བླ་མ་བརྒྱུད་པའི་རིམ་པའི་མན་ངག་ཅེས་བྱ་བ།
རྒྱ་གར་སྐད་དུ། གུ་རུ་པ་རཾ་པ་ར་ཀྲ་མོ་པ་དེ་ཤ་ནཱ་མ། བོད་སྐད་དུ། བླ་མ་བརྒྱུད་པའི་རིམ་པའི་མན་ངག་ཅེས་བྱ་བ། བླ་མ་དམ་པ་རྣམས་ལ་ཕྱག་འཚལ་ལོ། །དངོས་ཀུན་རང་བཞིན་ཟུང་འཇུག་པའི། །འོད་གསལ་སྟོང་པའི་བདག་ཉིད་ཀྱི། །ལྷུན་གྲུབ་དེ་ལ་ཕྱག་འཚལ་ཏེ། །དེ་ནས་ཅུང་ཟད་བྲི་བར་བྱ། །ཤིན་ཏུ་བསྡུས་པར་འདོད་རྣམས་དང༌། །བློ་དམན་སྐྱེ་བོས་རྟོགས་བྱའི་ཕྱིར། །དེ་ཉིད་ཐམས་ཅད་མདོར་བསྡུས་ནས། །ཅུང་ཟད་ཙམ་ཞིག་བྲི་བར་བྱ། །རེ་ཞིག་གད་ཟག་ནི་གཉིས་ཏེ། སྤྲེའུ་ལྟ་བུ་དང་ཁྭ་ལྟ་བུའོ། །སྤྲེའུ་ལྟ་བུ་ནི་རིམ་གྱིས་འཇུག་པའོ། །ཁྭ་ལྟ་བུ་ནི་ཅིག་ཅར་འཇུག་པའོ། །རིམ་གྱིས་འཇུག་པའི་དབང་དུ་བྱས་ན་ཐེག་པ་ནི་གསུམ་སྟེ། ཉན་ཐོས་ཀྱི་ཐེག་པ་དང༌། རང་སངས་རྒྱས་ཀྱི་ཐེག་པ་དང༌། ཐེག་པ་ཆེན་པོའོ། །ཐེག་པ་གསུམ་ནི་གནས་པ་བཞི་ལ་གནས་ཏེ། གནས་པ་བཞི་ནི་བྱེ་བྲག་ཏུ་སྨྲ་བར་གནས་པ་དང༌། མདོ་སྡེ་པར་གནས་པ་དང༌། རྣལ་འབྱོར་སྤྱོད་པར་གནས་པ་དང༌། དབུ་མ་པར་གནས་པའོ། །ཉན་ཐོས་དང་རང་སངས་རྒྱས་ནི་བྱེ་བྲག་ཏུ་སྨྲ་བ་ལ་གནས་སོ། །བྱེ་བྲག་ཏུ་སྨྲ་བ་ལ་ཡང་གཉིས་ཏེ། ནུབ་ཕྱོགས་བྱེ་བྲག་ཏུ་སྨྲ་བ་དང༌། ཁ་ཆེ་བྱེ་བྲག་ཏུ་སྨྲ་བའོ། །ཉན་ཐོས་ལ་གསུམ་སྟེ། དབང་པོ་ཐ་མ་དང༌། འབྲིང་དང་རབ་པོ། དེ་ལ་ཐ་མ་དང་འབྲིང་བོ་ནི་ནུབ་ཕྱོགས་ཁ་ཆེ་བྱེ་བྲག་ཏུ་སྨྲ་བ་ལ་གནས་སོ། །རབ་དང་རྐྱེན་རྟོག་ནི་ཁ་ཆེ་བྱེ་བྲག་ཏུ་སྨྲ་བ་ལ་གནས་སོ། །ཐེག་པ་ཆེན་པོ་ལ་ཡང་གཉིས་ཏེ། རྒྱུ་མཚན་ཉིད་ཀྱི་ཐེག་པ་དང༌། འབྲས་བུ་རྡོ་རྗེའི་ཐེག་པའོ། །དེ་ལ་རྒྱུ་མཚན་ཉིད་ཀྱི་ཐེག་པ་ལ་གསུམ་སྟེ། ཐ་མ་དང༌། འབྲིང་དང༌། རབ་བོ། །ཐ་མ་ནི་མདོ་སྡེ་པའོ། །འབྲིང་ནི་རྣལ་འབྱོར་སྤྱོད་པའོ། །རབ་ནི་དབུ་མ་པའོ། །རྣལ་འབྱོར་སྤྱོད་པ་ལ་གཉིས་ཏེ།
རྣམ་པ་དང་བཅས་མ་དང༌། རྣམ་པ་མེད་པའོ། །དབུ་མ་པ་ལ་ཡང་གཉིས་ཏེ། སྒྱུ་མ་ལྟ་བུ་གཉིས་སུ་མེད་པར་སྨྲ་བ་དང༌། ཆོས་ཐམས་ཅད་རབ་ཏུ་མི་གནས་པར་སྨྲ་བའོ། །དེ་ལྟར་ན་སྦྱོར་བ་དགུ་ལ་དབྱེ་བ་བཞི་བཞི་སྟེ། སོ་སོར་རྟོག་པ་དང༌། སྒོམ་པ་དང༌། སྒོམ་པའི་དྲི་མ་དང༌། ལྟ་བའོ། །དེ་ལ་དང་པོར་རེ་ཞིག་འཇིག་རྟེན་པའི་གྲུབ་པའི་མཐས་བདག་གཅིག་པུ། རྟག་པ། ཁྱབ་པ། ཚངས་པར་ཁས་ལེན་པའོ། །མ་རྟོགས་པའི་བློ་ལ་དེ་ལྟར་སྣང་ན་ཡང་ཡང་དག་པར་གྲུབ་པར་མི་འགྱུར་ཏེ། བདག་གཅིག་པུ་ཡིན་ན་གཅིག་ཤིའམ་སྐྱེས་པ་ཐམས་ཅད་ཤིའམ། སྐྱེས་པར་ཐལ་བ་དང༌། གཅིག་ཡིན་པའི་ཕྱིར་སྐད་ཅིག་མ་ཡང་རྟག་པར་ཁས་ལེན་ན་འཆི་འཕོ་དང་སྐྱེ་བ་མེད་པར་ཐལ་བར་འགྱུར་ཏེ། རྟག་པ་ཡིན་པའི་ཕྱིར་རོ། །ཁྱབ་པ་ཡིན་ན་གཅིག་བདེ་བ་དང༌། སྡུག་བསྔལ་བས་ཐམས་ཅད་བདེ་བ་དང་སྡུག་བསྔལ་གྱིས་ཁྱབ་པར་ཐལ་བར་འགྱུར་ཏེ། ཐམས་ཅད་ལ་ཁྱབ་པའི་ཕྱིར་རོ། །དེ་ལྟར་རིགས་པས་བརྟགས་ན་བདག་ཡོད་པ་མ་ཡིན་པས་དེ་དག་ལས་དྲང་བའི་དོན་དུ་ཉན་ཐོས་ཀྱི་ཐེག་པ་བསྟན་ཏོ། །དེ་ལ་རེ་ཞིག་ཉན་ཐོས་ཐ་མའི་སོ་སོར་རྟོག་པ་ནི་ཕྱིའི་དོན་དམིགས་པའི་རྐྱེན་མཚན་ཉིད་པར་ཁས་ལེན་ཞིང༌། གང་ཟག་ལ་བདག་མེད་པ་ཞེས་བྱ་བའི་ཁུར་ཁུར་བའི་གང་ཟག་རྟག་པ་ཡང་མ་ཡིན་མི་རྟག་པ་ཡང་མ་ཡིན་པའོ། །རྟག་པ་མ་ཡིན་པ་ནི་སྐད་ཅིག་མས་མི་རྟག་པའོ། །མི་རྟག་པ་མ་ཡིན་པ་ནི་རྒྱུན་གྱིས་རྟག་པའོ། །དེ་ལྟ་བུའི་གང་ཟག་རྟག་པ་དང་མི་རྟག་པ་ལས་འདས་པར་འདོད་པ་ནི་སོ་སོར་རྟོག་པའོ། །ལུས་ནི་འདོད་ཆགས་མ་སྤངས་ན་འཁོར་བར་འཁོར་བར་འགྱུར། སྤངས་ན་ནི་གྲོལ་བས་ལུས་ཀྱི་འདོད་ཆགས་སྤང་པའི་ཕྱིར་ལུས་ལ་མི་གཙང་བ་དང༌། མི་སྡུག་པ་དང༌། དུར་ཁྲོད་ལྟར་ཡན་ལག་འཐོར་པར་ལྟ་བ་ནི་བསྒོམ་པའོ། །ལུས་ལ་གཙང་བར་ལྟ་བ་དང༌། གང་ཟག་རྟག་པར་ལྟ་བ་ནི་སྒོམ་པའི་དྲི་མའོ།། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་གསུམ་ལ་སྐྱབས་སུ་འགྲོ་བ་དང༌། དགེ་བའི་རྩ་བ་ཅི་མཆིས་པ་བདག་ཉིད་ཀྱི་དོན་དུ་བསྔོ་བ་དང༌། སྙིང་རྗེ་དང་མ་བྲལ་བ་དང༌། རྒན་པ་དང༌། བདེ་བ་གཤེགས་པ་གཉིས་ལ་ཕྱག་བྱེད་པ་ནི་ལྟ་བའོ། །འབྲིང་པོའི་སོ་སོར་རྟོག་པ་དང་ལྟ་བ་ནི་སྔ་མ་བཞིན་ནོ།།
འདི་ནི་ཁྱད་པར་ཅུང་ཟད་ཅིག་ཙམ་སེམས་ཅན་གྱི་དོན་བྱེད་པའོ། །སྒོམ་པ་ནི་དབུགས་ལ་སློབ་སྟེ། ཁ་དོག་དང༌། དབྱིབས་དང༌། རེག་བྱ་ལ་སློབ་པའོ། །ཁ་དོག་ལ་སློབ་པ་ནི་དབུགས་དཀར་པོ་སྤ་ལྕག་གི་ཚད་སོར་བརྒྱད་དམ། བཅུ་གཉིས་སམ། སོར་བཅུ་དྲུག་གམ། ཉི་ཤུ་རྩ་བཞིའམ། བརྒྱད་ཅུའམ། ཇི་ཙམ་འདོད་ཀྱི་བར་དུ་བགྲངས་ལ། ཚུར་འོང་ལྟེ་བར་ཕྱིན་པར་སློབ་པོ། །དབྱིབས་ལ་སློབ་པ་ནི་ཨུཏྤ་ལ་འམ། རྡོ་རྗེ་ལྟ་བུ་ལ་བྱའོ། །རེག་བྱ་ལ་སློབ་པ་ནི་ལྟེ་བ་དང༌། སྣ་སྒོར་གྲང་བའི་རེག་བྱ་ལ་སློབ་ཅིང་བསྒོམ་པའོ། །བུམ་པ་གང་བ་ལྟར་གང་བའི་རླུང་གིས་སྲོག་དང་རྩོལ་བ་བཀག་ནས་སེམས་དྲན་པ་མེད་པར་གྱུར་པ་ནི་སྒོམ་པའི་དྲི་མའོ། །དེ་ནི་ནུབ་ཕྱོགས་བྱེ་བྲག་ཏུ་སྨྲ་བར་བསྟན་པའོ། །ཉན་ཐོས་དབང་པོ་རབ་ཀྱི་སོ་སོར་རྟོག་པ་ནི་ཕྱིའི་དོན་ཁས་ལེན་པ་སྔོན་དུ་འགྲོ་བས་ལུས་བདག་མེད་པར་ལྟ་ཞིང་འཕགས་པའི་བདེན་པ་བཞི་བསྒོམ་པས། གང་ཟག་ཀྱང་སྟོང་པ་ཉིད་དུ་འདོད་ཅིང་ཕྱི་གཟུང་བ་ནི་སྟོང་པ་ནང་འཛིན་པའི་སེམས་སུ་འདོད་པ་ནི་སོ་སོར་རྟོག་པའོ། །དེ་ལ་སྡུག་བསྔལ་བ་ནི་ཕུང་པོའི་རང་བཞིན་ཏེ་ཤེས་པར་བྱའོ། །ཀུན་འབྱུང་བ་ནི་རྣམ་པར་རྟོག་པ་སྟེ་སྤང་བར་བྱ་བའོ། །འགོག་པ་ནི་དབང་པོ་ཡུལ་ལས་ལོག་པ་སྟེ་མངོན་དུ་བྱའོ། །ཁམས་གསུམ་སྟོང་པ་ཉིད་ནི་མར་མ་བསད་པ་ལྟར་བཀག་ནས་ཅི་ཡང་མི་དམིགས་པ་ནི་སྒོམ་པའོ། །སྟོང་པ་ཉིད་དང་རྟག་པར་སྒྲོ་འདོགས་པ་ནི་བསམ་གཏང་ཡི་དྲི་མའོ། །གཞན་གྱི་དོན་བྱེད་པའི་ཁྱད་པར་ནི་ལྟ་བའོ། །འདིའི་འབྲས་བུ་ཡང་ཕུང་པོ་ལྷག་མ་དང་བཅས་པ་དང་ལྷག་མ་མེད་པའོ། །ལྷག་མ་དང་བཅས་བ་ནི་འདོད་ཆགས་སྤངས་ལ་ལུས་ཉིད་མ་སྤངས་པའོ། །ལྷག་མ་མེད་པ་ནི་འདོད་ཆགས་པ་དང་ལུས་གཉིས་ཀ་སྤངས་པའོ། །འདི་ནི་ཉན་ཐོས་ཀྱི་བྱང་ཆུབ་བོ། །རང་སངས་རྒྱས་ཀྱི་སོ་སོར་རྟོག་པ་ནི་ཉན་ཐོས་རབ་འབྲིང་བཞིན་ནོ། །ཡང་འདིའི་ཁྱད་པར་ནི་སློབ་དཔོན་མེད་པར་རང་འབྱུང་གི་ཡེ་ཤེས་ངང་བསམ་གྱིས་མི་ཁྱབ་པའོ། །དེ་ཡང༌། རྫོགས་སངས་རྒྱས་ནི་མི་འབྱུང་ཞིང༌། །ཉན་ཐོས་རྣམས་དང་འདས་པ་དང༌། །རང་སངས་རྒྱས་ཀྱི་ཡེ་ཤེས་ནི། །བརྟེན་པ་མེད་པར་འབྱུང་བར་འགྱུར། །ཞེའོ། །འདིའི་བསམ་གཏན་ནི་ཞི་གནས་དང༌། ལྷག་མཐོང་ངོ༌། །ལྷག་མཐོང་ནི་དབང་པོ་
ཡུལ་གྱི་གྲོང་ལས་བཟློག་པའོ། །ཞི་གནས་ནི་ལུས་དང༌། ངག་དང༌། ཡིད་ཡང་དག་པར་སྔོམ་པ་འདི་ནི་དེའི་སྒོམ་པའོ། །གཉིད་ཡུར་བ་ལྟ་བུར་ཕྱིའི་སྤྱོད་ཡུལ་འགགས་པ་དང༌། གཉིད་སྟུག་པོ་སེམས་དང་སེམས་ལས་བྱུང་བ་ཤིན་ཏུ་འགགས་པ་ནི་སྒོམ་པའི་དྲི་མའོ། །ལྟ་བ་ནི་སྔ་མ་བཞིན་ནོ། །འདིའི་འབྲས་བུ་ནི་ཚོགས་ན་སྤྱོད་པ་དང་བསེ་རུ་ལྟ་བུའོ། །ཡང་ཉན་ཐོས་དང་རང་སངས་རྒྱས་ཀྱི་སྙིང་རྗེ་ཡང་སེམས་ཅན་ལ་དམིགས་པའི་སྙིང་རྫེ་སྟེ། འདུ་བྱེད་ཀྱི་སྡུག་བསྔལ་དང༌། སྡུག་བསྔལ་གྱི་སྡུག་བསྔལ་དང༌། འགྱུར་པའི་སྡུག་བསྔལ་ལོ། །འདུ་བྱེད་ཀྱི་སྡུག་བསྔལ་ནི་ཚོར་བ་བཏང་སྙོམས་ཀྱི་ངོ་བོའོ། །སྡུག་བསྔལ་གྱི་སྡུག་བསྔལ་ནི་ཚོར་བ་སྡུག་བསྔལ་གྱི་ངོ་བོ་ཉིད་དོ། །འགྱུར་བའི་སྡུག་བསྔལ་ནི་ཚོར་བ་བདེ་བའི་ངོ་བོ་ཉིད་དེ། འདི་ལ་དམིགས་ཤིང་སྙིང་རྗེ་བྱེད་པ་ནི་སེམས་ཅན་ལ་དམིགས་པའི་སྙིང་རྗེའོ། །ཁ་ཆེ་བྱེ་བྲག་ཏུ་སྨྲ་བ་བསྟན་པ་དེ་སྟེ་ཐེག་པ་ཆུང་དུ་མདོར་བསྟན་པའོ། །དེ་ནས་གཞན་ཡང་ཐེག་པ་ཆེན་པོ་བསྟན་པར་བྱ་སྟེ། དེ་ལ་རྒྱུ་མཚན་ཉིད་ཀྱི་ཐེག་པའི་དབང་པོ་ཐ་མ་ནི་མདོ་སྡེ་པའོ། །དེའི་སོ་སོར་རྟོག་པ་ནི་ཕྱི་རོལ་གྱི་ཡུལ་ཆ་ཤས་དྲུག་གིས་གཞིགས་ན། རགས་སྣང་གི་ངོ་བོ་མེད་དེ། དྲུག་ཆས་གཞིགས་ན་རྡུལ་ལོ། །ཉི་ཟེར་གྱི་རྡུལ་བདུན་ཆ་ལ་གླང་རྡུལ། གླང་རྡུལ་བདུན་ཆ་ལ་ལུག་གི་རྡུལ། ལུག་རྡུལ་བདུན་ཆ་ལ་རི་བོང་གི་རྡུལ། རི་བོང་གི་རྡུལ་བདུན་ཆ་ལ་ཆུ་རྡུལ། ཆུ་རྡུལ་བདུན་ཆ་ལ་ལྕགས་རྡུལ། ལྕགས་རྡུལ་བདུན་ཆ་ལ་རྡུལ་ཕྲ་མོ། རྡུལ་ཕྲ་མོ་བདུན་ཆ་ལ་རྡུལ་ཕྲ་རབ་བོ། །དེ་ལྟར་གཞིགས་པས་ཕྱི་རོལ་གྱི་དངོས་པོ་ཐམས་ཅད་རྫས་སུ་མ་གྲུབ་པར་འདོད་དོ། །དེ་ལ་ཕྱོགས་སྔ་མ་མུ་སྟེགས་པའི་གཞུང་གི་རྡུལ་ཕྲ་རབ་ཐམས་ཅད་འདུས་པ་ཆ་ཤས་གཅིག་ཏུ་འདོད་དོ། རྡུལ་ཕྲ་རབ་ཆ་ཤས་ཅན་གཅིག་ཡིན་ན་ཡུལ་ཁ་དོག་སྔོན་པོ་ལ་དམིགས་ནས་ཤེས་པ་སྔོན་པོར་སྐྱེ་བའི་དུས་སུ་དཀར་པོ་དང༌། སེར་པོའི་ཁ་དོག་ཐམས་ཅད་གཅིག་པར་ཐལ་བར་འགྱུར་ཏེ། གཅིག་པ་ཡིན་པའི་ཕྱིར་རོ། །དེ་བས་ན་རྡུལ་ཕྲ་རབ་མ་འདྲེས་པ་ཆ་ཤས་ཅན་གཡག་རྔ་ནེའུ་གསིང་དེའི་འདབ་འབྱོར་བ་མི་སྣང་བའི་ངོ་བོར་འདོད་དོ། །འོན་ཏེ་མི་སྣང་ན་ཡོད་པར་ཅིས་མངོན་ཞེ་ན། འདི་མངོན་སུམ་དུ་རྣམ་པ་དང་བཅས་པའི་ཤེས་པ་ཡུལ་གྱིས་
བསྐྱེད་ཅིང་འདུག་པའི་ཕྱིར་རྡུལ་ཕྲ་རབ་ཡོད་པར་ཤེས་སོ། །དེ་ལྟར་ན་ཕྱིའི་དོན་ནི་རྡུལ་ཕྲ་རབ་རྫས་སུ་མི་གྲུབ་པ་དེས་སྐྱེས་པའི་ཤེས་པ་ནི་རྣམ་པ་དང་བཅས་པའི་ཤེས་པ་སྐད་ཅིག་མར་འདོད་པ་ནི་སོ་སོར་རྟོག་པའོ། །བསྒོམ་པ་གཉིས་ཏེ། གོམས་པར་བྱ་བའི་དུས་དང༌། མངོན་དུ་བྱ་བའི་དུས་སོ། །དེ་ལ་གོམས་པར་བྱ་བའི་དུས་ནི་དང་པོར་དབང་པོ་ཡུལ་གྱི་གྲོང་ལས་བཟློག་པ་ལ་བསམ་གྱིས་མི་ཁྱབ་པའོ། །དེ་ལ་བསམ་གྱིས་མི་ཁྱབ་པ་ནི་རྡོ་རྗེ་སེམས་དཔའ་སྐུ་མདོག་དཀར་པོའི་ཐུགས་ཀ་རུ་ཉི་མར་རྡོ་རྗེའི་ལྟེ་བར་ཧཱུཾ་བསམ་མོ། །དེ་ནས་རྡོ་རྗེ་སེམས་དཔའི་ཐུགས་ཀར་ཉི་མ་ལ་བསྡུའོ། །ཉི་མ་ཡང་རྡོ་རྗེ་ལའོ། །རྡོ་རྗེ་ཧཱུཾ་ལའོ། །ཧཱུཾ་ཡང་དེ་བཞིན་གཤེགས་པ་དྲུག་གི་རང་བཞིན་ནོ། །ཞབས་སྐྱེད་ཨུ་ནི་དོན་ཡོད་གྲུབ་པའི་རང་བཞིན་ནོ། །ལུས་པོ་ཧ་ནི་འོད་དཔག་ཏུ་མེད་པའོ། །མགོ་བོ་རིན་ཆེན་འབྱུང་ལྡན་ནོ། །ཟླ་ཚེས་རྣམ་པར་སྣང་མཛད་དོ། །ཐིག་ལེ་མི་བསྐྱོད་པའོ། །སྒྲ་ནི་རྡོ་རྗེ་སེམས་དཔའོ། །དེ་ལྟར་ཧཱུཾ་གི་ཞབས་བསྐྱེད་པའོ། །ཧ་སྒྲའི་བར་དུ་རིམ་པར་ཐིམ་པས་སྒྲ་དངོས་པོ་མེད་པར་བསྒོམ། དེ་ནི་གོམས་པར་བྱ་བའི་དུས་སོ། །མངོན་དུ་བྱ་བ་ནི་སྐད་ཅིག་ལ་བརྟེན་ནས། རྡོ་རྗེ་སྐྱིལ་ཀྲུང་བཅས་ནས་ནི། །སྣ་རྩེར་གཡོ་བའི་ཡིད་གཏང་ལ། །ཁྱིམ་པར་གྱུར་ཀྱང་བསྒོམ་པར་བྱ། །ཞེའོ། །དེ་བས་ན་མིག་གཉིས་དང་སེམས་སྣའི་རྩེ་མོར་གཏད་ནས་བལྟས་པས་ཅིར་ཡང་མི་དམིགས་པ་དེ་ཉིད་བསྒོམ་པའོ། །དྲི་མ་ནི་རང་སངས་རྒྱས་ལྟ་བུའོ། །རྡུལ་ཕྲ་རབ་ལྟ་བུར་ཆོས་ཐམས་ཅད་མི་དམིགས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པ་སྟེ། དེས་ཕ་རོལ་ཏུ་ཕྱིན་པ་ལྔ་མི་དམིགས་པ་གསུམ་གྱིས་འཁོར་གསུམ་ཡོངས་སུ་དག་པར་བྱས་ནས་འབྲས་བུ་ལ་རེ་བ་མེད་པར་སེམས་ཅན་གྱི་དོན་བྱེད་པ་ནི་ལྟ་བའོ། །ཕ་རོལ་ཏུ་ཕྱིན་པའི་དབང་པོ་ཐམ་མདོར་བསྡུས་པའོ། །འབྲིང་པོ་ནི་རྣལ་འབྱོར་སྤྱོད་པ་སྟེ། །དྲུག་གིས་ཅིག་ཅར་སྦྱར་བས་ན། །ཕྲ་རབ་རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུའང་རྡུལ་ཕྲན་ཙམ་དུ་འགྱུར། །ཞེས་པའི་རྡུལ་ཕྲ་རབ་དག་ཆ་ཤས་དྲུག་གིས་གཞིགས་ན་རྡུལ་དུ་འགྱུར་ཏེ། རྡུལ་ཕྲ་རབ་ནི་ཁས་ལེན་པར་ནུས་པ་མ་ཡིན་པ་དེ་བས་ན་འདི་དག་ཐམས་ཅད་སེམས་ཙམ་སྟེ། སེམས་ལས་ཕྱི་རོལ་གྱི་དོན་ལོགས་ན་ཡོད་པ་མ་ཡིན་པས་སེམས་དང་སྣ་ཚོགས་གཉིས་སུ་མེད་པར་རིགས་པས་
རྣམ་པར་བརྟགས་པ་ལ་ཀུན་དུ་བརྟགས་པའི་ངོ་བོ་གཟུང་བ་དང་འཛིན་པས་སྟོང་ཞིང་དབེན་པའི་ཤེས་པ་སྐད་ཅིག་མས་མི་རྟག་པ་དང༌། རྒྱུན་གྱིས་རྟག་པ་སྐད་ཅིག་མ་སྔ་མ་ཕྱི་མ་ལས་རྒྱུ་འབྲས་བུར་སྐྱེ་བ་དང་བཅས་པ་རང་རིག་པའི་མངོན་སུམ་གྱིས་གྲུབ་པའོ། །ལུང་ལས་ཀྱང་ཀྱེ་རྒྱལ་པའི་སྲས་དག་ཁམས་གསུམ་པོ་འདི་དག་སེམས་ཙམ་མོ་ཞེས་ལུང་གིས་གྲུབ་པ་རྣམ་པ་དང་བཅས་པའི་སོ་སོར་རྟོག་པའོ། །ཤེས་བྱ་གང་དང་གང་དག་ལ། །ཡིད་མི་གཡོ་བ་དེར་སྤྱར་ན། །གང་དུ་གཡོ་ཞིང་འགྲོ་འགྱུར་པ། །ཐམས་ཅད་དེ་ཡི་རང་བཞིན་ནོ། །ཞེས་བྱ་བས་སེམས་ཉིད་སྣ་ཚོགས་སུ་སྣང་བ་གཉིས་སུ་མེད་པས་རྟོག་པ་མ་ལུས་པ་སྤང་པར་ཡིད་ལ་བྱེད་པ་ནི་སྒོམ་པའོ། །སེམས་ཉིད་སྐད་ཅིག་མ་རྟོག་པར་འདོད་པ་ནི་ལེགས་ལྡན་པའི་གཞུང་སྟེ། ཏིང་ངེ་འཛིན་གྱི་དྲི་མའོ། །རྣམ་པ་དང་བཅས་པའི་རྣམ་པར་རིག་པ་ཙམ་གྱི་ཤེས་རབ་ཀྱི་ཕ་རོལ་ཏུ་ཕྱིན་པས་ཕ་རོལ་ཏུ་ཕྱིན་པ་ལྔ་མི་དམིགས་པ་གསུམ་གྱིས་འཁོར་གསུམ་ཡོངས་སུ་དག་པར་བྱས་ནས་བླ་མེད་བྱང་ཆུབ་སེམས་ཅན་གྱི་དོན་དུ་སྤྱོད་པ་ནི་ལྟ་བའོ། །རྣམ་པ་མེད་པའི་སེམས་ཙམ་གྱི་སོ་སོར་རྟོག་པ་ནི། རྣམ་པ་དང་བཅས་པའི་ཤེས་པ་ནི། འོན་ཏེ་རྣམ་པ་བེམས་པོ་ཡིན་ན་ཤེས་པ་རིག་པ་མ་ཡིན་ལ། དཔེར་ན་ནམ་མཁའ་རང་བཞིན་མེད་པ་ཡིན་ན་བུམ་པ་མ་ཡིན། བུམ་པ་ཡིན་ན་ནམ་མཁའ་མ་ཡིན། གཟུགས་ཅན་དང་གཟུགས་མེད་འགལ་བ་བཞིན་དུ་རྣམ་པ་བེམས་པོ་ཡིན་ན་ཤེས་པ་མ་ཡིན་ལ། ཤེས་པ་རིག་པ་ཡིན་ན་རྣམ་པ་བེམས་པོ་མ་ཡིན་ཏེ། རྣམ་པ་ཉིད་ཤེས་པ་དང་ཐ་མི་དད་ན་རྣམ་པ་འདུས་བྱས་མི་རྟག་པའི་དུས་སུ་ཡེ་ཤེས་ཀྱང་མི་རྟག་པ་སྟེ། འདུས་བྱས་སུ་ཐལ་བར་འགྱུར་རོ། །དེ་བས་ན་རྣམ་པ་དང་བཅས་པའི་ཤེས་པ་འཐད་པ་མ་ཡིན་ནོ། །ད་ནི་རྣམ་པ་མེད་པ་དཔྱད་པར་བྱ་སྟེ། མཉམ་པར་གཞག་པའི་ཤེས་པ་དང༌། རྗེས་ཐོབ་ཀྱི་ཤེས་པའོ། །མཉམ་པར་གཞག་པའི་ཤེས་པ་ནི་ཀུན་དུ་བརྟགས་པ་དང༌། གཞན་དབང་གིས་སྟོང་པ་ཡོངས་སུ་གྲུབ་པའི་ངོ་བོ་ཉིད་སྟོན་ཀའི་ཉི་མ་ཕྱེད་ཀྱི་ནམ་མཁའི་དཀྱིལ་ལྟར་རྣམ་པ་དང༌། སྤྲོས་པ་ལ་སྩོགས་པའི་དྲི་མ་མེད་པར་རིག་པ་བུམ་པའི་ནང་གི་མར་མེ་ལྟར་གསལ་བ་ལུང་དང་རིགས་པས་གྲུབ་པའི་རང་རིག་
པ་ནི་རང་རིག་པའི་མངོན་སུམ་གྱིས་གྲུབ་པའོ། །ལུང་ནི། ཇི་ལྟར་བྱིས་པས་བརྟགས་པ་ཡི། །ཕྱི་ཡི་དོན་ཡོད་མ་ཡིན་ན། །བག་ཆགས་ཀྱིས་ནི་དཀྲུགས་པའི་སེམས། །དོན་དུ་སྣང་བ་རབ་ཏུ་འཇུག །གང་ཞིག་ཇི་སྲིད་སྣང་འགྱུར་བ། །དེ་སྲིད་སྒྱུ་མ་བཞིན་དུ་སྣང༌། །སྣང་བ་མེད་པའི་སེམས་ཉིད་ནི། །ནམ་མཁའ་མཐའ་མེད་དག་པ་བཞིན། །ཐུབ་པ་ཆེན་པོའི་ཆོས་སྐུ་ནི། །སྤྲོས་མ་མེད་ཅིང་སྣང་བ་མེད། །དེ་ལས་བྱུང་བའི་གཟུགས་སྐུ་ནི། །རྗེས་ལ་སྒྱུ་མ་བཞིན་དུ་གནས། །ཞེས་བྱ་བས། མཉམ་པར་གཞག་པ་ཆོས་ཀྱི་སྐུའི་རང་བཞིན་ནི་རྣམ་པ་ལ་སྩོགས་པ་ཕྱིའི་དོན་གྱི་སྤྲོས་པ་མེད་པ་མི་རྟོག་པ། རྒྱུན་གྱིས་རྟག་པ་སྐད་ཅིག་མས་རྒྱུ་དང་འབྲས་བུར་འདོད་དོ། །རྗེས་ཐོབ་ནི་རྣམ་པར་རྟོག་པའི་བག་ཆགས་ཀྱི་སྟོབས་ཀྱིས་འཁྲུལ་ནས། ཕྱིན་ཅི་ལོག་ཏུ་སྣང་བའི་སྣ་ཚོགས་ཉིད་ཡང་དག་པ་མ་ཡིན་པ་སྒྱུ་མ་ལྟ་བུ་སྟེ་རྗེས་ལ་ཐོབ་པའོ། །དེ་ལྟ་བུའི་མཉམ་གཞག་དང་རྗེས་ཐོབ་ཏུ་འདོད་པ་ནི་སོ་སོར་རྟོག་པའོ། །ཡང༌། འདི་དག་ཐམས་ཅད་སེམས་ཙམ་ཞེས། །དེ་ལྟར་དུ་ནི་ཤེས་ནས་སུ། །ཅི་ཡང་རུང་སྟེ་མདུན་འཇོག་ན། །དེ་ཉིད་ཙམ་ལ་མི་གནས་སོ། །ཞེས་བྱ་བའི་ཚིག་གིས་སེམས་ཉིད་གཉིས་སུ་མེད་པར་རང་རིག་པ་སྤྲོས་པ་དང་སྣང་བ་མེད་པ་མངོན་དུ་བྱེད་པ་སྒོམ་པའོ། །སྤྲོས་པ་མེད་པ་རྣམ་པ་སྣང་བ་མེད་པའི་ཤེས་བ་རྟག་པར་འདོད་པ་ནི་ཉི་མའི་གཞུང་སྟེ། ཏིང་ངེ་འཛིན་གྱི་དྲི་མའོ། །རྣམ་པ་སྣང་བ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ལྔ་མི་དམིགས་པ་གསུམ་གྱིས་འཁོར་གསུམ་ཡོངས་སུ་དག་པར་བྱས་ནས་སེམས་ཅན་གྱི་དོན་བྱེད་པ་ནི་ལྟ་བའོ། །འདིར་མདོ་སྡེ་པ་དང་རྣལ་འབྱོར་སྤྱོད་པའི་སྙིང་རྗེ་ཡང་ཆོས་ལ་དམིགས་པའི་སྙིང་རྗེ་སྟེ། དཔེ་ཆུའི་ཟླ་བ་རླུང་གིས་བསྐྱོད་ནས་མི་རྟག་པ་ལྟར་ཆོས་ཐམས་ཅད་མི་རྟག་པའི་རླུང་གིས་བསྐྱོད་ནས། ཆོས་ཐམས་ཅད་མི་རྟག་པ་ལ་དམིགས་ནས་སྙིང་རྗེ་བྱེད་པའོ། །རྣལ་འབྱོར་སྤྱོད་པའི་གྲུབ་མཐའ་མདོར་བསྟན་པའོ། །ད་ནི་ཐེག་པ་ཆེན་པོ་དབུ་མའི་གྲུབ་མཐའ་ནི་རྣམ་པར་རིག་པ་ཙམ་ཉིད་དང་དོན་དུ་གྲུབ་པ་མ་ཡིན་ཏེ། རྣམ་པ་དང་ཤེས་པ་ཐ་མི་དད་ན་རྣམ་པ་གཅིག་དང་དུ་མས་གཞིགས་ན་མ་གྲུབ་པ་བཞིན་དུ་སེམས་ཉིད་ཀྱང་ཡང་དག་པར་གྲུབ་པར་མི་འགྱུར་རོ། །གཞན་ཡང་ཡོད་པ་དང་མེད་པ་ལས་སྐྱེ་བ་མི་
འཐད་དེ། ཡོད་པ་ལས་སྐྱེས་པའི་འབྲས་བུ་ཡང་སྐྱེ་བར་ཐལ་བའམ། མེད་པ་སྐྱེན་ནམ་མཁའི་མེ་ཏོག་ལ་སྩོགས་པ་ཡང་སྐྱེ་བར་ཐལ་བར་འགྱུར་རོ། །དེ་བཞིན་དུ་སྐད་ཅིག་མ་སྔ་མ་དང་ཕྱི་མ་ལས་ཀྱང་སྐྱེ་བ་མི་འཐད་དེ། སྔ་མ་རྒྱུ་ཡོད་པའི་དུས་སུ་ཕྱི་མ་འབྲས་བུ་མེད་དེ། ཕྱི་མ་འབྲས་བུ་ཡོད་པའི་དུས་སུ་སྔ་མ་རྒྱུ་འགག་སྟེ། རྡོ་རྗེ་གཟེགས་མས་གཞིགས་ནས་ཀྱང་རྒྱུ་འབྲས་འབྲེལ་པ་མེད་པའི་ཉེས་པ་ཡོད་པས་སྐྱེ་བ་མི་རིགས་སོ། །ཀླུའི་རྒྱལ་པོ་མ་དྲོས་པས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་ལས་ཀྱང༌། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པ་ཡིན། །གང་གིས་སྟོང་ཉིད་ཤེས་ན་མཁས་པ་ཡིན། །ཞེའོ། །དེས་ན་རང་རིག་པ་ཉམས་སུ་མྱོང་བ་ཉིད་རྟེན་ཅིང་འབྲེལ་ཏེ་འབྱུང་བའི་ཕྱིར་མ་སྐྱེས་པའོ། །ངོ་བོ་ཉིད་ཀྱིས་སྐྱེ་བ་ཡོད་ན་རྐྱེན་ལ་རག་མ་ལུས་པར་སྐྱེ་བར་ཐལ་བ་ལས་སྐྱེ་བར་མ་ནུས་པའི་ཕྱིར་རོ། །གཞན་ཡང༌། རྣམ་པ་མེད་པའི་ཤེས་པ་ནི། །ཡུལ་ལ་འཛིན་པར་མི་རིགས་ཏེ། །ཞེས་བྱ་བའི་ཚིག་གིས་རྣམ་པ་མེད་པའི་ཤེས་པ་སྐྱེ་རུ་མི་རུང་སྟེ། ཤེས་པ་མེད་པ་ཉིད་དུ་ཐལ་བར་འགྱུར་རོ། །དཔེར་ན་སྐྱེ་མོ་མིག་མ་དག་ལ་མི་མཁས་པས་ནམ་མཁའ་ལ་བལྟས་ན་མ་དག་པའི་སྟོབས་ཀྱིས་སྐྲ་ཤད་ལ་སོགས་པར་སྣང་ལ་མི་མཁས་པས་ཡང་དག་པར་འཛིན་ཏོ། །དེ་བཞིན་དུ་རྣམ་པར་རེག་པ་ཙམ་ཡང་འཁྲུལ་པའི་ཤེས་པ་སྟེ། མ་རིག་པའི་སྟོབས་ཀྱིས་སེམས་སུ་སྣང་བ་མི་མཁས་པ་ཡང་དག་པར་འཛིན་ཏེ། འཁྲུལ་པའི་ཤེས་པ་ནི་སེམས་སུ་སྣང་ན་ཡང་དོན་དུ་ཡོད་པ་མ་ཡིན་ནོ། །དཔེར་ན་རྨི་ལམ་སྒྱུ་མ་ཉམས་སུ་མྱོང་བས་གོང་གི་རྨི་ལམ་སྔ་མ་བརྫུན་པ་བཞིན་དུ་ཡང་དག་པར་སད་ན་ཕྱི་མ་ཉིད་ཀྱང་བརྫུན་ནོ། །དེ་བཞིན་དུ་ཕྱི་རོལ་གྱི་དོན་སྣ་ཚོགས་ཐམས་ཅད་སེམས་ལས་ལོགས་ཤིག་ཏུ་མ་གྲུབ་སྟེ། བརྫུན་པ་བཞིན་ཡང་དག་པར་བརྟགས་ན་སེམས་ལ་རང་བཞིན་མེད་དེ་བརྫུན་པ་ཉིད་དོ། །ད་ནི་སྒྱུ་མ་ལྟ་བུའི་གཞུང་བཤད་པར་བྱ་སྟེ། ཡོད་མིན་མེད་མིན་ཡོད་མེད་མིན། །གཉིས་ཀ་མིན་པའང་མ་ཡིན་པ། །མཐའ་བཞི་ལས་ནི་རྣམ་གྲོལ་བ། །དེ་ཉིད་དབུ་མ་པ་ཡིས་རིག །ཅེས་བྱ་བས། ཡོད་པ་མ་ཡིན་པ་ནི་གཅིག་དང་དུ་མའི་སྦྱོར་བས་
གནོད་པའི་ཕྱིར་རོ། །མེད་པ་མ་ཡིན་པ་ནི་སྣང་བ་ཉམས་སུ་མྱོང་བ་ཡོད་པའི་ཕྱིར་རོ། །གཉིས་ཀ་མ་ཡིན་པ་ནི་གཉིས་ཀ་ལ་སྐྱོན་ཡོད་པའི་ཕྱིར་རོ། །གཉིས་ཀ་མ་ཡིན་པ་ཡང་མ་ཡིན་པ་ནི་རྒྱུ་མེད་པ་མི་སྲིད་པ་དང༌། ཕུང་པོ་གསུམ་པ་མེད་པའི་ཕྱིར་རོ། །དེ་བས་ན་མཐའ་བཞི་ལས་གྲོལ་བའི་སྒྱུ་མ་ལྟ་བའི་ཤེས་པ་འོད་གསལ་བར་འདོད་དེ། དེ་ཡང་མྱ་ངན་ལས་འདས་པའི་ཆོས་ཀྱང་སྒྱུ་མ་ལྟ་བུ་རྨི་ལམ་ལྟ་བུ་མྱ་ངན་ལས་འདས་པ་ལས་ཆེས་ལྷག་པའི་ཆོས་ཡོད་ན་ཡང་དེ་ཡང་སྒྱུ་མ་ལྟ་བུ་རྨི་ལམ་ལྟ་བུའོ་ཞེས་གསུངས་པས། སྣ་ཚོགས་དང་སེམས་ཉིད་སྒྱུ་མ་ལྟ་བུར་གཉིས་སུ་མེད་པ་ནི་སོ་སོར་རྟོག་པའོ། སྣ་ཚོགས་ཐམས་ཅད་ཆུ་ཟླའམ་མེ་ལོང་གི་གཟུགས་བརྙན་ལྟར་བདེན་པ་མ་ཡིན་ལ་བརྫུན་པ་ཡང་མ་ཡིན་པར་སྒྱུ་མ་ལྟ་བུར་གཉིས་སུ་མེད་པར་འཇིག་པ་ནི་བསྒོམ་པའོ། །ཆད་པར་ཞེན་པ་ནི་སྒོམ་པའི་དྲི་མའོ། །སྒྱུ་མ་ལྟ་བུའི་ཤེས་རབ་ཀྱི་ཕ་རོལ་ཏུ་ཕྱིན་པས་ཕ་རོལ་ཏུ་ཕྱིན་པ་ལྔ་མི་དམིགས་པ་གསུམ་གྱིས་འཁོར་གསུམ་ཡོངས་སུ་དག་པར་སྤྱད་ནས་སེམས་ཅན་གྱི་དོན་བྱེད་པ་ནི་ལྟ་བའོ། །གཞན་ཡང་ཆོས་ཐམས་ཅད་རབ་ཏུ་མི་དམིགས་པས་སྒྱུ་མ་ལྟ་བུ་ཉིད་མ་གྲུབ་པར་འདོད་དེ། དེ་ཡང་འདི་སྐད་དུ། གསལ་ལམ་མི་གསལ་ཡང་རུང་སྟེ། །སུས་ཀྱང་ཇི་བཞིན་མ་མཐོང་བས། །མོ་གཤམ་གྱི་ནི་བུ་བཞིན་དུ། །བརྗོད་དུ་ཟིན་ཀྱང་དོན་མེད་དེ། །ཞེས་བྱ་བས་སྒྱུ་མ་ལྟ་བུ་ཉིད་འོད་གསལ་ལམ། འོན་ཏེ་སེམས་ལས་གཞན་ཞེ་ན། སེམས་ལས་གཞན་པའི་ཆོས་ནི་མ་གྲུབ་ལ། སེམས་ཉིད་ཡིན་ན་སེམས་ཉིད་མ་གྲུབ་པའི་དུས་སུ་སྒྱུ་མ་ཉིད་ཀྱང་མི་འགྲུབ་པོ། །དེ་ཅིའི་ཕྱིར་ཞེ་ན། སེམས་ཉིད་ལས་གཞན་མེད་པའི་ཕྱིར་རོ། །སྒྱུ་མ་ལྟ་བུ་ཡང་མི་མཁས་པའི་ཤེས་པ་སྟེ། སྒྲོ་འདོགས་སྐུར་བ་འདེབས་པ་སྟེ། དཔེར་ན་སྐྱེས་བུ་མ་དག་པས་མིག་ནམ་མཁའ་ལ་བལྟས་ན་མིག་མ་དག་པའི་སྟོབས་ཀྱིས་ཟླ་བ་གཉིས་པ་དང༌། སྐྲའི་འཁོར་ལོ་ལ་སོགས་པ་སྣང་ཞེས་སྒྲོ་འདོགས་ལ་མཁས་པའི་ཤེས་པས་སྣང་མ་ཐག་ཏུ་མེད་པར་ཤེས་ཏེ། མེད་དོ་ཞེས་སྐུར་བ་འདེབས་སོ། །དེ་བཞིན་དུ་སྒྱུ་མ་ལྟ་བུ་ཡང་ལས་དང་མ་རིག་པའི་དབང་གིས་སྣང་ཚོགས་སུ་སྣང་ངོ་ཞེས་སྒྲོ་བཏགས་ལ། མཁས་པའི་སྟོབས་ཀྱིས་སྣང་མ་ཐག་ཏུ་སྟོང་སྟེ། སྒྱུ་མ་ལྟ་བུ་ཞེས་སྐུར་པ་འདེབས་སོ། །
དེ་བས་ན་སྒྲོ་འདོགས་པ་དང་སྐུར་བ་འདེབས་པའི་མཐའ་ལ་གནས་སོ། །དེ་ནས་གཞན་ཡང་ཆོས་ཐམས་ཅད་རབ་ཏུ་མི་གནས་པའི་མཐར་སྨྲ་བར་འདོད་པས་འདི་སྐད་དུ། སྣ་ཚོགས་རྟག་པ་མ་ཡིན་ཏེ། །ཆད་པར་ཡང་ནི་ཁས་མི་ལེན། །རྟག་དང་ཆད་པ་གཉིས་ཀ་དང༌། །གཉིས་ཀ་མིན་པའང་མ་ཡིན་ནོ། །འདིར་ནི་ཐམས་ཅད་མི་གནས་པར། །དངོས་པོའི་དེ་ཉིད་མཁས་པས་རིག །དེས་ན་འདི་ལྟའི་རྣམ་རྟོག་གི །སེམས་ནི་སེམས་ཀྱིས་རིག་མ་ཡིན། །ཇི་སྲིད་སྒྲོ་འདོགས་ཐམས་ཅད་ནི། །དེ་ཀུན་ཐམས་ཅད་དུ་མེད་པས། །དབུ་མའི་དོན་ལ་སྒྲོ་འདོགས་མེད། །དེས་ན་དགག་དང་སྒྲུབ་པ་མེད། །ཅེས་བྱ་བ་དང༌། གཞན་ནས་ཀྱང༌། འདི་ལ་བསལ་བྱ་ཅི་ཡང་མེད། །གཞག་པར་བྱ་བ་གང་ཡང་མེད། །ཡང་དག་ཉིད་ལ་ཡང་དག་ལྟ། །ཡང་དག་མཐོང་ན་རྣམ་པར་གྲོལ། །ཞེས་བྱ་བས་ཡོད་པའི་སྒྲོ་འདོགས་དང་མེད་པའི་སྐུར་པ་འདེབས་པ་ལ་མི་གནས་ཏེ། སེམས་ཉིད་སྣ་ཚོགས་སུ་མྱོང་བ་ཉིད་རྟེན་ཅིང་འབྲེལ་པར་འབྱུང་བས་ན་མ་སྐྱེས་པ་སྟེ། མ་སྐྱེས་པ་ཉིད་སྐྱེ་བ་ལྟར་སྣང་སྟེ། སྐྱེ་བ་དང་སྐྱེ་བ་མེད་པ་གཉི་ག་ཐ་མི་དད་དོ། །དེ་བཞིན་དུ་སྣང་བ་ཉིད་རིགས་པས་བརྟགས་ན་སྟོང་པ་ཡིན་ལ། སྟོང་པ་མ་གྲུབ་པ་རིགས་པས་བརྟག་མི་བཟོད་པ་ཉིད་སྣང་བའོ།། སྣང་བ་ཉིད་ལས་ཀྱང་སྟོང་པ་གཞན་མ་ཡིན་ལ། སྟོང་པ་ཉིད་ལས་ཀྱང་སྣང་བ་གཞན་མ་ཡིན་ནོ། །དཔེར་ན་སྨིག་རྒྱུ་ལ་ཆུར་སྣང་བ་ཉིད་ལ་ཆུ་ཡིས་སྟོང་ལ། ཆུ་མེད་པ་ཉིད་ཆུར་སྣང་སྟེ། ཆུར་སྣང་བ་དང་ཆུ་མེད་པ་གཉིས་ཐ་དད་པ་མ་ཡིན་ན། །དེ་བཞིན་དུ་སྣང་བ་ཉིད་ན་རང་བཞིན་མེད་ལ། རང་བཞིན་མེད་པ་ཉིད་སྣང་བའོ། །སྣང་བ་དང་རང་བཞིན་མེད་པ་སྟོང་པ་ཉིད་ནི་ཐ་མི་དད་དོ། །དཔེར་ན་བུད་ཤིང་དུ་མ་མེས་བསྲེགས་ན་མེའི་ངོ་བོར་གཅིག་སྟེ། དེ་ནས་བུད་ཤིང་ཟད་པ་དང་མེ་ཉིད་མི་གནས་སོ། །དེ་བཞིན་དུ་སྣ་ཚོགས་སུ་སྣང་བ་ཉིད་རིགས་པས་སྟོང་པ་ཉིད་དུ་བྱས་ནས་དངོས་ངོ་མ་གྲུབ་པ་དང་སྟོང་པ་ཉིད་ཀྱང་མི་གནས་སོ། །དེ་བཞིན་དུ་གཉིས་སུ་མི་གནས་པ་ཡང་གཉིས་སུ་མ་གྲུབ་པའི་ཚེ་ན་གཉིས་སུ་མེད་པ་ཡང་མི་འགྲུབ་བོ། །དེ་བས་ན་གཞན་གྱི་ཞེན་པ་བཟློག་པའམ། སྒྲོ་སྐུར་གཅད་པའམ། དྲད་བའི་དོན་དུ་སྟོང་པ་དང་སྐྱེ་བ་མེད་པ་ཞེས་བརྗོད་ཀྱི།
མཁས་པས་བཙལ་བའམ། ངེས་པའི་དོན་དུ་དི་ཉིད་མི་གནས་ཏེ། རྣམ་གཅོད་དང༌། ཡོངས་གཅོད་དང༌། སྒྲོ་འདོགས་དང༌། སྐུར་བ་འདེབས་པ་ཡང་མི་གནས་ལ། ཞེན་པ་མེད་ཅིང་དགག་པ་དང༌། སྒྲུབ་པ་མེད་ལ་མཉམ་གཞག་དང་རྗེས་ཐོབ་གཉིས་སུ་མེད་ཅིང་མི་གནས་པ་ནི་སོ་སོར་རྟོག་པའོ། །སྒྲོ་སྐུར་དང་ཞེན་པ་མེད་པར་ཡིད་ལ་བྱེད་པ་མེད་པ་ནི་སྒོམ་པའོ། །དོན་ཐམས་ཅད་ཆད་པར་ལྟ་ཞིང་ཉམས་སུ་མྱོང་བ་མེད་པས་བེམས་པོར་གྱུར་པ་ནི་སྒོམ་པའི་དྲི་མའོ། །སྒྲོ་སྐུར་མེད་པ་དང༌། ཞེན་པ་མེད་པའི་ཤེས་རབ་ཀྱི་ཕ་རོལ་ཏུ་ཕྱིན་པས་ཕ་རོལ་ཏུ་ཕྱིན་པ་ལྔ་མི་དམིགས་པ་གསུམ་གྱིས་འཁོར་གསུམ་ཡོངས་སུ་དག་བས་སེམས་ཅན་གྱི་དོན་བྱེད་པ་ནི་ལྟ་བའོ། །དཔེར་ན་སྐྱེ་བོ་མིག་དག་བ་མཁས་པ་ཅིག་ནམ་མཁའ་ལ་ལྟ་བ་ན་མིག་དག་པས་སྐྲའི་འཁོར་ལོ་ལ་སོགས་པ་ཅི་ཡང་མི་དམིགས་ལ། མཁས་པས་ཡོད་ཅེས་བྱ་བའམ་མེད་ཅེས་བྱ་བར་སྒྲོ་འདོགས་པའམ་སྐུར་བ་འདེབས་པར་མི་བྱེད་དོ། །དེ་བཞིན་དུ་ཆོས་ཐམས་ཅད་རང་བཞིན་དུ་མ་སྐྱེས་པའི་ངོ་བོ་ཉིད་ཀྱིས་ཡོད་མེད་གང་ཡང་མི་གནས་པས་ཡོད་མེད་ཀྱི་སྒྲོ་སྐུར་གད་དུ་ཡང་མི་གནས་པ་ནི་དེ་ཁོ་ན་ཉིད་ཀྱི་ཤེས་པའོ། །སྒྱུ་མ་ལྟ་བུ་དང་རབ་ཏུ་མི་གནས་པའི་སྙིང་རྗེ་ཡང་དམིགས་པ་མེད་པའི་སྙིང་རྗེ་སྟེ། ཆོས་ཐམས་ཅད་ཅིར་ཡང་མི་དམིགས་པར་ཡིད་ལ་བྱེད་པས་ན་མི་དམིགས་པའི་སྙིང་རྗེའོ། །ཐེག་པ་ཆེན་པོ་མདོར་བསྟན་པའོ། །ཕ་རོལ་ཏུ་ཕྱིན་པའི་གྲུབ་པའི་མཐའ་མ་ལུས་པར་མདོར་བསྡུས་ཏེ་བསྟན་པའོ། །དེ་ནས་གཞན་ཡང་འབྲས་བུ་རྡོ་རྗེའི་ཐེག་པ་བརྗོད་པར་བྱ་སྟེ། དེ་ཡང་འདི་སྐད་དུ། དོན་གཅིག་ན་ཡང་མ་རྨོངས་དང༌། །ཐབས་མང་དཀའ་བ་མེད་པ་དང༌། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་གསུངས་པས་དོན་དེ་ཁོ་ན་ཉིད་ལ་དབྱེ་བ་མེད་ཀྱང་ཕ་རོལ་ཏུ་ཕྱིན་པའི་ཐེག་པ་ནི་རྨོངས་པ་སྟེ། ལུང་དང་རེགས་པས་གཏན་ལ་ཕབ་སྟེ་རྟོགས་པའོ། །རྡོ་རྗེ་ཐེག་པ་ནི་མ་རྨོངས་པ་སྟེ། ལུང་དང་རིགས་པ་དང༌། བླ་མའི་མན་ངག་གིས་ཉམས་སུ་མྱོང་བའོ། །གཞན་ཡང་དཀའ་བ་མེད་པ་སྟེ། བདེ་བ་ཆེན་པོ་ལམ་དུ་བྱེད་པའོ། །ཕ་རོལ་ཏུ་ཕྱིན་པའི་ཐེག་པ་ནི་བཏང་སྙོམས་པ་དང་ཉམས་སུ་མྱོང་བ་
མེད་པའོ། །རྒྱུ་ལམ་དུ་བྱེད་པས་ན་རྒྱུའི་ཐེག་པའོ། །འབྲས་བུ་ལམ་དུ་བྱེད་པས་ན་འབྲས་བུའི་ཐེག་པ་ཁྱད་དུ་འཕགས་སོ། །རྡོ་རྗེ་ཐེག་པ་ལ་ཡང་གསུམ་སྟེ། རྒྱུའི་རྒྱུད་དང༌། ཐབས་ཀྱི་རྒྱུད་དང༌། འབྲས་བུའི་རྒྱུད་དོ། །དེ་ཡང་འདི་སྐད་དུ། རྒྱུད་ཅེས་བྱ་བ་རྒྱུན་ཡིན་ཏེ། རྒྱུད་ཀྱི་དོན་ནི་གསུམ་ཡིན་ཏེ། །རྒྱུ་དང་རང་བཞིན་འབྲས་བུ་དང༌། །ཐབས་དང་རྣམ་པ་གསུམ་ཡིན་ཏེ། །ཞེས་གསུངས་སོ། །རྒྱུའི་རྒྱུད་ནི་རྡོ་རྗེ་འཆང་གི་རིགས་ཅན་གྱི་སེམས་ཅན་ནོ། །འབྲས་བུའི་རྒྱུད་ནི་ཕྱག་རྒྱ་ཆེན་པོའི་དངོས་གྲུབ་པོ། །ཐབས་ཀྱི་རྒྱུད་ལ་ལྔ་སྟེ། བྱ་བའི་རྒྱུད་དང༌། སྤྱོད་པའི་རྒྱུད་དང། རྣལ་འབྱོར་གྱི་རྒྱུད་དང། རྣལ་འབྱོར་བླ་ན་མེད་པའི་རྒྱུད་དང༌། རྣལ་འབྱོར་གོང་ན་མེད་པའི་རྒྱུད་དོ། །དེ་དག་ལས་རྣལ་འབྱོར་གྱི་རྒྱུད་དང༌། རྣལ་འབྱོར་བླ་ན་མད་པའི་རྒྱུད་ལ་སོགས་པ་ནས་རིམ་པ་གཉིས་སུ་གསུངས་སོ། །དེ་ཡང་དགྱེས་པའི་རྡོ་རྗེ་ལས། བསྐྱེད་པ་ཡི་ནི་རིམ་པ་དང༌། །རྫོགས་པ་ཡི་ནི་རིམ་པ་གཉིས། །རིམ་པ་གཉིས་ལ་བརྟེན་ནས་ནི། །རྡོ་རྗེ་འཆང་གིས་ཆོས་བཤད་དོ། །ཞེས་གསུངས་པས། བསྐྱེད་པའི་རིམ་པ་གཉིས་ཏེ། ཕྱི་བསྐྱེད་པའི་རིམ་པ་དང། ནང་ཟབ་མོ་བསྐྱེད་པའི་རིམ་པའོ། །རྫོགས་པའི་རིམ་པ་གསུམ་སྟེ། རྫོགས་པའི་རིམ་པ་དང༌། ཡོངས་སུ་རྫོགས་པའི་རིམ་པ་དང༌། ངོ་བོ་ཉིད་ཀྱི་རིམ་པའོ། །དེ་བཞིན་དུ་དབང་ལ་ཡང་གཉིས་ཏེ། འཇིག་རྟེན་པའི་དབང་བཅོས་མ་དང༌། འཇིག་རྟེན་ལས་འདས་པའི་དབང་མ་བཅོས་པའོ། །བཅོས་མ་ལ་གསུམ་སྟེ། སློབ་དཔོན་གྱི་དབང་དང༌། གསང་བའི་དབང་དང༌། ཤེས་རབ་ཡེ་ཤེས་ཀྱི་དབང་ངོ༌། མ་བཅོས་པ་ལ་གཉིས་ཏེ། ཆོས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་བཞི་པའོ། །དེ་ཡང་འདི་སྐད་དུ། སློབ་དཔོན་དབང་ནི་དང་པོ་སྟེ། །གསད་བ་མཆོག་ནི་གཉིས་པ་ཡིན། །གསུམ་པ་ཤེས་རབ་ཡེ་ཤེས་ཏེ། །བཞི་པ་དེ་ཡང་དེ་བཞིན་ནོ། །ཞེས་གསུངས་ཏེ། སློབ་དཔོན་གྱི་དབང་ནི་ལུས་དག་པར་བྱེད་པའོ། །གསང་བའི་དབང་ནི་ངག་དག་པར་བྱེད་པའོ། །ཤེས་རབ་ཡེ་ཤེས་ཀྱི་དབང་ནི་ཡིད་དག་པར་བྱེད་པའོ། །བཞི་པ་ནི་མན་ངག་སྟེ། བྱང་ཆུབ་སེམས་ཀྱི་ས་བོན་ནོ། །དེ་ལ་དབང་པོ་རབ་འབྲིང་ཐ་མའི་དབང་དུ་བྱས་ནས། ཕྱི་བསྐྱེད་པའི་རིམ་པ་ནི་དམ་ཚིག་གི་ཕྱག་རྒྱ་སྟེ། སློབ་
དཔོན་གྱི་དབང་དང༌། བསྐྱེད་པའི་རིམ་པ་ལྷའི་རྣལ་འབྱོར་རོ། །དབང་པོ་ཐ་མའི་ལས་ཀྱི་ཕྱག་རྒྱ་ལ་གཉིས་ཏེ། དེ་བཞིན་གཤེགས་པའི་དབུགས་དབྱུང་བ་དང༌། རྡོ་རྗེ་འཆང་གི་དབུགས་དབྱུང་བའོ། །གསང་བའི་དབང་དང། དེ་བཞིན་གཤེགས་པའི་དབུགས་དབྱུང་བ་ནི་ནང་ཟབ་མོ་བསྐྱེད་པའི་རིམ་པའོ། །རྡོ་རྗེ་འཆང་གི་དབུགས་དབྱུང་བ་ནི་རྫོགས་པའི་རིམ་པའོ། །དེ་བཞིན་གཤེགས་པའི་དབུགས་དབྱུང་བ་དང༌། རྡོ་རྗེ་འཆང་གི་དབྱུགས་དབྱུང་བ་ནི་ལས་ཀྱི་ཕྱག་རྒྱ་སྟེ། དབང་པོ་འབྲིང་པོའོ། །ཡོངས་སུ་རྫོགས་པའི་རིམ་པ་ནི་ཆོས་ཀྱི་ཕྱག་རྒྱ་སྟེ། དབང་པོ་རབ་བོ། ངོ་བོ་ཉིད་ཀྱི་རིམ་པ་ནི་ཕྱག་རྒྱ་ཆེན་པོ་སྟེ། དབང་པོ་རབ་ཀྱི་ཡང་རབ་པོ། དེ་ནས་ཕྱི་བསྐྱེད་པའི་རིམ་པ་རྡོ་རྗེ་སློབ་དཔོན་གྱི་དབང་ལུས་རྣམ་པར་དག་པ་བཤད་པར་བྱ་སྟེ། ཆུའི་དབང་དང༌། ཅོད་པན་དང༌། རྡོ་རྗེ་དང༌། དྲིལ་བུ་དང༌། མིང་དང༌། རིགས་གསུམ་གྱི་དམ་ཚིག་དང༌། སྣོད་དུ་བྱ་བ་དང༌། རྗེས་སུ་གནང་བ་དང༌། རྡོ་རྗེའི་བརྟུལ་ཞུགས་དང༌། ལུང་བསྟན་དང༌། དབུགས་དབྱུང་བ་དང་བཅུ་གཅིག་གོ །དེ་ལ་ཆུའི་དབང་ནི་མི་བསྐྱོད་པའི་ངོ་བོ་མེ་ལོང་ལྟ་བུའི་ཡེ་ཤེས་སོ། །དེ་བཞིན་གཤེགས་པ་ཐམས་ཅད་འོད་དུ་ཞུ་བའི་ཡེ་ཤེས་ཀྱི་བདུད་རྩིའི་ཆུས་དབང་བསྐུར་བ་ནི་དཔེར་ན་ཕྱི་རོལ་གྱི་དྲི་མ་དག་པར་བྱེད་པ་ལྟར་འདིར་ཡང་ཡེ་ཤེས་ཀྱི་ཆུས་མ་རིག་པའི་དྲི་མ་དག་པ་དང་ཉོན་མོངས་པའི་སྒྲིབ་པ་དག་པར་བྱེད་པ་དང༌། ཤེས་བྱའི་སྒྲིབ་པ་དག་པར་བྱེད་པ་སྟེ། དེས་ཁྱོད་ཀྱིས་མ་རིག་པ་ཡེ་ཤེས་གང་གིས་དག་པར་བྱེད་པའོ་ཞེས་ཁོང་དུ་ཆུད་པར་བྱའོ། །ཅོད་པན་ནི་རིན་ཆེན་འབྱུང་ལྡན་གྱི་ངོ་བོ་མཉམ་པ་ཉིད་ཀྱི་ཡེ་ཤེས་ཀྱི་རང་བཞིན་གྱིས་དབང་བསྐུར་བ་ནི་མ་འོངས་པའི་དུས་ན་སངས་རྒྱས་ཀྱི་དབུའི་གཙུག་ཏོར་གྱི་ས་བོན་ནམ་ཆེ་བའི་ཡོན་ཏན་ཡིད་བཞིན་གྱི་ནོར་བུ་ལྟར་འབྱུང་བའི་ས་བོན་དུ་སྟེར་བའོ། །རྡོ་རྗེའི་དབང་བསྐུར་བ་ནི་འོད་དཔག་ཏུ་མེད་པའི་ངོ་བོས་སོ་སོར་རྟོག་པའི་ཡེ་ཤེས་ཀྱི་རང་བཞིན་རྟེན་ཅིང་འབྲེལ་བར་འབྱུང་བ་བཅུ་གཉིས་ཀྱི་འཁོར་ལོ་རྣམ་པར་དག་པའི་ཚུལ་དུ་རྡོ་རྗེ་སོར་བཅུ་གཉིས་པ་ལྟེ་བ་ཟླུམ་པོ་ཆོས་ཀྱི་དབྱིངས་མཐའ་ཐམས་ཅད་དང་བྲལ་བའོ། །ལྟེ་བའི་ཡི་གེ་ཧཱུཾ་ནི་ཆོས་ཉིད་མཚོན་པར་ བྱེད་པ་སྟེ། ཧ་ནི་ཧེ་ཏུ་ཡོག་ཞེས་བྱ་སྟེ། རྒྱུ་དང ་བྲལ་པ་སྟེ་མ་སྐྱེས་པའོ། །ཨའུ་ནི་རྟོག་པ་དང་བྲལ་བའོ། །ཨ་ནི་
ཨ་པྲ་ཏི་ཧ་ཏ་ཞེས་བྱ་བ་སྟེ་མི་གནས་པའོ། །པདྨའི་ཁ་ནས་སྐྱེས་པའི་རྡོ་རྗེའི་རྩེ་མོ་ལྔ་ནི་པདྨ་ལས་སྐྱེ་བ་བཞིན་དུ་འཁོར་བའི་ཆོས་ལ་ཡང་འདོད་པ་སྐྱེ་བས་འཁོར་བ་ལས་སྐྱེ་བའི་ཕུང་པོ་ལྔ་རྣམ་པར་དག་པའོ། །ཕྱོགས་ཀྱི་རྩེ་མོ་བཞི་དབུས་ཀྱི་རྩེ་མོ་ལ་ཕྱོགས་པ་ནི་ཆོས་ཐམས་ཅད་སེམས་ཀྱི་ངོ་བོ་སྟེ། སེམས་ལས་ལོགས་ཤིག་ན་ཕྱིའི་དོན་མེད་དོ། །སེམས་ཉིད་གཟུང་བ་དང་འཛིན་པས་སྟོང་པའོ། །རང་རིག་པ་ཉིད་དེ་དེ་བཞིན་གཤེགས་པའི་དབུགས་དབྱུང་བའོ། །མེ་ཏོག་གསུམ་གྱིས་ར་རྣམས་ལ་མཚོན་པ་ནི་རྣམ་པར་ཐར་པའི་སྒོ་གསུམ་སྟེ། སེམས་ཉིད་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པ་སྟོན་པ་ཉིད་དུ་བྱེད་པ་སྟེ། རྡོ་རྗེ་འཆང་གི་དབུགས་དབྱུང་བའོ། །དེ་ལྟ་བུའི་རྡོ་རྗེ་སློབ་མའི་ལག་ཏུ་གཏང་པ་ནི་ཆོས་ཐམས་ཅད་ཀྱི་རང་བཞིན་གཉིས་སུ་མེད་པའི་ཡེ་ཤེས་མཚོན་པར་བྱེད་པ་སྟེ། དབྱེར་མི་ཕྱེད་པའི་ཡེ་ཤེས་ཀྱི་ངོ་བོ་སྟེར་བ་དང༌། ངས་ཁྱོད་ལ་གཉིས་སུ་མེད་པའི་ཡེ་ཤེས་སྦྱིན་ནོ་ཞེས་བྱ་བའི་དོན་ཏོ། །དྲིལ་བུའི་དབང་བསྐུར་བ་ནི་དོན་ཡོད་གྲུབ་བའི་ངོ་བོ་བྱ་བ་ནན་ཏན་གྱི་ཡེ་ཤེས་ཀྱི་རང་བཞིན་ཏེ། དགོངས་པ་སྔ་མའི་ཚུལ་གྱིས་རྟེན་ཅིང་འབྲེལ་པར་འབྱུང་བར་བཅུ་གཉིས་ཀྱི་འཁོར་ལོ་རྣམ་པར་དག་པའི་ཚུལ་གྱིས་སོར་བཅུ་གཉིས་པའོ། །ཁ་ཐུར་དུ་བལྟས་པ་ནི་ཤེས་རབ་ཀྱི་པདྨ་མཚོན་པར་བྱེད་པའོ། །དབྱེར་མི་བྱེད་པའི་གནས་ཆོས་ཀྱི་འབྱུང་གནས་རྟོགས་པའི་ཕྱིར་དྲིལ་བུའི་སྟེང་དང་འོག་གི་ཆ་ལ་རྡོ་རྗེའི་ཕྲེང་བ་ཟུང་གིས་མཛེས་པའོ། །སྒྲ་དཀྲོལ་བ་ནི་ཐབས་དང་ཤེས་རབ་ཀྱི་རྡོ་རྗེ་དང་པདྨ་མཉམ་པར་སྦྱོར་བ་སྟེ། ཆོས་ཐམས་ཅད་རྟེན་ཅིང་འབྲེལ་པར་འབྱུང་བས་ན་རང་གི་ངོ་བོ་མ་སྐྱེས་པ་སྟེ། སྒྲ་དེ་ཡང་བཙལ་ན་གང་ནས་ཀྱང་མི་རྙེད་པ་སྟེ། ཡང་དག་པར་རང་བཞིན་མེད་ལ། དེ་བཞིན་དུ་ཆོས་ཐམས་ཅད་རང་བཞིན་མེད་པར་རྟོགས་པར་བྱེད་པའོ། །ཁམས་གསུམ་ཐམས་ཅད་ཀྱི་ངོ་བོ་དཀྱིལ་འཁོར་དུ་བསྟན་པའི་ཕྱིར་དྲ་བ་དང་དྲ་བ་ཕྱེད་པ་སྟེ། དེ་ལ་དྲ་བ་དང་དྲ་བ་ཕྱེད་པ་ཞེས་བྱ་བ་ནི། ཧར་དང་ཧར་ཨརྡྷ་ཞེས་བྱ་སྟེ། འཕྲོག་པ་དང་འཕྲོག་པར་བྱེད་པ་ཞེས་བྱའོ། །དྲ་བ་ནི་ཉོན་མོངས་པ་ཆེན་པོ་བཅོམ་པའི་རྟགས་སོ། །དྲ་བ་ཕྱེད་པ་ནི་ཉོན་མོངས་པ་ཆུང་ངུ་བཅོམ་པའི་རྟགས་སོ། །རྟེན་གཞལ་ཡས་ཁང་དེར་བརྟེན་པ་ལྷའི་
དཀྱིལ་འཁོར་བསྟན་པ་དང༌། ཕུང་པོ་དང་ཁམས་ལ་སོགས་པ་དེ་བཞིན་གཤེགས་པར་བསྟན་པའི་ཕྱིར་དེ་བཞིན་གཤེགས་པ་ལྔ་དང་ལྷ་མོ་རྣམས་ཀྱི་ཕྱག་མཚན་བཀོད་པའོ། །སྟོང་པ་དང་སྙིང་རྗེ་དབྱེར་མི་ཕྱེད་པའི་རང་བཞིན་ནམ་རྒྱུ་བསྟན་པའི་ཕྱིར་དེ་སྟེང་དུ་ཤེས་རབ་ཀྱི་གདོང་བསྟན་པའོ། །པདྨོ་ལས་སྐྱེས་པའི་རྩེ་མོ་ལྔ་ནི་སྲིད་པ་ལས་སྐྱེས་པའི་ཕུང་པོའམ། ས་ལ་སོགས་པ་འབྱུང་བ་ལྔ་རྣམ་པར་དག་པའི་ཡེ་ཤེས་ལྔའི་ངོ་བོ་དེ་བཞིན་གཤེགས་པ་ལྔའོ། །ཕྱོགས་ཀྱི་རྩེ་མོ་རྣམས་དབུས་ཀྱི་རྩེ་མོ་ལ་ཕྱོགས་པ་ནི་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་ཆོས་ཐམས་ཅད་སེམས་ལས་ཕྱི་རོལ་དུ་མེད་དེ། སེམས་ཀྱི་ངོ་བོ་གཟུང་བ་དང་འཛིན་པའི་རྟོག་པས་སྟོང་པ་རང་རིག་པའི་ཡེ་ཤེས་ཏེ། དེ་བཞིན་གཤེགས་པའི་དབུགས་དབྱུང་བའོ། །ར་རྣམས་ལ་མེ་ཏོག་གསུམ་མཚན་པ་ནི་རྣམ་པར་ཐར་པའི་སྒོ་གསུམ་སྟེ། སེམས་ཉིད་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པས་སེམས་ཉིད་རང་བཞིན་མེད་པ་སྟེ། རྡོ་རྗེ་འཆང་གི་དབུགས་དབྱུང་བའོ། །དེ་ལྟ་བུའི་དྲིལ་བུ་སློབ་མའི་ལག་ཏུ་གཏད་པ་ནི་རྗོད་པར་བྱེད་བའི་སྒྲ་དང་ཆོས་ཉིད་རྟོགས་པར་བྱེད་པའི་རྒྱུ་སྟེར་བའོ། །མིག་གི་དབང་བསྐུར་བ་ནི་རྣམ་པར་སྣང་མཛད་ཀྱི་ངོ་བོ་ཆོས་ཀྱི་དབྱིངས་ཀྱི་ཡེ་ཤེས་ཀྱི་རང་བཞིན་ཏེ། ཆོས་ཐམས་ཅད་སྒྲོམ་བཏགས་པ་དང༌། མིང་མེད་མཚོན་པར་བྱེད་པའི་ཕྱིར་སྔར་ཀྱི་མིང་དོར་བའོ། །ཕྱིས་ཀྱི་མིང་འདོགས་པ་ནི་མེ་ཏོག་གར་ལྷུང་བའི་རང་གི་རིགས་ཀྱི་ལྷ་ལས་མིང་དྲངས་ནས་འདོགས་པ་སྟེ། བླ་ན་མེད་པའི་བྱང་ཆུབ་ཀྱི་གོ་འཕང་ལ་འོས་པའམ་སྐལ་བ་དང་ལྡན་ནོ་ཞེས་བྱ་བའོ། །དེ་ལྟར་དབང་ལྔ་པོ་དེ་དག་ནི་དེ་བཞིན་གཤེགས་པ་ལྔའི་ངོ་བོ་ཡིན་བས་རིགས་ལྔའི་དབང་ཞེས་བྱའོ། །དེ་བཞིན་གཤེགས་པ་ལྔ་དང་ཡེ་ཤེས་ལྔའི་རང་བཞིན་གྱིས་མ་རིག་པ་བཀག་ནས་རིག་པའི་ངོ་བོར་བྱས་པས་ན་རིག་པའི་དབང་ལྔ་ཞེས་བྱའོ། །རྗེས་སུ་གནང་བ་དང༌། དེ་ནས་གཞན་ཡང་དྲུག་པ་ནི་རྡོ་རྗེ་སེམས་དཔའི་དབང་ཞེས་བྱ་སྟེ། རྡོ་རྗེ་རིགས་ཀྱི་དམ་ཚིག་རྡོ་རྗེ་ནི་གཉིས་སུ་མེད་པའི་ཡེ་ཤེས་ཟུང་དུ་འཇུག་པ་བརྗོད་པར་བྱ་བ་ཡིན་པས་ཁྱོད་ཀྱིས་ནམ་ཡང་མི་འབྲལ་བར་བྱ་ཞིང་རྟོགས་པར་བྱ་བའི་དམ་ཚིག་གོ །དྲིལ་བུའི་དབང་རིགས་ཀྱི་དམ་ཚིག་ལ་དྲིལ་
བུ་ནི་ཆོས་ཀྱི་ཕུང་པོ་བརྒྱད་ཁྲི་བཞི་སྟོང་གི་རང་བཞིན་ཏེ། རྗོད་བར་བྱེད་པ་ཡིན་པས་ཁྱོད་ཀྱིས་སེམས་ཅན་རྣམས་ལ་བསྒྲག་པར་བྱའོ་ཞེས་རྟོགས་པར་བྱ་བ་ནི་དམ་ཚིག་གོ །ཕྱག་རྒྱ་རིགས་ཀྱི་དམ་ཚིག་ཞི་རང་ཉིད་ཡི་དམ་ལྷའི་ངོ་བོར་རྟོགས་པར་བྱ་བ་ནི་དམ་ཚིག་གོ །དེ་དག་ནི་རིགས་གསུམ་གྱི་དམ་ཚིག་གོ །སྣོད་དུ་བྱ་བ་ནི་དཀྱིལ་འཁོར་གྱི་དེ་ཁོ་ན་ཉིད་དང༌། དཀྱིལ་འཁོར་གྱི་རྣམ་པར་དག་པ་དང༌། ལྷའི་དེ་ཁོ་ན་ཉིད་དང༌། ལྷའི་རྣམ་པར་དག་པ། སློབ་དཔོན་གྱི་ལས་དང༌། དཀྱིལ་འཁོར་བསྒྲུབ་པའི་ལས་དང༌། བཟའ་བ་ལ་སོགས་པའི་དམ་ཚིག་གོ །རྗེས་སུ་གནང་བ་ནི། སེམས་ཅན་ཀུན་ལ་ཕན་པའི་ཕྱིར། །སེམས་ཅན་ཀུན་ལ་ཐམས་ཅད་དུ། །ཇི་ལྟར་འདུལ་བ་སྣ་ཚོགས་ལ། །ཆོས་ཀྱི་འཁོར་ལོ་བསྐོར་བར་གྱིས། །ཁྱོད་ཀྱིས་སེམས་ཅན་རྣམས་ལ་ཆོས་བཤད་པ་དང༌། དབང་བསྐུར་བར་གྱིས་ཤིག་པའི་གནང་བ་སྟེ། དེ་དག་བྱ་བའི་སྐལ་བ་དང་ལྡན་པར་རྟོགས་པར་བྱ་བའོ། །རྡོ་རྗེའི་བརྟུལ་ཞུགས་ཀྱི་དབང་ནི་ཕྱི་རོལ་གྱི་དཀའ་ཐུབ་ཀྱི་བརྟུལ་ཞུགས་སྤངས་ཏེ་གཉིས་སུ་མེད་པ་འདི་ནི་ཁྱོད་ཀྱི་བརྟུལ་ཞུགས་ཡིན་པས་ཟུང་ཤིག་པའི་དོན་དུ་རྡོ་རྗེ་སྟེར་བའོ། །ལུང་བསྟན་པ་ནི་ཁྱོད་ཉིད་རྡོ་རྗེ་སེམས་དཔའ་སྟེ། སངས་རྒྱས་ཀུན་དང་མཚུངས་པའོ་ཞེས་ཁོང་དུ་ཆུད་པར་བྱའོ། །དབུགས་དབྱུང་བ་ནི་འདི་ནས་བཟུང་ནས་སླར་ངན་སོང་དུ་མི་ལྟུང་ངོ་ཞེས་བྱའོ། །དྲུག་པོ་འདི་དག་ནི་རྡོ་རྗེ་སེམས་དཔའི་ངོ་བོ་ཡིན་པས་ན་རྡོ་རྗེ་སེམས་དཔའི་དབང་ཞེས་བྱའོ། །བུམ་པའི་བྱ་བ་ཐམས་ཅད་ལ་འཇུག་པ་ཡིན་པས་ན་བུམ་པའི་དབང་ཞེས་བྱའོ། །སླར་ངན་སོང་དུ་མི་སྐྱེ་བས་ན་ཕྱིར་མི་ལྡོག་པའི་དབང་ཞེས་བྱའོ། །ཆོས་བཤད་པའི་སྐལ་བ་དང་ལྡན་པས་ན་སློབ་དཔོན་གྱི་དབང་ཞེས་བྱའོ། །ཡེ་ཤེས་ལྔའམ་རིགས་ལྔའི་ངོ་བོར་ལུས་དག་པར་བྱེད་པས་ན་ལུས་རྣམ་པར་དག་པ་ཞེས་བྱའོ། །དེ་དག་ནི་བསྐྱེད་པའི་རིམ་པའི་རྡོ་རྗེ་སློབ་དཔོན་གྱི་དབང་མདོར་བསྡུས་ཏེ་བསྟན་པའོ། །ད་ནི་གཞན་ཡང་ལྷའི་སྒོ་ནས་རྟོགས་པར་བྱ་བ་ནི་ཕུང་པོ་ལ་སོགས་པའི་ཀུན་བརྟགས་རྣམས་གཞན་དབང་ལྷའི་ངོ་བོ་སྟེ། དེ་ཡང་འདི་སྐད་དུ། མདོར་ན་ཕུང་པོ་ལྔ་རྣམས་ནི། །སངས་རྒྱས་སྔར་ནི་རབ་ཏུ་གྲགས། །ཁམས་དང་སྐྱེ་མཆེད་ཐམས་ཅད་ནི། །བྱང་ཆུབ་སེམས་དཔའི་དཀྱིལ་འཁོར་མཆོག །ཅེས་གསུངས་པས་ན་ཕུང་པོ་
ལྔ་ནི་སངས་རྒྱས་ལྔའི་ངོ་བོ་ཡིན་ཏེ། དེ་ལ་གཟུགས་ཀྱི་ཕུང་པོ་རྣམ་པར་སྣང་མཛད་དོ། །ཚོར་བའི་ཕུང་པོ་རིན་ཆེན་འབྱུང་ལྡན་ནོ། །འདུ་ཤེས་ཀྱི་ཕུང་པོ་འོད་དཔག་མེད་དོ། །འདུ་བྱེད་ཀྱི་ཕུང་པོ་དོན་ཡོད་གྲུབ་པའོ། །རྣམ་པར་ཤེས་པའི་ཕུང་པོ་མི་བསྐྱོད་པ་ཞེས་བྱ་སྟེ། ཕུང་པོ་ལ་སོགས་པའི་ཞེན་པ་སྤང་བའི་ཕྱིར་ཀུན་བརྟགས་ཕུང་པོ་ལ་གཞན་དབང་དེ་བཞིན་གཤེགས་པ་ལྔས་རྒྱས་བཏབ་སྟེ། དེ་ཡང༌། གང་ལ་གང་གིས་རྒྱས་བཏབ་པ། དེ་དང་དེ་ཡི་ངོ་བོར་གྲགས། །ཞེས་བྱ་བས་ཕུང་པོ་ལྔ་དེ་བཞིན་གཤེགས་པ་ལྔས་རྒྱས་བཏབ་པའི་དུས་ན་ཕུང་པོ་ལྔར་འཛིན་པའི་ཞེན་པ་དང་བྲལ་ཏེ་དེ་བཞིན་གཤེགས་པ་ལྔར་རྟོགས་པར་བྱེད་དོ། །དེ་བཞིན་གཤེགས་པ་ལྔ་ཡང་ཐ་དད་མ་ཡིན་ཏེ། རྣམ་པར་སྣང་མཛད་ནི་སྐུ། འོད་དཔག་ཏུ་མེད་པ་ནི་གསུང༌། མི་བསྐྱོད་པ་ནི་ཐུགས། རིན་ཆེན་འབྱུང་ལྡན་ནི་ཡོན་ཏན། དོན་ཡོད་གྲུབ་པ་ནི་ཕྲིན་ལས་སོ། །དེ་ལྟར་ཐ་དད་མ་ཡིན་པ་ལ་ཐ་དད་གཞན་དབང་ལྷའི་རྣམ་པར་འཛིན་པའི་ཞེན་པ་བཟློག་པའི་ཕྱིར་དང༌། རྣམ་པར་རིག་པ་ཙམ་དུ་རྟོགས་པར་བྱ་བའི་ཕྱིར་བཞི་ལ་མི་བསྐྱོད་པས་བཏབ་སྟེ། དེ་ཡང༌། གང་དང་གང་ལ་རྒྱས་བཏབ་པ། །དེ་དང་དེ་ཡི་ངོ་བོར་འགྲོ། །ཞེས་གསུངས་པས་རྣམ་པར་སྣང་མཛད་ལ་སོགས་པ་བཞི་ལ་མི་བསྐྱོད་པ་རྣམ་པར་ཤེས་པའི་ཕུང་པོ་ཆོས་ཀྱི་དབྱིངས་ཀྱི་ཡེ་ཤེས་ཀྱིས་རྒྱས་བཏབ་པས་གཞན་དབང་ལྷར་འཛིན་པའི་ཞེན་པ་སྤངས་ནས་གཟུང་བ་དང་འཛིན་པའི་རྟོག་པ་སྤངས་ཏེ་གཟུངས་བ་དང་འཛིན་པའི་རྟོག་པས། སྟོང་པ་ཡོངས་སུ་གྲུབ་བས་སེམས་ཉིད་རང་རིག་པར་རྟོག་པ་སྟེ། དེ་བཞིན་གཤེགས་པའི་དབུགས་དབྱུང་བའོ། །དེ་ལ་ད་བཞིན་གཤེགས་པ་རྣམ་པར་སྣང་མཛད་དང༌། རིན་ཆེན་འབྱུང་ལྡན་ལ་སོགས་པ་དང༌། ཕུང་པོ་དང༌། ཁམས་དང༌། སྐྱེ་མཆེད་ལ་སོགས་པར་འཛིན་ཅིང་རྟོག་པས་སྐྱོ་ཞིང་དུབ་པའི་སྡུག་བསྔལ་བར་གྱུར་བ་རྣམས་མི་བསྐྱོད་པ་སེམས་ཀྱི་ངོ་བོ་དང་རིག་པར་བྱ་སྟེ། རྟོག་པ་དང་གཟུང་འཛིན་གྱི་ཞེན་པ་མེད་པར་ངལ་སོས་པའམ་དབུགས་དབྱུང་བས་ན་དེ་བཞིན་གཤེགས་པའི་དབུགས་དབྱུང་བ་ཞེས་བྱའོ། །དེ་ཡང་གཟུད་བ་དང་འཛིན་པའི་རྣམ་པར་རྟོག་པ་མེད་ཀྱང་རིག་པ་ཙམ་དུ་འཛིན་པའི་ཞེན་པ་ཡོད་པས་རྣམ་པར་རྟོག་པའི་ཟུག་རྡུལ་ཁྱད་པར་མེད་དེ། དཔེར་ན་ལྕགས་
ལས་བྱས་པའི་སྒྲོག་དང༌། གསེར་ལས་བྱས་པའི་སྒྲོག་ལ་རྒྱུ་ལ་ཁྱད་པར་ཡོད་ཀྱང་འཆིང་བ་ལ་ཁྱད་པར་མེད་དོ། །དེ་ལྟར་ཕྱི་རོལ་དུ་འཛིན་པ་དང༌། ནང་སེམས་ཉིད་རང་རིག་པར་འཛིན་པ་ལ་བཟང་དན་ཡོད་ཀྱང་མངོན་པར་ཞེན་པའི་རྣམ་པར་རྟོག་པའི་ཟུག་རྡུ་ལ་ཁྱད་མེད་པས་དེ་ཉིད་ཀྱི་ཞེན་པ་སྤང་བའི་ཕྱིར་རྣམ་པར་ཤེས་བའི་ཕུང་པོའི་རང་བཞིན་མི་བསྐྱོད་པ་ལ་རྡོ་རྗེ་སེམས་དཔའི་རྒྱས་བཏབ་སྟེ། དེ་ཡང༌། གང་ལ་གང་གིས་རྒྱས་བཏབ་པ། །དེ་དང་དེ་ཡི་ངོ་བོར་འགྲོ། །ཞེས་གསུངས་ཏེ། རྡོ་རྗེ་སེམས་དཔའ་སྟོང་པ་ཉིད་ཀྱིས་མི་བསྐྱོད་པ་ལ་རྒྱས་བཏབ་པས་སེམས་ཉིད་སྟོང་པ་ཉིད་དུ་རྟོགས་པར་བྱའོ། །དེ་ཡང་འདི་སྐད་དུ། སྙིང་པོ་བརྟན་ཕྱིར་ཁོང་སྟོང་མིན། །མི་ཆོད་མི་ཕྱེད་མཚན་ཉིད་ཅན། །མི་ཚིག་པ་ངང་མི་ཉམས་པས། །སྟོང་པ་རྡོ་རྗེ་ཞེས་བརྗོད་དོ། །ཞེས་གསུངས་སོ། །རྡོ་རྗེ་སེམས་དཔའ་སྟོང་པ་ཉིད་ཀྱིས་ནི་རྟོག་པའི་མཐའ་བསལ་ལ། མི་བསྐྱོད་པས་ནི་ཆད་པའི་མཐའ་བསལ་ཏེ་ཟུང་དུ་འཇུག་པ་ནི་རྡོ་རྗེ་འཆང་གི་དབུགས་དབྱུང་པ་སྟེ། སེམས་ཉིད་རང་རིག་པའི་ཞེན་པ་ཉིད་རང་བཞིན་མེད་པར་བྱས་ཏེ་དབུགས་དབྱུང་བ་ལ་རྡོ་རྗེ་འཆང་གི་དབུགས་དབྱུང་བ་ཞེས་བྱའོ། །ཕྱི་བསྐྱེད་པའི་རིམ་པ་སྟེ་དབང་པོ་ཐ་མ་མདོར་བསྟན་པའོ།། དེ་ནས་གཞན་ཡང་ཟབ་མོ་བསྐྱེད་པའི་རིམ་པ་ལ་གསང་བའི་དབང་གིས་ངག་རྣམ་པར་དག་བར་བྱེད་པ་བསྟན་པར་བྱ་སྟེ། དེ་ལ་གསང་བའི་དབང་ནི་དང་པོ་སློབ་དཔོན་གྱི་གསང་བའོ། །ཡུམ་དང་གཉིས་བསྐྱེད་པའི་རིམ་པ་ལྷའི་ང་རྒྱལ་དུ་བྱས་ཏེ། མཁའ་གསང་བྱིན་གྱིས་བརླབས་ནས་སྙོམས་པར་ཞུགས་ཏེ་རང་གི་སྙིང་གའི་ས་བོན་ལས་འོད་ཟེར་སྤྲོས་ཏེ། ཕྱོགས་བཅུའི་དེ་བཞིན་གཤེགས་པ་ཐམས་ཅད་སྤྱན་དྲངས་ཏེ་དེ་ཉིད་དུ་ཐིམ་པ་ལས་འོད་དུ་ཞུ་བའི་གཉིས་ལས་བྱུང་བའི་བྱང་ཆུབ་ཀྱི་སེམས་སློབ་མ་ལ་སྦྱིན་པར་བྱའོ། །དེ་ལ་གསང་བའི་དབང་ལ་གཉིས་ཏེ། རྗེ་བཙུན་གྱི་གསང་བའི་དཔང་དང༌། རྗེ་བཙུན་མའི་གསང་བའི་དབང་ངོ༌། །རྗེ་བཙུན་གྱི་གསང་བའི་དབང་ནི་བྱང་ཆུབ་ཀྱི་སེམས་རྡོ་རྗེ་ལས་ལྕེས་བླང་བར་བྱའོ། །རྗེ་བཙུན་མའི་གསང་བའི་དབང་ནི་བྱང་ཆུབ་ཀྱི་སེམས་པདྨ་ནས་ལྕེས་བླང་བར་བྱའོ། །དེ་ཡང་འདི་སྐད་དུ། ལག་ཏུ་བླང་
བར་མི་བྱ་ཞིང༌། །ཉ་ཕྱིས་དུང་ཆོས་དག་ཏུ་མིན། །མི་འཆི་ལྕེ་ཡིས་བླང་བར་བྱའོ། །ཞེས་སོ། །དེ་བས་ན་ལྕེ་ཁོ་ནས་བླང་བར་བྱའོ། །ངག་དག་པར་བྱེད་པ་ནི་དེ་བཞིན་གཤེགས་པ་ཐམས་ཅད་འོད་དུ་ཞུ་བའི་བྱང་ཆུབ་ཀྱི་སེམས་སློབ་མའི་ལྕེ་ལ་གཞག་པས་ཞི་རྒྱས་ལ་སོགས་པའི་སྔགས་ནུས་པ་དང་ལྡན་པར་གྲུབ་པར་བྱེད་པའམ། བཟའ་བྱ་དང་བཟའ་བྱ་མ་ཡིན་པའི་རྟོག་པ་དང༌། བཏུང་བྱ་དང་བཏུང་བྱ་མ་ཡིན་པའི་རྟོག་པ་བཅོམ་སྟེ། རང་བཞིན་མེད་པར་བྱེད་པའོ། །གསང་བ་ནི་ཐབས་དང་ཤེས་རབ་གཉིས་ཀྱི་གསང་བ་ལས་བྱུང་བས་ན་གསང་བའོ། །འདིའི་དོན་གཉིས་ཀྱི་སྙིང་པོ་བྱིན་པས་ཐབས་དང་ཤེས་རབ་གཉིས་སུ་མེད་པ་འབྱིན་ནོ་ཞེས་རྟོགས་པར་བྱའོ། །ད་ནི་དེ་བཞིན་གཤེགས་པའི་དབུགས་དབྱུང་བའི་ཟབ་མོ་བསྐྱེད་པའི་རིམ་པ་དང༌། རྫོགས་པའི་རིམ་པ་ལ་སོགས་པ་བསྟན་པའི་ཕྱིར་རིམ་པ་བཞིར་འདུས་ཏེ། ལས་ཀྱི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། ཕྱག་རྒྱ་ཆེན་པོ་དང་དམ་ཚིག་གི་ཕྱག་རྒྱའོ། །དེ་ལ་དབང་པོ་རབ་ཀྱི་དབང་དུ་བྱས་ཏེ་ལས་ཀྱི་ཕྱག་རྒྱ་ལ་རིམ་པ་གཉིས་འདུས་ཏེ། ལས་ཀྱི་ཕྱག་རྒྱའི་དུས་སུ་ཐ་མལ་པའི་འདུ་ཤེས་ཀྱིས་གསུངས་པས་ལྷའི་ངོ་བོར་བསྒོམ་ཞིང་མཁའ་གསང་བྱིན་གྱིས་བརླབས་པ་ནི་ཕྱི་བསྐྱེད་པའི་རིམ་པའོ། །དེ་ནས་བོ་ལ་དང་ཀཀྐོ་ལ་སྲུབ་ཅིང་བསྲུབ་པའི་སྤྱོར་བས་དེ་བཞིན་གཤེགས་པའི་དབུགས་དབྱུང་བའང་རྡོ་རྗེ་འཆང་གི་དབུགས་དབྱུང་བ་ལྔ་རུང་སྟེ། ལྷན་ཅིག་སྐྱེས་པའི་ཡེ་ཤེས་རིག་པ་ཉམས་སུ་མྱོང་བ་ནི་ནང་ཟབ་མོ་བསྐྱེད་པའི་རིམ་པའོ། །དེ་ལྟར་ལས་ཀྱི་ཕྱག་རྒྱ་ལ་རིམ་པ་གཉིས་དང་ལྡན་པས་ན་རིམ་པ་བཞིར་འདུས་ཏེ་ལས་ཀྱི་ཕྱག་རྒྱ་ནི་དཔེའོ། །ཆོས་ཀྱི་ཕྱག་རྒྱ་ནི་རྫོགས་པའི་རིམ་པ་སྟེ་ལམ་མོ། །ཕྱག་རྒྱ་ཆེན་པོ་ཡོངས་སུ་རྫོགས་པའི་རིམ་པ་སྟེ་འབྲས་བུའོ། །དམ་ཚིག་ཕྱག་རྒྱ་ནི་མཉམ་གཞག་དང་རྗེས་ཐོབ་དང༌། ཆོས་སྐུ་དང་གཟུགས་སྐུ་གཉིས་སུ་མེད་ཅིང་ཟུང་དུ་འཇུག་པར་སྟོན་པ་ནི་ངོ་བོ་ཉིད་ཀྱི་རིམ་པ་སྟེ་གཞན་གྱི་དོན་དུ་བྱུང་བའོ། །དེ་ལ་རེ་ཞིག་ལས་ཀྱི་ཕྱག་རྒྱ་ལ་ལུས་རྣམ་པར་དག་པར་བྱེད་པ་བསྟན་པར་བྱའོ། །དེ་ལ། ལས་ཀྱི་ཕྱག་རྒྱ་ལུས་ལས་བྱུང༌། །ཆོས་ཀྱི་ཕྱག་རྒྱ་ངག་ལས་ཏེ། །ཕྱག་རྒྱ་ཆེན་པོ་ཡིད་ལས་སོ། །དམ་ཚིག་ཕྱག་རྒྱ་ཀུན་དུ་འགྲོ་།ཞེས་གསུངས་
པ་ནི་ལུས་ཀྱི་ལས་སོ། །ཕྱག་རྒྱ་ནི་དེས་མཚོན་པར་བྱེད་པས་སོ། །ལས་ཀྱི་ཕྱག་རྒྱ་དེ་ཡང་གསུམ་སྟེ། དྲག་པོའི་དབང་དང༌། དབང་བསྐུར་ངན་པ་དང༌། ཡང་དག་པའི་དབང་བསྐུར་རོ། །དེ་ལ་དྲག་པོའི་དབང་ནི་ཕྱི་རོལ་གྱིའོ་བྱེད་པ་དང་འཁྱུད་པ་ལ་སོགས་པའི་ཆའི་སྐབས་སུ་གཟུང་བ་དང་འཛིན་པའི་རྟོག་པ་ཡོད་པ་ལ་རྣམ་པ་སྣ་ཚོགས་ཀྱི་སྐད་ཅིག་མ་སྟེ་དགའ་བའོ། །དེ་ལ་སྲུབ་དང་བསྲུབ་པའི་སྦྱོར་བ་ལ་ཕྱི་གཟུང་བའི་རྟོག་པས་སྟོང་ལ་ནང་འཛིན་པའི་ཤེས་པ་ནི་རྣམ་པར་སྨིན་པའི་སྐད་ཅིག་མ་སྟེ་མཆོག་ཏུ་དགའ་བའོ། །བྱང་ཆུབ་ཀྱི་སེམས་ནོར་ངུའོ་གྲོང་དུ་ཕྱིན་པ་ལས་གཟུང་འཛིན་གྱིས་སྟོང་པའི་ཤེས་པ་ཡོངས་སུ་གྲུབ་པ་ནི་རྣམ་པར་ཉེད་པའི་སྐད་ཅིག་མ་སྟེ་དགའ་བྲལ་ལོ། །དེ་ནས་བྱང་ཆུབ་ཀྱི་སེམས་ལྟུང་བ་ལས་གཟུང་འཛིན་གྱི་ཤེས་པ་རྟོག་པ་དང་བཅས་པ་ནི་མཚན་ཉིད་དང་བྲལ་བའི་སྐད་ཅིག་མ་སྟེ། ལྷན་ཅིག་སྐྱེས་པའི་དགའ་བའོ། །འདིར་ཡང༌། བཞི་པ་དེ་ཡང་དེ་བཞིན་ནོ། །ཞེས་བྱ་བས་རྟོག་པ་དང་བཅས་པ་དང་མི་རྟོག་པ་དེ་བཞིན་ཉིད་དུ་ཤེས་པར་བྱའོ་ཞེ་ན། འོ་ན་དེ་ལྟ་ན། མཆོག་དང་དགའ་བྲལ་དབུས་སུ་ནི། །མཚོན་བྱ་ཤེས་ནས་བརྟག་པར་གྱིས། །ཞེས་གསུངས་པས་ནི་མཆོག་དགའ་དང་དགའ་བྲལ་གྱི་དབུས་སུ་ལྷན་ཅིག་སྐྱེས་པའི་དགའ་བ་མཚོན་ནས་འདོར་བའོ། །དེས་ན་ཁྱོད་ཀྱི་གཞུང་དང་འགལ་ལོ། །དེ་ཡང་དྲག་པོའི་གཞུང་གིས་འདི་ལྟར་འདོད་དེ། སྒྲའི་ངེས་པར་གཟུང་བ་དྲུག་པས་གཉིས་ཀྱི་བར་ནས་གང་གཙོ་བོར་གྱུར་པ་གཟུང་བ་སྟེ། མཆོག་དགའ་དང་དགའ་བྲལ་གཉིས་ཀྱི་ནང་ངམ་དབུས་ནས་གཙོ་བོར་གྱུར་བ་ནི་དགའ་བྲལ་ལོ། །དེ་བས་ན་དགའ་བྲལ་ཉིད་གཙོ་བོ་ཡིན་ཞེ་ན། མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ །ཞེས་གསུངས་པས་ལྷན་ཅིག་སྐྱེས་པ་ནི་མཆོག་དགའ་དང་དགའ་བྲལ་གཉིས་ཀྱི་དབུས་སུ་ཤེས་པར་བྱའོ། །ཡང་དྲག་པོའི་སྦྱོར་བའི་གཞུང་གིས་དེ་ལྟ་བུ་ནི་མ་ཡིན་ཏེ། འདི་ཡང་མཆོག་ཏུ་དགའ་བའི་མཐའ་མ་ལྷན་ཅིག་སྐྱེས་པ་ལ་ལྟོས་ནས་དང་པོ་དགའ་བྲལ་ཏེ། དེས་ན་དགའ་བྲལ་ཡང་ཡིན་ལ་དང་པོ་ཡང་ཡིན་ནོ་ཞེ་ན། ལྷན་ཅིག་སྐྱེས་པའི་རང་བཞིན་མཆོག །མཐའ་དགའ་དང་པོ་ཉིད་དང་ནི། །མུན་པ་ལ་ནི་མར་མེ་
ལྟར། །དེ་བཞིན་བུས་ཀྱང་ཡིད་ཆེས་གྱིས། །ཞེས་གསུངས་པ་ནི་ལྷན་ཅིག་སྐྱེས་པ་རྡོ་རྗེ་འཆང་གི་ངོ་བོ་སྟེ། དཔེར་ན་མར་མེས་མུན་བ་བཅོམ་ནས་གསལ་བར་བྱས་པ་བཞིན་དུ་མཚོན་བྱེད་དཔེའི་ལྷན་ཅིག་སྐྱེས་བས་མ་རིག་པའི་མུན་བ་བཅོམ་སྟེ། མཚོན་བྱ་དོན་གྱི་ལྷན་ཅིག་སྐྱེས་པ་གསལ་བར་བྱེད་པ་ནི་མཆོག་ཏུ་དགའ་བའི་མཐའ་མ་དགའ་བྲལ། དགའ་བྲལ་གྱི་དང་པོར་ལྷན་ཅིག་སྐྱེས་པ་ཤེས་པར་བྱའོ། །གཞན་ཡང༌། འཁྱུད་དང་འོ་བྱེད་ལ་སོགས་པ། །སྣ་ཚོགས་རྣམ་པས་སྣ་ཚོགས་བཤད། །རྣམ་པར་སྨིན་པ་དེ་ལས་བཟློག །བདེ་བའི་ཡེ་ཤེས་ཟ་བ་ཉིད། །བདག་གིས་བདེ་བ་ཟོས་བ་ཡི། །རོས་ནི་རྣམ་པར་ཉེད་པ་བརྗོད། །མཚན་ཉིད་བྲལ་བ་གསུམ་ལ་ལས་གཞན། །ཆགས་དང་ཆགས་བྲལ་རྣམ་པར་སྤངས། །ཞེས་གསུངས་པའི་ཚིག་གིས་ནི་གོང་དུ་གསུངས་པ་ལྷན་ཅིག་སྐྱེས་པ་ཟོས་པ་ནི་ཉམས་སུ་མྱོང་བ་སྟེ། ཕྱིས་བཞི་པ་དགའ་བྲལ་གྱི་དུས་ན་གྲོགས་ནི་གོང་མ་ལ་རྟོག་ཅིང་དཔྱོད་པ་སྟེ། རྟོག་པ་ཉིད་ཡིན་གྱིས་མི་རྟོག་པར་གྲུབ་པ་མ་ཡིན་ནོ། །ཡང་དྲག་པོའི་སྦྱོར་བའི་གཞུང་གིས་རྣམ་པར་ཉེད་པ་ཉིད་རྟོག་པ་དང་བཅས་པ་ཡིན་ཡང་གནོད་པར་མི་འགྱུར་ཏེ་བསྒྲུབ་པར་བྱ་བ་དགའ་བྲལ་ནི་མི་རྟོག་པ་ཡིན་ནོ་ཞེ་ན། འདི་སྐད་དུ། སྣ་ཚོགས་དང་པོ་དགའ་བ་ཉིད། །རྣམ་སྨིན་ལ་ནི་མཆོག་དགའ་ཉིད། །རྣམ་ཉེད་དགའ་བྲལ་དགའ་བ་ཉིད། །མཚན་བྲལ་ལྷན་ཅིག་སྐྱེས་པ་ཉིད། །ཅེས་གསུངས་པ་དེས་དགའ་བྲལ་ནི་རྣམ་པར་ཉེད་པའི་སྐད་ཅིག་མ་ཉིད་དུ་གསུངས་སོ། །རྣམ་པར་ཉེད་པ་རྟོག་པ་དང་བཅས་པ་ཡིན་པས་དགའ་བྲལ་ཡང་རྟོག་པ་དང་བཅས་པ་ཡིན་པར་ཤེས་པར་བྱའོ། །དེ་བཞིན་དུ་གཞན་ཡང༌། དང་པོར་དགའ་བ་འགྲོ་བའི་གཟུགས། །དེ་བཞིན་མཆོག་དགའ་འགྲོ་པ་ཉིད། །དགའ་བྲལ་དགའ་འགྲོ་བ་ཉིད། །གསུམ་པ་ལྷན་ཅིག་སྐྱེས་པ་མེད། །ཅེས་བྱ་བ་ཡང་གནོད་པ་སྟེ། འགྲོ་བ་ནི་འཁོར་བའོ། །འཁོར་བ་ནི་རྟོག་པའི་ངོ་བོ་འཁྲུལ་པ་ཡིན་པས་ན་དགའ་བྲལ་ཡང་རྟོག་པ་དང་བཅས་པ་ཉིད་དུ་ཤེས་པར་བྱའོ། །དེས་ན་དྲག་པོའི་གཞུང་གིས་བསྒྲུབ་བྱ་དགའ་བྲལ་ཉིད་ཀྱང་ཉམས་པར་འགྱུར་རོ། །དེས་ན་དགའ་བྲལ་གྱི་དགའ་བ་བརྒྱུད་ནས་གྲངས་ཀྱི་གསུམ་པ་ལ་
བཤད་ཀྱང་དོན་གྱིས་བཞི་པ་ལ་གོ་བར་བྱའོ། །ལྷན་ཅིག་སྐྱེས་པ་གྲངས་ཀྱི་བཞི་པ་ལ་བཤད་ཀྱང་དོན་གྱིས་གསུམ་པ་ལ་རིག་པར་བྱའོ། །འོ་ན་ཅིའི་ཕྱིར་རྒྱུད་དག་ལས་ཡང་དག་དབང་བསྐུར་གྱི་རིམ་པ་ལྷན་ཅིག་སྐྱེས་པ་གསུམ་པ་ལ་མ་བཤད་པ་ཅིའི་ཕྱིར་ཞེ་ན། དེ་ནི་མ་ཡིན་ཏེ། གླེགས་བམ་ལ་མཁས་པ་ཕྱི་རོལ་ལ་སོགས་པའི་མཁས་པ་རྣམས་བླ་མ་ལ་མི་ལྟོས་པར་སྒྲ་ཡིས་ཚིག་གཏན་ལ་ཕབ་སྟེ། ཚད་མའི་དོན་གཏན་ལ་ཕབ་ནས་སྔགས་ཀྱི་དོན་ཟབ་མོ་དབང་ཟ་བར་བྱེད་པ་དེ་རྣམས་དགག་པའི་ཕྱིར་རྒྱུད་དུ་དཀྲུགས་པའོ། །བླ་མ་ལ་མ་ལྟོས་ན་སྐྱོན་ཅིར་འགྱུར་ཞེ་ན། དེ་ཡང་འདི་སྐད་དུ། དངོས་གྲུབ་བླ་མའི་རྗེས་འབྲངས་གསུངས། །ཞེས་བྱ་བ་དང༌། བླ་མ་མཉེས་བྱས་ཡང་དག་འདོད་པ་བླ། །ཞེས་བྱ་བའི་ཚིག་གིས་སོ། །དྲག་པོའི་སྦྱོར་བ་དགག་པ་བསྟན་པའོ། །དེ་ནས་གཞན་ཡང་དབང་བསྐུར་ངན་པ་བསྟན་པར་བྱའོ། །དེ་ལ་ཕྱི་རོལ་གྱི་འོ་བྱེད་པ་དང་འཁྱུད་པ་ལས་གཟུང་བ་དང༌། འཛིན་པའི་རྟོག་པ་ཡོད་པ་ནི་རྣམ་པ་སྣ་ཚོགས་པའི་སྐད་ཅིག་མ་སྟེ་དགའ་བའོ། །དེ་ནས་པོ་ལ་དང་ཀཀྐོ་ལ་མཉམ་པར་སྦྱོར་བ་ལས་ཕྱི་གཟུང་བའི་རྟོག་པས་སྟོང་ལ་ནང་འཛིན་པའི་ངོ་བོ་ནི་རྣམ་པར་སྨིན་པའི་སྐད་ཅིག་མ་སྟེ་མཆོག་ཏུ་དགའ་བའོ། །རྡོ་རྗེ་ནོར་བུའི་དཀྱིལ་དུ་ཀུན་རྫོབ་ཀུནད་ལྟ་བུ་དོན་དམ་པ་བདེ་བའི་རང་བཞིན་གྱིས་ཁྱབ་པའོ། །བྱང་ཆུབ་སེམས་ཀྱིས་སླེབ་པར་གྱུར་པ་ལས་གཟུང་བ་དང་འཛིན་པ་སྟོང་པའི་སེམས་ཡོངས་སུ་གྲུབ་པར་རིག་པ་ཉིད་མཚན་ཉིད་དང་བྲལ་བའི་སྐད་ཅིག་མ་སྟེ་ལྷན་ཅིག་སྐྱེས་པའི་དགའ་བའོ། །དེ་ནས་བྱང་ཆུབ་སེམས་ཀྱི་ཁུ་བ་ལྷུང་བ་ལས་བདེ་བ་ཉམས་ཏེ་རྟོག་པ་དང་བཅས་པར་གྱུར་པ་ལས་གཟུང་འཛིན་ཤེས་པའི་རྣམ་པར་ཉེད་པའི་སྐད་ཅིག་མ་སྟེ། དགའ་བྲལ་གྱི་དགའ་བའོ། །བཞི་པ་དེ་ཡང་དེ་བཞིན་ནོ། །ཞེས་བྱ་བའི་བཞི་པ་དགའ་བྲལ་རྟོག་བཅས་དང་གསུམ་པ་ལྷན་ཅིག་སྐྱེས་པ་མི་རྟོག་པ་བཞིན་དུ་ཤེས་པར་བྱའོ་ཞེས་བྱ་བ་ནི་དེ་བཞིན་གཤེགས་པའི་དབུགས་དབྱུང་བ་སྟེ། ཟབ་མོ་བསྐྱེད་པའི་རིམ་པའོ། །དེ་བཞིན་གཤེགས་པའི་དབུགས་དབྱུང་བ་ཡང་རྣམ་པར་རིག་པ་ཙམ་དུ་འདོད་པ་སྟེ་དམན་པའོ། །དེ་ཅིའི་ཕྱིར་ཞེ་ན། ཕྱི་རོལ་པའི་གཞུང་
ཞི་བ་དང་རིག་བྱེད་པ་དང་མཐུན་པའི་ཕྱིར་རོ། །ཅི་ཞི་བ་ལ་སོགས་པ་ལ་འདི་ལྟ་བུ་ཡོད་དམ་ཞེ་ན། ཡོད་དེ། ཞི་བ་ངེས་པར་བསྒྲགས་པའི་ལྷ་མོས་ཞུས་པ་ཞེས་བྱ་བའི་རྒྱུད་ལས། ལྷ་མོ་རིན་ཆེན་གྲོང་ཁྱེར་འདིར། །པདྨའི་ཟེའུ་འབྲུར་ཞུ་བར་འགྱུར། །མཉམ་འདུས་དྲག་པོ་ཞི་བ་མཆོག །དེ་ཉིད་ནུས་པ་མཆོག་གི་མཆོག །ཅེས་བྱ་བ་ལ་སོགས་པ་དབང་བསྐུར་བར་ངེས་ནས་གསུངས་སོ། །དེ་བས་ན་མུ་སྟེགས་པ་དང་ཐུན་མོང་གི་གྲུབ་མཐའ་སྟེ། སངས་རྒྱས་པའི་གཞུང་ནི་མ་ཡིན་ནོ། །དེས་ན་དབང་བསྐུར་བའམ་དམན་པ་ཞེས་བྱའོ། །འོན་ཡང་དག་པ་མ་ཡིན་ན་ཅིའི་ཕྱིར་དེ་བཞིན་གཤེགས་པས་དབུགས་དབྱུང་བའི་དབང་བསྐུར་ངན་པ་བསྟན་ཞེ་ན་མ་ཡིན་ཏེ། འདི་ནི་སེམས་ཅན་བློ་དམན་པའི་ལས་དང་པོ་པ་དྲང་བའི་དོན་དུ་སྟོན་པའོ། །དེ་བས་ན་དྲང་བའི་དོན་ཡིན་གྱི་ངེས་པའི་དོན་ནི་མ་ཡིན་ནོ། །དེ་ནས་གཞན་ཡང་ངེས་པའི་དོན་ཡང་དག་པའི་དབང་བསྐུར་བའི་རིམ་བ་རྡོ་རྗེ་འཆང་གི་དབུགས་དབྱུང་བ་བསྟན་པར་བྱ་སྟེ། ཐོག་མར་ཕྱི་རོལ་གྱི་བྱ་བའོ་བྱེད་པ་དང་འཁྱུད་པ་ནས་བརྩམས་ཏེ་བོ་ལ་དང་ཀཀྐོ་ལ་མཉམ་པར་སྦྱོར་བའི་སྲུབ་པ་དང་བསྲུབ་པའི་སྦྱོར་བའི་དུས་སུ་གཟུང་བ་དང་འཛིན་པའི་རྟོག་པའི་ཤེས་པ་ནི་རྣམ་པ་སྣ་ཚོགས་པའི་སྐད་ཅིག་མ་སྟེ། དགའ་བ་དང་པོའོ། །དེ་ཡང་འདི་སྐད་དུ། ཨེ་ཡི་ཆ་བྱད་བཟང་པོ་གང༌། །དབུས་སུ་ཝཾ་གྱིས་རྣམ་པར་བརྒྱན། །བདེ་བ་ཐམས་ཅད་ཀྱི་ནི་གནས། །སངས་རྒྱས་རིན་ཆེན་ཟ་མ་ཏོག །ཅེས་གསུངས་པས། དགའ་བ་ཐམས་ཅད་ཆོས་ཀྱི་འབྱུང་གནས་སུ་ཤེས་པར་བྱ་བའི་ཕྱིར་འོ་བྱེད་འཁྱུད་པའི་བྱ་བ་གཅིག་པུ་ལ་དགའ་བ་ནི་མ་ཡིན་ནོ། །དེ་ཡང་འདོད་རྒྱལ་མ་ཡིན་ཏེ། ལུང་ལས་མདོར་བསྟན་པ་དང༌། རྒྱས་པར་བསྟན་པ་དང༌། རབ་ཏུ་རྒྱས་པར་བསྟན་པའོ། །དེ་ལ་མདོར་བསྟན་པ་ནི། འཁྱུད་དང་འོ་བྱེད་ལ་སོགས་པ། །སྣ་ཚོགས་རྣམ་པ་སྣ་ཚོགས་བཤད། །ཅེས་བྱ་བ་ནི་འཁྱུད་པ་དང་འོ་བྱེད་པ་ནས་བརྩམས་ཏེ། དེ་ལ་སོགས་པའི་སྒྲས་བྷ་ག་དང་ལིངྒ་མཉམ་པར་སྦྱོར་པས་སྲུབ་དང་བསྲུབ་པའི་སྦྱོར་བ་ནི་དགའ་བར་རིག་པར་བྱའོ། །འོ་ན་ཅི་སོགས་པའི་སྒྲའི་མཉམ་པར་སྦྱོར་བ་ཇི་ལྟར་རྟོགས་པར་བྱ་ཞེ་ན། རྟོགས་པར་བྱ་བའི་ཕྱིར་རྒྱས་པར་བཤད་པ། ཤེས་རབ་བཅུ་དྲུག་ལོན་
པ་ལ། །ལག་པ་གཉིས་ཀྱིས་ཡང་དག་འཁྱུད། །རྡོ་རྗེ་དྲིལ་བུ་མཉམ་སྦྱོར་བས། །སློབ་དཔོན་དབང་དུ་རབ་ཏུ་བརྗོད། །ཅེས་གསུངས་པས་སློབ་དཔོན་གྱི་དབང་ནི་དགའ་བ་དང་པོ་སྟེ། རྡོ་རྗེ་དྲིལ་བུ་མཉམ་སྦྱོར་བ། །ཞེས་བྱ་བ་ནི་བོ་ལ་དང་ཀཀྐོ་ལ་མཉམ་སྦྱོར་བའོ། །དེས་ན་དགའ་བ་དང་པོ་ཡང་མཉམ་པར་སྦྱོར་བ་ལས་རྟོགས་པར་བྱའོ། །འོ་ན་ཅི་དགའ་བ་དང་པོ་སྒྲུབ་པར་བྱེད་པ་ལ་སློབ་དཔོན་གྱི་དབང་གི་ཚིགས་སུ་བཅད་པས་ཇི་ལྟར་རྟོགས་པར་བྱ་ཞེ་ན། དེ་ཉིད་ཀྱི་ཕྱིར་རབ་ཏུ་རྒྱས་པར་བཤད་པ། སློབ་དཔོན་གསང་བ་ཤེས་རབ་དང༌། །བཞི་པ་དེ་ཡང་དེ་བཞིན་ནོ། །དབང་ནི་བཞི་ཡི་གྲངས་ཀྱིས་ནི། །དགའ་བ་ལ་སོགས་རིམ་ཤེས་བྱ། །ཞེས་གསུངས་པས། སློབ་དཔོན་གྱི་དབང་ནི་དགའ་བ་སྟེ། བོ་ལ་དང་ཀཀྐོ་ལ་མཉམ་པར་སྦྱོར་བ་ལབ་རིག་པར་བྱའོ། །འོ་ན་ཆུའི་དབང་ལ་སོགས་པ་སློབ་དཔོན་གྱི་དབང་དུ་བཤད་པ་དེ་དགོས་པར་མི་འགྱུར་རམ་ཞེ་ན་མ་ཡིན་ཏེ། དེ་ནི་ཕྱི་བསྐྱེད་པའི་རིམ་པ་སྟེ། རྫོགས་པའི་རིམ་པ་མ་ཡིན་ནོ། །དེ་ནས་བྱང་ཆུབ་ཀྱི་སེམས་ཀུན་རྫོབ་ཀུནདའི་ཁ་དོག་ལྟ་བུ་ལ་དོན་དམ་བདེ་བའི་རང་བཞིན་གྱིས་རྡོ་རྗེ་ནོར་བུའི་དཀྱིལ་ན་གནས་པ་ལ་གཟུང་བ་དང་འཛིན་པས་སྟོང་པའི་ཤེས་པ་རང་རིག་པ་ཡོངས་སུ་གྲུབ་པ་ཉམས་སུ་མྱོང་བ་ནི་རྣམ་པར་སྨིན་པ་སྐད་ཅིག་མ་ལ་མཆོག་ཏུ་དགའ་བ་འགྲུབ་པའོ། །དེ་ཡང་མདོར་བསྟན་པ་དང༌། རྒྱས་པར་བསྟན་པ་རྣམ་པ་གཉིས་ཀྱིས་རྟོགས་པར་བྱའོ། །དེ་ལ་མདོར་བསྟན་པ་ནི། རྣམ་པར་སྨིན་པ་དེ་ལས་བཟློག །བདེ་བའི་ཡེ་ཤེས་ཟབ་པ་ཉིད། །ཅེས་གསུངས་པས་རྣམ་པར་སྨིན་པ་དེ་ལས་བཟློག་པ་སྟེ། དེ་ཞེས་བྱ་བ་ནི་རྣམ་པ་སྣ་ཚོགས་ཏེ་གཟུང་འཛིན་ནོ། །གཟུང་འཛིན་ལས་བཟློག་པ་ནི་གཟུང་འཛིན་གྱིས་སྟོང་པ་ཡོངས་སུ་གྲུབ་པ་རང་རིག་པ་ནི་རྣམ་པར་སྨིན་པའི་སྐད་ཅིག་མ་སྟེ། མཆོག་ཏུ་དགའ་བའོ། །འོན་ཏེ་འདི་ཡང་རྣམ་པར་སྨིན་པའི་སྐད་ཅིག་མ་སྟེ། མཆོག་ཏུ་དགའ་བ་ནི་མ་ཡིན་ནོ་ཞེ་ན། མཆོག་ཏུ་དགའ་བ་རྟོགས་པར་བྱ་བའི་ཕྱིར་རྒྱས་པར་བཤད་པ། མཆོག་ཏུ་དགའ་བ་ཡང་དག་ཐོབ། །སྣ་ཚོགས་སྤངས་པའི་སྐད་ཅིག་ལ། །སྟོན་པས་སྨྲས་པ་སེམས་དཔའ་ཆེ། །བདེ་བ་ཆེན་པོ་རྣམ་པར་ཟུང༌། །ཞེས་གསུངས་པ་ནི་སྣ་ཚོགས་སྤངས་པ་ཡིན་ཏེ།
སྣ་ཚོགས་ནི་རྣམ་པ་སྣ་ཚོགས་སོ། །དེ་སྤངས་པའི་སྐད་ཅིག་མ་ནི་རྣམ་པར་སྨིན་པ་སྟེ་མཆོག་ཏུ་དགའ་བའོ། །ད་ནི་ལྷན་ཅིག་སྐྱེས་པ་བསྟན་པའི་ཕྱིར། རྒྱུད་ཆེན་སྒྱུ་འཕྲུལ་དྲ་བ་ལས། །བཅུ་དྲུག་ཕྱེད་ཕྱེད་ཐིག་ལེ་ཅན། །ཡན་ལག་མེད་པའི་རྩིས་ལས་འདས། །ཞེས་གསུངས་ཏེ། བདེ་བ་ཆེན་བོའི་འཁོར་ལོའི་ཡི་གེ་ཧཾ་འོད་དུ་ཞུ་ནས་བཅུ་དྲུག་གི་ཕྱེད་བརྒྱད། བརྒྱད་ཀྱི་ཕྱེད་ཐིག་ལེ་བཞི་སྟེ། གཉིས་ཀཀྐོ་ལར་ལྷུང་ནས། གཉིས་རིགས་ཀྱི་བདག་པོའི་ཁ་དང༌། མཛེས་མའི་སྤྱི་བོ་ན་མཉམ་པར་གནས་སོ། །དེ་ཡང་འདི་སྐད་དུ། གཉིས་གནས་གཉིས་ནི་མཉམ་པའི་དབུས། །རྡོ་རྗེ་ནས་ལྷུང་པདྨར་རེག །མི་བསྐྱོད་རྡོ་རྗེ་ནས་ལྷུང་བ། །རྡོ་རྗེ་པདྨ་ལ་རེག་པ། །རྒྱུ་ལ་འབྲས་བུས་རྒྱས་བཏབ་ཅིང༌། །འབྲས་བུ་ལ་ཡང་རྒྱུས་རྒྱས་གདབ། །འདི་ནི་བདེ་ཆེན་རྒྱལ་པོ་ཡིན། །ཞེས་གསུངས་པས་ཐིག་ལེ་གཉིས་ལྷུང་ནས་གཉིས་མཉམ་པར་གནས་ཏེ། དེ་ཡང་རིགས་ཀྱི་བདག་པོའི་ཁ་ན་གནས་པ་མི་བསྐྱོད་པ་སྟེ། རང་རིག་པ་ཉིད་ཉམས་སུ་མྱོང་བ་ནི་ཐབས་སོ། །མཛེས་མའི་སྤྱི་བོ་ན་གནས་པ་རྡོ་རྗེ་སེམས་དཔའ་སྟེ། སྟོང་པ་ཉིད་རང་བཞིན་མེད་པ་ནི་ཤེས་རབ་པོ། །འབྲས་བུ་རྡོ་རྗེ་སེམས་དཔས་རྒྱུ་མི་བསྐྱོད་པ་ལ་རྒྱས་བཏབ་བས་རྟག་པའི་མཐའ་བསལ་ནས་ཉམས་སུ་མྱོང་བ་ཉིད་རང་བཞིན་མེད་པར་བྱེད་དོ། །ཡང་མི་བསྐྱོད་པས་རྡོ་རྗེ་སེམས་དཔའ་ལ་རྒྱས་བཏབ་པས་ཆད་པའི་མཐའ་བསལ་ནས་རང་བཞིན་མེད་པ་ཉིད་ཉམས་སུ་མྱོང་བར་བྱེད་དོ། །དེ་ལྟར་ན་ཉམས་སུ་མྱོང་བ་དང༌། སྟོང་པ་ཉིད་ཟུང་དུ་འཇུག་པའོ། །དེ་ཉིད་ལ་རྡོ་རྗེ་སེམས་དཔའ་སྟོང་པ་ཉིད་དང་སྙིང་རྗེ་དང་ཐབས་དང་ཤེས་རབ་གཉིས་སུ་མེད་པ་ཞེས་བྱ་སྟེ། མཐའ་གཉིས་ལ་མི་གནས་པའོ། །དེ་ཉིད་གཞན་གྱིས་བསྒྲུབ་པའི་ཕྱིར་མདོར་བསྟན་པ་དང༌། རྒྱས་པར་བསྟན་པ་དང༌། རབ་ཏུ་རྒྱས་པར་བསྟན་པའོ། །བཅོ་ལྔ་ཆ་ཡི་བདག་ཉིད་ཀྱི། །ཟླ་བ་བྱང་ཆུབ་སེམས་སུ་འགྱུར། །བདེ་བ་ཆེན་པོ་ཨཱ་ལིའི་གཟུགས། །རྣལ་འབྱོར་མ་རྣམས་དེ་ཡི་ཆ། །ཞེས་གསུངས་པ་ནི་ཟླ་བ་ཡོངས་སུ་གང་བ་བཅུ་དྲུག་ལ་བཅོ་ལྔའི་ཡོན་ཏན་དང་ཡང་ལྡན་པས་ནི་བྱང་ཆུབ་ཀྱི་སེམས་མཚོན་ཏེ། བྱང་ཆུབ་ཀྱི་སེམས་བདེ་བ་ཆེན་པོ་སྟེ། ཨཱ་ལི་ཀཱ་ལའི་གཟུགས་སོ། །ཨཱ་ལི་ལས་ཡི་གེ་ཨ་ནི་རྗེ་བཙུན་ཀྱེའི་
རྡོ་རྗེའོ། །ལྷག་མ་བཅོ་ལྔ་ནི་ལྷ་མོ་རྣམས་ཀྱི་ས་བོན་ནོ། །དེས་ན་བཅུ་དྲུག་པའི་ཨཿནི་ཚེག་དྲག་སྟེ། ཐིག་ལེ་གཉིས་སུ་འགྱུར་རོ། །དེ་བས་ན་ཟླ་བ་ནི་བྱང་ཆུབ་ཀྱི་སེམས། བདེ་བ་ཆེན་པོ་ནི་ཨ་ལིའོ། །ཨཱ་ལི་བཅུ་དྲུག་པ་ནི་ཐིག་ལེ་གཉིས་གཉིས་སུ་ཤེས་པར་བྱའོ། །འོ་ན་ཅིའི་ཕྱིར་ཨཱ་ལི་བཅུ་དྲུག་ལ་རྗེ་བཙུན་ཀྱེའི་རྡོ་རྗེའི་རང་བཞིན་བདེ་བ་ཆེན་པོ་ཡིན་ཞེ་ན། དེ་ཉིད་གསལ་བར་བསྟན་པའི་ཕྱིར་རྒྱས་པར་བསྟན་པ། གང་ཕྱིར་བཅུ་དྲུག་ཆ་མེད་པ། །འབད་པས་ཀུན་གྱི་ལྷག་མ་སྤངས། །དོན་གྱི་བྱ་བ་མི་བྱེད་ཕྱིར། །ཞེས་གསུངས་ཏེ། ཨཱ་ལི་བཅོ་ལྔས་ལྷ་མོ་རྣམས་ཀྱི་ས་བོན་བྱེད་ལ་བཅུ་དྲུག་པའི་ཨཱ་ལི་ནི་སྐྱེ་བ་མེད་པ་སྟེ། དོན་གྱི་བྱ་བའམ་འགག་པ་མེད་དོ། །དེས་ན་སྐྱེ་བ་མེད་པ་ནི་རྗེ་བཙུན་ཀྱེའི་རྡོ་རྗེའོ། །དེ་ནས་རྗེ་བཙུན་ཀྱེའི་རྡོ་རྗེ་ཉིད་ཀྱིས་ཐིག་ལེ་གཉིས་སུ་ཇི་ལྟར་ཤེས་ཤེ་ན། གཉིས་སུ་བསྒྲུབ་པར་བྱ་བའི་ཕྱིར་རབ་ཏུ་རྒྱས་པར་བསྟན་པ། མཆོག་གི་མཐའ་དང་དགའ་བྲལ་དབུས། །སྟོང་དང་སྟོང་མིན་ཧེ་རུ་ཀ །ཞེས་གསུངས་སོ། །དེ་བས་ན་མཆོག་ཏུ་དགའ་བ་དང༌། དགའ་བྲལ་གྱི་དབུས་སུ་རྗེ་བཙུན་ཧེ་རུ་ཀ་ནི་ཀྱེའི་རྡོ་རྗེ་ཐིག་ལེ་གཉིས་སོ། །འོ་ན་སྟོང་པའི་སྒྲས་ཐིག་ལེ་ཇི་ལྟར་ཤེས་ཤེ་ན། དེ་ཡང་སྔགས་བཏུ་བའི་ལེའུ་ལས། ཨུཤྨ་རྣམས་ཀྱི་བཞི་པ་ལ། །རྡོ་རྗེ་མཁའ་འགྲོ་མ་ཡིས་བརྒྱན། །སྟོང་པས་མནན་ཅིང་སུམ་འགྱུར་ཉིད། །ཅེས་གསུངས་པས་ཨུཤྨའི་བཞི་པ་ནི་ཧའོ། །རྡོ་རྗེ་མཁའ་འགྲོ་མ་ནི་ཨཱུའོ། །སྟོང་པས་མནན་པ་ནི་ཐིག་ལེའོ། །དེ་བས་ན་ཐིག་ལེ་གཉིས་ནི་སྟོང་པ་དང་སྟོང་པ་མ་ཡིན་པ་སྟེ། དངོས་པོ་མ་ཡིན་པ་སྟོང་པ་ནི་རྡོ་རྗེ་སེམས་དཔའི་ཐིག་ལེའི་རྒྱ་དང་ལྡན་པའོ། །སྟོང་པ་མ་ཡིན་པ་ནི་མི་བསྐྱོད་པའི་ཐིག་ལེའི་རྒྱ་དང་ལྡན་པའོ། །དེ་བས་ན་ཟུང་དུ་འཇུག་པ་སྟེ་ཧེ་རུ་ཀའོ། །དེ་ཡང་འདི་སྐད་དུ། ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སྩོགས་སྟོང་པ་ཉིད། །རུ་ནི་ཚོགས་དང་བྲལ་བ་ཉིད།། ཀ་ནི་གང་དུའང་མི་གནས་པའོ། །ཞེས་གསུངས་སོ། །དེས་ན་ཤྲཱི་ནི་གཉིས་སུ་མེད་པ་སྟེ། །དེ་ནི་ཧེ་རུ་ཀའོ། །ཧེ་ནི་ཧེ་ཏུ་ཡོ་ག་ཞེས་བྱ་སྟེ། རྒྱུ་མེད་པས་ན་མ་སྐྱེས་པའོ། །རུ་ནི་རུ་པ་ཀ་ཞེས་བྱ་སྟེ། རང་བཞིན་མེད་པའམ། རྣམ་པར་རྟོག་པའི་ཚོགས་དང་བྲལ་བའོ། །ཀ་ནི་ཀ་ཀོ་ཏི་སྟི་ཞེས་བྱ་
སྟེ། རྟག་ཆད་ལ་སོགས་པའི་མཐའ་གང་ལ་ཡང་མི་གནས་པའོ། །དེ་ལྟ་བུའི་ཟུང་དུ་འཇུག་པ་གཉིས་སུ་མེད་པའི་མཚན་ཉིད་དང་བྲལ་བའི་སྐད་ཅིག་མ་ལ་ལྷན་ཅིག་སྐྱེས་པའོ། །དེ་ནས་བྱང་ཆུབ་ཀྱི་སེམས་ཁུ་བ་ལྟུང་བར་གྱུར་པ་ལས་བདེ་བ་ཉམས་པ་སྟེ། གཟུང་འཛིན་གྱི་རྟོག་པ་དང་བཅས་བར་གྱུར་པ་ལ་རྣམ་པར་ཉེད་པའི་སྐད་ཅིག་མ་སྟེ། དགའ་བྲལ་གྱི་དགའ་བའོ། །དགའ་བྲལ་ནི་དགའ་བ་རྟོག་པ་དང་བཅས་པ་དང༌། ལྷན་ཅིག་སྐྱེས་པ་མི་རྟོག་པ་གཉིས་གཉིས་སུ་མེད་པར་བསྟན་པའི་ཕྱིར། བཞི་པ་དེ་ཡང་དེ་བཞིན་ནོ། །ཞེས་གསུངས་པས་བཞི་པ་ནི་དགའ་བྲལ་ལོ། །དེ་ཞེས་བྱ་བ་ནི་ལྷན་ཅིག་སྐྱེས་པའོ། །ཡང་ཞེས་བྱ་བ་ནི་དགའ་བྲལ་གྱི་དགའ་བའོ། །རྟོག་པ་དང་བཅས་པ་དང་རིགས་པས་དཔྱད་ན་མཐའ་བཞི་ལས་གྲོལ་བ་མི་རྟོག་པར་བསྡུ་བར་བྱའོ། །དེ་བཞིན་ནོ་ཞེས་བྱ་བ་ནི་དགའ་བྲལ་གྱི་དགའ་བ་རྟོག་པ་དང་བཅས་པ་ཡང་ལྷན་ཅིག་སྐྱེས་པ་མི་རྟོག་པ་བཞིན་དུ་ཤེས་པར་བྱའོ། །དེ་བས་ན་རྟོག་པ་དང་མི་རྟོག་པ་གཉིས་ནི་ཐ་མི་དད་པར་ཤེས་པར་བྱའོ། །རྡོ་རྗེ་འཆང་གི་དབུགས་དབྱུང་བ་རྫོགས་པའི་རིམ་པའོ། །ལས་ཀྱི་ཕྱག་རྒྱའི་དགའ་བ་རྣམས་ལྷན་ཅིག་སྐྱེས་པར་རོ་གཅིག་སྟེ། དེ་ཡང་འདི་སྐད་དུ། དགའ་བ་ཆེན་པོ་གཅིག་ཉིད་ལ། །ཕྱེ་བས་རྣམ་བ་བཞི་རུ་འགྱུར། །ཞེའོ། །དེ་བས་ན་དགའ་བ་རྣམས་ནི་ངོ་བོ་གཅིག་པ་སྟེ། མ་རྟོགས་པའི་གང་ཟག་ལ་དེ་རྟོགས་པར་བྱ་བའི་ཕྱིར་ལས་ཀྱི་ཕྱག་རྒྱ་བསྟན་པ་ལས་བདེ་བ་མི་རྟོག་པ་སྐྱེས་པ་དང་རྟོགས་པ་སྟོང་པའི་སེམས་ཀྱི་ཁྱད་པར་གྱི་སྐད་ཅིག་མ་སྟེ། སྐད་ཅིག་མས་ཕྱེ་བས་དགའ་བ་བཞིའོ། །དེས་ན་དགའ་བ་ཐམས་ཅད་སྐད་ཅིག་སྟེ། རྒྱུ་མཐུན་པའི་འབྲས་བུ་ཞེས་བྱའོ། །དཔེ་ལས་ཀྱི་ཕྱག་རྒྱ་མདོར་བསྡུས་ཏེ་བསྟན་པའོ། །ལས་ཀྱི་ཕྱག་རྒྱ་བཅོས་མ་ལས་མ་བཅོས་པའི་ཕྱག་རྒྱ་ཆེན་པོ་མི་འབྱུང་སྟེ། དྲ་བའི་རྒྱུ་ལས་འདྲ་བའི་འབྲས་བུ་འབྱུང་སྟེ། མེ་འདྲ་བ་ལས་མ་ཡིན་པ་བཞིན་དུ་ཆོས་ཀྱི་ཕྱག་རྒྱ་མ་བཅོས་པ་ལས་ཕྱག་རྒྱ་ཆེན་པོ་འབྱུང་གི །བཅོས་མ་ལས་ཀྱི་ཕྱག་རྒྱ་ལས་ནི་མ་ཡིན་ནོ། །དེ་ཡང་འདི་སྐད་དུ། མི་ཡི་ཕྱག་རྒྱ་དང་གིས་འཇིག །དེ་ཡི་ཡེ་ཤེས་ཀྱང་ནི་འཇིག །ཅེས་གསུངས་སོ། །དེས་ན་ལས་ཀྱི་ཕྱག་རྒྱ་ལས་ནི་མ་ཡིན་ནོ། །དེ་ནས་གཞན་ཡང་ཆོས་ཀྱི་
ཕྱག་རྒྱ་བསྟན་པར་བྱ་སྟེ། དེ་ལ་ཆོས་ཀྱི་ཕྱག་རྒྱའི་རང་གི་ངོ་བོ་ནི་ཆོས་ཀྱི་ཕུང་པོ་དང་ཁམས་དང༌། སྐྱེ་མཆེད་ལ་སོགས་པ་འགྲོ་བ་སྣ་ཚོགས་ཡིན་ལ། ཕྱག་རྒྱ་ནི་དེ་དག་གི་རང་བཞིན་ལྷན་ཅིག་སྐྱེས་པ་ལས་མ་འདས་པའོ། །དེ་ལ་རེ་ཞིག་དཔེ་ལས་ཀྱི་ཕྱག་རྒྱ་ལ་དགའ་བ་བཞི་བསྟན་པ་བཞིན་དུ་ལམ་ཆོས་ཀྱི་ཕྱག་རྒྱ་ལ་ཡང་དགའ་བ་བཞིར་ཤེས་པར་བྱའོ། །དེ་ལ་དགའ་བ་བཞི་ནི་དཔེ་ལས་ཀྱི་ཕྱག་རྒྱ་ལས་སྐད་ཅིག་མ་གསུམ་པ་ལ་མཚོན་བྱེད་དཔེའི་ལྷན་ཅིག་སྐྱེས་པ་ཉམས་སུ་མྱོང་བ་ཇི་ལྟ་བ་དེས་མཚོན་བྱ་དོན་གྱི་ལྷན་ཅིག་སྐྱེས་པ་སྟེ། དེ་འདི་སྐད་དུ། ལྷ་དང་མི་ཡི་བདེ་བ་ཡིས། །བསྡུས་བྱས་རྡོ་རྗེ་འཛིན་པ་ཡི། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པས་ལས་ཀྱི་ཕྱག་རྒྱ་ལས་མཚོན་བྱེད་དཔེའི་ལྷན་ཅིག་སྐྱེས་པ་ཉམས་སུ་མྱོང་བ་ལས་ཁྱད་པར་དུ་འཕགས་པའི་མཚོན་བྱ་དོན་གྱི་ལྷན་ཅིག་སྐྱེས་པའི་ཡེ་ཤེས་མི་རྟོག་པ་གཉིས་སུ་མེད་པ་ཉིད་རྐྱེན་ལས་དང་མ་རིག་པའི་སྟོབས་ཀྱིས་མ་རྟོགས་ཀྱང་ལྷན་ཅིག་སྐྱེས་པ་དེ་ཉིད་འགྲོ་བ་སྣ་ཚོགས་ཀྱི་རང་བཞིན་དུ་སྣང་གི །དེ་ལས་གཞན་པ་རྣམས་མ་ཡིན་པར་ཤེས་པ་ནི་རྣམ་པ་སྣ་ཚོགས་པའི་སྐད་ཅིག་མ་ལ་དགའ་བའོ། །དེས་ན། འཁོར་བ་སྤངས་ནས་གཞན་དུ་ནི། །མྱ་ངན་འདས་པ་ཐོབ་མི་འགྱུར། །ཞེས་གསུངས་པས། འགྲོ་བ་སྤངས་པའི་ཕ་རོལ་ནས་ལྷན་ཅིག་སྐྱེས་པ་རྙེད་པར་མི་འགྱུར་ཏེ། འགྲོ་བའི་རང་བཞིན་ཡོངས་སུ་ཤེས་ན་དེ་ཉིད་ལྷན་ཅིག་སྐྱེས་པ་ཡིན་པས་ན་འགྲོ་བར་འཛིན་པའི་ཞེན་པ་སྤང་བའི་ཕྱིར་འགྲོ་བའི་རང་བཞིན་ལྷན་ཅིག་སྐྱེས་པར་ཤེས་ནས་དེ་བཞིན་ཉིད་ལ་གོམས་པར་བྱས་ན་གོམས་པ་རབ་ཀྱི་མཐར་ཕྱིན་པ་ཙམ་ན་འགྲོ་བ་སྣ་ཚོགས་ཀྱི་ཞེན་པ་སྤངས་ནས་ཐམས་ཅད་ལྷན་ཅིག་སྐྱེས་པར་རྟོགས་པ་ནི་རྣམ་པར་སྨིན་པའི་སྐད་ཅིག་མ་ལ་མཆོག་ཏུ་དགའ་བའོ། །འགྲོ་བ་སྣ་ཚོགས་ཀྱི་ཞེན་པ་སྤངས་ཀྱང་ལྷན་ཅིག་སྐྱེས་པའི་འཛིན་པའི་ཞེན་པ་ཕྲ་མོ་ཡོད་པས་དེ་ཡང་ཁྱད་པར་མ་དམིགས་ན་དཔེར་ན་ལྕགས་ལས་བྱས་པའི་སྒྲོག་དང༌། གསེར་ལས་བྱས་པའི་སྒྲོག་གཉིས་རྒྱུ་ལ་ཁྱད་པར་ཡོད་ཀྱང་འཆིང་བ་ལ་ཁྱད་པར་མེད་དོ། །དེ་བཞིན་དུ་ཐ་མལ་པའི་འགྲོ་བ་སྣ་ཚོགས་སུ་འཛིན་པའི་རྟོག་པ་དང༌། གྱ་ནོམ་པ་ལ་ལྷན་
ཅིག་སྐྱེས་པ་ཙམ་དུ་འཛིན་པའི་རྟོག་པ་ལ་བཟང་རྟོག་ངན་རྟོག་ཁྱད་པར་ཡོད་ཀྱང་ཞེན་པའི་རྣམ་པར་རྟོག་པའི་ཟུག་རྔུའི་རང་བཞིན་དུ་ཁྱད་པར་མེད་པས་ལྷན་ཅིག་སྐྱེས་པ་ཉིད་དུ་འཛིན་པའི་ཞེན་པ་ལ་འཇུག་པ་ལས་སླར་ལྡོག་པར་བྱ་སྟེ། ཡང་དག་ཏུ་ན་འགྲོ་བ་སྤང་བར་བྱ་བའམ། ལྷན་ཅིག་སྐྱེས་པ་བསྒྲུབ་པར་བྱ་བར་མ་གྲུབ་སྟེ། འགྲོ་བ་སྤངས་པ་ལས་ལྷན་ཅིག་སྐྱེས་པ་གཞན་མ་ཡིད་ནོ། །མ་རྟོགས་པའི་བློ་ལ་ཐ་དད་དུ་སྣང་ཡང་རྟོགས་ན་འགྲོ་བ་ཉིད་ལྷན་ཅིག་སྐྱེས་པ་ཉིད་འགྲོ་བའོ། །དེ་ལྟར་འགྲོ་པ་དང་ལྷན་ཅིག་སྐྱེས་པ་གཉིས་ཀྱི་ཞེན་པ་སྤངས་ཏེ་གཉིས་སུ་མེད་པའི་ཤེས་པ་ཟུང་དུ་འཇུག་པ་ནི་མཚན་ཉིད་དང་བྲལ་བའི་སྐད་ཅིག་མ་ལ་ལྷན་ཅིག་སྐྱེས་པའི་དགའ་བའོ། །དེ་ལྟར་མཉམ་པར་གཞག་པའི་ཤེས་པ་ལ་གཉིས་སུ་མེད་ཀྱང་རྗེས་ལས་ཐོབ་པ་ལ་སྣ་ཚོགས་ཀྱི་རྟོག་པ་གཟུང་བ་དང་འཛིན་པ་དང་བཅས་པ་ནི་རྣམ་པར་ཉེད་པའི་སྐད་ཅིག་མ་ལ་དགའ་བྲལ་ལོ། །མཉམ་པར་གཞག་པའི་ཤེས་པ་དང༌། རྗེས་ལ་ཐོབ་པའི་ཤེས་པ་གཉིས་སུ་བསྟན་པའི་ཕྱིར། བཞི་པ་དེ་ཡང་དེ་བཞིན་ནོ། །ཞེས་བྱ་བ་ལ། བཞི་པ་ཞེས་བྱ་བ་ནི་དགའ་བྲལ་དང་རྗེས་ཐོབ་པོ། །དེ་ནི་ལྷན་ཅིག་སྐྱེས་པ་སྟེ། མཉམ་པར་གཞག་པའི་ཤེས་པའོ། །ཡང་ན་རྗེས་ཐོབ་ཀྱི་རྟོག་པ་ཉིད་མཐའ་བཞི་ལས་གྲོལ་བ་སྟེ། རང་བཞིན་མེད་པའོ། །དེ་བཞིན་ནོ་ཞེས་བྱ་བ་ནི་རྗེས་ཐོབ་ཀྱི་རྟོག་པ་ཡང་མཉམ་གཞག་གི་རྟོག་པ་བཞིན་ནོ། །དེ་བས་ན་མཉམ་གཞག་དང་རྗེས་ཐོབ་གཉིས་སུ་མེད་དེ་ཟུང་དུ་འཇུག་པའོ། །ཆོས་ཀྱི་ཕྱག་རྒྱའི་དགའ་བ་བཞི་ཡང་དགོངས་པ་སྔ་མ་བཞིན་དུ་དགའ་བ་རྣམས་གཅིག་གི་ངོ་བོ་སྟེ། རྣམ་པར་སྨིན་པའི་འབྲས་བུའོ། །དེ་ཡང༌། རྒྱུ་ཆུང་འབྲས་བུ་ཆེ་བའི་ཕྱིར། །རྣམ་པར་སྨིན་པ་རྗེས་སུ་བརྗོད། །ཅེའོ། །དེ་བས་ན་རྒྱུ་ལས་ཀྱི་ཕྱག་རྒྱ་བས་དགའ་བ་ཆུང་ལ་འབྲས་བུ་ཕྱག་རྒྱ་ཆེན་པོ་ཐོབ་ཏུ་རུང་བས་ནི་རྣམ་པར་སྨིན་པའི་འབྲས་བུ་སྟེ། རྣམ་པར་སྨིན་པའི་སྐད་ཅིག་མ་ལ་མཆོག་ཏུ་དགའ་བ་ཞེས་བྱའོ། །ལམ་ཆོས་ཀྱི་ཕྱག་རྒྱ་ཡོངས་སུ་རྫོགས་པའི་རིམ་པ་མདོར་བསྡུས་ཏེ་བསྟན་པའོ། །ཆོས་ཀྱི་ཕྱག་རྒྱ་ཡང་ལས་ཀྱི་ཕྱག་རྒྱ་ལ་ལྟོས་ན་མ་བཅོས་པ་ཡིན་ལ། ཕྱག་རྒྱ་ཆེན་པོ་ལ་ལྟོས་ན་བཅོས་མ་ཡིན་ཏེ། དགག་པ་དང་སྒྲུབ་པ་
དང་བཅས་པ་སྟེ་བཅོས་མའོ། །གཞན་ཡང་དཔེ་ལས་ཀྱི་ཕྱག་རྒྱ་ལས་མཚོན་བྱེད་དཔེའི་ལྷན་ཅིག་སྐྱེས་པ་ཉམས་སུ་མྱོང་བ་ཡང་མཚོན་བྱ་དོན་གྱི་ལྷན་ཅིག་སྐྱེས་པ་ཉམས་སུ་མྱོང་བ་མེད་པས་ན་ཕྱག་རྒྱ་ཆེན་པོ་སྒྲུབ་པའི་ཡན་ལག་མ་ཡིན་ནོ། །ད་ནི་ཕྱག་རྒྱ་ཆེན་པོ་ཉིད་བསྟན་པར་བྱ་སྟེ། ཕྱག་རྒྱ་ཆེན་པོའི་རང་གི་ངོ་བོའི་ཕྱག་རྒྱ་ནི་མི་འདའ་བས་ན་ཕྱག་རྒྱ་སྟེ། དཔེར་ན་འཁོར་ལོས་སྒྱུར་བའི་རྒྱལ་པོ་ཆེན་པོའི་བཀའ་རྟགས་ཀྱི་ཕྱག་རྒྱ་ལས་མཐའ་ཁོབ་ཀྱི་རྒྱལ་ཕྲན་དང་བློན་པོ་གང་གིས་ཀྱང་འདའ་མི་ནུས་པ་བཞིན་དུ། ཕྱི་ནང་གི་ཆོས་སྣ་ཚོགས་པ་རྣམས་ཕྱག་རྒྱ་ཆེན་པོ་ལྷུན་གྱིས་གྲུབ་པའི་ཡེ་ཤེས་ཟུང་དུ་འཇུག་པའི་ངོ་བོ་ལས་མི་འདའ་བས་ན་ཕྱག་རྒྱ་ཡིན་ལ། ཆེན་པོ་ནི་ལས་ཀྱི་ཕྱག་རྒྱ་དང༌། ཆོས་ཀྱི་ཕྱག་རྒྱ་དང༌། དམ་ཚིག་གི་ཕྱག་རྒྱ་གསུམ་གྱི་ངོ་བོ་ཡིན་པས་ན་ཆེན་པོའོ། །ཅི་ཕྱག་རྒྱ་ཆེན་པོ་ལ་ཡང་དགའ་བ་བཞིར་དབྱེའམ་ཅི་ཞེ་ན། དེ་ནི་མ་ཡིན་ཏེ། ཕྱག་རྒྱ་གསུམ་ལ་དགའ་བ་བཞིར་དབྱེའི་ཕྱག་རྒྱ་ཆེན་པོ་ལ་མ་ཡིན་ནོ། །དེ་ཅིའི་ཕྱིར་ཞེ་ན། ཕྱག་རྒྱ་ཆེན་པོ་ནི་དྲི་མ་དང་བྲལ་བའི་འབྲས་བུ་སྟེ། དེ་བས་ན་སྐད་ཅིག་མ་གསུམ་དྲི་མ་དང་བཅས་པ་འདིར་མི་འབྱུང་བས་དེས་ཕྱེ་བའི་དགའ་བ་གསུམ་ཡང་འདིར་མི་འབྱུང་ངོ༌། །དེས་ན་དགའ་བ་བཞིར་མི་དབྱེའོ། །རྒྱུ་མཚན་ཡང་ཕྱག་རྒྱ་ཆེན་པོ་ནི་འབྲས་བུ་ལམ་དུ་བྱེད་པའོ། །འབྲས་བུ་ནི་ཕྱག་རྒྱ་ཆེན་པོ་སྟེ། དངོས་པོའི་དེ་ཁོ་ན་ཇི་ལྟ་བར་རྟོག་པ་དེ་ཉིད་དེ། དེ་ལ་དགག་པ་དང་སྒྲུབ་པ་མེད་དེ། དེ་བས་ན་དགའ་བ་བཞི་རུ་མི་དབྱེའོ། །དེ་ཡང་འདི་སྐད་དུ། སྐད་ཅིག་གཅིག་གིས་རྫོགས་སངས་རྒྱས། །ཞེས་གསུངས་པས་གང་གི་ཚེ་མ་རྟོགས་ན་འཁོར་བ་ཡིན་ལ། རྟོགས་ན་དེ་ཉིད་ཕྱག་རྒྱ་ཆེན་པོ་ཡིན་ལ་དགག་བྱ་དང་བསྒྲུབ་བྱ་མེད་དོ། །དེས་ན་དགའ་བ་བཞི་རུ་དབྱེ་བ་ནི་མ་ཡིན་ནོ། །དེ་ལ་ཕྱག་རྒྱ་ཆེན་པོ་ནི་གཉེན་པོ་དང༌། དེ་ཁོ་ན་ཉིད་དང༌། འབྲས་བུ་གསུམ་ལ་རེ་བ་མེད་པའོ། །དེ་ལ་གཉེན་པོ་ལ་རེ་བ་མེད་པ་ནི་མི་མཐུན་པའི་ཕྱོགས་སེར་སྣ་དང༌། འཆལ་བའི་ཚུལ་ཁྲིམས་དང༌། ཁོང་ཁྲོ་དང༌། ལེ་ལོ་དང༌། རྣམ་པར་གཡེང་བ་དང༌། མ་རིག་པ་སྤང་བའི་ཕྱིར་གཉེན་པོའི་ཕྱོགས་ཕ་རོལ་ཏུ་ཕྱིན་པ་དྲུག་གིས་སྤང་བྱ་སྤོང་བྱེད་གང་ལ་ཡང་ཞེན་པ་མེད་པའོ། །
དེ་ཁོ་ན་ཉིད་ལ་རེ་བ་མེད་པ་ནི་དེ་ཁོ་ན་གང་གིས་ཐར་བ་དང༌། ཐམས་ཅད་མཁྱེན་པ་ཐོབ་པར་བྱེད་དོ་སྙམ་པའི་ཞེན་པ་མེད་པའོ། །འབྲས་བུ་ལ་རེ་བ་མེད་པ་ནི་འཁོར་བ་ལས་གཞན་པའི་ཕྱག་རྒྱ་ཆེན་པོ་ཐོབ་པར་འགྱུར་རོ་སྙམ་དུ་སེམས་པའི་ཞེན་པའི་རྟོག་པ་མེད་པ་ནི་ཕྱག་རྒྱ་ཆེན་པོ་སྟེ། དེ་ཉིད་དོན་ལྔ་དང་ལྡན་པའོ། །ལྔ་ནི་ངོ་བོ་ཉིད་ཀྱིས་མ་སྐྱེས་པ་དང༌། རང་བཞིན་མེད་པ་དང༌། ཐམས་ཅད་དུ་ཁྱབ་པ་དང༌། མི་འགྱུར་བ་དང༌། དུས་ཐམས་ཅད་པའོ། །དེ་ལ་ངོ་བོ་ཉིད་ཀྱིས་མ་སྐྱེས་པ་ནི་ཆོས་ཐམས་ཅད་སེམས་ལས་ཕྱི་རོལ་གྱི་དོན་ལོགས་སུ་མ་གྲུབ་པ་སྟེ། རིགས་པས་བརྟགས་ན་ཕྱིའི་དོན་གཅིག་ཀྱང་ཡོད་པ་མ་ཡིན་ནོ། །འོ་ན་སྣང་བ་ཅིའི་ཕྱིར་ཞེ་ན། སེམས་ཉིད་ལས་དང་མ་རིག་པའི་དབང་གིས་སྣ་ཚོགས་སུ་སྣང་ངོ༌། །དེས་ན་སེམས་ལས་གཞན་པ་ཕྱི་རོལ་གྱི་དོན་ཡོད་པ་མ་ཡིན་ཏེ། སེམས་ཉིད་རབ་ཏུ་སྣང་བའོ། །སེམས་ཉིད་ཀྱང་ཡང་དག་པར་བརྟགས་ན་རང་རིག་པ་ཉམས་སུ་མྱོང་བ་ཉིད་རྐྱེན་གཞན་ལ་རག་ལས་ནས་རྟེན་ཅིང་འབྲེལ་པར་འབྱུང་སྟེ་སྐྱེ་བའི་ཕྱིར་ཡང་དག་པར་ན་ངོ་བོ་ཉིད་ཀྱིས་མ་སྐྱེས་པའོ། །དེ་ཡང༌། གང་གི་རྐྱེན་ལས་སྐྱེས་པ་དེ་མ་སྐྱེས། །དེ་ལས་སྐྱེས་པའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པ་སྟེ། །གང་གིས་སྟོང་ཉིད་ཤེས་དེ་བག་ཡོད་ཡིན། །ཞེས་གསུངས་པས་སེམས་ཉིད་ཀྱང་རྐྱེན་གཞན་ལ་རག་ལས་ནས་ཉམས་སུ་མྱོང་བ་སྐྱེ་བས་ན་རང་གི་ངོ་བོས་མ་སྐྱེས་པའོ། །གཞན་ཡང་ཡོད་པ་དང་མེད་པ་གཉིས་ཀ་ལས་སྐྱེ་བ་མི་འཐད་དོ། །ཡོད་པ་སྐྱེ་ན་སྔར་སྐྱེས་པ་ཡང་སྐྱེ་ལ། མེད་པ་སྐྱེ་ན་ནམ་མཁའི་མེ་ཏོག་ཀྱང་སྐྱེ་བར་ཐལ་བས་སོ། །དེ་བས་ན་མ་སྐྱེས་པ་ནི་ངོ་བོ་ཉིད་ཀྱི་སྐྱེ་བ་ཡོད་པ་མ་ཡིན་ནོ། །རང་བཞིན་མེད་པ་ནི་ཡོད་པ་དང་མེད་པ་དང༌། གཉིས་ཀ་དང༌། གཉིས་ཀ་མེད་པའི་ངོ་བོར་མི་གནས་པའོ། །དེ་ལ་ཡོད་པ་མ་ཡིན་པ་ནི་གཅིག་དང་དུ་མ་ལ་སོགས་པའི་རིགས་བས་བརྟགས་ན་གང་གི་ངོ་བོར་ཡང་མ་གྲུབ་པ་ཉིད་དོ། །མེད་པ་མ་ཡིན་པ་ནི་ཉམས་སུ་མྱོང་བ་ཡོད་པའི་ཕྱིར་དང༌། མེད་པའི་དགག་བྱ་གྲུབ་པའོ། །གཉིས་ཀ་མ་ཡིན་པ་ནི། ཡོད་པའི་དངོས་པོ་ཉིད་ལ་རང་བཞིན་མེད་དེ། དེ་ལས་གཞན་པའི་མེད་པ་མི་འགྲུབ་ལ། རང་བཞིན་མེད་པ་མ་གྲུབ་པ་ཉིད་སྣང་གི །རིགས་པས་གྲུབ་པ་སྣང་བ་ནི་མ་ཡིན་ནོ། །དེས་ན་སྣང་བ་
ཉིད་སྟོང་པ་ཡིན་ལ་སྟོང་པ་ཉིད་སྣང་བའོ། །གཉིས་ཀ་མེད་པ་མ་ཡིན་པ་ནི་གཉིས་མ་གྲུབ་པས་ན་གཉིས་སུ་མེད་པ་ཉིད་ཀྱང་མ་ཡིན་ནོ། །ཐམས་ཅད་དུ་ཁྱབ་པ་ནི་ཆོས་ཐམས་ཅད་དེའི་ངོ་བོ་ལས་མ་འདས་ཏེ། འཁོར་བ་དང་མྱ་ངན་ལས་འདས་པ་གཅིག་པའི་ངང་བཞིན་ཏེ་ཐ་མི་དད་དོ། །དཔེར་ན་རྒྱ་མཚོ་ཆེན་པོ་ལ་རླབས་དུ་མ་སྣང་ཡང་གཞི་རྒྱ་མཚོ་ཆེན་པོའི་ཆུའི་རང་བཞིན་དུ་རོ་གཅིག་གོ །དེ་བཞིན་དུ་ཆོས་སྣ་ཚོགས་དུ་མར་སྣང་ཡང་དོན་དུ་ན་གཉིས་སུ་མེད་པའི་རང་བཞིན་ལས་མ་འདས་སོ། །དེ་བས་ན་དངོས་པོ་ཐམས་ཅད་ཀྱི་རང་བཞིན་དེ་ཉིད་ཡིན་གྱི་དེ་ལས་གཞན་པ་ནི་མ་ཡིན་ནོ། །མི་འགྱུར་བ་ནི་འགྲོ་འོང་མེད་པ་སྟེ། རྟོགས་པ་དང་མ་རྟོགས་པའི་ཁྱད་པར་གྱིས་འཁོར་བ་དང་མྱ་ངན་ལས་འདས་པ་དང༌། རྟོགས་པ་དང་མ་རྟོགས་པའི་ཡེ་ཤེས་ཞེས་བརྗོད་ཀྱི། དོན་ཡང་དག་པར་ན་ཐ་དད་པ་མ་ཡིན་ཏེ། དཔེར་ན་ཐ་གུ་སྤྲུལ་དུ་སྣང་བ་ནི་ཐ་གུར་མ་རྟོགས་པར་སྤྲུལ་དུ་སྣང་གི་རྟོགས་ན་སྦྲུལ་དུ་སྣང་བའི་རང་བཞིན་ཉིད་ཐ་གུ་ཡིན་ལ་ཐ་གུ་ཉིད་སྤྲུལ་ལོ། །སྦྲུལ་གསལ་བར་བྱ་བའམ་ཐ་གུ་གཞག་པར་བྱ་བ་ཅི་ཡང་མེད་དོ། །དེ་བཞིན་དུ་ཕྱག་རྒྱ་ཆེན་པོ་ཟུང་དུ་འཇུག་པའི་རང་བཞིན་མ་རྟོགས་ན་སྣ་ཚོགས་སུ་སྣང་སྟེ། ཡང་དག་པར་རྟོགས་ན་རྟོག་པ་སྣ་ཚོགས་ཀྱི་རང་བཞིན་ཉིད་མི་རྟོགས་པའི་རང་བཞིན་ཟུང་དུ་འཇུག་པ་ཡིན་ལ། མི་རྟོགས་པ་ཉིད་རྟོག་པ་སྣ་ཚོགས་སུ་སྣང་སྟེ། འདིར་རྟོག་པ་བསལ་བར་བྱ་བའམ། མི་རྟོགས་པ་གཞག་པར་བྱ་བ་ཅི་ཡང་མེད་དོ། །དེ་ཡང་འདི་སྐད་དུ། འདི་རྣམས་ཆོས་ནི་མྱ་ངན་འདས། །རྨོངས་པ་ལ་ནི་འཁོར་བའི་ཚུལ།། རྨོངས་མེད་འཁོར་བ་ངག་པས་ནི། །འཁོར་བ་མྱ་ངན་འདས་པར་འགྱུར། །ཞེས་གསུངས་སོ། །དུས་ཐམས་ཅད་པ་ནི་རྟོགས་ཀྱང་རུང་མ་རྟོགས་ཀྱང་རུང་རང་གི་ངོ་བོ་གཉིས་སུ་མེད་པ་ལས་གཞན་དུ་འགྱུར་བ་མེད་པའོ། །གཞན་ཡང་ཕྱག་རྒྱ་ཆེན་པོ་ལ་སྐུ་གསུམ་དུ་གཞག་པ་ནི་ཉམས་སུ་མྱོང་བའི་ཤེས་པ་ཉིད་ལ་གཞག་སྟེ། དེ་ཡང༌། འདུས་མ་བྱས་པ་ཆོས་ཀྱི་སྐུ། །རྟོགས་པ་ལོངས་སྤྱོད་རྫོགས་མཚན་ཉིད། །སྣ་ཚོགས་འབྱུང་བ་སྤྲུལ་པའི་སྐུ། །གཉུག་མ་ངོ་བོ་ཉིད་ཀྱི་སྐུ། །ཞེས་གསུངས་སོ། །དེས་ན་རྟོག་པ་གང་གིས་ཀྱང་མ་བསླད་པའི་ཤེས་པ་ནི་ཡོད་མེད་ཅེས་བྱ་བ་དང༌།
གཉིས་དང་གཉིས་སུ་མེད་པ་ཞེས་བྱ་བའི་སྒྲོ་སྐུར་གང་མེད་པ་སྟེ་ཆོས་ཀྱི་སྐུའོ། །གཉིས་སུ་མེད་པའི་རང་བཞིན་རྟོགས་ནས་བདེ་བ་ཆེན་པོ་ཉམས་སུ་མྱོང་པ་ནི་ལོངས་སྤྱོད་རྫོགས་པའི་སྐུའོ། །རང་གི་ངོ་བོ་ལས་མ་གཡོས་ཀྱང་སྣ་ཚོགས་སུ་སྣང་བ་ནི་སྤྲུལ་པའི་སྐུའོ། །དེ་ལྟར་ཐ་སྙད་ཙམ་དུ་གསུམ་དུ་དབྱེ་བ་ཡོད་ན་ཡང་དེ་ཁོ་ན་ཉིད་ཀྱི་ཤེས་པ་ལ་དབྱེ་བ་མེད་དེ། ངོ་བོ་གཅིག་པ་ནི་ངོ་བོ་ཉིད་ཀྱི་སྐུའོ། །ཐེག་པ་ཐུན་མོང་གི་སྐུ་གསུམ་རྣམ་པར་གཞག་པ་ནི་ངོ་བོ་ཉིད་ལ་དབྱེ་བ་མེད་དེ། ཆོས་ཚུལ་གྱིས་བརྩིས་ན་ཡང་དག་པར་རྫོགས་པའི་སངས་རྒྱས་ཀྱི་ཐུགས་ཡང་དག་པའི་ཡེ་ཤེས་ཀྱི་སྤྱོད་ཡུལ་རྣམ་པར་མི་རྟོག་པ་ཅིར་ཡང་མི་འཛིན་པ་ནི་ཆོས་ཀྱི་སྐུའོ། །ས་ཆེན་པོ་ལ་སྤྱོད་པའི་བྱང་ཆུབ་སེམས་དཔའི་སྤྱོད་ཡུལ་དུ་སྣང་བ་ནི་རྟེན་གཞལ་ཡས་ཁང་དང་བརྟེན་པ་ལྷའི་དཀྱིལ་འཁོར་མཚན་དང་དཔེ་བྱད་དང༌། མི་འཇིགས་པ་ལ་སོག་པས་བརྒྱན་པར་སྣང་བ་ནི་ལོངས་སྤྱོད་རྫོགས་པའི་སྐུའོ། །ལྷ་དང་མིའི་མཐོང་བ་མ་དག་པ་ལ་ནི་ཕྱིན་ཅི་ལོག་ཏུ་སྣང༌། མཐོང་བ་དག་པ་ལ་ནི་གང་དང་གང་གིས་འདུལ་བ་ལ་དེ་དང་དེའི་ངོ་བོར་སྐུ་སྣ་ཚོགས་སུ་དེ་བཞིན་གཤེགས་པའི་ཐུགས་རྗེ་ཆེན་པོའི་བྱིན་རླབས་དང༌། སྔོན་གྱི་སྨོན་ལམ་དང་སེམས་ཅན་གྱི་མོས་པའི་དབང་གིས་སྣང་བ་ནི་སྤྲུལ་པའི་སྐུའོ། །འདི་རྣམས་ཐ་སྙད་ཙམ་དུ་བཤད་ཀྱང་རང་གི་ངོ་བོ་ལ་ཐ་སྙད་ཀྱི་དབྱེ་བ་མེད་དེ། ངོ་བོ་ལྷུན་གྱིས་གྲུབ་པར་གཅིག་པས་ན་ངོ་བོ་ཉིད་སྐུའོ། །དེའི་ཡང་འདི་སྐད་དུ། འཆད་པ་པོ་ང་ཆོས་ཀྱང་ང༌། །རང་གི་ཚོགས་ལྡན་ཉན་པ་ང༌། །འཇིག་རྟེན་སྟོན་པ་བསྒྲུབ་བྱ་ང༌། །འཇིག་རྟེན་འཇིག་རྟེན་འདས་པར། །ཞེས་གསུངས་པས། འཆད་པ་པོ་ནི་ལོངས་སྤྱོད་རྫོགས་པའི་སྐུ། ཆོས་ནི་ཆོས་ཀྱི་སྐུ། རང་གི་ཚོགས་ལྡན་ཉན་པ་ནི་སྤྲུལ་པའི་སྐུའོ། །དེས་ན་ཐམས་ཅད་ཀྱི་ངོ་བོ་ཡིན་པས་ན་ངོ་བོ་ཉིད་ཀྱི་སྐུའོ། །དེ་ལྟ་བུའི་རིམ་པ་ནི་ཟུང་དུ་འཇུག་པ་ནི་འོད་གསལ་བ་དང༌། སྟོང་པ་ཉིད་སུ་མེད་པ་སྟེ། ངོ་བོ་ཉིད་ལ་དབྱེར་མེད་ཀྱང་ཆོས་ཚུལ་གྱིས་བརྩིས་ན་འོད་གསལ་བ་དང་སྟོང་པའོ། །རིགས་པས་ཡང་དག་པར་བརྟགས་ན་དངོས་པོ་མེད་པ་ནི་སྟོང་པ་ཡིན་ལ། མཉམ་པར་ཉམས་སུ་མྱོང་བ་ནི་འོད་གསལ་པའོ། །འོད་གསལ་
ལས་ཀྱང་སྟོང་པ་གཞན་མ་ཡིན་ལ་སྟོང་པ་ལས་ཀྱང་འོད་གསལ་བ་གཞན་མ་ཡིན་ཏེ། དཔེར་ན་སྨིག་རྒྱུ་ལས་ཆུར་སྣང་ཡང་ཡང་དག་པར་ན་ཆུའི་དངོས་པོ་མེད་དོ། །དེ་བཞིན་དུ་འོད་གསལ་བ་ཉིད་ལ་རྣམ་པར་དཔྱད་ན་རང་བཞིན་མེད་པ་སྟོང་པ་ཡིན་ཡང་གཏན་མ་གྲུབ་པ་རི་བོང་གི་རྭ་ལྟ་བུའི་སྟོང་པ་ནི་མ་ཡིན་ནོ། །རང་བཞིན་མེད་པ་སྟོང་པ་ཉིད་འོད་གསལ་བ་ཉམས་སུ་མྱོང་པ་སྟེ། དངོས་པོ་ཡོད་པར་རིགས་པས་གྲུབ་པ་སྣང་བ་ནི་མ་ཡིན་ནོ། །དེ་བས་ན་འོད་གསལ་བ་ཉིད་སྟོང་པ་ཉིད་འོད་གསལ་བའོ། །ཐ་དད་མ་ཡིན་པས་གཉིས་མེད་ཟུང་དུ་འཇུག་པའོ། །ཟུང་དུ་འཇུག་པ་ཡང་གཞན་གྱིས་གཉིས་སུ་སྣང་བའི་ཞེན་པ་བཟློག་པའི་ཕྱིར་ཟུང་དུ་འཇུག་པ་དང་གཉིས་སུ་མེད་པ་ཞེས་བརྗོད་ཀྱི། རང་གི་མཚན་ཉིད་ལ་ཟུང་དུ་འཇུག་པ་དང་གཉིས་སུ་མེད་པ་གཉིས་མ་གྲུབ་པས་ན་ཟུང་དུ་འཇུག་པ་དང༌། གཉིས་སུ་མེད་པ་ཉིད་ཀྱང་མི་གནས་སོ། །དེས་ན་འདི་ལ་མིང་དང་ངོས་གཟུང་བའམ། འདི་ཞེས་བྱ་བ་ནི་གཞག་པ་མེད་དོ། །ལྷུན་གྱིས་གྲུབ་པ་ནི་དཔེར་ན་མཐོ་ཡོར་ལ་མིར་ཤེས་པ་འཁྲུལ་ནས་སྣང་སྟེ། མ་རྟོགས་ན་མིར་སྣང་ཞིང༌། རྟོགས་ན་དེ་ཉིད་མཐོ་ཡོར་ཡིན་ལ། དེས་མི་གསལ་བ་བྱ་བའམ། མཐོ་ཡོར་བསྒྲུབ་པར་བྱ་བ་ཅི་ཡང་མེད་དོ། །དེ་བཞིན་དུ་དོན་རང་གི་ངོ་བོ་གཉིས་སུ་མེད་པའི་རང་བཞིན་མ་རྟོགས་ན་གཉིས་སུ་སྣང་སྟེ། རྟོགས་ཙམ་ན་དེ་ཉིད་གཉིས་སུ་མེད་པའི་ཡེ་ཤེས་སོ། །འདིར་ཡང་རྟོགས་པ་དང་མ་རྟོགས་པའི་ཁྱད་པར་གྱིས་གཉིས་སུ་སྣང་བའི་རྟོག་པ་དང༌། གཉིས་སུ་མེད་པའི་མི་རྟོག་པ་ཞེས་དགག་སྒྲུབ་བྱེད་ཀྱང་དེ་ཁོ་ན་ཉིད་ཀྱི་ཤེས་པ་ལ་མ་རྟོགས་པའི་དུས་ན་ཡང་དོན་རང་གི་ངོ་བོ་དང་གཉིས་སུ་མེད་དེ་ཟུང་དུ་འཇུག་པའོ། །བླ་མ་དམ་པའི་ཞལ་ནས་རྟོགས་པའི་དུས་ན་ཡང་ཟུང་དུ་འཇུག་པའོ། །འབྲས་བུ་ཕྱག་རྒྱ་ཆེན་པོ་ཐོབ་པའི་དུས་ན་ཡང་དེ་ཉིད་དོ། །དེས་ན་དུས་ཐམས་ཅད་དུ་མི་འགྱུར་བ་ནི་མ་བཅོས་པའོ། །དེ་ལྟ་བུ་དང་ལྡན་པའི་ཕྱག་རྒྱ་ཆེན་པོ་སྟེ། དེ་ལྟར་རྟོགས་པ་ནི་ལྟ་བའོ། །སྒོམ་པ་ནི་དུས་དེ་ཉིད་ལས་སེམས་མ་ཡེངས་པར་འཇོག་པ་ཡིན་ཏེ། དེ་ཡང༌། སྒོམ་པ་པོ་མེད་སྒོམ་པའང་མད། །ལྷ་མེད་སྔགས་ཀྱང་ཡོད་མ་ཡིན། །སྤྲོས་པ་མེད་པའི་རང་བཞིན་ལས། །ལྷ་དང་སྔགས་ཀྱང་ཡང་དག་གནས། །
ཞེས་གསུངས་པས་ན་ཕྱག་རྒྱ་ཆེན་པོ་ཉིད་མི་རྟོག་པ་ནི་བཅོས་མའི་སྒོམ་པ་ཆེད་དུ་གཏད་པ་གང་ཡང་མི་འདོད་དེ། དེ་ཉིད་ཀུན་གྱི་ངོ་བོ་ཡིན་པས་ན། བར་མ་ཆོད་པར་སྤྱོད་ལམ་བཞིར་མ་ཡེངས་པར་བསྒོམ་པར་བྱའོ། །དེ་ཡང་འདི་སྐད་དུ། ཆུ་བོ་ཀླུང་འབབ་གཞུང་དང་ནི། །མར་མེ་འབར་བའི་རྩེ་མོ་ལྟར། །སྔགས་ཀྱི་དེ་ཉིད་རྗེས་འབྲངས་ནས། །རྒྱུན་མི་འཆད་པའི་བསམ་གཏན་ཐོབ། །ཅེས་གསུངས་པས་མཉམ་པར་གཞག་པ་དང་རྗེས་ཐོབ་མེད་པར་ཆོས་ཐམས་ཅད་དེ་ཉིད་ཀྱི་ངོ་བོར་ཤེས་པར་བྱ། གོམས་པར་བྱའོ། །གཞན་ཡང༌། གང་ཡང་སྒོམ་པ་པོ་ཉིད་མེད། །གང་ཡང་རྣམ་པར་སྒོམ་པ་མེད། །བསྒོམ་བྱ་ཉིད་ཀྱང་ཡོད་མ་ཡིན། །དེ་ཡི་དེ་ཉིད་བསྒོམ་པར་བྱ། །ཞེས་གསུངས་པས་སྒོམ་པ་པོ་དང༌། བསྒོམ་པར་བྱ་བ་དང་སྒོམ་པའི་ཆེད་དུ་བྱ་བ་མེད་དེ། དེ་ཉིད་ལ་མ་ཡེངས་པར་གཞག་གོ །དེ་ཉིད་ལ་མ་ཡེངས་པར་བསྒོམས་པ་ཡང་རྟོག་པ་ཐམས་ཅད་གློ་བུར་དུ་རྐྱེན་གཞན་ལ་བརྟེན་ནས་བསྐྱེད་དེ། རང་བཞིན་ངོ་བོས་ནི་མ་སྐྱེས་ལ། །གོང་དུ་རྟོག་པའི་རྐྱེན་མ་ཚོགས་པ་ན། ཤེས་པ་རྐྱེན་གྱིས་མ་བསླད་པ་མ་བཅོས་པའི་གཉུག་མ་སྒྲོ་སྐུར་དང་བྲལ་བ་ནི་ཕྱག་རྒྱ་ཆེན་པོ་སྟེ། དེ་ལས་ཕྱིས་ཤེས་པ་སྐྱེ་བ་རྐྱེན་གྱིས་བསླད་པ་ནི་བརྟགས་ན་ངོས་གཟུང་དུ་མེད་པས་ན། བཞི་པ་དེ་ཡང་དེ་བཞིན་ནོ་ཞེས་བྱ་བས་གོང་བཞིན་དུ་ཤེས་པར་བྱ་སྟེ། བཞི་པ་ནི་ཕྱིས་ཀྱི་རྟོགས་པའི་རྐྱེན་གྱིས་བསླད་པའོ། །དེ་ཞེས་བྱ་བ་ནི་ཤེས་པ་གཉུག་མ་མ་བཅོས་པ་རྐྱེན་གྱིས་མ་བསླད་པའོ། །ཡང་ཞེས་བྱ་བ་ནི་ཕྱིས་ཀྱི་ཤེས་པ་རྟོག་པ་དང་བཅས་པ་ནི་གོང་མར་བསྡུའོ། །དེ་བཞིན་ནོ་ཞེས་བྱ་བ་ནི་སྣང་བའམ་རྟོག་པ་སྐྱེས་མ་ཐག་ཏུ་གོང་མའི་རང་བཞིན་དུ་ཤེས་པར་བྱའོ། །དེ་བས་ན་དབང་པོ་རྣམས་ཡུལ་ལ་མི་དགག་སྟེ། ཅི་དང་ཅི་སྣང་བ་ཐམས་ཅད་དེའི་རང་བཞིན་དུ་ཤེས་པར་བྱའོ། །དེ་ལ་རྟོག་པ་ཅི་སྐྱེས་པ་ལ་རིགས་པས་བརྟགས་ཤིང་རང་བཞིན་མེད་པར་བྱེད་པ་ནི་དམན་པར་འགྱུར་རོ། །དཔེར་ན་སྐྱུར་དུ་རའི་རོ་ཉམས་སུ་མྱོང་ནས་མཐོང་མ་ཐག་ཏུ་སྐྱུར་མོར་ཤེས་ཏེ། སྐྱུར་མོ་ཉིད་ཀྱང་སྐྱུ་རུང་ཡིན་ལ་སྐྱུ་རུ་ར་ཉིད་ཀྱང་སྐྱུར་མོར་ཤེས་སོ། །དེ་བཞིན་དུ་གོང་དུ་ལུང་དང༌། རིགས་པ་དང༌། བླ་མའི་མན་ངག་གིས་ཉམས་སུ་བླངས་ནས་རྟོགས་པས་ཕྱིས་དངོས་པོ་སྣང་བ་ཉིད་སྟོང་པར་ཤེས་ལ། སྟོང་པ་ཉིད་སྣང་བར་ཤེས་སོ། །
དེ་བས་ན་དབྱེར་མེད་པར་བྱའོ། །དེ་ཡང་འདི་སྐད་དུ། གང་ཕྱིར་ཡིད་ཀྱིས་མི་སྒོམ་པར། །འགྲོ་བ་ཐམས་ཅད་བསྒོམ་པར་བྱ། །ཐམས་ཅད་ཆོས་ནི་ཡོངས་ཤེས་ན། །སྒོམ་པ་ཉིད་ནི་སྒོམ་པ་མིན། །ཞེས་གསུངས་པས་དེ་ཉིད་ལ་མ་ཡེངས་པར་འཇོག་པ་ནི་སྒོམ་པའོ། །དེ་ཡང་དོ་ཧ་ལས། མདའ་བསྣུན་གྱིས་སྨྲས་པ། ཀྱེ་ལགས་གང་ཞིག་བརྫུན་པ་དེ་བོར་ལ། །གང་ལ་ཞེན་པ་ཡོད་ན་དེ་ཡང་ཐོང༌། །རྟོགས་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་པ་སུས་ཀྱང་ཤེས་མི་འགྱུར། །ཞེའོ། །དེས་ན་སྣ་ཚོགས་སུ་སྣང་བ་ཐམས་ཅད་སེམས་ཉིད་ཡིན་ལ། སེམས་ཉིད་ཞེན་པ་ཐམས་ཅད་མེད་པར་རྟོགས་པ་ན་ཅི་བྱུང་པ་ཐམས་ཅད་དེ་ལྟར་ཤེས་པར་བྱས་ལ་བསྒོམ་མོ། །སྒོམ་པ་ལ་ཡང་དཔེ་གསུམ་སྟེ། ཆུ་དངས་པ་དང༌། ནོར་བུ་ཆུ་འདོང་བཅུག་པ་དང༌། མ་རྙོགས་པར་གཞག་པས་དངས་པར་འགྱུར་ཏེ། དེ་བཞིན་དུ་རྟོག་པ་ཐམས་ཅད་འགེགས་པ་དང༌། མི་མཐུན་པའི་ཕྱོགས་ཀྱི་རྟོག་པ་སྤང་པའི་ཕྱིར་གཉེན་པོ་ཡེ་ཤེས་བསྒོམ་པ་ནི་བཅོས་མའི་སྒོམ་པའོ། །ཆུ་མ་རྙོགས་པར་བཞག་ན་རང་དངས་པ་བཞིན་དུ་དངོས་པོ་ཐམས་ཅད་ཀྱི་རང་བཞིན་ཤེས་པར་བྱས་ནས་མ་བཅོས་པར་འཇོག་པ་ནི་ཕྱག་རྒྱ་ཆེན་པོའི་སྒོམ་པའོ། །དེ་ལྟ་བུའི་ཤེས་པས་ཅི་དང་ཅི་བྱེད་པ་ཐམས་ཅད་དེའི་རང་བཞིན་དུ་བྱེད་པ་ནི་སྤྱོད་པ་སྟེ། དེ་ཡང་སྤྱོད་པ་ནི་གསུམ་སྟེ། སྤྲོས་པ་དང་བཅས་པའི་སྤྱོད་པ་དང༌། སྤྲོས་པ་མེད་པའི་སྤྱོད་པ་དང༌། ཤིན་ཏུ་སྤྲོས་པ་མེད་པའི་སྤྱོད་པའོ། །དེ་ལ་སྤྲོས་པ་དང་བཅས་པའི་སྤྱོད་པ་ནི་མཚན་མ་དང་བཅས་པའོ། །སྤྲོས་པ་མེད་པའི་སྤྱོད་པ་ནི་གསང་བ་ལ་སྩོགས་པའི་སྤྱོད་པའོ། །ཤིན་ཏུ་སྤྲོས་པ་མེད་པའི་སྤྱོད་པ་ནི་ཕྱག་རྒྱ་ཆེན་པོ་ལས་གཞན་དུ་མ་བསྟན་ཏེ། དེས་ཟིན་པའི་སྤྱོད་པ་ཅི་བྱས་པ་ཐམས་ཅད་ནི་སྤྱོད་པའོ། །དེ་ལྟ་བུ་ལ་གོམས་པར་གྱུར་པས་ལྷུན་གྱིས་གྲུབ་སྟེ། མངོན་དུ་གྱུར་པ་ནི་འབྲས་བུའོ། །དེ་ལྟ་བུའི་ཕྱག་རྒྱ་ཆེན་པོ་ནི་དྲི་མ་དང་བྲལ་བའི་འབྲས་བུ་སྟེ། དྲི་མ་ནི་དགག་པ་དང་སྒྲུབ་པ་ལ་སོགས་པའི་རྟོག་པ་རྣམས་མེད་པ་ནི་དྲི་མ་དང་བྲལ་བའི་འབྲས་བུ་སྟེ། མཚན་ཉིད་དང་བྲལ་བའི་ལྷན་ཅིག་སྐྱེས་པའི་དགའ་བའོ། །འབྲས་བུ་ཕྱག་རྒྱ་ཆེན་པོ་མ་བཅོས་པར་ལྷུན་གྱིས་གྲུབ་ཕ་ངོ་བོ་ཉིད་ཀྱི་རིམ་པ་
མདོར་བསྟན་པའོ། །དེ་ལྟ་བུའི་ཕྱག་རྒྱ་ཆེན་པོ་ལས་སེམས་ཅན་གྱི་དོན་དུ་འབྲས་བུ་གཟུགས་ཀྱི་སྐུ་གཉིས་འབྱུང་བ་ནི་དམ་ཚིག་གི་ཕྱག་རྒྱར་བཤད་དེ། དེ་ལ་དམ་ཚིག་ནི་ས་མ་ཡ་འབུམ་སྔེ་སྟེ། ས་ལས་དྲངས་ནས་ས་སཾ་ཀེ་ཏེ་ཞེས་བྱ་བ་སྟེ་བརྡ་ཡིན་ལ། ཕྱག་རྒྱ་ནི་མཚོན་པ་སྟེ། ཧེ་རུ་ཀའི་བརྡའི་སྒོ་ནས་ཐབས་སྣང་བ་མཚོན་ཅིང་བཙུན་མོའི་བརྡའི་སྒོ་ནས་ཤེས་རབ་སྟོང་པ་ཉིད་མཚོན་པར་བྱེད་ལ། གཉིས་པ་འཁྱུད་པའི་བརྡའི་སྒོ་ནས་གཉིས་སུ་མེད་པའི་ཡེ་ཤེས་ཟུང་དུ་འཇུག་པ་མཚོན་པ་ནི་དམ་ཚིག་གི་ཕྱག་རྒྱའོ། །དམ་ཚིག་གི་ཕྱག་རྒྱ་ལ་ཡང་ལས་ཀྱི་ཕྱག་རྒྱ་བཞིན་དུ་དགའ་བ་བཞིར་དབྱེ་སྟེ། དེ་ལ་དང་པོ་རྒྱུ་བསོད་ནམས་ཀྱི་ཚོགས་ནས་བརྩམས་ཏེ་རྒྱུའི་ཧེ་རུ་ཀ་མངོན་པར་བྱང་ཆུབ་པ་ལྡས་བསྐྱེད་པ་ནི་སྣ་ཚོགས་ཀྱི་རྟོག་པ་ཡོད་པས་རྣམ་པ་སྣ་ཚོགས་པའི་སྐད་ཅིག་མ་ལ་དགའ་བའོ། །ལྷ་མའི་འཁོར་ལོ་དབྱུང་པའི་ཕྱིར་མཁའ་གསང་བྱིན་གྱིས་བརླབས་ནས་སྙོམས་པར་ཞུགས་ནས་རྡོ་རྗེ་ནོར་བུའི་གྲོང་གི་དཀྱིལ་དུ་བྱང་ཆུབ་ཀྱི་སེམས་ཁུ་བའི་རྣམ་པ་ལས་བདེ་བའི་ངོ་བོ་ཉམས་སུ་མྱོང་བ་ནི་རྣམ་པར་སྨིན་པའི་སྐད་ཅིག་མ་ལ་མཆོག་ཏུ་དགའ་བའོ། །དེ་ནས་སྐུ་གསུང་ཐུགས་ཀྱི་ཡི་གེ་གསུམ་འདོད་ཆགས་ཆེན་པོའི་རང་བཞིན་ཧོ་དམར་པོ་གཉིས་ཀྱི་བར་དུ་ཆུད་པའི་དྲི་ཟའི་སྲོག་ཆགས་ཞལ་དུ་ཆུད་པས་རྗེ་བཙུན་དང་རྗེ་བཙུན་མ་གཉིས་འོད་དུ་ཞུ་སྟེ། ཟླ་བ་དང་ཉི་མའི་དབུས་ན་གནས་པའི་ཐིག་ལེ་གཉིས་ནི་འོད་གསལ་བ་དང་སྟོང་བའོ། །དེ་ཟླ་བ་ལ་རེག་པའི་ཐིག་ལེ་ནི་ཤེས་རབ་སྟེ་སྟོང་པའོ། །སྟེང་ཉི་མ་ལ་རེག་པ་ནི་འོད་གསལ་བ་སྟེ་ཐབས་སོ། །གཉིས་དབྱེར་མེད་པ་ནི་ཕན་ཚུན་གཅིག་ལ་གཅིག་རྒྱས་བཏབ་པ་སྟེ་ཟུང་དུ་འཇུག་པའོ། །དེ་ནི་མཚན་ཉིད་དང་བྲལ་བའི་སྐད་ཅིག་མ་ལ་ལྷན་ཅིག་སྐྱེས་པའི་དགའ་བའོ། །དེ་ནས་སྨོན་ལམ་གྱི་དབང་གིས་པུ་ཀྐ་སཱི་ལ་སོགས་པའི་ཆོད་མེད་པའི་ལྷ་མོ་བཞིའི་རྡོ་རྗེ་གླུས་བཞེངས་སུ་གསོལ་ནས་འབྲས་བུའི་ཧེ་རུ་ཀ་གཟུགས་ཀྱི་སྐུར་བཞེངས་པ་ནི་རྣམ་པར་ཉེད་པའི་སྐད་ཅིག་མ་ལ་དགའ་བྲལ་གྱི་དགའ་བའོ། །འདིར་ཡང༌། བཞི་པ་དེ་ཡང་དེ་བཞིན་ནོ། །ཞེས་བྱ་བས་སྔ་མ་བཞིན་དུ་ཤེས་པར་བྱའོ། །དགོངས་པ་སྔ་མ་བཞིན་དུ་དམ་ཚིག་གི་ཕྱག་རྒྱའི་དགའ་བ་བཞི་ཡང་
གཅིག་ཏུ་བྱས་ནས། སྐྱེས་བུའི་བྱེད་པའི་འབྲས་བུ་ཞེས་བྱ་སྟེ། སེམས་ཅན་གྱི་དོན་བྱེད་པས་ན་གཟུགས་ཀྱི་སྐུ་ནི་སྐྱེས་བུ་བྱེད་པའི་འབྲས་བུ་ཡིན་ཏེ། རྣམ་པར་ཉེད་པའི་སྐད་ཅིག་མ་ལ་དགའ་བྲལ་གྱི་དགའ་བར་གཞག་གོ །དེ་ལྟར་ན་དགའ་བ་བཅུ་དྲུག་གོ །འདིར་ཡང་ཕྱག་རྒྱ་ཆེན་པོ་དང༌། དམ་ཚིག་གི་ཕྱག་རྒྱ་གཉིས། བཞི་པ་དེ་ཡང་དེ་བཞིན་ནོ། །ཞེས་བྱ་བས་གོང་མ་བཞིན་དུ་གཉིས་སུ་མེད་པར་ཤེས་པར་བྱའོ། །དམ་ཚིག་གི་ཕྱག་རྒྱ་མདོར་བསྡུས་ཏེ་བསྟན་པའོ། །གང་ཞིག་བརྒྱུད་པའི་རིམ་པ་འདི། །བླ་མའི་ཞབས་ལ་ཡུན་རིངས་སུ། །བསྙེན་བཀུར་ལས་བྱུང་གོམས་པ་ཡིས། །བདག་ཉིད་དྲན་ཕྱིར་བྲིས་པ་ཡིན། །གཞན་ཡང་སེམས་ཅན་བདག་འདྲ་དང༌། །དོན་དུ་གཉེར་བ་གཞན་དག་དང༌། །དད་ལྡན་བྱང་ཆུབ་དོན་གཉེར་བའི། །དོན་དུ་བདག་གིས་ཅུང་ཞིག་བྲིས། །གང་ཡང་བདག་བློ་གཏི་མུག་པས། །ལེགས་བཤད་གང་ཡིན་ཉེས་གྱུར་པ། །མ་རྟོགས་དབང་གིས་ནོར་ན་ཡང༌། །མཁས་པ་རྣམས་ཀྱིས་བཟོད་པར་མཛོད། །བླ་མ་བརྒྱུད་པའི་རིམ་པ་འདི། །འབད་པས་བདག་གིས་བྲིས་པ་ལས། །དེས་ནི་དགེ་བ་ཅི་ཐོབ་པས། །སེམས་ཅན་ཕྱག་རྒྱ་ཆེན་པོར་ཤོག །བླ་མ་བརྒྱུད་པའི་རིམ་པའི་མན་ངག་ཅེས་བྱ་བ་ཕྱག་རྒྱ་ཆེན་པོ་རྣལ་དུ་མཚོན་པར་བྱེད་པ། སློབ་དཔོན་ཆེན་པོ་བཛྲ་པཱ་ཎིའི་ཞལ་སྔ་ནས་ཀྱིས་མཛད་པ་རྫོགས་སོ།། །།རྒྱ་གར་གྱི་མཁན་པོ་དྷི་རོཥྐྲྀ་ཛྙཱ་ནའི་ཞབས་དང༌། བོད་ཀྱི་ལོ་ཙཱ་བ་འབྲོག་མི་ཇོ་སྲས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།