེ་བ་སྟེ། །དེ་ཡི་གཡས་དང་གཡས་མིན་དུ། །འདབ་མ་རྣམས་ནི་བཞི་བྱ་ཞིང༌། །དེ་ཡི་གཡས་དང་གཡོན་དག་ཏུ། །འདབ་མ་རྣམས་ནི་བརྒྱད་དུ་བྱ། །དེ་ཡང་གཡས་
དད་གཡོན་རྣམས་སུ། །འདབ་མ་རྣམས་ནི་བཅུ་དྲུག་འགྱུར། །དེ་ཡང་རིམ་པ་གསུམ་པ་སྟེ། །རིམ་པ་གསུམ་དུ་གྱུར་པས་ཀྱང༌། །འདབ་མ་ཉི་ཤུ་རྩ་བརྒྱད་དོ། །ལྷ་ཡི་སྣམ་བུའི་ཐིག་ལས་ནི། །ཕྱི་རོལ་དུ་ཡང་རྩ་བའི་ཐིག །ཆ་ཆུང་བར་ནས་སྦྱིན་བྱ་སྟེ། །ཟུར་གྱི་ཐིག་གི་བར་དུའོ། །སྒོ་དང་རྟ་བབས་དག་གི་ཚད། །སྔར་བརྗོད་ཇི་བཞིན་འདིར་ཡང་སྟེ། །འོན་ཀྱང་གསུང་གི་དཀྱིལ་འཁོར་ཚད། །ཉིས་འགྱུར་དག་གིས་རབ་གཞལ་བྱ། །ཆུ་ཡི་ཁོར་ཡུག་ཕྱེད་དུ་ཡང༌། །རྟ་བབ་ཀྱིས་ཀྱང་ཁྱབ་པའོ། །གསུང་གི་དཀྱིལ་འཁོར་རྟ་བབས་ལས། །ཕྱི་རོལ་སྐུ་ཡི་དཀྱིལ་འཁོར་གྱི། །སྒོ་ཡི་དབུས་སུ་ཤིང་རྟ་ནི། །ཆ་ཆུང་བཅུ་གཉིས་པ་རྣམས་བྱ། །ས་ཡི་ཁོར་ཡུག་ལ་ཡང་ནི། །ཆ་ཆུང་དག་ནི་བཅུ་གཉིས་བྱ། །དེ་ཡི་ཕྱི་ནས་ཆུ་ཡི་ནི། །ཁོར་ཡུག་ཆ་ཆུང་ཉེར་བཞི་སྟེ། །དེ་ཕྱིར་མེ་ཡི་ཁོར་ཡུག་ལ། །སླར་ཡང་ཆ་ཆུང་ཉེར། བཞིའོ། །དེ་ནས་རླུང་གི་ཁོར་ཡུག་ལ། །ཆ་ཆུང་ཉི་ཤུ་རྩ་བཞིར་འགྱུར། །དེ་ལས་ཕྱི་རོལ་ནམ་མཁའ་ཡི། །ཁོར་ཡུག་ཆ་ཆུང་བཅུ་གཉིས་སོ། །ས་སོགས་ཁོར་ཡུག་དྲུག་པོ་ཡི། །དང་པོར་ཟླུམ་པོ་རབ་ཏུ་སྦྱིན། །འོད་ཕྲེང་མཐར་ཡང་ཟླུམ་པོ་སྟེ། །ཟླུམ་པོ་བདུན་དུ་འགྱུར་བ་ཡིན། །ཐུགས་ཀྱི་རྡོ་རྗེའི་དཀྱིལ་འཁོར་ཏེ། །དཀྱིལ་འཁོར་གསུམ་གྱི་བདག་ཉིད་མཆོག །འདི་ཡི་ཐིག་སྐུད་ཁྲུ་བརྒྱད་དེ། །འཛིན་མའི་ཟླུམ་པོ་ཇི་སྲིད་དུའོ། །ཞེས་པ་ནི་ཕྱོགས་གཅིག་གོ །གང་གི་ཚེ་འདིར་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་གསུང་གི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་བཅོ་བརྒྱད་དུ་ཡོངས་སུ་བརྟགས་ཏེ་དེའི་དྲུག་ཆ་ལ་ཆ་ཆུང་གི་ཐ་སྙད་བྱེད་ཕ་དེའི་ཚེ་ཆ་ཆུང་དེས་གཙོ་བོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་ཐུག་པར་ཆ་ཆུང་གི་གྲངས་བྱའོ། །དེའི་ཚེ་ནི་ཐུགས་རྡོ་རྗེ་གཙོ་བོ་སྟེ་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་འཁོར་ལ་ཁྲུ་བཅུ་གཉིས་དང༌། དེའི་ཉིས་འགྱུར་གྱི་ཐིག་སྐུད་ཁྲུ་ཉི་ཤུ་རྩ་བཞི་ནི་སའི་འཁོར་ཡུག་གི་དང་པོ་ཇི་སྲིད་དུའོ། །ཞེས་པ་ཕྱོགས་གཉིས་པའོ། །གང་གི་ཚེ་བཅོམ་ལྡན་འདས་ཐུགས་རྡོ་རྗེ་གསུང་རྡོ་རྗེའི་གནས་སུ་གྱུར་ན་གསུང་རྡོ་རྗེ་ནི་གཙོ་བོ་སྟེ། དེ་ལས་གཞན་པའི་ལྷ་ལ་སོགས་
པ་དགོད་པ་ནི་ཕྱོགས་དང་པོ་བཞིན་ནོ། །གང་གི་ཚེ་ཡང་དབུས་ཀྱི་དཀྱིལ་འཁོར་ཁྲུ་བཞི་པ་དང་དེའི་ཉིས་འགྱུར་གཉིས་པ་དང༌། དེའི་ཉིས་འགྱུར་གསུམ་བ་ཡིན་པ་དེའི་ཚེ་ཁྲུ་བཅུ་དྲུག་གི་དཀྱིལ་འཁོར་གསུམ་གྱི་བདག་ཉིད་གསུང་གི་དཀྱིལ་འཁོར་དང༌། དེའི་ཉིས་འགྱུར་གྱི་ཐིག་སྐུད་ཁྲུ་སུམ་ཅུ་སོ་གཉིས་ནི་སའི་ཁོར་ཡུག་གི་དང་པོ་ཇི་སྲིད་དུའོ་ཞེས་པ་ཕྱོགས་གསུམ་པའོ། །གང་གི་ཚེ་དང་པོར་བརྗོད་པའི་ཐུགས་ཀྱི་དཀྱིལ་འཁོར་གྱི་སྒོའི་ཚད་དང་པོར་བརྗོད་བའི་སྐུའི་དཀྱིལ་འཁོར་གྱི་སྒོའི་ཚད་བསྡོམས་ནས་སྒོ་ཆ་ཆུང་སུམ་ཅུར་ཡོངས་སུ་བརྟགས་ཏེ་དེའི་དྲུག་ཆ་ལ་ཆ་ཆུང་དུ་ཐ་སྙད་བྱེད་པ་དེའི་ཚེ་ཆ་ཆུང་ངེས་གཙོ་པོའི་པདྨའི་ལྟེ་བ་ལ་སོགས་པ་ནས་འོད་ཀྱི་ཁོར་ཡུག་གི་མཐར་ཐུག་པར་ཆ་ཆུང་གི་གྲངས་བྱ་ཞིང༌། བཅོམ་ལྡན་འདས་ཐུགས་རྡོ་རྗེ་ཡང་སྐུ་རྡོ་རྗེའི་གནས་སུ་བྱའོ། །སྐུ་རྡོ་རྗེ་ནི་གཙོ་བོ་སྟེ་དེ་ལས་གཞན་པའི་ལྷ་ལ་སོགས་པ་དགོད་པ་ནི་ཕྱོགས་དང་པོ་བཞིན་ནོ། །དེའི་ཚེ་སྐུ་རྡོ་རྗེ་ནི་གཙོ་པོའི་དཀྱིལ་འཁོར་གསུམ་གྱི་བདག་ཉིད་ཀྱི་དཀྱིལ་འཁོར་ལ་ཁྲུ་ཉི་ཤུ་དང་དེའི་ཉིས་འགྱུར་གྱི་ཐིག་སྐུད་ཁྲུ་བཞི་བཅུ་ནི་སའི་ཁོར་ཡུག་གི་དང་པོ་ཇི་སྲིད་དུའོ་ཞེས་པ་ཕྱོགས་བཞི་པའོ། །དེ་ལྟར་ཡང་དྲི་མ་མེད་པའི་འོད་ལས་ཐིག་སྐུད་ཁྲུ་བརྒྱད་པ་ཞེས་པ་ནི་རྩ་བ་ལ་ཁྲུ་བརྒྱད་ཅེས་བྱ་བ་སྟེ། དཀྱིལ་འཁོར་གྱི་ནི་ཉིས་འགྱུར་རོ། །ཞེས་རྣམ་པར་བཀྲལ་ནས་དེ་ལ་དང་པོའི་སངས་རྒྱས་སུས་ཐུགས་ཀྱི་དཀྱིལ་འཁོར་ལ་ཁྲུ་བཅུ་གཉིས་བྱ་ཞིང༌། དེ་ཉིས་འགྱུར་གྱི་ཐིག་སྐུད་ནི་ཁྲུ་ཉིད་ཤུ་རྩ་བཞིའོ། །དེ་བཞིན་དུ་གསུང་གི་དཀྱིལ་འཁོར་ལ་ཁྲུ་བཅུ་དྲུག་གོ །སྐུའི་དཀྱིལ་འཁོར་ལ་ཁྲུ་ཉི་ཤུའོ་ཞེས་པ་ནི་དེས་པ་སྟེ་ཐིག་སྐུད་ནི་དེའི་ཉིས་འགྱུར་རོ་ཞེས་གསུངས་སོ། །དབང་གི་དོན་དུ་ནི་དབུས་ཀྱི་དཀྱིལ་འཁོར་ཙམ་ཡང་བསྐོར་བར་རྗེས་སུ་གནང་སྟེ། ཇི་སྐད་དུ། དབང་གི་དོན་དུ་དཀྱིལ་འཁོར་རམ་ནི་རིགས་ཀྱི་དབང་གིས་ཕྱི་ཡི་འཁོར་ལོས་རབ་ཏུ་དམན་པར་འགྱུར། །ཞེས་གསུངས་སོ། །གང་ཡང་ཁམས་གསུམ་རྣམ་པར་རྒྱལ་བའི་རྒྱུད་ལས། སྒོ་འཁོར་ལོའི་དགུ་ཆ་དང༌། དཀྱིལ་འཁོར་ཆེན་པོ་བཀོད་པའི་རྒྱུད་ལས། སྒོ་འཁོར་ལོའི་བཅུ་ཆར་གསུངས་པ་དེ་དག་ནི། སློབ་དཔོན་རྣམས་ད་ལྟ་ཐ་སྙད་མི་མཛད་མོད། བདག་གིས་ནི་ཡོངས་སུ་བྱས་སོ། །དཀྱིལ་
འཁོར་གྱི་ཆད་རྣམས་ཀྱང་རབ་ཏུ་གྲགས་པ་བརྗོད་ཀྱི་འདི་ཙམ་ཁོ་ན་ནི་མ་ཡིན་ནོ། །དེ་ལྟར་ཡང་བཅོམ་ལྡན་འདས་ཀྱིས། འཛམ་བུའི་གླིང་གི་དབང་ཕྱུག་གམ། །འཁོར་ལོས་སྒྱུར་བའི་རྒྱལ་པོ་ཡིས། །ཕྱི་རོལ་དཀྱིལ་འཁོར་བྲི་བྱ་སྟེ། །ཀུན་ནས་དཔག་ཚད་རབ་ཏུའོ། །གདུལ་བྱའི་སྐྱེ་བོའི་བསམ་པ་ལ། །མཁས་པས་མཉམ་པར་བལྟས་ནས་ནི། །འདོད་པས་ཚད་ནི་བྱས་པ་ལ། །ཉེས་པ་ཅུང་ཟད་ཡོད་མ་ཡིན། །རང་གི་འདོད་པས་དཀྱིལ་འཁོར་ཀུན། །ལག་པའི་མཐིལ་དུ་བྲིས་བྱས་ནས། །བསྟན་བཅོས་ལས་གསུངས་དོན་བྱེད་དེ། །ས་སྟེངས་སོགས་སུ་སྨོས་ཅི་དགོས། །ཞེས་གསུངས་སོ། །དཔག་ཏུ་མེད་པའི་དབྱེ་བས་ཐ་དད་པའི་དཀྱིལ་འཁོར་རྣམས་འཇི་ཙམ་ཞིག་མངོན་པར་བརྗོད་པར་བྱ་བར་ནུས། གང་གི་ཕྱིར་བཅོམ་ལྡན་འདས་ཀྱིས་བཀའ་སྩལ་པ། དཀྱིལ་འཁོར་ཇི་ལྟ་དེ་བཞིན་དུ། །རབ་ཏུ་བརྟགས་པ་སུ་ཡིས་ནུས། །རང་གི་ལྷ་ཡི་རྣལ་འབྱོར་གྱིས། །དཀྱིལ་འཁོར་བརྟག་པ་འགྲུབ་པ་ཡིན། །ཞེས་པ་དཀྱིལ་འཁོར་ལ་ཐིག་གདབ་པའི་ཆོ་གའོ།། །།དེ་ནས་གཏོར་མ་བྱིན་ལ། བཾ་ལཾ་རཾ་ཡཾ་ཧཾ་རྣམས་ཀྱིས་བོན་ལས་གྲུབ་པའི་དཀར་པོ་དང་སེར་པོ་དང་དམར་བོ་དང་ལྗང་གུ་དང་ནག་པོའི་ཚོན་རྣམས་རིམ་པ་ཇི་ལྟ་བ་བཞིན་དུ་ཟླ་བ་ཆུ་ཤེལ་དང༌། ཀ་རྐེ་ཊ་ཎ་དང༌། པདྨ་རཱ་ག་དང༌། ཨིནྡྲ་ནཱི་ལ་ལས་བྱུང་བ་རྣམས་སམ་ཡང་ན་མུ་ཏིག་དང་གསེར་དང་བྱི་རུ་དང་བསྲེས་པ་མུ་མེན་ལས་བྱུང་བ་རྣམས་སམ། བསྲེས་པ་ནི་འདིར་མུ་ཏིག་ལ་སོགས་པ་བཞི་པོ་རྣམས་སོ། །ཡང་ན་ཁམས་ལས་བྱུང་བའམ། འབྲས་ལས་བྱུང་བ་འམ། མེ་ཏོག་ལས་བྱུང་བ་འམ། ཇི་ལྟར་རིགས་པར་སོལ་བ་དང་སོ་ཕག་དང་རུས་བའི་ཕྱེ་མ་ལ་སོགས་པས་ཀྱང་རུང༌། ལེགས་པར་འདུས་བྱས་པའི་བཟུང་བོ་རྣམས་བྷྲཱུཾ་ཨཾ་ཧྲཱིཾ་ཁཾ་ཧཱུཾ་རྣམས་ལས་གྲུབ་པའི་རྣམ་བར་སྣད་མཛད་ལ་སོགས་པའི་ངོ་བོར་བསམས་ནས། ནམ་མཁའ་ལ་བཀོད་པའི་དེ་བཞིན་གཤེགས་པ་ཐམས་ཅད་ཐུགས་ཀར་བྷྲཱུཾ་ལ་སོགས་པ་ལས་གྲུབ་པའི་ཡེ་ཤེས་ཀྱི་ཚོན་རྣམས་ཐིག་སྐུད་འདུ་བྱ་བར་བརྗོད་པའི་འབར་བའི་ལྟ་སྟངས་ཀྱིས་བཀུག་སྟེ་བཅུགས་བས་ཡེ་ཤེས་ཀྱི་ཚོན་དང་ལྷན་ཅིག་རོ་གཅིག་ཏུ་གྱུར་པ་རྣམས་ལ་ཕྲཱུཾ་ཞེས་པ་ལ་སོགས་པས་
མངོན་པར་བསྔགས་ཤིང༌། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བའི་སྔགས་ཀྱིས་བརྒྱ་རྩ་བརྒྱད་དུ་བསྔགས་སོ། །དེ་བཞིན་དུ་འབར་བའི་ལྟ་བས་ཡང་དག་པར་གཟི་བརྗིད་བསྐྱེད་ཅིང༌། རེ་རེ་ལ་ཧཱིཿ་ཡིག་བཀོད་ནས། བདེན་པ་གང་གིས་སེམས་ཅན་རྣམས་རྡུལ་ཚོན་མང་ཞིང་སངས་རྒྱས་བཅོམ་ལྡན་འདས་རྣམས་མི་སེམས་ཅན་རྣམས་ལ་ཆགས་པས་རྗེས་སུ་ཆགས་པར་གྱུར་པའི་བདེན་བ་དེས་རྡུལ་ཚོན་རྣམས་འབར་བར་གྱུར་ཅིག །ཅེས་བདེན་པའི་བྱིན་གྱི་རླབས་ཀྱིས་སྦར་བར་བྱ་སྟེ། ལྷ་སྒོམ་པ་ཕུལ་དུ་བྱུང་བ་ལ་ནི་འབར་བར་འགྱུར་རོ། །དྲི་དང་མེ་ཏོག་ལ་སོགས་པས་མཆོད་ནས་སྣོད་གསར་པར་གཞག་པར་བྱའོ་ཞེས་པ་རྡུལ་ཚོན་གྱི་བཟླས་པའི་ཆོ་གའོ།། །།དེ་ནས་དཀྱིལ་འཁོར་གྱི་ལྟེ་བར་གནས་པའི་ཕུར་བུ་དཀྱིལ་འཁོར་ཇི་ལྟ་བར་འཆད་པར་འགྱུར་པའི་ལ་།ཐམས་ཅད་པའི་སྔགས་ཀྱིས་བཏོན་ནས་རང་གི་ལག་པའི་རྡོ་རྗེ་ལ་བསྟིམ་སྟེ་ཕུར་བུའི་ཁུང་བུ་རིན་པོ་ཆེ་ལྔ་དང་ཚོན་སྣ་ལྔས་བཀང་བས་མཉམ་པོར་བྱས་ལ། དྲིལ་བུའི་སྒྲ་དང་རྡོ་རྗེའི་གླུས་མཚན་མ་ངན་པ་བསལ་བར་བྱའོ། །ཆོས་དབྱིངས་འདི་ནི་དག་པ་སྟེ། །སེམས་ཅན་ཁམས་ནི་རབ་གྲོལ་མཛད། །རང་ཉིད་རྒྱལ་པོ་རྡོ་རྗེ་འཆང༌། །དེ་བཞིན་གཤེགས་པ་ཀུན་གྱི་གནས། །ཉེས་པ་ཀུན་ལས་རྣམ་གྲོལ་བའི། །འཁོར་ལོའི་ནང་དུ་ཡང་དག་ཞུགས། །སེམས་ཅན་ཀུན་གྱི་དོན་གྱི་ཕྱིར། །དཀྱིལ་འཁོར་བདག་གིས་བྲི་བར་བྱ། །ཞེས་པ་ཆོས་ཀྱི་དབྱིངས་རྣམ་པར་དག་པར་མོས་ལ། ལག་པ་གཡས་པ་རྡོ་རྗེ་མཚན་ཞིང་གཡོན་པའི་ཁུ་ཚུར་གྱིས་ཨོཾ་བཛྲ་རཾ་ག་ས་ན་ཡ། ཨོཾ་ཨཱཿ་ཧཱུཾ་ཞེས་པའམ། ཨོཾ་བཛྲ་ཙི་ཏྲ་ས་མ་ཡ་ཧཱུཾ་ཞེས་བརྗོད་ཅིང་དཀྱིལ་འཁོར་གྱི་ནང་དུ་ཤར་དུ་ཕྱོགས་པར་འདུག་པས་དབང་ལྡན་གྱི་མཚམས་ནས་བརྩམས་ཏེ་གཡས་སྐོར་དུ་ཚོན་དགྱེ་བར་བྱའོ། །ཕྱི་ནས་ཇི་ལྟ་བ་བཞིན་དུ་སྒོའི་སློབ་དཔོན་ལ་སོགས་པ་གཞན་གྱིས་ཀྱང་ངོ༌། །སྦོམས་སུ་སྒོ་ཡི་ཉི་ཤུ་ཆའི། །རེ་ཁཱ་ཡང་དག་དྲང་བྱ་སྟེ། །མཉམ་ཞིང་དྲང་པོ་མ་ཆད་བ། །ཇི་ལྟར་རིགས་པའོ་ཕན་ཚུན་གྱི། །བར་གྱི་ཚད་ནི་ནས་ཙ་ལ། །འོག་དང་སྟེང་ནི་ཅི་མཛེས་བྱ། །སྦོམ་པོར་བཀྱེ་ན་ནད་འབྱུང་སྟེ། །ཕྲ་མོ་ཡི་ནི་ནོར་རྣམས་ཉམས། །ཡོན་པོ་ཡིས་ནི་རྣམ་པར་སྡང༌། །
ཆད་ན་བླ་མ་སློབ་མ་འཆི། །གཡས་སྐོར་མིན་པར་བཀྱེ་ན་ནི། །ཚོན་རྣམས་ཕུར་བུས་བཏབ་པར་འགྱུར། །ཕུར་བུས་བཏབ་པ་ནི་དངོས་གྲུབ་ཀྱི་རྒྱུ་མ་ཡིན་པ་སྟེ། ཕན་ཚུན་འདྲེས་པས་ནི་རིགས་འཆད་པར་འགྱུར་རོ། །ཉེས་པ་ཞི་བར་བྱ་བའི་ཕྱིར་བཅོམ་ལྡན་འདས་ཀྱིས་གསུངས་པ། དེ་ཉིད་མེད་པའི་བསམ་སྦྱོར་ལས། །གང་ཞིག་ཚོན་བཀྱེའི་ཉེས་པ་སྟེ། །བཟང་པོ་དེ་ཉིད་བསམ་སྦྱོར་ལས། །སུས་ཀྱང་བར་ཆད་བྱ་མི་ནུས། །དཀྱིལ་འཁོར་ཇི་ལྟ་བ་དེ་བཞིན། །ཇི་སྲིད་དུ་ནི་དེ་ཉིད་བརྟག །ཅེས་སོ། །ཚོན་གྱི་རེ་ཁཱ་རྣམས་ཀྱང་རིན་པོ་ཆེ་དཀར་པོ་ལ་སོགས་པའི་རང་བཞིན་གྱི་ཐུར་མ་ལ་སོགས་པའི་ངོ་བོར་ལྷག་པར་མོས་པར་བྱའོ། །འཇུག་པ་དང་འབྱུང་བ་ལ་ཐིག་དང་ཚོན་ལ་འགོམས་པའི་སྡིག་པས་འཇིགས་པའི་ཕྱིར་རྡོ་རྗེ་ཤུགས་ཀྱི་ཡེ་ཤེས་ཀྱི་ཚོན་གྱི་རེ་ཁཱ་ཡིད་ཀྱིས་ནམ་མཁའ་ལ་བཏེག་ལ། ཨོཾ་བཛྲ་བེ་གཱ་ཀྲ་མ་ཧཱུཾ་ཞེས་བཟླ་ཞིང༌། རྩ་བའི་ཐིག་གི་ནང་དུ་དཀྱིལ་འཁོར་བྲི་བའི་ཕྱིར་འཇུག་པ་དང་འབྱུང་བར་བྱའོ། །དེ་ལ་དང་པོར་ལྷ་ཐམས་ཅད་ཀྱི་དཀྱིལ་འཁོར་ལ་ཕྱི་དང་ནང་གི་དཀྱིལ་འཁོར་གྱི་སྤྱིའི་ཁ་དོག་གི་རིམ་པ་བརྗོད་པར་བྱའོ། །ཤར་དང་ལྷོ་དང་ནུབ་དང་བྱང་གི་ཕྱོགས་ཀྱི་དེ་བཞིན་གཤེགས་པ་དང་དབུས་ཀྱི་གཙོ་བོའི་ཁ་དོག་གི་རིམ་པ་ཇི་ལྟ་བ་བཞིན་དུ་ཕྱིའི་རེ་ཁཱ་ནས་བརྩམས་ཏེ། ནང་གི་རེ་ཁཱའི་བར་དུ་ཚོན་སྣ་ངའི་རྩིག་པའི་རེ་ཁཱ་རྣམས་ཀྱི་ཁ་དོག་གོ །ཕྱོགས་དང་དབུས་སུ་ལྷ་གཞན་འགོད་པ་ན་རྒྱས་འདེབས་ཀྱི་དེ་བཞིན་གཤེགས་པའི་ཁ་དོག་གི་རིམ་པའོ། །བསྒོམ་བྱའི་དཀྱིལ་འཁོར་ལ་རྩིག་པ་ལྔ་པོ་འདི་དག་རིན་པོ་ཆེ་ཁ་དོག་ལྔ་ལས་གྲུབ་ཅིང་བར་ནི་ནས་ཙམ་མོ་ཞེས་པ་ཁ་ཅིག་གོ །རྩིག་པ་འདི་ནི་གཅིག་ཉིད་རིམ་གྱིས་སྟེང་ནས་སྟེང་དུ་ཁ་དོག་ལྔའི་རིན་པོ་ཆེ་ལས་བྱས་པའོ་ཞེས་པ་ནི་གཞན་དག་གོ །འདིར་འདོད་པ་དང་པོ་ལ་རིན་པོ་ཆེའི་སྣམ་བུའི་ས་གཞི་དམར་པོ་དང་དྲ་བ་དང་དྲ་བ་ཕྱེད་པའི་ས་གཞི་ནག་པོའོ། །འདོད་པ་གཉིས་པ་ལ་ནི་དང་པོའི་ཁ་དོག་གི་རིན་པོ་ཆེའི་རང་བཞིན་གྱི་ཆ་ཉིད་རྣམ་པར་བཀྲ་བའི་རིན་པོ་ཆེའི་སྣམ་བུ་སྟེ། ཡང་ན་དེ་ལ་ཁ་དོག་གཞན་གྱིས་རིན་པོ་ཆེ་ལས་གྲུབ་བ་བཀོད་པ་ནི་རིན་པོ་ཆེའི་སྣམ་བུའོ། །ལྔ་པའི་ཁ་དོག་གི་
རིན་པོ་ཆེའི་རང་བཞིན་གྱི་ཆ་ཉིད་སྣ་ཚོགས་པའི་དྲ་བ་དང་དྲ་བ་ཕྱེད་པའི་སྣམ་བུའམ་ཡང་ན་དེ་ལ་ཁ་དོག་གཞན་གྱི་རིན་པོ་ཆེ་ལས་གྲུབ་པ་བཀོད་པ་ནི་དྲ་བ་དང་དྲ་བ་ཕྱེད་པའི་སྣམ་བུའོ། །ཕྱོགས་གཞན་བརྗོད་པ་ནི་དེའི་སྟེང་དུ་རིན་པོ་ཆེའི་སྣམ་བུ་དོ་ཤལ་གྱི་སྣམ་བུའོ། །འདོད་པ་གཉིས་ཀ་ལ་ཡང་སྟེགས་བུ་ནི་ཤེལ་ལམ་གསེར་གྱི་རང་བཞིན་ནམ་པདྨ་རཱ་གཱའི་རང་བཞིན་ནམ། རིན་པོ་ཆེ་གཞན་ཡང་རུང་སྟེ་ཇི་ལྟར་མཛེས་པའོ། །རིན་པོ་ཆེའི་ཤར་བུ་དང་མདའ་ཡབ་རྣམས་ནི་དཀར་པོའོ། །རིན་པོ་ཆེའི་ཤར་བུ་དང་མངའ་ཡབ་དང་དར་དཔྱངས་ཀྱི་བར་གྱིས་གཞི་ནི་སྔོན་པོ་སྟེ། ནམ་མཁའི་ངོ་བོ་ཡིན་པའི་ཕྱིར་རོ། །དེ་ཉིད་ཀྱི་ཕྱིར་བར་གྱི་སྣམ་བུ་ལ་མུན་པའི་སྣམ་བུ་ཞེས་བརྗོད་དོ། །གདུང་ནི་ཇི་ལྟར་མཛེས་པའི་རིན་པོ་ཆེ་ལས་བྱས་པ་སྟེ། རྣམ་པ་སྣ་ཚོགས་པའི་རིན་པོ་ཆེའི་པ་ཏྲ་འཕྲོ་བ་ལ་སོགས་པས་བརྒྱན་པའོ། །རྟ་བབས་ཀྱི་ཀ་བ་རྣམས་ནི་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ །ཀྱོག་པོའི་ནང་གི་བླ་རེའི་འོག་གི་ཡང་དེ་རང་གི་དེ་བཞིན་གཤེགས་པའི་ཁ་དོག་གི་འོད་ཀྱིས་སྤྲས་པའི་ནམ་མཁའི་རང་བཞིན་ནོ། །རྟ་རྨིག་དང་བ་རན་གྱི་ཁ་དོག་ནི་ཇི་ལྟར་མཛེས་པ་སྟེ་ཆུ་སྲིན་གྱི་སྣམ་བུ་ཡང་ངོ༌། །འཁོར་ལོ་རྣམས་ནི་གསེར་གྱི་ཁ་དོག་སྟེ་རིན་པོ་ཆེ་གཞན་ལས་ཀྱང་བྱས་པའོ་ཞེས་ཁ་ཅིག་གོ །རི་དགས་དང་རི་དགས་མོ་ནི་གསེར་གྱི་རང་བཞིན་ལ་རིན་པོ་ཆེ་གཞན་གྱིས་སྤྲས་པའོ། །སྣ་ཚོགས་རྡོ་རྗེའི་ལྟེ་བ་ནི་ནག་པོ་སྟེ། ཁ་ཅིག་ཏུ་ནི་གཙོ་བོའི་དེ་བཞིན་གཤེགས་པའི་མདོག་གོ །ར་དབུས་མ་རྣམས་ནི་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་སྟེ་དེ་ལས་གཞན་པ་རྣམས་ནི་དེ་དག་གི་ངོས་ཀྱི་དེ་བཞིན་གཤེགས་པའི་ཁ་དོག་གོ །ར་ལྔ་པ་ལས་ནི་དེ་ལས་གཞན་པའི་ཕྱོགས་དང་དབུས་ཀྱི་དེ་བཞིན་གཤེགས་པའི་མདོག་སྟེ་ཇི་ལྟར་རིགས་པར་རོ། །ཕྱོགས་གཅིག་གི་ར་ཐམས་ཅད་ཀྱང་རང་གི་ཕྱོགས་ཀྱི་དེ་བཞིན་གཤེགས་པའི་མདོག་གོ་ཞེས་པ་ཁ་ཅིག་སྟེ། འཁོར་ལོའི་དབང་པོ་ཞལ་བཞི་པ་ཉིད་ལ་རང་རང་གི་ཕྱོགས་ཀྱི་ཞལ་གྱི་མདོག་གོ་ཞེས་པ་ནི་ཕྱོགས་གཞན་ནོ། །བུམ་པ་བཟང་པོ་རྣམས་ནི་གསེར་ལས་བྱས་པའོ། །དཔག་བསམ་གྱི་ཤིང་རྣམས་ནི་དེ་ལས་གཞན་པའི་ཤིང་ལྟ་བུའོ། །པདྨའི་ལྟེ་བ་ནི་ལྗང་གུ་
སྟེ་གེ་སར་ནི་སེར་པོ་ཡིན་ལ་འདབ་མ་རྣམས་ནི་སྣ་ཚོགས་པའི་མདོག་གོ །དེའི་ས་གཞི་ནི་དམར་པོ་ཤས་ཆེ་བའི་དཀར་པོ་སྟེ་ཆོས་འབྱུང་གི་ཆའི་རེ་ཁཱ་ནི་དཀར་པོའོ། །ཁོར་ཡུག་གི་ཕྱོགས་ལ་ཡང་ཤེལ་ཉིད་ཡིན་ན་རེ་ཁཱ་དཀར་པོའམ་གསེར་གྱི་མདོག་ཡིན་ན་སེར་པོའོ། །རྡོ་རྗེ་རྣམས་དང་དེའི་རེ་ཁཱ་ཡང་ནག་པོ་སྟེ་གཞན་དུ་དཀར་པོའམ་སེར་པོ་ཞེས་གསུངས་སོ། །རྡོ་རྗེའི་ས་གཞིའི་མདོག་ནི་ཇི་ལྟར་མཛེས་པ་སྟེ། བསྒོམ་བྱའི་དཀྱིལ་འཁོར་ལ་འོག་རླུང་གི་དཀྱིལ་འཁོར་གྱི་མཐའ་ནས་སྟེང་དུ་ཡང་འོག་མིན་གྱི་མཐའ་ཇི་སྲིད་པར་རྡོ་རྗེའི་རབ་གནས་པའི་ཕྱིར་དང༌། རླུང་ལ་སོགས་པ་རྣམས་ཀྱང་ཇི་ལྟར་རིགས་པར་ཁ་དོག་སྣ་ཚོགས་པ་ཡིན་པའི་ཕྱིར་རོ། །འོད་ཟེར་རྣམས་ནི་ཁ་དོག་ལྔ་པ་སྟེ་འཕྲོ་བའི་ཚུལ་ལོ། །འཇམ་པའི་རྡོ་རྗེའི་ནི། རྫོགས་སངས་ཡེ་ཤེས་སྐུ་ཡིན་ཕྱིར། །ངག་དབང་རྡོ་རྗེའི་རིགས་སུ་བརྗོད། །ཆོས་སྐུའི་བདག་ཉིད་ལེགས་དག་པ། །འདི་ནི་ཐུགས་ཀྱི་དཀྱིལ་འཁོར་རོ། །ཞེས་བྱ་བའི་རིགས་པས། དཀར་པོ་སེར་པོ་དེ་བཞིན་དམར། །ལྗང་གུ་དང་ནི་ནག་པོ་ཉིད། །རྩིག་པ་ཡི་ནི་ཚོན་ཡིན་ནོ། །ཞེས་གསུངས་སོ། །གང་གི་ཚེ། ཆོས་རྣམས་རང་བཞིན་གྱིས་ནི་དཀར། །དེས་ན་ངག་དབང་འདི་དཀར་ཉིད། །ཅེས་གསུངས་པས། གསུང་རྡོ་རྗེ་དཀར་པོ་གཙོ་བོར་གྱུར་པ་དེའི་ཚེ་ནི། དཀར་པོ་དང་སེར་པོ་དང་ནག་པོ་དང་ལྗང་གུ་དང་དཀར་པོའི་ཚོན་གྱི་རེ་ཁཱའོ། །ཁ་སྦྱོར་དུ་གསུངས་པའི་རྡོ་རྗེ་སེམས་དཔའ་དཀར་པོ་ཡིན་ནའང་མི་བསྐྱོད་པ་དང་ལྷན་ཅིག་རོ་གཅིག་པ་ཉིད་དུ་བསྟན་པའི་ཕྱིར་ནང་གི་རྩིག་པ་ནག་པོ་ཉིད་དོ། །གཞན་དུ་ནི་དཀར་པོ་ཁོ་ན་ཡིན་ཏེ། ཇི་ལྟར་གསུང་རྡོ་རྗེ་གཙོ་བོར་གྱུར་པས་ཁ་ཅིག་ཏུ་དཀར་པོ་ཉིད་དུ་འགྱུར་རོ་ཞེས་སོ། །རྩ་བའི་ཐིག་གི་ནང་གི་དཀྱིལ་འཁོར་དུ་ཡང་ཟུར་ཐིག་གཉིས་གཉིས་ཀྱིས་ཡོངས་སུ་བཅད་པའི་ཕྱོགས་བཞིའི་ས་གཞི་རྣམས་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ ། བསྒོམ་བྱའི་དཀྱིལ་འཁོར་གྱི་ཕྱོགས་བཞིའི་ཐོག་རྣམས་ཀྱང་དེ་བཞིན་ནོ། །ཀ་བ་རྣམས་ཀྱང་དེ་བཞིན་ཏེ་རང་རང་གི་རེ་མིག་ནི་དེ་བཞིན་གཤེགས་པའི་མཚན་མའི་ཕྲེང་བས་མཚན་པའོ། །གཙོ་བོའི་ས་གཞི་ནི་གཙོ་བོའི་མདོག་གོ །སྣ་ཚོགས་པདྨའི་འདབ་མ་ནི། །བདེན་བྲལ་ལྗང་
གུ་དབང་ལྡན་གནག །མེ་དང་རླུང་ནི་སེར་པོ་སྟེ། །ཕྱོགས་རྣམས་ཀྱི་ནི་དམར་པོའོ། །གཙོ་བོའི་སྣམ་བུ་ལ་ནི་གཙོ་བོའི་མཚན་མའི་ཕྲེང་བ་སྟེ་རེ་ཁཱ་གཞན་གྱི་ལེགས་པའི་ཡོན་ཏན་དང་ཁ་དོག་ནི་ཇི་ལྟར་མཛེས་པའོ། །དཔལ་ལྡན་བདེ་མཆོག་གི་དཀྱིལ་འཁོར་ལ་ནི་ཐུགས་ཀྱི་འཁོར་ལོ་ནག་པོའོ། །དེའི་རྩིབས་ཀྱི་བར་རྣམས་ནི་དམར་པོ་སྟེ་གསུང་གི་འཁོར་ལོའི་ལྟེ་བ་ཡིན་པའི་ཕྱིར་རོ། །གསུང་གི་འཁོར་ལོ་ནི་དམར་པོའོ། །དེའི་རྩིབས་ཀྱི་བར་རྣམས་ནི་དཀར་པོ་སྟེ། སྐུའི་འཁོར་ལོའི་ལྟེ་བ་ཡིན་པའི་ཕྱིར་རོ། །སྐུའི་འཁོར་ལོ་ནི་དཀར་པོའོ། །དེའི་རྩིབས་ཀྱི་བར་རྣམས་ནི་ཤར་ལ་སོགས་པའི་ཕྱོགས་སུ་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཁ་དོག་གོ །མུ་ཁྱུད་གསུམ་ནི་གོ་རིམས་ཇི་ལྟ་བ་བཞིན་དུ་རྡོ་རྗེ་ནག་པོ་དང༌། པདྨ་དམར་པོ་དང་འཁོར་ལོ་དཀར་པོའི་ཕྲེང་བ་རྣམས་ཀྱིས་བསྐོར་བའོ། །དེའི་ཕྱི་རོལ་ནས་བརྩམས་ཏེ་ནང་གི་བར་དུ་ལྗང་གུ་དང་དཀར་པོ་དང་དམར་པོ་དང་སེར་པོ་དང་ནག་པོའི་ཁ་དིག་གི་རེ་ཁཱ་ལྔའོ། །ཤར་དང་བྱང་དང་ནུབ་དང་ལྷོ་དང་དབུས་ཀྱིས་གཞི་དང་ཐོག་རྣམས་ཀྱང་དཀར་པོ་དང་ལྗང་གུ་དང་དམར་པོ་དང་སེར་པོ་དང་ནག་པོའི་ཁ་དོག་གོ །གཞན་དག་ནི་རེ་ཁཱ་ལྗང་དང་ས་གཞི་དང་ཐོག་རྣམས་ནག་པོ་དང་ལྗང་གུ་དང་དམར་པོ་དང་སེར་པོ་དང་དཀར་པོ་དང་བསྲེས་པའི་སྔོན་པོའི་མདོག་གོ་ཞེས་ཟེར་རོ། །དེ་ལྟར་སྔ་མ་དང་ཕྱི་མར་ཁ་དོག་གི་རིམ་པ་ཡོངས་སུ་བསམས་ནས་རྔུལ་ཚོན་དགྱེ་བར་བྱའོ། །དེ་ལ་སྐལ་བར་མི་ལྡན་པ་འདུས་པ་ན་མཚན་མ་དང་ཕྱག་རྒྱ་ཉིད་ཇི་ལྟར་རིགས་པར་བྲི་བར་བྱའོ། །སྐལ་བ་དང་ལྡན་པ་འདུས་པ་ན་ནི་ལྷའི་སྐུ་བྲི་བར་བྱ་ཞིང༌། བྲིས་སྐུའམ་ལུགས་མའམ་འབུར་དུ་བཏོད་པའམ་ལེགས་པར་འདུས་པ་བྱས་པ་གཞག་པར་བྱའོ། །ད་ལྟར་ཡང་ཀླུའི་བློའི་ཞབས་ཀྱིས། ཇི་ལྟར་ནུས་པས་དཀྱིལ་འཁོར་དུ། །ས་བོན་དགོད་བྱ་ཡང་ན་ནི། །མཚན་མའམ་ལྷ་ཡི་གཟུགས་ཉིད་དེ། །ལུགས་མའམ་འབུར་མ་བཞག་པར་བྱ། །ཞེས་གསུངས་སོ། །ཕྱག་རྒྱ་བྲི་བར་ནི་མངོན་པར་བརྗོད་པ་བླ་མའི་རྒྱུད་ལས་གསུངས་སོ། །མི་ནུས་ན་ནི་བྲིས་པའི་ཕྱག་རྒྱའམ་མཚན་མ་གཞག་པར་བྱ་སྟེ། ཚོན་ནམ་ཡང་ན་པིར་རྣམས་ཀྱིས། །བྲིས་པ་རྣམས་ཀྱིས་རྣམ་པར་སྤྲས། །ཞེས་སོ། །དེའི་
ཕྱིར་འཇམ་པའི་རྡོ་རྗེའི་དཀྱིལ་འཁོར་ལ་ནི་ལྟེ་བར་ཟླ་བ་ལ་བཅོམ་ལྡན་འདས་འཇམ་པའི་རྡོ་རྗེའི་རལ་གྲི་སྔོ་བསངས་སོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་ཉི་མ་ལ་རིན་ཆེན་འབྱུང་ལྡན་གྱི་རིན་པོ་ཆེ་ལྗང་གུ་ཆ་དགུ་པའོ། །ནུབ་ཏུ་ཉི་མ་ལ་འོད་དཔག་མེད་ཀྱི་པདྨ་དམར་པོ་འདབ་མ་བརྒྱད་པའོ། །བྱང་དུ་ཉི་མ་ལ་དོན་ཡོད་གྲུབ་པའི་རལ་གྲི་ལྗང་གུའོ། །མེར་ཟླ་བ་ལ་སྤྱན་མའི་མིག་འབྲས་ནག་པོ་ཅན་གྱི་མིག་དཀར་པོ་གཉིས་སྤྲིན་ལ་གནས་པའོ། །བདེན་བྲལ་དུ་ཟླ་བ་ལ་མཱ་མ་ཀཱིའི་རྡོ་རྗེ་ནག་པོ་རྩེ་ལྔ་པ་སྟེ་རྒྱུད་དུ་དེ་ལྟར་གསུངས་པའི་ཕྱིར་རོ། །རླུང་དུ་ཟླ་བ་ལ་གོས་དཀར་མོའི་པདྨ་དམར་པོ་ཁ་བྱེ་ཞིང་ཡུ་བ་རྩ་བ་དང་བཅས་པའོ། །དབང་ལྡན་དུ་ཟླ་བ་ལ་སྒྲོལ་མའི་ཨུཏྤལ་ཁ་དོག་སྔོ་སེར་རོ། །མེ་ལ་སོགས་པའི་ཟུར་བཞི་དང་ཤར་སྒོའི་གཡོན་དང་གཡས་སུ་ཆ་ཆུང་གཉིས་སྤངས་པའི་འགྲམ་དག་ཏུ་ཟླ་བ་རྣམས་ལ་རིམ་པ་ཇི་ལྟ་བ་བཞིན་དུ་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ཀྱི་དབྱིངས་ཀྱི་རྡོ་རྗེ་མ་རྣམས་ཀྱི་མེ་ལོང་དཀར་པོ་དང་དྲི་ཟའི་པི་ཝང་སྔོན་པོ་དང༌། དྲི་སེར་པོའི་དུད་དང་རོའི་སྣོད་དམར་པོ་དང༌། སྣ་ཚོགས་པའི་གོས་དང་ཆོས་འབྱུང་དཀར་པོ་རྣམས་སོ། །ཤར་ལ་སོགས་པའི་སྒོར་ཉི་མ་རྣམས་ལ་གཤིན་རྗེ་མཐར་བྱེད་དང༌། ཤེས་རབ་མཐར་བྱེད་དང༌། པདྨ་མཐར་བྱེད་དང༌། བགེགས་མཐར་བྱེད་རྣམས་ཀྱི་གོ་རིམས་ཇི་ལྟ་བ་བཞིན་དུ་རྡོ་རྗེའི་ཐོ་བ་ནག་པོ་དང་རྡོ་རྗེས་མཚན་པའི་དབྱུག་པ་དཀར་པོ་དང་པདྨ་དམར་པོ་དང་རྡོ་རྗེ་ཁྱ་གྱེས་པ་སྔོན་པོའོ། །འདིར་ཟླ་བ་དང་ཉི་མ་བཅུ་དགུ་ནི་སྣ་ཚོགས་པདྨ་ལ་གནས་པའོ། །མཚན་མ་ཐམས་ཅད་ནི་འོད་ཟེར་དང་བཅས་པ་རང་རང་གི་ཕྱོགས་སུ་མགོ་བསྟན་ནས་གནས་ཏེ། འཁོར་ལོའི་དབང་ཕྱུག་གི་ནི་ནུབ་ཏུ་མགོ་བསྟན་པའོ། །དེ་ལྟར་ཕྱི་མ་རྣམས་སུ་ཡང་ངོ༌། །རྡོ་རྗེ་སེམས་དཔའ་འཁོར་ལོའི་དབང་ཕྱུག་ཉིད་ལ་ནི། དབུས་སུ་ཆུ་སྐྱེས་དང་ཟླ་བ་ལ་ཞི་བའི་རྡོ་རྗེ་སྔོན་པོའོ། །ཁ་ཅིག་ནི་སྣ་ཚོགས་རྡོ་རྗེའོ་ཞེས་སོ། །དབུས་ཀྱི་འོད་ཟེར་གྱི་ཐིག་ཟླུམ་པོ་ལ་ཚོན་གྱི་རེ་ཁཱ་མི་བྱའོ་ཞེས་པ་མན་ངག་གོ །ཟླུམ་པོའི་ཐིག་གི་ཕྱི་རོལ་དུ་ཚངས་ཐིག་གི་ངོས་སོ་སོར་ཆ་ཆུང་བཞི་སྤངས་ནས་བུམ་པ་ཆ་ཆུང་བཞི་པ་སྟེ་བདུད་རྩིས་གང་བའི་
གསེར་གྱི་བུམ་པ་བརྒྱད་དོ་ཞེས་ཕྱོགས་གཅིག་གི་སྟེ། གཞན་དག་ནི་རིན་པོ་ཆེའི་རང་བཞིན་རང་རང་གི་ཕྱོགས་ཀྱི་དེ་བཞིན་གཤེགས་པའི་ཁ་དོག་གོ་ཞེས་པའོ། །འདི་དང་ཕྱི་མ་རྣམས་ལ་ཡང་དབུས་སུ་དེ་བཞིན་གཤེགས་པ་གཞན་གྱི་མཚན་མ་འགོད་ནས་དེའི་གནས་སུ་དབུས་ཀྱི་མཚན་མ་བྲི་བར་བྱའོ། །བསྡུས་པའི་རིམ་པར་གསུངས་པའི་དཀྱིལ་འཁོར་ལ་དབུས་སུ་ཉི་མ་ལ་མི་བསྐྱོད་པའི་རྡོ་རྗེ་རྩེ་ལྔ་པ་ཁ་གྱེས་པ་ཨིནྡྲ་ནཱི་ལ་ལྟ་བུ་དང༌། རེག་བྱ་རྡོ་རྗེ་མའི་སྣ་ཚོགས་པའི་གོས་སོ། །རྣམ་པར་སྣང་མཛད་ལ་སོགས་པའི་རིམ་པ་དང་གཉིས་པར་གནས་པ་བཅུ་གཉིས་པོ་རྣམས་ཀྱི་མཚན་མ་རྣམས་ནི་སྔ་མ་བཞིན་ནོ། །རིམ་པ་གསུམ་པར་སྒོའི་འགྲམ་གྱི་སྣམ་བུ་ལ་ཚངས་པའི་ཐིག་ལས་ཆ་ཆུང་བཞི་སྤངས་པར་གཡོན་དུ་བྱམས་པའི་ཀླུ་ཤིང་མེ་ཏོག་འཁོར་ལོ་དང་བཅས་པ་དང༌། གཡས་སུ་སའི་སྙིང་པོའི་འཁོར་ལོ་དཀར་པོ་རྩིབས་བརྒྱད་པའོ། །ལྷོར་དེ་བཞིན་དུ་ཕྱག་ན་རྡོ་རྗེ་དང་ནམ་མཁའི་སྙིང་པོའི་རྡོ་རྗེ་དང་ཆ་དགུ་པའི་རིན་པོ་ཆེ་མར་ཀ་ཏའོ། །ནུབ་ཏུ་འཇིག་རྟེན་དབང་ཕྱུག་དང་འཇམ་པའི་དབྱངས་ཀྱི་པདྨ་དམར་པོ་དང་རལ་གྲིའོ། །བྱད་དུ་དེ་བཞིན་དུ་སྒྲིབ་པ་རྣམ་པར་སེལ་བ་དང་ཀུན་དུ་བཟང་པོའི་རལ་གྲི་དང་རྡོ་རྗེའོ། །ཤར་ལ་སོགས་པའི་སྒོ་རྣམས་སུ་རིམ་པ་ཇི་ལྟ་བ་བཞིན་དུ་གཤིན་རྗེ་གཤེད་ལ་སོགས་པ་རྣམས་ཀྱི་རྡོ་རྗེ་ཐོ་བ་དང་རྡོ་རྗེ་མཚན་པའི་དབྱུག་པ་དཀར་པོ་དང་པདྨ་དམར་པོ་དང་སྣ་ཚོགས་རྡོ་རྗེའོ། །མེ་ལ་སོགས་པའི་ཟུར་རྣམས་སུ་མི་གཡོ་བ་དང་འདོད་པའི་རྒྱལ་པོ་དང་དབྱུག་པ་སྔོན་པོ་དང་སྟོབས་པོ་ཆེ་རྣམས་ཀྱི་རལ་གྲི་དང་རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་རྡོ་རྗེས་མཚན་པའི་དབྱུག་པ་ནག་པོའོ། །གཙུག་ཏོར་འཁོར་ལོས་སྒྱུར་བའི་རྡོ་རྗེ་སྔོན་པོ་ནི་གཤིན་རྗེ་གཤེད་ཀྱི་མཚན་མའི་ཕྱི་ངོས་སུ་སྟེ། གཞན་དག་ནི་འཁོར་ལོ་སེར་པོའོ་ཞེས་སོ། །གནོད་མཛེས་ཀྱི་རྡོ་རྗེ་ནི་པདྨ་མཐར་བྱེད་ཀྱི་མཚན་མའི་ཕྱི་ངོས་སུའོ། །བྱམས་པ་ལ་སོགས་པ་བརྒྱད་ཀྱི་མཚན་མ་ནི་ཟླ་བ་ལ་གནས་པ་སྟེ། གཤིན་རྗེ་གཤེད་ལ་སོགས་པ་བཅུའི་མཚན་མ་ནི་ཉི་མ་ལ་གནས་པའོ། །འདིར་ཉི་མ་དང་ཟླ་བ་སུམ་ཅུ་རྩ་གཅིག་ནི་སྣ་ཚོགས་པདྨ་ལ་གནས་པ་སྟེ་བུམ་པ་བྲི་བ་ནི་སྔ་མ་བཞིན་ནོ། །ཁ་སྦྱོར་དུ་
གསུངས་པའི་རྡོ་རྗེ་སེམས་དཔའི་དཀྱིལ་འཁོར་ལ་དབུས་སུ་ཟླ་བ་སེམས་དཔའི་རྡོ་རྗེ་རྩེ་ལྔ་པ་སྔོན་པོའོ། །ཤར་དུ་ཟླ་བ་ལ་རྣམ་པར་སྣང་མཛད་ཀྱི་དཀྱིལ་འཁོར་ལོ་དང༌། ལྷོར་ཉི་མ་ལ་རིན་ཆེན་དབང་པོའི་རིན་པོ་ཆེ་དང༌། ནུབ་ཏུ་ཉི་མ་ལ་སྣང་བ་མཐའ་ཡས་ཀྱི་མདའ་དང༌། བྱང་དུ་ཉི་མ་ལ་དོན་ཡོད་གྲུབ་པའི་སྣ་ཚོགས་རྡོ་རྗེའོ། །སྤྱན་མའི་སྤྲིན་ལ་གནས་པའི་མིག་དང༌། མཱ་མ་ཀཱིའི་མདའ་དང་གོས་དཀར་མོའི་མདའ་དང་སྒྲོལ་མའི་ཨུཏྤལ་དམར་པོའོ། །རིམ་པ་གཉིས་པ་ལ་ཤར་ཕྱོགས་སུ་དྲག་མོའི་མདའ་དང༌། བདེན་བྲལ་དུ་སྒྲ་རྡོ་རྗེ་མའི་ཤ་ཀྟི་དང༌། རླུང་དུ་ས་རྡོ་རྗེ་མའི་བུམ་པ་དཀར་ལྗང་ངོ༌། །རིམ་པ་གསུམ་པ་ལ་ཤར་ཕྱོགས་སུ་བཞད་མའི་རྡོ་རྗེ་དང༌། ལྷོར་སྒེག་མོའི་རྡོ་རྗེ་དང༌། ནུབ་ཏུ་གླུ་མའི་འཁོར་རྔ་དང༌། བྱང་དུ་གར་མའི་རྡོ་རྗེ་རྩེ་གསུམ་པ་ལྗང་གུ་དང༌། དབང་ལྡན་དུ་གླིང་བུ་མའི་གླིང་བུ་དང༌། མེར་པི་ཝ་ང་མའི་པི་ཝང་དང༌། བདེན་བྲལ་དུ་རྔ་ཟླུམ་མའི་རྡ་ཟླུམ་དང༌། རླུང་དུ་རྫ་ང་མའི་རྫ་རྔའོ། ཕྱིའི་སྣམ་བུ་ལ་མེར་མེ་ཏོག་མའི་མེ་ཏོག་གི་ཕྲེང་བ་དང༌། བདེན་བྲལ་དུ་བདུག་སྤོས་མའི་སྨོས་མེད་དང༌། རླུང་དུ་མར་མེ་མའི་མར་མེའི་མཆོད་སྡོང་དང༌། དབང་ལྡན་དུ་དེར་མའི་དྲིའི་དུད་ཆོས་དང༌། ཤར་དུ་མེ་ལོང་མའི་མི་ལོང་དང༌། ལྷོར་རོ་མའི་རོའི་སྣོད་དང༌། ནུབ་ཏུ་རེག་བྱ་མའི་གོས་སྣ་ཚོགས་དང༌། བྱང་དུ་ཆོས་མའི་ཆོས་འབྱུང་དཀར་པོའོ། །ཤར་ལ་སོགས་པའི་སྒོ་རྣམས་སུ་རིམ་པ་ཇི་ལྟ་བ་བཞིན་དུ་རྡོ་རྗེ་ལྕགས་ཀྱུ་མ་དང༌། རྡོ་རྗེ་ཞགས་པ་མ་དང༌། རྡོ་རྗེ་ལྕགས་སྒྲོག་མ་དང༌། རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་ལྕགས་ཀྱུ་དང༌། རྡོ་རྗེ་ཞགས་པ་དང༌། རྡོ་རྗེ་ཕྲེང་བའི་བདག་ཉིད་ཀྱི་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་ཏེ་ཉི་མ་ལ་གནས་པའོ། །འདིར་བརྗོད་པའི་ཉི་མའི་གདན་ལ་གནས་པའི་མཆན་མ་བདུན་ལས་གཞན་པའི་མཚན་མ་རྣམས་ནི་ཟླ་བའི་གདན་ལ་གནས་པ་སྟེ། ཉི་མ་དང་ཟླ་བ་སུམ་ཅུ་རྩ་བདུན་པོ་འདི་རྣམས་ནི་སྣ་ཚོགས་པདྨའི་སྟེང་དུ་ཐོད་པ་རྣམས་ལ་གནས་པའོ། །བུམ་པ་བྲི་བ་ནི་སྔ་མ་བཞིན་ཏེ་ཐིག་ཟླུམ་པོ་དྲུག་པ་ལས་ཕྱི་རོལ་དུའོ་ཞེས་པ་ནི་ཁྱད་པར་རོ། །ཡེ་ཤེས་མཁའ་འགྲོ་མའི་དཀྱིལ་འཁོར་ལ་དབུས་དང་ཤར་དང་བྱང་དང་ནུབ་དང་ལྷོ་རྣམས་སུ་
རིམ་པ་ཇི་ལྟ་བ་བཞིན་དུ་ཡེ་ཤེས་མཁའ་འགྲོ་མ་དང་རྡོ་རྗེ་མཁའ་འགྲོ་མ་དང་མི་བཟད་མཁའ་འགྲོ་མ་དང་རོ་ལངས་མ་དན་གཏུམ་མོ་རྡོ་རྗེས་མཚན་པའི་ཁ་ཊྭཱཾ་ག་རྣམས་སོ། །དབང་ལྡན་དང་མེ་དང་བདེན་བྲལ་དང་རླུང་རྣམས་སུ་སེང་གེ་མོ་དང་སྟག་མོ་དང་ཅེ་སྤྱང་མོ་དང་འུག་པ་མོ་རྣམས་ཀྱི་རྡོ་རྗེ་ལྕགས་ཀྱུ་རྣམས་སོ། །ཤར་དང་བྱང་དང་ནུབ་དང་ལྷོའི་སྒོ་རྣམས་སུ། རྒྱལ་དབང་མོ་དང་གསལ་བྱེད་མོ་དང་འཇིབ་བྱེད་མོ་དན་འདྲ་བྱེད་མོ་རྣམས་ཀྱི་རིམ་པ་ཇི་ལྟ་བ་བཞིན་དུ། ལག་པ་གཉིས་སྙིམ་པ་ཕྱེ་བ་དང་སྙིམ་པ་ཁྲག་གིས་བཀང་བ་དང་རྡོ་རྗེ་ཐལ་མོ་ལས་མཐེ་བོའི་རྩེ་མོ་གཉིས་དང་མཛུབ་མོའི་རྩེ་མོ་གཉིས་སྦྱར་བའོ། །འདིར་མཚན་མ་དང་ཕྱག་རྒྱ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །བསྒོམ་བྱའི་དཀྱིལ་འཁོར་ལ་ཡེ་ཤེས་མཁའ་འགྲོ་མ་ལ་སོགས་པའི་སྣ་ཚོགས་པདྨ་རྣམས་ནི་གོ་རིམས་ཇི་ལྟ་བ་བཞིན་དུ། སེང་གེ་ལྔ་དང་སོ་ལྡན་དཀར་པོ་དང་རིན་པོ་ཆེ་སྣ་བདུན་གྱི་ཕུང་པོ་དང་མ་ཧེ་དང་གདེངས་ཅན་གྱི་དབང་པོ་བརྒྱད་ཀྱི་མཇུག་མ་དང་རོ་བཞི་ལ་གནས་པ་སྟེ། སོ་སོའི་རྔུལ་ཚོན་གྱི་དཀྱིལ་འཁོར་དུ་ནི་སྐལ་བ་དང་མི་ལྡན་པ་འདུས་པ་ན་བྲི་བར་མི་བྱའོ། །གཞན་དུ་ནི་ངལ་བས་འཇིགས་པའི་ཕྱིར་དང་སྦྱིན་བདག་བསྡུས་པ་ལ་དགའ་བས་སོ། །སྐལ་བ་ལྡན་པ་རབ་ཏུ་དང་བར་བྱ་བའི་དོན་དང་སྦྱིན་བདག་གི་དབང་ལས་ནི་བྲི་བར་བྱའོ། །དེ་བཞིན་དུ་ཕྱི་མ་རྣམས་ལ་ཡང་ཇི་ལྟར་འབྱུང་བར་བྲི་བ་དང་མི་བྲི་བར་རིག་པར་བྱའོ། །ཕྱི་ངོས་ཀྱི་ཐིག་ཟླུམ་པོའི་ཕྱི་རོལ་དུ་བུམ་པ་བྲིའོ། །བཅུ་བདུན་གྱི་བདག་ཉིད་ཀྱེའོ་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཁྲོ་བོའི་རྡོ་རྗེ་སྔོན་པོའོ། །ཤར་དང་ལྷོ་ལ་སོགས་པ་དང་བྱང་དང་མེ་ལ་སོགས་པའི་འདབ་མ་རྣམས་ལ་རིམ་པ་ཇི་ལྟ་བ་བཞིན་དུ་རྡོ་རྗེ་དྲག་མོ་དང་རྡོ་རྗེ་གཟུགས་མ་དན་རྡོ་རྗེ་འདོད་ཆགས་མ་དང་རྡོ་རྗེ་ཞེ་བ་མོ་དང་རྡོ་རྗེ་གནོད་སྦྱིན་མོ་དང་རྡོ་རྗེ་མཁའ་འགྲོ་མ་དང་སྒྲ་རྡོ་རྗེ་མ་དང་ས་རྡོ་རྗེ་མ་རྣམས་ཀྱི། གླིང་བུ་དང་པི་ཝང་དང་རྔ་ཟླུམ་དང་རྫ་རྔ་རྣམས་སོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང༌། རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དན་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །
མཚན་མ་བཅུ་བདུན་པོ་འདི་རྣམས་ནི་ཐོད་པ་དང་ཉི་མ་ལ་གནས་པ་སྟེ། གླིང་བུ་མ་ལ་སོགས་པ་བརྒྱད་ཀྱི་ནི་ཐོད་པའི་འོག་ཏུ་སྣ་ཚོགས་པ་པདྨའོ། །ཕྱག་གཉིས་པ་དན་ཕྱག་བཞི་པ་ལ་ནི་ཐོད་པ་མེད་དོ། །ཕྱག་བཅུ་དྲུག་པའི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཁྲོ་བོའི་རྡོ་རྗེ་སྔོན་པོའོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་གཽ་རཱི་དང་ཙཽ་རཱི་དང་རོ་ལངས་མ་དང་གྷསྨ་རཱི་དང་པུཀྐ་སཱི་དང་རི་ཁྲོད་མ་དང་གཏུམ་མོ་དང་རབ་ཏུ་རྨོངས་བྱེད་མ་རྣམས་ཀྱི་དོ་རྗེ་དང་ཐོད་པ་ཁྲག་དང་བཅས་པ་ལ་གནས་པའི་རུས་སྦལ་དང༌། ཚིལ་གྱིས་གང་བའི་ཐོད་པ་ལ་གནས་པའི་སྤྲུལ་དང་ཤས་གང་བའི་ཐོད་པ་ལ་གནས་པའི་སེང་གེ་དང་ཁུ་བ་དང་བཅས་པའི་ཐོད་པ་ལ་གནས་པའི་དགེ་སློང་དང་ཁྲག་དང་བཅས་པའི་ཐོད་པ་ལ་གནས་པའི་སྟག་དང་ཆང་གི་སྣོད་རྣམས་སོ། །རིམ་པ་གཉིས་པའི་ཟུར་རྣམས་སུ་གླིང་བུ་མ་ལ་སོགས་པའི་མཚན་མ་རྣམས་ནི་སྔ་མ་བཞིན་ནོ། །ཤར་ལ་སོགས་པའི་སྒོ་རྣམས་སུ་རྟ་གདོང་མ་དན་ཕག་གདོང་མ་དན་གྱི་གདོང་མ་དང་སེང་གེ་མོ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དན་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །མཚན་མ་བཅུ་བདུན་པོ་འདི་རྣམས་ནི་ཉི་མ་ལ་གནས་པ་སྟེ། གླིང་བུམ་ལ་སོགས་པ་བརྒྱད་ཀྱི་ནི་ཉི་མའི་འོག་ཏུ་སྣ་ཚོགས་པདྨ་རྣམས་སོ། །དབུས་ཀྱི་འོད་ཟེར་གྱི་ཕྱི་རོལ་དུ་བུམ་པ་རྣམས་ནི་སྔ་མ་བཞིན་ནོ། །བདག་མེད་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བ་དང་ཤར་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་བདག་མེད་མ་དང་རྡོ་རྗེ་མ་དང་དཀར་མོ་དང་ཆུ་མ་དང་རྡོ་རྗེ་མཁའ་འགྲོ་མ་རྣམས་དང༌། རིམ་པ་གཉིས་པར་ཕྱག་བཅུ་དྲུག་པའི་དཀྱིལ་འཁོར་དུ་བརྗོད་པའི་དཀར་མོ་ལ་སོགས་པ་རྣམས་ཀྱི་རྡོ་རྗེའོ། །གླིང་བུ་མ་ལ་སོགས་པའི་མཚན་མ་ནི་སྔ་མ་བཞིན་ཏེ། །རྟ་གདོང་མ་ལ་སོགས་པའི་གྲི་གུག་རྣམས་སོ། །རྟ་གདོང་མའི་ཕྱི་ངོས་སུ་མཁའ་སྤྱོད་མའི་རྡོ་རྗེ་སྟེ་ཁྱི་གདོང་མ་ལ་སོགས་པའི་ཕྱི་ངོས་སུ་ས་སྤྱོད་མའི་རྡོ་རྗེའོ། །འདིར་གྲི་གུག་བཞི་ནི་ཉི་མ་ལ་གནས་པ་སྟེ་མཚན་མ་གཞན་ནི་ཟླ་བ་དང་ཉི་མ་ནི་སྣ་ཚོགས་པདྨ་ལ་གནས་པའོ། །གླིང་བུ་མ་ལ་སོགས་པ་བརྒྱད་མེད་པ་ན་ལྷག་མ་ལྷ་མོ་བཅོ་ལྔ་པོ་རྣམས་ཀྱི་ནི་ཟླ་བ་ལ་གྲི་གུག་
རྣམས་སོ། །དཀར་མོའི་ཕྱི་ངོས་སུ་མཁའ་སྤྱོད་མའི་མཚན་མ་སྟེ་རོ་ལངས་མའི་ཕྱི་ངོས་སུ་ས་སྤྱོད་མའིའོ། །དེ་བཞིན་དུ་ཀུ་རུ་ཀུ་ལླེའི་དཀྱིལ་འཁོར་ལ་ཡང་ཡིན་ཏེ། ཁྱད་པར་ནི་ཟླ་བ་ལ་ཡུ་བ་དང་བཅས་པའི་ཨུཏྤལ་དམར་པོ་ཁ་འབུས་པ་ཡོད་པའི་མདའོ། །འདིར་ལྷ་མོ་བཅོ་ལྔ་པོ་རྣམས་ཀྱང་ཀུ་རུ་ཀུ་ལླེའི་བཞིན་དུ་ཁ་དོག་དམར་པོའོ། །རྡོ་རྗེ་བདུད་རྩིའི་དཀྱིལ་འཁོར་དང་པོ་ལ་སྣ་ཚོགས་ཆུ་སྐྱེས་ཀྱི་ལྟེ་བ་དང་ཤར་ལ་སོགས་པ་དག་དབང་ལྡན་ལ་སོགས་པའི་འདབ་མ་རྣམས་ལ་གོ་རིམས་ཇི་ལྟ་བ་བཞིན་དུ་རྡོ་རྗེ་བཅུད་རྩི་དང་ཞི་བ་མོ་དང༌། ཞི་བ་གདོང་མ་དང་ཟླ་ལྡན་མ་དན་རི་བོང་ཅན་མ་དང་ཟླ་བའི་དཀྱིལ་འཁོར་མ་དང་ཟླ་ཚེས་མ་དང་ཡིད་འོང་མ་དང་ཡིད་ཚིམ་པར་བྱེད་པ་རྣམས་ཀྱི་རྡོ་རྗེའོ། །ཁྱད་པར་ནི་ཟླ་ཚེས་མའི་ཟླ་བ་ཆ་གཅིག་གོ །རིམ་པ་གྱིས་པ་ལ་དབང་ལྡན་ལ་སོགས་པ་རྣམས་སུ་མེ་ཏོག་མ་དང་བདུད་སྦོས་མ་དང་མར་མེ་མ་དང་དྲི་ཆ་བ་མ་རྣམས་ཀྱི་མེ་ཏོག་གི་ཟ་མ་ཏོག་དང་སྤོས་ཕོ་དང་མར་མེའི་མཆོད་སྡོང་དང་དྲིའི་དུང་ཆོས་རྣམས་སོ། །ཤར་ལ་སོགས་པའི་སྣམ་བ་ལ་གླིང་བུ་མ་ལ་སོགས་པ་རྣམས་ཀྱི་གླིང་བུ་ལ་སོགས་པ་བཞིའོ། །ཤར་ལ་སོགས་པའི་སྒོ་རྣམས་སུ་ཁྲོ་གཉེར་རིམ་པར་ལྡན་དང་འཇིགས་བསྡིགས་དང་རྟག་གཟུགས་དང་ཚོགས་ཀྱི་གཙོ་བོ་རྣམས་ཀྱི་རྡོ་རྗེ་ལྕགས་ཀྱུ་དན་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་སོ། །མཚན་མ་ཉི་ཤུ་རྩ་གཅིག་པོ་འདིར་ནམས་ནི་ཟླ་བ་ལ་གནས་པ་སྟེ། མེ་ཏོག་མ་ལ་སོག་ས་བཅུ་གཉིས་ཀྱི་ཟླ་བའི་འོག་ཏུ་སྣ་ཚོགས་འདམ་སྐྱེས་རྣམས་སོ། །ཡང་ན་དཀྱིལ་འཁོར་པ་ཐམས་ཅད་ལ་ཆོས་འབྱུང་བྲི་བར་བྱའོ། །འདི་ཉིད་ཁོ་ན་བྲི་བར་བྱའོ་ཞེས་པ་ནི་གཞན་དག་གོ །རྡོ་རྗེ་བདུད་རྩི་གཞན་གསུམ་གྱི་དཀྱིལ་འཁོར་གྱི་མཚན་མ་ནི་རྡོ་རྗེ་བདུད་རྩིའི་རྒྱུད་དུ་རིག་པར་བྱའོ། །དགུའི་བདག་ཉིད་ཀྱི་ཀྱེའི་རྡོ་རྗེ་གསུམ་གྱི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་རྡོ་རྗེ་སྔོན་པོ་ཁ་གྱེས་པའོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མར་ཟླ་བ་རྣམས་ལ་གོ་རིམས་ཇི་ལྟ་བ་བཞིན་དུ་གཽ་རཱི་དང་ཆོམ་རྐུན་མ་དང་རོ་ལངས་མ་དང་གྷ་སྨ་རཱི་དན་པུཀྐ་སཱི་དན་རི་ཁྲོད་མ་དང་གཏུམ་མོ་དང་གཡུང་མོ་རྣམས་ཀྱི་གྲི་གུག་དང་ཅང་ཏེའུ་དན་རུས་སྦལ་དང་སྤྲུལ་དན་སེང་གེ་དང་དགེ་སློང་དང་འཁོར་ལོ་དང་རྡོ་རྗེ་
རྣམས་སོ། །ཕྱག་བཅུ་དྲུག་པའི་ཉི་མ་ལ་སྣ་ཚོགས་རྡོ་རྗེས་མཚན་པའི་ཐོད་པ་དཀར་པོའོ་ཞེས་པ་ནི་ཁྱད་པར་རོ། །དེའི་ཟླུམ་པོ་ལས་ཕྱི་རོལ་དུ་བུམ་པ་རྣམས་སོ། །སྒྱུ་མ་ཆེན་མོའི་དཀྱིལ་འཁོར་ལ་པདྨ་དམར་པོའི་ལྟེ་བར་ཉི་མ་ལ་བཅོམ་ལྡན་འདས་སྒྱུ་མ་ཆེན་མོའི་ངོ་བོ་པདྨའི་སྣོད་དོ། །ཤར་ལ་སོགས་པའི་འདབ་མར་ཟླ་བ་རྣམས་ལ་གཡས་སྐོར་དུ་རྡོ་རྗེ་མཁའ་འགྲོ་མ་དང་རིན་ཆེན་མཁའ་འགྲོ་མ་དང་པདྨ་མཁའ་འགྲོ་མ་དང་སྣ་ཚོགས་མཁའ་འགྲོ་མ་རྣམས་ཀྱི་རྡོ་རྗེ་དང་རིན་པོ་ཆེའི་སྙེ་མ་དང་སྣ་ཚོགས་ཆུ་སྐྱེས་དང་རལ་གྲིའོ། །སངས་རྒྱས་མཁའ་འགྲོ་མ་ནི་རྡོ་རྗེ་སེམས་དཔའ་ལ་འཁྱུད་ནས་གནས་པའི་ཕྱིར་དེའི་མཚན་མ་ཐ་དད་དུ་མི་དགོད་དོ། །དགུའི་བདག་ཉིད་སངས་རྒྱས་ཐོད་པའི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་ཅང་ཏེའུའོ། །ཤར་དང་བྱང་དང་ནུབ་དང་དབང་ལྡན་དང་མེ་དང་བདེན་བྲལ་དང་རླུང་གི་འདབ་མར་ཉི་མ་རྣམས་ལ། སྣ་ཚོགས་སྡེ་མ་དང་འདོད་མ་དང་ས་འོག་གནས་མ་དང་ལེགས་བཟང་མ་དང་ཆང་འཚོང་མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་རྣམས་ཀྱི་གྲི་གུག་གོ །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ལ་དབུས་སུ་རྡོ་རྗེ་ཧཱུཾ་མཛད་ཀྱི་རྡོ་རྗེའོ། །ཤར་ལ་སོགས་པར་གཡས་སྐོར་དུ་རྡོ་རྗེ་དབྱུག་པ་དང་རྡོ་རྗེ་མེ་དང་རྡོ་རྗེ་གཙུག་ཏོར་དང་རྡོ་རྗེ་འཁྱིལ་པ་རྣམས་དང་མེ་ལ་སོགས་པར་གཡས་སྐོར་དུ་རྡོ་རྗེ་གནོད་སྦྱིན་དང་རྡོ་རྗེ་དུས་དང་ནག་པོ་ཆེན་པོ་དང་རྡོ་རྗེ་བསྡིགས་པ་དང་གཙུག་ཏོར་དང་རྡོ་རྗེ་ས་འོག་རྣམས་ཀྱི་རྡོ་རྗེ་ཐོ་བ་དང་རྡོ་རྗེ་དབྱུག་པ་དང་ཆུ་སྐྱེས་དམར་པོ་དང་སྣ་ཚོགས་རྡོ་རྗེ་དང་ལྕགས་ཀྱུ་དང་དགྲ་སྟ་དང་རྩེ་གསུམ་དང་རལ་གྲི་དང་འཁོར་ལོ་དང་རྡོ་རྗེ་གཏུན་ཤིང་རྣམས་ཏེ། མཚན་མ་ཐམས་ཅད་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །ཡང་ན་ཤར་ལ་སོགས་པའི་ཕྱོགས་སུ་གཡས་སྐོར་དུ་གཤིན་རྗེ་མཐར་བྱེད་དང༌། ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་རྣམས་ཀྱི་རྡོ་རྗེ་ཐོ་བ་དང་རྡོ་རྗེས་མཚན་པའི་དབྱུག་པ་དང་པདྨ་དམར་པོ་དང་སྣ་ཚོགས་རྡོ་རྗེ་སྟེ། མེ་ལ་སོགས་པའི་མཚམས་སུ་མི་གཡོ་བ་དང་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་རྣམས་ཀྱི་རལ་གྲི་དང་རྡོ་རྗེ་དང་རྡོ་རྗེས་མཚན་པའི་དབྱུག་པ་སྔོན་པོ་དང་རྡོ་རྗེས་མཚན་པའི་དབྱུག་པའོ།
གཤིན་རྗེ་གཤེད་ཀྱི་མཚན་མ་ལས་ཕྱི་ངོས་སུ་གཙུག་ཏོར་འཁོར་ལོ་ཅན་གྱི་རྡོ་རྗེ་སྟེ། པདྨ་མཐར་བྱེད་ཀྱི་མཚན་མ་ལས་ཕྱི་ངོས་སུ་གནོད་མཛེས་ཀྱི་རྡོ་རྗེའོ། །མཚན་མ་བཅུ་གཅིག་པོ་འདི་རྣམས་ཀྱི་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །ཡང་ན་བགེགས་དགྲའི་རྡོ་རྗེ་ཁ་གྱེས་པའོ། །མེ་ལ་སོགས་པ་རྣམས་སུ་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་དང་མི་གཡོ་བ་རྣམས་ཀྱི་ལྕགས་ཀྱུ་དང་རྡོ་རྗེས་མཚན་པའི་དབྱུག་པ་སྔོན་པོ་དང་རྩེ་གསུམ་དང་རལ་གྲིའོ། །གཙུག་ཏོར་ཅན་གྱི་འཁོར་ལོ་ནི་སེར་པོ་སྟེ་གཞན་རྣམས་ནི་བཤད་མ་ཐག་པ་སྔ་མ་བཞིན་ནོ། །ཡང་ན་གཤིན་རྗེ་གཤེད་ལ་སོགས་པ་བཞི་པོ་རྣམས་ཀྱི་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་ཏེ་གཞན་ནི་བཤད་མ་ཐག་པ་སྔ་མ་བཞིན་ནོ།། །།དཔལ་བདེ་མཆོག་གི་དཀྱིལ་འཁོར་ལ་སྣ་ཚོགས་ཆུ་སྐྱེས་ཀྱི་ལྟེ་བར་ཉི་མ་ལ་གནས་པའི་དཔལ་བདེ་མཆོག་གི་རྡོ་རྗེ་རྩེ་ལྔ་པ་སྔོན་པོ་ཁ་གྱེས་པའོ། །ཕྱོགས་བཞིའི་འདབ་མ་ལ་མཁའ་འགྲོ་མ་དང་ལཱ་མ་དང་དུ་མ་སྐྱེས་མ་དང་གཟུགས་ཅན་མ་རྣམས་ཀྱི་གྲི་གུག་གོ །མཚམས་ཀྱི་འདབ་མ་རྣམས་ལ་པདྨའི་སྣོད་རྣམས་སོ། །བུམ་པའི་སྟེང་དུའོ་ཞེས་པ་ནི་ཁ་ཅིག་གོ །ཐུགས་ཀྱི་འཁོར་ལོ་ལ་སོགས་པའི་རྩིབས་ཉི་ཤུ་བཞི་ལ་རབ་གཏུམ་མ་དང་གཏུམ་མིག་མ་དང་འོད་ལྡན་མ་དང༌། སྣ་ཆེན་མ་དང༌། དཔའ་བོའི་བློ་ཅན་མ་དང༌། མིའུ་ཐུང་མ་དང༌། ལངྐའི་དབང་ཕྱུག་མ་དང༌། ཤིང་གྲིབ་མ་དང༌། ས་སྲུང་མ་དང༌། འཇིགས་བྱེད་ཆེན་མོ་དང༌། རླུང་ཤུགས་མ་དང༌། ཆང་འཐུང་མ་དང༌། སྔོ་བསངས་ལྷ་མོ་དང༌། ཤིན་ཏུ་བཟང་མོ་དང༌། རྟ་རྣམ་དང༌། བྱ་གདོང་མ་དང༌། འཁོར་ལོའི་ཤུགས་ཅན་མ་དང༌། དུ་མ་སྐྱེས་མ་དང༌། ཆང་འཚོང་མ་དང༌། འཁོར་ལོའི་གོ་ཆ་མ་དང༌། ཤིན་ཏུ་དཔའ་མོ་དང༌། སྟོབས་ཆེན་མ་དང༌། འཁོར་ལོས་སྒྱུར་མ་དང༌། བརྩོན་འགྲུས་ཆེན་མོ་རྣམས་ཀྱི་གྲི་གུག་གོ ། དཔའ་བོ་རྣམས་ཀྱི་མཚན་མ་ནི་གཙོ་བོ་མ་ཡིན་པ་ཉིད་ཀྱི་ཕྱིར་བྲི་བར་མི་བྱའོ། །སྒོ་རྣམས་སུ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་དང༌། མཚམས་རྣམས་སུ་གཤིན་རྗེ་བརྟན་མ་དང་གཤིན་རྗེ་ཕོ་ཉ་མོ་དང་གཤིན་རྗེ་མཆེ་བ་མ་དང་གཤིན་རྗེ་འཇོམས་པ་མོ་
རྣམས་ཀྱི་སྣ་ཚོགས་ཆུ་སྐྱེས་དང་ཉི་མ་ལ་གྲི་གུག་གོ །འདིར་ཤར་ལ་སོགས་པའི་ཕྱོགས་སུ་གཡོན་སྐོར་དང༌། མེ་ལ་སོགས་པའི་མཚམས་སུ་གཡས་སྐོར་གྱི་མཚན་མ་དགོད་པར་བྱའོ། །ཕྱི་ངོས་ཀྱི་ཟླུམ་པོའི་ཐིག་ལས་ཕྱི་རོལ་གྱི་མཚམས་ཀྱི་ཆར་བུམ་པ་རྣམས་བྲིའོ། །དེ་ལས་གཞན་པའི་འཁོར་ལོ་སྡོམ་པ་དང་རྡོ་རྗེ་ཕག་མོའི་དཀྱིལ་འཁོར་གྱི་མཚན་མ་རྣམས་ནི་འཆད་པར་འགྱུར་བའི་ལྷ་བསྒོམ་པའི་སྐབས་སུ་རིག་པར་བྱའོ། །ཉི་ཤུ་རྩ་ལྔའི་བདག་ཉིད་ཅན་སངས་རྒྱས་ཐོད་པའི་དཀྱིལ་འཁོར་ལ་དབུས་སུ་སྣ་ཚོགས་པདྨར་ཉི་མ་ལ་ཊ་མ་རུའོ། །ལྷ་མོ་ཉི་ཤུ་རྩ་བཞིའི་གྲི་གུག་རྣམས་ཏེ་ཤར་ལ་སོགས་པའི་ཕྱོགས་རྣམས་སུ་གཡོན་སྐོར་དང༌། མེ་ལ་སོགས་པའི་མཚམས་རྣམས་སུ་གཡོན་སྐོར་གྱིས་སོ། །དེ་ལ་འཁོར་ལོ་ནག་པོའི་རྩིབས་ཀྱི་སྟེང་དུ་ཕྱོགས་ཀྱི་འདབ་མ་རྣམས་ལ་ལེགས་ཕྲེང་ཅན་མ་དང་ཐོད་པ་ཅན་མ་དང་འཇིགས་མ་དག་མི་ཐུབ་མ་རྣམས་ཀྱིའོ། །མཚམས་ཀྱི་འདབ་མ་ལ་ཐོད་པ་རྣམས་སོ། །རྡོ་རྗེ་སྔོན་པོའི་ཕྲེང་བའོ། །རིམ་པ་གཉིས་པར་རྩིབས་བརྒྱད་དམར་པོ་ལ་གནས་པའི་ཆུ་སྐྱེས་ཀྱི་འདབ་མ་བརྒྱད་ལ་ཕྱོགས་རྣམས་སུ་མཛེས་པའི་སྐ་རགས་ཅན་མ་དང་གཟུགས་ཅན་མ་དང་རྣམ་པར་རྒྱལ་མ་དང་འདོད་ཅན་མ་རྣམས་ཀྱིའོ། །མཚམས་རྣམས་སུ་དུས་ཅན་མ་དང་མཚོ་ཅན་མོ་དང་བྱེད་མ་དང་གསོད་མ་རྣམས་ཀྱིའོ། །དེ་ནས་རྡོ་རྗེ་དམར་པོའི་ཕྲེང་བའོ། །རིམ་པ་གསུམ་པར་རྩིབས་བརྒྱད་དཀར་པོ་ལ་གནས་པའི་པདྨའི་འདབ་མ་བརྒྱད་ལ་ཕྱོགས་རྣམས་སུ་སྒྲོལ་མ་དང་འཇིགས་མཐོང་མ་དང་ལེགས་མཐོང་མ་དང་ཐུབ་དཀའ་མ་རྣམས་ཀྱིའོ། །མཚམས་རྣམས་སུ་དགེ་མ་དང་གྲིབ་གནོན་མ་དང་མཚན་མོ་དང་གྲགས་ཆེན་མོ་རྣམས་ཀྱིའོ། །དེ་ནས་རྡོ་རྗེ་དཀར་པོའི་ཕྲེང་བའོ། །སྒོའི་པདྨ་རྣམས་ལ་མཛེས་མ་དང་ནོར་འཛིན་མ་དང་སྐལ་བཟང་མ་དང་མཐོང་དགའ་མ་རྣམས་ཀྱིའོ། །པདྨ་ཉི་ཤུའི་སྟེང་དུ་ཉི་མ་ལ་གྲི་གུག་རྣམས་སོ་ཞེས་གདམས་སོ། །དཔལ་རྣལ་འབྱོར་ནམ་མཁའི་དཀྱིལ་འཁོར་ལ་གཙོ་བོའི་སྣ་ཚོགས་པདྨ་དང་ཟླ་བར་རྡོ་རྗེ་སྔོན་པོ་རྩེ་ལྔ་པའོ། །ཤར་དང་བྱང་དང་ནུབ་དང་ལྷོའི་རེ་མིག་རྣམས་སུ་པདྨ་དང་ཉི་མ་ལ་གནས་པའི་ཁ་ཊྭཱཾ་ག་རྣམས་སོ། །དབང་ལྡན་དང་མེ་ལ་སོགས་པའི་རེ་མིག་
རྣམས་སུ་ཁ་ཊྭཱཾ་ག་དང་ལྕགས་ཀྱུ་དང་དགྲ་སྟ་དང་དབྱུག་པའོ། །ཤར་ལ་སོགས་པའི་རེ་མིག་གི་ཁ་ཊྭཱཾ་ག་རྣམས་ཀྱི་ཕྱི་རོལ་དུ་རིམ་པ་ཇི་ལྟ་བ་བཞིན་དུ་ཁར་བསྡུས་པའི་ལག་པ་གཉིས་དང་ཐལ་མོ་སྦྱར་བ་དང་ཁྲག་གི་སྙིམ་པ་དང༌། གཏུན་ཤིང་སྟེ་ཁ་ཊྭཱཾ་ག་ལ་སོགས་པའི་མཚན་མ་རྣམས་ནི་པདྨ་དང་ཉི་མ་ལ་གནས་པའོ། །འོད་ཟེར་གྱི་ཁོར་ཡུག་གི་ཕྱི་རོལ་དུ་ཤར་ཕྱོགས་སུ་བདུད་རྩིའི་ཐོད་པ་གསུམ་དང་བྱང་དུ་སྒྲོལ་མའི་ཐོད་པ་གསུམ་དང་ནུབ་ཏུ་གཏོར་མའི་ཐོད་པ་གསུམ་དང་ལྷོར་བཏུང་བའི་ཐོད་པ་གསུམ་མོ། །དབང་ལྡན་དུ་བསྙེམས་པའི་ལག་པ་དང་དྲིའི་སྣོད་དོ། །མེར་པི་ཝང་དང་མེ་ཏོག་གི་ཟ་མ་ཏོག་གོ །བདེན་བྲལ་བྲལ་དུ་སྡིགས་མཛུབ་ཀྱི་ལག་པ་དང་སྤོས་ཀྱི་སྣོད་དོ། །རླུང་དུ་ཐལ་མོ་དང་མར་མེའོ། །དེ་ནས་རྡོ་རྗེ་ཕྲེང་བའི་ཕྱི་རོལ་དུ་ཤར་ལ་སོགས་པའི་སྣམ་བུ་རྣམས་ལ་སོ་སོར་བཞི་བཞི་དང་སྒོ་དང་མཚམས་རྣམས་སུ་བརྒྱད་དེ་ཁ་ཊྭཱཾ་ག་ཉི་ཤུ་རྩ་བཞིའོ། །བདུད་རྩིའི་ཐོད་པ་ལ་སོགས་པ་རྣམས་ནི་མཚོ་སྐྱེས་དང་ཉི་མ་ལ་གནས་པའོ། །གཤིན་རྗེ་བཤེད་ཀྱི་དཀྱིལ་འཁོར་ལ་སྣ་ཚོགས་རྡོ་རྗེའི་ལྟེ་བའི་དབུས་སུ་བཅོམ་ལྡན་འདས་གཤིན་རྗེ་གཤེད་ཀྱི་རྡོ་རྗེ་སྔོན་པོ་རྩེ་ལྔ་པ་ཁ་གྱེས་པའོ། །ཤར་དང་ལྷོ་ལ་སོགས་པའི་རའི་རྩ་བ་རྣམས་སུ་རྟག་པ་དང་རིན་ཆེན་དབང་པོ་དང་སྣང་བ་མཐའ་ལས་དང་དོན་ཡོད་གྲུབ་པ་རྣམས་ཀྱི་འཁོར་ལོ་དཀར་པོ་རྩིབས་བརྒྱད་པ་དང་རིན་པོ་ཆེ་ཆ་དགུ་པ་དང་པདྨ་དམར་པོ་འདབ་མ་བརྒྱད་པ་དང་རལ་གྲི་ལྗང་གུ་རྣམས་སོ། །སྣ་ཚོགས་རྡོ་རྗེའི་མེ་དང་བདེན་བྲལ་ལ་སོགས་པའི་ཟུར་རྣམས་སུ་རྡོ་རྗེ་ཙ་རྩི་ཀ་དང་རྡོ་རྗེ་ཕག་མོ་དང་དབྱངས་ཅན་མ་དང་གཽ་རཱི་རྣམས་ཀྱི་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །དེ་ནས་རྡོ་རྗེའི་ཕྲེང་བ་སྟེ་དེ་ནས་སྣ་ཚོགས་རྡོ་རྗེའི་ཕྱོགས་སོ་སོར་ར་ལྔའོ། །ཤར་དང་ལྷོ་ལ་སོགས་པའི་སྒོ་རྣམས་སུ་ཐོ་བ་གཤིན་རྗེ་གཤེད་དང་དབྱུག་པ་གཤིན་རྗེ་གཤེད་དང་པདྨ་གཤིན་རྗེ་གཤེད་དང་རལ་གྲི་གཤིན་རྗེ་གཤེད་རྣམས་ཀྱི་རྡོ་རྗེ་རྩེ་མོ་ཉི་ཤུས་མཚན་པའི་ཐོ་བ་དང་དབྱུག་པ་དཀར་པོ་དང་པདྨ་དང་རལ་གྲིའོ། །འདིར་རྟག་པ་དང་ལྷ་མོ་རྣམས་ཀྱི་མཚན་མ་ནི་ཟླ་བ་ལ་གནས་པ་སྟེ་གཞན་རྣམས་ནི་ཉི་མ་ལ་གནས་པའོ། །ཉི་མ་དང་ཟླ་བ་རྣམས་ཀྱི་འོག་ཏུ་སྣ་ཚོགས་པདྨའོ། །དཀྱིལ་འཁོར་གྱི་མཚམས་རྣམས་སུ་པདྨ་ལ་གནས་པའི་ཐོད་པ་བཞི་སྟེ་ངོས་
གཞན་དུ་ནི་བུམ་པ་རྣམས་སོ། །རྡོ་རྗེ་སྒྲོལ་མའི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་རྡོ་རྗེ་རྩེ་དགུ་པ་གསེར་གྱི་མདོག་ཅན་ནོ། །ཤར་དང་ལྷོ་ལ་སོགས་པའི་འདབ་མར་ཟླ་བ་རྣམས་ལ་མེ་ཏོག་སྒྲོལ་མ་དང་བདུག་སྤོས་སྒྲོལ་མ་དང་སྣང་གསལ་སྒྲོལ་མ་དང་དྲིའི་སྒྲོལ་མ་རྣམས་ཀྱི་མེ་ཏོག་གི་ཕྲེང་བ་དང་སྤོས་ཕོར་དང་སྣང་གསལ་གྱི་ཀོང་བུ་དང་དྲིའི་སྣོད་རྣམས་སོ། །མེ་ལ་སོགས་པའི་འདབ་མ་རྣམས་སུ་རྟག་པ་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམ་པར་དག་པའི་འཁོར་ལོ་དང་རྡོ་རྗེ་དང་པདྨ་དང་རལ་གྲི་རྣམས་སོ། །ཤར་དང་ལྷོ་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང་རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མ་རྣམས་ཀྱི་ལྕགས་ཀྱུ་ལ་སོགས་པ་སྔ་མ་བཞིན་ཏེ་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །རྡོ་རྗེ་ལྕགས་ཀྱུ་མའི་ཕྱི་ངོས་སུ་གཏུག་ཏོར་མའི་འཁོར་ལོ་ནི་སྣ་ཚོགས་པདྨ་དང་ཉི་མ་ལ་གནས་པ་སྟེ། །རྡོ་རྗེ་ལྕགས་སྒྲོག་མའི་ཕྱི་ངོས་སུ་སྣ་ཚོགས་ཆུ་སྐྱེས་དང་ཉི་མ་ལ་གནོད་མཛེས་མའི་སྤྲུལ་ཞགས་ནི་སྣ་ཚོགས་ཆུ་སྐྱེས་དང་ཉི་མ་ལའོ། །མེ་ལ་སོགས་པའི་ཟུར་རྣམས་སུ་ཆུ་སྐྱེས་ལ་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མའི་རྣམ་པར་དག་པའི་བྱང་སེམས་ཀྱི་བུམ་པ་དང་རི་རབ་དང་མེ་ཐབ་དང་རྒྱལ་མཚན་ཆེན་མོའོ། །པདྨའི་ཕྱི་རོལ་དུ་བུམ་པ་རྣམས་སོ། །འོད་ཟེར་ཅན་གྱི་དཀྱིལ་འཁོར་ལ་དབུས་སུ་སྣ་ཚོགས་པདྨར་ཟླ་བ་འམ་ཉི་མ་ལ་མདའ་སྟེ་མཚན་མོ་ཟླ་བ་ལ་གནས་ཤིང་ཉིན་པར་ཉི་མ་ལ་གནས་པས་ལྷ་མོ་རྣམ་པར་རྒྱུ་བའི་ཕྱིར། ཤར་དང་ལྷོ་ལ་སོགས་པའི་ཕྱོགས་རྣམས་སུ་ཨརྒ་མ་སི་དང་མརྒ་མ་སི་དང་ཨནྡྷརྡྷཱ་མ་སི་དང་ཏེ་ཛོ་མ་སིའི་ལྷ་མོ་རྣམས་ཀྱི་རིམ་པ་ཇི་ལྟ་བ་བཞིན་དུ་ཁབ་དང་སྐུད་པ་དང་བཅས་པའི་ཁབ་དང་མྱ་ངན་མེད་པའི་ཤིང་གི་ཡལ་ག་དང་མདའ་རྣམས་སོ། །མེ་དང་སྲིན་པོ་ལ་སོགས་པའི་མཚམས་རྣམས་སུ་ཨུ་ད་ཡ་མ་སི་དང་གུ་ལ་མ་སི་དང་ན་བ་མ་སི་དང་ཙི་བ་ར་མ་སི་རྣམས་ཀྱི་གོ་རིམས་བཞིན་དུ་ཨརྒ་མ་སི་ལ་སོགས་པའི་མཚན་མ་བཞིན་ནོ། །ཕྱིའི་ཕོ་བྲང་སི་སྣམ་བུའི་ཤར་དུ་མ་ཧཱ་ཙི་ཝ་ར་མ་སི་དང་བ་རཱ་ཧཱ་མུ་ཁའི་ལྷ་མོ་དག་གི་རྡོ་རྗེ་དང་ལྕགས་ཀྱུ་དག་གོ །ལྷོར་པ་དཱ་ཀྲ་མ་སི་དང་ཝ་ར་ལིའི་ལྷ་མོ་དག་གི་མྱ་ངན་མེད་པའི་
འདབ་མ་དག་གོ །ནུབ་ཏུ་བ་ར་ཀྲ་མ་སི་དང་བ་ད་ལའི་ལྷ་མོ་དག་གི་མདའ་དག་གོ །བྱང་དུ་ཨུརྨ་སི་དང་བ་ར་ལིའི་ལྷ་མོ་དག་གི་ཁབ་དག་གོ །མེ་ལ་སོགས་པའི་ཟུར་རྣམས་སུ་བཏྟཱ་ལི་དན་བ་དཱ་ལི་དང་བ་རཱ་ལི་དག་བ་རཱ་ཧཱ་མུ་ཁི་རྣམས་ཀྱི་ཁབ་དང་སྐུད་པ་དང་བཅས་པའི་ཁབ་དང་མྱ་ངན་མེད་པའི་ལོ་མ་དང་མདའ་རྣམས་སོ། །ཤར་སྒོར་ཨཱ་ལོའི་ལྷ་མོའི་ལྕགས་ཀྱུ་དང༌། ལྷོ་སྒོར་ཏཱ་ལོའི་ལྷ་མོའི་རྡོ་རྗེ་ཞགས་པ་དང༌། ནུབ་ཏུ་ཀཱ་ལོའི་ལྷ་མོའི་རྡོ་རྗེ་ལྕགས་སྒྲོག་དང༌། བྱང་དུ་སད་ས་ལོའི་ས་མ་མུརྟ་རིའི་ལྷ་མོའི་རྡོ་རྗེ་དྲིལ་བུའོ། །འདིར་སྒོ་སྐྱོང་མ་རྣམས་ཀྱི་མཚན་མ་ནི་པདྨ་དང་ཉི་མ་ལ་སྟེ་གཞན་རྣམས་ནི་པདྨ་དང་ཟླ་བ་ལའོ། །སྲུང་བ་ལྔའི་དཀྱིལ་འཁོར་ལ་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བར་ཟླ་བ་ལ་སོ་སོར་འབྲང་མ་ཆེན་མོའི་རིན་པོ་ཆེའི་ཆུན་པོའོ། །ཤར་དུ་སྣ་ཚོགས་ཆུ་སྐྱེས་དང་ཟླ་བ་ལ་སྟོང་ཆེན་མོ་རབ་ཏུ་འཇོམས་མའི་འཁོར་ལོའོ། །ལྷོར་སྣ་ཚོགས་ཆུ་སྐྱེས་དང་ཉི་མ་ལ་གསང་སྔགས་རྗེས་སུ་འཛིན་མའི་རྡོ་རྗེའོ། །ནུབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་བསིལ་བའི་ཚལ་ཆེན་མོའི་པདྨའོ། །བྱང་དུ་སྣ་ཚོགས་ཆུ་སྐྱེས་དང་ཟླ་བ་ལ་རྨ་བྱ་ཆེན་མོའི་རྨ་བྱའི་མཇུག་སྒྲོའོ། །རིམ་པ་གཉིས་པར་མེ་ལ་སོགས་པའི་མཚམས་སུ་ནག་མོ་དང་དུས་མ་དང་ནག་མོའི་རྣ་བ་མོ་དང་དཀར་མོ་རྣམས་ཀྱི་དུང་དང་རྡོ་རྗེས་མཚན་པའི་རྒྱལ་མཚན་དང་དགྲ་སྟ་དང་རྩེ་གསུམ་རྣམས་སོ། །སྣམ་བུ་རྣམས་ལ་བུམ་པའོ། །ཤར་ལ་སོགས་པའི་སྒོ་རྣམས་སུ་སྣ་ཚོགས་ཆུ་སྐྱེས་དང་ཉི་མ་རྣམས་ལ་རྡོ་རྗེ་ལྕགས་ཀྱུ་ལ་སོགས་པའི་རྡོ་རྗེ་ལྕགས་ཀྱུ་ལ་སོགས་པ་བཞིའོ། །རྡོ་རྗེ་དབྱིངས་ཀྱི་དཀྱིལ་འཁོར་ལ་སྣ་ཚོགས་པདྨའི་ལྟེ་བར་ཟླ་བ་ལ་བཅོམ་ལྡན་འདས་རྡོ་རྗེ་དབྱིངས་ཀྱི་རྡོ་རྗེ་རྩེ་ལྔ་པ་དཀར་བོའོ། །ལྟེ་བའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་གོ་རིམས་ཇི་ལྟ་བ་བཞིན་དུ་གཡས་སྐོར་གྱིས་སེམས་མ་རྡོ་རྗེ་མ་དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང་ལས་ཀྱི་རྡོ་རྗེ་མ་རྣམས་ཀྱི་རྡོ་རྗེ་རྩེ་ལྔ་པ་དམར་པོ་དང་རྡོ་རྗེ་རྩེ་ལྔ་པའི་རྩེ་མོ་ཅན་གྱི་རིན་པོ་ཆེ་དང་རྡོ་རྗེ་རྩེ་ལྔ་པས་མཚན་པའི་ཆུ་སྐྱེས་འདབ་བརྒྱད་དཀར་ཞིང་དམར་བ་དང་དེ་བཞིན་གཤེགས་པ་ལྔའི་ཁ་དོག་ཅན་གྱི་སྣ་ཚོགས་རྡོ་རྗེའོ། །ཤར་ལ་སོགས་པའི་པདྨའི་ལྟེ་བར་ཟླ་བའི་དཀྱིལ་འཁོར་
རྣམས་ལ་རིམ་པ་ཇི་ལྟ་བ་བཞིན་དུ་མི་བསྐྱོད་པ་དང་རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་རྣམས་ཀྱི་རྡོ་རྗེ་རྩེ་ལྔ་པ་སྔོན་པོ་དང་རྡོ་རྗེ་རིན་པོ་ཆེ་དང་རྡོ་རྗེ་པདྨ་དང་སྣ་ཚོགས་རྡོ་རྗེ་རྣམས་སོ། །མི་བསྐྱོད་པའི་པདྨའི་ཤར་ལ་སོགས་པའི་ཕྱོགས་ཀྱི་འདབ་མར་ཟླ་བ་རྣམས་ལ་རྡོ་རྗེ་སེམས་དཔའ་དང་རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱི་རིམ་པ་ཇི་ལྟ་བ་བཞིན་དུ་རྡོ་རྗེ་རྩེ་ལྔ་པ་དང་རྡོ་རྗེ་ལྕགས་ཀྱུ་དང་མདའ་དང་རྡོ་རྗེའོ། །རིན་ཆེན་འབྱུང་ལྡན་གྱི་ཆུ་སྐྱེས་ལ་རྡོ་རྗེ་རིན་པོ་ཆེ་དང་རྡོ་རྗེ་གཟི་བརྗིད་དང་རྡོ་རྗེ་རྒྱལ་མཚན་དང་རྡོ་རྗེ་བཞད་པ་རྣམས་ཀྱི་རྡོ་རྗེ་རྩེ་ལྔ་པ་སྔོན་པོ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་དང་ཉི་མ་དང་ཡིད་བཞིན་གྱི་ནོར་བུའི་རྒྱལ་མཚན་དང་སོའི་ཕྲེང་བ་དང་ལྡན་པའི་རྡོ་རྗེའོ། །འོད་དཔག་མེད་ཀྱི་ཆུ་སྐྱེས་ཀྱི་འདབ་མར་རྡོ་རྗེ་ཆོས་དང་རྡོ་རྗེ་ཆེན་པོ་དང་རྡོ་རྗེ་རྒྱུ་དང་རྡོ་རྗེ་སྨྲ་བ་རྣམས་ཀྱི་པདྨ་དམར་པོ་དང་རལ་གྲི་དང་འཁོར་ལོ་རྩིབས་བརྒྱད་པ་དང་རྡོ་རྗེ་རྩེ་གཅིག་པས་མཚན་པའི་ལྕེའོ། །དོན་ཡོད་པའི་ཆུ་སྐྱེས་ལ་རྡོ་རྗེ་ལས་དང་རྡོ་རྗེ་སྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱི་སྣ་ཚོགས་རྡོ་རྗེ་དང་རྡོ་རྗེའི་གོ་ཆ་དང་རྡོ་རྗེས་མཚན་པའི་མཆེ་བ་དང་རྡོ་རྗེ་རྩེ་ལྔ་པའོ། །མི་བསྐྱོད་པ་ལ་སོགས་པ་སོ་སོའི་བྱང་ཆུབ་སེམས་དཔའ་གསུམ་པའི་མཚན་མ་ནི་བྱང་གི་འདབ་མ་དང་བཞི་པའི་མཚན་མ་ནི་ནུབ་ཀྱི་འདབ་མར་བྲི་བར་བྱའོ། །མེ་ལ་སོགས་པའི་པདྨའི་ལྟེ་བར་ཟླ་བ་རྣམས་ལ་རྡོ་རྗེ་སྒེག་མོ་དང་རྡོ་རྗེ་ཕྲེང་བ་མ་དང་རྡོ་རྗེ་གླུ་མ་དང་རྡོ་རྗེ་གར་མ་རྣམས་ཀྱི་རྡོ་རྗེ་དང་རིན་པོ་ཆེའི་ཕྲེང་བ་དང་པི་ཝང་དང་རྡོ་རྗེའོ། །སྙིང་པོའི་གཞལ་ཡས་ཁང་ལས་ཕྱི་རོལ་གྱི་སྣམ་བུ་རྣམས་ལ་ཤར་དུ་བྱམས་པ་དང་མཐོང་བ་དོན་ཡོད་དང་ངན་སོང་ཀུན་འདྲེན་དང་མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་རྣམས་ཀྱི་པདྨ་དང་ཟླ་བ་ལ་རྡོ་རྗེ་རྩེ་ལྔ་པ་རྣམས་སོ། །ལྷོར་སྤོས་ཀྱི་གླང་པོ་དང་དཔའ་བར་འགྲོ་བ་དང་ནམ་མཁའི་མཛོད་དང་ཡེ་ཤེས་ཏོག་རྣམས་ཀྱི་ཆུ་སྐྱེས་དང་ཟླ་བ་ལ་རྡོ་རྗེ་རིན་པོ་ཆེ་རྣམས་སོ། །ནུབ་ཏུ་འོད་དཔག་མེད་དང་ཟླ་འོད་དང་བཟང་སྐྱོང་དང་དྲ་བ་ཅན་གྱི་འོད་རྣམས་ཀྱི་ཆུ་སྐྱེས་དང་ཟླ་བ་ལ་རྡོ་རྗེ་པདྨ་རྣམས་སོ། །བྱང་དུ་རྡོ་རྗེ་སྙིང་པོ་དང་བློ་གྲོས་མི་ཟད་པ་དང་སྤོབས་པ་བརྩེགས་པ་དང་ཀུན་དུ་བཟང་པོ་རྣམས་
ཀྱི་ཆུ་སྐྱེས་དང་ཟླ་བ་ལ་སྣ་ཚོགས་ཆུ་སྐྱེས་རྣམས་སོ། །ཕྱིའི་དཀྱིལ་འཁོར་གྱི་མེ་ལ་སོགས་པའི་ཟུར་རྣམས་སུ་ཆུ་སྐྱེས་དང་ཟླ་བ་ལ་རྡོ་རྗེ་བདུག་སྤོས་མ་དང་རྡོ་རྗེ་མེ་ཏོག་མ་དང་རྡོ་རྗེ་མར་མེ་མ་དང་རྡོ་རྗེ་དྲི་ཆབ་མ་རྣམས་ཀྱི་མཚན་མ་ནི་སྔ་མ་བཞིན་ནོ། །ཤར་ལ་སོགས་པའི་སྒོ་རྣམས་སུ་པདྨ་དང་ཟླ་བ་ལ་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་ཀྱི་མཚན་མའོ། །སྣམ་བུ་ལ་ནི་བུམ་པ་རྣམས་སོ། །བཞི་བཅུ་རྩ་གསུམ་གྱི་བདག་ཉིད་ཅན་འཇམ་པའི་རྡོ་རྗེའི་དཀྱིལ་འཁོར་ལ་ཕྱིའི་དཀྱིལ་འཁོར་གྱི་རྩིག་པ་ལྔ་ནི་སྔོན་པོ་དང་དམར་པོ་དང་དཀར་པོ་དང་ལྗང་གུ་དང་སེར་པོ་སྟེ་ཤར་ལ་སོགས་པའི་ཕྱོགས་རྣམས་དང་དབུས་ཀྱི་ས་གཞི་ཐམས་ཅད་ཀྱང་ངོ༌། །དཀྱིལ་འཁོར་གཉིས་པ་ལ་སྔོན་པོ་དང་དཀར་པོ་དང་སེར་པོའི་རྩིག་པ་གསུམ་སྟེ། འཁོར་ལོ་གསུམ་ལ་ནི་དཀར་པོའི་རྩིག་པ་གཅིག་གོ །དེ་ལ་དབུས་ཀྱི་ས་གཞི་སེར་པོར་སྣ་ཚོགས་པདྨ་དང་ཟླ་བ་ལ་འཇམ་དཔལ་གྱི་རལ་གྲི་ཡུ་བ་སེར་པོ་ཅན་ནོ། །ཤར་ལ་སོགས་པའི་རེའུ་མིག་ཏུ་ཉི་མ་རྣམས་ལ་མི་བསྐྱོད་པ་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱི་རྡོ་རྗེ་སྔོན་པོ་དང་རིན་པོ་ཆེ་དང་པདྨ་དཀར་པོ་དང་རལ་གྲིའོ། །དབང་ལྡན་ལ་སོགས་པའི་རེའུ་མིག་ཏུ་ཟླ་བ་རྣམས་ལ་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ཀྱི་རྡོ་རྗེ་སེར་པོ་དང་རྡོ་རྗེ་སྔོན་པོ་དང་རྡོ་རྗེ་དཀར་པོ་དང་རྡོ་རྗེ་ལྗང་གུའོ། །རིམ་པ་གཉིས་པའི་དཀྱིལ་འཁོར་ལ་ཤར་ལ་སོགས་པའི་ཕྱོགས་སུ་ཟླ་བ་རྣམས་ལ་སེམས་མ་རྡོ་རྗེ་མ་དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང་ལས་ཀྱི་རྡོ་རྗེ་མ་རྣམས་ཀྱི་མཚན་མ་ནི་མི་བསྐྱོད་པ་ལ་སོགས་པའི་བཞིན་ནོ། །དབང་ལྡན་ལ་སོགས་པའི་མཚམས་སུ་ཟླ་བ་རྣམས་ལ་བྱམས་པ་དང་འཇམ་དཔལ་དང་སྤོས་ཀྱི་གླང་པོ་དང་ཡེ་ཤེས་ཏོག་རྣམས་ཀྱི་མེ་ཏོག་དང་བཅས་པའི་ཀླུ་ཤིང་གི་ཡལ་ག་དང་རལ་གྲི་དང་བུམ་པ་ལ་གནས་པའི་ལག་ལྡན་དང་ཡིད་བཞིན་གྱི་ནོར་བུ་སེར་པོའོ། །ལྷོར་ཟླ་བ་རྣམས་ལ་བཟང་སྐྱོང་དང་བློ་གྲོས་རྒྱ་མཚོ་དང་བློ་གྲོས་མི་ཟད་པ་དང་སྤོབས་པ་བརྩེགས་པ་རྣམས་ཀྱི་མདའ་དམར་པོ་དང་དཀར་པོ་དང་སེར་པོ་དང་ལྗང་གུའོ། །ནུབ་ཏུ་ཟླ་བ་རྣམས་ལ་མཐུ་ཆེན་ཐོབ་དང་ངན་
སོང་ཀུན་འདྲེན་དང་མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་དང་དྲ་བ་ཅན་གྱི་འོད་རྣམས་ཀྱི་པདྨ་དཀར་པོ་དང་མདའ་དཀར་པོ་དང་མདའ་སེར་པོ་དང་ཨུཏྤལ་ལ་གནས་པའི་ཉི་མའོ། །བྱང་དུ་ཟླ་བ་རྣམས་ལ་ཟླ་འོད་དང་འོད་དཔག་མེད་དང་ནམ་མཁའི་མཛོད་དང་སྒྲིབ་པ་ཐམས་ཅད་རྣམ་པར་སེལ་བ་རྣམས་ཀྱི་ཨུཏྤལ་ལ་གནས་པའི་ཟླ་བ་ལ་བུམ་པ་དམར་པོ་དང་མདའ་སེར་པོ་དང་མདའ་སྔོན་པོའོ། །འདིར་གོ་རིམས་ཇི་ལྟ་བ་བཞིན་དུ་ཤར་ལ་སོགས་པའི་སྒོ་རྣམས་ཀྱི་ངོས་གཉིས་ཀྱི་སྣམ་བུ་རྣམས་ལ་མཚན་མ་གཉིས་གཉིས་སོ། །ཤར་ལ་སོགས་པའི་སྒོར་ཉི་མ་རྣམས་ལ་གཤིན་རྗེ་མཐར་བྱེད་དང་གཞན་གྱིས་མི་ཐུབ་པ་དང་རྟ་མགྲིན་དང་བདུད་རྩི་འཁྱིལ་པ་རྣམས་ཀྱི་རལ་གྲི་ཡུ་བ་ནག་པོ་ཅན་དང་རྡོ་རྗེ་སེར་པོ་དང་རྡོ་རྗེ་དབྱུག་པ་དམར་པོ་དང་རལ་གྲི་ཡུ་བ་ནག་པོ་ཅན་ནོ། །དབང་ལྡན་ལ་སོགས་པའི་མཚམས་སུ་ཉི་མ་རྣམས་ལ་མི་གཡོ་བ་དང་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་རྣམས་ཀྱི་རལ་གྲི་དང་རྡོ་རྗེ་སྔོན་པོ་དང་རྡོ་རྗེའི་དབྱུག་པ་སྔོན་པོའོ། །གཤིན་རྗེ་གཤེད་ཀྱི་མཚན་མའི་ཕྱི་ངོས་སུ་ཉི་མ་ལ་གནོད་མཛེས་ཀྱི་རལ་གྲི་སྟེ། རྟ་མགྲིན་གྱི་མཚན་མའི་ཕྱིར་ངོས་སུ་ཉི་མ་ལ་རྡོ་རྗེས་འོག་གི་རྡོ་རྗེ་ལྕགས་ཀྱུའོ། །ཟླ་བ་དང་ཉི་མ་ཐམས་ཅད་ཀྱི་འོག་ཏུ་སྣ་ཚོགས་འདམ་སྐྱེས་ཏེ་སྣམ་བུ་རྣམས་ལ་ནི་བུམ་པའོ། །ཁ་ཅིག་ཏུ་ནི་གཤིན་རྗེ་གཤེད་ཀྱི་མཚན་མའི་ཕྱི་ངོས་སུ་ཉི་མ་ལ་གཙུག་ཏོར་འཁོར་ལོས་སྒྱུར་བའི་འཁོར་ལོ་དང༌། དེའི་ཕྱི་ངོས་སུ་གནོད་མཛེས་ཀྱི་རལ་གྲིའོ་ཞེས་གསུངས་སོ། །ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་ལ་ནང་གི་འཁོར་ལོ་རྡུལ་ཚོན་དཀར་པོས་དགང་བར་བྱ་སྟེ། གཞན་རྣམས་ནི་སྔ་མ་བཞིན་ནོ། །ནང་གི་དཀྱིལ་འཁོར་གྱི་དབུས་སུ་སྣ་ཚོགས་པདྨའི་ལྟེ་བར་ཟླ་བ་ལ་འཇམ་པའི་དབྱངས་ཀྱི་རལ་གྲི་ཡུ་བ་སེར་པོ་ཅན་ནོ། །ཤར་ལ་སོགས་པ་དང་དབང་ལྡན་ལ་སོགས་པའི་འདབ་མར་ཟླ་བ་རྣམས་ལ་རིམ་པ་ཇི་ལྟ་བ་བཞིན་དུ་གཡས་སྐོར་གྱིས་གཙུག་ཏོར་ཆེན་པོ་དང་གདུགས་དཀར་པོ་དང་གཟི་བརྗིད་ཕུང་པོ་དང་རྣམ་པར་རྒྱལ་བའི་གཙུག་ཏོར་དང་འོད་ཟེར་རྣམ་པར་འཕྲོ་བ་དང་འཕགས་པ་དང་ཆེར་འཕགས་དང་རྒྱལ་བ་རྣམས་ཀྱི་འཁོར་ལོ་སེར་པོ་རྣམས་སོ། །ཤར་
གྱི་རེའུ་མིག་གི་དབུས་སུ་སྣ་ཚོགས་ཆུ་སྐྱེས་དང་ཉི་མ་ལ་མི་བསྐྱོད་པའི་རྡོ་རྗེ་སྔོན་པོ་སྟེ་དབང་ལྡན་ལ་སོགས་པའི་མཚམས་སུ་སྣ་ཚོགས་པདྨ་དང་ཟླ་བ་རྣམས་ལ་རྡོ་རྗེ་སེམས་དཔའ་དང་རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱི་རྡོ་རྗེ་དང་རྡོ་རྗེ་ལྕགས་ཀྱུ་དང་མདའ་དང་རྡོ་རྗེའོ། །ལྷོའི་རེའུ་མིག་གི་དབུས་སུ་སྣ་ཚོགས་ཆུ་སྐྱེས་དང་ཉི་མ་ལ་རིན་འབྱུང་ལྡན་གྱི་ཡིད་བཞིན་གྱི་ནོར་བུ་སེར་པོ་འམ་རྒྱལ་མཚན་ཏེ། དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་རྡོ་རྗེ་རིན་ཆེན་དང་རྡོ་རྗེ་ཉི་མ་དང་རྡོ་རྗེ་རྒྱལ་མཚན་དང་རྡོ་རྗེ་བཞད་པ་རྣམས་ཀྱི་རྡོ་རྗེ་རྩེ་ལྔ་པ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་དང་ཉི་མའི་དཀྱིལ་འཁོར་དང་ཡིད་བཞིན་ཡི་ནོར་བུའི་རྒྱལ་མཚན་དང་སོའི་ཕྲེང་བ་དང་ལྡན་པའི་རྡོ་རྗེའོ། །ནུབ་ཀྱི་རེའུ་མིག་གི་དབུས་སུ་སྣ་ཚོགས་ཆུ་སྐྱེས་དང་ཉི་མ་ལ་སྣང་བ་མཐའ་ཡས་ཀྱི་པདྨ་དམར་པོ་སྟེ་དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་རྡོ་རྗེ་ཆོས་དང་རྡོ་རྗེ་རྣོན་པོ་དང་རྡོ་རྗེ་རྒྱུ་དང་རྡོ་རྗེ་སྨྲ་བ་རྣམས་ཀྱི་པདྨ་དང་རལ་གྲི་དང་ཆོས་ཀྱི་འཁོར་ལོ་དང་རྡོ་རྗེ་རྩེ་གཅིག་པས་མཚན་པའི་ལྕེའོ། །བྱང་གི་རེའུ་མིག་གི་དབུས་སུ་སྣ་ཚོགས་ཆུ་སྐྱེས་དང་ཉི་མ་ལ་དོན་ཡོད་གྲུབ་པའི་རལ་གྲི་སྟེ་དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་རྡོ་རྗེ་ལས་དང་རྡོ་རྗེ་སྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱི་རྡོ་རྗེ་གསུམ་དང་རྡོ་རྗེ་གོ་ཆ་དང་རྡོ་རྗེས་མཚན་པའི་མཆེ་བ་དང་རྡོ་རྗེ་རྩེ་ལྔ་པའོ། །དབང་ལྡན་ལ་སོགས་པའི་མཚམས་ཀྱི་རེའུ་མིག་རྣམས་སུ་ཆུ་སྐྱེས་དང་ཟླ་བ་རྣམས་ལ་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ཀྱི་མཚན་མ་རྣམས་ནི་འཇམ་དབྱངས་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པའི་མཚན་མ་བཞིན་ནོ། །ཤར་ལ་སོགས་པའི་སྒོ་རྣམས་སུ་སྣ་ཚོགས་ཆུ་སྐྱེས་དང་ཉི་མ་རྣམས་ལ་རྡོ་རྗེ་ལྕགས་ཀྱུ་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་འབེབས་པ་རྣམས་ཀྱི་རྡོ་རྗེའི་ལྕགས་ཀྱུ་ལ་སོགས་པའོ། །སྙིང་པོའི་དཀྱིལ་འཁོར་འདི་ལས་དཀྱིལ་འཁོར་གཉིས་པར་ཤར་དུ་སྣ་ཚོགས་པདྨ་དང་ཟ་བ་རྣམས་ལས་བཅུ་གཉིས་པོ་མོས་པས་སྤྱོད་པ་དང་རབ་ཏུ་དགའ་བ་དང་དྲི་མ་མེད་པ་དང་འོད་བྱེད་པ་དང་འོད་འཕྲོ་བ་དང་སྦྱང་དཀའ་བ་དང་མངོན་དུ་
གྱུར་པ་དང་རིང་དུ་སོང་བ་དང་མི་གཡོ་བ་དང་ལེགས་པའི་བློ་གྲོས་དང་ཆོས་ཀྱི་སྤྲིན་དང་ཀུན་དུ་འོད་རྣམས་ཀྱི་རིམ་པ་ཇི་ལྟ་བ་བཞིན་དུ་གཡས་སྐོར་གྱིས་པདྨ་དམར་པོ་ངང་ཡིད་བཞིན་གྱི་ནོར་བུ་དང་པདྨ་དཀར་པོ་དང་སྣ་ཚོགས་ཆུ་སྐྱེས་ལ་གནས་པའི་ཉི་མ་དང་ཨུཏྤལ་དང་ནོར་བུ་མ་ར་ཀ་ཏ་དང་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང་སྣ་ཚོགས་ཆུ་སྐྱེས་ཀྱི་སྟེང་དུ་སྣ་ཚོགས་རྡོ་རྗེ་དང་ཡུ་བ་དང་བཅས་པའི་པདྨ་དང་ཟླ་བ་ལ་གནས་པའི་རྡོ་རྗེ་རྩེ་ལྔ་པ་དམར་པོ་དང་ཨུཏྤལའི་སྟེང་དུ་རལ་གྲི་དང་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་པདྨ་ལ་བཞུགས་པའི་ཡང་དག་པར་རྫོགས་པའི་སངས་རྒྱས་ཀྱི་སྐུའོ། །ལྷོར་སྣ་ཚོགས་ཆུ་སྐྱེས་དང་ཟླ་བ་རྣམས་ལ་ཕ་རོལ་ཏུ་ཕྱིན་པ་བཅུ་གཉིས་པ་རིན་པོ་ཆེ་པདྨ་དང་སྦྱིན་པ་དང་ཚུལ་ཁྲིམས་དང་བཟོད་པ་དང་བརྩོན་འགྲུས་དང་བསམ་གཏན་དང་ཤེས་རབ་དང་ཐབས་དང་སྟོབས་དང་སྨོན་ལམ་དང་ཡེ་ཤེས་དང་རྡོ་རྗེ་ལས་ཀྱི་ཕ་རོལ་ཏུ་ཕྱིན་པ་རྣམས་ཀྱི་པདྨའི་སྟེང་དུ་ཟླ་བའི་དཀྱིལ་འཁོར་དང་འབྲུ་སྣ་ཚོགས་པའི་རིན་པོ་ཆེའི་སྙེ་མ་དང་ལོ་མ་དང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་དང་པདྨ་དཀར་པོ་དང་ཨུཏྤལ་སྔོན་པོ་དང་པདྨ་དཀར་པོ་དང་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་ཆུ་སྐྱེས་སེར་པོ་ལ་གནས་པའི་རྡོ་རྗེ་དང་ཨུཏྤལ་ལ་གནས་པའི་རལ་གྲི་དང་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང་རིན་པོ་ཆེ་སྣ་ཚོགས་པའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་དང་ཨུཏྤལ་ལ་གནས་པའི་སྣ་ཚོགས་རྡོ་རྗེའོ། །ནུབ་ཏུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་བཅུ་གཉིས་པོ་ཚེ་དང་སེམས་དང་ཡོ་བྱད་དང་ལས་དང་སྐྱེ་བ་དང་རྫུ་འཕྲུལ་དང་མོས་པ་དང་སྨོན་ལམ་དང་ཡེ་ཤེས་དང་ཆོས་དང་དེ་བཞིན་ཉིད་དང༌། སངས་རྒྱས་ཀྱི་བྱང་ཆུབ་ལ་དབང་བ་རྣམས་ཀྱི་ནོར་བུ་པདྨ་རཱ་ག་ལ་གནས་ཤིང་ཏིང་ངེ་འཛིན་གྱི་ཕྱག་རྒྱ་དང་ལྡན་པའི་སངས་རྒྱས་ཚེ་དཔག་ཏུ་མེད་པའི་སྐུ་གཟུགས་དང་རྡོ་རྗེ་དམར་པོ་རྩེ་ལྔ་པ་དང་ཡིད་བཞིན་གྱི་ནོར་བུའི་རྒྱལ་མཚན་དང་སྣ་ཚོགས་རྡོ་རྗེ་དང་སྣ་ཚོགས་པའི་མདོག་ཅན་གྱི་ཛཱ་ཏིའི་འཁྲི་ཤིང་དང་པདྨ་ལ་གནས་པའི་ཟླ་བའི་དཀྱིལ་འཁོར་དང་པྲི་ཡང་ཀུའི་མེ་ཏོག་གི་སྙེ་མ་དང་ཨུཏྤལ་སྔོན་པོ་དང་ཨུཏྤལ་ལ་གནས་པའི་རལ་གྲི་དང་པདྨ་ལ་གནས་པའི་བུམ་པ་
བཟང་པོ་དང་འདམ་སྐྱེས་དཀར་པོ་དང་ཆུ་སྐྱེས་སེར་པོ་ལ་གནས་པའི་རྡོ་རྗེ་རྩེ་ལྔ་པའོ། །བྱང་དུ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་གཟུགས་བཅུ་གཉིས་པོ་དབྱིག་གི་བློ་གྲོས་མ་དང་རིན་ཆེན་སྐར་མདའ་མ་དང་གཙུག་ཏོར་རྣམ་པར་རྒྱལ་མ་དང་འོད་ཟེར་ཅན་དང་རི་ཁྲོད་ལོ་མ་ཅན་དང་དུག་སེལ་མ་དང་སྒོ་མཐའ་ཡས་མ་དང༌། ཙུནད་དང་ཤེས་རབ་འཕེལ་མ་དང་ལས་ཀྱི་སྒྲིབ་པ་རྣམ་པར་སེལ་མ་དང་ཡེ་ཤེས་མི་ཟད་པའི་ཟ་མ་ཏོག་དང་སངས་རྒྱས་ཐམས་ཅད་ཀྱི་མཛོད་ལྡན་མ་རྣམས་ཀྱི་འབྲས་ཀྱི་སྙེ་མ་དང་ཡིད་བཞིན་གྱི་ནོར་བུའི་རྒྱལ་མཚན་དང་ནོར་བུ་ཟླ་བ་ཆུ་ཤེལ་གྱི་བུམ་པ་དང་སྐུད་པ་དང་བཅས་པའི་ཁབ་དང་རྨ་བྱའི་མཇུག་སྒྲོ་དང་དུག་གི་མེ་ཏོག་གི་ཆུན་པོ་དང་པདྨ་དམར་པོ་ལ་གནས་པའི་མི་ཟད་པའི་གཏེར་ཆེན་པོའི་བུམ་པ་དང་རིལ་བ་སྤྱི་བླུགས་ཕྲེང་བ་དཔྱངས་པ་དང་ཨུཏྤལ་སྔོན་པོ་ལ་གནས་པའི་རལ་གྲི་དང་རྡོ་རྗེ་རྩེ་གསུམ་པས་མཚན་པའི་པདྨ་དཀར་ཞིང་དམར་བ་དང་རིན་པོ་ཆེའི་ཟ་མ་ཏོག་དང་པདྨ་ལ་གནས་པའི་རིན་པོ་ཆེ་སྣ་ཚོགས་པའི་དཔེ་སྒྲོམ་མོ། །ཤར་ལ་སོགས་པའི་སྒོར་ཆུ་སྐྱེས་དང་ཉི་མ་རྣམས་ལ་ཆོས་སོ་སོ་ཡང་དག་པར་རིག་པ་དང་དོན་སོ་སོ་ཡང་དག་པར་རིག་པ་དང༌། ངེས་པའི་ཚིག་སོ་སོ་ཡང་དག་པར་རིག་པ་དང་སྤོབས་པ་སོ་སོ་ཡང་དག་པར་རིག་པ་རྣམས་ཀྱི་རྡོ་རྗེའི་ལྕགས་ཀྱུ་དང་རིན་པོ་ཆེའི་ཞགས་པ་དང་མཐའ་གཉིས་སུ་པདྨས་མཚན་པའི་ལྕགས་སྒྲོག་དང་རྡོ་རྗེ་རྩེ་གསུམ་པས་མཚན་པའི་དྲིལ་བུའོ། །མེ་ལ་སོགས་པའི་མཚམས་རྣམས་སུ་སྒེག་མོ་དང་ཕྲེང་བ་མ་དང་གླུ་མ་དང་གར་མ་རྣམས་ཀྱི་རྡོ་རྗེ་རིན་པོ་ཆེའི་ཕྲེང་བ་དང་པི་ཝང་དང་རྡོ་རྗེའོ། །དཀྱིལ་འཁོར་གསུམ་པར་ཤར་ཕྱོགས་སུ་པདྨ་དང་ཟླ་བ་རྣམས་ལ་ཀུན་དུ་བཟང་པོའི་ཨུཏྤལ་ལ་གནས་པའི་རལ་གྲི་དང་སའི་སྙིང་པོའི་པདྨ་ལ་གནས་པའི་དཔག་བསམ་གྱི་ཤིང་དང་ནམ་མཁའི་སྙིང་པོའི་རིན་པོ་ཆེའོ། །ལྷོར་ནམ་མཁའི་མཛོད་ཀྱི་ཡིད་བཞིན་གྱི་ནོར་བུ་དང་ཕྱག་ན་རིན་ཆེན་གྱི་རིན་པོ་ཆེ་དང་བློ་གྲོས་རྒྱ་མཚོའི་དུང་དང་རྡོ་རྗེ་སྙིང་པོའི་རྡོ་རྗེའོ། །ནུབ་ཏུ་སྤྱན་རས་གཟིགས་དབང་ཕྱུག་གི་པདྨ་དང་མཐུ་ཆེན་ཐོབ་ཀྱི་རལ་གྲི་དང་ཟླ་བའི་འོད་ཀྱི་རྡོ་རྗེ་དང་བཅས་པའི་འཁོར་ལོ་དང་དྲ་བ་ཅན་གྱི་རལ་གྲིའོ། །བྱང་དུ་པདྨ་དང་ཟླ་བ་རྣམས་ལ་འོད་དཔག་མེད་དང་སྤོབས་པ་བརྩེགས་པ་དང་མྱ་ངན་དང་མུན་པ་ཐམས་ཅད་ངེས་
པར་འཇོམས་པའི་བློ་གྲོས་དང་སྒྲིབ་པ་ཐམས་ཅད་རྣམ་པར་སེལ་བ་རྣམས་ཀྱི་སྣ་ཚོགས་པདྨ་དང་པདྨ་ལ་གནས་པའི་རལ་གྲི་དང་རྡོ་རྗེ་རྩེ་ལྔ་པ་དང་རལ་གྲིའོ། །ཤར་ལ་སོགས་པའི་སྒོར་ཆུ་སྐྱེས་དང་ཉི་མ་རྣམས་ལ་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བགེགས་མཐར་བྱེད་རྣམས་ཀྱི་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་རྣམས་སོ། །དབང་ལྡན་ལ་སོགས་པའི་མཚམས་སུ་སྣ་ཚོགས་ཆུ་སྐྱེས་དང་ཉི་མ་རྣམས་ལ་འཇིག་རྟེན་གསུམ་ལས་རྣམ་པར་རྒྱལ་བ་དང་རྡོ་རྗེ་ཉི་མ་མེ་ལྟར་འབར་བ་དང་ཧེ་རུ་ཀ་རྡོ་རྗེ་དང་རྟ་མཆོག་རྣམས་ཀྱི་རལ་གྲི་དང་རྡོ་རྗེ་དང་སྣ་ཚོགས་རྡོ་རྗེའོ། །གཤིན་རྗེ་མཐར་བྱེད་ཀྱི་མཚན་མའི་ཕྱི་རོལ་དུ་གཙུག་ཏོར་འཁོར་ལོ་ཅན་གྱི་འཁོར་ལོ་སེར་པོ་སྟེ་པདྨ་མཐར་བྱེད་ཀྱི་མཚན་མའི་ཕྱི་རོལ་དུ་གནོད་མཛེས་ཀྱི་རྡོ་རྗེའོ། །འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་མཚན་མ་བཞིའི་ཕྱི་ངོས་དཀྱིལ་འཁོར་གསུམ་པ་ཁོ་ནའི་ཟུར་གྱི་ནང་དུ་རེ་ཁཱ་སྦྱིན་པར་བྱའོ། །དེའི་ཕྱི་རོལ་གྱི་གནས་ཀྱི་མེ་ལ་སོགས་པའི་ཟུར་ཐིག་རྣམས་ཀྱི་གཡས་ལོགས་སུ་གནས་པའི་པདྨ་དང་ཟླ་བ་རྣམས་ལ་མེ་ཏོག་མ་དང་བདུག་སྤོས་མ་དང་མར་མེ་མ་དང་དྲི་ཆབ་མ་རྣམས་ཀྱི་མེ་ཏོག་གི་སྣོད་དང་སྤོས་ཕོར་དང་མར་མེའི་མཆོད་སྡོང་དང་དུང་ཆོས་སོ། །གཡོན་ལོགས་སུ་གནས་པའི་པདྨ་དང་ཟླ་བ་རྣམས་ལ་རྡོ་རྗེ་གཟུགས་མ་དང་རྡོ་རྗེ་སྒྲ་མ་དང་རྡོ་རྗེ་རོ་མ་དང་རྡོ་རྗེ་རེག་བྱ་མ་རྣམས་ཀྱི་མེ་ལོང་དང་པི་ཝང་དང་རོའི་སྣོད་དང་སྣ་ཚོགས་པའི་གོས་སོ། །ཕྱི་རོལ་རྡོ་རྗེ་རིགས་ཀྱི་དཀྱིལ་འཁོར་དུ་པདྨ་རྣམས་ལ་ཤར་ལ་སོགས་པའི་ཕྱོགས་རྣམས་སུ་དབང་པོ་དང་གཤིན་རྗེ་དང་ཆུ་བདག་དང་ལུས་ངན་པོ་རྣམས་ཀྱི་རྡོ་རྗེ་དང་དབྱུག་པ་ནག་པོ་དང་ཞགས་པ་དང་ལྕགས་ཀྱུའོ། །དབང་ལྡན་ལ་སོགས་པའི་མཚམས་རྣམས་སུ་དབང་ལྡན་དང་མེ་ལྷ་དང་བདེན་བྲལ་དང་རླུང་རྣམས་ཀྱི་རྩེ་གསུམ་དང་བླུགས་གཟར་དང་རལ་གྲི་དང་རླུང་རས་སོ། །དེ་ནས་དབང་ལྡན་གྱི་ཕྱི་ངོས་སུ་ཉེ་བར་དབང་ལྡན་གྱི་མཚམས་ནས་བརྩམས་ནས་མཚན་མ་རྣམས་རིམ་གྱིས་བྲི་བར་བྱའོ། །དེ་ལ་ཚངས་པའི་བགྲང་ཕྲེང་དང་ཁྱབ་འཇུག་གི་འཁོར་ལོ་དང་དབང་ཕྱུག་ཆེན་པོའི་རྩེ་གསུམ་དང་གདོང་དྲུག་པའི་ཤཀྟི་དང་ཚངས་མའི་ཕྲེང་བ་དང་དྲག་མོའི་རྩེ་གསུམ་དང་ཁྱབ་
འཇུག་མའི་འཁོར་ལོ་དང་གཞོན་ནུ་མའི་ཤཀྟི་དང་དབང་མོའི་རྡོ་རྗེ་དང་ཕག་མོའི་ཉ་རོ་ཧི་ཏ་དང༌། ཙ་མུཎྜཱིའི་གྲི་གུག་དང་བྷྲྀངྒི་ནིའི་བྲེང་བ་དང་ཚོགས་བདག་གི་དགྲ་སྟ་དང་ནག་པོ་ཆེན་པོའི་རྩེ་གསུམ་དང་དགའ་བྱེད་དབང་ཕྱུག་གི་རྫ་རྔ་དང་ཉི་མའི་པདྨ་ལ་གནས་པའི་ཉི་མའི་དཀྱིལ་འཁོར་དང་ཟླ་བའི་ཀུ་མུ་ད་ལ་གནས་པའི་ཟླ་བའི་དཀྱིལ་འཁོར་དང་མིག་དམར་གྱི་གྲི་གུག་དང་གཟའ་ལྷག་གི་མདའ་དང་ཕུར་བུའི་བགྲང་ཕྲེང་དང་པ་སངས་ཀྱི་ཕྲེང་བ་དང་སྤེན་པའི་དབྱུག་པ་ནག་པོ་དང་སྒྲ་གཅན་གྱི་ཟླ་བ་དང་མཇུག་རིངས་ཀྱི་ཀླུའི་ཞགས་པ་དང་སྟོབས་བཟངས་ཀྱི་གཤོལ་དང་རྒྱལ་བར་བྱེད་པའི་མེ་ཏོག་གི་ཕྲེང་བ་དང་སྦྲང་རྩིར་བྱེད་པའི་ཆུ་སྲིད་ཀྱི་རྒྱལ་མཚན་དང་དཔྱིད་ཀྱི་ལྷའི་མདའ་དང་མཐའ་ཡས་དང་ནོར་རྒྱས་དང་འཇོག་པོ་དང་སྟོབས་ཀྱི་རྒྱུ་དང་པདྨ་དང་པདྨ་ཆེན་པོ་དང་དུང་སྐྱོང་དང་རིགས་ལྡན་རྣམས་ཀྱི་ཐལ་མོ་སྦྱར་བ་སྟེ་ཡང་ན་རང་གི་ཕའི་མཚན་མ་དང་འདྲ་བའི་མཚན་མའོ། །དེ་ལ་མཐའ་ཡས་དང་རིགས་ལྡན་གྱི་རིགས་ནི་བྲམ་ཟེ་སྟེ་མེ་ལྷའི་བུའོ། །ནོར་རྒྱས་དང་དུང་སྐྱོང་ནི་རྒྱལ་རིགས་ཏེ་དབང་པོའིའོ། །འཇོག་པོ་དང་པདྨ་ཆེན་པོ་ནི་རྗེའུ་རིགས་ཏེ་རླུང་ལྷའིའོ། །སྟོབས་ཀྱི་རྒྱུ་དང་པདྨ་ནི་དམངས་རིགས་ཏེ་ཆུ་ལྷའིའོ། །ཐགས་བཟང་རིས་དང་སྟོབས་ལྡན་དང་རབ་ཏུ་ཚིམ་བྱེད་དང་རྣམ་པར་སྣང་བྱེད་ལ་སོགས་པ་ལྷ་མ་ཡིན་གྱི་དབང་ཕྱུག་ཆེན་པོ་རྣམས་ཀྱི་ནི་རལ་གྲི་ལ་སོགས་པའི་མཚོན་ཆ་སྣ་ཚོགས་པའོ། །ནམ་མཁའི་ལྡིང་གི་དབང་པོའི་ཐལ་མོ་སྦྱར་བ་དང་མི་འམ་ཅིའི་དབང་པོ་ལྗོན་པའི་པི་ཝང་དང་དྲི་ཟའི་རྒྱལ་པོ་ཟུར་ཕུད་ལྔ་པའི་པི་ཝང་དང་རིག་པ་འཛིན་པའི་རྒྱལ་པོ་དོན་ཐམས་ཅད་གྲུབ་པའི་མེ་ཏོག་གི་ཕྲེང་བའོ། །གང་བ་བཟང་པོ་དང་ནོར་བུ་བཟང་པོ་དང་ནོར་སྦྱིན་དང་རྣམ་ཐོས་ཀྱི་བུ་དང་རྩི་བི་ཀུཎྜ་ལི་དང་ཀི་ལི་མཱ་ལི་དང་སྒོའི་དབང་པོ་དང་སྤྱོད་པའི་དབང་པོ་སྟེ་གནོད་སྦྱིན་གྱི་དབང་པོ་རྣམས་ཀྱི་ཤིང་ཏོག་བཱི་ཛ་པཱུ་ར་ཀ་རྣམས་སོ། །འཕྲོག་མའི་ནི་ཆང་བུ་གཉིས་སོ། །ཐ་སྐར་དང་བྲ་ཉེ་དང་སྨིན་དྲུག་དང་སྣར་མ་དང་མགོ་དང་ལག་དང་ནབ་སོ་དང་རྒྱལ་དང་སྐག་དང་མཆུ་དང་གྲེ་དང་དབོ་དང་མེ་བཞི་དང་ནག་པ་དང་ས་རི་དང་ས་ག་དང་ལྷ་མཚམས་དང་སྣྲོན་དང་སྣུམས་དང་ཆུ་སྟོད་དང་ཆུ་སྨད་དང་གྲོ་བཞིན་དང་མོན་གྲེ་དང་མོན་གྲུ་དང་མོག་གྲུ་དང་ཁྲུམས་སྟོད་དང་ཁྲུམས་སྨད་དང་ནམ་གྲུ་དང་བྱི་བཞིན་རྣམས་ཀྱི་ལག་པ་ཐལ་མོ་སྦྱར་བའི་ཕྱག་རྒྱ་རྣམས་སོ། །
འདིར་ཡང་སྒོ་རྣམས་སུ་རྡོ་རྗེ་ལྕགས་ཀྱུ་ལ་སོགས་པ་སྟེ་དཀྱིལ་འཁོར་བཞི་པ་ལ་བུམ་པ་རྣམས་སོ། །ངན་སོང་ཡོངས་སུ་སྦྱོང་བའི་དཀྱིལ་འཁོར་ལ་རྡོ་རྗེའི་ཕྲེང་བ་སྔོན་པོའི་ནང་དུ་འཁོར་ལོ་སེར་པོ་རྩིབས་བརྒྱད་པའི་སྟེ་བར་ཆོས་ཀྱི་འཁོར་ལོའི་ཕྱག་རྒྱ་སེར་པོའོ། །ཤར་ལ་སོགས་པའི་རྩིབས་རྣམས་སུ་གནོད་སྦྱིན་གྱི་ཕྱག་རྒྱ་དཀར་པོ་དང་མཆོག་སྦྱིན་གྱི་ཕྱག་རྒྱ་སྔོན་པོ་དང་བསམ་གཏན་གྱི་ཕྱག་རྒྱ་དམར་པོ་དང་མི་འཇིགས་པའི་ཕྱག་རྒྱ་ལྗང་གུ་རྣམས་སོ། །མེ་ལ་སོགས་པའི་རྩིབས་རྣམས་སུ་ཉི་མ་དང་ཡིད་བཞིན་གྱི་ནོར་བུའི་རྒྱལ་པོ་མཚན་དང་རལ་གྲི་དང་གདུགས་རྣམས་སོ། །རྡོ་རྗེ་ཕྲེང་བའི་ཕྱི་རོལ་གྱི་མེ་ལ་སོགས་པའི་མཚམས་རྣམས་སུ་སྒེག་མོ་ལ་སོགས་པའི་མཚན་མའོ། །ཤར་ལ་སོགས་པའི་སྣམ་བུ་རྣམས་ལ་སྒོའི་གཡོན་དུ་མཚན་མ་གཉིས་ཏེ་གཡས་སུ་ཡང་ངོ༌། །དེ་ལ་ཀླུ་ཤིང་གི་མེ་ཏོག་དང་སྤྱན་དང་བཅས་པའི་ཆུ་སྐྱེས་དང་ལྕགས་ཀྱུ་དང་དབྱུག་པ་དང་རལ་གྲི་དང་པདྨ་ལ་གནས་པའི་ཆོས་ཀྱི་སྒྲོམ་དང་ཡིད་བཞིན་གྱི་ནོར་བུའི་རྒྱལ་མཚན་དང་བདུད་རྩིའི་བུམ་པ་དང་པདྨ་ལ་གནས་པའི་ཟླ་བའི་གཟུགས་དང་རིན་པོ་ཆེ་དང་རྡོ་རྗེའི་གུར་དང་རྡོ་རྗེ་དང་བཅས་པའི་ཨུཏྤལ་དང་བདུད་རྩིའི་བུམ་པ་དང་ཆུ་སྐྱེས་ལ་གནས་པའི་རིན་པོ་ཆེ་དང་རིན་པོ་ཚེའི་སྙེ་མའོ། །མེ་ལ་སོགས་པའི་མཚམས་སུ་མེ་ཏོག་མ་ལ་སོགས་པའི་མཚན་མ་སྟེ་སྒོ་རྣམས་སུ་ནི་རྡོ་རྗེ་ལྕགས་ཀྱུ་ལ་སོགས་པའོ། །མཚན་མ་སུམ་ཅུ་རྩ་བདུན་པོ་རྣམས་ཀྱང་སྣ་ཚོགས་ཆུ་སྐྱེས་དང་ཟླ་བ་ལ་གནས་པ་སྟེ། མགྲིན་པ་སྔོན་པོ་ལ་སོགས་པའི་མཚན་མ་ནི་མི་བྲི་བ་ཡང་ངོ༌། །འབྱུང་པོ་འདུལ་བྱེད་ཀྱི་དཀྱིལ་འཁོར་ལ་རྩིག་པ་ལྔ་དང་ཤར་ལ་སོགས་པའི་ས་གཞི་ནི་དཀར་པོ་དང་སེར་པོ་དང་དམར་པོ་དང་ལྡང་གུ་དང་ནག་པོའོ། །ཐིག་གི་རེ་ཀཱ་གསུམ་ནི་དཀར་པོ་དང་དམར་པོ་དང་ནག་པོའི་ཁ་དོག་སྟེ་ཐིག་གི་རེ་ཁཱ་གཅིག་དང་རྡོ་རྗེ་ཕྲེང་བའི་རེ་ཁཱ་ནི་ནག་པོའོ། །སྙིང་པོའི་ཕོ་བྲང་གི་དབུས་ཀྱི་རེའུ་མིག་ཏུ་སྣ་ཚོགས་པདྨ་དང་ཟླ་བ་ལ་བཅོམ་ལྡན་འདས་འབྱུང་པོ་འདུལ་བྱེད་ཀྱི་རྡོ་རྗེ་རྩེ་ལྔ་པ་སྔོན་པོའོ། ཤར་དུ་ཉི་མ་ལ་དབང་ཕྱུག་ཆེན་པོའི་རྩེ་གསུམ་དང་ལྷོར་ཉི་མ་ལ་ཁྱབ་འཇུག་གི་འཁོར་ལོ་དང་ནུབ་ཏུ་ཟླ་བ་ལ་ཚངས་པའི་བགྲང་ཕྲེང་དང་བྱང་དུ་
ཉི་མ་ལ་སྨིན་དྲུག་གི་བུའི་ཤཀྟི་དང་དབང་ལྡན་དུ་ཟླ་བ་ལ་ཚོགས་བདག་གི་དགྲ་སྟ་དང་མེར་ཉི་མ་ལ་གཉི་མའི་པདྨ་ལ་གནས་པའི་དཀྱིལ་འཁོར་དང་བདེན་བྲལ་དུ་ཉི་མ་ལ་སྒྲ་གཅན་གྱི་ཟླ་བའི་དཀྱིལ་འཁོར་དང་རླུང་དུ་ཟླ་བ་ལ་དགའ་བྱེད་དབང་ཕྱུག་གི་ཌ་མ་རུའོ། །རིམ་པ་གཉིས་པར་ཤར་ལ་སོགས་པའི་ཕྱོགས་རྣམས་སུ་དཔལ་མོ་དང་ཐིག་ལེ་མཆོག་མ་དང་ཟླ་བ་མོ་དང་དཀའ་ཟློག་མ་རྣམས་ཀྱི་ཟླ་བ་ལ་པདྨ་དཀར་པོ་དང་སྤོས་ཕོར་དང་མར་མེའི་མཆོད་སྡོང་དང་གདེངས་ཀའི་རྣམ་པའི་ལག་པའོ། །མེ་ལ་སོགས་པ་རྣམས་སུ་རིན་ཆེན་དཔལ་མོ་དང་དབྱངས་ཅན་མ་དང་ལྷའི་མཛེས་མ་དང་ཀུན་དུ་འབྱོར་མ་རྣམས་ཀྱི་ཟླ་བ་ལ་རིམ་པ་ཇི་ལྟ་བ་བཞིན་དུ་དྲིའི་དུང་ཆོས་དང་པི་ཝང་དང་རིན་པོ་ཆེའི་ཕྲེང་བ་དང་རྡོ་རྗེ་རྩེ་གསུམ་པའོ། །རིམ་པ་གསུམ་པར་ཤར་ལ་སོགས་པའི་ཕྱོགས་རྣམས་སུ་དབང་པོ་དང་གཤིན་ཏུ་དང་གཤིན་རྗེ་དང་ཆུ་ལྟ་དང་ལུས་ངན་པོ་རྣམས་ཀྱི་ཟླ་བ་ལ་གནས་པའི་རྡོ་རྗེ་དང་ཉི་མ་ལ་གནས་པའི་ཐོད་པས་མཚན་པའི་དབྱུག་པ་དང་ཟླ་བ་ལ་གནས་པའི་ཀླུའི་ཞབས་པ་དང་ཟླ་བ་ལ་གནས་པའི་དབྱུག་ཏོའོ། །མེ་ལ་སོགས་མཚམས་སུ་མེ་ལྷ་དང་བདེན་བྲལ་དང་རླུང་ལྷ་དང་ཟླ་བ་རྣམས་ཀྱི་ཉི་མ་ལ་གནས་པའི་ཕྲེང་བ་དང་ཉི་མ་ལ་གནས་པའི་རལ་གྲི་དང་ཟླ་བ་ལ་གནས་པའི་རླུང་རས་དང་ཀུ་མུ་ད་ལ་གནས་པའི་ཟླ་བའོ། །ཟླ་པའི་མཚན་མ་དང་ཉེ་བར་དབང་ལྡན་གྱི་ཉི་མ་ལ་རྩེ་གསུམ་མོ། །རིམ་པ་བཞི་པར་ཤར་ལ་སོགས་པའི་ཕྱོགས་རྣམས་སུ་སེང་གེའི་རྒྱལ་མཚན་འཛིན་མ་དང་རྣམ་པར་འབྱོར་མ་དང་པད་ཆེན་ལྡན་མ་དང་ཆང་འཕྲོག་མ་རྣམས་ཀྱི་ཟླ་བ་ལ་སེང་གེའི་རྒྱལ་མཚན་དང་ལྕགས་ཀྱུ་དང་མདའ་དང་ཡིད་བཞིན་གྱི་ནོར་བུའོ། །དབང་ལྡན་ལ་སོགས་པ་རྣམས་སུ་མཆོག་འཕྲོག་མ་དང་རིན་ཆེན་དབང་ཕྱུག་མ་དང་རྒྱན་མ་དང་འགྲོ་སྐྱོང་མ་རྣམས་ཀྱི་ཟླ་བ་རྣམས་ལ་མེ་ཏོག་གི་སྣོད་དང་སྤོས་ཕོར་དང་དྲིའི་དུང་ཆོས་དང་མར་མེའི་མཆོད་སྡོང་ངོ༌། །འདིར་ཉི་མ་དང་ཟླ་བ་ཐམས་ཅད་སྣ་ཚོགས་པདྨ་ལ་གནས་པ་སྟེ་རིམ་པ་བཞི་པར་ནི་བུམ་པ་རྣམས་སོ། །མཁའ་འགྲོ་ལྔའི་དཀྱིལ་འཁོར་ལ་དབུས་ཀྱི་གཞལ་ཡས་ཁང་གི་དབུས་སུ་ཤེས་རབ་དང་བཅས་པའི་ཀྱེའི་རྡོ་རྗེའི་གྲི་གུག་དང་ཐོད་པའོ། །ཤར་ལ་སོགས་པའི་སྒོར་དཀར་མོ་དང་ཆོམ་རྐུན་མ་
དང་རོ་ལངས་མ་དང་གྷསྨ་རཱི་རྣམས་ཀྱི་རྡོ་རྗེ་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུའོ། །དབང་ལྡན་ལ་སོགས་པའི་མཚམས་སུ་པུཀྐ་སཱི་དང་རི་ཁྲོད་མ་དང་གཏུམ་མོ་དང་གཡུང་མོ་རྣམས་ཀྱི་བྱང་ཆུབ་ཀྱི་སེམས་ཀྱི་བུམ་པ་དང་རི་རབ་དང་མེ་ཐབ་དང་རྒྱལ་མཚན་ཆེན་པོའི་བ་དན་ནོ། །དེ་ལས་ཤར་གྱི་གཞལ་ཡས་ཁང་གི་དབུས་སུ་རྟག་པའི་ཐོབ་པ་ལ་གནས་པའི་རྨ་བྱ་སྟེ་ཤར་ལ་སོགས་པའི་སྒོར་སྐམ། པ་མ་དང་ཞགས་པ་མ་དང་དོལ་ཟླུམ་མ་དང་ལྕགས་ཀྱུ་འཛིན་མ་རྣམས་ཀྱི་སྐམ་པ་དང་ཞགས་པ་དང་དོལ་ཟླུམ་དང་ལྕགས་ཀྱུའོ། དབང་ལྡན་ལ་སོགས་པར་མེ་ཏོག་མ་དང་བདུག་སྤོས་མ་དང་མར་མ་མ་དང་དྲི་ཆབ་མ་རྣམས་ཀྱི་མེ་ཏོག་གི་སྣོད་དང་སྤོས་ཕོར་དང་མར་མེའི་མཆོད་སྡོང་དང་དིར་སེར་པོས་གང་བའི་དུང་ཆོས་སོ། །ལྷའི་གཞལ་ཡས་ཁང་གི་དབུས་སུ་རྡོ་རྗེ་ཉི་མའི་ཐོད་པ་ལ་གནས་པའི་བྱ་ཀ་རཎྜ་པ་སྟེ་ཤར་ལ་སོགས་པའི་སྒོར་ཉི་ལག་མ་དང་མར་མེ་དང་རིན་ཆེན་སྐར་མདའ་མ་དང་ཕྱག་ན་གློག་ཐོགས་མ་རྣམས་ཀྱི་ཉི་མའི་དཀྱིལ་འཁོར་དང་མར་མེའི་མཆོད་སྡོང་དང་རིན་པོ་ཆེ་དང་གློག་གི་ཕྲེང་བའོ། །དབང་ལྡན་ལ་སོགས་པར་སྒེག་མོ་དང་ཕྲེང་བ་མ་དང་གླུ་མ་དང་གར་མ་རྣམས་ཀྱི་རྡོ་རྗེ་དང་རིན་པོ་ཆེའི་ཕྲེང་བ་དང་འཁར་རྔ་དང་རྡོ་རྗེའོ། །ནུབ་ཀྱི་གཞལ་ཡས་ཁང་གི་དབུས་སུ་པདྨ་གར་གྱི་དབང་ཕྱུག་གི་ཐོད་བ་ལ་གནས་པའི་དོམ་སྟེ་ཤར་ལ་སོགས་པའི་སྒོར་པདྨ་དང་ཆོས་འབྱུང་མ་དང་ལྕགས་སྒྲོག་མ་དང་རང་འཁྱུད་མ་རྣམས་ཀྱི་པདྨ་དང་ཆོས་འབྱུང་དང་ལྕགས་སྒྲོག་དང་རྡོ་རྗེའོ། །དབང་ལྡན་ལ་སོགས་པར་གླིང་བུ་མ་དང་པི་ཝང་མ་དང་རྔ་ཟླུམ་མ་དང་རྫ་རྔ་མ་རྣམས་ཀྱི་རང་རང་གི་རོལ་མོ་རྣམས་སོ། །བྱང་གི་ག་ཞལ་ཡས་ཁང་གི་དབུས་སུ་རྟ་མཆོག་གི་ཐོད་པ་ལ་གནས་པའི་གཟའ་ལྷག་སྟེ་ཤར་ལ་སོགས་པའི་སྒོར་སྒོ་ལྕགས་མ་དང་ལྡེ་ཀྱོག་མ་དང་སྒོ་གླེགས་མ་དང་ཡོལ་བ་འཛིན་མ་རྣམས་ཀྱི་སྒོ་ལྕགས་དང་ལྡེ་ཀྱོག་དང་སྒོ་གླེགས་དང་ཡོལ་བ་དང༌། དབང་ལྡན་ལ་སོགས་པར་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ཀྱི་འཁོར་ལོ་དང་རྡོ་རྗེ་དང་པདྨ་དང་ཨུཏྤལའོ། །ཕྱིའི་དཀྱིལ་འཁོར་ཆེན་པོའི་སྒོ་རྣམས་སུ་དཀར་མོ་ལ་སོགས་པའི་མཚན་མ་རྣམས་ཏེ་དབང་ལྡན་ལ་སོགས་པའི་མཚམས་
སུ་པུཀྐ་སཱི་ལ་སོགས་པའི་མཚན་མ་རྣམས་སོ། །མཚན་མ་འདི་རྣམས་ཐམས་ཅད་ནི་སྣ་ཚོགས་པདྨ་དང་ཉི་མ་ལ་གནས་པ་སྟེ་རྟག་པ་ཁོ་ནའི་ཟླ་བའི་གདན་པ་ལ་གནས་པའོ། །དཀྱིལ་འཁོར་སོ་སོ་ལ་བདུད་རྩིའི་བུམ་པ་རྣམས་ཏེ་ཁ་ཅིག་ནི་དཀྱིལ་འཁོར་ཆེན་པོ་ཁོ་ན་ལའོ་ཞེས་སོ། །འཁོར་ལོས་སྒྱུར་བ་དྲུག་གི་དཀྱིལ་འཁོར་ལ་མཚན་མ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པ་སྟེ་སངས་རྒྱས་མཁའ་འགྲོ་ཁོ་ནའི་ཟླ་བ་ལ་གནས་པའོ། །གཞལ་ཡས་ཁང་དྲུག་པོ་རྣམས་ཀྱི་ཟུར་རྣམས་སུ་སྣ་ཚོགས་པདྨ་ལ་གནས་པའི་ཐོད་པ་རྣམས་སོ། །དེ་ལ་སྙིང་པོའི་དཀྱིལ་འཁོར་གྱི་དབུས་ཀྱི་པདྨ་ལ་རྡོ་རྗེ་སེམས་དཔའི་རྡོ་རྗེ་སྟེ། མཚམས་ཀྱི་འདབ་མ་རྣམས་ལ་མཁའ་འགྲོ་མ་དང་ལཱ་མ་དང་དུམ་སྐྱེས་མ་དང་གཟུགས་ཅན་མ་རྣམས་ཀྱི་ཅང་ཏེའུ་རྣམས་སོ། །འདིར་དགོད་པའི་རིམ་པ་ནི་ཤར་ལ་སོགས་པ་སྒོ་རྣམས་སུ་གཡོན་སྐོར་དང་མེ་ལ་སོགས་པའི་མཚམས་རྣམས་སུ་གཡས་སྐོར་གྱིས་སོ། །སྒོའི་ཆུ་སྐྱེས་རྣམས་ལ་ཐོད་པའི་དུམ་བུམ་དང་རབ་གཏུམ་མོ་དང་ཀེང་རུས་ཆེན་མོ་དང་གཏུམ་པའི་མིག་ཅན་མ་དག་དང་ཀེང་རུས་དང་འོད་ལྡན་མ་དང་མཆེ་བ་རྣམ་པར་གཙིགས་པ་དང་སྣ་ཆེན་མ་དག་གི་རྡོ་རྗེ་བྷི་སྟེ་འཁོར་ཡུག་གི་དབུས་སུ་རྡོ་རྗེའི་ཕྲེང་བའོ། །སངས་རྒྱས་མཁའ་འགྲོའི་དཀྱིལ་འཁོར་ལ་དབུས་སུ་འཁོར་ལོ་དང་སྒོའི་ཆུ་སྐྱེས་རྣམས་ལ་ཆང་དགྲ་དང་དཔའ་བོའི་བློ་ཅན་མ་དག་དང་འོད་དཔག་མེད་དང་མིའུ་ཐུང་མ་དང་རྡོ་རྗེའི་འོད་དང་ལངྐའི་དབང་ཕྱུག་མ་དང་རྡོ་རྗེའོ། །སྐུ་དང་ཤིང་གྲིབ་མ་དག་གི་འཁོར་ལོ་རྣམས་ཏེ་འཁོར་ཡུག་གི་དབུས་སུ་འཁོར་ལོའི་ཕྲེང་བའོ། །རིན་ཆེན་མཁའ་འགྲོའི་དཀྱིལ་འཁོར་ལ་དབུས་སུ་རིན་པོ་ཆེ་དང་སྒོའི་ཆུ་སྐྱེས་རྣམས་ལ་མྱུག་གུ་ཅན་དང་སུ་སྲུང་མ་དང་རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་དག་དང་དཔའ་བོ་ཆེན་པོ་དང་རླུང་ཤུགས་མ་དག་དང་རྡོ་རྗེ་ཧཱུཾ་མཛད་དང་ཆང་འཐུང་མ་དག་གི་རིན་པོ་ཆེ་རྣམས་ཏེ་ཁོར་ཡུག་གི་དབུས་སུ་རིན་པོ་ཆེའི་ཕྲེང་པའོ། །པདྨ་མཁའ་འགྲོའི་དཀྱིལ་འཁོར་ལ་དབུས་སུ་པདྨ་དང་སྒོའི་ཆུ་སྐྱེས་རྣམས་ལ་ཤིན་ཏུ་བཟང་པོ་དང་སྔོ་བསངས་ལྷ་མོ་དག་དང་རྡོ་རྗེ་བཟང་པོ་དག་དང་ཤིན་ཏུ་བཟང་མོ་དག་དང་འཇིགས་བྱེད་ཆེན་པོ་དང་རྟ་རྣམ་དག་དང་མིག་མི་བཟང་དང་བྱ་གདོང་མ་དག་གི་པདྨ་རྣམས་ཏེ་ཁོར་ཡུག་གི་དབུས་སུ་
པདྨའི་ཕྲེང་བའོ། །རྡོ་རྗེ་མཁའ་འགྲོའི་དཀྱིལ་འཁོར་ལ་དབུས་སུ་རྡོ་རྗེ་དང༌། སྒོའི་ཆུ་སྐྱེས་རྣམས་ལ་སྟོབས་པོ་ཆེ་དང་འཁོར་ལོའི་ཤུགས་ཅན་མ་དག་དང་རིན་ཆེན་རྡོ་རྗེ་དང་དུམ་སྐྱེས་མ་དག་དང་རྟ་མགྲིན་དང་ཆང་འཚོང་མ་དག་དང་ནམ་མཁའི་སྙིང་པོ་དང་འཁོར་ལོའི་གོ་ཆ་མ་དག་གི་རྡོ་རྗེ་རྣམས་ཏེ་ཁོར་ཡུག་གི་དབུས་སུ་རྡོ་རྗེའི་ཕྲེང་བའོ། །སྣ་ཚོགས་མཁའ་འགྲོའི་དཀྱིལ་འཁོར་ལ་དབུས་སུ་སྣ་ཚོགས་རྡོ་རྗེ་དང་སྒོའི་ཆུ་སྐྱེས་རྣམས་ལ་ཧེ་རུ་ཀ་དང་ཤིན་ཏུ་དཔའ་མོ་དག་དང་པདྨ་གར་གྱི་དབང་ཕྱུག་དང་སྟོབས་ཆེན་མོ་དག་དག་རྣམས་པར་སྣང་མཛད་དང་འཁོར་ལོས་སྒྱུར་མ་དག་དང་རྡོ་རྗེ་སེམས་དཔའ་དང་བརྩོན་འགྲུས་ཆེན་མོ་དག་གི་སྣ་ཚོགས་རྡོ་རྗེ་སྟེ་ཁོར་ཡུག་གི་དབུས་སུ་སྣ་ཚོགས་རྡོ་རྗེའི་ཕྲེང་བའོ། །གཞལ་ཡས་ཁང་ཆེན་པོའི་སྒོ་རྣམས་སུ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་རྣམས་ཀྱི་རྡོ་རྗེ་ལྕགས་ཀྱུས་དང་རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང་རྡོ་རྗེ་དྲིལ་བུ་རྣམས་ཏེ། མཚམས་རྣམས་སུ་ནི་གཤིན་རྗེ་བརྟན་མ་དང་གཤིན་རྗེ་ཕོ་ཉ་མ་དང་གཤིན་རྗེ་མཆེ་བ་མ་དང་གཤིན་རྗེ་འཇོམས་མ་རྣམས་ཀྱི་མེ་ལོང་དང་པི་ཝང་དང་དྲིའི་དུང་ཆོས་དང་རོའི་སྣོད་རྣམས་སོ། །བུམ་པ་རྣམས་ནི་རི་ལྟར་རིགས་པར་རོ། །དེ་ལྟར་བརྗོད་པའི་རྗེས་སུ་འབྲངས་ནས་དཀྱིལ་འཁོར་གཞན་རྣམས་ལ་ཡང་རྡུལ་ཚོན་དགྱེ་བ་ཤེས་པར་བྱ་སྟེ། འདིར་ནི་གཞུང་མངས་པས་འཇིགས་ནས་མ་བྲིས་སོ། །དུས་ཀྱི་འཁོར་ལོའི་དཀྱིལ་འཁོར་ལ་ནི་ཚོན་གྱི་ཁ་དོག་གི་རིམ་པ་བཤད་པ་རྣམས་དང་ཕལ་ཆེན་མི་མཐུན་པས་རྡུལ་ཚོན་གྱི་ཁ་དོག་གི་རིམ་བ་བརྗོད་པར་བྱའོ། །ཐུགས་ཀྱི་འཁོར་ལོའི་རྡོ་རྗེ་ཕྲེང་བ་གཉིས་པའི་མཐར་ཐུག་པའི་ནང་གི་ས་གཞི་ཐམས་ཅད་ནི་ནག་གོ །ཐུགས་དང་གསུང་དང་སྐུའི་དཀྱིལ་འཁོར་གྱི་ཤར་གྱི་ས་གཞི་ཐམས་ཅད་ནག་པོ་དང༌། ལྷོའི་དམར་པོ་དང༌། ནུབ་ཀྱི་སེར་པོ་དང༌། བྱང་གི་དཀར་པོའོ། །སྟེགས་བུ་རྣམས་ནི་དཀར་པོའོ། །རིན་པོ་ཆེའི་སྣམ་བུ་ནི་དམར་པོ་སྟེ་དེ་ལ་རིན་པོ་ཆེ་སྣ་ཚོགས་པས་སྤྲས་པའོ། །དྲ་བ་དང་དྲ་བ་ཕྱེད་པའི་ས་གཞི་ནི་ནག་པོ་སྟེ་དེར་དྲ་བ་དང་དྲ་བ་ཕྱེད་པ་རྣམས་ནི་དཀར་པོའོ། །ས་གཞི་ནག་པོ་ལ་རིན་པོ་ཆེའི་ཤར་བུ་རྣམས་ནི་དཀར་པོ་དང་ས་གཞི་ནག་པོ་ལ་མདའ་ཡབ་
རྣམས་ཀྱང་དཀར་པོའོ། །རྟ་བབས་ཀྱི་ཀ་བ་རྣམས་ནི་སེར་པོའོ། །ཐུགས་ཀྱི་འཁོར་ལོ་ལ་གཙོ་བོའི་གདན་པདྨ་ལྗང་གུ་སྟེ་ཞི་བ་ལ་སོགས་པ་ལ་ནི་དཀར་པོ་ལ་སོགས་པའི་ཁ་དོག་ཏུ་འགྱུར་རོ། །རྡོ་རྗེའི་ཕྲེང་བ་དང་ཀ་བ་བཅུ་དྲུག་ནི་ནག་པོ་སྟེ་ཤར་དུ་རལ་གྲི་ནག་པོ་དང་ལྷོར་རིན་ཆེན་དམར་པོ་དང་ནུབ་ཏུ་འཁོར་ལོ་སེར་པོ་དང་བྱང་དུ་པདྨ་དཀར་པོ་རྣམས་དང་ལྡན་པའོ། །བུམ་པ་བརྒྱད་ནི་དཀར་པོ་སྟེ་པདྨ་ལ་གནས་ཤིང་པདྨས་ཁ་བརྒྱད་པའོ། །ཐམས་ཅད་དུ་པདྨའི་གདན་རྣམས་ཀྱི་སུམ་ཆ་ནི་ལྟེ་བའོ། །རྡོ་རྗེའི་ཕྲེང་བ་གཉིས་པ་ནི་ལྗང་གུ་སྟེ་ལྷ་སྣམ་ནི་དཀར་པོའོ། །རྩིག་པའི་རེ་ཁཱ་གསུམ་ནི་ནང་ནས་བརྩམས་ཏེ་དཀར་པོ་དང་དམར་པོ་དང་ནག་པོའི་ཁ་དོག་གོ །དེ་རྣམས་ཀྱི་ས་ནི་ཆ་དགུར་བྱ་སྟེ་དེ་ལ་ཆ་གཅིག་དོར་ནས་ཆ་གཉིས་ལ་རེ་ཁཱ་རེ་རེའོ། །སྒོ་དང་སྒོ་ཁྱུད་ཀྱི་མཚམས་རྣམས་སུ་རྡོ་རྗེ་དང་རིན་པོ་ཆེས་སྤྲས་པའོ། །རྟ་བབས་བཅུ་གཉིས་ནི་སྣ་ཚོགས་པའི་ཁ་དོག་གོ །གསུང་གི་དཀྱིལ་འཁོར་གྱི་ལྷ་སྣམ་ནི་དཀར་པོ་སྟེ་དེའི་པདྨ་བརྒྱད་ནི་ཟླ་བ་དང་ཉི་མ་དང་བྲལ་བ་ཕྱོགས་སུ་དམར་པོ་དང་མཚམས་སུ་དཀར་པོའོ། །རེ་ཁཱ་ནི་ནང་ནས་བརྩམས་ཏེ་ལྗང་གུ་དང་ནག་པོ་དང་དམར་པོ་དང་དཀར་པོ་དང་སེར་པོའི་མདོག་ཅན་རྣམས་སོ། །དེ་རྣམས་ཀྱི་ས་གཞི་ཆ་བཅོ་ལྔར་བྱ་ལ་དེར་སྔ་མ་བཞིན་དུ་རེ་ཁཱ་བྱའོ། །སྐུའི་དཀྱིལ་འཁོར་གྱི་ལྷ་སྣམ་ནི་དཀར་པོ་སྟེ་དེའི་པདྨ་རྣམས་ནི་ཟླ་བ་དང་ཉི་མ་དང་བྲལ་བའོ། །རེ་ཁཱ་ལྔ་ནི་གསུང་གི་དཀྱིལ་འཁོར་བཞིན་ནོ། །རྟ་བབས་ཀྱི་ཀ་བའི་འོག་གི་སྟགས་བུའི་ཀླུའི་གདན་རྣམས་ཏེ་རེ་རེ་ཞིང་ཆ་ཆུང་བཅུ་གཉིས་པའོ། །དེ་ལ་ཤར་ཕྱོགས་སུ་ཟླུམ་པོ་ནག་པོ་གཉིས་ཀྱི་སྟེང་དུ་རྒྱལ་མཚན་དག་དང༌། ལྷོར་གྲུ་གསུམ་དམར་པོ་གཉིས་ལ་བཀྲ་ཤིས་ཀྱི་མཚན་པ་དང༌། ནུབ་ཏུ་གྲུ་བཞི་སེར་པོ་གཉིས་ལ་རྡོ་རྗེས་མཚན་པ་དང༌། བྱང་དུ་ཟླ་བ་ཕྱེད་པའི་རྣམ་པ་དཀར་པོ་གཉིས་ལ་པདྨས་མཚན་པའོ། །ཤར་གྱི་གཡས་ཀྱི་ཟླུམ་པོའི་གཡས་སུ་ཀླུའི་རྒྱལ་པོ་རྒྱལ་བ་ཞེས་བྱ་བའི་བདུད་རྩིའི་བུམ་པ་སྟེ་ནུབ་ཀྱི་གཡོན་གྱི་གྲུ་བཞིའི་གཡོན་དུ་རྣམས་པར་རྒྱལ་བ་ཞེས་བྱ་བའི་བདུད་རྩིའི་བུམ་པའོ། །རྟ་བབས་རྣམས་ཀྱི་རིམ་པ་དང་པོའི་མྱོས་བ་བསྲུང་བའི་སྟེང་གི་དབུས་ཀྱི་གྲུ་བཞི་ལས་ཤར་དུ་ཆོས་ཀྱི་
འཁོར་ལོ་ནག་པོ་སྟེ་དེའི་གཡས་དང་གཡོན་དུ་རི་དགས་དང་རི་དགས་མོ་ནག་པོའོ། །ལྷོར་བུམ་པ་བཟང་པོ་དམར་པོའི་མདོག་ཅན་ཏེ་དེའི་གཡས་དང་གཡོན་དུ་དུང་དང་པདྨ་དམར་པོའོ། །ནུབ་ཏུ་བྱང་ཆུབ་ཀྱི་ཤིང་སེར་པོ་སྟེ་དེའི་གཡས་དང་གཡོན་དུ་མིའམ་ཅི་དང་མིའམ་ཅི་སེར་པོའོ། །བྱང་དུ་རྔ་བོ་ཆེ་དཀར་པོ་སྟེ་དེའི་གཡས་དང་གཡོན་དུ་དབྱུག་པ་དང་ཐོ་བ་དཀར་པོའོ། །མདའ་ཡབ་དང་ཁོར་ཡུག་གི་བར་གྱིས་ནི་ནག་པོ་སྟེ་དེ་ལ་ཇི་ལྟར་རིགས་པར་མཆོད་པའི་ཡོ་བྱད་རྣམས་བྲི་བར་བྱའོ། །སའི་ཁོར་ཡུག་ནི་སེར་པོ་སྟེ་དེ་ལ་དབང་ལྡན་གྱི་མཚམས་ནས་འཆར་བཞིན་པའི་ཟླ་བ་ཉ་བའི་ཆ་ཆུང་བཅུ་གཉིས་པ་དང་བདེན་བྲལ་དུ་ནུབ་བཞིན་པའི་ཉི་མའི་དཀྱིལ་འཁོར་ཆ་ཆུང་བཅུ་གཉིས་པའོ། །ཆུའི་ཁོར་ཡུག་དཀར་པོ་དང་མེའི་ཁོར་ཡུག་དམར་པོ་དང་རླུང་གི་ཁོར་ཡུག་ནག་པོའོ། །མེ་དང་རླུང་གི་ཁོར་ཡུག་དེ་དག་གི་དབུས་སུ་སོ་སོར་ཆ་ཆུང་བཅུ་གཉིས་པ་རྩིབས་བརྒྱད་པའི་དུར་ཁྲོད་ཀྱི་འཁོར་ལོ་བརྒྱད་དེ། ཕྱོགས་རྣམས་སུ་དམར་པོ་དང་མཚམས་སུ་དཀར་པོའོ། །ཤར་གྱི་འཁོར་ལོའི་ཕྱི་ངོས་སུ་སྟོང་པའི་དཀྱིལ་འཁོར་ཏེ་ནུབ་ཀྱི་འཁོར་ལོའི་ཕྱི་ངོས་སུ་ཡང་སྟོང་པའི་དཀྱིལ་འཁོར་རོ། །སྟོང་པའི་དཀྱིལ་འཁོར་གཉིས་པོ་བྲི་བ་ནི་སྒྲུབ་ཐབས་ཀྱི་ལེའུར་གསུངས་པའི་ཚུལ་གྱིས་ཏེ་བཅུ་ཆར་ལ་ཡང་མཚན་མ་ནི་གྲི་གུག་གོ །རླུང་གི་ཁོར་ཡུག་ལ་ནི་སྣ་ཚོགས་པའི་མཚན་མ་བྲི་བར་བྱ་སྟེ་འདིར་འདོད་པས་སྤྱོད་པ་ནི་མ་ཡིན་ནོ། །ནམ་མཁའི་ཁོར་ཡུག་ནི་ནག་པོའོ། །དེའི་ལོགས་གཉིས་སུ་ཆ་ཆུང་གསུམ་གསུམ་བྱས་པར་རེ་ཁཱའི་ཟླུམ་སྐོར་གཉིས་ཏེ་དབུས་ཀྱི་ཆ་ཆུང་དྲུག་ལ་རྡོ་རྗེའི་ཕྲེང་བ་ལྗང་གུ་བྱའོ། །འོད་ཟེར་འབར་བ་རྣམས་ནི་ཁ་དོག་ལྔ་པའོ། །ཡང་སྙིང་པོའི་དཀྱིལ་འཁོར་ལ་ཤར་ཕྱོགས་ཀྱི་རྡུལ་ཚོན་ནག་པོའི་དཔངས་ནི་ནས་ཀྱི་རྐང་པ་གཅིག་སྟེ་ལྷོའི་དམར་པོ་ནི་གཉིས་དང་ནུབ་ཀྱི་སེར་པོ་ནི་བཞི་དང་བྱང་གི་དཀར་པོ་ནི་གསུམ་མོ། །རྩིག་པའི་རེ་ཁཱ་རྣམས་ཀྱི་དཔངས་ནི་རྡུལ་ཚོན་སེར་པོའི་སུམ་འགྱུར་ཏེ་རྡོ་རྗེ་ཕྲེང་བ་རྣམས་ཀྱང་ངོ༌། །རེ་ཁཱ་གཞན་རྣམས་ནི་རྡུལ་ཚོན་སེར་པོ་ལས་ཉིས་འགྱུར་ཏེ་པདྨ་རྣམས་སྣམ་བུ་ལས་ཉིས་འགྱུར་ཉིད་དོ། །ཟླ་བ་དང་ཉི་མ་དག་གི་
ཆུ་སྐྱེས་ཀྱི་རེ་ཁཱ་ལས་སོ། །དེ་ལྟར་བརྗོད་པའི་དཔངས་ལས་ཉིས་འགྱུར་ནི་གསུང་གི་དཀྱིལ་འཁོར་གྱི་དཔངས་ཏེ་དེ་རྣམས་ལས་ཉིས་འགྱུར་ནི་སྐུའི་དཀྱིལ་འཁོར་ལའོ། །མདའ་ཡབ་ལས་ཕྱི་རོལ་གྱི་མཆོད་པའི་ས་གཞི་ལ་ནི་ནས་གཅིག་སྟེ་ས་ལ་སོགས་པའི་ཁོར་ཡུག་དང་རེ་ཁཱ་ཟླུམ་པོ་གཉིས་ཀྱི་དཔངས་ནི་སྐུའི་དཀྱིལ་འཁོར་གྱི་རྩིག་པའི་རེ་ཁཱའི་ཚད་དུའོ། །གཞན་རྡུལ་ཚོན་དགྱེ་བ་ནི་ཐམས་ཅད་དུ་ཉིས་འགྱུར་གྱི་དབྱེ་བ་མཚུངས་པ་སྟེ་ས་གཞི་ཐམས་ཅད་ལའོ། །དེ་ལ་གཙོ་བོའི་ལྟེ་བར་ལྟེ་བ་དང་མཉམ་པའི་དཀར་པོ་དང་དམར་པོ་དག་ནག་པོ་དང་དམར་པོའི་ཟླ་བ་དང་ཉི་མ་དང་སྒྲ་གཅན་དང་དུས་མེའི་དཀྱིལ་འཁོར་གྱི་སྟེང་དུ་བཅོམ་ལྡན་འདས་དུས་ཀྱི་འཁོར་ལོའི་རྡོ་རྗེ་སྔོན་པོ་རྩེ་གསུམ་པའོ། །ཤར་གྱི་འདབ་མ་ལ་སྤོས་ཕོར་ནག་པོ་དང་ལྷོར་མར་མེ་དམར་པོ་དང་ནུབ་ཏུ་དུང་སེར་པོ་དང་བྱང་དུ་བཤོས་དཀར་པོ་དང༌། མེ་ལ་སོགས་པ་རྣམས་སུ་ནག་པོ་དང་དམར་པོ་དང་སེར་པོ་དང་དཀར་པོའི་རྔ་ཡབ་རྣམས་སོ། །དེའི་ཕྱི་རོལ་གྱི་དབང་ལྡན་དུ་ཆོས་ཀྱི་དུང་དཀར་པོ་དང༌། མེར་ཡིད་བཞིན་གྱི་ནོར་བུ་ནག་པོ་དང་བདེན་བྲལ་དུ་ཆོས་ཀྱི་གཎྜའི་དམར་པོ་དང་རླུང་དུ་དཔག་བསམ་གྱི་ཤིང་སེར་པོའོ། །རིམ་པ་གཉིས་པར་ཤར་དུ་ཆུ་སྐྱེས་དཀར་པོ་དང་ཉི་མ་ལ་རལ་གྲི་ནག་པོ་དང༌། མེར་ཆུ་སྐྱེས་དམར་པོ་དང་ཟླ་བ་ལ་ཨུཏྤལ་སྔོན་པོ་དང༌། ལྷོར་ཆུ་སྐྱེས་དཀར་པོ་དང་ཉི་མ་ལ་རིན་པོ་ཆེ་ཆ་དགུ་པ་དམར་པོ་དང༌། བདེན་བྲལ་དུ་ཆུ་སྐྱེས་དམར་པོ་དང་ཟླ་བ་ལ་པདྨ་དམར་པོ་དང༌། ནུབ་ཏུ་ཆུ་སྐྱེས་དཀར་པོ་དང་ཉི་མ་ལ་འཁོར་ལོ་སེར་པོ་དང་རླུང་དུ་ཆུ་སྐྱེས་དམར་པོ་དང་ཟླ་བ་ལ་འཁོར་ལོ་སེར་པོ་དང༌། བྱང་དུ་ཆུ་སྐྱེས་དཀར་པོ་དང་ཉི་མ་ལ་པདྨ་དཀར་པོ་དང༌། དབང་ལྡན་དུ་ཆུ་སྐྱེས་དམར་པོ་དང་ཟླ་བ་ལ་ཨུཏྤལ་དཀར་པོའོ། །རིམ་པ་གསུམ་པའི་སྣམ་བུ་ལ་སྒོ་སོ་སོའི་ངོས་དག་ཏུ་གཉིས་ཞེས་པས་པདྨ་བརྒྱད་དེ། དེའི་དྲུག་ལ་ནི་ཉི་མ་དང་ནུབ་དང་བྱང་གི་སྒོའི་གཡོན་དག་ཏུ་ཟླ་བའོ། །མཚམས་རྣམས་སུ་པདྨ་དང་ཟླ་བ་བཞིའོ། །དེ་རྣམས་སུ་དབང་ལྡན་ནས་བརྩམས་ནས་མེ་ལོང་དང་རྡོ་རྗེ་དང་རལ་གྲི་དང་གོས་དང་རྡོ་རྗེ་དང་རིན་པོ་ཆེ་དང་རོའི་སྣོད་དང་ཆོས་འབྱུང་བ་དང་འཁོར་ལོ་དང་དྲིའི་དུང་དང་པི་ཝང་དང་པདྨ་རྣམས་ཏེ། དཀར་པོ་དང་སྔོན་པོ་དང་ནག་
པོ་དང་ལྗང་གུ་དང་དམར་པོ་དང་དམར་པོ་དང་ལྗང་གུ་དང་སེར་པོ་དང་སོར་པོ་དང་སྔོན་པོ་དང་དཀར་པོའོ། །ཤར་གྱི་སྒོར་པདྨ་དང་ཉི་མ་ལ་རལ་གྲི་ནག་པོ་དང་ལྷོར་དབྱུག་པ་དམར་པོ་དང་ནུབ་ཏུ་པདྨ་སེར་པོ་དང་བྱང་དུ་ཐོ་བ་དཀར་པོའོ། །འདིར་ཉི་མའི་དཀྱིལ་འཁོར་རྣམས་ནི་ཆུ་སྐྱེས་དཀར་པོ་ལ་གནས་ཤིང་ཟླ་བའི་དཀྱིལ་འཁོར་རྣམས་ནི་ཆུ་སྐྱེས་དམར་པོ་ལ་གནས་པའོ། །སྟེགས་བུ་ལ་རྟ་བབས་ཀྱི་རྩ་བར་ཤར་གྱི་གཡོན་དུ་དུང་ཆོས་ནག་པོ་དང་གཡས་སུ་མེ་ཏོག་གི་ཕྲེང་བ་སྔོན་པོ་སྟེ། ལྷོར་སྤོས་ཕོར་དམར་པོ་དང་མར་མེའི་མཆོད་སྡོང་དང་ནུབ་ཏུ་ཅོད་པན་སེར་པོ་དང་དོ་ཤལ་སེར་པོའོ། །བྱང་དུ་འབྲས་བུ་དཀར་པོ་དང་བདུད་རྩིས་གང་བའི་སྣོད་དཀར་པོའོ། །སྟེགས་བུ་ཐམས་ཅད་དུ་ནི་མཆོད་པ་རྣམ་པ་སྣ་ཚོགས་པ་འཛིན་པའི་ལྷ་མོ་རྣམས་སོ། །རྟ་བབས་ཀྱི་མཆོད་པའི་ལྷ་མོའི་གནས་ལ་ཤར་གྱི་དབུས་སུ་གོས་དང་ལྷོར་པདྨ་དང་ནུབ་ཏུ་རྔ་པ་ཊ་ཧ་དང་བྱང་དུ་རྡོ་རྗེའོ། །གསུང་གི་དཀྱིལ་འཁོར་དུ་ནི་པདྨའི་ལྟེ་བ་དང་འདབ་མ་རྣམས་ལ་ཤར་དུ་གྲི་གུག་ནག་པོ་རྣམས་དང་མེར་འཁོར་ལོ་ནག་པོ་རྣམས་དག་གཤིན་རྗེར་དབྱུག་པ་དམར་པོ་རྣམས་དང་བདེན་བྲལ་དུ་ཤཀྟི་དམར་པོ་རྣམས་དང་ནུབ་ཏུ་རྡོ་རྗེ་སེར་པོ་རྣམས་དང་རླུང་དུ་ཚངས་པའི་དབྱུ་གུ་རྩེ་མོ་སེར་པོ་ཅན་རྣམས་དང་བྱང་དུ་རྩེ་གསུམ་དཀར་པོ་རྣམས་དང་དབང་ལྡན་དུ་པདྨ་དཀར་པོ་རྣམས་སོ། །སྐུའི་དཀྱིལ་འཁོར་གྱི་སྣམ་བུ་ལ་ཡང་པདྨའི་ལྟེ་བ་དང་འདྲ་བ་མ་རྣམས་ལ་མཚན་མ་རྣམས་ཏེ་དེ་ལ་ཤར་སྒོའི་གཡས་སུ་རལ་གྲི་རྣམས་དང་མེར་དཔག་བསམ་གྱི་ཤིང་རྣམས་དང་ལྷོ་སྒོའི་གཡོན་དུ་རྡོ་རྗེས་མཚན་པའི་དབྱུག་པ་རྣམས་དང་གཡས་སུ་ཤཀྟི་རྣམས་དང་བདེན་བྲལ་དུ་ཤཀྟིའམ་ཡང་ན་མདུང་རྣམས་དང༌། ནུབ་སྒོའི་གཡོན་དུ་རིན་པོ་ཆེའི་དབྱུག་ཏོ་རྣམས་དང་གཡས་སུ་རྡོ་རྗེ་རྣམས་དང་རླུང་དུ་ཁབ་རྣམས་དང་བྱང་སྒོའི་གཡོན་དུ་མདུད་རྩེ་གསུམ་པ་རྣམས་དང་གཡས་སུ་ཞགས་པ་རྣམས་དང་དབང་ལྡན་དུ་དགྲ་སྟ་རྣམས་དང༌། ཤར་སྒོའི་གཡོན་དུ་འཁོར་ལོ་རྣམས་སོ། །ཤར་སྒོར་དབྱུག་པ་དང་དེའི་ཕྱི་རོལ་དུ་རྡོ་རྗེ་ལྗང་གུ་དང༌། ལྷོ་སྒོར་མདའ་དམར་པོ་དང༌། ནུབ་སྒོར་དབྱུག་ཏོ་སེར་པོ་དང༌། དེའི་ཕྱི་རོལ་དུ་རྩེ་གསུམ་སྔོན་པོ་དང༌། བྱང་སྒོར་གཏུན་ཤིང་དཀར་
པོ་སྟེ་དབྱུག་པ་ལ་སོགས་པའི་མཚན་མ་འདི་རྣམས་ནི་པདྨ་དང་ཉི་མ་ལ་གནས་པའོ། །གསུང་དང་སྐུའི་དཀྱིལ་འཁོར་དག་གི་ཕྱོགས་ཀྱི་པདྨ་རྣམས་ནི་དམར་པོ་སྟེ་མཚམས་ཀྱི་པདྨ་རྣམས་ནི་དཀར་པོའོ། །འདིར་གསུང་གི་དཀྱིལ་འཁོར་གྱི་སྟེགས་བུ་ལ་ཤར་སྒོའི་གཡས་སུ་ཨུཏྤལ་དང་གོས་དང་གྲི་གུག་དང་འཁོར་ལོ་དང་ཁ་ཊྭཱཾ་ག་ནག་པོ་རྣམས་ཏེ་གཡོན་དུ་གྲི་གུག་དང་རལ་གྲི་དང་གྲི་གུག་དང་གྲི་གུག་ནག་པོའོ། །ལྷོ་སྒོའི་གཡས་སུ་པདྨ་དང་རོའི་སྣོད་དང་དབྱུག་པ་དང་ཤཀྟི་དང་པདྨ་རྣམས་དམར་པོ་སྟེ། གཡོན་དུ་མདའ་དང་དགྲ་སྟ་དང་གྲི་གུག་དང་གྲི་གུག་དམར་པོའོ། །ནུབ་སྒོའི་གཡས་སུ་འཁོར་ལོ་དང་དྲིའི་དུང་ཆོས་དང་རྡོ་རྗེ་དང་ཁབ་དང་འཁོར་ལོ་རྣམས་སེར་པོ་སྟེ་གཡོན་དུ་ཆོས་འབྱུང་ལྗང་གུ་དང་གྲི་གུག་དང་གྲི་གུག་རྣམ་སེར་པོའོ། །བྱང་སྒོའི་གཡས་སུ་ཨུཏྤལ་དང་མེ་ལོང་དང་རྩེ་གསུམ་དང་པདྨ་དང་ཨུཏྤལ་རྣམས་དཀར་པོ་སྟེ་གཡོན་དུ་པི་ཝང་སྔོན་པོ་དང་ཐོབ་དང་གྲི་གུག་དང་གྲི་གུག་རྣམས་དཀར་པོའོ། །དེ་ལྟར་མཚན་མ་སུམ་ཅུ་རྩ་དྲུག་པོ་རྣམས་ནི་སྐུའི་དཀྱིལ་འཁོར་གྱི་སྟེགས་བུ་རྣམས་ལ་ཡང་ངོ༌། །དེ་ནས་འཇམ་པའི་རྡོ་རྗེ་ལ་སོགས་པ་གང་ཡང་རུང་བའི་དཀྱིལ་འཁོར་བྲིས་པ་རྣམ་པ་ཐམས་ཅད་དུ་གསལ་བར་གྱུར་པར་ཤེས་ནས་ཧཱུཾ་ཡིག་དང་འཁྱིལ་པ་བཟླས་པའི་བདུད་རྩི་དང་བཅས་པའི་དྲིའི་ཆུས་དཀྱིལ་འཁོར་གྱི་ཕྱི་ངོས་སུ་བྱུགས་ལ་ཚད་དེས་འཁོར་ལོ་བསང་ཞིང༌། རྡུལ་ཚོན་ལྷག་མ་རྣམས་ལ་ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་པ་གཤེགས་སུ་གསོལ་ཏེ་སྣོད་ན་གནས་པའི་ཚོན་རྣམས་དབེན་པར་གཞག་པར་བྱའོ་ཞེས་པ་ཚོན་དགྱེ་བའི་ཆོ་གའོ།། །།དེའི་རྗེས་སུ་སྔར་ལྷག་པར་གནས་པ་བྱས་པའི་བུམ་པ་རྣམས་གཡས་སྐོར་དུ་དགོད་པར་བྱའོ། །དེ་ལ་འཁོར་ལོའི་དབང་པོའི་རྣམ་པར་རྒྱལ་བའི་བུམ་པ་ནི་དཀྱིལ་འཁོར་གྱི་འཁོར་ལོའི་གཡས་ཕྱོགས་ནས་བསྐོར་ཏེ་རྡོ་རྗེར་བའི་བདག་ཉིད་ཀྱི་ཁོར་ཡུག་དང་འབར་བའི་ཕྲེང་བའི་ས་གཞིའི་ཕྱི་རོལ་དུ་དཀྱིལ་འཁོར་གྱི་ཤར་སྒོའི་ཐད་ཀའི་གནས་ལས་ཅུང་ཟད་གཡས་སུ་གཞག་པར་བྱའོ། །གཡོན་ལོགས་སུ་ནི་གོ་རིམས་ཇི་ལྟ་བ་བཞིན་དུ་གཡས་སྐོར་གྱིས་རྣམ་པར་སྣང་མཛད་དང་སྤྱན་མ་དང་ལས་ཐམས་ཅད་པའི་བུམ་པ་སྟེ་གཡས་སུ་གཟུགས་རྡོ་རྗེ་དང་ཆོས་
དབྱིངས་རྡོ་རྗེ་མ་དང་གཤིན་རྗེ་མཐར་བྱེད་རྣམས་ཀྱིའོ། །ལྷོའི་གཡོན་དུ་རིན་ཆེན་འབྱུང་ལྡན་དང་མཱ་མ་ཀཱི་དང་གཡས་སུ་སྒྲ་རྡོ་རྗེ་མ་དང་ཤེས་རབ་མཐར་བྱེད་དག་གིའོ། །ནུབ་ཀྱི་གཡོན་དུ་སྣང་བ་མཐའ་ཡས་དང་གོས་དཀར་མོ་དག་དང་གཡས་སུ་དྲི་རྡོ་རྗེ་མ་དང༌། པདྨ་མཐར་བྱེད་དག་གིའོ། །བྱང་གི་གཡོན་དུ་དོན་ཡོད་གྲུབ་པ་དང༌། སྒྲོལ་མ་དག་དང༌། གཡས་སུ་རྡོ་རྗེ་མ་དང༌། རེག་བྱ་རྡོ་རྗེ་མ་དང༌། བགེགས་མཐར་བྱེད་དག་གིའོ། །གཤིན་རྗེ་མཐར་བྱེད་ལ་སོགས་པ་ཁྲོ་བོ་རྣམས་ཀྱི་ནི་མེ་ལ་སོགས་པའི་མཚམས་རྣམས་སུའོ་ཞེས་པ་ཁ་ཅིག་གིས་ཏེ་དེ་བཞིན་གཤེགས་པ་ཐམས་ཅད་ཀྱི་དེ་མ་ཐག་ཏུ་ཁྲོ་བོ་རྣམས་ཀྱི་དང་རིགས་ཀྱི་ཡུམ་རྣམས་ཀྱི་ནི་སྒོའི་གཡས་རྣམས་སུའོ་ཞེས་པ་གཞན་དག་གིས་སོ། །འདིའི་རྗེས་སུ་འབྲངས་ནས་ཕྱོགས་གཞན་རྣམས་སུ་ཡང་དགོད་པར་ཤེས་པར་བྱའོ། །འདོད་པ་གཞན་ཡང་ཡོད་མོད་དེས་ཅི་ཞིག་བྱ། དེ་ལྟར་འདི་ནི་འཇམ་པའི་རྡོ་རྗེའི་དཀྱིལ་འཁོར་ལ་བུམ་པ་དགོད་པའོ། །བསྡུས་པའི་རིམ་པའི་དཀྱིལ་འཁོར་ལ་གཡོན་དུ་རིགས་ཀྱི་ཡུམ་གྱི་དེ་མ་ཐག་ཏུ་ཡང་གཡས་སུ་དང་པོར་བྱང་ཆུབ་སེམས་དཔའ་བརྒྱད་པོ་རྣམས་ཀྱིའོ། །ཟུར་གྱི་ཁྲོ་བོ་རྣམས་ཀྱི་ཟུར་རྣམ་སུ་དང་གཤིན་རྗེ་མཐར་བྱེད་ཀྱི་རྗེས་ལ་གཙུག་ཏོར་འཁོར་ལོས་སྒྱུར་བའི་དང༌། པདྨ་མཐར་བྱེད་ཀྱི་རྗེས་ལ་གནོད་མཛེས་ཀྱི་སྟེ་ཁྱད་པར་རོ། །འདི་དག་གི་རྗེས་སུ་འབྲངས་ཏེ་དཀྱིལ་འཁོར་གཞན་རྣམས་ལ་བུམ་པ་དགོད་པ་ནི་རྟོགས་སླ་བས་འདིར་མ་བཀོད་དོ། །ཟུར་བཞིའི་བུམ་པ་རྣམས་ལ་ནི་སྒྲོ་དང་བཅས་པའི་མདའ་བཞི་སྟེ། ཨོཾ་བཛྲ་ཡཀྵ་ཧཱུཾ་ཞེས་པའི་སྔགས་ཀྱིས་དགོད་པར་བྱའོ། །དུས་ཀྱི་འཁོར་ལོ་ལ་ནི་རྡུལ་ཚོན་གྱི་དཀྱིལ་འཁོར་ལས་ཕྱི་རོལ་དུ་ཤར་ལ་སོགས་པའི་ཕྱོགས་རྣམས་སུ་བུམ་པ་བརྒྱད་དང༌། ནུབ་ཀྱི་བུམ་པ་ལས་ཕྱི་རོལ་དུ་སོར་གཉིས་སྤངས་པར་རྣམ་པར་རྒྱལ་བའི་བུམ་པ་དང༌། ཤར་གྱི་བུམ་པ་ལས་ཕྱི་རོལ་དུ་སོར་གཉིས་སྤངས་པར་རྒྱལ་བའི་བུམ་པ་སྟེ། དེའི་སྟེང་དུ་རྣམ་པར་རྒྱལ་བ་ཆེན་པོའི་བུམ་པ་དུང་ཆོས་ནི་བཅུ་གཅིག་པའོ། །ཤར་དུ་རྒྱལ་བའི་བུམ་པ་ཡང་སྟེ་ལྔ་པའོ། །དེའི་སྟེང་དུ་རྣམ་པར་རྒྱལ་བའི་
བུམ་པ་ནི་དུང་ཆོས་ཏེ་དྲག་པའོ་ཞེས་པ་བུམ་པ་ལྔ་པའི་ཕྱོགས་ལའོ། །བུམ་པ་བཅུའི་ཕྱོགས་ལ་ནི་ཕྱོགས་བརྒྱད་དུ་བུམ་པ་བརྒྱད་དང༌། ནུབ་ཀྱི་བུམ་པ་ལས་ཕྱི་རོལ་དུ་སོར་གཉིས་སྤངས་པར་རྣམ་པར་རྒྱལ་བའི་བུམ་པ་དང༌། ཤར་གྱི་བུམ་པ་ལས་ཕྱི་རོལ་དུ་སོར་གཉིས་སྤངས་པར་རྒྱལ་བའི་བུམ་པ་སྟེ་དེའི་སྟེང་དུ་རྣམ་པར་རྒྱལ་བ་ཆེན་པོའི་དུང་ཆོས་ནི་བཅུ་གཅིག་པའོ། །དེ་བཞིན་དུ་བརྒྱ་ཕྲག་སྟོང་གི་བུམ་པ་རྣམས་ལ་ཡང་རྣམ་པར་རྒྱལ་བ་ཆེན་པོ་ནི་དུང་ཆོས་ཏེ་ཞི་བ་དང་རྒྱས་པ་དང་ལ་ཐམས་ཅད་པ་ལ་ཡང་ངོ་ཞེས་པ་བུམ་པ་དགོད་པའི་ཆོ་གའོ།། །།དེ་ནས་དཀྱིལ་འཁོར་གྱི་ཕྱི་རོལ་དུ་ཕྱོགས་བཞིར་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་དམ་པའི་ཆོས་བཞི་བཀླག་པར་བྱའོ། །ག་བུར་དང་ཨ་ཀ་རུ་དང་ཏུ་རུཥྐ་ལ་སོགས་པའི་སྤོས་ཕོར་བརྒྱད་གཞག་པར་བྱའོ། །རྣམ་པ་སྣ་ཚོགས་པའི་ན་བཟའ་སྟོང་ལ་སོགས་པ་འམ་ལྷ་སོ་སོ་རེ་རེ་ལ་སོགས་པ་ཇི་ལྟར་ནུས་པ་ཡང་རུང་སློབ་མ་ལ་སོགས་པར་གཞག་པ་དང་གདུག་དང་རྒྱལ་མཚན་དང་བ་དན་རྣམས་ཧཱུཾ་ཡིག་དང་བདག་པོའི་སྔགས་ཀྱིས་བཟླས་པ་ཨོཾ་སྥ་ར་ཎ་ཁཾ་ཞེས་པས་ཕུལ་ནས་གནས་ཇི་ལྟ་བར་གཞག་པར་བྱ་སྟེ། རྟ་བབས་དང་གོས་བཟང་པོ་དང་དྲིལ་བུ་དང་བཅས་པའི་རྔ་ཡབ་དང་བུམ་པ་གདབ་དང་ལོ་མ་དང་བཅས་པའི་ཆུ་ཤིང་གི་སྡོང་བུའི་ཀ་བ་རྣམས་ཀྱང་ངོ༌། །དེ་ནས་ཁྲུས་བྱས་ཤིང་དྲི་ཞིམ་པོའི་ལུས་སྟོད་གཡོགས་དང་གཙུག་ཏོར་དང་རྒྱན་དང་བཅས་པས་འཁྱིལ་པ་བཟླས་པའི་ཆུས་དཀྱིལ་འཁོར་བསངས་ཏེ་ཡི་གེ་གསུམ་དང་འཁྱིལ་པའི་སྔགས་ཀྱིས་བསྲུངས་ནས་རྡོ་རྗེ་དང་དྲིལ་བུ་བཟུང་སྟེ་ཤར་གྱི་སྒོ་དང་ཉེ་བར་ནུབ་ཏུ་གདོང་ཕྱོགས་པས་འདུག་ལ་འཁོར་ལོའི་དབང་ཕྱུག་གི་རྣལ་འབྱོར་དང་ལྡན་པ་བྲིས་པའི་དཀྱིལ་འཁོར་སླད་ཅིག་གིས་སྟོང་པ་ཉིད་ཀྱི་རྗེས་སུ་སྲུང་བའི་འཁོར་ལོ་དང་བགེགས་ལ་ཕུར་བུས་གདབ་པ་ལ་སོགས་པའི་ཆོ་ག་འཁོར་དང་བཅས་པས་བསྒོམ་པར་བྱ་བའི་དཀྱིལ་འཁོར་གྱི་རང་བཞིན་དུ་ངེས་པར་བརྟགས་ནས། བཙུན་མོ་མཛེས་ཤིང་ལྟས་བཟང་བ། །ལོ་གྲངས་བཅུ་དྲུག་ལོན་རྙེད་ནས། །དྲི་དང་མེ་ཏོག་གིས་བརྒྱན་ཏེ། །དེ་ཡི་དབུས་སུ་འདོད་པ་བྱ། །ཡོན་ཏན་སྐ་རགས་མཱ་མ་ཀཱིར། །ཤེས་རབ་ཅན་
གྱིས་དེ་བྱིན་བརླབ། །ཞི་བ་སྤྲོ་བྱ་སངས་རྒྱས་གནས། །ནམ་མཁའི་དབྱིངས་ནི་རབ་ཏུ་བརྒྱན། །ཞེས་གསུངས་པས་རབ་ཏུ་བསྒྲུབ་པའི་ཕྱིར་ཕྱི་རོལ་གྱི་ཕྱག་རྒྱ་དང་སྙོམས་པར་འཇུག་པའམ། དེ་མེད་ན་ཡེ་ཤེས་ཀྱི་ཕྱག་རྒྱ་དང་སྙོམས་པར་འཇུག་པས་ཡང་དག་པར་བསྐྱོད་པའི་དགའ་བའི་སྒྲས། ཡེ་ཤེས་ཀྱི་འཁོར་ལོ་སྤྱན་དྲངས་ལ། ཞབས་བསིལ་དང་ཞལ་བསིལ་དང་མཆོད་ཡོན་དབུལ་བ་སྔོན་དུ་འགྲོ་བས་རང་གི་གནས་སུ་བཅུག་ནས་འདོད་ཆགས་ཆེན་པོ་ཞུ་བར་གྱུར་པ་རྡོ་རྗེའི་ལམ་ནས་པདྨར་ཕྱུང་བའི་ཡེ་ཤེས་ཀྱི་ལྷའི་འཁོར་ལོའི་བདག་ཉིད་སྤྲོས་ཏེ། དམ་ཚིག་གི་འཁོར་ལོ་ལ་ཇི་ལྟ་བ་བཞིན་དུ་ཞུགས་པར་བསམས་ནས། མིག་དང་སྐུ་ལ་སོགས་པ་བྱིན་གྱིས་བརླབས་ཤིང་དེ་མ་ཐག་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་དང་ལྷ་མོ་རྣམས་ཀྱིས་དབང་བསྐུར་ནས་ཇི་ལྟར་རིགས་པར་རྒྱས་གདབ་སྟེ་རིགས་མི་ཤེས་པ་རྣམས་ནི་མི་བསྐྱོད་པའམ་རྡོ་རྗེ་སེམས་དཔས་སོ། །དེ་ནས་ལྷ་མོ་སྤྲོས་པ་རྣམས་ཀྱིས་ཡིད་ཀྱི་རང་བཞིན་གྱི་མཆོད་པས་མཆོད་ཅིང༌། བསིལ་བའི་རས་དང་རས་ཟུང་བླ་རེ་ལ་དབྱངས་པ་དང་གོས་དང༌། ཡི་གེ་གསུམ་གྱིས་བསྔགས་པའི་བཟའ་བ་དང་བཅའ་བ་དང་བལྡག་བ་དང་བཏུང་བའི་ཉེ་བར་སྤྱད་པ་ལ་སོགས་པ་དང༌། གསེར་དང་བུ་མོ་དང་གླང་པོ་ཆེ་དང་རྟ་དང་བ་ལང་ལ་སོགས་པ་ཕུལ་ལ་གཟུགས་རྡོ་རྗེ་མ་ལ་སོགས་པའི་ངོ་བོ་ཕྱི་རོལ་གྱི་རྣལ་འབྱོར་མ་བཅུ་དྲུག་གམ་བརྒྱད་དམ་བཞིས་རང་རང་གི་མཆོད་པས་མཆོད་ནས་དྲིལ་བུ་དཀྲོལ་ཞིང་མི་བསྐྱོད་རྡོ་རྗེ་ཞེས་པ་ལ་སོགས་པས་བསྟོད་དེ། རང་དང་ཤེས་རབ་ཀྱི་མེ་ཏོག་དང་བཅས་པའི་བྱང་ཆུབ་ཀྱི་སེམས་པདྨའི་སྣོད་དུ་བཅུག་པ་བདུད་རྩི་དང་བཅས་པ་ཕུལ་བས། དེ་རྣམས་བདུད་རྩི་མྱངས་པས་ཚིམ་པར་གྱུར་ཅིང་བདེ་བ་ཆེན་པོའི་རང་བཞིན་དུ་མོས་པར་བྱས་ལ་འཁོར་ལོའི་དབང་པོའི་སྔགས་བརྒྱ་རྩ་བརྒྱད་དང༌། དེ་ལས་གཞན་དཀྱིལ་འཁོར་བའི་སྔགས་ཉི་ཤུ་རྩ་གཅིག་དང་ཡི་གེ་བརྒྱ་པ་བཟླས་པར་བྱའོ། །འཆད་པར་འགྱུར་བའི་ཆོ་གས་འབྱུང་པོ་ཐམས་ཅད་པའི་གཏོར་མ་གཏང་བར་བྱ་སྟེ། ཡོད་ན་སྒྲུབ་པའི་གྲོགས་པོ་དཀྱིལ་འཁོར་དུ་བཞག་ནས་ཕྱི་རོལ་དུ་ཕྱུང་ལ་ཤར་ལ་
སོགས་པའི་ཕྱོགས་སུ་འཆད་པར་འགྱུར་བའི་ཆོ་གས་འབྱུང་པོ་ཐམས་ཅད་པའི་གཏོར་མའི་ཆོ་གས་རང་གི་འདོད་པའི་ལྷ་དང་དབང་པོ་ལ་སོགས་པ་ལ་གཏོར་མ་དབུལ་བར་བྱའོ། །དེ་ནས་ལག་པ་གཡས་པ་གན་རྐྱལ་དུ་བྱས་ལ་གུང་མོ་དང་མིང་མེད་ཅིང་ཟད་བཀུག་པ་ཁ་ལ་མངོན་དུ་ཕྱོགས་པར་གཟུང་བར་བྱའོ། །དེའི་རྩེ་མོས་ལག་པ་གཉིས་པུས་མོའི་ནང་དུ་བྱས་ནས་ཙོག་ཙོག་པོར་འདུག་སྟེ་མི་སྨྲ་བར་དེའི་རྩེ་མོས་ལག་པའི་ཟེའུ་འབྲུའི་ཆས་ཁ་ལ་ལན་མང་དུ་བྱ་བ་ཅིང༌། ལན་གཉིས་སམ་གསུམ་དུ་རྣ་བའི་བུག་པ་གཉིས་དང་མིག་དག་དང་ཁ་དང་ལག་པ་དག་དང་ལྟེ་བ་དང་མགོ་བོ་རྣམས་ལ་རེག་པར་བྱའོ་ཞེས་པ་ཉེ་རེག་གི་ཆོ་ག་བྱའོ། །དེ་ནས་གྲུབ་ན་ལྷག་པ་ལ་སོགས་པའི་ཉེས་པ་ཞི་བར་བྱ་བའི་ཕྱིར་ཞི་བ་དང༌། དཀྱིལ་འཁོར་ཚིམ་པར་བྱ་བའི་ཕྱིར་ཞི་བ་དང་རྒྱས་པའི་སྦྱིན་སྲེག་འཆད་པར་འགྱུར་བ་བྱས་ནས་ཁམས་གསུམ་རྣམ་པར་རྒྱལ་བའི་རྣལ་འབྱོར་དང་ལྡན་པས་མེ་ཏོག་གི་ཕྲེང་བ་བླངས་ཏེ། ཨོཾ་སུམྦྷ་ནི་སུམྦྷ་ཧཱུཾ་ཧཱུཾ་ཕཊ། ཨོཾ་གྲྀཧྞ་གྲྀཧྞ་ཧཱུཾ་ཧཱུཾ་ཕཊ། ཨོཾ་གྲྀཧྞཱ་པ་ཡ་གྲྀཧྞཱ་པ་ཡ་ཧཱུཾ་ཧཱུཾ་ཕཊ། ཨོཾ་ཨཱ་ན་ཡ་ཧོ་བྷ་ག་ཝཱན་བིདྱཱ་རཱ་ཛ་ཧཱུཾ་ཧཱུཾ་ཕཊ་སྭཱ་ཧཱ། ཞེས་དཔལ་ཁ་སྦྱོར་དུ་གསུངས་པའི་ཁམས་གསུམ་རྣམ་པར་རྒྱལ་བའི་སྔགས་ཟློས་ཤིང་རྡོ་རྗེ་ཤུགས་ཀྱིས་དཀྱིལ་འཁོར་དུ་ཞུགས་པ་ལ་རྡོ་རྗེ་གསོར་ཞིང་དྲིལ་བུ་དཀྲོལ་ཏེ་རྡོ་རྗེའི་རྐང་པས་དེ་ཁོ་ན་བཞིན་དུ་ཨོཾ་ཨཱཿཧཱུཾ་ཕཊ་ཅེས་པ་དང༌། ཨོཾ་ཧཱུཾ་ཨཱཿཕཊ་ཅེས་པ་དང༌། ཨོཾ་ཧཱུཾ་ཨཱཿཨཱཿཕཊ་ཅེས་པ་དང༌། ཨོཾ་ཧཱུཾ་ཧ་ན་མཱ་ར་ཡ་དུཥྚཱ་ན་གྷཱ་ཏ་ཡ་གྷཱ་ཏ་ཡ་ཨཱཿཨཱཿཧཱུཾ་ཧྲཱིཿཕཊ་ཅེས་པའི་སྔགས་རིམ་པ་ཇི་ལྟ་བ་བཞིན་དུ་ཟློས་པའི་ཤར་དང་ལྷོ་ལ་སོགས་པའི་སྒོའི་སློབ་དཔོན་རྣམས་དང་ལྷན་ཅིག་ཏུ་གཡས་སྐོར་བྱས་ནས་ལྷག་པ་དང་མ་ཚང་བའི་ཉེས་པ་ཞི་བར་བྱ་བའི་ཕྱིར་འཁོར་ལོ་ལ་བལྟས་ཏེ་ཕྲེང་བ་བཅོམ་ལྡན་འདས་ལ་དབུལ་ཞིང་བསྐོར་བའི་གྲངས་ཇི་ལྟ་བ་བཞིན་དུ་ནུབ་སྒོ་ལ་སོགས་པ་བཞིར་གནས་པས་ཤར་སྒོ་ལ་སོགས་པ་བཞི་ཨོཾ་བཛྲོདྷ་ཊ་ས་མ་ཡ་པྲ་བེ་ཤ་ཡ་ཧཱུཾ་ཞེས་པའི་སྔགས་ཀྱིས་ཕྱེ་བར་བསམས་ཏེ། ཨོཾ་ས་མ་ཡཾ་པྲ་བེ་ཤཱ་མི་ཞེས་བརྗོད་ནས་གར་བྱེད་ཅིང་ཕྲེང་བ་བླངས་ལ་རང་གི་མགོ་ལ་བཅིངས་ཏེ་འཁོར་ལོ་ལ་ཕྱག་འཚལ་ནས་སེམས་ཅན་ཐམས་ཅད་
ལ་དངོས་གྲུབ་ཀྱི་སྐལ་བ་ཐམས་ཅད་སྩོལ་ཅིག་ཅེས་གསོལ་བ་གདབ་ཅིང་བསྒོམ་པ་དང་བཟླས་པ་བྱའོ། །འདིར་དཀྱིལ་འཁོར་གྱི་ཁང་པ་ལས་ཕྱི་རོལ་དུ་རྣམ་པར་སྣང་མཛད་དང་དེའི་རིགས་ཀྱི་ལྷ་རྣམས་ཀྱི་བ་དན་ནི་མེར་དགོད་པར་བྱའོ། །རིན་ཆེན་དབང་པོ་དང་དེའི་རིགས་ཀྱི་ལྷ་རྣམས་ནི་བདེན་བྲལ་དུའོ། །སྣང་བ་མཐའ་ཡས་དང་དེའི་རིགས་ལས་བྱུང་བ་རྣམས་ཀྱི་རླུང་དུའོ། །དོན་ཡོད་གྲུབ་པ་དང་དེའི་རིགས་ཀྱི་ལྷ་རྣམས་ཀྱི་དབང་ལྡན་དུའོ། །འཁོར་ལོའི་དབང་པོའི་ཤར་ཕྱོགས་སུ་སྟེ་དེའི་རིགས་ཀྱི་ལྷ་རྣམས་ཀྱི་ནི་རང་རང་གི་ཕྱོགས་སུའོ་ཞེས་པ་ཁ་ཅིག་གོ །དབང་པོར་ནི་ཁྱབ་འཇུག་གི་ནག་པོ་དང་ཟླ་བའི་དཀར་པོ་དང་ཉི་མའི་དམར་པོ་དང་མེའི་སེར་པོ་སྟེ་ནུབ་ཏུ་སའི་ལྷ་མོའི་སེར་པོ་དང་ཐགས་བཟངས་རིས་ཀྱི་ནག་པོའོ། །དབང་ལྡན་དུ་ནི་ཚོགས་ཀྱི་བདག་པོའི་དཀར་པོ་སྟེ་མ་འབྱོར་ན་ཇི་ལྟར་ནུས་པའི་བ་དན་དབུལ་བར་བྱའོ་ཞེས་པ་དཀྱིལ་འཁོར་བསྒྲུབ་པ་འཁོར་དང་བཅས་པའི་ཆོ་གའོ།། །།འདིར་བརྗོད་པའི་དཀྱིལ་འཁོར་གྱི་ལྷ་རྣམས་ཀྱི་ཁ་དོག་ལ་སོགས་པ་བསྒོམ་པའི་རིམ་པ་ཤེས་པར་བྱ་བའི་ཕྱིར་ཡང་དག་པར་བསྡུས་ནས་མཆོག་ཏུ་གྱུར་པའི་སེམས་ཅན་རྣམས་ལ་བཤད་པར་བྱའོ། །འདིར་གང་གི་ཕྱིར་ཆུང་ངུ་དང་འབྲིང་པོའི་རིམ་པ་དག་གི་ཏིང་ངེ་འཛིན་ལེགས་པར་བསྒོམ་པ་ལས་ ཤེས་རབ་མཆོག་ཏུ་གྱུར་པ་རྣམས་ལ་བཅོམ་ལྡན་འདས་ཀྱིས། རྣམ་པ་ཀུན་གྱི 
་མཆོག་ལྡན་པ། །སྤྲོ་ཞིང་སྡུད་པའི་བྱེད་པ་པོ། །སྐད་ཅིག་གིས་ནི་ཡེ་ཤེས་རྫོགས། །རྣལ་འབྱོར་རྫོགས་པར་བཤད་པར་བྱ། །ཞེས་གསུངས་པ་དེའི་ཕྱིར་རང་དང་སེམས་ཅན་ཐམས་ཅད་རྡོ་རྗེ་འཆང་ཉིད་ཐོབ་པར་འདོད་པའི་མངོན་པར་སྤྲོ་བ་དང་ལྡན་པས་ཕུང་པོ་དང་ཁམས་དང་སྐྱེ་མཆེད་ལ་སོགས་པ་གཟུགས་ཅན་གྱི་རང་བཞིན་སྟོང་པ་ཉིད་དང་རོ་གཅིག་པར་ངེས་པར་བྱས་ནས་འོད་གསལ་བར་ཞུགས་པ་ལས་སྐད་ཅིག་གིས་ཡན་ལག་དང་བཅས་པའི་གཞལ་ཡས་ཁང་གི་དབུས་སུ་དཀྱིལ་འཁོར་པས་ཡོངས་སུ་བསྐོར་ཞིང་རིགས་ཀྱི་བདག་པོའི་དབུ་རྒྱན་དང་ཐུགས་ཀའི་ས་བོན་དང་ལྡན་པ་སྟོང་པ་ཉིད་དང་སྙིང་རྗེ་རོ་གཅིག་པ་བདེན་པ་ཆེན་པོའི་རང་བཞིན་ཅན་དཔལ་རྡོ་རྗེ་སེམས་དཔའ་དང་འཇམ་པའི་རྡོ་རྗེ་ལ་སོགས་པའི་སྐུ་དཔག་ཏུ་མེད་པའི་དེ་བཞིན་
གཤེགས་པ་དང་ལྷ་མོ་དང་བྱང་ཆུབ་སེམས་དཔའ་དང་ཁྲོ་བོ་ལ་སོགས་པ་སྤྲོས་ཏེ་ཆོས་སྟོན་པ་ལ་སོགས་པས་སྐལ་བ་ཇི་ལྟ་བ་བཞིན་དུ་གཞན་ལ་ཕན་པ་མཛད་ནས་བསོད་ནམས་ཀྱི་ཚོགས་མཐར་ཕྱིན་པ་ལ་འཇོག་ཅིང་སྡུད་པ་བསམ་གྱིས་མི་ཁྱབ་པའི་སྐུར་འཆར་བར་བྱའོ། །དེ་ལ་ཡན་ལག་ལ་སོགས་པ་ནི་འདི་ཡིན་ཏེ། ས་འོག་གི་མཐར་ཐུག་པར་ཇི་ལྟར་མངོན་པར་འདོད་པའི་རྒྱར་གཅིག་ཏུ་སྲ་ཞིང་མཁྲེགས་ལ་འབར་བའི་རྡོ་རྗེའི་ས་གཞི་བསྐལ་པའི་མཐའི་མེ་ལྟར་འབར་བ་འོད་ཟེར་འབར་བའི་ཕྲེང་བས་མཚམས་བཅིངས་པ་དང་ས་འོག་ནས་སྟེང་གི་བར་དུ་ཤིན་ཏུ་མཐོ་བ་མཐུག་ཅིང་མཁྲེགས་ལ་སྲ་ཞིང་འབར་བའི་རྡོ་རྗེའི་རབ་དང་རྡོ་རྗེའི་ར་བའི་སྟེང་དུ་བར་མཚམས་མེད་པར་དུམ་བུ་གཅིག་ཏུ་གྱུར་པའི་སྟེང་རྡོ་རྗེའི་དྲ་བ་དང་འོག་རྡོ་རྗེའི་བླ་རེས་བརྒྱན་པའི་རྡོ་རྗེའི་གུར་འབར་བའོ། །དེའི་ནང་དུ་གནས་པར་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་འཁོར་ལོ་རྩིབས་བཅུ་པ་སེར་པོ་གཡས་སྐོར་ཏུ་འཁོར་བའོ། །དེའི་རྩིབས་ལ་ཤར་དུ་གཤིན་རྗེ་མཐར་བྱེད་ནག་པོ་དཀར་པོ་དང་དམར་པོའི་ཞལ་ཅན་རྡོ་རྗེ་ཐོབ་ནག་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །ལྷོར་ཤེས་རབ་མཐར་བྱེད་དཀར་པོ་ནག་པོ་དང་དམར་པོའི་ཞལ་ཅན་རྡོ་རྗེས་མཚན་པའི་དབྱུག་པ་དཀར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །ནུབ་ཏུ་པདྨ་མཐར་བྱེད་དམར་པོ་སྔོན་པོ་དང་དཀར་པོའི་ཞལ་ཅན། པདྨ་དམར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །བྱང་དུ་བགེགས་མཐར་བྱེད་ནག་པོ་དཀར་པོ་དང་དམར་པོའི་ཞལ་ཅན་རྡོ་རྗེ་ཁ་གྱིས་པ་དང་རལ་གྲི་དང་ནོར་བུ་དང་པདྨ་འཛིན་པའོ། །མེར་འདོད་པའི་རྒྱལ་པོ་སྔོན་པོ་དཀར་པོ་དང་དམར་པོའི་ཞལ་ཅན། ལྕགས་ཀྱུ་དང་རལ་གྲི་དང་ནོར་བུ་དང་པདྨ་འཛིན་པའོ། །བདེན་བྲལ་དུ་དབྱུག་སྔོན་ཅན་ནག་པོ་དཀར་པོ་དང་དམར་པོའི་ཞལ་ཅན་དབྱུག་པ་སྔོན་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །རླུང་དུ་སྟོབས་པོ་ཆེ་ནག་པོ་དཀར་པོ་དང་དམར་པོའི་ཞལ་ཅན། རྩེ་གསུམ་དང་རལ་གྲི་དང་ནོར་བུ་དང་པདྨ་འཛིན་པའོ། །དབང་ལྡན་དུ་མི་གཡོ་བ་སྔོན་པོ་དཀར་པོ་དང་དམར་པོའི་ཞལ་ཅན་རལ་གྲི་དག་རྡོ་རྗེ་དང་ནོར་བུ་དང་པདྨ་འཛིན་པའོ། །སྟེང་དུ་གཙུག་ཏོར་འཁོར་ལོས་སྒྱུར་བ་སེར་པོ་སྔོན་པོ་དང་དམར་པོའི་ཞལ་ཅན་འཁོར་ལོ་སེར་པོ་དང་རལ་གྲི་དང་ནོར་བུ་དང་
པདྨ་འཛིན་བའོ། །འོག་ཏུ་གནོད་མཛེས་རྒྱལ་པོ་སྔོན་པོ་དཀར་པོ་དང་དམར་པོའི་ཞལ་ཅན་རྡོ་རྗེ་དང་རལ་གྲི་དང་ནོར་བུ་དང་པདྨ་འཛིན་པའོ། །དེ་ལ་གཙུག་ཏོར་དང་འདོད་པའི་རྒྱལ་པོ་དང་མི་གཡོ་བ་དང་གནོད་མཛེས་རྣམས་ནི་རིན་པོ་ཆེའི་ཅོད་པན་ཅན། རྣམ་པ་སྣ་ཚོགས་པའི་རིན་པོ་ཆེས་བརྒྱན་ཅིང་འགྱིང་བར་གྱུར་པ་མཆེ་བ་ཅུང་ཟད་གཙིགས་པར་སྟོན་ཅིང་ཁྲོས་པའི་སྨ་ར་དང་ལྡན་པའོ། །དེ་ལས་གཞན་པ་རྣམས་ནི་རྣམ་པར་འགྱུར་བའི་གཟུགས་ཅན་སྨིན་མ་འཁྱོག་པ་དང་བཅས་པ་དབུ་སྐྲ་སེར་པོ་གྱེན་དུ་བརྫེས་པ་སྨིན་མ་དང་སྨར་སེར་བ་མཆེ་བ་གཙིགས་ཤིང་ཞལ་གདངས་པ་ལྗགས་འགྱུར་བ་གད་རྒྱངས་དང་ལྡན་པ་དྲག་པོའི་ཀླུ་བརྒྱད་ཀྱིས་བརྒྱན་པ་སྐུ་བོང་ཐུང་ཞིང་རགས་པ་ལྟོ་བ་འཕྱད་བའོ། །བཅུ་པོ་འདི་དག་ནི་གཡོན་བརྐྱང་ཞིང་གཡས་བསྐུམ་པ་རྩིབས་ཀྱི་རྩེ་མོ་ལ་ཅུང་ཟད་མ་རེག་པའི་སྣ་ཚོགས་ཆུ་སྐྱེས་ཉི་མ་དང་བཅས་པའི་གདན་ལ་བརྟན་པར་གནས་པ། ཉི་མའི་འོད་ཅན་རབ་ཏུ་ཁྲོ་བ་དང་འབར་བས་ཤིན་ཏུ་འཇིགས་པ་དུས་མཐའི་མེ་ལྟ་བུའི་འོད་དང་ལྡན་པའི་རང་གི་སྤྲུལ་པ་དཔག་ཏུ་མེད་པའི་ཚོགས་ཀྱིས་ཀྱང་ཁམས་གསུམ་མཐའ་ཡས་པ་ན་གནས་པའི་བགེགས་ཀྱི་ཚོགས་མ་ལུས་པ་ཡང་དང་ཡང་དུ་རླག་པར་བྱེད་པ་ཕྱག་དྲུག་པ་རྩ་བའི་ཕྱག་དག་གིས་རང་དང་འདྲ་བའི་ཤེས་རབ་ལ་འཁྱུད་པ། ཞལ་གསུམ་པ་རྩ་བའི་ཞལ་སྐུ་མདོག་ལྟ་བུ་གཡས་པ་དང་གཡོན་པ་ནི་བརྗོད་ཟིན་པ་ཇི་ལྟ་བ་བཞིན་ཏེ། ཞལ་རེ་རེ་ལ་ཡང་དམར་ལ་ཟླུམ་པའི་སྤྱན་གསུམ་གསུམ་མོ། །འཁོར་ལོ་ཡང་རྒྱུན་མི་འཆད་པར་དྲག་ཏུ་འཁོར་བས་བརྟན་པར་གནས་པ་ལྟ་བུ་སྟེ་འབར་བའི་ཚོགས་དཔག་ཏུ་མེད་པ་འཕྲོ་བའོ། །དེའི་ལྟེ་བའི་ནང་འོག་གི་རྩིབས་ཀྱི་སྟེང་དུ་ཆོས་འབྱུང་གྲུ་གསུམ་པ་དཀར་པོ་ཤིན་ཏུ་ཡངས་པའི་ནང་དུ་འོག་གི་ཟུར་ལ་གནས་བའི་སྣ་ཚོགས་པདྨའི་སྟེང་དུ་སྣ་ཚོགས་རྡོ་རྗེ་དང་བཅས་པའོ། །རྡོ་རྗེ་དེའི་ཕྱོགས་ཀྱི་ར་རྣམས་དང་ལྟེ་བ་ནི་ཇི་ལྟར་རིགས་པར་རྣམ་པར་སྣང་མཛད་ལ་སོགས་པའི་སྐུ་མདོག་དང་འདྲ་བའོ། །དེར་རིན་པོ་ཆེ་ཁ་དོག་ལྔ་ལས་ཡོངས་སུ་རྫོགས་ཤིང་འོད་གསལ་བའི་ཐུབ་པའི་དབང་བོའི་དཀྱིལ་འཁོར་སྣ་ཚོགས་པའི་འོད་ཀྱིས་ཕྱོགས་ཀྱི་འཁོར་ལོ་ཐམས་ཅད་ཁྱབ་པའི་གཞལ་ཡས་ཁང་ངོ༌། །དེའི་དབུས་སུ་
བཅོམ་ལྡན་འདས་རྡོ་རྗེ་སེམས་དཔའ་འཇམ་པའི་རྡོ་རྗེའི་སྐུ་གུར་ཀུམ་གྱི་མདོག་ལྟ་བུ་གཡས་དང་གཡོན་གྱི་ཞལ་ནག་པོ་དང་དཀར་པོ་རྩ་བའི་ཕྱག་དག་གིས་རང་དང་འདྲ་བའི་ཤེས་རབ་ལ་འཁྱུད་པ། རལ་གྲི་དད་མདའ་དང་ཨུཏྤལ་དང་གཞུ་འཛིན་པ། རིན་པོ་ཆེའི་ཅོད་པན་ཅན་སྣ་ཚོགས་པའི་རིན་པོ་ཆེ་ལ་སོགས་པས་བརྒྱན་ཅིང་འོད་ཟེར་མཐའ་ཡས་པའོ། །དེའི་ཤར་ཕྱོགས་སུ་རྣམ་པར་སྣང་མཛད་དཀར་པོ་གཡས་པ་དང་ཅིག་ཤོས་ཀྱི་ཞལ་ནག་པོ་དང་དམར་པོ། ཕྱག་རྣམས་ན་འཁོར་ལོ་རྩིབས་བརྒྱད་པ་དཀར་པོ་དང་རལ་གྲི་དང་ནོར་བུ་དང་པདྨ་འཛིན་པའོ། །ལྷོར་རིན་ཆེན་འབྱུང་ལྡན་སེར་པོ་རིན་པོ་ཆེ་ཆ་དགུ་པའི་མ་ར་ཀ་ཏ་དང་རལ་གྲི་དང་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་པདྨ་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །བྱང་དུ་དོན་ཡོད་གྲུབ་པ་ལྗང་གུ་རལ་གྲི་དང་འཁོར་ལོ་དང་ནོར་བུ་དང་པདྨ་འཛིན་པའོ། །འདི་གསུམ་གྱི་གཡས་པ་དང་ཅིག་ཤོས་ཀྱི་ཞལ་ནི་ནག་པོ་དང་དཀར་པོའོ། །དེ་བཞིན་གཤེགས་པ་ཐམས་ཅད་རིན་པོ་ཆེའི་ཅོད་པན་དང་ལྡན་ཞིང་རྣམ་པ་སྣ་ཚོགས་པའི་རིན་པོ་ཆེས་བརྒྱན་པའོ། །མེར་སྤྱན་མ་རྣམ་པར་སྣང་མཛད་དང་མཚུངས་པའོ། །བདེན་བྲལ་དུ་མཱ་མ་ཀཱི་མི་བསྐྱོད་པ་ལྟ་བུ་ཨུཏྤལ་དམར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པ་སྟེ་སྒྲུབ་ཐབས་ཐམས་ཅད་ལས་དེ་ལྟར་བཤད་པའི་ཕྱིར་རོ། །རླུང་དུ་གོས་དཀར་མོ་སྣང་བ་མཐའ་ཡས་དང་མཚུངས་པའོ། །དབང་ལྡན་དུ་སྒྲོལ་མ་རིན་ཆེན་འབྱུང་ལྡན་ལྟ་བུ་ཨུཏྤལ་སེར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །དེ་ནས་དབུས་ཀྱི་རིམ་པ་ལས་ཕྱི་རོལ་དུ་མེའི་མཚམས་སུ་གཟུགས་རྡོ་རྗེ་མ་རྣམ་པར་སྣང་མཛད་ལྟ་བུ་མེ་ལོང་དམར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །བདེན་བྲལ་དུ་སྒྲ་རྡོ་རྗེ་མ་མི་བསྐྱོད་པ་ལྟ་བུ་པི་ཝང་སྔོན་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། །རླུང་དུ་དྲི་རྡོ་རྗེ་མ་རིན་ཆེན་འབྱུང་ལྡན་ལྟ་བུ་དྲིའི་དུད་ཆོས་སེར་པོ་དང་རལ་གྲི་དང་འཁོར་ལོ་དང་ཆུ་སྐྱེས་འཛིན་པའོ། །དབང་ལྡན་དུ་རོ་རྡོ་རྗེ་མ་སྣང་བ་མཐའ་ཡས་ལྟ་བུ་རོའི་སྣོད་དམར་པོ་དང་རལ་གྲི་དང་ནོར་བུ་དང་འཁོར་ལོ་འཛིན་པའོ། །ཤར་སྒོའི་གཡོན་ལོགས་སུ་རེག་བྱ་རྡོ་རྗེ་མ་དོན་ཡོད་གྲུབ་པ་ལྟ་བུ་གོས་སྣ་ཚོགས་པ་དང༌། རལ་གྲི་
དང་ནོར་བུ་དང་ཆུ་སྐྱེས་འཛིན་པའོ། །ཤར་སྒོའི་གཡས་ལོགས་སུ་ཆོས་དབྱིངས་རྡོ་རྗེ་མ་རྡོ་རྗེ་སེམས་དཔའ་ལྟ་བུ་ཆོས་འབྱུང་དཀར་པོ་དང་རལ་གྲི་དང་ནོར་བུ་དང་ཆུ་སྐྱེས་འཛིན་པའོ། འཇམ་པའི་རྡོ་རྗེ་ལ་སོགས་པའི་ལྷ་འདི་རྣམས་ནི་ཞལ་གསུམ་ཕྱག་དྲུག་པ་ཕྱག་མཚན་དང་པོ་གཉིས་གཡས་པ་དག་གིས་དང་གཞན་པ་གཉིས་གཡོན་པ་དག་གིས་འཛིན་པ་སྟེ་ཐམས་ཅད་ཀྱི་རྩ་བའི་ཞལ་ནི་སྐུ་མདོག་བཞིན་ནོ། །ཤར་ལ་སོགས་པའི་སྒོ་རྣམས་སུ་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བདུད་རྩི་འཁྱིལ་པ་རྣམས་སོ། །འདིར་འཇམ་པའི་རྡོ་རྗེ་དང་རྣམ་པར་སྣང་མཛད་དང་ལྷ་མོ་བཅུ་དྲུག་པོ་རྣམས་ནི་ཟླ་བའི་དཀྱིལ་འཁོར་ལ་རྡོ་རྗེ་སྐྱིལ་ཀྲུང་གིས་བཞུགས་པ་སྟེ། གཞན་རྣམས་ནི་ཉི་མ་ལའོ། །ཟླ་བ་དང་ཉི་མ་རྣམས་ཀྱི་འོག་ཏུ་སྣ་ཚོགས་འདམ་སྐྱེས་སོ། །དེ་བཞིན་གཤེགས་པ་རྣམས་ཀྱི་རྩ་བའི་ཕྱག་དག་གིས་རང་འོད་ཀྱི་ཤེས་རབ་ལ་འཁྱུད་པ་སྟེ་ལྷ་མོ་རྣམས་ཀྱང་རང་འོད་ཀྱི་ཐབས་ལའོ། །དབུ་ལ་རིགས་ཀྱི་བདག་པོ་སྟེ་འཇམ་པའི་རྡོ་རྗེ་ལ་སོགས་པའི་དེ་བཞིན་གཤེགས་པ་རྣམས་དང་མཱ་མ་ཀཱི་དང་སྒྲ་རྡོ་རྗེ་མ་དང་སྲུང་བའི་འཁོར་ལོ་ལ་གནས་པའི་ཁྲོ་བོ་བརྒྱད་ལ་མི་བསྐྱོད་པའོ། །སྤྱན་མ་དང་གཟུགས་རྡོ་རྗེ་མ་དང་གཤིན་རྗེ་མཐར་བྱེད་རྣམས་ལ་རྣམ་པར་སྣང་མཛད་དེ། དྲི་རྡོ་རྗེ་མ་ལ་ནི་རིན་རིན་ཆེན་དབང་པོའོ། །གོས་དཀར་མོ་དང་རོ་རྡོ་རྗེ་མ་དང་པདྨ་མཐར་བྱེད་རྣམས་ལ་འོད་དཔག་མེད་དེ་སྒྲོལ་མ་དང་རེག་བྱ་རྡོ་རྗེ་མ་ལ་ནི་དོན་ཡོད་གྲུབ་པའོ། །ཆོས་དབྱིངས་རྡོ་རྗེ་མ་ལ་རྡོ་རྗེ་འཛིན་པ་སྟེ་གཞན་རྣམས་ལ་ནི་མི་བསྐྱོད་པའོ། །འདིར་རྡོ་རྗེ་སེམས་དཔའ་ནི་སྐུ་མདོག་དཀར་པོ་ལ་ཅུང་ཟད་དམར་བའི་མདངས་དང་ལྡན་པ་གཡས་པ་དང་ཅིག་ཤོས་ཀྱི་ཞལ་ནི་སྔོན་པོ་དང་དམར་པོ། །རྩ་བའི་ཕྱག་དག་གིས་རང་འོད་ཀྱི་ཤེས་རབ་ལ་འཁྱུད་པ། རྡོ་རྗེ་སྔོན་པོ་དང་རལ་གྲི་དང་ནོར་བུ་དང་པདྨ་འཛིན་པ་སྣ་ཚོགས་པདྨ་དང་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་ཟླ་བའི་འོད་ཅན་རིན་པོ་ཆེའི་ཅོད་པན་དང་རིན་པོ་ཆེའི་རྒྱན་དང་ལྡན་པ་མི་བསྐྱོད་པས་རྒྱས་བཏབ་པའོ། །འདིར་འཇམ་པའི་རྡོ་རྗེའི་ཐུགས་ཀར་དམ་ཚིག་སེམས་དཔའ་ལྟ་བུའི་ཡེ་ཤེས་སེམས་དཔའ་སྟེ་དའི་ཐུགས་
ཀའི་ཟླ་བར་རལ་གྲིའི་ཡུ་བར་གནས་པའི་ཟླ་བ་ལ་ས་བོན་མཾ་མོ། །རྟག་པ་དང་རིན་ཆེན་དབང་པོ་དང་འོད་དཔག་མེད་དང་དོན་ཡོད་གྲུབ་པ་དང་མི་བསྐྱོད་པ་རྣམས་ཀྱི་ཐུགས་ཀར་ཕྱག་མཚན་ལ་ཇི་ལྟར་རིགས་པར་ཟླ་བར་ཉི་མ་ལ་བྷཱུཾ་ཨཱཾ་ཛྲཱྀཾ་ཁཾ་ཧཱུཾ་དོ། །སྤྱན་མ་ལ་སོགས་པའི་ལྷ་མོ་རྣམས་ལ་ལཱཾ་མཱཾ་བཱཾ་ཏཾ་ཛཿ་ཧཱུཾ་བཾ་ཧོཿ་ཁཾ་རི་མོ། །ཁྲོ་བོ་རྣམས་ལ་ནི་ཧཱུཾ་ངོ་ཞེས་པ་ས་བོན་ཏེ་འཁོར་ལོའི་དབང་པོ་ལ་སོགས་པའི་ཐུགས་ཀར་སྔགས་རྣམས་དགོད་པར་བྱའོ། །ཨོཾ་ཨཱཿ་མཾ་ཧཱུཾ་འཁོར་ལོའི་དབང་པོ་མི་བསྐྱོད་པ་དང་ལྷན་ཅིག་དབྱེར་མེད་པའིའོ། །ཨོཾ་ཨཱཿ་ཛཱིན་ཛིཀ་ཧཱུཾ་རྣམ་པར་སྣང་མཛད་ཀྱིའོ། །ཨོཾ་ཨཱཿ་རཏྣ་བྷྲྀཀ་ཧཱུཾ་རིན་ཆེན་འབྱུང་ལྡན་གྱིའོ། །ཨོཾ་ཨཱཿ་ཨཱ་རོ་ལྀ་ཀ་ཧཱུཾ་འོད་དཔག་མེད་ཀྱིའོ། །ཨོཾ་ཨཱཿ་པྲཛྙཱ་དྷྲྀཀ་ཧཱུཾ་དོན་ཡོད་གྲུབ་པའོ། །ཨོཾ་ཨཱཿ་མོ་ཧར་ཏི་ཧཱུཾ་སྤྱན་མའིའོ། །ཨོཾ་ཨཱཿ་དྲཱེ་ཥ་ར་ཏི་ཧཱུཾ་མཱ་མ་ཀཱིའིའོ། །ཨོཾ་ཨཱཿ་རཱ་ག་ར་ཏི་ཧཱུཾ་གོས་དཀར་མོའིའོ། །ཨོཾ་ཨཱཿ་བཛྲ་ར་ཏི་ཧཱུཾ་སྒྲོལ་མའིའོ། །ཨོཾ་ཨཱཿ་རཱུ་པ་བཛྲི་ཛཿ་ཧཱུཾ་གཟུགས་རྡོ་རྗེ་མའོ། །ཨོཾ་ཨཱ་ཤ་བཏ་བཛྲེ་ཧཱུཾ་ཧཱུཾ་སྒྲ་རྡོ་རྗེ་མའིའོ། །ཨོཾ་ཨཱཿ་ག་ནྡྷ་བ་ཛྲེ་བཾ་ཧཱུཾ་དྲི་རྡོ་རྗེ་མའིའོ། །ཨོཾ་ཨཱཿ་ར་ས་བཛྲེ་ཧོཿ་ཧཱུཾ་རོ་རྡོ་རྗེ་མའིའོ། །ཨོཾ་ཨཱཿ་སྤཪྴེ་བཛྲེ་ཁཾ་ཧཱུཾ་རེག་བྱ་རྡོ་རྗེ་མའིའོ། །ཨོཾ་ཨཱཿ་དྷརྨ་དྷཱ་ཏུ་བཛྲེ་རཾ་ཧཱུཾ་ཆོས་དབྱིངས་རྡོ་རྗེ་མའིའོ། །ཨོཾ་ཨཱཿ་ཡ་མཱནྟ་ཀྲྀ་ཏ་ཧཱུཾ་གཤིན་རྗེ་མཐར་བྱེད་ཀྱིའོ། །ཨོཾ་ཨཱཿ་པྲཛྙཱནྟ་ཀྲྀ་ཏ་ཧཱུཾ་ཤེས་རབ་མཐར་བྱེད་ཀྱིའིའོ། །ཨོཾ་ཨཱཿ་བི་གྷྣཱནྟ་ཀྲྀ་ཏ་ཧཱུཾ་ཕཊ་བགེགས་མཐར་བྱེད་ཀྱིའོ། །གང་གི་ཚེ་འཇམ་པའི་རྡོ་རྗེ་དང་དབྱེར་མེད་པའི་མི་བསྐྱོད་པ་འཁོར་ལོའི་དབང་པོར་གྱུར་པ་དེའི་ཚེ་ཨོཾ་ཨཱཿ་བཛྲ་དྷྲྀཀ་ཧཱུཾ། ཞེས་པ་འདིའོ། །རྫོགས་པའི་རིམ་པའི་རྣལ་འབྱོར་ལ་མིག་ལ་སོགས་པ་བྱིན་གྱིས་བརླབ་པ་དང༌། ཡེ་ཤེས་སེམས་དཔའ་བཞུགས་པ་ལ་སོགས་པ་ནི་མ་བཤད་དོ། །དེའི་རྗེས་ལ་མིག་གི་མངོན་པར་ཤེས་པ་ལ་སོགས་པ་ཡོན་ཏན་གྱི་ཚོགས་དཔག་ཏུ་མེད་ཅིང་བསམ་གྱིས་མི་ཁྱབ་པས་མཛེས་པར་བྱས་པའི་ཡི་དམ་གྱི་ལྷའི་སྐུ་ལེགས་པར་ཡོངས་སུ་དག་ཅིང་རྣམ་པ་ཐམས་ཅད་ཡོངས་སུ་རྫོགས་པ་ལ་རྒྱུན་མི་འཆད་པར་ཡང་དང་ཡང་དུ་ལྷག་པར་མོས་པ་བསྟན་པར་བྱའོ། །སྙིང་པོའི་སྔགས་ལ་སོགས་པ་བསྟན་པ་ནི་བུམ་པ་ལྷག་
པར་གནས་པ་ལ་སོགས་པ་ལ་ཉེ་བར་སྦྱར་བའི་དོན་དུའོ། །གང་གི་ཚེ་དབུས་སུ་དེ་བཞིན་གཤེགས་པ་གཞན་གཙོ་བོར་གྱུར་པ་དེའི་ཆེ་དབུས་སུ་གནས་པ་དེ་གཞན་དེའི་གནས་སུ་དགོད་དོ། །འོད་དཔག་ཏུ་མེད་པ་དཀར་པོར་ཡང་འགྱུར་རོ། །ཆོས་རྣམས་དཀར་པོའི་རང་བཞིན་གྱིས། །འདིར་ནི་གསུང་གི་དབང་ཕྱུག་དཀར། །ཞེས་གསུངས་པའི་ཕྱིར་རོ། །འདི་དང་འཆད་པར་འགྱུར་བའི་དཀྱིལ་འཁོར་རྣམས་སུ་གང་གི་དཀྱིལ་འཁོར་པའི་ལྷའི་གཙོ་བོའི་གནས་དག་གོང་དུ་བཤད་པ་དེའི་ཚེ་གཙོ་བོ་དེ་ཉིད་དཀྱིལ་འཁོར་གྱི་དབང་པོ་ལ་མངོན་པར་ཕྱོགས་ཤིང༌། དེ་དང་འཁྱུད་པ་ནི་དེ་ལ་མངོན་པར་ཕྱོགས་པ་ཉིད་དེ་གཞན་གྱི་གནས་སུ་ཕྱིན་པའི་ཕྱིར་རོ། །འདིར་གཞལ་ཡས་ཁང་གི་ཡན་ལག་ནི་རྣམ་པ་གསུམ་སྟེ། རྡོ་རྗེའི་ས་གཞི་ལ་སོགས་པས་ཡོངས་སུ་བསྐོར་བའི་རྡོ་རྗེའི་གུར་དང་སྲུང་བའི་འཁོར་ལོ་དང་ཆོས་ཀྱི་འབྱུང་གནས་སོ། །དེ་ལ་རྡོ་རྗེའི་གུར་ནི་འཆད་པར་འགྱུར་བའི་གཞལ་ཡས་ཁང་ཐམས་ཅད་ལ་སྟེ། སྲུང་བའི་འཁོར་ལོ་དང་ཆོས་ཀྱི་འབྱུང་གནས་ནི་འགའ་ཞིག་ཁོ་ན་ལ་འཆད་པར་འགྱུར་རོ། །བྲི་བར་བྱ་བའི་གཞལ་ཡས་ཁང་རྣམས་ལ་ནི་ཆོས་ཀྱི་དབྱིངས་ཀྱི་ངོ་བོ་ཆོས་འབྱུང་དམ་ཆོས་ཀྱི་དབྱིངས་ཀྱི་ཁོངས་སུ་ཆུད་པ་མཚོན་པའི་ཆེད་དུ་རྡོ་རྗེའི་ཕྲེང་བ་བྲི་བར་བཤད་དོ། །ཇི་ལྟར་ཕྱི་རོལ་དེ་བཞིན་ནང༌། །ཞེས་པས་རྫོགས་པའི་རིམ་པའི་དཀྱིལ་འཁོར་རྟོགས་པར་བྱ་བའི་ཕྱིར་དུ་འཇིག་རྟེན་གྱི་ཁམས་ཀྱི་འཁོར་ཡུག་མཚོན་པའི་རྡོ་རྗེའི་ཕྲེང་བ་བྲི་བ་ནི་ངེས་པར་རོ། །འདིར་སྲུང་བའི་འཁོར་ལོ་ནི་དེ་ལྟ་མ་ཡིན་པས་བྲི་མི་དགོས་ཏེ། བགེགས་ཟློག་པ་ནི་གཞན་གྱིས་ཀྱང་བྱེད་པའི་ཕྱིར་རོ། །གཞན་ཡང་སྟོང་པ་ཉིད་ཁོ་ན་བཅོམ་ལྡན་འདས་མ་སྟེ་བགེགས་ཀྱི་ཚོགས་མ་ལུས་པ་རྩ་བ་དང་བཅས་པ་རླག་པར་བྱེད་པའི་ནུས་པ་རབ་ཏུ་གྱུར་པས་དེ་ལ་ལྷག་པར་མོས་པ་བརྟན་པ་ཉིད་བསྐྱེད་པའི་ཆེད་དུ་བྲི་བར་བྱ་བའི་དཀྱིལ་འཁོར་ལ་སྲུང་བའི་འཁོར་ལོ་བྲི་བར་མ་བསྟན་ཏོ། །བསྒོམ་པར་བྱ་བའི་དཀྱིལ་འཁོར་ལ་ཡང་ཁ་ཅིག་ཏུ་བསྒོམ་པར་གསུངས་ཀྱི་ཐམས་ཅད་ལ་ནི་མ་ཡིན་ནོ། །བགེགས་བསལ་བའི་རྗེས་ལ་སྟོང་པ་ཉིད་དུ་རབ་ཏུ་ཞུགས་པས་བསྒོམ་པར་བྱ་བའི་དཀྱིལ་འཁོར་ལ་སྲུང་བའི་འཁོར་
ལོ་མེད་དེ། དེའི་ཕྱིར་མི་བྲིའོ་ཞེ་ན་དེ་ལྟ་ན་ཁོར་ཡུག་མཚོན་པའི་རྡོ་རྗེའི་རབ་ཡང་མི་བྲི་བར་འགྱུར་རོ། །ཡང་གཞལ་ཡས་ཁང་བསྐྱེད་པའི་དུས་སུ་དེ་ཡང་བསྐྱེད་དོ་ཞེ་ན་མ་ཡིན་ཏེ། བཅོམ་ལྡན་འདས་ཀྱིས་རྡོ་རྗེའི་ར་བ་ལན་གཉིས་བསྐྱེད་པར་གང་ནས་ཀྱང་མ་གསུངས་པས་ལན་གཉིས་བསྐྱེད་པས་ཅི་ཞིག་བྱ། །ཅིག་ཅར་རྫོགས་པ་ཉིད་ཀྱི་རྡོ་རྗེའི་ས་གཞི་དང་མཚམས་བཅིང་བ་དང་རྡོ་རྗེའི་རབ་ལ་སོགས་པ་མ་ལུས་པ་ཀུན་བརྟགས་པ་སྟོང་པ་ཉིད་ཀྱི་རང་བཞིན་སྒྱུར་མའི་ངོ་བོར་གནས་པ་ཉིད་ཀྱི་ཕྱིར་རོ། །དེ་ལྟར་སྲུང་བའི་འཁོར་ལོ་ཡོད་ཀྱང་དཀྱིལ་འཁོར་དུ་མི་བྲི་བ་ཉིད་ཀྱི་འཐད་པ་བརྗོད་པ་ཉིད་དོ། །ཁ་ཅིག་ནི་སྲུང་བའི་འཁོར་ལོ་བྲི་བར་བྱའོ་ཞེས་ཀྱང་འདོད་དོ་ཞེས་པ་འཇམ་པའི་རྡོ་རྗེའི་དཀྱིལ་འཁོར་རོ། །བསྡུས་བའི་རིམ་པར་གསུངས་པའི་དཀྱིལ་འཁོར་ལ་ཡང་གཞལ་ཡས་ཁང་གི་མཐར་ཐུག་པ་ནི་སྔ་མ་བཞིན་ཏེ། ཁྲོ་བོ་རྣམས་ཀྱི་ཁྱད་པར་ནི་འཆད་པར་འགྱུར་རོ། །གཞལ་ཡས་ཁང་གི་དབུས་སུ་མི་བསྐྱོད་པ་ནག་པོ་དྲག་པོ་གཡས་པ་དང་ཅིག་ཤོས་ཀྱི་ཞལ་དཀར་པོ་དང་དམར་པོ་ཕྱག་གཡས་པ་རྣམས་ཀྱིས་ཁྲོ་བོའི་རྡོ་རྗེ་དང་འཁོར་ལོ་དང་པདྨ་རྣམས་དང་གཡོན་པ་རྣམས་ཀྱིས་དྲིལ་བུ་དང་ཡིད་བཞིན་གྱི་ནོར་བུ་དང་རལ་གྲི་འཛིན་པ་དང་འདྲ་བའི་རེག་བྱ་རྡོ་རྗེ་མས་འཁྱུད་པའོ། །དེའི་ཤར་ལ་སོགས་པའི་ཕྱོགས་རྣམས་སུ་རྣམ་པར་སྣང་མཛད་ལ་སོགས་པ་སྟེ། མེ་ལ་སོགས་པའི་མཚམས་སུ་སྤྱན་མ་ལ་སོགས་པའོ། །དེ་ལ་རྣམ་པར་སྣང་མཛད་ནི་དཀར་པོ་ཞི་བ། དཀར་པོ་དང་ནག་པོ་དང་དམར་པོའི་ཞལ་ཅན་འཁོར་ལོ་དང་རྡོ་རྗེ་དང་པདྨ་དཀར་པོ་དང་དྲིལ་བུ་དང་ནོར་བུ་དང་རལ་གྲི་འཛིན་པའོ། །བཤད་ཟིན་པ་དང་འཆད་པར་འགྱུར་བའི་ཕྱག་མཚན་རྣམས་ནི་རིམ་བ་བཞིན་དུ་ཕྱག་གཡས་པར་དང་པོར་སྟེང་ནས་འོག་ཏུ་དང་གཡོན་པར་འོག་ནས་སྟེང་དུ་རིག་པར་བྱའོ། །རྩ་བ་དང་གཡས་པ་དང་གཡོན་པའི་རིམ་པས་ཞལ་གྱི་ཁ་དོག་གསུམ་ཡང་རིག་པར་བྱའོ། །རིན་ཆེན་འབྱུང་ལྡན་ནི་སེར་པོ་སྟེ་སེར་པོ་དང་ནག་པོ་དང་དམར་པོའི་ཞལ་ཅན་ནོར་བུ་དང་རྡོ་རྗེ་དང་འཁོར་ལོ་དང་དྲིལ་བུ་དང་པདྨ་སེར་པོ་དང་རལ་གྲི་འཛིན་པའོ། །སྣང་བ་མཐའ་ཡས་ནི་དམར་པོ་དང་ནག་པོ་དང་དཀར་བའི་ཞལ་ཅན་ཕྱག་གཡོན་
པས་དྲིལ་བུ་དང་བཅས་པའི་པདྨ་དམར་པོའི་ཡུ་བ་ཐུགས་ཀར་བཟུང་བ་ཕྱག་གཡས་པས་ཁ་འབྱེད་པ་སྟེ་གཞན་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང་རལ་གྲི་འཛིན་པའོ། །དོན་ཡོད་གྲུབ་པ་ནི་ལྗང་གུ་སྟེ་ལྗང་གུ་དང་ནག་པོ་དང་དཀར་པོའི་ཞལ་ཅན་རལ་གྲི་དང་སྣ་ཚོགས་རྡོ་རྗེ་དང་འཁོར་ལོ་དང་དྲིལ་བུ་དང་པདྨ་ལྗང་གུ་དང་ནོར་བུ་འཛིན་པའོ། །དེ་བཞིན་གཤེགས་པ་ལྔ་པོ་འདི་དག་དང་འཆད་པར་འགྱུར་བའི་ཀུན་དུ་བཟང་པོའི་བར་ནི་རལ་བའི་ཐོར་ཅོག་དང་རིན་པོ་ཆེའི་ཅོད་པན་ཅན་རྣམ་པ་སྣ་ཚོགས་པའི་རིན་པོ་ཆེའི་རྒྱན་གྱིས་བརྒྱན་པའོ། །སྤྱན་མ་ནི་རྣམ་པར་སྣང་མཛད་དང་མཚུངས་པ་སྟེ། འོན་ཀྱང་པདྨ་དཀར་པོའི་གནས་སུ་ཨུཏྤལ་དཀར་པོའོ། །མཱ་མ་ཀཱི་ནི་མི་བསྐྱོད་པ་དང་མཚུངས་པ་སྟེ་འོན་ཀྱང་པདྨའི་གནས་སུ་ཨུཏྤལ་སྔོ་དམར་རོ། །གོས་དཀར་མོ་ནི་སྣང་བ་མཐའ་ཡས་དང་མཚུངས་པའོ། །སྒྲོལ་མ་ནི་དོན་ཡོད་གྲུབ་པ་དང་མཚུངས་པ་སྟེ། སྣ་ཚོགས་རྡོ་རྗེ་དང་འཁོར་ལོ་དང་ཨུཏྤལ་སྔོ་སེར་དང་དྲིལ་བུ་དང་རིན་པོ་ཆེ་དང་རལ་གྲི་འཛིན་པའོ། །རིམ་པ་གཉིས་པ་ལ་མེའི་མཚམས་སུ་གཟུགས་རྡོ་རྗེ་མ་སྤྱན་མ་ལྟ་བུ་སྟེ་འོན་ཀྱང་ཕྱག་དང་པོ་དག་གིས་མེ་ལོང་དམར་པོ་འཛིན་པའོ། །བདེན་བྲལ་དུ་སྒྲ་རྡོ་རྗེ་མ་སེར་མོ་སེར་པོ་དང་ནག་པོ་དང་དཀར་པོའི་ཞལ་ཅན་རྩ་བའི་ཕྱག་གཉིས་ཀྱིས་པི་ཝང་སྔོན་པོ་བསྒྲེང་བ་སྟེ་ཕྱག་ལྷག་མ་རྣམས་ཀྱིས་རྡོ་རྗེ་དང་ཨུཏྤལ་སྔོན་པོ་དང་རིན་པོ་ཆེ་དང་རལ་གྲི་འཛིན་པའོ། །རླུང་དུ་དྲི་རྡོ་རྗེ་མ་གོས་དཀར་མོ་ལྟ་བུ་རྩ་བའི་ཕྱག་དག་གིས་དྲིའི་དུང་ཆོས་སེར་པོའོ། །དབང་ལྡན་དུ་རོ་རྡོ་རྗེ་མ་ལྗང་གུ་ལྡན་གུ་དང་ནག་པོ་དང་དཀར་བའི་ཞལ་ཅན་ཕྱག་དང་པོ་དག་གིས་རོའི་སྣོད་དམར་པོ་འཛིན་པ་སྟེ་ལྷག་མ་རྣམས་ཀྱིས་རྡོ་རྗེ་དང་འཁོར་ལོ་དང་རིན་པོ་ཆེ་དང་རལ་གྲི་འཛིན་པའོ། །རིམ་པ་གསུམ་པའི་ཤར་གྱི་སྣམ་བུ་ལ་བྱམས་པ་དང་སའི་སྙིང་པོའོ། །ལྷོར་ཕྱག་ན་རྡོ་རྗེ་དང་ནམ་མཁའི་སྙིང་བོའོ། །ནུབ་ཏུ་འཇིག་རྟེན་དབང་ཕྱུག་དང་འཇམ་པའི་དབྱངས་སོ། །བྱང་དུ་སྒྲིབ་པ་ཐམས་ཅད་རྣམ་པར་སེལ་བ་དང་ཀུན་དུ་བཟང་པོའོ། །བརྒྱད་པོ་འདི་རྣམས་ནི་རྩ་བའི་རིགས་ཀྱི་བདག་པོ་དང་མཚུངས་པ་སྟེ་འོན་ཀྱང་བྱམས་པ་ནི་རྩ་བའི་ཕྱག་གིས་ཡལ་ག་དང་བཅས་པའི་ཀླུ་ཤིང་གི་མེ་ཏོག་འཛིན་པའོ། །ཤར་
ལ་སོགས་པའི་སྒོ་དང་མེ་ལ་སོགས་པའི་མཚམས་དང་སྟེང་དང་འོག་ཏུ་ཡང་རིམ་པ་ཇི་ལྟ་བ་བཞིན་དུ་ཁྲོ་བོ་བཅུའོ། །དེ་ལ་གཤིན་རྗེ་གཤེད་ནག་པོ་ནག་པོ་དང་དཀར་པོ་དང་དམར་པོའི་ཞལ་ཅན་རྡོ་རྗེ་ཐོ་བ་དང་འཁོར་ལོ་དང་རྡོ་རྗེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་བའོ། །ཤེས་རབ་མཐར་བྱེད་དཀར་པོ་དཀར་པོ་དང་ནག་པོ་དང་དམར་པོའི་ཞལ་ཅན་རྡོ་རྗེ་དང་རྡོ་རྗེས་མཚན་པའི་དབྱུག་པ་དཀར་པོ་དང་རལ་གྲི་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །པདྨ་མཐར་བྱེད་དམར་པོ་དམར་པོ་དང་ནག་པོ་དང་དཀར་པོའི་ཞལ་ཅན་པདྨ་དམར་པོ་དང་རལ་གྲི་དང་གཏུན་ཤིང་དང་དྲིལ་བུ་དང་དགྲ་སྟ་དང་ཞགས་པ་འཛིན་པའོ། །བགེགས་མཐར་བྱེད་སྔོན་པོ་སྔོན་པོ་དང་དཀར་པོ་དང་དམར་པོའི་ཞལ་ཅན་སྣ་ཚོགས་རྡོ་རྗེ་དང་འཁོར་ལོ་དང་གཏུན་ཤིང་དང་ཞགས་པ་དང་བཅས་པའི་སྡིགས་མཛུབ་དང་དྲིལ་བུ་དང་དགྲ་སྟ་འཛིན་པའོ། །མི་གཡོ་བ་སྔོན་པོ་སྔོན་པོ་དང་དཀར་པོ་དང་དམར་པོའི་ཞལ་ཅན་རལ་གྲི་དང་རྡོ་རྗེ་དང་འཁོར་ལོ་དང་སྡིགས་མཛུབ་དང་དགྲ་སྟ་དང་ཞགས་པ་འཛིན་པའོ། །འདོད་པའི་རྒྱལ་པོ་སྔོན་པོ་སྔོན་པོ་དང་དཀར་པོ་དང་དམར་པོའི་ཞལ་ཅན་རྩ་བའི་ཕྱག་གིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛད་ཅིང་གཞན་རྣམས་ཀྱིས་རྡོ་རྗེ་དང་རལ་གྲི་དང་ཞགས་པ་དང་ལྕགས་ཀྱུ་འཛིན་པའོ། །དབྱུག་སྔོན་ཅན་ནག་པོ་ནག་པོ་དང་དཀར་པོ་དང་དམར་པོའི་ཞལ་ཅན་རྡོ་རྗེས་མཚན་པའི་དབྱུག་པ་སྔོན་པོ་དང་རལ་གྲི་དང་འཁོར་ལོ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་དགྲ་སྟ་འཛིན་པའོ། །སྟོབས་པོ་ཆེ་ནག་པོ་ནག་པོ་དང་དཀར་པོ་དང་དམར་པོའི་ཞལ་ཅན་རྡོ་རྗེས་མཚན་པའི་དབྱུག་པ་དང་རལ་གྲི་དང་འཁོར་ལོ་དང་ཐུགས་ཀར་སྡིགས་མཛུབ་ཞགས་པ་དང་བཅས་པ་དང་པདྨ་དང་དགྲ་སྟ་འཛིན་པའོ། །གཙུག་ཏོར་འཁོར་ལོས་སྒྱུར་བ་ནག་པོ་ནག་པོ་དང་དཀར་པོ་དང་དམར་པོའི་ཞལ་ཅན་རྩ་བའི་ཕྱག་དག་གིས་གཙུག་ཏོར་གྱི་ཕྱག་རྒྱ་སྤྱི་བོར་འཛིན་པ་ལྷག་མ་རྣམས་ཀྱིས་རྡོ་རྗེ་དང་པདྨ་དང་སྡིགས་མཛུབ་དང་རལ་གྲི་འཛིན་པ་སྟེ། ཕྱག་གཉིས་ཐལ་མོ་གན་རྐྱང་དུ་མཉམ་པར་བརྐྱང་བའི་སྲིན་ལག་གཉིས་ཀྱི་སེན་མོའི་སྟེང་དུ་མཐེ་བོང་གཉིས་ཀྱི་སེན་
མོས་མནན་ཏེ་མཐེ་ཆུང་གཉིས་བརྐྱང་བའོ། །དེ་བཞིན་དུ་གུང་མོ་གཉིས་ཀྱི་སེན་མོ་ཡང་དག་པར་རྩེ་སྤྲད་ལ་མཛུབ་མོ་དབུས་སུ་གཉིས་ཀའི་རྣམ་པ་ནི་ཀུན་དུ་སྣང་བ་ཞེས་བྱ་བ་གཙུག་ཏོར་གྱི་ཕྱག་རྒྱའོ་ཞེས་ཁ་ཅིག་གི་སྟེ་འགའ་ཞིག་ནི་གཞན་ནོ། །གནོད་མཛེས་ནག་པོ་ནག་པོ་དང་དཀར་པོ་དང་དམར་པོའི་ཞལ་ཅན་རྡོ་རྗེ་དང་འཁོར་ལོ་དང་རིན་པོ་ཆེ་དང་ཐུགས་ཀར་ཞགས་པ་དང་བཅས་པའི་སྡིགས་མཛུབ་དང་པདྨ་དང་རལ་གྲི་འཛིན་པའོ། །མི་བསྐྱོད་པ་ལ་སོགས་པ་འདི་རྣམས་ནི་སྣ་ཚོགས་པདྨའི་སྟེང་དུ་གོ་རིམས་ཇི་ལྟ་བ་བཞིན་དུ་རྡོ་རྗེ་རྩེ་ལྔ་པ་དང་འཁོར་ལོ་དང་ཆ་དགུ་པའི་རིན་པོ་ཆེ་མ་ར་ཀ་ཏ་དང་པདྨ་དམར་པོ་དང་སྣ་ཚོགས་རྡོ་རྗེ་དང་འཁོར་ལོ་དང་རྡོ་རྗེ་དང་པདྨ་དང་སྣ་ཚོགས་རྡོ་རྗེ་དང་འཁོར་ལོ་དང་རྡོ་རྗེ་དང་པདྨ་དང་སྣ་ཚོགས་རྡོ་རྗེ་དང་ཀླུ་ཤིང་གི་མེ་ཏོག་དང་འཁོར་ལོ་དང་རྡོ་རྗེ་དང་རིན་པོ་ཆེ་དང་པདྨ་དང་རྡོ་རྗེ་དང་སྣ་ཚོགས་རྡོ་རྗེ་དང་རྡོ་རྗེ་ཐོ་བ་དང་རྡོ་རྗེ་དང་ཆུ་སྐྱེས་དམར་པོ་དང་སྣ་ཚོགས་རྡོ་རྗེ་དང་རལ་གྲི་དང་རྡོ་རྗེ་ཁུ་ཚུར་དང་དབྱུག་པ་སྔོན་པོ་དང་དབྱུག་པ་ནག་པོ་དང་རྡོ་རྗེ་དང་རྡོ་རྗེ་ལ་གནས་པའི་དབྱུག་པ་དང་ཉི་མ་དང་ཟླ་བ་ལ་བཞུགས་པའི་ཞལ་གསུམ་ཕྱག་དྲུག་པའོ། །ཡང་གཞན་ལས་ནི་ལྷ་རྣམས་ཀྱི་རང་རང་གི་མདོག་ལྟ་བུའི་རིན་པོ་ཆེ་ལས་བྱས་པའོ། །དེ་ལ་རྣམ་པར་སྣང་མཛད་དང་ལྷ་མོ་རྣམས་དང་བྱང་ཆུབ་སེམས་དཔའ་རྣམས་ནི་ཟླ་བ་ལ་གནས་པ་སྟེ་གཞན་རྣམས་ནི་ཉི་མ་ལ་གནས་པའོ། །མི་བསྐྱོད་པ་ལ་སོགས་པ་རྣམས་ནི་རྡོ་རྗེ་སྐྱིལ་ཀྲུང་ཅན་ནོ། །ཁྲོ་བོ་རྣམས་ནི་ཞབས་གཡས་བརྐྱང་བ་གཡོན་བསྐུམ་པ་ཞལ་སོ་སོ་ལ་དམར་ལ་ཟླུམ་པའི་སྤྱན་གསུམ་གསུམ་དང་ལྡན་པ་འབར་ཞིང་སྒྲ་སྒྲོགས་པ་ཤིན་ཏུ་འཇིགས་སུ་རུང་བ་སྲུང་བའི་འཁོར་ལོར་བཤད་པའི་རྣམ་པར་འགྱུར་བའི་གཟུགས་ལ་སོགས་པའི་ཁྱད་པར་དང་ལྡན་པའོ། །འདིར་ནི་འཁོར་ལོའི་དབང་ཕྱུག་ཁོ་ན་ཡུམ་དང་བཅས་པ་སྟེ་གནོད་མཛེས་ཀྱི་མཐར་ཐུག་པའི་ལྷ་གཞན་རྣམས་ནི་ཡུམ་མེད་པའོ། །སྲུང་བའི་འཁོར་ལོ་ལ་གནས་པའི་གཤིན་རྗེ་གཤེད་ལ་སོགས་པ་ནི་རང་འོད་ཀྱི་ཤེས་རབ་དང་བཅས་པ་སྟེ། དེ་ཡང་གོ་རིམས་བཞིན་དུ་རྡོ་རྗེ་རོ་ལངས་མ་དང་གཞན་གྱིས་མི་ཐུབ་མ་དང་ཁྲོ་གཉེར་ཅན་མ་དང་རལ་གཅིག་མ་དང་སྣ་ཚོགས་རྡོ་རྗེ་མ་དང་
སྣ་ཚོགས་རིན་ཆེན་མ་དང་སྣ་ཚོགས་པདྨ་དང་སྣ་ཚོགས་ལས་མ་དང་ནམ་མཁའི་རྡོ་རྗེ་མ་དང་ས་འཛིན་མ་རྣམས་སོ། །མི་བསྐྱོད་པ་ལ་ཐུགས་ཀར་ཡེ་ཤེས་སེམས་དཔའ་ཕྱག་གཉིས་པ་དམར་པོ་ཤེས་རབ་དང་བཅས་པ་དེའི་ཐུགས་ཀར་ཧཱུཾ་ནག་པོའོ། །རྣམ་པར་སྣང་མཛད་ཀྱི་ཐུགས་ཀར་ཨོཾ་དང་རིན་ཆེན་དབང་པོ་ལ་སྭཱ་དང་སྣང་བ་མཐའ་ཡས་ལ་ཨཱཿདང་དོན་ཡོད་གྲུབ་པ་ལ་ཧཱ་དང༌། སྤྱན་མ་ལ་སོགས་པའི་ལྷ་མོ་རྣམས་ལ་ལཱཾ་མཱཾ་པཱཾ་ཏཱཾ་ཛཿཧཱུཾ་བཾ་ཧོཿདང་རེག་བྱ་རྡོ་རྗེ་མ་ལ་ཁཾ་དང་བྱམས་པ་ལ་སོགས་པ་བརྒྱད་བོ་རྣམས་ལ་མཻཾ་ཐླིཾ་ཨོཾ་ཨོཾ་ཨོཾ་ཧཱུཾ་ཨོཾ་སཾ་དང་ཁྲོ་བོ་བཅུ་པོ་རྣམས་ལ་ཧཱུཾ་དོ། །མི་བསྐྱོད་པ་ལ་སོགས་པ་རྣམས་ཀྱི་སྙིང་པོའི་སྔགས་ནི་འཇམ་པའི་རྡོ་རྗེའི་དཀྱིལ་འཁོར་དུ་གསུངས་པ་ཉིད་དེ་བྱམས་པ་ལ་སོགས་པ་རྣམས་ཀྱི་ནི་ཨོཾ་ཨཱཿམཻ་ཏྲེ་ཡ་མཻཾ་ཧཱུཾ་ཨོཾ་ཨཱཿཀཥི་ཏི་གརྦྷ་ཐླིཾ་ཧཱུཾ། ཨོཾ་ཨཱཿབཛྲ་པཱ་ཎི་ཨོཾ་ཧཱུཾ། ཨོཾ་ཨཱཿཁ་གརྦྷ་ཨོཾ་ཧཱུཾ། ཨོཾ་ཨཱཿ་ལོ་ཀི་ཤྭ་ར་ཨོཾ་ཧཱུཾ། ཨོཾ་ཨཱཿམྙྫུ་གྷོ་ཥ་ཧཱུཾ་ཧཱུཾ། ཨོཾ་ཨཱཿསརྦ་ནི་བ་ར་ཎ་བིསྐ་མྦྷི་ནི་ཨོཾ་ཧཱུཾ། ཨོཾ་ཨཱཿས་མནྟ་བྷ་དྲ་སཾ་ཧཱུཾ། ཨོཾ་ཨཱཿཨ་ཙ་ལ་ཧཱུཾ་ཧཱུཾ། ཨོཾ་ཨཱཿ་ཊཀཀྐི་རཱ་ཛ་ཧཱུཾ་ཧཱུཾ། ཨོཾ་ཨཱཿནཱི་ལ་དཎྜ་ཧཱུཾ་ཧཱུཾ། ཨོཾ་ཨཱཿམ་ཧཱ་བ་ལ་ཧཱུཾ་ཧཱུཾ། ཨོཾ་ཨཱཿཨུཥྞཱི་ཥ་ཧཱུཾ་ཧཱུཾ། ཨོཾ་ཨཱཿསུམྦྷ་རཱ་ཛ་ཧཱུཾ་ཧཱུཾ། གང་གི་ཚེ་མི་བསྐྱོད་པ་དང་དབྱེར་མེད་པའི་རྡོ་རྗེ་སེམས་དཔའ་འཁོར་ལོའི་དབང་པོར་གྱུར་པ་དེའི་ཚེ་འདིའོ། །ཨོཾ་ཨཱཿཧཱུཾ་ཧཱུཾ་ཞེས་པའི་སྔགས་སོ། །རིགས་ཀྱི་བདག་པོ་ནི་མི་བསྐྱོད་པ་དང་ཀུན་དུ་བཟང་པོ་དག་གི་གོང་དུ་བརྗོད་པའི་རྡོ་རྗེ་སེམས་དཔའ་སྟེ་འོན་ཀྱང་རྡོ་རྗེ་དང་འཁོར་ལོ་དང་པདྨ་དང་དྲིལ་བུ་དང་ནོར་བུ་དང་རལ་གྲི་འཛིན་པ་རང་དང་འདྲ་བའི་རྡོ་རྗེ་དབྱིངས་ཀྱི་དབང་ཕྱག་མས་ཡང་དག་པར་འཁྱུད་པའོ། །དེ་བཞིན་གཤེགས་པ་རྣམས་དང་མཱ་མ་ཀཱི་དང་ཕྱག་ན་རྡོ་རྗེ་དང་འཇམ་པའི་དབྱངས་དང་གཙུག་ཏོར་འཁོར་ལོས་སྒྱུར་བ་དང་གནོད་མཛེས་རྒྱལ་པོ་རྣམས་ཀྱི་མི་བསྐྱོད་པའོ། །སྤྱན་མ་དང་གཟུགས་རྡོ་རྗེ་མ་དང་བྱམས་པ་དང་སའི་སྙིང་པོ་དང་གཤིན་རྗེ་མཐར་བྱེད་དང་མི་གཡོ་བ་རྣམས་ཀྱི་རྣམས་པར་སྣང་མཛད་དོ། །སྒྲ་རྡོ་རྗེ་མ་དང་ནམ་མཁའི་སྙིང་པོ་དང་ཤེས་རབ་མཐར་བྱེད་དང་འདོད་པའི་རྒྱལ་པོ་རྣམས་ཀྱི་རིན་ཆེན་དབང་པོའོ། །གོས་དཀར་མོ་དང་དྲི་རྡོ་རྗེ་མ་དང་
འཇིག་རྟེན་དབང་ཕྱུག་མ་དང་པདྨ་མཐར་བྱེད་དང་དབྱུག་སྔོན་ཅན་རྣམས་ཀྱི་སྣང་བ་མཐའ་ཡས་སོ། །སྒྲོལ་མ་དང་རོ་རྡོ་རྗེ་དང་རེག་བྱ་རྡོ་རྗེ་མ་དང་རྣམ་པར་སེལ་བ་དང་བགེགས་མཐར་བྱེད་དང་སྟོབས་པོ་ཆེ་རྣམས་ཀྱི་དོན་ཡོད་གྲུབ་པའོ། །རྒྱས་འདེབས་ཀྱི་དེ་བཞིན་གཤེགས་པ་ཐམས་ཅད་ནི་རང་འོད་ཀྱི་ཡུམ་དང་བཅས་པ་འཁོར་ལོས་སྒྱུར་བའི་གཟུགས་ཅན་ནོ། །དཔལ་ཀུན་དུ་ཁ་སྦྱོར་དུ་གསུངས་པའི་རྡོ་རྗེ་སེམས་དཔའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྲུང་བའི་འཁོར་ལོའི་ལྟེ་བར་རླུང་དང་མེ་དང་ཆུ་དང་སའི་དཀྱིལ་འཁོར་དང་རི་རབ་ཀྱི་སྟེང་དུ་ཆོས་འབྱུང་གི་དབུས་སུ་གཞལ་ཡས་ཁང་ངོ༌། །སྲུང་བའི་འཁོར་ལོ་ལ་གཤིན་རྗེ་གཤེད་ནི་ཕྱག་གཡས་པ་གསུམ་གྱིས་རྡོ་རྗེ་ལྕགས་ཀྱུ་དང་འཁོར་ལོ་དང་རྡོ་རྗེ་དང་གཡོན་བ་གསུམ་གྱིས་ཐུགས་ཀར་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་དགྲ་སྟ་འཛིན་པའོ། །ཤེས་རབ་མཐར་བྱེད་ནི་རྡོ་རྗེ་ཞགས་པ་དང་རྡོ་རྗེ་དང་རལ་གྲི་དང་ཐུགས་ཀར་སྡིགས་མཛུབ་དང་དྲིལ་བུ་དང་དགྲ་སྟའོ། །པདྨ་མཐར་བྱེད་ནི་ལྕགས་སྒྲོག་དང་པདྨ་དང་རལ་གྲི་དང་དྲིལ་བུ་དང་དགྲ་སྟ་དང་ཞགས་པའོ། །བགེགས་དགྲ་ནི་རྡོ་རྗེ་དྲིལ་བུ་དང་སྣ་ཚོགས་རྡོ་རྗེ་དང་འཁོར་ལོ་དང་སྡིགས་མཛུབ་དང་བཅས་པའི་ཞགས་པ་དང་གཏུན་ཤིང་དང་དགྲ་སྟའོ། །མི་གཡོ་བ་ནི་རལ་གྲི་དང་འཁོར་ལོ་དང་རྡོ་རྗེ་དང་སྡིགས་མཛུབ་དང་དགྲ་སྟ་དང་ཞགས་བའོ། །འདོད་པའི་རྒྱལ་པོ་ནི་གཡས་པ་དང་ཅིག་ཤོས་ཀྱི་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་དང་ལྕགས་ཀྱུ་དང་རལ་གྲི་དང་རྡོ་རྗེ་ཞགས་པའོ། །དབྱུག་སྔོན་ཅན་ནི་རྡོ་རྗེས་མཚན་པའི་དབྱུག་པ་སྔོན་པོ་དང་རལ་གྲི་དང་འཁོར་ལོ་དང་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །སྟོབས་པོ་ཆེ་ནི་རྩེ་གསུམ་དང་རལ་གྲི་དང་འཁོར་ལོ་དང་ཐུགས་ཀར་སྡིགས་མཛུབ་དང་བཅས་པའི་ཞགས་པ་དང་པདྨ་དང་དགྲ་སྟའོ། །གཙུག་ཏོར་འཁོར་ལོས་སྒྱུར་བ་ནི་གཡས་པ་དང་ཅིག་ཤོས་ཀྱི་ཕྱག་གཉིས་ཀྱིས་གཙུག་ཏོར་གྱི་ཕྱག་རྒྱ་དང་འཁོར་ལོ་དང་པདྨ་དང་སྡིགས་མཛུབ་དང་རལ་གྲིའོ། །གནོད་མཛེས་ནི་རྡོ་རྗེ་དང་འཁོར་ལོ་དང་རིན་པོ་ཆེ་དང་ཐུགས་ཀར་སྡིགས་མཛུབ་དང་བཅས་པའི་ཞགས་པ་དང་པདྨ་དང་རལ་གྲིའོ། །བཅུ་པོ་འདི་རྣམས་
ནི་དབུ་ལ་ཐོད་པ་ལྔས་བརྒྱན་པ་འཁོར་ལོ་ལ་སོགས་པའི་ཕྱག་རྒྱ་དང་ལྡན་པ་མི་མགོའི་ཕྲེང་བ་མགུལ་ལ་འཕྱད་བ་གོ་རིམས་ཇི་ལྟ་བ་བཞིན་དུ་རྣམ་པར་སྣང་མཛད་དང་རིན་ཆེན་དབང་པོ་དང་འོད་དཔག་མེད་དང་དོན་ཡོད་གྲུབ་པ་དང་རྟག་པ་དང་རིན་ཆེན་དབང་པོ་དང་འོད་དཔག་མེད་དང་དོན་ཡོད་གྲུབ་པ་དང་མི་བསྐྱོད་པ་དང་མི་བསྐྱོད་པས་རྒྱས་བཏབ་པའོ། །གཞལ་ཡས་ཁང་གི་སྙིང་པོར་རྡོ་རྗེ་འཛུམ་པ་དང་བཅས་པ་ཅུང་ཟད་དམར་བའི་མདངས་དང་ལྡན་པའི་སྐུ་མདོག་དཀར་པོ་རལ་པའི་ཐོར་ཅོག་ནག་པོ་ལ་གནས་པའི་ནོར་བུ་དང་སྣ་ཚོགས་རྡོ་རྗེ་དང་དེའི་འོག་ཏུ་གཡོན་ངོས་སུ་གནས་པའི་ཟླ་བ་ཕྱེད་པ་དྲི་མ་མེད་པ་དང་སངས་རྒྱས་ལྔའི་ཅོད་པན་ཅན། དཔྲལ་བའི་སྟེང་དུ་ཐོད་པ་ལྔ་དང་འཁོར་ལོ་དང་རྣ་ཆ་དང་མགུལ་རྒྱན་དང་ལག་གདུབ་དང་སྐ་རགས་དང་ཐལ་ཆེན་རྣམས་ཀྱིས་བརྒྱན་པ་ཞལ་གསུམ་པ་གཡས་པ་དང་ཅིག་ཤོས་ཀྱི་ཞལ་སྔོན་པོ་དང་དམར་པོ་ཞལ་རེ་རེ་ལ་སྤྱན་གསུམ་གསུམ་དང་ལྡན་པ་ཕྱག་དྲུག་པ་རྡོ་རྗེ་དང་དྲིལ་བུས་རྣམ་པར་མཛེས་པའི་ཕྱག་གཉིས་ཀྱིས་རང་དང་འདྲ་བའི་ཤེས་རབ་ལ་འཁྱུད་ཅིང་ཆུ་སྐྱེས་ལ་མཉམ་པར་སྦྱོར་བའི་དགའ་བ་དང་ལྡན་པ་ཕྱག་གཡས་པ་དག་གིས་རལ་གྲི་དང་ལྕགས་ཀྱུ་དག་དང་གཡོན་པ་དག་གིས་ཐོད་པ་དང་ཞགས་པ་འཛིན་པ། ཉི་མའི་འོད་ཀྱི་དཀྱིལ་འཁོར་ཅན་སྣ་ཚོགས་པདྨ་དང་ཐོད་པ་དང་ཟླ་བའི་གདན་ལ་སྐྱིལ་ཀྲུང་ཕྱེད་པས་བཞུགས་པ་གར་གྱི་ཉམས་དགུ་དང་ལྡན་པའོ། །དེའི་ཐུགས་ཀར་སྣ་ཚོགས་ཆུ་སྐྱེས་དང་ཟླ་བ་ལ་ཡེ་ཤེས་སེམས་དཔའ་སྐུ་མདོག་དཀར་དམར་སེམས་དཔའི་སྐྱིལ་ཀྲུང་ཅན་སངས་རྒྱས་ལྔས་སྤྲས་པའི་རིན་པོ་ཆེའི་ཅོད་པན་དང་རིན་པོ་ཆེས་བརྒྱན་པ་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས་རང་དང་འདྲ་བའི་ཤེས་རབ་མ་ལ་འཁྱུད་པ་སྟེ་དེའི་ཐུགས་ཀར་ཏིང་ངེ་འཛིན་སེམས་དཔའི་རང་བཞིན་ཧཱུཾ་ཡིག་ནག་པོའོ། །འདིར་སེམས་དཔའ་གསུམ་གྱི་བདག་ཉིད་རྡོ་རྗེ་འཆང་གི་ཤར་དུ་རྣམ་པར་སྣང་མཛད་དཀར་པོ་ཞི་བ། ཕྱག་བཞི་པ་གཡས་པ་དག་གིས་འཁོར་ལོ་དང་དྲིལ་བུ་གཡོན་པ་དག་གིས་ཐོད་པ་དང་ཞགས་པ་འཛིན་པའོ། །ལྷོར་རིན་ཆེན་དབང་བོ་སེར་པོ་ཕྱག་བཞི་བ་གཡས་པ་དག་གིས་རིན་པོ་ཆེ་དང་ལྕགས་ཀྱུ་གཡོན་
དག་གིས་ཐོད་པ་དང་ཞགས་པའོ། །ནུབ་ཏུ་སྣང་བ་མཐའ་ཡས་དམར་པོ་ཕྱག་བཞི་པ་གཡས་པ་དག་གིས་མདའ་དང་པདྨ། གཡོན་པ་དག་གིས་གཞུ་དང་ཞགས་པའོ། །བྱང་དུ་དོན་ཡོད་གྲུབ་པ་ལྗང་གུ་ཕྱག་བཞི་པ་གཡས་པ་དག་གིས་རྡོ་རྗེ་དང་ལྕགས་ཀྱུ་གཡོན་པ་དག་གིས་དྲིལ་བུ་དང་ཐོད་པའོ། །དབང་ལྡན་དུ་སྤྱན་མ་དཀར་མོ་ཕྱག་བརྒྱད་མ་གཡས་པ་རྣམས་ཀྱིས་འཁོར་ལོ་དང་རྡོ་རྗེ་དང་རལ་གྲི་དང་མདའ་དང༌། གཡོན་པ་རྣམས་ཀྱིས་ཐོད་པ་དང་དྲིལ་བུ་དང་ཞགས་པ་དང་གཞུའོ། །མེར་མཱ་མ་ཀཱི་སྔོན་མོ་ཕྱག་བཅུ་གཉིས་པ་གཡས་པ་རྣམས་ཀྱིས་མདའ་དང་རལ་གྲི་དང་རྡོ་རྗེ་དང་འཁོར་ལོ་དང་རིན་པོ་ཆེ་དང་པདྨ་དང༌། གཡོན་པ་རྣམས་ཀྱིས་གཞུ་དང་ལྕགས་ཀྱུ་དང་དྲིལ་བུ་དང་ཞགས་པ་དང་ཐོད་པ་དང་ཁ་ཊྭཱཾ་གའོ། །བདེན་བྲལ་དུ་གོས་དཀར་མོ་དམར་པོ་ཕྱག་བརྒྱད་མ་གཡས་པ་རྣམས་ཀྱིས་མདའ་དང་པདྨ་དང་རལ་གྲི་དང་རྡོ་རྗེ། གཡོན་པ་རྣམས་ཀྱིས་གཞུ་དང་ཐོད་པ་དང་ཞགས་པ་དང་དྲིལ་བུའོ། །རླུང་དུ་སྒྲོལ་མ་ལྗང་གུ་ཕྱག་བརྒྱད་མ་གཡས་པ་རྣམས་ཀྱིས་ཨུཏྤལ་དམར་པོ་དང་རལ་གྲི་དང་ལྕགས་ཀྱུ་དང་མདའ། གཡོན་པ་རྣམས་ཀྱིས་འཁོར་ལོ་དང་ཞགས་པ་དང་ཐོད་པ་དང་གཞུའོ། །རིམ་པ་གཉིས་པ་ལ་ཤར་ཕྱོགས་སུ་རྡོ་རྗེ་དྲག་མོ་དཀར་མོ་མདའ་དང་ལྕགས་ཀྱུ་དང་གཞུ་དང་བྱང་ཆུབ་ཀྱི་སེམས་ཀྱིས་གང་བའི་ཐོད་པ་ཅན་ནོ། །ལྷོར་གཟུགས་རྡོ་རྗེ་མ་སེར་མོ་རྡོ་རྗེ་དང་མདུང་དང་ཞགས་པ་དང་ཁྲག་གིས་གང་བའི་ཐོད་པ་ཅན་ནོ། །ནུབ་ཏུ་འདོད་ཆགས་རྡོ་རྗེ་མ་དམར་མོ་རལ་གྲི་དང་རྡོ་རྗེ་དང་དྲི་ཆུས་གང་བའི་ཐོད་པ་དང་དྲིལ་བུ་ཅན་ནོ། །བྱང་དུ་རྡོ་རྗེ་ཞི་བ་མ་ལྗང་གུ་ཐལ་ཆར་དང་བ་དན་གསུམ་པ་དང་རྡོ་རྗེས་མཚན་པའི་ཁ་ཊྭཱཾ་ག་དང་ཐོད་པ་ཅན་ནོ། །དབང་ལྡན་དུ་རྡོ་རྗེ་གནོད་སྤྱིན་མོ་དཀར་སེར་དབྱུག་པ་དང་ཨུཏྤལ་དང་ཐོད་པ་དང་ཌ་མ་རུ་ཅན་ནོ། །མེར་རྡོ་རྗེ་མཁའ་འགྲོ་མ་དཀར་སེར་པདྨ་དང་མེ་ལོང་དང་རྐང་མར་གྱིས་གང་བའི་ཐོད་པ་དང་དགྲ་སྟ་ཅན་ནོ། །བདེན་བྲལ་དུ་སྒྲ་རྡོ་རྗེ་མ་སྔོ་དམར་ཤཀྟི་དང་དུང་དང་འཁོར་ལོ་དང་ཁྲག་གིས་གང་བའི་ཐོད་པ་ཅན་ནོ། །རླུང་དུ་ས་རྡོ་རྗེ་མ་དཀར་ལྗང་པདྨ་དང་རྡོ་རྗེ་དང་བདུད་རྩི་དང་སྒྲོན་མས་གང་བའི་
ཐོད་པ་མི་ལྤགས་ཀྱིས་གཡོགས་པ་དང་དྲིལ་བུ་ཅན་ནོ། །བརྒྱད་པོ་འདི་རྣམས་ནི་ཕྱག་བཞི་མ་ཕྱག་དང་པོ་གཉིས་ནི་གཡས་པ་དག་གིས་ཏེ་གཞན་གཉིས་ནི་གཡོན་པ་དག་གིས་འཛིན་པའོ། །རིམ་པ་གསུམ་པ་ལ་ཤར་ཕྱོགས་སུ་བཞད་མ་དམར་མོ་ཕྱག་གཉིས་རྡོ་རྗེ་དྲིལ་བུ་དང་བཅས་པས་མངོན་པར་བཤད་པའི་ཚུལ་ཅན་ནོ། །ལྟོར་སྒེག་མོ་སྔོན་མོ་ཕྱག་གཉིས་རྡོ་རྗེ་དང་དྲིལ་བུ་འཛིན་པས་བསྙེམས་པ་དང་བཅས་པར་མངོན་པར་སྒེག་པའི་ཚུལ་ཅན་ནོ། །ནུབ་ཏུ་གླུ་མ་སེར་མོ་ཅུང་ཟད་གཡོ་ཞིང་སྒེག་པའི་ཕྱག་གཉིས་ཏིང་ཏིང་ཤགས་འཛིན་པའོ། །བྱང་དུ་གར་མ་ལྗང་གུ་པད་ཀོར་གྱི་ཚུལ་ལ་སོགས་པའི་གར་གྱིས་གཡོ་བའི་ཕྱག་གཉིས་ཀྱིས་རྡོ་རྗེ་རྩེ་གསུམ་པ་དང་རྡོ་རྗེ་དྲིལ་བུ་འཛིན་པའོ། །དབང་ལྡན་དུ་གླིང་བུ་མ་དམར་མོའོ། །མེར་པི་ཝང་མ་སེར་མོ་ཕྱག་གཉིས་ཀྱིས་སྒེག་པའི་ཉམས་ཀྱིས་སྐུ་ཅུང་ཟད་གཡོ་བའོ། །བདེན་བྲལ་དུ་མུ་ཀུན་དམ་དཀར་མོའོ། །རླུང་དུ་རྫ་རྡ་མ་དུ་བའི་མདོག་ཅན་ཏེ། བཞི་པོ་འདི་རྣམས་ནི་ཕྱག་གཉིས་ཀྱིས་རང་རང་གི་རོལ་མོ་སྒྲོགས་པའོ། །དེ་ནས་ཕྱིའི་སྣམ་བུ་ལ་མེ་མཚམས་སུ་མེ་ཏོག་མ་དཀར་མོ་གཡོན་པ་དང་ཅིག་ཤོས་ཀྱི་ཕྱག་གིས་མེ་ཏོག་གི་ཕྲེང་བ་དང་འཁོར་ལོ་འཛིན་པའོ། །བདེན་བྲལ་དུ་བདུག་སྦོས་མ་དུ་བའི་མདོག་ཅན་གཡོན་པ་དང་ཅིག་ཤོས་ཀྱི་ཕྱག་གིས་བདུག་སྦོས་ཀྱི་སྣོད་རིན་པོ་ཆེ་འཛིན་པའོ། །རླུང་དུ་མར་མེ་མ་གསེར་གྱི་མདོག་ཅན་གཡོན་པ་དང་གཡས་པའི་ཕྱག་གིས་མར་མེའི་མཆོད་སྡོ་དང་པདྨ་འཛིན་པའོ། །དབང་ལྡན་དུ་དྲི་ཆབ་མ་དམར་མོ་གཡོན་པ་དང་ཅིག་ཤོས་ཀྱི་ཕྱག་གིས་དྲིའི་དུང་ཆོས་དང་རལ་གྲི་འཛིན་པའོ། །ཤར་དུ་མེ་ལོང་མ་དཀར་མོ་ཕྱག་གཉིས་ཀྱིས་མེ་ལོང་འཛིན་པའོ། །ལྷོར་རོ་མ་དམར་མོ་ཕྱག་གཉིས་ཀྱིས་རོའི་སྣོད་འཛིན་པའོ། །ནུབ་ཏུ་རེག་བྱ་མ་ལྗང་གུ་ཕྱག་གཉིས་ཀྱིས་སྣ་ཚོགས་པའི་གོས་འཛིན་པའོ། །བྱང་དུ་ཆོས་མ་དཀར་མོ་ཕྱག་གཉིས་ཀྱིས་ཆོས་འབྱུང་དཀར་པོ་འཛིན་པའོ། །འདི་རྣམས་དང་རྣམ་པར་སྣང་མཛད་ལ་སོགས་པ་ལྷ་རྣམས་ནི་ཞལ་གཅིག་སྤྱན་གསུམ་པ་རལ་པའི་ཅོད་པན་ནག་པོ་ལ་ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ། ལྷའི་ན་བཟའ་གྱོན་བསྐྱིལ་ཀྲུང་ཕྱེད་པའི་གར་གྱིས་བཞུགས་པའོ།།
སྒོ་རྣམས་ལ་ཤར་དུ་རྡོ་རྗེ་ལྕགས་ཀྱུ་མ་ནམ་མཁའ་ལྟར་སྡོ་བསངས་ཞལ་གཡས་པ་དང་ཅིག་ཤོས་ནག་པོ་དང་དཀར་པོ་ཕྱག་དྲུག་གི་གཡས་པ་རྣམས་ཀྱིས་ལྕགས་ཀྱུ་དང་རལ་གྲི་དང་འཁོར་ལོ་གཡོན་པ་རྣམས་ཀྱིས་ཞགས་པ་དང་སྡིགས་མཛུབ་དང་དྲིལ་བུ་འཛིན་པའོ། །ལྷོར་རྡོ་རྗེ་ཞགས་པ་མ་དཀར་སེར་ཞལ་གཡས་པ་དང་ཅིག་ཤོས་ནག་པོ་དང་དམར་པོ་ཕྱག་དྲུག་གི་གཡས་པ་རྣམས་ཀྱིས་ཞགས་པ་དང་རྡོ་རྗེ་དང་རལ་གྲི། གཡོན་པ་རྣམས་ཀྱིས་འཁོར་ལོ་དང་དྲིལ་བུ་དང་སྡིགས་མཛུབ་དང་བཅས་པའི་ཞགས་པའོ། །ནུབ་ཏུ་རྡོ་རྗེ་ལྕགས་སྒྲོག་མ་དམར་མོ་ཞལ་གཡས་པ་དང་ཅིག་ཤོས་ནག་པོ་དང་དཀར་པོ་ཕྱག་དྲུག་གི་གཡས་པ་རྣམས་ཀྱིས་ལྕགས་སྒྲོག་དང་རྡོ་རྗེ་དང་རལ་གྲི། གཡོན་པ་རྣམས་ཀྱིས་འཁོར་ལོ་དང་དྲིལ་བུ་དང་ལྕགས་ཀྱུའོ། །བྱང་དུ་རྡོ་རྗེ་དྲིལ་བུ་མ་ལྗང་གུ་ཞལ་གཡས་པ་དང་ཅིག་ཤོས་ནག་པོ་དང་དཀར་པོ་ཕྱག་དྲུག་གི་གཡས་པ་རྣམས་ཀྱིས་དྲིལ་བུ་དང་རྡོ་རྗེ་དང་རལ་གྲི། གཡོན་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་ཞགས་པའོ། །བཞི་པོ་འདི་རྣམས་ནི་ཞལ་རེ་རེ་ཞིང་སྤྱན་གསུམ་གསུམ་པ་དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། ཐོད་པ་ལྔ་དང་འཁོར་ལོ་ལ་སོགས་པས་བརྒྱན་པ། སྟག་གི་པགས་པའི་གོས་ཅན་ཞབས་གཡས་བརྐྱང་ཞིང་གཡོན་བསྐུམ་པའི་གར་གྱིས་སྣ་ཚོགས་པདྨ་དང་ཐོད་པ་དང་ཉི་མ་ལ་བཞུགས་པའོ། །རིན་ཆེན་འབྱུང་ལྡན་དང་འོད་དཔག་མེད་དང་དོན་ཡོད་གྲུབ་པ་རྣམས་ནི་སྣ་ཚོགས་ཆུ་སྐྱེས་དང་ཐོད་པ་དང་ཉི་མ་ལ་སྟེ་ལྷ་གཞན་ཐམས་ཅད་སྣ་ཚོགས་པདྨ་དང་ཐོད་པ་དང་ཟླ་བ་ལ་གནས་པའོ། །ཐམས་ཅད་ཀྱང་ཉི་མའི་འོད་ཟེར་དང་ལྡན་པ་ཉིད་དོ། །འདིར་རྡོ་རྗེ་སེམས་དཔའ་ཁོ་ན་ཡུམ་དང་བཅས་པ་སྟེ་ལྷ་གཞན་ཐམས་ཅད་ནི་ཡུམ་མེད་པའོ་ཞེས་པ་ནི་ཕྱོགས་གཅིག་གོ །རང་དང་འདྲ་བའི་ཤེས་རབ་དང་བཅས་པ་ནི་གཉིས་པའོ། །རིགས་ཀྱི་བདག་པོ་ནི་རྡོ་རྗེ་སེམས་དཔའ་ལ་སོགས་པའི་དེ་བཞིན་གཤེགས་པ་རྣམས་དང་མཱ་མ་ཀཱི་དང་སྒྲ་རྡོ་རྗེ་མ་དང་གླུ་མ་དང་རེག་བྱ་རྡོ་རྗེ་མ་དང་ཆོས་དབྱིངས་རྡོ་རྗེ་མ་རྣམས་ཀྱི་མི་བསྐྱོད་པའོ། །སྤྱན་མ་དང་རྡོ་རྗེ་དྲག་མོ་དང་ས་རྡོ་རྗེ་མ་དང་མེ་ཏོག་མ་དང་བཞད་མ་དང་གླིང་བུ་མ་དང་མེ་ལོང་མ་དང་རྡོ་རྗེ་ལྕགས་ཀྱུ་མ་རྣམས་ཀྱི་རྣམ་པར་སྣང་
མཛད་དོ། །རྡོ་རྗེ་མཁའ་འགྲོ་མ་ནི་རྡོ་རྗེ་གཟུགས་མ་དང་བདུག་སྤོས་མ་དང་སྒེག་མོ་དང་པི་ཝང་མ་དང་རྡོ་རྗེ་ཞགས་པ་མ་རྣམས་ཀྱི་རིན་ཆེན་འབྱུང་ལྡན་ནོ། །གོས་དཀར་མོ་དང་འདོད་ཆགས་རྡོ་རྗེ་མ་དང་མར་མེ་མ་དང་དྲི་ཆབ་མ་དང་མུ་ཀུན་དམ་དང་རྡོ་རྗེ་ལྕགས་སྒྲོག་མ་རྣམས་ཀྱི་སྣང་བ་མཐའ་ཡས་སོ། །སྒྲོལ་མ་དང་རྡོ་རྗེ་ཞི་བ་མ་དང་རྡོ་རྗེ་གནོད་སྦྱིན་མོ་དང་གར་མཁན་མ་དང་རོ་མ་དང་རྫ་རྡ་མ་དང་རྡོ་རྗེ་དྲིལ་བུ་མ་རྣམས་ཀྱི་དོན་ཡོད་གྲུབ་པའོ། །རྡོ་རྗེ་སེམས་དཔའ་ལ་སོགས་པའི་ཐུགས་ཀའི་ས་བོན་ནི་དཀྱིལ་འཁོར་ལ་དགོད་པའི་རིམ་པས། ཧཱུཾ་བྷྲཱུཾ་ཨཱ་ཧྲིཿ་ཁཾ་བྷྲཱུཾ་ཧཱུཾ་ཧྲཱིཿ་ཨཾ་ཨཱཾ་ཨིཾ་ཨཱིཾ་ཨུཾ་ཨཱུཾ་ཨཾ་ཨཱཿ་རྀཾ་ཧཾ་ཨཱཾ་རཱྀཾལཾ་སཾ་ཁཾ་གཾ། བཾ་ལིཾ་ནཾ་རཾ། ཨོཾ་ཨཽཾ་ཨེཾ་ཨཻཾ་ཛ། ཧཱུཾ་བཾ་ཧོཿ་ཞེས་པས་རྡོ་རྗེ་སེམས་དཔའི་སྙིང་པོའི་སྔགས་ནི་ཨོཾ་བཛྲ་ཨ་མྲྀ་ཏ་མ་ཧཱ་སུ་ཁ་ཧཾ། ཞེས་པའོ། །རྡོ་རྗེ་དྲིལ་བུ་མའི་ཨོཾ་ཨཱཿ་བཛྲེ་གྷཎྜེ་ཧོཿ་སྭཱཧཱ། ཞེས་པ་སྟེ་ལས་ཐམས་ཅད་པའི་སྔགས་སོ། །རྫོགས་པའི་རིམ་པའི་རྣལ་འབྱོར་ལ་འཁོར་ལོའི་དབང་ཕྱུག་གི་སྙིང་པོའི་སྔགས་ཉིད་ཀྱིས་ལྷ་གཞན་རྣམས་ཀྱི་སྙིང་པོའི་སྔགས་ཀྱི་བསྒྲུབ་བྱ་ཡང་འགྲུབ་པ་སྟེ་དེ་རྣམས་ནི་མ་བྲིས་ཏེ་གཞུང་མངས་པས་འཇིགས་པས་སོ། །དེ་བཞིན་དུ་སྔ་མ་དང་ཕྱི་མ་རྣམས་ལ་རིག་བར་བྱའོ།། །།ཡེ་ཤེས་མཁའ་འགྲོ་མའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་སྣ་ཚོགས་རྡོ་རྗེའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གདུགས་དཀར་པོ་དང་བཅས་པའི་སེང་གེ་ལ་གནས་པའི་སྣ་ཚོགས་པདྨ་དང་ཉི་མ་ལ་ཡེ་ཤེས་ཀྱི་མཁའ་འགྲོ་མ་སྔོན་མོ་སྟེ་འདིའི་ཅོད་པན་དར་གྱིས་བཅིངས་པའི་སྟེང་དུ་རྡོ་རྗེས་མཚན་ཞིང་སངས་རྒྱས་ལྔ་འཕྲོ་བས་བརྒྱན་པ་རྩ་བའི་ཞལ་ཁྲོ་ཞིང་གད་རྒྱངས་དང་བཅས་པ། གཡས་དཀར་ཞིང་བཞད་པ་དང་བཅས་པ་གཡོན་དམར་ཞིང་སྒེག་པ་དང་བཅས་པ་ཞལ་རེ་རེ་ལ་སྤྱན་གསུམ་གསུམ་པ་ཕྱག་གཡས་པ་གསུམ་ན་སྟེང་དུ་གནས་པའི་ཁ་ཊྰྭཾ་ག་དང་དགྲ་སྟ་དང་རྡོ་རྗེ། གཡོན་པ་གསུམ་ན་དྲིལ་བུ་དང་ཁྲག་གིས་གང་བའི་ཐོད་པ་དང་རལ་གྲིའོ། །འདིའི་ཤར་ཕྱོགས་སུ་རྡོ་རྗེ་མཁའ་འགྲོ་མ་དཀར་མོ་སྒག་པའི་ཉམས་ཅན་དང༌། བྱང་དུ་མི་བཟད་མཁའ་འགྲོ་མ་གསེར་གྱི་མདོག་ཅན་དང༌། ནུབ་ཏུ་རོ་ལངས་མ་སྔོན་མོ་དང༌། ལྷོར་གཏུམ་མོ་དམར་མོ་སྟེ་བཞི་པོ་འདི་རྣམས་ཀྱང་སེང་གེ་
ལ་གནས་པའི་སྣ་ཚོགས་པདྨ་དང་ཉི་མ་ལ་བཞུགས་པ། གཡས་བ་དང་ཅིག་ཤོས་ཀྱི་ཕྱག་གཉིས་ཀྱིས་སྟེང་དུ་བགྲེང་བའི་ཁ་ཊྭཱཾ་ག་དང་ཁྲག་གིས་གང་བའི་ཐོད་པ་འཛིན་པའོ། །དབང་ལྡན་དུ་སེང་གེ་མོ་སེང་གེའི་གདོང་བ་ཅན་གཡོན་པ་དང་གཡས་བའི་ལུས་ཕྱེད་ཕྱེད་དཀར་པོ་དང་སེར་པོ་གླང་པོ་ཆེ་དཀར་པོ་ལ་གནས་པའོ། །མེར་སྟག་མོ་སྟག་གི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ཕྱེད་སྔོན་པོ་དང་དཀར་པོ་རིན་པོ་ཆེ་སྣ་བདུན་གྱི་ཕུང་པོ་ལའོ། །བདེན་བྲལ་དུ་ཅེ་སྤྱང་མོ་ཅེ་སྤྱང་གི་གདོང་པ་ཅན་གཡོན་པ་དང་གཡས་བའི་ལུས་ཕྱེད་ནག་པོ་དང་དམར་པོ་མ་ཧེ་ལའོ། །ནུབ་ཏུ་འུག་པ་མོ་འུག་པའི་གདོང་པ་ཅན་གཡོན་པ་དང་གཡས་པའི་ལུས་ཕྱེད་ཕྱེད་སེར་བོ་དང་དམར་པོ་ཀླུ་བརྒྱད་ཀྱི་མཇུག་མ་ལའོ། །བཞི་པོ་འདི་རྣམས་ནི་གཡས་པ་དང་གཡོན་པའི་ཕྱག་གཉིས་རྡོ་རྗེ་ལྕགས་ཀྱུ་དང་སྡིགས་མཛུབ་དང་བཅས་པའི་ཞགས་པས་བརྒྱན་ཅིང་སྣ་ཚོགས་ཆུ་སྐྱེས་དང་ཉི་མ་ལ་གནས་པའོ། །དེ་ནས་སྒོ་རྣམས་ལ་ཤར་དུ་རྒྱལ་བའི་དབང་ཕྱུག་མ་དཀར་མོ་ཕྱག་གཉིས་ཀྱིས་ཐལ་མོ་ཁར་བཅུག་པའོ། །བྱང་དུ་གསལ་བྱེད་མ་སེར་མོ་མར་མེ་ལྟ་བུའི་ཐལ་མོ་སྦྱར་བ་སྤྱི་བོར་འཛིན་པའོ། །ནུབ་ཏུ་འཇིགས་བྱེད་མ་དམར་མོ་ཁྲག་གིས་གང་བའི་སྙིམ་པ་སྟེང་དུ་བཀན་པ་ཁའི་ཐད་ཀར་བཟུང་ནས་ཁྲག་གི་རྒྱུན་འཐུང་བར་བྱེད་པའོ། །ལྷོར་ཀཾ་པོ་ཛཱི་ནག་མོ་རྡོ་རྗེའི་སྙམ་པ་ལ་མཐེ་བོང་གི་རྩེ་མོ་གཉིས་ཕན་ཚུན་སྦྱར་ཏེ་སྡིགས་མཛུབ་གཉིས་ཀྱི་མཛུབ་མོ་བརྐྱང་བ་སྦྱར་ནས་གསང་བའི་གནས་སུ་བཞག་པས་རང་གི་བྷ་ག་སྟོན་པར་བྱེད་པའོ། །བཞི་པོ་འདི་རྣམས་ནི་སྣ་ཚོགས་ཆུ་སྐྱེས་ལ་གནས་པའི་ཡི་དགས་ཀྱི་སྙིང་གར་ཉི་མ་ལ་བཞུགས་པའོ། །རྡོ་རྗེ་མཁའ་འགྲོ་མ་ལ་སོགས་པ་བཅུ་གཉིས་ནི་ཞལ་གཅིག་པ་སྤྱན་གསུམ་པའོ། །ལྷ་མོ་བཅུ་གསུམ་པོ་ཐམས་ཅད་ཀྱང་ལྷའི་རིན་པོ་ཆེ་དང་ལྷའི་གོས་དང་དབུ་ལ་ཐོད་པ་ལྔའི་ཕྲེང་བ་ཅན་ཕྱག་རྒྱ་ལྔ་དང་ལྡན་པ་སེམས་དཔའི་སྐྱིལ་ཀྲུང་ཅན་ཀླུའི་རྒྱལ་པོ་བརྒྱད་ཀྱིས་རྣམ་པར་མཛེས་པ། བསྐལ་པའི་མཐའི་མེ་འབར་བའི་འོད་ལྟ་བུའི་འོད་ཟེར་གྱི་ཚོགས་ཀྱི་འབར་ཞིང་འཇིགས་སུ་རུང་བ་སྟེ་གོ་རིམས་ཇི་ལྟ་བ་བཞིན་དུ་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་
མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་འོད་དཔག་མེད་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱིས་རྒྱས་བཏབ་པའོ། །ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཨཱཾ་ཨཱྀཾ་རཱྀཾ་ལཱྀམ་ཨཻཾ་ཨཽཾ་ཨཿ་ཞེས་པ་འདི་རྣམས་ནི་ཐུགས་ཀའི་ས་བོན་ནོ། །ཨོཾ་ཧྲཱི། སྭཱ་ཧཱ། ཞེས་པ་ནི་ཡེ་ཤེས་མཁའ་འགོར་མའི་སྙིང་པོའོ། །ཨོཾ་བེ་ཏ་ལཱི་ཧཱུཾ་སྭཱ་ཧཱ། ཞེས་པ་ནི་རོ་ལངས་མའི་སེ་ལས་ཐམས་ཅད་པའི་སྔགས་སོ། །བཅུ་བདུན་གྱི་བདག་ཉིད་ཀྱེའི་རྡོ་རྗེའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་ཀྱི་འབྱུང་གནས་ཀྱི་སྙིང་པོར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བ་ལ་གནས་པའི་རོའི་སྙིང་གར་ཁྲག་གིས་གང་བའི་ཐོད་པའི་སྟེང་དུ་ཉི་མ་ལ་གནས་པའི་ཀྱེའི་རྡོ་རྗེ་རྣམ་པ་གསུམ་སྟེ་བཞི་པ་ནི་རོ་དང་བྲལ་བའོ། །དེ་ལ་འཇིག་རྟེན་གསུམ་ཀུན་དུ་བསྐྱོད་པ་ནག་པོ་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ། ཐོད་པ་ལྔ་དང་ཕྱག་རྒྱ་དྲུག་དང་མི་མགོ་རློན་པོའི་ཕྲེང་བས་བརྒྱན་པ་རྒྱབ་ཀྱི་ཆར་སྟག་གི་པགས་པའི་སྨད་གཡོགས་ཅན་ཞབས་གཡོན་པའི་བརླ་ལ་ཞབས་གཡས་པའི་སེན་མོ་ཡང་དག་པར་བཞག་པའི་སྐྱིལ་ཀྲུང་ཕྱེད་པས་གནས་པ། དམར་ལ་ཟླུམ་པའི་སྤྱན་གསུམ་དང་ལྡན་པའི་ཞལ་གཅིག་པ་ཕྱག་གཉིས་པ་ཕྱག་གཡོན་གྱིས་རྡོ་རྗེས་མཚན་པའི་ཐོད་པ་ཁྲག་གིས་གང་བ་འཛིན་པས་འཆད་པར་འགྱུར་བའི་གཟུགས་ཅན་གྱི་བདག་མེད་མ་ལ་འཁྱུད་པ། ཕྱག་གཡས་ཀྱིས་རྡོ་རྗེ་རྩེ་ལྔ་པ་དབྱུག་པ་བརྡེག་པའི་ཚུལ་དུ་འཛིན་པའོ། །ཡང་ཕྱག་བཞི་པ་ནི་ཕྱག་གཉིས་པ་ལྟ་བུ་སྟེ་ཕྱག་གཞན་པ་གཉིས་ཀྱིས་རང་དང་འདྲ་བའི་རྡོ་རྗེ་ཕག་མོ་ལ་ཡང་དག་པར་འཁྱུད་པའོ་ཞེས་པ་ནི་ཁྱད་པར་རོ། །ཡང་ཕྱག་དྲུག་པ་ནི་ནག་པོ་དང་དཀར་པོ་དང་དམར་པོའི་ཞལ་གསུམ་པ་ཞལ་རེ་རེ་ཞིང་སྤྱན་གསུམ་གསུམ་དང་ལྡན་པ་རལ་པའི་ཅོད་པན་གྱིས་བརྒྱན་པ། ཕྱག་གཡོན་པ་རྣམས་ཀྱིས་རྡོ་རྗེ་དྲུལ་བུ་དང་གཞུག་དང་ཐོད་པ། གཡས་པ་རྣམས་ཀྱིས་རྡོ་རྗེ་དང་མདའ་དང་རྩེ་གསུམ་འཛིན་པ་རྡོ་རྗེ་དྲུལ་བུ་དང་ལྡན་པའི་ཕྱག་གཉིས་ཀྱིས་རང་དང་འདྲ་བའི་རྡོ་རྗེ་ལུ་གུ་རྒྱུད་མ་ལ་ཡང་དག་པར་འཁྱུད་པ་སྟེ་གཞན་ནི་ཇི་ལྟར་རིགས་པར་སྣ་མ་བཞིན་
ནོ། །དེ་ལྟར་ཧེ་རུ་ཀ་གསུམ་གྱི་ཤར་ལ་སོགས་པའི་འདབ་མ་བརྒྱད་ལ་རྡོ་རྗེ་དྲག་མོ་ལ་སོགས་པ་བརྒྱད་དོ། །འདི་དག་གི་ཕྱི་རོལ་དུ་དབང་ལྡན་ལ་སོགས་པའི་མཚམས་རྣམས་སུ་གླིང་བུ་མ་དང་པི་ཝང་མ་དང་མུ་ཀུན་ད་མ་དང་རྫ་རྔ་མའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང་རྡོ་རྗེ་ལྕགས་སྒྲོག་མ་དང་རྡོ་རྗེ་དྲིལ་བུ་མའོ། །ལྷ་མོ་བཅུ་དྲུག་པོ་འདི་དག་ནི་གོང་གི་དང་འདྲ་བ་ལ་ཡབ་དང་བྲལ་བའོ། །ཧེ་རུ་ཀ་གསུམ་གྱི་རིགས་ཀྱི་བདག་པོ་ནི་མི་བསྐྱོད་པ་སྟེ་ཐུགས་ཀའི་ས་བོན་ནི་ཧཱུཾ་ངོ༌། །སྙིང་པོའི་སྔགས་ནི་ཨོཾ་ཨཱཿ་ཧཱུཾ་ཧྲཱིཿ་སྭཱ་ཧཱ་ཞེས་པའོ། །སོ་སོའི་སྔགས་ནི་རིམ་པ་ཇི་ལྟ་བ་བཞིན་དུ་ཨོཾ་ཏྲཻ་ལོ་ཀྱ་ཨཱ་ཀེཥ་པ་ཧུཾ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཛྭ་ལ་ཛྭ་ལ་བྷྱོ་ཧུཾ་ཧུཾ་ཧཱུཾ་ཕཊ་སྭཱ་ཧཱ། ཨོཾ་ཀི་ཊི་ཀི་ཊི་བཛྲ་ཧུཾ་ཧུཾ་ཧུཾ་ཕཊ་ཅེས་པའོ།། །།སྐྱེའི་རྡོ་རྗེ་བཞི་པ་ནི་ཕྱག་བཅུ་དྲུག་པ་སྟེ་མི་སྐྱོད་པས་རྒྱས་བཏབ་པ་བདག་མེད་མ་དང་སྙོམས་པར་འཇུག་པའོ། །འོན་ཀྱང་འདི་ལ་གོང་དུ་བཤད་པའི་རོའི་གནས་སུ་བདུད་བཞི་སྟེ། དེའང་ཕུང་པོའི་བདུད་ཀྱི་ངོ་བོ་ཚངས་པ་སེར་པོ་དང་ཉོན་མོངས་པའི་བདུད་ཁྱབ་འཇུག་ནག་པོ་དང༌། འཆི་བདག་གི་བདུད་དབང་ཕྱུག་དཀར་པོ་དང༌། ལྷའི་བུའི་བདུད་དབང་པོ་དམར་སར་རོ། །དེ་རྣམས་ལ་བཅོམ་ལྡན་འདས་ཀྱི་ཞབས་བཞིའི་གཉིས་ཀྱིས་སྐྱིལ་ཀྲུང་ཕྱེད་པ་དང་གཞན་པ་དག་གི་ས་གཡོན་བསྐུམ་ཞིང་གཡས་བརྐྱང་བས་བཞུགས་པ། སྐུ་མདོག་ནག་པོ་ནས་སྣ་ཚོགས་རྡོ་རྗེ་ལ་སོགས་པ་དང་སྨད་གཡོགས་ཀྱི་བར་སྔར་བཤད་པའི་ཁྱད་པར་དང་ལྡན་པ། ཞལ་བརྒྱད་པ་སྤྱན་ཉི་ཤུ་རྩ་བཞི་པ། རྩ་ཞལ་ནག་པོ་གང་མོ་ཅན་གཡས་དཀར་པོ་གཡོན་དམར་པོ་སྟེང་མ་མཆེ་བ་གཙིགས་པ་ལྷག་མ་རྣམས་ནག་པོའོ། །ཕྱག་གཡས་པ་རྣམས་ན་རྡོ་རྗེ་དང་རལ་གྲི་དང་མདའ་དང་འཁོར་ལོ་དང་ཐོད་པ་དང་དབྱུག་པ་དང་རྩེ་གསུམ་དང་ལྕགས་ཀྱུ་དང༌། གཡོན་པ་རྣམས་ན་དྲིལ་བུ་དང་པདྨ་དང་གཞུ་དང་ཁ་ཊྭཱཾ་ག་བསྒྲེང་བ་དང་ཐོད་པ་དང་རིན་པོ་ཆེ་དང་སྡིགས་མཛུབ་དང་ཞགས་པའོ། །ཤར་གྱི་འདབ་མ་ལ་གཽ་རའི་དམར་སེར་ཕྱག་གཡས་པ་གཉིས་ན་མདའ་ཕྱུང་བ་དང་རྡོ་རྗེ་གྲི་གུག །གཡོན་གཉིས་ན་གཞུ་དང་ཉ་རོ་ཧི་ཏ་དང་བཅས་པའི་ཐོད་པ་ཁྲག་གིས་གང་བའོ། །
ལྷོར་ཚོམ་རྐུན་མ་དམར་མོ་རྡོ་རྗེ་དང་ཌ་མ་རུ་དང་ལྕགས་ཀྱུ་དང་ཕག་པ་དང་བཅས་པའི་ཐོད་པ་ཁྲག་གིས་གང་བ་ཅན་ནོ། །ནུབ་ཏུ་རོ་ལངས་མ་དཀར་སེར་རལ་གྲི་དང་རུས་སྦལ་དང་བཅས་པའི་ཐོད་པ་ཁྲག་གིས་གང་བ་དང༌། ཆང་གིས་གང་བའི་ཐོད་པ་དང་དྲི་ཆུས་གང་བའི་ཐོད་པ་ཅན་ནོ། །བྱང་དུ་གྷསྨ་རཱི་ལྗང་གུ་ཅུང་ཟད་སེར་བ་རྐང་མར་གྱིས་གང་བའི་ཐོད་པ་ལ་གནས་པའི་སྦྲུལ་དང་མི་འཇིགས་པའི་ཕྱག་རྒྱ་དང་རྡོ་རྗེས་མཚན་པའི་མེ་ཐབས་དང་རྡོ་རྗེས་མཚན་པའི་དགྲ་སྟག་ཅན་ནོ། །དབང་ལྡན་དུ་པུཀྐ་སཱི་སེར་མོ་ཤ་ཆེན་གྱིས་གང་བའི་ཐོད་པ་ལ་གནས་པའི་སེང་གེ་དང་མཆོག་སྦྱིན་གྱི་ཕྱག་རྒྱ་དང་དཔག་བསམ་གྱི་ཤིང་གི་ཡལ་ག་དང་རིན་པོ་ཆེ་ཆེན་ནོ། །མེར་རི་ཁྲོད་མ་དཀར་མོ་ཁུ་བས་གནག་བའི་ཐོད་པ་ལ་གནས་པའི་དགེ་སོང་དང་རྡོ་རྗེ་དང་ཁ་ཊྭཱཾ་ག་དང་ཞགས་པའོ། །བདེན་བྲལ་དུ་གཏུམ་མོ་སྔོན་མོ་གཡས་པ་ན་ཁྲག་གིས་གང་བའི་ཐོད་པ་ལ་སྟག་དང༌། གཡོན་ན་པདྨ་དཀར་པོ་དང་ཕྱག་གཉིས་ན་རླུང་རས་ཅན་ནོ། །རླུང་དུ་གཡུང་མོ་ནག་མོ་ཆང་གི་ཐོད་པ་དང་རྩེ་གསུམ་དང་བདུད་རྩི་ལྔའི་ཐོད་པ་ལ་གནས་པའི་ཅེ་སྤྱང་དང་ཐོད་གཤོལ་ཅན་ནོ། །འདི་དག་གི་ཕྱི་རོལ་གྱི་མཚམས་རྣམས་སུ་གླིང་བུ་མ་ལ་སོགས་པ་བཞི་སྔ་མ་བཞིན་ནོ། །སྒོ་རྣམས་ལ་ཤར་དུ་རྟ་གདོང་མ་ནག་མོ་སྟེ་ཞལ་རྣམས་ནི་ནག་པོ་དང་དཀར་པོ་དང་སེར་པོ་དང་སྟེང་དུ་རྟའི་གདོང་པ་ལྗང་གུའོ། །ལྷོར་ཕག་གདོང་མ་སེར་མོ་སྟེ་ཞལ་རྣམས་ནི་སེར་པོ་དང་ནག་པོ་དང་དཀར་པོ་དང་སྟེང་དུ་ཕག་གི་གདོང་བ་དམར་པོའོ། །ནུབ་ཏུ་ཁྱི་གདོང་མ་དམར་མོ་སྟེ་ཞལ་རྣམས་ནི་དམར་པོ་དང་ནག་པོ་དང་དཀར་པོ་དང་སྟེང་དུ་ཁྱིའི་གདོང་པ་སེར་པོའོ། །བྱང་དུ་སེང་གདོང་མ་ལྗང་གུ་སྟེ་ཞལ་རྣམས་ནི་ལྗང་གུ་དང་ནག་པོ་དང་དཀར་པོ་སྟེང་དུ་སེང་གེའི་གདོང་པ་དམར་པོ། །འདིར་རྩ་བ་དང་གཡས་པ་དང་ཅིག་ཤོས་དང་སྟེང་གི་རིམ་པས་ཞལ་བཞི་པའོ། །སྒོ་སྐྱོང་མ་རྣམས་ཕྱག་བཞི་མ་རྡོ་རྗེ་ལྕགས་ཀྱུ་མ་ལ་སོགས་པ་བཞིན་དུ་ཕྱག་མཚན་འཛིན་པ་སྣ་ཚོགས་ཆུ་སྐྱེས་དང་ཁྲག་གིས་གང་བའི་ཐོད་པ་དང་རོའི་སྟེང་དུ་གཡས་བསྐུམ་ཞིང་གཡོན་བརྐྱང་བས་གནས་པ་དབུ་སྐྲ་དམར་སེར་གྱེན་དུ་འབར་ཞིང་བརྫེས་པའོ། །ལྟ་གཞན་རྣམས་ནི་སྐྱིལ་ཀྲུང་ཕྱེད་པ་ཅན་ཐམས་
ཅད་ཀྱང་ཞལ་རེ་རེ་ཞིང་སྤྱན་གསུམ་གསུམ་པ་ཕྱག་རྒྱ་ལྔ་ལ་སོགས་པས་བརྒྱན་པ་ཡབ་མེད་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །སྙིང་པོའི་སྔགས་ནི་ཨོཾ་དེ་བ་བི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའོ། །གྷསྨ་རཱིའི་ཨོཾ་ཨོཾ་སྭཱ་ཧཱ། ཞེས་པ་སྟེ་ལས་ཐམས་ཅད་པའི་སྔགས་སོ།། །།བདག་མེད་མའི་དཀྱིལ་འཁོར་ནི་རྡོ་རྗེའི་གུར་གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་པདྨའི་ལྟེ་བར་བདག་མེད་མ་སྟེ། ཤར་ལ་སོགས་པའི་ཕྱོགས་ཀྱི་འདབ་མར་རྡོ་རྗེ་མ་དང༌། དཀར་མོ་དང༌། ཆུང་མ་དང༌། རྡོ་རྗེ་མཁའ་འགྲོ་མ་རྣམས་སོ། །རིམ་པ་གཉིས་པར་སྣ་ཚོགས་པདྨ་རྣམས་ཀྱི་ཤར་ལ་སོགས་པར་གཽ་རཱི་དང་ཆོམ་རྐུན་མ་དང་རོ་ལངས་མ་དང་གྷསྨ་རཱི་རྣམས་ཏེ། དབང་ལྡན་ལ་སོགས་པར་པུཀྐ་སཱི་དང་རི་ཁྲོད་མ་དང་གཏུམ་མོ་དང་གཡུང་མོ་རྣམས་སོ། བདག་མེད་མའི་སྟེང་དུ་ཤར་གྱི་ངོས་ཀྱི་ཆུ་སྐྱེས་ལ་གནས་པའི་མཁའ་སྤྱོད་མ་སྟེ་སྟེང་ཞལ་ཅན་ནོ། །འོག་ཏུ་ནུབ་ཀྱི་ངོས་ཀྱིས་པདྨ་ལ་གནས་པའི་ས་སྤྱོད་མ་སྟེ་འོག་ཞལ་ཅན་ནོ། །འདིའི་ཕྱི་རིམ་ལ་གནས་པའི་གཽ་རཱི་ལ་སོགས་པ་བརྒྱད་ནི་ཕྱག་བཅུ་དྲུག་པའི་དཀྱིལ་འཁོར་བཞིན་དུ་སེར་པོ་ལ་སོགས་པའི་མདོག་ཅན་ཏེ་གཞན་བདུན་ནི་སྔོན་མོའོ། །བཅོ་ལྔ་པོ་ཡང་སྐྱིལ་ཀྲུང་ཕྱེད་པས་རོ་དང་ཟླ་བ་ལ་གནས་པ་ཞལ་གཅིག་པ་སྤྱན་གསུམ་དམར་བ་དབུ་སྐྲ་དམར་སེར་གྱེན་དུ་བརྫེས་པ་སྟག་གི་པགས་པའི་ཤམ་ཐབས་ཅན། ཕྱག་བཞི་མ་གཡས་པ་དག་གིས་རྡོ་རྗེ་དང་གྲི་གུག། གཡོན་བ་དག་གིས་ཐོད་པ་དང་སྟེང་དུ་སྒྲེང་བའི་ཁ་ཊྭཱཾ་ག་འཛིན་པ། དབུ་ལ་ཐོད་པ་ལྔའི་ཕྲེང་བ་ཅན་ཕྱག་རྒྱ་ལྔ་དང་ལྡན་པའོ། །མཚམས་རྣམས་སུ་གླིང་བུ་མ་ལ་སོགས་པ་བཞི་ནི་སྔ་མ་བཞིན་དུའོ། །སྒོ་རྣམས་ལ་ཤར་དུ་རྟ་གདོང་མ་དཀར་སྔོ་དང་ལྷོར་ཕག་གདོང་མ་སེར་སྔོ་དང་ནུབ་ཏུ་ཁྱི་གདོད་མ་དམར་སྔོ་དང༌། བྱང་དུ་སེང་གདོང་མ་ལྗང་སྔོ་སྟེ་བཞི་པོ་འདི་རྣམས་ཀྱང་གཡས་བརྐྱང་ཞིང་གཡོན་བསྐུམ་པས་ཉི་མ་ལ་གནས་པ་གཡས་པ་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མིང་དང་རྗེས་སུ་མཐུན་པའི་ཞལ་གཅིག་མ་ཁ་དོག་གཉིས་གཉིས་
དང་ལྡན་པ། ཁྱད་པར་གཞན་རྣམས་ནི་བདག་མེད་མ་དང་མཚུངས་པ། བདག་མེད་མ་ལ་སོགས་པ་རྣམས་ནི་གོ་རིམས་ཇི་ལྟ་བ་བཞིན་དུ་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་མི་བསྐྱོད་པ་དང་རྟག་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་རྣམ་པར་སྣང་མཛད་ཀྱིས་རྒྱས་བཏབ་པ་སྟེ། གླིང་བུ་མ་ལ་སོགས་པ་དང་རྟ་གདོང་མ་ལ་སོགས་པ་རྣམས་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཀྱིས་སོ། །བདག་མེད་མའི་ཐུགས་ཀའི་ས་བོན་ནི་ཨོཾ་སྟེ་ཨོཾ་ཨཾ་སྭཱ་ཧཱ་ཞེས་པ་ནི་སྙིང་པོའོ། །ཨོཾ་ཨཾ་སྭཱ་ཧཱ། ཞེས་པ་ནི་གྷསྨ་རཱིའི་སྟེ་ལས་ཐམས་ཅད་པའི་སྔགས་སོ། །ཡང་བདག་མེད་མ་ལ་སོགས་པ་ལྷ་མོ་བཅོ་ལྔའི་དཀྱིལ་འཁོར་ཏེ། དེ་ཡང་ལྷ་མོ་ཐམས་ཅད་སྐུ་མདོག་ནག་མོ་གཡས་པ་དང་གཡོན་པའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པ་མཆོད་ཕྱིར་ཐོགས་པ་ཅན་ཁ་ཊྭཱཾ་ག་དང་བཅས་པ་སྟེ་གཞན་རྣམས་ནི་སྔ་མ་བཞིན་ནོ། །ཨོཾ་ཨཱཿབཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ་ཞེས་པ་གྷསྨ་རཱིའི་སྔགས་ཏེ་ལས་ཐམས་ཅད་པའོ། །གང་གི་ཚེ་དཀྱིལ་འཁོར་གྱི་དབང་མོ་ཀུ་རུ་ཀུ་ལླེར་གྱུར་པ་ན་སྐུ་མདོག་དམར་མོ་ཕྱག་བཞི་མ་གཡས་པ་དག་གིས་མདའ་དང་ལྕགས་ཀྱུ་གཡོན་པ་དག་གིས་ཨུཏྤལ་དམར་པོ་དང་གཞུ་འཛིན་པ། ཞལ་གཅིག་པ་སྤྱན་གསུམ་པ་སྣང་བ་མཐའ་ཡས་ཀྱིས་རིགས་ཀྱི་བདག་པོ་བྱས་པའོ། །རྡོ་རྗེ་མ་ལ་སོགས་པ་བཅུ་བཞི་འང་སྐུ་མདོག་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པ་སྟེ་བཅོ་ལྔ་བོ་ཐམས་ཅད་ཀྱང་པདྨ་དམར་པོ་དང་རོའི་སྙིང་གར་ཟླ་བ་ལ་སྐྱིལ་ཀྲུང་ཕྱེད་པས་གནས་པའོ། །ཀུ་རུ་ཀུ་ལླེའི་ཐུགས་ཀའི་ས་བོན་ནི་ཧྲཱིཿའོ། །ཨོཾ་ཀུ་རུ་ཀུལླེ་ཧྲཱིཿསྭཱ་ཧཱ། སྙིང་པོའོ། །གཞན་ནི་སྔ་མ་བཞིན་དུ་གྱུར་པ་དེའི་ཚེ་ཀུ་རུ་ཀུལླེའི་དཀྱིལ་འཁོར་དུ་འགྱུར་རོ། །རྡོ་རྗེ་བདུད་རྩིའི་དཀྱིལ་འཁོར་ནི་རྡོ་རྗེའི་གུར་གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡང་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བར་ཟླ་བ་ལ་དཔལ་རྡོ་རྗེ་བདུད་རྩི་སེམས་དཔའི་སྐྱིལ་ཀྲུང་ཅན་མེ་ཏོག་པྲི་ཡང་ཀུ་ལྟ་
བུར་སྔོ་བསངས་རྩ་བ་དང་གཡས་པ་དང་ཅིག་ཤོས་ཀྱི་ཞལ་གསུམ་མེ་ཏོག་པྲི་ཡང་ཀུ་ལྟ་བུ་སྔོ་བསངས་དང་དཀར་པོ་དང་དམར་པོའོ། །སྣ་ཚོགས་པའི་ལག་གདུབ་དང་རྐང་གདུབ་ལ་སོགས་པ་དང་གོས་རྣམས་ཀྱིས་བརྒྱན་པ། ཕྱག་དྲུག་པ་རྡོ་རྗེ་དྲིལ་བུ་དང་བཅས་པའི་ཕྱག་གཉིས་ཀྱིས་རང་འོད་ཀྱི་ཤེས་རབ་ལ་འཁྱུད་པ་གཡས་པ་དག་གིས་འཁོར་ལོ་དང་རལ་གྲི་དང་གཡོན་པ་དག་གིས་ཞགས་པ་དང་ལྕགས་ཀྱུ་འཛིན་པ་འོད་དམར་པོའི་དཀྱིལ་འཁོར་ཅན། ཞི་བ་དང་སྒེག་པའི་ཉམས་ཀྱི་ཕུང་པོ་ཅན་ནོ། །འདབ་མ་རྣམས་ལ་ཤར་དུ་ཞི་བ་མོ་དཀར་མོ་དཀར་བ་དང་ནག་པ་དང་དམར་བའི་ཞལ་གསུམ་མོ། །ལྷོར་ཞི་གདོང་མ་སེར་མོ་སེར་བ་དང་དཀར་བ་དང་དམར་བའི་ཞལ་གསུམ་མོ། །ནུབ་ཏུ་ཟླ་ལྡན་མ་དམར་མོ་དམར་བ་དང་གནག་པ་དང་དཀར་བའི་ཞལ་གསུམ་མོ། །བྱང་དུ་རི་བོང་ཅན་མ་ལྗང་གུ་ལྗང་བ་དང་དཀར་བ་དང་དམར་བའི་ཞལ་གསུམ་མོ། །མེར་ཟླ་དཀྱིལ་མ་སྔོན་མོ་སྔོ་བ་དང་དཀར་བ་དང་དམར་བའི་ཞལ་གསུམ་མོ། །བདེན་བྲལ་དུ་ཟླ་ཚེས་མ་མེ་ཏོག་པྲི་ཡང་ཀུ་ལྟར་སྔོ་བསངས་སྔོ་བསངས་དང་དཀར་བ་དང་དམར་བའི་ཞལ་གསུམ་མོ། །རླུང་དུ་ཡིད་འོད་མ་ཨུཏྤལ་སྔོན་པོའི་མདོག་ཅན་སྔོ་པ་དང་དཀར་བ་དང་དམར་བའི་ཞལ་གསུམ་མོ། །དབང་ལྡན་དུ་ཡིད་ཚིམ་པར་བྱེད་མ་གསེར་གྱི་མདོག་ཅན་སེར་བ་དང་དཀར་བ་དང་དམར་བའི་ཞལ་གསུམ་མོ། །ལྷ་མོ་འདི་རྣམས་འཁོར་ལོའི་དབང་ཕྱུག་ལྟ་བུའི་ཕྱག་མཚན་འཛིན་པ་སྟེ། འོན་ཀྱང་འཁོར་ལོའི་གནས་སུ་ཟླ་བའི་དཀྱིལ་འཁོར་རོ། །ཟླ་ཚེས་མ་ནི་ཟླ་བའི་ཆ་གཅིག་འཛིན་པའོ། །རིམ་པ་གཉིས་པར་དབང་ལྡན་གྱི་མཚམས་སུ་མེ་ཏོག་མ་དཀར་མོ་དཀར་པ་དང་གནག་པ་དང་དམར་བའི་ཞལ་གསུམ་མོ། །མེར་བདུག་སྤོས་མ་དུ་བའི་མདོག་ཅན་དུ་བའི་མདོག་དང་དཀར་བ་དང་དམར་བའི་ཞལ་གསུམ་མོ། །བདེན་བྲལ་དུ་མར་མེ་མ་གསེར་གྱི་མདོག་ཅན་སེར་བ་དང་དཀར་བ་དང་གནག་པའི་ཞལ་གསུམ་མོ། །རླུང་དུ་དྲི་ཆབ་མ་དམར་མོ་དམར་བ་དང་དཀར་བ་དང་གནག་པའི་ཞལ་གསུམ་མོ། །འདི་རྣམས་ནི་རིམ་པ་ཇི་ལྟ་བ་བཞིན་དུ་གཡས་ཀྱི་ཕྱག་དང་པོས་མེ་ཏོག་གི་ཟ་མ་ཏོག་དང་སྤོས་ཕོར་དང་མར་མེའི་མཆོད་སྡོང་དང་དྲིའི་དུང་ཆོས་
འཛིན་པ་སྟེ་ཕྱག་ལྷག་མ་རྣམས་ཀྱིས་ནི་གཙོ་བོའི་ཕྱག་མཚན་ནོ། །དེ་ནས་ཤར་ལ་སོགས་པའི་སྣམ་བུ་ལ་གླིང་བུ་མ་དང་པི་ཝང་དང་མུ་ཀུན་དམ་དང་རྫ་རྔ་མ་རྣམས་ནི་དམར་མོ་དང་སེར་མོ་དང་དཀར་མོ་དང་དུ་བའི་མདོག་ཅན་ཞལ་གཅིག་མ་ཕྱག་གཉིས་པ་གླིང་བུ་ལ་སོགས་པའི་སྒྲ་སྒྲོགས་པར་བརྩོན་པའོ། །སྒོ་རྣམས་ལ་ཤར་དུ་ཁྲོ་གཉེར་རིམ་པར་ལྡན་ནམ་མཁའ་ལྟར་སྔོ་བསངས་དང་དཀར་པོ་དང་དམར་པའི་ཞལ་གསུམ་པའོ། །ལྷོར་འཇིགས་སྡིགས་དཀར་བ་དཀར་པོ་དང་ནག་པོ་དང་དམར་པོའི་ཞལ་གསུམ་པའོ། །ནུབ་ཏུ་རྟའི་གཟུགས་དམར་པོ་དམར་པོ་དང་དཀར་པོ་དང་ནག་པོའི་ཞལ་གསུམ་པའོ། །བྱང་དུ་ཚོགས་ཀྱི་གཙོ་བོ་ལྗང་གུ་ལྗང་གུ་དང་དཀར་པོ་དང་དམར་པོའི་ཞལ་གསུམ་པའོ། །འདི་རྣམས་ནི་འགྱིང་བའི་ཁྲོ་བོ་འགྱིང་བའི་རྐང་སྟབས་ཀྱིས་བཞུགས་པ་འཁོར་ལོའི་དབང་ཕྱུག་གི་ཕྱག་མཚན་འཛིན་པ་སྟེ། ཁྱད་པར་ནི་ཕྱག་གཡས་ཀྱི་དང་པོས་རིམ་པ་ཇི་ལྟ་བར་ལྕགས་གྱུ་དང་ཞགས་པ་དང་ལྕགས་སྒྲོག་དང་དྲིལ་བུ་འཛིན་པ་མཆེ་བ་ཅུང་ཟད་གཙིགས་པའོ། །འདིར་ནི་འཁོར་ལོའི་དབང་པོའི་གཟུགས་བརྙན་དེ་བཞིན་གཤེགས་པ་ལྔ་དང་རྡོ་རྗེས་མཚན་པའི་རིན་པོ་ཆེ་སྣ་ཚོགས་པའི་ཅོང་པན་ནོ། །དེ་ལས་གཞན་པའི་ལྷ་ཉི་ཤུ་པོ་རྣམས་ནི་རྡོ་རྗེ་བདུད་རྩི་དང་པོ་ཏིས་མཚན་པའི་རིན་པོ་ཆེའི་ཅོད་པན་ཟླ་བ་ལ་གནས་པ། གཙོ་བོ་ལྟ་བུར་རྣམ་པ་སྣ་ཚོགས་པའི་གོས་དང་རིན་པོ་ཆེ་ལ་སོགས་པས་བརྒྱན་པའོ། །མེ་ཏོག་ལ་སོགས་པ་བཅུ་གཉིས་པོ་རྣམས་ཀྱི་ཟླ་བའི་འོག་ཏུ་སྣ་ཚོགས་པདྨའོ། །རྡོ་རྗེ་བདུད་རྩིའི་ཐུགས་ཀའི་ས་བོན་ནི་ཧཿའོ། །ཨོཾ་ཧཿབཛྲ་ཨ་མྲྀ་ཏ་སྭཱ་ཧཱ་ཞེས་པ་ནི་སྙིང་པོ་སྟེ་ལས་ཐམས་ཅད་པ་ཡང་འདི་ཉིད་དོ། །རྡོ་རྗེ་བདུད་རྩི་གཞན་གསུམ་འདི་ལྟར་རྣམ་པར་བསྒོམ་པའི་རིམ་པ་ནི་རྡོ་རྗེ་བདུད་རྩིའི་རྒྱུད་ལས་རིག་པར་བྱ་སྟེ་མངས་པས་འཇིགས་ནས་འདིར་མ་བཤད་དོ། །དགུའི་བདག་ཉིད་ཧེ་རུ་ཀ་བཞིའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་ཀྱི་འབྱུང་གནས་ལ་གཞལ་ཡས་ཁང་ངོ༌། །ཕྱག་བཅུ་དྲུག་པ་ལ་སླར་ཡང་འཇམ་པའི་རྡོ་རྗེའི་དཀྱིལ་འཁོར་ལྟ་བུའི་སྲུང་བའི་འཁོར་ལོ་རྩིབས་བཅུ་པ་ཡང་ཡོད་དོ་ཞེས་པ་ནི་ཕྱོགས་གཉིས་པའོ། །གཞལ་ཡས་ཁང་གི་དབུས་སུ་སྣ་ཚོགས་ཆུ་
སྐྱེས་ཀྱི་ལྟེ་བའི་སྟེང་དུ་གན་རྐྱལ་དུ་གནས་པའི་ཚངས་པ་དང་ཁྱབ་འཇུག་དང་དབང་ཕྱུག་དང་དབང་པོ་སྟེ། བདུད་བཞིའི་རང་བཞིན་ཅན་གྱི་སྙིང་གར་ཉི་མ་ལ་གནས་པའི་ཞབས་བཞི་པ་གཅེར་བུ་གར་གྱི་ཉམས་དགུ་དང་ལྡན་པ་ཞབས་གཉིས་སྐྱིལ་ཀྲུང་ཕྱེད་པ་དང་གཞན་གཉིས་གཡོན་བསྐུམ་ཞིང་གཡས་བརྐྱང་བའི་གར་སྟབས་ཅན་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ། དཔྲལ་བའི་སྟེང་དུ་མི་མགོ་སྐམ་པོ་ལྔས་བརྒྱན་པ། སངས་རྒྱས་ལྔའི་ཅོད་པན་ཅན་སྐུ་མདོག་ནག་པོ་ཕྱག་བཅུ་དྲུག་པ་གད་རྒྱངས་དང་བཅས་པའི་ཞལ་བརྒྱད་པ་ཞལ་རེ་རེ་ལ་དམར་ཞིང་ཟླུམ་པའི་སྤྱན་གསུམ་གསུམ་ཡོད་བ་རྩ་བའི་ཞལ་ནག་པོ་གཡས་པ་རྣམས་དཀར་པོ་དང་ནག་པོ་དང་ནག་པོ། གཡོན་པ་རྣམས་དམར་པོ་དང་ནག་པོ་དང་ནག་པོ་སྟེང་མ་དུ་བའི་མདོག་ཅན་རྣམ་པར་འགྱུར་བ། ཞལ་ཐམས་ཅད་སྨིན་མ་འཁྱོག་པོ་དང་བཅས་པ་ཁྲོ་གཉེར་ཅན་མཆེ་བའི་མྱུ་གུ་གཙིགས་པ་ཕྱག་གཡས་པ་བརྒྱད་ཀྱིས་ཐོད་པ་རྣམས་ན་གླང་པོ་ཆེ་དང་རྟ་དང་བོང་བུ་དང་གླང་དང་རྔ་མོ་དང་མི་དང་ཤ་ར་བྷ་དང་བྱི་ལ་རྣམས་དང༌། གཡོན་པ་བརྒྱད་ཀྱིས་ཐོད་པ་རྣམས་ན་ས་དང་ཆུ་དང་རླུང་དང་མེ་དང་ཟླ་བ་ཉི་མ་དང་གཤིན་རྗེ་དང་ནོར་སྦྱིན་རྣམས་འཛིན་པ། འཁོར་ལོ་དང་རྣ་ཆ་དང་མགུལ་རྒྱན་དང་ལག་གདུབ་དང་སྐ་རགས་དང་ཐལ་ཆེན་རྣམས་དང་མི་མགོ་རློན་བ་ཁྲག་འཛག་པ་ལྔ་བཅུའི་དོ་ཤལ་ཅན་དཔུང་རྒྱན་དང་རྐང་གདུབ་རྣམས་ཀྱིས་བརྒྱན་པའོ། །འདིའི་ཡུམ་ནི་བདག་མེད་མ་ནག་མོ་གཅེར་བུ་གྲི་གུག་དང་ཐོད་པར་ལྡན་པའི་ཕྱག་གཡས་པ་དང་གཡོན་པ་དག་གིས་བཅོམ་ལྡན་འདས་ལ་ཡང་དག་པར་འཁྱུད་པ། གཡས་བསྐུམ་ཞིང་གཡོན་བརྐྱང་བའི་གར་སྟབས་ཅན་ཕྱག་རྒྱ་ལྔ་དང་ལྡན་པ། ཞལ་གཅིག་མ་མཆེ་བ་གཙིགས་མ་དམར་ལ་ཟླུམ་པའི་སྤྱན་གསུམ་དང་ལྡན་པ། དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། དཔྲལ་བའི་མཚམས་སུ་ཐོད་པ་ལྡས་བརྒྱན་པ། མགྲིན་པར་མི་མགོ་སྐམ་པོའི་ཕྲེང་བ་འཕྲེང་བ་རྐང་གདུབ་ལ་སོགས་པས་བརྒྱན་པའོ། །ཤར་ལ་སོགས་པའི་ཕྱོགས་ཀྱི་འདབ་མར་གནས་པའི་ཚངས་བ་དང་དབང་པོ་དང་ཉེ་དབང་དང་དྲག་བོ་རྣམས་ཀྱི་སྙིང་གའི་སྟེང་དུ་ཟླ་བ་ལ་གཽ་རཱི་ལ་སོགས་པ་སྟེ་དབང་ལྡན་ལ་
སོགས་པའི་འདབ་མར་གནས་པའི་གཤིན་རྗེ་དང་ལུས་ངན་དང་སྲིན་པོ་དང་ཐགས་བཟངས་རིས་རྣམས་ཀྱི་སྙིང་གའི་སྟེང་དུ་ཟླ་བ་ལ་པུཀྐ་སཱི་ལ་སོགས་པའོ། །དེ་ལ་གཽ་རཱི་ནག་མོ་གཡས་པ་ན་གྲི་གུག་དང་གཡོན་པ་ན་ཉ་རོ་ཧཾ་ཏ་འཛིན་པའོ། །ཆོམ་རྐུན་མ་དམར་མོ་ཕྱག་གཡས་པ་དང་གཡོན་པ་དག་གིས་ཊ་མ་རུ་དང་ཕག་པ་འཛིན་པའོ། །རོ་ལངས་མ་གསེར་གྱི་མདོག་ཅན་ཕྱག་གཡས་པ་དང་གཡོན་པ་དག་གིས་རུས་སྦལ་དང་པདྨའི་སྣོད་འཛིན་པའོ། །གྷསྨ་རཱི་ལྗང་གུ་ཕྱག་གཡས་པ་དང་གཡོན་པ་དག་གིས་སྤྲུལ་དང་རྣལ་འབྱོར་གྱི་སྣོད་འཛིན་པའོ། །པུཀྐ་སཱི་སྔོན་མོ་ཕྱག་གཡས་པ་དང་གཡོན་བདག་གིས་སེང་གེ་དང་དགྲ་སྟ་འཛིན་པའོ། །རི་ཁྲོད་མ་དཀར་མོ་ཕྱག་གཡས་པ་དང་གཡོན་པ་དག་གིས་དགེ་སློང་དང་གསིལ་བྱེད་འཛིན་པའོ། །གཏུམ་མོ་ནམ་མཁའ་ལྟར་སྔོ་བསངས་ཕྱག་གཡས་པ་དང་གཡོན་པ་དག་གིས་འཁོར་ལོ་དང་ཐོང་གཤོལ་འཛིན་པའོ། །གཡུང་མོ་སྣ་ཚོགས་པའི་མདོག་ཅན་ཕྱག་གཡས་པ་དང་གཡོན་པ་དང་གིས་རྡོ་རྗེ་དང་སྡིགས་མཛུབ་འཛིན་པའོ། །བརྒྱད་པོ་འདི་རྣམས་ནི་སྐྱིལ་ཀྲུང་ཕྱེད་པའི་གར་གྱིས་བཞུགས་པ་སྟེ། ཁྱད་པར་གཞན་རྣམས་ནི་སྔར་བརྗོད་པའི་བདག་མེད་མ་བཞིན་ནོ། །རིགས་ཀྱི་བདག་པོ་ནི་ཧེ་རུ་ཀ་དང་བདག་མེད་མ་དག་གི་མི་བསྐྱོད་པའོ། །གཽ་རཱི་ལ་སོགས་པ་རྣམས་ཀྱི་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་ཏེ་པུཀྐ་སཱི་ལ་སོགས་པ་རྣམས་ཀྱི་ཡང་ངོ༌། །ཡང་ཕྱག་གཉིས་པ་དཀྱིལ་འཁོར་གྱི་གཙོ་བོར་གྱུར་པ་ན་གཡས་པས་རྡོ་རྗེ་གྱེན་དུ་འཕྱར་ཞིང་གཡོན་པས་རྡོ་རྗེ་ཐོད་པ་འཛིན་པས་བདག་མེད་མ་ལ་འཁྱུད་པ། ཁ་ཊྭཱཾ་ག་ཡང་དཔུང་པ་གཡོན་པ་ལ་བརྟེན་པའོ། །ཡང་ཕྱག་བཞི་པ་འཁོར་ལོའི་དབང་ཕྱུག་ཏུ་གྱུར་པ་ན། ཕྱག་གཡས་པས་རྡོ་རྗེ་སྔོན་པོ་དང་གཡོན་པས་ཁྲག་གིས་གང་བའི་ཐོད་པ་འཛིན་པ། ཕྱག་ལྷག་མ་དག་གིས་རྡོ་རྗེ་ཕག་མོ་ལ་འཁྱུད་པའོ། །ཡང་ཕྱག་དྲུག་པ་འཁོར་ལོའི་དབང་པོར་གྱུར་པ་ན་རྩ་བ་དང་གཡས་པ་དང་གཡོན་པའི་ཞལ་གསུམ་སྔོན་པོ་དང་དཀར་པོ་དང་དམར་པོ་ཕྱག་གཡས་པ་དག་གིས་རྡོ་རྗེ་དང་གྲི་གུག་དང་གཡོན་པ་དག་གིས་རྩེ་གསུམ་དང་དྲིལ་བུ་འཛིན་པ། ལྷག་མ་དག་གིས་རྡོ་རྗེ་
ལུ་གུ་རྒྱུད་མ་ལ་འཁྱུད་པ་སྟེ། རྡོ་རྗེ་ལུ་གུ་རྒྱུད་མ་ནི་སྐུ་མདོག་དང་ཞལ་དང་ཕྱག་ལ་སོགས་པ་བདག་མེད་མ་དང་མཚུངས་པར་ཡན་ལག་མེད་པའི་རྡོ་རྗེའི་ཞབས་ཀྱིས་གསུངས་པའོ། །ཕྱག་གཉིས་པ་ལ་སོགས་པ་འདི་རྣམས་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་རོའི་སྙིང་གར་ཉི་མ་ལ་སྐྱིལ་ཀྲུང་ཕྱེད་པའི་གར་སྟབས་མཛད་པ། མི་བསྐྱོད་པས་རྒྱས་བཏབ་པ་སྣ་ཚོགས་རྡོ་རྗེས་མཚན་པའི་དབུ་སྐྲ་དམར་སེར་གྱེན་དུ་བརྫེས་པ། མི་མགོ་ལྔས་བརྒྱན་པ། སྨིན་མ་འཁྱོག་པ་དང་བཅས་པའི་ཁྲོ་གཉེར་ཅན། མཆེ་བ་གཙིགས་པ། ཕྱག་བཅུ་དྲུག་པ་རིམ་པ་བཞིན་དུ་འཁོར་ལོ་ལ་སོགས་པས་བརྒྱན་པའོ། །གཽ་རཱི་ལ་སོགས་པའི་ལྷ་མོ་རྣམས་ཀྱིས་བསྐོར་བའོ། །ལྷ་མོ་ཐམས་ཅད་ནི་ཐབས་དང་བྲལ་བ་སྟེ་རྡོ་རྗེ་ཕག་མོ་དང་རྡོ་རྗེ་ལུ་གུ་རྒྱུད་ལ་ནི་མི་བསྐྱོད་པས་རྒྱས་བཏབ་པའོ། །ཀྱེའི་རྡོ་རྗེ་རྣམ་པ་བཞིའི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་དེ་བ་པི་ཙུ་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་ཕྱག་བཅུ་དྲུག་པའི་སྙིང་པོའོ། །ཨོཾ་ཏྲཻ་ལོཀྱ་ཨཱཀྵེ་པ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་ཕྱག་གཉིས་པའོ། །ཨོཾ་ཛྭ་ལ་ཛྭ་ལ་བྷྱོ་ཧཱུཾ་ཧཱུཾ་ཧཱུཾ་ཕཊ་ཅེས་པ་ཕྱག་བཞི་པའིའོ། །ཨོཾ་ཀི་ཊི་ཀི་ཊི་བཛྲ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ཕྱག་དྲུག་པའིའོ། །ཨོཾ་ཨཱཿ་བཛྲ་གྷསྨ་རཱི་ཨོཾ་ཧཱུཾ་སྭཱ་ཧཱ། ཞེས་པ་ནི་གྷསྨ་རཱིའི་སྟེ་ལས་ཐམས་ཅད་པའོ། །སྒྱུ་འཕྲུལ་ཆེན་མོའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པ་ནི་ཆོས་འབྱུང་གི་དབུས་སུ་གཞལ་ཡས་ཁང་སྟེ། ཁ་ཅིག་ནི་རྡོ་རྗེ་གུར་གྱི་ནང་དུ་ཆོས་འབྱུང་མེད་པར་གཞལ་ཡས་ཁང་ངོ་ཞེས་སོ། །གཞལ་ཡས་ཁང་གི་དབུས་སུ་པདྨ་དམར་པོ་འདབ་མ་བརྒྱད་པའི་ལྟེ་བར་ཉི་མ་ལ་སྒྱུ་མ་ཆེན་པོ་ལས་བྱུང་བའི་ཧེ་རུ་ཀ་ནག་པོ་ཉི་མའི་འོད་ཟེར་ཅན་འབར་བའི་ཕྲེང་བ་འཁྲིགས་པ་འགྱིང་བའི་ཁྲོ་བོ་དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། ཐོད་པའི་ཅོད་པན་ཅན་རྩ་བ་དང་གཡས་པ་དང་རྒྱབ་དང་གཡོན་པའི་ཞལ་བཞི་སྔོན་པོ་དང་སེར་པོ་དང་དཀར་པོ་དང་ལྗང་གུ་ཞལ་རེ་རེ་ལ་དམར་ལ་ཟླུམ་པའི་སྤྱན་གསུམ་གསུམ་པ་ཕྱག་བཞི་པ་གཡས་པ་དག་གིས་ཐོད་པ་དང་མདའ། གཡོན་པ་དག་གིས་ཁ་ཊྭཱཾ་ག་དང་གཞུ་འཛིན་པ། ཕྱག་བཞི་དང་ལྡན་པ། མིའི་པགས་པའི་ན་བཟའ་འཛིན་པ། སྐྱིལ་ཀྲུང་ཕྱེད་པའི་
གར་གྱིས་བཞུགས་པའོ། །དཔལ་ལྡན་སངས་རྒྱས་མཁའ་འགྲོ་མ་ནི་སྐུ་མདོག་དམར་མོ་དམར་པོ་དང་སེར་པོ་དང་དཀར་པོ་དང་ལྗང་གུའི་ཞལ་ཅན་གཙོ་བོ་ལྟ་བུའི་མཚོན་ཆ་འཛིན་པ། ཕྱག་གཉིས་ཀྱིས་དེའི་མགུལ་ནས་འཁྱུད་པའོ། །འདབ་མ་རྣམས་ལ་ཤར་དུ་རྡོ་རྗེ་མཁའ་འགྲོ་མ་སྔོན་མོ་སྔོན་པོ་དང་སེར་པོ་དང་དཀར་པོ་དང་ལྗང་གུའི་ཞལ་ཅན་རྡོ་རྗེ་དང་ཐོད་པ་དང་དྲིལ་བུ་དང་ཁ་ཊྭཱཾ་ག་འཛིན་པའོ། །ལྷོར་རིན་ཆེན་མཁའ་འགྲོ་མ་སེར་མོ་སེར་པོ་དང་སྔོན་པོ་དང་དཀར་པོ་དང་ལྗང་གུའི་ཞལ་ཅན། རིན་པོ་ཆེའི་པ་ཏྲ་དང་རྩེ་གསུམ་དང་མགྲིན་པ་བཙིར་བའི་ཅེ་སྤྱང་དང་བ་དན་འཛིན་པའོ། །ནུབ་ཏུ་པདྨ་མཁའ་འགྲོ་མ་དཀར་མོ་དཀར་པོ་དང་སེར་པོ་དང་སྔོན་པོ་དང་ལྗང་གུའི་ཞལ་ཅན་སྣ་ཚོགས་པདྨ་དང་མདའ་དང་ཐོད་པ་དང་གཞུ་འཛིན་པའོ། །བྱང་དུ་སྣ་ཚོགས་མཁའ་འགྲོ་མ་ལྗང་གུ་ལྗང་གུ་དང་སེར་པོ་དང་དཀར་པོ་དང་སྔོན་པོའི་ཞལ་ཅན་རལ་གྲི་དང་ཊ་མ་རུ་དང་ཞགས་པ་དང་ཐོད་པ་འཛིན་པའོ། །ཐམས་ཅད་ཕྱག་རྒྱ་ལྔ་དང་ལྡན་པ་ཟླ་བའི་གདན་དང་འོད་ཅན་ཏེ། འདི་རྣམས་ཀྱི་ཁྱད་པར་རྣམས་ནི་གཙོ་མོ་ལྟ་བུའོ། །རིགས་ཀྱི་བདག་པོ་ནི་བཅོམ་ལྡན་འདས་ཀྱི་མི་བསྐྱོད་པ་སྟེ། སངས་རྒྱས་མཁའ་འགྲོ་མ་ལ་སོགས་པ་རྣམས་ཀྱི་རིམ་པ་ཇི་ལྟ་བ་བཞིན་དུ་རྟག་པ་དང་མི་བསྐྱོད་པ་དང་རིན་ཆེན་དབང་པོ་དང་གསུང་གི་དབང་ཕྱུག་དང་དོན་ཡོད་གྲུབ་པ་རྣམས་སོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཧཱུཾ་ཧཱུཾ་སྙིང་པོའོ། །རྡོ་རྗེ་མཁའ་འགྲོ་མ་ལ་སོགས་པ་རྣམས་ཀྱི་ཡང་ཨོཾ་ཨོཾ་ཧཱུཾ། ཨོཾ་ཧཱུཾ་ཧཱུཾ། ཨོཾ་སྭཱ་ཧཱུཾ། ཨོཾ་ཨཱཿ་ཧཱུཾ་ཨོཾ་ཧཱ་ཧཱུཾ་ཞེས་པ་སྟེ་སྣ་ཚོགས་མཁའ་འགྲོ་མའི་སྔགས་ནི་ལས་ཐམས་ཅད་པའིའོ། །བཅོམ་ལྡན་འདས་སངས་རྒྱས་ཐོད་པའི་ལྷ་དགུའི་བདག་ཉིད་ཀྱི་དཀྱིལ་འཁོར་ནི། རྡོ་རྗེ་གུར་གྱི་ནང་དུ་ཆོས་འབྱུང་ལ་གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་ཀྱི་ལྟེ་བ་ལ་ལ་ངོའི་སྙིང་གར་ཉི་མ་ལ་ཤེས་རབ་མ་དང་བྲལ་བའི་བཅོམ་ལྡན་འདས་ཏེ་སྐུ་མདོག་ལ་སོགས་པ་ནི་འཆད་པར་འགྱུར་བའི་འཁོར་ལོ་གསུམ་ལ་གནས་པའི་དཔལ་སངས་རྒྱས་ཐོད་པ་བཞིན་ནོ། །ཤར་དང་བྱང་དང་ནུབ་དང་ལྷོའི་འདབ་མ་རྣམས་ལ་རིམ་པ་ཇི་ལྟ་བ་བཞིན་དུ་སྣ་ཚོགས་སྡེ་མ་དང་འདོད་མ་དང་ས་འོག་ན་གནས་པ་མ་དང་ལེགས་བཟངས་མ་
རྣམས་ནི་སྐུ་མདོག་སྔོན་མོ་གཡས་བསྐུམ་ཞིང་གཡོན་བརྐྱང་བ། སྟག་གི་པགས་པའི་ཤམ་ཐབས་ཅན། ཕྱག་གཡས་པ་དག་གིས་གྲི་གུག་དང་ཐོད་པ། གཡོན་པ་དག་གིས་ཁ་ཊྭཱཾ་ག་དང་ཊ་མ་རུ་འཛིན་པའོ། །དབང་ལྡན་དང་མེ་ལྷ་དང་བདེན་བྲལ་དང་རླུང་གི་འདབ་མ་རྣམས་ལ་ཆད་འཚོང་མ་དང་འབྱུང་མོ་དང་ཕྱག་བཞི་མ་དང་ནམ་མཁའ་ལ་གནས་མ་རྣམས་ནི་སེར་མོ་ན་བཟའ་སེར་པོ་གྱོན་པ་འོད་ཟེར་སེར་པོ་འཕྲོ་བ། ཞབས་གཉིས་གཡས་བརྐྱང་ཞིང་གཡོན་བསྐུམ་པ་ཀླུ་བརྒྱད་ཀྱིས་བརྒྱན་པ། ཕྱག་གཡས་པ་དག་གིས་གྲི་གུག་དང་ཊ་མ་རུ། གཡོན་པ་དག་གིས་ཁ་ཊྭཱཾ་ག་དང་པདྨའི་སྣོད་འཛིན་པའོ། །བརྒྱད་པོ་འདི་རྣམས་ཀྱང་ཉི་མའི་དཀྱིལ་འཁོར་ལ་གར་གྱི་ཚུལ་གྱིས་གནས་པ། དབུ་སྐྲ་དམར་སེར་འབར་ཞིང་གྱེན་དུ་བརྫེས་པ། དབུ་ལ་ཐོད་པ་ལྔའི་ཕྲེང་བ་དང་ལྡན་པ། ཕྱག་རྒྱ་ལྔ་ལ་སོགས་པས་བརྒྱན་པ། མི་མགོ་རློན་པ་ལྔ་བཅུ་མགུལ་དུ་འཆང་བ། མཆེ་བ་ཅུང་ཟད་གཙིགས་པའི་ཞལ་གཅིག་པ་སྤྱན་གསུམ་པ་ཕྱག་བཞི་བའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་སངས་རྒྱས་ལྔས་རྒྱས་བཏབ་པ་སྟེ། སྣ་ཚོགས་སྡེ་མ་ལ་སོགས་པ་རྣམས་ལ་མི་བསྐྱོད་པ་དང་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་རྣམས་ཀྱིས་སོ། །ཆང་འཚོང་མ་ལ་སོགས་པ་རྣམས་ཀྱི་ཡང་དེ་རྣམས་ཉིད་དོ། །ཡང་ན་བཅོམ་ལྡན་འདས་འདི་དང་ཕྱོགས་ཀྱི་ལྷ་མོ་རྣམས་ཀྱང་དཀར་པོ་སྟེ་མཚམས་ཀྱི་ལྷ་མོ་རྣམས་དམར་མོའོ། །འདི་ནི་ཡུམ་དང་བྲལ་བ་འམ་ཡུམ་དང་བཅས་པའོ། །རྡོ་རྗེ་ཧཱུཾ་མཛད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་ལ་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཉི་མའི་སྟེང་དུ་གཡོན་བསྐུམ་ཞིང་གཡས་བརྐྱང་བའི་ཞབས་དག་གིས་འཇིགས་བྱེད་དང་དུས་མཚན་མནན་པའི་བཅོམ་ལྡན་འདས་འཇིག་རྟེན་གསུམ་ལས་རྣམ་པར་རྒྱལ་བ་ཁྲོ་བོ་བསལ་བའི་དུས་ཀྱི་མེ་ལྟར་འོད་ཟེར་འབར་ཞིང་འགྲོ་བ་མ་ལུས་པའི་བགེགས་ཀྱི་ཚོགས་ཐམས་ཅད་རབ་ཏུ་གསོལ་བར་མཛད་པ། སྐུ་མདོག་སྔོན་པོ་རྣམ་པར་འགྱུར་ཞིང་གདངས་པའི་ཞལ་གསུམ་པ། རྩ་བ་དང་གཡས་པ་དང་གཡོན་པའི་ཞལ་རྣམས་སྔོན་པོ་དང་སེར་པོ་དང་ལྗང་གུ་མཆེ་བ་གཙིགས་ཤིང་རབ་ཏུ་གཏུམ་པ། ལྗགས་འདྲིལ་
ཞིང་ཤིན་ཏུ་འཇིགས་སུ་རུང་བ་ཞལ་རེ་རེ་ཞིང་དམར་ལ་ཟླུམ་པའི་སྤྱན་གསུམ་གསུམ་པ་སྨིན་མ་གཡོ་བ་དང་བཅས་པའི་ཁྲོ་གཉེར་ཅན་དཔྲལ་བའི་སྟེང་ན་ཐོད་པ་ལྔའི་ཕྲེང་བ་དང་ལྡན་པ། ཁྲག་འཛག་པའི་མི་མགོ་ལྔ་བཅུའི་ཕྲེང་བ་མགུལ་བར་འཕྱང་བ། ཕྱག་རྒྱ་དྲུག་དང་ལྡན་པ། ཀླུ་མཐའ་ཡས་སྔོན་པོས་དབུ་སྐྲ་དམར་སེར་གྱེན་དུ་འབར་བ་བཅིངས་པ། འཇོག་པོ་དམར་པོས་རྣ་རྒྱན་བྱས་པ། པདྨ་ཆེན་པོ་པདྨའི་རྩ་བ་ལྟ་བུ་དཀར་པོས་མགུལ་རྒྱན་བྱས་པ། སྟོབས་ཀྱི་རྒྱུ་དཱུར་བ་ལྟ་བུ་ལྗང་གུས་མཆོད་ཕྱིར་ཐོགས་བྱས་པ། ནོར་རྒྱས་དཀར་པོས་སྐ་རགས་བྱས་པ། པདྨ་དཀར་པོ་ཀུནདའི་མེ་ཏོག་ལྟར་མཛེས་པས་རྐང་གདུབ་བྱས་པ། དུང་སྐྱོང་སེར་པོས་ལག་གདུབ་བྱས་པ། རིགས་ལྡན་དུ་བ་ལྟ་བུ་ཁྲ་བོས་དཔུང་རྒྱན་བྱས་པ། རྡོ་རྗེ་སེམས་དཔས་རྒྱས་བཏབ་པ། རྡོ་རྗེ་དང་དྲིལ་བུ་འཛིན་པའི་ཕྱག་དང་གིས་འཇིག་རྟེན་གསུམ་ལས་རྣམ་པར་རྒྱལ་བའི་ཕྱག་རྒྱ་མཛད་པས་རང་དང་འདྲ་བའི་ཤེས་རབ་མ་ལ་སྙོམས་པར་འཇུག་པ། ཕྱག་གཡས་པ་དག་གིས་ལྕགས་ཀྱུ་དང་ཞགས་པ། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །འདིའི་ཤར་ཕྱོགས་སུ་རྡོ་རྗེ་དབྱུག་པ་སྔོན་པོ་རྩ་བ་དང་གཡས་པ་དང་གཡོན་པའི་ཞལ་རྣམས་སྔོན་པོ་དང་སེར་པོ་དང་ལྗང་གུ། ཕྱག་གཡས་པ་དག་གི་རྡོ་རྗེ་ཐོ་བ་དང་སྡིགས་མཛུབ་དང་བཅས་པའི་རྡོ་རྗེ་གྱེན་དུ་འཕྱར་བ། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །བྱང་དུ་རྡོ་རྗེ་ཉི་མ་སེར་པོ་དང་སྔོན་པོ་དང་ལྗང་གུའི་ཞལ་ཅན། ཕྱག་དང་པོས་རྡོ་རྗེ་དབྱུག་པ་འཛིན་པའོ། །རྡོ་རྗེ་ལ་སོགས་པའི་ཕྱག་མཚན་རྣམས་ནི་རྡོ་རྗེ་དབྱུག་པའི་ལྟ་བུ་སྟེ་འཆད་པར་འགྱུར་བ་གཞན་རྣམས་ཀྱང་ངོ༌། །ནུབ་ཏུ་རྡོ་རྗེ་གཙུག་ཏོར་དམར་པོ་དམར་པོ་དང་དཀར་པོ་དང་ལྗང་གུའི་ཞལ་ཅན་ཕྱག་ན་པདྨ་དམར་པོའོ། །ལྷོར་རྡོ་རྗེ་འཁྱིལ་པ་ལྗང་གུ་ལྗང་གུ་དང་དཀར་པོ་དང་སེར་པོའི་ཞལ་ཅན་ཕྱག་ན་སྣ་ཚོགས་རྡོ་རྗེས་མཚན་བའོ། །མེར་རྡོ་རྗེ་གནོད་སྦྱིན་དུ་བའི་མདོག་ཅན་དུ་པའི་མདོག་དང་སེར་པོ་དང་ལྗང་གུའི་ཞལ་ཅན་ལྕགས་ཀྱུ་འཛིན་པའོ། །བདེན་བྲལ་དུ་རྡོ་རྗེ་དུས་དམར་པོ་དམར་པོ་དང་སེར་པོ་དང་ལྗང་གུའི་ཞལ་ཅན་ཕྱག་ན་དགྲ་སྟའོ། །རླུང་དུ་ནག་པོ་ཆེན་པོ་སྔོན་པོ་སྔོན་པོ་དང་སེར་པོ་དང་ལྗང་གུའི་ཞལ་ཅན་ཕྱག་
ན་རྩེ་གསུམ་མོ། །དབང་ལྡན་དུ་རྡོ་རྗེ་འཇིགས་རུང་ནག་པོ་མིག་ཡོན་ནག་པོ་དང་སེར་པོ་དང་ལྗང་གུའི་ཞལ་ཅན་ཕྱག་ན་རལ་གྲིའི། །རྡོ་རྗེ་དབྱུག་པ་ལ་སོགས་པ་བརྒྱད་པོ་འདི་རྣམས་ནི་གོ་རིམས་ཇི་ལྟ་བ་བཞིན་གཤིན་རྗེ་མཐར་བྱེད་དང་ཤེས་རབ་མཐར་བྱེད་དང་པདྨ་མཐར་བྱེད་དང་བདུད་རྩི་འཁྱིལ་པ་དང་འདོད་པའི་རྒྱལ་པོ་དང་དབྱུག་སྔོན་ཅན་དང་སྟོབས་པོ་ཆེ་དང་མི་གཡོ་བ་རྣམས་ཀྱི་མིང་གཞན་ནོ། །སྟེང་དུ་གཙུག་ཏོར་འཁོར་ལོས་སྒྱུར་བ་དཀར་པོ་དཀར་པོ་དང་སྔོན་པོ་དང་ལྗང་གུའི་ཞལ་ཅན་ཕྱག་ན་འཁོར་ལོའོ། །འོག་ཏུ་རྡོ་རྗེ་ས་འོག་མ་གནོད་མཛེས་ཀྱི་མིང་གི་རྣམ་གྲངས་ཅན་སྔོན་པོ་སྔོན་པོ་དང་སེར་པོ་དང་ལྗང་གུའི་ཞལ་ཅན་ཕྱག་ན་རོལ་པ་དང་བཅས་པའི་རྡོ་རྗེའི་གཏུན་ཤིང་སྟེ། འདིའི་ཕྱག་གཡོན་པ་ན་ཀླུའི་ཞགས་པ་སྡིགས་མཛུབ་དང་བཅས་པ་དང་ཁ་ཊྭཱཾ་གའོ། །རྡོ་རྗེ་དབྱུག་པ་ལ་སོགས་པའི་ཁྲོ་བོ་འདི་རྣམས་ཕྱག་མཚན་གྱི་གཙོ་བོ་དང་ཐོད་པས་མཚན་པའི་ཕྱག་དག་གིས་རང་འོད་ཀྱི་ཤེས་རབ་མ་ལ་འཁྱུད་པ། དབུ་སྐྲ་དམར་སེར་འབར་ཞིང་གྱེན་དུ་འཁྱིལ་པ་རང་རང་གི་རིགས་ཀྱི་བདག་པོའི་ཅོད་པན་མཛེས་པར་བརྒྱན་པ། སྨིན་མ་གཡོ་བ་དང་བཅས་པའི་ཁྲོ་གཉེར་ཅན། ཞལ་མཆེ་བ་གཙིགས་པ། ཞལ་རེ་རེ་ལ་དམར་ཞིང་ཟླུམ་པའི་སྤྱན་གསུམ་པ། མི་མགོའི་ཕྲེང་བ་དང་ཕྱག་རྒྱ་ལྔ་ལ་སོགས་པ་དང་ཀླུའི་རྒྱལ་པོ་བརྒྱད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མ་རྣམས་ལ་གནས་པའི་ཕྱོགས་སྐྱོད་བརྒྱད་དང༌། སྟེང་དུ་ཚངས་པ་དང་འོག་ཏུ་ཐགས་བཟངས་རིས་རྣམས་མནན་པའི་གཡས་བརྐྱང་གིས་བཞུགས་པ་རང་གི་རིགས་ཀྱི་བདག་པོས་རྒྱས་བཏབ་པ་སྟེ། འཇམ་པའི་རྡོ་རྗེའི་དཀྱིལ་འཁོར་གྱི་རྩིབས་བཅུ་པའི་འཁོར་ལོ་ཇི་ལྟ་བ་བཞིན་ནོ། །བཅོམ་ལྡན་འདས་རྡོ་རྗེ་ཧཱུཾ་མཛད་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཁ་བཛྲ་དྷྲྀ་ཀ་བཛྲ་ཧཱུཾ་ཕཊ་ཅེས་པ་ནི་སྙིང་པོའོ། །ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ་ཅེས་པ་ནི་རྡོ་རྗེ་འཁྱིལ་པའི་སྔགས་ཏེ་ལས་ཐམས་ཅད་པའོ། །ཡང་ན་ཤར་ལ་སོགས་པའི་ཕྱོགས་དང་མཚམས་དང་སྟེང་དང་འོག་ཏུ་སྣ་ཚོགས་པདྨ་དང་ཉི་མ་རྣམས་ལ་གཡས་སྐོར་གྱིས་གཤིན་རྗེ་མཐར་བྱེད་ལ་སོགས་པའི་ཁྲོ་བོ་བཅུ་སྟེ་འདི་དག་ཐམས་ཅད་ཀྱི་གནས་དང་སྐུ་མདོག་ལ་སོགས་པ་ནི་བསྡུས་པའི་རིམ་པའི་དཀྱིལ་འཁོར་དུ་གསུངས་པ་ཇི་ལྟ་བ་བཞིན་ནོ། །ཡང་ན་
འཇམ་པའི་རྡོ་རྗེའི་དཀྱིལ་འཁོར་གྱི་རྩིབས་བཅུ་པའི་འཁོར་ལོ་ཇི་ལྟ་བ་བཞིན་ནོ། །ཡང་ན་དཔལ་ཀུན་དུ་ཁ་སྦྱོར་གྱི་རྡོ་རྗེ་སེམས་དཔའི་དཀྱིལ་འཁོར་ཇི་ལྟ་བ་བཞིན་ནོ། །ཕྱོགས་འདི་གསུམ་ཀ་ལ་ཡང་ཨོཾ་ཨཱཿ་བིགྷྣཱནྟ་ཀྲྀཏ་ཧཱུཾ་ཕཊ། ཅེས་པ་ནི་བགེགས་མཐར་བྱེད་ཀྱི་སྔགས་ཏེ་ལས་ཐམས་ཅད་པའོ། ། །བདེ་མཆོག་གི་དཀྱིལ་འཁོར་ནི་རྡོ་རྗེ་གུར་གྱི་ནང་རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་སྣ་ཚོགས་རྡོ་རྗེའི་ལྟེ་བར་གནས་པའི་གཞལ་ཡས་ཁང་གི་དབུས་སུ་བཅོམ་ལྡན་འདས་ཏེ་གཡས་བརྐྱང་གི་ཞབས་དག་གིས་སྣ་ཚོགས་པདྨའི་ལྟེ་བའི་སྟེང་དུ་ཉི་མ་ལ་གནས་པའི་འཇིགས་བྱེད་དང་དུས་མཚན་མནན་པ། སྐུ་མདོག་ནག་པོ་ཤར་དང་བྱང་ལ་སོགས་པའི་ཞལ་ནི་ནག་པོ་དང་ལྗང་གུ་དང་དམར་པོ་དང་སེར་པོའོ། །ཞལ་རེ་རེ་ལ་སྤྱན་གསུམ་གསུམ་པ། སྟག་གི་པགས་པའི་ཤམ་ཐབས་ཅན་ཕྱག་བཅུ་གཉིས་པ་རྡོ་རྗེ་དང་དྲིལ་བུར་བཅས་པའི་ཕྱག་གིས་རྡོ་རྗེ་ཕག་མོ་ལ་འཁྱུད་པ། ཕྱག་གཉིས་ཀྱིས་རྒྱབ་ཏུ་གླང་པོ་ཆེ་དཀར་པོའི་པགས་པ་ཁྲག་དང་བཅས་པ་བརྒྱངས་ནས་འཛིན་པ། དེ་དག་ལས་གཞན་པའི་ཕྱག་གཡས་པ་རྣམས་ཀྱིས་ཌ་མ་རུ་དང་དགྲ་སྟ་དང་གྲི་གུག་དང་རྩེ་གསུམ་པ་དང༌། གཡོན་པ་རྣམས་ཀྱིས་རྡོ་རྗེས་མཚན་པའི་ཁ་ཊྭཱཾ་ག་དང་ཁྲག་གིས་གང་བའི་ཐོད་པ་དང་རྡོ་རྗེ་ཞགས་པ་དང་ཚངས་པའི་མགོ་བོ་འཛིན་པ། འཛག་པའི་མི་མགོ་ལྔ་བཅུའི་ཕྲེང་བ་མགུལ་དུ་འཕྱང་པ། ཕྱག་རྒྱ་དྲུག་དང་ལྡན་པ་མིའི་རྒྱུས་པས་མཆོད་ཕྱིར་ཐོགས་བྱས་པ་དཔྲལ་བའི་སྟེང་དུ་ཐོད་པ་ལྔ་དང་ལྡན་པ། ནོར་བུ་དང་གཡོན་ངོས་སུ་གནས་པའི་ཟླ་བ་ཕྱེད་པ་དང་སྣ་ཚོགས་རྡོ་རྗེ་རྣམས་ཀྱིས་མནན་པའི་རལ་པའི་ཐོར་ཅོག་ནག་པོ་ཅན། རྣམ་པར་འགྱུར་ཞིང་གདངས་པའི་ཞལ་མཆེ་བ་གཙིགས་པ། གར་གྱི་ཉམས་དགུའི་ཚོགས་དང་ལྡན་པའོ། །རྡོ་རྗེ་ཕག་མོ་ནི་དམར་མོ་ཞལ་གཅིག་མ་སྤྱན་གསུམ་པ་སྐྲའི་ཚོགས་གྲོལ་པ་གཅེར་བུ་ཐོད་པའི་དུམ་བུས་རྐེད་པའི་རྒྱན་བྱས་པ། འཁྱུད་པའི་ཕྱག་གིས་གཟུང་བའི་ཐོད་པ་ཁྲག་གིས་གང་བ་འཛག་པའི་རྒྱུན་གཙོ་བོའི་ཞལ་དུ་སྟོབས་པ། སྡིགས་མཛུབ་དང་བཅས་པའི་རྡོ་རྗེ་སྟེང་དུ་འཕྱར་བས་གདུག་པ་ཅན་རྣམས་བསྡིགས་པ། ཁྲག་དང་བྲལ་བའི་མི་མགོ་སྐམ་པོའི་ཕྲེང་བ་ཅན། ཉི་མའི་
འོད་ཀྱི་དཀྱིལ་འཁོར་ཅན་ཕྱག་རྒྱ་ལྔ་དང་ལྡན་པ། ཅུང་ཟད་བཞད་པ་ཟླ་མཚན་འབབ་པ་དང་བཅས་ཤིང་བ་སྤུ་གྱེན་དུ་ལངས་པའོ། །དེ་ནས་ཤར་ལ་སོགས་པའི་ཕྱོགས་རྣམས་ལ་གཡོན་སྐོར་གྱིས་དང༌། མེ་ལ་སོགས་བའི་མཚམས་རྣམས་ལ་གཡས་སྐོར་གྱིས་དགོད་པར་བྱའོ། །དེ་ལ་ཕྱོགས་ཀྱི་འདབ་མ་རྣམས་སུ་མཁའ་འགྲོ་མ་དང་ལཱ་མ་དང་དུམ་སྐྱེས་མ་དང་གཟུགས་ཅན་མ་རྣམས་ནི་ནག་མོ་དང་ལྗང་གུ་དང་དམར་མོ་དང་སེར་མོའི་མདོག་ཅན་ཞལ་གཅིག་མ་སྤྱན་གསུམ་མ་སྐྲ་གྲོལ་བ། ཕྱག་བཞི་མ་གཡོན་བདག་གིས་ཁ་ཊྭཱཾ་ག་དང་ཐོད་པ་དང༌། གཡས་པ་དག་གིས་ཌ་མ་རུ་དང་གྲི་གུག་འཛིན་པ་གཡས་བརྐྱང་གིས་གནས་པའོ། །མཚམས་ཀྱི་འདབ་མ་རྣམས་ལ་བྱང་ཆུབ་ཀྱི་སེམས་དང་ཁྲག་དང་བདུད་རྩི་དང་སྒྲོན་མ་ལྔ་རྣམས་གྲུབ་པའི་དངུལ་ཆུ་ལྟ་བུའི་བདུད་རྩིར་གྱུར་པས་གང་བའི་པདྨའི་སྣོད་རྣམས་ཏེ། ཡང་ན་བཞི་ཆར་ཡང་བདུད་རྩི་ལྔས་གང་བའོ། །དེ་ནས་ཐུགས་ཀྱི་འཁོར་ལོ་ལ་རྩིབས་རྣམས་སུ་ཤར་དུ་ཐོད་བའི་དུམ་པུ་དང་རབ་ཏུ་གཏུ་མ་མོ། བྱང་དུ་ཀེང་རུས་ཆེན་པོ་དང་གཏུམ་པའི་མིག་ཅན་མ། ནུབ་ཏུ་ཀེང་རུས་དང་འོད་ལྡན་མ། ལྷོར་མཆེ་བ་རྣམ་པར་གཙིགས་མ་དང་སྣ་ཆེན་མོ། མེར་ཆང་དགྲ་དང་བརྟན་པའི་བློ་ཅན་མ། བདེན་བྲལ་དུ་འོད་དཔག་མེད་དང་མིའུ་ཐུང་མ། རླུང་དུ་རྡོ་རྗེའི་འོད་དང་ལངྐའི་དབང་ཕྱུག་མ། དབང་ལྡན་དུ་རྡོ་རྗེའི་སྐུ་དང་ཤིང་གྲིབ་མའོ། །རིམ་པ་དེ་བཞིན་དུ་གསུང་གི་འཁོར་ལོ་ལ་མྱུ་གུ་ཅན་དང་ས་སྲུང་མ་དང༌། རྡོ་རྗེ་རལ་པ་ཅན་དང་འཇིགས་བྱེད་ཆེན་མོ་དང་དཔའ་བོ་ཆེན་མོ་དང་རླུང་གི་ཤུགས་ཅན་མ་དང་རྡོ་རྗེ་ཧཱུཾ་མཛད་དང་ཆད་འཐུང་མ་དང་ཤིན་ཏུ་བཟང་མོ་དང་སྔོ་བསངས་ལྷ་མོ་དང་རྡོ་རྗེ་བཟང་པོ་དང་ཤིན་ཏུ་བཟང་མོ་དང་འཇིགས་བྱེད་ཆེན་པོ་དང་རྟ་རྣ་མ་དང་མིག་མི་བཟང་དང་བྱ་གདོང་མའོ། །དེ་བཞིན་དུ་སྐུའི་དཀྱིལ་འཁོར་ལ་སྟོབས་པོ་ཆེ་དང་འཁོར་ལོའི་ཤུགས་ཅན་མ་དང་རིན་ཆེན་རྡོ་རྗེ་དང་དུམ་སྐྱེས་མ་དང་རྟ་མགྲིན་དང་ཆང་འཚོང་མ་དང་ནམ་མཁའི་སྙིང་པོ་དང་འཁོར་ལོའི་གོ་ཆ་མ་དང་དཔལ་ཧེ་རུ་ཀ་དང་ཤིན་ཏུ་དཔའ་མོ་དང་པདྨ་གར་གྱི་དབང་ཕྱུག་དང་སྟོབས་ཆེན་མ་དང་རྣམ་པར་སྣང་མཛད་དང་འཁོར་ལོས་སྒྱུར་མ་དང་རྡོ་རྗེ་སེམས་དཔའ་དང་བརྩོན་
འགྲུས་ཆེན་མོའོ། །དེ་ལ་ཐོད་པའི་དུམ་བུ་ལ་སོགས་པའི་དཔའ་བོ་རྣམས་ནི་ཞལ་གཅིག་པ་སྤྱན་གསུམ་པ་རལ་པའི་ཐོར་གཙུགས་ཅན་དཔྲལ་བར་གནས་ཤིང༌། རྡོ་རྗེ་མཚན་པའི་དཔའ་བོའི་དར་དཔྱད་དང་ལྡན་པ་ཕྱག་བཞིས་འཁྱུད་པའི་ཕྱག་གཉིས་རྡོ་རྗེ་དང་དྲིལ་བུ་འཛིན་པ། གཡོན་པས་ཁ་ཊྭཱཾ་ག་དང་གཡས་པས་ཌ་མ་རུ་འཛིན་པ། ཚངས་པའི་སྐུད་པ་ཅན་དཔུང་རྒྱན་དང་ལྡན་པ་མཆེ་བ་གཙིགས་པའི་ཞལ་ཅན་ཕྱག་རྒྱ་ལྔ་དང་ལྡན་པ་གཡས་བརྐྱང་གིས་གནས་པའོ། །རབ་ཏུ་གཏུམ་མོ་ལ་སོགས་པའི་ལྷ་མོ་རྣམས་ནི་ཞལ་གཅིག་པ་སྤྱན་གསུམ་པ་དྲག་པོའི་གཟུགས་ཅན་མ། སྐྲ་གྲོལ་བ་གཅེར་བུ་ཕྱག་གཉིས་མ་འཁྱུད་པའི་ཕྱག་གིས་ཐོད་པ་དང་གཡས་པས་གདུག་པ་ཅན་བསྡིགས་པར་བྱེད་པའི་གྲི་གུག་འཛིན་པའོ། །སྒོ་རྣམས་ལ་ཁྭ་གདོང་མ་དང་འུག་གདོང་མ་དང་ཁྱི་གདོང་མ་དང་ཕག་གདོང་མ་ལ་སོགས་པ་རྣམས་ནི་མཁའ་འགྲོ་མ་ལ་སོགས་པ་བཞིན་ཏེ་འདི་རྣམས་ཀྱི་ཞལ་ནི་མིང་དང་རྗེས་སུ་མཐུན་པའོ། །མཚམས་རྣམས་སུ་གཤིན་རྗེ་བརྟན་མ་དང་གཤིན་རྗེ་ཕོ་ཉ་མོ་དང་གཤིན་རྗེ་མཆེ་བ་མོ་དང་གཤིན་རྗེ་འཇོམས་མ་རྣམས་ནི་མིའི་ཞལ་ཅན་ཏེ། གཡས་དང་གཡོན་གྱི་སྐུ་ཕྱེད་དེ་གཡས་དང་གཡོན་གྱི་ལྷ་མོ་རྣམས་ཀྱི་སྐུ་དང་འདྲ་བའོ། །བརྒྱད་པོ་འདི་རྣམས་ནི་རོའི་གདན་ཅན་ཉིད་དོ། །མཁའ་འགྲོ་མ་ལ་སོགས་པའི་ལྷ་མོ་ཐམས་ཅད་ཀྱང་འཛག་པའི་མི་མགོའི་ཕྲེང་བ་མགུལ་དུ་འཆང་བ། རྡོ་རྗེའི་ཕྲེང་བས་དཔྲལ་བ་མཚན་པ། ཕྱག་རྒྱ་ལྔ་དང་ལྡན་པ་སྐ་རགས་ལ་སྒྲ་དང་བཅས་པའི་གཡེར་ཁ་ལ་སོགས་པས་བརྒྱན་པའོ། །རིགས་ཀྱི་བདག་པོ་ནི་བཅོམ་ལྡན་འདས་ཀྱི་མི་བསྐྱོད་པ་སྟེ་རྡོ་རྗེ་ཕག་མོའི་རྣམ་པར་སྣང་མཛད་དང་མཁའ་འགྲོ་མ་ལ་སོགས་པའི་རིན་ཆེན་དབང་ཕྱུག་གོ །ཐུགས་དང་གསུང་དང་སྐུའི་འཁོར་ལོ་རྣམས་ཀྱི་མི་བསྐྱོད་པ་དང་སྣང་བ་མཐའ་ཡས་དང་རྟག་པ་རྣམས་ཏེ་དམ་ཚིག་གི་འཁོར་ལོ་ལ་གནས་པ་རྣམས་ཀྱི་ནི་དོན་ཡོད་གྲུབ་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཧཱུཾ་ཕཊ་ཌཱ་ཀི་ནཱི་ཛཱ་ལ་སམྦ་རཾ་སྭཱ་ཧཱ། ཞེས་པ་ནི་སྙིང་པོའོ། །ཨོཾ་ཁཎྜ་རོ་ཧེ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་དུམ་སྐྱེས་མའི་སྔགས་ཏེ་ལས་ཐམས་ཅད་པའོ། །ཡང་ན་འཁོར་
ལོའི་དབང་ཕྱུག་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་ཐམས་ཅད་ཞལ་གཅིག་པ་ཕྱག་གཉིས་པའོ། །དེ་ལ་དཔའ་བོ་ཉི་ཤུ་རྩ་ལྔ་ཐམས་ཅད་ནི་འཁྱུད་པའི་གཡས་དང་གཡོན་གྱི་ཕྱག་གཉིས་ཀྱིས་རྡོ་རྗེ་དང་དྲིལ་བུ་བསྣམས་པའོ། །མཁའ་འགྲོ་མ་ལ་སོགས་པ་བཞི་དང་ཁྭ་གདོང་མ་ལ་སོགས་པ་རྣམས་ནི་གཡོན་པས་ཐོད་པ་དང་དཔུང་པ་ལ་བརྟེན་པའི་ཁ་ཊྭཱཾ་ག་དང༌། གཡས་པས་ཌ་མ་རུ་འཛིན་པ་སྟེ་གཞན་ཐམས་ཅད་ནི་སྔ་མ་བཞིན་ནོ། །ཡང་ན་འཁོར་ལོའི་དབང་ཕྱུག་ལ་སོགས་པ་ཕྱག་གཉིས་པ་ཉིད་ཀྱི་ཕྱོགས་ལ་ནི་དཔལ་བདེ་མཆོག་དང་རྡོ་རྗེ་ཕག་མོ་གསེར་གྱི་མདོག་ཅན་ནམ་ཡང་ན་སྔོན་པོ་སྟེ། བཅོམ་ལྡན་འདས་ནི་ཕྱག་གཡས་པས་རྡོ་རྗེ་གསོར་བ་མཆོག་ཏུ་བརྩོན་པ། གཡོན་པས་ཐོད་པ་དང་ཁ་ཊྭཱཾ་ག་འཛིན་པའམ་ཡང་ན་རྡོ་རྗེ་དང་དྲིལ་བུའི་ཕྱག་གཉིས་ཀྱིས་འཁྱུད་པར་མཛད་པའོ། །མཁའ་འགྲོ་མ་ལ་སོགས་པ་བཞིན་ནི་སེར་མོ་གཡས་བས་ཌ་མ་རུ་འཛིན་པའོ། །ཐུགས་ཀྱི་འཁོར་ལོའི་དཔའ་བོ་རྣམས་ནི་ནག་པོ་རྡོ་རྗེ་དང་དྲིལ་བུ་འཛིན་པ་སྟེ། དཔའ་མོ་རྣམས་ནི་དཀར་མོ་ཕྱག་གཡས་པ་རྡོ་རྗེ་དང་བཅས་པའི་སྡིགས་མཛུབ་ཅན་ནོ། །གསུང་གི་འཁོར་ལོའི་དཔའ་བོ་རྣམས་ནི་དམར་པོ་པདྨ་དང་པདྨའི་དྲིལ་བུ་འཛིན་བ་སྟེ་མཁའ་འགྲོ་མ་རྣམས་ནི་ནག་མོ་གཡས་པ་པདྨ་དང་བཅས་པའི་སྡིགས་མཛུབ་ཅན་ནོ། །སྐུའི་འཁོར་ལོའི་དཔའ་བོ་རྣམས་ནི་དཀར་པོ་འཁོར་ལོ་དང་འཁོར་ལོའི་དྲིལ་བུ་འཛིན་པ་སྟེ་ལྷ་མོ་རྣམས་ནི་དམར་མོ་གཡས་པ་སྡིགས་མཛུབ་དང་བཅས་པའི་འཁོར་ལོ་འཛིན་པའོ། །དཔའ་བོ་ཐམས་ཅད་ཡུམ་ལ་འཁྱུད་པར་བརྩོན་ཞིང་གཡས་བརྐྱང་ཞིང་བཞུགས་པ་སྟེ་དཔའ་མོ་རྣམས་ནི་དེའི་བརླ་གཉིས་ལ་འཁྲིལ་བའི་ཚུལ་ལོ། །ཁྲ་གདོང་མ་ལ་སོགས་པ་ནི་གཡས་པ་སྡིགས་མཛུབ་དང་བཅས་པའི་གྲི་གུག་འཛིན་པ་སྟེ་ལྷ་མོ་ཐམས་ཅད་ཕྱག་གཡོན་པས་ཐོད་པ་འཛིན་པའོ། །གཤིན་རྗེ་བརྟན་མ་ལ་སོགས་པ་ནི་གཡས་པས་ཌ་མ་རུ་དང༌། གཡོན་པ་སྡིགས་མཛུབ་དང་བཅས་པས་མི་མགོ་འཛིན་པའོ། །མཁའ་འགྲོ་མ་ལ་སོགས་པ་རྣམས་དང་ཁྭ་གདོད་མ་ལ་སོགས་པ་རྣམས་ཀྱི་གཡོན་པ་ན་ཁ་ཊྭཱཾ་གའོ། །བཅུ་གཉིས་པོ་འདི་རྣམས་ནི་སྐྱིལ་ཀྲུང་ཕྱེད་པའི་གར་གྱིས་གནས་པ་སྟེ་གཞན་རྣམས་ནི་
སྔ་མ་བཞིན་ནོ་ཞེས་པ་བདེ་མཆོག་གི་དཀྱིལ་འཁོར་རྣམ་པ་གསུམ་མོ། །གང་གི་ཚེ་འདི་རྣམས་ལ་དཔའ་བོ་ཉི་ཤུ་རྩ་ལྔ་མི་བསྒོམ་པར་རྡོ་རྗེ་ཕག་མོ་དཀྱིལ་འཁོར་གྱི་གཙོ་མོར་གྱུར་པ་དེའི་ཚེ་རྡོ་རྗེ་ཕག་མོའི་དཀྱིལ་འཁོར་གསུམ་མོ། །རྡོ་རྗེ་ཕག་མོའི་ཐུགས་ཀའི་ས་བོན་ནི་བཾ་མོ། །ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་ཅེས་པ་ནི་སྙིང་པོའོ། །བདེ་མཆོག་ཕྱག་གཉིས་པ་ལ་སོགས་པའི་ལྷ་འདི་རྣམས་ཀྱི་ཕྱག་གཡས་སུ་གནས་པའི་ཕྱག་མཚན་ནི་བྲི་བྱའི་དཀྱིལ་འཁོར་ལ་ཡང་བྲི་བར་བྱའོ། །བཅོམ་ལྡན་འདས་སངས་རྒྱས་ཐོད་པ་ལྷ་ཉི་ཤུ་རྩ་ལྔའི་བདག་ཉིད་ཅན་གྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་གི་སྙིང་པོར་གནས་པའི་གཞལ་ཡས་ཁང་གི་དབུས་སུ་འཁོར་ལོ་རྩིབས་བརྒྱད་པ་ལ་གནས་པའི་སྣ་ཚོགས་ཆུ་སྐྱེས་ཀྱི་ལྟེ་བར་རོ་གན་རྐྱལ་གྱི་སྙིང་གར་ཉི་མའི་དཀྱིལ་འཁོར་ལ་བཅོམ་ལྡན་འདས་དཔལ་ཧེ་རུ་ཀ་སྐུ་མདོག་ནག་པོ་སྐྱིལ་ཀྲུང་ཕྱེད་པ་ཅན་གར་གྱི་ཉམས་དགུ་དང་ལྡན་པས་གར་མཛད་པ་ཞལ་གཅིག་པ་སྤྱན་གསུམ་པ་དམར་ལ་ཟླུམ་པ་ཕྱག་བཞི་པ་གཡས་པ་དག་གིས་ཌ་མ་རུ་དང་གྲི་གུག །གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པ་ཕྱག་རྒྱ་དྲུག་དང་ལྡན་པ་མི་མགོ་རློན་པ་ལྔ་བཅུའི་དོ་ཤལ་མགྲིན་པ་ལ་འཕྱད་བ། གཉིས་འཐུང་གི་པགས་པའི་ཤམ་ཐབས་རྒྱབ་ན་ཅུང་ཟད་དཔྱངས་པ། སྣ་ཚོགས་རྡོ་རྗེ་དང་ཟླ་བ་ཕྱེད་པས་མཚན་པའི་རལ་པ་ནག་པོའི་ཐོར་ཅོག་ཅན་དཔྲལ་བའི་མཐར་ཐོད་པ་ལྔས་བརྒྱན་པ། སངས་རྒྱས་ལྔའི་ཅོད་པན་ཅན་ནོ། །མངའ་བདག་འདིའི་དགའ་མ་ནི་སྣ་ཚོགས་སྡེ་མ། ན་བཟའ་མེད་པ་མི་མགོའི་ཕྲེང་བ་ཅན་དབུ་སྐྲ་སིལ་བུར་གྲོལ་ཞིང་གྱེན་དུ་འབར་བ་ཐོད་པ་ལྔས་དབུ་ལ་མཚན་པ། མཆེ་བ་ཅུང་ཟད་གཙིགས་པ་སྐུ་མདོག་དམར་མོ་ཞལ་གཅིག་མ་སྤྱན་གསུམ་པ་ཕྱག་གཡོན་པ་བདག་པོའི་མགྲིན་པར་འཁྱུད་པས་ཁྲག་གི་འཛག་པའི་ཐོད་པ་ཡབ་ལ་སྟོབས་པ། ཕྱག་གཡས་པ་ན་གྲི་གུག་རྡེག་པའི་ཚུལ་ཅན་ནོ། །རྩིབས་ནག་པོའི་སྟེང་གི་འདབ་མ་རྣམས་ལ་ཤར་དུ་ལེགས་ཕྲེང་ཅན་མ་དང༌། བྱང་དུ་ཐོད་པ་ཅན་མ་དང་ནུབ་ཏུ་འཇིགས་མ་དང་ལྷོར་ཐུབ་དཀའ་མའོ། །དབང་ལྡན་ལ་སོགས་པའི་འདབ་མ་རྣམས་ལ་གཡས་སྐོར་གྱིས་ཁུ་བ་དང་རྡུལ་དང་བདུད་རྩི་དང་སྒྲོན་མ་ལྔས་གང་བའི་པདྨའི་སྣོད་དེ་རིམ་པ་དང་པོ་
འདི་ནི་རྡོ་རྗེ་སྔོན་པོའི་ཁོར་ཡུག་ཅན་ནོ། །དེ་ནས་རིམ་པ་གཉིས་བའི་རྩིབས་བརྒྱད་དམར་པོ་ལ་གནས་པའི་པདྨ་བརྒྱད་ནི་རྡོ་རྗེའི་ཕྲེང་བ་དམར་བོས་བསྐོར་བ་སྟེ། དེའི་རྩིབས་རྣམས་ལ་ཤར་དུ་དགེ་བའི་སྐ་རགས་ཅན་མ་དང༌། བྱང་དུ་གཟུགས་ཅན་མ་དང༌། ནུབ་ཏུ་རྣམ་པར་རྒྱལ་མ་དང༌། ལྷོར་འདོད་མ་དང༌། དབང་ལྡན་དུ་དུས་ཅན་མ་དང༌། མེར་མཚོན་ཆེན་མ་དང༌། བདེན་བྲལ་དུ་ཕྱེད་མ་དང༌། རླུང་དུ་གསོད་མའོ། །དེ་ནས་རིམ་པ་གསུམ་པའི་རྩིབས་བརྒྱད་དཀར་པོ་ལ་གནས་པའི་པདྨ་བརྒྱད་ནི་རྡོ་རྗེའི་ཕྲེང་བ་དཀར་པོའི་འཁོར་ཡུག་ཅན་ཏེ། དེའི་རྩིབས་རྣམས་ལ་ཤར་དུ་སྒྲོལ་མ་དང་བྱང་དུ་འཇིགས་མཐོང་མ་དང༌། ནུབ་ཏུ་ལེགས་མཐོང་མ་དང༌། ལྷོར་མི་ཐུབ་མ་དང༌། དབང་ལྡན་དུ་དགེ་མ་དང༌། མེར་གྲིབ་གནོན་མ་དང༌། བདེན་བྲལ་དུ་དུས་མཚན་མ་དང༌། རླུང་དུ་གྲགས་ཆེན་མའོ། །སྒོ་རྣམས་སུ་ཤར་གྱི་པདྨ་ལ་མཛེས་མ་དང༌། བྱང་གི་པདྨ་ལ་ནོར་འཛིན་མ་དང༌། ནུབ་ཀྱི་པདྨ་ལ་སྐལ་བཟང་མ་དང༌། ལྷོའི་པདྨའི་མཐོང་དགའ་མའོ། །འདི་རྣམས་ཐམས་ཅད་གཡས་པ་དང་གཡོན་པའི་ཕྱག་དག་གིས་གྲི་གུག་དང་ཐོད་པ་འཛིན་པའོ། །སོ་ཅུང་ཟད་སྟོ་བ་ཞལ་གཅིག་མ་སྤྱན་གསུམ་མ། རུས་པའི་རྒྱན་གྱིས་བརྒྱན་མ། མི་མགོའི་ཕྲེང་བ་དང་བྲལ་བ། དབུ་སྐྲ་སིལ་བུ་དམར་སེར་གྱི་ཚོགས་གྱེན་དུ་འབར་བ་བྱང་སེམས་འཛག་པ། ཉི་མ་ལ་སྐྱིལ་ཀྲུང་ཕྱེད་པའི་གར་གྱིས་གནས་པའོ། །སྒོ་སྐྱོང་མ་རྣམས་ནི་གཡས་བ་སྐུམ་ཞིང་གཡོན་བརྐྱང་བ་སྟེ། ཐམས་ཅད་སྟག་གི་པགས་པའི་ན་བཟའ་སྐུ་མདོག་སྔོན་མོའོ། །ཡང་ན་ལེགས་མ་ལ་སོགས་པ་བཞི་ནག་མོ་དང་རིམ་པ་གཉིས་པ་ལ་གནས་པ་རྣམས་དཀར་སེར་དང་རིམ་པ་གསུམ་བ་ལ་གནས་པ་རྣམས་ལྗང་གུ་དང་སྒོའི་ལྷ་མོ་རྣམས་ནག་མོའོ། །བཅོམ་ལྡན་འདས་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པ་སྟེ། སྣ་ཚོགས་སྡེ་མ་ལ་རྣམ་པར་སྣང་མཛད་དང་ལེགས་ཕྲེང་མ་ལ་སོགས་པ་བཞི་ལ་རིན་ཆེན་དབང་པོ་དང༌། རིམ་པ་གཉིས་པར་གནས་པ་རྣམས་ལ་སྣང་བ་མཐའ་ཡས་དང༌། རིམ་པ་གསུམ་པ་ན་གནས་པ་རྣམས་ལ་རྣམ་པར་སྣང་མཛད་དང༌། སྒོའི་ལྷ་མོ་རྣམས་ལ་དོན་ཡོད་གྲུབ་པའོ། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་བུདྡྷྱ་ཀ་པཱ་ལི་ནཱི་ཨཱཿ་ཧི་ཧི་ཧཱུཾ་
ཕཊ། སྙིང་པོའོ། །ལས་ཐམས་ཅད་པའི་སྔགས་ཀྱང་འདི་ཉིད་ཀྱིས་བྱའོ། །རྣལ་འབྱོར་ནམ་མཁའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་སའི་དཀྱིལ་འཁོར་གྱི་སྟེང་དུ་རྒྱ་མཚོ་ཆེན་པོ་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྤྱི་བོར་སྣ་ཚོགས་ཆུ་སྐྱེས་དང་སྣ་ཚོགས་རྡོ་རྗེའི་ལྟེ་བ་ལ་གནས་པའི་གཞལ་ཡས་ཁང་གི་སྙིང་པོར་རིམ་པ་དབུས་མའི་ལྟེ་བར་སེང་གེའི་སྟེང་དུ་སྣ་ཚོགས་པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣལ་འབྱོར་ནམ་མཁའ་སྐུ་མདོག་ནག་པོ་རྩ་བ་དང་གཡས་པ་དང་གཡོན་པའི་ཞལ་གསུམ་ནག་པོ་དང་དཀར་པོ་དང་དམར་པོ། ཞལ་རེ་རེ་ལ་སྤྱན་གསུམ་གསུམ་པ། ཕྱག་རྒྱ་དྲུག་དང་ལྡན་པ་ཐོད་པ་ལྔའི་ཕྲེང་བ་དཔྲལ་བར་གནས་པ་ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པ་ནག་པོའི་ཐོར་ཅོག་ཅན། དེ་བཞིན་གཤེགས་པ་ལྔ་འཕྲོ་བའི་དབུ་རྒྱན་དང་ལྡན་པ། སྟག་གི་པགས་བའི་ཤམ་ཐབས་རྒྱབ་ཏུ་ཅུང་ཟད་འཕྱད་བ། ཕྱག་དྲུག་པ་རྡོ་རྗེ་དང་དྲིལ་བུ་བསྣམས་པའི་ཕྱག་དག་གིས་ཡེ་ཤེས་ཀྱི་མཁའ་འགྲོ་མ་དཀར་མོ་འམ་ནག་མོ་ལ་འཁྱུད་པ། གཡས་པ་དག་གིས་ནུ་མ་དང་མདའ། གཡོན་པ་དག་གིས་པདྨའི་སྣོད་དང་གཞུ་འཛིན་པའོ། །དེ་ནས་རེའུ་མིག་རྣམས་ལ་ཤར་དུ་གླང་པོ་ཆེའི་རྒྱལ་པོ་ལ་འགྱིང་བའི་ཚུལ་གྱིས་གནས་པའི་རྡོ་རྗེ་མཁའ་འགྲོ་མ་དཀར་མོ། །བྱང་དུ་རྨ་བྱ་ལ་སྐྱིལ་ཀྲུང་ཕྱེད་པས་གནས་པའི་མི་བཟད་མཁའ་འགྲོ་མ་སེར་མོ་སྦྲུལ་གྱིས་བརྒྱན་པའོ། །ནུབ་ཏུ་མཁའ་ལྡིང་ལ་ཙོག་པུའི་འདུག་སྟངས་ཀྱིས་གནས་པའི་རོ་ལངས་མ་དམར་མོའོ། །ལྷོར་མིའམ་ཅིའི་གདན་ལ་སྐྱིལ་ཀྲུང་ཕྱེད་པས་གནས་པའི་གཏུམ་མོ་སྔོན་མོ་དབུ་སྐྲ་དམར་པོ་གྲོལ་ཞིང་སྤྱི་བོར་ཐལ་མོ་སྦྱར་བའོ། །འདིར་ཡེ་ཤེས་མཁའ་འགྲོ་མ་ལ་སོགས་པ་ལྔ་ནི་གཡས་པ་དང་གཡོན་པའི་ཕྱག་གཉིས་ཀྱིས་ཁ་ཊྭཱཾ་ག་དང་ཐོད་པ་འཛིན་པའོ། །རྡོ་རྗེ་མཁའ་འགྲོ་མ་ལ་སོགས་པ་ནི་གླང་པོ་ཆེ་ལ་སོགས་པ་པདྨ་དང་ཉི་མ་ལ་གནས་པ་གླང་པོ་ཆེའི་པགས་པའི་སྨད་གཡོགས་དང་མིའི་པགས་པའི་སྟོང་གཡོགས་ཅན་ནོ། །དབང་ལྡན་དུ་སེང་གེ་ལ་འགྱིང་བའི་ཚུལ་གྱིས་གནས་པའི་སེང་གེ་མ་དཀར་སེར་ཕྱག་གཉིས་མ་གཡས་པས་སྟེང་དུ་འཕྱར་བའི་ཁ་ཊྭཱཾ་ག་དང༌། གཡོན་པས་སྡིགས་མཛུབ་དང་བཅས་
བའི་ཞགས་པ་འཛིན་པའོ། །མེར་རྡོ་རྗེ་ཕག་ལ་ཟླུམ་པོའི་ཚུལ་གྱིས་གནས་པའི་སྟག་མོ་དཀར་ནག་ཕྱག་གཉིས་མ་གཡས་པ་དང་གཡོན་པས་ལྕགས་ཀྱུ་དང་ཞགས་པ་འཛིན་པའོ། །བདེན་བྲལ་དུ་མ་ཧེ་ལ་སྐྱིལ་ཀྲུང་ཕྱེད་པས་གནས་པའི་ཅེ་སྤྱང་མོ་ཅེ་སྤྱང་གི་གདོང་པ་ཅན་དམར་ནག་ཕྱག་གཉིས་ཀྱིས་དགྲ་སྟ་དང་ཞགས་པ་འཛིན་པའོ། །རླུང་དུ་ཅེ་སྤྱང་ལ་ཙོག་པུའི་འདུག་སྟངས་ཀྱིས་གནས་པའི་འུག་པ་མོ་འུག་པའི་གདོང་པ་ཅན་དམར་སེར་ཕྱག་གཉིས་ཀྱིས་དབྱུག་པ་དང་ཞགས་པ་འཛིན་པའོ། །འདི་རྣམས་ནི་རང་རང་གི་བཞོན་པ་རྣམས་ལ་པདྨ་དང་ཉི་མར་གནས་པའོ། །ཤར་དུ་མཁའ་འགྲོ་མའི་རྒྱབ་ཏུ་མཁའ་འགྲོ་མ་དཀར་མོ་ཕྱག་གཉིས་ཀྱི་རྩེ་མོ་ཁར་བཅུག་པའོ། །བྱང་དུ་མི་བཟད་མཁའ་འགྲོ་མའི་རྒྱབ་ཏུ་མར་མེ་མ་སེར་མོ་སྤྱི་བོར་མར་མེ་ལྟ་བུའི་ཐལ་མོ་སྦྱར་བ་དང༌། ནུབ་ཏུ་རོ་ལངས་མའི་རྒྱབ་ཏུ་འཇིགས་བྱེད་མ་དམར་མོ་སྙིམ་པ་ཁྲག་གིས་བཀང་ནས་གསོལ་བ་དང༌། ལྷོར་གཏུམ་མོའི་རྒྱབ་ཏུ་ཀམ་པོ་ཛཱི་ནག་མོ་ཕྱག་དག་གིས་ཐུགས་ཀར་གཏུན་ཤིང་འཕྱར་བ་སྟེ་འདི་རྣམས་ནི་པདྨ་དང་ཉི་མ་དང་རོལ་གནས་པའོ། །དེ་ནས་རྡོ་རྗེ་ཕྲེང་བ་དང་འོད་ཟེར་གྱི་འཁོར་ཡུག་གི་ཕྱི་རོལ་དུ་ཟླུམ་པོའི་རིམ་པར་པདྨ་དང་ཟླ་བ་རྣམས་ལ་ཤར་ཕྱོགས་སུ་པུཀྐ་སཱི་དང་དྲ་མི་ཌི་དང་གཏུམ་མོ་རྣམས་ཕྱག་གཉིས་ཀྱིས་བདུད་རྩིའི་སྣོད་འཛིན་པའོ། །བྱང་དུ་མི་བཟད་མ་ཁྲག་མ་དང་ཤ་མ་རྣམས་ནི་སྒྲོན་མ་ལྔས་གང་བའི་པདྨའི་སྣོད་འཛིན་པའོ། །ནུབ་ཏུ་དྲག་ཤུལ་མ་དང་འབར་མ་དང་མི་སྡུག་མ་རྣམས་གཏོར་མའི་སྣོད་འཛིན་པའོ། །ལྷོར་ཐོད་པ་མ་དང་རྡོ་རྗེ་མ་དང་བུམ་པ་ཅན་མ་རྣམས་བཏུང་བའི་སྣོད་འཛིན་པའོ། །དབང་ལྡན་དུ་སྒེག་མོ་བསྙེམས་པའི་ཕྱག་རྒྱ་ཅན་དང་དྲི་ཆབ་མ་དྲིའི་སྣོད་འཛིན་པའོ། །མེར་པི་ཝང་མ་པི་ཝང་བསྒྲེང་བ་དང་མེ་ཏོག་མ་མེ་ཏོག་འཐོར་བའོ། །བདེན་བྲལ་དུ་གླུ་མ་ཁའི་ཐད་ཀར་མཛུབ་མོ་གཡོ་བ་དང་བདུག་སྤོས་མ་སྤོས་དང་བཅས་པའི་སྤོས་ཕོར་འཛིན་པའོ། །རླུང་དུ་གར་མ་གར་གྱི་ཚུལ་གྱིས་སྟེང་དུ་ཐལ་མོ་སྦྱར་བ་དང་མར་མེ་མ་མར་མེ་དང་བཅས་པའི་མར་མེའི་སྣོད་འཛིན་པའོ། །ཡེ་ཤེས་མཁའ་འགྲོ་མ་ལ་སོགས་པའི་ལྷ་སུམ་ཅུ་རྩ་གསུམ་པོ་འདི་རྣམས་ནི་ཕྱག་གཉིས་མ་ཞལ་གཅིག་པ་སྤྱན་གསུམ་པ་སྐྲ་གྲོལ་བ་དབུ་ལ་ཐོད་པའི་ཕྲེང་བ་ཅན་ནོ། །
མི་བཟད་མཁའ་འགྲོ་མ་ནི་དབུ་སྐྲ་གྱེན་དུ་བརྫེས་པ་སྟེ་སེང་གེ་མོ་ལ་སོགས་པ་ནི་གོས་དམར་བོ་གྱོན་པའོ། །པུཀྐ་སཱི་ལ་སོགས་པ་མེའི་མཚམས་ཀྱི་ལྷ་མོ་དག་ནི་དཀར་མོའོ། །མི་བཟད་མ་ལ་སོགས་པ་དང་དབང་ལྡན་གྱི་ལྷ་མོ་དག་ནི་སེར་མོའོ། །དྲག་ཤུལ་མ་ལ་སོགས་པ་དང་རླུང་གི་མཚམས་ཀྱི་ལྷ་མོ་དག་ནི་དམར་མོའོ། །ཐོད་པ་མ་ལ་སོགས་པ་དང་བདེན་བྲལ་གྱི་མཚམས་ཀྱི་ལྷ་མོ་དག་ནི་ནག་མོའོ། །དེ་ནས་རྡོ་རྗེ་ཕྲེང་བའི་ཁོར་ཡུག་གི་ཕྱི་རོལ་གྱི་རིམ་པར་སྒོ་རྣམས་དང་སྣམ་བུ་རྣམས་ལ་ཆུ་སྐྱེས་དང་ཟླ་བའི་གདན་རྣམས་ལ་ཤར་སྒོར་ཁྱབ་འཇུག་ནག་པོ་དང༌། བྱང་དུ་ཚངས་པ་སེར་པོ་དང༌། ནུབ་ཏུ་དབང་ཕྱུག་དཀར་པོ་དང༌། ལྷོར་གདོང་དྲུག་དམར་པོ་དང༌། དབང་ལྡན་གྱི་མཚམས་སུ་དབང་པོ་སེར་པོ་དང༌། མེར་ལུས་ངན་པོ་སེར་པོ་དང༌། བདེན་བྲལ་དུ་གཤིན་རྗེ་ནག་པོ་དང༌། རླུང་དུ་ཆུ་ལྷ་དཀར་པོའོ། །ལྷའི་སྣམ་བུ་ལ་ཤར་དུ་ཀེང་རུས་འཇིགས་དང་ཁ་ཊྭཱཾ་གའི་སྲིན་པོ་དང་ཚོགས་ཀྱི་དབང་ཕྱུག་དང་དྲིལ་བུའི་རྣམ་བ་ཅན་རྣམས་དཀར་པོའོ། །བྱང་དུ་གཏུམ་མོའི་དབང་ཕྱུག་དང་མདུན་དུ་སའི་ལྷ་དང་རིམ་གྱི་དབང་ཕྱུག་དང་བཞི་ཀ་ར་འཇིགས་སུ་རུང་བ་རྣམས་སེར་པོའོ། །ནུབ་ཏུ་དྲག་པོའི་འདོད་པ་དང་ཤཎྜི་ལིའི་དབང་ཕྱུག་དང་ཌ་མ་རུའི་འདུལ་བྱེད་དང་སྒྲས་འཇིགས་བྱེད་རྣམས་དམར་པོའོ། །ལྷོར་ཏུམྦུ་རའི་དབང་ཕྱུག་དང༌། སྠཱ་ར་ནཱ་དོ་དང་མཆེ་བ་གཙིགས་པ་དང་གཞུ་འཛིན་རྣམས་ནག་པོའོ། །ཁྱབ་འཇུག་ལ་སོགས་པ་ཉི་ཤུ་རྩ་བཞི་པོ་འདི་རྣམས་ནི་ཞལ་གཅིག་བ་སྤྱན་གསུམ་པ་ཕྱག་བཞི་པ་གཡས་པ་དག་གིས་ཁ་ཊྭཱཾ་ག་དང་རྩེ་གསུམ་འཛིན་པ་གཡོན་པ་དག་གིས་ལྷ་མོ་ལ་འཁྱུད་པ་དང་ཐོད་པ་འཛིན་པ། རལ་བ་ནག་པོའི་ཐོར་ཅོག་ཅན་ཐོད་པ་ལྔའི་ཕྲེང་བ་དང་ཕྱག་རྒྱ་ལྔ་དང་ལྡན་པ། སྟག་གི་པགས་པའི་ཤམ་ཐབས་ཅན་ནོ། །འདི་རྣམས་ཀྱི་ལྷ་མོ་རྣམས་ཀྱང་ཕྱག་གཡས་པ་དང་གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པའོ། །འདིར་དཔལ་ལྡན་ནམ་མཁའི་རྣལ་འབྱོར་ལ་མི་བསྐྱོད་པ་ལ་སོགས་པའི་དེ་བཞིན་གཤེགས་པ་ལྔས་རྒྱས་བཏབ་པ་སྟེ། ཡེ་ཤེས་མཁའ་འགྲོ་མ་ལ་མི་བསྐྱོད་པ་འམ་རྣམ་པར་སྣང་མཛད་ཀྱིས་རྒྱས་བཏབ་པའོ། །རྡོ་རྗེ་མཁའ་འགྲོ་མ་ལ་སོགས་པ་བཞི་དང་མཁའ་འགྲོ་མ་ལ་སོགས་པ་བཞི་རྟག་པ་དང་རིན་
ཆེན་དབང་པོ་དང་སྣང་བ་མཐའ་ཡས་དང༌། དོན་ཡོད་གྲུབ་པ་རྣམས་ཀྱི་སྟེ། སེང་གེ་མ་ལ་སོགས་པ་བཞི་ལ་མི་བསྐྱོད་པ་དང་རྣམ་བར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་རྣམས་ཀྱིས་སོ། །ཚངས་པ་ལ་རྣམ་པར་སྣང་མཛད་ཀྱིས་ཏེ་དབང་ཕྱུག་ཆེན་པོ་ལ་སྣང་བ་མཐའ་ཡས་ཀྱིས་སོ། །ལྷ་གཞན་དཀར་པོ་རྣམས་ལ་རྣམ་པར་སྣང་མཛད་དང་སེར་པོ་རྣམས་ལ་རིན་ཆེན་དབང་པོ་དང༌། དམར་པོ་རྣམས་ལ་ཚེ་དཔག་མེད་དང་ནག་པོ་རྣམས་ལ་མི་བསྐྱོད་པ་ནག་པོའོ། །དཀྱིལ་འཁོར་གྱི་དབང་ཕྱུག་གི་ཐུགས་ཀའི་ས་བོན་ནི་ཧཱུཾ་ངོ༌། །ཨོཾ་ཧུཾ་ཧཿ་སྭཱ་ཧཱ་ཞེས་པ་ནི་སྙིང་པོའོ། །ཨོཾ་ཡུཾ་ཡཿསྭཱ་ཧཱ། ཞེས་པ་ནི་རོ་ལངས་མའི་སྟེ་ལས་ཐམས་ཅད་པའི་སྔགས་སོ་ཞེས་པ་རིམ་པ་གསུམ་གྱི་དཀྱིལ་འཁོར་རོ། །སྙིང་པོའི་དཀྱིལ་འཁོར་གཞལ་ཡས་ཁང་ལྟ་བུ་ལ་མཁའ་འགྲོ་མ་ལ་སོགས་པ་བཞི་པོ་རྣམས་ནི་སྒོ་རྣམས་སུའོ། །ཞེས་པ་གཞན་དག་གིའོ། །རིམ་པ་གཉིས་པ་ལ་ཡང་གཞལ་ཡས་ཁང་གི་གཟུགས་སོ་ཞེས་པ་ནི་གཞན་དག་གི་སྟེ་དེ་ཡང་ཟླུམ་པོའི་བྱེད་པ་ཁ་ཅིག་གོ །གཤིན་རྗེ་གཤེད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་གི་ལྟེ་བར་གནས་པའི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཉི་མའི་སྟེང་དུ་གནས་པའི་མ་ཧེ་ནག་པོ་ཁྲོས་བ་རུས་པའི་རྒྱན་གྱིས་བརྒྱན་པའི་རྒྱབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་གཡས་བསྐུམ་ཞིང་གཡོན་བརྐྱང་བའི་རྐང་སྟབས་ཀྱིས་གཤིན་རྗེ་མནན་ནས་བཞུགས་པའི་གཤིན་རྗེ་གཤེད་ནག་པོ་སྨིན་མ་དང་སྨ་ར་ལངས་ཤིང་དབུ་སྐྲ་གྱེན་དུ་བརྫེས་པ། རྡོ་རྗེའི་རྒྱན་གྱིས་བརྒྱན་པ་སྐུ་བོང་ཐུང་ཞིང་གསུས་པ་འཕྱང་བ། ཡན་ལག་རགས་པ་མི་མགོའི་ཕྲེང་བ་མགུལ་བར་འཕྱང་བ་ལྗགས་འགྱུར་བ་མཆེ་བ་འབར་ཞིང་གཙིགས་བ་རྩ་བ་དང་གཡས་པ་དང་གཡོན་པའི་ཞལ་ནག་པོ་དང་དཀར་པོ་དང་དམར་པོ་ཕྱག་དྲུག་གི་གྲི་གུག་དང་ཐོད་པར་ལྡན་པའི་གཡས་པ་དང་གཡོན་པའི་ཕྱག་དག་གིས་རང་འོད་ཀྱི་ཤེས་རབ་མ་ལ་འཁྱུད་པ། གཡས་པ་དག་གིས་རྡོ་རྗེ་དང་རལ་གྲི་གཡོན་པ་དག་གིས་འཁོར་ལོ་དང་པདྨ་འཛིན་པ། འཇིག་རྟེན་གསུམ་ལས་རྣམ་པར་རྒྱལ་བ་བཞིན་དུ་མཐའ་ཡས་ལ་སོགས་པའི་ཀླུ་རྣམས་ཀྱིས་བརྒྱན་པའོ། །འདིའི་ཤར་དུ་རྣམ་པར་སྣང་མཛད་དཀར་པོ་རྩ་བ་དང་གཡས་པ་དང་གཡོན་པའི་ཞལ་གསུམ་དཀར་པོ་དང་ནག་པོ་དང་
དམར་པོ། །ཕྱག་གཡས་པ་དག་གིས་འཁོར་ལོ་དང་རལ་གྲི་དང༌། གཡོན་པ་དག་གིས་རིན་པོ་ཆེ་དང་ཆུ་སྐྱེས་འཛིན་པའོ། །ལྷོར་རིན་ཆེན་དབང་པོ་གསེར་བཙོ་མའི་མདོག་ལྟ་བུ་སེར་པོ་དང་སྔོན་པོ་དང་དཀར་པོའི་ཞལ་གསུམ་པ་ཕྱག་གཡས་པ་དག་གིས་རིན་པོ་ཆེ་དང་རལ་གྲི། གཡོན་པ་དག་གིས་འཁོར་ལོ་དང་པདྨ་འཛིན་པའོ། །ནུབ་ཏུ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོའི་ཞལ་གསུམ་པ། ཕྱག་གཡས་པ་དག་གིས་པདྨ་དང་རལ་གྲི་དང༌། གཡོན་པ་དག་གིས་ནོར་བུ་དང་འཁོར་ལོ་འཛིན་པའོ། །བྱང་དུ་ཕྲག་དོག་གཤིན་རྗེ་གཤེད་ལྗང་གུ་ལྗང་གུ་དང་ནག་པོ་དང་དཀར་པོའི་ཞལ་གསུམ་པ། ཕྱག་གཡས་པ་དག་གིས་རལ་གྲི་དང་འཁོར་ལོ། གཡོན་པ་དག་གིས་ནོར་བུ་དང་པདྨ་འཛིན་པའོ། །བཞི་ཆར་ཡང་འཁོར་ལོའི་དབང་ཕྱུག་གི་མཚན་ཉིད་ཅན་གྱི་ཁྲོ་བོ། གཡས་པ་དང་ཅིག་ཤོས་ཀྱི་རྩ་བའི་ཕྱག་དག་གིས་གྲི་གུག་དང་ཐོད་པ་འཛིན་པས་རང་དང་འདྲ་བའི་ཡུམ་ལ་འཁྱུད་པའོ། །མེའི་མཚམས་སུ་རྡོ་རྗེ་ཙརྩི་ཀ་སྐུ་དང་ཕྱག་མཚན་རྣམས་གཏི་མུག་གཤིན་རྗེ་གཤེད་ལྟ་བུའོ། །བདེན་བྲལ་དུ་རྡོ་རྗེ་ཕག་མོ་ཕག་ཞལ་ཅན་མ་ཞེ་སྡང་གཤིན་རྗེ་གཤེད་ལྟ་བུའོ། །དབང་ལྡན་དུ་གཽ་རཱི་ཕྲག་དོག་གཤིན་རྗེ་གཤེད་ལྟ་བུའོ། །འདིར་རྣམ་པར་སྣང་མཛད་ལ་སོགས་པ་ནི་སྣ་ཚོགས་རྡོ་རྗེའི་རྩ་བ་རྣམས་སུ་ཏེ། མཚམས་རྣམས་སུ་ནི་རྡོ་རྗེ་ཙརྩི་ཀ་ལ་སོགས་པ་རང་དང་འདྲ་བའི་ཐབས་དང་བཅས་པའོ། །སྒོ་རྣམས་ལ་ཤར་དུ་ཐོ་བ་གཤིན་རྗེ་གཤེད་ནག་པོའོ། །ནག་པོ་དང་དཀར་པོ་དང་དམར་པོའི་ཞལ་ཅན། ཕྱག་གཡས་པ་དག་གིས་ཐོ་བ་དང་རལ་གྲི་དང༌། གཡོན་པ་དག་གིས་ནོར་བུ་དང་པདྨ་འཛིན་པའོ། །ལྷོར་དབྱུག་པ་གཤིན་རྗེ་གཤེད་དཀར་པོ་དཀར་པོ་དང་སྔོན་པོ་དང་དམར་པོའི་ཞལ་ཅན་ཕྱག་གཡས་པ་དག་གིས་དབྱུག་པ་དང་རལ་གྲི། གཡོན་པ་དག་གིས་པདྨ་དང་འཁོར་ལོ་འཛིན་པའོ། །ནུབ་ཏུ་པདྨ་གཤིན་རྗེ་གཤེད་འདོད་ཆགས་གཤིན་རྗེ་གཤེད་ལྟ་བུའོ། །བྱང་དུ་རལ་གྲི་གཤིན་རྗེ་གཤེད་ཕྲག་དོག་གཤིན་རྗེ་གཤེད་ལྟ་བུ་ལས་ཅུང་ཟད་སྔོ་བའོ། །ཐམས་ཅད་ཀྱང་ཁྲོ་བོ་ཀླུ་རྣམས་ཀྱིས་བརྒྱན་པ། འཇིགས་པའི་གད་རྒྱངས་ཅན། དབུ་སྐྲ་དམར་སེར་གྱེན་དུ་འབར་བ་མཆེ་བ་གཙིགས་པའི་ཞལ་ཅན། རྩ་བའི་ཕྱག་གཉིས་ཀྱིས་གྲི་གུག་དང་ཐོད་པ་འཛིན་པས་རང་འོད་ཀྱི་ཤེས་རབ་མ་ལ་
འཁྱུད་པའོ། །འདིར་རྣམ་པར་སྣང་མཛད་དང་ལྷ་མོ་རྣམས་ནི་སྣ་ཚོགས་པདྨ་དང་ཟླ་བའི་གདན་ལ་སྟེ། ལྷ་གཞན་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའོ། །དཀྱིལ་འཁོར་གྱི་མེ་ལ་སོགས་པའི་མཚམས་བཞིར་སྣ་ཚོགས་པདྨ་ལ་གནས་པའི་ཐོད་པ་བཞི་ནི། ཁུ་བ་དང་རྡུལ་དང་བདུད་རྩི་ལྔ་དང་སྒྲོན་མ་ལྔས་གང་བའོ། །རིགས་ཀྱི་བདག་པོ་ནི་གཤིན་རྗེ་གཤེད་ནག་པོའི་སྤྱི་བོར་རང་ཉིད་དེ། རྣམ་པར་སྣང་མཛད་ལ་སོགས་པ་བཞིའི་ཡང་དེ་བཞིན་ནོ། །དེ་རྣམས་ནི་གོ་རིམས་ཇི་ལྟ་བར་སྤྱན་མ་ལ་སོགས་པ་བཞི་དང་ཐོ་བ་གཤིན་རྗེ་གཤེད་ལ་སོགས་པ་རྣམས་ཀྱི་ཡང་ངོ༌། །བཅོམ་ལྡན་འདས་ཀྱི་ཐུགས་ཀའི་ས་བོན་ནི་ཡའོ། །ཨོཾ་ཧྲིཿ་ཥྚྀཿབི་ཀྲྀ་ཏཱ་ནན་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ནི་སྙིང་པོ་སྟེ་ལས་ཐམས་ཅད་པའི་སྔགས་ཀྱང་འདིའོ། །རྡོ་རྗེ་སྒྲོལ་མའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་ཆོས་འབྱུང་གི་སྙིང་པོར་གཞལ་ཡས་ཁང་གི་དབུས་སུ་སྣ་ཚོགས་པདྨ་འདབ་མ་བརྒྱད་པའི་ལྟེ་བར་ཟླ་བ་ལ་བཅོམ་ལྡན་འདས་རྡོ་རྗེ་སྒྲོལ་མ་གསེར་གྱི་མདོག་ལྟ་བུ་སངས་རྒྱས་ལྔའི་ཅོད་པན་ཅན། རྩ་བ་དང་གཡས་པ་དང་རྒྱབ་དང་གཡོན་པའི་ཞལ་བཞི་གསེར་གྱི་མདོག་དང༌། དཀར་པོ་དང་སྔོན་པོ་དང་དམར་པོའོ། །ཕྱག་བརྒྱད་མ་གཡས་པ་རྣམས་ཀྱིས་རྡོ་རྗེ་དང་ཞགས་པ་དང་མདའ་དང་དུང་རྣམས་འཛིན་པ། གཡོན་པ་རྣམས་ནི་ཨུཏྤལ་སེར་པོ་དང་གཞུ་དང་ལྕགས་ཀྱུ་དང་སྡིགས་མཛུབ་ཅན་ནོ། །ཤར་གྱི་འདབ་མ་ལ་མེ་ཏོག་སྒྲོལ་མ་དཀར་མོ་ཕྱག་དག་གིས་མེ་ཏོག་གི་ཕྲེང་བ་འཛིན་པ་དང༌། ལྷོར་བདུག་སྦོས་སྒྲོལ་མ་ནག་མོ་ཕྱག་དག་གིས་བདུག་སྦོས་ཀྱི་སྣོད་འཛིན་པ་དང༌། ནུབ་ཏུ་མར་མེ་སྒྲོལ་མ་སེར་མོ་ཕྱག་གཉིས་ཀྱིས་མར་མེའི་ཀོང་བུ་འཛིན་པ་དང༌། བྱང་དུ་དྲི་ཆབ་སྒྲོལ་མ་དམར་མོ་ཕྱག་གཉིས་ཀྱིས་དྲི་ཆབ་ཀྱི་དུང་ཆོས་འཛིན་པ་སྟེ་ལྷ་མོ་བཞི་པོ་འདི་རྣམས་ཀྱང་ཟླ་བ་ལ་གནས་པའོ། །མེ་ལ་སོགས་པའི་འདབ་མ་རྣམས་ལ་རྣམ་པར་སྣང་མཛད་ལ་སོགས་པའི་ངོ་བོ་དེ་དག་ལྟ་བུའི་འཁོར་ལོ་དང་རྡོ་རྗེ་དང་པདྨ་དང་རལ་གྲིའོ། །རིམ་པ་གཉིས་པ་ལ་སྒོ་རྣམས་སུ་ཤར་དུ་རྡོ་རྗེ་ལྕགས་ཀྱུ་མ་དཀར་མོ་ཕྱག་གཡས་པས་ལྕགས་ཀྱུ་འཛིན་པ་དང༌། ལྷོར་རྡོ་རྗེ་ཞགས་པ་མ་སེར་མོ་ཕྱག་གཡས་པས་ཞགས་པ་འཛིན་པ་དང༌། ནུབ་ཏུ་རྡོ་རྗེ་ལྕགས་སྒྲོག་མ་དམར་མོ་ཕྱག་གཡས་བས་རྡོ་རྗེས་མཚན་པའི་ལྕགས་སྒྲོག་
འཛིན་པ་དང༌། བྱང་དུ་རྡོ་རྗེ་དྲིལ་བུ་མ་ལྗང་གུ་ཕྱག་གཡས་པས་རྡོ་རྗེ་དྲིལ་བུ་འཛིན་པའོ། །མེ་ལ་སོགས་པའི་མཚམས་རྣམས་སུ་གནས་པའི་སྣ་ཚོགས་པདྨ་རྣམས་ལ། སྤྱན་མ་ལ་སོགས་པ་རྣམ་པར་དག་པའི་བྱང་ཆུབ་ཀྱི་སེམས་ཀྱི་བུམ་པ་དང༌། རི་རབ་དང་མེ་ཐབ་དང་རྒྱལ་མཚན་ཆེན་པོའོ། །སྟེང་དུ་གཙུག་ཏོར་རྣམ་པར་རྒྱལ་མ་དཀར་མོ་ཕྱག་གཡས་པས་འཁོར་ལོ་འཛིན་པ་སྟེ། འོག་ཏུ་གནོད་མཛེས་མ་སྔོན་མོ་ཀླུའི་ཞགས་པ་འཛིན་པའོ། །ལྷ་མོ་བཅུ་དྲུག་པོ་འདི་རྣམས་ནི་ཕྱག་གཡོན་པ་སྡིགས་མཛུབ་དང་བཅས་པ་སྟེ་སྣ་ཚོགས་པདྨ་དང་ཉི་མ་ལ་གནས་པའོ། །བཅུ་པོ་འདི་རྣམས་ཀྱང་ཞལ་གཅིག་པ་ཕྱག་གཉིས་མའོ། །བཅུ་གཅིག་པོ་རྣམས་ཀྱང་རྡོ་རྗེ་སྐྱིལ་ཀྲུང་ཅན་གསེར་གྱི་རྣ་ཆ་གཡོ་བ། རྣམ་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པ། པདྨ་རཱ་གའི་འོད་ཟེར་འཕྲོ་བའོ། །རིགས་ཀྱི་བདག་པོ་ནི་རྡོ་རྗེ་སྒྲོལ་མའི་རིན་ཆེན་དབང་པོའོ། །མེ་ཏོག་སྒྲོལ་མ་ལ་སོགས་པ་ནི་རྣམ་པར་སྣང་མཛད་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་རྡོ་རྗེ་ལྕགས་ཀྱུ་མ་ལ་སོགས་པ་རྣམས་ཀྱི་ཡང་ངོ༌། །གཙུག་ཏོར་རྣམ་པར་རྒྱལ་མའི་རིན་ཆེན་དབང་པོ་སྟེ། གནོད་མཛེས་མའི་མི་བསྐྱོད་པའོ། །བཅོམ་ལྡན་འདས་མའི་ཐུགས་ཀའི་ས་བོན་ནི་ཏཱཾ་ངོ༌། །ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ། ཞེས་པ་ནི་སྙིང་པོ་སྟེ་ལས་ཐམས་ཅད་པའི་སྔགས་ཀྱང་འདིའོ། །འོད་ཟེར་ཅན་གྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གནས་པའི་ཆོས་འབྱུང་གི་ནང་དུ་གཞལ་ཡས་ཁང་སྟེ། ཁ་ཅིག་ནི་ཆོས་འབྱུང་མེད་པར་རི་རབ་ཀྱི་སྟེང་དུ་གཞལ་ཡས་ཁང་ངོ་ཞེས་པའོ། །གཞལ་ཡས་ཁང་གི་ལྟེ་བར་མཆོད་རྟེན་གྱི་ཕུག་གི་སྙིང་པོར་སྣ་ཚོགས་ཆུ་སྐྱེས་ལ་གནས་པའི་ཟླ་བའམ་ཉི་མ་ལ་གཡས་བསྐུམ་ཞིང་གཡོན་བརྐྱང་བས་གནས་པའི་བཅོམ་ལྡན་འདས་མ་འོད་ཟེར་ཅན་སེར་མོ་རིན་པོ་ཆེ་སྣ་ཚོགས་ཀྱི་ཅོད་པན་ཅན། དབུའི་རྩེར་མཆོད་རྟེན་གྱིས་བརྒྱན་པ་རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་ལྡན་པ། ཞལ་གསུམ་མ་རྩ་བའི་ཞལ་སེར་པོ་གཡས་ཞལ་དཀར་བོ། གཡོན་ཞལ་ནག་པོ་ཕག་པའི་གདོང་ཅན་ཁྲོས་པ་ཁྲོ་གཉེར་དང་ཟུར་མིག་ཏུ་ལྡན་པ། ལྗགས་འདྲིལ་བའི་འཇིགས་སུ་རུང་བ་ཕྱག་དྲུག་མ་གཡས་པ་རྣམས་ཀྱིས་མདའ་དང་རྡོ་རྗེ་དང་ཁབ་འཛིན་པ། གཡོན་པ་རྣམས་ཀྱིས་གཞུ་དང་སྐུད་པ་དང་མྱ་ངན་མེད་པའི་ཤིང་གི་ཡལ་ག་མེ་
ཏོག་དང་བཅས་པ་འཛིན་པ། སྨད་གཡོགས་སྔོན་པོ་གྱོན་པ་རྣམ་བར་བཀྲ་བའི་སྟོད་གཡོགས་སྔོན་པོ་ཅན། སེར་པོའི་མདོག་ཅན་གྱི་ཕག་པ་ལ་གནས་ཤིང་དེའི་མདོག་ཅན་གྱི་ཕག་པས་ཡོངས་སུ་བསྐོར་བ། མྱ་ངན་མེད་པའི་མེ་ཏོག་གི་ཕྲེང་བས་དབུ་ལ་བརྒྱན་པའོ། །ཤར་ཕྱོགས་སུ་ཨརྐ་མ་སཱི་མེ་ཏོག་བནྡུ་ཀའི་མདོག་ཅན་གཡས་པ་དང་གཡོན་པའི་ཕྱག་གིས་ཁབ་དང་སྐུད་པ་འཛིན་པའོ། །ལྷོར་མ་རྐ་མ་སཱི་སེར་མོ་གསེར་གྱི་མདོག་ཅན་གཡས་པས་སྐུད་པ་དང་བཅས་པའི་ཁབ་དང་གཡོན་པས་མྱ་ངན་མེད་པའི་ཡལ་ག་འཛིན་པའོ། །ནུབ་ཏུ་ཨནྡྷྲ་དྷ་མ་སཱི་སེར་མོ་གཡས་པས་མྱ་ངན་མེད་པའི་ཡལ་ག་དང་གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །བྱང་དུ་ཏེ་ཛོ་མ་སཱི་དམར་མོའི་མདོག་ཅན་གཡས་པ་དང་གཡོན་པའི་ཕྱག་གིས་མདའ་དང་གཞུ་འཛིན་པའོ། །མེ་ལ་སོགས་པའི་མཚམས་རྣམས་སུ་ཨུ་ད་ཡ་མ་སཱི་དང་གུལ་མམ་སཱི་དང་པ་ནམ་སཱི་དང་ཙི་བར་མ་སཱི་རྣམས་རིམ་པ་ཇི་ལྟ་བ་བཞིན་དུ་ཨ་རྐ་མ་སཱི་ལ་སོགས་པའི་སྐུ་མདོག་དང་ཕྱག་མཚན་ནོ། །རིམ་པ་ཕྱི་མའི་སྣམ་བུ་རྣམས་ལ་ཤར་དུ་མ་ཧཱ་ཙི་བ་རམ་སི་དང་བ་རཱ་ཧཱ་མུ་ཁི་མཆེ་བ་གཙིགས་པ་འཇིགས་སུ་རུང་བ་གཡས་པས་རྡོ་རྗེ་ལྕགས་ཀྱུ་དང་གཡོན་པས་རྡོ་རྗེ་ཞགས་པ་འཛིན་པའོ། །ལྷོར་པ་ཏ་ཀྲ་མ་སཱི་དང་བར་ལི་སེར་མོ་གཡས་པས་མྱ་ངན་མེད་པའི་ཡལ་ག་དང་གཡོན་པས་རྡོ་རྗེ་འཛིན་པའོ། །ནུབ་ཏུ་པ་ར་ཀྲམ་སཱི་དང་བ་ད་ལེ་དམར་མོ་གཡས་པ་དང་གཡོན་པ་དག་གིས་མདའ་དང་གཞུ་འཛིན་པའོ། །བྱང་དུ་ཨཱུརྨ་མ་སཱི་དང་བ་ར་ལི་ལྗང་གུ་གཡས་པ་དང་གཡོན་པའི་ཕྱག་དག་གིས་ཁབ་དང་སྐུད་པ་འཛིན་པའོ། །མེའི་མཚམས་སུ་བཏྟཱ་ལི་དམར་པོའི་མདོག་ཅན་གཡས་པ་དང་གཡོན་པའི་ཕྱག་དག་གིས་ཁབ་དང་སྐུད་པ་འཛིན་པའོ། །བདེན་བྲལ་དུ་བ་དཱ་ལི་སེར་མོ་གཡས་པས་སྐུད་པ་དང་བཅས་པའི་ཁབ་དང་གཡོན་པས་ཡལ་ག་དང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་འཛིན་པའོ། །རླུང་དུ་བ་རཱ་ལི་དཀར་མོ་གཡས་པ་དང་གཡོན་པ་དག་གིས་མྱ་ངན་མེད་པའི་ཡལ་ག་དང་ཞགས་པ་འཛིན་པའོ། །དབང་ལྡན་དུ་བ་རཱ་ཧཱ་མུ་ཁི་དམར་མོ་ཕྱག་གཉིས་ཀྱིས་མདའ་དང་གཞུ་འཛིན་པའོ། །ཤར་ལ་སོགས་པའི་སྒོ་རྣམས་སུ་ཨཱ་ལོ་དང༌། ཏཱ་ལོ་དང༌། ཀཱ་ལོ་དང༌། སད་པ་ལོ་སམྦ་མཱུརྡྷ་ཊི་རྣམས་ནི་རིམ་པ་ཇི་ལྟ་བཞིན་དུ། དཀར་མོ་དང༌། སེར་མོ་དང༌། དམར་
མོ་དང༌། ལྗང་གུ་སྟེ་ཕྱག་གཉིས་མ་རྡོ་རྗེ་ལྕགས་ཀྱུ་དང༌། ཞགས་པ་དང་ལྕགས་སྒྲོག་དང་དྲིལ་བུ་འཛིན་པའོ། །ཨརྐ་མ་སཱི་ལ་སོགས་པའི་ལྷ་མོ་ཉི་ཤུ་རྩ་བཞི་པོ་འདི་རྣམས་མངོན་པར་གསར་དུ་བྱུང་བའི་ལང་ཚོ་ཅན་སྤྱི་བོར་མཆོད་རྟེན་གྱིས་བརྒྱན་པ། རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་ལྡན་པ་རྣམ་པར་བཀྲ་བའི་གོས་སྔོན་པོས་སྟོད་གཡོགས་བྱས་པ། ཕག་ཞལ་གཅིག་མ་སྤྱན་གསུམ་མ་ཕྱག་གཉིས་མ་གསེར་གྱི་མདོག་ཅན་གྱི་ཕག་པ་ལ་གནས་ཤིང༌། གསེར་གྱི་མདོག་ཅན་གྱི་ཕག་པས་ཡོངས་སུ་བསྐོར་བའོ། །སྒོ་སྐྱོང་མ་རྣམས་ནི་སྣ་ཚོགས་ཆུ་སྐྱེས་དང་ཉི་མ་ལ་གཡས་བརྐྱང་གིས་གནས་པ་སྟེ་གཞན་ཉི་ཤུ་རྩ་བཞི་པོ་སྣ་ཚོགས་ཆུ་སྐྱེས་དང་ཟླ་བ་ལ་གཡོན་བརྐྱང་གིས་གནས་པའོ། །རིགས་ཀྱི་བདག་པོ་ནི་འོད་ཟེར་ཅན་མའི་རྟག་པའོ། །ཤར་ལ་སོགས་པའི་ཕྱོགས་ལ་བསྐོར་བ་རྣམས་ཀྱི་མི་བསྐྱོད་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་ཏེ་མེ་ལ་སོགས་པའི་མཚམས་ལ་བསྐོར་བ་རྣམས་ཀྱི་འདོད་བཞིན་ནོ་ཞེས་པ་ནི་ཁ་ཅིག་གོ །ཡང་ན་དཀར་མོ་རྣམས་ཀྱི་རྣམ་པར་སྣང་མཛད་དང་ནག་མོ་རྣམས་ཀྱི་མི་བསྐྱོད་པ་དང༌། སེར་མོ་རྣམས་ཀྱི་རིན་ཆེན་འབྱུང་ལྡན་དང༌། ལྗང་གུ་རྣམས་ཀྱི་དོན་ཡོད་གྲུབ་པའོ་ཞེས་པ་ནི་གཞན་ནོ། །འོད་ཟེར་ཅན་གྱི་ཐུགས་ཀའི་ས་བོན་ནི་མཾ་མོ། །ཨོཾ་མཱ་རཱི་ཙྱཻ་སྭཱ་ཧཱ། ཞེས་པ་ནི་སྙིང་པོའོ། །ཨོཾ་མཱ་རཱི་ཙྱཻ་ཧཱུཾ་སརྦྦ་བིགྷྣཱ་ན་ཨུདྦཱ་ད་ཡ་ཧཱུཾ་ཕཊ། ཅེས་པ་ལས་ཐམས་ཅད་པའི་སྔགས་སོ།། །།བསྲུང་བ་ལྔའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རི་རབ་ཀྱི་སྟེང་གི་གཞལ་ཡས་ཁང་གི་དབུས་སུ་སྣ་ཚོགས་ཆུ་སྐྱེས་དང་ཟླ་བ་ལ་བཅོམ་ལྡན་འདས་མ་སོ་སོར་འབྲང་མ་ཆེན་མོ་འོད་ཟེར་དམར་པོའི་དཀྱིལ་འཁོར་ཅན། ཞལ་བཞི་མ་རྩ་བའི་ཞལ་སེར་མོ་གཡས་དཀར་བ་རྒྱབ་སྔོ་བ། གཡེན་དམར་བ་ཕྱག་བཅུ་གཉིས་མ་གཡས་པ་རྣམས་ཀྱིས་རིན་པོ་ཆེའི་གདུགས་དང་འཁོར་ལོ་དང་རྡོ་རྗེ་དང་མདའ་དང་རལ་གྲི་དང་མཆོག་སྦྱིན་གྱི་ཕྱག་རྒྱའོ། །གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་རྩ་གསུམ་དང་གཞུ་དང་དགྲ་སྟ་དང་དུང་རྣམས་འཛིན་པ། དབུ་ལ་མཆོད་རྟེན་གྱིས་བརྒྱན་པ་རྡོ་རྗེའི་སྐྱིལ་ཀྲུང་ཅན་མའོ། །དེའི་ཤར་ཕྱོགས་སུ་སྣ་ཚོགས་པདྨ་དང་ཟླ་བ་ལ་སྟོང་ཆེན་མོ་རབ་ཏུ་འཇོམས་མ་རོལ་པའི་ཀུན་དུ་བསྐྱོད་པས་བཞུགས་པ། སྐུ་མདོག་དཀར་མོ་ཟླ་བའི་
དཀྱིལ་འཁོར་གྱི་འོད་ཅན་ཞལ་བཞི་མ་རྩ་བའི་ཞལ་དཀར་མོ་གཡས་སྔོ་བ་རྒྱབ་སེར་བ་གཡོན་ལྗང་གུ་ཕྱག་བཅུ་མ་གཡས་པ་རྣམས་ཀྱིས་པདྨ་ལ་གནས་པའི་འཁོར་ལོ་རྩིབས་བརྒྱད་པ་དང་མཆོག་སྦྱིན་དང་ལྕགས་ཀྱུ་དང་མདའ་དང་རལ་གྲི་དང་གཡོན་པ་རྣམས་ཀྱིས་རྡོ་རྗེ་དང་སྡིགས་མཛུབ་དང་ཞགས་པ་དང་གཞུ་དང་དགྲ་སྟ་རྣམས་འཛིན་པའོ། །ལྷོར་སྣ་ཚོགས་པདྨ་དང་ཉི་མ་ལ་གསང་སྔགས་རྗེས་སུ་འཛིན་མ་ཆེན་མོ་རྡོ་རྗེའི་སྐྱིལ་ཀྲུང་ཅན་མ་ནག་མོ་ཉི་མའི་འོད་ཅན་རྩ་བ་དང་གཡས་པ་དང་གཡོན་པའི་ཞལ་རྣམས་ནག་པོ་དང་དཀར་པོ་དང་དམར་པོ་ཕྱག་བཅུ་གཉིས་མ་གཡས་པ་དང་གཡོན་པའི་ཕྱག་གཉིས་ཀྱིས་ཆོས་འཆད་ཀྱི་ཕྱག་རྒྱ་མཛད་པ། གཞན་པ་གཉིས་ཀྱིས་བསམ་གཏན་གྱི་ཕྱག་རྒྱ་མཛད་པ་གཡས་པའི་ཕྱག་རྣམས་ཀྱིས་རྡོ་རྗེ་དང་མདའ་དང་མཆོག་སྦྱིན་དང་མི་འཇིགས་པའི་ཕྱག་རྒྱ་དང་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་རིན་པོ་ཆེའི་གདུགས་དང་པདྨ་ལ་གནས་པའི་བུམ་པ་འཛིན་པའོ། །ནུབ་ཏུ་སྣ་ཚོགས་ཆུ་སྐྱེས་དང་ཉི་མ་ལ་བསིལ་བའི་ཚལ་ཆེན་མོ་སྐྱིལ་ཀྲུང་ཕྱེད་པས་བཞུགས་པ་དམར་མོ་ཉི་མའི་འོད་ཅན་རྩ་བ་དང་གཡས་པ་དང་གཡོན་པའི་ཞལ་རྣམས་དམར་པོ་དང་དཀར་པོ་དང་ནག་པོ་ཕྱག་བརྒྱད་མ་གཡས་པ་རྣམས་ཀྱིས་པདྨ་དང་བཅས་པའི་མི་འཇིགས་པའི་ཕྱག་རྒྱ་དང་མདའ་དང་རྡོ་རྗེ་དང་རལ་གྲི་དང༌། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་གཞུ་དང་རིན་པོ་ཆེའི་རྒྱལ་མཚན་དང་ཐུགས་ཀར་པོ་ཏི་འཛིན་པའོ། །བྱང་དུ་སྣ་ཚོགས་པདྨ་དང་ཟླ་བ་ལ་རྨ་བྱ་ཆེན་མོ་སེམས་དཔའི་སྐྱིལ་ཀྲུང་ཅན་ལྗང་གུ་ཟླ་བའི་འོད་ཅན་རྩ་བ་དང་གཡས་པ་དང་གཡོན་པའི་ཞལ་རྣམས་ལྗང་གུ་དང་ནག་པོ་དང་དཀར་པོ་ཕྱག་བརྒྱད་མ་གཡས་པ་རྣམས་ཀྱིས་རྨ་བྱའི་མཇུག་སྒྲོ་དང་མདའ་དང་མཆོག་སྦྱིན་དང་རལ་གྲི། གཡོན་པ་རྣམས་ཀྱིས་ལྷུང་བཟེད་ལ་གནས་པའི་དགེ་སློང་དང་གཞུ་དང་པང་དུ་གནས་པའི་བུམ་པ་རིན་པོ་ཆེ་འབར་བ་འབབ་པ་ཅན་དང་སྣ་ཚོགས་རྡོ་རྗེས་སྦྲས་པའི་རིན་པོ་ཆེའི་རྒྱལ་མཚན་འཛིན་པ། རིམ་པ་གཉིས་པ་ལ་མེའི་མཚམས་སུ་དུས་མ་ནག་མོ་ཕྱག་དག་གིས་དུང་འཛིན་པ་དང༌། བདེན་བྲལ་དུ་དུས་མཚན་མ་སེར་མོ་ཕྱག་དག་གིས་རྡོ་རྗེས་མཚན་པའི་རྒྱལ་མཚན་འཛིན་པ་དང༌། རླུང་དུ་དུས་ཀྱི་རྣབ་མོ་དམར་མོ་ཕྱག་དག་གིས་དགྲ་སྟ་འཛིན་པ་དང༌། དབང་ལྡན་དུ་དཀར་མོ་སྐུ་
མདོག་དཀར་མོ་ཕྱག་དག་གིས་རྩེ་གསུམ་འཛིན་པ་སྟེ་བཞི་པོ་འདི་དག་ནི་ཞལ་གཅིག་ཕྱག་གཉིས་མའོ། །དགུ་པོ་འདི་རྣམས་ནི་རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་ལྷའི་གོས་དང་རིན་པོ་ཆེའི་ཅོད་པན་ཅན། ཞལ་རེ་རེ་ལ་སྤྱན་གསུམ་གསུམ་དང་ལྡན་པ་རིམ་པ་ཇི་ལྟ་བ་བཞིན་དུ་རིན་ཆེན་དབང་པོ་དང་རྣམ་པར་སྣང་མཛད་དང་མི་བསྐྱོད་པ་དང་སྣང་བ་མཐའ་ཡས་དང་དོན་ཡོད་གྲུབ་པ་དང་མི་བསྐྱོད་པ་དང་རིན་ཆེན་དབང་པོ་དང་སྣང་བ་མཐའ་ཡས་དང་རྣམ་པར་སྣང་མཛད་རྣམས་ཀྱིས་རྒྱས་བཏབ་པའོ། །ཤར་ལ་སོགས་པའི་སྒོ་རྣམས་སུ་སྣ་ཚོགས་པདྨ་དང་ཉི་མ་ལ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང་རྡོ་རྗེ་ལྕགས་སྒྲོག་མ་དང་རྡོ་རྗེ་འབེབས་མ་རྣམས་ནི་སྔ་མ་བཞིན་ནོ། །སོ་སོར་འབྲང་མ་ཆེན་མོ་ལ་སོགས་པ་རྣམས་ཀྱི་ས་བོན་ནི་པྲཾ་དང༌། ཨོཾ་མ་ནི་དྷ་རི་བཛྲཱི་ཎི་མ་ཧཱ་པྲ་ཏི་ས་རེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ་ཞེས་པ་ནི་སྙིང་པོ་དང༌། ས་བོན་ནི་བུཾ་དང༌། ཨོཾ་ཨཱཿ་མ་ཧཱ་སཱ་ཧ་སྲ་པྲ་མརད་ནཱི་ཧཱུཾ་ཧཱུཾ་ནི་སྙིང་པོ་དང༌། ས་བོན་ནི་ཧཱུཾ་དང༌། ཨོཾ་ཨཱཿམ་ཧཱ་མནྟྲ་ཨ་ནུ་སཱ་རི་ཎི་ཧཱུཾ་ཧཱུཾ་ནི་སྙིང་པོ་དང༌། ས་བོན་ནི་ཛཱིཾ་དང༌། ཨོཾ་ཨཱཿམ་ཧཱ་ཤཱི་ཏ་བ་ཏི་ཛཱིཾ་ཧཱུཾ་ཧཱུཾ་ནི་སྙིང་པོ་དང༌། ས་བོན་ནི་མཾ་དང༌། ཨོཾ་ཨཱཿམ་ཧཱ་མ་ཡཱུ་རཱ་བི་དྱཱེ་རཱ་ཛྙི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ནི་སྙིང་པོའོ། །དགོས་པའི་དབང་གིས་འདི་རྣམས་གང་ཡང་རུང་བས་འཁོར་ལོའི་དབང་ཕྱུག་མ་བྱ་སྟེ། འཁོར་ལོའི་དབང་ཕྱུག་མའི་སྙིང་པོའི་སྔགས་ནི་ལས་ཐམས་ཅད་པའོ། །རྡོ་རྗེ་དབྱངས་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་གླིང་རྣམས་དང་ཉེ་བའི་གླིང་རྣམས་རྒྱ་མཚོ་བདུན་ལ་སོགས་པས་ཡོངས་སུ་བསྐོར་བའི་རི་རབ་ཀྱི་སྟེང་དུ་གཞལ་ཡས་ཁང་སྟེ། དེའི་དབུས་སུ་སེང་གེའི་སྟེང་དུ་སྣ་ཚོགས་པདྨའི་ལྟེ་བ་ལ་བཅོམ་ལྡན་འདས་རྣམ་པར་སྣང་མཛད་དཀར་པོ་རྡོ་རྗེའི་སྐྱིལ་ཀྲུང་གིས་བཞུགས་པ། ཉི་མའི་འོད་ཅན། སངས་རྒྱས་ལྔས་སྤྲས་པའི་རིན་པོ་ཆེའི་ཅོད་པན་གྱིས་བརྒྱན་པའི་རལ་པའི་ཐོར་ཅོག་དང་ལྡན་པ། རྣམ་པ་སྣ་ཚོགས་པའི་རིན་པོ་ཆེའི་རྒྱན་དང༌། གོས་ཅན་ཞི་བ། དཀར་པོ་དང་སེར་པོ་དང༌། དམར་པོ་དང༌། ལྗང་གུའི་ཞལ་བཞི་པ། ཕྱག་བརྒྱད་པ་གཡས་པ་དང་གཡོན་པ་དག་གིས་རྡོ་རྗེ་དང་བཅས་པའི་བྱང་ཆུབ་མཆོག་གི་ཕྱག་རྒྱ་འཛིན་པ། གཞན་པ་དག་གིས་བསམ་གཏན་གྱི་ཕྱག་རྒྱ་འཛིན་པ། གཡས་པ་དག་གིས་བགྲང་ཕྲེང་དང་མདའ་འཛིན་པ་གཡོན་པ་དག་གིས་འཁོར་ལོ་དང་གཞུ་འཛིན་པའོ། །ཡང་
ན་འདི་ནི་ཞལ་གཅིག་ཕྱག་གཉིས་པ་སྐུ་མདོག་དཀར་པོ་རྡོ་རྗེ་དང་བཅས་པའི་བྱང་ཆུབ་མཆོག་གི་ཕྱག་རྒྱ་འཛིན་པ་སྟེ། གཡོན་པའི་རྡོ་རྗེ་ཁུ་ཚུར་གྱི་མཛུབ་མོ་བསླང་བ་གཡས་པའི་རྡོ་རྗེ་ཁུ་ཚུར་གྱིས་བཟུང་བ་ནི་བྱང་ཆུབ་མཆོག་གི་ཕྱག་རྒྱའོ། །འདབ་མ་རྣམས་ལ་མདུན་དུ་སེམས་མ་རྡོ་རྗེ་མ་སྔོན་མོ་གཡས་པས་རྡོ་རྗེ་རྩེ་ལྔ་པ་དམར་པོ་དང་གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པའོ། །གཡས་སུ་རིན་ཆེན་རྡོ་རྗེ་མ་སེར་མོ་གཡས་པས་རྡོ་རྗེ་རྩེ་ལྔ་པའི་རྩེ་མོར་རིན་པོ་ཆེས་མཚན་པ་འཛིན་ཞིང༌། གཡོན་པས་སྡིགས་མཛུབ་མཛད་པའོ། །རྒྱབ་ཏུ་ཆོས་ཀྱི་རྡོ་རྗེ་མ་དམར་མོ་གཡས་པས་རྡོ་རྗེ་རྩེ་ལྔ་པས་མཚན་པའི་པདྨ་འདབ་བརྒྱད་དཀར་དམར་དང་གཡོན་པས་པདྨ་འཛིན་པའོ། །གཡོན་དུ་ལས་ཀྱི་རྡོ་རྗེ་མ་ལྗང་གུ་གཡས་པས་དེ་བཞིན་གཤེགས་པ་ལྔའི་མདོག་ཅན་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་འཛིན་ཞིང་གཡོན་པས་སྡིགས་མཛུབ་མཛད་པའོ། །དེ་ནས་ཤར་ཕྱོགས་སུ་གླང་པོ་ཆེའི་དབང་པོའི་སྟེང་དུ་སྣ་ཚོགས་པདྨའི་ལྟེ་བ་ལ་མི་བསྐྱོད་པ་སྔོན་པོ་རྡོ་རྗེ་སྐྱིལ་ཀྲུང་གིས་བཞུགས་པ། ཕྱག་གཡས་བའི་སོར་མོ་གུང་མོས་རྡོ་རྗེ་རྩེ་ལྔ་པ་སྔོན་པོ་བཟུང་ནས་ས་གནོན་གྱི་ཚུལ་མཛད་ཅིང༌། ཕྱག་གཡོན་པ་གན་རྐྱང་པང་དུ་བཞག་པའོ། །འདབ་མ་རྣམས་ལ་མདུན་དུ་རྡོ་རྗེ་སེམས་དཔའ་དཀར་པོ་ཕྱག་གཡས་པའི་སེར་མོ་གུང་མོས་ཐུགས་ཀར་གཏོད་པའི་ཚུལ་དུ་རྡོ་རྗེ་འཛིན་པ་གཡོན་པའི་ཁུ་ཚུར་གྱིས་བསྙེམས་པ་དང་བཅས་པའི་དྲིལ་བུ་དཀུར་བརྟེན་ནས་འཛིན་པའོ། །གཡས་སུ་རྡོ་རྗེ་རྒྱལ་པོ་སེར་པོ་ཕྱག་གཡས་པར་གནས་པའི་རྡོ་རྗེ་ལྕགས་ཀྱུས་འགུགས་པའི་ཚུལ་མཛད་ཅིང་གཡོན་པས་ཞགས་པ་འཛིན་པའོ། །ཁ་ཅིག་ནི་ཕྱག་གཉིས་ཀྱིས་རྡོ་རྗེ་ལྕགས་ཀྱུ་འཛིན་པས་སྤྱན་འདྲེན་པའི་ཚུལ་བྱེད་པའོ་ཞེས་པའོ། །གཡོན་དུ་རྡོ་རྗེ་ཆགས་པ་དམར་པོ་གཡོན་པ་དང་ཅིག་ཤོས་དག་གིས་གཞུ་དང་མདའ་འཛིན་པའོ། །རྒྱབ་ཏུ་རྡོ་རྗེ་ལེགས་པ་མར་ཀ་ཏའི་མདོག་ལྟ་བུ་རྡོ་རྗེ་དང་བཅས་པའི་ཕྱག་གཉིས་ཀྱིས་ཐུགས་ཀར་ལེགས་སོ་སྦྱིན་པའི་ཚུལ་མཛད་པའོ། །ལྷོར་རྟའི་སྟེང་དུ་སྣ་ཚོགས་པདྨའི་ལྟེ་བར་རིན་ཆེན་འབྱུང་ལྡན་སེར་བོ་རྡོ་རྗེའི་སྐྱིལ་ཀྲུང་གིས་བཞུགས་པ། གཡས་པ་རྡོ་རྗེས་མཚན་པའི་རིན་པོ་ཆེ་སོར་མོ་གུང་མོས་བཟུང་ནས་མཆོག་སྦྱིན་གྱི་ཚུལ་མཛད་ཅིང༌། གཡོན་པ་གན་རྐྱལ་དུ་པང་པར་བཞག་པའོ། །འདབ་མ་རྣམས་ལ་མདུན་དུ་རྡོ་རྗེ་
རིན་ཆེན་སེར་པོ་གཡས་པས་རྡོ་རྗེ་དང་བཅས་པའི་ཁུ་ཚུར་གྱིས་མཐའ་གཉིས་སུ་རྡོ་རྗེ་གཉིས་ཀྱིས་མཚན་པའི་རིན་པོ་ཆེའི་ཕྲེང་བ་རང་གི་དབང་བསྐུར་བའི་གནས་སུ་འཆིང་བར་མཛད་ཅིང༌། གཡོན་པ་རྡོ་རྗེ་དྲིལ་བུ་བསྙེམས་པ་དང་བཅས་པས་འཛིན་པའོ། །གཡས་སུ་རྡོ་རྗེ་གཟི་བརྗིད་དམར་པོ་ཕྱག་གཉིས་ཀྱིས་ཉི་མ་ཐུགས་ཀར་འཛིན་པའི་འོད་ཀྱིས་གསལ་བར་མཛད་བའོ། །གཡོན་དུ་རྡོ་རྗེ་རྒྱལ་མཚན་ལྗང་གུ་ཕྱག་གཉིས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་འཛིན་ཞིང་གཡོན་གྱི་དཔུང་པའི་གནས་སུ་འཕྱང་བའོ། །རྒྱབ་ཏུ་རྡོ་རྗེ་བཞད་པ་དཀར་པོ་གཡས་པ་དང་གཡོན་པའི་ཕྱག་དག་གིས་སོའི་ཕྲེང་བ་རྡོ་རྗེ་གཉིས་དང་ལྡན་པ་བཟུང་ནས་ཞལ་གྱི་ཐད་ཀར་འཇོག་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་པདྨའི་ལྟེ་བ་ལ་སྣང་བ་མཐའ་ཡས་དམར་པོ་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡོན་དང་གཡས་པ་གན་རྐྱལ་དུ་པང་བའི་ཐད་དུ་བཞག་ནས་ཏིང་ངེ་འཛིན་གྱི་ཕྱག་རྒྱ་མཛད་དེ་གཡས་བའི་སོར་མོ་གུང་མོས་རྡོ་རྗེས་མཚན་པའི་སོར་མོ་འཛིན་པའོ། །འདབ་མ་རྣམས་ལ་མདུན་དུ་རྡོ་རྗེ་ཆོས་དཀར་དམར་གཡོན་པས་བསྙེམས་པ་དང་བཅས་པས་པདྨའི་ཡུ་བ་འཛིན་ཞིང་གཡས་པས་ཁ་འབྱེད་པའོ། །གཡས་སུ་རྡོ་རྗེ་རྣོན་པོ་ནམ་མཁའ་ལྟར་སྔོ་བསངས་གཡོན་པས་ཐུགས་ཀར་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་དང༌། གཡས་པས་རལ་གྲི་འཕར་ཐབས་སུ་འཛིན་པའོ། །གཡོན་དུ་རྡོ་རྗེ་རྒྱུ་གསེར་གྱི་མདོག་ཅན་ཕྱག་གཡོན་པར་གནས་པའི་འཁོར་ལོ་རྩིབས་བརྒྱད་པ་ཕྱག་གཡས་པའི་སོར་མོ་གུང་མོས་འགལ་མེའི་འཁོར་ལོ་ལྟར་བསྐོར་ཞིང་ཆོས་ཀྱི་འཁོར་ལོའི་ཕྱག་རྒྱ་འཛིན་པའོ། །རྒྱབ་ཏུ་རྡོ་རྗེ་སྨྲ་བ་དམར་པོ་གཡོན་པས་ཆོས་ཀྱི་དུང་དང་གཡས་པས་རྡོ་རྗེ་རྩེ་གཅིག་པ་ལྟ་བུའི་ལྕེ་འཛིན་པའོ། །བྱང་དུ་ནམ་མཁའ་ལྡིང་གི་སྟེང་དུ་སྣ་ཚོགས་པདྨའི་ལྟེ་བ་ལ་དོན་ཡོད་གྲུབ་པ་ལྗང་གུ་རྡོ་རྗེའི་སྐྱིལ་ཀྲུང་གིས་བཞུགས་པ། ཕྱག་གཡས་པའི་སོར་མོ་གུང་མོས་སྣ་ཚོགས་རྡོ་རྗེ་འཛིན་པས་མི་འཇིགས་པ་སྦྱིན་པའི་ཚུལ་མཛད་ཅིང༌། གཡོན་པ་གན་རྐྱལ་དུ་པང་པར་བཞག་པའོ། །འདབ་མ་རྣམས་ལ་མདུན་དུ་རྡོ་རྗེ་ལས་ལྗང་གུ་གཡས་པས་བསླང་བའི་སྦྱོར་བས་སྣ་ཚོགས་རྡོ་རྗེ་རྩེ་མོ་བཅུ་གཉིས་པ་ཐུགས་ཀར་གཏོད་པའི་ཚུལ་དུ་འཛིན་ཞིང༌། གཡོན་སྣ་ཚོགས་རྡོ་རྗེས་མཚན་པའི་དྲིལ་བུ་དཀུར་བརྟེན་པ་སྟེ། ཡང་ན་ཕྱག་གཉིས་ཀྱི་ཐལ་མོ་
སྤྱི་བོར་སྦྱར་ནས་སྣ་ཚོགས་རྡོ་རྗེ་འཛིན་པའོ། །གཡས་སུ་རྡོ་རྗེ་སྲུང་བ་སེར་པོ་ཕྱག་གཉིས་ཀྱིས་རྡོ་རྗེའི་གོ་ཆ་འཛིན་པའོ། །གཡོན་དུ་རྡོ་རྗེ་གནོད་སྦྱིན་ནག་པོ་ཕྱག་དག་གིས་མཐེའུ་ཆུང་གཉིས་རྡོ་རྗེ་མཆེ་བའི་མཚོན་གྱི་རྩེ་མོ་ཅན་རང་གི་ཞལ་གྱི་གྲྭར་འཛིན་པས་གདུག་པ་ཅན་རྣམས་བསྡིགས་པར་བྱེད་པའོ། །རྒྱབ་ཏུ་རྡོ་རྗེ་ཁུ་ཚུར་སེར་པོ་ཁུ་ཚུར་གྱི་མཚམས་སུ་རྡོ་རྗེ་སྟེ་རྡོ་རྗེ་ཁུ་ཚུར་དག་གིས་འཚིར་བའི་རྡོ་རྗེ་རྩེ་ལྔ་པ་བཟུང་བའོ། །དབུས་ཀྱི་གཞལ་ཡས་ཁང་གི་མེའི་པདྨ་ལ་རྡོ་རྗེ་སྒེག་མོ་དཀར་མོ་རྡོ་རྗེ་དཀུར་བརྟེན་པའི་ཕྱག་རྒྱ་དང་ལྡན་པའི་ཕྱག་གིས་རྡོ་རྗེ་གཉིས་འཛིན་པའོ། །བདེན་བྲལ་གྱི་པདྨ་ལ་ཕྲེང་བ་མ་སེར་མོ་ཕྱག་དག་གིས་རིན་པོ་ཆེའི་ཕྲེང་བ་འཛིན་པའོ། །རླུང་གི་པདྨ་ལ་གླུ་མ་དམར་མོ་ཕྱག་དག་གིས་པི་ཝང་སྒྲོགས་པའོ། །དབང་ལྡན་གྱི་པདྨ་ལ་གར་མ་ལྗང་གུ་རྡོ་རྗེ་རྩེ་གསུམ་པ་བཟུང་བའི་ཕྱག་དག་གིས་གར་མཛད་པའོ། །དབུས་ཀྱི་གཞལ་ཡས་ཁང་གི་ཕྱི་རོལ་གྱི་སྣམ་བུའི་ཤར་གྱི་པདྨ་རྣམས་ལ་བྱམས་པ་དང་མཐོང་བ་དོན་ཡོད་དང་ངན་སོང་ཀུན་འདྲེན་དང་མྱ་ངན་དང་མུན་པ་ཐམས་ཅད་འཇོམས་པའི་བློ་གྲོས་རྣམས་ནི་མི་བསྐྱོད་པ་ལྟ་བུའོ། །ལྷོའི་པདྨ་རྣམས་ལ་སྤོས་ཀྱི་གླང་པོ་དང་དཔའ་བར་འགྲོ་བ་དང་ནམ་མཁའི་མཛོད་དང་ཡེ་ཤེས་ཏོག་རྣམས་ནི་རིན་ཆེན་འབྱུང་ལྡན་ལྟ་བུའོ། །ནུབ་ཀྱི་པདྨ་རྣམས་ལ་འོད་དཔག་མེད་དང་ཟླ་བའི་འོད་དང་བཟང་སྐྱོང་དང༌། དྲ་བ་ཅན་གྱི་འོད་རྣམས་ནི་སྣང་བ་མཐའ་ཡས་ལྟ་བུའོ། །བྱང་གི་པདྨ་རྣམས་ལ་རྡོ་རྗེ་སྙིང་པོ་དང་བློ་གྲོས་མི་ཟད་པ་དང་སྤོབས་པ་བརྩེགས་པ་དང་ཀུན་དུ་བཟང་པོ་རྣམས་ནི་དོན་ཡོད་གྲུབ་པ་ལྟ་བུའོ། །ཡང་ན་ཤར་ལ་སོགས་པའི་སྣམ་བུ་རྣམས་ལ་བྱམས་པ་ལ་སོགས་པ་བསྐལ་པ་བཟང་པོའི་བྱང་ཆུབ་སེམས་དཔའ་སྟོང་དུ་བཞི་ཡིས་མ་ཚང་བ་བསྒོམ་པར་བྱའོ། །དེ་དག་གི་མཚན་རྣམས་ནི་རྣམ་པར་རྒྱས་པས་འཇིགས་ནས་མ་བཤད་དེ། གལ་ཏེ་འདོད་ན་བདག་གིས་བྱས་པའི་མཚན་ཡང་དག་པར་བརྗོད་པའི་འགྲེལ་པ་རྣལ་འབྱོར་སྙིང་པོའི་ཕྲེང་བ་ལས་རྟོགས་པར་བྱའོ། །མེའི་མཚམས་ཀྱི་པདྨ་ལ་རྡོ་རྗེ་བདུག་སྤོས་མ་དཀར་མོ་དང༌། བདེན་བྲལ་གྱི་པདྨ་ལ་རྡོ་རྗེ་མེ་ཏོག་མ་སེར་མོ་དང༌། རླུང་གི་པདྨ་ལ་རྡོ་རྗེ་མར་མེ་མ་དཀར་དམར་དང༌། དབང་ལྡན་གྱི་པདྨ་ལ་རྡོ་རྗེ་དྲི་ཆབ་མ་ལྗང་གུ་སྟེ། བདུག་སྤོས་
མ་ལ་སོགས་པ་འདི་རྣམས་སྔར་དང་འདྲ་བའི་ཕྱག་མཚན་འཛིན་པའོ། །ཤར་ལ་སོགས་པའི་སྒོའི་པདྨ་རྣམས་ལ་རྡོ་རྗེ་ལྕགས་ཀྱུ་དང༌། རྡོ་རྗེ་ཞགས་པ་དང་རྡོ་རྗེ་ལྕགས་སྒྲོག་དང༌། རྡོ་རྗེ་འབེབས་པ་རྣམས་ནི་རིམ་པ་བཞིན་དུ་དཀར་པོ་དང་སེར་པོ་དང་དམར་པོ་དང་ལྗང་གུ་སྟེ་སྔར་དང་འདྲ་བའི་ཕྱག་མཚན་འཛིན་པའོ། །འདིར་བཅོམ་ལྡན་འདས་རྡོ་རྗེ་དབྱིངས་ལས་གཞན་པའི་ལྷ་ཐམས་ཅད་ཞལ་གཅིག་ཕྱག་གཉིས་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པ། རིན་པོ་ཆེའི་ཅོད་པན་ཅན་ནོ། །རྡོ་རྗེ་སེམས་དཔའ་ལ་སོགས་པ་མ་གཏོགས་པ་ནི་དཀྱིལ་འཁོར་གྱི་དབང་ཕྱུག་ལ་མངོན་དུ་ཕྱོགས་པ་སྟེ། རྡོ་རྗེ་སེམས་དཔའ་ལ་སོགས་པའི་བྱང་ཆུབ་སེམས་དཔའ་བཅུ་དྲུག་ནི་རང་རང་གི་བདག་པོའི་དེ་བཞིན་གཤེགས་པ་ལ་མངོན་དུ་ཕྱོགས་པའོ། །རྣམ་པར་སྣང་མཛད་ལ་སོགས་པ་ནས་རྡོ་རྗེ་འབེབས་པའི་མཐར་ཐུག་པའི་ལྷ་ཐམས་ཅད་ནི་ཇི་སྐད་བཤད་པའི་ལྟེ་བ་དང་འདབ་མ་རྣམས་ལ་ཟླ་བ་ལ་གནས་ཤིང་ཉི་མའི་འོད་ཟེར་ཅན་ནོ། །དེ་བཞིན་གཤེགས་པ་ལྔ་ལས་གཞན་པའི་ལྷ་བཞི་བཅུ་རྩ་བརྒྱད་ནི་སེམས་དཔའི་སྐྱིལ་ཀྲུང་གིས་བཞུགས་པའོ། །འདིར་བཅོམ་ལྡན་འདས་རྡོ་རྗེ་དབྱིངས་རྣམ་པར་སྣང་བ་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་བདག་ཉིད་ལ་རང་དང་འདྲ་བའི་རྡོ་རྗེ་སེམས་དཔས་རྒྱས་གདབ་པོ། །མེ་ལོང་ལྟ་བུའི་ཡེ་ཤེས་ལ་སོགས་པའི་བདག་ཉིད་མི་བསྐྱོད་པ་ལ་སོགས་པ་དེ་བཞིན་གཤེགས་པ་བཞིའི་རིགས་ཀྱི་བདག་པོ་ནི་རྣམ་པར་སྣང་མཛད་དོ། །སེམས་མ་རྡོ་རྗེ་མ་དང་རྡོ་རྗེ་སེམས་དཔའ་ལ་སོགས་པ་བཞི་དང་སྒེག་མོ་དང་བདུག་སྤོས་མ་དང༌། བྱམས་པ་ལ་སོགས་པ་བཞི་དང༌། རྡོ་རྗེ་ལྕགས་ཀྱུ་རྣམས་ཀྱི་མི་བསྐྱོད་པའོ། །རིན་ཆེན་རྡོ་རྗེ་མ་དང་རྡོ་རྗེ་རིན་ཆེན་ལ་སོགས་པ་བཞི་དང༌། ཕྲེང་བ་མ་དང་མེ་ཏོག་མ་དང་སྤོས་ཀྱི་གླང་པོ་ལ་སོགས་པ་བཞི་དང་རྡོ་རྗེ་ཞགས་པ་རྣམས་ཀྱི་རིན་ཆེན་འབྱུང་ལྡན་ནོ། །ཆོས་ཀྱི་རྡོ་རྗེ་མ་དང་རྡོ་རྗེ་ཆོས་རབ་ལ་སོགས་པ་བཞི་དང་གླུ་མ་དང་མར་མེ་མ་དང་འོད་དཔག་མེད་ལ་སོགས་པ་བཞི་དང༌། རྡོ་རྗེ་ལྕགས་སྒྲོག་མ་རྣམས་ཀྱི་སྣང་བ་མཐའ་ཡས་སོ། །ལས་ཀྱི་རྡོ་རྗེ་མ་དང་རྡོ་རྗེ་ལས་རབ་ལ་སོགས་པ་བཞི་དང་གར་མ་དང་དྲི་ཆབ་མ་དང་རྡོ་རྗེ་སྙིང་པོ་ལ་སོགས་པ་བཞི་དང༌། རྡོ་རྗེ་འབེབས་པ་རྣམས་ཀྱི་དོན་ཡོད་གྲུབ་པའོ། །འདིར་ནང་གི་གཞལ་ཡས་ཁང་གི་སྒོ་རྣམས་
ལ་རྡོ་རྗེ་ལྕགས་ཀྱུ་ལ་སོགས་པ་བསྒོམ་པར་བྱའོ་ཞེས་པ་ནི་ཕྱོགས་གཞན་ནོ། །རྣམ་པར་སྣང་མཛད་ཀྱི་ཐུགས་ཀའི་ས་བོན་ནི་ཨའོ། །ཨོཾ་སརྦ་ཏ་ཐཱ་ག་ཏ་མ་ཧཱ་ཡོ་གཱི་ཤྭ་ར་ཧཱུཾ་ཞེས་པ་ནི་སྙིང་པོའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་རྡོ་རྗེ་གནོད་སྦྱིན་གྱི་སྟེ་ལས་ཐམས་ཅད་པའི་སྔགས་སོ། །གང་ཡང་རྡོ་རྗེ་རྩེ་མོ་ལ་སོགས་པའི་རྒྱུད་རྣམས་སུ་རྣམ་པ་གཞན་གྱིས་ཀྱང་ལྷའི་རྣམ་པའི་ཁྱད་པར་གསུངས་པ་དེ་དག་ནི་མངས་པས་འཇིགས་པས་མ་བཤད་དོ། །བཞི་བཅུ་རྩ་གསུམ་གྱི་བདག་ཉིད་ཅན་འཇམ་པའི་རྡོ་རྗེའི་དཀྱིལ་འཁོར་ནི་རྡོ་རྗེའི་གུར་ལ་སོགས་པ་ནས་གཞལ་ཡས་ཁང་གི་བར་དུ་དང་པོར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ། །འོན་ཀྱང་འདིར་ཁྲོ་བོ་རྣམས་ནི་འཆད་པར་འགྱུར་བའི་གཟུགས་ཅན་ནོ་ཞེས་པ་ནི་ཕྱོགས་གཅིག་སྟེ། རྡོ་རྗེ་གུར་གྱི་ནང་རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་ཀྱི་ལྟེ་བ་ལ་གནས་པའི་གཞལ་ཡས་ཁང་ངོ་ཞེས་པ་ནི་གཉིས་པའོ། །ཕྱོགས་གཉིས་ཀ་ལ་ཡང་མཆོད་རྟེན་དཀར་པོའི་ནང་དུ་གཞལ་ཡས་ཁང་ངོ༌། །དེའི་ལྟེ་བར་སེང་གེའི་སྟེང་དུ་སྣ་ཚོགས་ཆུ་སྐྱེས་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའི་བཅོམ་ལྡན་འདས་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ནི་སྐུ་མདོག་གསེར་བ་ཙོམ་ལྟ་བུ་སྡུག་ཅིང་ཡིད་དུ་འོང་བ་མེ་ཏོག་སྣ་ཚོགས་ཀྱིས་མཛེས་པའི་ཟུར་ཕུད་གསུམ་གྱིས་རྣམ་པར་བརྒྱན་པ། རྩ་བ་དང་གཡས་པ་དང་གཡོན་པའི་ཞལ་རྣམས་སེར་པོ་དང་སྔོན་པོ་དང་དཀར་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་མཆོག་སྦྱིན་དང་མདའ་གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་དང༌། ཨུཏྤལ་སྔོན་པོ་དང་གཞུ་འཛིན་པ། རང་དང་འདྲ་བའི་རྡོ་རྗེ་དབྱིངས་ཀྱི་དབང་ཕྱུག་མ་ལ་སྙོམས་པར་ཞུགས་པའོ། །དེའི་ཤར་གྱི་རེའུ་མིག་ལ་གླང་པོ་ཆེའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་མི་བསྐྱོད་པ་སྔོན་པོ་འགྱིང་བའི་ཚུལ་གྱིས་གནས་པ། རྩ་བ་དང་གཡས་པ་དང་གཡོན་པའི་ཞལ་རྣམས་སྔོན་པོ་དང་དཀར་པོ་དང་དམར་པོ་ཕྱག་བརྒྱད་པ་གཡས་པའི་སོར་མོ་གུང་མོས་རྡོ་རྗེ་ཐུགས་ཀར་གྱེན་དུ་བསྒྲེང་བ། གཡོན་པ་རྡོ་རྗེ་ཁུ་ཚུར་གྱིས་རྡོ་རྗེ་དྲིལ་བུ་དཀུར་བརྟེན་པ། གཞན་གཡས་པ་རྣམས་ཀྱིས་རལ་གྲི་དང་ལྕགས་ཀྱུ་དང་མདའ་དང༌། གཡོན་པ་རྣམས་ཀྱིས་ནུ་མ་དང་ཞགས་པ་དང་གཞུ་འཛིན་པའོ། །ལྷོར་རྟའི་
སྟེང་དུ་སྣ་ཚོགས་ཆུ་སྐྱེས་དང་ཉི་མ་རིན་ཆེན་འབྱུང་ལྡན་སེར་པོ་སེམས་དཔའི་སྐྱིལ་ཀྲུང་ཅན། རྩ་བ་དང་གཡས་པ་དང་གཡོན་པའི་ཞལ་རྣམས་སེར་པོ་དང་སྔོན་པོ་དང་དཀར་པོ་ཕྱག་དྲུག་པ་རྩ་བའི་ཕྱག་དག་གིས་མཉམ་གཞག་གི་ཕྱག་རྒྱ་མཛད་པ། གཡས་བདག་གིས་རིན་པོ་ཆེ་དང་རལ་གྲི་གཡོན་པ་དག་གིས་འཁོར་ལོ་དང་རྡོ་རྗེ་འཛིན་པའོ། །ནུབ་ཏུ་རྨ་བྱའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་སྣང་བ་མཐའ་ཡས་དཀར་པོ་སེམས་དཔའི་སྐྱིལ་ཀྲུང་ཅན། རྩ་བ་དང་གཡས་པ་དང་གཡོན་པའི་ཞལ་རྣམས་དཀར་པོ་དང་སྔོན་པོ་དང་དམར་པོ་ཕྱག་དྲུག་པ་གཡོན་པས་སྒེག་པ་དང་བཅས་པའི་པདྨའི་ཡུ་བ་ཐུགས་ཀར་བཟུང་སྟེ་གཡས་པས་ཁ་འབྱེད་པ། གཡས་པ་དག་གིས་བགྲང་ཕྲེང་དང་རྡོ་རྗེ་འཛིན་ཅིང༌། གཡོན་པ་དག་གིས་ནུ་མ་དང་སྤྱི་བླུགས་འཛིན་པའོ། །བྱང་དུ་ནམ་མཁའ་ལྡིང་གི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་དོན་ཡོད་གྲུབ་པ་དམར་པོ་སེམས་དཔའི་སྐྱིལ་ཀྲུང་ཅན། རྩ་བ་དང་གཡས་པ་དང་གཡོན་པའི་ཞལ་རྣམས་དམར་པོ་དང་སྔོན་པོ་དང་དཀར་པོ་ཕྱག་དྲུག་པ་དང་ཕོ་གཉིས་བསམ་གཏན་གྱི་ཕྱག་རྒྱ་བཅིངས་པ། གཡས་པ་དག་གིས་རལ་གྲི་དང་རྡོ་རྗེ་གཡོན་པ་དག་གིས་ནུ་མ་དང་ལྕགས་ཀྱུ་འཛིན་པའོ། །དབང་ལྡན་དུ་སྤྱན་མ་སེར་མོ་སེམས་དཔའི་སྐྱིལ་ཀྲུང་ཅན། ཕྱག་བརྒྱད་མ་གཡས་པ་རྣམས་ཀྱིས་མཆོག་སྦྱིན་དང་མི་འཇིགས་པ་དང་འཁོར་ལོ་དང་མདའ་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་རིན་པོ་ཆེའི་སྙེ་མ་དང་བགྲང་ཕྲེང་དང་གཞུ་འཛིན་པའོ། །མེར་མཱ་མ་ཀཱི་སྔོན་མོ་ཁྲོ་བ་དང་བཅས་པས་རྒོད་པ་སེམས་དཔའི་སྐྱིལ་ཀྲུང་ཅན། ཕྱག་དྲུག་མ་གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་གཡོན་པ་རྣམས་ཀྱིས་སྡིགས་མཛུབ་དང་ཞགས་པ་དང་གཞུ་འཛིན་པའོ། །བདེན་བྲལ་དུ་གོས་དཀར་པོ་འགྱིང་བའི་ཚུལ་གྱིས་གནས་པ་ཕྱག་དྲུག་མ། གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ། གཡོན་པ་རྣམས་ཀྱིས་པདྨ་དང་བགྲང་ཕྲེང་དང་གཞུ་འཛིན་པའོ། །རླུང་དུ་སྒྲོལ་མ་མ་ར་ཀ་ཏ་ལྟ་བུ་སེམས་དཔའི་སྐྱིལ་ཀྲུང་ཅན་ཕྱག་དྲུག་མ། གཡས་པ་རྣམས་ཀྱིས་མི་འཇིགས་པ་དང་རྡོ་རྗེ་དང་མདའ་གཡོན་པ་རྣམས་ཀྱིས་སྡིགས་མཛུབ་དང་ཨུཏྤལ་དང་གཞུ་འཛིན་པའོ། །རིམ་པ་གཉིས་པར་ཤར་ལ་སོགས་པའི་
ཕྱོགས་རྣམས་སུ་སེམས་མ་རྡོ་རྗེ་མ་དང་རིན་ཆེན་རྡོ་རྗེ་མ་དང་ཆོས་ཀྱི་རྡོ་རྗེ་མ་དང་ལས་ཀྱི་རྡོ་རྗེ་མ་རྣམས་ཀྱི་སྐུ་མདོག་དང་ཕྱག་མཚན་དང་མཚོན་ཆ་རྣམས་ནི་རིམ་པ་ཇི་ལྟ་བ་བཞིན་དུ་མི་བསྐྱོད་པ་ལ་སོགས་པ་རྣམས་དང་མཚུངས་པའོ། །འོན་ཀྱང་ནུ་མ་འཛིན་པ་མེད་པར་སེམས་མ་རྡོ་རྗེ་མ་དང་རིན་ཆེན་རྡོ་རྗེ་མ་དང་ལས་ཀྱི་རྡོ་རྗེ་མ་རྣམས་ནི་སྡིགས་མཛུབ་འཛིན་པ་སྟེ་ཆོས་ཀྱི་རྡོ་རྗེ་མ་ནི་ཞགས་པ་འཛིན་པའོ། །དབང་ལྡན་དུ་ཙུནད་མ་ཟླ་བའི་མདོག་ཅན་ཕྱག་ཉི་ཤུ་རྩ་དྲུག་མ་རྩ་བའི་ཕྱག་དག་གིས་ཐུགས་ཀར་རྩ་བའི་ཕྱག་རྒྱ་དང་གཡོན་པ་རྣམས་ཀྱིས་མི་འཇིགས་པ་དང་རལ་གྲི་དང་རིན་པོ་ཆེའི་ཕྲེང་བ་དང་པཱི་ཛ་པཱུ་ར་དང་མདའ་དང་དགྲ་སྟ་དང་དབྱུག་ཏོ་དང་ཐོ་བ་དང་ལྕགས་ཀྱུ་དང་རྡོ་རྗེ་དང་བདེན་གསུམ་གྱི་ཚུལ་དང་བགྲང་ཕྲེང་རྣམས་དང༌། གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང་པདྨ་དང་སྤྱི་བླུགས་དང་ཞགས་པ་དང་གཞུ་དང་ཤཀྟ་དང་འཁོར་ལོ་དང་རལ་གྲི་དང་སྡིགས་མཛུབ་དང་བུམ་པ་བཟང་པོ་དང་མཚོན་རྩེ་གཅིག་པ་དང་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ། ཀཉྩུ་ཀའི་སྟོད་གཡོགས་བཅིངས་པ་བླ་གོས་ཕྲག་པ་ལ་གཟར་བ། གར་གྱི་ཉམས་དགུའི་རང་བཞིན་ཅན་རྩ་བའི་ཞལ་དཀར་པོ་གཡས་པའི་ཞལ་སྔོན་པོ་ལྗགས་འདྲིལ་ཞིང་མཆེ་བ་ཅུང་ཟད་གཙིགས་པ་གཡོན་པ་སེར་པོ་མ་མཆུ་མནན་པའོ། །ཐལ་མོ་ཡང་དག་པར་སྦྱར་ཏེ་མཛུབ་མོ་གཉིས་གུང་མོའི་ཚིགས་བར་པ་ལ་ཟླུམ་པོའི་རྣམ་པར་བཞག་ཅིང་མཐེ་བོང་དག་མཛུབ་མོའི་ལོགས་ཀྱི་རྩ་བར་འཛིན་པ་ནི་འདིའི་རྩ་བའི་ཕྱག་རྒྱའོ། །མེར་རིན་ཆེན་སྐར་མདའ་མ་སེར་མོ་ཕྱག་དྲུག་མ་དང་པོ་གཉིས་ཀྱིས་ཐུགས་ཀར་རིན་པོ་ཆེ་ཁ་སྦྱོར་འཛིན་པ་གཡས་པ་དག་གིས་མི་འཇིགས་པ་དང་མདའ་དང༌། གཡོན་པ་རྣམས་སྡིགས་འཛུབ་དང་གཞུ་འཛིན་པའོ། །བདེན་བྲལ་དུ་ཁྲོ་གཉེར་ཅན་མ་དཀར་མོ་ཕྱག་བཅུ་དྲུག་མ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ། གཡོན་པ་རྣམས་ཀྱིས་སྡིགས་མཛུབ་དང་སྤྱི་བླུགས་དང་གཞུ་འཛིན་པའོ། །རླུང་དུ་རྡོ་རྗེ་ལྕགས་སྒྲོག་མ་ལྗང་གུ་ཕྱག་དྲུག་མ་གཡས་པ་རྣམས་ཀྱིས་རྡོ་རྗེ་དང་རྡོ་རྗེ་ལྕགས་སྒྲོག་དང་མདའ་དང་གཡོན་པ་རྣམས་ཀྱིས་སྡིགས་མཛུབ་དང་ཞགས་པ་དང་གཞུ་འཛིན་པའོ། །སྤྱན་མ་ལ་སོགས་པ་ལྷ་མོ་བཅུ་གཉིས་པོ་འདི་རྣམས་ནི་རོལ་པའི་ཀུན་དུ་བསྐྱོད་པ་དང་ལྡན་པས་ཟླ་བའི་
གདན་ལ་བཞུགས་ཤིང་འོད་ཟེར་དམར་པོའི་དཀྱིལ་འཁོར་ཅན་རང་རང་གི་རིགས་ཀྱི་བདག་པོ་བཞིན་དུ་ཞལ་གསུམ་པའོ། །རིམ་པ་གསུམ་པའི་དཀྱིལ་འཁོར་གྱི་སྣམ་བུ་རྣམས་ལ་ཤར་དུ་བྱམས་པ་གསེར་གྱི་མདོག་ཅན་ཕྱག་དང་པོ་གཉིས་ཆོས་ཀྱི་འཁོར་ལོའི་ཕྱག་རྒྱ་མཛད་ཅིང༌། གཡས་པ་མཆོག་སྦྱིན་གྱི་ཕྱག་རྒྱ་དང༌། གཡོན་པས་མེ་ཏོག་དང་བཅས་པའི་ཀླུ་ཤིང་གི་ཡལ་ག་འཛིན་པ། འཇམ་དཔལ་དམར་པོའི་གཟུགས་ཅན་ཁྱད་པར་དུ་ཤེས་རབ་མ་དང་བྲལ་བ་དང༌། སྤོས་ཀྱི་གླང་པོ་ལྗང་གུ་གཡོན་པས་བུམ་པར་གནས་པའི་གླང་པོ་ཆེའི་སྣ་འཛིན་ཞིང་གཡས་པ་མཆོག་སྦྱིན་པ་དང༌། ཡེ་ཤེས་ཏོག་སེར་པོ་གཡོན་པས་ཡིད་བཞིན་གྱི་ནོར་བུའི་རྒྱལ་མཚན་འཛིན་ཞིང༌། གཡས་པས་མཆོག་སྦྱིན་པ་བྱའོ། །ལྷོར་བཟང་སྐྱོང་སྐུ་མདོག་དམར་པོ་གཡོན་པས་རིན་པོ་ཆེ་འཛིན་ཞིང་གཡས་པས་མཆོག་སྦྱིན་པ་དང༌། བློ་གྲོས་རྒྱ་མཚོ་དཀར་པོ་ཕྱག་གཉིས་ཀྱིས་སེར་མོ་ཐམས་ཅད་བརྐྱང་བས་ཆུ་རླབས་ཀྱི་ཚུལ་མཛད་པ་པ་དང༌། བློ་གྲོས་མི་ཟད་པ་གསེར་གྱི་མདོག་ཅན་གཡོན་པའི་ཁུ་ཚུར་ཐུགས་ཀར་བཞག་སྟེ་གཡས་མཆོག་སྦྱིན་གྱི་ཕྱག་རྒྱ་ཅན་དང༌། སྤོབས་པ་བརྩེགས་པ་ལྗང་གུ་གཡོན་པའི་ཁུ་ཚུར་པང་དུ་བཞག་ཅིང་གཡས་པས་སེ་གོལ་གཏོགས་པའོ། །ནུབ་ཏུ་མཐུ་ཆེན་ཐོབ་པ་དཀར་པོ་གཡོན་པར་ཅུང་ཟད་ཁ་བྱེ་བའི་པདྨ་དཀར་པོ་འཛིན་ཞིང༌། གཡོན་པས་མཆོག་སྦྱིན་པ་དང༌། ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་སྡིག་པ་འདོར་བའི་ཚུལ་ཅན་དང༌། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་སེར་པོ་ཕྱག་གཉིས་ཀྱིས་ཁ་སྦྱར་བརྡེག་པའི་ཚུལ་ཅན་དང༌། དྲ་བ་ཅན་གྱི་འོད་དམར་པོ་གཡོན་པས་ཨུཏྤལ་ལ་ལ་གནས་པའི་ཉི་མའི་དཀྱིལ་འཁོར་འཛིན་ཞིང་གཡས་མཆོག་སྦྱིན་པའོ། །བྱང་དུ་ཟླ་འོད་དཀར་པོ་གཡོན་པས་ཨུཏྤལར་གནས་པའི་ཟླ་བའི་དཀྱིལ་འཁོར་འཛིན་ཞིང་གཡས་པས་མཆོག་སྦྱིན་པ་དང༌། འོད་དཔག་མེད་དམར་པོ་ཕྱག་གཉིས་ཀྱིས་དབང་བསྐུར་བའི་བུམ་པ་འཛིན་པ་དང༌། ནམ་མཁའི་མཛོད་སེར་པོ་གཡོན་པ་རྡོ་རྗེ་ཁུ་ཚུར་དཀུར་བརྟེན་ཞིང༌། གཡས་པ་ནམ་མཁའ་ལ་བསྐོར་བ་དང༌། སྒྲིབ་པ་ཐམས་ཅད་རྣམ་པར་སེལ་བ་སྔོན་པོའམ་དཀར་པོ་གཡོན་པས་ལ་རེག་ཅིང་གཡས་པའི་ཁུ་ཚུར་གྱི་མཛུབ་མོ་དང་མཐེ་བོང་སྦྱར་ཏེ་དྲི་བའི་ཚུལ་གྱིས་གནས་པའོ། །བྱམས་པ་ལ་
སོགས་པའི་བྱང་ཆུབ་སེམས་དཔའ་འདི་རྣམས་ནི་ཟླ་བའི་གདན་དང་ཟླ་བའི་འོད་ཅན། སེམས་དཔའི་སྐྱིལ་ཀྲུང་གིས་བཞུགས་པ། སྤྱན་གསུམ་པ་རང་ཕྱོགས་ཀྱི་བདག་པོ་དང་འདྲ་བར་ཞལ་གསུམ་པ། ཕྱག་དྲུག་གི་གཉིས་ཀྱིས་མཉམ་གཞག་གི་ཕྱག་རྒྱ་དང༌། གཉིས་ཀྱིས་གཞུ་དང་མདའ་འཛིན་པའོ། །བྱམས་པ་དང་འཇམ་དཔལ་གཉིས་ནི་མཉམ་གཞག་གི་ཕྱག་རྒྱ་མེད་པའོ། །འཇམ་པའི་རྡོ་རྗེ་ལ་སོགས་པའི་ལྷ་ཐམས་ཅད་རྣམ་པ་སྣ་ཚོགས་པའི་གོས་དང་རིན་པོ་ཆེའི་རྒྱན་ཅན། ཞལ་འཛུམ་བག་དང་བཅས་ཤིང་སྒེག་པའི་ཉམས་དང་ལྡན་པའོ། །ཤར་སྒོར་མ་ཧེའི་སྟེང་དུ་གཤིན་རྗེ་མཐར་བྱེད་ནག་པོ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་འཛིན་པ་དང༌། གཡོན་པས་ཞགས་པ་དང་བཅས་པའི་སྡིགས་མཛུབ་གྱེན་དུ་བསྒྲེང་བས་བསྡིགས་པར་བྱེད་པ། གཉིས་པས་འཁྱུད་པར་བྱེད་པའི་ལྷ་མོའི་ནུ་མ་ནས་འཛིན་པ་སྟེ། དེ་ཡང་ཕྱག་གཉིས་མ་དཀར་མོ་ཕྱག་གཡོན་པས་འདམ་སྐྱེས་འཛིན་ཞིང་གཡས་པས་ཀུན་ནས་འཁྱུད་པར་བརྩོན་པའོ། །གཡོན་པའི་གསུམ་པས་དངུལ་གྱི་གཞུ་འཛིན་པ་མར་ཀ་ཏ་ལྟར་ལྗང་བའི་ལྷ་མོ་ཕྱག་གཉིས་མ་གཡས་པ་ཨུཏྤལ་ལ་སྔོན་པོ་འཛིན་ཞིང་ཕྱག་གཡོན་པ་མགུལ་པ་ལ་འཁྱུད་པས་གཡས་ཕྱོགས་ནས་རྣམ་པར་མཛེས་པ་ཞབས་དྲུག་པ། གསུས་པ་འཕྱང་བ། ཞལ་དྲུག་ནི་སྔོན་པོ་རྩ་བའི་ཞལ་གད་རྒྱངས་དང་བཅས་པ། གཉིས་པ་འཇིགས་པར་བྱེད་པ་གསུམ་པ་གདངས་པ། བཞི་པ་དྲག་པོ་ཆེན་པོ་ལྔ་པ་རྡོ་རྗེའི་མཆེ་བ་ཅན། དྲུག་པ་སྤྱི་བོར་གནས་ཤིང་ལྗགས་བསྒྲིལ་བའོ། །ཡང་ན་སྤྱི་བོར་གནས་པ་སྔོན་པོ་རྩ་བའི་ཞལ་ལ་སོགས་པ་རྣམས་གཡས་སྐོར་གྱིས་སྔོན་པོ་དང་དཀར་པོ་དང་སེར་པོ་དང་དམར་པོ་དང་ལྗང་གུ་རྣམས་སོ། །ལྷོ་སྒོར་གཞན་གྱིས་མི་ཐུབ་པ་སེར་པོ་རྩ་བ་དང་གཡས་པ་དང་གཡོན་པའི་ཞལ་རྣམས་སེར་པོ་དང་ནག་པོ་དང་དཀར་པོ་དང་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ་འཛིན་ཞིང༌། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །ནུབ་ཏུ་རྟ་མགྲིན་དམར་པོ་རྩ་བ་དང་གཡས་པ་དང་གཡོན་པའི་ཞལ་རྣམས་དམར་པོ་དང་སྔོན་པོ་དང་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དབྱུག་པ་དང་ཀ་ཎ་ཡ་དང་མདའ་འཛིན་ཞིང༌། གཡོན་
པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །བྱང་དུ་བདུད་རྩི་འཁྱིལ་པ་སྔོན་པོ་ཞབས་ཀྱིས་བགེགས་མནན་པ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་དགྲ་སྟ་དང་མདའ་འཛིན་ཞིང་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །དབང་ལྡན་གྱི་མཚམས་སུ་རིན་པོ་ཆེའི་རི་བོའི་སྟེང་དུ་མི་གཡོ་བ་སྔོན་པོ་མི་གཡོ་བ་ཕྱག་དྲུག་པ་གཡས་པ་རྣམས་ཀྱིས་རལ་གྲི་དང་ཞགས་པ་དང་མདའ་འཛིན་ཞིང༌། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པ་གཡོན་ངོས་སུ་འཕྱང་བའི་གོས་སྔོན་པོ་ཅན། ཁྲག་གིས་བརླན་ཞིང་ལྗགས་འདྲིལ་བའི་ཞལ་གདངས་པའོ། །མེར་འདོད་པའི་རྒྱལ་པོ་སྔོན་པོ་ཕྱག་དྲུག་པ་ཕྱག་དང་པོ་གཉིས་ཀྱིས་ཕྱག་རྒྱ་མཛད་པ། གཡས་པ་དག་གིས་རྡོ་རྗེ་དང་མདའ་གཡོན་པ་དག་གིས་ནུ་མ་དང་གཞུ་འཛིན་པ་སྟེ། རྡོ་རྗེ་ཁུ་ཚུར་གཉིས་ཕན་ཚུན་རྒྱབ་སྦྱར་ནས་མཐེ་བ་ཆུང་གཉིས་ལུ་གུ་རྒྱུད་ལྟར་བྱས་ཏེ་སྡིགས་མཛུབ་གཉིས་རབ་ཏུ་བརྐྱང་ནས་ཞགས་པ་ལྟར་བྱས་པ་ནི་འདོད་པའི་རྒྱལ་པོའི་ཕྱག་རྒྱའོ། །བདེན་བྲལ་དུ་དབྱུག་སྔོན་ཅན་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་མདའ་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་ནུ་མ་དང་གཞུ་འཛིན་པའོ། །རླུང་དུ་སྟོབས་པོ་ཆེ་སྔོན་པོ་ཕྱག་བརྒྱད་པ་གཡས་པ་རྣམས་ཀྱིས་རྡོ་རྗེ་དང་དབྱུག་པ་དང་རལ་གྲི་དང་མདའ་གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་དང་ནུ་མ་དང་ཐོ་བ་དང་གཞུ་འཛིན་པའོ། །འཁོར་ལོའི་དབང་ཕྱུག་གི་སྟེང་དུ་གནོད་མཛེས་རྒྱལ་པོ་སྔོན་པོ་ཕྱག་དྲུག་པ་རྩ་ཕྱག་གཉིས་ཀྱིས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་བཅིངས་པ། གཡས་པ་དག་གིས་རལ་གྲི་དང་མདའ་འཛིན་ཞིང༌། གཡོན་པ་དག་གིས་ནུ་མ་དང་གཞུ་འཛིན་པ་སྟེ། འདིར་འདོད་པའི་རྒྱལ་པོའི་ཕྱག་རྒྱ་དེ་ཉིད་ཀྱི་མཛུབ་མོ་གཉིས་གྱེན་དུ་བསྒྲེང་བ་ནི་གནོད་མཛེས་ཀྱི་ཕྱག་རྒྱའོ། །འོག་ཏུ་རྡོ་རྗེས་འོག་སྔོན་པོ་ཕྱག་དྲུག་པ་གཡས་པ་རྣམས་ཀྱིས་རྡོ་རྗེ་དང་ལྕགས་ཀྱུ་དང་མདའ་འཛིན་ཞིང༌། གཡོན་པ་རྣམས་ཀྱིས་ནུ་མ་དང་ཞགས་པ་དང་བཅས་པའི་རྩེ་གཅིག་པ་དང་གཞུ་འཛིན་པའོ། །བགེགས་མཐར་བྱེད་ལ་སོགས་པ་བདུན་ནི་རྩ་བ་དང་གཡས་པ་དང་གཡོན་པའི་ཞལ་གསུམ་སྔོན་པོ་
དང་སེར་པོ་དང་དམར་པོའོ། །ཁྲོ་བོ་བཅུ་པོ་རྣམས་ཀྱང་ཁྲོས་པའི་ལྟ་སྟངས་ཅན་སྤྱན་གསུམ་དམར་ལ་སྨིན་མ་གཡོ་བ་རྩ་བའི་ཞལ་ཅུང་ཟད་བྱེ་བ། གཡས་པའི་ཞལ་གདངས་པ། གཡོན་པའི་ཞལ་ཚེམས་ཀྱིས་མཆུ་མནན་པ། མཆེ་བ་གཙིགས་པ་སྟག་གི་པགས་པའི་གོས་གྱོན་པ། ཐོད་པའི་ཕྲེང་བའི་ཅོད་པན་ཅན། སྐྲ་དང་སྨར་སེར་པོ་གྱེན་དུ་བརྫེས་པ། རོལ་པའི་ཀུན་དུ་བསྐྱོད་པ་ཅན། ཀླུ་བརྒྱད་ཀྱིས་བརྒྱན་པ། སྣ་ཚོགས་ཆུ་སྐྱེས་དང་ཉི་མ་ལ་གཡོན་བརྐྱང་གིས་གནས་པ་སྟེ། གཤིན་རྗེ་མཐར་བྱེད་ནི་གཡས་བརྐྱང་བའམ་རྡོ་རྗེ་སྐྱིལ་ཀྲུང་གིས་སོ། །དཀྱིལ་འཁོར་འདིར་གནོད་མཛེས་རྒྱལ་པོའི་ངོ་བོ་ཉིད་ཀྱིས་གནས་པའི་གཙུག་ཏོར་འཁོར་ལོས་སྒྱུར་བ་ནི་དཀྱིལ་འཁོར་བ་ཉིད་དུ་ལོགས་སུ་མ་བཤད་དེ་དཔལ་སྒྱུ་འཕྲུལ་དྲ་བའི་རྒྱུད་ལས་རྣལ་འབྱོར་རྒྱས་པར་བསྟན་པ་ལའོ། །བར་མའི་རིམ་པར་བསྟན་པ་ལ་ནི་འཇམ་པའི་རྡོ་རྗེའི་སྤྱི་གཙུག་གི་སྟེང་དུ་རིན་པོ་ཆེའི་རི་ལ་གནས་པའི་པདྨ་དང་ཉི་མ་ལ་རྡོ་རྗེ་སྐྱིལ་ཀྲུང་གིས་བཞུགས་པའི་གཙུག་ཏོར་འཁོར་ལོས་སྒྱུར་བ་སེར་པོ་རྩ་བ་དང་གཡས་པ་དང་གཡོན་པའི་ཞལ་རྣམས་སེར་པོ་དང་སྔོན་པོ་དང་ཕྱག་བརྒྱད་པ། དང་པོ་གཉིས་ཀྱིས་ཏིང་ངེ་འཛིན་གྱི་ཕྱག་རྒྱ་མཛད་པ། གཡས་པ་རྣམས་ཀྱིས་འཁོར་ལོ་དང་བགྲང་ཕྲེང་དང་མདའ་འཛིན་ཞིང༌། གཡོན་པ་རྣམས་ཀྱིས་རྡོ་རྗེ་དང་ནུ་མ་དང་གཞུ་འཛིན་པ་རྣམ་པ་སྣ་ཚོགས་པའི་གོས་དང་རིན་པོ་ཆེའི་རྒྱན་དང་རལ་པའི་ཅོད་པན་ཅན། སྤྱན་མ་ལ་སོགས་པའི་ལྷ་མོ་བཞིས་གཞོགས་གཉིས་སུ་རྣམ་པར་བརྒྱན་པའོ་ཞེས་གསུངས་སོ། །དེའི་རྗེས་སུ་འབྲངས་ནས་རྣལ་འབྱོར་རྒྱས་པ་ལ་ཡང་གཙུག་ཏོར་འཁོར་ལོས་སྒྱུར་བ་དཀྱིལ་འཁོར་པར་ཐ་དད་དུ་དང༌། དེའི་སྟེང་དུ་གནོད་མཛེས་རྒྱལ་པོ་ཤེས་པར་བྱའོ་ཞེས་པ་ནི་ཁ་ཅིག་གིའོ། །ལྷ་བཞི་བཅུ་རྩ་གསུམ་པོ་རྣམས་ཀྱང་ཞལ་རེ་རེ་ཞིང་སྤྱན་གསུམ་པའོ། །འདིར་ནུ་མ་འཛིན་པར་བཤད་པ་དེ་ཡང་མི་བསྐྱོད་པ་ལ་སོགས་པ་བཞི་ནི་རང་དང་འདྲ་བའི་ཤེས་རབ་མ་ལ་སྙོམས་པར་ཞུགས་པ་རྣམས་ཀྱི་སྟེ་ཁྲོ་བོ་རྣམས་ནི་རང་དང་འདྲ་བའི་ཤེས་རབ་མ་གཡོན་ལོགས་སུ་གནས་པ་རྣམས་ཀྱིའོ་ཞེས་ཤེས་པར་བྱའོ། །གཤིན་རྗེ་མཐར་བྱེད་ལས་གཞན་རྣམས་ལ་ཤེས་རབ་མ་མེད་ཀྱང་དེའི་ནུ་མ་འཛིན་པའི་ཚུལ་གྱིས་རང་གི་ནུ་མ་འཛིན་པའོ་ཞེས་པ་ནི་
གཞན་ནོ། །འདིར་རྣམ་པར་སྣང་མཛད་ཀྱི་རང་བཞིན་འཇམ་པའི་རྡོ་རྗེ་ཤིན་ཏུ་རྣམ་པར་དག་པའི་ཆོས་ཀྱི་དབྱིངས་ཀྱི་ཡེ་ཤེས་ཀྱི་བདག་ཉིད་ལ་རང་དང་འདྲ་བའི་རྡོ་རྗེ་སེམས་དཔའི་རྒྱས་བཏབ་པ་སྟེ། མེ་ལོང་ལྟ་བུའི་ཡེ་ཤེས་ལ་སོགས་པའི་རྣག་བཞིན་མི་བསྐྱོད་པ་ལ་སོགས་པའི་དེ་བཞིན་གཤེགས་པ་བཞི་དང༌། སྤྱན་མ་དང་ཙུནད་རྣམས་ལ་འཇམ་པའི་རྡོ་རྗེ་དང༌། མཱ་མ་ཀཱི་དང་སེམས་རྡོ་རྗེ་མ་དང་བྱམས་པ་ལ་སོགས་པ་བཞི་དང༌། ཁྲོ་བོ་བཅུ་ལ་མི་བསྐྱོད་པ་དང་རིན་ཆེན་རྡོ་རྗེ་མ་དང་རིན་ཆེན་སྐར་མདའ་དང་བཟང་སྐྱོང་ལ་སོགས་པ་བཞི་ལ་རིན་ཆེན་འབྱུང་ལྡན་དང༌། གོས་དཀར་མོ་དང་ཆོས་ཀྱི་རྡོ་རྗེ་མ་དང་ཁྲོ་གཉེར་ཅན་མ་དང་མཐུ་ཆེན་ཐོབ་ལ་སོགས་པ་བཞི་ལ་སྣང་བ་མཐའ་ཡས་དང༌། སྒྲོལ་མ་དང་ལས་ཀྱི་རྡོ་རྗེ་མ་དང་རྡོ་རྗེ་ལྕགས་སྒྲོག་མ་དང་ཟླ་འོད་ལ་སོགས་པ་རྣམས་ལ་དོན་ཡོད་གྲུབ་པའོ། །འཇམ་པའི་རྡོ་རྗེའི་ཐུགས་ཀའི་ས་བོན་ནི་མུཿའོ། །ཨོཾ་ཨཱཿཞེས་པ་ནི་སྙིང་པོའོ། །ཨོཾ་ཨ་མྲྀ་ཏ་ཀུཎྜལ་བིགྷྣཱནྟ་ཀ་ཧཱུཾ། ཞེས་པ་ལས་ཐམས་ཅད་པའོ། །ཆོས་ཀྱི་དབྱིངས་གསུང་གི་དབང་ཕྱུག་གི་དཀྱིལ་འཁོར་ལ་རྡོ་རྗེ་གྱུར་ལ་སོགས་པ་བསྒོམ་པའི་རྣམ་པར་གཞག་པ་ནི་བཤད་མ་ཐག་པའི་དཀྱིལ་འཁོར་བཞིན་ནོ། །གཞན་འདིར་གཤིན་རྗེ་གཤེད་ལ་སོགས་པའི་ཁྲོ་བོ་རྣམས་ནི་འཆད་པར་འགྱུར་བའི་གཟུགས་ཅན་ཏེ་མཆོད་རྟེན་འདི་ལ་མེད་དོ། །གཞལ་ཡས་ཁང་གི་ལྟེ་བར་སྣ་ཚོགས་ཆུ་སྐྱེས་ཀྱི་ཟེའུ་འབྲུ་ལ་གནས་པའི་སེང་གེའི་སྟེང་དུ་པདྨ་དང་ཟླ་བ་ལ་འཇམ་པའི་དབྱངས་རྡོ་རྗེའི་སྐྱིལ་ཀྲུང་གིས་བཞུགས་པ། ཉི་མ་གཞོན་ནུའི་དཀྱིལ་འཁོར་གྱི་འོད་དང་ལྡན་པ་གསེར་གྱི་མདོག་ཅན་ཨིནྡྲ་ནཱི་ལ་ལྟ་བུའི་ཟུར་ཕུད་དང་ལྡན་པ། རྡོ་རྗེ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེའི་ཕྲེང་བའི་ཅོད་པན་གྱི་སྟེང་སུ་སངས་རྒྱས་ལྔ་འཕྲོ་བའི་རིན་པོ་ཆེའི་ཅོད་པན་ཅན། རྣམ་པ་སྣ་ཚོགས་པའི་རིན་པོ་ཆེའི་རྒྱན་དག་ན་བཟའ་ཅན་སྒེག་པ་ལ་སོགས་པའི་ཉམ་གྱི་ཚོགས་དང་ལྡན་པ། རྩ་བ་དང་གཡས་དང་རྒྱ་བ་དང་གཡོན་གྱི་ཞལ་རྣམས་ནི་སེར་པོ་དང་སྔོན་པོ་དང་དམར་པོ་དང་དཀར་པོའོ། །ཕྱག་བརྒྱད་ཀྱི་གཉིས་ཀྱིས་ཆོས་ཀྱི་འཁོར་ལོའི་ཕྱག་རྒྱ་མཛད་པ། གཡས་པ་རྣམས་ཀྱིས་རལ་གྲི་དང་མདའ་དང་རྡོ་རྗེ་གཡོན་པ་རྣམས་ཀྱིས་ཤེས་རབ་ཀྱི་ཕ་རོལ་ཏུ་ཕྱིན་པའི་ཏོ་ཏི་དང་གཞུ་དག་རྡོ་རྗེ་དྲིལ་བུ་བསྣམས་པའོ། །འདབ་མ་བརྒྱད་ལ་གནས་པའི་སེང་གེའི་སྟེང་
དུ་པདྨ་དང་ཟླ་བའི་དཀྱིལ་འཁོར་རྣམས་ལ་ཤར་ལ་སོགས་པའི་ཕྱོགས་སུ་གཙུག་ཏོར་ཆེན་པོ་དང་གདུགས་དཀར་པོ་དང་གཟི་བརྗིད་ཕུང་པོ་དང་རྣམ་པར་རྒྱལ་བའི་གཙུག་ཏོར་རྣམས་དང་དབང་ལྡན་ལ་སོགས་པའི་མཚམས་རྣམས་སུ་འོད་ཟེར་རྣམ་པར་འཕྲོ་བ་དང་འཕགས་པ་དང་ཆེར་འཕགས་དང་རྒྱལ་བ་རྣམས་ཏེ། གཙུག་ཏོར་བརྒྱད་པོ་འདི་རྣམས་ནི་རྡོ་རྗེའི་སྐྱིལ་ཀྲུང་དང་རིན་པོ་ཆེའི་ཅོད་པན་ཅན། སྐུ་མདོག་སེར་པོ་ཕྱག་གཉིས་ཀྱི་གཡས་པས་འཁོར་ལོ་གྱེན་དུ་གཟུང་བ་གཡོན་པ་རང་གི་གདན་ལ་བརྟེན་པའོ། །དེ་ནས་ཤར་གྱི་རེའུ་མིག་གི་དབུས་སུ་གླང་པོ་ཆེའི་རྒྱལ་པོ་ལ་མི་བསྐྱོད་པ་སྔོན་པོ་ཞལ་བ་ཞིང་རྩ་བའི་ཞལ་སྔོན་པོ་ཁྲོ་ཞིང་སྒེག་པ་དང་བཅས་པ་གཡས་པ་དཀར་པོ་གདངས་ཤིང་དྲག་པ། རྒྱབ་མ་སེར་པོ་དཔའ་བ་གཡོན་པ་དམར་པོ་མཆེ་བ་གཙིགས་ཤིང་མ་མཆུ་མནན་པ། ཕྱག་བརྒྱད་ཀྱི་གཡས་པ་རྣམས་ཀྱིས་རལ་གྲི་དང་མདའ་དང་ལྕགས་ཀྱུ་འཛིན་ཞིང༌། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པ། རྡོ་རྗེ་སེམས་དཔའ་དང་རྡོ་རྗེ་རྒྱལ་པོ་དང་རྡོ་རྗེ་ཆགས་པ་དང་རྡོ་རྗེ་ལེགས་པ་རྣམས་ཀྱིས་ཡོངས་སུ་བསྐོར་བའོ། །ལྷོའི་རེའུ་མིག་གི་དབུས་སུ་རྟའི་རྒྱལ་པོ་ལ་རིན་ཆེན་འབྱུང་ལྡན་སེར་པོ་སེར་པོ་དང་སྔོན་པོ་དང་དཀར་པོ་དང་དམར་པོའི་ཞལ་ཅན་ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་ལྕགས་ཀྱུ་འཛིན་ཞིང༌། གཡོན་པ་རྣམས་ཀྱིས་ཡིད་བཞིན་གྱི་ནོར་བུའི་རྒྱལ་མཚན་དང༌། རྡོ་རྗེ་དྲིལ་བུ་དང་ཞགས་པ་དང་གཞུ་འཛིན་པའོ། །རྡོ་རྗེ་རིན་ཆེན་དང་རྡོ་རྗེ་གཟི་བརྗིད་དང་རྡོ་རྗེ་རྒྱལ་མཚན་དང་རྡོ་རྗེ་བཞད་པ་རྣམས་ཀྱིས་ཡོངས་སུ་བསྐོར་བའོ། །ནུབ་ཀྱི་རེའུ་མིག་གི་དབུས་སུ་རྨ་བྱ་ལ་སྣང་བ་མཐའ་ཡས་དམར་པོ་དམར་པོ་དང་ནག་པོ་དང་དཀར་པོ་དང་སེར་པོའི་ཞལ་བཞི་པ་ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་མདའ་དང་རལ་གྲི་དང་ལྕགས་ཀྱུ་འཛིན་ཞིང༌། གཡོན་པ་རྣམས་ཀྱིས་པདྨ་དང་གཞུ་དང་ཞགས་པ་དང་དྲིལ་བུ་འཛིན་པ། རྡོ་རྗེ་ཆོས་དང་རྡོ་རྗེ་རྣོན་པོ་དང་རྡོ་རྗེ་རྒྱུ་དང་རྡོ་རྗེ་སྲུང་བ་རྣམས་ཀྱིས་ཡོངས་སུ་བསྐོར་བའོ། །བྱང་གི་རེའུ་མིག་གི་དབུས་སུ་ནམ་མཁའ་ལྡིང་ལ་དོན་ཡོད་གྲུབ་པ་ལྗང་གུ་ཞལ་བཞིའི་རྩ་བ་ལྗང་གུ་མཆེ་བ་གཙིགས་པ། གཡས་པ་སེར་པོ་ཞི་བ། རྒྱབ་མ་དམར་པོ་རྣམ་པར་སྒེག་པ། གཡོན་པ་དཀར་པོ་ཞི་བ།
ཕྱག་བརྒྱད་ཀྱི་གཡས་པ་རྣམས་ཀྱིས་རལ་གྲི་དང་རྡོ་རྗེ་དང་མདའ་དང་ལྕགས་ཀྱུ་འཛིན་ཞིང༌། གཡོན་པ་རྣམས་ཀྱིས་སྡིགས་མཛུབ་དང་དྲིལ་བུ་དང་གཞུ་དང་ཞགས་པ་འཛིན་པ། རྡོ་རྗེ་ལས་དང་རྡོ་རྗེ་སྲུང་བ་དང་རྡོ་རྗེ་གནོད་སྦྱིན་དང་རྡོ་རྗེ་ཁུ་ཚུར་རྣམས་ཀྱིས་བསྐོར་བའོ། །མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་ནི་རང་རང་གི་བཞོན་པའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་སྐྱིལ་ཀྲུང་གིས་བཞུགས་པ། རྣམ་པ་སྣ་ཚོགས་པའི་རིན་པོ་ཆེའི་རྒྱན་དང་གོས་དང་ཅོད་པན་ཅན་ནོ། །རྡོ་རྗེ་སེམས་དཔའ་ལ་སོགས་པ་བཅུ་དྲུག་པོ་རྣམས་ནི་དབང་ལྡན་ལ་སོགས་པའི་མཚམས་སུ་གནས་པའི་སྣ་ཚོགས་ཆུ་སྐྱེས་དང་ཟླ་བ་ལ་རྡོ་རྗེ་དབྱིངས་ཀྱི་དཀྱིལ་འཁོར་ལས་བཤད་པའི་སྐུ་མདོག་ལ་སོགས་པ་ཅན་ནོ། །འདི་དག་ཀྱང་ཕྱོགས་སུ་གནས་པའོ་ཞེས་པའི་ཕྱོགས་ཀྱང་ཡོད་དོ། །དབང་ལྡན་ལ་སོགས་པའི་མཚམས་སུ་གནས་པའི་སྣ་ཚོགས་ཆུ་སྐྱེས་དང་ཟླ་བ་རྣམས་ལ། སེམས་དཔའི་སྐྱིལ་ཀྲུང་གིས་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་མ་རྣམས་ནི་རིམ་པ་ཇི་ལྟ་བ་བཞིན་དུ་འཇམ་པའི་དབྱངས་དང་མི་བསྐྱོད་པ་དང༌། སྣང་བ་མཐའ་ཡས་དང་དོན་ཡོད་གྲུབ་པ་ལྟ་བུའོ། །སྒོ་རྣམས་ལ་ཤར་དུ་རྡོ་རྗེ་ལྕགས་ཀྱུ་དམར་སེར་རྡོ་རྗེ་ལྕགས་ཀྱུ་དང་ཞགས་པ་འཛིན་པ། གཡས་བརྐྱང་གིས་གནས་པ་དང༌། ལྷོར་རྡོ་རྗེ་ཞགས་པ་སེར་པོ་རྡོ་རྗེ་ཞགས་པ་འཛིན་པ། གཡོན་བརྐྱང་གིས་གནས་པ་དང༌། ནུབ་ཏུ་རྡོ་རྗེ་ལྕགས་སྒྲོག་དམར་པོ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པ། ས་གའི་སྟབས་ཀྱིས་གནས་པ་དང༌། བྱང་དུ་རྡོ་རྗེ་འབེབས་པ་ལྗང་གུ་རྡོ་རྗེ་བསྡམས་པའི་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པ་ཟླུམ་པོའི་སྟབས་ཀྱིས་གནས་པ་སྟེ། བཞི་པོ་འདི་རྣམས་ནི་སྣ་ཚོགས་ཆུ་སྐྱེས་དང་ཉི་མ་གནས་པ་ཞལ་གཅིག་པ། ཕྱག་གཉིས་པ་སྤྱན་གསུམ་པ། དབུ་སྐྲ་དང་སྨ་ར་སེར་པོ་གྱེན་དུ་བརྫེས་པ། ཀླུ་བརྒྱད་ཀྱི་རྒྱན་གྱིས་བརྒྱན་པའོ། །སྙིང་པོའི་དཀྱིལ་འཁོར་འདི་ལས་ཕྱི་རོལ་གྱི་དཀྱིལ་འཁོར་གཉིས་པ་ལ། ཤར་ཕྱོགས་སུ་དབང་ལྡན་ནས་བརྩམས་ནས་གཡས་སྐོར་གྱི་རིམ་པ་ཇི་ལྟ་བ་བཞིན་དུ། ས་མ་བཅུ་གཉིས་ནི་ཕྱག་གཉིས་མ་གཡས་པ་རྣམས་ཀྱིས་རྡོ་རྗེ་འཛིན་ཞིང༌། གཡོན་པ་རྣམས་ཀྱིས་རང་རང་གི་ཕྱག་མཚན་འཛིན་པ་སྟེ། དེ་ལ་མོས་པས་སྤྱོད་པའི་ས་མ་པདྨ་དམར་
པོ་ལྟ་བུ་ཆུ་སྐྱེས་དམར་པོ་འཛིན་པ་དང༌། རབ་དགའ་མ་དམར་མོ་ཡིད་བཞིན་གྱི་ནོར་བུ་འཛིན་པ་དང༌། དྲི་མེད་མ་དཀར་མོ་ཆུ་སྐྱེས་དཀར་པོ་འཛིན་པ་དང༌། འོད་བྱེད་མ་དམར་མོ་སྣ་ཚོགས་ཆུ་སྐྱེས་ལ་གནས་པའི་ཉི་མའི་དཀྱིལ་འཁོར་འཛིན་པ་དང༌། འོད་འཕྲོ་མ་མར་ཀ་ཏའི་མདོག་ཅན་ཨུཏྤལ་སྔོན་པོ་འཛིན་པ་དང༌། སྦྱང་དཀའ་མ་སེར་མོ་པང་པར་གནས་པའི་ཕྱག་གན་རྐྱལ་གྱིས་མ་ར་ཀ་ཏའི་ནོར་བུ་འཛིན་པ་དང༌། མངོན་དུ་གྱུར་མ་གསེར་གྱི་མདོག་ཅན་པདྨའི་སྟེང་དུ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ་དང༌། རིང་དུ་སོང་མ་ནམ་མཁའ་ལྟར་སྔོ་བསངས་སྣ་ཚོགས་ཆུ་སྐྱེས་ལ་གནས་པའི་སྣ་ཚོགས་རྡོ་རྗེ་འཛིན་པ་དང༌། མི་གཡོ་མ་ཟླ་བའི་མདོག་ཅན་ཟླ་བ་ལ་གནས་པའི་རྡོ་རྗེ་རྩེ་ལྔ་པ་དམར་པོས་མཚན་པའི་པདྨའི་ཡུ་བ་ཁེངས་པ་དང་བཅས་པས་འཛིན་པ་དང༌། ལེགས་པའི་བློ་གྲོས་མ་དཀར་མོ་རལ་གྲིས་མཚན་པའི་ཨུཏྤལ་འཛིན་པ་དང༌། ཆོས་ཀྱི་སྤྲིན་མ་སེར་མོ་ཆོས་ཀྱི་སྤྲིན་གྱིས་ཡོངས་སུ་བསྐོར་བའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ་དང༌། ཀུན་དུ་འོད་མ་ཉིན་གུང་གི་ཉི་མའི་མདོག་ཅན་པདྨའི་སྟེང་དུ་ཡང་དག་པར་རྫོགས་པའི་བྱང་ཆུབ་མཚོན་པར་བྱེད་པའི་སངས་རྒྱས་ཀྱི་སྐུ་གཟུགས་འཛིན་པའོ། །ལྷོར་ཕ་རོལ་ཏུ་ཕྱིན་མ་བཅུ་གཉིས་ནི་ཕྱག་གཉིས་མ་གཡས་པ་རྣམས་ཀྱི་ཡིད་བཞིན་གྱི་ནོར་བུ་འཛིན་ཞིང༌། གཡོན་པས་རང་རང་གི་ཕྱག་མཚན་འཛིན་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་མ་ནི་ཕྱག་གཉིས་ཀྱིས་ལྷག་པའོ། །དེ་ལ་རིན་པོ་ཆེ་པདྨའི་ཕ་རོལ་ཏུ་ཕྱིན་མ་དམར་མོ་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པ་དང༌། སྦྱིན་པའི་ཕ་རོལ་ཏུ་ཕྱིན་མ་དཀར་དམར་གྱི་མདོག་ཅན་སྣ་ཚོགས་པའི་སོ་བའི་སྙེ་མ་འཛིན་པ་དང༌། ཚུལ་ཁྲིམས་ཀྱི་ཕ་རོལ་ཏུ་ཕྱིན་མ་དཀར་མོ་ཡལ་གདང་བཅས་པའི་མྱ་ངན་མེད་པའི་མེ་ཏོག་གི་ཆུན་པོ་འཛིན་པ་དང༌། བཟོད་པའི་ཕ་རོལ་ཏུ་ཕྱིན་མ་སེར་མོ་ཆུ་སྐྱེས་དཀར་པོ་འཛིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་མ་མ་ར་ཀ་ཏའི་མདོག་ཅན་ཨུཏྤལ་ལ་སྔོན་པོ་འཛིན་པ་དང༌། བསམ་གཏན་གྱི་ཕ་རོལ་ཏུ་ཕྱིན་མ་ནམ་མཁའ་ལྟར་སྔོ་བསངས་པ་པདྨ་དཀར་པོ་འཛིན་པ་དང༌། ཤེས་རབ་ཀྱི་ཕ་རོལ་ཏུ་ཕྱིན་མ་གསེར་གྱི་མདོག་ཅན་པདྨ་ལ་གནས་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་ཞིང༌། ཕྱག་གཉིས་ཀྱིས་ཆོས་ཀྱི་འཁོར་ལོའི་
ཕྱག་རྒྱ་མཛད་པ་དང༌། ཐབས་ཀྱི་ཕ་རོལ་ཏུ་ཕྱིན་མ་པྲི་ཡང་ཀུ་ལྟར་ལྗང་གུ་ཆུ་སྐྱེས་སེར་པོ་ལ་གནས་པའི་རྡོ་རྗེ་འཛིན་པ་དང་སྨོན་ལམ་གྱི་ཕ་རོལ་ཏུ་ཕྱིན་མ་ཨུཏྤལ་སྔོན་པོའི་མདོག་ཅན། ཨུཏྤལ་ལ་སྔོན་པོ་ལ་གནས་པའི་རལ་གྲི་འཛིན་པ་དང༌། སྟོབས་ཀྱི་ཕ་རོལ་ཏུ་ཕྱིན་མ་དམར་མོ་ཤེས་རབ་ཀྱི་ཕ་རོལ་ཏུ་ཕྱིན་པའི་པོ་ཏི་འཛིན་པ་དང༌། ཡེ་ཤེས་ཀྱི་ཕ་རོལ་ཏུ་ཕྱིན་མ་དཀར་མོ་སྣ་ཚོགས་པའི་རིན་པོ་ཆེའི་འབྲས་བུས་བརྒྱན་པའི་བྱང་ཆུབ་ཀྱི་ཤིང་གི་ཡལ་ག་འཛིན་པ་དང༌། རྡོ་རྗེ་ལས་ཀྱི་ཕ་རོལ་ཏུ་ཕྱིན་མ་སྣ་ཚོགས་མདོག་ཅན་ཨུཏྤལ་ལ་སྔོན་པོ་ལ་གནས་པའི་སྣ་ཚོགས་རྡོ་རྗེ་འཛིན་པའོ། །ནུབ་ཏུ་དབང་མ་བཅུ་གཉིས་ནི། ཕྱག་གཉིས་མ་གཡས་པ་རྣམས་ཀྱིས་ཨུཏྤལ་ལ་འཛིན་ཞིང༌། གཡོན་པས་བསྙེམས་པ་དང་བཅས་པས་རང་རང་གི་ཕྱག་མཚན་འཛིན་པ་སྟེ། དེ་ལ་ཚེ་ལ་དབང་མ་དཀར་དམར་གྱི་མདོག་ཅན་ནོར་བུ་པདྨ་རཱ་ག་ལ་གནས་ཤིང་ཏིང་ངེ་འཛིན་གྱི་ཕྱག་རྒྱ་ཅན་གྱི་སངས་རྒྱས་ཚེ་དཔག་ཏུ་མེད་པའི་སྐུ་གཟུགས་འཛིན་པ་དང༌། སེམས་ལ་དབང་མ་དཀར་མོ་རྡོ་རྗེ་རྩེ་ལྔ་པ་དམར་པོ་འཛིན་པ་དང༌། ཡོ་བྱད་ལ་དབང་མ་སེར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པ་དང༌། ལས་ལ་དབང་མ་ལྗང་གུ་སྣ་ཚོགས་རྡོ་རྗེ་འཛིན་པ་དང༌། སྐྱེ་པ་ལ་དབང་མ་སྣ་ཚོགས་མདོག་ཅན་རྣམ་པ་སྣ་ཚོགས་པའི་མདོག་ཅན་གྱི་ཛཱ་ཏིའི་འཁྲི་ཤིང་འཛིན་པ་དང༌། རྫུ་འཕྲུལ་ལ་དབང་ནམ་མཁའ་ལྟར་སྔོ་བསངས་པདྨ་གནས་པའི་ཉི་མ་དང་ཟླ་བའི་དཀྱིལ་འཁོར་འཛིན་པ་དང༌། མོས་པ་ལ་དབང་མ་པདྨའི་རྩ་བ་ལྟར་དཀར་བ་པྲི་ཡང་ཀུའི་མེ་ཏོག་གི་སྙེམ་འཛིན་པ་དང༌། སྨོན་ལམ་ལ་དབང་མ་སེར་མོ་ཨུཏྤལ་སྔོན་པོ་འཛིན་པ་དང༌། ཡེ་ཤེས་ལ་དབང་མ་སྔོན་མོ་ཨུཏྤལ་ལ་སྔོན་པོ་ལ་གནས་པའི་རལ་གྲི་འཛིན་པ་དང༌། ཆོས་ལ་དབང་མ་དཀར་མོ་པདྨ་ལ་གནས་པའི་བུམ་པ་བཟང་པོ་འཛིན་པ་དང༌། དེ་བཞིན་ཉིད་མ་དཀར་མོ་ཕྱག་གཡས་པས་པདྨ་དཀར་པོ་འཛིན་ཞིང༌། གཡོན་པས་རྡོ་རྗེ་རིན་པོ་ཆེའི་སྙེ་མ་འཛིན་པ་དང༌། སངས་རྒྱས་ཀྱི་བྱང་ཆུབ་མ་གསེར་ཞུན་མ་ལྟ་བུ་གཡས་པས་ཆུ་སྐྱེས་སེར་པོ་ལ་གནས་པའི་རྡོ་རྗེ་རྩེ་ལྔ་པ་འཛིན་ཞིང༌། གཡོན་པས་ཡིད་བཞིན་གྱི་ནོར་བུའི་རྒྱལ་མཚན་གྱི་སྟེང་དུ་འཁོར་ལོ་འཛིན་པའོ། །བྱང་དུ་གཟུགས་མ་བཅུ་གཉིས་ནི། ཕྱག་གཉིས་
མ་གཡས་པ་རྣམས་ཀྱིས་སྣ་ཚོགས་རྡོ་རྗེ་དང༌། གཡོན་པས་བསྙེམས་པ་དང་བཅས་པས་རང་རང་གི་ཕྱག་མཚན་འཛིན་པ་སྟེ། དེ་ལ་ནོར་གྱི་བློ་གྲོས་མ་སེར་མོ་འབྲས་ཀྱི་སྙེ་མ་འཛིན་པ་དང༌། རིན་ཆེན་སྐྲར་མདའ་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པ་དང༌། གཙུག་ཏོར་རྣམ་པར་རྒྱལ་མ་དཀར་མོ་ནོར་བུ་ཟླ་བ་ཆུ་ཤེལ་གྱི་བུམ་པ་འཛིན་པ་དང༌། འོད་ཟེར་ཅན་མ་དཀར་དམར་སྐུད་པ་དང་བཅས་པའི་ཁབ་འཛིན་པ་དང༌། རི་ཁྲོད་ལོ་མ་ཅན་མ་ལྗང་གུ་རྨ་བྱའི་མཇུག་སྒྲོ་འཛིན་པ་དང༌། དུག་སེལ་མ་དཀར་མོ་དུག་གི་མེ་ཏོག་གི་ཆུན་པོ་འཛིན་པ་དང༌། སྒོ་མཐའ་ཡས་མ་མེ་ཏོག་པྲི་ཡང་ཀུ་ལྟར་ལྗང་གུ་ཆུ་སྐྱེས་དམར་པོ་ལ་གནས་པ་མི་ཟད་པའི་གཏེར་ཆེན་པོའི་བུམ་པ་འཛིན་པ་དང༌། ཙུནད་མ་དཀར་མོ་བགྲང་ཕྲེང་འཆང་བའི་རིལ་བ་སྤྱི་བླུགས་འཛིན་པ་དང༌། ཤེས་རབ་འཕེལ་མ་དཀར་མོ་ཨུཏྤལ་སྔོན་པོ་ལ་གནས་པའི་རལ་གྲི་འཛིན་པ་དང༌། ལས་ཀྱི་སྒྲིབ་པ་ཐམས་ཅད་རྣམ་པར་སེལ་མ་ལྗང་གུ་རྡོ་རྗེ་རྩེ་གསུམ་པས་མཚན་པའི་པདྨ་དཀར་དམར་འཛིན་པ་དང༌། ཡེ་ཤེས་མི་ཟད་པའི་ཟ་མ་ཏོག་དམར་མོ་རིན་པོ་ཆེའི་ཟ་མ་ཏོག་འཛིན་པ་དང༌། སངས་རྒྱས་ཐམས་ཅད་ཀྱི་ཆོས་ཀྱི་མཛོད་མ་སེར་མོ་པདྨ་ལ་གནས་པའི་རིན་པོ་ཆེ་སྣ་ཚོགས་ཀྱི་དཔེ་སྒྲོམ་འཛིན་པའོ། །སྒོ་རྣམས་ལ་ཤར་དུ་ཆོས་སོ་སོ་ཡང་དག་པར་རིག་མ་དཀར་དམར་ཕྱག་གཉིས་ཀྱིས་ལྕགས་ཀྱུ་དང་ཞགས་པ་འཛིན་པ་དང༌། ལྷོར་དོན་སོ་སོ་ཡང་དག་པར་རིག་མ་མ་ར་ཀ་ཏའི་མདོག་ཅན་གཡས་པ་དང་གཡོན་པའི་ཕྱག་དག་གིས་རིན་པོ་ཆེའི་ཞགས་པ་འཛིན་པ་དང༌། ནུབ་ཏུ་ངེས་པའི་ཚིག་སོ་སོ་ཡང་དག་པར་རིག་མ་དམར་མོ་ཕྱག་གཉིས་ཀྱིས་མཐའ་གཉིས་སུ་པདྨས་མཚན་པའི་ལྕགས་སྒྲོག་འཛིན་པ་དང༌། བྱང་དུ་སྤོབས་པ་སོ་སོ་ཡང་དག་པར་རིག་མ་མར་ཀ་ཏ་ལྟར་ལྗང་གུ་ཕྱག་གཉིས་རྡོ་རྗེ་རྩེ་གསུམ་པ་མཚན་པའི་དྲིལ་བུ་འཛིན་པའོ། །མཚམས་རྣམས་སུ་མེར་སྒེག་མོ་སེར་མོ་སྒེག་པ་དང་བཅས་པའི་ཕྱག་དག་གིས་རྡོ་རྗེ་གཉིས་འཛིན་པ་དང༌། བདེན་བྲལ་དུ་ཕྲེང་བ་མ་དམར་སེར་ཕྱག་གཉིས་ཀྱིས་རིན་པོ་ཆེའི་ཕྲེང་བ་འཛིན་པ་དང༌། རླུང་དུ་གླུ་མ་དམར་མོ་ཕྱག་དག་གིས་པི་ཝང་འཛིན་ཞིང་སྒྲ་སྒྲོགས་པ་དང༌། དབང་ལྡན་དུ་གར་མ་ལྗང་གུ་ཕྱག་གཉིས་གར་གྱི་ཚུལ་གྱིས་རྡོ་རྗེ་རྩ་གསུམ་པ་དང་དྲིལ་བུ་འཛིན་
པའོ། །མོས་པས་སྤྱོད་པའི་ས་མ་ལ་སོགས་པའི་ལྷ་མོ་འདི་རྣམས་ཐམས་ཅད་ནི་རྣམ་པ་སྣ་ཚོགས་པའི་རིན་པོ་ཆེའི་རྒྱན་དང༌། ན་བཟའ་དང༌། རིན་པོ་ཆེའི་ཅོད་པན་ཅན། ཅུང་ཟད་འཛུམ་ཞིང་སྒེག་པའི་ཉམས་དང་ལྡན་པ། སྣ་ཚོགས་ཆུ་སྐྱེས་དང་ཟླ་བའི་དཀྱིལ་འཁོར་ལ་སེམས་དཔའི་སྐྱིལ་ཀྲུང་གིས་བཞུགས་པ་སྟེ། ཁྱད་པར་སྒོ་སྐྱོད་མ་རྣམས་ནི་ཉི་མའི་དཀྱིལ་འཁོར་རོ། །གཞན་དག་ནི་དེ་རྣམས་ཀྱང་ཟླ་བ་ལ་གནས་པའོ། །དཀྱིལ་འཁོར་གསུམ་པ་ལ་དབང་ལྡན་ནས་བརྩམས་ནས་བྱང་ཆུབ་སེམས་དཔའ་རྣམས་ཏེ། དེ་ལ་སྣམ་བུ་རྣམས་ཀྱི་ཤར་དུ་ཀུན་དུ་བཟང་པོ་སེར་པོ་གཡས་པས་མཆོག་སྦྱིན་དང་གཡོན་པས་ཨུཏྤལ་ལ་གནས་པའི་རལ་གྲི་འཛིན་པ་དང༌། བློ་གྲོས་མི་ཟད་པ་སེར་པོ་གཡས་པས་རལ་གྲི་དང་གཡོན་པས་མི་འཇིགས་པས་པདྨ་འཛིན་པ་དང༌། སའི་སྙིང་པོ་སེར་པོ་གཡས་པས་ས་གནོན་མཛད་ཅིང་གཡོན་པས་པདྨ་ལ་གནས་པའི་དཔག་བསམ་གྱི་ཤིང་འཛིན་པ་དང༌། ནམ་མཁའི་སྙིང་པོ་ལྗང་གུ་གཡས་པས་རིན་པོ་ཆེ་ཐམས་ཅད་ཀྱི་ཆར་འབེབས་ཤིང༌། གཡོན་པས་ཡིད་བཞིན་གྱི་ནོར་བུ་འཛིན་པའོ། །ལྷོར་ནམ་མཁའི་མཛོད་སེར་པོ་གཡས་པས་ཡིད་བཞིན་གྱི་ནོར་བུ་དང་གཡོན་པས་བུམ་པ་བཟང་པོ་ལས་འཕྱངས་པའི་དཔག་བསམ་གྱི་ཤིང་འཛིན་པ་དང༌། ཕྱག་ན་རིན་ཆེན་ལྗང་གུ་གཡས་པས་རིན་པོ་ཆེ་དང༌། གཡོན་པས་ཆུ་སྐྱེས་ལ་གནས་པའི་ཟླ་བའི་དཀྱིལ་འཁོར་འཛིན་པ་དང༌། བློ་གྲོས་རྒྱ་མཚོ་དཀར་པོ་གཡས་པས་དུང་དང་གཡོན་པས་རལ་གྲི་འཛིན་པ་དང༌། རྡོ་རྗེ་སྙིང་པོ་ཨུཏྤལ་སྔོན་པོའི་མདོག་ཅན་གཡས་པས་རྡོ་རྗེ་དང༌། གཡོན་པས་ས་བཅུ་པའི་གླེགས་བམ་འཛིན་པའོ། །ནུབ་ཏུ་སྤྱན་རས་གཟིགས་དབང་ཕྱུག་དཀར་པོ་གཡས་པས་མཆོག་སྦྱིན་དང༌། གཡོན་པས་ཆུ་སྐྱེས་འཛིན་པ་དང༌། མཐུ་ཆེན་ཐོབ་པ་སེར་པོ་གཡས་པས་རལ་གྲི་དང་གཡོན་པས་པདྨ་འཛིན་པ་དང༌། ཟླ་འོད་དཀར་པོ་གཡས་པས་འཁོར་ལོ་དད་གཡོན་པས་ཆུ་སྐྱེས་ལ་གནས་པའི་ཟླ་བའི་དཀྱིལ་འཁོར་འཛིན་པ་དང༌། དྲ་བ་ཅན་གྱི་འོད་དཀར་དམར་གཡས་པས་རལ་གྲི་དང་གཡོན་པས་ཆུ་སྐྱེས་ལ་གནས་པའི་ཉི་མ་འཛིན་པའོ། །བྱང་དུ་འོད་དཔག་མེད་དཀར་པོ་གཡས་པས་སྣ་ཚོགས་ཆུ་སྐྱེས་དང༌། གཡོན་པས་ཆུ་སྐྱེས་ལ་གནས་པའི་བུམ་པ་འཛིན་པ་དང༌། སྤོབས་པ་བརྩེགས་པ་སེར་
པོ་གཡས་པས་སེ་གོལ་གཏོགས་ཤིང་གཡོན་པས་པདྨ་ལ་གནས་པའི་རལ་གྲི་འཛིན་པ་དང༌། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་གུར་གུམ་གྱི་མདོག་གཡས་རྡོ་རྗེ་རྩེ་ལྔ་པ་དང༌། གཡོན་པས་ཤཀྟི་འཛིན་པ་དང༌། སྒྲིབ་པ་ཐམས་ཅད་རྣམ་པར་སེལ་བ་སྔོན་པོ་གཡས་པས་རལ་གྲི་དང་གཡོན་པས་སྣ་ཚོགས་རྡོ་རྗེས་མཚན་པའི་བ་དང་འཛིན་པའོ། །བཅུ་དྲུག་པོ་འདི་རྣམས་ནི་སྣ་ཚོགས་པདྨ་དང་ཟླ་བའི་དཀྱིལ་ལ་སེམས་དཔའི་སྐྱིལ་ཀྲུང་ཅན་རིན་པོ་ཆེའི་ཅོད་པན་དང་སྣ་ཚོགས་པའི་རིན་པོ་ཆེ་དང་ན་བཟས་བརྒྱན་པ། ཞལ་གཅིག་པ་ཕྱག་གཉིས་པ་རྣམས་སོ། །སྒོ་རྣམས་ལ་ཤར་དུ་མ་ཧེ་ལ་གཤིན་རྗེ་མཐར་བྱེད་ནག་པོ་གསུས་པ་འཕྱང་པ་ཞལ་དྲུག་པ་ཕྱག་དྲུག་པ་གཡས་པ་རྣམས་ཀྱིས་ལྕགས་ཀྱུ་དང༌། རལ་གྲི་དང་མདའ་དང༌། གཡོན་པ་རྣམས་ཀྱིས་སྡིགས་མཛུབ་དང་བཅས་པའི་ཞགས་པ་དང་དྲིལ་བུ་དང་གཞུ་འཛིན་པ་སྟེ། ཞལ་དང་ཞབས་ཀྱི་ཁྱད་པར་ནི་སྔ་མ་བཞིན་ནོ། །ལྷོར་ཤེས་རབ་མཐར་བྱེད་སེར་པོ་ཞལ་བཞི་པ་རྩ་བའི་ཞལ་སྒེག་པ་དང་བཅས་པ་གཡས་པ་གདངས་པ། རྒྱབ་མ་དྲག་པོ་ཆེན་པོ། །གཡོན་པ་ཞི་བ། ཡང་ན་འདི་རྣམས་རིམ་པ་ཇི་ལྟ་བར་སེར་པོ་དང་སྔོན་པོ་དང་དམར་པོ་དང་ལྗང་གུའོ། །འདིའི་ཕྱག་བརྒྱད་ཀྱི་གཡས་པ་རྣམས་ཀྱིས་ཞགས་པ་དང༌། རྡོ་རྗེ་དང་རལ་གྲི་དང་མདའ་དང༌། གཡོན་པ་རྣམས་ཀྱིས་དྲིལ་བུ་དང་ཤཀྟི་དང་གཞུ་འཛིན་པའོ། །ནུབ་ཏུ་པདྨ་མཐར་བྱེད་དམར་པོ་ཞལ་དམར་པོ་བཞིའི་རྩ་བ་དང་གཡས་དང་རྒྱབ་དང་གཡོན་གྱི་ཞལ་རྣམས་སྒེག་པ་དང་དྲག་པ་དང་བཞད་པ་དང་ཞི་བའི་ཉམས་དང་ལྡན་པ། ཡང་ན་འདི་རྣམས་དམར་པོ་དང་ནག་པོ་དང་སེར་པོ་དང་དཀར་པོའོ། །ཕྱག་བརྒྱད་ཀྱི་གཉིས་ཀྱིས་རྡོ་རྗེ་ལྕགས་སྒྲོག་དང༌། གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ། གཡོན་པ་རྣམས་ཀྱིས་དྲིལ་བུ་དང་སྡིགས་མཛུབ་དང་བཅས་པའི་ཞགས་པ་དང་གཞུ་འཛིན་པ་སྟེ། གསུམ་པ་འདི་དག་ནི་རོལ་པའི་ཀུན་དུ་བསྐྱོད་པས་གནས་པའོ། །བྱང་དུ་བགེགས་མཐར་བྱེད་སྔོན་པོ་ཞལ་སྔོན་པོ་བཞི་པ། ཡང་ན་འདི་རྣམས་སྔོན་པོ་དང་སེར་པོ་དང་དམར་པོ་དང་ལྗང་གུ། ཕྱག་བརྒྱད་ཀྱི་གཉིས་ཀྱིས་རྡོ་རྗེ་བསྡམས་པའི་ཚུལ་གྱིས་དྲིལ་བུ་དང༌། གཡས་པ་རྣམས་ཀྱིས་རལ་གྲི་དང་མདའ་དང་ལྕགས་ཀྱུ། གཡོན་པ་རྣམས་ཀྱིས་སྡིགས་མཛུབ་དང་བཅས་
པའི་ཞགས་པ་དང་གཞུ་དང་དྲིལ་བུ་འཛིན་པ་གཡོན་བརྐྱང་གིས་ལོག་འདྲེན་མནན་ནས་བཞུགས་པའོ། །མཚམས་རྣམས་ལ་དབང་ལྡན་དུ་འཇིག་རྟེན་གསུམ་ན་རྣམ་པར་རྒྱལ་བ་སྔོན་པོ་ཞལ་སྔོན་པོ་བཞིའི་རྩ་བ་ཁྲོ་ཞིང་སྒེག་པ་དང་བཅས་པ་གཡས་དྲག་པོ་རྒྱབ་དཔའ་བ། གཡོན་མི་སྡུག་པའི་ཉམས་ཅན། ཡང་ན་འདི་རྣམས་སྔོན་པོ་དང་སེར་པོ་དང་དམར་པོ་དང་དཀར་པོའོ། །ཕྱག་བརྒྱད་ཀྱི་གཉིས་ཀྱིས་རྡོ་རྗེ་དང་དྲིལ་བུ་ཐུགས་ཀར་བཟུང་ནས་རྡོ་རྗེ་ཧཱུཾ་མཛད་ཀྱི་ཕྱག་རྒྱ་མཛད་པ། གཡས་པ་རྣམས་ཀྱིས་རལ་གྲི་དང་ལྕགས་ཀྱུ་དང་མདའ། གཡོན་པ་རྣམས་ཀྱིས་རྡོ་རྗེ་དང་ཞགས་པ་དང་གཞུ་འཛིན་པ། ཞབས་གཡོན་བརྐྱང་བས་དབང་ཕྱུག་ཆེན་པོའི་མགོ་དང༌། གཡས་བསྐུམ་པས་ཨུ་མའི་ནུ་མ་མནན་པའོ། །མེར་རྡོ་རྗེ་ཉི་མ་མེ་ལྟར་འབར་བ་ནག་པོ་སྒེག་པ་དང་དཔའ་བ་དང་འཇིགས་སུ་རུང་བ་སྙིང་རྗེའི་ཉམས་དང་ལྡན་པའི་ཞལ་བཞི་པ། ཡང་ན་འདི་རྣམས་སྔོན་པོ་དང་དཀར་པོ་དང་སེར་པོ་དང་དམར་པོ། འདིའི་ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་དང་རལ་གྲི་དང་མདའ་དང་འཁོར་ལོ་འཛིན་ཞིང༌། གཡོན་པ་རྣམས་ཀྱིས་དྲིལ་བུ་དང་ཞགས་པ་དང་གཞུ་དང་ཁ་ཊྭཱཾ་ག་དང་འབྲེལ་བའི་བ་དང་འཛིན་པ། ཆུང་མ་དང་བཅས་པའི་ཁྱབ་འཇུག་གཡས་བརྐྱང་གིས་མནན་ནས་བཞུགས་པའོ། །བདེན་བྲལ་དུ་ཧེ་རུ་ཀ་སྔོན་པོ་ཞལ་སྔོན་པོ་བཞིའི་རྩ་བ་དྲག་པོ། །གཡས་པ་རབ་ཏུ་དགའ་བས་བཞད་པ། རྒྱབ་མ་ཟ་བར་རྔམ་པ། གཡོན་པ་སྒེག་པ་དང་བཅས་པ། ཡང་ན་འདི་རྣམས་སྔོན་པོ་དང་དམར་པོ་དང་ལྗང་གུ་དང་དཀར་པོ་ཕྱག་བརྒྱད་ཀྱི་གཡས་པ་རྣམས་ཀྱིས་རྡོ་རྗེ་རྩེ་ལྔ་པ་དང་མདའ་དང་ཁྲག་གིས་གང་བའི་ཐོད་པ། གཡོན་པ་རྣམས་ཀྱིས་སྙིང་གར་པདྨ་ཁ་བྱེ་བ་དང་གཞུ་དང་ཁ་ཊྭཱཾ་ག་དྲིལ་བུ་བ་དང་དང་བཅས་པ་འཛིན་ཞིང༌། གཉིས་ཀྱིས་འཇིགས་བྱེད་ཆེན་པོའི་པགས་པ་རླུང་རས་ལྟ་བུ་འཛིན་པ། ཆུང་མ་དང་བཅས་པའི་ཚངས་པ་གཡོན་བརྐྱང་གིས་མནན་ནས་བཞུགས་པའོ། །རླུང་དུ་རྟ་མཆོག་ལྗང་གུ་ཞལ་ལྗང་གུ་བཞིའི་རྩ་བ་ཁྲོ་ཞིང་སྒེག་པ་དང་བཅས་པ། གཡས་པ་དྲག་པོ་གཡོན་པ་ཚངས་པའི་གདོང་ཅན། ཡང་ན་འདི་རྣམས་ལྗང་གུ་དང་སྔོན་པོ་དང་དཀར་པོ་སྟེ་སྤྱི་བོར་རྟ་མགོ་ལྗང་གུ་འདིའི་ཕྱག་བརྒྱད་ཀྱི་གཡས་པ་སྣ་ཚོགས་རྡོ་རྗེ་བ་དན་དང་ལྡན་པས་བསྒྲེང་བའི་ཚུལ་དང༌། གཉིས་པས་བ་དན་གསུམ་པའི་ཚུལ་དང༌། གསུམ་
པས་རལ་གྲི། བཞི་པས་མདའ། གཡོན་པས་ཕུབ་དང་བཅས་པའི་ཕྱག་གིས་སྣ་ཚོགས་ཆུ་སྐྱེས་དང༌། གསུམ་གྱིས་ཤཀྟ་དང་དབྱུག་པ་དང་གཞུ་འཛིན་པ། གཡས་བརྐྱང་པ་དང་གཡོན་བརྐྱང་བ་སྟེ་ཞབས་བཞི་པ། གཡས་པ་གཅིག་གིས་དབང་མོ་དང་དཔལ་མོ། །གཉིས་པས་དགའ་མ་དང་རངས་མ་གཡོན་པ་གཅིག་གིས་དབང་པོ་དང་སྦྲང་རྩིར་བྱེད་པ། གཉིས་པས་རྒྱལ་བར་བྱེད་པ་དང་དཔྱིད་ཀྱི་ལྷ་མནན་ནས་བཞུགས་པའོ། །འཁོར་ལོའི་དབང་ཕྱུག་གི་སྟེང་གི་ནམ་མཁར་གཙུག་ཏོར་འཁོར་ལོས་སྒྱུར་བ་སེར་པོ་ཞལ་སེར་པོ་བཞི་པ། ཡང་ན་སེར་པོ་དང་སྔོན་པོ་དང་དམར་པོ་དང་དཀར་པོའི་ཞལ་བཞི་པ། ཕྱག་བརྒྱད་ཀྱི་གཡས་པ་རྣམས་ཀྱིས་འཁོར་ལོ་དང་ལྕགས་ཀྱུ་དང་རལ་གྲི་དང་མདའ། གཡོན་པ་རྣམས་ཀྱིས་དྲིལ་བུ་དང་ཞགས་པ་དང་བགྲང་ཕྲེད་དང་གཞུ་འཛིན་པ། རོལ་པའི་ཀུན་དུ་བསྐྱོད་པས་བཞུགས་པའོ། །འོག་ཏུ་གནོད་མཛེས་རྒྱལ་པོ་ནག་པོ་དྲག་པོ་དང་ཞི་བ་དང་བཞད་པ་དང་སྒེག་པའི་ཉམས་དང་ལྡན་པའི་ཞལ་ནག་པོ་བཞི་པ་ཡང་ན་ནག་པོ་དང་དཀར་པོ་དང་དམར་པོ་དང་སེར་པོའི་ཞལ་བཞི་པ། ཕྱག་གཡས་པ་རྣམས་ཀྱིས་རྡོ་རྗེ་དང་ལྕགས་ཀྱུ་དང་རལ་གྲི་དང་མདའ་གཡོན་པ་རྣམས་ཀྱིས་དྲིལ་བུ་དང་ཞགས་པ་དང་རྡོ་རྗེ་རྩེ་གཅིག་པ་དང་གཞུ་འཛིན་པ། གཡོན་བརྐྱང་གིས་བཞུགས་པའོ། །ཁྲོ་བོ་བཅུ་པོ་འདི་རྣམས་ནི་སྣ་ཚོགས་ཆུ་སྐྱེས་དང་ཉི་མ་ལ་གནས་པ། ཞལ་རེ་རེ་ཞིང་དམར་ལ་ཟླུམ་པའི་སྤྱན་གསུམ་པ། སྨིན་མ་འཁྱོག་པ་དང་བཅས་པ། སྟག་གི་པགས་པའི་གོས་དང་སྨད་གཡོགས་ཅན། ཐོད་པའི་ཕྲེང་བའི་ཅོད་པན་དང་ལྡན་པ། དབུ་སྐྲ་དམར་སེར་འབར་བ་གྱེན་དུ་བཅིངས་པ་སྨར་དམར་སེར་ཅན་གདེངས་ཅན་གྱི་དབང་པོ་བརྒྱད་དང་ལྡན་པ་འཇིགས་སུ་རུང་བའོ། །དཀྱིལ་འཁོར་གསུམ་པ་གཉིས་ཀྱི་གྲྭ་བཞིའི་ནང་དུ་འཇིག་རྟེན་གསུམ་ལས་རྣམ་པར་རྒྱལ་བ་ལ་སོགས་པའི་ཁྲོ་བོ་བཞིའི་ཕྱིའི་རེ་ཁཱའི་ཕྱི་རོལ་གྱི་གནས་སུ་མེ་ལ་སོགས་པའི་ཟུར་ཐིག་བཞི་པོ་རྣམས་ཀྱི་གཡས་ལོགས་སུ་མ་ཏོག་མ་ལ་སོགས་པ་བཞི་དང་གཡོན་ལོགས་སུ་རྡོ་རྗེ་གཟུགས་མ་ལ་སྟེ། དེ་ལ་མེ་ཏོག་མ་སེར་མོ་ཕྱག་ན་མེ་ཏོག་གི་སྣོད་ཅན་དང༌། བདུག་སྤོས་མ་ནག་མོ་ཕྱག་ན་སྦོས་ཕོར་ཅན་དང༌། མར་མེ་མ་དམར་མོ་ཕྱག་ན་རིན་པོ་ཆེའི་སྒྲོན་མའི་མཆོད་སྡོང་ཅན་དང༌། དྲི་ཆ་བ་མ་
ལྗང་གུ་ཕྱག་ན་དྲིའི་དུང་ཅན་དང༌། རྡོ་རྗེ་གཟུགས་མ་སེར་མོ་ཕྱག་ན་མེ་ལོང་ཅན་དང༌། རྡོ་རྗེ་སྒྲ་མ་ལྗང་གུ་ཕྱག་ན་པི་ཝང་ཅན་དང༌། རྡོ་རྗེ་རོ་མ་དམར་མོ་ཕྱག་ན་དྲིའི་སྣོད་ཅན་དང༌། རྡོ་རྗེ་རེག་བྱ་མ་སྣ་ཚོགས་པའི་མདོག་ཅན་ཕྱག་ན་གོས་སྣ་ཚོགས་ཅན་ནོ། །བརྒྱད་པོ་འདི་རྣམས་ནི་ཕྱག་གཉིས་མ་རིན་པོ་ཆེའི་ཅོད་པན་ཅན་རྣམ་པ་སྣ་ཚོགས་པའི་རིན་པོ་ཆེ་དང་གོས་ཀྱིས་བརྒྱན་པ། པདྨ་དང་ཟླ་བ་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །བཞི་པ་རྡོ་རྗེ་རིགས་ཀྱི་དཀྱིལ་འཁོར་ལ་དབང་པོའི་ཕྱོགས་སུ་ས་སྲུང་དཀར་པོ་ལ་གནས་པའི་དབང་པོ་སེར་པོ་རྡོ་རྗེ་དང་ནུ་མ་འཛིན་པ་དང༌། གཤིན་རྗེར་མ་ཧེ་ལ་གཤིན་རྗེ་ནག་པོ་ད་བྱུག་པ་དང་མདུང་འཛིན་པ། ཆུར་ཆུ་སྲིན་ལ་ཆུ་བདག་དཀར་པོ་གདེངས་ཀ་བདུན་པ་ཀླུའི་ཞགས་པ་དང་དྲུང་འཛིན་པ་དང༌། ལུས་ངན་དུ་མི་ལ་གནས་པའི་ལུས་ནང་པོ་སེར་པོ་ལྕགས་ཀྱུ་དང་དབྱུག་ཏོ་འཛིན་པ་དང༌། དབང་ལྡན་དུ་གླང་ལ་གནས་པའི་དབང་ལྡན་དཀར་པོ་རྩེ་གསུམ་དང་ཐོད་པ་འཛིན་པ། རལ་པའི་ཐོར་ཅོག་ལ་ཐོད་པ་དང་ཟླ་བ་ཕྱེད་པས་བརྒྱན་ཞིང་སྤྲུལ་གྱི་མཆོད་ཕྱིར་ཐོགས་པ་མགྲིན་པ་སྔོན་པོ་དང༌། མེར་ར་ལ་མེ་ཧ་དམར་པོ་བླུགས་གཟར་དང་སྤྱི་བླུགས་འཛིན་པ་དང༌། བདེན་བྲལ་དུ་རོལ་སྲིན་པོའི་བདག་པོ་བདེན་བྲལ་སྔོན་པོ་རལ་གྲི་དང་ཕུབ་འཛིན་པ་དང༌། རླུང་དུ་རི་དག་ས་ལ་རླུང་ལྷ་སྔོན་པོ་རླུང་རས་འཛིན་པ་སྟེ། བརྒྱད་པོ་འདི་རྣམས་ནི་ཕྱག་བཞི་པ། གཡས་པས་ཕྱག་མཚན་དང་པོ་དང༌། གཡོན་པས་གཉིས་པ་འཛིན་ཞིང་རང་སྣང་གི་བཙུན་མོ་ལ་འཁྱུད་པ། གཉིས་ཀྱིས་སྤྱི་བོར་ཐལ་མོ་སྦྱར་ནས་འདུད་པའོ། །དབང་ལྡན་དང་ཉེ་བའི་ཕྱི་རོལ་དུ་དབང་ལྡན་གྱི་ཕྱོགས་ནས་བརྩམས་ནས་རིམ་པས་ཚངས་པ་ལ་སོགས་པ་སྟེ། དེ་ཡང་དང་པ་ལ་ཚངས་པ་སེར་པོ་ཞལ་བཞི་པ། ཕྱག་བཞི་པ། བགྲང་ཕྲེང་དང་ཆུ་སྐྱེས་འཛིན་ཞིང་གཡས་པ་དང་ཅིག་ཤོས་དག་ཐལ་མོ་སྦྱར་བས་དབྱུག་པ་དང་སྤྱི་བླུགས་འཛིན་པའོ། །མཁའ་ལྡིང་ལ་ཁྱབ་འཇུག་ནག་པོ་ཕྱག་བཞི་པ་དང་པོ་གཉིས་འཁོར་ལོ་དང་དུང་འཛིན་ཞིང་གཡས་པ་དང་གཡོན་པ་དག་གིས་ཐལ་མོ་སྦྱར་བས་དབྱུག་ཏོ་དང་སཱ་རཾ་གའི་གཞུ་འཛིན་པའོ། །གླང་ལ་དབང་ཕྱུག་དཀར་པོ་རི་བོང་གིས་མཚན་པའི་རལ་པའི་ཐོར་ཅོག་ཅན། ཕྱག་བཞི་པ་སྤྱི་བོར་ཐལ་མོ་སྦྱར་བ་དང་རྩེ་གསུམ་དང་ཐོད་པ་འཛིན་པའོ། །རྨ་བྱ་ལ་གདོང་དྲུག་དམར་པོ་
ཞལ་དྲུག་པ་ཕྱག་དྲུག་པ་གཡས་པ་དག་གིས་ཤཀྟི་དང་རྡོ་རྗེ་དང༌། གཡོན་པ་དག་གིས་ཁྱིམ་བྱ་དང་དྲིལ་བུ་འཛིན་ཞིང་གཉིས་ཀྱིས་ཐལ་མོ་སྦྱར་བའོ། །འདི་རྣམས་ཀྱང་སྔ་མ་བཞིན་དུ་རང་སྣང་གི་བཙུན་མོ་ལ་འཁྱུད་པའོ། །ཚངས་མ་ནི་ཚངས་པ་དང་མཚུངས་པའོ། །དྲག་མོ་ནི་དྲག་པོ་དང་མཚུངས་པའོ། །ཁྱབ་འཇུག་མ་ནི་ཁྱབ་འཇུག་དང་མཚུངས་པའོ། །གཞོན་ནུ་མ་ནི་གཞོན་ནུ་དང་མཚུངས་པའོ། །དབང་མོ་ནི་དབང་པོ་དང་མཚུངས་པའོ། །ཕག་མོ་ནག་མོ་འུག་པ་ལ་གནས་མ་ཕྱག་བཞི་མ་གཡས་པ་དང་ཅིག་ཤོས་དག་གིས་རོ་ཧི་ཏ་དང་ཐོད་པ་འཛིན་ཞིང་གཉིས་ཀྱིས་ཐལ་མོ་སྦྱར་བའོ། །ཡི་དགས་ཀྱི་སྟེང་དུ་ཙ་མུཎྜི་དམར་མོ་ཕྱག་བཞི་མ་གཡས་པ་དང་གཡོན་པ་དག་གིས་གྲི་གུག་དང་ཐོད་པ་འཛིན་ཞིང་གཞན་པ་དག་གིས་ཐལ་མོ་སྦྱར་པའོ། །བྷྲྀ་ངྒི་ནི་མ་ནག་མོ་ཤིན་ཏུ་སྐེམ་པ་བགྲང་ཕྲེང་དང་སྤྱི་བླུགས་འཛིན་ཞིང་གཉིས་ཀྱིས་ཐལ་མོ་སྦྱར་བའོ། །བྱི་བ་ལ་ཚོགས་བདག་དཀར་པོ་གླང་པོ་ཆེའི་གདོང་བ་ཅན་སྤྲུལ་གྱི་མཆོད་ཕྱིར་ཐོགས་པ་དང་ལྡན་པ། ཕྱག་བཞི་པ་གཡས་པ་དག་གིས་རྩེ་གསུམ་དང་ལ་དུ། གཡོན་པ་དག་གིས་དགྲ་སྟ་དང་ལ་ཕུག་འཛིན་པའོ། །ནག་པོ་ཆེན་པོ་ནག་པོ་རྩེ་གསུམ་དང་ཐོད་པ་འཛིན་པའོ། །དགའ་བྱེད་དབང་ཕྱུག་ནག་པོ་རྫ་རྔ་ལ་ཞོན་ཞིང་རྫ་རྔ་བརྡུང་པར་བརྩོན་པའོ། །རྟ་བདུན་པའི་ཤིང་རྟ་ལ་ཉི་མ་དམར་པོ་གཡས་པ་དང་གཡོན་པ་དག་གིས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །དང་པ་ལ་ཟླ་བ་དཀར་པོ་གཡས་པ་དང་གཡོན་པ་དག་གིས་ཀུ་མུ་ཏ་ལ་གནས་པའི་ཟླ་བའི་དཀྱིལ་འཁོར་འཛིན་པའོ། །རལ་བཀྲ་ཤིས་དམར་པོ་གཡས་པས་ཆུ་གྲི་དང་གཡོན་པས་མིའི་མགོ་བོ་ཟླ་བའི་ཚུལ་གྱིས་འཛིན་པའོ། །པདྨ་ལ་གཟའ་ལྷག་སེར་པོ་མདའ་དང་གཞུ་འཛིན་པའོ། །སྦལ་པ་འམ་ཐོད་པ་ལ་ཕུར་བུ་དཀར་པོ་བགྲང་ཕྲེང་དང་སྤྱི་བླུགས་འཛིན་པའོ། །པདྨ་ལ་པ་སངས་དཀར་པོ་བགྲང་ཕྲེང་དང་སྤྱི་བླུགས་འཛིན་པའོ། །རུས་སྦལ་ལ་སྤེན་པ་ནག་པོ་དབྱུག་པ་འཛིན་པའོ། །སྒྲ་གཅན་དམར་ནག་ཕྱག་དག་གིས་ཉི་མ་དང་ཟླ་བ་འཛིན་པའོ། །མཇུག་རིངས་ནག་པོ་རལ་གྲི་དང་ཀླུའི་ཞགས་པ་འཛིན་པའོ། །གླང་པོ་ལ་སྟོབས་བཟངས་དཀར་པོ་རལ་གྲི་དང་གཤོལ་འཛིན་པའོ། །ཁུ་བྱུག་གི་ཤིང་རྟ་ལ་རྒྱལ་བར་བྱེད་པ་ལྗང་གུ་ཕྱག་བཞི་པ་
གཡས་པ་དག་གིས་མེ་ཏོག་གི་ཕྲེང་བ་དང་མདའ། གཡོན་པ་དག་གིས་བཏུང་བའི་སྣོད་དང་གཞུ་འཛིན་པའོ། །ནེ་ཙོའི་ཤིང་རྟ་ལ་སྦྲང་རྩིར་བྱེད་པ་དཀར་པོ་ཕྱག་བཞི་པ་གཡས་པ་དག་གིས་ཆུ་སྲིན་གྱི་རྒྱལ་མཚན་དང་མདའ།གཡོན་པ་དག་གིས་བཏུང་བའི་སྣོད་དང་གཞུ་འཛིན་པའོ། །སྤྲེའུ་ལ་དཔྱིད་ཀྱི་ལྷ་དཀར་པོ་ཕྱག་བཞི་པ་གཡས་པ་དག་གིས་མདའ་དང་རལ་གྲི། གཡོན་པ་དག་གིས་གཞུ་དང་བཏུང་བའི་སྣོད་འཛིན་པའོ། །མཐའ་ཡས་དང་ནོར་རྒྱས་དང་འཇོག་པོ་དང་སྟོབས་རྒྱུད་དང་པདྨ་དང་པདྨ་ཆེན་པོ་དང་དུང་སྐྱོང་དང༌། རིགས་ལྡན་རྣམས་ནི་སྦྲུལ་གྱི་གདེངས་ཀ་བདུན་དང་ལྡན་པ་ཐལ་མོ་སྦྱར་བ་སྟེ། ཡང་ན་རང་རང་གི་ཡབ་ཀྱི་ཕྱག་མཚན་གཙོ་བོ་དང་ལྡན་པས་ཐལ་མོ་སྦྱར་བའོ། །ཐགས་བཟངས་རིས་དང་སྟོབས་ལྡན་དང་ཚིམ་བྱེད་ལ་སོགས་པའི་ལྷ་མ་ཡིན་གྱི་དབང་པོ་རྣམས་ནི་ནག་པོ་གཡུལ་འགྱེད་པའི་གོ་ཆ་གྱོན་པ་རལ་གྲི་དང་ཕུབ་ལ་སོགས་པ་སྣ་ཚོགས་པའི་མཚོན་ཆ་ཕྱག་ན་འཛིན་པའོ། །ནམ་མཁའ་ལྡིང་གི་དབང་པོ་གཤོག་པ་རབ་ཏུ་བརྐྱང་བ་པུས་མོའི་བར་དུ་དཀར་པ། དེའི་སྟེང་ནས་ལྟེ་བའི་བར་དུ་སེར་པོ་ལྟེ་བའི་སྟེང་ནས་མགྲིན་པའི་བར་དུ་དམར་པོ། །དེའི་སྟེང་ནས་སྤྱི་བོའི་བར་ནག་པོ། །ཕྱག་དག་གིས་ཐལ་མོ་སྦྱར་པའོ། །མི་འམ་ཅིའི་རྒྱལ་པོ་དམར་སེར་པི་ཝང་གི་སྒྲ་སྒྲོགས་པར་བརྩོན་པའོ། །དྲི་ཟའི་རྒྱལ་པོ་ཟུར་ཕུང་ལྔ་པ་སེར་པོ་པི་ཝང་གི་སྒྲ་སྒྲོགས་པའོ། །རིག་པ་འཛིན་པའི་དབང་པོ་དོན་ཐམས་ཅད་གྲུབ་པ་དཀར་པོ་མེ་ཏོག་གི་ཕྲེང་བ་འཛིན་པའོ། །གང་བ་བཟང་པོ་སྔོན་པོ་དང༌། ནོར་བུ་བཟང་པོ་སེར་པོ་དང༌། ནོར་སྦྱིན་དམར་པོ་དང༌། རྣམ་ཐོས་སྲས་སེར་པོ་དང༌། ཙི་བི་ཀུཎྜ་ལི་དམར་པོ་དང༌། ཀི་ལི་མ་ལཱི་ལྗང་གུ་དང་སྒོའི་དབང་པོ་སེར་པོ་དང་སྤྱོད་པའི་དབང་པོ་སེར་པོ་སྟེ། གང་བ་བཟང་པོ་ལ་སོགས་པ་གནོད་སྦྱིན་གྱི་དབང་པོ་འདི་རྣམས་ནི་གཡས་པ་དང་གཡོན་པའི་ཕྱག་དག་གིས་བཱི་ཛ་པཱུ་ར་ཀའི་འབྲས་བུ་དང་ནེའུ་ལེ་འཛིན་པའོ། །འཕྲོག་མ་སེར་མོ་ཆད་བུ་གཉིས་འཛིན་པ་བུ་དང་བཅས་པའོ། །ཐ་སྐར་དཀར་པོ་དང༌། བྲ་ཉེ་ལྗང་གུ་དང༌། སྨིན་དྲུག་སྔོ་བསངས་དང༌། སྔར་མ་དམར་སྐྱ་དང༌། མགོ་ནག་པོ་དང༌། ལག་སེར་པོ་དང༌། རྒྱལ་སྔོ་བསངས་དང༌། སྐག་དཀར་པོ་དང༌། མཆུ་སེར་པོ་
དང༌། གྲེ་མེ་ཏོག་བྲི་ཡང་ཀུ་ལྟར་ལྗང་སེར་དང༌། དབོ་ལྗང་གུ་དང༌། མེ་བཞི་དཀར་པོ་དང༌། ནག་པ་ལྗང་གུ་དང༌། ས་རི་སེར་པོ་དང༌། ས་ག་ནག་པོ་དང༌། ལྷ་མཚམས་ལྗང་གུ་དང༌། སྣྲོན་སེར་པོ་དང༌། སྣུབས་སེར་པོ་དང༌། ཆུ་སྟོང་ནག་པོ་དང༌། ཆུ་སྨད་དཀར་པོ་དང༌། གྲོ་བཞིན་དཀར་སེར་དང༌། མོན་གྲེ་ནག་པོ་དང༌། མོན་གྲུ་སེར་པོ་དང༌། ཁྲུམས་སྟོད་ལྗང་གུ་དང༌། ཁྲུམས་སྨད་སེར་པོ་དང༌། ནམ་གྲུ་དཀར་པོ་དང༌། བྱི་བཞིན་སྔོ་བསངས་ཏེ། ཐ་སྐར་ལ་སོགས་པའི་ལྷ་འདི་རྣམས་ནི་གཡོ་བ་དང་བཅས་པའི་སྟོད་གཡོགས་ཡོངས་སུ་འཛིན་པ་ཐལ་མོ་སྦྱར་བའོ། །གཞན་ཡང་ལྷ་རྣམས་ནི་འཁོར་ལོས་འདྲེན་པའི་ཁང་བརྩེགས་ལ་གནས་པར་ཤེས་པར་བྱ་སྟེ། དབང་པོ་ལ་སོགས་པའི་ལྷ་འདི་རྣམས་པདྨ་ལ་གནས་པ། རེ་རེ་འང་འཁོར་དཔག་ཏུ་མེད་པས་བསྐོར་བ། འབྱོར་བ་ཇི་ལྟ་བ་བཞིན་དུ་རྣམ་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པ། དཀྱིལ་འཁོར་གྱི་དབང་པོ་བཅོམ་ལྡན་འདས་ལ་ཕྱག་འཚལ་ཞིང་བཀྲ་ཤིས་ཀྱི་ཚིགས་སུ་བཅད་པའི་སྒྲ་ཕྱོགས་ཐམས་ཅད་དུ་སྒྲོགས་པའོ། །ཤར་ལ་སོགས་པའི་སྒོ་རྣམས་སུ་རྡོ་རྗེ་ལྕགས་ཀྱུ་མ་ལ་སོགས་སྒོ་སྐྱོང་རྣམས་ནི་སྙིང་པོའི་དཀྱིལ་འཁོར་ཇི་ལྟ་བ་བཞིན་ནོ། །འདིར་བཅོམ་ལྡན་འདས་རྣམ་པར་སྣང་མཛད་ཆེན་པོའི་རང་བཞིན་འཇམ་པའི་དབྱངས་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་རང་བཞིན་ལ་རང་དང་འདྲ་པའི་རྡོ་རྗེ་སེམས་དཔས་རྒྱས་བཏབ་པའོ། །མེ་ལོང་ལྟ་བུ་ལ་སོགས་པའི་ཡེ་ཤེས་ཀྱི་རང་བཞིན་མི་བསྐྱོད་པ་ལ་སོགས་པའི་དེ་བཞིན་གཤེགས་པ་བཞི་དང་གཙུག་ཏོར་བརྒྱད་དང༌། སྤྱན་མ་རྣམས་ལ་འཇམ་པའི་དབྱངས་ཀྱིས་སོ། །རྡོ་རྗེ་སེམས་དཔའ་ལ་སོགས་པ་བཞི་དང༌། མཱ་མ་ཀཱི་དང༌། རྡོ་རྗེ་ལྕགས་ཀྱུ་དང༌། ས་མ་བཅུ་གཉིས་དང་ཆོས་སོ་སོ་ཡང་དག་པར་རིག་པ་དང་སྒེག་མོ་དང་ཀུན་དུ་བཟང་མོ་ལ་སོགས་པ་བཞི་དང་ཁྲོ་བོ་བཅུ་དང་མེ་ཏོག་མ་དང་གཟུགས་མ་དང་ཤར་ཕྱོགས་ན་གནས་པའི་ལྷ་རྣམས་ལ་མི་བསྐྱོད་པས་སོ། །རྡོ་རྗེ་རིན་ཆེན་ལ་སོགས་པ་བཞི་དང་རྡོ་རྗེ་ཞགས་པ་དང་ཕ་རོལ་ཏུ་ཕྱིན་མ་བཅུ་གཉིས་དང༌། དོན་སོ་སོ་ཡང་དག་པར་རིག་མ་དང༌། ཕྲེང་བ་མ་དང་ནམ་མཁའ་མཛོད་ལ་སོགས་པ་བཞི་དང་བདུག་སྤོས་མ་དང་སྒྲ་མ་དང་ལྷོ་ཕྱོགས་ན་གནས་པའི་
ལྷ་རྣམས་ལ་རིན་ཆེན་འབྱུང་ལྡན་གྱིས་སོ། །རྡོ་རྗེ་ཆོས་ལ་སོགས་པ་བཞི་དང་གོས་དཀར་མོ་དང་རྡོ་རྗེ་ལྕགས་སྒྲོག་དང་ཚེ་དང་དབང་མ་བཅུ་གཉིས་དང་ངེས་པའི་ཚིག་སོ་སོ་ཡང་དག་པར་རིག་མ་དང་གླུ་མ་དང་སྤྱན་རས་གཟིགས་ལ་སོགས་པ་བཞི་དང༌། མར་མེ་མ་དང་རོ་མ་དང་ནུབ་ཕྱོགས་ན་གནས་པའི་ལྷ་རྣམས་ལ་འོད་དཔག་མེད་ཀྱིས་སོ། །རྡོ་རྗེ་ལས་རབ་ལ་སོགས་པ་བཞི་དང་སྒྲོལ་མ་དང་རྡོ་རྗེ་འབེབས་པ་དང༌། གཟུགས་མ་བཅུ་གཉིས་དང༌། སྤོབས་པ་སོ་སོ་ཡང་དག་པར་རིག་མ་དང༌། གར་མ་དང་འོད་དཔག་མེད་ལ་སོགས་པ་བཞི་དང་དྲི་ཆབ་མ་དང་རེག་བྱ་རྡོ་རྗེ་མ་དང་བྱང་ཕྱོགས་ན་གནས་པའི་ལྷ་རྣམས་ལ་དོན་ཡོད་གྲུབ་པས་རྒྱས་བཏབ་པོ། །འཇམ་པའི་དབྱངས་ཀྱི་ཐུགས་ཀའི་ས་བོན་ནི་མུཿའོ། །ཨོཾ་ཨ་ཨཿ་སརྦ་ཏ་ཐཱ་ག་ཏཱ་ཧྲྀ་ད་ཡ་ཧ་ར་ཧ་ར། ཨོཾ་ཧཱུཾ་ཧྲཱིཿ་བྷ་ག་ཝཱ་ན་ཛྙཱ་ན་མཱུ་རྟི་ཝཱ་གཱི་ཤྭ་ར། མ་ཧཱ་བ་ཙ། སརྦ་དྷ་རྨ་ག་ག་ན་ཨ་མ་ལ་སུ་པ་རི་ཤུདྡྷ་དྷ་རྨ་དྷཱ་ཏུ་ཛྙཱ་ན་གྲྦྷ་ཨཿ་ཞེས་པ་སྙིང་པོའི་སྔགས་སོ། །ཨོཾ་ཨ་མྲི་ཏ་ཀུཎྜ་ལི་བྷི་གྷྣཱནྷ་ཀ་ཧཱུཾ། ཞེས་པ་བདུད་རྩི་འཁྱིལ་པའི་སྔགས་ཏེ་ལས་ཐམས་ཅད་པའོ། །ངན་སོང་ཡོངས་སུ་སྤྱོད་པའི་དཀྱིལ་འཁོར་ནི་རྡོ་རྗེ་གུར་གྱི་ནང་དུ་རླུང་དང་མེ་དང་ཆུ་དང་ས་དང་རི་རབ་ཀྱི་སྟེང་གི་གཞལ་ཡས་ཁང་གི་དབུས་སུ། ནང་གི་དཀྱིལ་འཁོར་འཁོར་ལོ་རྩིབས་བརྒྱད་པ་སེར་པོ། །རྡོ་རྗེ་ཕྲེད་བ་སྔོན་པོས་ཡོངས་སུ་བསྐོར་བ་སྟེ་འགའ་ཞིག་འཁོར་ལོ་རྩིབས་བརྒྱད་པ་སྔོན་པོར་གསུངས་ལ། གཞན་དུ་ནི་འདིའི་འཁོར་ལོའི་ལྟེ་བ་སྔོན་པོ་དང༌། རྩིབས་རྣམས་ཀྱི་ཤར་དཀར་པོ་དང༌། ལྷོ་ནག་པོ་དང༌། ནུབ་དམར་པོ་དང༌། བྱང་ལྗང་གུའོ་ཞེས་གསུངས་སོ། །འཁོར་ལོའི་ལྟེ་པར་སྣ་ཚོགས་པདྨ་ལ་གནས་པའི་སེང་གེའི་སྟེང་དུ། བཅོམ་ལྡན་འདས་ཤཱཀྱ་སེར་གེ་རྣམ་པར་སྣང་མཛད་ཆེན་པོ་གསེར་གྱི་མདོག་ཅན་ཆོས་ཀྱི་འཁོར་ལོའི་ཕྱག་རྒྱ་མཛད་པའོ། །ཤར་གྱི་རྩིབས་ལ་རྡོ་རྗེ་གཙུག་ཏོར་དཀར་པོ་ས་གནོན་གྱི་ཕྱག་རྒྱ་ཅན་ནོ། །ལྷོའི་རྩིབས་ལ་རིན་ཆེན་གཙུག་ཏོར་སྔོན་པོ་མཆོག་སྦྱིན་གྱི་ཕྱག་རྒྱ་ཅན་ནོ། །ནུབ་ཀྱི་རྩིབས་ལ་པདྨ་གཙུག་ཏོར་དམར་པོ་བསམ་གཏན་གྱི་ཕྱག་རྒྱ་ཅན་ནོ། །བྱང་གི་རྩིབས་ལ་སྣ་ཚོགས་གཙུག་ཏོར་ལྗང་གུ་མི་འཇིགས་པ་རབ་ཏུ་སྦྱིན་པའོ། །མེའི་རྩིབས་ལ་གཟི་བརྗིད་གཙུག་ཏོར་དཀར་དམར་འདྲེས་པའི་མདོག་ཅན་ཕྱག་གཡས་པས་ཉི་མ་འཛིན་ཅིང༌། གཡོན་
པ་དཀུར་བརྟེན་པའོ། །བདེན་བྲལ་གྱི་རྩིབས་ལ་རྒྱལ་མཚན་གཙུག་ཏོར་དམར་པོ་དང་འདྲེས་པའི་ནག་པོ་ཕྱག་དག་གིས་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །རླུང་གི་རྩིབས་ལ་རྣོན་པོའི་གཙུག་ཏོར་ནམ་མཁའ་ལྟར་སྔོ་བསངས་ཕྱག་གཡས་པ་རལ་གྲི་དང་གཡོན་པས་པོ་ཏི་འཛིན་པའོ། །དབང་ལྡན་གྱི་རྩིབས་ལ་གདུགས་ཅན་གཙུག་ཏོར་དཀར་པོ་ཕྱག་དག་གིས་གདུགས་འཛིན་པའོ། །རྡོ་རྗེ་ཕྲེང་བའི་ཕྱི་རོལ་མེ་ལ་སོགས་པའི་མཚམས་རྣམས་སུ་སྒེག་མོ་དང་ཕྲེང་བ་དང་གླུ་མ་དང་གར་མ་རྣམས་ནི། དཀར་མོ་དང་སེར་མོ་དང་དམར་མོ་དང༌། སྣ་ཚོགས་ཀྱི་མདོག་ཅན་ཕྱག་གཉིས་མའོ། །སྣམ་བུ་རྣམས་ལ་སྒོའི་གཡོན་དུ་བྱང་ཆུབ་སེམས་དཔའ་གཉིས་དང་གཡས་གཉིས་ཏེ། དེ་ཡང་ཤར་གྱི་སྣམ་བུ་ལ་བྱམས་པ་སེར་པོ་གཡས་པས་ཀླུ་ཤིང་གི་མེ་ཏོག་དང༌། གཡོན་པས་སྤྱི་བླུགས་འཛིན་པ་དང༌། མཐོང་པ་དོན་ཡོད་སེར་པོ་ཕྱག་གཡས་པས་སྤྱན་དང་བཅས་པའི་པདྨ་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། ངན་སོང་ཀུན་འདྲེན་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་པ་དང༌། མྱ་ངན་དང་མུན་པ་ཐམས་ཅད་ངེས་པར་འཇོམས་པའི་བློ་གྲོས་དཀར་སེར་བསྲེས་པའི་མདོག་ཅན་ཕྱག་གཡས་དབྱུག་པ་འཛིན་ཞིང༌། གཡོན་པའི་ཁུ་ཚུར་བཀུར་བརྟེན་པའོ། །ལྷོ་ཕྱོགས་སུ་སྤོས་ཀྱི་གླང་པོ་དཀར་ལྗང་གཡས་པས་དྲིའི་དུང་ཆོས་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། དཔའ་བར་འགྲོ་བ་དཀར་པོ་གཡས་པ་རལ་གྲི་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། ནམ་མཁའི་མཛོད་དཀར་སེར་གཡས་པ་པདྨ་ལ་གནས་པའི་ཆོས་ཀྱི་མཛོད་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། ཡེ་ཤེས་ཏོག་སྔོན་པོ་ཕྱག་གཡས་པ་ཡིད་བཞིན་གྱི་ནོར་བུའི་རྒྱལ་མཚན་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པའོ། །ནུབ་ཏུ་བདུད་རྩིའི་འོད་དཀར་པོ་གཡས་པ་ཅོད་པན་གྱི་སྟེང་དུ་བདུད་རྩིའི་བུམ་པ་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། ཟླ་བའི་འོད་དཀར་པོ་གཡས་པ་པདྨ་ལ་གནས་པའི་ཟླ་བའི་གཟུགས་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། བཟང་སྐྱོང་དཀར་པོ་གཡས་པ་འབར་བའི་འོད་ཅན་གྱི་རིན་པོ་ཆེ་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང་དྲ་བ་
ཅན་གྱི་འོད་དཀར་པོ་གཡས་པ་རྡོ་རྗེའི་གུར་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པའོ། །བྱང་དུ་རྡོ་རྗེ་སྙིང་པོ་སྔོ་སྐྱ་གཡས་པ་རྡོ་རྗེ་དང་བཅས་པའི་ཨུཏྤལ་སྔོན་པོ་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། བློ་གྲོས་མི་ཟད་པ་དཀར་པོ་ཕྱག་གཉིས་ཀྱིས་ཡེ་ཤེས་ཀྱི་བདུད་རྩིའི་བུམ་པ་འཛིན་པ་དང༌། སྤོབས་པ་བརྩེགས་པ་དམར་པོ་གཡས་པ་ཆུ་སྐྱེས་ལ་གནས་པའི་རིན་པོ་ཆེ་བརྩེགས་པ་འཛིན་ཞིང༌། གཡོན་པའི་ཁུ་ཚུར་དཀུར་བརྟེན་པ་དང༌། ཀུན་དུ་བཟང་པོ་གསེར་གྱི་མདོག་ཅན་ཕྱག་གཡས་པ་རིན་པོ་ཆེའི་སྙེ་མ་འཛིན་པའི་ཁུ་ཚུར་འཁུར་བརྟེན་པའོ། །དཀྱིལ་འཁོར་གྱི་མེ་ལ་སོགས་པའི་མཚམས་རྣམས་སུ་མེ་ཏོག་མ་དང་བདུག་སྤོས་མ་དང་མར་མེ་མ་དང་དྲི་ཆབ་མ་རྣམས་ནི་དཀར་མོ་དང་ནག་མོ་དང་དམར་མོ་དང་ལྗང་གུ་སྟེ་མེ་ཏོག་ལ་སོགས་པ་འཛིན་པའོ། །སྒོ་རྣམས་ལ་ཤར་དུ་རྡོ་རྗེ་ལྕགས་ཀྱུ་དཀར་པོ་ཕྱག་གཉིས་ཀྱིས་ལྕགས་ཀྱུ་འཛིན་པ་དང༌། ལྷོར་རྡོ་རྗེ་ཞགས་པ་སྔོན་པོ་ཕྱག་གཉིས་ཀྱིས་ཞགས་པ་འཛིན་པ་དང༌། ནུབ་ཏུ་རྡོ་རྗེ་ལྕགས་སྒྲོག་དམར་པོ་ཕྱག་གཉིས་ཀྱིས་རྡོ་རྗེ་ལྕགས་སྒྲོག་འཛིན་པ་དང༌། བྱང་དུ་རྡོ་རྗེ་འབེབས་པ་ལྗང་གུ་ཕྱག་གཉིས་ཀྱིས་རྡོ་རྗེ་དྲིལ་བུ་འཛིན་པའོ། །ལྷ་སུམ་ཅུ་རྩ་བདུན་པོ་འདི་རྣམས་ཀྱང་རྣམ་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པ་རིན་པོ་ཆེའི་ཅོད་པན་ཅན། སྤྱན་གཉིས་པ་ཕྱག་གཉིས་པ་སྣ་ཚོགས་ཆུ་སྐྱེས་དང་ཟླ་བ་རྣམས་ལ་སེམས་དཔའི་སྐྱིལ་ཀྲུང་གིས་བཞུགས་པའོ། །འདིར་རྣམ་པར་སྣང་མཛད་ཆེན་པོ་ལ་རང་དང་འདྲ་བའི་རྣམ་པར་སྣང་མཛད་ཀྱིས་རྒྱས་བཏབ་པའོ། །རྡོ་རྗེ་གཙུག་ཏོར་ལ་སོགས་པ་བཞི་ལ་རྣམ་པར་སྣང་མཛད་ཆེན་པོས་སོ། །ཤར་ཕྱོགས་དང་མེ་མཚམས་ན་གནས་པའི་ལྷ་རྣམས་ལ་རྡོ་རྗེ་གཙུག་ཏོར་གྱིས་སོ། །ལྷོ་ཕྱོགས་དང་བདེན་བྲལ་གྱི་མཚམས་ན་གནས་པ་རྣམས་ལ་རིན་ཆེན་གཙུག་ཏོར་གྱིས་སོ། །ནུབ་ཕྱོགས་དང་རླུང་གི་མཚམས་ན་གནས་པ་རྣམས་ལ་པདྨ་གཙུག་ཏོར་གྱིས་སོ། །བྱང་ཕྱོགས་དང་དབང་ལྡན་གྱི་མཚམས་ན་གནས་པ་རྣམས་ལ་སྣ་ཚོགས་གཙུག་ཏོར་གྱིས་སོ། །འདིར་ཕྱིའི་དཀྱིལ་འཁོར་གྱི་ལྷའི་གནས་ཀྱི་སྣམ་བུ་ལ་ཟླ་བའི་དཀྱིལ་འཁོར་ཉི་ཤུ་རྩ་བརྒྱད་པོ་བལྟ་བར་བྱའོ་ཞེས་སྦྱོང་རྒྱུད་ལས་གསུངས་པའི་ཕྱིར། འདོད་ཡོན་གྱི་སྣམ་བུ་
ལ་བྱང་ཆུབ་སེམས་དཔའ་བཅུ་དྲུག་དགོད་པ་ནི་ཡང་དག་པར་རིགས་སོ། །ཁ་ཅིག་ནི་ནང་གི་དཀྱིལ་འཁོར་ཞེས་རྒྱུད་ལས་གསུངས་པས་ཕྱིའི་གཞལ་ཡས་ཁང་གི་ནང་དུ་གཞལ་ཡས་ཁང་གཉིས་པའོ་ཞེས་སྨྲའོ། །འགའ་ཞིག་ཏུ་ནི་རྣམ་པར་སྣང་མཛད་ཆེན་པོ་ལ་སོགས་པའི་དེ་བཞིན་གཤེགས་པ་དགུ་པོ་གཙུག་ཏོར་དང་བཅས་པ་དགེ་སློང་གི་ཆ་ལུགས་འཛིན་པའོ་ཞེས་བཤད་དོ། །དེ་ནི་མི་རིགས་ཏེ་ཆགས་པ་དང་ལྡན་པའི་གཟུགས་ཅན་འཁོར་ལོས་སྒྱུར་པའི་གཟུགས་སུ་མངོན་པར་སྤྲུལ་བའོ་ཞེས་བཅོམ་ལྡན་འདས་ཀྱིས་གསུངས་པའི་ཕྱིར་རོ། །པདྨའི་ཕྲེང་བས་ཡོངས་སུ་བསྐོར་པ་དང༌། ཁོར་ཡུག་གི་ནང་དུ་དབང་ལྡན་གྱི་མཚམས་ནས་བརྩམས་ཏེ་གཡས་སྐོར་གྱིས་མགྲིན་བ་སྔོན་པོ་ལ་སོགས་པ་དགོད་པར་བྱ་སྟེ། དེ་ནས་དབང་ལྡན་ནས་གླང་ལ་མགྲིན་པ་སྔོན་པོ་དཀར་པོ་སྤྲུལ་གྱི་མཆོད་ཕྱིར་ཐོགས་པ་ཅན། ཕྱག་གཡས་པ་དག་ན་རྡོ་རྗེ་དང་མཆོག་སྦྱིན་གྱི་ཕྱག་རྒྱ་དང༌། གཡོན་པ་དག་ན་རྩེ་གསུམ་དང་རལ་གྲིའོ། །ནམ་མཁའ་ལྡིང་ལ་ཁྱབ་འཇུག་ནག་པོ་གཡས་པ་དག་ན་དབྱུག་ཏོ་དང་རྡོ་རྗེ་དང༌། གཡོན་པ་དག་ན་དུང་དང་འཁོར་ལོའོ། །རྡོ་རྗེ་གསེར་མ་ཁྱབ་འཇུག་ལྟ་བུ་སྟེ་ཁྱད་པར་ནི་གསེར་གྱི་མདོག་ཅན་ནོ། །རྨ་བྱ་ལ་རྡོ་རྗེ་དྲིལ་བུ་ཞལ་དྲུག་པ་དམར་པོ་གཡས་པ་དག་ན་ཤཀྟི་དང་རྡོ་རྗེ་དང༌། གཡོན་པ་དག་ན་ཁྱིམ་བྱ་དང་རྡོ་རྗེ་དྲིལ་བུའོ། །རྡོ་རྗེ་གཞོན་ནུ་མ་ནི་རྡོ་རྗེ་དྲིལ་བུ་ལྟ་བུའོ། །ངང་པ་ལ་མི་སྨྲ་རྡོ་རྗེ་སེར་པོ་ཞལ་བཞི་པ། གཡས་པ་དག་ན་རྡོ་རྗེ་དང་བགྲང་ཕྲེང་དང༌། གཡོན་པ་དག་ན་དབྱུག་པ་དང་སྤྱི་བླུགས་སོ། །རྡོ་རྗེ་ཞི་བ་མ་ནི་ཚངས་པ་ལྟ་བུའོ། །སོ་ལྡན་གྱི་དབང་པོ་དཀར་པོ་མཆེ་བ་དྲུག་པ་དང༌། ཟླ་བ་རྡོ་རྗེ་མཚོན་ཆ་སེར་པོ་ཕྱག་གཡས་པས་རྡོ་རྗེ་འཛིན་ཞིང་གཡོན་པས་རྡོ་རྗེ་དཀུར་བརྟེན་པའོ། །ལྷ་མོ་རྡོ་རྗེ་ཁུ་ཚུར་མ་ནི་རྡོ་རྗེ་མཚོན་ཆ་ལྟ་བུའོ། །རྟ་བདུན་གྱི་ཤིང་རྟ་ལ་རྡོ་རྗེ་འཁྱིལ་པ་ཁྲོ་བོ་དམར་པོ་ཕྱག་གཡས་པ་ན་པདྨ་དང༌། གཡོན་པ་ན་པདྨ་ལ་གནས་པའི་ཉི་མའི་དཀྱིལ་འཁོར་རོ། །རྡོ་རྗེ་བདུད་རྩི་མ་ནི་རྡོ་རྗེ་འཁྱིལ་པ་ལྟ་བུའོ། །ངང་པ་ལ་རྡོ་རྗེའི་འོད་ཁྲོ་བོ་དཀར་པོ། །གཡས་པ་ན་རྡོ་རྗེ་དང་གཡོན་པ་ན་པདྨ་ལ་གནས་པའི་ཟླ་བའི་དཀྱིལ་འཁོར་འཛིན་པ་དང༌། རྡོ་རྗེ་མདོག་མ་ནི་རྡོ་རྗེའི་འོད་ལྟ་བུའོ། །རལ་རྡོ་རྗེ་དམར་སེར་ཁྲོ་བོ་དམར་པོ་ཕྱག་གཡས་ན་རྡོ་རྗེ་དང་གཡོན་པས་མི་བཟུང་ནས་ཟ་བའི་ཚུལ་ལོ། །རྡོ་རྗེ་སྐ་རགས་མ་ནི་རྡོ་རྗེ་
དམར་སེར་ལྟ་བུའོ། །པདྨ་ལ་རྡོ་རྗེ་ཞི་བ་ཁྲོ་བོ་སེར་པོ་མདའ་དང་གཞུ་ཅན་ནོ། །རྡོ་རྗེ་ཞི་བ་མ་ནི་རྡོ་རྗེ་ཞི་བ་ལྟ་བུའོ། །སྦལ་པ་ལ་རྡོ་རྗེ་བླ་མ་ཁྲོ་བོ་སེར་པོ་བགྲང་ཕྲེང་དང་སྤྱི་བླུགས་འཛིན་པ། རྡོ་རྗེ་བླ་མ་མ་ནི་རྡོ་རྗེ་བླ་མ་ལྟ་བུའོ། །པདྨ་ལ་རྡོ་རྗེ་བ་སངས་ཁྲོ་བོ་དཀར་པོ་བགྲང་ཕྲེང་དང་སྤྱི་བླུགས་འཛིན་པ་དང༌། རྡོ་རྗེ་པ་སངས་མ་ནི་རྡོ་རྗེ་པ་སངས་ལྟ་བུའོ། །རུས་སྦལ་ལ་རྡོ་རྗེ་དབྱུག་པ་ཁྲོ་བོ་ནག་པོ་གཡས་པ་ན་རྡོ་རྗེ་དང་གཡོན་པ་ན་དབྱུག་པའོ། །རྡོ་རྗེ་དབྱུག་པ་མ་ནི་རྡོ་རྗེ་དབྱུག་པ་ལྟ་བུའོ། །རྡོ་རྗེ་སྒྲ་གཅན་ཁྲོ་བོ་དམར་ནག་གཡས་པ་དང་གཡོན་པའི་ཕྱག་དག་ན་ཟླ་བ་དང་ཉི་མའི་དཀྱིལ་འཁོར་ཅན་ནོ། །རྡོ་རྗེ་ལྷ་མིན་མོ་ནི་རྡོ་རྗེ་སྒྲ་གཅན་ལྟ་བུའོ། །རྡོ་རྗེ་མཇུག་རིངས་ཁྲོ་བོ་ནག་པོ་རལ་གྲི་དང་ཀླུའི་ཞགས་པ་འཛིན་པའོ། །རྡོ་རྗེ་ཀླུ་མོ་རྡོ་རྗེ་མཇུག་རིངས་ལྟ་བུའོ། །བཞི་པོ་འདི་དག་དང་རྡོ་རྗེ་ཞི་བ་ལ་སོགས་པ་དྲུག་ནི་རྒྱུད་གཞན་ལས་གསུངས་པ་ལྟར་བྲིས་པའོ། །གླང་པོ་ཆེ་ལ་རྡོ་རྗེ་གླང་སྣ་དཀར་པོ་གཡས་པ་ན་རྡོ་རྗེ་དང་གཡོན་པ་ན་ཐང་གཤོལ་ལོ། །རྡོ་རྗེ་འདུལ་པ་མ་ནི་རྡོ་རྗེ་གླང་སྣ་ལྟ་བུ་སྟེ་ཁྱད་པར་ནི་གཡས་པས་ཁ་ཊྭཱཾ་གའོ། །ཁུ་བྱུག་གི་ཤིང་རྟ་ལ་རྡོ་རྗེ་ཕྲེང་པ་ཅན་ལྗང་གུ་གཡས་པ་ན་རྡོ་རྗེ་དང༌། གཡོན་བ་ན་མེ་ཏོག་གི་ཕྲེང་བའི། །རྡོ་རྗེ་གདན་མ་ནི་རྡོ་རྗེ་ཕྲེང་བ་ཅན་ལྟ་བུ་སྟེ་ཁྱད་པར་ནི་ཕྱག་གཡོན་ན་ཤཀྟིའོ། །ནེ་ཙོའི་ཤིང་རྟ་ལ་རྡོ་རྗེ་དབང་ཅན་སེར་པོ་གཡས་ན་རྡོ་རྗེ་དང༌། གཡོན་ན་ཆུ་སྲིན་གྱི་རྒྱལ་མཚན་ནོ། །རྡོ་རྗེ་དབང་ཅན་མ་ནི་རྡོ་རྗེ་དབང་ཅན་ལྟ་བུ་སྟེ་ཁྱད་པར་ནི་སྐུ་མདོག་དམར་མོའོ། །སྦལ་པའི་ཤིང་རྟ་ལ་རྣམ་བར་རྒྱལ་བའི་རྡོ་རྗེ་དཀར་པོ་རྡོ་རྗེ་དང་རལ་གྲི་འཛིན་པའོ། །རྡོ་རྗེ་གདན་མ་ནི་རྡོ་རྗེ་རྣམ་པར་རྒྱལ་བ་ལྟ་བུའོ། །མེ་ཏོག་གི་ཤིང་རྟ་ལ་རྡོ་རྗེ་གཏུན་ཤིང་སེར་པོ་གཡས་པ་དང་གཡོན་པ་དག་གིས་རྡོ་རྗེ་གཏུན་ཤིང་འཛིན་པའོ། །རྡོ་རྗེ་ཕོ་ཉ་མོ་ནི་རྡོ་རྗེ་གཏུན་ཤིང་ལྟ་བུ་སྟེ་གཡོན་པས་ཁ་ཊྭཱཾ་ག་འཛིན་པ་ནི་ཁྱད་པར་རོ། །ར་ལ་རྡོ་རྗེ་མ་དམར་མོ་གཡས་པ་དག་ན་རྡོ་རྗེ་དང་གོ་ཆ། གཡོན་པས་དབྱུག་པ་དང་སྤྱི་བླུགས་འཛིན་པའོ། །རྡོ་རྗེ་འབར་བ་མ་ནི་རྡོ་རྗེ་མེ་ལྟ་བུའོ། །མ་ཧེ་ལ་རྡོ་རྗེ་དུས་ནག་པོ་རྡོ་རྗེ་དང་ལྕགས་ཀྱུ་འཛིན་པའོ། །རོ་ལངས་ལ་རྡོ་རྗེ་དུས་མ་ནག་མོ་རྡོ་རྗེ་དང་ཁ་ཊྭཱཾ་ག་འཛིན་པའོ། །ཀླུ་ལྷག་མ་རྣམས་ལ་རྡོ་རྗེ་ལྕགས་ཀྱུ་སྔོན་པོ་ཕག་གི་གདོང་པ་ཅན་རྡོ་རྗེ་དང་ལྕགས་ཀྱུ་འཛིན་པའོ། །སྐྱེས་བུ་ལ་རྡོ་རྗེ་གདོང་
མ་སྔོན་མོ་ཕག་པའི་གདོང་ཅན་མ་རྡོ་རྗེ་དང་རལ་གྲི་འཛིན་པའོ། །ཆུ་སྲིན་ལ་རྡོ་རྗེ་ཀླུ་དཀར་པོ་གདེངས་ཀ་བརྒྱད་དང་ལྡན་པ་གཡས་ན་རྡོ་རྗེ་དང༌། གཡོན་ན་ཀླུའི་ཞགས་པ་འཛིན་པའོ། །ཆུ་སྲིན་ལ་རྡོ་རྗེ་ཆུ་སྲིན་མ་དཀར་མོ་གདེངས་ཀ་བརྒྱད་དང་ལྡན་པ་གཡས་ན་རྡོ་རྗེ་དང༌། གཡོན་ན་རྡོ་རྗེས་མཚན་པའི་ཆུ་སྲིན་ཅན་ནོ། །རི་དྭགས་ལ་རྡོ་རྗེ་རླུང་སྔོན་པོ་གཡས་ན་རྡོ་རྗེ་དང་གཡོན་ན་རླུང་རས་ཅན་ནོ། །རྡོ་རྗེ་ཤུགས་ཅན་མ་ནི་རྡོ་རྗེ་རླུང་ལྟ་བུའོ། །རོ་ལངས་ལ་རྡོ་རྗེ་འཇིགས་བྱེད་སྔོན་པོ་རྡོ་རྗེ་དང་དབྱུག་ཏོ་འཛིན་པའོ། །རྡོ་རྗེ་རྣམ་པར་གཙིགས་མ་ནི་རྡོ་རྗེ་འཇིགས་བྱེད་ལྟ་བུའོ། །གཡོན་པས་ཞགས་པ་འཛིན་པ་ན་ཁྱད་པར་རོ། །བྱི་བ་ལ་རྡོ་རྗེ་ལེགས་འདྲེན་དཀར་པོ་གླང་པོ་ཆེའི་གདོང་ཅན་ཕྱག་གཡས་པ་ངག་གིས་རྡོ་རྗེ་དང་དགྲ་སྟ་འཛིན་ཞིང༌། གཡོན་པ་དག་གིས་རྩེ་གསུམ་དང་དབྱུག་ཏོ་འཛིན་པ་སྦྲུལ་གྱི་མཆོད་ཕྱིར་ཐོགས་པ་ཅན་ནོ། །བྱི་བ་ལ་སྲུལ་མོ་སྔོན་མོ་གཡས་པ་ན་རྡོ་རྗེ་དང་གཡོན་པས། ཕྱགས་ཤིང་ཅན་ནོ། །སྡིགས་མ་ལྗང་གུ་གཡས་པ་ན་རྡོ་རྗེ་དང་གཡོན་པ་ན་རལ་གྲི་འགེགས་བྱེད་འཛིན་པའོ། །དཔལ་མོ་སེར་མོ་གཡས་པ་ན་རྡོ་རྗེ་དང་གཡོན་པ་ན་པདྨ་ཅན་ནོ། །དབྱངས་ཅན་མ་དཀར་མོ་གཡས་པ་ན་རྡོ་རྗེ་དང་གཡོན་པ་ན་པི་ཝང་ཅན་ནོ། །སེང་གེ་ལ་བགྲད་དཀའ་མ་ལྗང་གུ་གཡས་པ་དག་ན་རྡོ་རྗེ་དང་འཁོར་ལོ་དང༌། གཡོན་པ་དག་ན་ལྡ་མན་དང་རལ་གྲི་ཅན་ནོ། །འདིར་མགྲིན་པ་སྔོན་པོ་ལ་སོགས་པའི་ལྷ་རྣམས་ཀྱི་ཕྱག་གཡས་པ་རྣམས་སུ་ཇི་ལྟར་འབྱུང་བའི་རྡོ་རྗེ་རྣམས་ནི་རྩ་མོ་གསུམ་པར་རིག་པར་བྱའོ། །ནུབ་ཏུ་རྡོ་རྗེ་ཀླུ་དང་ཉེ་བར་པདྨ་ལ་སའི་ལྷ་མོ་གསེར་གྱི་མདོག་ཅན་ཕྱག་དག་གིས་བདུད་རྩིའི་བུམ་པ་འཛིན་པའོ། །ལྷ་མ་ཡིན་རྣམས་ནི་སྣ་ཚོགས་པའི་མདོག་ཅན་གོ་ཆ་དང་བཅས་པ་རལ་གྲི་འཛིན་པ་རས་བལ་གྱི་གདན་ལ་འདུག་པའོ། །ཀླུ་རྣམས་ནི་ནོར་བུ་དང་ལྡན་པའི་གདེངས་ཀ་ཅན་བཙུན་མོ་དང་བཅས་པ་ཐལ་མོ་སྦྱར་བའོ། །ཁོར་ཡུག་གི་ཕྱི་རོལ་མཚམས་རྣམས་སུ་མེར་མ་ནར་མེད་ལ་སོགས་པའི་དམྱལ་བ་རྣམས་དང༌། བདེན་བྲལ་དུ་ཡི་དགས་ཀྱི་འགྲོ་བ་རྣམས་དང༌། རླུང་དུ་བྱོལ་སོང་གི་འགྲོ་བ་རྣམས་དང༌། དབང་ལྡན་དུ་མིའི་འགྲོ་བ་རྣམས་གནས་པ་སྟེ། རིམ་པ་འདི་ནི་རྒྱུད་གཞན་ལས་བྲིས་པའོ། །གཞན་དག་ནི་རྡོ་རྗེ་འཇིགས་བྱེད་དང་ཉེ་བར་སའི་ལྷ་མོ་དང་གནོད་སྦྱིན་རྣམས་
དང་ཉེ་བར་ལྷ་མ་ཡིན་རྣམས་སོ་ཞེས་རྗོད་པར་བྱེད་དོ། །འཁོར་ལོའི་དབང་ཕྱུག་གི་ཐུགས་གར་ཟླ་བ་ལ་ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ། ཞེས་པའི་སྔགས་ཏེ་འདི་ཉིད་ནི་སྙིང་པའོ། །ཨོཾ་ན་མོ་བྷ་ག་ཝ་ཏེ་སརྦ་དུ་རྒ་ཏི་བ་རི་ཤོ་དྷ་ན་རཱ་ཛཱ་ཡ་ཏ་ཐཱ་ག་ཏཱ་ཡ། ཨརྷ་ཏེ། སྨྱཀྶཾ་བུ་དྡྷ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོ་དྷ་ནེ། སརྦ་པཱ་པཾ་ཤོ་དྷ་ནེ་ཤུདྡྷེ་བི་ཤུ་དྡྷེ། སརྦ་ཀྲྨ་ཨཱ་བ་ར་ཎ་བི་ཤུདྡྷེ་སྭཱ་ཧཱ། ཞེས་པ་ཕྲེང་པའི་སྔགས་སོ། །རྡོ་རྗེ་འབེབས་པའི་སྔགས་ནི། ཨོཾ་སརྦ་བིཏ་སརྦ་ཨ་པཱ་ཡ་གཏི་ཧ་ན་བི་ཤོ་དྷ་ནི་ཧཱུཾ་ཧོཿ་ཕཊ། ཅེས་པ་སྟེ་ལས་ཐམས་ཅད་པའོ། །ཨོཾ་བཛྲ་ཡཀྵ་ཧཱུཾ་ཞེས་པ་ནི་གཞན་དག་གོ །འབྱུང་བོ་འདུལ་བྱེད་ཀྱི་དཀྱིལ་འཁོར་ནི་རྡོ་རྗེ་གུར་གྱི་ནང་རི་རབ་ཀྱི་སྟེང་སྣ་ཚོགས་ཆུ་སྐྱེས་ཀྱི་ཟེའུ་འབྲུལ་གནས་པའི་སྣ་ཚོགས་རྡོ་རྗེའི་ལྟེ་བའི་སྟེང་དུ་གཞལ་ཡས་ཁང་གི་ལྟེ་བ་ལ་གླང་པོ་ཆེའི་རྒྱལ་པོའི་སྟེང་ངམ། གླང་པོ་ཆེ་དང་བྲལ་བ་ཡང་རུང་སྣ་ཚོགས་པདྨ་དང་ཟླ་བ་ལ་གཞན་གྱིས་མི་ཐུབ་པའི་འབྱུང་པོ་ཆེན་པོ་དཀར་པོ་ཟླ་བ་ཕྱེད་པས་མཚན་པའི་རལ་བའི་ཐོར་ཅོག་དང༌། སྨར་དམར་སེར་ཅན། ཐོད་པ་ལྔ་དང་ལྡན་པ། མིག་གསུམ་པ། མཆེ་བ་གཙིགས་པ། གསུས་པ་འཕྱང་བ། སྤྲུལ་གྱི་མཆོད་ཕྱིར་ཐོགས་པ་དང་བཅས་པ་སྟག་གི་པགས་པའི་སྨད་གཡོགས་ཅན། ལག་པ་བཞིའི་གཡས་པ་དག་གིས་གྲི་གུག་དང་ཌ་མ་རུ་འཛིན་ཞིང༌། གཡོན་པ་དག་གིས་ཐོད་པ་དང་རྩེ་གསུམ་འཛིན་པ་དྲག་པོ་སྟེ། དེ་གཡོན་བརྐྱང་གིས་མནན་པའི་འབྱུང་པོ་འདུལ་བྱེད་དྲག་པོ་ཆེན་པོ་སྐུ་མདོག་སྔོན་པོ་ཐོང་པ་ལྔས་མཚན་པའི་ཅོད་པན་ལ་དེ་བཞིན་གཤེགས་པ་ལྔའི་དབུ་རྒྱན་དང་ལྡན་པ། དབུ་སྐྲ་དམར་སེར་གྱེན་དུ་བཅིངས་པ་ན་བཟའ་སྔོན་པོ་མནབས་པ་མཆེ་བ་གཙིགས་པའི་ཞལ་ཅན་བཞད་པའི་གང་རྒྱངས་ཅན་སྤྱན་གསུམ་དམར་ལ་ཟླུམ་པ། ཕྱག་བཞིའི་གཡས་པས་རྡོ་རྗེ་སྔོན་པོ་ཁ་གྱེས་པ་གསོར་ཞིང༌། གཡོན་པས་སྡིགས་མཛུབ་དང་བཅས་པའི་ཞགས་པ་འཛིན་པ། གཉིས་ཀྱིས་ཕྱག་རྒྱ་བཅིངས་པ་སྟེ། ཕྱག་རྒྱ་ནི་མིང་མེད་གཉིས་བསྣོལ་ནས་མཛུབ་མོ་གཉིས་བསྐུམ་སྟེ་མཐེའུ་ཆུང་དང་གུང་མོ་ཡང་མཐེ་བོང་རྒན་པས་མནན་པའོ་ཞེས་པ་འདི་གསུངས་སོ། །ཀླུའི་རྒྱལ་པོ་ཆེན་པོ་བརྒྱད་ཀྱིས་བརྒྱན་པ་སྟེ། དེའང་སྟོབས་ཀྱི་རྒྱུ་སྔོན་པོས་སྤྱི་བོ་བཅིངས་པ། མགྲིན་པར་འཇོག་པོ་དམར་པོ། །དགའ་བོ་
དང་ཉེར་དགའ་སེར་པོས་རྣ་རྒྱན། མཐའ་ཡས་དཀར་པོས་ཚངས་སྐུད། ནོར་རྒྱས་དཀར་པོས་སྐ་རགས། ཕྱག་རྒྱའི་ཕྱག་དག་གི་དཔུང་པར་ནི་རིགས་ལྡན་ཕུག་རོན་གྱི་མདོག་ཅན། ཕྱག་གཞན་པ་གཉིས་ཀྱི་དཔུང་པ་ལ་དུང་སྐྱོང་དཀར་པོ། །རྐང་གདུབ་དག་ནི་པདྨ་དང་པདྨ་ཆེན་པོ་དམར་པོ། །རེའུ་མིག་རྣམས་ལ་ཤར་དུ་གླང་དང་ཉི་མ་ལ་དབང་ཕྱུག་ཆེན་པོ་དཀར་པོ་མཚན་མ་གྱེན་དུ་ལངས་པ་ཐོད་པའི་ཕྲེང་བ་ཅན། སྤྱན་གསུམ་པ་ཟླ་བ་ཕྱེད་པས་མཚན་པའི་རལ་པའི་ཐོར་ཅོག་ཅན་སྦྲུལ་གྱི་མཆོད་ཕྱིར་ཐོགས་པ་དང་བཅས་པ། ཕྱག་བཞིའི་གཡས་པ་དག་གིས་གྲི་གུག་དང་ཌ་མ་རུ་འཛིན་ཞིང༌། གཡོན་པ་དག་གིས་ཐོད་པ་དང་རྩེ་གསུམ་འཛིན་པའོ། །ལྷོར་ནམ་མཁའ་ལྡིང་དང་ཉི་མ་ལ་ཁྱབ་འཇུག་ནག་པོ་རིན་པོ་ཆེའི་ཅོན་པན་ཅན་གཡས་པ་དག་གིས་རྔ་ཡབ་དང་དུང་འཛིན་ཞིང༌། གཡོན་པ་དག་གིས་འཁོར་ལོ་དང་དབྱུག་ཏོ་འཛིན་པའོ། །ནུབ་ཏུ་ངང་པ་དང་ཟླ་པ་ལ་ཚངས་པ་དཀར་པོ་ཞལ་བཞི་པ། ཕྱག་བཞི་པ། གཡས་པ་དག་གིས་བགྲང་ཕྲེང་དང་གདུགས་ཀྱི་ཡུ་བ་འཛིན་ཞིང༌། གཡོན་པ་དག་གིས་པདྨ་དང་སྤྱི་བླུགས་འཛིན་པའོ། །བྱད་དུ་རྨ་བྱ་དང་ཉི་མ་ལ་སྨིན་དྲུག་གི་བུ་དམར་པོ་གཙུག་ཕུད་གསུམ་དང་ལྡན་པ་གཡས་པས་རྔ་ཡབ་དང༌། གཡོན་པས་ཤཀྟི་འཛིན་པའོ། །དབང་ལྡན་དུ་བྱི་པ་དང་ཟླ་བ་ལ་ཚོགས་བདག་དཀར་པོ་གླང་པོ་ཆེའི་གདོད་པ་ཅན་སྤྱན་གསུམ་པ་སྤྱི་བོར་ཟླ་བ་ཕྱེད་པས་མཚན་པ་གཡས་པ་དག་གིས་ལ་ཕུག་དང་དགྲ་སྟ། གཡོན་པ་དག་གིས་རྩེ་གསུམ་དང་ཐོད་པ་འཛིན་པའོ། །མེར་ཉི་མའི་དཀྱིལ་འཁོར་ལ་ཉི་མ་དམར་པོ་གཡས་པ་དང་གཡོན་པ་དག་གིས་པདྨ་ལ་གནས་པའི་ཉི་མའི་དཀྱིལ་འཁོར་འཛིན་པའོ། །བདེན་བྲལ་དུ་ཤིང་རྟ་ལ་གནས་པའི་ཉི་མ་དང་ཟླ་བ་ལ་སྒྲ་གཅན་དབུ་སྐྲ་དམར་སེར་གྱེན་དུ་འབར་བ་མིག་དང་སྨིན་མ་དང་སྨིན་མ་དང་སྨར་དམར་སེར་འབར་བ། མཆེ་བ་བཞི་པ་ཞལ་གདངས་པ་ཕྱག་དག་གིས་ཉི་མ་དང་ཟླ་བར་བཅས་པས་ཐལ་མོ་སྦྱར་བའོ། །རླུང་དུ་ཟླ་བ་ལ་དགའ་བྱེད་དབང་ཕྱུག་སེར་པོ་གར་བྱེད་པ། སྤྱི་བོར་ཟླ་བ་ཕྱེད་པ་ཅན་སྤྲུལ་གྱི་མཆོད་སྤྱིར་ཐོགས་པ་དང་ལྡན་པ། གཡས་པ་དང་ཅིག་ཤོས་དག་གིས་ཌ་མ་རུ་དང་རྩེ་གསུམ་འཛིན་པའོ། །རིམ་པ་གཉིས་པའི་ཤར་ཕྱོགས་སུ་ཟླ་བ་ལ་དཔལ་མོ་དཀར་མོ་ཐུགས་ཀར་ཐལ་མོ་སྦྱར་བས་མེ་
ཏོག་པདྨ་འཛིན་པའོ། །ལྷོ་རུ་ཟླ་བ་ལ་ཐིག་ལེ་མཆོག་མ་དམར་མོ་སྤོས་སྣོད་འཛིན་ཞིང་གར་བྱེད་པའོ། །ནུབ་ཏུ་ཟླ་བ་ལ་རི་བོང་ཅན་མ་དམར་མོ་མར་མེ་འཛིན་པའོ། །བྱང་དུ་ཟླ་བ་ལ་དཀའ་ཟློག་མ་སེར་མོ་སྤྱི་བོར་གདེངས་ཀའི་རྣམ་པར་བྱས་པའི་ལག་པ་ཟློག་ཅིང་གར་བྱེད་པའོ། །མེར་ཟླ་བ་ལ་རིན་ཆེན་དཔལ་མོ་དམར་མོ་དྲིལ་བུ་འཛིན་པའོ། །བདེན་བྲལ་དུ་ཟླ་བ་ལ་དབྱངས་ཅན་མ་ལྗང་གུ་པི་ཝང་སྒྲོགས་པའོ། །རླུང་དུ་ཟླ་བ་ལ་ལྷ་མཛེས་མ་ནག་པོ་རིན་པོ་ཆེའི་ཕྲེང་བ་འཛིན་པའོ། །དབང་ལྡན་དུ་ཟླ་བ་ལ་ཀུན་འབྱོར་མ་སེར་མོ་གར་བྱེད་ཅིང་ཕྱག་ན་རྡོ་རྗེ་རྩེ་གསུམ་པ་འཛིན་པའོ། །རིམ་པ་གསུམ་པའི་གར་དུས་སྲུང་དཀར་པོ་དང་ཟླ་བ་ལ་བརྒྱ་བྱིན་སེར་པོ་རིན་པོ་ཆེའི་ཅོད་པན་ཅན་གཡས་པས་མི་འཇིགས་པ་སྦྱིན་ཞིང་གཡོན་པ་རྡོ་རྗེའི་མཚོན་ཆ་ཅན་ནོ། །ལྷོར་མ་ཧེ་དང་ཉི་མ་ལ་གཤིན་རྗེ་ནག་པོ་གསུས་པ་འཕྱང་བ། སྤྱན་དང་སྨིན་མ་དང་སྨར་དང་རལ་པ་དམར་སེར་ཅན། གོས་སེར་པོ་གྱོན་པ་གཡས་པ་ཐོད་པས་མཚན་པའི་དབྱུག་པ་འཛིན་ཞིང༌། གཡོན་པ་སྡིགས་མཛུབ་དང་བཅས་བས་ཞགས་པ་འཛིན་པའོ། །ནུབ་ཏུ་ལག་འགྲོ་དང་ཟླ་བ་ལ་ཆུ་ལྷ་དཀར་པོ་གདེངས་ཀ་བདུན་དང་ལྡན་པ། གཡོན་པས་ཀླུའི་ཞགས་པ་འཛིན་ཞིང་གཡས་པས་མཆོག་སྦྱིན་པའོ། །བྱང་དུ་གནོད་སྦྱིན་ལ་གནས་པའི་ལུས་ངན་སེར་པོ་ཤ་རྒྱས་ཤིང་གསུས་པ་འཕྱང་བ་རིན་པོ་ཆེའི་ཅོད་པན་ཅན། གཡས་པ་དང་གཡོན་པ་དག་གིས་དབྱུག་ཏོ་དང་ནེའུ་ལེ་འཛིན་པའོ། །མེར་ར་དང་ཉི་མ་ལ་མེ་ལྷ་དམར་པོ་རལ་པ་དང་ལྡན་པ། སྐྲ་དང་སྨར་སེར་ཞིང་འབར་བ། གསུས་པ་འཕྱང་བ། རིལ་བ་དང་མཆོད་ཕྱིར་ཐོགས་པ་ཅན། གཡས་པ་དག་གིས་མཆོག་སྦྱིན་དང་བགྲང་ཕྲེང་འཛིན་ཞིང༌། གཡོན་པ་དག་གིས་དབྱུག་གུ་གསུམ་པ་དང་སྤྱི་བླུགས་འཛིན་པའོ། །བདེན་བྲལ་དུ་རོ་ལངས་དང་ཉི་མ་ལ་སྲིན་པོ་ནག་པོ་སྨར་སེར་པོ་ཅན། གཡས་པས་རལ་གྲི་དང་གཡོན་པས་མི་ཤས་གང་བའི་ཐོད་པ་འཛིན་པའོ། །རླུང་དུ་རི་དགས་དང་ཟླ་བ་ལ་རླུང་ལྷ་སྔོན་པོ་གཙུག་ཕུད་གསུམ་དང་ལྡན་པ་ཕྱག་དག་གིས་རླུང་རས་འཛིན་པའོ། །དབང་ལྡན་དུ་ངང་པ་དང་ཟླ་བ་ལ་ཟླ་བ་དཀར་པོ་གཡོན་པ་ན་ཀུ་མུ་ཏ་ན་གནས་པའི་ཟླ་བའི་དཀྱིལ་འཁོར་དང༌། གཡས་པས་མཆོག་སྦྱིན་པའོ། །དབང་ལྡན་དུ་དབང་ལྡན་ཡང་དབང་ཕྱུག་ཆེན་པོ་ལྟ་བུའོ། །རིམ་པ་བཞི་པའི་ཤར་
དུ་ཟླ་བ་ལ་སེང་གེའི་རྒྱལ་མཚན་འཛིན་མ་དཀར་མོ་སེང་གེའི་རྒྱལ་མཚན་འཛིན་པའོ། །ལྷོ་རུ་ཟླ་བ་ལ་རྣམ་པར་འབྱོར་མ་དམར་མོ་ལྕགས་ཀྱུ་འཛིན་པའོ། །ནུབ་ཏུ་པདྨ་ལ་ལྡན་མ་ཆེན་མོ་དཀར་མོ་གཞུ་དང་མདའ་འཛིན་པའོ། །བྱང་དུ་ཟླ་བ་ལ་ཆང་མཆོག་མ་དམར་མོ་ཡིད་བཞིན་གྱི་ནོར་བུའི་རྒྱལ་མཚན་འཛིན་པའོ། །དབང་ལྡན་དུ་ཟླ་བ་ལ་མཆོག་འཕྲོག་མ་དམར་མོ་ཐུགས་ཀར་མེ་ཏོག་དང་བཅས་པའི་ཐལ་མོ་སྦྱར་བའོ། །མེར་ཟླ་བ་ལ་རིན་ཆེན་དབང་ཕྱུག་མ་སེར་མོ་སྤོས་ཕོར་འཛིན་པའོ། །བདེན་བྲལ་དུ་ཟླ་བ་ལ་རྒྱལ་མཚན་མ་སེར་མོ་དྲིའི་དུང་ཆོས་འཛིན་པའོ། །རླུང་དུ་ཟླ་བ་ལ་འགྲོ་སྐྱོད་མ་སེར་མོ་མར་མེའི་མཆོད་སྡོང་འཛིན་པའོ། །འདིར་གང་ལ་ཁྱད་པར་གྱི་ཚིག་མེད་པ་དེར་ནི་ཉི་མ་དང་ཟླ་བ་ཐམས་ཅད་སྣ་ཚོགས་པདྨ་ལ་གནས་པ་སྟེ། ལྷ་ཐམས་ཅད་སེམས་དཔའི་སྐྱིལ་ཀྲུང༌། རྣམ་པ་སྣ་ཚོགས་པའི་གོས་དང་རིན་པོ་ཆེས་བརྒྱན་པའོ། །འདིར་འཁོར་ལོའི་དབང་ཕྱུག་གི་རིགས་ཀྱི་དབང་པོ་ནི་མི་བསྐྱོད་པ་སྟེ་ཐུགས་ཀའི་ས་བོན་ནི་ཧཱུཾ་ངོ༌། །ཧཱུཾ་བཛྲ་ཕཊ་ཅེས་པ་ནི་སྙིང་པོ་སྟེ། ཡང་ན། ཨོཾ་བྷཱུ་ཏ་ཌཱ་མ་ར་བྷཱུ་ཏ་ཨ་དྷི་པ་ཏི་ཨཀྵ་བྷྱཿཀི་རཱི་ཌི་ན་སརྦྦ་བྷཱུ་ཏ་པྲེ་ཏ་པི་ཤཱ་ཙ་ན་སཱ་དྷ་ཡ་ཧཱུཾ་ཕཊ། ཅེས་པའོ། །ལས་ཐམས་ཅད་པའི་སྔགས་ཀྱང་འདི་ཉིད་དེ་ཡང་ན་བགེགས་མཐར་བྱེད་ཀྱི་སྔགས་སོ། །མཁའ་འགྲོ་ལྔའི་དཀྱིལ་འཁོར་ནི་རྡོ་རྗེའི་ས་གཞི་ལ་སོགས་པ་ནས་གཞལ་ཡས་ཁང་གི་མཐར་ཐུག་པ་སྔར་གྱི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ། །དེ་ལ་དབུས་ཀྱི་གཞལ་ཡས་ཁང་གི་དབུས་སུ་བཅོམ་ལྡན་འདས་རྡོ་རྗེ་མཁའ་འགྲོ་སྟེ་ཤར་ལ་སོགས་པའི་སྒོ་རྣམས་སུ་གཽ་རཱི་ལ་སོགས་པ་རྣམས་དང༌། དབང་ལྡན་ལ་སོགས་པའི་མཚམས་རྣམས་སུ་པུཀྐ་སཱི་ལ་སོགས་པ་རྣམས་སོ། །དེ་ཡང་གཽ་རཱི་དཀར་མོ་གཡས་པ་ལྕགས་ཀྱུ་འཛིན་པ་དང༌། ཙཽ་རཱི་སེར་མོ་ཞགས་པ་འཛིན་པ་དང༌། བེ་ཏ་ལཱི་དམར་མོ་ལྕགས་སྒྲོག་འཛིན་པ་དང༌། གྷསྨ་རཱི་ལྗང་གུ་དྲིལ་བུ་འཛིན་པ་དང༌། པུཀྐ་སཱི་སྔོན་མོ་བྱང་ཆུབ་ཀྱི་སེམས་ཀྱི་བུམ་པ་འཛིན་པ་དང༌། ཤ་པ་རཱི་དཀར་མོ་རི་རབ་འཛིན་པ་དང༌། ཙཎྜ་ལཱི་སྔོན་མོ་མེ་ཐབ་འཛིན་པ་དང༌། ཌོམྦི་ནཱི་སྣ་ཚོགས་མདོག་ཅན་རྒྱལ་མཚན་འཛིན་པའོ། །ཤར་གྱི་གཞལ་ཡས་ཁང་གི་དབུས་སུ་ཟླ་བ་ལ་སངས་རྒྱས་མཁའ་འགྲོ་དཀར་མོ་སྟེ། རྩ་བའི་ཞལ་དཀར་པོ་གཡོན་པ་
དམར་པོ་ལྷག་མ་རྣམས་སྔོན་པོ་གཡས་པའི་ཐོད་པ་བརྒྱད་པོ་རྣམས་ན་རྨ་བྱ་དང་མ་ཧེ་དང་ཆུ་སྲིན་དང་ཉ་དང༌། གླང་པོ་ཆེ་དང་རུས་སྦལ་དང་ཀླུ་ལྷག་མ་ཅན་དང༌། དང་པ་རྣམས་དང་གཡོན་པའི་ཐོད་པ་བརྒྱད་པོ་རྣམས་ན་དཔྱིད་དང༌། སྲོག་ཆགས་ཛྱེཥྛི་དང༌། སྦྲུལ་ཧ་ལ་ཧ་ལ་དང༌། ཨཱཉྫ་ན་བྷོ་དང་བྱི་བ་དང་གཡག་དང་དྲི་ཅན་དང་ཙཱ་ཏ་ཀ་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པའི་མཚམས་རྣམས་སུ་རིམ་པ་ཇི་ལྟ་བར་ལྷ་མོ་རྣམས་ཏེ། དེ་ཡང་སྐམ་པ་མ་སྔོན་མོ་སྐམ་པ་འཛིན་པ་དང༌། ཞགས་པ་མ་སེར་མོ་ཞགས་པ་འཛིན་པ་དང༌། དོལ་ཟླུམ་མ་དམར་མོ་ཉ་རྒྱ་ཟླུམ་པོ་འཛིན་པ་དང༌། ལྕགས་ཀྱུ་མ་ལྕགས་ཀྱུ་འཛིན་པ་དང༌། མེ་ཏོག་མ་དཀར་མོ་མེ་ཏོག་གི་ཟ་མ་ཏོག་འཛིན་པ་དང༌། བདུག་སྤོས་མ་ནག་མོ་སྤོས་ཕོར་འཛིན་པ་དང༌། མར་མེ་མ་སེར་མོ་མར་མེའི་མཆོད་སྡོང་འཛིན་པ་དང༌། དྲི་ཆབ་མ་སེར་མོ་དྲི་ཡིས་གང་བའི་དུང་ཆོས་འཛིན་པའོ། །ལྷོའི་དཀྱིལ་འཁོར་གྱི་དབུས་སུ་རིན་ཆེན་མཁའ་འགྲོ་སེར་མོ་སྟེ་འདིའི་རྩ་བ་དང་གཡོན་པའི་ཞལ་དག་ནི་སེར་པོ་དང་དཀར་པོའོ། །ལྷག་མ་རྣམས་ནི་སྔོན་པོའོ། །གཡས་པས་ཐོད་པ་རྣམས་ན་བྱ་ཀ་རཎྜ་དང༌། ངུར་པ་དང༌། ལུག་དང༌། ཙ་ཀོ་ར་དང༌། ཁྲ་དང༌། ཧོར་པ་དང༌། འོལ་བ་དང༌། ཀུ་ར་རྣམས་དང༌། གཡོན་པ་རྣམས་ན་སྟོབས་ཀྱི་རྒྱུ་དང༌། དུང་སྐྱོང་དང༌། རིགས་ལྡན་དང༌། པདྨ་དང༌། པདྨ་ཆེན་པོ་དང༌། འཇོག་པོ་དང༌། ནོར་རྒྱས་དང༌། མཐའ་ཡས་རྣམས་སོ། །ཤར་ལ་སོགས་པའི་སྒོ་རྣམས་དང༌། དབང་ལྡན་ལ་སོགས་པའི་མཚམས་རྣམས་སུ་ལྷ་མོ་རྣམས་ཏེ། དེ་ཡང་ཉི་ཕྱག་མ་དཀར་མོ་ཉི་མའི་དཀྱིལ་འཁོར་འཛིན་པ་དང༌། མར་མེ་མ་སྔོན་མོ་མར་མེའི་མཆོད་སྡོང་འཛིན་པ་དང༌། རིན་ཆེན་དཀར་མདའ་མ་སེར་མོ་རིན་པོ་ཆེ་འཛིན་པ་དང༌། གློག་ཕྱག་མ་ལྗང་གུ་གློག་གི་འཁྲི་ཤིང་འཛིན་པ་དང༌། སྒེག་མོ་དམར་མོ་བསྙེམས་ཤིང་སྒེག་པ་དང་བཅས་པའི་ཚུལ་གྱི་ཕྱག་གཉིས་ཀྱིས་རྡོ་རྗེ་འཛིན་པ་དང༌། ཕྲེང་བ་མ་དམར་མོ་ཕྱག་དག་གིས་རིན་པོ་ཆེའི་ཕྲེང་བ་འཛིན་པ་དང༌། གླུ་མ་དམར་སྐྱ་ཕྱག་དག་གིས་ཏིང་ཏིང་ཤགས་སྒྲོགས་པ་དང༌། གར་མ་སྣ་ཚོགས་མདོག་ཅན་རྡོ་རྗེ་དང་བཅས་པའི་ཕྱག་དག་གིས་གར་བྱེད་པའོ། །ནུབ་ཀྱི་དཀྱིལ་འཁོར་གྱི་དབུས་སུ་པདྨ་མཁའ་འགྲོ་དམར་མོ་སྟེ་
འདིའི་རྩ་བ་དང་གཡོན་པའི་ཞལ་དག་ནི་དམར་པོ་དང་དཀར་པོ། ལྷག་མ་རྣམས་ནི་སྔོན་པོའོ། །གཡས་པའི་ཐོད་པ་རྣམས་ན་དོམ་དང༌། བྱ་རྒོད་དང་བསེ་དང་བ་མེན་དང་སྟག་དང་སྦྲེའུ་དང་ཆུ་སྲིན་དང་ཅེ་སྤྱང་རྣམས་དང༌། གཡོན་པ་རྣམས་ན་ཁྲ་དང་འུག་པ་དང༌། སོ་བྱ་དང༌། སེང་གེ་དང༌། བཞད་བྱ་དང༌། ར་དང་རི་དགས་དང་ཕག་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པའི་མཚམས་རྣམས་སུ་ལྷ་མོ་རྣམས་ཏ། དེ་ཡང་པདྨ་དཀར་པོ་པདྨ་འཛིན་པ་དང༌། ཆོས་འབྱུང་མ་སེར་མོ་ཆོས་འབྱུང་འཛིན་པ་དང༌། ལྕགས་སྒྲོག་མ་ནག་མོ་ཕྱག་དག་གིས་ལྕགས་སྒྲོག་འཛིན་པ་དང༌། རང་འཁྱུད་མ་ལྗང་གུ་སངས་རྒྱས་ལ་རྗེས་སུ་ཆགས་པ་འཆིང་བའི་ཕྱག་གཉིས་རྡོ་རྗེ་དང་ཐོད་པ་འཛིན་པས་རང་ལ་འཁྱུད་པར་བརྩོན་པའོ། །གླིང་བུ་མ་དམར་མོ་ཕྱག་དག་གིས་གླིང་བུ་འབུད་པར་བརྩོན་པ་དང༌། པི་ཝང་མ་སེར་མོ་ཕྱག་གཉིས་ཀྱིས་པི་ཝང་སྒྲེང་བ་ལ་བརྩོན་པ་དང༌། རྔ་ཟླུམ་མ་དཀར་མོ་ཕྱག་དག་གིས་རྔ་བོ་ཆེ་བརྡུང་བ་དང༌། རྫ་རྔ་མ་དུ་བའི་མདོག་ཅན་ཕྱག་དག་གིས་རྫ་རྔ་བརྡུང་བ་ལ་བརྩོན་པའོ། །བྱང་གི་གཞལ་ཡས་ཁང་གི་དབུས་སུ་སྣ་ཚོགས་མཁའ་འགྲོ་དཱུར་བ་ལྟར་ལྗང་གུ་སྟེ། འདིའི་རྩ་བའི་ཞལ་ནི་སྟག་གདོང་ལྗང་གུ་གཞན་རྣམས་ནི་ལྷའི་ཞལ་ཅན། ཕྱོགས་ཁ་ཅིག་ནི་རྩ་བའི་ཞལ་ཡང་ལྷའི་ཡིན་ལ་གཡོན་པ་དཀར་པོ། །ལྷག་མ་རྣམས་ནི་སྔོན་པོའོ། །གཡས་པའི་ཐོད་པ་རྣམས་ན་གཟའ་ལྷག་དང་ཕུར་བུ་དང་མཇུག་རིངས་དང་སྒྲ་གཅན་དང་མིག་དམར་དང་པ་སངས་དང་སྤེན་པ་དང་ཁྱབ་འཇུག་རྣམས་དང༌། གཡོན་པ་རྣམས་ན་དབང་པོ་དང་ཆུ་ལྷ་དང་ཚོངས་པ་དང་དག་པོ་དང་འདོད་པའི་ལྷ་དང་སྟོབས་བཟང་དང་ཐགས་བཟངས་རིས་དང་སྟོབས་ཅན་རྣམས་སོ། །ཤར་ལ་སོགས་པའི་སྒོ་རྣམས་དང་དབང་ལྡན་ལ་སོགས་པའི་མཚམས་རྣམས་སུ་ལྷ་མོ་རྣམས་ཏེ། དེའང་སྒོ་ལྕགས་མ་དཀར་མོ་སྒོ་ལྕགས་འཛིན་པ་དང༌། ལྡེ་ཀྱོག་མ་སེར་མོ་ལྡེ་ཀྱོག་འཛིན་པ་དང༌། སྒོ་གླེགས་མ་དམར་མོ་སྒོ་གླགས་འཛིན་པ་དང༌། ཡོལ་བ་མ་ནག་མོ་ཡོལ་བ་འཛིན་པ་དང༌། སྤྱན་མ་དཀར་མོ་འཁོར་ལོ་འཛིན་པ་དང༌། མཱ་མ་ཀཱི་སྔོན་མོ་རྡོ་རྗེ་འཛིན་པ་དང༌། གོས་དཀར་མོ་དམར་མོ་པདྨ་འཛིན་པ་དང༌། སྒྲོལ་མ་ལྗང་གུ་ཨུཏྤལ་སྔོན་པོ་འཛིན་པའོ། །གཞལ་ཡས་ཁང་ཆེན་པོའི་སྒོ་རྣམས་དང་དཔའ་
ལྡན་ལ་སོགས་པའི་མཚམས་རྣམས་སུ་གཽ་རཱི་ལ་སོགས་པ་དང༌། པུཀྐ་སཱི་ལ་སོགས་པ་སྔ་མ་བཞིན་ནོ། །འདིར་རྡོ་རྗེ་མཁའ་འགྲོའི་གདན་དང་སྐུ་མདོག་དང་དབྱིབས་དང་ཞལ་དང་ཕྱག་ལ་སོགས་པ་རྣམས་ནི་དགུའི་བདག་ཉིད་ཅན་གྱི་དཀྱིལ་འཁོར་གྱི་ཕྱག་བཅུ་དྲུག་པའི་ཀྱེའི་རྡོ་རྗེ་ཇི་ལྟ་བ་སྟེ། ཀུན་ནས་འཁྱུད་པའི་བདག་མེད་མ་ཡང་དེ་བཞིན་ནོ། །འཁོར་ལོ་ལ་སོགས་པའི་མཁའ་འགྲོ་བཞི་བརྗོད་པའི་ཁྱད་པར་གཞན་རྣམས་ནི་རྡོ་རྗེ་མཁའ་འགྲོ་དང་མཚུངས་པའོ། །དེ་རྣམས་ལ་འཁྱུད་པའི་ལྷ་མོ་རྣམས་ནི་རིམ་པ་ཇི་ལྟ་བར། སྤྱན་མ་དང༌། མཱ་མ་ཀཱི་དང༌། གོས་དཀར་མོ་དང༌། སྒྲོལ་མ་རྣམས་ཏེ་དཀར་མོ་དང་སེར་མོ་དང་དམར་མོ་དང་ལྗང་གུ་གྲི་གུག་དང་སྡིགས་མཛུབ་དང་ལྡན་པའི་ཕྱག་གཉིས་མ་རྣམས་སོ། །མཁའ་འགྲོ་ལྔ་པོ་རྣམས་ཀྱང་རེ་རེ་ཞིང་སངས་རྒྱས་ལྔའི་ཅོད་པན་ཅན་ནོ། །ཐམས་ཅད་དུ་གཞལ་ཡས་ཁང་གི་ལྷ་མོ་རྣམས་ནི་གཅིར་བུ་སྤྱན་གསུམ་དམར་ལ་ཟླུམ་པ། མཆེ་བ་གཙིགས་པ་ཞལ་གཅིག་མ་ཕྱག་གཉིས་མ་དབུ་སྐྲ་འབར་ཞིང་གྱེན་དུ་བརྫེས་པ། དཔྲལ་བའི་དབྱིངས་སུ་གནས་པའི་ཐོད་པ་ལྔ་དང་མི་མགོ་སྐམ་པོའི་ཕྲེང་བའི་དོ་ཤལ་དང་ཕྱག་རྒྱ་ལྔས་རྣམ་པར་བརྒྱན་པ་སྣ་ཚོགས་ཆུ་སྐྱེས་དང་རོ་དང་ཉི་མ་ལ་གཡོན་བརྐྱང་གི་གར་གྱིས་གནས་པའོ། །ཁྱད་པར་མ་བཤད་པ་རྣམས་ནི་ཐུགས་ཀའི་གཡོན་པའི་ཁུ་ཚུར་གྱི་སྡིགས་མཛུབ་ཀྱིས་བསྡིགས་པར་མཛད་པ་སྟེ། འཁྱུད་པའི་ལྷ་མོ་རྣམས་ལ་ནི་གདན་ཐ་དང་པ་མེད་དོ། །གཽ་རཱི་ལ་སོགས་པ་བརྒྱད་ལ་རིམ་པ་ཇི་ལྟ་བ་བཞིན་དུ་རོའི་གདན་གྱི་གནས་སུ་ཚངས་པ་དང་དབང་པོ་དང་ཉེ་དབང་དང་དྲག་པོ་དང་གཤིན་རྗེ་དང་ལུས་ངན་དང་བདེན་བྲལ་དང་ཐགས་བཟངས་རིས་རྣམས་སོ་ཞེས་པ་ནི་ཕྱོགས་གཅིག་གོ །མཁའ་འགྲོ་རྣམས་དང་གཽ་རཱི་ལ་སོགས་པ་རྣམས་ནི་རྡོ་རྗེ་མཁའ་འགྲོ་ལ་མངོན་པར་ཕྱོགས་པ་སྟེ་ལྷ་མོ་གཞན་རྣམས་ནི་རང་རང་གི་བདག་པོ་ལ་མངོན་པར་ཕྱོགས་པའོ། །ཀྱེའི་རྡོ་རྗེའི་སྤྱི་བོར་རྡོ་རྗེ་འཛིན་པ་དང་རྡོ་རྗེ་སྟེ་སྒོ་དང་མཚམས་ཀྱི་ལྷ་མོ་ལ་ཐུགས་དང་རྟག་པ་དང་རིན་ཆེན་དབང་པོ་དང་འོད་དཔག་མེད་རྣམས་སོ། །རྟག་པ་ལ་འཁོར་ལོ་འཛིན་པ་དང་འཁོར་ལོ་སྟེ་སྒོ་དང་མཚམས་ཀྱི་ལྷ་མོ་རྣམས་ལ་ཐུགས་དང་རིན་ཆེན་དབང་པོ་དང་འོད་དཔག་མེད་དང་དོན་ཡོད་གྲུབ་པ་རྣམས་སོ། །རྡོ་རྗེ་ཉི་མ་ལ་རིན་ཆེན་
འཛིན་པ་དང་ཡིད་བཞིན་གྱི་ནོར་བུ་སྟེ། སྒོ་དང་མཚམས་ཀྱི་ལྷ་མོ་རྣམས་ལ་སྐུ་དང་ཐུགས་དང་འོད་དཔག་མེད་དང་དོན་ཡོད་གྲུབ་པ་རྣམས་སོ། །པདྨ་གར་གྱི་དབང་ཕྱུག་ལ་པདྨ་འཛིན་པ་དང་རྡོ་རྗེ་པདྨ་སྟེ། སྒོ་དང་མཚམས་ཀྱི་ལྷ་མོ་རྣམས་ལ་སྐུ་དང་རིན་ཆེན་དང་མི་བསྐྱོད་པ་དང་འོད་དཔག་མེད་རྣམས་སོ། །རྟ་མཆོག་ལ་རལ་གྲི་འཛིན་པ་དང་རལ་གྲི་སྟེ། སྒོ་དང་མཚམས་ཀྱི་ལྷ་མོ་རྣམས་ལ་སྐུ་དང་ཐུགས་དང་འོད་དཔག་མེད་དང་དོན་ཡོད་གྲུབ་པ་རྣམས་སོ། །ཕྱི་རོལ་གྱི་གཽ་རཱི་ལ་སོགས་པ་རྣམས་ལ་ནི་སྔ་མ་བཞིན་ནོ། །རྡོ་རྗེ་ལ་སོགས་པའི་མཁའ་འགྲོ་རྣམས་ཀྱི་ཐུགས་ཀའི་ས་བོན་ནི་རིམ་པ་ཇི་ལྟ་བ་བཞིན་དུ། ཧཱུཾ་ཨོཾ་ཏྲཱཾ་ཨཱཿཁཾ་ཞེས་པའོ། །སྙིང་པོའི་སྔགས་ནི་ཨོཾ་དྷ་ར་དྷ་ར་དྷཱ་ར་ཡ་དྷཱ་ར་ཡ་མྲྡ་མྲྡ་བཛྲ་དྷྲྀ་ཀ་ཕཊ་སྭཱ་ཧཱ། ཨོཾ་ཤཱ་ཤྲ་ཏ་པེར་མ་ཤཱ་ཤྭ་ཏ་ཨེ་ཧྱེ་ཧི་ཛི་ན་ཛི་ཀ་ཧཱུཾ་ཕཊ་སྭཱ་ཧཱ། ཨོཾ་བཛྲ་སཱུ་ཪྻ་ཏ་མོ་པིདྷ་མ་ན་ས་མ་ཡ་སྟྭཾ་ཨ་ཧཾ་རཏྣ་དྷྲྀ་ཀ་ཕཊ་སྭཱ་ཧཱ། ཨོཾ་བཛྲ་དྷ་རྨཱ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀཀ་ཕཊ་སྭཱ་ཧཱ། ཨོཾ་ཧཱུཾ་ཧཱུཾ་ཧི་ཧི་པྲཛྙཱ་དྷྟྀ་ཀ་ཧཱུཾ་ཕཊ། ཅེས་པ་རྣམས་སོ། །ན་མཿས་མནྟ་བུདྡྷེ་བྷྱོ། །ན་མོ་བཛྲ་ཀྲོ་དྷཱ་ཡ་མ་ཧཱ་དཾཥྚ་ཨུཏྐ་ཊ་བྷཻ་ར་ཝ་ཡ་བཛྲ་སནྟོ་ཧ་དརྤཱ་ཡ་ཨ་མྲྀ་ཏེ་ཀུཎྚ་ལི་ཧཱུཾ་ཞེས་པ་ནི་མཐར་བྱེད་ཀྱི་སྔགས་ཏེ་ལས་ཐམས་ཅད་པའོ། །མཁའ་འགྲོ་ལྔ་པོ་འདི་རྣམས་ལས་གང་ཡང་རུང་བ་དཀྱིལ་འཁོར་གྱི་དབུས་སུ་བསྒོམ་པར་བྱ་སྟེ་རེ་རེ་ཞིང་ཡང་དཀྱིལ་འཁོར་སོ་སོའོ། །དེ་ཉིད་བཅོམ་ལྡན་འདས་ཀྱིས་གསུངས་ཏེ། གང་ཞིག་སངས་རྒྱས་མགོན་པོ་ཉིད། །དབུས་སུ་གྱུར་པའི་དཀྱིལ་འཁོར་ལ། །དེ་ཉིད་ཀྱིས་ནི་དཀྱིལ་འཁོར་གསུངས། །དཀྱིལ་འཁོར་སྙིང་པོ་ཡོངས་འཛིན་ཕྱིར། །དཀྱིལ་འཁོར་རེ་རེ་བསྒོམ་པའམ། །ཡང་བསྡུས་པ་ཡི་དཀྱིལ་འཁོར་རོ། །ཞེས་པས་སོ། །འཁོར་ལོས་སྒྱུར་བ་དྲུག་གི་དཀྱིལ་འཁོར་ནི་རྡོ་རྗེའི་ས་གཞི་ལ་སོགས་པ་ནས་རྩེབས་བཅུ་པའི་འཁོར་ལོའི་མཐར་ཐུག་པ་འཇམ་པའི་རྡོ་རྗེའི་དཀྱིལ་འཁོར་ཇི་ལྟ་བ་བཞིན་ཏེ། རྩིབས་བཅུ་པའི་འཁོར་ལོ་ལ་ཁྲོ་བོ་བཅུའོ། །གཞན་འཇིག་རྟེན་གསུམ་ལས་རྣམ་པར་རྒྱལ་བའི་ཁྲོ་བོའི་དཀྱིལ་འཁོར་ལས་བཤད་པའི་རྡོ་རྗེ་ས་འོག་གི་བར་ལྟ་བུའོ་ཞེས་པ་ནི་ཁྱད་པར་རོ། །འདིར་འཁོར་ལོ་རྩིབས་བཅུ་པའི་ལྟེ་བའི་ནང་ཆོས་ཀྱི་འབྱུང་གནས་ཀྱི་དབུས་སུ་རླུང་དང་
མེ་དང་ཆུ་དང་སའི་དཀྱིལ་འཁོར་དང་རི་རབ་ཀྱི་སྟེང་དུ་སྣ་ཚོགས་ཆུ་སྐྱེས་དང་རྡོ་རྗེའི་ལྟེ་བ་ལ་གཞལ་ཡས་ཁང་ཆེན་པོ་སྟེ། ཕྱོགས་གཞན་ལ་ནི་འདིར་ཆོས་འབྱུང་མེད་པའོ། །གཞལ་ཡས་ཁང་ཆེན་པོའི་ལྟེ་བར་གནས་པའི་གཞལ་ཡས་ཁང་གི་དབུས་སུ་གནས་པའི་སེང་གེའི་སྟེང་དུ་སྣ་ཚོགས་པདྨ་ལ་གནས་པའི་ཉི་མའི་དཀྱིལ་འཁོར་གྱི་དབུས་སུ་བཞུགས་པའི་རྡོ་རྗེ་སེམས་དཔའ་བསྒོམ་པར་བྱའོ་ཞེས་མངོན་པར་བརྗོད་པ་བླ་མ་ལས་གསུངས་པའི་ཕྱིར། ཉི་མ་ལ་གནས་པའི་འཇིགས་བྱེད་དང་དུས་མཚན་གྱི་སྟེང་དུ་རྡོ་རྗེའི་སྐྱིལ་ཀྲུང་གིས་བཞུགས་པའི་ཡེ་ཤེས་མཁའ་འགྲོ་སྟེ་རྡོ་རྗེ་སེམས་དཔའ་དཀར་པོའམ་ནག་པོ། །རྡོ་རྗེ་དང་རྡོ་རྗེ་དྲིལ་བུར་བཅས་པའི་གཡས་པ་དང་ཅིག་ཤོས་ཀྱི་ཕྱག་དག་གིས་ལྷ་མོ་ལ་འཁྱུད་པའོ། །དེ་ནི་རྡོ་རྗེ་དང་སྡིགས་མཛུབ་ཏུ་བཅས་པའི་ཕྱག་གཡས་བརྐྱང་ཞིང་ཕྱག་གཡོན་ཐོད་པ་ཁྲག་གིས་གང་བ་འཛིན་པས་འཁྱུད་པ། སྐུ་མདོག་དམར་མོ་ཡེ་ཤེས་མཁའ་འགྲོ་མ་སྟེ། མིང་གཞན་ཆོས་ཀྱི་དབྱིངས་ཀྱི་དབང་ཕྱུག་མ་དང༌། རྡོ་རྗེ་ཕག་མོ་ཞེས་པར་ཡང་གྲགས་སོ། །དེ་ནས་ཤར་ལ་སོགས་པའི་ཕྱོགས་རྣམས་སུ་གཡས་སྐོར་གྱིས་སངས་རྒྱས་མཁའ་འགྲོ་ལ་སོགས་པ་ལྔ་པོ་དགོད་པར་བྱ་སྟེ། དེ་དག་གི་འཁོར་ལོ་རྣམས་ནི་དཀྱིལ་འཁོར་སོ་སོའི་ཤར་ལ་སོགས་པའི་སྒོ་རྣམས་སུ་གཡོན་སྐོར་དང༌། མེ་ལ་སོགས་པའི་མཚམས་རྣམས་སུ་གཡས་སྐོར་གྱིས་སོ། །རྡོ་རྗེ་སེམས་དཔའི་མཚམས་རྣམས་སུ་རིམ་པ་ཇི་ལྟ་བར་མཁའ་འགྲོ་མ་དང་ལཱ་མ་དང་དུམ་སྐྱེས་མ་དང་གཟུགས་ཅན་མ་རྣམས་ནི། སྔོན་མོ་དང་སེར་མོ་དང་དམར་མོ་དང་ལྗང་གུ་རྣམས་ཏེ་གཡས་བརྐྱང་གིས་བཞུགས་པའོ། །སྒོ་རྣམས་སུ་ཐོད་པའི་དུམ་བུ་དང་ཀེང་རུས་ཆེན་པོ་དང་ཀེང་རུས་དང་མཆེ་བ་རྣམ་པར་གཙིགས་པ་རྣམས་ནི་ནག་པོ་སྟེ་རྡོ་རྗེ་དང་རྡོ་རྗེ་དྲིལ་བུར་བཅས་པའི་ཕྱག་དག་གིས་རབ་ཏུ་གཏུམ་མོ་དང༌། གཏུམ་པའི་མིག་ཅན་མ་དང་འོད་ལྡན་མ་དང་སྣ་ཆེན་མོ་ཐལ་བ་དཀར་པོའི་མདོག་ཅན་རྣམས་ལ་འཁྱུད་པའོ། །དེ་ནས་རྣམ་པར་སྣང་མཛད་ཀྱི་གཞལ་ཡས་ཁང་གི་དབུས་སུ་སེང་གེའི་སྟེང་དུ་སྣ་ཚོགས་ཆུ་སྐྱེས་དང་ཟླ་བ་ལ་གནས་པའི་ཚངས་པའི་སྙིང་གར་སྐྱིལ་ཀྲུང་གིས་བཞུགས་པའི་རྡོ་རྗེ་མཁའ་འགྲོ་དཀར་པོ་སྟེ་འཁོར་ལོ་དང་འཁོར་ལོས་
མཚན་པའི་དྲིལ་བུ་འཛིན་པའི་གཡས་པ་དང་གཡོན་པའི་ཕྱག་དག་གིས་སངས་རྒྱས་མཁའ་འགྲོ་མ་དཀར་མོ་ལ་འཁྱུད་པའོ། །སྒོ་རྣམས་ལ་ཆང་དགྲ་དང་འོད་དཔག་མེད་དང་རྡོ་རྗེའི་འོད་དང༌། རྡོ་རྗེའི་སྐུ་རྣམས་ནི་དཀར་པོ་སྟེ་འཁོར་ལོ་དང་འཁོར་ལོའི་དྲིལ་བུ་འཛིན་པའི་ཕྱག་དག་གིས་དཔའ་བོའི་བློ་ཅན་མ་དང་མིའུ་ཐུད་མ་དང་ལང་ཀའི་དབང་ཕྱུག་མ་དང་ཤིང་གྲིབ་མ་སེར་མོ་རྣམས་ལ་འཁྱུད་པའོ། །རིན་ཆེན་འབྱུང་ལྡན་གྱི་གཞལ་ཡས་ཁང་གི་དབུས་སུ་རྟའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་ལྷའི་བུ་ཉི་མའི་སྙིང་གར་རྡོ་རྗེའི་སྐྱིལ་ཀྲུང་གིས་བཞུགས་པའི་རིན་ཆེན་མཁའ་འགྲོ་སེར་མོ་སྟེ་རིན་པོ་ཆེ་དང་རིན་པོ་ཆེས་མཚན་པའི་དྲིལ་བུ་འཛིན་པའི་གཡས་པ་དང་གཡོན་པའི་ཕྱག་དག་གིས་རིན་ཆེན་མཁའ་འགྲོ་མ་སེར་མོ་ལ་འཁྱུད་པའོ། །སྒོ་རྣམས་ལ་མྱུ་གུ་ཅན་དང་རྡོ་རྗེ་རལ་པ་ཅན་དང་དཔའ་བོ་ཆེན་པོ་དང་རྡོ་རྗེ་ཧཱུཾ་མཛད་རྣམས་ནི་སེར་པོ་སྟེ་རིན་པོ་ཆེ་དང་རིན་པོ་ཆེའི་དྲིལ་བུ་འཛིན་པའི་ཕྱག་དག་གིས་ས་སྲུང་མ་དང་འཇིགས་བྱེད་ཆེན་མོ་དང་རླུང་ཤུགས་མ་དང་ཆང་འཐུང་མ་ལྗང་གུ་རྣམས་ལ་འཁྱུད་པའོ། །སྣང་བ་མཐའ་ཡས་ཀྱི་གཞལ་ཡས་ཁང་གི་དབུས་སུ་རྨ་བྱའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་དབང་ཕྱུག་ཆེན་པོའི་སྙིང་གར་རྡོ་རྗེའི་སྐྱིལ་ཀྲུང་གིས་བཞུགས་པའི་པདྨ་མཁའ་འགྲོ་དམར་པོ་སྟེ་པདྨ་དང་པདྨས་མཚན་པའི་དྲིལ་བུ་འཛིན་པའི་གཡས་པ་དང་གཡོན་པའི་ཕྱག་དག་གིས་པདྨ་མཁའ་འགྲོ་མ་དམར་མོ་ལ་འཁྱུད་པའོ། །སྒོ་རྣམས་ལ་ཤིན་ཏུ་བཟང་པོ་དང་རྡོ་རྗེ་བཟང་པོ་དང་འཇིགས་བྱེད་ཆེན་པོ་དང་མིག་མི་བཟང་རྣམས་ནི་སྐུ་མདོག་དམར་པོ་སྟེ་པདྨ་དང་པདྨའི་དྲིལ་བུ་འཛིན་པའི་ཕྱག་དག་གིས་སྔོ་བསངས་ལྷ་མོ་དང་ཤིན་ཏུ་བཟང་མོ་དང་རྟ་རྣ་བ་དང་བྱ་གདོང་མ་དཀར་མོ་རྣམས་ལ་འཁྱུད་པའོ། །མི་བསྐྱོད་པའི་གཞལ་ཡས་ཁང་གི་དབུས་སུ་གླང་པོ་ཆེའི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་ཁྱབ་འཇུག་གི་སྙིང་གར་རྡོ་རྗེའི་སྐྱིལ་ཀྲུང་གིས་བཞུགས་པའི་རྡོ་རྗེ་མཁའ་འགྲོ་ནག་པོ་སྟེ་རྡོ་རྗེ་དང་རྡོ་རྗེས་མཚན་པའི་དྲིལ་བུ་འཛིན་པའི་གཡས་པ་དང་གཡོན་པའི་ཕྱག་དག་གིས་རྡོ་རྗེ་མཁའ་འགྲོ་མ་ལ་འཁྱུད་པའོ། །དེ་ནི་དམར་མོའམ་ནག་མོའོ། །སྒོ་རྣམས་ལ་སྟོབས་པོ་ཆེ་དང་རིན་ཆེན་རྡོ་རྗེ་དང་ནམ་མཁའི་སྙིང་པོ་རྣམས་ནི་ནག་པོ་སྟེ་རྡོ་རྗེ་དང་རྡོ་རྗེ་དྲིལ་བུ་འཛིན་པའི་ཕྱག་དག་གིས་
འཁོར་ལོའི་ཤུགས་ཅན་མ་དང་དུམ་སྐྱེས་མ་དང་ཆང་འཚོང་མ་དང་འཁོར་ལོའི་གོ་ཆ་མ་རྣམས་སེར་མོ་ལ་འཁྱུད་པའོ། །དོན་ཡོད་གྲུབ་པའི་གཞལ་ཡས་ཁང་གི་དབུས་སུ་ནམ་མཁའ་ལྡིང་གི་སྟེང་དུ་སྣ་ཚོགས་ཆུ་སྐྱེས་དང་ཉི་མ་ལ་གནས་པའི་ལྷའི་བུ་ཟླ་བའི་སྙིང་གར་རྡོ་རྗེའི་སྐྱིལ་ཀྲུང་གིས་བཞུགས་པའི་སྣ་ཚོགས་མཁའ་འགྲོ་ལྗང་གུ་སྟེ་སྣ་ཚོགས་རྡོ་རྗེས་མཚན་པའི་དྲིལ་བུ་འཛིན་པའི་གཡས་པ་དང་གཡོན་པའི་ཕྱག་དག་གིས་སྣ་ཚོགས་མཁའ་འགྲོ་མ་ལྗང་གུ་ལ་འཁྱུད་པའོ། །སྒོ་རྣམས་ལ་དཔལ་ཧེ་རུ་ཀ་དང་པདྨ་གར་གྱི་དབང་ཕྱུག་དང་རྣམ་པར་སྣང་མཛད་དང་རྡོ་རྗེ་སེམས་དཔའ་རྣམས་ལྗང་གུ་སྟེ་སྣ་ཚོགས་རྡོ་རྗེ་དང་སྣ་ཚོགས་རྡོ་རྗེའི་དྲིལ་བུ་འཛིན་པའི་ཕྱག་དག་གིས་ཤིན་ཏུ་དཔའ་མོ་དང་སྟོབས་ཆེན་མོ་དང་འཁོར་ལོས་སྒྱུར་མ་དང་བརྩོན་འགྲུས་ཆེན་མོ་དུ་བ་ལྟར་སྔོ་སྐྱའི་མདོག་ཅན་རྣམས་ལ་འཁྱུད་པའོ། །དཔའ་བོ་ཉི་ཤུ་རྩ་བཞི་ནི་གཡས་བརྐྱང་གིས་བཞུགས་པའོ། །འདིར་མཁའ་འགྲོ་མ་ལ་སོགས་པ་ནི་གཡོན་པས་ཐོད་པ་དང་ཁ་ཊྭཱཾ་ག་དང་གཡས་པས་ཌ་མ་རུ་འཛིན་པའོ། །ཡེ་ཤེས་མཁའ་འགྲོ་མ་དང་རབ་ཏུ་གཏུམ་མོ་ལ་སོགས་པ་བཞི་ནི་ཕྱག་གཡས་པས་རྡོ་རྗེ་དང་བཅས་པའི་སྡིགས་མཛུབ་གདེངས་པའོ། །སངས་རྒྱས་མཁའ་འགྲོ་མ་དང་དཔའ་བོའི་བློ་ཅན་མ་ལ་སོགས་པ་རྣམས་ནི་འཁོར་ལོ་དང་བཅས་པའི་སྡིགས་མཛུབ་ཅན་ནོ། །རིན་ཆེན་མཁའ་འགྲོ་མ་དང་ས་སྲུང་མ་ལ་སོགས་པ་རྣམས་ནི་རིན་པོ་ཆེ་དང་བཅས་པའི་སྡིགས་མཛུབ་པོ། །པདྨའི་མཁའ་འགྲོ་མ་དང་བསྔོ་བསངས་ལྷ་མོ་ལ་སོགས་པ་རྣམས་ནི་པདྨ་དང་བཅས་པའི་སྡིགས་མཛུབ་པོ། །རྡོ་རྗེ་མཁའ་འགྲོ་དང་འཁོར་ལོའི་ཤུགས་ཅན་མ་ལ་སོགས་པ་ནི་རྡོ་རྗེ་དང་བཅས་པའི་སྡིགས་མཛུབ་བོ། །སྣ་ཚོགས་མཁའ་འགྲོ་མ་དང་ཤིན་ཏུ་དཔའ་མོ་ལ་སོགས་པ་རྣམས་ནི་སྣ་ཚོགས་རྡོ་རྗེ་དང་བཅས་པའི་སྡིགས་མཛུབ་བོ། །ཡེ་ཤེས་མཁའ་འགྲོ་མ་ལ་སོགས་པ་ཐམས་ཅད་ཀྱང་འཁྱུད་པར་བྱེད་པ་གཡོན་པའི་ཕྱག་དག་གིས་འཛག་པའི་ཁྲག་གིས་གང་བའི་ཐོད་པ་འཛིན་པའོ། །དཀྱིལ་འཁོར་ཆེན་པོའི་སྒོ་རྣམས་ལ་ཁྭ་གདོང་མ་དང་འུག་གདོང་མ་དད་ཀྱི་གདོང་མ་དང་ཕག་གདོང་མ་རྣམས་ནི་མིང་དང་རྗེས་སུ་མཐུན་པའི་ཞལ་ཅན་ཏེ་རིམ་པ་ཇི་ལྟ་བར་སྔོན་མོ་དང་སེར་མོ་དང་དམར་མོ་དང་ལྗང་གུའི་མདོག་ཅན། ཕྱག་གཡས་
པ་རྣམས་ཀྱིས་ལྕགས་ཀྱུ་དང་ཞགས་པ་དང་ལྕགས་སྒྲོག་དང་དྲིལ་བུ་འཛིན་པའོ། །མཚམས་རྣམས་ལ་གཤིན་རྗེ་བརྟན་མ་དང་ཤིན་རྗེ་ཕོ་ཉ་མོ་དང་གཤིན་རྗེ་མཆེ་བ་མ་དང་གཤིན་རྗེ་འཇོམས་མ་རྣམས་ནི་མིའི་གདོང་ཅན་ཏེ། གཡས་དང་གཡོན་གྱི་སྐུ་ཕྱེད་ཕྱེད་གཡས་དང་གཡོན་གྱི་ལྷ་མོའི་མདོག་ཅན། ཕྱག་གཡས་པ་རྣམས་ཀྱིས་མེ་ལོང་དང་པི་ཝང་དང་དྲིའི་དུང་ཆོས་དང་རོའི་སྣོད་འཛིན་པའོ། །ལྷ་མོ་བརྒྱད་པོ་འདི་དག་ཀྱང་གཡོན་པས་ཐོད་པ་དང་ཁ་ཊྭཱཾ་ག་འཛིན་པ་གཡས་བརྐྱང་གིས་གནས་པའོ། །གཞལ་ཡས་ཁང་དྲུག་པོ་རྣམས་ཀྱི་མཚམས་རྣམས་སུ་བྱང་ཆུབ་ཀྱི་སེམས་ལ་སོགས་པས་གང་བའི་ཐོད་པ་རྣམས་ནི་སྣ་ཚོགས་ཆུ་སྐྱེས་ལ་གནས་པའོ། །མཁའ་འགྲོ་མ་ལ་སོགས་པ་ནས་གཤིན་རྗེ་འཇོམས་མའི་མཐར་ཐུག་པ་རྣམས་ནི་སྣ་ཚོགས་པདྨ་དང་ཉི་མ་ལ་གནས་པའི་རོ་རྣམས་ལ་བཞུགས་པའོ། །འཁོར་ལོས་སྒྱུར་བ་རྣམས་ཀྱང་རོ་ལ་གནས་པའོ་ཞེས་པ་ནི་ཕྱོགས་གཞན་ནོ། །ལྷ་ཕོ་རྣམས་ནི་སྐུ་རྒྱབ་ཏུ་འཕྱང་བའི་སྟག་གི་པགས་པའི་ཤམ་ཐབས་དཀྲིས་པ། མཆོད་ཕྱིར་ཐོགས་པ་ཅན་མི་མགོ་རློན་པའི་ཕྲེང་བ་མགྲིན་པ་ལ་འཕྱང་བ། རལ་པ་ནག་པོའི་ཐོར་ཅོག་ཅན་ནོ། །ལྷ་མོ་རྣམས་ནི་གཅེར་བུ་དབུ་སྐྲ་ནག་པོ་གྲོལ་ཞིང་མི་མགོ་སྐམ་པོའི་ཕྲེང་བ་མགྲིན་པར་འཕྱང་བའོ། །ལྷ་མོ་བཞི་བཅུ་རྩ་གཉིས་པོ་རྣམས་ཀྱང་ཞལ་གཅིག་མ་ཕྱག་གཉིས་མ་སྤྱན་གསུམ་པ་རྡོ་རྗེ་ཕྲེང་བས་མཚན་པའི་དཔྲལ་བའི་དབྱེས་ནས་ཐོད་པ་ལྔས་བརྒྱན་པ། དཔུང་རྒྱན་དང་གཡེར་ཁ་ལ་སོགས་པས་མངོན་པར་བརྒྱན་པ། ཕྱག་རྒྱ་ལྔ་དང་ལྡན་པའོ། །འཁོར་ལོས་སྒྱུར་བ་དྲུག་ནི་མཆོག་གི་ཕྱག་རྒྱ་དྲུག་དང་ལྡན་པ། ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པ་ནག་པའི་ཐོར་ཅོག་ཅན་ནོ། །ལྷ་མོ་སུམ་ཅུ་རྩ་བཞི་པོ་རྣམས་ནི་རང་རང་གི་འཁོར་ལོའི་དབང་པོ་ལ་མངོན་པར་ཕྱོགས་པའོ། །འཁོར་ལོས་སྒྱུར་བ་ལྔ་དང་ཁྭ་གདོང་མ་ལ་སོགས་པ་རྣམས་ནི་དབུས་ཀྱི་འཁོར་ལོའི་དབང་པོ་ལ་མངོན་པར་ཕྱོགས་པའོ། །དཔའ་བོ་རྣམས་ནི་རང་རང་གི་ཤེས་རབ་མ་ལ་མངོན་པར་ཕྱོགས་བའོ། །དེ་ལྟར་འདི་ནི་ཕྱོགས་གཅིག་གོ །འཁོར་ལོས་སྒྱུར་བ་དྲུག་པོ་འདི་དག་ཀྱང་གཡས་བརྐྱང་གི་ཞབས་ཅན་ནོ་ཞེས་པའི་ཁྱད་པར་ནི་ཕྱོགས་གཉིས་
པའོ། །ཕྱོགས་གཉིས་པོ་འདི་དག་ལ་ཡང་ཡེ་ཤེས་མཁའ་འགྲོ་དང་སངས་རྒྱས་མཁའ་འགྲོ་དང་དེ་དག་གི་འཁོར་རྣམས་ཀྱང་སེང་གེའི་སྟེང་དུ་གནས་པ་དང༌། རིན་ཆེན་མཁའ་འགྲོ་དང་དེའི་འཁོར་རྣམས་ཀྱང་རྟའི་སྟེང་དུ་གནས་པ་དང༌། པདྨ་མཁའ་འགྲོ་དང་དེའི་འཁོར་རྣམས་ཀྱང་རྨ་བྱའི་སྟེང་དུ་གནས་པ་དང༌། རྡོ་རྗེ་མཁའ་འགྲོ་དང་དེའི་འཁོར་རྣམས་ཀྱང་གླང་པོ་ཆེའི་སྟེང་དུ་གནས་པ་དང༌། སྣ་ཚོགས་མཁའ་འགྲོ་དང་དེའི་འཁོར་རྣམས་ཀྱང་ནམ་མཁའི་ལྡིང་གི་སྟེང་དུ་གནས་པའོ། །ཡེ་ཤེས་མཁའ་འགྲོ་ལ་སོགས་པ་འདི་དག་ནི་རྡོ་རྗེའི་སྐྱིལ་ཀྲུང་ཅན་ནོ། །ཁྭ་གདོང་མ་ལ་སོགས་པ་བརྒྱད་པོ་འདི་དག་ཕྱོགས་སྐྱོང་བ་བརྒྱད་པོ་རྣམས་ལ་གཡས་བརྐྱང་གིས་གནས་པའོ་ཞེས་པ་ནི་ཕྱོགས་གསུམ་པའོ། །ཕྱོགས་འདི་རྣམས་དང་ཕྱོགས་གཞན་ལ་ཡང་ཡེ་ཤེས་མཁའ་འགྲོ་ལ་སོགས་པ་རྣམས་ནི་ཞལ་གཅིག་ཕྱག་གཉིས་མ་ཉིད་ལ་སོགས་པ་དང༌། ཞལ་གསུམ་ཕྱག་དྲུག་མ་ཉིད་ལ་སོགས་པ་དང༌། ཞལ་ལྔ་ཕྱག་བརྒྱད་མ་ཉིད་ལ་སོགས་པ་དང༌། ཞལ་བཞི་ཕྱག་བཅུ་གཉིས་མ་ཉིད་ལ་སོགས་པ་དང༌། ཞལ་བརྒྱད་ཕྱག་བཅུ་དྲུག་མ་ཉིད་ལ་སོགས་པ་ཡང་བཅོམ་ལྡན་འདས་ཀྱིས་རབ་ཏུ་སྤྲོས་ནས་གསུངས་མོད། གཞུང་རྣམ་པར་རྒྱས་པས་འཇིགས་ནས་འདིར་མ་བསྟན་ནོ། །རིགས་ཀྱི་བདག་པོ་ནི་འཁོར་ལོས་སྒྱུར་བ་དྲུག་པོ་རྣམས་རང་རང་གི་དཀྱིལ་འཁོར་པ་རྣམས་ཀྱི་སྟེ། རྡོ་རྗེ་མཁའ་འགྲོ་ནི་འཁོར་ལོས་སྒྱུར་བ་ལྔའིའོ། །དེའི་ནི་ཡེ་ཤེས་མཁའ་འགྲོའོ། །ཁྭ་གདོང་མ་ལ་སོགས་པ་རྣམས་ཀྱི་ནི་སྣ་ཚོགས་མཁའ་འགྲོ་སྟེ། ཡེ་ཤེས་མཁའ་འགྲོའོ་ཞེས་པ་ནི་ཁ་གཅིག་གིའོ། །ཐུགས་ཀའི་ས་བོན་རྣམས་ནི་ཡེ་ཤེས་མཁའ་འགྲོ་ལ་སོགས་པ་རྣམས་ཀྱི་རིམ་པ་ཇི་ལྟ་བར་བཾ་བྷྲཱུཾ་ཨཱཾ་ཧྲཱིཾ་ཁཾ་ངོ༌། །སྙིང་པོའི་སྔགས་རྣམས་ནི་ཨོཾ་ཤྲཱི་མ་ཧཱ་སུ་ཁ་བཛྲ་སཏྭཱ་ཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཨཱ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བུདྡྷ་ཌཱ་ཀ་ཨ་ལ་ལ་ལ་བྷྲཱུཾ་ཨཱཿཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་རཏྣ་ཌཱ་ཀ་ཏྲཾ་ཨཿཧཱུཾ་ཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་པདྨ་ཌཱ་ཀ་ཧྲཱིཿཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བཛྲ་ཌཱ་ཀ་ཨཱཿཧཱུཾ་ཕཊ་ཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཕཊ་སྭཱ་ཧཱ། ཨོཾ་ཤྲཱི་བི་ཤྭ་ཌཱ་ཀ་ཧོཿ་ཁཾ་ཨཱཿ་ཧཱུཾ་ཌཱ་ཀི་ནཱི་ཛཱ་ལ་སམྦ་རཾ་ཧཱུཾ་ཕཊ་སྭཱ་ཧཱ། ཞེས་པའོ། །ཨོཾ་ཁཾ་ཧཱུཾ་ཕཊ། ཅེས་པ་ནི་དུམ་སྐྱེས་མའི་སྟེ་
ལས་ཐམས་ཅད་པའི་སྔགས་སོ། །དཔལ་དུས་ཀྱི་འཁོར་ལོ་ལ་ནི་རྡོ་རྗེ་གུར་གྱི་ནང་དུ་སྲུང་བའི་འཁོར་ལོ་རྩིབས་བཅུ་པའོ། །དེའི་ཤར་དང་ལྷོ་དང་ནུབ་དང་བྱང་གི་རྩིབས་རྣམས་ལ་ཤིན་ཏུ་སྟོབས་དང་རྨུགས་བྱེད་དང༌། རེངས་བྱེད་དང་ཁེངས་བྱེད་རྣམས་ནི་མིང་གཞན་ནི་བགེགས་མཐར་བྱེད་དང་ཤེས་རབ་མཐར་བྱེད་དང་གཤིན་རྗེ་མཐར་བྱེད་དང་པདྨ་མཐར་བྱེད་རྣམས་སོ། །མེ་ལ་སོགས་པའི་རྩིབས་རྣམས་ལ། དབྱུག་སྔོན་ཅན་དང་འདོད་པའི་རྒྱལ་པོ་དང་སྟོབས་པོ་ཆེ་དང་མི་གཡོ་བ་རྣམས་སོ། །སྟེང་གི་རྩིབས་ལ་གཙུག་ཏོར་འཁོར་ལོས་སྒྱུར་བ་སྟེ་འོག་གི་རྩིབས་ལ་གནོད་མཛེས་རྒྱལ་པོའོ། །དེ་སྐད་དུའང་བསྡུས་པའི་རྒྱུད་ལས། སླར་ཡང་འཁོར་ལོའི་རྩིབས་བཅུ་ལ་ནི་ཕྱོགས་དང་ཕྱོགས་བྲལ་དུ་གནས་ཁྲོ་བོའི་ཚོགས་ནི་བསྒོམ་པར་བྱ། །ཞེས་པ་དང་དྲི་མ་མེད་པའི་འོད་ལས་སྲུང་བའི་འཁོར་ལོ་ཁྲོ་བོ་ལ་སོགས་པ་སྤྲོ་བར་བྱ་སྟེ་དཀྱིལ་འཁོར་གྱི་ས་གཞི་བསྲུང་བའི་དོན་དུའོ་ཞེས་གསུངས་སོ། །ཁྲོ་བོ་འདི་རྣམས་ནི་འཆད་པར་འགྱུར་བའི་གཟུགས་ཅན་ནོ། །སྲུང་བའི་འཁོར་ལོའི་ལྟེ་བའི་ནང་དུ་ཆོས་ཀྱི་འབྱུང་གནས་ཏེ། གང་ཡང་དྲི་མ་མེད་པའི་འོད་ལས་ཕྱི་རོལ་དུ་སྐྱེ་བའི་མཚན་མ་ནི་ནམ་མཁའི་ཁམས་མཐའ་ཡས་པ་སྟེ་ནང་དུ་ནི་ཤེས་རབ་ཀྱི་ཆོས་འབྱུང་ཟུར་གསུམ་པའོ་ཞེས་གསུངས་པས། ཕྱི་རོལ་གྱི་ནམ་མཁའི་ཁམས་ཉིད་དཀྱིལ་འཁོར་ལ་ཆོས་ཀྱི་འབྱུང་གནས་ཀྱི་གཟུགས་སུ་བསྒོམ་བར་བྱའོ། །ཆོས་འབྱུང་གི་དབུས་སུ་རླུང་དང་མེ་དང་ཆུ་དང་སའི་དཀྱིལ་འཁོར་ལ་གནས་པའི་རི་རབ་དང་སྣ་ཚོགས་ཆུ་སྐྱེས་དང་ཟླ་བ་དང་ཉི་མ་དང་ཐིག་ལེ་ནག་པོའི་གཟུགས་ཅན་སྒྲ་གཅན་གྱི་དཀྱིལ་འཁོར་གྱི་སྟེང་དུ་གནས་ཤིང༌། ཕྱི་རོལ་ནས་རྡོ་རྗེའི་འོད་ཟེར་དང་ནམ་མཁའ་དང་རླུང་དང་མེ་དང་ཆུ་དང་སའི་ཁོར་ཡུག་གིས་ཡོངས་སུ་བསྐོར་བའི་གཞལ་ཡས་ཁང་ཆེན་པོའོ། །ཡང་ན་སྲུང་བའི་འཁོར་ལོ་ནི་བགེགས་ཉེ་བར་ཞི་བ་ཙམ་གྱི་དགོས་པའོ་ཞེས་པས་བགེགས་བཅོམ་པའི་རྗེས་ནས་མ་བསམས་ཤིང༌། ཆོས་འབྱུང་ཡང་མ་བསྒོམས་པར་སྲུང་བའི་གུར་གྱི་ནང་དུ་ནམ་མཁའ་ལ་རླུང་ལ་སོགས་པའི་དཀྱིལ་འཁོར་དང་སྒྲ་གཅན་གྱི་དཀྱིལ་འཁོར་གྱི་མཐར་ཐུག་བའི་སྟེང་དུ་གནས་ཤིང་ཕྱི་རོལ་ནས་འོད་ཟེར་ལ་སོགས་པའི་ཁོར་ཡུག་རྣམས་ཀྱིས་
ཡོངས་སུ་བསྐོར་བའི་གཞལ་ཡས་ཁང་ཆེན་པོའོ། །དེའི་ཕྱེད་དུ་གསུང་གི་འཁོར་ལོ་དང༌། དེའི་ཕྱེད་དུ་ཐུགས་ཀྱི་འཁོར་ལོ་དང༌། དེའི་ཕྱེད་དུ་བདེ་བ་ཆེན་པོའི་འཁོར་ལོ་དང༌། དེའི་ཕྱེད་དུ་བཅོམ་ལྡན་འདས་ཀྱི་པདྨ་ལྗང་གུ་སྟེ། པདྨའི་སུམ་ཆ་ནི་ལྟེ་བའོ། །དེའི་སྟེང་ནས་སྟེང་དུ་གནས་པའི་ཟླ་བ་དང་ཉི་མ་ལ་སྒྲ་གཅན་དང་དུས་མེའི་དཀྱིལ་འཁོར་གྱི་སྟེང་དུ་ཡན་ལག་མེད་པ་དང་དྲག་པོ་གན་རྐྱལ་དུ་བསྒྱེལ་བའི་སྙིང་གར་གཡས་བརྐྱང་གི་གར་གྱིས་བཞུགས་པའི་བཅོམ་ལྡན་འདས་དུས་ཀྱི་འཁོར་ལོ་སྟེ། སྐུ་མདོག་ནག་པོ་ནོར་བུ་དང་ཟླ་བ་ཕྱེད་པ་དང་སྣ་ཚོགས་རྡོ་རྗེས་མཚན་པའི་རལ་པའི་ཐོར་ཅོག་ཅན། རྡོ་རྗེའི་ནོར་བུ་དང་རྡོ་རྗེའི་རྣ་ཆ་དང་རྡོ་རྗེའི་མགུལ་རྒྱན་དང༌། རྡོ་རྗེའི་ལག་གདུབ་དང༌། རྡོ་རྗེའི་སྐ་རགས་དང༌། རྡོ་རྗེའི་རྐང་གདུབ་དང༌། རྡོ་རྗེའི་དར་དཔྱངས་དང༌། རྡོ་རྗེའི་ཕྲེང་བ་དང༌། སྟག་གི་པགས་པ་འཕྱང་བའི་ཤམ་ཐབས་ཅན། ཞལ་བཞི་པ་སྤྱན་བཅུ་གཉིས་པའོ། །དེ་ཡང་རྩ་བའི་ཞལ་ནག་པོ་མཆེ་བ་གཙིགས་པ་དྲག་པོ། གཡས་པ་དམར་པོ་ཆགས་པ་དང་བཅས་པ། རྒྱབ་མ་སེར་པོ་ཏིང་ངེ་འཛིན་ལ་གནས་པ། གཡོན་པ་དཀར་པོ་ཞི་བའོ། །དབུས་དང་གཡས་དང་གཡོན་གྱི་མགྲིན་པ་གསུམ་ནི་སྔོན་པོ་དང་དམར་པོ་དང་དཀར་པོ་སྟེ་བཅོམ་ལྡན་འདས་ནི་མགྲིན་པ་གསུམ་པའོ། །གཡས་པའི་ཕྲག་པ་དང་པོ་སྔོན་པོ་དང་གཉིས་པ་དམར་པོ་དང་གསུམ་པ་དཀར་པོ་སྟེ། དེ་བཞིན་དུ་གཡོན་པའི་ཡང་སྔོན་པོ་དང་དམར་པོ་དང་དཀར་པོའོ། །དེ་ལྟར་ན་ཕྲག་པ་དྲུག་དང༌། དཔུང་པ་བཅུ་གཉིས་དང་ཉེ་བའི་དཔུང་པ་ནས་བརྩམས་ཏེ་ཕྱག་དར་ཉི་ཤུ་རྩ་བཞིའོ། །དེ་ལ་གཡས་ཀྱི་དཔུང་པ་གཉིས་སྔོན་པོ་དང་གཉིས་དམར་པོ་དང་གཉིས་དཀར་པོའོ། །དེ་བཞིན་དུ་གཡོན་གྱིའང་ངོ༌། །དེ་བཞིན་དུ་ཕྱག་བཞི་བཞི་ནག་པོ་དང༌། བཞི་བཞི་དམར་པོ་དང༌། བཞི་བཞི་དཀར་པོ་སྟེ། གཡས་པ་དང་གཡོན་པ་རྣམས་ཀྱིའོ། །ཕྱག་རེ་རེ་འང་སོར་མོ་ལྔ་པ་སྟེ། དེ་དག་རེ་རེ་ཞིང་ཡང་ཚིགས་གསུམ་པའོ། །དེའང་མཐེ་བོང་སེར་པོ་དང་མཛུབ་མོ་དཀར་པོ་དང་གུང་མོ་དམར་པོ་དང་མིང་མེད་ནག་པོ་དང་མཐེ་ཆུང་ལྗང་གུ་སྟེ། ཕྱག་གི་མཐིལ་ནས་སོར་མོ་ཐམས་ཅད་ཀྱི་ཚིགས་ཀྱི་ཕྲེང་བ་དང་པོ་ནག་པོ་གཉིས་པ་དམར་པོ། གསུམ་པ་དཀར་པོའོ། །
དེ་རྣམས་ཀྱང་སོར་གདུབ་རྣམས་ཀྱི་འོད་དང་ལྡན་པའོ། །གཡས་པའི་ཕྱག་རྣམས་ཀྱི་ནག་པོ་རྣམས་ན་རྡོ་རྗེ་དང་རལ་གྲི་དང་རྩེ་གསུམ་དང་གྲི་གུག་དང༌། དམར་པོ་རྣམས་ན་མེའི་མདའ་དང་རྡོ་རྗེའི་ལྕགས་ཀྱུ་དང༌། ཌ་མ་རུ་དང༌། ཐོ་བ་དང༌། དཀར་པོ་རྣམས་ན་འཁོར་ལོ་དང༌། མདུང་དང་དབྱུག་པ་དང་དགྲ་སྟ་རྣམས་སོ། །གཡོན་པའི་ནག་པོ་རྣམས་ན་དྲིལ་བུ་དང༌། ཕུབ་དང༌། ཁ་ཊྭཱཾ་ག་དབྱེ་བ་དང༌། ཁྲག་གིས་གང་བའི་ཐོད་པ་དང༌། དམར་པོ་རྣམས་ན་གཞུ་དང༌། ཞགས་པ་དང༌། ནོར་བུ་དང༌། རིན་པོ་ཆེ་དང༌། པདྨ་དམར་པོ་དང༌། དཀར་པོ་རྣམས་ན་དུང་དང༌། མེ་ལོང་དང༌། རྡོ་རྗེ་ལྕགས་སྒྲོག་དང༌། ཚངས་པའི་མགོ་བོ་རྣམས་སོ། །བརླ་ནས་བརྩམས་ནས་དམར་པོའི་མདོག་ཅན་གྱི་ཞབས་གཡས་པའི་མཐིལ་དམར་པོས་འདོད་པའི་ལྷ་དམར་པོ་གདོང་གཅིག་པ་ལག་པ་བཞིས་མེ་ཏོག་གི་མདའ་ལྔ་དང༌། གཞུ་དང༌། ཞགས་པ་དང༌། ལྕགས་ཀྱུ་འཛིན་པའི་སྙིང་གར་མནན་ཅིང༌། བརླ་ནས་བརྩམས་ནས་དཀར་པོའི་ཞབས་གཡོན་པའི་མཐིལ་གྱིས་དྲག་པོ་དཀར་པོ་གདོང་གཅིག་པ་མིག་གསུམ་པ་ལག་པ་བཞིས་རྩེ་གསུམ་དང༌། ཌ་མ་རུ་དང༌། ཐོད་པ་དང༌། ཁ་ཊྭཱཾ་ག་འཛིན་པའི་སྙིང་གར་མནན་པའོ། །འདོད་ལྷའི་གཞོགས་སུ་དགའ་མ་དང་དབང་ཕྱུག་ཆེན་པོའི་གཞོགས་སུ་དཀར་མོ་སྟེ་ལྷ་མོ་འདི་དག་ནི་དམན་པའི་བཞིན་དང་ལྡན་པས་བཅོམ་ལྡན་འདས་ཀྱི་ཞབས་ལ་འཇུས་པའོ། །བཅོམ་ལྡན་འདས་ཀྱིས་འཁྱུད་པའི་སྣ་ཚོགས་ཡུམ་ནི་གཡོན་བརྐྱང་གིས་གནས་པ་གསེར་གྱི་མདོག་ཅན་ཕྱག་གཡས་པ་རྣམས་ཀྱིས་གྲི་གུག་དང་ལྕགས་ཀྱུ་དང་ཌ་མ་རུ་དང༌། བགྲང་ཕྲེང་རྣམས་དང༌། གཡོན་པ་རྣམས་ཀྱིས་ཐོད་པ་དང་ཞགས་པ་དང་པདྨ་དཀར་པོ་དང་རིན་པོ་ཆེ་རྣམས་འཛིན་པའོ། །འདབ་མ་རྣམས་ལ་ཤར་དུ་ནག་མོ་འབར་མ་ནག་མོ་ཕྱག་གཡས་པ་རྣམས་ཀྱིས་བདུག་སྤོས་ཀྱི་སྣོད་དང་ཙནྡན་གྱི་སྣོད་དང་གུར་གུམ་གྱི་སྣོད་དང་གླ་རྩི་དང་བཅས་པའི་ག་བུར་གྱི་སྣོད་དང༌། གཡོན་བ་རྣམས་ཀྱིས་དྲིལ་བུ་དང་པདྨ་དང་ལྷའི་ལྗོན་པའི་མེ་ཏོག་དང་སྣ་ཚོགས་པའི་མེ་ཏོག་གི་ཕྲེང་བ་འཛིན་པའོ། །ལྷོར་དམར་མོ་འབར་མ་དམར་མོ་གཡས་པ་རྣམས་ཀྱིས་མར་མེ་དང་དོ་ཤལ་དང་ཅོད་པན་དང་ལག་གདུབ་དང༌། གཡོན་པ་
རྣམས་ཀྱིས་གོས་དང་སྐ་རགས་དང་རིན་པོ་ཆེའི་རྣ་རྒྱན་དང་རྐང་གདུབ་འཛིན་པའོ། །ནུབ་ཏུ་སེར་མོ་འབར་མ་སེར་མོ་གཡས་པ་རྣམས་ཀྱིས་དུང་དང་གླིང་བུ་དང་ནོར་བུ་དང་ཌ་མ་རུ་དང༌། གཡོན་པ་རྣམས་ཀྱིས་པི་ཝང་དང་རྔ་ཟླུམ་དང་འཁར་རྔ་དང་ཟངས་དུང་འཛིན་པའོ། །བྱང་དུ་དཀར་མོ་འབར་མ་དཀར་མོ་གཡས་པ་རྣམས་ཀྱིས་འོ་མའི་སྣོད་དང་ཆུའི་སྣོད་དང་ལྷའི་སྨན་དང་ཆང་གི་སྣོད་དང༌། གཡོན་པ་རྣམས་ཀྱིས་བདུད་རྩེའི་སྣོད་དང་གྲུབ་པའི་བཅུད་ཀྱི་སྣོད་དང་བདུད་རྩིའི་འབྲས་བུ་དང་བཟའ་བའི་སྣོད་འཛིན་པའོ། །མེ་ལ་སོགས་པ་རྣམས་སུ་དུ་བ་མ་དང་སྨིག་རྒྱུ་མ་དང་མར་མེ་མ་དང་མཁའ་སྣང་མའི་ལྷ་མོ་རྣམས་ཏེ། རིམ་པ་ཇི་ལྟ་བར་ནག་མོ་དང་དམར་མོ་དང་སེར་མོ་དང་དཀར་མོའི་མདོག་ཅན་ཕྱག་བརྒྱད་ཀྱིས་རང་རང་གི་མདོག་ཅན་གྱི་རྔ་ཡབ་བརྒྱད་འཛིན་པའོ། །དེ་དག་གི་རྒྱབ་ཀྱི་ཕྱི་རོལ་དུ་ཡིད་བཞིན་གྱི་ནོར་བུ་དང་ཆོས་ཀྱི་གཎྜི་དང༌། དཔག་བསམ་གྱི་ཤིང་དང་ཆོས་ཀྱི་དུད་རྣམས་ཏེ་ནག་པོ་དང་དམར་པོ་དང་སེར་པོ་དང་དཀར་པོའོ། །ནག་མོ་འབར་མ་ལ་སོགས་པ་བརྒྱད་ནི་མཉམ་པའི་རྐང་སྟབས་ཀྱི་གནས་པའོ། །སྣ་ཚོགས་ཡུམ་ལ་སོགས་པའི་ལྷ་མོ་ཐམས་ཅད་ཕྱག་རྒྱ་ལྔ་དང་ལྡན་པ། ཕྱག་བརྒྱད་མ་ཞལ་བཞི་མ་སྤྱན་བཅུ་གཉིས་མའོ། །དེ་ཡང་ཤར་ལྷོ་དང་ནུབ་བྱང་གི་རིམ་པས་སྣ་ཚོགས་ཡུམ་གྱི་ཞལ་རྣམས་ནི་སེར་པོ་དང་དཀར་པོ་དང་སྔོན་པོ་དང་དམར་པོ་སྟེ། དེ་བཞིན་དུ་ལྷ་མོ་སེར་མོ་དག་གིའང་ངོ༌། །ནག་མོ་དག་གི་ནི་ནག་པོ་དང་དམར་པོ་དང་སེར་པོ་དང་དཀར་པོའོ། །དམར་མོ་དག་གི་ནི་དམར་པོ་དང་སེར་པོ་དང་དཀར་པོ་དང་སྔོན་པོའོ། །དཀར་མོ་དག་གི་ནི་དཀར་པོ་དང་ནག་པོ་དང་དམར་པོ་དང་སེར་པོའོ། །རིམ་པ་གཉིས་པ་དང་གསུམ་པ་དག་གི་ལྷ་མོ་རྣམས་ནི་ཞལ་གསུམ་པ་སྤྱན་དགུ་པ་ཕྱག་དྲུག་པ་རྣམས་སོ། །དེ་ཡང་ཕྱོགས་རྣམས་ལ་ཤར་དུ་དོན་ཡོད་གྲུབ་པ་ནག་པོ་ནག་པོ་དང་དམར་པོ་དང་དཀར་པོའི་ཞལ་ཅན། གཡས་པ་རྣམས་ཀྱིས་རལ་གྲི་དང་གྲི་གུག་དང་རྩེ་གསུམ་དང་གཡོན་པ་རྣམས་ཀྱིས་ཕུབ་དང་ཐོད་པ་དང་ཁ་ཊྭཱཾ་ག་འཛིན་པ་སྤྱན་མས་འཁྱུད་པའོ། །ལྷོར་རིན་ཆེན་འབྱུང་ལྡན་དམར་པོ་དམར་པོ་དང་དཀར་པོ་དང་ནག་པོའི་ཞལ་ཅན། གཡས་པ་རྣམས་ཀྱིས་མེའི་མདའ་དང་ལྕགས་ཀྱུ་དང་ཌ་མ་རུ་དང༌། གཡོན་
པ་རྣམས་ཀྱིས་གཞུ་དང་ཞགས་པ་དང་རིན་པོ་ཆེ་ཆ་དགུ་པ་འཛིན་པ་མཱ་མ་ཀཱི་ས་འཁྱུད་པའོ། །ནུབ་ཏུ་རྣམ་པར་སྣང་མཛད་སེར་པོ་སེར་པོ་དང་དཀར་པོ་དང་ནག་པོའི་ཞལ་ཅན། གཡས་པ་རྣམས་ཀྱིས་འཁོར་ལོ་དང་དབྱུག་པ་དང་མི་འཇིགས་པ་མཛད་པས་རྡོ་རྗེ་དང༌། གཡོན་པ་རྣམས་ཀྱིས་དུང་དང་རྡོ་རྗེ་ལྕགས་སྒྲོག་དང་དྲིལ་བུ་འཛིན་པས་སྒྲོལ་མ་ལ་འཁྱུད་པའོ། །བྱང་དུ་སྣང་བ་མཐའ་ཡས་དཀར་པོ་དཀར་པོ་དང་ནག་པོ་དང་དམར་པོའི་ཞལ་ཅན། གཡས་པ་རྣམས་ཀྱིས་ཐོབ་དང་མདུང་དང་རྩེ་གསུམ་དང༌། གཡོན་པ་རྣམས་ཀྱིས་པདྨ་དཀར་པོ་དང་མེ་ལོང་དང་བགྲང་ཕྲེང་འཛིན་པ། གོས་དཀར་མོས་འཁྱུད་པའོ། །བཞི་པོ་འདི་རྣམས་ནི་ཆུ་སྐྱེས་དཀར་པོ་དང་ཉི་མ་ལ་གནས་པ་རལ་པའི་ཐོར་ཅོག་ཅན་ཏེ། ཞལ་རྣམས་ནི་རྩ་བ་དང་གཡས་པ་དང་གཡོན་པའི་རིམ་པས་སོ། །མེ་དང་བདེན་བྲལ་དང་རླུང་དང་དབང་ལྡན་རྣམས་སུ་པདྨ་དམར་པོ་དང་ཟླ་བ་ལ་སྒྲོལ་མ་དང་གོས་དཀར་མོ་དང་སྤྱན་མ་དང་མཱ་མ་ཀཱི་རྣམས་ནི་རིམ་པ་ཇི་ལྟ་བ་བཞིན་དུ་དོན་ཡོད་གྲུབ་པ་དང་རིན་ཆེན་འབྱུང་ལྡན་དང་རྟག་པ་དང་སྣང་བ་མཐའ་ཡས་དང་མཚུངས་པ་སྟེ། རྣམ་པར་སྣང་མཛད་དང་སྣང་བ་མཐའ་ཡས་དང་དོན་ཡོད་གྲུབ་པ་དང༌། རིན་ཆེན་འབྱུང་ལྡན་རྣམས་དང་སྙོམས་པར་འཇུག་པའོ། །ཡང་ན་སྒྲོལ་མའི་ཁ་ཊྭཱཾ་གའི་གནས་སུ་ཨུཏྤལ་སྟེ། གཞོགས་བརྒྱང་དུ་ནི་བདུད་རྩིའི་བུམ་པ་བརྒྱད་དོ། །རིམ་པ་གསུམ་པའི་སྣམ་བུ་ལ་ཤར་སྒོའི་གཡོན་ངོས་སུ་ཀུན་དུ་བཟང་པོ་སྔོན་པོ་གཡས་པ་རྣམས་ཀྱིས་རྡོ་རྗེ་དང་གྲི་གུག་དང་དགྲ་སྟ། གཡོན་པ་རྣམས་ཀྱིས་དྲིལ་བུ་དང་ཐོད་པ་དང་ཚངས་པའི་མགོ་བོ་འཛིན་པ་ཡང་ན་ཚངས་པའི་མགོའི་གནས་སུ་ཨུཏྤལ་སྟེ། ཆོས་ཀྱི་དབྱིངས་ཀྱི་རྡོ་རྗེ་མ་དང་སྙོམས་པར་འཇུག་པའོ། །གཡས་སུ་ནམ་མཁའི་སྙིང་པོ་དོན་ཡོད་གྲུབ་པ་ལྟ་བུ་ལ་དྲི་རྡོ་རྗེ་མས་འཁྱུད་པའོ། །ལྷོ་སྒོའི་གཡོན་དུ་ཕྱག་ན་རྡོ་རྗེ་ལྗང་གུ་གཡས་པ་རྣམས་ཀྱིས་རྡོ་རྗེ་དང་གྲི་གུག་དང་དགྲ་སྟ། གཡོན་པ་རྣམས་ཀྱིས་དྲིལ་བུ་དང་ཐོད་པ་དང་ཚངས་པའི་མགོ་འཛིན་པ་སྒྲ་རྡོ་རྗེ་མས་འཁྱུད་པའོ། །གཡས་སུ་སའི་སྙིང་པོ་རིན་ཆེན་འབྱུང་ལྡན་ལྟ་བུ་གཟུགས་རྡོ་རྗེ་མ་དང་སྙོམས་པར་འཇུག་པ་ནུབ་སྒོའི་གཡོན་དུ་ཆོས་
ཀྱི་དབྱིངས་ཀྱི་རྡོ་རྗེ་མ་ཕྱག་ན་རྡོ་རྗེ་ལྟ་བུ་ལ་ཀུན་དུ་བཟང་པོས་འཁྱུད་པའོ། །གཡས་སུ་སྒྲིབ་པ་ཐམས་ཅད་རྣམ་པར་སེལ་བ་རྣམ་པར་སྣང་མཛད་ལྟ་བུ་ལ་རེག་བྱ་རྡོ་རྗེ་མས་འཁྱུད་པའོ། །བྱང་སྒོའི་གཡོན་དུ་སྒྲ་རྡོ་རྗེ་མ་ཀུན་དུ་བཟང་པོ་ལྟ་བུ་ལ་ཕྱག་ན་རྡོ་རྗེས་འཁྱུད་པའོ། །གཡས་སུ་འཇིག་རྟེན་དབང་ཕྱུག་སྣང་བ་མཐའ་ཡས་ལྟ་བུ་ལ་རོ་རྡོ་རྗེ་མས་འཁྱུད་པའོ། །མེར་རེག་བྱ་རྡོ་རྗེ་མ་སྒྲོལ་མ་ལྟ་བུ་ལ་སྒྲིབ་པ་ཐམས་ཅད་རྣམ་པར་སེལ་བས་སྙོམས་པར་འཇུག་པའོ། །བདེན་བྲལ་དུ་རོ་རྡོ་རྗེ་མ་གོས་དཀར་མོ་ལྟ་བུ་ལ་འཇིག་རྟེན་དབང་ཕྱུག་གིས་འཁྱུད་པའོ། །རླུང་དུ་དྲི་རྡོ་རྗེ་མ་སྤྱན་མ་ལྟ་བུ་ལ་ནམ་མཁའི་སྙིང་པོས་འཁྱུད་པའོ། །དབང་ལྡན་དུ་གཟུགས་རྡོ་རྗེ་མ་མཱ་མ་ཀཱི་ལྟ་བུ་ལ་སའི་སྙིང་པོས་འཁྱུད་པའོ། །འདིར་དོན་ཡོད་གྲུབ་པ་ལ་སོགས་པའི་དེ་བཞིན་གཤེགས་པ་རྣམས་དང༌། བྱང་ཆུབ་སེམས་དཔའ་རྣམས་ནི་རྡོ་རྗེའི་གདན་གྱིས་བཞུགས་པ་སྟེ། སྒྲོལ་མ་ལ་སོགས་པའི་ལྷ་མོ་རྣམས་ནི་པདྨའི་འདུག་སྟངས་ཀྱིས་བཞུགས་པའོ། །སྒོ་རྣམས་ལ་ཁྲོ་བོ་ཤིན་ཏུ་སྟོབས་དོན་ཡོད་གྲུབ་པ་ལྟ་བུ་ལ་རེངས་བྱེད་མས་ཡང་དག་པར་འཁྱུད་པ་སྟེ་དེའང་སྤྱན་མ་ལྟ་བུའོ། །ལྷོར་རྨུགས་བྱེད་རིན་ཆེན་དབང་པོ་ལྟ་བུ་ལ་ཁེངས་བྱེད་མས་སྙོམས་པར་ཞུགས་པ་སྟེ་དེ་ཡང་མཱ་མ་ཀཱི་ལྟ་བུའོ། །ནུབ་ཏུ་རེངས་བྱེད་རྣམ་པར་སྣང་མཛད་ལྟ་བུ་ལ་ཤིན་ཏུ་སྟོབས་མས་འཁྱུད་པ་སྟེ་དེ་ཡང་སྒྲོལ་མ་ལྟ་བུའོ། །བྱང་དུ་ཁེངས་བྱེད་འོད་དཔག་མེད་ལྟ་བུ་ལ་རྨུགས་བྱེད་མས་ཡང་དག་པར་འཁྱུད་པ་སྟེ་དེ་ཡང་གོས་དཀར་མོ་ལྟ་བུའོ། །འོན་ཀྱང་ཁྲོ་བོ་འདི་རྣམས་ནི་གཡས་བརྐྱང་གིས་གནས་པ་སྟེ་ཁྲོ་བོའི་ལྷ་མོ་རྣམས་ནི་གཡོན་བརྒྱང་གིས་གནས་པའོ། །འདིར་ལྷ་ཕོ་རྣམས་ཀྱི་གདན་ནི་པདྨ་དཀར་པོ་དང་ཉི་མ་རྣམས་ཏེ། ལྷ་མོ་རྣམས་ཀྱི་གདན་ནི་པདྨ་དམར་པོ་ལ་ཟླ་བའི་དཀྱིལ་འཁོར་རྣམས་སོ། །ཡང་ན་ནག་པོ་དང་དཀར་པོ་དང་ལྗང་གུ་རྣམས་ལ་ཟླ་བ་ལ་གནས་པ་དང་དམར་པོ་དང་སེར་པོ་རྣམས་དང་ཀུན་དུ་བཟང་པོ་དང་སྒྲ་རྡོ་རྗེ་མ་ནི་ཉི་མའི་དཀྱིལ་འཁོར་ལ་གནས་པ་སྟེ། དེ་དག་གི་རིགས་པ་ཡང་དྲི་མ་མེད་པའི་འོད་ལས་གསུངས་པའོ། །འདིར་གང་གི་གནས་སུ་ལྷ་རྣམས་གང་གསུངས་པ་དེ་ནི་དེའི་བཙོ་བོ་
ཡིན་པའི་ཕྱིར་འཁོར་ལོའི་དབང་པོ་ལ་མངོན་པར་ཕྱོགས་པ་སྟེ། དེའི་པང་དུ་གནས་པ་ནི་མ་ཡིན་ནོ། །འདིར་འདབ་མ་བརྒྱད་ཀྱི་ལྷ་མོ་རྣམས་དང་བུམ་པ་རྣམས་དང་ཆོས་ཀྱི་དུང་ལ་སོགས་པ་སྤངས་ནས་ཉི་ཤུ་རྩ་ལྔའི་བདག་ཉིད་ཅན་གྱི་ཐུགས་ཀྱི་དཀྱིལ་འཁོར་ཡང་བསྒོམ་པར་བྱའོ། །དེའི་ཚེ་བཅོམ་ལྡན་འདས་ཀྱིས་ཉེ་བར་བསྐོར་བ་ཡང་དཔལ་གསང་བ་འདུས་པ་ལྟ་བུའོ། །སྟེགས་བུ་རྣམས་ལ་ཤར་གྱི་གཡོན་རྟ་བབས་ཀྱི་ཀ་བའི་རྩ་བའི་གཡོན་དུ་དྲི་ཆབ་མ་ནག་མོ་དྲིའི་དུང་ཆོས་འཛིན་པ་དང༌། གཡས་སུ་ཕྲེང་བ་མ་ནག་མོ་མེ་ཏོག་གི་ཕྲེང་བ་འཛིན་པ་དང༌། ལྷོར་བདུག་སྤོས་མ་དམར་མོ་བདུག་སྦོས་ཀྱི་སྣོད་འཛིན་པ་དང༌། མར་མེ་མ་དམར་མོ་མར་མེའི་མཆོད་སྡོང་འཛིན་པའོ། །ནུབ་ཏུ་སྒེག་མོ་སེར་མོ་ཅོད་པན་སེར་པོ་འཛིན་པ་དང༌། བཞད་མ་སེར་མོ་དོ་ཤལ་སེར་པོ་འཛིན་པའོ། །བྱང་དུ་བདུད་རྩི་མའམ་མིང་གཞན་ཞལ་ཟས་མ་ཞེས་བྱ་བ་དཀར་མོ་འབྲས་བུ་དཀར་པོ་འཛིན་པ་དང༌། འབྲས་བུ་མི་ཟད་པའམ་མིང་གཞན་བདུད་རྩིའི་འབྲས་བུ་མ་ཞེས་བྱ་བ་དཀར་མོ་བདུད་རྩིས་གང་བའི་སྣོད་འཛིན་པའོ། །སྟེགས་བུ་ཐམས་ཅད་ལ་ཡང་རྣམ་པ་སྣ་ཚོགས་པའི་མཆོད་པ་འཛིན་པའི་ལྷ་མོ་གྲངས་མེད་པའོ། །ཤར་གྱི་རྟ་བབས་ཀྱི་མཆོད་པའི་ལྷ་མོའི་གནས་སུ་གར་མ་སྔོན་མོ་གར་གྱི་ཚུལ་གྱིས་གོས་འཛིན་པའོ། །ལྷོར་འདོད་མ་དམར་མོ་པདྨ་འཛིན་པ་དང༌། ནུབ་ཏུ་སིལ་སྙན་མ་སེར་མོ་རྔ་པ་ཊ་ཧ་བརྡུང་བ་དང༌། བྱང་དུ་གླུ་མ་དཀར་མོ་རྡོ་རྗེ་འཛིན་པ་སྟེ་བདུད་རྩི་མ་ལ་སོགས་པ་དགོད་བ་འདི་དག་ནི་དབང་བསྐུར་བའི་ལེའུའི་རིམ་པའོ། །གང་ཡང་སྒྲུབ་ཐབས་ཀྱི་ལེའུའི་འགྲེལ་པ་ལས་བྱང་དུ་སིལ་སྙན་མ་དང་གར་མ་དང༌། ནམ་མཁར་གླུ་མ་དང་འདོད་མ་དང༌། འོག་ཏུ་ཞལ་ཟས་མ་དང༌། བདུད་རྩིའི་འབྲས་བུ་མ་ཞེས་གསུངས་པ་དེ་ལ་ཡང་དབང་བསྐུར་བའི་ལེའུ་ལས་གསུངས་པའི་དགོད་པ་འདི་ལྟར་རིག་པར་བྱ་སྟེ། གཞུང་དེ་དག་རྗེས་སུ་མཐུན་པར་སྦྱོར་བ་ཉིད་ཀྱི་ཕྱིར་རོ། །གཞན་དུ་ན་སྔ་མ་དང་ཕྱི་མ་དག་འགལ་བར་འགྱུར་རོ། །ལྷ་མོ་བཅུ་གཉིས་པོ་འདི་དག་ནི་པདྨའི་འདུག་སྟངས་ཀྱིས་གནས་པའོ། །གསུང་གི་དཀྱིལ་འཁོར་ལ་ཕྱོགས་ཀྱི་པདྨ་རྣམས་ནི་དམར་པོ་དང༌། མཚམས་
ཀྱི་པདྨ་རྣམས་ནི་དཀར་པོ་སྟེ་དེ་རྣམས་ཉི་མ་དང་ཟླ་བ་དང་བྲལ་བ་ལ་ས་གའི་འདུག་སྟངས་ཀྱིས་གནས་པའི་ལྷ་མོ་རྣམས་སོ། །དེ་ཡང་ཡི་དགས་དམར་པོའི་སྟེང་དུ་གནས་པའི་ཤར་གྱི་ཆུ་སྐྱེས་ཀྱི་ལྟེ་བ་ལ་རྩ་རྩིག་ནག་མོ་ཞལ་གཅིག་མ་སྤྱན་གསུམ་མ། ཕྱག་གཡས་པ་དག་གིས་གྲི་གུག་དང་རྩེ་གསུམ་དང༌། གཡོན་པ་དག་གིས་ཐོད་པ་དང་ཁ་ཊྭཱཾ་ག་འཛིན་པ་དབང་པོ་སེར་པོས་འཁྱུད་པ་སྟེ། མདུན་ལ་སོགས་པའི་འདབ་མ་བརྒྱད་ལ། འཇིགས་མ་དང་དྲག་མོ་དང་དུས་ཀྱི་མཆེ་བ་མ་དང་མེ་འབར་གདོང་མ་དང་རླུང་ཤུགས་མ་དང་རབ་གཏུམ་མ་དང་དྲག་མིག་མ་དང་སྣ་ཆེན་མ་རྣམས་སོ། །ནམ་མཁའ་ལྡིང་གི་སྟེང་དུ་གནས་པའི་མེའི་ཆུ་སྐྱེས་ཀྱི་ལྟེ་བ་ལ་ཁྱབ་འཇུག་མ་ནག་མོ་གཡས་པ་དག་གིས་འཁོར་ལོ་དང་དབྱུག་པ། གཡོན་པ་དག་གིས་པདྨ་དང་དུང་འཛིན་པ་ཚངས་མས་འཁྱུད་པ་སྟེ། འདབ་མ་རྣམས་ལ་དཔལ་མོ་དང་སྒྱུ་མ་དང་གྲགས་མ་དང་གཡང་མོ་དང་ཕུན་སུམ་ཚོགས་མ་དང་རྣམ་པར་རྒྱལ་མ་དང་དཔལ་ལྡན་རྒྱལ་མ་དང་དཔལ་ལྡན་རྒྱལ་བྱེད་མ་དང་དཔལ་ལྡན་འཁོར་ལོ་ཅན་མ་རྣམས་སོ། །མ་ཧེའི་སྟེང་དུ་ལྷོའི་ཆུ་སྐྱེས་ཀྱི་ལྟེ་བ་ལ་ཕག་མོ་དམར་མོ་ཕག་གི་ཞལ་ཅན། གཡས་པ་དག་གིས་དབྱུག་པ་དང་རལ་གྲི་དང༌། གཡོན་པ་དག་གིས་ལྕགས་སྒྲོག་དང་ཕུབ་འཛིན་པ་དྲག་པོས་འཁྱུད་པ་སྟེ། འདབ་མ་རྣམས་ལ་ཀེང་རུས་མ་དང་དུས་མཚན་མ་དང་རབ་ཁྲོས་གདོང་མ་དང་དུས་ཀྱི་ལྕེ་མ་དང༌། གཙིགས་མ་དང་ནག་མོ་དང་གཟུགས་ངན་མ་རྣམས་སོ། །རྨ་བྱའི་སྟེང་དུ་བདེན་བྲལ་གྱི་ཆུ་སྐྱེས་ཀྱི་ལྟེ་བ་ལ་གཞོན་ནུ་མ་དམར་མོ་ཞལ་དྲུག་མ་གཡས་པ་དག་གིས་ཤཀྟི་དང་ལྕགས་ཀྱུ། གཡོན་བ་དག་གིས་རིན་པོ་ཆེ་དང་ཞགས་པ་འཛིན་པ་ཚོགས་བདག་གིས་འཁྱུད་པ་སྟེ། འདབ་མ་རྣམ་ལ་པདྨ་དང་ལུས་མེད་མ་དང་གཞོན་ནུ་མ་དང་རི་དགས་བདག་པོས་འགྲོ་མ་དང་རིན་ཆེན་ཕྲེང་བ་མ་དང༌། མིག་བཟངས་མ་དང་རུལ་མ་དང་བཟང་མོ་རྣམས་སོ། །ས་སྲུང་གི་སྟེང་དུ་ནུབ་ཀྱི་ཆུ་སྐྱེས་ཀྱི་ལྟེ་བ་ལ་དབང་མོ་སེར་མོ་གཡས་པ་དག་གིས་རྡོ་རྗེ་དང་མདའ། གཡོན་པ་དག་གིས་དྲིལ་བུ་དང་གཞུ་འཛིན་པ་བདེན་བྲལ་གྱིས་འཁྱུད་པ་སྟེ། འདབ་མ་རྣམས་ལ་རྡོ་རྗེ་འོད་མ་དང་རྡོ་རྗེ་ལུས་མ་དང༌། གསེར་ལྡན་
མ་དང་ཨུར་བ་སཱ་དང་བཀྲ་བའི་རི་མོ་དང་ཆུ་ཤིང་མ་དང་ཟུག་རྔུ་མེད་པ་དང་ཤིན་ཏུ་སྒྲོལ་མ་རྣམས་སོ། །ངང་པའི་སྟེང་དུ་རླུང་གི་ཆུ་སྐྱེས་ཀྱི་ལྟེ་བ་ལ་ཚངས་མ་སེར་མོ་ཞལ་བཞི་མ་གཡས་པ་དག་གིས་པདྨ་དང་ཚངས་པའི་དབྱུག་པ། གཡོན་པ་དག་གིས་སྐྱི་བླུགས་དང་པར་བུ་འཛིན་པ་ཁྱབ་འཇུག་གིས་སྙོམས་པར་ཞུགས་པ་སྟེ། འདབ་མ་རྣམས་ལ་མཆོད་སྦྱིན་འདོད་མ་དང་པདྨའི་སྤྱན་མ་དང་ཆུ་སྐྱེས་ལྡན་མ་དང༌། བློ་གྲོས་མ་དང་ངག་གི་དབང་ཕྱུག་མ་དང་གླུ་མ་དང་གློག་མ་དང་དྲན་མ་རྣམས་སོ། །གླང་གི་སྟེང་དུ་བྱང་གི་ཆུ་སྐྱེས་ཀྱི་ལྟེ་བ་ལ་དྲག་མོ་དཀར་མོ་གཡས་པ་དག་གིས་རྩེ་གསུམ་དང་ཅང་ཏེའུ་གཡོན་པ་དག་གིས་ཁ་ཊྭཱཾ་ག་དང་སྦྲུལ་འཛིན་པ་གཤིན་རྗེས་འཁྱུད་པ་སྟེ། འདབ་མ་རྣམས་ལ་གཽ་རཱི་མ་དང་གངྒཱ་མ་དང་རྟག་མ་དང་མྱུར་མ་དང་ཏྲོ་ཏ་ལ་དང༌། མཚོན་བྱེད་མ་དང༌། དམར་སེར་མ་དང༌། ནག་མོ་རྣམས་སོ། །སེང་གེའི་སྟེང་དུ་དབང་ལྡན་གྱི་ཆུ་སྐྱེས་ཀྱི་ལྟེ་བ་ལ་དཔལ་མོ་དཀར་མོ་གཡས་པ་དག་གིས་པདྨ་དང་བགྲང་ཕྲེང༌། གཡོན་པ་དག་གིས་པདྨ་དང་རིན་པོ་ཆེ་འཛིན་པ་གདོང་དྲུག་གིས་འཁྱུད་པ་སྟེ། འདབ་མ་རྣམས་ལ་དཔལ་ལྡན་དཀར་མོ་དང༌། ཟླ་བའི་རི་མོ་དང༌། རི་བོང་འཛིན་ཞལ་མ་དང༌། ངང་པའི་མདོག་མ་དང་འཛིན་མ་དང༌། པདྨའི་དབང་ཕྱུག་མ་དང༌། སྐར་མིག་མ་དང༌། དྲི་མེད་རི་བོང་འཛིན་མ་རྣམས་སོ། །ཙ་རྩི་ཀ་ལ་སོགས་པའི་ལྷ་མོ་བདུན་ཅུ་རྩ་གཉིས་པོ་འདི་དག་ནི་ཕྱག་བཞི་མ་སྤྱན་གསུམ་མ་སྟེ། འདིར་འདབ་མའི་ལྷ་མོ་རྣམས་ནི་རོལ་པའི་རྐང་སྟབས་ཀྱིས་གནས་པ་ཁ་དོག་ལ་སོགས་པ་རྣམས་རང་རང་གི་གཙོ་བོ་དང་མཚུངས་པ་རང་རང་གི་གཙོ་མོ་ལ་མངོན་དུ་ཕྱོགས་པའོ། །གཙོ་མོ་བརྒྱད་པོ་འདི་དག་ནི་ས་གའི་རྐང་སྟབས་ཀྱིས་གནས་པ་འཁོར་ལོའི་དབང་ཕྱུག་ལ་གཟིགས་པ་སྟེ་བརྒྱད་པོ་འདི་རྣམས་ཀྱིས་འཁྱུད་པ་པོ་ས་གའི་རྐང་སྟབས་ཀྱིས་གནས་པའི་རྗེས་སུ་གཙོ་བོ་རྣམས་ནི་དེ་ལ་མངོན་དུ་ཕྱོགས་པའོ། །སྐུའི་དཀྱིལ་འཁོར་གྱི་སྣམ་བུ་རྣམས་ལ་པདྨ་བཅུ་གཉིས་ཏེ། དེ་ཡང་ཕྱོགས་ཀྱི་པདྨ་རྣམས་དམར་པོ་དང་མཚམས་ཀྱི་པདྨ་རྣམས་དཀར་པོའོ། །པདྨ་རེ་རེ་ཞིང་ཡང་འདབ་མ་
རྣམས་ནི་གོ་རིམས་བཞིན་དང་པོ་ལ་བཞི་དང་གཉིས་པ་ལ་བརྒྱད་དང༌། གསུམ་པ་ལ་བཅུ་དྲུག་སྟེ། དེ་དག་གི་ཕྱིའི་རིམ་པའི་མདུན་གྱི་འདབ་མ་ནས་བརྩམས་ནས་གཡས་སྐོར་གྱིས་ཚེས་གཅིག་ལ་སོགས་པའི་ལྷ་མོ་རྣམས་དགོད་པར་བྱའོ། །ལྟེ་བ་ལ་ཉ་དང་གནམ་སྟོང་དག་ནི་གཙོ་བོ་ཉིད་ཀྱིས་གནས་པ་ཡིན་ལ། དེ་ཡང་ཉ་ནི་ཤེས་རབ་དང་གནམ་སྟོང་ནི་ཐབས་ཏེ། བདེན་བྲལ་ལ་སོགས་པའོ། །ལྷ་ཐམས་ཅད་ནི་ཕྱག་བཞི་པའོ། །དེ་ལ་ཤར་སྒོའི་གཡས་ཕྱོགས་སུ་ཡི་དགས་དམར་པོའི་སྟེང་དུ་པདྨའི་ལྟེ་བ་ལ་བདེན་བྲལ་ནག་པོ་སྲིན་མོ་མེ་འབར་གདོང་མས་ཡང་དག་པར་འཁྱུད་མ། གཡས་པ་དག་ན་རལ་གྲི་དང་གྲི་གུག །གཡོན་པ་དག་ན་ཕུབ་དང་ཐོད་པ་ཅན་ཏེ། འདིར་ནི་ནག་པའི་ཚེས་རྣམས་སོ། །མེར་རི་དགས་ཀྱི་སྟེང་དུ་པདྨའི་ལྟེ་བ་ལ་རླུང་ལྷ་ནག་པོ་རབ་ཏུ་གཏུམ་མོས་འཁྱུད་པ། གཡས་པ་དག་ན་དཔག་བསམ་གྱི་ཤིང་དང་ཡོངས་འདུའི་མེ་ཏོག་གཡོན་པ་དག་ན་ཨིནྡྲ་ནཱི་ལ་དང་ཨུཏྤལ་སྔོན་པོ་ཅན་ཏེ་འདིར་ནི་ས་གའི་ཚེས་རྣམས་སོ། །ལྷོ་སྒོའི་གཡོན་ཕྱོགས་སུ་མ་ཧེའི་སྟེང་དུ་པདྨའི་ལྟེ་བ་ལ་གཤིན་རྗེ་དམར་པོ་དུས་མས་ཡང་དག་པར་འཁྱུད་པ། གཡས་པ་དག་ན་དབྱུག་པ་དང་རལ་གྲི། གཡོན་པ་དག་ན་ལྕགས་སྒྲོག་དང་ཞགས་པ་ཅན་ཏེ་འདིར་ནི་དབོའི་ཚེས་རྣམས་སོ། །གཡས་ཕྱོགས་སུ་ལུག་གི་སྟེང་དུ་པདྨའི་ལྟེ་བ་ལ་མེ་ལྷ་དམར་པོ་ཆུ་ལྷ་མོས་འཁྱུད་པ། གཡས་པ་དག་ན་ཤཀྟི་དང་དབྱུག་པ། གཡོན་པ་དག་ན་པདྨ་དང་སྤྱི་བླུགས་ཅན་ཏེ་འདིར་ནི་སྣྲོན་གྱི་ཚེས་རྣམས་སོ། །བདེན་བྲལ་དུ་རྨ་བྱའི་སྟེང་དུ་པདྨའི་ལྟེ་བ་ལ་གདོང་དྲུག་དམར་པོ་དཔལ་མོས་འཁྱུད་པ། གཡས་པ་དག་ན་ཤཀྟི་དང་མདུང༌། གཡོན་པ་དག་ན་རིན་པོ་ཆེ་དང་མེ་ལོང་ཅན་ཏེ་འདིར་ནི་ཆུ་སྟོད་ཀྱི་ཚེས་རྣམས་སོ། །ནུབ་སྒོའི་གཡོན་ཕྱོགས་སུ་པདྨའི་ལྟེ་བ་ལ་ལུས་ངན་པོ་སེར་པོ་ལུས་ངན་མོས་ཡང་དག་པར་འཁྱུད་པ། གཡས་པ་དག་ན་ནོར་བུ་རིན་པོ་ཆེ་དང་དབྱུག་ཏོ། །གཡོན་པ་དག་ན་ནེའུ་ལེ་དང་པདྨ་ཅན་ཏེ་འདིར་ནི་རྒྱལ་གྱི་ཚེས་རྣམས་སོ། །གཡས་ཕྱོགས་སུ་གླང་པོ་ཆེའི་སྟེང་དུ་པདྨའི་ལྟེ་བ་ལ་དབང་པོ་སེར་པོ་རླུང་ལྷ་མོས་འཁྱུད་པ། གཡས་པ་དག་ན་རྡོ་རྗེ་དང་མེའི་མདའ་དང༌། གཡོན་པ་དག་ན་
དྲིལ་བུ་དང་གཞུ་ཅན་ཏེ་འདིར་ནི་ཐ་སྐར་གྱི་ཚེས་རྣམས་སོ། །རླུང་དུ་ངང་པའི་སྟེང་དུ་པདྨའི་ལྟེ་བ་ལ་ཚངས་པ་སེར་པོ་གློག་མས་ཡང་དག་པར་འཁྱུད་པ། གཡས་པ་དག་ན་ཁབ་དང་བགྲང་ཕྲེང༌། གཡོན་པ་དག་ན་པདྨ་དང་སྤྱི་བླུགས་ཅན་ཏེ་འདིར་ནི་སྨིག་དྲུག་གི་ཚེས་རྣམས་སོ། །བྱང་སྒོའི་གཡོན་ཕྱོགས་སུ་གླང་གི་སྟེང་དུ་པདྨའི་ལྟེ་བ་ལ་དྲག་པོ་དཀར་པོ་གཽ་རཱིས་ཡང་དག་པར་འཁྱུད་པ། གཡས་པ་དག་ན་རྩེ་གསུམ་དང་མདའ། གཡོན་པ་དག་ན་སྦྲུལ་གྱིས་དཀྲིས་པའི་ཁ་ཊྭཱཾ་ག་དང་གཞུ་ཅན་ཏེ། འདིར་ནི་མགོའི་ཚེས་རྣམས་སོ། །གཡས་ཕྱོགས་སུ་ཆུ་སྲིན་གྱི་སྟེང་དུ་པདྨའི་ལྟེ་བ་ལ་རྒྱ་མཚོ་དཀར་པོ་ཕག་མོས་ཡང་དག་པར་འཁྱུད་པ། གཡས་པ་དག་ན་ཞགས་པ་དང་རིན་པོ་ཆེ། གཡོན་པ་དག་ན་སྦྲུལ་ཞགས་དང་ནོར་བུ་ཟླ་བ་ཆུ་ཤེལ་ཅན་ཏེ་འདིར་ནི་གྲོ་བཞིན་གྱི་ཚེས་རྣམས་སོ། །དབང་ལྡན་དུ་བྱི་བ་ལ་ཚོགས་བདག་དཀར་པོ་གཞོན་ནུ་མས་ཡང་དག་པར་འཁྱུད་པ། གཡས་པ་དག་ན་དགྲ་སྟ་དང་རྡོ་རྗེ། གཡོན་པ་དག་ན་ཞགས་པ་དང་རིན་པོ་ཆེ་ཅན་ཏེ་འདིར་ནི་ཁྲུམས་སྟོད་ཀྱི་ཚེས་རྣམས་སོ། །ཤར་སྒོའི་གཡོན་ཕྱོགས་སུ་ནམ་མཁའ་ལྡིང་གི་སྟེང་དུ་པདྨའི་ལྟེ་བ་ལ་ཁྱབ་འཇུག་ནག་པོ་དཔལ་མོས་ཡང་དག་པར་འཁྱུད་པ། གཡས་པ་དག་ན་འཁོར་ལོ་དང་དབྱུག་ཏོ། །གཡོན་པ་དག་ན་པདྨ་དང་དུང་ཅན་ཏེ་འདིར་ནི་མཆུའི་ཚེས་རྣམས་སོ། །འདིར་ལྷ་རྣམས་རྡོ་རྗེའི་འདུག་སྟངས་ཀྱིས་གནས་པ་སྟེ། ནག་པ་ལ་སོགས་པའི་ཚེས་ཀྱི་ལྷ་མོ་རྣམས་ནི་རོལ་པའི་རྐང་སྟབས་ཀྱིས་གནས་པ་རང་རང་གི་བདག་པོ་བདེན་བྲལ་ལ་སོགས་པའི་སྐུ་མདོག་དང་ཕྱག་མཚན་དང་དབྱིབས་རྣམས་དང་མཚུངས་པ་དེ་དག་ལ་གཟིགས་པའོ། །དེ་རྣམས་འཁོར་ལོའི་དབང་ཕྱུག་ལ་སྟེ། དེ་རྣམས་ཀྱིས་འཁྱུད་པ་རྣམས་ནི་དེ་ཉིད་ལ་གཟིགས་པའོ། །སྒོ་རྣམས་ལ་ཤར་དུ་ཕག་ནག་པོ་བདུན་གྱིས་དྲངས་པའི་ཤིང་རྟ་ནག་པོ་ལ་དབྱུག་སྔོན་ཅན་དོན་ཡོད་གྲུབ་པ་ལྟ་བུ་སྟེ། འདི་ལ་འཁྱུད་པའི་འོད་ཟེར་ཅན་ནི་སེར་མོ་ཕྱག་གཡས་པ་དག་གིས་འཁོར་ལོ་དང་དབྱུག་པ། གཡོན་པ་དག་གིས་དུང་དང་རིན་པོ་ཆེ་འཛིན་པའོ། །ལྷོར་རྟ་དམར་པོ་བདུན་གྱིས་དྲངས་པའི་ཤིང་རྟ་དམར་པོ་ལ་འདོད་པའི་རྒྱལ་པོ་རིན་ཆེན་འབྱུང་ལྡན་ལྟ་བུ་སྟེ།
འདི་ལ་འཁྱུད་པའི་ཙུནད་དཀར་མོ་གཡས་པ་དག་གིས་ཐོ་བ་དང་མདུང༌། གཡོན་པ་དག་གིས་པདྨ་དང་མེ་ལོང་འཛིན་པའོ། །ནུབ་ཏུ་གླང་པོ་ཆེ་སེར་པོ་བདུན་གྱིས་དྲངས་པའི་ཤིང་རྟ་སེར་པོ་ལ་སྟོབས་པོ་ཆེ་རྣམ་པར་སྣང་མཛད་ལྟ་བུ་སྟེ། འདི་ལ་འཁྱུད་པའི་རྡོ་རྗེ་ལྕགས་སྒྲོག་མ་གཡས་པ་དག་གིས་རལ་གྲི་དང་རྡོ་རྗེ། གཡོན་པ་དག་གིས་ཕུབ་དང་སྤྲུལ་འཛིན་པའོ། །བྱང་དུ་སིང་གེ་དཀར་པོ་བདུན་གྱིས་དྲངས་པའི་ཤིང་རྟ་དཀར་པོ་ལ་མི་གཡོ་བ་སྣང་བ་མཐའ་ཡས་ལྟ་བུ་སྟེ། འདི་ལ་འཁྱུད་པའི་ཁྲོ་གཉེར་ཅན་དམར་མོ་གཡས་པ་དག་གིས་མདའ་དང་ལྕགས་ཀྱུ་དང༌། གཡོན་པ་དག་གིས་གཞུ་དང་ཞགས་པ་འཛིན་པའོ། །འཁོར་ལོའི་དབང་ཕྱུག་གི་སྟེང་གི་ནམ་མཁའ་ལ་མིག་གསུམ་པ་ཁ་དོག་ལྔ་པའི་ནམ་མཁའ་ལྡིང་གིས་དྲངས་པའི་ཤིང་རྟ་ལྗང་གུ་ལ་གཙུག་ཏོར་འཁོར་ལོས་སྒྱུར་བ་ལྗང་གུ་ཕྱག་ན་རྡོ་རྗེ་ལྟ་བུ་སྟེ། འདིའི་ཤེས་རབ་མ་ཤིན་ཏུ་སྔོན་མོ་སྐུ་མདོག་སྔོན་མོ་གཡས་པ་དག་གིས་གྲི་གུག་དང་རྡོ་རྗེ་དང༌། གཡོན་པ་དག་གིས་ཐོད་པ་དང་དྲིལ་བུ་འཛིན་པའོ། །འཁོར་ལོའི་དབང་ཕྱུག་གི་འོག་གིས་འོག་ཏུ་རྐང་པ་བརྒྱད་པའི་སེང་གེ་ནག་པོ་བདུན་གྱིས་དྲངས་པའི་ཤིང་རྟ་ནག་པོ་ལ་གནོད་མཛེས་རྒྱལ་པོ་ཀུན་དུ་བཟང་པོ་ལྟ་བུ་སྟེ། འདིའི་ཤེས་རབ་མ་དྲག་སྤྱན་མ་ལྗང་གུ་ཕྱག་གཡས་པ་དག་གིས་དགྲ་སྟ་དང་རྩེ་གསུམ་དང༌། གཡོན་པ་དག་གིས་སྦྲུལ་ཞགས་དང་ཁ་ཊྭཱཾ་ག་འཛིན་པའོ། །འདིར་དབྱུག་སྔོན་ཅན་ལ་སོགས་པའི་ཁྲོ་བོ་རྣམས་ནི་ཤིང་རྟའི་སྟེང་དུ་པདྨ་དཀར་པོ་དང་ཉི་མ་རྣམས་ལ་གཡས་བརྐྱང་གིས་གནས་པ་སྟེ། གཙོ་བོ་གཞན་རྣམས་ནི་རང་རང་གི་གནས་ན་གནས་པའི་ཕྱིར་འཁོར་ལོའི་དབང་པོ་ལ་གཟིགས་པའོ། །འོད་ཟེར་ཅན་ལ་སོགས་པ་ནི་གཡོན་བརྐྱང་གིས་གནས་པའི་རྗེས་སུ་གཙོ་མོ་སྟེ། གཞན་གྱི་གནས་སུ་ཕྱིན་པའི་ཕྱིར་ཁྲོ་བོ་རྣམས་ལ་གཟིགས་པའོ། །འདིར་ཤིང་རྟ་རྣམས་ནི་ནག་བོ་ལ་སོགས་པའི་ཁ་དོག་ཉིད་ནི་སྒོའི་དབུས་སུ་གནས་པའི་ཤིང་རྟ་རྣམས་ནི་རིགས་ཀྱི་དབང་གིས་འགྱུར་བ་ཡིན་ཞེས་པ་འདིས་བསྟན་ཏེ། དེའི་རྗེས་སུ་འབྲངས་ནས་ཕག་པ་ལ་སོགས་པ་རྣམས་ཀྱང་ངོ༌། །རྟ་བབས་ཀྱི་འོག་ཀ་བའི་འོག་གི་སྟེགས་བུའི་གནས་རྣམས་དང༌། སྟེང་དང་འོག་ཏུ་ཀླུ་རྣམས་
སོ། །དེ་ལ་ཤར་གྱི་སྒོའི་གཡོན་དང་གཡས་དག་ཏུ་རླུང་གི་དཀྱིལ་འཁོར་དག་ལ་གྲངས་ཇི་ལྟ་བར་པདྨ་དང་སྟོབས་རྒྱུ་དག་ནི་ནག་པོ་སྟེ་ཁྱི་གདོང་མ་དང་ཁྭ་གདོང་མས་འཁྱུད་པའོ། །ལྷོའི་སྒོར་མེའི་དཀྱིལ་འཁོར་དག་ལ་ནོར་རྒྱས་དང་དུང་སྐྱོང་དག་ནི་དམར་པོ་སྟེ་ཅེ་སྤྱང་གདོང་མ་དང་མཁའ་ལྡིང་གདོང་མས་འཁྱུད་པའོ། །ནུབ་ཀྱི་སྒོར་སའི་དཀྱིལ་འཁོར་ལ་འཇོག་པོ་དང་པདྨ་སེར་པོ། །ཅེ་སྤྱང་གདོང་མ་དང་མཁའ་ལྡིང་གདེང་མས་འཁྱུད་པའོ། །བྱང་གི་སྒོར་ཆུའི་དཀྱིལ་འཁོར་དག་ལ་མཐའ་ཡས་དང་རིགས་ལྡན་དག་ནི་དཀར་པོ་སྟེ་སྟག་གདོང་མ་དང་འུག་གདོང་མས་འཁྱུད་པའོ། །སྟེང་གི་ནམ་མཁར་སྟོང་པའི་དཀྱིལ་འཁོར་ལ་རྒྱལ་བ་ནི་ཤིན་ཏུ་ལྗང་གུ་སྟེ་སྔོན་མོས་འཁྱུད་པའོ། །འོག་གི་ས་འོག་ཏུ་སྟོང་པའི་དཀྱིལ་འཁོར་ལ་རྣམ་པར་རྒྱལ་བ་སྔོན་པོ་སྟེ། རྡོ་རྗེའི་མིག་ཅན་མས་ཡང་དག་པར་འཁྱུད་པའོ། །ཀླུ་ཐམས་ཅད་ཀྱང་རྡོ་རྗེའི་གདན་གྱིས་བཞུགས་པ་ཕྱག་བཞི་པ། གཡས་པ་དག་གིས་བདུད་རྩིའི་བུམ་པ་དང་རྡོ་རྗེ་དང༌། གཡོན་པ་དག་གིས་པདྨ་དང་རིན་པོ་ཆེ་འཛིན་པའོ། །སའི་དཀྱིལ་འཁོར་གྱི་མཚམས་སུ་དབང་ལྡན་ནས་ཟླ་བའི་དཀྱིལ་འཁོར་ཡོངས་སུ་རྫོགས་པ་འཆར་བཞིན་པ་དང༌། བདེན་བྲལ་དུ་ཉི་མ་ནུབ་པར་འགྲོ་བཞིན་པའོ། །མེ་དང་རླུང་གི་འཁོར་ཡུག་གི་དབུས་སུ་དུར་ཁྲོད་ཆེན་པོ་རྣམས་ལ་འཁོར་ལོ་རྩིབས་བརྒྱད་པ་རྣམས་ཏེ། ཕྱོགས་རྣམས་སུ་དམར་པོ་དང་མཚམས་རྣམས་སུ་དཀར་པོའོ། །དེ་ལ་ཤར་གྱི་འཁོར་ལོར་ཁྱི་གདོང་མ་ནག་མོ་དང་ལྷོར་ཕག་གདོང་མ་དམར་མོ་དང༌། ནུབ་ཏུ་ཅེ་སྤྱང་གདོང་མ་སེར་མོ་དང༌། བྱང་དུ་སྟག་གདོང་མ་དཀར་མོའོ། །མེ་ལ་སོགས་པ་རྣམས་སུ་ཁྭ་གདོང་མ་དང་བྱ་རྒོད་གདོང་མ་དང་མཁའ་ལྡིང་གདོང་མ་དང་འུག་གདོང་མ་རྣམས་ནི་ནག་མོ་དང་དམར་མོ་དང་སེར་མོ་དང་དཀར་མོའོ། །སྟེང་གི་ནམ་མཁར་ཤིང་རྟ་ལ་སྔོན་མོ་སྐུ་མདོག་སྔོན་མོ་སྟེ་འདིའི་ཤིང་རྟ་ནི་ཤིན་ཏུ་སྔོན་མོའི་ལྟ་བུའོ། །འོག་གི་སའི་འོག་ཏུ་ཤིང་རྟ་ལ་རྡོ་རྗེའི་མིག་ཅན་མ་ལྗང་གུ་སྟེ། འདིའི་ཤིང་རྟ་ནི་དྲག་སྤྱན་མའི་ལྟ་བུའོ། །ཁྱི་གདོང་མ་ལ་སོགས་པ་འདི་དག་ནི་ཟླུམ་པོའི་སྟབས་ཀྱིས་གནས་པ། སྔར་བཤད་པའི་པདྨ་ལ་སོགས་པས་འཁྱུད་པ། གཡས་པ་དང་གཡོན་པའི་ཕྱག་གཉིས་ཀྱིས་གྲི་
གུག་དང་ཐོད་པ་འཛིན་པ། སྤྱན་གསུམ་མ་གཅེར་བུ་ཕྱག་རྒྱ་ལྔ་དང་ལྡན་པ། མི་མགོའི་ཕྲེང་བས་མགུལ་དུ་འཕྱང་བའོ། །སྔར་གྱི་འཁོར་ལོ་བརྒྱད་པོ་རྣམས་ཀྱི་འོག་ཏུ་རིམ་པ་ཇི་ལྟ་བར་བསེ་དང་དོམ་དང་སེང་གེ་དང་འབྲི་དང་བྷེ་རུཎྜ་དང་ཁྲུང་ཁྲུང་དང་མིག་སྔོན་དང་བྱ་མ་བྱི་རྣམས་སོ། །དུར་ཁྲོད་འདི་དག་ཉིད་ལ་རླུང་གི་ཁོར་ཡུག་གི་ཤར་དང་མེའི་མཚམས་སུ་རླུང་གི་དཀྱིལ་འཁོར་དག་ལ་གནས་པའི་ཟླ་བ་དང་ཉི་མའོ། །ལྷོ་དང་བདེན་བྲལ་དུ་མེའི་དཀྱིལ་འཁོར་དག་ལ་གནས་པའི་གཟའ་ལྷག་དང་མིག་དམར་རོ། །ནུབ་དང་རླུང་དུ་སའི་དཀྱིལ་འཁོར་དག་ལ་གནས་པའི་མཇུག་རིངས་དང་སྤེན་པའོ། །བྱང་དང་དབང་ལྡན་དུ་ཆུའི་དཀྱིལ་འཁོར་དག་ལ་གནས་པའི་བ་སངས་དང་ཕུར་བུའོ། །སྟེང་དུ་སྟོང་པའི་དཀྱིལ་འཁོར་དག་ལ་སྒྲ་གཅན་ཏེ། འོག་ཏུ་སྟོང་པའི་དཀྱིལ་འཁོར་དག་ལ་དུས་མེའོ། །དེ་བཞིན་དུ་འདིར་རླུང་གི་ཁོར་ཡུག་ལ་བརྟན་པ་དང་ཨ་གསྟི་དང༌། རྒྱུ་སྐར་ཉི་ཤུ་རྩ་བརྒྱད་དང༌། ཁྱིམ་བཅུ་གཉིས་དང༌། ཆ་བཅུ་དྲུག་དང༌། ཕྱོགས་བཅུའི་འཇིག་རྟེན་སྐྱོང་བ་རྣམས་དང༌། དགའ་བོ་དང་ནག་པོ་ཆེན་པོ་དང་དྲིལ་བུའི་རྣ་བ་ཅན་དང་བྷྲྀངྒི་ཎི་དང༌། ཞིང་སྐྱོང་རྣམས་དང༌། ཕོ་ཉ་རྣམས་དང༌། འཕྲོག་མ་རྣམས་དང༌། གྲུབ་པ་ཐམས་ཅད་ཅེས་བྱ་བ་ལ་སོགས་པ་སྟེ། སྣ་ཚོགས་པའི་སྐུ་མདོག་དང་ཕྱག་མཚན་དང་དབྱིབས་ཅན་བྱེ་བ་ཕྲག་ཕྱེད་དང་བཞིའོ། །འདིར་ཟླ་བ་ལ་སོགས་པའི་ལྷ་རྣམས་ནི་རྡོ་རྗེའི་གདན་གྱིས་གནས་པ་སྟེ་ལྷ་མོ་རྣམས་ནི་རོལ་པའི་སྟབས་ཀྱིས་གནས་པའོ། །གསུང་གི་དཀྱིལ་འཁོར་གྱི་སྟེགས་བུ་ལ་འདོད་པའི་ལྷ་མོ་རྣམས་སོ། །དེ་ཡང་ཤར་གྱི་སྟེགས་བུ་ལ་སྒོའི་གཡས་སུ་དབྱེ་བར་འདོད་མ་སྒྲོལ་མ་ལྟ་བུ་དང༌། གོས་འདོད་མ་རེག་བྱ་རྡོ་རྗེ་མ་ལྟ་བུ་དང༌། ལུས་འཁྲུག་པར་འདོད་མ་ཙ་མུཎྜི་ལྟ་བུ་དང༌། མཆིལ་མ་འདོད་བར་འདོད་མ་ལྟ་བུ་ཁྱབ་འཇུག་མ་ལྟ་བུ་དང༌། སྐྲོད་པར་འདོད་མ་ཤིན་ཏུ་སྟོབས་མ་ལྟ་བུ་སྟེ། སྒོའི་གཡོན་དུ་ཀུན་དུ་གདུང་བར་འདོད་མ་ཤིན་ཏུ་སྔོན་མོ་ལྟ་བུ་དང༌། རེག་བྱ་འདོད་མ་རྡོ་རྗེ་ལྕགས་སྒྲོག་ལྟ་བུ་དང༌། ཡན་ལག་ཐམས་ཅད་བསྐྱོད་པར་འདོད་མ་ཁྱི་གདོང་མ་ལྟ་བུ་དང༌། ལྷག་མ་ཟ་བར་འདོད་མ་
ཁྭ་གདོང་མ་ལྟ་བུ་དང༌། སྒོའི་གཡས་སུ་བསྐྱོད་པར་འདོད་མ་གོས་དཀར་མོ་ལྟ་བུ་དང༌། ཟས་འདོད་མ་རོ་རྡོ་རྗེ་མ་ལྟ་བུ་དང༌། ལུས་ཀྱི་དྲི་མ་འདོད་མ་ཕག་གདོང་མ་ལྟ་བུ་དང༌། གར་འདོད་མ་གཞོན་ནུ་མ་ལྟ་བུ་དང༌། སྐེམ་པར་འདོད་མ་རྨུགས་བྱེད་མ་ལྟ་བུ་སྟེ། གཡོན་དུ་འགུགས་པར་འདོད་མ་ཁྲོ་གཉེར་ཅན་ལྟ་བུ་དང༌། རྒྱུག་པར་འདོད་མ་དྲག་ཅན་མ་ལྟ་བུ་དང༌། བཤང་གཅི་ཟག་པར་འདོད་མ་ཕག་གདོང་མ་ལྟ་བུ་དང༌། གཡུལ་ངོ་འདོད་མ་བྱ་རྒོད་གདོང་མ་ལྟ་བུའོ། །ནུབ་ཀྱི་སྒོའི་གཡས་སུ་རེངས་པར་འདོད་མ་སྤྱན་མ་ལྟ་བུ་དང༌། དྲི་འདོད་མ་དྲི་རྡོ་རྗེ་མ་ལྟ་བུ་དང༌། མལ་སྟན་ལ་སྙེས་པར་འདོད་མ་དབང་མོ་ལྟ་བུ་དང༌། ཆུ་ལ་རྐྱལ་བར་འདོད་མ་ཚངས་མ་ལྟ་བུ་དང༌། གཉེན་འདོད་མ་རེངས་བྱེད་མ་ལྟ་བུའོ། །གཡོན་དུ་འཁྲིག་པ་འདོད་མ་ཆོས་དབྱིངས་རྡོ་རྗེ་མ་ལྟ་བུ་དང༌། ཕུར་བུས་འདེབས་པར་འདོད་མ་འོད་ཟེར་མ་ལྟ་བུ་དང༌། སླུ་འདོད་མ་ཅེ་སྤྱང་གདོང་མ་ལྟ་བུ་དང༌། སྦྲུལ་འཆིང་བར་འདོད་མ་མཁའ་ལྡིང་གདོང་མ་ལྟ་བུ་དང༌། བྱང་གི་སྒོའི་གཡས་སུ་རྒྱས་འདོད་མ་མཱ་མ་ཀཱི་ལྟ་བུ་དང༌། རྒྱན་འདོད་མ་གཟུགས་རྡོ་རྗེ་མ་ལྟ་བུ་དང༌། མལ་སྟན་འདོད་མ་དྲག་མོ་ལྟ་བུ་དང༌། རྒྱལ་སྲིད་འདོད་མ་དཔལ་མོ་ལྟ་བུ་དང༌། འཇམ་པར་སྨྲ་འདོད་མ་ཁེངས་བྱེད་མ་ལྟ་བུ་སྟེ། གཡོན་དུ་རོལ་མོ་འདོད་མ་སྒྲ་རྡོ་རྗེ་མ་ལྟ་བུ་དང༌། འཆི་བར་འདོད་མ་ཙུནད་ལྟ་བུ་དང༌། རྩོད་པ་མང་པོ་འདོད་མ་སྟག་གདོང་མ་ལྟ་བུ་དང༌། བྱིས་པ་བསྡིགས་པར་འདོད་པ་འུག་གདོང་མ་ལྟ་བུའོ། །ལྷ་མོ་སུམ་ཅུ་རྩ་དྲུག་པོ་འདི་རྣམས་བསྒོམ་པར་བྱ་སྟེ། གང་ཡང་གསོད་པར་འདོད་མ་ནི་རྡོ་རྗེ་དབྱིངས་ཀྱི་དབང་ཕྱུག་མས་བསྐྱེད་པ་དང༌། བསྐྱེད་པར་འདོད་མ་ནི་སྣ་ཚོགས་ཡུམ་གྱིས་བསྐྱེད་པའོ་ཞེས་གསུངས་པའི་འདོད་མ་གཉིས་པོ་དེ་དག་ནི་ཇི་ལྟར་རིགས་པར་འདོད་མ་གཞན་དག་ལ་འདུ་བའི་ཕྱིར་ཐ་དད་དུ་བསྒོམ་པར་བྱ་བ་མ་ཡིན་ནོ། །གཞན་ཡང་གང་དང་གང་འདོད་པ་དེ་ཐམས་ཅད་ནི་འདོད་མ་སུམ་ཅུ་རྩ་དྲུག་པོ་འདི་དག་ལ་ཇི་ལྟར་རིགས་པར་བསྡུ་བར་བྱའོ་ཞེས་པའི་བསམ་པ་ཁོ་ནའོ། །བསྡུ་བར་བྱ་བ་རྣམས་ཉེ་བར་མཚོན་པར་བྱེད་པ་ལ་གཞན་དེ་དག་འདོད་མ་གཅིག་སྟེ། དེ་ལྟར་ན་འདོད་མ་སུམ་ཅུ་རྩ་བདུན་ཞེས་གསུངས་སོ། །དེ་ཉིད་ཀྱི་
ཕྱིར་དྲི་མ་མེད་པའི་འོད་ལས། གཞན་ཡང་གང་ཅུང་ཟད་སེམས་ཅན་རྣམས་ཀྱིས་བྱ་བར་འདོད་པ་དེ་ཐམས་ཅད་ནི་འདིར་རྣལ་འབྱོར་མ་རྣམས་ཀྱི་བྱ་བ་ཁམས་ཀྱི་དབང་གིས་སོ་ཞེས་གསུངས་སོ། །དེ་བས་ན་རྡུལ་ཚོན་གྱི་དཀྱིལ་འཁོར་ལ་ལྷ་སུམ་ཅུ་རྩ་དྲུག་གི་ས་བོན་དགོད་པར་བྱ་བར་བཤད་དེ། འོན་ཀྱང་ཕུར་བུས་འདེབས་པར་འདོད་མའི་ས་བོན་སཿ་ཞེས་པ་ནི་ཤར་སྒོའི་གཡོན་དུ་དགོད་པར་གསུངས། སླུ་འདོད་མའི་ས་བོན་ཀཿ་ཞེས་པ་ནི་ལྷོ་སྒོའི་གཡོན་དུའོ། །སྦྲུལ་འཆིང་བར་འདོད་པའི་ས་བོན་ལཿ་ཞེས་པ་ནི་བྱང་སྒོའི་གཡོན་དུ་སྟེ། དེ་ལྟར་འདོད་མའི་ལྷ་མོ་བསྒོམ་པ་ནི་མ་ཡིན་ནོ། །གང་ཡང་དྲི་མ་མེད་པའི་འོད་ལས་འདོད་མ་སུམ་ཅུ་རྩ་བདུན་ནི་གསུང་གི་དཀྱིལ་འཁོར་ལ་རང་རང་གི་རིགས་ཀྱི་དབྱེ་བས་རང་རང་གི་རིགས་ཀྱི་ཕྱོགས་སུའོ་ཞེས་གསུངས་པས། འདི་ཐམས་ཅད་ཀྱང་ངེས་པར་འདོད་པར་རྟོགས་པར་བྱའོ། །དེ་ལྟ་མ་ཡིན་ན་མང་དུ་གསུངས་པའི་འདོད་མ་སུམ་ཅུ་རྩ་དྲུག་ཅེས་པའི་ཚིག་རྣམས་ཕན་ཚུན་འགལ་བར་འགྱུར་རོ། །འདོད་མ་འདི་རྣམས་ལ་ཟློག་པའི་རང་བཞིན་ཕྱིར་འདོད་མ་སུམ་ཅུ་རྩ་དྲུག་ནི་སྐུའི་དཀྱིལ་འཁོར་གྱི་སྟེགས་བུ་རྣམས་ལ་སྔ་མ་བཞིན་དུ་རང་གི་རིགས་ཀྱི་དབང་གིས་རང་རང་གི་ཕྱོགས་རྣམས་སུའོ། །འཁོར་ལོའི་དབང་ཕྱུག་ལ་སོགས་པའི་དེ་བཞིན་གཤེགས་པ་རྣམས་ལས་གཞན་པའི་ལྷ་ཐམས་ཅད་ནི་སྣ་ཚོགས་པའི་རིན་པོ་ཆེའི་ཅོད་པན་ཅན་ནོ། །འདིར་གང་གི་ཚེ་བཅོམ་ལྡན་འདས་དུས་ཀྱི་འཁོར་ལོ་རྡོ་རྗེ་སེམས་དཔའི་ངོ་བོར་རྣམ་པར་བཞུགས་པ་དེའི་ཚེ་མི་བསྐྱོད་པ་ལྗང་གུའི་མདོག་ཅན་གྱིས་རྒྱས་བཏབ་པའོ། །དེ་བཞིན་དུ་གང་གི་ཚེ་སྣ་ཚོགས་ཡུམ་མི་བསྐྱོད་པའི་རང་བཞིན་ཡིན་པ་དེའི་ཚེ་མི་བསྐྱོད་པ་སྔོན་པོའི་གཟུགས་ཅན་གྱི་རྡོ་རྗེ་སེམས་དཔའ་སྔོན་པོས་སོ། །དེ་བཞིན་དུ་སྣ་ཚོགས་ནི་རྡོ་རྗེ་དབྱིངས་ཀྱི་དབང་ཕྱུག་མའི་རང་བཞིན་ཏེ། དེ་ལྟར་ན་ཡེ་ཤེས་དང་རྣམ་ཤེས་དག་ཕན་ཚུན་རྒྱས་བཏབ་པར་འགྱུར་རོ། །དེ་སྐད་དུའང་དྲི་མ་མེད་པའི་འོད་ལས་མཆོག་གི་རྒྱལ་བའི་བདག་པོ་ནི་ཡེ་ཤེས་ཀྱི་ཕུང་པོ་ཡིན་ལ་སྣ་ཚོགས་ཡུམ་ནི་རྣམ་པར་ཤེས་པའི་ཁམས་ཏེ་རྣམ་པར་ཤེས་པ་ནི་ནམ་མཁའི་ཁམས་སོ་ཞེས་གསུངས་སོ། །འདིར་ཡེ་ཤེས་ནི་སྟོང་པ་ཉིད་
དང་སྙིང་རྗེ་རོ་གཅིག་པ་མི་འགྱུར་བའི་བདེ་བ་ཆེན་པོའི་ཡེ་ཤེས་ཏེ། གང་གི་ཚེ་དུས་ཀྱི་འཁོར་ལོ་རྣམ་པར་ཤེས་པའི་ཕུང་པོ་ཡིན་པ་དེའི་ཚེ་སྣ་ཚོགས་ཡུམ་ནི་ནམ་མཁའི་ཁམས་རྡོ་རྗེ་དབྱིངས་ཀྱི་དབང་ཕྱུག་མའི་རག་བཞིན་ནོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་འཁྱུད་པར་གྱུར་པ་རྡོ་རྗེ་དབྱིངས་ཀྱི་དབང་ཕྱུག་མ་ནི་སྣ་ཚོགས་ཡུམ་ཞེས་པ་དང༌། རྡོ་རྗེ་དབྱིངས་ཀྱི་དབང་ཕྱུག་མ་དང་ལྷན་ཅིག་རྣམ་པར་ཤེས་པ་པདྨའི་སྙིང་པོ་ལ་བདེ་བ་ཆེན་པོ་ཞེས་གསུངས་སོ། །དོན་ཡོད་གྲུབ་པ་དང༌། རིན་ཆེན་དབང་པོ་དང༌། རྣམ་པར་སྣང་མཛད་དང༌། སྣང་བ་མཐའ་ཡས་རྣམས་ལ་ནི་མི་བསྐྱོད་པ་ལྗང་གུས་རྒྱས་བཏབ་པ་སྟེ། ཡང་དོན་ཡོད་གྲུབ་པ་ལ་རིན་ཆེན་དབང་པོ་དང༌། རིན་ཆེན་འབྱུང་ལྡན་ལ་སྣང་བ་མཐའ་ཡས་དང༌། དེ་ལ་རྣམ་པར་སྣང་མཛད་དང༌། དེ་ལ་མི་བསྐྱོད་པ་ལྗང་གུས་སོ། །ཤིན་ཏུ་བཟང་པོ་དང༌། སྒྲ་རྡོ་རྗེ་མ་དང་གནོད་མཛེས་རྒྱལ་པོ་དང་ཤིན་ཏུ་སྔོན་མོ་དང་སྔོན་མོ་དང་དྲག་མོ་དང་རྨུགས་བྱེད་མ་དང་རྣམ་པར་རྒྱལ་བའི་ཀླུ་རྣམས་ནི་མི་བསྐྱོད་པ་སྔོན་པོའི་གཟུགས་ཅན་གྱི་རྡོ་རྗེ་སེམས་དཔས་རྒྱས་བཏབ་པ་སྟེ། ཕྱག་ན་རྡོ་རྗེ་དང་ཆོས་དབྱིངས་རྡོ་རྗེ་མ་དང་གཙུག་ཏོར་འཁོར་ལོས་སྒྱུར་བ་དང༌། དྲག་ཅན་མ་དང་ཁྱབ་འཇུག་མ་དང་གཤིན་རྗེ་དང་རྒྱལ་བའི་ཀླུ་རྣམས་ལ་མི་བསྐྱོད་པ་ལྗང་གུས་སོ། །ལྷ་གཞན་ནག་པོ་རྣམས་ལ་དོན་ཡོད་གྲུབ་པ་དང༌། དམར་པོ་རྣམས་ལ་རིན་ཆེན་འབྱུང་ལྡན་དང༌། སེར་པོ་རྣམས་ལ་རྣམ་པར་སྣང་མཛད་དང༌། དཀར་པོ་རྣམས་ལ་སྣང་བ་མཐའ་ཡས་ཀྱིས་སོ། །རྒྱས་འདེབས་ཀྱི་དེ་བཞིན་གཤེགས་པ་དྲུག་པོ་འདི་དག་ནི་འཁོར་ལོས་སྒྱུར་བའི་གཟུགས་སམ། གཙུག་ཏོར་དང་བཅས་ཤིང་སྣམ་སྦྱར་འཛིན་པ་གནོན་ལ་སོགས་པའི་ཕྱག་རྒྱ་དང་ལྡན་པའོ། །བཅོམ་ལྡན་འདས་འཁོར་ལོའི་དབང་ཕྱུག་གི་ཐུགས་ཀའི་ས་བོན་ནི་ཧཱུཾ་སྟེ། སྔགས་གཞན་ནི་རྣམ་པར་རྒྱས་པས་འཇིགས་ནས་མ་བརྗོད་དོ་ཞེས་པ། ཡང་དག་པར་བསྡུས་པའི་རིམ་པས་དཀྱིལ་འཁོར་གྱི་ལྷ་ཐམས་ཅད་ཀྱི་སྐུ་མདོག་དང་ཕྱག་མཚན་དང་ཕྱག་དང་ཞབས་ལ་སོགས་པ་བསྒོམ་པའི་ཆོ་གའོ། །དེ་ནས་དེར་རྡུལ་ཚོན་གྱི་དཀྱིལ་འཁོར་རམ་རས་རིས་ལ་སོགས་པའི་དཀྱིལ་འཁོར་
རམ། ཡིད་ཀྱི་དཀྱིལ་འཁོར་མངོན་སུམ་དུ་བྱས་པར་ཇི་ལྟར་བཤད་པའི་མཆོད་པ་ལ་སོགས་པ་སྔོན་དུ་འགྲོ་བས་སློབ་མ་རབ་ཏུ་གནས་པ་བཞིན་དུ་སྐུ་གཟུགས་ལ་སོགས་པ་རབ་ཏུ་གནས་པ་ཡང་བྱའོ། །དེ་ལ་དཀྱིལ་འཁོར་གཞན་དུ་ཡང་སྔར་བཤད་པའི་ཆོ་གས་དང་པོར་བུམ་པ་ལྷག་པར་གནས་པ་དང་དགོད་པ་བྱས་ནས་སྐུ་གཟུགས་ལ་སོགས་པ་སྟོང་པ་ཉིད་ཀྱི་རྗེས་ལ་ས་བོན་ལ་སོགས་པ་ལས་རྫོགས་པའམ། སྐད་ཅིག་གིས་ཀྱང་རུང་སྟེ་དམ་ཚིག་སེམས་དཔའི་ངོ་བོ་ཐུགས་ཀའི་ས་བོན་དང་བཅས་པ་བསམས་ལ་གོས་གསར་པ་དམར་པོ་ལ་སོགས་པས་གཡོགས་ཤིང་མེ་ཏོག་དང་ལྡན་པར་བྱའོ། །དེ་ནས་འདིའི་མེ་ཏོག་གི་ཕྲེང་བ་བླངས་ཏེ་སྦྱིན་པའི་བདག་པོ་དང་སྐུ་གཟུགས་ལ་སོགས་པ་ལྷན་ཅིག་སློབ་མ་བཞིན་དུ་རྡུལ་ཚོན་གྱི་དཀྱིལ་འཁོར་ལ་སོགས་པ་གང་ཡང་རུང་བའི་དཀྱིལ་འཁོར་དུ་བཞུགས་པར་བྱའོ། །སློབ་དཔོན་གྱིས་ཀྱང་སྐུ་གཟུགས་ལ་སོགས་པ་ལྷག་པའི་ལྷའི་མཚན་མ་འམ་དེའི་རིགས་ཀྱི་བདག་པོའི་མཚན་མ་ལ་མེ་ཏོག་འབུལ་དུ་གཞུག་གོ །དེ་ནས་དཀྱིལ་འཁོར་གྱི་ཁང་པའི་ཕྱི་རོལ་དུ་ཤར་གྱི་ཕྱོགས་སམ། དེར་སྐབས་མེད་ན་དབང་ལྡན་དུ་ཧ་ཅང་མི་རིང་ཞིང་ཡིད་དུ་འོང་བའི་གནས་སུ་ཁྲུས་ཀྱི་སྟེགས་བུ་འོད་ཟེར་དང་བཅས་པའི་དཀྱིལ་འཁོར་གྱི་ཕྱེད་ཀྱི་ཚད་དང་ལྡན་པ། དེའི་ཕྱེད་དུ་མཐོ་བ། ས་སེལ་ལ་སོགས་པའི་ཉེས་པ་དང་བྲལ་བའི་ལས་བྱས་པའམ། སོ་ཕག་ལ་སོགས་པ་ལས་བྱས་པ་འམ། དེ་མེད་ན་ཇི་ལྟར་རྙེད་པ་འམ་ཇི་ལྟར་གནས་པའི་གཞིར་ཡང་རུང་སྟེ་འབྲས་བཏགས་པའི་ཁུ་བ་ལ་སོགས་པས་བྲིས་པའི་སྟེགས་བུ་ཕྱོགས་དང་མཚམས་སུ་བུམ་པ་བརྒྱད་གཞག་པ་ཤིན་ཏུ་འཇམ་པ། བདུད་རྩི་དང་བཅས་པའི་བའི་རྣམ་པ་ལྔ་ལ་སོགས་པས་བྱུགས་པ། བླ་རེ་དང་གདུགས་དཀར་པོ་དང་རྒྱལ་མཚན་དང་བ་དན་དང་བུམ་པ་གང་བ། མེ་ཏོག་དང་གར་དང་གླུ་དང་རོལ་མོ་ལ་སོགས་པས་སམ་ཇི་ལྟར་རྙེད་པས་ཀྱང་རུང་ཡིད་དུ་འོང་བ་བྱས་ནས། ཚེས་དང་གཟའ་རྒྱུ་སྐར་དང་ཡུད་ཙམ་ལ་སོགས་པ་བཟང་པོ་ལ་ཁྲུས་བྱས་ཤིང་དོ་ཤལ་དང་རྐང་གདུབ་དང་དཔུང་རྒྱན་དང་རྣ་རྒྱན་དང་གདུ་བུ་དང་སོར་གདུབ་ལ་སོགས་པས་བརྒྱན་པ་འམ་ཇི་ལྟར་
རྙེད་པས་བརྒྱན་པའི་སློབ་དཔོན་རྡོ་རྗེ་སེམས་དཔའི་སྐུ་རིག་མ་དང་བཅས་པས། སྟེགས་བུའི་དབུས་སུ་སྒོ་ནུབ་ཏུ་བསྟན་པའི་རེ་ཁཱ་གྲུ་བཞི་པ་ཅིག་གིས་བསྐོར་བའི་སྣ་ཚོགས་ཆུ་སྐྱེས་རྡུལ་ཚོན་ནམ། འབྲས་བཏགས་པའི་ཁུ་བ་ལ་སོགས་པས་བྲི་བར་བྱ་སྟེ། ཡང་ན་རིམ་པ་གཉིས་པ་གྲུ་བཞི་པ་རྟ་བབས་མེད་པའོ། །ཤར་ལ་སོགས་པའི་སྣམ་བུ་རྣམས་ལ་འཁོར་ལོ་དང་རིན་པོ་ཆེ་དད་པདྨ་དང་རལ་གྲི་རྣམས་དང༌། མཚམས་རྣམས་སུ་སྤྱན་དང་རྡོ་རྗེ་དང་པདྨ་དང་ཨུཏྤལ་རྣམས་ཏེ་དབུས་སུ་སྣ་ཚོགས་ཆུ་སྐྱེས་འདབ་མ་བརྒྱད་པའོ། །དེའི་སྟེང་དུ་པདྨ་འདབ་བརྒྱད་བྲིས་པའི་ཤིང་སྟན་ནམ་ཟླ་བའི་དཀྱིལ་འཁོར་བྲིས་པའི་རས་ལ་སོགས་པས་གཡོགས་པའི་སེང་གེའི་ཁྲི་ལ་ཁྲུས་ཀྱི་དཀྱིལ་འཁོར་གྱི་པདྨའི་ལྟེ་པའི་སྟེང་དུ་འཇོག་པར་མོས་པ་ལ་སོགས་པས་བཞག་ནས་སམ། ཁྲུས་ཀྱི་དཀྱིལ་འཁོར་མེད་པར་ཡང་དེ་བཞིན་ཉིད་དེ། གཞན་དུ་ཡང་ཤིང་སྟན་ལ་སོགས་པར་སྒོམ་པའི་དཀྱིལ་འཁོར་ལ་སྐུ་གཟུགས་དང་རས་རིས་དང་གླེགས་བམ་དང་མཆོད་རྟེན་ལ་སོགས་པ་ཤར་དུ་མངོན་པར་ཕྱོགས་པའམ། གཞན་དུ་མངོན་པར་ཕྱོགས་པར་ཡང་གཞག་པར་བྱའོ། །གང་ཡང་གནས་གཞན་དུ་བསྐྱོད་པར་མི་ནུས་པའི་གཙུག་ལག་ཁང་དང་མཆོད་རྟེན་དང་དྲིའི་གཙང་ཁང་དང་སྐུ་གཟུགས་ལ་སོགས་པ་དེ་དག་ནི་སྔ་མ་བཞིན་དུ་དམ་ཚིག་སེམས་དཔའི་གཟུགས་སུ་བསྒོམས་ལ་དཀྱིལ་འཁོར་བརྟན་པར་མོས་པར་བྱ་སྟེ། དེ་དག་ལ་ཁྲུས་ཀྱི་སྟེགས་བུ་ནི་དགོད་པ་མེད་དོ། །གཉིས་ཀ་ལ་ཡང་སྐྱོན་མེད་པའི་དུས་སུ་སྐུ་གཟུགས་ལ་སོགས་པ་མངོན་དུ་བྱས་ཏེ། དེ་ལ་མངོན་དུ་ཕྱོགས་པས་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་སམ། མཆོད་ཡོན་ལ་སོགས་པ་མ་ཕུལ་ཡང་རུང་སྟེ་སྦྱང་བར་བྱའོ། །དེ་ཡང་ཨོཾ་ཨཱཿ་བིགྷྣཱནྟྲ་ཀྲྀཏ་ཧཱུཾ་ཞེས་པ་འཁྱིལ་པའི་སྔགས་དང་ཧཱུཾ་ཡིག་ལན་བདུན་བཟླས་པའི་དོན་གྲུབ་གཡས་པ་དང་ཅིག་ཤོས་ཀྱི་ཁུ་ཚུར་གྱིས་གཟུང་ནས་རེ་རེ་ཞིང་གཡོན་སྐོར་དུ་ལན་གཉིས་སུ་སརྦྦ་པཱ་པཾ་ད་ཧ་ན་བཛྲ་སཏྭ་སྱ་སརྦྦ་པཱ་པ་ད་ཧ་སྭཱ་ཧཱ། ཞེས་བརྗོད་ཅིང་བྱ་བས་ལ་དོན་གྲུབ་མེར་དོར་ཏེ་གཡས་སྐོར་གྱིས་ཀྱང་དེ་བཞིན་ཏེ། དེ་ལྟར་གཡོན་དང་གཡས་སུ་ཆུ་ཡིས་ཀྱང་བྱ་ཞིང༌། དེ་བཞིན་དུ་ཁན་
ཕོར་དཀར་པོ་རྣམས་དང༌། དེ་བཞིན་དུ་དཱུར་བའི་མྱུ་གུ་དང་བཅས་པའི་པའི་བ་ལྕིའི་ཆད་བུ་རྣམས་དང༌། དེ་བཞིན་དུ་མར་མེ་དང་བཅས་པའི་ཟན་གྱི་ཆད་བུ་རྣམས་དང༌། དེ་བཞིན་དུ་སེར་རས་རྣམས་ཀྱིས་ཀྱང་སྟེ་འོན་ཀྱང་ཁམ་ཕོར་ལ་སོགས་མེར་དོར་བ་ནི་མ་ཡིན་ནོ། །དེ་ལ་ལ་ལ་དག་གིས་སྐུ་གཟུགས་ལ་སོགས་པ་ལ་ཉེ་རེག་བྱ་ཞིང་འཁོར་ལོའི་དབང་ཕྱུག་གི་སྔགས་ཀྱིས་སྐུ་གཟུགས་ལ་སོགས་པ་ཇི་ལྟར་རིགས་པར་དངོས་སུའམ་མེ་ལོང་ལ་གཟུགས་བརྙན་ཤར་བའི་ཐུགས་ཀར་དྲིའི་བྱུག་པ་དང༌། དབུལ་མེ་ཏོག་གི་ཕྲེང་བ་བཅིང་བ་དང་མདུན་དུ་མཆོད་ཡོན་དབུལ་བ་བྱས་ནས་མར་མེས་ཡོངས་སུ་བསྐོར་ཏེ་འཁྱིལ་པ་དང་ཧཱུཾ་ཡིག་ལན་བདུན་བཟླས་པའི་མར་དང་བཅས་པའི་སྤོས་དཀར་གྱིས་བདུག་པར་བྱའོ་ཞེས་པ་སྦྱང་བའི་ཆོ་གའོ། །དེའི་རྗེས་ལ་འཁྱིལ་པ་བཟླས་པའི་དཱུར་བའི་ཆུན་པོས་ཟངས་ཀྱི་སྣོད་ན་གནས་པའི་ཞོ་དང་འོ་མ་དང་མར་དང་སྦྲང་རྩི་དང་ཀར་བསྲེས་པའི་ངོ་བོ་བདུད་རྩི་ལྔ་དང་དེའི་རྗེས་ལ་བའི་འོ་མ་དང་ཞོ་དང་མར་དང་ལྕི་བ་དང་ཆུ་སྟེ་བའི་རྣམ་པ་ལྔས་སྐུ་གཟུགས་ལ་སོགས་པ་བཀྲུ་བར་རིགས་པ་རྣམས་ལ། ཨོཾ་ཧཱུཾ་ཏྲཱཾ་ཧྲཱིཿ་ཨཿ་ཞེས་པའི་སྔགས་ཀྱིས་བྱུག་པར་བྱའོ། །རས་བྲིས་དང་གླེགས་བམ་དང་ས་ལ་སོགས་པ་ལས་བྱས་པ་འམ། བྲིས་པའི་སྐུ་གཟུགས་ལ་སོགས་པ་ནི་མེ་ལོང་ལ་གཟུགས་བརྙན་ཤར་བ་ལའོ། །དེ་ནས་འཁྱིལ་པ་བཟླས་པའི་ཆུ་གཙང་མ་དྲི་ཞིམ་པོས་བཀྲུས་ནས་འཁར་བའི་སྣོད་དུ་གཞག་པའི་ཉ་གྲོ་དྷ་དང༌། ཨུ་དུམྦཱ་ར་དང༌། པླཀྵ་དང༌། པིསྦ་ལ་དང༌། གནྡྷ་མུཎྜ་སྟེ་ཤིང་ལྔའི་ཤུན་པའི་ཕྱེ་མས་རྣམ་པར་མཉེས་ལ། ཨོཾ་སརྦ་ཏ་ཐཱ་ག་ཏ་ཀཱ་ཡ་བི་ཤོ་དྷ་ནེ་སྭཱ་ཧཱ་ཞེས་པའི་སྔགས་ཟློས་ཤིང་འཁར་གཞོང་ན་གནས་པའི་དྲི་ཞིམ་པོའི་ཏིལ་མར་གྱིས་བྱུགས་ལ་མཉེས་ཏེ་འཁར་གཞོང་ན་གནས་པའི་སྐྱུ་རུ་རས་བྱུག་པར་བྱའོ། །དེ་ལྟར་བཀྲུས་ནས་འཁར་གཞོང་ན་གནས་པའི་ཡུང་བས་བྱུགས་ཏེ་བཀྲུས་ལ་ཤྲི་ཁཎྜ་དང་ཙནྡན་དམར་པོ་དང་གུར་གུམ་དང༌། གྲནྠི་ཀ་དང༌། ཨ་ཀ་རུ་རྣམས་སམ། གུར་གུམ་དང༌། ཨ་ཀ་རུ་དང༌། གླ་ཙི་དང༌། ག་བུར་ལ་སོགས་པ་ཇི་ལྟར་རྙེད་པས་ཀྱང་རུང་བས་བྱུགས་ནས། སྙིང་གའི་ས་བོན་གྱི་འོད་ཟེར་གྱིས་བཀུག་པའི་
དེ་བཞིན་གཤེགས་པ་དང་ལྷ་མོ་རྣམས་ཀྱི་བུམ་པས་འཁྲུད་བཞིན་པ་དང་བཀྲ་ཤིས་ཀྱི་གླུ་དང་སྣ་ཚོགས་པའི་རོལ་མོ་སྔོན་དུ་འགྲོ་བས་རྣམ་པར་རྒྱལ་བ་ལ་སོགས་པ་བུམ་པའི་ཆུ་དང༌། དུང་ཆོས་སམ་གཞན་དུ་བླུགས་པ་རྣམས་ཀྱིས། ཇི་ལྟར་བལྟམས་པ་ཙམ་གྱིས་ནི། །ཞེས་པ་ལ་སོགས་པ་འཆད་པར་འགྱུར་བ་བརྗོད་ཅིང་སྐུ་ཁྲུས་གསོལ་བར་བྱའོ། །དེ་ལ་གོས་པའི་ཆུ་ན་བཟའ་འཇམ་པོས་ཕྱིས་ནས་ཇི་ལྟར་ནུས་པའི་ན་བཟའ་ལ་སོགས་པས་བརྒྱན་པར་བྱའོ། །དེ་ནས་སྙིང་གའི་སྔགས་ཀྱི་འོད་ཟེར་གྱིས་རབ་ཏུ་གནས་པར་བྱ་བའི་ཡེ་ཤེས་སེམས་དཔའ་དང་སངས་རྒྱས་དང་བྱང་ཆུབ་སེམས་དཔའ་ལ་སོགས་པའི་ལྷ་རྣམས་མདུན་གྱི་ནམ་མཁར་སྤྱན་དྲངས་ལ། མཆོད་ཡོན་ལ་སོགས་པ་སྔོན་དུ་འགྲོ་བས་པུས་མོ་གཡས་པ་ས་ལ་བཙུགས་ནས། གཡོན་པས་དྲིལ་བུ་དཀྲོལ་ཞིང་གཡས་པས་སྤོས་ཕོར་གཟུང་སྟེ། ལྕེ་ཧཱུཾ་ལས་སྐྱེས་པའི་རྡོ་རྗེར་བྱས་ལ། བཅོམ་ལྡན་ཆེ་གེ་རྡོ་རྗེ་མཆོག །རིག་པའི་རྒྱལ་པོ་ཁྱོད་ལ་འདུད། །སློབ་མ་རྣམས་ལ་བརྩེ་དོན་དང༌། །ཁྱེད་རྣམས་ལ་ཡང་མཆོད་པའི་ཕྱིར། །སེམས་ཅན་བསོད་ནམས་སྤེལ་དོན་དུ། །བྱང་ཆུབ་སེམས་ནི་བསྐྱེད་པའི་ཕྱིར། །མགོན་པོ་ཐུགས་རྗེའི་བདག་ཉིད་ཅན། ཁྱེད་ཀྱི་རབ་གནས་བགྱིད་པར་འཚལ། །དེ་ཕྱིར་བཅོམ་ལྡན་བདག་གུས་ལ། །བཀའ་དྲིན་གནང་བར་མཛད་པའི་རིགས། །སངས་རྒྱས་འགྲོ་འཁོར་བྱ་དོན་བརྩོན། །འབྲས་གནས་བྱང་ཆུབ་སེམས་དཔའ་དང༌། །སྔགས་ཀྱི་ལྷ་གཞན་གང་ལགས་དང༌། །ལྷ་དང་འཇིག་རྟེན་སྐྱོང་བ་དང༌། །འབྱུང་པོ་བྱང་ཆུབ་བརྟེན་གནས་དང༌། །སེམས་ཅན་བསྟན་ལ་མངོན་དགའ་བ། །གང་གཞན་རྡོ་རྗེའི་སྤྱན་ལྡན་རྣམས། །བདག་ལ་ཡང་དག་དགོངས་སུ་གསོལ། །རྡོ་རྗེ་ཅན་ཆེན་ཆེ་གེ་དག །ཆེ་གེའི་རབ་ཏུ་གནས་པའོ། །བགྱིའོ་དེ་ཕྱིར་ཁྱེད་རྣམས་ཀྱིས། །ཉེ་བར་གནས་པར་མཛད་པར་རིགས། །ཞེས་ལན་གསུམ་བརྗོད་པར་བྱའོ། །དེ་ལྟར་འདིར་རིགས་ཞེས་པའི་བར་གྱིས་རབ་གནས་པའི་དོན་དུ་ལྷག་པར་གནས་པ་དང༌། ལྷག་མ་རྣམས་ཀྱིས་ནི་ཉེ་བར་གནས་པར་གསོལ་བ་བཏབ་ནས། ནམ་མཁར་གནས་པའི་ལྷའི་འཁོར་ལོ་ཡང་དག་པར་མཆོད་དེ་ཕྱག་འཚལ་ཞིང་བསྟོད་ལ། ཨོཾ་བཛྲ་
པུ་ན་རཱ་ག་མ་ནཱ་ཡ་མུཿ་ཞེས་པས་གཤེགས་སུ་གསོལ་བར་བྱའོ། །ཁྲུས་བྱས་པའི་སྐུ་གཟུངས་ལ་སོགས་པའི་ཐུགས་ཀ་དང་སྤྱི་བོ་དང་མགྲིན་པ་དང་ཕྱག་དང་སྤྱི་གཙུག་རྣམས་སུ་ཡང་དག་པར་བྱུགས་ནས་མཆོད་ལ་འཁྱིལ་པའི་སྔགས་ཀྱིས་རྡོ་རྗེ་དང་བཅས་པའི་ལག་པ་གཡས་པས་ལན་གསུམ་རེག་ཅིང་ཇི་ལྟར་རིགས་པར་རང་ཉིད་ཀྱི་སྔགས་སམ་འཁྱིལ་པའི་སྔགས་བཟླ་བར་བྱ་སྟེ། ཕྱོགས་ཀྱི་གཏོར་མ་ཡང་དབུལ་ལོ། །གང་དུ་ལྷ་ལྷག་པར་གནས་པ་མ་བྱས་པར་རབ་ཏུ་གནས་པར་བྱེད་པ་ལ་ནི་ལྷག་པར་མོས་པ་བརྟན་པར་བྱའོ། །དེས་ན་ལྷག་པར་གནས་པ་མ་བྱས་པ་ཉིད་ལྷག་པར་གནས་པའི་དོན་དུ་བརྗོད་དེ། རབ་ཏུ་གནས་པའི་དོན་དུ་འཆད་པར་འགྱུར་བའི་ཚིག་ཐམས་ཅད་ཉི་མ་གཅིག་ལ་བྱའོ། །འོན་ཀྱང་སྦྱང་བ་ལ་སོགས་པ་མཐུན་པའི་ཆོ་ག་རྣམས་ནི་ལན་ཅིག་ཁོ་ན་བྱའི་སླར་ཡང་མ་ཡིན་ནོ། །དེ་ལ་ཡང་སྦྱིན་པའི་བདག་པོ་ལ་ནུས་པ་ཡོད་ན་ནི་བསོད་ནམས་ཀྱི་ཚོགས་ཉེ་བར་བསགས་པའི་དོན་དུ་ལྷག་པར་གནས་པ་བྱ་བ་ཉིད་དོ་ཞེས་པ་ལྷ་ལྷག་པར་གནས་པའི་ཆོ་གའོ།། །།དེའི་རྗེས་སུ་སྔ་བར་དེ་བཞིན་དུ་ཁྲུས་ཀྱི་སྟེགས་བུ་ཡིད་དུ་འོད་བ་བྱེད་དུ་བཅུག་ནས་ཡུང་ཙམ་ལ་སོགས་པ་བཟང་པོ་ལ། །དེ་ལྟར་རྒྱན་དང་ལྡན་པའི་སློབ་དཔོན་རྡོ་རྗེ་འཆང་གི་ངོ་བོ་ཤེས་རབ་དང་བཅས་པ་འདུག་སྟེ། གཏོར་མ་དང་མཆོད་པ་སྔོན་དུ་འགྲོ་བས། སྐུ་གཟུགས་ལ་སོགས་པ་དེ་ལྟར་གཞག་པ་དང༌། ལྷ་ཁང་ལ་སོགས་པ་ཇི་ལྟར་གནས་པ་རྣམས་དམ་ཚིག་སེམས་དཔའི་གཟུགས་སུ་བསྐྱེད་པར་བྱའོ། །དེ་ཡང་རྒྱུད་དང་མངོན་པར་རྟོགས་པ་དང་སྒྲུབ་ཐབས་ལ་སོགས་པ་ལྷའི་ཁྱད་པར་བསྐྱེད་པའི་རིམ་པ་རིགས་པས་ལྷའི་ཁྱད་པར་སོ་སོར་བྱས་པ་གང་ཡིན་པ་དེ་སྟོང་པ་ཉིད་ཀྱི་རྗེས་ལ་རིམ་པ་ཇི་ལྟ་བ་བཞིན་ནམ་ཅིག་ཅར་ཡང་རུང་སྟེ། ཇི་ལྟ་བུའི་དམ་ཚིག་སེམས་དཔའི་གཟུགས་སུ་བསྒོམ་པར་བྱའོ། །གླེགས་བམ་རྣམས་ནི་ཡི་གེའི་ཚོགས་མ་ལུས་པ་སྟོད་པ་ཉིད་ཀྱི་རྗེས་སུ་པདྨ་དམར་པོ་དང་ཉི་མ་ལ་ཧྲཱིཿ་དམར་པོ་ལས་བྱུང་བའི་ཆུ་སྐྱེས་དང་ཧྲཱིཿ་ཡིག་ཡོངས་སུ་གྱུར་པ་ལས་གོས་དཀར་མོས་འཁྱུད་པའི་སྣང་བ་མཐའ་ཡས་ཏེ། དེ་ཡོངས་སུ་གྱུར་བ་ལས་ཡང་དག་པར་བྱུང་བའི་ཡི་གེའི་རྣམ་པ་
རྣམས་སྣང་བ་མཐའ་ཡས་ཀྱི་གཟུགས་བརྙན་ཤར་བའི་དམ་ཚིག་སེམས་དཔར་གནས་པའོ་ཞེས་བསམ་བར་བྱའོ། །མར་མེ་མཛད་དང་གཙུག་ལག་ཁང་ལ་སོགས་པ་རྣམས་ནི་སྟོང་པ་ཉིད་ཀྱི་རྗེས་སུ་པདྨ་དང་ཟླ་བ་ལ་བྷཱུཾ་དཀར་པོ་ལས་སྐྱེས་པའི་འཁོར་ལོ་རྩིབས་བརྒྱད་པ་དང༌། བྷཱུཾ་ལས་བྱུང་བའི་རྣམ་པར་སྣང་མཛད་སྤྱན་མས་འཁྱུད་པ་ལས་མར་མེ་མཛད་ཀྱི་རྣམ་པའམ་གཙུག་ལག་ཁང་གི་གཟུགས་སམ། དྲིའི་གཙང་ཁང་གི་གཟུགས་སམ། མཆོད་རྟེན་གྱི་གཟུགས་སུའོ། །འོན་ཀྱང་གཙུག་ལག་ཁང་ནི་རྣམ་པར་སྣང་མཛད་ཤེས་རབ་དང་བཅས་པའི་གཟུགས་བརྙན་ཤར་བའི་དམ་ཚིག་སེམས་དཔའི་གཟུགས་སུ་གནས་པ་སྟེ། དེ་བཞིན་དུ་དྲིའི་གཙང་ཁང་དང་མཆོད་རྟེན་ཡང་བསྒོམ་པར་བྱའོ། །དེ་ལྟར་དམ་ཚིག་སེམས་དཔའ་བསྐྱེད་ནས་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་དུ་སྦྱང་བར་བྱའོ། །དེ་ནས་དེ་མ་ཐག་ཏུ་བརྗོད་པའི་ཆོ་གས་བདུད་རྩི་ལྔས་བྱུག་པ་ལ་སོགས་པ་དང་གུར་གུམ་ལ་སོགས་པས་བྱུག་པ་དང་བཀྲུ་བ་དང་གོས་པའི་ཆུ་ཕྱི་བའི་མཐར་ཐུག་པ་རྣམས་བྱས་ནས་དཀྱིལ་འཁོར་གྱི་ཁང་བར་གཞུག་ཅིང་དཀྱིལ་འཁོར་གྱི་དབང་ལྡན་གྱི་མཚམས་སམ་དེར་སྐབས་མེད་ན་གཞན་དུ་ཡང་རུང་སྟེ། ཧ་ཅང་ཡང་མི་རིང་བར་དཀྱིལ་འཁོར་ལ་མངོན་དུ་ཕྱོགས་པར་སྐུ་གཟུགས་ལ་སོགས་པ་གཞག་པར་བྱའོ། །གཙུག་ལག་ཁང་ལ་སོགས་པ་བསྐྱོད་པར་མི་ནུས་པ་རྣམས་ནི་རང་གི་གནས་ན་གནས་པ་ཁོ་ནའོ། །ཇི་ལྟར་རིགས་པར་དེ་དག་གི་ཐུགས་ཀའི་ས་བོན་དང་མིག་ལ་སོགས་པ་དང་སྐུ་ལ་སོགས་པ་རྣམས་བྱིན་གྱིས་བརླབ་པ་སྒོམ་པ་སྔོན་དུ་འགྲོ་བས་རང་གི་སྙིང་གའི་ས་བོན་གྱི་འོད་ཟེར་རྣམས་ཀྱིས་བདག་ཉིད་ཇི་ལྟ་བའི་ཡེ་ཤེས་སེམས་དཔའ་སྤྱན་དྲངས་བ་ལ་སོགས་པ་དེ་མ་ཐག་ཏུ་བརྗོད་པ་རྣམས་བྱ་སྟེ། བཅོམ་ལྡན་ཞེས་པ་ནས་རིགས་ཞེས་པའི་བར་ལན་གསུམ་བརྗོད་ཅིང༌། ཇི་ལྟར་རིགས་པར་སྙིང་གའམ་ལྷ་རྣམས་ཀྱི་འོད་ཟེར་གྱིས་ཡེ་ཤེས་སེམས་དཔའ་བཀུག་ནས་རང་ཉིད་ཇི་ལྟ་བའི་དམ་ཚིག་སེམས་དཔའ་ལ་གཞུག་ཅིང་རོ་གཅིག་ཏུ་བྱས་ཏེ་དབང་དུ་བྱའོ། །དེ་ནས་རང་གི་སྙིང་གའི་ས་བོན་གྱི་འོད་ཟེར་གྱིས་ཕྱོགས་བཅུ་ན་བཞུགས་པའི་དེ་བཞིན་གཤེགས་པ་དང་སྤྱན་མ་ལ་སོགས་པའི་ལྷ་མོ་རྣམས་མདུན་དུ་ནམ་མཁར་སྤྱན་དྲངས་ཏེ། མཆོད་ནས་སྐུ་གཟུགས་ལ་སོགས་
ལ་སོགས་པ་དབང་བསྐུར་བའི་དོན་དུ། རྡོ་རྗེ་ཅན་གྱིས་སངས་རྒྱས་ལ། །འགྲོ་བ་བསྐྱབ་པའི་ཆེད་དུ་དབང༌། །ཇི་ལྟར་ཡོན་ཏན་འབྱུང་གནས་སྩལ། །དེ་ལྟར་འདི་ལ་སྩལ་དུ་གསོལ། །ཞེས་བྱ་བའི་ཚིགས་སུ་བཅད་པར་གསོལ་བ་གདབ་པར་བྱའོ། །དེ་བཞིན་གཤེགས་པ་རྣམས་ཀྱང་ཤེས་རབ་དང་སྙོམས་པར་ཞུགས་པས་ཆགས་པ་ཆེན་པོས་ཞུ་བར་གྱུར་ནས། རང་གི་རྣམ་པར་སྣང་མཛད་ཀྱི་ལམ་ནས་ཞུགས་ཏེ། རྡོ་རྗེའི་ལམ་ནས་ཕྱུང་བའི་ཁུ་བ་དེ་རྣམས་ཀྱིས་སྐུ་གཟུགས་ལ་སོགས་པ་ཁ་ནས་པདྨར་ཞུགས་པ་ལ་དབང་བསྐུར་ནས་སླར་ཡང་ཞལ་ཕྱག་ལ་སོགས་པའི་གཟུགས་ཀྱིས་པདྨ་ལས་ཕྱིར་ཕྱུང་བ་ལ་ནམ་མཁའ་ཀུན་ནས་གང་བར་བཞུགས་པའི་སྤྱན་མ་ལ་སོགས་པའི་རིགས་མ་རྣམས་དང་ལྷན་ཅིག་གདུགས་དང་རྒྱལ་མཚན་དང་གར་དང་གླུ་དང་རོལ་མོའི་སྒྲ་དང་མེ་ཏོག་དང་གུར་གུམ་ལ་སོགས་པའི་ཆར་འབེབས་བཞིན་པ་དང༌། ཕྱག་གིས་བྱང་ཆུབ་ཀྱི་སེམས་ཀྱི་བདུད་རྩིས་གང་བའི་བུམ་པ་དཀར་པོ་ཅུང་ཟད་ཡོ་བར་བཟུང་བས་སྐུ་གཟུགས་ལ་སོགས་པ་པདྨ་ནས་ཕྱིར་ཕྱུང་བ་དེ་ལ་དབང་བསྐུར་བཞིན་པ་དང༌། གཟུགས་རྡོ་རྗེ་མ་ལ་སོགས་པས། བཀྲ་ཤིས་གང་ཞིག་ཅེས་པ་ལ་སོགས་པའི་བཀྲ་ཤིས་ཀྱི་གླུ་རྣམས་རྣལ་འབྱོར་མ་རྣམས་ཀྱིས་ལེན་བཞིན་པ་དང༌། བདག་ཉིད་ཀྱིས་ཀྱང་དེ་རྣམས་ལེན་བཞིན་བས་རྣམ་པར་རྒྱལ་བ་ལ་སོགས་པའི་བུམ་པའི་ཆུ་གཅིག་ཏུ་བསྡུས་པ་དུད་ཆོས་སུ་བླུགས་པའམ། རིམ་པ་ཇི་ལྟ་བ་བཞིན་དུ་རེ་རེས་ཀྱང་རུང་ལག་པས་འདབ་མ་དང་བཅས་པའི་རྡོ་རྗེ་གཟུང་བའི་རྩེ་མོ་ལས་འབབ་པའི་བྱང་ཆུབ་ཀྱི་སེམས་ཀྱི་བདུད་རྩིའི་ངོ་བོས། །ཇི་ལྟར་བ་ལྟམས་བ་ཙམ་གྱིས་ནི། དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་བགྱི། ཨོཾ་ཨཱཿ་སརྦྦ་ཏ་ཐཱ་ག་ཏ་ཨ་བྷི་ཥེ་ཀ་སམ་ཡ་ཤྭི་ཡེ་ཧཱུཾ་སྭཱ་ཧཱ། ཨོཾ་བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་ཞེས་བརྗོད་ཅིང༌། བཅོམ་ལྡན་འདས་རྡོ་རྗེ་སེམས་དཔའ་ཉིད་བླ་མ་དམ་པ་དཀྱིལ་འཁོར་གྱི་གཙོ་བོའི་གཟུགས་སུ་འཁྲུར་འཇུག་པ་དང༌། ཁྲུས་གསོལ་བར་བརྟན་པར་མོས་པས་དབང་བསྐུར་བར་བྱའོ་ཞེས་པ་ཆུའི་དབང་ངོ༌། །དེ་བཞིན་གཤེགས་པ་ལྔས་བྱིན་གྱིས་བརླབས་པའི་རིན་པོ་ཆེ་དང་རས་ལ་སོགས་པ་ལས་བྱས་པའི་དབུ་
རྒྱན། ཨོཾ་ཨཱཿ་བཛྲ་ཨ་བྷི་ཥིཉྩ་ཧཱུཾ་ཞེས་བརྗོད་ཅིང་དཀྱིལ་འཁོར་གྱི་དབང་པོའི་གཟུགས་ཅན་རྡོ་རྗེ་འཛིན་པ་བླ་མ་ཉིད་ཀྱིས་བསྐོན་པར་མཛོད་ཅེས་བརྟན་པར་མོས་པར་སྐུ་གཟུགས་ལ་སོགས་པའི་ལྷའི་དབུ་ལ་བསྐོན་པར་བྱའོ་ཞེས་པ་ཅོད་པན་གྱི་དབང་ངོ༌། །དཔའ་བོ་ལ་ནི་ཨོཾ་ཧཱུཾ་ཏྲཱཾ་ཧྲཱིཿ་ཨཱཿ་ཞེས་པའི་སྔགས་ཀྱིས་དཔྲལ་བར་དར་དཔྱད་བཅིང་བར་བྱའོ། །སངས་རྒྱས་ཀུན་གྱི་རྡོ་རྗེ་ཡི། །དབང་གིས་དེ་རིང་ཁྱོད་དབང་བསྐུར། །འདི་དེ་སངས་རྒྱས་ཐམས་ཅད་ཉིད། །རབ་ཏུ་གྲུབ་ཕྱིར་རྡོ་རྗེ་ཟུང༌། །ཞེས་བརྗོད་ཅིང་རྡོ་རྗེ་དེ་བཞིན་དུ་རྡོ་རྗེ་སེམས་དཔའ་ཉིད་ཀྱིས་གཏོད་པར་ལྷག་པར་མོས་པས་གཏད་པར་བྱའོ། །དེ་ཡང་སྐུ་གཟུགས་ལ་སོགས་པའི་ལྷ་རྣམས་ཀྱིས་བཟུང་བར་ལྷག་པར་མོས་པར་བྱ་སྟེ། རྡོ་རྗེའི་དབང་ངོ༌། །ཨོཾ་བཛྲ་ཨ་དྷ་བ་ཏི་སྟྭཱཾ་ཨ་བྷི་ཥིཉྩཱ་མི་ཏིཥ་བཛྲས་མ་ཡ་སྟྭཾ། ཞེས་བརྗོད་ཅིང་དེ་ལྟ་ལྷག་པར་མེས་པས་དྲིལ་བུ་གཏད་པར་བྱ་སྟེ། དེ་ཡང་སྐུ་གཟུགས་ལ་སོགས་པའི་ལྷ་ཡིས་གཟུང་བར་མོས་པར་བྱ་བ་ནི་དྲིལ་བུའི་དབང་ངོ༌། །ཨོཾ་བཛྲ་སཏྭ་ཏྭཱཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏཿ་ཨོཾ་ཆེ་གེ་མོ་བཛྲ་སཏྭཾ་ཞེས་བརྗོད་ཅིང༌། དེ་བཞིན་དུ་རྡོ་རྗེ་སེམས་དཔའ་ཉིད་སྐུ་གཟུགས་ལ་སོགས་པ་ལ་རང་ཉིད་ཇི་ལྟ་བ་བཞིན་དུ་མིང་འདོགས་པར་ལྷག་པར་མོས་པས་བརྗོད་པར་བྱ་སྟེ་མིང་གི་དབང་ངོ༌། །སྐུ་གཟུགས་ལ་སོགས་པའི་རྡོ་རྗེ་དང་དྲིལ་བུར་བཅས་པའི་ཕྱག་གིས་ཡེ་ཤེས་ཀྱི་ཕྱག་རྒྱལ་འཁྱུད་པའི་ཚུལ་བྱ་བར་བསྒོམས་ལ་དེ་མ་ཐག་ཏུ་བརྗོད་པའི་ཆུའི་དབང་གི་ཆོ་གས་མངོན་པར་དབང་བསྐུར་ཏེ་རང་རང་གི་རིགས་ཀྱི་བདག་པོས་སྤྱི་བོར་རྒྱས་བཏབ་པོ། །རིགས་མི་ཤེས་པ་རྣམས་ལ་མི་བསྐྱོད་པའམ་རྡོ་རྗེ་སེམས་དཔས་རྒྱས་གདབ་པར་བྱ་སྟེ། དེ་བཞིན་གཤེགས་པ་དང༌། བྱང་ཆུབ་སེམས་དཔའ་དང༌། ལྷ་མོ་གཞན་རྣམས་ནི་དེ་ཉིད་དུ་ཡེ་ཤེས་སེམས་དཔའི་ངོ་བོར་བཅུག་ནས། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབ་བོ། །གཙུག་ལག་ཁང་དང་མཆོད་རྟེན་ལ་ནི་ཨོཾ་ཧཱུཾ་ཧྲཱིཿ་བྷྲཱུཾ་ཁཾ་བཛྲི་བྷ་ཝ་དྲྀ་ཌྷོ་ཏིཥྛ་བྷྲཱུཾ་ཁཾ་ཞེས་པ་སྔགས་ཀྱིས་ཏེ། གླེགས་བམ་ལ་ནི་ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཨོཾ་ཧཱུཾ་ཧྲཱིཿ་ཏྲཱཾ་ཞེས་བྱ་བའི་སྔགས་དག་གིས་སོ་ཞེས་པ་སློབ་དཔོན་གྱི་དབང་ངོ༌། །དེའི་རྗེས་སུ་སྐུ་གཟུགས་
ལ་སོགས་པ་དང་རྗེས་སུ་མཐུན་ཞིང་སྦྱིན་པའི་བདག་པོ་བསོད་ནམས་སྤེལ་བར་མངོན་པར་འདོད་པ་དང་བསྟུན་ནས། གསེར་གྱི་ཐུར་མས་དངུལ་གྱི་ཀོང་བུར་གཞག་པའི་མར་དང་སྦྲང་རྩི་བསྐུས་པས། ཨོཾ་ཙཀྵུཿ་ཙཀྵུཿ་ས་མནྟ་ཙཀྵུཿ་བི་ཤོ་དྷ་ནེ་སྭཱ་ཧཱ། ཞེས་བརྗོད་ཅིང་མིག་སྨན་གྱིས་སྐུ་གཟུགས་ཀྱི་སྤྱན་དབྱེ་བར་བྱའོ། །གླེགས་བམ་ལ་སོགས་པ་ལ་ནི་ལྷ་རྣམས་མེ་ལོང་ལ་བསྒོམས་པའི་གཟུགས་བརྙན་ལ་སྟེ་ཞི་བ་ལ་སོགས་པའི་དོན་དུ་སྦྱིན་པའི་བདག་པོ་ལ་གཟིགས་པ་མཆོག་གི་ལྷ་ཉིད་དུ་ལྷག་པར་མོས་པར་བྱའོ། །དེ་ནས་ཨོཾ་བཛྲ་སཏྭ་ཨཱཿ་ཞེས་པའི་སྔགས་ཀྱིས་མེ་ལོང་བསྟན་པར་བྱའོ། །མདའ་འཕང་བ་ལ་སོགས་པ་བསྒོམ་པར་བྱ་སྟེ་ཐམས་ཅད་རྗེས་སུ་གནས་པའོ། །དེའི་རྗེས་སུ་འཁོར་ལོའི་དབང་པོའི་སྐུ་རྡོ་རྗེ་འཛིན་ར་རང་གི་ཐུགས་ཀའི་ས་བོན་གྱི་འོད་ཟེར་རྣམས་ཀྱིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་ཚོགས་རིག་མ་དང་བཅས་པ་རྣམ་པར་སྣང་མཛད་ཀྱི་སྒོ་ནས་བཅུག་ཅིང་ཞུ་བར་གྱུར་པས་བདེ་བ་ཆེན་པོ་ཉམས་སུ་མྱོང་ནས། རྡོ་རྗེ་པདྨ་དག་གིས་ཁ་ནས་སྤྲོས་པའི་བྱང་ཆུབ་ཀྱི་སེམས་ཀྱི་ངོ་བོ་སྐུ་གཟུགས་ལ་སོགས་པའི་ལྷ་རྣམས་ཀྱི་ཞལ་དུ་རབ་ཏུ་འབེབས་པར་བསམ་པར་བྱའོ་ཞེས་པ་གསང་བའི་དབང་ངོ༌། །དེ་ནས་རྡོ་རྗེ་འཛིན་པ་དེས་གཏང་བའི་ལྷ་མོ་དང་སྙོམས་པར་ཞུགས་པས་སྐུ་གཟུགས་ལ་སོགས་པའི་ལྷ་རྣམས་ལྷན་ཅིག་སྐྱེས་པའི་དགའ་བའི་རང་བཞིན་དུ་མོས་པར་བྱའོ་ཞེས་པ་ཤེས་རབ་ཡེ་ཤེས་ཀྱི་དབང་ངོ༌། །དེའི་རྗེས་སུ་རྡོ་རྗེ་སེམས་དཔའ་དས་རབ་ཏུ་བསྟན་པའི་དབང་བཞི་པའི་རང་བཞིན་གྱིས་སྐུ་གཟུགས་ལ་སོགས་པའི་ལྷ་རྣམས་བག་ཆགས་དང་བཅས་པའི་སྒྲིབ་པ་སྤངས་པའི་བདེ་བ་ཆེན་པོ་སྟོང་པ་ཉིད་དང་སྙིང་རྗེ་རོ་གཅིག་པར་མོས་པར་བྱའོ་ཞེས་པ་དབང་བཞི་པའོ། །དེ་ནས་སྐུ་གཟུགས་ལ་སོགས་པའི་ལྷ་རྣམས་ལ་རང་རང་གི་སྙིང་པོའི་སྔགས་ཀྱིས་ན་བཟའ་ལ་སོགས་པ་དབུལ་བར་བྱའོ། །ཡང་ན་ཨོཾ་ཨཱཿ་བཛྲ་བཱ་ས་སེ་ཧཱུཾ་སྭཱ་ཧཱ། ཨོཾ་ཨཱཿ་བཛྲ་པུཤྤཻ་ཧཱུཾ་སྭཱ་ཧཱ། ཨཱོཾ་ཨཱཿ་བཛྲ་དྷཱུ་པེ་ཧཱུཾ་སྭཱ་ཧཱ། ཨོཾ་ཨཱཿ་བཛྲ་དྷི་པེ་ཧཱུཾ་སྭཱ་ཧཱ། ཨོཾ་ཨཱཿ་བཛྲ་ནཻ་བི་ཏྱེ་ཧཱུཾ་སྭཱ་ཧཱ། ཨོཾ་ཨཱཿ་བཛྲ་གནྡྷ་ཧཱུཾ་སྭཱ་ཧཱ། ཨོཾ་སརྦ་ཨཱ་བ་ར་ཎ་བི་བྷྱ་ཥ་ཎེ་ཧཱུཾ་སྭཱ་ཧཱ། ཞེས་པའི་སྔགས་འདི་རྣམས་ཀྱིས་སོ། །ཨོཾ་ཨཱཿ་སརྦ་ཤ་ཤོ་དྷ་ནཻ་ཧཱུཾ་ཕཊ། འབྲས་བུ་དང་མེ་
ཏོག་ལ་སོགས་པ་དང་དངོས་པོ་སྣ་ཚོགས་པ་གསང་བའི་སྔགས་སོ། །ཨོཾ་བཛྲཾ་སྭཱ་ཧཱ་འབྲས་བུ་དབུལ་བའི་སྔགས་སོ། །དེའི་རྗེས་སུ་འཆད་པར་འགྱུར་བའི་ཆོ་གས་ཞི་བའི་སྦྱིན་སྲེག་གིས་ཚིམ་པར་བྱས་ནས་སྦྱིན་སྲེག་གི་ཐབ་ཀྱི་མེ་འམ། དེ་མེད་ན་ཡང་མེ་གཞན་ལ་ཡང་ཙཱ་རུའི་བཟའ་བ་བསྒྲུབ་པར་བྱའོ། །ཕྱི་ནས་འོ་ཐུག་དང་དམ་ཚིག་གི་རྫས་དང་གི་ཝང་ཡང་དབུལ་ཏེ། ཨོཾ་དི་བྱ་ཨགྣེ་ས་མཱ་དྷི་དྷྱེ་ན་པྲི་ཎ་ནེ་སྭཱ་ཧཱ། ཞེས་པའི་སྔགས་བརྗོད་ཅིང་སྐུ་གཟུགས་དང་གླེགས་བམ་ལ་སོགས་པ་ལ་བསྒོམས་པའི་གཟུགས་བརྙན་ཤར་བའི་ལྷ་རྣམས་གསོལ་དུ་གཞུག་པར་བྱའོ། །དེ་ནས་ཞལ་བསིལ་དང་ཙནྡན་ལ་སོགས་པའི་ཕྱེ་མ་དང་སོ་རྩི་རྣམས་ཀྱང་ཕུལ་ནས། ཨོཾ་ཧཱུཾ་ཏྲཱཾ་ཧྲཱྀཿ་ཨཱཿ་ཞེས་པས་དམ་ཚིག་བསྒྲག་པར་བྱའོ། །དེ་ནས་སྣང་བ་མཐའ་ཡས་ཤེས་རབ་དང་བཅས་པ། གླེགས་བམ་གྱི་ཡི་གེ་རྣམས་ལ་བཅུག་ནས་ཡི་གེའི་གཟུགས་དང༌། རྣམ་པར་སྣང་མཛད་རིག་མ་དང་བཅས་པ་གཙུག་ལག་ཁང་ངམ་མཆོད་རྟེན་རྣམས་ལ་བཅུག་ནས་གཙུག་ལག་ཁང་གི་གཟུགས་ནི་རྫོགས་པའི་སངས་རྒྱས་དང་དེའི་ཆོས་དང༌། བྱང་ཆུབ་སེམས་དཔའ་དང༌། ཉན་ཐོས་ལ་སོགས་པའི་རྟེན་དང༌། ཏིང་ངེ་འཛིན་སྣ་ཚོགས་པའི་གཞི་དང༌། མཆོད་རྟེན་གྱི་ཕྱི་གཟུགས་ནི་འཁོར་བ་ཇི་སྲིད་དུ་འགྲོ་བའི་དོན་བྱ་བའི་ཕྱིར་རྡོ་རྗེ་སེམས་དཔའ་ལ་སོགས་པས་བྱིན་གྱིས་བརླབས་པར་བསམ་པར་བྱའོ། །དེ་ནས་མེ་ཏོག་ལ་སོགས་པ་ཕུལ་ཏེ་ཐལ་མོ་སྦྱར་ནས། ཇི་ལྟར་རྫོགས་པའི་སངས་རྒྱས་ཀུན། །དགའ་ལྡན་དུ་ནི་རབ་བཞུགས་ནས། །ལྷ་མོ་སྒྱུ་འཕྲུལ་ལྷུམས་ཞུགས་ལྟར། །དེ་བཞིན་སྐུ་གཟུགས་འདིར་བཞུགས་མཛོད། །འདིར་ནི་མགོན་པོ་རྟག་བཞུགས་ནས། །མེ་ཏོག་ལ་སོགས་མཆོད་པ་འདི། །བྱང་ཆུབ་སེམས་ནི་རྣམ་སྤེལ་ཕྱིར། །ཆེ་གེའི་དོན་དུ་བཞེས་སུ་གསོལ། །ཞེས་པ་འདིས་ཡུན་རིང་དུ་གནས་པའི་དོན་དུ་གསོལ་བ་བཏབ་ནས་འཁྱིལ་བའི་སྔགས་བཟླས་ཤིང་སྐུ་གཟུགས་ལ་སོགས་པའི་འོག་དང་བར་དང་སྟེང་གི་ཆ་རྣམས་ལ་ལག་པ་གཡས་པས་རྡོ་རྗེ་གསོར་པ་ལན་གསུམ་སྐོར་ན་བརྟན་པར་བྱ་སྟེ། མི་བསྐྱོད་རྡོ་རྗེ་ཡེ་ཤེས་ཆེ། །རྡོ་རྗེ་དབྱིངས་ནི་མཁས་ཆེན་པོ། །རྡོ་རྗེ་གསུམ་མཆོག་དཀྱིལ་འཁོར་གསུམ། །རྡོ་
རྗེ་དབྱིངས་ཁྱོད་ཕྱག་འཚལ་ལོ། །རྣམ་པར་སྣང་མཛད་དག་པ་ཆེ། །རྡོ་རྗེ་ཞི་བ་དགའ་ཆེན་པོ། །རང་བཞིན་འོད་གསལ་མཆོག་གི་མཆོག །སྟོན་པ་རྡོ་རྗེ་ཁྱོད་ཕྱག་འཚལ། །རིན་ཆེན་རྒྱལ་པོ་རབ་ཏུ་ཟབ། །རྡོ་རྗེ་ནམ་མཁའ་དྲི་མེད་མཁའ། །རང་བཞིན་དག་པ་གོས་པ་མེད། །རྡོ་རྗེ་སྐུ་ཁྱོད་ཕྱག་འཚལ་ལོ། །རྡོ་རྗེ་དཔག་མེད་རྒྱལ་པོ་ཆེ། །མི་རྟོག་ནམ་མཁའ་རྡོ་རྗེ་འཛིན། །འདོད་ཆགས་ཕ་རོལ་ཕྱིན་པ་བརྙེས། །རྡོ་རྗེའི་གསུང་ཁྱོད་ཕྱག་འཚལ་ལོ། །དོན་ཡོད་རྡོ་རྗེ་རྫོགས་སངས་རྒྱས། །བསམ་པ་ཐམས་ཅད་ཡོངས་རྫོགས་མཛད། །དག་པ་ངོ་བོ་ཉིད་ལས་བྱུང༌། །རྡོ་རྗེ་སེམས་དཔའ་ཁྱོད་ཕྱག་འཚལ། །ཞེས་བྱ་བའི་ཚིགས་སུ་བཅད་པ་རྣམས་ཀྱིས་བསྟོད་པ་བྱའོ། །ཆོ་ག་མ་ཚང་བ་ལ་སོགས་པའི་ཉེས་པ་ཞི་བར་བྱ་བའི་དོན་དུ། ཨོཾ་བཛྲ་ས་ཏྭ་ས་མ་ཡ་མ་ནུ་པཱ་ལ་ཡ་ཞེས་པ་ལ་སོགས་པའི་ཡི་གེ་བརྒྱ་པའི་སྔགས་ལན་གསུམ་བརྗོད་ནས། མ་རྙེད་ཡོངས་སུ་མ་ཤེས་དང༌། །མ་ནུས་པ་ཡིས་ཆད་པ་དང༌། །གཞན་ཡང་ནོངས་པ་གང་བ་གྱིས་པ། །དེ་ཀུན་ཐུགས་རྗེས་བཟོད་མཛད་རིགས། །ཞེས་པས་བཟོད་པར་གསོལ་ཏེ། །རྫོགས་སངས་རྒྱས་དང་ལྷ་མོ་དང༌། །དེ་སྲས་རྣམས་དང་ཚངས་ལ་སོགས། །ལྷ་ཀླུ་རྣམས་ཀྱི་ཆོ་ག་གང༌། །མ་ཚང་ལ་སོགས་བཟོད་མཛད་རིགས། །མེ་ཆུ་ས་དང་རླུང་རྣམས་དང༌། །སྐུ་གཟུགས་ཡུན་རིང་བསྲུང་དུ་གསོལ། །སྦྱིན་བདག་རྣམས་དང་དེ་སྲས་སོགས། །སློབ་མ་རྣམས་དང་བདག་ལ་ཡང༌། །དེ་རྣམས་མ་ཉེས་ནས་ཐམས་ཅད་དུ། །ཞི་རྒྱས་བདེ་ལེགས་མཛད་དུ་གསོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་པས་ལན་གསུམ་གསོལ་བ་གདབ་ཅིང་ཕྱོགས་ཀྱི་གཏོར་མ་རྣམས་དང༌། འབྱུང་པོ་ཐམས་ཅད་པའི་གཏོར་མ་ཡང་དབུལ་བར་བྱའོ། །སྦྱིན་པའི་བདག་པོས་ཀྱང་སྐུ་གཟུགས་ལ་སོགས་པ་ལ་བསྐོར་བ་དང་མཆོད་པ་དང་ཕྱག་བྱས་ནས། སློབ་དཔོན་ཡང་དག་པའི་ཡོན་རྣམས་ཀྱིས་ཡོངས་སུ་མཉེས་པར་བྱའོ། །འདིར་ནི་སྣང་བ་མཐའ་ཡས་གཙོ་བོའི་དཀྱིལ་འཁོར་དུ་གླེགས་བམ་རབ་ཏུ་གནས་པར་བྱ་སྟེ། རྣམ་པར་སྣང་མཛད་གཙོ་བོ་ལ་ནི་གཙུག་ལག་ཁང་ལ་སོགས་པའོ། །མི་བསྐྱོད་པ་གཙོ་བོ་འམ་རྡོ་རྗེ་སེམས་དཔའ་
གཙོ་བོ་ལ་ནི་སྐུ་གཟུགས་ཐམས་ཅད་དང་རིགས་མི་ཤེས་པ་རྣམས་ཀྱང་རབ་ཏུ་གནས་པར་བྱའོ། །ཡང་ན་ལྷ་གང་གི་རིགས་གང་ཡིན་པ་ཤེས་ན་ནི། རིགས་དེའི་དེ་བཞིན་གཤེགས་པ་གཙོ་བོའི་དཀྱིལ་འཁོར་དུའོ། །འགའ་ཞིག་ཏུ་ནི་སྐུ་གང་རབ་ཏུ་གནས་བྱ་བར། །རྒྱུད་གང་ལས་ནི་རྣམ་གཞག་པ། །དེར་ནི་དེ་ཡི་དཀྱིལ་འཁོར་བྱ། །ཡང་ན་རང་གི་ལྷག་པའི་ལྷ། །སློབ་དཔོན་རང་གི་གང་ཡིན་པ། །དེ་ལ་དབྱེ་བ་མཐོང་བར་བྱ། །ཞེས་སོ། །འདིར་དེ་ཡི་ཞེས་པ་ནི་སྐུ་གཟུགས་ཀྱི་སྟེ་དེ་ཉིད་དཀྱིལ་འཁོར་གྱི་བདག་པོ་ཉིད་ཀྱིས་སོ། །རང་གི་ལྷག་པའི་ལྷ་ནི་སྐུ་དེའི་རིགས་ཀྱི་བདག་པོ་དེ་བཞིན་གཤེགས་པ་སྟེ་འདིར་ནི་དེའི་དཀྱིལ་འཁོར་བྱའོ། །ཡང་ན་སློབ་དཔོན་རང་གིས་ནི་བདག་ཉིད་ཀྱི་དཀྱིལ་འཁོར་བྱ་སྟེ་འདིས་གང་བསྒོམ་པ་དེ་ཉིད་འདིའོ་ཞེས་པ་ཕྱོགས་གསུམ་དུ་བརྗོད་དོ། །འདིས་ནི་རྒྱུད་གཞན་གང་ཡང་རུང་བར་གསུངས་པའི་ཆོ་ག་དེ་ལྟ་བུའི་དཀྱིལ་འཁོར་དུ་ཡང༌། རྒྱུད་གཞན་དུ་གསུངས་པའི་ལྷ་རྣམས་ཀྱི་རབ་ཏུ་གནས་པ་རིགས་ཏེ། ཇི་ལྟར་གསུངས་པའི་གཙོ་བོའི་དཀྱིལ་འཁོར་ཉིད་ཀྱིས་དེའི་རིགས་ཀྱི་དཀྱིལ་འཁོར་རྣམས་བསྡུས་པའི་ཕྱིར་རོ། །མདོར་བསྡུས་པ་རབ་ཏུ་གནས་པ་ནི། སྐུ་གཟུགས་ལ་སོགས་པ་སྟོང་པ་ཉིད་ཀྱི་རྗེས་སུ་སྐད་ཅིག་གིས་དེ་དང་དེའི་དམ་ཚིག་སེམས་དཔའི་སྤྱན་དང་སྐུ་ལ་སོགས་པ་བྱིན་གྱིས་བརླབ་པ་བསྐྱེད་ནས། དེ་ལ་དེའི་ཡེ་ཤེས་སེམས་དཔའ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པ་བཅུག་ལ། རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་ལ་སོགས་པས་དབང་བསྐུར་ཞིང་རང་གིས་ཀྱང་བུམ་པའི་ཆུས་མངོན་པར་དབང་བསྐུར་ཏེ་མཆོད་ནས་དེའི་སྔགས་བརྒྱ་རྩ་བརྒྱད་བཟླས་པར་བྱའོ་ཞེས་པས། སྐུ་གཟུགས་ལ་སོགས་པ་རབ་ཏུ་གནས་པར་འགྱུར་རོ། །གང་གི་ཚེ་དེ་བཞིན་གཤེགས་པའི་གདུང་ལ་བཀུར་སྟིའི་ཁྱད་པར་བྱ་བར་འདོད་ན་དེའི་ཚེ་སྒྲུབ་པའི་དུས་ཉིད་དུ་སྐུ་གཟུགས་དབུ་འམ་རྒྱབ་ཏུ་མཆོད་རྟེན་གྱི་ནང་སྟོང་བ་བྱས་ཏེ། གྲུབ་ན་གྲོ་ག་ལ་གུར་ཀུམ་དང་གི་ཝང་དག་གིས། ན་མོ་བྷ་ག་ཝ་ཏེ་ཤཱཀྱ་མུ་ན་ཡེ་ཏ་ཐཱ་ག་ཏ་ཡ་ཨརྷ་ཏེ་ས་མྱཀྶཾ་བུདྡྷཱ་ཡ། ཏདྱ་ཐཱ། ཨོཾ་མུ་ནི་མུ་ནི་མུ་ཧཱ་མུ་ན་ཡེ་སྭཱ་ཧཱ། ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་བ་དཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ། ཞེས་པའི་གཟུངས་ཀྱི་ཁྱད་པར་
བྲིས་ནས་དེ་ཁྲུས་བྱས་པའི་གདུང་ལ་དཀྲིས་ཏེ། ཨོཾ་མནྟྲ་དྷཱ་ཏུ་གརྦྷཱ་ཡ་སྭཱ་ཧཱ། ཞེས་བརྗོད་ཅིང་སྟོང་པར་གཞུག་གོ །ཨོཾ་བཛྲ་དྷཱ་ཏུ་གརྦྷཱ་ཡ་སྭཱ་ཧཱ། ཞེས་བརྗོད་ཅིང་རྡོ་རྗེའི་དགག་པས་སྟོང་པའི་སྒོ་བཀག་ནས་སྔ་མ་བཞིན་དུ་རབ་ཏུ་གནས་པར་བྱའོ། །གཞན་དག་ཏུ་ནི་ཀྱེའི་རྡོ་རྗེ་དང་བདེ་མཆོག་ལ་སོགས་པའི་སྐུ་གཟུགས་ལ་ཡང་འདུས་པའི་དམ་ཚིག་བསྐྱེད་པ་དང༌། ཡེ་ཤེས་པའི་དཀྱིལ་འཁོར་གཞུག་པ་དང་མངོན་པར་དབང་བསྐུར་བ་བྱས་པས་རབ་ཏུ་གནས་པར་འགྱུར་བ་ཉིད་དེ། འདུས་པ་ནི་བླ་ན་མེད་པའི་ཕྱིར་རོ། །དེའི་རྗེས་ལ་དེ་མ་ཐག་ཏུ་འདུས་པའི་དམ་ཚིག་པ་དང་ཡེ་ཤེས་པའི་དཀྱིལ་འཁོར་གྱི་དབང་ཕྱུག་ནི་བདེ་མཆོག་ལ་སོགས་པའི་གཟུགས་སུ་གསལ་བར་བསྒོམ་པར་བྱ་སྟེ། དེའི་སྐུ་གཟུགས་ཀྱང་དེའི་གཟུགས་ཉིད་དུ་ཅི་ལྟར་འགལ་ཞེས་གསུངས་སོ། །རིག་མ་རབ་ཏུ་གནས་པ་ནི་སློབ་དཔོན་རྡོ་རྗེ་འཆང་གི་གཟུགས་སམ། རིག་མ་བདག་པོའི་གཟུགས་སུ་བྱས་ཏེ་རིག་མ་ལ་རིག་མའི་བདག་པོ་དང་དེའི་ཡེ་ཤེས་སེམས་དཔའ་གཞུག་པ་ལ་སོགས་པ་ཆོ་ག་ཇི་ལྟ་བ་བཞིན་དུ་བསྒོམ་པར་བྱའོ། །དེ་བཞིན་དུ་ཇི་ལྟར་རིགས་པར་བསྒྲུབ་བྱའི་ཁྱད་པར་རྣམས་ཀྱང་ངོ༌། །དེ་ནས་རིག་མའི་བདག་པོ་ནི་སྔགས་རྣམས་དང༌། བསྒྲུབ་བྱ་རྣམས་ནི་རང་གི་མིང་ལ་བཅུག་ནས་རིག་མའི་སྤྱི་བོའི་བུ་ག་འམ་ཁ་ནས་བཅུག་སྟེ་རྡོ་རྗེའི་ལམ་ནས་ཕྱུང་བ་ལྷ་མོའི་པདྨར་ཞུགས་པ་ལ་སྙིང་གའི་འོད་ཟེར་གྱིས་བཀུག་པའི་དེ་བཞིན་གཤེགས་པ་དེ་ལྟར་ཞུགས་པ་རྣམས་ཀྱིས་དབང་བསྐུར་ཞིང་ཕྱིར་ཕྱུང་བ་རྣམས་ཀྱིས་ཕྱིར་ཕྱུང་བ་རྣམས་ལ་དབང་བསྐུར་བའི་ཚེ་བུམ་པའི་ཆུས་མངོན་པར་དབང་བསྐུར་བར་བྱ་སྟེ། ཡང་དག་པར་མཆོད་ནས་རིག་མའི་བདག་པོའི་སྙིང་པོ་བརྒྱ་རྩ་བརྒྱད་བཟླས་པར་བྱའོ་ཞེས་པ་རིག་མ་རབ་ཏུ་གནས་པའི་ཆོ་གའོ།། །།སློབ་དཔོན་རྡོ་རྗེ་འཆང་གི་གཟུགས་ཀྱིས་ལག་པ་གཡས་པའི་སོར་མོ་རྣམས་རྡོ་རྗེ་འཆང་གི་གཟུགས་ཀྱིས་ལག་པ་གཡས་པའི་སོར་མོ་རྣམས་རྡོ་རྗེ་རྩེ་ལྔ་པའི་ངོ་བོར་སྐད་ཅིག་གིས་བསྒོམ་པ་ལ་ཨཿ་ཡིག་ལས་སྐྱེས་པའི་ཉི་མ་ཨཿ་ཡིག་གིས་བྱིན་གྱིས་བརླབས་པ་དང༌། ལག་པ་གཡོན་པའི་སོར་མོ་རྣམས་པདྨའི་འདབ་མ་སྐད་ཅིག་གིས་བསམ་པ་ལ་ཨ་ཡིག་ལས་སྐྱེས་པའི་ཟླ་བ་དེས་བྱིན་གྱིས་བརླབས་པར་རྣམ་པར་བསྒོམས་ནས། དེ་དག་གི་བར་དུ་གཟུང་བའི་ཕྲེང་ཐག་གི་སྐུད་པ་དབུས་
མ་རྡོ་རྗེ་སེམས་དཔའི་རང་བཞིན་དང༌། ཕྱོགས་དང་ཕྱོགས་བྲལ་གྱི་སྐུད་པ་རྣམས་ཕྱག་ན་པདྨ་དང་བྱམས་པ་དང་ནམ་མཁའི་མཛོད་དང་ཀུན་དུ་བཟང་པོ་དང་ཕྱག་ན་རྡོ་རྗེ་དང་འཇམ་དཔལ་དང་སྒྲིབ་པ་ཐམས་ཅད་རྣམ་པར་སེལ་བ་དང་སའི་སྙིང་པོ་རྣམས་ཀྱི་རང་བཞིན་དང༌། ཕྲེང་རྡོག་རྣམས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པའི་རང་བཞིན་དང༌། མདོ་འཛིན་ནི་སྟོབས་དང་མི་འཇིགས་པ་ལ་སོགས་པའི་ཆོས་ཀྱི་མཆོད་རྟེན་གྱི་རང་བཞིན་དུ་སྐད་ཅིག་གིས་ལྷག་པར་མོས་ནས་སྙིང་གའི་ས་བོན་གྱི་འོད་ཟེར་གྱིས་བཀུག་པའི་རྡོ་རྗེ་སེམས་དཔའ་ལ་སོགས་པ་རྣམས་རང་ཉིད་ཇི་ལྟ་བ་ལ་བཅུག་སྟེ། ཨཀྑ་རུ་ཀཱ་ར་ཎ་རཱུ་ཨ་སོ་ཧི་ཨ་མནྟ་བི་སཱ་རུ་ག་ཎི་ཨ། ཨ་སཾ་ཁ་ཨ་ལིཀྐ་སིརྫ་ཨུ་ཏཏྟ་བི་སཱ་རུ། ཨོཾ་པ་དེ་པ་དེ་མ་ཧཱ་ཛྙཱ་ནཾ་སརྦ་བུདྡྷ་མ་ཧཾ་བྷ་ཝེ་ཧཱུཾ་ཧཱུཾ་ཧོ་ཧོ་ཨ་ཁཾ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབ་ཅིང༌། བུམ་པའི་ཆུས་མངོན་པར་དབང་བསྐུར་ནས་མཆོད་པར་བྱའོ་ཞེས་པ་ཕྲེང་བ་རབ་ཏུ་གནས་པའོ། །མདོར་བསྡུས་པ་ནི་བགྲང་ཕྲེང་གསུང་རྡོ་རྗེར་རྣམ་པར་བསྒོམས་ནས་ཡེ་ཤེས་སེམས་དཔའ་དང་གཅིག་ཏུ་བྱས་ཏེ། དེ་ཡོངས་སུ་གྱུར་པ་ལས་བགྲང་ཕྲེང་གི་རྣམ་པར་བསམས་ལ་བུམ་པའི་ཆུས་མངོན་པར་དབང་བསྐུར་ཞིང་མཆོད་ནས་གསུང་རྡོ་རྗེའི་སྙིང་པོ་བརྒྱ་རྩ་བརྒྱད་བཟླས་སོ་ཞེས་པ། མདོར་བསྡུས་པས་བགྲང་ཕྲེང་རབ་ཏུ་གནས་པའི་ཆོ་གའོ།། །།ད་ནི་རྡོ་རྗེ་མཁའ་འགྲོའི་རྒྱུད་ལས་གསུངས་པའི་བགྲང་ཕྲེང་གི་ཆོ་ག་བྲི་བར་བྱ་སྟེ། ཞི་རྒྱས་དེ་བཞིན་དབང་དང་ནི། །མངོན་སྤྱོད་དང་ནི་ལས་ཀུན་ལ། །རྡོ་རྗེ་འཛིན་པས་མཉམ་བཤད་པ། །བོ་དྷི་ཙི་ནི་རབ་ཏུ་བསྟན། །ཤེལ་དང་ཉ་ཕྱིས་དག་དང་ནི། །མུ་ཏིག་དང་ནི་ཁམས་ཀུན་སྐྱེས། །དེ་བཞིན་དུང་གི་མི་དག་རྣམས། །ཚེ་དང་ལང་ཚོ་འཕེལ་བར་བྱེད། །གསེར་དང་དེ་བཞིན་དངུལ་དང་ནི། །པདྨའི་ས་བོན་དེ་བཞིན་མཆོག །འདི་ཡི་སྦྱོར་བའི་སྔགས་ཀྱིས་ནི། །དབང་ཕྱུག་ལྷག་པར་འགྲོ་བར་འགྱུར། །གུར་གུམ་ལ་སོགས་དྲི་བཟངས་དང༌། །ཁྱད་པར་དུ་ནི་བྱི་རུ་དང༌། །ཙནྡན་དམར་པོ་དག་དང་ནི། །དེ་བཞིན་དམར་པོ་གཞན་ལ་ཡང༌། །སྒྲུབ་པ་པོ་ཡིས་རིལ་བུ་བྱ། །སྔགས་ཀྱི་རྒྱལ་པོའི་སྦྱོར་བ་ཡིས། །དབང་དང་རྗེས་སུ་ཆགས་པ་མཆོག །སྒྲུབ་པ་པོ་ལ་འབྲས་རབ་
སྟེར། །རུ་ཏྲཱཀྵ་དང་དེ་བཞིན་དུ། །ལུང་ཏང་ས་བོན་མི་རུས་ཏེ། །འདི་ཡི་བཟླས་པས་དྲག་པོ་དང༌། །མངོན་སྤྱོད་ལ་ནི་འབྲས་རབ་སྟེར། །ཞི་བ་ལ་ནི་བརྒྱ་ཕྲག་གཅིག །རྒྱས་ལ་དེ་བཞིན་ལྷག་པ་བརྒྱད། །དབང་ལ་ཉི་ཤུ་རྩ་ལྔ་སྟེ། །སྔགས་བསྒྲུབ་པ་ལ་བརྒྱ་ཕྲག་ཕྱད། །རིལ་བུ་དྲུག་ཅུའི་སྦྱོར་བ་ཡི། །དྲག་པོ་མངོན་སྤྱོད་ལས་ལའོ། །སྔགས་ཀྱི་ནུས་པས་འགྲུབ་འགྱུར་ཏེ། །སྙིང་རྗེའི་བདག་ཉིད་སྔགས་པས་སོ། །རིལ་བུ་ཐམས་ཅད་དགྲ་བཅོམ་སྟེ། །སྟེང་དུ་མཆོད་རྟེན་ཡོངས་སུ་བརྟག །མཆོད་རྟེན་ཆོས་ཀྱི་སྤང་པོའི་ཕྱིར། །ཆོས་ཀྱི་དབྱིངས་ནི་དབུས་སུའོ། །དངོས་གྲུབ་ཀུན་བྱེད་ཞི་བ་ལ། །གསེར་གྱི་སྐུད་པས་བརྒྱུ་བར་བྱ། །ཡང་ན་རས་བ་ལ་སྐུད་པ་ནི། །གཞོན་ནུ་མ་ཡིས་བཀལ་བས་སོ། །བྱ་རོག་སྒྲོ་ཡི་སྐུད་པ་ཡིས། །བསྐྲད་པའོ་བོང་བུ་རྣམས་དང་ནི། །དེ་བཞིན་རྔ་མོའི་སྐྲ་ཡིས་ཀྱང༌། །མཁས་པ་ཡིས་ནི་བསྐྲད་པར་བྱ། །མ་ཧེའི་སྐྲ་ཡི་སྐུད་པ་ཡིས། །རྣམ་པར་བཏང་པའོ་རྟ་ཡི་ཀྱང༌། །དུར་ཁྲོད་སྐྲ་ཡི་སྐུད་པ་དང༌། །ཁྱི་ཡི་སྤུ་ནི་བསྲེས་པ་ཡིས། །རིལ་བུ་བརྒྱུས་ནས་ཡང་དག་པར། །ཁྲོ་བའི་ལས་ནི་མཉམ་པར་སྤྱད། །ལས་གང་ལ་ནི་སྐུད་པ་གང༌། །བཤད་པ་ཡང་ནི་མདོར་བསྡུས་པའོ། །ཞི་བ་དང་ནི་རྒྱས་པ་དང༌། །དབང་དང་མངོན་སྤྱོད་ལས་ལ་ཡང༌། །སོར་མོ་སོགས་ལ་མཉམ་གཞག་ནས། །མཁས་པས་རིམ་པ་ཇི་བཞིན་བྱ། །དེ་བཞིན་མཐེ་བོང་མཉམ་སྦྱར་ནས། །ཐམས་ཅད་འགུགས་པའི་རང་བཞིན་དུ། །མཉམ་པར་གཞག་སྟེ་གནས་བྱས་ནས། །འགྲུབ་འགྱུར་འདི་ལ་ཐེ་ཚོམ་མེད། །ཞེས་པ་སྣ་ཚོགས་པའི་ལས་ཀྱི་བགྲང་ཕྲེང་གི་ཆོ་གའོ།། །།ལེགས་པར་གྲུབ་པ་ལྷ་ཡི་གནས་དང་སྤོས་ཁང་དང༌། །གཙུག་ལག་ཁང་དང་ཁང་བཟངས་ཁང་མིག་འདུན་ཁང་རྣམས། །མཉམ་པར་བལྟས་ནས་དམ་པའི་སྒོ་ཡི་དབུས་ཀྱི་རྩེར། །རྒྱལ་མཚན་རྣམས་ནི་ངེས་པར་རབ་ཏུ་གཟུགས་པར་བྱ། །གསེར་དང་ནོར་བུ་ཉི་མའི་ཤེལ་དང་དངུལ་དང་ནི། །འཇིམ་པ་མཆོག་དང་ཤིང་ལས་བྱས་པ་ཉིད་ཀྱང་སྟེ། །ལེགས་པར་གནས་པ་དྲང་ཞིང་བརྟན་པ་རབ་འབར་བ། །ཆ་གསུམ་མཉམ་པ་ལེགས་པར་དགོད་པར་བྱ། །རྒྱལ་བའི་དབང་པོའི་ཁང་བརྩེགས་རྣམས་དང་ཁང་མིག་དང༌། །འདུན་ཁང་རྣམས་ཀྱི་ཚད་ལ་སྒོ་ནི་རིང་བའི་ཚད། །དེ་ཕྱེད་ཚད་ནི་སྤོང་ཁང་རྣམས་
དང་ཁང་ཆེན་ལ། །ལེགས་པར་འཇུག་སྟེ་རྒྱལ་ལ་ཡང་ནི་དེ་བཞིན་ཉིད། །རྒྱལ་མཚན་ཇི་སྙེད་བུམ་པ་དང་ནི་མཚུངས་པ་སྟེ། །ཐུབ་པའི་དབང་པོའི་ཡེ་ཤེས་བདུད་རྩིས་གང་བ་ཉིད། །བདུད་རྩིའི་འོད་ཅན་དམ་པའི་དཀྱིལ་འཁོར་རང་བཞིན་གྱིས། །ལེགས་པར་བཀྲུས་ནས་གཙུག་ལག་ཁང་གི་ལུས་སུའོ། །དེ་བསླང་བ་ནི་བྷྲཱུཾ་ལས་བྱུང་བའི་མཆོད་རྟེན་གཟུགས། །རྣམ་པར་བསམས་ནས་གདུགས་དང་གོས་དང་རྒྱན་གྱིས་བརྒྱན། །མེ་ཏོག་གོས་དང་སྐུད་པ་ལྔས་བཅིངས་བཟླས་བྱ་སྟེ། །མཉམ་པར་གཟུགས་བྱ་རྡོ་རྗེ་དང་ནི་བཅས་པས་སོ། །ཤར་དུ་གནས་པས་རྒྱལ་བའི་དབང་པོའི་གསང་སྔགས་དང༌། །ལྷོ་རུ་གནས་པས་རྒྱལ་མཚན་རྩེ་མོའི་གསང་སྔགས་ནི། །ནུབ་ཏུ་གནས་བྱས་འོད་དཔག་མེད་པའི་གསང་སྔགས་དང༌། །བྱང་ནས་ཀྱང་ནི་ཐུབ་པ་རྒྱན་གྱི་ཡིད་ཀྱིས་ཏེ། །གཡས་སྐོར་དུ་ནི་ཀུན་ནས་རབ་ཏུ་བསྐོར་འགྲོ་ཞིང༌། །མེ་ཏོག་གོས་དང་སྐུད་པར་བྱས་པའི་ལག་པ་ཡིས། །རབ་ཏུ་གནས་བྱ་མེ་ཏོག་མཆོད་ཡོན་འབྲས་སོགས་ཀྱི། །བུམ་པས་མངོན་པར་དབང་བསྐུར་བྱ་སྟེ་འབད་པས་སོ། །རོལ་མོ་དང་བཅས་དུད་དང་ཟངས་དུང་རྣམས་ཀྱི་ནི། །སྒྲ་དང་བཅས་ཤིང་བུམ་པ་རྣམས་དང་མཉམ་ལྡན་པས། །བུད་མེད་རྣམས་ཀྱི་བཀྲ་ཤིས་གླུ་དབྱངས་དང༌། །ལྷན་ཅིག་པ་ཡི་རྡོ་རྗེ་སློབ་དཔོན་རྣམས་ཀྱིས་སོ། །རྒྱལ་བ་རྣམ་པར་སྣང་མཛད་ཀྱི་སྔགས་ནི། །ཨོཾ་སུཀྵྨེ་སུཀྵྨེ་ས་མེ་ས་མ་ཡེ་ཤཱནྟེ་ཤཱནྟེ། དཱནྟེ་དཱནྟེ། ཨ་ས་མཱ་རོ་པེ། ནི་རཱ་ལཾ་བྷེ་ནི་རཱ་ཀུ་ལེ་ནི་རྦཱ་ནེ། ཡ་ཤོ་བ་ཏི། མ་ཧཱ་ཏེ་ཛེ་སརྦ་བུདྡྷཱ་དྷིཥྛཱ་ན་ཨ་དྷིཥྛི་ཏེ་སྭཱ་ཧཱ། ཤར་ནས་ལན་ཉི་ཤུ་རྩ་གཅིག་གོ །རྒྱལ་མཚན་རྩེ་མོའི་དཔུང་རྒྱན་གྱི་སྔགས་ཆེན་པོ་ནི། ཨོཾ་དྷྭ་ཛ་ཨ་གྲ་ཀེ་ཡཱུ་རི་ཛ་ཡ་ཛ་ཡ། བི་ཛ་ཡ་བི་ཛ་ཡ། ཛ་ཡ་བཱ་ཧི་ནི། ཤངྐ་རི་པྲ་བྷཉྫ་ནི། བྷཉྫ་བྷཉྫ། མོ་ཧ་ཡ་མོ་ཡ། བྷ་ག་ཝ་ཏི་ཛ་ཡ་བཱ་ཧི་ནི། ཛ་ཡོ་ཏ་རི། མ་ཐ་མ་ཐ། པྲ་མ་ཐ་པྲ་མ་ཐ། ཧ་ས་ཧ་ས། གྲ་ས་གྲ་ས། ཧཱུཾ་ཧཱུཾ། ཧཻ་ཧཻ། ལམྦོ་ད་རི། དྲི་ནི་དྲེ། ཙ་ཏུར་ཝཱ་ཀྐྲེ། ཙ་ཏུ་ར་དཾཥྚེ། ཙ་ཏུར་བྷུ་ཛེ། ཨ་སི་མུ་ཁ་ལ་ཙཀྲ་ཏྲི་ཤཱུ་ལ་བཛྲ་ཀ་བ་ཙ་དྷཱ་རི་ཎི། རཀྵ་རཀྵ་མཱཾ། བྷ་ག་ཝ་ཏི། ཧ་ན་ཧ་ན། ད་ཧ་ད་ཧ། པ་ཙ་པ་ཙ། དྷུ་ན་དྷུ་ན། བི་དྷུ་ན་བི་དྷུ་ན། སྥོ་ཊ་ཡ་སྥོ་ཊ་ཡ། ཧཱུཾ་ཧཱུཾ་ཕཊ།
དྷཉྫ་བྷཉྫ། བིདྷཱནྶ་ཡ། བིདྷྭནྶ་ཡ། སརྦ་ཤ་ཏྲཱུཾ་ཏྲུ་ཊ་ཏྲུ་ཊ། ཏྲཱུ་ཊ་ཏྲཱུ་ཊ། ཨུ་པ་ཀ་མུ་ཁི། ཨུལྐ་དྷཱ་རི་ཎཱི། ཏྲཻ་ལོ་ཀྱ་མ་ཐ་ནི། རཀྵ་རཀྵ་མཾ། ཙ་ལ་ཙ་ལ། ཙི་ལི་ཙི་ལི། ཙུ་ལུ་ཙུ་ལུ། ཀ་ལ་ཀ་ལ། ཀི་ལི་ཀི་ལི། ཀུ་ལུ་ཀུ་ལུ། བྷཉྫ་བྷཉྫ། ཨ་ཊ་ཌ་ཧཱ་སཾ་བྷྲ་མ་ཡ་སཾ་བྷྲ་མ་ཡ། ཏྲཱ་ཤ་ཡ་བུ་དྡྷཱ་ས་ཏྱ་ན་དྷརྨ་ས་ཏྱ་ན་སཾ་གྷ་ས་ཏྱ་ན། ས་ཏྱ་བཱ་དི་ནཾ། ས་ཏྱ་ན་བུདྡྷ་ས་ཏྱཾ་ན་མཱ་ཏི་ཀྲ་མ་སཏྱ་བཱ་དཱི་ནཾ་སཏྱ་མཱ་ཏི་ཀྲ་མ་ལམྦོ་ད་རི། ཀུ་ཊ་ཀུ་ཊ། རུ་ཊ་ཡ་ཀུ་ཊ་ཡ། རུ་ཊ་མཱ་ན་ཡ། བིཥྞུ་མཱ་ན་ཡ་ཙནྡྷ་སཱུ་ཪྻ་མཱ་ན་ཡ་ཏྲཻ་ལོ་ཀྱ་ཨ་དྷི་པ་ཏི་མཱ་ན་ཡ། སརྦ་ཡཀྵ་རཀྵ་ས་ཀུཾ་བྷཱཎྜ་མ་ཧོ་ར་ག་ཨ་དཱི་ནཱཾ་མ་ན་ཡ་མཱཾ། རཀྵ་རཀྵ། རཀྵ་ས་ཡ་རཀྵ་ས་ཡ། ཙུ་ལུ་ཙུ་ལུ་པུཥྤ་མཱི་ལི་ནི། རུནྡྷ་རུནྡྷ། རུ་ནི་རུ་ནི། ཛྷ་ཊི་ཛྷ་ཊི། ཙི་ཊི་ཙི་ཊི། བྷྲྀ་ཀུ་ཊི་མུ་ཁི་པ་ར་སཻ་ནྱེ་ཀུ་ལོ་ཙྪ་ད་ན་ཀ་རི། ཧ་ལ་ཧ་ལ། ཧི་ལི་ཧི་ལི། ཧུ་ལུ་ཧུ་ལུ། དྷྭཾ་དྷྭཾ། ཀྲཱུ་ན་མ་ཏི་ཛམྦུ་དྷྭ་ཛེ་བུདྡྷ་ཨ་པ་ལོ་ཀི་ཏི། རཀྵ་རཀྵ་སཾ་སརྦ་ཏ་ཐཱ་ག་ཏ་ཨ་བ་ལོ་ཀི་ཏེ་སྭཱ་ཧཱ། གུ་ཎ་རཱ་ཛི་པྲ་བྷཱ་ས་ཨུ་ཏྟ་མེ་སྭཱ་ཧཱ། ཙནྡྲ་ཨརྐ་པི་མི་ནེ་སྭཱ་ཧཱ། སརྦ་གྲ་ཧ་ན་ཀྵ་ཏྲ་དྷཱ་མི་ཀ་ར་ཎི་སྭཱ་ཧཱ། རཀྵ་རཀྵ་ཨི་མཾ་སྠ་ནཾ་སརྦ་བྷ་ཡེ་བྷྱཿསྭཱ་ཧཱ། ལྷོ་ནས་ལན་ཅིག་གོ །འོད་དཔག་མེད་ཀྱི་སྔགས་ཀྱི་རྒྱལ་པོ་ནི། ཨོཾ་ཨ་མི་ཏེ་ཨ་མི་ཏ་ཨ་མི་ཏོ་དྦྷ་ཝེ། ཨ་མི་ཏ་སཾ་བྷ་ཝེ་ཨ་མི་ཏ་བི་ཀྲའྣྟེ་གཱ་མི་ནི་ཨ་མི་ཏ་ཨཱ་ཡུརད་ཏེ་དྷརྨ་དྷཱ་ཏུཛྙཱ་ན་ག་ག་ན་པ་རི་ཀཱིརྟ་ཏེ་སརྦྦ་ཀརྨ་ཀླེ་ཤ་ཀྵ་ཡཾ་ཀ་རཱི་ཡེ་སྭཱ་ཧཱ། ནུབ་ནས་ལན་བདུན་ནོ། །རྡོ་རྗེ་སྙིང་པོ་བརྒྱན་གྱི་གཟུངས་ཀྱི་སྔགས་ནི། ཨོཾ་བོ་དྷི་བོ་དྷི་སརྦྦ་བོ་དྷི་སརྦྦ་ཏ་ཐཱ་ག་ཏ་གོ་ཙ་རི་དྷ་ར་ཙ་རི་དྷ་ར། ཧ་ར་ཧ་ར། པྲ་ཧ་ར་ཕྲ་ཧ་ར་མ་ཧཱ་བོ་དྷི་ཙིཏྟ་དྷ་ར། ཙུ་ལུ་ཙུ་ལུ་རསྨི་སཉྩོ་དི་ཏེ་སརྦ་ཏ་ཐཱ་ག་ཏ་ཨ་བྷི་ཥི་ཀྟེ་གུ་ཎ་ག་ག་ནེ་ཤུདྡྷ། གུ་ཎ་ཨ་བ་བྷཱ་སེ་མི་ལི་མི་ལི། ག་ག་ན་ཏ་ལ་པྲ་ཏིཥྛི་ཏེ་ཤ་མ་ཤ་མ། པྲ་ཤ་མ་པྲ་ཤ་མ། སརྦ་པཱ་པ་པྲ་ཤ་མ་ནེ་སརྦ་པཱ་པ་བི་ཤོ་དྷ་ནི་ཧུ་ལུ་ཧུ་ལུ། མ་ཧཱ་བོ་དྷི་མཱ་རྒ་སཾ་པྲསྠི་ཏེ། སརྦ་ཏ་ཐཱ་ག་ཏ་མུ་དྲེ་སྭཱ་ཧཱ། བྱང་ནས་ལན་བདུན་ནོ། །ཨོཾ་སརྦ་ཏ་ཐཱ་ག་ཏ་མ་ནི་ཤཔྟ་དིཔྟེ་ཛྭཱ་ལ་ཛྭཱ་ལ་དྷརྨ་དྷཱ་ཏུ་གརྦྷེ་སྭཱ་ཧཱ། ཡེ་དྷརྨཱ་ཧེ་ཏུ་པྲ་བྷ་བཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱེ་བ་ད་ཏ། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མ་ཧཱ་ཤྲ་མ་ཎཿ་ཤར་ཉིད་ནས་སོ་ཞེས་པ་རྒྱལ་མཚན་གཟུགས་པའོ། །
རྡོ་རྗེ་ཨ་བ་དྷུ་ཏཱི་བརྟན་པའི་ཡུ་བར་གནས། སུམ་ཅུ་རྩ་གཉིས་འདབ་མ་ངེས་པར་འཆིང་བྱེད་པ། །ཧཾ་ཡིག་ལས་སྐྱེས་པདྨ་རྣམ་པར་དག་པའི་གདུགས། །ཀུན་ནས་མཛེས་པ་འབར་བའི་མཐའ་དང་ལྡན་པ་ཉིད། །དཔལ་ལྡན་ཆོས་ཀྱི་དབྱིངས་ཀྱིས་མཚན་ཞིང་མཛེས་པའི་གཟུགས། །རིན་ཆེན་དྲ་བ་ཕྱེད་པའི་ཕྲེང་བ་སྐྱེས་པས་མཛེས། །སེམས་ཀྱི་མཐོན་པོ་འཕྲོག་པར་བྱེད་པའི་རྒྱལ་བས་མཚན། །གདུགས་ལ་གནས་ཞེས་སྦྱོར་བ་རིག་པ་ཡིན། །ཨོཾ་ན་མཿསམནྟ་བུདྡྷ་བོ་དྷི་སཏྭཱ་ནཱཾ་ཨཱ་ཙནྡྲ་ཙྪ་ཏྲ་ཨཱ་བ་ལི་སྭཱ་ཧཱ། བརྒྱ་དང་རྩ་བརྒྱད་བཟླས་པར་བྱའོ་ཞེས་པ་གདུགས་ཀྱིའོ། །ཡེ་ཤེས་མེ་ལོང་ཆེན་པོ་རབ་འབར་ཞིང༌། །རྡོ་རྗེའི་བདག་ཉིད་མཛེས་པའི་ཡུ་བར་གནས། །རི་རབ་པདྨའི་གདན་དང་སེང་གེ་ལ། །སོགས་པའི་རྒྱལ་མཚན་ཆེན་པོ་དགའ་བ་ཆེ། །ཨ་ག་མ་ག་ས་ཡི་ས་བོན་ལས་བྱུང་བའི། །གཞན་གྱིས་མི་ཐུབ་བུམ་པ་མཁའ་ལྡིང་ཆུ་སྲིན་སོགས། །ཉ་དང་རྨ་བྱ་རི་དགས་ནོར་བུ་སེང་གེས་མཚན། །ཟླ་བའི་ཐིག་ལེ་པདྨའི་གཟུགས་དང་ལྡན་པ་ཉིད། །ཨོཾ་ཨཱཿབཛྲ་དྷྭ་ཛ་བ་ཏི་ཙ་ཡོ་ཏྟ་རི་སྭཱ་ཧཱ། ཞེས་པས་ཏེ་རྒྱལ་མཚན་གྱིའོ། །ཤེས་རབ་ལས་བྱུང་དམ་པའི་གྲགས་དང་ཡོན་ཏན་མཆོག་གི་ཕུན་ཚོགས་ཅན། །པཾ་གྱི་ས་བོན་ལས་བྱུང་རྣམ་པ་སྣ་ཚོགས་ལྡན་པའི་བདན་རྣམས། །ཨོཾ་ཨཱཿབཛྲ་ཀེ་ཏུ་བཛྲ་པ་ཏཱ་ཀེ་ཨ་དྷི་ཏིཥྛ་པཾ་སྭཱ་ཧཱ། ཞེས་པ་སྟེ་བ་དན་གྱིའོ། །དམ་པའི་གསེར་དང་རིན་པོ་ཆེ་དང་མུ་ཏིག་འབར་བ་སྣ་ཚོགས་པའི། །ཡུ་བར་སྒེག་ཅིང་བཀྲ་ཤིས་ཆེན་པོ་འབྱུང་བའི་རྔ་ཡབ་རྣམས་ཀྱང་ངོ༌། །ཙཾ་གྱི་ས་བོན་ལས་རྔ་ཡབ་རྣམས་སུ་སྟེ། ཨོཾ་ཙུ་རུ་ཙཱ་མ་རི་སྭཱ་ཧཱ། ཞེས་པ་ནི་རྔ་ཡབ་ཀྱིའོ། །གཏོར་མ་སྦྱིན་སྲེག་ལ་སོགས་ཆོ་ག་ཡིས། །རྒྱས་པའི་ཡིད་ཀྱིས་མཐའ་དག་ལྷ་ཡི་ཚོགས། །གྲོང་ཁྱེར་གནས་སོགས་ནོར་ལས་སྐྱེས་རྣམས་ཀྱིས། །མཉེས་པར་བྱ་སྟེ་བསོད་ནམས་དོན་དུའོ། །རྒྱལ་མཚན་ལ་སོགས་པ་གཟུགས་པའི་རབ་ཏུ་གནས་པའི་ཆོ་གའོ།། །།སྦྱིན་པའི་བདག་པོ་ལ་ནུས་པ་ཡོད་ན་ཆུའི་འགྲམ་དུ་རྣམ་པར་སྣང་མཛད་གཙོ་བོར་གྱུར་པའི་དཀྱིལ་འཁོར་བཞེངས་པ་སྟེ་འཁོར་ལོའི་དབང་ཕྱུག་གི་རྣལ་འབྱོར་དང་ལྡན་པས་རྫིང་ལ་སོགས་པའི་ཕྱོགས་སུ་གཏོར་མ་བཏང་ནས་ཆུ་སྟོང་པར་གྱུར་པར་བསམས་ལ།
བྷྲཱུཾ་ལས་སྐྱེས་པའི་འཁོར་ལོ་དང་བྷྲཱུཾ་ལས་རྫོགས་ཤིང་སྤྱན་མ་དང་སྙོམས་པར་འཇུག་པའི་རྣམ་པར་སྣང་མཛད་ཡོངས་སུ་གྱུར་པ་ལས་རྡོ་རྗེ་ཆུ་ལྷ་དཀར་པོ་མིའི་གདོང་པ་ལ་གདེངས་ཀ་བདུན་དང་ལྡན་པ། ཕྱག་གཡོན་པ་ཀླུའི་ཞགས་པ་འཛིན་པ་མཛེས་མ་ལ་འཁྱུད་ཅིང་སྙོམས་པར་ཞུགས་པ། གཡས་པ་འགྱིང་བ་དང་བཅས་པས་ཨུཏྤལ་སྔོན་པོ་འཛིན་པ། ལྟེ་བའི་འོག་ནས་སྤྲུལ་གྱི་རྣམ་པ་ཅན་གྱི་དམ་ཚིག་སེམས་དཔའ་རྣམ་པར་བསྒོམས་ནས། དེ་ལ་རང་གི་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་རྣམ་པར་སྣང་མཛད་ལ་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་ཨོཾ་བཛྲ་ས་མ་ཡ་སྟྭཾ་ཞེས་བརྗོད་པས་རབ་ཏུ་བཅུག་སྟེ། མངོན་པར་དབང་བསྐུར་བ་ལ་མེ་ཏོག་ལ་སོགས་པས་ཡང་དག་པར་མཆོད་ཅིང་དེ་ཡོངས་སུ་གྱུར་པའི་གཟུགས་བརྙན་དང་ལྡན་པས་ཡེ་ཤེས་བདུད་རྩིའི་རང་བཞིན་དྲི་བཟང་བ་དང་རོ་ཞིམ་པ་དང་ཡང་བ་དང་དྲི་མ་མེད་པ་དང་འཇམ་པ་དང་བསིལ་བ་དག་མགྲིན་པ་དང་ལྟོ་བ་ལ་མི་གནོད་པ་སྟེ་ཡན་ལག་བརྒྱད་དང་ལྡན་པའི་ཆུ་དབང་ཆེན་གྱི་མཐིལ་ལ་ཐུག་པར་ཀླུ་རིགས་བརྒྱད་ཀྱི་གནས་དང་རླབས་ཀྱི་ཕྲེང་བ་དང་ལྡན་པར་ཀུན་ནས་བསྒོམ་པར་བྱའོ། །དེ་ལ་ཡང་ཆུའི་མཐིལ་དུ་བཟོ་བྱས་པའི་ཀླུ་བརྒྱད་འཆད་པར་འགྱུར་བའི་གཟུགས་ཅན་སྐད་ཅིག་གིས་དམ་ཚིག་སེམས་དཔའི་གཟུགས་སུ་བྱས་པ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཡེ་ཤེས་སེམས་དཔའ་དང་དབྱེར་མེད་པ་རྣམས་གཞག་པར་བྱ་ཞིང༌། དེ་ཡང་ཀུ་མུ་ད་དང་ཨུཏྤལ་དང་པདྨ་དང་ལྡན་པའི་རྫིང་ངམ་འབབ་ཆུ་འམ་ཁྲོན་པ་ལ་སོགས་པ་རྣམས་སུ་ནི། དེ་ཡི་ཟབས་སུ་ཉིས་འགྱུར་དུ་ནི་བསླང་བ་ཡི། །ཟླུམ་པོར་གྱུར་བ་ཆུ་ལྷའི་བདག་ཉིད་ཅན་གྱི་ཤིང༌། །གདེངས་ཀ་བདུན་གྱིས་མཚན་པའི་རྩེ་མོ་དང་ལྡན་པ། །ཆུ་ཡི་དབུས་སུ་གཞག་པར་བྱ་སྟེ་ཤིང་ཆེན་པོ། །ཕྱོགས་དང་ཕྱོགས་བྲལ་རྣམས་སུ་ཡང་ནཾ་ཀླུ་རྣམས་ཏེ། །གདེངས་ཀ་དགུ་དང་ལྡན་པ་རྣམས་ནི་རིམ་པས་སོ། །ཤིང་གི་དངོས་པོ་མེད་ན་དབུས་སུ་ཤེལ་ལས་ནི། །ལེགས་པར་བྱས་པའི་ཆུ་ལྷ་ཡི་ནི་རྒྱལ་པོ་སྟེ། །དེ་ཡི་ཆུ་ནི་དཀར་པོའི་མདོག་ཅན་ཞིམ་པ་ཡི། །རོ་དང་ལྡན་ཞིང་བསིལ་ལ་དྲི་མ་མེད་པའོ། །དེ་ཡི་ཕྱི་རོལ་ཤར་དུ་མཐའ་ཡས་གསེར་གྱི་ནི། །རང་བཞིན་པདྨའི་མཚན་མ་སྤྱི་བོར་ལྡན་པ་སྟེ། །ཆུ་ནི་མིག་སྨན་ཕྱེ་མའི་མདོག་ཅན་ཚབ་
དང༌། །ཁ་ཞིང་དུག་དང་མཚུངས་པ་འཇིགས་སུ་རུང་བའོ། །ལྷོ་རུ་ར་གན་མཉམ་པའི་རང་བཞིན་པདྨ་ནི། །དཔལ་གྱི་བེའུ་མཚན་མ་སྤྱི་བོར་ལྡན་པ་སྟེ། །དེ་ཡི་ཆུ་ནི་ཀུནད་ཟླ་བ་པད་རྩ་དང༌། །མཚུངས་ཤིང་མདར་ལ་ཁ་བ་དང་ཡང་ལྡན་པའོ། །ནུབ་ཏུ་ཟངས་ཀྱི་རང་བཞིན་འཇོག་པོ་འཇིགས་རུང་བ། །སྤྱི་བོར་དགའ་བ་འཁྱིལ་པ་དང་ནི་ལྡན་པ་སྟེ། །དེ་ཡི་ཆུ་ནི་གུར་གུམ་དང་མཚུངས་བསྐ་བ་དང༌། །ཚ་བ་ཤིན་ཏུ་ཁ་བ་དང་ཡང་ལྡན་པའོ། །ནོར་སྦྱིན་ཕྱོགས་སུ་དངུལ་ལས་སྤྲུལ་པ་ཀླུ་ཡི་ནི། །མངའ་བདག་ནོར་རྒྱས་གདེངས་ཀའི་སྤྱི་བོར་ཨུཏྤལ། །སྔོན་པོས་མཚན་པའོ་དེ་ཡི་ཆུ་ནི་ལྗང་གུ་དང༌། །སེར་པོ་ཚ་ཞིང་ཁ་བ་དང་ཡང་ལྡན་པའོ། །དབང་ལྡན་དུ་ནི་ཞ་ཉེ་དཀར་པོ་ལས་བྱས་པའི། །པདྨ་ཆེན་པོ་སྤྱི་བོར་རྩེ་གསུམ་མཚན་པ་སྟེ། །དེ་ཡི་ཆུ་ནི་གསེར་གྱི་འོད་ཅན་རླབས་མེད་པ། །ཞིམ་པ་དང་ནི་ཚ་ཞིང་དྲོ་བར་གྱུར་པའོ། །མེ་ཡི་མཚམས་སུ་ཞ་ཉེ་ནག་པོ་ལས་བྱུང་བའི། །ཀླུ་དབང་དུང་སྐྱོང་སྤྱི་བོར་བཀྲ་ཤིས་ཀྱིས་མཚན་པ། །ཆུ་ནི་གུར་གུམ་ཡུང་བ་དག་དང་མཚུངས་པ་སྟེ། །དམར་བ་དད་ནི་བསྐ་བའི་རོ་ཅན་ཚིམ་བྱེད་པའོ། །བདེན་བྲལ་དུ་ནི་འཁར་བ་དག་ལས་བྱས་པ་ཡི། །ཀླུ་ཡི་དབང་པོ་སྟོབས་ཀྱི་རྒྱུ་ནི་མགྲིན་པ་ལ། །རི་མོ་རྣམ་པ་གསུམ་གྱིས་གྱེན་དུ་མཚན་པ་སྟེ། །ཆུ་ནི་དཀར་པོ་ཞིམ་ཞིང་བསིལ་ལ་དགའ་བའོ། །རླུང་གི་ཕྱོགས་སུ་ལྕགས་ལས་སྤྲུལ་པའི་རིགས་ལྡན་ཆེ། །མགྲིན་པར་ཟླ་བའི་ཆ་ཤས་རྣམས་ཀྱིས་མཚན་པ་སྟེ། །ཆུ་ནི་དམར་ཞིང་སེར་པོའི་མདོག་ཅན་རོ་མངར་ཞིང༌། །བསྐ་བ་དང་ལྡན་བསིལ་ཞིང་དྲི་མ་མེད་པའོ། །ཆུ་ནི་ཁ་དོག་དབྱེ་བ་དག་དང་རོ་ཡི་ནི། །དབྱེ་བའི་ཁྱད་པར་རྟགས་ལས་རྗེས་སུ་ཤེས་བྱ་སྟེ། །ཀླུ་རྣམས་ཀྱི་ནི་རིགས་རྣམས་དག་དང་གནས་རྣམས་ལ། །ཀུན་ནས་བྱ་བའི་དོན་རྣམས་ཡང་དག་འགྲུབ་པའོ། །གང་ཡང་ཐང་སོགས་གནས་རྣམས་ལ་ནི་དཔང་བྱེད་པ། །ཀླུ་ཡི་མངའ་བདག་རྣམས་ནི་ཇི་ལྟར་འདོད་བཞིན་གསུངས། །ཞིང་རྣམས་སུ་ནི་ཆུ་མིག་ལ་གནས་མཐའ་ཡས་ཏེ། །ལྷ་ཡི་གནས་ལ་ཀླུ་ཡི་རྒྱལ་པོ་ནོར་རྒྱས་སོ། །སངས་རྒྱས་གནས་ཀྱི་རྫིང་དང་རྫིང་བུར་དགའ་བོ་དང༌། །ཉེར་དགའ་བོ་སྟེ་ཡུར་བ་ཡི་ནི་ཆུ་རྣམས་ལ། །རི་ཡི་རྩེ་དང་རི་ཤོད་རྣམས་སུ་དུང་སྐྱོང་སྟེ། །སྟོབས་ཀྱི་
རྒྱུ་ནི་རྒྱ་མཚོ་རྣམས་དང་འབབ་ཆུ་ལའོ། །གླིང་གི་ཆུ་ཀླུང་ལྡེང་ཀའི་ས་ལ་རབ་གནས་ཤིང༌། །བྱས་པའི་ནགས་ཚལ་དགའ་བ་ལ་གནས་འཇོག་པོའི་དབང༌། །སྐྱེས་ཚལ་མེ་ཏོག་རྒྱས་པས་དགའ་བའི་ཆ་དང་ནི། །མཚོ་རྣམ་དང་ནི་མཚོ་ལ་ཀླུ་རྒྱལ་ནག་པོ་སྟེ། །པདྨ་ཆེན་པོ་ཆུ་སྐྱེས་དུམ་བུ་ལ་ཤེས་བྱ། །ཁྲོན་པ་དང་ནི་ཁྲོན་ཆུ་རྣམས་ལ་རིགས་ལྡན་ཀླུ། །ཆུ་མིག་མཉམ་པའི་ཆུ་ཡི་རོ་ཡི་ཁྱད་པར་ལའོ། །ཀླུ་རྒྱལ་པདྨ་ཨུཏྤལ་ནགས་ཚལ་སོགས་ལ་སྟེ། །འོ་མ་མར་དང་དཀར་རྣམས་དང་སྦྲང་རྩི་དང༌། །དངུལ་ཆུ་ཆུ་རྒྱུན་རྣམས་ཀྱིས་ཡང་དག་མངོན་པར་མཆོད། །དཱུར་བ་རྣམས་དང་ཀུནད་དང་ནི་ཏིལ་སོགས་ཀྱིས། །ཆུ་ཡི་འགྲམ་དུ་སྦྱིན་སྲེག་ལ་སོགས་བྱ་བ་ཉིད། །བདུད་རྩི་ལྔ་རྣམས་སྦྲང་རྩི་དང་ནི་ལྡན་པ་དང༌། །འོ་མ་མར་གྱི་ཆང་དང་བྲལ་བའི་གཏོར་མ་སྦྱིན། །འདི་དག་རྣམས་ཀྱི་སྔགས་རྣམས་ཀྱི་ནི་ཆོ་ག་ཡིས། །སློབ་དཔོན་དབང་པོ་རྣམས་ཀྱིས་མཐའ་ཡས་ཡང་དག་འཕགས། །ཨོཾ་ཨཱཿ་བ་རུ་ཎཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་ཨ་ནནྟཱ་ཡ་སྭཱ་ཧཱ། ཨོཾ་ཨཱཿ་པདྨཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་ཏཀྵ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་བཱ་སུ་ཀི་ཡེ་ཧཱུཾ་སྭཱ་ཧཱ། ཨོཾ་ཨཱཿ་མ་ཧཱ་པདྨཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་ཤཾ་ཁ་པཱ་ལཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་ཀརྐོ་ཊ་ཀཱ་ཡ་ཧཱུཾ་སྭཱ་ཧཱ། ཨོཾ་ཨཱཿ་ཀུ་ལི་ཀཱ་ཡ་ཧཱུཾ་སྭཱ་ཧཱ། ཞེས་པ་སྙིང་པོའི་སྔགས་རྣམས་སོ། །མེ་ཏོག་དཀར་པོས་ཡང་དག་པར་མཆོད་དེ། ལག་པ་གཡོན་པ་གདེངས་ཀའི་ཚུལ་བྱ་ཞིང༌། གཡས་པ་མཆོག་སྦྱིན་གྱི་ཚུལ་དུ་བརྐྱང་ལ། ཨོཾ་ཨཱ་ནནྟ་བཱ་སུ་ཀི་ཏཀྵ་ཀ་ཀརྐོ་ཊ་ཀ །པདྨ་མ་ཧཱ་པདྨ་ཤདྑ་པཱ་ལ་ཀུ་ལི་ཀ །བ་རུ་ཎ་པཱ་ལ་དེ་བེ་ཏི་མ་ཧཱ་དེ་བ་ཏི། སོ་མ་ཤི་ཁ་མ་ཧཱ་ཤི་ཁི་དཎྜ་དྷ་ར་མ་ཧཱ་དཎྜ་དྷ་ར། ཨ་པ་ལཱ་ལ་ཧུ་ལུ་ཧུ་ལུ་ནནྟོ་པ་ནནྟ། སཱ་ག་ར་མ་ཧཱ་སཱ་ག་ར་ཨ་ན་ཏཔྟ་མ་ཧཱ་ཏཔྟ། ཤྲཱི་ཀནྟི་མ་ཧཱ་ཀནྟི། སུ་རཱུ་པ་མ་ཧཱ་སུ་རཱུ་པ། བྷ་དྲ་ཧི་ཀ།མ་ཧོ་ད་ར། སི་ལི་མ་ཧཱ་སི་ལི་ཨཱ་གཙྪ་ཏ་ཨཱ་གཙྪ་ཏ་མ་ཧཱ་ནཱ་ག་ཨ་དྷི་པ་ཏ་ཡེ་བྷུ་རྦྷུ་ཝ་ཧཱུཾ་ཕཊ་སྭཱ་ཧཱ། ཞེས་པ་ཀླུའི་གཏོར་མའི་སྔགས་བརྗོད་ཅིང་འོ་མའི་གཏོར་མ་བྱིན་གྱིས་བརླབ་པར་བྱའོ། །དེ་ནས་ཡུན་རིང་དུ་གནས་པར་བྱ་བའི་དོན་དུ་གསོལ་བ་བཏབ་ལ། ཡི་གེ་བརྒྱ་པ་བརྗོད་ནས་བཟོད་པར་གསོལ་ཏེ་བྱིན་གྱིས་བརླབས་པའི་འོ་མའི་གཏོར་མ་དེ་རྣམས་ཕྱོགས་བརྒྱད་རྣམས་
སུ་དབུལ་ཞིང་དེའི་ཕྱི་རོལ་དུའང་གཏོར་བར་བྱའོ། །གཞོན་ནུ་མ་རྣམས་ཀྱང་ཚིམ་པར་བྱའོ་ཞེས་པ་རྫིང་དང་ཆུ་མིག་དང་ཁྲོན་པ་རབ་ཏུ་གནས་པའི་ཆོ་གའོ།། །།ཨ་མྲའི་སྐྱེད་མོས་ཚལ་ལ་སོགས་པའི་རབ་ཏུ་གནས་པའི་ཆོ་ག་ནི། ཕྱོགས་ཀྱི་གཏོར་མ་ཕུལ་ནས་རྣམ་པར་སྣང་མཛད་ཀྱི་བདག་ཉིད་ཀྱིས་ཤིང་གི་གཙོ་བོ་སྟོང་པ་ཉིད་ཀྱི་རྗེས་ལ་རྣམ་པར་སྣང་མཛད་ཀྱི་གཟུགས་སུ་བསམས་ཏེ། དེ་ལས་ཡེ་ཤེས་སེམས་དཔའ་རྣམ་པར་སྣང་མཛད་མཆོད་ཡོན་ལ་སོགས་པ་སྔོན་དུ་འགྲོ་བས་གཞུག་ཅིང༌། བུམ་པའི་ཆུས་མངོན་པར་དབང་བསྐུར་ལ་དེ་ཡོངས་སུ་གྱུར་པའི་ཤིང་དེ་དང༌། དེ་ཉིད་ཀྱི་ཚེ་ཤིང་གཞན་རྣམས་ཀྱང་དེ་ཡོངས་སུ་གྱུར་པར་ལྷག་པར་མོས་པར་བྱའོ། །ཤིང་གི་གཙོ་བོ་དེ་དང་དེ་དག་ལ་བྱིན་གྱིས་བརླབས་པའི་ལྷའི་མེ་ཏོག་ལ་སོགས་པས་ཡང་དག་པར་མཆོད་དེ། འབྲས་བུ་ལ་སོགས་པ་རྣམས་ཀྱིས་གཞན་གྱི་དོན་བྱེད་པའི་སྐྱེད་མོས་ཚལ་ལ་སོགས་པ་ཡུན་རིང་དུ་གནས་པར་གསོལ་བ་བཏབ་ནས་ཕྱོགས་ཀྱི་གཏོར་མ་རྣམས་དབུལ་བར་བྱའོ་ཞེས་པ་ནགས་ཚལ་ལ་སོགས་པ་རབ་ཏུ་གནས་པའི་ཆོ་གའོ།། །།བརྗོད་པའི་ཆོ་ག་འདི་རྣམས་ཐམས་ཅད་ལ་ལས་གང་ལ་སྔགས་མ་བརྗོད་པ་དེར་ནི་ལས་ཐམས་ཅད་པའི་སྔགས་བཟླས་སོ་ཞེས་ཡོངས་སུ་བཤད་པར་བྱའོ། །བཅོམ་ལྡན་འདས་ཀྱིས་གང་གསུངས་པ། །གལ་ཏེ་བདེ་གཤེགས་བསྟན་པ་ལ། །དད་པའི་རིགས་ཀྱི་བུ་ཡོང་ན། །དད་པོར་གསུམ་ལ་སྐྱབས་འགྲོ་སྦྱིན། །ཕྱི་ནས་བྱང་ཆུབ་ཀྱི་ནི་སེམས། །དེ་ནས་བསླབ་པའི་གནས་ལྔ་དང༌། །གསོ་སྦྱོང་ལ་སོགས་མཉམ་པར་ལྡན། །མི་དགེ་བཅུ་ནི་ཡོངས་སྤོང་བ། །བྱིན་ནས་དགེ་བསྙེན་དུ་ནི་བྱ། །འདིའི་སྔོན་དུ་འགྲོ་བ་བརྗོད་པར་བྱ་སྟེ། དེ་ལ་དང་པོར་རིམ་པ་འདིས་བླ་མའི་མཎྜལ་བྱའོ། །ཨོཾ་བཾ་བཛྲ་ཨུ་ད་ཀེ་ཧཱུཾ་སྭཱ་ཧཱ། ཞེས་པས་ཆུ་སྦྱང་བའོ། །ཇི་ལྟར་བལྟམས་པ་ཙམ་གྱིས་ནི། །དེ་བཞིན་གཤེགས་ཀུན་ཁྲུས་གསོལ་ལྟར། །ལྷ་ཡི་ཆུ་ནི་དག་པ་ཡིས། །དེ་བཞིན་བདག་གིས་ཁྲུས་གསོལ་ལོ། །ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ས་མ་ཡ་ཤྲི་ཡེ་ཧཱུཾ། འདིས་ཁྲུས་བྱའོ། །ཨོཾ་ཧྲཱིཿ་སྭཱ་ཧཱ། ལག་པ་དང་རྐང་པ་བཀྲུ་བ་དང་ཞབས་བསིལ་བའི་སྔགས་སོ། །ན་མོ་བྷ་ག་ཝ་ཏེ་པུཥྤ་ཀེ་ཏུ་རཱ་ཛཱ་ཡ། ཏ་ཐཱ་ག་ཏཱ་ཡ། ཨདྷ་ཏེ་སམྱཀྶ་མྦུ་དྡྷཱ་ཡ། ཏདྱ་ཐཱ།
ཨོཾ་པུཥྤེ་པུཥྤེ་མ་ཧཱ་པུཥྤེ་སུ་པུཥྤེ་པུཥྤ་ཨུདྦྷ་ཝེ། པུཥྤ་སམྦྷ་ཝེ། པུཥྤ་ཨ་ཝ་ཀཱི་རྞེ་སྭཱ་ཧཱ། ཞེས་པས་མེ་ཏོག་སྦྱང་བར་བྱའོ། །ཨོཾ་བཛྲ་བྷཱུ་མི་ཧཱུཾ་ཕཊ། འདིས་ས་ལ་ཆུས་མངོན་པར་གཏོར་བར་བྱའོ། །ཨོཾ་བཛྲ་སཏྭ་སརྦ་བིགྷྣཱ་ནུཏྤཱ་ར་ཡ་ཧཱུཾ་ཕཊ། འདིས་ས་སྦྱང་བར་བྱའོ། །སྦྱིན་པ་ལྕི་བ་ཆུ་དང་བཅས་པ་ཚུལ་ཁྲིམས་ཡང་དག་བྱུག་པ་ཡིན། །བཟོད་བ་གྲོག་སྦུར་ཕྲ་མོ་སེལ་བ་བརྩོན་འགྲུས་བྱ་བ་ལགས་གནས་པ། །བསམ་གཏན་འཕྲལ་དུ་རྩེ་གཅིག་སེམས་པ་ཤེས་རབ་རི་མོ་ལེགས་འབར་བ། །ཕ་རོལ་ཕྱིན་དྲུག་འདི་རྣམས་ཐུབ་པའི་མཎྜལ་བྱས་པས་ཐོབ་པར་འགྱུར། །བདེ་གཤེགས་ཕོ་བྲང་མཆོག་འདིར་ལུས་ཀྱི་ལས་རྣམས་བྱས་བ་ཡིས། །ནད་རྣམས་ཀུན་ལས་རྣམ་པར་གྲོལ་ཞིང་གསེར་གྱི་མདོག་ཏུ་འགྱུར། །ལྷ་མི་ཁྱད་འཕགས་ཟླ་བ་བཞིན་དུ་གསལ་ཞིང་མཛེས་པ་དང༌། །ནོར་དང་གསེར་སོགས་ཕུན་ཚོགས་རྒྱལ་པོའི་རིགས་སུ་སྐྱེ་བར་འགྱུར། །ཞེས་པས་མཎྜལ་བྱེད་དོ། །ཨོཾ་སུ་རེ་ཁེ་བཛྲ་ཁེ། ཨ་དྷི་ཏིཥྛ་ནྟུ་སརྦ་ཏ་ཐཱ་ག་ཏཱཿ་སྭཱ་ཧཱ། འདིས་མཎྜལ་གྱི་དབུས་སུ་པདྨ་འདབ་མ་བརྒྱད་པ་བྲིའོ། །ཨོཾ་ཙཎྜ་ཨ་རྐ་བི་མ་ལེ་སྭཱ་ཧཱ། འདིས་མཎྜལ་གྱི་དབུས་སུ་མེ་ཏོག་གཅིག་དབུལ་བར་བྱའོ། །ཨོཾ་ཨཱཿ་ཧཱུཾ་འདི་ཡིས་སྐུ་དང་གསུང་དང་ཐུགས་བྱིན་གྱིས་བརླབ་པ་ལན་གསུམ་བྱའོ། །ཨོཾ་མ་ཎི་དྷ་རི་བཛྲ་ཎི་མ་ཧཱ་ཕྲ་ཏི་སཱ་རེ་རཀྵ་རཀྵ་མཾ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། འདིས་མེ་ཏོག་གཅིག་སྤྱི་བོར་སྦྱིན་ནོ། །ཨོཾ་ཨཱ་ས་ན་བཛྲེ་ཧཱུཾ། འདིས་གདན་ལ་མེ་ཏོག་གཅིག་སྦྱིན་ནོ། །ཨོཾ་སུཾ་སུ་མེ་ར་ཝ་ན་མཿ་འདིས་མཎྜལ་གྱི་དབུས་སུ་མེ་ཏོག་གཅིག་དབུལ་ལོ། །ཨོཾ་ཧཱུཾ་ཨུཏྟ་མེ་ར་ཝེ་ན་མཿ་ཨོཾ་ཧཱུཾ་མ་དྷྱེ་མེ་ར་ཝེ་ན་མཿ་ཨོཾ་ཧཾ་ཨ་དྷོ་མེ་ར་ཝེ་ན་མཿ་འདིས་རི་རབ་ཀྱི་སྟེང་དང་དབུས་དང་འོག་ཏུ་མེ་ཏོག་དབུལ་ལོ། །ཨོཾ་ཡཾ་པཱུརྦ་བི་དེ་ཧ་ཡ་ན་མཿ་འདིས་རི་རབ་ཀྱི་ཤར་དུ་མེ་ཏོག་དབུལ་ལོ། །ཨོཾ་རཾ་ཛམྦུ་དྭི་པཱ་ཡ་ན་མཿ་ལྷོ་རུའོ། །ཨོཾ་ལཾ་ཨ་པ་ར་གོ་དཱ་ནི་ཡཱ་ཡ་ན་མཿ་ནུབ་ཏུའོ། །ཨོཾ་ཝཾ་ཨུཏྟ་ར་ཀུ་ར་ཝེ་ན་མཿ་བྱང་དུའོ། །ཨོཾ་ཡཱ་ཨུ་པ་དྭཱི་པཱ་ཡ་ན་མཿ་ཨོཾ་རཱཿ་ཨུ་པ་དྭཱི་པཱ་ཡ་ན་མཿ་ཨོཾ་ལཱཿ་ཨུ་པ་དྭཱི་པཱ་ཡ་ན་མཿ་ཨོཾ་ཝཾ། ཨུ་པ་དྭཱི་པཱ་ཡ་ན་མཿ་འདིས་མེ་ལ་སོགས་པའི་ཟུར་རྣམས་སུ་མེ་ཏོག་དབུལ་ལོ། །ཨོཾ་ཡཾ་ག་ཛ་རཏྣཱ་ཡན་མཿ་ཨོཾ་རཾ་ཨ་ཤྭོ་རཏྣཱ་ཡན་མཿ་ཨོཾ་ལཾ་པུ་རུ་ཥ་རཏྣཱ་ཡན་མཿ་ཨོཾ་ཝཾ་སྟྲཱི་རཏྣཱ་ཡན་མཿ་ཤར་ལུས་
འཕགས་པོ་ལ་སོགས་པའི་ནང་དུ་མེ་ཏོག་དབུལ་ལོ། །ཨོཾ་ཡཿ་ཙ་ཀྲ་རཏྣཱ་ཡ་ན་མཿ་ཨོཾ་ཡཿ་ཁཌྒ་རཏྣཱ་ཡ་ན་མཿ་ཨོཾ་ལཱཿ་མ་ཎི་རཏྣཱ་ཡ་ན་མཿ་ཨོཾ་ཝཱཿ་སརྦ་ནི་དྷ་ནེ་བྷྱོ་ན་མཿ་མེ་ལ་སོགས་པའི་ཟུར་རྣམས་ཀྱི་ནང་དུ་མེ་ཏོག་དབུལ་ལོ། །ཨོཾ་ཨཱཿ་བཛྲ་གུ་ར་ཝེ་ཨི་དཾ་བཛྲ་པུཥྤཾ་པྲ་ཏཱི་ཙྪ་ཧཱུཾ་སྭཱ་ཧཱ། འདིས་རི་རབ་ཀྱི་དབུས་ཀྱི་ཁང་པ་བརྩེགས་པའི་ནང་སྣ་ཚོགས་ཆུ་སྐྱེས་དང་ཟླ་བའི་སྟེང་དུ་བླ་མ་རྡོ་རྗེ་སེམས་དཔར་བསམས་བ་ལ་མེ་ཏོག་སྙིམ་པ་གསུམ་སྤྱི་བོར་དབུལ་བར་བྱའོ། །ཨོཾ་ཨཱཿ་བཛྲ་གུ་ར་ཝེ་བཛྲ་དྷཱུ་པེ་ཧཱུཾ་ཨོཾ་ཨཱཿ་བཛྲ་གུ་ར་ཝེ་བཛྲ་དཱི་པ་ཧཱུཾ། ཨོཾ་ཨཱཿ་བཛྲ་གུར་ཝེ་བཛྲ་གནྡྷེ་ཧཱུཾ། ཨོཾ་ཨཱཿ་བཛྲ་གུར་ཝེ་བཛྲ་ནཻ་ཝི་ཏྱ་ཧཱུཾ། ཨོཾ་ཨཱཿ་བཛྲ་གུ་ར་ཝེ་བཛྲཱ་དཪྴ་ན་ཕཱ་ལཱ་ཡ་ཧཱུཾ། རིམ་པ་འདི་ཉིད་ཀྱིས་གཞན་དུ་ཡང་གང་ཅུང་ཟད་དེ་ཐམས་ཅད་ཆོ་ག་འདིས་དབུལ་བར་བྱའོ། །ཞེས་སོ། །སླར་ཡང་མེ་ཏོག་གི་སྙིམ་པས་ཕུལ་ཏེ། །སངས་རྒྱས་གཙོ་ལ་ཕྱག་འཚལ་ལོ། །སྐྱོབ་བ་ཆོས་ལ་ཕྱག་འཚལ་ལོ། །དགེ་འདུན་ཆེ་ལ་ཕྱག་འཚལ་ལོ། །གསུམ་རྣམས་ལ་ཡང་རྟག་ཕྱག་འཚལ། །དཀོན་མཆོག་གསུམ་ལ་བདག་སྐྱབས་འཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །སངས་རྒྱས་ཆོས་དང་ཚོགས་མཆོག་ལ། །བྱང་ཆུབ་པར་དུ་སྐྱབས་སུ་མཆི། །རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་ཏུ་ནི་སེམས་བསྐྱེད་བགྱིའོ། །བྱང་ཆུབ་མཆོག་གི་སེམས་ནི་བསྐྱེད་བགྱིས་ནས། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྱུར་བར་ཤོག །སྡིག་པ་ཐམས་ཅད་བཤགས་པར་བགྱི། །བསོད་ནམས་ལ་ཡང་རྗེས་ཡི་རང༌། །བྱས་ནས་བསྙེན་གནས་སྤྱད་པར་བགྱི། །འཕགས་པའི་ཡན་ལག་བརྒྱད་གསོ་སྦྱོང༌། །ཞེས་པའི་ཚིགས་སུ་བཅད་པ་འདིས་དཀོན་མཆོག་གསུམ་གྱི་ངོ་བོ་བླ་མ་ལ་བསྟོད་པ་བྱའོ། །དེ་ནས། བླ་མ་བྱང་ཆུབ་སེམས་རྣམས་ལ། །རིན་ཆེན་མཎྜལ་ཡོངས་རྫོགས་པས། །དངོས་པོ་ཐམས་ཅད་དབུལ་བགྱི་སྟེ། །འགྲོ་བས་ཀུན་མཁྱེན་ཐོབ་ཕྱེད་དུའོ། །ལྕོག་བརྒྱད་ལྡན་པའི་རི་རབ་ནི། །གླིང་དང་ཉེ་གླིང་མཛེས་པ་དང༌། །རིན་ཆེན་བརྒྱད་དང་ཡང་དག་ལྡན། །བླ་མེད་སྟེར་བ་བོ་ལ་
དབུལ། །ཞེས་པས་དབུལ་བར་བྱའོ། །གང་གི་བཀའ་དྲིན་འོད་ཀྱིས་གསལ་བྱས་བདག་ཉིད་ཀྱི། །དེ་ཉིད་རིན་ཆེན་འོད་ཀྱི་ཚོགས་ཀྱིས་མུན་བཅོམ་སྟེ། །མིག་སྐྱོན་མེད་རྣམས་རོལ་བར་བཅས་ཏེ་སྟེང་དུ་ནི། །ལྟ་གྱུར་བླ་མ་ཉི་མ་དེ་ལ་ཕྱག་འདི་བགྱིད། །ཅེས་པས་མེ་ཏོག་རབ་ཏུ་གཏོར་སྟེ་ཕྱག་འཚལ་བར་བྱའོ། །ཞེས་པ་བླ་མའི་མཎྜལ་ལོ། །དེ་ནས་སྦྱིན་བ་ལྕི་བ་ཞེས་པའི་ཚིགས་སུ་བཅད་པ་བརྗོད་ནས་སྔར་གྱི་མཎྜལ་གསུམ་བྱ་སྟེ། དེ་ལ་རྣམ་པར་སྣང་མཛད་དང་རིན་ཆེན་འབྱུང་ལྡན་དང་སྣང་བ་མཐའ་ཡས་དང་དོན་ཡོད་གྲུབ་པ་རྣམས་འཁོར་དང་མི་བསྐྱོད་པ་གཙོར་བྱས་པའི་མཎྜལ་ནི་སངས་རྒྱས་ཀྱི་མཎྜལ་ལོ། །བྱ་བ་དང་སྤྱོད་པ་དང་རྣལ་འབྱོར་དང་རྣལ་འབྱོར་མའི་རྒྱུད་རྣམས་འཁོར་དང༌། རྣལ་འབྱོར་བླ་ན་མེད་པའི་རྒྱུད་གཙོ་བོར་བྱས་པའི་མཎྜལ་ཆོས་ཀྱིའོ། །བྱམས་པ་དང༌། ནམ་མཁའ་མཛོད་དང༌། ཀུན་དུ་བཟང་པོ་དང༌། ཕྱག་ན་རྡོ་རྗེ་དང༌། འཇམ་དབྱངས་དང་སྒྲིབ་པ་རྣམ་པར་སེལ་བ་དང་སའི་སྙིང་པོ་དང་ཡེ་ཤེས་བླ་མ་རྣམས་འཁོར་དང༌། འཇིག་རྟེན་དབང་ཕྱུག་གཙོར་བྱས་པ་ནི་དགེ་འདུན་གྱི་མཎྜལ་ལོ། །མཎྜལ་གསུམ་པོ་འདི་རྣམས་སུ་ཤར་ལ་སོགས་པ་ནས་གཡས་སྐོར་གྱིས་ཏེ། ཨོཾ་གྱི་ཡི་གེ་དང་པོ་དང༌། ན་མཿའི་སྒྲ་མཐར་བཅུག་ནས་སོ་སོ་རང་རང་གི་མཚན་བརྗོད་ནས་སྔར་གྱི་མཎྜལ་དུ་མེ་ཏོག་དབུལ་བར་བྱའོ། །དེ་ལྟར་བརྗོད་པའི་རིམ་པས་མཎྜལ་བཞི་པོ་བྱས་ནས། དད་པས་རིགས་ཀྱི་བུའམ་རིགས་ཀྱི་བུ་མོ་དགེ་བའི་ཚེས་དང་གཟའ་དང་དུས་སྦྱོར་ལ་སོགས་པ་ལ། གཙང་ཞིང་གཙང་བའི་གོས་བགོས་ཏེ། ཡིད་དུ་འོང་བ་རབ་ཏུ་སྟོན་པ་དེ་བཞིན་གཤེགས་པའི་གཟུགས་ལ་མཆོད་པ་དེའི་མཆོག་ཇི་ལྟ་བར་རྣམ་པར་བསྒོམས་ལ། མེ་ཏོག་ལ་སོགས་པ་དབུལ་བ་སྔོན་དུ་འགྲོ་བས་དཀོན་མཆོག་གསུམ་ལ་ཕྱག་འཚལ་པ་སྔོན་དུ་འགྲོ་བར་བྱའོ། །དེ་བཞིན་དུ་ཇི་ལྟར་ནུས་པའི་མཆོད་བ་དང་ཡོན་ཕུལ་ནས། ཐུགས་རྗེ་དང་རྣམ་མཁྱེན་དང་ལྡན་པའི་བླ་མ་ལ་མེ་ཏོག་གི་སྙིམ་པ་སྔོན་དུ་འགྲོ་བས་ཞབས་དག་ལ་ཕྱག་བྱ་ཞིང༌། བུས་མོའི་ལྷ་ངས་ལ་བཙུགས་པའམ། ཙོག་ཙོག་པོར་འདུག་ལ་ཐལ་མོ་སྦྱར་ཏེ་གནས་པས་འདི་སྐད་ཅེས་གསོལ་བ་གདབ་པ་ལན་གསུམ་བྱའོ། །དགེ་བའི་བཤེས་གཉེན་བདག་ལ་
སྡིག་པ་བཤགས་པ་དང་སྐྱབས་སུ་འགྲོ་བའི་བྱང་ཆུབ་ཏུ་སེམས་བསྐྱེད་པ་སྩལ་དུ་གསོལ་ཞེས་པས་སོ། །དེ་ནས་བླ་མས་ལྷག་པའི་བསམ་པ་རབ་ཏུ་འཕེལ་བས་སློབ་མ་བལྟས་ཏེ་ཇི་ལྟར་ནུས་པ་སྦྱིན་པར་བྱའོ་ཞེས་ཁས་བླང་བ་སྔོན་དུ་འགྲོ་བས་འདི་ལྟར་སྦྱིན་པར་བྱའོ། །ཆོ་དང་ལྡན་པ་ཁྱོད་འདི་སྐད་ཅེས་སྨྲོས་ཤིག །ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ན་ཡང་དག་པར་བཞུགས་པའི་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་ཆེན་པོ་བདག་ལ་དགོངས་སུ་གསོལ། སློབ་དཔོན་དགོངས་སུ་གསོལ། བདག་མིད་འདི་ཞེས་བགྱི་བས་གང་ཅུང་ཟད་ལུས་དང་ངག་དང་ཡིད་ཀྱིས། སངས་རྒྱས་དང་བྱང་ཆུབ་སེམས་དཔའ་རྣམས་དང༌། མ་དང་ཕ་དང༌། དེ་ལས་གཞན་པའི་སེམས་ཅན་ཡང་དག་པར་འོངས་པ་རྣམས་ལ་སྐྱེ་བ་འདིའམ་སྐྱེ་བ་གཞན་མཐའ་ཡས་བ་རྣམས་སུ་བདག་གིས་སྡིག་པའི་ལས་བགྱིས་པའམ། བགྱིད་དུ་སྩལ་བའམ། བགྱིད་པ་ལ་རྗེས་སུ་ཡིད་རང་བ་དེ་ཐམས་ཅད་གཅིག་ཏུ་བསྡུས་ཤིང་བསྡོམས་ཏེ་བཟླུམས་ལ་མཉམ་པར་བྱས་ནས། སངས་རྒྱས་དང་བྱང་ཆུབ་སེམས་དཔའ་རྣམས་དང༌། སློབ་དཔོན་གྱི་སྤྱན་སྔར་མ་ལུས་པ་རབ་ཏུ་བཤགས་ཤིང་སོ་སོར་བཤགས་པར་བགྱིའོ། །ཤེས་པ་དང་དྲན་པ་རྣམས་ལ་འཆབ་པར་མི་བགྱིད་དོ། །དེ་བཞིན་དུ་ལན་གསུམ་མོ། །དེ་ནས་བདག་མིང་འདི་ཞེས་བགྱི་བ་དེ་ལྟར་སྡིག་པ་བཤགས་ཏེ་ཉི་མ་འདི་ནས་ཉེ་བར་བཟུང་ནས་ཇི་སྲིད་བྱང་ཆུབ་སྙིང་བོ་ལ་མཆིས་ཀྱི་བར་དུ། སངས་རྒྱས་བཅོམ་ལྡན་འདས་ཐུགས་རྗེ་ཆེན་པོ་ཐམས་ཅད་མཁྱེན་པ་ཐམས་ཅད་གཟིགས་པ། ཐམས་ཅད་དུ་དགྲའི་འཇིགས་པ་མེད་པ། སྐྱེས་བུ་ཆེན་པོ། །མི་ཕྱེད་བའི་སྐུ། བླ་ན་མེད་པའི་སྐུ། ཆོས་ཀྱི་སྐུ། རྐང་གཉིས་རྣམས་ཀྱི་མཆོག་ལ་སྐྱབས་སུ་མཆིའོ། །དེ་ནས་བདག་མིང་འདི་ཞེས་བྱ་བ་དེ་ལྟར་སྡིག་པ་བཤགས་ཏེ། ཉི་མ་འདི་ནས་ཉེ་བར་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཆོས་རྣམས་ཀྱི་རབ་མཆོག་བླ་ན་མེད་པ་ཐེག་པ་ཆེན་པོའི་ཆོས་ལ་སྐྱབས་སུ་མཆིའོ། །དེ་ནས་བདག་མིང་འདི་ཞེས་བགྱི་བ་དེ་ལྟར་སྡིག་པ་བཤགས་ཏེ་ཉི་མ་འདི་ནས་ཉེ་བར་གཟུང་ནས་ཇི་སྲིད་བྱང་ཆུབ་སྙིང་བོ་ལ་མཆིས་ཀྱི་བར་དུ།
དུལ་བའི་ཚོགས་རྣམས་ཀྱི་མཆོག་ཕྱིར་མི་ལྡོག་པ་བྱང་ཆུབ་སེམས་དཔའི་དགེ་འདུན་རྣམས་ལ་སྐྱབས་སུ་མཆིའོ། །དེ་བཞིན་དུ་ལན་གསུམ་མོ། །དེ་ནས་བདག་མིང་འདི་ཞེས་བགྱི་བ་འདི་ལྟར་བསྟན་པ་ལས་མ་འདས་པར་ཉི་མ་འདི་ནས་ཉེ་བར་བཟུང་སྟེ་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། གསུམ་ལ་སྐྱབས་སུ་འགྲོ་བས་མཐའ་ཡས་བའི་སེམས་ཅན་གྱི་ཁམས་རྣམས་ངེས་པར་བསྒྲལ་བའི་ཕྱིར་དང༌། མངོན་པར་བསྒྲལ་བའི་ཕྱིར་དང༌། འཁོར་བའི་སྡུག་བསྔལ་ལས་ཡོངས་སུ་བསྐྱབ་པའི་ཕྱིར་དང༌། ཐམས་ཅད་མཁྱེན་པའི་ཡེ་ཤེས་ལ་སོ་སོར་དགོད་པའི་ཕྱིར་དུ། ཇི་ལྟར་འདས་པ་དང་མ་བྱོན་པ་དང་ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་དང༌། བྱང་ཆུབ་སེམས་དཔའ་ཆེན་པོ་རྣམས་ཀྱིས་བྱང་ཆུབ་ཏུ་ཐུགས་བསྐྱེད་པ་དང༌། སངས་རྒྱས་ཀྱི་དོན་དུ་ལྷག་པར་གཤེགས་པར་གྱུར་པ་དང༌། ལྷག་པར་གཤེགས་པ་དང༌། ལྷག་པར་གཤེགས་པར་འགྱུར་བ་དང༌། ཇི་ལྟར་རྫོགས་པའི་སངས་རྒྱས་དེ་རྣམས་ཐམས་ཅད་ཀྱིས་སྒྲིབ་པ་མེད་པའི་སངས་རྒྱས་ཀྱི་ཡེ་ཤེས་དང༌། སངས་རྒྱས་ཀྱི་སྤྱན་གྱིས་མཁྱེན་པས་གཟིགས་པ་དང༌། ཇི་ལྟར་ཆོས་རྣམས་ཀྱི་ཆོས་ཉིད་མཁྱེན་ནས་མངོན་པར་རྗེས་སུ་མཁྱེན་པ་ལྟར་ཆོ་ག་དེ་ཉིད་ཀྱིས་བདག་མིང་འདི་ཞེས་བགྱི་བ་སློབ་དཔོན་གྱི་དྲུང་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱི་སྤྱན་སྔར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བགྱིའོ། །དེ་བཞིན་དུ་ལན་གསུམ་མོ། །དེ་རིང་བདག་བྱང་ཆུབ་སེམས་དཔར་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སློབ་དཔོན་གྱིས་གཟུང་དུ་གསོལ་ཞེས་པ། དཀོན་མཆོག་གསུམ་ལ་སྐྱབས་སུ་འགྲོ་བས་སྔོན་དུ་བྱང་ཆུབ་སེམས་བསྐྱེད་པའོ། །བསླབ་པའི་གནས་ལྔ་འཛིན་པའི་དགེ་བསྙེན་གྱི་སྔོམ་པ་དེ་ཡང་གསོལ་བ་འདེབས་པར་གྱུར་ན་སློབ་མའི་ཆེད་དུ་འདི་ལྟར་སྦྱིན་པར་བྱའོ། །ཚེ་དང་ལྡན་པ་ཁྱོད་འདི་སྐད་སྨྲོས་ཤིག །སློབ་དཔོན་དགོངས་སུ་གསོལ། །ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པ་དེ་བཞིན་དུ། བདག་ཆེ་གེ་མོ་ཞེས་བགྱི་བས་ཀྱང་དུས་འདི་ནས་ཉེ་བར་བཟུང་སྟེ་
ཇི་སྲིད་འཚོའི་བར་དུ་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལོག་པར་བགྱིའོ། །ཡན་ལག་དང་པོ་འདིས། བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་བསླབ་པོ། །རྗེས་སུ་བསྒྲུབ་པོ། །རྗེས་སུ་བགྱིད་དོ། །གཞན་ཡང་སློབ་དཔོན་དགོངས་སུ་གསོལ། ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། འབྲུའི་ཆང་དང༌། བཅོས་པའི་ཆང་མྱོས་བར་འགྱུར་བ་བག་མེད་པའི་གནས་སྤངས་ཏེ་མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། འབྲུའི་ཆང་དང༌། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལོག་པ་དེ་བཞིན་དུ། བདག་ཆེ་གེ་མོ་ཞེས་བགྱི་བས་ཀྱང་ཉིན་པར་འདི་ནས་ཉེ་བར་བཟུང་སྟེ། ཇི་སྲིད་འཚོའི་བར་དུ་མ་བྱིན་པར་ལེན་པ་དང༌། འདོད་པས་ལོག་པར་གཡེམ་པ་དང༌། བརྫུན་དུ་སྨྲ་བ་དང༌། འབྲུའི་ཆང་དང༌། བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ། །ཡན་ལག་ལྔ་པ་འདིས་བདག་འཕགས་པ་དགྲ་བཅོམ་པ་དེ་དག་གི་བསླབ་པ་ལ་རྗེས་སུ་སློབ་བོ། །རྗེས་སུ་བསྒྲུབ་བོ། །རྗེས་སུ་བགྱིད་དོ། །དགེ་བསྙེན་དུ་ཡང་བདག་སློབ་དཔོན་གྱིས་གཟུང་དུ་གསོལ། དེ་བཞིན་དུ་ལན་གཉིས་དང་གསུམ་དུ་ཡང་ངོ༌། །འཕགས་པའི་ཡན་ལག་བརྒྱད་དང་ལྡན་པའི་གསོ་སྦྱོང་བྱ་བར་འདོད་པས་དེའི་ཚེ་སྔར་བཞིན་དུ་གསོལ་བ་བཏབ་བར་གྱུར་བ་དང༌། སློབ་མའི་ཆེད་དུ་གསུམ་ལ་སྐྱབས་སུ་འགྲོ་བ་བྱིན་གྱིས་བརླབས་པའི་གནས་བརྒྱད་པོ་འདི་ལྟར་སྦྱིན་པར་བྱའོ། །ཚེ་དང་ལྡན་པ་ཁྱོད་འདི་སྨྲོས་ཤིག །སློབ་དཔོན་དགོངས་སུ་གསོལ། བདག་ཆེ་གེ་མོ་ཞེས་བགྱི་བ་དུས་འདི་ནས་ཉེ་བར་བཟུང་སྟེ། ཇི་སྲིད་མཚན་མོ་སོང་བ་དང་ཇི་སྲིད་ཉི་མ་ཤར་བའི་མཐར་ཐུག་པར་སྲོག་གཅོད་པ་ཐམས་ཅད་དང༌། གཞན་གྱི་ནོར་འཕྲོག་པ་དང༌།
མི་ཚངས་པར་སྦྱོང་པ་དང༌། ངག་གི་དབྱེ་བ་ལས་བརྫུན་དུ་སྨྲ་བ་དང༌། མྱོས་པར་འགྱུར་བའི་བཏུང་བ་དང༌། དུས་མ་ཡིན་པའི་ཁ་ཟས་དང༌། ཕྲད་བ་དང༌། ཁ་དོག་འཆད་བ་དང༌། གར་དང་གླུ་དང་རོལ་སྒེག་དང་མལ་སྟན་མཐོན་པོ་རྣམས་ལ་དེ་རིང་ནས་བདག་དགའ་བ་དང་བྲལ་བར་བགྱི་སྟེ་དགྲ་བཅོམ་པའི་ཡོན་ཏན་བརྒྱད་ལ་འཇུག་པས་སོ། །དེ་བཞིན་དུ་ལན་གསུམ་སྟེ་བདག་གིས་གསོ་སྦྱོང་གི་ཚུལ་ཁྲིམས་ཀྱི་སྔོམ་པ་ཡང་དག་པར་བླངས་པ་འདི་ནི་སེམས་ཀྱི་རྒྱན་དང༌། སེམས་ཀྱི་ཡོ་བྱད་དང༌། སེམས་ཅན་ཐམས་ཅད་ཀྱིས་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་བྱ་བའི་ཆེད་དུའོ་ཞེས་པའོ། །དེ་ནས་བླ་མས་ཐབས་ཡིན་ནོ་ཞེས་བརྗོད་པར་བྱ་ཞིང་སློབ་མས་ལེགས་སོ་ཞེས་སོ། །གང་ཕྱིར་དགེ་བ་མ་ལུས་གསོ་བ་དང༌། །བསགས་པའི་སྡིག་པ་འདིར་ནི་སྦྱོང་བྱེད་པ། །དེ་བཞིན་གསོ་དང་རྣམ་པར་སྦྱོང་བྱེད་པ། །དེ་བཞིན་གཤེགས་པས་གསོ་སྦྱོང་ཞེས་སུ་གསུངས། །ཞེས་པ་གསོ་སྦྱོང་གི་ཆོ་གའོ།། །།འདི་ཉིད་ཀྱི་སྔོམ་པ་གོ་མིའོ་ཞེས་སོ། །དེ་ནས་རྡུལ་ཚོན་གྱི་དཀྱིལ་འཁོར་རམ་དཀྱིལ་འཁོར་གཞན་དུ་ཡང་རུང་སྟེ་སྔར་བརྗོད་པའི་ཆོ་གས་དང་པོར་བུམ་པ་ལྷག་པར་གནས་པ་དང་དགོད་པ་དང་ཉེ་བར་སྤྱོད་པ་ལྔ་ལ་སོགས་པའི་མཆོད་པ་བྱས་ནས། ལེགས་བར་ཡོངས་སུ་བརྟགས་པའི་སློབ་མ་ང་རྒྱལ་ལ་སོགས་པའི་སྐྱོན་དང་བྲལ་བ། དགེ་བསྙེན་ལ་སོགས་པའི་བསླབ་པ་ལ་གནས་པ་ཡོངས་སུ་ཐོབ་པ་ལ་སོགས་པ་ལེགས་པར་ཡོངས་སུ་བྱང་ཞིང་གུས་པ་དང་ལྡན་པ། རྡོ་རྗེ་སེམས་དཔའི་སྔོམ་པ་གཟུང་བའི་ནུས་པ་དང་ལྡན་ན། རིགས་གཟུགས་ཀྱི་ཡོན་ཏན་དང་བྲལ་བ་རྣམས་ཀྱང་ལྷག་པར་གནས་པར་བྱ་སྟེ། གལ་ཏེ་དེ་དག་ཀྱང་དད་པས་རྡོ་རྗེ་སེམས་དཔའི་སྔོམ་པ་ཤིན་ཏུ་དོན་དུ་གཉེར་ཞིང༌། རྡོ་རྗེ་ཐེག་པ་ལ་སྟོན་པ་གཞན་མི་ཚོལ་བར་གྱུར་ནའོ། །དེ་ནི་བཅོམ་ལྡན་འདས་ཀྱིས་ཕྱེད་དང་བཞི་བརྒྱ་པ་ལས་གསུངས་ཏེ། གཟུགས་ངན་ཡོན་ཏན་མེད་པ་དང༌། །དམན་པའང་ལྷག་པར་གནས་པར་བྱ། །
འཁོར་ནི་བཞི་པོ་རྣམས་ལ་ཡང༌། །དཀྱིལ་འཁོར་དག་ཏུ་ཆོ་ག་གནང༌། །རང་རང་བསླབ་པ་ལེགས་པར་ལྡན། །ཐེག་ཆེན་ལ་དགའི་བསམ་པ་ཅན། །ཞེས་སོ། །འཁོར་བཞི་ནི་དགེ་སློང་དང༌། དགེ་སློང་མ་དང༌། དགེ་བསྙེན་དང༌། དགེ་བསྙེན་མའོ། །ཆོ་ག་ནི་གཞུག་པ་ལ་སོགས་པའོ། །ལྡན་ནི་ལྷུར་བྱེད་པའོ། །ཐེག་ཆེན་ལ་དགའ་བའི་བསམ་པ་ཅན་འདིས་ནི་ཐེག་པ་འདི་ལ་ཡིད་ཀྱི་ལས་གཙོ་བོར་སྟོན་པར་བྱེད་དོ། འགལ་བ་སྤང་བའི་དོན་དུའོ། །བཅོམ་ལྡན་འདས་ཀྱིས་རང་བཞིན་གྱིས་ཁ་ན་མཐོ་བའི་ལས་ཉིད་ལ་ཡང་ཀུན་སློང་གི་ཁྱད་པར་ལས་ལྷུང་བར་མི་འགྱུར་བ་མང་པོ་རབ་ཏུ་བསྟན་ཏོ། །དེ་ལྟར་ཡང༌། གདོལ་བ་སྨིག་མ་མཁན་ལ་སོགས། གསོད་དོན་དོན་དུ་སེམས་པ་པོ། །དེ་རྣམས་ཀྱེ་རྡོ་རྗེ་ཤེས་ནས། །འགྲུབ་འགྱུར་འདི་ལ་ཐེ་ཚོམ་མེད། །ཅེས་པ་དང༌། གཞན་དུ་ཡང༌། སེམས་དགེ་བ་ལ་ལྟུང་མེད་དེ། །སྙིང་རྗེར་ལྡན་ཞིང་བྱམས་ཕྱིར་རོ། །ཞེས་པ་དང༌། སྙིང་རྗེ་ལྡན་ཞིང་དོན་མཐོང་ལ། །བཀག་པ་ཡང་ནི་གནང་བ་ཡིན། །ཞེས་པ་ལྟར་གང་ཞིག་སླར་ཡང་བསོད་ནམས་ཉེ་བར་བསགས་པ་མང་དུ་ཐོས་བ་ལ་སོགས་པའོ། །ཆོས་ཐམས་ཅད་སྒྱུ་མ་རྨི་ལམ་ལྟ་བུ་དང་སྟོང་པ་ཉིད་དུ་རོ་གཅིག་པར་ཤིན་ཏུ་བརྟན་པར་མོས་པ་བྱེད་པ་དེ་ལ་ནི་དགེ་སློང་རྡོ་རྗེ་འཛིན་པའི་སྔོམ་པ་དག་ལ་འགལ་བའི་དྲི་མ་ག་ལ་ཡོད། དེ་ཉིད་ཀྱི་ཕྱིར་བཅོམ་ལྡན་འདས་ཀྱིས། དགེ་སློང་རྡོ་རྗེ་འཛིན་ཞེས་བྱ། །ཞེས་གསུངས་སོ། །དེ་ནི་ངེས་པར་ཁས་བླངས་དགོས་ཏེ། གཞན་དུ་ན་དུས་མཚུངས་པར་གཉི་ག་ཅི་ལྟར་འགྱུར། བག་ཆགས་རབ་ཏུ་སད་པ་ལས་དགེ་སློང་གིས་ཉམས་སུ་མྱོང་བའི་བདེ་བ་དེའི་སྦྱོར་བའི་བདེ་བ་རྨི་ལམ་དུ་མཐོང་ན་རྨི་ལམ་དུ་མཐོང་བའི་ཕྱི་རོལ་གྱི་ཡན་ལག་དབང་པོ་གཉིས་ཀྱི་བདེ་བའི་མཐར་ཐུག་པ་ཉམས་སུ་མྱོང་ན་ཡང་ལྟུང་བ་མེད་དོ་ཞེས། དེ་འདུལ་བར་བསྟན་པ་རྟོགས་པར་བྱའོ། །གལ་ཏེ་ཡང་སྐྱེ་བ་ངན་པའི་སྤྱོད་ཡུལ་དུ་རབ་ཏུ་བསྟན་པར་གྱུར་ན་ནི། དེའི་ཚེ་དེ་ལ་ཡང་ཡེ་ཤེས་ཀྱི་ཕྱག་རྒྱ་གསད་བ་དང༌། ཤེས་རབ་ཡེ་ཤེས་ཀྱི་མངོན་པར་དབང་བསྐུར་བ་སྦྱིན་བར་བྱ་སྟེ། སྐྱེ་བོ་ངན་པ་མེད་ན་ནི། །ལས་ཀྱི་ཕྱག་རྒྱ་ཉིད་ཀྱིས་སོ། །དེ་ཁོ་ན་ཉིད་ལ་ལྷག་པར་མོས་པ་མི་བརྟན་
པའི་དགེ་སློང་ལ་ནི་དད་པ་དང་ལྡན་ཡང་ཕྱིའི་ཤེས་རབ་མའི་དབང་གཟུང་བ་བཀག་སྟེ། གཞན་དུ་སྔོམ་པ་སྔ་མ་ཉམས་པས་དོན་མེད་པ་ཆེན་པོར་འགྱུར་རོ། །གལ་ཏེ་ཡང་བླ་མ་བསྒོམ་པ་ལ་བརྟན་པར་གྱུར་ན་ནི། དེའི་ཚེ་དེ་ལ་ཡང་དེས་གཏད་པའི་ཡེ་ཤེས་ཀྱི་ཕྱག་རྒྱས་ཤེས་རབ་ཡེ་ཤེས་ཀྱི་དབང་བསྐུར་བ་སྦྱིན་པར་བྱའོ། །དེ་བླངས་པ་ལ་ཡང་ཚངས་པར་སྤྱོད་པ་དང་བྲལ་བའི་དོགས་པ་ནི་མེད་དེ་ལུས་ཀྱི་ལས་མེད་པའི་ཕྱིར་རོ། །དེ་ཡང་སྔར་ཁྱིམ་ན་གནས་པ་ཡིན་ན་ནི་ཉམས་སུ་མྱོང་བའི་བདེ་བ་དྲན་དུ་བཅུག་ལ་དགའ་བ་ལ་སོགས་པའི་དབྱེ་བ་སོ་སོར་བརྟན་པར་བྱའོ། །བླ་མ་ལ་དགེ་སློང་དུ་གྱུར་པ་ཉིད་ན་ནི་གསང་བའི་དབང་མངོན་པར་དབང་བསྐུར་བ་ལ་སོགས་པ་སྟེར་བ་ན། ཐམས་ཅད་བརྗོད་པས་མཚམས་སྦྱར་བར་བྱའོ། །ཧ་ཅང་སྤྲོས་པས་ཆོག་སྟེ་སྐབས་སུ་བབ་པ་བརྗོད་པར་བྱའོ། །དེའི་རྗེས་སུ་སློབ་མས་མཎྜལ་བྱས་ནས། མེ་ཏོག་བཟུང་བའི་ཐལ་མོ་སྦྱར་ཞིང་བུས་མོ་ས་ལ་བཙུགས་པ་རྣམས་ལ། སྔགས་ཀྱི་ཚུལ་གྱི་སྐལ་བ་དང་ལྡན་པ་རྣམས་ལ་ནི་འཇིག་རྟེན་འདི་ཉིད་ཀྱི་མངོན་པར་མཐོ་བ་དོན་དུ་གཉེར་བས་མ་ཡིན། འཇིག་རྟེན་ཕ་རོལ་གྱི་མངོན་པར་མཐོ་བའི་ཆེད་དུ་ཡང་མ་ཡིན་གྱི། འོན་ཀྱང་དེ་བཞིན་གཤེགས་པའི་སྐུ་གསུམ་གྱི་ཕུན་སུམ་ཚོགས་པ་ཐོབ་པར་བྱ་བའི་ཕྱིར་དཀྱིལ་འཁོར་དུ་འཇུག་པར་བྱའོ། །དེ་ལྟ་ན་ནི་མངོན་པར་མཐོ་བ་གཉིས་ཀྱང་ཐོབ་པར་འགྱུར་རོ་ཞེས་བསྒྲགས་ནས། སློབ་མ་རྣམས་རང་གི་ལུས་ལ་ཁ་ནས་བཅུག་སྟེ། རང་གི་རྡོ་རྗེའི་ལམ་ནས་འཐོན་པ་རང་འོད་ཀྱི་ཤེས་རབ་མའི་པདྨར་གནས་པ་རྣམས་ལ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་དེ་བཞིན་གཤེགས་པ་ཤེས་རབ་དང་བཅས་པ་ཁ་ནས་ཞུགས་ཤིང་ཞུ་བར་གྱུར་པ་རྣམས་ཀྱིས་མངོན་པར་དབང་བསྐུར་བར་བསམས་ནས། དཀྱིལ་འཁོར་གྱི་ཤར་སྒོར་བཞག་སྟེ་འཇུག་པར་གསོལ་བ་འདེབས་སུ་གཞུག་གོ །སྐྱེ་རྒ་འཚེ་བ་ན་ཀྲ་ཡི། །ཆུ་སྲིན་ལ་སོགས་འཇིགས་རུང་བ། །སྲིད་པའི་མཚོ་ལས་བདག་གྲོལ་མཛོད། །དགའ་ཆེན་སྟོན་པ་ཁྱོད་གཅིག་པུ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །
སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་དག་ཀྱང་བདག་ལ་སྩོལ། །ཐར་པ་ཆེན་པོའི་གྲོང་ཁྱེར་དུ། །མགོན་པོ་བདག་ནི་གཞུག་ཏུ་གསོལ། །ཞེས་བརྗོད་པས་དེའི་རྗེས་སུ་སློབ་མ་གཅིག་གཙོ་བོར་བྱས་ཏེ། བུ་ཚུར་ཤོག་ཅིག་ཐེག་ཆེན་པོའོ། །གསང་སྔགས་སྤྱོད་ཚུལ་ཆོ་ག་རྣམས། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་གྱི། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ཤེས་མཉམ་མེད་ཡང་དག་བརྙེས། །གསང་སྔགས་སྦྱོར་བ་མཉམ་མེད་པ། །གང་གིས་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེན་པོའི་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ཀུན་མཁྱེན་ཐོབ་བྱའི་ཕྱིར། །བུ་ཡིས་བློ་གྲོས་འདི་གྱིས་ཤིག །ཅེས་རང་གིས་བརྗོད་ལ། དཀོན་མཆོག་གསུམ་ལ་བདག་སྐྱབས་འཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང༌། །སངས་རྒྱས་བྱང་ཆུབ་ཡིད་ཀྱིས་གཟུང༌། །ཞེས་ལན་གསུམ་བརྗོད་དུ་གཞུག་གོ །དེ་ལྟར་ཐུན་མོང་གི་སྡོམ་པ་ཅན་གྱིས་སློབ་དཔོན་གྱི་སྡོམ་པ་གཟུང་བའི་ཕྱིར། འཁོར་ལོ་ཕྱིར་མི་ལྡོག་པའི་དབང༌། །དམ་པ་བདག་ལ་མགོན་པོས་སྩོལ། །འཁོར་ལོ་ལྷ་ཡི་དེ་ཉིད་དང༌། །སློབ་དཔོན་གྱི་ནི་ཕྲིན་ལས་དང༌། །སངས་རྒྱས་ཀུན་གྱི་དམ་ཚིག་དང༌། །སྡོམ་པ་གསང་མཆོག་བཤད་དུ་གསོལ། །སེམས་ཅན་ཀུན་གྱི་དོན་གྱི་ཕྱིར། །རྟག་ཏུ་བདག་ནི་སློབ་དཔོན་པ་གྱིང༌། །ཅེས་ཁྱད་པར་དུ་གསོལ་བ་འདེབས་སུ་བཅུག་ནས། བྱང་ཆུབ་ཏུ་སེམས་བསྐྱེད་པ་བྱ་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། སློབ་དཔོན་བདག་ལ་དགོངས་སུ་གསོལ། བདག་ཆེ་གེ་མོ་ཞེས་བགྱི་བ་དུས་འདི་ནས་ཉེ་བར་བཟུང་སྟེ། ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ། ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་ན་མེད། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་ཀྱི་ནི་བསླབ་པ་དང༌། །དགེ་བའི་ཆོས་ནི་སྡུད་པ་དང༌། །སེམས་ཅན་དོན་བྱེད་ཚུལ་
ཁྲིམས་གསུམ། །སོ་སོར་བརྟན་པོར་བདག་གིས་གཟུང༌། །སངས་རྒྱས་ཆོས་དང་དགེ་འདུན་ཏེ། །བླ་ན་མེད་པའི་དཀོན་མཆོག་གསུམ། །སངས་རྒྱས་རྣལ་འབྱོར་ལས་སྐྱེས་པའི། །སྡོམ་པ་དེང་ནས་བརྟན་པོར་གཟུང༌། །རྡོ་རྗེ་རིན་ཆེན་བསྡུས་པ་ལ། །རྡོ་རྗེ་དྲིལ་བུ་ཕྱག་རྒྱ་ཡང༌། །དེ་ཉིད་ཀྱིས་ནི་རབ་ཏུ་གཟུང༌། །སློབ་དཔོན་དག་ཀྱང་གཟུང་བར་བགྱི། །རིན་ཆེན་རིགས་མཆོག་ཆེན་པོ་ཡི། །དམ་ཚིག་ཡིད་དུ་འོང་བ་ལ། །ཉིན་རེ་ཞིང་ཡང་དུས་དྲུག་ཏུ། །སྦྱིན་པ་རྣམ་བཞི་སོ་སོར་སྦྱིན། །བྱང་ཆུབ་ཆེན་པོ་ལས་བྱུང་བའི། །པདྨའི་རིགས་ཆེན་དག་པ་ལ། །ཕྱི་དང་གསང་བ་ཐེག་པ་གསུམ། །དམ་པའི་ཆོས་རྣམས་སོ་སོར་གཟུང༌། །ལས་ཀྱི་རིགས་མཆོག་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །དེ་ཉིད་སོ་སོར་གཟུང་བར་བགྱི། །མཆོད་པའི་ལས་ཀྱང་ཅུ་ནུས་བགྱི། །སེམས་ཅན་ཀུན་གྱི་དོན་བགྱིད་ཕྱིར། །བྱང་ཆུབ་སེམས་ནི་བླ་ན་མེད། །དམ་པ་ཡང་དག་བསྐྱེད་བགྱིས་ཤིང༌། །སྡོམ་པ་མ་ལུས་གཟུང་བགྱིས་ནས། །མ་བརྒལ་བ་རྣམས་བསྒྲལ་བར་བགྱི། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང༌། །སེམས་ཅན་མྱ་ངན་འདས་ལ་དགོད། །ཅེས་ལན་གསུམ་བརྗོད་དུ་བཅུག་པས་སོ། །དེའི་རྗེས་སུ་བདུད་རྩི་འཁྱིལ་བའི་སྔགས་ཀྱིས་བསྲུངས་ནས། དེ་རྣམས་ཀྱི་སྙིང་ག་དང་མགྲིན་པ་དང་སྤྱི་བོ་རྣམས་ལ་རྡོ་རྗེ་དང་པདྨ་དང་འཁོར་ལོའི་སྟེང་དུ། ཉི་མ་དང་པདྨ་དང་ཟླ་བ་ལ་གནས་པའི་ཧཱུཾ་ཨཱཿ་ཨོཾ་གྱི་ཡི་གེ་ནག་པོ་དང་དམར་པོ་དང་དཀར་པོ་རྣམས་བསམས་ཏེ། དེ་ནས་བརྗོད་ཅིང་སྙིང་ག་དང་མགྲིན་པ་དང་སྤྱི་བོ་རྣམས་སུ་དྲིའི་ཆུ་རྡོ་རྗེ་དང་བཅས་པས་ཡང་དག་པར་རེག་ནས། མགོ་བོར་མེ་ཏོག་དང་མདུན་དུ་བདུག་སྦོས་དང་མར་མེ་དང་སྙིང་གར་སླར་ཡང་དྲི་སྦྱིན་པར་བྱའོ། །ཨ་ཤྭ་དྠ་ལ་སོགས་པས་སོ་ཤིང་སོར་བཅུ་གཉིས་པ་དྲང་པོ་སྲོག་ཆགས་མེད་ཅིང་མ་གས་པ་རྨ་མེད་པ་དྲི་བཟངས་ཀྱི་ཆུས་བསྒོས་པ། རྩེ་མོར་མེ་ཏོག་བཅིངས་པ་སློབ་མ་རྣམས་ལ་སྦྱིན་ཞིང༌། དེ་རྣམས་ཀྱིས་ཀྱང་ཁྲུ་བཞི་པ་གྲུ་བཞིའི་དཀྱིལ་འཁོར་བའི་ལྕི་བ་ལ་སོགས་པས་བྱུགས་པར་ཤར་རམ་བྱང་དུ་ཕྱོགས་པས་སོ་ཤིང༌། ཨོཾ་བཛྲ་ཧཱ་ས་ཧཾ་ཞེས་བརྗོད་ནས་རྩེ་མོ་འཆོས་ཏེ་མ་གས་པ་སྟེང་དུ་བལྟ་བས་
ལྟོས་པ་མེད་པར་མདུན་དུ་དོར་བར་བྱའོ། །དེ་རྣམས་ལ་སོ་ཤིང་ལྷུང་བའི་རྗེས་སུ་འབྲངས་ནས་འབྱུང་བར་འགྱུར་བའི་དངོས་གྲུབ་བརྗོད་པར་བྱ་སྟེ། ཤར་དང་བྱང་དང་ནུབ་དང་ལྷོ་དང་སྟེང་དང་འོག་ཏུ་ཕྱོགས་པར་གྱུར་ན་རིམ་བ་ཇི་ལྟ་བ་བཞིན་དུ་ཞི་བ་དང་རྒྱས་པ་དང་དབང་དང་མངོན་སྤྱོད་དང་རིག་པ་འཛིན་པ་དང་ས་འོག་གི་དངོས་གྲུབ་རྣམས་སོ། །དཀྱིལ་འཁོར་གྱི་ཕ་རོལ་དུ་ལྷུང་ན་ནི་དངོས་གྲུབ་མེད་དོ། །དེའི་རྗེས་སུ་བཾ་ཡིག་ལས་སྐྱེས་ཤིང་དེ་བཟླས་པའི་ཆུ་ཁ་བཀྲུ་བའི་ཕྱིར་བྱིན་ནས། འཁྱིལ་པ་ལན་བདུན་བཟླས་པའི་དྲི་ཆུ་ཁྱོར་བ་གསུམ། ཨོཾ་ཧྲཱིཿ་བི་ཤུདྡྷ་སརྦྦ་དྷརྨྨཱཿསརྦྦ་པཱ་པཾ་ནི་ཙསྱ་ཤོདྷ་ཡ་སརྦྦ་བི་ཀལྤཱ་ན་ཨ་པ་ན་ཡ་ཧཱུཾ་ཞེས་བརྗོད་ཅིང་འཐུང་དུ་གཞུག་གོ །དེ་ནས་དེ་རྣམས་ཕྱི་རོལ་དུ་བཞག་ལ་ཧཱུཾ་ལས་སྐྱེས་ཤིང་དེ་བཟླས་པའམ་འཁྱིལ་པ་བཟླས་པའི་ཀུ་ཤ་སྔས་ཀྱི་དོན་དུ། ཨོཾ་བཛྲ་ཏཱི་ཀྵྞ་བཾ་ཞེས་བརྗོད་པའི་སྔགས་ཀྱིས་སྦྱིན་ནོ། །དེའི་རྗེས་སུ་གཞོན་ནུ་མས་བཀལ་བའི་སྐུད་བ་ལུས་ཀྱི་ཚད་སུམ་ལྟ་བ་ལ་བདུད་རྩི་འཁྱིལ་པའི་སྔགས་ཀྱིས་མདུད་པ་གསུམ་བྱས་པ་དེ་རྣམས་ཀྱི་དཔུང་པ་གཡས་པའམ་བུད་མེད་ཀྱི་གཡོན་པར་ཨོཾ་བུདྡྷ་མཻ་ཏྲི་རཀྵ་རཀྵ་སརྦཱ་ན་སྭཱ་ཧཱ། ཞེས་བརྗོད་ཅིང་རང་ཉིད་ཀྱིས་བཅིངས་ནས་ཡང་དག་པར་བསྲུངས་ལ་སྤྲོ་བ་བསྐྱེད་པར་བྱ་སྟེ། བསྐལ་པ་བྱེ་བ་དུ་མ་རུ། །སྔོན་དུ་སྡིག་པ་གང་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད་ཟད་པར་འགྱུར། །སྤྱོད་མཆོག་འདི་ལ་གང་རྣམས་ཀྱིས། །བློ་གྲོས་ཤིན་ཏུ་དྲི་མེད་པ། །དེ་དག་རྣམས་ཀྱི་སྡུག་བསྔལ་ཀུན། །འབྱུང་བའི་ངན་འགྲོ་ཡང་དག་ཞི། །བདག་ཉིད་ཆེན་པོ་ཁྱེད་རྣམས་ཀྱིས། །རྙེད་པ་མཉམ་མེད་དེ་རིང་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱི། །བསྟན་པ་འདི་ལ་ཁྱེད་རྣམས་ཀུན། །ཡོངས་སུ་གཟུང་སྟེ་སྐྱེ་འགྱུར་ནི། །དེ་ཡིས་ཁྱེད་རྣམས་ཐེག་ཆེན་ལ། །ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་གིས་ཁྱེད་རྣམས་འགྲོ་འགྱུར་བ། །དེ་བཞིན་གཤེགས་པར་འགྱུར་བ་ཡིན། །ཞེས་ཉན་དུ་བཅུག་ནས་དེ་ནས་དེ་རྣམས་འཁྱིལ་པའི་སྔགས་ཀྱིས་བསྲུངས་ནས། །བཟླས་པའི་དོན་དུ་འཁྱིལ་པའི་སྔགས་བརྗོད་དུ་
བཅུག་སྟེ། གང་ཅུང་ཟད་རྨི་ལམ་དུ་མཐོང་བ་དེ་ཐམས་ཅད་ནང་པར་ང་ལ་སྨྲོས་ཤིག་ཅེས་མངོན་པར་བརྗོད་ནས། དཀྱིལ་འཁོར་གྱི་ཁང་བའི་ནང་ངམ། ཡོལ་བ་ལ་སོགས་པས་བཅད་པའམ་གཞན་དུ་ཡང་རུང་སྟེ་སེང་གེའི་ཉལ་སྟབས་ཀྱིས་ཉལ་དུ་གཞུག་གོ །རང་ཉིད་ཀྱང་དཀྱིལ་འཁོར་གྱི་ཁང་པར་ཞུགས་ནས་བསྲུང་བའི་དོན་དུ་འཁྱིལ་པའི་སྔགས་བཟླས་པར་བྱའོ། །འདིར་སྔོམ་པ་གང་སློབ་དཔོན་དུ་མི་བྱེད་པ་ལ་བྱེད་པ་ལ་ཡང་སྟེར་བ་དེ་ནི་ཐུན་མོང་བ་སྟེ། སྐྱབས་སུ་འགྲོ་བ་དང་བྱང་ཆུབ་ཏུ་སེམས་བསྐྱེད་པ་ཙམ་གྱི་མཚན་ཉིད་དོ། །གང་ཡང་སློབ་དཔོན་བྱེད་པ་ལ་སྟེར་བ་དེ་ནི་སློབ་དཔོན་གྱི་སྡོམ་པ་སྟེ། རིགས་ལྔས་ཡང་དག་པར་བསྡུས་པའོ། །དེ་བས་ན་འདི་ནི་སྡོམ་པ་གཉིས་སྦྱིན་པ་སྔོན་དུ་འགྲོ་བ་ཅན་གྱི་སློབ་མ་ལྷག་པར་གནས་པའི་ཆོ་གའོ།། །།དེའི་རྗེས་སུ་བླ་མས་ནང་པར་གཏོར་མ་ཕུལ་ཏེ་དཀྱིལ་འཁོར་གྱི་ཁང་པ་ནས་འཐོན་ལ། སློབ་མ་རྣམས་ལ་རྨི་ལམ་དྲི་ཞིང་རི་ལས་ལྷུང་བ་ལ་སོགས་པས་མཚོན་པ་མི་དགེ་བའི་རྨི་ལམ་ནི་འཁྱིལ་པའི་སྔགས་ཀྱིས་བསྲུང་བར་བྱའོ། །སླར་ཡང་དཀྱིལ་འཁོར་གྱི་ཁང་པར་འཇུག་པའི་དུས་སུ་སློབ་མ་རྣམས་ཀྱིས་ཨོཾ་བྲ་བི་ཤ་བྷ་ག་ཝཱ་ན་མ་ཧཱ་སུ་ཁ་མོཀྵ་སུ་རཾ་སརྦ་བི་དྡྷ་པྲ་དཾ་པར་མ་སུ་ཁོཏྟ་མ་སིདྡྱ་ཛཿ་ཧཱུཾ་བཾ་ཧོཿཔྲ་སིདྡྷྱ་སྭཱ་ཧཱ། ཞེས་ཡང་དག་པར་སྤྲོ་བར་བྱའོ། །དེ་ནས་ལངས་ནས་རྣལ་འབྱོར་གྱི། །དབང་ཕྱུག་རབ་རྒྱས་སྤྱན་འབར་བ། །གཡས་སྐོར་བྱས་ནས་འཁོར་ལོ་ཡི། །སྒོ་དབྱེ་བདུད་རྣམས་གཞོམ་པར་བྱ། །ནུབ་ཀྱི་སྒོ་རུ་གནས་བྱས་ནས། །གཡོན་བརྐྱང་སྟབས་ཀྱིས་སྤྲོ་བ་ཡིས། །ཤར་སྒྲོ་དབྱེ་ཕྱིར་འདི་བརྗོད་ཅིང༌། རྡོ་རྗེ་ཧཱུཾ་མཛད་ཕྱག་རྒྱ་བྱ། །ཨོཾ་བཛྲོ་དྒྷཱ་ཊ་ས་མ་ཡ་བྲ་བེ་ཤ་ཡ་ཧཱུཾ། དེ་བཞིན་བྱང་ཕྱོགས་ཡང་དག་གནས། །ཁྲོ་བོའི་ལྟ་བས་དེ་ལྟར་བརྗོད། །ལྷོ་ཡི་སྒོ་ནི་ངེས་པར་དབྱེ། །ཁྲོ་བོའི་ཕྱག་རྒྱའི་རྣམ་ཐར་བྱ། །ཤར་གྱི་ཕྱོགས་སུ་ཡང་དག་གནས། །དེ་བཞིན་རྣལ་འབྱོར་ནུབ་ཏུ་ཕྱོགས། །ཆུ་ཡི་སྒོ་ནི་ངེས་པར་དབྱེ། །ཁྲོ་བོའི་ཕྱག་རྒྱའི་རྣམ་ཐར་བྱ། །དེ་བཞིན་ལྷོ་ཕྱོགས་ཡང་དག་གནས། །གཡས་སྐོར་གྱིས་ནི་སྔ་མ་བཞིན། །ནོར་སྦྱིན་གནས་བའི་སྒོ་དབྱེ་ཞིང༌། །དེ་ལྟར་སླར་ཡང་འཇུག་པར་བྱ། །མེ་ཏོག་གི་ཕྲེང་བ། ཨོཾ་པ་རམ་སུ་ཁ་ཤ་ཡ་སུ་ལ་ལི་ཏ་བི་ལཱ་ས་ན་
༄༅། ན་མ་མི་བྷ་ག་ཝཱ་ནྟཾ་ཛཿ་ཧཱུཾ་བཾ་ཧོཿ་ཧི་ཧི་ཧི་ཧི་ཧཱི་པྲ་ཏཱི་ཙྪ་ཀུ་སུ་མཱཉྫ་ལི་ནཱ་ཐ་ཧོཿ་ཞེས་པའི་སྔགས་ཀྱིས་དཀྱིལ་འཁོར་དུ་དོར་ནས། །སླར་ཡང་བཟུང་སྟེ་ཕྲེང་བའི་དབང་བསྐུར་བའི་བསམ་པས་མགོ་བོར་བཅིང་བར་བྱའོ། །འཁོར་ལོའི་དབང་ཕྱུག་ནི་བླ་མ་ལ་མངོན་སུམ་དུ་གྱུར་པར་ལྷག་པར་མོས་པར་བྱ་ཞིང༌། དེ་ལས་སྟེར་བཞིན་པ་ཕྲེང་བའི་དབང་གཟུང་བ་ལ་སོགས་པ་འཆད་པར་འགྱུར་བའི་དབང་བསྐུར་བ་མཐའ་དག་དང༌། ཆོ་ག་ཇི་ལྟ་བ་བཞིན་དུ་སློབ་དཔོན་གྱི་ལས་ཐམས་ཅད་ལ་རྗེས་སུ་གནང་བ་ཐོབ་པར་བྱས་སློབ་མ་གཞུག་པའི་ཆེད་དུ། བདེ་བ་ཆེན་པོའི་བདག་ཉིད་ཤེས་རབ་དང་ཐབས་ཀྱི་རང་བཞིན་དེ་ཁོ་ན་ཉིད་ཀྱི་བསྟོད་པ་སྔོན་དུ་འགྲོ་བས་དཀྱིལ་འཁོར་གྱི་དངོས་གྲུབ་ཞུ་ཞིང་བདེན་པའི་བྱིན་བརླབ་བྱ་སྟེ། ནམ་མཁའ་སྐྱེ་བ་མཚན་ལྡན་ཕྱིར། །ཐོག་མ་ཐ་མ་མེད་པའི་མཆོག །སེམས་དཔའ་རྡོ་རྗེ་ཆེ་རང་བཞིན། །མི་བསྐྱོད་རྡོ་རྗེར་དེང་བདག་སྒྲུབས། །ཀུན་མཆོག་དངོས་གྲུབ་ཆེན་པོ་སྟེ། །དབང་ཕྱུག་ཆེན་པོ་ལྷག་པའི་ལྷ། །རྡོ་རྗེ་འཛིན་པ་ཀུན་གྱི་རྒྱལ། །མི་འགྱུར་མཆོག་ཏུ་བདག་བསྒྲུབ་མཛོད། །ཉེས་པ་མི་མངའ་རྟག་པ་ཁྱོད། །འདོད་ཆགས་ཀུན་གྱི་རྗེས་ཆགས་པ། །འདོད་ཆགས་ཆེན་པོ་དགའ་བ་ཆེ། །བཅོམ་ལྡན་དེ་ཉིད་ཀྱིས་གྲུབ་མཛོད། །ཤིན་ཏུ་རྣམ་དག་ཆོས་ཀྱི་མཆོག །གདོད་ནས་གྲོལ་བ་དེ་བཞིན་གཤེགས། །ཀུན་དུ་བཟང་པོ་ཀུན་བདག་ཉིད། །བྱང་ཆུབ་སེམས་དཔར་བདག་བསྒྲུབ་མཛོད། །དངོས་གྲུབ་ཆེན་པོ་ཀུན་གྱི་མཆོག །དབང་ཕྱུག་མཆོག་གི་ཕྱག་རྒྱ་ཅན། །གྲུབ་པའི་རྡོ་རྗེ་ཆེར་གསལ་བ། །རྡོ་རྗེ་སྙེམས་དག་བདག་བསྒྲུབ་མཛོད། །སེམས་ཅན་ཀུན་གྱི་ཡིད་ཁྱབ་པ། །སེམས་ཅན་ཀུན་གྱི་སྙིང་ལ་གནས། །སེམས་ཅན་ཀུན་གྱི་ཡབ་ཀྱང་ཉིད། །འདོད་པ་མཆོག་གི་དམ་ཚིག་མཆོག །ཤེས་རབ་ཐབས་བདག་དཀྱིལ་འཁོར་གྱི། །བདེན་པ་དེ་ཡིས་མགོན་པོ་ཁྱོད། །བདག་ལ་འདོད་པ་ཡོངས་རྫོགས་མཛོད། །ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང༌། །བདེན་པ་དེ་ཡིས་དཀྱིལ་འཁོར་ནི། །གཟུགས་བརྙན་གསལ་བར་སློབ་མ་རྣམས། །ཀུན་
གྱིས་སྒྲིབ་བྲལ་མཐོང་བར་ཤོག །ཅེས་བརྗོད་པས་སོ། །འདི་ནི་སློབ་དཔོན་འཇུག་པའོ།། །།དེ་ནས་ལྷག་པར་གནས་པ་བྱས་ཤིང་སྡོམ་པ་གཉིས་དང་ལྡན་པའི་སློབ་མ་ཤར་གྱི་སྒོར་ཡོལ་བས་བཅད་པར་བཞག་ནས། དྲི་ཞིམ་པོ་ལ་སོགས་པས་ཡང་དག་པར་བྱས་པ་རྣམ་པར་སྣང་མཛད་ཀྱི་གཟུགས་སམ་འཁོར་ལོའི་དབང་ཕྱུག་གི་གཟུགས་སུ་དམིགས་ཏེ། ཨོཾ་སརྦྦ་ཏ་ཐཱ་ག་ཏ་ཨ་ནུཏྟ་ར་བོདྷི་ཨ་ལངྐཱ་ར་ཝསྟྲ་པཱུ་ཛ་མེ་གྷ་ས་མུ་དྲ་སྥར་ཎ་ས་མ་ཡེ་ཧཱུཾ། ཞེས་པའི་སྔགས་ཀྱིས་གོས་དམར་པོའམ་གཞན་ཡང་རུང་བས་སྨད་གཡོགས་བྱས་ལ། ཨོཾ་བཛྲ་རཀྵ་ཧཾ་ཞེས་པས་སྟོད་གཡོགས་བྱ་ཞིང༌། ཨོཾ་བཛྲ་ཨུཥྞཱི་ཥ་ཧཱུཾ་ཕཊ་ཅེས་པས་གཙུག་ཏོར་བྱའོ། །ཨོཾ་ཙ་ཀྵུ་བདྷ་བར་མཱ་ན་ཡ་ཧཱུཾ་ཞེས་པའི་སྔགས་ཀྱིས་མིག་བཅིང་ཞིང༌། ཨཱ་ཁཾ་བཱི་ར་ཧཱུཾ་ཞེས་པས་མེ་ཏོག་གི་ཕྲེང་བཟུང་ནས་ཡོན་ཕུལ་བ། ལས་ཐམས་ཅད་པའི་སྔགས་ཆུས་བསངས་ཏེ། རྣལ་འབྱོར་མའམ་ལས་ཀྱི་རྡོ་རྗེ་ཅན་གྱིས་བཟུང་ལ། དེ་ནས་རང་གི་སློབ་མ་ལ་དྲི་བར་བྱ་སྟེ། དགའ་བ་ལ་དགའ་ཁྱོད་སུ་ཀྱེ། །སློབ་མ་དེ་དག་རྣམས་ཀྱིས་ཀྱང༌། །སྐལ་བཟང་བདག་ནི་བདེ་ཆེན་ལའོ། །དེ་ནས་དེས། ཨོཾ་སརྦ་ཡོ་ག་ཙིཏྟ་ཨུདྤཱ་ད་ཡཱ་མི། ཞེས་བརྗོད་ཅིང་བྱང་ཆུབ་ཏུ་སེམས་བསྐྱེད་ལ། སྙིང་གར་རྡོ་རྗེ་མེ་ཏོག་དང་བཅས་པ་བཟུང་ནས། ཨོཾ་སུ་ར་ཏ་ས་མ་ཡ་སྟྭཾ་ཧོཿ་སིདྡྷྱ་བཛྲ་ཡ་ཐཱ་སུ་ཁཾ། ཞེས་བརྗོད་དེ། དེང་ཁྱོད་ལ་དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་རློབ་པར་འགྱུར་གྱི་ཁྱོད་ཀྱིས་ཀྱང་དེ་བཞིན་གཤེགས་པ་ཐམས་ཅད་ཀྱི་མཆོག་ཏུ་གསང་བའི་དཀྱིལ་འཁོར་འདི་དཀྱིལ་འཁོར་དུ་མ་ཞུགས་པ་རྣམས་ལ་སྨྲ་བར་མི་བྱ་ཞིང་མ་དད་པར་ཡང་མི་བྱའོ་ཞེས་བརྗོད་པར་བྱའོ། །ཨོཾ་ཡ་མཱནྟ་ཀྲྀ་ཏ་ཧཱུཾ་ཞེས་བརྗོད་ཅིང་ཁྲིད་ལ། ཨཱ་ཁཾ་བཱི་ར་ཧཱུཾ་ཞེས་པ་འདིས་ཡོལ་བའི་ནང་དུ་བཅུག་ནས། མ་ཧཱ་ར་ཏ་སུ་དྲྀ་ཌྷྱ་སུ་ཏོཥྱ་སུ་སུ་ཁོ་བཛྲ་སཏྭ་ཨཱ་དྱ་སིདྡྷྱ་མཾ་ཞེས་བརྗོད་པས་གཡས་སྐོར་བྱ་ཞིང་ཐལ་མོ་སྦྱར་ལ་དཀྱིལ་འཁོར་གྱི་ཤར་སྒོའི་ཕྱི་རོལ་དུ་ཕྱིན་ནས་ཕྱག་འཚལ་བར་བྱ་སྟེ། སྔགས་འདི་རྣམས་འདོན་བཞིན་པས་སོ། །ཨོཾ་སརྦ་ཏ་ཐཱ་ག་ཏ་པཱུ་ཛོ་པ་སྠཱ་ནཱ་ཡ། ཨཱཏྨ་ནཱཾ་ནཱི་ཪྻ་ཏ་ཡཱ་མི་སརྦ་ཏ་ཐཱ་ག་ཏ་བཛྲ་སཏྭ་ཨ་དྷི་ཏིཥྛ་སྭ་མཱཾ། ཨོཾ་སརྦ་ཏ་ཐཱ་ག་ཏ་པཱུ་ཛ་ཨུ་པསྠཱ་ནཱ་ཡ་ཨཱཏྨ་ནཱཾ་
ནཱི་ཪྻ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་བཻ་རོ་ཙ་ན་ཨ་དྷི་ཏིཥྛ་མཾ། ལྷོར་སྙིང་གར་ཐལ་མོ་སྦྱར་ཏེ། ཨོཾ་སརྦ་ཏ་ཐཱ་ག་ཏ་པཱུ་ཛ་ཨ་བྷི་ཥེ་ཀ་ཡ་ཨཱཏྨ་ནཱཾ་ནཱི་ཪྻ་ཏ་ཡ་མི། སརྦ་ཏ་ཐཱ་ག་ཏ་བཛྲ་རཏྣ་ཨ་བྷི་ཥིཉྩ་མཱཾ། ནུབ་ཏུ་དཔྲལ་བར་ཐལ་མོ་སྦྱར་ཏེ། ཨོཾ་སརྦ་ཏ་ཐཱ་ག་ཏ་པཱུ་ཛ་པྲ་ཝ་རྟ་ནཱ་ཡ་ཨཱཏྨ་ནཱཾ་ནཱི་ཪྻ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་དྷརྨཱ་བྲ་ཝརྟ་ཡ་མཱཾ། བྱང་དུ་སྙིང་གར་ཐལ་མོ་སྦྱར་ཏེ། ཨོཾ་སརྦ་ཏ་ཐཱ་ག་ཏ་པཱུ་ཛ་ཀརྨ་ཎེ་ཨཱཏྨ་ཎེ་ཨཱཏྨ་ནཱཾ་ནཱི་ཪྻ་ཏ་ཡཱ་མི། སརྦ་ཏ་ཐཱ་ག་ཏ་བཛྲ་ཀརྨ་ཀུ་རུ་མཱཾ། ཞེས་པའི་རིགས་ལྔས་མི་བསྐྱོད་པ་ལ་སོགས་པའི་དེ་བཞིན་གཤེགས་པ་རྣམས་ལ་ཕྱག་བྱེད་དུ་བཅུག་སྟེ། སླར་ཡང་ཤར་སྒོའི་ཕྱི་རོལ་ནས་རབ་ཏུ་དང་བས། ཨོཾ་གུ་རུ་ཙ་ར་ཎོ་པ་སྠ་ནཱ་ཡ་ཨཱཏྨ་ནཱཾ་ནི་ཪྻ་ཏ་ཡཱ་མི། ཨོཾ་སརྦ་སཏྭ་པ་རི་དྲ་ཎརྠཱ་ཡ་ཨཱཏྨ་ནཱཾ་ནཱི་ཪྻ་ཏ་ཡཱ་མི། ཞེས་པ་རྣམས་དོན་གོ་བ་སྔོན་དུ་འགྲོ་བས་འདོན་དུ་གཞུག་པར་བྱའོ། །དེ་ནས་དེང་ཁྱོད་དེ་བཞིན་གཤེགས་པ་ཐམས་ཅད་ཀྱི་རིགས་སུ་ཞུགས་ཀྱི། དེའི་ཕྱིར་ངས་ཁྱོད་ལ་རྡོ་རྗེ་ཡེ་ཤེས་བསྐྱེད་པར་བྱ་སྟེ། ཡེ་ཤེས་གང་གིས་ཁྱོད་དེ་བཞིན་གཤེགས་པ་ཐམས་ཅད་ཀྱི་དངོས་གྲུབ་ཀྱང་ཐོབ་པར་འགྲུབ་ན་དངོས་གྲུབ་གཞན་ལྟ་སྨོས་ཀྱང་ཅི་དགོས། ཁྱོད་ཀྱིས་འདི་དཀྱིལ་འཁོར་མ་མཐོང་བ་རྣམས་ཀྱི་མདུན་དུ་སྨྲ་བར་མི་བྱ་སྟེ་ཁྱོད་དམ་ཚིག་ཉམས་པར་གྱུར་ཏེ་རེ་ཞེས་བརྗོད་ནས་མགོ་བོར་རྡོ་རྗེ་གཟུང་ཞིང་དྲིལ་བུ་དཀྲོལ་ནས། ཁྱོད་ཀྱི་དམ་ཚིག་རྡོ་རྗེ་འདིས། །གལ་ཏེ་ཁྱོད་ཀྱིས་འགའ་ཞིག་ལ། །འདི་སྨྲས་ན་ནི་མགོ་བོ་འགེམས། །ཞེས་བརྗོད་པར་བྱའོ། །སླར་ཡང་སྙིང་གར་རྡོ་རྗེ་གཟུང་སྟེ། དེ་རིང་རྡོ་རྗེ་སེམས་དཔའ་ནི། །ཁྱོད་ཀྱི་སྙིང་ལ་ཡང་དག་གནས། །གལ་ཏེ་ཚུལ་འདི་སྨྲས་ན་ནི། །དེ་མ་ཐག་ཏུ་དྲལ་ཏེ་གཤེགས། །ཞེས་པ་འདིས་མནའ་བྱས་ནས། བདུད་རྩི་ལྔ་པདྨའི་སྣོད་དུ་གནས་པ་ལ་ཡི་གེ་གསུམ་གྱིས་བསྔགས་པ་རྣམ་རྒྱལ་བུམ་པའི་སྟེང་དུ་བཞག་པ། ཨོཾ་བཛྲ་ཨ་མྲྀ་ཏ་ཨུ་ད་ཀ་ཋཿ་ཞེས་པ་བདུན་བཟླས་ཏེ་མིང་མེད་དང་མཐེ་བོང་གིས་བཟུང་བའི་སྣོད་ཀྱི་ཁ་ནས་དེའི་ཁར་སྦྱིན་ཞིང༌། འདི་ནི་ཁྱོད་ཀྱི་དམྱལ་བའི་ཆུ། །དམ་ཚིག་འདས་ན་སྲེག་པར་བྱེད། །དམ་ཚིག་བསྲུངས་ན་དངོས་གྲུབ་སྟེ། །རྡོ་རྗེ་བདུད་རྩིའི་ཆུ་འཐུང་ཤིག །ཅེས་བརྗོད་པས་མ་ནའི་བཏུང་བ་བྱེད་དུ་བཅུག་ལ། དེང་ནས་བརྩམས་ཏེ་ཁྱོད་ཀྱི་ཕྱག་ན་རྡོ་རྗེ་ང་ཡིན་གྱི། །ངས་འདི་གྱིས་ཤིག་ཅེས་གང་
བསྒོ་བ་དེ་ཁྱོད་ཀྱིས་བྱ་དགོས་སོ། །ཁྱོད་ཀྱིས་ང་ལ་བརྙས་པར་ཡང་མི་བྱ་སྟེ། ཁྱོད་ཡང་བ་མ་སྤངས་པར་དུས་བྱས་ནས་དམྱལ་བར་ལྟུང་བར་གྱུར་ཏ་རེ་ཞེས་བརྗོད་པར་བྱའོ་ཞེས་པ་དམ་ཚིག་གི་ཆུ་སྦྱིན་པའོ། །དེ་རྗེས་སློབ་མས་འདི་བརྗོད་དེ། རང་ཉིད་མཉམ་པར་གཞག་པས་དབབ། སློབ་དཔོན་གྱིས་བསྐུལ་ཚིག་གིས་ནི། དངོས་གྲུབ་ཐམས་ཅད་རབ་བསྒྲུབ་ཕྱིར། །དེ་བཞིན་གཤེགས་པ་ཐམས་ཅད་ཀྱིས་བྱིན་གྱིས་བརླབ་ཏུ་གསོལ། རྡོ་རྗེ་སེམས་དཔའ་བདག་ལ་འབབ་པར་གྱུར་ཅིག་ཅེས་སོ། །དེ་ནས། རྐང་པའི་མཐིལ་ནས་སྟེང་ཀུན་དུ། །ལུས་ལ་བུག་པ་རྣམས་བསམ་ཞིང༌། །དེ་ཡི་རྐང་པའི་འོག་ཏུ་ནི། །འབར་བཅས་མེ་ཡི་དཀྱིལ་འཁོར་བསྒོམ། །དེ་ཡི་སྟེང་དུ་ཛྷཻཾ་ཡིག་ནི། །དམར་མོའི་མདོག་ཅན་རྣམ་བསམས་ཏེ། །དེ་ལས་བྱུང་བའི་མེ་འོད་ཀྱིས། །བརྟུལ་ཞུགས་ཅན་གྱིས་ལུས་རྣམས་སྦྱང༌། །དེ་བཞིན་འོད་ནི་གསལ་བྱ་ཞིང༌། །མཁས་པས་བླང་བ་བྱས་ནས་སླར། །སློབ་མའི་སྙིང་མགྲིན་མགོ་བོ་ལ། །ཧཱུཾ་ཧཿ་ཨཱཿ་ཞེས་རྣམ་པར་དགོད། །དྲིལ་བུ་སྒྲ་ནི་སྒྲོགས་ལྡན་པ། །འཛིན་པ་ཡིས་ནི་དབབ་པར་བྱ། །དེ་བཞིན་གཤེགས་རྣམས་དབབ་པ་ཡི། །དོན་དུ་སྔགས་འདི་བརྗོད་པར་བྱ། །འདི་དེ་དམ་ཚིག་རྡོ་རྗེ་སྟེ། །རྡོ་རྗེ་སེམས་དཔའ་ཞེས་སུ་བརྗོད། །རྡོ་རྗེ་ཡེ་ཤེས་བླ་མེད་འདི། །དེ་རིང་ཉིད་དུ་འབབ་པར་ཤོག །ཨོཾ་བཛྲ་ཨཱ་བེ་ཤ་ཨཿ་ཨཿ་ཨཿ་ཨཿ། གལ་ཏེ་ཕེབས་པ་ཉིད་མིན་ན། །སྔགས་འདི་ཡང་ནི་བརྟན་པར་བརྗོད། །དེ་ནས་ཨཱཿ་ཡིག་འོད་ཟེར་གྱིས། །ཡེ་ཤེས་སེམས་དཔའ་རབ་བསྐུལ་བྱ། །ཨཱ་བེ་ཤ་ཡ་སྟམྦྷ་ཡ་ར་རར་ར་ཙ་ལ་ཡ་ཙལ་ཡ་ཧཱུཾ་ཧཿ་ཨཱཿ་ཛྷཻཾ། འདར་བའམ་བསྤུ་ལྡང་བར་བྱེད། །བརྒྱལ་བའམ་གང་གིས་གར་བྱེད་པ། །དེ་དག་སྟེང་དུ་འཕར་བ་ཡང༌། །ཕེབས་པའི་མཚན་ཉིད་རིག་པར་བྱ། །དགའ་ཞིང་ལྟ་བས་ཞུགས་པ་ཡི། །སློབ་མའི་ལྕེ་ལ་ཨཿ་ཡིག་དགོད། །ཡི་གེ་བརྒྱ་པས་བརྟན་བྱས་ཏེ། །མཁས་པས་དགེ་དང་མི་དགེ་དྲི། །ཕེབས་པ་གཏོང་བར་བྱེད་པ་ནི། །སྔགས་ཀྱི་རིམ་པ་འདི་ཡིས་རིག །ངེས་པར་ཞུགས་པའི་ལྷ་རྣམས་སྙིང་གའི་ས་བོན་གྱི་འོད་ཟེར་གྱིས་བཀུག་ནས་རང་གི་སྙིང་གའི་ས་བོན་ལ་བསྟིམ་ཞིང་སློབ་མའི་མགོ་བོར་རྡོ་རྗེ་གཟུང་ལ། ཨོཾ་ཁྱོད་ཀྱིས་སེམས་ཅན་དོན་ཀུན་མཛད། །ཅེས་པ་ལ་སོགས་པ་སྔོན་དུ་འགྲོ་བའི་ཧཱུཾ་ཧཿ་ཨཿ་ཛྷཻཾ་མུཾ་ཞེས་
པས་གཤེགས་སུ་གསོལ་བར་བྱ་སྟེ། འདི་ནི་དབབ་པའི་ཆོ་གའོ།། །།དེ་ནས་སློབ་མ་དཀྱིལ་འཁོར་དུ་མངོན་པར་ཕྱོགས་པ་ལ་ཁྱོད་ཀྱི་མིག་གིས་བལྟས་པ་ལ་ཇི་ལྟར་སྣང་ཞེས་དྲིས་ཏེ། དེ་ན་རེ་དཀར་པོ་དང་སེར་པོ་དང་དམར་པོ་དང་ལྗང་གུ་དང་ནག་པོར་སྣང་ངོ་ཞེས་ཟེར་ན། རིམ་པ་ཇི་ལྟ་བ་བཞིན་དུ་ཞི་བ་དང༌། རྒྱས་པ་དང༌། དབང་དང༌། མངོན་སྤྱོད་ཀྱི་དངོས་གྲུབ་ལ་སྐལ་བ་དང་ལྡན་པར་གོ་བར་བྱ་ཞིང༌། འདིའི་མཐེ་བོང་གཉིས་རྡོ་རྗེ་དང་བཅས་པའི་ལག་པ་གཡས་པས་གཟུང་ལ། རྡོ་རྗེའི་རྐང་སྟབས་ཀྱི་གར་གྱི་ཚུལ་གྱིས་འཁྱིལ་པའི་སྔགས་བརྗོད་ཅིང་སྐོར་བ་གསུམ་བྱེད་དུ་བཅུག་ནས་བདེན་པའི་བྱིན་གྱིས་བརླབ་པ་འདི་བྱ་སྟེ། ཡང་དག་པ་ཡི་དཀྱིལ་འཁོར་འདིར། །བདག་གིས་སློབ་མ་གཞུག་པ་འདི། །ལྷ་རྣམས་རིགས་ཀྱི་རིམ་པ་ནི། །བསོད་ནམས་རིམ་པ་དེ་བཞིན་ཤོག །འདི་ཡི་དངོས་གྲུབ་ཅི་འདྲར་འགྱུར། །རིགས་ནི་གང་གི་སྣོད་དུ་རུང༌། །བསོད་ནམས་མཐུ་ཡང་ཅི་འདྲ་བ། །དེ་འདྲར་དཀྱིལ་འཁོར་དུ་གྱུར་ཅིག །ཅེས་པ་འདི་བརྗོད་པས་སོ། །དེ་ནས་སྔར་བཟུང་པའི་མེ་ཏོག་གི་ཕྲེང་བ་ཡི་གེ་ཏྲཾ་གིས་བསྔགས་པ་ལས་ཡང་ཞིང་མ་རྙིང་པའི་མེ་ཏོག་ཅིག་བཏོན་ལ། དེའི་ལག་པ་ཐལ་མོ་སྦྱར་བར་སྦྱིན་པར་བྱ་ཞིང་དེས་དེའི་ཚེ་མེ་ཏོག་གི་ཕྲེང་བར་ལྷག་པར་མོས་ཏེ། བདག་ཉིད་ཀྱང་ཡི་གེ་གསུམ་གྱིས་འོད་གསལ་ཞིང་སྡིག་པ་དང་བྲལ་བར་མོས་ལ། བླ་མས་དེ་ལྟར་བྱིན་གྱིས་བརླབས་པ་དང་གུས་པ་སྔོན་དུ་འགྲོ་བས་དཀྱིལ་འཁོར་བ་དང་བཅས་པའི་དཀྱིལ་འཁོར་གྱི་དབང་ཕྱུག་མདུན་ན་གནས་བཞིན་པར་དམིགས་པའི་དཀྱིལ་འཁོར་དེར་ཡིད་ཀྱིས་ཞུགས་ནས་དེའི་དབུ་ལ་མེ་ཏོག་དོར་བར་བྱ་སྟེ། ཨོཾ་ཏིཥྛ་བཛྲ་དྲྀ་ཌྷོ་མེ་བྷ་ཝ། ཤཱ་ཤྭ་ཏོ་མེ་བྷ་ཝ། ཧྲྀ་ད་ཡཾ་མེ། ཨ་དྷི་ཏིཥྛ་སརྦ་སིདྡྷི་མེ་པྲ་ཡཙྪ་ཧཱུཾ་ཧ་ཧ་ཧ་ཧ་ཧོཿ་ཨཱ་ཁཾ་བཱིར་ཧཱུཾ་པྲ་ཏཱི་ཙྪ་ཀུ་སུ་མཱ་ཉྫ་ལི་ནཱ་ཐ་ཧོཿ་ཞེས་པའི་སྔགས་བརྗོད་པས་སོ། །རེ་ཁཱ་ལྔའི་ནང་དུ་མེ་ཏོག་ལྷུང་བ་དང་རྗེས་སུ་མཐུན་པར་འདིའི་རིགས་ལ་སོགས་པ་བསྟན་པར་བྱ་ཞིང༌། དེའི་རྣལ་འབྱོར་ཀྱང་སྦྱིན་ནོ། །དངོས་གྲུབ་མཚོན་པར་བྱ་སྟེ། གལ་ཏེ་སངས་རྒྱས་ཀྱི་དབུའམ་གཙུག་ཏོར་རམ། མཛོད་སྤུ་ལ་མེ་ཏོག་ལྷུང་ན་དེའི་ཚེ་ཕྱག་རྒྱ་ཆེན་པོའི་དངོས་གྲུབ་བོ། །སྤྱན་ནམ་ཞལ་ལ་ལྷུང་ན་དེའི་ཚེ་སྔགས་ཀྱི་དངོས་གྲུབ་བོ།
སྐུའི་སྟོད་ལ་ནི་མཆོག་སྟེ། བར་ལ་ནི་འབྲིང་དང༌། འོག་གི་ཆ་ལ་ནི་དམན་པའོ། །སྐུ་ལས་ཤིན་ཏུ་རིང་བར་གྱུར་པ་ལ་ནི་ཡུན་རིང་བོས་ཏེ། ཉེ་བ་ལ་ནི་མྱུར་བར་རབ་ཏུ་འགྲུབ་བོ། །ལྷ་རྣམས་ཀྱི་རང་གི་གནས་ནི་རེའུ་མིག་ལ་སོགས་པས་རྣམ་པར་བཅད་པ་ལས་ཤེས་པར་བྱ་སྟེ། གལ་ཏེ་ལྷ་གཉིས་ཀྱི་བར་དུ་ལྷུང་ན་དེའི་ཚེ་མེ་ཏོག་གང་ལ་ཉེ་བར་གྱུར་པ་དེའི་རིགས་སུ་འགྱུར་རོ། །མཉམ་བ་ཉིད་ལ་ནི་གཉི་གའི་ཆོག་འགྲུབ་སྟེ་དེའི་ཚེ་དེ་རྣམས་གང་དད་པ་དེའི་རིགས་སུ་འགྱུར་རོ། །རེ་ཁཱ་ལྔའི་ཕྱི་རོལ་དུ་ལྷུང་ན་སླར་ཡང་ལན་གསུམ་གྱི་བར་དུ་དོར་བར་བྱ་སྟེ། དེ་ལ་ཡང་ཕྱི་རོལ་དུ་ལྷུང་ན་ནི་དངོས་གྲུབ་ཕྲ་མོའོ། །ཕྱིའི་རེ་ཁཱ་ཟླུམ་པོ་རྣམས་དང་རྡོ་རྗེ་ཕྲེང་བའི་ཕྱི་རོལ་དུ་ལྷུང་ན་ནི་དངོས་གྲུབ་མེད་དེ་འདི་ལ་དཀྱིལ་འཁོར་ཡང་བསྟན་པར་མི་བྱའོ། །སྔགས་བཟླས་པ་ལ་སོགས་པས་སྐལ་བ་དང་ལྡན་པ་ཉིད་དུ་བསྒྲུབས་ནས་སྐབས་གཞན་དུ་དེ་གཞུག་པར་བྱའོ། །དེ་ནས་མེ་ཏོག་དེ་བཟུང་ནས་ཨོཾ་པྲ་ཏི་གྲྀཧྞ་སྟྭཾ་ཨི་མཾ་སཏྭ་མ་ཧཱ་བ་ལ། ཞེས་བརྗོད་དེ་སློབ་མའི་མགོ་བོ་ལ་བཅིང༌། འདི་ནི་ཕྲེང་བའི་མངོན་པར་དབང་བསྐུར་བའི་ཆོ་གའོ།། །།འདིར་ཕེབས་པར་གྱུར་པ་ན་དགེ་བ་ལ་སོགས་པ་སྨྲས་པའི་མཐར་ཨོཾ་ཏིཥྛ་བཛྲ་ཞེས་པ་འདིས་ཕེབས་པ་བརྟན་པར་བྱ་ཞིང་མིག་གི་སྣང་བ་དྲི་བ་ལ་སོགས་པ་ནས་མགོ་བོར་བཅིང་བའི་མཐར་ཐུག་པར་ཏེ། ངེས་པར་ཞུགས་པའི་ལྷ་གཤེགས་སུ་གསོལ་བར་བྱའོ། །མི་ནུས་པས་ནི་འབེབས་པའི་ཆོ་ག་མ་བྱས་པར་དམ་ཚིག་གི་ཆུ་བྱིན་པའི་མཇུག་ཐོགས་སུ་མིག་ནི་སྣང་བ་དྲི་བ་ལ་སོགས་པ་བྱའོ་ཞེས་འཆད་དོ། །དེའི་རྗེས་སུ་སློབ་མའི་མིག་གཉིས་ལ་འབར་བ་དང་བཅས་པའི་ཨོཾ་གཉིས་རྣམ་པར་བསྒོམས་ཏེ། དེ་རིང་རྡོ་རྗེ་སེམས་དཔའ་རང༌། །ཁྱོད་ཀྱི་མིག་ནི་འབྱེད་པར་བརྩོན། །རྡོ་རྗེ་མིག་ནི་བླ་ན་མེད། །ཐམས་ཅད་མིག་ནི་དབྱེ་བར་མཛོད། །ཨོཾ་ཛྙཱ་ན་ཙཀྵུ་ཧཱུཾ་ཨཿ་ཞེས་བརྗོད་ཅིང་གདོད་གཡོགས་བསལ་བར་བྱའོ། །དེ་ནས་ཀྱེ་རྡོ་རྗེ་ལྟོས་ཤིག་ཅེས་སྨྲས་ནས། ད་ནི་དད་པའི་ཤུགས་ཀྱིས་སུ། །དཀྱིལ་འཁོར་འདི་དེ་ཉིད་ལ་ལྟོས། །ཁྱོད་ནི་སངས་རྒྱས་རིགས་སུ་སྐྱེས། །གསང་སྔགས་རྣམས་ལ་བསྒྲུབ་པར་བགྱིས། །ཞེས་བརྗོད་དོ། །དེ་ནས་རིམ་བཞིན་དཀྱིལ་འཁོར་གྱི། །དེ་ཉིད་རབ་ཏུ་བསལ་བར་བྱ། །ལྷ་རྣམས་
དེ་དག་ཐམས་ཅད་ཀྱི། །ངོ་བོ་འང་ཉེ་བར་བསྟན་པར་བྱ། །འཕགས་པའི་བདེན་པས་གྲུ་བཞིར་འགྱུར། །ཚངས་པའི་གནས་པས་ཟུར་རྣམས་ཏེ། །སྒོ་རྣམས་བསྡུ་བའི་དངོས་པོར་བརྗོད། །སོ་སོར་བཞིར་ནི་ཡང་དག་ཤེས། །དད་དབང་ལ་སོགས་སེམས་གང་ཡིན། །ར་བ་ལྔར་ནི་ཡང་དག་བྱུང༌། །རྫུ་འཕྲུལ་རྐང་པ་བཞི་པོ་ནི། །སྒོ་ཁྱུད་རྣམ་བཞི་དེ་རྣམས་སོ། །དེ་ཡི་དབུས་སུ་འཁོར་ལོ་གང༌། །དཀྱིལ་འཁོར་བརྒྱད་ལ་མཚུངས་པ་སྟེ། །རྣམ་པར་ཐར་པ་བརྒྱད་པོ་འདིས། །དངོས་གྲུབ་ཐམས་ཅད་རབ་ཏུ་བསྒྲུབ། །དངོས་གྲུབ་ཆེན་པོའི་ཕུང་པོ་ཀུན། །ཀ་བ་ལྟ་བུར་རྟག་ཏུ་འགྱུར། །འཕགས་ལམ་ཡན་ལག་བརྒྱད་པོ་འདི། །ཀ་བ་བརྒྱད་ཅེས་བྱ་བར་བཤད། །ཆོས་ཀྱི་དབྱིངས་ཀྱི་དོན་གྱི་བརྡར། །འཁོར་ལོའི་ནང་དུ་དཀྱིལ་འཁོར་ཏེ། །ཐུགས་ཀྱི་དཀྱིལ་འཁོར་འདི་ཉིད་ནི། །ཐར་པ་ཆེན་པོའི་གྲོང་ཁྱེར་མཆོག །བསམ་གཏན་རྣམས་ནི་རྟ་བབས་འདིར། །བ་དན་རང་བཞིན་དེ་བཞིན་ཏེ། །བྱང་ཆུབ་འབྲས་བུ་ར་བ་ནི། །སྒོ་རྣམས་སུ་ནི་དཔག་བསམ་ཤིང༌། །ཕུང་པོ་ལྔ་ཡི་རང་བཞིན་གྱིས། །སངས་རྒྱས་ལྔ་ནི་རབ་ཏུ་བསྟན། །སྤྱན་མ་ལ་སོགས་ལྷ་མོ་བཞི། །ས་ལ་སོགས་པའི་རང་བཞིན་ཉིད། །འདོད་པ་ལྔ་ཡི་རང་བཞིན་གྱིས། །གཟུགས་ཀྱི་རྡོ་རྗེ་སོགས་དེ་བཞིན། །མིག་ལ་སོགས་པའི་རང་བཞིན་ཡང༌། །ས་ཡི་སྙིང་པོ་ལ་སོགས་སོ། །ལག་སོགས་ངོ་བོ་ཁྲོ་བོའི་དབང༌། །གཤིན་རྗེའི་དགྲ་སོགས་རབ་བསྟན་ཏེ། །སྐུ་ཡི་འཁོར་ལོར་གནས་སངས་རྒྱས། །རིམ་བཞིན་མི་བསྐྱོད་ལ་སོགས་མགོན། །ཕྱི་ཡི་འཁོར་ལོར་སློབ་མ་ལ། །གསལ་བྱ་སྙིང་རྗེའི་བདག་ཉིད་ཅན། །ཞེས་པའོ། །རྡོ་རྗེའི་དཀྱིལ་འཁོར་དཀྱིལ་འཁོར་ཆེན་པོར་བདག་ཞུགས་སོ། །རྣལ་འབྱོར་དཀྱིལ་འཁོར་དཀྱིལ་འཁོར་ཆེན་པོ་བདག་གིས་མཐོང༌། །གསང་བའི་དཀྱིལ་འཁོར་དཀྱིལ་འཁོར་ཆེན་པོར་བདག་དབང་བསྐུར། །ཞེས་བརྗོད་དུ་བཅུག་ནས་དམ་ཚིག་བསྒྲགས་པར་བྱ་སྟེ། ཧོཿཧོཿཧོཿཞེས་པའོ། །སློབ་མ་གཞུག་པའི་ཆོ་གའོ།། །།དེའི་རྗེས་ལ་ཆུའི་དབང་གི་དོན་དུ་བླ་མ་ལ་ཇི་ལྟར་འབྱར་བའི་ཡོན་ཕུལ་ནས། པུས་མོ་ས་ལ་བཙུགས་ཤིང་ཐལ་མོ་སྦྱར་ཏེ། བྱང་ཆུབ་རྡོ་རྗེ་སངས་རྒྱས་ལ། །མཆོད་
ཆེན་ཇི་ལྟར་སྩལ་བ་ལྟར། །བདག་ཀྱང་བསྐྱབ་བའི་དོན་གྱི་ཕྱིར། །ནམ་མཁའི་རྡོ་རྗེ་དེང་བདག་སྩོལ། །ཞེས་བརྗོད་ཅིང་གསོལ་བ་གདབ་པར་བྱའོ། །དེ་ནས་དཀྱིལ་འཁོར་ཕྱི་རོལ་དུ། །ཤར་གྱི་ཕྱོགས་སུ་དཀྱིལ་འཁོར་ཏེ། །ཡང་ན་དབང་ལྡན་སྔགས་པས་བྲི། །གྲུ་བཞི་པ་ལ་སྒོ་བཞི་པ། །ཁྲུ་དོ་རིམ་པ་གཉིས་པ་ཉིད། །དེ་དབུས་སྣ་ཚོགས་འདམ་སྐྱེས་ཏེ། །དཀར་དམར་དེ་བཞིན་ནག་པོ་ཡི། །ར་བ་གསུམ་ནི་དེ་ལ་བྲི། །ར་བའི་རྡུལ་ཚོན་ལྡན་བྱས་ནས། །ཕྱག་རྒྱ་བཞི་ནི་དགོད་བྱ་སྟེ། །ཤར་དུ་འཁོར་ལོ་ལྷོར་རིན་ཆེན། །ནུབ་ཏུ་ཆུ་སྐྱེས་གེ་སར་བཅས། །ནོར་སྦྱིན་སྣ་ཚོགས་རྡོ་རྗེ་གཞག །བུམ་པ་ཡང་ནི་དགོད་པར་བྱ། །ཞེས་པ་ཁྲུས་ཀྱི་དཀྱིལ་འཁོར་གྱི་ཆོ་གའོ།། །།ཕྲེང་བའི་དབང་བསྐུར་བྱས་ནས་ནི། །སློབ་མ་བཟུང་ནས་མཎྜལ་གྱི། །ད་བུས་སུ་པདྨར་ཡང་དག་གཞག །ལྷ་ཡི་ང་རྒྱལ་འཛིན་པས་སོ། །སློབ་དཔོན་ཚོགས་དང་བཅས་རྣམས་ཀྱིས། །ཤིས་བརྗོད་ཚིགས་བཅད་སྔོན་འགྲོ་བས། །བུམ་པ་ལས་བྱུང་རྣམས་ཀྱིས་ནི། །རྡོ་རྗེ་སློབ་མ་བཀྲུ་བར་བྱ། །ཏིལ་གྱི་གང་བུ་ལྟར་གང་བའི། །བུམ་པ་འཛིན་པའི་རྒྱལ་བ་རྣམས། །དེ་རིང་ཁྱོད་ལ་དབང་བསྐུར་གྱི། །ཤེས་ནས་ཡིད་ནི་བདེ་བར་གྱིས། །ཞེས་བརྗོད་ནས་སློབ་མ་རྡོ་རྗེ་འཆང་གི་གཟུགས་སུ་བསྒོམས་ཏེ་སྔར་བརྗོད་པའི་ཆོ་གས་སྦྱང་བར་བྱའོ། །དེ་ནས་གཞན་ཡང་སྙིང་གའི་ས་བོན་གྱི་འོད་ཟེར་རྣམས་ཀྱིས་ཕྱོགས་མཐའ་ཡས་པ་ན་བཞུགས་པའི་དེ་བཞིན་གཤེགས་པ་དང་རིག་པའི་ལྷ་མོ་རྣམས་ཀྱང་སྤྱན་དྲངས་ནས་ཡང་དག་པར་མཆོད་དེ། སློབ་མ་དབང་བསྐུར་བའི་དོན་དུ། །རྡོ་རྗེ་ཅན་གྱིས་སངས་རྒྱས་ལ། །འགྲོ་བ་བསྐྱབ་པའི་ཆེད་དུ་དབང༌། །ཇི་ལྟར་ཡོན་ཏན་འབྱུང་གནས་སྩལ། །དེ་ལྟར་འདི་ལ་སྩལ་དུ་གསོལ། །ཞེས་པའི་ཚིགས་སུ་བཅད་པས་གསོལ་བ་བཏབ་པ་དང༌། དེ་བཞིན་གཤེགས་པ་དེ་རྣམས་ཤེས་རབ་དང་སྙོམས་པར་ཞུགས་པས་འདོད་ཆགས་ཆེན་པོས་ཞུ་བར་གྱུར་པ། རྣམ་པར་སྣང་མཛད་ཀྱི་སྒོ་ནས་ཞུགས་ཏེ་རྡོ་རྗེའི་ལམ་ནས་བྱུང་བའི་ཁུ་བ་དེ་རྣམས་ཀྱི་ཁ་ནས་ལྷ་མོའི་པདྨར་ཞུགས་པའི་སློབ་མ་སྐད་ཅིག་གིས་སྟོང་པ་ཉིད་ཀྱི་རྗེས་ལ་ཧཱུཾ་དང་རྡོ་རྗེ་ལས་སྐྱེས་པའི་མི་བསྐྱོད་པ་ཤེས་རབ་དང་བཅས་པའི་གཟུགས་ཡེ་ཤེས་
སེམས་དཔའ་དང་དབྱེར་མེད་པ་ལ་མངོན་པར་དབང་བསྐུར་ནས། སླར་ཡང་ཕྱག་དང་ཞལ་ལ་སོགས་པའི་སྐུ་རྣམས་ཀྱི་པདྨ་ལས་བྱུང་སྟེན་མ་མཁའ་གང་བར་གནས་པའི་སྤྱན་མ་ལ་སོགས་པའི་རིག་མ་རྣམས་དང་ལྷན་ཅིག་པས་གདུགས་དང་རྒྱལ་མཚན་དང་བ་དན་དང་ན་བཟའ་དང་རོལ་མོའི་སྒྲ་དང༌། གླུ་དང་གར་དང་མེ་ཏོག་དང་བདུག་སྤོས་དང་གུར་གུམ་གྱི་ཆར་རྣམས་དང༌། ཕྱག་གིས་ཅུང་ཟད་ཡོ་བར་བཟུང་བའི་བུམ་པ་དཀར་པོ་ཅུང་ཟད་ཡོ་བ་བྱང་ཆུབ་ཀྱི་སེམས་ཀྱིས་གང་བ་རྣམས་པདྨ་ནས་ཕྱུང་བའི་སློབ་མ་དེ་རྣམས་ལ་མངོན་པར་དབང་བསྐུར་བཞིན་པ་དང༌། གཟུགས་རྡོ་རྗེ་ལ་སོགས་པའི་ལྷ་མོ་རྣམས་ཀྱིས། བཀྲ་ཤིས་གང་ཞིག་སེམས་ཅན་ཀུན་གྱི་སྙིང་ལ་གནས། །ཀུན་གྱི་བདག་ཉིད་རིགས་ཀུན་གྱི་ནི་བདག་པོ་མཆོག །སེམས་ཅན་མ་ལུས་སྐྱེད་མཛད་བདེ་བ་ཆེན་པོ་སྟེ། །དེས་ནི་དེང་ཁྱོད་དབང་བསྐུར་མཆོག་ལ་ཞི་བྱེད་ཤོག །བཀྲ་ཤིས་གང་ཞིག་མཐའ་དག་རྡོ་རྗེའི་རིགས་དང་ལྡན། །ཞེ་སྡང་ཟིལ་གནོན་སྐྱེ་བོ་ཡོངས་སུ་སྦྱོང་བ་པོ། །དེ་ནི་མི་བསྐྱོད་མགོན་པོ་ཞེས་བྱའི་མཚན་འཆང་བ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་གཏི་མུག་རིགས་དང་ལྡན། །རྣམ་པར་སྣང་མཛད་རྟག་ཏུ་སྲིད་པའི་སྡུག་བསྔལ་འཕྲོག །གཏི་མུག་ཟིལ་གནོན་སྐྱེ་བོ་ཡོངས་སུ་སྤྱོད་བ་པོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་རིན་ཆེན་རིགས་དང་ལྡན། །དབུལ་བའི་སྡུག་བསྔལ་ཡོངས་སུ་གྲོལ་བའི་ཆེད་དུ་བརྩོན། །ང་རྒྱལ་ཟིལ་གནོན་སྐྱེ་བོ་ཡོངས་སུ་སྦྱོང་བ་བོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་པདྨའི་རིགས་དང་ལྡན། །འཇིག་རྟེན་དབང་ཕྱུག་སྲིད་པའི་དྲ་བ་རྣམས་འཇོམས་ཤིང༌། །འདོད་ཆགས་ཟིལ་གནོན་སྐྱེ་བོ་ཡོངས་སུ་སྤྱོད་བ་པོ། །དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་མཐའ་དག་ལས་ཀྱི་རིགས་དང་ལྡན། །བརྫུན་སྨྲར་དགའ་བ་རྣམས་ལ་སྙིང་རྗེའི་བདག་ཉིད་ཅན། །དེ་རྣམས་ཕྲག་དོག་སྡིག་ལས་གྲོལ་བའི་གཉེན་པོ་སྟེ། དེས་ནི་དེང་ཁྱོད་དབང་བསྐུར་མཆོག་ལ་བཀྲ་ཤིས་ཤོག །ཕུན་སུམ་
ཚོགས་པ་མངའ་བ་གསེར་གྱི་རི་བོ་འདྲ། །འཇིག་རྟེན་གསུམ་གྱི་མགོན་པོ་དྲི་མ་གསུམ་སྤངས་པ། །སངས་རྒྱས་པདྨ་རྣམ་རྒྱས་འདབ་འདྲའི་སྤྱན་མངའ་བ། །དེས་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །དེ་ཡིས་ཉེ་བར་བསྟན་པའི་མཆོག་རབ་མི་གཡོ་བ། །འཇིག་རྟེན་གསུམ་ན་གྲགས་ཤིང་ལྷ་དང་མིས་མཆོད་པ། །ཆོས་ཀྱི་དམ་པ་སྐྱེ་དགུ་རྣམས་ལ་ཞི་བྱེད་པ། །དེས་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །དགེ་འདུན་དམ་པའི་ཆོས་ལྡན་ཐོས་པའི་བཀྲ་ཤིས་ཕྱུག །མི་དང་ལྷ་དང་ལྷ་མ་ཡིན་གྱི་ཡོན་གྱི་གནས། །ཚོགས་ཀྱི་མཆོག་རབ་ངོ་ཚ་ཤེས་དང་དཔལ་གྱི་གཞི། །དེས་ནི་དེ་རིང་ཁྱོད་ལ་ཞི་བྱེད་བཀྲ་ཤིས་ཤོག །ཅེས་པ་ལ་སོགས་པའི་བཀྲ་ཤིས་ཀྱི་གླུ་རྣམས་ཀྱིས་བཀྲ་ཤིས་ཉེ་བར་སྦྱོར་བཞིན་པ་ལ། རང་གིས་ཀྱང་དེ་རྣམས་ཀྱི་གླུ་ཉེ་བར་བླང་ཞིང༌། །དང་བོར་རྣམ་པར་རྒྱལ་བའི་བུམ་པ་དང༌། དེ་བཞིན་གཤེགས་པ་བཞིའི་བུམ་པ་དང༌། དེ་ནས་ལྷ་མོ་བཞིའི་བུམ་པ་དང༌། དེ་ནས་ཇི་ལྟར་རིགས་པར་དཀྱིལ་འཁོར་པའི་བུམ་པའི་ཆུ་བྱང་ཆུབ་ཀྱི་སེམས་ཀྱི་བདུད་རྩིའི་ངོ་བོ་རྣམས་ཡལ་འདབ་དང་བཅས་རྡོ་རྗེ་ལག་པ་གཡས་པའི་ཁུ་ཚུར་གྱིས་བཟུང་བའི་རྡོ་རྗེ་རྩེ་མོ་ལས་བླུགས་ཏེ་ཨོཾ་མ་ཧཱ་སུ་ཁ་བཛྲ་ས་ཏྭ་ཨ་བྷི་ཥེ་ཀེ་ཎ་སྟྭཾ་ཨ་བྷི་ཥིཉྩཱ་མི་སརྦ་ཏ་ཐཱ་ག་ཏ་ཨ་དྷི་པ་ཏི་ཏྲེ་ན་དྲི་དྷོ་བྷ་ཝ་ཞེས་བརྗོད་ཅིང༌། དབང་བསྐུར་ཆེན་པོ་རྡོ་རྗེ་ནི། །ཁམས་གསུམ་པ་ཡིས་ཕྱག་བྱས་པ། །རྡོ་རྗེའི་གསང་གསུམ་ཡང་དག་བྱུང༌། །སངས་རྒྱས་ཀུན་གྱིས་སྦྱིན་པར་བྱ། །ཨོཾ་ཨཱཿ་བཛྲ་ཨུ་ད་ཀ་ཨ་བྷི་ཥིཉྩ་ཧཱུཾ་སུ་ར་ཏེ་ཨ་ཧཾ་ཞེས་བརྗོད་པས་མངོན་པར་དབང་བསྐུར་བར་བྱའོ། །ཡང་ཁྲུས་ཀྱི་དཀྱིལ་འཁོར་མེད་ན་དཀྱིལ་འཁོར་གྱི་ཤར་གྱི་སྒོར་སློབ་མ་ཉེ་བར་གཞག་པ་ལ་རྣམ་པར་རྒྱལ་བ་ལ་སོགས་པའི་བུམ་པ་རྣམས་ལས་ཆུ་ཉུང་ཟད་པ་བསྡུས་ཏེ་པདྨའི་སྣོད་དམ་དུང་ཆོས་སུ་བཟུང་བ་རྣམས་བླུགས་ཤིང་དབང་བསྐུར་བར་བྱའོ། །རྡུལ་ཚོན་གྱི་དཀྱིལ་འཁོར་མ་འབྱོར་ན་ཡང་རས་ལ་སོགས་པ་ལ་གནས་པའི་དཀྱིལ་འཁོར་འབའ་ཞིག་ཏུ་རྣམ་པར་རྒྱལ་བའི་བུམ་པའི་ཆུ་ཉིད་མི་བསྐྱོད་པའི་བདག་ཉིད་བྱང་ཆུབ་ཀྱི་སེམས་ཀྱི་ངོ་བོས་མངོན་པར་དབང་བསྐུར་བར་བྱའོ། །དེའི་ཚེ་དེ་རྣམས་བདེ་བ་ཆེན་པོ་ལ་མཉམ་པར་འགྱུར་རོ།།
ཞེས་བསམ་པར་བྱའོ་ཞེས་པ་ནི་ཆུའི་དབང་བསྐུར་བ་སྟེ་མེ་ལོང་ལྟ་བུའི་ཡེ་ཤེས་སོ། །འགའ་ཞིག་ནི་ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་སོ་ཞེས་སོ། །ཁྲུས་ཀྱི་དཀྱིལ་འཁོར་རིམ་པ་ལས། །ཆུ་ཡི་དབང་བསྐུར་ཡད་དག་ཐོབ། །རྒྱན་རྣམས་རབ་འཛིན་གང་ཡིན་པ། །དཀྱིལ་འཁོར་ཆེན་པོའི་ངོས་སུའོ། །དམར་པོའི་གོས་ནི་འཛིན་གྱུར་པ། །རྒྱལ་བའི་རྒྱན་རྣམས་ཀྱིས་ནི་བརྒྱན། །ཅོད་པན་དཀར་པོ་ཡང་དག་འཛིན། །གླུ་འདི་ཡིས་ནི་དགའ་བར་བྱ། །བདེ་བ་ཆེན་པོ་ཆགས་པ་ཆེ། །རྡོ་རྗེ་ཆེན་པོ་ནོར་ཆེན་པོ། །ཤེས་རབ་ཆེན་པོ་ཡེ་ཤེས་ཆེ། །རྡོ་རྗེ་སེམས་དཔར་དེང་བདག་བསྒྲུབ། །སངས་རྒྱས་ཀུན་གྱི་རྡོ་རྗེ་ཆེ། །རྡོ་རྗེའི་དབང་ཕྱུག་བླ་ན་མེད། །དབང་བསྐུར་ཐམས་ཅད་ཀུན་དོན་དུ། །དངོས་གྲུབ་ཐམས་ཅད་བདེ་རབ་སྩོལ། །ཇི་བཞིན་དང་པོའི་སངས་རྒྱས་དོན་དམ་བདེ་བ་སྟེར་བ་པོ། །ཇི་བཞིན་འདོད་པ་ཐར་བ་ནོར་དང་ཆོས་རྣམས་སྟེར་བ་པོ། །ཇི་བཞིན་ཡེ་ཤེས་ལྔ་དང་ཤིན་ཏུ་དགའ་བའི་གྲོགས་བྱེད་པ། །ཇི་བཞིན་ཕྱག་ན་རྡོ་རྗེ་བདེ་བ་ཆེན་པོའི་མགོན་པོ་ཉིད། །ཛ་ཨ་ཨཱ་ཨི་བུདྡྷཱ་ས་ར་མ་ཐེ་དེ་ཧ་ཨོ། །ཛ་ཨ་ཀཱ་མོ་མོཀྑ་དྷ་ཎ་དྷརྨ་དཱ་ཨ་ཨོ། །ཛ་ཨ་པཉྫ་ཉ་ཎ་སུ་ར་ཨ་ས་ཧཱ་ཨ་ཨོ། །ཛ་ཨ་བཛྲ་བཱ་ཎི་མ་ཧཱ་སུ་ཧ་ཎ་ཨོ། །སླར་ཡང་འདིར་ནི་བླ་མ་ཡི། །དཀྱིལ་འཁོར་བསྐོར་བ་གསུམ་བྱས་ཏེ། །དེ་ནས་ཤར་དུ་གནས་པ་ཡིས། །སྒོ་ཕྱེ་ནས་ནི་རྣམ་པར་གཞུག །སངས་རྒྱས་ཀུན་གྱི་དབང་བསྐུར་གྱིས། །བླ་མས་སློབ་མ་བསྡུ་བྱ་སྟེ། །མགོ་བོའི་དབུས་སུ་དཔྲལ་བ་དང༌། །ལོགས་གཉིས་དེ་བཞིན་སྤྱི་པོ་དང༌། །རྒྱབ་ཏུ་འང་ཕྱག་རྒྱ་ཡང་དག་གཞག །སྔགས་འདི་རྗེས་སུ་བརྗོད་པར་བྱ། །ཨོཾ་བཛྲ་དྷཱ་ཏཱི་ཤྭ་རི་ཨ་བྷི་ཥིཉྩ་ཧཱུཾ། ཨོཾ་སཏྭ་བཛྲི་ཨ་བྷི་ཥིཉྩ་བྷྲཱུཾ། ཨོཾ་རཏྣ་བཛྲི་ཨ་བྷི་ཥི་ཉྩ་ཧྲཱཾ་ཨོཾ་དྷརྨ་བཛྲི་ཨ་བྷི་ཥིཉྩ་ཧྲཱིཿ། ཨོཾ་ཀརྨ་བཛྲི་ཨ་བྷི་ཥིཉྩ་ཏྲཱཾ། དབང་བསྐུར་ཆེན་པོ་ཞེས་པ་ལ་སོགས་པའི་ཚིགས་སུ་བཅད་པ་དང༌། ཨོཾ་ཨཱཿབཛྲ་མུ་ཀུ་ཊ་ཨ་བྷི་ཥིཉྩ་ཧཱུཾ། སུ་ར་ཏ་སྟྭཾ་ཨ་ཧཾ། ཞེས་བརྗོད་ཅིང༌། སླར་ཡང༌། ཨོཾ་ཧཱུཾ་ཧྲཱཾ་ཧྲཱིཿཨཿ་ཞེས་པའི་སྔགས་ཀྱིས་དཔྲལ་བར་དར་དཔྱངས་བཅིངས་ལ། བཛྲ་ཏུ་ཥྱ་ཧོཿ་ཞེས་བརྗོད་པས་མཉམ་པ་ཉིད་དུ་དགྱེས་པར་བྱའོ་ཞེས་པ་ནི་ཅོད་པན་གྱི་དབང་
བསྐུར་བ་སྟེ། མཉམ་པ་ཉིད་ཀྱི་ཡེ་ཤེས་སོ། །དེ་ནས་སློབ་མ་ཧྲཱིཿ་དང་པདྨ་ཡོངས་སུ་གྱུར་པ་ལས། །སྣང་བ་མཐའ་ཡས་ཀྱི་གཟུགས་ཡེ་ཤེས་སེམས་དཔའ་དང་དབྱེར་མེད་པ་ལ་རྡོ་རྗེ་སྣང་བ་མཐའ་ཡས་ཀྱི་བདག་ཉིད་དེ། སློབ་མའི་སྙིང་གར་བཟུང་ནས། སངས་རྒྱས་རྣམས་ཀྱི་རྡོ་རྗེའི་དབང༌། །དེ་རིང་ཁྱོད་ལ་བསྐུར་བར་བྱ། །འདི་དེ་སངས་རྒྱས་ཐམས་ཅད་ཀྱི། །རབ་ཏུ་གྲུབ་ཕྱིར་རྡོ་རྗེ་གཟུང༌། །ཞེས་བརྗོད་ཅིང་སློབ་མའི་སྙིང་ག་དང་མགྲིན་པ་དང་མགོ་བོ་རྣམས་ལ་རྡོ་རྗེ་རེག་ནས་ལག་པ་གཡས་པར་རྡོ་རྗེ་སྦྱིན་པར་བྱའོ་ཞེས་པ་ནི་རྡོ་རྗེའི་དབང་བསྐུར་བ་སྟེ་སོ་སོར་རྟོག་པའི་ཡེ་ཤེས་སོ། །དེ་ནས་སློབ་མ་ཁཾ་དང་རལ་གྲི་ལས་སྐྱེས་པའི་དོན་ཡོད་གྲུབ་པའི་གཟུགས་ཡེ་ཤེས་སེམས་དཔའ་དང་དབྱེར་མེད་པ་ལ་དྲིལ་བུའང་དོན་ཡོད་གྲུབ་པ་ཡོངས་སུ་གྱུར་པ་སྟེ་ལག་པ་གཡོན་པར་བྱིན་པ་ལ། རྡོ་རྗེ་དང་དྲིལ་བུར་ལྡན་པའི་ལག་པ་དག་གིས་ཕྱག་རྒྱ་ལ་འཁྱུད་པའི་ཚུལ་བྱེད་དུ་བཅུག་ནས། ཨོཾ་བཛྲ་ཨ་དྷི་པ་ཏི་སྟྭཾ་ཨ་བྷི་ཥིཉྩཱ་མི་ཏིཥྛ་བཛྲ་ས་མ་ཡ་སྟྭཾ་ཞེས་བརྗོད་ཅིང༌། ཨོཾ་བཛྲ་གྷཎྜེ་ཨཿ་ཨཿ། བཅོམ་ལྡན་འདས་གཟུང་ངོ་བདག་ལ་ནི། །ཡང་དག་ཉེ་བར་གྱུར་པར་མཛོད། །ཅེས་ཀྱང་འདོན་དུ་གཞུག་གོ་ཞེས་པ་ནི། དྲིལ་བུའི་དབང་བསྐུར་བ་སྟེ་བྱ་བ་གྲུབ་པའི་ཡེ་ཤེས་སོ། །དེའི་རྗེས་སུ་ཨོཾ་དང་འཁོར་ལོ་ལས་བྱུང་བའི་རྣམ་པར་སྣང་མཛད་ཀྱི་གཟུགས་ཡེ་ཤེས་སེམས་དཔའ་དང་རོ་གཅིག་པར་བསམས་ལ་མགོ་བོར་རྡོ་རྗེ་དང་དྲིལ་བུ་མཉམ་པར་གཟུང་སྟེ། ཨོཾ་བཛྲ་སཏྭ་སྟྭཾ་ཨ་བྷི་ཥིཉྩཱ་མི་བཛྲ་ནཱ་མ་ཨ་བྷི་ཥེ་ཀ་ཏ་ཀྱེ་དཔལ་ཆེ་གེ་མོ་རྡོ་རྗེ་ཞེས་བྱ་བའི་དེ་བཞིན་གཤེགས་པ་སིདྡྷི་ས་མ་ཡ་སྟྭཾ་བྷུརྦྷུ་ཝ་སྭཿ་ཞེས་པས་མེ་ཏོག་ལྷུང་བའི་རྗེས་སུ་འབྲངས་ནས་རང་གི་རིགས་ཀྱི་མིང་གི་རྣམ་པར་སྣང་མཛད་ཀྱི་བདག་ཉིད་ཅན་གྱིས་མངོན་པར་དབང་བསྐུར་བར་བྱའོ། །དེ་ལ་རྡོ་རྗེ་སེམས་དཔའི་མིང་རྣམས་ནི་མཆོག་གི་དང་པོ་དང༌། དཔེ་མེད་པ་དང༌། ཤིན་ཏུ་དགའ་བ་དང༌། རོ་མཉམ་པ་དང༌། རྣམ་པར་རྒྱལ་བ་དང༌། ཨ་ལ་ལ་དང༌། སེམས་དཔའ་དང༌། བདེ་བ་ཆེན་པོ་དང༌། ཡན་ལག་མེད་པ་དང༌། ཡེ་ཤེས་དང༌། ལྷན་ཅིག་སྐྱེས་པའི་རྡོ་རྗེ་རྣམས་སོ། །རེ་རེ་ལ་ཡང་རྡོ་རྗེའི་སྒྲ་མངོན་པར་སྦྱར་བར་བྱ་སྟེ། དེ་བཞིན་གཤེགས་པ་དྲུག་གི་མིང་
རྣམས་ཁོ་ནའོ། །མི་བསྐྱོད་པའི་བཞད་པ་དང༌། རྣམ་པར་སྒེག་པ་དང༌། དགའ་བ་དང༌། སྒེག་པ་དང༌། རོལ་པ་དང༌། རང་བྱུང་དང༌། ཞེ་སྡང་དང༌། ཧེ་དང༌། སྙིང་རྗེ་དང༌། ཐུགས་དང༌། ཧཱུཾ་མཛད་དང༌། མིང་རྡོ་རྗེ་རྣམས་སོ། །རྣམ་པར་སྣང་མཛད་ཀྱི། ཨོཾ་མཛད་དང༌། རྟག་པ་དང༌། དེ་བཞིན་གཤེགས་པ་དང༌། གཏི་མུག་དང༌། སྒྱུ་མ་དང༌། སངས་རྒྱས་དང༌། གཟུགས་དང༌། སྐུ་དང༌། རྣམ་པར་སྣང་མཛད་དང༌། རྡོ་རྗེ་རྣམས་སོ། །རིན་ཆེན་འབྱུང་ལྡན་གྱི་ཡིད་བཞིན་ནོར་བུ་དང༌། མཁའ་དང༌། ནམ་མཁའ་དང༌། གཟི་བརྗིད་དང༌། བདུད་ལས་རྒྱལ་བ་དང༌། འོད་ཅེས་དང༌། ང་རྒྱལ་དང༌། རིན་ཆེན་རྡོ་རྗེ་རྣམས་སོ། །སྣང་བ་མཐའ་ཡས་ཀྱི་འདོད་ཆགས་དང༌། སྤྱན་རས་གཟིགས་དང༌། ཆོས་དང༌། པདྨ་དང༌། རྡོ་རྗེ་མྱུ་གུ་དང༌། ཤིན་ཏུ་དགའ་བའི་མྱུ་གུ་དང༌། དཔག་མེད་དང༌། པདྨའི་མྱུ་གུ་དང༌། མཆོག་གི་དགའ་བ་དང༌། ཤིན་ཏུ་དགའ་བའི་དགའ་བ་དང༌། སྙིང་རྗེའི་མྱུ་གུ་དང༌། གསུང་དང༌། སྣང་བ་མཐའ་ཡས་རྡོ་རྗེ་རྣམས་སོ། །དོན་ཡོད་གྲུབ་པའི་རྟ་མཆོག་དང༌། དམ་ཚིག་དང༌། མཆོག་དང༌། ཕ་རོལ་ཏུ་ཕྱིན་པ་དང༌། ལས་དང༌། རླུང་དང༌། །རེག་བྱ་དང༌། ཕྲག་དོག་དང༌། དོན་ཡོད་རྡོ་རྗེ་རྣམས་སོ། །བུད་མེད་རྣམས་ལ་རྡོ་རྗེ་སེམས་དཔའི་རྡོ་རྗེ་ཤུགས་མ་དང༌། རྡོ་རྗེ་རོལ་མ་དང༌། རྡོ་རྗེ་མྱོས་མ་དང༌། རྡོ་རྗེ་ཀོངྐ་ཎ་དང༌། རྡོ་རྗེ་བཞིན་མ་དང༌། རྡོ་རྗེ་ཕྲེང་བ་མ་དང༌། རྡོ་རྗེ་འཆར་མ་ཞེས་པའོ། །མི་བསྐྱོད་པའི་རྡོ་རྗེ་བདག་མེད་མ་དང༌། རྡོ་རྗེ་ཕྱག་མ་དང༌། རྡོ་རྗེ་ཕྲེང་མ་དང༌། རྡོ་རྗེ་མཱ་མ་ཀཱི་དང༌། ཞེ་སྡང་དགའ་མ་ཞེས་པའོ། །རྣམ་པར་སྣང་མཛད་ཀྱི་རྡོ་རྗེ་མཁའ་འགྲོ་མ་དང༌། རྡོ་རྗེ་གཽ་རཱི་དང༌། སངས་རྒྱས་མཁའ་འགྲོ་མ་དང༌། རྡོ་རྗེ་རྣམ་སྣང་མ་དང༌། རྡོ་རྗེ་སྒེག་མོ་དང༌། རྡོ་རྗེ་སྤྱན་མ་དང༌། གཏི་མུག་དགའ་ཞེས་པའོ། །རིན་ཆེན་འབྱུང་ལྡན་གྱི་རྡོ་རྗེ་སྒྲོལ་མ་དང༌། རྡོ་རྗེ་དོ་ཤལ་མ་དང༌། རྡོ་རྗེ་དབུགས་འབྱིན་མ་དང༌། རྡོ་རྗེ་འབར་མ་དང༌། རྡོ་རྗེ་ང་རྒྱལ་མ་དང༌། ང་རྒྱལ་མ་རྡོ་རྗེ་དང༌། རྡོ་རྗེ་ནམ་མཁའ་མ་དང༌། ནམ་མཁའ་རྡོ་རྗེ་མ་དང༌། ནམ་མཁའ་དགའ་མ་ཞེས་བྱ་བའོ། །སྣང་བ་མཐའ་ཡས་ཀྱི་འདོད་ཆགས་མ་དང༌། འདོད་ཆགས་རྡོ་རྗེ་མ་དང༌། རྡོ་རྗེ་གླུ་མ་དང༌། རྡོ་རྗེ་ཨེ་མ་བདེ་དང༌། རྡོ་རྗེ་རོ་ལངས་མ་དང༌། རྡོ་རྗེ་
བློ་གྲོས་མ་དང༌། རྡོ་རྗེ་བཞད་མ་དང༌། རྡོ་རྗེ་གོས་དཀར་མོ་དང༌། འདོད་ཆགས་དགའ་མ་ཞེས་བའོ། །དོན་ཡོད་གྲུབ་པའི་རྡོ་རྗེ་སྙེམས་མ་དང༌། རྡོ་རྗེ་སྒྱུ་མ་དང༌། རྡོ་རྗེ་རྒོད་མ་དང༌། རྡོ་རྗེ་གར་གྱི་དབང་ཕྱུག་མ་དང༌། དམ་ཚིག་རྡོ་རྗེ་མ་དང༌། རྡོ་རྗེ་དགའ་མ་ཞེས་པའོ། །མིང་གི་དབང་བསྐུར་བ་སྟེ། ཤིན་ཏུ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་སོ། །སྔར་བཤད་པའི་དབང་བསྐུར་བ་འདི་རྣམས་ལ་སོ་སོར། བྱང་ཆུབ་རྡོ་རྗེ་སངས་རྒྱས་ལ། །ཞེས་པ་ལ་སོགས་པའི་ཚིགས་སུ་བཅད་པས་གསོལ་བ་གདབ་ཅིང༌། དབང་བསྐུར་ཆེན་པོ་རྡོ་རྗེ་ནི། །ཞེས་པ་ལ་སོགས་པའི་ཚིགས་སུ་བཅད་པས་ཀྱང་བཀྲུ་བར་བྱའོ། །ཕྲེང་བ་དང་ཆུ་ལ་སོགས་པའི་དབང་བསྐུར་དྲུག་པོ་འདི་རྣམས་ནི། མ་རིག་པའི་གཉེན་པོ་ནུས་པ་ཉིད་དུ་སྒྲུབ་པར་བྱེད་པའི་རིག་པའི་དབང་བསྐུར་བ་ཞེས་བརྗོད་དོ། །དབང་འདི་རྣམས་བསྐུར་བའི་རིམ་པ་ནི། བྱ་བ་དང་སྤྱོད་པའི་རྒྱུད་ཉན་པ་དང་འཆད་པ་དང་སྔགས་བསྒྲུབ་པ་ལ་དབང་བསྐུར་བར་འགྱུར་རོ། །སླར་ཡང་རྣལ་འབྱོར་བ་དང་རྣལ་འབྱོར་མའི་རྒྱུད་ཀྱང་ངོ་ཞེས། སློབ་དཔོན་གྱི་དབང་དུ་རློམ་པ་འདོད་པ་ནི་ལུང་དང་མི་ལྡན་ཏེ། ལྷན་ཅིག་སྐྱེས་དབང་དང་སྔོམ་པ་བྲལ་བ་རྣམས་ལ་དེའི་རང་གི་ངོ་བོ་མངོན་པར་བརྗོད་པར་བཅོམ་ལྡན་འདས་ཀྱིས་རྒྱུད་གང་དུ་ཡང་མ་བསྟན་ཅིང་རིགས་པ་ཡང་མ་ཡིན་ནོ། །དབང་འདི་རྣམས་སློབ་དཔོན་གྱི་དབང་དོན་དུ་མི་གཉེར་བ་ལ་ནི་ཐུན་མོང་གི་སྔོམ་བ་སྦྱིན་པ་སྔོན་དུ་འགྲོ་བས་བསྐུར་བར་བྱའོ། །དོན་དུ་གཉེར་པ་ལ་ནི་གཉིས་ཀའི་སྔོམ་པ་སྦྱིན་པ་སྔོན་དུ་འགྲོ་བས་སོ། །དེ་ནས་སློབ་མས་ཡོན་ཕུལ་ལ་ཐལ་མོ་སྦྱར་ཏེ། གང་གིས་བདག་ནི་ཁྱོད་དྲིན་ལས། །རང་དང་གཞན་དོན་ནུས་གྱུར་པ། །རྡོ་རྗེ་སློབ་དཔོན་གྱི་ནི་དབང༌། །ཐུགས་རྗེའི་གཏེར་གྱིས་བདག་ལ་སྩོལ་དུ་གསོལ། །ཞེས་བརྗོད་ཅིང་བླ་མ་ལ་གསོལ་བ་བཏབ་པ་དེ་ལ། རྡོ་རྗེ་ཧཱུཾ་ལས་སྐྱེས་པའི་རྡོ་རྗེ་སེམས་དཔའི་གཟུགས་སུ་བསམས་ནས། ཐོག་མཐའ་མེད་པའི་སེམས་དཔའ་ནི། །རྡོ་རྗེ་སེམས་དཔའ་དགའ་བ་ཆེ། །ཀུན་དུ་བཟང་བོ་ཀུན་བདག་ཉིད། །རྡོ་རྗེ་སེམས་དཔའ་བདག་པོའི་བདག །བཅོམ་ལྡན་འདས་མཆོག་གི་དང་པོའི་སྐྱེས་བུ་ཞེས་བརྗོད་ཅིང་ལག་པ་གཡས་པར་རྡོ་རྗེ་སྦྱིན་པར་བྱ་སྟེ་རྡོ་རྗེའི་དམ་ཚིག་གོ །དེ་ནས་དྲིལ་བུ་ཨ་ལས་སྐྱེས་པར་བསམས་ནས། །འདི་དེ་སངས་རྒྱས་ཐམས་ཅད་ཀྱི། །ཤེས་རབ་
དབྱངས་ཀྱི་རྗེས་འགྲོར་བཤད། །ཁྱོད་ཀྱིས་ཀྱང་ནི་རྟག་ཏུ་གཟུང༌། །བྱང་ཆུབ་མཆོག་ཏུ་རྒྱལ་བ་བཞེད། །ཅེས་བརྗོད་ཅིང་ལག་པ་གཡོན་པར་དྲིལ་བུ་སྦྱིན་པར་བྱ་སྟེ་དྲིལ་བུའི་དམ་ཚིག་གོ །སློབ་མས་ཀྱང་དྲིལ་བུ་དེ། སྲིད་པ་ངོ་བོ་ཉིད་ཀྱིས་དག །ངོ་བོ་ཉིད་ཀྱིས་སྲིད་བྲལ་བྱས། །རང་བཞིན་དག་མཆོག་སེམས་དཔའ་ཡི། །དམ་པའི་སྲིད་པ་བྱེད་པར་འགྱུར། །ཞེས་བརྗོད་ཅིང་དཀྲོལ་བར་བྱའོ། །དེ་ནས་གཞན་ཡང་ཕྱག་རྒྱའི་དམ་ཚིག་གསུངས་པ། ཡིད་ཀྱི་ལུས་ནི་བརྟན་པ་ཉིད། །ཕྱག་རྒྱའི་དམ་ཚིག་རབ་ཏུ་བརྗོད། །གང་གིས་ལུས་འདི་ཐམས་ཅད་བརྟན། །དེས་ན་ཕྱག་རྒྱར་རབ་ཏུ་བསྒྲགས། །འདིས་ནི་ལྷག་པའི་བདག་ཉིད་ཡེ་ཤེས་ཀྱི་ཕྱག་རྒྱར་བྱིན་གྱིས་བརླབས་པ་ལ་ལག་པས་འཁྱུད་པའི་ཚུལ་བྱའོ་ཞེས་པ་ཕྱག་རྒྱའི་དམ་ཚིག་གོ །མཆོག་གི་དང་པོ་ལས་གང་གསུངས་པ། རྡོ་རྗེ་དེ་ཉིད་ཀྱིས་ནི་གཟུང༌། །དྲིལ་བུ་ཆོས་ཀྱིས་དཀྲོལ་ནས་ནི། །དམ་ཚིག་གི་ནི་ཕྱག་རྒྱ་ཆེ། །བྱིན་གྱིས་བརླབས་ནས་སྙིང་པོ་བཟླས། ཞེས་སོ་དམ་ཚིག་གསུམ་སྦྱིན་པའི་ཆོ་གའོ།། །།དེ་ནས་དམ་ཚིག་གསུམ་གཟུང་བ་ནི། སློབ་མ་རྡོ་རྗེ་སེམས་དཔའི་གཟུགས་སུ་བསྒོམས་ཏེ། སྙིང་གའི་ས་བོན་གྱིས་བསྐུལ་བའི་ལྷ་མོ་རྣམས་དང་དེ་བཞིན་གཤེགས་པ་ནམ་མཁར་བཞུགས་པ་རྣམས་ཀྱིས་མངོན་པར་དབང་བསྐུར་བཞིན་པར་རྣམ་པར་བསམས་ལ། དབང་བསྐུར་རྡོ་རྗེ་ཆེན་པོ་ནི། །ཁམས་གསུམ་པ་ཡིས་ཕྱག་བྱས་པ། །གསང་གསུམ་ཡང་དག་འབྱུང་བའི་གནས། །སངས་རྒྱས་ཀུན་གྱིས་སྦྱིན་པར་བྱ། །ཨོཾ་ཨཱཿ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ། ཞེས་བརྗོད་པས་དབང་བསྐུར་བར་བྱའོ། །དེ་ནས་མི་བསྐྱོད་པ་ཅོད་པན་དུ་བསམས་ཏེ། གཞན་དེ་བཞིན་གཤེགས་པ་རྣམས་དང་ལྷ་མོ་རྣམས་ཡེ་ཤེས་སེམས་དཔའི་ངོ་བོས་བཅུག་ལ། ཨོཾ་སུ་པྲ་ཏིཥྛ་བཛྲེ་སྭཱ་ཧཱ། ཞེས་པའི་སྔགས་ཀྱིས་བྱིན་གྱིས་བརླབ་ཅིང༌། དེ་རྣམས་ལ་མེ་ཏོག་ལ་སོགས་པ་དབུལ་བར་བྱའོ། །གང་གསུངས་པ། ཤེས་རབ་བཅུ་དྲུག་ལོན་པ་ལ། །ལག་པ་དག་གིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བས། །སློབ་དཔོན་གྱི་ནི་དབང་དུ་འདོད། །ཅེས་སོ། །དེའི་རྗེས་སུ་མདོར་བསྡུས་པས་དཀྱིལ་འཁོར་གྱི་དེ་ཁོ་ན་ཉིད་དཀྱིལ་འཁོར་གྱི་
རྣམ་པར་དག་པ་ཡང་བརྗོད་པར་བྱའོ། །ཕུང་པོ་དྲི་མེད་ཉིད་ནི་དཀྱིལ་འཁོར་ཏེ། །མཐའ་དག་ལྷ་མོའི་ཆོགས་ཀྱི་རྣམ་པར་ངེས། །ཧེ་རུ་ཀ་དང་དཔའ་བོ་དེ་བཞིན་གཤེགས། །དེར་ཡང་ལུས་དང་རོ་ཡི་རྒྱུན་ལས་རྟོགས། །ཞེས་པ་ཕྱིར་མི་ལྡོག་པའི་དབང་བསྐུར་བ་སྟེ། །མིང་གཞན་སློབ་དཔོན་གྱི་དབང་གི་ཆོ་གའོ།། །།དེ་ནས་རྡོ་རྗེ་སེམས་དཔའི་རྣམ་པར་བལྟས་ནས། མེ་ཏོག་ལ་སོགས་པ་རྣམས་ཀྱིས་ཡང་དག་པར་མཆོད་ཅིང་བསྟོད་དེ། སྒེག་པ་དང་བཅས་པའི་མེ་ཏོག་གཅིག་གིས་སློབ་མ་ལ་བསྣུན་ནས་འདི་རྣམས་བརྗོད་པར་བྱའོ། །དེང་ནས་བརྩམས་ཏེ་རྫོགས་སངས་རྒྱས། །སྲོག་དང་བཅས་པ་རྣམ་རོལ་ཕྱིར། །རྡོ་རྗེ་བསྙེམས་མའི་རྣལ་འབྱོར་གྱིས། །དགའ་མཆོག་བདེ་བའི་མཆོད་པ་གྱིས། །ཨཱཿ། སྒེག་དང་བཅས་པས་ཕྲེང་བ་འཕང༌། །སངས་རྒྱས་ཐམས་ཅད་ཆོད་པར་བྱ། །འདི་རྣམ་འབྲལ་བར་མི་འགྱུར་ཏེ། །ཕྲེང་བ་འདི་ནི་རྒྱན་ཡིན་ནོ། །ཨོཾ། །ལུས་ཅན་ཀུན་ལ་དམ་ཆོས་ཀྱི། །གླུ་ནི་ཁྱོད་ཀྱིས་བླང་པར་གྱིས། །དེ་ཡིས་བདེ་གཤེགས་དངོས་གྲུབ་ནི། །ཤིན་ཏུ་བདེ་བ་ཐོབ་པར་འགྱུར། །གཱི། དེ་ཉིད་ཐལ་མོའི་གར་གྱིས་ནི། །རྫོགས་སངས་རྒྱས་ལ་རྗེས་ཆགས་པའི། །སངས་རྒྱས་འདུལ་བའི་ཕྲིན་ལས་ཀྱིས། །གར་མཁན་ཚུལ་དུ་བསྒྱུར་བར་གྱིས། །ཧོ། །རྫོགས་སངས་རྒྱས་ལ་སྤོས་ཕུལ་བས། །དམ་ཚིག་བརྟུལ་ཞུགས་ལེགས་བསྒོས་པའི། །ལུས་ཅན་བདེ་གཤེགས་ཆ་ལུགས་སུ། །ཡེ་ཤེས་ཀྱི་ནི་ཚུལ་དུ་བགྱིས། །ཨཱཿ། སངས་རྒྱས་རྣམས་ལ་མེ་ཏོག་དོར། །བྱང་ཆུབ་ཡན་ལག་ཚོགས་གྱུར་པས། །མཚན་དང་དཔེ་བྱད་ལྡན་པ་ཡི། །བདེ་གཤེགས་སྐུ་ནི་ཐོབ་པར་གྱིས། །བྷྲཱུཾ། ཆོས་ཀྱི་མེ་ནི་ལེགས་སྤར་བས། །རྡོ་རྗེ་ཆོས་དང་འདྲ་བར་དང༌། །སེམས་ཅན་མ་རིག་ལྗོངས་རྣམས་ལས། ཡེ་ཤེས་སྣང་བས་གསལ་བར་གྱིས། །པྲ། རྒྱལ་བ་རྣམས་ལ་དྲི་ཕུལ་བས། །ཚུལ་ཁྲིམས་ཏིང་འཛིན་ཤེས་རབ་དང༌། །རྣམ་གྲོལ་ཡེ་ཤེས་གཟིགས་པ་ཡིས། །བྱང་ཆུབ་ལུས་ཅན་རྣམས་ལ་བསྐོར། །གཿ། དེ་ནས་རང་གི་སྙིང་པོ་ལ་སོགས་པའི་སྔགས་བརྒྱ་རྩ་བརྒྱད་དམ་ལན་གསུམ་དུ་བཟླས་ཏེ། བཅོམ་ལྡན་འདས་ཀྱིས་གཟུངས་སྦྱིན་ལགས་ཀྱིས། །འདི་ལ་ཉེ་བར་མཛད་དུ་གསོལ། །ཞེས་བརྗོད་ཅིང་སློབ་མ་ལ་སྦྱིན་པར་བྱའོ། །སློབ་མས་ཀྱང༌། བཅོམ་ལྡན་བདག་གིས་བཟུང་ལགས་ཀྱིས། །བདག་ལ་ཉེ་བར་
མཛད་དུ་གསོལ། །ཞེས་འདིས་གཟུངས་ལན་གསུམ་བཟླས་སོ། །སྔགས་གཏད་པའི་ཆོ་གའོ།། །།འདིའི་རྗེས་སུ་གསེར་རམ་དངུལ་གྱི་སྣོད་དུ་བཞག་པའི་སྦྲང་རྩི་དང་མིག་སྨན་ཐུར་མས་བླངས་ནས་དེ་དག་ཉིད་ཀྱིས་བསྐུ་ཞིང་སྔགས་ཀྱི་དེ་ཁོ་ན་ཉིད་རིག་པས། ཨོཾ་བཛྲ་ནཻ་ཏྲ་ཨ་པ་ཧ་ར་པ་ཊ་ལཾ་ཧྲཱིཿ། ཐུར་ལྡན་སྨན་པའི་རྒྱལ་པོ་ཡིས། །ཇི་ལྟར་འཇིག་རྟེན་རབ་རིབ་བཞིན། །བུ་ཁྱོད་ཀྱིས་ནི་མི་ཤེས་པའི། །རབ་རིབ་རྒྱལ་བ་རྣམས་ཀྱིས་བསལ། །ཞེས་བརྗོད་པར་བྱ་སྟེ་མིག་སྨན་གྱི་ཆོ་གའོ།། །།དེ་ནས་མེ་ལོང་བླངས་ལ། ཨཿཡིག་གིས་མངོན་པར་བསྔགས་ནས་སློབ་མའི་གདོང་ལ་བསྟན་ཞིང་ཚིགས་སུ་བཅད་པ་འདི་བརྗོད་པར་བྱ་སྟེ། ཆོས་རྣམས་གཟུགས་བརྙན་ལྟ་བུ་སྟེ། །གསལ་ཞིང་དག་ལ་རྙོག་པ་མེད། །གཟུང་དུ་མེད་ཅིང་བརྗོད་དུ་མེད། །རྒྱུ་དང་ལས་ལས་ཡང་དག་བྱུང༌། །རྡོ་རྗེ་སེམས་དཔའ་མེ་ལོང་བཞིན། །དེ་ནི་དག་གོས་ལ་རྙོག་པ་མེད། །སངས་རྒྱས་ཀུན་བདག་བདག་ཉིད་ནི། །བུ་ཁྱོད་ཀྱི་ནི་སྙིང་ལ་ཞུགས། །རང་བཞིན་མེད་ཅིང་གནས་མེད་པར། །ཆོས་རྣམས་དེ་ལྟར་ཤེས་ནས་ཁྱོད། །སེམས་ཅན་དོན་ནི་མཉམ་མེད་བྱོས། །སྐྱོབ་པ་རྣམས་ཀྱི་སྲས་སུ་སྐྱེ། །ཞེས་པའོ། །མེ་ལོང་བསྟན་པའི་ཆོ་གའོ།། །།དེ་ནས་ཧོཿ་ཡིག་ལས་བྱུང་བའི་གཞུ་ཧོཿཞེས་བརྗོད་ཅིང༌། སརྦ་ཏ་ཐཱ་ག་ཏ་ཨ་ནུ་རཱ་ག་ཡ་སྭ་ཞེས་པས་བྱིན་ནས་མངའ་འཕང་བའི་ཚེ་ཡང་སློབ་མས། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཡ་ནས། བགེགས་ལ་ཕྱིགས་པའི་བསམ་པས་ཕྱོགས་བ་ཞིར་མདའ་འཕང་མངའ་འཕང་བར་བྱ་སྟེ་སྟེང་དུ་གཅིག་དང་འོག་ཏུ་གཞན་ནོ་ཞེས་བ་མདའ་འཕང་བའི་ཆོ་གའོ།། །།དབང་བསྐུར་བ་འདི་རྣམས་ཐམས་ཅད་དུ། ཨོཾ་སརྦ་ཏ་ཐཱ་ག་ག་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུཾ་སྭཱ་ཧཱ། ཞེས་བརྗོད་པས་དབང་བསྐུར་བར་བྱའོ་ཞེས་སློབ་དཔོན་གྱི་དབང་བསྐུར་ཏེ་ལུས་རྣམ་པར་སྤྱོད་བའོ། །དེ་ནས་འཆད་པར་འགྱུར་བའི་དམ་ཚིག་འཁོར་ལོའི་ཚོགས་དམ་ཚིག་བྱས་ནས་ཡོལ་བས་བཅད་པ་ལ་སོགས་པ་དབེན་པར་བྱས་ནས་སློབ་མ་ལ་རབ་ཏུ་བསྟན་པའི་ཆེད་དུ་གཟུགས་དང་ཚོ་ལ་སོགས་པས་བརྒྱན་ཅིང༌། དམ་ཚིག་དང་སྔོམ་པ་དང་སྐལ་བར་ལྡན་པའམ་མ་རྙེད་ན་གཞན་
ཡང་རུང་བའི་ཤེས་རབ་མ་བླ་མ་ལ་གསང་བའི་དོན་དུ་དབུལ་བར་བྱའོ། །དེ་ལ་བླ་མ་རྡོ་རྗེ་སེམས་དཔའི་ངོ་བོར་ལྷག་པར་མོས་པས་ཐལ་མོ་སྦྱར་ཏེ། ཁྱོད་ཀྱི་ཞབས་ཀྱི་བཀའ་དྲིན་ལས། །བདག་གིས་བླ་མེད་བྱ་བ་ཐོབ། །དེ་ཕྱིར་གསང་བའི་དབང་གིས་ནི། །མགོན་པོ་རྗེས་སུ་གཟུང་བར་མཛོད། །ཅེས་པ་ལན་གསུམ་གྱིས་གསོལ་བ་གདབ་པར་བྱའོ། །དེ་ནས་རིམ་པས་དམ་ཚིག་ལ་ཉེ་བར་བཞག་སྟེ། དེ་ལ་ཏིང་ངེ་འཛིན་གསུམ་གྱིས་དགེ་བའི་བླ་མས། ཐ་མལ་བའི་བུད་མེད་ཀྱི་གཟུགས་སྟོང་པ་ཉིད་ཀྱི་རྗེས་ལ་ལྷ་མོའི་གཟུགས་སུ་བསྐྱེད་པ་དེ་དང༌། རྡོ་རྗེ་དང་པདྨ་འདུ་བྱ་བ་སྔོན་དུ་འགྲོ་བས་སྙོམས་པར་འཇུག་པར་བྱ་ཞིང༌། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨཀོ྅ཧཾ། ཞེས་བརྗོད་ནས་སྙིང་གའི་ས་བོན་གྱི་འོད་ཟེར་གྱིས་རྣམ་པར་སྣང་མཛད་ལ་སོགས་པའི་དེ་བཞིན་གཤེགས་པས་སྤྱན་མ་ལ་སོགས་པ་དང་སྙོམས་པར་འཇུག་པ་བཀུག་སྟེ། རྣམ་པར་སྣང་མཛད་ཀྱི་སྒོ་ནས་བདག་ཉིད་ལ་བཅུག་པ་རྣམས་འདོད་ཆགས་ཆེན་པོས་ཞུ་བར་གྱུར་པ་ཨ་ཝ་དྷཱུ་ཏཱི་ནས་འགྲོ་བར་བསམས་ལ། རྡོ་རྗེ་ནོར་བུར་ལྷན་ཅིག་སྐྱེས་པ་བསྟན་པར་བྱ་ཞིང༌། མཐེ་བོང་དང་མིང་མེད་དག་གིས་རྡོ་རྗེ་ནོར་བུ་བཙིར་ནས་པདྨ་ལས་བྱུང་བའི་དེ་བཞིན་གཤེགས་བ་ཞུ་བ་དེ་རྣམས་རང་གི་བྱང་ཆུབ་ཀྱི་སེམས་དང་དབྱེར་མེད་པར་མོས་པར་བྱ་སྟེ། གསུང་རྡོ་རྗེའི་ངོ་བོས་སློབ་མ་རྣམས་ལའོ། །ཐབས་དང་ཤེས་རབ་སྦྱོར་བ་མཐོང་ནས་མ་དད་པར་དོགས་པར་གདོང་གཡོགས་བཅིངས་ལ། དེར་འཇུག་པ་རྣམས་རྣལ་འབྱོར་མའི་ལས་ཀྱི་རྡོ་རྗེ་ཅན་གྱིས་བཟུང་ནས་གཞུག་པར་བྱ། པུས་མོ་བཙུགས་ནས་མེ་ཏོག་དང་བཅས་པའི་ཐལ་མོ་སྦྱར་ཞིང༌། བཅོམ་ལྡན་ཞི་བ་ཆེན་པོ་ཀྱེ། །རྡོ་རྗེ་རྣལ་འབྱོར་གཅིག་བཞེད་པ། །མི་ཕྱེད་ཕྱག་རྒྱ་སྒྲུབ་པ་པོ། །རྡོ་རྗེའི་སྦྱོར་ལས་ཡང་དག་བྱུང༌། །ཇི་ལྟར་ཁྱོད་ནི་བདག་ཉིད་ཆེ། །ཁྱབ་བདག་བདག་ཀྱང་དེ་འདྲར་མཛོད། །འཁོར་བ་འདམ་གྱི་ཚོགས་ནང་དུ། །བྱིང་པ་སྐྱབས་མེད་བདག་ལ་སྐྱོབས། །ཞེས་པས་བླ་མ་ལ་བསྟོད་པ་བྱའོ། །དེ་ནས་བླ་མས་ལངས་ཏེ། འདས་པའི་རྡོ་རྗེ་འཆང་སོགས་ཀྱིས། །ཇི་ལྟར་སངས་རྒྱས་སྲས་དབང་བསྐུར། །བྱང་ཆུབ་སེམས་ནི་བཟང་པོ་ཡིས། །དེ་བཞིན་བུ་ཁྱོད་དབང་བསྐུར་བགྱི། ཞེས་པའི་ཚིགས་བཅད་བརྗོད་པ་སྔོན་
དུ་འགྲོ་བས། ཨོཾ་ཨཱཿབཛྲ་དྷྲྀ་ཀ་ཧཱུཾ་ཞེས་པ་ལ་སོགས་པ་དཀྱིལ་འཁོར་གྱི་དབང་ཕྱུག་གི་སྔགས་རྣམས་ཇི་ལྟ་བ་བཞིན་དུ་བརྗོད་པས་སློབ་མའི་ཁར་དབབ་པར་བྱའོ། །དེས་ཀྱང་རྣམ་པར་སྣང་མཛད་ལ་སོགས་པ་དེ་བཞིན་གཤེགས་པ་ཐམས་ཅད་འདུས་པའི་སློབ་མ་ཨཾ་ཧོ་མ་ཧཱ་སུ་ཁཾ་ཞེས་བརྗོད་ཅིང་བཏུང་བར་བྱའོ། །ཤེས་རབ་ཀྱིས་ཀྱང་ལངས་ནས་གོས་མེད་པ་ཉིད་དུ་ལྷུང་བའི་ཆུ་སྐྱེས་ན་གནས་པ་དེ་བཞིན་གཤེགས་པའི་བདུད་རྩིའི་ཐིག་ལེ་རྣམས་དེའི་ཁར་གཞུག་པར་བྱ་སྟེ། དེས་ཀྱང་དེ་བཞིན་དུ་བཏུང་བར་བྱའོ་ཞེས་པ། གསང་བའི་མངོན་པར་དབང་བསྐུར་བ་སྟེ་ངག་རྣམ་པར་སྦྱོང་བའོ། །དེའི་རྗེས་ལ་དེའམ་གཞན་ཡང་རུང་བའི་ཤེས་རབ་མ་དམ་ཚིག་དང་སྔོམ་པ་ལ་གནས་པའམ། གཞན་ཡང་རུང་སྟེ་གཟུགས་དང་ལང་ཚོ་ཅན་ལ་སོགས་པ་དང་ལྡན་ཞིང༌། ཁྱོད་ཀྱི་ཞབས་ཀྱི་བཀའ་དྲིན་ལས། གསང་བའི་དབང་བསྐུར་བླ་མེད་ཐོབ། །ཤེས་རབ་ཡེ་ཤེས་དབང་བསྐུར་གྱིས། །མགོན་པོ་རྗེས་སུ་གཟུང་བར་མཛོད། །ཅེས་པའི་ཚིགས་སུ་བཅད་པས་གསོལ་བ་བཏབ་བ་ཅན་གྱིས་སློབ་མ་ལ། གཟུངས་མ་ཡིད་འོང་འདི་ཁྱོད་ཀྱིས། །བསྟན་བྱར་སངས་རྒྱས་རྣམས་ཀྱིས་བསྟན། །འཁོར་ལོའི་རིམ་པ་སྦྱོར་བ་ཡིས། །དམ་པའི་བདེ་པ་མྱོང་བར་གྱིས། །དགའ་སྦྱིན་གནས་སྦྱིན་ལྷ་མོ་འདི། །སྣ་ཚོགས་གཟུགས་ཅན་ཡིད་འོང་མ། །ཟུང་ཞིག་ཟུང་ཞིག་སེམས་དཔའ་ཆེ། །ཞེས་གོ་བར་བྱས་ནས་གཏད་པར་བྱའོ། །དེ་ནས་རིག་མས་ཀྱང་འདོད་ལྷ་བཞིན་དུ་སྒྲུབ་པ་པོ་ལ་རྣམ་པར་བལྟ་ཞིང༌། གོས་དང་བྲལ་བ་ལ་མེ་ཏོག་གི་རྒྱན་རྣམས་ཀྱིས་བརྒྱན་ཏེ་ལངས་ནས་གཡོན་བརྐྱང་ལ་སོགས་པ་རྣམས་ཀྱིས་སྒེག་པར་བྱས་ལ་གཡས་བརྐྱང་གི་རྐང་སྟབས་ཀྱི་ཚུལ་དང༌། ཟླུམ་པོའི་རྐང་སྟབས་དང༌། ཙོག་པུ་རྣམས་ཀྱང་བྱ་ཞིང༌། བཞི་མཉམ་ལ་སོགས་པ་རྣམས་ཀྱིས་དྲི་ཞིམ་པར་བྱས་ཏེ། ཆུ་སྐྱེས་གསལ་པོར་ཉེ་བར་བསྟན་ནས་དགའ་བས་འདི་ཉིད་བརྗོད་པར་བྱའོ། །ཨེ་མ་ང་ཡི་པདྨ་འདི། །བདེ་བ་ཐམས་ཅད་ཀྱི་ནི་གནས། །གང་ཞིག་ཆོ་གས་སྟེན་བྱེད་པ། །དེ་ཡི་མདུན་ན་ང་གནས་སོ། །སངས་རྒྱས་བསྟན་པ་ལ་སོགས་པ། །བྱ་བ་པདྨར་ཇི་བཞིན་གྱིས། །བདེ་ཆེན་རྒྱལ་པོ་རང་ཉིད་ཀྱང༌། །འདི་ཉིད་དུ་ནི་རྟག་ཏུ་ཞུགས། །བྷཉྫ་མོཀྵ་ཧོཿཞེས་འདོན་
པས་སོ། །དེས་ཀྱང་ལངས་ནས་འོ་བྱས་ལ་ཡང་དག་པར་འཁྱུད་དེ་གནས་པར་བྱའོ། །དེ་ལ་བླ་མས་དགའ་པ་ལ་སོགས་པའི་དབྱེ་བ་བཤད་པར་བྱ་སྟེ། རྡོ་རྗེ་པདྨར་རབ་བཞག་ནས། །བྱང་ཆུབ་སེམས་ནི་སྤྲོ་མི་བྱ། །བསྐྱོད་བྱས་དེ་ནི་དགའ་བ་ཡི། །སེམས་ནི་བསྐྱེད་ཅིང་བསྒོམ་པར་བྱ། །རྣལ་འབྱོར་ཅན་གྱིས་བྱང་ཆུབ་སེམས། །ཇི་སྲིད་གཤེགས་པར་མི་བྱ་བར། །གང་ཡང་དགའ་བདེ་སྐྱེས་ཐོབ་པ། །དེ་སྲིད་རྒྱུན་མི་འཆད་པར་བསྟེན། །དངོས་གྲུབ་ཀུན་གྱི་བསྟེན་གྱུར་པ། །བྱང་ཆུབ་སེམས་ནི་ལྷུང་བ་ན། །རྣམ་ཤེས་ཕུང་པོ་བརྒྱལ་འགྱུར་བས། །མ་སྨད་དངོས་གྲུབ་ག་ལ་ཡོད། །མཁའ་དབྱིངས་རྡོ་རྗེ་སྦྱོར་བ་ཡིས། །རེག་པ་རྨད་བྱུང་ཆེན་པོ་སྟེ། །བདེ་བ་སྐྱེས་པ་གང་དེ་ནི། །མཆོག་ཏུ་དགའ་བའི་བྱེད་པ་པོ། །ཞེས་པ་དང༌། ནམ་མཁའ་ནོར་བུ་པདྨ་ཡི། །ཟེའུ་འབྲུ་བལྟམས་པའི་གནས་དག་ལ། །རྡོ་རྗེ་སྐྱིལ་ཀྲུང་གིས་ནི་སེམས། །ནོར་བུའི་ནང་དུ་གནས་པར་བལྟ། །ངེས་པར་སྐྱེས་པའི་ཡེ་ཤེས་གང༌། །ཡེ་ཤེས་དེ་ནི་དྲི་མེད་གཟུགས། །མཆོག་དང་དགའ་བྲལ་དག་པའི་དབུས། །མཚན་ཉིད་བལྟས་ཏེ་བརྟན་པར་བྱ། །ཞེས་པས་བླ་མའི་བཀའ་དྲིན་ལས་དགའ་བ་སོ་སོའི་དབྱེ་བ་དང་ལྡན་པར་རང་ཉིད་ལྷའི་སྐུ་དང་ཤེས་རབ་མ་ལྷ་མོའི་གཟུགས་སུ་བསྐྱེད་ནས། ཧྲཱིཿདང་ཧཱུཾ་དག་ལས་སྐྱེས་པའི་པདྨ་དང་རྡོ་རྗེ་དག་གི་ཟེའུ་འབྲུ་དང་ནོར་བུ་དག་ཨཿདང་ཨོཾ་དག་ལས་སྐྱེས་པ་དང༌། །རྡོ་རྗེའི་ཁར་ཕཊ་ཡིག་སེར་པོ་རྣམ་པར་བསྒོམས་ལ་གཡོན་གྱི་ཆར་གནས་པའི་རྩ་དང་མཛུབ་མོ་དང་ལྕེ་རྣམས་ཀྱི་རྩེ་མོར་ཡང་ཧྲཱིཿཡིག་དམར་པོ་གནས་ཤིང༌། ཤཱིཏ་ཡིག་སྔོན་དུ་འགྲོ་བས་ཡང་དག་པར་བསྐུལ་སྟེ། ཨོཾ་ཤཱི་ཤཱི་ཤཱི་ཤཱི་ཧ་ཧ་ཧ་སྭཱ་ཧཱ། ཞེས་པ་དང༌། ཨོཾ་སརྦ་ཏ་ཐཱ་ག་ཏ་ཨ་ནུ་རཱ་ག་ཎ་བཛྲ་སྭ་བྷཱ་ཝ་ཨཱཏྨཀོ྅ཏོ། ཞེས་པའི་སྔགས་བཟླས་ཤིང༌། རང་གི་སྙིང་གའི་ས་བོན་གྱི་འོད་ཟེར་གྱིས་སྤྱན་དྲངས་པའི་དེ་བཞིན་གཤེགས་པ་ལ་སོགས་པ་ལུས་ལ་བཅུག་སྟེ། བླ་མས་ཀྱང་རྣམ་པར་སྣང་མཛད་དང་སྤྱན་མ་ལ་སོགས་པ་དཔག་ཏུ་མེད་པ་བཅུག་པ་དང་རོ་གཅིག་ཏུ་གྱུར་པས་དགའ་བ་བརྩམ་པར་བྱའོ། །གང་ཚེ་རྣལ་འབྱོར་ཡེ་ཤེས་མཐོང༌། །བདེ་བས་གནས་ཏེ་འགྱུར་བ་མེད། །ཐུན་ཚོད་ཡང་ན་ཉིན་ཞག་གམ། ཕྱོགས་དང་ཟླ་བ་ལོ་ཡིས་སམ། །
བསྐལ་པ་འམ་བསྐལ་པ་སྟོང་ཕྲག་ཏུ། །ཡེ་ཤེས་མངོན་སྦྱོར་གནས་པར་བྱ། །ཞེས་པ་དང༌། སློབ་མས་དེ་ཡི་ཆ་གཟུང་སྟེ། །པདྨའི་ནང་དུ་སྤྲོ་བར་བྱ། །དེ་ནས་བཅུད་ལེན་སེམས་ཀྱིས་ནི། །བྱང་ཆུབ་སྔོན་དུ་གཟུང་བར་བྱ། །ཞེས་པ་ཤེས་རབ་ཡེ་ཤེས་ཀྱི་མངོན་པར་དབང་བསྐུར་བ་སྟེ་ཐུགས་རྡོ་རྗེ་རྣམ་པར་སྤྱོད་པའོ། །དེའི་རྗེས་སུ། ཤེས་རབ་ཡེ་ཤེས་དབང་བསྐུར་གྱིས། །སེམས་ཀྱི་རྡོ་རྗེ་རྣམ་པར་སྦྱངས། །ད་ནི་བདག་ལ་བཞི་པ་ཡང༌། །འདྲེན་པས་བཀའ་དྲིན་མཛད་དུ་གསོལ། །ཞེས་པ་གསོལ་བ་བཏབ་བ་ཅན་གྱི་སློབ་མ་ལ། སྔར་གྱི་དོན་གྱི་ཡང་དག་པའི་དེ་ཁོ་ན་ཉིད་ཚིག་གིས་བསྟན་པར་བྱ་སྟེ། ཇི་སྐད་གསུངས་པའི་ཚིགས་མངོན་སུམ་དུ་གཟུང་བའི་ཤེས་རབ་ཡེ་ཤེས་ཀྱི་དབང་བསྐུར་བ་དེ་བཞིན་དུ་བཞི་པར་མངོན་པར་བརྗོད་ཅིང་འབྲས་བུར་གྱུར་པའི་དབང་བསྐུར་བ་རིན་པོ་ཆེ་བཤད་པར་བྱའོ། །མ་ཡིན་པར་གཞན་དུ་ན་དམ་ཚིག་ཟད་པའི་འཇིགས་པ་དེ་ནི་བཅོམ་ལྡན་འདས་ཀྱིས་གསུངས་ཏེ། ཇི་ལྟར་གསུངས་པའི་ཆོ་གས་དབང་བསྐུར་སྦྱིན། །སློབ་མའི་མོས་པའི་ཡིད་ནི་ཡང་དག་བརྟག །རྒྱ་ཆེན་ཟབ་མོའི་ཚུལ་ལ་ལྷག་མོས་ན། །དབང་བསྐུར་རིན་ཆེན་དེ་ཉི་ཚིག་གིས་སྦྱིན། །ཞེས་པ་དག་སླར་ཡང༌། དབང་བསྐུར་མེད་ན་རྣལ་འབྱོར་བ། །རྣལ་འབྱོར་ཉིད་ལ་སླུ་བར་བྱེད། །མཁའ་ལ་ཁུ་ཚུར་བསྣུན་པ་དང༌། །རི་དགས་སྐོམ་ནི་འཐུང་བའོ། །བྱང་ཆུབ་སེམས་དཔའི་འདུལ་བ་ལ་ཡང་སྔོམ་པ་མེད་ན་ནི་ཐར་བ་འཛིན་པ་མ་ཡིན་ནོ་ཞེས་སོ། །འོ་ན་འདི་ནི་རྒྱ་ཆེན་པོ་ལ་ལྷག་པར་མོས་པའོ་ཞེས་བྱ་བར་ཇི་ལྟར་ཁོང་དུ་ཆུད་པར་བྱ་ཞེ་ན། དེ་གསུངས་པ། ཆུ་སྐྱར་ལས་ནི་ཆུ་ཡོད་དང༌། །དུ་བ་ལས་ནི་མེར་ཤེས་བཞིན། །བྱང་ཆུབ་སེམས་དཔའ་བློ་ལྡན་གྱི། །རིགས་ནི་མཚན་མ་དག་ལས་ཤེས། ཤིན་ཏུ་རབ་དང་ཆུ་སྐྱེས་གདོང༌། །དགའ་བར་བརྒྱས་ལུས་ལས་སྐྱེས། །དེ་ཉིད་བལྟས་ན་མཁས་བ་ཡིས། །དམ་པའི་སློབ་མ་རྗེས་སུ་གཟུང༌། །ཞེས་སོ། །དེ་ཉིད་ཀྱེའི་རྡོ་རྗེར་ཡང་གསུངས་པ། །དབང་བསྐུར་རྣམ་གསུམ་དབྱེར་མེད་པ། །རྒྱུད་འདི་ལས་ནི་རྣམ་པར་གནས། །སློབ་དཔོན་གསང་བ་ཤེས་རབ་དང༌། །བཞི་པ་དེ་ཡང་དེ་བཞིན་ནོ། །སྐད་ཅིག་དགོད་དང་ལག་པས་ཐོབ། །དེ་ཡང་འཁྱུད་བ་
རྒྱུད་ལས་ཏེ། །དགོད་པ་དག་ལ་སློབ་དཔོན་ཉིད། །ལྟ་བ་གསང་བ་དེ་བཞིན་ཏེ། །ལག་བཅངས་ལས་ནི་ཤེས་རབ་ཉིད། །གཉིས་གཉིས་འཁྱུད་ལ་དེ་ཡང་ངོ༌། །དགའ་བ་དང་ནི་མཆོག་དགའ་ཉིད། །དགའ་བྲལ་ལྷན་སྐྱེས་དེ་བཞིན་ཏེ། །སྣ་ཚོགས་དང་ནི་རྣམ་སྨིན་དང༌། །རྣམ་ཉེད་དེ་བཞིན་མཚན་ཉིད་བྲལ། །དབང་གི་རིམ་པའི་ཆོ་ག་ཀུན། །ཤེས་རབ་ཡན་ལག་ཆགས་ལས་སྐྱེས། །དགའ་བའི་བདེ་བ་ཅུང་ཟད་སྐྱེ། །མཆོག་ཏུ་དགའ་བ་དེ་བས་ལྷག །དགའ་བྲལ་བ་ཆགས་བྲལ་ཡིན། །ལྷག་མ་ལྷན་ཅིག་སྐྱེས་དགར་འགྱུར། །དང་པོ་རེག་པར་འདོད་པ་སྟེ། །གཉིས་པ་བདེ་བར་འདོད་པ་ཡིན། །གསུམ་པ་འདོད་ཆགས་འཇིགས་པ་ཉིད། །དེ་ནས་བཞི་པ་བསྒོམ་པར་བྱ། །སྣ་ཚོགས་དང་པོའི་དགའ་བ་སྟེ། །རྣམ་སྨིན་ལ་ནི་མཆོག་དགའ་བ། །རྣམ་ཉེད་དགའ་བྲལ་དགའ་བ་ཡིན། །མཚན་བྲལ་ལྷན་ཅིག་སྐྱེས་དགའ་ཉིད། །འཁྱུད་དང་འོ་བྱེད་ལ་སོགས་པ། །སྣ་ཚོགས་རྣམ་པ་སྣ་ཚོགས་བརྗོད། །རྣམ་སྨིན་དེ་ལས་བཟློག་པ་སྟེ། །ཡང་དག་བདེ་བའི་ཡེ་ཤེས་སྤྱོད། །རང་ཉིད་བདེ་བ་སྤྱད་པ་ཡི། །གོས་ནི་རྣམ་པར་ཉེད་པར་གསུངས། །མཚན་ཉིད་བྲལ་བ་གསུམ་ལ་གཞན། །ཆགས་དང་ཆགས་བྲལ་རྣམ་པར་སྤངས། །དེ་ཉིད་ཀྱི་ཕྱིར་གསུངས་པ། འདོད་ཆགས་མ་ཡིན་ཆགས་བྲལ་མིན། །དབུ་མར་དམིགས་པར་མི་འགྱུར་རོ། །གསུམ་པོ་སྤངས་པ་ཉིད་ཀྱི་ཕྱིར། །ལྷན་ཅིག་སྐྱེས་པ་བྱང་ཆུབ་བརྗོད། །དེ་ཉིད་ནག་པོ་ཞབས་ཀྱིས་གསུངས། །རེག་བ་ལ་སོགས་སྣ་ཚོགས་ཡིན་ཏེ་པདྨར་རྡོ་རྗེ་གནས་པ་གང་ཡིན་དེ་ནི་རྣམ་སྨིན་ནོ། །ཕྱི་ནས་བསྲུབས་པ་ལས་སྐྱེས་ཆགས་པའི་མེ་ཡིས་བསྲེགས་ནས་མགྲོན་ལ་ཞེན་པའི་ཕུང་པོ་རྣམ་ཉེད་ཡིན། །དེ་ལ་ཡིད་ནི་འཛིན་པས་རླུང་དག་ལྷན་ཅིག་སྤྱོད་ཅིང་ཆུ་སྐྱེས་ལ་ནི་ལྷག་པར་གྱུར་པའི་མེ། །དེ་འདིར་རྫོགས་པའི་བྱང་ཆུབ་ལམ་སྟེ་མཐའ་དག་རྒྱལ་བའི་སྐུ་ནི་རྣལ་འབྱོར་བགྲོད་བྱ་མཚན་བྲལ་ལོ། །དཱ་རི་ཀ་པའི་ཞབས་ཀྱིས་ཀྱང་གསུངས་པ། ནོར་བུའི་རྩ་བར་རབ་ཏུ་གནས་པ་སྣ་ཚོགས་དགའ་བ་ཙམ་ཡིན་ཏེ། །སླར་ཡང་ནོར་བུའི་དབུས་སུ་ལྷག་མའོ་རྣམ་རྟོག་དང་བཅས་གཡོ་བ་དང༌། །དེ་ལས་སྟེང་དུ་སྤྱི་བོའི་ཐུར་ནི་འཛག་ཅིང་འཕོ་བ་མེད་པའི་གཟུགས། །ལྷན་ཅིག་སྐྱེས་པ་འདམ་སྐྱེས་ལ་གནས་སངས་རྒྱས་
ལས་ནི་གཞན་པ་ཅི། །བི་རཱུ་པ་ཞེས་བྱ་བའི་ཞབས་ཀྱིས་ཀྱང་གསུངས་པ། ཇི་སྙེད་རང་བཞིན་འོད་གསལ་བསིལ་ཟེར་ཅན་གྱི་སྒོ་ལས་ཁྲུ་བ་ལྷུང་བ་མ་ཡིན་པར། །ལྟ་མོའི་པདྨའི་འདབ་མའི་ནང་དུ་རོ་མཉམ་གྱུར་པ་རྒྱལ་བའི་ཚོགས་རྣམས་ཀྱིས། །རྡོ་རྗེའི་སྤྱི་བོའི་རྩེ་མོར་སྤྲོ་ཞིང་སྙིང་རྗེས་མི་ཕྱེད་འགྲོ་ལ་མཛད་པ་ཅན། །ཇི་སྙེད་དཔལ་ལྡན་སྙིང་རྗེའི་སྟོབས་ནི་ལྷན་ཅིག་སྐྱེས་པར་ཤེས་བྱ་ཁྱབ་པ་དག་གཟུགས། །ཨིནྡྲ་བྷུ་ཏཱི་ཞབས་ཀྱིས་ཀྱང་གསུངས་པ། ཇི་སྲིད་རྡོ་རྗེ་ནོར་བུར་རྡོ་རྗེ་གསུམ་ནི་བསྲེག་ཅིང་གཡོ་བའི་ཟླ་བ་རླུང་གིས་ནི། །ཆུ་སྐྱེས་གནས་ཀྱི་ལྟེ་བའི་ནང་དུ་འགྲོ་བར་འདོད་པའི་སྐད་ཅེས་འདི་ལ་བརྟན་གྱུར་པ། །གང་དུ་རང་དང་གཞན་ལ་སོགས་པའི་རྣམ་རྟོག་བྲལ་གྱུར་བྱ་བ་རྣམས་ནི་དམན་པའི་ཡིད། །ཤེས་པར་བྱ་སྟེ་ལྷན་ཅིག་སྐྱེས་པའི་དེ་བཞིན་ཉིད་ནི་སླར་ཡང་རིག་པར་འགྲོ་བ་གསལ། །གཞན་ཡང༌། དེ་ཡི་རྩ་བར་མ་ཡིན་པོ་ལའི་སྙིང་པོར་མིན། །པདྨའི་སྦྱོར་བ་མེད་པ་ཡང་ནི་མ་ཡིན་ཏེ། །ཇི་སྙེད་རྡོ་རྗེའི་རྩེ་ལས་འཕོ་བ་མེད་གྱུར་པ། །དེ་སྙེད་མཚན་ཉིད་བྲལ་བས་ལྷན་སྐྱེས་མཚན་ཉིད་དོ། །ཞེས་པ་ལ་སོགས་པའོ། །དོན་འདི་ཉིད་དཔལ་གསང་བ་འདུས་པ་ལས་ཀྱང་གསུངས་པ། བསྒྲུབ་བྱ་སྒྲུབ་བྱེད་ཡང་དག་སྦྱོར། །གང་དེ་བསྙེན་པར་གསུངས་པ་དེ། །རྡོ་རྗེ་པདྨ་མཉམ་སྦྱོར་བ། །ཉེ་བར་སྒྲུབ་པ་ཞེས་བརྗོད་དོ། །ཧཱུཾ་ཕཊ་ཡི་གེ་ཡང་དག་ལྡན། །སྒྲུབ་པ་ལ་ནི་གཡོ་བར་གསུངས། །ངོ་བོ་ཉིད་ཀྱིས་གང་བདེ་ཞིང༌། །སྒྲུབ་པ་ཆེན་པོ་ཞེས་བརྗོད་དོ། །བསྒྲུབ་བྱ་ནི་ཤེས་རབ་དང༌། སྒྲུབ་བྱེད་ནི་ཐབས་ཏེ་དེ་དག་ཡང་དག་པར་སྦྱོར་བ་ནི་བསྙེན་པའོ། །པདྨར་རྡོ་རྗེ་རབ་ཏུ་ཞུགས་པ་ནི་ཉེ་བར་སྒྲུབ་པའོ། །གཡོ་བ་ནི་སྒྲུབ་པའོ། །ངོ་བོ་ཉིད་ཀྱིས་རང་ཉིད་བདེ་ཞིང་ཞི་བ་ནི་སྒྲུབ་པ་ཆེན་པོར་གསུངས་སོ། །བསྒྲུབ་བྱ་དང་ནི་སྒྲུབ་བྱེད་དག །རྡོ་རྗེ་རབ་ཞུགས་མཐར་དགའ་བ། །ཤིན་ཏུ་བསྐྱོད་པའི་བྱང་སེམས་ཀྱི། །མཐར་ནི་མཆོག་ཏུ་དགའ་བ་པོ། །འཕོ་བ་ལ་ནི་དགའ་བྲལ་གྱི་དགའ་བ་སྟེ། གང་གི་ཚེ་འདི་དག་གི་དབུས་སུ་རང་བདེ་ཞིང་ཞི་བར་གྱུར་པ་དེ་རྗེས་ལྷན་ཅིག་སྐྱེས་པའི་དགའ་བ་ཞེས་པའོ། །དེ་ཉིད་དཔལ་ཀྱཻའི་རྡོ་རྗེར་ཡང་གསུངས་པ། ད་ནི་ཐོག་མ་དབུས་མཐའ་མིན། །སྲིད་མིན་མྱ་ངན་འདས་པ་འང་མིན། །འདི་ནི་མཆོག་གི་བདེ་ཆེན་ཏེ། །གཞན་མིན་
གཞན་པ་མིན་པའང་མིན། །མཆོག་ཏུ་དགའ་བ་སྲིད་པར་བརྗོད། །དགའ་བྲལ་ལས་ནི་མྱ་ངན་འདས། །དབུ་མ་དགའ་བ་ཙམ་ཉིད་དེ། །འདིས་ནི་ལྷན་ཅིག་སྐྱེས་པའང་སྤངས། །མཆོག་ཏུ་དགའ་བས་ཡང་དག་ཐོབ། །སྣ་ཚོགས་སྤངས་པའི་སྐད་ཅིག་ལ། །སྟོན་པས་གསུངས་པ་སེམས་དཔའ་ཆེ། །བདེ་བ་ཆེན་པོ་གཟུང་བར་གྱིས། །ཇི་སྲིད་བྱང་ཆུབ་མཐར་ཐུག་པར། །སེམས་ཅན་དོན་གྱི་རྡོ་རྗེ་འཛིན། །ཞེས་པ་ལ་སོགས་པ་རྒྱ་ཆེར་རོ། །འོ་ན་ཇི་ལྟར་རྣམ་པ་གསུམ་པོ་དེ་དག་དབྱེར་མེད་པར་གསུངས་ཤེ་ན། འབྲས་བུ་རྒྱུ་ལས་གཞན་མིན་ཕྱིར། །རྣམ་གསུམ་མངོན་དུ་རབ་གྲག་སྟེ། །དགའ་བྲལ་དགའ་བའི་དབུས་དག་ཏུ། །བཞི་པ་རྣམ་པར་བསལ་ཕྱིར་རོ། །འོ་ན་ཇི་ལྟར་འདི་དག་གི་དབུས་ཉིད་དུ་རབ་ཏུ་གསལ་བར་བཤད་ཅེ་ན། །མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ །ཞེས་པའི་གསུང་ལས་སོ། །སྟོང་དང་སྟོང་མིན་ཞེས་པ་ཇི་ལྟར་ཞེ་ན། ཐོག་མ་ཐ་མ་མེད་ཞི་བ། །དངོས་དང་དངོས་མེད་བདག་ཉིད་གཙོ། །རང་ཉིད་སྙིང་རྗེ་དབྱེར་མེད་པ། །བྱང་ཆུབ་སེམས་ཞེས་བརྗོད་པར་བྱ། །ཞེས་པ་གྲུབ་པའི་མཐའ་ལས་སོ། །འདི་ཉིད་ཐབས་གང་གིས་བསྐྱེད་པར་བྱ་ཞེ་ན། དཀྱིལ་འཁོར་འཁོར་ལོའི་ཐབས་དང་ནི། །རང་བྱིན་བརླབ་པའི་རིམ་པ་ཡིས། །བྱང་ཆུབ་སེམས་ནི་བསྐྱེད་པར་བྱ། །ཀུན་རྫོབ་བ་དོན་དམ་གཟུགས་ཅན་ནོ། །འདི་དག་ནི་གང་གིས་བརྗོད་པར་མི་ནུས་ཏེ། གང་དང་གང་གི་ཕྱིར་ཞེ་ན། སོ་སོ་རང་རིག་ཡེ་ཤེས་འདི། །དག་གི་ལས་འདས་སྤྱོད་ཡུལ་ཏེ། །རང་བྱིན་བརླབ་པའི་རིམ་པ་འདིས། །ཀུན་མཁྱེན་ཡེ་ཤེས་དེ་རང་བཞིན། །གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མའི་རིམ་པ་ཉེར་བསྟེན་དང༌། །བདག་ཉིད་བསོད་ནམས་ལས་ཤེས་བྱ། །བླ་མའི་ཞལ་གྱི་བཀའ་དྲིན་དང༌། །རང་ཉིད་བསོད་ནམས་ཆེ་ལྡན་པ། །འཛིན་པ་ལས་ཀྱི་ཡེ་ཤེས་ནི། །ངག་གི་ལམ་འདས་སྤྱོད་ཡུལ་ལོ། །དེ་གསུངས་པ། གང་གིས་འདི་ནི་རྗོད་པར་བྱེད་པའི་ཚེ། །ཐམས་ཅད་མཁྱེན་པའང་ཚིག་གིས་ཕོངས་གྱུར་པ། །བྱེད་པ་དང་བྲལ་འགྲོ་ལ་རྟག་ཏུ་ཤར། །བདེ་བའི་རྒྱལ་པོ་གཅིག་ཉིད་རྒྱལ་གྱུར་ཅིག །ས་ར་ཧ་པའི་ཞབས་ཀྱིས་ཀྱང་གསུངས་པ། །དེ་ཡི་དེ་ཉིད་བླ་མ་ཡི། །
གསུང་ལས་བླ་མས་རྟོགས་པར་འགྱུར། །ལྷན་སྐྱེས་གནས་སྐབས་བདུད་རྩིའི་རོ། །གང་དུ་སྨྲ་ཞིང་ཅི་ལྟར་ཤེས། །སླར་ཡང༌། འདི་ནི་བློ་ཡི་སྤྱོད་ཡུལ་མ་ཡིན་ཚིག་གི་སྤྱོད་པ་ལས། །རིང་དུ་གྱུར་ཅིང་བླ་མ་དངོས་པོའི་གཏམ་གྱི་འཇུག་པས་སྟོང༌། །རྒྱུད་ཀྱི་རིམ་པས་སྙིང་རྗེ་ལ་སོགས་ཡོན་ཏན་འཇུག་འགྱུར་པ། །རང་ཉིད་དང་དང་ལྡན་པའི་སྙིང་ལ་གོ་འཕང་སྟེར་བར་བྱེད། །འོན་བྱང་ཆུབ་སེམས་ཀྱི་སའི་མཚན་ཉིད་ཅི་ཞེ་ན། དེ་གསུངས་པ། དབང་པོ་རྣམས་ནི་རང་ཉིད་བཞིན། །ཡིད་ནི་ནང་དུ་དུ་ཞུགས་པ་བཞིན། །ཚིག་ནི་ཉམས་པ་བཞིན་དུ་འཇུག །ལུས་ནི་བདེ་བས་ཡང་དག་རྒྱས། །དབང་པོའི་ཚོགས་ནི་ཉམས་ཤིང་འཇུག་པ་མེད། །རྣམ་རྟོག་མ་རྫོགས་སྲིད་པའི་ས་བོན་ཏེ། །དགའ་བའི་རང་བཞིན་འདི་ནི་ནམ་མཁའ་ཡི། །མེ་ཏོག་བསིལ་བའི་རོལ་མྱང་བའོ། །དབང་པོའི་ལམ་ནི་རྣམ་པར་ཞི་གྱུར་ཅིང༌། །ཉམས་པར་གྱུར་པའི་རང་བཞིན་གང་ཡིན་པ། །དེ་ཡི་འབྲས་བུ་ལན་ཅིག་སྐྱེས་དགའ་སྟེ། །ལུས་ཀྱི་མེ་ཏོག་བླ་མའི་ཞལ་ལས་དྲིས། །དེ་ཉིད་གསུངས་པ། གང་ཞིག་ཤར་བས་དུས་རྣམས་ཉམས་ཞིང་སྤྱི་བོར་གནས། །ཡུལ་དང་དབང་པོ་མཚུངས་པ་དེ་ལ་ཕྱག་འཚལ་ལོ། །གང་ཡང་མངོན་དགའ་རྒྱལ་པའི་མཛེས་སྐུ་གཅིག་པུ་ཉིད། །སད་གྱུར་དེ་ཡང་མཁས་པའི་སྙིང་ལ་བཅང་བར་གྱིས། །སླར་ཡང༌། བློ་ཡི་རྣམ་རྟོག་རྣམ་པར་བཅོམ་ན་ནི། །གང་འདིར་དམ་པའི་བདེ་བ་སྟོབས་བྱེད་དོ། །བྱ་བ་དེ་ཡང་མཁས་པ་རྣམས་ཀྱིས་བྱ། །གཞན་ཡང༌། ཕུན་ཚོགས་བསམ་པ་དང་ལྡན་ཉིད། །ཅེས་པ་ལ་སོགས་པ་རྒྱ་ཆེར་རོ། །དེའི་ཕྱིར་ཡང་དག་པའི་བླ་མ་དམ་པ་ལ་སློབ་མ་དམ་པས་གུས་པར་བྱ་ཞིང་གསུམ་ལ་འཇུག་པའི་བདེ་བ་ཆེན་པོ་རང་གིས་རིག་པར་བྱའོ་ཞེས་པའོ། །དེའི་རྗེས་ཐོགས་ཉིད་ལ་ཤེས་རབ་མ་དེའི་ལག་པ་སློབ་མའི་ལག་པར་གཏད་ཅིང༌། མེ་ཏོག་གི་ཕྲེང་བ་བཅིངས་ནས། དེ་གཉིས་རང་གི་ལག་པ་གཡོན་པས་བཟུང་སྟེ། རྡོ་རྗེ་དང་བཅས་པའི་ལག་པ་གཡས་པ་སློབ་མའི་མགོ་བོར་བཞག་ལ་དཀྱིལ་འཁོར་གྱི་མདུན་དུ། འདིར་ནི་ཁྱེད་རྣམས་དབང་པོ་ལགས། །བདག་གིས་འདི་ལ་འདི་གཏད་དོ། །ཞེས་དེ་བཞིན་གཤེགས་པ་རྣམས་དབང་པོར་བཅུག་སྟེ། ཐབས་གཞན་གྱིས་ནི་སངས་རྒྱས་མིན། །འགྲོ་གསུམ་འདི་
ཡང་དག་པ་མིན། །དེ་ཕྱིར་འདི་དང་བྲལ་བར་ནི། །ཁྱོད་ཀྱིས་ནམ་ཡང་མ་བྱེད་ཅིག །འདི་དེ་སངས་རྒྱས་ཐམས་ཅད་ཀྱི། །རིག་མའི་བརྟུལ་ཞུགས་བླ་ན་མེད། །རྨོངས་པ་གང་ཞིག་འདའ་བྱེད་པ། །དེ་ལ་མཆོག་གི་དངོས་གྲུབ་མེད། །ཅེས་བརྗོད་ཅིང་རིག་མའི་བརྟུལ་ཞུགས་གཟུང་བར་བྱ་སྟེ། འདི་ནི་རིག་མའི་བརྟུལ་ཞུགས་སྦྱིན་པའི་ཆོ་གའོ།། །།དེ་ནས་སློབ་མ་རྡོ་རྗེ་སེམས་དཔའི་གཟུགས་སུ་རྣམ་པར་བསྒོམས་ལ། འདི་དེ་སངས་རྒྱས་ཐམས་ཅད་ཉིད། །རྡོ་རྗེ་སེམས་དཔའི་ཕྱག་ན་གནས། །ཁྱོད་ཀྱིས་ཀྱང་ནི་རྟག་ཏུ་ཟུང༌། །ཕྱག་ན་རྡོ་རྗེའི་བརྟུལ་ཞུགས་བརྟན། །ཞེས་བརྗོད་ནས་རྡོ་རྗེ་ལག་པ་གཡས་པར་སྦྱིན་ཞིང་དེས་ཀྱང༌། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡེ་ཏིཥྛ་ཨེ་ཥ་སཏྭཾ་དྷ་ར་ཡ་མི་བཛྲ་སཏྭ་ཧི། ཧི་ཧི་ཧི་ཧི་ཧཱུཾ་ཞེས་བརྗོད་དེ་གཟུང་བར་བྱའོ། །ཞེས་པ་རྡོ་རྗེའི་བརྟུལ་ཞུགས་སྦྱིན་པའི་ཆོ་གའོ།། །།དེ་ནས་སངས་རྒྱས་ཐོད་པ་དང་བདེ་མཆོག་དང༌། ཀྱེའི་རྡོ་རྗེ་ལ་སོགས་པ་གང་ཡང་རུང་བའི་སྙིང་པོའི་སྔགས་ཀྱིས་ཁ་ཊྭཱཾ་ག་དང་ཌ་མ་རུ་དང་པདྨའི་སྣོད་རྣམས་ལ་ལན་གསུམ་བཟླས་ལ། རྡོ་རྗེ་སེམས་དཔའི་ཕྱག་རྒྱ་འདི། །ཕྱི་དང་ནང་དུ་ཡང་དག་གནས། །དེ་ནས་ཁ་ཊྭཱཾ་ཅང་ཏེའུ། །སྣོད་སྦྱིན་དཔའ་བོས་གཟུང་བར་བགྱི། །ཞེས་པའི་ཚིགས་སུ་བཅད་པ་བརྗོད་ཅིང་འཛིན་དུ་གཞུག་གོ། ཁ་ཊྭཱཾ་ག་ལ་སོགས་པ་ལས་གཞན་སྤྱོད་པའི་ཡན་ལག་རྒྱུད་དུ་གསུངས་པ་རྣམས་ཀྱང༌། དེང་དེའི་འཁོར་ལོའི་དབང་ཕྱུག་གི་སྙིང་པོའི་སྔགས་ཀྱིས་བཟླས་ལ། །རྡོ་རྗེ་སེམས་དཔའ་ཞེས་པ་ལ་སོགས་པས་འཛིན་དུ་བཞུག་གོ །དེ་ལྟར་ཡང་དཔལ་གསང་བ་འདུས་པ་ལས། །ཐོར་ཚུགས་ཅོད་པན་འཛིན་པ་གཟུགས། །ཁ་དོག་དཀར་པོ་ལྟ་བུ་ཆེ། །ཐམས་ཅད་ཆོ་ག་བཞིན་དུ་བྱ། །སྔགས་ཀྱི་སྔོམ་པས་ཡང་དག་བསྡམ། །སྡོང་བུ་རྩ་བ་འབྲས་བུ་སྟེ། །ལོངས་སྤྱོད་ཀུན་ལ་མཉམ་པར་སྤྱད། །ཅེས་པ་ལ་སོགས་པས་རིག་མའི་བརྟུལ་ཞུགས་ཡང་དག་པར་བླངས་ཏེ་སྤྱོད་པའི་བརྟུལ་ཞུགས་བྱ་བར་གསུངས་སོ། །གང་ཡང་བཙུན་མོའམ་སྐྱེས་པ་སྤྱོད་པའི་བརྟུལ་ཞུགས་ནི། །དེ་རྣམས་རྡོ་རྗེ་ཕག་མོའི་གཟུགས་སམ་བདག་མེད་མའི་གཟུགས་སམ་མེ་ཏོག་ལྷུང་བ་དང་རྗེས་སུ་མཐུན་བའི་རིགས་ཀྱི་ལྷའི་གཟུགས་དང༌། སྐྱེས་པ་རྣམས་བདེ་མཆོག་དང་ཀྱེའི་རྡོ་རྗེ་ལ་སོགས་
པ་གང་ཡང་རུང་བའི་གཟུགས་སུ་རྣམ་པར་བསམས་ལ། དེ་དང་དེ་ལ་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཡེ་ཤེས་ཀྱི་ལྷ་རྣམས་གཞུག་ཅིང༌། འཁོར་ལོའི་གཟུགས་ཀྱིས་མི་བསྐྱོད་པ། རྣ་ཆའི་བདག་ཉིད་འོད་དཔག་མེད། །མགུལ་གྱི་ཕྲེང་བ་རིན་ཆེན་དབང༌། །ལག་པ་རྣམ་པར་སྣང་མཛད་དྲན། །སྐ་རགས་ལ་ནི་དོན་ཡོད་གནས། །ཡན་ལག་ཀུན་ལ་རྡོ་རྗེ་འཛིན། །ཞེས་གསུངས་པས་རིམ་པ་ཇི་ལྟ་བ་བཞིན་དུ་འཁོར་ལོ་དང༌། རྣ་ཆ་དང༌། མགུལ་རྒྱན་དང༌། གདུ་བུ་དང༌། སྐ་རགས་དང༌། ཐལ་བ་རྣམས་ལ་མི་བསྐྱོད་པ་དང༌། འོད་དཔག་མེད་དང༌། རིན་ཆེན་འབྱུང་ལྡན་དང༌། རྣམ་པར་སྣང་མཛད་དང་དོན་ཡོད་གྲུབ་པ་དང་རྡོ་རྗེ་སེམས་དཔའི་གཟུགས་སུ་སྐད་ཅིག་གིས་བསམས་ཏེ། དེ་དང་དེའི་ཡེ་ཤེས་སེམས་དཔའ་དེ་བཞིན་དུ་སྤྱན་དངས་པ་བཅུག་ནས། མི་བསྐྱོད་པ་ལ་སོགས་པ་ཡོངས་སུ་གྱུར་པ་ལས་འཁོར་ལོ་ལ་སོགས་པའི་ཕྱག་མཚན་རྣམས་མི་བསྐྱོད་པ་ལ་སོགས་པའི་རང་བཞིན་ཉིད་དོ་ཞེས་བྱ་བ་ལ་སོགས་པར་ལྷག་པར་མོས་ལ། ཨོཾ་དྷ་ར་དྷ་ར་དྷཱ་ར་ཡ་དྷཱ་ར་ཡ་མ་རྡ་མ་རྡ་བཛྲ་དྷྲྀ་ཀ་ཕཊ་སྭཱ་ཧཱ། ཞེས་པས་ལན་གསུམ་བཟླས་པའི་འཁོར་ལོ་དེ་དང་དེའི་མགོར་རྡོ་རྗེ་སེམས་དཔའ་ཞེས་པ་ལ་སོགས་པའི་ཚིགས་སུ་བཅད་པས་ཏེ། བུད་མེད་ཀྱི་ཕྱོགས་ལ་ནི་དཔའ་བོ་ཞེས་པའི་ཚབ་ཏུ་ལྷ་མོ་ཞེས་པ་བཅུག་ཅིང་བརྗོད་པས་གཞག་པར་བྱའོ། །ཨོཾ་བཛྲ་དྷརྨ་ས་མ་ཡ་སྟྭཾ་ཧུ་ལུ་ཧུ་ལུ་ཨཱ་རོ་ལྀཀ་ཕཊ་སྭཱ་ཧཱ། ཞེས་པ་ལན་གསུམ་བཟླས་པའི་རྣ་རྒྱན་གཉིས་ནི་རྣ་བ་དག་ལའོ། །ཨོཾ་བཛྲ་སཱུཪྻ་ཏ་མོ་བུདྡྷ་མ་ན་ས་མ་ཡ་སྟྭཾ་ཨ་རཏྣ་དྷྲྀ་ཀ་ཕཊ་སྭཱ་ཧཱ། ཞེས་པ་ལན་གསུམ་བཟླས་པའི་མགུལ་རྒྱན་གྱི་ནི་མགྲིན་པར་རོ། །ཨོཾ་ཤཱ་ཤྭ་ཏ་པར་མ་ཤཱ་ཤྭ་ཏ་ཨེ་ཧྱེ་ཧི་ཛི་ན་ཛི་ཀ་ཕཊ་སྭཱ་ཧཱ། ཞེས་པ་ལན་གསུམ་བཟླས་པའི་ལག་གདུབ་གཉིས་ནི་ལག་པ་དག་ལ་གདུ་བུ་བཞིན་ནོ། །ཨོཾ་ཕུཿཕུཿཧི་ཧི་ཧི་པྲཛྙཱ་དྷྲྀ་ཀ་ཕཊ་སྭཱ་ཧཱ། ཞེས་པ་ལན་གསུམ་བཟླས་པའི་སྐ་རགས་ནི་སྐེད་པ་ལའོ། །ཡང་དག་གནས་ཞེས་པའི་རྗེས་ལ། རིམ་པ་ཇི་ལྟ་བ་བཞིན་དུ། འཁོར་ལོ་མི་བསྐྱོད་པ་ཡི་གཟུགས། །ཞེས་པ་དང༌། རྣ་རྒྱན་གཉིས་ནི་གསུང་རྡོ་རྗེ། །ཞེས་པ་དང༌། མགུལ་རྒྱན་ཕྲེང་བ་རིན་འབྱུང་ལྡན། །ཞེས་པ་དང༌། ལག་གདུབ་
རྟག་པའི་བདག་ཉིད་དོ། །ཞེས་པ་དང༌། སྐ་རགས་དོན་ཡོད་གྲུབ་པ་ནི། །ཞེས་བཅུག་སྟེ། རྡོ་རྗེ་སེམས་དཔའ་ཞེས་པ་ལ་སོགས་པ་བརྗོད་པར་བྱའོ། །ཨོཾ་བཛྲ་སཏྭ་ཧཱུཾ་ཞེས་པ་ལན་གསུམ་བཟླས་པའི་ཐལ་བ་ནི་ཡན་ལག་ཐམས་ཅད་ལ་དགོད་པར་བྱའོ། །བུད་མེད་རྣམས་ཀྱིས་ནི་ཐལ་བ་དང་བྲལ་བའི་ཕྱག་རྒྱ་གཟུང་བར་བྱ་སྟེ། སྐྱེས་པ་རྣམས་ཀྱིས་ནི་ཐལ་བ་ལྷན་ཅིག་ཕྱག་རྒྱ་དྲུག་གོ །གང་ཡང་བུད་མེད་སྐྱེས་པ་ལྟ་སྟངས་ལ་སོགས་པའི་ནུས་པ་ཐོབ་པས་གཞན་དོན་དུ་དཔའ་བོའི་བརྟུལ་ཞུགས་བླང་བར་འདོད་ན། དེ་རྣམས་རྡོ་རྗེ་ཕག་མོའི་གཟུགས་དང་བདེ་མཆོག་གི་གཟུགས་ཡེ་ཤེས་སེམས་དཔའ་དང་རོ་གཅིག་ཏུ་རྣམ་པར་བསམས་ལ། འཁོར་ལོ་ལ་སོགས་པ་སྔར་བཞིན་དུ་མོས་པ་བྱ་ཞིང༌། མགོ་བོའི་ཕྲེང་བ་ལ་སོགས་པ་རྣམས་རང་རང་གི་སྔགས་ཀྱིས་ལྷའི་རང་བཞིན་དུ་མོས་ཏེ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པ་ལན་གསུམ་བཟླས་ནས་འཁོར་ལོ་ལ་སོགས་པ་དེ་བཞིན་དུ་བསྒོམ་པར་བྱའོ། །སངས་རྒྱས་ལྔའི་བདག་ཉིད་ཀྱི་ཐོད་པ་ཡང་སྟེ། བཻ་རོ་ཙ་ནའི་སྔགས་གང་ཡིན། མགོ་བོར་ཐོད་པས་བརྒྱན་པའོ། །ཞེས་གང་གསུངས་པའོ། །ཐོད་པ་ནི་འདིར་འཁོར་ལོའི་གཟུགས་ཀྱང་ངོ༌། །ཨོཾ་ཧྲཱྀཿཧ་ཧ་ཧཱུཾ་ཧཱུཾ་ཕཊ། ཅེས་ལན་གསུམ་བཟླས་པའི་རྣ་རྒྱན་གཉིས་ཏེ། ཡི་གེ་བདུན་པའི་གསང་སྔགས་ཀྱིས། །རྣ་རྒྱན་གྱིས་ནི་རྣ་བར་མཛེས། །ཞེས་གང་གསུངས་པའོ། །རྡོ་རྗེ་ཕག་མོའི་རྩ་བའི་སྔགས་སམ། ཨོཾ་སརྦ་བུདྡྷ་ཞེས་པ་ལ་སོགས་པའི་སྔགས་ཀྱིས་ལན་གསུམ་བཟླས་པའི་མགུལ་རྒྱན་ཏེ། རྡོ་རྗེ་ཕག་མོའི་སྔགས་གང་ཡིན། མགྲིན་པར་མགུལ་རྒྱན་རྣམ་པར་བརྒྱན། །ཞེས་གང་གསུངས་པའོ། །ཨོཾ་ཧཿ། ན་མ་ཧི། སྭཱ་ཧཱ་ཧུ། བཽ་ཥ་ཌ་ཧེ། ཧཱུཾ་ཧཱུཾ་ཧོ་ཕཊ་ཧཾ། ཞེས་པ་ལན་གསུམ་བཟླས་པའི་གདུ་བུ་གཉིས་ཏེ། དཔའ་བོའི་གོ་ཆ་དྲུག་གིས་ནི། ཕྱག་རྒྱ་འདི་ནི་ལུས་ལ་མཛས། །ཞེས་གང་གསུངས་པའོ། །ཨོཾ་བཾ་ཧོཾ་ཡཾ་ཧྲིཾ་ཧཱུཾ་ཧཱུཾ་ཕཊ་ཕཊ། ཅེས་པ་ལན་གསུམ་བཟླས་པའི་སྐ་རགས་ཏེ། ཧཱུཾ་ཧཱུཾ་ཕཊ་ཕཊ། ཅེས་པ་ལན་གསུམ་བཟླས་པའི་སྐ་རགས་ཏེ། རྣལ་འབྱོར་མ་དྲུག་ཅེས་པ་ཡི། །སྔགས་ཀྱིས་སྐ་རགས་རྒྱན་དུ་བྱ། །ཞེས་གང་གསུངས་པའོ། །ཨོཾ་ཤྲཱི་བཛྲ་ཧེ་ཧེ་རུ་རུ་ཀཾ་ཧཱུཾ་ཕཊ་ཌཱ་ཀི་ནཱི་ཛྭ་ལ་སམྦ་རཾ་སྭཱ་ཧཱ། ཞེས་པ་ལན་གསུམ་
བཟླས་པའི་མི་མགོ་ལྔ་བཅུའི་ཕྲེང་བ་ནི་མགྲིན་པ་ལ་སྟེ། ལྷ་ཡི་སྙིང་པོའི་སྔགས་ཀྱིས་ནི། །བརྒྱ་ཕྱེད་ཕྲེང་བས་རྣམ་པར་བརྒྱན། །ཞེས་གང་གསུངས་པའོ། །ཨོཾ་སརྦ་བུདྡྷ་ཌཱ་ཀི་ནཱི་ཡེ་བཛྲ་བརྞ་ནཱི་ཡེ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་ལན་གསུམ་བཟླས་པའི་སྟག་གི་པགས་པ་ནི་ཤམ་ཐབས་ཀྱི་ཆེད་དུ་སྟེ། སངས་རྒྱས་ཀུན་གྱི་མཁའ་འགྲོ་མས། །པགས་པའི་གོས་ནི་འཛིན་པ་མཆོག །ཅེས་གང་གསུངས་པའོ། །ཨོཾ་པྲ་ཙཎྜེ་ཧཱུཾ་ཧཱུཾ་ཕཊ། ཅེས་པ་ལ་སོགས་པ་ནས། ཨོཾ་རཱུ་པི་ནཱི་ཡེ་ཧཱུཾ་ཧཱུཾ་ཕཊ། ཅེས་པའི་བར་སྔགས་སུམ་ཅུ་རྩ་དྲུག་གིས་ལན་གསུམ་བཟླས་ཤིང༌། འཆད་པར་འགྱུར་བའི་མཚན་ཉིད་ཅན་གྱི་སྔགས་ཀྱིས། གང་བའི་སྣོད་ནི་ལག་པར་ཏེ། །འཁོར་ལོ་ཀུན་གྱི་རྣལ་འབྱོར་མའི། །སྔགས་ཀྱིས་བཏུང་བའི་ཐོད་པའོ། །ཞེས་གང་གསུངས་པའོ། །ཁ་ཊྭཱཾ་ག་དང་ཌ་མ་རུ། །ན་མོ་བྷ་ག་ཝ་ཏེ་བཱ་རེ་ཤ་ཡ་ཞེས་པ་བཅོམ་ལྡན་འདས་ཀྱི་རྩ་བའི་སྔགས་ཀྱིས་ལན་གསུམ་མངོན་པར་བསྔགས་ཏེ། རྡོ་རྗེ་སེམས་དཔའ་ལ་སོགས་པའི་ཚིགས་སུ་བཅད་པས་སོ། །སླར་ཡང་སྔགས་དེ་ཉིད་ཀྱིས་ལན་གསུམ་བཟླས་པའི་ཚངས་སྐུད་དང༌། མགྲིན་པར་འཕྱང་བའི་དོ་ཤལ་དང༌། རྡོ་རྗེའི་རྒྱན་དང༌། རྐུན་མའི་སྐྲ་ལས་བྱས་པའི་ཅོད་པན་དང༌། སྐོར་གཉིས་པའི་སྐ་རགས་དང༌། ཐལ་བ་དང༌། དཔུང་རྒྱན་དང༌། རྐང་གདུབ་དང༌། གཡེར་ཁ་རྣམས་ནི་རང་རང་གི་གནས་སུ་སྟེ། དཔའ་བོའི་རྩ་བའི་སྔགས་ཀྱིས་ཀྱང༌། །ཚངས་སྐུད་ལ་སོགས་གནས་སུ་གདགས། །ཞེས་གང་གསུངས་པའོ། །དེ་ལ་ཕྲེང་གཅིག་གིས་ཚངས་སྐུད་བྱའོ། །ཕྲེང་བརྒྱད་ཀྱིས་ནི་སྐ་རགས་ཏེ། དེ་ཉིད་བུད་མེད་ཀྱི་རྐེད་པར་བཅུ་དྲུག་གིས་ཏེ། ཉི་ཤུ་རྩ་ལྔས་ནི་དོ་ཤལ་ལོ། །གང་ཡང༌། སྐུད་པ་གཅིག་གིས་ཚངས་སྐུད་དེ། །སྐུད་པ་བརྒྱད་ཀྱིས་སྐ་རགས་ཉིད། །བུད་མེད་བཅུ་དྲུག་ཤེས་པར་བྱ། །ཉི་ཤུ་རྩ་ལྔའི་ཕྲེང་བ་ཅན། །ཞེས་གསུངས་པའོ། །ཡང་ན་མིའི་རྒྱུས་པ་ལས་བྱས་པའམ། སྐྲ་ལས་བྱས་པའི་ཚངས་སྐུད་དོ། །འདིར་འཁོར་ལོ་ལ་སོགས་པ་དང་རྡོ་རྗེའི་རྒྱན་རྣམས་ནི་ཇི་ལྟར་རིགས་པར་མིའི་རུས་པ་ལས་བྱས་པའོ། །དེ་ལ་གཅིག་ནི་སྤྱི་བོར་ཏེ། དེ་སྐད་དུ། ཐོད་པའི་དུམ་བུ་སོ་ལྔ་བར། །བྱས་པའི་ཅོད་པན་འཛིན་པར་བྱེད། །
ཅེས་གསུངས་སོ། །དཔའ་བོའི་སྤྱོད་པའི་བརྟུལ་ཞུགས་ཉིད་ལ། རྒྱལ་བུ་གཞོན་ནུའི་བརྟུལ་ཞུགས་ཀྱི་སྤྱོད་པ་དང༌། རྡོ་རྗེ་ཐོད་པའི་སྤྱོད་པའི་བརྟུལ་ཞུགས་ཞེས་ཀྱང་དཔལ་སམྦུ་ཊའི་རྒྱུད་དུ་གསུངས་སོ། །དེའི་རྗེས་སུ་ཕྱག་རྒྱ་ལྔ་ལ་སོགས་པ་རྟག་ཏུ་མཆོད་པ་བྱའོ་ཞེས་པ་སྤྱོད་པའི་བརྟུལ་ཞུགས་སྦྱིན་པའི་ཆོ་གའོ།། །།དེ་ནས་མཆོག་སྦྱིན་བླ་མ་ཡིས། །ཕྱག་རྒྱ་ཡང་དག་ལུང་བསྟན་བྱ། །དེ་ཉིད་དེ་བཞིན་གཤེགས་གྱུར་ནས། །སློབ་མ་རྡོ་རྗེ་འཛིན་བདག་ཉིད། །གཡོན་པས་ཆོས་གོས་འཛིན་པ་དང༌། གཡས་པས་མཆོག་སྦྱིན་ཕྱག་ལྡན་པས། དེ་བཞིན་གཤེགས་ཀུན་ལྷན་གཅིག་ཏུ། །ཚིགས་བཅད་འདི་ཉིད་བརྗོད་པར་བྱ། །སྲིད་པའི་ངན་འགྲོ་ལས་བཏོན་པས། །སྲིད་མཐའ་ཤིན་ཏུ་གྲུབ་བྱའི་ཕྱིར། །རྡོ་རྗེ་སེམས་དཔའ་དེ་བཞིན་གཤེགས། །བདག་གིས་ཁྱོད་འདྲི་ལུང་བསྟན་བགྱི། །ཀྱེའི་ཆེ་གེ་མོ་རྡོ་རྗེ་ཞེས་བྱ་བའི་དེ་བཞིན་གཤེགས་པ་སིདྡྷྱ་ས་མ་ཡ་སྟྭཾ་བྷུ་རྦྷྱ་ཝ་སྭཿཞེས་པའི་སྔགས་བརྗོད་ཅིང་སློབ་མ་ལུང་བསྟན་པར་བྱ་སྟེ། གང་ཡང་འདི་ལྟར་བསྟན་པ་ལ་དེ་བཞིན་གཤེགས་པ་ཐམས་ཅད་ཀྱིས་དབྱང་གཅིག་ཏུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་པར་མཛད་དོ་ཞེས་པ་ལུང་བསྟན་པའི་ཆོ་གའོ།། །།རིག་མ་དང་རྡོ་རྗེ་དང་སྤྱོད་པའི་བརྟུལ་ཞུགས་དང༌། ལུང་བསྟན་པ་འདི་རྣམས་ལ་རྒྱུད་ལ་སོགས་པ་ཁ་ཅིག་ཏུ་ནི་དབང་བསྐུར་པ་ཉིད་ཀྱི་ཐ་སྙད་བྱས་སོ། །དེའི་རྗེས་སུ་སློབ་མ་རྣམ་པར་སྣང་མཛད་ལ་སོགས་པའི་གཟུགས་བསམ་གཏན་གྱི་མདུན། འཁོར་ལོ་རིན་ཆེན་དེ་བཞིན་དུ། །པདྨ་དང་ནི་རྡོ་རྗེ་སྟེ། །རྗེས་སུ་གནང་བ་དེ་རྣམས་སྦྱིན། །ཚིགས་སུ་བཅད་པ་འདི་རྣམས་སྦྱིན། །སེམས་ཅན་ཀུན་ལ་ཕན་དོན་དུ། །སེམས་ཅན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་བ་ཡི། །ཆོས་ཀྱི་འཁོར་ལོ་རབ་ཏུ་བསྐོར། །ཛཱ་ཡ་ཛཱ་ཡ་སརྦ་ཏ་ཐཱ་ག་ཏ་ཨ་དྷི་པ་ཏི་པྲ་ཝ་རྟ་ཡ་དྷརྨ་ཙཀྲཾ་སེམས་ཅན་ཀུན་ལ་ཕན་དོན་དུ། །ཇི་ལྟར་སྣ་ཚོགས་འདུལ་བ་ཡི། །སངས་རྒྱས་རིན་ཆེན་རབ་ཏུ་སྟོན། །ཨོཾ་བཛྲ་རཏྣ་དྷརྨ་བི་ཤུདྡྷ་ཛྙཱ་ན་ཨ་བྷི་ཞེ་ཀ་པཱ་ཏ་ཨོཾ་ཨོཾ་ཨོཾ། །སེམས་ཅན་ཀུན་ལ་ཕན་དོན་དུ། །འཇིག་རྟེན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་བ་ཡི། །འདོད་ཆགས་དག་པ་རབ་ཏུ་སྟོན། །ཨོཾ་བཛྲ་དྷརྨཱ་བི་ཤུདྡྷ་ཛྙཱ་ན་རཱ་ག་པདྨ་
དལ་སྭཱ་བྷཱ་ཝ་བཛྲི་ཨཱཿ། སེམས་ཅན་ཀུན་ལ་ཕན་དོན་དུ། །འཇིག་རྟེན་ཀུན་ལ་ཐམས་ཅད་ནས། །ཇི་ལྟར་སྣ་ཚོགས་འདུལ་བ་ཡི། །རྡོ་རྗེའི་མཆོད་པ་རབ་ཏུ་བསྐོར། །བཛྲ་ཀརྨ་བི་ཤུདྡྷ་ཛྙཱ་ན་སརྦ་པཱུ་ཛ་སྭཱ་བྷཱ་ཝ་ཨཱཿཋ། སླར་ཡང་ཁྱད་པར་གྱི་རྗེས་སུ་གནང་བ་སྦྱིན་པར་བྱ་སྟེ། ཨོཾ་བཛྲ་བྷ་ཥ་རཾ་ཞེས་བརྗོད་ཅིང་ཨ་ཡིག་ལས་སྐྱེས་པའི་དུང་དང༌། གཡོན་པར་དབྱངས་ཐ་མ་ལས་སྐྱེས་པའི་དྲིལ་བུ་དབྱངས་ཐ་མ་བརྗོད་ཅིང་བྱིན་ལ། སློབ་མ་དྲིལ་བུ་འཁྲོལ་དུ་གཞུག་ཅིང༌། ཐམས་ཅད་ནམ་མཁའི་མཚན་ཉིད་དེ། །ནམ་མཁའ་ལ་ཡང་མཚན་ཉིད་མེད། །ནམ་མཁའ་མཉམ་པར་སྦྱོར་བ་ཡིས། །ཀུན་མཆོག་མཉམ་པ་ཉིད་དུ་གསལ། །དེང་ནས་བརྩམས་ཏེ་དང་བཅས་པའི། །སེམས་ནི་བསྐྱེད་པ་ཙམ་གྱིས་ནི། །ཆོས་ཀྱི་འཁོར་ལོ་རབ་ཏུ་བསྐོར། །ཆོས་ཀྱི་དུང་ནི་བླ་མེད་པ། །ཀུན་ནས་ཡོངས་སུ་གང་བར་གྱིས། །ཞེས་པས་སོ། །སླར་ཡང༌། རྣམ་པ་སྣ་ཚོགས་ལས་བྱས་པའི། །རིན་ཆེན་བདུན་ནི་གཏད་པར་བྱ། །གྲི་གུག་དང་ནི་ཁ་ཏྭཱཾ་ག །བགྲང་ཕྲེང་གླེགས་བམ་ས་བོར། །གྱོ་མོ་རྣལ་འབྱོར་དབྱུག་པ་དང༌། །ཞེས་བརྗོད་པའི་མཐར། པདྨའི་ལག་པས་ལྷམ་དང་ནི། །རྣལ་འབྱོར་པ་ཡི་སྒོམ་ཐག་རྣམས། །ལེགས་པར་དགའ་བའི་བསམ་པ་ཡིས། །སྔགས་ཆེན་དེ་ཡིས་སྦྱིན་པར་བྱ། །ཐེ་ཚོམ་མེད་པའི་བསམ་པ་ཡིས། །ཁྱོད་འདིར་བློ་གྲོས་ངན་མི་བྱ། གསང་སྔགས་སྤྱོད་པའི་ཚུལ་མཆོག་ནི། །མཉམ་མེད་རང་གིས་རང་གསལ་བྱ། །དེ་ལྟར་བྱས་ན་སངས་རྒྱས་ལ། །ཕན་བཏགས་བྱས་པ་གཟོ་བ་ཡིན། །རྡོ་རྗེ་འཛིན་པ་དེ་ཀུན་ཡང༌། །ཁྱད་ལ་རྟག་ཏུ་ཀུན་སྲུང་མཛད། །ཤེས་རབ་ལས་ཀྱི་རང་བཞིན་བདག །ཡིད་བཞིན་ནོར་བུ་ལྟར་མཐོ་བས། །སྐྱེ་མེད་དོགས་དང་བྲལ་བ་ཡིས། །དེ་ལྟར་སེམས་ཅན་དོན་གྱིས་ཤིག །ཅེས་བརྗོད་དོ། །དེས་ཕྱག་བྱས་ལ། གཙོ་བོས་ཇི་ལྟར་བཀའ་བསྒོ་བ། །དེ་བཞིན་དུ་ནི་བདག་གིས་བགྱི། །ཞེས་བརྗོད་པར་བྱ་སྟེ་རྗེས་སུ་གནང་བ་སྦྱིན་པའི་ཆོ་གའོ།། །།དེའི་རྗེས་སུ། སྤྱི་བོ་རུ་ནི་གདུགས་བཟུང་ནས། །སྐོར་བ་བྱེད་དུ་བཅུག་ནས་ནི། །དཀྱིལ་འཁོར་སྒོར་ནི་ཐལ་སྦྱོར་བ། །གདུགས་པ་བཅས་དན་བཅིང་འདི་བརྗོད་བྱ། །རྒྱུད་རྣམས་འཛིན་པར་གྱུར་པ་ཡི། སློབ་མ་འདི་ནི་ཕུལ་བ་
ལགས། །ཞེས་བརྗོད་པས་དེ་ལྟར་དཀྱིལ་འཁོར་གྱི་དབང་ཕྱུག་ལ་གསོལ་བ་བཏབ་ལ། གདུགས་གཞན་དུ་གཞག་ནས་སློབ་མའི་སྙིང་ལ་འབབ་པའི་ཚིག་བརྗོད་པར་བྱ་སྟེ། ད་ནི་ཁྱེད་རྣམས་དཀྱིལ་འཁོར་གྱི། །སློབ་དཔོན་སྔགས་དང་རྒྱུད་འཛིན་པར། །སངས་རྒྱས་བྱང་ཆུབ་སེམས་དཔའ་དང༌། །ལྷ་རྣམས་ཀྱིས་ཀྱང་དགོངས་པར་འགྱུར། །སེམས་ཅན་རྣམས་ལ་བརྩེ་དོན་དུ། །ཁྱེད་ཀྱིས་དཀྱིལ་འཁོར་ཆོ་ག་བཞིན། །རབ་ཏུ་འབད་པས་བྲི་བར་བྱ། །སྒྲུབ་པ་པོ་རྣམས་སྔགས་ལ་སྦྱོར། །མཆོག་ཏུ་གསང་བ་དམ་པ་ཡི། །དཀྱིལ་འཁོར་མཐོང་བཞིན་རབ་ཞུགས་པས། །སྡིག་པ་ཀུན་ལས་རྣམ་པར་གྲོལ། །དེ་རིང་ཁྱོད་རྣམས་བདེ་བར་གནས། །བདེ་ཆེན་ཐོག་པ་འདི་ལ་ནི། །ཕྱིན་ཆད་འཆི་བ་ཡོད་མེད་དེ། །སྲིད་པའི་སྡུག་བསྔལ་ལས་ཁྱོད་འདས། །སྲིད་པ་ཤིན་ཏུ་མཐའ་གྲུབ་པོ། །སངས་རྒྱས་རྡོ་རྗེ་ཅན་ཀུན་གྱིས། །དེ་རིང་ཚེ་ལྡན་དཔང་བསྐུར་ཏེ། །ཁམས་གསུམ་གྱི་ནི་རྒྱལ་སྲིད་ཆེ། །རྗེ་བོ་ཉིད་དུ་ཁྱོད་ངེས་སོ། །འདོད་ཆགས་བྲལ་བ་ལྟ་བུའི་སྡིག །ཁམས་གསུམ་ན་ནི་གཞན་མེད་དེ། །དེ་བས་འདོད་ལ་ཆགས་བྲལ་ཉིད། །ཁྱོད་ཀྱིས་ནམ་ཡང་མི་བྱའོ། །འདོད་པ་ཀུན་ལ་སྤྱོད་པས་ཁྱོད། །གང་ལ་འཇིགས་པ་མེད་པར་གྱིས། །ཤ་ལྔ་བདུད་རྩི་ལྔ་བཟའ་བྱ། །དེ་ལས་གཞན་ཡང་དམ་ཚིག་བསྲུང༌། །སྲོག་ཆགས་གསད་པར་མི་བྱ་ཞིང༌། །བུད་མེད་རིན་ཆེན་སྤང་མི་བྱ། །སློབ་དཔོན་སྤང་བར་མི་བྱ་སྟེ། །སྡོམ་པ་ལས་ནི་འདའ་མི་བྱ། །ཤེས་རབ་ཐབས་ཀྱི་བསམ་པ་ཡིས། །མི་བྱ་ཅུང་ཟད་ཡོད་མ་ཡིན། །མ་འཇིགས་ཁྱོད་ལ་སྡིག་པ་མེད། །རྡོ་རྗེ་སེམས་དཔའི་གསུང་ཇི་བཞིན། །ཞེས་པའོ། །དབུགས་དབྱུང་བ་སྦྱིན་པའི་ཆོ་གའོ།། །།དབྱུགས་དབྱུང་སྦྱིན་ནས་སློབ་མ་ལ། །བླ་མས་དམ་ཚིག་སྤྱོད་རིགས་བྱ། །རིགས་ལྔ་ལས་ནི་ཡང་དག་བྱུང༌། །དམ་ཚིག་ལྔ་ནི་མཉན་པར་གྱིས། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་ལ་སྐྱབས་སུ་སོང༌། །འདི་ནི་སངས་རྒྱས་རིགས་དགེ་བའི། །དམ་ཚིག་སྡོམ་པ་ཡིན་པར་འདོད། །རྡོ་རྗེ་དྲིལ་བུའི་ཕྱག་རྒྱ་ཡང༌། །བློ་ཆེན་ཁྱོད་ཀྱིས་གཟུང་བར་བྱ། །བྱང་ཆུབ་སེམས་གང་དེ་རྡོ་རྗེ། །ཤེས་རབ་དྲིལ་བུ་ཞེས་བྱར་བརྗོད། །སློབ་དཔོན་བརྙས་པར་མི་བྱ་སྟེ། །
བླ་མ་སངས་རྒྱས་ཀུན་དང་མཉམ། །འདི་ནི་རྡོ་རྗེའི་རིགས་དག་པའི། །དམ་ཚིག་སྡོམ་པ་ཡིན་པར་གསུངས། །རིན་ཆེན་རིགས་ལ་དེ་བཞིན་དུ། །ཉིན་དང་མཚན་མོ་ལན་གསུམ་དུ། །ཟང་ཟིང་ཆོས་དང་མི་འཇིགས་བྱམས། །སྦྱིན་པ་རྣམ་བཞི་རབ་ཏུ་སྦྱིན། །ཕྱི་དང་གསང་བ་ཐེག་པ་གསུམ། དམ་ཆོས་ཁྱོད་ཀྱིས་གཟུང་བར་བྱ། །འདི་ནི་པདྨའི་རིགས་དག་པའི། །དམ་ཚིག་སྡོམ་པ་མཆོག་ཡིན་ནོ། །ལས་ཀྱི་རིགས་མཆོག་ཆེན་པོ་ལ། །སྡོམ་པ་ཐམས་ཅད་ལྡན་པར་ནི། །ཡང་དག་ཉིད་དུ་གཟུང་བར་བྱ། །མཆོད་པའི་ལས་ཀྱང་ཅི་ནུས་བགྱིས། །འདི་ལས་གཞན་དུའང་བཅུ་བཞི་ནི། །རྡོ་རྗེའི་ཐག་ལ་ཕམ་པར་བཤད། །ཉིན་ལན་གསུམ་དང་མཚན་ལན་གསུམ། །ཉིན་རེ་ཞིང་ནི་བཟླས་པར་བྱ། །བཤེས་གཉེན་རྡོ་རྗེའི་སྤུན་ཟླ་དང༌། །རྣལ་འབྱོར་མ་རྣམས་བསྙེན་བཀུར་བྱ། །སྤང་བར་མི་བྱ་དོར་མི་བྱ། །ཇི་ལྟར་ནུས་བཞིན་ཡང་དག་སྤྱད། །ཐེག་པ་དམན་པ་འདོད་མི་བྱ། །སེམས་ཅན་དོན་ལ་རྒྱབ་ཕྱོགས་མིན། །འཁོར་བ་ཡོངས་སུ་མི་སྤོང་ཞིང༌། །མྱ་ངན་འདས་ལ་རྟག་དགའ་མིན། །ལྷ་རྣམས་དང་ནི་གསང་བ་པ། །ཁྱོད་ཀྱིས་བརྙས་པར་མི་བྱ་ཞིང༌། །ཕྱག་རྒྱ་བཞོན་པ་མཚོན་ཆ་དང༌། །མཚན་མ་འགོམ་པར་མི་བྱའོ། །ཁྱོད་ཀྱིས་སྲོག་ཆགས་གསད་མི་བྱ། །མ་བྱིན་པར་ཡང་མོ་བླང་ངོ༌། །འདོད་པ་ལོག་པར་མི་སྤྱད་ཅིང༌། །བརྫུན་དུ་སྨྲ་བར་མི་བྱའོ། །སེམས་ཅན་གདུལ་ཕྱིར་མ་གཏོགས་པ། །བྱ་བ་མ་ཡིན་པ་ཐམས་ཅད་སྤངས། །དམ་པ་ཉེ་བར་བསྟེན་བྱ་ཞིང༌། །རྣལ་འབྱོར་མ་ཀུན་བསྙེན་བཀུར་བྱ། །ལུས་ཀྱི་ལས་ནི་རྣམ་གསུམ་དང༌། །ངག་གི་རྣམ་པ་བཞི་རྣམས་དང༌། །ཡིད་ཀྱི་རྣམ་པ་གསུམ་དག་ནི། །ཅི་ནུས་པར་ནི་རྗེས་སུ་སྐྱོངས། །འདི་དག་དམ་ཚིག་ཡིན་པར་གསུངས། །ད་ནི་ཁྱོད་ཀྱིས་བསྲུང་བར་བྱ། །དེ་བཞིན་དེས་ཀྱང་བརྗོད་པར་བྱ། །སློབ་དཔོན་བདག་ཉིད་ཆེན་པོ་སྟེ། གཙོ་བོས་ཇི་ལྟར་བཀའ་སྩལ་པ། །དེ་བཞིན་དུ་ནི་བདག་གིས་བགྱི། །དེ་ལྟར་ཡིད་ནི་རབ་དང་རྡོ་རྗེ་ཉིད་དུ་གྱིས། །རང་གི་དམ་ཚིག་མི་ཟད་པ་དེ་སྟེར་སྣོད་དུ་གྱིས། །འགྲོ་བ་བདེ་བ་ཉུང་ལས་རྡོ་རྗེ་སེམས་དཔའ་དང༌། །མཚུངས་པའི་རྟག་པ་ཉིད་དུ་ཕྱིན་པར་འགྱུར། །
གཞན་ཡང་གང་དག་ཆོ་ག་ཇི་ལྟ་བ་བཞིན་དུ་མངོན་པར་དབང་བསྐུར་བ་ལ་དགེ་བ་ཉིད་ཀྱི་ཕྱིར། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་སྡུག་པའི་བུད་ན་འདྲ་བར་ཐུགས་དང་བས་གསང་སྔགས་པར་དགོངས་པར་མཛད་པ་འདི་ནི་ཆོས་རྣམས་ཀྱི་ཆོས་ཉིད་ཡིན་ནོ་ཞེས་སོ། །དམ་ཚིག་བསྒྲག་པའི་ཆོ་གའོ།། །།དེ་ལྟར་མངོན་པར་དབང་བསྐུར་བ་ཐོབ་ཅིང་དབུགས་ཕྱུང་བས་དགའ་བའི་སློབ་མས་ཀྱང༌། དེ་བཞིན་དུ་བགྱིའོ་ཞེས་པ་དང༌། དེང་བདག་སྐྱེ་བ་འབྲས་བུར་བཅས། །བདག་གི་གསོན་པའང་འབྲས་བུར་བཅས། །དེ་རིང་སངས་རྒྱས་རིགས་སུ་སྐྱེས། །སངས་རྒྱས་སྲས་སུ་དང་བདག་གྱུར། །ཞེས་བརྗོད་པར་བྱའོ། །དེ་ནས་རྗེས་སུ་མཐུན་པའི་ཡིན། །སློབ་མ་ལས་ནི་བླང་བྱ་སྟེ། །དེས་ཀྱང་དཀྱིལ་འཁོར་དེ་ཉིད་ནི། མངོན་དུ་བྱས་ནས་སླར་ཡང་དབུལ། །རྒྱལ་སྲིད་ས་བཞི་ཆུང་མ་དགའ་བའི་བུ་དང་བྲམ་མོ་དེ་ནི་དེ་བཞིན་བྲམ་བཟང་དང༌། །གླང་པོ་རྟ་དང་ནོར་དང་སོ་བ་གསེར་དང་ཤིང་རྟ་གོས་དང་མཚོན་ཆ་དེ་བཞིན་དུ། །ཕུན་ཚོགས་མ་ཧེ་རྣམས་དང་ཁྱིམ་སོགས་མཆོག་དེ་རྣམས་དང་དམ་པ་རྣམས་ཀྱང་བསྟེན་པ་སྟེ། །བདག་ཉིད་ཀྱང་ནི་ངེས་པར་ཤེས་བྱ་གཞན་ཅིའང་སློབ་མ་རྣམས་ཀྱིས་རིག་པའི་བླ་མ་ལའོ། །དེ་མ་བྱས་ན་བསོད་ནམས་ཅི། །སྨྱུར་གནས་དང་ནི་དཀའ་ཐུབ་གང༌། །བླ་ན་མེད་མཛད་སློབ་དཔོན་ནི། །རྡོ་རྗེ་སེམས་དཔའ་མཆོད་པར་བྱ། །དེ་ལ་ཕུལ་བས་སངས་རྒྱས་རྣམས། །ཀུན་ལ་རྟག་ཏུ་ཕུལ་བར་འགྱུར། །དེ་ལ་བྱིན་བས་བསོད་ནམས་ཚོགས། །ཚོགས་ལས་དངོས་གྲུབ་བླ་ན་མེད། །མདོར་ན་དེ་འདྲའི་བྱ་བ་རྣམས། །བླ་མ་དམ་པ་མཉེས་བཞིན་བྱ། །བླ་མ་མཉེས་ན་དངོས་གྲུབ་ལས། །གཞན་མོན་ཞེས་ནི་ཐུབ་པས་གསུངས། །ཞེས་པ་ལ་སོགས་པའོ། །ད་ནི་དབང་གི་དག་པ་བཤད་དེ། །འདིར་མེ་ཏོག་ལྷུང་བས་ཉེ་བར་མཚོན་པའི་དེ་བཞིན་གཤེགས་པའི་རང་བཞིན་གྱིས་ཡོངས་སུ་དག་པ་རེས་པར་གསལ་བར་བྱ་བའི་ཕྱིར། མགོ་བོའི་ཕྲེང་བའི་དབང་བསྐུར་བའམ། །མ་རིག་པའི་དྲི་མ་འཁྲུད་པར་ནུས་པ་ཉིད་དུ་བསྒྲུབ་པའི་ཕྱིར་ཆུའི་མངོན་པར་དབང་བསྐུར་བའོ། །རྒྱས་འདེབས་ཀྱི་དེ་བཞིན་གཤེགས་པ་འདུས་བྱ་བ་བསྐྱེད་པ་དང༌། གཙུག་ཏོར་བསྐྱེད་པར་ནུས་པ་ཉིད་ཀྱི་ཆེན་དུ་ཅོད་པན་གྱི་
མངོན་པར་དབང་བསྐུར་བའོ། །ཉོན་མོངས་པ་ལ་སོགས་པའི་དགྲ་རྩ་བ་ནས་འདོན་པ་ཉིད་ཀྱི་ཕྱིར་དཔའ་བོའི་དར་དབྱངས་འཆིང་བ་ནི་ཅོད་པན་གྱི་དབང་གི་འཁོར་ཡིན་ཏེ། ཁ་ཅིག་ཏུ་ནི་དབང་བསྐུར་བ་ཐ་དད་པར་བརྗོད་དོ། །དབྱེར་མེད་པའི་ཡེ་ཤེས་སྐྱེ་བར་འགྱུར་བར་ནུས་པ་ཉིད་དུ་བསྒྲུབ་པའི་ཕྱིར་རྡོ་རྗེའི་མངོན་པར་དབང་བསྐུར་བའོ། །སྟོང་པ་ཉིད་དང་སྙིང་རྗེ་དབྱེར་མེད་པ་བླ་ན་མེད་པའི་ཡེ་ཤེས་འབྱུང་བའི་མངའ་བདག་ཆོས་འབྱུང་རྟོགས་པར་བྱ་བའི་ཆེད་དུ་ཆོས་འབྱུང་མཚོན་པར་བྱེད་པ་དྲིལ་བུ་སྒྲ་དང་བཅས་པས་མངོན་པར་དབང་བསྐུར་བའོ། །བདག་པོའི་ཆེད་དུ་མངོན་པར་དབང་བསྐུར་བ་ནི་བདག་པོའི་དབང་དུ་ཡང་བརྗོད་དོ། །འབྱུང་བར་འགྱུར་བ་ན་ཐུབ་པའི་དབང་པོའི་གོ་འཕང་གི་མིང་དུ་འོས་པའི་ས་བོན་བསྒྲུབ་པའི་ཆེད་དུ་མིང་གི་མངོན་པར་དབང་བསྐུར་བའོ། །འདི་ནས་བརྩམས་ཏེ་རྣམ་པར་དག་པ་ཟུང་འཇུག་གི་བྱང་ཆུབ་རྟོགས་པར་བྱ་བའི་ཆེད་དུ་བརྩོན་པར་གྱིས་ཤིག་ཅེས་ངེས་པར་བྱ་བར་དགོངས་ནས་དེའི་རང་བཞིན་གྱི་རྡོ་རྗེ་འཛིན་པ་ལ་སྦྱོར་བ་ནི་རྡོ་རྗེའི་དམ་ཚིག་གོ །ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟོན་པའི་ངེས་པ་སྟེར་བའི་དེ་བཞིན་ཉིད་རྟོགས་པ་ལ་སྦྱར་བའི་ཆེད་དུ་སྒྲ་དང་བཅས་པའི་དྲིལ་བུའི་དམ་ཚིག་གོ །ཤེས་རབ་དང་ཐབས་ཀྱི་རང་བཞིན་བདེ་བ་ཆེན་པོའི་བདག་ཉིད་རྫོགས་པའི་སངས་རྒྱས་ཀྱི་རང་བཞིན་ཤིན་ཏུ་བརྟན་པར་ནུས་པ་ཉིད་དུ་བསྒྲུབ་པའི་ཕྱིར་ཕྱག་རྒྱའི་དམ་ཚིག་གོ །དེ་ཉིད་ཀྱི་ཕྱིར་མཁའ་འགྲོ་མ་རྡོ་རྗེ་གུར་ལས། དམ་ཚིག་གཉིས་ཀྱི་འཁོར་ཅན་ཕྱག་རྒྱའི་དམ་ཚིག་ཁོ་ན་རྫོགས་པའི་སངས་རྒྱས་ཀྱི་དབང་དུ་གསུངས་སོ། །རྒྱུད་གཞན་དུ་ནི་དམ་ཚིག་གསུམ་སློབ་དཔོན་གྱི་དབང་གི་དོན་དུ་གསུངས་ཏེ། དེ་ལྟར་ཡང་སྔར་ཤེས་རབ་བཅུ་དྲུག་ཅེས་པ་ལ་སོགས་པ་གསུངས་སོ། །དྲི་མ་འཁྲུད་པར་ནུས་པ་ཉིད་ནི་དམ་ཚིག་གསུམ་གྱི་རྣམ་པར་གཞག་བ་གཉི་ག་ལ་མི་འགལ་ལོ། །ཇི་ལྟར་ས་བཅུ་པ་ལ་ཕྱིར་མི་ལྡོག་པའི་བྱང་ཆུབ་སེམས་དཔའ་ཆེན་པོ་རྣམས་ཕྱོགས་བཅུའི་དེ་བཞིན་གཤེགས་པ་རྣམས་ཀྱིས་མངོན་པར་དབང་བསྐུར་བ་དེ་བཞིན་དུ། དམ་ཚིག་གསུམ་དང་བཅས་པ་འདི་ཡང་དེ་རྣམས་དང་བླ་མས་དཔག་ཏུ་
མེད་པའི་སེམས་ཅན་གྱི་ཕུང་པོ་ལ་གཞལ་དུ་མེད་པའི་ཆས་སྟོན་པ་ལ་སོགས་པའི་སློབ་དཔོན་དུ་བྱ་བའི་ཆེད་དུ་ཁམས་གསུམ་གྱི་ཆོས་ཀྱི་རྒྱལ་སྲིད་ལ་དབང་བས་ན། སློབ་དཔོན་གྱི་དབང་བསྐུར་བ་ནི་ཕྱིར་མི་ལྡོག་པ་རྣམས་དང་འདྲ་བས་ན་ཕྱིར་མི་ལྡོག་པའི་དབང་སྟེ་ཕྱིར་མི་ལྡོག་པ་ཉིད་ཀྱི་ས་བོན་ཉིད་ཀྱང་བསྐྲུན་པར་བྱེད་པའོ། །དེའི་ཕྱིར་དེ་ལ་ལྟོས་ནས་ཕྱིར་མི་ལྡོག་པར་བྱ་བའི་ཆེད་དུ་དབང་བསྐུར་བ་དང༌། ཕྱིར་མི་ལྡོག་པར་བྱེ་དཔའི་དབང་བསྐུར་བ་ནི། ཕྱིར་མི་ལྡོག་པ་དང་ལྡན་པའི་དབང་དང་ཕྱིར་མི་ལྡོག་པའི་དབང་དུ་བརྗོད་དོ། །དེ་ཉིད་ཀྱི་ཕྱིར། རྡོ་རྗེ་གསང་བ་ཡེ་ཤེས་ཀྱིས། །སློབ་དཔོན་ཞེས་བྱ་གསུམ་དུ་འདོད། །ཅེས་པའི་ལུགས་ནི་བློ་གྲོས་ངན་པ་རྣམས་ཁོ་ནའི་ཡིན་ནོ། །འདི་དག་ལ་སོགས་པས་ནི་ཉན་ཐོས་ཀྱི་དམ་ཚིག་གིས་རྩེ་བ་སྤང་བར་བྱའོ་ཞེས་པའི་ངེས་པའི་ཆེད་དུ། རྫོགས་པའི་སངས་རྒྱས་རྡོ་རྗེ་འཛིན་པས་རྡོ་རྗེ་ལྡན་ཅིག་རབ་ཏུ་སྦྱོར་བས་རྩེ་བར་བྱ་བའི་དོན་དུ་གང་གིས་མེ་ཏོག་འཐོར་བའོ། །རྫོགས་པའི་སངས་རྒྱས་རྡོ་རྗེ་འཛིན་པས་རྟག་ཏུ་རང་གི་དམ་ཚིག་ལ་མཆོད་པར་བྱའོ་ཞེས་པ་ནི། ཕྲེང་བ་ཀུན་ནས་འཕང་བའོ། །སེམས་ཅན་ཐམས་ཅད་ཀྱི་བསམ་པ་ཇི་ལྟ་བ་བཞིན་དུ་དམ་པའི་ཆོས་ཡང་དག་པར་བརྗོད་པའི་དོན་དུ་ཨོཾ་གྱི་ཡི་གེ་དང་སྭཱའི་ཡི་གེ་ཀློག་པའོ། །སངས་རྒྱས་ཀྱི་གར་རབ་ཏུ་བསྐོར་ཞིང་གར་གྱི་རྗེས་སུ་ཆགས་པས་སྐྱེ་བོ་རྣམས་གདུལ་བའི་ཆེད་དུ་ཏིང་ཏིང་ཤགས་འཛིན་པའོ། །སེམས་ཅན་ཐམས་ཅད་ལ་སངས་རྒྱས་ཀྱི་ཡེ་ཤེས་འཇུག་པའི་དོན་དུ་སྤོས་ཀྱི་ཀུན་དུ་བསྐྱོད་པའོ། །བྱང་ཆུབ་ཀྱི་ཡན་ལག་བདུན་གྱིས་ཡང་དག་པར་འབྱོར་ཞིང༌། །མཚན་སུམ་ཅུ་སོ་གཉིས་དང་དཔེ་བྱད་བརྒྱད་ཅུས་རྣམ་པར་མཛེས་པའི་དེ་བཞིན་གཤེགས་པའི་སྐུ་ཐོབ་པའི་ཆེད་དུ་མེ་ཏོག་ངེས་པར་འགྲེམས་པའོ། །མ་རིག་པའི་མུན་པར་མུན་པའི་སེམས་ཅན་རྣམས་ཡེ་ཤེས་ཀྱི་སྒྲོན་མེས་ཡང་དག་པར་སྣང་བར་བྱ་བའི་ཆེད་དུ་སྣང་གསལ་དབུལ་བའོ། །འབྱུང་བར་འགྱུར་བ་ན་ཐུབ་པའི་དབང་པོའི་སེམས་དང་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་ཐོབ་པར་བྱ་བའི་བྱེད་དུ་དྲིལ་བུ་དབུལ་བའོ། །བགེགས་མེད་པ་ཉིད་དང་ཞི་བ་ལ་སོགས་པའི་དངོས་གྲུབ་ཀྱི་ས་བོན་དགོད་པ་དང༌། དོན་དམ་པའི་སྔགས་
ཀྱིས་དངོས་གྲུབ་ཀྱི་ཞིང་དག་པར་བྱ་བའི་ཆེད་དུ་སྔགས་བརྗོད་པའོ། །མི་ཤེས་པའི་རབ་རིབ་བསལ་ནས་ལྷའི་མིག་མངོན་པར་ཤེས་པ་བསྐྱེད་པའི་ཆེད་དུ་མིག་སྨན་ནོ། །དེ་བཞིན་དུ་ཡང་གཟུགས་བརྙན་དང་འདྲ་བར་སྣ་ཚོགས་པར་ལྟ་བ་འདུ་བྱ་བའི་ཆེད་དུ་མེ་ལོང་གི་དབང་ངོ༌། །བདུད་བཞི་ལས་རྣམ་པར་རྒྱལ་ནས། ཤིན་ཏུ་ཕ་པའི་ཆོས་ཀྱི་དབྱིངས་ཀྱི་འབེན་ལ་སླེབ་པའི་ས་བོན་དགོད་པའི་ཆེད་དུ་མདའ་འཕང་བའོ། །དད་པ་དང་ཤེས་རབ་ཀྱི་ཞིང་དུ་བྱ་བའི་དོན་དང༌། དམ་ཚིག་བསྲུང་བའི་དོན་དང༌། ངག་དག་པའི་དོན་དུ་གསང་བའི་མངོན་པར་དབང་བསྐུར་པའོ། །ཕུལ་དུ་ཕྱིན་པའི་ཡེ་ཤེས་འདི་ལ་ཡོད་པས་ཤེས་རབ་ནི་ཕྱི་རོལ་གྱི་གཞོན་ནུ་མ་ཡིན་ལ། དེ་ལས་ཡེ་ཤེས་ནི་སེམས་རྣམ་པར་རྟོག་པ་དང་བྲལ་བ་སྟེ། རྣམ་པར་དག་པ་དང་ལྷན་ཅིག་སྐྱེས་པའི་དགའ་བ་ནི་ཤེས་རབ་ཡེ་ཤེས་ཀྱི་མངོན་པར་དབང་བསྐུར་བའོ། །ཡེ་ཤེས་དེ་ཉིད་དྲི་མ་དང་བྲལ་ཞིང་ཡོངས་སུ་དག་པར་རྟོགས་པ་ནི་བཞི་པའི་མངོན་པར་དབང་བསྐུར་པའོ། །འདི་དག་ནི་བདེ་བ་ཆེན་པོའི་རོས་ཡིད་འཁྲུད་པར་བྱེད་པའི་ཕྱིར་ན་དབང་ངོ༌། །འདི་དང་འབྲེལ་བ་ཁོ་ནར་ཤེས་རབ་ཉིད་ཟག་པ་མེད་པའི་བདེ་བ་དམ་པ་འཕེལ་ཞིང་མངོན་སུམ་དུ་བྱེད་པའི་ཐབས་ཡིན་པའི་ཕྱིར། ལས་དང་པོ་ལ་སོགས་པའི་གནས་སྐབས་སུ་ཡང་སྤང་བར་མི་བྱའོ་ཞེས་པ་ནི་རིག་མའི་བརྟུལ་ཞུགས་སོ། །གང་ཚེ་རྣམ་པར་མི་རྟོག་པས། །ལས་ཀུན་ཐབས་དང་བཅས་པར་སྤྱོད། །རྣམ་པར་མི་རྟོག་སྒོམ་པ་ནི། །བརྟུལ་ཞུགས་རྣམས་ཀྱི་བླ་མའི་བླ། །ཞེས་སོགས་རྡོ་རྗེ་མཁའ་འགྲོ་མས་གསུངས་པའི་ཕྱིར་བརྟུལ་ཞུགས་ཅན་གྱིས་ཅི་བྱ། དེས་ན་ཡེ་ཤེས་ལྔའི་རང་བཞིན་གྱི་བྱང་ཆུབ་ཀྱི་སེམས་ཀྱི་བརྟུལ་ཞུགས་ཁོ་ན་ལ་སྦྱིན་དུ་སྦྱོར་བའི་ཕྱིར་རྡོ་རྗེའི་བརྟུལ་ཞུགས་སོ། །སྤྱོད་པ་དང་བྲལ་ན་ཡང་བྱང་ཆུབ་ཀྱི་སེམས་མི་རྟོག་གོ་ཞེས་བསླབ་པའི་དོན་དུ་སྤྱོད་པའི་བརྟུལ་ཞུགས་ཏེ་དེ་ནི་རྣམ་པ་གསུམ་མོ། །དེ་ལ་དང་པོ་ནང་གི་བདག་ཉིད་ཀྱི་ཕྱག་རྒྱ་གསུམ་དང་སྦྱོར་བ་ནི་མཆོག་སྟེ། དེ་ལྟར་ཡང༌། ཁ་ཊྭཱཾ་ག་ནི་ལྷ་ཡི་སྐུ། །ཅང་ཏེའུ་ཤེས་རབ་དང་ནི་རྟགས། །ཞེས་པ་དང༌། སྔགས་ནི་ཐོད་པའི་བཏུང་བའོ། །ཞེས་གསུངས་སོ། །ལྷའི་སྐུ་དང་གཞོམ་དུ་མེད་པའི་གཏུམ་མོ་སྒྲ་ཙམ་དང་གཉིས་སུ་མེད་པའི་
བདེ་བ་ཆེན་པོ་ཉམས་སུ་མྱོང་པའི་རྟེན་ནི་ཀུན་རྫོབ་བྱང་ཆུབ་ཀྱི་སེམས་ཏེ། དེ་ལྟར་གསུམ་ནི་མཚོན་པར་བྱེད་པའོ། །གཉིས་པ་ནི། དེ་བཞིན་གཤེགས་པ་ལྔ་རྣམ་པར་དག་པ་ཆོས་ཀྱི་དབྱིངས་ཀྱི་ཡེ་ཤེས་ལ་སོགས་པ་བསྐྱེད་པ་ལ་སྦྱོར་བ་ལྷུར་བྱེད་པ་སྟེ་རྣལ་འབྱོར་མ་དང་སྤྱོད་པའི་རྟུལ་ཞུགས་སོ། །གསུམ་པ་ནི་ལྟ་སྟངས་བཞི་དང་མངོན་པར་ཤེས་པ་ལྔ་ལ་སོགས་པའི་ནུས་པ་ཐོབ་པར་གྱུར་པ་ན་སེམས་ཅན་གྱི་དོན་སྒྲུབ་པ་ལྷུར་པ་སྟེ། འཇིག་རྟེན་ལས་ཕྱིར་རོལ་པའི་རྣལ་འབྱོར་པའམ་རྣམ་འབྱོར་མ་ནང་གི་བདག་ཉིད་ཀྱི་རྒྱན་མ་ལུས་པའི་དོན་གྱི་མཐུ་མཆོག་ཏུ་བྱེད་པ་སྟོང་པ་ཉིད་དང་སྙིང་རྗེ་དབྱེར་མེད་པའི་རང་བཞིན་བྱང་ཆུབ་ཀྱི་སེམས་འབྱུང་བ་ལ་ངེས་པར་སྦྱོར་བའོ། །དེ་ལྟར་ཡང་རྣལ་འབྱོར་མ་ཀུན་དུ་སྤྱོད་པའི་རྒྱུད་ལས། དང་པོ་མཉམ་གཞག་རྣལ་འབྱོར་པས། །འབད་དེ་ནུས་པ་བསྐྱེད་པར་བྱ། །ནུས་པ་བསྐྱེད་པའི་རྗེས་ལ་ནི། །བརྟུལ་ཞུགས་སྤྱོད་པ་ཡིད་འོང་བ། །རིགས་ལྔ་མཉམ་པར་ཀུན་སྤྱོད་པ། །རིགས་གཅིག་ཏུ་ནི་ཡང་དག་བརྟག །མི་རྟོག་སེམས་གཅིག་བདག་ཉིད་ཀྱིས། །འདོད་པ་ལྔ་ལ་སྤྱད་པར་བྱ། །དེ་ལྟར་དཔལ་ལྡན་ཧེ་རུ་ཀའི། །ཡེ་ཤེས་བསམ་པ་ཀུན་རྫོགས་མཛད། །ཤེས་རབ་ཆེ་ལྡན་དེ་ཡི་ནི། །གཉིས་མེད་ཡེ་ཤེས་བརྟུལ་ཞུགས་བཟང༌། །སྤྱོད་པའི་བརྟུལ་ཞུགས་ལ་ཞུགས་པའི། །རྣལ་འབྱོར་རབ་ངེས་ཤེས་པར་བྱ། །ཞེས་གསུངས་སོ། །འབྱུང་བར་འགྱུར་བ་ན་ཐུབ་པའི་དབང་པོའི་གོ་འཕང་དུ་འོས་པ་འཇིག་རྟེན་དང་འཇིག་རྟེན་ལས་འདས་པའི་དབང་ཕྱུག་ཐོབ་པའི་ཆེད་དུ་གླེགས་བམ་དང་ཐོད་ལོ་ཀོར་དང་སམ་བོར་འཛིན་པའོ། །རྒྱལ་སྲིད་ལ་སོགས་པའི་བདེ་བ་ལ་ལྟོས་པ་མེད་པར་བྱ་བའི་ཆེད་དུ་བསོད་སྙོམས་ལ་བརྟེན་པར་གྱུར་པའོ། །མི་ཆོད་པའི་བསམ་གཏན་དང་བཟླས་པ་བྱ་བའི་ཆེད་དུ་གྱོ་མོའི་སྣོད་དང་རྣལ་འབྱོར་མའི་དབྱུག་པ་འཛིན་པའོ། །མ་རིག་པ་ཐམས་ཅད་གཅད་པར་བྱ་བའི་ཆེད་དུ་གྲི་གུག་འཛིན་པའོ། །འདི་དག་ཐམས་ཅད་ཀྱང་སྤྱོད་པའི་བརྟུལ་ཞུགས་ཉིད་ཀྱི་འཁོར་ཡིན་ནོ། །ཁམས་གསུམ་དང་དབྱེར་མེད་པའི་ཆོས་ཉིད་རྟོགས་པའི་རིམ་པའི་རྣལ་འབྱོར་དང་ལྡན་པ་འདི་ཁྱོད་ཡིན་ནོ་ཞེས་གཟེངས་བསྟོད་པའི་དོན་དུ་ལུང་བསྟན་པའོ། །དེ་ལྟར་ཡང་བྷུར་ཞེས་པ་སྟེང་གི་འཇིག་
རྟེན་ནོ། །བྷུ་ཝ་ཞེས་པ་རླུང་གི་དཀྱིལ་འཁོར་ལ་སོགས་པ་འཁོར་དང་བཅས་པའི་ས་འོག་གོ །སྭཱཿ་ཞེས་པ་ནི་མཐོ་རིས་ཏེ་འདུ་ཤེས་མེད་མིན་སྐྱེ་མཆེད་ཀྱི་མཐར་ཐུག་པའོ། །དེ་གསུམ་ཆར་ཡང་ཁྱོད་ཡིན་ཏེ། གང་གི་ཕྱིར་དེ་རྣམས་ཀྱི་རང་བཞིན་ཏེ་དེ་ཁོ་ན་ཉིད་ཀྱི་དམ་ཚིག་སྟེ་རབ་ཏུ་དགའ་བའི་ས་ལ་སོགས་པ་རིམ་གྱིས་རྟོགས་པར་ནུས་པ་ཉིད་ཀྱི་ཕྱིར་རོ་ཞེས་པ་ནི། ས་མ་ཡ་སྟྭཾ་བྷུ་རྒྷུ་ཝ་སྭཿ་ཞེས་པ་འདིའི་དོན་ཏོ། །ཆོ་ག་ཇི་ལྟ་བ་བཞིན་དུ་དངོས་གྲུབ་བསྒྲུབས་ཏེ་ཆོས་བསྟན་པ་ལ་སོགས་པ་རྣམས་ཀྱིས་སེམས་ཅན་གྱི་དོན་གྱིས་ཤིག་ཅེས་པ་ནི་རྗེས་སུ་གནང་བའོ། །ཁྱོད་ཀྱིས་འདོད་པ་རྣམས་ལ་ཉེ་བར་ལོངས་སྤྱོད་ཀྱང་སྒྲིབ་པ་ཐམས་ཅད་ལས་ངེས་པར་གྲོལ་པའི་སངས་རྒྱས་ཉིད་དེ་རང་ངོ་ཞེས་དཀྱིལ་འཁོར་དུ་འཇུག་པ་ལ་སོགས་པ་བྱས་པས་རྒྱས་པར་འོས་པ་ལ་མངོན་པར་སྦྱོར་བ་རྟོགས་པར་བྱ་བའི་ཆེད་དུ་དབུགས་དབྱུང་བའོ། །ཕྱི་དང་གསང་བ་དང་དེ་ཁོ་ཉིད་ཀྱི་དམ་ཚིག་གསུམ་བསྲུང་བའི་དོན་དུ་དམ་ཚིག་བསྒྲག་པའི་ཆོ་གའོ། །རྡོ་རྗེའི་བརྟུལ་ཞུགས་ལ་སོགས་པ་ལྔ་པོ་འདི་རྣམས་ཀྱང་སློབ་དཔོན་གྱི་དབང་གི་རྗེས་དང༌། རིག་པའི་དབང་གི་རྗེས་ལ་དེ་དང་དེ་ཙམ་གྱིས་ཚིམ་པ་རྣམས་ལ་ཤེས་པར་བྱའོ་ཞེས་པ་ནི་ཁ་ཅིག་ཏུའོ། །སྔགས་དང་མིག་སྨན་དང་མེ་ལོང་དང་མདའ་འཕང་པ་རྣམས་ནི་རིག་པའི་དབང་གི་རྗེས་ལའོ། །རིག་མའི་བརྟུལ་ཞུགས་ནི་ཤེས་རབ་དང་ཡེ་ཤེས་ཀྱི་དབང་བསྐུར་བའི་རྗེས་ལ་ཡང་ཁ་ཅིག་ཏུའོ། །ཁ་ཅིག་ཏུ་ནི་སླར་ཡང་སྔགས་ལ་སོགས་པ་དང་སྤྱོད་པའི་བརྟུལ་ཞུགས་དང༌། སྤྱིར་རྗེས་སུ་གནང་བ་དང་དམ་ཚིག་གསུམ་ནི་སྐལ་བ་དང་ལྡན་པ་རྣམས་ལའང་མ་བཤད་དེ། ཇི་ལྟར་རིགས་པར་དབང་གཞན་རྣམས་སུ་དེ་དང་དེའི་དོན་ཡོད་པ་རྣམས་ལ་དགོངས་པས་སོ། །ཁ་ཅིག་རྗེས་སུ་གནང་བ་དང་དབུགས་དབྱུང་བ་དག་གི་ཕྱིར་མི་ལྡོག་པའི་དབང་དུ་བསྡུས་ཏེ། འདིར་ནི་ཐམས་ཅད་ཐ་དད་བུ་བརྗོད་དོ། །གང་ཡང་མཁའ་འགྲོ་མ་རྡོ་རྗེའི་གུར་ལས། དང་པོ་ཆུ་ཡི་དབང་ཡིན་ཏེ། །གཉིས་པ་ཅོད་བན་གྱི་ནི་དབང༌། །གསུམ་པ་རྡོ་རྗེའི་དབང་ཡིན་ཏེ། །བཞི་པ་རང་གི་བདག་པོ་ཡིན། །ལྔ་བ་མིང་གི་དབང་ཡིན་ཏེ། །དྲུག་པ་རྫོགས་པའི་སངས་རྒྱས་དབང༌། །བུམ་པའི་དབང་ནི་བདུན་པ་སྟེ། །བརྒྱད་པ་
གསང་བའི་དབང་ཡིན་ནོ། །དགུ་པ་ཤེས་རབ་དབང་བསྐུར་ཏེ། །དེ་ཉིད་རྡོ་རྗེའི་སྦྱོར་བ་ཡིས། །ཀུན་དུ་རྡོ་རྗེའི་བརྟུལ་ཞུགས་སྦྱིན། །རང་ཉིད་སྟོན་པས་ལུང་སྟོན་ཏེ། །འདི་དག་དབང་མཆོག་རིམ་པའོ། །ཞེས་གསུངས་ཤིང་འདི་ཉིད་བརྟག་པའི་རྒྱལ་པོ་གཉིས་པར་ཡང༌། །སློབ་དཔོན་གསང་བ་ཤེས་རབ་དང༌། །བཞི་པ་དེ་ཡང་དེ་བཞིན་ནོ། །ཞེས་གསུངས་སོ། །དེ་ལ་ཆུ་དང་ཅོད་པ་ན་དང་རྡོ་རྗེ་དང་བདག་པོ་དང་མིང་དང་སློབ་དཔོན་གྱི་དབྱེར་པ་དྲུག་ནི་བུམ་པའི་དབང་སྟེ། ཐམས་ཅད་དུ་དེ་བཞིན་གཤེགས་པ་རྣམས་དང་སྤྱན་མ་ལ་སོགས་པའི་རིམ་པ་རྣམས་ཀྱིས་བུམ་པས་མངོན་པར་དབང་བསྐུར་བའི་ཕྱིར་རོ། །སློབ་དཔོན་གྱི་དབང་ནི་མཆོག་ཏུ་ཉེ་བར་བླང་བར་བྱ་བ་ཉིད་ཀྱིས་ཕུལ་དུ་བྱུང་བ་དང་བཅས་པར་དབང་བསྐུར་པའི་ཕྱིར། བུམ་པའི་དབང་ནི་བདུན་བ་སྟེ། །ཞེས་གསུངས་ལ། སློབ་དཔོན་གྱི་དབང་དེ་འབྱུང་བའི་རྒྱུ་ཡིན་པས་ཆུའི་དབང་ལ་སོགས་པ་ལྔ་ཡང་སློབ་དཔོན་གྱི་དབང་དུ་བརྗོད་དེ། དེས་ན་ཐམས་ཅད་ལ་འགལ་བ་མེད་དོ་ཞེས་པ་འདི་ནི་གཞན་དབང་བསྐུར་བའི་ཆོ་གའོ།། །།རང་ཉིད་ཀྱང་དམ་ཚིག་ཉམས་ན་འདི་ལྟ་བུའི་དབང་བསྐུར་བ་ཉིད་ཇི་ལྟར་སློབ་དཔོན་འཇུག་པའི་ཆོ་གར་གཟུང་ཞིང་བཤད་པ་དེ་བཞིན་དུ་བླང་བར་བྱའོ། །འོན་ཀྱང་གལ་ཏེ་བླ་མ་དམ་པ་དང་ཤིན་ཏུ་རིང་བ་དང་ལམ་བགྲོད་དཀའ་བ་ལ་སོགས་པའི་ཉེ་བར་འཚོ་བས་བགྲོད་མི་ནུས་པའི་ཕྱོགས་ན་གནས་པ་སྟེ་གཞན་དུ་མ་ཡིན་ནོ། །རྟག་ཏུ་ཡི་དམ་བྱེད་པ་ནི་ཤེས་རབ་དང་ཐབས་རོ་གཅིག་པར་རང་གི་འདོད་པའི་ལྷའི་རྣལ་འབྱོར་གྱི་ཡིད་ཀྱིས་རང་བཞིན་གྱི་དཀྱིལ་འཁོར་བསྒོམས་ནས་དཀྱིལ་འཁོར་གྱི་དབང་ཕྱུག་ལས་ཆུའི་དབང་ལ་སོགས་པ་དང་གསང་བ་དང་ཤེས་རབ་ཡེ་ཤེས་དང་བཞི་པའི་མཐར་ཐུག་པ་རྣམས་དང་དབུགས་དབྱུང་བའི་མཐར་ཐུག་པ་བླང་བར་བྱའོ་ཞེས་པ་རང་དབང་བསྐུར་བའི་ཆོ་གའོ།། །།རྡོ་རྗེ་སེམས་དཔའི་སྡོམ་པ་དང་ལྡན་པ་འདིའི་ཡང་ལྟུང་བ་ནི་རིགས་རྣམ་པ་གཉིས་ཏེ། རྩ་བའི་ལྟུང་བ་དང་སྤོམ་པོའི་ལྟུང་བའོ། །དེ་རྣམས་ཇི་ལྟར་ན། །བླ་མ་དམ་པའི་ཐུགས་དཀྲུགས་པ། །རྩ་བའི་ལྟུང་བ་དང་པོར་གསུངས། །བདེ་གཤེགས་བཀའ་ལས་འདས་པ་ནི། །ལྟུང་བ་གཉིས་པར་བརྗོད་པ་ཡིན། །རྡོ་རྗེ་སྤུན་ལ་ཁྲོས་པ་ཡིས། །ཉེས་པ་གསལ་བྱས་
གསུམ་པ་སྟེ། སེམས་ཅན་རྣམས་ལ་བྱམས་པ་སྤོང༌། །བཞི་པ་ཡིན་པར་རྒྱལ་བས་གསུངས། །ཆོས་ཀྱི་རྩ་བ་བྱང་ཆུབ་སེམས། །དེ་སྤོང་བ་ནི་ལྔ་པ་སྟེ། །རང་དང་གཞན་གྱི་གྲུབ་པའི་མཐའི། །ཆོས་ལ་སྨོད་པ་དྲུག་པ་ཡིན། །ཡོངས་སུ་མ་སྨིན་སེམས་ཅན་ལ། །གསང་བ་སྒྲོགས་པ་བདུན་པ་སྟེ། །ཕུང་པོ་ལྔ་བདག་སངས་རྒྱས་ཉིད། །དེ་ལ་སྨོད་པ་བརྒྱད་པའོ། །རང་བཞིན་དག་པའི་ཆོས་རྣམས་ལ། །སོམ་ཉི་ཟ་བ་དགུ་པ་སྟེ། །གདུག་ལ་རྟག་ཏུ་བྱམས་ལྡན་པར། །བྱེད་པ་དེ་ནི་བཅུ་པའོ། །ཐོག་མཐའ་བྲལ་བའི་ཆོས་རྣམས་ལ། །དེར་རྟོག་པ་ནི་བཅུ་གཅིག་པ། །སེམས་ཅན་དད་དང་ལྡན་པ་ཡི། །སེམས་སུན་འབྱིན་པ་བཅུ་གཉིས་པ། །དམ་ཚིག་རྫས་ནི་ཇི་བཞིན་རྙེད། །མི་བསྟེན་པ་ནི་བཅུ་གསུམ་པ། །ཤེས་རབ་རང་བཞིན་བུད་མེད་ལ། །སྨོད་པར་བྱེད་པ་བཅུ་བཞི་པ། །ཞེས་པ་ནི་རྩ་བའི་ལྟུང་བའོ། །རྣལ་འབྱོར་སྔོམ་ལྡན་རྣལ་འབྱོར་མར། །རྣལ་འབྱོར་པ་གང་སྟོབས་ཀྱིས་གཙོ། །སྦོམ་པོའི་ལྟུང་བ་དང་པོར་བཤད། །དེ་ལ་མཐོ་བཙམས་པ་ཡང་ངོ༌། །རྒྱུད་ལས་གསུངས་པའི་རྗེས་འབྲངས་ནས། །བྱིན་རླབས་མེད་པའི་བདུད་རྩི་ཡང༌། །དེ་ཡི་སྦོམ་པོའི་ལྟུང་པ་ནི། །གཉིས་པ་རབ་ཏུ་སྐྱེ་བར་བྱེད། །ཚོགས་ཀྱི་འཁོར་ལོར་རྩོད་པ་དང༌། །དམ་ཚིག་ལ་ནི་དམོད་པ་དག །རྣལ་འབྱོར་པ་དེའི་སྦོམ་པོ་ཡི། །ལྟུང་བ་གསུམ་པར་བཤད་པ་ཡིན། །གང་ཆོ་གསང་བའི་ཆོས་མཐོང་ལ། །གཡོ་སྒྱུའི་བློ་ཡིས་མི་སྦེད་པར། །རབ་ཏུ་གསལ་བར་བྱ་ན་དེའི། །སྦོམ་པོའི་ལྟུང་བ་བཞི་པར་འགྱུར། །གང་ཞིག་དད་པའི་སེམས་ཅན་ནི། །གསང་བའི་ཆོས་ལ་དགའ་བ་ཡི། །ཕྱིན་ཅི་ལོག་ནི་འཆད་བྱེད་པ། །སྦོམ་པོའི་ལྟུང་བ་ལྔ་པར་འགྱུར། །ཉན་ཐོས་ཐེག་པ་དམན་པ་རྣམས། །ཞག་བདུན་ལྷན་ཅིག་གནས་པ་དང༌། །དེ་ལ་སྦོམ་པོའི་ལྟུང་བ་ནི། །ཤིན་ཏུ་ལྕི་བ་དྲུག་པ་སྐྱེ། །རྣལ་འབྱོར་ངེས་པར་མི་ཤེས་པར། །རྣལ་འབྱོར་མངོན་པའི་ང་རྒྱལ་སེམས། །དེ་ཡི་སྦོམ་པོའི་ལྟུང་བ་ནི། །བདུན་པར་འགྱུར་བར་ཐེ་ཚོམ་མེད། །སྣོད་དུ་གྱུར་པའི་སེམས་ཅན་གང༌། །ཕྱི་ཡི་ཆོས་ལ་དགའ་བ་ལ། །གསང་པའི་ཆོས་རྣམས་ཡང་དག་འཆད། །དེ་ཡི་སྦོམ་པོའི་ལྟུང་བ་ནི། །བརྒྱད་པ་ཉིད་དུ་འགྱུར་བ་ཡིན། །ཞེས་པ་ནི་སྦོམ་
པོའི་ལྟུང་བའོ། །དེའི་ཕྱིར་ལྟུང་བ་གཉིས་ཀྱིས་གཟུང་བས་དམ་ཚིག་མེད་ན་ཇི་ལྟར་ནུས་པའི་སྟོན་མོ་སྦྱིན་པ་སྔོན་དུ་འགྲོ་བའི་འབུལ་བ་བྱས་ནས་བླ་མ་དམ་པའི་མ་དུན་དུ་སྡིག་པ་བཤགས་པ་དང་སྔར་གྱི་གསུམ་ལ་སྐྱབས་སུ་འགྲོ་བ་ལ་སོགས་པ་བརྩམས་ཏེ་སྔར་བཞིན་དུ་རྡོ་རྗེ་འཛིན་པའི་སྔོམ་པ་གཟུང་བར་བྱའོ་ཞེས་པ། གདམས་པ་དང་བཅས་ཤིང་འཁོར་དང་བཅས་པའི་དབང་གི་ཆོ་གའོ།། །།འདིར་ཞི་བ་ལ་སོགས་པའི་དོན་དུ་སྦྱིན་སྲེག་བྱའོ་ཞེས་སྔར་གསུངས་ཏེ། དེས་ན། དཀྱིལ་འཁོར་སྦྱིན་སྲེག་དང་བྲལ་བའི། །རབ་གནས་འདིར་ནི་བསྟན་པ་མེད། །དེའི་ཕྱིར་སློབ་མར་ཕན་འདོད་པས། །སྦྱིན་སྲེག་ཆོ་ག་ཡང་དག་བྱ། །སེམས་ཅན་དབྱེ་བས་མཐའ་ཡས་ཏེ། །རིགས་ཀྱི་དབྱེ་བས་རྣམ་པ་ལྔ། །ལས་ཀྱི་དབྱེ་བས་རྣམ་པ་བཞི། །ཐབ་ཁུང་ཞེས་བྱའི་མཚན་ཉིད་འདི། །རྣམ་མང་བརྗོད་པ་ཡོངས་སྔངས་ནས། །དེ་ནི་བདག་གིས་ལེགས་བསྡུས་ཏེ། །ཞི་བ་ལ་སོགས་རབ་དབྱེ་བས། །ཐབ་ཁུང་མཚན་ཉིད་བརྗོད་པར་བྱ། །ཞི་བའི་ཐབ་ཁུང་ཟླུམ་པ་སྟེ། །ཁ་ཁྱེར་འདམ་སྐྱེས་གསེར་བཅས། །དབུས་སུ་ཆུ་སྐྱེས་འདབ་བརྒྱད་དང༌། །སོར་བརྒྱད་པ་ཡི་འཁོར་ལོ་དགོད། །རྒྱར་ནི་ཀུན་ནས་ཁྲུ་གང་བ། །སོར་བཞི་ཡང་དག་སྤངས་བའོ། །ཁ་ཁྱེར་ལ་ནི་སོར་བཞི་སྟེ། །རྒྱ་ནི་དཔངས་ཀྱི་ཚད་ཡིན་ནོ། །རྒྱས་པ་ལ་ནི་གྲུ་བཞི་འམ། །གང་ཡང་ཟུར་བརྒྱད་ཁྲུ་དོ་པ། ཀུན་ནས་སོར་བརྒྱད་སྤངས་པར་ཏེ། །དབུས་སུ་ཆུ་སྐྱེས་འདབ་བརྒྱད་ལ། །སོར་དྲུག་པ་ཡི་རིན་པོ་ཆེ། །རྒྱར་ནི་དཔངས་ཀྱི་ཚད་ལྡན་པའི། །སོར་མོ་བརྒྱད་པའི་ཁ་ཁྱེར་གྱིས། །ཀུན་ནས་ཡོངས་སུ་འཁོར་བའོ། །དབང་ལ་ཞི་རྒྱས་ཐབ་དེ་བཞིན། །ཅུང་ཟད་ཁ་ནི་རྒྱས་པའོ། །སྟེགས་བུ་ལ་སོགས་ཞི་བ་ཡི། །ཐབ་ཁུང་བཞིན་དུ་བཤད་པར་བྱ། །དགུག་པ་ལ་ཡང་དེ་བཞིན་འདོད། །པདྨའི་དབུས་སུ་དབང་ལ་ནི། །བྷ་ག་ལྟ་བུ་འདོད་པ་སྟེ། །དགུག་པའི་དབུས་སུ་ལྕགས་ཀྱུ་དགོད། །རྡོ་རྗེ་རྩེ་གཅིག་རྣམ་པ་ཅན། །མངོན་སྤྱོད་ལ་ནི་བརྗོད་པར་བྱ། །རྩུབ་ཅིང་གསེག་མའི་ས་གཞིའི་ཆར། །ཐབ་ཁུང་གྲུ་གསུམ་རྒྱ་ལ་ནི། །སོར་མོ་ཉི་ཤུ་བ་ཡི་ཚད། །སོར་མོ་གསུམ་ནི་སྤངས་པ་སྟེ། །རྒྱ་དང་དཔངས་ནི་ཚད་མཉམ་པ། །ཕྱི་
རོལ་ཁ་ཕྱིར་གཞོལ་གྱུར་བའི། །ཁ་ཁྱེར་སོར་མོ་གསུམ་པའོ། །མཐིལ་དབུས་རྩེ་གསུམ་ལ་གནས་པའི། །རྡོ་རྗེ་རྣོན་པོ་སོར་བརྒྱད་པའི། །རྩེ་མོ་བྱང་དུ་ཕྱོགས་པ་སྟེ། །རོ་བསྲེགས་ཐལ་བ་རྔ་མོའི་བྲུན། །མེ་ཏོག་དྲི་ངན་ལ་སོགས་གཏོར། །ལས་ཀུན་པ་ཡི་ཐབ་ཁུང་ནི། །ཞི་བའི་ཐབ་དང་མཉམ་པ་སྟེ། །འོན་ཀྱང་རབ་རྒྱས་པདྨ་འདྲ། །ཁ་ཁྱེར་རྡོ་རྗེ་ཕྲེང་བས་བསྐོར། །དབུས་སུ་མཉམ་པར་གནས་པ་ནི། །རྡོ་རྗེ་རིན་ཆེན་ཆུ་སྐྱེས་དང༌། །སྣ་ཚོགས་རྡོ་རྗེ་ཡོངས་བསྐོར་དག །འཁོར་ལོ་རྩིབས་བརྒྱད་མཛེས་པའོ། །ཞི་དང་དབང་གི་ཐབ་ནི་ཤར། །རྒྱས་བ་བྱང་གི་ཕྱོགས་སུ་སྟེ། །ལྷོ་ཕྱོགས་སུ་ནི་དགུག་པ་བཤད། །གཤིན་རྗེའི་ཕྱོགས་སུ་མངོན་སྤྱོད་དོ། །ཞི་དང་རྒྱས་དང་དེ་བཞིན་དུ། །དབང་དང་མངོན་སྤྱོད་ཐབ་ཀྱི་སར། །བྱུག་པ་འཇིམ་པ་མེ་ཏོག་དྲི། །དཀར་སེར་དམར་པོ་ནག་པོའོ། །རྒྱ་ཡི་ཆ་ཡི་ཚད་གང་ཡིན། །ད་ཡི་ཕྱེད་ན་ཟབས་སུ་འདོད། །རང་རང་ཐབ་དབྱིབས་ཁ་ཁྱེར་ཏེ། །ས་སོགས་མ་ལུས་དབང་བཞིན་ནོ། །ལས་ཀྱི་དབྱེ་བས་ཐབ་རྣམས་ལ། །རྡུལ་ཚོན་རང་བཞིན་དགྲམ་པར་བྱ། །སློབ་དཔོན་ལ་ཡང་དེ་དང་དེའི། །ཡོལ་བ་ལ་གནས་དུས་ལྡན་འགྱུར། །ཞེས་པ་ཐབ་ཁུང་གི་ཆོ་གའོ།། །།དགང་གཟར་གསེར་དང་ཟངས་ལས་བྱས། །དེ་བཞིན་ནི་མ་པའི་རང་བཞིན་བསྟན། །མཆོད་སྦྱིན་ཤིང་ལས་བྱས་པའང་རུང༌། །དེ་དག་གི་ཡང་ཡུ་བ་ནི། །སོར་མི་ཉི་ཤུ་རྩ་བཞི་བའི། །ཚད་ཅན་ཟླུམ་པོར་འདོད་པ་སྟེ། །རྡོ་རྗེ་ལ་སོགས་ཁུ་ཚུར་གྱིས། །གཟུང་དུ་རུང་ཞིང་སྒོམ་པ་ཉིད། །ཡུ་བའི་རྩེ་མོར་འདབ་མ་ནི། །སོར་བཞི་བ་སྟེ་གྲུ་བཞིའོ། །ཟབས་སུ་སོར་གཉིས་གྲུ་བཞི་ཡང༌། །དབུས་སུ་རྡོ་རྗེས་མཚན་པ་ཉིད། །གདང་གཟར་རྩེ་མོར་བུག་པ་ནི། །སོར་གང་ཙམ་དུ་རབ་བསྟན་པའོ། །ཆུ་སྐྱེས་འདབ་ལ་སོར་བཞི་པའི། །དབུས་སུ་རྩེ་གསུམ་དགོད་པར་བྱ། །ཡུ་པའི་རྩ་བར་སོར་དྲུག་པའི། །རྡོ་རྗེ་རིན་ཆེན་གྱིས་མཚན་འདོད། །བླུགས་གཟར་ཡུ་བ་དག་གཟར་བཞིན། །རྩ་བར་རྡོ་རྗེའི་བྱུག་པ་ཉིད། །བླུགས་གཟར་ཀུན་དུ་ཁྲུ་གང་ཙམ། །རྩེ་མོར་ཀུན་ནས་སོར་གཉིས་པའི། །ཆུ་སྐྱེས་འདབ་མའི་རྣམ་པ་སྟེ། །དབུས་སུ་རྡོ་རྗེ་དགོད་
པར་བྱ། །དགང་གཟར་བླུགས་གཟར་མིད་གྱུར་ན། །སོར་མོ་ལྔ་དང་གསུམ་པོ་ཡང༌། །རབ་ཏུ་སྦྱར་བ་དག་གིས་ནི། །བདེ་ལེགས་རྫོགས་པར་གཞན་དག་གསུངས། །ཞེས་བ་དགང་གཟར་དང་བླུགས་གཟར་གྱི་ཆོ་གའོ།། །།ཨ་ཤྭཱ་དྷྟ་དད་པླ་ཀྵ་སོགས། །འོ་མ་ཅན་ཤིང་ལོ་མར་བཅས། །རྩེ་མོ་མཉམ་བཅད་མཐོ་གང་ཙམ། །རླན་བཅས་རྨ་མེད་རྩེ་མོ་དག །འོ་མ་སྤྲང་ཅི་མར་ལ་བསྙུགས། །རྩེ་གཅིག་དཀར་པོའི་དྲི་ཡིས་བྲན། །ཟུང་དག་མཉམ་པར་གྱུར་པ་ཡི། །ཡམ་ཤིང་རྣམས་ཀྱིས་སྦྱིན་སྲེག་བྱ། །ཆགས་པ་གས་པ་ཕྲ་དང་སྦོམ། །རྩེ་མོ་ཉམས་དང་རྩེ་གཉིས་པ། །སྐམ་པོ་སྒུར་པོ་མི་འདོད་པར། །ཤེས་བྱ་བསྲེག་བྱ་གཞན་བཤད་བྱ། །ཞོ་དང་འོ་མ་ཟས་མཆོག་དང༌། །དཱུར་འབྲས་ཡོས་ནས་དང་ཏིལ། །ཀུ་ཤ་ཙུ་ཏའི་འདབ་མ་དང༌། །མེ་ཏོག་དཀར་པོའི་གེ་སར་དང༌། །ཙནྡན་པྲི་ཡང་ཀུ་དང་ནི། །མེ་ཏོག་ཐང་ཆུའི་སྲེག་རྫས་གསུངས། །ཇི་ལྟར་རྙེད་པས་སྦྱིན་སྲེག་བྱ། །སྦྲང་དང་མར་བསྲེས་ཞི་བ་ལའོ། །རྒྱས་པར་ཡ་ཤིང་དེ་རྣམས་ཉིད། །ཚད་ནི་གང་ཞིག་ཁྲུ་གང་སྟེ། །འོ་མ་ཞོ་དང་མར་བསྲེས་པ། །ལག་གཟུངས་སེར་པོ་དྲི་ཡིས་བྲན། །ཟས་མཆོག་གོང་བུ་ཞོ་ཟན་དང༌། །ཀ་རྞི་ཀ་ར་ཏི་ལ་ཆེན་པོ། །པདྨ་དང་ནི་དཔལ་འབྲས་དང༌། །སཱ་ལུའི་འབྲས་དང་འབྲུ་རྣམས་དང༌། །དེ་བཞིན་ནཱ་ག་གེ་སར་དང༌། །མེ་ཏོག་བརྒྱ་པ་ལྷན་ཅིག་ཏུ། །ཀུན་ནས་མངར་གསུམ་བསྲེས་པ་ཡི། །སྲེག་རྫས་རྒྱས་ལ་ཇི་བཞིན་འདོད། །རྩམ་བ་ཀ་དང་ཨ་ཤོ་ཀ །བ་ཀུ་ལ་དང་པྲི་ཡང་ཀུ། །ལ་གུ་ཙ་དད་ཨ་མྲ་སོགས། །སོར་ལྔའི་ནཱ་ག་གེ་སར་གྱི། །གསེར་རྣམས་དན་དམར་པོ་ཡི། །འབྲས་བུ་རྣམས་དང་མེ་ཏོག་གི །སྲེག་རྫས་རྣམས་ནི་དབང་ལའོ། །དགུག་པ་ལ་ཡང་དེ་བཞིན་ཉིད། །འོན་ཀྱང་ཚེར་ལྡན་ལྕགས་ཀྱུའི་དབྱིབས། །ལས་ཀུན་པ་ལ་འདབ་ལྡན་པའི། །ཨུ་དུ་མྦའ་ར་བཱ་ལ་ཤ །པཱ་ཀྵ་ཨ་ཤྭ་དྛ་སེང་ལྡེང༌། །ས་མཱ་ཨ་བ་མརྒ་དང༌། ཨ་ཀརྐ་ཀ་ཥྨ་ཨ་མྲ། །བཻ་ཀཾ་ཀ་ཏ་ཉ་གྲོ་དྷ། །གསར་བའི་ཡམ་ཤིང་འདི་རྣམས་གཟུང༌། །མཛུབ་གང་རྩེ་གཅིག་སྦྱིན་སྲེག་འགྱུར། །མངོན་སྤྱོད་ལ་ནི་ཡུངས་ཀར་དང༌། །ཚ་བའི་ཏིལ་མར་ཁྲག་དང་ནི། །ནི་མ་པའི་འདབ་མ་ཀེ་ཆེ་དང༌། །རྔ་མོ་ལ་སོགས་བྲུན་རྣམས་དང༌། །བཤད་གཅི་རོ་བསྲེགས་
ཐལ་བ་དང༌། །སྐྲ་དང་ཚེར་མ་ཁྭ་སོགས་ཀྱི། །གཤོག་པ་རུས་པ་རྐང་བའི་རྡུལ། །ཤ་ཆེན་ཚིལ་བུ་ལ་སོགས་པའི། །རྫས་འདི་རྣམས་དང་དགྲ་ཡི་ལུས། །བྱས་ནས་དུམ་བུར་བཅད་པ་ལ། །རེ་རེ་དུག་དང་ཁྲག་ལན་ཚྭ། །མངོན་པར་བསྲེག་པའི་སྲེག་རྫས་འགྱུར། །གང་ཞིག་ཞི་དང་རྒྱས་པའི་རྫས། །གང་ཡིན་བདག་ཉིད་བཟའ་བ་ཡང༌། །མར་དང་བསྲེས་པའི་གུ་གུལ་དང༌། །སྦོས་སྐར་དེ་ཀུན་རྟག་ཏུ་སྦྱར། །སྭཱ་ཧཱའི་བདག་ཉིད་སྔགས་ཀྱིས་ནི། །དབྱེ་བས་སྦྱིན་སྲེག་མང་དུ་བྱ། །དྲི་དང་མེ་ཏོག་ཉེར་སྤྱོད་རྣམས། །ལས་ཀྱི་སྦྱོར་བས་བྱ་བ་ཉིད། །ཅེས་པ་སྲེག་རྫས་ཀྱི་ཆོ་གའོ།། །།ཞི་པའི་བུད་ཤིང་ཐབ་ཁུང་ལས། །ཅུང་ཟད་ཐུང་བའི་མཆོད་སྦྱིན་ཤིང༌། །འབྲོག་དགོན་པ་ལང་ལྕི་བདག །སྲོག་ཆགས་མེད་པ་ལྷན་ཅིག་འདོད། །རྒྱས་པའི་བུད་ཤིང་འབྲོག་དགོན་པའི། །བ་ལང་ལྕི་བ་མ་གཏོགས་པ། །ཇི་སྐད་གསུངས་བཞིན་བསྟན་པ་སྟེ། རང་གི་ཐབ་མཉམ་འབྲས་བུར་བཅས། །དབང་ལ་ནི་མ་པ་སྐྱུར་བའི་ཤིང༌། མེ་ཏོག་ལྡན་པའི་བུད་ཤིང་སྟེ། །དགུག་པར་ཚེར་མ་ཅན་ཞེས་བྱ། །མངོན་སྤྱོད་ལ་ནི་སྐམ་པོ་དང༌། །ཚ་བ་ཚེར་ལྡན་དྲི་དན་དང༌། །དེ་བཞིན་དུར་ཁྲོད་སྐྱེས་པའི་ཤིང༌། །བོད་བུ་རྔ་མོ་ལ་སོགས་སྤངས། །ལས་ཀུན་ལ་ཡང་དེ་རྣམས་ཀུན། །ཞེས་པ་བུད་ཤིང་གི་ཆོ་གའོ།། །།ཞི་བར་དཀར་པོའི་ཚེས་གཅིག་ནས། །བརྩམས་ཏེ་དཀར་པོའི་གོས་སོགས་ཅན། །སྲོད་ལ་ཤར་དུ་ཁ་བལྟས་ནས། །སྟན་བཟང་པདྨའི་གདན་གྱིས་འདུག །ལས་དང་རྗེས་མཐུན་བསམ་གཏན་བསྒྲུབ། །བྱམས་དང་སྙིང་རྗེ་དང་ལྡན་པས། ལས་དང་མཐུན་པའི་རྣལ་འབྱོར་གྱིས། །ཞི་བའི་ཡིད་ཀྱིས་ཡང་དག་སྦྱང༌། །རྒྱས་པར་ཟླ་བ་གང་བ་ནས། །བརྩམས་ཏེ་སེར་པོའི་གོས་སོགས་ཅན། །སྔ་དྲོ་ཤར་དུ་ཁ་བལྟས་ནས། །བཟང་པོའི་འདུག་སྟངས་ཀྱིས་གནས་བརྩམས། །དབང་ལ་དམར་པོའི་གོས་སོགས་ཅན། །ནུབ་ཏུ་ཁ་བལྟས་མཐོན་པོ་ཡི། གདན་ལ་རྡོ་རྗེའི་སྐྱིལ་ཀྲུང་གནས། །བདེ་ཞིན་དགའ་བས་བྱ་བར་གསུངས། །དགུག་པ་ལ་ནི་ཐམས་ཅད་མཚུངས། །འོན་ཀྱང་སྟེང་དུ་ཁ་བལྟས་འདོད། །ལྷན་རྣམས་མཉེས་པར་བྱེད་པ་ལའང༌། །ནུབ་ཏུ་བ་ལྟས་ཡང་དག་སྤྱད། །མངོན་སྤྱོད་སྔོན་
པོའི་གོས་སོགས་སམ། །གང་ཡང་ཁྲོ་ཞིང་ཁྲག་ལྡན་གོས། །ཁ་ནི་གཤིན་རྗེར་བལྟས་ཏེ་འདུག །སྲ་བའི་སྟན་ནམ་རྩུབ་མོའི་ས། །བསྒྲུབ་བྱའི་གཟུགས་བརྙས་བྲང་ལ་ནི། །བརྟན་པར་ཀུན་ནས་གནས་པ་འམ། །ཡང་ན་སྟན་ནི་མེད་པར་ཡང༌། །རྐང་བས་རྐང་བ་མནན་ཏེ་བསྡད། །ནག་པོ་ཡི་ནི་ཚེས་གཅིག་གི །ཉི་མ་གུང་ངམ་མཚན་ཕྱེད་ལ། །སོ་རྣམས་འཆའ་ཞིང་སྨིན་མ་དག །ཁྲོ་གཉེར་བསྡུས་ཏེ་སྦྱང་པར་བྱ། །རེངས་དང་རྨོངས་པ་དབང་ལྡན་བལྟ། །དེ་བཞིན་རྡོ་རྗེ་སྐྱིལ་ཀྲུང་སྟེ། །པཽ་ཥཊ་སྔགས་ཀྱི་མཐར་ལྡན་པས། །ཐབ་ཁུང་གྲུ་བཞིར་བྱས་པ་ལ། །སེར་དང་དཀར་བའི་རྒྱན་གྱིས་སྤྲས། །རྒྱས་མཚུངས་ཆོགས་གང་དག་གནས། །བསྐྲད་ལ་དེ་བཞིན་མེར་ཕྱོགས་ཏེ། །རྔ་མོ་ལ་སོགས་སྔགས་ཀྱིས་བྱུག །དཀར་གནག་གིས་བརྒྱན་དུག་གིས་བྲི། །རྫས་དང་སྔགས་ནི་འདི་དག་སྟེ། །ཁྭ་ཏ་ལ་སོགས་གཤོག་པ་མཆོག །སྤེལ་ཚིག་དང་ནི་ཡང་དག་ལྡན། །འདིར་ནི་ཁྭ་སོགས་གཤོག་པ་དང༌། །ཆེ་གེ་མོ་ཨུ་ཙྪ་ཊ་ཡ། །ཧཱུཾ་ཕཊ་ཅེས་པའི་སྔགས་རྣམས་ནི། །བྲིས་པ་དག་དང་ལྡན་པའོ། །དབྱེ་བ་དེ་བཞིན་བདེན་བྲལ་དུ། །ཕྱོགས་དེར་རྐང་པ་བཟློག་པས་འདུག །སེར་པོ་ནག་པོས་རྣམ་པར་བརྒྱན། །ཚ་བའི་ཏིལ་མར་དུག་གིས་བྲི། །ཐམས་ཅད་དུ་ཕྱོགས་དང་ཕྱོགས་བྲལ་གང་དུ་ཁ་བལྟས་པའི་ཐད་ཀའི་ཕྱོགས་དང་ཕྱོགས་བྲལ་དུ་གནས་པས་སོ། །ཡང་དོན་དམ་པར་ཕྱོགས་རན་རྒྱུད་པ་མ་ཡིན་པའི་ཕྱིར་ཇི་ལྟ་བ་བཞིན་དུ་ངེས་པར་གནས་པ་དེའི་ང་རྒྱལ་ཆེན་པོའི་ཡིད་ཀྱིས་ཏིང་ངེ་འཛིན་དང་ལྡན་པས་དེ་ཁོ་ན་བཞིན་ཐམས་ཅད་བྱའོ། །གསེར་དངུལ་རྡོ་དང་ཟངས་དང་ཤིང༌། །སས་བྱས་ཉ་ཕྱིས་དུང་དང་ནི། འདབ་མའི་ཀྱོང་བུ་ཞབས་བསིལ་དང༌། །བསང་གཏོར་ཞལ་བ་སིལ་མཆོད་ཡོན་སྣོད། །ཞི་བར་དེར་གནས་འོ་མ་དང༌། །དཀར་པོའི་དྲི་སོགས་འདུས་བྱས་ཏེ། །སྔགས་རིག་བདག་ཉིད་སྔགས་པ་ཡིས། །ཆུ་ལ་སྭཱ་ཧཱའི་མཐའ་ཅན་བཟླས། །རྒྱས་པར་དེར་ནི་ཏིལ་ཞོ་བསྲེ། །སེར་པོའི་དྲི་སོགས་འདུས་བྱས་ཏེ། །ཆུ་ལ་ཨོཾ་ཡིག་མཐའ་ཅན་ཏེ། །རང་གི་སྔགས་ཀྱི་བཟླས་པ་བྱ། །དབང་ལ་དམར་པོའི་དྲི་ལ་སོགས། །འདུས་བྱ་ཆུ་ལ་ཧོཿ་ཡིག་གི །མཐའ་ཅན་སྔགས་ཀྱི་བཟླས་པ་བྱ། །དགུག་པར་ཛཿ་ཡིག་མཐའ་
ཅན་བདུན། །མངོན་སྤྱོད་ལ་ནི་ཁྲག་དང་བཅས། །བ་ལང་ཆུ་དང་ཀོ་ཊ་བ། །ནག་དང་ངན་པའི་དྲི་སོགས་ལྡན། །ཆུ་ལ་ཕཊ་མཐའི་སྔགས་བཟླས་བྱ། །ཀུན་དུ་དྲི་དང་མེ་ཏོག་དང༌། །ཀུ་ཤ་འབྲས་ཡོས་ཏི་ལ་དང་ལྡན། །ལས་དང་རྗེས་མཐུན་ཆུ་ལ་ནི། །ཇི་ལྟར་རྙེད་པ་རབ་ཏུ་གཞུག །མཆོད་ཡོན་སྣོད་དང་དེ་བཞིན་དུ། །ལས་ཀུན་པ་ཡི་ཆུ་ཡི་སྣོད། །ལས་ཀུན་པ་ཡི་ཆུ་སྔགས་ནི། །རང་གི་སྔགས་ཀྱིས་བསྔགས་པར་བྱ། །པདྨའི་སྣོད་གཉིས་གཡོན་ལོགས་སུ། །རྣམ་པར་བཀོད་པར་གྱུར་པའི་ཆུ། །ལག་པ་གཡས་པས་བཟུང་བ་ཡིས། །ཡམ་ཤིང་སོགས་ལ་བསང་གཏོར་བྱ། །བསྲེག་པར་བྱ་བའི་རྫས་རྣམས་གཞན། །རང་གི་གཡས་སུ་གཞག་བྱ་སྟེ། །བསད་དང་བསྐྲད་དང་དགུག་པ་ལ། །བསང་གཏོར་དགོད་པ་བཟློག་སྟེ་བྱ། །ཞི་བར་འོ་མ་ཅན་གྱི་ཤིང༌། །གཙུབས་པའམ་གང་ཡང་དགོན་པའི་མེ། །རྒྱས་པར་ནགས་ཆེན་ཚིག་པའམ། །རྒྱལ་པོ་ལ་སོགས་ཁྱིམ་བྱུང་སྟེ། །དབང་ལ་སྨད་འཚོང་རྗེའུ་རིགས་ཁྱིམ། །དགུག་པར་གར་མཁན་འགྲོན་སོགས་ལས། །དྲག་པོར་རོ་བསྲེགས་རུས་པའམ་རྡོ། །གདོལ་བའི་ཁྱིམ་ནས་བྱུང་བའི་མེ། །དྲག་པོའི་དགུག་པར་ཡང་འདི་ཉིད། །ཇི་བཞིན་རང་རང་ལས་ཀུན་ལའོ། །ཞེས་པ་མེའི་མཚན་ཉིད་ཀྱི་ཆོ་གའོ།། །།དེ་ནས་མེ་རྣམས་བླང་བྱ་སྟེ། །གཙང་མའི་སྣོད་དུ་ཡང་དག་གཞག །གཏོར་མ་སྦྱིན་ཞིང་བསྲུང་བ་བྱ། །སྔོན་དུ་དྲིལ་བུ་དཀྲོལ་བ་ཉིད། །བགེགས་མཐར་བྱེད་པའི་སྔགས་དང་ནི། །དེ་ནས་སླར་ཡང་ཡི་གེ་གསུམ། །མཆོད་ཡོན་ཞབས་བསིལ་ལ་སོགས་དབུལ། །དེ་དག་དང་ནི་བཟླས་པའི་ཆུ། །ཀུ་ཤའི་རྩེ་མོས་བཟུང་བ་ཡིས། །ལན་གསུམ་གཡས་སྐོར་གཏོར་བར་བྱ། །མངོན་སྤྱོད་ལ་ནི་གཡོན་པ་ཡིས། །མཆོད་ཡོན་ལ་སོགས་ཐམས་ཅད་བྱ། །སྐམ་པོའི་རྩྭ་དང་ལྷན་ཅིག་མེ། །ཐབ་ཁུང་དུ་ནི་རབ་ཏུ་གཞུག །ཨོཾ་ཛྭ་ལ་ཛྭ་ལ་ཧཱུཾ་བརྗོད་དེ། །རླུང་ཡབ་ལས་བྱུང་རླུང་དང་ནི། །རིགས་ཀྱི་སྙིང་པོ་བདུན་བཟླས་པའི། །བླུགས་གཟར་གནས་པའི་མར་གྱིས་སྦར། །དེ་ཡིས་ཡང་དག་འབར་བའི་མེར། །གསང་ལ་ཚ་བའི་ཏིལ་མར་རོ། །ཀུ་ཤ་གསར་པ་མ་གྲུགས་པ། །ལྗང་གུ་བ་ལང་རྣ་བ་ཙམ། །ཨོཾ་བཛྲ་སཏྭ་ཨཱཿ་ཞེས་པ། །སྔགས་ཀྱིས་ཡོངས་སུ་བཟླས་པ་རྣམས།།
སྒྲུབ་པོས་དང་པོར་ཀུ་ཤ་གཉིས། །གཡོན་ནས་སོ་སོར་ཁ་ཁྱེར་ལ། །རྩེ་མོ་ཤར་དུ་བསྟན་པ་དང༌། །གཤིན་རྗེར་ཕྱོགས་དང་ནུབ་ཏུ་བསྟན། །རྩེ་མོ་བྱང་དང་དེ་ནས་ཤར། །ཐབ་ལ་ཀུ་ཤས་གཡོགས་པར་བྱ། །རྒྱས་དང་དབང་དང་མངོན་སྤྱོད་ཀྱི། །ཐབ་ལ་རིམ་པ་ཇི་བཞིན་དུ། །རྩེ་མོ་བྱང་དང་རྩེ་མོ་ནུབ། །རྩེ་མོ་ལྷོ་རུ་དེ་བཞིན་ཉིད། །དང་པོར་ཀུ་ཤ་གཉིས་གཡོན་ནས། །དེ་ལྟར་ཁ་ཁྱེར་ལ་ཡང་དགོད། །འདིར་ཡང་སྒྲུབ་པ་པོ་གང་དུ་མངོན་པར་ཕྱོགས་པ་དེ་ལ་ལྟོས་ནས་ཤར་ལ་སོགས་པའི་ཕྱོགས་ཀྱི་ཐ་སྙད་བྱས་ཏེ། དོན་དམ་པར་ན་ཕྱོགས་དངོས་པོར་མེད་པའི་ཕྱིར་རོ། །དེ་ནས། སྔགས་རིག་རང་གི་ལྷག་པའི་ལྷའི། །ས་བོན་ལས་ནི་ཐབ་ཁུང་བསྐྱེད། །མེ་རྣམས་འབར་བ་ཤེས་གྱུར་ནས། །དེ་དབུས་བདག་མེད་བསྒོམ་པར་བྱ། །དེ་ནས་རཾ་ཡིག་ལས་སྐྱེས་པའི། །གྲུ་གསུམ་མེ་ནི་བསྐྱེད་པའི་དབུས། །པདྨ་ཉི་མ་ལ་གནས་པའི། །རཾ་ཡིག་ས་བོན་ལས་བྱུང་བའི། །བོང་ཐུང་ལྟོ་བ་འཕྱང་ཤ་རྒྱས། །ཞལ་གསུམ་ཕྱག་དྲུག་འབར་བ་སྟེ། །སྤྱན་གསུམ་རལ་པའི་ཅོད་པན་ཅན། །སྨར་མཆོད་ཕྱིར་ཐོགས་དང་ལྡན། །ལས་དང་རྗེས་མཐུན་སྐུ་མདོག་དང༌། །གོས་དང་རྒྱན་རྣམས་དག་གིས་བརྒྱན། །དང་པོའི་ཕྱག་གཉིས་རོལ་པ་ཡིས། །རང་འོད་ལ་ནི་ཡང་དག་འཁྱུད། །གཡོན་ན་དབྱུག་པ་སྤྱི་བླུགས་ཏེ། །གཡས་ན་བགྲང་ཕྲེང་མི་འཇིགས་སྦྱིན། །དེ་བཞིན་དུ་རྣམ་པར་ཤེས་པའི་འོད་ཟེར་གྱི་ཕྲེང་བ་དང་རྒྱས་འདེབས་ཀྱི་དབང་པོ་དང་ཡང་དག་པར་ལྡན་པ་མེའི་དཀྱིལ་འཁོར་ལ་གནས་པའི་ས་བོན་རཾ་དེ་ཉིད་དང་སྙིང་གར་མེ་ལྷ་རྣམ་པར་བསྒོམས་ལ། དམ་ཚིག་སེམས་དཔའི་སྙིང་གའི་ས་བོན་གྱི་འོད་ཟེར་གྱི་ལྕགས་ཀྱུས་ནམ་མཁར་དམ་ཚིག་སེམས་དཔའ་དང་འདྲ་བའི་མེ་ལྷ་ཡེ་ཤེས་སེམས་དཔའ་མེའི་མཚམས་ནས་བྱོན་པ་དྲང་སྲོང་གི་ཚོགས་ཀྱིས་ཡོངས་སུ་བསྐོར་བ་རྩ་བའི་ཞལ་ནི་སྐུ་མདོག་དང་མཐུན་པ་སྟེ། དེ་ཉིད་དཀར་པོ་ཡིན་ན་གཡས་པ་དང་གཡོན་པའི་ཞལ་ནག་པོ་དང་དམར་པོ་དག་དང༌། སེར་པོ་དང་དམར་པོ་དང་ལྗང་གུ་ཉིད་ལ་ནི་སྔོན་པོ་དང་དཀར་པོ་དག་དང༌། སྔོན་པོ་ཉིད་ལ་ནི་དཀར་པོ་དང་དམར་པོ་དག་རྣམ་པར་བལྟས་ནས་གཡས་པའི་མཐེ་བོ་མི་འཇིགས་པས་བསྐྱོད་པ་དང་སྔགས་འདིས་
སྤྱན་དྲང་བར་བྱའོ། །ཨོཾ་ཨེ་ཧྱེ་ཧི་མཧཱ་བྷཱུ་ཏ་དེ་བ་རྀ་ཥི་དྭི་ཛ་ས་ཏ་མ། གྲྀ་ཧི་ཏཱ་ཧུ་ཏི། མ་ཧཱ་ར་ཨ་སྨིན་སནྣི་ཧི་ཏྭ་བྷ་ཝ། ཞེས་པས་སྤྱན་དྲངས་པ་དེ་དང་ལྷན་ཅིག་འོངས་པའི་བགེགས་གཤིན་རྗེ་གཤེད་ལ་སོགས་པས་བསྐྲད་ནས་དེ་ཉིད་ཛཿ་ཧཱུཾ་བཾ་ཧོཿ། ཞེས་བརྗོད་པས་རིམ་པ་ཇི་ལྟ་བ་བཞིན་དུ་དགུག་པ་དང་གཞུག་པ་དང་བཅིང་བ་དང་མཉེས་པར་བྱའོ། །དེ་ནས་ཨོཾ་ཨཱཿ་ཧཱུཾ་ཨརྒྷཾ་པྲ་ཏཱི་ཙྪ་ཧཱུཾ་ཞེས་པ་འདིས་མཆོད་ཡོན་དབུལ་ཞིང་ཨརྒྷཾ་གྱི་སྒྲའི་གནས་སུ་པཱ་ཏྱཾ་ཞེས་པ་ལ་སོགས་པ་བཅུག་པས་ཞབས་བསིལ་དང་ཞལ་བསིལ་དང་བསང་གཏོར་རྣམས་ཀྱང་ཕུལ་ནས་ལས་དང་རྗེས་སུ་མཐུན་པའི་མེ་ཏོག་ལ་སོགས་པ་རྣམས་དང་གསང་བའི་མཆོད་པས་ཀྱང་མཆོད་པར་བྱའོ། །དེ་ལ་འདིའི་མཆོད་ཡོན་ལ་སོགས་པའི་རིམ་པ་ནི། ཀུ་ཤ་ཡི་ནི་ཆུན་པོ་ཡིས། །དང་པོའི་སྣོད་དུ་བསང་གཏོར་གསུམ། །ཀུན་དུ་བཟླས་བྱས་ཆུ་ཡིས་ནི། །དེ་ཉིད་དུ་ནི་ཞབས་བསིལ་དབུལ། །ཁུ་ཚུར་འོག་ཏུ་ཕྱོགས་པ་ཡི། །མཛུབ་མོས་མེ་ཏོག་གཟུང་བྱས་ནས། །མཐེ་ཆུང་མིང་མེད་གུང་མོ་དང༌། །མཛུབ་མོ་རིམ་གྱིས་བཀྲོལ་བས་སོ། །གཉིས་པ་དུང་གི་མཆོད་ཡོན་ཏེ། །གཉིས་པ་ཉིད་དུ་སོ་སོར་དབུལ། །རྡོ་རྗེ་སྙིམ་པ་ཕྱེ་བས་སོ། །གསུམ་པར་ཞལ་བསིལ་དབུལ་བྱ་སྟེ། །ཁུ་ཚུར་མཛུབ་མོ་མཐེ་བོང་གི །སྐམ་པས་གཟུང་བའི་མེ་ཏོག་རྣམས། །སངས་རྒྱས་རྣམས་ཀྱི་སྤྱན་སྔ་རུ། །སོར་མོ་རིམ་གྱིས་ལན་གསུམ་བསྐོར། །མཛུབ་མོ་གུང་མོ་མིང་མེད་དང༌། །མཐེ་ཆུང་རྣམས་ནི་བཀྲོལ་བས་སོ། །ཞེས་པ་ནི་མན་ངག་གོ །དེ་ནས། ཨོཾ་བཛྲ་ཨ་ན་ལ་མ་ཧཱ་བྷཱུ་ཏ་ཛྭ་ལ་ཡ་སརྦ་བྷསྨི་ཀུ་རུ་སརྦ་དུཥྚཱ་ན་ཧཱུཾ་ཕཊ་དྲྀ་ཤྱ་ཛཿ་ཧཱུཾ་ས་མ་ཡ་སྟྭཾ་ས་མ་ཡོ྅ཧཾ་ཞེས་པ་གསུམ་གྱིས་དམ་ཚིག་བསྒྲག་པར་བྱའོ། །དེ་ནས། །དྲིལ་བུ་ཡོངས་གྱུར་དགང་གཟར་ཏེ། །བླུགས་གཟར་རྡོ་རྗེ་ལས་བྱུང་འདོད། །ཅེས་བསམས་གསང་སྔགས་རིག་པ་ཡིས། །རིམ་པ་འདིས་ནི་སྦྱིན་སྲེག་བྱ། །ལག་པ་གཡོན་པ་གན་རྐྱལ་དུ། །མར་གྱིས་གང་བའི་དགང་གཟར་གཟུང༌། །གཡས་པའི་ཁུ་ཚུར་ཁ་སྦུབ་ཀྱིས། །བླུགས་གཟར་གན་རྒྱལ་མར་གྱིས་དགང༌། །ཀུན་ནས་དགང་གཟར་ལ་གནས་པ། །བྱང་ཆུབ་མཆོག་གིས་དེ་
དག་གཟུང༌། །ལག་པ་པུས་མོའི་ནང་བྱས་ནས། །ཏིང་འཛིན་མཆོག་ནི་བསམ་བྱ་སྟེ། །སླར་ཡང་རྡོ་རྗེ་མེ་ལྷའི་ཁར། །ལྕེ་ལ་ཧཱུཾ་ཡིག་དགོད་པར་བྱ། །དགང་གཟར་གཡས་སྐོར་བྱས་ནས་ནི། སྲེག་བླུགས་རྫོགས་པར་དབུལ་བར་བྱ། །དེ་ལ་སྔགས་ནི་འདི་ཡིན་ཏེ། ཨོཾ་ཨགྣ་ཡེ་དི་པྱཱ་དི་པྱ་ཨ་བི་ཥ་ཨ་བི་ཥ་མ་ཧཱ་ཤྲི་ཡེ་ཧ་བྱ་ཀ་བྱ་བཱ་ཧཱ་ན་ཡ་སྭཱ་ཧཱ། ཞེས་པས་སྦྱིན་བདག་ནུས་པའི་དབང་གིས་སྲེག་བླུགས་རྫོགས་པ་གསུམ་མམ་བདུན་ནམ་ཉི་ཤུ་རྩ་གཅིག་དབུལ་བར་བྱའོ། །ཨོཾ་ཨགྣ་ཡེ་སྭཱ་ཧཱ། ཞེས་པ་ནི་མར་གྱི་སྲེག་བླུགས་ཀྱི་སྔགས་སོ། །ཞི་རྒྱས་ལ་སོགས་སྔགས་རྣམས་ལ། །བྱང་ཆུབ་མཆོག་དང་ནོར་བུ་དང༌། །པདྨ་ཁྲོ་བོའི་ཁུ་ཚུར་བཞིས། །དགང་གཟར་བླུགས་གཟེར་གཟུང་བ་བསྟན། །མངོན་སྤྱོད་ཚ་བའི་ཏིལ་མར་དང༌། །དུག་དང་བཅས་པས་སྦྱིན་སྲེག་བྱ། །ཁྲོ་བོ་ཡི་ནི་གཡོན་སྐོར་ཏེ། །ལག་པ་པུས་མོའི་ཕྱི་ནས་སོ། །འདམ་སྐྱེས་འདབ་མ་སོ་གཉིས་སྣོད། །མར་གང་བུ་ག་ཅུང་ཟད་གནས། །ཀུ་ཤའི་རྩེ་མོ་ལས་འཛག་པ། །ཐབ་ཀྱི་སྟེང་དེར་དགོད་པར་བྱ། །ཡེ་ཤེས་ཀྱི་ནི་རྒྱུན་རབ་ཏུ། །ཐབ་ཁུང་ལྟེ་བར་འབབ་པར་བྱ། །དྲག་པོར་ཚ་བའི་ཏིལ་མར་དང༌། །དུག་དང་བཅས་པ་འབབ་པའོ། །དགང་གཟར་བླུགས་གཟར་གྱི་ཁལ་ཡི་གེ་གསུམ་དགོད་པར་བྱ་ཞིང་རང་གི་ལྷའི་ས་བོན་ལས་བྱུང་བ་བསྒོམ་པར་བྱའོ། །ཞི་བ་དང་རྒྱས་པ་དང་དབང་དུ་བྱ་བ་དང་དབང་དུ་བྱས་པའི་དགུག་པ་རྣམས་ལ་སྭཱ་ཧཱ་དང་ཨོཾ་དང་ཧོཿ་དང་ཛཿ་སྟེ་དྲག་པོ་ལ་ནི་ཧཱུཾ་ཧཱུཾ་ཕཊ་ཅེས་པ་སྔགས་ཀྱི་མཐར་བརྗོད་པར་བྱ་ཞིང༌། ཞལ་ཅུང་ཟད་གདངས་པ་དང་དྲག་པོ་དང་དྲག་པོའི་དགུག་པ་ནི་ཞལ་ཤིན་ཏུ་གདངས་པའོ། །དེ་ནས་འབར་བའི་མཚན་མ་ནི། །བགེགས་དང་བྲལ་བ་མཚོན་བྱ་སྟེ། །འོད་ཟེར་དང་བཅས་གཡས་སྐོར་དང༌། །སྣུམ་ཞིང་དེ་བཞིན་དུ་བ་མེད། །གསེར་དང་དངུལ་དང་བྱི་རུ་སོགས། །འདྲ་ཞིང་རྔ་ཡབ་དབྱིབས་ཅན་དང༌། །རྩེ་གསུམ་རྡོ་རྗེ་དུང་དང་ནི། །ཆུ་སྐྱེས་ཉ་དང་དཔལ་བེའུ་འདྲ། །བུམ་པ་བཀྲ་ཤིས་གདུགས་དང་ནི། །རྒྱལ་མཚན་རལ་གྲི་བླུགས་གཟར་དབྱིབས། །རྔ་སྒྲ་ཟབ་མོ་དྲི་ཞིམ་ལྡན། །ཤིན་ཏུ་དྲི་མ་མེད་པ་དང༌། །མེ་ཏོག་བཻ་ཌཱུཪྻ་
འདྲ་དང༌། །དབང་པོའི་གཞུ་དང་མཚུངས་རྣམས་དགེ། །ཞེས་པ་ཐུན་མོང་བསྟན་པ་སྟེ། །ད་ནི་ཁྱད་པར་བརྗོད་པར་བྱ། །ཞི་བར་ཁ་དོག་དཀར་པོར་སྣང༌། །རྒྱས་པ་ལ་ནི་སེར་པོར་མཚུངས། །དབང་ལ་དམར་ཞིང་རྩེ་མོ་མཆོག །མངོན་སྤྱོད་ལ་ནི་སྔོ་ནག་གོ །རྩེ་མོ་གཅིག་པ་མཆོག་ཏུ་བསྟན། །རྩེ་མོ་གཉིས་པ་འབྲིང་དུ་འདོད། །རྩེ་མོ་འབར་བ་དམན་པ་ཡིན། །སྒྲུབ་པོས་མདོར་བསྡུས་ཤེས་པར་བྱ། །རྣམ་པར་ཆད་ཅིང་འབར་བར་དཀའ། །རྩུབ་མོའི་སྒྲ་ལྡན་དེ་མི་འདོད། །མེ་སྟག་འཕྲོ་དང་དེ་བཞིན་དུ། །འོད་ཟེར་དམན་དང་དུ་བ་མང༌། །རོ་ཡི་དྲི་དང་རུལ་པའི་དྲི། །ཁ་དོག་མི་སྣུམ་རྩེ་མོ་གུག །དེ་བཞིན་གཡོན་དུ་འཁོར་བ་དང༌། །བསྲེག་ཕོར་མེ་ཡིས་ལྡག་པའི་དབྱིབས། །དྲག་པོའི་ལས་ལ་ཤིས་པ་སྟེ། །དེ་ལྟར་མི་དགེའི་ལས་ལའོ། །དེ་བཞིན་གཤེགས་པས་བགེགས་བསལ་ཏེ། །ལས་རྣམས་ཐམས་ཅད་རང་གིས་བྱས། །ཡན་ལག་དེ་དག་ཉིད་ཀྱིས་ནི། །མར་གྱི་སྲེག་བླུགས་བདུན་དབུལ་ལོ། །སླར་ཡང་མར་སོགས་སྔགས་རྣམས་ཀྱིས། །སྔར་བཞིན་དགང་གཟར་གྱིས་གང༌། །སྲེག་བླུགས་རྫོགས་པ་གསུམ་མམ་བདུན། །ཡང་ན་གཅིག་རྣམས་དབུལ་བར་བྱ། །དེ་ལ་དང་པོར་སྔགས་འདི་རྣམས་ཀྱིས་ཡམ་ཤིང་ལ་སོགས་པ་སྦྱང་བར་བྱ་སྟེ། ཨོཾ་ཨཱཿ་ཧཱུཾ་སྭཱ་ཧཱ། ཡམ་ཤིང་སྦྱང་བའོ། །ཨོཾ་ཤྲིཾ་སྭཱ་ཧཱ། མར་གྱིའོ། །ཨོཾ་སྭཱ་སྭཱ་ཧཱ། རྫས་རྣམས་བཀྲུ་བའོ། །ཨོཾ་ཛྲྀཾ་སྭཱ་ཧཱ། འབྲུ་རྣམས་སྦྱང་བའོ། །ཨོཾ་ཀུ་རུ་ཀུ་རུ་སྭཱ་ཧཱ། རྫས་གཞན་རྣམས་སྦྱང་བའི་སྔགས་སོ། །འདིར་ནི་རིམ་པས་ཡམ་ཤིང་དག །བསྲེགས་ནས་ཡམ་ཤིང་མེ་ལ་མར། །ཏིལ་དང་དཱུར་བ་འབྲས་ཞོ་ཟན། །ཀུ་ཤ་ལ་སོགས་བསྲེག་པར་བྱ། །དེ་ལ་ཡམ་ཤིང་རྣམས་རིམ་པས་བཟུང་སྟེ་འཆད་པར་འགྱུར་བའི་རང་རང་གི་སྔགས་ཀྱིས་ཡམ་ཤིང་དང་དཱུར་བ་དང་ཀུ་ཤ་རྣམས་མིང་མེད་དང་མཐེ་བོང་གིས་བླངས་ནས་སོ། །རྩ་བ་དང་ནི་རྩེ་མོ་ཡིས། །ཞི་གྱུར་རྒྱས་ལ་དེ་བཞིན་ནོ། །རྩེ་མོས་དབང་སྟེ་དེ་བཞིན་དགུག །རེངས་དང་རྨོངས་པ་དག་ལའང་དེ། །རྩ་བའི་ཆ་ཡིས་འཆི་བར་འགྱུར། །དབུས་ཀྱིས་བསྐྲད་པར་འདོད་པ་ཡིན། །སྙིང་རྗེ་ལྡན་པས་དེ་ཤེས་ནས། །སྦྱིན་སྲེག་ཆོ་ག་ཇི་
བཞིན་བྱ། །ཨོཾ་བཛྲ་བྲཧྨ་ནེ་སྭཱ་ཧཱ། པ་ལཱ་ཤའིའོ། །ཨོཾ་བཛྲ་ཡཛྙཱ་ཡ་སྭཱ་ཧཱ། ཨུ་དུ་མྺཱ་རའིའོ། །ཨོཾ་ས་ཧ་ཧ་ཀ་རཱ་ཡ་སྭཱ་ཧཱ། ཨ་མྲའིའོ། །ཨོཾ་ཀ་དམྤཱ་ཡ་སྭཱ་ཧཱ། ཀ་དམྤཱིའོ། །ཨོཾ་སརྦ་ཏོ་བྷ་དྲཱ་ཡ་སྭཱ་ཧཱ། གམྦྷ་རིའིའོ། །ཨོཾ་བོ་དྷི་པྲྀ་ཀྵ་ཡ་སྭཱ་ཧཱ། ཨ་ཤྭ་དྠའིའོ། །ཨོཾ་བཛྲ་ལཱ་ཏཱ་ཡ་སྭཱ་ཧཱ། པླཀྵའིའོ། །ཨོཾ་བཛྲ་ཤཱི་བཱ་སྭཱ་ཧཱ། ས་མཱིའིའོ། །ཨོཾ་བཛྲ་ཀུ་པེ་རཱ་ཡ་སྭཱ་ཧཱ། ནྱ་གྲོ་དྷའིའོ། །ཨོཾ་ག་ཏྲཱ་ཡ་སྭཱ་ཧཱ། སེང་ལྡེང་གིའོ། །ཨོཾ་བཛྲ་ཨ་ཤོ་ཀཱ་ཡ་སྭཱ་ཧཱ། མྱ་ངན་མེད་པའིའོ། །ཨོཾ་བཛྲ་ལ་ཀུ་ཙཱ་ཡ་སྭཱ་ཧཱ། ལ་ཀུ་ཙཱའོ། །ཨོཾ་བཛྲ་ཨརྐ་ཡ་སྭཱ་ཧཱ། ཨརྐཱིའོ། །ཨོཾ་བཛྲ་སྲུ་བཱ་ཡ་སྭཱ་ཧཱ། བེ་ཀངྐཱིའོ། །ཨོཾ་བཛྲ་བི་ལོ་ཌྷ་ཀཱ་ཡ་སྭཱ་ཧཱ། བི་ལོ་ཌྷ་ཀའིའོ། །ཨོཾ་བཛྲ་མ་ད་ནཱ་ཡ་སྭཱ་ཧཱ། མྱོས་བྱེད་ཚེར་མ་ཅན་གྱིའོ། །ཨོཾ་བཛྲ་ཤི་ཁ་རཱ་ཡ་སྭཱ་ཧཱ། ཨ་པ་མརྒའིའོ། །ཨོཾ་བཛྲ་ཨངྒུ་ཤཱ་ཡ་སྭཱ་ཧཱ། འདི་ནི་ཚེར་མ་ཅན་གྱི་ཤིང་ཐམས་ཅད་ཀྱིའོ། །ཨོཾ་ཨགྣ་ཡེ་སྭཱ་ཧཱ། མར་གྱིའོ། །ཨོཾ་སརྦ་པཱ་པཾ་ད་ཧ་ན་བཛྲ་ཡ་སྭཱ་ཧཱ། ཏིལ་གྱིའོ། །ཨོཾ་བཛྲ་ཨཱ་ཡུ་ཥེ་སྭཱ་ཧཱ། དཱུར་པ་ཀུན་དའིའོ། །ཨོཾ་བཛྲ་པུཥྚ་ཡེ་སྭཱ་ཧཱ། འབྲས་མ་ཆག་པ་རྣམས་ཀྱིའོ། །ཨོཾ་སརྦ་སཾ་པ་དེ་སྭཱ་ཧཱ། ཞོ་ཟན་དང་བུར་ཟན་དང་ཟས་མྖྒོ་གིའོ། །ཨོཾ་ཨ་པྲ་ཏི་ཧ་ཏ་ཡ་སྭཱ་ཧཱ། ཏིལ་མར་གྱིས་བྱུགས་པའི་ཀུ་ཤ་རྣམས་ཀྱིའོ། །ཨོཾ་བཛྲ་བི་ཛཱ་ཡ་སྭཱ་ཧཱ། སོ་བའིའོ། །ཨོཾ་བཛྲ་བི་གཱ་ཡ་སྭཱ་ཧཱ། ནས་ཀྱིའོ། །ཨོཾ་བཛྲ་གྷསྨ་རཱི་ཡ་སྭཱ་ཧཱ། གྲོའི་འོ། །ཨོཾ་བཛྲ་མ་ཧཱ་བ་ལཱ་ཡ་སྭཱ་ཧཱ། སྲན་མ་ཤའིའོ། །ཨོཾ་བཛྲ་ལཱ་ཛཱ་ཡ་སྭཱ་ཧཱ། འབྲས་ཡོས་ཀྱིའོ། །ཡང་ན་ཚིམ་པར་བྱ་བའི་ཆེད་དུ་སོ་བ་ལ་སོགས་པ་རྣམས་ལྷའི་སྔགས་ཀྱིས་སོ། །པྲི་ཡང་ཀུ་དང་ཙནྡན་དང་གུ་གུལ་གྱི་རིལ་བུ་ལ་སོགས་པའི་རྫས་ཀྱི་ཁྱད་པར་རྣམས་ལྷའི་སྔགས་ཁོ་ནས་བསྲེག་པར་བྱའོ། །བསྲེག་བྱའི་རྫས་ཐམས་ཅད་ཀྱང་བཤད་པ་ལ་སོགས་པའི་བདུད་རྩི་ལྔས་བྲན་ཞིང་བདུད་རྩིའི་དངོས་པོར་བསྒོམས་པས་སྲེག་བླུགས་བྱའོ་ཞེས་མན་ངག་རིག་ཅིང་མང་དུ་མཁྱེན་པ་རྣམས་གསུང་ངོ༌། །ཐམས་ཅད་དུ་ཁུ་བའི་རྫས་རྣམས་ནི་ཞལ་དུའོ། །ཡམ་ཤིང་དང་མི་རུས་ཀྱི་ཕྱེ་མ་རྣམས་ནི་འོད་ཀྱི་དཀྱིལ་འཁོར་ལའོ། །ཞོ་ཟན་དང་བཟའ་བ་དང་ཞལ་བསིལ་དང་ཏིལ་དང་དཱུར་བ་དང་ཆུ་རྣམས་ནི་ཕྱག་ཏུའོ། །དྲི་ནི་ཐུགས་ཀར་རོ། །
མེ་ཏོག་ནི་དབུ་ལའོ། །བདུག་སྤོས་ནི་ཤངས་ལའོ། །ཞབས་བསིལ་ནི་ཞབས་དག་ལའོ། །མར་མེ་དང་མཆོད་ཡོན་ནི་མདུན་དུ་སྟེ་མཆོད་ཡོན་གྱི་ཆུ་ནི་སྣོད་དུ་བླུགས་པར་བྱའོ། །དེའི་རྗེས་སུ་ཞབས་བསིལ་དང་བསང་གཏོར་བྱས་ནས། །མེ་ལྷ་ནི་འབར་བའི་རྣམ་པས་ཐབ་ཏུའང་རང་གི་གཟུགས་ཀྱིས་མེའི་ཕྱོགས་སུ་གཞག་པར་བྱའོ་ཞེས་པ་མེ་ལྷ་མཉེས་པར་བྱེད་པའི་ཆོ་གའོ།། །།སྦྱིན་སྲེག་ལ་ནི་ཉེར་མཁོ་ཀུན། །ཇི་ལྟར་གསུངས་བཞིན་སྔགས་པ་ཡིས། །ཆོ་ག་བཞིན་བྱ་བསང་གཏོར་བྱ། །སླར་ཡང་མཉམ་བཞག་མེ་དབུས་སུ། །རྟག་པ་ལ་སོགས་ཆོ་ག་བཞིན། །ལས་དང་རྗེས་མཐུན་བསམ་བྱས་ནས། །བསྲེག་བྱ་གང་སོགས་སྔ་མ་བཞིན། །ཕྱི་ཡི་རྫས་སོགས་དབུལ་བར་བྱ། །ཀུན་གྱི་མཐར་ཡང་བདག་པོ་ཡི། །སྙིང་པོ་ཉི་ཤུ་རྩ་གཅིག་གམ། །བདུན་ནམ་དེ་བཞིན་གསུམ་བཟླས་པའི། །མར་གྱི་སྲེག་བླུགས་རྣམས་ཀྱིས་སྦར། །སླར་ཡང་བདག་པོའི་སྙིང་པོའི་སྔགས། །བཟླས་པས་སྲེག་བླུགས་གང་བ་བྱ། །ཤིན་ཏུ་མཉམ་གཞག་དེ་ཉིད་བཟླས། །བརྟུལ་ཞུགས་ཅན་གྱིས་མཆོད་ཡོན་དབུལ། །དེ་ནས་བསང་གཏོར་དང་ཞལ་བསིལ་དང་གོས་གསར་པ་དང་རྡོ་ཐལ་མེད་པའི་སོ་རྩི་དང༌། དྲག་པོའི་ལས་ལ་ནི་རྡོ་ཐལ་དང་བཅས་པའི་སོ་རྩི་ཕུལ་ནས་སྔར་བཞིན་དུ་ཡང་དག་པར་མཆོད་ཅིང་བསྟོད་དེ་ཕྱག་བྱས་ནས་ཡོན་དབུལ་ཞིང་མེ་ཏོག་དང་བཅས་པའི་ཐལ་མོ་སྙིང་གར་སྦྱར་ལ་བཅོམ་ལྡན་འདས་ལ་བཟོད་པར་གསོལ་བའི་ཆེད་དུ་འདི་སྐད་ཅེས་བརྗོད་པར་བྱ་སྟེ། གང་ཡང་བདག་རྨོངས་བློ་ཡིས་ནི། །ཉེས་བྱས་ཅུང་ཟད་གང་བ་གྱིས་པ། །གང་ཕྱིར་ལུས་ཅན་སྐྱབས་ཡིན་ཕྱིར། །དེ་ཀུན་མགོན་ཁྱོད་བཟོད་པར་མཛོད། །མ་རྙེད་ཡོངས་སུ་མ་ཤེས་དང༌། །གང་ཡང་ནུས་པ་མ་མཆིས་ལས། །འདིར་ནི་བྱ་བ་གང་བགྱིས་པ། །དེ་ཀུན་གཙོ་བོས་བཟོད་མཛད་རིགས། །ཞེས་པས་བཟོད་པར་གསོལ་ནས་མངོན་པར་འདོད་པ་གྲུབ་པའི་ཆེད་དུ་གསོལ་བ་གདབ་ཅིང་ཆད་པ་ངང་ལྷག་པའི་ཉེས་པ་ཞི་བར་བྱ་བའི་ཆེད་དུ་ཐར་པའི་བསམས་པས། ཨོཾ་བཛྲ་སཏྭ་ཨཿ་ཞེས་མང་དུ་བརྗོད་ནས་ཡི་གེ་བརྒྱ་པ་བཀླག་པར་བྱའོ། །ཨོཾ་བཛྲ་སཏྭ་ས་མ་ཡ་མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་བྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་
རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ་ཧ་ཧ་ཧ་ཧ་ཧོ་བྷ་ག་ཝཱན་སརྦྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ་།དེའི་རྗེས་ལ། ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །ཞེས་པས་ཡང་དག་པར་བསྐུལ་ནས་རང་གི་སྔགས་ཡི་གེ་གསུམ་གྱི་ནང་དུ་བཅུག་པའི་མཐར་མུཿ་ཞེས་པའི་ཡི་གེ་བརྗོད་ཅིང་རང་གི་བདག་པོའི་མགོན་པོ་ཡིད་ཀྱིས་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ནས་མེ་ལྷ་ཐབ་ཁུང་དུ་སྤྱན་དྲངས་ཏེ། སླར་ཡང་དག་པར་མཆོད་ནས་བསང་གཏོར་དང་ཞལ་བསིལ་དང་རྡོ་ཐལ་མེད་པའི་སོ་རྩི་དང༌། དྲག་པོ་ལ་ནི་རྡོ་ཐལ་དང་བཅས་པའི་སོ་རྩི་དང༌། གོས་གསར་པ་ཡང་ཕུལ་ལ་ཡོ་བྱད་ལྷག་མ་རྣམས་ཀྱིས་སྦྱིན་སྲེག་བྱས་ནས་དྲིལ་བུ་དཀྲོལ་ཞིང༌། མི་བསྐྱོད་རྡོ་རྗེ་ཞེས་པ་ལ་སོགས་པའི་ཚིགས་སུ་བཅད་པ་རྣམས་ཀྱིས་བསྟོད་པར་བྱའོ། །ཆོ་ག་འདི་ནི་ཕལ་ཆེར་རང་གི་མངོན་པར་འདོད་པའི་དངོས་གྲུབ་བསྒྲུབ་པའི་ཆེད་དུའོ། །རབ་ཏུ་གནས་པ་ལ་སོགས་པ་གཞན་གྱི་དོན་འདོད་པ་རྣམས་ཀྱི་ཁྱད་པར་ནི་འདི་ཡིན་ཏེ། ཡོན་ཕུལ་བའི་སློབ་མའི་མཐེ་བོང་གཡོན་པའི་མཐེ་ཆུང་གིས་བཟུང་ནས། ཐབ་ཁུང་ལ་གཡས་སྐོར་གསུམ་བྱས་ལ་བླུགས་གཟར་གྱིས་མགོ་ལ་གཡས་སྐོར་གྱིས་བྱུགས་པས་ལན་བདུན་དུ་སྲེག་བླུགས་བྱས་ཏེ་སྲེག་བླུགས་གང་བ་འབུལ་དུ་གཞུག་པར་བྱའོ། །འཁྱིལ་པས་བཟླས་པའི་སྲུང་སྐུད་དེའི་ལག་པ་ལ་བཅིངས་ཏེ་བསང་གཏོར་བྱའོ། །ཡོད་པར་གྱུར་ན་རྒྱལ་པོ་ལ་སོགས་པའི་དགེ་བ་ལ་དམིགས་ནས་ཀྱང་སྲེག་བླུགས་རྫོགས་པ་དབུལ་བར་བྱ་སྟེ། དེ་ལྟར་ཡང་རྒྱལ་པོ་དང་འཇིག་རྟེན་སྐྱོང་བ་རྣམས་དང་སེམས་ཅན་ཐམས་ཅད་དང་གང་ལ་མངོན་པར་འདོད་པ་རྣམས་ཀྱི་ཡང་སོ་སོར་སྲེག་བླུགས་ལན་གསུམ་བྱ་ཞིང་ཆོ་ག་བཞིན་དུ་ཡོན་ཡང་དབུལ་དུ་གཞུག་པར་བྱའོ་ཞེས་གསུངས་སོ། །དེའི་རྗེས་སུ་ཞལ་བསིལ་ཕུལ་ནས་བསང་གཏོར་བྱ་ཞིང་ཡང་དག་པར་མཆོད་དེ་མཆོད་ཡོན་ཕུལ་ལ་བཟོད་པར་གསོལ་ཞིང་མངོན་པར་འདོད་པའི་དངོས་གྲུབ་ཞུས་ནས་
ཨོཾ་བཛྲ་སཏྭ་ཨཱཿ་ཞེས་བརྗོད་པས་སྔ་མ་བཞིན་དུ་གཤེགས་པར་ཡང་དག་པར་བསྐུལ་ལ། ཨོཾ་མུཿ་ཞེས་བརྗོད་ཅིང་ཆོ་ག་བཞིན་དུ་གཤེགས་སུ་གསོལ་བར་བྱའོ། །དེ་ལྟར་ཉི་མ་རེ་རེ་ཞིང་ངམ། བཤད་པའི་དུས་སམ། ཐུན་གསུམ་མ་མ་ཐུན་བཞིར་བྱའོ། །སོར་མོ་ཡང་དག་པར་བརྐྱང་ཞིང་སྦྱར་བས་དེ་ནས་འོ་མ་དང་འབྲས་མ་ཆགས་པ་དང༌། མར་དང་སྦྲང་རྩི་དན་ཀ་ར་རྣམས་དགང་གཟར་དང་བླུགས་གཟར་གྱིས་བླུགས་ཤིང་དེ་དག་མེད་ན་ཨི་པྤ་ལའི་འདབ་མ་འམ་སེར་མོ་ཡང་དག་པར་བརྐྱང་ཞིང་སྦྱར་བས་མན་རྗེའི་སྟེང་དུ་གནས་པའི་ཟངས་ལ་སོགས་པར་ཙཱ་རུའི་བཟའ་བ་བླུགས་ལ་ལས་དང་རྗེས་སུ་མཐུན་པའི་དྲིས་བྱུགས་ཏེ་མགུལ་པར་མེ་ཏོག་གི་ཕྲེང་བ་བཅིངས་ནས་གཡོན་པའི་དྲིལ་བུ་དང་ལྷན་ཅིག་ཕྲེང་བ་བཟུང་ལ་གཡས་པའི་བགྲང་ཕྲེང་དང་རྡོ་རྗེ་ཡོངས་སུ་གྱུར་པ་ལས་བདུད་རྩིར་བྱས་པར་བསྒོམ་ཞིང་སྔགས་བཟླས་པར་བྱའོ། །བདུད་རྩིའི་རང་བཞིན་དུ་འོ་ཐུག་རྫོགས་པར་བྱས་ནས་ཐབ་ཁུང་གི་མེ་ལ་ཇི་ལྟ་བ་བཞིན་དུ་རང་ཉིད་རྣལ་འབྱོར་ལ་མཉམ་པར་བཞག་པས་ལྷ་དང་འཇིག་རྟེན་སྐྱོང་བ་དང་བདག་ཉིད་དང་སྦྱིན་བདག་རྣམས་ཀྱང་ཚིམ་པར་བྱ་སྟེ། འདི་ནི་དེ་བཞིན་གཤེགས་པ་ཡི། །ལྷག་མའོ་སྡིག་པ་ཉམས་བྱེད་ཟོ། །ཞེས་སློབ་དཔོན་གྱིས་བརྗོད་ཅིང་ལྷག་མ་དོན་དུ་གཉེར་བ་རྣམས་ལ་ཡང་བགོ་བཤའ་བྱའོ། །མེ་གཞིལ་བ་ནི་ཞི་བ་ལ། །འོ་མའོ་རྒྱས་པ་བསྒྲུབ་པ་ལ། །སེར་པོའི་ཆུ་ཡིས་དབང་དྲག་ལ། །འོ་མ་དམར་དང་ནག་པོས་སོ། །ཞེས་པ་ལྷ་མཉེས་པར་བྱ་བའི་ཆེད་དུ་ཕྱི་རོལ་གྱི་སྦྱིན་སྲེག་གི་ཆོ་གའོ།། །།འདི་རྣམས་ཐམས་ཅད་ཆད་པ་དང་ལྷག་པ་མེད་པར་ཡིད་ཀྱིས་བསྒོམ་པར་བྱས་ན་ངེས་པར་མངོན་པར་འདོད་པ་རྣམས་རྫོགས་པར་འགྱུར་རོ་ཞེས་པས། ཕྱི་རོལ་གྱི་དངོས་པོ་རྣམས་ལ་ལྟོས་པ་མེད་པར་ནི་ཡིད་ཀྱིས་སྦྱིན་སྲེག་གོ །རང་གི་འདོད་པའི་ལྷའི་རྣལ་འབྱོར་དང་ལྡན་པས་དེའི་ངོ་བོའམ། རྡོ་རྗེ་སེམས་དཔའི་གཟུགས་སམ་མ་རིམ་པ་ཇི་ལྟ་བ་བཞིན་དུ་རང་རང་གི་རང་བཞིན་རྣམ་པར་དག་པ་རྣམ་པར་སྣང་མཛད་ལ་སོགས་པའི་ངོ་བོས་གཟུགས་ལ་སོགས་པའི་འདོད་པ་ལྔ་ཇི་ལྟར་རྙེད་པ་ཐེ་ཚོམ་མེད་པར་ལོངས་སྤྱོད་པར་བྱ་སྟེ། ཟ་བའི་དུས་སུ་ནི་རང་གི་བཟའ་བ་ཐམས་ཅད་མཉམ་
པ་ཉིད་དུ་རྣམ་པར་དག་པའི་བདུད་རྩིར་བྱས་ནས་ལྟེ་བའི་ཐབ་ཁུང་གི་མེས་འཁྱུད་ཅིང་སྙིང་གར་གནས་པའི་རྣག་གི་འདོད་པའི་ལྷའི་འཁོར་ལོ་ལག་པའི་དགང་གཟར་ལ་སོགས་པས་ཆོ་ག་བཞིན་དུ་ཡང་དག་པར་མཉེས་པར་བྱའོ་ཞེས་པ་ཕྱིའི་རྫས་ཀྱིས་ནང་གི་སྦྱིན་སྲེག་གི་ཆོ་གའོ།། །།དེ་ནས་ཆོ་ག་ཇི་ལྟ་བ་བཞིན་དུ་ཞི་བ་དང་རྒྱས་པའི་སྦྱིན་སྲེག་བྱས་ཏེ་རང་ཉིད་ཀྱིས་དཀྱིལ་འཁོར་ཡང་དག་པར་མཆོད་ནས་ཐམས་ཅད་དུ་ཇི་ལྟར་ནུས་པས་དེ་བཞིན་གཤེགས་པ་ལ་སོགས་པ་རྣམས་ལ་མཆོད་པ་གྱིས་ཤིག་ཅེས་སློབ་མ་ལ་སོགས་པ་རྣམས་མཆོད་པ་བྱེད་དུ་བཅུག་ལ་དེར་ཞུགས་པ་རྣམས་ཀྱང་དམ་ཚིག་གི་ཀུན་དུ་སྤྱོད་པས་ཚིམ་པར་བྱའོ། །དེ་ལ་འདི་ནི་དམ་ཚིག་གི་ཆོ་ག་སྟེ། དང་པོར་རྡོ་རྗེ་སེམས་དཔའ་དང༌། ཆོས་སྟོན་དེ་བཞིན་དཔའ་བོ་དང༌། །དཔའ་མོའི་དབང་ཕྱུག་ལ་བཏུད་ནས། །ཚོགས་ཀྱི་སྟོན་མོ་བདག་གིས་བཤད། །སྟོན་མོ་དེ་བཞིན་སྟོན་མོ་ཆེ། །ཚོགས་ཀྱི་འཁོར་ལོ་འཁོར་ལོ་ཆེ། །མཚན་མོའི་འཁོར་ལོ་མཚན་མོར་བཤད། །དེ་བཞིན་ཕྱོགས་ཕྲེང་འཁོར་ལོའོ། །དགེ་འདུན་སྟོན་མོ་སྟོན་མོ་ཆེ། །གཎྜཱི་བརྡུངས་པ་སྟོན་མོ་ཆེ། །ཚོགས་པ་ལྷན་ཅིག་འཁོར་ལོ་སྟེ། །དེ་བས་ལྷག་པ་འཁོར་ལོ་ཆེ། །ཉིན་རེའམ་ཟླ་བ་སོ་སོ་འམ། །དེ་བཞིན་དུ་ནི་ལོ་རེའམ། །བརྒྱད་དང་བཅུ་བཞི་གཞན་ཡང་འདིར། །རྒྱས་པ་ཡི་ནི་ཚེས་རྣམས་ལ། །མཆོད་རྟེན་རྣམས་ནི་ངེས་པར་ཡ། །དམ་ཚིག་བསྲུང་བའི་དོན་དུ་སྟེ། །འདུས་སྟོན་མཚན་མོའི་འཁོར་ལོ་ཡང༌། །བྱང་ཆུབ་འགྲུབ་པའི་ཆེད་དུ་བྱ། །བཟའ་བཅའ་དེ་བཞིན་འགམ་བྱ་དང༌། །གཞི་བ་དང་བལྡག་བ་མྱང་བྱ་རྣམས། །བཏུང་བ་ལ་སོགས་མཉམ་ལྡན་པའི། །རོ་དྲུག་ལྡན་པ་སྟོན་མོར་འདོད། །ཡོ་བྱད་ཐམས་ཅད་བསྒྲུབས་ནས་ནི། །ཁྱད་པར་དུས་ལ་སྤྱན་དྲང་བྱ། །དང་པོ་མཎྜལ་བྱས་ནས་ནི། །མེ་ཏོག་རྣམས་དག་སོ་རྩི་སྤྱན། །སངས་རྒྱས་དགེ་འདུན་ཡོ་བྱད་རྣམས། །སྔ་མོར་ཉེ་བར་དབུལ་བྱ་སྟེ། །གླུ་གར་དེ་བཞིན་རོལ་མོ་ཡིས། །དེ་བཞིན་གཤེགས་པ་བསྙེན་བཀུར་བྱ། །དེར་ཡང་སྨོན་ལམ་བྱས་ནས་ནི། །དགེ་འདུན་སྟོན་མོ་བརྩམ་པར་བྱ། །བ་བྱུང་བྱུགས་པའི་ས་ཡི་ཆར། །མེ་ཏོག་དེ་བཞིན་བདུག་སྤོས་ལྡན། །གྱོ་མོ་གསེག་མ་
རྣམས་བསལ་ནས། །གདན་རྣམས་རབ་ཏུ་བརྟག་པར་བྱ། །སངས་རྒྱས་རྗེས་སུ་རིམ་པ་ཡིས། །ཀུན་ལ་ཕྱག་སོགས་བྱས་ནས་ཀྱང༌། །ཇི་བཞིན་གདན་ལ་ཡང་དག་འདུག །ལུས་ངག་སེམས་ནི་ཡང་དག་བསྡམ། །ནག་པོ་ཆེན་པོར་གཏོར་མ་སྦྱིན། །དེ་བཞིན་དུ་ཡང་ནོར་བུའི་ཟས། །ཁང་པར་ཟ་བར་འདོད་རྣམས་ཀྱང༌། །དེ་ལྟར་འདོད་བཞིན་ཡང་དག་གཞག །སོ་རྩི་དེ་བཞིན་སྣོད་རྣམས་དང༌། །འདག་ཆལ་དང་ནི་སོ་ཤིང་དང༌། །དྲི་ཡི་ཆུ་རྣམས་དེ་བཞིན་སྦྱིན། །སྦྱིན་པ་འདུས་པས་ལོངས་སྤྱོད་དེ། །སླར་ཡང་ཞལ་བསིལ་ལ་སོགས་དབུལ། །འདུས་པ་རྣམས་ལ་ཡོན་ཕུལ་ཏེ། །དེ་ཀུན་བསོད་ནམས་ཐུན་མོང་དུ། །བློ་ལྡན་མཁས་པ་རྣམས་ཀྱིས་བྱ། །ཕྱག་འཚལ་བཟོད་པར་གསོལ་ནས་ནི། །དགེ་འདུན་སྟོན་མོ་གཤེགས་སུ་གསོལ། །ཞེས་པ་ནི་སྟོན་མོའོ།། །།ཆོས་སྒྲོགས་ཉིད་དང་དེ་བཞིན་དུ། །གནས་བརྟན་ཉེ་བར་སྤྱན་འདྲེན་དང༌། །ཁྱད་པར་དུས་ཀྱི་སྤྱན་འདྲེན་ལའང༌། །གཎྜཱི་ཀུན་ནས་བརྡུང་བར་བྱ། །སྔར་བཞིན་བདེ་གཤེགས་སྤྱན་དྲངས་ཏེ། །བླ་ན་མེད་པའི་མཆོད་པ་དང༌། །ཉེར་སྤྱོད་ལྔ་ཡི་མཆོད་པ་རྣམས། །དེ་ཉིད་ཡིད་ཀྱིས་མཆོད་པར་བྱ། །ལྷག་མའི་རྡོ་རྗེ་འཁོར་ལོ་དང་བཅས་པ་སྤྱན་དྲངས་ཏེ་ཞི་བ་ལ་སོགས་པའི་གཟུགས་ཀྱིས་བཏུང་བའི་དོན་དུ་ལག་པ་གཉིས་རབ་ཏུ་བརྐྱང་བར་བལྟས་ལ་འཁོར་ལོ་བསྐོར་བའི་མདུན་དུ་བཟླས་པའི་ཁྱད་པར་རྣམས་བླངས་ནས་དེར་གཞུག་པར་བྱ་ཞིང་དམ་ཚིག་གི་སྤོས་ལ་སོགས་པ་སྦྱིན་པར་བྱའོ། །དེ་ནས་སྔགས་བརྗོད་ཅིང་ལག་པ་གཉིས་ཁ་དང་ཉེ་བར་རབ་ཏུ་བརྐྱང་སྟེ། ཁ་བདུད་རྩིས་གང་བས་གཏོར་ན་ལྷག་མའི་རྡོ་རྗེ་འཁོར་དང་བཅས་པ་དེས་མགུ་བར་འགྱུར་རོ། །འཁོར་དང་བཅས་པ་རྨི་ལམ་དུ་མཐོང་ཞིང་བྱ་བ་ཡང་བྱེད་པར་འགྱུར་རོ། །དེ་ལ་སྔགས་ནི་འདི་ཡིན་ཏེ། །ཨོཾ་ཀུ་རུ་ཀུ་རུ་བཏྟ་ལི་བཏྟ་ལི་མ་ཧཱ་བཏྟ་ལི་སིདྡྷི་མུ་ཁེ། སྨ་ཤཱ་ན་བཱ་སི་ནི་པྲེ་ཏ་མུ་ཁེ། སྨ་ཤཱ་ན་བཱ་སི་ནི་པྲེ་ཏ་མུ་ཁེ། ཙཎྜ་ཀཱ་ར་ལི་རུ་དྷི་ར་པྲྀ་ཡེ། ས་མ་ཡཱ་རཀྵི། ཡོ་གཱཾ་བ་རི། ཀི་ལ་ཀི་ལ། རཱ་བེ་པི་ཏྲི་བ་ན་མ་དྷྱེར། བྷུ་ཛ་ཧ་བྷ་ཀ་ཁ་ཧ། ས་ཧ་ག་ན་རཱུ་དྷེ། དྷཱུ་མཱཾ་ག་རི། ཙཎྜ་ཀཱ་ར་ལི། ཏིཥྛ་སྭི་ཀུ་རུ་ཀུ་རུ་ཧཱུཾ། གྲྀཧྞ་གྲྀཧྞ་སརྦ་དུཥྚཱ་ན་བྷཀྵ་བྷཀྵ་ཧོཿཔཻཾ་ཕཻཾ་ཆེ་གེ་མོའི་སརྦ་བིགྷྣཱ་ན་ཤཱིནྟཾ་ཀུ་རུ་ཀུ་རུ་ཕཊ་སྭཱ་ཧཱ། ཞེས་པ་ནི་ཐམས་ཅད་དུ་ལྷག་
མའི་གཏོར་མའི་སྔགས་སོ།། །།དེ་ནས་དེར་ནི་དྲི་བཟངས་ཆུ། །ཞལ་བསིལ་རྣམས་ནི་སྦྱིན་པར་བྱ། །དྲི་དང་མེ་ཏོག་སོ་རྩི་རྣམས། །བྱིན་ནས་སློབ་དཔོན་སྔོན་འགྲོ་བས། །སྦྱིན་པའི་ཚིགས་སུ་བཅད་པ་བརྗོད། །དེ་ཡི་འབྲས་བུ་ཡོངས་སུ་བསྔོ། །ནུས་པ་ཡིས་ནི་ཡོན་ཕུལ་ནས། །ཚོགས་ཀྱི་འཁོར་ལོ་གཤེགས་སུ་གསོལ། །དེ་ལ་སྦྱིན་པའི་ཚིགས་སུ་བཅད་པ་ནི། དུང་འགྲོའི་སྐྱེ་གནས་རྣམས་ལ་ཡོན་ནི་བརྒྱ་འགྱུར་སྡིག་པ་ཅན་གྱི་མི་ལའང་སྟོང་ཕྲག་སྟེ། །ཚུལ་ཁྲིམས་ལྡན་པ་རྣམས་ལ་སྟོང་ཕྲག་བརྒྱ་འགྱུར་དུ་ནི་གསུང་གི་དབང་ཕྱུག་གིས་རབ་གསུངས། །ཕྱི་རོལ་འདོད་པ་རྣམས་ལ་ཆགས་བྲལ་ཉེ་བར་གནས་པ་ལ་ནི་བྱེ་བ་བརྒྱ་ཕྲག་བརྒྱ། །ལམ་ལ་གནས་པ་རྣམས་ལ་སླར་ཡང་ཚད་མེད་འབྲས་བུ་སྟེར་བར་ཡོན་ལས་ཡང་དག་འབྱུང༌། །བསོད་ནམས་འདི་ཡིས་ཐམས་ཅད་གཟིགས་པ་ཡི། །གོ་འཕང་ཐོབ་ནས་སྐྱོན་གྱི་དགྲ་བཅོམ་སྟེ། །རྒ་ནང་འཆི་བའི་རླབས་ཆེན་འཁྲུགས་པ་ཡི། །སྲིད་པའི་མཚོ་ལས་འགྲོ་བ་འདོན་པར་ཤོག །ཅེས་པས་བསོད་ནམས་ཡོངས་སུ་བསྔོ་བར་བྱའོ་ཞེས་པ་ནི་ཚོགས་ཀྱི་འཁོར་ལོའོ།། །།འདི་ཉིད་ཕྱི་རོལ་དུ་སོང་ནས། །དུར་ཁྲོད་དུ་ནི་བྱེད་པ་ན། །སྐལ་བ་དང་ལྡན་སློབ་དཔོན་གྱིས། །འཁོར་ལོ་ཆེན་པོར་དེ་བརྗོད་བྱ། །མེ་ཏོག་བདུག་སྤོས་སྣང་གསལ་དང༌། །དེ་བཞིན་དྲི་དང་ཕྲེང་བ་སྤོས། །ཇི་ལྟར་ཡོད་བཞིན་བཏུང་བ་དང༌། །བཟའ་བ་རྣམས་ཀྱང་རིག་པར་བྱ། །དབུས་སུ་བཏུང་བ་ཡི་ནི་སྣོད། །དེར་ནི་གཡོ་བ་མེད་པར་གཞག །ལྷག་མའི་འཁོར་ལོ་སྤྱན་དྲངས་ལ། །བསྙེན་བཀུར་བྱས་ཏེ་རབ་ཏུ་གཞག །དེ་ཡི་སྟེང་དུ་ཐོད་པ་ནི། །མཚན་ཉིད་དང་ལྡན་དགོད་པར་བྱ། །མེ་ཏོག་སྤོས་སོགས་མཆོད་པ་རྣམས། །ལས་ཀྱི་རྡོ་རྗེ་ཅན་གྱིས་དབུལ། །བདུད་རྩི་ལྔ་དང་ཤ་ལྔ་རྣམས། །སྔགས་ཀྱི་བྱིན་གྱིས་བརླབས་ནས་སླར། །ཡོ་བྱད་ཐམས་ཅད་རབ་ཏུ་གཞུག །ལྷ་ཡི་རྣམ་པའི་རྣལ་འབྱོར་གྱིས། །སྣ་ཚོགས་བཤེས་གཉེན་སོགས་ཐོད་པར། །བཏུང་བའི་སྣོད་རྣམས་རབ་ཏུ་བརྟག །བཟའ་དང་བཏུང་བ་ལ་སོགས་ཀུན། །ཇི་ལྟར་སྔར་གྱི་དེ་བཞིན་འདིར། །སྔགས་ཀྱི་ཁུ་བའི་རང་བཞིན་ཕྱིར། །སྔགས་ཀྱི་བཏུང་བ་ཞེས་པར་
དྲན། །སྔགས་ཀྱི་ལྷ་ཡི་རྣལ་འབྱོར་བདག །སྔགས་ཀྱི་བཏུང་བ་ཡང་དག་སྤྱོད། །ཚོགས་ཀྱི་འཁོར་ལོ་གཤེགས་གསོལ་བྱ། །གོ་ཡུ་ལ་སོགས་འབྲས་བུ་དབུལ། །བླ་མར་གུས་པས་ཕྱག་བྱས་ནས། །གནས་ཇི་ལྟ་བར་བྱོན་པར་གསོལ། །ཞེས་པ་ནི་འཁོར་ལོ་ཆེན་པོའོ། །། །རི་ཡི་ཕུག་དང་སྨན་ལྗོངས་དང༌། །རྒྱ་མཚོའི་འགྲམ་དང་སྐྱེད་མོས་ཚལ། །ནགས་ཚལ་ངག་གམ་རྫིང་བུར་ཡང༌། །མཚན་མོའི་འཁོར་ལོ་ཡང་དག་བརྩམ། །བདུད་རྩི་ལྔ་དང་ཤ་ལྔ་རྣམས། །སངས་རྒྱས་ལྔ་ཡི་རང་བཞིན་དགེ །སྟན་ལྔ་ལ་ནི་མཉམ་པར་འདུག །རིགས་ལྔ་དག་ཏུ་རྣམ་པར་གནས། བརྡ་དང་དགོངས་པར་ནན་ཏན་བྱ། །རྣལ་འབྱོར་པ་ཉིད་འོངས་གྱུར་ན། །དེ་ལ་སྔོན་དུ་གདན་བྱིན་ཏེ། །མཚན་མོའི་འཁོར་ལོ་ཀུན་ནས་བརྩམ། །སྒོ་བཞི་རྣམས་སུ་ཁྲོ་བོ་བཞི། །གནོད་མཛེས་གཙུག་ཏོར་ལས་བྱེད་པ། །གཟུགས་ཀྱི་རྡོ་རྗེ་མ་ལ་སོགས། །རྣལ་འབྱོར་མ་རྣམས་རང་སར་དགོད། །སློབ་དཔོན་མི་ཡི་པགས་པ་ལ། །བ་ལང་སོགས་ལ་གཞན་རྣམས་ཀྱང༌། །མཚན་མོ་དག་པའི་བློ་ཡིས་ནི། །སངས་རྒྱས་ལྔ་རྣམས་མཆོད་པར་བྱ། །ཁྲི་ལ་སོགས་པར་མཉམ་གནས་པའི། །དཔའ་བོ་དཔའ་མོའི་དབང་ཕྱུག་མཉམ། །དེ་ནས་འཁོར་ལོ་བྱིན་གྱིས་བརླབ། །མཉམ་པར་སྙིང་རྗེ་བརྟན་པས་སོ། །ཚིགས་བཅད་ལན་གསུམ་བརྗོད་པ་ཡིས། །སྟེང་དུ་མེ་ཏོག་སོགས་གཏོར་ཏེ། །དེ་ཚེ་ལྷ་རྣམས་སྤྱན་དྲང་བྱ། །ཡང་དང་ཡང་དུ་ཕྱག་རྒྱའོ། །མཚན་མོའི་འཁོར་ལོ་གསལ་བྱས་ནས། །ཡེ་ཤེས་འཁོར་ལོ་རབ་ཏུ་གཞུག །འཇམ་པའི་རྡོ་རྗེ་བདག་ཉིད་ཀྱི། །རྣལ་འབྱོར་པ་ཡི་དཀྱིལ་འཁོར་མཆོད། །མཆོད་ནས་རྣལ་འབྱོར་མ་འཁོར་ལོ། །ཇི་ལྟར་དགའ་བ་མི་སྤང་སྟེ། །གཡས་དང་གཡས་མིན་སྦྱོར་བ་ཡིས། །ཀུན་སྤྱོད་དེར་ནི་བརྟག་པར་བྱ། །རྣལ་འབྱོར་རྣལ་འབྱོར་མ་རྒྱུད་དུ། །གང་གསུངས་ཚོགས་ཀྱི་འདུས་པ་རྣམས། །ཚོགས་དེ་མཆོད་ཅིང་དམ་ཚིག་གི །ཀུན་སྤྱོད་རིག་པའི་བླ་མས་སོ། །རྣམ་པ་ལྔ་ནི་རྣམ་དག་པའི། །དེ་བཞིན་གཤེགས་པ་རྣམས་མཆོད་པར་བྱ། །སྙིང་རྗེར་ཞུགས་པའི་རྣལ་འབྱོར་པས། །སེམས་ཅན་དོན་བྱེད་ངེས་པར་རོ། །རྡོ་རྗེ་པདྨར་རང་
གནས་པས། །བྱང་ཆུབ་སེམས་ནི་སྤྲོ་མི་བྱ། །དེར་ནི་དགའ་བ་སོགས་དབྱེ་བའི། །དེ་བཞིན་ཉིད་ལས་དེ་བཞིན་རྟོགས། །བསམ་པ་ཐམས་ཅད་ཡོངས་སྤངས་ཏེ། །ལྷ་ཡི་གཟུགས་སུ་སེམས་པའམ། །རྣམ་པར་མི་རྟོག་རང་བཞིན་ལས། །དེར་ནི་རྣལ་འབྱོར་པས་གནས་བྱ། །མཚན་མོའི་འཁོར་ལོའི་ཆོ་ག་ལས། །འགའ་ཡང་དོར་བ་ཉིད་མིན་ཏེ། །མ་མ་སྲིང་མོ་ཉིད་དང་ནི། །བུ་མོ་དང་ནི་ཚ་མོ་དང༌། །བདག་ཅན་དེ་བཞིན་ཆུང་མ་དང༌། །སྒྱུག་མོ་དང་ནི་དེ་བཞིན་ཡང༌། །ཕ་ཡི་སྲིད་མོ་མ་རྣམས་ཏེ། །ཤེས་རབ་བརྒྱད་རྣམས་གྲུབ་མཆོག་སྟེར། །དེ་རྣམས་མཆོད་པའི་བྱ་བ་ནི། །བོ་ལ་ཀཀྐོ་ལ་སྦྱར་ནས། །སངས་རྒྱས་ཉིད་ནི་སངས་རྒྱས་ཀུན། །རང་གིས་ཡང་ཡང་རྟོགས་པར་བྱ། །སྔགས་ཀྱི་བཟླས་མེད་དཀའ་ཐུབ་མེད་ཅིང་སྦྱིན་སྲེག་མེད། །དཀྱིལ་འཁོར་ཅན་ཡང་མེད་ཅིང་དཀྱིལ་འཁོར་ཡང་ནི་མེད། །དེ་ནི་སྔགས་བཟླས་དཀའ་ཐུབ་དེ་སྦྱིན་སྲེག ། དེ་ནི་དཀྱིལ་འཁོར་ཅན་དང་དཀྱིལ་འཁོར་ཡང༌། །མདོར་བསྡུས་ནས་ནི་སེམས་ནི་འདུས་པའི་གཟུགས་ཅན་ཉིད། །ཡིད་ནི་བརྟན་ནམ་གཡོ་འམ་ཅི། །རང་གི་སེམས་ལ་སོ་སོར་བརྟག །གང་བཤད་འཇིགས་པའི་གཟུགས་ཅན་གྱི། །སྤྱོད་པ་ལོངས་སྤྱོད་ཕྱི་རམ་གསུངས། །དེ་ལྟའི་ཆོ་གས་མཚན་མོ་ཡི། །འཁོར་ལོར་བློ་བཟང་དབང་བསྐུར་སླར། །བསྒོམས་པའི་སྟོབས་ཀྱིས་དངོས་གྲུབ་ནི། །འདི་ཉིད་ཀྱི་ནི་སྲིད་པར་སྐྱེ། །བསྒོམ་པ་ལ་སོགས་དེ་བཞིན་འདིར། །ཉུང་བའམ་བྱས་པ་མེད་ན་ཡང༌། །གལ་ཏེ་ལྟུང་བ་མེད་གྱུར་ན། །བདུན་པར་དེ་ཡི་དངོས་གྲུབ་འགྱུར། །ཨེ་མ་ཐབས་དང་ནུས་པ་ཡིས། །ཐེག་པ་ཆེན་པོར་ལེགས་འོངས་ནས། །འདོད་ལྡན་མ་ལ་བརྟན་འཁྱུད་དེ། །འདོད་པའི་ལྷ་ནི་བསྟེན་པར་བྱ། །སྔར་བཞིན་གཏོར་མ་མཆོད་པ་སོགས། །བྱས་ནས་འཁོར་ལོ་གཤེགས་སུ་གསོལ། །འཁོར་ལོའི་དབང་པོའི་ཕྱག་བྱས་ནས། །ཇི་ལྟར་བདེ་བར་གནས་པར་བྱ། །ཞེས་པ་ནི་མཚན་མོའི་འཁོར་ལོའོ།། །།འཐུང་གཅོད་ཀྱི་ནི་དམ་ཚིག་བྱ། །དེ་ཡང་གྲོང་གི་དབུས་རྣམས་སམ། །དཀྱིལ་འཁོར་ཁང་པའི་ཕྱི་རོལ་དུའང༌། །མཁས་པ་ས་ཕྱོགས་ཕྲེང་སྦྱིན་པར་བྱ། །གདོང་ནི་འགའ་ཡང་མི་བལྟ་སྟེ།།
ཡོངས་སུ་དྲི་ཉིད་འགའ་ཡང་མིན། །སྣ་ཚོགས་གཟུགས་ཀྱིས་སེམས་ཅན་རྣམས། །ངེས་པར་དེར་ནི་འོངས་གྱུར་ན། །བྱོན་ནས་བྱོན་ལ་ལེགས་ཤེས་བྱ། །འདབ་མའམ་སྣོད་རྣམས་རབ་ཏུ་བརྟག །གཟའ་བཏུང་ལ་སོགས་དེ་རྣམས་སྦྱིན། །ཐམས་ཅད་ཇི་ལྟར་འདོད་བཞིན་བྱ། །དང་པོ་བར་དང་མཐའ་རྣམས་སུ། །གཏོར་མ་གསུམ་ནི་མཁས་པས་སྦྱིན། །སོ་རྩི་དྲི་དང་མེ་ཏོག་སོགས། །ཕུལ་ནས་འཁོར་ལོ་གཤེགས་སུ་གསོལ། །ཞེས་པ་ནི་ཕྱོགས་ཕྲེང་འཁོར་ལོའོ།། །།དམ་ཚིག་གང་ལ་ཐམས་ཅད་རྣལ་འབྱོར་མར་གྱུར་ཅིང་བདེ་བའི་དོན་དུ་འཁོར་ལོའི་དབང་ཕྱུག་མའི་གཡོན་ཕྱོགས་སུ་ཐབས་གཅིག་ཡོད་པར་གྱུར་ན་ནི་དཔའ་མོའི་དབང་ཕྱུག་མའི་འཁོར་ལོའོ། །གང་དུ་ཐམས་ཅད་དཔའ་བོར་གྱུར་ཅིང་བདེ་བའི་དོན་དུ་འཁོར་ལོའི་དབང་ཕྱུག་གི་གཡོན་དུ་རྣལ་འབྱོར་མ་གཅིག་ཡོད་པར་གྱུར་པ་ནི་དཔའ་བོའི་འཁོར་ལོའོ། །འཁོར་ལོ་འདི་གཉིས་ཉིན་པར་ཡང་དགའ་བ་ན་བུག་པ་མེད་པའི་ཁང་པར་ཐུན་གཉིས་ཡན་ཆད་བྱ་བར་ཤེས་པར་བྱའོ། །དེའི་ཕྱིར་དཔའ་བོ་དང་དཔའ་མོའི་དབང་ཕྱུག་གི་འཁོར་ལོ་དག་ལ་གལ་ཏེ་ཤེས་རབ་གཅིག་དང་ཐབས་གཅིག་ཀྱང་མེད་པར་གྱུར་ན་དེའི་ཚེ་སྦྱིན་པའི་བདག་པོའི་བསོད་ནམས་ལས་བཟློག་པར་འགྱུར་རོ། །ཤེས་རབ་ཐབས་ཀྱི་བདེ་བ་དག །མེད་ན་འཁོར་ལོ་ཐབས་མི་འགྱུར། །གང་ཞིག་ཤེས་རབ་ཀྱིས་དམན་པའི། །འཁོར་ལོ་དེ་ནི་རྩོད་མེད་དང༌། །ལྷན་ཅིག་པ་ཡི་འཁོར་ལོའོ། །ཞེས་པ་འདི་བཅོམ་ལྡན་འདས་ཀྱི་གསུང་ངོ༌། །ཚོགས་ཀྱི་འཁོར་ལོའི་ཆོ་གའོ།། །།དེ་གསུངས་པ་ཚོགས་ཀྱི་འཁོར་ལོའི་ཆོ་གས་དཀྱིལ་འཁོར་གྱི་ཁང་པར་བཟའ་བ་དང་བཏུང་བ་ལ་སོགས་པ་རྣམས་འཁོར་ལོ་ལ་ཕུལ་ཏེ། །དེར་ཞུགས་པ་རྣམས་ཡང་དག་པར་ཚིམ་པར་བྱའོ། །དེ་རྣམ་དང་ལྷན་ཅིག་མཚན་མོ་མི་ཉལ་བར་གར་དང་གླུ་ལ་སོགས་པ་དང་བྱང་ཆུབ་སེམས་ཀྱི་རྟོག་པས་ཡང་དག་པར་མཆོད་ནས་ཁྱེད་རྣམས་ཀྱིས་འཇུག་པ་འདི་སུ་ལའང་སྨྲ་བར་མི་བྱའོ་ཞེས་བརྗོད་པར་བྱའོ། །དེ་ནས་སློབ་མ་རྣམས་གཞག་སྟེ་ཕྱི་རོལ་དུ་ཕྱོགས་ཀྱི་གཏོར་མ་དང་མཆོད་པ་ལ་སོགས་པ་བྱས་ལ་ནང་དུ་ཞུགས་ནས་འཁོར་ལོ་ལ་ཕྱག་འཚལ་ཏེ། མཆོད་ཡོན་ལ་སོགས་པ་འཁོར་ལོའི་དབང་པོ་ལ་ཕུལ་ནས་དགེ་
བ་རྣམས་ཡོངས་སུ་བསྡོས་ཏེ། དཀྱིལ་འཁོར་ལ་ལན་གསུམ་གཡས་སྐོར་བྱས་ལ། བཅོམ་ལྡན་འདས་ལ་མངོན་པར་ཕྱོགས་པས་ཤར་སྒོར་འདུག་སྟེ་ཡི་གེ་བརྒྱ་པ་ལན་གསུམ་བརྗོད་ནས་མ་རྙེད་བ་ཞེས་པ་ལ་སོགས་པས་བཟོད་པར་གསོལ་ཞིང༌། ཁྱེད་ཀྱིས་སེམས་ཅན་དོན་ཀུན་མཛད། །ཅེས་པ་ལ་སོགས་པ་དང༌། ཨོཾ་ཨཱཿཧཱུཾ་བཛྲ་མུཿཞེས་པས་ཡེ་ཤེས་ཀྱི་དཀྱིལ་འཁོར་གཤེགས་སུ་གསོལ་ནས། རང་གི་སྤྲུལ་པའི་དཀྱིལ་འཁོར་བདག་ཉིད་ལ་བསྟིམ་སྟེ། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨ་དྱ་ནུཏྤནྣ་ཏྲྭཱ་ཏ་ཨོཾ་ཨཱཿཧཱུཾ་ཕཊ་སྭཱ་ཧཱ། ཨོཾ་ཨཱཿཧཱུཾ་མུཿཞེས་འདོན་ཅིང་ཆོས་ཐམས་ཅད་སྐྱེ་བ་མེད་པར་མོས་པས་དྲིལ་བུ་དཀྲོལ་ཞིང་ལག་པར་གནས་པའི་རྡོ་རྗེས་ཤར་གྱི་སྒོ་ནས་བརྩམས་ཏེ་ཚངས་པའི་ཐིག་གི་ལམ་ནས་གཙོ་བོའི་གནས་ཀྱི་བར་དུ་དབྱེ་ཞིང་མགོ་བོ་ལ་རྡུལ་ཚོན་ཅུང་ཟད་བླུགས་ནས་པདྨ་ལ་སོགས་པ་དབྱི་བར་བྱའོ། །དེ་ནས་སྒོ་རྣམས་དང་ཟུར་རྣམས་ཀྱང་ལག་པ་ན་གནས་པའི་རྡོ་རྗེའི་རྩེ་མོས་མངོན་པར་གཞིག་པར་བྱའོ། །དེའི་རྗེས་སུ་ཨོཾ་བཛྲ་ཀཱི་ལ་ཨུཏྐཱི་ལ་ཡ་སརྦ་ཀཱི་ལན་བཛྲ་དྷར་ཨཱ་ཛྙཱ་ཡ་ཧཱུཾ་ཧཱུཾ་ཧཱུཾ་ཕཊ་ཧོཿཞེས་པ་ཧཱུཾ་བཞི་པས་གཡོན་བརྐྱང་དང་སྐམ་པའི་ཕྱག་རྒྱས་ཕུར་བུ་རྣམས་བཏོན་ལ། ཨོཾ་རུ་རུ་སྥུ་རུ་ཛྭ་ལ་ཏིཥྛསིདྡྷི་ལོ་ཙ་ནེ་སརྦ་ཨརྠ་སཱ་དྷ་ནེ་སྭཱ་ཧཱ། ཞེས་པ་བརྒྱ་རྩ་བརྒྱད་བཟླས་པའི་འོ་མས་བཀྲུ་བར་བྱའོ། །ཕུར་བུའི་ལྷ་རྣམས་ཀྱང་གཤེགས་སུ་གསོལ་ཞིང་ཕུར་བུའི་ཁུང་བུ་རྣམས་ཀྱང་དགང་བར་བྱའོ། །ཞི་བ་ལ་སོགས་པ་དོན་དུ་གཉེར་བ་རྣམས་ལ་རྡུལ་ཚོན་ཅུང་ཟད་སྦྱིན་པར་བྱའོ། །དེ་བཞིན་དཀྱིལ་འཁོར་ཁང་པ་ཉིད་དུ་སྐྱེ་བོ་མེད་པར་བྱས་ནས་རྡུལ་ཚོན་ཡང་དག་བསྡུས། །ཕྱི་ནས་བ་ལས་བྱུང་བ་རྣམས་ཀྱིས་འདི་ལྟར་མཐའ་དག་འཁོར་ལོ་ལ་ནི་མཁས་པས་གཏོར། །དེ་ནས་བ་བྱུང་རྣམས་ཀྱིས་བྱུག་པ་རབ་ཏུ་བྱ་སྟེ་རི་མོ་རྣམས་ཀྱང་བྱུག་པར་བྱ། །མེ་ཏོག་རྣམས་ནི་ངེས་པར་དགྲམ་ཞིང་ཕྱག་བྱས་ནས་ནི་ས་ཡི་ལྷ་མོ་མཉེས་པར་བྱ། །ཕྱི་ནས་དཔལ་ལྡན་རྣམ་རྒྱལ་རྡུལ་ཚོན་རྣམས་ཀྱིས་རབ་ཏུ་བཀང་སྟེ་ཐབ་ཀྱི་ཐལ་བ་སོགས། །བགེགས་དགྲའི་བུམ་པར་དེ་བཞིན་ཉིད་དེ་ཆོ་གས་དམ་པའི་གོས་རྣམས་འདི་དག་མགྲིན་པ་ལའོ། །རྣལ་འབྱོར་མ་ཡིས་བཟུང་ནས་གླང་ཆེན་སྟེང་དུ་དེ་ལྟར་མཐོན་པོར་སྤྲོ་བས་ཁྱེར་ནས་ནི། །ཀླུ་ཡི་གཏོར་
མ་བྱས་ནས་ཆུ་ཀླུང་རྣམས་སམ་མཚོ་རྣམས་སུ་ནི་བླུགས་པར་བྱ། །ཆོ་ག་འདི་ནི་སྦྱིན་བདག་གིས་བྱིན་པའི་རས་ཀྱིས་བརྒྱན་པའི་རྣལ་འབྱོར་མ་རྣམས་ཀྱིས་བཟུང་ལ་འོད་ལི་ལ་གནས་པའི་སློབ་དཔོན་ནམ་སློབ་མས་དྲིལ་བུའི་སྒྲ་དག་བཀྲ་ཤིས་ཀྱི་གླུ་དང་རོལ་མོའི་སྒྲ་དང་གདུགས་དང་རྒྱལ་མཚན་དང་བ་དན་ལ་སོགས་པའི་མཆོད་པ་རྣམས་དང་ལྡན་པས་ཁྱེར་ནས་ཆུ་ཀླུང་ཆེན་པོ་དང་མཚོ་ཆེན་པོ་དང་ཆུ་ཟབ་མོའི་འགྲམ་ཏུ་འདུག་ལ་བ་བྱུང་གིས་བྱུགས་པའི་སའི་ཆར་དཀར་པོའི་དྲིས་མཎྜལ་བྱས་ཏེ། དེའི་དབུས་སུ་པདྨ་འདབ་མ་བརྒྱད་བྲིས་ཏེ། ལྟེ་བར་རྡོ་རྗེ་སེམས་དཔའ་དང་འདབ་མ་བརྒྱད་ལ་ཀླུ་རྣམས་སྔ་མ་བཞིན་དུ་མཆོད་ཅིང་ཀླུ་གཏོར་གྱི་སྔགས་ཀྱིས་འོ་ཐུག་གི་གཏོར་མ་ཕུལ་ནས་མཆོད་དེ་ཀླུ་རྣམས་ལ་བྱིན་གྱིས་བརླབས་པའི་རྡུལ་ཚོན་གཏོར་ནས་ཆུ་ལ་བསྐུར་བར་བྱའོ། །ཀླུ་རྣམས་ཀྱིས་བཀུར་སྟི་ཆེན་པོས་ས་འོག་གི་གཞི་ལ་ཁྱེར་བར་བསམ་པར་བྱའོ། །གང་རྡུལ་ཚོན་ཁྱེར་བའི་བུམ་པ་དེ་དག་ཆུས་བཀང་ནས་དེ་ཁོ་ན་ཉིད་དུ་ཁྱེར་ཏེ་དེ་དག་གིས་ཞི་བའི་དོན་དུ་དཀྱིལ་འཁོར་ཁང་པ་ལ་སོགས་པར་གཏོར་བར་བྱའོ། །ཕྱི་ནས་དེ་ཡི་ཆེན་པོའི་བསམ་པ་ཡིས་ནི་མཐའ་དག་གཉེན་དང་བཅས་པའི་རིགས་རྣམས་ཀྱིས། །སྤྲོ་བ་ཆེན་པོས་ཆོ་ག་བཞིན་དུ་གཞོན་ནུ་མ་ཡི་སྟོན་མོ་བདེ་བ་ཆེན་པོ་བྱ། །སྡུག་བསྔལ་ཅན་ལའང་འབྱོར་བའི་རྗེས་སུ་མཐུན་པའི་སྦྱིན་པ་དྲི་མེད་མཁས་པས་སྦྱིན་པར་བྱ། །དགེ་འདུན་རྣམས་ལ་ཡང་ནི་སྟོན་མི་གོས་དང་བཅས་ཤིང་ཡོན་དང་བཅས་པ་གུས་པས་སོ། །དེ་ལ་འདི་ནི་གཞོན་ནུ་མ་མཆོད་པའི་ཆོ་ག་སྟེ། གཞོན་ནུ་མ་རྣམས་ལྷ་མོའི་གཟུགས། །ཡང་དག་གནས་པ་ཆོ་གས་མཆོད། །དཀྱིལ་འཁོར་ཡང་དག་བྱས་ནས་ནི། །ས་དེར་ནུས་པས་སྤྱད་པར་བྱ། །དཀྱིལ་འཁོར་གང་དུ་ལྷ་མོ་ཇི་སྙད་ཡོད་པ་དེ་སྙེད་ཀྱི་གཞོན་ནུ་མ་རྣམས་ཉི་མ་སྔོན་མ་ལ་མཎྜལ་ལ་སོགས་པ་སྔོན་དུ་འགྲོ་བས་སྙན་གསན་དབབ་པར་བྱ་ཞིང༌། དེ་ནས་གཅིག་གམ་གཉིས་སམ་གསུམ་མམ་བཞི་ལ་སོགས་པ་སྦྱིན་བདག་གི་ནུས་པའི་དབང་གིས་མཆོད་པར་བྱའོ། །དེ་ཡང་རྡུལ་ཚོན་དོར་བའི་རྗེས་སུ་དྲི་བཟངས་ལ་སོགས་པས་ཁྲུས་བྱ་ཞིང་གོས་དམར་པོས་བརྒྱན་པར་བྱས་ནས་གུས་པ་དང་བཅས་ཏེ་སྤྱན་དྲངས་པ་རྣམས་བཅོམ་ལྡན་
འདས་མ་ཉིན་དུ་ཡོངས་སུ་བརྟགས་ལ། ཞབས་བསིལ་དང༌། ཞལ་བསིལ་ལ་སོགས་པ་ཕུལ་ནས་དཀྱིལ་འཁོར་གྱི་ཁང་པར་གཞུག་པར་བྱའོ། །ཤར་དུ་མངོན་པར་ཕྱོགས་པར་བྱས་ནས་ཀུ་ཤའི་ཆུན་པོ་རྣམས་གདན་གྱི་འོག་ཏུ་བྱིན་ལ་དེའི་སྟེང་དུ་འདུག་པར་བྱའོ། །དེའི་རྗེས་སུ་སློབ་དཔོན་གྱིས་ཇི་ལྟ་བར་དཀྱིལ་འཁོར་དུ་ས་བོན་དང་མཚན་མ་ཡོངས་སུ་གྱུར་པ་ལས་སྐད་ཅིག་གིས་དཀྱིལ་འཁོར་དབང་ཕྱུག་རྣམ་པར་བསྒོམས་ཏེ། ཡེ་ཤེས་སེམས་དཔའ་དང་དབྱེར་མེད་པ་ལ་མཆོད་ཡོན་ལ་སོགས་པ་ཕུལ་ནས་མགོ་བོར་སིནྡྷུ་ར་དང་མགྲིན་པར་སྐུད་པའི་ཕྲེང་བ་དང་མིག་ལ་ཐུར་མས་མིག་སྨན་དང་མེ་ཏོག་དམར་པོའི་རྒྱན་རྣམས་ཀྱང་སྦྱིན་པར་བྱའོ། །དེ་ནས་བཞི་མཉམ་ལ་སོགས་པ་ཇི་ལྟར་རྙེད་པའམ་དྲི་བཟངས་ཀྱིས་དཔྲལ་བ་དང་སྙིང་ག་དང་ལག་པ་དང་རྐང་པ་དག་ལ་བྱུག་པར་བྱའོ། །གཏོར་མ་བྱིན་ཏེ་དེ་ནས་ནི། །སྔགས་པས་བཟའ་བ་དེ་དག་དབུལ། །བཟའ་དང་བཅའ་དང་དེ་བཞིན་འགམ། །མྱང་དང་གཞིབ་དང་བལྡག་པ་དང༌། །ཙཱ་རུ་སྒྲོན་མ་ཆང་བཅས་ཀུན། །ཡང་དག་སྦྱངས་ཏེ་དབུལ་བར་བྱ། །བསྟོད་དང་མཆོད་པ་ཡང་དག་ལྡན། །སྔགས་ཀྱི་བཟླས་པར་རྟག་ཏུ་བརྩོན། །ཕྱག་རྒྱ་ཆེན་པོ་མངོན་འདོད་པའོ། །མཁས་པས་གཞོན་ནུ་མ་རྣམས་མཆོད། །དེ་ལྟར་ཡང༌། ཆང་དང་ཤ་རྣམས་ཀྱིས་ཀྱང་རྡོ་རྗེའི་ལྷ་མོ་རྣམས། །མྱུར་བར་རབ་ཏུ་འབད་པས་སོ་སོར་མཆོད་བྱེད་ན། །གུས་དང་ལྡན་པས་དེ་རྣམས་མཆོད་སྦྱིན་སྐྱེ་བོ་ནི། །དཔལ་ལྡན་རྡོ་རྗེའི་ཐེག་པར་གནས་དགར་གནས་དེ་ལ། །ཡང་དག་ཚིམ་པར་སེམས་ལ་མཆོག་ནི་སྟེར་བར་འགྱུར། །དེ་ཡི་ལག་པར་མཆོག་རྣམས་ངེས་པར་གནས་པའོ། །ཞེས་བཅོམ་ལྡན་འདས་ཀྱིས་དཔལ་སྡོམ་པ་འབྱུང་བ་ལས་གསུངས་སོ། །དགེ་དང་མི་དགེའི་མཚན་མ་རྣམས། །རྒྱས་པར་དེ་ཉིད་ཤེས་བྱ་སྟེ། །ཡང་དག་བསྡུས་ཕྱིར་འདིར་མ་བརྗོད། །བདག་ནི་མངས་པས་འཇིགས་ཕྱིར་རོ། །དེ་ནས་ཞབས་བསིལ་ཕུལ་ནས་ནི། །དྲི་བཟངས་རྣམས་ཀྱིས་ལག་པ་བྱུག །སོ་རྩི་རྣམས་དང་ཡོན་ཕུལ་ནས། །ལག་པར་མེ་ཏོག་རབ་ཏུ་དབུལ། །ཤིས་པ་བརྗོད་པ་དེ་ཐོབ་ནས། །བསོད་ནམས་ཡོངས་སུ་བསྔོ་བར་བྱ། །ཐམས་ཅད་གཤེགས་གསོལ་བྱས་ནས་ནི། །ཕྱག་བྱ་རང་ཁྱིམ་བྱོན་པར་གསོལ། །
ཞེས་པས་དཀྱིལ་འཁོར་དུ་གཞོན་ནུ་མའི་མཆོད་པ་བྱས་ནས། དེ་ཡི་རྗེས་སུ་བཟའ་དང་བཅའ་དང་འགམ་པ་རྣམས་དང་སྣ་ཚོགས་རོ་མཆོག་རྣམས་དང་བཏུང་བ་དང༌། །གཞི་བ་དང་བལྡག་དང་མེ་ཏོག་སོ་རྩི་རྣམས་དང་དེའི་གོས་རྣམས་དང་གཡོན་རྣམས་རབ་ཏུ་དབུལ་བྱ་སྟེ། །འཁོར་ལོའི་ཁང་པར་འཁོར་ལོ་འོ་དེ་རྗེས་འབྱོར་པས་བཟོ་བོ་འདུས་པ་རྣམས་ཀྱང་ཚིམ་པར་བྱ། །ཕྱི་ནས་རབ་ཏུ་གནས་པའི་ལྷ་དང་དེ་རྗེས་ལྗོངས་ཀྱི་སྐྱེ་བོ་མཆོད་པར་བྱ་ཞིང་ཚིམ་པར་བྱ། །ཁང་པ་རྣམས་དང་སྒོ་དང་སྟེགས་བུ་ལྷག་པར་གནས་པའི་ཆོ་ག་དང་ནི་ཐབ་ཁུང་ཁྲི་རྣམས་ལས། །གང་གང་དངོས་པོ་རབ་ཕུལ་དེ་དང་དེ་རྣམས་མཐའ་དག་འདིར་ནི་སློབ་དཔོན་རྒྱལ་བོ་ཉིད་ཀྱིས་ཏེ། །འདི་རྣམས་སློབ་དཔོན་ལས་ནི་གཞན་གྱིས་མ་ཡིན་དེ་བཞིན་བཟོ་རྣམས་ལ་ཡང་ཅུང་ཟད་ཉིད་མི་འགྱུར། །དེ་རྣམས་ཐམས་ཅད་སྦྱིན་པ་དང་ནི་བསོད་ནམས་ལ་ཡང་བླ་མའི་རང་ཉིད་འདོད་པས་སྦྱར་བར་བྱ། །སྦྱིན་བདག་རྣམས་ཀྱིས་རབ་ཏུ་གནས་པ་བྱས་པས་སྐུ་གཟུགས་ལ་སོགས་སྐྱེད་དུ་རུང་བ་རྣམས། །རོལ་མོ་ལ་སོགས་པ་ཡི་མཆོད་པས་རང་གི་གནས་སུ་ཁྱེར་ལ་མཆོད་པ་བྱའོ། །མན་ངག་རྣམས་ཀྱིས་ཡོངས་སུ་སྦྱངས་པའི་དགེ་བ་མཆོད་སྦྱིན་རྣམས་ཀྱིས་འབྲས་བུར་གྱུར་པ་ནི། གཉིས་ཀས་སངས་རྒྱས་རྣམས་ཀྱི་འབྲས་བུ་ཐོབ་ཅིང་ཕན་པར་བྱེད་པའི་སྦྱིན་པས་སྦྱིན་བདག་བདེ། །སློབ་དཔོན་གྱིས་ཀྱང་སེམས་ཅན་ཀུན་ལ་བདེ་བ་སྦྱིན་པ་ཐོབ་ཅིང་རབ་གནས་བདག་ཉིད་ཀྱི། །རྒྱལ་པོ་གནས་ཀྱི་བདག་པོ་རྣམས་དང་སྐྱེ་བོ་རྣམས་ལ་ངེས་པར་ཀུན་དུ་དགེ་བ་སྟེ། །ཞེས་པ་དཀྱིལ་འཁོར་ཉེ་བར་བསྡུ་བའི་ཆོ་གའོ།། །།དེ་ལྟར་འདི་ནི་བྲིས་པའི་དཀྱིལ་འཁོར་གྱི་ཆོ་ག་སྟེ། །ཡིད་ཀྱིས་རྗེས་སུ་བསྒྲུབ་པའི་ཆོ་ག་ཉིད་འབྲས་བུ་དང་ལྡན་ནོ་ཞེས་པ་ཡིད་ཀྱི་ཆོ་ག་ཁོ་ན་མཆོག་ཡིན་ནོ། །དེའི་ཕྱིར་དཀྱིལ་འཁོར་གྱི་མངའ་བདག་གི་གཟུགས་ཀྱིས་ས་ཡོངས་སུ་གཟུང་བ་ལ་སོགས་པ་དང་སྐུ་གཟུགས་ལ་སོགས་པའི་རབ་གནས་དང༌། སློབ་མ་ལ་མངོན་པར་དབང་བསྐུར་བ་དང་གཤེགས་སུ་གསོལ་བ་དང་ཞི་བའི་སྦྱིན་སྲེག་གི་མཐར་ཐུག་པ་ཐམས་ཅད་ཡིད་ཀྱིས་བྱའོ། །དེ་ཉིད་ཀྱི་ཕྱིར་འདི་ལྟར་གང་གི་ཚེ་འདི་དག་ཐམས་ཅད་ཡོ་བྱད་འགའ་ཞིག་དང་བྲལ་བས་བྱ་བར་མི་ནུས་པའམ། །མི་རིགས་པའམ་མ་རྙེད་པ་དེའི་ཚེ་བསམ་པས་ཐམས་ཅད་བྱའོ། །
ཕྱི་རོལ་གྱི་དངོས་པོ་ཡོད་པ་ལ་ཡང་བསམ་གཏན་ཁོ་ན་གཙོ་བོ་ཡིན་ནོ། །འཇིག་རྟེན་པས་མཐོང་བས་ན་སྦྱིན་པ་ལ་མངོན་པར་དད་པ་ལ་སོགས་པས་བསོད་ནམས་འཕེལ་བར་བྱ་བའི་ཆད་འབའ་ཞིག་ཏུ་ཕྱིའི་ཆོ་ག་འདོད་དོ། །ཡོ་བྱད་དང་བྲལ་བས་ནི་བསམ་པ་ཁོ་ནས་ཆོ་ག་ཐམས་ཅད་བསྒྲུབ་པར་བྱའོ། །དེའང༌། དངོས་པོ་ཐམས་ཅད་མེད་གྱུར་ན། །བསམ་པ་ཉིད་ཀྱིས་ཡོངས་སུ་བརྟག །ཅེས་གསུངས་སོ། །དེའི་ཕྱིར་ལས་དང་པོ་པས་ཀྱང་སེམས་བརྟན་པོས་ཡིད་ཀྱིས་སྤྲུལ་པའི་དཀྱིལ་འཁོར་དུ་རབ་ཏུ་གནས་པ་ལ་སོགས་པ་བྱ་ཞིང་སྐལ་བ་དང་ལྡན་པའི་སྐྱེ་བོ་རྣམས་ཀྱང་མངོན་པར་དབང་བསྐུར་བར་བྱའོ། །དེ་ལྟར་དཔལ་ལྡན་སངས་རྒྱས་ཐོད་པའི་རྒྱུད་དུ། ཤེས་རབ་པདྨའི་ནང་དུ་ནི། །དཔག་ཚད་བྱེ་བའི་དཀྱིལ་འཁོར་ལ། །རིགས་གསུམ་དཀྱིལ་འཁོར་དེ་དབུས་སུ། །མཁས་པས་སློབ་མ་དབང་བསྐུར་བྱ། །ཞེས་གསུངས་ཤིང་གཞན་དུའང༌། ཡིད་ཀྱིས་འགའ་ཞིག་ཉིད་དུ་ནི། །རྒྱལ་བས་དཀྱིལ་འཁོར་བྱ་བར་བཞེད། །ཞེས་གསུངས་ཏེ་ཡིད་ཀྱི་དཀྱིལ་འཁོར་གྱི་ཆོ་གའོ།། །།འདིར་བརྗོད་པའི་ཆོ་ག་རྣམས་ཀྱང་བྱ་བ་གཞན་རྣམས་ལ་ཡང་དང་པོ་དང་མཐར་བགེགས་ཐམས་ཅད་ཉེ་བར་ཞི་བའི་ཆེད་དུ་གཏོར་མ་སྦྱིན་པར་བྱའོ། །དེ་ལ་འདི་ནི་ཆོ་ག་སྟེ་རེ་ཞིག་དང་པོར་སློབ་དཔོན་ཇི་ལྟར་རྙེད་པའི་ཅོད་པན་ལ་སོགས་པས་རྣམ་པར་བརྒྱན་པ་དཔལ་རྡོ་རྗེ་སེམས་དཔའི་མདུན་དུ་ཤ་ཀ་ཊ་དང་པི་ཊ་ཀ་ལ་སོགས་པའི་སྣོད་ཆེན་པོ་རྣམས་སུ་ཟན་དང་ཁུར་བ་དང་ལ་དུ་དང་ཛམྦུ་ཏི་ལ་སོགས་པ་དང་ཉ་ཤ་དང་བཙོད་དང་སྒོག་སྐྱ་དང་ཆང་དང་ཆུ་དང་འོ་མ་ལ་སོགས་པ་དང་མེ་ཏོག་དང་ལྡན་པ། བླ་རེ་ལ་སོགས་པས་བརྒྱན་ཅིང་རོལ་མོ་མཁན་གྱི་མདུན་དུ་བསྟར་བ་འམ་ཟན་དང་ཆུ་ལ་སོགས་པ་ཙམ་ཡང་རུང་ཇི་ལྟར་རྙེད་པ་ཡང་དག་པར་བཀོད་ནས་བཟའ་བ་དང་བཅའ་བ་དང་བལྡག་པ་དང་བཏུང་བ་ལ་སོགས་པ་རྣམས་སྔར་ཚོགས་ཀྱི་འཁོར་ལོར་བཤད་པའི་བདུད་རྩི་བསྒྲུབ་པའི་ཆོ་གས་བདུད་རྩིར་བསྐྱེད་པར་བྱའོ། །དེ་ནས་བསྡུས་པའི་རིམ་པའི་ཆོ་གའམ་ཡན་ལག་བཞི་པའི་ཆོ་ག་འམ་ས་བོན་ལ་སོགས་པ་ལས་སམ་སྐད་ཅིག་གིས་ཀྱང་རྡོ་རྗེ་སེམས་དཔའི་གཟུགས་ཀྱི་མདུན་དུ་དྲི་བཟངས་ལ་སོགས་པས་མཎྜལ་བྱས་པར་རང་གི་འཁོར་ལོའི་དབང་ཕྱུག་ལ་སོགས་པའི་དེ་བཞིན་གཤེགས་པ་ལ་སོགས་པ་ཐམས་ཅད་ཡང་དག་
པར་མཆོད་ནས། མི་བསྐྱོད་རྡོ་རྗེ་ཞེས་པ་ལ་སོགས་པའི་ཚིགས་སུ་བཅད་པ་དྲིལ་བུ་འཁྲོལ་བ་སྔོན་དུ་འགྲོ་བས་བསྟོད་དེ། རང་གི་སྙིང་གའི་ས་བོན་གྱི་འོད་ཟེར་གྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བ་ལ་གནས་པའི་གཞལ་ཡས་ཁང་གི་ནང་ན་བཞུགས་པའི་དཀྱིལ་འཁོར་དང་དབང་པོ་ལ་སོགས་པ་འཁོར་དང་བཅས་པ་དང་ཀླུ་རྣམས་དང་སེམས་ཅན་ཐམས་ཅད་ཀྱང་བཀུག་ནས་དབང་པོ་ལ་སོགས་པ་སྐད་ཅིག་གིས་འོད་གསལ་བར་རབ་ཏུ་ཞུགས་པའི་རྗེས་ལ་འདུས་པའི་ལྷ་ཤེས་རབ་དང་བཅས་པའི་ངོ་བོར་རྣམ་པར་བསམས་ཏེ། མདུན་དུ་ཞབས་བསིལ་ལ་སོགས་པ་སྔོན་དུ་འགྲོ་བས་དྲིལ་བུ་དཀྲོལ་ཞིང་རྡོ་རྗེ་གསེར་ཏེ་སྟོང་པ་ཉིད་དང་སྙིང་རྗེ་དབྱེར་མེད་པའི་བྱང་ཆུབ་ཀྱི་སེམས་སུ་ལྷག་པར་མོས་པ་དང་འཁོར་གསུམ་ཡོངས་སུ་དག་པས་གཏོར་མ་རྣམས། ཨོཾ་ཨཱཿཧཱུཾ་ཆེ་གེ་མོ་བཛྲ་ཞེས་རང་གི་འཁོར་ལོའི་དབང་པོ་ལ་སོགས་པ་ནས་གནོད་མཛེས་ཀྱི་བར་གྱི་ལྷ་རྣམས་རེ་རེ་ནས་མིང་ནས་སྤྲོས་ཤིང་དེ་དག་གི་ས་བོན་ཡང་བརྗོད་དེ། སརྦ་དུ་ཥྚ་ས་མ་ཡ་མུ་དྲ་པྲ་བྷ་ཉྫ་ཀ་མ་མ་ཤཱནྟིཾ་རཀྵཉྩ་ཀུ་རུ་སྭཱ་ཧཱ་ཧཱུཾ། ཨོཾ་སརྦ་ཏྱ་དྷྭ་ཛ་ད་ཤ་དི་ཀ །ལོ་ཀ་དྷཱ་ཏྭ་ནནྟག་ག་ན། ས་མུ་དྲ་མེ་གྷ་བྱཱུ་ཧ་པྲ་ས་ར། པ་ར་མཱ་ནུ་ར་ཛོ་མཎྜ་ལ། པ་རཾ་པ་ར་ཨ་ནནྟ་རྒ་ཏ། ས་མཱ་པཏྟྱ་པ་སྠི་ཏཱ། དྷརྨ་དྷཱ་ཏུ་ས་མ་བ་ས་ར་ཎཱ། ཨཱ་ཀཱ་ཤ་དྷཱ་ཏུ་པཪྻ་བ་སཱ་ནཾ། སརྦ་ཏྱ་དྷྭ་ཛ་ད་ཤ་དི་ཀ །ལོ་ཀ་དྷཱ་ཏུ་ཨ་ནནྟ་མེ་གྷ་བྷྱཱུ་ཧ། པྲ་ས་ར་ག་ག་ན་ས་མཱ། སརྦ་ལོ་ཀ་པཱ་ལཱཿ་སརྦ་སཏྭཉྩ། ཏྡྱ་ཐཱ། བཛྲ་ཡུ་དྷ་མཱ་ཡ་བཛྲ། བཛྲཱ་ན་ལ་བཛྲ་ཀཱ་ལ་བཛྲ་མུ་ས་ལ་ནཱ་ག་བཛྲ། བཛྲཱ་ནི་ལ། བཛྲ་བྷཻ་ར་ཝ། བཛྲ་ཤཽཎྜ་བཛྲ་ཀྲོ་དྷ། བཛྲ་ཀུཎྜ་ལི་བཛྲ་པྲ་བྷཱ། མོན་བཛྲ་བེ་མ་ཙི་ཏྲི། །པྲྀ་ཐི་བཱི་དེ་ཝ་ཏཱ་ས་པ་རི་ཝཱ་རཱཿ། ཨི་མཾ་པུ་ཥྤཾ་དྷཱུ་པ་དཱི་པ་གནྡྷ་ནཻ་ཝི་དྱཾ་ཨཱ་དི་སཾ་ཡུ་ཀྟ་བ་ལི་ཨུ་པ་ཧ་རཾ། པྲ་ཏཱི་ཙྪ་ཨུ་པ་བྷུ་ཛྱ། མ་མ་ཧི་ར་ཎྱ་སུ་ཝ་རྞ། དྷ་ན་དྷྱ་ན་ཨཱ་ཡུཿ་ཡཽ་ཝཎ་ཨ་རོ་གྱ་སཚུ་ཁ། པྲཱ་ཧཱ་ར་ཀཱ་ན་སརྦ་བི་གྷྣཱཾ་བི་ནཱ་ཡ་ཀཱ་ན། སརྦ་དུ་ཥྚཱ་ན་པྲ་དུ་ཥྚཱ་ན། མ་ནུ་ཥྱ་ཨ་མ་ནུ་ཥྱཱ། ཛམྦྷ་ཡ་སྟམྦྷ་ཡ་བནྡྷ་ཡ་བི་དྷྭནྶ་ཡ། མ་མ་ཧི་ར་ཎྱ་སཱུ་ཝརྞ་དྷ་ན་དྷཱ་ཉ་ཨཱ་ཡུཿ་ཡཽ་བ་ན། ཨ་རོ་གྱ་སཚུ་ཁཱ་ནི། མ་ཧཱ་སུ་ཁ་པྲ་བྲྀདྡྷ་ཡེ། བཱ་ཡད་ཨཱ་བོ་དྷ་མཎྜ་པཪྻ་ནྟཾ། ཌྷཽ་ཀ་ཡ་ཏི་ས་དཱ་ས་ཧཱ་ཡི་ཀ་ཤའ་ནྟིཾ་ར་ཀྵ་ཉྩ་ཀུ་རུ་ཧཱུཾ། ཞེས་པའི་སྔགས་རྣམས་དང་ཀླུ་གཏོར་གྱི་སྔགས་ཀྱིས་ཀྱང་དབུལ་བར་
བྱའོ། །དེ་རྣམས་ཀྱང་རང་གི་དཀྱིལ་འཁོར་གྱི་བདག་པོ་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་རྣམས་དང༌། དེ་ནས་དབང་པོ་ལ་སོགས་པ་འཁོར་དང་བཅས་པ་རྣམས་དང་དེའི་རྗེས་སུ་ཀླུ་རྣམས་དང༌། དེ་ནས་སེམས་ཅན་ཐམས་ཅད་ཀྱི་ལྕེ་ཧཱུཾ་ལས་བྱུང་བའི་རྡོ་རྗེ་རྩེ་གཅིག་པ་དམར་པོ་རྣམས་ཀྱི་འོད་ཟེར་གྱི་སྦུ་གུས་སམ། ཡིད་ཀྱིས་བདུད་རྩི་བཀུག་པ་རྣམས་ཉེ་བར་གསོལ་བས་བདེ་བ་ཆེན་པོའི་རང་བཞིན་སྟོང་པ་ཉིད་དང་རོ་གཅིག་པ་ཇི་སྲིད་འདོད་ཀྱི་བར་དུ་བསམ་པར་བྱའོ། །ཞལ་བསིལ་དང་དྲི་བཟང་པོ་ཅན་གྱི་ཙནྡན་དང་སོ་རྩི་ལ་སོགས་པ་རྣམས་ཕུལ་ནས་ཡང་དག་པར་མཆོད་དེ། བྱ་བ་བསྒྲུབ་པ་ལྷུར་བྱེད་པ་རྣམས་ལ་བཟོད་པར་གསོལ་ཞིང་སྔར་བཤད་པའི་ཡི་གེ་བརྒྱ་པའི་སྔགས་བཟླས་ལ། ཨོཾ་ཡོ་ག་ཤུདྡྷཿསརྦ་དྷརྨཱཿཡོ་ག་ཤུདྡྷོ྅ཧཾ། ཞེས་བརྗོད་ནས་པད་ཀོར་དང་འཁྱུད་པའི་ཕྱག་རྒྱ་བྱས་ཏེ་རང་གི་ལྷའི་འཁོར་ལོ་བདག་ཉིད་ལ་རབ་ཏུ་གཞུག་གོ །བསྲུང་བའི་འཁོར་ལོ་ལ་གནས་པའི་ཁྲོ་བོ་བཅུ་དང༌། དབང་པོ་ལ་སོགས་པ་བསྲུང་ཞིང་འདོད་པ་བསྒྲུབ་པ་ལ་མཁས་པ་རྣམས་དཀྱིལ་འཁོར་གྱི་ཁང་པའི་ཕྱི་རོལ་གྱི་ཕྱོགས་བཅུར་རྣམ་པར་དགོད་པར་བྱ་སྟེ། དཀྱིལ་འཁོར་གྱི་ལས་རྩོམ་པ་ནས་གཟུང་སྟེ་ཇི་སྲིད་མཐར་ཐུག་པའི་བར་རོ། །རྡུལ་ཚོན་གྱི་དཀྱིལ་འཁོར་གཤེགས་སུ་གསོལ་བའི་རྗེས་སུ་ནི་གཏོར་མ་སྦྱིན་པ་ལ་སོགས་པ་བྱས་ནས་ཁྲོ་པོ་རྣམས་བདག་ཉིད་ལ་རབ་ཏུ་གཞུག་ཅིང་སེ་གོལ་གསུམ་བྱས་ནས་དབང་པོ་ལ་སོགས་པ་རྣམས་གནས་ཇི་ལྟ་བར་གཤེགས་སུ་གསོལ། གཞན་ཡང་ཉི་མ་སོ་སོ་ལ་གཏོར་མ་དབུལ་བ་ནི་དེ་ལྟ་ཉིད་དོ། །འདི་ནི་གཤེགས་སུ་གསོལ་བའི་སྔགས་ཏེ། །ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་གནང༌། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། ཨོཾ་ཨཱཿཧཱུཾ་ཨ་ཀཱ་རོ་མུ་ཁཾ་སརྦ་དྷ་རྨཱ་ཎཱཾ་ཨ་དྱཱ་ནུ་ཏྤནྣ་ཏྭཱ་ཏ་ཧཱུཾ་མུཿ་ཞེས་པའམ། ཨོཾ་ཨཱཿཧཱུཾ་བཛྲ་མུཿཞེས་བརྗོད་པས་གཤེགས་སུ་གསོལ་ལོ། །འདིར་ཞི་བ་ལ་སོགས་པའི་བྱ་བ་གཙོ་ཆེ་བའི་དབྱེ་བ་དུས་དང་ཕྱོགས་དང་ཁ་དོག་གི་དབྱེ་བ་རྟོགས་པར་བྱའོ། །དཀྱིལ་འཁོར་གྱི་ཁང་པའི་ཕྱི་རོལ་ཤར་ལ་སོགས་པའི་ཕྱོགས་རྣམས་སུ་ཁྲོ་བོ་བཅུའི་གོང་བུ་རྣམས་དང་ཉེ་བར་དྲན་
ལ་སོགས་པའི་གཏོར་མས་སེན་ཐི་ལ་སོགས་པ་བཀང་བ་འམ་ཁམ་ཕོར་རྣམས་སམ་སྙིམ་པས་དབུལ་བར་བྱའོ། །སའི་གོང་བུ་རྣམས་ལས་ཕྱི་རོལ་དུ་སའི་གོང་བུ་བཅོ་ལྔ་དང༌། དེ་དག་མེད་ན་མཎྜལ་རྣམས་ཀྱི་སྟེང་དུ་དབང་པོ་ལ་སོགས་པ་བཅོ་ལྔ་པོ་རྣམས་ལ་སྦྱིན་པར་བྱའོ། །དབང་པོའི་གཡས་ཕྱོགས་སུ་སྒྱུ་མ་རྡོ་རྗེ་སྟེ་ཁྱབ་འཇུག་དང་རྡོ་རྗེ་འཇིགས་བྱེད་ནི་ལུས་ངན་ཏེ། དེའི་གཡས་ཕྱོགས་སུ་ལོག་འདྲེན་དང༌། རྡོ་རྗེ་ཁྲོ་བོ་ནི་དབང་ལྡན་ཏེ་དབང་ལྡན་དང་ཉེ་བའི་དབང་ལྡན་དག་གི་དབུས་སུ་ཉི་མ་དང་ཟླ་བ་དང་ཚངས་པ་རྣམས་དང་ཆུ་ལྟ་དང་བདེན་བྲལ་གྱི་བར་དུ་ཐག་བཟངས་རིམ་དང་སའི་ལྷ་མོ་དག་ལའོ། །དེ་ལྟར་དབང་པོ་ལ་སོགས་པའི་བ་དན་བཅོ་ལྔ་ནི་རང་རང་གི་ཕྱོགས་སུའོ། །དབང་པོ་ལ་སོགས་པའི་གོང་བུ་ལས་ཕྱི་རོལ་དུ་སའི་གོང་བུ་བརྒྱད་དམ་བ་བྱུང་གི་མཎྜལ་བྱས་པ་རྣམས་སུ་ཀླུ་རྣམས་ལ་ཁམ་ཕོར་དུའོ་ཐུག་ལ་སོགས་པ་སྦྱིན་པར་བྱའོ། །ཕྱི་རོལ་དུ་གཏོར་མའི་ཟན་ལ་སོགས་པ་ལ་མར་དང་སྦྲང་རྩི་དང་ཆུ་དང་ཆང་དང་འོ་མ་སྟེ་རྒྱུན་པ་ལྔས་གཡས་སྐོར་དུ་གཏོར་བར་བྱའོ། །གཞན་གྱི་དོན་དུ་གཏོར་མ་སྦྱིན་པ་ན་ཡང་སྔགས་ལ་ཇི་ལྟར་ཡོད་པའི་བདག་གམ་ལ་འམ་བདག་གི་ཞེས་པ་ནི་ཇི་ལྟར་གནས་པ་བཞིན་དུ་བཀླག་པར་བྱ་སྟེ། དེ་ཡང་བདག་ཉིད་དུ་ལྷག་པར་མོས་པར་བྱའོ། །འདི་ལ་ཕན་བཏགས་པ་ན་བདག་ཉིད་ལ་ཕན་བཏགས་པར་འགྱུར་ཏེ། བར་དག་ཏུ་ཡང་དོན་རྣམ་པར་ཤེས་པར་བྱའོ་ཞེས་པ་འདུས་པའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དྷརྨ་དྷ་ཏུ་ས་མ་བ་ས་ར་ཎཱ་ཞེས་པ་ནི་སྟོང་པ་ཉིད་དང་སྙིང་རྗེ་རོ་གཅིག་པ་དང་སྟོང་པ་ཉིད་ཀྱི་མཐར་ཐུག་པ་ཞེས་པའི་དོན་ཏོ། །གཏོར་མའི་ཆོ་ག་ལ་ཁྲོ་བོ་བཅུ་པོ་རྣམས་ཀྱི་གཏོར་མ་རྣམས་སོ་སོའི་སྔགས་རྒྱུད་དུ་གསུངས་པ་རྣམས་ཀྱིས་འབུལ་བ་ནི་ཤིན་ཏུ་ཁྱད་པར་དུ་སྔགས་པར་འགྱུར་ཏེ། སྔགས་དེ་རྣམས་ཀྱང་མང་བས་འཇིགས་ནས་འདིར་མ་བརྗོད་དོ། །གང་ཡང་དཔལ་འཁོར་ལོ་སྔོམ་པའི་རྣལ་འབྱོར་དང་ལྡན་པས་དྲི་བཟངས་ལ་སོགས་པའི་མཎྜལ་བྱས་པར་རང་གི་འཁོར་ལོ་ཡང་དག་པར་མཆོད་ཅིང་རྐང་པ་བརྒྱད་པའི་སྔགས་ཀྱིས་བསྟོད་དེ་རང་གི་སྙིང་གར་གནས་པའི་ཧཱུཾ་ཡིག་གི་འོད་ཟེར་རྣམས་ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་
གཞལ་ཡས་ཁང་གི་ནང་ན་གནས་པའི་དཀྱིལ་འཁོར་དང་སྲུང་བའི་འཁོར་ལོའི་ཕྱི་རོལ་གྱི་ཕྱི་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང་སེམས་ཅན་དཔག་ཏུ་མེད་པ་རྣམས་ཀྱང་ནང་དུ་བཀུག་ནས་དཔྲལ་བའི་དབྱིངས་སུ་འབར་བའི་ཕྱག་རྒྱ་བཅིངས་ཏེ་འགྱིང་བ་དང་བཅས་པས་ཕེཾ་ཞེས་པ་ལན་གསུམ་བརྗོད་ཅིང་མདུན་དུ་དཀྱིལ་འཁོར་སྤྱན་དྲང་ངོ༌། །ཨོཾ་ཀྐཀ་ཌྷ་ན། བནྡྷ་ན་ཁ་ཀ་ཁའ་དན་སརྦ་དུ་ཥྚཱ་ནཱཾ། ཧ་ན་ཧ་ན་གྷ་གྷ་གྷ་ཏ་ཡ་ཆེ་གེ་མོའི་ཤཱི་ནྟཾ་ཀུ་རུ་ཧཱུཾ་ཧཱུཾ་ཕཊ་ཕཊ་ཛཿསྭཱ་ཧཱ། ཞེས་པ་འདིས་དབང་པོ་ལ་སོགས་པ་བཀུག་ནས་སྐང་ཅིག་གིས་སྟོང་པ་ཉིད་ལ་རབ་ཏུ་ཞུགས་པའི་རྗེས་ལ་རིག་པ་དང་བཅས་པའི་བདེ་མཆོག་གི་ལྷའི་སྐུར་རྣམ་པར་བསྒོམས་ཏེ་ཞལ་བསིལ་ལ་སོགས་པ་དངུལ་པ་སྔོན་དུ་འགྲོ་ཞིང་སྔ་མ་བཞིན་དུ་འཁོར་གསུམ་ཡོངས་སུ་དག་པས་ལག་པ་གཡོན་པའི་མཐིལ་དུ་ཟླ་བ་ལ་གནས་པའི་ཧཱུཾ་ལས་སྐྱེས་པའི་སྣ་ཚོགས་རྡོ་རྗེའི་ལྟེ་བར་བདུད་རྩིའི་སྣོད་བཀོད་པའམ་བསྒོམ་པ་ལག་པ་གཡས་པ་རྡོ་རྗེ་ཁུ་ཚུར་བྱས་པའི་སྡིགས་མཛུབ་བརྐྱང་པས་དེ་སྟོན་ཅིང༌། བཅོམ་ལྡན་འདས་དང་དེའི་ཤེས་རབ་མ་དང་མཁའ་འགྲོ་མ་ལ་སོགས་པ་དང་ཁྭ་གདོང་མ་ལ་སོགས་པ་ལ་ཇི་ལྟར་རིགས་པར་ཕྱོགས་སུ་གཡོན་སྐོར་དང་མེའི་ཟུར་ནས་བརྩམས་ཏེ་ཕྱོགས་བྲལ་རྣམས་སུ་གཡས་སྐོར་གྱིས་ཏེ། ཨོཾ་བཛྲ་ཌཱ་ཀ་ཨི་མཾ་བ་ལིཾ་གྲྀ་ཧྞ་གྲྀ་ཧྞ་ཧཱུཾ་ཕཊ། ཨོཾ་ཛཿ་ཧཱུཾ་བཾ་ཧོཿ་ས་མ་ཡ་སྟྭཾ་དྲི་ཤྱ་ཧོཿ་ཞེས་པའི་སྔགས་ལན་གཅིག་དང་གཉིས་དང་གསུམ་དང་བཞི་དང་ལྔ་བརྗོད་པས་ཕུལ་ནས་འཁོར་ལོ་གསུམ་གྱི་ལྷ་རྣམས་ལ། ཨོཾ་ཀ་ར་ཀ་ར་ཀུ་རུ་ཀུ་རུ་བནྡྷ་བནྡྷ་ཏྲཱ་ས་ཡ་ཏྲཱ་ས་ཡ་ཀློ་བྷ་ཡ་ཀྵོ་བྷ་ཡ་ཧྲཽཾ་ཧྲཽཾ་ཧྲཿཧྲ་ཕཻཾ་ཕཻཾ་ཕཊ་ཕཊ་ད་ཧ་ད་ཧ་པ་ཙ་བ་ཙ་བྷཀྵ་བྷཀྵ་བ་ས་རུ་དྷི་ར་ཨནྟ་མཱ་ལ་བ་ལ་མྦི་ནེ་གྲྀཧྞ་གྲྀཧྞ་སཔྟ་པཱ་ཏཱ་ལ་ག་ཏ་བྷུ་ཛངག་སརྦཾ་བཱ་ཏཛ་ཡ་ཏ་ཛ་ཡ་ཨཱ་ཀ་ཌྜྷྱ་ཨཱ་ཀཌྜྷྱ་ཧྲིཾ་ཧྲིཾ་ཛྞཽཾ་ཛྞཽཾ་ཀྵྨཾ་ཀྵྨཾ་ཧྰཾ་ཧྰཾ་ཧིཾ་ཧིཾ་ཧཱུཾ་ཧཱུཾ་ཀི་ལི་ཀི་ལི་སི་ལི་སི་ལི་ཧི་ལི་ཧི་ལི་དྷི་ལི་དྷི་ལི་ཧཱུཾ་ཧཱུཾ་ཕཊ་སྭ་ཧཱ། ཞེས་པའི་སྔགས་ལན་ཅིག་བརྗོད་པས་དབུལ་བར་བྱའོ། །དེའི་རྗེས་སུ་སྲུང་བའི་འཁོར་ལོའི་རྩིབས་ལ་གནས་པའི་ཁྲོ་བོ་བཅུ་པོ་རྣམས་ལ་ཨོཾ་ཁཿ་བཛྲ་དྷྲིཀ་བཛྲ་ཧཱུཾ་ཀ་ར་བཛྲ་ཧཱུཾ་ཕཊ། ཨོཾ་བཛྲ་དཎྜ་བཛྲ་ཧཱུཾ་ཕཊ། ཨོཾ་བཛྲ་ཨ་ནཱ་ལཱརྐ་བཛྲ་ཧཱུཾ་ཕཊ། ཨོཾ་བཛྲ་ཀུཎྜ་ལི་བཛྲ་ཧཱུཾ་ཕཊ། ཨོཾ་བཛྲ་
ཡཀྵ་བཛྲ་ཧཱུཾ་ཕཊ། ཨོཾ་བཛྲ་ཀཱ་ལ་བཛྲ་ཧཱུཾ་ཕཊ། ཨོཾ་བཛྲ་མ་ཧཱ་བ་ལ་བཛྲ་ཧཱུཾ་ཕཊ། ཨོཾ་བཛྲ་བྷི་ཥ་ཎ་བཛྲ་ཧཱུཾ་ཕཊ། ཨོཾ་བཛྲ་ཨུཥྞཱི་ཥ་ཙ་ཀྲ་བརྟི་བཛྲ་ཧཱུཾ་ཕཊ། ཨོཾ་བཛྲ་པཱ་ཏ་ལ་བཛྲ་ཧཱུཾ་ཕཊ། ཅེས་བའི་སྔགས་བཅུའི་ཧཱུཾ་ཕཊ་ཅེས་པའི་སྔོན་དུ་ཨི་མཾ་བ་ལིཾ་གྲྀ་ཧྞ་གྲྀཧྞ་གྲྀཧྞ་ཆེ་གེ་མོའི་ཤཱནྟི་ཀུ་རུ་རཀྵ་ཀུ་རུ་ཞེས་པ་བཅུག་ལ། ལན་རེ་བརྗོད་པ་རྣམས་ཀྱིས་གཡོན་དང་གཡས་སུ་བསྐོར་བ་དག་དང་སྟེང་དང་འོག་ཏུ་དབུལ་བར་བྱ། །ཕྱི་རོལ་དུ་དབང་པོ་ལ་སོགས་པ་རྣམས་ལ་ཨོཾ་ཁ་ཁ་ཁཱ་ཧི་ཁཱ་སརྦ་དེ་བ་ནཱ་ག་ཡཀྵ་རཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུནྨ་ད་ཨ་པ་སྨཱ་ར་ཌཱ་ཀ་ཌཱ་ཀི་ཉ་དཱ་ཡ་ཨི་མཾ་བ་ལིཾ་གྲྀཧྞ་ནྟུ་ས་མ་ཡ་རཀྵནྟུ། སརྦ་སིདྡྷི་མྨེ་པྲ་ཡ་ཙྪནྟུ་ཡ་ཐཻ་བཾ། ཡ་ཐཻཥྚཾ། བྷུཉྫ་ཐ། པི་པ་ཐ། ཛི་གྷ་ཐ། མཱ་ཏི་ཀྲ་མ་ཐ། མ་མ་སརྦཱ་ཀཱ་རྟ་ཡཱ་ས་ཚུ་ཁཾ་བི་བྲྀདྡྷ་ཡེ། ས་ཧཱ་ཡི་ཀཱ་བྷ་ཝནྟུ་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ཞེས་པ་འདི་ལན་བཞི་བརྗོད་པས་བསྐོར་ཕྱོགས་གཉིས་དང་སྟེང་འོག་ཏུ་དབུལ་བར་བྱའོ། །འདིར་ཡང་དེ་རྣམས་དང་དཀྱིལ་འཁོར་གྱི་བདག་བོ་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་ཞེས་པ་ལ་སོགས་པ་དང་སྔགས་གཞན་རྣམས་ཀྱང་ཤེས་པར་བྱའོ། །ཡི་གེ་བརྒྱ་པ་ནི་འདིར་གཞན་ཡིན་ཏེ། ཨོཾ་བཛྲ་ཧི་རུ་ཀ་ས་མ་ཡ་མ་ནུ་པཱ་ལ་ཡ། ཧེ་རུ་ཀ་ཏྭེ་ནོ་པ་ཏིཥྠ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སུ་པོ་ཥྱོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ་སརྦ་ཀརྨ་སུ་ཙ་མེ་ཙིཏྟཾ་ཤྲེ་ཡཿ་ཀུ་རུ་ཧཱུཾ་ཧ་ཧ་ཧ་ཧ་ཧོཿ་བྷ་ག་ཝའན་བཛྲ་ཧེ་རུ་ཀ་མཱ་མེ་མུཉྩ་ཧེ་རུ་ཀ་བྷ་ཝ་མ་ཧཱ་ས་མ་ཡ་སདྭ་ཨཱཿ་ཧཱུཾ་ཕཊ་སྭཱ་ཧཱ། ཞེས་པའོ། །འདིར་བརྗོད་པའི་ཁྲོ་བོ་བཅུ་མངོན་པར་བརྗོད་པ་བླ་མར་གསུངས་པ་རྣམས་ཀྱི་སྐུ་མདོག་དང་ཕྱག་མཚན་ལ་སོགས་པ་ནི་ཡང་དག་པར་བསྡུས་ཏེ་སྔར་བརྗོད་པའི་དཔལ་བདེ་མཆོག་གི་དཀྱིལ་འཁོར་དུ་ཤེས་པར་བྱའོ། །བདེ་མཆོག་གི་འབྱུང་པོ་ཐམས་ཅད་པའི་གཏོར་མའོ།། །།ཡང་ན་དཔལ་ཀྱེའི་རྡོ་རྗེའི་གཟུགས་ཀྱིས་སྙིང་གར་གནས་པའི་ཧཱུཾ་ཡིག་གི་འོད་ཟེར་རྣམས་ཀྱིས་ཁྲོ་བོ་དང་བཅས་པའི་སྲུང་བའི་འཁོར་ལོ་རྩིབས་བཅུ་པའི་ལྟེ་བར་ཆུད་པའི་གཞལ་ཡས་ཁང་ན་བཞུགས་པའི་དཀྱིལ་འཁོར་དང་སྲུང་བའི་འཁོར་ལོའི་ཕྱི་རོལ་གྱི་ཕྱོགས་རྣམས་སུ་དབང་པོ་ལ་སོགས་པ་འཁོར་དང་བཅས་པ་དང༌། སེམས་ཅན་དཔག་ཏུ་མེད་པ་རྣམས་ཀྱང་བཀུག་
ནས་དབང་པོ་ལ་སོགས་པ་འོད་གསལ་བར་རབ་ཏུ་ཞུགས་པ་རྣམས་ཤེས་རབ་དང་བཅས་པའི་ཧེ་རུ་ཀའི་གཟུགས་སུ་གྱུར་པར་རྣམ་པར་བསམས་ལ། ཞབས་བསིལ་ལ་སོགས་པ་དབུལ་བ་སྔོན་དུ་འགྲོ་བས་སྔ་མ་བཞིན་དུ་སྦྱངས་པའི་གཏོར་མ་རྣམས། །ཨོཾ་དེ་བ་པི་ཙུ་བཛྲ་ཨི་མཾ་བ་ལིཾ་གྲྀ་ཧྞ་གྲྀ་ཧྞ་ཆེ་གེ་མོའི་ཤཱནྟིཾ་རཀྵཉྩ་ཀུ་རུ་ཀུ་རུ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་བཅོམ་ལྡན་འདས་ལ་དབུལ་བར་བྱ་སྟེ། ཨོཾ་ཨཱཿ་ནཻ་རཱཏྨ་ཞེས་པ་ལ་སོགས་པས་མཚན་པ་བརྗོད་ཅིང་ས་བོན་ཡང་སྨོས་ནས་ཨི་མཾ་བ་ལིཾ་གྲྀ་ཧྞ་གྲིཧྞ་ཆེ་གེ་མོའི་ཤཱིནྟཾ་རཀྵ་ཉྩ་ཀུ་རུ་སྭཱཧཱ། ཞེས་པ་འདིས་བདག་མེད་མ་ལ་སོགས་པ་རྣམས་ལའོ། །ན་མཿ་ས་མནྟ་བུ་དྡྷེ་བྷྱོ། ན་མོ་བཛྲ་མུངག་ར་ཧ་སྟཱ་ཡ། ཙནྟྲ་ལཱཀྵེ་པ་ཀཱ་རཱ་ཡ་ཧཱུཾ་ཕཊ། ན་མཿ་ས་མནྟ་བུདྡྷེ་བྷྱོ། མ་ཧཱ་དཎཌ་དྷཱ་ར་བི་བི་དྷ་སུ་ར་ཨ་སུ་ར་མྲྡ་ན་བྷཱུ་ཏནྣི་ར་མ་ཐན་ཧཱུཾ་ཕཊ། ནམཿ་ས་མྣྟ་བུ་དྡྷེ་བྷྱོ། ཧུ་ལུ་ཧུ་ལུ་མ་ཧཱ་པདྨ་ཨ་མྲྀ་ཏཱི་ཀུ་རུ་མ་ཧཱ་བི་ཥྰཾ་ཨཿ་ན་མཿ་ས་མྣྟ་བུ་དྡྷོ་བྷྱོ། ན་མོ་བཛྲ་ཀྲོ་དྷཱ་ཡ་མ་ཧཱ་དཾ་ཥྚོཏ་ཀ་ཊ་བྷཻ་རཾ་བཱ་ཡ་བཛྲ་སཾ་དོ་ཧ་དརྤཱ་ཡ་ཨ་མྲྀ་ཏ་ཀུཎྜ་ལི་ཧཱུཾ་ཕཊ། ན་མཿས་མནྟ་བུདྡྷེ་བྷྱོ། ན་མོ་ཨ་ཙ་ལ་ཀཱཉྩེ་ཏ་མོ་ཊ་མོ་ཊ་ཏུ་ཊ་ཏུ་ཊ་གྷ་གྷ་གྷཱ་ཏ་ཡ་གྷཱ་ཏ་ཡ་ཧཱུཾ་ཕཊ། ན་མཿ་ས་མནྟ་བུདྡྷེ་བྷྱོ། ཊཀྐི་ཧཱུཾ་ཛཿ་ན་མཿ་ས་མ་ནྟ་བུ་དྡྷེ་བྷྱོ། ཨོཾ་ཡ་མ་དཎྜ་ཡ་ནཱི་ལ་ད་ཎྜ་ཡ་ཏུ་རུ་ཏུ་རུ་མུ་རུ་མུ་རུ་སརྦ་དུ་ཥྚཱ་ན་མཱ་ར་ཡ་ཧཱུཾ་ཕཊ། ན་མཿ་ས་མནྟ་བུདྡྷེ་བྷྱོ། ན་མོ་མ་ཧཱ་བཱ་ལ་ཨུ་ཙུ་ཥྨ་ཀྲོ་དྷ་རཱ་ཛཱ་ཡ་སརྦ་ནཱ་ག་ནཱཾ་ཧྲྀ་ཡ་ཏཱ་ཌ་ཡ་ཧཱུཾ་ཕཊ། ན་མཿ་ས་མནྟ་བུདྡྷཱ་ནཱཾ། ན་མཿ་ས་མནྟ་དྷ་རྨཱ་ཎཱཾ། ན་མཿ་ས་མནྟ་སཾ་གྷཱ་ནཱཾ། ཨོཾ་སི་ཏཱ་ཏ་པ་ཏྲེ། ཨོཾ་བི་མ་ལ། ཨོཾ་ཤངྐར། ཨོཾ་པྲ་དྱཾ་གི་ར། བཛྲ་ཨུཥྞཱི་ཥ་ཙཀྲ་བརྟི་སརྦ་ཡནྟ་མནྟྲ་མཱུ་ལ་ཀརྨ་བནྡྷ་ནཾ། ཏཱ་ཌ་ནཾ་ཀཱི་ལ་ན་མྤ་མ་མཀྲྀ་ཏེ། ཡེ་ན་ཀེ་ན་ཙི་ཏ་ཀྲྀ་ཏཾ། སརྦནྟུ་ཚིནད་ཚིནད་བྷི་ནྦྷ་བྷིནྡྷ་ཙི་རི་ཙི་རི་གི་རི་གི་རི་མ་ར་མ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ། ཨོཾ་སུམྦྷ་ནི་སུམྦྷ་ཧཱུཾ། གྲྀཧྞ་གྲྀ་ཧྞ་ཧཱུཾ། གྲྀ་ཧྞཱ་པ་ཡ་གྲྀ་ཧྞཱ་པ་ཡ་ཧཱུཾ། ཨཱ་ན་ཡ་ཧོ་བྷ་ག་ཝའ་ན་བི་དྱཱ་རཱ་ཛ་ཧཱུཾ་ཕཊ། ཅེས་པའི་སྔགས་བཅུས་ཤར་ལ་སོགས་པ་དང་དབང་ལྡན་ལ་སོགས་པར་གཡས་སྐོར་དང་སྟེང་དང་འོག་ཏུ་གཤིན་རྗེ་གཤེད་ལ་སོགས་པའི་ཁྲོ་བོ་བཅུ་མཁའ་འགྲོ་མ་རྡོ་རྗེ་གུར་དུ་གསུངས་པ་རྣམས་ལའོ། །ཨོཾ་ཨིནད་ཛ་མ་ཛ་ལ་ཛཀྑ་བྷཱུཾ་ཏ་བཧྣི་བཱ་ཨུ་རཀྑ་ཙནད་སུདྫ། མཱ་ད་པཔྤ་ཏ་ལ་པ་ཏ་ལ་ཨཊྚ་སཔྤ་སཱ་ཏ། ཨི་དཾ་བ་ལིཾ་བྷུཉྫ། ཛིགྷ་ཕུལླ་དྷཱུ་པ་མཾ་ས་
སིངྒྷ་ཨཾ་བྷ་ཀཛྫ་སཔྤ། སཱ་ད་ཁནྟི་ཁུ་ཎི་ཕེ་ཌ་ག་ད། ཨོཾ་ཨ་ཀཱ་རོ་མུ་ཁཾ་སརྦ་དྷརྨཱ་ཎཱཾ་ཨཱ་དྱཱ་ནུཏྤནྣ་ཏྭཱ་ཏ་ཨོཾ་ཨཱཿ་ཧཱུཾ་ཕཊ་སྭཱ་ཧཱ། ཞེས་པའི་སྔགས་ཀྱིས་དབང་པོ་ལ་སོགས་པ་རྣམས་ལའོ། །ཨོཾ་ཨིནད་ཞེས་པ་ལ་སོགས་པ་མིང་ནས་འབོད་པ་རྣམས་ནི་རང་རང་གི་ཕྱོགས་ཀྱི་སེམས་ཅན་དཔག་ཏུ་མེད་པ་མཚོན་པར་བྱེད་པའོ། །གཱ་དང་ཞེས་པ་ནི་ལུས་ལའོ། །འདི་ཡང་དེ་རྣམས་ཀྱི་མངའ་བདག་ནས་བརྩམས་ཏེ་གནོད་མཛེས་ཀྱི་མཐར་ཐུག་པ་ཞེས་པ་ལ་སོགས་པ་ནི་འདུས་པའི་གཏོར་མའི་ཆོ་ག་བཞིན་དུ་ཤེས་པར་བྱའོ། །འདིར་ཡང་ཁྲོ་བོའི་སྔགས་རྣམས་ཀྱི་ཧཱུཾ་ཡིག་རྣམས་དང༌། ཨཿ་ཡིག་སྔོན་དུ་ཨི་མཾ་བ་ལིཾ་གྲྀ་ཧྞ་གྲྀ་ཧྞ་ཞེས་བརྗོད་པར་བྱ་སྟེ། ཁྲོ་བོ་རྣམས་ཀྱི་སྐུ་མདོག་དང་ཕྱག་མཚན་ལ་སོགས་པ་ནི་སྔར་བཤད་པའི་འཇམ་པའི་རྡོ་རྗེའི་དཀྱིལ་འཁོར་བཞིན་ནོ་ཞེས་པ་ནི། ཀྱེའི་རྡོ་རྗེའི་འབྱུང་པོ་ཐམས་ཅད་པའི་གཏོར་མའི་ཆོ་གའོ།། །།དེ་བཞིན་དུ་ཁྱིམ་དང་གཙུག་ལག་ཁང་ལ་སོགས་པ་བསྲུང་བ་དང་བདེ་ལེགས་སུ་བྱ་བའི་དོན་དུ་དཔལ་ལྡན་དཔུང་པ་བཟང་པོས་ཡོངས་སུ་ཞུས་པ་རྣལ་འབྱོར་གྱི་རྒྱུད་ཆེན་པོར་གསུངས་པའི་སྔགས་ཀྱི་ཚིགས་སུ་བཅད་པ་རྣམས་ཀྱིས་ཆོ་ག་བཞིན་དུ་གཏོར་མ་སྦྱིན་པར་བྱའོ། །དེ་ལ་འདི་ནི་ཆོ་ག་སྟེ། ཞོ་དང་འོ་མ་དང་མར་དང་སྦྲང་རྩི་དང་ཀ་ར་དང་ཤ་མེད་པའི་ཚོད་མ་དང་བཟའ་པ་དང་དྲི་བཟང་པོའི་ཆུ་དང་དྲི་བཟང་པོ་ཅན་གྱི་མེ་ཏོག་དཀར་པོ་དང༌། རྩེ་མོར་མེ་ཏོག་གི་ཕྲེང་བ་དང་མེ་ཏོག་སིལ་མ་དང༌། ཙནྡན་དཀར་པོ་ལ་སོགས་པ་དྲི་བཟང་པོའི་རྫས་རྣམས་དང༌། ཨ་ཀ་རུ་དང་གུ་གུ་ལ་དང༌། ཡན་ལག་བཅུ་པའི་བདུག་སྤོས་དང་སྣང་གསལ་ལ་སོགས་པ་ཇི་ལྟར་རྙེད་པ་དང་ཇི་ལྟར་ནུས་པས་བདེ་ལེགས་སུ་འགྱུར་བའི་དོན་རྣམས་ཉེ་བར་གསོག་པར་བྱེད་དོ། །གྲོང་ཁྱེར་ལ་སོགས་པའི་བགེགས་ཞི་བའི་ཆེད་དུ་ཤ་ཀ་ཊ་ལ་སོགས་པའི་སྣོད་ཆེན་པོ་ཞེས་པ་ནི་རྣམ་པར་རྒྱས་པ་ཉིད་དེ། ཁུར་བ་དང་ཏིལ་དང་འབྲས་ཡོས་དང༌། སྲིད་སིནྣ་དང༌། ཛམྦུ་ཏི་ཀ་དང༌། ངེས་པ་ཉིད་དུ་འབྱོར་པ་དང་རྗེས་སུ་མཐུན་པ་རྣམས་སྦྱིན་བདག་ལས་ཉེ་བར་བླང་བར་བྱ་ཞིང་འདི་རྣམས་ཐམས་ཅད་ཆ་གཉིས་སུ་ཡོངས་སུ་བརྟགས་པ་དྲི་བཟང་པོས་རྣམ་པར་བསྒོས་པ་རྣམས་ཆུ་ཤིང་གི་འདབ་མ་འམ་ཞིབ་མ་སར་བ་ལ་སོགས་པར་སོ་སོར་གཞག་པར་བྱའོ། །སློབ་དཔོན་
གྱིས་ཁྲུས་དང་གཙང་སྦྲ་དང་ཡན་ལག་དྲི་ཞིམ་པོ་དང་ལྡན་པས་ལུས་ལ་གོས་གཙང་མ་བགོས་ཏེ་ཇི་ལྟར་རྙེད་པའི་ཅོད་པན་ལ་སོགས་པས་བརྒྱན་ནས་སྙིང་རྗེ་དང་བྱམས་པ་ལ་ཡོངས་སུ་གནས་པའི་ཡིད་ཀྱིས་པུས་མོ་གཡས་པའི་ལྷ་ང་སའི་གཞི་ལ་བཙུགས་ཏེ་ལག་པ་ཐལ་མོ་སྦྱར་བ་བྱས་ལ། ཤར་རམ་བྱང་དུ་ཁ་བལྟས་ནས་ཆ་གཅིག་གིས་གདོན་རྣམས་མཆོད་པའི་ཆེད་དུ་ཚིགས་སུ་བཅད་པ་འདི་རྣམས་བརྗོད་པར་བྱའོ། །ལྷ་དང་ལྷ་མིན་ཀླུ་དང་གྲུབ་པ་ཀུན། །འདབ་བཟངས་ནམ་མཁའ་ལྡིང་དང་ལུས་སྲུལ་པོ། །དྲི་ཟ་གནོད་སྦྱིན་གདོན་གྱི་རིགས་རྣམས་དང༌། །གང་ཡང་ས་ལ་གནས་པའི་ལྷ་རྣམས་ནི། །བུ་སྨད་བཅས་ཤིང་གཡོག་འཁོར་བཅས་པ་ལ། །བདག་གི་པུས་མོ་ས་ལ་བཙུགས་ནས་ནི། །ཐལ་མོ་སྦྱར་ཏེ་ཁྱེད་ལ་གསོལ་འདེབས་ཀྱིས། །གསན་ནས་ཕན་གདགས་སླང་དུ་འདིར་གཤེགས་ཤིག །འབྱུང་པོ་གང་དག་རི་རབ་སྟེང་གནས་དང༌། །དགའ་བའི་ཚལ་དང་ལྷ་ཡི་གནས་ཁང་དང༌། །ཤར་ནུབ་རི་དང་ཉི་ཟླའི་ཁྱིམ་རྣམས་དང༌། །རི་བོ་ཀུན་ལ་གང་དག་གནས་པ་དང༌། །ཆུ་བོ་ཀུན་དང་ཆུ་བོ་འདུས་རྣམས་དང༌། །རིན་ཆེན་གནས་ན་ལྷག་པར་གང་གནས་དང༌། །མཚོ་དང་རྫིང་བུ་ལྟེང་ཀ་ཁྲོན་པ་དང༌། །ཁྲུས་ཀྱི་ཆུ་དང་རི་ཡི་ཆུ་རྣམས་དང༌། །གྲོང་དང་ཕྱུགས་ལྷས་རྣམས་དང་བས་མཐའ་དང༌། །ཁང་སྟོང་དག་དང་ལྷ་ཡི་ཁྱིམ་རྣམས་དང༌། །དཀའ་ཐུབ་གནས་དང་ཚོགས་ཁང་གླང་ཆེན་བྲེས། །འབྱུང་པོ་སྣ་ཚོགས་ཕུག་གནས་གང་དག་དང༌། །ལམ་སྲང་རྣམས་དང་ཚོང་འདུས་གཞི་མདོ་དང༌། །གང་དག་ཤིང་གཅིག་དྲུང་དང་ལམ་བོ་ཆེ། །དུང་ཁྲོད་ཆེན་པོ་ནགས་ཚལ་ཆེན་པོ་དང༌། །སེང་གེ་དྲེད་དང་གླང་ཆེན་གནས་རྣམས་དང༌། །འབྲོག་ཆེན་འཇིགས་སུ་རུང་བར་གང་གནས་དང༌། །གང་དག་གླིང་མཆོག་དག་ན་གནས་པ་དང༌། །ལྷུན་པོ་དུར་ཁྲོད་དག་ན་གནས་པ་རྣམས། །དེ་རྣམས་རབ་ཏུ་དགེ་བར་གྱུར་ནས་སུ། །མེ་ཏོག་དྲི་དང་ཕྲེང་བ་བདུག་སྤོས་དང༌། །གཏོར་མ་སྣང་གསལ་ཆོགས་གུས་འབུལ་གྱིས། །འདི་རྣམས་བཞེས་ནས་གསོལ་ཞིང་བཏུང་བར་མཛོད། །འདིར་ཡང་ལས་ཀྱི་འབྲས་བུ་ལྡན་པར་མཛོད། །དེ་ལྟར་གདོན་རྣམས་ལ་མཆོད་པ་བྱས་ནས་ཕྱོགས་ཀྱི་མཆོད་པ་གཅིག་པའི་ཡིད་ཀྱིས་རབ་ཏུ་བྱའོ་ཞེས་པ། ཆ་གཞན་གྱིས་ཕྱོགས་ཀྱི་བདག་
པོ་རྣམས་མཆོད་པའི་ཆེད་དུ་ཚིགས་སུ་བཅད་པ་འདི་རྣམས་བརྗོད་པར་བྱའོ། །དབང་པོ་ཅན་གྱི་ལྟ་ཚོགས་འཁོར་དང་བཅས། །ཁྱད་འཕགས་གཏོར་མ་འདི་ནི་བཞེས་སུ་གསོལ། །མེ་དང་གཤིན་རྗེ་བདེན་བྲལ་ས་ཡི་བདག །ཆུ་བདག་རླུང་དང་ནོར་གྱི་བདག་པོ་དང༌། །དབང་དང་ལྡན་པ་འབྱུང་པོའི་ལྷ་རྣམས་དང༌། །སྟེང་གི་ཉི་ཟླ་ཚངས་པ་ཆེན་པོ་དང༌། །ལྷ་རྣམས་ཀུན་དང་གང་དག་ས་སྟེང་ཀླུ། །ས་འཛིན་ལྷ་དང་གཙང་བའི་ཚོགས་བཅས་ལ། །སོ་སོ་སོ་སོར་རེ་རེས་ཕུལ་བ་རྣམས། །ཚིམ་ཞིང་ཐོབ་པས་བཞེས་པར་མཛད་ནས་སུ། །རང་རང་ཕྱོགས་སུ་ལེགས་པར་བཞུགས་ནས་ཀྱང༌། །རང་རིགས་སྡེ་དང་སྲས་བཅས་གྲོགས་སུ་བཅས། །སྤོས་དང་གཏོར་མ་མེ་ཏོག་ཞལ་ཟས་རྣམས། །འདི་དག་གསོལ་ཞིང་བསྣམས་ཏེ་བཏུང་མཛད་ནས། །འདིར་ཡང་ལས་ཀྱི་འབྲས་བུ་ལྡན་པར་མཛོད། །དེ་ནས་ཁྱིམ་དང་གཙུག་ལག་ཁང་དང་གྲོང་ཁྱེར་ལ་སོགས་པའི་དབང་ལྡན་གྱི་མཚམས་སུ་ཡོ་བྱད་དེ་རྣམས་ཐམས་ཅད་ཉིད་བཞག་པར་བྱའོ། །ཞོ་དང་ཟན་དང་ཛམྦུ་ཏི་ཀ་རྣམས་སྣོད་གཅིག་ཏུ་བསྲེས་ནས་པི་ཌ་ཀ་ལ་སོགས་པར་བྱ་ཞིང༌། ཏིལ་དང་འབྲས་ཡོས་ནི་སྣོད་སོ་སོར་བྱས་ནས་གཡས་སྐོར་གྱིས་ཁྱིམ་ལ་སོགས་པའི་ཕྱི་རོལ་ནས་ཞུགས་ཏེ་གཏོར་མ་སྦྱིན་པར་བྱའོ། །སྣང་གསལ་ལ་སོགས་པའི་ཡོ་བྱང་གཞན་རྣམས་ནི་དབང་ལྡན་གྱི་མཚམས་ཉིད་དུ་གཞག་པར་བྱ་ཞིང་སྤོས་དང་ཆུ་ནི་དོར་བར་བྱའོ། །དེ་ལྟར་ཡང་གཏོར་མ་བྱིན་པའི་ཟན་ལ་སོགས་པ་ཇི་ལྟར་དབང་ལྡན་གྱི་མཚམས་ཇི་སྲིད་པར་རོ་ཞེས་སོ། སྔ་དྲོའམ་དུས་ཁྱད་པར་ཅན་གྱི་དུས་སུ་གཏོར་མ་དབུལ་བར་བྱ་ཞིང་སྔ་དྲོའི་ཉི་མ་ལ་གཏོར་མ་བྱིན་པའི་ཕྱི་ནས་སློབ་དཔོན་གྱིས་ཁ་ན་མ་ཐོ་པ་མེད་པའི་བཟའ་བ་རྣམས་ཆུ་ཚོད་བདུན་ན་བཟའ་བར་བྱ་སྟེ། ཉི་མ་ནུབ་པ་ན་ཡང་གཏོར་མ་མང་དུ་དབུལ་བ་ཉིད་དོ། །སློབ་དཔོན་ལ་ཡང་ཇི་ལྟར་ནུས་པའི་ཡོན་དབུལ་པར་བྱ་སྟེ། འདི་དག་ནི་བགེགས་ཉེ་བར་ཞི་བའི་དོན་དང་གཞན་ཡང་འདོད་པའི་བྱ་བའི་དོན་དང་བསོད་ནམས་ཀྱི་ངོན་དུ་ཡང་རྗེས་སུ་གནས་པའོ་ཞེས་པ་ནི་དཔུང་པ་བཟང་པོས་ཡོངས་སུ་ཞུས་པའི་མདོ་རྒྱུད་ཆེན་པོར་གསུངས་པའི་གཏོར་མའི་ཆོ་གའོ།། །།གཏོར་མ་བཞི་པོ་འདི་དག་ནི་བསྐྱེད་པའི་
རིམ་པ་ལའོ། །རྫོགས་པའི་རིམ་པ་ལ་ནི་ཤེས་རབ་དང་ཐབས་ལས་གཡོ་བ་མེད་པའི་སེམས་ཀྱིས་དགོངས་པར་གསོལ་བ་ཙམ་གྱིས་སྤྱན་དྲངས་པའི་ཤེས་རབ་དང་ཐབས་ཀྱི་རང་བཞིན་ཉིད་དང་འདོད་པའི་དཀྱིལ་འཁོར་གྱི་དབང་ཕྱུག་ལ་སོགས་པའི་ལྷ་དང་བཅས་པའི་དབང་པོ་ལ་སོགས་པ་རྣམས་ལ་ཡེ་ཤེས་ཀྱི་རོ་དང་ཐ་མི་དད་པའི་གཏོར་མ་དབུལ་བ་ནི་གཏོར་མའི་ཆོ་གའོ།། །།གདོན་སོགས་ཉེས་པ་ཉེ་བར་ཞི་བའི་ཆེད་ཉིད་དང༌། །དབུལ་བའི་སྡུག་བསྔལ་རབ་ཏུ་ཉམས་པར་བྱ་ཕྱིར་དང༌། །ཚེ་ཐུང་བ་རྣམས་ཚེ་ནི་འཕེལ་བའི་རྒྱུ་ཡི་ཕྱིར། །དཀྱིལ་འཁོར་གསུམ་གྱིས་བདེ་ལེགས་བྱེད་པ་རབ་ཏུ་བསྟན། །དེ་ཕྱིར་མི་རྣམས་རང་ལ་ཕན་པའི་བསམ་པ་ཡིས། །གདོན་གྱི་ཉེས་པ་ཉེ་བར་ཞི་བ་ཉིད་བྱ་སྟེ། །ཆོ་ག་འདི་ནི་ཤིན་ཏུ་རྣམ་དག་ཐུགས་ལྡན་པའི། །སངས་རྒྱས་རྣམས་ཀྱིས་འགྲོ་བའི་དོན་གྱི་རྒྱུར་གསུངས་ཕྱིར་རོ། །གཟའ་ཡུམ་གྱི་ནི་དཀྱིལ་འཁོར་ལ། །ཐིག་རྣམས་བྲི་བར་བྱ་སྟེ་སླར། །རྩ་བའི་ཐིག་གི་ནང་དུ་ནི། །ཆ་ཆུང་བཞི་ནི་སྤངས་བྱས་ནས། །སྔགས་པས་དེར་ནི་སྦྱིན་བྱ་སྟེ། །ཟུར་ཐིག་གཉིས་ཀྱི་བར་དུའོ། །དེ་ཡི་ནང་དུ་ཟླུམ་པོ་ནི། །དེ་ཡི་མཐར་ཐུག་བར་དུ་བྱ། །ཆ་ཆུང་གཅིག་ནས་སླར་ཡང་བསྐོར། །དེ་ལ་རྡོ་རྗེ་ཕྲེང་བ་བྱ། །ལྷག་མ་དེ་ཡང་ཆ་གསུམ་ལ། །པདྨ་འདབ་མ་བརྒྱད་པ་བྱ། །དེ་ལ་ཟུར་ཐིག་ལ་སོགས་རྣམས། །གསང་སྔགས་རིག་པས་དབྱེ་བར་བྱ། །རྩ་བའི་ཐིག་གི་ནང་དུ་ནི། །སྒོ་ཡི་བར་ནི་སྤངས་པ་དང༌། །དེ་ཡང་ནང་དུ་ཐིག་བྱ་སྟེ། །ཆ་ཆུང་བཞི་ཡི་བར་དེ་བཞིན། །ལྷག་མ་པདྨ་འདབ་བརྒྱད་ཚང༌། །འདི་ལས་ལྷག་དང་ཆད་པ་མིན། །ནོར་རྒྱུན་མ་ཡི་དཀྱིལ་འཁོར་ཏེ། །ཆོག་རིག་པ་རྣམས་ཀྱིས་བྱ། །ཚངས་ལས་ཆ་ཆུང་རིག་བྱེད་མཐར། །ཟླུམ་པོ་གཅིག་ནི་བསྐོར་བར་བྱ། །དེ་ནས་ཆ་ཆུང་ཕྱེད་སྤངས་ཏེ། །ཟླུམ་པོ་གཉིས་པའི་ཐིག་ཡིན་ནོ། །དེ་ནས་ཆ་ཆུང་བཞི་སྤངས་པར། །རྩིབས་ཀྱི་ཟླུམ་པོ་གསུམ་པ་སྟེ། །དེ་ནས་ཆ་ཆུང་ཡོངས་དོར་བར། །མུ་ཁྱུད་ཟླུམ་པོ་བཞི་པའོ། །དེ་ནས་ཆ་ཆུང་གཉིས་སྤངས་ནས། །ཟླུམ་པོ་གེ་སར་ཐིག་ཡིན་ཏེ། །ཆ་ཆུང་རིག་བྱེད་སྤངས་ནས་ནི། །ཟླུམ་པོ་པདྨའི་འདབ་མའི་ཡང༌། །དེ་ཡི་ཕྱེ་རོལ་ཟླུམ་པོ་གསུམ། །ཆ་ཆུང་གཉིས་པར་དུའོ་སླར། །པདྨ་འདབ་བརྒྱད་བྲི་བྱ་སྟེ། །ཕྱོགས་དང་
ཕྱོགས་བྲལ་རྣམས་སུའོ་སླར། །རྣམ་པར་རྒྱལ་བའི་འཁོར་ལོ་ནི། །དོན་ཀུན་གྲུབ་པར་བྱེད་པ་སྟེ། །སེམས་ཅན་ཀུན་ལ་ཕན་བལྟས་ནས། །འདི་ནི་ཡེ་ཤེས་རྡོ་རྗེས་བྱ།། །།དེ་ལ་དང་པོར་གཟའ་ཡུམ་གྱི་ཆོ་ག་བྲི་བར་བྱའོ། །དབུས་ཀྱི་ལྟེ་བར་པདྨ་དཀར་པོའི་སྟེང་དུ་གུར་གུམ་གྱི་དྲིའི་མཎྜལ་ལ་ལྷ་ཉི་མ་བསམ་པར་བྱ་སྟེ། །དཀའ་ཐུབ་ཅན་གྱི་གཟུགས་འཛིན་པ་སྐུ་མདོག་དམར་པོ་ཕྱག་དག་གིས་ཆུ་སྐྱེས་དཀར་པོ་བསྣམས་པ། །ཉི་མ་བྱེ་བའི་འདོད་དང་མཚུངས་པའོ། །འདི་ལ་ནི་འོ་ཐུག་གི་བཟའ་བ་དང༌། །ཀུན་དུ་རུའི་བདུག་སྤོས་ཀྱང་དབུལ་བར་བྱ་སྟེ། ཨོཾ་ཨཱཿ་མེ་གྷ་ཨུ་ལ་ཀཱ་ཡ་སྭཱ་ཧཱ། ཞེས་པ་སྙིང་པོའི་སྔགས་ཀྱིས་མཆོད་པར་བྱའོ། །ཤར་གྱི་འདབ་མར་ཆུ་སྐྱེས་དམར་པོའི་སྟེང་དུ་པྲི་ཡང་ཀུའི་དྲིའི་མཎྜལ་ལ་ཟླ་བ་བྲམ་ཟེའི་གཟུགས་འཛིན་པ་སྐུ་མདོག་དཀར་པོ་རལ་པའི་ཅོད་པན་ཅན། །ཕྱག་གིས་བགྲང་ཕྲེང་དང་མེ་ཏོག་ཀུ་མུ་དལ་གནས་པའི་སྤྱི་བླུགས་འཛིན་པའོ། །འདི་ལ་ནི་མར་གྱི་བཟའ་བ་དང་སིཧླའི་བདུག་སྤོས་དབུལ་བར་བྱ་སྟེ། ཨོཾ་ཙནྡྲ་ཨ་མྲྀ་ཏ་བི་ཀྲ་མཱ་ཡ་ཤཱི་ཏ་ཨཾ་ཤ་བེ་ཨཱཿ་སྭཱ་ཧཱ། ལྷོའི་འདབ་མར་པདྨ་དཀར་པོའི་སྟེང་དུ་ཙནྡན་གྱི་དྲིའི་མཎྜལ་ལ་བཀྲ་ཤིས་ནི་དགེ་སློང་གི་གཟུགས་འཛིན་པ། སྐུ་མདོག་དམར་པོ་གོས་དམར་པོ་དང་ཅོད་པན་ཅན། གཡོན་པས་ཤཀྟི་འཛིན་ཅིང་གཡས་པས་མཆོག་སྦྱིན་མཛད་པའོ། །འདི་ལ་ནི་སྲན་མ་ནག་པོའི་ཟན་ནམ་བུ་རམ་གྱི་ཟན་གྱི་བཟའ་བ་དང༌། གུ་གུལ་གྱི་བདུག་སྤོས་ཀྱང་དབུལ་བར་བྱ་སྟེ། ན་མོ་རཀྟ་ཨདྒ་ར་ཛྭ་ལ་ཀུ་མཱ་རཱ་ཡ་སྭཱ་ཧཱ། ནུབ་ཀྱི་འདབ་མར་ཆུ་སྐྱེས་དམར་པོའི་སྟེང་དུ་ཨ་ཀ་རུ་ནག་པོའི་དྲིའི་མཎྜལ་ལ་གཟའ་ལྷག་ཏུ་གྲགས་པ་ནི་ཚངས་པར་སྤྱོད་པའི་གཟུགས་ཅན་སྐུ་མདོག་སེར་པོ་སྨར་དམར་པོ་ཅན། གཡས་པ་དང་གཡོན་པ་དག་གིས་བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་སྲན་མུངྒ་དང་རྒྱ་སྲན་སྦྱར་པའི་བཟའ་བ་དང་གནྡྷ་ར་སའི་བདུག་སྤོས་ཏེ། རཱ་ཛ་སུ་ཏྲ་བུདྡྷ་སུ་པཱི་ཏ་ཝརྞཱ་ཡ་ནམཿ་ཨོཾ་བུདྡྷཱ་ཡ་སྭཱ་ཧཱ། བྱང་གི་འདབ་མར་ཆུ་སྐྱེས་དཀར་པོའི་ལྟེ་བར་དེ་བ་དཱ་རུའི་དྲིའི་མཎྜལ་ལ་ཕུར་བུ་དགེ་སློང་གི་རྣམ་པ་གསེར་བཅོ་མའི་འོད་ཅན། སྨ་ར་དམར་པོ་དང་ལྡན་པ་བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་ཞོ་ཟན་ནམ་འོ་ཐུག་གི་བཟའ་བ་དང་སྦང་དང་མར་གྱི་
བདུག་སྤོས་ཏེ། ལོ་ཏི་ཏ་ཝརྞ་ནིར་ག་མཱ་ཡ་བྲྀ་ཧ་ས་བཱ་ད་ཡེ་ཨོཾ་ན་མོ་བྷོ་ག་སྤ་དཱ་ཡ་སྭཱ་ཧཱ། མེའི་འདབ་མར་ཙནྡན་གྱི་དྲིའི་མཎྜལ་བ་སངས་ནི་ཕྱུགས་བདག་གི་བརྟུལ་ཞུགས་འཛིན་པ་སྐུ་མདོག་དཀར་པོ་རལ་བའི་ཅོད་པན་ཅན། བགྲང་ཕྲེང་དང་སྤྱི་བླུགས་འཛིན་པའོ། །འདི་ལ་ནི་འོ་ཐུག་གི་བཟའ་བ་དང་ག་བུར་གྱི་བདུག་སྤོས་ཀྱང་དབུལ་བར་བྱ་སྟེ། ཨོཾ་ན་མཿ་ཤཱཀྲ་ཨ་དྷི་པ་ཏ་ཡེ་ཨ་སུ་ར་ཨུཏྟ་མཱ་ཡ་ཤུདྡྷེ་བི་ར་ཛེ་སྭཱ་ཧཱ། བདེན་བྲལ་གྱི་འདབ་མར་འདམ་སྐྱེས་དཀར་པོའི་སྟེང་དུ་སྔོན་པོ་དང་ཙནྡན་གྱི་དྲིའི་མཎྜལ་ལ་སྤེན་པ་ནི་ནག་པོ་ཕྱོགས་ཀྱི་གོས་ཅན་དུ་ཤེས་པར་བྱ་སྟེ། རལ་པ་སེང་སྐྱའི་ཅོད་པན་ཅན་སྨ་ར་ཙན་བགྲང་ཕྲེང་དང་འཁར་གསིལ་འཛིན་པའོ། །འདི་ལ་ནི་སྲན་ནག་ལས་སྦྱར་བའི་ཟན་གྱི་བཟའ་བ་དང་གནྡྷ་ར་སའི་བདུག་སྤོས་དབུལ་བར་བྱ་སྟེ། ཨོཾ་ཤ་ན་ནཱི་ལ་ཨ་པ་སུ་ཀྲྀཥྞཱ་ཡ་ཀྲྀཥྞཱ་བརྞ་བྷུ་ག་སྭཱ་ཧཱ། རླུང་གི་འདབ་མར་ཆུ་སྐྱེས་དམར་པོའི་སྟེང་དུ་པཎྜི་ཏ་ཀ་རིའི་དྲིའི་མཎྜལ་ལ་སྒྲ་གཅན་ནི་ཐོད་པ་དང་ལྡན་པ་ལུས་ཕྱེད་ཉི་མའི་ཤིང་རྟ་ལ་གནས་ཤིང་འཇིགས་སུ་རུང་བའི་སྤྱན་གཉིས་དང་ལྡན་པ། མཆེ་བ་རྣམ་པར་གཙིགས་ཤིང་སྨིན་མའི་ཁྲོ་གཉེར་དཔྲལ་བར་བསྡུས་པ་ཁ་དོག་ལྔ་པའི་སྤྲིན་གྱི་གསེབ་ན་གནས་བ། ཕྱག་གིས་ཉི་མ་དང་ཟླ་བ་ཟ་བའི་ཚུལ་གྱིས་གནས་པའོ། །འདི་ལ་ནི་ཉ་དང་ཤ་འམ་ཏིལ་ལས་སྦྱར་བའི་བཟའ་བ་དང་བིལ་བའི་བདུག་སྤོས་ཏེ། ཨོཾ་ན་མོ་པི་ཀྲྀ་ཏ་པ་ཀྭ་རུ་དྷི་ར་རཱ་ཧོ་བྷིདྒ་ཨཉྫ་སིནྣཱ་བྷཱ་ཡ་ཨ་མྲྀ་ཏ་པྲྀ་ཡཱ་ཡ་སྭཱ་ཧཱ། དབང་ལྡན་གྱི་འདབ་མར་པདྨ་དམར་པོའི་སྟེང་དུ་སྦྱར་སྤོས་ཀྱི་དྲིའི་མཎྜལ་ལ་གཏུམ་པོའི་གཟུགས་ཅན་མཇུག་རིངས་ནི་དུ་བའི་མདོག་ཅན་ཐལ་མོ་སྦྱར་བ་ཀླུའི་རྣམ་པ་ཅན་གྱི་མཇུག་མ་འཁྱིལ་བའོ། །འདི་ལ་ནི་སྣུམ་ཁུར་གྱི་བཟའ་བ་དང་སྤོས་དཀར་གྱི་བདུག་སྤོས་ཀྱང་དབུལ་བར་བྱའོ། །ཨོཾ་ན་མོ་དྷཱུ་མྲ་ཨཱ་བྷ་ཝ་རྞ་སནྣི་བྷཱ་ཡ་ཛྱོ་ཏི་ཀ་ཏ་བེ་སྭཱ་ཧཱ། དཀྱིལ་འཁོར་གྱི་ཤར་གྱི་སྒོར་སངས་རྒྱས་བཅོམ་ལྡན་འདས་གསེར་གྱི་མདོག་ཅན་ཏིང་ངེ་འཛིན་གྱི་ཕྱག་རྒྱ་མཛད་པའོ། །ལྷོའི་སྒོར་ཕྱག་ན་རྡོ་རྗེ་སྔོ་བསངས་ཕྱག་གཡས་པས་རྡོ་རྗེ་ཐུགས་ཀར་འཛིན་ཞིང་ཕྱག་གཡོན་པ་ས་ལ་གནས་པའོ། །ནུབ་ཀྱི་སྒོར་འཇིག་རྟེན་དབང་ཕྱུག་དམར་པོ་གཡས་པས་མཆོག་སྦྱིན་དང་གཡོན་པས་མི་འཇིགས་
པ་མཛད་པའོ། །བྱང་གི་སྒོར་འཇམ་དཔལ་གཞོན་ནུ་གུར་གུམ་གྱི་མདོག་ཅན་ཆོས་འཆད་ཀྱི་ཕྱག་རྒྱ་མཛད་པའོ། །དབང་ལྡན་དུ་ནི་གཟའ་ཐམས་ཅད་དེ་སྣ་ཚོགས་པའི་མདོག་དང༌། སྣ་ཚོགས་པའི་དབྱིབས་དང་རྣམ་པ་སྣ་ཚོགས་པའི་གཟུགས་ཅན་ནོ། །མེར་ནི་རྒྱུ་སྐར་ཐམས་ཅད་དེ་རང་རང་གི་བཞོན་པ་ལ་ཡང་དག་པར་གནས་ཤིང་ཐམས་ཅད་ཐལ་མོ་ཡང་དག་པར་སྦྱར་བའོ། །བདེན་བྲལ་དུ་ནི་ཉེ་བར་འཚེ་བར་བྱེད་པ་ཐམས་ཅད་དེ་འཇིགས་སུ་རུང་བའི་གཟུགས་ཅན་ནོ། །རླུང་དུ་ནི་རྡོ་རྗེ་བཙུན་མ་རིག་པ་ཆེན་པོ་སྟེ་དཀར་པོ་དང་སྔོན་པོ་དང་དམར་པོའི་ཞལ་གསུམ་མ་རྩ་བའི་ཕྱག་དག་ནི་རྣམ་པར་བཤད་པའི་ཕྱག་རྒྱ་འཛིན་ཅིང༌། གཡས་པ་དག་ན་པདྨ་དང་རིན་པོ་ཆེ་འབར་བ་དང་གཡོན་པ་དག་ན་ཞགས་པ་དང་ཤཀྟི་བསྣམས་པ། རིན་པོ་ཆེའི་ཅོད་པན་ཅན་ཟླ་བའི་གདན་ལ་རྡོ་རྗེ་སྐྱིལ་ཀྲུང་གིས་བཞུགས་པ་ལོ་བརྒྱད་གཉིས་ལོན་པ་རྒྱན་ཐམས་ཅད་དང་ལྡན་པའོ། །དཀྱིལ་འཁོར་གྱི་སྒོའི་ཕྱི་རོལ་དུ་ཤར་དུ་ཡུལ་འཁོར་སྐྱོང་དང༌། ལྷོར་འཕགས་སྐྱེས་པོ་དང༌། ནུབ་ཏུ་སྤྱན་མི་བཟང་དང༌། བྱང་དུ་ལུས་ངན་པོ་ནི་སེར་པོ་དང་ནག་པོ་དང་དམར་པོ་དང་སེར་པོ་སྟེ་རང་རང་གི་ཕྱག་མཚན་དང་ལྡན་བའོ། །དེ་ལ་སངས་རྒྱས་ལ་སོགས་པའི་ཞལ་ཟས་ནི་སངས་རྒྱས་ལའོ་ཐུག་དང༌། ཕྱག་ན་རྡོ་རྗེ་ལ་འོ་མ་དང༌། འཇིག་རྟེན་དབང་ཕྱུག་ལ་བུ་རམ་གྱི་ཟན་དང༌། འཇམ་དཔལ་ལ་ཞོའི་ཟན་དང༌། གཟའ་ཐམས་ཅད་ལ་མར་གྱི་ཟན་དང༌། རྒྱུ་སྐར་ཐམས་ཅད་ལ་ཞོའི་ཟན་དང༌། ཉེར་འཆོ་བྱེད་པ་ཐམས་ཅད་ལ་སྲན་ནག་གི་ཟན་དང༌། བཅོམ་ལྡན་འདས་མ་ལ་འོ་མ་དང་དྲི་བཟང་པོའི་བདུག་སྤོས་དང༌། ཐམས་ཅད་ལ་སྤོས་དཀར་གྱི་བདུག་སྤོས་དང་རང་རང་གི་མདོག་ཅན་གྱི་བ་དན་རྣམས་རང་རང་གི་མདོག་ཅན་གྱི་སྡོང་བུ་རྣམས་ལ་མར་གྱི་སྣང་གསལ་དང༌། རང་རང་གི་མདོག་ཅན་གྱི་རས་བཟང་པོ་རྣམས་ཀྱང་དབུལ་བར་བྱའོ། །སངས་རྒྱས་ལ་སོགས་པའི་སྔགས་ཀྱི་ཚིག་རྣམས་ནི། ཨོཾ་ན་མོ་བུདྡྷཱ་ཡ་སྭཱ་ཧཱ། ཨོཾ་བཛྲ་དྷཱ་རཱ་ཡ་ན་མཿ་སྭཱ་ཧཱ། ཨོཾ་པདྨ་དྷཱ་རཱ་ཡ་ན་མཿ་སྭཱ་ཧཱ། ཨོཾ་ཀུ་མཱ་རཱ་ཡ་ན་མཿ་སྭཱ་ཧཱ། ཨོཾ་སརྦ་གྲ་ཧ་ནཱཾ་ན་མཿ་སྭཱ་ཧཱ། ཨོཾ་སརྦ་ནཀྵ་ཧྲཱ་ཎཱཾ་སྭཱ་ཧཱ། ཨོཾ་སརྦ་ཨུ་པ་དྲ་བཱ་ནཱཾ་སྭཱ་ཧཱ། ཨོཾ་མ་ཧཱ་བིདྱེ་ཧཱུཾ་ཧཱུཾ་ཧཱུཾ་ཕཊ་སྭཱ་ཧཱ། ཨོཾ་དྷྲེ་ཏ་རཥྚཱ་ཡ་སྭཱ་ཧཱ། ཨོཾ་བི་རཱུ་ཌྷ་ཀཱ་ཡ་
སྭཱ་ཧཱ། ཨོཾ་བི་རའུ་པ་ཀཥཱ་ཡ་སྭཱ་ཧཱ། ཨོཾ་ཀུ་བཻ་རཱ་ཡ་སྭཱ་ཧཱ། འདི་རྣམས་ཐམས་ཅད་ལ་རང་རང་གི་སྔགས་དེ་ཉིད་ཀྱིས་མཆོད་ཡོན་དབུལ་བར་བྱ་སྟེ། དེའང་ཉི་མ་ལ་ནི་ཏིལ་དམར་པོ་དང་ཟངས་དང་ཙནྡན་དམར་པོས་སོ། །ཟླ་བ་ལ་ནི་དངུལ་དང་ཏིལ་དཀར་པོ་དང་ཙནྡན་དཀར་པོས་སོ། །བཀྲ་ཤིས་ལ་ནི་ཟངས་དང་འབྲས་དམར་པོ་དང་ཙནྡན་དམར་པོས་སོ། །གཟའ་ལྷག་ལ་ནི་ནས་དང་བྱི་རུ་དང་གུར་གུམ་གྱིས་སོ། །ཕུར་བུ་ལ་ནི་གསེར་དང་ཡུངས་ཀར་དང་གུར་གུམ་གྱིས་སོ། །པ་སངས་ལ་ནི་མུ་ཏིག་དང་འབྲས་མ་ཆག་པ་དང་ཙནྡན་དཀར་པོས་སོ། །སྤེན་པ་ལ་ནི་ལྕགས་དང་སྲན་ནག་དང་གླ་རྩིས་སོ། །སྒྲ་གཅན་ལ་ནི་ལྕགས་དང་ཏིལ་ནག་པོ་དང་དྲི་ཐམས་ཅད་ཀྱིས་སོ། །མཇུག་རིངས་ལ་ནི་ལྕགས་དང་སྲན་མུདྒ་དང་དྲི་བཟང་པོས་སོ། །ལྷག་མ་རྣམས་ལ་ནི་མར་དང་སྦྲང་རྩིས་དུང་བཀང་སྟེ་རིན་པོ་ཆེ་ལྔ་བཅུག་ནས་མཆོད་ཡོན་དབུལ་ལོ། །ཛཿ་ཧཱུཾ་བཾ་ཧོཿ་ཞེས་པའི་སྔགས་ཀྱིས་དགུག་པ་དང་གཞུག་པ་དང་བཅིང་བ་དང་མཉེས་པའི་ཆོ་གས་རོ་མཉམ་པར་གྱུར་པར་རྣམ་པར་བསམས་ཏེ་སྔར་བཤད་བའི་མེ་ཏོག་དང་བདུག་སྤོས་ལ་སོགས་པས་སོ་སོའི་སྔགས་ཀྱིས་ཡང་དག་པར་མཆོད་པར་བྱའོ། །དེ་ལ་འདི་དག་གིས་རིམ་པ་ཇི་ལྟ་བར་འདི་རྣམས་ཐམས་ཅད་མཆོད་པ་བྱས་ནས་གཟའ་ཐམས་ཅད་ཀྱི་སྔགས་རྣམས་རེ་རེ་ཞིང་ལན་བརྒྱ་རྩ་བརྒྱད་བཟླས་པར་བྱའོ། །དེའི་རྗེས་སུ་གཟའ་རྣམས་ཀྱི་ཡུམ་ཞེས་བྱ་བའི་གཟུངས་ལན་བདུན་བླུག་པར་བྱའོ། །དེ་ནས་གཟའ་ཡུམ་གྱི་སྙིང་པོའི་སྔགས་བརྒྱ་རྩ་བརྒྱད་དམ་སྟོང་ངམ་གཞན་ཡང་ཇི་ལྟར་ནུས་པ་ཡོངས་སུ་བཟླས་ཏེ་རང་གི་མངོན་པར་འདོད་པའི་དངོས་གྲུབ་ཞུས་ནས་ཡི་གེ་བརྒྱ་པས་བརྟན་པར་བྱ་ཞིང་ཆོ་ག་བཞིན་དུ་གཤེགས་སུ་གསོལ་ལ་སྔར་བཞིན་དུ་ཆུ་ཀླུང་གི་ཆུ་རྣམས་ལ་དོར་བར་བྱའོ། །ཕྱི་ནས་སློབ་དཔོན་ལ་སོགས་པ་རྣམས་ཁ་ན་མ་ཐོ་པ་མེད་པའི་བཟའ་བ་ལ་སྤྱད་པར་བྱ་ཞིང་ཡོན་ལ་སོགས་པ་ཇི་ལྟར་ནུས་པ་དབུལ་བར་བྱའོ་ཞེས་པ་གཟའ་ཡུམ་གྱིས་བདེ་ལེགས་སུ་བྱེད་པའི་ཆོ་གའོ།། །།ནོར་རྒྱུན་མའི་ཆོ་ག་བཤད་པར་བྱ་སྟེ། སྟོང་པ་ཉིད་བསྒོམས་པའི་མ་ཐར་ཧྲཱིཿ་ཡིག་ཡོངས་སུ་གྱུར་པ་ལས་པདྨ་སེར་པོའི་སྟེང་དུ་ཨ་
ཡིག་ལས་ཟླ་བའི་དཀྱིལ་འཁོར་དང༌། སླར་ཡང་དེའི་སྟེང་དུ་བྷྲཱུཾ་ཡིག་ཡོངས་སུ་གྱུར་བ་ལས་རིན་པོ་ཆེའི་རི་བོ་དང་དེའི་སྟེང་དུ་བྷཱུཾ་ཡིག་གི་ས་བོན་ལས་ནོར་རྒྱུན་མ་བསྒོམ་པར་བྱ་སྟེ། སྐུ་མདོག་སེར་པོ་ཞལ་གཅིག་ཕྱག་དྲུག་མ་རོལ་པའི་འདུག་སྟངས་ཀྱིས་བཞུགས་པ། དེ་བཞིན་གཤེགས་པའི་ཅོད་པན་ཅན་ཕྱག་གཡས་ཀྱི་ངང་པོས་མཆོག་སྦྱིན་གྱི་ཕྱག་རྒྱས་གཏེར་སྟོན་པར་མཛད་པ། གཉིས་པས་རིན་པོ་ཆེའི་ཆར་འབེབས་པར་མཛད་པ། །གསུམ་པས་དེ་བཞིན་གཤེགས་པ་རྡོ་རྗེ་འཛིན་པ་རྒྱ་མཚོའི་དབྱངས་ལ་ཕྱག་མཛད་པ། ཕྱག་གཡོན་གྱི་དང་པོས་བུམ་པ་བཟང་པོ་དང༌། གཉིས་པས་འབྲས་ཀྱི་སྙེ་མ་དང༌། གསུམ་པས་ཤེས་རབ་ཀྱི་ཕ་རོལ་ཏུ་ཕྱིན་པའི་གླེགས་བམ་འཛིན་པ་རྒྱན་ཐམས་ཅད་དང་ལྡན་པར་བསམ་པར་བྱའོ། །སྣམ་བུ་གཉིས་པ་ལ་ནུབ་ཀྱི་ཕྱོགས་སུ་དེ་བཞིན་གཤེགས་པ་རྡོ་རྗེ་འཛིན་པ་རྒྱ་མཚོའི་ངེས་པར་སྒྲོགས་པ་སེར་པོ་རྡོ་རྗེའི་སྐྱིལ་ཀྲུང་གི་བྲལ་ལ་ཕྱག་གཡོན་པ་བཞག་ཅིང་གཡས་པས་མཆོག་སྦྱིན་མཛད་པའོ། །གཡས་སུ་འཕགས་པ་སྤྱན་རས་གཟིགས་དབང་ཕྱུག་དང༌། གཡོན་དུ་ཕྱག་ན་རྡོ་རྗེ་སྟེ་དེ་དག་ཀྱང་དམར་པོ་དང་ལྗང་གུ་མཆོག་སྦྱིན་དང་རྡོ་རྗེའི་ཕྱག་ཅན་གཡོན་པ་དག་ནི་རྒྱལ་པོ་རོལ་པའི་ཚུལ་གྱིས་གནས་པ། རྡོ་རྗེ་སྐྱིལ་ཀྲུང་གིས་བཞུགས་པའོ། །ཤར་དུ་ལྷ་མོ་ཨི་ལཱ་ཉེ་བར་མཁོ་བ་ཐམས་ཅད་ལ་དབང་བྱེད་པ་སེར་མོའོ། །དེའི་གཡོན་དུ་ཆུ་བདག་རོ་བཅུད་ལ་དབང་བྱེད་པ་དཀར་པོའོ། །དེའི་གཡས་སུ་ཛམྦྷ་ལ་སྔོན་པོའོ། །མེ་མཚམས་སུ་ཙི་པི་ཀུཎྜ་ལི་ཅུང་ཟང་དམར་པོའོ། །བདེན་བྲལ་དུ་ཀི་ལི་མཱ་ལི་མ་ར་ཀ་ཏ་ལྟར་ལྗང་བའོ། །རླུང་དུ་སྒོའི་དབང་པོ་སེར་པོའོ། །དབང་ལྡན་དུ་སྤྱོད་པའི་དབང་པོ་དཀར་སེར་རོ། །སྣམ་བུ་གསུམ་པ་ལ་མེར་སྦས་བའི་ལྷ་མོ་ལྗང་གུའོ། །བདེན་བྲལ་དུ་ཤིན་ཏུ་སྦས་པའི་ལྷ་མོ་དམར་མོ་གདུགས་འཛིན་པའོ། །རླུང་དུ་ལྷ་མོ་དབྱངས་ཅན་མེ་སེར་མོ་ཕྱག་ན་རྒྱལ་མཚན་ནོ། །དབང་ལྡན་དུ་ཟླ་བ་ཆུ་ཤེལ་གྱི་ལྷ་མོ་དཀར་མོ་བ་དན་གྱི་ཕྱག་རྒྱ་ཅན་ནོ། །ཤར་དུ་གང་བ་བཟང་པོ་གུར་གུམ་གྱི་མདོག་ཅན་ནེའུ་ལེ་དང་བི་ཛ་པའུ་ར་ཀའི་ཕྱག་རྒྱ་ཅན་ནོ། །ལྷོར་ནོར་བུ་བཟང་པོ་སྔོན་མོའི་འོད་དང་ལྡན་པ་རིན་པོ་ཆེ་དང་བི་ཛ་པའུ་ར་ཀའི་ཕྱག་རྒྱ་ཅན་ནོ། །ནུབ་ཏུ་
ནོར་སྦྱིན་མ་དམར་མོ་བུམ་པ་བཟང་པོ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །བྱང་དུ་རྣམ་ཐོས་སྲས་སེར་པོ་རིན་པོ་ཆེའི་མྱུ་གུ་དང་བི་ཛ་པཱུ་ར་ཀའི་ཕྱག་རྒྱ་ཅན་ནོ། །ཐམས་ཅད་སེམས་དཔའི་སྐྱིལ་ཀྲུང་ཅན་ཏེ། གང་བཤད་པ་དེ་རྣམས་ནི་གཡས་པ་བི་ཛ་པཱུ་ར་ཀའི་ཕྱག་ཅན་དང༌། གཡོན་པ་བརླ་ལ་བརྟེན་པའོ། །འདི་དག་ནི་ལྷ་རྣམས་དགོད་པའི་རིམ་པའོ། །བཅོམ་ལྡན་འདས་མའི་རྩ་བའི་སྔགས་ནི། ཨོཾ་བ་སུ་དྷཱུ་ར་སྭཱ་ཧཱ། ཨོཾ་ལཀྵྨཱ་བྷུ་ཏ་ལ་ནི་བཱ་སི་ནཱི་ཡེ་སྭཱ་ཧཱ། ཉེ་བའི་སྙིང་པོའོ། །ཐམས་ཅད་ལ་ཡང་དང་པོར་ཨོཾ་ཡིག་དང་མཐར་སྭཱ་ཧཱ་དང༌། རང་རང་གི་མིང་སྤེལ་བའི་སྔགས་ཀྱིས་མཆོད་པར་བྱའོ། །དེ་ནས་གང་སུ་ཡང་རུང་རིགས་ཀྱི་བུ་འམ་རིགས་ཀྱི་བུ་མོ་མཆོག་ཏུ་དད་པ་དང་ལྡན་པས་ནོར་རྒྱུན་མའི་སྐུ་གཟུགས་སམ་བྲིས་སྐུ་རབ་ཏུ་བཀོད་དེ་ཇི་ལྟར་འབྱོར་པའི་མཆོད་པ་བྱས་ནས་ཉི་མ་རེ་རེ་ཞིང་མ་ཆང་པར་མཉམ་པར་གཞག་སྟེ། གཟུངས་རྣམས་མ་ཆད་པར་བཀླག་པར་བྱའོ། །དེའི་རིམ་པས་ནི་ཐམས་ཅད་དུ་ཕུན་སུམ་ཚོགས་པར་འགྱུར་རོ། །དེ་ནས་ཉིན་པར་སྔ་མོ་ནས་རྔུལ་ཚོན་སེར་པོའི་དཀྱིལ་འཁོར་བྱས་ཏེ་བརྟུལ་ཞུགས་དང་ལྡན་པས་མཚན་མོ་འདས་པར་བྱས་ནས། སླར་ཡང་སྔ་མོར་དྲི་བཟང་པོའི་ཆུས་ཁྲུས་བྱས་ལ་གཙང་ཞིང་དྲི་མ་མེད་པའི་གོས་གྱོན་ཏེ་ཚངས་པར་སྤྱོད་པར་གྱུར་པས་དགེ་བའི་གནས་སུ་སྐུ་གཟུགས་སམ་བྲིས་སྐུ་རབ་ཏུ་བཀོད། །ཙནྡན་གྱི་མཎྜལ་བྱས་ཏེ་ཐེ་ཚོམ་མེད་པས་གཟུངས་རྣམས་བར་མ་ཆད་པར་ལན་གསུམ་བཀླག་པར་བྱའོ། །དེ་ལྟ་ན་རིགས་ཀྱི་བུའམ་རིགས་ཀྱི་བུ་མོ་དེའི་ཁྱིམ་སྐྱེས་བུ་ཆེན་པོའི་ཚད་ཙམ་དུ་ནོར་གྱི་རྒྱུན་གྱིས་གང་བར་འགྱུར་ཏེ་ནོར་ཐམས་ཅད་དང༌། སོ་བ་དང༌། གསེར་དང་དངུལ་དང་ཉེ་བར་མཁོ་བ་ཐམས་ཅད་ཀྱིས་སོ། །ཉེ་བར་འཚེ་བ་ཐམས་ཅད་ཀྱང་མེད་པར་འགྱུར་རོ། །གང་ཡང་དེ་བཞིན་ཉིད་དུ་མཎྜལ་ཟླུམ་པོ་བྱས་ནས་སླར་ཡང་སྔ་མོར་དྲི་ཞིམ་པོའི་ཆུས་ཁྲུས་བྱས་པ་གཙང་ཞིང་དྲི་མ་མེད་པའི་གོས་གྱོན་ཏེ། མྱོས་བྱེད་ཀྱི་བཏུང་བ་ལ་སོགས་དང་བྲལ་ཞིང་ཁ་ན་མ་ཐོ་བ་དང་ལན་ཚྭ་མེད་པའི་བཟའ་བ་དང་ཚངས་པར་སྤྱོད་པ་དང་ལྡན་པར་གྱུར་པས། རྒྱས་པའི་དོན་དུ་རང་གི་ཁྱིམ་མམ་གཞན་གྱི་ཁྱིམ་མམ་དགེ་བའི་གནས་
སམ་ཁང་པའི་མཛོད་མིག་ཏུ་ཙནྡན་གྱི་མཎྜལ་གྲུ་བཞི་པ་བྱས་ལ། བཅོམ་ལྡན་འདས་དེ་བཞིན་གཤེགས་པ་དང་འཕགས་པ་སྤྱན་རས་གཟིགས་དབང་ཕྱུག་དང༌། སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང་སྔགས་ཀྱི་ལྷ་རྣམས་ཀྱི་སྤྱན་སྔར་ཇི་ལྟར་འབྱོར་པའི་མཆོད་པ་རྒྱ་ཆེན་པོ་བྱས་ཏེ། ཤིན་ཏུ་མཉམ་པར་གཞག་པས་བཅོམ་ལྡན་འདས་མ་དེ་ཉིད་བསྒོམ་པར་བྱ་ཞིང༌། སེམས་རྩེ་གཅིག་པས་སྦྱིན་བདག་ལ་ཕན་བ་དང་བདེ་བའི་བསམས་པ་དང་དད་པ་དང་མཆོག་ཏུ་ཐེ་ཚོམ་མེད་པས་གཟུངས་འདི་ཉིན་མཚན་གཅིག་གམ་ཉིན་མཚན་བདུན་དུ་གཞན་དང་མི་སྨྲ་ཞིང་རྒྱུན་མ་ཆད་པར་བཀླག་པར་བྱའོ། །སློབ་དཔོན་གྱིས་དེ་བཞིན་གྱི་བརྟུལ་ཞུགས་དང་ལྡན་པས་མཚན་མོ་གསུམ་དུ་བྱ་ཞིང༌། ཉིན་མོའང་གསུམ་དུ་བྱས་ནས་མཆོད་པ་དང་གཏོར་མ་དང་ཉེ་བར་མཁོ་བ་ཐམས་ཅད་ཀྱིས་མཆོད་པར་བྱའོ། །དེ་བཞིན་དུ་སྦྱིན་བདག་གིས་ཀྱང་བརྟུལ་ཞུགས་དང་ལྡན་པས་ཐམས་ཅད་བརྩམ་བར་བྱ་ཞིང་ཀློག་པའི་དུས་སུ་ཡང་ཇི་ལྟར་ནུས་པས་སེམས་ཅན་རྣམས་ལ་གསེར་ལ་སོགས་པའི་སྦྱིན་པ་གཏང་བར་བྱ་སྟེ། དེ་ནས་བཀླགས་པས་འགྲུབ་པར་འགྱུར་རོ། །དེ་ལ་མིག་བཙུམས་པ་ཙམ་ལ་ནོར་རྒྱུན་མས་སྐྱེས་བུ་ཆེན་པོ་དང་འཚམ་པའི་ནོར་གྱི་རྒྱུན་གྱིས་སྦྱིན་བདག་གི་ཁྱིམ་ཡོངས་སུ་འགེངས་པར་འགྱུར་ཏེ། ནོར་ཐམས་ཅད་དང་སོ་བ་དང་གསེར་དང་དངུལ་དང་ཉེ་བར་མཁོ་བ་ཐམས་ཅད་ཀྱིས་སོ། །ཉེ་བར་འཚེ་བ་ཐམས་ཅད་ཀྱང་མེད་པར་འགྱུར་རོ། །དེ་ནས་སྔར་བཞིན་དུ་རྡུལ་ཚོན་གྱི་དཀྱིལ་འཁོར་གཤེགས་སུ་གསོལ་ལ་རྔུལ་ཚོན་ཐམས་ཅད་ཁང་བའི་མཛོད་མིག་དུ་བཅུག་ནས་གཞག་པར་བྱ་སྟེ། གང་དུ་རྔུལ་ཚོན་བཅུག་པ་དེར་ནི་ཐམས་ཅད་ཟད་པ་མེད་པར་འགྱུར་རོ། །རྒྱལ་མཚན་དང་བ་དན་ལ་སོགས་པ་གཞན་དག་ནི་ཆུ་ཀླུང་གི་ཆུ་ལ་དོར་བར་བྱའོ། །སློབ་དཔོན་ལ་སོགས་པ་རྣམས་ཀྱང་ཁ་ན་མ་ཐོ་བ་མེད་པའི་བཟའ་བ་དང་ཡོན་ལ་སོགས་པས་མཉེས་པར་བྱའོ་ཞེས་པ་ནོར་རྒྱུན་མའི་གཟུངས་བཀླག་པའི་ཆོ་གའོ།། །།རིགས་ཀྱི་བུ་དག་དེ་བཞིན་གཤེགས་པ་ཐམས་ཅད་ཀྱི་གཙུག་ཏོར་རྣམ་པར་རྒྱལ་མ་ཞེས་པའི་གཟུངས་འདི་ནི། །འཆི་བའི་ཆད་པ་ཆེན་པོ་
འཛིན་པ་རྣམས་དག་པར་བྱེད་ཅིང་སྡིག་པ་སེལ་བར་བྱེད་པ་སྟེ་གང་སུ་དག་ཚེ་རིང་པར་འདོད་པ་རྣམས་ཀྱིས་འཆད་པར་འགྱུར་བའི་རིམ་པས་དེ་ཉིད་བཀླག་པར་བྱའོ། །རྣམ་པར་རྒྱས་པའི་ས་ཕྱོགས་འགའ་ཞིག་ཏུ་འཇིམ་པ་དང་བ་བྱུང་རྣམས་ཀྱིས་ཉེ་བར་བྱུགས་ཏེ་དྲི་བཟང་པོའི་ཆུས་མངོན་བར་གཏོར་ལ། རྣམ་པར་བཀྲ་བའི་བླ་རེ་བྲེས་ནས་རྔུལ་ཚོན་དཀར་པོས་འཁོར་ལོ་རྩིབས་བརྒྱད་པ་རྣམ་པར་བཀོད་པས་བརྒྱན་པར་བྱས་པ་དེའི་དབུས་སུ་ནི། དེ་བཞིན་གཤེགས་པ་རང་བཞིན་ནམ་རྣམ་པར་རྒྱས་པའི་གཙུག་ཏོར་ཏེ། རིམ་པ་ཇི་ལྟར་བར་ཤར་ལ་སོགས་པའི་རྩིབས་རྣམས་སུ་ནམ་མཁའ་དང་མཉམ་པ་ལས་བྱུང་བའི་གཙུག་ཏོར་དང༌། སའི་སྙིང་པོ་ལས་བྱུང་བའི་གཙུག་ཏོར་དང༌། ནོར་བུའི་སྙིང་པོ་ལས་བྱུང་བའི་གཙུག་ཏོར་དང༌། རོའི་སྙིང་པོ་ལས་བྱུང་བའི་གཙུག་ཏོར་དང༌། དཔག་ཏུ་མེད་པ་ལས་བྱང་བའི་གཙུག་ཏོར་དང༌། གཟི་བརྗིད་སྙིང་པོ་ལས་བྱུང་བའི་གཙུག་ཏོར་དང༌། རྔ་སྒྲའི་དབྱངས་ལས་བྱུང་བའི་གཙུག་ཏོར་དང༌། རླུང་གི་སྙིང་པོ་ལས་བྱུང་བའི་གཙུག་ཏོར་རྣམས་དགོད་པར་བྱའོ། །དེའི་ཕྱི་རོལ་དུ་ཤིན་ཏུ་མཛེས་པའི་པདྨ་འདབ་མ་བཅུ་དྲུག་པ་བྱས་ནས་འདབ་མ་རེ་རེ་ཞིང་རིམ་པ་ཇི་ལྟ་བར་སོ་སོར་ཟླ་བ་བཅུ་དྲུག་ལ་དེ་བཞིན་གཤེགས་པ་བཅུ་དྲུག་དགོད་པར་བྱ་སྟེ། ནང་སྟོང་པ་ཉིད་ལས་བྱུང་བའི་གཙུག་ཏོར་དང༌། ཕྱི་སྟོང་པ་ཉིད་ལས་བྱུང་བའི་གཙུག་ཏོར་དང༌། ཕྱི་ནང་སྟོང་པ་ཉིད་ལས་བྱུང་བའི་གཙུག་ཏོར་དང༌། སྟོང་པ་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང༌། འདུས་བྱས་སྟོང་པ་ཉིད་ལས་བྱུང་བའི་གཙུག་ཏོར་དང༌། འདུས་མ་བྱས་སྟོང་པ་ཉིད་ལས་བྱུང་བའི་གཙུག་ཏོར་དང༌། མཐའ་ལས་འདས་པ་སྟོང་པ་ཉིད་ལས་བྱུང་བའི་གཙུག་ཏོར་དང༌། ཐོག་མ་དང་ཐ་མ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང༌། དོར་བ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང༌། རང་བཞིན་སྟོང་པ་ཉིད་ལས་བྱུང་བའི་གཙུག་ཏོར་དང༌། ཆོས་ཐམས་ཅད་སྟོང་པ་ཉིད་ལས་བྱུང་བའི་གཙུག་ཏོར་དང༌། རང་གི་མཚན་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང༌། མི་དམིགས་པ་སྟོང་པ་ཉིད་ལས་བྱུང་བའི་གཙུག་ཏོར་དང༌། དངོས་པོ་མེད་པ་སྟོང་པ་ཉིད་ལས་བྱུང་བའི་གཙུག་ཏོར་དང༌། ངོ་བོ་ཉིད་སྟོང་པ་ཉིད་ལས་བྱུང་བའི་གཙུག་ཏོར་དང༌།
དངོས་པོ་མེད་པའི་ངོ་བོ་ཉིད་སྟོང་པ་ཉིད་ལས་བྱུང་བའི་གཙུག་ཏོར་རྣམས་སོ། །དེ་བཞིན་གཤེགས་པ་འདི་དག་གིས་གདན་གྱི་མཎྜལ་བྱས་ནས་དུས་ཇི་ལྟ་བར་མེ་ཏོག་གི་ཚོམ་བུ་དགོད་པར་བྱའོ། །འདིའི་སྟེང་དུ་མན་ཇི་ལྟའི་ཁར་ཆུའི་སྣོད་དུ་རྣམ་པར་སྣང་མཛད་ཀྱི་སྙིང་པོ་ཅན་གྱི་མཆོད་རྟེན་གཞག་ཅིང། གསེར་གྱི་བྱང་བུལ་སྔགས་དང་སྤེལ་བའི་བསྒྲུབ་བྱའི་མིང་མངོན་པར་བྲིས་ལ་གཞག་སྟེ་བུམ་པ་ཆུས་དགང་བར་བྱའོ། །པདྨའི་ཕྱི་རོལ་ཕྱོགས་བཞིར་ཆུས་གང་བའི་བུམ་པ་བཞི་གཞག་པར་བྱའོ། །ཡལ་འདབ་དང་བཅས་པ་དང་གདུགས་དང་བ་དན་གྱིས་ཉེ་བར་མཛེས་པར་བྱས་ནས། སླར་ཡང་ཤར་དུ་བགེགས་རབ་ཏུ་ཞི་པར་བྱེད་པའི་ལྷ་མོ་རྣམ་པར་རྒྱལ་མ་དང༌། ལྷོར་འཆི་བ་རབ་ཏུ་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང༌། ནུབ་ཏུ་ཉོན་མོངས་པ་རབ་ཏུ་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང༌། བྱང་དུ་ཕུང་པོའི་ནང་ཞི་བར་བྱེད་པའི་ལྷ་མོ་རྣམ་པར་རྒྱལ་མ་དང༌། མེར་རྡོ་རྗེའི་ཕྲེང་བ་ཚེ་སྦྱིན་མ་དང༌། བདེན་བྲལ་དུ་སྒྱུ་འཕྲུལ་ཆེན་མོ་དང༌། རླུང་དུ་གསེར་གྱི་འོད་ཅན་མ་དང༌། དབང་ལྡན་དུ་ཚེ་སྟེར་བར་བྱེད་པ་གསེར་གྱི་ཕྲེང་བ་མ་རྣམས་ཏེ། སྣོད་བཞི་ཆུས་ཡོངས་སུ་བཀང་ནས་དྲི་བཟང་པོ་དང་བསྲེས་ཏེ་མེ་ཏོག་གི་ཕྲེང་བ་འཕྱང་བ་བཞི་དགོད་པར་བྱའོ། །རྔུལ་ཚོན་གྱི་བའི་རེ་ཁཱ་གསུམ་གྱི་ནང་མའི་ནང་མ་ལ་སཱ་ལུའི་ཟན་ནམ་འཇིམ་པ་ལས་མཆོད་རྟེན་སྟོང་བྱའོ། །གལ་ཏེ་མ་འབྱོར་ན་བརྒྱ་གཞག་པར་བྱའོ། །ཕྱོགས་བཞིར་བསྙེན་བཀུར་བའི་ཕྱིར་མཆོད་པ་རྒྱ་ཆེན་པོ་བྱ་སྟེ། དཱུར་བ་དང་ཀུནད་གཟུང་སྟེ་ཆོས་ཀློག་པ་པོས་གཟུངས་འདི་བཀླག་པར་བྱ་ཞིང༌། མཆོད་རྟེན་སོ་སོའི་དབུ་ལ་མཆོད་པར་བྱས་ལ་རབ་ཏུ་གནས་པར་བྱའོ། །འབྲས་མ་ཉམས་པ་དང་དཱུ་ར་བ་དང་ཀུནད་སྟོང་གིས་དབུས་ཀྱི་མཆོད་རྟེན་གྱི་དབུ་ལ་དོར་ནས་མཆོད་པར་བྱ་ཞིང༌། །མེ་ཏོག་དང་བདུག་སྤོས་དང་སྣང་གསལ་དང་དྲི་དང་གཏོར་མ་དང་ཞལ་ཟས་དང་གདུགས་དང་བ་དན་ལ་སོགས་པའི་མཆོད་པ་ཐམས་ཅད་རེ་རེ་ཞིང་ངེས་པར་སྟོང་སྟོང་གི་ཕྲེང་བ་བྱས་ནས་ཡང་དག་པར་མཆོད་པར་བྱའོ། །ཡོངས་སུ་རྫོགས་པ་ཇི་སྲིད་པར་མར་མེའི་ཕྲེང་བ་མ་ཆད་པར་བྱ་ཞིང༌། རེང་བ་མ་ཆད་པར་བྱ་ཞིང༌། རྟག་མའི་དངོས་པོ་བྱའོ། །ཆོས་སྟོན་པ་པོ་སློབ་དཔོན་དང་
ལས་ཀྱི་རྡོ་རྗེ་རྣམས་ཀྱིས་དྲི་བཟང་པོའི་ཆུས་ཁྲུས་བྱས་ཏེ། དཀར་པོའི་རང་བཞིན་གྱི་གོས་དང་རྒྱན་གྱིས་བརྒྱན་ཏེ་སྔོམ་བ་དང་ལྡན་པས་ཤར་དུ་མངོན་པར་ཕྱོགས་ཏེ་བཀླག་བར་བྱའོ། །དེ་ལྟར་བྱས་ན་ཞག་བདུན་གྱི་ཚེ་ནི་ལོ་བདུན་གྱི་ཚེར་འགྱུར་ལ། ལོ་བདུན་གྱི་ཚེ་ནི་ལོ་བདུན་ཅུར་འཚོ་བར་འགྱུར་ལ་དུས་མ་ཡིན་པར་འཆི་བའང་མི་འབྱུང་བར་འགྱུར་རོ། །ཞེས་པ་གཙུག་ཏོར་རྣམ་པར་རྒྱལ་མ་བཀླག་པའི་ཆོ་གའོ།། །།འདིར་རྡུལ་ཚོན་གྱི་དཀྱིལ་འཁོར་བྲིས་པ་ལ་སོགས་པ་ན་གལ་ཏེ་ས་འོག་ནས་ཆུ་རྡོལ་བ་དང་མེ་དང་རླུང་དང༌། སྤྲིན་དང་ཐོག་དང་མི་དང་ལྷའི་སྡེ་དང་གླང་པོ་ལ་སོགས་པ་བགེགས་ཀྱི་ཉེ་བར་འཚེ་བ་ལྷས་བྱས་པའམ། མི་ལ་སོགས་པས་བྱས་པ་འབྱུང་བ་སྲིད་དེ། དེའི་ཚེ་ཆོག་ག་ཇི་ལྟ་བ་བཞིན་དུ་རྡོ་རྗེའི་རང་བཞིན་གྱི་ས་གཞི་དང༌། རབ་དང༌། གུར་དང་མདའི་དྲ་བ་དང༌། བླ་རེ་རྣམས་ཀྱི་ནང་གི་བར་སྣང་ལ་གནས་པའི་རྩིབས་ཀྱི་རྩེ་མོ་ལ་བརྟན་པར་བཞུགས་པའི་ཤིན་ཏུ་འཇིགས་སུ་རུང་བའི་ཁྲོ་བོ་བཅུར་བྱིན་གྱིས་བརླབས་པའི་རྩིབས་བཅུ་པའི་འཁོར་ལོ་སེར་པོ་གཡས་སུ་བསྐོར་བའི་ལྟེ་བའི་དབུས་སུ་གནས་པའི་གཞལ་ཡས་ཁང་གི་རྣམ་པར་དཀྱིལ་འཁོར་ཁང་པར་ཤིན་ཏུ་བརྟན་པར་སྐད་ཅིག་གིས་ལྷག་པར་མོས་པར་བྱ་སྟེ། རྡོ་རྗེའི་རང་བཞིན་ཉིད་ལ་སོགས་པས་བགེགས་ཐམས་ཅད་བཟློག་པར་འགྱུར་རོ་ཞེས་སོ། །གང་ཡང་རྒྱུན་མི་འཆད་པར་སྙིང་རྗེ་ཆེན་པོ་དང་རོ་གཅིག་པའི་སྟོང་པ་ཉིད་ཀྱི་ཏིང་ངེ་འཛིན་གོམས་པར་བྱེད་པ་དེ་ལ་ནི་དཔག་ཏུ་མེད་པའི་བགེགས་རྣམས་ཀྱང་རབ་ཏུ་ཞི་བར་འགྱུར་ཏེ་དེའི་ཕྱེད་དུ་ནི་རིམ་པ་འདི་དག་མ་ཡིན་ནོ་ཞེས་པ་བགེགས་བཟློག་པའི་ཆོ་གའོ།། །།སངས་རྒྱས་རྣམ་པ་བྱས་པའི་འབྲས། །བཅོམ་ལྡན་འདས་ཀྱིས་གང་གསུངས་ཏེ། དེས་ན་སངས་རྒྱས་རྣམས་ཀྱི་སྐུའི། །མཚན་ཉིད་འདིར་ཡང་བྲི་བར་བྱ། །སྐུ་གཟུགས་མཚན་ཉིད་ཐམས་ཅད་ནི། །རབ་རྫོགས་བདེ་བ་སྟེར་བའོ། །གང་ཚེ་དེ་ཉིད་རྣམ་ཉམས་འགྱུར། །དེ་ཚེ་སྡུག་བསྔལ་རབ་སྦྱིན་བྱེད། །བདེ་བ་ཅི་ཞེན་དེ་བཤད་པ། །བཅོམ་ལྡན་འདས་ཀྱི་མཆོད་རྟེན་རྣམས་དང་སྐུ་གཟུགས་ལ་ཡང་ཕྲ་རབ་རྡུལ་ནི་ཇི་སྙེད་པ། །དེ་སྙེད་དེ་དག་
བྱེད་པ་པོ་ནི་ལྷ་ཡི་ས་གཞིར་ངེས་པ་ཉིད་དུ་རྒྱལ་སྲིད་དང༌། །གཟུགས་དང་གཟུགས་མེད་ཏིང་ངེ་འཛིན་གྱི་ཕུན་སུམ་ཚོགས་པ་མཐའ་དག་སྤྱད་པར་གྱུར་ནས་ཀྱང༌། །བདེ་བ་ཀུན་རྫོགས་མཐར་ནི་སྐྱེ་རྒར་ལྷུང་བ་བྲལ་ནས་སངས་རྒྱས་གོ་འཕང་ཐོབ་པར་འགྱུར། །དེའི་ཕྱིར་གཟུགས་ཀྱི་སྐུའི་མཚན་ཉིད་བཤད་པར་བྱའོ། །དེ་ལ་ཡང་དག་པར་རྫོགས་པའི་སངས་རྒྱས་རྣམས་དང༌། རྡོ་རྗེ་འཛིན་པ་རྣམས་ཀྱི་སྐུའི་རིང་བར་དཔུང་བ་གཉིས་ངོས་སུ་རབ་ཏུ་བརྐྱང་བ་སྟེ་ཞིང་དུ་ཡང་ངོ༌། །ཚད་རྣམས་ཅི་ཞེ་ན། རང་གི་སོར་གྱི་སོར་ཕྱེད་དང་བཅས་པའི་བཅུ་གཉིས་ནི་མཐོའོ། །མཐོ་དེ་ཉིད་བཅུ་ལ་ནི་སོར་ཉི་ཤུ་རྩ་ལྔ་ལྷག་པའི་བརྒྱའོ། །སྤྱན་མ་ལ་སོགས་པ་ལྷ་མོ་རྣམས་ཀྱི་ནི་སོར་བཅུ་གཉིས་ལ་མཐོའོ། །མཐོ་དེ་ཉིད་དགུ་ལ་སོར་བརྒྱ་དང་བརྒྱད་དེ་ཞེང་དུ་ཡང་ངོ༌། །བྱང་ཆུབ་སེམས་དཔའ་རྣམས་ཀྱི་ཡང་སོར་བཅུ་གཉིས་པའི་མཐོ་བཅུ་པ་ཉིད་དོ། །ཐུང་ཞིང་ལྟོ་བ་འཕྱང་བ་རྣམས་དང༌། ཁྲོ་བོ་རྣམས་ཀྱི་ཡང་མཐོ་བརྒྱད་བ་སྟེ་སོར་དགུ་བཅུ་རྩ་དྲུག་གོ །རོལ་པའི་ཁྲོ་བོ་རྣམས་ཀྱི་ནི་མཐོ་བཅུ་པ་དང༌། སོར་བརྒྱད་དང་ཉི་ཤུ་པ་སྟེ་དཔངས་དང་ཞེང་དུ་ཡང་ངོ༌། །ཡན་ལག་དང་ཉེ་བའི་ཡན་ལག་ཐམས་ཅད་ཀྱང་ཤེས་པར་བྱའོ། །སྟོན་པ་ཆོས་འཆད་པ་ལ་བྱོན་པའི་དུས་སུ། །ཤཱ་རིའི་བུས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་མི་བཞུགས་པ་ན་དད་པའི་རིགས་ཀྱི་བུའམ་རིགས་ཀྱི་བུ་མོ་རྣམས་ཀྱིས་ཅི་ལྟར་བསྒྲུབ་པར་བགྱི། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་ང་ཡོངས་སུ་མྱ་ངན་ལས་འདས་པར་གཤེགས་པ་ནའང་མཆོད་པ་དང་བསྙེན་བཀུར་བྱ་བའི་དོན་དུ་སྐུ་གཟུགས་བྱའོ། །ཉ་གྲོ་དྷའི་དཀྱིལ་འཁོར་ནི་ཇི་སྙེད་པའི་ཞེང་དེ་སྙེད་པའི་ལུས་ཏེ། ཇི་སྙེད་པའི་སྐུ་ཡང་དེ་སྙེད་པའི་ཞེང་ངོ༌། །ཐམས་ཅད་དུ་ཡན་ལག་དང་ཉེ་བའི་ཡན་ལག་སྟེ་ལུས་ཀྱི་ཆ་ཤས་རྣམས་སྤོམ་ཞིང་སྣུམ་པ་དང༌། རོལ་པ་དང་སྒེག་པ་དང་བདུན་མཐོ་བ་དང་འགྲམ་པ་ཆེ་བ་ཉིད་དང༌། སྤྱི་བོ་གདུགས་ཀྱི་རྣམ་པ་དང་ཕྲག་པ་ལེགས་པར་གནས་པ་དང༌། གཙུག་ཏོར་ལ་སོགས་པ་ཤིན་ཏུ་ལེགས་པར་གནས་པའོ། །དེ་ཡང་དཔངས་དང་ཞེང་དང་མཐོ་དང་ཚིགས་བསྐུམ་པ་དང༌། བརྐྱང་
བ་རྣམས་ཀྱི་ཚད་ནི་སངས་རྒྱས་ཀྱི་སྐུ་རྣམས་དང་བྱང་ཆུབ་སེམས་དཔའ་རྣམས་ཀྱི་ཡང་ངོ་ཞེས་པའི་གསུང་ལས་སོ། །དེ་ལ་སྣུམ་པ་ནི་པགས་པ་སྣུམ་པའོ། །རོལ་པ་ནི་ཡིད་འཕྲོག་པའོ། །སྒེག་པ་ནི་གསུམ་དུ་འཁྱོག་པ་ཉིད་ལ་སོགས་པའི་ཡོན་ཏན་གྱིས་སོ། །བདུན་མཐོ་བ་ཞེས་པ་ལ་བདུན་ནི་ལུས་ཀྱི་ཆ་ཤས་ཡིན་ཞིང་མཐོ་བ་ནི་ངེས་པར་མཐོ་བ་དང་ཤིན་ཏུ་མཐོ་བ་ཞེས་པའི་རྣམ་གྲངས་སོ། །དེ་དག་གང་ཞེ་ན། ཞབས་གཉིས་དང༌། ཕྱག་གཉིས་དང༌། ཕྲག་པ་གཉིས་དང༌། མགུལ་པ་རྣམས་སོ། །གཞན་ནི་རབ་ཏུ་གྲགས་ཏེ་ཅུང་ཟད་མཐོ་བ་ཡང་མཐོ་བ་ཞེས་བྱའོ། །དེ་ལ་གཙུག་ཏོར་ནི་སོར་བཞི་སྟེ་སྐྲའི་གནས་ཀྱང་ངོ༌། །དེ་བཞིན་ཉིད་དུ་དཔྲལ་བ་དང་ཤངས་ལའོ། །ཤངས་ཀྱི་འོག་ནས་ཀོ་སྐོའི་མཐར་ནི་ནས་བཞི་ལྷག་པའི་སོར་བཞིའོ། །འདི་ཉིད་ནི་ཆ་ཆུང་ཕྱེད་དང་བཅུ་གསུམ་སྟེ་ཞལ་གྱི་ཆའོ། །ཀོ་སྐོ་ནི་སོར་གཉིས་སུ་འགྱུར་པ་དཔངས་ལ་སྟེ་རྒྱ་ལ་ཡང་དེ་བཞིན་དུ་སོར་བཞིར་འདོད་དོ། །འགྲམ་པ་དག་ལ་སོར་བཞི་སྟེ་རྣ་བའི་རྩ་བར་སོན་པ་ལའོ། །སྤྱན་གྱི་འོག་གི་པགས་པ་དག་ལས་འོག་གི་ཆ་ནི་འཁུར་བར་འགྱུར་རོ། །དེ་དག་ནི་སོར་གཉིས་སུ་མཐོ་བ་དང་རྒྱར་ཡང་དེ་དག་སོར་གཉིས་པ་སྟེ། བྱང་ཆུབ་སེམས་ལ་ལྟོས་པའིའོ། །ལྷག་པ་དང་བཅས་ཤིང་ཡོངས་སུ་རྫོགས་པར་གྱུར་པས་སེང་གེ་ཆེན་པོའི་འགྲམ་པ་ཇི་ལྟ་བ་ནི་སངས་རྒྱས་དང་རྡོ་རྗེ་འཛིན་པ་རྣམས་ཀྱི་སྟེ་ཅུང་ཟད་མཐོ་བའོ་ཞེས་པའི་དོན་ཏོ། །ཁྲོ་བོ་རྣམས་ཀྱི་ནི་ལེབ་མོར་རྣམ་པར་རྒྱས་ཤིང་ལྷག་པའོ། །མ་མཆུའི་རྒྱ་ལ་སོར་གཉིས་ཏེ་དཔངས་ལ་ནི་ཆ་ཆུང་གསུམ་མོ། །སོར་སུམ་ཆ་ལ་ནི་ཆ་ཆུང་ཞེས་བྱའོ། །མཆུའི་དབུས་སུ་ནི་བིམ་པའི་འབྲས་བུ་ལྟ་བུའོ། །སོར་གཅིག་ནི་ཞལ་གྱི་གྲུ་སྟེ་ཞལ་གྱི་ཞེང་ལ་སོར་བཞིའོ། །ཇི་ལྟ་བར་སྐྱེས་ཤིང་བཀོད་པའི་ཚེམས་བཞི་བཅུ་ནི་རྒྱལ་པོའི་ཚེམས་ལ་སོགས་པའི་རིམ་པས་སོ། །ཡ་མཆུ་དག་ལ་སོར་ཕྱེད་དང་ནས་བཞི་ནི་རྒྱ་དང་དཔངས་དག་ལའོ། །ཤངས་ཀྱི་རྩེ་མོའི་འོག་ཏུ་མཆུ་ལ་སོར་སུམ་ཆ་པད་འདབ་ཀྱི་རྣམ་པ་བྱ་སྟེ་སྨ་རའི་དབུས་ནི་མཆུའི་སྒྲོས་སོ། །ཤངས་ཀྱི་ཞེང་ལ་ནི་སོར་གཉིས་ཏེ་དེའི་ཕྱེད་སོར་ནི་དཔངས་ལའོ། །སངས་རྒྱས་རྣམས་ཀྱི་ནི་ཅུང་ཟད་ལྷག་པའོ། །ཤིན་ཏུ་ཁོས་པ་རྣམས་ཀྱི་
ཅུང་ཟད་ལེབ་ཅིང་ངོས་སུ་སོན་པའོ། །སོར་ཕྱེད་པར་མཉམ་ཞིང་ཟླུམ་པ་ནི་ཤངས་ཀྱི་བུག་པའོ། །དེའི་ཤངས་ཀྱི་ཀ་པ་དང་ཤངས་ཀྱི་རྩེ་མོའི་འཁྱོག་བ་རྒྱ་ལ་སོར་ཕྱེད་དོ། །སྤྱན་གྱི་སྦུབས་ལ་སོར་བཞིའོ། །དེའི་དབུས་ལ་སོར་གཅིག་གི་རྒྱའོ། །སྨིན་མའི་འོག་ནས་བརྩམས་ཏེ། འོག་གི་མཐར་ཐུག་པ་ལ་སོར་གསུམ་མོ། །སྤྱན་དག་གི་བར་དུ་ཤངས་ཀྱི་རྩ་བ་སོར་གཅིག་གོ །སྨིན་མ་ནི་སོར་བཞི་སྟེ་དེ་ནི་གཞུའི་རྣམ་པའོ། །དབུས་ཀྱི་ཞེང་ལ་སོར་གཉིས་ཏེ་རྡོ་རྗེ་འཛིན་པ་རྣམས་ཀྱིའོ། །ཁྲོ་བོ་རྣམས་ཀྱི་ནི་འཁྱོག་པོའོ། །སངས་རྒྱས་རྣམས་ཀྱི་ཏིང་ངེ་འཛིན་གྱི་གཟིགས་སྟངས་ལ་ནས་གཉིས་ཏེ་རྒྱར་སོར་གཉིས་དང་ནས་དྲུག་ལྷག་པ་ཉའི་རྣམ་པའོ། །བྱང་ཆུབ་སེམས་དཔའ་རྣམས་ཀྱི་ནི་ཞེང་ལ་ནས་བཞི་དང་རིང་བར་ནས་ཉི་ཤུ་སྟེ་ཨུཏྤལའི་རྣམ་པའོ། །ཐམས་ཅད་བུད་མེད་སྒེག་མོ་རྣམས་ཀྱི་ནི་རིང་བར་ནས་བཅོ་བརྒྱད་དང་ཞེང་ལ་ནས་དྲུག་སྟེ་ཉའི་ལྟོ་བའི་རྣམ་པའོ། །ཤངས་དང་ཉེ་བའི་སྤྱན་གྱི་མཐའ་སྟེ་ནང་ཟུར་ལ་ནས་བཞིའོ། །ཕ་རོལ་གྱི་མཐའ་སྟེ་ཕྱི་ཟུར་ལ་ནས་བཞིའོ། །སྤྱན་གྱི་ནོར་བུ་ལ་སོར་གསུམ་མོ། །འབུར་པོར་ནས་གཉིས་སུ་མཐོ་བའོ། །ནག་པོ་ལ་ནི་མཉམ་པར་ནས་ལྔའི་ཚད་དེ་ཞལ་གྲྭའི་ཐིག་དང་མཉམ་པའོ། །སྤྱན་གྱི་དབུས་སུ་པུ་ཏ་ལི་ག་ནི་སོང་ཕྱེད་དང་གཉིས་ཀྱི་ལྔ་ཆའི་ཞེང་སྟེ་སོར་གཅིག་ནི་སྤྱན་འབྲས་ཡིན་ལ། སོར་གསུམ་གྱི་བཞི་ཆ་ནི་རབ་ཏུ་གསལ་པ་སྤྱན་གྱི་བུའོ། །པདྨའི་འདབ་མའི་རྣམ་པ་སྤྱན་གྱི་སྦུབས་ནི་སོར་གསུམ་མོ། །ནང་ཟུར་གྱི་ཆ་ནི་ཤངས་ཀྱི་བུ་གའི་ཐིག་དང་མཉམ་པའོ། །སྤྱན་འབྲས་དང་མཉམ་པར་ཀོསྐོ་དང་ཞལ་གྱི་གྲྭ་ཟུར་ཡང་དེ་བཞིན་ནོ། །སྨིན་མ་དག་གི་བར་ལ་ནི་སོར་ཕྱེད་དང་གཉིས་སོ། །དེ་ཉིད་དུ་མཛོད་སྤུ་ནི་སོར་གཅིག་པ་སྟེ་ཟླ་བ་གང་བ་ལྟ་བུའོ། །ཤངས་དང་མཛོད་སྤུ་དང་གཙུག་ཏོར་རྣམས་ཀྱི་ཐིག་ནི་མཚུངས་པའོ། །སྨིན་མ་དག་ནི་རི་མོ་དང་མཉམ་པར་སྙན་དག་སྟེ། དཔངས་སུ་སོར་གཞི་དང་ཞེང་དུ་སོར་གཉིས་སོ། །དེའི་འདབ་མ་ནི་ནས་བཞིའོ། །དེ་དག་གི་སྟེང་གི་འདབ་མའང་ནས་བཞི་སྟེ་དེའི་དཔངས་སུ་ནི་སོར་གཅིག་གོ །བུག་པ་ནི་ནས་བཞིའོ། །འགྲམ་པ་དང་སྙན་གྱི་བུག་པའི་བར་དུ་སྙན་གྱི་འཁྱིལ་པ་ནི་གདེངས་ཀའི་
རྣམ་པ་སྟེ་ནས་གཉིས་སོ། །སྙན་ཤལ་དག་ནི་སོར་བཞིར་རིང་བ་སྟེ་སྦོམས་སུ་ནི་ཇི་ལྟར་མཛེས་པའོ། །སྔར་གྱི་གཙུག་ཏོར་ལ་སོགས་པ་ནས་མགྲིན་པའི་མཐར་ཐུག་པ་ལ་ནི་ནས་བཞི་ལྷག་པའི་སོར་ཉི་ཤུར་བཤད་དོ། །ད་ནི་མགྲིན་པ་ལ་སོགས་པ་ནས་ལོང་བུའི་འོག་གི་མཐར་ཐུག་པའི་ཆ་དབྱེ་བར་བྱ་སྟེ་མགྲིན་པ་ལ་ནི་སོར་བཞིའོ། །མགྲིན་པ་ནས་ཐུགས་ཀ་ལ་སོར་ཕྱེད་དང་བཅུ་གསུམ་མོ། །ཐུགས་ཀ་ནས་ལྟེ་བའི་མཐར་ཐུག་པ་ལ་ཡང་དེ་བཞིན་ནོ། །ལྟེ་བ་ནས་གསང་གནས་ཀྱི་མཐར་ཐུག་པ་ལ་ཡང་སོར་ཕྱེད་དང་བཅུ་གསུམ་མོ། །བརླ་ལ་ནི་སོར་ཉི་ཤུ་རྩ་ལྔ་སྟེ་བྱིན་པ་ལ་ཡང་དེ་བཞིན་ནོ། །པུས་མོ་ལ་སོར་དྲུག་གོ །ལོང་བུ་ལ་སོར་གཉིས་སོ། །ལོང་བུའི་འོག་ཏུ་སོར་བཞིའོ། །ཡང་དག་པར་རྫོགས་པའི་སངས་རྒྱས་དང་རྡོ་རྗེ་འཛིན་པ་དང་བྱང་ཆུབ་སེམས་དཔའ་རྣམས་མཐོ་བཅུ་པར་བཤད་པའི་རྣམ་པར་དབྱེ་བ་སྟེ། གཞན་རྣམས་ནི་ཇི་ལྟར་རིགས་པར་ཤེས་པར་བྱའོ། །སྤྱིའི་ནོར་བུ་ནི་ཇི་ལྟར་མཛེས་ཤིང་དྲི་མ་མེད་པ་བྱའོ། །རྡོ་རྗེ་འཛིན་པ་རྣམས་ཀྱི་ནོར་བུ་ནི་གཙུག་ཏོར་གྱི་དབུས་སུ་རལ་པའི་ཅོད་པན་སོར་བཅུ་གཉིས་པ་བྱ་ཞིང༌། །དཔའ་བོ་རྣམས་དང་བྱང་ཆུབ་སེམས་དཔའ་རྣམས་ཀྱི་ཡང་རལ་པའི་ཅོད་པན་སོར་བརྒྱད་པའོ་ཞེས་པ་ཁྱད་པར་ཏེ། སོར་བཅུ་པའོ་ཞེས་པ་ནི་འགའ་ཞིག་གིའོ། །གཙུག་ཏོར་གྱི་འོག་ཏུ་བསྐོར་བ་ལ་སོར་བཅུ་གཉིས་སོ། །དཔྲལ་བའི་སྟེང་དུ་ནི་གདུགས་ཀྱི་རྣམ་པ་སྟེ་སྔོན་པོ་གཡས་སུ་འཁྱིལ་པ་ནི་སྟེང་དུ་ཡང་ངོ༌། །སྤྱི་བོ་ནི་མཐོ་བ་སྟེ་སྙན་གྱི་མདུན་དང་རྒྱབ་ཏུ་བསྐོར་བ་ལ་སོར་སུམ་ཅུ་སོ་གཉིས་ནི་སྤྱི་བོའི་རྒྱའོ། །མགྲིན་པའི་ཞེང་ལ་སོར་བརྒྱད་དེ་དེའི་མཐའ་སྐོར་ལ་སོར་ཉི་ཤུ་རྩ་བཞིའོ། །མགྲིན་པའི་སོར་བརྒྱད་སྤངས་ནས་སྙན་དང་ཉེ་བའི་སོར་བཞི་དང་བཅས་པའི་སོར་བཅུ་གཉིས་ནི་ཕྲག་པའི་ཟླུམ་པོ་ལ་འགྱུར་ཏེ་མཚན་ཉིད་དང་ལྡན་པ་རྣམས་ལའོ། །ཕྲ་བའི་གནས་དང་བྲལ་བའི་ཕྲག་པ་ནས་གྲུ་མོའི་བར་ལ་སོར་ཉི་ཤུ་ནི་དཔུང་པའོ། །གྲུ་མོ་ལ་ནི་སོར་གཅིག་གོ །གྲུ་མོའི་འོག་ནས་ནོར་བུ་འཆིང་བའི་སྟེང་ནི་ཕྱག་ངར་ཏེ་སོར་བཅུ་དྲུག་གོ །ནོར་བུ་འཆིང་བ་ལ་ནི་སོར་གཅིག་གོ །ནོར་བུ་འཆིང་བའི་འོག་
ནས་སོར་མོ་གུང་མོའི་རྩེ་མོའི་མཐར་ཐུག་པ་ལ་ནི་སོར་བཅུ་གཉིས་ཏེ་ཕྱག་ལག་གོ །དེ་ལྟར་སོར་ལྔ་བཅུའོ། །དཔུང་པའི་དབུས་ནས་བསྐོར་བ་ལ་སོར་ཉི་ཤུ་སྟེ། ཉེ་བའི་དཔུང་པའི་དབུས་ནས་བསྐོར་བ་ལ་སོར་བཅུ་དྲུག་གོ །ནོར་བུ་འཆིང་བའི་མཐའ་སྐོར་ལ་ནི་སོར་བཅུ་གཉིས་ཏེ། ནོར་བུ་འཆིང་བ་ནས་ཕྱག་གི་མཐིལ་ལ་སོར་བདུན་ནོ། །སོར་མོ་གུང་མོ་ལ་ཆ་ཆུང་ལྔའོ། །དེའི་ཚིགས་ཕྱེད་ཀྱིས་ཐུང་བ་ནི་མཛུབ་མོ་སྟེ་མིང་མེད་ནི་དེ་དང་མཉམ་པའོ། །ཚིགས་གཅིག་གིས་ཐུང་བ་ནི་མཐེའུ་ཆུང་སྟེ་སོར་མོ་ཐམས་ཅད་ནི་ཚིགས་གསུམ་པའོ། །དེ་རྣམས་ཀྱི་ཚིགས་ཕྱེད་ཀྱིས་སེན་མོའོ། །ནོར་བུ་འཆིང་བ་ལས་སོར་བཞི་སྤངས་ནས་སེན་མོའི་རྩེ་མོ་ཇི་སྲིད་པ་ལ་སོར་བཞི་ནི་མཐེ་བོང་སྟེ་ཚིག་གཉིས་པའོ། །ནས་ཕྱེད་ནི་སོར་མོའི་རྩ་བའོ། །མཐེ་བོང་གི་མཐའ་སྐོར་ལ་ནི་སོར་བཞིའོ། །མཐེ་བོང་ནས་མཛུབ་མོ་ལ་ནི་སོར་བཞིའམ་གསུམ་མོ། །ནོར་བུ་འཆིང་བ་ནས་མཐེ་ཆུང་གི་རྩ་བའི་མཐར་ཐུག་པ་ལ་ནི་སོར་ལྔའོ། །ཕྲག་པ་ནས་མཆན་ཁུང་གི་མཐར་ཐུག་པ་ལ་སོར་དགུ་སྟེ་མཆན་ཁུང་ནས་ནུ་མ་ཇི་སྲིད་པ་ལ་སོར་བཅུ་དྲུག་གོ །བྲང་ནས་རྒྱབ་དག་གི་མཐའ་སྐོར་ལ་སོར་ལྔ་བཅུ་དྲུག་སྟེ། ནུ་མ་དག་གི་བར་ལ་སོར་ཕྱེད་དང་བཅུ་གསུམ་མོ། །ནུ་མ་ནས་ལྟེ་བའི་བར་ལ་སོར་བཅུ་དྲུག་གོ །ལྟེ་བ་ནས་བརྩམས་ཏེ་རྒྱབ་དང་ལྷན་ཅིག་ལྟེ་ཧ་ཇི་སྲིད་པ་ལ་སོར་བཞི་བཅུ་དྲུག་གོ །ལྟེ་བའི་ཁུང་བུ་ལ་སོར་གཅིག་སྟེ་མཐའ་སྐོར་ལ་ཡང་ངོ༌། །དེ་བཞིན་དུ་རྐེད་པའི་རྒྱ་ལ་སོར་བཅོ་བརྒྱད་དོ། །ཚད་ར་དག་གི་རྒྱ་དང་དཔངས་ལ་ནི་སོར་བཞི་བཞིའོ། །བརླའི་རྩ་བ་དག་གི་དབུས་ལ་སོར་བཅུ་གཉིས་ཏེ་མཐའ་སྐོར་དུ་ནི་སུམ་འགྱུར་རོ། །དེ་དག་གི་བར་གྱི་དཔངས་ལ་སོར་ལྔའོ། །རྒྱ་ལ་སོར་ལྔ་ནི་སྒོ་ངའི་ཤུབས་དག་ལའོ། །དེའི་སྟེང་དུ་སོར་གཉིས་ཀྱི་ཞེང་ནི་གསང་བ་ལ་སྟ་རིང་བ་ལ་ནས་གཉིས་དང་བཅས་པའི་དྲུག་གོ །བརླའི་དབུས་ཀྱི་མཐའ་སྐོར་ལ་སོར་སུམ་ཅུ་རྩ་གཉིས་སོ། །པུས་མོའི་མཐའ་སྐོར་ལ་སོར་ཉི་ཤུ་རྩ་བརྒྱད་དོ། །བྱིན་པའི་དབུས་ཀྱི་མཐའ་སྐོར་ལ་སོར་ཉི་ཤུ་རྩ་བཞི་སྟེ། བྱིན་པའི་འོག་གི་མཐའ་སྐོར་ལ་ནི་སོར་ཉི་ཤུ་རྩ་གཅིག་གོ །ཞབས་ཀྱི་ལོང་བུའི་འོག་ཏུ་རྟིང་པ་ལ་
སོར་བཞི་སྟེ་འོག་དང་སྟེང་ལ་སོར་དྲུག་གོ །ཞེང་གི་རྒྱ་ཡོངས་སུ་བསྐོར་བ་ལ་ནི་སོར་བཅོ་བརྒྱད་དེ་ལོང་བུ་ལས་ཕ་རོལ་མཐེ་བོང་གི་སེན་མོའི་ཇི་སྲིད་པ་ལའོ། །ཞབས་དག་ལ་ནི་སོར་བཅུ་གཉིས་ཏེ་ཞེང་ལ་སོར་དྲུག་གོ །སྟེང་དང་འོག་ཏུ་སོར་གཉིས་ཏེ་ཞབས་དག་གི་ངོས་ཀྱི་ཞེང་ལའོ། །ཞབས་ཀྱི་སོར་མོ་ལྔ་ནི་ཚིགས་གཉིས་གཉིས་པའོ། །དེ་རྣམས་ཀྱི་རྩེ་མོར་ཚིགས་ཕྱེད་ཀྱིས་སེན་མོའོ། །ཞབས་ཀྱི་མཐེ་བོང་གི་ཟླུམ་ལ་སོར་ལྔ་སྟེ་རིང་བར་ནི་སོར་གསུམ་མོ། །དེ་དང་མཉམ་པའི་མཛུབ་མོའོ། །དེ་ལས་ནས་ཕྱེད་ཀྱིས་དམན་པ་ནི་གུང་མོའོ། །དེ་ལས་བརྒྱད་ཆས་དམན་པ་ནི་མིང་མེད་དེ། དེ་ལས་ཀྱང་བརྒྱད་ཆས་དམན་པ་ན་མཐེའུ་ཆུང་ངོ༌། །སོར་མོ་རྣམས་ཀྱི་དཔངས་ལ་ནི་སོར་གཅིག་སྟེ་སོར་མོའི་རྩེ་མོ་ནི་སོར་ཕྱེད་ཀྱིས་མཐོ་བའོ། །ཞབས་དག་གི་ཕྱི་རོལ་གྱི་སྟེང་ནི་རུས་སྦལ་གྱི་རྒྱབ་དང་མཚུངས་པ་སྟེ། །དེ་དག་གི་འོག་ཏུ་འཁོར་ལོ་ལ་སོགས་པས་བརྒྱན་པའོ། །བྱ་གག་གི་སྒོ་ང་དང་ཏིལ་གྱི་རྣམ་པ་དང་གྲུ་བཞི་དང་ཟླུམ་པོ་རྣམས་ཐམས་ཅད་དུ་མཉམ་པའི་རྟགས་ཀྱི་ཞལ་བྱ་སྟེ་རྣམ་པ་བཞིའོ། །རྫོགས་པའི་སངས་རྒྱས་རྣམས་དང་རྡོ་རྗེ་འཛིན་པ་རྣམས་ཀྱི་ཞལ་ནི་བྱ་གག་གི་སྒོ་ངའི་རྣམ་པའོ། །སྤྱན་མ་ལ་སོགས་པ་ལྷ་མོ་གཞོན་ནུ་རྣམས་ཀྱི་ནི་ཏིལ་གྱི་གཟུགས་ཀྱི་རྣམ་པའོ། །བྱམས་པ་ལ་སོགས་པ་བྱང་ཆུབ་སེམས་དཔའ་རྣམས་ཀྱི་ཞལ་ནི་རྡོ་རྗེ་འཛིན་པ་ཆེན་པོ་རྣམས་དང་འདྲ་བའོ། །རོལ་པའི་ཁྲོ་བོ་རྣམས་ཀྱི་ནི་བྱང་ཆུབ་སེམས་དཔའ་རྣམས་དང་འདྲའོ། །ཐུང་ཞིང་ལྟོ་བ་འཕྱང་བའི་ཁྲོ་བོ་རྣམས་ཀྱི་ཞལ་ནི་མཎྜལ་གྱི་རྣམ་པ་སྟེ་ཟླུམ་པོའོ། །གཤིན་རྗེ་ལ་སོགས་པ་རྣམས་ཀྱི་གདོང་ནི་གྲུ་བཞི་སྟེ་བསྣུན་པའི་ལྟ་བ་ཅན་ནོ། །གྲུ་བཞི་དང་ཟླུམ་པོའི་ཞལ་གཉིས་ནི་རྣམ་པར་འགྱུར་བའི་རྣམ་པ་ཅན་ནོ། །ཞི་བའི་ཞལ་རྣམས་ནི་མཉམ་པར་གཟིགས་པ་དང་རབ་ཏུ་དང་བ་དང་སྣུམ་པ་དང་ངེས་པར་གཟིགས་པ་ན་སྟེང་དུ་མ་ཡིན་པ་དང་མི་རིག་པ་དང་འོག་ཏུ་མ་ཡིན་པར་ཐམས་ཅད་མཐོང་བར་བྱའོ་ཞེས་པའོ། །སྤྱན་མ་ལ་སོགས་པ་རྣལ་འབྱོར་མ་རྣམས་ཀྱི་ནི་གཙུག་ཏོར་དང་གསང་བ་དང་བརླ་དང་རྒྱབ་ཀྱི་ཟླུམ་པ་ལས་སོར་བཅུ་དང་བཅས་པ་དང་མཁྲེགས་ཤིང་སྟུག་པའི་ནུ་མ་དག་གོ །ལྟེ་
པའི་ཟླུམ་ལས་བཅུའི་ཆ་སྤངས་ནས་རྩེད་པའི་གནས་མཛེས་པའོ། །བྱང་ཆུབ་སེམས་དཔའ་རྣམས་ཀྱི་ཚད་ལས་བྲང་གི་བཅུའི་ཆ་དང་གསང་བའི་ཆ་ཡིས་ཀྱང་དཔའ་བོ་རྣམས་ཀྱི་ནུ་མ་ཟུང་དག་གོ །ཁྭ་གདོང་མ་ལ་སོགས་པ་རྣམས་ཀྱི་དེ་དག་གི་མཐོ་གཉིས་ཀྱིས་ནུ་མ་དག་སྟེ་མཁྲེགས་པའོ། །བཅོམ་ལྡན་འདས་དཔལ་བདེ་མཆོག་གི་ནི་སྔར་བྱས་པའི་མཚན་ཉིད་ཅན་གྱི་ཞལ་གྱི་གནས་ལས་ནས་བཞི་སྤངས་ནས་ཆ་བཅུ་གཉིས་ཀྱི་ཞེང་ལ་འོག་གི་ཟུར་དག་ཏུ་ཆ་ཕྱེད་དང་གཉིས་དང་གསུམ་མདོར་བའི་ཟླུམ་པོ་ནི་བཅོམ་ལྡན་འདས་ཀྱི་རྩ་བ་དང་གཡོན་པ་དང་གཡས་པ་དང་རྒྱབ་ཀྱི་ཞལ་རྣམས་སོ། །བཅོམ་ལྡན་འདས་ཀྱི་གཡས་པའི་ཞལ་ནི་བྱ་གག་གི་སྒོ་ང་དང་འདྲ་བ་སྟེ་རྡོ་རྗེ་ཕག་མོ་དང་དུམ་སྐྱེས་མ་དང་གཟུགས་ཅན་མ་དང་ལྷ་མོ་གཞོན་ནུ་མ་རྣམས་ཀྱི་ཡང་ངོ༌། །རྒྱབ་ཀྱི་ཞལ་ནི་ཏིལ་གྱི་གཟུགས་ཀྱི་རྣམ་པ་སྟེ་མཁའ་འགྲོ་མའིའོ། །རྩ་བའི་ཞལ་དང་འདྲ་བ་ནི་ལཱ་མའིའོ། །གཡོན་པའི་ཞལ་དང་འདྲ་བར་ཨ་མྲ་ལྟ་བུ་ནི་དཔའ་བོ་དང་དཔའ་མོའི་དབང་ཕྱུག་མ་རྣམས་ཀྱི་ཡང་ངོ༌། །ཁྭ་གདོང་མ་ལ་སོགས་པ་རྣམས་ཀྱི་ནི་ཁྭ་ལ་སོགས་པའི་གདོང་དང་འདྲའོ། །བཅོམ་ལྡན་འདས་ཀྱི་གཡོན་པ་དང་གཡས་པ་དང་རྒྱབ་ཀྱི་ཞལ་རྣམས་ཀྱི་སྤྱན་ནི་དགོད་པ་དང་འཇིགས་པ་དང་མི་སྡུག་པ་དང་འདྲ་བའོ་ཞེས་པ་ནི་ཁྱད་པར་རོ། །དབང་པོ་དང་དབང་ལྡན་དང་རླུང་ལྷ་དང་ཆུ་ལྷ་དང་ཉེ་དབང་དང་ཚངས་པ་རྣམས་ནི་མཐོ་དགུ་པ་སྟེ་བྱའི་སྒོ་ངའི་ཞལ་ལོ། །ཐགས་བཟངས་རིས་དང་བདེན་བྲལ་དང་གཤིན་རྗེའི་ཁྲོ་བོའི་རང་བཞིན་ནོ། །ལུས་ངན་པོ་དང་མེ་ལྷ་ནི་རོལ་པ་ཐུང་དུ་མཐོ་བརྒྱད་པ་སྟེ་བྱའི་སྒོ་ངའི་ཞལ་ལོ། །ཞི་བའི་གཟའ་རྣམས་ནག་ཉི་མ་ཡང་བརྒྱ་བྱིན་གྱི་ཚད་དང་འདྲ་བར་འདོད་དོ། །དྲག་པོ་རྣམས་ནི་ཁྲོ་བོའི་རང་བཞིན་ནོ། །སྒྲ་གཅན་ནི་ལུས་ཕྱེད་པ་སྟེ་མཇུག་རིངས་ནི་ལུས་ཕྱེད་ཀླུའི་རྣམ་པའོ། །ཀླུ་ཐམས་ཅད་ནི་མཐོ་དགུ་པ་སྟེ་བྱའི་སྒོ་ངའི་ཞལ་ལོ། །བ་ཌུ་དང་མིའུ་ཐུང་དང་ཚོགས་བདག་རྣམས་ནི་མཐོ་ལྔ་པ་བྱའོ། །དེ་ལ་མཐོ་གཅིག་གིས་ནི་ཞལ་ལོ། །མགྲིན་པ་ནས་གསང་བ་ཇི་སྲིད་པ་ལ་མཐོ་གཉིས་སོ། །གསང་བ་ནས་རྐང་མཐིལ་ཇི་སྲིད་པ་ལ་མཐོ་གཉིས་ཏེ་དེ་ལྟར་མཐོ་ལྔའོ། །དེ་ལ་རྫོགས་པའི་སངས་རྒྱས་རྣམས་ཀྱི་ནི་
སྙིང་རྗེ་དང་ཞི་བའི་ཉམས་དང་ལྡན་པའོ། །རྡོ་རྗེ་འཛིན་པ་རྣམས་ཀྱི་ཞལ་དང་སྐུ་ཐམས་ཅད་ནི་ཉམས་དགུའི་ཉམས་དང་ལྡན་པའོ། །བྱང་ཆུབ་སེམས་དཔའ་ལ་སོགས་པ་རྣམས་ཀྱི་ནི་སྒེག་པའི་ཉམས་ལྷག་པའོ་ཞེས་པ་རབ་ཏུ་བརྐྱང་སྟེ་བརྗོད་པའོ། །དེ་རྣམས་ཀྱི་སྐུའི་མཚན་དང་དཔེ་བྱད་རྣམས་དང་རྗེས་སུ་དཔེ་བྱད་རྣམས་བརྗོད་པར་བྱའོ། །འདི་ལྟ་སྟེ། ཕྱག་དང་ཞབས་ཀྱི་མཐིལ་ལ་འཁོར་ལོ་རྩིབས་སྟོང་པས་མཚན་པ་ཉིད་དང༌། ཞབས་རུས་སྦལ་དང་འདྲ་བར་ལེགས་པར་རབ་ཏུ་གནས་པ་ཉིད་དང༌། ཕྱག་དང་ཞབས་ཀྱི་སོར་མོ་རྣམས་དང་པའི་རྒྱལ་པོ་བཞིན་དུ་དྲ་བས་འབྲེལ་པ་ཉིད་དང༌། ཕྱག་དང་ཞབས་འཇམ་ཞིང་གཞོན་ཤ་ཆགས་པ་ཉིད་དང༌། ཕྱག་གཉིས་དང་ཞབས་གཉིས་དང་ཕྲག་པ་གཉིས་དང་མགྲིན་པ་རྣམས་ཡང་དག་པར་མཐོ་བར་རབ་ཏུ་བསྟན་པས་སྐུའི་བདུན་མཐོ་བ་ཉིད་དང༌། སོར་མོ་རྣམས་རིང་བ་ཉིད་དང༌། རྟིང་པ་ཡངས་པ་ཉིད་དང༌། སྐུ་ཆེ་ཞིང་དྲང་བ་ཉིད་དང༌། ཞབས་ཀྱི་ལོང་བུ་མི་མངོན་པ་ཉིད་དང༌། སྐུའི་སྤུ་རྣམས་གྱེན་དུ་ཕྱོགས་པ་ཉིད་དང༌། བྱིན་པ་རི་དགས་ཨེ་ནྱའི་ལྟ་བུ་ཉིད་དང༌། ཕྱག་རིང་བ་ཉིད་དང༌། མདོམས་ཀྱི་གསང་བ་སྦུབས་སུ་ནུབ་པ་ཉིད་དང༌། གསེར་གྱི་ཁ་དོག་ཉིད་དང༌། པགས་པ་སྲབ་པ་ཉིད་དང༌། བ་སྤུ་རྣམས་རེ་རེ་ནས་གཡས་ཕྱོགས་སུ་འཁྱིལ་པ་ཉིད་དང༌། ཞལ་མཛོད་སྤུས་བརྒྱན་པ་ཉིད་དང༌། སྐུ་སྟོད་སེང་གེ་ལྟ་བུ་ཉིད་དང༌། དཔུང་མགོ་ཤིན་ཏུ་ཟླུམ་པ་ཉིད་དང༌། ཐལ་གོང་བར་མེད་པ་ཉིད་དང༌། ལྗགས་ལ་རོ་བྲོ་བའི་མཆོག་ཉིད་དང༌། ཉ་གྲོ་དྷ་ལྟར་ཆུ་ཞེང་གབ་པ་ཉིད་དང༌། གཙུག་ཏོར་སྤྱི་བོར་གནས་པ་ཉིད་དང༌། ལྗགས་རིང་ཞིང་སྲབ་པ་ཉིད་དང༌། ཚངས་པའི་དབྱངས་དང་ལྡན་པ་ཉིད་དང༌། འགྲམ་པ་སེང་གེའི་ལྟ་བུ་ཉིད་དང༌། ཚེམས་དཀར་པ་ཉིད་དང༌། བདུད་བཞི་མཐར་མཛད་པ་ཉིད་ཀྱི་ཕྱིར་མཆེ་བ་བཞི་པོ་མ་གཏོགས་པ་བཅོམ་ལྡན་འདས་ཀྱི་ཚེམས་མཉམ་པ་ཉིད་དང༌། ཚེམས་ཐགས་བཟང་བ་ཉིད་དང༌། ཚེམས་བཞི་བཅུ་ཚང་བ་ཉིད་དང༌། སྤྱན་མཐོན་མཐིང་ཉིད་དང༌། སྤྱན་གྱི་རྫི་མ་པའི་ལྟ་བུ་ཉིད་དོ་ཞེས་པ་ནི། མཚན་བཟང་པོ་སུམ་ཅུ་རྩ་གཉིས་སོ།། །།དཔེ་བྱད་རྣམས་བརྗོད་པར་བྱ་སྟེ། སེན་མོ་ཟངས་ཀྱི་མདོག་ལྟ་བུ་ཉིད་དང༌། སེན་མོ་མདོག་སྣུམ་པ་ཉིད་དང༌།
སེན་མོ་མཐོ་བ་ཉིད་དང༌། སོར་མོ་རྣམས་ཟླུམ་པ་ཉིད་དང༌། སོར་མོ་རྣམས་རྒྱས་པ་ཉིད་དང༌། སོར་མོ་རྣམས་བྱིང་ཡི་ཕྲ་བ་ཉིད་དང༌། རྩ་ཤིན་ཏུ་མི་མངོན་པར་གནས་པ་ཉིད་དང༌། རྩ་མདུང་མེད་པ་ཉིད་དང༌། ལོང་བུ་མི་མངོན་པ་ཉིད་དང༌། ཞབས་མི་མཉམ་པ་མེད་པ་ཉིད་དང༌། སེང་གེའི་སྟབས་སུ་གཤེགས་པ་ཉིད་དང༌། གླང་པོ་ཆེའི་སྟབས་སུ་གཤེགས་པ་ཉིད་དང༌། རང་བའི་སྟབས་སུ་གཤེགས་པ་ཉིད་དང༌། ཁྱུ་མཆོག་གི་སྟབས་སུ་གཤེགས་པ་ཉིད་དང༌། གཡས་ཕྱོགས་སུ་གཤེགས་པ་ཉིད་དང༌། མཛེས་པར་གཤེགས་པ་ཉིད་དང༌། མི་གོ་བར་གཤེགས་བ་ཉིད་དང༌། སྐུ་འཁྲུལ་བག་ཆགས་པ་ཉིད་དང༌། སྐུ་བྱི་དོར་བྱས་པ་ལྟ་བུ་ཉིད་དང༌། སྐུ་རིམ་པར་འཚམ་པ་ཉིད་དང༌། སྐུ་གཙང་བ་ཉིད་དང༌། སྐུ་འཇམ་པ་ཉིད་དང༌། སྐུ་རྣམ་པར་དག་པ་ཉིད་དང༌། སྐུ་མཚན་རྣམས་ཡོངས་སུ་རྫོགས་པ་ཉིད་དང༌། སྐུའི་ཁོ་ལག་ཡངས་ཤིང་བཟང་བ་ཉིད་དང༌། གོམ་པ་སྙོམས་པ་ཉིད་དང༌། སྤྱན་རྣམ་པར་དག་པ་ཉིད་དང༌། སྐུ་ཤིན་ཏུ་གཞོན་ཤ་ཅན་ཉིད་དང༌། སྐུ་ཞུམ་པ་མེད་པ་ཉིད་དང༌། སྐུ་རྒྱས་པ་ཉིད་དང༌། སྐུ་ཤིན་ཏུ་གྲིམས་པ་ཉིད་དང༌། ཡན་ལག་དང་ཉིད་ལག་ཤིན་ཏུ་འབྱེས་པ་ཉིད་དང༌། གཟིགས་པ་རབ་རིབ་མེད་ཅིང་རྣམ་པར་དག་པ་ཉིད་དང༌། དཀུ་ཟླུམ་པ་ཉིད་དང༌། དཀུ་སྐབས་ཕྱིན་པ་ཉིད་དང༌། དཀུ་མ་རྙོང་པ་ཉིད་དང༌། ཕྱལ་ཕྱང་དེ་བ་ཉིད་དང༌། ལྟེ་བ་ཟབ་པ་ཉིད་དང༌། ལྟེ་བ་གཡས་ཕྱོགས་སུ་འཁྱིལ་པ་ཉིད་དང༌། ཀུན་ནས་བལྟ་ན་སྡུག་པ་ཉིད་དང༌། ཀུན་དུ་སྤྱོད་པ་གཙང་བ་ཉིད་དང༌། སྐུ་ལ་སྨེ་བ་དང་གནག་བག་མེད་པ་ཉིད་དང༌། ཕྱག་ཤིང་བ་ལ་ལྟར་ཤིན་ཏུ་འཇམ་པ་ཉིད་དང༌། ཕྱག་གི་རི་མོ་མདངས་ཡོད་པ་ཉིད་དང༌། ཕྱག་གི་རི་མོ་ཟབ་པ་ཉིད་དང༌། ཕྱག་གི་རི་མོ་རིང་བ་ཉིད་དང༌། ཧ་ཅང་མི་རིང་བ་ཉིད་དང༌། མཆུ་བམ་པ་ལྟར་དམར་པ་ཉིད་དང༌། ལྗགས་མཉམ་པ་དང༌། ལྗགས་སྲབ་པ་ཉིད་དང༌། ལྗགས་དམར་པ་ཉིད་དང༌། འབྲུག་གི་སྒྲ་དང་ལྡན་པ་ཉིད་དང༌། གསུང་སྙན་ཅིང་མཉེན་ལ་འཇམ་པ་ཉིད་དང༌། མཆེ་བ་ཟླུམ་པོ་ཉིད་དང༌། མཆེ་བ་རྣོ་བ་ཉིད་དང༌། མཆེ་བ་དཀར་པ་ཉིད་དང༌། མཆེ་བ་བཞི་པོ་མ་གཏོགས་པའི་ཚེམས་རྣམས་མཉམ་པ་ཉིད་དང༌། མཆེ་
བ་རྣམས་བྱིན་གྱིས་ཕྲ་བ་དང༌། ཤངས་མཐོ་བ་ཉིད་དང༌། ཤངས་གཙང་བ་ཉིད་དང༌། སྤྱན་ཡངས་པ་ཉིད་དང༌། རྫི་མ་སྟུག་པ་ཉིད་དང༌། སྤྱན་དཀར་ནག་འབྱེས་ཤིང་པདྨའི་འདབ་མ་ལྟ་བུ་ཉིད་དང༌། ཕྱག་རིང་ཞིང་རྒྱས་པ་ཉིད་དང༌། སྨིན་ཚུགས་རིང་བ་ཉིད་དང༌། སྨིན་མ་འཇམ་པ་ཉིད་དང༌། སྨིན་མ་སྣུམ་པ་ཉིད་དང༌། སྨིན་མའི་སྤུ་མཉམ་པ་ཉིད་དང༌། ཕྱག་རིང་ཞིང་རྒྱས་པ་ཉིད་དང༌། སྙན་མཉམ་པ་ཉིད་དང༌། སྙན་གྱི་དབང་པོ་མ་ཉམས་པ་ཉིད་དང༌། དཔྲལ་བ་ལེགས་པར་དབྱེས་པ་ཉིད་དང༌། དཔྲལ་བའི་དབྱེས་ཆེ་བ་ཉིད་དང༌། དབུ་ཤིན་རུ་རྒྱས་པ་ཉིད་དང༌། དབུ་སྐྲ་བུང་བ་ལྟར་གནག་པ་ཉིད་དང༌། དབུ་སྐྲ་སྟུག་པ་ཉིད་དང༌། དབུ་སྐྲ་འཛམ་པ་ཉིད་དང༌། དབུ་སྐྲ་མ་འཛིངས་པ་ཉིད་དང༌། དབུ་སྐྲ་མི་གཤོར་བ་ཉིད་དང༌། དབུ་སྐྲ་དྲི་ཞིམ་པ་ཉིད་དང༌། ཕྱག་དང་ཞབས་ཀྱི་མཐིལ་ལ་དཔལ་བེའུ་དང་བཀྲ་ཤིས་དང་དགའ་བ་འཁྱིལ་པས་བརྒྱན་པ་ཉིད་ཀྱང་ངོ༌།། །།སྔོན་དང་སྔོན་གྱི་སྐྱེ་བ་རྣམས་སུ་རྣམ་པ་མང་པོའི་བསོད་ནམས་ཉེ་བར་བསགས་པའི་དགེ་བའི་རྩ་བ་ལས་བཅོམ་ལྡན་འདས་ཀྱིས་དཔེ་བྱད་བརྒྱད་ཅུ་གསུངས་ཤིང༌། ཆོས་ཀྱི་དུང་གི་མདོ་སྡེ་ལས་ཀྱང་བཅོམ་ལྡན་འདས་ལ་རི་མི་བརྒྱད་ཅུས་རྗེས་སུ་མཚན་པར་གསུངས་པ་ནི་འདི་ལྟ་སྟེ། གང་ཡང་འཇམ་དཔལ་དཔེ་བྱད་བརྒྱད་ཅུ་རྗེས་སུ་གྲུབ་པའི་བསོད་ནམས་ཀྱི་ཕུང་པོ་དེ་ཉིད་ཀྱི་བསོད་ནམས་ཀྱི་ཕུང་པོ་དུ་མ་བྱེ་བ་འབུམ་བརྒྱ་སྟོང་དུ་བསྒྱུར་བ་ལ་ནི་དེ་བཞིན་གཤེགས་པའི་ཕྱག་དང་ཞབས་ཀྱི་མཐིལ་ལ་མཚན་པ་གཅིག་བསྐྱེད་པར་འགྱུར་རོ། །དེ་བཞིན་དུ་སོ་སོར་རི་མོ་རྣམས་རྗེས་སུ་མཚོན་པར་འགྱུར་རོ། །རི་མོ་བརྒྱད་ཅུས་རྗེས་སུ་མཚན་པ་དེ་བཞིན་གཤེགས་པའི་ཕྱག་དང་ཞབས་ཀྱི་མཐིལ་ལ་མཐིལ་ལ་མངོན་པར་སྐྱེ་བར་འགྱུར་བ་ནི་འདི་ལྟ་སྟེ། གདུགས་དང་རྒྱལ་མཆན་དང་དཔལ་བེའུ་དང་ཕྲེང་བ་དང་ལྕགས་ཀྱུ་དང་ཅོད་པན་དང་རལ་གྲི་དང་བུམ་པ་དང་གླང་པོ་དང་རྟ་དང་སྟག་དང་ནམ་མཁའ་ལྡིང་དང་ཆུ་སྲིན་དང་ཉ་དང་རུས་སྦལ་དང་རྨ་བྱ་དང་ཀ་ལ་བིངྐ་དང་ཤང་ཤང་དང་ཙ་ཀོ་ར་དང་ངུར་པ་དང་ནེ་ཙོ་དང་ངང་པ་དང་ཕུག་རོན་དང་རྡོ་རྗེ་དང་ཆུ་གཏེར་ཆེན་པོ་དང་འདོད་འཇོ་དང་བ་ལང་དང་ཀླུ་དང་ཁུ་མཆོག་དང་རི་དག་ཤིང་དང་ས་དང་རི་དགས་ནག་པོ་དང་ནོར་བུ་རིན་པོ་ཆེ་དང་དུང་གི་མཆོག་དང་འཁོར་ལོ་དང་
གཞུ་དང་མངའོ། །འདི་ནས་སྐུ་གཟུགས་ཀྱི་མཚན་ཉིད་ཀྱི་མཐའ་དང་ཁམས་ཀྱི་ཡོན་ཏན་ཞེས་པའི་ས་བཏང་གཅིག་གི་ཁོངས་དང་སེལ་བྱང་པའི་སྟོད་ཅུང་ཟད་ཅིག་རྣམས་ཀྱི་ཕྱི་ནོ་ལས་ཆད་བ་འདྲའོ། །སེལ་གྱི་གཟུགས་རྣམས་རྣམ་པ་མང་པོ་འདྲེས་པ་མཐོང་ན་ཆུ་ལ་ངེ་པར་དར་བར་བྱ། །སྙིང་པོར་ཡོད་ཅིང་གནས་པར་འགྱུར་ན་རིགས་འཆད་དངོས་གྲུབ་མེད་ཅིང་ནད་རྣམས་སྐྱེ་བར་འགྱུར། །དེ་བཞིན་དུ་ཡང༌། གོས་དང་སྒྲ་ལ་སོགས་པ་རྣམས། བསལ་ནས་རང་བྱུང་མེ་ཏོག་དང༌། འོད་དཔག་མེད་པ་ཡང་དག་བསྲེས། །བྱུགས་པའི་རས་བྲིས་མཆོག་ཡིན་ནོ། །ཤེས་རབ་ཐབས་ནི་མཉམ་སྦྱོར་བ། །སྙིང་ལ་བཟུང་ནས་སྔགས་རིག་པས་འདྲི་བར་འགྱུར་བའི་ལྷའི་སྔགས་བརྒྱ་དང་བཅས་པའི་བརྒྱད་ཀྱིས་ངེས་པར་བསྔགས་ནས་རས་བྲིས་བྱས་ན་ཕུན་སུམ་ཚོགས་པ་དང་བདེ་བ་ཐམས་ཅད་ཐོབ་པར་འགྱུར་རོ་ཞེས་པ་ཤིང་ལ་སོགས་པ་གནས་པའི་སེལ་དབྱུང་བའི་ཆོ་གའོ།། །།མཆོད་རྟེན་གྱི་བུམ་པ་ནི་གསེར་དང་འབྲས་ཀྱི་ཕུང་པོ་དང་འཁྲི་ཤིང་དུ་གྲགས་པའི་དབྱེ་བས་གྲངས་ཇི་ལྟ་བ་བཞིན་དུ་ཐ་ཡིག་གི་དབྱིབས་དང་གཙུག་ཏོར་ལྟ་བུ་དང་བྱའི་སྒོ་ང་ལྟ་བུ་དང་ཏིལ་ལྟ་བུའོ། །གྲུ་བཞི་པའི་ས་ཆ་ལ་བཅུ་གཉིས་སུ་བྱས་ཏེ་ཕྱེད་དང་གཉིས་དང་ཕྱེད་དང་གསུམ་གྱི་ཆ་ཟུར་གཉིས་སུ་དོར་ནས་ཟླུམ་པ་ལ་བུམ་པར་འགྱུར་རོ། །བུམ་པའི་ཕྱེད་ཀྱིས་ནི་བང་རིམ་དུ་འགྱུར་ཞིང་བུམ་པའི་ཕྱེད་ཀྱིས་ནི་ཁྲིའོ། །དེ་བཞིན་དུ་བྲེ་དང་རྩེ་མོའི་མཐར་ཏེ་སྐུ་གཟུགས་ཀྱི་དབང་གིས་གདུགས་སོ། །དེ་ཡང་གཅིག་དང་གསུམ་དང་ལྔ་དང་བཅུ་གསུམ་ནི་རྫོགས་པའི་སངས་རྒྱས་དང་རྡོ་རྗེ་འཛིན་པ་རྣམས་ཀྱིའོ། །དགུ་དང་བདུན་ནི་ཉན་ཐོས་དང་རང་སངས་རྒྱས་ཀྱིའོ། །འདོད་ཆགས་ཀྱི་ཁམས་དང་མ་བྲལ་བ་རྣམས་ཀྱི་མཆོད་རྟེན་ལ་ནི་པདྨ་ཟླུམ་པ་ལྟ་བུ་སྟེ་གཞན་དུ་མ་ཡིན་ནོ། །དེ་ལྟར་ན་སྐུ་གཟུགས་ཀྱི་དབྱེ་བས་སྲོག་ཤིང་གཟུགས་པར་བྱའོ། །སངས་རྒྱས་བཞིའི་ཁྲི་དང་སླར་ཡང་རྣམ་པར་སྣང་མཛད་ནི་གཙོ་བོར་བྱ་ཞིང་བུམ་པའི་ཕྱི་རོལ་བཟང་པོ་བཞི་ལས་སངས་རྒྱས་བཞིས་རྣམ་པར་མཛེས་པའོ། །ཟུར་ལ་ཀ་བས་བཏེག་པ་བྱ་ཞིང་བྱང་ཆུབ་སེམས་དཔའ་ལ་སོགས་པས་བརྒྱན་པའོ། །གདུགས་ཀྱི་རྣམ་པ་ནི་སྲོག་ཤིང་གི་སྟེང་དུ་སྟེ་ཆར་ཁེབས་ཀྱི་མིང་ཅན་ནོ། །དོ་ཤལ་དང་དོ་ཤལ་ཕྱེད་པ་དང་དྲིལ་བུ་ལ་སོགས་པ་དང་གཡེར་ཁའི་དྲ་བས་བརྒྱན་པའོ། །དེའི་སྟེང་དུ་ནོར་བུ་བྱ་སྟེ་པདྨ་ཟླུམ་པ་ནི་མཐར་རོ་ཞེས་པ་ནི་ཁ་ཅིག་གིའོ། །ཆོ་ག་མཚན་
ཉིད་དང་ལྡན་པ་བྱ་སྟེ་ཆོ་ག་རིམ་པ་རྣམས་ཀྱིས་སོ་ཞེས་པ་མཆོད་རྟེན་གྱི་མཚན་ཉིད་ཀྱི་ཆོ་གའོ། །ད་ནི་རྡོ་རྗེ་དང་དྲིལ་བུ་ལ་སོགས་པ་ཕྱག་མཚན་རྣམས་ཀྱི་མཚན་ཉིད་བརྗོད་པར་བྱའོ། །མཐོ་གང་གི་དཔངས་དང་ཞེང་ལ་ཆ་ཆུང་གཉིས་པའི་ས་སྟེ་དེའི་དཔངས་ནི་སུམ་འགྱུར་རོ། །སྔ་མ་དང་ཕྱི་མའི་ཆ་དག་གིས་ཟུར་བཞི་པོ་རྣམས་སུ་ཕྱེད་དང་བཅས་པའི་རེའུ་མིག་བསྐོར་ནས་ཚངས་པའི་ཐིག་གི་དབུས་ཀྱི་གཡོན་དང་གཡས་དག་གི་རེའུ་མིག་གཉིས་ཡོངས་སུ་དོར་ཏེ་སྔ་མ་དང་ཕྱི་མའི་རེའུ་མིག་གི་དབུས་ཀྱི་ཚངས་ཐིག་གི་མཐར་ཐིག་བཞི་བཏབ་པ་ལས་དབུས་ཀྱི་རྩེ་མོའོ། །རྩེ་མོའི་གཉིས་ཀའི་ངོས་དག་ཏུ་ཆ་གཉིས་ཕྱིས་པ་ལས་ཆ་གཉིས་གཉིས་ཀྱིས་རྩེ་མོ་བཞིའོ། །ཆ་གཉིས་ཀྱི་དཔངས་ནི་ཆུ་སྲིན་གྱི་ཁ་ནས་བྱུང་བའོ། །ཆ་གཉིས་ཀྱི་རྩ་བ་ནི་སེང་གེའི་སྣ་ཤིན་ཏུ་མཛེས་པའོ། །ངོས་སུ་ཆ་གཉིས་ཀྱི་དཔངས་དང་ཆ་བཞི་པའི་དུ་མ་བུ་ནི་ཟླ་བ་ཕྱེད་པའི་རྣམ་པའོ། །ཆ་བརྒྱད་དུ་མཐོ་ཞིང་འཁྱོག་པ་ནི་གསུམ་དུ་འཁྱོག་པ་སྟེ་འོད་ཟེར་འཕྲོ་བ་གསུམ་གྱིས་རྣམ་པར་མཛེས་པའོ། །དབུས་ཀྱི་ཆལ་ནི་ཚངས་ཐིག་གི་དབུས་ནས་ཕྱོགས་བཞིར་ཐིག་གཉིས་དོར་ཏེ་ཟླུམ་པོར་བསྐོར་བས་ལྟེ་བའོ། །དེའི་སྟེང་དུ་ཆ་ཕྱེད་པའི་རྐེད་ཆིངས་དོར་ནས་ཆ་གཉིས་པ་དག་གིས་རྣམ་པར་རྒྱས་པའི་པདྨའོ། །རྐེད་ཆིངས་ཀྱི་ཁྱུད་མོའི་སྟེང་དང་འོག་ཏུ་ཁྱུད་མོ་ཕྲ་མོ་གཉིས་དང་སྦྱར་ཏེ་བྱའོ། །རྐེད་ཆིངས་ལ་ནི་རིན་པོ་ཆེའི་ཕྲེང་བ་བྱའོ། །ཆ་ཕྱེད་ཀྱིས་ནི་གེ་སར་རོ། །ཆ་གཅིག་གིས་ནི་ཟླ་བ་རྫོགས་པ་སྟེ་ལྷག་མ་རྣམས་ཕྱིས་པ་ན་ནི་བཅོམ་ལྡན་འདས་ཀྱི་དམ་ཚིག་གི་རྡོ་རྗེར་འགྱུར་རོ། །སོར་བཞི་ནས་བརྩམས་ཏེ་སོར་ཉི་ཤུའི་བར་གྱིས་རྡོ་རྗེ་བྱས་ཏེ་སོར་ཉི་ཤུ་ལ་སོགས་སུ་ནི་མི་བྱའོ། །ཞེས་པ་ལུང་ལས་སོ། །ཁྲོ་བོའི་ནི་ཟུར་རྣམས་སུ་ཆ་རེ་དོར་ནས་ཁ་གྱེས་པའོ། །རྩེ་མོ་གཉིས་དོར་བ་ལས་ནི་རྩེ་གཅིག་པ་སྟེ་ཀླུ་ཀུན་ནས་སྐྱོད་པར་བྱེད་པའོ། །རྩེ་དགུ་པ་ནི་ཟུར་རྣམས་སུ་རྩེ་མོ་བཞི་བྱས་པ་སྟེ་འོན་ཀྱང་དབུས་ཀྱི་རྩེ་མོ་ནི་ཟླུམ་པོའོ། །རྩེ་མོ་བཅུ་གཉིས་པའི་སྣ་ཚོགས་རྡོ་རྗེ་ནི་ལྟེ་བའི་ཕྱོགས་བཞིར་རྩེ་མོ་གསུམ་བྱས་པའོ། །དེ་ཉིད་རྩེ་མོ་ལྔ་པར་བྱས་པས་རྩེ་མོ་ཉི་ཤུ་པའི་སྣ་ཚོགས་རྡོ་རྗེའོ། །སླར་ཡང་དེ་ཉིད་ལ་སྟེང་དང་འོག་ཏུ་རྩེ་མོ་ལྔ་ལྔ་བྱིན་པ་ལས་རྩེ་མོ་སུམ་ཅུ་པའི་སྣ་ཚོགས་རྡོ་རྗེའོ་ཞེས་སོ། །དྲིལ་བུ་ནི་སྔར་གྱི་ཆ་རྣམས་
སྔར་དང་འདྲ་བ་སྟེ། དབུས་ཀྱི་ཆ་ཕྱེད་ཀྱིས་ཟླ་བའོ། །ཆ་ཕྱེད་ཀྱིས་གེ་སར་རོ། །ཆག་ཅིག་གིས་པདྨའོ། །ཆ་བཞི་ལས་ཤེས་རབ་ཀྱི་ཞལ་ལོ། །ཆ་བཞི་པ་བུམ་པའོ། །ཆ་གཉིས་ཀྱིས་བུམ་པའི་གདན་ནོ། །ཆ་གཞན་དག་གི་ཟུར་དག་ལས་ཆ་བཞི་སྤངས་ནས་འདབ་མ་བརྒྱད་པའི་པདྨ་སྟེ་ལྟེ་བ་དང་གེ་སར་དང་ལྡན་པའོ། །ལྟེ་བའི་སྟེང་གདན་གྱི་འོག་ཏུ་རི་མོ་གསུམ་པ་མགྲིན་པའི་གཟུགས་ཅན་བྱའོ། །ཆ་ཕྱེད་བྱས་པའི་རྐེད་ཆིངས་གཉིས་ཀྱི་དབུས་སུ་རྡོ་རྗེའི་ཕྲེང་བ་རྣམས་པར་མཛེས་པ་ཆ་གཅིག་གོ །དབུས་སུ་དོ་ཤལ་དང་དོ་ཤལ་ཕྱེད་པ་རྣམས་པར་གནས་པ་ཆ་བཞིའོ། །སྔ་མ་བཞིན་དུ་འོག་ཏུ་རྡོ་རྗེའི་ཕྲེང་བ་རྣམ་པར་མཛེས་པ་ཆ་གཅིག་གོ །ཀུན་ནས་ངེས་པར་སོང་བའི་མུ་ཁྱུད་ལ་ཆ་གཅིག་སྟེ་རྡོ་རྗེ་འཛིན་པ་ཆེན་པོའིའོ། །མི་བསྐྱོད་པའི་ནི་ཅུང་ཟད་ཁ་གྱེས་པའོ། །དོ་ཤལ་དང་དོ་ཤལ་ཕྱེད་པས་བརྒྱན་པའི་དབུས་སུ་དོ་ཤལ་གྱི་སྙིང་པོར་ཕྱོགས་སུ་འཁོར་ལོ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེའོ། །ཡང་ན་སྣ་ཚོགས་རྡོ་རྗེའི་གནས་སུ་རལ་གྲི་སྟེ་རྣམ་པར་སྣང་མཛད་ལ་སོགས་པ་རྣམས་ཀྱིའོ། །ཕྱོགས་བྲལ་རྣམས་སུ་སྤྱན་དང་རྡོ་རྗེ་དང་ཡུ་བ་དང་བཅས་པའི་པདྨ་དང་ཨུཏྤལ་རྣམས་ཏེ་སྤྱན་མ་ལ་སོགས་པའིའོ། །འོག་དང་སྟེང་དུ་རྡོ་རྗེ་ཕྲེང་བའི་གནས་ལ་འཁོར་ལོ་དང་རིན་པོ་ཆེ་དང་པདྨ་དང་སྣ་ཚོགས་རྡོ་རྗེའི་ཕྲེང་བའོ་ཞེས་པ་ནི། དེ་བཞིན་གཤེགས་པའི་རིགས་ཀྱི་དབྱེ་བས་རྟོགས་པར་བྱ་སྟེ། རྣམ་པར་སྣང་མཛད་ལ་སོགས་པའི་གནས་སུ་མི་བསྐྱོད་པ་ལ་སོགས་པ་རྣམས་ཀྱི་མཚན་ཉིད་དོ། །འདིར་དྲིལ་བུའི་མགྲིན་པ་ནས་བརྩམ་པ་ཏེ་འཁར་བ་དག་པའི་རང་བཞིན་ནོ། །དེའི་སྟེང་དུ་ཆ་གཉིས་ནི་གསེར་ལ་སོགས་པའི་རང་བཞིན་གྱི་རྡོ་རྗེ་ཡང་ངོ༌། །དྲིལ་བུ་ཁ་ཅིག་ནི་ཆུ་སྐྱེས་ཅུང་ཟད་ཁ་བྱེ་བ་ཅན་ནོ། །ཁ་ཅིག་ནི་བ་ལང་གི་གདོང་ལྟ་བུའོ། །ཁ་ཅིག་ནི་པདྨའི་རྣམ་པ་ཡང་ངོ་ཞེས་པ་ནི་ཁྱད་པར་རོ། །འདིར་རྡོ་རྗེའི་དབུས་དང་ཤར་ལ་སོགས་པའི་རྩེ་མོ་དང་ལྟེ་བའི་མཐར་ཐུག་པ་རྣམས་ལ་མི་བསྐྱོད་པ་དང་རྣམ་པར་སྣང་མཛད་ལ་སོགས་པ་བསམས་པར་བྱའོ། །ཡང་ན་དབུས་སུ་རྣམ་པར་སྣང་མཛད་དེ་ཤར་ལ་སོགས་པའི་འདབ་མ་རྣམས་ལ་བྱམས་པ་དང་སའི་སྙིང་པོ་དང་ཕྱག་ན་རྡོ་རྗེ་དང་ནམ་མཁའ་མཛོད་དང་འཇིག་རྟེན་དབང་ཕྱུག་དང་འཇམ་དཔལ་དང་སྒྲིབ་པ་ཐམས་ཅད་རྣམ་པར་
སེལ་བ་དང་ཀུན་དུ་བཟང་པོ་དང་ཆ་བརྒྱད་པ་ལ་རྡོ་རྗེ་སེམས་དཔའོ། །པདྨ་གཞན་གྱི་ཤར་ལ་སོགས་པའི་འདབ་མ་རྣམས་ལ་རྡོ་རྗེ་ལྕགས་ཀྱུ་མ་དང་རྡོ་རྗེ་ཞགས་པ་མ་དང་རྡོ་རྗེ་འཕྲོ་བ་མ་དང་རྡོ་རྗེ་འབེབས་པ་མ་རྣམས་ཏེ། མེ་ལ་སོགས་པ་རྣམས་སུ་སྐུལ་བྱེད་མ་དང་རིན་ཆེན་སྐར་མདའ་མ་དང་རྡོ་རྗེ་ལྕགས་སྒྲོག་མ་དང་གཞན་གྱིས་མི་ཐུབ་མ་རྣམས་སོ། །ཕྱོགས་གཞན་གྱི་རྩེ་མོ་རྣམས་ལ་ནི་དབུས་སུ་ཡེ་ཤེས་མཁའ་འགྲོ་མ་དང༌། ཤར་དུ་རྡོ་རྗེ་མཁའ་འགྲོ་མ་དང༌། བྱང་དུ་རྡོ་རྗེ་དག་མོ་མཁའ་འགྲོ་མ་དང༌། ནུབ་ཏུ་རོ་ལངས་མ་དང༌། ལྷོར་གཏུམ་མོ་རྣམས་སོ། །དྲིལ་བུ་དེའི་སྟེང་དུ་ཁ་འོག་ཏུ་ཕྱོགས་པའི་པདྨ་རྣམས་ལ་གཡས་སྐོར་གྱིས་ཕྱོགས་སུ་སྤྱན་མ་དང་མཱ་མ་ཀཱི་དང་གོས་དཀར་མོ་དང་སྒྲོལ་བ་རྣམས་དང༌། ཕྱོགས་བྲལ་དུ་ནོར་འཛིན་མ་དང་སྐུལ་བྱེད་མ་དང་ཁྲོ་གཉེར་ཅན་མ་དང་རྡོ་རྗེ་ཕྲེང་བ་མ་རྣམས་སོ། །བུམ་པའི་སྟེང་གི་ཞལ་ནི་ཤེས་རབ་རབ་ཀྱི་ཕ་རོལ་ཏུ་ཕྱིན་མའི་སྐུའོ། །དེའི་སྟེང་དུ་པདྨ་དང་ཟླ་བ་དང་རྡོ་རྗེ་རྣམས་ཀྱང་སྔ་མ་བཞིན་ནོ། །མི་བསྐྱོད་པ་ལ་སོགས་པ་ལྟ་འདི་རྣམས་ཀྱི་སྐུ་མདོག་ལ་སོགས་པ་ནི་སྔར་བཤད་པའོ། །དེ་ནས་དམ་ཚིག་སེམས་དཔའི་ལྷ་རྣམས་བསྐྱེད་དེ་སྙིང་གའི་ས་བོན་གྱི་འོད་ཟེར་གྱིས་ཡེ་ཤེས་སེམས་དཔའ་སྤྱན་དྲངས་པ་ལ་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་དེ་རྣམས་ལ་རབ་ཏུ་གཞུག་ཅིང་ཆོ་ག་བཞིན་དུ་རབ་གནས་བྱས་ནས་མཆོད་པ་ལ་སོགས་པ་བྱས་ལ་ལྷ་རྣམས་ཡོངས་སུ་གྱུར་བ་ལས་རྩེ་མོ་ལ་སོགས་པའི་གཟུགས་སུ་ཡང་དག་པར་གནས་པའོ། །རྡོ་རྗེ་ཐབས་ཀྱི་རང་བཞིན་དང་དྲིལ་བུ་ཤེས་རབ་ཀྱི་བདག་ཉིད་དང༌། གཉིས་ཀ་ཡང་དོན་དམ་པ་བྱང་ཆུབ་ཀྱི་སེམས་ཀྱི་རང་བཞིན་ནོ་ཞེས་ཤིན་ཏུ་བརྟན་པར་མོས་པ་བྱས་ནས། ཨོཾ་སརྦ་ཏ་ཐཱ་ག་ཏ་སིདྡྷི་བཛྲ་ས་མ་ཡ་ཏིཥྛཿ་ཨེ་ཥ་སྟྭཾ་དྷ་ར་ཡ་མི་ཧཱིཿ་ཧི་ཧི་ཧི་ཧི་ཧཱུཾ་ཧཱུཾ་ཕཊ་སྭཱ་ཧཱ། ཞེས་བརྗོད་ཅིང་རྡོ་རྗེ་གཡས་པའི་རྒན་པོ་མིང་མེད་དག་གིས་དང༌། ཨོཾ་བཛྲ་གྷཎྚ་ཧཱུཾ་ཞེས་བརྗོད་ཅིང་དྲིལ་བུ་ཡང་གཡོན་པ་དག་གིས་བཟུང་ནས་གཡོན་པའི་དཀུར་བཞག་སྟེ། རྡོ་རྗེ་སེམས་དཔའ་ལ་སོགས་མཉེས་པར་བྱའོ་ཞེས་ལྷག་པར་མོས་ལ། །སོ་ཧི་ཨི་བཛྫ་མུལླཱ་ལུ་ཏཱ་རི་ཨཏྭ་བི་མོཀྑ་དྷ་རམ་བི་མོ་ཀྦེཾ་བཱ་ཛྫྫ་ཏུ་ཧཱུཾ་བཱཛྫ་
ཨུཙྪ་ཌ་དྷ་རཾ་ཏུ་ཧཱུཾ་ཧཱུཾ་ཧཱུཾ་ཧོཿ་ཞེས་བརྗོད་ཅིང་རྡོ་རྗེ་གསོར་བར་བྱའོ། །དེ་ནས་རྡོ་རྗེ་གཡས་པའི་དཀུར་གནས་པ་འམ་གསོར་ཞིང༌། ཨོཾ་བཛྲ་དྷ་རྨ་ར་ཎི་ཏ་པྲ་ར་ཎི་ཏ། སམྤྲ་ར་ཎྀ་ཏ་སརྦ་བུདྡྡྷ་ཀྵེ་ཏྲ་པྲ་ཙྪ་ལི་ཏེ། པྲཛྙ་བཱ་ར་མི་ཏ་ནཱ་ད་སམྦྷ་ཝེ། བཛྲ་སཏྭ་ཧྲྀ་ད་ཡ་སནྟོ་ཥ་ཎི་ཧཱུཾ་ཧཱུཾ་ཧཱུཾ་ཧོ་ཧོ་ཧོཿ་སྭཱ་ཧཱ། ཞེས་བརྗོད་ལ་དཔུང་པའི་དབྱུག་པ་བསྐྱོད་པས་དྲིལ་བུ་དང་པོར། ལྟེ་བ་སྙིང་ག་དེ་ནས་མགྲིན། ཁ་དང་སྣ་ཡི་བུ་ག་གཉིས་རྣམ་བ་དག་དང་མིག་དག་དང༌། །དེ་བཞི་སྤྱི་བོར་དྲིལ་བུ་དཀྲོལ། །ཞེས་སོ། །སླར་ཡང་རྡོ་རྗེ་གསོར་བ་སྔོན་དུ་འགྲོ་བས་རྒྱུད་ལས་ཇི་ལྟར་གསུངས་པའི་སྔགས་བརྗོད་ཅིང་དྲིལ་བུ་དཀྲོལ་བར་བྱའོ་ཞེས་ཏེ། པད་ཀོར་རྣམ་པ་གསུམ་མམ་རྣམ་པ་ལྔ་པུས་མོའི་ཁོངས་སུ་བྱའོ་ཞེས་པ་རྡོ་རྗེ་དང་རྡོ་རྗེ་དྲིལ་བུའི་མཚན་ཉིད་ལ་སོགས་པའི་ཆོ་གའོ།། །།ཌ་མ་རུ་ལ་ནི་ཁའི་ཚད་གྲུབ་ཞི་བའི་ས་ལ་ཆ་བཅུ་གཉིས་ཏེ་ཚངས་ཐིག་གཉིས་བཏབ་ནས་ཚངས་པའི་ཐིག་ནས་བཟུང་སྟེ་ལྟེ་བ་ནས་གཡས་དང་གཡོན་གྱི་ཟུར་ཇི་སྲིད་པར་བསྐོར་ཞིང་ཚངས་པ་དང་ཟུར་གྱི་ཐིག་གི་མཐའ་རྣམས་ཕྱིས་པ་ལས་ཌ་མ་རུར་འགྱུར་རོ། །ཆངས་པས་གཟུང་བར་རང་པའི་སྦོམ་པ་དང་རྣ་བའི་མཐར་ཐུག་པར་རིང་བ་ནི་ཡུ་བ་སྟེ་གདོང་གི་ཚད་ཀྱི་གྲུབ་ཞིའི་ས་ལ་སྔ་མ་བཞིན་དུ་རྩེ་མོ་གསུམ་པའི་རྡོ་རྗེ་ཡུལ་རེ་རེར་སྟེང་དུ་བརྐྱང་བ་ལས་རྩེ་མོ་གསུམ་དུ་འགྱུར་རོ། །དེ་ནས་ཁ་ཊྭཱཾ་ག་ནི་དམ་ཚིག་གི་རྡོ་རྗེ་ལྟ་བུའི་རྡོ་རྗེས་རྩེ་མོར་རྣམ་པར་མཛེས་པ་སྟེ་དེའི་འོག་ཏུ་མི་མོག་སྐམ་པོ་གསུམ་གྱིས་མཛེས་ཤིང་སྣ་ཚོགས་རྡོ་རྗེ་དབུས་སུ་བརྒྱན་པ། རྩེ་མོ་གཅིག་པའི་རྡོ་རྗེ་གཅིག་ནི་རྩ་བའི་གནས་སུའོ་ཞེས་ཁ་ཅིག་གོ །དབྱུག་པའི་སྟེང་དུ་སྐམ་པོ་དང་རློན་པའི་མི་མགོ་གཉིས་དང་དེའི་སྤྱི་བོར་སྣ་ཚོགས་རྡོ་རྗེ་དང༌། དེའི་ལྟེ་བར་བུམ་པ་ཟླུམ་པོ་འདབ་མ་ལ་སོགས་པས་ཁ་བརྒྱན་པ་དང༌། ཁའི་སྟེང་དུ་དམ་ཚིག་གི་རྡོ་རྗེ་བ་དང་ལྟར་རབ་ཏུ་འཕྱང་བའོ་ཞེས་པ་ནི་གཉིས་བའོ། །གཉིས་ཀ་ཡང་ཡུ་བའི་སྟེང་སྦོམ་ཞིང་དབུས་ནས་ཕྲ་བ་སྟེ་དྲིལ་ཆུང་ལ་སོགས་པས་བརྒྱན་པའོ། །མགོ་བོ་ལ་སོགས་པ་རྣམས་ཇི་ལྟར་མཛེས་པར་བྱའོ་ཞེས། མཐོའི་ཚད་གྲུ་བཞི་པ་ཆ་བཅུ་གཉིས་ཀྱིས་ལ་ཆང་གཟུངས་ཆ་བཞི་ནི་དབུས་སུའོ། །དེ་བཞིན་དུ་ཆ་བཞི་ནི་འཁྱོག་
པ་སྟེ་རྩེ་མོའི་རྣམ་པའོ། །ཆ་བརྒྱད་ཀྱི་ཟུར་ནས་ཆ་དགུའི་ཟུར་ཇི་སྲིད་པར་འཁྱོག་པ་ནི་གྲི་གུག་སྟེ་ཆང་གཟུགས་ཀྱི་སྟེང་དུ་རྡོ་རྗེ་ཕྱེད་པས་བརྒྱན་པའོ། །ཐོད་པ་ནི། གསེར་གྱི་སྒོ་དང་ཡང་དག་ལྡན། །རྣམ་པར་ཤེས་བྱ་མི་ཡི་མགོ །བྲམ་ཟེ་ལ་སོགས་ལས་བྱས་པ། །རེ་རེའི་ཐོད་པ་འཕེལ་བའོ། །ཁ་དོག་དམན་གྱུར་ཐོད་པ་དང༌། །རྣ་བའི་སྟེང་དུ་བུག་པ་དང༌། །རྒྱབ་ཏུ་བུག་པ་དུམ་བུ་ཅན། །བུད་མེད་རྣམས་ཀྱི་རྟག་ཏུ་ཡང༌། །མཁས་པས་རྣམ་ཤེས་དང་ལྡན་པའི། །སྔགས་པས་དེ་བཞིན་མགོ་ཞེས་བྱ། །དཔྲལ་བ་རྣ་བའི་དུང་དག་ལ། མུ་ཏིག་ཕྲེང་འདྲའི་རི་མོར་གྱུར། །གཅིག་གཉིས་གསུམ་བཞིའི་དུམ་བུ་དང༌། བཅུ་དྲུག་བཅུ་གཉིས་རི་བོང་ཅན། བ་ལང་གདོང་དང་དཀར་དམར་གྱུར། །ཅུང་ཟད་རིང་ཞིང་མཛེས་པ་དང༌། པདྨའམ་པདྨ་འདྲ་བའི་དབྱིབས། །སེར་དམར་དཀར་པོ་དེ་ལྟ་བུའི། །ཐོད་པ་རབ་ཏུ་བསྟན་པ་སྟེ། །ལྷག་མ་རྣམས་ནི་རབ་ཏུ་སྤང༌། །ཞེས་སོ། །རང་གི་འདོད་པས་འཁྱིལ་པ་བྱས་ཏེ་སོར་གཉིས་སུ་སྦོམ་པ་མཐའ་གཉིས་ལ་རྡོ་རྗེས་བརྒྱན་པ་ནི་ཞགས་པའོ། །མགྲིན་པ་གནས་ཁྲག་འཛག་པའི་གདོང་བཞི་པ་ནི་ཚང་པའི་མགོ་བོའོ། །དགྲ་སྟའི་ཁ་ནི་ཞལ་གྱི་ཚད་དེ་ཡུ་བ་ནི་ཁུ་དོ་པ་མཐའ་སྐོར་དུ་སོར་དྲུག་པ་སྟེ་སྟེང་དུ་རྡོ་རྗེས་བརྒྱན་པའོ། །དེ་དང་འདྲ་པ་ལ་ལྕགས་ཀྱུ་ནི་མཐོ་གང་པའི་རྩེ་མོ་གུག་པའོ། །གླང་པོ་ཆེའི་པགས་བ་ནི་རྣ་བའི་བར་དུ་འཛིན་པའོ། །ཐོ་བ་ནི་སྣ་ཚོགས་དང་འདྲ་སྟེ་འོག་ཀྱང་ཕྱོགས་གཅིག་གི་རྩེ་མོ་རྣམས་གཅིག་པ་ཟླུམ་པོའི་ཡུ་བ་ཅན་ནོ། །གཞུ་ནི་མཐོ་བཅུ་པ་སྟེ་ཞེང་ལ་སོར་བཞི་པ་ཆང་གཟུངས་ཀྱི་ཆ་རིང་པར་སོར་བཅུ་དྲུག་པ་འཁྱོག་པོའི་དབུས་ལ་སོར་བརྒྱད་པ་མཐའ་སྐོར་གྱི་ཟླུམ་ལ་སོར་དགུ་པ། མཆོག་མ་རྣམ་པར་རྒྱས་ཤིང་རྒྱུད་པའི་མཚན་ཉིད་དང་ལྡན་པའོ། །ཕྲག་པ་བརྟན་པར་བྱས་ནས་དབུང་པ་གཡོན་པ་བརྐྱང་བའི་ཁུ་ཚུར་གྱིས་དབུས་ནས་བཟུང་སྟེ། གཡས་པའི་མིག་མདའ་ཇི་ལྟ་བ་བཞིན་དུ་བལྟ་བའི་དབང་གིས་མདེའུའི་བར་དུ་རྡོ་རྗེ་ཁུ་ཚུར་གྱིས་ཁྲུ་དོ་བའི་མདའ་སྣ་དང་མཆུའི་ཐད་ནས་རྣ་བའི་བར་ཇི་སྲིད་པར་འཐེན་ནས་ཅུང་ཟད་གཡོ་བ་དང་བཅས་པས་ཡོངས་སུ་འཛིན་པའོ། །རིང་པར་སོར་སུམ་ཅུ་སོར་དྲུག་པ་འཁྲུལ་འཁོར་གྱི་ཞེང་ལ་སོར་བཞི་པ་སོར་བཞིར་རིང་བའི་སྐམ་
པས་དབུས་ནས་བཟུང་བ། སོར་བཞི་བཞི་ངོས་སུ་གྱེས་པ། །ཀླུའི་གདེངས་ཀའི་རྣམ་པས་མཛེས་པ་དེ་དག་གི་དབུས་སུ་ཀོ་སྐོ་ལྟ་བུ་སོར་གང་དུ་རྣམ་པ་རྒྱས་པ། དཔངས་ཀྱི་མཐར་སོར་བཞི་བའི་ཡུ་བ་མཛེས་པ་དང་ལྡན་པ། ལས་དང་རྗེས་སུ་མཐུན་པར་སོར་བརྒྱད་པའི་ཚད་ལ་སོར་གཅིག་པའི་འདབ་མ་ཅན་གྲུ་བཞི་དང་གདུགས་དང་ཟླ་བ་ཕྱེད་པའི་རྣམ་པ་ཅན་གྱི་སྒོ་སྐྱོང་བྱེད་དང་ལྡན་པ། སོར་གཉིས་པའི་སྙིང་པོས་རྣམ་པར་མཛེས་པར་བྱས་པ་ནི་རལ་གྲིའོ། །འཁོར་ལོ་ལ་ནི་ཆ་གཅིག་གིས་ལྟེ་བ་ཟླུམ་བོ་དང་དེའི་ཕྱི་རོལ་དུ་ཆ་ཕྱེད་ཀྱིས་སྙིང་པོའི་མུ་ཁྱུད་ཟླུམ་པོ་དང༌། སླར་ཡང་དེའི་ཕྱི་རོལ་དུ་རྐང་པ་དང་བཅས་པའི་ཆ་གཅིག་གིས་རྩིབས་ཀྱི་ཟླུམ་པོ་དང༌། དེའི་ཕྱི་རོལ་དུ་ཡང་ཆ་ཕྱེད་ཀྱིས་སྙིང་པོའི་མུ་ཁྱུད་ཟླུམ་པོ་དང་ཞེས་པ་སྟེ་རྩིབས་བཞི་པ་ལ་སོགས་པ་འཁོར་ལོ་ཐམས་ཅད་ཀྱི་ཚད་དོ། །ལྕགས་སྒྲོག་གིས་རྩེ་མོར་བཅིངས་པའི་ལྕགས་ཀྱི་བིལ་བ་ཅན་ནི་ཀ་ཎ་ཡའོ། །མངའ་ལྟ་བུ་སྒྲོ་གསུམ་དང་ལྡན་ཞིང་གདོང་གི་ཚད་ཅན་ནི་འཕང་མདུད་ངོ༌། །དེ་དང་འདྲ་བ་ལ་སྒྲོ་དང་ལྡན་ཞིང་རིང་བ་ཁ་ཊྭཱཾ་གའི་རྣམ་པ་ཅན་ནི་མདའ་བོ་ཆེའོ། །མདུང་དང་རྡོ་རྗེ་ལ་སོགས་པ་རྣམས་ཀྱི་ཚད་ནི་རབ་ཏུ་གྲགས་པ་ཉིད་ཀྱི་ཕྱིར་མ་བྲིས་སོ། །མཚོན་ཆ་ཐམས་ཅད་འཛིན་པ་ན་རྣ་བའི་སྟེང་དུ་བསྟན་ཏོ་ཞེས་པ་མཚོན་ཆའི་མཚན་ཉིད་ཀྱི་ཆོ་གའོ། །།མཆོད་རྟེན་དང་མགྲོན་ཁང་དང་གཙུག་ལག་ཁང་ལ་སོགས་པ་རབ་ཏུ་བརྩམས་པ་ཡང་དག་པར་གནས་པ་ལ་མཆོག་ཏུ་འབད་བ་ན། གཎྜཱི་དང་སྲོག་ཤིང་དང་རྩེ་མོར་གནས་བ་དང༌། སྒོ་ལ་སོས་པ་ཀ་བ་དང་བསྐྱེད་པའི་ཤིང་གི་དཔངས་དང་ཞེང་དང་ཁོ་ལག་དང་ཟླུམ་རྣམས་དང་གནས་ཀྱི་བདག་པོ་དང་ཐིག་འཛིན་པ་ལ་སོགས་པ་མཐའ་དག་གིས་དེ་དག་གི་ཚད་ཡོངས་སུ་གྲོས་བྱས་ནས་སློབ་དོན་དག་ཤིག་མཁན་རྣམས་དང་ལྷན་ཅིག་ནགས་ཚལ་གྱི་ལྟད་མོ་ལ་འགྲོ་བར་བྱའོ། །ཚོགས་བ་ན་ཕུན་སུམ་ཚོགས་པའི་སྐར་མ་དང་གཟའ་དང་ཉི་མ་བཟང་པོ་བརྟགས་ཏེ་སྔགས་པས་བགེགས་མཐར་བྱེད་ཀྱི་གཟུགས་ཀྱིས་དུས་ཡོངས་སུ་བརྟགས་ལ་ཤར་དང་བྱང་གི་ཕྱོགས་སུ་ཁ་བལྟ་ནས་སོ།། །།ནགས་ཚལ་དང་རི་དང་དགའ་བའི་ས་གཞི་མཆོག་གི་ཚ་ལ་རབ་ཏུ་འཇུག་
པར་བྱའོ། །བཟང་པོའི་གནས་སུ་སྐྱེས་ལ་སྡུག་ཅིང་སྣུམ་པ། སྔོ་བསངས་དང་དམར་པོ་དང་སེར་པོའི་མདོག་ཅན་འབྲས་བུ་ཞིམ་པོ་དང་ལྡན་ཞིང་དྲི་བཟང་བ་མེ་ཏོག་དང་འོ་མས་འབྱོར་བ། ཡལ་ག་དང་ལོ་མ་ཡོངས་སུ་རྫོགས་ཤིང་ཡོན་ཏན་དང་རིགས་དང་བཞོན་པ་དང་ལྡན་པ་དྲངས་སོ། །ཤིང་སྐྱེས་ནས་ལོ་བརྒྱ་ལྷག་ཅིང་ཉིས་བརྒྱའི་བར་དང་ལྡན་པ་དར་ལ་བབ་པ་རྣམས་ཏེ། ཤིང་སཱུ་མ་ནཱ་ག་དང༌། ནཱ་ག་གེ་སར་དང༌། ཤྲཱི་ཥཱི་ས་དང༌། ཨ་ཤྭ་དྷ་དང༌། ཤིང་ཤང་དང༌། མྱ་དན་མེད་པ་དང༌། ཛམ་བུ་དང༌། པའི་ལ་ཤ་དང༌། ཙནྡན་དང༌། ཀིཾ་ཤུ་ཀ་དང༌། ཀཾ་ཀི་ལླི་དང༌། ཏཱ་ལ་དང༌། སཱ་ལ་དང༌། ཨ་མྲ་དང༌། ཙམྦ་ཀ་དང༌། བིལ་བ་དང༌། ཙནྡན་དམར་པོ་དང༌། བཻ་ཀདྐ་ཏ་དང༌། བ་ཀུ་ལ་དང༌། རོ་ཧི་ཎི་དང༌། སེང་ལྡེང་དང༌། སྲཱི་པརྞ་དང༌། ཏིནྟུ་དང༌། ཤ་ར་ཀ་དང༌། སྦྲང་གི་ཤིང་དང༌། ཨརྫུ་ན་དང༌། དེ་བ་ད་ཏུ་དང༌། པ་ཊཱི་རིགས་ཏེ་ཁང་བཟངས་ལ་སོགས་པའི་ལས་ལ་འོས་པ་རྣམས་སོ། །གཞོན་པ་དང་རྒས་པ་དང་ཡན་ལག་འཁྱོག་པ་རྣམ་ནི་མ་ཡིན་ཏེ། གཞོན་པ་ནི་ལོ་བརྒྱ་མ་ལོན་པ་དང༌། རྒས་པ་ནི་ལོ་གཉིས་བརྒྱ་ལྷག་པའོ། །སྐམ་པོ་དང་གཅིག་ཏུ་དང་ཡལ་ག་ཆག་པ་དང་ཚིག་པ་དང་འདབ་མ་ཉིལ་བ་དང༌། ཡན་ལག་གས་པ་དང༌། དུར་ཁྲོད་དང་ཁུང་བུ་དང་བྱ་སྐྱིབས་དང་ལྷའི་གནས་དང་ལམ་དུ་སྐྱེས་པ་དང་ཚ་བ་དང་ཁ་བ་དང་གྲོང་གི་མི་གཏང་བའི་ཡུལ་དུ་གནས་པ་དང༌། མཚེ་འུ་དང་ཆུ་ཀླུང་གི་དོགས་སུ་སྐྱེས་པ་ལ་སོགས་པ་རྣམས་དང༌། བྱ་དང་ལག་འགྲོའི་ཚད་བཅས་པ་དང༌། རྡོ་རྗེས་བསྣུན་པས་དུམ་བུར་སོང་བ་རྣམས་སྤངས་ཏེ། དེ་རྣམས་ཀྱི་ནང་ནས་རིགས་ཤིང་ཀུན་དུ་བཟང་བ་རྣམས་འདིར་བརྟག་པར་བྱའོ། །དེ་ལ་ཡང་ཐུན་མཚམས་ཀྱི་དུས་སུ་བཟོ་བོ་དང་བཅས་པའི་ཤིང་མཁན་རྣམས་ཡང་དག་པར་བསྲུང་བར་བྱ་ཞིང་བདུད་རྩི་འཁྱིལ་བའི་རྣལ་འབྱོར་དང་ལྡན་ཞིང་སྤྲོ་བ་དང་བཅས་པས་བདེ་བར་གཤེགས་པ་སྲས་དང་བཅས་པ་དང༌། ཕྱོགས་ཀྱི་ལྷ་རྣམས་དང་ནགས་ཚལ་གྱི་ཤིང་གི་ལྷ་རྣམས་ཉེ་བར་སྤྱོད་པ་ལྔས་ཡང་དག་པར་མཆོད་དོ། །ཕྱོགས་ཀྱི་གཏོར་མ་བྱས་ནས་བཟོ་བོ་དང་བཅས་པའི་སྔགས་པ་རྣམས་བཟའ་བ་དང་བཏུང་བས་ཡོངས་སུ་ཚིམ་པར་བྱས་ལ་བདེ་བར་གཤེགས་པ་དང་ལྷ་རྣམས་ལ་བཅོམ་
ལྡན་འདས་ཞེས་པ་ལ་སོགས་པའི་ཚིགས་སུ་བཅད་པ་རྣམས་ཀྱིས་གསོལ་བ་གདབ་པར་བྱའོ། །ལྷན་ཅིག་ཏུ་རབ་ཏུ་དགའ་བའི་སེམས་དང་ཞི་བའི་ཡིད་དང་གཉིས་སུ་མེད་པའི་རྣལ་འབྱོར་གྱིས་ཉལ་བར་བྱ་སྟི། །རྨི་ལམ་བཟང་ན་ཡང་དག་པར་འགྲུབ་ཅིང་རྨི་ལམ་ངན་ན་ལས་ཐམས་ཅད་པའི་བཟླས་པ་བྱའོ། །ནད་པར་སྔ་བར་དོ་ལྡན་རྣམ་པར་སྣང་མཛད་ཀྱི་རྣལ་འབྱོར་གྱིས་མཆོད་པ་ཐམས་ཅད་ཡང་དག་པར་ལྡན་པས་ཤིང་གི་རྒྱལ་པོ་དེ་ལ་གནས་པའི་ཕྱོགས་ཀྱི་ལྷའི་གཟུགས་ཅན་རྣམས་ཡང་དག་པར་མཆོད་པར་བྱ་སྟེ། སཱ་ལ་དང་ཐང་ཤིང་དང་ཏིལ་སེའི་ཤིང་རྣམས་ལ་ཡང་དག་པར་གནས་པའི་ལྷ་མོ་ནི་འཇིག་རྟེན་གྱི་མ་མོ་དང་དེ་ལ་གནས་པའི་ཞིང་སྐྱོད་ནི་རི་རབ་ཆེན་པོ་ཞེས་བྱ་བ་འདིའོ། །སཱུ་མ་ནཱ་ག་དང་ནཱ་ག་གེ་སར་དང་ཙམ་བ་དང་མྱ་ངན་མེད་པ་རྣམས་ཀྱིས་ལྷ་མོ་ནི་གསང་བ་མ་དང༌། དེ་རྣམས་སྲུང་བའི་ཞིང་སྐྱོད་ནི་སྟོབས་པོ་ཆེ་ཞེས་བྱའོ། །ཨ་རུ་རའི་ཤིང་དང་ཧ་རཱི་ཏི་དང་པ་ཊའི་ཤིང་ལ་ཀརྞ་མོ་ཏི་ཀ་དང་ཧེ་ཏུའོ། །ཙུ་ཏའི་ཤིང་ལ་ཨམྦི་ཀ་དང་ཕ་ན་ལའོ། །ཏཱ་ལའི་ཤིང་ལ་ཤནྐ་རི་ཀ་དང་སྐྲ་གྱེན་དུ་བརྫེས་པའོ། །ཀ་དམྤའི་ཤིང་ལ་ལྷ་མོ་བཞིན་བཟང་མོ་དང༌། འཇམ་འབྲས་ཀྱི་ཤིང་ལ་ལྷ་མོ་འཇམ་འབྲས་ལ་གནས་མ་སྟེ་ཞིང་གི་བདག་པོ་དག་ནི་དྲིལ་བུ་ཆེན་པོའོ། །སྦྲང་གི་ཤིང་ལ་སྐྱེས་བུའི་དབང་ཕྱུག་དང་ཤ་ཤཱའོ། །གསེར་གྱི་ཤིང་ལ་ལྷ་མོ་གཏུམ་མོ་དང་ཞིང་སྐྱོང་སྐྱེ་བ་བཟང་པོའོ། །ཤལ་མ་ལིའི་ཤིང་ལ་ལྷ་མོ་ཆེན་མོ་མེ་ཞལ་དང༌། སྟར་ཀའི་ཤིང་ལ་འདོད་མ་སྟེ་ཞིང་སྐྱོང་དག་ནི་འཇིགས་པའོ། །ཤྲྀདྒའི་ཤིང་ལ་ཕུན་ཚོགས་ཆེན་མོ་དང་ཞིང་སྐྱོད་མི་གདོང་ཞེས་བྱ་བ་རྣམས་སོ། །གནས་ལ་སོགས་པའི་དབྱེ་བ་རིགས་པ་འདི་ལྟ་སྟེ་མངས་པས་འཇིགས་ནས་མ་བཤད་པའི་ཕྱག་དག་སྐུ་མདོག་དང་མཚོན་ཆ་དང་སྔགས་ནི་རྒྱུད་ཀྱི་ནད་ནས་འབད་པས་ངེས་པར་གཟུང་བར་བྱའོ། །གཙུག་ལག་ཁང་སོགས་རྒྱུ་རུ་ནི། །དེ་རིང་ཤིང་གཅོད་བདག་སྤྲོ་བས། ཁྱེད་རྣམས་ད་ནི་བཟོད་མཛད་ནས། །ཤིང་གཞན་ལ་ནི་གནས་པར་མཛོད། །ཤིང་གཞན་རྒན་པོ་ལ་སོང་བའི་ལྷ་རྣམས་མཐའ་དག་ལ་གཏོར་མ་དང་མཆོད་པ་ལ་སོགས་པའི་ཁྱད་པར་རྣམས་ཀྱིས་ཡང་དག་པར་མཆོད་པར་བྱའོ། །ཤིང་མཁན་བགེགས་
མཐར་བྱེད་ཀྱི་གཟུགས་ཅན་བཏུང་བ་དང་བཟའ་བ་དང་སོ་རྩི་དང་ཕྲེང་བ་དང་ཙནྡན་དང་གོས་དང་གསེར་རྣམས་ཀྱིས་ཡང་དག་པར་མཉེས་པར་བྱས་ལ་སྟ་རེའི་སོ་ལ་རྡོ་རྗེའི་སྦྲང་རྩི་ཡང་དག་པར་བྱུགས་ནས་ལག་པ་གཡས་པས་བསྟོད་དེ། དགེ་བའི་ཡིད་ཀྱི་ཤར་དང་བྱང་དུ་ཕྱོགས་བས་ཉི་མ་ལ་བལྟ་ཞིང་གཅད་པར་བྱའོ། །ལྷན་ཅིག་པའི་གཙོ་བོ་རྣམས་བསྲུང་བའི་ཆེད་དུ་དཔལ་ལྡན་རྨ་བྱ་ཆེན་མོ་བཀླག་པར་བྱའོ། །ཆོག་དང་མཆོག་མ་ཡིན་པའི་མཚན་མ་རྣམས་སྔགས་པ་ཆེན་པོས་ཀུན་ནས་བལྟ་བར་བྱ་སྟེ། མཆོག་མ་ཡིན་ན་ནི་དེ་རྣམས་སྤང་བར་བྱ་ཞིང༌། མཆོག་ཡིན་ན་མཁས་པས་ཐམས་ཅད་ཡང་དག་པར་མཆོད་པར་བྱའོ། །བྱང་གི་ཕྱོགས་སུ་འགྱེལ་ན་སྦྱིན་པ་པོ་ལ་ནོར་དང་ལས་འགྲུབ་པ་ལ་སོགས་པ་སྟོན་པའོ། །དབང་ལྡན་གྱི་ཕྱོགས་སུ་འགྱེལ་ན་རིག་པ་དང་ཡེ་ཤེས་ཡང་དག་པ་ལ་སོགས་པ་སྟོན་པའོ། །དབང་པོའི་ཕྱོགས་སུ་ཤིང་འགྱེལ་ན་རྒྱལ་བ་དང་འབྱོར་བའི་ཁྱད་པར་ཡང་དག་པ་ལ་སོགས་པ་སྟོན་པའོ། །གཞན་གྱི་བར་དུ་མ་རེག་པར་འགྱེལ་བ་ན་བདེ་བ་དང་མཆོག་གོ །མེའི་མཚམས་སུ་ནི་མེའི་འཇིགས་པའོ། །ཡི་དགས་ཀྱི་བདག་པོའི་ཕྱོགས་སུ་སོང་ན་འཆི་བ་སྟོན་ནོ། །བདེ་བྲལ་དུ་ནི་ནད་ཀྱི་འཇིགས་པའོ། །ཆུ་དང་རླུང་དུ་སོང་ན་ཆུ་དང་རླུང་གི་འཇིགས་པའོ། །ཤིང་གཞན་ལ་ཉེད་པ་དང་བཅས་ཤིང་སོང་ན་རྗེའི་འཇིགས་པ་སྟོན་པའོ། །འདར་ཞིང་དུ་བས་རིང་པོར་ལྷུང་ན་སྦྱིན་པ་བོ་ལ་སྡུག་བསྔལ་འཐོབ་པོ། །གཅོད་པའི་དུས་སུ་ཁྱི་དང༌། རྔ་མོ་དང༌། སྤྲུལ་དང༌། ཕག་དང༌། ཅེ་སྤྱང་དང༌། བོད་བུ་དང༌། །བྱ་རོག་དང༌། བྱ་རྒོད་དེ། གདུག་བ་ཅན་རྣམས་མཐོང་ན། འཆིང་བའི་འཇིགས་པ་དང་བགེགས་མད་བར་འགྱུར་རོ། །གལ་ཏེ་བཅད་པ་ན་ཤིང་ལས་ཁྲག་འཛག་ན་སྦྱིན་པ་པོ་འཆི་བ་ལ་སོགས་པ་སྟོན་པའོ། །ཞོ་དང་མར་དང་སྦྲང་དང་འོ་མ་བྱུང་ན་གསོད་པ་དང༌། འཆིང་བའི་འཇིགས་པ་ལ་སོགས་པ་སྟོན་པའོ། །མངར་བ་དང༌། བསྐ་བའི་རོ་ལ་སོགས་པ་དང༌། དག་པ་དང༌། གསོ་བསངས་དང༌། དྲི་བཟང་པོ་མནམ་པ་དང༌། རོའི་རྒྱུན་སྣུམ་པ་དང་བཅས་པ་འབབ་པ་ནི་རང་བཞིན་པར་བསྟེན་ཏོ། །གཅོད་པའི་ཤིང་གང་གཟུང་བའི་ཁ་དོག་གི་རྣམ་པར་དབྱེ་བ་མཐོང་བ་གང་ཡིན་པ་དེའི་ཁ་དོག་གི་
རྣམ་པའི་དབྱེ་བ་ལས་སྙིང་པོའི་རྣམ་པ་རྒྱུ་མཚན་ཤེས་པས་བསྟན་ཏེ། བཙོད་ཀ་དང༌། སེར་སྐྱ་དང༌། སེར་པོ་དང༌། ཕུག་རོན་གྱི་མདོག་དང༌། རལ་གྲིའི་མདོག་དང༌། དམར་པོ་དང༌། སྔོ་བསངས་རྣམས་ལས་སོ། །བཙོད་ཀྱི་ཁ་དོག་གི་རྟགས་ལས་ནི་སྦལ་པ་རྗེས་སུ་ཤེས་པར་བྱ་སྟེ་དེ་ནི་མེད་དོ། །སེར་སྐྱ་ལས་ནི་ནང་ན་བྱི་བ་སྟེ་དེས་ནི་ཆོམ་རྐུན་དང་གློའི་ནད་སྐྱེད་པར་བྱེད་དེ། སེར་པོ་ལས་ནི་དབྱིག་སྟེ་དེས་ཀྱང་ནོར་ཉམས་པ་སྐྱེད་པར་བྱེད་དོ། །ཕུག་རོན་གྱི་མདོག་ལས་ནི་ཁྱིམ་གྱི་དབྱིག་སྟེ་དེས་ཀྱང་རྒྱལ་པོ་དབུལ་པོར་བྱེད་དོ། །སྐྱ་རིངས་ཀྱི་མདོག་ལས་ནི་རྩངས་པ་ཡོད་པ་སྟེ། དེས་ནི་འདིར་སྣ་ཚོགས་པའི་ནད་དུ་འགྱུར་རོ། །སྔོ་བསངས་ལས་ནི་སྤྲུལ་འབྱུང་སྟེ་དེས་ཀྱང་སྦྱིན་བདག་ཆེན་པོའི་ནོར་ཟད་པའོ། །རལ་གྲིའི་ཁ་དོག་གི་དབྱེ་བ་ལས་ནི་ཆུ་སྟེ་དེའི་འཇིགས་པར་འགྱུར་རོ། །དཔལ་བེའུ་དང་འཕེལ་ལྡན་དང༌། དགའ་བ་འཁྱིལ་བ་དང༌། འཁོར་ལོ་དང་བཀྲ་ཤིས་དང༌། ཆུ་སྐྱེས་དང་གདུགས་དང༌། ལྕགས་ཀྱུ་དང༌། བུམ་པ་དང༌། རྒྱལ་མཚན་དང༌། རྔ་ཡབ་རྣམས་ནི་ཆེན་པོའི་མཚན་མར་བསྟན་ཏོ། །དེ་ལྟ་བུ་སོགས་དགེ་དང་མི་དགེ་བ། །མཐའ་དག་སློབ་དཔོན་ཆེན་པོས་ལེགས་བརྟགས་ནས། །བཅད་པ་དང་ནི་གཤོག་པ་དེ་སྙེད་པ། །ཤིང་གི་མཆོག་ལ་བློ་དང་ལྡན་པས་བྱ། །རྩ་བ་དང་ནི་རྩེ་མོ་དབུས་ཀྱི་ཆར། །མཛེར་པ་ཅན་རྣམས་ཀུན་དུ་བལྟས་ལ་ཡང༌། །ཀུན་ལ་བཅུ་ཡི་ཆ་ནི་ལྷག་པ་སྟེ། །ཚད་ལ་སོགས་པ་ཐམས་ཅད་དུ་ནི་བྱ། །དེ་ནས་མཆོད་རྟེན་ལ་སོགས་པ་བསྒྲུབ་པའི་ཆེད་དུ་རྡོའི་ཁྱད་པར་དམ་པར་གནས་པ་རྣམས་ཡོངས་སུ་ཤེས་པར་བྱ་སྟེ། རིའི་ཤོད་དང་ཆུ་ཀླུང་གི་འགྲམ་དང༌། བཟང་པོའི་འཇུག་དོགས་དང་ལྷ་ཉེ་བར་ལོངས་སྤྱོད་པའི་ཤིང་དང༌། ཕུག་དང་ལྷའི་དབང་པོ་དང་ནོར་སྦྱིན་དང་ཕྱུགས་བདག་དང་ཚངས་པ་རྣམས་དང་ལྷན་ཅིག་འགྲོགས་པའི་སྟེང་ནས་ལྷུང་བ་དང་ཤར་དང་བྱར་དང་སྟེང་གི་ཕྱོགས་སུ་ཁ་བལྟས་པའི་རྡོ་རྣམས་ནི་བསྔགས་སོ། །ཤར་དུ་ཕྱོགས་པ་ནི་རང་འདོད་པ་སྟེར་ཞིང༌། ལུས་ངན་དུ་ཕྱོགས་པས་བུ་དང་བུ་མོ་དང་རིགས་སྐྱེད་པར་བྱེད་དོ། །དབང་ལྡན་དུ་ཕྱོགས་པས་གྲོལ་བའི་འབྲས་བུ་སྟེར་ཞིང༌། སྟེང་ནས་ཕྱོགས་པས་ཐམས་ཅད་དུ་མཁའ་ལ་སྤྱོད་པ་འགྲུབ་བོ། །མཆོད་རྟེན་གྱི་ཉེ་འཁོར་
དང༌། དུར་ཁྲོད་དང་ལམ་གྱི་བཞི་མདོ་དང༌། དམར་པོ་དང་མྱུར་དུ་བྲོས་པ་དང༌། གྲོག་མའི་ཤིང་དང་འབྱར་བ་དང༌། ཁ་དོག་མང་པོ་དང་གཞན་གྱི་ལས་བྱས་པའི་རྡོ་རྣམས་དོར་བར་བྱའོ། །འཁར་བ་དྲི་མ་མེད་པ་ལྟ་བུས་ནི་སྦྱིན་པ་པོ་ལ་འཆི་བ་སྟེར་བར་བྱེད་པ་སྟེ། དེ་ནི་གསོད་པར་འགྱུར་རོ། །དཀར་པོ་དང༌། སེར་པོ་དང༌། དམར་པོའི་ཁ་དོག་རྣམས་ལས། སྐྱོན་བྱེད་པ་ནི་རི་མོ་ནག་པོ་དང་མཉམ་པར་ལྡན་པ་ཡིན་པས། གང་གིས་སྙིང་པོར་མཚན་མ་མཐོང་བ་ན་སྤང་བར་བྱ་སྟེ་སྐྱོན་མང་བའི་ཕྱིར་རོ། །བྱིས་པ་དང་ལང་ཚོ་དང༌། བར་མ་དང་རྒན་པོ་སྟེ། རྣམ་པ་བཞི་ནི་རྡོ་རྗེའི་རིགས་རྣམས་སོ། །བྱིས་པ་ནི་ཤིན་ཏུ་འཇམ་ཞིང༌། བཟོད་བསྣུན་པ་དང་ལྷན་ཅིག་ཕ་གུ་ལྟ་བུར་འགྱུར་བའོ། །རྒན་པོ་ནི་རྩུབ་ཅིང་ཁ་དོག་ངན་པ་དབྱངས་དང་བྲལ་བ་སྦལ་པ་ལྟ་བུ་སྟེ་དམན་པའོ། །བར་མ་ནི་ཕྲ་བའི་ཡོན་ཏན་དང་ལྡན་ཞིང་དྲི་ཞིམ་པ་དང༌། སྒྲ་ཟབ་པ་དང་བསིལ་བ་དང་མཁྲེགས་པའོ། །བརྟན་པ་དང་མཉེན་པ་དང་ཤིན་ཏུ་སྣུམ་པ་ནི་ལང་ཚོ་སྟེ་འདོད་པ་སྟེར་བས་མཆོག་གོ །དཀར་པོ་དང་སེར་པོ་དང་ལྗང་གུ་དང་དམར་པོ་དང་སྔོ་བསངས་ཀྱི་ཁ་དོག་དང་འོད་དང་ལྡན་པ་ཡང་ལང་ཚོ་ཅན་ནོ། །རིགས་ལ་སོགས་པའི་དབྱེ་བས་ཕྱེ་བ་ཤེས་པར་བྱས་ནས། སྔགས་ལ་སོགས་པས་ཀྱང་བསྔགས་བར་བྱའོ། །རྡོ་བ་བཟང་པོ་ནག་པོ་ཡིན་ཡང་གལ་ཏེ་རི་མོ་དཀར་པོ་ཕྲ་མོ་དང་ཐིག་ལེ་རྣམས་དང་ཡང་དག་པར་ལྡན་ན་བློ་དང་གཉེན་དང་ལྡན་པར་འགྱུར་རོ་ཞེས་པ་ནགས་ཚལ་གྱི་ཆོ་གའོ།། །།གཎྜཱི་རྣམ་པ་བཞི་ནི་སྐུའི་མཚན་ཉིད་ཀྱི་རབ་ཏུ་དབྱེ་བས་ཤེས་པར་བྱའོ། །ཐམས་ཅད་དུ་བླ་ན་མེད་པའི་དག་པས་ཉི་ཤུ་ལྷག་པའི་ཆ་བརྒྱ་ནི་སྲིད་དུ་སྟེ་འཇིག་ཚོགས་ལ་ལྟ་བའི་རིའི་རྩེ་མོ་ཉི་ཤུ་རྣམ་པར་བརྙིལ་བའི་དོན་དུའོ། །རྒྱར་ནི་བཞི་ལྷག་པའི་ཆ་ཉི་ཤུར་ཡང་དག་པར་བལྟའོ། །བདེན་པའི་རྣམ་པ་བཅུ་དྲུག་གིས་དེ་ནི་ཆ་བཅུ་དྲུག་པར་བཤད་དོ། །དབུས་ཀྱི་ཆ་ལྔའི་གཅིག་ནི་ཁ་ཟླུམ་པོའི་ཆ་སྟེ། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་རྣམ་པར་གྲོལ་བའི་ཡེ་ཤེས་གཟིགས་པའི་ཕུང་པོའོ། །འདི་དག་ནི་འཇིག་ཚོགས་རྣམ་པར་དག་པ་སྟེ་དེས་ན་འདིར་ཆ་ཤས་ལྔ་པའི་ཆར་བཀོད་པའོ། །རིང་བར་སོར་བརྒྱ་དང་བཅུ་པ་ནི་རབ་ཏུ་སྦྱོར་བའི་
རྣམ་པར་ཤེས་པའི་རྣམ་པར་དག་པའོ། །དེའི་རྒྱར་ནི་ཉི་ཤུ་རྩ་གཉིས་ཏེ་སེམས་བསྐྱེད་པ་ཉི་ཤུ་རྩ་གཉིས་ཀྱི་རྣམ་པར་དག་པའོ། །ཟུར་བཅུ་གཉིས་དང་མཉམ་པར་ལྡན་པ་ནི་རྟེན་ཅིང་འབྲེལ་བར་འབྱུང་བའི་ཆོས་ཉིད་ཀྱི་རྣམ་པའོ། །ཉོན་མོངས་པ་དགུ་བཅུ་རྩ་བརྒྱད་རབ་ཏུ་ཉམས་པའི་ལམ་བསྒོམས་པའི་རྣམ་པས་དེའི་ཚད་ནི་དེ་སྙེང་དུ་རིང་བའོ། །སྟོང་པ་ཉིད་ཀྱི་རྣམ་པ་ཉི་ཤུ་ནི་ཁོར་ཡུག་ཏུའོ། །རྣམ་པར་ཐར་པ་བརྒྱད་རྣམ་པར་དག་པས་ཟུར་བརྒྱད་ཀྱིས་བརྒྱན་པའི་གཎྜཱིའོ། །སོར་མོ་བཞི་དང་མཉམ་ལྡན་པའི། །སོར་མོ་བརྒྱད་ཅུ་སྲིད་དུ་བསྟན། །སྲིད་ནི་ཆོས་ཀྱི་ཕུང་པོའོ། །མ་འདྲེས་ཆོས་ཀྱི་རྣམ་པ་ཡིས། །ཡོངས་སུ་བསྐོར་བ་བཅོ་བརྒྱད་དེ། །ལག་པའི་འདབ་མས་དེ་ཚད་ཤེས། །འདི་རྣམས་ཀྱི་ནི་ཚད་བཤད་པ། །རྒྱ་དང་དཔངས་ཀྱི་རིམ་པའོ། །དེ་ཉིད་བཅུ་དྲུག་རྣམ་པ་ཡིས། །དེ་ཚད་ཟླུམ་པོ་གཞན་ནི་དབུས། །བདེན་པ་བཅུ་གཉིས་ཁྱད་པར་ལས། །ཟླུམ་པའི་བདག་ཉིད་གཎྜཱིའོ། །ནོར་བུའི་རྩ་བར་འོད་ཟེར་གནས། །ཁམས་གསུམ་སེམས་ཅན་དབྱངས་རྣམ་པ། །བརྩམ་པར་བྱ་ཞེས་ཚིགས་བཅད་གཉིས། །ཡོངས་སུ་དག་པའི་དྲིལ་བུ་ཟུང༌། །རྩེ་མོར་སོར་བཞི་སོར་གསུམ་དང༌། །སོར་མོ་ཕྱེད་དང་གསུམ་དང་གཉིས། །སྦལ་པའི་གདོང་དང་འདྲ་བ་ནི། །སངས་རྒྱས་ཡེ་
ཤེས་རྣམ་པ་མཆོག །གསུམ་གཅིག་ལྔ་དང་བདུན་གྱི་ནས། །དམན་པ་ཚད་རྣམས་ཀུན ་ལ་བཟང༌། །འདིར་ནི་ཚད་རྣམས་བཤད་ལས་གད། །ཡིད་ལ་འཐད་པ་དེ་རྣམས་བྱ། །སྣ་ཚོགས་ཚོན་རྣམས་ཀྱིས་ནི་ལེགས་པར་བྱུགས། །གང་ཡང་ཚད་ལྡན་ཚོན་གྱི་ཕྲེང་བ་འབར། །དམར་པོའི་ཚོན་གྱིས་འབར་ཞིང་ས་བཟང་སྐྱེས། །བརྡུངས་ན་དབྱངས་བཟང་བ་ནི་གཎྜཱིའོ། །རྣམ་པ་མང་པོའི་ཡོན་ཏན་ཚོགས་དང་ལྡན། །ཁྲུས་སོགས་ཆོ་ག་རིག་པའི་སྔགས་པ་ཡིས། །དབང་ལྡན་ཟུར་གྱི་ཆ་ལ་གསེར་དང་ནི། །རིན་ཆེན་ལ་སོགས་ཁྲི་ལ་ཆུ་སྐྱེས་གནས། །ཐེའུ་དང་ལེགས་པར་མཉམ་པར་ལྡན་པ་ཡི། །གཎྜཱི་དང་པོར་རབ་ཏུ་གནས་པ་སྟེ། །དྷཱིཿཡིག་གི་ས་བོན་ལས་སྐྱེས་པའི་གཎྜཱི་ཆེན་པོ་ཤེས་རབ་དང་ཡེ་ཤེས་ཀྱི་བདག་ཉིད་ལ་ཨོཾ་དྷཱིཿཤྲུ་ཏི་སྨྲྀ་ཏི་ཞེས་པ་ལ་སོགས་པ་རྩ་བའི་སྔགས་ལན་བརྒྱ་རྩ་
བརྒྱད་དང་རྒྱུད་ལས་སྐྱེས་པ་རྣམ་པར་དག་པ་ཡེ་དྷརྨཱའི་ཚིགས་སུ་བཅད་པ་ལན་གསུམ་བཟླས་པར་བྱའོ། །ཆུང་བ་ཆ་གསུམ་ཕྲ་ཞིང་ན་ཀུ་ལ། །འདྲ་བའི་རྣམ་པ་ཟླུམ་པོའི་རྣམ་པ་ཅན། །སྡུག་ཅིང་སྲ་བའི་ཤིང་ལས་ངེས་བྱས་པ། །གང་ཡང་དམར་པོ་ཡི་ནི་ཚོན་གྱིས་བྱུགས། །མཆོག་གི་དང་པོའི་ས་བོན་ལས་བྱུང་བའི། །ཐེའུ་རྡོ་རྗེའི་རང་བཞིན་རྣམ་པར་དག །རིང་བར་ཆ་ནི་བཅུ་གཉིས་པ་ཡིན་ཏེ། །ཡོངས་སུ་ཟླུམ་ལ་སོར་མོ་དྲུག་པའོ། །བཅུ་གཉིས་ཆ་ནི་གསུང་རབ་ཡན་ལག་སྟེ། །དྲུག་ཀྱང་ཕ་རོལ་ཕྱིན་པ་དག་པ་ཉིད། །ཆོས་ཀྱི་ཡན་ལག་འཁོར་ལོ་བསྐོར་བ་ན། །ལུགས་འབྱུང་ལུགས་ལས་བཟློག་པའི་རྣམ་པ་ལས། །སྤྲོ་དང་སྡུད་པའི་རྣམ་པས་ལན་གསུམ་དུ། །ཡན་ལག་དྲུག་གི་སྦྱོར་བ་ལྟ་བུར་བརྡུང༌། །སྐུ་གསུམ་ལ་ནི་རྣམ་པར་ཐིམ་པ་དང༌། །དཀོན་མཆོག་གསུམ་ལ་ཕྱག་འཚལ་ཚུལ་གྱིས་སོ། །གཙུག་ལག་ཁང་དུ་ཆོ་ག་དྲན་པ་ཡིས། །རྟག་ཏུ་ཉིན་བཞིན་ལན་གསུམ་བཞི་འམ་ལྔར། །ཞི་བསྒོམ་དམིགས་པས་གཎྜཱི་རྡུང་བྱེད་ན། །གནས་དེར་ཡོན་ཏན་ཚོགས་ཀྱིས་ཕུན་ཚོགས་པའི། །དགེ་སྦྱོང་རྣམས་ནི་བརྟན་པར་ངེས་གནས་འགྱུར། །གང་ཡང་སྒྲ་ནི་ཐོས་པར་གྱུར་པ་དེར། །ནོར་དང་སྐྱེ་བོ་ཕུན་ཚོགས་རྒྱུན་ལྡན་འགྱུར། །བྱིན་གྱིས་བརླབ་པའི་སྔགས་ནི་ཨོཾ་དྷཱིཿཤྲུ་ཏི་སྨྲྀ་ཏི་མ་ཏི་ག་ཏི་བི་ཛ་ཡེ་པྲ་ཛྙ་པྲ་ཛྙཱ་བ་ལ་དྷཱིཿདྷཱ་ར་ཎི་སྭཱ་ཧཱ། ཞེས་པ་གཎྜཱིའི་མཚན་ཉིད་ཀྱི་ཆོ་གའོ།། །།ཨོཾ་སུཀྵྨེ་སུཀྵྨེ་ཤཱནྟེ་ཤཱནྟེ་དཱནྟེ་དཱནྟེ་ཨ་པ་མ་རོ་པེ་ནི་ར་ལམྦྷེ། ནི་རཱ་ཀུ་ལེ། ནི་རྦ་ཎེ། ཡ་ཤོ་བ་ཏི། མ་ཧཱ་ཏེ་ཛ་སརྦ་བུདྡྷ་ཨ་དྷིཥྵ་ན་ཨ་དྷི་ཥྠི་ཏེ་སྭཱ་ཧཱ། ཞེས་པ་ནི་རྣམ་པར་སྣང་མཛད་ཀྱི་གཟུངས་ཏེ་སྔགས་འདིས་མཆོད་རྟེན་ལ་སོགས་པ་རྣམས་ལ་སྲོག་ཤིང་གཟུགས་པར་བྱའོ། །ཁང་བཟངས་རྣམས་ཀྱི་བརྒྱད་དང་བཅུའི་ཆ་ཤས་ཀྱི་ཞེང་ནི་སྒོའི་དབུས་ཀྱི་ཆ་སྟེ་དེའི་ཚད་ཀྱིས་ཡལ་འདབ་དང༌། དེའི་ཉིས་འགྱུར་ནི་སྒོའི་དཔངས་སུ་བསྟན་ཅིང་སྒོ་ཁྱུད་དང་དཔུང་པ་དང་རེ་བཞི་རྣམས་ནི་དེའི་ཆ་ལྔ་པར་བཤད་དོ། །ལེགས་པར་འབྱོར་ཞིང་མཚམས་རྣམས་འབྲེལ་བ། རིན་པོ་ཆེ་དང་ཆུ་སྐྱེས་རྣམ་པར་ཕྱེ་བའི་གཟུགས་ཡང་དག་པར་གནས་པའོ། །དྲི་མ་དང་བྲལ་བའི་བསམ་གཏན་ལ་གནས་པས་ཧཱུཾ་ཡིག་ལ་
ཡང་དག་པར་བསྐྱེད་པ་ནི་སྒྲོ་ཆེན་པོ་སྟེ་དད་པའི་དབང་པོ་ལ་སོགས་པ་དང༌། དག་པའི་བསམ་གཏན་ནི་མཛེས་པའི་རྟ་བབས་དང་ལྡན་པའོ། །སྔགས་པས་སྔ་མ་བཞིན་དུ་སྒོ་རྣམས་ལ་སོ་སོར་ལན་བརྒྱ་དང་རྩ་བརྒྱད་ཀྱིས་ཡང་དག་པར་བཟླས་པ་སྟེ། ཤར་ལ་སོགས་པའི་ཕྱོགས་སུ་ཡང་དག་པར་གནས་པ་རྣམས་གཤིན་རྗེ་གཤེད་ཀྱི་སྔགས་དང༌། ལྷོའི་ཕྱོགས་སུ་ཡང་དག་པར་གནས་པ་ནི་དཔའ་བོའི་རྒྱལ་པོ་ཤེས་རབ་མཐར་བྱེད་ཀྱི་སྔགས་དང༌། ནུབ་ཀྱི་ཕྱོགས་ཀྱི་ཆར་གནས་པ་ནི་པདྨ་མཐར་བྱེད་ཀྱི་སྙིང་པོའི་སྔགས་དང༌། བྱང་གི་ཕྱོགས་ཀྱི་ཆར་གནས་པ་ནི་དཔའ་པོའི་རྒྱལ་པོ་བགེགས་མཐར་བྱེད་ཀྱི་སྔགས་ཀྱིས་སོ། །ལེགས་པར་རྣམ་པར་ཕྱེ་བའི་ཚད་དུ་བསླང་བའི་སྒོ་རྣམས་ཆོག་བཞིན་དུ་ལེགས་པར་མཆོད་པར་བྱའོ་ཞེས་པ་སྒོ་གླེགས་བསླང་བའི་ཆོ་གའོ།། །།རིན་ཆེན་དང་བཅས་རྡོ་རྗེའི་སྟེང་དུ་གནས། །ཟླུམ་དང་སྲིད་ཀྱི་ཚད་རྣམས་ཡང་དག་ལྡན། །གྲུ་བཞི་ལ་སོགས་ཡོན་ཏན་མང་ལྡན་ཞིང༌། །སྙིང་པོ་བརྟན་ཅིང་མི་འཁྱོག་ལེགས་གནས་པའི། །ཀ་བ་ཐམས་ཅད་རྩེ་མཉམ་སེང་གེ་ལ། །སོགས་པའི་ཏིང་འཛིན་སྟེགས་བུར་ཡང་དག་གནས། །སྟོང་ཉིད་རྣམ་པར་ཐར་པ་རྣམ་དག་པས། ཧཱུཾ་གི་ཡི་གེ་ལས་སྐྱེས་རྡོ་རྗེ་སྟེ། །ཕྱོགས་དང་ཕྱོགས་བྲལ་རྣམས་སུ་ལེགས་པར་གཟུགས། །རང་རང་ཕྱོགས་ཀྱི་ཁྲོ་རྒྱལ་སྙིང་པོའི་སྔགས། །ལན་ནི་བརྒྱ་དང་རྩ་བརྒྱད་རྣམས་སུ་ཡང༌། །སོ་སོར་རིམ་པས་ཡང་དག་བཟླས་པར་བྱ། །ཞེས་པ་ནི་ཀ་བ་གཟུགས་པའི་ཆོ་གའོ།། །།གཙུག་ལག་ཁང་སོགས་པ་ཡི་སྟེང་གནས་པར། །མྱུར་ལྡན་པས་ནི་ཤིང་རྣམས་མངོན་པར་གཟུང༌། །འདབ་མ་མ་རྙིང་པ་ཡི་དུས་དག་ཏུ། །སྐར་མ་མགོ་ལ་སོགས་པ་བསྔགས་པ་ཡིན། །གསེར་དང་དངུལ་རྣམས་དག་གིས་པདྨར་ནི། །རིག་བྱེད་མ་ཡི་གཟུགས་ནི་མཉམ་པར་ལྡན། །ན་མོ་རཏྣ་ཏྲ་ཡཱ་ཡ། ན་མོ་བུདྡྷ་བོ་དྷི་སཏྭེ་བྷྱཿན་མོ་ཉྵྚ་མ་ཧཱ་ཨཱཪྻ་པུངྒ་ལཱ་ཡ། ན་མཿསཔྟ་བྷྱོ་པུངྒྷཀོ་ཊི་བྷྱཿཏ་དྱ་ཐཱ། ཨོཾ་ཧྲཱིཿཧྲཱིཿཧྲཱིཿསརྦ་ནཱ་ག་ནཱཾ། ཨ་ནནྟ་ཀུ་ལཱ་ནཱཾ། བ་སུ་ཀི་ཀུ་ལཱ་ནཱཾ། ཏཀྵ་ཀ་ཀུ་ལཱ་ནཱཾ། ཤངྑ་ཀ་ཀུ་ལཱ་ནཱཾ། ཤངྑ་པཱ་ལ་ཀུ་ལཱ་ནཱཾ། ཀརྐོ་ཊ་ཀུ་ལཱ་ནཱཾ། པདྨ་ཀུ་ལཱ་ནཱཾ། མ་ཧཱ་པདྨ་ཀུ་ལཱ་ནཱཾ། བ་ལ་ཧཱ་ཀུ་ལཱ་ནཱཾ།
པུཎྜ་རཱི་ཀ་ཀུ་ལཱ་ནཱཾ། གྷ་ན་ཀུ་ལཱ་ནཱཾ། མེ་གྷ་ཀུ་ལཱ་ནཱཾ། ཛ་ལ་དྷ་རཱ་ཀུ་ལཱ་ནཱཾ། ཛི་མཱུ་ཏ་ཀུ་ལཱ་ནཱཾ། སཾ་བརྟ་ཀུ་ལཱ་ནཱཾ། ཨེ་ར་བ་ཀུ་ལཱ་ནཱཾ། ཀུ་མུ་ད་ཀུ་ལཱ་ནཱཾ། ཀཧྨ་ཧ་ར་ཀུ་ལཱ་ནཱཾ། སཽ་གནྡྷི་ཀ་ཀུ་ལཱ་ནཱཾ། ཧ་ན་ཧ་ནེ་ཤ་རེ་ཎ། བནྡྷ་བནྡྷ་ཙཱ་པེ་ན། ཧཱ་ཊ་ཡ་ཏཱ་ཊ་ཡ། ཨུ་པ་ལེ་ན། བྷི་ཏཱ་ནཱཾ། ཨ་པ་ཡཾ་དེ་ཧི་པྲ་ལཱ་ཡ། ཀཱ་ལ་ཨི་བ་ཛ་ལ་དྷ་རཾ་ཨ་བེ་ཏ་ར་ཡ་བཪྵ་ན་ནཱ་གཱ་ན་བ་ཤི་ཀུ་རུ་ཀུ་རུ་ཕཿཀཱ་རཱ་པ་ཡ་ཀཱ་རཱ་པ་ཡ་ཕུཿཕུཿ་ཨོཾ་ཀུ་རུ་ཀུལླེ་ཧཱུཾ་ཕཊ་སྭཱ་ཧཱ། ཤིན་ཏུ་བརྟན་པའི་བྱ་འདབ་རྒྱན་དང་བཅས། །བླ་རེ་མང་པོའི་ཚོགས་ཀྱིས་དཀྱིལ་འཁོར་བཀྲམ། །སྟེགས་བུའི་ཚད་ཀྱི་ཉིས་འགྱུར་རབ་འཕྱང་བ། །ཚད་དང་ལྡན་པ་བྱ་འདབ་ཆེན་པོའོ། །ལན་ནི་བརྒྱ་དང་རྩ་བརྒྱད་རྣམས་སུ་ཡང༌། །དཔལ་ལྡན་གཙུག་ཏོར་འཁོར་ལོས་སྒྱུར་བའི་སྔགས། །ཡང་དག་བཟླས་ཤིང་མཆོད་བྱ་གཏོར་མ་དང༌། །སྦྱིན་སྲེག་ཆོ་ག་རྒྱ་ཆེན་ལྡན་པས་བྱ། བུམ་པའི་ཆུ་ཡིས་མངོན་པར་དབང་བསྐུར་ཞིང༌། །གདུགས་དང་གོས་དང་འདབ་མས་བརྒྱན་པར་བྱ། །ཞེས་པའི་སྔགས་ནི། ན་མཿས་མནྟ་བུདྡྷེ་བྷྱཿཨོཾ་པྲ་ཧྱཾ་གི་ར་ཨུཥྞཱི་ཥ་ཙ་ཀྲ་བརྟི་སརྦ་ཡནྟྲ་བནྡྷ། ཨིནྡྲ་བྷུ་བ་ནཾ་བནྡྷ། མ་ཧཱ་བྷུ་བ་ནཾ་བནྡྷ། མ་ཧཱ་བྲྀཥྚི་བནྡྷ། བྲྀཀྵ་དེ་བ་ཏཱཾ་བནྡྷ། རཱ་ཡ་ཨི་ཧཱ་བཱ་སི་ནཱཾ་ཡེ་ན་ཀེ་ན་ཙི་ཏ་ཀྲྀ་ཏ་བྷ་ཡ་ཨཱ་དྷི་ཀཾ། ཚིནྡྷ་ཚིནྡྷ། བིནྡྷ་བིནྡྷྱ། ཙི་རི་ཙི་རི། གི་རི་གི་རི། མི་རི་མི་རི་ཧཱུཾ་ཧཱུཾ་ཕཊ་ཕཊ་སྭཱ་ཧཱ། གཙུག་ལག་ཁང་ལ་སོགས་པའི་སྟེང་དུ་ཤིང་དགོད་པའི་ཆོ་གའོ།། །།ད་ནི་སྐུ་གཟུགས་ལ་སོགས་པའི། །ལྷ་རྣམས་བཞུགས་པའི་ཆེད་དུ་ཡང༌། །ཁང་ཆུང་དང་ནི་ཆེན་པོ་ཡི། །རྩིག་པའི་ཁང་པ་བྱ་བར་འདོད། །འདེགས་པའི་ས་ཡི་ཚད་ཀྱིས་ནི། །ཆུང་དུ་ལ་སོགས་དབྱེ་བ་ལས། །མདའ་བཞི་ལ་སོགས་ནས་ཞི་མདའ། །སུམ་ཅུ་རྩ་དྲུག་པར་དུ་བྱ། །ལེགས་པའི་ཚད་ལྡན་སྐྱེས་བུ་ཡི། །སོར་མོ་ལ་སོགས་ལྷན་ཅིག་ཏུ། །ཁྲུ་གཅིག་བྱས་པ་ཁྲུ་ཤིང་སྟེ། །མདའ་ཤིང་ཞེས་པའང་བརྗོད་པར་བྱ། །བཅུ་གཉིས་ཁྲུ་ཡི་མཐར་ཐུག་པ། །དེ་ནི་ཆུང་ངུར་གྲགས་པ་སྟེ། །ཁྲུ་ནི་ཉི་ཤུ་རྩ་བཞི་ཡི། །མཐར་ཐུག་པ་ནི་བར་མ་ཡིན། །སུམ་ཅུ་རྩ་དྲུག་ཁྲུ་ཡི་མཐའ། །དེ་ནི་མཆོག་ཏུ་གྲགས་པའོ། །འདི་རྣམས་དབྱེ་བ་ཡིས་ནི་འདིར། །འདེགས་པའི་ས་ཡི་ཆ་འཕེལ་བས། །ཚོགས་པར་གྱུར་པ་འབའ་ཞིག་དེར། །ཁྲུ་ཤིང་བཅུ་དྲུག་པ་ཡང་
བྱ། །སྙིང་པོར་ཁང་མིག་བཞི་པ་དང༌། །ཕྱི་རོལ་རེའུ་མིག་རྩིག་པ་རྣམས། །མང་པོ་རྐང་པའི་ཆ་ཡིས་ནི། །རྩིག་པ་རྣམས་ནི་འཕེལ་བར་འདོད། །གང་ལ་སྟེང་དུ་ཁུར་ཆེན། །ལྷག་པ་ཡང་ནི་བྱ་བ་སྟེ། །འདེགས་པའི་འཁོར་ས་མེད་པ་དང༌། །ཁང་མིག་མེད་པ་མཛེས་མ་ཡིན། །ཡོད་པ་དེར་ནི་ཆ་ལྔ་པའི། །དགའ་བའི་སྐ་རགས་རྐེད་པར་བྱ། །ལྷ་རྣམས་འགལ་བ་མེད་པར་ནི། །འོད་དང་ལྷན་ཅིག་མཐོང་བ་དང༌། །ཀུན་ལ་རབ་ཏུ་གྲགས་བྱའི་ཕྱིར། །དེ་དོན་སྒོ་ནི་རིང་བ་ཉིད། །ལྷ་རྣམས་གང་དུ་མི་འགལ་བར། །བཞེངས་པ་ཉིད་ཀྱང་ཡང་དག་འདོད། །སྒོ་ཡི་ཕྱེད་ཀྱི་ཤིང་ཚད་གྱུར། །ཉེ་བར་གནས་ཀྱི་ལྷག་པ་མིན། །འགལ་བ་མེད་པར་ལྷ་ཡི་ཕྱིར། །རིང་བའི་སྒོ་ནི་བཤད་པ་ཡིན། །ཤིན་ཏུ་ཆུང་རྣམས་མི་འགལ་བས། །མཆོད་བྱ་རྣམས་ཀྱང་བསྟན་པ་སྟེ། །ཆ་ཡིས་རྣམ་པར་རྒྱས་པ་ཡང༌། །རབ་མཛེས་དོན་དུ་ཀུན་ལ་གྲགས། །འགྲོ་བ་ཡི་ནི་ཁང་ཆུང་བཞི། །སྙིང་པོའི་ཁང་བའི་སྲིད་དུ་བྱ། །འདེགས་པའི་རྒྱ་དང་མཉམ་པའི་དཔངས། །འདེགས་པའི་དཔངས་ཀྱི་ཚད་ཡིན་ནོ། །རྣམ་རྒྱས་གར་ནི་ཡང་དག་བསྡུས། །མཛེས་པའི་མཛེས་སུ་མཐུན་པ་བྱ། །སྒོ་ལ་སོགས་པའི་རྣམ་འཇུག་པ། །སྔོན་སོགས་སློབ་དཔོན་རྣམས་ཀྱིས་གསུངས། །བཞི་དྲུག་བརྒྱད་རྣམས་ཆ་ཤས་ཀྱིས། །ཆུང་དུ་ལ་སོགས་གྲགས་རྣམས་ལ། །ཤིན་ཏུ་ཆུང་དང་རྣམ་རྒྱས་པའི། །རྩིག་པར་གསུངས་ཏེ་རྣམ་གཞན་མིན། །ཤིན་ཏུ་ཆུང་དང་རབ་ཆེས་པ། །དེ་དག་མཛེས་པར་འགྱུར་བ་མིན། །བཞི་པའི་ཆ་ཤས་ཉིད་ཀྱིས་ཆ། །སྒོ་རྣམས་ཀུན་ཏུ་མི་འདོད་དེ། །གྲགས་པ་བཞིན་དུ་འདབ་བརྒྱད་དང༌། །དེ་བཞིན་ཉིད་དུ་སྒོ་རྣམས་འདོད། །ཁྲུ་དོ་གསུངས་པའི་གཅིག་གི་ཆས། །མཉམ་པ་ཆ་གསུམ་གྲགས་པ་ལ། །བཅུ་ལ་སོགས་པའི་སྒོ་བྱ་འདིར། །ཅུང་ཟད་ལྷག་པ་ལྷག་པའོ། །དྲུག་གི་ཆ་ཤས་ཉིད་ཀྱིས་ནི། །བར་མར་ལྡན་པའི་སྒོ་སོགས་ཀྱིས། །སྒོ་ནི་ཉི་ཤུ་རྩ་གཉིས་ལས། །ཉུང་མིན་ཇི་ལྟར་མཛེས་པར་བྱ། །སོ་སོར་དེ་རྣམས་ལ་ནི་སླར། །སྒོ་དང་འགྲམ་ལོགས་ལ་སོགས་བྱ། །ཀུན་དུ་མཆོག་ཏུ་གྲགས་པ་ནི། །བརྒྱད་ཀྱི་ཆ་ཤས་
རྣམས་ཀྱིས་འཇུག །རིམ་པར་སྒོ་ལ་སོགས་པ་རྣམས། །ཤེས་ལྡན་ཉིད་ལ་ངེས་པར་བསྟན། །འཕེལ་དང་ཉུང་བའང་མཛེས་བྱ་སྟེ། །ཉུང་པ་མ་ཡིན་ལྷག་པ་མིན། །འཁོར་ས་མེད་པའི་འདེགས་བྱེད་ནི། །ཁང་ཆུང་རྣམས་ལས་ཉིས་འགྱུར་འདོད། །ཉིས་འགྱུར་སླར་ཡང་དེ་ཡི་ནི། །དྲུག་དང་བདུན་ལ་སོགས་པ་ཡང༌། །གྲུ་བཞི་པ་ཡི་ཁང་ཆུང་བསྔགས། །ཀ་བ་མཉམ་པའི་ས་ལ་སྟེ། །མན་ངག་གིས་ནི་ཁང་ཆུང་ཡང༌། །གང་ཞིག་གཅིག་པ་སླར་ཡང་འདོད། །འདེགས་པ་དེ་ཡི་སྙིང་པོ་ཉིད། །ཅུང་ཟད་སྟོང་པར་ལྷ་གནས་གཅིག །འཁོར་སར་ཁང་ཆུང་གཅིག་པ་གང༌། །དེ་ཡང་དེ་བཞིན་སླར་ཡང་ངོ༌། །རྩིག་པར་བཅས་པའི་འཁོར་ས་འདིར། །ཁང་ཆུང་བགྲོད་པའི་སྐབས་དང་ལྡན། །ཁང་པའི་ངོས་གཉིས་དག་ཏུ་ཡང༌། །ཁང་ཆུང་ནང་ནི་རྫོགས་པ་ཅན། །ཕྱོགས་བཞིར་ཁང་ཆུང་རྣམས་ཀྱིས་ཀྱང༌། །དེ་ནི་རྣམ་པར་མཛེས་པའོ། །གང་ཞིག་འདེགས་པ་གཅིག་བཅས་པའི། །སྙིང་པོ་དེར་ནི་ལྷ་གནས་བཞི། །ཤིན་ཏུ་ཆེན་པོར་གྲགས་པ་ནི། །ཁང་ཆུང་གཉིས་གཉིས་ལྡན་པར་བྱ། །ནང་གི་འཁོར་ས་དང་བཅས་པའི། །སོ་སོར་སྒོ་ནི་ཕྱོགས་ཕྱོགས་སུ། །དེ་བར་ཁང་ཆུང་དང་འདེགས་པས། །མཉམ་པར་འཁོར་བས་ཤིན་ཏུ་མཛེས། །འཁོར་ས་ལམ་གྱི་རྩིག་པ་རྣམས། །ལྷན་ཅིག་བར་མ་དག་ཏུ་བྱ། །འདིར་ནི་དེ་ཉིད་སྙིང་པོའི་སྟེང༌། །དྲི་ཡི་གཙང་ཁང་བརྟན་པ་ཆེ། །ཁང་པ་བརྩེགས་མའམ་དེ་ལས་གཞན། །ཐམས་ཅད་ཤིན་ཏུ་བརྟན་པར་བྱ། །འཁོར་ས་དང་བཅས་འདེགས་པ་དང༌། །ཁང་ཆུང་ངོས་སུ་རྩིག་པ་སྟེ། །འདེགས་པའི་རྩིག་པ་མཉམ་པར་བྱ། །ལས་དང་གནས་ལ་འཇུག་པས་སོ། །འཁོར་ས་རྣམས་དང་ཁང་ཆུང་རྣམས། །མཐོ་དམན་རྗེས་སུ་མཐུན་པ་དག །འདིར་ནི་ཇི་ལྟར་རིགས་པར་བྱ། །ལས་རྣམས་ཤེས་པའི་བཟོ་བོས་སོ། །བརྟན་པའི་དོན་དུ་འདེགས་པ་དང༌། །རྨང་ལ་སོགས་པའི་ལས་ལ་ཡང༌། །རྩིག་པའི་ཆ་ཡི་རྐང་པ་ཡི། །ཕྱེད་ཀྱིས་ཀྱང་ནི་འཕེལ་བའང་འདོད། །འདེགས་པའི་དཔངས་ནི་རྣམ་གཟུང་བ། །འདེགས་པའི་རྒྱ་ཡི་ཚད་ཡིན་ཏེ། །ཆ་གཉིས་སླར་ཡང་སྟེང་དུ་ནི། །ཆུང་བར་བཟོ་བོ་ཡང་དག་
འདོད། །རྡོ་བའི་ལས་ནི་གནས་དོན་དུ། །གཉིས་ཀྱི་ཆ་ཡིས་གཞན་དག་སླར། །དེ་ནི་མཐོང་བར་འདོད་པ་སྟེ། །འགའ་ཞིག་དེ་ཡི་སྟེང་དུ་འང་འཆད། །དྲི་གཙང་ཁང་དེའི་སྟེང་དུ་ཡང༌། །བརྒྱད་ཀྱི་ཆ་འམ་བདུན་དོན་འདོད། །ཇི་ལྟའི་ཆ་ཡི་ཁང་བརྩེགས་ནི། །སྔར་བཤད་པ་ཡང་བསྟན་པའོ། །དེ་ལྷའི་རིམ་པ་བདག་གིས་བྱས། །མཛེས་པ་རྣམ་དཔྱོད་ཇི་ལྟའི་རིམ། །འདེགས་པའི་སྟེང་དུ་གྲི་གཙང་ཁང༌། །ལྷ་ཡི་ཁྱད་པར་གྱིས་དེ་བརྗོད། །སྟེང་དུ་བདུན་གྱི་ཆ་ཤས་རྣམས། །རྣམ་བརྒྱད་ཆ་སྟེ་སླར་ཡང་གང༌། །བཅོ་བརྒྱད་སྟེང་གི་རྒྱ་ཡིན་ཏེ། །དེ་ཡང་བཞི་བཞིའི་ཆ་ཤས་ཅན། །ཕྱི་རོལ་རྣམས་སུ་ཆ་ཤས་བཞི། །རེ་རེའང་བདུན་པ་བརྒྱད་པ་སྟེ། །དེ་དག་ཆ་ཤས་རབ་བསྐོར་བ། །ངོས་གཉིས་རི་མོ་མཛེས་དོན་དུའོ། །བཞི་ཡི་ཆ་ཤས་ངོས་གཉིས་དང༌། །རབ་མཐོ་གང་གི་དབུས་སུ་གནས། །དེ་རྣམས་ཆ་བཅུས་ཕུང་པོར་འདོད། །བཱ་རེནྡྲ་ཡི་བཟོ་བོའི་ལུགས། །དྲི་གཙང་ཁང་སོགས་སྤྲུལ་པ་ལ། །ངོས་གཉིས་དེར་ཡང་བཟོ་བོ་ཡིས། །ཆ་ཤས་དགུ་པའི་རྒྱར་ལྡན་པའི། །དྲི་གཙང་ཁང་ཡང་ངེས་པར་འཇུག །སྔར་གསུངས་རྗེས་སུ་རིམ་པ་ལའང༌། །གཉིས་གཉིས་ཆ་ནི་རབ་འཇུག་སྟེ། །དབུས་སུ་གནས་པའི་ལྔ་ཡི་ཆ། །འདི་ནི་ཕུང་པོར་རབ་ཏུ་གྲགས། །གཞན་ཡང་ཆ་ལྔའི་ཆ་ཤས་རྣམས། །དེར་བྱ་དཔངས་སུ་གཉིས་སླར་ཡང༌། །གསུམ་གྱི་ཆ་འདིར་ཕུང་པོ་དང༌། །དཔུང་པར་བཟོ་བོ་རྣམས་ཀྱིས་འདོད། །རབ་འཇུག་ལྔ་པར་ཐིག་ལ་ཐིག །བཟུང་ནས་གཞན་ཡང་གསུམ་པ་དང༌། །གཉིས་པར་འོག་གི་ཟུར་དག་སྟེ། །དྲི་གཙང་མར་མེའི་རྩེ་མོ་མཚུངས། །གལ་ཏེ་རྣམ་གསུམ་ཞེས་བཤད་རྣམས། །དབྱེ་བ་མེད་དེ་ལྟ་བ་ནའོ། །དབྱེ་བ་མེད་པ་གང་དུ་འབྱེད། །བློ་ལྡན་མི་འགྱུར་ཞེས་མཐོང་ངོ༌། །དྲི་ཡི་གཙང་ཁང་གསུམ་གྱི་ཆ། །སྟེང་དུ་རབ་འཇུག་ཤེས་བྱ་སྟེ། །རྩ་བར་ཡང་ནི་རབ་འཇུག་དང༌། །ནས་ཀྱི་སྙིང་པོའང་མི་འདོད་དོ། །ཟླུམ་པོའི་དྲི་གཙང་ཁང་གི་ལས། །ཡང་ན་གྲུ་བཞིའི་ལས་ཅན་ཏེ། །ཕུང་པོའི་རྗེས་མཐུན་དག་པ་ཉིད། །གང་ཞིག་ད་ནི་ཆ་རྣམས་དབྱེ། །ཆ་ཤས་བརྒྱད་ཀྱིས་ཡན་ལག་བརྒྱད། །ཇི་ལྟར་མཐོང་བའི་ལས་རྣམས་ཀྱིས། །ཆ་ཤས་བཅུ་གཉིས་པར་ཡང་འགྱུར། །དྲི་ཡི་གཙང་ཁང་ལྷག་པར་ཡང༌། །ཇི་སྙེད་སུམ་ཅུ་རྩ་དྲུག་པའི། །ཤིན་ཏུ་ཟླུམ་པོའི་གཟུགས་ཅན་བྱ། །གང་ཡང་དྲི་ཡི་གཙང་ཁང་འདི། །གྲུ་བཞི་པ་ཡང་
བལྟ་བར་བྱ། །དེ་ལྟའི་གཟུགས་རྣམས་མངོན་འདོད་པས། །དེ་སྙེད་ཆ་ཤས་རྣམས་ཀྱང་བྱ། །ལྷ་ཡི་རིགས་ལས་རྣམ་སྤྲུལ་པའི། །རིམ་པ་ཉིད་དེ་གཞན་དུ་མིན། །བར་བར་ལ་སོགས་སྣམ་བུ་རྣམས། །དྲི་གཙང་ཁང་སོགས་ལུས་ལ་ནི། །འཕེལ་བ་དང་ནི་ཐུང་བ་ཡང༌། །རྐང་པ་ཇི་ལྟར་མཛེས་པར་བྱ། །སྣམ་བུ་གཞུང་ཤིང་སོགས་པ་རྣམས། །ཉེ་བར་བསྟན་པ་ཇི་བཞིན་བྱ། །གཞན་དང་གཞན་གྱི་ལས་རྣམས་ཀྱང༌། །ཇི་ལྟ་ཇི་ལྟར་བཞིན་དུ་བྱ། །མགྲིན་པའི་དཔངས་ཆ་རྐང་པས་དམན། །གཞན་ཡང་ཆུང་སོགས་གྲགས་རྣམས་ལ། །ཡོངས་སུ་རྫོགས་པའི་ཆ་ཉིད་ཀྱིས། །སྤྱི་བོའི་དཔངས་སུ་འདོད་པའོ། །ཕུང་པོར་བྱས་པ་དེ་ནས་ལྔའི། །ཆ་འདི་རྣམས་ཀྱི་ནང་ལ་གསུམ། །དེ་ནི་མགྲིན་པའི་ཟླུམ་ལ་བྱ། །མགྲིན་པ་ཉེ་བའི་མཐར་གནས་པའོ། །འདི་འམ་ཐམས་ཅད་ཀྱི་ནི་ཚད། །མགྲིན་པའི་རྒྱལ་འདོད་པས་ཏེ། །ཕུང་པོ་ཆ་ཡིས་ཕྱེད་ཀྱི་ཆ། །སྔོན་གྱི་བཟོ་བོ་རྣམས་ཀྱི་ལུགས། །ཆེན་པོ་ཡི་ནི་ཕྱེད་ཀྱི་ཆས། །མགྲིན་པའི་དཔངས་དག་ལྷག་པ་མིན། །རྐང་པས་དམན་པའམ་གཞན་ཡང་ཕྱེད། །སྤྱི་བོ་ཡི་ན་དཔངས་ལ་འདོད། །སྤྱི་བོར་གང་ཞིག་འཆི་མེད་གནས་།སྐྱུ་རུ་ར་གནས་ལྟ་བུར་འགྱུར། །རྒྱ་དང་ཕུང་པོའི་ཚད་ཀྱིས་ནི། །ཅུང་ཟད་དེ་ནི་ལྷག་པ་ཡང༌། །སྤྱི་བོའི་གསུམ་གྱི་ཆ་ཡིས་ནི། །སྟེང་གི་སྤྱི་བོར་འདོད་པ་ཡིན། །དཔངས་འདིར་ཇི་ལྟར་མཛེས་པ་སྟེ། །མཐོ་དང་དམའ་བ་དེ་བཞིན་ནོ། །མཆོད་རྟེན་རྒྱ་ནི་གཅིག་གིས་དམན། །མཆོད་རྟེན་དཔངས་ནི་གཉིས་ཀྱི་ཆ། །ཞེས་འདིར་དཔངས་དང་རྒྱལ་འགྱུར། །མཆོད་རྟེན་སྤྱི་བོའི་སྟེང་དུའོ། །མགྲིན་མཐའ་ཇི་སྲིད་རེ་རེ་ཞིང༌། །བྱ་སྟེ་དེ་ཡི་སྟེང་དུའོ། །བརྟན་པའི་གདུགས་དང་སྣམ་བུར་བཅས། །གདུགས་ལ་དྲིལ་བུ་མེ་ལོང་ངོ༌། །ཞེས་པ་དྲིའི་གཙང་ཁང་ལ་སོགས་པའི་མཚན་ཉིད་ཀྱི་ཆོ་གའོ།། །།འདེགས་པ་ལྷན་ཅིག་འཕེལ་བ་ཡིས། །དེར་ནི་ལྔ་ཡི་ཆ་ལྡན་བྱ། །འདིར་གང་གསུམ་གྱི་ཆ་ལྡན་པ། །དེ་ཡི་དཔངས་ཅན་ཁང་བརྩེགས་སོ། །སྟེང་དུ་འཕེལ་བཅས་འདེགས་པའི་དཔངས། །དེ་བཞིན་དུ་ཡང་ཁང་བརྩེགས་འགྱུར། །ལེགས་པར་དཔངས་སུ་གནས་པ་འདིར། །མཐོང་བའང་གཞན་དང་ལྡན་པར་འགྱུར། །སྔར་བཞིན་ཕུང་པོ་རྣམ་གནས་པས། །འདིར་ཡང་བརྩེགས་མར་རྣམ་གནས་ཉིད། །གཞན་དང་གཞན་གྱི་ལས་རྣམས་ནི། །ཤེས་པ་རྣམས་ཀྱིས་མཛེས་པར་བྱ། །ཁང་བརྩེགས་ཉིད་ནི་རིང་བ་དང༌། །ཕྱོགས་འདིར་ཐུང་བའང་འདོད་པ་སྟེ། །གང་དུ་མགྲིན་སོགས་རྣམ་དབྱེ་བ། །དེས་སླར་འདིར་ཡང་སྔ་མ་བཞིན། །ཞེས་པ་ཁང་པ་བརྩེགས་མའི་ཆོ་གའོ།། །།
གསུམ་གྱི་ལྷ་རྣམས་གནས་པའི་ཕྱིར། །རྒྱ་ཕུབས་འགའ་ཡང་བལྟ་བྱ་སྟེ། །བཱ་རེནྡྲཱམ་ཌཱ་བི་ཌའི། །ཉེ་བར་བསྟན་པ་ཇི་བཞིན་བྱ། །ལྔ་ཡི་ཆའམ་དྲུག་གི་ཆ། །རྒྱ་ཕུབས་ཡང་དག་གནས་པར་འདོད། །འདེགས་པའི་ཆ་དད་མཉམ་པའི་དཔངས། །བཱ་རེནྡྲ་གནས་སྟེང་དུའོ། །རྒྱ་ཕུབས་དབུས་ཀྱི་ལུས་ལ་ནི། །ཌཱ་བི་ཌ་བ་དུམ་བུ་གཉིས། །དུམ་བུ་གཅིག་པའི་རྒྱ་ཕུབས་ནི། །བཱ་རེནྡྲ་དང་གཽ་ཌའི་ལུགས། །རྒྱབ་ཀྱི་རྩེ་མོ་ཡང་དག་བསྡུས། །ངོས་རྣམས་རྣམ་རྒྱས་མཁས་པ་ཡིས། །དབུས་སུ་གཞུང་ཤིང་སྣམ་བུ་རྣམས། །མཐོང་ན་མཛེས་པར་འགྱུར་བ་བྱ། །རྔ་ཟླུམ་མཚུངས་པ་དབུས་ཀྱི་སྟེང༌། །ངོས་གཉིས་གཞུང་ཤིང་མཐོ་བ་སྟེ། །ཌཱ་བི་ཌ་བ་གཞུང་ཕྱེད་ཀྱིས། །བུམ་པ་སེང་གེ་རབ་མཛེས་འདོད། །བཱ་རེནྡྲ་བའི་རྒྱ་ཕུབས་ཀྱི། །ལས་ནི་ཡུལ་རྣམས་ཀུན་དུ་མཐོང༌། །ཌཱ་བི་ཌ་བའི་རྒྱ་ཕུབས་ནི། །གང་དུ་ཆ་ཤས་སོགས་ལ་མཐོང༌། །སླར་ཡང་ཁང་བཟངས་ཆེན་པོ་གཞན་ཡང་སྟེ། །རི་རབ་མནད་ར་དང་ཕུན་ཚོགས་མཐར། །གནས་ཁང་བགྲོད་པའི་ཁང་བརྩེགས་བཟང་པོ་དང༌། །གླང་པོ་སེང་གེ་ངང་པ་བུ་ལྡན་མཁའ་ལྡིང་རིག་བྱེད་གནས་རྣམས་ལ་ནི་རྒྱ་ཕུབས་བཤད། །རིག་བྱེད་ཞལ་གྱི་ཉིས་འགྱུར་ཞལ་རྣམས་དང་ནི་རྒྱལ་པོའི་ཁང་པ་རྣམས་ལའང་དེ་ཉིད་དེ། །ཟླུམ་པོ་ཉིད་དང་དྲུག་དང་བཞི་ཡིས་དབྱེ་བས་རྒྱན་ལའང་ཇི་བཞིན་འཇུག་པ་ཤེས་པར་བྱ། །ཤེས་ནས་བཟང་པོ་ཤིན་ཏུ་བཟང་པོ་དགའ་བ་པདྨ་བཟང་པོ་གསུམ་དང་ལྔ་པ་དང༌། །དཔལ་བེའུ་ཕྱེད་དང་དུམ་བུ་མེད་ཅིང་བྱ་བ་ལྡན་བ་དེ་ནི་འཕེལ་ལྡན་བདག་ཉིད་དེ། ཁྱིམ་གང་རྒྱལ་པོའི་བདེ་བ་ལྡན་པ་བཤད་ཅིང་གཞན་ཡང་ཁང་པ་བརྩེགས་མ་རྣམས་ལའང་དྲན། །བུམ་པའི་སྟེང་དུ་ཟླ་བ་དྲ་གོ་རྣམས་ཀྱི་གོ་ཡུའི་ཤིང་ལས་ཕུན་ཚོགས་འཇུག་པ་ཉིད། །འདི་དག་དབྱེ་བཞིས་བརྒྱན་པ་རྣམས་དང་དེ་ལ་སོགས་པ་རྣམས་ནི་གྲོང་ཁྱེར་ཏེ། ལཱ་ཌཱ་ཀྵ་དང་དེ་ནས་པར་ཌ་ཀ་རབ་གསལ་ཞེས་བྱ་དེ་བཞིན་ཌཱ་བི་ཌ། །བསམ་པའི་དབང་གིས་ཆུང་དུའི་གནས་དང་ཆེན་པོའང་སེམས་ཅན་རྣམས་ལ་རྣམ་པར་བསྟན། །མ་བཤད་པ་རྣམས་ཐོས་ལས་རྣམ་པར་རྒྱས་པའང་ཆོ་ག་ཤེས་པ་རྣམས་ཀྱིས་དེ་བཞིན་བྱ། །གཙུག་ལག་ཁང་རྣམས་དང་ནི་རྐང་པའི་དབྱེ་བས་མིང་རྣམས་ཤེས་པར་བྱ་བ་སྟེ། །རྒྱའི་གནས་ཀྱི་སྟེང་དུ་ནི་མི་བྱའོ་ཞེས་པ་རྒྱ་ཕུབས་ལ་སོགས་པའི་མཚན་ཉིད་ཀྱི་ཆོ་གའོ།། །།བསམ་གཏན་དོན་དམ་ལྷ་རྣམས་ཀྱི། །ཁང་པ་ལ་ནི་ཐོག་གཅིག་སྟེ། །སངས་རྒྱས་གནས་པའི་དོན་དུ་ཡང༌། །སངས་རྒྱས་བཞི་ཡི་གདན་
རིམ་བཞིན། །གནས་པ་འམ་དགའ་བ་བསྟན་པ་ཡི། །རྟག་ཏུ་རྣལ་འབྱོར་རྒྱལ་པོ་ཡིས། །ཡིད་སོགས་དང་མཐུན་ཁང་པ་ཉིད། །བསམ་གཏན་ལ་སོགས་བསྒྲུབ་ཕྱིར་བྱ། །དཀྱིལ་འཁོར་ལྟ་བུ་ཆ་བཞི་པའི། །ཁང་པ་བརྩེགས་པ་ཡང་བྱ་སྟེ། །ཁང་བརྩེགས་ལ་ནི་ཁང་ཆུང་འགྱུར། །དེ་ནི་རྟ་བབས་དང་བཅས་བྱ། །ཇི་སྙེང་པ་ལ་ཀ་བའི་ཆ། །སླར་ཡང་རྣམ་པར་གནས་གྱུར་པ། །དེ་སྙེད་འདུན་ཁང་སྟེང་གི་དཔངས། །ཉུང་བ་མིན་པ་གཞན་ཡང་འདོད། །ཁང་པ་བརྩེགས་མ་ལ་སོགས་ཆ། །དེ་རྣམས་སྔར་བཞིན་རབ་ཏུ་གྲགས། །སླར་ཡང་བརྗོད་པར་འགྱུར་བ་རྣམས། །འདིར་ནི་དེ་རྣམས་བྱ་བ་སྟེ། །དེ་དག་སྟེང་དུ་མགྲིན་པ་དང༌། །དྲི་མེད་སྙིང་པོ་མཛེས་པ་སྟེ། ཁང་བརྩེགས་ལ་འདོད་མཆོད་རྟེན་དང༌། །འདུན་ཁང་ལ་ཡང་སླར་དེ་ཉིད། །གཙུག་ལག་ཁང་དང་ཚོགས་ཁང་ངམ། །དེ་བཞིན་ཁང་པ་གཞན་ལ་ཡང༌། །དྲ་གོ་རྣམས་ནི་མི་འགལ་བར། །བྱ་སྟེ་དེ་ལས་གཞན་དུ་མིན། །གཟུགས་རྣམས་ཇི་ལྟ་བ་ཡི་གནས། །མཆོག་གི་ལས་ཀྱི་གྲོགས་པོ་ཡིས། །བྱ་སྟེ་སླར་ཡང་ཁང་པ་ཉིད། །ཅེས་འདི་བྱ་བའི་རིམ་པའོ། །ཁང་པ་བཞི་དང་བསམ་གཏན་གྱི་ཁང་པ་ལ་སོགས་པའི་མཚན་ཉིད་ཀྱི་ཆོ་གའོ།། །།ད་ནི་རྡོ་རྗེ་སློབ་དཔོན་རྣམས་ཀྱིས་ཡོངས་སུ་འདས་པ་ཐ་མ་དགའ་བར་བྱེད་པའི་ཆོ་ག་བརྗོད་པར་བྱ་སྟེ། གཞན་དོན་ལ་དགྱེས་ཤི་བ་འཚོ་མཛད་མ། །སྤྱན་མར་གྲགས་པའི་ལྷ་མོ་ཕྱག་འཚལ་ཏེ། །ཤི་བ་ཡང་དག་འཚོ་བྱེད་སྦྱོར་བ་ཡི། །ཤི་བ་བདེ་འགྲོར་ངེས་སྦྱོར་བཤད་པར་བྱ། །ཤི་བའི་ཁང་པ་ཤིན་ཏུ་དབེན་པར་ནི། །ཉེར་སྤྱོད་ཀུན་དང་ལྡན་པས་རྣལ་འབྱོར་པ། །མེ་ཏོག་དཀར་པོའི་ཕྲེང་བས་གཙུག་ཏོར་བཅིངས། །ཞི་ཞིང་དཀར་པོའི་དྲི་ཡིས་རྣམ་པར་བྱུགས། །དཀར་པོའི་གོས་དང་རྒྱན་ལྡན་ཤར་དུ་ཞལ། །བལྟས་པའམ་ཡང་ན་དེ་རུ་མོས་པ་ཡིས། །རྡོ་རྗེ་དང་ནི་རྡོ་རྗེ་དྲིལ་བུ་གཟུང༌། །འཇམ་ཞིང་ཡངས་པ་མཐོ་བའི་སྟན་ལ་འདུག །ཙནྡན་དཀར་པོ་ལ་སོགས་དྲི་རྣམས་དང༌། །བདུད་རྩི་ལྔ་སྦྱར་ཆུ་ཡིས་མདུན་དུ་ནི། །མཎྜལ་ཉེ་བར་བྱུགས་ཏེ་དཀར་པོ་ཡི། །མེ་ཏོག་རྣམས་ཀྱིས་ཉེ་བར་མཛེས་པ་བྱ། །ཨརྒྷ་ལ་སོགས་རང་གི་སྔགས་རྣམས་ན། །སྭཱ་ཧཱའི་མཐའ་ཅན་ལེགས་བཟླས་བསྐུལ་ཚིག་དང༌། །སྙིང་གའི་ཟླ་བར་རང་གི་ས་བོན་རྣམས། །བལྟས་ནས་གནས་ལ་སོགས་པ་བསྲུང་བར་བྱ། །དེ་ལ་གནས་བདག་རྣལ་འབྱོར་བསྲུང་བའི་སྔགས། །ཨོཾ་ཨཱཿབིགྷྣཱཾ་ཏ་ཀྲྀཏ་ཧཱུཾ། ཞེས་པའོ། །ཡང་ན། ན་མཿས་མནྟ་སོགས་སོ། །ཆོ་ག་བཞིན་དུ་བསྒྲུབ་ཤེས་
རྣལ་འབྱོར་བས། །སྤྱན་མའི་རྣལ་འབྱོར་རབ་ཏུ་རྣམ་བསྒྲུབས་ནས། །སྙིང་གའི་ས་བོན་རྩེ་ལས་ལེགས་གྲུབ་འདོད། །འཁོར་ལོས་མཚན་བའི་ལྕགས་ཀྱུ་སྤྲོ་བར་བྱ། །དེ་ཡིས་འཇིག་རྟེན་ཕ་རོལ་སོང་བའི་སེམས། །ཤིན་ཏུ་དམར་ཞིང་གསལ་བ་དགུག་བྱ་སྟེ། །ཆོས་ཀྱི་སྒོ་ཡི་གཟུགས་སམ་ཡང་ན་ནི། །རླུང་མེད་མི་གཡོའི་མར་མེ་ལྟ་བུ་ཡིས། །ཤི་བདེ་ཡི་ཤེས་པ་འོངས་ནས་ནི། །སྤྱི་བོ་ནས་ནི་སྙིང་གར་གཞུག་པར་བྱ། །དེ་རྗེས་དེ་ནི་ཤེས་པར་ལྡན་པ་ཡིས། །ཡང་དག་ལངས་ནས་འདུག་བར་བལྟ་བར་བྱ། །དེ་ཡི་སྙིང་གར་མོ་ཧ་ར་ཏི་ཞེས། །བཀོད་ནས་དེ་ཡི་འོད་ཟེར་ཕྲེང་འབར་བས། །དེ་ཡི་ལུས་ནི་སྟོང་པར་བྱས་ནས་སུ། །ལྷག་མ་རྣམ་པར་རིག་བྱེད་ཙམ་དུ་བལྟ། །དེ་ཡི་རྗེས་སུ་མོ་ཧ་ར་ཏི་ཞེས། །རབ་བརྗོད་དེ་ནི་སྤྱན་མའི་གཟུགས་སུ་བསམ། །དེ་ཡི་མིག་དང་ལུས་ལ་སོགས་པ་རྣམས། །ཐམས་ཅད་དུ་ནི་བྱིན་གྱིས་བརླབ་པར་བྱ། །སྙིང་པོ་ཡེ་ཤེས་ལྷ་ཡི་ཐུགས་ཀ་ཡི། །ཟླ་བ་ལ་གནས་རྩ་སྔགས་འོད་ཟེར་དང༌། །ལྷ་མོའི་སྤྲིན་གྱི་བདུད་རྩིའི་འོད་ཅན་གྱི། །རོ་ལྡན་བུམ་བ་རྣམས་ཀྱིས་དབང་བསྐུར་བྱ། །རང་གི་ལུས་ལས་ངེས་པར་སྤྲོས་ནས་ནི། །ནམ་མཁའི་དཀྱིལ་འཁོར་ཁྱབ་པར་འཕྲོས་པ་ཡི། །འོད་ཟེར་གོང་བུར་གྱུར་བའི་ཚོགས་རྣམས་ཀྱིས། །དེ་རྗེས་སྤྱན་མའི་སྤྲིན་གྱིས་དབང་བསྐུར་བྱ། །དེ་ཡི་སྔགས་བཟླས་ཆུ་ཡིས་གང་བ་ཡི། །བུམ་པ་ཡིས་ཀྱང་དེ་བཞིན་དབང་བསྐུར་བྱ། །མགོ་བོ་ལ་ནི་ཅོད་པན་སྦྱིན་བྱ་སྟེ། །ལག་པ་དག་ལ་རྡོ་རྗེ་དྲིལ་བུ་ཡང༌། །རྡོ་རྗེའི་སྔགས་པས་ཀུ་ཤའི་རྩེ་མོ་ལ། །རྡོ་རྗེ་རྩེ་གཅིག་རྣོན་བོ་རྣམ་བསྒོམས་ནས། །དེ་ནི་མེ་དང་མཚུངས་པར་བསམ་པར་བྱ། །དེ་རྗེས་མཉམ་གཞག་སེམས་ཀྱིས་དེ་ཡི་ནི། །སྙིང་གར་བཀོད་པའི་ཤེས་པ་རྣམ་འཕྲོ་བ། །ཡང་དག་བསྐུལ་ནས་འབར་བར་གྱུར་པ་རྣམས། །རྡོ་རྗེའི་རྩེ་ནས་རླུང་གིས་བསྐྱོད་པར་བྱ། །མེ་ཡི་འོད་ཟེར་རྣམས་ཀྱིས་རེག་པ་ཡིས། །དེ་ནི་དངུལ་ཆུ་བཞིན་དུ་འབར་བར་བསམ། །སྟེང་གི་ལམ་ནས་རྣམ་པར་དགྲོལ་བའམ། །ཡང་ན་རྣམ་དག་སངས་རྒྱས་ཞིང་དུའོ། །གལ་ཏེ་ཤེས་པ་ལམ་གཞན་ནས་ཐོན་ན། །འཁོར་བའི་རྒྱ་མཚོ་རུ་ནི་ལྟུང་བར་འགྱུར། །དེ་ཡི་ཕྱིར་ན་སྟེང་གི་ལམ་ནས་སུ། །དེ་ནི་ངེས་པར་འཕོ་བ་བྱ་བ་ཡིན། །སྤྱི་བོ་ནས་ནི་གཟུགས་མེད་འགྲོ་བ་སྟེ། །མཛོད་སྤུ་ནས་ནི་གཟུགས་ཀྱི་ཁམས་སུ་གྲགས། །མིག་དག་ལས་ནི་མི་ཡི་འགྲོ་བ་ཉིད། །རྣ་བ་དག་ནས་གྲུབ་པའི་ལྷ་རུ་འགྲོ། །སྣ་བུག་དག་ནས་གནོད་སྦྱིན་ཉིད་དུ་སྟེ། །ཁ་ནས་དྲི་ཟ་ཉིད་དུ་ངེས་པར་འགྲོ། །ལྟེ་བ་ནས་ནི་འདོད་པའི་ལྟ་རུ་སྟེ།།
ཁུ་བའི་ལམ་ནས་ཡི་དག་ས་འགྲོ་བར་རོ། །ཆུ་ཡི་ལམ་ནས་དུད་འགྲོའི་སྐྱེ་གནས་ཏེ། །བཤང་བའི་ལམ་ནས་དམྱལ་བའི་འགྲོ་བ་རུ། །ངེས་བར་འགྲོ་བར་ཤེས་བྱ་དེ་ཡི་ཕྱིར། །ལམ་དེ་དག་ནི་རྣམ་པར་སྤང་བར་བྱ། །དེ་ནས་ཐར་པའི་གྲོང་ཁྱེར་དུ་གཞུག་བའི་ཕྱིར་མདུན་དུ་ཞི་བའི་སྦྱིན་སྲེག་གསུངས་པ་ལས་ཡོངས་སུ་རྫོགས་པའི་ཆོ་ག་འམ་རྫས་གཅིག་པའི་སྦྱིན་སྲེག་གི་ཕྱོགས་གསུངས་པའི་ཕྱིར་སྦྱིན་སྲེག་བྱའོ། །དེ་ལ་ཇི་སྲིད་དེའི་རུས་པ་མ་འོངས་པ་དེ་སྲིད་དུ་དེའི་གོས་ལ་དེའི་མིང་སྨོས་པ་སྔོན་དུ་འགྲོ་བས་བྱ་ཞིང༌། འོངས་ནས་ནི་དེའི་རུས་པ་དང་གོས་ལ་ཡང་བྱ་སྟེ་ཉིན་ཞག་བརྒྱད་ཇི་སྲིད་པར་རོ། །ཡང་ན་ལྷོ་ཡི་ཕྱོགས་ཀྱི་ཆ་ལ་ནི། །ཁྲུ་གང་ཙམ་གྱི་སྟེགས་བུ་གྲུ་བཞི་བྱ། །བ་ཡི་ལྕི་བ་སར་མ་ལྷུང་བས་བྱུག །བ་ཡི་རྣམ་ལྔ་མཉམ་བས་མངོན་པར་གཏོར། །དེར་ཡང་དཀྱིལ་འཁོར་མ་ལ་ཡ་ཡི་ནི། །ཙནྡན་དཀར་པོས་བྱུགས་ཤིང་མེ་ཏོག་གིས། །མཛེས་བྱས་དེ་སྟེང་བུ་མ་པ་རྣམ་པར་དགོད། །མཚན་ཉིད་དང་ལྡན་སྨན་དང་ཡལ་གང་དང༌། །ནོར་བུ་དྲི་བཟངས་འབྲུ་ལྔ་རྣམས་དང་ལྡན། །གདུགས་དང་བ་དན་རྣམས་ཀྱིས་ཉེ་བར་མཛེས། །མགྲིན་པར་སྔོན་པོའི་གོས་ཀྱིས་རྣམ་པར་དཀྲིས། །ཉེ་བར་སྤྱོད་པ་ལྔ་དང་ཡང་དག་ལྡན། །ཀུ་ཤའི་གདན་ལ་ཡང་དག་གཞག་བྱ་སྟེ། །རྒྱ་ཆེན་རིགས་བདག་རང་གི་མཚན་མས་མཚན། །ཡི་གེ་གསུམ་ལྡན་རྩ་བའི་ས་བོན་གྱིས། །དེ་ནི་ལྷག་པར་གནས་པར་བྱ་བ་ཡིན། །སྔགས་པས་ཡང་ན་ཁྲུས་ཀྱི་སྔགས་རྣམས་ནི། །ལན་གྲངས་བརྒྱ་དང་རྩ་བརྒྱད་བཟླས་པས་སོ། །དེ་ནས་མདུན་དུ་དཀར་པོའི་རྡུལ་ཚོན་གྱིས། །ལྟེ་བར་བཅས་ཤིང་མུ་ཁྱུད་འབར་བར་བཅས། །འཁོར་ལོ་རྩིབས་བརྒྱད་བྲིས་ནས་མེ་ཏོག་ནི། །དཀར་པོ་མཛེས་པས་རྣམ་པར་སྤྲས་བྱས་ནས། །དེ་ཡི་སྟེང་དུ་བུམ་པ་སྟོང་པ་ཡི། །སྟེང་དུ་བུག་པ་དང་བཅས་ཁམ་སྐྱོགས་གཞག །དེ་རྗེས་དེ་ཡི་རུས་བུ་ཁམ་སྐྱོགས་དེར། །ལྷག་མ་མེད་པར་ཡང་དག་དགོད་བར་བྱ། །ཏིང་འཛིན་གསུམ་དང་རྣམ་པར་ལྡན་པ་ཡི། །དེ་ཡི་ཕྱིར་བཟློག་ཆོ་ག་ཡང་དག་བྱ། །ཡུངས་ཀར་མེ་ཏོག་སྙོམས་བར་ལྡན་པ་རྣམས། །རིམ་པ་བཞིན་དུ་གསང་སྔགས་རབ་བརྗོད་པས། །དེ་ཡི་རུས་པའམ་ཡང་ན་གོས་དག་གམ། །དེ་ཡི་མིང་ལ་ཡང་དག་བསྣུན་པར་བྱ། །དེ་ནས་སྔགས་ཀྱི་ཚིག་ཏུ་འགྱུར་བ་ནི། །ཨོཾ་སརྦ་པཱ་པཾ་ད་ཧ་ན་བཛྲ་ཧཱུཾ་ཕཊ། ཨོཾ་སརྦ་པཱ་པཾ་བི་ཤོ་དྷ་ན་བཛྲ་ཧཱུཾ་ཕཊ། ཨོཾ་སརྦ་ཀརྨ་ཨཱ་བ་ར་ཎ་བྷ་སྨི་ཀུ་རུ་ཧཱུཾ་ཕཊ། ཨོཾ་བྷྲཱུཾ་བི་ནཱ་ཤ་ཡ་ཨཱ་བ་ར་ཎཱ་ནི་ཛུཾ་ཧཱུཾ་ཕཊ། ཨོཾ་དྷྲཱུཾ་བི་ཤོ་དྷ་ཡ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སརྦ་ཀརྨ་
ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཛྭ་ལ་ཛྭ་ལ་དྷ་དྷ་ཀ་ཧ་ན་ཧ་ན་ཨཱ་བར་ཎཱ་ནི་ཧཱུཾ་ཕཊ། ཨོཾ་སྲུཾ་སར་ས་ར་བྲ་ས་ར་པྲ་ས་ར་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཧཱུཾ་ཧ་ར་ཧ་ར་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཧཱུཾ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་སརྦ་ཨཱ་བ་ར་ཎཱ་ནི་བི་སྤོ་ཊ་ཡ་ཧཱུཾ་ཕཊ། ཨོཾ་པྲྀ་ཏ་པྲྀ་ཏ་སརྦ་ཨཱ་བ་ར་ཎཱ་ནི་ཧཱུཾ་ཕཊ། ཨོཾ་ཏྲཱ་ཊ་ཏྲཱ་ཊ་སརྦ་ཨཱ་བ་རཎཱ་ནི་ཧཱུཾ་ཕཊ། ཨོཾ་ཚིནྡྷ་ཚིནད་སརྦ་ཨཱ་བར་ཎཱ་ནི་ཧཱུཾ་ཕཊ། ཨོཾ་ད་ཧ་ད་ཧ་སརྦ་ན་ར་ཀ་ག་ཏེ་ཧེ་ཏུ་ན་ཧཱུཾ་ཕཊ། ཨོཾ་པ་ཙ་པ་ཙ་སརྦ་ཕྲེ་ཏ་ག་ཏེ་ཧེ་ཏུན་ཧཱུཾ་ཕཊ། ཨོཾ་མ་ཐ་མ་ཐ་སརྦ་ཏི་ཪྻ་ཀ་ག་ཏི་ཧེ་ཏུན་ཧཱུཾ་ཕཊ། ཅེས་པ་ནི་རུས་པ་ལ་སོགས་པ་ལ་བསྣུན་པའི་སྔགས་སོ། །དེ་ནས་ལྷག་པར་གནས་པ་བྱས་པའི་ཆུས་དེའི་རུས་པ་ལ་སོགས་བཀྲུ་བར་བྱ་སྟེ་སྔགས་རྣམས་བརྗོད་བཞིན་པས་སོ། །སྔགས་ནི། ཨོཾ་ན་མོ་བྷ་ག་ཝ་ཏེ། སརྦ་དུ་རྒ་ཏི་པ་རི་ཤོ་དྷ་ནི་རཱ་ཛཱ་ཡ། ཏ་ཐཱ་ག་ཏཱ་ཡ་ཨརྷ་ཏེ་སམྱྐྶཾ་བུདྡྷཱ་ཡ། ཏདྱ་ཐཱ། ཨོཾ་ཤོ་དྷ་ནེ་ཤོདྷ་ནེ། སརྦ་བཱ་པཾ་བི་ཤོདྷ་ནེ་ཤུདྡྷེ་ནེ་ཤུདྡྷེ་བི་ཤུདྡྷེ་སརྦ་ཀརྨ་ཨཱ་བ་ར་ཎ་བི་ཤོ་དྷ་ནེ་སྭཱ་ཧཱ། ཞེས་པ་ནི་རུས་པ་ལ་སོགས་པ་བཀུར་བའི་སྦགས་སོ། །དེ་ནས་མེ་ཏོག་གཏོར་ཞིང་སྔགས་བཟླས་པས་ལམ་ཡང་དག་པར་བསྟན་པར་བྱ་སྟེ། སྔགས་ནི། ཨོཾ་རཏྣེ་རཏྣེ་རཏྣ་སམྦྷ་ཝེ། རཏྣ་ཀི་ར་ཎེ་རཏྣ་མཱ་ལ་བི་ཤུདྡྷ། ཤོདྷ་ཡ་སརྦ་པཱ་པཾ་ཧཱུཾ་ཕཊ། འགྲོ་བ་བསྟན་པའི་སྔགས་སོ། །དེ་ནས་མེ་ཏོག་དེ་རྣམས་ཆུ་ལ་གཏོར་ཞིང་ལམ་རྣམ་པར་སྦྱང་བར་བྱ་སྟེ་སྔགས་ནི། ཨོཾ་པདྨེ་པདྨེ་པདྨ་ཨུདྦྷ་ཝེ་སུ་ཁ་བ་ཏིཾ་གཙྪ་ནྟུ་སྭཱ་ཧཱ། ཞེས་པ་ནི་ལམ་སྦྱང་བའི་སྔགས་སོ། །སྔགས་ཚིག་དེ་དང་དེ་རྣམས་ལ། །བསྐུལ་བའི་ཚིག་རྣམས་སྤེལ་བར་བྱ། །ལམ་སྦྱང་བ་ཡི་སྔགས་རྣམས་ཀྱིས། །མེ་ཏོག་ཆར་བ་རབ་ཏུ་དབབ། །བཀྲ་ཤིས་ཚིགས་བཅད་འདོན་པ་ལ། །མཉམ་གཞག་དོན་དུ་གཞུག་པར་བྱ། །ཐུན་གསུམ་ཡང་ན་ཐུན་གཅིག་ལ། ཉི་མ་སོ་སོར་དེ་བཞིན་བྱ། །ཆོ་ག་ཇི་ལྟར་བཤད་དེ་ལྟར། །ཡང་དག་མཆོད་ཅིང་ཐམས་ཅད་བསྡུ། །དེ་ལ་བཀྲ་ཤིས་ཀྱི་ཚིགས་སུ་བ་ཅད་པ་ནི། བཀྲ་ཤིས་གང་ཞིག་སེམས་ཅན་ཀུན་ལ་ཕན་པར་དགྱེས། །སངས་རྒྱས་སྐྱོན་བྲལ་རྣམ་པར་དག་པའི་བློ་ལྡན་པ། །ཤེས་རབ་ཡན་ལག་འདུས་པས་མཛེས་པ་བདེ་བའི་བདག །དེས་ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་ལྷ་དང་ལྷ་མིན་མིས་མཆོད་པ། །ཆོས་ནི་དེ་ཡི་བསྟན་པ་བླ་ན་མེད་པ་ཉིད། །འཇིག་རྟེན་གསུམ་དུ་རབ་ཏུ་གསལ་ཞིང་བདག་མེད་པ། །དེས་ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །བཀྲ་ཤིས་གང་ཞིག་རབ་མཆོག་ཆོས་རྣམས་
རྟག་ཏུ་འཛིན། །དམ་པའི་སར་ཞུགས་རྒྱལ་བའི་སྲས་པོའི་ཚོགས་ཀྱི་མཆོག །སེམས་ཅན་རྣམས་ལ་ཕན་པར་མཁས་ཤིང་ཤིན་ཏུ་མཛེས། །དེས་ནི་ཁྱེད་རྣམས་དབང་བསྐུར་མཆོག་ལ་བཀྲ་ཤིས་ཤོག །ཅེས་བའི་བཀྲ་ཤིས་ཀྱི་ཚིགས་སུ་བཅད་པ་དེ་རྣམས་ཀྱང་རུས་པ་འཁྲུད་པའི་དུས་སུ་འདོན་ནམ་འདོན་དུ་གཞུག་པར་བྱའོ། །དེ་ནས་གཤེགས་སུ་གསོལ་བའི་སྔགས་ནི། །ཨོཾ་ཁྱེད་ཀྱིས་སེམས་ཅན་དོན་ཀུན་མཛད། །རྗེས་སུ་མཐུན་པའི་དངོས་གྲུབ་སྩོལ། །སངས་རྒྱས་ཡུལ་དུ་གཤེགས་ནས་ཀྱང༌། །སླར་ཡང་འབྱོན་པར་མཛད་དུ་གསོལ། །མུཿཞེས་པའོ། །དེ་ནས་མཚན་མོ་ཚོགས་ཀྱི་འཁོར་ལོ་བྱས་ཏེ་ཐམས་ཅད་ཡང་དག་པར་བསྡུ་བར་བྱའོ། །འབྱོར་པ་ཡོད་ནང་ན་སོང་ཡོངས་སུ་སྤྱོང་བའི་ཆོ་ག་ཇི་ལྟ་བ་བཞིན་དུ་བཞེངས་ཏེ། ཇི་ལྟར་གསུངས་པའི་ཆོ་ག་རྣམས་བསྒྲུབ་པར་བྱའོ། །སླར་ཡང་རྡོ་རྗེ་སློབ་དཔོན་གྱིས་སྦྱིན་བདག་ལས་ཡོན་བླང་བར་བྱ་སྟེ། དེས་ཀྱང་འབྱོར་བ་དང་རྗེས་སུ་མཐུན་པར་རབ་ཏུ་དབུལ་བར་བྱ་ཞིང༌། བཀྲུས་བའི་གོས་ཀྱང་སློབ་དཔོན་ཉིད་ལ་དབུལ་བར་བྱའོ། །ཡང་གསུངས་པ། ཤི་བ་ལ་དམིགས་གང་ཡིན་རྣམས། །རང་གི་གཉེན་གྱིས་སློབ་དཔོན་དབུལ། །ད་ནི་མཐོ་རིས་ལམ་ཆས་སུ། །དེ་ལ་བྱིན་ཞེས་ཤེས་པར་བྱ། །གང་ཞིག་ཅུང་ཟད་ཞི་དོན་གྱིས། །སྦྱིན་པ་དེས་འདིར་ངེས་པར་ནི། །བདེ་བ་ཅན་གྱི་སར་འགྲོ་བ། །ཞག་བདུན་སྔ་བར་རབ་སྦྱིན་བྱེད། །དེ་ལྟར་གང་ཡིན་ཀུན་བྱས་ཏེ། །ཆོ་གས་ལུས་ཅན་སྟེང་བྱས་ན། །སྡིག་པ་ཐམས་ཅད་སྤངས་ནས་ནི། །བདེ་བ་ཅན་དུ་ངེས་པར་འགྲོ། །དེ་རྗེས་དེ་རུས་རྣམ་སྦྱང་བྱ། །ཞིབ་མོར་རྔོ་བས་བཏགས་ནས་ནི། །ཆུ་ཀླུང་ཤིན་ཏུ་རྒྱ་ཆེན་ལ། །མཆོད་པ་བྱས་ཏེ་དོར་བར་བྱ། །ཡང་ནས་འཛིན་ཆེན་པོ་ནི། །མཐོན་པོའི་རྩེ་མོའི་མཐར་འཛེགས་ནས། །ཤིན་ཏུ་ཤུགས་དྲག་རྗེས་མཐུན་པའི། །རླུང་ལ་དེ་ནི་བསྐུར་བར་བྱ། །ཤིན་ཏུ་དྲག་པོའི་ལས་ཀྱི་དབང་དུ་གྱུར་པ་ཡིས། །གལ་ཏེ་བདེ་སྟེར་བདེ་བ་ཅན་དུ་མ་སོང་ན། །འདི་ནི་ངེས་པར་དྲན་པའི་འགྲོ་བ་སྤངས་ནས་སུ། །སུམ་ཅུ་རྩ་གསུམ་པ་ཡི་གནས་སུ་འགྲོ་བར་འགྱུར། །ཞེས་པ་རྡོ་རྗེ་སློབ་དཔོན་རྣམས་ཀྱིས་འདས་པ་ཐ་མ་དགའ་བར་བྱེད་པའི་མཚན་ཉིད་ཀྱི་ཆོ་གའོ།། །།དེ་ལྟར་སློབ་དཔོན་རྣམས་ཀྱི་བྱ་བ་བསྡུས་པ་དངོས་གྲུབ་ཆེན་པོའི་རྒྱུར་ནི་རབ་ཏུ་འབད་པ་ལས། །སྣ་ཚོགས་གཞུང་ལས་འོངས་པ་ལ་སོགས་མང་བོའི་མེ་ཏོག་ཚུལ་ནི་བདུད་རྩིའི་གཟུགས་ཅན་ཏེ། །གང་ཞིག་བྱས་ལས་སྐྱེས་པའི་བསོད་ནམས་རྒྱལ་སྲས་རྣམས་ཀྱི་ཆེན་པོའི་ས་ཡི་
ཚོགས་གྱུར་བ། །དེ་ཡིས་འཇིག་རྟེན་གསུམ་གྱི་འཇིག་རྟེན་རྒྱལ་མཆོག་ཀུན་དགའ་དང་ལྡན་ཁང་བཟངས་རབ་འཇུག་ཤོག །ཅེས་པ་སློབ་དཔོན་གྱི་བྱ་བ་ཀུན་ལས་བཏུས་བ་རྣམ་པར་གྲགས་པའི་དཀྱིལ་འཁོར་གྱི་སློབ་དཔོན་ཆན་པོ་པཎྜི་ཏ་ཨ་བདྷཱུ་ཏཱི་པ་དཔལ་ལྡན་འགྲོ་བའི་མེ་ལོང་གིས་མཛད་པ་རྫོགས་སོ།། །།རྡོ་རྗེ་སློབ་དཔོན་རྣམས་ལ་ཉེ་བར་མཁོ་བའི་ཚོག་མཐའ་ཡས་པ་ཕྱོགས་གཅིག་ཏུ་བསྡུས་པའི་བསྟན་བཅོས་ཆེན་པོ་འདི་ཉིད་ནི། དཔལ་ལྡན་བླ་མ་དམ་པ་དྷརྨ་ཀཱིརྟི་ཤྲཱི་བྷ་དྲའི་ཐུགས་དགོངས་རྣམ་བར་དག་པའི་སྒོ་ནས། བཀའ་ལུང་སྙན་པས་བསྐུལ་ཞིང་མཐུན་རྐྱེན་ཕུན་སུམ་ཚོགས་པ་བསྒྲུབས་པ་ལ་བརྟེན་ནས། བི་ཀྲ་མ་ཤཱི་ལའི་པཎྜི་ཏ་ཆེན་པོ་མཉྫུ་ཤྲཱི་དང༌། བོད་ཀྱི་ལོ་ཙཱ་བ་བློ་གྲོས་རྒྱལ་མཚན་དཔལ་བཟང་པོས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།བསྟན་པ་རིན་པོ་ཆེ་དང་འགྲོ་བ་མང་པོ་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིག །དཔལ་དྷརྨ་ཀཱི་རྟིའི་ག་སུང་གི་བདུད་རྩིས་བསྐུལ་བར་གྱུར་པ་ལས། འཇིག་རྟེན་ཕན་པར་ངེས་པར་དགའ་བའི་པཎྜི་ཏ་དང་མ་ཏི་ཡིས། །ཆོ་ག་ཀུན་ལས་བཏུས་བའི་རིན་ཆེན་ཕུང་པོ་རྣམ་པར་གསལ་བྱས་བའི། །དགེ་བས་འཇིག་རྟེན་རྣམས་ནི་བདེ་བ་ཆེན་པོ་ཉིད་དང་ལྡན་གྱུར་ཅིག །ཕུན་སུམ་ཚོགས་པ་ཀུན་ནས་འབར་ཞིང་གྲགས་པ་གསལ་བར་ལྡན་པས་འདི་ནི་རྟག་ཏུ་གནས་གྱུར་ཅིག །ནད་དང་མུ་གེ་ལས་གྲོལ་དགྲ་མི་ལྷག་མ་མེད་པའི་ས་སྐྱོང་ཡུན་རིང་ཕྱོགས་རྣམས་སྲུང་གྱུར་ཅིག །ཚུལ་ཁྲིམས་སོགས་ལྡན་ཡོན་གནས་རྣམས་ནི་གསུང་རབ་མཛོད་རྣམས་ཀུན་ནས་འཕེལ་བ་ཉིད་གྱུར་ཅིག །ཉི་མ་ཟླ་བ་ཇི་བཞིན་ཉིད་དང་མཚན་དུ་དཔལ་ལྡན་དྷརྨ་ཀཱིརྟི་དགེ་ཞིང་ཤིས་གྱུར་ཅིག །ཅེས་པ་དག་ཀྱང་པཎྜི་ཏས་མཛད་པའི་སྨོན་ལམ་བསྒྱུར་བ་སྟེ་ཇི་ལྟ་བ་བཞིན་དུ་འགྲུབ་པར་གྱུར་ཅིག །སླར་ཡང་དཔལ་ལྡན་བྱང་ཆུབ་རྩེ་མོའི་ཞབས་རྡུལ་སྤྱི་བོས་ལེན་ཞིང་གསུང་གི་བདུད་རྩི་འཐུངས་པ་དགེ་སློང་བཛྲ་ཤྲཱིས་ཀྱང་ཅུང་ཟད་བཅོས་ཤིང་དག་པར་བགྱིས་སོ། །དེ་ཡིས་མཚོན་པ་དགེ་ཚོགས་བདུད་རྩིའི་འོད་ལྡན་པ། །དཔག་ཡས་ཕན་པ་དེའི་འོད་དཀར་བརྒྱད་ལྡན་པས། །ལུས་ཅན་སྙིང་ལ་གནས་པའི་མུན་བསལ་ཞིང༌། །ཐུབ་བསྟན་ཀུ་མུད་བཞད་པའི་གཉེན་གྱུར་ཅིག།། །།