རྡོ་རྗེ་རྣལ་འབྱོར་མའི་སྒྲུབ་ཐབས།
རྒྱ་གར་སྐད་དུ། བཛྲ་ཡོ་གི་ནཱི་སཱ་དྷ་ནཾ། བོད་སྐད་དུ། རྡོ་རྗེ་རྣལ་འབྱོར་མའི་སྒྲུབ་ཐབས། རྡོ་རྗེ་རྣལ་འབྱོར་མ་ལ་ཕྱག་འཚལ་ལོ། །ཨོཾ་ཨཱཿ་ཧཱུཾ། དང་པོར་རེ་ཞིག་སྔགས་པ་འགའ་ཞིག་གིས་ས་ཕྱོགས་གང་ཡང་རུང་བར་སྟན་ཅི་ཡང་རུང་བ་ལ་ཉེ་བར་གནས་ལ་རྡོ་རྗེ་རྣལ་འབྱོར་མ་བསྒོམ་པ་བརྩམ་པར་བྱ་བའོ། །དེ་ལ་རང་གི་ལྟེ་བར་ཁ་བྱེ་བའི་པདྨ་ཁ་དོག་དཀར་པོ་བསྒོམ་པར་བྱ་བའོ། །དེའི་སྟེང་དུ་རྩིའི་ཁ་དོག་ལྟ་བུའི་ཆོས་འབྱུང་དབུས་ན་ཡི་གེ་ཧྲཱིཾ་གནས་པར་བསྒོམ་པར་བྱ་བའོ། །དེ་ལ་ཡང་སྟེང་དུ་རྡེ་བཙུན་རྡོ་རྗེ་རྣལ་འབྱོར་མའོ། །དེ་ལ་གནས་པའི་ཡི་གེ་ཧྲཱིཾ་ཡོངས་སུ་གྱུར་པ་ལས་སྐུ་མདོག་སེར་མོ་སྟ། རང་ཉིད་ཁོ་ན་རང་གི་གྲི་གུག་དང༌། ཕྱག་གཡོན་པ་གྲི་གུག་བསྣམས་པ། རང་གི་དབུའི་སྟེང་དུ་གནས་པ། ཕྱག་གཡས་བ་ནི་ཐོད་པ་དང་ལྡན་པའོ། །དཔུང་པ་གཡོན་པ་ནི་གྱེན་ལ་བརྐྱང་བའོ། །དཔུང་པ་གཡས་པ་ནི་འོག་ཏུ་སྨད་པའོ། །གོས་མེད་པ་ཞབས་གཡས་པ་རབ་ཏུ་བརྐྱང་པ། ཞབས་གཡོན་པ་ལེགས་པར་བསྐུམས་པར་བསྒོམ་པར་བྱ་བའོ། །ཨོཾ་འདུད་པ་ལ་ཀུན་ནས་བརྟེན་པའི་ཁྲག་གི་རྒྱུན་རང་ཉིད་ཀྱི་ཞལ་དུ་རབ་ཏུ་འབར་བ། གཞན་
དག་ནི་གཞོགས་གཉིས་ཀྱིས་རྣལ་འབྱོར་མ་གཉིས་ཀྱི་ཞལ་དུ་ལེགས་པར་འཇུག་པ་འདི་ལྟ་བུར་བསྒོམ་པར་བྱ་བའོ། །གཡོན་པ་དང་གཡས་པའི་ཕྱོགས་གཉིས་ན་ནི་ཁ་དོག་སྔོན་མོ་རྡོ་རྗེའི་ཁ་དོག་མ་དང༌། ཁ་དོག་སེར་མོ་རྡོ་རྗེ་རྣམ་པར་སྣང་མཛད་མ་སྟེ། གཡོན་པ་དང་གཡས་པའི་གྲི་གུག་དང་ལྡན་པའོ། །གཡས་པ་དང་གཡོན་པའི་ཕྱག་ན་ནི་ཐོད་པ་དང་ལྡན་མའོ། །ཞབས་གཡོན་པ་རབ་ཏུ་བརྐྱང་བ་དང༌། ཞབས་གཡས་པ་རབ་ཏུ་བརྐྱང་བ་དང༌། ཞབས་གཞན་དག་ནི་ལེགས་པར་བསྐུམས་པ་དང༌། སྐྲ་ལྷུག་པར་གྱུར་པར་བསྒོམ་པར་བྱ་བའོ། །ཤིན་ཏུ་འཇིགས་སུ་རུང་བས་གང་བར་གྱུར་པའི་དུར་ཁྲོད་འཇིགས་པའི་དབུས་སུ་ཟུར་གཉིས་ན་རྣལ་འབྱོར་མ་གཉིས་དང་ལྡན་པར་སྣང་ལ་བསྒོམ་པར་བྱ་བའོ། །འདི་ནི་བསྒོམ་པ་ཡིན་ནོ། །མཆོད་པ་བརྗོད་པར་བྱ་སྟེ། མཎྜལ་བྱས་ལ་ཆོས་འབྱུང་ལ་གནས་པའི་ཉི་མའི་དཀྱིལ་འཁོར་བྲི་བར་བྱ་བའོ། །དབུས་སུ་ནི་ཡི་གེ་ཧྲཱིཾཿ་དང་བཅས་པའོ། །དེ་ནས་སྔར་བཤད་པའི་བསྒོམ་པས་རྗེ་བཙུན་མ་དབུས་སུ་བཞུགས་སུ་གསོལ་བར་བྱས་ལ། ཨོཾ་སརྦ་བུདྡྷ་ཌཱ་ཀི་ནཱི་ཡེ་ཞེས་བྱ་བ་ལ་སོགས་པའི་སྔགས་ཀྱིས་ཆོས་འབྱུང་གི་དབུས་སུ་མཆོད་པར་བྱ་བའོ། །ཕྱི་ནས་ནི་མཆོད་ཡོན་ཏེ། ཨོཾ་སརྦ་བུདྡྷ་ཌཱ་ཀི་ནཱི་ཡེ་སྭཱ་ཧཱ། ཞེས་བྱ་བའི་སྔགས་ཀྱིས་སོ། །དེ་ནས་ནི་གཡོན་གྱི་ཕྱོགས་སུ། ཨོཾ་བཛྲ་ཝ་རྞ་ནཱི་ཡེ་སྭཱ་ཧཱ། ཞེས་བྱ་བའི་སྔགས་ཀྱིས་སོ། །དེ་ནས་ནི་གཡོན་གྱི་ཕྱོགས་སུ་སྟེ། ཨོཾ་བཛྲ་བཻ་རོ་རྩ་ནཱི་ཡེ་ཧཱུཾ་སྭཱ་ཧཱ་བྱ་བས་སོ། །འདིའི་ཕྱི་ནས་ནི་གཞན་ཡང༌། ཨོཾ་ཌ་ཌི་ཡཱ་ཎ་དང༌། པཱུ་རྞ་གི་རི་དང༌། ཀཱ་མཱ་ཁྱ་དང༌། ཤྲི་རི་ཧ་ཊྚ་ཞེས་བྱ་བ་འདི་དག་རྣམས་མཆོད་པར་བྱ་བའོ། །གཞན་ཡང་ཆོས་དང་ ལོངས་སྤྱོད་རྫོགས་པ ་དང༌། སྤྲུལ་པ་དང༌། བདེ་བ་ཆེན་པོ་ཞེས་བྱ་བ་འདི་དག་གོ །ཨོཾ་སརྦ་བུདྡྷ་ཌཱ་ཀི་ནཱི་ཡེ། ཨོཾ་བཛྲ་ཝ་རྞ་ནཱི་ཡེ། ཨོཾ་བཛྲ་བཻ་རོ་ཙ་ནཱི་ཡེ་ཧཱུཾ་ཧཱུཾ་ཧཱུཾ་ཕཊ་ཕཊ་ཕཊ་སྭཱ་ཧཱ། ཞེས་བྱ་བ་འདི་ནི་བཟླས་པའི་སྔགས་སོ། །རྡོ་རྗེ་རྣལ་འབྱོར་མའི་སྒྲུབ་ཐབས་རྫོགས་སོ།། །།དཱ་དང་ཨ་བྷ་ཡའི་ཞལ་སྔ་ནས་དགེ་སློང་ཚུལ་ཁྲིམས་རྒྱལ་མཚན་གྱིས་བསྒྱུར་བའོ། །