བྱང་ཆུབ་ཀྱི་སྤྱོད་པ་ལ་འཇུག་པའི་དཀའ་འགྲེལ།
ཤེས་རབ་འབྱུང་གནས་བློ་གྲོས།
རྒྱ་གར་སྐད་དུ། བོ་དྷི་ཙཱཪྻ་ཨ་བ་ཏཱ་ར་པཉྩི་ཀཱ། བོད་སྐད་དུ། བྱང་ཆུབ་ཀྱི་སྤྱོད་པ་ལ་འཇུག་པའི་དཀའ་འགྲེལ། འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་ཕྱུག་ལ་ཕྱག་འཚལ་ལོ། །བམ་པོ་དང་པོ། །བདེ་བར་གཤེགས་པ་ཆོས་སྐུ་དང་བཅས་རྣམས་དང་བདེ་གཤེགས་སྲས། །གཏི་མུག་ལྗོན་པ་རྩ་ནས་བཏོན་ཅིང་སྤྲོས་པ་རྣམས་བཅོམ་པ། །སྐྱེ་སྩོགས་སྡུག་བསྔལ་གྱིས་བཅོམ་སེམས་ཅན་ཕན་ལ་རྗེས་འཇུག་པ། །འོད་ཟེར་ཆེན་པོས་རྒྱལ་བ་རྣམས་ལ་སྤྱི་བོས་ཕྱག་འཚལ་ཏེ། །བྱང་ཆུབ་སྤྱོད་ལ་འཇུག་པ་ཡི། །ཚིག་དོན་ཟབ་མོ་རྟོགས་བྱེད་པ། །ཚིག་དང་ངག་རྣམས་རབ་གསལ་བའི། །དཀའ་འགྲེལ་བདག་གིས་བརྩམ་པར་བྱ། །བྱང་ཆུབ་སྤྱོད་ལ་འཇུག་པའི་དོན་གང་ཡིན་ལ་ཤིན་ཏུ་བློ་གྲོས་གསལ་བ་དང༌། །གསུང་རབ་རོ་ལ་གོམས་པས་ཞུགས་པའི་ནང་གི་བདག་ཉིད་ཅན་གྱིས་བརྗོད་ནུས་ཏེ། །དེ་ཡི་དོན་ལ་བློ་གྲོས་བླུན་བདག་སྨྲ་བར་དབང་བ་ཅི་ཞིག་དེ་ལྟ་ནའང༌། །གང་ཕྱིར་དགེ་བ་གོམས་བྱས་ལེགས་པའི་འབྲས་བུར་གྱུར་པ་དེས་ན་བདག་འཇུག་ཡིན། །ཡོན་ཏན་བག་ཆགས་ཅུང་ཟད་དང་ནི་སྤོབས་པ་དང༌། །ཡོན་ཏན་གྱིས་མཛེས་བློ་གྲོས་བདག་ལ་འགའ་མེད་ཀྱང༌། །དེ་ལྟ་མོད་ཀྱི་དེ་འདྲ་ལ་བདག་ཚིག་འཇུག་གང༌། །བཤེས་གཉེན་དམ་པ་བསྟེན་པའི་འབྲས་བུར་གྱུར་པ་ཡིན། །འདིར་འཕགས་པ་ཞི་བའི་ལྷ་དེ་གསུང་རབ་མཐའ་དག་གི་དོན་གྱི་དེ་ཁོ་ན་ཉིད་རྟོགས་ཤིང༌། ཏིང་ངེ་འཛིན་གྱི་ཆེ་བའི་བདག་ཉིད་བརྙེས་པ། ཡང་དག་པར་རྫོགས་པའི་བྱང་ཆུབ་བཞེད་པ། སེམས་ཅན་རྣམས་ལ་ཐུགས་རྗེ་དང་ལྡན་པ། རང་གི་བདེ་བ་ལ་ལྟོས་པ་མེད་པ། གཞན་ལ་ཕན་པ་དང་བདེ་བ་བཞེད་པ། བྱང་ཆུབ་སེམས་དཔའི་ཡོན་ཏན་ལ་ཐུགས་གཞོལ་བ། བདག་ཉིད་ཡོན་ཏན་དེ་ལ་གོམས་པས་རོ་མཆོག་ལ་ཞུགས་ཤིང༌། གཞན་དག་ལ་ཡང་ལམ་དེ་བསྟན་པའི་ཆེད་དུ་བྱང་ཆུབ་ཀྱི་སྤྱོད་པ་ལ་འཇུག་པ་མཛད་པར་བཞེད་ནས། བདེ་གཤེགས་ཞེས་བྱ་བ་ལ་སོགས་པའི་ཚིགས་སུ་བཅད་པ་གསུངས་པ་ལ། ཚིགས་སུ་བཅད་པ་འདིས་ནི་མདོར་བསྡུས་ནས་དོན་བདུན་བསྟན་ཏེ། དཀོན་མཆོག་གསུམ་དང་མཁན་པོ་ལ་སོགས་པ་ཕྱག་བྱ་བར་འོས་པ་རྣམས་ལ་ཕྱག་འཚལ་བ་དང༌། བརྗོད་
པར་བྱ་བ་དང༌། དགོས་པ་དང༌། དེའི་འགྲེལ་པ་བརྗོད་པ་བསྟན་པ་དང༌། རང་བཟོར་རྩོམ་པ་སྤོང་བ་དང༌། ཟློས་པའི་ཉེས་པ་སྤང་བའོ། །དེ་ལ། བདེ་གཤེགས་ཆོས་ཀྱི་སྐུ་མངའ་སྲས་བཅས་དང༌། །ཞེས་པ་ནི་དཀོན་མཆོག་གསུམ་བསྟན་ཏོ། །ཕྱག་འཚལ་ཏེ་ཞེས་བྱ་བས་ནི་ཕྱག་འཚལ་བའི་བྱ་བའོ། །གུས་པས་ཞེས་པས་ནི་དེ་ཉིད་ཀྱི་ཁྱད་པར་རོ། །ཕྱག་འོས་ཀུན་ལའང་ཞེས་པས་ནི་དགེ་བའི་བཤེས་གཉེན་ལ་སོགས་པ་རྣམས་ལའོ། །བདེ་གཤེགས་སྲས་ཀྱི་སྡོམ་ལ་འཇུག་པ་ཞེས་བྱ་བས་བརྗོད་པར་བྱ་བ་བསྟན་ཏོ། །བསྟན་པར་བྱ་ཞེས་པས་ནི་དགོས་པ་བརྗོད་དོ། །འབྲེལ་པ་སྟོན་པའི་ཚིག་ནི་མེད་དེ། དེ་ནི་ཤུགས་ཉིད་ཀྱིས་རྟོགས་པར་བྱའོ། །ལུང་བཞིན་ཞེས་པ་ནི་རང་བཟོར་རྩོམ་པ་སྤོང་བའི་ཚིག་གོ །མདོར་བསྡུས་ནས་ཞེས་པ་ནི་ཟློས་པ་སྤོང་བའི་ཚིག་སྟེ། འདི་ནི་བསྡུས་པའི་དོན་ཏོ། །ཡན་ལག་གི་དོན་ཡང་བརྗོད་པར་བྱ་སྟེ། བདེ་གཤེགས་ཞེས་པ་ལ། འདིར་གཤེགས་པའི་སྒྲས་ནི་སོ་སོའི་སྐྱེ་བོ་རྣམས་ལས་བཅོམ་ལྡན་འདས་རྣམ་པར་གཅོད་པ་སྟོན་ཏེ། དེ་རྣམས་ནི་འཁོར་བའི་ནང་ན་གནས་པའི་ཕྱིར་དང༌། བཅོམ་ལྡན་འདས་ནི་འཁོར་བ་ལས་རྣམ་པར་གཤེགས་པའི་ཕྱིར་རོ། །བདེ་བའི་སྒྲ་ནི་མཛེས་པ་ལ་སོགས་པ་དོན་གསུམ་ལ་འཇུག་པས་ཁྱད་པར་འཕགས་པའི་བདེ་བར་གཤེགས་པ་ཉིད་གསུངས་སོ། །དེ་བས་ན་དོན་ནི་འདི་ཡིན་ཏེ། ཅི་ལྟ་བ་བཞིན་དུ་བསྔགས་པར་འགྱུར་བ་ནི་འདི་ལྟར་དབུ་མའི་དོན་རྟོགས་པས་ཉོན་མོངས་པ་ལ་སོགས་པའི་སྒྲིབ་པ་སྤངས་པར་གཤེགས་པས་བདེ་བར་གཤེགས་པ་སྟེ། འདིས་ནི་སྤངས་པ་ཕུན་སུམ་ཚོགས་པ་བསྟན་ཏོ། །ཡང་ན་བསྔགས་པས་ཆོས་ཐམས་ཅད་རང་བཞིན་མེད་པའི་དེ་ཁོ་ན་ཉིད་དུ་གཤེགས་པ་ནི་རྟོགས་པ་སྟེ་བདེ་བར་གཤེགས་པའོ། །འདིས་ནི་རྟོགས་པ་ཕུན་སུམ་ཚོགས་པ་བསྟན་ཏོ། །འདི་ཉིད་ཀྱིས་ནི་མུ་སྟེགས་ཅན་གྱི་སྟོན་པ་རྣམས་ལས་ཁྱད་པར་དུ་འཕགས་པའང་བསྟན་པ་ཡིན་ནོ། །དེ་རྣམས་ནི་བདག་ལ་སོགས་པར་མངོན་པར་ཞེན་པའི་ལྟ་བས་མཛེས་པར་འགྲོ་བ་མེད་པའི་ཕྱིར། བདག་ལ་སོགས་པ་ཡང་ཚད་མས་གནོད་པའི་ཕྱིར་དང༌། འཁོར་བའི་གཉེན་པོ་མ་ཡིན་པའི་ཕྱིར་མཛེས་པར་འགྲོ་བ་མ་ཡིན་ནོ། །སླར་མི་ལྡོག་པར་གཤེགས་པ་ནི་ཡང་སྐྱེ་བ་དང་འདོད་ཆགས་ལ་སོགས་པའི་ཉེས་པ་རྣམས་ཀྱི་རྒྱུ་ངར་འཛིན་པའི་ས་བོན་མ་རིག་པ་རྣམ་པ་ཐམས་ཅད་
དུ་སྤངས་པས་བདེ་བར་གཤེགས་པའོ། །འདིས་ནི་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། བྱང་ཆུབ་སེམས་དཔའ་རྣམས་ལས་བཅོམ་ལྡན་འདས་ཁྱད་པར་དུ་འཕགས་པར་བསྟན་པ་ཡིན་ཏེ། དེ་རྣམས་ནི་བསྔགས་པར་གཤེགས་ཀྱང་རྒྱུ་རྣམ་པ་ཐམས་ཅད་དུ་མ་སྤངས་པའི་ཕྱིར་སླར་ལྡོག་པ་སྲིད་པའི་ཕྱིར་རོ། །མ་ལུས་པར་ཡང་ཇི་སྲིད་དུ་བགྲོད་པར་བྱ་བར་གཤེགས་པ་སྟེ། ཉེས་པ་ཐམས་ཅད་ཀྱི་བག་ཆགས་ལུས་དང་ངག་དང་སེམས་ཀྱི་གནས་ངན་ལེན་གྱི་མཚན་ཉིད་དང༌། རང་གི་རྟོགས་པའི་ལམ་སྟོན་པ་ལ་མི་གསལ་བ་སྤངས་པའི་ཕྱིར་བདེ་བར་གཤེགས་པའོ། །དེ་དག་གིས་ནི་བཅོམ་ལྡན་འདས་རྫོགས་པར་གཤེགས་པ་ཉིད་དུ་བསྟན་ཏོ། །འདིས་ཀྱང་ཕྱིར་མི་འོང་བ་དང༌། དགྲ་བཅོམ་པ་དང༌། རང་སངས་རྒྱས་རྣམས་ལས་བཅོམ་ལྡན་འདས་ཐུན་མོང་མ་ཡིན་པའི་ཡོན་ཏན་དང་ལྡན་པ་ཉིད་དུ་རིག་པར་བྱའོ། །དེ་རྣམས་ནི་ཉོན་མོངས་པ་ཅན་མ་ཡིན་པའི་ལུས་དང་ངག་དང་ཡིད་ཀྱི་གནས་ངན་ལེན་དང༌། རང་གི་རྟོགས་པའི་ལམ་སྟོན་པ་ལ་གསལ་བ་མི་སྲིད་པའི་ཕྱིར་རོ། །དེ་ལྟ་ན་སངས་རྒྱས་ཉིད་ཡོན་ཏན་མ་ལུས་པའི་གཞི་དང༌། གཞན་དག་དང་ཐུན་མོང་མ་ཡིན་ནོ་ཞེས་བདེ་བར་གཤེགས་པའི་སྒྲས་བསྟན་ཏོ། །དེ་ལྟ་བུར་གྱུར་པའི་བདེ་བར་གཤེགས་པ་དེ་རྣམས་ལ་གུས་པས་ཏེ་མཆོག་ཏུ་དང་བས་སོ། །ཕྱག་འཚལ་ཏེ་ཞེས་པ་ནི་ཕྱག་བྱས་ཏེ་བདེ་གཤེགས་སྲས་ཀྱི་སྡོམ་ལ་འཇུག་པ་བརྗོད་པར་བྱ་ཞེས་བྱ་བ་དང་སྦྱར་རོ། །ཇི་ལྟ་བུར་གྱུར་པ་ཞིག་ཅེ་ན། སྲས་བཅས་ཞེས་པ་སྟེ། ཐུབ་པ་རྣམས་ཀྱི་སྲས་ཀྱང་འདིར་རབ་ཏུ་དགའ་བ་ལ་སོགས་པའི་ས་ཐོབ་པའི་བྱང་ཆུབ་སེམས་དཔའ་ཉིད་གཟུང་ངོ༌། དེ་རྣམས་ཉིད་འདིར་དབང་བར་གྱུར་པའི་ཕྱིར་དེ་རྣམས་དང་བཅས་པའོ། །བྱེ་བྲག་འདིས་འཕགས་པའི་དགེ་འདུན་ལ་ཕྱག་འཚལ་བ་བསྡུས་པ་ཡིན་ནོ། །བྱེ་བྲག་གཞན་གསུངས་པ་ཆོས་སྐུ་དང་བཅས་ཞེས་པ་ལ། བཅོམ་ལྡན་འདས་ཀྱི་སྤྲོས་པ་ཐམས་ཅད་དང་བྲལ་བའི་ངོ་བོ་ཉིད་ཀྱི་ཆོས་ཀྱི་སྐུའོ། །དེ་ཉིད་ནི་རྟོགས་པའི་རང་བཞིན་གྱི་ཆོས་སོ། །ཡང་ན་སྐུའི་སྒྲ་ནི་ཚོགས་ཀྱི་དོན་ཏེ། སྐྱེ་བོའི་ཚོགས་དང་དཔུང་གི་ཚོགས་ཞེས་བྱ་བ་ཡིན་ནོ། །དེས་གསུང་རབ་ཀྱང་གཟུང་སྟེ། དེ་དང་བཅས་པའོ། །འདིས་ཀྱང་ཆོས་ལ་ཕྱག་འཚལ་བ་བསྡུས་པ་ཡིན་ནོ། །དེ་ལྟར་ན་འདིས་ནི་དཀོན་མཆོག་གསུམ་ལ་ཕྱག་འཚལ་བ་
ཉེ་བར་བསྟན་པ་ཡིན་ནོ། །སངས་རྒྱས་ལས་ཆོས། ཆོས་ལས་འཕགས་པའི་དགེ་འདུན་ཏེ་ཞེས་པའི་གོ་རིམས་མ་ཡིན་ནམ། དེ་ཅིའི་ཕྱིར་སངས་རྒྱས་ཀྱི་དེ་མ་ཐག་ཏུ་འཕགས་པའི་དགེ་འདུན་དང༌། དེའི་རྗེས་ལ་ཆོས་ཞེས་གོ་རིམས་འཚོལ་བར་བསྟན་ཞེ་ན། བདེན་ཏེ་འདིར་ཚིགས་སུ་བཅད་པ་སྦྱར་བའི་ངོར་བྱས་པའི་ཕྱིར་གོ་རིམས་འཚོལ་བར་བསྟན་པར་རིག་པར་བྱའོ། །སྦྱར་བ་ནི་བདེ་གཤེགས་ཆོས་ཀྱི་སྐུ་མངའ་སྲས་བཅས་ལ་ཕྱག་འཚལ་ཏེ་ཞེས་གོ་རིམས་ཉིད་བཞིན་བྱ་སྟེ། དེས་ན་ཉེས་པ་མེད་དོ། །ཡང་ན་བྱང་ཆུབ་སེམས་དཔའ་རྣམས་ལ་ཡང་རྟོགས་པའི་ཆོས་མངའ་བའི་ཕྱིར་རྗེས་སུ་མཐུན་པའི་ཕྱིར་ན་ཆོས་ཀྱི་སྐུ་ཡོད་པ་ཉིད་དེ། ཆོས་ཀྱི་སྐུ་དང་བཅས་པ་དེ་རྣམས་ལའང་ཕྱག་འཚལ་བ་བསྟན་པའི་དོན་དུའོ། །དེ་རྣམས་ཀྱང་ཆོས་ཉིད་རྟོགས་པར་བདེ་བར་གཤེགས་པ་ཉིད་དུ་ངེས་པ་ཡིན་ཏེ། བདེ་བར་གཤེགས་པ་དང་འདྲ་བའི་ཕྱིར་ཆོས་ལས་སྔར་བསྟན་ཏོ། །དེས་ན་མི་རིགས་པ་ཅུང་ཟད་ཀྱང་མེད་དོ། །ཅིའི་ཕྱིར་འདི་རྣམས་ཁོ་ན་ལ་ཡིན་ནམ་ཞེ་ན། ཕྱག་འོས་ཀུན་ལའང་ཞེས་གསུངས་ཏེ། གཞན་ཕྱག་བྱ་བར་འོས་པ་མཐའ་དག་ལའང་སྟེ། སློབ་དཔོན་དང་མཁན་པོ་ལ་སོགས་པ་རྣམས་ལ་ཡང་ངོ༌། །གུས་པས་ཕྱག་འཚལ་ཏེ་ཞེས་པ་ཕྱེད་སྔ་མས་བདེ་བར་གཤེགས་པ་ལ་སོགས་པ་ལ་ཕྱག་འཚལ་བར་བརྗོད་ནས། ཕྱེད་ཕྱི་མས་བརྗོད་པར་བྱ་བ་ལ་སོགས་པ་བསྟན་པའི་ཕྱིར། བདེ་གཤེགས་སྲས་ཞེས་བྱ་བ་ལ་སོགས་པ་གསུངས་ཏེ། སྲས་ནི་བདེ་བར་གཤེགས་པ་རྣམས་ལས་སྐྱེས་པའི་སྲས་ཏེ། རྒྱལ་བའི་སྲས་བྱང་ཆུབ་སེམས་དཔའ་ཞེས་བྱ་བའི་དོན་ཏོ། །དེ་རྣམས་ཀྱི་སྡོམ་ལ་འཇུག་པ་ནི་བསྡམ་པར་བྱ་བའམ། འདིས་སྡོམ་པར་བྱེད་པས་ན་སྡོམ་པ་སྟེ། བྱང་ཆུབ་ཀྱི་སེམས་གཟུང་བ་སྔོན་དུ་སོང་བའི་བྱང་ཆུབ་སེམས་དཔའི་བསླབ་པ་ཡང་དག་པར་བླང་བ་ཡིན་ལ། དེ་ཡང་སྐབས་ཇི་ལྟ་བ་བཞིན་དུ་བརྗོད་པར་བྱའོ། །དེ་ལ་འཇུག་པར་བྱ་བའམ། འདིས་དེ་ལ་འཇུག་པར་བྱེད་པའི་ཕྱིར་འཇུག་པ་ནི་ལམ་སྟེ། གང་གིས་བྱང་ཆུབ་སེམས་དཔའི་གོ་འཕང་ཐོབ་པ་ན་བདེ་བར་གཤེགས་པ་ཉིད་ཐོབ་པར་འགྱུར་བ་དེ་གཞུང་འདིས་བསྟན་པར་བྱའོ་ཞེས་བྱ་བའི་དོན་ཏོ། །དེ་ལྟར་ན་འདིས་སྟོན་པར་བྱེད་པ་ཡིན་པའི་ཕྱིར་སྡོམ་ལ་འཇུག་པ་ནི་འདིའི་བརྗོད་པར་བྱ་བ་ཡིན་ལ།
འདིས་ནི་སྡོམ་ལ་འཇུག་པའི་བརྗོད་པར་བྱེད་པ་ཡིན་ནོ། །དེ་ལྟར་ན་རྗོད་པར་བྱེད་པ་དང་བརྗོད་པར་བྱ་བའི་མཚན་ཉིད་ཀྱི་འབྲེལ་པ་ཡང་དོན་གྱིས་བསྟན་པ་ཡིན་ལ། བསྟན་པ་ནི་རྗོད་པར་བྱེད་པའི་དགོས་པ་སྟེ། དངོས་སུ་ནི་བརྗོད་པར་བྱ་བའི་རང་གི་ངོ་བོ་རྟོགས་པ་ཉིད་དེའི་དགོས་པའོ། །བརྗོད་པར་བྱ་བའི་དགོས་པ་ཡང་ཐོས་པ་ལས་བྱུང་བ་ལ་སོགས་པའི་ཤེས་རབ་བསྐྱེད་པའི་རིམ་པས་སྒྲིབ་པ་ཐམས་ཅད་དང་བྲལ་བའི་སངས་རྒྱས་ཉིད་ནི་དགོས་པ་མཐར་ཐུག་པ་ཡིན་ནོ། །འདི་ཡང་བདེ་གཤེགས་སྲས་ཀྱི་སྡོམ་ལ་འཇུག་པའི་སྒྲ་ཉིད་ཀྱིས་བསྡུས་པ་ཡིན་ཏེ། དེ་ཡང་གང་ཞིག་ཕན་ཡོན་བསྟན་པས་ཟུར་གྱིས་སྟོན་པར་འགྱུར་ཏེ། མི་གཙང་ལུས་འདི་བླངས་ནས་རྒྱལ་བའི་སྐུ། །རིན་ཆེན་རིན་ཐང་མེད་པར་བསྒྱུར་བས་ན། །ཞེས་བསྟན་ཏོ། །དེ་ལྟར་འབྲེལ་པ་དང༌། བརྗོད་པར་བྱ་བ་དང༌། དགོས་པ་རྣམས་ནི་འཇུག་པའི་ཡན་ལག་ཏུ་བསྟན་ཏེ། གཞན་དུ་ན་བརྗོད་པར་བྱ་བ་ལ་སོགས་པ་མེད་པར་དོགས་པས་འདིར་རྟོག་པ་དང་ལྡན་པ་རྣམས་འཇུག་པར་མི་འགྱུར་རོ། །ཁྱོད་ཀྱིས་རང་བཟོར་བརྗོད་པ་མ་ཡིན་ནམ་འདིས་སུ་ཞིག་འཛིན་པར་འགྱུར་ཞེ་ན། ལུང་བཞིན་ཞེས་གསུངས་ཏེ། ལུང་ལས་མ་འདས་པར་བཅོམ་ལྡན་འདས་ཀྱིས་ཇི་ལྟར་གཞན་གསུང་རབ་ཏུ་བསྟན་པ་དེ་བཞིན་དུ་བདག་གིས་དེའི་དོན་ལས་མ་འདས་པར་བསྟན་པར་བྱ་བའོ། །འདིས་ནི་ལུང་ལས་རང་བཟོར་རྩོམ་པ་ཡོངས་སུ་སྤངས་པ་ཡིན་ཏེ། །འདི་ནི་རང་དགའ་མ་ཡིན་ནོ་ཞེས་པའི་དོན་ཏོ། །འདིས་བདག་ཉིད་ཀྱིས་གསུང་རབ་ཀྱི་དོན་རྟོགས་པར་ཡང་ཟུར་གྱིས་བསྟན་པ་ཡིན་ཏེ། འདི་ཡང་འཇུག་པའི་ཡན་ལག་ཉིད་དོ། །གལ་ཏེ་ལུང་བཞིན་དུ་བསྟན་པར་བྱ་བ་མ་ཡིན་ནམ། དེ་ལྟ་ན་ལུང་ཉིད་ལ་དེ་འདོད་པ་རྣམས་འཇུག་པར་འགྱུར་ན། དེས་ན་ཅི་འདིས་ཅི་ཞིག་བྱ་ཞེ་ན། མདོར་བསྡུས་ནས་ཞེས་གསུངས་ཏེ། མདོར་བྱས་ནས་སོ། གལ་ཏེ་ལུང་དུ་བསྟན་པར་གྱུར་པ་དེ་ལྟ་མོད་ཀྱིས་མདོ་སྡེ་སྣ་ཚོགས་པ་དེ་རྣམས་སུ་ཤིན་ཏུ་རྒྱས་པར་བསྟན་པའི་ཕྱིར་ལ། ཁོ་བོས་ནི་མདོར་བྱས་ཤིང་བསྡུས་ནས་བསྟན་པར་བྱ་བ་སྟེ་འདི་ནི་ཁྱད་པར་རོ། །འདིས་ནི་བློས་པ་ཡིན་ནོ་ཞེས་བརྗོད་པ་ཡིན་ཏེ། འདི་ཡང་འཇུག་པའི་ཡན་ལག་མ་ཡིན་པ་སྤངས་པ་ཡིན་ནོ། །དེའི་ཕྱིར་འཇུག་པའི་ཡན་ལག་ཡིན་པས་ན་བརྗོད་པར་བྱ་བ་ལ་སོགས་པ་བསྟན་པ་ནི་མི་
རིགས་པ་མ་ཡིན་ནོ། །འོ་ན་ཕྱག་འཚལ་བར་བརྗོད་པ་དོན་མེད་པ་ཡིན་ནོ་ཞེ་ན། དེ་ཡང་ལེགས་པ་ཐོབ་པ་ལ་སོགས་པའི་དོན་དུ་རྗོད་པར་བྱེད་པ་ཡིན་ན་ཇི་ལྟར་ན་དོན་མེད་པ་ཉིད་ཡིན། འདིའི་དགོངས་པ་ནི་འདི་ཡིན་ཏེ། བདེ་བར་གཤེགས་པ་ལ་སོགས་པ་ལ་ཕྱག་འཚལ་བ་ལས་བྱུང་བའི་བསོད་ནམས་ཀྱི་སེམས་ཀྱི་རྒྱུད་ཡང་དག་པར་བརླན་པས་སྔོན་བྱས་པའི་སྡིག་པའི་རྒྱུན་ཤིན་ཏུ་བསྲབས་པས་བགེགས་ཉེ་བར་ཞི་བ་ནི་བརྩམས་པ་ཡོངས་སུ་རྫོགས་པར་འགྱུར་བ་དང༌། སྐྱེ་བོ་དམ་པ་མཐའ་དག་སོན་པའི་ལམ་དུ་བདག་ཉིད་རྗེས་སུ་འགྲོ་བར་ཡང་བསྟན་པར་འགྱུར་བ་དང༌། འདོད་པའི་ལྷ་ལ་སོགས་པ་ལ་ཕྱག་བྱས་པ་ཐོས་པ་ལས་ཡོད་པ་ཉིད་སྲིད་པ་ཡིན་ནོ། །ཞེས་ཉན་པ་པོ་རྣམས་བདག་ཉིད་དང་གཞུང་ལ་ཡང་གུས་པ་སྐྱེ་བར་འགྱུར་བའོ། །འདིར་ཡང་བདེ་བར་གཤེགས་པའི་སྒྲས་བརྗོད་པའི་བཅོམ་ལྡན་འདས་ཀྱི་ཆེ་བའི་བདག་ཉིད་ཐོས་པ་ལས་དེ་འདོད་པས་དེ་བསྐྱེད་པ་ལ་གཞོལ་བའི་ཡིད་ཀྱི་བདེ་བར་གཤེགས་པའི་སྲས་ཀྱི་སྡོམ་པ་ལ་འཇུག་པ་ཡོངས་སུ་ཤེས་པར་བྱ་བའི་ཕྱིར་འབད་པ་དང་ལྡན་པ་དག་འདིར་འཇུག་པར་འགྱུར་རོ། །འདི་དག་ནི་འདོད་པའི་ལྷ་ལ་སོགས་པ་ལ་ཕྱག་འཚལ་བའི་འབྲས་བུའོ། །དེས་ནི་འདི་ལྟར་གང་གིས་གང་འདོད་པ་དང་བྱེད་པར་འདོད་པ་དེས་དེ་ཉིད་བྱ་སྟེ། གཞན་མ་ཡིན་ལ་གཞན་དུ་བྱེད་ན་སྐབས་མ་ཡིན་པ་བརྗོད་པ་དང༌། ཧ་ཅང་ཐལ་བར་འགྱུར་ལ། དེའི་ཕྱིར་འདི་ཡང་སྡོམ་པ་ལ་འཇུག་པ་སྟོན་པར་མཛད་པ་དགོངས་པ་ཡིན་ན། ཅིའི་ཕྱིར་སྐབས་སུ་མ་བབ་པའི་འདོད་པའི་ལྷ་ལ་ཕྱག་འཚལ་བར་བྱེད་དེ། སྔར་བརྗོད་པའི་ཉེས་པ་གཉིས་སུ་ཐལ་བར་འགྱུར་རོ་ཞེས་གང་ཞིག་བརྗོད་པ་དེ་ཡང་བསལ་བར་གྱུར་པ་ཡིན་ལ། དེ་མ་ཐག་ཉིད་དུ་དེ་ལ་མཁོ་བ་བསྙད་པའི་ཕྱིར་སྐབས་སུ་མ་བབ་པ་བརྗོད་པ་ནི་མ་ཡིན་ནོ། །གང་ཞིག་དེ་མ་ཐག་ཏུ་མཁོ་བ་དེ་ནི་བརྗོད་པར་བྱ་བ་ཡིན་ཏེ། གཞན་དུ་མ་ཡིན་ནོ། །དེ་ལྟར་ན་ཧ་ཅང་ཐལ་བར་འགྱུར་བ་མེད་པའི་ཕྱིར་ཐམས་ཅད་ལེགས་པར་གནས་པ་མ་ཡིན་ནོ། །ཅི་སྟེ་ལུང་ལས་ལྷག་པ་མ་ཡིན་པར་མདོར་བསྡུས་ནས་རྗོད་པར་བྱེད་པ་ཡིན་ན་ཡང་དོན་ལ་ཁྱད་པར་མེད་པའི་ཕྱིར་ཅི་ལྟར་ན་ཁྱད་པར་དུ་འཇུག་པའི་ཡན་ལག་གི་སྒོ་ནས་འགའ་ཞིག་གིས་བླང་བར་བྱ་བར་འགྱུར། དེ་ལྟ་བས་ན་འདིར་
ལུང་ལས་ལྷག་པ་ཅུང་ཟད་ཀྱང་བརྗོད་པར་བྱ་བ་ཡིན་ནོ་ཞེས་དོགས་ནས། སྔོན་ཆད་ཅེས་བྱ་བ་ལ་སོགས་པ་གསུངས་ཏེ། འདིར་ལུང་ལས་ལྷག་པ་སྔོན་ཆད་མ་བྱུང་བ་གཞན་ཅུང་ཟད་འདིར་བདག་ལ་ལྷག་པ་བརྗོད་པ་མེད་པ་ཉིད་དོ། །ཡང་ན་ནིའི་སྒྲ་ནི་གང་གི་ཕྱིར་གྱི་དོན་ཏོ། །འོ་ན་དེ་ལས་ལྷག་པར་བརྗོད་པ་མེད་ན་ཡང་འདིའི་ཚིག་གི་དོན་སྤྲོས་པའི་ཁྱད་པར་ཅན་དུ་འགྱུར་ཏེ། དེ་ལྟ་བས་ན་ཡང་ཁྱད་པར་དུ་འཇུག་པར་འགྱུར་རོ་ཞེ་ན། འདིར་སྡེབ་སྦྱོར་ཞེས་བྱ་བ་གསུངས་ཏེ། སྡེབ་སྦྱོར་ནི་དོན་དང་ཚིག་བཀོད་པའི་ཁྱད་པར་ཡང་ཡོད་པ་ཡིན་ན། དེ་ལ་མཁས་ཤིང་བརྟགས་པ་བདག་ལ་ཡོད་པ་མ་ཡིན་ནོ། །ཡང་ནས་ཡང་གི་སྒྲ་ནི་ངེས་པར་གཟུང་བའོ། །གལ་ཏེ་དེ་ལྟར་ཡིན་ན་འདི་གཞན་གྱི་དོན་ལ་མཁོ་བ་ཉིད་དུ་ཇི་ལྟར་འགྱུར་ཞེ་ན། དེ་ཕྱིར་གསུངས་ཏེ། གཞན་གྱིས་ཐལ་བར་བརྗོད་པ་ཉིད་ཁས་ལེན་པར་བྱེད་དེ། གང་གི་ཕྱིར་སྔོན་མེད་པ་བརྗོད་པའི་ནུས་པ་བདག་ལ་མེད་ཅིང༌། སྡེབ་སྦྱོར་མཁས་པ་ཡང་བདག་ལ་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་གཞན་དོན་གྱི་བསམ་པ་བདག་ལ་མཁོ་བ་འདི་ཡང་ཡོད་པ་མ་ཡིན་ལ། རྣམ་པར་རྟོག་པ་ཡང་བདག་ལ་ཡོད་པ་མ་ཡིན་ཏེ། དེ་ལ་ནུས་པ་དང་བྲལ་བའི་ཕྱིར་རོ། །འོ་ན་ཅིའི་ཕྱིར་འདི་བྱེད་པའི་དོན་དུ་འབད་པར་བྱེད་ཅེ་ན། རང་གི་ཡིད་ལ་ཞེས་གསུངས་ཏེ། བདེ་བར་གཤེགས་པའི་སྲས་ཀྱི་སྡོམ་ལ་འཇུག་པ་གོམས་པའི་རོས་གོང་ནས་གོང་དུ་བསྒོམ་པར་འདོད་པས་སོ། །འདི་ཞེས་ཏེ། རབ་ཏུ་བྱེད་པའམ། སྡོམ་པ་ལ་འཇུག་པ་བསྟན་པ་བདག་གིས་བརྩམས་ཤིང་བྱས་པའོ། །འདས་པའི་རྐྱེན་བསྟན་པ་ནི་ནང་གི་དངོས་པོ་རྫོགས་པར་ཐུགས་ལ་གཞག་པ་ཡིན་ནོ། །རེ་ཞིག་ནང་གི་དོན་དུ་གཞུང་རྩོམ་པ་ཡང་མ་མཐོང་ལ། རང་གིས་བྱས་པས་བདག་ཉིད་ལ་ཁྱད་པར་འཇོག་པའང་མ་ཡིན་ཏེ། དངོས་པོ་ལ་འདུས་བྱས་པའི་ཁྱད་པར་ཡང་བདག་ཉིད་ལ་སྔར་ཉིད་ནས་ཡོད་པའི་ཕྱིར་རོ་ཞེ་ན། འདིར་དགེ་བ་བསྒོམ་ཕྱིར་ཞེས་བྱ་བ་ལ་སོགས་པ་གསུངས་ཏེ། གཞུང་འདིས་སམ་དེའི་དོན་གྱིས་སོ། །དགེ་བ་ནི་དགེ་ལེགས་ཏེ། དེ་ཡིད་ལ་བྱེད་པའོ། །བསྒོམ་ཕྱིར་ནི་བསྐྲུན་པར་བྱ་བའི་ཕྱིར་རོ། །དད་པའི་ཤུགས་འཕེལ་བར་འགྱུར་བ་ནི་སེམས་དང་བའི་རྒྱུན་གོང་ནས་གོང་དུ་འཕེལ་བར་འགྱུར་བ་སྟེ། རྒྱུན་དུ་འབྱུང་བར་རབ་ཏུ་འཇུག་པ་ཡིན་ནོ། །འདིས་ནི་རང་
གི་དོན་དུ་བྱེད་པ་ཉིད་དུ་ཉམས་སུ་མྱོང་བས་འདི་གྲུབ་པར་བསྟན་ཏོ། །གཞན་གྱི་དོན་ཅུང་ཟད་བྱེད་པ་ཡང་སྲིད་པ་ཡིན་ནོ་ཞེས་བསྟན་པ་བདག་དང་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཞེས་བྱ་བ་ནི་རྣམ་པ་གཞན་ཉེ་བར་བཀོད་པའོ། །རང་གི་དོན་དུ་བྱེད་པ་འདི་ནི་རེ་ཞིག་ཉམས་སུ་མྱོང་བས་གྲུབ་པ་ཡིན་ལ། གལ་ཏེ་ཡང་བདག་དང་རང་བཞིན་མཉམ་པ་གཞན་ཁ་ཅིག་གིས་གཞུང་ངམ་དོན་འདི་མཐོང་ཞིང་རྟོགས་ན་གཞན་གྱི་དོན་ལ་མཁོ་བའི་ཕྱིར་འདི་ཡང་དོན་བཅས་ཡིན་ཏེ། དེའི་ཕྱིར་ཡང་གཞན་གྱི་དོན་ལ་མཁོ་བའི་ཡང་ཕྱིར་འདི་དགོས་པ་དང་བཅས་པ་ཡིན་ནོ། །འདིས་ཀྱང་ནི་གཞན་གྱི་དོན་ལ་མཁོ་བ་ཡིན་པའི་ཕྱིར་འདི་དོན་དང་བཅས་ཤིང་དགོས་པ་དང་བཅས་པ་ཡིན་ཏེ། ཅི་ཞིག་ལྟར་ཡང་གཞན་གྱི་དོན་ལ་མཁོ་བ་སྲིད་པའི་ཕྱིར་རོ། །ཚིགས་སུ་བཅད་པ་གཉིས་པོ་འདིས་བདག་ཉིད་མངོན་པའི་ང་རྒྱལ་མེད་པ་ཉིད་དུ་བསྟན་ཏོ། །ད་ནི་སྡོམ་པ་ལ་འཇུག་པའི་བསྟན་པ་འཛིན་དུ་གཞུག་པའི་ཕྱིར་གླེང་བསླང་བ་སྦྱར་བ། དལ་འབྱོར་ཞེས་བྱ་བ་ལ་སོགས་པ་གསུངས་ཏེ། མི་ཁོམ་པ་བརྒྱད་སྤངས་པ་ནི་དལ་བ་འབྱོར་བའོ། །ཚོགས་པ་འདི་ནི་ཤིན་ཏུ་རྙེད་དཀའ་བ་སྟེ། ཤིན་ཏུ་དཀའ་བས་རྙེད་པར་བྱ་བ་ཡིན་ནོ། །རྒྱ་མཚོ་ཆེན་པོའི་གཉའ་ཤིང་གི་བུ་གར་རུ་སྦལ་གྱི་མགྲིན་པ་ཆུད་པ་ལྟ་བུར་ཇི་ཞིག་ལྟར་ཐོབ་པར་བྱ་བ་ཐོབ་པ་ནི་རྙེད་པའོ། །དེ་ཡང་སྐྱེས་བུའི་དོན་སྒྲུབ་པ་སྟེ་སྐྱེས་བུའི་དོན་ནི་མངོན་པར་མཐོ་བ་དང་ངེས་པར་ལེགས་པའི་མཚན་ཉིད་དོ། །དེ་སྒྲུབ་པ་ནི་རྫོགས་པར་བྱེད་པ་སྟེ། དེའི་ཡན་ལག་ཡིན་པའི་ཕྱིར་དེ་ནུས་པ་ཡིན་ནོ། ཞེས་བྱ་བའི་ཐ་ཚིག་གོ །གལ་ཏེ་དེ་ལྟ་བུར་གྱུར་བ་འདི་ལ་ཕན་པ་མ་བསྒྲུབས་ན་སྟེ། རང་དང་གཞན་ལ་བདེ་བའི་རྒྱུ་མཐོ་རིས་དང་ཐར་པ་སྒྲུབ་པར་བྱེད་པ་མ་བླངས་ན་དེའི་ཚེ་ཕྱིས་ཏེ་སླར་ཡང་ངོ༌། །འདི་ནི་དེ་བཞིན་གཤེགས་པ་འབྱུང་བ་དང༌། དད་པ་དང་མི་ཁོམ་པ་བརྒྱད་སྤངས་པའི་མིའི་དངོས་པོ་ཞེས་བྱ་བ་སྟེ། འདི་ཡང་དག་འབྱོར་པ་ནི་ཕྲད་པ་དང་འདུ་བ་དང་ཚོགས་པ་ཞེས་བྱ་བའི་ཐ་ཚིག་གོ །གལ་ནི་ཅི་ལྟར་ག་ལས་ཀྱང་འབྱུང་བར་མི་འགྱུར་ཏེ། མི་ཁོམ་བའི་གནས་སྐབས་ན་ཤིན་ཏུ་རྙེད་པར་དཀའ་བའི་ཕྱིར་ན་ཆོས་རབ་ཏུ་རྣམ་པར་འབྱེད་པར་བྱ་བར་མི་ནུས་པའི་ཕྱིར་
རོ་སྙམ་དུ་དགོངས་པའོ། །ཇི་སྐད་དུ། འཕགས་པ་སྡོང་པོ་བཀོད་པའི་མདོར། འཕགས་པ་རྒྱལ་བ་དྲོད་ཀྱི་སྐྱེ་མཆེད་ཀྱི་རྣམ་པར་ཐར་པ་ལས་མི་ཁོམ་པ་བརྒྱད་ལས་ལྡོག་པ་ཡང་རྙེད་པར་དཀའ། མི་ཉིད་ཐོབ་པ་ཡང་རྙེད་པར་དཀའ། དལ་བ་ཕུན་སུམ་ཚོགས་པ་རྣམ་པར་དག་པ་ཡང་རྙེད་པར་དཀའ། སངས་རྒྱས་འབྱུང་བ་ཡང་རྙེད་པར་དཀའ། དབང་པོ་མ་ཚང་བ་མེད་པ་ཡང་རྙེད་པར་དཀའ། སངས་རྒྱས་ཀྱི་ཆོས་ཉན་པ་ཡང་རྙེད་པར་དཀའ། སྐྱེས་བུ་དམ་པ་དང་འགྲོགས་པ་ཡང་རྙེད་པར་དཀའ། ཡང་དག་པའི་དགེ་བའི་བཤེས་གཉེན་རྣམས་ཀྱང་རྙེད་པར་དཀའ། ཡང་དག་པའི་རྗེས་སུ་བསྟན་པ་ཉེ་བར་སྦྱོར་བ་ཡང་རྙེད་པར་དཀའ། མིའི་འཇིག་རྟེན་ན་ཡང་དག་པའི་འཚོ་བ་ཡང་རྙེད་པར་དཀའོ་ཞེས་གསུངས་སོ། །འདི་ཉིད་ལ་དགོངས་ནས། །འཇིག་རྟེན་ན་ནི་མི་རྙེད་དཀའ། །སངས་རྒྱས་འབྱུང་བ་ཤིན་ཏུ་དཀའ། །དེ་བས་དད་དང་རབ་བྱུང་དང༌། །གྲུབ་པའང་ཤིན་ཏུ་རྙེད་པར་དཀའ། །སེམས་ཅན་ཀུན་ལ་རྗེས་བརྩེ་བས། །སྡུག་བསྔལ་ཐམས་ཅད་རབ་ཞིའི་ཕྱིར། །བྱང་ཆུབ་སེམས་ནི་བསྟན་པ་དག །གཅིག་ནས་གཅིག་ཏུ་དཀོན་པ་ཡིན། །ཞེས་གསུངས་སོ། །ཡང་མི་ཁོམ་པ་ནི་འདི་རྣམས་ཡིན་ཏེ། དམྱལ་བ་ཡི་དགས་དུད་འགྲོ་དང༌། །ཀླ་ཀློ་ཚེ་རིངས་ལྷ་དང་ནི། །ལོག་ལྟ་སངས་རྒྱས་མི་འབྱུང་དང༌། །ལྐུགས་པ་འདི་དག་མི་ཁོམ་བརྒྱད། །ཅེས་སོ། །དེ་བས་ནད་ལྟ་ཉིད་དུ་བརྩོན་པར་བྱའོ། །ད་ནི་བྱང་ཆུབ་ཀྱི་སེམས་ཡོངས་སུ་གཟུང་བའི་དོན་དུ་དེ་ལ་འདོད་པ་བསྐྱེད་པའི་ཕྱིར་ཕན་ཡོན་ལ་འཇུག་པ། ཇི་ལྟར་མཚན་མོ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་མཚན་མོའི་སྤྲིན་འདུས་པའི་དུས་སུ་སྤྲིན་རྣམས་ཀྱིས་མུན་ནག་ཤིན་ཏུ་སྟུག་པར་གྱུར་པ་ན་གློག་འགྱུ་སྐད་ཅིག་ཐང་ཅིག་ཙམ་སྣང་བར་བྱེད་དེ། དངོས་པོར་གྱུར་པ་ཅུང་ཟད་རབ་ཏུ་གསལ་བར་བྱེད་དོ། །འདིར་ཡང་དཔེ་དེ་ཉིད་སངས་རྒྱས་མཐུ་ཡིས་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་བཅོམ་ལྡན་འདས་ཉིད་ཕན་པ་དང་བདེ་བ་ལ་སྦྱོར་བའི་ཕྱིར་སྐལ་བ་ཅན་དང་སྐལ་བ་ཅན་མ་ཡིན་པའི་སེམས་ཅན་གྱི་རྒྱུད་ལ་གཟིགས་ཤིང་རྟག་ཏུ་བཞུགས་ཏེ། གང་གི་ཚེ་གང་དུ་ཐབས་གང་གིས་གང་ལ་སྐལ་བ་དང་ལྡན་པ་གང་ཡིན་པ་གཟིགས་ནས། དེའི་ཚེ་དེར་ཐབས་དེས་དེ་ལ་དེ་
བྱིན་གྱིས་རློབ་པར་མཛད་ཅིང༌། སྐལ་བ་དང་མི་ལྡན་པའི་གནས་སྐབས་སུ་བཏང་སྙོམས་ཀྱིས་བཞུགས་སོ། །དེ་ལྟ་ན་དེ་བཞིན་གཤེགས་པའི་བྱིན་གྱི་བརླབས་ཀྱིས་ཅི་ཞིག་ལྟར་ན་རྙེད་པར་དཀའ་བ་འབྱུང་བའི་ཕྱིར་འཇིག་རྟེན་ཏེ། སྐྱེ་བོའི་བསོད་ནམས་ཕན་པ་དང་བདེ་བའི་རྒྱུ་དགེ་བའི་ལས་རྣམས་ལ་བློ་གྲོས་ཡུད་ཙམ་ཞིག་འབྱུང་སྟེ། དེ་ནི་དེར་མི་བརྟེན་པའི་ཕྱིར་དང༌། འཁོར་བ་ཐོག་མ་མེད་པར་འཇིག་རྟེན་གྱི་མི་དགེ་བའི་ཕྱོགས་ཉིད་ལ་གོམས་པའི་ཕྱིར་རོ། །དེས་ཅིར་འགྱུར་ཞེ་ན། དེ་ལྟས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དེ་ལྟ་བས་ན་དགེ་བ་སྟེ། བསོད་ནམས་ཉམ་ཆུང་བ་དང་སྟོབས་དང་བྲལ་བ་ཉིད་གློག་འགྱུ་བ་དང་འདྲ་བའི་ཕྱིར་རོ། །རྟག་ཅེས་བྱ་བ་ནི་དུས་ཐམས་ཅད་དུ་ཤིན་ཏུ་ཉམ་ཆུང་བ་ཡིན་ནོ། །དེ་ལྟ་ན་གང་ལ་ཤིན་ཏུ་སྟོབས་ཆེ་བ་ཡོད་ཅེ་ན། སྡིག་པ་སྟོབས་ཆེན་ཞེས་གསུངས་པ་ལ། སྟོབས་ཆེན་ནི་ཡང་མི་དགེ་བ་ཆེན་པོ་ཡིན་ཏེ། ཕྱིའི་སྤྲིན་རུམ་གྱི་མུན་པ་དང་འདྲ་བའི་ཕྱིར་རོ། །དེའི་མི་བཟོད་པ་ནི་ཤིན་ཏུ་འཇིགས་པར་བྱེད་པ་སྟེ། དམྱལ་བ་ལ་སོགས་པའི་སྡུག་བསྔལ་སྐྱེད་པར་བྱེད་པའི་ཕྱིར་དང༌། ཐུབ་པར་དཀའ་བའི་ཕྱིར་རོ། །དེ་ལྟར་འདི་ལ་ནུས་པ་ཆེན་པོ་ཡོད་དུ་ཆུག་ཀྱང་དེ་ལྟ་ན་ཡང་དེ་ལས་གཞན་བསོད་ནམས་སྟོབས་དང་ལྡན་པས་རྒྱལ་བར་བྱེད་པར་འགྱུར་ཏེ། དེ་ལྟར་ཡང་ཅུང་ཟད་ཀྱང་ཉམས་པ་མེད་དོ་ཞེ་ན། དེ་ནི་ཞེས་བྱ་བ་ལ་སོགས་པ་གསུངས་ཏེ། ནུས་པ་ཆེན་པོ་དང་ལྡན་པ་དེ་ལྟ་བུ་དེ་ནི་གཞན་གང་གིས་ཏེ། ཅིག་ཤོས་བསོད་ནམས་ཀྱིས་ཟིལ་གྱིས་གནོན་པར་འགྱུར་ཞིང་རྒྱལ་བར་འགྱུར་ཏེ། གཞན་གང་གིས་ཀྱང་མ་ཡིན་ནོ་ཞེས་བྱ་བའི་དོན་ཏོ། །ཡང་ཅིའི་ཕྱིར་འདི་ལྟར་བརྗོད་ཅེ་ན། རྫོགས་པའི་བྱང་ཆུབ་ཅེས་བྱ་བ་ལ་སོགས་པ་ལ། རྫོགས་པའི་བྱང་ཆུབ་སྟེ་སངས་རྒྱས་ཉིད་ལ་སེམས་ཅན་ཐམས་ཅད་ཡང་དག་པར་གདོན་པའི་བསམ་པས་དེ་ཐོབ་པར་བྱ་བའི་དོན་དུ་ལྷག་པའི་བསམ་པ་སེམས་གང་ཞིག་ཡིད་ལ་བྱེད་པ་སྟེ། གལ་ཏེ་དེ་མེད་པར་གྱུར་ནའོ། །ནུས་པ་ཆེན་པོ་ཡང་དེ་ལས་གཞན་སྟོབས་ཆེ་བས་རྒྱལ་བར་བྱེད་དེ། མཚན་མོའི་མུན་པ་ལ་ཉི་མས་བྱེད་པ་བཞིན་དུ། བྱང་ཆུབ་ཀྱི་སེམས་ལས་གཞན་གཉེན་པོ་ཆེན་པོ་སྲིད་པ་ཡང་མ་ཡིན་ནོ། །དེ་ལྟ་
བས་ན་དེ་གཞོམ་པའི་ཕྱིར་བྱང་ཆུབ་ཀྱི་སེམས་ཉིད་བླང་བར་བྱ་སྟེ། གཞན་ནི་མ་ཡིན་ནོ་སྙམ་དུ་དགོངས་པའོ། །བྱང་ཆུབ་ཀྱི་སེམས་བླང་བར་བྱ་བ་ཡིན་ནོ་ཞེས་བསྐལ་པ་ཞེས་པ་ལ་སོགས་པ་འདིས་ཀྱང་གསུངས་ཏེ། བར་གྱི་བསྐལ་པ་གཅིག་ཀྱང་བསྐལ་པ་ཡིན་ལ། བར་གྱི་བསྐལ་པ་ཉི་ཤུ་ཡང་བསྐལ་པ་ཡིན་ཞིང༌། བར་གྱི་བསྐལ་པ་བརྒྱད་ཅུ་ཡང་བསྐལ་པ་ཡིན་ཏེ། དེ་ལ་ཡང་བསྐལ་པ་ཆེན་པོ་ཞེས་བརྗོད་ལ། འདི་ནི་བསྐལ་པ་ཆེན་པོ་ཉིད་དུ་གཟུང་ངོ༌། །བསྐལ་པ་མང་པོར་ཏེ་བསྐལ་པ་གྲངས་མེད་པ་དང་པོའི་ཁོངས་སུ་གཏོགས་པ་རྣམས་སོ། །རབ་དགོངས་མཛད་པ་ནི་འབད་པས་སེམས་པར་མཛད་པ་རྣམས་ཀྱིས་ཏེ། གཟིགས་པ་ནི་རྟོགས་པའོ། །ཐུབ་དབང་རྣམས་ཀྱིས་ནི་སངས་རྒྱས་བཅོམ་ལྡན་འདས་རྣམས་ཀྱིས་སོ། །ཕན་པའི་དོན་ཐམས་ཅད་གྲུབ་པར་རུང་བ་ཡིན་ཏེ། དེའི་ས་བོན་དུ་གྱུར་པའི་ཕྱིར་རོ། །འདི་ཉིད་ནི་བྱང་ཆུབ་ཀྱི་སེམས་ཉིད་དོ། །ཅིའི་ཕྱིར་འདི་ཁོ་ན་ཕན་པ་ཡིན་ཞེ་ན། གང་ཕྱིར་ཞེས་གསུངས་ཏེ། གང་གི་ཕྱིར་བདེ་འཕེལ་ནི་ཕུལ་དུ་བྱུང་བ་སྟེ། སངས་རྒྱས་ཀྱི་མཚན་ཉིད་དོ། །ཚད་མེད་ནི་གཞལ་དུ་མེད་པ་ཡིན་ལ། སྐྱེ་བོའི་ཚོགས་ནི་སེམས་ཅན་གྱི་ཕུང་པོའོ། །ཐོབ་པར་བྱེད་པ་ནི་འཁོར་བའི་སྡུག་བསྔལ་གྱི་མཚོ་ལས་སྒྲོལ་བར་བྱེད་པའོ། །དེའི་ཕྱིར་ན་འདི་ཉིད་ཕན་པའོ། །ཡང་ན་གང་གི་ཕྱིར་བདེ་བ་ནི་ལྷ་དང་མིའི་བདེ་བ་ཕུན་སུམ་ཚོགས་པའི་མཚན་ཉིད་ཡིན་ལ། འཕེལ་བ་ནི་འཕེལ་བར་གྱུར་པ་སྟེ་དོན་གྱིས་ན་བྱང་ཆུབ་ཀྱི་སེམས་ཉིད་དོ། །ཐོབ་པར་བྱེད་པ་ནི་ཤིན་ཏུ་ཚིམ་པར་བྱེད་པ་སྟེ་བྱ་སླ་བས་ཆེས་ལྷག་པར་གང་འགྱུར་བ་དེ་ལ་འཐོབ་པར་བྱེད་པ་ཞེས་བརྗོད་དེ། དཔེར་ན་ཞོས་བདག་ཚིམ་པར་བྱས་སོ་ཞེས་བྱ་བ་ལྟ་བུ་སྟེ། ཞོས་ཆེས་ལྷག་པར་སླ་བར་གྱུར་ཏོ་ཞེས་བྱ་བའི་དོན་ཏོ། །ཡང་ན་རྫོགས་པའི་བྱང་ཆུབ་ཀྱི་སེམས་གང་ལས་བདེ་བ་འཕེལ་བ་ཡིན་ནོ་ཞེས་བྱ་བར་སྦྱར་བར་བྱའོ། །ཅིའི་ཕྱིར་རབ་ཏུ་འཕེལ་ཞེ་ན། །བདེ་བླག་ཉིད་དུ་ཞེས་གསུངས་ཏེ། ཚོགས་མེད་པར་ཡིན་ཏེ་སྐྲ་འབལ་བ་ལ་སོགས་པའི་དཀའ་བ་ཆེན་པོ་མེད་པས་སོ། །འདི་ལྟར་ཡང་བྱང་ཆུབ་ཀྱི་སེམས་དང་སྡོམ་པ་ཉིད་བྱང་ཆུབ་སེམས་དཔའི་སྡོམ་པ་རྣམས་དང་ཡེ་ཤེས་ཀྱི་ཚོགས་དཔག་ཏུ་མེད་པས་ལྷ་དང་མི་
རྣམས་ཀྱི་ཕུན་སུམ་ཚོགས་པར་རབ་ཏུ་འཕེལ་བ་བདེ་བླག་ཏུ་འཐོབ་ཅིང་སེམས་ཅན་རྣམས་ལ་ཆེས་ལྷག་པར་ཚིམ་པར་བྱེད་པ་ཡིན་ཏེ། དེ་ལྟར་སྐྱོ་ངལ་ཀུན་བསལ་བའི། །བྱང་སེམས་ཤིང་རྟ་ཞོན་ནས་ནི། །བདེ་ནས་བདེ་རུ་འགྲོ་བ་ལ། །སེམས་ཤེས་སུ་ཞིག་སྐྱིད་ལུག་འགྱུར། །ཞེས་གང་འཆད་པར་འགྱུར་བའོ། །བཅོམ་ལྡན་འདས་ལ་འཕགས་པ་བྱམས་པའི་སྟོབས་ལ་སོགས་པ་སྐྱེས་པའི་རབས་རྣམས་སུ་དཀའ་བ་ཆེན་པོ་མཛད་པ་ཐོས་པ་མ་ཡིན་ནམ། དེ་ཅི་ལྟར་ན་བདེ་བླག་ཉིད་དུ་བདེ་བ་འཕེལ་བར་བྱེད་ཅེ་ན། ཉེས་པ་འདི་ནི་མེད་དེ་གང་གི་ཕྱིར་སྙིང་རྗེའི་བདག་ཉིད་ཅན་རྣམས་ཀྱི་གཞན་ལ་ཕན་པ་དང་བདེ་བ་སྐྱེད་པར་བྱེད་པའི་སྡུག་བསྔལ་ནི་རང་དང་གཞན་ལ་བསྐྱེད་པར་བྱའོ། །ཕ་རོལ་སྡུག་བསྔལ་བས་སྡུག་བསྔལ་བར་གྱུར་པའི་བློ་ཅན་རྣམས་ནི་སྡུག་བསྔལ་དེ་འདྲ་བ་ལ་བདེ་བ་ཉིད་དུ་མཐོང་བར་འགྱུར་རོ། །རང་དང་གཞན་ལ་ཕན་པའི་རྒྱུ་ཉིད་ཡིན་པ་འདིའི་ཕྱིར་ཡང་བྱང་ཆུབ་ཀྱི་སེམས་ཡོངས་སུ་གཏོང་བར་མི་བྱའོ་ཞེས་བསྟན་པའི་ཕྱིར། སྲིད་པའི་སྡུག་བསྔལ་ཞེས་བྱ་བ་ལ་སོགས་པ་གསུངས་ཏེ། འཁོར་བར་གནས་པའི་དམྱལ་བ་ལ་སོགས་པའི་འགྲོ་བའི་སྡུག་བསྔལ་བདེ་བ་མ་ཡིན་པ་མྱོང་བ་རྣམས་ཡིན་ལ། བརྒྱ་ཕྲག་ནི་མཐར་ཐུག་པ་མེད་པའི་ཚོགས་སོ། །གཞོམ་འདོད་པ་ནི་ཡོངས་སུ་འདོར་བར་འདོད་པས་དེ་ཉན་ཐོས་དང་རང་སངས་རྒྱས་ཀྱི་རིགས་རྣམས་ཀྱི་སོ། །བདག་ཉིད་འབའ་ཞིག་གི་མ་ཡིན་པར་འཇིག་རྟེན་པ་རྣམས་ཀྱི་སྐྱེ་བ་ལ་སོགས་པའི་སྡུག་བསྔལ་ཡང་བསལ་བར་འདོད་པ་ནི་བྲལ་བར་འདོད་པ་སྟེ། བྱང་ཆུབ་སེམས་དཔའི་རིགས་རྣམས་ཀྱིས་སོ། །གཅིག་ཏུ་རང་དང་གཞན་གྱི་སྡུག་བསྔལ་བསལ་བར་འདོད་པ་མ་ཡིན་གྱི། གཞན་ཡང་བདེ་བ་དང་སྐྱིད་པ་མང་པོ་སྟེ། དེ་རྣམས་ཀྱི་བརྒྱ་ཕྲག་ནི་ལྷ་དང་མི་རྣམས་ཀྱི་སྐྱེ་བ་འཐོབ་པ་ཉམས་སུ་མྱོང་བར་འདོད་པ་སྟེ། འཁོར་བའི་བདེ་བ་འདོད་པས་ཀྱང་ངོ༌། །རྟག་ཏུ་ནི་དུས་ཐམས་ཅད་དུའོ། །གཏང་མི་བྱ་བ་སྟེ། བྱང་ཆུབ་ཀྱི་སེམས་ཁས་བླང་བར་བྱའོ་ཞེས་བྱ་བའི་དོན་ཏོ། །ཡང་ན་རྫོགས་པའི་བྱང་ཆུབ་འདོད་པ་རྣམས་ཉིད་ཀྱི་ཁྱད་པར་དག་གོ །ཡོན་ཏན་གྱི་ཁྱད་པར་འདི་ལས་ཀྱང་བྱང་ཆུབ་ཀྱི་
སེམས་གཟུང་བར་བྱའོ་ཞེས་བྱ་བར་འཁོར་བའི་བཙོན་ར་ཞེས་པ་ལ་སོགས་པ་གསུངས་ཏེ། འཁོར་བ་ཉིད་བཙོན་ར་ཡིན་ལ། དེར་བསྡམས་པ་ནི་འཆིང་བདག་སྟེ། འདིར་འདོད་ཆགས་ལ་སོགས་པ་ཉིད་ཡིན་ནོ་ཞེས་ཚིག་རྣམ་པར་སྦྱར་རོ། །དེ་ལྟ་བུའི་ཉམ་ཐག་རྣམས་ནི་ཉོན་མོངས་པ་རྣམས་སོ། །བསྐྱེད་གྱུར་པ་ནི་དང་པོ་ཉིད་དུ་བྱང་ཆུབ་ཀྱི་སེམས་དང་སྡོམ་པ་ལེན་པས་བྱང་ཆུབ་ཀྱི་སེམས་བསྐྱེད་པ་པ་ཉིད་ནའོ། །བདེ་གཤེགས་རྣམས་ཀྱི་སྲས་ཞེས་བརྗོད་བྱ་ཞིང༌། །ཞེས་པ་ནི་སངས་རྒྱས་ཀྱི་སྲས་ཞེས་བརྗོད་པར་བྱའོ། །སྐད་ཅིག་གིས་ཞེས་པ་ནི་སྐད་ཅིག་དེ་ཉིད་ལའོ། །འདི་འབའ་ཞིག་ནི་མ་ཡིན་ནོ་ཞེས་བྱ་བར་འཇིག་རྟེན་ལྷ་མིར་བཅས་ཞེས་པ་ལ་སོགས་པ་གསུངས་ཏེ། ལྷ་མིར་ཏེ། ལྷ་དང་མི་དང་ལྷན་ཅིག་པར་གྱུར་པ་ཡིན་ལ། གང་ལྷ་མ་ཡིན་གྱི་འཇིག་རྟེན་ལ་སོགས་པ་དེ་རྣམས་ཀྱི་ཡང་ཕྱག་བྱར་གྱུར་པ་སྟེ། ཕྱག་བྱ་བའི་འོས་དང་བསྟོད་པར་བྱ་བའི་འོས་སུ་ཡང་གྱུར་པའོ། །གྱུར་པའི་སྒྲས་ནི་འདས་པ་བསལ་བར་བྱེད་པའི་ཕྱིར་བྱང་ཆུབ་ཀྱི་སེམས་སྐྱེས་པའི་དུས་ཉིད་ན་གྱུར་པ་ཡིན་ནོ། །ཡོན་ཏན་དང་ཕན་ཡོན་མཐོང་བ་འདི་ལས་ཀྱང་བྱང་ཆུབ་ཀྱི་སེམས་བླང་བ་ལ་འབད་བར་བྱའོ་ཞེས་བྱ་བ་ནི། མི་གཙང་བ་ཞེས་བྱ་བ་ལ་སོགས་པ་གསུངས་ཏེ། མི་གཙང་བའི་ལུས་འདི་ནི་མི་ལ་སོགས་པའི་ལུས་ཀྱི་རང་བཞིན་དེའི་རྒྱུའམ་དེའི་ངོ་བོ་ཡིན་ཏེ། དེས་བསྐྱེད་པ་ཞེས་བྱ་བའི་དོན་ཏོ། །དེ་བླངས་ནས་ནི་བཟུང་ནས་སོ། །རྒྱལ་བ་ཉིད་རིན་ཆེན་ཏེ། རྙེད་དཀའ་བ་ཐོབ་པ་ལ་སོགས་པའི་ཡོན་ཏན་དང་ལྡན་པའི་ཕྱིར་རོ། །བྱང་ཆུབ་ཀྱི་སེམས་ཀྱིས་དེའི་སྐུར་བ་སྒྱུར་བ་ནི་སྐྱེད་པར་བྱེད་པ་སྟེ། དེ་བཞིན་གཤེགས་པའི་སྐུར་རྫོགས་པར་བྱེད་ཅེས་པའི་དོན་ཏོ། །ཅི་ལྟ་བུར་གྱུར་པ་ཞིག་ཡིན་ཞེ་ན། རིན་ཐང་མེད་པ་སྟེ། གང་ལ་རིན་ཐང་མེད་པ་དེ་ལ་དེ་སྐད་ཅེས་བརྗོད་དེ། ཁམས་གསུམ་པོ་ཐམས་ཅད་ཡོན་ཏན་མཆོག་ཏུ་གྱུར་པ་དང་ལྡན་པའི་ཕྱིར་དང༌། ཡོན་ཏན་གྱི་མཐའ་མི་ཤེས་པའི་ཕྱིར་རོ། །དེ་ཉིད་ཀྱི་ཕྱིར་གསེར་སྒྱུར་རྩིའི་རྣམ་པ་སྟེ། ཤིན་ཏུ་ཆེར་སྒྱུར་བར་བྱེད་པའི་ཕྱིར་མཆོག་ཏུ་སྒྱུར་བའོ། །དེ་ལྟ་བུའི་བྱང་ཆུབ་ཀྱི་སེམས་འདི་ལ་གསེར་སྒྱུར་རྩིའི་རྣམ་པ་ལྟ་བུ་དང་གཞན་བྱང་ཆུབ་ཀྱི་སེམས་
ཞེས་བརྗོད་དོ། །རབ་བརྟན་གཟུང་ནི་ཅི་ལྟར་བླངས་པ་དེ་སླར་གཡོ་བ་མེད་པར་རོ། །དེ་ལྟ་བས་ན་བདག་ཉིད་རྒྱལ་བ་རིན་པོ་ཆེར་བྱེད་པར་འདོད་པས་བྱང་ཆུབ་ཀྱི་སེམས་ཀྱི་གསེར་སྒྱུར་རྩི་ཆེན་པོ་ལྟ་བུར་རབ་ཏུ་བསྟན་པར་གཟུང་བར་བྱའོ། །དེ་ཡང་བྱམས་པའི་རྣམ་པར་ཐར་པ་ལས་རིགས་ཀྱི་བུ་འདི་ལྟ་སྟེ་དཔེར་ན། དངུལ་ཆུའི་རིགས་གསེར་དུ་སྣང་བ་ཞེས་བྱ་བ་ཡོད་དེ། དེ་སྲང་གཅིག་གིས་ཀྱང་ལྕགས་སྲང་སྟོང་གསེར་དུ་བསྒྱུར་རོ། །དངུལ་ཆུ་སྲང་གཅིག་པོ་དེ་ནི་ལྕགས་སྲང་སྟོང་པོ་དེས་ཟད་པར་བྱ་བའམ། ལྕགས་སུ་བསྒྱུར་བར་མི་ནུས་སོ། །དེ་བཞིན་དུ་ཐམས་ཅད་མཁྱེན་པ་ཉིད་དུ་སེམས་བསྐྱེད་པའི་བཅུད་ཀྱིས་ལེན་དགེ་བའི་རྩ་བ་ཡོངས་སུ་བསྔོས་པའི་ཡེ་ཤེས་ཀྱིས་ཡོངས་སུ་བཟུང་བ་ནི་ལས་དང་ཉོན་མོངས་པའི་སྒྲིབ་པའི་ལྕགས་ཐམས་ཅད་ཟད་པར་བྱས་ཏེ། ཆོས་ཐམས་ཅད་ཐམས་ཅད་མཁྱེན་པའི་གསེར་གྱི་ཁ་དོག་ཏུ་བྱེད་ཀྱང་ཐམས་ཅད་མཁྱེན་པ་ཉིད་དུ་བསྐྱེད་པའི་བཅུད་ཀྱིས་ལེན་ཅིག་པོ་དེ་ནི་ལས་དང་ཉོན་མོངས་པའི་ལྕགས་ཐམས་ཅད་ཀྱིས་ཀྱང་ཉོན་མོངས་པའམ་ཟད་པར་བྱ་བར་མི་ནུས་སོ་ཞེས་གསུངས་སོ། །སྲིད་པའི་འགྲོ་བ་རྣམས་སུ་འབྱོར་པ་འདོད་པ་རྣམས་ཀྱིས་ཀྱང་འདིར་ཐེ་ཚོམ་དང་ཕྱིན་ཅི་ལོག་མི་བྱའོ་ཞེས་ཉེ་བར་བསྟན་པའི་ཕྱིར་འགྲོ་བའི་དེད་དཔོན་ཞེས་བྱ་བ་ལ་སོགས་པ་གསུངས་ཏེ། འགྲོ་བ་ཉིད་ཚང་རྡལ་ཏེ། ཟོང་གི་རྫས་ཉོ་བ་དང་འཚོང་བའི་གྲོང་ཁྱེར་ནི་འདིར་ཚོང་རྡལ་ཡིན་ལ། དེ་བཞིན་དུ་དགེ་བ་དང་མི་དགེ་བའི་ལས་ཀྱིས་ཟོང་གི་རྫས་ཉོ་བ་དང་འཚོང་བའི་གནས་ནི་འགྲོ་བའི་ཚོང་རྡལ་ལོ། །དེ་རྣམས་སུ་གནས་པ་ནི་རྣམ་པར་གནས་པ་ཉིད་ཀྱི་ངང་ཚུལ་གྱི་རང་བཞིན་གང་ལ་ཡོད་པ་དེ་ལ་དེ་སྐད་ཅེས་བརྗོད་དེ། ཀྱེ་འགྲོ་བའི་ཚོང་རྡལ་དུ་གནས་པའི་ངང་ཚུལ་ཅན་རྣམས། རིན་ཆེན་བྱང་ཆུབ་སེམས་ལེགས་བརྟན་པར་ཟུང༌། །ཞེས་དེ་རྣམས་ལ་འབོད་པ་ཡིན་ནོ། །བྱང་ཆུབ་ཀྱི་སེམས་ཉིད་རིན་ཆེན་ཏེ། རིན་པོ་ཆེ་ལྟ་བུའོ། །དཔེར་ན་ཡིད་བཞིན་གྱི་ནོར་བུ་རིན་པོ་ཆེས་དབུལ་བའི་ངན་འགྲོ་ཞི་བར་བྱེད་པའི་རྒྱུ་ཡིན་པ་དེ་བཞིན་དུ་བྱང་ཆུབ་ཀྱི་སེམས་རིན་པོ་ཆེ་འདི་ཡང་ཡིན་ནོ། །དགོས་པ་ནི་ཁྱེད་ཅག་ཚོང་པ་བཞིན་དུ་བདེ་བ་ཕུན་སུམ་
ཚོགས་པ་ཐོབ་པ་དོན་དུ་གཉེར་བ་ཡིན་པས་རིན་པོ་ཆེ་འདི་ཉིད་གུས་པ་ཆེན་པོས་ཟུང་ཞིག་ཅེས་བྱ་བ་འདི་ཡིན་ནོ། །ཅིའི་ཕྱིར་ཞེ་ན། རིན་ཆེ་བས་ཞེས་ཏེ། འདི་ནི་གཏན་ཚིགས་ཀྱི་ཚིག་ཡིན་ཏེ། གང་གི་ཕྱིར་འདི་ནི་རིན་ཐང་མེད་པ་ཐམས་ཅད་ལས་མཆོག་ཏུ་གྱུར་པ་འཇིག་རྟེན་དང་འཇིག་རྟེན་ལས་འདས་པའི་ཕུན་སུམ་ཚོགས་པའི་རྒྱུར་གྱུར་པའི་ཕྱིར་རོ། །དེའི་ཕྱིར་འདི་ཉིད་གཟུང་བར་བྱའོ་ཞེས་བྱ་བའི་དོན་ཏོ། །འདི་ཅི་ལྟར་ཤེས་ན། ལེགས་པར་ཡོངས་སུ་བརྟགས་ན་ཞེས་གསུངས་ཏེ། ཤིན་ཏུ་ངེས་པར་བརྟགས་ཤིང་ཡང་དག་པར་གཏན་ལ་ཕབ་པ་ཞེས་བྱ་བའི་དོན་ཏོ། །གང་དག་གིས་ཤེ་ན། ཚད་མེད་བློས་ཏེ། ཚད་མེད་ཅིང་གཞལ་བར་མི་ནུས་པའི་བློ་དང་བློ་གྲོས་གང་ལ་ཡོད་པ་དེ་དག་གིས་ཏེ། ཤེས་རབ་ཆེན་པོ་དང་ལྡན་པའི་སངས་རྒྱས་དང་བྱང་ཆུབ་སེམས་དཔའ་རྣམས་ཀྱིས་སོ། །དེ་དག་གིས་ཡོངས་སུ་བརྟགས་པ་ལས་འཁྲུལ་པ་མི་མངའ་བའི་ཕྱིར། ལེགས་པར་ཡོངས་སུ་བརྟགས་ན་ཞེས་གསུངས་སོ། །ཡང་ཇི་ལྟ་བུར་གྱུར་པ་ཞིག་གིས་ཤེ་ན། འགྲོ་བའི་དེད་དཔོན་གཅིག་པུ་སྟེ། འགྲོ་བ་ན་ཐུགས་རྗེའི་དབང་དུ་གྱུར་པའི་སངས་རྒྱས་བཅོམ་ལྡན་འདས་དང་བྱང་ཆུབ་སེམས་དཔའ་འདི་དག་ནི་དེད་དཔོན་གཅིག་བུ་ཉིད་དེ་དེ་དག་གིས་སོ། །དཔེར་ན་ཚོང་པ་རྣམས་ལ་ཕན་པ་དང་མི་ཕན་པ་ཐོབ་པ་དང་སྤོང་བ་དག་ལ་ཕན་པར་འདོད་པ་དང་ཤེས་པ་དང་ལྡན་པའི་དེད་དཔོན་གྱིས་ཁྲིད་པར་བྱེད་པར་གྱུར་ན་དེས་སླུ་བར་བྱེད་པ་མ་ཡིན་ནོ། །དེ་བཞིན་དུ་འདིར་ཡང་ཡིན་ནོ་སྙམ་དུ་དགོངས་པའོ། །དེའི་ཕྱིར་བྱང་ཆུབ་ཀྱི་སེམས་རིན་པོ་ཆེ་རིན་ཐང་མེད་པ་བརྟེན་པར་ཟུང་ཤིག་ཅེས་པའོ། །འདི་ཡང་དེ་ཉིད་དུ། རིགས་ཀྱི་བུ་འདི་ལྟ་སྟེ་དཔེར་ན། ཇི་སྲིད་དུ་ཉི་མ་དང་ཟླ་བའི་དཀྱིལ་འཁོར་གྱི་འོད་ཀྱིས་སྣང་བར་བྱེད་པ་དེ་སྲིད་དུ་ནོར་དང༌། འབྲུ་དང༌། རིན་པོ་ཆེ་དང༌། ས་ལེ་སྦྲམ་དང༌། དངུལ་དང༌། མེ་ཏོག་དང༌། སྤོས་དང་ཕྲེང་བ་དང༌། བྱུག་པ་དང། གོས་དང༌། ལོངས་སྤྱོད་གང་ཇི་སྙེད་པ་དེ་དག་ཐམས་ཅད་ཀྱིས་ནོར་བུ་རིན་པོ་ཆེ་དབང་གི་རྒྱལ་པོའི་རིན་དུ་མི་བཟོད་དོ། །དེ་བཞིན་དུ་ཇི་སྲིད་དུ་དུས་གསུམ་དུ་ཐམས་ཅད་མཁྱེན་པའི་ཡེ་ཤེས་ཀྱིས་ཆོས་ཀྱི་དབྱིངས་ཀྱི་ཡུལ་སྣང་བར་མཛད་པ་དེ་སྲིད་དུ་ལྷ་དང་མིའི་སེམས་ཅན་
ཐམས་ཅད་དང༌། ཉན་ཐོས་དང༌། རང་སངས་རྒྱས་ཀྱི་དགེ་བའི་རྩ་བ་ཟག་པ་དང་བཅས་པ་དང་ཟག་པ་མེད་པ་གང་ཇི་སྙེད་པ་དེ་དག་ཐམས་ཅད་ཀྱིས་བྱང་ཆུབ་ཏུ་སེམས་བསྐྱེད་པའི་ནོར་བུ་རིན་པོ་ཆེ་ཆེན་པོ་དབང་གི་རྒྱལ་པོའི་རིན་དུ་མི་ཆོག་གོ་ཞེས་གསུངས་སོ། །མཆོག་ཏུ་ཐུན་མོང་མ་ཡིན་པ་ཕུལ་དུ་བྱུང་བ་དང་ལྡན་པའི་དཔག་བསམ་གྱི་ཤིང་ལྟ་བུ་ཆེ་བའི་བདག་ཉིད་བསྟན་པའི་ཕྱིར། དགེ་བ་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་ཆུ་ཤིང་ལན་ཅིག་འབྲས་བུ་བསྐྱེད་ནས་ཡང་འབྲས་བུ་མི་སྐྱེད་པ་དེ་བཞིན་དུ་བྱང་ཆུབ་ཀྱི་སེམས་ལས་གཞན་པའི་དགེ་བ་ཀུན་ནི་ཅུང་ཟད་ཀྱང་མ་ཡིན་པ་ཉིད་དོ། །རྣམ་པར་སྨིན་པ་ཡོངས་སུ་སྨིན་ནས་ཡང་འབྲས་བུ་བསྐྱེད་པའི་ནུས་པ་མེད་པ་ཡིན་ཏེ། དེ་ཙམ་ཉིད་ཀྱིས་འདིའི་རྣམ་པར་སྨིན་པ་ཟད་པའི་ཕྱིར་དང༌། རྣམ་པར་སྨིན་པ་ཡང་ལུང་དུ་བསྟན་དུ་མེད་པས་ཡང་འབྲས་བུ་དང་རྗེས་སུ་འབྲེལ་པ་མེད་པའི་ཕྱིར་རོ།། །།བམ་པོ་གཉིས་པ། ཡང་བྱང་ཆུབ་ཀྱི་སེམས་འདིའི་ཁྱད་པར་རྟག་པར་ཡང་ཞེས་བྱ་བ་ལ་སོགས་པ་གསུངས་ཏེ། རྟག་པར་དུས་ཐམས་ཅད་དུ་དེ་ལས་གཞན་པའི་དགེ་བ་བཞིན་དུ་ལྷ་དང་མིར་སྐྱེས་པ་རྣམས་ལ་བདེ་བ་ཕུན་སུམ་ཚོགས་པ་བྱུང་ནས་ཟད་པར་འགྱུར་བ་མ་ཡིན་ཏེ། བརྟན་པའི་རང་བཞིན་ཡིན་པའི་ཕྱིར་དང༌། སྐད་ཅིག་སོ་སོ་ལ་དགེ་བའི་ཚོགས་ཀྱི་རྒྱུན་རྣམ་པ་དུ་མས་འགེངས་པའི་ཕྱིར་རོ། །འབྱིན་པས་འཕེལ་བ་ནི་བྱང་ཆུབ་ཀྱི་སེམས་ཀྱི་ལྗོན་ཤིང་སྟེ། རྒྱུན་མི་འཆད་པར་བདེ་བ་ཕུན་སུམ་ཚོགས་པའི་འབྲས་བུ་འབྱིན་པའི་ཕྱིར་དང༌། གོང་ནས་གོང་དུ་ཡོན་ཏན་གཞན་དང་གཞན་གྱི་ཁྱད་པར་སྐྱེད་པའི་ཕྱིར་རོ། །བྱང་ཆུབ་ཀྱི་སེམས་ནི་ལྗོན་ཤིང་ལྟ་བུར་དཔེར་བྱས་པ་ཡིན་ཏེ། སྐྱེས་བུ་རྟག་ཅེས་བྱ་བ་ལ་སོགས་པའི་ཚིག་བསྡུས་པ་ལྟ་བུའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་རྒྱུན་མི་འཆད་ཅིང་ཕུལ་དུ་བྱུང་བ་དང་ལྡན་པའི་བདེ་བ་ཕུན་སུམ་ཚོགས་པ་ཐོབ་པར་འདོད་པའི་རྟོག་པ་དང་ལྡན་པ་རྣམས་ཀྱིས་འདི་ཉིད་གཟུང་བར་བྱའོ། །འདི་ཡང་བློ་གྲོས་མི་ཟད་པས་བསྟན་པ་ལས། བཙུན་པ་ཤ་ར་དྭ་ཏིའི་བུ་འདི་ལྟ་སྟེ་དཔེར་ན། རྒྱ་མཚོ་ཆེན་པོར་ཆུའི་ཐིག་
པ་ལྷུང་བ་ནི་བསྐལ་པའི་མཐར་མ་ཐུག་གི་བར་དུ་བར་མ་དོར་ཡོངས་སུ་ཟད་པའམ་གཏུགས་པ་མེད་དོ། །དེ་བཞིན་དུ་བྱང་ཆུབ་ཏུ་ཡོངས་སུ་བསྔོས་པའི་དགེ་བའི་རྩ་བ་ནི་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་བར་མ་དོར་ཡོངས་སུ་ཟད་པའམ་གཏུགས་པ་མེད་དོ་ཞེས་གསུངས་སོ། །ཡང་བྱང་ཆུབ་ཀྱི་སེམས་ནི་དགེ་བ་མ་ལུས་པ་འཕེལ་བར་བྱེད་པ་འབའ་ཞིག་ནི་མ་ཡིན་ཏེ། མི་དགེ་བའི་ཕྱོགས་ཟད་པར་བྱེད་པའི་རྒྱུ་ཡང་ཡིན་པར་ཚིགས་སུ་བཅད་པ་ཕྱེད་དང་གཉིས་ཀྱིས་བསྟན་པའི་ཕྱིར་རོ། །སྡིག་པ་ཤིན་ཏུ་ཞེས་པ་ལ་སོགས་པ་གསུངས་ཏེ། བྱང་ཆུབ་ཀྱི་སེམས་ཡོངས་སུ་བཟུང་བ་ལས་སྔར་བྱས་པའི་སྡིག་པ་མི་དགེ་བའི་ལས་རྣམས་ནི་དམྱལ་བ་ལ་སོགས་པ་རྣམས་སུ་བཟོད་པར་དཀའ་བའི་སྡུག་བསྔལ་སྐྱེད་པར་བྱེད་པའི་ཕྱིར་མི་བཟད་པ་རྣམས་ཏེ། ཤིན་ཏུ་འཇིགས་པར་བྱེད་པའམ་ཆེན་པོ་རྣམས་སོ། །བྱང་ཆུབ་ཀྱི་སེམས་གང་ལ་བརྟེན་ནས་ཏེ། བརྟེན་པར་བྱས་པ་ནི་བསྐྱེད་པ་དང་བསྲུང་བ་དང༌། སྤེལ་བ་དང༌། བརྟེན་པའི་མཚན་ཉིད་ལས་སོ། །ཡུད་ཀྱིས་ནི་སྐད་ཅིག་མ་ཉིད་ལ་དེ་བསྐྱེད་པ་ཙམ་གྱིས་བསོད་ནམས་ཀྱི་ཕུང་པོ་ཆེན་པོ་ཉེ་བར་སྩོགས་པའི་ཕྱིར་རོ། །སྒྲོལ་འགྱུར་བ་ནི་ངེས་པར་སྒྲོལ་བར་འགྱུར་བ་སྟེ། དེའི་མཐུས་ཟིལ་གྱིས་མནན་ཅིང་འདའ་བར་བྱེད་པས་ཞེས་བྱ་བའི་དོན་ཏོ། །ཇི་ལྟར་ཞེ་ན། དཔའ་ལ་བརྟེན་ནས་འཇིགས་པ་ཆེན་པོ་ལྟར་ཏེ། དཔེར་ན་ཁ་ཅིག་གིས་གནོད་པ་ཆེན་པོ་བྱས་པ་ཡང་སྐྱེས་བུ་སྟོབས་དང་ལྡན་པ་ལ་བརྟེན་ནས་སྒྲོལ་བར་འགྱུར་ཏེ། དེ་གནོད་པ་བྱས་པའི་འབྲས་བུས་འཇིགས་པ་མེད་པར་འགྱུར་བ་དེ་བཞིན་དུ་སྐབས་སུ་བབ་པ་ལ་ཡང་ངོ༌། །བྱང་ཆུབ་ཀྱི་སེམས་དེ་ལྟ་བུར་གྱུར་པ་དེ་ལ་མི་ཤེས་པའི་སེམས་ཅན་ཤེས་རབ་དང་བྲལ་བ་རྨོངས་པའི་འགྲོ་བ་རྣམས་ཀྱིས་ཅི་ལྟར་ན་མི་བརྟེན་ཅིང་རྟེན་པར་མི་བྱེད་ཅེས་བྱ་བའི་དོན་ཏེ་དེ་ལ་བརྟེན་པར་བྱ་བ་ཉིད་ཡིན་ནོ་སྙམ་དུ་དགོངས་པའོ། །འདི་ཡང་དེ་ཉིད་ལས་རིགས་ཀྱི་བུ་འདི་ལྟ་སྟེ་དཔེར་ན་སྐྱེས་བུ་དཔའ་བོ་ལ་ཡང་དག་པར་བརྟེན་པ་ན་དགྲ་བོ་ཐམས་ཅད་ཀྱིས་མི་འཇིགས་སོ། །དེ་བཞིན་དུ་བྱང་ཆུབ་ཏུ་སེམས་བསྐྱེད་པའི་སྐྱེས་བུ་དཔའ་བོ་ལ་ཡང་དག་པར་བརྟེན་པའི་བྱང་ཆུབ་སེམས་དཔའ་
ནི་ཉེས་པར་སྤྱོད་པའི་དགྲ་བོ་ཐམས་ཅད་ཀྱིས་མི་འཇིགས་སོ་ཞེས་གསུངས་སོ། །བྱང་ཆུབ་ཀྱི་སེམས་ཀྱིས་སྡིག་པ་ཟད་པའི་དཔེ་གཞན་ཡང་དེས་ནི་དུས་མཐའ་ཞེས་བྱ་བ་ལ་སོགས་པ་གསུངས་པ་ལ། དུས་མཐའ་ནི་འཇིག་པའི་དུས་སོ། །མེ་ནི་ཉི་མ་བདུན་ཤར་བ་ལས་བྱུང་བའོ། །དཔེར་ན་བསམ་གཏན་དང་པོ་དང་བཅས་པའི་འདོད་པའི་ཁམས་ཐམས་ཅད་ངེས་པར་བསྲེགས་ཏེ་མ་ལུས་པར་ངེས་པར་བསྲེགས་པ་ན་ཇི་ལྟར་ཐལ་བ་ཡང་ལུས་པ་མེད་པ་དེ་བཞིན་དུ་སྡིག་པ་རྣམས་སོ། །ཇི་ལྟ་བུར་གྱུར་པ་ཞིག་ཅེ་ན། བྱང་ཆུབ་ཀྱི་སེམས་གང་གིས་ཆེན་པོ་རི་རབ་དང་མཉམ་པ་ངུ་འབོད་ཆེན་པོ་ལ་སོགས་པ་སྡུག་བསྔལ་བའི་རྣམ་པར་སྨིན་པ་རྣམས་ངེས་པར་སྲེག་པར་བྱེད་དེ། དེའི་རྣམ་པར་སྨིན་པ་ཉེ་བར་འཇོམས་པས་རྩ་བ་ནས་མེད་པར་བྱེད་དོ། །སྐད་ཅིག་གིས་ནི་ཡུན་མི་རིང་པས་སོ། །དེ་ལ་མི་ཤེས་སེམས་ཅན་རྣམས་ཀྱིས་ཅིས་མི་བསྟེན། །ཞེས་སྦྱར་བར་བྱའོ། །འདི་ཡང་དེ་ཉིད་ལས་ཉེས་པར་བྱས་པ་ཐམས་ཅད་སྲེག་པར་བྱེད་པས་སྲེག་པའི་བསྐལ་པའི་མེ་ལྟ་བུའོ། །མི་དགེ་བའི་ཆོས་ཐམས་ཅད་ནུབ་པར་བྱེད་པས་ས་འོག་ལྟ་བུའོ་ཞེས་གསུངས་སོ། །བཅོམ་ལྡན་འདས་ཀྱིས་ལས་བྱས་པ་ཆུད་མི་ཟ་བར་གསུངས་པ་མ་ཡིན་ནམ། དེ་ཇི་ལྟར་ན་འདི་སྐད་དུ་བརྗོད་ཅེ་ན། བདེན་མོད་ཀྱི་བརྗོད་པར་བྱའོ། །བྱང་ཆུབ་ཀྱི་སེམས་ལ་སོགས་པའི་བསོད་ནམས་ཀྱི་ཚོགས་སྐད་ཅིག་སོ་སོ་ལ་ནམ་མཁའི་ཁམས་ཁྱབ་པར་བྱེད་པ་ཆེན་པོའི་ནང་དུ་ཆུད་པར་གྱུར་པས་རྒྱ་མཚོར་ལན་ཚྭ་སྲང་གཅིག་གི་དཔེ་བཞིན་དུ་མི་མངོན་པའི་ཕྱིར་དང༌། གཉེན་པོའི་ཕྱོགས་སྟོབས་དང་ལྡན་པས་ཟིལ་གྱིས་གནོན་པའི་ཕྱིར་འབྲས་བུ་སྐྱེད་པའི་ནུས་པ་མེད་པ་དེ་བསྲེགས་པ་ཉིད་ཡིན་པས་ཉེས་པ་མེད་དོ། །ཡང་ན་མ་སྤྱད་པར་ནི་ཟད་ཅེས་བྱ་བ་ནི་ཐབས་མེད་པ་ལ་དགོངས་ནས་གསུངས་པ་ཡིན་ལ། འདི་ནི་སྡིག་པ་ཐམས་ཅད་རྩ་བ་ནས་མེད་པར་བྱེད་པའི་ཐབས་ཆེན་པོ་ཡིན་ནོ། །འདི་ལྟར་ཡང་གང་གི་ཚེ་བྱང་ཆུབ་སེམས་དཔའ་ནམ་མཁའི་ཁམས་ཁྱབ་པའི་སེམས་ཅན་ཐམས་ཅད་སྡུག་བསྔལ་ཐམས་ཅད་ལས་བཏོན་ཏེ། བདེ་བ་ཕུན་སུམ་
ཚོགས་པ་ཐམས་ཅད་ལ་སྦྱར་བར་བྱའོ་སྙམ་དུ་ལྷག་པའི་བསམ་པ་རྣམ་པར་སེམས་པར་བྱེད་ཅིང་སྔར་བྱས་པའི་སྡིག་པ་ཡང་རྣམ་པར་སུན་འབྱིན་པ་ཀུན་ཏུ་སྤྱོད་པས་ཟད་པར་བྱེད་དོ། །དེའི་ཚེ་བྱང་ཆུབ་ཀྱི་སེམས་ཀྱི་སྟོབས་ཉིད་ཀྱིས་དེའི་རྒྱུད་ལ་སྡིག་པ་ཇི་ལྟར་འབྱུང་ཞིང༌། གང་གིས་ན་རྩོད་པའི་སྐབས་ཡོད་པར་འགྱུར་ཏེ། ཐམས་ཅད་དུ་འཁྲུགས་པ་མེད་དོ། །དེ་ལྟ་བས་ན། དགེ་གཞན་གང་གིས་ཟིལ་གྱིས་གནོན་པར་འགྱུར། །ཞེས་གསུངས་པ་དེ་ཡང་གསལ་བར་བྱས་པ་ཡིན་ནོ། །ཡང་གཞན་ནི་རྣམ་པར་སྨིན་པ་མ་ངེས་པ་ལ་དགོངས་ནས་འདི་དག་ཐམས་ཅད་གསུངས་པ་ཡིན་ཏེ། རྣམ་པར་སྨིན་པ་ངེས་པ་ནི་ལས་གང་གིས་ཀྱང་དགག་པར་མི་ནུས་པའི་ཕྱིར་རོ་ཞེས་བརྗོད་དོ། །འདི་ལྟར་ཡང་བྱང་ཆུབ་ཀྱི་སེམས་བླང་བར་བྱ་བ་ཉིད་དུ་གང་གིས་ཞེས་གསུངས་ཏེ། བྱང་ཆུབ་ཀྱི་སེམས་གང་གི་ཕན་ཡོན་ནི་ངོ་བོ་ཉིད་དུ་གྱུར་པའི་ཡོན་ཏན་ནོ། །དཔག་ཏུ་མེད་པ་ནི་གཞལ་དུ་མེད་པའོ། །བྱམས་མགོན་ནི་བཅོམ་ལྡན་འདས་མི་ཕམ་པས་སོ། །ཇི་ལྟ་བུར་གྱུར་པ་ཞིག་ཅེ་ན། བློ་དང་ལྡན་པ་སྟེ། བྱང་ཆུབ་སེམས་དཔའོ། །བཤད་པ་ནི་གསུངས་པར་གྱུར་པའོ། །གང་ཞིག་ལ་ཞེ་ན། ནོར་བཟངས་ལ་སྟེ། བྱང་ཆུབ་སེམས་དཔའ་ནོར་བཟངས་ལའོ། །དེ་ལྟར་ཡང་སྡོང་པོ་བཀོད་པ་ལས། རིགས་ཀྱི་བུ་བྱང་ཆུབ་ཀྱི་སེམས་ནི་སངས་རྒྱས་ཀྱི་ཆོས་ཐམས་ཅད་ཀྱི་ས་བོན་ལྟ་བུའོ། །འགྲོ་བ་ཐམས་ཅད་ཀྱི་དཀར་པོའི་ཆོས་རྣམ་པར་འཕེལ་བར་བྱེད་པས་ཞིང་ལྟ་བུའོ། །འཇིག་རྟེན་ཐམས་ཅད་བརྟན་པས་ས་ལྟ་བུའོ་ཞེས་བྱ་བ་ནས། བྱང་ཆུབ་སེམས་དཔའ་ཐམས་ཅད་ཡོངས་སུ་བསྲུང་བས་ཕ་ལྟ་བུའོ་ཞེས་བྱ་བའི་བར་དུ་ཡང་བསྒྲེའོ། །དབུལ་བ་ཐམས་ཅད་ཡང་དག་པར་གཅོད་པས་རྣམ་ཐོས་ཀྱི་བུ་ལྟ་བུའོ། །དོན་ཐམས་ཅད་ཡང་དག་པར་བསྒྲུབས་པས་ཡིད་བཞིན་གྱི་ནོར་བུའི་རྒྱལ་པོ་ལྟ་བུའོ། །བསམ་པ་ཐམས་ཅད་ཡོངས་སུ་རྫོགས་པར་བྱེད་པས་བུམ་པ་བཟང་པོ་ལྟ་བུའོ། །ཉོན་མོངས་པའི་དགྲ་ཕམ་པར་བྱ་བ་ལ་མདུང་ཐུང་ལྟ་བུའོ་ཞེས་བྱ་བ་ལ་སོགས་པ་རྒྱ་ཆེར་གསུངས་སོ། །དེ་ལ་མི་ཤེས་སེམས་ཅན་ཅིས་མི་བརྟེན། །ཞེས་
པ་ནི་འདིར་ཡང་སྦྱར་རོ། །ད་ནི་བྱང་ཆུབ་ཀྱི་སེམས་ཀྱི་རབ་ཏུ་དབྱེ་བ་བསྟན་པའི་ཕྱིར། བྱང་ཆུབ་ཀྱི་སེམས་དེ་ཞེས་བྱ་བ་ལ་སོགས་པ་གསུངས་ཏེ། དེ་ཞེས་པ་ནི་ཕན་ཡོན་བསྟན་མ་ཐག་པའི་བྱང་ཆུབ་ཀྱི་སེམས་སོ། །གཉིས་ནི་རྣམ་པ་གཉིས་ཏེ། ཤེས་བྱ་ནི་གོ་བར་བྱ་བའོ། །རིགས་དང་ས་ལ་སོགས་པར་གྱུར་པས་རྣམ་པ་དུ་མ་སྲིད་ན། ཇི་ལྟར་གཉིས་ཡིན་ཞེ་ན། མདོར་བསྡུས་ནས་ཞེས་གསུངས་ཏེ། རྣམ་པ་གཞན་ཡོད་ན་ཡང་འདི་ནི་མདོར་བསྡུས་ནས་གཉིས་སུ་བརྗོད་དོ། །གཉིས་པོ་གང་ཡིན་ཞེ་ན། བྱང་ཆུབ་སྨོན་པའི་སེམས་ཤེས་པ་ནི་གཅིག་ཡིན་ལ། བྱང་ཆུབ་འཇུག་པ་ཞེས་པ་ནི་གཉིས་པའོ། །བྱང་ཆུབ་ལ་སྨོན་པ་ཡིན་ཏེ། སེམས་དེ་ཉིད་དམ་དེ་ལ་སེམས་པའོ། །སེམས་གང་སྨོན་པ་ལས་སྐྱེས་པར་གྱུར་པ་སྦྱིན་པ་ལ་སོགས་པ་ལ་འཇུག་པ་བྲལ་བ་དེ་ནི་སྨོན་པ་བྱང་ཆུབ་ཀྱི་སེམས་ཏེ། འདི་ལྟར་འགྲོ་བ་ཐམས་ཅད་བསྐྱབ་པའི་ཕྱིར་སངས་རྒྱས་སུ་གྱུར་ཅིག་ཅེས་དང་པོ་ཁོ་ནར་སྨོན་པའི་སེམས་ལྟ་བུའོ། །འཇུག་པ་ཉིད་ལ་སེམས་པའམ་འཇུག་པ་ཉིད་ཀྱི་སེམས་ཏེ། སེམས་དེའི་རང་བཞིན་ཡིན་པའི་ཕྱིར་རོ། །སེམས་སྔ་མ་སྔོན་དུ་སོང་བ་ཉིད་གང་ནས་བཟུང་སྟེ་སྡོམ་པ་ལེན་པ་སྔོན་དུ་འགྲོ་བའི་ཚོགས་རྣམས་ལ་རབ་ཏུ་འཇུག་པ་དེ་ནི་འཇུག་པ་བྱང་ཆུབ་ཀྱི་སེམས་སོ། །བསྟན་པའི་རིམ་པས་རྣམ་པ་གཉིས་ཡིན་ཏེ། དབྱེ་བ་ནི་དེ་དག་ཁོ་ནའོ་ཞེས་བྱ་བ་ཉིད་ཀྱི་སྒྲས་བསྟན་ཏོ། །ཀྱང་གི་སྒྲས་ཕན་ཚུན་སྡུད་པ་ཡིན་ཏེ། གཉི་ག་ཡང་བྱང་ཆུབ་ཀྱི་སེམས་ཡིན་པར་བསྟན་ཏོ། །དེས་ནི་སྔ་མ་བྱང་ཆུབ་ཀྱི་སེམས་མ་ཡིན་ནོ་སྙམ་པའི་དོགས་པ་བསལ་བ་ཡིན་ཏེ། དཔའ་བར་འགྲོ་བའི་མདོ་ལས། བཙན་ཐབས་སུ་བྱང་ཆུབ་ཏུ་སེམས་བསྐྱེད་པ་དེ་ཡང་སངས་རྒྱས་ཀྱི་རྒྱུ་ཉིད་དུ་བསྟན་པའི་ཕྱིར་རོ། །དེ་བཞིན་དུ་སྡོང་པོ་བཀོད་པ་ལས། རིགས་ཀྱི་བུ་སེམས་ཅན་གྱི་འཇིག་རྟེན་ན་སེམས་ཅན་གང་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་སྨོན་པ་དེ་དག་ཀྱང་དཀོན་ནོ། །དེ་བས་ཀྱང་གང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཇུག་པའི་སེམས་ཅན་དེ་དག་ནི་ཤིན་ཏུ་དཀོན་ནོ་ཞེས་གསུངས་སོ། །ད་ནི་རབ་ཏུ་དབྱེ་
བ་བསྟན་པ་ཉིད་དཔེས་གསལ་བར་བྱ་བའི་ཕྱིར། འགྲོ་བར་འདོད་དང་ཞེས་བྱ་བ་ལ་སོགས་པ་གསུངས་ཏེ། དཔེར་ན་སྐྱེས་བུ་འགའ་ཞིག་མངོན་པར་འདོད་པའི་ཡུལ་དུ་ཕྱིན་པར་བྱ་བའི་ཆེད་དུ་འགྲོ་བར་འདོད་པ་ནི་འགྲོ་བར་བསམ་པ་སྟེ་འགྲོ་བ་ཉིད་མ་ཡིན་ནོ། །ཡང་གཞན་ནི་དེར་ཕྱིན་པར་བྱ་བའི་ཆེད་དུ་འཇུག་པ་སྟེ་འགྲོ་བ་ཉིད་དོ། །ཇི་ལྟར་ནི་ཇི་བཞིན་དུའོ། །དེ་དག་གི་དབྱེ་བའི་ཁྱད་པར་ཤེས་པ་ནི་རྟོགས་པའོ། །དེ་བཞིན་དུ་ནི་དེ་ལྟར་རོ། །བྱང་ཆུབ་སྨོན་པ་དང་འཇུག་པའི་སེམས་འདི་དག་གཉིས་ཀྱི་བྱེ་བྲག་ནི་དབྱེ་བ་ཡིན་ལ། ཤེས་པར་བྱ་བ་ནི་རྟོགས་པར་བྱ་པའོ། །མཁས་པས་ཤེས་པ་ནི་ཤེས་པས་སོ། །ཇི་ལྟར་ཞེ་ན། རིམ་བཞིན་ཏེ། སྔར་གྱིས་སྨོན་པ་བྱང་ཆུབ་ཀྱི་སེམས་བསྟན་པ་དང༌། ཕྱིས་ཀྱིས་འཇུག་པའི་སེམས་ཞེས་པ་ནི་རིམ་བཞིན་ཞེས་བྱ་བའི་དོན་ཏོ། །དེ་ལ་སྨོན་པ་བྱང་ཆུབ་ཀྱི་སེམས་འདི་སྒྲུབ་པ་དང་བྲལ་ཡང་འཁོར་བར་འབྲས་བུ་ཆེན་པོ་འབྱུང་བར་བཅོམ་ལྡན་འདས་ཀྱིས་གསུངས་པ་ཡིན་ནོ་ཞེས་པ་ནི་བྱང་ཆུབ་སྨོན་པའི་ཞེས་བྱ་བ་ལ་སོགས་པ་གསུངས་ཏེ། ད་སྒྲུབ་པ་དང་བྲལ་བ་ཡིན་དུ་ཆུག་མོད་ཀྱི། དེ་ལྟ་ནའང་སངས་རྒྱས་ཉིད་ཀྱི་རྒྱུ་ཉིད་དུ་རེ་ཞིག་གཞག་སྟེ། དགེ་བ་གཞན་ལས་ཆེན་པོ་ཡིན་པར་རྟག་པར་ཡང་འབྲས་བུ་འབྱིན་ཞེས་བྱ་བ་ལ་སོགས་པའི་ཁྱད་པར་གྱིས་ཁྱད་པར་དུ་བྱས་པའི་ཕྱིར་རོ། །དེ་ལྟར་ཡང་བྱམས་པའི་རྣམ་པར་ཐར་པ་ལས། རིགས་ཀྱི་བུ་འདི་ལྟ་སྟེ་དཔེར་ན་རྡོ་རྗེ་རིན་པོ་ཆེ་ནི་ཆག་ཀྱང་གསེར་གྱི་རྒྱན་ཁྱད་པར་དུ་འཕགས་པ་ཐམས་ཅད་ཟིལ་གྱིས་གནོན་ཅིང་རྡོ་རྗེ་རིན་པོ་ཆེའི་མིང་ཡང་མི་འདོར་ལ། དབུལ་བ་ཐམས་ཅད་ཀྱང་རྣམ་པར་བཟློག་གོ །རིགས་ཀྱི་བུ་དེ་བཞིན་དུ་ཐམས་ཅད་མཁྱེན་པར་སེམས་བསྐྱེད་པའི་རྡོ་རྗེ་རིན་པོ་ཆེ་ནན་ཏན་དང་བྲལ་བས་ཉན་ཐོས་དང་རང་སངས་རྒྱས་ཀྱི་ཡོན་ཏན་གྱི་གསེར་གྱི་རྒྱན་ཐམས་ཅད་ཟིལ་གྱིས་གནོན་ཅིང༌། བྱང་ཆུབ་སེམས་དཔའི་མིང་ཡང་མི་འདོར་ལ། འཁོར་བའི་དབུལ་བ་ཐམས་ཅད་ཀྱང་རྣམ་པར་བཟློག་གོ་ཞེས་གསུངས་སོ། །དེ་བས་ན་གང་གིས་ཕ་རོལ་ཏུ་ཕྱིན་པ་རྣམས་ལ་ཐམས་ཅད་ཀྱི་ཐམས་ཅད་རྣམ་པ་ཐམས་ཅད་དུ་སློབ་པར་མི་ནུས་པ་དེས་ཀྱང་
བྱང་ཆུབ་ཀྱི་སེམས་བསྐྱེད་པར་བྱ་བ་མ་ཡིན་ཏེ། འདི་ལྟར་ཐབས་ཡོངས་སུ་བཟུང་བས་འབྲས་བུ་ཆེན་པོ་ཉིད་དུ་འགྱུར་བའི་ཕྱིར་རོ། །དེ་ཡང་ཇི་སྐད་དུ། འཕགས་པ་རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་འདི་ལྟར་ཁྱོད་བྱ་བ་མང་བ། བྱེད་པ་མང་བ་སྟེ། ཐམས་ཅད་ཀྱི་ཐམས་ཅད་རྣམ་པ་ཐམས་ཅད་ཀྱི་ཐམས་ཅད་དུ་སྦྱིན་པའི་ཕ་རོལ་ཏུ་ཕྱིན་པ་ལ་བསླབ་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་བར་ལ་བསླབ་པར་མི་ནུས་ཀྱི། དེ་བས་ན་རྒྱལ་པོ་ཆེན་པོ་ཁྱོད་ཡང་དག་པར་རྫོགས་པའི་བྱང་ཆུབ་འདུན་པ་དང༌། དད་པ་དང། དོན་དུ་གཉེར་བ་དང༌། སྨོན་པ་འགྲོ་ཡང་རུང༌། འགྲེང་ཡང་རུང༌། འདུག་ཀྱང་རུང༌། ཉལ་ཡང་རུང༌། སད་ཀྱང་རུང༌། ཟ་ཡང་རུང༌། འཐུང་ཡང་རུང༌། རྟག་པར་རྒྱུན་དུ་དྲན་པར་གྱིས་ལ་ཡིད་ལ་ཟུང་སྟེ་སྒོམས་ཤིག །སངས་རྒྱས་དང༌། བྱང་ཆུབ་སེམས་དཔའ་དང༌། འཕགས་པ་ཉན་ཐོས་དང༌། རང་སངས་རྒྱས་དང༌། སོ་སོའི་སྐྱེ་བོ་ཐམས་ཅད་དང༌། བདག་གི་འདས་པ་དང་མ་འོངས་པ་དང༌། ད་ལྟར་བྱུང་བའི་དགེ་བའི་རྩ་བ་ཐམས་ཅད་བསྡུས་ཤིང་གཞོལ་ཏེ་བརྫིས་ལ་རྗེས་སུ་ཡི་རང་བར་གྱིས་ཤིག །རྗེས་སུ་ཡི་རང་བའི་མཆོག་གིས་རྗེས་སུ་ཡི་རང་བར་གྱིས་ཤིག ། རྗེས་སུ་ཡི་རང་བས་ཀྱང་སངས་རྒྱས་དང་བྱང་ཆུབ་སེམས་དཔའ་དང༌། འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་མཆོད་པར་བྱ་བར་ཕུལ་ཅིག །ཕུལ་ནས་ཀྱང་སེམས་ཅན་ཐམས་ཅད་དང་ཐུན་མོང་དུ་གྱིས་ཤིག །དེ་ནས་སེམས་ཅན་ཐམས་ཅད་ཐམས་ཅད་མཁྱེན་པའི་བར་དུ་ཐོབ་པར་འགྱུར་བ་དང༌། སངས་རྒྱས་ཀྱི་ཆོས་ཐམས་ཅད་ཡོངས་སུ་རྫོགས་པར་འགྱུར་བ་ཉིན་གཅིག་བཞིན་དུ་དུས་གསུམ་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་སྔོས་ཤིག །རྒྱལ་པོ་ཆེན་པོ་ཁྱོད་དེ་ལྟར་ཞུགས་ན་རྒྱལ་པོ་ཡང་བྱེད་ལ། རྒྱལ་པོའི་བྱ་བ་ཡང་ཉམས་པར་མི་འགྱུར་ཞིང༌། བྱང་ཆུབ་ཀྱི་ཚོགས་ཀྱང་ཡོངས་སུ་རྫོགས་པར་འགྱུར་རོ་ཞེས་བྱ་བ་ལ་སོགས་པ་གསུངས་ནས། རྒྱལ་པོ་ཆེན་པོ་ཁྱོད་ཡང་དག་པར་རྫོགས་པའི་བྱང་ཆུབ་ཀྱི་སེམས་ཀྱི་དགེ་བའི་རྩ་བའི་ལས་ཀྱི་རྣམ་པར་སྨིན་པས་ལེན་དུ་མར་ལྷའི་ནང་དུ་སྐྱེས་
ཤིང། ལེན་དུ་མར་མིའི་ནང་དུ་སྐྱེས་ཏེ། ལྷ་དང་མི་ཐམས་ཅད་དུ་སྐྱེས་པ་ན་དབང་པོ་བྱེད་པར་གྱུར་ཀྱང་ད་དུང་ཞེས་བྱ་བ་ལ་སོགས་པ་རྒྱ་ཆེར་གསུངས་པ་ཡིན་ནོ། །དེས་ན་སྤྱོད་པ་དང་བྲལ་བའི་བྱང་ཆུབ་ཀྱི་སེམས་ཀྱང་བརྙེས་བར་མི་བྱ་སྟེ། དེས་ཀྱང་འཁོར་བའི་བདེ་བ་མཐའ་ཡས་པ་སྐྱེད་པའི་ཕྱིར་རོ། །གང་ཡང་སྒྲུབ་པ་སྙིང་པོར་བྱེད་པའི་བྱང་ཆུབ་ཀྱི་སེམས་དེ་ནི་ཤིན་ཏུ་ཡང་འབྲས་བུ་ཆེན་པོ་ཉིད་དུ་གྲུབ་པ་ཡིན་ནོ་ཞེས་བྱ་བར་སྟོན་པ་ནི། ཇི་ལྟར་འཇུག་པའི་ཞེས་བྱ་བ་ལ་སོགས་པ་གསུངས་ཏེ། དཔེར་ན་འཇུག་པའི་སེམས་ཀྱི་བསོད་ནམས་ཉིད་རྒྱུན་ཆགས་ཤིང་བར་མེད་པའི་དགེ་བ་འབྱུང་ཞིང་འཇུག་པ་ལྟར་ཡང་འདི་ནི་དེ་ལྟ་མ་ཡིན་ནོ་སྙམ་དུ་དགོངས་པའོ། །འདི་ཉིད་བསོད་ནམས་རྒྱུན་ཆགས་ཉིད་ཡིན་པར་ཚིགས་སུ་བཅད་པ་གཉིས་ཀྱིས་བསྒྲུབ་པའི་ཕྱིར། གང་ནས་ཞེས་བྱ་བ་ལ་སོགས་པ་གསུངས་ཏེ། གང་ནས་བཟུང་སྟེ་ཞེས་པ་ནི་གང་ནས་བརྩམས་ནས་སོ། །གང་ལ་མཐའ་སྟེ་འདི་ཙམ་ཞེས་བྱར་མེད་པ་དེ་ནི་མཐའ་ཡས་པ་སྟེ། དེ་ནི་ནམ་མཁའི་ཁམས་ཀྱིས་ཁྱབ་པའི་སེམས་ཅན་གྱི་ཁམས་སོ། །རབ་ཏུ་གྲོལ་བའི་ཕྱིར་ནི་རབ་ཏུ་དགྲོལ་བར་བྱ་བའི་དོན་དུ་སྟེ། སྡུག་བསྔལ་ཐམས་ཅད་ཉེ་བར་ཞི་བར་བྱ་བའི་རྒྱུ་མཚན་དུའོ། །སེམས་དེ་ཡང་དག་བླངས་གྱུར་པ། །ཞེས་བྱ་བ་ནི་ཡང་དག་པར་རྫོགས་པའི་བྱང་ཆུབ་ཀྱི་སེམས་ཡང་དག་པར་བླངས་ནས་འཇུག་པའོ། །ཇི་ལྟར་ཞེ་ན། མི་ལྡོག་པ་ཡི་སེམས་ཀྱིས་ཏེ། འཇུག་པ་ཉམས་པ་མེད་པའི་སེམས་ཀྱིས་སོ། །དེ་ནས་བཟུང་སྟེ་ཞེས་པ་ནི་དེ་དང་པོར་བྱས་ནས་སོ། །གཉིད་ལོག་གམ་ནི་སེམས་གཉིད་ཀྱིས་ནོན་པ་ཡིན་ལ། བག་མེད་པ་ནི་རྣམ་པར་གཡེངས་པས་ཏེ། སེམས་ཀྱང་གཉི་ག་དང་འབྲེལ་ཏོ། །འདི་ཡང་ཉེ་བར་མཚོན་པ་ཙམ་ཡིན་ཏེ། འགྲོ་བ་དང༌། འགྲེང་བ་དང༌། འདུག་པ་དང༌། ཟ་བ་དང༌། བརྒྱལ་བ་ལ་སོགས་པའི་གནས་སྐབས་ན་ཡང་ཞེས་བྱ་བ་ལ་སོགས་པར་བལྟ་བར་བྱའོ། །དུ་མ་ཞིག་ཅེས་པ་ནི་སྐད་ཅིག་སོ་སོ་ལ་རྣམ་པ་དུ་མའི་བསོད་ནམས་ཀྱི་རྒྱུན་མི་འཆད་པར་རྟག་ཏུ་བསོད་ནམས་ཀྱི་ཤུགས་རབ་ཏུ་འབྱུང་སྟེ། ནམ་མཁའ་དང་མཉམ་པ་ནི་སྐད་ཅིག་རེ་རེ་ལ་ནམ་མཁའི་ཚད་
ཙམ་མོ། །དེ་ལྟ་བས་ན་བྱང་ཆུབ་སེམས་དཔས་སྒྲུབ་པ་སྙིང་པོར་གྱུར་པར་བྱའོ། །འཕགས་པའི་ཏིང་ངེ་འཛིན་གྱི་རྒྱལ་པོ་ལས། དེ་ལྟ་བས་ན་གཞོན་ནུ་ཁྱོད་ཀྱིས་སྒྲུབ་པ་སྙིང་པོར་གྱུར་པ་ལ་བསླབ་པར་བྱ་སྟེ། ཅིའི་ཕྱིར་ཞེ་ན། གཞོན་ནུ་སྒྲུབ་པ་སྙིང་པོར་བྱེད་པ་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དཀའ་བ་མ་ཡིན་ནོ་ཞེས་གསུངས་སོ། །འདི་ལ་བསོད་ནམས་རྒྱུན་མི་འཆད་པ་ཉིད་དུ་བཅོམ་ལྡན་འདས་ཀྱིས་གསུངས་སོ་ཞེས་བསྟན་པའི་ཕྱིར། འདི་ནི་ཞེས་བྱ་བ་ལ་སོགས་པ་གསུངས་པ་ལ། འདི་ཉིད་བསོད་ནམས་དཔག་ཏུ་མེད་པ་ཉིད་ཡིན་ཏེ། ཉིད་ཀྱིས་ནི་བདག་གིས་སོ། །བཅོམ་ལྡན་འདས་དེ་བཞིན་གཤེགས་པས་གསུངས་པ་ནི་བཀའ་སྩལ་པར་གྱུར་པའོ། །གང་དུ་ཞེ་ན། དཔུང་བཟངས་ཀྱིས་ཞུས་པ་ལས་ཏེ། དཔུང་བཟངས་ཀྱིས་ཞུས་པའི་མིང་ཅན་གྱི་མདོ་སྡེ་ལས་སོ། །ཇི་ལྟར་ཞེ་ན། འཐད་པ་དང་བཅས་པ་སྟེ། རིགས་པ་དང་ལྡན་པར་རོ། །གང་གི་དོན་དུ་ཞེ་ན། དམན་མོས་སེམས་ཅན་དོན་དུ་སྟེ། དམན་པ་ནི་ཉན་ཐོས་དང༌། རང་སངས་རྒྱས་ཀྱི་ཐེག་པ་ལའོ། །མོས་པ་ནི་དད་པའམ་འདུན་པའོ། །སེམས་ཅན་གང་ལ་དེ་ཡོད་པ་དེ་ལ་དེ་སྐད་ཅེས་བྱ་སྟེ། དེའི་དོན་དུ་འདི་ཡིན་པ་དེའི་ཕྱིར་ཏེ། དགོས་པ་དེ་ལ་བཏང་ནས་ཞེས་བྱ་བའི་དོན་ཏོ། །འདི་ལྟར་ཡང་རིགས་མ་ངེས་པ་ཡུན་རིང་པོ་ནས་ཚོགས་ཤིན་ཏུ་མང་བ་སོགས་པར་བྱེད་པ་ལ་འཇིགས་པ་རྣམས་ཀྱིས་ཐེག་པ་ཆེན་པོ་ལ་སེམས་བཟློག་ནས་ཡུན་ཤིན་ཏུ་ཐུང་དུས་བསོད་ནམས་ཀྱི་ཚོགས་ཤིན་ཏུ་ཆུང་བ་ཉན་ཐོས་དང་རང་སངས་རྒྱས་ཀྱི་ཐེག་པ་ལ་སེམས་སྐྱེད་པར་བྱེད་དེ། དེ་བཟློག་པའི་དོན་དུ་བཅོམ་ལྡན་འདས་ཀྱིས་འཐད་པ་གསུངས་སོ། །འཐད་པ་དེ་ཉིད་ཚིགས་སུ་བཅད་པ་གཉིས་ཀྱིས་བསྟན་པའི་ཕྱིར། སེམས་ཅན་ཞེས་བྱ་བ་ལ་སོགས་པ་གསུངས་ཏེ། སྔགས་སམ་སྨན་གྱིས་སྐྱེ་བོ་ཉུང་ཟད་ཀྱི་གླད་པའི་ནད་ཙམ་བསལ་བར་བྱའོ་སྙམ་དུ་ཡིད་ལ་བྱེད་པ་ན་དགེ་བའི་བསམ་པ་ཅན་འདི་ལེགས་པར་སྤྱད་པ་ཚད་མེད་པ་དང་ལྡན་པར་བལྟ་བར་བྱ་བ་ཡིན་ན། འགྲོ་བ་ཚད་མེད་པ་ལས་སེམས་ཅན་རེ་རེའི་འཁོར་བའི་སྡུག་བསྔལ་ཚད་མེད་པ་བསལ་བར་འདོད་པ་ལྟ་ཅི་སྨོས། གཞན་ཡང་སེམས་ཅན་ཐམས་ཅད་
ཀྱི་ནད་དེ་བསལ་ནས་ཡོན་ཏན་ཐམས་ཅད་དང་ལྡན་པར་འདོད་པས་ན་བསོད་ནམས་ཚད་མེད་པར་འབྱུང་བར་ཅི་སྟེ་མི་འགྱུར། རྣམ་དབྱེ་བསྒྱུར་བས་སྦྱར་བར་བྱ་སྟེ། རྒྱུན་མི་འཆད་པར་བསོད་ནམས་ཤུགས་ནམ་མཁའ་མཉམ་པར་རབ་ཏུ་འབྱུང་བ་སྨོས་ཅི་དགོས་ཞེས་བྱའོ། །དེ་ལྟ་བས་ན་ཅི་ལྟར་སངས་རྒྱས་ཉིད་ཚོགས་མང་པོས་བསྒྲུབ་པར་བྱ་བ་ཡིན་པ་དེ་བཞིན་དུ་སྐད་ཅིག་མ་རེ་རེ་ལ་ཚོགས་ཀྱང་རྒྱ་ཆེ་བའི་ཕྱིར་རྒྱུའི་ཁྱད་པར་ལས་ཐེག་པ་ཆེན་པོ་འདི་ཉིད་དུ་རྙེད་པ་ཆེན་པོ་ཡིན་ནོ། །དེའི་ཕྱིར་འཇིགས་པའི་གནས་མ་ཡིན་པ་ལ་སྐྲག་པས་འདི་ལ་ཕྱིར་ལྡོག་པར་མི་བྱའོ་ཞེས་བསྟན་པར་འགྱུར་རོ། །གང་འདི་ནི། བྱང་ཆུབ་སེམས་ཀྱི་སྟོབས་ཉིད་ཀྱིས། །སྔོན་གྱི་སྡིག་པ་ཟད་བྱེད་ཅིང༌། །བསོད་ནམས་རྒྱ་མཚོ་སྡུད་བྱེད་པས། །ཉན་ཐོས་རྣམ་པས་མྱུར་དུ་འགྲོ། །ཞེས་འཆད་པར་འགྱུར་རོ། །དེ་ལྟར་སེམས་ཅན་ཐམས་ཅད་ལ་ཕན་པ་དང་བདེ་བའི་དོན་དུ་གང་གིས་བརྩོན་པར་བྱེད་པ་དེ་ལྷ་ལ་སོགས་པ་རྣམས་ཀྱང་ཡོན་ཏན་ཐུན་མོང་མ་ཡིན་པ་དང་ལྡན་པས་བསྔགས་པར་བྱ་བ་བསྟན་པའི་ཕྱིར། ཕའམ་ཞེས་བྱ་བ་ལ་སོགས་པ་གསུངས་ཏེ། སུ་ལ་སྟེ་སེམས་ཅན་ལའོ། །གང་གིས་སྐྱེད་པ་སྟེ་ཕ་དང༌། སྐྱེད་བྱེད་མ་དང༌། ལྷ་ནི་ཟླ་བ་དང་ཆུ་ལྷ་ལ་སོགས་པ་རྣམས་དང༌། དྲང་སྲོང་རྣམས་ནི་གནས་འཇིག་དང༌། གཽ་ཏ་མ་དང༌། ཚངས་པ་ལ་ཡང་ཞེས་བྱ་བ་ནི་རིག་བྱེད་ཅན་ལའོ། །འདི་འདྲ་བ་ནི་ཕན་སེམས་འདི་ཡིན་ཏེ། བྱང་ཆུབ་སེམས་དཔའི་ཕན་པ་ལ་སྦྱོར་བའི་བློ་གྲོས་བཤད་མ་ཐག་པ་འདི་ལྟ་བུ་བྱུང་བ་དང༌། འབྱུང་བ་ལྟ་ཞོག་སྟེ། འབྱུང་བ་ཡང་འགྱུར་རམ་ཞེས་བྱ་བ་ཡིན་ལ། འབྱུང་བར་འགྱུར་བ་ཡང་བྱང་ཆུབ་སེམས་དཔའ་ལས་གཞན་འགའ་ཡང་མ་ཡིན་པ་ཉིད་དོ། །ཡང་ཅིའི་ཕྱིར་དེ་ལྟར་ཡིན་ཞེ་ན། སེམས་ཅན་དེ་དག་ཅེས་བྱ་བ་ལ་སོགས་པ་གསུངས་པ་སྟེ། དེ་དག་ནི་མ་ལ་སོགས་པ་ཡིན་ལ། རང་གི་དོན་དུའང་ཞེས་པ་ནི། བདག་ཉིད་ཀྱི་དབང་དུ་བྱས་ནས་ཀྱང་ངོ༌། །ཡོན་ཏན་དཔག་མེད་དུ་བསྒྲུབ་པར་ཡིད་ལ་བསམས་པ་འདི་ལྟ་སྟེ། སྡུག་བསྔལ་ཐམས་ཅད་དང་བྲལ་བར་འདོད་པའོ། །སྔོན་མ་རྨིས་པ་ནི་སྔོན་མ་བྱུང་བའོ། །བློ་སྔོན་དུ་སོང་བའི་སད་པའི་
གནས་སྐབས་ནས་བྱུང་བ་ལྟ་ཞོག །རྨི་ལམ་ན་ཡང་ངོ༌། །བརྒྱ་ལ་གཞན་གྱི་དོན་དུ་སྐྱེའོ་ཞེ་ན། གཞན་གྱི་དོན་དུ་ག་ལ་སྐྱེ། །ཞེས་གསུངས་ཏེ། འཇིག་རྟེན་ན་བདག་ལ་སོགས་པ་ཕོངས་པ་ཡིན་ལ། དེ་ཉིད་ལ་ཡང་མེད་པ་ཡིན་ན་གཞན་གྱི་དོན་དུ་ལྟ་ག་ལ་སྲིད། ཡང་ན་གཞན་གྱི་དོན་དུ་རྨི་ལམ་ན་ཡང་ག་ལ་སྲིད། ཅེས་སྦྱར་རོ། །དེ་ལྟར་བྱང་ཆུབ་སེམས་དཔའི་ཐུན་མོང་མ་ཡིན་པར་བསྟན་ནས། མཇུག་བསྡུ་བའི་ཕྱིར། སེམས་ཅན་རིན་ཆེན་ཞེས་བྱ་བ་ལ་སོགས་པ་གསུངས་ཏེ། དེ་ལྟར་རྨད་དུ་བྱུང་བའི་ལས་བྱེད་པས་རྙེད་དཀའ་བའི་ཕྱིར། སེམས་ཅན་ཉིད་རིན་ཆེན་གྱི་ཁྱད་པར་རོ། །སྔ་ན་མེད་པ་ནི་སྔ་ན་ཆད་མ་བྱུང་བའོ། །འདི་ཞེས་པ་ནི་འདིས་ཇི་ལྟར་བསྟན་པའི་ཡོན་ཏན་ཅན་ནོ། །རྨད་ཅིག་ཇི་ལྟར་འཁྲུངས་ཞེས་པ་ལ། ཇི་ལྟར་ནི་རྨད་དུ་བྱུང་བའོ། །ཡང་ཅིའི་ཕྱིར་འདི་ལྟར་བརྗོད་ཅེ་ན། གཞན་དག་ཅེས་གསུངས་ཏེ། བདག་ཉིད་ཆེན་པོ་གང་གཞན་གྱི་དོན་དུ་སེམས་སྐྱེ་བ་དེ་ནི་བསྟན་པའི་རིམ་པ་བཞིན་དུ་སེམས་ཅན་གཞན་དག་ལ་རང་གི་དོན་དུ་ཡང་མི་འབྱུང་བའི་ཕྱིར་རོ། །འདིར་བྱང་ཆུབ་ཏུ་སེམས་བསྐྱེད་པའི་ཡོན་ཏན་གཞན་ཡང་བརྗོད་པར་བྱ་སྟེ། འཕགས་པ་སྡོང་པོ་བཀོད་པ་ལས། བཅོམ་ལྡན་འདས་འཕགས་པ་བྱམས་པས་འཕགས་པ་ནོར་བཟངས་ཀྱི་དབང་དུ་མཛད་ནས་གསུངས་པ་དེ་ཡང་བསྟན་བཅོས་མཛད་པ་ཉིད་ཀྱིས་བསླབ་པ་ཀུན་ལས་བཏུས་པར་ཤིན་ཏུ་རྒྱས་པར་བསྟན་པས་དེ་ཉིད་དུ་ཤེས་པར་བྱའོ། །ཡང་བྱང་ཆུབ་ཀྱི་སེམས་ཀྱི་ཕན་ཡོན་བསྟན་པའི་སྒོ་ནས། བྱང་ཆུབ་སེམས་དཔའི་བསོད་ནམས་ཚད་མེད་པའི་བསོད་ནམས་ཉིད་འགྲོ་བ་ཀུན་ཏུ་དགའ་བ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཐམས་ཅད་ཀྱི་དགའ་བ་ཀུན་གྱི་རྒྱུ་ལྷ་ལ་སོགས་པའི་ཕུན་སུམ་ཚོགས་པ་ཐམས་ཅད་ཀྱི་རྒྱུ་རིན་ཆེན་སེམས་ཏེ། བྱང་ཆུབ་ཀྱི་སེམས་ཀྱི་བསོད་ནམས་ཚད་མེད་པའི་བསོད་ནམས་གང་ཡིན་པ་དེ་ནི་ཇི་ལྟར་གཞལ་གྱིས་ལང་སྟེ། རྣམ་པ་གང་གིས་བགྲང་བར་ནུས་ཏེ། འདི་ཤིན་ཏུ་རྒྱ་ཆེ་བས་གཞལ་བར་མི་ནུས་པའི་ཕྱིར་རོ། །འདི་ནི་འཕགས་པ་དཔས་སྦྱིན་གྱིས་ཞུས་པ་ལས། བྱང་ཆུབ་སེམས་ཀྱི་བསོད་ནམས་
གང། །དེ་ལ་གལ་ཏེ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་གསུངས་སོ། །སྤྱིར་བསྟན་དུ་ཟིན་ཀྱང་དེ་ལྟ་ནའང་འཇུག་པའི་སེམས་ཀྱིས་ཡིན་པར་བལྟ་བར་བྱ་སྟེ། དེ་ཉིད་ཀྱི་སྐབས་ཡིན་པའི་ཕྱིར་རོ། །ཡང་དེ་ཉིད་ཀྱི་ཁྱད་པར་སེམས་ཅན་ཞེས་བྱ་བ་ལ། སེམས་ཅན་སྡུག་བསྔལ་རྩིར་གྱུར་པ་ནི་སྲོག་ཆགས་ཐམས་ཅད་ཀྱི་ལུས་དང་སེམས་ལས་བྱུང་བའི་སྡུག་བསྔལ་ཐམས་ཅད་ལྡོག་པར་བྱེད་པ་ཡིན་པས་ནད་ཐམས་ཅད་འཇོམས་པའི་སྨན་ཆེན་པོའི་རང་བཞིན་ཡིན་པའི་ཕྱིར་རོ། །དེའི་ཕྱིར་འདིས་བྱང་ཆུབ་ཀྱི་སེམས་མངོན་པར་མཐོ་བ་དང་ངེས་པར་ལེགས་པའི་རྒྱུ་ཡིན་པར་བསྟན་ཏོ། །དེ་བས་ན་འདིའི་བསོད་ནམས་བགྲང་དུ་མེད་པར་རིགས་པ་ཉིད་དོ་ཞེས་བསྟན་པ་ཡིན་ནོ། །ཡང་འདི་ཅི་ལྟར་རིགས་པ་ཡིན་སྙམ་དུ་དོགས་པ་ལ། དེ་བསྟན་པའི་ཕྱིར། ཕན་པར་ཞེས་བྱ་བ་ལ་སོགས་པ་གསུངས་ཏེ། འགྲོ་བ་ཐམས་ཅད་བསྐྱབ་པའི་ཕྱིར་སངས་རྒྱས་སུ་གྱུར་ཅིག །ཅེས་ལྷག་པའི་བསམ་པས་སྨོན་ཅིང་འདོད་པ་འབའ་ཞིག་སྒྲུབ་པ་དང་བྲལ་བའི་བྱང་ཆུབ་ཀྱི་སེམས་ལས་བསོད་ནམས་གང་ཞིག་འབྱུང་བ་སྟེ། སངས་རྒྱས་མཆོད་ལས་ཁྱད་པར་འཕགས། །ཞེས་བྱ་བའི་དོན་ཏེ། དེ་ལྟར་བསོད་ནམས་ཀྱི་ཕུང་པོ་སྐྱེ་བའི་རྒྱུ་ཡིན་པར་ལུང་ལས་འབྱུང་བ་ཉིད་དོ། །དེ་ལྟར་བྱང་ཆུབ་ཀྱི་སེམས་དང་པོའི་ཆེ་བའི་བདག་ཉིད་བསྟན་པ་ཡིན་ནོ། །འདི་ཡང་དེ་ཉིད་དུ། གང་གཱའི་བྱེ་མའི་གྲངས་སྙེད་ཀྱི། །སངས་རྒྱས་ཞིང་ནི་མི་གང་གིས། །རིན་ཆེན་བདུན་གྱིས་བཀང་བྱས་ཏེ། །འཇིག་རྟེན་མགོན་ལ་ཕུལ་བ་བས། །གང་གིས་ཐལ་མོ་སྦྱར་བྱས་ཏེ། །བྱང་ཆུབ་ཏུ་ནི་སེམས་བསྐྱེད་ན། །གང་ལ་མཐའ་ནི་མ་མཆིས་པའི། །མཆོད་པ་འདི་ནི་ཁྱད་པར་འཕགས། །ཞེས་སོ། །སྡུག་བསྔལ་བའི་སྐྱེ་བོ་ཐམས་ཅད་ཀྱི་སྡུག་བསྔལ་ཐམས་ཅད་བསལ་ནས་བདེ་བ་ཕུན་སུམ་ཚོགས་པ་ཐམས་ཅད་དང་ལྡན་པར་བྱའོ་ཞེས་འདི་ལྟར་བརྩོན་པར་བྱེད་པ་ལ་བསོད་ནམས་ཁྱད་པར་ཅན་དུ་ཅིའི་ཕྱིར་མི་འགྱུར། ཕན་པ་དང་མི་ཕན་པ་འཐོབ་པ་དང་སྤོང་བ་དག་སེམས་ཅན་རང་ཉིད་མཁས་པ་མ་
ཡིན་ནམ། བརྩོན་པ་དེ་གང་དུ་དགོས་ཤེ་ན། ཚིགས་སུ་བཅད་པ་གསུམ་གྱིས་ལན་བསྟན་པའི་ཕྱིར། སྡུག་བསྔལ་ཞེས་པ་ལ་སོགས་པ་གསུངས་ཏེ། སྡུག་བསྔལ་ལས་བྲལ་བར་འདོད་པ་རྣམས་སྲོག་གཅོད་པ་ལ་སོགས་པ་མི་དགེ་བའི་ལས་རྣམས་ཀྱིས་བཀྲེས་པ་ལ་སོགས་པའི་སྡུག་བསྔལ་ཕྱིར་འཆོས་པར་འདོད་པ་དག་དམྱལ་བ་ལ་སོགས་པའི་གཡང་སའི་སྡུག་བསྔལ་ཉིད་མྱོང་བའི་རང་བཞིན་ལ་མངོན་པར་རྒྱུག་གོ །དེ་ཉིད་ལ་ཕྱོགས་ཤིང་འཇུག་པ་ཡིན་ཏེ། ཕྱེ་མ་ལེབ་མར་མེའི་རྩེ་མོ་ལ་མཆོངས་པ་བཞིན་དུ་སྡུག་བསྔལ་ཉིད་ལ་རབ་ཏུ་འཇུག་གོ་ཞེས་བྱ་བའི་དོན་ཏོ། །དེ་ཉིད་ཀྱི་ཕྱིར་བདེ་བ་འདོད་པ་ཉིད་ནི་བདེ་བ་མངོན་པར་འདོད་པ་ཉིད་རང་གི་བདེ་བ་དགྲ་ལྟར་འཇོམས་སོ། །རང་གི་བདེ་བ་གཞོམ་པའི་ཕྱིར་རང་ཉིད་དགྲ་ལྟ་བུར་འགྱུར་བ་ཅི་ལྟ་བུ་ཞེ་ན། གཏི་མུག་པས་ཞེས་པ་སྟེ། ཕྱིན་ཅི་ལོག་གི་དབང་དུ་གྱུར་པ་སྟེ། ཕན་པ་དང་མི་ཕན་པ་འཐོབ་པ་དང་སྤོང་བ་ཤེས་པ་མེད་པའི་ཕྱིར་རོ། །དེ་བས་ན་གང་ཞིག་ཅེས་པ་ནི་བསོད་ནམས་ཀྱི་བདག་ཉིད་ཅན་རྒྱུ་མེད་པར་མཉེས་གཤིན་པའོ། །དེ་བས་ན་ཕོངས་པ་ནི་བདེ་བ་འདོད་པ་རྣམས་རྣམ་པ་ཐམས་ཅད་དུ་བདེ་བ་མ་རྙེད་པའོ། །སྡུག་བསྔལ་ནི་གཟིར་བའོ། །མང་ལྡན་ཞེས་པ་ནི་སྡུག་བསྔལ་རྣམ་པ་བརྒྱ་ཕྲག་དུ་མ་མང་པོས་གནོན་པ་རྣམས་སོ། །དེ་དག་ལ་ཞེས་པ་ནི་ཕྱིན་ཅི་ལོག་ཅན་ལའོ། །ལུས་ལས་བྱུང་བ་དང་སེམས་ལས་བྱུང་བ་ཐམས་ཅད་ཀྱི་བདེ་བ་ཀུན་གྱིས་ཚིམ་པ་དང་སྟེ་ངོམས་པར་བྱེད་པའོ། །ཡང་ན་མང་ལྡན་ནི་ཚིམ་པ་རྣམ་པ་དུ་མར་བདེ་བ་ཀུན་གྱིས་བྱེད་དོ་ཞེས་སྦྱར་བར་བྱའོ། བདེ་བ་ཙམ་གྱིས་ཚིམ་པ་སྐྱེད་པ་ནི་མ་ཡིན་གྱི་འོན་ཀྱང་སྡུག་བསྔལ་ཐམས་ཅད་དེ། གཟིར་བ་མཐའ་དག་གི་ཚོར་བ་གཅོད་བྱེད་ཅིང་སྟེ་ཞི་བར་ཡང་བྱེད་དོ། །སྡུག་བསྔལ་ཞི་བར་བྱེད་པ་འབའ་ཞིག་ནི་མ་ཡིན་གྱི་བདེ་བས་ཚིམ་པར་བྱེད་པ་ཡང་ཡིན་ནོ། །གཏི་མུག་ཀྱང་ནི་སེལ་བྱེད་པ། །ཞེས་བྱ་བ་ནི་ཡོངས་སུ་མི་ཤེས་པ་ཡང་ཟློག་པར་བྱེད་པ་སྟེ། འདི་ནི་ལམ་མིན་འདི་ནི་ལམ་ཡིན་འདི་ལས་འཇིགས། །འདི་ནས་འདེང་ངོ་སྒྱིད་ལུག་པར་ནི་མ་
བྱེད་ཅིག །ཅེས་དོར་བར་བྱ་བ་དང་བླང་བར་བྱ་བའི་ལམ་སྟོན་པའི་ཕྱིར་རོ། །དེ་ལྟར་གང་ཞིག་གཞན་སྡུག་བསྔལ་བ་བཟློག་པ་ལས་གཞན་དབང་དུ་གྱུར་པ་དང༌། འབྱུང་པོ་ཐམས་ཅད་ལ་ཕན་པ་དང་བདེ་བ་བསྒྲུབ་པ་ལ་བརྩོན་པ་ཡིན་ནོ། །དེ་དང་དགེ་མཚུངས་ག་ལ་ཡོད། ཅེས་པ་ནི་བདག་ཉིད་ཆེན་པོ་དེ་དང་མཚུངས་པའི་ལེགས་པ་ནི་གང་ལ་ཡོད་ཅིང༌། གང་ནའང་ཡོད་པ་མ་ཡིན་ནོ། །རྒྱུ་མེད་པར་མཆོག་ཏུ་མཉེས་གཤིན་པའི་ཕྱིར་རོ། །དེ་འདྲའི་བཤེས་ཀྱང་ག་ལ་ཡོད་དེ། ཕན་པ་དང་བདེ་བ་ལ་སྦྱོར་བར་གཞོལ་བའི་ཡིད་ཅན་མཆོག་ཏུ་ཡིད་ཆེས་པའི་གནས་ཏེ་དེ་འདྲ་ནི་དེ་དང་མཚུངས་པའོ། །བཤེས་པ་ནི་ག་ལ་ཡོད་དེ་སྲིད་པ་མ་ཡིན་ནོ། །བསོད་ནམས་དེ་འདྲའང་ག་ལ་ཡོད་དེ། །དེ་འདྲ་བར་གནས་པའི་བྱང་ཆུབ་སེམས་དཔའི་བསོད་ནམས་གང་ཞིག་སྐྱེས་པ་དེ་ཡང་བསོད་ནམས་གང་དང་ཡང་མཉམ་པ་མ་ཡིན་ནོ། །ཡང་དེ་ལྟར་ཅིའི་ཕྱིར་བརྗོད་ཅེ་ན། ཕན་བཏགས་ཞེས་པ་ལ་སོགས་པ་གསུངས་ཏེ། སྔར་འཇིགས་ཤིང་དོགས་པ་དང་ཉོན་མོངས་པ་རྣམས་ལ་ཕན་བཏགས་པ་ན་འདིས་ཕན་བཏགས་སོ་ཞེས་གང་ཞིག་ལན་དུ་ཕན་འདོགས་པ་དེ་འང་རེ་ཞིག་འདི་ནི་ལེགས་སོ་ཞེས་འཇིག་རྟེན་པས་བསྔགས་ཤིང་བསྟོད་དོ། །གང༌། མ་བཅོལ་ལེགས་པར་བྱེད་པ་ཡི། །ཞེས་པ་སྟེ། གསོལ་བ་མ་བཏབ་པར་དགེ་བ་ལ་སྦྱོར་བའི་བྱང་ཆུབ་སེམས་དཔའ་ལྟ་སྨོས་ཀྱང་ཅི་དགོས་ཤིང་གཞན་བརྗོད་ཅི་དགོས་ཏེ། དེའི་བསྔགས་པ་བྱ་བར་མི་ནུས་སོ་ཞེས་བྱ་བའི་དོན་ཏོ། །མཐོང་བའི་ཆོས་ལ་ལྟོས་ནས་བྱང་ཆུབ་སེམས་དཔའི་ཆེ་བའི་བདག་ཉིད་བསྟན་པའི་ཕྱིར། འགྲོ་བ་ཉུང་ཟད་ཅེས་པ་སྟེ། སེམས་ཅན་ཚད་ཡོད་པ་ལ་ཟས་དང་སྐོམ་ཙམ་སྦྱོར་ཞིང་སྟེར་བས་ན་བསོད་ནམས་བྱེད་པ་ཡིན་ནོ་ཞེས་འགྲོ་བ་ལས་དམ་པ་ལ་དགའ་བའི་འཇིག་རྟེན་རྣམས་ཀྱིས་བཀུར་ཞིང་མཆོད་པར་བྱེད་དེ། སྦྱིན་པ་དེ་ཡང་སྐད་ཅིག་སྟེ། ཉི་མ་རངས་པའམ་དེའི་ཕྱེད་དུ་མ་ཡིན་ཏེ། འོན་ཀྱང་ཡུད་ཙམ་ཉིད་དོ། །ཟས་ཙམ་སྦྱིན་པར་བྱེད་པ་དང༌། ཞེས་བྱ་བ་ནི་ཟས་ངན་ངོན་ནི་ཟས་ཏེ་གྱ་ནོམ་པ་མ་ཡིན་པའི་ཟས་སོ། །དེ་འབའ་ཞིག་ཉིད་ནི་དེ་ཙམ་སྟེ། རྣམ་པ་དེ་ལྟ་བུའི་
ཚོད་མ་དང་བྲལ་བའོ། །དེ་སྦྱིན་པར་བྱེད་པ་ནི་དེ་གཏོང་བར་བྱེད་པའོ། །ཅི་ལྟར་ཞེ་ན། བརྙས་བཅས་ནི་ཐོ་འཚམ་པ་དང་བཅས་པ་སྟེ། བཀུར་སྟི་སྔོན་དུ་མ་སོང་བར་སྦྱིན་པའི་ཁང་པར་བཅུག་ཅིང་ཁུ་ཚུར་དང་ཐལ་ལྕག་ལ་སོགས་པས་བསྣུན་ཞིང་ཞེས་བྱ་བའི་ཐ་ཚིག་ཡིན་ལ། འདི་ནི་བྱ་བའི་ཁྱད་པར་རོ། །ཡང་ཅི་ལྟ་བུར་གྱུར་པ་ཞེ་ན། ཉིན་ཕྱེད་འགྲངས་པར་བྱེད་ཅེས་པ་སྟེ། ཐུན་གཉིས་ཙམ་ཉེ་བར་རྟོན་པར་བྱེད་པའི་ཕྱིར་ཏེ། ཉི་མ་ཕྱེད་ན་ཟོས་ནས་ཡང་དགོངས་ག་ཟས་ཚོལ་བར་བྱེད་པའི་ཕྱིར་རོ། །བྱང་ཆུབ་སེམས་དཔའི་སྦྱིན་པ་ནི་འདི་ལས་བཟློག་པ་ཡིན་ནོ་ཞེས་བསྟན་པའི་ཕྱིར། སེམས་ཅན་ཞེས་བྱ་བ་ལ་སོགས་པ་གསུངས་ཏེ། འདི་སྙེད་ཅིག་ཅེས་མཚམས་ཆད་པ་མེད་པར་གྲངས་བརྒྱའམ་སྟོང་ངམ་ཞེས་པ་འདི་སྙེད་ལ་སྦྱིན་གྱི་དེ་ལས་གཞན་པ་མ་ཡིན་ནོ་ཞེས་སེམས་ཅན་བགྲངས་ནས་སྦྱིན་པར་བྱེད་པ་ནི་མ་ཡིན་ཏེ། འོན་ཀྱང་མཚམས་ཆད་པ་མེད་པའི་སེམས་ཅན་ལའོ། །དུས་ངེས་པ་ཅན་ཡང་མ་ཡིན་ཏེ། འོན་ཀྱང་དུས་རིང་དུ་སྟེ། བསྐལ་པ་བརྒྱ་དང༌། སྟོང་དང༌། འབུམ་དང༌། བྱེ་བ་ཕྲག་བརྒྱའི་བར་དུ་སྦྱིན་པར་བྱའོ། །དེ་ལས་གཞན་དུ་ནི་མ་ཡིན་ནོ་ཞེས་སྦྱིན་པར་བྱེད་པ་མ་ཡིན་ནོ། །འོ་ན་ཇི་ལྟར་སྦྱིན་པར་བྱེད་ཅེ་ན། ནམ་མཁའ་ཞེས་གསུངས་པ་ལ། ནམ་མཁའ་དང་འདྲ་བའི་སྐྱེ་བོ་ནི་ནམ་མཁའི་སྐྱེ་བོ་སྟེ། དཔེར་ན་ནམ་མཁའ་ལ་མཐར་ཐུག་པ་མེད་པ་དེ་བཞིན་དུ་སྐྱེ་བོ་ཡང་ཞེས་བྱ་བའི་དོན་ཏོ། །ཡང་ན་ནམ་མཁའ་དང་སྐྱེ་བོ་ནི་ནམ་མཁའི་སྐྱེ་བོ་སྟེ། དེ་རྣམས་ཟད་པ་ནི་གཏུགས་པའོ། །ནམ་མཁའི་ཁམས་ཇི་སྲིད་པ་དང་སེམས་ཅན་རྣམས་མྱ་ངན་ལས་མ་འདས་པའི་བར་དེ་སྲིད་ཀྱི་མཚམས་ཏེ། གང༌། ཇི་སྲིད་ནམ་མཁའ་གནས་པ་དང༌། །འགྲོ་བ་ཇི་སྲིད་གནས་གྱུར་པ། །དེ་སྲིད་བདག་ནི་གནས་གྱུར་ཏེ། །ཞེས་གང་འཆད་པར་འགྱུར་བའོ། །དེའི་ཕྱིར་མི་ཟད་པ་ནི་ཟད་པ་མེད་པ་སྟེ། འདི་ལ་མཐའ་མེད་དོ་ཞེས་བྱས་ནས་སོ། །འདིར་དགོངས་པ་ནི་འདི་ཡིན་ཏེ། ནམ་མཁའ་དང་སྐྱེ་བོ་མ་ཟད་ཀྱི་བར་དུ་སྦྱིན་པ་གང་ཡིན་པ་དེ་ནི་དངོས་པོ་ལ་ཟད་པ་མེད་པ་ཉིད་ཡིན་ཏེ། དེ་དག་ལ་ཡོངས་སུ་ཟད་པ་མེད་པའི་ཕྱིར་རོ། །དངོས་པོ་
སོ་སོར་ངེས་པ་ནི་མ་ཡིན་ཏེ། འོན་ཀྱང་ཡིད་ལ་བསམ་པ་མཐའ་དག་ཡང་དག་པར་རྫོགས་པར་བྱེད་པ་ཡིན་ཏེ། གང་གིས་མངོན་པར་འདོད་པ་ཁ་ན་མ་ཐོ་བ་མེད་པས་བསམ་པ་ཚིམ་པར་བྱེད་པ་དེ་དག་ཐམས་ཅད་མཆོག་ཏུ་བརྩེ་བ་དང༌། གུས་པ་དང༌། བཀུར་སྟི་དང༌། སྙན་པར་སྨྲ་བ་སྔོན་དུ་སོང་ཞིང་ཡིད་རབ་ཏུ་དགའ་བས་རབ་ཏུ་སྟེར་བར་བྱེད་པའི་བྱང་ཆུབ་སེམས་དཔའ་ལྟ་ཅི་ཞིག་སྨོས་ཏེ། མཆོད་པར་རིགས་པ་ཡིན་པས་དེ་ལ་ཤིན་ཏུ་རིགས་སོ་ཞེས་སྦྱར་རོ། །གང་སྲེད་མེད་ཀྱི་བུས་ཞུས་པ་ལས། དངོས་པོ་སྦྱིན་པར་བྱ་བ་གང་ལ་དེ་གཏོང་བའི་སེམས་མི་སྐྱེ་བ་དང། གཏོང་བའི་བློ་མི་འཇུག་པ་ཞེས་བྱ་བ་ནས་བདག་གི་ལུས་འདི་ཡང་སེམས་ཅན་ཐམས་ཅད་ལ་སྦྱིན་ཞིང་ཡོངས་སུ་གཏོང་ན། ཕྱི་རོལ་གྱི་དངོས་པོ་རྣམས་ལྟ་ཅི་སྨོས་ཀྱིས། སེམས་ཅན་གང་དང་གང་ལ་ཅི་དགོས་པར་འགྱུར་བ་དེ་དག་ལ་དེ་དང་དེ་སྦྱིན་ནོ། །ཡོད་དེ་ཡོད་ན་ལག་པ་འདོད་པ་ལ་ལག་པ་ཞེས་བྱ་བ་ནས་མགོ་བོ་འདོད་པ་ལ་མགོ་བོ་ཡོངས་སུ་གཏོང་ན། ཕྱི་རོལ་གྱི་དག་ལ་འདི་ལྟ་སྟེ། ནོར་དང༌། འབྲུ་དང༌། ས་ལེ་སྦྲམ་དང༌། དངུལ་དང༌། རིན་པོ་ཆེ་དང༌། རྒྱན་དང༌། རྟ་དང༌། གླང་པོ་ཆེ་དང༌། ཤིང་རྟ་དང༌། བཞོན་པ་དང༌། གྲོང་དང༌། གྲོང་ཁྱེར་དང༌། གྲོང་རྡལ་དང༌། ལྗོངས་དང༌། རྒྱལ་སྲིད་དང༌། ཡུལ་འཁོར་དང༌། རྒྱལ་པོའི་ཕོ་བྲང་འཁོར་དང༌། ཚོང་འདུས་དང༌། ཚོང་རྡལ་དང༌། བྲན་ཕོ་དང༌། བྲན་མོ་དང༌། ལས་བྱེད་པ་དང༌། ཞོ་ཤས་འཚོ་བ་དང༌། བུ་དང༌། བུ་མོ་དང༌། གཡོག་རྣམས་ལྟ་ཅི་སྨོས་ཏེ་ཞེས་རྒྱས་པར་གསུངས་སོ། །དེ་ལྟར་ཡང་ཡོན་ཏན་རིན་པོ་ཆེ་གསུམ་བསྡུས་པའི་གནས་གཞན་ལ་གཅིག་ཏུ་ཕན་པ་བསྒྲུབ་པ། མཆོག་ཏུ་བརྟུལ་ཞུགས་ཆེ་བའི་བྱང་ཆུབ་སེམས་དཔའ་ལ་བདག་ཉིད་ལ་ཕན་པར་འདོད་པས་རང་གི་སེམས་བསྲུང་བ་ལ་འབད་པར་བྱའོ་ཞེས་བསྟན་པའི་ཕྱིར། གང་ཞིག་ཅེས་བྱ་བ་ལ་སོགས་པ་གསུངས་ཏེ། དེ་འདྲ་ནི་དེ་ལྟར་བརྗོད་པའི་རིམ་པས་སོ། །སྦྱིན་བདག་ལ་ཞེས་པ་ནི་ཐམས་ཅད་དུ་བདེ་བ་སྟེར་བའི་བདག་པོ་རྒྱལ་བའི་སྲས་ལ་སྟེ། བདེ་བར་གཤེགས་པའི་སྲས་པོ་བྱང་ཆུབ་སེམས་དཔའ་ལ་ཞེས་བྱ་བའི་དོན་ཏོ། །
ངན་སེམས་ནི་སྡིག་པའི་སེམས་སོ། །རང་གི་ཡིད་ལ་ནི་རང་གི་རྒྱུད་ལའོ། །བྱེད་པ་ནི་སྐྱེད་པའོ། །གང་བདག་ཉིད་ངན་པ་དེ་དམྱལ་བ་རྣམས་སུ་གནས་པར་བཅོམ་ལྡན་འདས་ཀྱིས་གསུངས་ཏེ་བཀའ་སྩལ་ཏོ། །ངན་སེམས་བསྐྱེད་པའི་གྲངས་བཞིན་བསྐལ་པར་ནི་སྟེ། དེའི་རྒྱུད་ལ་ངན་སེམས་ཀྱི་ཡིད་བསྐྱེད་པའི་སྐད་ཅིག་ཇི་སྙེད་ཀྱི་བསྐལ་པར་ངན་སེམས་ཀྱི་ཡིད་ཀྱི་གྲངས་བཞིན་དུ་དམྱལ་བར་འགྱུར་རོ་སྙམ་དུ་དགོངས་པའོ། །གང་རབ་ཏུ་ཞི་བ་རྣམ་པར་ངེས་པ་ཆོ་འཕྲུལ་བསྟན་པའི་མདོ་ལས། འཇམ་དཔལ་བྱང་ཆུབ་སེམས་དཔས་བྱང་ཆུབ་སེམས་དཔའ་ལ་ཁོང་ཁྲོ་བའི་སེམས་སྐྱེད་ཅིང་བརྙས་པའི་སེམས་བསྐྱེད་པ་དེ་སྲིད་དུ་དེས་བདག་བསྐལ་པར་དམྱལ་བར་གནས་པར་བྱའོ་ཞེས་གོ་ཆ་བགོ་བར་བྱའོ་ཞེས་གསུངས་སོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་སེམས་བསྐྱེད་པའི་སྐད་ཅིག་གི་གྲངས་བཞིན་དུ་བསྐལ་པར་མནར་མེད་པར་གནས་པར་ནི་མ་གསུངས་པ་མ་ཡིན་ནམ། འཇིག་རྟེན་གསུམ་ན་དེ་བཞིན་གཤེགས་པ་ལས་ལྷག་པ་ནི་ཡོད་པ་མ་ཡིན་ན། དེ་ཇི་སྲིད་ན་ཤིན་ཏུ་དོགས་པར་ཁྱེར་བར་བྱེད་ཅེ་ན་བདེན་ཏེ་ཚུལ་འདི་ལ་སྒྲ་ཇི་བཞིན་དུ་དངོས་པོ་ཉིད་རྣམ་པར་གཞག་པ་ནི་མ་ཡིན་ཏེ། གསུང་རབ་ཐམས་ཅད་ལ་དྲང་བ་དང་ངེས་པའི་དོན་དུ་རྣམ་པར་གཞག་པ་ཡིན་པའི་ཕྱིར་རོ། །དེ་བཞིན་གཤེགས་པ་ལ་ལྷ་དང་བཅས་པའི་འཇིག་རྟན་འགས་ཀྱང་ངན་སེམས་སྐྱེད་པར་མི་ནུས་ཏེ། བསྐལ་པ་གྲངས་མེད་པར་སེམས་ཅན་ཐམས་ཅད་ལ་བྱམས་པའི་ཐུགས་གོམས་པར་བསྒོམས་པའི་ཕྱིར་འདིའི་སྐུ་ལ་མཚོན་གྱིས་མི་ཚུགས་སོ་ཞེས་བྱམས་པའི་སེམས་ཀྱི་ཕན་ཡོན་བསྟན་པའི་ཕྱིར་རོ། །འདིར་ལས་ཀྱི་རྣམ་པར་སྨིན་པ་ནི་དངོས་པོ་ལ་མ་བསྟན་ཏེ། སངས་རྒྱས་རྣམས་ནི་ལས་ཀྱི་རྣམ་པར་སྨིན་པ་དང་བྲལ་བའི་ཕྱིར་རོ། །དེ་ལྟ་བས་ན་གདུལ་བྱའི་བསམ་པ་ལ་དགོངས་ནས་བསྟན་གྱི། དོན་དམ་པར་ནི་མ་ཡིན་ནོ། །བྱང་ཆུབ་སེམས་དཔའ་ལ་གནོད་པ་བྱས་པ་ནི་སངས་རྒྱས་ཉིད་རྩ་བ་དང་བཅས་པ་བཅོམ་ཞིང་ཉེ་བར་བཅོམ་པ་ཡིན་ཏེ། དེ་ལྟར་ན་ཡང་ལྷ་དང་བཅས་པའི་འཇིག་རྟེན་གྱི་དོན་ཉེ་བར་བཅོམ་
པར་འགྱུར་རོ། །ལུང་ཇི་ལྟ་བར་འདིར་བསྟན་པ་ཡིན་ཏེ། འདི་ལ་དོན་དམ་པར་ནི་བཅོམ་ལྡན་འདས་ཉིད་ཀྱིས་མཁྱེན་ཏོ། །འདི་ཡང་དད་པའི་སྟོབས་བསྐྱེད་པ་ལ་འཇུག་པའི་ཕྱག་རྒྱའི་མདོ་ལས། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལས་གང་གཱའི་ཀླུང་གི་བྱེ་མ་སྙེད་ཀྱི་མཆོད་རྟེན་བཤིག་པའམ། བསྲེགས་ལ། ཡང་རིགས་ཀྱི་བུའམ། རིགས་ཀྱི་བུ་མོ་གང་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་ལ་གནོད་སེམས་དང་ཐ་བ་དང་ཁོང་ཁྲོ་བའི་སེམས་བསྐྱེད་ཅིང་སྤྱོས་ཏེ་བརྒྱད་ན་འདི་ནི་དེ་བས་ཆེས་གྲངས་མེད་པའི་སྡིག་པ་སྐྱེ་བར་འགྱུར་རོ། །དེ་ཅིའི་ཕྱིར་ཞེ་ན། བྱང་ཆུབ་སེམས་དཔའ་ལས་འཁྲུངས་པ་ནི་སངས་རྒྱས་བཅོམ་ལྡན་འདས་སོ། །སངས་རྒྱས་ལས་བྱུང་བ་ནི་མཆོད་རྟེན་དང༌། བདེ་བའི་ཡོ་བྱད་ཐམས་ཅད་དང༌། ལྷའི་རིས་ཐམས་ཅད་དོ། །བྱང་ཆུབ་སེམས་དཔའ་ལ་དམ་པ་མ་ཡིན་པར་བྱས་ན་སངས་རྒྱས་ཐམས་ཅད་ལ་དམ་པ་མ་ཡིན་པ་བྱས་པར་འགྱུར་རོ། །བྱང་ཆུབ་སེམས་དཔའ་ལ་དམ་པར་བྱས་ན་སངས་རྒྱས་ཐམས་ཅད་ལ་དམ་པར་བྱས་པར་འགྱུར་རོ་ཞེས་བྱ་བ་ལ་སོགས་པ་གསུངས་སོ། །ཡང་གང་ཞིག་དེ་ལ་སེམས་དང་བ་བསྐྱེད་པ་དེའི་བསོད་ནམས་ཀྱི་འབྲས་བུ་ཇི་ཙམ་ཞིག་སྐྱེ་བར་འགྱུར་ཞེ་ན། གལ་ཏེ་གང་ཞིག་ཅེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་དཔའ་ལའང་གང་གི་བསོད་ནམས་ཀྱི་བདག་ཉིད་ཀྱིས་ཡིད་དང་བསྐྱེད་པར་བྱེད་ན། དེའི་འབྲས་བུ་ཡང་དེ་བས་ལྷག་པར་སྐྱེ་སྟེ། དེའི་སེམས་དང་བ་འཕེལ་བ་ནི་ཉེ་བར་སྐྱེ་བར་འགྱུར་བའོ། །དེ་བས་ན་ལྷག་པ་ནི་སྔར་གྱི་སྡིག་པའི་འབྲས་བུ་དེ་བས་ཆེས་མང་བར་བསོད་ནམས་ཀྱི་རྣམ་པར་སྨིན་པའི་འབྲས་བུ་ཁྱད་པར་དུ་སྐྱེ་སྟེ་འབྱུང་བའི་ཕྱིར་རོ། །ཡང་ན་དེ་བས་ལྷག་པའི་རྣམ་པར་སྨིན་པའི་འབྲས་བུ་སྐྱེད་པར་བྱེད་པའི་ལས་ཉིད་ལ་འབྲས་བུ་ཞེས་བརྗོད་དོ། །ཆེས་ལྷག་པར་འབྲས་བུ་སྐྱེད་པར་བྱེད་པའི་ལས་སྐྱེའོ་ཞེས་པའི་དོན་ཏོ། །དེས་པ་དང་མ་ངེས་པ་ལ་འཇུག་པའི་ཕྱག་རྒྱའི་མདོ་ལས། འཇམ་དཔལ་གལ་ཏེ་ཡོངས་སུ་བརྟག་པ་ཉེ་བར་བཟུང་སྟེ། ཕྱོགས་བཅུའི་འཇིག་རྟེན་
ཁམས་ཀྱི་སེམས་ཅན་ཐམས་ཅད་ཀྱི་མིག་བཏོན་པར་གྱུར་ལ། ཡང་ཡོངས་སུ་བརྟག་པ་ཉེ་བར་བཟུང་སྟེ། གལ་ཏེ་རིགས་ཀྱི་བུའམ་རིགས་ཀྱི་བུ་མོ་བྱམས་པའི་སེམས་ལ་གནས་པ་འགའ་ཞིག་དེ་དག་ཐམས་ཅད་ཀྱི་མིག་སྐྱེད་པར་བྱེད་པ་པས། འཇམ་དཔལ་རིགས་ཀྱི་བུ་འམ་རིགས་ཀྱི་བུ་མོ་གང་གཞན་ཞིག་གིས་ཐེག་པ་ཆེན་པོ་ལ་མོས་པའི་བྱང་ཆུབ་སེམས་དཔའ་ལ་སེམས་དང་བས་ལྟ་ན་འདི་ནི་དེ་བས་བསོད་ནམས་ཆེས་ལྷག་པར་སྐྱེའོ་ཞེས་གསུངས་སོ། །དེ་ལྟ་བས་ན་བསོད་ནམས་ཀྱི་ཞིང་ཆེན་པོ་ལ་མཁས་པ་རྣམས་ཀྱིས་དགེ་བའི་སེམས་ཉིད་དུ་བྱའོ། །གཞན་ཡང་འདིའི་ཕྱིར་ཡང་དགེ་བའི་སེམས་ཉིད་སྐྱེད་པར་རིགས་པ་ཡིན་ཏེ། གང་གི་ཕྱིར་བྱང་ཆུབ་སེམས་དཔའ་རྣམས་ལ་དོ་གལ་ཆེན་པོས་ཀྱང་སྟེ། ཚེགས་ཆེན་པོས་སོ། །སྡིག་པ་ནི་སྡིག་པ་ཉིད་དམ་ངན་པའི་ཕྱིར་སྡིག་པ་ཡིན་ཏེ། ཉེས་པར་བྱས་པའི་ལས་རྣམས་དོ་གལ་ཆེན་པོས་ཀྱང་སྟེ། གཞན་ཡང་ཆེན་པོས་བྱེད་ལ། དེ་རྣམས་ཀྱི་ལུས་དང་ངག་དང་ཡིད་ཀྱི་སྤྱོད་པ་མཐའ་དག་དང་བས་སྐྱེད་པར་བྱེད་པའི་ཕྱིར་དང༌། བྱང་ཆུབ་ཀྱི་སེམས་ཀྱི་མཐུ་ལས་ཡིན་པའི་ཕྱིར་བྱང་ཆུབ་སེམས་དཔའ་རྣམས་ལ་འགའ་ཞིག་གིས་གནོད་པ་བྱེད་པའི་སེམས་སྐྱེ་བར་མི་འགྱུར་རོ། །འདིར་ཡང་འཕགས་པ་འཇམ་དཔལ་གྱི་རྣམ་པར་ཐར་པ་ལས། རིགས་ཀྱི་བུ་དཔེར་ན་རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་ཅོད་པན་ལ་བཏགས་པའི་ཀླུའི་རྒྱལ་པོ་རྣམས་ལ་ཕ་རོལ་གྱི་གནོད་པ་དང་འཇིགས་པ་མི་འབྱུང་ངོ༌། །དེ་བཞིན་དུ་བྱང་ཆུབ་ཀྱི་སེམས་དང་སྙིང་རྗེ་ཆེན་པོའི་རིན་པོ་ཆེའི་རྒྱལ་པོ་ཡིད་བཞིན་གྱི་ནོར་བུ་ཅོད་པན་ལ་བཅིངས་པའི་བྱང་ཆུབ་སེམས་དཔའ་ལ་ངན་སོང་དང་ངན་འགྲོའི་ཕ་རོལ་གྱི་གནོད་པ་དང་འཇིགས་པ་མི་འབྱུང་ངོ་ཞེས་གསུངས་པ་ཡིན་ན། དེའི་ཕྱིར་དེ་རྣམས་ལ་དོན་མ་ཡིན་པ་འཕེལ་བའི་འབྲས་བུ་རྩུབ་པ་ཅིའི་ཕྱིར་འབད་ཅིང་རྩོལ་བར་བྱེད། དེ་ཉིད་ཀྱི་ཕྱིར། དགེ་བ་ངང་གིས་ཏེ། བསྡུ་བའི་དངོས་པོ་རྣམས་ཀྱིས་སེམས་ཅན་ཐམས་ཅད་ལ་ཕན་པ་དང་བདེ་བའི་ལས་བྱེད་པའི་ཕྱིར་དང༌། ལས་ཡོངས་སུ་དག་
པས་གང་དུ་ཡང་འཁྲུལ་པ་མེད་པའི་ཕྱིར་དེ་རྣམས་ལ་ངང་གིས་དགའ་བ་དང༌། དང་བ་དང་མཆོག་ཏུ་དགའ་བ་སྐྱེ་བར་འགྱུར་རོ། །དེའི་ཕྱིར་ཡང་འབད་པ་མེད་པར་དགེ་བ་ཉིད་སྐྱེད་པ་ཡིན་ནོ། །ད་ནི་བྱང་ཆུབ་ཏུ་སེམས་བསྐྱེད་པ་རྣམས་ལ་བསྟན་བཅོས་བྱེད་པ་བདག་ཉིད་ཀྱི་ཤིན་ཏུ་ཡང་ཡིད་རབ་ཏུ་དང་བ་གསལ་བར་བྱེད་པ་དེ་ལ་ཕྱག་འཚལ་བ། གང་ལ་ཞེས་པ་ལ་སོགས་པ་གསུངས་ཏེ། སྐྱེས་བུ་གླང་པོ་དེའི་སྐུ་ལས་ཏེ། སྐུ་ལུས་ལའོ། །ཕྱག་འཚལ་ཞིང་ཞེས་པ་ནི་རབ་ཏུ་འདུད་པའོ། །གང་ལ་སྟེ། དེ་རྣམས་ཀྱི་རྒྱུད་ལའོ། །སེམས་ཀྱི་དམ་པ་རིན་ཆེན་དེ་ཡིད་བཞིན་གྱི་ནོར་བུ་དང་འདྲ་བའི་ཕྱིར་སེམས་ཉིད་རིན་པོ་ཆེའོ། །དབུལ་བའི་སྡུག་བསྔལ་ཐམས་ཅད་སེལ་བའི་ཕྱིར་རབ་དམ་པ་སྟེ་མཆོག་གོ །དེ་ནི་བསྟན་པའི་ཕན་ཡོན་ཅན་ཏེ་སྐྱེས་པ་ནི་བྱུང་བའོ། །དེ་ཡང་ཡིན་ལ་སེམས་ཀྱི་དམ་པ་རིན་ཆེན་ཡང་དེ་ཡིན་པས་ཞེས་ཚིག་བསྡུ་བའམ། དེ་ཞེས་བྱ་བ་ནི་ལོགས་ཤིག་པའོ། །འདི་ནི་ཡོན་ཏན་གྱི་གཞི་ལ་ལྷག་པར་བཀུར་བ་ཡིན་ནོ། །དེའི་ཁྱད་པར་གཞན་ཡང༌། གང་ལ་གནོད་པ་བྱས་ཀྱང་ཞེས་བྱ་བ་ལ་སོགས་པ་གསུངས་ཏེ། གང་ལ་ནི་བྱང་ཆུབ་སེམས་དཔའ་མཆོག་ཏུ་དགེ་བའི་ཐུགས་མངའ་བ་རྣམས་ལའོ། །གནོད་པ་བྱས་ཀྱང་ནི་བརྙས་པ་བྱས་ཀྱང་ངོ༌། །བདེ་འབྲེལ་པ་ནི་དེ་བྱེད་པ་ལ་བདེ་བ་གོང་ནས་གོང་དུ་འཕེལ་བར་འགྱུར་བའོ། །དགོངས་པ་ནི་འདི་ཡིན་ཏེ། དེ་ལ་གནོད་པ་ནི་བྱ་བར་མི་ནུས་ལ། བརྒྱ་ལ་སྲིད་ན་ཡང་དེ་ལ་གནོད་པ་བྱེད་པ་ཉིད་རྒྱུ་མཚན་དུ་བྱས་ནས་འཇུག་པ་དང་བའི་བསམ་པ་དང་ལྡན་པ་རྣམས་ལ་ཡང་རྒྱུ་མཚན་འགའ་ཞིག་གིས་དེ་ལ་སེམས་དང་བ་སྐྱེས་པས་དེ་ལ་གནོད་པ་བྱེད་པ་མྱ་ངན་ལས་འདས་པའི་བདེ་བ་དང་འབྲེལ་པར་འགྱུར་ཏེ། དཔེར་ན་བྱམས་པའི་སྟོབས་ཀྱི་སྐྱེས་པའི་རབས་སུ་ལྔ་དབང་དུ་བྱས་ནས་བརྗོད་པ་ལྟ་བུའོ། ཡང་ན་བྱང་ཆུབ་སེམས་དཔའི་སྨོན་ལམ་གྱིས་གནོད་པ་བྱས་པ་ཉིད་བདེ་བ་དང་འབྲེལ་པར་བརྗོད་དོ། །ཡང་ན། གང་དག་ལ་བདག་ཁ་ཟེར་བའམ། །གཞན་དག་གནོད་པར་བྱེད་པའམ། །དེ་བཞིན་ཕྱར་ཀ་གཏོང་བའང་རུང༌། །ཐམས་ཅད་བྱང་ཆུབ་སྐལ་ལྡན་གྱུར། །ཞེས་འཆད་པར་
འགྱུར་རོ། །གང་ལ་གནོད་པ་བྱས་ཀྱང་ནི། །གང་དག་བདག་ལ་གནོད་པ་བྱས་ཀྱང་སྟེ། བུ་སྡུག་པས་བྱས་པ་བཞིན་དུ་ཐུགས་རྗེ་ཆེན་པོའི་ལྷག་པའི་བསམ་པས་སྡུག་བསྔལ་གྱི་རྒྱུ་ཉིད་ཀྱང་བདེ་བ་ཉིད་སྐྱེད་པར་བྱེད་པ་ཡིན་ཏེ། ཇི་སྐད་དུ་བཟོད་པའི་ལེའུ་ལས་འཆད་པར་འགྱུར་བ་བཞིན་ནོ། །དེ་ལྟར་རྣམ་པ་ཐམས་ཅད་དུ་བདེ་བའི་རྒྱུ་ཡིན་པའི་ཕྱིར་བདེ་བ་དོན་དུ་གཉེར་བ་རྣམས་ཀྱིས་བྱང་ཆུབ་སེམས་དཔའ་ལ་བརྟེན་པར་བྱ་བ་ཡིན་ཏེ། རིན་པོ་ཆེ་དོན་དུ་གཉེར་བ་རྣམས་ཀྱིས་རིན་པོ་ཆེའི་འབྱུང་ཁུངས་བཞིན་ནོ་ཞེས་བསྟན་པའི་ཕྱིར། བདེ་བའི་འབྱུང་གནས་དེ་ལ་སྐྱབས་སུ་མཆི། ཞེས་པ་ལ། བདེ་བའི་འབྱུང་གནས་ནི་གཅིག་ཏུ་བདེ་བ་ཐམས་ཅད་སྐྱེད་པར་བྱེད་པའི་ཕྱིར་རོ། །དེ་ལ་སྟེ། ཇི་སྐད་དུ་བསྟན་པའི་རིམ་པས་གནོད་པ་བྱས་ཀྱང་བདེ་བའི་རྒྱུར་གྱུར་པ་ལ་སྐྱབས་སུ་མཆི་བ་ཡིན་ལ། དེ་ལ་བསྟན་པར་བགྱི་བ་སྟེ། དེ་རྣམས་ཀྱིས་བདག་གི་སྐྱབས་མཛོད་ཅིག་ཅེས་བྱ་བར་དགོངས་པའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ་ཤེས་རབ་འབྱུང་གནས་བློ་གྲོས་ཀྱིས་བྱས་པ་ལས། བྱང་ཆུབ་ཀྱི་སེམས་ཀྱི་ཕན་ཡོན་གྱི་ལེའུ་སྟེ་དང་པོའོ།། །།བམ་པོ་གསུམ་པ། ད་ནི་དེ་ལྟར་དལ་བ་ཕུན་སུམ་ཚོགས་པ་རྙེད་པར་དཀའ་བ་ཐོབ་ཅིང༌། བྱང་ཆུབ་ཀྱི་སེམས་ཀྱི་ཕན་ཡོན་རིག་ནས། བྱང་ཆུབ་ཀྱི་སེམས་བླང་བའི་དོན་དུ་སངས་རྒྱས་དང་བྱང་ཆུབ་སེམས་དཔའ་རྣམས་མངོན་དུ་བྱས་ཏེ་ཕྱག་འཚལ་བ་དང༌། མཆོད་པ་དང༌། གསུམ་ལ་སྐྱབས་སུ་འགྲོ་བ་དང༌། སྡིག་པ་བཤགས་པ་དང། རྗེས་སུ་ཡི་རང་པ་དང༌། སངས་རྒྱས་ལ་བསྐུལ་བ་དང༌། གསོལ་བ་གདབ་པ་དང༌། བྱང་ཆུབ་ཏུ་ཡོངས་སུ་བསྔོ་བ་རྣམས་བྱ་བའི་ཕྱིར། རིན་ཆེན་སེམས་དེ་ཞེས་བྱ་བ་ལ་སོགས་པ་གསུངས་ཏེ། དེ་ཞེས་བྱ་བ་ནི་ཕན་ཡོན་བསྟན་མ་ཐག་པའི་བྱང་ཆུབ་ཀྱི་སེམས་རིན་པོ་ཆེ་ཡིན་ལ། གཟུང་བའི་ཕྱིར་ནི་བདག་གིར་བྱ་བའི་ཕྱིར་ཏེ། དེ་སྐྱེད་པའི་ཕྱིར་ཞེས་བྱ་བའི་དོན་ཏོ། །དེ་བཞིན་གཤེགས་པ་རྣམས་ནི་སངས་རྒྱས་རྣམས་ཏེ། བཅོམ་ལྡན་འདས་ལ་མཆོད་པའོ། །བདག་ཅེས་པ་ནི་བྱང་ཆུབ་ཀྱི་སེམས་ལེན་པ་པོར་བདག་ཉིད་བསྟན་པ་ཡིན་ཏེ། འདི་ནི་སངས་
རྒྱས་དཀོན་མཆོག་བསྟན་པ་ཡིན་ནོ། །དམ་པའི་ཆོས་དཀོན་མཆོག་ཅེས་པ་ནི་ལུང་དང་རྟོགས་པའི་མཚན་ཉིད་ཡིན་ལ། དྲི་མ་མེད་ཅེས་བྱ་བ་ནི་དགེ་བ་གསུམ་གྱིས་འཁོར་གསུམ་དག་པ་དང༌། རང་བཞིན་གྱིས་འོད་གསལ་བ་ཡིན་ཏེ། ཐམས་ཅད་དུ་དྲི་མ་ཐམས་ཅད་ཀྱི་གནས་མ་ཡིན་པའི་ཕྱིར་དང༌། ཉོན་མོངས་པ་ཞེས་བྱ་བ་ལ་གློ་བུར་བ་ཡིན་པའི་ཕྱིར་དང༌། དྲི་མ་ཐམས་ཅད་སྤོང་བ་ལ་མཁས་པའི་ཕྱིར་རོ། །འདིས་ནི་དམ་པའི་ཆོས་དཀོན་མཆོག་བསྟན་པ་ཡིན་ནོ། །དེ་སངས་རྒྱས་སྲས་ཏེ། སངས་རྒྱས་ཀྱི་སྲས་པོ་ཡིན་ལ། ཡོན་ཏན་རྒྱ་མཚོ་རྣམས་ནི་ཡོན་ཏན་རིན་པོ་ཆེའི་རྒྱ་མཚོ་སྟེ། འཕགས་པ་སྤྱན་རས་གཟིགས་དབང་ཕྱུག་དང༌། འཇམ་དཔལ་དབྱངས་ལ་སོགས་པ་ཡིན་ཏེ། འདིས་ནི་དགེ་འདུན་དཀོན་མཆོག་བསྟན་ཏོ། །འདི་ནི་དང་པོ་དཀོན་མཆོག་གསུམ་ལ་མཆོད་པའི་ཆོ་ག་ཡིན་ནོ། །མཆོད་ཅེས་པ་ནི་ཐམས་ཅད་དུ་སྦྱར་བར་བྱའོ། །ལེགས་པར་ཞེས་པ་ནི་མཆོད་པ་ཉིད་ཀྱི་ཁྱད་པར་ཡིན་ཏེ། ལེགས་པར་ཕྱིན་ཅི་མ་ལོག་ལ་ཇི་ལྟ་བ་བཞིན་དུ་གྱུར་པའམ། སེམས་དང་བ་དྲག་པོས་སོ། །ཡང་ན་གཟུང་བའི་ཁྱད་པར་ཡིན་ཏེ། ལེགས་པར་ཞེས་པ་ནི་ཤིན་ཏུ་དང་བའི་སེམས་ཀྱིས་ལེགས་པར་གཟུང་བའི་ཕྱིར་ཡིན་ལ། གཞན་གྱི་ངོ་བོ་ལ་སོགས་པར་ནི་མ་ཡིན་ཏེ། ཇི་ལྟར་བཟུང་བ་བཞིན་དུ་ཉམས་པར་མི་འགྱུར་བ་ཡིན་ནོ། །མཆོད་པ་ཉིད་བསྟན་པའི་ཕྱིར། མེ་ཏོག་འབྲས་བུ་ཇི་སྙེད་ཅེས་པ་ལ་སོགས་པ་གསུངས་ཏེ། འདི་དག་གི་ཚད་གང་ཡིན་པ་ནི་ཇི་སྙེད་ཡོད་པ་སྟེ། ལྷག་མ་མ་ལུས་པའི་མེ་ཏོག་དང་འབྲས་བུ་རྣམས་ཡིན་ནོ། །ནམ་མཁའ་རབ་འབྱམ་ཁམས་ཀྱི་མཐར་གཏུགས་པ། །ཡོངས་སུ་གཟུང་བ་མེད་པ་དེ་དག་ཀུན། །བློ་ཡིས་བླངས་ནས་ཐུབ་པ་སྐྱེས་ཀྱི་མཆོག །སྲས་དང་བཅས་པ་རྣམས་ལ་ལེགས་པར་དབུལ། །ཞེས་པ་གོང་མ་ཐམས་ཅད་ལ་སྦྱར་བར་བྱའོ། །སྨན་གྱི་རྣམ་པ་ནི་སྨན་གྱི་བྱེ་བྲག་གོ །དང་བ་ཡིད་དུ་འོང་བ་ཞེས་བྱ་བ་ནི་རིན་པོ་ཆེའི་ཁྱད་པར་རོ། །ས་འཛིན་ནི་རི་བོའོ། །རིན་ཆེན་རང་བཞིན་ནི་རིན་པོ་ཆེའི་རིའོ། །དབེན་ཞིང་ཉམས་དགའ་ཞེས་པ་ནི་ཡིད་འཕྲོག་ཅིང་དབེན་པ་སྟེ་རྗེས་སུ་མཐུན་པ་ཞེས་པའི་དོན་ཏོ། །མེ་ཏོག་མཛེས་
རྒྱན་འབར་བ་ཞེས་བྱ་བ་ནི། མཛེས་པའི་མེ་ཏོག་ཉིད་རྒྱན་ཡིན་ཏེ། བརྒྱན་པ་དེ་ཉིད་ཀྱིས་འབར་བ་སྟེ་ཤིན་ཏུ་ལྷག་གེ་བའོ། །འབྲས་བཟང་ཡལ་ག་དུད་པ་དང༌། །ཞེས་པ་ལ། བཟང་བ་ནི་མཛེས་པ་སྟེ། ཁ་དོག་དང་དྲི་དང་རོ་ཕུན་སུམ་ཚོགས་པའི་འབྲས་བུ་དེ་དག་ཡིན་ཏེ། དེ་རྣམས་ཀྱིས་དུད་པ་ནི་དམའ་བར་གྱུར་པ་སྟེ། ཡལ་ག་གང་ཞིག་ས་ལ་རེག་པ་བཞིན་དུ་གྱུར་པ་དེ་ལ་དེ་སྐད་ཅེས་བྱའོ། །དཔག་བསམ་གྱི་ཤིང་ནི་དཔག་བསམ་གྱི་ལྗོན་པའོ། །པདྨས་བརྒྱན་པ་ནི་པདྨའི་རྒྱན་གང་ལ་ཡོད་པ་དེ་ལ་དེ་སྐད་ཅེས་བྱའོ། །ངང་པ་ཤིན་ཏུ་སྐད་སྙན་ཡིད་འོད་ལྡན། །ཞེས་པ་ནི་ངང་པ་རྣམས་ཀྱི་སྐད་ནི་སྒྲའོ། །ཤིན་ཏུ་ཡིད་དུ་འོང་བ་ནི་ཉམས་དགའ་བ་སྟེ། དེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །མ་རྨོས་འཁྲུངས་པའི་ཞེས་པ་ནི་མ་རྨོས་པ་ཉིད་དེ་ཐོང་གཤོལ་གྱིས་གློགས་པ་མེད་པར་སྐྱེས་པ་རྣམས་ཡིན་ལ། སྐྱེས་པའི་ལོ་ཐོག་གི་རྣམ་པ་ནི་འབྲུའི་ཁྱད་པར་རོ། །གཞན་ཡང་མ་ཆོད་པར་ནི་འོས་པའི་རྒྱན་རྣམས་ཞེས་པ་ལ། གཞན་ཡང་ནི་ལོགས་ཤིག་པའོ། །མཆོད་པར་བྱ་བ་ནི་མ་ཉེས་པར་བྱ་བ་ཡིན་ཏེ། རྒྱན་རྣམས་ནི་མཛེས་པར་བྱེད་པ་རྣམས་སོ། །ནམ་མཁའི་ཁམས་ཀྱི་རབ་འབྱམས་མཐར་གཏུགས་པ། །ཞེས་བྱ་བ་ལ། ནམ་མཁའི་ཁམས་རབ་འབྱམ་ནི་སྐབས་སམ་རྒྱ་ཆེ་བའོ། །དེ་སྲིད་ཀྱི་མཐར་གཏུགས་པ་ནི་དེའི་མཐར་ཐུག་པའོ། །དེ་དག་ཀུན་ནི་བརྗོད་པ་དང་མ་བརྗོད་པ་དང་འདྲ་བ་ཡིན་ལ། ཡོངས་སུ་གཟུང་བ་མེད་པ་ནི་བདག་གི་ཕ་མ་ཡིན་པ་རྣམས་ཏེ། གང་གིས་ཀྱང་རང་གིར་མ་བྱས་པ་ཞེས་བྱ་བའི་དོན་ཏོ། །བློ་ཡིས་བླངས་ནས་ཞེས་པ་ནི་ཡིད་ཀྱིས་ཞེས་པའོ། །ཐུབ་པ་སྐྱེས་ཀྱི་མཆོག་ནི་ཐུབ་པའི་ཁྱུ་མཆོག་སྟེ། སྲས་དང་བཅས་པ་ནི་བྱང་ཆུབ་སེམས་དཔའ་དང་ངོ༌། །ལེགས་འབུལ་ནི་ལེགས་པར་སྦྱིན་པའོ། །ཡིན་གནས་དམ་པ་ནི་ཡོན་གྱི་སྣོད་བླ་ན་མེད་པའོ། །ཐུགས་རྗེ་ཆེན་པོ་རྣམས་ནི་སངས་རྒྱས་དང་བྱང་ཆུབ་སེམས་དཔའི་སེམས་ཅན་ཐམས་ཅད་ལ་ཕན་པ་དང་བདེ་བའི་དགོངས་པ་ཅན་ནོ། །བདག་ལ་ཞེས་པ་ནི་ཞན་ཅིང་སྡུག་བསྔལ་བའི་སེམས་ཅན་ལའོ། །བརྩེར་དགོངས་ནི་ཐུགས་རྗེ་མཛོད་ཅིག་པ་སྟེ། བདག་
རྗེས་སུ་གཟུང་བའི་ཕྱིར་ཞེས་བྱ་བའི་དོན་ཏོ། །འདི་དག་ནི་འདི་དག་ཐམས་ཅད་དེ་དག་གིས་མཆོད་པར་སྦྱར་བའི་དངོས་པོའོ། །བཞེས་ཞེས་པ་ནི་བདག་གིར་མཛོད་ཅིག་པའོ། །དེ་ལྟར་ཡིན་ན་ཡང་འདི་ལྟར་ཡིད་ལས་བྱུང་བའི་མཆོད་པ་ཙམ་ཅིའི་ཕྱིར་བྱེད་དེ། །རེ་ཞིག་དངོས་པོ་ཡིད་དུ་འོང་བ་དེ་དང་དེ་དངོས་སུ་ཅིའི་ཕྱིར་འབུལ་བར་མི་བྱེད་ཅེ་ན། བདག་ནི་བསོད་ནམས་མི་ལྡན་ཞེས་པ་ལ་སོགས་པ་གསུངས་ཏེ། བདག་བསོད་ནམས་མ་བྱས་པ་དེ་ཉིད་ཀྱི་ཕྱིར་བཀྲེན་ཆེན་ཏེ། བསོད་ནམས་དག་གིས་ཡོ་བྱད་ཕུན་སུམ་ཚོགས་པར་འགྱུར་བ་ཡིན་ལ་དེ་དང་བྲལ་བའི་ཕྱིར་མཆོད་པའི་ནོར་གཞན་ཏེ། ཡོ་བྱད་གང་ཅིའང་བདག་ལ་མ་མཆིས་པའོ། །དེས་ན་བདག་གི་དོན་སླད་ཅེས་བྱ་བ་ནི་བདག་གི་བསོད་ནམས་བཞེད་པ་སྟེ། བཅོམ་ལྡན་འདས་ཀྱང་གཞན་དོན་དགོངས་པ་ནི་གཞན་ལ་ཕན་པ་དང་བདེ་བར་བཞེད་པ་ཡིན་ཏེ། ཐུགས་རྗེ་ཆེན་པོ་དང་ལྡན་པའི་ཕྱིར་རོ། །མཆོད་པའི་ཡོ་བྱད་བརྗོད་པ་འདི་བདག་གིས་ཕུལ་བ་དེས་ན་མགོན་པོ་ཉིད་ཀྱི་མཐུས་ཏེ་ཉིད་ཀྱི་སྟོབས་བཞེས་ཤིག་པའོ། །ཡང་བདག་དབང་བའི་ལུས་འདི་ཡོད་པས་དེ་འབུལ་བར་བྱའོ་ཞེས་རྒྱལ་དང་ཞེས་པ་ལ་སོགས་པ་ལ་གསུངས་པ་ལ། རྒྱལ་བ་རྣམས་ལ་བདག་ཉིད་ཀྱང་དབུལ་བར་བགྱི་སྟེ། རྣམ་པ་ཀུན་གྱིས་ཞེས་པ་ནི་རྣམ་པ་ཐམས་ཅད་དུ་བདག་གིར་ཁས་བླངས་པ་ཡོངས་སུ་དོར་ནས་སོ། །དེའི་སྲས་རྣམས་ལའང་སྟེ། སེམས་དཔའ་མཆོག་རྣམས་ལའོ། །བདག་ནི་ཡོངས་བཞེས་ཤིག་ཅེས་པ་ནི་བདག་སོ་སོ་ནས་ཡོངས་སུ་བཞེས་ཤིག་པའོ། །སྐྱེ་བུ་ཁྱུ་མཆོག་ཁྱེད་ཀྱི་འབངས་སུ་བྲན་གྱི་དངོས་པོར་ཁས་བླང་བར་བགྱི་བ་སྟེ། འཚོ་བ་ལ་སོགས་པ་འཚོལ་བ་མ་ལགས་ལ། འོན་ཀྱང་གུས་པས་ནི་མཆོག་ཏུ་གུས་པ་སྟེ། སེམས་དད་པའི་སྟོབས་ཀྱིས་ཞེས་བྱ་བའི་ཐ་ཚིག་གོ །འོ་ན་ཡང་འདིར་ཡོན་ཏན་ཅི་ཞིག་ཡོད་ཅེ་ན། བདག་ནི་ཁྱོད་ཀྱིས་ཞེས་བྱ་བ་ལ་སོགས་པ་གསུངས་ཏེ། ཁྱེད་ཀྱིས་ནི་ཁྱེད་རྣམས་ཀྱིས་སོ། །སྲིད་ན་མི་འཇིགས་སེམས་ཅན་ཕན་པར་བགྱིད་སྟེ། ཆེན་པོ་ལ་བརྟེན་ནས་འཇིགས་པ་དང་བྲལ་ནས་འཁོར་བར་འཇིག་རྟེན་པ་རྣམས་ལ་ཕན་པའི་དོན་བསྒྲུབ་པར་བགྱི་སྟེ། ཆེན་པོ་ལ་བརྟེན་ནའང་
ལས་མི་དགེ་བས་བསྒྲིབས་པ་དག་རང་ལ་ཕན་པ་བྱེད་པའི་ནུས་པ་ཡང་མེད་པས་སྔོན་གྱི་ཞེས་པ་ལ་སོགས་པ་གསུངས་ཏེ། སྔོན་མ་ཤེས་ནས་ལས་མི་དགེ་བ་བྱས་པ་ལས་ཡང་དག་པར་འདའ་བར་བགྱིད་ཅིང་རྣམ་པར་སུན་འབྱིན་པ་ཀུན་ཏུ་སྤྱོད་པ་ལ་སོགས་པ་རྣམས་ཀྱིས་སྤང་བར་བགྱིའོ། །སྡིག་པ་གཞན་ཡང་སླན་ཆད་མི་བགྱིད་དོ་ཞེས་པ་ནི་ཡང་སླན་ཆད་མི་བྱེད་པར་སྡོམ་པ་ལེན་པའོ། །དེ་ལྟར་ལུས་འབུལ་བ་ལ་སོགས་པ་མཆོད་པའི་ཡོ་བྱད་ཐམས་ཅད་ཕུལ་ནས་ཡང་མཆོད་པའི་ཁྱད་པར་བྱ་བ་བཞེད་ནས། རིན་ཆེན་འབར་བ་ཞེས་བྱ་བ་ལ་སོགས་པ་གསུངས་ཏེ། རིན་ཆེན་ནི་ཨིནྡྲ་ནཱི་ལ་ལ་སོགས་པའོ། །འབར་བ་ནི་འོད་གསལ་བའོ། །གང་ཀ་བ་ཡིད་དུ་འོང་བ་དེ་ནི་འདོད་པར་བྱ་བ་སྟེ། ཁྲུས་ཀྱི་ཁང་པ་དེར་དེ་བཞིན་གཤེགས་པ་རྣམས་ལ་བདག་གིས་ཁྲུས་གསོལ་ལོ་ཞེས་སྦྱར་རོ། །ཡང་ཇི་ལྟ་བུར་གྱུར་པ་ཞེ་ན། མུ་ཏིག་རང་བཞིན་ཞེས་པ་མུ་ཏིག་གིས་སྤྲས་ཤིང་བཀོད་པའོ། །འོད་ཆགས་ནི་འོད་གསལ་བ་སྟེ། བླ་རེ་ཉིད་ནི་བླ་རེ་ཡིན་ལ། གང་དེ་དག་ཡོད་པ་དེ་ལ་དེ་སྐད་ཅེས་བྱའོ། །གསལ་བ་ནི་ཤིན་ཏུ་དྲི་མ་མེད་པ་སྟེ། འཚེར་བ་ནི་འོད་ཟེར་དང་ལྡན་པའོ། །འདི་ཤེལ་གྱི་ཡིན་པས་ཤེལ་ཞེས་པ་སྟེ། བསྟར་བ་ནི་ས་གཞི་སྤྲས་པའི་ཁྱད་པར་རོ། །གང་དྲི་ཞིམ་པ་དེར་ཏེ་ཨ་ཀ་རུ་ནག་པོ་དང་ཙན་དན་ལ་སོགས་པས་བདུགས་ཤིང་བསྒོས་པའི་ཁྲུས་ཀྱི་ཁང་པ་དེར་ཡིད་འོང་དྲི་ཆུ་མེ་ཏོག་གིས་བཀང་བ་ནི་ཆུ་དང༌། མེ་ཏོག་དང༌། ཡིད་དུ་འོང་བའི་དྲི་དེ་རྣམས་ཀྱིས་བཀང་བའོ། རིན་ཆེན་རང་བཞིན་བུམ་པ་ནི་དེ་དག་བཻཌཱུཪྻ་ཆེན་པོ་ཡང་ཡིན་ལ་རིན་པོ་ཆེའང་ཡིན་ཏེ། དེའི་རང་བཞིན་ནོ། །དུ་མ་ཡིན་ཞེས་པ་ནི་བརྒྱ་དང་སྟོང་དང་བྱེ་བ་རྣམས་ཀྱིས་སོ། །དེ་བཞིན་གཤེགས་དང་དེ་ཡི་སྲས་རྣམས་ལ། །གླུ་དང་རོལ་མོར་བཅས་པས་བདག་ཁྲུས་གསོལ། །ཞེས་པ་ནི་ཡིད་འཕྲོག་པའི་གླུ་དང་གར་དང་རྫ་རྔལ་སོགས་པའི་རོལ་མོ་དང་བཅས་པ་རྣམས་ཀྱིས་སོ། །དེ་དག་ནི་དེ་བཞིན་གཤེགས་པ་མཐའ་ཡས་པ་དང་དེའི་སྲས་སོ། །མཚུངས་པ་མེད་པ་ནི་མཉམ་པ་མེད་པ་སྟེ། གོས་ནི་དུ་གུ་ལའི་རས་ཡིན་ལ། གཙང་བ་ནི་དྲི་མ་བཀྲུས་པ་སྟེ་དྲི་
མ་མེད་པ་ཞེས་བྱ་བའི་དོན་ཏོ། །དྲི་རབ་བསྒོས་པ་ནི་ཨ་ཀ་རུ་ལ་སོགས་པའི་བདུག་སྤོས་རྣམས་ཀྱིས་སོ། །སྐུ་ནི་སྐུ་སྟེ། ཕྱི་བ་ནི་བྱི་དོར་བྱ་བའོ། །དེ་ནས་ཞེས་པ་ནི་ཕྱིས་པའི་འོག་ཏུའོ། །ལེགས་བསྒྱུར་བ་ནི་ལེགས་པའི་ཚོན་གྱིས་ཤིན་ཏུ་ལེགས་པར་བསྒྱུར་བ་སྟེ། ལེགས་པའི་བདུག་སྤོས་རྣམས་ཀྱིས་བདུགས་པ་རྣམས་འབུལ་བའོ། །ན་བཟའ་དམ་པ་ནི་བླ་ན་མེད་པའི་གོས་སོ། །དེ་ལ་ནི་དེ་རྣམས་ཏེ། བཟང་པོ་ནི་ལྷ་ཡུལ་དུ་བྱུང་བ་ལྷ་ལ་འོས་པའོ། །སྲབ་པ་ཡང་ཡིན་ལ་རེག་བྱ་འཇམ་པ་ཡང་ཡིན་ཏེ། འཇམ་ཞིང་ཕྲ་བའོ། །སྣ་ཚོགས་པ་ནི་ཁ་དོག་དུ་མའོ། །མཛེས་པར་བྱས་པ་སྟེ། གང་ལ་ན་བཟའ་ཡང་ཡིན་ལ་རྒྱན་མཆོག་ཀྱང་ཡིན་པ་དེས་ཏེ་ལྷབ་ལྷུབ་གཙོ་བོར་གྱུར་པས་སོ། །དེ་དང་དེ་དག་གིས་ཞེས་པ་ནི་ཅོད་པན་དང༌། གདུ་བུ་དང་དཔུང་རྒྱན་དང༌། དོ་ཤལ་དང༌། རྐང་གདུབ་ལ་སོགས་པ་དེ་རྣམས་ཀྱིས་ཀུན་ཏུ་བཟང་པོ་དང༌། མི་ཕམ་པ་དང༌། འཇམ་དབྱངས་དང༌། འཇིག་རྟེན་དབང་ཕྱུག་ལ་སོགས་པ་བྱང་ཆུབ་སེམས་དཔའ་རྣམས་ལ་བརྒྱན་པར་བགྱི་སྟེ་ཆས་སུ་བགྱིའོ། །སྟོང་གསུམ་ཀུན་དུ་ཞེས་པ་ལ། གླིང་བཞི་པ་སྟོང་དང༌། དེ་བཞིན་དུ་སོ་སོར་ཟླ་བ་དང་ཉི་མ་དང༌། རི་རབ་དང༌། འདོད་པའི་ལྷ་དང༌། ཚངས་པའི་འཇིག་རྟེན་རྣམས་ནི་སྟོང་སྤྱི་ཕུད་དུ་འདོད་ལ། དེ་ལྟ་བུ་དེ་སྟོང་དུ་བསྒྲེས་པ་ནི་སྟོང་གཉིས་པ་བར་མ་ཡིན་ཏེ། དེ་སྟོང་ནི་སྟོང་གསུམ་ཡིན་ན་གླིང་བཞི་པ་བྱེ་བ་ཕྲག་བརྒྱ་ཞེས་བྱ་བའི་དོན་ཏོ། །དེ་ལྟར་དེ་ཕྱོགས་ཐམས་ཅད་དུ་འཇིག་རྟེན་གྱི་ཁམས་མཐའ་ཡས་མུ་མེད་པ་དང༌། སྟོང་གསུམ་ཐམས་ཅད་དུ་ངད་ལྡང་བར་བྱེད་པའི་ངང་ཚུལ་གང་ལ་ཡོད་པ་དེ་ལ་དེ་སྐད་ཅེས་བྱའོ། །རྣམ་པ་དེ་ལྟ་བུའི་དྲིའི་བྱུག་པ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། དྲི་མཆོག་དེ་རྣམས་ཀྱིས་ཏེ། གཞི་མཉམ་པ་དང༌། ཙན་དན་ལ་སོགས་པ་རྣམས་ཀྱིས་སོ། །ཐུབ་དབང་གི་སྐུ་དེ་དག་བྱུག་པར་བགྱི་སྟེ་བསྐུ་བར་བགྱིའོ། །ཇི་ལྟ་བུར་གྱུར་པ་གང་དག་ལ་ཞེ་ན། བཙོ་མ་ནི་ཁ་སྦྱར་དུ་བསྐོལ་བ་ལ་སོགས་པས་ནང་གི་དྲི་མ་ཡོངས་སུ་སྦྱངས་བའོ། །བྱི་དོར་བྱས་པ་ནི་རོ་ཙ་ན་ལ་སོགས་པའི་ནོར་བུས་ཕྱི་བདར་བྱས་པའོ། །སྦྱངས་པ་ནི་བུལ་ཏོག་དང༌། སྐྱུ་རུ་ར་དང༌། ལན་ཚྭ་ལ་སོགས་པས་ཕྱིའི་དྲི་མ་
བཀྲུས་པའོ། །དེ་ལྟ་བུར་གྱུར་པ་ཡང་ཡིན་ལ། གསེར་ཡང་ཡིན་པ་དེའི་འོད་ཆགས་ནི་འོད་ཟེར་ཞེས་པའི་དོན་ཏོ། །དེ་དང་འདྲ་བར་འབར་ཞིང་འོད་ཟེར་དང་ལྡན་པའོ། །འདི་ཡང་འཇིག་རྟེན་ལ་གྲགས་པས་བཤད་པ་ཡིན་ཏེ། དེ་བཞིན་གཤེགས་པའི་སྐུ་མཛེས་པ་ལ་ནི་འཇིག་རྟེན་ན་དཔེ་ཅུང་ཟད་ཀྱང་ཡོད་པ་མ་ཡིན་ནོ། །ད་ནི་ཕྲེང་བའི་མཆོད་པ། ཐུབ་དབང་ཞེས་བྱ་བ་ལ་སོགས་པ་གསུངས་ཏེ། མན་དར་ནི་ལྷ་རྣམས་ཀྱི་མེ་ཏོག་གི་ཁྱད་པར་རོ། །མ་ལི་ཀ་ནི་བར་ཤི་ཀའོ། །དེ་དག་ལ་སོགས་པ་ཐམས་ཅད་དེ། དྲི་ཞིམ་པའི་མེ་ཏོག་ཡིད་འཕྲོག་པ་རྣམས་ཀྱིས་མཆོད་གནས་ཀྱི་མཆོག་ཐུབ་པའི་དབང་པོ་རྣམས་ལ་མཆོད་པར་བགྱིའོ། །མེ་ཏོག་ཀྱང་ཡིན་ལ་ཕྲེང་བ་ཡང་ཡིན་ཏེ། སྤེལ་ལེགས་ཡིད་འོང་ཞེས་པ་ནི་ལེགས་པར་བསྒྱུར་ཞིང་སྤྲས་པའི་ཁྱད་པར་ཏེ། འདོད་པར་འོས་པ་རྣམས་ཀྱིས་སོ། །སྤོས་ཀྱི་མཆོད་པ་སྤོས་མཆོག་ཅེས་བྱ་བ་ལ་སོགས་པ་ལ་གསུངས་པ་ལ། རྒྱས་པ་ནི་སྡུག་པའོ། །ཁྱབ་པ་ནི་འཕྲོ་བའམ་དྲི་ཆེ་བར་ལྡང་བའོ། །དེ་ལྟ་བུའི་དྲི་བདུག་པའི་སྤྲིན་ཚོགས་གང་ལ་ཡོད་པ་དེ་ལ་དེ་སྐད་ཅེས་བྱའོ། །བདུག་པ་དེ་རྣམས་སྤྲིན་ལྟ་བུར་ནམ་མཁའི་དཀྱིལ་དུ་འཁྲིགས་པའི་གཟུགས་ཅན་ཏེ། སྐྱེས་བུ་སྟག་ལ་སོགས་པ་རྣམས་ཀྱི་ཞེས་པ་ལྟར་དཔེར་བྱས་པའི་ཚིག་བསྡུ་བའོ། །བདུག་པ་རྣམས་ཀྱི་ཚོགས་ཏེ་སྤྲིན་བཞིན་དུ་གྱེན་དུ་འགྲོ་བ་རྣམས་ཀྱིས་ཞེས་པའི་དོན་ཏོ། །དེ་ལ་ཞེས་པ་ནི་ཐུབ་པའི་དབང་པོ་ལའོ། །བདུག་པ་རང་གི་ཞེས་པ་ནི་བདུག་པ་རྣམས་ཀྱིས་ལྷག་པར་བསྒོ་བར་བགྱིའོ། །བཤོས་གཙང་གི་མཆོད་པ། ཞལ་ཟལ་ཞེས་བྱ་བ་ལ་སོགས་པ་གསུངས་ཏེ། ཞལ་ཟས་ནི་གང་ཞིག་ཞལ་བཀང་ནས་གསོལ་བའོ། །བཟའ་བ་ནི་གང་ཁམ་དུ་བཅད་ནས་ཏེ་སྣུམ་ཁུར་ལ་སོགས་པའོ། །བཏུང་བ་ནི་གང་བཏུང་བར་བྱ་བ་དེ་ཉིད་དེ། སྒོམ་ལ་སོགས་པའོ། །སྣ་ཚོགས་པ་ནི་རྣམ་པ་དུ་མ་ལེགས་པར་སྦྱར་བ་དེ་རྣམས་ཀྱིས་སོ། །དེ་ལ་ཞེས་པ་ནི་ཐུབ་དབང་རྣམས་ལའོ། །དབུལ་བར་བགྱི་བ་ནི་སྦྱིན་པར་བགྱི་བའོ། །མར་མེའི་མཆོད་པ། གསེར་གྱི་པདྨ་ཞེས་པ་ལ་སོགས་པ་གསུངས་ཏེ། རིན་པོ་ཆེ་ལས་གྲུབ་པའི་སྒྲོན་མ་
དེ་རྣམས་ཚར་དུ་དང་ར་བ་གང་ཡིན་པ་དེ་དག་ལ་དེ་སྐད་ཅེས་བྱའོ། །གང་དུ་ཞེ་ན། གསེར་གྱི་པདྨ་རྣམས་སུའོ། །སྤོས་ཀྱིས་བྱུགས་པ་དེར་ཞེས་པ་ནི་ཙནྡན་དང་གུར་ཀུམ་ལ་སོགས་པ་རྣམས་ཀྱིས་བྱུགས་པའོ། །མུ་ཏིག་རིན་ཆེན་རྒྱན་ཕྲེང་ཞེས་པ་ནི་གང་མཛེས་པའི་ཕོ་བྲང་ཡིན་ལ། དཔག་ཡས་ཞེས་པ་ནི་ཕོ་བྲང་གི་ཚོགས་ཏེ། འཇིག་རྟེན་གསལ་བར་བྱེད་ཅིང་མཛེས་པར་བྱེད་པ་རྣམས་སོ། །གསེར་གྱི་རང་བཞིན་གྱི་ཡུ་བ་ཅན་དབྱིབས་སྡུག་པ་མུ་ཏིག་གིས་མཛེས་པར་བྱས་པ་རིན་པོ་ཆེའི་རང་བཞིན་གྱི་གདུགས་ཡིན་ལ་བསྒྲེང་བ་ནི་ཡུ་བ་གྱེན་དུ་བསྒྲེང་བའོ། །ད་ནི་མཆོད་པའི་ཡོ་བྱད་ཉེ་བར་བསྡུ་བ་བསྟན་པའི་ཕྱིར། དེ་ལས་ཞེས་བྱ་བ་ལ་སོགས་པ་གསུངས་པ། འདི་ལ་སོགས་པ་བདག་གིས་ཕུལ་བ་མཆོད་པའི་སྤྲིན་དང༌། གཞན་ཏེ་ལྷ་ལ་སོགས་པས་ཕུལ་བ་བསྐལ་པའམ་བསྐལ་པ་ལས་ལྷག་པ་མཆོག་ཏུ་འཇུག་པས་རབ་ཏུ་གནས་པར་གྱུར་ཅིག་པའོ། །རོལ་མོའི་སྤྲིན་རྣམས་ཀྱང་ཞེས་པ་ནི་རྫ་རྔ་ལ་སོགས་པ་བརྡུང་བར་བྱ་བ་རྣམས་ཡིན་ལ། བསྡུས་དབྱངས་ནི་ཚོགས་པའི་གླུ་ཞེས་བྱ་བའི་དོན་ཏོ། །ཡང་ན་བསྡུས་དབྱངས་ནི་གར་དང་གླུ་དང་རོལ་མོ་རྣམས་ཚོགས་པ་ལ་བརྗོད་དེ། །དེ་རྣམས་ཀྱི་སྤྲིན་ནི་དུ་མ་ཚོགས་པ་ཡིན་ལ། དེ་ཡང་སེམས་ཅན་ཐམས་ཅད་ཚིམ་པ་སྟེ། སེམས་ཅན་ཐམས་ཅད་དགའ་བར་བྱེད་པ་ཡིན་ལ། མཉན་པར་མི་ནུས་པ་རབ་ཏུ་གནས་པར་གྱུར་ཅིག་ཅེས་འབྲེལ་བ་ནི་མ་ཡིན་ནོ། །དམ་པའི་ཆོས་ལ་སོགས་པ་རྣམས་ལ་སྤྱི་མདོར་བསྡུས་ནས་མཆོད་པ་དམ་ཆོས་ཞེས་བྱ་བ་ལ་སོགས་པ་གསུངས་ཏེ། གསུང་རབ་ཡན་ལག་བཅུ་གཉིས་ཀྱི་བདག་ཉིད་དམ་པའི་ཆོས་རིན་ཆེན་ཐམས་ཅད་ལ་ཡིན་ལ། རིན་ཆེན་བཞིན་དུ་རིན་ཆེན་ཡིན་ཏེ། དངོས་པོའི་དེ་ཁོ་ན་ཉིད་གསལ་བར་བྱེད་པའི་ཕྱིར་དང༌། མཆོག་ཏུ་ཞི་བར་བྱེད་པའི་རྒྱུ་ཡིན་པའི་ཕྱིར་རོ། །མཆོད་རྟེན་ནི་དེ་བཞིན་གཤེགས་པའི་མཆོད་རྟེན་ཡིན་ལ། སྐུ་གཟུགས་ནི་སངས་རྒྱས་དང་བྱང་ཆུབ་སེམས་དཔའི་སྐུའི་གཟུགས་བརྙན་རྣམས་སོ། །རིན་ཆེན་མེ་ཏོག་ལ་སོགས་ཆར། །ཞེས་པ་ནི་མེ་ཏོག་གི་ཆར་དང༌། རིན་པོ་ཆེའི་ཆར་རོ། །སོགས་
པའི་སྒྲས་ཀྱང་ཙནྡན་གྱི་ཕྱེ་མ་དང༌། གོས་ལ་སོགས་པ་བཟུང་ལ། །འཁོར་བ་ཇི་སྲིད་པར་རྒྱུན་མི་འཆད་པའོ། །བླ་ན་མེད་པའི་མཆོད་པ་བསྟན་པའི་ཕྱིར། འཇམ་དབྱངས་ཞེས་པ་ལ་སོགས་པ་གསུངས་ཏེ། འཇམ་པའི་དབྱངས་དང༌། ཀུན་དུ་བཟང་པོ་དང༌། མི་ཕམ་པ་དང༌། འཇིག་རྟེན་མགོན་པོ་ལ་སོགས་པས་བཅུའི་དབང་ཕྱུག་གི་བྱང་ཆུབ་སེམས་དཔའ་རྣམས་སོ། །ཇི་ལྟར་ཞེས་པ་ནི་གང་གི་ལྷག་པའི་བསམ་པས་དེ་བཞིན་གཤེགས་པ་རྣམས་མཆོད་པ་དེ་བཞིན་དུ་དེའི་མོས་པས་བདག་གིས་ཀྱང་དེ་བཞིན་གཤེགས་པ་རྣམས་དང་སྲས་བྱང་ཆུབ་སེམས་དཔའི་ཚོགས་དང་བཅས་པ་རྣམས་ལ་མཆོད་དོ། །བསྟོད་པའི་མཆོད་པ། བདག་གི་དབྱངས་ཀྱི་ཡན་ལག་ཅེས་པ་ལ་སོགས་པ་གསུངས་ཏེ། དབྱངས་ནི་ས་འཛིན་བདུན་ལ་སོགས་པ་ཡིན་ལ། དེ་རྣམས་ཀྱི་ཡན་ལག་ནི་རབ་ཏུ་དབྱེ་བ་ཡིན་ཏེ། ཀ་མོད་ལ་སོགས་པའོ། །དེ་རྣམས་རྒྱ་མཚོ་བཞིན་དུ་ཤིན་ཏུ་མང་བས་ནི་རྒྱ་མཚོའོ། །དེ་རྣམས་ཀྱིས་བསྟོད་པ་ནི་བསྟོད་དབྱངས་དུ་མས་བསྟོད་པ་རྣམས་ཏེ། གླུ་དབྱངས་རྣམས་བསྡུས་པའོ། །དེ་རྣམས་ཀྱི་སྤྲིན་འབྱུང་གྱུར་ཅིག་སྟེ། ཉེ་བར་གནས་པར་གྱུར་ཅིག་པའོ། །དེ་རྣམས་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་རྣམས་ཡིན་ལ། གཞན་ནི་མ་ཡིན་ཏེ། ཇི་ལྟར་བདག་གིས་ཉེ་བར་བརྟགས་པ་དེ་ལྟ་ཉིད་ཡིན་ནོ་ཞེས་པའི་ཐ་ཚིག་གོ །སངས་རྒྱས་དང་ཆོས་དང་དགེ་འདུན་དཀོན་མཆོག་གསུམ་ལ་ཕྱག་འཚལ་བའི་མཆོད་པ། དུས་གསུམ་ཞེས་པ་ལ་སོགས་པ་གསུངས་པ་ལ། ཕྱོགས་བཅུའི་སངས་རྒྱས་ཀྱི་ཞིང་ཇི་སྙེད་པ་དེ་དག་གི་རྡུལ་ཕྲ་མོ་ཇི་སྙེད་པའི་གྲངས་དེ་སྙེད་ཀྱིས་ཏེ། དུས་གསུམ་གཤེགས་པ་ཀུན་ཞེས་པ་ནི་འདས་པ་དང་མ་འོངས་པ་དང་ད་ལྟར་བྱུང་བའི་དེ་བཞིན་གཤེགས་པའོ། །ཇི་ལྟ་བུར་གྱུར་པ་ཞིག་ལ་ཞེ་ན། ཆོས་དང་ཚོགས་ཀྱི་མཆོག་བཅས་ལ་སྟེ། ཚོགས་རྣམས་ཀྱི་མཆོག་ནི་རྩེ་མོར་གྱུར་པ་སྟེ། །བྱང་ཆུབ་སེམས་དཔའི་ཚོགས་སོ། །ཆོས་ཀྱང་ཡིན་ལ་ཚོགས་མཆོག་ཀྱང་ཡིན་ཏེ། དེ་དག་དང་ལྷན་ཅིག་པའོ། །དེ་བཞིན་གཤེགས་པའི་མཆོད་རྟེན་རྣམས་
ལ་ཕྱག་འཚལ་བ། མཆོད་རྟེན་རྣམས་དང་ཞེས་བྱ་བ་ལ་སོགས་པ་གསུངས་པ་ལ། སྟེང་དང་བར་དང་འོག་དག་དང༌། ཕྱོགས་དང་ཕྱོགས་མཚམས་རྣམས་སུ་ཡང༌། །སྐུར་བཅས་སྐུ་ནི་མེད་པ་ཡི། །མཆོད་རྟེན་རྣམས་ལ་བདག་ཕྱག་འཚལ། །ཞེས་བྱ་བའི་དོན་ཏོ། །བྱང་ཆུབ་སེམས་ཀྱི་གཞི་རྣམས་དང༌། །ཞེས་བྱ་བ་ནི་སྐྱེས་པའི་རབས་དང༌། རྟོགས་པ་བརྗོད་པ་དང༌། བལྟམས་པ་ལ་སོགས་པའི་གནས་རྣམས་སོ། །ཕྱག་འོས་ཞེས་པ་ནི་སངས་རྒྱས་རྣམས་ཏེ་མཆོད་པར་འོས་པའོ། །དེ་ལྟར་འདིས་ནི་མཆོད་པ་དང་ཕྱག་འཚལ་བའི་ཆོ་ག་བརྗོད་དོ། །མཆོད་པའི་ཆོ་ག་འདི་ཡང་དམ་ཚིག་གསུམ་གྱི་རྒྱལ་པོ་ལས་བསྟན་པ་ཡིན་ཏེ། ཐང་ལས་སྐྱེས་པའི་རིན་པོ་ཆེའི་རི་བོ་དང༌། ཆུ་ལས་སྐྱེས་པའི་རིན་པོ་ཆེའི་རི་བོ་དང༌། ཆུ་དང་ཐང་ལས་སྐྱེས་པའི་ཕྱོགས་བཅུ་ན་གནས་པའི་བདག་གིར་ཡོངས་སུ་བཟུང་བ་མེད་པ་རྣམས་དབུལ་བར་བྱའོ་ཞེས་ཇི་སྐད་བརྗོད་པ་ལྟ་བུའོ། །ཕྱོགས་འདིས་སྨན་ཐམས་ཅད་དང༌། བཅུད་ཀྱིས་ལེན་ཐམས་ཅད་དང༌། ཆུའི་དཀྱིལ་འཁོར་ཁ་ན་མ་ཐོ་བ་མེད་པ་རྣམས་དང༌། འཇིག་རྟེན་གྱི་ཁམས་མཐའ་ཡས་པ་རྣམས་ན་རོ་དང་རེག་བྱ་ཕུན་སུམ་ཚོགས་པའི་ས་ཞག་དང། བདུད་རྩིའི་ཤིང་དང༌། མ་རྨོས་པའི་འབྲས་དཀར་དང༌། བྱང་གི་སྒྲ་མི་སྙན་རྣམས་དང༌། འཇིག་རྟེན་གྱི་ཁམས་རྣམ་པར་དག་པ་རྣམས་ནི་ཤིན་ཏུ་ཡིད་དུ་འོང་བའི་ལོངས་སྤྱོད་རྣམས་ཀྱང་ངོ༌། །དཀོན་མཆོག་སྤྲིན་ལས་ཀྱང༌། མདོ་སྡེ་རྣམས་སུ་བརྗོད་པའི་རྒྱ་ཆེ་བའི་མཆོད་པའི་ལས་གང་འདི་རྣམས་ལྷག་པའི་བསམ་པ་ཤིན་ཏུ་དྲག་པོས་དེ་རྣམས་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཡོངས་སུ་སྔོ་བར་བྱེད་པ་དང༌། དེ་བཞིན་དུ་དེས་སྣ་ཚོགས་པའི་མཆོད་པའི་ལས་རྣམས་ཡོངས་སུ་སེམས་པར་བྱེད་དེ་ཞེས་གསུངས་སོ། །ད་ནི་དཀོན་མཆོག་གསུམ་ལ་སྐྱབས་སུ་འགྲོ་བ་སྔོན་དུ་སོང་བའི་སྡིག་པ་བཤགས་པ། །བྱང་ཆུབ་ཅེས་བྱ་བ་ལ་སོགས་པ་གསུངས་པ་ལ། སྐྱབས་ཀྱི་དོན་ནི་སྐྱོབ་པའི་དོན་ཡིན་ལ། མཆི་བ་ནི་དེའི་བཀའ་ཡོངས་སུ་སྐྱོང་བ་ཡིན་ཏེ། གང་ཞིག་གང་ལ་སྐྱབས་སུ་འགྲོ་བ་དེ་ནི་
དེའི་བཀའ་ལས་འདས་པ་མ་ཡིན་ནོ་ཞེས་པའི་དོན་ཏོ། །བྱང་ཆུབ་སྙིང་པོར་ཞེས་པ་ལ། །སྙིང་པོའི་སྒྲ་འདི་ནི་སྙིང་པོའི་ཚིག་སྟེ། མར་གྱི་སྙིང་པོ་དང་འོ་མའི་སྙིང་པོ་ཞེས་པ་བཞིན་ནོ། །དེ་ལྟར་ན་ཇི་སྲིད་དུ་བྱང་ཆུབ་ཀྱི་སྙིང་པོ་ཡང་དག་པར་རྫོགས་པའི་བྱང་ཆུབ་མ་ཐོབ་ཀྱི་བར་དུ་ཞེས་པའི་དོན་ཏོ། །ཕྱོགས་རྣམས་ཀུན་ན་བཞུགས་པའི་ཞེས་པ་ལ། གསོལ་བ་ནི་ཞེས་པ་སངས་རྒྱས་དང་བྱང་ཆུབ་སེམས་དཔའ་རྣམས་མདུན་དུ་དམིགས་ནས་བསམ་པ་ཐག་པས་འདི་སྐད་ཅེས་བརྗོད་པར་བྱའོ་ཞེས་པ་འདི་སྟོན་པ་ནི་ཐལ་མོ་སྦྱར་ཏེ་ཞེས་པས་ནི་ལུས་ཀྱི་རྣམ་པར་རིག་བྱེད་བརྗོད་དོ། །ལག་པ་གཉིས་ཁ་སྦྱར་བར་བྱས་པ་ནི་ཐལ་མོ་སྦྱར་ཞེས་པའི་དོན་ཏོ། །ཐོག་མ་མེད་ལྡན་ཞེས་པ་ནི་སྔོན་གྱི་སྐྱེ་བ་བརྒྱུད་པ་ཡིན་ལ། ཚེ་རབས་འདི་ཞེས་པ་ནི་སྐྱེ་བ་འདི་ཉིད་ལ་ཡང་སྟེ། སྔ་མ་འབའ་ཞིག་ནི་མ་ཡིན་ནོ། །མ་འཚལ་ཞེས་པ་ནི་བདག་ཉིད་གཏི་མུག་ཆེན་པོ་ཉིད་དུ་བསྟན་ཏོ། །དེ་ལ་ལུས་དང་ངག་དང་ཡིད་གསུམ་པོ་རྣམས་ཀྱིས་རྣམ་པ་གསུམ་བྱས་པའང་སྟེ། བགྱིད་དུ་སྩལ་བ་ནི་ངག་དང་ཡིད་ཀྱིས་ཡིན་ལ་རྗེས་སུ་ཡི་རང་བ་ཡང་ངོ༌། །བདག་གནོད་ཕྱིར་ཞེས་པ་ནི་དེའི་ལས་ཀྱི་འབྲས་བུ་བདག་ཉིད་ལ་སྨིན་པའི་ཕྱིར་རོ། །ནོངས་པ་དེ་ནི་ཞེས་པ་ནི་ལྟུང་བ་སྟེ། བཤགས་པ་ནི་མཐོལ་བ་སྟེ་བསལ་བར་བྱེད་ཅིང་མི་འཆབ་པའོ། །འགྱོད་བགྱིས་ནས་ཞེས་པ་ནི་དམྱལ་བ་ལ་སོགས་པར་མི་དགེ་བའི་ལས་ཀྱི་རྣམ་པར་སྨིན་པ་སྡུག་བསྔལ་བ་ཐོབ་པས་སོ། །དེ་ནི་ཇི་ལྟར་གཙོ་བོར་གྱུར་བའི་སྡིག་པ་བཤགས་པ། དཀོན་མཆོག་གསུམ་ཞེས་པ་ལ་སོགས་པ་གསུངས་པ། དཀོན་མཆོག་གསུམ་ནི་བློན་མེད་པའི་ཞིང་ཡིན་ལ། ཕ་ཞེས་བྱ་བ་ལ་སོགས་པས་ནི་ཕན་འདོགས་པའི་ཞིང་ཡིན་ཏེ། དེ་ལ་གནོད་པས་ནི་སྡུག་བསྔལ་གྱི་རྣམ་པར་སྨིན་པ་རྒྱ་ཆེ་བར་གྲགས་པ་ཡིན་པའི་ཕྱིར་རོ། །ཉེས་པ་དུ་མས་སྐྱོན་ཆགས་པ་ནི་འདོད་ཆགས་ལ་སོགས་པའི་ཉོན་མོངས་པས་སྐྱོན་ཆགས་པ་སྟེ། རང་དབང་དུ་ནི་མ་ཡིན་ནོ་ཞེས་བྱ་བའི་དོན་ཏོ། །སྡིག་པའི་ལས་ལ་སྐྱོ་བར་བྱ་བ་གསུངས་པ། ཇི་ལྟར་འདི་ལས་ཏེ་རྣམ་པ་གང་གིས་སོ། །མི་དགེ་བ་འདི་ལས་སོ། །
མྱུར་བ་ནི་ཤིན་ཏུ་མྱུར་བར་རོ། །ཁྱེད་ཅིའི་ཕྱིར་རིངས་ཤེ་ན། བདག་ནི་ཞེས་བྱ་བ་ལ་སོགས་པ་གསུངས་ཏེ། ཇི་སྲིད་དུ་སྡིག་པ་བྱང་བར་མ་བྱས་པ་དེ་སྲིད་དུ་བདག་འཆི་བར་མ་གྱུར་ཅིག་ཅེས་པ་སྟེ། གཞན་དུ་ན་ངན་སོང་དུ་འགྲོ་བས་འཇིགས་པའི་ཕྱིར་རོ། །ཅི་སྟེ་སྡིག་པ་བྱང་བར་མ་བྱས་པར་ཁྱེད་ལ་འཆི་བའི་གོ་སྐབས་མེད་པ་ཡིན་ནམ་ཞེ་ན། བྱས་དང་མ་བྱས་ཞེས་པ་ལ་སོགས་པ་གསུངས་ཏེ། རེ་ཞིག་འདི་ནི་བྱས་ལ་འདི་ནི་མ་བྱས་སོ་ཞེས་ཏེ་འཆི་བས་མི་སྡོད་དོ། །ཡིད་བརྟན་པ་ནི་ཡིད་ཆེས་པར་བྱས་ནས་ཏེ་དེས་འཇོམས་པའོ། །བདག་ནད་མེད་པ་དང༌། ལང་ཚོ་དང༌། སྟོབས་དང་ལྡན་པའི་ལུས་ཡིན་ནོ་ཞེས་བརྟན་པར་མི་བྱའོ། །ཅིའི་ཕྱིར་ཞེ་ན། གློ་བུར་ཐོག་ཆེན་ཞེས་ཏེ། མ་བསམས་པར་ཐོག་འབབ་པ་དང་འདྲའོ། །གང་ཞིག་དེ་ལྟར་སྡིག་པས་འཇིགས་ན་འོ་ན་ཅིའི་ཕྱིར་དེ་བྱེད་ཅེ་ན། མཛའ་དང་ཞེས་པ་ལ་སོགས་པ་གསུངས་ཏེ། མཛའ་བ་ནི་བདག་དང་བདག་གི་བ་ཡིན་ལ། མི་མཛའ་བ་ནི་དེ་ལ་གནོད་པ་བྱེད་པ་ཡིན་ཏེ། མཛའ་བ་ལ་ཕན་པ་དང་བདེ་བ་དང༌། མི་མཛའ་བ་ལ་ཟློག་པར་བྱེད་པའོ། །རྣམ་པ་སྣ་ཚོགས་བྱས་པ་ནི་སྲོག་གཅོད་པ་དང་མ་བྱིན་པར་ལེན་པ་ལ་སོགས་པའི་དབྱེ་བ་སྟེ་རྣམ་པ་དུ་མའོ། །འདི་དག་ཐམས་ཅད་ཡུན་མི་རིང་བར་དོར་བར་བྱ་བ་མ་ཡིན་ནམ། དེ་ཅིའི་ཕྱིར་ན་དོན་མེད་པའི་སྡིག་པ་སོགས་པར་བྱེད་ཅེ་ན། ཐམས་ཅད་ཅེས་པ་ལ་སོགས་པ་གསུངས་ཏེ། ཐམས་ཅད་ནི་མཛའ་བ་དང་མི་མཛའ་བ་ཡིན་ལ། དེ་བོར་ནས་འགྲོ་བར་བྱ་བ་ཡིན་པར་བདག་རྨོངས་པས་འདི་མ་ཤེས་ཏེ་ཡོངས་སུ་མ་བསྒོམས་སོ། །དེ་ནི་ལྷག་མ་ཞིག་གནས་ཤེ་ན། དེ་དེ་ཞེས་པ་ལ་སོགས་པ་གསུངས་ཏེ། དངོས་པོ་གང་དང་གང་ཞེས་པ་ནི་བདེ་བའི་རྒྱུ་དང་སྡུག་བསྔལ་གྱི་རྒྱུ་ཡིན་ལ་སྤྱད་པ་ནི་དེ་མྱོང་བའོ། །ཡང་ཅིའི་ཕྱིར་འདི་ལྟར་ཡིན་ཞེ་ན། རྨི་ལམ་བཞིན་དུ་ཞེས་པ་ལ་སོགས་པ་གསུངས་ཏེ། དཔེར་ན་རྨི་ལམ་གྱི་གནས་སྐབས་ན་ཉམས་སུ་མྱོང་བ་ཞིག་སྟེ། མི་མཐོང་ཞིང་དེར་དྲན་པ་འབའ་ཞིག་ལྷག་མ་ཡིན་ནོ། །དེ་བཞིན་དུ་གཞན་ཡང་སྟེ། མཛའ་བ་ལ་སོགས་པ་དང་འགྲོགས་པ་ཐམས་ཅད་སྐྱེ་བ་འདི་ཉིད་ལ་མི་བརྟེན་པ་
ཡིན་ནོ་ཞེས་བསྟན་པའི་ཕྱིར། རེ་ཞིག་གནས་པ་ཞེས་པ་ལ་སོགས་པ་གསུངས་ཏེ། གནས་པ་ཞེས་པ་ནི་ཡོད་པ་ཉིད་ནའོ། །འདས་པ་ནི་མི་རྟག་པ་ཉིད་ཀྱིས་བཟུང་བར་བདག་གིས་དེ་ལྟར་མཐོང་ངོ༌། །གལ་ཏེ་དེ་ལྟར་ན་དེའི་དོན་དུ་བྱས་པའི་སྡིག་པ་ཡང་དེ་དང་ལྷན་ཅིག་ཏུ་འགྲོ་བར་འགྱུར་རོ་ཞེ་ན། དེ་དག་དོན་དུ་ཞེས་པ་ལ་སོགས་པ་གསུངས་ཏེ། དེ་རྣམས་ནི་མཛའ་བ་ལ་སོགས་པ་ཡིན་ལ། དེའི་དོན་དུ་ནི་དེའི་རྒྱུ་མཚན་དུ་བྱས་པའི་སྡིག་པ་ཡིན་ཏེ། དེ་ཡང་བདག་གི་མདུན་ཉིད་ན་གནས་པ་ཡིན་ལ། དེ་ཡང་བདག་དང་ལྷན་ཅིག་ཏུ་འགྲོ་ཞེས་པའི་དོན་ཏོ། །ཅི་སྟེ་དེ་ལྟར་མཐོང་ན་ཡང་ཅི་ལྟར་བསླུས་ཤེ་ན། དེ་ལྟར་ཞེས་པ་ལ་སོགས་པ་གསུངས་ཏེ། བདག་ནི་གང་གིས་ཀྱང་ངོ་ཤེས་པ་དང་གང་ཡང་བདག་གིས་ངོ་ཤེས་པ་མ་ཡིན་ནོ་ཞེས་དེ་ལྟར་བདག་གིས་རྟོགས་པར་མ་གྱུར་ཏེ་སྤྱད་པ་མ་ཡིན་ནོ། །རྒྱུ་དེས་ན་བདག་དང་བདག་གི་བ་ལ་རྗེས་སུ་ཆགས་པ་དང༌། དེ་དང་མི་མཐུན་པར་སྤྱོད་པ་ལ་ཞེ་སྡང་བ་ཏེ་ཁོང་ཁྲོ་བའོ། །ཁྱེད་ཀྱི་ཚེ་ནི་ཤིན་ཏུ་ཡུན་རིང་བ་ཡིན་ན། འཆི་བའི་དོགས་པ་ཅི་ལྟར་ཡོད་དེ་ཅིའི་ཕྱིར་འདི་ལྟར་འཇིགས་ཤེ་ན། ཉིན་མཚན་ཞེས་པ་ལ་སོགས་པ་གསུངས་ཏེ། ཉིན་མཚན་དུ་ཚེ་འགོད་པར་འགྱུར་ཏེ། ཚེའི་འདུ་བྱེད་ཟད་པར་འགྱུར་རོ། །སྡོད་པ་མེད་པར་ཞེས་པ་ནི་སྐད་ཅིག་ཙམ་ཡང་འགོད་པ་ལ་རྒྱུན་ཆད་པ་མེད་དོ། །འོང་བ་ནི་རྗེས་སུ་འཇུག་པ་ཡིན་ལ་དེ་ཡང་བསྣོན་པ་སྟེ། བསྲིང་བའི་ཆ་ཙམ་ཡང་ཡོད་པ་མ་ཡིན་ནོ། །དེ་ལྟར་ན་བདག་ཅིའི་ཕྱིར་འཆི་བར་མི་འགྱུར་ཏེ། འོན་ཀྱང་རིང་པོར་གནས་ནས་ཀྱང་གསོན་པ་ནི་མཐར་འཆི་བར་འགྱུར་རོ། །དེ་ལྟར་ན་ཡང་གང་གི་དོན་དུ་སྡིག་པ་བྱས་པ་དེ་ཡང་དམྱལ་བ་ལ་སོགས་པར་དེའི་འབྲས་བུ་སྡུག་བསྔལ་ཉམས་སུ་མྱོང་བའི་ཚེ་དེང་ཡང་དེ་དང་ལྷན་ཅིག་ཏུ་སྐལ་བ་ལེན་པར་འགྱུར་ཏེ། དེ་ཅིའི་ཕྱིར་ན་འཇིགས་པར་བྱེད་ཅེ་ན། རེ་ཞིག་འཇིག་རྟེན་ཕྱི་མ་ལྟ་ཞོག་སྟེ། འདི་ན་ཞེས་པ་ནི་སྲིད་པ་འདི་ཉིད་ནའོ། །འཆི་བ་དང་ཉེ་བའི་སྡུག་བསྔལ་གྱིས་ནོན་པ་གཉེན་འདབ་དང་འཁོར་གྱི་ནང་ན་གནས་ནས་ཡང་ངོ༌། །གནད་ཆད་པའི་
ཚོར་བ་དག་ཅེས་པ་ནི་སྐོམ་པ་དང་ལུས་ཚ་བ་ལ་སོགས་པའི་སྡུག་བསྔལ་བདག་ཉིད་གཅིག་པུས་མྱོང་བར་འགྱུར་གྱི། དེའི་ཆ་ཤིན་ཏུ་ཆུང་ངུ་ཡང་གཞན་ལ་འབྱུང་བ་མ་ཡིན་ནོ། །དམྱལ་བ་ལ་སོགས་པར་ཅི་སྨོས་ཞེས་སྟོན་པ་ནི། གཤིན་རྗེའི་ཕོ་ཉ་ཞེས་པ་ལ་སོགས་པ་གསུངས་ཏེ། དུས་ཀྱི་ཕོ་ཉས་ཟིན་པ་ནི་དེས་བྱིན་གྱིས་བརླབས་པ་ཡིན་ཏེ། སྐེ་ལ་ཞགས་པས་བཅིངས་ནས་ཐོ་བས་བརྡུང་བཞིན་དུ་འབྲོག་དགོན་པའི་ཚེར་མ་སྟུག་པོ་ཅན་དང་ཕ་འོང་ཐག་ཐུག་ཅན་རྣམས་ཀྱིས་རྐང་པ་གཅོད་ཅིང་གྲོགས་མེད་པའི་ལས་ཉམས་སུ་མྱོང་བའི་སར་ཁྲིད་པ་ན། གཉེན་གྱིས་ཅི་ཕན་བཤེས་ཅི་ཕན། །ཞེས་པ་སྟེ། དེར་གྲོགས་འགའ་ཡང་སྐྱབས་སུ་འགྱུར་བ་མ་ཡིན་ལ། དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟན་ཏོ། །སྐྱབས་སུ་གྱུར་པའི་བསོད་ནམས་དེ་ཡང་བདག་གིས་མ་བསགས་སོ། །ཡང་སྡིག་པ་ལས་བསྐྱབ་པར་བྱ་བ་མགོན་པོ་ཞེས་པ་ལ་སོགས་པ་གསུངས་པ་ལ། མི་རྟག་པ་ནི་ཚེ་མི་གནས་པའོ། །ཆགས་པས་ནི་འཛིན་པས་སྟེ། འདི་འདྲ་ཞེས་པ་ནི་དམྱལ་བ་ལ་སོགས་པའི་སྡུག་བསྔལ་འབྱུང་བར་འགྱུར་བ་མ་ཤེས་ཏེ་མ་མཐོང་ནས་སོ། །བག་མེད་ཅེས་པས་ནི་ལང་ཚོ་དང་གཟུགས་དང་ནོར་དང༌། དབང་ཆེ་བ་ལ་སོགས་པས་རྒྱགས་པར་གྱུར་པས་སོ། །ཡང་ཅིའི་ཕྱིར་ཁྱེད་ལ་དེ་ལྟ་བུའི་སྐྱོ་བ་མང་དུ་འབྱུང་ཞེ་ན། སྐྱེ་བོ་ཡན་ལག་གཅོད་ཅེས་པ་ལ་སོགས་པ་གསུངས་ཏེ། དམྱལ་བའི་སྡུག་བསྔལ་བས་རྐང་པ་དང་ལག་པ་བཅད་པ་ལས་བྱུང་བའི་སྡུག་བསྔལ་འདི་ཤིན་ཏུ་ཆུང་བ་ཡིན་ཏེ། དེ་ལྟ་ན་ཡང་དེ་ལ་གནས་སྐབས་འདི་ལྟ་བུར་འགྱུར་ཏེ། སྐམས་པ་ནི་བདག་ཉིད་ཐམས་ཅད་ཉེ་བར་སྐམས་པར་གྱུར་པ་དང༌། སྐོམ་པ་སྟེ་སྐོམ་གྱིས་གདུངས་པ་དང༌། མིག་རྩ་ངན་པ་ནི་ཕོངས་པའི་ལྟ་སྟངས་སོ། །གཞན་དུ་ནི་བཟློག་པར་རོ། །དམྱལ་བའི་སྡུག་བསྔལ་ཤིན་ཏུ་ཆེ་བ་ནི་གཤིན་རྗེའི་ཕོ་ཉ་ཞེས་པ་ལ་སོགས་པ་གསུངས་ཏེ། འཇིགས་འཇིགས་ལྟའི་ཞེས་པ་ནི་འཇུག་པ་བྱེད་པས་སོ། །བྱིན་གྱིས་བརླབས་པ་ནི་བདག་གིར་བྱས་པའོ། །འཇིགས་ཆེན་ནད་ཀྱིས་
ཐེབས་གྱུར་པ་ནི་ཟིན་པར་གྱུར་པའོ། །མི་གཙང་བྱུང་བ་ནི་དེ་ལས་བྱུང་ཞིང་ལུག་པའོ། །གོས་པ་ནི་ཟགས་པའོ། །བྲེད་ཤ་ཐོན་པ་ནི་ཞན་པ་སྟེ། ཕྱོགས་བཞིར་སྐྱབས་དག་གསོལ་ཅིང་ཚོལ་བར་བྱེད་དོ། །ཇི་ལྟར་བྱེད་ཅེ་ན། སུ་ཞིག་ཅེས་པ་ལ་སོགས་པ་གསུངས་པ་ལ། ལེགས་པར་ནི་རྒྱུ་མཚན་མེད་པར་བྱས་པའོ། །སྐྱོབ་པ་ནི་ཡོངས་སུ་སྐྱོབ་པར་བྱེད་པའོ། །དེ་ལྟ་ན་ཡང་གང་གི་ཚེ་གང་དུ་ཡང་སྐྱབས་མ་མཐོང་ནས་དེའི་ཚེ་སླར་ཡང་སྐྱབས་མེད་པས་ཀུན་ཏུ་ཡི་མུག་འགྱུར་རོ། །དེའི་ཚེ་དེའི་དུས་ན་ཇི་ལྟར་བྱ་སྟེ་བྱ་བ་ཐམས་ཅད་ལ་ནུས་པ་མེད་པ་ན། གནས་དེར་ཞེས་པ་ནི་རབ་ཏུ་ཚ་བ་ལ་སོགས་པ་དམྱལ་བའི་སར་རོ། །དེ་ལྟ་བས་ན་ད་ལྟར་ཉིད་དུ་ཕྱིར་བཅོས་པ་ཉམས་སུ་བླང་བར་རིགས་སོ་ཞེས་པ་ནི། དེ་བས་རྒྱལ་བ་ཞེས་བྱ་བ་ལ་སོགས་པ་གསུངས་ཏེ། འགྲོ་བའི་མགོན་ནི་དབུགས་འབྱིན་པ་དང་ཡིད་བརྟན་པའི་གནས་སུ་གྱུར་པའི་འདྲེན་པའོ། །སྟོབས་ཆེན་ནི་ཐམས་ཅད་དུ་ནུས་པ་ཐོགས་པ་མེད་པ་སྟེ། འགྲོ་བ་སྐྱོབ་པའི་དོན་བརྩོན་པ་ཞེས་པ་ནི། སེམས་ཅན་ཐམས་ཅད་ཡོངས་སུ་སྐྱོབ་པའི་དོན་དུ་བརྩོན་པའོ། །གལ་ཏེ་དེ་ལྟ་མོད་ཀྱི། དེ་ལ་བརྟེན་ན་ཡང་འཇིགས་པ་ཉེ་བར་ཞི་བར་མི་འགྱུར་ན་དེའི་ཚེ་སྐྱབས་སུ་འགྲོ་བས་ཅི་ཞིག་བྱ་ཞེ་ན། འཇིགས་པ་ཀུན་སེལ་ཞེས་གསུངས་ཏེ། སྡུག་བསྔལ་བ་ཐམས་ཅད་སེལ་བར་བྱེད་པའོ། །ཆོས་དང་དགེ་འདུན་དཀོན་མཆོག་ལ་སྐྱབས་སུ་འགྲོ་བ་ནི། དེ་ཡིས་ཞེས་པ་ལ་སོགས་པ་གསུངས་ཏེ། དེ་ཡིས་ཞེས་པ་ནི་སངས་རྒྱས་བཅོམ་ལྡན་འདས་རྣམས་སོ། །ཐུགས་སུ་ཆུད་པ་ནི་མངོན་དུ་བྱས་པ་སྟེ། མྱ་ངན་ལས་འདས་པའི་ཆོས་ཞེས་པའི་དོན་ཏོ། །འཁོར་བའི་འཇིགས་པ་སེལ་བ་ནི་ཉོན་མོངས་པ་ཐམས་ཅད་ཀྱི་གཉེན་པོར་གྱུར་པའི་ཕྱིར་རོ། །ཡང་དག་ཅེས་པ་ནི་མཆོག་ཏུ་དད་པས་ཏེ། སྒྱུ་དང་གཡོས་སམ་ཐེ་ཚོམ་གྱི་བསམ་པས་མ་ཡིན་པའོ། །བྱང་ཆུབ་སེམས་དཔའི་ཚོགས་ཞེས་པ་ནི་དགེ་འདུན་ལ་ཡང་དེ་བཞིན་ཡང་དག་པར་རོ། །ད་ནི་ཇི་ལྟ་བ་བཞིན་དུ་གཙོ་བོར་གྱུར་པའི་བྱང་ཆུབ་སེམས་
དཔའ་རྣམས་ལ་ལུས་འབུལ་བ་ནི་བདག་ནི་འཇིགས་པས་ཞེས་པ་ལ་སོགས་པ་གསུངས་ཏེ། འཇིགས་པས་རྣམ་སྐྲག་ནས་ནི་དམྱལ་བ་ལ་སོགས་པའི་འཇིགས་པས་རྣམ་པར་འཁྲུགས་ནས་སོ། །ཀུན་ཏུ་བཟང་པོ་ནི་བྱང་ཆུབ་སེམས་དཔའ་སྟེ། བདག་ཉིད་འབུལ་བ་ནི་ངེས་པར་དབུལ་བར་བགྱི་བའོ། །འཇམ་པའི་དབྱངས་ལའང་སྟེ་འཇམ་པའི་མགོན་པོ་ལའོ། །བདག་ཉིད་ཀྱིས་ཞེས་པ་ནི་གཞན་གྱིས་བསྐུལ་བས་མ་ཡིན་ཏེ་རང་ཉིད་ཀྱི་སེམས་དང་བས་ཞེས་པའི་དོན་ཏོ། །དེ་ལ་ཡང་ཞེས་པ་ནི་རབ་ཏུ་གྲགས་པ་ཡིན་ལ། སྤྱན་རས་གཟིགས་མགོན་ནི་འཕགས་པ་སྤྱན་རས་གཟིགས་དབང་ཕྱུག་གོ །ཐུགས་རྗེའི་སྤྱོད་པ་མ་འཁྲུལ་བ་ཞེས་པ་ནི་འདི་ལ་སྤྱོད་པའི་ངང་ཚུལ་ཡོད་པ་ནི་ཐུགས་རྗེའི་སྤྱོད་པ་མ་འཁྲུལ་བའོ། །འདི་ནི་དེ་ཉིད་ཀྱི་ཁྱད་པར་རོ། །འོ་དོད་འབོད་པ་ནི་ཀློང་ཆེར་འབོད་པའོ། །ཉམ་ཐག་ང་རོས་ཞེས་པ་ནི་བྱ་བའི་ཁྱད་པར་ཏེ། སྡུག་བསྔལ་ཞིང་ཞན་པས་བྲེད་པའི་ང་རོའོ། །འཇིགས་པ་ནི་ལས་ཀྱི་རྣམ་པར་སྨིན་པ་ལ་སྐྲག་པའོ། །དེས་ཞེས་པ་ནི་བཅོམ་ལྡན་འདས་སྤྱན་རས་གཟིགས་ཀྱིས་སོ། །སྡིག་ལྡན་བདག་ལ་ཞེས་པ་ནི་སྡིག་པ་བྱས་པ་བདག་ལ་སྐྱོབས་ཤིག་པའོ། །འཕགས་པ་ནམ་མཁའི་སྙིང་པོ་ཞེས་པ་ནི་བྱང་ཆུབ་སེམས་དཔའོ། །སའི་སྙིང་པོ་ཡང་བྱང་ཆུབ་སེམས་དཔའ་གཞན་ཏེ། འོ་དོད་འབོད་ཅེས་ཕྱི་མ་དང་འབྲེལ་ཏོ། །ཐུགས་རྗེ་ཆེན་པོ་ཐམས་ཅད་ལ་ཞེས་པ་ནི་གང་མཚན་སྨོས་ནས་མ་བརྗོད་པ་གང་ཡིན་པ་དེ་དག་ཀྱང་མཆོག་ཏུ་ཐུགས་རྗེ་དང་ལྡན་པ་ཡིན་ཏེ། གཞན་སྡུག་བསྔལ་བས་སྡུག་བསྔལ་བར་གྱུར་བའོ། །གང་ཞིག་མཐོང་ནས་ཞེས་པ་ནི་གང་ཞིག་མཐོང་བ་ཙམ་གྱིས་སོ། །ཕོ་ཉ་ལ་སོགས་ཞེས་པ་ལ་སོགས་པའི་སྒྲས་ནི་གནོད་སྦྱིན་དང་སྲིན་པོ་ལ་སོགས་པ་གཞན་དག་ཀྱང་སྟེ། སྡང་བ་རྣམས་འཇིགས་པར་གྱུར་ནས་འབྱེར་བྱེད་པ་སྟེ་ཐག་རིང་དུ་འབྲོས་པར་བྱེད་པའི་རྡོ་རྗེ་ཅན་ལ་ཕྱག་འཚལ་ཞེས་ཕྱག་འཚལ་བར་བྱེད་པའོ། །རྡོ་རྗེ་ཅན་ནི་གང་ལ་རྡོ་རྗེ་ཡོད་པ་སྟེ། བྱང་ཆུབ་སེམས་དཔའ་ཕྱག་ན་རྡོ་རྗེའོ། །དེ་ལྟར་སྐྱབས་སུ་འགྲོ་བ་ལ་སོགས་
པ་འདིས་ནི་སྡིག་པ་ཟད་པར་བྱ་བའི་དོན་དུ་རྟེན་གྱི་སྟོབས་བསྟན་པ་ཡིན་ནོ། །གང་འཕགས་པ་ཆོས་བཞི་བའི་མདོ་ལས། དེ་ལ་རྟེན་གྱི་སྟོབས་ནི་སངས་རྒྱས་དང་ཆོས་དང༌། དགེ་འདུན་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་མི་གཏོང་བའོ། །དེ་སྟོབས་དང་ལྡན་པ་ལ་བརྟེན་ནས་སྡིག་པས་ཟིལ་གྱིས་གནོན་པར་མི་ནུས་སོ་ཞེས་གསུངས་སོ། །ཡང་གཞན་དུ་དོགས་པ་བསལ་བའི་དོན་དུ་སྔོན་ཆད་ཅེས་པ་ལ་སོགས་པ་གསུངས་པ་ལ། ཁྱེད་ཀྱི་བཀའ་ལས་ཞེས་པ་ནི་ཁྱེད་ཀྱིས་བཀའ་སྩལ་པ་ལས་འདས་པར་བྱས་པ་སྟེ། ད་ནི་སྟེ་ད་ལྟའོ། །འཇིགས་པ་ཆེ་མཐོང་ནས་ནི་གང་གི་ཕྱིར་དེ་ལས་འདས་པས་མི་འདོད་པའི་འཇིགས་པ་སྟེ། མི་འདོད་པའི་འབྲས་བུས་སྐྲག་ནས་སྐྱབས་སུ་མཆི་ལགས་ཀྱིས་སོ། །དེ་ལྟ་བས་ན་གཞན་དུ་དོགས་པར་མི་བྱ་བས་དེའི་ཕྱིར་འཇིགས་པ་བསལ་དུ་གསོལ་ཞེས་པ་ཡིན་ཏེ། སྔོན་བྱས་པའི་སྡིག་པའི་འཇིགས་པ་བསལ་བར་མཛོད་ཅིག་པའོ། །མྱུར་བ་ནི་སྐྱེན་པར་ཏེ། བདག་ནི་ཞེས་ཁོང་ནས་འབྱུང་ངོ༌། །དེ་ལྟར་ན་ཡང་ཁྱོད་ཀྱི་ཚིག་ལ་སུ་ཞིག་ཡིད་ཆེས་པར་མི་འགྱུར་བ་མ་ཡིན་ནམ་ཞེས་དོགས་པ་ལ་འདིར་དོན་བསྟན་པར་བྱ་བའི་ཕྱིར། ཐ་མལ་ནད་ཅེས་པ་ལ་སོགས་པ་གསུངས་ཏེ། ཐ་མལ་ནི་འགྲོ་བཞིན་པར་འཇིགས་པ་སྟེ། ཡུན་རིང་དུ་མི་གནས་ཞེས་པའི་དོན་ཏོ། །ཡང་ནི་ཡང་བའོ། །འདི་དེ་ཡང་ཡིན་ལ་ནད་ཀྱང་ཡིན་པ་སྟེ། དེ་ལ་འཇིགས་པ་ཡིས་སྨན་པའི་ངག་བཞིན་བྱ་དགོས་ན་སྟེ། བདག་གི་ནད་ནི་འཕེལ་བར་མ་གྱུར་ཅིག་ཅེས་པས་སྨན་པའི་ངག་ལས་འདའ་བར་མི་བྱ་ཞེ་ན་ནད་རྒྱས་ཐེབས་པས་འདའ་བར་མི་བྱ་བ་ལྟ་ཅི་སྨོས་ཏེ། ཡང་ལྟ་སྨོས་ཅི་དགོས། བཞི་བརྒྱ་བཞི་ཡིས་ལྷག་པ་ཡིན་ཞེས་པ་ལ། བཞི་ཡིས་ལྷག་པའི་བཞི་བརྒྱ་རྣམས་ཀྱིས་ཞེས་པའི་དོན་ཏེ། །དུས་མ་ཡིན་པར་འཆི་བ་བརྒྱ་དང་དུས་སུ་འཆི་བ་གཅིག་ནི་བརྒྱ་རྩ་གཅིག་གོ །དེ་དག་སོ་སོ་ལ་ཡང་རླུང་དང་མཁྲིས་པ་དང་བད་ཀན་དང་དེ་དག་འདུས་པ་ལས་གྱུར་པ་ནི་ནད་བཞི་བརྒྱ་རྩ་བཞིར་འགྱུར་རོ། །རྒྱུ་ཐ་དད་པས་འབྲས་བུ་ཐ་
དད་པ་ཡིན་ལ། འབྲས་བུ་ཐ་དད་པས་རྒྱུ་ཐ་དད་པར་རྣམ་པར་གཞག་པ་ཡིན་ནོ། །དེ་ལྟ་ཡང་གང་ཞིག་མེད་པ་དེ་ལ་ཅིའི་ཕྱིར་འཇིགས་པར་བྱེད་ཅེ་ན། དེ་གཅིག་གིས་ཀྱང་ཞེས་བྱ་བ་ལ་སོགས་པ་གསུངས་ཏེ། ནད་ཀྱིས་འཁྲུགས་པ་དེ་དག་གཅིག་གིས་ཀྱང་ངོ༌། །གང་གི་ཕྱིར་འཛམ་གླིང་ན་གནས་པའི་མི་ཀུན་དེ་སྲོག་ཆགས་རྣམས་སོ། །རླག་བྱེད་པ་ནི་འཆི་བར་བྱེད་པའོ། །གཞན་ཡང་གང་དག་ནད་རྣམས་ཀྱི་སྨན་དེ་རྩི་སྨན་གསོ་བའི་དོན་དུ་གང་ནས་ཀྱང་མི་རྙེད་ནའོ། །འདིར་ཡུལ་ཀ་ཤིའི་རྒྱལ་པོ་པདྨའི་སྐྱེས་པའི་རབས་སུ་བསྟན་པ་འདི་ལྟར་ཐོས་ཏེ། འདས་པའི་དུས་ན་བཅོམ་ལྡན་འདས་འདི་བྱང་ཆུབ་སེམས་དཔའི་སྤྱད་པ་སྤྱོད་པ་ན་ཀ་ཤིའི་རྒྱལ་པོ་པདྨ་ཞེས་བྱ་བར་གྱུར་ཏེ། དེའི་ཚེ་འཛམ་བུའི་གླིང་པའི་མི་ཐམས་ཅད་ལ་ནད་ཆེན་པོས་བཏབ་པར་གྱུར་ནས་འཆི་བ་ན་དེ་དག་གིས་འདི་ལྟར་བགྲོས་ཏེ་བདག་ཅག་གི་རྗེ་རྒྱལ་པོ་འདི་དག་ཏུ་སྙིང་རྗེ་དང་ལྡན་པ་སླར་འཆོས་པར་མཛད་ལགས་ཀྱི་འདི་ཉིད་ལ་བདག་ཅག་གི་སྡུག་བསྔལ་ཞི་བར་བྱའོ་ཞེས་དེ་དག་གིས་དེ་ལྟར་ངེས་པར་བཟུང་ནས་འདུག་སྟེ། ཀྱེ་རྒྱལ་པོ་ཆེན་པོ་རྗེ་མཆོག་ཏུ་ཕན་པར་བཞེད་པ་ཁྱེད་བཞུགས་བཞིན་དུ་ཡང་བདག་ཅག་འདི་འདྲ་བའི་གནས་སྐབས་སུ་གྱུར་ཏོ་ཞེས་རྒྱལ་པོ་དེ་ལ་རང་གི་སྡུག་བསྔལ་བསལ་བར་བྱས་པར་གྱུར་ཏོ། །རྒྱལ་པོ་དེ་ཡང་སྙིང་རྗེས་གཞན་གྱི་དབང་དུ་གྱུར་བའི་ཡིད་ཀྱིས་དེ་དག་གི་སྡུག་བསྔལ་མ་བཟོད་ནས་མྱུར་དུ་འདི་དག་གི་ནད་ཀྱི་གདུང་བ་སོལ་ཅིག་ཅེས་སྨན་པ་རྣམས་ལ་བཀའ་བསྒོའོ། །དེ་དག་གིས་ཀྱང་དེ་བཞིན་བགྱིའོ་ཞེས་སླར་མཉན་ནས་གསོ་བའི་བསྟན་བཅོས་བལྟས་པ་དང་ཉ་རོ་ཧི་ཏའི་འཕྲལ་གྱི་ཤ་ལས་སྐྱབས་གཞན་མ་རྙེད་ནས་དེ་བཞིན་དུ་རྒྱལ་པོ་ལ་སླར་གསོལ་ཏོ་ནས་རྒྱ་ཆེར་རོ། །འདི་ཉིད་སློབ་དཔོན་ལ་ཀྵི་ནས་སྐྱེས་པའི་རབས་ཀྱི་བསྟོད་པར་ཡང་བསྟན་ཏོ། །ཟུག་རྔུ་ཐམས་ཅད་འབྱིན་པ་ཡི། །ཞེས་པ་ནི་ལུས་དང་ཡིད་ལས་བྱུང་བའི་ཟུག་རྔུ་དུ་མ་འདོན་པའིའོ། །བདག་ཉིད་སྨད་པའི་གནས་ཡིན་ཏེ། ཤིན་ཏུ་ངན་ཅིང་གཏི་མུག་བར་གྱུར་པ་ཡིན་ནོ། །དེ་ལྟར་ཤེས་ཀྱང་གལ་ཏེ་དེ་བཞིན་གཤེགས་པའི་བཀའ་ལྟར་མི་
བྱེད་པ་ནི་ཕྱིར་ཕྱོགས་ཤིང་མི་བསྟེན་པ་ཡིན་ལ། དེའི་ཚེ་བདག་ལ་གཏི་མུག་མཐར་ཐུག་པ་ཡོད་པ་ཡིན་ཏེ་བདག་སྨད་པར་བྱ་བ་ཡིན་ནོ་ཞེས་པའི་དོན་ཏོ། །ཅིའི་ཕྱིར་དེ་ལྟར་ཡིན་ཞེ་ན། གཡང་ས་ཞེས་བྱ་བ་ལ་སོགས་པ་གསུངས་ཏེ། གཡང་ས་ཐ་མལ་ཆུང་ངུ་ནི་རི་ལ་སོགས་པའི་གཡང་ས་ཆུང་ངུ་ཡིན་ཏེ། གང་དུ་རུས་པ་འཆག་པ་ཙམ་མམ་འཆི་བ་ཙམ་གྱི་སྡུག་བསྔལ་དུ་གྱུར་པ་ཡིན་ལ། དཔག་ཚད་སྟོང་དུ་ལྟུང་བ་ཞེས་ཏེ་དཔག་ཚད་སྟོང་ཕྲག་དུ་མའི་ཚད་ཀྱི་མནར་མེད་པ་ལ་སོགས་པའི་གཡང་ས་ཞེས་པའི་དོན་ཏོ། །ཡུན་རིང་ཞེས་པ་ནི་གང་དུ་བར་གྱི་བསྐལ་པ་པ་ལ་སོགས་པས་ཚེ་གཏུགས་པའོ། །དེ་ལྟར་འཆི་བ་མ་མཐོང་བ་ཉིད་ཡིན་ཏེ། ཅིའི་ཕྱིར་སྐབས་མ་ཡིན་པར་སྔར་བས་བདེ་བར་གནས་པ་འདོར་ཞེས་པའི་དོགས་པ་སྤང་བར་མི་ནུས་སོ་ཞེ་ན། དེ་རིང་ཞེས་པ་ལ་སོགས་པ་གསུངས་ཏེ། གདོན་མི་ཟ་བར་ཞེས་པ་ནི་འདི་ངེས་པའོ། །དེ་ལྟ་ནའང་འཇིགས་པར་མི་རིགས་སོ་ཞེ་ན། བདག་ལ་མི་འཇིགས་ཞེས་པ་ལ་སོགས་པ་གསུངས་པ་ལ། གང་གིས་ན་འཇིགས་པར་མི་འགྱུར་བར་གནས་པ་མ་འཇིགས་ཤིག་ཅེས་མི་འཇིགས་པ། སྐྱེས་བུ་དམ་པ་སུ་ཡིས་བདག་ལ་བྱིན། ཞེས་པའི་དོན་ཏོ། །ཡང་ན་གལ་ཏེ་ངེས་པར་ཐར་པའི་ཐབས་ཡོད་པ་དེ་ལྟར་ན་ཡང་འཇིགས་པར་མི་རིགས་ཏེ། དེ་ཡང་ཡོད་པ་མ་ཡིན་ལ། སྡུག་བསྔལ་འདི་ལས་ཇི་ལྟར་ངེས་ཐར་འགྱུར་ཏེ། འགྱུར་བ་མ་ཡིན་ནོ། །བཅོམ་ལྡན་འདས་ཀྱིས་གསོན་པ་ཐམས་ཅད་འཆི་བའི་མཐར་གཏུགས་པར་འགྱུར་རོ་ཞེས་གསུངས་སོ། །འདིས་ཀྱང་ཡིད་བདེ་བར་གནས་པར་མི་རིགས་སོ་ཞེས་བསྟན་པའི་ཕྱིར། སྔོན་ཆད་མྱོང་སྟེ་ཞེས་པ་ལ་སོགས་པ་གསུངས་པ་ལ། མངོན་ཞེན་ནས་ཞེས་པ་ནི་ཆགས་ནས་སོ། །བླ་མའི་ཞེས་པ་ནི་སངས་རྒྱས་དང་བྱང་ཆུབ་སེམས་དཔའ་དང༌། དགེ་བའི་བཤེས་གཉེན་རྣམས་ཀྱིའོ། །དེའི་ཕྱིར་འདིར་ཉིན་མཚན་དུ་འདི་ཡིད་ལ་བྱ་བར་རིགས་སོ་ཞེས་གསོན་ཚེ་འདི་དང་ཞེས་པ་ལ་སོགས་པ་གསུངས་པ་ལ། གསོན་ཚེ་ནི་སེམས་ཅན་གྱི་འཇིག་རྟེན་ཡིན་ལ། འདི་ནི་མི་ལ་
སོགས་པ་རིགས་མཐུན་པའི་མཚན་ཉིད་ཡིན་ཏེ། གཅིག་པུ་ཞེས་པ་ནི་གྲོགས་མེད་པའོ། །གཤེད་ཅེས་པ་ནི་ངེས་པ་མེད་པའི་གནས་སོ། །མི་དགེ་བ་ལས་ཞེས་པ་ནི་མི་དགེ་བའི་ལས་ལས་ཏེ། དེ་ལས་ཞེས་པ་ནི་མི་དགེ་བའི་ལས་སོ། །ད་ནི་ལས་དང་འབྲས་བུ་ངེས་པར་བྱས་པས་མངོན་པར་ཞེན་པ་ཆེན་པོའི་སྒོ་ནས་ཡང་ལྟུང་བ་བཤགས་པར་བྱའོ་ཞེས་བསྟན་པའི་ཕྱིར། བདག་ནི་ཞེས་པ་ལ་སོགས་པ་གསུངས་ཏེ། བྱིས་པ་ཞེས་པ་ནི་མི་ཤེས་པ་ཉིད་ཡིན་ལ། གཏི་མུག་པས་ཞེས་པ་ནི་གཏི་མུག་གི་མུན་པས་སོ། །གང་ཅུང་ཟད་ཅེས་པ་ནི་ལུས་དང་ངག་དང་ཡིད་རྣམས་ཀྱིས་སོ། །རང་བཞིན་ཁ་ན་མ་ཐོ་བ་ནི་སྲོག་གཅོད་པ་ལ་སོགས་པ་མི་དགེ་བ་བཅུའི་རང་བཞིན་ཡིན་ལ། བཅས་པའི་སྡིག་པ་ནི་སྡོམ་པ་བླངས་པ་རྣམས་ཉིད་ལ་བཅོམ་ལྡན་འདས་ཀྱིས་དུས་མ་ཡིན་པའི་ཟས་ལ་སོགས་པ་བཅས་པའི་རང་བཞིན་ནོ། །བཤགས་པར་བགྱི་ཞེས་པ་ནི་ངག་གི་རྣམ་པར་རིག་བྱེད་བསླང་བ་ཡིན་ལ། ཐལ་སྦྱར་ཞེས་པ་ནི་ལུས་ཀྱི་རྣམ་པར་རིག་བྱེད་དོ། །ཡང་དང་ཡང་དུ་ཕྱག་འཚལ་ནས་ཞེས་པ་ནི་ཤིན་ཏུ་ཡང་སེམས་སྐྱོ་བར་སྟོན་ཏོ། །ལྟུང་བ་ལ་ཞེས་པ་ནི་དམྱལ་བ་ལ་སོགས་པ་རྣམས་སུ་འདིས་ཤིན་ཏུ་ལྟུང་བར་བྱེད་པས་ན་ལྟུང་བའོ། །ལས་མི་དགེ་བ་ཡིན་པའི་ཕྱིར་ནོངས་པ་ཉིད་དེ་ཉེས་པ་ཉིད་དུའོ། །གཟུང་ངུ་གསོལ་ཏེ་མཁྱེན་པ་དང༌། གཟིགས་པ་དང༌། རིག་པར་མཛོད་ཅིག་པའོ། །སྒྲིབ་པ་མེད་པའི་སེམས་ཀྱིས་བདག་གིས་བསལ་བར་བྱ་སྟེ། བདག་ལ་འཆབ་པ་ཡོད་པ་མ་ཡིན་ནོ་ཞེས་པའི་དོན་ཏོ། །ཡང་འཆལ་བར་དོགས་པས་སྤང་བར་འདོད་ནས་ཕྱིན་ཆད་མི་བྱེད་པའི་དོན་དུ་སྡོམ་པ་ལེན་པར་མགོན་པོ་ཞེས་པ་ལ་སོགས་པ་གསུངས་ཏེ། གང་གི་ཚེ་འཕགས་པ་དགྱེས་ཤིང་གང་དུ་འཕགས་པ་མཉེས་པ། མཁས་པས་བསྔགས་པ་མ་ཡིན་པས་མགོན་པོ་བཟང་པོ་མ་ལགས་པ་ནི་དམན་པ་སྟེ། འཕགས་པ་མ་ཡིན་པའི་ལས་སུ་བརྗོད་དོ། །དེ་ནས་བཟུང་སྟེ་ཤེས་ཤིང་མཐོང་བཞིན་དུ་བློ་སྔོན་དུ་སོང་བས་ཡང་དེ་བདག་གིས་མི་བྱ་སྟེ། སླན་ཆད་ཀྱང་མི་བགྱིད་པར་སྡོམ་པར་འཚལ་ལ་ཞེས་པའི་དོན་ཏོ། །
དེ་ཡང་ཕུང་པོ་གསུམ་པ་གདོན་པའི་སྐབས་སུ་གསལ་བར་འཆད་པར་འགྱུར་རོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ། ཤེས་རབ་འབྱུང་གནས་བློ་གྲོས་ཀྱིས་བྱས་པ་ལས་སྡིག་པ་བཤགས་པའི་ལེའུ་སྟེ་གཉིས་པའོ།། །། བམ་པོ་བཞི་པ། ད་ནི་སྡིག་པ་བཤགས་པའི་དེ་མ་ཐག་ཏུ་བསོད་ནམས་ལ་རྗེས་སུ་ཡི་རང་བ། སེམས་ཅན་ཀུན་གྱི་ཞེས་བྱ་བ་ལ་སོགས་པ་གསུངས་པ་ལ། དམྱལ་བ་ལ་སོགས་པའི་འགྲོ་བར་སྡུག་བསྔལ་ཉམས་སུ་མྱོང་བས་ངལ་བ་རྣམས་ལེགས་པར་བྱས་པའི་རྣམ་པར་སྨིན་པ་ལ་བརྟེན་ནས་བདེ་བ་ཐོབ་པས་དུས་ཅུང་ཟད་ཅིག་ཏུ་ངལ་བསོ་བའོ། །དགའ་བས་རྗེས་སུ་ཡི་རང་ངོ༌། །ཞེས་བྱ་བ་ནི་སེམས་རབ་ཏུ་དང་བས་ཡང་དག་པར་དགའ་བར་བགྱི་བ་སྟེ། རྗེས་སུ་ཡི་རང་བ་ཡང་རྣམ་པ་གསུམ་སྟེ། ཡིད་དང་ལུས་དང་ངག་གིས་སོ། །དེ་ལ་ཡིད་ཀྱིས་ནི་སེམས་རབ་ཏུ་དང་བས་ཡང་དག་པར་དགའ་བར་བྱེད་པ་དང༌། ལུས་ཀྱིས་ནི་བ་སྤུ་ཟིང་ཞེས་བྱེད་པ་དང༌། མཆི་མ་འབྱུང་བ་དང༌། ལུས་འདར་བ་ལ་སོགས་པ་ཉམས་སུ་མྱོང་བ་དང༌། ངག་གིས་ནི་ཡང་དག་པར་དགའ་བའི་སེམས་ཀྱིས་ལེགས་པར་བྱས་སོ། །རབ་ཏུ་བྱས་སོ། །བཟང་པོ་ཞིག་བྱས་སོ་ཞེས་དེ་ལྟར་ངག་ཏུ་བརྗོད་ཅིང་རྗེས་སུ་ཡི་རང་བར་བྱེད་པའོ། །སྡུག་བསྔལ་ཅན་དག་བདེ་བར་གནས་པ་ཞེས་བྱ་བ་ནི་དེ་དག་གིས་གང་གི་དོན་དུ་ལས་དེ་བྱས་པ་དེ་ཡང་དེ་དག་གིས་ཐོབ་པར་གྱུར་ཅིག་སྙམ་དུ་དགོངས་པའོ། །འཇིག་རྟེན་པའི་ལས་ལ་རྗེས་སུ་ཡི་རང་བ་བྱས་ནས། འཇིག་རྟེན་ལས་འདས་པ་ལ་རྗེས་སུ་ཡི་རང་བ་ནི་ལུས་ཅན་ཞེས་བྱ་བ་ལ་སོགས་པ་གསུངས་པ་ལ། སྡུག་བསྔལ་ལས་ངེས་པར་ཐར་པ་ཞེས་བྱ་བ་ནི་ཉན་ཐོས་ཀྱི་བྱང་ཆུབ་བམ། རང་སངས་རྒྱས་ཀྱི་བྱང་ཆུབ་བམ་སེམས་ཀྱང་རུང་སྟེ། དེའི་དོན་དུ་བསྐྱེད་པ་དེ་ལ་དེ་སྐད་ཅེས་བྱའོ། །དེའི་ཚེ་བྱང་ཆུབ་གསུམ་ལ་གནས་པ་དེ་འང་གཟུང་ངོ༌། །ལུས་ཅན་ཞེས་པ་ནི་སྲོག་ཆགས་སོ། །བྱང་ཆུབ་སེམས་དཔའ་དང་སངས་རྒྱས་ཉིད་ཅེས་པ་ལ། བྱང་ཆུབ་སེམས་དཔའ་ཉིད་ནི་བཅོམ་ལྡན་འདས་ཀྱི་རྒྱུའི་གནས་
སྐབས་སོ། །སངས་རྒྱས་ཉིད་ནི་འབྲས་བུའི་གནས་སྐབས་ཡིན་ནོ། །སྐྱོབ་པ་རྣམས་ནི་རང་གི་ཐུགས་སུ་ཆུད་པའི་ལམ་སྟོན་པ་པོ་རྣམས་ཀྱིས་ཏེ། སྐྱོབ་པ་ཉིད་གཟིགས་ལམ་གསུང་བ་ཞེས་གང་གསུངས་པ་སྟེ། དེ་གང་ལ་ཡོད་པ་དེ་ལ་འདི་སྐད་ཅེས་བྱའོ། །ཡང་ན་སྐྱོབ་པ་ནི་རྒྱུར་གྱི་དོན་ཏོ། །འཁོར་བ་ཇི་སྲིད་པ་མི་གནས་པའི་མྱ་ངན་ལས་འདས་བར་གནས་སོ། །བྱང་ཆུབ་སེམས་དཔའ་རྣམས་ཀྱི་བསོད་ནམས་ལ་རྗེས་སུ་ཡི་རང་བ་བྱེད་པ་ནི་ཐུགས་ཞེས་བྱ་བ་ལ་སོགས་པ་གསུངས་ཏེ། ཐུགས་བསྐྱེད་པ་སྐད་ཅིག་རེ་རེ་ལ་བྱུང་བ་ཡང་མཐའ་ཡས་ཤིང་གཏིང་ཐུག་པ་མེད་པས་རྒྱ་མཚོ་དང་འདྲ་བས་ན་རྒྱ་མཚོའོ། །དེ་ཇི་ལྟ་བུར་གྱུར་པ་ཞིག་ཡིན་ཞེ་ན། སེམས་ཅན་ཐམས་ཅད་བདེ་མཛད་པ། །ཞེས་བྱ་བ་སྟེ། སེམས་ཅན་ཐམས་ཅད་ལ་བདེ་བར་མཛད་པ་ནི་རོ་དེ་ལ་གཅིག་ཏུ་ཞུགས་པའི་རང་བཞིན་ཅན་ཞེས་བྱ་བའི་དོན་ཏོ། སེམས་ཅན་ཀུན་ལ་ཕན་མཛད་པ། །ཞེས་བྱ་བ་ནི་ཕན་པ་མཛད་པ་པོ་རྣམས་སོ། །སྟོན་པ་ཞེས་པ་ལ་སོགས་པ་ནི་བསྟན་པ་སྟེ། སངས་རྒྱས་ཉིད་ཀྱི་ཐབས་ལ་གོམས་པ་ཡིན་ཏེ། དེའི་དོན་ཡིན་པས་བཏགས་པའི་ཕྱིར་རོ། །དེ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། སྟོན་པ་ནི་བྱང་ཆུབ་སེམས་དཔའ་རྣམས་སོ། །དེ་སྐད་དུ། འདི་ནི་ཐབས་ལ་གོམས་པ་ཉིད། །དེའི་ཕྱིར་དོན་ནི་བསྟན་པར་འདོད། །ཅེས་བསྟན་ཏོ། །ཡང་ན་འདི་ལ་སྟོན་པའི་ངང་ཚུལ་ཡོད་པས་སྟོན་པ་ཞེས་བྱ་སྟེ། བྱང་ཆུབ་སེམས་དཔའ་ཡང་སྦྱིན་པ་ལ་སོགས་པ་བསྡུ་བའི་དངོས་པོ་རྣམས་ཀྱིས་སེམས་ཅན་རྣམས་བསྡུས་ནས་ཡང་དག་པའི་ལམ་ལ་འཇུག་པར་བྱེད་པ་ཡིན་ནོ། །དེ་དག་གི་རྗེས་སུ་ཡི་རང་བ་བསྟན་ནས། བསྐུལ་བ་བསྟན་པའི་ཕྱིར། ཕྱོགས་རྣམས་ཞེས་བྱ་བ་ལ་སོགས་པ་གསུངས་པ་ལ། ཆོས་ཀྱི་སྒྲོན་མ་སྦར་དུ་ཞེས་བྱ་བ་ནི་མི་ཤེས་པས་བསྒྲིབས་པའི་སེམས་ཅན་གྱི་ལམ་དང་ལམ་མ་ཡིན་པ་ཡོངས་སུ་ཤེས་པ་མེད་པ་རྣམས་ལ་ཆོས་སྟོན་པ་པོའི་བདག་ཉིད་ཀྱིས་སྣང་བ་མཛད་དུ་གསོལ་ཅིག་ཅེས་བྱ་བའོ། །དེ་དག་གིས་བསྐུལ་བ་བརྗོད་དོ། །གསོལ་བ་བཏབ་པ་བསྟན་པ་ནི། རྒྱལ་བ་མྱ་ངན་ཞེས་བྱ་བ་ལ་
སོགས་པ་སྟེ། བྱ་བ་བྱས་པས་ཡོངས་སུ་མྱ་ངན་ལས་འདའ་བར་བཞེད་པའི་ཐུགས་མངའ་བ་རྣམས་ལ་བསྐལ་པ་མཐའ་ཡས་པར་བཞུགས་པར་གསོལ་བ་འདེབས་པའོ། །ལྡོངས་པས་མི་འགྱུར་བར་ཞེས་པ་ནི་སྔ་མ་བཞིན་དུ་ལམ་མི་ཤེས་པ་དང་སེམས་པ་མེད་པར་མ་གྱུར་པའོ། །འདིས་ཀྱང་གསོལ་བ་གདབ་པར་བསྟན་ནས། ད་ནི་གསོལ་བ་གདབ་པའི་དེ་མ་ཐག་ཏུ་ཡོངས་སུ་བསྔོ་བ་ནི། དེ་ལྟར་དེ་དག་ཅེས་བྱ་བ་ལ་སོགས་པ་གསུངས་ཏེ། དེ་ལྟར་བསྟན་པའི་རིམ་པས་དེ་དག་ཀུན་མཆོད་པ་དང༌། སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་ལ་སོགས་པ་བྱས་ཏེ། བསྒྲུབས་ནས། དགེ་བ་ལེགས་པར་བྱས་པ་བདག་གིས་བསགས་པ་སྟེ། ཐོབ་པ་གང་ཡིན་པའི་དགེ་བ་དེས་ནི་སེམས་ཅན་ཐམས་ཅད་ཀྱི་སྟེ་སྲོག་ཆགས་མཐའ་དག་གིའོ། །སྡུག་བསྔལ་ཐམས་ཅད་རབ་ཞིར་ནི་ཕོངས་པ་མ་ལུས་པ་རབ་ཏུ་ཞི་བར་བྱེད་ནུས་པར་གྱུར་ཅིག་པ་སྟེ་ཤོག་ནི་གྱུར་ཅིག་པའོ། །དེ་དག་གིས་སྤྱིར་ཡོངས་སུ་བསྔོས་ནས། ཡང་བྱེ་བྲག་ཏུ་འགྲོ་བ་ནད་པ་ཞེས་བྱ་བ་ལ་སོགས་པ་གསུངས་ཏེ། དེས་ནི་ཞེས་བྱ་བ་ཅི་རིགས་པ་ཐམས་ཅད་དུ་སྦྱར་བར་བྱའོ། །ནད་པ་ཞེས་པ་ནི་ནད་ཀྱིས་གདུངས་པའོ། །སྨན་ཞེས་པ་ནི་སྨན་ནོ། །སྨན་པ་ནི་གསོ་དཔྱད་བྱེད་པའོ། །དེའི་ནད་གཡོག་ནི་ནད་པ་དེའི་རིམ་གྲོ་བྱེད་པའོ། །ནད་སོས་གྱུར་གྱི་བར་ཞེས་པ་ནི་ཇི་སྲིད་དུ་ནད་མེད་པར་གྱུར་གྱི་བར་དུའོ། །བཀྲེས་པ་ནི་ལྟོགས་པའོ། །སྐོམ་པ་ནི་ཁ་སྐོམ་པ་སྟེ། དེ་དག་གིས་གནོད་པའོ། །དེ་གཞོམ་པ་ནི་བཟློག་པའོ། །ཟས་དང་སྐོམ་གྱི་ཆར་ཕབ་སྟེ། བཟའ་བ་དང་བཏུང་བ་ཕུན་སུམ་ཚོགས་པའི་རྒྱུན་རྣམས་ཀྱིས་སོ། །མུ་གེའི་བསྐལ་པ་བར་མའི་ཚེ་ཞེས་པ་ལ། བསྐལ་པ་མཚོན་དང་ནད་དང་ནི། །མུ་གེ་དག་གིས་ཚར་ཕྱིན་བྱེད། །ཅེས་བྱ་བ་ཡིན་ཏེ། དེ་ལ་སྐྱེ་དགུ་རྣམས་ཚེ་ལོ་བཅུ་པ་ན་བར་གྱི་བསྐལ་པ་མཐའ་མ་ལ་མུ་གེས་འཇིག་པའོ། །ལོ་བདུན་དང༌། ཟླ་བ་བདུན་དང༌། ཉི་མ་བདུན་འབྱུང་བར་འགྱུར་ཏེ། བསྐལ་པ་མཚོན་དང་ནད་དང་ནི། །མུ་གེ་དག་གིས་ཚར་ཕྱིན་བྱེད། །ཞག་རྣམས་དང་ནི་
ཟླ་བ་དང༌། །ལོ་བདུན་དག་སྟེ་གོ་རིམས་བཞིན། །ཞེས་གང་བསྟན་པའོ། །དེར་ཟས་དང་སྐོམ་མེད་པས་གཅིག་ལ་གཅིག་གིས་ཤ་དང་རུས་པ་ཟ་བ་ཉིད་ཟས་ཡིན་ནོ། །གཅིག་གིས་དེ་ཡང་མི་རྙེད་ལ་ཟས་མེད་པས་འཆི་བར་འགྱུར་ཏེ། དེར་ཟས་དང་སྐོམ་དུ་གྱུར་ཅིག་པའོ། །དབུལ་བ་ཞེས་བྱ་བ་ནི་ནོར་མེད་པ་རྣམས་སོ། །མི་ཟད་ཅེས་བྱ་བ་ནོར་གང་གིས་ཕྲོགས་ཀྱང་ཟད་པ་མེད་པའོ། །ཡོ་བྱད་མཁོ་དགུ་སྣ་ཚོགས་སུ་ཞེས་པ་ནི་མལ་ཆ་དང༌། སྟན་དང༌། གནས་དང༌། ན་བཟའ་དང༌། རྒྱན་དང༌། བྱུག་བ་ལ་སོགས་པ་གང་དང་གང་སེམས་ཅན་རྣམས་འདོད་པ་དེ་དང་དེའི་ཡོ་བྱད་དེ་ཉེ་བར་མཁོ་བའི་བྱེ་བྲག་གི་རྣམ་པར་རོ། །བདག་ཉིད་ཉེ་བར་གནས་གྱུར་ཅིག་སྟེ་སོ་སོར་ཉེ་བར་གནས་པར་གྱུར་ཅིག་པའོ། །སེམས་ཅན་དབུལ་པོ་དེ་རྣམས་ཀྱི་མདུན་དུ་ནི་སྔོན་དུའོ། །ཡོངས་སུ་བསྔོ་བ་ན་འདི་ཡང་འཕགས་པ་རྡོ་རྗེ་རྒྱལ་མཚན་གྱི་མདོ་ལས་རྒྱ་ཆེར་བསྟན་ཏེ། དེ་ལས་འདི་སྐད་དུ། དེས་དགེ་བའི་རྩ་བ་དེ་དག་ཡོངས་སུ་བསྔོ་བ་ན་འདི་ལྟར་ཡོངས་སུ་བསྔོ་སྟེ། དགེ་བའི་རྩ་བ་འདིས་བདག་སྡུག་བསྔལ་གྱི་ཕུང་པོ་ཐམས་ཅད་བཟློག་པའི་ཕྱིར་སེམས་ཅན་ཐམས་ཅད་ཀྱི་གནས་སུ་གྱུར་ཅིག །ཉོན་མོངས་པ་ཐམས་ཅད་ལས་ཡོངས་སུ་དགྲོལ་བའི་ཕྱིར་སེམས་ཅན་ཐམས་ཅད་སྐྱོབ་པར་གྱུར་ཅིག །འཇིགས་པ་ཐམས་ཅད་ལས་བསྲུང་བའི་ཕྱིར་སེམས་ཅན་ཐམས་ཅད་ཀྱི་སྐྱབས་སུ་གྱུར་ཅིག །ས་ཐམས་ཅད་ཀྱི་རྗེས་སུ་འགྲོ་བའི་ཕྱིར་སེམས་ཅན་ཐམས་ཅད་ཀྱི་རྟེན་དུ་གྱུར་ཅིག་ཤིན་ཏུ་གྲུབ་པ་དང་བདེ་བ་ཐོབ་པར་བྱ་བའི་ཕྱིར་སེམས་ཅན་ཐམས་ཅད་ཀྱི་དཔུང་གཉེན་དུ་གྱུར་ཅིག །རབ་རིབ་མེད་པའི་ཡེ་ཤེས་ཀུན་ཏུ་བསྟན་པའི་ཕྱིར། སེམས་ཅན་ཐམས་ཅད་ཀྱི་སྣང་བར་གྱུར་ཅིག །མ་རིག་པའི་མུན་པ་བཟློག་པའི་ཕྱིར་སེམས་ཅན་ཐམས་ཅད་ཀྱི་སྒྲོན་མར་གྱུར་ཅིག་ཅེས་བྱ་བ་ལ་སོགས་པ་རྒྱ་ཆེར་འབྱུང་སྟེ། དེ་ལྟར་བསྟན་ནས། ཡང་འདི་སྐད་དུ། དེ་ཡང་ལྷག་པའི་བསམ་པ་ཐག་པ་ནས་ཡོངས་སུ་བསྔོའི། ཚིག་ཙམ་གྱིས་ནི་མ་ཡིན་ནོ། །དེ་ཡང་དགའ་བའི་སེམས་ཀྱིས་ཡོངས་སུ་བསྔོའོ། །མགུ་བའི་སེམས་ཀྱིས་
ཡོངས་སུ་བསྔོའོ། །རབ་ཏུ་དད་པའི་སེམས་ཀྱིས་ཡོངས་སུ་བསྔོའོ། །རབ་ཏུ་དགའ་བའི་སེམས་ཀྱིས་ཡོངས་སུ་བསྔོའོ། །མཉན་པའི་སེམས་ཀྱིས་ཡོངས་སུ་བསྔོའོ། །བྱམས་པའི་སེམས་དང༌། མངའ་བའི་སེམས་དང༌། ཕན་གདགས་པའི་སེམས་ཀྱིས་ཡོངས་སུ་བསྔོའོ་ཞེས་རྒྱ་ཆེར་གསུངས་སོ། །ད་ནི་ལུས་ལ་སོགས་པ་ཡོངས་སུ་གཏོང་བར་བྱེད་པ། ལུས་དང་ཞེས་བྱ་བ་ལ་སོགས་པ་གསུངས་ཏེ། འགྲོ་བ་ཐམས་ཅད་དུ་འཆི་འཕོ་དང༌། སྐྱེ་བ་དང༌། བྱ་བ་ཐམས་ཅད་ལ་ལྟོས་པ་མེད་པར་ཏེ། རྣམ་པ་ཐམས་ཅད་དུ་ཆགས་པ་མེད་པར་ཞེས་བྱ་བའི་དོན་ཏོ། །གཏང་བར་བྱ་ཞེས་པ་ནི་དབུལ་བར་བྱ་བ་སྟེ་སྦྱིན་པར་བྱ་ཞེས་པའི་དོན་ཏོ། །ལོངས་སྤྱོད་ཅེས་བྱ་བ་ནི་ཉེ་བར་སྤྱད་པར་བྱ་བའི་དངོས་པོ་རྣམས་ཏེ། རྟ་དང་གླང་པོ་ཆེ་དང༌། ཤིང་རྟ་དང༌། ཁང་བཟངས་ལ་སོགས་པའི་གནས་དང༌། མེ་ཏོག་གི་ཕྲེང་བ་དང༌། ཙནྡན་དང༌། གོས་དང༌། རྒྱན་དང༌། བུ་མོ་ལ་སོགས་པའོ། །དུས་གསུམ་དགེ་བ་ཐམས་ཅད་ཀྱང་ཞེས་བྱ་བ་ནི་ཁམས་གསུམ་པར་བསྡུས་པའི་བསོད་ནམས་དང༌། མི་གཡོ་བའི་རང་བཞིན་ཐམས་ཅད་དོ། །ཡང་ན་སྦྱིན་པ་དང་ཚུལ་ཁྲིམས་ལ་སོགས་པ་དང༌། བསྒོམས་པ་ལས་བྱུང་བ་སྟེ་དུས་གསུམ་དུ་གཏོགས་པ་ནི་འདས་པ་དང༌། མ་འོངས་པ་དང༌། ད་ལྟར་བྱུང་བའོ། །འོ་ན་མ་འོངས་པའི་རང་བཞིན་ཡོད་པ་མ་ཡིན་པ་འདི་ཇི་ལྟར་གཏང་དུ་རུང་ཞེ་ན། བདེན་མོད་ཀྱི་འོན་ཀྱང་དེ་ཡོད་པའི་དུས་སུ་དེ་ལ་ཞེན་པ་བཟློག་པའི་དོན་དུ་དེ་སྐད་དུ་བརྗོད་པ་དང༌། ད་ལྟ་ན་ཡང་དེ་ཡོངས་སུ་བཏང་བས་བསམ་པ་རྣམ་པར་དག་པ་འཕེལ་བར་བྱ་བའི་དོན་དུ་ཡང་ཡིན་ནོ། །དེ་ཉིད་ནི་ལྟོས་པ་མེད་པ་ཞེས་གསུངས་པ་ཡིན་ཏེ། དེའི་རྣམ་པར་སྨིན་པ་ལ་རང་གི་དོན་དུ་ལྟོས་པ་མེད་པའོ། །དེ་ལྟར་ན་སུའི་དོན་དུ་ཉམས་སུ་ལེན་པར་བྱེད་ཅེ་ན། སེམས་ཅན་ཀུན་གྱི་དོན་བསྒྲུབ་ཕྱིར། །ཞེས་གསུངས་ཏེ། སེམས་ཅན་ཀུན་ཏེ་ཁམས་གསུམ་པར་གནས་པ་རྣམས་ཀྱིས་མངོན་པར་མཐོ་བ་དང་ངེས་པར་ལེགས་པའི་མཚན་ཉིད་ཀྱི་དོན་རྫོགས་པར་བྱ་བའི་ཕྱིར་རོ། །འདས་པ་དང༌། མ་འོངས་པའི་དགེ་
བའི་རྩ་བ་བཏང་བ་ནི། འཕགས་པ་བློ་གྲོས་མི་ཟད་པའི་མདོ་ལས་བསྟན་པ། དགེ་བའི་སེམས་དང་སེམས་ལས་བྱུང་བ་རྣམས་རྗེས་སུ་དྲན་ལ་རྗེས་སུ་དྲན་ནས་ཀྱང་བྱང་ཆུབ་ཏུ་ཡོངས་སུ་བསྔོ་བ་འདི་ནི་འདས་པ་ལ་མཁས་པའོ། །གང་མ་འོངས་པའི་དགེ་བའི་རྩ་བ་ངེས་པར་སེམས་ཤིང་བྱང་ཆུབ་ལ་མངོན་དུ་ཕྱོགས་པའི་ལས་སེམས་པ་སྟེ། བདག་ལ་དགེ་བའི་སེམས་བསྐྱེད་པ་འབྱུང་བ་གང་ཡིན་པ་དེ་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བ་འདི་ནི་མ་འོངས་པ་ལ་མཁས་པའོ་ཞེས་རྒྱ་ཆེར་གསུངས་པ་དང༌། ཐམས་ཅད་གཏོང་བ་ལ་མོས་པ་ཡོངས་སུ་རྫོགས་ཏེ། གཏོང་བའི་སེམས་ཀྱི་ཤུགས་ཀྱིས་ལུས་ཀྱི་སྦྱོར་བ་དེས་ཡོངས་སུ་འཛིན་པ་ཐམས་ཅད་གཏོང་སྟེ། ཡོངས་སུ་འཛིན་པ་ཐམས་ཅད་ཀྱི་རྩ་བ་སྲིད་པའི་སྡུག་བསྔལ་ལས་གྲོལ་བ་ལ་གྲོལ་བ་ཞེས་རྒྱ་ཆེར་གསུངས་པ་གང་ཡིན་པའོ། །འོ་ན་བདག་གི་དོན་དུ་ཡང་ཅུང་ཟད་བསྲུང་བར་རིགས་པ་མ་ཡིན་ནམ་སྙམ་པའི་སེར་སྣ་ཟློག་པར་བྱེད་པ། ཐམས་ཅད་བཏང་བར་ཞེས་བྱ་བ་ལ་སོགས་པ་གསུངས་ཏེ། ཟག་པ་དང་བཅས་པའི་ལུས་ལ་སོགས་པ་ཐམས་ཅད་ཀྱི་མྱ་ངན་ལས་འདས་པ་ནི་ཐར་པ་ཡིན་ལ། བདག་གི་སེམས་པ་ནི་དེ་དོན་དུ་གཉེར་བ་ཡིན་ཏེ། གཏང་བྱ་ན་ཞེས་བྱ་བ་ནི་གལ་ཏེ་མྱ་ངན་ལས་འདས་པའི་ཚེ་ལུས་ལ་སོགས་པ་ཐམས་ཅད་བདག་གིས་ངེས་པར་བཏང་ལ་འགྲོ་བར་བྱ་བ་ཡིན་པ་དེའི་ཚེ་སེམས་ཅན་རྣམས་ལ་བཏང་བ་མཆོག་ཡིན་ན། སེར་སྣའི་རྒྱུ་འདིས་བཟུང་ལ་ཅི་ཞིག་བྱ་སྙམ་དུ་དགོངས་པའོ། །དེ་ལྟ་བས་ན་འདི་དག་ལ་འདི་འཚམ་པ་ཡིན་ནོ་ཞེས། བདག་གིས་ལུས་ཅན་ཞེས་བྱ་བ་ལ་སོགས་པ་གསུངས་ཏེ། ལུས་ཅན་ཐམས་ཅད་དེ། སེམས་ཅན་ཐམས་ཅད་ཀྱི་ཆེད་དུ་ཇི་ལྟར་འདོད་པ་དང་མཐུན་པར་བྱ་བ་ལ་བདག་གིས་རང་གི་ལུས་སྦྱར་བར་བྱའོ། །དེ་ཉིད་སྟོན་པར་བྱེད་པ་ནི། རྟག་ཏུ་ཞེས་བྱ་བ་ལ་སོགས་པ་གསུངས་པ་ཡིན་ཏེ། དབྱིག་པ་ལ་སོགས་པས་རྡེག་པར་བྱེད་པའམ། བསྔགས་པ་མ་ཡིན་པ་བརྗོད་པས་སྨད་དུ་ཆུག་ལ། ལུད་ཀྱིས་ཀྱང་གཏོར་དུ་ཆུག་སྟེ། རྡུལ་གྱིས་ཀྱང་འཐོར་ཅིག་པའོ། །བདག་
གིས་དེ་ལ་ལུས་བྱིན་གྱིས། །ཞེས་བྱ་བ་ནི་ཐམས་ཅད་ཀྱི་ཐམས་ཅད་དུ་བདག་གིས་དེ་རྣམས་ལ་ཡོངས་སུ་བཏང་བ་ཡིན་ལ། བདག་ལ་བདེ་བ་དང་སྡུག་བསྔལ་བས་ཁ་དས་ཅི་ཞིག་བྱ། ལས་རྣམས་ཀྱང་ནི་བྱེད་དུ་ཆུག །ཅེས་བྱ་བ་ནི་ཁ་ན་མཐོ་བ་མེད་པ་དག་སྟེ། དེ་ཉིད་ནི་བདག་ལ་ཞེས་པ་ལ་སོགས་པ་གསུངས་ཏེ། བདག་ལ་བརྟེན་ནས་ནམ་དུ་ཡང་སྟེ། འདི་འམ་ཕ་རོལ་དུ་སྲོག་ཆགས་འགའ་ལ་ཡང་མི་འདོད་པར་མ་གྱུར་ཅིག་ཅེས་པའོ། །གང་དག་གི་ཁྲོ་བ་འམ་གང་དག་གི་མ་དད་པའི་སེམས་ཏེ། བློ་བྱུང་བ་དེ་དག་གི་ནི་སྟེ། ཁྲོ་བ་འམ་མ་དད་པའི་བློ་ཅན་རྣམས་ཀྱིའོ། །དེ་ཉིད་ནི་རྒྱུར་གྱུར་ཅིག་ཏེ། ཁྲོ་བའམ་མ་དད་པའི་སེམས་དེ་ཉིད་དོ། །དོན་ཀུན་འགྲུབ་པའི་ཞེས་བྱ་བ་ནི་བདག་དང་གཞན་གྱི་དོན་མངོན་པར་མཐོ་བ་དང༌། ངེས་པར་ལེགས་པར་རྫོགས་པའི་ཆེད་དུའོ། །སྐུར་འདེབས་པ་ཞེས་བྱ་བ་ནི་ལོག་པར་བརྟགས་པའི་ཉེས་པས་སུན་འབྱིན་པར་འགྱུར་བ་དང༌། གཞན་དུ་ཡང་གང་དག་ལུས་སམ་ཡིད་ཀྱིས་གནོད་པ་བྱེད་པར་འགྱུར་བའོ། །ཁ་ཟེར་བ་ཞེས་བྱ་བ་ནི་བཤད་གང་དུ་བྱེད་པའམ། ཅོ་འདྲི་བར་བྱེད་པའོ། །དེ་བཞིན་གཞན་ཞེས་བྱ་བ་ནི་ཐ་མལ་པ་ཙམ་མམ། དད་པ་རྣམས་ཏེ། ཐམས་ཅད་སངས་རྒྱས་ཉིད་ཐོབ་པར་གྱུར་ཅིག་པའོ། །མགོན་མེད་རྣམས་ཀྱི་ཞེས་བྱ་བ་ནི་མགོན་དང་བཅས་པར་འདོད་པ་རྣམས་ཀྱིའོ། །ལམ་ཞུགས་རྣམས་ཀྱི་དེད་དཔོན་དང༌། །ཞེས་བྱ་བ་ནི་ལམ་དུ་ཉེ་བར་ཞུགས་པ་རྣམས་ཀྱི་དེད་དཔོན་གྱི་གཙོ་བོར་རོ། །རྒལ་འདོད་རྣམས་ཀྱི་ཞེས་བྱ་བ་ནི་འབབ་ཆུ་ལ་སོགས་པ་རྣམས་ཀྱི་ཕ་རོལ་གྱི་འགྲམ་དུ་འགྲོ་བར་འདོད་པ་རྣམས་ཀྱིའོ། །སྒྲོན་མ་ཞེས་བྱ་བ་ནི་མུན་པ་ན་གནས་པ་རྣམས་ཀྱིའོ། །གནས་མལ་འདོད་པ་ཞེས་བྱ་བ་ནི་མལ་ཆ་འདོད་པ་རྣམས་ལའོ། །བྲན་འདོད་པ་ཞེས་བྱ་བ་ནི་གང་དག་རིམ་གྲོའི་དོན་དུ་བྲན་དང་ལས་བྱེད་པ་འདོད་པའོ། །ཡིད་བཞིན་གྱི་ནོར་བུ་ཞེས་བྱ་བ་ནི་བསམས་པའི་འབྲས་བུ་སྟེར་བར་བྱེད་པའི་རིན་པོ་ཆེའི་ཁྱད་པར་རོ། །བུམ་པ་བཟང་ཞེས་བྱ་བ་ནི་དངོས་པོ་གང་དང་གང་འདོད་པའི་བསམ་པས་དེར་ལག་པ་བཅུག་ན་དེ་དང་དེ་ཐམས་ཅད་ཕུན་སུམ་ཚོགས་པར་བྱེད་པའོ། །
རིག་སྔགས་གྲུབ་ཅེས་བྱ་བ་ནི་གསང་སྔགས་གྲུབ་པ་སྟེ། གང་དང་གང་ལས་སུ་བྱ་བ་དེ་ཐམས་ཅད་འགྲུབ་པའོ། །སྨན་ཆེན་དང་ཞེས་བྱ་བ་ནི་གནོད་པ་དང་གཟིར་བ་ཐམས་ཅད་རབ་ཏུ་ཞི་བར་བྱེད་པའི་རྒྱུ་གཅིག་པུ་ཉིད་གང་ཡིན་པའོ། །དཔག་བསམ་གྱི་ནི་ཤིང་དག་དང༌། །ཞེས་བྱ་བ་ནི་དཔག་ཅིང་བསམ་པའི་དོན་གྲུབ་པར་བྱེད་པའི་ཤིང་གི་ཁྱད་པར་རོ། །འདོད་འཇོར་ཞེས་བྱ་བ་ནི་གང་འདོད་པ་བཞོར་ཡོད་པའོ། །ས་སྩོགས་ཞེས་བྱ་བ་ལ་ས་ནི་ནོར་འཛིན་ནོ། །སྩོགས་པའི་སྒྲས་ཆུ་དང་མེ་དང༌། རླུང་བཟུང་སྟེ། འབྱུང་བ་ཆེན་པོ་བཞི་པོ་དག་གོ །དེ་དག་ཀྱང་ཇི་ལྟར་མལ་ཆ་དང༌། སྟན་དང༌། འབྲུ་དང༌། སྨན་དང༌། མེ་ཏོག་དང༌། འབྲས་བུ་དང༌། རྩ་བ་ལ་སོགས་པའི་རྟེན་ཉིད་དང༌། དེ་བཞིན་དུ་བཏུང་བ་དང་ཞུགས་པ་ལ་སོགས་པའི་རྒྱུ་ཡིན་པའི་ཕྱིར་རོ། །དེ་ལྟར་གཞན་ལ་ཡང་སྦྱར་བར་བྱའོ། །ནམ་མཁའ་མཐའ་ཡས་པར་ཁྱབ་པའི་སེམས་ཅན་གངས་མེད་པ་རྣམས་ཀྱི་ཡོངས་སུ་སྤྱོད་པ་ཉེ་བར་འགྱུར་བ་དེ་བཞིན་དུ་བདག་ཀྱང་སེམས་ཅན་ཐམས་ཅད་ཀྱི་རྣམ་པ་དུ་མ་ཡིས་ཉེ་བར་སྤྱོད་པར་གྱུར་ཅིག་པའོ། །ཐམས་ཅད་མྱ་ངན་འདས་པར་དུ། །ཞེས་བྱ་བ་ནི་ཇི་སྲིད་དུ་ཐམས་ཅད་འཁོར་བའི་སྡུག་བསྔལ་ལས་རྣམ་པར་མ་གྲོལ་གྱི་བར་དུ་སྟེ། དེ་ལྟ་བས་ན་བྱང་ཆུབ་དོན་དུ་གཉེར་བ་རྣམས་ཀྱི་ལུས་ལ་སོགས་པ་འདི་དག་གཏོང་བར་བྱའོ། །སྦྱིན་པ་འདི་དག་ཀྱང་བསླབ་པ་ཀུན་ལས་བཏུས་པ་ལས་ཤིན་ཏུ་རྒྱ་ཆེ་བར་བསྟན་ཏོ། དེ་ནི་འདི་ལྟར་དེ་ཉིད་ལས་བྱང་ཆུབ་སེམས་དཔའི་སོ་སོར་ཐར་པ་ལས་གསུངས་པ། ཤཱ་རིའི་བུ་གཞན་ཡང་བྱང་ཆུབ་སེམས་དཔའ་ནི་ཆོས་ཐམས་ཅད་ལ་གཞན་གྱིར་འདུ་ཤེས་སྐྱེད་པར་བྱེད་དེ། དངོས་པོ་འགའ་ཡང་མི་ལེན་ཏོ། །དེ་ཅིའི་ཕྱིར་ན། ཉེ་བར་ལེན་པ་ནི་དོར་བྱ་ཡིན་ནོ་ཞེས་དེ་སྐད་བསྟན་ནས། ཡང་དེ་ཉིད་ལས་འདི་སྐད་ཅེས་ཤཱ་རིའི་བུ་དེ་བཞིན་དུ་བྱང་ཆུབ་སེམས་དཔའ་རྣམས་ནི་སེམས་དཔའ་བ་ཡིན་ཏེ། རང་གི་ལག་པའི་བར་དུ་ཡོངས་སུ་གཏོང་བ་ཡིན། རྐང་པ་ཡོངས་སུ་གཏོང་བ་དང༌། སྣ་ཡོངས་སུ་གཏོང་བ་དང༌། མགོ་ཡོངས་།སུ་གཏོང་བ་དང༌། ཡན་ལག་དང་ཉིད་ལག་ཡོངས་སུ་གཏོང་བ་
ནས། བདོག་པ་ཐམས་ཅད་ཡོངས་སུ་གཏོང་བ་ཡིན་ནོ་ཞེས་བསྟན་ཏོ། །དེ་བཞིན་དུ་སྲེད་མེད་ཀྱི་བུས་ཞུས་པ་ལས་ཀྱང་གསུངས་ཏེ། དངོས་པོ་གང་ལ་དེ་གཏོང་བའི་སེམས་མི་སྐྱེ་བ་དང༌། གཏོང་བའི་བློ་མི་འཇུག་པའི་དངོས་པོ་དེ་བསྲེལ་བར་མི་བྱའོ། །རིགས་ཀྱི་བུ་འོན་ཀྱང་བྱང་ཆུབ་སེམས་དཔའ་དེ་ལྟར་སེམས་བསྐྱེད་པར་བྱ་སྟེ། བདག་གི་ལུས་འདི་ཡང་སེམས་ཅན་ཐམས་ཅད་ལ་བྱིན་ཞིང་ཡོངས་སུ་བཏང་ན། ཕྱི་རོལ་གྱི་དངོས་པོ་རྣམས་ལྟ་ཅི་སྨོས་ཀྱི་ཞེས་པ་ལ་སོགས་པ་རྒྱ་ཆེར་འབྱུང་ངོ༌། །དེ་བཞིན་དུ་འཕགས་པ་བློ་གྲོས་མི་ཟད་པའི་མདོ་ལས་ཀྱང༌། ལུས་འདི་བདག་གིས་སེམས་ཅན་ཐམས་ཅད་ཀྱི་བྱ་བ་ཅི་ཡོད་པ་ལ་ངེས་པར་བྱས་ཏེ། དཔེར་ན་སའི་ཁམས་དང༌། མེའི་ཁམས་དང༌། ཆུའི་ཁམས་དང༌། རླུང་གི་ཁམས་དང༌། འབྱུང་བ་ཆེན་པོ་བཞི་པོ་འདི་དག་སྒོ་སྣ་ཚོགས་དང༌། རྣམ་གྲངས་སྣ་ཚོགས་དང༌། དམིགས་པ་སྣ་ཚོགས་དང༌། ཡོ་བྱད་སྣ་ཚོགས་དང༌། ལོངས་སྤྱོད་སྣ་ཚོགས་ཀྱིས་ཉེ་བར་ལོངས་སྤྱོད་པ་དང༌། ཡོངས་སུ་ལོངས་སྤྱོད་པར་བྱེད་པ་དེ་བཞིན་དུ་བདག་གིས་ཀྱང་འབྱུང་བ་ཆེན་པོ་བཞི་འདུས་པའི་ལུས་འདི་སྒོ་སྣ་ཚོགས་དང༌། རྣམ་གྲངས་སྣ་ཚོགས་དང༌། དམིགས་པ་སྣ་ཚོགས་དང༌། ཡོ་བྱད་སྣ་ཚོགས་དང༌། ལོངས་སྤྱོད་སྣ་ཚོགས་ཀྱིས་རྒྱ་ཆེར་སེམས་ཅན་ཐམས་ཅད་ཀྱི་ཉེ་བར་འཚོ་བར་བྱའོ་ཞེས་རྒྱ་ཆེར་བསྟན་ཏོ། །རིན་ཆེན་སེམས་དེ་ཞེས་བྱ་བ་ལ་སོགས་པ་ནས་བརྩམས་ཏེ། འདི་དག་ཐམས་ཅད་ནི་བྱང་ཆུབ་ཀྱི་སེམས་གནོད་པའི་ཕྱིར་སྔོན་དུ་སྦྱོར་བ་ཡིན་པར་རིག་པར་བྱའོ། །དེ་ལྟར་མཆོད་པ་ལ་སོགས་པ་བྱས་ལ་ལུས་ལ་སོགས་པ་སྦྱིན་པར་བཏང་སྟེ། བྱང་ཆུབ་ཀྱི་སེམས་ཀྱི་ཕན་ཡོན་རྫོགས་པས་ངལ་བ་ཕུན་སུམ་ཚོགས་པ་མཆོག་ཏུ་རྙེད་དཀའ་བར་རིག་ནས་དད་པའི་རྩ་བ་བརྟེན་པོར་ཉེ་བར་གཞག་སྟེ། སེམས་ཅན་སྐྱབས་མེད་པ་དང༌། དཔུང་གཉེན་མེད་པ་རྣམས་ལ་སྙིང་རྗེ་དང་ལྡན་ཞིང་རང་གི་བདེ་བ་ལ་ལྟོས་པ་མེད་པར་གཞན་སྡུག་བསྔལ་བས་སྡུག་བསྔལ་བ་དེ་དག་གདོན་པའི་བསམ་པ་དང་དགོངས་པ་ཅན་སངས་རྒྱས་ཉིད་ཀྱི་ཐབས་འདི་དག་
ལེགས་པར་མཐོང་ནས། དེ་ལ་གོ་བགོས་པ་འདི་ལྟར་བདག་དང་གཞན་དག་ཀྱང་འཇིགས་པ་དང་སྡུག་བསྔལ་མི་འདོད་ན་བདག་དང་བྱེ་བྲག་ཅི་ཡོད་ཀྱིས། གང་དེ་བསྲུངས་ལ་གཞན་དེ་ནི་མི་བསྲུང་སྙམ་སྟེ། དེས་བདག་དང་སེམས་ཅན་གྱི་ཁམས་རྣམས་ཀྱི། སྡུག་བསྔལ་མཐར་འབྱིན་འདོད་པ་དང༌། །བདེ་བའི་མཐར་ཡང་འགྲོ་འདོད་པས། །དད་པའི་རྩ་བ་བརྟན་བྱས་ཏེ། །བྱང་ཆུབ་ལ་ཡང་བློ་བརྟན་བྱ། །སྙམ་དུ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པར་བྱ་བའི་ཕྱིར་བརྩོན་པར་བྱེད་པ་ནི། ཇི་ལྟར་སྔོན་གྱི་ཞེས་བྱ་བ་ལ་སོགས་པ་སྟེ། བསམ་པ་གང་གིས་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་སྤང་བའི་དོན་དུ་འམ། ཡང་ན་ཇི་ལྟར་གཟུང་བ་དེ་ཉིད་བཅོམ་ལྡན་འདས་ཀྱིས་མཁྱེན་པའོ། །བྱང་ཆུབ་ཐུགས་ནི་ཞེས་པ་ལ། བྱང་ཆུབ་ནི་སངས་རྒྱས་ཉིད་ཡིན་ཏེ། བག་ཆགས་དང་བཅས་པའི་སྒྲིབ་པ་ཐམས་ཅད་སྤངས་པའི་ཕྱིར། ཆོས་ཐམས་ཅད་རང་བཞིན་མེད་པ་ཉིད་ཐུགས་སུ་ཆུད་པའོ། །འདི་ཡང་སྤྲོས་པ་དང་བཅས་པར་ཤེས་རབ་ཀྱི་ལེའུར་བཤད་པར་བྱའོ། །དེར་ཐུགས་ནི་ལྷག་པའི་བསམ་པས་ཐོབ་པར་བྱ་བའི་ཕྱིར་ཡིད་ལ་བྱེད་པ་སྟེ། སེམས་ཅན་ཐམས་ཅད་ལ་ཕན་པ་དང་བདེ་བ་བསྒྲུབ་པའི་ཕྱིར་སངས་རྒྱས་སུ་གྱུར་ཅིག་ཅེས་བྱ་བའི་དོན་ཏོ། །དེ་ལྟར་ཕྱེད་སྔ་མས་བྱང་ཆུབ་ཏུ་སེམས་བསྐྱེད་པ་བསྟན་ནས། བསླབ་པ་སྡོམ་པ་གཟུང་བ་བསྟན་པ་ནི། བྱང་ཆུབ་སེམས་དཔའ་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་དཔའ་རྣམས་ཀྱི་བསླབ་པ་ནི་བྱང་ཆུབ་སེམས་དཔའ་བྱང་ཆུབ་ཏུ་སེམས་བསྐྱེད་པ་གང་གིས་རྟག་ཏུ་བྱ་བར་འོས་པ་སྟེ། དེ་ལ་ཞེས་བྱ་བའི་དོན་ཏོ། །རིམ་བཞིན་ཞེས་བྱ་བ་ནི་གོ་རིམས་བཞིན་དུའོ། །གང་གི་ཚེ་ལས་དང་པོ་པས་དང་པོར་བྱ་བར་ནུས་པ་ནི་དེ་ཉིད་རེ་ཞིག་བྱ་བར་འོས་པ་སྟེ། དེ་བས་དཀའ་བ་ནི་བྱ་བ་མ་ཡིན་ནོ་སྙམ་དུ་དགོངས་པའོ། །གནས་སྐབས་བར་མ་ལ་ཡང་དེ་བཞིན་དུ་ཤེས་པར་བྱ་སྟེ། སྙིང་རྗེའི་བསམ་པ་མ་དག་པས། །ལུས་འདི་བཏང་བར་མི་བྱ་སྟེ། །ཞེས་གང་འཆད་
པར་འགྱུར་བ་ཡིན་ནོ། །དེ་ལྟར་གཞན་ལ་ཡང་བལྟ་བར་བྱའོ། །ད་ནི་བདག་ཉིད་ཀྱི་སྡོམ་པ་གཟུང་བ་བརྗོད་པ་ནི། དེ་བཞིན་ཞེས་བྱ་བ་ལ་སོགས་པ་ལ། དེ་དག་གི་བཞིན་དུའམ། དེ་དག་བཞིན་དུའོ། །སྡོམ་པ་གཟུང་བ་ཡང་བྱང་ཆུབ་སེམས་དཔའི་བསླབ་པའི་གནས་ལ་གོམས་པ་ལྷུར་བྱེད་པ་སྡོམ་པ་དང་ལྡན་པའི་ཐད་ནས་མནོད་དོ། །དེ་ལྟར་བྱས་དང་དེ་བསླབ་པ་ལས་འདས་ན་ནི་ཤིན་ཏུ་ཡང་ཁྲེལ་ཡོད་པར་འགྱུར་ཞིང་བླ་མ་ལ་བསླུས་པར་དོགས་པའི་འཇིགས་པ་ཡང་སྐྱེ་བས་དེ་ལ་ནི་ནན་ཏན་བྱ་མི་དགོས་པར་དགའ་བ་དང་གུས་པ་འགྲུབ་པར་འགྱུར་ཏེ། འདི་ནི་སྡོམ་པའི་ཆོས་ཀྱི་སྤྱིའོ། །དེ་བས་ན་བྱང་ཆུབ་སེམས་དཔའ་དེ་བཞིན་གཤེགས་པའི་སྤྱན་སྔ་ནས་བསླབ་པ་རྣམས་ལས་བསླབ་པ་གང་ཡང་རུང་བ་འགྲུབ་པར་འདོད་པ་རྣམས་ཡི་དམ་འཆའ་བར་བྱེད་དོ། །དེ་བས་ན་སྡོམ་པ་ནོད་པར་འདོད་པ་རྣམས་དགེ་བའི་བཤེས་གཉེན་ལ་གསོལ་བ་བཏབ་ལ། དེས་གསུངས་པ་དང་མཐུན་པར་སྨྲས་པས་ཤིན་ཏུ་མཉམ་པར་གཞག་པས་བརྗོད་པར་བྱའོ། །སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་ཞེས་བརྗོད་ནས། ཇི་ལྟར་འཕགས་པ་འཇམ་དཔལ་གྱི་སངས་རྒྱས་ཀྱི་ཞིང་གི་ཡོན་ཏན་བཀོད་པའི་མདོ་ལས། བཅོམ་ལྡན་འདས་འཕགས་པ་འཇམ་དཔལ་གྱི་སྔོན་གྱི་རྟོགས་པ་བརྗོད་པ་ལས་སྤྱོད་པ་དང་ལྡན་པས་བྱང་ཆུབ་ཏུ་སེམས་བསྐྱེད་པ་དེ་བཞིན་དུ་བསྐྱེད་པར་བྱའོ། །དེས་འདི་སྐད་ཅེས་བརྗོད་དེ། །འཁོར་བ་ཐ་མ་མེད་པ་ཡི། །སྔོན་གྱི་ཐ་མ་ཇི་སྲིད་པ། །དེ་སྲིད་སེམས་ཅན་ཕན་དོན་དུ། །སྤྱོད་པ་དཔག་ཡས་སྤྱད་པར་བགྱི། །འཇིག་རྟེན་མགོན་པོའི་སྤྱན་སྔར་ནི། །རྫོགས་པའི་བྱང་ཆུབ་སེམས་བསྐྱེད་དོ། །འགྲོ་བ་ཐམས་ཅད་མགྲོན་གཉེར་ཏེ། །དབུལ་ཞིང་ཕོངས་ལས་དགྲོལ་བར་བགྱི། །བྱང་ཆུབ་ནམ་ཞིག་ཐོབ་བར་དུ། །གནོད་སེམས་དང་ནི་ཐ་བའམ། །ཕྲག་དོག་དང་ནི་སེར་སྣའང་རུང༌། །དེ་རིང་ཕན་ཆད་མི་བགྱིད་དོ། །སྡིག་པའི་འདོད་པ་སྤངས་ནས་ནི། །ཚངས་པར་སྤྱོད་པ་སྤྱད་པར་བགྱི། །ཚུལ་ཁྲིམས་སྡོམ་དང་
དེས་པ་ལ། །སངས་རྒྱས་རྗེས་སུ་བསླབ་པར་བགྱི། །ཞེས་བྱ་བ་ལ་སོགས་པ་རྒྱ་ཆེར་འབྱུང་ངོ༌། །རྣམ་པ་དེ་ལྟ་བུའི་དགེ་བའི་བཤེས་གཉེན་མེད་ན། ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་རྣམས་མངོན་དུ་བསྒོམས་ལ་སྡོམ་པ་གཟུང་སྟེ། སྡོམ་པ་རང་གི་ནུས་པ་དང་སྦྱར་ལ་བླང་ངོ༌། །གཞན་དུ་ན་སངས་རྒྱས་དང་བྱང་ཆུབ་སེམས་དཔའ་ཐམས་ཅད་དང༌། ལྷ་དང་བཅས་པའི་འཇིག་རྟེན་རྣམས་བསླུས་པར་འགྱུར་རོ། །སྡོམ་པ་འདི་ནི་བུད་མེད་ཉོན་མོངས་པ་ཆུང་དུ་སེམས་བྱང་ཆུབ་ལ་མོས་པ་རྣམས་ལ་ཡང་སྐྱེ་བར་འགྱུར་ཏེ། བྱང་ཆུབ་སེམས་དཔའི་སོ་སོར་ཐར་བ་ལས། ཤཱ་རིའི་བུ་ཆོས་བཞི་དང་ལྡན་ན་བྱང་ཆུབ་སེམས་དཔའ་བདེན་པར་སྨྲ་བ་ཡིན་ནོ་ཞེས་བྱ་བ་ནས་བརྩམས་ཏེ། ཤཱ་རིའི་བུ་འདི་ལ་རིགས་ཀྱི་བུའམ་རིགས་ཀྱི་བུ་མོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་བརྩོན་འགྲུས་བརྩམས་ཏེ་གནས་པ་དང༌། དགེ་བའི་ཆོས་ཡོངས་སུ་ཚོལ་བའི་ཕྱིར་ཞེས་བྱ་བ་ནས་བརྩམས་ཏེ་གདམས་པ་ཐམས་ཅད་གསུངས་སོ། །བྱང་ཆུབ་ཏུ་སེམས་བསྐྱེད་པ་འདི་ཡང་རྒྱུ་བཞིས་སྐྱེ་བར་འགྱུར་ཏེ། དེ་ནི་འདི་ལྟར་ཆོས་བཅུ་པའི་མདོ་ལས་བསྟན་པ། རིགས་ཀྱི་བུ་འདི་ལ་བྱང་ཆུབ་སེམས་དཔའ་རིགས་ལ་གནས་པར་གྱུར་པ་བྱང་ཆུབ་ཏུ་སེམས་མ་བསྐྱེད་པ་ན་དེ་བཞིན་གཤེགས་པའམ། དེ་བཞིན་གཤེགས་པའི་ཉན་ཐོས་ཀྱིས་བསྐུལ་ཞིང་སྐྱོ་བར་བྱས། ཡང་དག་པར་འཛིན་དུ་བཅུག་སྟེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་བྱང་ཆུབ་ཀྱི་སེམས་ལ་མོས་པའི་རྒྱུ་དང་པོའོ། །རྫོགས་པའི་བྱང་ཆུབ་བམ། བྱང་ཆུབ་ཀྱི་སེམས་ཀྱི་བསྔགས་པ་བརྗོད་པ་ཐོས་ནས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་རྒྱུ་གཉིས་པའོ། །དེ་སེམས་ཅན་སྐྱོབ་པ་མེད་པ་དང༌། སྐྱབས་མེད་པ་དང༌། གླིང་མེད་པ་རྣམས་མཐོང་ནས་སྙིང་རྗེའི་སེམས་ཉེ་བར་གཞག་སྟེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱི་བར་དུ་སེམས་བསྐྱེད་པ་འདི་ནི་རྒྱུ་གསུམ་པའོ། །དེ་བཞིན་གཤེགས་
པའི་སྐུ་རྣམ་པ་ཐམས་ཅད་ཡོངས་སུ་རྫོགས་པ་མཐོང་ནས་དགའ་བ་བསྐྱེད་དེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་འདི་ནི་རྒྱུ་བཞི་པའོ་ཞེས་སོ། །འདི་དག་ནི་བྱང་ཆུབ་ཀྱི་སེམས་དང་སྡོམ་པའི་དངོས་གཞིའི་ལས་ཡིན་པར་རིག་པར་བྱའོ། །དེ་ལྟར་བྱང་ཆུབ་ཀྱི་སེམས་དང་སྡོམ་པ་བསྟན་ནས། མཇུག་བསྟན་པར་བྱ་བའི་ཕྱིར། དེ་ལྟར་ཞེས་བྱ་བ་ལ་སོགས་པ་གསུངས་པ་ལ། སྦྱོར་བ་དང༌། དངོས་གཞི་དང༌། མཇུག་གསུམ་དང་འབྲེལ་པར་གཟུང་བ་སྟེ། ལས་ཡོངས་སུ་རྫོགས་པ་ནི་འབྲས་བུ་ཡང་ངེས་པར་འགྱུར་རོ། །ཡན་ལག་གཅིག་མ་ཚང་བས་ནི་དེ་ལས་བཟློག་པ་ཡིན་ནོ། །དེ་ལྟར་ཞེས་བྱ་བ་ནི་བསྟན་པའི་རིམ་པས་སོ། །བཟུང་ནས་ནི་ཡང་དག་པར་བླངས་ནས་ཏེ་བསྐྱེད་ནས་ཞེས་བྱ་བའི་དོན་ཏོ། །བློ་དང་ལྡན་པ་ཞེས་བྱ་བ་ནི་བློ་གྲོས་དང་ལྡན་པ་སྟེ། བྱང་ཆུབ་སེམས་དཔའ་ཞེས་བྱ་བའི་དོན་ཏོ། །རབ་དང་བས་ཞེས་བྱ་བ་ནི་མཆོག་ཏུ་དགའ་བ་དང་རབ་ཏུ་མགུ་བ་ཡིས་ཏེ། གཞན་གྱི་རྗེས་སུ་འབྲང་བ་ལ་སོགས་པའམ་འདོད་རྒྱལ་གྱིས་མ་ཡིན་པའོ། །རྒྱས་པར་བྱ་བའི་ཕྱིར་ཞེས་བྱ་བ་ནི་གཞན་དུ་གལ་ཏེ་བཟུང་ནས་གུས་པ་ཞན་པ་འམ། ཡིད་ལ་གཅགས་པར་གྱུར་ན་དེའི་ཚེ་མི་འཕེལ་བ་ཉིད་དམ། ཡོངས་སུ་ཟད་པར་འགྱུར་རོ། །འདི་ལྟར་ནི་དེ་བསྲུང་བ་དང་དག་པ་དང་སྤེལ་བར་འགྱུར་རོ། །འདི་ལྟར་ཞེས་བྱ་བ་ནི་འཆད་པར་འགྱུར་བའི་རིམ་པས་གཟེངས་བསྟོད་དོ་ཞེས་པ་ནི་སྤྲོ་བར་བྱ་བའོ། །དེ་ཉིད་བསྟན་པ་ནི། དེང་དུ་བདག་ཚེ་འབྲས་བུ་ཡོད། །ཅེས་བྱ་བ་ལ་སོགས་པ་གསུངས་པ་ཡིན་ཏེ། འཁོར་བ་ཐོག་མ་མེད་པའི་ཚེ་རབས་བརྒྱུད་པ་དག་ཏུ་ནམ་དུ་ཡང་འདི་འདྲ་བ་ཞིག་ཐོབ་པར་མ་གྱུར་ཏོ་སྙམ་དུ་དགོངས་པ་ཡིན་ནོ། །དེ་རིང་སངས་རྒྱས་རིགས་སུ་སྐྱེས། །ཞེས་བྱ་བ་ནི་གང་གི་ཚེ་བྱང་ཆུབ་ཏུ་སེམས་བསྐྱེད་པ་ནའོ། །སངས་རྒྱས་སྲས་སུ་ད་གྱུར་ཏོ། །ཞེས་བྱ་བ་ནི་ང་རྒྱལ་ཁྱད་པར་དུ་འཕགས་པ་ཡིད་ལ་བྱེད་པས་སེམས་དམན་པ་ཉིད་ཡོངས་སུ་ངོར་བའོ། །རང་རིགས་མཐུན་པའི་ལས་ཞེས་བྱ་བ་ནི་སངས་རྒྱས་ཀྱི་གདུང་དང་འཚམ་པའི་ལས་སོ། །སྐྱོན་མེད་
ཅེས་བྱ་བ་ནི་ཐོག་མ་དང་བར་དང་ཐ་མར་ཡོངས་སུ་དག་པའོ། །རྙོག་པར་མི་འགྱུར་ཞེས་བྱ་བ་ནི་བདག་གི་ཉེས་པར་སྤྱད་པས་སྡིག་པ་ཅི་ནས་ཀྱང་མི་འགྱུར་བར་རོ། །འདི་ལྟར་ཡང་རང་གི་སེམས་ཡང་དག་པར་གཟེངས་བསྟོད་པར་བྱ་སྟེ། ལོང་བས་ཞེས་བྱ་བ་ལ་སོགས་པ་གསུངས་པ་ལ། ལོང་བ་ནི་མིག་མེད་པའོ། །ཕྱག་དར་ཕུང་པོ་ནས་ནི་ལམ་པོ་ཆེའི་ཉལ་ཉིལ་སྤུངས་པ་ནས་སོ། །འདི་དག་ཐམས་ཅད་ནི་ཤིན་ཏུ་ཡང་འཕྲད་པར་དཀའ་བའོ་སྙམ་དུ་དགོངས་པའོ། །འདིར་ཡང་དེ་ཉིད་དཔེ་ཉིད་དུ་དེ་བཞིན་ཞེས་བྱ་བ་གསུངས་ཏེ། དེ་ཁོ་ན་ཉིད་རྟོགས་པའི་མིག་མེད་པ་དག་ལ་ཕྱག་དར་གྱི་ཕུང་པོ་ལྟ་བུ་འཁོར་བ་ནས་ཇི་ཞིག་ལྟར་སངས་རྒྱས་ཀྱི་བྱིན་གྱི་རླབས་ཀྱི་སྟོབས་ཀྱིས་བྱང་ཆུབ་ཀྱི་སེམས་རིན་པོ་ཆེ་དང་འདྲ་བ་སྐྱེས་སོ། །ཡང་འདི་ལྟར་རབ་ཏུ་དགའ་བར་བྱ་སྟེ། འགྲོ་བའི་ཞེས་བྱ་བ་ལ། འཇིག་རྟེན་གསོན་པོའི་འཆི་བ་དྲུང་ནས་མེད་པར་བྱ་བའི་དོན་དུ་བྱང་ཆུབ་ཀྱི་སེམས་འདི་བཅུད་ཀྱིས་ལེན་པ་ཡང་ཡིན་ཏེ། སྨན་གྱི་ཁྱད་པར་སྣ་ཚོགས་པ་ལེགས་པར་སྦྱར་བ་གང་ཞིག་ཆོ་ག་བཞིན་དུ་བསྟེན་ནས་རྒ་ཤི་ལས་གྲོལ་བར་འགྱུར་རོ་ཞེས་འཇིག་རྟེན་ན་གྲགས་པའི་བཅུད་ཀྱིས་ལེན་བཞིན་ནོ། །འདི་ཞེས་བྱ་བ་ནི་བྱང་ཆུབ་ཀྱི་སེམས་སོ། །སྐྱེས་པ་ནི་བྱུང་བའོ། །ཡང་འདི་ལྟར་ཡང་དག་པར་རབ་ཏུ་དགའ་བར་བྱ་སྟེ། འགྲོ་བའི་ནད་ཅེས་བྱ་བ་སྟེ། འགྲོ་བ་རྣམས་ཀྱི་ནད་རྣམས་ནི་ན་ཚ་ཐམས་ཅད་དོ། །མཆོག་ནི་གཙོ་བོ་སྟེ། ལུས་ལས་བྱུང་བ་དང༌། ཡིད་ལས་བྱུང་བའི་ནད་ཐམས་ཅད་རབ་ཏུ་ཞི་བར་བྱེད་པའི་ཕྱིར་རོ། །འདི་ཞེས་བྱ་བ་ནི་བྱང་ཆུབ་ཀྱི་སེམས་སོ། །སྲིད་ལམ་འཁྱམ་པ་ནི་སྐྱེ་བའི་སྲིད་པ་དང༌། འཆི་བའི་སྲིད་པ་དང༌། སྲིད་པ་བར་མདོའི་རང་བཞིན་ཏེ། འཁོར་བའི་ལམ་ན་འཕྱན་པའོ། །དེས་དུབ་པ་ནི་ཡོངས་སུ་ངལ་བ་སྟེ། ངན་འགྲོ་ནི་སེམས་ཅན་དམྱལ་བ་དང༌། ཡི་དགས་དང༌། དུད་འགྲོ་རྣམས་སོ། །དེ་རྣམས་དགྲོལ་བར་བྱེད་པ་ནི་འདའ་བར་བྱེད་པ་སྟེ། དེའི་རྒྱུ་མཚན་དུ། སྤྱི་སྟེ་ཐུན་མོང་གི་སྟེགས་ཡིན་ནོ་ཞེས་བྱ་བ་འདི་ནི་བྱང་ཆུབ་ཀྱི་སེམས་སོ། །བདག་ལ་སྐྱེས་ཞེས་བྱ་བ་ཐམས་ཅད་དུ་ལྷག་མའོ། །ཉོན་མོངས་གདུང་བ་ནི་ཚ་བའོ། །དེ་སེལ་
བའི་ཕྱིར་ཤར་བ་སྟེ། རབ་ཏུ་སྐྱེས་པའི་སེམས་ཞེས་པ་ནི་བྱང་ཆུབ་ཀྱི་སེམས་སོ། །དེ་ཉིད་ནི་ཟླ་བ་ཕྱེད་དེ་ཁ་བའི་འོད་ཟེར་ཅན་ཏེ། གདུང་བ་ཐམས་ཅད་སེལ་བར་བྱེད་པའི་ཕྱིར་རོ། །ཤར་བ་ནི་རབ་ཏུ་སྐྱེས་པའོ། །ཡང་འདི་ལྟར་འགྲོ་བའི་མི་ཤེས་ཞེས་བྱ་བ་ནི་མི་ཤེས་པ་ཉིད་ནི་རབ་རིབ་ཡིན་ཏེ། དངོས་པོའི་དེ་ཁོ་ན་ཉིད་འགེགས་པའི་ཕྱིར་རོ། །དཔྱིས་འབྱིན་ནི་ངེས་པར་འབྱིན་པའོ། །ཉི་མ་ཆེན་པོ་ནི་སེམས་ཅན་ཐམས་ཅད་ཀྱི་ནང་གི་རབ་རིབ་སེལ་བར་བྱེད་པའི་ཕྱིར་རོ། །ཡང་འདི་ལྟར་དམ་ཆོས་ཞེས་བྱ་བ་ནི་བཅོམ་ལྡན་འདས་ཀྱི་གསུང་རབ་བོ། །དེ་ཉིད་ནི་འོ་མ་ལྟ་བུ་སྟེ། དེ་བསྲུབས་པ་ནི་ཐོས་པ་ལས་བྱུང་བ་ལ་སོགས་པའི་ཤེས་རབ་ཀྱིས་དཀྲོགས་པ་སྟེ་དཀྲུགས་པའོ། །མར་གྱི་སྙིང་ཁུ་དང་འདྲ་བའི་བྱང་ཆུབ་ཀྱི་སེམས་བྱུང་བ་ཡིན་ཏེ། སྐྱེས་པ་ཡིན་ནོ། །རྣམ་པ་གཞན་ཡང་བདེ་བའི་ལོངས་སྤྱོད་ཅེས་བྱ་བ་ལ་སོགས་པ་གསུངས་པ་ལ། བདེ་བའི་ལོངས་སྤྱོད་པར་བྱ་བ་ལ་ལོངས་སྤྱོད་པར་འདོད་པའི་སེམས་ཅན་གྱི་ཚོགས་ཀྱི་བྱེ་བྲག་སྟེ། སྤྱད་པར་འདོད་པ་ལ་ཞེས་བྱ་བ་ནི་ལོངས་སྤྱད་པར་འདོད་པའོ། །འདི་ཞེས་བྱ་བ་ནི་བྱང་ཆུབ་ཀྱི་སེམས་ཏེ། བདེ་བ་ཐམས་ཅད་འབྱུང་བའི་རྒྱུ་ཡིན་པའི་ཕྱིར་རོ། །འབྲས་བུ་མ་ཐོབ་པ་ཉིད་ཡིན་ན་ཡང་ལྷག་པའི་བསམ་པ་བརྟན་པས་འབྲས་བུ་ཐོབ་པ་བཞི་དུ་བརྗོད་དེ། དཔེར་ན་ཆར་པ་འབབ་པ་ན་འབྲས་སཱ་ལུ་སྐྱེས་སོ་ཞེས་ཟེར་བ་ལྟ་བུར་བྱང་ཆུབ་ཏུ་སེམས་བསྐྱེད་པ་ནས་ཕུན་སུམ་ཚོགས་པ་ཐམས་ཅད་ཐོབ་བོ་ཞེས་བྱ་བ་ཡང་དེ་བཞིན་ནོ། །འགྲོན་ཆེན་ནི་འགྲོན་པོ་སྟེ། དེ་དང་དེའི་འགྲོ་བར་འགྲོ་བ་དང༌། འོང་བར་བྱེད་པའི་ཕྱིར་རོ། །ཚིམ་པར་བྱེད་པ་ཡིན་ཞེས་བྱ་བ་ནི་བདེ་བ་ཐམས་ཅད་ཀྱིས་ངོམས་པར་བྱེད་པའི་ཕྱིར་རོ། །ད་ནི་བྱང་ཆུབ་ཏུ་སེམས་བརྟན་པ་ངེས་པར་བྱས་པ་ལ་སེམས་དང་བ་བསྐྱེད་པ་ནི། བདག་གིས་དེ་རིང་ཞེས་བྱ་བ་ལ་སོགས་པ་གསུངས་པ་ཡིན་ཏེ། འགྲོ་བ་ནི་སེམས་ཅན་འཇིག་རྟེན་ནོ། །མགྲོན་དུ་བོས་ཟིན་པ་ནི་བདེ་བར་གཤེགས་པ་ཉིད་དང་སངས་རྒྱས་ཉིད་ལའོ། །བར་དུ་བདེ་ལ་ནི་ཇི་སྲིད་དུ་སངས་རྒྱས་ཉིད་དུ་མ་ཐོབ་པ་དེ་སྲིད་ཀྱི་
བར་དུ་ལྷ་དང་མིའི་ཕུན་སུམ་ཚོགས་པའི་བདེ་བ་ལའོ། །སྐྱོབ་པ་ཐམས་ཅད་ཀྱི་སྤྱན་སྔར་ཏེ། སངས་རྒྱས་བཅོམ་ལྡན་འདས་ཐམས་ཅད་ཀྱི་མདུན་དུ་སྟེ། འདི་ལ་བཅོམ་ལྡན་འདས་རྣམས་ཁོ་ན་དཔང་དུ་གྱུར་པ་ཡིན་ནོ་སྙམ་དུ་དགོངས་པའོ། །ལྷ་དང་ལྷ་མིན་ལ་སོགས་པ་དགའ་བར་གྱིས་ཤིག་ཅེས་བྱ་བ་བདག་གི་བསམ་པ་འགྲོ་བ་ཐམས་ཅད་ཀྱི་ཕན་པ་དང༌། བདེ་བའི་གཞི་ལ་ཞུགས་པ་འདི་ལ་ལྷ་དང༌། ལྷ་མ་ཡིན་དང༌། གནོད་སྦྱིན་ལ་སོགས་པ་རྣམས་སེམས་རབ་ཏུ་དང་བས་ཡི་རང་བར་གྱིས་ཤིག་པའོ། །བྱང་ཆུབ་སེམས་ཀྱི་སྤྱོད་པ་ལ་འཇུག་པའི་དཀའ་འགྲེལ། ཤེས་རབ་འབྱུང་གནས་བློ་གྲོས་ཀྱིས་བྱས་པ་ལས་ལེའུ་གསུམ་པའོ།། །།བམ་པོ་ལྔ་པ། དེ་ལྟར་མཇུག་རྒྱས་པར་བརྗོད་ནས། སྒྲུབ་པ་སྙིང་པོར་བྱེད་པ་ལ་བྱང་ཆུབ་ཡོད་ཀྱི། དེ་ལས་བཟློག་པ་ལ་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར། རྒྱལ་བའི་ཞེས་བྱ་བ་ལ་སོགས་པ་གསུངས་ཏེ། དེ་ལྟར་བསྟན་མ་ཐག་པའི་ཆོ་གས་བྱང་ཆུབ་ཀྱི་སེམས་རབ་ཏུ་བརྟན་པར་བཟུང་ནས། བྱང་ཆུབ་སེམས་དཔས་བསླབ་པ་ལ་ནན་ཏན་དུ་བྱ་བ་སྟེ། བྱང་ཆུབ་སེམས་དཔར་གྱུར་པས་བསླབ་པར་འོས་པ་གང་ཡིན་པ་ལ་ཞེས་བྱ་བའི་དོན་ཏོ། །འདའ་བ་ནི་འགོམ་པའོ། །དེ་ལས་བཟློག་པ་ནི་མི་འདའ་བའོ། །དེ་ལ་འབད་པ་ནི་དང་དུ་བླང་བའོ། །གཡེལ་བ་མེད་པ་ནི་ལེ་ལོ་མེད་པའོ། །ཇི་སྐད་དུ་འཕགས་པ་ག་ཡ་གོ་རི་ལས། བྱང་ཆུབ་སེམས་དཔའ་སྒྲུབ་པ་སྙིང་པོར་བྱེད་པ་རྣམས་ལ་བྱང་ཆུབ་ཡོད་ཀྱི་སྒྲུབ་པ་སྙིང་པོར་བྱེད་པ་མ་ཡིན་པ་རྣམས་ལ་ནི་མ་ཡིན་ནོ་ཞེས་གསུངས་པ་ལྟ་བུའོ། །འཕགས་པ་ཏིང་ངེ་འཛིན་གྱི་རྒྱལ་པོ་ལས་ཀྱང༌། གཞོན་ནུ་ཁྱོད་ཀྱིས་དེ་ལྟ་བས་ན་སྒྲུབ་པ་སྙིང་པོར་བྱེད་པར་འགྱུར་བ་དེ་ལྟར་བསླབ་པར་བྱའོ། །གཞོན་ནུ་དེ་ཅིའི་ཕྱིར་ཞེ་ན། སྒྲུབ་པ་སྙིང་པོར་བྱེད་པ་ལ་ནི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྙེད་པར་དཀའ་བ་མ་ཡིན་ནོ་ཞེས་གསུངས་སོ། །བྱང་ཆུབ་སེམས་དཔའི་བསླབ་པ་དེ་ཡང་ཕ་རོལ་ཏུ་ཕྱིན་པ་དང༌། ཚད་མེད་པ་དང༌། བསྡུ་བའི་དངོས་པོ་ལ་སོགས་པའི་དབྱེ་བས་བློ་གྲོས་མི་ཟད་པ་དང༌། དཀོན་མཆོག་སྦྱིན་ལ་སོགས་པའི་མདོ་
རྣམས་ལས་རྒྱ་ཆེར་བསླབ་པར་བྱའོ། །དེ་བཞིན་དུ་འཇིག་རྟེན་པའི་བསླབ་པ་ལ་སོགས་པ་ལ་གནས་པ་རྣམས་ཀྱི་བར་ལ་ཡང་བྱང་ཆུབ་སེམས་དཔས་བསླབ་པར་བྱ་ན། འཇིག་རྟེན་ལས་འདས་པའི་བསམ་གཏན་ལ་སོགས་པ་རྣམས་ལ་ལྟ་ཅི་སྨོས། གཞན་དུ་ན་ཇི་ལྟར་རྣམ་པ་ཐམས་ཅད་དུ་སེམས་ཅན་གྱི་དོན་བྱ་བར་ནུས་པར་འགྱུར། མདོར་ན་བྱང་ཆུབ་སེམས་དཔའི་ཐབས་དང་ཤེས་རབ་ཀྱི་ངོ་བོ་གྲུབ་པ་འདི་ཡང་ཤེས་རབ་ཙམ་ཡང་མ་ཡིན་ལ། ཐབས་ཙམ་ཡང་མ་ཡིན་ནོ། །དེ་ལ་ཤེས་རབ་ཀྱི་ཕ་རོལ་ཏུ་ཕྱིན་པ་མ་གཏོགས་པའི་སྦྱིན་པ་ལ་སོགས་པའི་ཕ་རོལ་ཏུ་ཕྱིན་པ་དང༌། བསྡུ་བའི་དངོས་པོ་ལ་སོགས་པ་འདི་དག་ཐམས་ཅད་ནི་ཞིང་ཡོངས་སུ་དག་པ་དང༌། ལོངས་སྤྱོད་ཆེན་པོ་དང༌། འཁོར་ཆེ་བ་དང༌། ཡང་དག་པར་སེམས་ཅན་ཡོངས་སུ་སྨིན་པ་དང༌། སྤྲུལ་པ་ལ་སོགས་པ་མངོན་པར་མཐོ་བའི་ཆོས་ཐམས་ཅད་སྡུད་པར་བྱེད་པའི་དགེ་བའི་རྩ་བ་ཞེས་བརྗོད་དོ། །ཤེས་རབ་ནི་ཐབས་དེ་ཉིད་ཕྱིན་ཅི་མ་ལོག་པའི་རང་བཞིན་དུ་ཡོངས་སུ་གཅོད་པའི་རྒྱུ་ཡིན་ནོ། །དོན་འདི་ཡང་རྒྱས་པར་ནི་ཀ་མ་ལ་ཤཱི་ལའི་བསྒོམ་པའི་རིམ་པར་བལྟ་བར་བྱའོ། །ལེའུ་འདིས་ཀྱང་དེ་བསྲུང་བ་དང་དག་པ་དང་སྤེལ་བ་རྣམས་སམ། ཡང་ན་དེ་བསྲུང་བ་འབའ་ཞིག་བསྟན་པ་ཡིན་ནོ། །ཐོག་མ་ཉིད་དུ་ཡང་བྱང་ཆུབ་སེམས་དཔའི་སྡོམ་པ་ལ་བདག་ཉིད་ཀྱང་ནུས་པ་ཡོད་དམ་མེད་ཤེས་པར་བྱས་ལ་སྡོམ་པ་མནོད་དོ། །དེ་ནས་སྡོམ་པ་མནོས་པའི་བྱང་ཆུབ་སེམས་དཔས་འདི་ལྟར་བསམ་པར་བྱའོ་ཞེས་བབ་ཅོལ་ཞེས་བྱ་བ་ལ་སོགས་པ་གསུངས་ཏེ། བབ་ཅོལ་ཞེས་བྱ་བ་ནི་བབ་བབ་ཏུའོ། །བརྩམས་པ་གང་ཡིན་པ་ནི་ལེགས་པར་བརྟགས་པའང་མ་ཡིན་པ་སྟེ། དེ་ལ་ནི་ཁས་བླངས་སུ་ཟིན་ཀྱང་བྱ་བའམ་བཏང་ཞེས་རེས་ཀྱིས་འགྲོ་བ་ལ་བརྟེན་ནས་དེ་ལྟར་བརྟག་པར་རིགས་ན། འདི་ནི་དེ་ལྟ་མ་ཡིན་ནོ་ཞེས་སངས་རྒྱས་རྣམས་དང་ཞེས་བྱ་བ་ལ་སོགས་པ་གསུངས་ཏེ། སངས་རྒྱས་ཀྱི་ཞེས་བྱ་བ་ནི་ལག་བཟངས་ཀྱིས་ཞུས་པ་ལ་སོགས་པའི་མདོ་དེ་དང་དེ་རྣམས་ལས་བསྔགས་པའི་ཕྱིར་རོ། །དེའི་སྲས་ནི་ཤེས་རབ་ཆེན་
པོས་ཞེས་བྱ་བ་ནི། འཕགས་པ་མགོན་པོ་བྱམས་པ་ལ་སོགས་པའི་བྱང་ཆུབ་སེམས་དཔའ་རྣམས་ཀྱིས་འཕགས་པ་སྡོང་པོ་བཀོད་པ་ལ་སོགས་པའི་མདོ་རྣམས་ལས་སོ། །བདག་ཉིད་ཀྱིས་ཀྱང་ནུས་པ་བཞིན་ཞེས་བྱ་བ་ནི་རང་གི་ཤེས་རབ་ཀྱི་ནུས་པ་དང་མཐུན་པར་བརྟགས་པའོ། །དེ་ལ་བཤོལ་དུ་ཅི་ཞིག་ཡོད་དེ་ཅི་སྟེ་བཤོལ་བར་བྱེད་ཅེས་བྱ་བའམ། གང་ལ་ཐེ་ཚོམ་དུ་གྱུར་པའི་ལྷག་མ་ཅི་ཞིག་ཡོད། དེ་བས་ན་ཇི་ལྟར་དམ་བཅས་པ་བཞིན་དུ་ལེགས་པར་བརྩམས་པ་ཉིད་རིགས་པ་ཡིན་ནོ། །གཞན་དུ་ན་འདིར་སངས་རྒྱས་དང༌། བྱང་ཆུབ་སེམས་དཔའ་ཐམས་ཅད་དང༌། ལྷ་དང་བཅས་པའི་འཇིག་རྟེན་བསླུས་པར་ཡང་འགྱུར་རོ། །གལ་ཏེ་དེ་ལྟར་ཞེས་བྱ་བ་ལ་སོགས་པ་ལ། དེ་ལྟར་དམ་བཅས་ནས་ཞེས་བྱ་བ་ནི་མ་རྒལ་བ་བསྒྲལ་བར་བྱ་བ་དང༌། མ་གྲོལ་བ་དགྲོལ་བར་བྱ་བ་དང༌། དབུགས་མ་ཕྱུང་བ་དབུགས་དབྱུང་བར་བྱ་བ་དང༌། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའ་བར་བྱ་བའི་ཕྱིར་དབུགས་དབྱུང་ནས་ལས་ཀྱིས་བསྒྲུབ་པར་མ་བྱས་ན་སྟེ། གལ་ཏེ་ལས་ཀྱི་བྱ་བ་ཡིས་འདི་རྫོགས་པར་མ་བྱས་ན་འདིས་ལྷ་དང་མི་ལ་སོགས་པའི་སེམས་ཅན་དེ་དག་ཐམས་ཅད་བསླུས་ཤིང་བྲིད་ན་བདག་གི་འགྲོ་བ་ཅི་འདྲར་འགྱུར་ཏེ། སེམས་ཅན་དམྱལ་བ་ལ་སོགས་པའི་འགྲོ་བ་ལས་གཞན་གྱི་འགྲོ་བ་མེད་དོ་སྙམ་དུ་དགོངས་པའོ། །དོན་འདི་ཡང་འཕགས་པ་བློ་གྲོས་རྒྱ་མཚོའི་མདོ་ལས་བསྟན་པ། བློ་གྲོས་རྒྱ་མཚོ་འདི་ལྟ་སྟེ་དཔེར་ན་རྒྱལ་པོའམ་རྒྱལ་པོའི་བློན་པོ་ཆེན་པོས་གྲོང་ཁྱེར་གྱི་སྐྱེ་བོ་ཐམས་ཅད་ལ་སང་ཟན་སྦྱིན་ནོ་ཞེས་མགྲོན་དུ་བོས་ལ་བཟའ་བ་དང་བཏུང་བ་མ་སྦྱར་ན་དེས་སྐྱེ་བོའི་ཚོགས་དེ་ཐམས་ཅད་བསླུས་པ་ཡིན་ཏེ། དེ་ལ་དེ་དག་ཀྱང་བཟའ་བ་དང་བཏུང་བའི་ཟས་མ་ཐོབ་པས་འཕྱ་ཞིང་སླར་འདོང་བ་དེ་བཞིན་དུ་བློ་གྲོས་རྒྱ་མཚོ་བྱང་ཆུབ་སེམས་དཔའ་གང་མ་རྒལ་བ་བསྒྲལ་བ་དང༌། མ་གྲོལ་བ་དགྲོལ་བ་དང༌། དབུགས་མ་ཕྱིན་པ་དབུགས་དབྱུང་བ་དང༌། ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་བཟླ་བའི་ཕྱིར་སེམས་ཅན་ཐམས་ཅད་དབུགས་དབྱུང་ལ་མང་དུ་ཐོས་པ་དང༌། དེ་ལས་གཞན་དགེ་བ་བྱང་ཆུབ་ཀྱི་ཕྱོགས་
ཀྱི་ཆོས་རྣམས་ཀྱི་བར་ལ་ཡང་བརྩོན་པར་མི་བྱེད་ན། བྱང་ཆུབ་སེམས་དཔའ་དེ་ནི་ལྷ་དང་བཅས་པའི་འཇིག་རྟེན་བསླུ་བ་ཡིན་ནོ། །དེ་ལྟ་བུ་དེ་ལ་སྔོན་སངས་རྒྱས་མཐོང་བའི་ལྷ་རྣམས་ཀྱིས་མཐོང་ནས་འཕྱ་ཞིང་གཞོགས་འཕྱས་བྱེད་ལ་རྣམ་པར་སྨོད་དེ། གང་དག་མཆོད་སྦྱིན་ཆེན་པོ་བྱ་བར་དམ་བཅས་པ་ཉམས་འོག་ཏུ་ཆུད་པར་བྱེད་པའི་མཆོད་སྦྱིན་གྱི་བདག་པོ་དེ་དག་ནི་དཀོན་ནོ། །བློ་གྲོས་རྒྱ་མཚོ་དེ་ལྟ་བས་ན་ཚིག་གང་གིས་ལྷ་དང་མི་དང་ལྷ་མ་ཡིན་དུ་བཅས་པའི་འཇིག་རྟེན་སླུ་བར་བྱེད་པའི་ཚིག་དེ་ལྟ་བུ་བྱང་ཆུབ་སེམས་དཔས་སྨྲ་བར་མི་བྱའོ་ཞེས་འབྱུང་ངོ༌། །དམ་བཅས་པ་ཤིན་ཏུ་ཆུང་བ་ལས་འདའ་ན་ཡང་འབྲས་བུ་ལྟུང་བ་ལྕི་བར་འགྱུར་བ་ཡིན་ནོ་ཞེས། དངོས་པོ་ཕལ་པ་ཞེས་བྱ་བ་ལ་སོགས་པ་གསུངས་ཏེ། ཟན་ལ་སོགས་པའི་ངོ་བོའི་དངོས་པོ་ཅུང་ཟད་ཙམ་སྟེ་ཉུང་ཟད་ཙམ་ལ་ཡང་འདི་སྦྱིན་པར་བྱའོ་སྙམ་དུ་སེམས་ཀྱིས་རྣམ་པར་བསམས་ཏེ། སླར་ཡང་དེ་སྦྱིན་པ་ལ་སོགས་པ་ལས་ལྡོག་པར་བྱེད་པ་དེ་ཡང་འཇིག་རྟེན་ཕ་རོལ་དུ་ཡི་དགས་འགྱུར་གསུངས་ན་ཞེས་བྱ་བ་ནི་ལུང་ནས་བརྗོད་པའོ། །དེ་བཞིན་དུ་ཚིག་ཏུ་དམ་བཅས་ནས་སྦྱིན་པར་མི་བྱེད་པ་སེམས་ཅན་དམྱལ་བར་འགྲོ་བར་གསུངས་སོ། །བླ་ན་མེད་པ་ནི་གང་ལས་བླ་མ་སྟེ་གོང་ན་མེད་པ་དེ་ནི་བླ་ན་མེད་པའོ། །བདེ་བ་ནི་མངོན་པར་མཐོ་བ་དང་ངེས་པར་ལེགས་པའི་མཚན་ཉིད་ཐུན་མོང་མ་ཡིན་པའོ། །སྐད་གསང་མཐོན་པོ་ནི་རྩོམ་པ་ཆེན་པོས་སངས་རྒྱས་དང་བྱང་ཆུབ་སེམས་དཔའ་དང༌། ལྷ་དང་བཅས་པའི་འཇིག་རྟེན་གྱི་མདུན་དུ། བདག་གིས་དེ་རིང་སྐྱོབ་པ་ཐམས་ཅད་ཀྱི། །ཞེས་བྱ་བ་ལ་སོགས་པ་དང༌། བདག་གིས་མ་རྒལ་བ་བསྒྲལ་བར་བགྱིའོ་ཞེས་བྱ་བ་ལ་སོགས་པ་སྐད་ཆེར་བྱས་ནས་སོ། །བསམ་པ་ཐག་པས་ནི་གུས་པ་ཆེན་པོས་སོ། །དོན་དེ་མ་གྲུབ་ན་བདག་གི་འགྲོ་བ་ཅི་འདྲར་འགྱུར། དེ་དག་ཀྱང་དམ་པའི་ཆོས་དྲན་ཉེ་བར་གཞག་པའི་མདོ་ལས། ཅུང་ཟད་ཙམ་ཞིག་བསམ་པ་ལས་མ་བྱིན་ན་ཡི་དགས་ཀྱི་འགྲོ་བར་སྐྱེ་ལ། དམ་བཅས་པ་ལས་མ་བྱིན་ན་སེམས་ཅན་དམྱལ་བའི་འགྲོ་བར་འགྱུར་རོ་ཞེས་བསྟན་ན། འགྲོ་བ་མ་ལུས་པའི་དོན་བླ་ན་མེད་པ་དམ་བཅས་ནས་སྒྲུབ་
པར་མི་བྱེད་པ་ལྟ་ཅི་སྨོས། དེ་བས་ན་ཆོས་ཡང་དག་པར་སྡུད་པའི་མདོ་ལས་ཀྱང༌། རིགས་ཀྱི་བུ་བྱང་ཆུབ་སེམས་དཔའ་བདེན་པ་ལྷུར་བྱེད་པར་འགྱུར་བར་བྱ་སྟེ། རིགས་ཀྱི་བུ་བདེན་པ་ཡང་དག་པར་བརྗོད་པ་ནི་ཆོས་ཡང་དག་པར་བརྗོད་པའོ། །རིགས་ཀྱི་བུ་དེ་ལ་བདེན་པ་གང་ཞེ་ན། གང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས་སེམས་དེ་སྲོག་གི་ཕྱིར་ཡང་མི་གཏོང་ཞིང༌། སེམས་ཅན་རྣམས་ལ་ཡང་ལོག་པར་མི་བྱེད་པ་འདི་ནི་བྱང་ཆུབ་སེམས་དཔའི་བདེན་པའོ། །གང་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པ་ལ་སེམས་ཏེ། ཕྱིས་ཡོངས་སུ་གཏོང་ཞིང་སེམས་ཅན་རྣམས་ལའང་ལོག་པར་བྱེད་པ་འདི་ནི་བྱང་ཆུབ་སེམས་དཔའི་བརྫུན་དུ་སྨྲ་བ་ཐ་མ་ཡིན་ནོ་ཞེས་གསུངས་སོ། །དེ་ལྟར་གྱུར་ན་འཕགས་པ་ཤཱ་རིའི་བུས་སྔོན་གྱི་ཚེ་རབས་སུ་བྱང་ཆུབ་ཏུ་སེམས་བསྐྱེད་ནས་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བས་ཚོགས་རྣམས་ལ་འཇུག་པར་བྱས་ཤིང༌། སངས་རྒྱས་སྟོང་ཕྲག་བཅུ་ལ་བསྙེན་བཀུར་བྱས་ནས། དེ་ནས་བདུད་ཀྱིས་ཐོ་འཚམས་པས་བྱང་ཆུབ་ཀྱི་སེམས་བཏང་ངོ་ཞེས་ཐོས་ཏེ། དེ་ལྟ་ནའང་ཉན་ཐོས་ཀྱི་བྱང་ཆུབ་ཐོབ་ནས་སེམས་ཅན་གྱི་དོན་སྒྲུབ་པར་ནུས་པར་འགྱུར་བ་འདི་ཇི་ལྟར་དྲང་ཞེ་ན། གང་ཞིག་ཅེས་བྱ་བ་ལ་སོགས་པ་གསུངས་ཏེ། རྣམ་པ་ཐམས་ཅད་དུ་དངོས་པོ་ཐམས་ཅད་ཀྱི་དེ་ཁོ་ན་ཉིད་མཁྱེན་པའི་སངས་རྒྱས་བཅོམ་ལྡན་འདས་ཁོ་ནས་མཁྱེན་གྱི་ལས་ཚུལ་བསམ་གྱིས་མི་ཁྱབ་པ་སྟེ། ལས་ཀྱི་ཚུལ་སྣ་ཚོགས་པའི་རང་བཞིན་ཡིན་པའི་ཕྱིར་དོན་འདི་ཚུ་རོལ་མཐོང་བའི་སྤྱོད་ཡུལ་མ་ཡིན་ནོ། །གང་སངས་རྒྱས་དང་བྱང་ཆུབ་སེམས་དཔའ་རྣམ་མངོན་དུ་བྱས་ཏེ་ཁས་བླངས་པའི་བྱང་ཆུབ་ཀྱི་སེམས་བཏང་བ་སྔར་དམ་བཅས་པའི་ཡུལ་དུ་བྱ་བའི་སེམས་ཅན་དེ་རྣམས་འཁོར་བའི་སྡུག་བསྔལ་ལས་ཡོངས་སུ་ཐར་བར་བྱེད་པ་ཉིད་ཡིན་ནོ། །འདི་ལ་རིགས་པ་ནི་འདི་སྣང་སྟེ། འཕགས་པ་ཤཱ་རིའི་བུས་ཐར་པའི་སེམས་རྣམ་པ་ཐམས་ཅད་དུ་ཡོངས་སུ་བཏང་བ་ནི་མ་ཡིན་ཏེ། རྫོགས་པའི་བྱང་ཆུབ་ཀྱི་སེམས་བཏང་ནའང་ཉན་ཐོས་ཀྱི་བྱང་ཆུབ་ཐོབ་
པའི་ཕྱིར་རོ། །དེའི་ཕྱིར་ནུས་པ་དེ་ལ་བརྟེན་ནས་བསྐལ་པ་ཇི་ལྟ་བ་བཞིན་དུ་སེམས་ཅན་རྣམས་སྒྲོལ་བར་འགྱུར་བ་ཡིན་ཏེ་ཉེས་པ་མེད་དོ། །ཞར་ལ་འོངས་པ་དོར་ནས་སྐབས་ལ་སྦྱར་བ། དེས་ན་བྱང་ཆུབ་སེམས་དཔའ་ཞེས་བྱ་བ་ལ་སོགས་པ་གསུངས་པ་ལ། དེས་ན་སྟེ་གང་གི་ཕྱིར་སེམས་ཅན་ཐམས་ཅད་ཀྱི་དོན་དུ་ཁས་བླངས་པ་དེས་ན་རྒྱུ་དེའི་ཕྱིར་ནའོ། །ཡང་ཅིའི་ཕྱིར་དེ་ལྟར་ཡིན་ཞེ་ན། གང་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བྱང་ཆུབ་སེམས་དཔའ་འདི་ལ་ལྟུང་བ་དང་བཅས་པར་གྱུར་ན། སེམས་ཅན་ཐམས་ཅད་ཀྱི་དོན་ལ་དམན་པར་འགྱུར་རོ། །གལ་ཏེ་ཡང་འདི་ལ་གང་ཟག་གཞན་གྱི་བྱེད་པས་སེམས་ཅན་གྱི་དོན་ལ་དམན་པར་གྱུར་པ་དེའི་ཚེ་གཞན་དེ་ཉིད་ཀྱི་ལྟུང་བ་ཡང་ལྕི་བར་གྱུར་པ་ཡིན་ནོ། །གང་གཞན་ཞེས་བྱ་བ་ལ་སོགས་པ་གསུངས་ཏེ། གཞན་ཞེས་བྱ་བ་ནི་བྱང་ཆུབ་སེམས་དཔའ་ལས་གཞན་པའོ། །སྐད་ཅིག་ཀྱང་ཞེས་བྱ་བ་ལ་མིག་བཙུམས་པའི་བར་དང༌། ཡུད་ཙམ་པ་དང༌། ཆུ་ཚོད་ཕྱེད་དང༌། ཐུན་ཕྱེད་ལ་སོགས་པའི་དུས་ལྟ་རེ་ཞིག་ཞོག །སྐད་ཅིག་གཅིག་ཙམ་གྱི་བར་དུ་ཡང་སྟེ། བསོད་ནམས་ཀྱི་གེགས་བྱེད་པ་དེའི་ངན་འགྲོའི་གྲངས་བ་གྲང་བར་མི་ནུས་སོ། །ཅིའི་ཕྱིར་ཞེ་ན། སེམས་ཅན་དོན་ནི་བཅོམ་གྱུར་པས། །ཞེས་བྱ་བ་སྟེ། བྱང་ཆུབ་སེམས་དཔའི་དགེ་བ་རྣམ་པར་འཇོམས་པར་བྱེད་པ་དེས་ཀྱང་སེམས་ཅན་མ་ལུས་པའི་དོན་ཉམས་པར་བྱས་པར་འགྱུར་རོ། །ཇི་ལྟར་ན་འདིའི་ངན་འགྲོ་ལ་མུ་མཐའ་མེད་པ་ཡིན་ཞེ་ན། འདིའི་འཐད་པ། སེམས་ཅན་གཅིག་གི་ཞེས་བྱ་བ་ལ་སོགས་པ་གསུངས་ཏེ། ཕན་པ་ཞེས་བྱ་བ་ནི་ཉེ་བར་མཚོན་པ་སྟེ། བདེ་བ་ལ་ཡང་བལྟ་བར་བྱའོ། །ཉམས་གྱུར་ན་སྟེ། བདེ་འགྲོ་ཉམས་པར་བྱེད་པའི་ཕྱིར་རོ། །དོན་འདི་ཡང་རབ་ཏུ་ཞི་བ་རྣམ་པར་གདོན་མི་ཟ་བའི་ཚེ་འཕྲུལ་གྱི་མདོ་ལས་བསྟན་ཏེ། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་ལ་ལ་ཞིག་འཛམ་བུའི་གླིང་པའི་སེམས་ཅན་ཐམས་ཅད་སྲོག་དང་ཕྲལ་ཞིང་བདོག་པ་ཐམས་ཅད་ཕྲལ་ལ། འཇམ་དཔལ་རིགས་ཀྱི་བུའམ་རིགས་ཀྱི་བུ་མོ་གང་གཞན་དག་གིས་བྱང་ཆུབ་སེམས་དཔའི་དགེ་བའི་
སེམས་ཀྱི་བར་ཆད་བྱེད་དེ། ཐ་ན་དུད་འགྲོའི་སྐྱེ་གནས་སུ་སྐྱེས་པ་ལ་ཁམ་གཅིག་ཙམ་སྟེར་བ་ལས་བྱུང་བའི་དགེ་བའི་བར་དུ་གཅོད་ན་དེ་ནི་དེ་བས་ཆེས་གྲངས་མེད་པའི་སྡིག་པ་སྐྱེད་དོ། །དེ་ཅིའི་ཕྱིར་ཞེ་ན། དེ་སངས་རྒྱས་འབྱུང་བ་སྐྱེད་པར་བྱེད་པའི་དགེ་བའི་རྩ་བ་རྣམས་ཀྱི་བར་ཆད་བྱེད་པར་གནས་པར་གྱུར་བའི་ཕྱིར་རོ་ཞེས་གང་གསུངས་པའོ། །དེ་ལྟ་ཞེས་བྱ་བ་ནི་སྔར་བརྗོད་པའི་རིམ་པས་ཡིན་ཏེ། རང་གི་བྱེད་པས་ལྟུང་བ་དང་བཅས་པར་གྱུར་པ་དང༌། བྱང་ཆུབ་ཀྱི་སེམས་རབ་ཏུ་བརྟེན་པར་མ་ནོས་པའི་ཕྱིར་རྒྱབ་ཏུ་དྲངས་ཤིང་སླར་ཡང་མདུན་དུ་ཁྲིད་པར་བྱས་པ་དེ་ལྟར་རེས་ཀྱིས་འགྲེ་བར་བྱེད་པས་ས་ཐོབ་པ་སྟེ། རབ་ཏུ་དགའ་བ་ལ་སོགས་པའི་ས་ཐོབ་པ་ལ་ཡུན་རིངས་ཐོགས་ཤིང་དུས་རིང་པོ་འཁོར་བར་ཡོངས་སུ་སྐྱེ་བར་འགྱུར་རོ། །དེ་བས་ན་ཇི་ལྟར་རིགས་ཤེ་ན། དེ་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་དམ་བཅས་ནི་སེམས་ཅན་ཐམས་ཅད་གདོན་པར་བྱ་བའི་ཕྱིར་ཁས་བླངས་པའོ། །བསྒྲུབ་པར་བྱ་བ་ནི་རྫོགས་པར་བྱ་བའོ། །བདག་གིས་བརྩོན་པར་ནི་དང་དུ་བླང་བའོ། །དེ་ནས་ཞེས་བྱ་བ་ནི་ཕྱི་ནས་བྱའོ་སྙམ་དུ་ཡིད་ལའང་མི་བྱའོ། །འོག་ནས་འོག་ཏུ་འགྲོ་བར་འགྱུར་ཞེས་བྱ་བ་ནི་ངན་འགྲོར་བརྒྱུད་ནས་འོག་ཏུ་འགྲོ་བའི་ཕྱིར་རོ། །དེ་ལྟར་ཡིན་དུ་ཟིན་ཀྱང་དེ་བཞིན་གཤེགས་པ་འགའ་ཞིག་དང་ཕྲད་པ་ལ་བརྟེན་ནས་ཉེས་པ་ཐམས་ཅད་སྤོང་བའི་ཕྱིར་ངན་འགྲོའི་དོགས་པ་ག་ལ་ཡོད་ཅེ་ན། འདིར་སེམས་ཅན་ཕན་པ་ཞེས་བྱ་བ་ལ་སོགས་པ་གསུངས་ཏེ། གྲངས་མེད་པ་ནི་འཁོར་བ་ཐོག་མ་མེད་པ་བཞིན་དུ་སངས་རྒྱས་འབྱུང་བ་ལ་ཐོག་མ་མེད་པའི་ཕྱིར་རོ། །སེམས་ཅན་ཐམས་ཅད་ཚོལ་མཛད་པ་ནི་འགྲོ་བ་མ་ལུས་པ་ལ་ཕན་པ་དང་བདེ་བར་སྦྱར་བའི་ཕྱིར་རྒྱུན་དུ་གཟིགས་པའོ། །དེ་ལྟ་མོད་ཀྱི། རང་གི་ཉེས་པས་ཏེ་བདག་ཉིད་ཀྱི་ཉེས་པར་སྤྱད་པས་དེ་བཞིན་གཤེགས་པ་དེ་དག་གི་གསོ་བའི་སྤྱོད་ཡུལ་དུ་བདག་མ་གྱུར་ཏེ། གསོ་བར་མི་རུང་བའི་ནད་ཀྱིས་བཏབ་པའི་ནད་པ་བཞིན་དུ་སྨན་པ་ཆེན་པོ་ཡིས་ཀྱང་གསོ་བའི་སྐལ་བ་མེད་པར་གྱུར་པ་ཡིན་ནོ། །གང་ཞིག་ནམ་དུ་ཡང་མ་བྱུང་བ་དེ་ནི་འབྱུང་བར་མི་འགྱུར་རོ་ཞེས་བྱ་བ་འདི་ལ་རྒྱུ་ཅི་ཞིག་ཡོད་ཅེ་ན། ད་དུང་ཞེས་བྱ་བ་ལ་
སོགས་པ་གསུངས་ཏེ། དེ་བཞིན་ཞེས་བྱ་བ་ནི་བསླབ་པའི་སྡོམ་པ་ལྷོད་པ་སྟེ་མི་དགེ་བ་ལས་མི་ལྡོག་པའོ། །བཅད་དང་ནི་རྐང་ལག་དང་རྣ་བ་དང་སྣ་ལ་སོགས་པའོ། །གཤེགས་པ་ནི་དེ་དག་ཉིད་ལ་མདུང་ཐུང་དང༌། གསལ་ཤིང་དང་མདའ་ལ་སོགས་པ་རྣམས་ཀྱིས་སོ། །སོགས་པའི་སྒྲས་ནི་གསོད་པ་དང༌། འཆིང་བ་དང༌། བརྡེག་པ་ལ་སོགས་གཟུང་ངོ༌། །གཞན་ཡང་འདི་འདྲའི་འདུ་འཕྲོད་ནི་ཤིན་ཏུ་དཀོན་ཞེས་བྱ་བ་ཡིན་པས་དེའི་ཕྱིར་དེད་ནས་བརྩོན་པར་བྱའོ་ཞེས་བསྟན་པའི་ཕྱིར། དེ་བཞིན་གཤེགས་པ་ཞེས་བྱ་བ་ལ་སོགས་པ་གསུངས་ཏེ། དེ་བཞིན་གཤེགས་པ་འབྱུང་བ་ཞེས་བྱ་བ་ནི་སངས་རྒྱས་འབྱུང་བ་ནི་བརྒྱ་ལ་རེས་འགའ་སྲིད་པ་ཙམ་ཡིན་པའི་ཕྱིར་རོ། །དད་པ་ཞེས་བྱ་བ་ནི་འཇིག་རྟེན་པ་དང་འཇིག་རྟེན་ལས་འདས་པའི་དོན་དད་པས་སྡུད་པར་བྱེད་པའི་ཕྱིར་རོ། །མི་ཞེས་བྱ་བ་ནི་མི་ཁོམ་པ་སྤངས་པའི་མིའི་དངོས་པའོ། །དགེ་གོམས་རུང་བ་ཞེས་བྱ་བ་ནི་དབང་པོ་མ་ཚང་བ་མེད་པ་དང་ཉམས་བདེ་བའོ། །དེ་དག་ཐམས་ཅད་ནི་ཤིན་ཏུ་དཀོན་པ་སྟེ། བྱ་སླ་བར་རྙེད་པ་མ་ཡིན་ནོ། །གང་ནམ་ཞིག་ཐོབ་པར་འགྱུར་ཏེ། དུས་གང་གི་ཚེ་འཐོབ་པར་འགྱུར་བའོ། །འདི་ལྟར་ཡང་མྱུར་བ་ཁོ་ནར་འདིར་བྱ་བ་ཉིད་དུ་རིགས་པ། ནད་མེད་ཅེས་བྱ་བ་ལ་སོགས་པ་གསུངས་ཏེ། ནད་ལས་རྣམ་པར་གྲོལ་བའི་དུས་སོ། །ཟས་བཅས་ཞེས་བྱ་བ་ནི་ཟས་མེད་པ་མ་ཡིན་པའོ། །འཚེ་བ་མེད་པ་ནི་ཆོམ་རྐུན་དང༌། སྦྲུལ་དང༌། གཅན་གཟན་དང༌། ཤ་སྦྲང་དང༌། སྦྲང་བུ་མཆུ་རིངས་དང༌། སྡིག་པ་ལ་སོགས་པའི་འཚེ་བ་དང་བྲལ་བའོ། །ལུས་དང་སྲོག་ལ་ཡིད་ཆེས་པ་མེད་པ་ཡིན་པར་བསྟན་པའི་ཕྱིར། ཚེ་ནི་སྐད་ཅིག་སླུ་བ་སྟེ། བློ་བུར་དུ་ཐོག་ཆེན་པོ་འབབ་པ་ལྟར་སྐད་ཅིག་ཉིད་ལ་སླུ་བར་བྱེད་པའོ། །ལུས་འདི་ཐང་ཅིག་བརྙན་པོ་བཞིན་བདག་ཉིད་ཀྱི་དབང་དུ་མ་གྱུར་པའི་ཕྱིར་ཕ་རོལ་གྱི་བརྙན་པའི་རྒྱན་དང་འདྲ་བ་སྟེ། གློ་བུར་དུ་འཆི་བདག་གིས་ཕྲལ་ནས་འཁྱེར་བའོ། །མི་ལུས་འཐོབ་པའི་ངེས་པ་ཡང་མེད་པ་ཡིན་པར་བསྟན་པའི་ཕྱིར། །བདག་གི་སྤྱོད་པ་འདི་འདྲས་ནི། །ཞེས་བྱ་བ་ལ་སོགས་པ་གསུངས་ཏེ། བདག་གི་སྤྱོད་པ་མི་དགེ་བ་བྱེད་པ་རྣམས་ཀྱིས་ཏེ། སླར་ཡང་ཞེས་
བྱ་བ་ནི་ཚེ་རབས་གཞན་དུ་སྟེ། དེའི་ཚེ་ངན་འགྲོ་ཉིད་དོ། །ངན་འགྲོར་ལྷུང་ན་ཡང་སྡིག་པ་འབའ་ཞིག་སོགས་པའོ། །ངན་འགྲོ་ལ་དགེ་བ་སྤྱོད་པའི་སྐལ་བ་ཡོད་པ་མ་ཡིན་ནོ་ཞེས། གལ་ཏེ་ཞེས་བྱ་བ་ལ་སོགས་པ་གསུངས་ཏེ་དགེ་བའི་ནུས་པ་ཡོད་ཀྱང་ངོ༌། །ངན་སོང་སྡུག་བསྔལ་གྱིས་ཞེས་བྱ་བ་ནི་སེམས་ཅན་དམྱལ་བ་ལ་སོགས་པའི་གནོད་པས་ཀུན་ནས་ནོན་པས་ཀུན་ནས་བརྒྱལ་བའམ། ཕན་པ་དང་མི་ཕན་པའི་ཡོངས་སུ་ཤེས་པ་མེད་པས་བྱ་བ་ཐམས་ཅད་ལ་ལས་སུ་རུང་བ་མེད་པའོ། །དེ་སྤྱད་ཚེ་ནི་སེམས་ཅན་དམྱལ་བ་ལ་སོགས་པའི་སྡུག་བསྔལ་ཉམས་སུ་མྱོང་བའི་སྐབས་སུའོ། །དགེ་བ་ཞེས་བྱ་བ་ནི་སྤྱོད་པར་མ་གྱུར་ལ། མཐོ་རིས་ནི་བདག་ལས་འབྱུང་བར་ཤོག་ཤིག་སྙམ་དུ་དེ་ལྟ་མ་ཡིན་ནོ་ཞེས་དགེ་བ་དག་ཀྱང་ཞེས་བྱ་བ་ལ་སོགས་པ་གསུངས་ཏེ། དགེ་བ་མི་བྱེད་པར་སྡིག་པ་བསགས་པ་ལའོ། །བདེ་འགྲོའི་སྒྲ་ཡང་ཐོས་མི་འགྱུར། །ཞེས་བྱ་བ་ནི་བདེ་འགྲོའི་གྲག་པ་ཙམ་ཡང་སྤངས་པའོ། །བདེ་འགྲོའི་རྒྱུ་ནི་དགེ་བ་ཉིད་ཡིན་ན། དེ་མེད་པར་བདེ་འགྲོ་ག་ལས་འབྱུང་སྙམ་དུ་དགོངས་པ་ཡིན་ནོ། །བསྐལ་པ་བྱེ་བ་བརྒྱར་ཡང་ནི། །ཞེས་བྱ་བ་ནི་ངན་སོང་གཅིག་ནས་ངན་སོང་གཞན་དུ་འགྲོ་བའི་ཕྱིར་རོ། །དེ་ཉིད་ལུང་ལས་ཀྱང་བསྟན་ཏོ་ཞེས། དེ་ཉིད་ཕྱིར་ན་ཞེས་བྱ་བ་ལ་སོགས་པ་གསུངས་ཏེ། མི་ཉིད་ཅེས་བྱ་བ་ནི་མི་ཁོམ་པ་བརྒྱད་རྣམ་པར་སྤངས་པའི་མིའི་ལུས་སོ། །འདིར་དཔེར་བརྗོད་པ་བསྟན་པ་ནི། རྒྱ་མཚོ་ཆེར་གཡེངས་ཞེས་བྱ་བ་ལ་སོགས་པ་ཡིན་ཏེ། དཔེར་ན་ཡོངས་སུ་བརྟག་པ་ཉེ་བར་བཟུང་སྟེ་འཛམ་བུའི་གླིང་ཐམས་ཅད་རྒྱ་མཚོ་ཆེན་པོའི་ཆུ་གཅིག་གི་གཞིར་གྱུར་ལ། དེར་ཡང་གཉའ་ཤིང་བུག་གཅིག་པ་ཡོངས་སུ་འཕྱོ་བ་ལ་ཤར་ནས་རླུང་གིས་ནུབ་ཀྱི་འགྲམ་དུ་ནུབ་ནས་རླུང་གིས་ཤར་གྱི་འགྲམ་དུ་ཁྱེར་ཞིང༌། དེ་བཞིན་དུ་ལྷོ་ནས་བྱང་དང༌། བྱང་ནས་ལྷོའི་འགྲམ་དུ་སྟེ། རྒྱ་མཚོ་དེར་རུས་སྦལ་ཞར་བ་གཅིག་གནས་ཤིང༌། དེ་ཡང་ལོ་བརྒྱ་འདས་པ་དང༌། མགྲིན་པ་བཏེགས་ནས་ལྟའོ། །ཇི་ལྟར་འགའ་ཞིག་ཏུ་འདི་འདྲ་བའི་ཚོགས་པ་ཡོད་པར་གྱུར་པ་སྟེ། ཤིང་གང་ཡིན་པ་མིག་ཞར་བ་དེའི་ཕྱོགས་སུ་སོང་བར་གྱུར་པ་དང༌། དེ་ལ་མི་ལྟ་ན་ཡང་དེའི་མགྲིན་པ་བུ་ག་
དེར་ཆུད་པ་བཞིན་དུ་མིའི་ལུས་ཐོབ་པ་ཡང་དཔེ་དེ་བཞིན་ནོ། །ཡང་ཅིའི་ཕྱིར་དེ་ལྟ་བུ་ཡིན་ཞེ་ན། སྐད་ཅིག་གཅིག་ཅེས་བྱ་བ་ལ་སོགས་པ་གསུངས་ཏེ། གང་ཡང་སྦྱོར་བའི་སྐད་ཅིག་མ་མང་མོད་ཀྱི། དེ་ལྟ་ན་ཡང་དངོས་པོ་གཞི་མཚམས་མེད་པ་ནི་སྐད་ཅིག་མ་གཅིག་ཉིད་ལ་འགྲུབ་པར་འགྱུར་ཏེ། དེ་ལྟར་གཞན་ལ་ཡང་བལྟ་བར་བྱའོ། །ཡང་ན་ཤིན་ཏུ་མྱུར་བར་བྱེད་པའི་ཕྱིར་སྐད་ཅིག་མ་མང་པོ་ཉིད་ལ་སྐད་ཅིག་མ་གཅིག་ཅེས་བརྗོད་དེ། དཔེར་ན་མིག་བཙུམས་པ་དུ་མའི་བྱ་བ་ལ་ཡང་མྱུར་བར་བསྟན་པར་བྱ་བའི་དོན་དུ་མིག་བཙུམས་པ་ཙམ་གྱིས་བྱེད་དོ་ཞེས་བརྗོད་པ་ལྟ་བུའོ། །བསྐལ་པར་གནས་གྱུར་ན་ཞེས་བྱ་བ་ནི་བར་གྱི་བསྐལ་པ་གཅིག་སྟེ། མནར་མེད་པ་བར་གྱི་བསྐལ་པར་བརྗོད་དོ་ཞེས་བསྟན་པའི་ཕྱིར་རོ། །འཁོར་བ་ཐོག་མ་དང་ཐ་མ་མེད་པར་ཡང་ཐོག་མེད་དུས་ནས་བྱས་ཤིང་བསགས་པས་ཏེ། བྱས་པ་ཙམ་དང་བསགས་པ་ཙམ་གྱི་སྡིག་པ་ཡིས་སོ། །བདེ་འགྲོར་མི་འགྲོ་སྨོས་ཅི་དགོས་ཏེ། བདེ་འགྲོའི་གྲག་པ་ཙམ་ཡང་མེད་དོ་ཞེས་བྱ་བའི་དོན་ཏོ། །འབྲས་བུ་ཉམས་སུ་མྱོང་ཟིན་པའི་ལས་ནི་ལྡོག་པ་མེད་ཅིང༌། འབྲས་བུ་ཉམས་སུ་མྱོང་བཞིན་པ་ཡང་རྣམ་པར་སྨིན་པ་ཡོངས་སུ་འཛད་ན། དེ་ཇི་ལྟར་ན་དེ་ལྟར་འགྱུར་བ་ཡིན་ཞེ་ན། དེ་ཙམ་ཁོ་ན་ཞེས་བྱ་བ་ལ་སོགས་པ་གསུངས་ཏེ། ལས་ཀྱི་འབྲས་བུ་མྱོང་བ་ཙམ་ཁོ་ན་མྱོང་གྱུར་ནས་ཏེ། ཉམས་སུ་མྱོང་ནས་སོ། །དེ་ནི་ཞེས་བྱ་བ་བྱེད་པ་པོས་ཏེ། ལས་དེས་བསྐྱེད་པའི་སྡུག་བསྔལ་ལས་རྣམ་པར་གྲོལ་བར་མི་འགྱུར་བའོ། །གང་གིས་ན་ཅིའི་ཕྱིར་དེ་དག་མི་རིགས་པ་ཡིན་ཞེ་ན། གང་གི་ཕྱིར་དེ་ལས་བྱས་ཤིང་བསགས་པའི་སྡིག་པའི་ལས་ཀྱི་འབྲས་བུ་མྱོང་བར་བྱེད་ཅིང་སྡིག་པ་གཞན་སོགས་པར་བྱེད་དོ། །དེ་ཉིད་ཀྱི་ཕྱིར། རྒྱ་མཚོ་ཆེར་གཡེངས་གཉའ་ཤིང་གི་བུ་གར་ཞེས་བྱ་བ་ལ་སོགས་པའི་དཔེར་བརྗོད་པ་རིགས་པ་ཡིན་ནོ། །ཡང་དེ་བཞིན་དུ་དལ་བ་ཕུན་སུམ་ཚོགས་པ་ཐོབ་པ་ཡང་ཤིན་ཏུ་དཀོན་པར་རིག་ནས་གལ་ཏེ་དགེ་བའི་ཕྱོགས་འཕེལ་བར་བྱ་བའི་ཕྱིར་བརྩོན་པར་མི་བྱེད་ན་རྨོངས་པ་ལས་གཞན་འདིར་རྒྱུ་ཅི་ཞིག་ཡོད་སྙམ་དུ་བདག་ཉིད་སྐྱོ་བ་སྐྱེས་ནས་འདི་འདྲའི་ཞེས་བྱ་བ་ལ་སོགས་པ་གསུངས་ཏེ།
བདག་ཉིད་ཀྱིས་ཀྱང་བདག་ཉིད་ལ་སླུ་བ་དགེ་བའི་ནོར་ཉམས་པར་བྱེད་པ་འདི་ལས་བསླུས་པ་ཆེན་པོ་གཞན་མེད་དོ། །གཏི་མུག་ཀྱང་འདི་ལས་ཆེ་ཞིང་མཆོག་ཏུ་གྱུར་པ་འབྱུང་བ་མེད་དེ། །གང་ཞིག་དགེ་བའི་ཆོས་ཀྱི་ནོར་ལག་ན་གནས་པ་མཐོང་བཞིན་དུ་འཕྲོག་པ་ཡིན་ནོ། །དེ་ཉིད་བསྟན་པ་ནི་འདི་འདྲའི་ཞེས་བྱ་བ་ལ་སོགས་པ་ཡིན་ཏེ། འདི་ལྟར་མི་དགེ་བའི་ཕྱོགས་སྟོབས་ཆེ་བ་དང༌། དལ་བ་ཕུན་སུམ་ཚོགས་པ་མཆོག་ཏུ་དཀོན་པ་དང༌། གཏི་མུག་ནི་ཤིན་ཏུ་ནུས་པ་དང་ལྡན་པར་རིག་ནས་ཇི་སྐད་དུ་བསྟན་པའི་བསླབ་པ་སྒྲུབ་པའི་ཕྱིར་དང༌། རང་གི་སེམས་བརྟན་པར་བྱ་བའི་ཕྱིར། གལ་ཏེ་བདག་གིས་ཞེས་བྱ་བ་ལ་སོགས་བའི་ཚིགས་སུ་བཅད་པ་རྣམས་ཀྱིས་བདག་ཉིད་ཀྱི་ཚུལ་འདི་བརྟགས་ནས་བརྩོན་འགྲུས་བསྐྱེད་པ་ནི། དེ་ལྟར་ཞེས་བྱ་བ་ལ་སོགས་པ་གསུངས་ཏེ། དེ་དག་བརྟེན་པར་སྤྱད་པར་བྱའོ། །ཕྱིར་ཡང་སྒྱིད་ལུག་ན་ནི་ལེ་ལོར་གྱུར་པ་སྟེ། དགེ་བའི་ལས་རྣམས་ལ་སྤྲོ་བ་མེད་པའམ་ཡིད་བསད་པར་གྱུར་ནའོ། །ཅི་ཞིག་གིས་ཤེ་ན། རྨོངས་པ་སྟེ། གལ་ཏེ་རྨོངས་པའི་དབང་དུ་གྱུར་ནས་སོ། །དེའི་ཚེ་མྱ་ངན་ལྡང་བར་འགྱུར་ཏེ། མྱ་ངན་འབྱུང་བར་འགྱུར་བའོ། །སེམས་ཅན་དམྱལ་བ་ལ་སོགས་པའི་འགྲོ་བར་ཡུན་རིང་དུ་ནི་དུས་རིང་པོར་ཏེ། ཕྱིར་ཞིང་ནི་ཇི་ལྟར་སྔར་མ་བསླབས་བས་མྱ་ངན་དང་ལྡན་པ་བཞིན་དུ་སླར་ཡང་ངོ༌། །གཤིན་རྗེའི་ཕོ་ཉས་ནི་སེམས་ཅན་དམྱལ་བའི་སྲུང་མ་བསྡིགས་པ་དང་བརྡེག་པ་ལ་སོགས་པའི་ལས་བྱེད་པ་རྣམས་ཀྱིས་ཏེ། ཅིའི་ཕྱིར་ཁྱོད་ཀྱིས་སྔར་འདི་ལྟ་བུ་བྱས་ཞེས་བརྗོད་ཅིང་སྔར་བྱས་པའི་ལས་རྗེས་སུ་དྲན་པས་སམ། དེ་བཞིན་དུ་བརྡེག་པ་ལ་སོགས་པ་སྔོན་དུ་འགྲོ་བས་སོང་ཞིག་སྡོད་ཅིག་ཅེས་ཟེར་བས་བསྐུལ་བས་ནའོ། །བག་མེད་པའི་འབྲས་བུ་གཞན་ཡང་ཡོད་དོ་ཞེས་བསྟན་པ་ནི། དམྱལ་མེ་ཞེས་བྱ་བ་ལ་སོགས་པ་ཡིན་ཏེ། །སེམས་ཅན་དམྱལ་བའི་མེ་དེ་ནི་སེམས་ཅན་དམྱལ་བ་པ་རྣམས་བསྲེག་པའི་ཕྱིར་རབ་ཏུ་སྤང་བ་ཡིན་པས་དམྱལ་བ་པའིའོ། །བཟོད་དཀའ་ནི་ཤིན་ཏུ་སྡུག་བསྔལ་བས་བསྟན་པར་མི་ནུས་པའོ། །བདག་གིས་དེ་ལྟར་ཅི་སྟེ་བྱ་སྙམ་ནས་ཕྱིས་གདུང་བ་དེ་ཉིད་མེ་དང་འདྲ་བ་སྟེ། སེམས་སྲེག་པར་བྱེད་པའི་ཕྱིར་རོ། །མ་བསླབས་ཞེས་བྱ་བ་ནི་བསླབ་པ་མེད་པ་སྟེ་མ་བསྡམས་པ་ཞེས་བྱ་བའི་དོན་ཏོ། །ཡང་བདག་ཉིད་
ཀྱིས་བརྟགས་པ། ཤིན་ཏུ་ཞེས་བྱ་བ་ལ་སོགས་པ་གསུངས་པ་ལ། ཕན་པའི་ས་ནི་ཕན་པ་དང་བདེ་བའི་དོན་དུ་དལ་བ་ཕུན་སུམ་ཚོགས་པ་དང༌། དགེ་བའི་བཤེས་གཉེན་དང་ཕྲད་པ་ཤིན་ཏུ་རྙེད་དཀའ་བ་ནི་བསྟན་ཟིན་ཏོ། །ཤེས་དང་ཡང་ལྡན་བཞིན་དུ་སྟེ། དཔྱོད་པ་ཡང་འབྱུང་བཞིན་དུ་དེར་སླར་ཡང་ཁྲིད་ནས་སོ། །གལ་ཏེ་ཤེས་པ་ཡོད་ན་ཇི་ལྟར་ན་ཁྲིད་ཅེ་ན། སྔགས་ཀྱིས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དོན་འདི་ལ་བདག་གི་སེམས་ཀྱིས་འཕྲིགས་པ་མེད་པའོ། །ཅིའི་ཕྱིར་དེ་ལྟར་འགྱུར། འདིར་རིགས་པ་ནི་ཅི་ཡོད། དེ་དག་ཏུ་ཡང་ཇི་ལྟར་འགྱུར་ཞེ་ན། འདིར་སྔགས་ཀྱིས་རྨོངས་པར་བྱས་པ་བཞིན་ཞེས་གསུངས་ཏེ། སྔགས་ཀྱང་གང་གིས་རྨོངས་པར་བྱས་ཤེ་ན། ཅིས་རྨོངས་བདག་གིས་ཀྱང་མི་ཤེས་ཏེ་ཞེས་སོ། །ཁྱོད་ཀྱི་ཁོང་ན་གནས་པ་འགའ་ཞིག་ཡོད་པར་འགྱུར་རོ་ཞེ་ན་བདག་གི་ཁོང་ན་ཅི་ཞིག་ཡོད་ཅེའོ།། ཉོན་མོངས་པའི་དགྲ་ཉིད་དག་ཡོད་པ་མ་ཡིན་ནམ་ཞེ་ན། འདིར་ཞེ་སྡང་ཞེས་བྱ་བ་ལ་སོགས་པ་གསུངས་ཏེ། སོགས་པའི་སྒྲས་ནི་མགོ་བོ་ལ་སོགས་པ་མེད་པར་བརྗོད་དེ། འདིས་ནི་དེ་དག་དབང་པོ་ཐམས་ཅད་ཀྱིས་སྟོང་བར་བསྟན་ཏོ། །ཞེ་སྡང་ནི་ཁོང་ཁྲོ་བའོ། །སྲིད་པ་ནི་ཡང་སྲིད་ལ་མངོན་པར་དགའ་བ་དང་དགའ་བའི་འདོད་ཆགས་ཀྱི་མོད་ལ་སྐྱེས་པའོ། །སོགས་པའི་སྒྲས་ང་རྒྱལ་ལ་སོགས་པ་ཕྲ་རྒྱས་བཅུ་གཟུང་བར་བྱ་སྟེ། སྲིད་པའི་རྩ་བ་ཕྲ་རྒྱས་དྲུག །འདོད་ཆགས་ཁོང་ཁྲོ་དེ་བཞིན་དུ། །ང་རྒྱལ་དང་ནི་མ་རིག་པ། །ལྟ་བ་ཐེ་ཚོམ་དེ་དག་བཅུ། །ཞེས་གང་གསུངས་པའོ། །ལྟ་བ་རྣམ་པ་ལྔར་ཕྱེ་བས་བཅུར་འགྱུར་ཏེ། འདི་ལྟ་སྟེ། འཇིག་ཚོགས་ལ་ལྟ་བ་དང༌། ལོག་པར་ལྟ་བ་དང༌། མཐར་འཛིན་པར་ལྟ་བ་དང༌། ལྟ་བ་མཆོག་ཏུ་འཛིན་པ་དང༌། ཚུལ་ཁྲིམས་དང་བརྟུལ་ཞུགས་མཆོག་ཏུ་འཛིན་པའོ། །དེ་དག་ནི་ལམ་དང་ཁམས་བདེན་པའི་རབ་ཏུ་དབྱེ་བས་དགུ་བཅུ་རྩ་བརྒྱད་དུ་འགྱུར་རོ། །ཡང་བྱང་ཆུབ་སེམས་དཔའི་ནི་བརྒྱ་ཉི་ཤུར་འགྱུར་བ་ཡིན་ནོ། །དཔའ་བ་སྟེ་དཔའ་བརྟན་དང་མི་ལྡན་པའོ། །མཛངས་མིན་ཏེ་ཡིད་གཞུངས་པ་དང་ལྡན་པ་མ་ཡིན་པའོ། །དེ་ལྟ་བུར་གྱུར་པའི་ཡན་ལག་ཐམས་ཅད་མ་
ཚང་བ་རྣམས་ཀྱིས་ཀྱང་ཇི་ཞིག་ལྟར་དེ་དག་གིས་བདག་བྲན་བཞིན་བྱས་སོ་སྙམ་དུ་རང་ཉིད་ལ་རྣམ་པར་དཔྱོད་པར་བྱེད་པ་ཡིན་ནོ། །འདི་ནི་ཤིན་ཏུ་ཡང་ངོ་མཚར་ཆེ་བ་ཡིན་ནོ་ཞེས། བདག་གི་སེམས་ལ་ཞེས་བྱ་བ་ལ་སོགས་པ་གསུངས་ཏེ། བདག་གི་སེམས་ཉིད་ལ་བརྟེན་བཅས་ནས་བདག་ཉིད་ལ་གནོད་པ་བྱེད་པ་སྟེ། དགའ་མགུར་ཞེས་བྱ་བ་ནི་འཇིག་རྟེན་པ་མེད་པར་རམ་སེམས་པའང་མེད་པར་རོ། །བསྟེན་པ་རྣམས་ནི་དེ་མི་རིགས་སོ། །དེ་ལའང་ནི་དེ་ལྟར་ན་དྲན་ཡང་སྟེ། མི་རིགས་པའི་ཚུལ་ཅན་དེ་དག་ལའང་བདག་མི་ཁྲོའོ་ཞེས་ཚིག་ཟུར་གྱིས་སྟོན་པ་ཡིན་ནོ། །བྱང་ཆུབ་ཏུ་སེམས་བསྐྱེད་པས་ནི་གཞན་གནོད་པ་བྱེད་པ་ལ་ཇི་མི་སྙམ་པ་རིགས་པ་ཉིད་མ་ཡིན་ནམ་ཞེ་ན། འདིར། གནས་མིན་ཞེས་གསུངས་ཏེ། ཡུལ་འདི་ལྟ་བུ་ལ་བཟོད་པའི་ངང་ཚུལ་ཅན་ནི་སྨད་པ་ཡིན་ནོ། །ཅིའི་ཕྱིར་དེ་ལྟར་དེ་དག་ཁྱོད་མི་བཟོད་ཅེ་ན། གལ་ཏེ་ཞེས་བྱ་བ་ལ་སོགས་པ་གསུངས་ཏེ། དེ་དག་གིས་ཇི་ལྟར་དམྱལ་བ་ལ་སོགས་པའི་སྡུག་བསྔལ་སྐྱེད་པར་བྱེད་པ་དེ་ལྟར་དགྲ་གཞན་དག་གིས་ཁྲིད་ཅིང་སྤྱོད་པར་མི་ནུས་ཤིང་མི་ལྕོགས་སོ། །མནར་མེད་པའི་མེ་ཅི་འདྲ་བ་ཞིག་ཅེ་ན། རི་རབ་ཀྱང་ཞེས་བྱ་བ་ལ་སོགས་པ་གསུངས་པ་ཡིན་ཏེ། རི་རབ་ཀྱང་ཞེས་བྱ་བ་ནི་གཞན་ངན་ངོན་ལྟར་རེ་ཞིག་ཞོག །རིའི་རྒྱལ་པོ་དང་མེ་ཕྲད་ན་ཡང་ཐལ་བ་ཡང་མི་མངོན་པར་བྱེད་དེ། མེ་དྲག་པོའི་འབར་བ་ཆེན་པོས་སྲེག་པར་བྱེད་པའི་ཕྱིར་རོ། །དེར་བདག་སྐད་ཅིག་གཅིག་ལ་འདོར་ཏེ་འདི་འདྲ་བའི་མེར་རོ། །མཚམས་མེད་པའི་ལས་ཀྱི་རྒྱུ་རྣམས་ནི་སྟོབས་ཅན་ནུས་པ་དང་ལྡན་པ་སྟེ། གཉེན་པོས་ཀུན་ནས་སློང་བ་མེད་པའི་ཕྱིར་རོ། །འོ་ན་ཁྱོད་དེ་དག་ལ་ལ་ནི་དེ་ལྟར་འཁོན་དུ་འཛིན་པ་དམ་པོར་བྱེད་ལ་དགྲ་གཞན་དག་ལ་ནི་མ་ཡིན་པ་ཇི་ལྟ་བུ་ཡིན་ཞེ་ན། བདག་གི་ཞེས་བྱ་བ་ལ་སོགས་པ་གསུངས་པ་ཡིན་ཏེ། ཐོག་མཐའ་མེད་པ་ཞེས་བྱ་བ་ནི་སྔོན་དང་ཕྱི་མའི་དུས་ཏེ། འཁོར་བ་མཐར་ཐུག་པ་མ་ཡིན་པའི་ཕྱིར་རོ། །གཞན་དག་ལ་ནི་ཉི་མ་སོ་སོར་ངེས་པར་གནས་པ་ཡིན་པའི་ཕྱིར་རོ། །དགྲ་གཞན་ཀུན་ནི་ལྷ་དང་མི་ལ་སོགས་པའོ། །འོ་ན་དེ་དང་མཐུན་པར་སྤྱད་ན་དབང་དུ་འགྱུར་བ་དང་ཕན་པ་དང་བདེ་བ་སྒྲུབ་པར་བྱེད་པར་འགྱུར་བ་མ་ཡིན་ནམ་ཞེ་ན།
འདིར་མཐུན་པར་ཞེས་བྱ་བ་ལ་སོགས་པ་གསུངས་ཏེ། ཉོན་མོངས་པ་འདི་དག་ནི་དེ་བཞིན་དུ་རྗེས་སུ་འབྲང་ན་མི་ཕན་པ་བྱེད་པ་ཡིན་པའི་ཕྱིར་སེམས་ཅན་དམྱལ་བ་ལ་སོགས་པའི་སྡུག་བསྔལ་ཤིན་ཏུ་སྐྱེད་པར་བྱེད་པ་ཡིན་ཏེ། རང་བཞིན་མི་སྲུན་པའི་ཕྱིར་ནན་གྱིས་གཞོམ་པར་བྱ་བ་ཉིད་ཡིན་ནོ། །དེ་བས་ན་ངེས་པར་འདི་དག་ཉིད་བདག་གིས་བྱ་བར་འོས་པ་ཡིན་ནོ་ཞེས་གསུངས་པ། དེ་ལྟར་ཞེས་ཏེ་དེ་བཞིན་དུ་རྒྱུན་ཆགས་ཤིང་བར་མེད་པར་ཏེ། དུས་ཐོག་མཐའ་མེད་པར་ཉེ་བར་གནས་པའི་ཕྱིར་དང༌། ཉེ་བར་འཇོམས་པར་བྱེད་པ་ཡིན་པའི་ཕྱིར། ཡུན་རིངས་དགྲར་གྱུར་པ་ཡིན་ནོ། །གླེགས་བམ་ལ་ལར་རྒྱུན་ཞེས་འདོན་པ་དེར་ནི་རྒྱུན་བར་མ་ཆད་པར་འཇུག་པའི་ཕྱིར་རོ་ཞེས་བཤད་པར་བྱའོ། །ཡང་ཁྱད་པར་དུ་བྱེད་པ་ནི། གནོད་པ་ཞེས་པ་ཡིན་ཏེ། སེམས་ཅན་དམྱལ་བ་ལ་སོགས་པའི་སྡུག་བསྔལ་གྱིས་གནོད་པ་ཇི་སྙེད་པ་རྣམས་ཏེ། དེ་སྐྱེ་བའི་རྒྱུ་གཅིག་པུ་ཁོ་ནའི་སྙིང་ལ་ལེགས་པར་གནས་བཅས་པ་དེ་དག་ཉིད། ཡོད་ན་འཁོར་བར་བདག་འཇིགས་པ་མེད་དེ་འཇིགས་པ་དང་བྲལ་ཞིང་དགའ་བར་ག་ལ་འགྱུར་ཏེ། མི་རིགས་སོ་ཞེས་བྱ་བའི་དོན་ཏོ། །ཡང་ཉོན་མོངས་པའི་དགྲ་བོ་རྣམས་སྤངས་པའི་ཕྱིར། ཤ་ཁོན་ཞུགས་པར་ཞེན་པ་ཡིད་ལ་བརྟེན་པར་གཞག་པའི་ཕྱིར། འཁོར་བའི་བཙོན་རའི་ཞེས་བྱ་བ་ལ་སོགས་པ་གསུངས་པ་ཡིན་ཏེ། ངེས་པར་འབྱུང་བའི་གནས་བྱེད་པའོ། །དམྱལ་སོགས་ནའང་གསོད་བྱེད་གཤེད་མ་ནི་གཤིན་རྗེའི་སྐྱེས་བུ་དེ་དག་ཡིན་ཏེ། ཉོན་མོངས་པའི་དབང་དུ་གྱུར་པ་ལ་ལས་ཀྱི་རྣམ་པར་སྨིན་པའི་དབང་གིས་དེ་དག་སྣང་བའི་ཕྱིར་རོ། །དེ་ལྟར་ཞེས་ཉེས་པ་མ་ལུས་པའི་འབྱུང་གནས་སུ་གྱུར་པ་དེ་དག་གལ་ཏེ་ཡིད་ཀྱི་ཁྱིམ་དུ་ཆགས་པའི་རང་བཞིན་གྱི་གཟེབ་གང་ཡིན་པ་དེར་གལ་ཏེ་གནས་པར་གྱུར་ན་སྟེ། རྫོད་ལ་བརྟེན་ནས་གལ་ཏེ་འདུག་ན་བདག་ལ་ག་ལ་བདེ། དེ་བས་ན་འདིར་བདག་གི་འདི་ཉིད་ནི་རིགས་པ་ཡིན་ནོ་སྙམ་དུ་བསྟན་པར་བྱ་བ། དེ་ལྟར་ཞེས་བྱ་བ་ལ་སོགས་པ་གསུངས་ཏེ་གང་གི་ཕྱིར་དེ་ལྟར་དེ་དག་ཉེས་པ་ཐམས་ཅད་ཀྱི་རྒྱུ་ཡིན་པ་དེའི་ཕྱིར་རོ། །ཁུར་ཞེས་བྱ་བ་ནི་གླང་གི་རྒྱབ་ཏུ་བཀལ་བའི་ཁལ་ཞེས་བྱའོ། །ཁུར་དང་མཚུངས་པས་ན་ཁུར་ཏེ་
དམ་བཅས་པ་འཛིན་པའོ། །འདི་ཞེས་བྱ་བ་ནི་ཉོན་མོངས་པའི་རང་བཞིན་ཏེ། མདུན་ན་འདུག་པའི་ཕྱིར་མངོན་སུམ་དུ་སྒྲོས་བཏགས་ན་འདི་ཞེས་བསྟན་ཏོ། །མངོན་སུམ་དུ་ཞེས་བྱ་བ་ནི་བདག་གིས་མཐོང་བ་བཞིན་དུའོ། །ངེས་པར་བཅོམ་པ་ནི་རྩ་བ་ནས་མེད་པར་རོ། །ཆུང་དུ་ལ་ཡང་ནི་གནོད་པ་ཆུང་དུ་བྱེད་པ་ལའང་སྟེ་ཕ་དང་མས་བྱས་པའི་འཁོན་གྱི་རྒྱུ་མཚན་ལའང་ངོ༌། །ཡང་ན་དངོས་པོ་རྒྱུ་ཆུང་དུ་ལའོ། །ཁྲོས་གྱུར་པ་ནི་སྙིང་ལ་དགྲར་བྱས་པའི་ཞེན་པ་བརྟན་པོ་གཞག་པ་སྟེ། འཁོན་དུ་འཛིན་པ་ཞེས་བྱ་བའི་དོན་ཏོ། །ང་རྒྱལ་བདོ་རྣམས་ནི་ང་རྒྱལ་འབར་བའི་ང་རྒྱལ་ཅན་རྣམས་སོ། །དེ་ཞེས་པ་ནི་གནོད་པ་བྱེད་པའོ། །མ་བཅོམ་པ་ནི་དེ་གཞོམ་པར་མ་བྱས་པར་རོ། །གཉིད་མི་འོང་ནི་སེམས་ལས་མེད་པ་དང་བདེ་བ་དང་ལྡན་པར་མི་འགྱུར་བའོ། །སྐབས་སུ་བབ་པ་དོར་ནས་གོ་བགོས་པ་ཉིད་བསྟན་པར་བྱ་བ། རང་བཞིན་ཞེས་བྱ་བ་ལ་སོགས་པ་གསུངས་ཏེ། རང་བཞིན་གྱིས་ནི་ངོ་བོ་ཉིད་ཀྱིས་འཆི་བ་སྟེ། གསོན་པའི་མཐའ་ནི་འཆི་བ་ཡིན་ནོ་ཞེས་བྱ་བའི་ཕྱིར་རོ། །གང་ལ་དེ་ཡོད་པ་དེ་ལ་དེ་སྐད་ཅེས་བྱ་སྟེ། དེ་ཡང་ཡིན་ལ་དེ་སྡུག་བསྔལ་བ་ཡིན་པའོ། །དེ་དག་སྐྱེ་བ་ལ་སོགས་པའི་སྡུག་བསྔལ་གྱིས་གཟིར་བར་གྱུར་པའམ། དེས་སྡུག་བསྔལ་བར་གྱུར་བའོ། །དེ་ཉིད་ཀྱི་ཕྱིར་ཉོན་མོངས་པ་དག་ཡིན་ཏེ། སྙིང་རྗེ་བའོ། །གཡུལ་ངོར་དངར་ཚེ་ནི་གཡུལ་སྤྲད་པར་བྱ་བའི་གནས་གཙོ་བོ་སྟེ། གཡུལ་གྱི་ས་གཞིའི་སྟོབས་དང་ལྡན་པའི་དཔུང་གང་ན་པར་ཞེས་བྱ་བའི་དོན་ཏོ། །ནན་གྱིས་ཞེས་བྱ་བ་ནི་བཙན་ཐབས་སུ་སྟེ། ནུས་པ་ཇི་ལྟ་བ་བཞིན་དུ་ཞེས་བྱ་བའི་དོན་ཏོ། །གཞོམ་ཕྱིར་ནི་སྲོག་དང་བྲལ་བའི་ཕྱིར་རོ། །དྲག་ཤུལ་ཅན་ནི་གཟི་མདངས་ཅན་ཏེ། བརྩོན་པ་བརྩམས་པ་ཞེས་བྱ་བའི་དོན་ཏོ། །ཇི་ལྟ་བུར་གྱུར་པ་ཞིག་ཅེ་ན། མདའ་མདུང་གི་མཚོན་གྱིས་ཕོག་པའི་སྡུག་བསྔལ་ཁྱད་བསད་ནས་ཏེ། གཡུལ་ངོར་མཚོན་གྱིས་སྨས་པ་མི་སེམས་པར་ཏེ། སྐྱེས་བུ་དཔའ་བོ་ཞེས་བྱ་བའི་དོན་ཏོ། །ཕྱིར་ཕྱོགས་འབྱོར་བར་མི་བྱེད་ན་ནི་ཁ་ཕྱིར་ལྡོག་པར་མི་འགྱུར་བའོ། །དོན་མ་གྲུབ་པ་ནི་མངོན་པར་འདོད་པར་གྲུབ་པར་མ་བྱས་པར་རོ། །བརྟན་པ་རྣམ་པས་ཉོན་མོངས་པ་
ལྷག་པར་གསུངས་པ། རྟག་ཏུ་ཞེས་བྱ་བ་ལ་སོགས་པ་གསུངས་པ་ཡིན་ཏེ། རྟག་ཏུ་ནི་དུས་ཐམས་ཅད་དུའོ། །རང་བཞིན་གྱིས་ཏེ་གནོད་པ་མ་བྱས་ཤིང་རྒྱུ་མེད་པའི་དགྲ་རྣམས་སོ། །བརྩོན་པ་ནི་འབད་པ་སྟེ། བརྩོན་པར་བྱས་པ་ཞེས་བྱ་བའི་དོན་ཏོ། །དེང་ཞེས་པ་ནི་དུས་འདིར་ཞེས་པ་སྟེ། འདི་ནི་འཇིག་རྟེན་གྱི་སྨྲ་ལུགས་སོ། །སྒྱིད་ལུག་པ་ནི་བྱ་བར་འོས་པ་རྣམས་ལ་ནི་ནུས་སོ་སྙམ་པའི་ཞན་པའོ། །ཡི་ཆད་ནི་སེམས་ཞུམ་པའམ། དང་བ་མེད་པའམ། བསམ་པ་དམན་པའོ། །འདི་ནི་ཚིག་བསྡུས་པ་སྟེ། ཡི་ཆད་པ་མི་འབྱུང་བ་སྒྱིད་ལུག་པ་མི་འབྱུང་བ་ཞེས་བྱ་བའོ། །སྨོས་ཅི་དགོས་ཞེས་བྱ་བ་ནི་དེ་བས་ཀྱང་ལྷག་པ་ཞེས་བྱ་བའོ། །སྡུག་བསྔལ་བརྒྱ་ཕྲག་ནི་ངལ་བ་བརྒྱ་ཕྲག་གམ། སྡུག་བསྔལ་བརྒྱ་ཕྲག་གིའོ། །རྒྱུར་གྱུར་པ་གང་གིས་ཀྱང་ཞེས་པ་ནི་རང་གི་སེམས་ཀྱི་རྟོག་པ་སྟེ། མི་རིགས་པ་ཡིན་ནོ་ཞེས་བྱ་བའི་དོན་ཏོ། །ཇི་ལྟར་ན་མི་རིགས་པ་ཡིན་ཞེ་ན། དོན་མེད་ཅེས་བྱ་བ་ལ་སོགས་པ་གསུངས་ཏེ། དོན་མེད་ཅེས་བྱ་བ་ནི་འདིར་འཇིག་རྟེན་ཕ་རོལ་ལ་སོགས་པར་དག་པར་འགྱུར་བའི་དགོས་པ་གཞན་ཅུང་ཟད་ཀྱང་མེད་པའོ། །དེ་ལྟ་ན་ཡང་དགྲའི་མཚོན་ཆ་ཡིས་སྨས་པའི་རྨ་བརླ་དང༌། སྙིང་ག་དང༌། དཔུང་བ་དང༌། ལག་པ་ལ་སོགས་པ་ལུས་ལ་རྒྱན་དང་ལྡན་པ་སྟེ། རྒྱན་ཆ་བཞིན་དུ་ཡིད་དགའ་བས་འཆང་བར་བྱེད་ན། འདི་བདག་ལ་ཇི་ལྟར་མི་རིགས་ཤེ་ན། དོན་ཆེན་ཞེས་བྱ་བ་ལ་སོགས་པ་གསུངས་ཏེ། དོན་ཆེན་ནི་འགྲོ་བ་ཐམས་ཅད་སངས་རྒྱས་ཉིད་དུ་སྒྲུབ་པ་སྟེ་སྒྲུབ་པར་བྱེད་པ་དེའི་དོན་དུའོ། །བརྩོན་འགྲུས་བརྩམས་པ་ལ་ཅིའི་ཕྱིར་ཞེས་སྤོང་བར་བྱེད་པ་ཡིན་ནོ། །མཆོག་ཏུ་དད་པའི་རྒྱུ་སྡུག་བསྔལ་དེ་འདྲ་བ་ནི་ཅི་བདག་ལ་རིགས་པ་ཉིད་མ་ཡིན་ནམ། གང་འགྲོ་བའི་གདུང་སེལ་སྡུག་བསྔལ་ལ། དགའ་བ་འབའ་ཞིག་འདིར་བྱ་རིགས། །ཞེས་བརྗོད་པར་འགྱུར་བའོ། །གལ་ཏེ་དེ་ལྟར་བརྩོན་པར་བྱེད་པ་དེ་ལྟ་ཡིན་ན་ཡང་རང་གི་བདེ་བ་དང་མི་འགལ་བ་ཉིད་དུ་བརྩོན་པར་བྱ་བར་རིགས་པ་ཡིན་ནོ་ཞེ་ན། འདིར་ཉ་པ་ཞེས་བྱ་བ་ལ་སོགས་པ་གསུངས་ཏེ། རང་གི་ཆུང་མ་དང་བུ་ལ་སོགས་པ་དགང་བ་དང་གསོ་བ་ལ་སོགས་པ་བྱ་
བ་ལ་སེམས་ཆགས་པའི་ཉ་པ་ནི་ཉའི་དགྲ་སྟེ། ཉ་འཚེ་བ་ལ་ཡིད་ཆགས་པའོ། །དགུན་གྱི་དུས་ཀྱི་མཚན་མོ་ཁ་བའི་ཚིགས་སྡུག་པར་འཇུག་པར་བྱེད་པ་དང༌། ཆོམ་རྐུན་དང༌། སྟག་ལ་སོགས་བའི་འཇིགས་པ་ལ་མི་ལྟོས་པ་དང༌། དེ་བཞིན་དུ་ཤན་པ་ལ་སོགས་པ་དང༌། དེ་ལྟར་གདོལ་པ་ཡང་རྟག་ཏུ་ལས་མ་ཡིན་པ་ལ་དགའ་བ། གཞན་གྱི་ནོར་འཕྲོག་པ་ལ་སོགས་པའི་བསམ་པ་ཅན་ནི་ཚེར་མ་ཅན་དང་ཐག་ཐུག་དང་གསེག་མ་ཅན་བགྲོད་དཀའ་བའི་སའི་ཆ་འབྲོག་གི་ལམ་དུ་རླུང་དང་ཚད་པ་དང༌། ཐོག་དང༌། ཆར་བབ་པ་དང༌། མུན་པ་དང་ལྡན་པའི་མཚན་མོ་སྡིག་སྤྲུལ་ལ་སོགས་པའི་འཇིགས་པའི་སྡུག་བསྔལ་རྩིས་མེད་པར་འགྲོ་བ་ན་སྲོག་ལ་ཐེ་ཚོམ་ཟ་བ་བྱ་དཀའ་བའི་ལས་ལ་འཇུག་པར་བྱེད་དོ། །དེ་བཞིན་དུ་གཞན་གྱི་བུད་མེད་ལ་སྤྱོད་པ་ལ་སོགས་པ་དང༌། དེ་ལྟར་ཞིང་པ་སྟེ་རྨོད་པར་བྱེད་པ་པོ་ཞིང་གི་ལས་ཀྱིས་ཉེ་བར་འཚོ་བ་ཞིང་རྨོད་པ་ལ་སོགས་པའི་བྱེད་པ་བྱས་པ་རྣམས་ཀྱང་ཉིན་མཚན་དུ་གྲང་བ་དང༌། ཚ་བ་དང༌། རླུང་ལ་སོགས་པའི་སྡུག་བསྔལ་ཉམས་སུ་མྱོང་བ་མཐོང་བ་ཉིད་ཡིན་ནོ། །དེ་བཞིན་དུ་བདག་གི་གདོང་དུ་ལྟ་ཞིང་འཚོ་བ་ཞབས་འབྲིང་བ་ལ་སོགས་པ་དང༌། དེ་ལྟར་དམན་པའི་ལས་ལ་མངོན་པར་དགའ་བ་དེ་དག་ཀྱང་གྲང་བ་དང་ཚ་བ་ལ་སོགས་པའི་གནོད་པ་བཟོད་ན་འགྲོ་བ་ལ་ཕན་པ་དང་བདེ་བའི་དོན་དང་སྐྱེས་བུ་མཆོག་གི་དོན་གྱི་ཕྱིར་ཇི་ལྟར་ན་བདག་གིས་མི་བཟོད། བདག་གིས་སླར་ཤིན་ཏུ་ཡང་བསྟེན་པར་བྱ་བར་རིགས་པ་ཡིན་ནོ་སྙམ་དུ་དགོངས་པའོ། །འོ་ན་གལ་ཏེ་སེམས་ཅན་ཐམས་ཅད་ལ་ཕན་པ་དང་བདེ་བ་བསྒྲུབ་པའི་ཕྱིར་སྨོན་ལམ་བཏབ་པ་དེ་ལྟ་ཡིན་ན། དེའི་ཚེ་དེ་ཉིད་ལ་ནན་ཏན་བྱ་བའི་ཕྱིར་བརྩོན་པར་བྱ་བ་ཉིད་ཡིན་ན། ཅིའི་ཕྱིར་རང་ཉིད་ཀྱི་སྲེད་པ་ལ་སོགས་པ་སྤོང་པ་གཙོ་བོ་མ་ཡིན་ཞིང་དགོས་པ་མེད་པའི་དོན་དུ་བརྩོན་འགྲུས་རྩོམ་པར་བྱེད་ཅེ་ན། དེའི་ཕྱིར། ཕྱོགས་བཅུའི་ཞེས་བྱ་བ་ལ་སོགས་པ་གསུངས་ཏེ། ཕྱོགས་བཅུའི་ནམ་མཁའི་ཚད་ཀྱི་འཚོ་བའི་འཇིག་རྟེན་གྱི་སྡུག་བསྔལ་ཐམས་ཅད་རྣམ་པར་དགྲོལ་བའི་ཕྱིར་སེམས་བསྐྱེད་ཅིང་ཚིག་ཏུ་ཡང་ཆེར་བཏོན་ནས་གཞན་དག་ལྟ་ཞོག །གང་གི་ཚེ་བདག་ཉིད་ཀྱང་སྲེད་པ་ལ་
སོགས་པའི་ཉོན་མོངས་པ་རྣམས་མ་གྲོལ་བ་དེའི་ཚེ་རང་གི་ནུས་པ་ལ་མ་བལྟས་པ་ཁོ་ནར་ཚིག་ཏུ་རྗོད་པར་བྱེད་པ་ནི་སེམས་རྣམ་པར་འཁྲུགས་པར་གྱུར་པ་ཡིན་ནོ་སྙམ་དུ་བསམས་ནས་ཕྱིར་མི་ལོག་པར་དམ་བཅས་པ་ལས་བརྟན་པར་འགྱུར་བར་བྱའོ། །འདིར་དགོངས་པ་ནི་འདི་ཡིན་ཏེ། བདག་གི་ཉོན་མོངས་པ་མ་སྤངས་པར་གཞན་གྱི་ཉོན་མོངས་པ་སྤང་བ་ཞེས་བྱ་བ་ནི་མི་ནུས་ཏེ། དེ་བས་ན་དེའི་ཐབས་ཡིན་པའི་ཕྱིར་དེ་ཉིད་དང་པོར་ངེས་པར་ཉམས་སུ་བླང་བར་བྱ་བ་ཉིད་ཡིན་ཏེ། བདག་ཉིད་ཀྱང་མ་དུལ་བར་གཞན་གདུལ་བར་མི་ནུས་པར་མི་འགྱུར་རོ། །དེ་ལྟ་བས་ན་སྡུག་བསྔལ་ཐམས་ཅད་ཁྱད་དུ་བསད་ནས། འདིར་ཞེན་བྱ་ཞིང་སྟེ་འདིར་ཉོན་མོངས་པ་གཞོམ་པའི་དོན་དུ་བརྩོན་འགྲུས་བརྟེན་པ་ལ་ནན་ཏན་དུ་བྱའོ། །ཁོན་དུ་བཟུང་ནས་ནི་ཁོན་མ་བརྗེད་པའོ། །གཡུལ་སྤྲད་ནི་རྩོད་པས་ཡིད་བྱུང་བ་སྤངས་པ་རྣམ་པ་ཐམས་ཅད་དུ་འཐབ་མོ་བརྩམ་པའོ། །ཡང་ན་འོ་ན་གལ་ཏེ་ཐོག་མ་ཉིད་དུ་བདག་ཉིད་ཀྱི་ཉོན་མོངས་པ་སྤངས་པར་མ་གྱུར་ན་འདི་ལ་མི་རིགས་པ་ཅི་ཞིག་ཏུ་འགྱུར། གང་གིས་ན་གུས་པ་ཆེན་པོས་དེ་ཉིད་ལ་བརྩོན་པར་བྱ་ཞེ་ན། འདིར་ཕྱོགས་བཅུའི་ཞེས་བྱ་བ་ལ་སོགས་པ་གསུངས་ཏེ། འདིར་བསྡུས་པའི་དོན་ནི་འདི་ཡིན་ཏེ། ཐམས་ཅད་ལའང་གཞན་པས་རང་འདུལ་བ་ནི་རང་ལ་རག་པ་ཡིན་ལ། གང་ལ་བདག་རང་ལའང་ནུས་པ་མེད་པ་དེ་ལ་གཞན་གྱི་རྒྱུད་ལ་ལྟ་ག་ལ་འགྱུར་ཏེ། འདི་ནི་མི་སྲིད་པའི་ཕྱིར་བཞད་གང་བྱེད་པར་ཟད་དེ། རང་གི་ཚོད་མི་ཤེས་པར་དམ་འཆའ་བར་འགྱུར་བ་སྨྱོན་པའི་ཚིག་ལྟ་བུ་ཡིན་ནོ། །དེ་བས་ན་བདག་ཉིད་ཡོངས་སུ་སྤྱད་པ་ལ་དང་པོར་འབད་པར་བྱའོ། །གཞན་ཐམས་ཅད་ནི་སྔ་མ་དང་འདྲའོ། །འོ་ན་གལ་ཏེ་ཉོན་མོངས་པ་རྣམ་པ་ཐམས་ཅད་དུ་སྤང་བར་འདོད་པ་དེ་ལྟ་ཡིན་ན་ནི་དེའི་ཚེ་ཉོན་མོངས་པ་སྤང་བ་པོ་མངོན་པར་ཞེན་པ་གང་ཡིན་པ་དེ་ཡང་སྤང་བར་བྱ་བ་ཉིད་དུ་འགྱུར་ཏེ། དེ་ཡང་བག་ལ་ཉལ་གྱི་རང་བཞིན་ཡིན་པའི་ཕྱིར་རོ། །ཇི་སྟེ་དེ་ལྟར་ན་ཡང་ཉོན་མོངས་པ་སྤོང་བ་ཉིད་དུ་མི་འགྱུར་རོ་ཞེ་ན། འདིར་མ་གཏོགས་པ་ཞེས་བྱ་བ་གསུངས་ཏེ། ཉོན་མོངས་པ་གང་ཞིག་ཉོན་མོངས་པ་འཇོམས་པར་བྱེད་པའི་གཉེན་པོ་དང་
འབྲེལ་པ་རྣམ་པ་དེ་འདྲ་བ་ནི་རྣམ་པ་དེ་ལྟ་བུ་སྟེ་དེར་སྣང་བ་ཙམ་ཡིན་གྱི་དེ་ཉིད་ནི་ཉོན་མོངས་པ་མཚན་ཉིད་བཞི་མ་ཡིན་ཏེ། དེ་དག་ལ་གཞན་ཞེས་བྱ་བའི་དོན་ཏོ། །དེ་དག་གིས་ནི་ཉོན་མོངས་པ་ཐམས་ཅད་རྣམ་པ་ཐམས་ཅད་དུ་སྤངས་པས་འཁོར་བར་མི་སྐྱེ་བའི་ཕྱིར། བླ་ན་མེད་པའི་བྱང་ཆུབ་འཐོབ་པར་མི་འགྱུར་རོ་ཞེས་བྱ་བའི་ཐལ་བར་འགྱུར་བ་འདི་ཡང་བསལ་བ་ཡིན་ནོ། །ཉོན་མོངས་པ་གང་དག་ངེས་པར་འཆི་བའི་རྒྱུར་གྱུར་པ་དེ་དག་ནི་འདིར་ངེས་པར་གཞོམ་པར་བྱ་བ་ཡིན་ལ། གང་ཡང་ཚོགས་སོག་པའི་རྒྱུ་སྐྱེད་པ་དེ་དག་ཇི་སྲིད་དུ་ཚོགས་རྫོགས་པར་མ་གྱུར་གྱི་བར་དུ་རྟ་ཤིན་ཏུ་དུལ་བ་བཞིན་དུ་དུལ་བར་བྱས་ཏེ་གཞག་པར་བྱའོ། །ཕྱིས་ནི་དེ་དག་ཀྱང་གཞོམ་པར་བྱ་བ་ཁོ་ན་ཡིན་ཏེ། འདི་ཉིད་གསུངས་པ་ནི་ཉོན་མོངས་འཇོམས་པ་དང་འབྲེལ་པ་ཞེས་བྱ་བ་ཡིན་ནོ། །ཡང་ཉོན་མོངས་མ་བསྲེགས་རྩྭ་ལྟར་ཆུང་ཞིང་ཡང་བ་ཉིད་དུ་བྱ་ཞེས་གང་གསུངས་པའོ། །དེ་བས་ན་རྣམ་པ་ཐམས་ཅད་དུ་ཐམས་ཅད་སྤོང་བར་ནི་མི་འདོད་དོ། །དོན་འདི་ནི་བྱ་དཀའ་བ་བརྒྱ་ཕྲག་དུ་མས་ཐོབ་པར་བྱ་བ་ཡིན་ཏེ། དེར་ཡང་སྡུག་བསྔལ་བརྒྱ་ཕྲག་མཐའ་ཡས་པས་འཇོམས་པ་འབྱུང་བར་འགྱུར་བ་མ་ཡིན་ནམ། དེ་བས་ན་དེའི་རྗེས་སུ་འབྲང་བ་ཉིད་བླ་སྟེ་ལེགས་པར་བྱས་པར་འགྱུར་རོ་ཞེ་ན། བདག་ནི་བསྲོགས་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་ཆུང་བ་བརྗོད་པ་ཡིན་ཏེ། བདག་གི་དམ་བཅའ་འདི་ངེས་པ་ཉིད་ཡིན་པར་ཟུང་ཤིག །རྒྱུ་མ་ཞེས་བྱ་བ་རྣམས་ཀྱང་ཇི་ལྟར་འདོད་པ་བཞིན་དུ་འོག་ཏུ་ལྷུག་ལ་དུམ་བུར་བྲུལ་བུ་བྲུལ་བུ་བྱས་པའམ། ཤ་དང་ཁྲག་ཞིག་ཅིང་ཟགས་པར་བྱས་ཀྱང་ཉོན་མོངས་པའི་དགྲ་བོ་རྣམས་ལ་མགོ་བོ་འདུད་པར་བྱས་ནས་རྗེས་སུ་བསྒྲུབ་པར་མི་བྱ་སྟེ་དེའི་བཀའ་བཞིན་བྱེད་པར་མི་བྱ་ཞེས་བྱ་བའི་དོན་ཏོ།། །།བམ་པོ་དྲུག་པ། རྣམ་པ་ཀུན་ཏུ་ཞེས་བྱ་བ་ནི་ནམ་དུ་ཡང་ངོ༌། །ཁྱོད་ཀྱིས་རང་གི་གནས་ལས་བཏོན་ཡང་གལ་ཏེ་སྟོབས་དང་ལྡན་པའི་གནས་ལ་བརྟེན་ནས་དགྲ་གཞན་བཞིན་དུ་དགྲ་ཚར་གཅོད་དུ་འོང་བ་མ་ཡིན་ནམ། དེའི་ཚེ་འདིར་ཅི་ལྟར་སླར་བཅོས་པར་བྱ་ཞེས་དོགས་པ་ལ། ཐ་མལ་དགྲ་བོ་ཞེས་བྱ་བ་ལ་སོགས་པ་
གསུངས་ཏེ། ཐ་མལ་པའི་དགྲ་བོ་གཞན་དག་ནི་ཡུལ་ནས་ཕྱུང་ཡང་གནས་གང་ཞིག་ནས་ནུས་པ་བརྟས་ཤིང་སྟོབས་རྙེད་ནས་དགྲ་ཚར་ཕྱིན་པར་བྱ་བའི་ཕྱིར། ཕྱིར་ལ་ལྡོག་པའི་གནས་ཡུལ་གཞན་དེ་ནི་སྲིད་ཀྱིས་ཉོན་མོངས་པའི་དགྲ་ལ་ནི་མ་ཡིན་ཏེ། དགྲ་གཞན་ལྟར་དེའི་སྤྱོད་པ་མི་སྣང་ངོ༌། །ཡང་དེ་ལྟར་འདོད་ཀྱང་ག་ལ་འགྱུར་ཞེ་ན། ཉོན་མོངས་ཉོན་མོངས་ཞེས་བྱ་བ་ལ་སོགས་པ་གསུངས་ཏེ། བདག་གི་སེམས་ལས་ཡུལ་ཕྱུང་ན། ཉོན་མོངས་པའི་དགྲ་འདི་གང་དུ་སོང་ནས་གནས་པར་བྱེད་གང་དུ་གནས་པར་བྱས་ནས་བདག་ལ་གནོད་པ་བྱ་བའི་ཕྱིར་འབད་རྩོལ་བྱེད་དེ། འདིའི་གནས་ནི་མ་མཐོང་ངོ༌། །རྩ་བ་ནས་མེད་པར་གྱུར་པ་ལ་སླར་ལྡང་བར་མི་རིགས་པའི་ཕྱིར་རོ་སྙམ་དུ་དགོངས་སོ། །བློའི་རྒྱུ་བ་མི་ཟིན་པའི་ཕྱིར་བདག་ལ་སྤྲོ་བ་མེད་པ་འབའ་ཞིག་ཏུ་ཟད་ཀྱི་ཉོན་མོངས་པ་འདི་ནི་རྩ་བ་མེད་པའི་ཕྱིར་དོན་དམ་པ་དེ་ཁོ་ན་ཉིད་མཐོང་བ་ཙམ་གྱིས་སྤང་བར་བྱ་བ་ཡིན་པས་ན་ཉོན་མོངས་ཡིན་ནོ། །དེ་ཉིད་རབ་ཏུ་བསྒྲུབ་པའི་ཕྱིར་ཉོན་མོངས་རྣམས་ནི་ཞེས་བྱ་བ་ལ་སོགས་པ་གསུངས་ཏེ། ཡིད་དུ་འོང་བ་ལ་སོགས་པའི་ཡུལ་མཐོང་ཡང་དབང་པོ་བསྡམས་པ་ཁ་ཅིག་ནི་ཉོན་མོངས་པ་མི་སྐྱེ་བའི་ཕྱིར་དང༌། རྣམ་པར་བརྟགས་ན་རྡུལ་ཕྲ་རབ་ཀྱང་དེ་ལ་མ་མཐོང་བའི་ཕྱིར་ཡུལ་ན་མི་གནས་སོ། །མིག་ལ་སོགས་པའི་དབང་པོའི་ཚོགས་ལ་ཡང་སྔ་མ་བཞིན་དུ་མི་གནས་ཏེ། ཆོས་ལ་སེམས་པ་ལ་སོགས་པའི་གནས་སྐབས་ན་དབང་པོའི་དངོས་པོ་ཡོད་ཀྱང་མི་དམིགས་པའི་ཕྱིར་རོ། །ཡུལ་དང་དབང་པོ་དག་གི་བར་ན་སྟེ། དབུས་ན་གནས་པའང་མིན་སྟེ། སྣང་བུ་རུང་བ་མི་དམིགས་པ་ཉིད་ཡིན་པའི་ཕྱིར་རོ། །དེ་དག་ལས་གནས་གཞན་འགའ་ཞིག་ཏུ་ཡང་གནས་པའི་ངེས་པ་མེད་དོ། །དེ་བས་ན་རྩ་བ་མེད་པའི་ཕྱིར་དེ་ཁོ་ན་ཉིད་དུ་སྟོང་པ་སྟེ་གློ་བུར་བ་ཉིད་ཡིན་ཏེ། ཡང་དག་པ་མ་ཡིན་པའི་ཀུན་ཏུ་རྟོགས་པ་ཙམ་ལས་བྱུང་བའི་ཕྱིར་རོ། །དེ་ལྟ་བུར་གྱུར་ན་ཡང་འགྲོ་བ་ཀུན་གནོད་བྱེད་དེ་འཁྲུག་པར་བྱེད་དོ། །དེ་ལྟར་ཡིན་ན་ཅི་ལྟར་བྱ་བར་རིགས་ཤེ་ན། གསུངས་པ་འདི་ནི་སྒྱུ་འདྲ་སྟེ། དཔེར་ན་སྒྱུ་མ་ནི་དེའི་རྣམ་པས་སྟོང་ཡང་སྔགས་དང་སྨན་གྱི་མཐུ་ལས་དེ་རྐྱེན་འདི་ཙམ་
གྱིས་དེ་ཁོ་ན་ཉིད་དུ་མེད་ཀྱང་གླང་པོ་ཆེ་ལ་སོགས་པའི་རྣམ་པར་སྣང་བ་དེ་བཞིན་དུ་ཉོན་མོངས་པ་འདི་རྣམས་ཀྱང་ཕྱིན་ཅི་ལོག་གི་རྒྱུ་མཚན་དང་ཚུལ་བཞིན་མ་ཡིན་པ་ཡིད་ལ་བྱེད་པ་ལས་བྱུང་བ་སྟེ། རྐྱེན་འདི་དག་ཙམ་གྱིས་དེ་ཁོ་ན་ཉིད་དུ་མེད་པ་ཉིད་དུ་སྣང་ངོ༌། །དེའི་ཕྱིར་སྙིང་ལ་འཇིགས་པ་སྤངས་ཏེ་ཉོན་མོངས་པ་རྣམས་ལས་སོ། །དོན་དམ་པར་རྣམ་པར་དཔྱད་ན་བརྫུན་པ་འདི་ཅི་ཞིག་ཏུ་རུང་སྟེ། དེའི་ཕྱིར་བརྩོན་པ་བསྟེན་ཅིག་སྟེ་སྤྲོ་བར་གྱིས་ཤིག་པའོ། །ཤེས་ཕྱིར་ནི་དེ་ཁོ་ན་ཉིད་རབ་ཏུ་རྣམ་པར་འབྱེད་པས་རྟོགས་པའི་དོན་དུའོ། །དོན་མེད་ཉིད་དུ་དགོས་པ་མེད་པ་ཉིད་དུའོ། །དམྱལ་བ་རྣམས་སུ་ནི་བསྡུས་འཇོམས་ལ་སོགས་པ་རྣམས་སུའོ། །ཉོན་མོངས་པའི་དབང་དུ་གྱུར་པས་བདག་ལ་གནོད་པ་ནི་གཟིར་བ་སྟེ་ཅི་སྟེ་བྱ་བའོ། །ད་ནི་སྔར་བསྟན་པའི་དོན་མ་ལུས་པ་ཉེ་བར་བསྡུ་བའི་ཕྱིར། དེ་ལྟར་ཞེས་བྱ་བ་ལ་སོགས་པ་གསུངས་ཏེ། དེ་ལྟར་ནི་བསྟན་མ་ཐག་པའི་ལེའུ་མ་ལུས་པས་བསྟན་པའི་དོན་ནམ། བསྟན་མ་ཐག་པའི་སྒྱུ་མའི་རང་བཞིན་ལ་རྣམ་པར་བསམས་ཏེ་བརྟེན་པར་བྱས་ནས་འབད་པར་བྱའོ། །ཅིའི་དོན་དུ་ཞེ་ན། ཇི་ལྟར་བཤད་པའི་བསླབ་པ་བསྒྲུབ་པའི་རྒྱུར་ཏེ་ཇི་སྐད་གསུངས་པའི་བསླབ་པ་ནི་མདོ་དེ་དང་དེ་དག་ལས་བྱང་ཆུབ་སེམས་དཔའི་བྱ་བར་འོས་པ་གང་ཞིག་བསྟན་པའམ། བསྟན་བཅོས་འདི་ཉིད་ལས་མདོར་བསྡུས་ནས་དེ་དང་དེར་ཉེ་བར་བསྟན་པ་དེ་དག་བསྟན་པའི་དོན་དུའོ། །བཅོམ་ལྡན་འདས་ཀྱིས་མདོ་སྡེ་རྣམས་སུ་བྱང་ཆུབ་སེམས་དཔའི་བསླབ་པའི་གཞི་གསུངས་པ་ནི། ཇི་སྐད་དུ། འཕགས་པ་དཀོན་མཆོག་སྤྲིན་ལས། རིགས་ཀྱི་བུ་ཇི་ལྟར་ན་བྱང་ཆུབ་སེམས་དཔའ་རྣམས་བྱང་ཆུབ་སེམས་དཔའི་བསླབ་པའི་སྡོམ་པས་བསྡམས་པ་ཡིན་ཞེ་ན། འདི་ལ་བྱང་ཆུབ་སེམས་དཔའ་འདི་ལྟར་དཔྱོད་དེ། སོ་སོ་ཐར་པའི་སྡོམ་པ་ཙམ་གྱིས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་མི་ནུས་ཀྱིས་དེ་བཞིན་གཤེགས་པས་གང་འདི་མདོ་སྡེ་དེ་དང་དེ་དག་ལས་བྱང་ཆུབ་སེམས་དཔའི་སྤྱོད་པ་དང༌། བྱང་ཆུབ་སེམས་དཔའི་བསླབ་པའི་གནས་བཅས་པ་དེ་དག་ལ་བདག་གིས་བསླབ་པར་བྱའོ་ཞེས་
རྒྱ་ཆེར་གསུངས་པ་ལྟ་བུ་སྟེ། དེ་བས་ན་བདག་ལྟ་བུ་བློ་ཞན་པས་རྒྱ་ཆེར་གསུངས་པའི་ཕྱིར་བྱང་ཆུབ་སེམས་དཔའི་སྡོམ་པ་ཤེས་པར་དཀའ་ན། དེས་ན་ཇི་ལྟར་བྱ་བའི་རིགས། །གང་གིས་ལྟུང་བར་མི་འགྱུར་བའི། །གནད་ཀྱི་གནས་རྣམས་འདིས་རིགས་བྱ། །གནད་ཀྱི་གནས་དེ་གང་ཞེ་ན་འདི་ལྟ་སྟེ། བདག་གི་ལུས་དང་ལོངས་སྤྱོད་དང༌། །དགེ་བ་དུས་གསུམ་སྐྱེས་པ་རྣམས། །སེམས་ཅན་ཀུན་ལ་བཏང་བ་དང༌། །དེ་བསྲུང་དག་པ་སྤེལ་བའོ། །ཞེས་གསུངས་སོ། །གང་ལ་བྱང་ཆུབ་སེམས་དཔའ་རྣམས་གོམས་པ་གློད་ཅན་ཡང་ལྟུང་བར་རྣམ་པར་གཞག་པ་འདི་ནི་བྱང་ཆུབ་སེམས་དཔའི་སྡོམ་པ་མདོར་བསྡུས་པ་ཡིན་ནོ། །ཇི་སྐད་དུ་བྱང་ཆུབ་སེམས་དཔའི་སོ་སོར་ཐར་པའི་མདོ་ལས་གསུངས་པ་ལྟ་བུ་སྟེ། བྱང་ཆུབ་སེམས་དཔའ་སེམས་ཅན་ཐམས་ཅད་ཀྱི་ཕྱིར་སྡུག་བསྔལ་ཟད་པར་འགྱུར་བའི་ལམ་གང་ཡོངས་སུ་བཟུང་བ་སྟེ། གལ་ཏེ་བྱང་ཆུབ་སེམས་དཔས་ལམ་དེ་ཡོངས་སུ་བཟུང་ནས་གནས་པ་ན། བསྐལ་པ་བྱེ་བ་འདས་ནས་ཐ་ན་འདུག་པ་ཙམ་གྱི་བདེ་བ་འདོད་པའི་སེམས་གཅིག་བསྐྱེད་ན་ཡང་དེ་ལ་བྱང་ཆུབ་སེམས་དཔས་སེམས་འདི་ལྟར་བསྐྱེད་པར་བྱ་སྟེ། བདག་གིས་སེམས་ཅན་ཐམས་ཅད་ཀྱི་ཉེས་པ་དང་དུ་བླངས་ནས་འདུག་པ་གང་ཡིན་པ་དེ་ཡང་མ་ངེས་པ་ཡིན་ནོ་ཞེས་སོ། །དེ་ཉིད་ཀྱི་ཕྱིར། སྨན་པའི་དག་ཅེས་བྱ་བ་ལ་སོགས་པ་གསུངས་པ་ལ། དཔེར་ན་སྨན་པའི་དག་ལྟར་མི་བྱེད་ན་གང་ལ་སྨན་བསྒྲུབ་པར་བྱ་བའི་སྨན་གྱིས་བསྒྲུབ་པར་བྱ་བའི་ནོད་པ་སྐྱོན་མེད་ཅིང་ནད་མེད་པར་འགྱུར་བ་ག་ལ་ཡོད། དེ་བཞིན་དུ་ཐམས་ཅད་མཁྱེན་པའི་སྨན་པ་ཆེན་པོས་ལུང་ཕོག་པའི་བསླབ་པ་བསྒྲུབ་པར་མ་བྱས་པར་སྐྱོན་མེད་པར་འགྱུར་བ་ལས་དང་ཉོན་མོངས་པས་བསྐྱེད་པའི་སྐྱེ་བ་ལ་སོགས་པའི་སྡུག་བསྔལ་གྱི་འཇིགས་པ་ཆེན་པོ་ལས་རྣམ་པར་གྲོལ་བར་འགྱུར་བ་ལྟ་ག་ལ་ཡོད། དེ་ལྟར་སྡོམ་པ་ཡང་དག་པར་བཟུང་བ་ལ་ལྟུང་བའི་མཚན་ཉིད་གང་དང་ལྡན་པའི་དངོས་པོ་བདག་ཉིད་ཀྱིས་བརྟགས་ཤིང་སྤོང་བ་དང༌། ལྟུང་བའི་གཟུགས་བརྙན་དང༌། ལྟུང་བ་མ་ཡིན་པའི་གཟུགས་བརྙན་ལ་རྨོངས་པར་མི་འགྱུར་བའི་ལྟུང་བ་སྤྱིའི་
མཚན་ཉིད་བརྗོད་པར་བྱའོ། །བྱང་ཆུབ་སེམས་དཔས་སེམས་ཅན་ཐམས་ཅད་ཀྱི་ད་ལྟར་དང་མ་འོངས་པའི་སྡུག་བསྔལ་དང༌། ཡིད་མི་བདེ་བ་ཐམས་ཅད་ཞི་བར་བྱ་བ་དང༌། ད་ལྟར་དང་མ་འོངས་པའི་བདེ་བ་དང༌། ཡིད་བདེ་བ་ཐམས་ཅད་བསྐྱེད་པའི་ཕྱིར་གཡོ་མེད་པར་ལུས་དང༌། ངག་དང། ཡིད་བརྩོན་པས་ནན་ཏན་མི་བྱེད་པ་དང༌། དེའི་རྐྱེན་ཚོགས་པ་མི་ཚོལ་བ་དང༌། དེའི་བར་དུ་གཅོད་པའི་འཆོས་པ་པོ་ལ་མི་འབད་པ་དང༌། སྡུག་བསྔལ་དང་ཡིད་མི་བདེ་བ་ཆུང་ངུས་སྡུག་བསྔལ་དང་ཡིད་མི་བདེ་བ་ཆེན་པོའི་འཆོས་པར་འགྱུར་བ་མི་སྐྱེད་པ་དང༌། དོན་ཆེན་པོ་བསྒྲུབ་པའི་ཕྱིར་དོན་ཆུང་ངུ་ཉམས་པར་མི་བྱེད་པ་དང༌། སྐད་ཅིག་གཅིག་ཙམ་ཡང་ཡལ་བར་འདོར་ན་ལྟུང་བ་དང་བཅས་པ་ཡིན་ནོ། །མདོར་ན་རང་གི་ནུས་པ་མ་ཡིན་པའི་བྱ་བའི་ཡུལ་རྣམས་ལ་ལྟུང་བ་མེད་དེ། དེ་ལ་འབྲས་བུ་མེད་པས་བསླབ་པ་བཅས་པ་མེད་པའི་ཕྱིར་རོ། །གཞན་ནི་རང་བཞིན་གྱིས་ཁ་ན་མ་ཐོ་བ་དང་བཅས་པ་ཡིན་པས་བཟུང་བ་ཉིད་དོ། །རང་གི་ནུས་པའི་སྤྱོད་ཡུལ་མ་ཡིན་པ་གང་ལ་བརྩོན་པ་ནི་ཤུགས་ཀྱིས་ལྟུང་བར་འགྱུར་ཏེ། དེ་བསམ་མི་དགོས་པར་སྤྱིར་སྡིག་པ་བཤགས་པའི་ནང་དུ་འདུས་པས་དེ་ལས་གྲོལ་བར་འགྱུར་རོ། །དེ་དག་ནི་མདོར་ན་བྱང་ཆུབ་སེམས་དཔའི་བསླབ་པའི་ལུས་ཡིན་ཏེ། རྒྱས་པར་བཤད་ན་བསྐལ་པ་དཔག་ཏུ་མེད་པའི་མཐས་བསྟན་དགོས་པས་སོ། །ཡང་ན་མདོར་བསྡུ་ན་བྱང་ཆུབ་སེམས་དཔའི་ལྟུང་བ་གཉིས་ཏེ། ཅི་ནུས་ཀྱིས་རིགས་པ་དང་མི་རིགས་པ་བརྟགས་ནས་རྩོམ་པའམ། མི་ལྡོག་པའམ། བཏང་སྙོམས་སུ་འཇོག་པ་ནི་ལྟུང་བ་དང་བཅས་པ་ཡིན་ནོ། །བརྟགས་ཏེ་ཇི་ལྟར་འོས་པ་ལས་འདའ་བར་བྱེད་ལ། ཐ་ན་གདོལ་པའི་བྲན་གྱིས་དཔྱས་ནའང་ལྟུང་བ་དང་བཅས་པ་ཡིན་ནོ། །གང་ཞིག་དེ་དག་གོམས་པར་བྱ་བའི་དོན་དུ་བྱེ་བྲག་ཏུ་རྟོགས་པར་འདོད་པ་དེས་རེ་ཞིག་བསླབ་པ་ཀུན་ལས་བཏུས་པ་ལས་སྤྱོད་པའི་སྒོ་ཙམ་བསླབ་པའི་དོན་དུ་མངོན་པར་བརྩོན་པར་བྱའོ། །བསླབ་པ་ལ་རྩོམ་པ་ཙམ་ཡང་འབྲས་བུ་ཆེ་བ་ཡིན་པའི་ཕྱིར་ཏེ། ཇི་སྐད་དུ་རབ་ཏུ་ཞི་བ་རྣམ་པར་ངེས་པའི་ཆོ་འཕྲུལ་ལས་བསྔགས་པ་ལྟ་བུའོ། །བྱང་ཆུབ་སེམས་དཔའི་བསླབ་པ་མདོར་བསྡུས་ནས་བསྟན་པ།
བརྗོད་པ་ཡིན་ནོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ། ཤེས་རབ་འབྱུང་གནས་བློ་གྲོས་ཀྱིས་བྱས་པ་ལས་ལེའུ་བཞི་པའོ།། །།དེ་ལྟར་ལུས་ལ་སོགས་པ་བཏང་བ་དང་བསྲུང་བ་བསྟན་ནས། ཡང་རྒྱས་པར་བསྲུང་བ་དང་སྦྱང་བ་དང་དག་པར་བྱ་བ་རྒྱས་པར་བསྟན་པར་བྱ་བའི་ཕྱིར་རྩོམ་པར་བྱེད་དེ། བྱང་ཆུབ་ཏུ་སེམས་བསྐྱེད་པའི་བྱང་ཆུབ་སེམས་དཔས་ལུས་བཏང་བ་ཡང་བསྲུང་བ་དང་སྦྱང་བ་དང་སྤེལ་བ་དག་བྱ་སྟེ། གང་གི་ཕྱིར། སེམས་ཅན་རྣམས་ཀྱི་ལོངས་སྤྱོད་ཕྱིར། །ལུས་ལ་སོགས་པ་སྦྱིན་པར་བྱ། མ་བསྲུངས་ལོངས་སྤྱོད་དག་ལས་འོང༌། །གང་མི་སྤྱོད་ལ་ཅི་ཞིག་སྦྱིན། །དེ་བས་སེམས་ཅན་ལོངས་སྤྱོད་ཕྱིར། །དགེ་བའི་བཤེས་གཉེན་མི་གཏོང་ཞིང༌། །མདོ་སྡེ་དག་ལ་རྟག་ལྟ་བས། །ལུས་ལ་སོགས་པ་བསྲུང་བར་བྱ། །ཞེས་བསྟན་ཏོ། །ལུས་ལ་སོགས་པ་ཡོངས་སུ་བསྐྱང་བ་ལ་སོགས་པ་དེ་ཡང་བསླབ་པ་བསྲུངས་པ་ལས་འགྱུར་བ་ཉིད་ཡིན་ཏེ། གཞན་དུ་ན་མི་འགྱུར་ཏེ། སེམས་ཅན་དམྱལ་བ་ལ་སོགས་པ་ལོག་པར་ལྟུང་བར་འགྲོ་བའི་ཕྱིར་རོ། །དེ་བས་ན་འདི་བརྗོད་པར་བྱ་སྟེ། བསླབ་པ་ཞེས་བྱ་བ་ལ་སོགས་པ་ལ་བསླབ་པ་ནི་བླང་བར་བྱ་སྟེ། སྡོམ་པ་བཟུང་བས་གནང་བ་རྣམས་ལ་བྱ་བ་དང༌། བཀག་པ་རྣམས་ལ་མི་བྱེད་པར་བསླབ་པའོ། །དེ་བསྲུང་བར་བྱ་སྟེ། ཡོངས་སུ་བསྐྱང་བར་རོ། །འདོད་པས་ནི་འདོད་པའི་བྱང་ཆུབ་སེམས་དཔས་ཏེ། བདག་གི་སེམས་བསྲུང་བར་བྱའོ། །རབ་ཏུ་བསྒྲིམས་ནས་ནི་འཆད་པར་འགྱུར་བ་དག་གིས་སོ། །ཅི་སྟེ་བསླབ་པ་བསྲུང་བའི་སྐབས་སུ་ཅིའི་ཕྱིར་སེམས་བསྲུང་བར་བྱ་བ་ཞེ་ན། བསླབ་པ་ཞེས་བྱ་བ་གསུངས་ཏེ། གཞན་དུ་ན་བསླབ་པ་བསྲུང་བ་ཉིད་དུ་མི་ནུས་སོ། །གཡོ་ཞིང་དབང་དུ་མ་གྱུར་པའི་སེམས་མ་བསྲུངས་ན་སེམས་གཡོ་བའི་བསླབ་པ་ལ་བསྟན་པ་མི་རིགས་པའི་ཕྱིར་རོ། །འདི་ལས་ཀྱང་སེམས་ཁོ་ན་བསྲུང་བར་བྱའོ་ཞེས། །གླང་ཆེན་མ་དུལ་ཞེས་བྱ་བ་ལ་སོགས་པ་གསུངས་ཏེ། བྱང་བར་མ་བྱས་པའོ། །མྱོས་པ་ནི་གླང་པོ་ཆེ་མཆོག་སྟེ། འཇིག་རྟེན་འདི་དང་འཇིག་རྟེན་ཕ་རོལ་ཏུ་མནར་མེད་པ་ལ་སོགས་པ་གང་བྱེད་པའི་གནོད་པ་དེ་མི་
བྱེད་དོ། །རང་འདོད་པ་ལ་སྤྱོད་ཅིང་གནས་པའི་སེམས་ཉིད་ནི་གླང་པོ་ཆེ་མྱོས་པ་དང་འདྲ་བའང་ཡིན་ཏེ། དེ་བཞིན་གཤེགས་པའི་བཀའི་ལྕགས་ཀྱུས་ཇི་ཞིག་ལྟར་དབང་དུ་བྱེད་པའི་ཕྱིར་རོ། །དེ་དབང་དུ་བྱས་པའི་ཡོན་ཏན་ནི། བཏགས་ན་ཞེས་བྱ་བ་ལ་སོགས་པ་གསུངས་པ་གལ་ཏེ་ཇི་ཞིག་ལྟར་བཅིངས་པར་གྱུར་ནའོ། །དྲན་པར་ནི་འཆད་པར་འགྱུར་བའི་མཚན་ཉིད་ཅན་ནོ། །དེ་ཉིད་ནི་ཐག་པ་དང་འདྲ་བ་སྟེ། འཆིང་བའི་ཐབས་ཡིན་པའི་ཕྱིར་རོ། །ཀུན་ནས་ནི་རྣམ་པ་ཐམས་ཅད་དུ་སྟེ། དམ་པ་མ་ཡིན་པའི་ཕྱོགས་ལ་འཇུག་པ་འགེགས་པའི་ཕྱིར་རོ། །དེའི་ཚེ་འཇིགས་པ་མེད་འགྱུར་ཏེ་ནུབ་པར་འགྱུར་བའོ། །ཐམས་ཅད་ནི་མ་ལུས་པའོ། །དགེ་བ་ཐམས་ཅད་ནི་མངོན་པར་མཐོ་བ་དང༌། ངེས་པར་ལེགས་པའི་མཚན་ཉིད་དོ། །འོངས་པ་ནི་ཐོབ་པ་སྟེ། དཔེར་ན་ཆར་བབ་པ་ན་འབྲས་སཱ་ལུ་སྐྱེས་སོ་ཞེས་ཟེར་བ་ལྟ་བུའོ། །གཅན་གཟན་ཁྲོ་བོ་དང་སྦྲུལ་ལ་སོགས་པ་ཉེ་བར་འཚེ་བར་བྱེད་པ་མང་པོ་ཡོད་པ་མ་ཡིན་ནམ། དེ་དག་ལས་སེམས་དབང་དུ་བྱས་པས་ཇི་ལྟར་འཇིགས་པ་འབྱུང་བར་མི་འགྱུར་ཞེ་ན། སྟག་དང་ཞེས་བྱ་བ་ལ་སོགས་པ་གསུངས་ཏེ་གོ་སླའོ། །ཡང་འདི་ཅིའི་ཕྱིར་ཞེ་ན། འདི་ལྟར་ཞེས་བྱ་བ་ལ་སོགས་པ་གསུངས་ཏེ། ལས་ཀྱི་འཕེན་པའི་དབང་གིས་འདི་དག་ཐམས་ཅད་མི་འདོད་པ་སྟེར་བར་བྱེད་པ་ཡིན་ནོ། །ལས་ཀྱང་སེམས་ཉིད་ཡིན་ཏེ། སེམས་པ་ལས་ཡིན་ཏེ་ཞེས་གསུངས་པའི་ཕྱིར་རོ། །ངག་དང་ལུས་ཀྱི་ལས་ཀྱང་སེམས་ཉིད་ཀྱིས་ཀུན་ནས་སློང་བར་བྱེད་པ་ཡིན་པས་དེ་མེད་པར་དེ་དག་མི་འབྱུང་སྟེ་བསམས་པའི་ལས་ཞེས་བརྗོད་པའི་ཕྱིར་རོ། །དེ་བས་ན་འདི་དག་ཐམས་ཅད་ནི་ལས་ཀྱི་སྤྲུལ་པ་ཡིན་ལ། དེ་ཡང་སེམས་ལས་གཞན་ན་མེད་པའི་ཕྱིར་རོ། །དེ་ནི། ལས་ལས་འཇིག་རྟེན་སྣ་ཚོགས་སྐྱེས། །དེ་ནི་སེམས་པ་དང་དེས་བྱས། །སེམས་པ་ཡིད་ཀྱི་ལས་ཡིན་ཏེ། །དེས་སྐྱེད་ལུས་དང་ངག་གི་ལས། །ཞེས་བསྟན་ཏོ། །གནོད་པ་བྱེད་པའི་སེམས་མེད་པ་ལ་ནི་སུ་ཡང་གནོད་པ་བྱེད་པར་མི་འགྱུར་ཏེ། གང་གི་ཕྱིར། འཇིག་རྟེན་ན་ནི་སྡིག་པའི་སེམས། །མེད་ལ་སྡང་དང་འཇིགས་པ་མེད། །གང་
གི་སེམས་ནི་དབང་བྱས་པ། །དེ་ཡི་བདེ་བ་ཉམས་པ་མེད། །དེའི་ཕྱིར་འདི་སྐད་དུ། སེམས་འདུལ་བ་ནི་ལེགས་པ་སྟེ། །སེམས་དུལ་བ་ནི་བདེ་བ་འཐོབ། །ཅེས་གསུངས་སོ། །ཡང་དག་གསུངས་པ་ནི་བཅོམ་ལྡན་འདས་ཏེ། དངོས་པོའི་དེ་ཁོ་ན་ཉིད་གསུངས་པའི་ངང་ཚུལ་ཅན་ཡིན་པའི་ཕྱིར་རོ། །དེས་དེ་ཁོ་ན་ཉིད་འདི་བསྟན་པ་ནི་ཐམས་ཅད་སེམས་ལས་བྱུང་བ་ཡིན་ནོ་ཞེས་རབ་ཏུ་གསལ་བར་བྱས་པའོ། །དེ་བས་ན་ཐམས་ཅད་དུ་སེམས་ཉིད་གཙོ་བོ་ཡིན་ནོ། །དེ་ལྟར་དེ་དག་ནི་གཞན་མ་ཡིན་ནོ་ཞེས་རབ་ཏུ་བསྒྲུབ་པའི་ཕྱིར་རོ། །སེམས་ཅན་ཞེས་བྱ་བ་ལ་སོགས་པ་གསུངས་ཏེ། དམྱལ་བའི་སྲུང་མ་རྣམས་ཀྱིས་མདུང་དང༌། རལ་གྲི་དང༌། གཏུན་ཤིང་ལ་སོགས་པའམ། ལོ་མ་རལ་གྲི་ལྟ་བུའི་ནགས་བྱུང་བ་དག་སུ་ཡིས་བྱས་ཏེ་དེ་ལ་དབང་ཕྱུག་ལ་སོགས་པ་བྱེད་པ་པོ་འགའ་ཡང་མེད་དེ། དེ་བྱེད་པ་པོ་གཞན་དུ་བཀག་པའི་ཕྱིར་དང༌། འདིར་ཡང་འགེགས་པར་འགྱུར་བའི་ཕྱིར་རོ། །ལྕགས་བསྲེགས་པའི་རང་བཞིན་གྱིས་གཞི་སུ་ཡིས་བྱས། བུད་མེད་དེ་དག་གི་རྒྱུའི་ཚོགས་པ་གཞན་གྱི་བུད་མེད་ལ་སྤྱོད་པ་རྣམས་ཀྱིས་ཤལ་མ་ལིའི་ཤིང་གི་འོག་དང་སྟེང་དུ་སྣང་བ་དང༌། ཤལ་མ་ལི་གང་ཡིན་པ་དེ་ཡང་ག་ལས་སྐྱེས་ཏེ་དེའི་ཕྱིར་འདིར་སེམས་ལས་གཞན་པའི་རྒྱུ་ཡོད་པར་བརྟག་པར་མི་བྱའོ། །གང༌། སེམས་ཅན་འཇིག་རྟེན་སྣོད་ཀྱི་འཇིག་རྟེན་དག །སྣ་ཚོགས་སེམས་ཉིད་ཀྱིས་ནི་སྤྲོས་པ་སྟེ། །འགྲོ་བ་མ་ལུས་ལས་ལས་སྐྱེས་པར་བསྟན། །སེམས་ལས་མ་གཏོགས་ལས་ནི་ཡོད་པ་མིན། །ཞེས་གསུངས་པའོ། །དེ་བས་ན་འདིར་སེམས་ཉིད་རྒྱུ་ཡིན་ཏེ། གཞན་མེད་དོ་ཞེས་དེའི་ཕྱིར། སྡིག་སེམས་ཞེས་བྱ་བ་ལ་སོགས་པ་གསུངས་ཏེ། སྡིག་པའི་ལས་ཉེ་བར་འདུས་བྱས་པའི་སེམས་ཉིད་དེ་དག་གི་རྒྱུ་ཡིན་པར་བཅོམ་ལྡན་འདས་ཀྱིས་གསུངས་ཏེ། གཞན་ཅུང་ཟད་ཀྱང་ཡོད་པ་མ་ཡིན་པ་ཉིད་དོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་འཇིག་རྟེན་གསུམ་ན་སྡིག་པའི་སེམས་ལས་གཞན་འཇིགས་པའི་རྒྱུ་འགའ་ཡང་མེད་དོ། །དེའི་ཕྱིར་སེམས་ཁོ་ན་དབང་དུ་བྱའོ། །གང་
འཕགས་པ་དཀོན་མཆོག་སྤྲིན་ལས། སེམས་ནི་ཆོས་ཐམས་ཅད་ཀྱི་སྔོན་དུ་འགྲོ་བ་སྟེ། སེམས་ཡོངས་སུ་ཤེས་ན་ཆོས་ཐམས་ཅད་ཡོངས་སུ་ཤེས་པར་འགྱུར་རོ་ཞེས་གསུངས་སོ། །གཞན་ཡང༌། འཇིག་རྟེན་སེམས་ཀྱིས་ཁྲིད་པ་སྟེ། །སེམས་ཀྱིས་སེམས་ནི་མི་མཐོང་ངོ༌། །དགེ་བའམ་ཡང་ན་མི་དགེ་བའི། །ལས་ནི་སེམས་ཀྱིས་སོགས་པའོ། །སེམས་ནི་མགལ་མེ་བཞིན་དུ་འཁོར། །སེམས་ནི་རླབས་དང་འདྲ་བར་གཡོ། །སེམས་ནི་ནགས་ཀྱི་མེ་བཞིན་སྲེག །སེམས་ནི་ཆུ་ཆེན་བཞིན་དུ་བསྐྱེད། །ཅེས་སོ། །དེས་དེ་ལྟར་ཉེ་བར་བརྟགས་པས་ན་སེམས་ལ་དྲན་པ་ཉེ་བར་གཞག་ནས་གནས་ཏེ། སེམས་ཀྱི་དབང་དུ་མི་འགྲོའོ། །འོན་ཀྱང་སེམས་དེའི་དབང་དུ་སེམས་ཉིད་འགྲོ་བར་འགྱུར་ཏེ། དེའི་དབང་དུ་སེམས་གྱུར་པ་ན་ཆོས་ཐམས་ཅད་དབང་དུ་གྱུར་པ་ཡིན་ནོ། །དེ་ལྟར་ཡིན་ན་ཇི་ལྟར་ན་སྦྱིན་པའི་ཕ་རོལ་ཏུ་ཕྱིན་པ་ལ་སོགས་པ་ལས་སེམས་གཙོ་བོ་ཡིན། དེ་ནི་སེམས་ཅན་ཐམས་ཅད་ཀྱི་དབུལ་བ་སེལ་བར་བྱེད་པའི་མཚན་ཉིད་ཡིན་ནོ་ཞེ་ན། གལ་ཏེ་འགྲོ་བ་ཞེས་བྱ་བ་ལ་སོགས་པ་གསུངས་ཏེ། དབུལ་པོ་ཞེས་བྱ་བ་ནི་ཟག་པ་དང་བཅས་པའི་བདེ་བའི་ལོངས་སྤྱོད་ཀྱིས་བཀྲེན་ཞིང་སེམས་བཀྲེན་པའམ་ཡོ་བྱད་མེད་པ་སྟེ། གལ་ཏེ་དེ་དང་འགྲོ་བ་བྲལ་བར་བྱས་པས་སྦྱིན་པའི་ཕ་རོལ་ཏུ་ཕྱིན་པ་རྫོགས་པ་ཡིན་ནོ་ཞེས་བརྗོད་ན། དེའི་ཚེ་སྔོན་སྐྱོབ་པ་སྟེ་སྔོན་མངོན་པར་རྫོགས་པར་སངས་རྒྱས་པའི་བཅོམ་ལྡན་འདས་རྣམས་ཀྱི་དེ་ཇི་ལྟར་ཏེ། ཇི་ལྟར་ཡང་རིགས་པར་མི་འགྱུར་རོ། །ཅིའི་ཕྱིར་ཞེ་ན། ད་དུང་འགྲོ་བཀྲེན་ཡོད་ན་སྟེ། ད་དུང་ཡང་ཇི་སྲིད་དུ་འགྲོ་བའི་དབུལ་པོ་ཉེ་བར་ཞི་བ་མེད་དོ། །གལ་ཏེ་དེ་ལྟར་མི་འདོད་ན་འོ་ན་དེ་ཇི་ལྟར་འགྱུར་ཞེ་ན། བདོག་པ་ཞེས་བྱ་བ་ལ་སོགས་པ་གསུངས་ཏེ། བདོག་པ་ཐམས་ཅད་ནི་ཕྱི་དང་ནང་གི་དངོས་པོ་ཐམས་ཅད་དེ་སྦྱིན་པ་དང༌། སྦྱིན་པའི་འབྲས་བུ་སེམས་ཅན་ཐམས་ཅད་ལ་ཡོངས་སུ་གཏོང་བ་གོམས་པའི་རབ་ཀྱི་མཐར་ཕྱིན་པའི་ཕྱིར། གང་གི་ཚེ་ཆགས་པ་མེད་པས་སེར་སྣའི་དྲི་མ་དང་བྲལ་བའི་སེམས་སྐྱེ་བ་དེའི་ཚེ་སྦྱིན་པའི་ཕ་རོལ་ཏུ་ཕྱིན་པ་རྫོགས་ཞེས་བརྗོད་དོ། །དེ་བས་ན་སེམས་ཉིད་ལས་གཞན་སྦྱིན་པའི་
ཕ་རོལ་ཏུ་ཕྱིན་པ་མེད་དོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་ཡང་ཤིན་ཏུ་སེམས་ཉིད་ཡིན་ནོ་ཞེས་བྱ་བ་དེའི་ཕྱིར། ཉ་ལ་སོགས་པ་ཞེས་བྱ་བ་ལ་སོགས་པ་གསུངས་ཏེ། སྲོག་གཅོད་པ་ལ་སོགས་པ་ཁ་ན་མ་ཐོ་བ་ཐམས་ཅད་སྤོང་བའི་སེམས་ཉིད་ནི་ཚུལ་ཁྲིམས་ཡིན་ཏེ། དེའི་རྟེན་དུ་གྱུར་པ་ཕ་རོལ་གྱི་ཡུལ་བཟློག་པའི་རང་བཞིན་ནི་མ་ཡིན་ནོ། །གལ་ཏེ་གསད་པ་ལ་སོགས་པའི་ཡུལ་གྱི་དངོས་པོ་མེད་པས་དེ་གསོད་པ་ལ་སོགས་པ་མེད་པའི་ཕྱིར་ཚུལ་ཁྲིམས་སུ་འགྱུར་རོ་ཞེ་ན། དེའི་ཚེ་ཉ་ལ་སོགས་པ་དང༌། གཞན་གྱི་བདོག་པ་དང༌། བུད་མེད་དང་ཆང་ལ་སོགས་པ་དེ་དག་གང་ཞིག་ཏུ་དེ་དག་མི་མཐོང་བར་འགྱུར་བར་བསྐྲད་པར་བྱ། གཞན་དུ་ན་དེ་དག་གསད་པ་ལ་སོགས་པ་ལ་འཇུག་པར་བྱེད་པ་ན་ཚུལ་ཁྲིམས་སུ་མི་འགྱུར་རོ། །དེ་ལྟར་མ་ཡིན་པ་དེའི་ཕྱིར་དེ་དག་ཡོད་པ་རྣམས་ལ་ཡང་སྤོང་བའི་སེམས་ནི་ཐོབ་པ་སྟེ། སེམས་ལྡོག་པར་ཡིད་ལ་བྱེད་པ་ནི་ཚུལ་ཁྲིམས་ཀྱི་ཕ་རོལ་ཏུ་ཕྱིན་པར་འདོད་དེ་དེའི་རང་བཞིན་རིགས་པ་རྣམས་འདོད་དོ། །དེ་བས་ན་དེ་ཡང་སེམས་ཉིད་ཡིན་ནོ། །བཟོད་པའི་ཕ་རོལ་ཏུ་ཕྱིན་པ་ཡང་སེམས་ལས་ཐ་དད་པ་མ་ཡིན་ནོ་ཞེས། སེམས་ཅན་ཞེས་བྱ་བ་ལ་སོགས་པ་གསུངས་ཏེ། གཞན་གནོད་པ་བྱེད་པ་ལ་སོགས་པ་ཡོད་ནའང་སེམས་འཁྲུགས་པ་མེད་པ་ཉིད་ནི་བཟོད་པ་ཡིན་ནོ། །གཞན་དུ་ན་གལ་ཏེ་དགྲ་ཐམས་ཅད་ལོག་པར་ལྟུང་བར་བྱེད་པས་དགྲ་ཚར་ཕྱིན་པར་བྱས་པར་གྱུར་པ་ནི་གང་གིས་ཀྱང་དགྲ་མེད་པས་ཉེ་བར་ཞི་བ་དང༌། དགྲ་ལ་ཡང་གནོད་པ་བྱེད་པ་མེད་པར་འགྱུར་བས་བཟོད་པ་ནི་བཟོད་པ་ཡིན་ན་དེའི་ཚེ་དེ་དག་ནི་བསྒྲུབ་པར་མི་ནུས་ཏེ། དགྲ་བོ་རྣམས་ནི་ནམ་མཁའ་དང་མཚུངས་པའི་ཕྱིར་མཐའ་ཡས་པ་ཉིད་ཡིན་ཏེ། དེ་དག་གསད་པར་མི་ནུས་སོ། །དེ་ལྟ་བས་ན་ཁྲོ་བ་ལ་སོགས་པ་ལས་སེམས་ལོག་པ་ཉིད་དེ་དག་ཐབས་ཀྱིས་བསད་པ་དང་འདྲ་བ་ཡིན་ཏེ། དེས་གནོད་པ་བྱས་པར་མི་བརྩི་བའི་ཕྱིར་དང༌། ཚེ་རབས་གཞན་ལ་དགྲ་བོ་མི་འབྱུང་བའི་ཕྱིར་དེ་དག་བསད་པ་དང་འདྲ་བ་ཡིན་ན། །མི་ནུས་པ་འདི་ལ་ཡང་ཐབས་ཀྱིས་འཇུག་པ་ན་དཔེ་ཉེ་བར་བསྟན་པས་ནུས་པ་ཉིད་དུ། ས་སྟེངས་ཞེས་བྱ་བ་ལ་སོགས་པ་གསུངས་
ཏེ། ཚེར་མ་ལ་སོགས་པའི་གནོད་པ་བསྲུང་བའི་དོན་དུ་ས་སྟེངས་གཡོགས་པར་ནི་རིགས་ན་དེ་ནི་མི་ནུས་ཏེ། དེ་སྙེད་ཀྱི་ཀོ་བ་མེད་པའི་ཕྱིར་དང༌། ཡོད་དུ་ཟིན་ཀྱང་གཡོགས་པར་བྱེད་མི་ནུས་པའི་ཕྱིར་རོ། །ཡང་ཐབས་ཀྱིས་ནུས་པ་ནི། ལྷམ་མཐིལ་ཙམ་གྱི་གོ་བས་ནི་ས་སྟེངས་ཐམས་ཅད་གཡོགས་པ་དང་འདྲ་བར་འགྱུར་རོ། །དཔེ་བསྟན་ནས་དོན་རྣལ་མ་ལ་སྦྱར་བ། དེ་བཞིན་ཞེས་པ་ལ་སོགས་པ་གསུངས་ཏེ། དེ་བཞིན་ནི་ས་སྟེངས་ཀོ་བས་གཡོགས་པ་ལྟ་བུར་རོ། །དགྲ་ལ་སོགས་པའི་དངོས་པོ་བདག་གིས་ཕྱིར་བཟློག་པར་མི་ལང་གི་གནོད་པ་བྱེད་པའི་བྱ་བ་ལས་རང་གི་སེམས་ཀྱི་ནུས་པ་ཉིད་ཕྱིར་བཟློག་པ་སྟེ། གཞན་བཟློག་པ་ལ་དོན་མེད་པའི་ཕྱིར་དང༌། རང་གི་སེམས་བཟློག་པ་ཁོ་ནས་དེ་འགྲུབ་པའི་ཕྱིར་རོ། །དེ་བས་ན་དེ་ནི་སེམས་ཉིད་ཡིན་ནོ། །བརྩོན་འགྲུས་ཀྱི་ཕ་རོལ་ཏུ་ཕྱིན་པའི་དགེ་བའི་ལས་ལ་སྤྲོ་བའི་རང་བཞིན་ཡང་སེམས་ཉིད་ཡིན་པར་ཤིན་ཏུ་གསལ་བས། སེམས་གསལ་ཞེས་བྱ་བ་ལ་སོགས་པ་གསུངས་ཏེ། དགེ་བའི་ཕྱོགས་ལ་ལུས་དང་ངག་དང་བཅས་ཀྱང་སེམས་ཀྱི་འཇུག་པ་ཞེན་པས་བསམ་གཏན་ལ་སོགས་པ་ཡུལ་ལ་གསལ་བར་རབ་ཏུ་འཇུག་པ་སེམས་གཅིག་པུ་ཞིག་ན་ཡང་འབྲས་བུ་ཚངས་པ་ལ་སོགས་པ་འབྱུང་བ་ཇི་ལྟ་བ་དེ་ལྟར་འབྲས་བུ་མི་སྐྱེ་སྟེ། དེ་ལྟ་བས་ན་དེ་ཡང་སེམས་ཉིད་ཡིན་ནོ། །བསམ་གཏན་ནི་སེམས་རྩེ་གཅིག་པའི་མཚན་ཉིད་ཡིན་ཏེ། སེམས་ལས་གཞན་དུ་སྨྲ་བར་མི་ནུས་པས། བཟླས་བརྗོད་ཅེས་བྱ་བ་ལ་སོགས་པ་གསུངས་ཏེ། གསང་སྔགས་ལ་སོགས་པ་ཟློས་པའི་མཚན་ཉིད་དག་གིས་བྱེད་པ་ནི་བཟླས་བརྗོད་དོ། །དཀའ་ཐུབ་ནི་ལུས་ཀྱིས་ཏེ་དབང་པོ་འདུལ་བའི་མཚན་ཉིད་དོ། །དེ་རྣམས་ཞེས་བྱ་བ་ནི་དུས་རིང་པོར་གོམས་པར་བྱས་པ་རྣམས་ཀྱང་ངོ༌། །གཞན་དུ་ན་ནི་སེམས་ཆགས་པས་སམ། །གཉིད་ཀྱིས་བཅོམ་པའི་སེམས་ཀྱིས་ཏེ། བསམ་གཏན་ལ་གསལ་བ་མེད་པས་ཞེས་བྱ་བའི་དོན་ཏོ། །དོན་མེད་པ་ནི་འབྲས་བུ་མེད་པ་ཉིད་དོ། །འབྲས་བུ་ཤིན་ཏུ་ཉུང་བའི་ཕྱིར་རམ། འདོད་པའི་དོན་ལ་མཁོ་བ་མེད་པའི་ཕྱིར་རོ། །དཔེར་ན་བུའི་བྱ་བ་མི་བྱེད་པའི་ཕྱིར། བུ་ཡང་བུ་མིན་པ་དང་
འདྲ་བ་ཡིན་པ་ལྟ་བུའོ། །ཐམས་ཅད་མཁྱེན་པ་སྟེ། བཅོམ་ལྡན་འདས་ཀྱིས་གསུངས་སོ། །དེ་ལྟ་བས་ན་བསམ་གཏན་གྱི་ཕ་རོལ་ཏུ་ཕྱིན་པ་ཡང་སེམས་ཉིད་ཡིན་ནོ། །ཤེས་རབ་ནི་རྩོད་པ་མེད་པར་སེམས་ཉིད་ཡིན་པས། གང་གིས་ཞེས་བྱ་བ་ལ་སོགས་པ་གསུངས་ཏེ། འགྲོ་བ་ལྔའི་སྐྱེ་བ་ལ་སོགས་པའི་སྡུག་བསྔལ་སྤངས་པའི་ཕྱིར་དེ་སྤོང་བར་བྱེད་པ་དང༌། མྱ་ངན་ལས་འདས་པའི་བདེ་བ་ཐོབ་པར་བྱ་བར་འདོད་ཀྱང་སེམས་ཅན་དེ་དག་འཁོར་བར་འབྲས་བུ་མེད་ཅིང་དོན་མེད་པ་གྱི་ན་ཉིད་དུ་ནམ་མཁའ་ལ་མེ་ཏོག་ཀ་ཤི་བཞིན་དུ་འཁྱམ་མོ། །དེ་ཉིད་ཀྱིས་མེ་ལྔ་བསྟན་པ་དང་སྐྲ་བསལ་བ་ལ་སོགས་པའི་བརྟུལ་ཞུགས་འབད་པར་བྱས་པ་གང་དུ་ཡང་འབྲེལ་པ་མེད་པར་བརྗོད་པ་ཡིན་ནོ། །སུ་ཞིག་དེ་ལྟར་འཁྱམ་ཞེ་ན། གང་གིས་ཏེ་འཁོར་བའི་འཇིགས་པས་བྲེད་པས་བདེ་བ་དོན་དུ་གཉེར་བ་རྣམས་ཀྱིས་ཆོས་ཀྱི་བདོག་པ་ཀུན་ཏེ་འཇིག་རྟེན་དང་འཇིག་རྟེན་ལས་འདས་པའི་ཆོས་ཀྱི་གཏེར་དུ་གྱུར་པའོ། །སེམས་ཅན་བྱིས་པ་རྣམས་ཀྱི་སྤྱོད་ཡུལ་མ་ཡིན་པའི་རང་བཞིན་ཡིན་པའི་ཕྱིར་གསང་བ་སྟེ། གང་གིས་མ་བསྒོམས་པ་ནི་དེ་ཁོ་ན་ཉིད་ཀྱི་སེམས་ཀྱིས་ཡང་ནས་ཡང་དུ་བརྟན་པར་མ་བྱས་པའོ། །དེ་བས་ན་འདི་ནི་ཤིན་ཏུ་ཡང་སེམས་ཉིད་ཡིན་ནོ། །ཇི་སྐད་དུ་འཕགས་པ་སྡོང་པོ་བཀོད་པའི་མདོ་ལས་ཀྱང་བསྔགས་ཏེ། བྱང་ཆུབ་སེམས་དཔའི་སྤྱོད་པ་ཐམས་ཅད་ནི་རང་གི་སེམས་ལ་བརྟེན་ཏོ། སེམས་ཅན་ཐམས་ཅད་སྨིན་པར་བྱ་བ་དང༌། གདུལ་བ་ནི་རང་གི་སེམས་ལ་བརྟེན་ཏོ། །དེ་བཞིན་དུ་སྦྱར་རོ། །རིགས་ཀྱི་བུ་དེ་ལ་བདག་འདི་སྙམ་དུ་སེམས་ཏེ། དགེ་བའི་རྩ་བ་རྣམས་ཀྱིས་རང་གི་སེམས་ཉིད་ཉེ་བར་བརྟེན་པར་བྱའོ། །ཆོས་ཀྱི་སྤྲིན་རྣམས་ཀྱིས་རང་གི་སེམས་ཡོངས་སུ་བརླན་པར་བྱའོ། །སྒྲིབ་པར་འགྱུར་བའི་ཆོས་ཅན་རྣམས་ལས་རང་གི་སེམས་ཡོངས་སུ་སྦྱང་བར་བྱའོ། །བརྩོན་འགྲུས་ཀྱིས་རང་གི་སེམས་ཉིད་བརྟན་པར་བྱའོ་ཞེས་བྱ་བ་ལ་སོགས་པའོ། །དེ་ལྟར་ཐམས་ཅད་དུ་སེམས་ཀྱི་རང་བཞིན་ཡིན་པར་བསྟན་ནས་མཇུག་བསྡུ་བ་དེ་ལྟ་ཞེས་བྱ་བ་ལ་སོགས་པ་གསུངས་ཏེ། དེ་ལྟར་བྱང་ཆུབ་ཀྱི་སེམས་བསྐྱེད་པས་བསླབ་པ་ལ་
བསྲུང་བ་ལ་འབད་པ་དང་ལྡན་པར་ཡིད་ལ་བྱའོ། །འཆད་པར་འགྱུར་བའི་ཚུལ་གྱིས་དྲན་པས་ཤིན་ཏུ་བརྟན་པ་དང༌། ཤེས་བཞིན་གྱིས་ཤིན་ཏུ་བསྲུང་བས་བདག་གིས་རང་གི་སེམས་རྩེ་གཅིག་པའི་ཡིད་དུ་བྱ་སྟེ། འདི་ཉིད་ཀྱི་ནང་དུ་ཐམས་ཅད་འདུས་པའི་ཕྱིར་རོ། །དེ་བས་ན་སེམས་བསྲུང་བ་ཉིད་བརྟུལ་ཞུགས་གཙོ་བོ་ཡིན་ཏེ། དེ་བོར་ནས་བརྟུལ་ཞུགས་མང་པོ་གཞན་གྱིས་ཀྱང་བདག་ལ་ཅི་ཞིག་དགོས་ཏེ། ཕན་པ་ཅུང་ཟད་ཀྱང་མེད་དེ། དེ་དང་བྲལ་ན་དེ་ལ་འབྲས་བུ་མེད་པའི་ཕྱིར་རོ། །རེ་ཞིག་བྱང་ཆུབ་སེམས་དཔའི་བསླབ་པ་ནི་འདི་ཡིན་ཏེ། འདི་ལྟ་སྟེ་སེམས་ཡོངས་སུ་སྦྱང་བར་བྱའོ། །དེ་ནི་སེམས་ཅན་གྱི་དོན་ཐམས་ཅད་ཀྱི་རྩ་བ་ཡིན་པའི་ཕྱིར་རོ། །དེ་ནི་འདི་ལྟར་ཆོས་ཡང་དག་པར་སྡུད་པ་ལས་བསྟན་ཏེ། བྱང་ཆུབ་སེམས་དཔའ་རྣམ་པར་གནོན་པའི་བློ་གྲོས་ཀྱིས་གསོལ་བ། ཆོས་ཆོས་ཞེས་བགྱི་བའི་ཆོས་གང་ལགས་པ་དེ་ནི་ཡུལ་ན་མི་གནས། ཕྱོགས་ན་མི་གནས་ཏེ། ཆོས་རང་གི་སེམས་ལ་རག་ལས་པ་ནི་མ་གཏོགས་པས་དེ་ལྟ་བས་ན་དེ་དག་གིས་རང་གི་སེམས་ཤིན་ཏུ་གཟུང་བ་དང༌། ལེགས་པར་མགུ་བ་དང༌། ཤིན་ཏུ་མཐར་གཏུགས་པ་དང་ཤིན་ཏུ་དུལ་བ་དང་ཤིན་ཏུ་མཉམ་པར་བརྩམས་པ་དང༌། ཤིན་ཏུ་ཚར་གཅོད་པར་བྱའོ། །དེ་ཅིའི་ཕྱིར་ཞེ་ན། སེམས་གང་ན་མཆིས་པ་དེ་ནི་ཡོན་ཏན་དང་ཉེས་པ་རྣམས་མཆིས་ཀྱི། སེམས་མ་མཆིས་པ་ལ་ནི་ཡོན་ཏན་དང་ཉེས་པ་རྣམས་མ་མཆིས་སྙམ་སྟེ། དེའི་ཕྱིར་བྱང་ཆུབ་སེམས་དཔའ་ཉེས་པ་རྣམས་ལས་སེམས་བཟློག་ནས་ཡོན་ཏན་རྣམས་ལ་འཇུག་སྟེ། དེ་ལྟ་བས་ན་ཆོས་ནི་སེམས་ལ་རག་ལས། བྱང་ཆུབ་ནི་ཆོས་ལ་རག་ལས་ཞེས་བགྱིའོ་ཞེས་སོ། །དེ་ལྟར་ཐམས་ཅད་དུ་སེམས་ལ་རག་ལས་པ་ཉེས་པར་བྱས་ནས་སེམས་བརྟན་པར་བྱ་བའི་དཔེ་བརྗོད་པ། མ་གྲངས་ཞེས་བྱ་བ་ལ་སོགས་པ་གསུངས་ཏེ། སྐྱེ་བོ་མཉམ་པར་མ་བཞག་པའི་ཁྲོད་ན་ཡང་ཉེ་བར་གནོད་པའི་འཇིགས་པས་དེར་བརྟད་པའི་ཡིད་ཀྱིས་བག་ཡོད་པ་འགའ་ཞིག་ཇི་ལྟར་སྲུང་བ་རྨའི་བག་བྱེད་པ་བཞིན་དུ་དེ་བཞིན་ཏེ་དེ་ལྟར་བསླབ་པ་བསྲུང་བར་འདོད་པས་དོན་མེད་པར་བྱིས་པའི་སྐྱེ་བོའི་ནང་ན་གནས་པ་ན་བརྩོན་པས་སེམས་ཀྱི་རྨ་དུས་ཐམས་ཅད་དུ་བསྲུང་ངོ༌། །
གྲགས་པ་ཇི་བཞིན་དུ་འདིར་དཔེར་བརྗོད་པ་ཡིན་ཏེ། ཡང་ཅུང་ཟད་དུ་ཡང་འདྲ་བ་མེད་པར་གསུངས་པ། རྨའི་ཞེས་བྱ་བ་ལ་སོགས་པས་ཏེ། རྨ་ཡིས་བྱས་པའི་སྡུག་བསྔལ་ཅུང་ཟད་ཙམ་ནི་སྡུག་བསྔལ་ཆུང་ངུའོ། །དེ་ཡིས་སྐྲག་པའང་རྨའི་བག་བྱེད་ནའང་སྟེ། གུས་པས་ནི་ལྷུར་བླང་བ་ནས་སོ། །བསྡུས་འཇོམས་ནི་སེམས་ཅན་དམྱལ་བར་ལྷུང་བའི་སྡུག་བསྔལ་ལོ། །སྟོང་ཕྲག་དུ་མར་མྱོང་བར་འགྱུར་བའི་རིས་འཇོམས་པ་ཐམས་ཅད་དུ་ཁྱབ་པའི་བསྣུན་པའི་སྐྲག་པ་ཡིས། སེམས་ཀྱི་རྨ་ལྟ་ཅིས་མི་བསྲུང་སྟེ་བསྲུང་བར་བྱའོ་ཞེས་སྐབས་ཀྱིས་འབྲེལ་ཏོ། །ཡང་ན་བདག་གིས་ཅིས་ཏེ་བསྲུང་བར་མི་བྱ་ཞེས་སྒྱུར་ཏེ་སྦྱར་བར་བྱའོ། །ཡང་ན་བྱང་ཆུབ་ཏུ་སེམས་བསྐྱེད་པས་དེ་ལྟར་ཡིད་ཀྱིས་བསམ་པར་བྱའོ་ཞེས་དྲངས་ལ། དེའི་ཚེ་བསྲུང་བར་བྱའོ་ཞེས་གདོན་ཅིང་སྦྱར་བར་བྱའོ། །དེ་ལྟར་གྱུར་པ་ལ་ཡོན་ཏན་ཅི་ཞིག་ཡོད་ཅེ་ན། ཡོད་པ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཁང་བཟངས་ཀྱི་སྟེང་ན་བུད་མེད་ཀྱི་འགྲོ་བའི་ཁྲོད་ན་ཡིད་ལ་བྱེད་པ་འདི་ལྟ་བུས་གནས་པ་ན་འདོད་པ་རྣམས་ལས་ཤིན་ཏུ་བཟློག་པར་མི་ནུས་པ་འདི་ཡིན་པ་དེའི་ཕྱིར། སྡོམ་བརྩོན་བརྟེན་པ་ཞེས་བྱ་བ་གསུངས་པ་ཡིན་ཏེ། ཡིད་ལ་བྱེད་པ་འདི་ལ་ངེས་པར་སེམས་པའོ། །ཉམས་མི་འགྱུར་ཏེ། བསླབ་པ་བསྲུང་བའི་ཡིད་ལ་བྱེད་པ་འཁྲུལ་པར་མི་འགྱུར་བའོ། །ཡང་དེ་ལྟར་བྱ་བར་འོས་པ་ཡིན་ནོ་ཞེས་དོན་འདི་ལ་མངོན་པར་ཞེན་པ་བརྟན་པར་བྱ་བ་བསྟན་པ། བདག་གིས་ཞེས་བྱ་བ་ལ་སོགས་པ་གསུངས་ཏེ། ཆོས་གོས་དང༌། བསོད་སྙོམས་ལ་སོགས་པ་རྙེད་པ་ཉམས་བླ་ཞིང་ནི་བརླག་ཀྱང་བླའིའོ། །བདག་གི་འདོད་པ་ནི་ཇི་ལྟར་འདོད་པའོ། །བཀུར་སྟི་ནི་གུས་པས་སྟན་གདིང་བ་དང༌། ཞབས་ལ་ཕྱག་འཚལ་བ་ལ་སོགས་པའི་མཆོད་པའོ། །ལུས་དང་འཚོ་བ་སྟེ་དེ་དག་ཐམས་ཅད་ཉམས་པ་བླ་ཞིང་གཞན་ཡང་སྟེ། བདེ་བ་དང༌། ཡིད་བདེ་བའི་རྒྱུ་མཚན་གང་ཅི་ཡང་རུང་བ་དེ་དག་ཉམས་སུ་ཆུག་གི །བདག་གི་སེམས་དགེ་བ་ནི་དུས་ནམ་དུ་ཡང་ཉམས་པར་མི་བྱ་བའོ། །ཡང་འདིར་གུས་པ་བསྐྱེད་པར་བྱ་བའི་ཕྱིར་བསྟན་བཅོས་མཛད་པས་སེམས་ཞེས་
བྱ་བ་ལ་སོགས་པ་གསུངས་ཏེ། ཐལ་མོ་སྦྱར་ཏེ་གསོལ་བ་འདེབས། ཅིའི་དོན་དུ་ཞེ་ན། དྲན་པ་དང་ནི་ཤེས་བཞིན་དག་སྟེ། དྲན་པ་འབའ་ཞིག་ཀྱང་མ་ཡིན་ལ། ཤེས་བཞིན་འབའ་ཞིག་ཀྱང་མ་ཡིན་ནོ་ཞེས་པ་སྟེ། རང་གི་དོན་ནི་ཕན་ཚུན་དུ་ལྟོས་པས་སོ། །དེ་ལ་དྲན་པ་ནི་འཕགས་པ་གཙུག་ན་རིན་པོ་ཆེའི་མདོ་ལས་བཤད་དེ། དྲན་པ་གང་གིས་ཉོན་མོངས་པ་ཐམས་ཅད་འབྱུང་བར་མི་འགྱུར་བ་དང༌། དྲན་པ་གང་གིས་བདུད་ཀྱི་ལས་ཐམས་ཅད་ཀྱི་སྐབས་མི་འབྱེད་པ་དང༌། དྲན་པ་གང་གིས་ལམ་གོལ་བའམ་ངན་པར་མི་འགྲོ་བ་དང༌། དྲན་པ་སྒོ་བ་ལྟ་བུར་གྱུར་པ་གང་གིས་སེམས་དང་སེམས་ལས་བྱུང་བའི་ཆོས་མི་དགེ་བ་ཐམས་ཅད་ཀྱི་སྐབས་མི་འབྱེད་པ་འདི་ནི་ཡང་དག་པའི་དྲན་པ་ཞེས་བྱའོ་ཞེས་སོ། །མདོར་ན་དྲན་པ་ནི་འདི་ཡིན་ཏེ། གནང་བ་དང་བཀག་པ་གཉིས་ཅི་རིགས་པར་དྲན་པ་ནི་དྲན་པ་ཞེས་བྱ་སྟེ། གང་གི་ཕྱིར་དྲན་པ་དམིགས་པ་མ་བརྗེད་པའོ་ཞེས་བསྟན་པ་ཡིན་ནོ། །ཤེས་བཞིན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་ཏེ། སྤྱོད་ན་ཡང་བདག་སྤྱོད་དོ་ཞེས་རབ་ཏུ་ཤེས་སོ། །འགྲེང་ན་བདག་འགྲེང་ངོ་སྙམ་དུ་རབ་ཏུ་ཤེས་སོ། །འདུག་ན་བདག་འདུག་གོ་སྙམ་དུ་རབ་ཏུ་ཤེས་སོ། །ཉལ་ན་བདག་ཉལ་ལོ་སྙམ་དུ་རབ་ཏུ་ཤེས་སོ། །དེའི་ལུས་ཇི་ལྟ་ཇི་ལྟར་གནས་པར་འགྱུར་བ་དེ་ལྟ་དེ་ལྟར་རབ་ཏུ་ཤེས་སོ། །དེ་བཞིན་དུ་སྦྱར་ཏེ། དེ་འགྲོ་བ་དང་འོང་བ་ཡང་ཤེས་བཞིན་དུ་སྤྱོད་པ་ཡིན་ནོ། །ལྟ་བ་དང་རྣམ་པར་ལྟ་བ་དང༌། བསྐུམ་པ་དང༌། བརྐྱང་བ་དང༌། ཆོས་གོས་སྣམ་སྦྱར་དང༌། ཐང་བ་དང། ལྷུང་བཟེད་དང༌། ཆོས་གོས་འཆང་བ་དང༌། ཟ་བ་དང༌། འཐུང་བ་དང༌། འཆལ་བ་དང༌། གཉིད་དང༌། སྡོམ་པ་བསལ་བ་དང༌། འོང་བ་དང༌། འགྲོ་བ་དང༌། འགྲེང་བ་དང༌། འདུག་པ་དང༌། གཉིད་ཀྱིས་ལོག་པ་དང༌། གཉིད་ཀྱིས་མ་ལོག་པ་དང༌། སྨྲ་བ་དང༌། མི་སྨྲ་བ་དང༌། ནང་དུ་ཡང་དག་པར་འཇོག་པ་ན་ཤེས་བཞིན་དུ་སྤྱོད་པ་ཡིན་ནོ། །འདི་ཉིད་ནས་ཀྱང༌། ལུས་དང་སེམས་ཀྱི་གནས་སྐབས་ལ། །ཡང་ནས་ཡང་དུ་ལྟ་བ་གང༌། །འདི་ཉིད་ཁོ་ན་མདོར་བསྡུས་ན། །ཤེས་བཞིན་བསྲུང་བའི་མཚན་ཉིད་དོ། །ཞེས་འཆད་པར་འགྱུར་རོ། །གང་གིས་འདི་དག་བསྲུང་བར་བྱ་བར་
བསྟན་པ་འདི་དག་མེད་ན་ཉེས་པ་ཅི་ཞིག་ཡོད་ཅེ་ན། ནད་ཀྱིས་ཞེས་བྱ་བ་ལ་སོགས་པ་གསུངས་ཏེ། ནད་ཀྱིས་ནུས་པ་ཉམས་པའི་སྐྱེས་བུ་ཇི་ལྟ་བར་ལས་རྣམས་ཀུན་ལ་སྟེ། འགྲོ་བ་དང་སྟོན་མོ་ལ་སོགས་པའི་ལས་རྣམས་ཀུན་ལ་ལས་སུ་རུང་བར་མི་འགྱུར་བ་དེ་བཞིན་དུ་དྲན་པ་དང་ཤེས་བཞིན་མེད་པའི་སེམས་ཀྱིས་བསམ་གཏན་དང་ཁ་ཏོན་ལ་སོགས་པའི་མཚན་ཉིད་དེ་ལས་རྣམས་ཀུན་ལའོ། །འདི་དག་བསྡོམས་ནས་མེད་པའི་ཉེས་པ་བསྟན་ནས། རེ་རེ་མེད་པར་བརྗོད་པའི་ཕྱིར། ཤེས་བཞིན་མེད་པའི་ཞེས་བྱ་བ་ལ་སོགས་པ་གསུངས་ཏེ། གང་ལ་ཤེས་བཞིན་ཡོད་པ་མ་ཡིན་པ་དེ་ནི་ཤེས་བཞིན་མེད་པ་སྟེ། སེམས་ཅན་དེ་གང་ལ་ཡོད་པ་དེ་ལ་ཐོས་པ་དང༌། བསམས་པ་དང༌། བསྒོམས་པ་ལས་བྱུང་བའི་ཤེས་རབ་ཀྱིས་དངོས་པོ་ཡོངས་སུ་ཤེས་ཀྱང་དྲན་པ་ལ་མི་གནས་སོ། །དེ་དགེ་བ་ཐམས་ཅད་ཀྱི་རྩ་བ་ཡིན་ནོ། །ཅི་དང་འདྲ་བ་ཞིག་ཅེ་ན། ཇི་ལྟར་བུམ་པ་གློ་རྡོལ་དུ་ཁ་ནས་ཆུ་བླུགས་པ་འོག་ཏུ་འགྲོ་ཞིང་མི་གནས་པ་བཞིན་ནོ། །གཞན་ཡང་འདི་མེད་པ་ཡི་སྐྱོན། །ཐོས་ལྡན་ཞེས་བྱ་བ་ལ་སོགས་པ་གསུངས་ཏེ། མང་བ་ནི་མང་དུ་ཐོས་པའོ། །དེ་བཞིན་དུ་དད་པ་དང་ལྡན་པ་བརྩོན་པ་ལྷུར་ལེན་པ་སྟེ། བསླབ་པ་ལ་གུས་པར་བྱེད་པ་རྣམས་ཀྱང༌། ཤེས་བཞིན་མེད་པའི་སྐྱོན་ཆགས་པས་ལྟུང་བའི་རྙོག་པ་དང་བཅས་པར་འགྱུར་ཏེ། ལུས་དང་སེམས་ཀྱི་སྤྱོད་པ་སོ་སོར་མི་རྟོག་པའི་ཕྱིར་རོ། །དེ་མེད་པའི་སྐྱོན་གཞན་ཡང༌། ཤེས་བཞིན་མེད་ཅེས་བྱ་བ་ལ་སོགས་པ་གསུངས་ཏེ། ཤེས་བཞིན་མེད་པ་ནི་ཤེས་བཞིན་དང་བྲལ་བའོ། །ཉོན་མོངས་པའི་དངོས་པོའི་ངོ་བོ་ནི་ཆོམ་རྐུན་ཏེ། དགེ་བའི་ནོར་འཕྲོག་པར་བྱེད་པའི་ཕྱིར་རོ། །དེས་དྲན་པ་ཉམས་པའི་རྗེས་སུ་འབྲང་བས་བསྲུང་ཞིང་སྐྱོང་བར་འགྱུར་བའི་དྲན་པ་བརྗེད་པའི་དངོས་པོའི་རྗེས་སུ་འབྲངས་ནས། ཕྲོགས་པ་ནི་དགེ་བའི་ནོར་ཡོད་པ་དང་བྲལ་བའོ། །བསོད་ནམས་དག་ནི་ཉེ་བར་བསགས་ཀྱང་སྟེ། དགེ་བའི་ནོར་རྣམས་བསགས་པར་བྱས་ནས་ཀྱང་ངན་འགྲོར་གཞོལ་བར་འགྱུར་རོ། །དེ་ཅིའི་ཕྱིར་ཞེ་ན། དེ་ལྟར་ན་བསྟན་པའི་དོན་ཉིད་གསལ་བར་བྱེད་པ་ཉོན་མོངས་ཞེས་བྱ་བ་ལ་སོགས་པ་
གསུངས་ཏེ། ཆོམ་པོ་དང་རྐུན་པོ་དེ་དག་གི་ཚོགས་གླགས་སྐབས་ཚོལ་བར་བྱེད་པ་སྟེ། ཤ་ཟ་བཞིན་དུ་གླགས་སྐབས་ཀྱི་ལམ་ལྟ་ཞིང་སྐྱོན་ཚོལ་བ་ལ་སོགས་པ་ཞེས་བྱ་བའི་དོན་ཏོ། །གླགས་རྙེད་གྱུར་ནས་དེ་འཇུག་པའི་ལས་དང་ཕྲད་ནས་དགེ་བ་འཕྲོག་ཅིང༌། དེའི་ཕྱིར་འགྲོ་བ་བཟང་པོའི་སྲོག་ཐོབ་པ་འཇོམས་པར་བྱེད་དེ། དགེ་བའི་བརྒྱགས་མེད་པའི་ཕྱིར་རོ། །ད་ནི་དྲན་པའི་དབང་དུ་བྱས་ཏེ་གསུངས་པ། དེ་བས་ཞེས་བྱ་བ་ལ་སོགས་པ་ལ་གང་གི་ཕྱིར་དྲན་པ་མེད་པའི་ཉེས་པ་དེ་ལྟར་འགྱུར་བ་དེའི་ཕྱིར་ཏེ། འདིར་ཉེས་པ་འདི་མཐོང་ནས་དྲན་པ་དམིགས་པ་མ་བརྗེད་པའི་མཚན་ཉིད་དོ། །ཡིད་སྒོ་ནས་ཡིད་ཀྱི་ཁྱིམ་གྱི་འཇུག་པའི་སྒོ་ནས་གུད་དུ་མི་གཏང་ཞིང་མ་སྤང་བར་རྟག་ཏུ་གཞག་པར་བྱའོ་ཞེས་བྱ་བའི་དོན་ཏོ། །ཇི་སྟེ་བརྒྱ་ཞིག་ལ་བག་མེད་པས་དེ་དེ་ནས་སོང་ནས་དེའི་ཚེ་སོང་ནའང་སླར་བཟློག་ནས་དེ་ཉེ་བར་གཞག་སྟེ། དེ་ཉིད་དུ་གཏད་དེ་གཞག་པར་བྱའོ། །ཇི་ལྟར་ཞེ་ན། ངན་སོང་སྟེ་སེམས་ཅན་དམྱལ་བ་ལ་སོགས་པ་ངན་འགྲོའི་གནོད་པ་དྲན་པར་བྱས་ཤིང་ཡིད་ལ་གཞག་ལའོ། །དེ་ལ་དྲན་པ་བཅུ་གཉིས་པོ་འདི་དག་གི་འབྲས་བུ་མེད་པའི་སྤྱོད་པ་སྤང་བའི་ཕྱིར་ཏེ། དེ་བཞིན་གཤེགས་པའི་བཀའ་ལས་མི་འདའ་བར་སྲུང་ཞིང་རྣམ་པར་སྨིན་པ་ལ་གུས་པར་བྱ་བའི་དྲན་པ་དང་ཞེས་བྱ་བ་ལ་སོགས་པ་བསླབ་པ་ཀུན་ལས་བཏུས་པ་ལས་རབ་ཏུ་བསྟན་ནས་ཏེ། དེ་ཉིད་ནས་རྣམ་པར་ཕྱེ་སྟེ་གཟུང་བར་བྱའོ། །དྲན་པ་དེ་ཡང་གུས་པ་དྲག་པོས་སྐྱེའོ། །གུས་པ་ཡང་ཞི་གནས་ཀྱི་བདག་ཉིད་ཆེན་པོ་ཁོང་དུ་ཆུད་ནས་ལྷུར་བླངས་པ་ལས་སྐྱེ་སྟེ། དེ་དག་ཀྱང་སྐབས་ཇི་ལྟ་བ་བཞིན་དུ་བཤད་པར་བྱའོ། །ཁ་ཅིག་ལ་རྣམ་པ་གཞན་དུ་ཡང་དྲན་པ་སྐྱེ་བར་འགྱུར་ཏེ། དེ་བསྟན་པ་ནི་བླ་མ་དང་ནི་ཞེས་བྱ་བ་ལ་སོགས་པ་གསུངས་ཏེ། སློབ་དཔོན་དང་མཁན་པོ་དང་ཉེ་བའམ། དེ་ལས་གཞན་ཡང་དུང་སྟེ་མ་གུ་བར་བྱ་བ་ཚངས་པ་མཚུངས་པར་སྤྱོད་པ་དང་ཉེ་བར་སྟེ་འགྲོགས་པའོ། །དེའི་རྗེས་སུ་བསྟན་པ་འཇིགས་པ་ནི་དེས་འཇིགས་པ་ལའང་ངོ༌། །གུས་པས་ནི་བྱ་བ་རྣམས་ལ་དངོས་པོ་ཀུན་གྱིས་ཕྱོགས་པ་ཉིད་དེ་བརྙས་པའི་གཉེན་པོའི་ཆོས་ཡིན་ནོ། །དེ་བྱེད་པ་ནི་མཁས་པ་འབད་པ་དང་ལྡན་པའོ། །
དེའི་རྗེས་སུ་བསྟན་པ་ནི་ཕན་པ་དང་མི་ཕན་པ་སྒྲུབ་པ་དང་དགག་པ་ངེས་པ་རྗེས་སུ་འཛིན་པ་ཚེགས་ཆུང་དུས་དྲན་པ་སྐྱེ་བར་འགྱུར་རོ། །འདི་ལྟར་ཡང་གནས་ན་དྲན་པ་ཡིད་ལ་བྱེད་པ་མང་དུ་གནས་པར་འགྱུར་རོ་ཞེས་ཚིག་ལེའུར་བྱས་པ་གཉིས་ཀྱིས་བསྟན་པ། སངས་རྒྱས་ཞེས་བྱ་བ་ལ་སོགས་པ་གསུངས་པ་ཡིན་ཏེ། སངས་རྒྱས་དང་བྱང་ཆུབ་སེམས་དཔའ་དུས་ཀུན་ཏུ་དངོས་པོའི་ཡུལ་མཐའ་དག་ཐོགས་པ་མེད་པའི་སྤྱན་མངའ་བ་རྣམས་ཀྱི་སྤྱན་སྔ་ན་དངོས་པོའི་རྣམ་པ་ཐམས་ཅད་དུས་ཀུན་ཏུ་གནས་པ་ཡིན་ཏེ། དངོས་པོ་ཐམས་ཅད་ལྟར་བདག་ཀྱང་དེ་རྣམས་ཀྱི་སྤྱན་སྔ་ན་འདུག་པ་ཉིད་ཡིན་ནོ་ཞེས་ཡིད་ལ་བཞག་ལ། དེ་བཞིན་དུ་བདག་ཉིད་ལེགས་པར་བསྡམས་ཤིང་བསྡད་དོ། །ངོ་ཚ་ཤེས་གུས་འཇིགས་བཅས་ཞེས་བྱ་བ་ལ། མི་མཐུན་པའི་ལས་ལ་འཇོམ་པ་ནི་ངོ་ཚ་ཤེས་པ་དང༌། བསླབ་པ་ལ་གུས་པ་དང༌། དེ་ལས་མི་འདའ་བར་འཇིགས་པའམ། འདིར་ཁྲེལ་ཡོད་པ་ལ་སོགས་པ་སངས་རྒྱས་དང་བྱང་ཆུབ་སེམས་དཔའ་རྣམས་ལ་གོ་བར་བྱའོ། །དེ་ལྟར་གྱུར་ན་ཁྱད་པར་གཞན་ཡང་ཡོད་པས་ན། དེ་ནི་ཞེས་བྱ་བ་ལ་སོགས་པ་གསུངས་ཏེ། དེ་ལྟར་གནས་པ་དེ་ལ་སྐད་ཅིག་རེ་རེ་ཞིང་མི་འདོད་བཞིན་དུ་སངས་རྒྱས་རྗེས་སུ་དྲན་བར་ཡང་འགྱུར་རོ། །ཤེས་བཞིན་དུ་སྐྱེ་བ་དང་བརྟེན་པ་དག་གིས་ཡང་རྒྱུ་དྲན་པ་ཉིད་ཡིན་ནོ་ཞེས་བརྗོད་པ། གང་ཚེ་ཞེས་བྱ་བ་ལ་སོགས་པ་གསུངས་ཏེ། གང་གི་ཚེ་དྲན་པ་ཡིད་ཀྱི་སྒོ་ནས་ཉོན་མོངས་པའི་ཚེ་མ་རྐུན་གྱི་ཚོགས་འཇུག་པ་ཕྱིར་བཟློག་པའི་དོན་དུ་སྒོ་བ་ལྟར་གནས་པར་གྱུར་པ་ན་དེའི་ཚེ་ཤེས་བཞིན་ཡང་འབད་པ་མེད་པར་འབྱུང་ངོ༌། །བྱུང་བ་ཡང་བརྟེན་པར་འགྱུར་རོ། །དེ་ལྟར་རེ་ཞིག་འདི་དག་གི་རྗེས་སུ་འགྲོ་བ་དང་ལྡོག་པ་གང་གི་ཡོན་ཏན་དང་སྐྱོན་བརྗོད་ནས། དོན་མེད་པ་སྤང་བའི་དོན་དུ་དོན་མེད་པའི་སྤྱོད་པ་སྤང་བ་རེ་ཞིག་ཅེས་བྱ་བ་ལ་སོགས་པ་གསུངས་ཏེ། དང་པོ་རེ་ཞིག་འདི་འདྲའི་སེམས། །ཞེས་བྱ་བ་ནང་དུ་བསམ་པར་བྱའོ། རྟག་ཏུ་དུས་ཐམས་ཅད་དུ་འདི་འདྲ་བའི་བསྟན་པའི་རིམ་པ་དང་ལྡན་པར་ཉེ་བར་གནས་པར་བྱ་སྟེ། དེ་ལས་གཞན་འབྲས་བུ་མེད་པའི་སྤྱོད་པ་སྤང་བའི་དོན་དུ་
དབང་པོའི་ཚོགས་དང་བྲལ་བས་གཟུགས་ལ་སོགས་པའི་ཡུལ་འབྲས་བུ་མེད་པ་འཛིན་པའི་རྣམ་པར་རྟོག་པ་ཐམས་ཅད་བསྡུས་ལ་བདག་གིས་གནས་པར་བྱའོ། །ཅི་འདྲ་བར་ཞེ་ན། ཤིང་བཞིན་དུ་ཞེས་གསུངས་ཏེ། མིག་ལ་སོགས་པའི་བྱེད་པས་སྟོང་པའི་ཕྱིར་རོ། །འདི་ཉིད་གསལ་བར་བྱེད་པ། འབྲས་མེད་ཅེས་བྱ་བ་ལ་སོགས་པ་ལ། རྫི་མ་གཉིས་ཅུང་ཟད་ཕྱེ་ལ། སྣའི་རྩེ་མོར་གཏད་པའམ། གཉའ་ཤིང་གང་ཙམ་དུ་རྣམ་པར་བལྟ་བར་བྱ་སྟེ། དང་པོ་རྩོམ་པ་ནའོ། །རྟག་ཏུ་གོམས་པར་བྱེད་བཞིན་དུ་ངལ་བ་སྤང་བའི་དོན་དུ་ལྟ་བ་ཞེས་བྱ་བ་ལ་སོགས་པ་གསུངས་ཏེ། ལྟ་བ་དང་སེམས་སྐྱོ་བ་སྤང་བའི་ཕྱིར་རེས་འགའ་སྟེ་བར་སྐབས་སུ་ཕྱོགས་སུ་རྣམ་པར་ལྟའོ། །ཇི་སྟེ་བརྒྱ་ལ་འགའ་ཞིག་དེ་དང་ཉེ་བར་འོངས་ན་དེའི་ཚེ་དེའི་འོངས་པའི་ཞད་ཙམ་རིག་པར་བྱས་ལ། ལེགས་པར་བྱོན་ནམ་ཞེས་སྨྲ་བས་ཕེབས་པར་སྨྲ་བའི་དོན་དུ་རྣམ་པར་བལྟ་བར་བྱའོ། །གཞན་དུ་ན་དེར་དེ་ལ་འཕྱ་བས་མི་དགེ་བ་འབྱུང་བར་འགྱུར་རོ། །ལམ་དུ་འགྲོ་ཞིང་དེ་ལྟར་ལྟ་བ་ན་ཡང་གནོད་པ་བསལ་བའི་དོན་དུ། ལམ་སོགས་ཞེས་བྱ་བ་ལ་སོགས་པ་གསུངས་ཏེ། འཇིགས་པའི་རྒྱུ་རྐུན་མོ་ལ་སོགས་པ་རིག་པར་བྱ་བའི་དོན་དུ་རྣམ་པར་བལྟ་བར་བྱ་བའི་རིམ་པ་བཞིན་དུའོ། །གཞན་དུ་ན་ལུས་བསྲུང་བར་བྱས་པར་མི་འགྱུར་རོ། །ཕྱོགས་ཐམས་ཅད་དུ་རྣམ་པ་བལྟ་བར་བྱེད་པ་ན་རྒོད་པའི་གནོད་པ་སྤང་བར་བྱ་བའི་དོན་དུ་བསྡད་དེ་བྱའོ། །རྒྱབ་ཏུ་རྣམ་པར་ལྟ་བ་ན་ལེགས་པར་ལོག་སྟེ་བ་ཕྱིར་བལྟས་པར་འགྱུར་བས་བྱའོ། །མཉམ་པར་གཞག་པ་བསྲུང་བར་བྱ་བའི་དོན་དུ། མདུན་དང་ཞེས་བྱ་བ་ལ་སོགས་པ་གསུངས་ཏེ། འགྲོ་བ་ནི་མདུན་དུའོ། །འོང་བ་ནི་ཕྱིར་ལ་སྟེ། གཡང་ས་ལ་སོགས་པའི་གནོད་པ་བལྟ་བར་བྱའོ། །དེ་ལྟར་བསྟན་པའི་རིམ་པའི་ཟུར་གྱིས་རང་དང་གཞན་ལ་ཕན་པ་དང་དགོས་པ་ཁོང་དུ་ཆུད་པར་བྱས་ན་སྒྲུབ་པ་སྙིང་པོར་གྱུར་པ་ཡིན་ནོ།། །།བམ་པོ་བདུན་པ། ད་ནི་ཤེས་བཞིན་གྱི་བྱ་བ་བསླབ་པའི་ཕྱིར། ལུས་ཀྱིས་ཞེས་བྱ་བ་ལ་སོགས་པ་གསུངས་ཏེ། སྤྱོད་ལམ་བཞིའི་ནང་ནས་སྤྱོད་ལམ་གང་ཡང་རུང་བ་ཞིག་ལ། ལུས་ཀྱིས་འདི་ལྟར་
ཞེས་བྱ་བ་ནི་འགྲེང་བས་སམ་འདུག་པས་གནས་པར་བྱ་སྟེ། དེ་མ་ཐག་ཏུ་ཁ་ཏོན་ལ་སོགས་པའི་བྱ་བའི་ལས་བརྩམས་ནས་ཡང་ལུས་འདི་ཇི་ལྟར་བུར་གནས་པ་ཡིན་ཞེས་སྐབས་སུ་རྣམ་པར་བལྟ་བར་བྱའོ། །སྤྱོད་ལམ་དེ་ཉིད་ལའམ། དེ་སྟེ་སྤྱོད་ལམ་ལོགས་ཤིག་ལའོ། །ལོགས་ཤིག་པ་ལ་ཡིན་ན་ཡང་སྔ་མ་བཞིན་དུ་ལེགས་པར་གནས་པར་བྱའོ། །ལུས་ལ་སོ་སོར་རྟོག་པ་བརྗོད་ནས་སེམས་ལ་སོ་སོར་རྟོག་པ། སེམས་ཀྱིས་ཞེས་བྱ་བ་ལ་སོགས་པ་གསུངས་ཏེ། བདག་དང་གཞན་ལ་ཕན་པའི་མཚན་ཉིད་ཀྱི་ཆོས་ལ་སེམས་པ་ནི་ཀ་ཆེན་ཏེ། འཆིང་བ་དག་ལས་ཐར་བར་བྱེད་པའི་རྒྱུ་ཡིན་པའི་ཕྱིར་རོ། །དེ་ལ་བཏགས་པ་ཡང་ཡང་དང་ཡང་དུ་བརྟག་པར་བྱ་བ་ཡིན་པས། ཅི་ནས་ཞེས་བྱ་བ་ལ་སོགས་པ་གསུངས་ཏེ། ཡང་བདག་གིས་ཡིད་འདི་གང་ན་སྤྱོད་ཅེས་དམིགས་པ་སྔ་མའམ། དམིགས་པ་བཞིན་དུ་བརྟགས་ལ། སོང་བར་རྟོགས་ན་དེ་ནས་བཟློག་ལ་དེ་ཉིད་དུ་སྦྱར་བར་བྱའོ། །རང་གི་ངང་གིས་འབབ་ན་ནི་བཏང་སྙོམས་སུ་བྱའོ། །དེ་ལྟར་ཞི་གནས་ཀྱི་ཁུར་སྐད་ཅིག་གཅིག་ཀྱང་ཇི་ལྟར་མི་འཚོར་བ་དེ་ལྟར་གཟུང་བར་བྱའོ། །རེ་ཞིག་དེ་དག་གིས་ནི་ཚུལ་ཁྲིམས་ནི་ཏིང་ངེ་འཛིན་སྒྲུབ་པར་བྱེད་པ་ཡིན་ནོ་ཞེས་བསྟན་པ་ཡིན་ནོ། །ཇི་སྐད་དུ་ཟླ་བ་སྒྲོན་མའི་མདོ་ལས། ཉོན་མོངས་མེད་པའི་ཏིང་ངེ་འཛིན་མྱུར་ཐོབ་སྟེ། །དེ་ནི་ཚུལ་ཁྲིམས་རྣམ་དག་ཕན་ཡོན་ནོ། །ཞེས་གསུངས་སོ། །དེ་བས་ན་ཏིང་ངེ་འཛིན་གྱི་རྒྱུར་གྱུར་པའི་སྦྱོར་བ་ཇི་སྙེད་པ་གང་ཅི་ཡང་རུང༌། བཟའ་བ་དེ་དག་ནི་ཚུལ་ཁྲིམས་རྗེས་སུ་སོང་བ་ཡིན་པར་རིག་པར་བྱའོ། །དེ་ལྟ་བས་ན་ཏིང་ངེ་འཛིན་དོན་དུ་གཉེར་བས་དྲན་པ་དང་ཤེས་བཞིན་གྱི་ངང་ཚུལ་ཅན་དུ་བྱའོ། །དེ་བཞིན་དུ་ཚུལ་ཁྲིམས་དོན་དུ་གཉེར་བས་བྱ་བ་ཏིང་ངེ་འཛིན་ལ་ནན་ཏན་དུ་བྱའོ། །ཏིང་ངེ་འཛིན་ཡོངས་སུ་སྤོང་བའི་སྐབས་ན་འཇིགས་དང་ཞེས་བྱ་བ་ལ་སོགས་པ་གསུངས་ཏེ། འཇིགས་པ་ནི་མེའི་སྲེག་པ་ལ་སོགས་པའོ། །དེ་བཞིན་དུ་དཀོན་མཆོག་གསུམ་ལ་མཆོད་པ་ལ་སོགས་པ་ནི་དགའ་སྟོན་ནོ། །དེ་བས་ཆེས་ལྷག་པའི་སེམས་ཅན་གྱི་དོན་ལ་སོགས་པའང་རུང་སྟེ། དེ་དག་བྱུང་བ་ན་གལ་ཏེ་གནས་པར་མི་ནུས་ན་དེའི་ཚེ་འདོད་པ་བཞིན་དུ་སྦྱོར་
དོ་ཞེས་གནང་བ་སྟེ། ལྟུང་བ་དང་བཅས་པར་མི་འགྱུར་རོ་ཞེས་བྱ་བའི་དོན་ཏོ། །ཡང་ཅིའི་ཕྱིར་འདི་ངེས་པ་མེད་པར་འགྱུར་ཞེ་ན། འདི་ལྟར་ཞེས་བྱ་བ་ལ་སོགས་པ་གསུངས་ཏེ། གང་ཡང་ཚུལ་ཁྲིམས་ནི་སྦྱིན་པ་བས་མཆོག་ཏུ་བྱུང་བ་ཡིན་མོད་ཀྱི། དེ་ལྟ་ན་ཡང་བསླབ་པ་གཞན་སློབ་པའི་དེ་མ་ཐག་ཏུ་ཕྱི་ནས་བསླབ་པའི་གནས་ལ་གོམས་པ་གསལ་བ་མེད་པའི་ཕྱིར། ཇི་ཞིག་ལྟར་དུས་དེ་སྲིད་དུ་དེ་ལས་ལྡོག་པར་བྱེད་ནའང་ལྟུང་བ་མེད་པ་ཡིན་ནོ། །འདི་སྦྱིན་པའི་དུས་ཡིན་གྱི་ཚུལ་ཁྲིམས་ཀྱི་ནི་མ་ཡིན་པ་སྟེ། དེ་ཉིད་ཀྱི་ཕྱིར་གསུངས་པ། གལ་ཏེ་མི་ནུས་ཞེས་སོ། །དེ་དག་ཙམ་ཉིད་ཀྱི་དཔེ་བརྗོད་པ་ཡིན་ནོ། །ཇི་སྐད་དུ། དེ་ལ་བསླབ་པ་གཅིག་རྫོགས་པར་བྱེད་པ་བསླབ་པ་ཕྱི་མ་གོམས་པར་མ་བྱས་པས་མི་ནུས་པ་ལ་ལྟུང་བ་མེད་དོ་ཞེས་བསྟན་ཏོ། །འཕགས་པ་བློ་གྲོས་མི་ཟད་པའི་མདོ་ལས་ཀྱང༌། ཇི་སྐད་དུ། སྦྱིན་པའི་དུས་སུ་ཚུལ་ཁྲིམས་ཉེ་བར་བསྡུས་ཏེ་བཏང་སྙོམས་སུ་བྱའོ་ཞེས་རྒྱ་ཚེར་གསུངས་སོ། །དེ་ལྟ་བས་ན་ལྷོད་པར་མི་བྱའོ། །དགེ་བའི་ཕྱོགས་གང་ལ་སྤྱོད་ན་ཡང་ཏིང་ངེ་འཛིན་འགའ་ཞིག་གི་གེགས་སུ་འགྱུར་བ་དེ་བླང་བར་བྱ་བ་མ་ཡིན་པས། གང་ཞིག་བསམས་ཏེ་ཞེས་བྱ་བ་ལ་སོགས་པ་གསུངས་ཏེ། རང་ཉིད་ཀྱི་རིགས་པ་དང་ལུང་གིས་སམ་དགེ་བའི་བཤེས་གཉེན་གྱི་གསུང་གི་ཅུས་པ་ཇི་ལྟ་བ་བཞིན་དུ་ངེས་པར་བཟུང་ནས་བསམ་གཏན་དང་བསམ་པ་ལ་སོགས་པ་ལས་གང་ཅུང་ཟད་ཅིག་བརྩམས་པ་དེར་ཡིད་གཞོལ་བས་དང་པོར་དེ་ཉིད་རེ་ཞིག་བསྒྲུབ་པར་བྱ་སྟེ། དེ་མ་གྲུབ་པར་དུ་ཡོངས་སུ་དོར་ནས་གཞན་བརྩམ་པར་ནི་མི་བྱའོ། །གལ་ཏེ་དེ་ལྟར་མ་གྱུར་ན་ཅི་ཉེས་ཤེ་ན། དེ་ལྟ་ན་ནི་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དེ་ལྟར་ནན་ཏན་བྱས་པས་ཐམས་ཅད་ལེགས་པར་བྱས་པར་འགྱུར་གྱི་དེ་ལས་བཟློག་པ་ནི་སྔར་ཁས་བླངས་པ་དང་ཕྱིས་དམ་བཅས་པ་གཉི་གར་མ་འབྲེལ་བར་འགྱུར་རོ། །འཇུག་པ་མི་བརྟན་པ་ནི་ཤེས་བཞིན་མ་ཡིན་པར་རྗེས་སུ་འཇུག་པས་འཕེལ་བར་འགྱུར་རོ། །དེ་ལྟ་ནའང་འབྲས་བུ་མེད་པ་སྤང་བར་བྱའོ་ཞེས་གསུངས་པ། བྲེ་མོའི་གཏམ་ནི་ཞེས་བྱ་བ་ལ་སོགས་པ་ཡིན་ཏེ། འབྲེལ་པ་མེད་པ་རྣམ་པ་དུ་མ་བརྗོད་པ་དང་གཞན་
དག་གིས་བྱས་པ་ལ་འཇུག་པ་ངོ་མཚར་བའི་དངོས་པོ་མཐའ་དག་ལའམ་རང་གིས་ཀྱང་བྱ་བ་དེ་ལ་ལྟ་བ་དང་མཉན་པའི་ཕྱིར་ངག་དང་སེམས་ཞུགས་པ་ལས་བཟློག་པར་བྱའོ། །གཞན་ཡང་འབྲས་བུ་མེད་པ་སྤང་བར་བྱ་བའི་ཕྱིར་སོ་སོར་ཐར་པ་ལས་བསྟན་པར་བྱ་བ་སྤྱད་པར་བྱའོ་ཞེས་བྱ་བ་ནི། དོན་མེད་ས་རྐོ་ཞེས་བྱ་བ་ལ་སོགས་པ་གསུངས་པ་ཡིན་ཏེ། ས་དང་བྱང་བུ་ལ་སོགས་པ་ལ་སེན་མོ་དང༌། དབྱུགས་པ་ལ་སོགས་པའི་རི་མོ་འདྲེན་ཅིང་འབྲི་བ་ལ་སོགས་པ་དགོས་པ་མེད་པ་བྱེད་པ་ནི་ལྟུང་བར་འགྱུར་བས། བཅོམ་ལྡན་འདས་ཀྱིས་འདི་ལས་བཟློག་པར་བྱ་བ་བཀའ་བསྒོ་བ་དྲན་པར་བྱས་ལ་རྣམ་པར་སྤང་བར་བྱ་སྟེ། དེ་ལས་འདིར་ནི་འབྲས་བུ་རྣམ་པར་སྨིན་པ་འཇིགས་པའི་ཕྱིར་རོ། །དེའི་མོད་ལ་ཞེས་བྱ་བ་ནི་དུས་དེ་འགྲོ་བར་མི་བྱའོ། །ཀུན་ནས་ཉོན་མོངས་པའི་སྤྱོད་པ་ལ་ཤེས་བཞིན་དུ་བྱ་བར་བསླབ་པ་ནི་གང་ཚེ་ཞེས་བྱ་བ་ལ་སོགས་པའི་ཚིགས་སུ་བཅད་པ་བདུན་གྱིས་བསྟན་པ་ཡིན་ཏེ། གང་ཚེ་ཞེས་བྱ་བ་ལ་སོགས་པ་ལ་དང་པོར་རང་གི་སེམས་བརྟགས་ནས་གསུངས་པ་ནི་ཀུན་ནས་ཉོན་མོངས་པ་མེད་པའི་གནས་སྐབས་ལྟར་བྱ་བ་བསྟན་པའོ། །དེ་ཉིད་ནི་ཆགས་པའམ་ཞེས་བྱ་བ་ལ་སོགས་པས་བསྟན་པར་བྱེད་དེ། གང་གི་ཚེ་རང་གི་སེམས་ཆགས་པའམ་སྡང་བར་མཐོང་བ་དེའི་ལག་པ་དང་རྐང་པ་ལ་སོགས་པ་བསྐྱོད་པ་ཙམ་ཡང་མི་བྱ་ཞིང་དག་གིས་ཀྱང་བརྗོད་པར་མི་བྱ་སྟེ། གཞན་དུ་ན་དེས་བསླང་པའི་ལུས་དང་ངག་གི་རྣམ་པར་རིག་བྱེད་ཀྱང་ཀུན་ནས་ཉོན་མོངས་པ་ཅན་དུ་འགྱུར་རོ། །དེའི་ཕྱིར་དབང་པོ་ཕྱི་རོལ་གྱི་བྱེད་པའི་རྣམ་པར་རྟོག་པ་བསྡུས་ལ་དེ་ཚེ་ཤིང་བཞིན་དུ་གནས་པར་བྱས་ཏེ། བྱེད་པ་ཐམས་ཅད་དང་བྲལ་བའི་ཕྱིར་ཆོས་ཐམས་ཅད་ནི་བྱེད་པ་པོ་མེད་པའོ་ཞེས་ཡིད་ལ་བཞག་ལ་ཤིང་བཞིན་དུ་གནས་པར་བྱའོ། །གཞན་ཡང་རྒོད་དང་ཞེས་གསུངས་པ་ནི་དམ་པའི་ཆོས་ལ་སོགས་པ་ཉན་པ་ལ་དད་པ་ལས་ཀྱང་རྒོད་པ་སྟེ། རྣམ་པར་གཡེང་བ་མང་བ་ཞེས་བྱ་བའི་དོན་ཏོ། །གཞར་བཅས་པ་ནི་ངག་གི་ཐེ་འཚམས་པ་ལ་བརྩོན་པར་བྱེད་པ་སྟེ། དེ་དག་ལྡན་པའམ་ང་རྒྱལ་ནི་སེམས་ཁེངས་པའོ། །རྒྱགས་པ་ནི་རྣག་གི་ཆོས་ལ་སེམས་མངོན་པར་ཞེན་པ་
སྟེ། དེ་དག་དང་ལྡན་པ་ནི་དེ་དག་དང་ཡང་དག་པར་ལྡན་པའོ། །མཚང་འབྲུ་བ་ནི་ལུས་ཀྱི་ཐོ་མཚམས་པ་སྟེ། དེ་དང་ལྡན་པས་རྒོད་པའོ། །སྐྱོར་འབྱིན་ནི་གྱ་གྱུར་ཅན་ནམ་གཡོ་ཅན་ནོ། །སླུ་སེམས་ནི་སླུ་བར་བྱེད་པའམ་སྒྱུ་ཅན་ཏེ། གང་གི་ཚེ་ཡིད་དེ་ལྟར་གྱུར་པ་ན། དེ་ཚེ་ཤིང་བཞིན་གནས་པར་བྱ། །ཞེས་བྱ་བར་འབྲེལ་ཏོ། །བདག་ལ་བསྟོད་པ་ནི་རང་གི་ཡོན་ཏན་ཤིན་ཏུ་ཡང་སྟོན་པའོ། །དེར་སྣང་བ་ནི་དེ་རུ་སྣང་བ་སྟེ། དེར་རྣམ་པར་བརྟགས་པའི་ཕྱིར་རོ། །གཞན་ལ་སྨོད་པ་ནི་གཞན་ཚར་གཅོད་པའམ་ཉེས་པ་བསལ་བར་བྱེད་པ་སྟེ། དེ་དང་ལྡན་པའོ། །གཤེ་བཅས་ནི་གཞན་གྱི་ཚིག་ལ་སྨོད་པའོ། །འགྱེད་པ་ནི་རྟག་ཏུ་འཐབ་པ་དང་རྩོད་པའི་རྒྱུ་མཚན་ལ་སེམས་པ་སྟེ། འདིར་གཉི་ག་ལ་དེ་དང་བཅས་པར་གནས་པ་ཞེས་ཚིག་བསྡུས་པ་ཡིན་ནོ། །དེ་ལྟར་གང་གི་ཚེ་མཐོང་བ་ན་རང་གི་ཡིད། དེ་ཚེ་ཤིང་བཞིན་གནས་པར་བྱ། ཞེས་སྤྱིར་བསྟན་པ་དང་སྦྱར་རོ། །གྲགས་པ་ནི་སྙན་པའོ། །འཁོར་ནི་བྲན་ཕོ་དང་བྲན་མོ་དང་ལས་བྱེད་པ་ལ་སོགས་པའོ། །རིམ་གྲོ་ནི་རྐང་པ་འཁྲུ་བ་དང་ཉེད་པ་ལ་སོགས་པའོ། །འདི་དག་དོན་དུ་གཉེར་བ་ནི་འདོད་པ་སྟེ་བདག་གིས་སེམས་དེ་དག་ལས་ཞིང་བཞིན་དུ་གནས་པར་བྱའོ། །གཞན་དོན་ཡལ་བར་འདོར་བ་ནི་གཞན་གྱི་དོན་ལ་ཕྱིར་ཕྱོགས་པའོ། །རང་དོན་གཉེར་བ་ནི་རང་གི་དོན་ལ་མངོན་པར་ཞེན་པའོ། །གཡོག་འཁོར་ནི་སློབ་མ་དང་ཉེ་གནས་ལ་སོགས་པ་འདུས་པ་སྟེ། འདི་དག་མངོན་པར་འདོད་ཅིང་འཁོར་དེ་དག་དོན་དུ་གཉེར་བའོ། །མི་བཟོད་པ་ནི་བཟོད་པ་མེད་པའི་ངང་ཚུལ་ལོ། །ལེ་ལོ་ནི་བྱ་བ་ལ་ལས་སུ་མི་རུང་བ་ཡིན་ཏེ་སྙོམ་ལས་ཞེས་བྱ་བའི་དོན་ཏོ། །འཇིགས་པ་ནི་ལུས་དང་འཚོ་བའི་འཇིགས་པའམ་འཇིགས་པའི་རྒྱུ་ལས་སོ། །སྤྱི་བརྟོལ་ནི་སྤྱིས་བརྩོན་པའོ། །མུར་ཅོར་སྨྲ་བ་ནི་ཚིག་ངན་པ་ཅན་ནམ་རིགས་པ་དང་མི་རིགས་པ་ལ་ལྟོས་པ་མེད་པར་རྗོད་པར་བྱེད་པའོ། །རང་གི་ཕྱོགས་ནི་སློབ་མ་དང་ཉེ་གནས་དང་གཉེན་དང་ཕ་ལ་སོགས་པའོ། །ཞེན་པ་ནི་ཤིན་ཏུ་ཕྱོགས་སུ་ལྟུང་བ་དང་ལྟན་པའི། །ད་ནི་ཕྱིར་བཅོས་པའི་ཕྱོགས་ཙམ་གསུངས་པ། དེ་ལྟར་ཞེས་བྱ་བ་ལ་སོགས་པ་སྟེ་བསྟན་པའི་
རིམ་པས་སོ། །ཀུན་ནས་ཉོན་མོངས་ཏེ་ཀུན་ནས་ཉོན་མོངས་པ་དང་ལྡན་པའོ། །རང་གི་སེམས་འབྲས་བུ་མེད་པའི་བྱེད་པ་དང་ལྡན་པ་ཤེས་པར་བྱས་ནས་འཇུག་པ་ཐམས་ཅད་བཀག་ལ་ནུས་པ་མཐུ་ཆུང་བར་བྱས་ནས་ཚར་གཅད་པར་བྱ་ཞིང་ཟིལ་གྱིས་མནན་པར་བྱའོ། །བསྟན་པ་ནི་ཇི་ནས་སླར་ཡང་འཇུག་པར་མི་འགྱུར་བའི་ཆོས་ཅན་ནོ། །ཉོན་མོངས་པའི་དགྲའི་གཡུལ་ལས་རྣམ་པར་རྒྱལ་བར་བྱ་བའི་ཕྱིར་ག་དར་བྱས་པའི་དཔའ་བོ་སྟེ་བྱང་ཆུབ་སེམས་དཔའོ། །གཉེན་པོ་ཡིས་ནི་གང་ཞིག་གང་དུ་གཉེན་པོར་བསྟན་པ་སྟེ། ཇི་ལྟར་འདོད་ཆགས་པ་ལ་སོགས་པའི་མི་སྡུག་པ་ལ་སོགས་པ་ལྟ་བུའོ། །དེས་དེ་ལས་བཟློག་པར་བྱའོ་ཞེས་བྱ་བའི་དོན་ཏོ། །རྟག་ཏུ་ནི་དུས་ཐམས་ཅད་དུ་སྟེ་གང་དང་གང་གི་ཚེ་ཀུན་ནས་ཉོན་མོངས་པ་རྟོགས་པ་ནའོ། །དྲག་ཤུལ་ཅན་གྱིས་ཞུས་པ་ལས། བྱང་ཆུབ་སེམས་དཔའ་ཁྱིམ་པའི་དབང་དུ་བྱས་ཏེ་གསུངས་པ། དེས་འབྲུའི་ཆང་དང་སྦྱར་བའི་ཆང་བག་མེད་པའི་གནས་སྤང་བར་བྱ་སྟེ། དེ་ར་རོ་བ་མེད་པ་དང༌། མྱོས་པ་མེད་པ་དང༌། འཁྲུལ་པ་མེད་པ་དང༌། ཚིག་མ་འཆལ་བ་དང༌། མི་འཆར་བ་དང༌། མི་ཁེངས་པ་དང༌། མི་རྒོད་པ་དང༌། མི་གཡེང་བ་དང༌། དྲན་པ་ཉེ་བར་གནས་པ་དང༌། ཤེས་བཞིན་དང་ལྡན་པར་བྱའོ་ཞེས་སོ། །དེ་ཉིད་ལས་རབ་ཏུ་བྱུང་བའི་བྱང་ཆུབ་སེམས་དཔའི་དབང་དུ་བྱས་ཏེ་གསུངས་པ། དྲན་པ་དང་ཤེས་བཞིན་ནི་མི་གཡེང་བའོ་ཞེས་སོ། །དེ་བཞིན་དུ་འཕགས་པ་དེ་བཞིན་གཤེགས་པའི་གསང་བའི་མདོ་ལས་བསྟན་ཏེ། རིགས་ཀྱི་བུ་བྱང་ཆུབ་སེམས་དཔའ་ངག་ནི་ཚིགས་པའམ། སྡང་བའམ། ཉོན་མོངས་པ་ཅན་ནམ། སྐད་ཅིག་གསལ་བར་བྱས་པའམ། རང་གི་ཕྱོགས་བསྟོད་པའི་ཚིག་གམ་གཞན་གྱི་ཕྱོགས་ཚར་བཅད་པའི་ཚིག་གམ། བདག་ལ་བསྟོད་པ་ལ་རྗེས་སུ་ཆགས་པའི་ཚིག་གམ། གཞན་གྱིས་བསྟོད་པ་ལ་གནོད་པའི་ཚིག་གམ། ཁ་འོག་ཏུ་ལུས་འཁྲུས་པར་མི་བྱེད་པའི་ཚིག་གམ། མངོན་པའི་ང་རྒྱལ་གྱིས་ལུང་སྟོན་པའི་ཚིག་མི་འབྱིན་ཞེས་སོ། །དེ་ལྟར་འབྲས་བུ་མེད་པའི་སྤྱོད་པ་སྤངས་པས། དོན་མེད་པ་སྤང་པའི་ཕྱིར་ལུས་བསྲུང་བ་བསྟན་པ་ཡིན་ནོ། །
དེ་ལྟ་བས་ན་བདག་གིས་ཚུལ་ཁྲིམས་ལ་ལེགས་པར་གནས་པ་དང༌། མི་བསྐྱོད་པ་དང༌། མི་ལྷོད་པར་གྱུར་པར་བྱའོ། །དེ་དག་ཀྱང་སེམས་མཉམ་པར་གཞག་པས་འགྲུབ་པར་འགྱུར་རོ། །དེའི་ཕྱིར་ཞི་གནས་ཀྱི་བདག་ཉིད་ཆེན་པོ་འདི་རྟོགས་ནས་དེ་ལྷུར་བླངས་ཏེ་བསྒོམ་པར་བྱའོ། །འདིས་ནི་བསླབ་པ་རྣམས་ལ་གུས་པ་དྲག་པོར་འགྱུར་བ་ཡིན་ལ། དེས་ཀྱང་དྲན་པ་ཉེ་བར་གནས་ཏེ། དྲན་པ་ཉེ་བར་གནས་པས་འབྲས་བུ་མེད་པ་སྤོང་ཞིང་དེ་ལ་དོན་མེད་པ་ཕྱིར་འབྱུང་ངོ༌། །དེ་ལྟ་བས་ནི་ལུས་བསྲུང་བར་འདོད་པས་རྩ་བ་དྲན་པ་བཙལ་ཏེ་དྲན་པ་ཉེ་བར་གནས་པར་རྟག་ཏུ་གྱུར་པར་བྱའོ། །དེ་ཉིད་ནི། དེ་ལ་ལུས་བསྲུང་གང་ཡིན་ན། །གང་ཞིག་དོན་མེད་སྤང་བའོ། །དེ་ཀུན་གང་གིས་འཐོབ་ཅེ་ན། །འབྲས་བུ་མེད་པའི་སྤྱོད་སྤངས་ལས། །དེ་ཡང་རྟག་ཏུ་དྲན་པས་འགྲུབ། །དྲན་པ་ཤིན་ཏུ་གུས་ལས་འབྱུང༌། །གུས་ནི་ཞི་བ་ཆེ་བདག་ཉིད། །ཤེས་པར་གྱུར་ནས་བརྟུན་པ་སྐྱེ། །ཞེས་གསུངས་པ་ཡིན་ནོ། །ཞི་གནས་ཀྱི་ཆེ་བའི་བདག་ཉིད་ཀྱང་སྐབས་ཇི་ལྟ་བ་བཞིན་དུ་འདི་ལས་འཆད་པར་འགྱུར་རོ། །འདིར་དོན་མེད་པ་སྤང་བའི་དོན་དུ་བསྡུས་པའི་དོན་འདི་ཁོང་དུ་ཆུད་པར་བྱའོ་ཞེས་ཚིགས་སུ་བཅད་པ་གསུམ་གྱིས་བསྟན་པ། ཤིན་ཏུ་ངེས་དང་ཞེས་བྱ་བ་ལ་སོགས་པ་གསུངས་ཏེ། ཤིན་ཏུ་ངེས་པ་ནི་ཐེ་ཚོམ་དང་ཕྱིན་ཅི་ལོག་སྤངས་པའོ། །རབ་དང་ནི་རྟག་ཏུ་དགའ་བ་དང་ཡིད་བདེ་བ་མང་བའོ། །བརྟན་པ་ནི་མ་བརྟགས་པའོ། །གུས་པ་ནི་བཤད་པ་ཉིད་ཡིན་ནོ། །ཞེ་ས་ནི་མཉེས་པར་བྱ་བ་རྣམས་ལ་སེམས་འདུད་པ་སྟེ། དེ་དག་དང་ལྷན་ཅིག་འཇུག་པའོ། །ངོ་མཚར་བཅས་ནི་སྔ་མ་བཞིན་ནོ། །འཇིགས་བཅས་ནི་འཁྲུལ་པ་བྱུང་བས་འཇིག་རྟེན་ལ་འཇིགས་པའོ། །ཞི་བ་ནི་དབང་པོ་ཡང་དག་པར་སྡོམ་པའོ། །སེམས་ཅན་མགུ་བར་བྱེད་པ་ལ་བརྩོན་པ་དང་ལྡན་པ་དང༌། སྐྱེ་བོ་གཅིག་གི་འདོད་པ་གང་ཡིན་པ་དེ་གཞན་ལ་བཟློག་པ་ཡིན་པས་སོ་སོའི་སྐྱེ་བོའི་འདོད་པ་ཕན་ཚུན་མི་མཐུན་པ་རྣམས་ཀྱིས་མི་སྐྱོབ་སྟེ་ཡིད་ལ་གཅགས་པ་མེད་པའོ། །ཇི་ལྟར་ཞེ་ན། བརྩེར་ལྡན་ཏེ། འདི་ནི་གཏན་ཚིགས་ཀྱི་ཚིག་ཡིན་ནོ། །གང་གི་ཕྱིར་ཉོན་མོངས་པ་སྐྱེས་པས་ཏེ་རང་དབང་མེད་པས་སོ།།
འདི་ཞེས་པ་ནི་དེ་དག་སྟེ་བྱིས་པ་འདི་དག་གི་ཕན་ཚུན་མི་མཐུན་པའི་སྤྱོད་པའོ་སྙམ་དུ་ཤེས་པར་བྱས་ནས་སོ། །བདག་དང་སེམས་ཅན་དབང་བྱས་ཤིང་ནི་རང་དང་གཞན་ལ་རག་ལས་པར་ཏེ་དུས་ཐམས་ཅད་དུའོ། །ཅི་ཐམས་ཅད་དུའམ་ཞེ་ན་མ་ཡིན་ཏེ། ཁ་ན་མ་ཐོ་མེད་དངོས་ལ་སྟེ། ཁ་ན་མ་ཐོ་བ་གཉི་གས་སྟོང་པ་རྣམས་ལའོ། །ཅི་དང་འདྲ་བར་ཞེ་ན། སྤྲུལ་པ་བཞིན་དུ་སྟེ་སྤྲུལ་པ་བྱས་པ་ལྟར་ང་རྒྱལ་དང་བྲལ་བ་སྟེ། ང་རྒྱལ་ལེགས་པར་གཟུང་བར་བྱ་སྟེ་བདག་འདི་ལྟ་བུ་ཡིན་ནོ་སྙམ་དུ་བྱང་ཆུབ་སེམས་དཔའ་ཡིད་ལ་གཞག་པར་བྱའོ། །སྐྱེ་བ་ཡིད་ལ་བྱེད་པ་འདི་ལས་ཀྱང་སེམས་ཀྱི་དོན་མེད་པ་སྤངས་པས་བསྲུང་བར་བྱའོ་ཞེས་གསུངས་པ། རིང་ཞིག་ཅེས་བྱ་བ་ལ་སོགས་པ་ཡིན་ཏེ། དུས་ཤིན་ཏུ་མང་བ་ཞིག་གིས་ཐོབ་པའི་དལ་བ་མཆོག་བསྟན་པ་དྲན་པའི་སེམས་ཀྱིས་ཡང་དང་ཡང་དུ་བར་མེད་པར་བྱས་ཤིང་བརྟན་པར་བྱའོ། །དེ་ལྟ་བུར་ནི་བརྟན་པའི་རང་བཞིན་ཅན་དུའོ། །རབ་ཏུ་མི་གཡོ་ནི་འདོད་པ་ལ་སོགས་པ་རྣམ་པར་རྟོག་པའི་རླུང་རྣམས་ཀྱིས་རིའི་རྒྱལ་པོ་ལྟར་བསྐྱོད་པར་མི་ནུས་པའོ། །དེ་ལྟར་ཚུལ་ཁྲིམས་དང་ཏིང་ངེ་འཛིན་ཕན་ཚུན་འཕེལ་བར་བྱེད་པ་དེ་དག་གིས་སེམས་ཀྱི་ལས་ཡོངས་སུ་བསྒྲུབ་པ་ཡིན་ནོ། དེ་ལྟ་བས་ན་བྱང་ཆུབ་སེམས་དཔའི་བསླབ་པ་ནི་སེམས་ཡོངས་སུ་སྦྱང་བ་ཉིད་ཡིན་ནོ་ཞེས་བྱ་བ་དེ་དག་གནས་སོ། །དེས་ན་གང༌། སེམས་བསྲུང་བརྟུལ་ཞུགས་མ་གཏོགས་པ། །བརྟུལ་ཞུགས་མང་པོས་ཅི་ཞིག་བྱ། །ཞེས་གསུངས་ཏེ། དེ་གནས་པ་ཡིན་ནོ། །ཡང་དེ་ཉིད་གཅིག་ཏུ་ངེས་པར་ལེགས་པར་གཟུང་བར་བྱ་བའི་ཕྱིར་ལུས་ལ་སོ་སོར་བརྟགས་པ། བྱ་རྒོད་ཅེས་བྱ་བ་ལ་སོགས་པ་གསུངས་ཏེ། ལུས་ལ་ནི་རྣམ་པ་ཐམས་ཅད་དུ་གང་ཡང་བྱེད་པ་མེད་དེ། བདག་རང་ཉིད་ལའང་ནུས་པ་མེད་པའི་ཕྱིར་རོ། །གཞན་དུ་སེམས་དང་བྲལ་བའི་ལུས་བྱ་རྒོད་ལ་སོགས་པ་རྣམས་ཀྱིས་ཕན་ཚུན་ཀུན་ཏུ་དྲངས་ཤིང་གློངས་ཀྱང་བདག་ཉིད་བསྲུང་བའི་དོན་དུ་སླར་བཅོས་པ་ཅི་སྟེ་མི་བྱེད་ཅེས་འདྲི་བའོ། །ནུས་པ་ཐམས་ཅད་མེད་པའི་ཕྱིར་ཏེ། དེ་ཉིད་ཀྱི་ཕྱིར་ནི་སེམས་ཡོངས་སུ་སྦྱང་བ་ཉིད་བསྒྲུབ་པར་བྱ་བ་ཡིན་ནོ། །དེ་ཡོངས་སུ་སྦྱངས་ནས་འབད་པ་མེད་
པར་ལུས་ཡོངས་སུ་སྦྱངས་པ་འགྲུབ་སྟེ་དེ་ནི་དེ་ལ་རག་ལས་པའི་ཕྱིར་རོ། །ཞེས་བསྟན་པར་འགྱུར་རོ། །དེ་ལྟར་རྣམ་པ་ཐམས་ཅད་དུ་མཁོ་བ་མ་ཡིན་པའི་ལུས་ལ་ལྟོས་པ་དང་བཅས་པ་དགག་པ། ལུས་འདི་ཞེས་བྱ་བ་ལ་སོགས་པ་གསུངས་ཏེ། ཀྱེ་ཡིད་བདག་ཉིད་མ་ཡིན་པ་ལ་བདག་ཉིད་དུ་ཁས་བླངས་ནས་ཤ་དང་རུས་པའི་ཚོགས་ལུས་ཀྱི་མིང་ཅན་ལ་ཅིའི་ཕྱིར་ན་ཁྱོད་སྲུང་བར་བྱེད། ཅི་སྟེ་དེ་ལྟར་མི་བྱ་ཞེ་ན། གལ་ཏེ་ཁྱོད་དང་ལུས་འདི་ཐ་དད་པ་ཡིན་ན། དེ་སྟེ་འདི་གོད་པས་ཁྱོད་ལ་ཅི་ཞིག་གོད་པར་འགྱུར། སྔར་ནས་ཡུན་རིང་པོར་བདག་གིར་བྱས་པས་སོ་ཞེ་ན། གསུངས་པ། རྨོངས་པ་ཀྱེ་བདག་གིར་མི་བྱེད་པ་སྟེ། ཁྱོད་རྨོངས་པས་འགྱིངས་པ་འདི་གཙང་མ་ནི་དག་བྱེད་དོ། །འདི་ནི་མི་གཙང་བ་ཡིན་ནོ། །མི་གཙང་ཞེས་བྱ་བ་འདི་གསུངས་ཏེ། རུལ་པ་ནི་སུམས་པའི་ཆོས་སོ། །འོ་ན་དེ་ལྟ་ན། ཅི་གཞན་ལ་མེད་པའི་ངང་སྐྱོན་བརྗོད་དམ་ཞེ་ན། འདིར་རེ་ཞིག་ཅེས་བྱ་བ་ལ་སོགས་པ་གསུངས་ཏེ། བགས་པའི་རང་བཞིན་གྱི་རིམ་པའོ། །རང་གི་བློ་གྲོས་ཀྱི་ཁྱད་པར་གྱིས་ཐ་དད་ཕྱི་ཞིག་པ་ནི་རང་གི་ལུས་རུས་པ་ལས་བྱས་པའི་དྲ་བའི་འཁྲུལ་འཁོར་ལས་སོལ་ཅིག་པའོ། །ཤེས་རབ་ཀྱི་བདག་ཉིད་ཀྱིས་མཚོན་གྱིས་ཤ་ཆོད་ལ། དེ་མ་ཐག་ཏུ་རུས་པ་རྣམས་ཀྱང་དུམ་བུར་སོ་སོར་ཐ་དད་པར་གྱིས་ལ་རྐང་ལ་བལྟ་བར་བྱ་སྟེ། རྣམ་པར་ལྟོས་ཤིག །ལུས་ཀྱི་ནང་གང་ཡིན་པ་འབྱུང་བ་ཆེན་པོ་བཞི་ལས་བྱུང་བ། ཕ་དང་མའི་མི་གཙང་བ་ནུར་ནུར་པོ་ལས་བྱུང་བ། སྡུག་བསྔལ་གྱི་རང་བཞིན་བྱས་པ་མི་གཟོ་བའོ་ཞེས་རྒྱ་ཆེར་རྟོགས་པར་བྱའོ། །འདི་ལ་སྙིང་པོ་ཅི་ཡོད་ཅེས་བྱ་བ་ནི་མཁས་པས་བསྔགས་པའམ་རིག་པ་དང་ལྡན་པར་ཏེ། དེ་ལྟར་བདག་ཉིད་ཀྱིས་བརྟགས་པར་གྱིས་ཤིག །དེ་ལྟར་ནི་བརྗོད་པའི་ཚུལ་དུའོ། །ལེགས་པར་སྨྲས་པ་ཡིན་ནོ་ཞེ་ན། ད་དུང་དུ་ཅིའི་ཕྱིར་ཏེ་ཁྱོད་ད་དུང་ཡང་ཡོན་ཏན་ཐམས་ཅད་དང་བྲལ་བར་དེ་ལྟར་རིགས་བཞིན་དུ་ཡང་ལུས་སྲུང་བར་བྱེད་སྨྲོས་ཤིག །དེ་ལྟ་མོད་ཀྱི། འདི་ལས་ཅུང་ཟད་བླང་བར་བྱ་བ་ཡོད་དོ་ཞེ་ན། བཟར་མི་རུང་ཞེས་བྱ་བ་སྟེ། མདོར་ན་གང་ཞིག་ཡོད་པ་དེ་ནི་མཁོ་བ་མ་ཡིན་ནོ་ཞེས་བྱ་བའི་དོན་ཏེ། དེའི་ཕྱིར་མི་མཁོ་བའི་ལུས་ཀྱིས་ཅི་བྱེད།
འདི་ལ་ཆགས་པར་མི་རིགས་སོ་ཞེས་བྱ་བའི་དོན་ཏོ། །དགོས་པ་གཞན་མེད་པའི་ཕྱིར། འདི་ནི་རིགས་པར་བལྟ་བར་བྱའོ་ཞེས་གསུངས་པ་ནི། ཉིས་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །གང་གི་ཕྱིར་ལས་ལ་གང་གིས་ཀྱང་ལྷན་ཅིག་བྱེད་པར་དངོས་པོས་སྦྱར་བར་བྱ་བ་ཡིན་པས་ན་མཁོ་བ་ནི་ཆགས་པར་བྱའོ་ཞེ་ན། དེ་ལྟ་མོད་ཀྱི། འདི་ལ་མངོན་པར་ཞེན་པར་མི་བྱའོ་ཞེས། འདི་ལྟར་ཞེས་བྱ་བ་ལ་སོགས་པ་གསུངས་ཏེ། འཆི་བདག་སྙིང་བརྩེ་བ་མེད་པས་ཁྱོད་ཀྱི་ལུས་ཕྲོགས་ཏེ་ཞེས་བྱ་བ་སྟོབས་ཀྱིས་ཁྱེར་ཏེ་བྱ་རྒོད་རྣམས་ལ་བྱིན་པ་ན། དེའི་ཚེ་ན་ཡང་འགའ་ཡང་སླར་འཆོས་པར་མི་འགྱུར་རོ་སྙམ་དུ་དགོངས་པ་ཡིན་ནོ། །དེ་ལྟར་གྱུར་པ་ཡིན་མོད་ཀྱི། ཟས་དང་བགོ་བ་ལ་སོགས་པ་ཙམ་གྱིས་བསྐྱང་བར་བྱའོ་སྙམ་ན། འདིར། བྲན་གཡོག་ཅེས་བྱ་བ་ལ་སོགས་པ་གསུངས་ཏེ། གལ་ཏེ་བྲན་གཡོག་ལ་སོགས་པ་བཀོལ་བར་བྱ་བ་ཡིན་དུ་ཟིན་ན། དེ་ལྟ་མོད་ཀྱི། དེ་ལ་འཁོར་དུ་མི་བཏུབ་པའི་རང་བཞིན་མཛངས་པས་ཤེས་པར་བྱེད་ནས་འཇུག་པར་བྱེད་དོ། །དེ་བཞིན་དུ་སྐབས་སུ་བབ་པར་ཡང་དེའི་ཆོས་ཅན་ཡིན་ན། ཀྱེ་ཡིད་ཁྱོད་བསམ་པ་གང་གི་ཡོ་བྱད་ཟད་ཟད་དུ་ཤ་ཐང་གསོ། འོན་ཅི་དེ་ལ་རྣམ་པ་ཐམས་ཅད་དུ་སྐབས་མི་དབྱེ་འམ་ཞེ་ན། མ་ཡིན་ཏེ། འདི་ལ་ཞེས་བྱ་བ་ལ་སོགས་པ་གསུངས་ཏེ། གླ་རྔན་ནི་ལས་ཀྱི་རིན་ནོ། །དེ་སྙིང་ཙམ་ལུས་འགྲོ་བའི་ཚུལ་ཅན་འདི་ལ་བྱིན་ལ་སྟེ། ལས་ལ་མཁོ་བར་བྱ་བའི་ཕྱིར་རོ། །ཀྱེ་ཡིད་རང་གི་དགོས་བསྒྲུབས་ཤིག ། ཅིའི་ཕྱིར་འདི་ལ་ཉིད་ཀྱིས་བསགས་པ་ཅིའི་ཕྱིར་འདི་ལ་སྦྱིན་པར་མི་བྱ་ཞེ་ན། གང་གི་ཕྱིར་གང་ཅུང་ཟད་བྱེད་པས་སྒྲུབ་པ་ལས་བྱེད་པ་དེ་ལ་སྦྱིན་པར་བྱའོ་ཞེས་བྱ་བའི་རིགས་པ་ནི་ཡོད་པ་མ་ཡིན་ཏེ། དེ་བས་ན་འཇུག་པ་དང་ཟློག་པའི་རྒྱུར་ལུས་ལ་གྲུའི་བློར་བ་ཞོག་ནས་ཉེ་བར་རྟོན་པ་ཙམ་བྱིན་ནས། སེམས་ཅན་གྱི་དོན་བསྒྲུབ་ཅིང་རྫོགས་པར་བྱ་བའི་ཕྱིར་འདོད་པ་ལ་རག་ལས་པའི་ལུས་སུ་གྱུར་ཅིག་པ་སྟེ། ཀྱེ་ཡིད་ཅེས་སྐབས་ཡིན་པར་སྦྱར་བར་བྱའོ། །དེ་ལྟར་ལུས་སོ་སོར་བརྟགས་ནས་དེའི་རང་བཞིན་མཁོ་བ་ཡང་དཔྱད་དེ། ལུས་ཀྱི་དགོས་པ་
ངེས་པའི་ཉེ་བར་བསྡུ་བ་ནི། དེ་ལྟར་ཞེས་བྱ་བ་ལ་སོགས་པ་གསུངས་པ་ཡིན་ཏེ། བསྟན་པའི་ཚུལ་དུའོ། །བདག་གི་སེམས་དང་ལུས་ཀྱི་མཚན་ཉིད་རག་ལས་པར་གྱིས་ཏེའོ། །དུས་ཐམས་ཅད་དུ་དང་བའི་བཞིན་དུ་གྱིས་ཤིག་པ་སྟེ། སྨིན་མ་དཔྲལ་བར་བསྡུས་ལ་གཉེར་བ་སྟེ། དང་བ་ཉམས་པར་བྱས་པ་ཐང་ཞིག་པའོ། །དེ་བཞིན་དུ་གཞན་གྱིས་སྔར་མ་བསྐུལ་བ་ཉིད་དུ་ལེགས་པར་འོངས་སམ་ཞེས་བྱ་བ་ལ་སོགས་པའི་ངག་གིས་ཕེབས་པར་སྨྲ་བའི་ངང་ཚུལ་དང༌། རྒྱུ་མེད་པར་སེམས་ཅན་ཐམས་ཅད་ཀྱི་གཉེན་དུ་གྱུར་པར་གྱིས་ཤིག་པའོ། །དེ་ལྟར་ཡང་དོན་མེད་པ་སྤངས་པའི་ཕྱིར་བསླབ་པའི་བྱ་བ། ཁྲི་ལ་སོགས་པ་ཞེས་བྱ་བ་ལ་སོགས་པ་གསུངས་པ་ཡིན་ཏེ། བབ་ཅོལ་དུ་རྟབ་རྟབ་བོར་དགོས་པ་མེད་པར་ལག་པ་དང་དབྱུག་པ་ལ་སོགས་པས་སྒོ་གླེགས་ཀྱང་བརྡུང་བར་མི་བྱའོ། །མདོར་ན་རྟག་ཏུ་སྒྲ་མེད་པར་བཅོམ་བསྐྱུད་བ་ལ་མངོན་པར་དགའ་བར་གྱུར་བར་བྱའོ། །དེ་ལར་བྱས་པ་ལ་ཡོན་ཏན་ཅི་ཡོད་ཅེ་ན། ཆུ་སྐྱར་ཞེས་བྱ་བ་ལ་སོགས་པ་གསུངས་ཏེ། དེ་དག་ཐམས་ཅད་ཀྱིས་བཅོམ་བསྐྱུངས་ཤིང་སྒྲ་མེད་པ་དང་མི་རྒོད་པར་གནས་པས་བརྗོད་པར་འདོད་པའི་དོན་འཐོབ་པ་དེ་བཞིན་དུ་བརྟུལ་ཞུགས་ཅན་གྱིས་ཀྱང་ཏིང་ངེ་འཛིན་གྱི་ཚེར་མ་སྤངས་ལ་གནས་པར་བྱའོ། །འདི་ལྟར་བསླབ་པར་བྱའོ། །གཞེན་ལ་ཞེས་བྱ་བ་ལ་སོགས་པ་གསུངས་ཏེ། མདོར་ན་འགྱོད་པ་སེལ་བ་དང༌། གདམས་ངག་དང༌། རྗེས་སུ་བསྟན་པ་ལ་གུས་པ་ཅན་འདུལ་བ་ལ་སོགས་པ་མཁས་པ་གསོལ་བ་མ་བཏབ་པར་ཕན་པར་འདོད་ཅིང་ཕན་འདོགས་བའི་ཚིག་ནི་སྤྱི་བོས་བླང་བར་བྱ་སྟེ། དེ་དག་ལ་སེམས་སུན་དབྱུང་བར་མི་གྱ་སྟེ་བྱད་དུ་གསད་པར་ཡང་མི་བྱའོ་སྙམ་དུ་དགོངས་སོ། །སེམས་ཅན་ཐམས་ཅད་ལ་བླ་མར་གུས་པའི་གློས་ལེགས་པར་དཔྱད་པར་བྱའོ་སྙམ་པས་ཐམས་ཅད་ལ་ཐམས་ཅད་བསླབ་བར་བྱའོ། །ཕྲག་དོག་གི་དྲི་མ་རབ་ཏུ་བཀྲུ་བའི་ཕྱིར། ལེགས་པར་གསུངས་པ་ཞེས་བྱ་བ་གསུངས་པ་ལ། གཞན་དག་ལ་ཡོན་ཏན་དང་ལྡན་པར་བརྗོད་པ་ལ་དེ་མགུ་བར་བྱ་བའི་ཕྱིར་ལེགས་སོ་ལེགས་སོ་འདི་ནི་བཟང་ངོ་ཞེས་བྱ་བའི་སྒྲ་ལྷག་པའི་བསམ་
པས་བརྗོད་པར་བྱའོ། །དགེ་བའི་ལས་བྱེད་པ་དག་མཐོང་ན་ཡང་ལེགས་པར་བྱས་སོ། །སྐལ་པ་དང་ལྡན་པའོ། །ལེགས་པར་བྱ་བའི་ལས་བྱེད་པ་ཡིན་ནོ་ཞེས་བྱ་བ་ལ་སོགས་པའི་བསྟོད་པ་བརྗོད་པ་རྣམས་ཀྱིས་སྤྲོ་བ་བསྐྱེད་པར་བྱའོ། །ཁ་གསག་ཏུ་དགོས་པ་བཟློག་པའི་དོན་དུ། ལྐོག་ན་ཞེས་བྱ་བ་ལ་སོགས་པ་གསུངས་ཏེ། གཞན་ལ་ཡོན་ཏན་ཡོད་པར་གྱུར་བ་ཡིན་ནའང་ལྐོག་ཏུ་བརྗོད་པར་བྱ་སྟེ། མངོན་སུམ་དུ་ནི་མ་ཡིན་ནོ། །གཞན་དུ་ན་ཁ་ཅིག་ཁ་གསག་ཡིན་སྙམ་པར་འགྱུར་རོ། །གཞན་གྱིས་དེའི་མངོན་སུམ་དུ་གཞན་གྱི་ཡོན་ཏན་སྨྲ་བར་བྱེད་པ་ན། དེ་དང་མཐུན་པར་སྨྲ་བར་བྱེད་པས་དེའི་མངོན་སུམ་དུ་བརྗོད་པར་བྱའོ། །གཞན་དུ་ན་འདི་དེ་ལམ་དགའོ་སྙམ་ནས་ཕ་རོལ་རང་གི་སེམས་སུན་འབྱིན་པར་བྱེད་དོ། །རང་གི་ཡོན་ཏན་ལ་ཡོན་ཏན་གྱི་ཕྱོགས་སུ་ལྷུང་བས་དང་བ་འགའ་ཞིག་གིས་མངོན་སུམ་དང་ལྐོག་ཏུ་གྲགས་པར་བྱེད་པ་ན་སེམས་ཀྱི་ཁེངས་པ་བཟློག་ཅིང་ཡོན་ཏན་རྗོད་པར་བྱེད་པ་དེ་ལ་ཡོན་ཏན་ལ་རྗེས་སུ་ཆགས་པ་ཡིན་པར་ཡིད་ལ་བྱའོ། །གཞན་གྱི་ཡོན་ཏན་ལ་མི་བཟོད་པ་སྤང་བ་གལ་ཏེ་ཞེས་བྱ་བ་ལ་སོགས་པ་གསུངས་ཏེ། སེམས་ཅན་ཐ་མ་དང་འབྲིང་དང་ཕུལ་དུ་བྱུང་བ་ཐམས་ཅད་ཀྱིའམ། ཡང་ན་བརྩོན་པའོ། །སྡུག་བསྔལ་ཡོངས་སུ་སྤོང་བས་དགའ་ཕྱིར་ཏེ། ཡོངས་སུ་ངལ་བའི་རྩོམ་པ་ཐམས་ཅད་ཀྱིས་ནི་དགའ་བ་ཉིད་བསྐྱེད་པར་བྱའོ་ཞེས་བྱ་བའི་དོན་ཏེ། དགའ་བ་དེ་ཡང་ནོར་བཏང་བས་ཀྱང་རྙེད་པར་དཀའ་སྟེ་རྙེད་པར་འགྱུར་བ་མ་ཡིན་པའོ། །འདིར་ནི་འབད་པ་མེད་པར་གྲུབ་ཅིང་ཉེ་བར་གནས་པ་ཡིན་ན་ཅིའི་ཕྱིར་འདོར་བར་བྱེད་སྙམ་དུ་ཤེས་པར་བྱས་ལ་དགའ་བའི་བདེ་བ་ལ་ལོངས་སྤྱད་པར་བྱ་སྟེ་ཉམས་སུ་མྱོང་བར་བྱའོ། །ཅི་སྟེ་གཞན་གྱིས་འབད་པས་བསྒྲུབས་པའི་ཡོན་ཏན་རྣམས་ཀྱིས་བསྐྱེད་པ་ལ་མ་ཡིན་ན། བུ་སྡུག་པའི་ཡོན་ཏན་སྲུང་བ་ནི་མི་རིགས་སོ་སྙམ་དུ་བསྒོམས་ལ་གཞན་གྱི་ཡོན་ཏན་ཐོས་པ་ལས་སེམས་རྩུབ་པར་འགྱུར་བ་སྤང་བར་བྱའོ། །འདི་ལ་སོགས་པ་ཡིན་པས་བདག་ལ་ཞེས་བྱ་བ་ལ་སོགས་པ་གསུངས་ཏེ། དོན་འདི་ལ་འཇུག་པར་འགྱུར་བ་
བདག་ལ་འཇིག་རྟེན་འདིར་ཟད་པའི་ཞད་ཙམ་ཡང་འབྱུང་བ་མ་ཡིན་ལ་བསགས་པ་ནི་ཡོད་དོ་ཞེས་སྟོན་པར་བྱེད་པ་ཕ་རོལ་དུའང་བདེ་བ་ཆེ་སྟེ། གཞན་གྱི་ཡོན་ཏན་ལ་མངོན་པར་དགའ་བའི་ཕྱིར་རོ། །དེ་ལྟར་མི་བྱེད་པ་ལ་འགྲིབ་པ་འཇིག་རྟེན་གཉི་གར་ཡང་སྡུག་བསྔལ་བ་མཐོང་སྟེ། གཞན་གྱི་ཡོན་ཏན་མ་བཟོད་པའི་ཕྱིར་རོ། །དེ་བས་ན་སྡིག་པ་ཐམས་ཅད་ཡོངས་སུ་སྤངས་ཏེ། རིགས་པའི་ལས་བྱ་བ་ལ་བསླབ་པར་བྱའོ་ཞེས་གསུངས་པ་ནི། སྨྲ་ན་ཞེས་བྱ་བ་ལ་སོགས་པ་ཡིན་ཏེ། ཁ་ན་མ་ཐོ་བ་ཐམས་ཅད་ལས་རྣམ་པར་གྲོལ་བའི་ཕྱིར་ཡིད་ཕེབས་པའོ།། རིམ་པར་རྣམ་པར་གནས་པའི་ཚིག་དང༌། ཐེ་ཚོམ་མེད་པའི་དོན་དང༌། ཡིད་ཚིམ་པར་བྱེད་པ་དང༌། མཉན་ན་ཚིམ་པར་བྱེད་པ་དང༌། སྙིང་རྗེའི་རོའི་རྒྱུ་མཐུན་པ་ལས་བྱུང་བ་དང༌། འདོད་ཆགས་ལ་སོགས་པ་རྒྱུ་མ་ཡིན་པ་དང༌། འཇམ་པ་ནི་རྩུབ་པའི་ཚིག་སྤངས་པ་དང༌། རན་པའི་ཚིག་ནི་སྒྲ་ཇི་ཙམ་གྱིས་གོ་བར་བྱ་བ་རྟོགས་པར་འགྱུར་བ་སྟེ། དེ་ལས་གཞན་པ་ཡང་མ་ཡིན། ཧ་ཅང་ལྷུག་པ་ཡང་མ་ཡིན་པར་བརྗོད་པར་བྱའོ། །དྲང་པོར་ལྟ་བ་ནི་ཡོན་པོ་མ་ཡིན་ཞིང་གྱ་གྱུ་ཅན་མ་ཡིན་པ་སྟེ། མཆོག་ཏུ་དགའ་བའི་རོའི་ཁུར་གྱིས་དུད་པར་གྱུར་པའི་མིག་གིས་སྐོམ་པ་ཆུ་གྲང་མོ་མཆོག་ཏུ་ཚིམ་པར་བྱེད་པ་ལེགས་པར་འཐུང་བ་བཞིན་དུ་སེམས་ཅན་རྣམས་ལ་རྣམ་པར་བལྟ་བར་བྱ་སྟེ། ཆགས་པས་མ་ཡིན། སྡང་བས་མ་ཡིན། རྨོངས་པས་མ་ཡིན་ཏེ། དེ་དག་ནི་མཆོག་ཏུ་ཕན་འདོགས་པར་བྱེད་པ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་སེམས་ཅན་དེ་དག་ལ་བརྟེན་ནས་རྙེད་པར་དཀའ་བའི་སངས་རྒྱས་ཉིད་འཐོབ་པར་བདག་འགྱུར་བ་སྟེ་སྐྱེ་བར་འགྱུར་རོ། །དེ་ལྟར་གནས་པ་ན་དེང་སང་ཉིད་ནས་ཀྱང་སེམས་ཅན་གྱི་དོན་ནུས་པ་ཉིད་ཡིན་ཏེ། གང༌། ཀུན་དུ་མི་རྒོད་འཇམ་པ་དང༌། རན་ཅིང་མི་ཉོན་པར་སྨྲ་བ་ཡིས། །སྐལ་མ་ཅན་སྐྱེ་བོ་འདུན་པར་འགྱུས། །གཟུང་བར་འོས་པའང་སྐྱེ་བར་འགྱུར། །ཞེས་གསུངས་པ་ཡིན་ཏེ། དེ་དག་ནི་བྱང་ཆུབ་སེམས་དཔའི་ཆོས་ལ་ཡང་དག་པར་སྡུད་པ་ཡིན་ནོ། །དེ་ལྟར་མི་བྱེད་ན་ཅི་ཉེས་ཤེ་ན། དེ་ནི་གཟུང་འོས་མ་ཡིན་ན། འཇིག་རྟེན་རྒྱལ་བའི་མྱུ་གུ་
བརྙས། །ཐལ་བས་གཡོགས་བའི་མེ་བཞིན་དུ། །སེམས་ཅན་དམྱལ་ལ་སོགས་པར་བསྲེག །ཅེས་སོ། །དེ་ལྟ་བས་ན་སེམས་ཅན་མགུ་བར་བྱ་བ་ཉིད་བྱང་ཆུབ་སེམས་དཔའི་ལས་ཡིན་ནོ། །ཕན་འདོགས་པའི་ཞིང་ནི་བསོད་ནམས་འབྱུང་བའི་རྒྱུ་ཐུན་མོང་མ་ཡིན་པ་ཡིན་པས་དེའི་ཞར་ལ་འོངས་པ་གཞན་ཡང་བསྟན་པ། རྟག་ཏུ་ཞེས་བྱ་བ་ལ་སོགས་པ་གསུངས་ཏེ། མངོན་པར་ཞེན་པ་ལས་བྱུང་བ་ནི་ཡི་དམ་དུ་བྱས་པའི་དང་བ་དྲག་པོས་བསྐྱེད་པའོ། །གཉེན་པོའི་ཕྱོགས་ཀྱི་ཉོན་མོངས་པའི་གཉེན་པོ་སྟོང་པ་ཉིད་ལ་སོགས་པ་བསྒོམས་པ་ལས་བྱུང་བའོ། །ཡོན་ཏན་གྱི་ཞིང་ནི་སངས་རྒྱས་དང་བྱང་ཆུབ་སེམས་དཔའ་ལ་སོགས་པའོ། །ཕན་འདོགས་པའི་ཞིང་ནི་ཕ་མ་ལ་སོགས་པའོ། །སྡུག་བསྔལ་བའི་ཞིང་ནི་ནད་པ་ལ་སོགས་པ་སྟེ། དེ་དག་ལ་ཉུང་དུ་ཞིག་བྱས་པས་ཀྱང་དགེ་བ་ཚད་མེད་པའི་རྒྱུ་སྐྱེ་བར་འགྱུར་རོ། །བྱང་ཆུབ་སེམས་དཔའ་རྣམས་ཀྱིས་ཏེ་འདི་ཡང་གོམས་པར་བྱ་བ་ཡིན་ནོ་ཞེས་གསུངས་པ། མཁས་ཤིང་ཞེས་བྱ་བ་ལ་སོགས་པ་ཡིན་ཏེ། ཐམས་ཅད་དུ་སྤྱོད་པ་སྦྱིན་པའོ། །ལྡང་དང་ལྡན་པ་ནི་ལེ་ལོ་སྤངས་པའི་ཕྱིར་ཏེ་བརྩོན་འགྲུས་དང་ལྡན་པར་གྱུར་པའོ། །དེ་ཉིད་ཀྱི་ཕྱིར་བདག་ཉིད་ཀྱིས་ཐམས་ཅད་བྱ་བ་སྟེ། ལས་འགའ་ལ་ཡང་གཞན་ལ་ལྟོས་པ་མེད་པར་བྱའོ་ཞེས་པ་འདི་ཉིད་སྐབས་དབྱེ་བར་ཞེས་བྱ་བ་ལ་སོགས་པར་བསྟན་པ་ཡིན་ནོ། །ཕ་རོལ་ཏུ་ཕྱིན་པ་གོམས་པར་བྱེད་པ་ན་དོན་མེད་པ་སྤང་བར་བྱ་བའི་ཕྱིར་མཐར་གྱིས་བྱ་བ་སྦྱིན་པའི་ཞེས་བྱ་བ་ལ་སོགས་པ་གསུངས་ཏེ། གོང་ནས་གོང་དུ་ནི་སྦྱིན་པ་བས་ཚུལ་ཁྲིམས་ཁྱད་ཞུགས་ལ། ཚུལ་ཁྲིམས་པས་བཟོད་པའོ་ཞེས་བྱ་བ་ལ་སོགས་པའོ། །དེའི་ཕྱིར་ཕ་རོལ་ཏུ་ཕྱིན་པ་གཞན་གྱི་རྒྱུར་གོང་མ་མི་བཏང་སྟེ། དེ་དང་འགལ་བས་མི་བསྟེན་སྙམ་དུ་དགོངས་པའོ། །ཅི་རྣམ་པ་ཐམས་ཅད་དུ་འམ་མ་ཡིན་ཞེ་ན། སྤྱོད་པའི་ཞེས་གསུངས་ཏེ། བྱང་ཆུབ་སེམས་དཔའ་རྣམས་ཀྱི་སྤྱོད་པ་བསླབ་པ་སྡོམ་པ་མཚན་ཉིད་གང་ཡིན་པ་དེ་ཉིད་ནི་དགེ་བའི་ཆུ་བསྲུང་བའི་ཆེད་དུ་ཆུ་ལོན་བྱས་པའོ། །དེ་བས་
ན་ལས་གཞན་དུ་ཞེས་བྱ་བ་ནི་མ་གཏོགས་པ་སྟེ། དེ་ཇི་ལྟར་མི་ཉམས་པར་ཞེ་ན། བྱ་བའི་དོན་ཏོ། །དེ་བས་ཚོགས་བསགས་པར་འདོད་པ་སྙིང་རྗེ་གཞན་གྱི་དབང་དུ་གྱུར་པས་ཐམས་ཅད་བྱ་བར་གསུངས་པ་ཡིན་ནོ་ཞེས་བརྗོད་པ་དེ་ལྟར་ཞེས་བྱ་བ་ལ་སོགས་པ་གསུངས་ཏེ། དེ་ལྟར་བླ་ན་མེད་པ་ཤེས་པར་བྱས་ལ་སེམས་ཅན་རྣམས་ཀྱི་ཕན་པ་དང་བདེ་བ་བསྒྲུབ་པར་བྱ་བའི་ཕྱིར། རྟག་ཏུ་བརྩོན་འགྲུས་བརྩམས་པར་འགྱུར་བར་བྱའོ། །དོན་བཀག་པ་ལ་འཇུག་པ་དག་ཇི་ལྟར་ན་ལྟུང་བར་བཅས་པ་མ་ཡིན་ཞེ་ན། འགའ་ཞིག་བཀག་པ་ཡང་བྱ་བར་འོས་པ་བཅོམ་ལྡན་འདས་ཀྱིས་གནང་སྟེ། བཅོམ་ལྡན་འདས་ཀྱིས་བསྟན་པ་ལ་ངེས་པར་འབྱུང་བ་དང་བཅས་པ་ཡིན་ནོ། །དེ་ཡང་ཐམས་ཅད་ལ་མ་ཡིན་གྱི། འོན་ཀྱང་ཐུགས་རྗེ་མངའ་བ་སྟེ་ཐུགས་རྗེ་རབ་ཀྱི་མཐར་ཕྱིན་པ་ལ་འཇུག་པའི་ཕྱིར་རོ། །དེའི་གཞན་དབང་དུ་གྱུར་ཅིང་གཞན་གྱི་དོན་ལ་རོ་གཅིག་པ་ཅན་རང་གི་དགོས་པ་ལ་ཕྱིར་ཕྱོགས་པར་བལྟ་སྟེ། དེ་ལྟར་ཤེས་རབ་དང་སྙིང་རྗེ་ལས་བྱུང་བས་གཞན་གྱི་དོན་ལ་འཇུག་པ་ཐབས་མཁས་པས་རབ་ཏུ་འཇུག་པར་བྱེད་པ་ལ་ནི་ལྟུང་བ་མེད་དོ། །འདིར་ཡང་ཉེ་བ་འཁོར་གྱིས་ཞུས་པ་ལས་ལྟུང་བ་དང་ལྟུང་བ་མེད་པའི་རྣམ་པར་འབྱེད་པར་རིག་པར་བྱའོ། །དེ་བཞིན་དུ་ཐབས་ལ་མཁས་པའི་མདོ་ལས། བྲམ་ཟེའི་ཁྱེའུ་སྐར་མའི་དབང་དུ་བྱས་ཏེ་ལྟུང་བ་དང་ལྟུང་བར་མི་འགྱུར་བའི་ཆ་ཤེས་པར་བྱའོ། །འདི་ནི་བདག་ལུས་བསྲུང་བ་སྟེ་སྨན་དང་གོས་ལ་སོགས་པ་རྣམས་ཀྱིས་ཞེས་བྱ་བ་དེ་དག་བསྟན་པར་བྱ་བའི་ཕྱིར། ལོག་པར་ལྟུང་དང་ཞེས་བྱ་བ་ལ་སོགས་པ་གསུངས་ཏེ། སྨན་དང་གོས་ལ་སོགས་པས་བདག་གི་ལུས་ཡོངས་སུ་བསྐྱང་བར་བྱ་སྟེ་གཞན་གྱི་དོན་ལ་མཁོ་བའི་ཕྱིར་རོ། །ཇི་སྐད་དུ་སྔར་བསྟན་པ་ལྟ་བུ་སྟེ། དེ་ལ་སྨན་ནི་རྣམ་པ་གཉིས་ཏེ། རྟག་ཏུ་བྱ་བའི་སྨན་དང༌། ན་བའི་གསོས་སྨན་ནོ། །དེ་ལ་རྟག་ཏུ་བྱ་བའི་སྨན་ནི་ཟན་ལ་སོགས་པའོ། །ཟས་དེ་ནི་དོན་དུ་སྤྱོད་ཡུལ་དུ་སྤྱོད་པ་གྲོང་དུ་འཇུག་པ་ན་ཇི་སྐད་དུ་བསྟན་པའི་བསླབ་པ་ལ་དྲན་པ་གཞག་སྟེ་རྒྱུ་བར་བྱའོ། །དེ་ནས་བསོད་སྙོམས་རྙེད་པ་ལས་ཆ་བཞིར་བགོས་ལ། ལོག་པར་ལྟུང་བར་གྱུར་པ་དང༌། མགོན་མེད་པ་
དང་བརྟུལ་ཞུགས་ལ་གནས་པ་ལ་ལེགས་པར་བགོ་བར་བྱ་སྟེ། བགོ་སྐལ་གཅིག་ནི་ལོག་པར་ལྟུང་བ་རྣམས་ལ། གཉིས་པ་ནི་མགོན་མེད་པ་རྣམས་ལ། གསུམ་པ་ནི་ཚངས་པ་མཚུངས་པར་སྤྱོད་པ་རྣམས་ལ་བྱིན་ནས། བཞི་པ་བདག་ཉིད་བཟའ་བར་བྱའོ། །དེ་ཟ་བ་ན་འདོད་ཆགས་མེད་པར་བཟའ་སྟེ། ཆགས་པར་མ་ཡིན། བརྐམ་པར་མ་ཡིན། ཞེན་པར་མ་ཡིན་གྱི། གཞན་དུ་ན་ཇི་ཙམ་དུ་ལུས་འདི་གནས་པར་བྱ་བ་དང༌། བསྐྱང་བར་བྱ་བའི་ཕྱིར་རན་པ་ཙམ་དུ་བཟའོ། །ཇི་ལྟར་ཧ་ཅང་ཡང་ཉམས་དམའ་བ་དང༌། ཧ་ཅང་ཡང་ལུས་ལྕི་བར་མི་འགྱུར་བ་དེ་ལྟར་བཟའོ། །དེ་ཅིའི་ཕྱིར་ཞེ་ན། ཧ་ཅང་ཡང་ཉམས་དམས་ན་ནི་དགེ་བའི་ཕྱོགས་ལ་རྒྱབ་ཀྱིས་ཕྱོགས་པར་འགྱུར་རོ། །ལུས་ཧ་ཅང་ཡང་ལྕིས་ན་གཉིད་ཀྱིས་ནོན་པར་འགྱུར་རོ། །དེས་བསོད་སྙོམས་དེ་ཟོས་ནས་དགེ་བའི་ཕྱོགས་ལ་མངོན་དུ་ཕྱོགས་པར་བྱའོ་ཞེས་འཕགས་པ་དཀོན་མཆོག་སྤྲིན་ལས་གསུངས་སོ། །འཕགས་པ་རིན་པོ་ཆེའི་ཕུང་པོ་ལས་ཀྱང་ཟས་ཟ་བ་ན་སེམས་འདི་ལྟར་བསྐྱེད་པར་བྱ་སྟེ། ལུས་འདི་ལ་སྲིན་བུའི་རིགས་སྟོང་ཕྲག་བརྒྱད་ཅུ་ཡོད་པ་དེ་དག་དེའི་མཐུས་བདེ་བར་གནས་པར་གྱུར་ཅིག །དེ་ལྟ་ན་ནི་འདི་དག་ཟང་ཟིང་གིས་བསྡུ་བར་བྱའོ། །བྱང་ཆུབ་ཐོབ་ནས་ནི་ཆོས་ཀྱིས་བསྡུ་བར་བྱའོ་ཞེས་རྒྱ་ཆེར་འབྱུང་ངོ༌། །ཡང་དེ་ཉིད་ལས། འོད་སྲུངས་ངས་གཉིས་ལ་དད་པས་བྱིན་པ་གནང་སྟེ། གཉིས་གང་ཞེ་ན། རིགས་པ་དང་སྟོང་པའོ་ཞེས་སོ། །ཕྱོགས་འདིས་ལོངས་སྤྱོད་ཐམས་ཅད་སེམས་ཅན་ཐམས་ཅད་ཀྱི་དོན་དུ་བྱིན་གྱིས་བརླབ་པར་བྱའོ། །གཞན་དུ་ན་བདག་ཉིད་ལ་ཆགས་པས་ལོངས་སྤྱོད་པ་ལས་ནི་ཉོན་མོངས་པ་ཅན་གྱི་ལྟུང་བ་འབྱུང་བར་འགྱུར་རོ། །ཇི་སྐད་དུ་ཟླ་བའི་སྒྲོན་མའི་མདོ་ལས། དེ་དག་ཁ་ཟས་རོ་ཞིམ་བསོད་པ་དག །རྙེད་ནས་རྣལ་འབྱོར་མི་བརྩོན་ཟ་ཞིང་འཐུང༌། །དེ་དག་ལ་ནི་ཟས་དེ་དུག་པར་འགྱུར། །བ་གླང་ཕྲུ་གུ་པད་རྩམ་བཀྲུས་བཞིན། །ཞེས་གསུངས་པ་ལྟ་བུ་སྟེ། དེ་དག་རྒྱ་ཆེར་ནི་བསླབ་པ་ཀུན་ལས་བཏུས་པར་བལྟ་བར་བྱའོ། །བཟའ་བ་དང་བཏུང་བ་ནི་ཐུན་ཆོད་དུ་བྱ་བ་དང༌། ཉིན་ཞག་
ཏུ་བྱ་བ་དང་ཇི་སྲིད་དུ་འཚོ་བའི་བར་དུ་ཞེས་བྱ་བ་སྟེ་རྣམ་པ་གསུམ་མོ། །དེ་དག་ཀྱང་དགེ་སློང་གི་འདུལ་བར་བསྟན་པས་དེ་ཉིད་ལས་ཁོང་དུ་ཆུད་པར་བྱའོ། །གོས་ལ་སོགས་པ་ལུས་བསྲུང་བ་ཆོས་གོས་གསུམ་མ་གཏོགས་པར་སྦྱིན་ཞེས་བྱ་བ་ལ་སོགས་པ་གསུངས་ཏེ། གལ་ཏེ་བྱང་ཆུབ་སེམས་དཔའ་ལ་ལྷུང་བཟེད་དང་ཆོས་གོས་སློང་བ་འགའ་ཞིག་འོངས་ན། དེས་ཤིན་ཏུ་གཏོང་བར་མི་བྱ་སྟེ། འོན་ཀྱང་བཅོམ་ལྡན་འདས་ཀྱིས་གནང་བ་གང་ཡིན་པ་དགེ་སྦྱོང་ལ་རུང་བ་ཆོས་གོས་གསུམ་པོ་དེ་ལས་ལྷག་པ་གང་ཡིན་པ་ནི་སློང་བ་ལ་སྦྱིན་པར་བྱ་སྟེ། གཞན་དུ་ནི་མ་ཡིན་ནོ། །བྱང་ཆུབ་སེམས་དཔའི་སོ་སོར་ཐར་པ་ལས་གསུངས་པ། ཡང་གལ་ཏེ་ལ་ལ་ཞིག་འོངས་ནས་ལྷུང་བཟེད་དང་ཆོས་གོས་སློང་བ་ན། གལ་ཏེ་དེ་ལ་སངས་རྒྱས་ཀྱིས་གནང་བའི་ཆོས་གོས་གསུམ་ལས་ལྷག་པ་ཞིག་ཡོད་ན་ཇི་ལྟ་བ་བཞིན་དུ་བཏང་ཞིང་སྦྱིན་པར་བྱའོ། །གལ་ཏེ་དེ་ལ་ཆོས་གོས་གསུམ་ལས་ཉུང་བར་གྱུར་ན་གང་ལ་བརྟེན་ནས་ཚངས་པར་སྤྱོད་པ་ལ་གནས་པ་དེ་ནི་ཡོངས་སུ་གཏོང་བར་མི་བྱའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པས་ཆོས་གོས་གསུམ་གཏོང་བར་མི་བྱའོ་ཞེས་གསུངས་པ་ཡིན་ནོ། །ཤཱ་རིའི་བུ་གལ་ཏེ་བྱང་ཆུབ་སེམས་དཔའ་ཆོས་གོས་གསུམ་ཡོངས་སུ་བཏང་ནས་སློང་བ་པོ་ལ་གཙོ་བོར་བྱེད་ན་དེས་ནི་འདོད་པ་ཆུང་བ་བསྟེན་པ་མ་ཡིན་པར་འགྱུར་རོ་ཞེས་ཧ་ཅང་བཏང་བ་བཀག་པའི་ཕྱིར་རོ། །ཡང་བདག་བསྲུང་པ་བསྟན་པར་བྱ་བའི་ཕྱིར། དམ་པའི་ཆོས་ནི་ཞེས་བྱ་བ་ལ་སོགས་པ་གསུངས་ཏེ། དམ་པ་སྟེ་སྐྱེས་བུ་དམ་པ་བྱང་ཆུབ་སེམས་དཔའ་རྣམས་ཀྱི་འམ། དམ་པའི་ཆོས་ཏེ་གཞན་ལ་ཕན་པ་དང་བདེ་བ་འཇིག་རྟེན་པ་དང་འཇིག་རྟེན་ལས་འདས་པ་བསྒྲུབ་པ་སྟེ། དེ་བསྟན་པའི་ལུས་ལ་རྒྱུ་མཚན་ཅུང་ཟད་ཀྱི་དོན་ཆེད་དུ་གཟིར་བར་མི་བྱ་སྟེ། གཞན་དུ་ནི་དོན་ཆེན་པོའི་ཕུང་པོ་ཉམས་པར་འགྱུར་རོ། །དེའི་ཕྱིར་འདི་དག་ནི་སྔ་མའི་གཏན་ཚིགས་ཀྱི་ཚིག་ཡིན་ནོ། །ཅིའི་ཕྱིར་དེ་ལྟར་ཞེ་ན། གང་གི་ཕྱིར་ཤིན་ཏུ་འཇམ་པའི་བརྩོན་པ་འདི་ཉིད་འཕེལ་བས་མྱུར་དུ་སེམས་ཅན་ཐམས་ཅད་ལ་ཕན་པ་དང་བདེ་བ་བསྒྲུབ་པར་ནུས་པར་འགྱུར་བ་ཡིན་ནོ། །གང་གི་ཕྱིར་དེ་བས་ན་རང་གི་ལུས་
དང་མགོ་སྦྱིན་པ་ལ་སོགས་པ་མི་བྱའོ་ཞེས་བཀག་གོ །གང་གི་ཚེ་ཞེ་ན། མཛའ་བ་དང་མི་མཛའ་བ་དང་ཅིག་ཤོས་དང་སྐྱེ་བོ་ཕོངས་པ་ཐམས་ཅད་ལ་ཐུན་མོང་དུ་འཇུག་པ་སྙིང་རྗེའི་སེམས་མ་དག་པ་ནའོ། །བརྩོན་འགྲུས་ཧ་ཅང་བརྩམས་ན་ཡང་བདག་དང་གཞན་ལ་ཕན་པའི་དོན་ལ་གནོད་པར་འགྱུར་བ་ཡིན་ནོ། །བདག་དང་གཞན་ལ་མཉམ་པའམ་ལྷག་པར་འཇུག་པའི་བསམ་པ་ཅན་ལ་ནི་མ་བཀག་སྟེ། གང་དེ་བཞིན་དུ་བདག་དང་གཞན་གྱི་བྱང་ཆུབ་ཀྱི་ཕྱོགས་དང་ཐོས་པ་ལ་སོགས་པའི་བར་ཆད་བྱེད་པ་ལ་གཏོང་བ་དང་མི་གཏོང་བ་མི་བྱའོ། །སེམས་ཅན་གྱི་དོན་ལ་ནུས་པ་ལྷག་པའམ་ནུས་པ་མཉམ་པ་དང༌། བྱང་ཆུབ་སེམས་དཔའ་ལྷག་པའམ་མཉམ་པའི་དགེ་བའི་བར་ཆོད་བྱེད་པ་ལ་གཏོང་བ་དང་མི་གཏོང་བ་མི་བྱའོ་ཞེས་གསུངས་ཏེ་གྲུབ་པ་ཡིན་ནོ། །འདི་ཉིད་ལ་དགོངས་ནས་བྱང་ཆུབ་སེམས་དཔའི་སོ་སོར་ཐར་པ་ལས་བཤད་དེ། ཤཱ་རིའི་བུ་བྱང་ཆུབ་སེམས་དཔའ་ཁྱིམ་གྱི་གནས་ནས་མངོན་པར་འབྱུང་བ་བྱང་ཆུབ་ཀྱི་ཡན་ལག་ལ་མངོན་པར་བརྩོན་པ་དེས་ཇི་ལྟར་སྦྱིན་པ་སྦྱིན་པར་བྱ་བ་གང་སྦྱིན་པར་བྱ། ཇི་ཙམ་ཞིག་སྦྱིན་པར་བྱ་དེ་བཞིན་དུ་སྦྱར་རོ། །ཆོས་སྦྱིན་པར་བྱེད་པ་དང་ཆོས་ཀྱི་སྦྱིན་བདག་ཏུ་བྱའོ། །ཤཱ་རིའི་བུ་བྱང་ཆུབ་སེམས་དཔའ་ཁྱིམ་པ་གང་ཞིག་གིས་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་རིན་པོ་ཆེ་སྣ་བདུན་གྱིས་ཡོངས་སུ་བཀང་སྟེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ལ་དབུལ་བ་ཕུལ་བ་བས། ཤཱ་རིའི་བུ་རབ་ཏུ་བྱུང་བར་གྱུར་བའི་བྱང་ཆུབ་སེམས་དཔའ་གང་ཞིག་ཚིག་བཞི་པའི་ཚིགས་སུ་བཅད་པ་གཅིག་བསྟན་ན་འདི་ནི་དེ་བས་ཆེས་བསོད་ནམས་མང་དུ་བསྐྱེད་དེ། ཤཱ་རིའི་བུ་དེ་བཞིན་གཤེགས་པས་རབ་ཏུ་བྱུང་བས་ཟང་ཟིང་གི་སྦྱིན་པ་བྱ་བར་མ་གནང་ངོ༌། །དེ་བཞིན་དུ་ཤཱ་རིའི་བུ་གང་གིས་ལྷུང་བཟེད་དུ་འོངས་པ་ལྷུང་བཟེད་དུ་ཆུད་པའི་རྙེད་པ་ཆོས་དང་མཐུན་པ་ཆོས་ཀྱིས་མེད་པར་གྱུར་ན་དེས་ཚངས་པ་མཚུངས་པར་སྤྱོད་པ་རྣམས་དང་ལྷན་ཅིག་ཏུ་ཐུན་མོང་དུ་བཟའ་བར་བྱའོ་ཞེས་སོ། །དེ་ཉིད་དུ་གསུངས་པ། ཤཱ་རིའི་བུ་ཁྱིམ་གྱི་གནས་ནས་མངོན་པར་མ་བྱུང་བ་གང་ཡིན་པ་དེས་ནི་ཆོས་ཀུན་ནས་
བསྟེན་པར་བྱའོ། །དེས་དེ་ལ་བརྩོན་པར་བྱའོ་ཞེས་སོ། །གཞན་དུ་ན་སེམས་ཅན་གཅིག་གི་དོན་བསྡུ་བའི་ཕྱིར་སེམས་ཅན་གྱི་ཚོགས་ཆེན་པོ་དང་སེམས་ཅན་དེས་ཀྱང་བྱང་ཆུབ་སེམས་དཔའི་བསམ་པ་ཡོངས་སུ་སྦྱོང་བའི་བར་ཆད་བྱས་པས་དོན་ཆེན་པོ་ཉམས་པར་བྱས་པར་འགྱུར་རོ། །ཐབས་ལ་མཁས་པ་འདིས་གནས་ན་བྱང་ཆུབ་ཀྱི་ལམ་ལ་ཉམས་པར་མི་འགྱུར་རོ། །འདིར་དགོངས་པ་ནི་འདི་ཡིན་ཏེ། སྔོན་དུ་ལུས་སེམས་ཅན་ཐམས་ཅད་ལ་བྱིན་མོད་ཀྱི། འོན་ཀྱང་དུས་མ་ཡིན་པར་ལོངས་སྤྱོད་པ་ལས་བསྲུང་བར་བྱ་བ་འབའ་ཞིག་ཡིན་ཏེ། དེས་ན་སེར་སྣའི་གོ་སྐབས་ཀྱང་མེད་ཅིང་དམ་བཅས་པའི་དོན་ལས་ཉམས་པ་ཡང་མེད་དོ། །གང༌། སྨན་ཤིང་ལྗོན་པ་བལྟ་ན་སྡུག་ཅེས་པའི། །རྩ་བ་ལ་སོགས་སྤྱད་འོས་ས་བོན་ལྟར། །རྫོགས་སངས་རྒྱས་ཀྱི་སྨན་ཤིང་དེ་བཞིན་དུ། །བྱིས་པ་དུས་མིན་སྤྱོད་ལས་ལེགས་བསྲུང་བྱ། །ཞེས་གསུངས་པའོ།། སེམས་ཅན་གྱི་བསམ་པ་བསྲུང་བ་ལས་ཀྱང་བདག་བསྲུང་བར་བྱའོ་ཞེས་བསྟན་པ་ནི། མ་གུས་པ་ལ་ཞེས་བྱ་བ་ལ་སོགས་པ་ཡིན་ཏེ། བཅོམ་ལྡན་འདས་ཀྱི་ཆོས་ལྷ་དང་མི་ལ་སོགས་པས་མཆོད་པ་གུས་པར་མི་བྱེད་པ་ལ་ཆོས་བཤད་ན་དེས་ན་ལྷ་ལ་སོགས་པ་རྣམས་འཕྱ་བར་འགྱུར་ཏེ། དེ་དག་བཅོམ་ལྡན་འདས་ཀྱིས་བཀག་པ་ཡིན་པས་དེའི་བཀའ་ལས་འདའ་བ་ནི་ལྟུང་བ་དང་བཅས་པར་འགྱུར་རོ། །རས་ལ་སོགས་པས་མགོ་བོ་བཅིངས་པ་ལ་མ་ཡིན་ཏེ། བཅས་པའི་སྒྲ་ནི་གསུམ་ཀ་དང་ཡང་འབྲེལ་ཏོ། །དེ་བཞིན་དུ་མཆོད་ཕྱིར་ཐོགས་པས་མགོ་བོ་དཀྲིས་པ་ལ་ཡང་མ་ཡིན་ནོ། །མི་ན་བཞིན་དུ་ཞེས་བྱ་བས་ནི་རེ་རེ་ལ་སྐྱར་བར་བྱའོ། །ན་བ་ལ་ནི་ལྟུང་བ་མེད་དོ། །དེ་དག་ནི་ཉ་བར་མཚོན་པ་ཡིན་ཏེ། ཉལ་བ་དང་འདུག་པ་ལ་འགྲེང་བས་མ་ཡིན་ཞིང༌། ཉལ་བ་ལ་འདུག་པས་མ་ཡིན་ལ། འདུག་པ་ལ་སྟན་མེད་པས་ཀྱང་མ་ཡིན་ཏེ། ལམ་གོལ་བ་ནས་འགྲོ་བས་ལམ་ནས་འགྲོ་བ་ལ་མ་ཡིན་ནོ། །མདུན་ནས་འགྲོ་བ་ལ་རྒྱབ་ནས་འགྲོ་བས་མ་ཡིན་ཏེ། རྒྱན་དང་ལྡན་པ་ལ་སོགས་པའང་མ་ཡིན་པར་བལྟ་བར་བྱའོ། །དོན་མེད་པ་སྤང་བར་བྱ་བའི་ཕྱིར་རྩ་བའི་ལྟུང་བའི་རྒྱུ་འདི་ཡང་མི་བྱའོ་ཞེས་བསྟན་པ། དམན་ལ་ཞེས་བྱ་བ་ལ་
སོགས་པ་ཡིན་ལ། ཟབ་མོ་ནི་ཡིད་གཞུངས་པ་མ་ཡིན་པས་གཏིང་མི་དཔོགས་པའི་ཕྱིར་རོ། །རྒྱ་ཆེ་བ་ནི་རབ་ཀྱི་མཐར་ཐུག་པའི་ཕྱིར་རོ། །དེ་འདྲ་བའི་ཆོས་ཀྱང་དམན་པ་ལ་ནི་བློ་ལེགས་པར་མ་སྦྱངས་པའམ། དམན་པ་ལ་མོས་པ་རྣམས་ལ་སྟེ་མི་བཤད་དོ་ཞེས་སྐབས་སུ་བབ་པས་སྦྱར་བར་བྱའོ། །བུད་མེད་ལ་གཅིག་པུ་དབེན་པར་སོང་སྟེ་ཆོས་མི་བཤད་མི་སྨྲ་སྟེ། བཤད་ན་ལྟུང་བ་དང་བཅས་པར་འགྱུར་རོ། གལ་ཏེ་སྐྱེས་པ་ཡོད་ན་ཉེས་པ་མེད་དོ། །ཉན་ཐོས་ཀྱི་ཐེག་པ་བཤད་པའམ། ཐེག་པ་ཆེན་པོ་བཤད་པའི་ཆོས་རྣམས་ལ་སེམས་དད་པ་ལ་སོགས་པས་མཉན་པར་བྱ་སྟེ། གཞན་དུ་ན་དམ་པའི་ཆོས་སྤོང་བར་འགྱུར་རོ། །སེམས་ཅན་ཟབ་མོ་དང་རྒྱ་ཆེ་བའི་ཆོས་ཀྱི་སྣོད་དུ་རྒྱུ་མཚན་གྱིས་ཤེས་ནས་ཉན་ཐོས་ལ་སོགས་པའི་ཆོས་ལ་གཞུག་པར་མི་བྱའོ། །སྡོམ་པའི་བསླབ་པའི་སྤྱོད་པར་བྱ་བར་འོས་པ་རྣམས་དོར་ནས་མདོ་སྡེ་ལ་སོགས་པ་བཀླགས་པ་ཉིད་ཀྱིས་ཁྱོད་དག་པར་འགྱུར་རོ་ཞེས་ཆོས་འདོད་པ་ལ་བསྟན་པར་མི་བྱའོ།། །།བམ་པོ་བརྒྱད་པ། ཡང་འདིར་གསུངས་པ། གཞན་ཡང་དོན་མེད་པ་ནི་དཀོན་མཆོག་བརྩེགས་པ་ལས་གསུངས་པ་མཐོང་སྟེ། སེམས་ཅན་ཡོངས་སུ་སྨིན་པར་མ་བྱས་པ་རྣམས་ལ་ཡིད་རྟོན་ཏེ་སྟོན་པ་བྱང་ཆུབ་སེམས་དཔའི་འཁྲུལ་པ་དང༌། སེམས་ཅན་སྣོད་དུ་མ་གྱུར་པ་རྣམས་ལ་སངས་རྒྱས་ཀྱི་ཆོས་རྒྱ་ཆེན་པོ་སྟོན་པ་བྱང་ཆུབ་སེམས་དཔའི་འཁྲུལ་པ་དང༌། རྒྱ་ཆེན་པོ་ལ་མོས་པའི་སེམས་ཅན་རྣམས་ལ་ཐེག་པ་དམན་པ་སྟོན་པ་བྱང་ཆུབ་སེམས་དཔའི་འཁྲུལ་པ་ཞེས་སོ། །འཕགས་པ་ཆོས་ཐམས་ཅད་རྣམ་པར་འཐག་པ་ཐམས་ཅད་བསྡུས་པ་ལས་ཀྱང་དོན་མེད་ཕྲ་མོ་གསུངས་ཏེ། འཇམ་དཔལ་དམ་པའི་ཆོས་སྤོང་བའི་ལས་ཀྱི་སྒྲིབ་པ་ནི་ཤིན་ཏུ་ཕྲའོ། །འཇམ་དཔལ་གང་ལ་ལ་ཞིག་དེ་བཞིན་གཤེགས་པས་གསུངས་པའི་ཆོས་ལ་ལ་ནི་བཟང་བར་འདུ་ཤེས་པར་བྱེད། ལ་ལ་ནི་ངན་པར་འདུ་ཤེས་ན་དེ་དམ་པའི་ཆོས་སྤོང་བའོ། །གང་འདི་ནི་རིགས་པའོ་འདི་ནི་མི་རིགས་པའོ་ཞེས་སྨྲ་བ་དེས་དམ་པའི་ཆོས་སྤངས་པས་དེ་བཞིན་གཤེགས་པ་ལ་སྐུར་པ་འདེབས་པ་ཡིན། དགེ་བདུན་ལ་
ངན་དུ་བརྗོད་པ་ཡིན་ནོ་ཞེས་རྒྱ་ཆེར་རོ། །འཕགས་པ་ནམ་མཁའི་སྙིང་པོའི་མདོ་ལས་ཀྱང༌། རྩ་བའི་ལྟུང་བའི་སྐབས་སུ་གསུངས་ཏེ། གཞན་ཡང་བྱང་ཆུབ་སེམས་དཔའ་ལས་དང་པོ་པས་ཁ་ཅིག་ལ་འདི་སྐད་དུ། ཁྱོད་ཀྱིས་སོ་སོར་ཐར་པ་དང་འདུལ་བའི་ཚུལ་ཁྲིམས་ལ་ལེགས་པར་བསླབས་ཏེ། ཁྱོད་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་པས་ཅི་ཞིག་བྱ། ཐེག་པ་ཆེན་པོ་ལྷོགས་ཤིག་དང༌། དེས་ན་ཉོན་མོངས་པའི་རྐྱེན་གྱིས་ལུས་དང་ངག་དང་ཡིད་རྣམས་ཀྱིས་མི་དགེ་བའི་ལས་གང་བསྒྲུབས་པ་དེ་དག་རྣམ་པར་སྨིན་པར་མི་འགྱུར་བར་དག་པར་འགྱུར་རོ་ཞེས་སྨྲ་བ་འདི་ནི་བྱང་ཆུབ་སེམས་དཔའ་ལས་དང་པོ་བའི་རྩ་བའི་ལྟུང་བ་གསུམ་པ་སྟེ། གོང་དུ་ཇི་སྐད་སྨོས་པའི་བར་དུའོ་ཞེས་སོ། །དེའི་ཕྱིར་འདི་ཡང་སོ་སོར་ཐར་པ་ལས་བཀག་པས་སྤྱོད་པར་མི་བྱའོ་ཞེས་སོ། །ཤིང་ཞེས་བྱ་བ་ལ་སོགས་པ་གསུངས་པ་ཡིན་ཏེ། མཆིལ་མ་ནི་བད་ཀན་ནོ། །དོར་བར་བྱ་བ་ནི་གཞག་པར་མི་བྱ་བའོ། །ལོངས་སྤྱོད་པའི་ཆུ་དང་ཐང་ནི་ལོངས་སྤྱོད་པར་བྱ་བ་སྟེ། གཅི་བ་དང་ཕྱིས་ལ་སོགས་པ་ཡང་སྨད་པའོ། །འདིར་ཡང་ལྷ་ལ་སོགས་པ་འཕྱོ་བས་བསོད་ནམས་མ་ཡིན་པ་འབྱུང་ངོ༌། །ཁ་བཀང་བ་ནི་ཁ་གང་བར་བྱས་པ་སྟེ། ཁམ་ཆེན་པོར་བཅད་ནས་སོ། །སྒྲ་བཅས་ནི་ཅག་ཅག་ལ་སོགས་པའི་སྒྲ་དང་ངོ༌། །ཁ་ཆེར་ཕྱེ་བ་སྟེ། རྐང་པ་བརྐྱང་བ་ནི་ཁྲི་ལ་སོགས་པ་ལ་འདུག་པ་ནས་ས་ལ་སོགས་པ་ལ་རྐང་པ་བརྐྱང་སྟེ་འདུག་པར་མི་བྱའོ། །དཔུང་པ་གཉི་ག་ཡང་མཉམ་པ་སྟེ་དུས་གཅིག་ཏུ་མི་མཉེའོ། །རིམ་གྱིས་མཉེ་བ་ལ་ནི་ཉེས་པ་མེད་དོ། །རྐྱེན་ཡོད་པས་གཅིག་པུ་སྟེ། གཉིས་པ་མེད་པར་གཞན་གྱིས་བུད་མེད་ལ་སོགས་པ་དང་སྟེ་བཞོན་པ་ལ་སོགས་པར་གནས་པར་མི་བྱའོ། །འདིར་འདི་ནི་ཁྱིམ་པ་དང་རབ་ཏུ་བྱུང་བ་གཉི་གའི་ཐུན་མོང་ཡིན་པས་གཞན་གྱི་ཞེས་སྨོས་པ་ཡིན་ནོ། །མདོར་བསྡུས་ནས་བསྟན་པ་ནི། འཇིག་རྟེན་ཞེས་བྱ་བ་ལ་སོགས་པ་གསུངས་ཏེ། འཇིག་རྟེན་རྣམས་ཀྱི་དང་བ་སྐྱེད་པར་བྱེད་པ་མ་ཡིན་པ་གང་ཡིན་པ་དེ་ཐམས་ཅད་བསྟན་བཅོས་སམ་ཐ་སྙད་བལྟས་ཤིང་མཁས་པ་ལ་དྲིས་ནས་སྤང་བར་བྱའོ་
ཞེས། དེ་དག་ནི་འདིས་བསྟན་པ་ཡིན་ནོ། །མཐོང་བ་ཡང་ནི་གང་གནོད་པ་བྱེད་པའི་རྣམ་པ་དེ་ལྟ་བུ་དེ་སྤང་བར་བྱ་སྟེ་ལྟུང་བར་འགྱུར་བ་ཡིན་ནོ། །གང༌། དེ་ཕྱིར་རྒྱལ་བའི་སྡོམ་པའི་མདོར། །གང་གིས་སེམས་ཅན་མ་དད་གྱུར། །དེ་ནི་བསྒྲིམས་ཏེ་རྣམ་སྤང་ཞེས། །དཀོན་མཆོག་སྤྲིན་ལས་བཀའ་སྩལ་ཏོ། །ཇི་སྐད་དུ་བྱང་ཆུབ་སེམས་དཔའི་ལེགས་པར་སྤྱོད་པ་དེ་གང་ཞེ་ན། འདིར་ཇི་ཙམ་དུ་བྱང་ཆུབ་སེམས་དཔའ་གནས་དམའ་བ་ན་དུས་མ་ཡིན་པར་མ་ཡིན། དུས་མ་ཡིན་པར་སྨྲ་བམ་ཡིན། དུས་མི་ཤེས་པ་མ་ཡིན། ཡུལ་མི་ཤེས་པ་མ་ཡིན། རྒྱུ་གང་ལས་དེའི་ཐད་དུ་སེམས་ཅན་མ་དད་པ་སྨྲ་བ་ནི་དེ་སེམས་ཅན་ཐམས་ཅད་རྗེས་སུ་བསྲུང་བ་དང༌། བདག་གི་བྱང་ཆུབ་ཀྱི་ཚོགས་ཡོངས་སུ་རྫོགས་པར་བྱ་བའི་དོན་དུ་སྤྱོད་ལམ་ཕུན་སུམ་ཚོགས་ཤིང་འཇམ་པར་སྨྲ་བ་དང༌། དལ་བུས་སྨྲ་བ་དང༌། འདུ་འཛི་མི་མང་བ་དང༌། རབ་ཏུ་དབེན་པ་ལ་མངོན་པར་ཕྱོགས་པ་དང༌། བཞིན་གྱི་མདངས་རབ་ཏུ་དང་བ་ཡིན་ནོ་ཞེས་གསུངས་པ་ལྟ་བུའོ། །བྱང་ཆུབ་སེམས་དཔས་བྱང་ཆུབ་སེམས་དཔའ་འགའ་ལ་ཡང་ཁྱད་དུ་གསད་པར་མི་བྱའོ་ཞེས་གསུངས་པ། སོར་མོས་ཞེས་བྱ་བ་ནི་མཛུབ་མོ་ལ་སོགས་པའི་སོར་མོ་གཅིག་གིས་ཅི་ཡང་བསྟན་པར་མི་བྱ་སྟེ། འོན་ཀྱང་ཀུན་གྱིས་ཀྱང་སྟེ་ལག་པ་གཡས་པ་མཐའ་དག་གིས་བྱའི། ལག་པ་གཡོན་པས་ནི་གུས་པ་མ་ཡིན་པའི་དངོས་པོ་གཞན་ལ་རེ་ཞིག་ཞོག །ལམ་ཡང་བསྟན་པར་མི་བྱའོ་ཞེས་འཇིག་རྟེན་ལ་མ་དད་པ་སྤང་བའི་ཕྱིར། ལག་པས་ཤས་ཆེར་ཞེས་བྱ་བ་ལ་སོགས་པ་ལ། དགོས་པ་ཆུང་ངུ་ལ་ལག་པ་བརྟེན་ཏེ་འགའ་ཞིག་ལ་བོད་པར་མི་བྱའོ། །ཤིན་ཏུ་གལ་ཆེ་བ་ལ་ཉེས་པ་མེད་དོ། །སེ་གོལ་གཏོགས་པ་ལ་སོགས་པའི་སྒྲ་བྱ་སྟེ། དེ་མི་བྱེད་ན་མཉམ་པར་མ་བཞག་པ་དང་སྤྱོད་པ་མ་བསྡམས་པར་འགྱུར་རོ། །དེ་དག་གིས་ནི་རྒོད་པ་སྤང་བ་ཡང་བསྟན་པ་ཡིན་ནོ། །དེས་ཉལ་བ་ཡོངས་སུ་བརྟག་པ་ནི་འདི་ལྟར་ཡོངས་སུ་བརྟག་པར་བྱའོ་ཞེས་བསྟན་པ་མགོན་པོ་ཞེས་བྱ་བ་ལ་སོགས་པ་གསུངས་ཏེ། བཅོམ་ལྡན་འདས་མྱ་ངན་ལས་འདས་པ་ཆེན་པོ་གཟིམས་པ་བཞིན་ཉལ་བ་བརྟག་པར་བྱའོ། །མངོན་པར་འདོད་
པའི་ཕྱོགས་སུ་མགོ་བསྟན་ལ་གློ་གཡས་པ་ཕབ་སྟེ་རྐང་པའི་སྟེང་དུ་རྐང་པ་བཞག་ལ། ལག་པ་གཡས་པ་སྔས་སུ་བྱས་ནས་གཡོན་པའང་བརྐྱང་སྟེ་བྱིན་པའི་སྟེང་དུ་གཞག་ལ་ཆོས་གོས་ཀྱིས་ལུས་ལེགས་པར་གཡོགས་པ། དྲན་པ་དང་ཤེས་བཞིན་དང་ལྡན་པས་ལྡང་བའི་འདུ་ཤེས་དང་སྣང་བའི་འདུ་ཤེས་ཀྱིས་ཉལ་བར་བྱེད་དེ། སེམས་གཉིད་ཀྱིས་ནོན་པ་མ་ཡིན་པ་དང༌། གཉིད་ཀྱི་བདེ་བ་མྱོང་བར་མི་བྱེད་པ་དང༌། མ་ཉེས་པའི་བདེ་བ་ཡང་མ་ཡིན་ཏེ། གཞན་དུ་ན་ཇི་ཙམ་དུ་འབྱུང་བ་ཆེན་པོ་རྣམས་གནས་པ་དང་འཚོ་བར་བྱ་བའི་ཕྱིར་རོ། །མྱུར་དུ་ལྡང་བ་ནི་སྐྱེན་པར་ལྡང་བར་བྱ་བའོ། །བྱ་རྨྱངས་དང༌། ལུས་གཅུ་བ་དང་ལེ་ལོས་ཉམས་པས་གནས་པར་མི་བྱ་སྟེ། དེ་དག་ཐམས་ཅད་ཀྱང་སྔ་ནས་སོ། །གཞན་ཡང་འདི་དག་མདོར་བསྡུས་ཏེ་བསྟན་པ། བྱང་ཆུབ་ཅེས་བྱ་བ་ལ་སོགས་པ་གསུངས་ཏེ། བསླབ་པར་བྱ་བ་ཚད་མེད་ཅིང་གྲངས་མེད་པ་བྱང་ཆུབ་སེམས་དཔའི་སོ་སོར་ཐར་པ་ལ་སོགས་པ་ལས་རབ་ཏུ་བསྟན་པ་དེ་དག་བསྡུས་པའི་ཚུལ་དང་པོ་ཉིད་དུ་སེམས་སྦྱང་བ་ཉིད་ཀྱི་སྤྱོད་པ་ངེས་པར་གདོན་མི་ཟ་བར་སྤྱད་པར་བྱའོ། །ལྟུང་བ་སྤྱིར་སྦྱོང་བ། ཉིན་དང་ཞེས་བྱ་བ་ལ་སོགས་པ་གསུངས་ཏེ། ཉིན་ལན་གསུམ་མཚན་ལན་གསུམ་དུ་ཕུང་པོ་གསུམ་པ་སྟེ། ཕུང་པོ་གསུམ་པོ་རྣམས་ནི་སྡིག་པ་བཤགས་པ་དང༌། བསོད་ནམས་ལ་རྗེས་སུ་ཡི་རང་བ་དང༌། བྱང་ཆུབ་ཏུ་བསྔོ་བ་རྣམས་ཀྱིས་མདོར་བསྡུས་པའི་ཕུང་པོ་གསུམ་པ་རབ་ཏུ་གདོན་པར་བྱའོ། །ལྷག་མ་ནི་རྩ་བ་ལས་གཞན་པའམ། ཡང་ན་བསམས་བཞིན་དུ་བྱས་པ་གང་སླར་བཅོས་པ་སྟེ། དེ་ལས་གཞན་པའམ། དྲན་པ་བརྗེད་ངས་པའམ། ཤེས་བཞིན་མ་ཡིན་པས་བྱས་པ་དེ་དག་རབ་ཏུ་ཞི་བར་བྱ་བ་ནི་ཕྱིར་བཅོས་པ་སྟེ། དེས་ཞེས་པ་ནི་ཕུང་པོ་གསུམ་འདོན་པ་དང༌། བྱང་ཆུབ་ཀྱི་སེམས་དང༌། རྒྱལ་བ་བཅོམ་ལྡན་འདས་ལ་ཡང་དག་པར་བརྟེན་པས་སོ། །དེ་དག་གིས་རྣམ་པར་སུན་འབྱིན་པ་ཀུན་ཏུ་སྤྱོད་པ་ལ་སོགས་པ་བསྟན་པ་ཡིན་ནོ། །དེ་ལ་སྡིག་པ་སྦྱང་བ་ནི་ཆོས་བཞི་པའི་མདོ་ལས་བསྟན་པ། བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་བཞི་དང་ལྡན་ན་སྡིག་
པ་བྱས་ཤིང་བསགས་པ་ཟིལ་གྱིས་ནོན་པར་འགྱུར་རོ། །བཞི་གང་ཞེ་ན། འདི་ལྟ་སྟེ་རྣམ་པར་སུན་འབྱིན་པ་ཀུན་ཏུ་སྤྱོད་པ་དང༌། གཉེན་པོ་ཀུན་ཏུ་སྤྱོད་པ་དང༌། ཉེས་པ་བཟློག་པའི་སྟོབས་དང༌། རྟེན་གྱི་སྟོབས་སོ། །དེ་ལ་རྣམ་པར་སུན་འབྱིན་པ་ཀུན་ཏུ་སྤྱོད་པའི་སྟོབས་ནི། མི་དགེ་བའི་ལས་སྤྱད་ན་དེ་ཉིད་ལ་འགྱོད་པ་མང་བ་ཡིན་ནོ། །དེ་ལ་གཉེན་པོ་ཀུན་ཏུ་སྤྱོད་པ་ནི་མི་དགེ་བའི་ལས་བྱས་ནས་ཀྱང་དགེ་བའི་ལས་ལ་ཤིན་ཏུ་བརྩོན་པའོ། །དེ་ལ་ཉེས་པ་བཟློག་པའི་སྟོབས་ནི་སྡོམ་པ་ཡང་དག་པར་བླངས་ནས་མི་བྱེད་པའི་སྡོམ་པ་ཐོབ་པའོ། །དེ་ལ་རྟེན་གྱི་སྟོབས་ནི་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་འགྲོ་བ་དང༌། བྱང་ཆུབ་ཀྱི་སེམས་མི་གཏོང་བ་སྟེ། དེ་སྟོབས་དང་ལྡན་པ་ལ་བརྟེན་ནས་སྡིག་པ་བྱས་པས་ཟིལ་གྱིས་གནོན་པར་མི་ནུས་སོ། །བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་སྡིག་པ་བྱས་ཤིང་བསགས་པ་ཟིལ་གྱིས་གནོན་པར་འགྱུར་རོ་ཞེས་སོ། །ཁྱད་པར་དུ་བྱང་ཆུབ་སེམས་དཔའི་ལྟུང་བ་ལྕི་བ་དང་ཡང་བ་རྣམས་ཀྱི་བཤགས་པར་བྱ་བ་ནི་འཕགས་པ་ཉེ་བ་འཁོར་གྱིས་ཞུས་པ་ལས་གསུངས་ཏེ། དེ་དག་བསླབ་པ་ཀུན་ལས་བཏུས་པར་བལྟ་བར་བྱའོ། །བྱང་ཆུབ་སེམས་དཔས་ལྟུང་བ་ཐམས་ཅད་སངས་རྒྱས་བཅོམ་ལྡན་འདས་སུམ་ཅུ་རྩ་ལྔའི་སྤྱན་སྔར་གཅིག་པུས་བཤགས་པར་བྱའོ། །དེ་ལ་བཤགས་པ་ནི་འདི་ཡིན་ཏེ། བདག་མིང་འདི་ཞེས་བགྱི་བ་སངས་རྒྱས་ལ་སྐྱབས་སུ་མཆིའོ་ཞེས་བྱ་བ་ནས་བརྩམས་ན། དགེ་འདུན་ལ་སྐྱབས་སུ་མཆིའོ་ཞེས་བྱ་བའི་བར་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱ་ཀྱ་ཐུབ་པ་ལ་ཕྱག་འཚལ་ལོ། །རྡོ་རྗེ་སྙིང་པོས་རབ་ཏུ་འཇོམས་པ་ལ་ཕྱག་འཚལ་ལོ་ཞེས་བྱ་བ་ནས་བརྩམས་ཏེ། ཐལ་མོ་སྦྱར་བར་བགྱིས་ཏེ་སྐྱབས་སུ་ཉེ་བར་མཆི་ཞེས་བྱ་བའི་བར་རྒྱ་ཆེར་བསྟན་ནས་གསུངས་པ། ཤཱ་རིའི་བུ་འདི་ལྟར་བྱང་ཆུབ་སེམས་དཔས་སངས་རྒྱས་སུམ་ཅུ་རྩ་ལྔ་པོ་འདི་དག་ལ་སོགས་པ་དེ་བཞིན་གཤེགས་པ་ཐམས་ཅད་ཀྱི་རྗེས་སུ་སོང་བ་ཡིད་ལ་བྱེད་པས་སྡིག་པ་རྣམ་
པར་དག་པར་བྱའོ། །དེ་ལྟར་སྡིག་པ་རྣམ་པར་དག་པར་གྱུར་པས་དེ་ལ་སངས་རྒྱས་བཅོམ་ལྡན་འདས་རྣམས་ཞལ་ཉེ་བར་སྟོན་ཏོ། །དེ་བཞིན་དུ་སྦྱར་རོ། །བྱང་ཆུབ་སེམས་དཔས་ཉིན་མཚན་དུ་སངས་རྒྱས་བཅོམ་ལྡན་འདས་དེ་དག་གི་མཚན་འཛིན་པ་དང༌། ཡོངས་སུ་བརྗོད་པ་དང༌། ཕུང་པོ་གསུམ་པའི་ཆོས་ཀྱི་རྣམ་གྲངས་གདོན་པས་ལྟུང་བ་འགྱོད་པ་ལས་བྱུང་བ་དང༌། ཏིང་ངེ་འཛིན་ཡང་ཐོབ་པ་གང་ཡིན་པ་དེ་ནི་ཉན་ཐོས་དང་རང་སངས་རྒྱས་ཀྱི་ཐེག་པ་བ་ཐམས་ཅད་ཀྱི་ལྟུང་བ་འགྱོད་པའི་གནས་རྣམ་པར་སྦྱང་བར་མི་ནུས་སོ་ཞེས་སོ། །དེ་དག་མ་ལུས་པར་བསླབ་པ་ཀུན་ལས་བཏུས་པ་ལས་རིག་པར་བྱའོ། །རྣམ་པར་སུན་འབྱིན་པ་ཀུན་ཏུ་སྤྱོད་པ་བསྟན་ཏོ། །གཉེན་པོ་ཀུན་ཏུ་སྤྱོད་པ་དང༌། ཉེས་པ་བཟློག་པའི་སྟོབས་ཀྱང་རྒྱས་པར་བསླབ་པ་ཀུན་ལས་བཏུས་པ་ཉིད་ལས་བལྟ་བར་བྱའོ། །འཕགས་པ་བྱམས་པའི་རྣམ་པར་ཐར་པ་ལས། བྱང་ཆུབ་ཀྱི་སེམས་ཀྱིས་སྡིག་པ་རྣམ་པར་དག་པར་གསུངས་ཏེ། དེ་ཡང་སྔར་བསྟན་པ་ཉིད་ཡིན་ནོ། །རྒྱལ་བ་ལ་བརྟེན་ནས་སྡིག་པ་རྣམ་པར་དག་པར་འགྱུར་བ་ནི་ཕག་མོའི་རྟོགས་པ་བརྗོད་པ་དཔེར་བྱ་སྟེ། གང་དག་སངས་རྒྱས་སྐྱབས་སོང་བ། །དེ་དག་ངན་འགྲོར་འགྲོ་མི་འགྱུར། །མི་ཡི་ལུས་འདི་སྤངས་ནས་སུ། །དེ་དག་ལྷ་ཡི་ལུས་འཐོབ་བོ། །ཞེས་ཏེ། དེ་ལྟར་ཆོས་དང་དགེ་འདུན་གྱི་དབང་དུ་བྱས་ནས་ཀྱང་བརྗོད་དོ། །འདིས་ཀྱང་གཉེན་པོའི་སྟོབས་བསྟན་ཏོ། །ཡང་ངེས་པ་མེད་པར་བསྟན་པ། རང་ངམ་ཞེས་བྱ་བ་ལ་སོགས་པ་གསུངས་ཏེ། རང་སྟེ་བདག་ཉིད་དམ་གཞན་ལ་རག་ལས་པའང་རུང་སྟེ་སེམས་ཅན་གྱི་དོན་ལ་རབ་ཏུ་འཇུག་པའོ། །ཡང་ཅི་ལྟར་ངེས་པ་མེད་པར་བརྗོད་ཅེ་ན། རྒྱལ་སྲས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དངོས་པོ་ཐམས་ཅད་ཀྱི་དེ་ཁོ་ན་ཉིད་རྣམ་པ་ཐམས་ཅད་དུ་ཁོང་དུ་ཆུད་ནས་ཐམས་ཅད་ལ་ཕན་པ་དང་བདེ་བ་བསྒྲུབ་པའི་དོན་དུ་བརྩོན་པའི་སངས་རྒྱས་ཀྱི་སྲས་པོ་རྣམས་ཀྱིས་བསླབ་པར་བྱ་བ་གནག་ཡིན་པ་དེ་ནི་ཅུང་ཟད་ཀྱང་ཡོད་པ་མ་ཡིན་ཏེ། གཞན་དུ་ན་སེམས་ཅན་གྱི་དོན་ཐམས་
ཅད་དུ་བྱ་བར་མི་ནུས་ལ་དེ་ལྟར་ནམ་པར་སྤྱོད་པ་ནི་བསོད་ནམས་ཀྱི་ཚོགས་ཀྱང་མཐར་ཐུག་པ་མེད་པར་འགྱུར་རོ། །བསླབ་པའི་གཞིའི་རྒྱུ་འདི་ཡང་གཟུང་བར་བྱའོ་ཞེས་གསུངས་པ། དངོས་སམ་ཞེས་བྱ་བ་ལ་སོགས་པ་ཡིན་ཏེ། ཐ་ན་རང་ཟས་ལ་སོགས་པ་བྱེད་པའམ། གཞན་བསྐུལ་བའམ། བརྒྱུད་ནས་ཕོ་ཉ་བསྐུལ་བའམ། དངོས་སུ་རང་ཉིད་ཟང་ཟིང་གི་སྦྱིན་པ་ལ་སོགས་པ་བྱེད་པའང་རུང་སྟེ། གང་སེམས་ཅན་རྣམས་ཀྱི་ཕན་པ་དང་བདེ་བའི་རྒྱུར་མི་འགྱུར་བ་དེ་མི་བྱའམ་བྱེད་དུ་མི་གཞུག་གོ །དེ་དག་འབའ་ཞིག་ཙམ་ནི་མ་ཡིན་ཏེ། འཁོར་བ་སྡུག་བསྔལ་བར་ལྟུང་བའི་སེམས་ཅན་རྣམས་དེ་ནས་དབྱུང་བའི་ཕྱིར་དགེ་བའི་རྩ་བ་ཆུང་ངུའང་ཐམས་ཅད་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་བྱའོ། །ཚིགས་སུ་བཅད་པ་གཉིས་པོ་དེ་དག་གིས་ནི་བསོད་ནམས་འཕེལ་བ་ཉེ་བར་བསྟན་པ་ཡིན་ནོ། །དགེ་བའི་བཤེས་གཉེན་མི་གཏོང་ཞིང༌། །ཞེས་གང་གསུངས་པ་དེ་རྟག་པར་ཞེས་བྱ་བ་ལ་སོགས་པ་གསུངས་ཏེ། དགེ་བ་ནི་མངོན་པར་མཐོ་བ་དང་ངེས་པར་ལེགས་པ་འཐོབ་པའི་མཚན་ཉིད་ཀྱི་ལས་སོ། །གཉེན་ནི་ཐུན་མོང་མ་ཡིན་པའི་ཉེ་བ་སྟེ། དེ་ལུས་དང་སྲོག་ཆུད་ཟ་བའི་འཇིགས་པས་འཇིགས་ཀྱང་མི་བཏང་ངོ༌། །དགེ་བའི་བཤེས་གཉེན་གྱི་ཕན་ཡོན་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་བརྒྱད་སྟོང་པའི་རྟག་པར་རབ་ཏུ་ངུ་བའི་ལེའུ་ལས་ཤེས་པར་བྱའོ། །ཆོས་བཞི་པའི་མདོར་ཡང་གསུངས་པ། དགེ་སློང་དག་བྱང་ཆུབ་སེམས་དཔའ་སེམས་དཔའ་ཆེན་པོས་ཇི་སྲིད་འཚོ་བའི་བར་དུ་དགེ་བའི་བཤེས་གཉེན་སྲོག་གི་ཕྱིར་ཡང་གཏང་བར་མི་བྱའོ་ཞེས་སོ། །ཡོངས་སུ་མི་གཏང་བ་ནི་དགེ་བའི་བཤེས་གཉེན་གྱི་མཚན་ཉིད་གསུངས་པ། བྱང་ཆུབ་སེམས་དཔའ་ཞེས་བྱ་བ་ལ་བྱང་ཆུབ་སེམས་དཔའ་བསླབ་པའི་སྡོམ་པ་ལ་རྣམ་པར་གནས་ཤིང༌། ཐེག་པ་ཆེན་པོའི་དོན་ལ་མཁས་པ་སྟེ། ཤིན་ཏུ་རྙེད་པར་དཀའ་བ་དེ་ལྟ་བུའོ། །དགེ་བའི་བཤེས་གཉེན་གྱི་བསྙེན་བཀུར་ཡོངས་སུ་ཤེས་པར་བྱ་བའི་དོན་དུ་དཔལ་འབྱུང་བའི་ཞེས་གསུངས་ཏེ། འཕགས་པ་སྡོང་པོ་བཀོད་པའི་མདོ་ལེའུ་དཔལ་འབྱུང་བའི་རྣམ་པར་
པར་ཐར་པ་ལས། དགེ་བའི་བཤེས་གཉེན་གྱི་བསྙེན་བཀུར་བསླབ་པར་བྱ་སྟེ་ཤེས་པར་བྱའོ། །ཇི་སྐད་དུ་འཕགས་པ་སྡོང་པོ་བཀོད་པ་ལས། འཕགས་པ་དཔལ་འབྱུང་གིས་བསྟན་པ། དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་ངན་འགྲོར་མ་ལྟུང་ངོ་ཞེས་བྱ་བ་ནས་དགེ་བའི་བཤེས་གཉེན་ནི་བྱ་བ་མ་ཡིན་པ་རྣམས་ཁོང་དུ་ཆུད་པར་བྱེད་པའོ། །བག་མེད་པའི་གནས་ལས་ཡང་དག་པར་བཟློག་པའོ། །འཁོར་བའི་གྲོང་ཁྱེར་ནས་འདོན་པའོ། །རིགས་ཀྱི་བུ་དེ་ལྟ་བས་ན་དེ་ལྟར་ཡིད་ལ་བྱ་བ་རྒྱུན་མ་ཆད་པས་དགེ་བའི་བཤེས་གཉེན་རྣམས་ཀྱི་དྲུང་དུ་འགྲོ་བར་བྱའོ། །ཁུར་ཐམས་ཅད་བཀུར་བས་ཡོངས་སུ་མི་སྐྱོ་བས་ས་ལྟ་བུའི་སེམས་དང༌། བསམ་པ་མི་ཕྱེད་པས་རྡོ་རྗེ་ལྟ་བུའི་སེམས་དང༌། སྡུག་བསྔལ་ཐམས་ཅད་ཀྱིས་མི་བསྒུལ་བའི་ཕྱིར་ཁོར་ཡུག་ལྟ་བུའི་སེམས་དང༌། ལས་ཐམས་ཅད་ཉམས་སུ་བླང་བ་ལ་མི་སྨོད་པས་འཇིག་རྟེན་གྱི་བྲན་ལྟ་བུའི་སེམས་དང༌། ང་རྒྱལ་དང་ཆེ་བའི་ང་རྒྱལ་རྣམ་པར་སྤོང་བས་ཕྱག་དར་བ་ལྟ་བུའི་སེམས་དང༌། ཁུར་ལྕི་བ་ཁུར་བས་ཐེག་པ་ལྟ་བུའི་སེམས་དང༌། མི་ཁྲོ་བས་ཁྱི་ལྟ་བུའི་སེམས་དང༌། འགྲོ་ཞིང་འོང་བས་ཡོངས་སུ་མི་སྐྱོ་བའི་གྲུ་ལྟ་བུའི་སེམས་དང༌། དགེ་བའི་བཤེས་གཉེན་གྱི་ངོར་ལྟ་བས་བུ་མཛངས་པ་ལྟ་བུའི་སེམས་ཀྱིས་དགེ་བའི་བཤེས་གཉེན་ལ་བསྙེན་བཀུར་བྱའོ། །རིགས་ཀྱི་བུ་ཁྱོད་ཀྱི་བདག་ལ་ནི་ནང་པར་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་སྨན་པའི་འདུ་ཤེས་དང༌། རྗེས་སུ་བསྟན་པ་ལ་ནི་སྨན་གྱི་འདུ་ཤེས་དེས། ནན་ཏན་ཉམས་སུ་བླང་བ་ལ་ནི་ནད་འཚོ་བའི་འདུ་ཤེས་བསྐྱེད་པར་བྱའོ། །རིགས་ཀྱི་བུ་ཁྱོད་ཀྱིས་བདག་ལ་ནི་འཇིགས་པའི་འདུ་ཤེས་བསྐྱེད་པར་བྱའོ། །དགེ་བའི་བཤེས་གཉེན་ལ་ནི་དཔའ་བོའི་འདུ་ཤེས་དང༌། རྗེས་སུ་བསྟན་པ་ལ་ནི་མཚོན་ཆའི་འདུ་ཤེས་དང༌། ནན་ཏན་ལ་ནི་དགྲ་སེལ་བའི་འདུ་ཤེས་བསྐྱེད་པར་བྱའོ་ཞེས་བྱ་བའི་བར་དུ་གསུངས་པ་ལྟ་བུའོ། །མདོ་སྡེ་དག་ལ་རྟག་ལྟ་བས། །ཞེས་གང་གསུངས་པ་དེ་བསྟན་པར་བྱ་བའི་ཕྱིར་གསུངས་ཕ། འདི་དང་ཞེས་པ་བསྟན་བཅོས་
འདིར་བསྟན་པ་འདི་དང༌། གཞན་ཡང་སྟེ་གང་འདིར་མ་བསྟན་པས་སངས་རྒྱས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་རྣམས་ཀྱི་བསླབ་པ་བསྟན་པ་གང་ཡིན་པ་སྟེ། མདོ་སྡེ་སྣ་ཚོགས་པའི་དོན་དེ་དག་འདྲིས་པར་རིག་པར་བྱའོ། །དེ་ཉིད་ནི་མདོ་སྡེ་རྣམས་ལ་སྟེ། ཐེག་པ་ཆེན་པོའི་མདོ་སྡེ་དཀོན་མཆོག་སྤྲིན་ལ་སོགས་པ་རྣམས་ནའོ། །བསླབ་པ་སྣང་ཞེས་པས་སྟོན་པ་ཡིན་ཏེ། བསླབ་པ་ནི་བྱང་ཆུབ་སེམས་དཔའ་རྣམས་ཀྱིས་བླང་བར་བྱ་བ་དང་དོར་བར་བྱ་བའི་མཚན་ཉིད་དོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་ཁྱད་པར་འདི་བསྟན་པ། ནམ་མཁའ་ཞེས་བྱ་བ་ལ་སོགས་པ་གསུངས་ཏེ། འཕགས་པ་ནམ་མཁའི་སྙིང་པོའི་མདོ་ལས། རྒྱལ་རིགས་སྤྱི་བོ་ནས་དབང་བསྐུར་བའི་རྩ་བའི་ལྟུང་བ་ལྔ་དང༌། དེ་བཞིན་དུ་སྤྱིའི་རྩ་བའི་ལྟུང་བ་གཅིག་དང༌། དེ་བཞིན་དུ་བྱང་ཆུབ་སེམས་དཔའི་ལས་དང་པོ་པའི་རྩ་བའི་ལྟུང་བ་བརྒྱད་བསྟན་པ་ཡིན་ནོ། །དེ་ལྟར་ཡང་དེ་ཉིད་ལས་གསུངས་པ། རིགས་ཀྱི་བུ་རྒྱལ་རིགས་སྤྱི་བོ་ནས་དབང་བསྐུར་བའི་རྩ་བའི་ལྟུང་བ་ལྔ་སྟེ། རྩ་བའི་ལྟུང་བ་དེ་དག་གིས་རྒྱལ་རིགས་སྤྱི་བོ་ནས་དབང་བསྐུར་བ་དགེ་བའི་རྩ་བ་སྔོན་བསྐྱེད་པ་ཐམས་ཅད་ཐལ་བར་བརླག་སྟེ་ཕམ་པར་གྱུར་ཅིང་ལྷ་དང་མིའི་བདེ་བའི་དངོས་པོ་ཐམས་ཅད་བཅད་ནས་ངན་སོང་དུ་འགྲོ་བར་འགྱུར་རོ། ལྔ་གང་ཞེ་ན། རིགས་ཀྱི་བུ་རྒྱལ་རིགས་སྤྱི་བོ་ནས་དབང་བསྐུར་བས་མཆོད་རྟེན་གྱི་རྫས་འཕྲོག་གམ། དགེ་འདུན་གྱི་འམ། ཕྱོགས་བཞིའི་དགེ་འདུན་ལ་ཕུལ་བ་འཕྲོག་གམ། འཕྲོག་ཏུ་འཇུག་པ་འདི་ནི་རྩ་བའི་ལྟུང་བ་དང་པོའོ། །དེ་བཞིན་དུ་ཐེག་པ་གསུམ་དུ་བཤད་པའི་ཆོས་སྤོང་བ་ནི་གཉིས་པའོ། །རབ་ཏུ་བྱུང་བ་ཚུལ་ཁྲིམས་དང་ལྡན་པའམ། ཚུལ་ཁྲིམས་འཆལ་བའི་ངུར་སྨིག་འཕྲོག་པའམ། ཁྱིམ་ན་གནས་པར་བྱེད་པའམ། ལུས་ལ་བརྡེག་པའམ། བཙོན་རར་འཇུག་པའམ། སྲོག་དང་བྲལ་བར་བྱེད་པ་ལས་ནི་གསུམ་པའོ། །མཚམས་མེད་པ་ལྔ་ལས་གང་ཡང་རུང་བའི་མཚམས་མེད་པ་བྱེད་པ་ལས་ནི་བཞི་པའོ། །ལོག་པར་ལྟ་བ་དང༌། མི་དགེ་བ་བཅུའི་ལས་ཀྱི་ལམ་ཡང་དག་པར་བླངས་པའམ།
གཞན་ཡང་དག་པར་ལེན་དུ་འཇུག་པ་ལས་ནི་ལྔ་པའོ། །དེ་བཞིན་དུ་གྲོང་འཇོམས་པ་ལ་སོགས་པ་བྱེད་པ་ལས་ནི་ཐམས་ཅད་ཀྱི་ཐུན་མོང་བ་གཅིག་གོ་ཞེས་སོ། །དེ་ཉིད་ལས་གསུངས་པ། རིགས་ཀྱི་བུ་འམ་རིགས་ཀྱི་བུ་མོ་ཐེག་པ་ཆེན་པོ་ལ་ཡང་དག་པར་ཞུགས་པ་ལས་དང་པོ་བ་རྣམས་ཀྱི་རྩ་བའི་ལྟུང་བ་ནི་བརྒྱད་དེ། རྩ་བའི་ལྟུང་བ་དེ་དག་གིས་ཐེག་པ་ཆེན་པོ་ལ་ཡང་དག་པར་ཞུགས་པའི་ལས་དང་པོ་བ་རྣམས་དགེ་བའི་རྩ་བ་སྔོན་བསྐྱེད་པ་ཐམས་ཅད་ཅེས་བྱ་བ་ལ་སོགས་པ་སྔ་མ་བཞིན་ནོ། །བརྒྱད་གང་ཞེ་ན། སེམས་ཅན་གང་དག་སྔོན་ཉེས་པར་སྤྱད་པའི་རྒྱས་སྙིགས་མ་ལྔ་པའི་འཇིག་རྟེན་གྱི་ཁམས་ཉོན་མོངས་པ་ཅན་འདིར་སྐྱེས་པ་དེ་དག་དགེ་བའི་རྩ་བ་ཆུང་ལ་ཞེས་བྱ་བ་ནས་དེ་དག་གི་ནང་ན་སྟོང་པ་ཉིད་དང་ལྡན་པའི་མདོ་སྡེ་མཆོག་ཏུ་ཟབ་པ་འདི་ཞེས་པའི་བར་དང་མདུན་དུ་རྒྱས་པར་དྲན་པར་བྱེད་ཅིང་སྟོན་ལ། དེ་དག་ནི་ནན་ཏན་དུ་མ་སྦྱངས་པའི་བྱས་པ་སོ་སོའི་སྐྱེ་བོ་དག་སྟེ་མཉན་ནས་སྐྲག་ཅིང་ཞེས་བྱ་བའི་བར་དང༌། བླ་ན་མེད་པ་ཡང་དག་པར་རྫོགས་པའི་བྱང་ཆུབ་སེམས་ལས་ཕྱིར་ལྡོག་སྟེ། ཉན་ཐོས་ཀྱི་བྱང་ཆུབ་ལ་སྨོན་ན་འདི་ནི་བྱང་ཆུབ་སེམས་དཔའ་ལས་དང་པོ་བའི་རྩ་བའི་ལྟུང་བ་དང་པོ་སྟེ་རྩ་བའི་ལྟུང་བ་དེས་ཞེས་བྱ་བ་ལ་སོགས་པ་ནི་སྔ་མ་བཞིན་ནོ། །དེ་བས་ན་བྱང་ཆུབ་སེམས་དཔས་སེམས་ཅན་ཕ་རོལ་དང་གང་ཟག་ཕ་རོལ་གྱི་བསམ་པ་དང༌། བག་ལ་ཉལ་དང་པོར་ཤེས་པར་བྱས་ནས་སེམས་ཅན་རྣམས་ཀྱི་བསམ་པ་ཇི་ལྟ་བ་བཞིན་དུ་མཐར་གྱིས་ཆོས་བསྟན་པར་བྱ་བ་ཡིན་པ་ལས་ཐབས་དང་བཅས་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་བཟློག་སྟེ། ཐེག་པ་དམན་པ་ལ་གཞན་གྱི་སེམས་སྐྱེད་པར་བྱེད་པ་འདི་ནི་གཉིས་པའོ། །སོ་སོར་ཐར་པའི་བསླབ་པའི་སྡོམ་པ་སྤངས་ནས་ཐེག་པ་ཆེན་པོ་ལ་སེམས་བསྐྱེད་པ་ཙམ་དང་དེ་ཀློག་པས་ཕ་རོལ་དག་པར་བསྟན་པ་ལས་ནི་གསུམ་པའོ། །ཉན་ཐོས་ལ་སོགས་པའི་ཐེག་པ་དག་དེའི་འབྲས་བུ་གསུངས་ཏེ། ཉེས་པ་རབ་ཏུ་སྟོན་པ་དང༌། ཐེག་པ་ཆེན་པོ་ལ་ནི་ཐམས་ཅད་དག་པར་རབ་ཏུ་སྟོན་པ་དང༌། གཞན་དག་ཀྱང་དེ་བརྗོད་དུ་འཇུག་པ་ལས་ནི་བཞི་པའོ། །གྲགས་པ་དང་རྙེད་པ་ལ་
སོགས་པའི་རྒྱུས་ཐེག་པ་ཆེན་པོ་ཀློག་པ་ལ་སོགས་པ་བྱེད་ཅིང༌། དེ་བཞིན་དུ་དེའི་རྐྱེན་གྱིས་ཕ་རོལ་ལ་བཤུང་ཞིང་སྨོད་པ་ལ་སོགས་པ་སྨྲ་བ་དང༌། བདག་ལ་བསྟོད་པ་དང༌། མིའི་ཆོས་བླ་མ་ཁས་ལེན་པ་ལས་ནི་ལྔ་པའོ། །བཀླགས་པ་ཙམ་གྱིས་ཟབ་མོའི་ཆོས་རྟོགས་པར་སྟོན་པ་དང༌། གཞན་དག་ཀྱང་དེ་བཞིན་དུ་ཡང་དག་པར་ལེན་དུ་འཇུག་པ་ལས་ནི་དྲུག་པའོ། །རྒྱལ་རིགས་མདུན་ན་འདོན་དང༌། ཞང་བློན་གདོལ་པ་རྣམས་ཀྱིས་དགེ་སློང་གང་དག་ལ་ནོར་གྱི་ཆད་པས་ཆད་པ་བཅད་ཅིང༌། དགེ་འདུན་གྱི་འམ། མཆོད་རྟེན་གྱི་འམ། ཕྱོགས་བཅུའི་དགེ་འདུན་གྱི་རྫས་ཕྲོགས་ནས་དེ་དག་ལ་འབུལ་བར་བྱེད་དེ། རྒྱལ་རིགས་དང་གཉི་ག་ལ་ཡང་རྩ་བའི་ལྟུང་བར་འགྱུར་ཏེ་འདི་ནི་བདུན་པའོ། །ཆོས་དང་ཆོས་མ་ཡིན་པ་བཟློག་ནས་སྔར་མེད་པའི་བསླབ་པ་སྟོན་པ་དང༌། རྩ་བ་དེས་ཆོ་ག་ཉམས་པ་རྣམས་དང་བཀུར་སྟི་ཉམས་པར་བྱེད་པ་རྣམས་ཀྱིས་ཉེ་བར་སྤྱོད་པ་དང༌། ཡོངས་སུ་སྤྱོད་པ་ལ་ཡོངས་སུ་བསྔོས་པ་མ་གཏོགས་པར་གཉི་གར་ཡང་རྩ་བའི་ལྟུང་བ་དང་བཅས་པར་འགྱུར་ཏེ། འདི་ནི་བརྒྱད་པའོ། །རྩ་བའི་ལྟུང་བ་འདི་དག་བདེ་བླག་ཏུ་བཟུང་བར་བྱ་བའི་དོན་དུ་བསྟན་བཅོས་མཛད་པས་བསྡུས་པའི་ཚིག་ལེའུར་བྱས་པས་བསྟན་པ་བརྗོད་པར་བྱ་སྟེ། དཀོན་མཆོག་གསུམ་གྱི་དཀོར་རྐུ་བ། །ཕས་ཕམ་པ་ཡི་ལྟུང་བར་འདོད། །དམ་པའི་ཆོས་ནི་སྤོང་བྱེད་པ། །གཉིས་པར་ཐུབ་པས་གསུངས་པ་ཡིན། །ཚུལ་ཁྲིམས་འཆལ་བའི་དགེ་སློང་ལའང༌། །ངུར་སྨྲིག་འཕྲོག་དང་བརྡེག་པ་དང༌། །བཙོན་རར་འཇུག་པར་བྱེད་པ་དང༌། །རབ་ཏུ་བྱུང་ལས་འབེབས་པ་དང༌། །མཚམས་མེད་ལྔ་པ་བྱེད་པ་དང༌། །ལོག་པར་ལྟ་བ་འཛིན་པ་དང༌། །གྲོང་ལ་སོགས་པ་འཇིག་པ་ཡང༌། །རྩ་བའི་ལྟུང་བར་རྒྱལ་བས་གསུངས། །བློ་སྦྱངས་མ་བྱས་སེམས་ཅན་ལ། །སྟོང་པ་ཉིད་ནི་བརྗོད་པ་དང༌། །སངས་རྒྱས་ཉིད་ལ་ཞུགས་པ་དག །རྫོགས་པའི་བྱང་ཆུབ་བཟློག་པ་དང༌། །སོ་སོར་ཐར་བ་ཡོངས་སྤངས་ཏེ། །ཐེག་པ་ཆེ་ལ་སྦྱོར་བ་དང༌། །སློབ་མའི་ཐེག་པས་ཆགས་ལ་སོགས། །སྤོང་པར་འགྱུར་བ་མིན་ཞེས་འཛིན།།
ཕ་རོལ་དག་ཀྱང་འཛིན་འཇུག་དང༌། །རང་གི་ཡོན་ཏན་བརྗོད་པ་དང༌། །རྙེད་པ་དང་ནི་བཀུར་སྟི་དང༌། །ཚིགས་བཅད་རྒྱུ་ཡིས་གཞན་སྨོད་དང༌། །བདག་ནི་ཟབ་མོ་བཟོད་པའོ་ཞེས། །ལོག་པ་ཉིད་ནི་སྨྲ་བ་དང༌། །དགེ་སྦྱོང་ཆད་པས་གཅོད་འཇུག་དང༌། །སྐྱབས་གསུམ་གྱིས་ནི་སྦྱིན་བྱེད་དང༌། །སྦྱིན་པ་ལེན་པར་བྱེད་པ་དང༌། །ཞི་གནས་འདོར་བར་བྱེད་པ་དང༌། །ཡང་དག་འཇོག་པའི་ལོངས་སྤྱོད་རྣམས། །ཁ་ཏོན་བྱེད་ལ་སྦྱིན་པ་རྣམས། །དེ་དག་རྩ་བའི་ལྟུང་བ་སྟེ། །སེམས་ཅན་དམྱལ་བ་ཆེན་པོའི་རྒྱུ། །རྨི་ལམ་ནམ་མཁའི་སྙིང་པོ་ཡི། །མདུན་དུ་འདུག་སྟེ་བཤགས་པར་བྱ། །བྱང་ཆུབ་སེམས་ནི་ཡོངས་འདོར་དང༌། །ཆགས་དང་སེར་སྣ་མི་བཟོད་པས། །སློང་ལ་སྦྱིན་པར་མི་བྱེད་དང༌། །ཁྲོས་ནས་སེམས་ཅན་བརྡེག་པ་དང༌། བསྒྲིམས་ཏེ་དགའ་བར་བྱེད་པ་ན། །སེམས་ཅན་ལ་ནི་མི་བཟོད་དང༌། །ཉོན་མོངས་པ་དང་གཞན་མཐུན་པས། །ཆོས་ལྟར་བཅོས་མ་བརྗོད་པའོ། །ཞེས་སོ། །འདི་དག་གསོ་བ་ནི་མདོ་སྡེ་ཉིད་ནས་གསུངས་སོ། །བསླབ་པ་ཀུན་ལས་བཏུས་པར་ཡང་བྱང་ཆུབ་སེམས་དཔའ་རྣམས་ཀྱིས་བྱ་བར་འོས་པ་བསྟན་པ་ཡིན་པས་དེ་ཉིད་ཀྱང་བལྟ་བར་བྱའོ་ཞེས་གསུངས་པ་ནི། མདོ་སྡེ་ཞེས་བྱ་བ་ལ་སོགས་པ་ལ་བསླབ་པ་ཀུན་ལས་བཏུས་པར་ཡང་ནི་རང་ཉིད་ཀྱིས་མཛད་པའོ། །ངེས་པར་ནི་གདོན་མི་ཟ་བར་རོ། །ཡང་དང་ཡང་དུ་ནི་ལན་ཅིག་མིན་པར་བལྟ་བར་བྱ་སྟེ། གོམས་པར་བྱའོ་སྙམ་དུ་དགོངས་པའོ། །ཅིའི་ཕྱིར་ཞེ་ན། གང་གི་ཕྱིར་བྱང་ཆུབ་སེམས་དཔའ་དམ་པ་རྣམས་ཀྱི་སྤྱོད་པ་སྟེ། སྤྱོད་པ་ནི་དེ་ལྟར་བྱ་བ་ཉིད་ཡིན་ཏེ་བསླབ་པ་ཀུན་ལས་བཏུས་པ་དེ་ལས་རྒྱ་ཆེར་རྒྱུན་ཆགས་པར་རབ་ཏུ་བསྟན་པར་ཏེ། རྣམ་པར་གསལ་བར་བྱས་ཤིང་རབ་ཏུ་ཕྱེ་བའོ། །དེའི་ཕྱིར་གལ་ཏེ་དེ་ལ་གོམས་པར་བྱེད་མི་ནུས་ན་དེའི་ཚེ་མདོ་སྡེ་སྣ་ཚོགས་པ་ནས་ཕྱོགས་གཅིག་ཏུ་བདག་ཉིད་ཀྱིས་མདོར་བསྡུས་ནས་བཏུས་ཤིང་བྱས་པར་བལྟ་སྟེ། གཞུང་ངམ་དོན་རྣམ་པར་བལྟ་བར་བྱའོ། །འདིར་ཡང་དགོངས་པ་ནི་སྔ་མ་ཉིད་ཡིན་ནོ། །ཡང་ན་འཕགས་ཀླུ་སྒྲུབ་ཀྱིས་མཛད་པའི་བསླབ་པ་
ཀུན་ལས་བཏུས་པ་དང་མདོ་ཀུན་ལས་བཏུས་པ་གཉིས་པོ་འང་འབད་པ་སྟེ། གུས་པས་བལྟ་བར་བྱའོ། །གང་འདིར་མི་སྣང་བ་དེ་ནི་དེ་ལ་སྣང་ངོ་སྙམ་དུ་དགོངས་པའོ། །བསླབ་པ་ངེས་པར་མཐོང་བ་རྣམས་ཀྱང་མ་ལུས་པར་ཐམས་ཅད་ལ་ཉེ་བར་མཁོ་བ་གསུངས་པ། གང་ལས་ཞེས་བྱ་བ་ལ་སོགས་པ་ཡིན་ཏེ། གང་ལས་ཏེ་དོར་བར་བྱ་བ་སྟེ་བྱ་བར་འོས་པ་མ་ཡིན་པ་ལས་བཟློག་པར་བྱ་ཞིང་མི་བྱ་བ་སྟེ། དེ་དག་ནི་རབ་ཏུ་གྲུབ་པ་ཡིན་ནོ། །གང་ལས་ནི་བསླབ་པ་ཀུན་ལས་བཏུས་པའམ་མདོ་ཀུན་ལས་བཏུས་པ་ལས་སོ། །དེ་ཉིད་ལས་སུ་བྱ་བ་སྟེ། དེ་ལ་སྦྱར་བར་བྱ་བ་ནི་བསྒྲུབ་པར་བྱ་བའོ། །བཀག་པ་དང་སྒྲུབ་པ་དེ་ཡང་འཇིག་རྟེན་པའི་སེམས་ཏེ་བསམ་པ་ཡིན་ལ། དེ་བསྲུང་བའི་དོན་དུའོ། །དེ་ཇི་ལྟར་འཁྲུག་པར་མི་འགྱུར་བ་སྟེ། བསླབ་པ་ཀུན་ལས་བཏུས་པ་ལ་སོགས་པ་ལས་བསླབ་པ་མཐོང་ནས་རྟོགས་པར་བྱས་ལ་སྟེ་ཡང་དག་པར་དཔྱད་དོ། །གང་ལས་གང་ཞིག་ཇི་ལྟར་དཔྱད་པར་བྱ་བ་དེ་ལ་དེ་བཞིན་དུ་ཐ་སྙད་དུ་འཇུག་པར་བྱའོ། །གཞན་དུ་ཐ་སྙད་ཀྱི་དོན་ལ་རྨོངས་པ་ནི་ལྟུང་བའི་དྲི་མ་ཅན་དུ་འགྱུར་རོ། །དེ་དག་གིས་ནི་ལུས་དག་པ་བཤད་པ་ཡིན་ནོ། །ལུས་ཀྱི་དག་པ་གང་ཞེ་ན། སྡིག་དང་ཉོན་མོངས་རྣམ་སྦྱོང་ཡིན། །རྫོགས་སངས་རྒྱས་ཀྱིས་གསུངས་ཚུལ་དུ། །འབད་པ་མེད་ན་ངན་སོང་འགྲོ། །ཞེས་གང་གསུངས་པའོ། །རྟག་ཏུ་དྲན་པ་དང་ཤེས་བཞིན་དཔྱད་པར་བྱའོ་ཞེས་གང་གསུངས་པ་དེ་ལ་དྲན་པ་ནི་རང་གི་མིང་གིས་རང་གི་ངོ་བོ་བསྟན་ཏེ། ཤེས་བཞིན་མི་ཤེས་པས་ཤེས་བཞིན་ཅི་འདྲ་བ་ཞིག་ཅེ་ན། དེའི་རང་གི་ངོ་བོ་བསྟན་པའི་ཕྱིར། ལུས་དང་ཞེས་བྱ་བ་ལ་སོགས་པ་གསུངས་ཏེ། ལུས་ཀྱི་གནས་སྐབས་དང༌། སེམས་ཀྱི་གནས་སྐབས་གང་ཡིན་པའི་སྤྱོད་ལམ་རྣམས་ལ་དུས་ཐམས་ཅད་དུ་སོ་སོར་བརྟག་པར་བྱེད་ཅིང་ངེས་པར་རྟོག་པ་སྟེ། སྔར་ཇི་སྐད་དུ་བསྟན་པ་བཞིན་ནོ། །བསྟན་པའི་བསླབ་པ་དེ་དག་ཐམས་ཅད་ལ་མཁས་པར་བྱ་བ་དང༌། ལས་རྣམས་བསྒྲུབ་པར་བྱ་བའི་ཚིག་ཙམ་གྱིས་ནི་མ་ཡིན་ནོ་ཞེས་ངེས་པར་བྱ་བའི་ཕྱིར། །ལུས་ཀྱིས་ཞེས་བྱ་བ་ལ་སོགས་པ་གསུངས་ཏེ། ཡིད་ནི་
ལུས་ཀྱིས་བྱེད་པའི་སྔོན་དུ་འགྲོ་བའི་ཕྱིར་དེ་ཡང་འདིས་བསྟན་པ་ཡིན་ནོ། །ནན་ཏན་གྱིས་ཐམས་ཅད་བསྒྲུབ་པར་བྱའི། སྒྲ་ཙམ་བསྒྲགས་པས་ནི་མ་ཡིན་ཏེ། འབྲས་བུ་མེད་པའི་ཕྱིར་རོ། །བྱང་ཆུབ་སེམས་དཔས་འབད་པར་བྱའོ། །ཇི་ལྟར་ཞེ་ན། སྨན་པའི་བསྟན་བཅོས་བཀླགས་པ་ཙམ་གྱིས་དེའི་བྱ་བ་མི་བྱེད་པས་ནད་ཀྱིས་ཐེབས་པ་ལ་འབྲས་བུ་ཅི་ཞིག་སྒྲུབ་པར་འགྱུར། དེ་ཙམ་གྱིས་ནི་དེའི་ནད་མེད་པར་མི་འགྱུར་རོ་སྙམ་དུ་དགོངས་པ་ཡིན་ནོ། །དེ་ལྟ་བས་ན་བྱ་བ་དེ་དག་ཐམས་ཅད་ནན་ཏན་གྱིས་རྫོགས་པར་བྱའོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ། ཤེས་རབ་འབྱུང་གནས་བློ་གྲོས་ཀྱིས་མཛད་པ་ལས་ལེའུ་ལྔ་པའོ།། །།དེ་ལྟར་ཚུལ་ཁྲིམས་རྣམ་པར་དག་པ་རྣམ་པ་མང་པོ་སྟོན་པ་ན་ལུས་ལ་སོགས་པ་བསྲུང་བ་དང་དག་པ་ཡང་བསྟན་ནས། དགེ་བ་རྣམ་པར་དག་པ་བསྟན་པར་བྱ་བའི་ཕྱིར། བཟོད་བྱ་ཐོས་པ་བཙལ་བར་བྱ། །དེ་ནས་ནགས་སུ་གནས་པར་བྱ། །མཉམ་པར་གཞག་ལ་བརྩོན་བྱ་ཞིང༌། །མི་སྡུག་ལ་སོགས་བསྒོམ་པར་བྱ། །ཞེས་བྱ་བ་དེ་དག་མངོན་པར་བརྗོད་པར་བྱ་བའི་ཕྱིར་བརྩོན་པར་བྱེད་པ། བསྐལ་པ་ཞེས་བྱ་བ་ལ་སོགས་པ་ཡིན་ཏེ། དེ་དག་ཀུན་ཞེས་བྱ་བ་ནི་ཚུལ་ཁྲིམས་ཀྱི་སྡོམ་པ་ཡང་དག་པར་བླངས་པ་ལས་བྱུང་བའི་ལེགས་པར་སྤྱད་པ་སྟེ། དགེ་བའི་ངོ་བོས་སོ། །སྦྱིན་པ་ནི་སྤྱིར་རྣམ་པ་གསུམ་མོ། །བདེ་གཤེགས་མཆོད་པ་ཡང་རྣམ་པ་གསུམ་མོ། །བསྐལ་པ་སྟོང་ཕྲག་དུ་མར་བསགས་ཤིང་བྱས་པ་གང་ཡིན་པ་དེ་དག་ཐམས་ཅད་ཁོང་ཁྲོ་སྟེ་སེམས་ཅན་ཐམས་ཅད་ལ་རྣམ་པར་སྤང་བས་འཇོམས་པར་བྱེད་དོ། མེ་ཆུང་ངུས་རྩའི་ཚོགས་བཞིན་དུ་སྲེག་པར་བྱེད་དོ། །འཕགས་པ་འཇམ་དཔལ་རྣམ་པར་རོལ་པའི་མདོ་ལས། འཇམ་དཔལ་ཁོང་ཁྲོ་ཁོང་ཁྲོ་ཞེས་བྱ་བ་ནི་བསྐལ་པ་བརྒྱར་བསགས་པའི་དགེ་བ་འཇོམས་པར་བྱེད་པ་སྟེ། དེའི་ཕྱིར་ཁོང་ཁྲོ་ཞེས་བྱའོ་ཞེས་གསུངས་སོ། །འཕགས་པ་ཐམས་ཅད་ཡོད་པར་སྨྲ་བ་ལས་ཀྱང་གསུངས་ཏེ། དགེ་སློང་དག་དགེ་སློང་འདི་དབུའི་སྐྲ་དང༌། སེན་མོའི་མཆོད་རྟེན་ལ་ཡན་ལག་ཐམས་
ཅད་ཀྱིས་ཕྱག་འཚལ་ནས་སེམས་དང་བར་བྱེད་པ་ལྟོས། བཙུན་པ་དེ་ལྟར་ལགས་སོ། །དགེ་སློང་དག་དགེ་སློང་འདིས་ས་ཇི་ཙམ་ཞིག་ནོན་པའི་འོག་ཏུ་དཔག་ཚད་བརྒྱད་ཁྲི་བཞི་སྟོང་ན་གསེར་ལས་གྲུབ་པ་ལ་ཐུག་པའི་བར་ན་རྡུལ་ཕྲན་ཇི་སྙེད་ཡོད་པ་དེ་སྙེད་དུ་དགེ་སློང་འདིས་འཁོར་ལོས་སྒྱུར་བའི་རྒྱལ་སྲིད་སྟོང་འགྱུར་དུ་ཡོངས་སུ་སྤྱོད་པར་འགྱུར་ཞེས་བྱ་བ་ནས་ཚེ་དང་ལྡན་པ་ཉེ་བ་འཁོར་གྱིས་བཅོམ་ལྡན་འདས་གང་ན་བ་དེར་ལོགས་སུ་ཐལ་མོ་སྦྱར་བ་བཏུད་ནས་འདི་སྐད་ཅེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་འདིའི་དེ་ལྟར་དགེ་བའི་རྩ་བ་ཆེ་བ་གང་གསུངས་པ་ལྟར་ན། བཅོམ་ལྡན་འདས་དགེ་བའི་རྩ་བ་འདིས་གང་དུ་བསྲབས་པ་དང༌། ཡོངས་སུ་བྱང་བ་དང༌། ཡོངས་སུ་བས་པར་འགྱུར་བ་ལས་བཀའ་སྩལ་པ། ཉེ་བ་འཁོར་ཇི་སྲིད་དུ་ཚངས་པར་སྤྱོད་པ་དམ་པས་ཚངས་པ་མཚུངས་པར་སྤྱོད་པ་ལ་སྡང་བའི་སེམས་མ་བསྐྱེད་པ་དེ་སྲིད་དུ་ཟད་པ་དང་ཉམས་པར་དུས་ཡང་དག་པར་རྗེས་སུ་མ་མཐོང་ངོ༌། །ཉེ་བ་འཁོར་དེར་དགེ་བའི་རྩ་བ་ཆེན་པོ་འདི་ཡང་བསྲབས་པ་དང༌། ཡོངས་སུ་བྱང་བ་དང༌། ཡོངས་སུ་ཟད་པར་འགྱུར་བ་དེ་ལྟ་བས་ན་མགལ་དུ་མ་ལ་ཡང་སེམས་ཀྱིས་ཁྲོ་བར་མི་བྱ་ན་རྣམ་པར་ཤེས་པ་དང་བཅས་པའི་ལུས་ལ་ལྟ་ཅི་ཞིག་སྨོས་ཞེས་སོ། །དེའི་ཕྱིར་ཞེ་སྡང་ལྟ་བུའི་ཞེས་བྱ་བ་ལ་སོགས་པ་གསུངས་པ་ལ། ཞེ་སྡང་ལྟ་བུའི་སྡིག་པ་མེད་དོ། མི་དགེ་བས་བསོད་ནམས་ཟིལ་གྱིས་ནོན་པའི་རྒྱུ་མེད་དེ། བཟོད་པ་སྲན་ཚུགས་པ་ལྟ་བུ་དང་མཉམ་པའི་དཀའ་ཐུབ་མེད་དོ། །ཤིན་ཏུ་ངལ་བ་ཆེར་བྱས་པས་བསྒྲུབ་པར་བྱ་བའི་ཕྱིར་ལེགས་སྤྱད་དོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་བཟོད་པ་ནི་བཟོད་པ་སྟེ། ལྷུར་བླང་བ་ཐམས་ཅད་ཀྱིས་བསྒོམ་པར་བྱ་སྟེ་གོམས་པར་བྱའོ། །སྣ་ཚོགས་ནི་འོག་ནས་འཆད་པར་འགྱུར་བའི་ཐབས་རྣམ་པ་སྣ་ཚོགས་པས་སོ། །མཐོང་བའི་ཆོས་ཀྱི་ཉེས་པ་ཚིགས་སུ་བཅད་པ་གསུམ་གྱིས་བསྟན་པ་ཞེ་སྡང་ཞེས་བྱ་བ་ལ་སོགས་པ་གསུངས་ཏེ། ཞི་བ་ནི་རབ་ཏུ་ཞི་བའོ། །ཉམས་མི་མྱོང་ནི་རྟེན་པ་མེད་པའོ། །ཉེ་བར་མ་ཞི་བ་ཉིད་ནི་རྟག་ཏུ་ཞེ་སྡང་
གི་མེ་འབར་བའི་ཕྱིར་རོ། །དགའ་དང་བདེ་བ་ནི་ཡིད་བདེ་བ་དང་བདེ་བ་མི་འཐོབ་ལ་མི་རྙེད་པ་སྟེ་དེས་མནན་པའི་ཕྱིར་རོ། །གཉིད་མི་འོང་ཞིང་རྟེན་མེད་ན་སེམས་བདེ་བ་ཐོབ་པ་མེད་པ་སྟེ། ལུས་དང་སེམས་ཀྱི་རྒྱུན་གདུང་བར་བྱེད་པའི་ཞེ་སྡང་ཟུག་རྔུ་སྙིང་ལ་གནས་འཆའ་བས་སོ། །མཆོད་པ་ནི་བཀུར་སྟི་སྟེ་གང་དག་རྙེད་པ་དང་བཀུར་སྟི་རྣམས་ཀྱིས་སོ། །གང་ཡང་རྗེས་སུ་འཚོ་བ་སྟེ། རྗེ་དཔོན་ཞེ་སྡང་ཅན་དེ་ལ་གནོད་པར་བྱ་བར་འདོད་པའོ། །ཅི་སྟེ་ཞེ་ན། ཞེ་སྡང་སྐལ་ངན་ཏེ་མི་སྡུག་པས་ཞེས་བྱ་བ་སྟེ་འདི་ནི་གཏན་ཚིགས་ཀྱི་ཚིག་གོ །མཛའ་བཤེས་ནི་བཤེས་པ་རྣམས་ཀྱང་སྐྱོ་བར་འགྱུར་ཏེ། ཞེ་སྡང་ཅན་དེས་སྐྲག་པར་འགྱུར་རོ། །སྦྱིན་པ་ལ་ཕྱོགས་ཀྱང་བྲན་གྱི་ཚོགས་རྣམས་ཀྱིས་སྟེན་པར་མི་བྱེད་རྗེས་སུ་འགྲོ་བར་མི་བྱེད་དོ། །མང་དུ་སྨྲ་ཅི་དགོས། འདིར་མདོར་ན་ཞེས་བྱ་བ་འདི་ནི་ངེས་པར་གཟུང་བར་བྱ་སྟེ། གང་གིས་ཁྲོ་བར་བྱེད་པ་ལ་བདེ་བ་ཐོབ་པ་ཉེ་བར་ཞི་བའི་རྒྱུ་དེ་ནི་ཅུང་ཟད་ཀྱང་ཡོད་པ་མ་ཡིན་ནོ། །སེམས་ཀྱི་རྩུབ་པའི་གནས་ནི་ཞེ་སྡང་ངོ༌། །དེ་ལས་བྱུང་བའི་འཇུག་པ་ནི་ཁྲོ་བ་སྟེ། གང་གི་དབང་གིས་དབྱུག་པ་ལ་སོགས་པ་ལེན་པར་བྱེད་པའོ། །དེ་ལྟར་ཐ་དད་པ་གཉི་ག་ཡང་སྤང་བར་བྱ་བ་ཉིད་ཀྱིས་ཐ་མི་དད་པར་བསྟན་ཏེ། དེ་བཞིན་དུ་འདིར་མཐོང་བའི་ཆོས་ལ་ཡང་ཞེ་སྡང་གི་ཉེས་པ་རྟོགས་པར་བྱས་ནས་དེ་སྤང་བར་བྱ་བའི་ཕྱིར་འབད་རྩོལ་དང་ལྡན་པར་བྱའོ་ཞེས་གསུངས་པ། ཁྲོ་བ་ཞེས་བྱ་བ་ལ་སོགས་པ་ཡིན་ཏེ། ཇི་སྐད་དུ་གསུངས་པའི་རྣམ་པས་གང་གི་ཕྱིར་སྡུག་བསྔལ་སྐྱེད་པར་བྱེད་པ་དེའི་ཕྱིར། གང་ཞིག་ལེགས་པར་སྤྱད་པའི་བདག་ཉིད་ཀྱིས་བསྒྲིམས་ཏེ་དྲག་ཏུ་མངོན་པར་ཞེན་པས་ཏེ། བརྩོན་འགྲུས་བརྩམས་པས་ཞེས་བྱ་བའི་དོན་ཏོ། །དེ་ནི་འཇིག་རྟེན་འདི་དང་འཇིག་རྟེན་ཕ་རོལ་དུ་བདེའོ། །ད་ནི་ཞེ་སྡང་གཞོམ་པར་བྱ་བའི་ཆེད་དུ་དེ་ལ་རྒྱུ་གཞོམ་པར་བྱ་བའི་ཕྱིར་རྣམ་པར་གཞག་པ་མཛད་པ་མི་འདོད་ཅེས་བྱ་བ་ལ་སོགས་པ་གསུངས་ཏེ། འདོད་པ་དང་མི་འདོད་པ་ནི་བདག་དང་བདག་གིར་འཛིན་པ་ལས་བྱུང་བ་སྟེ། བདག་དང་བདག་གི་ལ་བདེ་བ་བསྒྲུབ་པ་ནི་འདོད་པ་སྟེ། དེ་ལས་བཟློག་པ་ནི་མི་འདོད་པའོ། །
དེ་ལྟར་ན་དེ་དག་ནི་རྟོག་པ་བྱས་སུ་བླད་ཀྱི། དོན་དམ་པར་ནི་འདོད་པའམ་མི་འདོད་པར་སྲིད་པ་ཅུང་ཟད་ཀྱང་མེད་དོ། །དེ་ལྟ་བས་ན་ལོག་པར་མངོན་པར་ཞེན་པའི་བག་ཆགས་ཀྱིས་མི་འདོད་པ་བྱས་པ་དང་འདོད་པ་བཤིག་པས་ཡིད་མི་བདེ་བ་སྟེ། ཡིད་ལ་སྡུག་བསྔལ་འབྱུང་ངོ༌། །དེ་ལྟ་བས་ན་དེ་བྱེད་པའམ་དེ་དང་འགལ་བར་བྱེད་པ་ལ་ཞེ་སྡང་སྐྱེ་བར་འགྱུར་རོ། །དེ་ལྟར་ན་ཟས་ནུས་པ་དང་ལྡན་པ་ཡིད་མི་བདེ་བ་ཉིད་ལ་བརྟེན་ནས་སྟོབས་ཡོད་པ་དང་ཞེ་སྡང་གིས་བདག་འཇོམས་སོ་སྙམ་དུ་ངེས་པར་བྱས་ནས་དེ་རྒྱས་པའི་རྒྱུ་ཉིད་དང་པོར་གཞོམ་པར་བྱའོ། །དེ་བཅོམ་པས་ནི་བདེ་བ་ཉིད་དུ་འགྱུར་ཏེ། དེའི་རྩ་བ་བཅོམ་པའི་ཕྱིར་དང༌། རྩ་བ་དང་བཅས་པའི་བཅོམ་པ་ནི་སླར་ལྡང་བ་མི་རིགས་པའི་ཕྱིར་རོ། །འོ་ན་ཁྱེད་ཀྱིས་ཤིན་ཏུ་མངོན་པར་ཞེན་པ་འདི་ཅི་ལྟ་བུ་ཡིན་ཞེ་ན། དེ་ལྟར་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བདག་ལ་གནོད་པ་མ་གཏོགས་པ་ཞེ་སྡང་གི་དགྲ་འདི་ལ་ཉིན་དང་མཚན་དུ་གཞན་ཅུང་ཟད་ཀྱང་བྱ་བ་མེད་དོ། །དེ་ལྟར་ཞེ་སྡང་ཉེས་པ་དང་ལྡན་པ་རྣམ་པར་བསྒོམས་ལ་ཐབས་ཐམས་ཅད་ཀྱིས་དེའི་གཉེན་པོར་གྱུར་པ་བཟོད་པ་བསྐྱེད་པར་བྱའོ། །དེ་ལ་བཟོད་པ་ནི་རྣམ་པ་གསུམ་སྟེ། ཆོས་ཡང་དག་པར་སྡུད་པའི་མདོ་ལས་བཤད་པ། འདི་ལྟ་སྟེ། སྡུག་བསྔལ་དང་དུ་ལེན་པའི་བཟོད་པ་དང༌། ཆོས་ལ་ངེས་པར་སེམས་པའི་བཟོད་པ་དང༌། གཞན་ཞིག་གིས་གནོད་པ་བྱེད་པ་ལ་ཇི་མི་སྙམ་པའི་བཟོད་པའོ་ཞེས་སོ། དེ་ལ་རེ་ཞིག་སྡུག་བསྔལ་དང་དུ་ལེན་པའི་བཟོད་པའི་དབང་དུ་བྱས་ཏེ། ཅི་ལ་བབ་ཀྱང་ཞེས་བྱ་བ་ལ་སོགས་པ་གསུངས་ཏེ། སྡུག་བསྔལ་དང་དུ་ལེན་པའི་བཟོད་པའི་མི་མཐུན་པའི་ཕྱོགས་ནི་མི་འདོད་པ་བྱུང་བ་ལ་བརྟེན་ནས་སྡུག་བསྔལ་བས་འཇིགས་པ་དང༌། འདོད་པའི་གེགས་ལ་བརྟེན་ནས་བདེ་བ་ལ་ཆགས་པ་སྟེ། དེ་དག་གིས་ནི་ཡིད་མི་བདེ་ལ། དེ་ལས་སེམས་ཞེ་སྡང་བའམ། ཞུམ་པར་འགྱུར་རོ། །དེ་ཉིད་ཀྱི་ཕྱིར་ཟླ་བའི་སྒྲོན་མའི་མདོ་ལས། བདེ་བ་ལ་མི་ཆགས་པ་དང༌། སྡུག་བསྔལ་ལ་ཕྱིར་མི་ཕྱོགས་པར་མི་བྱའོ་ཞེས་སོ། །དཀོན་མཆོག་སྤྲིན་གྱི་མདོ་ལས་
ཀྱང་གསུངས་ཏེ། གང་ནང་གི་མྱ་ངན་དང་སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང་འཁྲུགས་པ་དེ་དག་བཟོད་ཅིང་དང་དུ་ལེན་ཏོ་ཞེས་སོ། །དེ་བས་ན་གལ་ཏེ་བདག་གི་མགོ་གཅོད་ན་དེ་ལྟ་ན་ཡང་བདག་གིས་དགའ་བ་དཀྲུག་པར་མི་བྱའོ། །ཁོང་ནས་ལྡང་བར་མི་བྱའོ། །དགའ་བ་ནི་ཡིད་མི་བདེ་བའི་གཉེན་པོ་ཡིན་ཏེ། སྡུག་བསྔལ་བྱུང་ཡང་སེམས་རབ་ཏུ་དགའ་བ་ལ་ཡིད་མི་བདེ་བའི་གོ་སྐབས་མེད་པའི་ཕྱིར་རོ། །དེ་ལྟར་ཡིད་མི་བདེ་བ་སྤང་བར་བྱ་བའི་ཕྱིར་དགའ་བས་འབད་པས་བསྲུང་བར་བྱའོ། །ཅིའི་ཕྱིར་ཞེ་ན། ཡིད་མི་བདེ་བ་བྱས་ཀྱང་འདོད་པའི་གེགས་ཡོད་ན་འདོད་པ་མི་འགྲུབ་སྟེ། མངོན་པར་འདོད་པ་འགྲུབ་པར་མི་འགྱུར་བའོ། །འདི་ནི་ཁྱད་པར་དུ་ཡོད་དེ་ཡང་དགེ་བ་ཉམས་པར་འགྱུར་བའོ། །ཡིད་དགའ་བ་ཡང་འཕགས་པ་བློ་གྲོས་མི་ཟད་པའི་མདོ་ལས་རབ་ཏུ་བསྔགས་ཏེ། དེ་ལ་དགའ་བ་གང་ཞེ་ན། གང་སངས་རྒྱས་ཀྱི་ཆོས་རྣམས་དྲན་པ་དང༌། རྗེས་སུ་དྲན་པ་ལ་དགའ་བ་དང༌། དད་པ་དང་མཆོག་ཏུ་དགའ་བ་དང༌། སེམས་མི་འགོང་ཞིང་མི་བརྫི་བ་དང༌། འདོད་པའི་དགའ་བ་མེད་པ་དང༌། འདོད་པའི་དགའ་བ་ཐམས་ཅད་བཏང་བས་ཆོས་ཀྱི་དགའ་བ་ཐམས་ཅད་ཀྱི་རྟེན་དང༌། སེམས་རབ་ཏུ་དགའ་བ་དང༌། ལུས་རབ་ཏུ་ཚིམ་པ་དང༌། སངས་རྒྱས་ལ་དགའ་ཞིང་ཡིད་འཕར་བ་དང༌། དེ་བཞིན་གཤེགས་པའི་སྐུ་ལ་དགའ་ཞིང་མོས་པས་ཞེས་བྱ་བ་ལ་སོགས་པ་རྒྱ་ཆེར་བརྗོད་དོ། །གཞན་ཡང་ཡིད་མི་བདེ་བ་ནི་མ་སྤྱད་པས་སྐྱེ་བ་ཡིན་ནོ་ཞེས་གསུངས་པ། གལ་ཏེ་ཞེས་བྱ་བ་ལ་སོགས་པ་ཡིན་ཏེ། གལ་ཏེ་འདོད་པའི་གེགས་བཟློག་པའི་ཕྱིར་དང་མི་འདོད་པ་བྱུང་བ་ཕྱིར་བཅོས་པའི་ཐབས་གཞན་ཡོད་ན་དེའི་ཚེ་དེ་ལ་མི་དགར་ཅི་ཞིག་ཡོད། དེ་ཉིད་ལ་ནན་ཏན་དུ་གྱིས་ཤིག །ཅི་སྟེ་མེད་ན་དེའི་ཚེ་ཡང་དེ་ལ་མི་དགའ་བྱས་ཅི་ཕན། དགོས་པ་ཅུང་ཟད་ཀྱང་མེད་དེ། དེ་ཐབས་མེད་པའི་ཕྱིར་དེ་དག་ནི་ཐམས་ཅད་དུ་འདས་པ་ཡིན་ནོ། །དེ་ལྟར་རྣམ་པར་དཔྱད་ནས་ཡིད་མི་བདེ་བ་བསལ་བ་ཉིད་མཆོག་ཡིན་ནོ། །གོམས་པ་སྡུག་བསྔལ་གནོད་པ་མེད་པར་འགྱུར་བ་ཡིན་ནོ་ཞེས་
རབ་ཏུ་བསྒྲུབ་པའི་ཕྱིར་བརྩོན་པར་བྱེད་པ། སྡུག་བསྔལ་ཞེས་བྱ་བ་ལ་སོགས་པ་ཡིན་ཏེ། སྡུག་བསྔལ་ནི་རྣམ་པ་གཉིས་ཏེ། ལུས་ལ་གནོད་པ་བྱུང་བ་དང་སེམས་ལ་གནོད་པ་བྱུང་བའོ། །དེ་ལ་ལུས་ལ་གནོད་པ་བྱུང་བ་ནི་དབྱུག་པ་ལ་སོགས་པ་བསྣུན་པ་ལས་བྱུང་བའོ། །ཡིད་ལ་གནོད་པ་བྱུང་བ་ནི་བརྙས་པ་ལ་སོགས་པའི་རྒྱུ་མཚན་ལས་སོ། །དེ་ལ་བརྙས་པ་ནི་ངན་པ་བྱེད་པའོ། །ཚིག་རྩུབ་ནི་གནད་འབྱེད་པའི་ཚིག་སྟེ། མི་སྙན་པ་ནི་གྲགས་པ་མ་ཡིན་པ་དང༌། ཡོན་ཏན་དང་བྲལ་བར་བརྗོད་པའོ། །དེ་དག་ཐམས་ཅད་ནི་མི་འདོད་པ་ཡིན་ནོ། །གལ་ཏེ་གཞན་ལས་བྱུང་ན་ལེགས་པ་མ་ཡིན་ནམ་ཞེ་ན། དེའི་ཕྱིར་གསུངས་པ། བཤེས་རྣམས་ལ་ཞེས་གསུངས་ཏེ། གང་ལ་བདག་ཉིད་ཀྱིས་ཁས་བླངས་པ་མཛའ་བའི་གནས་དེ་དེ་དག་དང་བདག་ཉིད་ལ་ཡང་ངོ༌། །སྡུག་བསྔལ་ལ་སོགས་པ་བྱེད་པ་པོ་དགྲ་དེ་ལས་བཟློག་པ་འབྱུང༌། དེ་ལ་ནི་སྡུག་བསྔལ་བ་ལ་སོགས་པ་མངོན་པར་འདོད་པ་ཡིན་ནོ། །དེ་ལ་སྡུག་བསྔལ་མི་བཟོད་པ་དེ་རེ་ཞིག་ཟློག་པར་བྱེད་པ། བདེ་བའི་རྒྱུ་ཞེས་བྱ་བ་ལ་སོགས་པ་གསུངས་ཏེ། འབད་པ་ཆེན་པོས་དགེ་བའི་ཕྱོགས་ཉེ་བར་བསྟེན་པ་རེས་འགའ་འམ་བརྒྱ་ལ་སྟེ་འཁོར་བར་ཟག་པ་དང་བཅས་པའི་བདེ་བ་ཤིན་ཏུ་རྙེད་པར་དཀའོ། །སྡུག་བསྔལ་ནི་ཐམས་ཅད་དུ་རྙེད་པར་སླ་སྟེ་འབད་པ་མེད་པར་འགྲུབ་པའི་ཕྱིར་རོ། །དེ་བས་ན་དེ་གོམས་པ་ནི་དཀའ་བ་མ་ཡིན་ཏེ། ཐམས་ཅད་དུ་འདྲིས་པའི་ཕྱིར་རོ། །འདི་ལྟར་ཡང་འཁོར་བ་ནས་ངེས་པར་འབྱིན་པའི་ཐབས་ཀྱང་སྡུག་བསྔལ་ཉིད་ཡིན་ཏེ། དེ་ལྟ་ན་ཡང་རྒྱགས་ཀྱི་ཚུལ་དུ་དེ་ཡོངས་སུ་བཟུང་བར་རིགས་པ་ཉིད་ཡིན་ནོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་ཀྱེ་སེམས་སྡུག་བསྔལ་ཉམས་སུ་མྱོང་བར་བྱ་བའི་ཕྱིར་བརྟེན་པར་གྱིས་ལ་སྡང་བ་ལ་གནས་བརྟན་པར་མ་བྱེད་ཅིག །།བམ་པོ་དགུ་པ། འོན་ཀྱང་སྡུག་བསྔལ་འདི་དོན་ཆེན་པོ་བསྒྲུབ་པའི་ཕྱིར་བསྟེན་པར་རིགས་སོ་སྙམ་དུ་ཡིད་ལ་བྱའོ་ཞེས་བྱ་བ་ནི་རྫོབ་གཏུམ་མོ་ཞེས་བྱ་བ་ལ་སོགས་པ་གསུངས་ཏེ། རྫོང་གཏུམ་
མོའི་བུ་ནི་གཏུམ་མོའི་བུ་སྟེ། སྟོན་ཟླ་འབྲིང་པོའི་ཚེས་དགུའི་དུས་ལ་སོགས་པར་ཞག་གསུམ་མམ་ཞག་གཅིག་ཏུ་གསོ་སྦྱིན་བྱས་ནས་ལུས་སྲེག་པ་དང་གཅོད་པ་དང་འབིགས་པར་བྱེད་པའི་སྡུག་བསྔལ་ཚོར་བ་འབྲས་བུ་མེད་པ་ཉམས་སུ་མྱོང་བར་བྱེད་པའོ། །དེ་བཞིན་དུ་ཡུལ་ཀར་ཎ་ཊ་ལ་སོགས་པར་བྱང་བ་ལྷོ་ཕྱོགས་ཀྱི་རྒྱུད་དུ་གོང་མའི་མིང་འབྲི་བ་ཙམ་གྱི་ང་རྒྱལ་གྱིས་ཕན་ཚུན་དུ་འགྲན་པར་བྱེད་པའི་བྱེད་པ་དུ་མས་སྡུག་བསྔལ་ཉམས་སུ་མྱོང་ཞིང་སྲོག་ཀྱང་འདོར་བར་བྱེད་ན། བདག་ནི་བདག་དང་གཞན་མཆོག་ཏུ་དཀོན་པའི་སངས་རྒྱས་ཉིད་དུ་བསྒྲུབ་པའི་ཕྱིར་བརྩོན་པར་བྱས་པ་ཡིན་ན་ཅིའི་ཕྱིར་སྡུག་བསྔལ་རྣམས་ཀྱིས་བདར་བར་བྱ། འོ་ན་དེ་ལྟར་གྱུར་ན་གལ་ཏེ་སྡུག་བསྔལ་ཤིན་ཏུ་ཆུང་བ་ནི་བསྟེན་པར་ནུས་ཀྱིས། ལག་པ་དང༌། རྐང་པ་དང༌། མགོ་བོ་བཅད་པ་ལ་སོགས་པའམ། སེམས་ཅན་དམྱལ་བ་ལ་སོགས་པའི་སྡུག་བསྔལ་ལས་ཐར་པའི་དོན་དུ་ཇི་ལྟར་ན་བསྟེན་པར་བྱ་ཞེ་ན། འདིར་གོམས་ན་ཞེས་བྱ་བ་ལ་སོགས་པ་གསུངས་ཏེ། བསྟན་བཅོས་གོམས་པར་བྱེད་པ་དང༌། སྒྱུ་རྩལ་ལ་སོགས་པ་ལ་མཁས་པ་ལ་སོགས་པའམ། སྡུག་བསྔལ་ཆུང་ངུ་དང་འབྲིང་དང་ཆེན་པོ་ཙམ་ཉམས་སུ་མྱོང་བར་བྱ་བའི་དངོས་པོ་གང་ཞིག་གོམས་པའི་སྤྱོད་ཡུལ་དུ་མི་འགྱུར་བ་དེ་ཅུང་ཟད་ཀྱང་ཡོད་པ་མ་ཡིན་ཏེ་ཐམས་ཅད་ནི་གོམས་པས་བདག་གིར་བྱ་བ་ནུས་སོ་སྙམ་དུ་དགོངས་པ་ཡིན་ནོ། །གང་གི་ཕྱིར་གནོད་པ་ཤིན་ཏུ་ཆུང་ངུ་ལ་སོགས་པ་གོམས་པར་འགྱུར་བ་དེའི་ཕྱིར་སེམས་ཅན་དམྱལ་བ་ལ་སོགས་པའི་གནོད་པ་ཆེན་པོའང་བསྟེན་པར་མི་ནུས་ཏེ། ཡུན་རིང་པོར་ཤིན་ཏུ་གོམས་པར་བྱས་པས་སླར་ཡང་དེ་ཉིད་བདེ་བའི་ངོ་བོར་ཡོངས་སུ་འགྱུར་བ་འགྲོ་བ་ཡིན་པས་ན་བྱང་ཆུབ་སེམས་དཔའ་རྣམས་ཀྱི་བདེ་བ་ཉིད་ནི་སྡུག་བསྔལ་ཏེ། ཇི་སྐད་དུ་གསུངས་པ། དེ་ལ་སྡུག་བསྔལ་ཆུང་ངུ་ལ་གོམས་པ་སྔོན་དུ་བཏང་ན་དགའ་བ་ཤིན་ཏུ་དཀའ་བ་ཡང་གོམས་པར་འགྱུར་ཏེ། དཔེར་ན་གོམས་པའི་དབང་གིས་སེར་སྣ་ཅན་རྣམས་སྡུག་བསྔལ་ལ་བདེ་བར་འདུ་ཤེས་པ་དེ་བཞིན་དུ་སྡུག་བསྔལ་འབྱུང་བ་ཐམས་ཅད་བདེ་བའི་འདུ་ཤེས་ཉེ་བར་གནས་པ་
གོམས་པས་བདེ་བའི་འདུ་ཤེས་ཉིད་དུ་ཉེ་བར་གནས་པར་འགྱུར་རོ་ཞེས་སོ། །དེ་ལྟར་ན་རྒྱུ་མཐུན་པའི་འབྲས་བུ་ཡང་ཆོས་ཐམས་ཅད་བདེ་བར་འགྲོ་བ་ཞེས་བྱ་བའི་ཏིང་ངེ་འཛིན་འཐོབ་པོ། །ཡབ་དང་སྲས་མཇལ་བ་ལས། བཅོམ་ལྡན་འདས་ཆོས་ཐམས་ཅད་ལ་བདེ་བར་འགྲོ་བ་ཞེས་བགྱི་བའི་ཏིང་ངེ་འཛིན་མཆིས་ཏེ། ཏིང་ངེ་འཛིན་དེ་གང་གིས་ཐོབ་པས་བྱང་ཆུབ་སེམས་དཔའ་དམིགས་པའི་དངོས་པོ་ཐམས་ཅད་ལ་བདེ་བའི་ཚོར་བ་ཤ་སྟག་མྱོང་བར་འགྱུར་ཞིང་སྡུག་བསྔལ་གྱི་ཚོར་བ་མི་མྱོང་ལ། སྡུག་བསྔལ་ཡང་མ་ལགས། བདེ་བ་ཡང་མ་ལགས་པ་མི་མྱོང་སྟེ། དེ་ལ་སེམས་ཅན་དམྱལ་བའི་གནོད་པས་གནོད་པ་བགྱིས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང༌། མིའི་གནོད་པས་གནོད་པ་བགྱིས་ཀྱང་བདེ་བའི་འདུ་ཤེས་ཉེ་བར་གནས་པ་དང༌། ལག་པ་བཅད་དམ། རྐང་པའམ། རྣ་བ་འམ། སྣ་གཏུབས་ཀྱང་བདེ་བའི་འདུ་ཤེས་ཉེ་བར་གནས་པར་འགྱུར་བ་དང༌། རྩ་ལྕག་གིས་གཞུས་སམ། རྩ་ལྕག་ཕྱེད་ཚལ་ལམ། ལྕག་གིས་གཞུས་ཀྱང་བདེ་བའི་འདུ་ཤེས་ཉེ་བར་གནས་པ་དང༌། བཙོན་རར་བཅུག་གམ། དུག་གི་སྣོད་ལྟར་བདུགས་སམ། བུ་རམ་ཤིང་བརྡུངས་པ་ལྟར་བརྡུངས་སམ། འདོམ་བུ་གཞོམ་པ་ལྟར་བཅོམ་མམ། འབྲུ་མར་གྱི་མར་མེ་ལྟར་འབར་བར་བྱས་སམ་ཞེས་བྱ་བ་ནས་ཀཱར་ཥཱ་པ་ཎ་ཙམ་དུ་གཏུབས་སམ། འབྲས་ཕྱེ་བཅོ་བ་ལྟར་བཙོས་སམ། གླང་པོ་ཆེ་རྣམས་ཀྱིས་མ་ཉེས་ཀྱང་བདེ་བའི་འདུ་ཤེས་འཇུག་གོ་ཞེས་རྒྱ་ཆེར་འབྱུང་ངོ༌། །གལ་ཏེ་དང་པོ་གནོད་པ་ཆུང་དུ་གོམས་པར་འགྱུར་བ་དེ་ལྟར་འགྱུར་ན། འོན་ཀྱང་དེ་ཉིད་མེད་དོ་ཞེ་ན། འདིར་སྦྲུལ་དང་ཞེས་བྱ་བ་ལ་སོགས་པ་གསུངས་ཏེ། སྦྲུལ་ལ་སོགས་པས་བྱས་པའི་སྡུག་བསྔལ་དོན་མེད་པ་ཅི་མ་མཐོང་སྟེ། དེ་ནི་འབད་པ་མེད་པར་གྲུབ་པ་ཡིན་ཏེ། གནོད་པ་ཆུང་དུ་གོམས་པའི་རྒྱུ་མཚན་ནི་ཡོད་པ་ཉིད་དོ་སྙམ་དུ་དགོངས་པའོ། །ཡང་གཞན་དུ་རང་གི་སེམས་བརྟན་པར་བྱ་བའི་ཕྱིར། ཚ་གྲང་ཞེས་བྱ་བ་ལ་སོགས་པ་གསུངས་ཏེ། སེམས་པ་ཟེ་རེ་ཅན་ལ་ནི་སྡུག་བསྔལ་ཤིན་ཏུ་ཆེད་གནོད་པར་
འགྱུར་ཏེ། སེམས་བརྟན་པ་ལ་ནི་སྡུག་བསྔལ་ཡང་བཟློག་ནས་སོ། །སེམས་བརྟན་པའི་ཡང་སྡུག་བསྔལ་མི་བཟོད་པ་ཉིད་མ་ཡིན་ནམ་ཞེ་ན། འདིར་ལ་ལ་ཞེས་བྱ་བ་ལ་སོགས་པ་གསུངས་ཏེ། སེམས་བརྟེན་པ་ལ་ནི་མི་ནུས་པ་ཞེས་བྱ་བ་ཅུང་ཟད་ཀྱང་མེད་དེ། འདི་ལྟར་སྐྱེས་བུ་དཔའ་བོ་ལ་ལ་གཡུལ་ངོའི་སར་བདག་གི་ཁྲག་མཐོང་ཡང་ལྷག་པར་དཔའ་བ་བརྟན་པར་བྱེད་དོ། །ཡང་སེམས་ཀྱི་རྒྱུད་སྔར་བ་ལ་ལ་ནི་གཞན་གྱི་ཁྲག་མཐོང་བས་ཀྱང་ཤི་ལ་ཐུག་པའི་སྡུག་བསྔལ་ཉམས་སུ་མྱོང་བར་འགྱུར་ཏེ། དེ་དག་གཉི་ག་ཡང་གཅིག་ལ་གཅིག་སེམས་གོམས་པ་དང་བཟློག་པ་ལས་ཡིན་ནོ། །དེ་ལྟར་ཤེས་པར་བྱས་ནས་སྡུག་བསྔལ་རྣམས་ཀྱིས་མི་ཚུགས་བྱོས་ཏེ། སྡུག་བསྔལ་རྣམས་ཀྱིས་ཀྱང་ཟིལ་གྱིས་མི་ནོན་པར་བྱ་སྟེ། སེམས་མི་བསྒུལ་བའི་ཕྱིར་རོ། །དེ་བས་ན་གནོད་པ་ཟིལ་གྱིས་ནོན་ཅིང་དེས་ནི་ཟིལ་གྱིས་མི་གནོན་ནོ། །དེ་ལྟར་ན་ཡང་གནོད་པ་ཁྱད་དུ་གསད་པར་བྱའོ་ཞེས་མཁས་པས་ཞེས་བྱ་བ་ལ་སོགས་པ་གསུངས་ཏེ། མཁས་པས་སྔར་བསྟན་པའི་དང་བ་ཉམས་པར་མི་བྱའོ། །ཅིའི་ཕྱིར་ཞེ་ན། གང་གི་ཕྱིར་ཉོན་མོངས་པའི་དགྲ་རྣམས་དང་ཐབས་ཅིག་ཏུ་གཡུལ་འགྱེད་པར་རྩོམ་པ་ན། གཡུལ་དུ་ཡང་གནོད་པ་ཞེས་བྱ་བ་མི་འགྱུར་རོ་ཞེས་བྱ་བ་ནི་དཀོན་ཏེ། གནོད་པ་ནི་མོད་པ་ཉིད་ཡིན་ནོ། །དེ་ལྟ་མོད་ཀྱི་ཤིན་ཏུ་བྱ་དཀའ་བ་འདི་འདྲ་བ་སྣང་བ་མ་ཡིན་ནམ་ཞེ་ན། འདིར་གང་ཞིག་ཅེས་བྱ་བ་ལ་སོགས་པ་གསུངས་ཏེ། གཡུལ་ངོར་དགྲ་བོ་ཟིལ་གྱིས་གནོན་པ་ལ་མངོན་དུ་ཕྱོགས་པ་ནི་དེས་མཚོན་བརྡེག་པ་བྲང་དུ་ཕོག་ནའང་ཕོག་ཕོག་ཏུ་དགྲ་ལས་རྒྱལ་བར་བྱེད་པ་གང་ཡིན་པ་དེ་དང་དེ་དག་ནི་སྐྱེས་བུ་དཔའ་བོ་ཡིན་ཏེ། མཆོག་ཏུ་དགྲ་ལས་རྣམ་པར་རྒྱལ་བར་བྱེད་པས་འདི་རྣམ་པར་རྒྱལ་བ་ཐོབ་པར་བྱས་སོ་ཞེས་བསྔགས་པར་བྱེད་དོ། །ཡང་གཞན་གང་ཞིག་དོན་གྱིས་རྨ་ལ་སོགས་པས་དགྲ་ཟིལ་གྱིས་གནོན་པ་དེ་དག་ནི་ཅུང་ཟད་ཀྱང་བྱེད་པ་མིན་པས་རོ་ལ་གསོད་པ་ལྟར་དཔའ་བོ་རྣམས་ཀྱིས་སྨད་པར་འོས་པ་ཡིན་ནོ། །ཡོན་ཏན་བསྟན་པ་འདིས་ཀྱང་སྡུག་བསྔལ་དང་དུ་བླང་བར་
བྱའོ་ཞེས་གསུངས་པ་ནི། གཞན་ཡང་ཞེས་བྱ་བ་ལ་སོགས་པ་ཡིན་ཏེ། གཞན་ཡང་སྡུག་བསྔལ་འདིའི་ཡོན་ཏན་ནི་འདི་ཡིན་ཏེ། དགེ་བའི་རྒྱུ་རྫོགས་པའི་ལམ་དང་རྗེས་སུ་མཐུན་པའོ། །སྡུག་བསྔལ་གང་ཡིན་ལ་ཞུགས་ན་སྐྱོ་བ་སྐྱེ་བར་འགྱུར་རོ། །དེའི་ཕྱིར་ན་གཟུགས་དང་ལང་ཚོ་དང་ནོར་ལ་སོགས་པས་བྱས་པའི་དྲེགས་པ་སེལ་བར་བྱེད་དེ་ཉམས་པར་འགྱུར་བ་དང༌། འཁོར་བ་ལ་སྟེ་འཁོར་བ་སྡུག་བསྔལ་གྱིས་གཟིར་བ་རྣམས་ལ་སྙིང་རྗེ་བའི་སེམས་དང༌། འདི་ནི་སྡིག་པའི་འབྲས་བུ་ཡིན་ནོ་སྙམ་དུ་རིག་ནས་སྡིག་པས་འཇིགས་ཏེ། མི་བྱ་བའི་སེམས་དང༌། སངས་རྒྱས་བཅོམ་ལྡན་འདས་ཉིད་ཀྱིས་སྡུག་བསྔལ་ཟད་པར་འགྲོ་བའི་ལམ་ཉེ་བར་བསྟན་པའོ་སྙམ་ནས་གུས་པ་དང༌། དད་པ་དང༌། སེམས་དང་བའོ། །སྡུག་བསྔལ་དང་དུ་ལེན་པ་ཡང་གཞན་གྱི་རྐྱེན་གྱིས་བྱུང་བར་བརྟག་པ་མཁྲིས་པ་ཞེས་བྱ་བ་ལ་སོགས་པ་གསུངས་ཏེ། ལུས་འདི་མཁྲིས་པ་ལ་སོགས་པ་ཉེས་པ་གསུམ་གྱི་བདག་ཉིད་དེ། དེ་ཡང་རྣམ་པ་དེ་ལྟ་བུའི་ཟས་དང་གནས་པ་དང་བྲལ་བས་མ་སྙོམས་པའི་གནས་སྐབས་སུ་གྱུར་ནས་ནད་སྐྱེད་པར་བྱེད་དེ། སྡུག་བསྔལ་ཐམས་ཅད་ཀྱི་རྒྱུར་འགྱུར་རོ། དེ་ལྟ་མོད་ཀྱི་དེ་དག་ལ་ནི་བདག་མི་ཁྲོ་སྟེ་སེམས་པ་མེད་པའི་ཕྱིར་རོ། །དེ་དག་བསམས་བཞིན་དུ་སྡུག་བསྔལ་སྐྱེད་པར་བྱེད་པ་ནི་མ་ཡིན་ཏེ། །འོན་ཀྱང་རང་གི་རྒྱུ་ཚོགས་པའི་དབང་གིས་རབ་ཏུ་འཁྲུག་པར་འགྱུར་བ་ཡིན་ནོ་ཞེ་ན། གལ་ཏེ་དེ་ལྟར་ཡིན་ན་སེམས་ཡོད་རྣམས་ལ་ཅི་སྟེ་ཁྲོ་ཅི་སྟེ་མ་ཡིན་ཞེ་ན། དེ་དག་ཀྱང་སྟོན་གྱི་ལས་ལ་རག་ལས་པའི་ཕྱིར་རང་གི་རྒྱུ་ཚོགས་པ་རབ་ཏུ་འཁྲུགས་པར་གྱུར་པས་སྡུག་བསྔལ་བསྐྱེད་པ་ཡིན་ནོ། །དེ་བས་ན་མཁྲིས་པ་ལ་སོགས་པ་བཞིན་དུ་དེ་དག་ལ་ཡང་བདག་ཁྲོ་བར་མི་རིགས་སོ། །འདིར་གཉི་ག་ཡང་མཚུངས་པར་རྒྱུ་ལ་རག་ལས་པའི་ཕྱིར་རོ་ཞེས་ཉེ་བར་སྟོན་པ་དཔེར་ན་ཞེས་བྱ་བ་གསུངས་ཏེ། དཔེར་ན་རང་གི་རྐྱེན་གྱིས་ཉེ་བར་བསྐྱེད་པའི་ནུས་པ་ཅན་མཁྲིས་པ་ལ་སོགས་པ་འདོད་པ་མེད་པར་ཡང་ངེས་པར་ན་ཚ་བསྐྱེད་པ་དེ་བཞིན་དུ་རང་གི་རྒྱུ་ཡོངས་སུ་འགྱུར་བ་ལ་
བརྟེན་པའི་ནུས་པ་ཡིད་མི་བདེ་བ་ལ་སོགས་པས་ཁྲོ་བ་བསྐྱེད་དོ། །དེ་ལྟར་ན་འདི་དག་ཐུན་མོང་དུ་རྒྱུ་དང་རྐྱེན་ལ་རག་ལས་པ་ཡིན་ནོ། །ཇི་སྟེ་དེ་ལྟར་ན་འདིར་སེམས་པ་དང་བཅས་པ་རྣམས་བསམས་ནས་རྣམ་པ་དེ་ལྟར་མི་འདོད་པ་བྱེད་པ་ཡིན་ལ། ཅིག་ཤོས་ནི་དེ་ལྟར་མ་ཡིན་ནོ་ཞེ་ན། ཁྲོ་བར་ཞེས་བྱ་བ་ལ་སོགས་པ་གསུངས་ཏེ། དེ་ནི་རྐྱེན་ཚོགས་པ་མེད་པར་ཁྲོ་བར་བྱའོ་ཞེས་དེ་ལྟར་བློ་སྔོན་དུ་བཏང་ནས་བསམས་བཞིན་དུ་སྐྱེ་བོ་རྣམས་རང་དགར་ནི་མེད། ཁྲོ་བར་མི་བྱེད་དོ། །ཁྲོ་བ་ཡང་བསྐྱེད་པར་བྱའོ་སྙམ་དུ་དགོངས་ནས་རང་དབང་ཅན་དུ་མི་སྐྱེའོ། །དེ་ལྟ་བས་ན་འདིར་འདི་ཉིད་ནི་ཚད་མས་གྲུབ་པོ་ཞེས་ཉེས་པ་ཞེས་བྱ་བ་ལ་སོགས་པ་གསུངས་ཏེ། འདི་དག་ཐམས་ཅད་ནི་རྐྱེན་འདི་དག་ཙམ་ཉེ་བར་གནས་པའི་རང་བཞིན་ཡིན་ཏེ། རང་དབང་དུ་འཇུག་པ་ནི་འགའ་ཡང་ཡོད་པ་མ་ཡིན་ཏེ། རྐྱེན་རྣམས་ཚོགས་པ་དེ་དག་ཀྱང་རང་གི་འབྲས་བུ་བསྐྱེད་པ་ན་ལེགས་པར་བསམས་ནས་མི་སྐྱེད་དེ། དེ་ནི་རང་གི་རྒྱུ་ཡོངས་སུ་འགྱུར་བ་ཉེ་བའི་ཆོས་ཉིད་ཀྱིས་རྣམ་པ་དེ་འདྲ་བའི་འབྲས་བུ་སྐྱེད་པ་ཡིན་ཏེ། བསམས་ནས་ནི་མ་ཡིན་ལ། དེས་བསྐྱེད་དེ་ཡང་སྟེ་འབྲས་བུ་ཡང་ཚོགས་པ་འདི་དག་གིས་བསྐྱེད་དོ་ཞེས་སེམས་པ་ཡིད་ལ་བྱེད་པ་ཡོད་པ་མ་ཡིན་ནོ། །དེ་ལྟ་བས་ན་ཆོས་ཐམས་ཅད་བྱེད་པ་མེད་པའི་ཕྱིར་རོ། །འདི་ཡོད་པས་འདི་འབྱུང་ལ། འདི་སྐྱེས་པའི་ཕྱིར་འདི་སྐྱེ་བ་ཡིན་པས། འགྲོ་བ་འདི་ནི་རྐྱེན་ལས་བྱུང་བ་ཙམ་སྟེ། འདིར་འགའ་ཡང་རང་དབང་ཅན་འབྱུང་བ་མེད་དེ། ཆོས་ཐམས་ཅད་རྒྱུ་དང་རྐྱེན་ལ་རག་ལས་པའི་ཕྱིར་རོ། །འོ་ན་དེ་ལྟར་ཡིན་ན་རང་དབང་ཅན་ནི་ཡོད་པ་མ་ཡིན་ཏེ། ཇི་ལྟར་གྲངས་ཅན་པའི་གཙོ་བོ་དང༌། བདག་དང་རིགས་པ་ཅན་ལ་སོགས་པའི་ནམ་མཁའ་ལ་སོགས་པའོ། །དེས་ན་ཅིའི་ཕྱིར་འདི་ལ་རང་དབང་ཅན་ནི་འགའ་ཡང་མེད་དོ་ཞེས་བརྗོད་པར་བྱེད་ཅེས་དོགས་པ་ལ། གཙོ་བོ་ཞེས་བྱ་བ་ལ་སོགས་པ་གསུངས་ཏེ། ཁྱེད་ཀྱིས་གང་རྡུལ་དང་མུན་པ་དང་སྙིང་སྟོབས་ཀྱི་ཆ་ཉམ་པའི་རང་བཞིན་ནི་གཙོ་བོ་ཞེས་འདོད་པའོ། །ད་ཞེས་བྱ་ཞེས་པ་ནི་དེ་ནི་ཚད་མས་གྲུབ་པ་མེད་དོ་ཞེས་མི་འདོད་
པ་སྟོན་པར་བྱེད་བའོ། །དངོས་པོ་འགའ་ཞིག་ལ་བདག་ཅེས་བརྟགས་ཤིང་ཞེན་པ་གང་ཡིན་པ་དེ་ཡང་ཚད་མ་དང་མི་ལྡན་ནོ་ཞེས་གསུངས་པའོ། །གང་གི་ཕྱིར་དེ་ཉིད་ནི་རང་ཉི་དེ། དེ་ལས་གཞན་པའི་རྒྱུ་མེད་པའི་ཕྱིར་འབྱུང་ངོ་སྐྱེའོ་ཞེས་བསམས་ནས་སྐྱེ་བ་མེད་དོ། །ཅིའི་ཕྱིར་ཞེ་ན། གང་གི་ཕྱིར་མ་སྐྱེས་པར་ནི་དེ་སྟེ་གཙོ་བོ་ལ་སོགས་པ་སྔ་ནས་ཡོད་པ་མ་ཡིན་པ་ཉིད་ཡིན་ལ། མེད་པ་ཡང་མོ་གཤམ་གྱི་བུ་ལ་སོགས་པ་ལྟ་བུ་ཡིན་ན་སྐྱེ་བར་འདོད་པར་གྱུར་བ་གང་ཡིན། ཇི་སྟེ་མེད་པ་ནི་འགའ་ཡང་མི་སྐྱེ་སྟེ། འོན་ཀྱང་མི་གསལ་བའི་གནས་སྐབས་ལས་གསལ་བའི་གནས་སྐབས་སུ་ཡོངས་སུ་འགྱུར་བ་ཙམ་ཡིན་ནོ་ཞེ་ན། གལ་ཏེ་དེ་ལྟ་ཡིན་ན་ཡོངས་སུ་འགྱུར་བ་དང༌། གསལ་བའི་གནས་སྐབས་ཀྱང་མེད་ན་ཇི་ལྟར་སྐྱེད། ཡོངས་སུ་འགྱུར་བ་དང་གསལ་བའི་གནས་སྐབས་དེ་དེའི་རང་བཞིན་ཡིན་ན་དེ་ཡང་སྐྱེ་བར་ཐལ་བར་འགྱུར་རོ། །ཐ་དད་པ་ཡིན་ན་འབྲེལ་པ་མེད་པ་དང༌། འབྲེལ་པ་བརྟགས་པ་ཡིན་ན་ཡང་ཐུག་པ་མེད་པར་འགྱུར་ཏེ། འོག་ནས་རྒྱས་པར་གཙོ་བོ་འགེགས་པར་འགྱུར་རོ། །འོ་ན་དེ་ལྟར་ན་ཡང་བདག་ལ་ཡང་ཉེས་པ་འདི་མེད་པ་ཉིད་དེ། དེ་ལ་ནི་བདག་ཅག་སྐྱེ་བར་མི་འདོད་དེ། དེ་ནི་དུལ་ཐམས་ཅད་དུ་རྟག་པའི་རང་བཞིན་སྐྱེ་བ་མེད་པ་ཁོ་ནའོ་ཞེ་ན། དེ་ལྟར་འདོད་དུ་ཆུག་ན་ཡང་འདི་ནི་རྣམ་པ་ཐམས་ཅད་དུ་བོང་བུའི་རྭ་དང་འདྲ་བ་ཉིད་ཡིན་ཏེ། སྐྱེ་བ་མེད་པའི་ཕྱིར་རོ། །དེ་བས་ན་འདི་ལ། མ་སྐྱེས་པར་ནི་དེ་མེད་ན། །དེ་ཚེ་སྐྱེ་བར་འདོད་པ་གང༌། །ཞེས་བྱ་བའི་ཞེས་པ་ལྡོག་པར་མི་འགྱུར་རོ། །ཡོད་ན་ཡང་འདི་ལ་བདག་ཉིད་ལ་ཡང་རང་དབང་ཉིད་མེད་དོ། །དེ་ཡང་གཙོ་བོས་གཏད་པའི་ཡུལ་ཉིད་ལ་ལོངས་སྤྱོད་པ་ཡིན་ན། དེའི་ཚེ་ཡང་ལུས་ལ་ལོངས་སྤྱོད་པ་ལས་སྔར་འདི་ལ་ལོངས་སྤྱོད་པ་པོ་ཉིད་མེད་དོ། །ཕྱིས་སྐྱེས་པ་ཡང་དེའི་རང་བཞིན་ཉིད་ཡིན་ཏེ། གཞན་དུ་ན་དེའི་ལོངས་སྤྱོད་པ་པོ་ཉིད་མི་རིགས་པའི་ཕྱིར་རོ། །དེ་སྐྱེ་བ་ན་ཡང་དེ་ཡང་ཡིན་པའི་ཕྱིར་ཇི་ལྟར་ན་བདག་ལ་སྐྱེ་བར་མི་འདོད། ཡང་དེ་ཉིད། མ་སྐྱེས་པར་ནི་དེ་མེད་ན། །དེ་ཚེ་སྐྱེ་བར་འདོད་པ་གང༌། །ཞེས་བྱ་བ་འདི་
འཐོབ་བོ། །འདིར་གཞན་ཡང་སུན་དབྱུང་བ་གསུངས་པ། ཡུལ་ལ་རྟག་ཏུ་གཡེངས་འགྱུར་བས། །ཞེས་བྱ་བ་ལ། གང་གི་ཚེ་འདི་གཙོ་བོས་གཏད་བའི་ཡུལ་ལ་ལོངས་སྤྱོད་པའི་ཕྱིར་འཇུག་པ་ཡིན་ནོ་ཞེས་འདོད་ན། དེའི་ཚེ་སྔར་འཇུག་པ་མེད་པས་ཕྱིས་ཀྱང་འཇུག་པར་མི་རིགས་སོ། །ཇི་སྟེ་བརྒྱ་ལ་འཇུག་གོ་ཞེ་ན། དེའི་ཚེ་ཡང་ཡུལ་ལ་གཡེངས་པ་ལས་ལྡོག་པར་མི་འགྱུར་རོ། །དེ་ཉིད་ན་འགག་པར་འགྱུར་བའང་མ་ཡིན་ནོ་ཞེས་གསུངས་པ་ཡིན་ཏེ། དེའི་ཚེ་ཡུལ་ལ་ལོངས་སྤྱོད་པ་ལྡོག་པར་ཡང་སྤྲོ་མ་མེད་པར་འགྱུར་ཏེ། དེའི་རང་བཞིན་དེ་ཡིན་པའི་ཕྱིར་རོ། །དེ་ཡང་རྟག་པའི་ཕྱིར་མི་ལྡོག་སྟེ། ལྡོག་ན་ཡང་མི་རྟག་པ་ཉིད་དུ་ཐལ་བར་འགྱུར་བའི་ཕྱིར་རོ། །རིགས་པ་ཅན་ལ་སོགས་པའི་བདག་ཏུ་བརྗོད་པ་ནི་རྟག་པའི་ཕྱིར་དེའི་ཁྱད་པར་གསུངས་པ་ཅི་སྟེ་ཞེས་བྱ་བ་ལ་སོགས་པ་ལ། འདིར་གྲངས་ཅན་ལས་བྱེ་བྲག་ནི་སེམས་པ་མེད་པ་ཡིན་ཏེ། གཞན་ནི་མཚུངས་པ་ཉིད་དོ། །དེ་ལ་རྟག་པ་ནི་དུས་སྔ་ཕྱིར་རང་བཞིན་གཅིག་པའོ། །སེམས་པ་མེད་པ་ཡང་སེམས་མེད་པའི་རང་བཞིན་ཏེ་བེམས་པོ་ཞེས་བྱ་བའི་དོན་ཏེ། སེམས་ཅན་ནི་གཞན་དང་འབྲེལ་པས་སེམས་པར་བྱེད་པའོ། །མཁའ་བཞིན་ནི་ཁྱབ་པའོ། །དེའི་ཕྱིར་མངོན་ཏེ་བྱེད་པ་མེད་པར་གསལ་བའོ། །གང་གཞན་དག །འདོད་པ་ལ་སོགས་རྟེན་པ་དང༌། །རང་ནི་སེམས་མེད་ངོ་བོ་དང༌། །རྟགས་དང་དེ་བཞིན་ཀུན་ཁྱབ་དང༌། །དགེ་དང་མི་དགེའི་ལས་རྣམས་ཀྱིས། །བྱེད་པ་པོ་དང་དེ་འབྲས་བུ། །ལོངས་སྤྱོད་པ་དང་སེམས་པ་དང༌། །ལྡན་ཕྱིར་སེམས་པའི་རང་བཞིན་གྱི། །བདག་ཏུ་འདི་ནི་འདོད་པ་ཡིན་། །ཞེས་བསྟན་པ་ཡིན་ནོ། །དེ་ལྟར་ན་འདི་ནི་ཅི་ཡང་མི་བྱེད་པ་ཡིན་ཏེ། བྱ་བ་འགའ་ལ་ཡང་མི་མཁོ་བའི་ཕྱིར་རོ། །འོན་ཏེ་བྱེད་པ་མེད་པ་ལ་ལྷན་ཅིག་བྱེད་པའི་རྐྱེན་གཞན་ཉེ་བ་ལས་དེ་ལ་ཡང་བྱེད་པ་ཁས་བླང་བར་བྱ་སྟེ། གང་ཤེས་པ་དང་རྩལ་བ་དང་འབྲེལ་པ་དེ་ལ་བྱེད་པ་ཉིད་དུ་བཤད་ཅེས་གསུངས་སོ་ཞེ་ན། འདིར་རྐྱེན་གཞན་ཞེས་བྱ་བ་ལ་སོགས་པ་གསུངས་ཏེ། ཤེས་པ་དང་རྩོལ་བ་ལ་སོགས་པ་རྐྱེན་གཞན་རྣམས་དང་ཕྲད་ན་ཡང་རྟག་པའི་ཕྱིར་འགྱུར་བ་
མེད་པ་སྔར་གྱི་རང་བཞིན་ལས་འཕོ་བ་མེད་པའི་བདག་ལ་ཅི་བྱར་ཡོད། དེ་ལ་བྱ་བ་ཡོད་པར་མི་རིགས་སོ། །བྱེད་པའི་ཞེས་བྱ་བ་ལ་སོགས་པ་ལ། ཇི་ལྟར་གང་ཞིག་སྔོན་བྱེད་པ་མེད་པའི་དུས་ན་ཡིན་པ་དེ་བྱེད་པའི་དུས་ན་ཡང་ཡིན་ན་བྱེད་པ་པོའི་རང་བཞིན་དང་བྲལ་བ་དེ་ལ་བྱེད་པ་པོས་ཅི་ཞིག་བྱས། གང་གིས་ན་རྐྱེན་གཞན་དང་ཕྲད་པ་དེ་ལ་བྱ་བ་རྣམ་པར་འཇོག་པར་བྱེད་པ་ཡིན། གཞན་ཡང་འབྲེལ་པ་གཉི་ག་མེད་པའི་ཕྱིར་ན་བདག་དེའི་བྱེད་པ་འདི་ཡིན་ནོ་ཞེས་འབྲེལ་པར་འགྱུར་བ་གང་ཞིག་ཡོད་དེ། རྒྱུ་མཚན་གཞན་ཅི་ཡོད། ཅི་ཡང་ཡོད་པ་མ་ཡིན་ཏེ། བདག་དང་དབང་ཕྱུག་ཀྱང་རྒྱས་པར་འགེགས་པར་འགྱུར་བའི་ཕྱིར་ཏེ། རང་དབང་ཅན་འགའ་ཡང་ཡོད་པ་མ་ཡིན་ནོ། །དེ་ལྟར་ཐམས་ཅད་དུ་རང་དབང་ཅན་མ་ཡིན་པར་བསྒྲུབས་ནས་མཇུག་བསྡུ་བ་ནི། དེ་ལྟར་ཞེས་བྱ་བ་ལ་སོགས་པ་གསུངས་ཏེ།། དེ་ལྟར་བསྟན་པའི་ཚུལ་གྱིས་ཕྱི་དང་ནང་གི་དངོས་པོའི་རྣམ་པ་ཐམས་ཅད་གཞན་གྱི་དབང་སྟེ་གཞན་ལ་རག་ལས་པ་ཡིན་ནོ། །དེ་ལྟར་ན་འོ་ན་གང་གི་དབང་ཡིན་པ་དེ་ནི་གཞན་ལ་རག་ལས་པ་མ་ཡིན་ནོ་ཞེ་ན་མ་ཡིན་ཏེ། གང་གི་དབང་གིས་དེ་དབང་མེད་དེ། རང་གི་རྒྱུའི་གཞན་གྱི་དབང་ཡིན་ནོ། །དེ་ལྟར་ན་རྒྱུ་དེ་ཡང་རང་གི་རྒྱུ་ལས་སྐྱེ་བའི་ཕྱིར་ཐོག་མ་མེད་པར་འཁོར་བའི་བརྒྱུད་པ་ལ་འགའ་ཡང་རང་དབང་ཅན་དུ་གྱུར་པ་མི་སྲིད་དོ། །དེའི་ཕྱིར་ཆོས་ཐམས་ཅད་ནི་བྱེད་པ་མེད་པ་ཡིན་ནོ། །དོན་དམ་པར་སུ་ཞིག་སུ་ལ་གནོད་པ་བྱེད། དེ་བས་ན་གནོད་པ་བྱེད་པ་གང་ལ་གནོད་པ་བྱས་པ་གང་ཞིག་གང་ཞེ་སྡང་འབྱུང་བར་འགྱུར། དེ་ཉིད་གསུངས་པ། མྱ་ངན་འདས་ལྟའི་ཞེས་བྱ་བ་ལ་སོགས་པ་སྟེ། བྱེད་པའི་རྟོག་པ་ཐམས་ཅད་དང་བྲལ་བའི་ཕྱིར་མྱ་ངན་ལས་འདས་པ་བཞིན་དུ་སེམས་པ་མེད་ཅིང་གཡོ་བ་མེད་པའི་ཆོས་ཐམས་ཅད་དེ་ལྟར་གྱུར་པ་རྣམས་པ་སུ་ལ་ཁྲོ་བར་བྱེད་དེ། རྟོག་པ་དང་ལྡན་པ་དག་འགའ་ལ་ཡང་ཁྲོ་བར་མི་རིགས་སོ་སྙམ་དུ་དགོངས་པ་ཡིན་ནོ། །འོ་ན་དེ་ལྟར་ཡིན་ན་གཅིག་བསྒྲུབ་པ་ན་གཉིས་པ་ཉམས་པར་འགྱུར་རོ་སྙམ་དུ་དོགས་པ། གང་གིས་ཞེས་བྱ་བ་ལ་སོགས་པ་གསུངས་ཏེ། བསྒྲུབ་
པའི་རིགས་པ་བཟློག་པའང་སྟེ་ཕྱིར་བཟློག་པའང་མྱང་འདས་ལྟ་བུའོ། །སེམས་མེད་དངོས་རྣམས་ལ་མི་རིགས་སོ། །དེ་ལྟར་ཞེས་བྱ་བ་ནི་གང་གི་ཚེ་རང་དབང་ཅན་འགའ་ཡང་མ་མཐོང་སྟེ། ཐམས་ཅད་རྐྱེན་ཚོགས་པ་ལ་བརྟེན་ཏེ་སྐྱེས་པ་ཡིན་པ་དེའི་ཚེ་བཟློག་པ་པོ་ཡང་མི་རིགས་སོ། །གལ་ཏེ་དེ་ལྟར་ཡིན་པ་དེ་ལྟར་ན་ཡང་ཇི་ལྟར་མི་རིགས། བྱེད་པ་པོ་རང་དབང་ཅན་གང་གིས་བཟློག་པར་བྱ། རང་དབང་ཅན་འཇུག་པ་གང་ཞིག་བཟློག་པར་བྱ་དགོས་པ་ནི་འདི་ཡིན་ཏེ། རིགས་པ་མཚུངས་པ་ལ་ལར་ནི་འཇུག་ལ། ལ་ལར་ནི་ལྡོག་པར་མི་རིགས་སོ།། གཅིག་ཏུ་ལྡོག་པ་ན་ཐམས་ཅད་དུ་ལྡོག་པར་རིགས་ཀྱི་ལ་ལར་ནི་མ་ཡིན་ཏེ། རིགས་པ་མཚུངས་པའི་ཕྱིར་རོ། །དེ་བས་བཟློག་པ་རིགས་པ་མིན། །ཞེས་བྱ་བ་དེ་རིགས་པ་ཡིན་ནོ་ཞེས་གལ་ཏེ་དེ་ལྟར་སེམས་ན། འདིར་ལན་གསུངས་པ། བཟློག་པར་རིགས་སོ། །ཅིའི་ཕྱིར་ཞེ་ན། བརྟེན་ནས་སོ། །གང་གི་ཕྱིར་བྱེད་པ་མེད་པའི་དངོས་པོ་རྣམས་ལ་འདི་ལ་བརྟེན་ནས་འདི་སྐྱེས་སོ་ཞེས་རྟེན་ཅིང་འབྲེལ་པར་འབྱུང་བ་ཡོད་པ་དེའི་ཕྱིར་བཟློག་པར་རིགས་པ་ཡིན་ཏེ། དེ་བས་ན་འགལ་བ་མེད་དོ། །འདི་སྐད་དུ་བསྟན་པར་འགྱུར་ཏེ། གང་ཡང་ཆོས་རྣམས་ཐམས་ཅད་བྱེད་པ་མེད་པ་ཡིན་མོད་ཀྱི། དེ་ལྟར་ན་ཡང་རྟེན་ཅིང་འབྲེལ་པར་འབྱུང་བའི་སྟོབས་ཀྱིས་གཞན་གྱི་དབང་ཅན་དུ་བསྟན་ཏེ། དེ་ལྟར་ཐམས་ཅད་གཞན་གྱི་དབང༌། །ཞེས་བསྟན་པའི་ཕྱིར་རོ། །དེ་བས་ན་མ་རིག་པ་ལ་སོགས་པའི་རྐྱེན་གྱི་སྟོབས་ཀྱིས་གོང་ནས་གོང་དུ་འབྲས་བུ་འདྲེན་པས་འདུ་བྱེད་ལ་སོགས་པའི་ངོ་བོ་འཇུག་ཅིང༌། སྔ་མ་སྔ་མ་ལོག་པ་ན་ལྡོག་སྟེ། དེ་དག་ཀྱང་ཕྱི་ནས་རྒྱས་པར་སྟོན་པར་འགྱུར་རོ། །དེའི་འཁོར་བའི་སྡུག་བསྔལ་རྒྱུན་ཆད་པ་ལྡོག་པར་མངོན་པར་འདོད་དེ། དེ་བས་ན་ཞེ་སྡང་ལ་སོགས་པ་སྡིག་པ་འཇུག་པ་ལས་བཟློག་པ་འཐད་པ་ཡིན་ནོ། །དེ་དག་ལ་བརྟེན་ནས་རྣམ་པ་དེ་ལྟ་བུའི་མངོན་པར་མཐོ་བ་དང༌། ངེས་པར་ལེགས་པའི་རང་བཞིན་གྱི་འབྲས་བུ་སྐྱེའོ། །ད་ནི་སྐབས་ཉིད་ལ་སྦྱར་བར་བྱ་སྟེ། དེ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་ཐམས་ཅད་
བརྟེན་ནས་སྐྱེས་པ་དེའི་ཕྱིར་མི་མཛའ་བ་དང་ཅིག་ཤོས་གནོད་པ་བྱེད་པ་རྐྱེན་ལས་གྱུར་ཏོ་ཞེས་བདེ་བ་ཉིད་དུ་དམིགས་པར་བྱའོ། །ཅིའི་ཕྱིར་ཞེ་ན། འདི་ནི་གནོད་པ་བྱེད་པའི་རྒྱུའི་དང་ཚུལ་ཅན་མི་མཛའ་བའམ་ཅིག་ཤོས་འདི་འདྲ་བ་ཡིན་པ་སྟེ། དེ་ལྟར་ངེས་པར་བྱས་ལ་བདེ་བར་འདུག་ལ་ཡིད་མི་བདེ་བར་མི་བྱའོ། །གཞན་ཡང་སྡུག་བསྔལ་དང་ཉེ་བས་སེམས་འཁྲུགས་ན་ཡང་སྡུག་བསྔལ་ལྡོག་པར་མི་འདོད་དོ་ཞེས་བསྟན་པ། གལ་ཏེ་ཞེས་བྱ་བ་ལ་སོགས་པ་གསུངས་ཏེ། བདག་ཉིད་ཀྱི་འདོད་པ་ཙམ་གྱིས་རྒྱུ་མེད་པ་ཡང་མངོན་པར་མི་འདོད་པ་ལྡོག་པ་དང༌། མངོན་པར་འདོད་པ་གནས་པར་འགྱུར་བ་མེད་དེ། དེ་ལྟར་གྱུར་ན་སེམས་ཅན་སུ་ལ་ཡང་སྡུག་བསྔལ་བར་མི་འགྱུར་རོ། །ཅིའི་ཕྱིར་ཞེ་ན། བདག་ཉིད་སྡུག་བསྔལ་བར་འདོད་པ་སུ་ཡང་མེད་དོ། །དེ་ལྟར་ན་སེམས་ཅན་ཐམས་ཅད་ནི། རང་བདེ་བར་འདོད་པ་ཡིན་ནོ། །སྡུག་བསྔལ་དང་དུ་ལེན་པའི་བཟོད་པ་བརྗོད་ནས། ད་ནི་གཞན་གནོད་པ་བྱེད་པ་ལ་ཇི་མི་སྙམ་པའི་བཟོད་པ་བསྟན་པ། བག་མེད་པས་ནི་ཞེས་བྱ་ལ་སོགས་པ་གསུངས་ཏེ། མ་བརྟགས་པར་བྱེད་པ་ནི་བག་མེད་པའོ། །རང་ཉིད་ནི་རང་ཉིད་ཀྱི་ལུས་ལ་ཚེར་མ་དང་དོང་དང༌། གྱོ་མོ་དང༌། རྡོ་བ་དང༌། གསེག་མ་ལ་སོགས་པ་དང༌། བགྲོད་དཀའ་བའི་ལམ་དུ་ལས་མ་ཡིན་པ་ལ་འཇུག་པའམ། ཚེར་མ་བཏིང་བ་ལ་ཉལ་བ་ལ་སོགས་པའམ། དེ་བཞིན་དུ་ཟས་དང་སྐོམ་དང༌། བགོ་བ་ལ་སོགས་པ་རྣམས་ཀྱིས་གནོད་པ་བྱེད་པའོ། །ཅིའི་ཕྱིར་ཞེ་ན། རྔམ་པ་སྟེ། བགྲོད་པར་བྱ་བ་མ་ཡིན་པ་གཞན་གྱི་བུད་མེད་དང་ནོར་ལ་སོགས་པ་ཐོབ་པར་འདོད་པའི་དོན་དུའོ། །འགེགས་པ་ནི་དབྱངས་པའོ། །གཡང་ས་ནི་རི་ལ་སོགས་པའི་གཡང་ངོ༌། །ཆུ་དང་མེར་འཇུག་པ་ལ་སོགས་པ་དང༌། དུག་དང་མི་འཕྲོད་པ་ལ་སོགས་པ་ཟ་བ་སྟེ། ཧ་ཅང་ཟ་བ་དང༌། ཧ་ཅང་མི་ཟ་བ་ལ་སོགས་པའོ། །འགའ་ཞིག་ནི་མི་རྨོངས་པའོ། །རད་ལ་ནི་བདག་ཉིད་ཀྱི་ལུས་ལ་གཞན་གྱི་གནོད་པས་གནོད་པ་བྱེད་པ་ཡོད་དེ་གསོད་པར་བྱེད་པའོ། །བསོད་ནམས་མ་ཡིན་སྤྱོད་པ་
ཡིས་ནི་གཞན་བསད་པའི་བསམ་པས་གཡུལ་ངོ་ལ་སོགས་པར་མི་དགེ་བའི་ལས་བྱེད་པས་སོ། །གང་གི་ཚེ་དེ་ལྟར་བསྟན་པའི་རིམ་པས་ཉོན་མོངས་དབང་དུ་གྱུར་པ་སྟེ། ཉོན་མོངས་པའི་གཞན་དབང་དུ་གྱུར་པའི་ཕྱིར། སེམས་ཅན་དེ་དག་བདག་སྡུག་ཉིད་ཀྱང་སྟེ། ཕངས་པའང་གསོད་བྱེད་པ་གཟིར་བར་བྱེད་པ་དེའི་ཚེ་དེ་དག་གཞན་ལུས་ལ་གཞན་གྱི་ལུས་པོ་ལ་གནོད་པ་སྤོང་བར་ཇི་ལྟར་འགྱུར། དེ་ལྟར་ན་དེ་དག་སྙིང་བརྩེ་བའི་གནས་ཡིན་པས་ཞེ་སྡང་གི་གནས་ནི་མ་ཡིན་ནོ་ཞེས་གསུངས་པ། ཉོན་མོངས་ཞེས་བྱ་བ་ལ་སོགས་པ་ཡིན་ཏེ། ཤ་ཟ་བཞིན་དུ་ཉོན་མོངས་པས་སྨྱོ་བར་བྱས་པ་གནོད་པ་བྱེད་པ་དེ་དག་རང་ལ་གནོད་པའམ། གཞན་ལ་གནོད་པ་བྱེད་པའི་སྒོ་ནས་བསྟན་པའི་ཚུལ་དུ་ཞུགས་པ་རྣམས་ལ་སྙིང་རྗེ་མེད་པ་ཙམ་མ་ཡིན་པ་སྟེ། དེ་ཙམ་མ་ཡིན་པའོ། །ཐ་མལ་པའམ་བར་མ་ཡང་དེ་ལ་མི་རིགས་ན། བརྩེ་བའི་གནས་རྣམས་ལ་ཞེ་སྡང་བསྐྱེད་པ་ཅི་ཐ་ཚིག་སྟེ། ཤིན་ཏུ་ཆེར་ཕྱིན་ཅི་ལོག་པ་ཡིན་ནོ། །དེ་ལྟར་ཡང་རང་གི་སེམས་བཟློག་པར་བྱའོ་ཞེས་བྱ་བ་ནི། གལ་ཏེ་ཞེས་བྱ་བ་ལ་སོགས་པ་གསུངས་པ་ཡིན་ཏེ། འདི་ལྟར་འདིར་བརྟག་པ་རྣམ་པ་གཉིས་བྱ་སྟེ། གལ་ཏེ་བྱིས་པ་སོ་སོའི་སྐྱེ་བོ་རྣམས་ཀྱི་རང་བཞིན་གཞན་ལ་གནོད་པ་བྱེད་པ་དེ་འདྲ་བ་ཡིན་ན། དེའི་ཚེ་ཁྱོད་ཀྱི་རང་བཞིན་ལ་ནི་ཅི་སྟེ་གཞན་ལ་གནོད་པ་བྱེད་ཅེས་བརྒལ་ཞིང་བརྟག་པར་མི་རིགས་སོ་ཞེས་ཡོངས་སུ་བརྟགས་ནས་བྱ་སྟེ། དེ་དག་ལ་བདག་གིས་ཞེ་སྡང་བར་མི་རིགས་ཏེ། དཔེར་ན་མེ་སྲེག་པར་བྱེད་པའི་ཕྱིར་མེ་སྲེག་པར་བྱེད་པ་རང་བཞིན་ཡིན་པ་ལྟ་བུའོ། །གཞན་དུ་དེ་མེད་ན་དེའི་རང་བཞིན་ཉིད་ཉམས་པར་ཐལ་བར་འགྱུར་བའི་ཕྱིར་རོ། །བརྟག་པ་གཉིས་པའི་དབང་དུ་བྱས་ཏེ། འོན་ཏེ་ཞེས་བྱ་བ་ལ་སོགས་པ་གསུངས་ལ། འོན་ཏེ་སྐྱོན་འདི་གློ་བུར་ཏེ་དེའི་རང་བཞིན་དུ་གྱུར་པ་ལས་གཞན་ཉིད་ཡིན་ལ་ཡང་སེམས་ཅན་གྱི་རང་བཞིན་ནི་སེམས་རང་བཞིན་གྱིས་འོད་གསལ་བ་ཡིན་པའི་ཕྱིར་དེས་པ་ཡིན་ན་སྟེ། གྱ་གྱུ་ཅན་མ་ཡིན་ལ། ཞེ་སྡང་ཉིད་ནི་སྡང་བའི་རང་བཞིན་ཏེ། སེམས་ཅན་ནི་མ་ཡིན་ན། དེ་ལྟར་ནའང་སེམས་
ཅན་དེས་པའི་རང་བཞིན་ཅན་དེ་དག་ལ་ཁྲོ་བར་མི་རིགས་སོ། །གང་དང་འདྲ་ཞེ་ན། གང་ན་དུ་བ་དཀུ་བ་འཐུལ་བ་ཡོད་པ་དེ་དང་འདྲ་སྟེ། ནམ་མཁའ་དྲི་མ་མེད་པ་དེ་ལ་དུ་བ་དགུ་བའི་རང་བཞིན་མེད་པ་ཡིན་ཏེ། འོན་ཀྱང་དུ་བའི་ཡིན་ནོ། །དེ་བས་ན་ཉེས་པ་དེ་ནི་དུ་བ་ཉིད་ཀྱི་ཉེས་པར་རིགས་ཏེ། རང་བཞིན་གྱིས་ཡོངས་སུ་དག་པའི་ནམ་མཁའ་ལ་ནི་མ་ཡིན་ནོ། །དེ་བས་ན་ཉེས་པ་རྣམས་ལ་ཁྲོ་བར་རིགས་ཀྱི་སེམས་ཅན་རྣམས་ལ་ནི་མ་ཡིན་ནོ། །གཞན་ཡང་སྡུག་བསྔལ་གྱི་རྒྱུ་གཙོ་བོ་གང་ཡིན་པ་དེ་ལ་ཁྲོ་བ་རིགས་པར་འགྱུར་གྱི་གཙོ་བོ་མ་ཡིན་པ་ལ་ནི་མ་ཡིན་ནོ་ཞེས། དབྱུག་པ་ལ་སོགས་ཞེས་བྱ་བ་ལ་སོགས་པ་གསུངས་ཏེ། སེམས་མ་བསྒོམས་པའི་ལུས་ལ་དབྱུག་བ་བརྡེགས་པས་སྡུག་བསྔལ་འབྱུང་བ་དེ་བས་ན་དབྱུག་པ་ཉིད་སྡུག་བསྔལ་གྱི་རྒྱུ་དངོས་ཡིན་པས་དེ་ཉིད་ལ་ཁྲོ་བར་རིགས་སོ། །འོན་ཏེ་གཞན་གྱིས་འཕངས་པ་ཡིན་པས་དབྱུག་པ་ལ་སོགས་ལ་ཉེས་པ་ཅི་ཡོད་ཅེ་ན། དེའི་ཕྱིར་འཕེན་པར་བྱེད་པ་ཉིད་ཉེས་པ་ཅན་དུ་འགྱུར་རོ། །འོ་ན་དེ་ལྟར་ན་དེ་ཡང་དབྱུག་པ་བཞིན་དུ་ཞེ་སྡང་སྤྱོད་པར་བྱེད་པས་སྤད་པས་ཞེ་སྡང་ལ་བདག་ཁྲོ་བར་རིགས་ཀྱི། སྤད་པ་ལ་ནི་མ་ཡིན་ནོ།། གཞན་ཡང་བདེ་བ་དང༌། སྡུག་བསྔལ་ལ་མ་གཏང་པ་ནི་འགའ་ཡང་ལོངས་སྤྱོད་པར་མི་བྱེད་དོ་ཞེས་རྣམ་པར་བསམས་ལ། གཞན་གནོད་པ་བྱེད་ཀྱང་དེ་ལ་སེམས་ཁྲོ་བར་མི་བྱའོ་ཞེས། བདག་གིས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བདག་གིས་ཀྱང་ཚེ་རབས་སྔ་མ་གཞན་ལ་སེམས་ཅན་རྣམས་ལ་རྣམ་པ་འདི་ལྟ་བུས་གཟིར་བར་བྱས་པ་དེའི་ཕྱིར་བུ་ལོན་འཇལ་བའི་རིགས་པས་བདག་ལ་གནོད་པ་བྱེད་པར་རིགས་པ་ཉིད་ཡིན་ཏེ། གནོད་པ་དེ་ནི་བདག་གི་ལས་ཀྱི་འབྲས་བུ་སྨིན་པའི་ཕྱིར་རོ་སྙམ་དུ་དགོངས་པའོ། གང་ཞིག་གང་གི་རྒྱུ་ཡིན་པ་དེ་ལས་དེ་འབྱུང་སྟེ། གཞན་ལས་ནི་མ་ཡིན་ནོ་ཞེས་བརྟག་ཅིང་གཞན་གནོད་པ་བྱེད་པ་ཇི་མི་སྙམ་པར་ཞེས་བསྟན་པ། དེའི་མཚོན་དང་ཞེས་བྱ་བ་ལ་སོགས་པ་གསུངས་ཏེ། རྒྱུའི་ཚོགས་པ་མ་ཚང་བ་མེད་པ་ནི་འབྲས་བུ་ཐམས་ཅད་ཀྱི་རྒྱུ་ཡིན་ནོ་
ཞེས། ཚད་མས་ངེས་པ་ཡིན་ནོ། །དེ་ནི་འདིར་ཡང་རྣམ་པ་དེ་ལྟ་བུ་ཡོད་དེ། འདི་ལྟར་གནོད་པ་བྱེད་པ་དེའི་མཚོན་རལ་གྲི་ལ་སོགས་པ་དང་བདག་གི་ལུས་ཏེ། དེ་དག་གཉི་ག་ཚོགས་པའི་ངོ་བོ་ནི་སྡུག་བསྔལ་གྱི་རྒྱུ་ཡིན་ནོ། །དེ་ལྟ་བུ་ནུས་པ་ཅན་གྱི་རྒྱུ་ཡོད་པར་གྱུར་པ་ནའང་ཇི་ལྟར་ན་འབྲས་བུ་མི་སྐྱེ། གཞན་དུ་ན་དེ་དེའི་རྒྱུ་མ་ཡིན་པར་འགྱུར་བ་དང༌། དེ་ལས་གཞན་པ་ཡང་དེ་ལས་སྐྱེ་བར་འགྱུར་རོ། །དེ་ལྟ་བས་ན་གལ་ཏེ་རྒྱུ་ཉེ་བ་ལ་ཁྲོ་བར་བྱེད་ན་དེའི་ཚེ་བདག་ལའང་ཁྲོ་བར་རིགས་སོ། །དེ་བས་ན་ཁྱེད་རང་ཡང་སྡུག་བསྔལ་གྱི་རྒྱུ་འཛིན་ཅིང་ཉེ་བར་བྱེད་པས་རང་ལ་མི་ཁྲོ་ན་གཞན་ལ་ཡང་མི་རིགས་སོ་སྙམ་དུ་དགོངས་པ་ཡིན་ནོ། །བསྟན་པའི་དོན་རྣམ་པ་གཞན་གྱིས་གསལ་བར་བྱེད་པ་ནི། ཤུ་བ་ཞེས་བྱ་བ་ལ་སོགས་པ་གསུངས་པ་ཡིན་ཏེ། བདག་གིས་ཤུ་བ་སྨིན་པ་ལུས་ཀྱི་རྣམ་པ་འདི་བཟུང་བ་སྟེ། སྡུག་བསྔལ་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །འཇོམས་པ་ཐམས་ཅད་མི་བཟོད་པ་ནི་བརྡུང་བ་དང་བརྡེག་པ་ལ་སོགས་པས་ཀྱང་ཉམས་པར་བྱ་བ་ཡང་མ་ཡིན་པའི་ཕྱིར་རོ། །སྡུག་བསྔལ་སྤོང་བར་བྱ་བའི་ཕྱིར་དང༌། བད་པ་ཐོབ་པར་བྱ་བའི་སྲེད་པའི་སྟེ་འདོད་པ་གང་ཡིན་པའོ། །དེས་ལྡོངས་པ་ན་ཤེས་རབ་ཀྱི་མིག་བཀག་པས་དེ་ལ་གནོད་པ་ཡོད་པ་སུ་ལ་ཁྲོ་བར་བྱེད། ཤུ་བ་རྩིག་པ་ལ་སོགས་པ་ལ་ཐུགས་པ་ལས་བྱུང་བའི་སྡུག་བསྔལ་བ་ལ་རྟོག་པ་དང་ལྡན་པ་གང་ལ་ཁྲོ་བར་མི་རིགས་སོ། །གཞན་ཡང་གང་འབྲས་བུ་དོན་དུ་མི་གཉེར་བ་དེས་དེའི་རྒྱུ་སྤང་པར་བྱ་བ་ཡིན་ན། །བདག་ནི་བློ་ཕྱིན་ཅི་ལོག་ཏུ་གྱུར་པ་ཡིན་ནོ་ཞེས་དཔྱད་པ་ལ་བྱིས་པ་ཞེས་བྱ་བ་ལ་སོགས་པ་གསུངས་ཏེ། བྱིས་པ་ཞེས་བྱ་བ་ནི་བྱིས་པའི་ཆོས་ཕྱིན་ཅི་ལོག་དང་ལྡན་པའོ། །སྡུག་བསྔལ་ཏེ་དབྱུག་པ་ལ་སོགས་པས་བསྣུན་པ་ལས་བྱུང་བ་མི་འདོད་ཅིང༌། ཡང་དེའི་རྒྱུ་ལུས་དང་སླར་གནོད་པ་སྟེ། བྱེད་རྒྱུ་ལས་པ་རྐམ་པས་ན་སྟེ། དེའི་ཕྱིར་ན་རང་གི་ལུས་ཀྱི་སྡུག་བསྔལ་གང་ཡིན་པ་དེ་ནི་རང་གི་ཉེས་པ་ལས་གྱུར་པ་འདི་ཡིན་ནོ། །དེ་བས་ན་ཅིའི་
ཕྱིར་གཞན་ལ་སྟེ། དེའི་ལྷན་ཅིག་བྱེད་པ་ཙམ་ལ་བཀོན་དུ་ཡོད། བདག་ཉིད་ལ་གནོད་པའི་དོན་དུ་རང་གིས་མཚོན་བྱ་འདུས་བྱས་པ་ལྟ་བུ་ཡིན་པས་གཞན་ལ་བདག་ཁྲོ་བ་མི་རིགས་སོ་ཞེས། དཔེར་ན་དམྱལ་བའི་ཞེས་བྱ་བ་ལ་སོགས་པ་གསུངས་ཏེ། རལ་གྲི་ལོ་མའི་ནགས་ཚལ་ནི་སེམས་ཅན་དམྱལ་བ་འབྱུང་བ་སྟེ། འདི་ལ་རལ་གྲི་ལོ་མ་ཡོད་པས་ན་སྟེ་དེའི་ཕྱིར་རོ། །རལ་གྲི་སྨོས་པ་ནི་གཙོ་བའི་ཕྱིར་ཏེ། སེམས་ཅན་དམྱལ་བའི་སྡུག་བསྔལ་གྱི་རྒྱུའི་འཁྲུལ་འཁོར་དང་མཚོན་ཆ་གཞན་དག་ཀྱང་གཟུང་ངོ༌། །ནགས་ཚལ་དེ་ན་གནས་པའི་བྱ་རྒོད་དག་འུག་པ་དང་ཁྭ་ལ་སོགས་པའི་བྱ་རྣམས་ཇི་ལྟ་བ་བཞིན་དུ་རང་གི་ལས་ཀྱིས་བསྐྱེད་པ་སྡུག་བསྔལ་གྱི་རྒྱུར་གྱུར་པ་སྟེ། སྡུག་བསྔལ་གྱི་རྒྱུ་གཞན་ཡོད་པ་མ་ཡིན་པ་དེ་བཞིན་དུ་གཞན་གྱི་མཚོན་ཆ་ལ་སོགས་པ་འདི་ཡང་སྡུག་བསྔལ་གྱི་རྒྱུ་ཡང་ཡིན་ནོ། །རང་གི་ལས་ཀྱིས་འདི་བསྐྱེད་པ་ཡིན་པས་གང་ཞིག་ལ་ཁྲོ་བར་བྱ། འདི་ལྟར་ཡང་འདི་ནི་ཕྱིན་ཅི་ལོག་ཡིན་ནོ་ཞེས་བསྟན་པར་བྱ་བའི་ཕྱིར། བདག་གི་ལས་ཀྱིས་ཞེས་བྱ་བ་ལ་སོགས་པ་གསུངས་ཏེ། གང་གི་བདག་གི་ལས་ཀྱིས་བསྐུལ་བྱས་ནས་ཏེ། སྤད་ནས་བདག་ལ་གནོད་པ་བྱས་པས་གནོད་པ་བྱེད་པ་རྣམས་བྱུང་སྟེ་ཡོད་པ་སེམས་ཅན་དམྱལ་བར་དོང་ནས་དེའི་ཕྱིར་བདག་གིས་འདི་དག་ལ་གནོད་པ་བྱས་ཏེ་མ་བརླག་གམ་ཞེས་རང་གི་སེམས་ལ་འབད་པར་བྱེད་པ་ཡིན་ཏེ། ང་ནི་འདི་དག་གིས་མ་བརླག་གོ།། དགོངས་པ་ནི་འདི་ཡིན་ཏེ། གལ་ཏེ་བདག་གིས་འདི་འདྲ་བའི་ལས་མ་བྱས་ན་དེའི་ཚེ་དེ་དག་ཀྱང་གནོད་པ་བྱེད་པར་མི་འགྱུར་བས་དེ་བས་ན་བདག་གིས་བྱས་པའི་ལས་ཉིད་གནོད་པ་བྱེད་པ་ཡིན། བདག་གི་བློ་ནི་ཕན་འདོགས་པ་རྣམས་ལ་རྨོངས་པའི་དབང་གིས་གནོད་པ་བྱེད་པར་འཛིན་པའོ་ཞེས་ཚིག་ལེའུར་བྱས་པ་གཉིས་ཀྱིས་བསྟན་པ། འདི་དག་ལ་ནི་ཞེས་བྱ་བ་ལ་སོགས་པ་གསུངས་པ་ཡིན་ཏེ། འདི་དག་ལ་ནི་གནོད་པ་བྱེད་པའོ། །བརྟེན་བཅས་ནས་ནི་རྒྱུ་མཚན་དུ་བྱས་ནས་ཏེ། བཟོད་པས་ནི་བཟོད་པ་ལ་དམིགས་པས་སོ། །
བདག་གིས་སྡིག་པ་ཚེ་རབས་སྔ་མ་ལ་བྱས་པ་སྟེ། གཞན་ལ་གནོད་པ་བྱས་པ་ལས་བྱུང་བའོ། །མང་བ་ནི་རྣམ་གྲངས་དུ་མས་བྱས་པའོ། །འབྱུང་སྟེ་སྡུག་བསྔལ་དེ་ཉམས་སུ་མྱོང་བ་རྣམ་པར་སྨིན་པས་ཟད་པར་འགྱུར་རོ། །བདག་ལ་བརྟེན་ནས་ནི་བདག་གི་ལས་ཀྱིས་བསྐུལ་བ་སྟེ་དེ་ལྟར་བདག་ལ་གནོད་པ་བྱས་ནས་ཡང་འདི་དག་ནི་དམྱལ་བའི་ཚོར་བ་མི་བཟད་པ་བསྟན་པར་དཀའ་བའི་སྡུག་བསྔལ་ཉམས་སུ་མྱོང་བར་དོང་ངོ༌། །དེའི་ཕྱིར་བསྟན་པའི་རིམ་པས། བདག་ནི་དེ་ལ་གནོད་བྱེད་ལ། །ཞེས་བྱ་བ་ལ་སོགས་པ་ནི་གོ་སླའོ། །གལ་ཏེ་ཁྱོད་གནོད་པ་བྱེད་པ་མ་ཡིན་ནམ། དེ་ལྟ་ན་ནི་ཁྱོད་སེམས་ཅན་དམྱལ་བར་འགྲོ་བར་རིགས་ལ་དེ་དག་ནི་མ་ཡིན་ནོ་ཞེ་ན། བདག་ལ་བསམས་པའི་ཡོན་ཏན་གྱིས། །ཞེས་གསུངས་པ་ཡིན་ཏེ། སླར་གནོད་པ་བྱེད་པ་ལས་ལོག་པའི་མཐར་ཐུག་པ་དེ་དག་ནི་བདག་གི་བསམ་པའི་ཆེ་བའི་བདག་ཉིད་ཡིན་ཏེ། དམྱལ་བར་འགྲོ་བ་ལས་ལོག་པའི་རྒྱུ་ཡིན་ནོ། །དམྱལ་བར་མི་འགྲོ་བ་གང་ཡིན་པ་དེ་ནི་བདག་གི་བསམ་པའི་ཆེ་བའི་བདག་ཉིད་ཀྱི་སྟོབས་ཀྱིས་ཡིན་ལ། འདི་དག་ནི་བསམ་པ་ངན་པའི་ཕྱིར་བདག་དམྱལ་བར་མ་ལྷུང་བ་ནི་མ་ཡིན་ནོ་སྙམ་དུ་དགོངས་པའོ། །དེ་ལྟར་ན་ཡང༌། གལ་ཏེ་ཞེས་བྱ་བ་ལ་སོགས་པ་གསུངས་ཏེ། འདིར་བསྡུས་པའི་དོན་ནི་འདི་ཡིན་ཏེ། གལ་ཏེ་བདག་ཉིད་གནོད་པ་བྱེད་པ་ཡིན་ཡང་ཐབས་ལ་མཁས་པ་འགའ་ཞིག་གིས་གལ་ཏེ་སེམས་ཅན་དམྱལ་བར་མི་འགྲོ་ཡང་དེའི་ཚེ་ཕན་འདོགས་པར་བྱེད་པ་དེ་དག་ལ་ཅི་ཞིག་འབྱུང་སྟེ་ཅི་ཞིག་ཟད་ཅི་ཞིག་ཉམས་ཞེས་བྱ་བའི་དོན་ཏོ། །རེ་ཞིག་བདག་ཉིད་གཅིག་པུས་ཁྱེད་ཅག་གཞན་ནི་མ་བསྲུངས་ལ། བདག་ཉིད་ནི་བསྲུང་བ་ཡིན་ཏེ། དེ་དག་གིས་དེ་དག་གི་ཡོན་ཏན་དང་སྐྱོན་ལ་ཅུང་ཟད་ཀྱང་ལྷག་པའམ་མ་ཚང་བར་འགྱུར་བ་མེད་དོ། །གལ་ཏེ་དེ་ལྟ་ན་ཡང་ཁྱོད་ཀྱི་བདག་ཉིད་བསྲུང་པ་ཡང་མི་རིགས་པ་ཡིན་ཏེ་ཕན་འདོགས་པ་བྱས་པ་ཤེས་པའི་ཕྱིར་རོ་ཞེས་དོགས་པ་ལ། འོན་ཏེ་ཞེས་བྱ་བ་ལ་སོགས་པ་གསུངས་ཏེ། གལ་ཏེ་བྱིས་པ་ལ་སོགས་པ་
རྡེག་པར་བྱེད་པ་ལ་ལེན་དུ་གནོད་པ་བྱས་ན་དེ་ལྟར་ནའང་དེ་དག་མ་བསྲུངས་པར་འགྱུར་ཏེ། དེ་དག་སེམས་ཅན་དམྱལ་བར་འགྲོ་བ་ལ་སོགས་པ་ལ་སླར་བཅོས་པ་ཅི་ཡང་མ་བྱས་པར་འགྱུར་ལ། བརྡེགས་ཀྱང་བདག་གིས་སླར་བརྡེག་པར་མི་བྱ་བ་དང༌། དེ་བཞིན་དུ་སེམས་ཅན་ཐམས་ཅད་ལ་བྱམས་པའི་སེམས་བདག་གིས་སྤང་བར་མི་བྱ་བ་དང༌། ཐ་ན་མ་གལ་དུ་མ་ལ་ཡང་ཁོང་ཁྲོ་བསྐྱེད་པར་མི་བྱའོ་ཞེས་བྱ་བ་ལ་སོགས་པ་བྱང་ཆུབ་སེམས་དཔའི་སྤྱོད་པ་ལས་བདག་ཉིད་སླར་ཉམས་པར་འགྱུར་རོ། །དེ་ལྟ་བས་ན་ད་ནི་སླར་འཆོས་པའི་ཐབས་མེད་པས་ཉོན་མོངས་རེ་སྡུག་བསྲུང་བར་མི་ནུས་པའི་ཕྱིར་བརླག་པར་འགྱུར་ཏེ། ངན་འགྲོར་ལྟུང་བར་འགྱུར་བ་ཡིན་པས་ད་ལྟ་རེ་ཞིག་བཏང་སྙོམས་སུ་བྱས་ལ་ཕྱིན་ནས་ཐབས་ལ་བརྟེན་ཏེ་ཇི་ནས་འདི་དག་ལ་སྡུག་བསྔལ་རྡུལ་ཙམ་ཡང་མེད་པར་འགྱུར་བ་དེ་བྱའོ། །དེ་ལྟར་གཞན་གྱིས་གནོད་པ་བྱས་པ་ལ་ཇི་མི་སྙམ་པའི་བཟོད་པ་བསྟན་ནས། ད་ནི་ཆོས་ལ་ངེས་པར་སེམས་པའི་བཟོད་པ་ཉེ་བར་བསྟན་པའི་ཕྱིར། ཡིད་ནི་ཞེས་བྱ་བ་ལ་སོགས་པ་གསུངས་ཏེ། མ་བརྟགས་ན་གནོད་པ་སྐྱེ་བའི་སྡུག་བསྔལ་རྣམ་པ་གཉིས་ཏེ། ལུས་ཀྱིས་དང། སེམས་ཀྱིའོ། །དེ་ལ་ཡིད་ལ་ནི་སུས་ཀྱང་དབྱིག་པས་བརྡེག་པ་ལ་སོགས་པ་བྱར་མི་ནུས་ཏེ། ཡིད་ནི་ལུས་ཅན་མ་ཡིན་པའི་ཕྱིར་རོ། །དེ་ལྟར་ན་དེ་ལས་བྱུང་བའི་སྡུག་བསྔལ་དོན་དམ་པར་མེད་དོ། །རྟོག་པ་ལས་བྱས་པའི་ཡིད་མི་བདེ་བ་ཡོད་དེ། དེ་ཉིད་བསྟན་པ་ལུས་ལ་ཞེས་བྱ་བ་ལ་སོགས་པ་ལ། བདག་གི་ལུས་འདི་སྙམ་དུ་རྣམ་པར་རྟོག་པ་གོམས་པའི་དབང་གིས་སྡུག་བསྔལ་དག་གིས་ནོན་ཏེ། དེ་ལ་ཡང་སྡུག་བསྔལ་གྱི་རྒྱུ་ངེས་པ་ཉིད་ཡིན་ནོ་ཞེས། བརྙས་དང་ཞེས་བྱ་བ་ལ་སོགས་པ་གསུངས་པ་ལ། བརྙས་པ་ལ་སོགས་པའི་ཚོགས་པ་ནི་ལུས་ཀྱི་སྡུག་བསྔལ་གྱི་རྒྱུ་མ་ཡིན་ཏེ། གང་གི་ཕྱིར་འདི་ནི་ལུས་ལ་ཅུང་ཟད་ཀྱང་གནོད་པ་བྱེད་པར་མིན་པ་དེའི་ཕྱིར་ན་སེམས་ཁྱོད་རྒྱུ་ཅིའི་ཕྱིར་ཐོབ་བར་བྱེད། འོན་ཏེ་གལ་ཏེ་བརྙས་པ་ལ་སོགས་པ་ལ་ལུས་ལ་གནོད་པར་བྱེད་པ་མ་ཡིན་མོད་ཀྱི། དེ་ཐོས་པས་ཀྱང་བདག་
ལ་འཇིག་རྟེན་རྣམས་སེམས་མ་དད་པ་སྐྱེ་བ་ཡིན་པས་བདག་མི་འདོད་པ་ཡིན་ནོ་ཞེ་ན། བརྙས་དང་ཞེས་བྱ་བ་ལ་སོགས་པ་གསུངས་ཏེ། དེ་ལྟར་ཡིན་དུ་ཆུག་ཀྱང༌། དེ་ལྟ་མོད་ཀྱི་འདི་དཔྱད་པར་བྱའོ། །བདག་ལ་བརྙས་པ་ལ་སོགས་པ་ཐོས་པ་ལ་སོགས་པས་འགྲོ་བ་རྣམས་ལ་མ་དད་པ་འཇིག་རྟེན་འདི་འམ་འཇིག་རྟེན་གཞན་དུ་ཅི་བདག་ལ་ཟ་བར་འགྱུར་རམ། གང་གི་ཕྱིར་འཇིག་རྟེན་མ་དད་པ་དེ་ལ་བདག་མི་དགའ། དེ་ལྟར་རྣམ་པར་དཔྱད་ལ་འདི་ལ་མངོན་པར་ཞེན་པར་མི་བྱའོ། །ཡང་ན་འདི་ལ་མངོན་པར་ཞེན་པའི་རྒྱུ་ཡོད་དེ། རྙེད་པའི་བར་ཆད་བྱེད་པར་མི་འགྱུར་བ་ཡིན་ནོ་ཞེས། རྙེད་པའི་ཞེས་བྱ་བ་ལ་སོགས་པ་གསུངས་ཏེ། འདི་ལྟར་བརྙས་པ་ལ་སོགས་པ་ཐོས་པས་འཇིག་རྟེན་རྣམས་མི་དད་ལ། དེ་ཡིས་རྙེད་པ་འབུལ་བ་ལས་ཕྱིར་ཕྱོགས་པར་འགྱུར་ཏེ། དེ་བས་ནི་བརྙས་པ་ལ་སོགས་པའི་ཚོགས་དེ་དག་མི་འདོད་པ་ཡིན་ནོ་ཞེ་ན། དེ་ནི་མི་རིགས་ཏེ། བདག་གི་རྙེད་པ་འདི་ཉིད་དུ་ཡང་ཉི་མ་སོ་སོར་ངེས་པར་འདོར་ཏེ། འཇིག་པའི་ངང་ཅན་གྱི་ཆོས་ཡིན་པའི་ཕྱིར་འབྲལ་པར་འགྱུར་ཞིང་འཇིག་རྟེན་ཕ་རོལ་ཏུ་ཡང་རྗེས་སུ་འབྲང་བར་མི་འགྱུར་རོ། །དེའི་རྒྱུ་མཚན་གྱིས་བརྙས་པ་ལ་སོགས་པ་བྱེད་པ་རྣམས་ལ་ཁྲོས་པའི་སྡིག་པ་གང་ཡིན་པ་དེ་ཉིད་ནི་ཕ་རོལ་དུ་གནས་པར་འགྱུར་ཏེ། འཇིག་རྟེན་ཕ་རོལ་དུ་རྗེས་སུ་འབྲང་བར་འགྱུར་རོ། །བརྟེན་པར་ཞེས་བྱ་བ་ནི་དེའི་འབྲས་བུ་དེ་ལོངས་མ་སྤྱད་པར་འཇིག་པར་མི་འགྱུར་བའོ། །རང་ཉིད་ཀྱིས་འདིར་འདི་དག་དཔྱད་པར་བྱའོ་ཞེས། བདག་ནི་ཞེས་བྱ་བ་ལ་སོགས་པ་གསུངས་ཏེ། རྙེད་པ་གང་ཡིན་པ་དེ་མེད་པས་ཉི་མ་འདི་ཉིད་དུ་བདག་ཤི་བ་ནི་རུང་གི་གཞན་ལ་གནོད་པ་བྱས་པའི་སྒོ་ནས་རྙེད་པ་རྙེད་པས་ལོག་འཚོ་ཡུན་རིང་ནི་མ་ཡིན་ཏེ། དུས་ཡུན་རིང་པོར་རོ། །ཅིའི་ཕྱིར་ཞེ་ན། གང་གི་ཕྱིར་འཚོ་བའི་མཐའ་ནི་འཆི་བ་ཡིན་ནོ་ཞེས་གསུངས་པས་དུས་མང་པོ་ཞིག་ཏུ་འཚོ་ཡང་ངེས་པར་འོངས་པར་འགྱུར་རོ། །འཆི་བའི་སྡུག་བསྔལ་དེ་ཉིད་ཡིན་ཏེ། བདག་ལ་ཕྱིས་ལོ་བརྒྱ་འདས་ནས་བྱུང་བ་གང་ཡིན་པ་དེ་ཉིད་ད་ལྟ་ཉིད་དུ་འཆི་བར་འགྱུར་བ་ཡིན་ནོ། །དེའི་ཕྱིར་ཡུན་རིང་པོར་འཚོ་ཡང་ཁྱད་པར་ནི་མེད་དོ། །འདི་དག་གིས་ཀྱང་ཁྱད་པར་མེད་
པ་ཡིན་ནོ་ཞེས་ཚིགས་སུ་བཅད་པ་གཉིས་ཀྱིས་བསྟན་པ། རྨི་ལམ་ཞེས་བྱ་བ་ལ་སོགས་པ་གསུངས་ཏེ། དཔེར་ན་འགའ་ཞིག་རྨི་ལམ་དུ་ལོ་བརྒྱར་བདེ་བ་མྱོང་བ་རྨིས་ཏེ་སད་པ་དང༌། གཞན་ཞིག་སྐད་ཅིག་ཙམ་དུ་སྟེ། དེ་དེ་ཙམ་ཞིག་ཏུ་བདག་ཉིད་བདེ་བར་གྱུར་བར་རློམ་སྟེ། འདི་དག་གཉི་ག་ལ་ཡང་རྨི་ལམ་དུ་བདེ་བ་མྱོང་བར་རྨིས་པ་སད་པར་གྱུར་པ་ན་རྨིས་པའི་བདེ་བ་ཞིག་པ་དེ་ནི་ཕྱིར་འོང་བ་མེད་དོ། །སད་པའི་གནས་སྐབས་ན་རྗེས་སུ་འབྲང་བ་མེད་དེ། དྲན་པ་ཙམ་ཞིག་ལས་མ་ལུས་པ་ཡིན་པའི་ཕྱིར་རོ། །དེ་འདྲར་ཟད་ན་ནི་རྨི་ལམ་དུ་རྨིས་པ་བཞིན་དུ་སྐྱེས་བུའིའོ། །འཆི་བའི་དུས་ན་ནི་འཆི་བའི་ཚེ་ནའོ། །ཚེ་རིང་བ་དང་ཚེ་ཐུང་བའི་བདེ་བ་ནི་ཕྱིར་མི་འོང་བ་ཡིན་ཏེ། དེ་བས་ན་ལོག་པའི་འཚོ་བ་ཞོག་ཅིག །འདི་དག་གིས་ཀྱང་རྙེད་པ་དང་མ་རྙེད་པ་ལ་ཁྱད་པར་འགའ་ཡང་མེད་དོ་ཞེས་བསྟན་པ། རྙེད་པ་ཞེས་བྱ་བ་ལ་སོགས་པ་གསུངས་ཏེ། རྙེད་པ་མང་པོ་ནི་ཤིན་ཏུ་བུངས་ཆེ་བའོ། །འཐོབ་གྱུར་ཀྱང་ནི་ཐོབ་ནས་དུས་ཡུན་རིང་པོར་ལོངས་སྤྱད་པའི་བདེ་བ་དག་ཀྱང་ངོ༌། །ཡང་འཆི་བ་ལ་བརྟེན་ནས་ལག་པ་སྟོང་པ་སྟེ་ལག་སྟོངས་སུའོ། །རྙེད་པ་ལ་སོགས་པ་དེ་དག་ལས་རྒྱགས་མ་བཟུང་ཞིང་བདེ་བ་ལས་ལྷག་མ་ཅུང་ཟད་ཀྱང་གནས་པ་མེད་དེ། རྐེད་པའི་སྲད་བུ་ཙམ་ཡང་མ་ལུས་པས་སྒྲེན་མོ་སྟེ། ཆོམ་པོས་ཕྲོགས་པ་བཞིན་དུ་འཇིག་རྟེན་འདི་ནས་འཇིག་རྟེན་ཕ་རོལ་དུ་འགྲོ་རྙེད་པ་ལ་ནི་ཁྱད་པར་ཡོད་པ་ཉིད་མ་ཡིན་ནམ། ཆོས་གོས་ལ་སོགས་པའི་གེགས་མེད་པས་ཚེའི་དུས་བྱེད་ཉེ་བར་སྟོན་པ་ལས་ཡུན་རིང་པོར་འཚོ་བར་འགྱུར་ཏེ། དེས་ན་ནི་སྔར་བྱས་པའི་སྡིག་པ་དག་རྣམ་པར་སུན་འབྱིན་པ་ཀུན་ཏུ་སྤྱོད་པ་ལ་སོགས་པས་ཡོངས་སུ་ཟད་པར་བྱ་བ་དང༌། བསླབ་པ་སྡོམ་པ་ཡོངས་སུ་བསྲུང་བས་བྱང་ཆུབ་ཀྱི་སེམས་བསྟེན་པ་ལ་སོགས་པ་དང༌། དགེ་བའི་ཕྱོགས་འཕེལ་བར་བྱ་སྟེ། གང༌། ཆོས་ལ་སྤྱོད་པ་ཇི་སྲིད་ཡུན་རིང་འཚོ། །དེ་སྲིད་དགེ་བའི་རྒྱུད་ནི་རབ་ཏུ་འཕེལ། ཞེས་གསུངས་པ་ལྟ་བུའོ། །དེ་བས་ན་རྙེད་པའི་བར་ཆད་བྱེད་པ་ལ་ཁྲོ་བར་རིགས་པ་ཡིན་ནོ་སྙམ་དུ་དོགས་པ་ལ། གལ་ཏེ་རྙེད་པས་ཞེས་བྱ་བ་
ལ་སོགས་པ་གསུངས་ཏེ། གལ་ཏེ་བསྟན་པའི་རིམ་པ་བཞིན་དུ་རྙེད་པས་འཚོ་བ་བསྟན་པ་དང་སྡིག་པ་ཟད་པ་དང༌། བསོད་ནམས་བྱའོ་ཞེས་བྱ་བ་ལ་སོགས་པར་སེམས་ན་དེ་ལྟར་མ་ཡིན་ཏེ། དེ་བས་ན་ལྷག་པའི་ཉེས་པ་མ་མཐོང་ནས་བརྗོད་པ་ཡིན་ནོ་ཞེ་ན། རྙེད་པའི་དོན་དུ་ཞེས་བྱ་བ་ལ་སོགས་པ་གསུངས་ཏེ། རྙེད་པའི་དོན་དུ་ནི་རྙེད་པའི་རྒྱུ་མཚན་དུའོ། །དེའི་བར་ཆད་བྱེད་པ་ལ་ཞེ་སྡང་བྱེད་ན་ལེགས་པར་སྤྱད་པ་ཉིད་ཟད་པར་འགྱུར་ཏེ། གང། བསྐལ་པ་སྟོང་དུ་བསགས་པ་ཡི། །སྦྱིན་དང་བདེར་གཤེགས་མཆོད་ལ་སོགས། །ལེགས་སྤྱད་གང་ཡིན་དེ་ཀུན་ཀྱང༌། །ཞེས་བྱ་བ་གསུངས་པའོ། །ཁྱད་པར་ནི་འདི་ཡིན་ཏེ། བཟོད་པ་མ་ཡིན་པ་ལས་བྱུང་བ་སྡིག་པའི་ཕུང་པོ་མངོན་པར་འཕེལ་བའོ། །ཇི་སྟེ་འདི་ལྟར་ཇི་ཞིག་ལྟར་དུས་ཡུན་རིང་པོ་དེ་སྲིད་དུ་རྙེད་པས་འཚོ་བར་འགྱུར་ན་དེ་ཙམ་ཞིག་བདག་གི་དགོས་པ་ཡིན་ནོ་ཞེ་ན། གང་གི་དོན་དུ་ཞེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་དཔའ་སེམས་ཅན་ངན་དོན་གྱི་འཚོ་བ་དགོས་པ་མེད་པ་ཉིད་འདོད་པར་བྱ་བ་ནི་མ་ཡིན་ཏེ། འོན་ཀྱང་ཚོགས་མངོན་པར་འཕེལ་བར་བྱ་བའི་དོན་དང༌། སྡིག་པ་ཟད་པར་བྱ་བའི་དོན་དུ་གལ་ཏེ་དེ་ལེགས་པར་སྤྱད་པ་ཟད་པར་བྱེད་པའི་རྒྱུ་མཚན་དུ་འགྱུར་ན། དེའི་ཚེ་མི་དགེ་བ་འབའ་ཞིག་གི་ལས་བྱེད་པའི་ངང་ཚུལ་ཅན་དེས་ཀོ་སྟེ་དེ་འདྲ་བས་ཅི་ཞིག་བྱ།། །།བམ་པོ་བཅུ་པ། དེ་ནི་སྨད་པ་ཉིད་ཡིན་ནོ་སྙམ་དུ་དགོངས་པའོ། །འོ་ན་དེ་ལྟ་མོད་ཀྱི་རྙེད་པའི་བར་ཆད་བྱེད་པའི་ཕྱིར་བདག་ལ་བསྔགས་པ་མ་ཡིན་པར་སྨྲ་བ་རྣམས་ལ་ཁོང་ཁྲོའི་སེམས་སྐྱེ་བ་ནི་མ་ཡིན་ཏེ། འོན་ཀྱང་ཡོན་ཏན་འཆབ་པ་ལ་སོགས་པའི་ལས་ཀྱི་སྡུག་བསྔལ་གྱི་རྒྱུ་ཡིན་པའི་ཕྱིར་རོ་ཞེ་ན། གལ་ཏེ་ཞེས་བྱ་བ་ལ་སོགས་པ་གསུངས་ཏེ། མི་སྙན་པ་སྨྲ་བ་ནི་གྲགས་པ་མ་ཡིན་པ་བརྗོད་པའོ། །གལ་ཏེ་ཁྱོད་ཀྱི་ཁྲོ་བ་གང་ཡིན་པ་འདི་མི་སྙན་པ་སྨྲ་བ་དེ་སྐྱོན་གསལ་བར་བྱེད་ཅིང་ཡོན་ཏན་འཆབ་པར་བྱེད་པའི་ཕྱིར་ཁྱོད་ཉམས་པར་བྱེད་ཅིང་སུན་འབྱིན་པར་བྱེད་པའོ་སྙམ་དུ་རིག་ནས་དེའི་རྒྱུ་མཚན་གྱིས་སམ། ཡང་ན་སེམས་ཅན་དེ་འཇིག་རྟེན་ཉམས་པར་བྱེད་པ་མི་སྙན་པར་སྨྲ་བས་བདག་ལ་
འཛིན་པར་བྱེད་པ་སྟེ། རང་སེམས་མ་དང་བས་དེ་དག་ཀྱང་སེམས་མ་དང་བར་བྱེད་དོ་ཞེས་བྱ་བའི་དོན་ཏོ། །དེས་ན་མི་སྙན་པ་སྨྲ་བ་ལ་ཁྲོ་བ་ཡིན་ནོ་ཞེས་བརྗོད་ན་དེའི་ཚེ་གཞན་ལ་སྟེ། སེམས་ཅན་ཕ་རོལ་པོ་ལ་མི་སྙན་པ་བརྗོད་པ་གང་ཡིན་པ་དེ་ལ་ཡང་ཅི་སྟེ་ཁྲོ་བའང་མི་བྱེད། མི་སྙན་པ་སྨྲ་བ་དེ་ཡང་སེམས་ཅན་ཉམས་པར་བྱེད་པ་ཡིན་ཏེ། དེ་བས་ན་འདི་ལ་ཡང་ཁྲོ་བའི་ཚུལ་རིགས་པ་ཡིན་ནོ། །འདིར་ལེན་ཏེ་དོགས་པ་མ་དད་ཅེས་བྱ་བ་ལ་སོགས་པ་གསུངས་པ། གཞན་ཏེ་སེམས་ཅན་ཕ་རོལ་ལ་མ་དད་པ་རག་ལས་ཤིང་བརྟེན་པ་སྟེ། སེམས་ཅན་གཞན་ཡུལ་དུ་བྱས་པ་ལས་བྱུང་བ་ཡིན་ནོ། །དེའི་དངོས་པོ་ནི་དེ་ཉིད་དེ། དེ་བས་ན་མ་དད་པ་གཞན་ལ་བརྟེན་པ་ཉིད་ཀྱི་ཕྱིར་རོ། །དད་པ་མེད་པ་ནི་སེམས་མ་དད་པ་དང་མི་སྙན་པ་སྨྲ་བ་ལའོ། །ཁྱོད་བཟོད་ན་ནི་བཟོད་པ་སྐྱེ་ནའོ་ཞེས་རང་གི་སེམས་ཉིད་ལ་འདྲི་བའོ། །འདིར་གསུངས་པ། ཉོན་མོངས་སྐྱེ་ལ་ཞེས་བྱ་བ་ལ་སོགས་པ་ལ། གལ་ཏེ་ཁྱོད་མ་དད་པ་གཞན་ལ་རག་ལས་པ་གང་ཡིན་པ་དེ་ལ་བཟོད་པ་ཡིན་ན། དེའི་ཚེ་རང་ལ་མི་སྙན་སྨྲ་ལ་ཅིས་མི་བཟོད། ཅིའི་ཚུལ་གྱིས་སོ། །ཉོན་མོངས་སྐྱེས་ལ་རག་ལས་པའི་ཉོན་མོངས་པ་རྣམས་ཀྱི་སྐྱེས་པ་ནི་གཞན་གྱི་དབང་ཡིན་ཏེ། མ་དད་གཞན་ལ་རག་ལས་པ་ཉིད་ལ་བཟོད་པའི་རྒྱུས་འདིར་གཉི་གར་མཚུངས་པ་ཡིན་ནོ་ཞེས་བྱ་བའི་དོན་ཏོ། །སྐུ་གཟུགས་ལ་སོགས་པ་འཇིག་པར་བྱེད་པ་རྣམས་ལ་ནི་དད་པའི་དབང་གིས་ཀྱང་ཁོང་ཁྲོའི་སེམས་བསྐྱེད་པར་མི་བྱའོ་ཞེས་གསུངས་པ། སྐུ་གཟུགས་ཞེས་བྱ་བ་ལ་སོགས་པ་སྟེ། འཇིག་པར་བྱེད་པ་ནི་རྣམ་པར་འཁྲུག་པར་བྱེད་པའོ། །འཁྱལ་བ་ནི་སྐྱོན་གྱི་བློས་ཚུལ་དང་མི་མཐུན་པར་སྨྲ་བའོ། །དེ་རྣམས་ལ་བདག་གི་ཞེ་སྡང་མི་རིགས་སོ། །ཅིའི་ཕྱིར་ཞེ་ན། གང་གི་ཕྱིར་སངས་རྒྱས་ལ་སོགས་པ་སྟེ། བྱང་ཆུབ་སེམས་དཔའ་དང་འཕགས་པ་ཉན་ཐོས་དང་རང་སངས་རྒྱས་ལ་སོགས་པ་རྣམས་ལ་ལོག་པར་མངོན་པར་ཞེན་པ་ལས་བྱུང་བའི་བདག་ཏུ་འཛིན་པ་ལ་ལོག་ཅིང་ཆགས་པ་མེད་པའི་ཕྱིར་གནོད་པ་ནི་མི་མངའ་སྟེ། སེམས་གཟིར་བའི་མཚན་ཉིད་
ཡང་མི་བདེ་བ་མི་མངའོ་སྙམ་དུ་དགོངས་པའོ། །དེ་བས་ན་སྐུ་གཟུགས་ལ་སོགས་པ་འཇིག་པར་བྱེད་པ་རྣམས་ལ་ཞེ་སྡང་གི་སེམས་བསྐྱེད་པར་མི་བྱའོ། །དེའི་ཚེ་འགལ་བའི་ཆོས་བྱེད་པ་དེ་དག་ལ་དམ་པ་རྣམས་ཀྱིས་སྙིང་བརྩེ་བ་ཉིད་དུ་རིགས་སོ། །གཞན་དུ་ན་དེ་ཁྱད་པར་མེད་པའི་ཕྱིར་སྡིག་པ་འབའ་ཞིག་སྐྱེ་བར་འགྱུར་རོ། །གལ་ཏེ་ཆོས་ཀྱིས་བཟློག་པར་ནུས་ན་དེའི་ཚེ་ཉེས་པ་མེད་དེ། གང་ལ་ཆོས་འདོད་པས་བླ་མ་དང་ཕ་མ་ལ་སོགས་པ་ལ་གནོད་པ་བྱེད་པ་རྣམས་ལ་ཞེ་སྡང་གི་སེམས་སྐྱེ་བ་དེ་ཡང་བཟློག་པར་བྱའོ་ཞེས་གསུངས་པ། བླ་མ་གཉེན་ལ་ཞེས་བྱ་བ་ལ་སོགས་པ་ལ། བླ་མ་ནི་ཆོས་ཀྱི་ལམ་སྟོན་པར་བྱེད་ཅིང་མི་དགེ་བའི་ཕྱོགས་ལས་ལོག་པར་བྱེད་པའོ། །གཉེན་ནི་མ་ལྟོ་གཅིག་པ་དང༌། གཉེན་འདབ་དང༌། རུས་ཆགས་དང༌། གཉེན་འདུན་ལ་སོགས་པ་གཞན་དག་ཀྱང་སྟེ། དེ་དག་ལ་གནོད་པ་བྱེད་པ་དང། དེ་བཞིན་དུ་བཤེས་ལ་སྟེ་ཕོངས་པའི་གནས་རྣམས་ལ་གནོད་པ་བྱེད་པ་རྣམས་ལ་ཡང་ཁྲོ་བ་བཟློག་པར་བྱའོ་ཞེས་སྦྱར་རོ། །ཇི་ལྟར་ཞེ་ན། སྔ་མའི་ཚུལ་དུ་རྐྱེན་དག་ལས་འབྱུང་བ་མཐོང་ནས་གང༌། ཉེས་པ་ཇི་སྙེད་ཐམས་ཅད་དང༌། །སྡིག་པ་རྣམ་པ་སྣ་ཚོགས་པ། །ཞེས་བྱ་བ་ལ་སོགས་པ་གསུངས་ཏེ། དེ་བས་ན་འདི་དག་ཐམས་ཅད་ཀྱང་སྔར་གྱི་ལས་ཀྱིས་བསྐྱེད་པའི་འབྲས་བུ་ལོངས་སྤྱོད་དེ། འདི་ལ་འགའ་ཡང་བཅོས་པའི་རྒྱུ་ཡོད་པ་མ་ཡིན་ནོ། །དེ་བས་ན་འདིས་ནི་ཇི་སྐད་དུ་གཞན་གྱི་གཞུང་ལུགས་ལས་ལྷ་དང་མི་དང་བྲམ་ཟེ་དང་ཕ་དང་མ་ལ་སོགས་པའི་དོན་དུ་སྡིག་བྱས་ཀྱང་ཉེས་པ་མེད་དོ་ཞེས་འདོད་པ་དེ་ལྟར་འདིར་མངོན་པར་འདོད་པ་མ་ཡིན་ནོ་ཞེས་བསྟན་པ་ཡིན་ནོ། །གཞན་ཡང་དངོས་པོའི་དེ་ཁོ་ན་ཉིད་འདི་ཡང་ཡིད་ལ་བྱེད་པས་སེམས་ཅན་རྣམས་ལ་ཁྲོ་བར་མི་བྱའོ་ཞེས་གསུངས་པ། ལུས་ཅན་ཞེས་བྱ་བ་ལ་སོགས་པ་ལ། འབྲས་བུ་མཐའ་དག་གིས་སྐྱེད་པར་བྱེད་པ་པོ་ཉིད་དུ་རྗེས་སུ་འགྲོ་བ་དང་ལྡོག་པ་དག་གིས་ཚོགས་པའི་མཚན་ཉིད་ནི་རྒྱུ་ཡིན་པར་ངེས་པར་བཟུང་སྟེ་ཚོགས་པ་དེ་ཡང་དངོས་པོའི་ཆོས་ཡིན་པའི་ཕྱིར་འགའ་ཞིག་དུ་ནུས་པ་ཡོད་པའི་རང་བཞིན་ཡིན་ནོ། །དེ་ལ་
སེམས་ཡོད་པས་བྱས་པ་ནི་ལག་པ་དང་རྐང་པ་ལ་སོགས་པ་བསྣུན་པས་སོ། །སེམས་མེད་པས་ནི་དབྱིག་པ་དང་མཚོན་ཆ་དང་ནད་ལ་སོགས་པས་ཏེ། དེ་དག་ལ་ཡང་སེམས་ཡོད་པ་བཞིན་དུ་བྱེད་པ་ཡོད་པ་ཉིད་ཡིན་ཏེ། ཁྱད་པར་ནི་དངོས་དང་བརྒྱུད་པས་བྱས་པ་ཡིན་ནོ། །རང་ཉིད་འདོད་རྒྱལ་གྱིས་སམ། བོང་བ་དང་རྩིག་པ་ལ་སོགས་པས་གནོད་པ་བྱས་པ་ལས་བྱུང་བའང་རུང་སྟེ། ལུས་ཅན་རྣམས་ལ་གནོད་བྱས་ན་སྟེ། ངེས་པར་བྱུང་བ་ན་འདི་ལས་གཞན་གནོད་པའི་རྒྱུ་ནི་མེད་དོ། །དེ་ལྟར་རྒྱུའི་ཚོགས་པ་རྣམ་པ་གཉིས་པོ་སྐབས་སུ་བབ་པ་དེ་ཡང་སེམས་ཡིད་རྣམ་པར་ཤེས་པ་དང་བཅས་པའི་ལུས་ལ་མཐོང་བ་ཚད་མས་ཡོངས་སུ་ངེས་པ་དེ་བས་ན་དེ་ཉིད་དེའི་སྐྱེ་བོའི་གནས་ཡིན་གྱི་གཞན་ནི་མ་ཡིན་ཏེ། སེམས་མེད་པ་ལ་ཚོར་བ་མི་རིགས་པའི་ཕྱིར་རོ། །དེ་བས་ན་གང་ཞིག་གང་གི་སྐྱེ་བའི་གནས་ཡིན་པ་དེ་ནི་དེ་ཉིད་དུ་འབྱུང་གི །གཞན་དུ་ནི་མ་ཡིན་ཏེ། དཔེར་ན་འདམ་བུ་འདམ་སྐྱེས་འབྱུང་གི་སྐམ་ལ་ནི་མ་ཡིན་པ་ལྟ་བུའོ། །དེ་བས་ན་རིགས་པ་འདི་ཡི་ས་དེ་དག་སྟེ་བརྗོད་མ་ཐག་པའི་གནོད་པའི་ངོ་བོ་ཉིད་བཟོད་པར་གྱིས་སྲན་པར་གྱིས་ཤིག་པའོ། །ད་ནི་གཉི་ག་ལ་ཡང་ཐུན་མོང་དུ་སུན་དབྱུང་བའི་ཕྱིར་སུ་ལ་ཡང་ཁྲོ་བར་མི་རིགས་སོ་ཞེས་བརྗོད་པར་བྱ་བའི་ཕྱིར། ལ་ལ་རྨོངས་པས་ཞེས་བྱ་བ་ལ་སོགས་པ་གསུངས་ཏེ། བདག་དང་བདག་གིར་འཛིན་པ་ལ་མངོན་པར་ཞེན་པ་ཕྱིན་ཅི་ལོག་གིས་ལ་ལ་ཁ་ཅིག་གནོད་པ་བྱེད་དེ། དབྱུག་པ་ལ་སོགས་པས་བརྡེག་པའམ་བརྒྱད་བཀག་སྨྲ་བའི་ཉེས་པ་དེ་རང་གིས་བྱས་པ་ཡིན་ཏེ། གཞན་ནི་གནོད་པ་བྱས་པས་དེ་ལ་ཁྲོ་བར་གྱུར་ན་སྟེ་འཚིག་པར་འགྱུར་ནའོ། །རྨོངས་པས་ནི་རྣམ་པར་རྨོངས་ནས་ཏེ། རང་གིས་བྱས་པའི་ལས་དང་འབྲས་བུའི་འབྲེལ་པ་མི་གཉེར་བ་སྟེ། མ་རིག་པའི་སྒྲིབ་པས་སླར་བརྡེག་པ་དང༌། འཁྱལ་པ་ལ་སོགས་པ་བརྩོན་པར་བྱེད་པའོ། །དེ་ལྟར་ན་ཉོན་མོངས་པའི་སྲིན་པོས་བརླམས་པས་དབང་དུ་བྱས་པ་དེ་ལ་གང་སྐྱོན་མེད་པར་སྨྲ་ཞེས་པ་མེད་པ་དང་ཉེས་པ་དང་ལྡན་པར་གང་ལ་སྨྲ། འདི་དག་གཉི་ག་ཡང་ཐུན་མོང་དུ་
ཉེས་པ་དང་ལྡན་པའི་ཕྱིར་རོ། །འདི་ལྟར་ཡང་བདག་གི་ཚུལ་ཉིད་ལ་བསམས་ཏེ་ཁོང་ཁྲོའི་སེམས་བཟློག་པར་བྱའོ་ཞེས་གསུངས་པ། གང་གིས་ཞེས་བྱ་བ་ལ་སོགས་པ་ལ་གང་གི་ཕྱིར་ཏེ། ཅི་སྟེ་དེ་བཞིན་དུ་འབྲས་བུ་དེ་དག་གི་རྒྱུའི་ལས་བྱས། གང་གིས་ཞེས་བྱ་བ་འདི་ནི་འཇིག་རྟེན་པའི་སྨྲ་བའི་ཚུལ་ལོ། །ཡང་ན་གང་གི་ཕྱིར་ལས་ལ་ནུས་པ་ཡོད་པའི་རྒྱུས་འཁྱལ་བ་དང༌། འཆིང་བ་དང་བརྡེག་པ་ལ་སོགས་པས་གཞན་དག་ཕ་རོལ་པོས་གནོད་པ་བྱེད་གཟིར་པར་བྱེད་པའོ། །གལ་ཏེ་དེ་ལྟ་ཡིན་ན་ཡང་ཕྱིར་བཅོས་པར་རིག་པ་མ་ཡིན་ནམ་ཞེ་ན། ཐམས་ཅད་ཅེས་བྱ་བ་ལ་སོགས་པ་གསུངས་ཏེ། སྡུག་བསྔལ་གྱི་རྒྱུ་ཐམས་ཅད་ལས་ཀྱི་རྐྱེན་གྱིས་བསྐྱེད་ཅིང་རབ་ཏུ་འཇུག་པ་ཡིན་ཏེ། དེ་ལྟ་ན་དེའི་འབྲས་བུ་བཟློག་པའི་དོན་དུ་འདི་ལ་གཞན་དུ་བདག་གིས་བྱར་ཅི་ཡོད་སྟེ། འབྲས་བུ་བསྐྱེད་པ་ལ་ཕྱོགས་པའི་ལས་ལ་གང་གིས་ཀྱང་བཟློག་པར་མི་ནུས་པའི་ཕྱིར་རོ། །ཡང་འདིར་རིགས་པའི་ཚུལ་འདི་ཡིན་ནོ་ཞེས། དེ་ལྟར་མཐོང་ནས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་འདི་དག་ནི་ལས་དང་ཉོན་མོངས་པ་ལ་རག་ལས་པ་སྟེ་གནས་པའོ། །ཕན་ཚུན་དུ་མི་རིགས་པའི་ལས་བྱེད་པ་རྣམས་བཟློག་པར་མི་ནུས་སོ་ཞེས་དེ་ལྟར་རྟོགས་ནས་ཏེ་ཤེས་ནས་ཡང་བསོད་ནམས་དག་དགེ་བའི་ལས་རྣམས་ལ་དེ་ལྟར་བདག་གིས་བསྒྲིམས་ཏེ་བྱ་སྟེ། གང་གིས་རྣམ་པ་དེ་ལྟ་བུའི་ནུས་པ་ཐོབ་པར་བྱས་ནས་ཡང་དག་པའི་ལམ་དུ་ཞུགས་པར་གྱུར་པ་ན་ཐམས་ཅད་ཕན་ཚུན་གཅིག་ལ་གཅིག་བྱམས་པའི་སེམས་དང་ཕན་པ་དང་བདེ་བ་བསྒྲུབ་པ་ལ་བརྩོན་པར་འགྱུར་བའི་རྣམ་པ་དེ་ལྟ་བུས་བརྩོན་འགྲུས་བརྩམ་མོ། །ཕངས་པའི་དངོས་པོ་འཇོམས་པར་བྱེད་པ་ལ་གནོད་པའི་སེམས་ལས་བཟློག་པར་བྱ་བའི་ཆེད་དུ་འཇིག་རྟེན་པའི་དཔེ་བརྗོད་པས་ཞེ་སྡང་ལས་ལྡོག་པར་བྱའོ་ཞེས་ཚིགས་སུ་བཅད་པ་གཉིས་ཀྱིས་བསྟན་པ། དཔེར་ན་ཞེས་བྱ་བ་ལ་སོགས་པ་གསུངས་ཏེ། དཔེར་ན་ཁྱིམ་གཅིག་ན་མེས་ཚིག་པར་གྱུར་བ་ན། ཁྱིམ་དེ་ནས་ཁྱིམ་གཞན་དུ་མེ་སོང་ནས་གང་ན་རྩྭ་དང་ཤིང་ལ་སོགས་པ་ལ་མཆད་པར་བྱེད་པ་འཕེལ་བར་འགྱུར་བ་ན་དེའི་ནང་དུ་ཆུད་པའི་རྫས་གཞན་དམ་ཀྱང་ཚིག་པར་དོགས་པས།
དེ་ནི་ཕྱུང་སྟེ་དོར་བར་རིགས་ཏེ་སོ་སོར་བྱས་ཏེ་བསྩལ་བར་བྱའོ། །དེ་ལྟར་དཔེའི་རིམ་པས་སྐབས་ལ་སྦྱར་བར་བྱ་སྟེ། དེ་བཞིན་ཞེས་བྱ་བ་ལ་སོགས་པ་གསུངས་ཏེ། དེ་ལྟར་བསྟན་པའི་དཔེ་བརྗོད་པའི་ཚུལ་གྱིས་དངོས་པོ་གང་ལ་སེམས་ཡིད་ཆགས་ན་སྟེ་ཞེན་པས། ཞེ་སྡང་མེ་ནི་ཁོང་ཁྲོ་བའི་མེ་ཡིན་ལ་མཆེད་པར་གྱུར་པ་ནི་ཡོངས་སུ་གདུང་བར་བྱེད་པ་སྟེ། ཆགས་པའི་གནས་སུ་གྱུར་པའི་དངོས་པོ་དེ་དེའི་མོད་ལ་ནི་དུས་གཞན་དུ་མི་འགོང་བར་ཡོངས་སུ་དོར་ཏེ། དེ་ལ་མངོན་པར་ཞེན་པ་ཡོངས་སུ་སྤང་ངོ༌། །ཅིའི་ཕྱིར་ཞེ་ན། བསོད་ནམས་བདག་ཉིད་ནི་ལུས་ཏེ། བསོད་ནམས་ཀྱི་ཕུང་པོ་ཞེས་བྱ་བའི་དོན་ཏོ། །དེ་ནི་བསྟན་པའི་རིམ་པས་ཚིག་པར་ཏེ་ཡོངས་སུ་ཟད་པར་མ་གྱུར་ཅིག་ཅེས་པས་སོ། །གཞན་དུ་ན་ཁྱིམ་གཞན་དུ་སོང་བའི་དངོས་པོ་བཞིན་དུ་ཞེ་སྡང་གི་མེས་དེ་ཡང་སྲེག་པར་བྱེད་དོ། །གཞན་ཡང་མིའི་སྡུག་བསྔལ་གང་ཡིན་པ་རྣམས་ཀྱིས་སེམས་ཅན་དམྱལ་བའི་འབྲས་བུའི་ལས་སྨིན་པར་འགྱུར་བ་བྱ་བ་འདི་ནི་རྙེད་པ་རྙེད་པ་ཡིན་ནོ་ཞེས་བསྟན་པ་ནི། བསད་བའི་ཞེས་བྱ་བ་ལ་སོགས་པ་གསུངས་པ་ཡིན་ཏེ། གང་ཞིག་བསད་པའི་རིགས་པ་དེ་གལ་ཏེ་ལག་པ་ཙམ་བཅད་དེ་བཏང་ན་དེའི་ཚེ་འདི་ལ་ཉམས་པ་གང་ཡང་མེད་ཀྱི། སླར་ཡང་འཆི་བའི་སྡུག་བསྔལ་བས་ལག་པ་བཅད་པའི་སྡུག་བསྔལ་འདི་ཤིན་ཏུ་ཆུང་བ་ཡིན་ནོ་ཞེས་བདག་ཉིད་རྙེད་པ་དེ་རྙེད་དོ་སྙམ་དུ་སེམས་སོ། །དེ་བཞིན་དུ་གང་མའི་སྡུག་བསྔལ་བརྡེག་པ་དང་འཆིང་བ་དང་བརྙས་པ་ལ་སོགས་ཉམས་སུ་མྱོང་བར་བྱས་པས་སེམས་ཅན་དམྱལ་བའི་སྡུག་བསྔལ་ལས་ཐར་བར་འགྱུར་བ་དེ་ལ་ཅུང་ཟད་ཀྱང་གོད་པ་མེད་དོ། །འདི་ནི་ཅུང་ཟད་ཀྱང་སྡུག་བསྔལ་མ་ཡིན་ཏེ། སེམས་ཅན་དམྱལ་བའི་སྡུག་བསྔལ་ལ་ལྟོས་ན་བདེ་བ་རང་ཉིད་ཡིན་ནོ། །དེ་བས་ན་གལ་ཏེ་མཁས་པ་ཡིན་ན་དེའི་ཚེ་འདིར་འདི་ལ་ཡིད་བདེ་བ་ཉིད་དུ་བྱ་བར་རིགས་པ་ཡིན་ནོ། །ཇི་སྟེ་བདག་གིས་སྡུག་བསྔལ་ཤིན་ཏུ་ཆུང་ངུ་ཡང་བཟོད་པར་ནུས་སོ་ཞེ་ན། འདིར་ད་ལྟའི་སྡུག་བསྔལ་ཞེས་བྱ་བ་ལ་སོགས་པ་གསུངས་ཏེ། ཁུ་ཚུར་དང་ཐལ་ལྕག་དང་བོང་བ་ལ་སོགས་པས་བསྣུན་པར་བྱས་པའི་སྡུག་བསྔལ་
ཅུང་ཟད་ཙམ་ཡང་དེ་ལྟར་བཟོད་པར་ཏེ་བརྟེན་པར་མི་ནུས་ཤིང་མི་ལྕོགས་ན་དེ་འདིར་ཁྱོད་ལ་འདྲི་བར་བྱ་སྟེ། གལ་ཏེ་དེ་ལྟར་ཡིན་ན་སེམས་ཅན་དམྱལ་བའི་སྡུག་བསྔལ་གྱི་རྒྱུ་ཁྲོ་བ་སྟེ་ཁོང་ནས་ལྡང་བ་འདི་ཅིའི་ཕྱིར་ན་ལྡོག་པར་མི་བྱེད། འཇིལ་བར་མི་བྱེད། འདི་ཉིད་ནི་ཤིན་ཏུ་ཡང་སེམས་ཅན་དམྱལ་བ་རྣམས་སུ་སྡུག་བསྔལ་སྐྱེད་པར་བྱེད་པ་ཡིན་པས་སྡུག་བསྔལ་གྱི་འཇིགས་པ་རྣམས་ལྡོག་པར་བྱ་བར་རིགས་པ་ཡིན་ནོ། །གཞན་ཡང་གལ་ཏེ་བརྟེན་པར་མི་ནུས་པ་དེ་ལྟར་ཡིན་མོད་ཀྱི་ཁྱོད་ཀྱིས་དེའི་རྒྱུའི་ལས་བྱས་པས་མི་འདོད་ཀྱང་སྡུག་བསྔལ་དུ་འབབ་པར་འགྱུར་གྱི་འབྲས་བུ་ཅུང་ཟད་ཀྱང་མི་འབྱུང་ལ། བཟོད་པ་ལས་ནི་དེ་ལ་དོན་ཆེན་པོ་རྙེད་པར་འགྱུར་བ་ཡིན་ནོ་ཞེས་ཚིགས་སུ་བཅད་པ་གཉིས་ཀྱིས་བསླབ་པར་བྱ་བའི་ཕྱིར། ཁྲོ་བའི་དོན་དུ་ཞེས་བྱ་བ་ལ་སོགས་པ་གསུངས་ཏེ། ཁྲོ་བའི་རྒྱུ་མཚན་ཉིད་ཀྱིས་སོ། །དེ་བཞིན་དུ་འབྲས་བུ་མེད་པར་སེམས་ཅན་དམྱལ་བ་ཡང་སོས་ལ་སོགས་པ་རྣམས་སུ་སྟོང་ཕྲག་སྟེ་ལན་སྟོང་ཕྲག་དུ་མར་བཅས་པ་དང༌། དབྱུག་པ་དང་བརྩལ་བ་ལ་སོགས་པའི་རྒྱུ་རྣམས་ཀྱིས་གཟིར་བ་བདག་གིས་མྱོང་བར་བྱས་ཀྱང་དེ་བཞིན་དུ་སྡུག་བསྔལ་ཉམས་སུ་མྱོང་བ་ཡང་བདག་གིས་རང་གི་དོན་མཐོང་བ་དང་མ་མཐོང་བའི་འབྲས་བུ་བསྒྲུབ་པའམ། བདག་གིས་ཕ་རོལ་དག་གི་དོན་ཕན་པ་དང་བདེ་བ་བསྒྲུབ་པའི་མཚན་ཉིད་མ་བྱས་སོ་སྟེ་མ་བསྒྲུབས་སོ། །དེ་ལྟར་དགོས་པ་མེད་པ་ཁོ་ནར་སེམས་ཅན་དམྱལ་བར་སྡུག་བསྔལ་སྟོང་ཕྲག་མྱོང་བར་གྱུར་ཏོ། །དེ་བས་ན་ད་དུང་ཡང་དེ་བཞིན་དུ་བདག་མི་བཟོད་པ་བྱ་བར་རིགས་པ་མ་ཡིན་ནོ་ཞེས་གསུངས་པ། འདི་ནི་ཞེས་བྱ་བ་ལ་སོགས་པ་སྟེ། སྡུག་བསྔལ་འདི་ནི་སེམས་ཅན་དམྱལ་བར་བྱུང་བ་ཅི་འདྲ་བ་མ་ཡིན་ལ། འོན་ཀྱང་དོན་ཆེན་པོ་སེམས་ཅན་ཐམས་ཅད་ལ་ཕན་པ་དང་བདེ་བའི་གཏེར་དུ་གྱུར་པས་སངས་རྒྱས་ཉིད་བསྒྲུབ་པར་འགྱུར་བའོ། །དེའི་ཕྱིར་ན་འགྲོ་བའི་གནོད་སེལ་འགྲོ་བ་གསུམ་དུ་གཏོགས་པ་སྟེ་སེམས་ཅན་ཐམས་ཅད་ཀྱི་སྡུག་བསྔལ་ཐམས་ཅད་རབ་ཏུ་ཞི་བར་བྱེད་པའི་སྡུག་བསྔལ་དགའ་བ་འབའ་ཞིག་འདིར་བྱ་རིགས་ཀྱི་མི་འདོད་པར་མི་བྱའོ་སྙམ་དུ་དགོངས་པ་ཡིན་ནོ། །གཞན་གྱི་ཡོན་ཏན་ཐོས་པ་
ན་ཕྲག་དོག་གི་དྲི་མ་བཀྲུ་བར་བྱ་བའི་ཕྱིར། གཞན་གྱིས་ཞེས་བྱ་བ་ལ་སོགས་པ་གསུངས་ཏེ། ཡོན་ཏན་ལྷག་པ་ཡོད་པར་བསྟོད་པས་གལ་ཏེ་དགའ་བའི་བདེ་བ་འབའ་ཞིག་ཐོབ་ན་དེའི་ཚེ་ཀྱེ་ཡིད་ཁྱོད་ཀྱང་དེའི་ཡོན་ཏན་ཡང་དག་པར་བརྗོད་ནས་ཅི་སྟེ་དགའ་བའི་བདེ་བ་ཉམས་སུ་མྱོང་བར་མི་བྱེད། ཅིའི་ཕྱིར་དགོས་པ་མེད་པར་དེ་ལ་ཕྲག་དོག་གི་མེ་འབར་བས་རང་གི་རྒྱུད་བུད་ཤིང་ལྟ་བུར་བྱེད། བདེ་བ་ཐམས་ཅད་ནི་ཆགས་པའི་བདག་ཉིད་ཡིན་པའི་ཕྱིར། རྟེན་པ་བཀག་པ་ཉིད་མ་ཡིན་ནམ། དེ་བས་ན་བདག་ནི་བདེ་བ་ཐམས་ཅད་ལས་ཕྱིར་ཕྱོགས་པ་ཡིན་པའི་ཕྱིར་འདི་ཡང་ལེན་པར་མི་བྱེད་དེ། བདེ་བར་རྣམ་པར་རྨོངས་པའི་ཡིད། །གང་དང་གང་ལ་ཆགས་གྱུར་པ། །དེ་དང་དེ་བསྡོངས་སྟོང་གྱུར་དུ། །སྡུག་བསྔལ་ཉིད་དུ་གྱུར་ཅིང་ལྡང༌། །ཞེས་འཆད་པར་འགྱུར་བ་ཡིན་ནོ་ཞེ་ན། ཁྱོད་ཀྱིས་ཞེས་བྱ་བ་ལ་སོགས་པ་གསུངས་ཏེ། དགའ་བའི་བདེ་བ་ཐམས་ཅད་ནི་དགག་པ་མ་ཡིན་ཏེ། འོན་ཀྱང་ཁ་ན་མ་ཐོ་བ་དང་བཅས་པ་མི་དགེ་བའི་རྒྱུ་དེ་དག་དགག་པ་ཡིན་ནོ། །ཁྱོད་ཀྱིས་གཞན་གྱི་ཡོན་ཏན་ལ་བརྟེན་པའི་དགའ་བའི་བདེ་བ་ཁ་ན་མ་ཐོ་བ་མེད་པ་འདི་ནི་མི་དགེ་བའི་རྒྱུ་མ་ཡིན་ནོ། །དེའི་ཕྱིར་ན་བདེ་འབྱུང་སྟེ་འདི་ལ་བདེ་བ་འབྱུང་བ་ཡོད་པས་ཞེས་དེ་ལྟར་ཡིན་པས་སོ། །དེ་ཉིད་ཀྱི་ཕྱིར་ཡོན་ཏན་ལྡན་པ་རྣམས་ཀྱིས་སྣང་བ་སྟེ། བཅོམ་ལྡན་འདས་ཀྱིས་བསྟན་པའི་ཆོས་ཤེས་པ་རྣམས་ཀྱིས་སོ། །གཞན་ཡང་འདིའི་ཡོན་ཏན་གང་གཞན་སྡུད་པའི་མཆོག་ཀྱང་ཡིན་ཏེ། གཞན་གྱི་ཡོན་ཏན་རྣམས་ལ་དགའ་བས་འདི་ནི་ཡོན་ཏན་དག་ལ་ཕྲག་དོག་མེད་པ་ཡིན་ནོ་སྙམ་ནས་སེམས་ཅན་གཞན་ཡང་སྡུད་པར་འགྱུར་རོ། །དེ་བས་ན་འདིར་དགའ་བའི་བདེ་བ་བླང་བར་རིགས་པ་ཡིན་ནོ། །འོན་ཏེ་ཕ་རོལ་གྱི་ཡོན་ཏན་དག་ལ་བདག་མི་བཟོད་པ་ནི་གང་ཡང་མེད་དེ། །འོན་ཀྱང་བསྟོད་པ་བྱེད་པའི་བདེ་བ་དེ་བདག་གིས་བསྟན་པར་མི་ནུས་སོ་ཞེ་ན། འདིར། གཞན་ལ་ཞེས་བྱ་བ་ལ་སོགས་པ་གསུངས་ཏེ། གཞན་ལ་ནི་མ་སྟོད་པ་བྱེད་པའོ། །བདེ་འགྱུར་ཞེས་པ་ནི་དེ་ལྟ་བས་ན་དགོངས་པ་འདིས་ཁྱོད་གལ་ཏེ་གཞན་གྱི་ཡོན་ཏན་བསྟོད་པའི་དགའ་བ་ལས་བྱུང་
བའི་བདེ་བ་གང་ཡིན་པ་འདི་མི་འདོད་ན་དེའི་ཚེ་ཤིན་ཏུ་དོགས་པར་ལྷུང་བར་འགྱུར་བ་ཡིན་ནོ། །ཇི་ལྟར་ཞེ་ན། བྲན་ལ་གླ་རྔན་སྦྱིན་སོགས་སྤང༌། །གཞན་ཡང་ཁྱོད་བདག་རང་བདེ་བའི་རྒྱུ་མཚན་དུ་རང་གི་བྲན་ལ་སོགས་པ་ལ་བྲན་གྱི་གླ་རྔན་ལས་ཀྱི་རིན་སྦྱིན་པ་དང༌། དེ་བཞིན་དུ་ཕན་འདོགས་པ་ལ་ལེན་དུ་ཕན་འདོགས་པ་སྟེ། དེ་དག་ལ་སོགས་པ་སྤོང་བ་དེ། ཕྱིར་ཕྱོགས་པའི་ཕྱིར་གཞན་གྱི་བདེ་བ་ལ་སྡང་བ་ཅན་ལ་དེ་ཡང་མི་བྱ་བ་ཉིད་དུ་འགྱུར་རོ། །གང་གི་ཕྱིར་དེས་ཀྱང་དེ་ལ་བདེ་བ་ཉིད་དུ་བསྒྲུབ་པར་འགྱུར་ཏེ། དེ་ལྟ་བས་ན་མཐོང་བ་ནི་ཚེ་འདིའི་འབྲས་བུ་དང་མ་མཐོང་བ་ནི་འཇིག་རྟེན་ཕ་རོལ་གྱི་སྟེ་གཞན་གྱི་བདེ་བ་ཕུན་སུམ་ཚོགས་པ་ལ་མི་བཟོད་པའི་གཉི་ག་ཉམས་པར་འགྱུར་རོ། །གཞན་ཡང་འདི་ནི་ཁྱོད་ཀྱི་ལོག་པའི་ཕན་ཡིན་ནོ་ཞེས་བསྟན་པ། རང་གི་ཡོན་ཏན་ཞེས་བྱ་བ་ལ་སོགས་པ་གསུངས་ཏེ། གལ་ཏེ་འགའ་ཞིག་ཁྱོད་ལ་ཡོན་ཏན་རྗོད་པར་བྱེད་ན་ནི་དེའི་ཚེ་གཞན་དེ་ལ་མི་འདོད་ཀྱང་བདེ་བར་འདོད་ལ་ཇི་སྟེ་གཞན་གྱི་ཡོན་ཏན་གྱི་རྗེས་སུ་བསྔགས་པ་བྱེད་པ་ནི་དེའི་ཚེ་ཕྲག་དོག་གི་དྲི་མ་དང་ལྡན་པའི་ཡིད་ཀྱིས་རང་གི་བདེ་བ་ཡང་མི་འདོད་བྱེད། གཞན་གྱི་བདེ་བ་ལྟར་རེ་ཞིག་ཞོག་ཅིག་ཅེས་བྱ་བ་ནི་འང་གི་སྒྲའོ། །དེ་བས་ན་ཁྱོད་ཀྱི་ཡོན་ཏན་ཕུན་སུམ་ཚོགས་པ་ལ་ཕྲག་དོག་པ་ཉིད་ཡིན་ཏེ། སྟོད་པར་བྱེད་པ་པོའི་བདེ་བ་མི་བཟོད་པ་ནི་མ་ཡིན་ནོ། །གཞན་ཡང་དེ་ལྟར་བདེ་འགྱུར་ཞེས། །གལ་ཏེ་ཁྱོད་བདེ་བ་འདི་མི་འདོད་ཅེས་གང་གསུངས་པ་དེ་ལ་ཁྱད་པར་སུན་འབྱིན་པ། སེམས་ཅན་ཐམས་ཅད་ཅེས་བྱ་བ་ལ་སོགས་པ་གསུངས་ཏེ། ཁྱད་པར་དུ་བྱང་ཆུབ་ཏུ་སེམས་བསྐྱེད་ནས་ཕ་རོལ་གཞན་གྱི་བདེ་བ་ཕུན་སུམ་ཚོགས་པ་མི་བཟོད་པ་ཞེས་བྱ་བ་གང་ཡིན་པ་ནི་ཤིན་ཏུ་སྨད་པ་ཁོ་ན་ཡིན་ནོ། །གང་གི་ཕྱིར་བདག་གིས་སངས་རྒྱས་ཉིད་ཐོབ་ནས་ཁམས་གསུམ་པར་གཏོགས་པའི་སེམས་ཅན་ཐམས་ཅད་ལ་བདེ་བ་ཕུན་སུམ་ཚོགས་པ་མཐའ་དག་འབྱོར་པར་བྱའོ་སྙམ་དུ་ཡིད་ལ་བྱེད་པས། བྱང་ཆུབ་ཏུ་ནི་སེམས་བསྐྱེད་ནས་ཏེ། དེ་བསྐྱེད་ནས་སེམས་ཅན་ལ་ཇི་སྟེ་ཁྲོ་བར་བྱེད་དེ་དད་པར་བྱ་བའི་གནས་རང་གི་སེམས་མངོན་པར་དང་བས་བྱས་ནས་བདག་རང་གི་བདེ་
བ་ཐོབ་པ་རྣམས་ལ་ད་ཀོ་སྟེ། ད་ལྟ་ཅི་སྟེ་ཁྲོ་བར་བྱེད། དེ་བས་ན་བྱང་ཆུབ་སེམས་དཔས་གཞན་གྱི་བདེ་བ་ལ་ཕྱིར་ཕྱོགས་པ་དེ་ལྟ་བུ་མི་བྱའོ་སྙམ་དུ་དགོངས་པ་ཡིན་ནོ། །ཡང་བྱང་ཆུབ་ཏུ་སེམས་བསྐྱེད་པ་གང་ཞིག་བདག་གི་རྙེད་པ་དང་བཀུར་སྟི་ཕུན་སུམ་ཚོགས་པ་མཐོང་ནས་སེམས་ཕྲག་དོག་གིས་ཉོན་མོངས་པའི་མྱ་ངན་དེས་ཚིག་པ་དེས་སྤྱོ་བའི་དོན་དུ། འཇིག་རྟེན་གསུམ་ཞེས་བྱ་བ་ལ་སོགས་པ་གསུངས་སོ། །ཡང་ན་དེ་ལྟར་གྱུར་མོད་བདག་གིས་བདེ་བ་དེ་མི་བཟོད་པ་ནི་མ་ཡིན་ནོ། །འོན་ཀྱང་དེས་བརྗོད་པའི་ཡོན་ཏན་གཞན་གྱིས་ཐོས་པ་ན་ཡིད་དད་པས་དེ་དག་ལ་རྙེད་པ་དང་བཀུར་སྟི་འབུལ་བར་བྱེད་པ་མི་བཟོད་པ་ཡིན་ནོ་ཞེ་ན། འཇིག་རྟེན་གསུམ་མཆོད་ཅེས་བྱ་བ་ལ་སོགས་པ་གསུངས་ཏེ། འཇིག་རྟེན་གསུམ་ནི་འདོད་པ་དང༌། གཟུགས་དང༌། གཟུགས་མེད་པའི་མཚན་ཉིད་དམ། འཇིག་རྟེན་དུ་གྲགས་པའི་མཐོ་རིས་ལ་སོགས་པའི་རང་བཞིན་གྱི་འཇིག་རྟེན་གསུམ་སྟེ་དེ་དག་བསྡུས་པའོ། །དེ་ལ་མཆོད་པར་འོས་པས་ན་མཆོད་བྱ་སྟེ། རྗོད་པར་བྱ་བའོ། །འདིས་ནི་ཐམས་ཅད་ལས་ཕུལ་དུ་བྱུང་བ་ཉིད་དུ་བསྟན་པ་སྟེ། དེ་ལྟ་བུར་གྱུར་པའི་སངས་རྒྱས་ཉིད་དུ་དུའོ། །སེམས་ཅན་རྣམས་ནི་འདོད་ཅེ་ན་ཞེས་བྱ་བ་ལ་ལོ་ཞེས་བྱ་བ་འདིས་ནི་ཕྱིན་ཅི་ལོག་ཏུ་མཐོང་ནས་མ་མགུ་བར་སྟོན་པར་བསྙེན་བཀུར་ཞེས་བྱ་བ་ནི་ཉེ་བར་མཚོན་པ་སྟེ་རྙེད་པ་ཡང་ངོ༌། །ལྷག་མ་ནི་གོ་སླའོ། །རྙེད་པ་ལ་བསམས་ནས། གསོ་བྱ་ཞེས་བྱ་བ་ལ་སོགས་པ་གསུངས་ཏེ། ཁྱོད་ཀྱིས་གསོ་བར་བྱ་བ་ཕོངས་པའི་བུ་ལ་སོགས་པ་ཁྱོད་ཉིད་ཀྱིས་གསོ་བ་གང་ཡིན་པ་དེ་ཁྱོད་ཀྱིས་ནི་སྦྱིན་པར་བྱ་བ་སྟེ་དེས་ནི་ཁྱོད་ཀྱི་ཟད་པར་བྱས་པར་འགྱུར་རོ། །དེའི་ཕྱིར་ཁྱོད་ཀྱི་གཉེན་གྱིས་འཚོ་བ་སྟེ། ཁྱོད་ཀྱི་བཟའ་ཡིས་འཚོ་བ་གང་ཡིན་པ་སྟེ་རྣམ་པ་དེ་ལྟ་བུའི་སྐྱེས་བུས་རྙེད་གྱུར་ན་སྟེ། ཐོབ་པར་གྱུར་ནས་དགའ་བར་མི་འགྱུར་རམ་ཞེས་ཟུར་གྱིས་འདྲི་བའོ། །སླར་ཁྲོའམ་དགའ་བར་མི་བྱེད་དམ་ཞེས་བྱ་བའི་དོན་ཏོ། །དེ་ལྟར་སྐབས་ལ་ཡང་སྦྱར་ཏེ། གང་གི་ཕྱིར་སེམས་ཅན་ཐམས་ཅད་བདག་གིར་བཟུང་བ་དེའི་བདེ་བས་
བདེ་བ་ཉིད་དུ་རིགས་པ་ཡིན་ནོ། །འོན་ཏེ་དེ་དག་སངས་རྒྱས་ཉིད་དུ་བྱ་བར་བདག་གིས་དམ་བཅས་ཀྱི། བདེ་བ་གཞན་ལ་ནི་མ་ཡིན་ནོ་སྙམ་དུ་དོགས་པ་ལ། དེ་ཅི་ཞེས་བྱ་བ་ལ་སོགས་པ་གསུངས་ཏེ། དེ་དག་ཀྱང་ཡང་དག་པ་མ་ཡིན་ཏེ། གང་གི་ཕྱིར། བདག་གིས་དེ་རིང་སྐྱོབ་པ་ཐམས་ཅད་ཀྱི། །སྤྱན་སྔར་འགྲོ་བ་བདེ་གཤེགས་ཉིད་དང་ནི། །བར་དུ་བདེ་ལ་མགྲོན་དུ་བོས་ཟིན་གྱིས། །ཞེས་དམ་བཅས་པ་ཡིན་ནོ། །དེ་ལྟར་གྱུར་མོད་དེ་ལྟར་ན་བྱང་ཆུབ་ཏུ་སེམས་བསྐྱེད་པ་ནི་སེམས་ཅན་དེ་དག་བྱང་ཆུབ་སྟེ། སངས་རྒྱས་ཉིད་བྱ་བར་འདོད་ཀྱི། ཅི་སྟེ་གཞན་གྱི་འཇིག་རྟེན་པ་དང་འཇིག་རྟེན་ལས་འདས་པའི་དོན་གྱི་རྣམ་པ་མི་འདོད་པ་ཡིན་ནམ་ཞེ་ན། ཇི་སྙེ་དེ་ལྟར་མི་འདོད་ན་དེའི་ཚེ་བྱང་ཆུབ་ཀྱི་སེམས་ཀྱང་ཉམས་པར་འགྱུར་རོ་ཞེས་གསུངས་པ། དེ་ལ་བྱང་ཆུབ་སེམས་ནི་རང་ལ་ཡོད་དེ་བྱང་ཆུབ་སེམས་དཔའ་ལོག་པར་དམ་བཅས་པ་ལའོ། །སུ་ལ་ཞེ་ན། གང་ཞིག་གཞན་འབྱོར་ཁྲོ་དེ་ལ། །འབྱོར་པ་ངན་ངོན་རྙེད་པ་དང་བཀུར་སྟི་བྱང་བ་ལའོ། །དེ་ལྟར་གནོད་བྱེད་པ་ནི་བྱང་ཆུབ་སེམས་དཔའི་དགེ་བའི་ལས་ལྡོག་པའི་རྒྱུ་ཡིན་ནོ། །གཞན་ཡང་གཞན་ལ་རྙེད་པ་དང་བཀུར་སྟི་ཕུན་སུམ་ཚོགས་པ་མེད་ན་ཡང་དངོས་པོ་དེ་ཁྱེད་ལ་ནི་མི་འབྱུང་ན། དེ་ཅིའི་ཕྱིར་རྒྱུ་མེད་པར་དེ་ལ་སྡང་བས་བདག་ཉིད་འཛོམས་པའི་དོན་དུ་འབད་པར་བྱེད་ཅེས་བསྟན་པ། གལ་ཏེ་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཞིག་ན་ཁྱོད་མི་བཟོད་པའི་ཡུལ་དུ་གྱུར་པའི་སེམས་ཅན་དེས་སྟེན་པར་བྱེད་པའི་དངོས་པོ་དེ་མ་ཐོབ་པ་དེ་ལྟར་ན་ཡང་སྦྱིན་བདག་ཁྱིམ་དུ་གནས་པར་གྱུར་པ་དེ་ལས་ཁྱོད་ལ་ཅི་ཞིག་བྱུང་བར་གྱུར། རྣམ་པ་ཀུན་ཏུའང་དེས་རྙིད་པའང༌། ཁྱིམ་ན་གནས་པའང་རུང་སྟེ། དངོས་པོ་དེ་ཁྱོད་ལ་ཡོད་པ་མ་ཡིན་ནོ། །དེ་བས་ན་བྱིན་དང་མ་བྱིན་རུང་དེས་ཅི་བྱ། ཁྱོད་ལ་དགོས་པ་ཅུང་ཟད་ཀྱང་མེད་དོ། །དེའི་ཕྱིར་ན་དེ་ལ་ནི་མཁས་པས་བཏང་སྙོམས་སུ་བྱ་བར་རིགས་སོ། །གཞན་ཡང་རེ་ཞིག་འདི་ལྟར་ཡང་བརྟག་པར་བྱའོ་ཞེས་བསྟན་པ། བསོད་ནམས་དང་ནི་ཞེས་བྱ་བ་ལ་སོགས་པ་གསུངས་ཏེ། སྦྱིན་པ་བྱེད་པ་དང་སྦྱིན་བདག་ལ་སོགས་པས་མངོན་པར་དད་པས་རྙེད་པ་དང་བཀུར་སྟི་
རྣམས་ཀྱིས་གང་ཞིག་ལ་མཆོད་པ་བྱས་པའི་བསོད་ནམས་དེ་ཅིའི་ཕྱིར་དོར་བར་བྱ། གང་གི་དབང་གིས་དེ་ལ་རྙེད་པ་དང་བཀུར་སྟི་བྱུང་བར་གྱུར་པ་སྔོན་གྱི་ལས་ཀྱིས་བྱས་པའི་རྣམ་པར་སྨིན་པ་མངོན་པར་ཕྱོགས་པ་དང༌། དེས་ཏེ་རབ་ཏུ་དང་བ་དང༌། སྦྱིན་པ་པོ་དང་སྦྱིན་བདག་དོར་རམ། འོན་ཏེ་གང་ལ་བརྟེན་ནས་འདི་དག་གི་དད་པ་སྐྱེ་བ་དེ་འགྲོ་བ་འདི་དག་བདག་ལམ་དད་པར་གྱུར་ཅིག་ཅེས་རང་གི་ཡོན་ཏན་དོར་བའམ། ཇི་སྟེ་རྙེད་པར་འགྱུར་བ་ཡང་དེ་དག་ལས་མི་བླང་བར་བྱ་བའམ། རྣམ་པ་གང་གིས་འདིར་ཁྱོད་མགུ་བར་མི་འགྱུར་བར་སྨྲོས་ཤིག །དེ་ལ་བསོད་ནམས་ལ་སོགས་པ་ནི་ལྡོག་པར་མི་ནུས་པའི་ཕྱིར་དང༌། རྙེད་པར་འགྱུར་བ་འཛིན་པ་ལ་ཡང་ཀུན་ཏུ་དེ་ཁྱོད་ལ་མེད་ན་ཞེས་བྱ་བ་ལ་སོགས་པ་གནོད་པ་གང་གསུངས་པའི་ཕྱིར། མགུ་བའི་རྒྱུ་ཅུང་ཟད་ཀྱང་མེད་དོ། །ཇི་སྟེ་ཡང་གཞན་ནི་རྙེད་པ་དང་བཀུར་སྟི་ཕུན་སུམ་ཚོགས་པ་ཡོད་ལ། འོན་ཏེ་བདག་ལ་ནི་མེད་པ་དེའི་ཚེ་གཞན་ལའང་བྱུང་བར་མ་གྱུར་ཅིག་སྙམ་སྟེ་དེ་དག་བདག་གི་རྒྱུ་ཡིན་ནོ་ཞེ་ན། དེའི་ཕྱིར་ཁྱོད་ནི་རང་གིས་ཞེས་བྱ་བ་ལ་སོགས་པ་གསུངས་ཏེ། གོ་སླ་སྟེ་སྡུག་བསྔལ་གང་ཅི་ཡང་རུང་བ་དེ་དག་ཐམས་ཅད་ནི་སྡིག་པ་ལས་བྱུང་བ་ཡིན་ལ། མངོན་པར་འདོད་པའི་གེགས་ཀྱང་སྡུག་བསྔལ་ཡིན་ཏེ། གང་འདོད་པ་བཙལ་ཏེ་མ་རྙེད་པ་དེ་ཡང་སྡུག་བསྔལ་བའི་ཞེས་གསུངས་པའི་ཕྱིར་རོ། །གང། འདོད་པ་རྣམས་དང་བྲལ་བ་ནི། །སྡིག་པ་སྤྱོད་ལ་འབྱུང་བར་འགྱུར། །ཞེས་འཆད་པར་འགྱུར་བའོ། །གང་ཅི་ཡང་རུང་བ་དེ་དག་ཐམས་ཅད་ནི་བསོད་ནམས་ལས་བྱུང་བ་ཡིན་ནོ་ཞེས་དེ་ལྟར་བྱས་ནས་བདེ་བ་འདོད་པ་རྣམས་དགེ་བའི་ལས་ལ་བརྩོན་པར་བྱའོ། །གང། བསོད་ནམས་བྱེད་པ་བདེ་འདོད་པ། །ཞེས་བྱ་བ་ལ་སོགས་པ་འཆད་པར་འགྱུར་བའི་ཕྱིར། ཇི་ལྟར་ན་བསོད་ནམས་བྱས་པ་དང་ལྷན་ཅིག་འགྲན་པར་རིགས། ལེགས་པར་བྱས་པ་བྱེད་པ་ཉིད་ལ་བདེ་བ་ཉིད་མངོན་པར་འདོད་པ་ནི་འགྲན་པར་རིགས་སོ་ཞེས་བྱ་བའི་དོན་ཏོ། །གཞན་ཡང་འདི་འདྲི་བར་བྱ་སྟེ། གལ་ཏེ་ཁྱོད་ཀྱི་དགྲ་བོ་ཞེ་སྡང་གི་ཡུལ་དུ་གྱུར་པ་ལ་
ཁྱོད་འདོད་པ་ཙམ་གྱིས་མི་དགའ་བ་མི་འདོད་པ་བྱུང་ཞིང་སྐྱེས་ན་རེ་ཞིག་དེ་ལ་མི་འདོང་པ་བྱུང་ཡང་གྱུར་མོད། ཁྱོད་ལ་དེ་ཙམ་ཞིག་གིས་ཅིར་འགྱུར། ཡང་གཞན་ལ་གྱུར་རུང་མ་གྱུར་རུང་བདག་གི་ཅུང་ཟད་དེ་ཙམ་ཞིག་གིས་དགོས་པ་ཡིན་ཞེས་གཞན་གྱི་བསམ་པའི་དོགས་པ་བསུ་བ། ཁྱོད་ཀྱིས་ཞེས་བྱ་བ་ལ་སོགས་པ་ལ། ཁྱོད་ཀྱིས་ཡིད་སྨོན་ནི་འདོད་པ་སྟེ་མངོན་པར་འདོད་པ་ཞེས་བྱ་བའི་དོན་ཏོ། །དེ་ཙམ་གྱིས་རྒྱུར་མི་འགྱུར་ན་འདི་ལ་རྒྱུ་ཡོད་པ་མ་ཡིན་པ་ནི་རྒྱུ་མེད་པའི་དོན་ཏེ། མི་འགལ་བའི་མི་འབྱུང་ངོ༌། །དེ་ལྟར་གྱུར་དུ་ཟིན་མོད་ཅེས་ཁས་བླངས་ནས་ཀྱང་བརྗོད་པར་བྱ་བ་ཡིན་པས་ན། ཇི་སྟེ་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཞིག་ན་ཁྱོད་ཀྱི་འདོད་པའི་དགྲ་ལ་མི་དགའ་བ་བསྒྲུབ་ཅིང་རྫོགས་ན་དེ་ལྟ་ན་ཡང་དེ་ལ་སྡུག་བསྔལ་འབྱུང་བ་ལ་ཁྱོད་བདེར་ཅི་ཡོད། ཅུང་ཟད་ཀྱང་མེད་དེ་འདོད་པ་འདི་ནི་དགོས་པ་མེད་པ་ཡིན་ནོ་ཞེས་བྱ་བའི་དོན་ཏོ། །དེ་སྡུག་བསྔལ་བས་བདག་དགའ་བ་གང་ཡིན་པ་འདི་ཉིད་དགོས་པ་ཡིན་ནོ་ཞེ་ན། གལ་ཏེ་ཞེས་བྱ་བ་ལ་སོགས་པ་གསུངས་ཏེ། དེ་ལྟར་ཡང་ཕ་རོལ་སྡུག་བསྔལ་བ་ལ་དགའ་བ་དེ་གལ་ཏེ་འཚོངས་པར་དང་དགོས་པ་ཡིན་ནོ་ཞེ་ན། དེའི་ཚེ་དེ་ལས་གཞན་ཕུང་བ་ཅི་ཡོད། ཅི་ཞེས་བྱ་བ་ནི་ཁྱད་པར་ཏེ། འདི་ཉིད་ནི་ཕུང་བ་ཆེན་པོའོ་ཞེས་བྱ་བའི་དོན་ཏོ། །ཇི་ལྟར་ན་འདི་དོན་མེད་པ་ཡིན་ཞེ་ན། ཉོན་མོངས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་འདི་ནི་སྟེ་རྣམ་པ་འདི་ལྟ་བུ་གཞན་ཕུང་ན་རུང་སྙམ་པའི་སེམས་མཆིལ་པ་མི་བཟད་གཟེ་བ་ཆེར་འཇིགས་པར་བྱེད་པའོ། །ཇི་ལྟ་བུར་གྱུར་པ་ཞིག་ཡིན་ཞེ་ན། ཉོན་མོངས་ཉ་བས་བཏབ་པའི་སྟེ། ཉོན་མོངས་པ་ཉིད་ཉ་བ་བཞིན་དུ་སྤྱོད་པ་ཡང་ཡིན་པས་ཉ་བ་སྟེ་དེས་བཏབ་པ་ནི་བཏབ་པའོ། །ཉོན་མོངས་ཉ་བ་གང་གིས་ཉ་བ་ཉ་ལ་བྱ་བ་བཞིན་དུ་དམྱལ་བའི་སྲུང་མ་གཤིན་རྗེའི་སྐྱེས་བུས་ཁྱོད་བཟུང་ནས་བུམ་པར་ནི་སེམས་ཅན་དམྱལ་བའི་བྱེ་བྲག་ཏུ་འཚེད་དེས་ཏེ་སྐོལ་ཞིང་གདུང་བར་བྱེད་དོ། །དེ་ལྟ་བས་ན་འདི་ལ་འདོད་པར་མི་བྱའོ་སྙམ་དུ་དགོངས་པ་ཡིན་ནོ། །གང་བསྟོད་པ་ལ་སོགས་པའི་གེགས་བྱེད་པས་སྡུག་
བསྔལ་སྐྱེ་བ་དེ་ཡང་མ་བརྟགས་པ་ཁོ་ན་ཡིན་ནོ་ཞེས་ཉེ་བར་བསྟན་པ། བསྟོད་དང་གྲགས་པ་ཞེས་བྱ་བ་ལ་སོགས་པ་གསུངས་ཏེ། དོན་རྣམ་པ་ལྔ་ནི་མཁས་པ་དག་སྐྱེས་བུའི་དོན་དུ་འདོད་པ་ཡིན་ཏེ། འདི་ལྟ་སྟེ། བསོད་ནམས་དང་ཚེ་འཕེལ་བ་དང༌། སྟོབས་འཕེལ་བ་དང༌། ནད་མེད་པ་འཐོབ་པ་དང༌། ལུས་བདེ་བ་འཐོབ་པ་དང༌། བསྟོད་པ་ལ་སོགས་པ་ནི་དེ་དག་འགའ་ལ་ཡང་མི་མཁོའི། རང་གི་དོན་དུ་འགྱུར་ན་ནི་འདི་དག་འགྱུར་ལ་རང་དོན་ཤེས་པ་ནི་ཤེས་རབ་དང་ལྡན་པ་སྟེ། གཞན་ལ་ནི་གཞན་དུའང་འགྱུར་རོ་ཞེས་བདག་ཉིད་ལ་སྤྱོད་དེ། གལ་ཏེ་རང་གི་དོན་ཤེས་པ་ཡིན་ན་ཡང་དེ་ལྟ་མོད་ཀྱི་རང་གི་དོན་ཤེས་པའི་ཐབས་མ་ཡིན་པའི་ཕྱིར་ལོགས་ཤིག་ཏུ་མ་བསྟན་ཏོ། །བློ་ལྡན་ཞེས་བྱ་བ་ནི་སྐབས་དེ་དང་འབྲེལ་བའི་ཕྱིར་དེ་ཡང་བསྟན་པ་ཡིན་ནོ། །འོ་ན་ཡིད་བདེ་བ་ཡོད་པ་མ་ཡིན་ནམ། །དེའི་ཕྱིར་ངེས་པར་གཟུང་བར་མི་རིགས་སོ་ཞེ་ན། འདིར་རྒྱན་སོགས་ཞེས་བྱ་བ་ལ་སོགས་པ་གསུངས་ཏེ། ཡིད་བདེ་བ་ནི་སེམས་བདེ་བ་སྟེ་དེ་ཙམ་ཞིག་འདོད་ན་ནི་ཆང་དང་རྒྱན་པོ་དང་སྨད་འཚོང་མ་དང་གཞན་གྱི་བུད་མེད་ལ་སོགས་པ་བསྟེན་པར་བྱ་དགོས་པར་འགྱུར་རོ། །དམ་པའི་ཆོས་ལ་སོགས་པ་ཐོས་པ་ལས་ཡིད་བདེ་བ་གང་ཡིན་པ་དེ་ནི་བསོད་ནམས་སྨོས་པས་བསྡུས་པ་ཡིན་པས་ན་ཉེས་པ་མེད་དོ། །དེ་ལྟ་བས་ན་ཡིད་བདེ་བའི་རྒྱུས་བསྟོད་པ་ལ་སོགས་པ་བྱིས་པའི་སྐྱེ་བོ་དགའ་བར་བྱས་པ་ནི་བླང་བར་བྱ་བ་ཉིད་མ་ཡིན་ནོ། །དེ་ལྟ་ན་ཡང་བསྟོད་པ་ལ་སོགས་པ་ནི་བྱིས་པ་སྐྱེ་བོའི་ཚིག་ཡིན་ནོ་ཞེས་གྲགས་པའི་དོན་དུ་ཞེས་བྱ་བ་ལ་སོགས་པ་གསུངས་ཏེ། སྐྱེས་བུ་རྨོངས་པ་འགའ་ཞིག་ཡོན་ཏན་དེ་འདྲ་བ་རང་ལས་ཤིན་ཏུ་རིང་བ་གནས་ན་ཡང་བརྒྱ་བྱིན་ལ་སོགས་པའི་ཡོན་ཏན་གྱིས་སྐྱེ་བོ་སློང་མོ་གཞན་དག་གིས་སྟོད་པར་བྱེད་པ་ནི། མིག་གདངས་པའི་བཞིན་གྱིས་གྲགས་པ་དོན་དུ་གཉེར་བས་གླང་པོ་ཆེ་དང་རྟ་ལ་སོགས་པའི་ནོར་རྩྭ་བཞིན་དུ་སྦྱིན་པར་བྱེད་དོ། །དེ་བཞིན་དུ་ཡོན་ཏན་དེ་དག་དང་ལྡན་པར་ཡིད་ལ་བྱས་པས་བདག་བརྒྱ་བྱིན་ལྟར་དགྲ་ལས་རྣམ་པར་རྒྱལ་བ་ལས་བྱུང་བའི་བདག་གིས་གྲགས་པ་འགྲོ་བར་རྒྱ་ཆེར་འབྱུང་
བར་འགྱུར་རོ་སྙམ་དུ་མངོན་པར་ཞེན་པས་བཟོད་པར་དཀའ་བའི་གཡུལ་དུ་ཆས་ཏེ་གསོད་པར་བྱེད་དོ། །འདི་ལ་དོན་དམ་པར་དགོས་པ་ཅུང་ཟད་ཀྱང་མེད་དེ། གཞན་དུ་ན་ལོག་པའི་རྣམ་པར་རྟོག་པ་ཡིན་པའི་ཕྱིར་རོ་ཞེས་བསྟན་པ། ཚིག་འབྲུ་རྣམས་ཀྱིས་ཞེས་བྱ་བ་ལ་སོགས་པ་གསུངས་ཏེ། བསྟོད་པ་ལ་སོགས་པ་རྗོད་པར་བྱེད་པའི་ཡིག་འབྲུ་སྟེ་ཡི་གེ་རྣམས་ཀྱིས་ཅི་བཟའ་ཞིང་མྱུར་དུ་རུང་ངམ། གྲགས་པའི་དོན་དུ་ཤི་བར་གྱུར་ན་གྲགས་པ་ཐོས་པ་ལས་བྱུང་བའི་བདེ་བ་དེ་ཀོ་སུ་ལ་བདེ། དེ་ལྟ་བས་ན་དེ་དག་བྱིས་པའི་རྩེད་མོ་དང་མཚུངས་སོ་ཞེས་ཉེ་བར་བསྟན་པ། བྱེ་མའི་ཞེས་བྱ་བ་ལ་སོགས་པ་གསུངས་ཏེ། བྱིས་པ་ཁ་ཅིག་རྡུལ་ལས་བྱས་པའི་ཁང་བུས་ཤིན་ཏུ་དགའ་ཞིང་ཡོངས་སུ་རྩེ་བ་ན་འགའ་ཞིག་གིས་དེ་བཤིག་པ་དང༌། སྡུག་བསྔལ་ཆེན་པོས་ཟིན་ཏེ། མཆོག་ཏུ་ཉམ་ཐག་པར་གཟིར་བས་ངའི་ཁང་པ་བཤིག་གོ་ཞེས་སྙིང་རྗེ་རྗེར་ཆོ་ངེས་འདེབས་པའོ། །དཔེ་དེ་ཉིད་ལྟར་འདིར་ཡང་གསུངས་པ། དེ་བཞིན་ཞེས་བྱ་བ་ལ་དེ་བཞིན་དུ་བསྟོད་པ་དང་གྲགས་པ་ཉམས་ན་སྟེ་རྣམ་པར་བཅོམ་ན། རང་གི་སེམས་ནི་སྡུག་བསྔལ་ཞུགས་པས་བྱིས་པ་བཞིན་སྣང་སྟེ། རྣམ་པར་དཔྱད་ན་འདིར་ཡང་བདག་གི་དངོས་པོར་གྱུར་པ་སུས་ཀྱང་བཤིག་པ་མེད་དོ་ཞེས་བརྟག་པར་བྱའོ། །ཡང་གཞན་དུ་དཔྱད་ན་འདི་ནི་བྱིས་པའི་ཚིག་ཡིན་ནོ་ཞེས་ཚིགས་སུ་བཅད་པ་བཞིན་གསུངས་པ། རེ་ཞིག་ཅེས་བྱ་བ་ལ་སོགས་པ་ཡིན་ཏེ། སྒྲ་ནི་རྗོད་པར་བྱེད་པའི་བདག་ཉིད་དེ་ཕྱི་རོལ་གྱི་དོན་ཡིན་པའི་ཕྱིར་སེམས་མེད་ཅིང་སེམས་མེད་པ་སྟེ་དེའི་དངོས་པོ་ནི་དེ་ཡིན་པའི་ཕྱིར་རོ། །སྒྲ་དེ་བདག་ལ་བསྟོད་སེམས་ཏེ་བདག་གི་བསྔགས་པ་བརྗོད་པའི་བསམ་པ་ཡོད་མི་སྲིད་དེ་དེ་མི་འབྱུང་ངོ༌། །དེ་ཇི་ལྟར་ན་ཡིད་བདེ་བར་འགྱུར་ཞེ་ན། བདག་ལ་གཞན་ཞེས་བྱ་བ་གསུངས་ཏེ། སྐྱེས་སུ་ཕ་རོལ་སེམས་པའི་བདག་ཉིད་ཅན་ནོ། །གྲག་ཅེས་བྱ་བ་ནི་འདི་ཡང་དོན་མེད་པ་ཡིན་ནོ་ཞེས་མི་འདོད་པ་སྟོན་པར་བྱེད་པའོ། །བདག་ལ་དགའ་བ་ནི་མངོན་པར་འདོད་པའོ། །དེ་ནི་སྟེ་བསམས་པ་དེ་དགའ་བའི་རྒྱུ་ཡིན་གྲང་ན་དེ་ལ་ཡང་འབྲེལ་པ་མེད་པའི་ཕྱིར་བྱིས་པའི་སྤྱོད་པ་ཁོ་ནར་
ཟད་ཅེས་སྦྱར་རོ། །འབྲེལ་པ་མེད་པ་ཉིད་བསྟན་པ་གཞན་ནམ་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སེམས་ཅན་གཞན་ལའམ། བདག་ལ་དགའ་བ་གཞན་གྱི་རྒྱུད་ལ་ཡོད་པས་ཅི་ཞིག་འོངས་ཏེ། བདག་ལ་ཕན་པ་ཅུང་ཟད་ཀྱང་མེད་དོ། །ཅིའི་ཕྱིར་ཞེ་ན། དེ་ཉིད་ཀྱིས་ཏེ་དེའི་ཕྱིར་རོ། །བདེ་བ་གང་ཡིན་པ་ནི་བསྟོད་པ་བྱེད་པ་དེའི་དགའ་བ་ཡིན་གྱི་གཞན་གྱི་ནི་མ་ཡིན་ནོ། །དེ་བས་ན་ཤས་ནི་གཞན་གྱི་རྒྱུད་ལ་ཡོད་པའི་དགའ་བ་དེ་དེ་ལས་ཅུང་ཟད་ཙམ་སྟེ་བདག་གིས་མི་འཐོབ་བོ། །དེ་ལྟ་ཡིན་མོད་བྱང་ཆུབ་སེམས་དཔའ་རྣམས་ནི་གཞན་བདེ་བས་བདེ་བར་གྱུར་པ་ཡིན་ན་དེ་ཅིའི་ཕྱིར་དེ་ལ་ཆ་ཤས་མི་འཐོབ་ཅེ་ན། འདིར་བདེ་བ་ཡིས་ཞེས་བྱ་བ་ལ་སོགས་པ་གསུངས་ཏེ། གལ་ཏེ་ཕ་རོལ་བདེ་བས་བདེ་བ་དང་ལྡན་པར་འགྱུར་ན། དེའི་ཚེ་ཐམས་ཅད་ལའང་སྟེ་གཞན་དགའ་བས་བདེ་བར་གྱུར་པ་ལ་ཡང་དེ་བཞིན་དུ་བྱ་དགོས་ན། ཅིའི་ཕྱིར་བདག་ལ་གཞན་མངོན་པར་དང་བས་ནི་གཞན་ལ་སླར་དགའ་ཞིང་གཞན་ལ་དད་པས་བདེ་བར་གྱུར་པའི་སེམས་ཅན་ལ་བདག་བདེ་བ་མ་ཡིན། །དེ་ལྟ་བས་ན་དེས་ནི་ཚིག་ཙམ་ཡིན་གྱི་དོན་དམ་པ་ནི་མ་ཡིན་ནོ་ཞེས་བསྟན་པར་བྱ་བའི་ཕྱིར། དེ་བས་ཞེས་བྱ་བ་ལ་སོགས་པ་གསུངས་ཏེ། དེ་ལས་རྒྱུ་མཚན་གཞན་མེད་པའི་ཕྱིར་རོ། །བདག་ལ་བསྟོད་དོ་ཞེས་དེ་ལྟར་རྣམ་པར་རྟོག་པས་རང་ལ་དགའ་བ་སྐྱེ་བར་འགྱུར་ཞིང་གཞན་བདེ་བས་བདེ་བར་མི་འགྱུར་བའི་ཕྱིར་རོ། །དེ་ལ་ཡང་སྟེ་དེ་གཞན་ལ་དགའ་བས་བདེ་བར་མི་འགྱུར་བ་འབའ་ཞིག་ཏུ་མ་ཟད་ཀྱི། བདག་ཉིད་ཀྱང་དེ་ལྟར་བསྟན་པའི་རིམ་པས་མི་འཐད་ཅིང་འབྲེལ་པ་མེད་པས་དེ་དག་གི་ནི་བྱིས་པའི་རྩེད་མོ་འབའ་ཞིག་ཏུ་ཟད་དོ། །གཞན་ཡང་བསྟོད་འདོད་པ་ལ་སོགས་པས་ནི་བདག་ལ་གོད་པ་ཉིད་བསྒྲུབ་པ་ཡིན་ནོ་ཞེས་ཉེ་བར་བསྟན་པ་བསྟོད་སོགས་ཞེས་བྱ་བ་ལ་སོགས་པ་གསུངས་ཏེ། བསྟོད་པ་ལ་སོགས་པ་འདི་དག་ནི་བདག་གི་ལེགས་པ་སྟེ་དགེ་བའོ། །ཡང་ན་དགེ་བ་ནི་དགེ་བའི་ཕྱོགས་ཡོངས་སུ་སྐྱོང་བའོ། །དེ་བཞིན་དུ་སྐྱོ་བ་ནི་འཁོར་བའི་སྡུག་བསྔལ་ལ་སྐྱོ་བ་སྟེ། འཇིག་པར་བྱེད་པ་ནི་འཇོམས་པར་བྱེད་པའོ། །
དེ་དག་ཙམ་དུ་མ་ཟད་ཀྱི་འོན་ཀྱང་ཡོན་ཏན་ལྡན་ལ་ཕྲག་དོག་དང་སྟེ་བདག་གི་ཡོན་ཏན་ལྷག་པར་བྱའོ་སྙམ་པ་དེས་གཞན་གྱི་ཡོན་ཏན་སྦེད་པའི་ཕྱིར་རམ། དེའི་ཡོན་ཏན་ལ་མི་བཟོད་པའི་ཕྱིར་རོ། །ཕུན་སུམ་ཚོགས་པ་ནི་རྙེད་པ་དང་བཀུར་སྟི་ལ་སོགས་པའི་ངོ་བོའོ། །ཁྲོ་བར་བྱེད་པ་ནི་དེ་དག་ལ་མི་བཟོད་པར་བྱེད་པའོ། །བདག་ཉིད་ཁོ་ན་ཡོན་ཏན་ལྷག་པ་དང༌། བདག་ཁོ་ན་ལ་ཕུན་སུམ་ཚོགས་པ་ཐམས་ཅད་རིགས་ཀྱི་གཞན་དག་ལ་ནི་མ་ཡིན་ནོ་སྙམ་ནས་སོ། །གང་གི་ཕྱིར་བསྟོད་པ་ལ་སོགས་པ་ལ་ཉེས་པ་དེ་དག་འབྱུང་བ་དེ་ལྟ་བས་ན་བསྟོད་ལ་སོགས་གཞོམ་ཕྱིར་ཏེ། དགག་པར་བྱ་བའི་ཕྱིར་སེམས་ཅན་གང་དག་ཉེ་བར་གནས་པ་སྟེ་འབད་པར་བྱེད་པའོ། །ངན་སོང་དུ་ལྷུང་བ་ནི་སེམས་ཅན་དམྱལ་བ་ལ་སོགས་པར་ལྟུང་བའོ། །དེ་ལས་བདག་ནི་བསྲུང་བའི་ཕྱིར་ཏེ་བསྐྱབ་པའི་དོན་དུ་སྟེ། བསྲུང་བར་བྱ་བའི་རྒྱུ་མཚན་དུ་ཞུགས་ཤིང་བརྩོན་པར་བྱེད་པ་མིན་ནམ། དེའི་ཕྱིར་དེ་དག་ནི་དགེ་བའི་བཤེས་གཉེན་ཡིན་ཏེ་གནོད་པ་བྱེད་པ་མ་ཡིན་པས་རྙེད་པ་ལ་སོགས་པའི་གེགས་བྱེད་པ་ལ། རྣམ་པ་ཐམས་ཅད་དུ་བདག་ཁོང་ཁྲོ་བའི་སེམས་སུ་མི་རིགས་སོ་ཞེས་བསྟན་པར་བྱ་བའི་ཕྱིར་བདག་ནི་གྲོལ་བ་ཞེས་བྱ་བ་ལ་སོགས་པ་གསུངས་ཏེ། རྣམ་པར་གྲོལ་བར་འདོད་པ་ལ་ནི་རྙེད་པ་དང་བཀུར་སྟི་རྣམས་འཆིང་བ་དང་འདྲ་སྟེ། ཆགས་པའི་གནས་ཡིན་པའི་ཕྱིར་རོ། །མི་དགོས་པ་ནི་ཐར་པའི་འདོད་པ་ལ་འཆིང་བ་མི་རིགས་པའོ། །བདག་བཅིངས་པ་ལས་འཁོར་བ་སྡུག་བསྔལ་གྱི་མཚན་ཉིད་དམ། རྙེད་པ་ལ་སོགས་པའི་ངོ་བོ་ལས་དགྲ་བོ་མངོན་པར་འདོད་པས་དགེ་བའི་བཤེས་གཉེན་གྱི་བྱ་བ་བྱེད་པས་གྲོལ་བར་བྱེད་པ་སྟེ་བྲལ་བར་བྱེད་པའོ། །དེ་དག་སྟེ་མཆོག་ཏུ་ཕན་འདོགས་པ་དགའ་བའི་གནས་དག་ལ་བདག་ནི་ཇི་ལྟར་ཁྲོ་སྟེ་མི་རིགས་སོ་སྙམ་དུ་དགོངས་པ་ཡིན་ནོ། །དེ་ཇི་ལྟར་མི་རིགས་ཤེ་ན། བདག་ནི་ཞེས་བྱ་བ་ལ་སོགས་པ་གསུངས་ཏེ། རྙེད་པ་དང་བཀུར་སྟི་ལ་མངོན་པར་ཞེན་པར་གྱུར་པས་ཏེ། འཁོར་བའི་སྡུག་བསྔལ་ལས་གྲོལ་བར་འདོད་པ་ལ། སྐྱེས་བུ་དམ་པའི་བྱེ་བྲག་གང་ཞིག་སྒོ་འཕར་ཉིད་དེ་སྒོ་གླེགས་ཉིད་དུ་གྱུར་པ་སྟེ་སོན་པའོ། །གང་ལས་ཤེ་ན། སངས་རྒྱས་
རྣམས་ཀྱི་བྱིན་རླབས་མཐུ་ཆེན་པོ་བཞིན་དུ་སྟེ། དེ་ལ་བདག་ནི་ཇི་ལྟར་ཁྲོའོ། །དགེ་བ་འཇོམས་པར་བྱེད་པ་རྣམས་ལ་ཡང་སྡང་བ་བཟློག་པར་བྱ་བ་གསུངས་པ། འདི་ནི་བསོད་ནམས་ཀྱི་གེགས་བྱེད་དོ་ཞེས་བྱ་བ་ལ་སོགས་པ་སྟེ། འདིས་ནི་དགེ་བའི་གེགས་བྱས་སོ་ཞེས་དེ་ལྟར་ཡིད་ལ་བཞག་ལ། འདིར་བསོད་ནམས་ཀྱི་གེགས་བྱེད་པ་རྣམས་ལ་སྡང་བར་རིགས་པ་མིན་ཏེ། ཅིའི་ཕྱིར་ཞེ་ན། གང་གི་ཕྱིར་བཟོད་པ་སྟེ་སྲོན་པ་དང་མཚུངས་ཤིང་མཉམ་པའི་དཀའ་ཐུབ་ནི་ལེགས་པར་སྤྱོད་པ་ཡོད་པ་མ་ཡིན་ན་སྟེ། དགེ་བའི་ལས་ཐམས་ཅད་ཀྱི་རྒྱུ་ཡིན་པའི་ཕྱིར་ཏེ། བཟོད་པ་ལྟ་བུའི་དཀའ་ཐུབ་མེད། །ཅེས་གསུངས་པའི་ཕྱིར་རོ། །དེ་ལ་སྟེ་འབད་རྩོལ་འདི་ཉིད་ལ་གནས་ཤིང་བསྒྲུབ་པ་མ་ཡིན་ནམ། བསོད་ནམས་ཀྱི་གེགས་བྱེད་པ་ལྟ་བུའི་དོར་གྱིས་བསོད་ནམས་ཀྱི་རྒྱུ་ཉེ་བར་གནས་པ་དེ་ལ་ཁྲོ་ན་བདག་ཉིད་ཀྱིས་བསོད་ནམས་ཀྱི་གེགས་བྱས་པར་འགྱུར་རོ་ཞེས་གསུངས་པ། གལ་ཏེ་བདག་ནི་ཞེས་བྱ་བ་ལ་སོགས་པ་ཡིན་ཏེ། ཇི་སྟེ་གལ་ཏེ་བདག་ཉིད་ཀྱི་སྐྱོན་མི་བཟོད་པའི་བདག་ཉིད་ཀྱིས་གེགས་བྱེད་པ་འདི་ལ་བཟོད་ཅིང་སྲོན་པར་མི་བྱེད་ན་དེའི་ཚེ་བདག་ཉིད་ཀྱིས་ཏེ་གཞན་གྱིས་ནི་མ་ཡིན་པར་བསོད་ནམས་འདི་ལ་གེགས་བྱས་པར་ཟད་དོ། །ཅིའི་ཕྱིར་ཞེ་ན། བསོད་ནམས་ཀྱི་རྒྱུ་ལ་བསོད་ནམས་ཀྱི་གེགས་བྱེད་པ་ཉིད་དུ་མངོན་པར་འདོད་པས་ཉེ་བར་གནས་པ་སྟེ་ཉེ་བར་གྱུར་པས་སོ། །ཡང་ན་འདི་ལ་ནི་བསོད་ནམས་ཀྱི་རྒྱུ་འདི་ལ་ཞེས་སྦྱར་རོ། །གལ་ཏེ་བསོད་ནམས་ཀྱི་གེགས་བྱེད་ན་འདི་ཇི་ལྟར་ན་བསོད་ནམས་ཀྱི་རྒྱུར་གྱུར། འོན་ཀྱང་དེ་ཉིད་ནི་གེགས་ཡིན་ནོ་ཞེ་ན། གང་ཞིག་གང་མེད་ཅེས་བྱ་བ་ལ་སོགས་པ་གསུངས་ཏེ། དངོས་པོ་གང་འབྲས་བུར་མངོན་པར་འདོད་པ་གང་ཞིག་རྒྱུར་མངོན་པར་འདོད་པ་གང་མེད་ན་མི་འབྱུང་ལ་སྟེ། དེ་ལག་ན་མེད་པའི་འབྲས་བུ་མངོན་པར་འདོད་པ་དེའི་སྐྱེད་པར་བྱེད་པའི་རྒྱུ་གཞན་མ་ཡིན་པ་སྟེ། དེ་དང་རྗེས་སུ་འགྲོ་བ་དང་ལྡོག་པ་ལྡན་པའི་ཕྱིར་རོ། །དེ་བཞིན་དུ་སྐབས་སུ་བབ་པ་ལ་ཡང་སྐྱེད་པར་བྱེད་པ་དེ་ཇི་ལྟར་ན་བསྐྱེད་པར་བྱ་བའི་གེགས་སུ་བརྗོད་དོ། །གེགས་ཀྱི་རྒྱུ་ཞེས་བརྗོད་པར་བྱེད། རྣམ་པ་དེ་ལྟ་བུ་ལ་ཡང་དེ་ལྟར་ཐ་སྙད་དུ་བྱེད་ན་མིང་ལ་ལོག་པར་རྟོག་པར་ཟད་དོ། །
བསྟན་པའི་དོན་དཔེ་ཉེ་བར་བསྟན་པའི་སྒོ་ནས་གསལ་བར་བྱེད་པ་དུས་སུ་ཞེས་བྱ་བ་ལ་སོགས་པ་གསུངས་ཏེ། འདི་ལྟར་སྦྱིན་བདག་འགའ་ཞིག་སྦྱིན་པ་བྱེད་པའི་དུས་ལ་བབ་པ་ན། སློང་མོ་པ་སློང་བར་བྱེད་པས་སྦྱིན་པའི་གེགས་བྱེད་པ་མ་ཡིན་པར་བརྗོད་དེ། གང་གི་ཕྱིར་དེ་ནི་སྦྱིན་པའི་རྒྱུ་ཉིད་ཡིན་ནོ། །རབ་ཏུ་བྱུང་བར་འདོད་པ་གང་ལ་ལའི་རབ་ཏུ་འབྱིན་པར་བྱེད་པ་དང་ཕྲད་པ་ན་རབ་ཏུ་འབྱུང་བར་སྡོམ་པ་ལ་སོགས་པ་ལེན་པའི་ངོ་བོ་དེའི་ཚེ་གེགས་ཞེས་བྱ་བར་ནི་མི་རུང་ངོ༌། །འོན་ཀྱང་དེ་ནི་རྒྱུ་ཉིད་ཡིན་ཏེ། དེ་མེད་པར་དེ་མི་འབྱུང་བའི་ཕྱིར་རོ། །དེ་ལྟར་སྐབས་སུ་བབས་པ་ལ་ཡང་བལྟ་བར་བྱའོ།། །།བམ་པོ་བཅུ་གཅིག་པ། གཞན་ཡང་བཟོད་པའི་རྒྱུ་ནི་ཤིན་ཏུ་དཀོན་པ་ཡིན་པས་དེ་དང་ཕྲད་པ་ན་དགའ་བ་ཁོ་ནར་རིགས་སོ་ཞེས་བསྟན་པ། འཇིག་རྟེན་ན་ནི་ཞེས་བྱ་བ་ལ་སོགས་པ་གསུངས་ཏེ། ཐམས་ཅད་དུ་ཐམས་ཅད་ན་འཇིག་རྟེན་ན་སློང་བར་བྱེད་པ་ནི་ཤིན་ཏུ་མང་བར་གྱུར་བ་ཡིན་ཏེ། དེ་ལྟར་སྦྱིན་པར་བྱེད་པ་ན་ཕྱིར་མི་ལྡོག་པའི་ཕྱིར་རོ། །གནོད་པ་བྱེད་པ་ནི་དེ་ལྟ་མ་ཡིན་ཏེ་དེ་བས་ན་དེ་དག་དཀོན་པ་སྟེ། སྟོང་ཕྲག་བརྒྱའི་ནང་ནས་གལ་ཏེ་ཇི་ཞིག་ལྟར་འགའ་ཞིག་འབྱུང་བའམ་མ་ཡིན་ནོ། །དེ་དེ་ལྟར་ཡིན་པ་ཅིའི་ཕྱིར་ཞེ་ན། འདི་ལྟར་ཞེས་བྱ་བ་གསུངས་ཏེ། གང་གི་ཕྱིར་ཕར་གནོད་པ་མ་བྱས་ན་སྟེ། ཕ་རོལ་ལ་གནོད་པ་བྱེད་པ་ལས་ལྡོག་ན་བདག་ལ་རྒྱུ་མཚན་མེད་པས་འགའ་ཡང་སྟེ་གཅིག་ཀྱང་གནོད་པ་མི་བྱེད་དོ། །དེ་ལྟར་ན་ཤིན་ཏུ་དཀོན་པའི་ཕྱིར་དང༌། མཆོག་ཏུ་ཕན་འདོགས་པའི་ཕྱིར་གནོད་པ་བྱེད་པ་ལ་མངོན་པར་དགའ་བར་བྱའོ་ཞེས་གསུངས་པ། དེ་བས་ངལ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཚེ་ཇི་ཞིག་ལྟར་གནོད་པ་བྱེད་པ་དང་ཕྲད་ན་དེའི་ཚེ་ཁྱིམ་དུ་བྱུང་བའི་གཏེར་བཞིན་དུ་ངལ་བ་མ་བྱས་པར་ཐོབ་པའི་དགྲ་ལ་བདག་གིས་འདོད་པར་བྱའོ། །བྱང་ཆུབ་སྤྱོད་པ་ནི་སངས་རྒྱས་ཉིད་ཀྱི་ཚོགས་ཉེ་བར་རྫོགས་པ་ན་གྲོགས་བྱེད་པར་གྱུར་པས་སོ། །རྣམ་པ་དེ་ལྟ་བུར་སྐྱེས་བུ་མཆོག་གི་དོན་ལ་གྲོགས་བྱེད་པ་ལ་བྱས་པ་ཤེས་པའི་ཕྱིར་བདག་ལེན་དུ་ཕན་གདགས་པར་རིགས་པ་ཡིན་ནོ་ཞེས་ཉེ་བར་བསྟན་
པ། འདི་དང་བདག་གི་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དེ་ལ་འདིས་གྲོགས་སུ་བྱས་པས་རྒྱུ་ཉིད་ཡིན་གྱི་གེགས་མ་ཡིན་པ་དེའི་ཕྱིར་བདག་གིས་བཟོད་པ་གོམས་པར་བྱས་པ་དང༌། འདིས་ཀྱང་གནོད་པ་བྱས་པ་ཡིན་ཏེ་གཉི་གས་བསྐྱེད་པ་ཡིན་ནོ། །འདི་ཞེས་བྱ་བ་ནི་བསྒྲུབ་པར་བྱ་བའི་ཕྱིར་གྲོགས་བྱས་ཤིང་བསྟེན་པའི་བཟོད་པའི་འབྲས་བུ་སྟེ། བསོད་ནམས་ཐོབ་པའི་མཚན་ཉིད་དོ། །འདི་ལ་སྟེ་ཆོས་ཀྱི་གྲོགས་ལ་ཐོག་མར་ཕུད་བདར་བར་བྱའོ། །དཔེར་ན་བྱང་ཆུབ་སེམས་དཔའ་བྱམས་པའི་སྟོབས་ཀྱིས་ལྔ་སྡེའི་ཆེད་དུ་སྨོན་ལམ་བཏབ་པ་ལྟར་བདག་གིས་སྨོན་ལམ་གདབ་པར་བྱའོ། །དེ་ལ་རྒྱུ་གསུངས་པ་ནི་གང་གི་ཕྱིར་ཞེས་སོ། །གལ་ཏེ་བསམས་པ་དེ་ཉིད་ཀྱིས་དེ་འཇུག་ན་དེ་དེ་ལྟར་རིགས་ན། འོན་ཀྱང་འདི་ནི་གནོད་པ་བྱེད་པའི་བསམ་པ་ཅན་ཡིན་ནོ་ཞེས་དོགས་པ། གལ་ཏེ་བཟོད་བསྒྲུབ་ཅེས་བྱ་བ་ལ་སོགས་པ་གསུངས་ཏེ། བྱང་ཆུབ་སེམས་དཔའི་བཟོད་པ་བསྒྲུབ་བོ་སྙམ་པའི་བསམ་པ་མེད་པར་གནོད་པར་བརྩོན་པ་དེའི་ཕྱིར་ན་གལ་ཏེ་དགེ་བའི་རྒྱུ་ཡིན་ཡང་དགྲ་འདི་མཆོད་པར་འོས་པ་མ་ཡིན་ནོ་ཞེ་ན། འོན་ཏེ་དེ་ལྟར་ན་དགོས་པ་མི་མངའ་བའི་དགེ་བ་འགྲུབ་པའི་རྒྱུ་དམ་པའི་ཆོས་གསུང་རབ་ཀྱི་མཚན་ཉིད་ཅི་སྟེ་མཆོད་པར་བྱེད་དེ་ཡང་བསམ་པ་དེས་སྟོང་བའི་ཕྱིར་མཆོད་པར་འོས་པར་མི་འགྱུར་རོ་སྙམ་དུ་དགོངས་པ་ཡིན་ནོ། ཅི་སྟེ་དམ་པའི་ཆོས་ལ་བསམ་པ་མེད་པའི་ཕྱིར་གནོད་པ་བྱ་བའི་བསམ་པའང་མེད་ལ། འདི་ལ་དེ་ལས་བཟློག་པ་སྣང་ངོ་ཞེས་གལ་ཏེ་དགྲ་འདི་ཞེས་བྱ་བ་ལ་སོགས་པ་གསུངས་ཏེ། གལ་ཏེ་དགྲ་འདི་གནོད་པ་བྱ་བའི་བསམ་པ་ཡོད་དོ་སྙམ་དུ་བསམས་ནས། དགྲ་བོ་མཆོད་བྱ་བ་མ་ཡིན་ཏེ། །སྦྱིན་པས་བསྙེན་བཀུར་མི་བྱའོ། །ཞེ་ན། སྨན་པ་བཞིན་དུ་ཞེས་བྱ་བ་སྟེ་གནོད་པ་བྱེད་པ་ལ་ཁྲོ་བའི་སེམས་མ་བཟློག་ན་ཇི་ལྟར་བདག་གི་བཟོད་པ་འགྲུབ། གནོད་པ་བྱེད་པ་ལ་མི་བཟོད་པའམ། སླར་གནོད་པ་བྱ་བར་མི་རིགས་སོ་ཞེས་བྱ་བའི་དོན་ཏོ། །འོན་ཏེ་གཞན་དུ་གྱུར་མོད་ཅེ་ན། གཞན་དུ་ཡང་སྨན་པ་བཞིན་དུ་ཕན་བརྩོན་ན་སྟེ། སྨན་པ་བཟང་པོ་ལྟར་ཕན་པ་དང་བདེ་བ་སྒྲུབ་པར་བྱེད་པ་
ལ་ནི་གང་ལ་རྟག་ཏུ་དགའ་བ་དང་གུས་པ་ཡོད་པ་ཡིན་ཏེ། ཞེ་སྡང་གི་རྒྱུའི་དྲི་ཡང་མེད་དོ། །ཞེ་སྡང་གི་སེམས་ལོག་པ་ལས་ནི་བཟོད་པ་ཞེས་བརྗོད་དེ། །དེ་ལྟ་བས་ན་གནོད་པ་བྱེད་པ་ཉིད་ལ་ཁོང་ཁྲོ་བའི་སེམས་བཟློག་ན་བཟོད་པ་ཡིན་ནོ་ཞེས་དེ་ཉིད་བསྟན་པ་དེ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སྨན་པ་ཕན་པར་བརྩོན་པ་ལ་བཟོད་པ་མི་རིགས་པ་དེ་བས་ན་སྟེ། གཏན་ཚིགས་འདི་ལས་སྡང་བའི་བསམ་པ་ཅན་དེ་ལ་བསྟན་ནས་རྒྱུ་མཚན་དུ་བྱས་ཏེ་བཟོད་པ་ཡང་དག་པར་སྐྱེ་བ་ཡིན་གྱི། དགེ་བའི་བསམ་པ་ལས་ནི་མ་ཡིན་ནོ། །དེའི་ཕྱིར་གང་གི་བསམ་པ་ལ་བརྟེན་ནས་བཟོད་པ་སྐྱེ་བ་དེ་ནི་བཟོད་པའི་རྒྱུ་ཡིན་གྱི། གང་ཞིག་སྨན་པ་བཞིན་སྡང་བའི་བསམ་པ་མེད་པ་ལ་ནི་མ་ཡིན་ནོ། །དེ་བས་ན་བཟོད་པ་བསྒྲུབ་པའི་བསམ་པ་མེད་ཀྱང་དམ་པའི་ཆོས་ལྟར་འདི་བདག་གིས་མཆོད་པར་བྱའོ། །འདི་སྐད་དུ་བསྟན་པར་འགྱུར་ཏེ་བདག་ལ་བསམ་པ་དཔྱད་པ་འདིས་དགོས་པ་ཅི་ཞིག་ཡོད། བསྒྲུབ་བྱར་མངོན་པར་འདོད་པ་འགྲུབ་པ་ཡིན་ན་མཁོ་བ་ཡིན་ཏེ་དེ་ཙམ་ཞིག་བདག་གིས་བླང་བར་བྱ་བར་གྱུར་པ་ཡིན་ནོ། །བསམ་པ་ཡོན་ཏན་མེད་པ་ཅན་གྱི་འབྲས་བུ་ནི་བསམ་པ་ཡོན་ཏན་མེད་པ་གང་ཡིན་པ་དེ་ཉིད་ཀྱི་ཡིན་ལ། བདག་ལ་ནི་དགེ་བ་འབྱུང་བའི་རྒྱུ་ཉིད་འདི་ཡིན་པས་ན་ཇི་ལྟར་མཆོད་པར་འོས་པར་མི་འགྱུར་ཞེས་སོ། །དེ་ལྟ་བས་ན་ཚོགས་ལ་མཁོ་བའི་རྒྱུ་དག་ལ་རང་གི་ངོ་བོ་དཔྱད་པས་ཅི་ཞིག་བྱ་སྟེ། དེ་དག་འདིའི་ཚོགས་ཀྱི་རྒྱུར་གྱུར་པ་ཡིན་ནོ་ཞེས་ལུང་ལས་རབ་ཏུ་བསྒྲུབ་པའི་ཕྱིར་སེམས་ཅན་ཞེས་བྱ་བ་ལ་སོགས་པ་གསུངས་ཏེ། ཚོགས་འབྱུང་ཞིང་འཕེལ་བའི་རྒྱུ་ཡིན་པའི་ཕྱིར་སེམས་ཅན་གྱི་ཞིང་ངོ༌། །སངས་རྒྱས་བཅོམ་ལྡན་འདས་རྣམས་ཀྱང་དེ་བཞིན་དུ་ཞིང་ཡིན་ཏེ། དེ་ལྟ་བུ་དེ་ཡིན་པས་ན་སངས་རྒྱས་ཉིད་ཀྱི་བྱེད་པའི་རྒྱུ་ཡིན་པའི་ཕྱིར་རྣམ་པ་འདིས་བཅོམ་ལྡན་འདས་ཀྱིས་བསྔགས་སོ། །ཅིའི་ཕྱིར་ཞེ་ན། འདི་ལྟར་གང་གི་ཕྱིར་སེམས་ཅན་དང་རྒྱལ་བ་དེ་དག་རྗེས་སུ་མཐུན་པར་བསྒྲུབས་པས་མགུ་བར་བྱས་ཏེ་མང་པོ་ཞིག་སངས་རྒྱས་ཉིད་ཐོབ་ནས་འཇིག་རྟེན་དང་འཇིག་རྟེན་ལས་འདས་པ་ཐམས་ཅད་ཀྱི་ཕུན་སུམ་ཚོགས་པ་
ཐམས་ཅད་མཐར་ཐུག་པ་ཐོབ་པ་ཡིན་ནོ། །འོ་ན་དེ་ལྟར་ཡིན་ན། གལ་ཏེ་ཞིག་ན་སེམས་ཅན་རྣམས་ཀྱང་ཕུན་སུམ་ཚོགས་པ་ཐམས་ཅད་ཀྱི་རྒྱུ་ཡིན་ན་དེ་ལྟ་ན་ཡང་དེ་བཞིན་གཤེགས་པ་རྣམས་དང་མཚུངས་པ་མི་རིགས་སོ་ཞེ་ན། སེམས་ཅན་རྣམས་དང་ཞེས་བྱ་ལ་སོགས་པ་གསུངས་ཏེ། གཉི་ག་ལས་ཀྱང་སངས་རྒྱས་ཀྱི་ཆོས་སྟོབས་དང་མི་འཇིགས་པ་ལ་སོགས་པ་འགྲུབ་པ་དང་འཐོབ་པ་ལ་མཚུངས་ཤིང་ཁྱད་མེད་དེ། གཉི་ག་ཡང་དེ་ལ་རྒྱུ་ཉིད་ཡིན་པར་ཁྱད་མེད་དོ་སྙམ་དུ་དགོངས་པ་ཡིན་ནོ། །དེ་ལྟ་བས་ན་རྒྱུའི་དངོས་པོ་ཐུན་མོང་ཡིན་ཡང་རྒྱལ་བ་རྣམས་ལ་གུས་པར་བྱ་བ་ཅི་འདྲ་བ་དེ་བཞིན་དུ་སེམས་ཅན་རྣམས་མིན་པ་དེ་ལྟ་བུ་ཅིའི་ཚུལ་དང་གོ་རིམས་ཡིན། རྟོག་པ་དང་ལྡན་པས་མི་རིགས་སོ་ཞེས་བྱ་བའི་དོན་ཏོ། །འོ་ན་སེམས་ཅན་རྣམས་ལ་འདོད་ཆགས་ལ་སོགས་པའི་དྲི་མ་རྣམས་ཀྱིས་བསམ་བཞེན་པར་གྱུར་པའི་ཕྱིར་རྒྱུ་ཉིད་ཡིན་ན་ཡང་ཇི་ལྟར་ན་བཅོམ་ལྡན་འདས་དང་མཚུངས་པ་ཉིད་དུ་རིགས་པ་ཡིན་སྙམ་དུ་དོགས་པ་ལ། བསམ་པའི་ཞེས་བྱ་བ་ལ་སོགས་པ་གསུངས་ཏེ། འདི་ལ་ཡང་བཅོམ་ལྡན་འདས་ནི་བསོད་ནམས་དང་ཡེ་ཤེས་དཔག་ཏུ་མེད་པས་བསྐྱེད་པ་བླ་ན་མེད་པའི། བདག་ཉིད་ཆེན་པོའོ། །དེ་ལྟར་ཡང་ཉེ་བར་མཁོ་བར་སྦྱོར་བ་ཉིད་ཀྱི་ཕྱིར་རྒྱུའི་དངོས་པོ་མཚུངས་པས་ན་ཆེ་བའི་བདག་ཉིད་མཉམ་པར་བརྗོད་དོ། །གཏན་ཚིགས་དེའི་ཕྱིར་སེམས་ཅན་དེ་དག་རྒྱལ་བ་རྣམས་དང་མཉམ་པ་ཡིན་ཏེ་འདྲ་བར་ཞེས་བརྗོད་དོ། །དེ་ལྟར་ན་འདིར་བྱེད་པ་ལ་ཁྱད་པར་མེད་པ་ཡིན་ནོ། །གང་དུ་སོ་སོར་ངེས་པའི་བདག་ཉིད་ཀྱི་ཚུལ་ལ་ནི་ཁྱད་པར་དེ་བསྟན་པའི་ཕྱིར། བྱམས་སེམས་ཞེས་བྱ་བ་ལ་སོགས་པ་གསུངས་ཏེ། སེམས་ཅན་རྣམས་ལ་བྱམས་པའི་སེམས་སུ་གནས་པ་ལ་སྐྱེ་བོ་རྣམས་ཀྱིས་མཆོད་པ་གང་ཡིན་པ་དེ་ནི་བྱམས་སེམས་ལྡན་པ་དེའི་སོ་སོ་རང་གི་རྣམ་པའི་ཆེ་བའི་བདག་ཉིད་དེ་གཞན་གྱིས་ནི་མ་ཡིན་ནོ། །དེ་བཞིན་དུ་དེ་བཞིན་གཤེགས་པ་ལ་དམིགས་ནས་རང་གི་སེམས་དད་པར་བྱེད་པའི་བསོད་ནམས་སྐྱེ་བ་གང་ཡིན་པ་དེ་ནི་བཅོམ་ལྡན་འདས་ཉིད་ཀྱི་ཆེ་བའི་བདག་ཉིད་ཐུན་མོང་མ་ཡིན་པ་སྟེ།
གཞན་ལ་རྣམ་པ་དེ་ལྟ་བུའི་ཡོན་ཏན་མེད་པའི་ཕྱིར་རོ། །དེ་ལྟར་ཐུན་མོང་མ་ཡིན་པའི་ཡོན་ཏན་བརྗོད་ནས། སྐབས་ལ་བབ་པའི་མཇུག་བསྡུ་བ། སངས་རྒྱས་ཆོས་འགྲུབ་བྱེད་ཅེས་བྱ་བ་ལ་སོགས་པ་གསུངས་ཏེ། འདིར་མཚུངས་པར་བསྒྲུབ་པའི་ས་བོན་ནི་འདི་ཡིན་ནོ་ཞེས་བྱ་བའི་དོན་ཏོ། །དོན་དམ་པར་ནི་སངས་རྒྱས་བཅོམ་ལྡན་འདས་རྣམས་དང་མཚུངས་པའི་སེམས་ཅན་དུ་གྱུར་བ་འགའ་ཡང་མེད་དོ། །གལ་ཏེ་རྣམ་པ་དེ་ལྟ་བུར་གྱུར་ན་དེའི་ཚེ་ཡང་སངས་རྒྱས་ཉིད་ཡིན་ནོ། །ཇི་ལྟར་གྱུར་པའི་ཞེ་ན། ཡོན་ཏན་རྒྱ་མཚོ་མཐའ་ཡས་པའི། །ཡོན་ཏན་རྣམས་ཀྱི་རྒྱ་མཚོ་ནི་ཡོན་ཏན་རིན་པོ་ཆེའི་འབྱུང་གནས་ཡིན་ཏེ། གཏིང་མཐའ་མི་དཔོགས་པའི་ཕྱིར་ན་དེ་རྣམས་དང་ངོ༌། །ཡང་དེ་དག་གི་ཁྱད་པར་དུ་ཕྱེད་པ་གསུངས་པ། མཐའ་ཡས་ཆ་ནི་མཐའ་ཡས་ཤིང་མུ་མེད་པའི་ཆ་ཉིད་ནི་ཕྱོགས་ཀྱང་སྟེ། ཡོན་ཏན་རྒྱ་མཚོ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ་སེམས་རྣམས་དང་ངོ༌། །བསྟན་པའི་དོན་ཉིད་གསལ་བར་བྱེད་པ་ཡོན་ཏན་མཆོག་ཅེས་བྱ་བ་ལ་སོགས་པ་གསུངས་ཏེ། ཡོན་ཏན་རྣམས་ལ་གཙོ་བའི་ཕུང་པོ་གཅིག་པུ་མངའ་བའི་བཅོམ་ལྡན་འདས་གང་ཡིན་པ་དང་དེ་དག་གི་ཡོན་ཏན་ཤས་ཙམ་ནི་རྡུལ་ཕྲ་རབ་ཙམ་ཡང་སྟེ། ཡོན་ཏན་ཕྲ་མོ་ཡང་ཞེས་བྱ་བའི་དོན་ཏོ། །གལ་ཏེ་སེམས་འགའ་ཞིག་ལ་ཁྱད་པར་སྣང་ན་ཡང་དེ་ལ་སྟེ་ཡོན་ཏན་རྒྱ་མཚོ་དེ་མཆོད་པའི་རྒྱུ་མཚན་དུ་ཁམས་གསུམ་ཕུལ་ཡང་ཆུངས་པར་འགྱུར། འཇིག་རྟེན་གསུམ་དུ་བྱུང་བའི་རིན་པོ་ཆེ་ལ་སོགས་པ་རྣམས་འཚམ་པ་ཡིན་ནོ་ཞེས་བྱ་བའི་དོན་ཏོ། །གལ་ཏེ་དེ་ལྟ་ཡིན་ན་ཇི་ལྟར་ན་སེམས་ཅན་མགུ་བར་བྱ་བ་བསྟན་ཅེ་ན། སངས་རྒྱས་ཆོས་མཆོག་ཅེས་བྱ་བ་ལ་སོགས་པ་གསུངས་ཏེ། སྔར་བཤད་པ་ཉིད་ཡིན་ནོ། །འདི་དག་གིས་ཀྱང་སེམས་ཅན་མགུ་བར་བྱ་བར་རིགས་པ་ཡིན་ནོ་ཞེ་ན། གཞན་ཡང་ཞེས་བྱ་བ་ལ་སོགས་པ་གསུངས་ཏེ། གཡོ་མེད་གཉེན་གྱུར་པ་ནི་བཅོས་མ་མ་ཡིན་པའི་ཤེས་པ་སངས་རྒྱས་དང་བྱང་ཆུབ་སེམས་དཔའ་རྣམས་ཏེ། ཕན་འདོགས་པ་མཐའ་ཡས་པ་མཛད་པ་རྣམས་ལ་ལན་ལྡོག་པ་ནི་དེ་ལ་ཕན་གདགས་པ་བྱས་པའི་ལན་
གླེན་པ་སྟེ། ལན་ཁྱེར་བ་ཞེས་བྱ་བའི་དོན་ཏོ། །གཞན་གང་ཞིག་གིས་འགྱུར་སེམས་ཅན་མགུ་བར་བྱ་བ་མིན་པར་ཏེ། དེ་ཉིད་མཆོག་ཏུ་ལན་ལྡོན་པར་བྱེད་པ་ཡིན་ནོ་ཞེས་བྱ་བའི་དོན་ཏོ། །བདག་པོའི་སེམས་དང་མཐུན་པར་འཇུག་པ་ཉིད་བྲན་གྱི་འདོད་པ་འགྲུབ་པར་འགྱུར་རོ་སྙམ་དུ་ཤེས་པར་བྱས་ནས་སེམས་ཅན་མགུ་བར་བྱ་བ་ཁོ་ན་བླང་བར་བྱ་བ་ཡིན་ནོ་ཞེས་བསྟན་པ། གང་གི་ཕྱིར་ཞེས་བྱ་བ་ལ་སོགས་པ་གསུངས་ཏེ། གང་དག་ལ་ཕན་པ་དང་བདེ་བ་བསྒྲུབ་པའི་ཕྱིར་ལག་པ་དང་རྐང་པ་དང་མགོ་དང་མིག་ལ་སོགས་པ་བཅད་ཅིང་རབ་ཏུ་སྟེར་བར་བྱེད་པ་དང༌། དེ་བཞིན་དུ་གང་གི་དབང་དུ་བྱས་ཏེ་དེ་དག་གི་གནོད་པ་བཞི་བར་བྱ་བའི་དོན་དུ་གཞན་སྡུག་བསྔལ་བས་སྡུག་བསྔལ་བར་གྱུར་པ་རྣམས་མནར་མེད་པར་ཡང་འཇུག་པ་སྟེ། སྐབས་སུ་བབ་པའི་ཕྱིར་སངས་རྒྱས་དང་བྱང་ཆུབ་སེམས་དཔའ་རྣམས་ཡིན་ནོ། །དེ་ལ་སྟེ་སེམས་ཅན་རྣམས་ལ་ཕན་གདགས་ལན་ལྡོན་འགྱུར་བས་ན་གཞན་དུ་ནི་ཕན་བཏགས་ཀྱང་ལན་ལོན་པར་མི་འགྱུར་རོ། །ལན་གྱི་སྒྲ་ནི་འདིར་སྐབས་ཀྱི་དབང་དུ་བྱས་པས་ལེགས་པར་བྱེད་པ་ལ་འཇུག་གོ །གང་གི་ཕྱིར་དེ་ལྟར་ཡིན་པ་དེས་ན་མཆོག་ཏུ་གནོད་པ་རྣམས་ལ་ཡང་སེམས་ཁྲོ་བར་མི་བྱ་སྟེ། འོན་ཀྱང་ཐམས་ཅད་དེ་རྣམ་པ་དུ་མར་ལུས་སམ། ངག་གམ། ཡིད་དག་གིས་བཟད་དགུ་ཞིག་ཏུ་འདི་དག་ལ་ཕན་པ་དང་བདེ་བ་བསྒྲུབ་པར་བྱ་བའོ། །བསྟན་པ་ཉིད་བསྒྲུབ་པ་ནི་རེ་ཞིག་ཅེས་བྱ་བ་ལ་སོགས་པ་གསུངས་ཏེ། བདག་གི་རྗེར་གྱུར་ཉིད་ནི་སངས་རྒྱས་ལ་སོགས་པའོ། །རང་གི་བདག་ཉིད་ཀྱི་སྟེ་རེ་ཞིག་ཅེས་པ་ནི་དཔྱོད་པའོ། །གང་གི་ཕྱིར་ནི་གང་དག་གི་རྒྱུ་མཚོན་དུ་སྟེ། རང་གི་སྐུ་ལའང་ནི་རང་ཉིད་ཀྱི་ལུས་འཚོ་བ་ལ་ཡང་བསྟན་པའི་རིམ་པས་མི་གཟིགས་པ་སྟེ། མངོན་ཞེན་མེད་པར་རྩྭ་བཞིན་དུ་ཡོངས་སུ་འདོར་བའོ། །དེ་བས་ན་བདག་ནི་དེ་དག་གི་བྲན་དུ་གྱུར་པ་ཡིན་ན། སེམས་ཅན་བདག་པོ་ལྟ་བུ་དང་བུ་ལྟར་མཆོག་ཏུ་སྡུག་པ་དེ་དག་ལ་ཅི་ལྟར་ན་ང་རྒྱལ་བྱ་ཞིང་སྟེ་རེ་ཞིག་ཤེས་བཞིན་དུ་ཅིའི་ཕྱིར་མི་མཐུན་པར་བྱ་ཞིང་བྲན་གྱི་
དངོས་མི་བྱ་སྟེ་བྲན་དུ་གྱུར་ཏེ་བརྙས་པར་མི་བྱ། འདི་དག་གིས་ཀྱང་སེམས་ཅན་ལ་གནོད་པ་བྱེད་པ་ཡོངས་སུ་དོར་ལ་དེ་དག་མགུ་བར་བྱ་བ་ཁོ་ན་བྱའོ་ཞེས། གང་དག་བདེ་བས་ཞེས་བྱ་བ་ལ་སོགས་པ་གསུངས་ཏེ། བུ་སྡུག་པ་ལྟ་བུའི་སེམས་ཅན་གང་དག་གི་ལུས་དང་ཡིད་ལས་བྱུང་བ་བདེ་བས་ཕ་ལྟ་བུའི་ཐུབ་པའི་དབང་པོ་སངས་རྒྱས་བཅོམ་ལྡན་འདས་རྣམས་ལ་དགྱེས་པར་འགྱུར་ཞིང་དེ་དག་ལ་སྡུག་བསྔལ་ན་མི་དགྱེས་འབྱུང་བར་འགྱུར་བ་ནི་ཡོངས་སུ་མི་མགུ་བར་འགྱུར་བ་སྟེ་དེ་དག་མི་མཉེས་པའི་ཕྱིར་བཅོམ་ལྡན་འདས་ལ་དེ་སྐད་དུ་བརྗོད་དོ། །དེ་ནི་སྟེའུ་དང་ཙན་དན་ལྟ་བུ་ཡིན་ཏེ། ཉན་ཐོས་རྣམས་ལ་ཡང་ཁོང་ཁྲོ་བས་རྗེས་སུ་ཆགས་པ་ནི་མི་འབྱུང་བའི་ཕྱིར་རོ། །གཞན་ནི་གོ་སླའོ། །ཇི་ལྟར་ན་དེ་ལ་གནོད་པ་བྱས་པས་ཐུབ་པ་རྣམས་ལ་གནོད་པ་བྱས་པར་འགྱུར་ཞེ་ན། འདིར་ཇི་ལྟར་ཞེས་བྱ་བ་ལ་སོགས་པ་གསུངས་ཏེ། ཇི་ལྟར་སྐྱེས་བུའི་ལུས་ལ་ཀུན་ནས་ཡན་ལག་ཐམས་ཅད་ལ་ཁྱབ་པར་མེ་འབར་བ་ན་འདོད་པའི་ཡོན་ཏན་ལྡས་ཡིད་བདེ་བར་མི་འགྱུར་ཞིང༌། ལུས་ལའང་བདེ་བ་མེད་དེ། དེ་ལ་རབ་ཏུ་འབར་བའི་སྡུག་བསྔལ་དེ་ཉིད་ཀྱིས་ནོན་པའི་ཕྱིར་རོ། །དེ་བཞིན་ཏེ་དེ་ལྟར་སེམས་ཅན་རྣམས་ལ་གནོད་པ་བྱས་ན་ཡང་སྟེ་སྡུག་བསྔལ་མྱོང་བ་ན་ཐུགས་རྗེའི་བདག་ཉིད་སངས་རྒྱས་བཅོམ་ལྡན་འདས་རྣམས་དགྱེས་པ་སྟེ། ཡིད་བདེ་བའི་ཐབས་དང་རྒྱུ་མེད་དོ། །དེ་ནི་དེ་ལྟ་ཡིན་པས་ན་ཡོངས་སུ་མ་ཤེས་པས་སམ། ཉོན་མོངས་པའི་གདོན་དང་བཅས་པའི་དབང་གིས་སེམས་ཅན་རྣམས་ལ་གནོད་པ་བྱས་པའི་མི་དགེ་བ་གང་བསགས་པ་དེ་ཡང་མཇུག་བསྡུ་བའི་སྒོ་ནས་བཤགས་པར་བྱ་བ། དེ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་དེ་ལྟར་སེམས་ཅན་ལ་གནོད་པ་བྱས་ན་ཐུབ་པ་རྣམས་ལ་གནོད་པ་བྱས་པར་འགྱུར་བ་དེའི་ཕྱིར། སྡིག་པ་དེ་རིང་ད་ལྟ་སོ་སོར་བཤགས་པར་བགྱི། སྐྱོབ་པས་ཐུགས་རྗེ་ཆེན་པོ་དེ་དག་གི་སྤྱན་སྔར་བཤགས་པར་བགྱི་ཞིང༌། ཡང་དེ་བཞིན་དུ་ཤེས་བཞིན་དུ་མི་བགྱིད་དོ་ཞེས་སླན་ཆད་བསྡམ་པར་བགྱིའོ། །མི་མཐུན་པ་གང་ཞིག་སྤྱད་བ་དེ་ལ་ཐུགས་བརྩེ་བ་ཉེ་བར་བཟུང་
སྟེ་བདག་ལ་བཟོད་པ་མཛད་དུ་གསོལ། བཟོད་པ་གསོལ་ནས་ད་ནི་དེ་བཞིན་གཤེགས་པ་རྣམས་མཉེས་པར་བགྱི་སླད་དུ་ཞེས་བྱ་བ་ལ་སོགས་པས་དེ་ལ་བདག་ཉིད་གཅིག་པུ་གཞོལ་བར་སྟོན་པར་བྱེད་དོ། །དེ་བཞིན་གཤེགས་པ་རྣམས་ཀྱི་བཞེད་བསྒྲུབ་པའི་ཕྱིར་འཇིག་རྟེན་དང་འཇིག་རྟེན་གྱི་ཡུལ་དུ་བདག་གི་ལུས་ཐམས་ཅད་ཀྱིས་སམ་ངག་གམ་ཡིད་ཀྱིས་བྲན་གྱི་དངོས་པོར་ཁས་བླང་བར་བྱའོ། །དེ་དག་ཀྱང་བདག་ལ་སྤྱི་བོར་རྡོག་པས་བཞག་ཀྱང་དེ་དག་གི་རྐང་པ་ལ་རབ་ཏུ་དགའ་བའི་སེམས་ཀྱིས་མགོ་བོར་བླང་བར་བགྱིའོ། འདིས་ཀྱང་བདག་གིས་སྔར་ཉེས་པ་བྱས་པ་སྤངས་པས་འགྲོ་བའི་བདག་པོ་བཅོམ་ལྡན་འདས་ཐུགས་དགྱེས་པར་མཛོད་ཅིག །བཅོམ་ལྡན་འདས་ལ་གུས་པ་བྱེད་པ་རྣམས་ཀྱིས་སེམས་ཅན་རྣམས་ལ་མ་གུས་པར་བྱའོ་ཞེས་རབ་ཏུ་བསྒྲུབ་པ་གསུངས་པ། འགྲོ་བ་འདི་ཀུན་ཞེས་བྱ་བ་ལ་སོགས་པ་ཡིན་ཏེ། ཐམས་ཅད་དུ་ཆོས་ཀྱི་དབྱིངས་སོ་སོར་རྟོགས་པའི་ཕྱིར་སེམས་ཅན་ཐམས་ཅད་མཉམ་པར་བསྒྲུབ་པས་སམ། གཞན་དང་བདག་བརྗེ་བ་ལ་སོགས་པའང་རུང་སྟེ། འགྲོ་བ་འདི་ཀུན་ཐུགས་རྗེའི་བདག་ཉིད་མ་ཡིན་པ་ལ་བདག་གིར་མཛད་ཅིང་ཞལ་གྱིས་བཞེས་ཏེ། འགའ་ཙམ་ལ་ནི་མ་ཡིན་ནོ། །གཞན་དུ་ན་སངས་རྒྱས་ཉིད་དུ་མི་རིགས་པའི་ཕྱིར་རོ། །དེ་བས་ན་སེམས་ཅན་གྱི་ངོ་བོར་ཏེ་སངས་རྒྱས་བཅོམ་ལྡན་འདས་ཉིད་དུ་སེམས་ཅན་འདི་དག་མཐོང་བ་ཉིད་ཡིན་ན་དེས་ན་འདིར་སེམས་རྨོངས་པ་དག་ཅིའི་ཕྱིར་གུས་པར་མི་བྱེད། །རིགས་པ་མ་ཡིན་ནོ་སྙམ་དུ་དགོངས་པའོ། །སེམས་ཅན་མགུ་བར་བྱེད་པ་ནི་དོན་དུ་མ་གྲུབ་བར་བྱེད་པའི་ཕྱིར་ཡང་དེ་ཉིད་ལ་བརྩོན་བར་བྱའོ་ཞེས་གསུངས་པ། འདི་ཉིད་དེ་བཞིན་གཤེགས་པ་ཞེས་བྱ་བ་ལ་སོགས་པ་སྟེ། འདིའི་རང་གི་དོན་སངས་རྒྱས་ཉིད་ཀྱི་ཚོགས་ཀྱི་མཚན་ཉིད་དམ། འཇིག་རྟེན་གྱི་སྡུག་བསྔལ་སེལ་བར་བྱེད་པའི་རྒྱུ་ཡིན་པའི་ཕྱིར་རོ། །འདི་ནི་ཞེས་བྱ་བ་ནི་སེམས་ཅན་མགུ་བར་བྱ་བ་ཡིན་པས་ཐམས་ཅད་དུ་སྦྱར་བར་བྱའོ། །གཞན་ཡང་མ་འོངས་པའི་འཇིགས་པ་བསྟན་པས་ཀྱང་གཞན་ལ་གནོད་པ་བྱེད་
པ་ལ་ཕྱིར་ཕྱོགས་པ་གོམས་པར་བྱའོ་ཞེས་དཔེ་བརྗོད་པས་གསུངས་པ། དཔེར་ན་ཞེས་བྱ་བ་ལ་སོགས་པ་གསུངས་ཏེ། རྒྱལ་པོ་གང་གི་ཡུལ་ན་གནས་པ་དེའི་སྐྱེས་བུ་དེ་སྐྱེ་བོ་མང་པོ་ལ་སྟེ། གྲོང་ཁྱེར་དང༌། གྲོང་རྡལ་དང༌། གྲོང་དང༌། ཚོང་རྡལ་ན་གནས་པ་རྣམས་ལ་གནོད་པ་བྱེད་ཀྱང་སྟེ་རྣམ་པར་འཇོམས་པར་བྱེད་ཀྱང་དེ་དག་ཀྱང་མ་འོངས་པའི་རྒྱལ་པོའི་ཆད་བས་འཇིགས་པ་མཐོང་བས་སྐྱེ་བོ་མང་པོ་དག་ཚིག་ཙམ་གྱིས་ཀྱང་ཇི་ཙམ་དུ་རྣམ་པར་འགྱུར་བར་འགྲོ་བ་ཙམ་ཡང་མི་ནུས་སོ། །དེས་དེ་དག་ཤིན་ཏུ་ཡང་སེམས་ཀྱི་ཚུལ་བསྐུམ་པ་ཉིད་དུ་གནས་ཏེ། གང་གི་ཕྱིར་འདི་ལྟར་རྒྱལ་པོའི་སྐྱེས་བུ་དེ་གྲོགས་མེད་པ་ཉིད་དུ་མི་བལྟའོ། །ཇི་ལྟར་ན་འདི་གྲོགས་མེད་པ་མ་ཡིན་ཞེ་ན། དེའི་ཞེས་གསུངས་ཏེ། རྒྱལ་པོའི་མཐུ་སྟོབས་ཉིད་དེའི་སྟོབས་ཡིན་ཏེ། དེའི་ཕྱོགས་འཛིན་པའི་ཕྱིར་རོ། །དེ་བས་ན་ནུས་པ་ཆུང་བ་ཡིན་ཡང་དེས་གནོད་པ་བྱས་ནས་སླར་མི་བྱའོ། །གང་གི་ཕྱིར་དེ་ཡང་གཅིག་པུ་མ་ཡིན་པ་དེའི་ཕྱིར་སེམས་ཅན་མགུ་བར་བྱའོ། །ཅིའི་ཕྱིར་ཞེ་ན། འདི་ལྟར་དམྱལ་བའི་སྲུང་མ་དང་སྟེ། དེ་ལ་གནོད་པ་བྱས་པ་བཞིན་དུ་བརྟན་ཏེ་སླར་གནོད་པ་བྱེད་པའོ། །ཐུགས་རྗེ་ལྡན་རྣམས་ནི་རྒྱལ་བ་ལ་སོགས་པ་སྟེ་དེའི་ཕྱོགས་སུ་ལྷུང་བས་དཔུང་ཡིན་ནོ། །ཇི་ལྟར་བྱ་ཞེ་ན། ཇི་ལྟར་དམངས་ཀྱིས་རྒྱལ་གཏུམ་བཞིན། །དཔེར་ན་རྒྱལ་པོ་འཇིགས་སུ་རུང་བ་ལ་རྗེས་སུ་འཕེལ་བའི་ལས་ཀྱིས་རྗེས་སུ་འཚོ་བར་བྱེད་པ་ཅན་ཐམས་ཅད་ཇི་ལྟར་ན་ཉེས་པར་བྱེད་པ་དེ་བཞིན་དུའོ། །གཞན་ཡང་འདི་ནི་འཇིག་རྟེན་གྲགས་པས་འདིར་བསྟན་པ་ཡིན་གྱི་སེམས་ཅན་ལ་གནོད་པ་བྱས་པ་ལས་བྱུང་བའི་འབྲས་བུ་དང༌། རྒྱལ་པོ་ལ་གནོད་པ་བྱས་པའི་འབྲས་བུ་དག་མཚུངས་པ་མ་ཡིན་ནོ་ཞེ་ན། རྒྱལ་པོ་ལྟ་ཞིག་ཁྲོས་ན་ཡང༌། །ཞེས་བྱ་བ་ལ་སོགས་པ་གསུངས་ཏེ། ཅིའི་ཕྱིར་ཞེས་ཟུར་གྱིས་འདྲི་བ་ཡིན་ཏེ། ཅི་དེའི་སྡུག་བསྔལ་གྱི་རྣམ་པ་བསྐྱེད་བར་མིའི་བདག་པོས་ནུས་སེམས་ཡིན་ནོ་སྙམ་དུ་དགོངས་པ་ཡིན་ནོ། ཅི་འདྲ་བར་གྱུར་བ་ཞིག་ཅེ་ན། སྡུག་བསྔལ་གྱི་རྣམ་པ་གང་གིས་སེམས་ཅན་དམྱལ་བའི་
ཚོར་བ་ཉམས་སུ་མྱོང་བར་བྱེད་པ་ཡིན་ནོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ་ཤེས་རབ་འབྱུང་གནས་བློ་གྲོས་ཀྱིས་མཛད་པ་ལས་ལེའུར་དྲུག་པའོ།། །།རྒྱ་གར་གྱི་མཁན་པོ་པཎྜི་ཏ་ཆེན་པོ་སུམ་ཏི་ཀཱི་རྟིའི་ཞལ་སྔ་ནས་དང། སྒྲ་བསྒྱུར་གྱི་ལོ་ཙཱ་བ་ཨ་ཙའྲྱ་མར་པ་ཆོས་ཀྱི་དབང་ཕྱུག་གིས་བསྒྱུར་ཅིང་ཞུས་པ།། །།དེ་ལྟར་མི་མཐུན་པའི་ཕྱོགས་བཀག་པའི་སྒོ་ནས་བཟོད་པ་གསུམ་བསྟན་ནས། བརྩོན་འགྲུས་བསྟན་པའི་ཕྱིར། དེ་ལྟར་བཟོད་པས་ཞེས་བྱ་བ་ལ་སོགས་པ་གསུངས་ཏེ། དེ་ལྟར་ནི་བརྗོད་པའི་རིམ་པས་ཡིན་ལ། བཟོད་པ་དང་ལྡན་པས་ན་བཟོད་པ་སྟེ། རང་གིས་གོམས་པར་བྱས་པའི་བཟོད་པའོ། །བརྩོན་འགྲུས་བརྩམས་པ་ནི་བརྩོན་འགྲུས་ལ་འབད་པར་བྱ་བ་སྟེ། གཞན་དུ་སྡུག་བསྔལ་བཟོད་པར་མི་ནུས་པས་བརྩོན་འགྲུས་ཞེན་པར་འགྱུར་རོ། །ཅིའི་ཕྱིར་བརྩོན་འགྲུས་བླང་བར་བྱ་བ་ཡིན་ཞེ་ན། འདི་ལྟར་བརྩོན་ལ་ཞེས་བྱ་བ་ལ་སོགས་པ་གསུངས་པ་གསུངས་ཏེ། གང་གི་ཕྱིར་བརྩོན་ལ་བྱང་ཆུབ་གནས་པ་ནི་དེའི་རྒྱུ་ཉིད་ཀྱིས་ཡིན་ཏེ། དེ་ལ་རག་ལས་པས་སམ་སངས་རྒྱས་ཉིད་དོ། །འདི་ཡང་གང་ལས་ཤེ་ན། གང་གི་ཕྱིར། །བསོད་ནམས་བརྩོན་འགྲུས་མེད་མི་འབྱུང༌། །ཞེས་ཏེ་བསོད་ནམས་ཀྱི་ཚོགས་ཡོད་པ་མ་ཡིན་ནོ། འདི་ནི་མཚོན་པ་ཙམ་སྟེ་བརྩོན་འགྲུས་གཉི་གའི་རྒྱུ་ཡིན་པའི་ཕྱིར་ཡེ་ཤེས་ཀྱང་བལྟ་བར་བྱའོ། །དེས་ན་བརྩོན་འགྲུས་འདི་ལས་བསོད་ནམས་དང་ཡེ་ཤེས་ཀྱི་ཚོགས་ཡིན་ལ། དེ་དག་ལས་སངས་རྒྱས་ཉིད་དོ་ཞེས་བརྗོད་པ་ཡིན་ནོ། །བརྩོན་འགྲུས་ཀྱི་རང་གི་ངོ་བོ་མི་ཤེས་ནས་བརྩོན་འགྲུས་གང་ཞེས་འདྲི་བར་བྱེད་དེ། བརྩོན་འགྲུས་ཞེས་བྱ་བ་འདི་ཅི་ཡིན་ཞེ་ན། འདིར་གང་གསུངས་པ་དགེ་ལ་སྤྲོ་བ་སྟེ་ཞེས་པ་ལ། གང་འདི་དགེ་བའི་ལས་སྦྱིན་པ་ལ་སོགས་པ་དང་ཐོས་པ་ལ་སོགས་པ་ལ་སྤྲོ་བ་དེ་ལ་བརྩོན་འགྲུས་ཞེས་བརྗོད་དོ། །མི་དགེ་བ་ལ་སྤྲོ་བ་ནི་ལེ་ལོ་ཉིད་དོ། །མངོན་པར་འདོད་པ་གྲུབ་པ་ལ་མི་མཐུན་པའི་ཕྱོགས་ཀྱིས་ཉམས་པར་བྱས་པའི་བརྩོན་འགྲུས་ཡན་ལག་མ་ཡིན་པའི་ཕྱིར་མི་མཐུན་པའི་ཕྱོགས་དེ་
སྤང་བར་བསྟན་པའི་ཆེད་དུ། དེའི་མི་མཐུན་པའི་ཕྱོགས་ཞེས་བྱ་བ་ལ་སོགས་པ་གསུངས་ཏེ། དེའི་ནི་བརྩོན་འགྲུས་ཀྱིའོ། །འགའ་ཞིག་ཉམས་པར་བྱེད་པའི་ཕྱོགས་ནི་མི་མཐུན་པའི་ཕྱོགས་སོ། །དེ་གང་ལ་བཤད་ཅེ་ན། ལེ་ལོ་ཞེས་པ་ལ་སོགས་པ་ལ། ལེ་ལོ་ནི་སྙོམ་ལས་ཏེ། ལུས་དང་ཡིད་དག་ལས་སུ་མི་རུང་བའོ། །ངན་ལ་ནི་སྨད་པར་བྱ་བ་ཡིན་ཏེ། རྒོད་པ་དང་སྒེག་པ་ལ་སོགས་པ་ཡིན་པ་དེ་ལ་ཞེན་པའོ། །སྒྱིད་ལུག་པ་ནི་སྒྱིད་ལུག་པ་ཉིད་དེ་དཀའ་བའི་ལས་ལ་སེམས་བཟློག་པ་ཡིན་ཏེ་ཞེན་པ་མེད་ཅེས་བྱ་བའི་དོན་ཏོ། །དེས་བདག་ཉིད་ལ་བརྙས་པ་སྟེ་ཚོད་ཡོད་བྱེད་པ་ཡིན་ལ། འདི་ནི་དེའི་མི་མཐུན་པའི་ཕྱོགས་སོ། །དེ་ལེ་ལོ་དགག་པའི་དོན་དུ་དེའི་རྒྱུ་རེ་ཞིག་བསྟན་པར་འདོད་ནས་མི་རྩོལ་བ་ཞེས་བྱ་བ་ལ་སོགས་པ་གསུངས་ཏེ། འཁོར་བའི་སྡུག་བསྔལ་མི་སྐྱོ་ལས། །ཞེས་པ་ནི་སྐྱོ་བ་དང་བྲལ་བས་གང་ཞིག་མི་རྩོལ་བ་ནི་བྱེད་པ་དང་བྲལ་བ་ཡིན་ཏེ། དེ་ལའང་དེས་བདེ་ཉམས་ལེན་པ་ནི་བདེ་བ་མངོན་པར་འདོད་པ་སྟེ་དེ་དང་གཉིད་ནི་གཉིད་ཀྱིས་ནོན་པ་ཡིན་ལ། དེ་དག་གིས་ཏེ་སྲེད་པ་ནི་བསྟན་པར་འདོད་པའོ། །དེ་ལས། ལེ་ལོ་ཉེ་བར་སྐྱེ་བར་འགྱུར། །ཞེས་སྦྱར་རོ། །ཡང་ན་འགྲོ་བའི་སྡུག་བསྔལ་མི་སྐྱོ་ལས་མི་རྩོལ་བ་ཡིན་ཏེ། དགེ་བའི་ལས་གང་ལ་ཡང་མི་འཇུག་པའོ། །དེ་ལས་བདེ་ཉམས་ལེན་པ་ཡིན་ལ། དེ་ལས་ནི་གཉིད་ཡིན་ཏེ་དེ་ལས་ཀྱང་བསྟན་སྲིད་པའོ། །དེའི་ཕྱིར་འཁོར་བའི་སྡུག་བསྔལ་ལ་མི་སྐྱོ་བ་བཟློག་པའི་དོན་དུ་འདིར་སྐྱོ་བ་བསྒོམ་པ་འདི་མངོན་དུ་བྱའོ་ཞེས་བྱ་བར། ཉོན་མོངས་རྒྱ་པས་ཞེས་བྱ་བ་ལ་སོགས་པ་གསུངས་ཏེ། རྒྱ་ནི་ཉི་ལ་སོགས་པ་གསོད་པར་བྱེད་པའི་དྲ་བར་བརྗོད་ལ་དེ་སྤྱོད་པ་ནི་ཉ་ལ་སོགས་པ་རྣམས་ཏེ་དེ་བཞིན་དུ་ཉོན་མོངས་པ་ཉིད་རྒྱ་ཡིན་ལ་དེས་བཤོར་བ་ནི་དབང་དུ་བྱས་།པ་ཡིན་ནོ། །འདི་ཅི་ལྟར་ཞེ་ན། སྐྱེ་བའི་རྒྱར་ནི་ཆུད་པ་སྟེ། རིགས་མཐུན་ཞིང་སྐལ་བ་མཉམ་པར་སྐྱེས་པ་ཉིད་སྐྱེ་བའི་རྒྱར་ཆུད་པ་ཡིན་ཏེ། དེར་ཆུད་པ་ནི་དེའི་ནང་དུ་སོན་པ་ཞེས་པའི་ཐ་ཚིག་གོ །འདི་འདིར་དེའི་དབང་དུ་གྱུར་པ་ནི་འཐད་པའོ། །ད་དུང་ནི་འདི་ལྟ་བུའི་གནས་སྐབས་ཐོབ་པར་
གྱུར་ན་ཡང་ངོ༌། །འཆི་བདག་ཁར་ནི་སོང་གྱུར་པ། །ཡིན་ན་ཡང་མི་ཤེས་སམ་ཞེས་པ་སྟེ། གལ་ཏེ་སྐྱེས་པར་གྱུར་ན་ངེས་པར་འཆི་བར་འགྱུར་རོ་ཞེས་པའི་དོན་ཏོ། །སྐྱོ་བའི་རྒྱུ་གཞན་འདི་ཡང་གསུངས་པ། རང་སྡེ་ཞེས་པ་ལ་སོགས་པའོ། །རང་སྡེ་ནི་སྡེ་ཚན་ཏེ། གང་དང་ལྷན་ཅིག་ཏུ་བྱིས་པ་ལ་སོགས་པའི་གནས་སྐབས་ན་རོལ་ཅིང་དགོད་པ་ལ་སོགས་པ་རྣམ་པར་སྤྱད་པའོ། །རང་སྡེ་དེ་རྣམས་ནི་གདོལ་པ་རྣམས་ཀྱིས་ངེས་པར་གསད་པར་བྱ་བའི་མ་ཧེ་དང་འདྲའོ། །མཐོང་བར་མ་གྱུར་ཏམ་ཞེས་པ་ནི། བདག་ཀྱང་གནས་སྐབས་འདི་ཉིད་ལ་གནས་སོ་ཞེས་པའོ། །འདིས་དུས་ཅུང་ཟད་ཅིག་ཡོངས་སུ་ཐོབ་ནས་ངེས་པར་འཆི་བར་འགྱུར་ཏེ། དེས་ན་དུས་དེ་སྲིད་དུ་བདག་གིས་བདེ་བ་ཉམས་སུ་མྱོང་བར་བྱ་བ་ཉིད་རིགས་སོ་ཞེ་ན། གལ་ཏེ་དེ་ལྟར་གྱུར་པ་དེ་ལྟ་ན་ཡང་ངེས་པར་འཆི་བར་འགྱུར་བ་ལ་ཡིད་ཆེས་པར་རིགས་པ་མ་ཡིན་ཏེ། ཐམས་ཅད་དུ་གསད་པར་བྱ་བའི་སྐྱེས་བུ་གཤེད་མས་བྱིན་གྱིས་བརླབས་པ་གསད་པར་བྱ་བའི་སར་ཁྲིད་པ་བཞིན་དུ་ཐར་པར་མ་མཐོང་ན་ཁྱོད་ཀྱི་བདེ་བ་ལ་སྤྱོད་པར་སྲིད་པ་རིགས་པ་མ་ཡིན་ནོ། །དེའི་ཕྱིར་སྐྱོ་བ་བསྒོམས་པས་རྒྱུ་དགག་པ་ལས་ལེ་ལོ་སྤངས་ཏེ། དགེ་བའི་ཕྱོགས་ལ་སྤྲོ་བ་འཕེལ་བ་ཉམས་སུ་བླང་བར་བྱའོ། །གལ་ཏེ་ངེས་པར་འཆི་བར་འགྱུར་བ་དེ་ལྟ་ན་ཡང་དེ་དང་ཉེ་བ་དང་གོ་བར་བྱས་ལ་ལེ་ལོ་སྤང་བར་བྱའོ་ཞེས་འདོགས་ནས། ཇི་སྲིད་ཅེས་པ་ལ་སོགས་པ་གསུངས་ཏེ། བསགས་པ་ནི་ཚོགས་པར་བྱས་པ་ཡིན་ལ། ཚོགས་པ་ནི་གང་གིས་འཆི་བའི་དོན་དུ་ནད་དང་རྒས་པའི་མཚན་ཉིད་འབྱོར་བའོ། །ཇི་སྲིད་ཅེས་པ་ནི་འཇིག་རྟེན་པའི་བརྗོད་པ་ཡིན་ལ། མྱུར་བ་ནི་མགྱོགས་པར་ཡིན་ཏེ། ཤིན་ཏུ་ཉེ་བར་གྱུར་པའི་ཕྱིར་རོ། །དེ་ལྟར་འཆི་བ་དག་གི་ཁར་སོན་པ་དེའི་ཚེ་དུས་མ་ཡིན་པར་ལེ་ལོ་སྤངས་ཀྱང་ཅི་ཞིག་བྱ་སྟེ། དེའི་ཚེ་དགོས་པ་ཅུང་ཟད་ཀྱང་ཡོད་པ་མ་ཡིན་ནོ་ཞེས་པའི་དོན་ཏེ། །ཚིགས་སུ་བཅད་པ་གསུམ་གྱིས་དུས་མ་ཡིན་པ་ཉིད་དུ་བསྒྲུབ་པའི་ཕྱིར། འདི་ནི་མ་ཐོབ་ཅེས་པ་ལ་སོགས་པ་གསུངས་ཏེ། འདི་ནི་ཞེས་པ་ནི་ཕྱི་ནས་བྱའོ་ཞེས་པ་ཡིད་ལ་བྱས་པ་སྟེ་དེ་མ་ཐོབ་པའོ། །
འདི་བརྩམས་པ་ནི་དགོས་པ་གང་ཞིག་དང་པོ་ཉིད་དུ་བྱེད་པར་འདོད་པའོ། །འདི་ཆེད་བྱས་པར་གནས་པ་ལ། །ཞེས་པ་ནི་གང་གིས་ཅུང་ཞིག་བསྒྲུབས་ཤིང་ཅི་ཞིག་མ་བསྒྲུབས་པའོ། །དེའི་ཕྱིར་བྱ་བ་མཐར་མ་ཐུག་པ་ཉིད་དུ། གློ་བུར་འཆི་བདག་འོངས་ནས་ནི། །བདག་ནི་བཅོམ་ཞེས་སེམས་པར་འགྱུར། །ཤིན་ཏུ་དཀའ་བས་སེམས་ཏེ་མྱོས་པར་འགྱུར་ཚེ་ཅི་ཞིག་བྱ་ཞེས་པ་ཕྱིས་འབྱུང་བ་དང་འབྲེལ་ཏོ། །མྱ་ངན་ནི་སྡུག་པ་དང་བྲལ་བས་སེམས་ཡོངས་སུ་གདུང་བར་བྱས་པའོ། །དེའི་ཤུགས་ནི་རྒྱུན་མི་འཆད་པར་འཇུག་པའོ། །དེས་སྐྱངས་པ་ནི་ཆེན་པོར་གྱུར་པ་ཡིན་པ། མཆི་མ་ནི་རླངས་པ་དང་བཅས་པའོ། །དམར་པོ་ནི་ཟངས་ཀྱི་ཁ་དོག་ཡིན་ལ། མིག་ནི་ལྟ་བར་བྱེད་པ་ཡིན་ཏེ། གང་གི་གདོང་ལ་དེ་ཡོད་པ་དེ་ལ་དེ་སྐད་ཅེས་བྱའོ། །དེ་ལྟ་བུར་གྱུར་པའི་གདོང་ངམ་བྱེད་ཉེ་དུ་གང་རྣམས་ཀྱི་ཡིན་པ་དེ་ལ་དེ་སྐད་ཅེས་བྱ་སྟེ། དེ་རྣམས་མཐོང་ནས་ནི་རྣམ་པར་བལྟས་པ་ནའོ། །ཅི་ལྟ་བུར་གྱུར་པ་ན་ཞེ་ན། རེ་ཐག་ཆད་པ་ལའོ། །གང་དུ་ཞེ་ན། སླར་གསོན་པའི་བསམ་པ་དང་བྲལ་བའམ་མགོན་དང་བྲལ་བ་དེ་ལའོ། །འཆི་བའི་དུས་ན་གནས་པའི་གཤིན་རྗེའི་ཕོ་ཉའི་བཞིན་ལ་ཡང་སྟེ། སྐྱེས་བུ་ཁྲེ་བ་དང་བཅས་པ་ཁྲོ་གཉེར་ཅན་མཐོང་བ་ན། མྱོས་པར་འགྱུར་ཚེ་ཅི་ཞིག་བྱ། །ཞེས་སོ། །རང་སྡིག་དྲན་པས་གདུངས་པ་ནི་འཆི་བའི་དུས་ན་འདི་ཅིའི་ཕྱིར་བདག་གིས་བྱས་ཞེས་ཏེ། ཕྱིས་འགྱོད་བས་གདུངས་པ་ནའོ། །འདི་ཙམ་འབའ་ཞིག་ནི་མ་ཡིན་ཏེ། འོན་ཀྱང་དམྱལ་བའི་སྒྲ་ཐོས་པ་ན་སྟེ་སྡུག་བསྔལ་མི་བཟོད་པ་ཉམས་སུ་མྱོང་བས་སྡུག་བསྔལ་བར་གྱུར་པས་བཏོན་པའི་འོ་དོད་བོས་པའི་སྒྲ་དམྱལ་བ་ལས་བྱུང་བ་དོན་འགའ་ཞིག་ལ་ཁྲོ་བའི་སྒྲ་བཞིན་དུ་དེ་ཐོས་ནས་བདག་ཀྱང་གནས་སྐབས་འདི་ཉིད་ལ་གནས་པ་ཡིན་ནོ་ཞེས་སོ། །སྐྲག་པས་གང་ཞིག་ལ་མི་གཙང་བ་འབྱུང་བ་ནི་དོར་བ་སྟེ། དེས་ལུས་བསྒོས་པའོ། །མྱོས་པ་ནི་ལུས་དང་ངག་དང་ཡིད་ཀྱིས་འཇུག་པ་དབང་དུ་མ་གྱུར་པའོ། །ཅི་ཞིག་བྱ་ཞེས་པ་ནི་བྱ་བ་ཐམས་ཅད་ལ་བྱེད་པ་ལོག་པའོ། །འདི་ལྟར་རྟོགས་པར་བྱས་ནས་ནད་མེད་པའི་གནས་སྐབས་ཉིད་སུ་བསླང་པར་འདོད་ནས། ཁྱོད་ནི་ཉ་གསོན་ཞེས་པ་ལ་སོགས་པ་
གསུངས་ཏེ། རིམ་གྱིས་བཟའ་བའི་དོན་དུ་ཉ་ཉིད་གསོ་བར་བྱེད་པ་ཡིན་ཏེ། ཕལ་ཆེར་ན་ཤར་ཕྱོགས་ན་གནས་པའི་སྐྱེ་བོ་རྣམས་ཀྱིས་སྲུང་བར་བྱེད་དོ། །གསོན་པས་མཚོན་པའི་ཉ་ནི་ཉི་གསོན་མ་ཡིན་ཏེ། དེའི་དུས་ནའོ། །དེ་དང་འདྲ་བར་བདག་ཀྱང་དེ་རིང་ངམ་སང་ངེས་པ་ཉིད་དུ་འཆི་བར་འགྱུར་རོ་ཞེས་ཡིད་ལ་བྱས་ནས་ཁྱེད་ཀྱིས་འདི་ཉིད་དུ་འཇིགས་པར་རིགས་སོ། །འདིར་ཞེས་པ་ནི་ཤེས་བཞིན་ལྡན་པའི་གནས་སྐབས་ཉིད་ནའོ། །ཁྱེད་ནི་ཞེས་པ་ནི་འཆི་བ་འཐོབ་པར་གྱུར་པ་སྟེ། སྡིག་པ་བྱས་པར་གྱུར་པ་ཁྱེད་ཤིན་ཏུ་བཟོད་པར་དཀའ་བའི་དམྱལ་བའི་སྡུག་བསྔལ་ལས་འཇིགས་པར་རིགས་པ་ལྟ་སྨོས་ཀྱང་ཅི་དགོས་པའོ། །མི་རྩོལ་བ་དང་བདེ་ཉམས་ལེན་པའི་དབང་དུ་བྱས་པའི་ཆུ་ཚན་ཞེས་པ་ལ་སོགས་པ་གསུངས་ཏེ། ཆུ་ཚན་གྱིས་ཀྱང་རེག་པའོ། །གཞོན་ཤ་ཅན་ཞེས་པ་ནི་བོད་པ་ཡིན་ཏེ། ཤིན་ཏུ་འཇམ་པའི་ལུས་ཡིན་པས་བཟོད་པར་མི་ནུས་སོ། །གལ་ཏེ་དེ་ལྟར་ཡིན་པ་དེའི་ཚེ་སྡིག་པ་བྱས་ཞེས་པ་ལ་སོགས་པ་ནི་གོ་སླའོ། །གཞན་གྱིས་ཡང་དབང་དུ་བྱས་ཏེ། བརྩོན་མེད་ཅེས་བྱ་བ་ལ་སོགས་པ་གསུངས་པ་ལ། བདེ་བའི་རྒྱུ་བསྐྱེད་པའི་དོན་དུ་བྱས་པས་སྟོང་པ་དེ་ལྟ་ན་ཡང་དེའི་འབྲས་བུ་བདེ་བ་འདོད་པ་དང་སྡུག་བསྔལ་མི་བཟོད་པར་བྱེད། དེ་ལྟ་ནའང་གནོད་པ་མང་བར་བྱེད་པ་ཡིན་ཏེ། སྡུག་བསྔལ་ཐམས་ཅད་ཀྱི་འབྱུང་ཁུངས་ཡིན་པའི་ཕྱིར་རོ། །འཆི་བདག་གིས་ཀྱང་དབང་དུ་བྱེད་པར་ཅིའི་ཕྱིར་བྱེད། དེ་ལྟར་ནའང་བདག་ཉིད་མི་འཆི་བར་ཅིའི་ཕྱིར་སེམས་པར་བྱེད་ཅེས་པའོ། །དེ་ལྟར་ཡང་འདི་ལ་སྤྱོད་པའི་ཕྱིན་ཅི་ལོག་པ་མཐོང་ནས་སྙིང་རྗེ་བཞིན་པས་སྐྱོ་བ་དང་བཅས་པས། ཀྱི་ཧུད་སྡུག་བསྔལ་དག་གིས་བཅོམ། །ཞེས་གསུངས་ཏེ་འདི་རྨོངས་པ་ཆེན་པོ་ཉིད་ཀྱིས་དཀའ་བའི་གནས་སྐབས་སུ་ཞུགས་སོ་ཞེས་པ་དང༌། བདག་ཉིད་ལ་ཡང་སྐྱོ་བར་བྱེད་དེ། དེ་བཞིན་དུ་གཞན་དུ་ཡང་ཇི་ལྟར་རིགས་པར་བལྟ་བར་བྱའོ། །བརྩོན་མེད་ཅེས་པ་ལ་སོགས་པ་རྣམས་ནི་འབོད་པའི་ཚིག་རྣམས་ཡིན་ནོ། །གཉིད་ཀྱི་དབང་དུ་གྱུར་པའི་དབང་དུ་མཛད་ནས། མིའི་གྲུ་གཞེས་པ་ལ་སོགས་པ་གསུངས་པ་ལ། མི་ཁོམ་པ་བརྒྱད་ལས་
གྲོལ་བའི་མིའི་དངོས་པོ་ཐོབ་པ་གྲུ་དང་འདྲ་བ་མངོན་པར་མཐོ་བ་ལ་སོགས་པ་ཕ་རོལ་དུ་སྒྲོལ་བ་རྙེད་ནས་སོ། །སྡུག་བསྔལ་གྱི་རང་བཞིན་གྱི་ཆུ་བོ་ཆེན་པོ་ལས་སྒྲོལ་ཞེས་པ་ནི་བརྒལ་བར་གྱིས་ཞེས་པ་སྟེ། བརྩོན་འགྲུས་ལ་བརྟེན་ནས་སྡུག་བསྔལ་རྣམས་ལ་རྒྱབ་ཀྱིས་ཕྱོགས་པར་གྱིས་ཤིག་པའོ། །ཀྱེ་རྨོངས་པའི་དབང་དུ་གྱུར་པ་ཇི་སྲིད་དུ་གྲུ་འདི་དང་ཉེ་བར་གྱུར་པའི་དུས་འདི་ནི་གཉིད་ལོག་པའི་དུས་མ་ཡིན་ནོ། །གལ་ཏེ་དེ་ལྟ་ཉིད་དུ་འབད་པར་མི་བྱེད་ན། དེའི་ཚེ་ཡང་ངན་སོང་གི་འགྲོ་བ་ལས་སྒྲོལ་བའི་གྲུ་འདི་རྙེད་པར་དཀའ་སྟེ། ཕྱིས་འདི་ཡང་དག་འབྱོར་པར་ག་ལ་འགྱུར། །ཞེས་གང་གསུངས་པའོ། །དེ་ལྟར་ལེ་ལོ་བཀག་ནས། ངན་ལ་མངོན་པར་ཞེན་པ་སྤང་བའི་ཕྱིར། དམ་ཆོས་དགའ་བ་ཞེས་བྱ་བ་ལ་སོགས་པ་གསུངས་ཏེ། དགའ་བ་ནི་ལས་རྣམས་ལ་དགའ་བའོ། །མཆོག་ནི་བླ་ན་མེད་པའོ། །ཅི་ལྟ་བུར་གྱུར་པ་ཞེ་ན། བར་མེད་པའི་དགའ་བའི་རྒྱུན་ཡིན་ཏེ། བདེ་འགྲོ་གོང་ནས་གོང་དུ་བསྐྱེད་པའི་ཕྱིར་རོ། །མཐའ་ཡས་པ་ནི་མཐར་ཐུག་པ་མེད་པ་ཡིན་ཏེ་དགའ་བའི་རྒྱུན་ཏེ་གང་ལ་བདེ་བའི་རྒྱུན་ཡོད་པ་དེ་ལ་དེ་སྐད་ཅེས་བྱ་སྟེ། དེ་ཉིད་ཀྱི་ཕྱིར་མཆོག་ཏུ་བརྗོད་པའོ། །དེ་སྤངས་ནས་ཏེ་དགའ་བ་ནི་མངོན་པར་དགའ་བའོ། །གཡེང་བ་ནི་ལུས་དང་སེམས་འཕང་བསྟོད་པ་ཡིན་ཏེ་དགོད་པའི་ངང་ཚུལ་ཞེས་པའི་དོན་ཏོ། །དགོང་པ་ནི་ངག་གི་རྣམ་པར་གཡེང་བ་ཡིན་ཏེ། དགའ་བ་དང་བཅས་པའི་ངག་གི་རྣམ་པར་འགྱུར་བའོ་ཞེས་བྱ་བའི་དོན་ཏོ། །སྩོགས་ཀྱི་སྒྲས་ནི་གླུ་ལ་སོགས་པ་བཟུང་ངོ། །དེ་ལ་ཁྱོད་ཅིའི་ཕྱིར་དགའ་ཞེས་ཏེ་རིགས་པ་མ་ཡིན་ནོ་ཞེས་དགོངས་པའོ། །ཅི་ལྟ་བུར་གྱུར་པ་ལ་ཞེ་ན། སྡུག་བསྔལ་གྱི་རྒྱུ་ལས་ཏེ་དམྱལ་བ་ལ་སོགས་པ་ངན་འགྲོར་ཁྱེར་བར་བྱེད་པའི་ཕྱིར་སྡུག་བསྔལ་གྱི་རྒྱུའོ། །དེ་ལྟར་ངན་ལ་ཞེན་པ་སྤངས་ནས་སྒྱིད་ལུག་ཅིང་བདག་ཉིད་བརྙས་པ་བརྩོན་འགྲུས་ཀྱིས་མི་མཐུན་པའི་ཕྱོགས་སྤོང་བར་འདོད་པས་དེའི་མི་མཐུན་པའི་ཕྱོགས་གཞན་ཡང་སྤང་བའི་ཕྱིར་དུ་བསྟན་པ། སྒྱིད་ལུག་མེད་ཅེས་པ་ལ་སོགས་པ་གསུངས་ལ། སྒྱིད་ལུག་པ་ལས་ཕྱིན་ཅི་ལོག་པ་ནི་སྒྱིད་ལུག་མེད་པ་ཡིན་ལ། དཔུང་ཚོགས་ནི་ཚོགས་
པ་ཡིན་ཏེ། འཆད་པར་འགྱུར་བའི་མཚན་ཉིད་ཅན་ནོ། །ལྷུར་བླང་བ་ནི་གྲིམས་པའོ། །བདག་ཉིད་དབང་དུ་བྱ་བ་ནི་བདག་ཉིད་དབང་དུ་གྱུར་པའོ། །འདི་དག་ཐམས་ཅད་ནི་ཟླས་དབྱེ་བའི་ཚིག་སྡུད་པ་ཡིན་ནོ། །ཡང་ན་འདི་རྣམས་དང་ལྷན་ཅིག་པའི་བདག་ཉིད་དབང་དུ་བྱས་པ་ཡིན་ནོ། །བདག་དང་གཞན་དུ་མཉམ་པ་དང༌། བདག་དང་གཞན་དུ་བརྗེ་བ་དག་ནི་བསམ་གཏན་གྱི་ལེའུར་འཆད་པར་འགྱུར་བའོ། །འདི་དག་མ་ལུས་པ་ནི་ལེ་ལོ་སྤང་བའི་ཕྱིར་བརྩོན་འགྲུས་སྤེལ་བ་ལ་མཐུ་དང་ལྡན་པ་ཡིན་ནོ་ཞེས་མདོར་བསྟན་པ་ཡིན་ལ། མདོར་བསྟན་པའི་དོན་ཉིད་རིམ་གྱིས་རྒྱས་པར་བསྟན་པའི་ཆེད་དུ། བདག་གིས་ཞེས་པ་ལ་སོགས་པ་གསུངས་ཏེ། བདག་གིས་བྱང་ཆུབ་ག་ལ་ཞེས་ཤེས་པ་ནི་ཉོན་མོངས་བདག་ཇི་ལྟར་ཡང་དག་པར་རྫོགས་པའི་བྱང་ཆུབ་ཀྱི་སྣོད་ཡིན་ཏེ། སངས་རྒྱས་ཉིད་ནི་དབང་པོ་རྣོན་པོ་བརྩོན་འགྲུས་བརྩམས་པ། དཔག་ཏུ་མེད་པའི་བསོད་ནམས་ཀྱི་ཚོགས་བསགས་པ་ཤིན་ཏུ་དཀའ་བ་སྤྱོད་པ་ཉམས་སུ་ལེན་པས་བསྐལ་པ་གྲངས་མེད་པ་དུ་མས་སྐྱེས་བུ་ཁྱད་པར་ཅན་འགའ་ཞིག་གིས་བསྒྲུབ་པར་བྱ་བ་ཡིན་ལ། བདག་ནི་དེ་ལྟ་བུ་མ་ཡིན་པའི་ཕྱིར་བདག་ཅི་ལྟ་བ་དེ་ལྟ་བུ་ལ་སངས་རྒྱས་ཉིད་ཅི་ལྟར་སྲིད་པར་འགྱུར་ཞེས་རྣམ་པ་འདི་ལྟ་བུར་ཡིད་ལ་བྱ་བས་སྒྱིད་ལུག་ཅིང་བརྙས་པར་མི་བྱ་སྟེ་དོན་ཆེན་པོ་ལས་ཉམས་པའི་རྒྱུ་ཡིན་པའི་ཕྱིར་རོ། །ཇི་ལྟར་སྒྱིད་ལུག་པ་ཡང་དོན་མེད་ཡིན། །ཞེས་གསུངས་སོ། །ཅིའི་ཕྱིར་ཞེ་ན། གང་གི་ཕྱིར་དེ་བཞིན་གཤེགས་པས་ཏེ། འདི་ནི་འཆད་པར་འགྱུར་བ་ཡིན་ལ་བདེན་པ་ནི་དེ་ལས་གཞན་དུ་མ་ཡིན་པ་ཡིན་ཏེ། གསུངས་པ་ནི་བཀའ་སྩལ་པའོ། །ཇི་ལྟར་ཤེས་པར་བྱ་ཞེ་ན། བདེན་པ་གསུངས་པས་ཞེས་ཏེ། ཡེ་ཤེས་ཀྱི་བྱ་བ་མངའ་བས་ཕྱིན་ཅི་མ་ལོག་པར་གསུངས་པའོ། །དེའི་ཕྱིར་བདེན་པ་གསུངས་པ་ལ་འདི་ནི་གཏན་ཚིགས་ཀྱི་ཚིག་ཡིན་ནོ། །ཇི་ལྟ་བུའི་བདེན་པ་གསུངས་ཤེ་ན། སྦྲང་བུ་ཞེས་པ་ལ་སོགས་པ་གསུངས་ཏེ། དེས་ཀྱང་ཞེས་པ་ནི་སངས་རྒྱས་བཅོམ་ལྡན་འདས་ཤཱཀྱ་ཐུབ་པ་དང༌། རིན་ཆེན་གཙུག་ཏོར་ཅན་དང༌། མར་མེ་མཛད་ལ་སོགས་པ་འཁོར་བའི་རྒྱ་མཚོའི་འཁོར་བའི་ནང་དུ་ཆུད་པ་སྔར་གྱི་སོ་སོའི་སྐྱེ་བོའི་
གནས་སྐབས་ན་ཡོངས་སུ་འཁོར་བར་གྱུར་པ་ཉིད་དུ་གནས་པ་ན། གང་གིས་བརྩོན་པའི་སྟོབས་བསྐྱེད་པ་ནི་བརྩོན་འགྲུས་འཕེལ་བའི་སྟོབས་ཀྱིས་ཚོགས་བསགས་པ་ནའོ། །བྱང་ཆུབ་ཐོབ་དཀའ་ནི་རྙེད་པར་དཀའ་བ་ཡིན་ལ་བླ་མེད་ཐོབ་པ་ནི་མཆོག་གོ །བརྩོན་འགྲུས་བརྩམས་པ་ལ་ཅུང་ཟད་ཀྱང་དཀའ་བ་ཡོད་པ་མ་ཡིན་ནོ་ཞེས་པ་ནི་བདེན་པ་ཉིད་དོ་ཞེས་དགོངས་སོ། །བདག་ནི་མིར་སྐྱེས་པ་སྟེ་མི་རུ་སྐྱེ་བ་ཐོབ་པ་ཡིན་ལ། ཕན་གནོད་ངོ་ཤེས་ནུས་པ་ཡིས། །ཞེས་པ་འདི་ནི་ཕན་པ་ཡིན་ལ་འདི་ནི་མི་ཕན་པ་ཡིན་ནོ་ཞེས་དགེ་བ་དང་མི་དགེ་བའི་ལས་ཉེ་བར་སྟོན་པ་དང་ངོ་ཤེས་པ་སྟེ། ཁོང་དུ་ཆུད་པར་ནུས་པའོ། །དེའི་ཕྱིར་བདག་ལ་ཤིན་ཏུ་ཡང་བྱང་ཆུབ་རྙེད་དཀའ་བ་མ་ཡིན་ནོ་ཞེས་སྟོན་པ་ནི། བདག་གི་ཞེས་པ་སོགས་པ་གསུངས་ཏེ། འདི་ལྟར་བསམས་ནས་སོ། །ཐམས་ཅད་མཁྱེན་པ་ནི་དངོས་པོའི་དེ་ཁོ་ན་ཉིད་མཁྱེན་པ་ཡིན་ལ། ཚུལ་འདི་ནི་བླང་བ་དང་དོར་བའི་དེ་ཁོ་ན་ཉིད་སྟོན་པའི་ཐེག་པའོ། །མ་བཏང་ན་ནི་ཡོངས་སུ་མ་སྤངས་པ་སྟེ། དེ་ལེན་པ་དང་ཡོངས་སུ་འཛིན་པ་དང་བསྟེན་པ་ཞེས་པ་ལ་སོགས་པའི་དོན་ཏོ། །སངས་རྒྱས་ཉིད་བདག་གིས་ཅིས་མི་འཐོབ་སྟེ་ཚིག་ཟུར་གྱིས་འཐོབ་པ་ཁོ་ནར་བསྟན་ཏོ། །འདི་བཅོམ་ལྡན་འདས་ཀྱིས་དཀོན་མཆོག་སྤྲིན་དུ་གསུངས་པ་ཡིན་ཏེ། ཇི་ལྟར་འདི་ལ་བྱང་ཆུབ་སེམས་དཔའ་འདི་སྙམ་དུ་མིར་གྱུར་པ་ནི་བྱང་ཆུབ་ཐོབ་པ་དཀའ་སྟེ། བདག་གི་བརྩོན་འགྲུས་འདི་ནི་ཆུང་ཞིང་ཞན་ལ། བདག་ཀྱང་ལེ་ལོ་ཅན་ཏེ། བྱང་ཆུབ་ནི་མགོའི་ཐོད་ལ་མེ་འབར་བ་བཞིན་དུ་བསྐལ་པ་མང་པོ་བསྐལ་པ་བརྒྱ་ཕྲག་མང་པོར་བསྒྲུབ་དགོས་པས་བདག་ནི་དེ་ལྟ་བུའི་ཁུར་བསྐུར་བར་མི་སྤྲོ་སྙམ་དུ་སེམས་མི་བསྐྱེད་དེ། འོན་ཀྱང་ཅི་འདི་ལྟར་བྱང་ཆུབ་སེམས་དཔའ་ནི་འདི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་མངོན་པར་རྫོགས་པར་སངས་རྒྱས་པ་དེ་དག་དང༌། གང་མངོན་པར་རྫོགས་པར་འཚང་རྒྱ་བ་དེ་དག་དང༌། གང་མངོན་པར་རྫོགས་པར་འཚང་རྒྱ་བར་འགྱུར་བ་དེ་དག་ཀྱང་ཚུལ་འདི་འདྲ་བ་དང༌། ལམ་འདི་འདྲ་བ་ཉིད་དང༌། བརྩོན་འགྲུས་འདི་འདྲ་བ་ཉིད་ཀྱིས་མངོན་པར་རྫོགས་པར་སངས་རྒྱས། མངོན་པར་རྫོགས་པར་འཚང་རྒྱ།
མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དེ་དག་ཀྱང་དེ་བཞིན་གཤེགས་པར་གྱུར་པ་ཤ་སྟག་ལས་མངོན་པར་རྫོགས་པར་སངས་རྒྱས་པ་མ་ཡིན་གྱིས། བདག་ཀྱང་ཅི་ནས་ཀྱང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་བར་སེམས་ཅན་ཐམས་ཅད་དང་ཐུན་མོང་གི་བརྩོན་འགྲུས་དང༌། སེམས་ཅན་ཐམས་ཅད་ལ་དམིགས་པའི་བརྩོན་འགྲུས་ཀྱིས་བདག་གིས་ཀྱང་དེ་ལྟ་དེ་ལྟར་བཙལ་ལོ་འབད་དོ་ཞེས་སོ། །འདི་ནི་རིགས་པ་ཉིད་ཡིན་ཏེ། འོན་ཀྱང་གཅིག་པུ་ཤིན་ཏུ་དཀའ་བའི་སྤྱོད་པ་ཐོས་པས་སྒྱིད་ལུག་པ་བཟློག་པར་མི་ནུས་སོ་ཞེས་པའི་རྣམ་པར་རྟོག་པ། འོན་ཏེ་རྐང་ལག་ཅེས་པ་ལ་སོགས་པ་གསུངས་ཏེ། ལག་པ་དང་རྐང་པ་དང་མགོ་ལ་སོགས་པའི་སྦྱིན་པ་མེད་པར་སངས་རྒྱས་ཉིད་ཐོབ་པ་མ་ཡིན་ནོ་ཞེས་ཤིན་ཏུ་དཀའ་བའི་ལས་རྣམས་ལ་འཇུག་པས་འཇིགས་པ་སྤྲོ་བ་ཡང་ལྡོག་པ་ཉིད་དོ་ཞེས་གལ་ཏེ་སེམས་ན། རང་གི་སེམས་ཉིད་ལ་གསུངས་པ། དེ་ལ་ལྕི་བ་དང་ཡང་བ་ལ་བདག་རྨོངས་པ་ཉིད་དེ་ཆུང་ངུ་ལ་ཆེན་པོ་ཉིད་དང༌། ཆེན་པོ་ཆུང་ངུ་ཉིད་དུ་གཏི་མུག་གི་དབང་དུ་གྱུར་པ་ཡིན་ལ། མ་དཔྱད་པ་ནི་མ་ཤེས་པས་ཏེ་བདག་གི་དོན་དམ་པར་དཔྱད་པར་མ་གྱུར་ཏོ། །དོན་དམ་པར་དཔྱད་ན་ལྕི་བ་དང་ཡང་བ་འདི་ཕྱིན་ཅི་ལོག་པ་ཉིད་དོ་ཞེས། བསྐལ་པ་ཞེས་བྱ་བ་ལ་སོགས་པ་གསུངས་ཏེ། འཁོར་བའི་བཙོན་རར་གནས་པ་ན་དེ་ལྟ་བུའི་ལས་ཀྱི་དབང་གིས་བདག་བཅད་པ་སྟེ། ལག་པ་དང་རྐང་པ་ལ་སོགས་པ་ལུས་དང་ཡན་ལག་དང་ཉིད་ལག་བཅད་པའི་ཕྱིར་དེ་དམྱལ་བ་ལ་སོགས་པ་རྣམས་སུ་ནི་མ་ཡིན་ནོ། །དེ་བཞིན་དུ་ཕུག་སྟེ་ནི་མདུང་དང་འཕང་མདུང་ལ་སོགས་པ་རྣམས་ཀྱིས་སོ། །སྲེག་པ་ནི་དམྱལ་བའི་དེ་ལ་སོགས་པས་སོ། །གཤེག་པ་ནི་སོག་ལེ་འབར་བུ་ལ་སོགས་པས་སོ། །ལན་གྲངས་དུ་མར་ལན་མང་དུ་ཡིན་ཏེ་འཁོར་བའི་ལམ་མཐར་ཐུག་པ་མེད་པར་དམྱལ་བ་ལ་སོགས་པ་རྣམས་སུ་སྡུག་བསྔལ་ཉམས་སུ་མྱོང་བ་ཡིན་ནོ། །བསྐལ་པ་བྱེ་བ་གྲངས་མེད་དུ། །ཞེས་པ་ནི་བགྲང་བར་མི་ནུས་པ་ཡིན་ནོ། །དེའི་ཕྱིར་མི་འདོད་ཀྱང་མཐར་ཐུག་པ་མེད་པའི་སྡུག་བསྔལ་རྣམ་པ་དུ་མ་འབྱུང་
བར་འགྱུར་ཏེ། དེ་སངས་རྒྱས་ཀྱི་ཚོགས་སུ་གྱུར་པ་ནི་མ་ཡིན་ནོ། །འདི་ནི་འཁོར་བ་ལ་མཐར་ཐུག་པ་མེད་པས་སྡུག་བསྔལ་ཤིན་ཏུ་ཆེན་པོ་དང་འབྲས་བུ་མེད་པ་ཡང་ཡིན་ནོ། །སངས་རྒྱས་ཉིད་སྒྲུབ་པར་བྱེད་པ་ནི་ཤིན་ཏུ་ཆུང་བ་དང་འབྲས་བུ་དང་བཅས་པ་ཡང་ཡིན་ནོ་ཞེས་བསྟན་པའི་ཕྱིར། བདག་གི་ཞེས་པ་ལ་སོགས་པ་གསུངས་ཏེ། སངས་རྒྱས་ཉིད་སྒྲུབ་པར་བྱེད་པའི་བདག་གིས་སྡུག་བསྔལ་འདི་ནི་ཚད་ཡོད་དོ་ཞེས་པ་ནི་དུས་ངེས་པར་གྱུར་པའི་ཕྱིར་དང༌། ཡང་སྡུག་བསྔལ་གྱི་རྒྱུད་དེ་ལྟ་བུར་གྱུར་པའི་ཟུག་རྡུ་དེས་གནོན་པ་དེ་བསལ་བའི་ཕྱིར་ཏེ། དེ་སེལ་བ་ནི་ལྡོག་པར་བྱེད་པའོ། །དེའི་རྒྱུ་མཚན་དུ་དེ་བཏང་སྙོམས་སུ་བོར་ནས་ཇི་སྲིད་འཚོའི་བར་གྱི་སྡུག་བསྔལ་བསལ་བར་བྱས་སོ་ཞེས་པའི་དོན་ཏོ། །དེའི་ཟུག་རྡུ་ཁོང་རླག་གདོན་པའི་ཆེད་དུ་ལུས་ལ་རྨ་བཏོད་ནས་འབྱིན་ཅིང་འདོན་པར་བྱེད་དོ་ཞེས་པའི་དོན་ཏོ། །དུས་སོ་སོར་ངེས་པའི་སྡུག་བསྔལ་ཤིན་ཏུ་ཆུང་བ་དེས་ཡུན་རིང་པོའི་སྡུག་བསྔལ་ཞི་བའི་རྒྱུ་མཚན་ཡིན་པ་དེ་བཞིན་དུ་སྡུག་བསྔལ་འདི་ལ་ཡང་བཟོད་པར་བྱ་བར་རིགས་སོ། །སྨན་པ་ཀུན་ཀྱང་ཞེས་པ་ལ་སོགས་པ་གསུངས་པ་འདིས་ཀྱང་སྡུད་པ་ཡིན་ཏེ། སྨན་པ་ཀུན་ཀྱང་ནི་བདག་འགའ་ཞིག་མ་ཡིན་པ་ཉིད་དོ། །བསྙུང་བ་དང་སྨན་པ་ལ་སོགས་པ་བྱས་པས་ཇི་ལྟར་འདོད་པར་ཟ་བ་དང་འདུག་པ་ལ་སོགས་པ་བཀག་པ་ལས་བྱུང་བའི་བྱ་བའི་སྡུག་བསྔལ་གྱིས་གདུངས་པ་རྣམས་ལ་ནད་མེད་པ་སྐྱེད་པར་བྱེད་དེ། གཞན་དུ་ན་དེ་ཞི་བར་བྱེད་པར་མི་ནུས་སོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་ཤིན་ཏུ་ཡང་སྡུག་བསྔལ་ཆུང་ངུའི་ཆུང་ངུ་ལ་བཟོད་པར་བྱའོ། །ཅིའི་ཕྱིར་ཞེ་ན། སྡུག་བསྔལ་མང་པོ་དག་གཞོམ་ཕྱིར། །ཞེས་ཏེ། བདག་དང་སེམས་ཅན་ཐམས་ཅད་ཀྱི་ཡུན་རིང་པོའི་སྡུག་བསྔལ་ཐམས་ཅད་ཞི་བར་བྱེད་པའི་ཕྱིར་རོ་ཞེས་པའི་དོན་ཏོ། །བློ་དང་ལྡན་པས་འདི་ལྟར་རེ་ཞིག་ཁས་བླངས་པར་རིགས་ཏེ་འདིར་རིགས་པ་ཡིན་ཡང་དཀའ་བའི་ལས་ལ་བཅོམ་ལྡན་འདས་ཀྱིས་ལས་དང་པོ་པ་ལ་དང་པོར་རྗེས་སུ་གནང་བ་མ་ཡིན་ནོ་ཞེས་བསྟན་པའི་ཕྱིར། གསོ་དཔྱད་ཅེས་པ་ལ་སོགས་པ་གསུངས་ཏེ། གསོ་དཔྱད་འོས་པ་འདི་འདྲ་བ་བརྗོད་མ་ཐག་པའི་སྡུག་བསྔལ་སྐྱེད་པར་བྱེད་པ་རྣམས་ཡིན་ལ། འོས་
པ་ཡིན་ན་ཡང་བསྟན་པར་བྱ་བ་ཡིན་ན་ཡང་ངོ༌། །སྨན་པའི་མཆོག་ནི་བཅོམ་ལྡན་འདས་ཏེ་ནད་ཐམས་ཅད་འཆོས་པར་མཛད་པས་རྣམ་པ་ཐམས་ཅད་དུ་དང་པོར་གནང་བ་མ་ཡིན་ལ། ལས་དང་པོ་བས་བྱ་བ་མ་ཡིན་པ་ཉིད་དུ་བསྟན་ཏོ། །འོ་ན་ཇི་ལྟར་འདོད་ཆགས་ལ་སོགས་པའི་ནད་སེལ་བར་བྱེད་ཅེ་ན། ཉེ་བར་སྤྱོད་པ་འཇམ་པོས་ཞེས་པ་ལ་སོགས་པ་གསུངས་ཏེ། ཉེ་བར་སྤྱོད་པ་ཤིན་ཏུ་འཇམ་པོའི་རིམ་པས་ཏེ་ཇི་ལྟར་བཟོད་པར་གསོ་དཔྱད་གསུངས་པས་ཞེས་པའི་དོན་ཏོ། །གསོ་བར་མཛད་པ་ནི་ནད་ལས་གྲོལ་བར་མཛད་པའོ། །ནད་པ་ཆེན་པོ་ནི་ཡུན་རིང་པོའི་ནད་པ་སྟེ། འདོད་ཆགས་ལ་སོགས་པའི་ནད་ཆེན་པོས་བཟུང་བ་རྣམས་སོ། །ཡང་ཅི་ལྟར་ཉེ་བར་སྤྱོད་པ་འཇམ་པོ་ཡིན་ཞེ་ན། ཚོད་དམ་ཞེས་པ་ལ་སོགས་པ་གསུངས་ཏེ། སེར་སྣའི་དྲི་མ་སྤང་བའི་ཕྱིར་དང་བདེ་ཞིང་བདེ་བའི་ཚོགས་སྤེལ་བའི་དོན་དུ་ཡོངས་སུ་གསོ་བར་ནུས་པའི་སྔོ་རྔད་དང་ཕྱེ་ཟན་གྱི་ཆང་བུ་ཙམ་སྦྱིན་པ་ལ་ཐོག་མ་ཁོ་ནར་འདྲེན་པས་ཏེ་བཅོམ་ལྡན་འདས་ཀྱིས་སྦྱོར་བར་མཛད་དེ། ཡང་ཐབས་ཀྱི་ཁྱད་པར་གྱིས་སྦྱོར་བ་མཛད་དོ། །དེ་ལ་ཞེས་པ་ནི་འཇིག་རྟེན་པའི་བརྗོད་པ་ཡིན་ལ། གང་དེ་ལྟར་ན་སྦྱིན་པ་ཆུང་ངུ་ལ་སོགས་པ་སྟེར་བ་ལ་གོམས་པའི་རིམ་པས་སྦྱིན་པ་ཆེན་པོའི་ཆེན་པོ་ལ་གོམས་པ་ཕུལ་དུ་ཕྱིན་པར་གྱུར་པ་ན་ཕྱི་ནས་དཀའ་བ་མེད་པ་ཉིད་དུ་རང་གི་ཤ་དང་ཁྲག་ལ་སོགས་པ་ཡང་དང་བས་སྟེར་བར་བྱེད་དོ། །ཡང་འདི་ཅིའི་ཕྱིར་ཞེས་དགོངས་ནས། གང་ཚེ་ཞེས་བྱ་བ་ལ་སོགས་པ་གསུངས་ཏེ། གང་གི་དུས་ན་སྦྱིན་པ་ལ་སོགས་པ་ལ་མཆོག་ཏུ་གོམས་པ་ཕུལ་དུ་ཕྱིན་པར་གྱུར་པ་ལས་སེར་སྣ་རྣམ་པ་ཐམས་ཅད་དུ་བྲལ་བས་རང་གི་ཤ་ལ་ཡང་སྔོ་རྔད་ལྟ་བུའི་ཞེན་པ་མེད་པའི་བློ་སྐྱེ་བར་འགྱུར་ལ། དེའི་ཚེ་རང་གི་ཤ་ལ་སོགས་པ་གཏོང་བ་ཡང་ཉམས་སུ་ལེན་པར་མི་ནུས་པ་མ་ཡིན་པའི་ཕྱིར་དེའི་དུས་ན་དཀའ་བ་ཅི་ཞིག་ཡོད་དེ་ཅུང་ཟད་ཀྱང་མ་ཡིན་ནོ་ཞེས་བྱ་བའི་དོན་ཏོ། །འོ་ན་དེ་ལྟར་གྱུར་ན་ཡང་དུས་ཡུན་རིང་པོར་གཞན་གྱི་དོན་དུ་འཁོར་བ་ཇི་སྲིད་ཀྱི་སྡུག་བསྔལ་ཅི་དང་འདྲ་བར་སྤང་ནུས་ཤེ་ན། སྡིག་པ་ཞེས་པ་ལ་སོགས་པ་གསུངས་ཏེ། སྡུག་བསྔལ་གྱི་གནོད་པ་
པ་རྣམ་པ་གཉིས་ཁོ་ན་སྐྱེད་པར་བྱེད་དེ། ལུས་ལས་བྱུང་བ་དང་ཡིད་ལས་བྱུང་བའོ། །དེ་ལ་གཉིས་པོ་འདི་ཡང་བྱང་ཆུབ་སེམས་དཔའ་ལ་སྲིད་པ་མ་ཡིན་ཏེ། ལུས་དང་ངག་དང་ཡིད་རྣམས་ཀྱིས་ཁ་ན་མ་ཐོ་བ་ཐམས་ཅད་སྤང་བའི་ཕྱིར་ལུས་ཀྱི་སྡུག་བསྔལ་འདི་ལ་སྐྱེ་བ་མ་ཡིན་ནོ། །ལུང་དང་རིགས་པ་དག་གིས་བདག་མེད་པ་གཉི་ག་གཏན་ལ་ཕབ་པའི་ཕྱིར་ཡིད་ཀྱི་ཡང་ཇི་ལྟར་སྲིད་པ་ཡིན། འདི་ལྟར་ལོག་པར་རྟོག་པ་དང་ཞེས་པ་ནི་གང་བདེན་པ་མ་ཡིན་པའི་རྣམ་པར་རྟོག་པ་དེས་བདག་དང་བདག་གིར་འཛིན་པ་ལ་འཇུག་པ་དང༌། དངོས་པོ་ལ་མངོན་པར་ཞེན་པར་བྱས་པས་སེམས་ཅན་སྡུག་བསྔལ་བ་དང་སྡིག་པ་སྟེ་སྲོག་གཅོད་པ་ལ་སོགས་པའི་ལུས་སྡུག་བསྔལ་བ་ཡིན་ནོ། །དེ་ལྟར་རེ་ཞིག་སྡུག་བསྔལ་གྱི་རྒྱུ་སྤངས་པའི་ཕྱིར་འདི་ལ་སྡུག་བསྔལ་སྐྱེ་བ་མ་ཡིན་ནོ་ཞེས་བསྟན་པ་ཡིན་ནོ། །ད་ནི་འདི་ལ་བདེ་བ་ཁོ་ན་ཡིན་ནོ་ཞེས་བསྟན་པའི་ཕྱིར་བསོད་ནམས་ཞེས་པ་ལ་སོགས་པ་གསུངས་ཏེ། གང་ལ་བདེ་བ་སྐྱེས་པའི་ལུས་ནི་བདེ་བ་ཡིན་ལ། བདེ་བ་གང་ལ་ཡོད་པའི་ཡིད་ནི་བདེ་བ་ཡིན་ཏེ། དེ་ལྟར་གཉི་ག་ལ་ཡང་བདེ་བ་དང་ལྡན་པའི་ཕྱིར་རོ། །ཐུགས་རྗེ་དང་ལྡན་པ་གཞན་གྱི་དོན་དུ་འཁོར་བར་འཁོར་བ་ན་སྡུག་བསྔལ་གང་གིས་སྐྱོ་བར་བྱེད་དེ་སྐྱོ་བར་སེམས། ཡང་ན་གང་གིས་སྐྱོ་བར་བྱེད་དེ་སྐྱོ་བའི་རྒྱུ་མེད་པའི་ཕྱིར་གང་གིས་ཀྱང་མ་ཡིན་ནོ་ཞེས་དགོངས་སོ། །དེ་ལྟར་ཅིའི་ཕྱིར་རྒྱུ་མེད་པར་འཇིགས་པས་ཕྱིར་ཕྱོགས་པར་བྱེད། དེ་ལྟར་གྱུར་ན་ཡང་ཡུན་རིང་པོར་བསྟེན་ཅིང་བསྒོམ་པ་མང་དུ་བྱས་པའི་བསོད་ནམས་ཀྱི་ཚོགས་ཆེན་པོས་ཡང་དག་པར་རྫོགས་པའི་བྱང་ཆུབ་འཐོབ་ལ་དེ་བས་རྨོངས་པ་རྣམས་བྱེད་པ་མྱུར་བས་ཉན་ཐོས་ཀྱི་ཐེག་པ་ཉིད་ལ་བརྟེན་པ་བླའོ་ཞེས་དོགས་ནས། འདི་ནི་བྱང་ཆུབ་སེམས་སྟོབས་ཞེས་པ་ལ་སོགས་པ་གསུངས་ཏེ། སྔར་བྱས་པའི་སྡིག་པ་གང་ཡིན་པ་དེ་རྣམས་ནི་བྱང་ཆུབ་ཀྱི་སེམས་ཀྱི་སྟོབས་ཉིད་ཀྱིས་ཟད་པར་བྱེད་དོ། །ཇི་ལྟར་སྔར་ཡང༌། གང་གི་དུས་མཐའི་མེ་བཞིན་སྡིག་ཅན་རྣམས། །སྐད་ཅིག་གཅིག་གིས་ངེས་པར་སྲེག་པར་བྱེད། །ཅེས་བརྗོད་པ་ལྟ་བུའོ། །དེ་བཞིན་དུ་བྱང་ཆུབ་ཀྱི་སེམས་ཀྱི་སྟོབས་ཉིད་ཀྱིས་སྡུད་པར་བྱེད་པ་ནི་སྟེར་བར་
བྱེད་པ་སྟེ། བསོད་ནམས་ཀྱི་རྒྱ་མཚོ་རྣམས་ཏེ། རྒྱུན་མི་འཆད་པར་གསོད་ནམས་ཤུགས། །ནམ་མཁའ་མཉམ་པར་རབ་ཏུ་འབྱུང༌། །ཞེས་གང་བརྗོད་པའོ། །རྣམ་པ་འདི་ལྟ་བུའི་དད་པའི་ཤུགས་ཀྱིས་ཐེག་པ་ཆེན་པོ་ལ་གནས་པའི་བྱང་ཆུབ་སེམས་དཔའ་ནི་ཉན་ཐོས་ལ་སོགས་པ་རྣམ་པས་ཀྱང་མྱུར་ཞིང་མགྱོགས་པར་འགྲོའོ། །དེ་ལྟར་ཞེས་པ་ལ་སོགས་པས་བསྟན་པའི་དོན་ཉིད་བསྡུས་ནས་སྟོན་པར་བྱེད་དེ། དེ་ལྟར་ནི་བརྗོད་པའི་རིམ་པ་ཡིན་ལ། ཁ་ན་མ་ཐོ་བ་སྤངས་པ་དང་སྔར་བྱས་པའི་སྡིག་པ་ཟད་པའི་ཕྱིར་རྨི་ལམ་ན་ཡང་ངན་སོང་དུ་འགྲོ་བ་དང་བྲལ་བའི་ཕྱིར་དང་བསམ་པ་ཤིན་ཏུ་དྲག་པའི་བདེ་བ་དུ་མས་ཉིན་མཚན་དུ་ནམ་མཁའ་ཁྱབ་པའི་བསོད་ནམས་ཀྱི་རྒྱ་མཚོ་མངོན་པར་འཕེལ་བར་བྱ་བའི་ཕྱིར་བདེ་འགྲོ་བརྒྱུད་པས་ལམ་བཟང་པོར་འཇུག་པའི་བྱང་ཆུབ་ཀྱི་སེམས་ཤིང་རྟ་དང་འདྲ་བ་བསྐྱེད་ཅིང་ཞོན་ནས་ཤེས་པའི་དོན་ཏོ། །ཅི་ལྟ་བུར་གྱུར་པ་ཞེ་ན། སྐྱོ་བས་ནི་ཡོངས་སུ་ཉོན་མོངས་པ་སྟེ། ངལ་བ་ནི་དུབ་པའོ། །དེ་སེལ་བ་ནི་རིགས་པ་སྔར་བསྟན་པའི་ཚུལ་གྱིས་སྐྱོན་ཀུན་སེལ་བའོ། །དེ་བདེ་བ་གཅིག་ལས་གཞན་གོང་ནས་གོང་དུ་ལྷག་ཅིང་ལྷག་པར་ལྷ་དང་མིའི་བདེ་བ་ཕུན་སུམ་ཚོགས་པའི་མཚན་ཉིད་དུ་འགྲོ་སྟེ་ཐོབ་པར་གྱུར་ནའོ། །རྟོག་པ་དང་ལྡན་པ་རྣམས་སྒྱིད་ལུག་པར་འགྱུར་བ་ཇི་ལྟར་སྲིད། དེའི་ཕྱིར་དེ་ལྟར་ན་རྣམ་པ་དུ་མས་སྒྱིད་ལུག་པའི་རྒྱུ་མཚན་བཀག་པས་སྒྱིད་ལུག་པ་མེད་པ་ཉིད་དུ་བསྟན་ནས། དཔུང་གི་ཚོགས་བསྟན་པའི་ཕྱིར། སེམས་ཅན་དོན་ནི་ཞེས་པ་ལ་སོགས་པ་གསུངས་ཏེ། འདིར་ཡང་མདོར་བསྟན་པའི་བདག་ཉིད་ཡིན་ནོ། །འདུན་པ་ནི་འདིར་དགེ་བའི་འདོད་པ་ཡིན་ལ། བརྟན་པ་ནི་བརྩམས་པ་ལ་བརྟན་པ་ཡིན་ཞིང་དགའ་བ་ནི་དམ་པའི་ལས་ལ་ཞེན་པ་ཡིན་ཏེ། གཏོང་བ་ནི་མི་ནུས་པ་ན་དུས་ཅུང་ཟད་ཅིག་འཇིག་པའོ། །འདི་ནི་དཔུང་གི་ཚོགས་བཞི་ཡིན་ཏེ། ཆ་ཤས་དུ་མས་བསྡུས་པའི་བདག་ཉིད་ཡིན་པའི་ཕྱིར་གླང་པོ་ཆེ་ལ་སོགས་པའི་དཔུང་བཞིན་ནོ། །སེམས་དོན་གྲུབ་ཕྱིར་ཞེས་པ་ལ། འདི་བརྩོན་འགྲུས་ཀྱི་རྒྱུ་ཡིན་པའི་ཕྱིར་ལ། བརྩོན་འགྲུས་ཀྱང་མངོན་པར་འདོད་པ་ཐམས་ཅད་གྲུབ་པར་བྱེད་པའི་ཕྱིར་རོ་
ཞེས་པའི་དོན་ཏོ། །དེ་ལ་སྟོབས་ཀྱི་ཚོགས་ནི་བྱེད་པ་མང་བའི་ཕྱིར་འདུན་པ་ཞེས་པ་ལ་སོགས་པས་སྐྱེད་པའི་རྒྱུ་གསུངས་ཏེ། སྡུག་བསྔལ་འཇིགས་པས་ཤེས་པ་ནི་མི་དགེ་བའི་ལས་ལས་སྡུག་བསྔལ་འབྱུང་བས་འཇིགས་པ་ལས་འདུན་པ་བསྐྱེད་དོ། །དེའི་ཕན་ཡོན་བསམ་པས་ཞེས་ཏེ། ཕན་ཡོན་ནི་འབྲས་བུའི་སྒོ་ནས་ཡོན་ཏན་གྱི་ཁྱད་པར་ཡིན་ཏེ་དེ་ཡང་ཤུགས་ཀྱིས་ལས་དགེ་བ་ཉིད་དོ། །དེ་བསྒོམ་པ་ནི་དགེ་བའི་ལས་ལས་རྣམ་པ་དུ་མའི་སྒོ་ནས་འབྲས་བུ་བཟང་པོ་འབྱིན་པར་ཡང་ནས་ཡང་དུ་བསམ་པས་ཞེས་པའི་དོན་ཏོ། །ད་ནི་དཔུང་གི་ཚོགས་ཀྱི་བྱ་བ་བསྟན་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ནི་བརྗོད་པའི་རྒྱུན་གྱི་རིགས་པས་སོ། །མི་མཐུན་པའི་ཕྱོགས་ནི་ལེ་ལོ་ལ་སོགས་པའོ། །སྤངས་པ་ནི་གཉེན་པོ་བསྒོམ་པའི་ཆོ་གས་སེལ་བ་སྟེ་བརྩོན་འགྲུས་སྤེལ་བའི་ཕྱིར་སྟོབས་བསྐྱེད་པར་བྱའོ། །ཐབས་གང་གིས་ཤེ་ན། འདུན་དང་ཞེས་པ་ལ་སོགས་པ་སྨོས་ཏེ། ང་རྒྱལ་ནི་སེམས་མཐོན་པོ་ཡིན་ལ་འདི་ནི་བརྟན་པའི་དཔུང་འཕེལ་བར་བྱེད་པའམ་བརྟན་པའི་སྟོབས་ཉིད་ཡིན་ཏེ། འདི་རྣམས་ཀྱི་སྟོབས་ཀྱིས་ནི་མཐུ་རྣམས་ཀྱིས་སོ། །འདིར་ནུས་པའི་རྣམ་གྲངས་ནི་སྟོབས་ཀྱི་སྒྲ་ཡིན་ནོ། །དེ་ལ་རེ་ཞིག་འདུན་པ་བསྐྱེད་པ་དང་པོར་བདག་དང་གཞན་གྱི་ཞེས་པ་ལ་སོགས་པ་གསུངས་ཏེ། སེམས་ཅན་ཐམས་ཅད་ལ་ཕན་བཏགས་པས་བདག་ཉིད་ཀྱི་ཡང་ཉོན་མོངས་པ་ཐམས་ཅད་སྤང་བའི་ཆེད་དང༌། ཡོན་ཏན་མ་ལུས་པ་བསྐྱེད་པའི་དོན་དུ་བདག་གིས་བྱང་ཆུབ་ཀྱི་སེམས་བསྐྱེད་ལ་དེ་ཡང་བྱ་བ་ཞན་པས་བསྒྲུབ་པར་བྱ་བ་མ་ཡིན་ནོ་ཞེས་གོ་བར་བྱས་ནས་ཀྱང་གལ་ཏེ་བརྩོན་འགྲུས་མ་བརྩམས་པ་ཡིན་པས་རྩོམ་པར་ཞན་པར་གནས་པ་ཡིན་ལ། དེའི་ཚེ་ངན་སོང་དུ་ལྷུང་བ་ལས་གཞན་རྟེན་ཡོད་པ་མ་ཡིན་པར་བདག་གིས་བསམས་ནས་སྐྱེ་བ་མངོན་དུ་བྱ་སྟེ། འདུན་པ་བསྐྱེད་པར་བྱའོ་ཞེས་པ་ནི་བསྡུས་པའི་དོན་ཏོ། །ཡན་ལག་གི་དོན་བརྗོད་པར་བྱ་སྟེ། དཔག་ཏུ་མེད་པ་ནི་ཚད་དུ་བྱ་བར་མི་ནུས་པའོ། །ཉེས་པ་ནི་ལུས་དང་སེམས་ལ་བརྟེན་པའོ། །གཞོམ་པར་བྱ་བ་ནི་སྤང་བར་བྱ་བའོ། །བདག་དང་གཞན་ནི་རང་གི་བདག་ཉིད་དང༌། གཞན་གྱི་བདག་ཉིད་
དོ། །རེ་རེ་ལ་ཞེས་པ་ནི་རེ་ཞིག་མང་པོ་རྣམས་བཞག་སྟེ། མང་དུ་ནི་དེ་རྣམས་ལའོ། །བསྐལ་པ་རྒྱ་མཚོ་སྟེ། བསྐལ་པ་བརྒྱ་སྟོང་དུ་མས་སོ། །ཟད་པ་ནི་སྤོང་བར་བྱེད་པས་སོ། །དེ་ལ་ནི་དེ་རྣམས་ལའོ། །ཉེས་ཟད་རྩོམ་པ་ནི་ཉེས་པ་སྤོང་བ་ལ་སྤྲོ་བའོ། །ཅུང་ཟད་ཙམ་ནི་ཆ་ཙམ་ཡང་ངོ༌། །བདག་ལ་མ་མཐོང་བ་ནི་མི་སྣང་བའོ། །དེའི་ཕྱིར་སྡུག་བསྔལ་དཔག་ཏུ་མེད་པའི་རྟེན་ཏེ། སྡུག་བསྔལ་ཚད་མེད་པའི་སྣོད་ཡིན་ནོ། །བདག་གི་སྙིང་མི་འགས་པ་ནི་ཅིའི་ཕྱིར་རལ་བར་མ་གྱུར་པ་སྟེ། རྣམ་པ་གང་གིས་སོ། །བདག་དང་གཞན་གྱི་ཞེས་པ་ལ་སོགས་པ་ནི་གོ་སླའོ། །དོན་མེད་པ་ནི་འབྲས་བུ་མེད་པ་ཉིད་དེ། བདག་གི་སྐྱེ་བ་ནི་མི་ཁོམ་པ་བརྒྱད་ལས་གྲོལ་བ་ཡིན་ལ་ཁྱེར་བ་ནི་བསྐྱལ་བས་ཏེ་རྒྱབ་ཏུ་བྱས་ཞེས་པའི་ཐ་ཚིག་གོ །བརྒྱ་ལ་ན་ཐོབ་པ་ནི། རྒྱ་མཚོ་ཆེར་གཡེངས་གཉའ་ཤིང་གི །བུ་གར་རུས་སྦལ་མགྲིན་ཆུད་ལྟར། །ཡུན་རིང་པོས་ཐོབ་པ་ཡིན་ནོ། །དེ་ཉིད་ཀྱི་ཕྱིར་ངོ་མཚར་བའི་གནས་ཡིན་པས་རྨད་དུ་བྱུང་བའོ། །འདིའི་ཕྱིར་ཡང་ཉམས་པ་ཡིན་ནོ་ཞེས། བདག་གིས་ཞེས་པ་ལ་སོགས་པ་གསུངས་ཏེ། དེ་བཞིན་གཤེགས་པ་རྣམས་ལ་བསྙེན་བཀུར་བྱས་བས་དགའ་སྟོན་ཆེན་པོ་སྟེ་ཤིན་ཏུ་མངོན་པར་དགའ་བ་དང་ལྡན་པ་ཡིན་ཞིང༌། དེས་བདེ་བ་ནི་ཡིད་བདེ་བ་ཡིན་ལ། མ་ཐོབ་པ་ནི་བདག་གིས་མ་རྟོགས་པའོ། །བསྟེན་པ་ནི་སྐུ་གཟུགས་དང་མཆོད་རྟེན་དང༌། དམ་པའི་ཆོས་ལ་སོགས་པ་ལ་བཀུར་སྟི་དང༌། ལྷ་ཁང་དང༌། ཀུན་དགའ་ར་བ་དང༌། གཟིམས་ཆ་ལ་སོགས་པའི་དངོས་པོ་དབུལ་བ་བྱ་བ་སྟེ་མཆོད་པ་ཡང་མ་བྱས་སོ། །དབུལ་བ་རྣམས་ནི་ནོར་ཞན་པ་རྣམས་ཡིན་ལ། བསམ་པ་འདི་འདོད་པ་ཡིན་ཏེ། ཉེ་བར་མཁོ་བའི་སྒོ་ནས་རྫོགས་པར་མ་བྱས་པའོ། །འཇིགས་པ་ལ་ནི་དགྲ་ལ་སོགས་པའི་འཇིགས་པས་འཁྲུགས་པ་རྣམས་ལ་མ་འཇིགས་ཤིག་ཅེས་མི་འཇིགས་པ་མ་བྱིན་པའོ། །ཉམ་ཐག་ནི་ལུས་དང་ཡིད་ཀྱི་སྡུག་བསྔལ་གྱིས་གདུངས་པ་ཡིན་ལ། དེ་བསལ་ནས་བདེ་བར་བྱས་པ་ཡང་མ་ཡིན་ནོ། །སྐྱེས་བུ་དམ་པའི་ཆོས་འདི་དག་ཐམས་ཅད་དང་བྲལ་བའི་ཕྱིར་བདག་མའི་མངལ་གྱི་ཞེས་པ་ལ་སོགས་པ་གསུངས་ཏེ་
གོ་སླའོ། །ཁྱེད་རྣམས་ཀྱི་གནས་སྐབས་ངན་པ་འདི་ཡང་ཅིའི་ཕྱིར་ཐོབ་ཅེ་ན། ཆོས་ལ་འདུན་དང་ཞེས་པ་ལ་སོགས་པ་གསུངས་ཏེ། ཆོས་ལ་འདུན་པ་དང་བྲལ་བའི་སྔར་གྱི་སྐྱེ་བར་བསགས་པ་ཉིད་ཀྱིས་བདག་ལ་ད་ལྟའི་སྐྱེ་བ་འདི་ལ་ཡང་རྒུད་བ་འདི་འདྲ་བ་འབྱུང་བར་འགྱུར་ཏེ། ནུས་པ་ཐམས་ཅད་དང་བྲལ་བའི་རང་བཞིན་སྔར་བརྗོད་པ་རྣམས་ཐོབ་པར་གྱུར་པར་འདི་ལྟར་ཤེས་པར་བྱས་ནས་སུ་ཞིག་ཆོས་ལ་འདུན་པ་གཏོང་བར་བྱེད་དེ་ཡོངས་སུ་གཏོང་བར་བྱེད་ཅིང་མཁས་པས་ཅིའི་ཕྱིར་ལེན་པར་མི་བྱེད་ཅེས་པའི་ཐ་ཚིག་གོ །ཡང་ཅིའི་ཕྱིར་དགེ་བ་དོན་དུ་གཉེར་བ་རྣམས་ཀྱིས་འདུན་པ་བསྐྱེད་པ་ལ་འབད་པར་བྱེད་ཅེས་དགོངས་ནས། གང༌། འདུན་པ་སྡུག་བསྔལ་འཇིགས་པས་སྐྱེད། །ཅེས་པ་ལ་སོགས་པ་གསུངས་པ་དེ་བསལ་བར་བྱ་བར་འདོད་ནས། དགེ་བའི་ཕྱོགས་ནི་ཞེས་པ་ལ་སོགས་པ་གསུངས་ཏེ། རྒུད་པ་བསལ་བ་འབའ་ཞིག་གི་དོན་དུ་ནི་མ་ཡིན་ཏེ། དཀར་པོའི་ཆོས་བསགས་པའི་དོན་དུ་ཡང་འདུན་པ་བསྐྱེད་པ་ལ་འབད་པར་བྱའོ་ཞེས་པ་ནི་འང་གི་སྒྲའི་དོན་ཏོ། །ཐམས་ཅད་ཀྱི་ཞེས་པ་ནི་འགའ་ཞིག་མ་ཡིན་པའོ། །རྩ་བ་འདུན་པ་ནི་རྒྱུ་ཡིན་པར་བཅོམ་ལྡན་འདས་ཀྱིས་གསུངས་ཏེ། རང་གིས་བཏགས་ནས་བརྗོད་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེའི་ཡང་ནི་འདུན་པའི་ཡང་ངོ༌། །རྩ་བ་རྟག་ཏུ་ནི་དུས་ཐམས་ཅད་དུའོ། །རྣམ་སྨིན་འབྲས་བུ་བསྒོམས་པས་ནི་དགེ་བ་དང་མི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་འཇིག་རྟེན་ཕ་རོལ་ཏུ་འདོད་པ་དང་མི་འདོད་པ་འཐོབ་པའི་མཚན་ཉིད་ཡིན་ལ། དེ་བསྒོམ་པ་ནི་ཡང་ནས་ཡང་དུ་མངོན་དུ་བྱེད་པའོ། །དེ་ལ་ལས་མི་དགེ་བའི་རྣམ་པར་སྨིན་པའི་འབྲས་བུ་བསྟན་པའི་ཕྱིར། སྡུག་བསྔལ་ཞེས་པ་ལ་སོགས་པ་གསུངས་ཏེ། ལུས་དང་ངག་དང་ཡིད་ཇི་སྲིད་པ་རྣམས་ཀྱིས་དམྱལ་བ་ལ་སོགས་པའི་སྡུག་བསྔལ་སྣ་ཚོགས་པ་རྣམ་པ་དུ་མའི་འཇིགས་པ་འདི་ལྟར་བཅིང་ཞིང་འཁྱིག་པ་དང་བརྡེག་པ་ལ་སོགས་པ་རྣམས་དང༌། ཡིད་ཀྱིས་ཚོལ་བའི་རྙེད་པའི་བར་ཆད་འདོད་པའི་གེགས་བྱེད་པ་ཡང་སྡིག་པ་བྱེད་པ་རྣམས་ཉིད་ལས་སྐྱེད་ཅིང་འབྱུང་བར་འགྱུར་རོ། །ལེགས་སྤྱད་ཀྱི་ལས་ཀྱི་རྣམ་པར་སྨིན་པའི་འབྲས་བུ་བསྟན་
པའི་ཕྱིར་དང༌། ཡིད་ལ་བསམ་པའི་ཞེས་པ་ལ་སོགས་པ་གསུངས་ཏེ། འདོད་པ་ལ་སྨིན་པའི་རྣམ་པར་རྟོག་པ་ནི་ཡིད་ལ་བསམས་པ་ཡིན་ལ། གང་འཇིག་རྟེན་ན་ཡིད་ཀྱི་རྒྱལ་སྲིད་ཅེས་རབ་ཏུ་གྲགས་པ་བཞིན་ནོ། །དགེ་བ་བྱས་པ་ན་བསོད་ནམས་བྱས་པ་ཡིན་ལ། གང་དང་གང་དུ་ཞེས་པ་ནི་ཟློས་པ་ཡིན་ཏེ། འགའ་ཞིག་ཁོ་ནར་མ་ཡིན་ནོ། །འགྲོ་བ་ནི་བསྐྱོད་པའོ། །འབྲས་བུ་རིན་གྱིས་ཞེས་པ་ནི་མངོན་པར་འདོད་པའི་འབྲས་བུ་སྟོན་པར་བྱེད་པ་ཉིད་རིན་ཆེན་བཞིན་དུ་རིན་ཏེ། དེས་མཆོད་པ་ཡིན་ནོ། །ཡང་མི་དགེ་བའི་འབྲས་བུ་བསྟན་པའི་ཕྱིར། སྡིག་པ་ཞེས་པ་ལ་སོགས་པ་གསུངས་ཏེ། བདེ་བ་འདོད་པ་ནི་བདེ་བ་དོན་དུ་གཉེར་བའོ། །སྡུག་བསྔལ་མཚོན་གྱིས་ཞེས་པ་ནི་བྱེད་པས་ཏེ། སྡུག་བསྔལ་ཉིད་མཚོན་བཞིན་དུ་དེའི་འདོད་པ་གཅོད་པར་བྱེད་པའི་རྒྱུ་ཉིད་ཡིན་པའི་ཕྱིར་རོ། །སོ་སོའི་སྐྱེ་བོ་དང་ཐུན་མོང་མ་ཡིན་པའི་དགེ་བའི་ལས་ཀྱི་རྣམ་པར་སྨིན་པའི་འབྲས་བུ་ཐུན་མོང་མ་ཡིན་པ། རྒྱ་ཆེ་བ་ཞེས་པ་ལ་སོགས་པ་གསུངས་ཏེ། རབ་ཏུ་དགའ་བའི་ས་ཐོབ་པའི་བྱང་ཆུབ་སེམས་དཔའ་རྣམས་མི་འདོད་བཞིན་དུ་མའི་མངལ་དུ་སྐྱེ་བ་མ་ཡིན་ཏེ། འོན་ཀྱང་བདེ་བ་ཅན་དུ་སྣ་ཚོགས་པའི་འདབ་མ་ཅན་གྱི་པདྨའི་ནང་དུ་སྐྱེ་བར་འགྱུར་རོ། །དེ་རྣམས་ཀྱི་བདེ་བའི་འབྱོར་བ་དུ་མ་སྟོན་པར་བྱེད་དེ་རྒྱ་ཆེ་བ་ནི་ཤིན་ཏུ་ཡངས་པ་ཡིན་ལ། དྲི་ཞིམ་པ་ནི་ཡིད་དུ་འོང་བའི་དྲི་ཡིན་ཏེ། བསིལ་བ་ནི་བདེ་བའི་རེག་བྱ་ཡིན་ཞིང་དེ་རྣམས་ཀྱང་པདྨས་ཏེ་འདམ་སྐྱེས་ཡིན་ནོ། །དེ་དག་གི་སྙིང་པོ་ནི་ཡང་པདྨའི་སྙིང་པོའི་བྱེ་བྲག་ཡིན་ནོ། །དེ་རྣམས་ལ་གནས་པ་ནི་བཞུགས་པ་ཡིན་ལ། ཤེས་རབ་དང་ཐབས་དང་སྙིང་རྗེ་ཆེན་པོ་ལས་བྱུང་བའི་བསོད་ནམས་དང༌། ཡེ་ཤེས་ཀྱི་ཡན་ལག་བསྡུས་པས་བྱང་ཆུབ་ཀྱི་སེམས་དང་ལྡན་པའི་བདེ་གཤེགས་ཀྱི་སྲས་སུ་དགེ་བས་འགྱུར་རོ་ཞེས་འབྲེལ་ཏོ། །པདྨའི་སྙིང་པོ་རྣམས་སུ་ཡང་ཇི་ལྟར་རྒྱས་པར་འགྱུར་ཞེ་ན། རྒྱལ་བའི་གསུང་སྙན་ཞེས་པ་ལ་སོགས་པ་གསུངས་ཏེ། སྙན་པ་ནི་དབྱངས་ཀྱི་ཡན་ལག་ཐམས་ཅད་དང་ལྡན་པས་མཆོག་ཏུ་ཡིད་བདེ་བར་བྱེད་པ་རྣམས་ཀྱིས་སོ། །རྫོགས་པའི་སངས་རྒྱས་ཀྱི་ཆོས་ཀྱི་དབྱིངས་ཀྱི་ཟས་ཏེ། ཞལ་ཟས་ཀྱིས་མདར་
འཕེལ་བར་བྱས་པའི་ལུས་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ཇི་ལྟར་སྐྱེས་ཤེ་ན། ཐུབ་འོད་ཅེས་པ་ལ་སོགས་པ་གསུངས་ཏེ། ཡོངས་སུ་སྨིན་པའི་དུས་སུ་མཁྱེན་ནས་ཐུབ་འོད་དེ་དེ་བཞིན་གཤེགས་པའི་འོད་ཟེར་རྣམས་ཀྱིས་རྒྱས་ཤིང་ཁ་ཕྱེ་བར་བྱས་པ་ཡང་ཡིན་ལ་དེ་ནི་པདྨ་འང་ཡིན་ནོ་ཞེས་པའི་དོན་ཏོ། །དེ་ལས་བྱུང་བ་ནི་སྐྱེས་པ་ཡིན་ལ། མཚན་དང་དཔེ་བྱད་ཀྱིས་བརྒྱན་པའི་ལུས་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་ལྟ་བུར་གྱུར་པའི་བདེ་གཤེགས་ཀྱི་སྲས་བྱང་ཆུབ་སེམས་དཔའི་རྒྱུད་དུ་སྟེ། བདེ་གཤེགས་སྤྱན་སྔར་བདེ་བ་ཅན་དུ་བཅོམ་ལྡན་འདས་འོད་དཔག་མེད་ཀྱི་སྤྱན་སྔར་གཅིག་ཏུ་དཀར་བའི་དགེ་བའི་ལས་རྣམས་ཀྱིས་འབྱུང་ཞིང་སྐྱེ་བར་འགྱུར་རོ། །དེ་ལྟར་འདི་ནི་མའི་མངལ་དུ་སྐྱེ་བར་འགྱུར་བ་རྣམས་ལ་ཁྱད་པར་འདི་ལས་བཟློག་པའི་སྡུག་བསྔལ་ཉམས་སུ་མྱོང་བར་འགྱུར་རོ་ཞེས་བསྟན་པར་འགྱུར་ཏེ། འདི་ལྟར་ཡང་དེ་ན་དོག་པ་དང༌། དྲིང་བ་དང༌། ཕོ་བའི་མེ་དྲོད་ཀྱིས་ཚ་བ་དང༌། ཕ་དང་མའི་མི་གཙང་བ་ནུར་ནུར་པོ་ལས་ཡང་དག་པར་བྱུང་ཞིང་སྐྱེས་པ་དང༌། མས་ཟོས་པ་དང་འཐུངས་པ་སྐྱུགས་པ་དང་འདྲ་བས་བསྐྱེད་པ་དང༌། མངལ་གྱི་དྲི་མས་གོས་པ་དང༌། ཡོངས་སུ་སྨིན་པའི་དུས་ན་བརྒྱ་ལ་སྲོག་མགྲིན་པར་ཕྱིན་པ་དང༌། བཅར་ལ་མནན་པ་བཞིན་དུ་བཙའ་བའི་དུས་ན་ཡང་ཡིན་ཏེ་ཕལ་ཆེར་མིར་སྐྱེས་པའི་འདྲེན་པའི་ལས་ཀྱི་རྣམ་པར་སྨིན་པ་བཤད་པ་ཡིན་ནོ། །གཅིག་ཏུ་གནག་པའི་ལས་ཀྱི་རྣམ་པར་སྨིན་པ་གཤིན་རྗེའི་སྐྱེས་བུ་ཞེས་པ་ལ་སོགས་པ་གསུངས་ཏེ། གཤིན་རྗེའི་སྐྱེས་བུ་ཞེས་པ་ནི་དུས་ཀྱི་ཕོ་ཉ་བས་ཏེ་བཤུས་པ་ནི་འབར་བའི་ཐོབ་ལ་སོགས་པའི་མཚོན་རྣམས་ཀྱིས་རྣམ་པར་ཕྲལ་བའོ། །མ་ལུས་པ་ནི་མཐའ་དག་ཡིན་ལ་པགས་པ་ནི་ཤུན་ཕྲགས་སམ་ནུས་པ་སྟེ་གང་ལ་ཡོད་པ་དེ་ལ་དེ་སྐད་ཅེས་བྱའོ། །རབ་ཏུ་ཉམ་ཐག་པར་གྱུར་བ་ནི་ཤིན་ཏུ་འབར་བའི་ལྕགས་ཀྱིས་གཞིར་ལྟུང་ངོ༌། །སླར་ཡང་ཅི་ལྟ་བུར་གྱུར་པ་ཞེ་ན། རབ་ཏུ་ཚ་བའི་མེས་ཞུ་བར་གྱུར་བའི་ཟངས་གང་ཡིན་པ་དེས་ལུས་རྣམས་ལ་བླུགས་པ་སྟེ་བཀྲུས་པའོ། །དེ་ནས་ཡང་པགས་པ་མ་ལུས་པར་བཤུས་པ་ལ་འབར་བའི་རལ་གྲི་རྣམས་དང༌། མདུད་ཐུང་སྟེ་
མཚོན་ཆའི་ཁྱད་པར་རྣམས་ཀྱིས་དེ་རྣམས་ལ་བསྣུན་པ་ཡིན་ཏེ་རྣམ་པ་དུ་མའི་མཚོན་གྱིས་སོ། །ལྷགས་ཤིང་ནི་རྣམ་པར་བཅད་པ་དག་ཡིན་ཏེ་ཤའི་དུམ་བུ་ནི་མཐའ་དག་ཡིན་ལ་གང་གི་ཚེ་དེ་ལྟར་གྱུར་པ་ན་ཤིན་ཏུ་འབར་བའི་རང་བཞིན་གྱི་ས་གཞི་རྣམས་སུ་ལྷུང་བར་འགྱུར་བའོ། །མི་དགེ་བ་ནི་དགེ་བ་མ་ཡིན་པའི་ལས་རྣམས་ཀྱིས་སོ། །མང་པོས་ཞེས་པ་ནི་ལན་མང་པོར་ཡིན་ཏེ། དུས་རིང་པོར་དེའི་འབྲས་བུ་ཟད་པའི་ཕྱིར་རོ། །དེ་ལྟར་དགེ་བ་དང་མི་དགེ་བའི་ལས་དེའི་རྣམ་པར་སྨིན་པའི་འབྲས་བུ་བསྟན་ནས། འདུན་པའི་སྟོབས་ཉེ་བར་བསྡུ་བའི་ཕྱིར་དེ་བས་ཞེས་པ་ལ་སོགས་པ་གསུངས་ཏེ། གང་གི་ཕྱིར་དེ་ལྟར་དགེ་བ་དང་མི་དགེ་བའི་ལས་ཀྱི་འབྲས་བུ་རྣམ་པར་སྨིན་པ་འཇམ་པ་དང་རྩུབ་པ་ཡིན་པ་དེའི་ཕྱིར་འདི་ལྟར་ཡོངས་སུ་བསམས་ནས་མི་དགེ་བའི་ལས་སྤངས་ནས་དགེ་བ་ལ་འདུན་པ་ཉིད་ལ་སུས་པར་བྱའོ། །ད་ནི་བརྟན་པའི་སྟོབས་བསྟན་པར་བཞེད་ནས་རྡོ་རྗེ་རྒྱལ་མཚན་ཞེས་གསུངས་ཏེ། རྡོ་རྗེ་རྒྱལ་མཚན་གྱི་མདོ་ལས་གསུངས་པའི་ཆོ་ག་ཡང་ང་རྒྱལ་ཏེ་བསྒྲུབ་པར་བྱ་བའི་དོན་བརྩམས་ནས་བསྒོམ་པར་བྱའོ། །ཡང་ན། བརྩམས་ནས་བསྒོམ་པར་བྱ། ཞེས་པ་ནི་བརྟན་པར་ཡང་དག་པར་བརྩམས་ནས་བསྒོམ་པར་བྱ་སྟེ། སེམས་ལ་བརྟན་པར་བྱ་བ་ཡིན་ལ་སྦྱོར་བ་དམན་པས་ནི་མ་ཡིན་ནོ། །རྩོམ་པའི་རིམ་པ་ཉིད་བསླབ་པར་བཞེད་ནས། དང་པོར་ཞེས་པ་ལ་སོགས་པ་གསུངས་ཏེ། དང་པོར་སྟེ་སྔ་མ་ཉིད་དུ་མངོན་པར་འདོད་པའི་དོན་བསྒྲུབ་པའི་ཆེད་དུ་འབྱོར་པ་སྟེ་རྒྱུ་མཐའ་དག་གོ །བརྟགས་ལ་དེའི་སྟོབས་དང་ལྡན་པ་དང་སྟོབས་དང་མི་ལྡན་པ་རྣམ་པར་དཔྱད་ནས་སྟོབས་དང་ལྡན་ན་བརྩམས་པའམ། སྟོབས་དང་མི་ལྡན་ན་བརྩམ་པར་མི་བྱའོ། །འདི་ལྟར་བརྟགས་པ་ལ་དགོས་པ་ཅི་ཡོད་ཅེ་ན། མ་བརྩམས་པ་ནི་མཆོག་ཡིན་གྱི། །ཞེས་གསུངས་ཏེ། མི་ནུས་ན་དང་པོ་ཉིད་དུ་བརྩམས་ནས་བཟློག་པར་མི་བྱའོ། །ཅི་སྟེ་འདི་ལྟར་གང་གིས་ཅི་ཞིག་མི་འདོད་ནས་སྟོན་ཅེ་ན། སྐྱེ་བ་གཞན་དུ་ཡང་ཞེས་པ་ལ་སོགས་པ་གསུངས་ཏེ། དེ་ལྟར་བྱེད་པ་ནི་སྐྱེ་བ་གཞན་ལ་དེ་གོམས་པ་སྟེ། བརྩམས་ཤིང་ལྡོག་པ་ཞེས་
བྱ་བ་ཡིན་ལ། དམ་བཅས་ཤིང་ཡང་མི་བྱེད་པའི་སྡིག་དེ་ལས་སྡུག་བསྔལ་འཕེལ་བར་འགྱུར་རོ། །གཞན་ནི་གང་ཞིག་སྤངས་ནས་དེ་བརྩམས་པ་ཡིན་ལ་དམན་པ་ནི་དེ་ཆུད་ཟོས་པའོ། །འབྲས་བུའི་དུས་ཀྱང་དམན་པ་ནི་བརྩམས་པ་ཡོངས་སུ་སྤངས་པའི་འབྲས་བུའི་དུས་ཏེ། འདིའི་འབྲས་བུ་དེའི་དུས་ན་གང་འབྲས་བུ་གཞན་བྱ་བ་དེ་ཆུད་ཟོས་པ་ཞེས་པའི་དོན་ཏོ། །དེ་ཡང་ནི་གང་བརྩམས་ནས་ཡོངས་སུ་དོར་བ་དེ་ཡང་མ་བསྒྲུབས་ཏེ་འགྲུབ་པར་མ་བྱས་པའོ། །དེ་ལྟར་ཉེས་པ་རྣམ་པ་ལྔ་ཡིན་ལ་དེས་ན་འདོད་པ་མ་ཡིན་ནོ་ཞེས་དགོངས་པ་ཡིན་ནོ། །འོ་ན་ང་རྒྱལ་འདི་ཐམས་ཅད་དུ་བྱ་བ་མ་ཡིན་ནམ་ཞེ་ན། གསུམ་པོ་ཞེས་པ་ལ་སོགས་པ་གསུངས་ཏེ། གསུམ་པོ་གང་དག་ལ་ཞེ་ན། དེ་ནི་ལས་དང་ཉེ་བའི་ཉོན་མོངས་ནུས་ཞེས་གསུངས་ཏེ། དེ་ལ་ཉེ་བའི་ཉོན་མོངས་པ་ནི་དངོས་པོ་ཕྲན་ཚེགས་ཀྱི་མིང་ཅན་ཏེ། ཁྲོ་བ་དང༌། འཁོན་དུ་འཛིན་པ་དང༌། འཆང་བ་དང༌། འཚིག་པ་ལ་སོགས་པ་ལྔ་བཅུ་རྩ་བདུན་ནམ། འདོད་ཆགས་ལ་སོགས་པའི་ཉོན་མོངས་པ་རྣམས་ཉིད་ཉེ་བའི་ཉོན་མོངས་པ་རྣམས་སུ་བརྗོད་དོ། །དེ་ལ་ལས་ཀྱི་ང་རྒྱལ་བཤད་པར་འདོད་ནས། བདག་ཉིད་གཅིག་པུས་ཞེས་པ་ལ་སོགས་པ་གསུངས་ཏེ། གང་ཅུང་ཟད་སེམས་ཅན་རྣམས་ཀྱི་ཁ་ན་མ་ཐོ་བ་མེད་པའི་ལས་བྱ་བར་གྱུར་པ་དེ་ཐམས་ཅད་བདག་ཉིད་གཅིག་པུས་བྱ་སྟེ། གཞན་ལ་སྐབས་དབྱེ་བར་མི་བྱའོ་ཞེས་པའི་དོན་ཏོ། །འདི་ཉིད་བསྟན་པའི་ཕྱིར་ཉོན་མོངས་ཞེས་པ་ལ་སོགས་པ་གསུངས་ཏེ། ཉོན་མོངས་པས་དབང་དུ་བྱས་པ་ནི་སྐྱེ་བོའི་ཚོགས་འདི་ཐམས་ཅད་ཡིན་ཏེ། གང་དུ་ཡང་རང་གི་དོན་བསྒྲུབ་པ་ལ་ནུས་པ་དང་ལྡན་པར་མི་འགྱུར་རོ། །གང་རྣམ་པ་བདེ་བ་ཐམས་ཅད་བསྐྱེད་པར་བྱ་བའི་ཕྱིར་བདག་གིས་བྱང་ཆུབ་མཆོག་ཏུ་སེམས་བསྐྱེད་དེ། གང་གི་ཕྱིར་དེ་ལྟར་ཡིན་པ་དེའི་ཕྱིར་སྐྱེ་བོ་འདི་དག་འདི་ལྟ་བུའི་ཁུར་བསྐུར་བ་ལ་བདག་ལ་ནུས་པ་མེད་པ་མ་ཡིན་ནོ། དེའི་ཕྱིར་བདག་ཉིད་ཀྱིས་འདི་ཐམས་ཅད་བྱའོ། །དམན་པའི་ལས་ལ་ཡང་ལྡོག་པར་མི་བྱའོ་ཞེས་པ། གཞན་དག་དམན་པའི་ལས་ཞེས་པ་ལ་སོགས་པ་གསུངས་ཏེ། དམན་པ་ནི་ཤིན་ཏུ་
སྨད་པ་ཡིན་ཏེ། འཇིག་རྟེན་ན་ཁུར་ཁུར་བ་ལ་སོགས་པའོ། །བདག་ཀྱང་སེམས་ཅན་ཐམས་ཅད་ཀྱི་བྲན་དུ་གྱུར་ནས་ཡང་འདུག་སྟེ་ཡོད་ཀྱང་ངོ༌། །བདག་གི་བྱ་བ་ཅི་ལྟར་གཞན་གྱིས་བྱེད་དེ་བདག་ཉིད་ཀྱིས་བྱ་བར་འོས་སོ་ཞེས་པའི་དོན་ཏོ། །འོ་ན་ལས་དེ་དག་གིས་རྗེས་སུ་མཐུན་པ་ཉིད་དོ་ཞེས་པའི་སེམས་ཁེངས་པ་བཟློག་པར་འདོད་ནས། འདི་ལ་ང་རྒྱལ་གྱིས་ཞེས་པ་ལ་སོགས་པ་གསུངས་ཏེ། བདག་ནི་དེའི་བུ་ཡིན་ལ་ལས་འདི་ནི་ཤིན་ཏུ་དམན་པ་ཡིན་སྟེ་དེ་བདག་གིས་བྱ་བར་རིགས་པ་མ་ཡིན་ནོ་ཞེས་ནས་གལ་ཏེ་ང་རྒྱལ་གྱིས་མི་བྱེད་ན་དེའི་ཚེ་བདག་གི་ང་རྒྱལ་བརླག་ན་བླ་སྟེ། ང་རྒྱལ་དོན་ཆེན་པོ་ཉམས་པར་བྱེད་པ་འདིས་བདག་ལ་ཅི་ཞིག་བྱ། དམན་པའི་ལས་ལ་འཇུག་པར་མི་བྱའོ་ཞེས་པའི་དོན་ཏོ། དེ་ལྟར་ལས་རྣམས་ལ་ང་རྒྱལ་བཤད་ནས། ཉེ་བའི་ཉོན་མོངས་པ་རྣམས་ལ་ང་རྒྱལ་བསྟན་པར་འདོད་ནས། སྦྲུལ་ནི་ཞེས་པ་ལ་སོགས་པ་གསུངས་ཏེ། གལ་ཏེ་ཉེ་བའི་ཉོན་མོངས་པ་རྣམས་ལ་ང་རྒྱལ་བཅོམ་པས་བདག་གི་སེམས་ཞན་པར་འགྱུར་ཏེ། དེའི་ཚེ་ཕོངས་པ་སྟེ་ལྟུང་བས་གནོད་པར་བྱེད་དེ། གནོད་པར་བྱེད་ཅིང་ལྟུང་བ་དང་བཅས་པར་བྱེད་དོ་ཞེས་པའི་དོན་ཏོ། །ཆུང་ངུ་ཡང་ནི་ཉེ་བའི་ཉོན་མོངས་པས་བསྐྱོད་པའི་སྤྱོད་པས་ཞེན་པའོ། །ཅི་ལྟ་བུས་ཤེ་ན། ཤི་བ་སྟེ་སྲོག་དོར་བ་ཡིན་ལ། དེ་ལྟ་བུའི་སྤྲུལ་རྙེད་པར་གྱུར་པ་ན་དཔེར་ན་ནམ་མཁའ་ལྡིང་ལྟ་བུར་སྤྱོད་དོ། །ཡང་ཅིའི་ཕྱིར་དེ་ལྟར་ཡིན་ཞེ་ན། ཞུམ་བྱས་ཞེས་པ་ལ་སོགས་པ་གསུངས་ཏེ། སེམས་ཀྱི་དབངས་མཐོ་བ་བོར་ཏེ་ཞུམ་པར་བྱས་པས་ལུས་དང་སེམས་ཀྱིས་འཇུག་པ་དམན་པ་ན་ལེ་ལོས་བཅོམ་པ་དང༌། བརྗེད་ངས་པ་ན་ལྟུང་བ་བླ་སྟེ། རྙེད་སླ་ཞིང་འབྱུང་བར་འགྱུར་བ་ཉིད་དེ་ལྟུང་བ་ཆུང་ངུས་ཀྱང་གཞོམ་པར་བྱ་བ་ཡིན་པའི་ཕྱིར་རོ། །མ་ཞུམ་པ་ནི་སེམས་དེ་སྐྱེས་པས་སླར་ཡང་སྤྲོ་བ་ཕུན་སུམ་ཚོགས་པ་དང་ལྡན་པར་འགྱུར་སྟེ། དཔྱོད་པ་དང་ལྡན་པ་ནི་དྲན་པ་དང་ཤེས་བཞིན་དག་གིས་ཉེ་བའི་ཉོན་མོངས་པ་ལ་སྐབས་སྟེར་བར་མི་བྱེད་དོ། །ཆེན་པོ་ཡིས་ཀྱང་ཐུབ་པར་དཀའ་སྟེ་རྒྱལ་བར་མི་འགྱུར་རོ། །དེ་བས་ཞེས་པ་ལ་
སོགས་པས་བརྟེན་པའི་སྟོབས་ལ་བརྟེན་པའི་མཇུག་བསྡུ་བ་སྟོན་ཏེ། གང་གི་ཕྱིར་དེ་ལྟར་ཡིན་པ་དེ་བས་ན་སེམས་ནི་བརྟན་པ་ཡིན་ཏེ། ང་རྒྱལ་གྱི་གོ་ཆ་བ་གོས་པས་སོ། །ལྟུང་བ་ཉིད་ཉམས་པར་བྱེད་པ་སྟེ། གཞོམ་པར་བྱའོ། །རྣམ་པ་ཐམས་ཅད་དུ་དེའི་རྗེས་སུ་འཇུག་པ་བཀག་པས་དེའི་རྒྱུད་དྲུངས་དབྱུང་བར་བྱ་སྟེ། གཞན་དུ་ལྟུང་བའི་དབང་དུ་གྱུར་པར་ཕོངས་པས་འཇོམས་པར་འགྱུར་རོ། །ཁམས་གསུམ་ལས་རྒྱལ་བར་རྩོམ་པ་ལ་བཞད་གད་དེ། ཁྲེལ་གད་ཀྱི་གནས་སུ་འགྱུར་རོ། །དེ་ཇི་ལྟ་བུར་གྱུར་པ་ཡིན་ཞེ་ན། བདག་གིས་ཞེས་པ་ལ་སོགས་པ་གསུངས་ཏེ། ཅིའི་ཕྱིར་ཞེ་ན། གང་ལས་རྒྱལ་བ་ཉིད་ནི་བཅོམ་ལྡན་འདས་ཏེ། སེང་གེ་ནི་བདུད་ཀྱི་རི་དགས་ཐམས་ཅད་དག་གིས་གཞོམ་པར་བྱ་བ་མ་ཡིན་པའི་ཕྱིར་རོ། །དེ་རྣམས་ཀྱི་སྲས་བདག་ཀྱང་ཅི་ལྟར་གཞན་གྱིས་ཕམ་པ་ཞེས་བྱ་བ་འཐོབ་པར་བྱེད། དེ་ལྟར་ཡིད་ལ་བྱས་ནས་བདག་གིས་ང་རྒྱལ་འདི་ལ་གནས་པར་བྱ་སྟེ། དཔེར་ན་སེང་གེའི་ཕྲུ་གུ་མི་འཇིགས་པ་ཐོབ་ནས་རི་དགས་གཞན་ཐམས་ཅད་ཀྱིས་ཟིལ་གྱིས་མི་ནོན་པ་ཉིད་ཀྱིས་ནགས་སུ་སྤྱོད་པར་བྱེད་པ་དེ་བཞིན་དུ་བདག་ཀྱང་བརྟན་པར་གནས་པར་བྱའོ་ཞེས་པའི་དོན་ཏོ། །གལ་ཏེ་དེ་ལྟར་ན་དེའི་ཚེ་གང་ཡང་དགྲ་ལ་སོགས་པ་ལས་རྒྱལ་བའི་ང་རྒྱལ་ཅན་ང་རྒྱལ་ཡོད་པ་དེ་རྣམས་ཀྱང་བསྔགས་པར་བྱ་བར་ཅིའི་ཕྱིར་མི་འགྱུར་ཞེ་ན། གྲོང་ངམ་ཞེས་པ་ལ་སོགས་པ་གསུངས་ཏེ། ང་རྒྱལ་གྱིས་བཅོམ་པ་ནི་ང་རྒྱལ་གྱིས་ཟིལ་གྱིས་མནན་པ་སྟེ། ཉོན་མོངས་པའི་སྡུག་བསྔལ་ཅན་དེ་རྣམས་ཀྱང་ང་རྒྱལ་ཅན་དུ་འགྱུར་བ་མ་ཡིན་པ་ཉིད་དོ། །ང་རྒྱལ་ཅན་དགྲའི་དབང་མི་འགྲོ་།ཞེས་པ་ནི་འདི་འགྲོ་བ་མ་ཡིན་ཏེ། དགྲའི་སྐྱེ་བོའི་རྗེས་སུ་འཇུག་པ་མ་ཡིན་ནོ་ཞེས་པའི་དོན་ཏོ། །གང་དག་རྣམས་འདོད་པའི་ང་རྒྱལ་ཅན་དེ་རྣམས་ང་རྒྱལ་དགྲའི་དབང་དུ་གྱུར་པ་ཡིན་ཏེ་དེའི་དབང་དུ་བྱས་ནས་འཇུག་པ་ཡིན་ནོ། །འདི་ཉིད་ཚིགས་སུ་བཅད་པ་གཉིས་ཀྱིས་བསྒྲུབ་པར་འདོད་ནས། ང་རྒྱལ་གྱིས་ནི་ཞེས་པ་ལ་སོགས་པ་གསུངས་པ། ང་རྒྱལ་བདུན་པོ་རྣམས་ལས་གང་ཡང་རུང་བའི་ང་རྒྱལ་གྱིས་ངན་སོང་དུ་ཁྲིད་པ་ནི་དམྱལ་བ་ལ་སོགས་པ་རྣམས་
སུ་ཁྲིད་པའོ། །དེ་རྣམས་བརྒྱ་ལ་མིའི་དངོས་པོ་ཐོབ་པར་གྱུར་པ་དེའི་ཚེ་དེར་ཡང་རྒྱུ་མཐུན་པའི་འབྲས་བུ་དགའ་སྟོན་བཅོམ་པ་ནི་དགའ་བ་མེད་པ་འགྱུར་བ་ཡིན་ཏེ། དམན་ཞིང་ཞན་པའི་ཡིད་དུ་འགྱུར་རོ་ཞེས་པའི་དོན་ཏོ། །གཞན་གྱི་ཁམ་ཟ་བ་ནི་ཟས་མེད་པའི་ཕྱིར་ཏེ། གཞན་གྱིས་བྱིན་པའི་སློང་མོའི་ཟས་ཟ་བའོ། །བྲན་ནི་གཞན་དབང་དུ་གྱུར་པའི་ཁོལ་པོའོ། །གླེན་པ་ནི་སྤྱོད་པ་ཐམས་ཅད་ཀྱིས་སྟོང་པའོ། །མི་སྡུག་པ་ནི་ལུས་མི་མཛེས་པ་དང་མི་དགའ་བ་སྐྱེད་པའོ། །ཉམ་ཆུང་བ་ནི་ལུས་རྗུད་པ་དང་སྟོབས་མེད་པའོ། །ཐམས་ཅད་དུ་ཐམས་ཅད་ལ་གནོད་པ་མ་བྱས་ཀྱང་ལུས་དང་ངག་གིས་བརྙས་པ་ཐོབ་པར་འགྱུར་རོ། །གང་གིས་འདི་ལྟར་ཡིན་ཞེ་ན། ང་རྒྱལ་གྱིས་ཁེངས་དཀའ་ཐུབ་ཅན། །ཞེས་ཏེ་ང་རྒྱལ་གྱིས་ཁེངས་པ་ནི་ཞུམ་པ་མ་ཡིན་པའོ། །དཀའ་ཐུབ་ཅན་ནི་ཉོན་མོངས་པ་སྟེ། དེ་ཡང་ནི་དེ་ལྟར་གྱུར་པ་ཡང་གལ་ཏེ་ང་རྒྱལ་ཅན་གྱི་ནང་དུ་གཏོགས་ན་ཇི་ལྟར་དམན་པ་སྟེ་བཀྲེན་པ་ཡིན་ལ་སྙིང་རྗེའི་གནས་ཡིན་ནོ་ཞེས་པའི་དོན་ཏོ། །སླར་ཡང་གཞན་ཅི་ལྟ་བུ་ཞིག་ཏུ་འགྱུར་སྨྲོས་ཞེས་པ་ནི་བརྗོད་ཅིག་ཅེས་རྒོལ་བ་པོ་ལ་བོད་པའོ། །གལ་ཏེ་རྣམ་པ་དེ་ལྟ་བུ་ང་རྒྱལ་ཅན་དུ་མི་བརྗོད་ན་འོ་ན་དེ་དག་ཇི་ལྟ་བུར་གྱུར་པ་ཡིན་ཞེ་ན། གང་ཞིག་ང་རྒྱལ་ཞེས་པ་ལ་སོགས་པ་གསུངས་སྟེ། གང་ཞིག་ང་རྒྱལ་གྱི་དགྲ་ལས་རྒྱལ་བར་ཏེ་རྒྱལ་བར་འགྱུར་བ་དེ་ཉིད་ང་རྒྱལ་ཅན་དུ་བརྗོད་དོ། །གང་ཞིག་ནི་བྱང་ཆུབ་སེམས་དཔའ་སྟེ། བདེ་བ་ཡང་ཡིན་ལ་སྟོབས་དང་ལྡན་པའང་ཡིན་ཞིང་ང་རྒྱལ་གྱི་དགྲ་བཅོམ་སྟེ་བསལ་ནས་འདོད་བཞིན་ཏེ་ཅི་བདེར་འདོད་པར་སྐྱེའོ། །འཇིག་རྟེན་པ་ལས་ནི་ལྷ་དང་བཅས་པ་ལས་སོ། །རྒྱལ་བའི་འབྲས་བུ་སངས་རྒྱས་ཀྱི་གནས་སྐབས་གསལ་བར་བྱེད་དོ། །འདི་ལྟ་བུའི་ང་རྒྱལ་དེ་དགྲ་ལས་རྒྱལ་བ་དེ་འདི་ལྟ་བུ་བདག་ཅག་རྣམས་ལ་མཐོང་ངོ་ཞེས་པའི་དོན་ཏོ། །དེ་ཉིད་ནི་རྣམ་པར་རྒྱལ་བ་ཡིན་ཏེ་རྒྱལ་བ་ཐོབ་པ་དང༌། དེ་ཉིད་དཔའ་བོ་ཡིན་ཏེ་གཟི་བརྗིད་དང་ལྡན་པ་ཡིན་ནོ། །ཚིག་གཉིས་པོ་འདི་ནི་ཇི་ལྟར་རིགས་པར་བྱའོ། །དེ་ལྟར་ཉེ་བའི་ཉོན་མོངས་པ་རྣམས་ལ་ང་རྒྱལ་བཤད་ནས།
ནུས་པའི་ང་རྒྱལ་ཉོན་མོངས་ཞེས་པ་ལ་སོགས་པ་གསུངས་ཏེ། ཉོན་མོངས་པའི་ཕྱོགས་ནི་སྡེ་ཚན་ཡིན་ལ་དེའི་ཁྲོད་ན་གནས་པ་ནི་རྣམ་པ་སྟོང་འགྱུར་དུ་བསྲན་བཙུགས་ཏེ་ཤིན་ཏུ་ཡང་བརྟན་པའི་སྟོབས་ལ་བརྟེན་ནས་སོ། །ཅི་ལྟ་བུར་གྱུར་པ་ཞེ་ན། ཉོན་མོངས་ཚོགས་ཀྱིས་ཞེས་ཏེ། ཉོན་མོངས་པའི་ཚོགས་ཀྱིས་ཚུགས་པར་དཀའ་བ་ནི་མི་ཚུགས་པ་སྟེ། ཅི་ལྟར་ཡང་ང་རྒྱལ་བར་མི་འགྱུར་བར་རོ་ཞེས་པའི་དོན་ཏོ། །ཅི་ལྟ་བུར་གྱུར་པ་ཞེ་ན། རི་དགས་ཚོགས་ཀྱིས་སེང་གེ་བཞིན། །ཞེས་ཏེ་ཇི་ལྟར་རི་དགས་ཀྱི་རྒྱལ་པོ་སེང་གེ་རི་དགས་འཁྲུགས་པའི་དབུས་ན་གཟི་བརྗིད་ཆེན་པོ་ཅན་སྟོབས་དང་ལྡན་པར་གྱུར་པས་ནགས་སུ་གནས་པ་ན་རི་དགས་ཐམས་ཅད་རྣམ་པར་གནོན་ལ། དེ་དག་གིས་ནི་དེ་ལ་གནོད་པ་མ་ཡིན་པ་དེ་བཞིན་དུ་བྱང་ཆུབ་སེམས་དཔའ་ལ་ཚུགས་པར་དཀའ་བར་འགྱུར་བར་རོ། །འདི་དང་རྒྱུ་མཚན་གཞན་ཡང་གཟུང་བར་བྱའོ་ཞེ་ན། ཉམ་ང་ཆེ་དང་ཞེས་པ་ལ་སོགས་པ་གསུངས་ཏེ། ཆེ་དང་སྟེ་ཤིན་ཏུ་ཕུལ་དུ་བྱུང་བ་ཡང་ངོ༌། །ཉམ་ང་བ་སྟེ་སྡུག་བསྔལ་ཡོད་ཀྱང་ངོ༌། །རོ་ནི་མངར་བ་ལ་སོགས་པ་ལྕེའི་དབང་པོའི་ཡུལ་ཡིན་ཡང་མིག་གིས་མི་མཐོང་སྟེ་མི་རྟོགས་ལ་ཡུལ་དུ་མི་བྱེད་དོ་ཞེས་པའི་དོན་ཏོ། །དེའི་ཡུལ་གཟུགས་ཡིན་པའི་ཕྱིར་ཡུལ་རོ་ལ་འཇུག་པ་མ་ཡིན་ནོ་ཞེས་དགོངས་པ་ཡིན་ནོ། །དེ་ལྟར་བརྗོད་པའི་རོ་དང་མིག་གི་ཚུལ་གྱིས་ཉམ་ད་བྱུང་གྱུར་ཀྱང༌། ཉོན་མོངས་དབང་དུ་མི་འགྱུར་བར་རོ། །དེ་ལྟར་བརྗོད་པའི་རིམ་པས་བསྟན་པའི་སྟོབས་བཤད་ནས། དགའ་བའི་སྟོབས་བསྟན་པའི་ཕྱིར་རྩེད་མོའི་ཞེས་པ་ལ་སོགས་པ་གསུངས་ཏེ། ལས་ནི་ཚོགས་ཀྱི་རྒྱུ་མཚན་བསམ་གཏན་དང་ཀློག་པ་ལ་སོགས་པའི་མཚན་ཉིད་ཡིན་ལ། གང་གྱུར་པ་ནི་རིམ་གྱིས་བྱེད་པ་ལ་སྦྱོར་བས་ཐོབ་པར་གྱུར་པའོ། །ལས་དེ་ཉིད་ལ་ཞེན་པར་བྱ་སྟེ། བྱ་བ་དེའི་རོ་ལ་ཞུགས་པའི་སེམས་ཀྱིས་སོ། །ལས་དེ་དགའ་བར་བྱ་བ་ནི་དེ་ལ་ཤིན་ཏུ་འཇུག་པར་འདོད་པའོ། །མི་ངོམས་པ་ནི་ཡང་ནས་ཡང་དུ་འདོད་པ་དང་ལྡན་པའོ། །ཅི་དང་འདྲ་བར་ཞེ་ན། རྩེད་མོའི་འབྲས་བུ་བདེ་བ་འདོད་པ་ལྟར་ཏེ། རྒྱན་པོ་ལ་སོགས་པ་
རྩེད་མོའི་འབྲས་བུ་གང་ཡིན་པའི་བདེ་བ་དེ་ལ་འདོད་པ་བཞིན་དུའོ། །རྣམ་པར་དཔྱད་པ་འདིས་ཀྱང་ལས་ལ་དགའ་བ་བསྐྱེད་པར་བྱའོ་ཞེས་བསྟན་པར་བྱ་བའི་ཕྱིར། བདེ་བའི་དོན་དུ་ཞེས་པ་ལ་སོགས་པ་གསུངས་ཏེ། ཐམས་ཅད་ཀྱིས་ཀྱང་ལས་ཀྱི་འབྲས་བུའི་བདེ་བ་ཐོབ་པར་འདོད་པས་བྱེད་དེ། གཞན་དུ་ན་དེ་ལ་འཇུག་པར་མི་འགྱུར་ཏེ། དེ་ལྟར་ན་ཡང་འདི་ལྟར་སེམས་རབ་ཏུ་ཞུགས་པ་ཡང་ལས་འགའ་ཞིག་གིས་མངོན་པར་འདོད་པའི་འབྲས་བུར་འགྱུར་ཞིང༌། འགའ་ཞིག་གི་ཡང་འབྲས་བུ་མེད་པར་འགྱུར་ཏེ། འབྲས་བུ་མེད་པར་རྩོམ་པ་ཡང་སྲིད་པའི་ཕྱིར་ལ། དེ་ལྟར་ན་ཡང་སྐྱེ་བོས་ལས་བརྩམས་པ་ལས་ཡང་འབྲས་བུ་སྲིད་པའི་ཕྱིར་ལྡོག་པར་འགྱུར་བ་མ་ཡིན་པ་ཉིད་དོ། །གང་གིས་ཏེ་ཡང་ལས་ཉིད་བདེ་བར་གྱུར་པ་དེའི་ཕྱིས་ཀྱི་བདེ་བ་གཞན་འདོད་པ་དེས་ལས་མི་བྱེད་དེ་ལས་དང་བྲལ་ན་ནམ་ཞིག་བདེ་བར་འགྱུར་ཏེ། བརྒྱ་ལམ་ན་ཡང་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་ཡང་བསམས་ནས་ལས་ལ་མངོན་པར་ཞེན་པར་བྱའོ་ཞེས་སྤུ་གྲི་ཞེས་པ་ལ་སོགས་པ་གསུངས་ཏེ། གཟུགས་ལ་སོགས་པའི་ཡུལ་རྣམས་ཀྱིས་འཁོར་བར་ཏེ། འཁོར་བ་ན་ཡང་དང་ཡང་དུ་མྱོང་བས་མི་ངོམས་ཏེ་ཚིམ་པ་མ་ཡིན་ནོ། །ཇི་ལྟ་བུར་གྱུར་པས་ཤེ་ན། སྤུ་གྲིའི་སོར་ཆགས་སྦྲང་རྩི་ལྟའི། །ཞེས་ཏེ། སྤུ་གྲིའི་སོ་ལ་སྦྲང་རྩི་སྟེ་གང་སྦྲང་རྩིའི་རོ་གང་གི་ཚེ་མྱང་བ་ན་སེར་སྣའི་དབང་དུ་གྱུར་པས་ཕྱིས་ལྕེ་ཆོད་པའི་སྡུག་བསྔལ་སྐྱེ་བར་འགྱུར་བ་དེས་མཚོན་པ་དེ་ལྟ་བུ་ནི་དཔེ་སྟེ། གང་དག་གིས་འདྲ་བ་དེས་སོ། །རེ་ཞིག་ཙམ་གྱི་བདེ་བ་ཡང་ཡོངས་སུ་གྱུར་པའི་སྡུག་བསྔལ་གྱིས་ན་སེམས་ཅན་དེ་རྣམས་ལ་སྡུག་བསྔལ་དྲག་པོར་འགྱུར་རོ་ཞེས་དགོངས་པའོ། །བདུད་རྩི་དང་འདྲ་བའི་བསོད་ནམས་དེ་རྣམས་ཉིད་ཀྱིས་ཇི་ལྟར་ངོམས་པར་འགྱུར། ཁྱད་པར་ཇི་ལྟ་བུས་ཤེ་ན། རྣམ་པར་སྦྱིན་པ་བདེ་བ་སྟེ་མངོན་པར་མཐོ་བའི་བདེ་བའི་འབྲས་བུའི་རྒྱུ་ཉིད་ཀྱིས་ཡོངས་སུ་གྱུར་པས་བདེ་བའི་རོ་ཡིན་པའི་ཕྱིར་མཆོག་ཏུ་བདེ་བསྐྱེད་བར་བྱེད་པ་རྣམས་ཀྱིས་སོ། །ཞི་བ་ནི་དགེ་བར་བྱེད་པ་དག་ཡིན་ཏེ། ངེས་པར་ལེགས་པ་སྐྱེད་པར་བྱེད་པས་སྐྱེ་ཤི་མེད་པའི་
འབྲས་བུ་འབྱིན་པར་བྱེད་པའི་ཕྱིར་སྡུག་བསྔལ་ཐམས་ཅད་ཞི་བར་བྱེད་པས་སོ་ཞེས་པའི་དོན་ཏོ། །དེ་ཉིད་ཀྱི་ཕྱིར་བསོད་ནམས་བདུད་རྩིས་ཞེས་པ་ནི་འདིར་འདི་གཏན་ཚིགས་ཀྱི་ཚིག་ཡིན་ནོ། །དེ་ལྟས་ཞེས་པས་མཇུག་སྡུད་པས་ལས་ལ་མངོན་པར་དགའ་བ་བསྟན་པར་བྱ་བའི་ཆེད་དུ་གསུངས་པ་ཡིན་ཏེ། ལས་བརྩམས་པ་དེ་མཐར་ཕྱིན་ན་ཡང་སྟེ་ཟིན་པའི་དུས་ན་ཡང་འཇུག་པར་བྱེད་དེ། དེ་ལ་མངོན་པར་ཞེན་པའི་རོ་ལ་ཞུགས་པ་ཉིད་ན་གཏོང་བར་བྱེད་དོ། ཅི་ལྟ་བུར་ཞེ་ན། ཇི་ལྟར་སོས་ཀའི་དུས་ན་ཉི་མ་ཕྱེད་དུ་གྱུར་པའི་ཚེ་ཀུན་ཏུ་ཆུ་མ་རྙེད་ཅིང་ཉི་མ་ཤིན་ཏུ་ཚ་བས་གདུངས་པའི་གླང་པོ་ཆེ་མཆོག་ཏུ་མངོན་པར་ཞེན་པའི་རོ་དང་ལྡན་པས་ཤིན་ཏུ་ཡང་སིམ་པར་བྱེད་པའི་ཆུ་བསིལ་བས་ཡོངས་སུ་གང་བའི་མཚོ་བྲན་དང་ཕྲད་པ་ན་དང་པོ་ཉིད་དུ་ནུབ་པར་བྱེད་པ་དེ་བཞིན་དུའོ་ཞེས་པ་ནི་སྤྱིའི་དོན་ཏོ། །གང་གིས་མཚོ་དང་ཕྲད་པ་དེ་ལ་དེ་སྐད་ཅེས་བྱ་སྟེ་ཕྱི་ནས་ལས་འཛིན་པ་ཡིན་ནོ། །དང་པོར་ཞེས་པ་དང་མཇུག་ཅེས་པ་ནི་འབྲེལ་ཏོ། །དགའ་བའི་སྟོབས་བཤད་ནས། ད་ནི་དོར་བའི་སྟོབས་སྟོན་པར་འདོད་ནས། སྟོབས་ཟད་ཅེས་པ་ལ་སོགས་པ་གསུངས་ཏེ། བསམས་པའི་ལས་རྫོགས་པར་བྱ་བ་ལ་བདག་ཉིད་ནུས་པ་ཟད་པར་རིག་བྱས་ནས། ནུས་པ་མེད་པར་གྱུར་པ་ན་སླར་ཡང་བྱའོ་ཞེས་པའི་བསམ་པས་དུས་རེ་ཞིག་ཏུ་སྤང་ཞིང་དོར་བར་བྱ་སྟེ། དེ་སྲིད་དུ་འདིར་རྣམ་པར་གཡེང་བར་འགྱུར་བ་ནི་མ་ཡིན་ལ། གཞན་དུ་ན་དེ་ལྟར་གྱུར་ཀྱང་དེ་མ་དོར་ན་མི་འདོད་པ་དང་ཕྲད་པ་ཉིད་དུ་འགྱུར་རོ། །གང་གི་ཚེ་བརྩམས་པའི་ལས་དེ་ལེགས་པར་རྫོགས་པར་གྱུར་པ་དེའི་ཚེའང་དོར་བར་བྱ་སྟེ། གཞན་དུ་ན་ཞེན་པས་དེ་ལ་ཞུགས་ནས་སླར་ཡང་བྱ་བ་ལ་རྣམ་པར་གཡེང་བར་འགྱུར་རོ། །དེ་ལྟ་བས་ན་ཕྱི་ཕྱིར་ཁྱད་པར་འདོད་པས་སྤང་སྟེ་དོར་བར་བྱའོ། །འདི་ནི་གང་སྔར། དང་པོར་འབྱོར་པ་བརྟག་བྱ་སྟེ། །ཞེས་པ་ལ་སོགས་པ་གསུངས་པ་སྤྱིར་བསྟན་པ་དེའི་དམིགས་ཀྱིས་བསལ་བ་བསྟན་པ་ཡིན་ནོ། །དེ་ལྟར་ནང་གི་ཁྱད་པར་བསྟན་པས་སྟོབས་ཀྱི་ཚོགས་དེ་རྣམ་པ་ཐམས་ཅད་དུ་བརྗོད་ནས། དང་པོ་མདོར་བསྟན་པས་རྟོགས་པར་བྱས་ཀྱང་ཡང་འདུན་པ་ལ་སོགས་པའི་ཚོགས་ཀྱི་
ནང་དུ་བརྗོད་པའི་འབད་པ་བསྟན་པའི་ཕྱིར། ཉོན་མོངས་མཚོན་ཞེས་བ་ལ་སོགས་པ་གསུངས་ཏེ། ཉོན་མོངས་པ་རྣམས་ཀྱི་མཚོན་ནི་གནོད་པ་བྱེད་པ་ཡིན་ལ། གཟུང་བ་ནི་བཟློག་པ་སྟེ། ཇི་ལྟར་དེ་དག་གི་མཚོན་གྱིས་ཕོག་པར་མི་འགྱུར་བར་རོ་ཞེས་པའི་དོན་ཏོ། །སླར་ཉོན་མོངས་པ་རྣམས་ནི་མཚོན་གྱིས་གདབ་པར་བྱ་སྟེ། འཇེབས་པར་ནི་ཤིན་ཏུ་བསྣུན་པས་ཏེ་ཇི་ལྟར་སླར་སྐབས་རྙེད་པར་མི་འགྱུར་བར་རོ། །འདིར་དཔེ་བསྟན་པ་ནི་གཡུལ་ངོར་རལ་ཁ་ཞེས་པ་སྟེ་དཔེར་ན་བསླབས་པ་སྟེ་མཚོན་ཆའི་རིགས་པ་ལ་མཁས་པ་དང་ལྡན་པའི་དགྲ་དང་ལྷན་ཅིག་ཏུ་ཤིན་ཏུ་བརྩོན་པས་རལ་གྲིའི་གཡུལ་ངོར་དེ་ལ་རྡེག་པར་བྱེད་དེ། དེ་ནི་ཇི་ལྟར་མི་ཕོག་པར་གྱུར་བ་དེ་ལྟར་རོ། །དེ་ལ་ཞེས་པ་ལ་སོགས་པས་འབད་པ་ལ་བསླབ་པར་བྱ་བ་གསུངས་ཏེ། དེ་ལ་ནི་རལ་གྲིའི་གཅོད་པ་ལའོ། །དཔེར་ན་རལ་གྲི་ལག་པ་ནས་བརྒྱ་ལ་ལྷུང་བར་གྱུར་ན་དགྲས་བདག་ལ་གླགས་འདི་རྙེད་པར་མ་གྱུར་ཅིག་ཅེས་པས་མྱུར་དུ་སྟེ་རིངས་པ་ཉིད་དུ་ལེན་ཅིང་འཛིན་ཏེ་དུས་ལ་སྡོད་པ་ནི་མ་ཡིན་ནོ་ཞེས་པའི་ཐ་ཚིག་གོ །དེ་བཞིན་དུ་ནི་དེ་དང་འདྲ་བར་ཏེ། ཉོན་མོངས་པའི་དགྲ་ལས་རྣམ་པར་རྒྱལ་བའི་དབང་དུ་བྱས་ཏེ་རལ་གྲི་བཞིན་དུ་བརྗེད་ངས་པ་མེད་པར་དྲན་པ་མ་ཉམས་པར་བཟུང་བར་བྱས་ཤིང་མངོན་དུ་བྱའོ། །དམྱལ་བ་དག་ནི་ངུ་འབོད་ལ་སོགས་པ་ཡིན་ལ་དྲན་པ་བརྗེད་པར་གྱུར་པས་ན་དེའི་སྡུག་བསྔལ་ལ་བརྟན་པ་ཉིད་དུ་ཡིད་ལ་བྱའོ། །ཅི་སྟེ་གང་གིས་ན་དེ་ལ་བཏང་སྙོམས་སུ་མི་བྱེད་དེ་ཉོན་མོངས་པ་ཕྲ་བ་ཀུན་ཏུ་སྤྱོད་པས་ཀྱང་ཉམས་པ་ཅུང་ཟད་ཀྱང་མེད་དོ་ཞེ་ན། ཇི་ལྟར་ཁྲག་ལ་ཞེས་པ་ལ་སོགས་པ་གསུངས་ཏེ། ཉེས་པ་རྡུལ་ཙམ་ལ་ཡང་སྐབས་དབྱེ་བར་མི་བྱ་ལ། གཞན་དུ་ན་དེ་ཙམ་ལ་ཡང་སེམས་ལ་རྗེས་སུ་ཞུགས་ན་དེ་འཕེལ་བ་དགག་པར་མི་ནུས་པའི་ཕྱིར་རོ། །དཔེར་ན་ལུས་ཀྱི་རྨ་ཆུང་ངུ་ལ་ཡང་ཁྲག་དང་ལྷན་ཅིག་པའི་དུག་བཞིན་དུ་རྡུལ་གྱི་ཚད་ཙམ་གྱིས་ཉོན་མོངས་པ་ཆུང་ངུས་འཇོམས་པ་བཟློག་པ་ལ་འབད་པར་བྱའོ། །ཡང་ཇི་ལྟར་འབད་པ་ལ་བརྟེན་པར་བྱ་བར་ཉུངས་མར་ཞེས་པ་ལ་སོགས་པ་གསུངས་ཏེ། དཔེར་ན་སྐྱེས་བུ་འགའ་ཞིག་ལ་རྒྱལ་པོ་གཏུམ་པོའི་བཀས་མར་ནག་
གིས་ཡོངས་སུ་བཀང་བའི་སྣོད་བསྐུར་ནས་འགྲེད་པའི་སར་འགྲོར་བཅུག་པ་ན་ལག་ན་རལ་གྲི་ཐོགས་པའི་རྒྱལ་པོའི་མིས་མར་ནག་ཐིགས་པ་ཙམ་གྱིས་བོ་ན་ཡང་ད་ལྟ་ཉིད་དུ་ཁྱོད་ཀྱི་སྲོག་གཅོད་པར་བྱའོ་ཞེས་སྨྲ་བས་ལྟ་ཞིང་འགྲོ་བ་ན་འདིར་གལ་ཏེ་བདག་ཉམས་པར་གྱུར་ན་དེའི་ཚེ་ངེས་པར་འདིས་གསོད་པར་འགྱུར་ཞེས་ནས་འཆི་བས་འཇིགས་ཏེ་འབད་པར་འགྱུར་བ་དེ་བཞིན་དུ་བརྟུལ་ཞུགས་ཅན་སྡོམ་པ་འཛིན་པས་རང་བཞིན་ལས་ཉམས་པས་དམྱལ་བ་ལ་སོགས་པའི་སྡུག་བསྔལ་གྱིས་འཇིགས་ནས་དེ་སྐབས་མི་དབྱེ་བའི་ཆེད་དུ་འབད་པར་བྱ་སྟེ་ལྷུར་བྱེད་པ་དང་ལྡན་པར་བྱའོ། །བརྗོད་ཟིན་པ་མཇུག་སྡུད་པ། དེ་བས་ཞེས་པ་ལ་སོགས་པ་གསུངས་ཏེ། གང་གི་ཕྱིར་དེ་ལྟར་ཡིན་པ་དེ་བས་ན་པང་དུ་སྟེ་ཕང་པར་འོང་བ་ཡིན་ལ། སྦྲུལ་ནི་སྦྲུལ་དུག་ཅན་ཡིན་ཏེ། རིངས་པ་ཉིད་དུ་བདག་ལ་དུག་གིས་གཟུང་བར་མ་གྱུར་ཅིག་ཅེས་ནས། ལྡང་བ་དེ་བཞིན་གཉིད་དང་སྙོམ་འོངས་ན་སྟེ་གཉིད་དང་རྨུགས་པ་འོངས་ནས་བཟློག་པར་བྱ་བ་ནི་དེའི་གཉེན་པོ་མི་རྟག་པ་ལ་སོགས་པ་བསྒོམས་པས་ཕྱིར་བཅོས་པར་བྱའོ། །ཡང་དེ་ལྟར་འབད་པ་དང་ལྡན་ཡང་བརྒྱ་ལ་ཉམས་པར་གྱུར་ན་དབང་པོ་ཉམས་པའི་ཚུལ་གྱིས་ཉམས་པར་གྱུར་ན་དེའི་ཚེ་ཕྱིར་བཅོས་པ་བྱས་ནས་འབད་པར་བྱའོ་ཞེས་བསྟན་པའི་ཕྱིར། ཉེས་པ་བྱུང་བ་ཞེས་བྱ་བ་ལ་སོགས་པ་གསུངས་ཏེ། དྲན་པ་ཉམས་པ་ན་རེ་རེ་སྟེ་སོ་སོར་བརྒྱ་ལ་ཉོན་མོངས་པའི་རྗེས་སུ་འཇུག་པའི་གླགས་རྙེད་ན། ཕྱིར་བཅོས་པའི་བསམ་པས་ཡིད་ལ་གདུང་བར་བྱས་ནས་བསམ་པར་བྱ་ཞིང་ཀྱེ་མ་ཤིན་ཏུ་དཀའ་སྟེ་ཤེས་བཞིན་དུ་གྲགས་རྙེད་པས་རྣམ་པ་གང་གིས་འདིར་དེ་ཕྱིར་བཅོས་པར་བྱ་སྟེ་ཡང་འདི་ཕྱིས་མི་འབྱུང་བར་དེ་ལྟར་བསྟན་པར་རྩོམ་པ་བླངས་ནས་གནས་པར་བྱ་སྟེ། སླར་ལྷོད་པར་འགྱུར་བར་མི་བྱའོ་ཞེས་པའི་དོན་ཏོ། །དེ་ཉིད་ཀྱི་ཕྱིར་རྣམ་པར་དབེན་པ་འདོད་པ་རྣམས་ཀྱིས་དགག་པ་ལ་ཡང་སྣང་པ་ཕྲད་པ་ཞེས་པ་ལ་སོགས་པ་གསུངས་ཏེ། མཁན་པོ་དང་སློབ་དཔོན་ནམ་དེ་ལས་གཞན་པ་ཚངས་པར་སྤྱོད་པ་རྣམས་དང་མང་དུ་ཐོས་པ་དང༌། སྡེ་སྣོད་གསུམ་རིག་པ་འགྱོད་པ་སེལ་བ་ལ་མཁས་པ་རྣམས་དང་ལྷན་ཅིག་ཏུ་ཕྲད་ནས་བསྒྲུབ་པར་བྱ་ཞེས་འདོད་ཅིང་སྨོན་པར་
བྱ་སྟེ། དེ་ལ་བརྟེན་པ་ཉིད་ཀྱིས་གནས་པར་བྱའོ་ཞེས་དགོངས་སོ། །ལས་ཐོབ་པ་ལ་ཞེས་པ་ནི་དེ་ལ་གདམས་པ་དང་རྗེས་སུ་བསྟན་པའི་མཚན་ཉིད་དང༌། །ལྟུང་བ་ལས་ལྡང་བའི་ཆེད་དུ་དེས་ཆད་པའི་ལས་བྱིན་པ་བསྒྲུབ་པར་འདོད་པར་བྱའོ། །རྒྱུ་འདིས་དེ་དག་འཇུག་པ་བསྲུང་བའི་བསམ་པས་སོ། །འདི་ཉིད་བསྟན་པའི་ཕྱིར། ཇི་ལྟར་ཞེས་གསུངས་ཏེ། ཐབས་གང་གིས་ཞེས་པའོ། །གནས་སྐབས་འདི་དག་ལ་ནི་ཉོན་མོངས་པ་འཇུག་པའི་གནས་སྐབས་ལའོ། །དྲན་པ་གོམས་པར་འགྱུར་བ་ནི་འབད་པ་མེད་པ་ཉིད་ལ་བརྟེན་ནས་བདག་ལ་བརྗེད་པ་མེད་པར་འགྱུར་བའོ་ཞེས་པ་ནི་བསམས་པ་འདིས་སོ། །འདིར་འདི་ནི་བསྡུས་པའི་དོན་ཏེ། དགེ་བའི་བཤེས་གཉེན་དང་ཉེ་བ་ན་དེའི་གདམས་ངག་དང་རྗེས་སུ་བསྟན་པ་དང༌། དེའི་སྤྱོད་པ་མཐོང་བས་ཀྱང་རྟག་ཏུ་དྲན་པ་དང་ཤེས་བཞིན་གྱིས་གནས་པས་ཉོན་མོངས་པ་འཇུག་པའི་སྐབས་མི་རྙེད་དོ། །དེའི་ཕྱིར་འདི་ལ་འགལ་བ་མེད་པ་ཉིད་ཀྱིས་སྤྲོ་བ་འཕེལ་བར་བྱའོ་ཞེས་སོ། །གང་དགེ་བའི་བཤེས་གཉེན་རྟག་པར་ཡང་སྲོག་གི་ཕྱིར་མི་གཏོང་ངོ་ཞེས་གསུངས་པ་དང༌། དེ་བཞིན་དུ་མཁན་པོས་རྗེས་སུ་བསྟན་པ་དང༌། བླ་མ་དང་ནི་འགྲོགས་པ་ལས། །འཇིགས་པས་སྐལ་ལྡན་གུས་བྱེད་ལ། །དྲན་པ་ཤིན་ཏུ་སྐྱེ་བར་འགྱུར། །ཞེས་སོ། །འབད་པ་བསྟན་ནས། ད་ནི་བདག་ཉིད་དབང་དུ་བྱ་བ་བསྟན་པར་འདོད་ནས། བག་ཡོད་ཅེས་པ་ལ་སོགས་པ་གསུངས་ཏེ། བདག་ཉིད་ཀྱི་ལུས་དང་ངག་དང་ཡིད་ཀྱི་མཚན་ཉིད་ལས་ཐམས་ཅད་རྒྱས་པར་དེ་བཞིན་བྱ་སྟེ། སྤྲོ་བ་གོམས་པར་བྱས་པས་དབང་དུ་བྱའོ་ཞེས་པའི་དོན་ཏོ། །ཇི་ལྟར་ལས་བྱུང་སྔོན་རོལ་ནས། །ཞེས་པ་ནི་རྩོམ་པ་ལས་སྔོན་རོལ་ཏེ་སྔ་མ་བཞིན་ཉིད་དུ་རྟོགས་ཤིང་དབང་དུ་གྱུར་པས་དེའི་ལམ་རྟོགས་བཞིན་དུ་ལས་ལ་འཇུག་པར་བྱའོ། །བརྗོད་པའི་དོན་དཔེའི་སྒོ་ནས་གསལ་བར་བྱ་བའི་ཕྱིར། ཇི་ལྟར་ཞེས་པ་ལ་སོགས་པ་གསུངས་ཏེ། ཤིང་བལ་ནི་རས་བལ་ལ་སོགས་པ་ལས་བྱུང་བའོ། །ཇི་ལྟར་རླུང་འགྲོ་བ་དང་འོང་བས་དབང་དུ་བྱས་ཏེ་དེ་ལ་རག་ལས་པ་དེ་བཞིན་དུ་དེ་ཉིད་སྤྲོ་བའི་དབང་དུ་གྱུར་པས་ཏེ་བརྩོན་འགྲུས་ཀྱི་དབང་དུ་གྱུར་པས་སོ། །འདི་
ལྟར་གོམས་པའི་དབང་དུ་གྱུར་པས་རྫུ་འཕྲུལ་ཡང་སྟེ། ནམ་མཁའ་ལ་འགྲོ་བ་ལ་སོགས་པ་ཐོབ་པར་འགྱུར་རོ། །བདག་དང་གཞན་དུ་མཉམ་པ་དང་བདག་དང་གཞན་དུ་བརྗེ་བ་གཉིས་ཀར་ཡང་མཁོ་བ་བསམ་གཏན་གྱི་ལེའུར་འཆད་པར་འགྱུར་རོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ་ཤེས་རབ་འབྱུང་གནས་བློ་གྲོས་ཀྱིས་བྱས་པ་ལས་བརྩོན་འགྲུས་ཀྱི་ལེའུ་སྟེ་བདུན་པའོ།། །།དེ་ལྟར་བཟོད་པའི་རྗེས་ལ་བརྩོན་འགྲུས་བརྗོད་ནས། དེ་ནས་ནགས་སུ་གནས་པར་བྱ། །མཉམ་པར་གཞག་ལ་བརྩོན་བྱ་ཞིང༌། །མི་སྡུག་ལ་སོགས་བསྒོམ་པར་བྱ། །ཞེས་གསུངས་པ། དེ་ལྟར་བརྩོན་འགྲུས་བསྐྱེད་ནས་ནི། །ཞེས་པ་ལ་སོགས་པས་རྟོགས་པར་བྱ་བར་འདོད་ནས་འཇུག་པར་བྱེད་དེ། དེ་ལྟར་བརྗོད་པའི་གཉེན་པོ་བསྟན་པ་ལ་སོགས་པས་མི་མཐུན་པའི་ཕྱོགས་རྩད་ནས་བཏོན་པས་བརྩོན་འགྲུས་སྤེལ་བར་བྱས་ནས་ལྷུན་གྱིས་གྲུབ་པར་འཇུག་པས་བསྟན་པར་བྱ་ཞིང་ཏིང་ངེ་འཛིན་ཏེ། མཉམ་པར་གཞག་པ་ལ་ཡིད་དེ་སེམས་རྩེ་གཅིག་ཏུ་གཞག་པར་བྱ་སྟེ། དེ་ལ་གཞག་པར་བྱ་ཞིང་བསྡད་པར་བྱའོ་ཞེས་པའི་ཐ་ཚིག་གོ །ཅིའི་ཕྱིར་ཞེ་ན། རྣམ་པར་གཡེང་བའི་ཞེས་སྨོས་སོ། །ནི་ཞེས་པ་ནི་གཏན་ཚིགས་ཡིན་ལ་གང་གི་ཕྱིར་མི་སྟེ་སྐྱེས་བུས་ཏིང་ངེ་འཛིན་མེད་པར་རྣམ་པར་གཡེང་བའི་སེམས་ཏེ་མཉམ་པར་མ་བཞག་པ་ཉེ་བར་སྤྱོད་པས་བརྩོན་འགྲུས་དང་ལྡན་ཡང་སྲིན་པོ་ལྟ་བུའི་ཉོན་མོངས་པ་རྣམས་ཀྱི་མཆེ་བའི་ཕྲག་ན་སྟེ། དབུས་ན་གནས་ལ་དེས་ཁམ་དུ་བྱས་ནས་ཡོད་པའོ། །དེ་ལྟ་བས་ན་དེ་ལ་རེ་ཞིག་ཏིང་ངེ་འཛིན་གྱི་མི་མཐུན་པའི་ཕྱོགས་རྣམ་པར་གཡེང་བ་སྤང་བར་འདོད་ནས་གཞི་འཆའ་བ། ལུས་དང་སེམས་ནི་ཞེས་པ་ལ་སོགས་པ་གསུངས་ཏེ། ལུས་དབེན་པ་ནི་སྐྱེ་བོ་དང་འགྲོགས་པ་སྤངས་པ་ཡིན་ལ། སེམས་དབེན་པ་ནི་འདོད་པ་ལ་སོགས་པའི་རྣམ་པར་རྟོག་པ་སྤངས་པ་ཉིད་དེ། དེ་ལྟར་ལུས་དང་སེམས་དག་གི་རྣམ་པར་མི་དབེན་པ་ལ་ཞེན་པ་མེད་པ་ཉིད་ཀྱིས་རྣམ་པར་གཡེང་བ་སྟེ། དེ་དག་གི་གཟེངས་བསྟོད་པ་ཉིད་ལ་དམིགས་པ་ཉིད་ཀྱིས་རབ་ཏུ་གནས་པ་ཞེས་བྱ་བའི་དོན་ཏོ། །མི་འབྱུང་བ་སྟེ་མི་སྐྱེ་བའོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་དང་པོར་འཇིག་རྟེན་ཏེ།
རང་གི་གཉེན་དང་བཤེས་ལ་སོགས་པའི་མཚན་ཉིད་སྤང་བར་བྱ་སྟེ་དོར་བར་བྱའོ། །རྣམ་པར་རྟོགས་པ་ནི་སེམས་རྣམ་པར་གཡེང་བའི་རྒྱུ་ཡིན་ཏེ། ཡོངས་སུ་དོར་ཞིང་ཡོངས་སུ་སྤང་བར་བྱའོ། །དེ་ལ་འཇིག་རྟེན་མི་སྤང་བའི་རྒྱུ་རེ་ཞིག་དགག་པར་འདོད་ནས། རྙེད་དང་ཞེས་པ་ལ་སོགས་པ་གསུངས་ཏེ། བདག་དང་བདག་གི་བའི་འཛིན་པས་ཡོངས་སུ་འཇུག་པའི་མངོན་པར་ཞེན་པ་ནི་ཆགས་པ་སྟེ། དེའི་ཕྱིར་འཇིག་རྟེན་མི་སྤོང་ལ། རྙེད་བ་ལ་སོགས་པ་ལ་སྲེད་པས་ཀྱང་ངོ༌། །སོགས་པའི་སྒྲས་ནི་བཀུར་སྟི་དང༌། སྙན་པ་དང༌། ཚིགས་སུ་བཅད་པ་ལ་སོགས་པ་ཡོངས་སུ་བཟུང་སྟེ། དེ་རྣམས་ལ་སྲེད་པས་ཏེ་རབ་ཏུ་འདོད་པས་སོ། །ངང་གི་སྒྲས་ནི་འཇིག་རྟེན་མི་སྤོང་ཞེས་པས་རྙེད་པ་ལ་སོགས་པ་ལའང་སྡུད་དོ། །གང་གི་ཕྱིར་འདིའི་རྒྱུ་མི་སྤོང་བ་དེ་བས་ནའོ། །འདི་དག་སྟེ་ཆགས་པ་དང་རྙེད་པ་ལ་སོགས་པ་ལའམ། འཇིག་རྟེན་ནའང་སྤོང་བ་ན་རྒྱུ་མཚན་དུ་གྱུར་པའོ། །འཆད་པར་འགྱུར་བ་འདི་ལྟར་བརྟག་པར་བྱ་ཞིང་བསམ་པར་བྱའོ། །དེ་ཉིད་ཞི་གནས་ཞེས་པ་ལ་སོགས་པ་གསུངས་པ་ལ། ཞི་གནས་ནི་སེམས་རྩེ་གཅིག་པའི་མཚན་ཉིད་ཀྱི་ཏིང་ངེ་འཛིན་ཡིན་ལ། དེ་དང་རབ་ཏུ་ལྡན་པ་ཞེས་པ་སྟོན་ཏོ། །འདིར་ཡང་རབ་ཏུ་སྦྱར་རོ། །ཡང་ན་གཏན་ཚིགས་ཀྱི་དོན་ལ་གསུམ་པ་ཡིན་ཏེ། ཞི་གནས་ཀྱི་རྒྱུས་ལྷག་མཐོང་དང་ལྡན་པའམ་ལྷན་ཅིག་པའི་དོན་ཡིན་ཏེ། ཞི་གནས་དང་ལྷན་ཅིག་ཏུ་ལྷག་མཐོང་དང་ལྡན་པའོ་ཞེས་སོ། །ལྷག་མཐོང་ནི་ཇི་ལྟ་བུར་གྱུར་པའི་དེ་ཁོ་ན་ཉིད་ཡོངས་སུ་ཤེས་པའི་རང་བཞིན་གྱི་ཤེས་རབ་ཡིན་ལ། དེ་དང་ལྡན་པ་ནི་ཟུང་དུ་འཇུག་པས་ཞུགས་པའི་ལམ་གྱི་སྦྱོར་བས་ཉོན་མོངས་པ་འཇོམས་ཤིང་སྤོང་བར་བྱེད་དེ་ཞེས་ཤེས་པར་བྱ་སྟེ་གོ་བར་བྱས་ནས་སོ། །ཉོན་མོངས་པ་ལས་གྲོལ་བར་འདོད་པས་ཞི་གནས་ཐོག་མར་ཏེ་དང་པོར་བཙལ་བྱ་སྟེ་ཉེ་བར་བྱ་ཞིང་བསྐྱེད་པར་བྱའོ་ཞེས་པའི་ཐ་ཚིག་གོ །དེའི་རྗེས་ལ་ནི་ལྷག་མཐོང་སྟེ་མཉམ་པར་གཞག་པས་ཇི་ལྟ་བུར་གྱུར་པ་ཤེས་པ་ཉིད་དུ་སྟེ། གང་བརྗོད་པ། མཉམ་གཞག་ཡང་དག་ཅི་བཞིན་དུ། །ཤེས་པར་འགྱུར་ཞེས་ཐུབ་པས་གསུངས། །ཕྱི་རོལ་གཡོ་བ་བཟློག་པ་ཡིས། །
སེམས་ནི་ཞི་ལས་གཡོ་མི་འགྱུར། །དེ་ཡང་ནི་ཞི་གནས་སོ། །འཇིག་རྟེན་ནི་འཇིག་རྟེན་ཡུལ་དུ་བྱས་པ་ལའོ། །ལྟོས་པ་མེད་པ་ནི་མངོན་པར་དགའ་བ་སྤངས་པ་སྟེ། དེ་ཉིད་ཀྱིས་འགྲུབ་སྟེ་གཞན་གྱིས་མ་ཡིན་ནོ་ཞེས་པའི་དོན་ཏོ། །མངོན་པར་དགའ་ཞང་ལྟོས་པ་མེད་པ་ཉིད་འཆད་པར་འགྱུར་བའི་གཞུང་རྒྱས་པར་བསྟེན་པར་འདོད་ནས། མི་རྟག་ཅེས་པ་ལ་སོགས་པ་གསུངས་ཏེ། སེམས་དང་ལྡན་པ་སུ་ཞིག་རང་ཉིད་མི་རྟག་པ་སྟེ་བུ་ལ་སོགས་པ་མི་རྟག་པ་རྣམས་ལ་ཆགས་པར་འགྱུར་བར་ཇི་ལྟར་རྒྱུ་གང་གིས་ཏེ་རྒྱུ་མཚན་གང་གིས་རིགས་ཤིད་རུང་བར་འགྱུར་སྟོང་ཕྲག་ནི་སྐྱེ་བ་དུ་མ་ཡིན་ཏེ། མཐར་ཐུག་པ་མེད་པའི་འཁོར་བར་འཁོར་བ་ན་བརྒྱ་ལ་ཞིག་ན་ཡང་སྡུག་པ་མཐོང་བ་མ་ཡིན་ནོ། །གཞན་ཡང་དགའ་བར་བྱེད་པས་ན་སྡུག་པར་བརྗོད་ལ། དེ་ཡང་འདི་ན་མེད་དོ་ཞེས་སོ། །མ་མཐོང་ན་ནི་ཞེས་པ་ལ་སོགས་པ་གསུངས་ཏེ། གང་གི་ཚེ་དེ་རེ་ཞིག་དེ་མཐོང་བ་དེའི་ཚེ་དགའ་བར་འདིར་མི་འགྱུར་ཏེ། ཡིད་མི་བདེ་བ་དེ་ཉིད་ཀྱིས་ཏིང་ངེ་འཛིན་ལ་འཇོག་པར་མི་འགྱུར་ཏེ་མི་གནས་པ་ཉིད་དུ་འགྱུར་ལ། དེ་ལ་དམིགས་པ་ལ་ནུས་པ་མེད་པ་ཡིན་ཏེ། སེམས་རྣམ་པར་འཁྲུག་པའི་ཕྱིར་རོ་ཞེས་པའི་དོན་ཏོ། །འོན་ཏེ་གལ་ཏེ་ཡང་སྡུག་པ་མཐོང་བ་འདིར་འགྱུར་བ་དེ་ལྟར་ན་མཐོང་ཡང་ངོམས་པར་མི་འགྱུར་ཏེ་སླར་ཡང་ལྷག་པར་སྲེད་པས་གདུངས་པར་འགྱུར་ལ། དེ་མཐོང་བར་འདོད་པས་སྔར་བཞིན་དུ་སྟེ། མ་མཐོང་བ་དང་འདྲ་བར་གདུང་བར་གདུང་བར་འགྱུར་རོ། །གཞན་ཡང་དོན་ཉམས་པ་ཐམས་ཅད་ཀྱི་རྒྱུ་སྡུག་པ་དང་ཕྲད་པ་ཡིན་ནོ་ཞེས་བསྟན་པའི་ཕྱིར། ཡང་དག་གྱུར་པ་ཞེས་པ་ལ་སོགས་པ་གསུངས་ཏེ་སྡུག་པ་དང་ཕྲད་པར་འདོད་པས་ཡང་དག་པར་གྱུར་པ་སྟེ་མ་ནོར་བའི་ཡོན་ཏན་དང་སྐྱོན་མི་མཐོང་སྟེ་མི་ཤེས་སོ། །ཞེན་པ་དེ་ཉིད་ཀྱིས་སྐྱོ་ལ་འཇིག་རྟེན་ཉམས་པར་འགྱུར་རོ། །དེ་ཉིད་དང་ཕྲད་པར་འདོད་པས་སྲེག་པར་འགྱུར་ཏེ་མྱ་ངན་དེ་ཡིས་ཏེ། ཡུད་ཙམ་ཡང་རྒྱུན་མ་ཆད་པར་གྱུར་པས་སོ། །མྱ་ངན་དེས་ནི་ཞེས་པ་ནི་ཡིད་གདུང་བར་གྱུར་བ་དེ་ཉིད་ཀྱིས་སྲེག་པར་བྱེད་དོ། །ཡོངས་སུ་གདུང་བར་བྱེད་དོ། །སྡུག་དང་ཕྲད་པར་འདོད་པ་ནི་སྡུག་པ་དང་ཕྲད་ཅིང་སྦྱོར་བའོ། །དེ་ལ་འདོད་པས་ཏེ་སྲེད་པ་རྒྱུར་གྱུར་པས་སླར་ཡང༌།
ཡང་ནས་ཡང་དུ་ལྷག་ཅིང་ལྷག་པར་ཚོར་བར་བྱེད་པས་སོ། །དེ་དང་ཕྲད་པས་ནི་དོན་མེད་པའི་རྒྱུ་ཉིད་དེ་ཞེས་དེ་ལ་སེམས་པ་ཞེས་པ་ལ་སོགས་པ་འདིས་ཀྱང་སྟོན་པར་བྱེད་དེ། དེ་ལ་ནི་སྡུག་པ་ཡིན་ལ། ཡང་ན་ཕྲད་པ་དེ་ལའོ། །སེམས་ཀྱིས་དེའི་ཡོན་ཏན་ལ་རྟག་ཏུ་སེམས་པས་སོ། །ཅི་ལྟར་ཡང་བདག་སྡུག་པ་འདི་དང་ཕྲད་པ་རྒྱུན་ཆད་པར་མ་གྱུར་ཞེས་པའམ། དེ་ལ་སེམས་ཞུགས་པས་སོ། །དོན་མེད་པ་ཉིད་ནི་ཚེའི་འདུ་བྱེད་སྐད་ཅིག་རེ་རེ་ལ་ཟད་པར་འགྱུར་བ་སྟེ། དགེ་བའི་ལས་ཅུང་ཟད་ཙམ་ལ་ཡང་ཡང་དག་པར་སྦྱར་བ་མ་ཡིན་ནོ་ཞེས་དགོངས་ལ། གང་གི་དོན་དུ་ཚེ་ཟད་པར་བྱས་པ་མ་ཡིན་ནོ་ཞེས་སོ། །དེ་ལྟར་ན་ཡང་མཛའ་བཤེས་བརྟན་པ་ཡིན་ནོ་ཞེ་ན། རྟག་པ་མེད་པའི་ཞེས་པ་ལ་སོགས་པ་གསུངས་ཏེ། ངེས་པར་འཇིག་པར་འགྱུར་བས་མི་གནས་པའི་ཕྱིར་མི་རྟག་པའི་མཛའ་བཤེས་ཀྱི་རྒྱུས་ཆོས་འཇིག་པས་ཏེ་ཡོངས་སུ་ཉམས་པར་འགྱུར་བ་ཡིན་ལ། རྟག་པ་ནི་དུས་རིང་པོའི་གནས་སྐབས་སུ་ཚོགས་སུ་གྱུར་པའི་ཕྱིར་དང༌། འབྲས་བུ་ཆེན་པོ་ཉམས་པ་མེད་པའི་ཕྱིར་རོ། །དེ་ལྟར་གྱུར་ན་ཡང་འགའ་ཞིག་དང་འགྲོགས་པ་ལས་ངེས་པར་ཕན་པ་དང་བདེ་བའི་རྒྱུ་མཚན་ཐོབ་པར་གྱུར་ན་དེ་ཅིའི་ཕྱིར་རྣམ་པ་ཐམས་ཅད་དུ་འགོག་པར་བྱེད་ཅེ་ན། འདིར་བྱིས་པ་ཞེས་པ་ལ་སོགས་པ་གསུངས་ཏེ། དེ་དང་འགྲོགས་པ་ལས་དོན་མེད་པ་མ་གཏོགས་པར་འདོད་པ་མཆོག་ཅུང་ཟད་ཀྱང་ཐོབ་པར་མི་འགྱུར་ཏེ། དེ་ལྟར་ཡང་བྱིས་པ་སོ་སོའི་སྐྱེ་བོ་དང་ལྷན་ཅིག་སྐལ་བ་མཉམ་པར་སྤྱོད་པ་སྟེ། སྤྱོད་པ་མཚུངས་པས་ངན་འགྲོར་ངེས་པ་ཉིད་དུ་འགྲོ་བར་འགྱུར་ཏེ། དེ་དང་འདྲ་བའི་ལས་སྤྱད་པའི་ཕྱིར་དང༌། འཕགས་པའི་ཆོས་ལས་ཕྱི་རོལ་དུ་གྱུར་པའི་ཕྱིར་ལ། འོན་ཏེ་འཕགས་པའི་ཆོས་ཀྱི་རྗེས་སུ་ཞུགས་པ་ནི་དེ་དང་མི་འདྲ་བའི་ལས་བྱེད་པར་འགྱུར་བ་དེའི་ཚེ་སྐལ་པ་མི་མཉམ་པ་སྟེ་མཉམ་པོར་སྤྱོད་པའི་བྱིས་པ་མི་འདོད་དེ་སྡང་བས་ན་བྱིས་པ་ཞེས་པ་དང་འབྲེལ་ཏོ། །འདིར་བྱེད་པ་པོ་ལ་གསུམ་པ་ཡིན་ཏེ། དེ་ལྟར་ན་འཇིག་རྟེན་གཉི་ག་ལ་གནོད་པའི་ཕྱིར་རོ། བྱིས་པ་དང་འགྲོགས་པས་ཅི་ཞིག་འཐོབ་སྟེ། ཕན་པ་དང་བདེ་བའི་རྒྱུ་དེ། ལྷག་པ་ཅུང་ཟད་ཀྱང་མེད་
དོ་ཞེས་པའི་དོན་ཏོ། །རྗེས་སུ་མཐུན་པ་སྤྱད་ཀྱང་བདག་གིས་བྱ་བར་མི་ནུས་སོ་ཞེས་སྐད་ཅིག་ཅེས་པ་ལ་སོགས་པ་གསུངས་ཏེ། གང་གི་དགོས་པ་ཅུང་ཟད་ལ་བརྟེན་ནས་སྐད་ཅིག་ཙམ་གྱིས་མཛའ་བར་འགྱུར་ཏེ་གྲོགས་སུ་འགྱུར་རོ། །རྒྱུ་མཚན་ཅུང་ཟད་ཙམ་ལ་དམིགས་ནས་སྐད་ཅིག་ཙམ་ཉིད་ཀྱིས་དེ་ཉིད་དགྲ་སྟེ་མི་མཐུན་པར་འགྱུར་ཏེ། ལོག་པར་སེམས་པའི་ཕྱིར་རོ། །དེ་རྣམས་ལ་ངེས་པར་རྒྱུ་མཚན་ཡོད་པ་ཡང་མ་ཡིན་ནོ། །གང་ཞིག་བརྒྱ་ལ་སེམས་དགའ་བའི་གནས་ཏེ་དགའ་བའི་ཁྱད་པར་ལ་བཟློག་པའི་དབང་གིས་ཁྲོ་བར་བྱེད་དོ། །སོ་སོའི་སྐྱེ་བོ་འཕགས་པ་མ་ཡིན་པ་མགུ་བར་དཀའ་བ་ཡིན་ཏེ། སྡུག་བསྔལ་དང་བཅས་པས་མགུ་བར་ནུས་པས་སོ། །བྱིས་པའི་ཆོས་གཞན་ཡང་སྤང་བའི་དོན་དུ་ཕན་པ་ཞེས་པ་ལ་སོགས་པ་སྟོན་པར་མཛད་དོ། འདི་ནི་བྱ་བ་ཡིན་ལ་འདི་ནི་བྱ་བ་མ་ཡིན་ནོ་ཞེས་བརྗོད་ཅིང་སྨྲས་པ་ན་ཁྲོ་བར་འགྱུར་ཏེ་ཞེ་སྡང་བར་འགྱུར་རོ། །ཡང་ཕན་པ་དང་མི་ཕན་པ་བརྗོད་པ་འཛིན་པར་མི་འགྱུར་ཏེ། སླར་ཡང་བདག་ཕན་པ་ལས་ཟློག་པར་བྱེད་ལ། ཁྱོད་གཅིག་པུ་ངལ་བའི་འབྲས་བུ་འདི་ཉམས་སུ་བླངས་ནས་ཅི་བྱ་ཞེས་བདག་དེ་ལ་ཞུགས་པ་དེ་ལ་དེས་ཟློག་པར་བྱེད་དོ། །གལ་ཏེ་བྱིས་པ་དེ་རྣམས་ཀྱི་ཚིག་མ་མཉན་ན་ཞེས་པ་ནི་ལྷག་མའོ། །གལ་ཏེ་དེའི་ཚིག་ལ་བརྙས་ནས་རང་གི་ཕན་པ་ལ་འཇུག་པར་བྱས་པ་དེའི་ཚེ་ཁྲོ་བར་བྱེད་དེ། བདག་གིས་ཚིག་ལས་འདི་མ་ལོག་གོ་ཞེས་པས་སོ། །དེ་ལ་ཕན་པ་མ་ཡིན་པ་བྱེད་པ་ཡིན་ནོ་ཞེས་ལས་དེས་བསྐུལ་བས་ངན་འགྲོར་འགྲོ་བར་འགྱུར་རོ། །བྱིས་པའི་ཆོས་གཞན་འདི་ལ་ཡང་སྐྱོ་བར་བྱའོ་ཞེས་བསྟན་པའི་ཕྱིར་ཕྲག་དོག་ཅེས་པ་ལ་སོགས་པ་གསུངས་ཏེ། བདག་ལས་ཁྱད་པར་མཆོག་ཏུ་གྱུར་པའི་རིགས་དང་རིག་པ་དང་ནོར་ལ་སོགས་པ་དང་ལྡན་པ་ལ་ཕྲག་དོག་སྟེ། གཞན་གྱི་ཕུན་སུམ་ཚོགས་པ་ལ་མི་བཟོད་པ་སྐྱེ་བར་འགྱུར་བའོ། དོན་གྱིས་ན་དེ་རྣམས་དང་བདག་མཉམ་ཞིང་མཚུངས་པ་ལ་འགྲན་པས་རྩོད་དོ། །བདག་པས་དམན་པ་སྟེ་ཞན་པ་ལ་མངོན་པའི་ང་རྒྱལ་ཏེ་ངན་མཆོག་ཡིན་ནོ་ཞེས་མངོན་པའི་ང་རྒྱལ་བའི་ཕྱིར་རོ། །བསྟོད་པས་དྲགས་པ་ནི་བདེན་པ་དང་བདེན་པ་མ་ཡིན་པའི་ཡོན་ཏན་བརྗོད་པ་ན་བདག་ཆེན་པོ་
ཡིན་ནོ་ཞེས་སྒྲོ་འདོགས་པས་དགོད་པར་བྱེད་དོ། །མི་སྙན་བརྗོད་པ་སྟེ་བདག་གི་ཉེས་པ་བསྒྲགས་པ་ཐོས་པ་ལས་ཏེ་དོན་གྱིས་ན་མི་སྙན་པ་བརྗོད་པ་ལས་ཁོང་ཁྲོ་བ་སྟེ་ཞེ་སྡང་སྐྱེའོ། །དེ་ལྟར་ན་ནམ་ཞིག་སྟེ་དུས་འགའ་ཞིག་ན་བྱིས་པ་ལས་ཕན་པར་འགྱུར་བ་ནམ་ཡང་མ་ཡིན་ནོ་ཞེས་པའི་དོན་ཏོ། །འདིས་ཀྱང་བྱིས་པ་རྣམས་ཡོངས་སུ་སྤངས་ནས་གནས་པར་བྱའོ་ཞེས་བསྟན་པའི་ཕྱིར། བྱིས་ལས་བྱིས་པ་ལན་ཞེས་པ་ལ་སོགས་པ་གསུངས་ཏེ། བྱིས་པ་གཅིག་ལ་བྱིས་པ་གཞན་ལས་འདི་ལྟ་བུ་ལ་སོགས་པའི་མི་དགེ་བ་སྟེ་དགེ་བ་མ་ཡིན་པ་ངེས་པར་སྐྱེ་པར་འགྱུར་རོ། །ཅི་ལྟ་བུར་ཞེ་ན། བདག་ལ་བསྟོད་པས་དེ་ཐོས་པ་དང་ཤེས་པ་ལ་སོགས་པས་མཆོག་ཏུ་བསྔགས་པའོ། །ཐོས་པ་ལ་སོགས་པ་སྦ་བའི་དོན་དུ་གཞན་ལ་སྨོད་པ་སྟེ་ཉེས་པ་སྒྲོགས་པའོ། །འཁོར་བར་དགའ་བ་ནི་མངོན་པར་དགའ་བ་ཡིན་ཏེ། དེའི་གཏམ་ནི་དེ་ལ་བསྔགས་པ་སྟེ། འདོད་པའི་ཡོན་ཏན་རྣམས་ལ་ཡང་དག་པར་བསྟོད་པའི་ཕྱིར་ཏེ། འདི་ལྟ་བུ་ལ་སོགས་པའི་རྣམ་པ་དེ་ལྟར་རོ། །དེ་ལྟར་དེ་དང་ཞེས་པ་ནི་གཞན་དང་ཡིན་པ་སྟེ། དེ་དང་འབྲེལ་པ་དེ་བཞིན་གཉིས་པ་དང་འགྲོགས་པས་སོ། །མི་དགེ་བ་ཅུང་ཟད་དུ་ངེས་པར་གྱུར་ཏོ། །གང་གིས་དེ་ལྟར་ཡིན་པའི་རྒྱུ་དེས་ན་ཕུང་བར་འགྱུར་བ་སྟེ་མི་དགེ་བ་འབྱུང་བར་འགྱུར་ཏེ། བྱིས་པ་འདི་དང་འགྲོགས་པ་ལ་ཐོབ་པར་འགྱུར་རོ། །དེའི་ཕྱིར་འཕགས་པའི་ཆོས་ལ་རྗེས་སུ་བསླབ་པའི་དོན་དུ་གཅིག་པུ་སྟེ་བྱིས་པ་དང་འགྲོགས་པ་དང་བྲལ་བས་གཉིས་པ་མེད་པར་རྒྱུ་བར་བྱའོ། །དེ་དང་བྲལ་བས་བདེ་བ་སྟེ་བྱ་བ་འདི་ནི་བྱ་བའི་ཁྱད་པར་ཡིན་ནོ། །ཅི་ལྟར་ཞེ་ན། དེས་ན་ཡིད་ནི་སྦྱོར་བས་ཞེས་ཏེ། དེ་དང་འགྲོགས་པ་སྤངས་པའི་ཕྱིར་ཏེ་དེས་བྱས་པའི་ཉོན་མོངས་པ་དང་བྲལ་བའི་ཕྱིར་རོ། །སྔ་མ་ལ་འདི་ནི་གཏན་ཚིགས་ཀྱི་ཚིག་ཡིན་ནོ། །ཡང་ན་བདེ་བ་ནི་ལུས་ཀྱི་ཡིན་ལ། ཉོན་མོངས་མེད་ཡིད་ཀྱིས་ཞེས་པ་ནི་ཡིད་ལས་བྱུང་བ་ཡིན་ནོ། །དེའི་ཕྱིར་བྱིས་པའི་སྐྱེ་བོ་དང་འགྲོགས་པས་སྡུག་བསྔལ་བ་སྤོང་བར་འདོད་པས་དེ་དང་འགྲོགས་པར་མི་བྱའོ་ཞེས་བསྟན་པའི་ཕྱིར་བྱིས་ལས་ཞེས་པ་ལ་སོགས་པ་གསུངས་ཏེ།
བྱིས་ལས་ཏེ་ཐམས་ཅད་དུ་ཤིན་ཏུ་ཐག་རིང་སར་བྱོལ་བར་བྱ་སྟེ་འབྲོས་པར་བྱ་ཞིང་ཇི་ལྟར་དེ་དང་བརྒྱ་ལ་ཡང་ཕྲད་པར་མི་འགྱུར་བར་བྱའོ་ཞེས་པའི་དོན་ཏོ། །འོན་ཏེ་བརྒྱ་ལ་སྟེ་དབང་ཐང་གིས་ཕྲད་པ་དེའི་ཚེ་ཕྲད་ཅིང་ཚོགས་པ་ན་བསྟེན་པར་བྱ་སྟེ་དགའ་བས་ཏེ། དགའ་བའི་རྣམ་པའི་ཉེ་བར་སྤྱོད་པས་བསྟེན་པར་བྱའོ། །སྟོན་པ་ན་ཡང་འདྲིས་ཆེན་ཉིད་དུ་མི་འགྱུར་བར་ཏེ། བསྙེན་བཀུར་རེ་བའི་བསམ་པས་མ་ཡིན་པའོ། །ཡང་ན་འདྲིས་ཆེན་ནི་རྗེས་སུ་ཆགས་པ་མ་ཡིན་གྱི་འོན་ཀྱང་ཆགས་སྡང་དང་བྲལ་བས་ཐ་མལ་བ་བཞིན་དུ་སྟེ། དམ་པའི་སྤྱོད་པ་གཟུ་བོ་ལྟ་བུར་རོ། །སྐྱེ་བོ་བཟང་པོ་དང་ལྷན་ཅིག་སྤྱོད་པ་འདིས་ཀྱང་བསླབ་པར་བཞེད་ནས། ཆོས་ཀྱི་དོན་ཙམ་ཞེས་པ་ལ་སོགས་པ་གསུངས་ཏེ། ཆོས་ཀྱི་ཆེད་འདི་ནི་ཆོས་དོན་ཏེ། དེ་ཉིད་འབའ་ཞིག་ཙམ་ནི་དེ་ཙམ་མོ། །དེ་བླངས་ནས་ནི་བཟུང་ནས་ཏེ་སྙིང་པོ་བླང་བར་བྱས་ནས་ཞེས་པའི་དོན་ཏོ། །བུང་བ་བཞིན་དུ་ནི་སྦྲང་རྩི་བྱེད་བཞིན་དུ་སྟེ། མེ་ཏོག་ལས་སྦྲང་རྩི་ལེན་པ་བཞིན་དུའོ། །ཡང་ན་ཆོས་ཉིད་ཀྱི་དོན་ནི་དགོས་པ་སྟེ། འདི་ཆོས་གོས་དང་བསོད་སྙོམས་ལ་སོགས་པ་ཡིན་ནོ་ཞེས་ཚིག་བསྡུའོ། །བྱིས་པ་དང་འགྲོགས་པ་ལ་རྒྱབ་ཀྱིས་ཕྱོགས་ཏེ། སྔོན་མེད་བཞིན་དུ་སྟེ་ཟླ་བ་གསར་པ་དང་འདྲ་བར་གནས་སྐབས་ཀུན་ཏུའམ་ཡུལ་ཀུན་ཏུ་གནས་པར་བྱའོ། །འདྲིས་པ་མེད་པ་ནི་ངོ་ཤེས་པ་མེད་པ་སྟེ། གནས་པར་བྱ་ནི་དེར་རེ་དང་བྲལ་བར་ཞེས་པའི་དོན་ཏོ། །དེ་ལྟར་ན་སྡུག་པ་དང་འགྲོགས་པའི་རྒྱུ་ཆགས་པ་བསལ་ནས། ད་ནི་རྙེད་པ་ལ་སོགས་པ་ལ་སྲེད་པ་འཇིག་རྟེན་མི་གཏོང་བའི་རྒྱུ་སྤོང་བར་བྱའོ་ཞེས་བསྟན་པར་བྱ་བའི་ཕྱིར། བདག་ནི་རྙེད་པ་མང་ཞེས་པ་ལ་སོགས་པ་གསུངས་ཏེ། འདིའི་རྙེད་པ་གང་ཡིན་པ་དེ་ལ་དེ་སྐད་ཅེས་བྱ་སྟེ། ཆོས་གོས་དང་བསོད་སྙོམས་ལ་སོགས་པའི་རྙེད་པ་དང་ལྡན་པས་བདག་རྙེད་པ་ཅན་དང་བཀུར་སྟི་བྱས་པའང་ཡིན་ཏེ་སྐྱེ་བོས་མཆོད་པ་ཡིན་ནོ། །བདག་ལ་དགའ་བ་ནི་འདོད་པ་ཡིན་ལ་མང་པོ་ཡང་དུ་མ་ཡིན་ཏེ། སྐྱེ་བོ་མང་པོས་འདོད་པ་ཞེས་པའི་དོན་ཏོ་ཞེས་པ་ནི་དེ་ལྟར་སེམས་པ་ན་འདི་ལྟར་ས་སྟེང་སྟེ་མི་ཡིན་ལ། ཤི་བའི་འོག་ཏུ་འཇིགས་པ་སྐྱེའོ། །ཅི་ལྟ་བུར་
གྱུར་པ་ལ་ཞེ་ན། མ་བསམས་པར་ཐོབ་པ་ལ་གློ་བུར་དུའོ། །དེ་ལྟར་ན་ཐམས་ཅད་དུ་ངེས་པར་འཆི་བ་ཡིད་ལ་བྱས་པས་འཇིག་རྟེན་པའི་སྐྱེ་བོ་ལ་སེམས་པའི་སྤྱོད་པ་ཡོངས་སུ་བསམ་པས་ཅི་ཞིག་བྱ་སྟེ་དགོས་པ་ཅུང་ཟད་ཀྱང་མེད་དེ་བླང་བར་བྱ་བ་མ་ཡིན་ནོ་ཞེས་པའི་ཐ་ཚིག་གོ །བྱིས་པ་དང་འགྲོགས་པ་སྡུག་བསྔལ་གྱི་རྒྱུ་ཉིད་དོ་ཞེས་སེམས་ཅན་རྙེད་པ་མེད་ལ་ཞེས་པ་འདིས་ཀྱང་སྟོན་ཏེ། སེམས་ཅན་རྙེད་པ་མེད་པ་སྟེ་རྙེད་པ་དང་བྲལ་བ་ཡིན་ལ། བསོད་ནམས་མ་བྱས་པའི་ཉོན་མོངས་པ་འདིས་བསོད་སྙོམས་ལ་སོགས་པ་ཤིན་ཏུ་ཉོན་མོངས་པས་མི་རྙེད་དོ་ཞེས་འཕྱ་བར་བྱེད་དོ། །རྙེད་པ་ཅན་ལ་ཡང་མི་སྙན་པར་བརྗོད་དེ། ཡོན་བདག་གམ་སྦྱིན་པ་པོ་རྣམས་ཀྱིས་དད་པས་མཆོད་ནས་སྦྱིན་པ་པོ་དང་ཡོན་བདག་རྣམས་ཚུལ་འཆོས་ལ་སོགས་པས་དད་པར་བྱས་ནས་ཆོས་གོས་ལ་སོགས་པའི་རྙེད་པ་ཐོབ་པ་ཡིན་ཏེ། གཞན་དུ་ན་གཞན་ལ་ཡང་དེ་ལྟ་བུའི་ཡོན་ཏན་ཡོད་ན་ཅིས་ན་འདི་ཉིད་ཀྱིས་ཐོབ་ལ་གཞན་གྱིས་མ་ཡིན་ཞེས་དེ་ལ་མ་དད་པར་བྱེད་ཅིང་ཚིག་དེ་ལྟར་སྨྲའོ། །དེ་ལྟར་གཉི་ག་ལ་ཡང་དེ་རྣམས་ལས་སེམས་ཞི་བ་ཡོད་པ་མ་ཡིན་ཏེ། དེ་འདི་ལྟར་རང་བཞིན་གྱིས་སྡུག་བསྔལ་གྱི་རྒྱུ་ཡིན་པའི་ཕྱིར་རོ། །ཡང་ན་གང་བྱིས་པའི་སྐྱེ་བོ་དེ་རྣམས་སྡུག་བསྔལ་བས་གནས་པ་ཡིན་པ་དེ་ལ་དེ་སྐད་ཅེས་བྱའོ། །དེ་དག་གིས་ནི་དེ་ལྟ་བུར་གྱུར་པས་ཏེ། ལྷན་ཅིག་ཏུ་འགྲོགས་པར་གྱུར་པས་དགའ་བ་ཇི་ལྟར་སྐྱེ་བར་འགྱུར་ཏེ་མ་ཡིན་ནོ་ཞེས་པའི་དོན་ཏོ། །བྱིས་པ་སྙིང་གྲོགས་ཀྱང་བརྟེན་པ་མ་ཡིན་པར་གང་གི་ཕྱིར་བྱིས་པ་ཞེས་པ་ལ་སོགས་པ་གསུངས་ཏེ། གྲོགས་པོ་ནི་སྙིང་དུ་སྡུག་པ་ཡིན་ལ། དེ་བཞིན་གཤེགས་པས་གསུངས་པས་ནི་ལུང་རྣམས་སུ་གསུངས་པ་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་རང་ལ་དགོས་པ་མེད་པར་བྱིས་པ་གང་ལ་ཡང་དགའ་བ་སྐྱེ་བར་མི་འགྱུར་ཏེ། དེའི་ཕྱིར་དེ་མེད་པ་ལས་བཟློག་པར་འགྱུར་རོ། །དེས་ཀྱང་བྱིས་པ་དང་འགྲོགས་པ་ཡིན་ན་ཡང་བརྟན་པ་མ་ཡིན་ནོ། །དེ་ལ་བྱམས་པར་བྱས་པས་ཀྱང་སོ་སོའི་སྐྱེ་བོ་མགུ་བར་མི་ནུས་སོ། །དེ་ལྟ་བས་ན་དེ་དང་འགྲོགས་པ་ལས་བྱུང་བའི་ཉེས་པ་སྤང་བའི་
ཆེད་དུ་བདེ་བ་དང་ཡིད་བདེ་བས་དབེན་པ་འདོད་པས་གནས་པར་བྱ་སྟེ། བདག་གིས་དགོན་པ་ལ་སོགས་པ་བསྟེན་པ་ལ་གནས་པར་བྱའོ་ཞེས་ནས་དེའི་ཕན་ཡོན་བསྟན་པའི་ཕྱིར། ཤིང་རྣམས་ཞེས་པ་ལ་སོགས་པ་གསུངས་ཏེ། ཤིང་རྣམས་སྨོད་པར་མི་བྱེད་པ་ནི་ལྗོན་ཤིང་རྣམས་སོ། །རབ་ཏུ་བསྒྲིམས་ནས་ཞེས་པ་ནི་ནགས་ལ་སོགས་པ་རྣམས་སུ་དེ་དང་རྗེས་སུ་མཐུན་པའི་ཡང་དག་པར་སྤྱོད་པས་བསྟེན་མི་དགོས་པ་ནི་བསྟན་པར་བྱ་བ་མ་ཡིན་ཏེ། ནགས་ན་འགྲོགས་པ་ན་བསམས་པ་ངན་པ་དང་བྲལ་བའི་ཕྱིར་རོ། །དེའི་ཕྱིར་བདག་ནམ་ཞིག་ཤིང་རྣམས་དང་ལྷན་ཅིག་ཏུ་འགྲོགས་པར་འགྱུར། ཅི་ལྟ་བུར་གྱུར་བ་ཞེ་ན། བདེ་བར་འགྲོགས་པས་ཏེ་འདི་ལྟར་སྨོན་པ་ཡིན་ལ་བདེ་བའི་རྒྱུ་ཡིན་པས་བདེ་བ་ཡིན་ནོ་ཞེས་སྔར་བཞིན་དུའང་ཡང་གཅིག་པུ་རྒྱུ་བར་བྱ་བ་ལ་དགའ་བར་བྱ་བར་ཕུག་གམ་ཞེས་པ་ལ་སོགས་པ་གསུངས་པ་ལ། ལྷ་གང་ནི་སྐྱེ་བོའི་ཚོགས་དང་བྲལ་བ་ཡིན་ཏེ། གནས་བཅས་ནི་ཅི་ལྟར་འདོད་པར་ནུབ་གཅིག་གམ་གཉིས་ངལ་བསོ་ཞིང་གནས་པའོ། །ལྗོན་ཤིང་གི་དྲུང་ནི་ཤིང་གི་འོག་ཡིན་ལ། ཕུག་ནི་རི་ལ་སོགས་པ་རྣམས་སུ་གསང་བའི་ཡུལ་ཡིན་ཏེ་དེར་ཡང་ངོ༌། །ལྟོས་པ་མེད་པ་ནི་ཞེན་པ་མེད་པ་ཡིན་ཏེ། འགྱུར་ཞིག་གུ་ནི་སྨོན་པའི་གནས་འགའ་ཡང་མེད་པས་སོ། །དེ་ཉིད་ཀྱི་ཕྱིར་རྒྱབ་ཏུ་མི་ལྟ་བ་ནི་ཕྱིས་ལྡོག་པ་མེད་པའི་ཕྱིར་རོ། །ཡང་གཞན་གསུངས་པ། ས་ཕྱོགས་ཞེས་པ་ལ་སོགས་པ་ལ། འགེགས་པར་བྱེད་པ་གང་གིས་ཀྱང་སྔར་བདག་གིར་མ་བྱས་པ་ཡངས་ཤིང་རྒྱ་ཆེ་བ་ཡིད་བདེ་བར་བྱེད་པ་རྣམས་སུ་སྟེ། རང་བཞིན་གྱིས་ནི་རང་ཉིད་ཀྱིས་སོ། །དེ་ལྟ་བུ་རྣམས་སུ་བཅོས་མ་མ་ཡིན་པས་གནས་པར་བྱའོ། །ནམ་ཞིག་བདག་ཅེས་པ་ནི་སྨོན་པ་སྟེ། འདིར་གནས་པའི་བདེ་བ་གང་ཡིན་པ་དེ་བསྟན་པའི་ཕྱིར། རང་དབང་ཞེས་པ་ལ་སོགས་པ་གསུངས་ཏེ། རང་དབང་དུ་སྤྱོད་པ་ནི་གཞན་དབང་གིས་འཇུག་པ་མ་ཡིན་ལ་གནས་མེད་པ་ནི་གནས་དང་བྲལ་བ་ཡིན་ཏེ་གང་ལ་གནས་པ་ལ་ཞེན་པ་དང་བྲལ་བས་གང་ལ་གནས་མེད་པ་སྟེ། གང་ལ་ཡང་བདག་གིར་བྱས་པ་མེད་པའི་ཕྱིར་རོ། །དེ་ལྟ་བུར་གྱུར་པ་གང་དང་ཡང་འབྲེལ་པ་མེད་པ་ཡིན་ཏེ་ལྷག་མ་ནི་གོ་སླའོ། །ཡང་འདི་ལྟར་འདོད་པ་
ཆུང་བས་སྨོན་པར་བྱ་བ་ཡིན་ནོ་ཞེས་བསྟན་པའི་ཕྱིར། སའི་ལྷུང་བཟེད་ཙམ་ཞེས་པ་ལ་སོགས་པ་གསུངས་ལ། སའི་ལྷུང་བཟེད་ནི་སའི་རང་བཞིན་གྱི་སློང་སྣོད་དོ། །དེ་ཉིད་འབའ་ཞིག་ནི་དེ་ཙམ་ཡིན་ལ། དེ་ལྟ་བུའི་བདོག་པ་གང་གི་ཡིན་པ་དེ་ལ་དེ་སྐད་ཅེས་བྱའོ། །ཀུན་ལ་མི་མཁོ་བ་ནི་ཕྱག་དར་ཁྲོད་ལས་གོས་བྱས་པའི་ཕྱིར་ཏེ་ཡོངས་སུ་ལོངས་སྤྱད་པར་བྱ་བ་མ་ཡིན་པ་དང༌། མཁོ་བ་མ་ཡིན་པ་ཞེས་པའི་ཐ་ཚིག་གོ །དེ་ལྟ་བུའི་ཆོས་གོས་གང་གི་གོས་ཡིན་པ་དེ་ལ་དེ་སྐད་ཅེས་བྱའོ། །གཉིས་པོ་འདི་གཞན་གྱི་ས་འཕྲོག་པ་མ་ཡིན་ཏེ། དེ་ཉིད་ཀྱི་ཕྱིར་འཇིགས་པ་མེད་པ་དང༌། ལུས་གསོན་པ་ལ་ལྟོས་པ་མེད་པ་ཡིན་ལ། དེ་ཉིད་ལུས་འདི་སྦ་བ་མ་བྱས་ཀྱང་ཞེས་པས་སྟོན་ཏེ། ཕྱི་དང་ནང་གི་བདག་ཉིད་ཀྱི་ཡོངས་སུ་བཟུང་བ་མེད་པའི་ཕྱིར་བསྲུང་བ་དང་བྲལ་བ་ཡིན་ནོ། །མི་རྟག་པ་འདི་ཡང་ཞེན་པ་འདོར་བའི་རྒྱུ་ཡིན་པས་ཐམས་ཅད་དུ་བསྟེན་པར་བྱའོ་ཞེས་ཚིགས་སུ་བཅད་པ་གསུམ་གྱིས་གསུངས་པ་ནི། ལུས་ཀྱི་གཉུག་མའི་སར་སོང་ནས། །ཞེས་པ་ལ་སོགས་པ་ཡིན་ཏེ། ལུས་ཀྱི་གཉུག་མའི་ས་ནི་དུར་གྱིས་སྟེ། ལུས་ཀྱིས་ཡུན་རིང་པོར་གནས་ནས་ཀྱང་དེ་བཞིན་དུ་མཐར་གཏུགས་པའི་ཕྱིར་རོ། །གཞན་རུས་ཞེས་པ་ནི་སྔར་ཤི་བ་རྣམས་ཀྱི་རུས་པ་ཡིན་ལ་རུས་པ་ནི་རྣག་དང་ལྡན་པའོ། །དེའི་ཆོས་ཅན་ནི་དེའི་རང་བཞིན་ལ། བདག་གི་ལུས་ནི་འདི་ཉིད་ཀྱང༌། །ཞེས་པ་ལ་སོགས་པས་དེ་ཉིད་མགོ་སྙོམས་པར་སྟོན་པར་བྱེད་དེ། འདི་ལྟར་ཞེས་པ་ནི་རུས་པ་གཞན་ཞུ་བ་དང་རང་གི་ལུས་པོ་འདྲ་བ་ལ་བརྗོད་དོ། །རུས་པ་སྟེ་སྨད་པར་འགྱུར་བའོ། །ཇི་ལྟ་བུར་གྱུར་པ་ཞེ་ན། རང་གི་དྲིའི་ཞེས་པ་ལ་སོགས་པ་གསུངས་ཏེ། ཤིན་ཏུ་དྲི་བ་བས་ལྕེ་སྦྱང་ཟས་དེ་དོན་དུ་གཉེར་བས་ཀྱང་བཟོད་པར་དཀའ་བ་ཡིན་ནོ། །སྡུག་པ་དང་འགྲོགས་པ་ནི་དེས་ཀྱང་དགག་པར་སྟོན་པ་ནི་ལུས་འདི་གཅིག་པུ་ཞེས་པ་ལ་སོགས་པ་གསུངས་པ་ལ། ལུས་འདི་གཅིག་པུ་བྱུང་བ་ནི་གཅིག་པ་ཉིད་དུ་བརྟགས་པའི་ལུས་ཡིན་ལ། ལྷན་ཅིག་སྐྱེས་པ་ནི་ལུས་དང་ལྷན་ཅིག་སྐྱེས་པའི་རུས་དུ་མ་ཡིན་ལ། སོ་སོར་འགྱེས་པར་གྱུར་པ་ནི་བྲལ་བར་འགྱུར་ན་
ཞེས་པའི་དོན་ཏོ། མཛའ་བ་དང་གཞན་ལྟ་ཅི་ཞིག་སྨོས་པ་ནི་སོ་སོར་ཅིའི་ཕྱིར་མི་འགྱུར་ཞེས་པའི་དོན་ཏེ། གང་ཐམས་ཅད་དུ་བྲལ་བ་ཉིད་དུ་འགྱུར་རོ་ཞེས་པའོ། །དེ་ལྟར་གྱུར་ན་ཡང་བུ་དང་ཆུང་མ་ལ་སོགས་པ་རྟག་ཏུ་བདག་གི་བདེ་བ་དང་སྡུག་བསྔལ་གྱི་གྲོགས་སུ་གྱུར་པས་དེ། རྣམས་ལ་རྗེས་སུ་ཆགས་པར་བྱ་བར་འོས་པ་ཉིད་དོ་ཞེ་ན། སྐྱེ་བོ་གཅིག་པུ་ཞེས་པ་ལ་སོགས་པ་གསུངས་ཏེ། སྐྱེ་བ་དང་འཆི་བ་དག་གི་སྡུག་བསྔལ་གང་གིས་ཀྱང་ཐུན་མོང་དུ་བྱེད་པར་མི་འགྱུར་ཏེ། ཐམས་ཅད་ཀྱི་བར་སྐབས་སུ་རང་གི་ལས་ཀྱིས་བསྐྱེད་པའི་བདེ་བ་དང་སྡུག་བསྔལ་ཉིད་མྱོང་བར་འགྱུར་ཏེ། དེའི་ཕྱིར་འདི་མངོན་པར་ཞེན་པ་ཙམ་ཉིད་དོ། །སྡུག་བསྔལ་གྱི་སྐལ་པ་དེ་གང་གི་ཕྱིར་གཞན་བདག་ལས་ཐ་དད་པ་རྗེས་སུ་ཆགས་པ་བྱས་པ་དེ་ལ་སྡུག་བསྔལ་བ་དེའི་ཆ་སྟེ་ཤས་ལེན་པར་འགྱུར། དེའི་དེ་ཡང་དེ་ཉིད་ཀྱིས་མྱོང་བར་བྱ་བའི་ཕྱིར། དེའི་ཕྱིར་དགེ་བའི་ཕྱོགས་ཀྱི་གེགས་བྱེད་པའི་མཛའ་བསད་གོས་པ་ཅུང་ཟད་ཀྱང་ཡོད་པ་མ་ཡིན་ནོ། །དེ་ཁོ་ན་ཉིད་དུ་གང་ལ་ལའི་མཛའ་བ་ཅུང་ཟད་ཀྱང་གང་གིས་ཀྱང་ཡོད་པ་མ་ཡིན་ནོ་ཞེས་བསྟན་པའི་ཕྱིར། ལམ་དག་ཏུ་ནི་ཞེས་པ་ལ་སོགས་པ་གསུངས་ཏེ། ལམ་དུ་ཞུགས་པ་ནི་ཕྱོགས་འགའ་ཞིག་ཏུ་འགྲོ་བར་རྩོལ་བ་ཡིན་ལ། ཇི་ལྟར་གཞན་དུ་འགྲོ་བ་དང་ལྷན་ཅིག་ཏུ་གནས་གཅིག་སྟེ་འདུ་ཁང་ལ་སོགས་པའི་གནས་འཛིན་པར་འགྱུར་བ་དེ་བཞིན་དུ་འཁོར་བར་ཡང་ལས་ཀྱི་དབང་དུ་གྱུར་པས་འཁོར་བ་ན་སྐྱེ་བ་ནི་རིགས་གཅིག་པ་དང་སྣག་གི་གཉེན་མཚམས་ལ་སོགས་པ་རྣམས་དང་གནས་གཅིག་པ་སྟེ། སྐྱེ་བའི་གནས་ཡོངས་སུ་ལེན་ཏོ། །སླར་ཡང་དེ་སྤངས་ནས་འགའ་ཞིག་ཏུ་གཅིག་པུ་འགྲོ་བར་འགྱུར་ཏེ། དེར་སུ་ཞིག་ཀྱང་དེ་དང་ལྷན་ཅིག་ཏུ་འགྲོ་བ་མ་ཡིན་ནོ། །དེའི་ཕྱིར་གང་ལ་ལའི་དངོས་པོར་གྱུར་པའི་གྲོགས་ལ་ལ་ཡང་ཡོད་པ་མ་ཡིན་ནོ། །དེས་ན་དོན་མེད་སྟོང་ཕྲག་བསྐྱེད་བའི་རྒྱུ་རང་ཉིད་ཀྱིས་བརྟགས་ན་ས་སུ་ཞིག་གིས་གྲོགས་སུ་བྱེད་པར་འགྱུར་རོ་ཞེས་པའོ། །མཛའ་བའི་སྐྱོན་དེ་ལྟར་བརྗོད་ནས། ཡང་གཅིག་པུ་ཉིད་ཀྱི་ཡོན་ཏན་འདི་དག་ཡིན་ནོ་ཞེས་ཚིགས་སུ་བཅད་པ་གསུམ་གྱིས་
བསྟན་པའི་ཕྱིར། འཇིག་རྟེན་ཞེས་པ་ལ་སོགས་པ་གསུངས་ཏེ། ད་ནི་གསོན་པའི་མཐའ་མི་འདོད་ཀྱང་ངེས་པར་འཆི་བར་འགྱུར་བས་ཁྱིམ་ན་གནས་པའི་སྟོབས་ཀྱིས་དོར་བར་བྱ་བ་ཡིན་པ་དེ་བས་ན་དེ་ལྟར་རང་ཉིད་ཀྱིས་གསོན་པ་ཉིད་ན་དོར་བར་རིགས་སོ། །དེ་ནས་ཞེས་པ་ནི་ཁྱིམ་ནས་སོ། །མྱ་ངན་མེད་པར་ཞེས་པ་ནི་ཀྱི་ཧུད་ཅེས་པ་ལ་སོགས་པ་བརྗོད་པའི་ཚིག་གིས་ཡོངས་སུ་གདུངས་པ་འཇིག་རྟེན་གྱི་གཉེན་ལ་སོགས་པས་མ་བྱས་པ་དེ་སྲིད་ཉིད་དུའོ། །དེ་ལས་དང་པོ་ཉིད་དུ་ནགས་སུ་འགྲོ་བར་བྱའོ། །ཡང་འདིར་ཡོན་ཏན་གྱི་ཁྱད་པར་ཅི་ལྟ་བུ་ཡོད་ཅེ་ན། བཤེས་མེད་ཅེས་པ་ལ་སོགས་པ་གསུངས་ཏེ། རྗེས་སུ་ཆགས་པ་དང་འཁོན་པ་དང་བྲལ་བའི་ཕྱིར་རོ། །ཤི་ན་ཡང་མྱ་ངན་བྱེད་པ་མེད་པ་ནི་མྱ་ངན་གྱིས་བསྐྱེད་པའི་སྡུག་བསྔལ་བརྟེན་པར་མི་འགྱུར་བའོ། །ཅིའི་ཕྱིར་ཞེ་ན། འཇིག་རྟེན་ན་ནི་སྔར་ཉིད་ཤི། །གང་གི་ཚེ་ཁྱིམ་ནས་བྱུང་བ་དེ་ཉིད་ཀྱི་ཚེ་རང་གི་བཤེས་དང་གཉེན་ལ་སོགས་པའི་འཇིག་རྟེན་གྱི་ཡུལ་ནའོ། །ཡོན་ཏན་གཞན་འདི་ཡང་ཡོད་པར་དྲུང་ན་འཁོད་པར་ཞེས་བྱ་བ་ལ་སོགས་པ་གསུངས་ཏེ། དྲུང་ན་འཁོད་པ་ནི་ཉེ་བར་གནས་པའི་གཉེན་དང་རིགས་གཅིག་པ་ལ་སོགས་པ་རྣམས་ཡིན་ཏེ། ནད་པ་དེ་དང་བྲལ་བས་མྱ་ངན་ཏེ། མྱ་ངན་སྐྱེད་པ་དང་གནོད་པ་བྱེད་པ་ཡང་ཡོད་པ་མ་ཡིན་ཏེ། བདག་ཉིད་ཀྱི་ལུས་དང་ངག་དང་ཡིད་ལ་གདུང་བར་བྱེད་པ་མ་ཡིན་ནོ། །ཡང་ན་དེ་རྣམས་ཀྱི་མྱ་ངན་མཐོང་བས་འཆི་བ་པོའི་ཡིད་གདུང་བར་བྱེད་པ་མ་ཡིན་ནོ། །འདིའི་ཞེས་པ་ནི་སྐྱེ་བོ་དང་འགྲོགས་པ་དང་བྲལ་བའི་སྟེ། འཆི་བའི་དུས་ན་ཡོན་ཏན་འདི་འབའ་ཞིག་ནི་མ་ཡིན་ནོ། །འོན་ཀྱང་སངས་རྒྱས་རྗེས་དྲན་ལ་སོགས་པའང་ཡིན་ལ། སོགས་པའི་སྒྲས་ནི་དེ་ཁོ་ན་ཉིད་ཡིད་ལ་བྱེད་པའམ་ཆོས་རྗེས་སུ་དྲན་པ་ཡང་ངོ༌། །དེ་བས་ཞེས་པ་ལ་སོགས་པས་ནི་མཇུག་སྡུད་པར་བྱེད་དེ། གཅིག་པུ་ནི་ཆགས་པ་མེད་པར་རྒྱུ་བས་སོ། །ཉ་མས་དགའ་བ་ནི་བདེ་བ་སྐྱེད་པའི་རྒྱུ་ཡིན་པའི་ཕྱིར་ལ། ཚེགས་ཆུང་བ་ནི་སྡུག་བསྔལ་གྱི་གཉེན་པོ་ཡིན་པའི་ཕྱིར་ཏེ། བདེ་བ་སྐྱེད་པ་ནི་མངོན་པར་མཐོ་བ་དང་ངེས་པར་ལེགས་པ་ཐོབ་པའི་རྒྱུ་ཡིན་པའི་ཕྱིར་ལ་
གཡེང་བ་ཐམས་ཅད་ཞི་བར་བྱེད་པ་ནི་ལུས་དང་ངག་དང་ཡིད་ཀྱིས་ཉེས་པར་སྤྱོད་པའི་རྣམ་པར་གཡེང་བ་ཐམས་ཅད་ཞི་བར་བྱེད་པ་ཡིན་ཏེ། ཟློག་པར་བྱེད་པའི་རྒྱུ་ཡིན་པའི་ཕྱིར་རོ། །བདག་གིས་རྟག་ཏུ་བསྟེན་པར་བྱ། །ཞེས་པ་ནི་འདི་ཉིད་ལ་མངོན་པར་ཞེན་པས་ཞེན་པ་མེད་པར་བྱ་ཞེས་པའི་དོན་ཏོ། །དེ་ལྟར་སྐྱེ་བོ་དང་འགྲོགས་པ་སྤངས་པས་ལུས་རྣམ་པར་དབེན་པ་བཤད་ནས། སེམས་རྣམ་པར་དབེན་པ་བཤད་པའི་ཕྱིར། བསམ་པ་གཞན་ནི་ཞེས་པ་ལ་སོགས་པ་གསུངས་ཏེ། བསམ་པ་གཞན་ཀུན་ནི་མི་བདེན་པའི་རྣམ་པར་རྟོག་པའི་རང་བཞིན་ཏེ་དེ་རྣམས་བཏང་བ་ནི་དེ་དང་བྲལ་བའོ། །བདག་གི་སེམས་ནི་རྩེ་གཅིག་གིས་ཞེས་པ་ནི་རྩེ་གཅིག་པ་ནི་གཙོ་བོ་ཡིན་ཏེ། སེམས་དེ་ཡིད་ལ་བྱེད་པ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། དེ་ལྟ་བུའི་སེམས་གང་ལ་ཡོད་པ་དེ་ནི་དེ་སྐད་ཅེས་བརྗོད་པའམ། སེམས་རྩེ་གཅིག་པས་གཅིག་ཏུ་དབང་དུ་གྱུར་པར་དེའི་རྒྱུ་བ་ལ་ལྟ་བར་བརྩོན་པའམ། དམིགས་པ་ངེས་པ་ལ་འབྲེལ་བའི་ཡིད་གང་གི་ཡིན་པ་ཞེས་ཚིག་སྡུད་པ་ཡིན་ལ། དེ་ལྟ་བུར་གྱུར་པའི་ཡང་དག་པར་མཉམ་པར་གཞག་པ་ལ་སེམས་ཞི་བར་གནས་པས་གཞག་པར་བྱ་སྟེ། དེ་ལ་བརྩོན་པར་འགྱུར་པར་འགྲོ་བར་བྱ་ཞིང་དེ་ལ་རྩེ་གཅིག་པས་སྦྱར་བར་བྱའོ་ཞེས་པ་ནི་གདུལ་བར་བྱ་སྟེ་ཡང་དང་ཡང་དུ་དམིགས་པ་དེ་ཉིད་ལ་སྦྱོར་བའམ་ཕྱིའི་རྣམ་པར་གཡེང་བ་དགག་པའི་ཕྱིར་དེ་ལ་སེམས་མཉམ་པར་གཞག་པ་ནི་གཉེན་པོ་ཡིན་པའི་ཕྱིར་རོ། །འདོད་པའི་རྣམ་པར་རྟོག་པ་དགག་པར་འདོད་ནས། འཇིག་རྟེན་ཞེས་པ་ལ་སོགས་པ་གསུངས་ཏེ། སྲིད་པ་ལ་སྦྱོར་པ་མ་སྤངས་པས་འདོད་པར་བྱ་བ་ཉིད་ཀྱིས་ཞེན་པའི་ཕྱིར་འདོད་པ་ནི་གཟུགས་ལ་སོགས་པའི་ཡུལ་ལ་བརྗོད་དེ། ནིའི་སྒྲ་ནི་གང་གི་ཕྱིར་གྱི་དོན་ཡིན་ལ། དེ་བས་འདོད་ལ་དགའ་མི་བྱ། །ཞེས་པ་དང་འབྲེལ་ཏོ། །དེ་ཡང་བརྟེན་པ་ན་ཕུང་ ཁྲོལ་སྐྱེད་པ་ཡིན་ཏེ། མི་འདོད་པའི་འབྲས་བུ 
་སྟོབ་པའི་ཕྱིར་རོ། །འཇིག་རྟེན་འདི་ནི་སྐྱེ་བ་འདི་ཉིད་ཡིན་ལ། ཕ་རོལ་ནི་འཇིག་རྟེན་ཕ་རོལ་ཏེ་སྐྱེ་བ་ཕྱི་མ་ཞེས་པའི་དོན་ཏོ། །དེ་ཉིད་འདིར་བསད་དང་ཞེས་པ་ལ་སོགས་པས་
སྟོན་ཏེ། གཞན་གྱི་ཆུང་མ་འཕྲོག་པ་ལ་སོགས་པས་འཇིག་རྟེན་འདིར་འཆི་བ་ལ་སོགས་པའི་ཁྱད་པར་མངོན་སུམ་ཉིད་དུ་རྟོགས་ལ་འཇིག་རྟེན་ཕ་རོལ་དུ་ནི་ལུང་ལས་སོ། །དེ་ལ་གཞན་འདོད་པའི་འདོད་ཆགས་རྣམས་ལ་འདོད་པའི་ཆགས་པ་ནི་ཤིན་ཏུ་ཡང་དཀའ་བ་ཡིན་ཏེ། འདི་ལྟར་བུད་མེད་ལ་སྟེ་རེག་པའི་ཆགས་པའོ། །དེའི་ཕྱིར་དང་པོར་དེ་ཉིད་ལ་ཆགས་པ་བཟློག་པའི་ཕྱིར་སྨད་པར་བཞེད་ནས། གང་ཕྱིར་ཞེས་པ་ལ་སོགས་པ་གསུངས་ཏེ། གང་གི་ཕྱིར་ནི་གང་གཞན་གྱི་ཆུང་མ་ལ་སོགས་པའི་ཆེད་དུ་ཡིན་ལ། ཕོ་ཉ་དང་ཕོ་ཉ་མོ་ལ་དེའི་དོན་བསམ་པས་སྐྱེས་པ་དང་ཕྲིན་སྐུར་བར་བྱེད་པ་རྣམས་ཐལ་མོ་སྦྱར་ནས་ཁྱེད་ཀྱི་དྲིན་གྱིས་བདག་དང་དེ་ཇི་ལྟར་ཕྲད་པར་བྱེད་པ་དེ་བཞིན་དུ་མཛོད་ཅིག །དེ་ལྟར་ན་བདག་ཁྱེད་ཀྱིས་གསོན་པར་བྱས་པ་ཡིན་ནོ་ཞེས་གསོལ་བ་འདེབས་པ་སྔོན་དུ་སོང་བས་ལག་པ་ཐལ་མོ་སྦྱར་ཏེ་ལན་དུ་མར་གསོལ་བ་འདེབས་སོ། །དེའི་ལས་ཀྱི་རྣམ་པར་སྨིན་པ་ལས་འཇིག་རྟེན་ཕ་རོལ་དུ་གནོད་པའི་མི་དགེ་བའི་ལས་དེ་ལ་ཡང་མ་བལྟས་པ་དང༌། གྲགས་པ་མ་ཡིན་པ་འཇིག་རྟེན་འདི་ལ་གནོད་པར་བྱེད་པ་ཡིན་ལ་སྔོན་ཏེ་སྔ་མ་ཉིད་དུ་དེ་ལ་གསོལ་བ་འདེབས་པའི་དུས་ན་སྟེ། དེའི་གསོན་པའི་གནས་སྐབས་ན་ཞེས་པའི་དོན་ཏོ། །འཇིགས་པ་ལ་ཡང་བདག་ཞུགས་ཤིང༌། །ཞེས་ཏེ་དེ་ལ་ཞུགས་ཕན་འཆི་བ་ལ་སོགས་པའི་ཉེས་དམིགས་ཀྱིས་འཇིགས་པ་ཡང་དེ་ལྟར་བྱུང་བ་ལ་མ་འཛེམས་པས་བདག་ཉིད་ནི་རང་གི་ལུས་བཅུག་པ་སྟེ་སྦྱར་བའོ། །རྫས་ཀྱང་ཟད་པར་བྱས་པས་ཏེ་གོས་དང་རྒྱན་དང་བྱུག་པ་དང་ག་བུར་ལ་སོགས་པའི་བྱུག་པ་སྤྱད་པས་རྫས་ཀྱང་ཟད་པར་བྱེད་དོ། །གཉི་གར་ཡང་གང་གི་དོན་དུ་ཞེས་པ་དང༌། སྔོན་ཞེས་པ་དང་ཡང་འབྲེལ་ཏོ། །གང་ལ་ཞེས་པ་ནི་རུས་པ་ཞེས་པ་དང་སྦྱར་བར་བྱ་སྟེ། ཡོངས་སུ་འཁྱུད་པ་ནི་བརྟན་པར་འཁྱུད་པ་ཡིན་ལ། མཆོག་ཏུ་དགའ་བའི་རོ་ཉམས་སུ་མྱོང་བར་གྱུར་པ་ཡིན་ཏེ། དེ་ཉིད་ཀྱི་རུས་པ་ནི་ཤི་བ་དེའི་རུས་པ་ཡིན་ཏེ། དུར་ཁྲོད་ཀྱི་སར་ལྷུང་བ་རྣམས་ཡིན་ལ། གཞན་གྱི་དབང་དུ་གྱུར་པ་ནི་མ་ཡིན་ཏེ། བདག་གི་དབང་དུ་གྱུར་པ་ཡིན་ཞིང་བདག་མ་ཡིན་
པ་ནི་ཡོངས་སུ་མ་བཟུང་བ་དག་ཡིན་ཏེ། གཞན་གང་གིས་ཀྱང་བདག་གིར་མ་བྱས་པ་ཞེས་པའི་དོན་ཏོ། །དེའི་ཕྱིར་རབ་ཏུ་འདོད་ཅིང་ཡོངས་སུ་ཞེན་ནས་ཏེ། ཅིའི་ཕྱིར་ཇི་ལྟར་འདོད་པར་འཁྱུད་པའི་དོན་དུ་བརྟན་པར་འགྲོ་བར་མི་བྱེད་ཅེས་པའོ། །དགའ་བར་ཞེས་པ་ནི་སྔར་བཞིན་ནོ། །རང་གི་ཆུང་མ་ལ་ཞེན་པའི་དབང་དུ་བྱས་ནས། གང་ཞིག་དང་པོ་ཞེས་པ་ལ་སོགས་པ་གསུངས་ཏེ། ངོ་ཚའི་དབང་དུ་གྱུར་བས་ཆུང་མའི་བཞིན་འོག་ཏུ་ལྟ་བ་ན་ཇི་ལྟར་ཡང་འདིའི་བྱད་བཞིན་གསལ་བར་བལྟ་བར་བྱ་བར་འདོད་པས་འབད་པས་ཏེ་འདོད་པ་ཅན་གྱིས་ཞེས་བས་བསྐྱེད་པའི་སེམས་ཀྱིས་འདེགས་པ་ན་ཆུང་མ་ངོ་ཚའི་དབང་དུ་གྱུར་པ་དེ་ཡང་འོག་ཏུ་ལྟ་བར་བྱེད་དེ། ངོ་ཚས་ངེས་པར་འོག་ཏུ་ལྟའོ། །སྔོན་ནི་སྔར་དུར་ཁྲོད་དུ་འགྲོ་བ་ལས་སྔ་མར་ཡིན་ལ་དེ་ལྟ་ན་ཡང་བྱ་སླ་བས་མ་མཐོང་ངོ་ཞེས་མཐོང་ངམ་མ་མཐོང་ཡང་ཞེས་གསུངས་པ་ལ། བརྒྱ་ལ་ཅུང་ཟད་མཐོང་བ་ན་རྣམ་པ་ཐམས་ཅད་དུ་ལྟ་བར་འདོད་པ་ཅིའི་ཕྱིར་ལྡོག །སེང་བའི་རས་ཀྱིས་གདོང་གཡོགས་པ་སྟེ་ཡུལ་དབུས་ན་ཕལ་ཆེར་བཅོམ་བརླག་པའི་རིགས་རྣམས་ཀྱི་རིགས་ཀྱི་ཆུང་མ་བཞིན་དགབ་པའི་དོན་དུ་སེང་རས་ཀྱིས་གཡོགས་ཏེ། གང་གི་བྱད་དེས་གཡོགས་ཤིང་བསྒྲིབས་པའི་བྱད་དེས་ད་ནི་དུར་ཁྲོད་ཀྱིས་ན་བྱ་རྒོད་ཀྱིས་བསལ་བར་བྱས་པས་སོ། །གཡོགས་མ་ཐམས་ཅད་དང་བྲལ་བས་རྣམ་པར་བསལ་བར་བྱས་བ་ཇི་ལྟར་འདོད་པར་ཅིའི་ཕྱིར་ལྟ་ཞིང་རྟོག་པར་མི་བྱེད། ཅི་ལྟར་གྱུར་པས་ཤེ་ན། ཁྱོད་ཉོན་མོངས་པའི་གདོང་ལ་མི་བཟོད་གྱུར་པ་བཞིན་དུ་དེའི་གདོང་བལྟ་བའི་དོན་དུ་ཁྱོད་ཀྱིས་སྔོན་ཡོངས་སུ་ངལ་བར་བྱས་པ་དེ་ལ་ཁྱེད་རྣམས་ཀྱིས་བཟོད་པར་མི་ནུས་པ་བཞིན་དུ་དེ་ལ་ད་ལྟར་འཇིགས་པ་མཐོང་ནས་འཇིགས་པར་གྱུར་པ་ན་ཅིའི་ཕྱིར་འབྱེར་བར་བྱེད་ཅིང་འབྲོས་པར་བྱེད། འདོད་པ་ཅན་ལ་བརྒལ་ཞིང་བརྟགས་པས་བསྐྱོད་པ་གཞན་འདི་ཡང་བསྟན་པའི་ཕྱིར། གཞན་རྣམས་མིག་གིས་ཞེས་པ་ལ་སོགས་པ་གསུངས་ཏེ། སུ་ཡང་དེ་ལ་ལྟ་བར་མ་བྱེད་ཅིག་ཅེས་སྔར་གསུངས་ནས་ཡོད་པ་དེ། ཇི་སྲིད་དུ་ད་ནི་བྱ་རྒོད་ལ་སོགས་པས་ཟ་བ་ལ་
ཐུག་པ་སྟེ། ཀྱེ་ཕྲག་དོག་ཅན་ཅིའི་ཕྱིར་སྲུང་བར་མི་བྱེད་དེ་སྦེད་པར་མི་བྱེད། གཞན་ཡང་ད་ནི་ཤིན་ཏུ་ཡང་བསྲུང་བར་འོས་སོ་ཞེས། ཤའི་ཕུང་པོ་ཞེས་པ་ལ་སོགས་པ་གསུངས་ཏེ། བྱ་རྒོད་ལ་སོགས་པ་གང་རྣམས་ཀྱི་ཟས་ཏེ། ཁ་ཟས་ཤའི་ཕུང་པོའི་གཟུགས་ལ་ཁྱོད་ཀྱིས་མེ་ཏོག་ལ་སོགས་པ་རྣམས་ཀྱིས་མཆོད་པར་བྱེད། བྱ་རྒོད་དང་གཞན་ཅེ་སྤྱང་ལ་སོགས་པ་རྣམས་ཀྱིས་ཤའི་ཕུང་པོ་སྟེ་ཤའི་ཚོགས་ཟ་བ་འཇིགས་སུ་རུང་བ་མཐོང་བ་ན་ཅིའི་ཕྱིར་ཕྲག་དོག་ཅན་སྲུང་བར་མི་བྱེད་ཅེས་སྦྱར་བར་བྱ་བ་དང༌། ད་ལྟ་ཅིའི་ཕྱིར་འབྱེར་བར་མི་བྱེད་ཅེས་པ་བར་དུ་ཆོད་པ་དང་ཡང་འབྲེལ་ཏོ། །འདི་ཡང་ཁྱེད་རྣམས་ཀྱིས་ཅིའི་ཕྱིར་ལྟ་བར་མི་བྱེད་ཅེས་རུས་གོང་ཞེས་པ་ལ་སོགས་པ་གསུངས་ཏེ། མི་འགུལ་ཡང་སྟེ་ཤིང་དང་བོང་བ་ལ་སོགས་པ་དང་འདྲ་བའི་ཕྱིར་རོ། །ཁྱོད་སྐྲག་ན་ཞེས་ཟུར་གྱིས་འདྲི་བར་བྱེད་དེ། རུས་གོང་ལས་ཏེ་རུས་པའི་སྒལ་ཚིགས་ལས་སོ། །དེ་ལྟར་ཞེས་པ་ནི་འདི་ལྟར་འཇིགས་པའི་གཟུགས་མཐོང་བ་ལས་ཏེ་བལྟས་པ་ལས་སོ། །ཡང་ན་དེ་ལྟར་ཞེས་པ་ནི་སྐྲག་པ་སྟེ་གང་རིང་བ་ལས་ཀྱང་ཤིན་ཏུ་རིང་བར་བྲོས་པར་བྱེད་ཅེས་པ་དང་སྦྱར་རོ། །གང་གི་ཕྱིར་དེ་ལྟར་གཡོ་བ་ལས་ཅིའི་ཕྱིར་འཇིགས་ཤེ་ན། རོ་ལངས་བཞིན་དུ་ཞེས་གསུངས་ཏེ། གསོན་པར་གྱུར་པ་འབྱུང་པོའི་གདོན་གྱིས་བསྐྱོད་པར་བྱས་པ་ན་བསྐྱོད་པ་ལས་ཅིས་ན་འཇིགས་པར་མི་འགྱུར་ཏེ། དེའི་ཕྱིར་ཤིན་ཏུ་འཇིགས་པར་རིགས་སོ་ཞེས་པའི་དོན་ཏོ། །རེ་ཞིག་དེ་ལྟར་སྨད་པར་བྱ་བ་ཉིད་དུ་བསྟན་ནས། ཡང་གཞན་དུ་བསྟན་པའི་ཕྱིར། ཟས་ནི་གཅིག་པུ་ཞེས་པ་ལ་སོགས་པ་གསུངས་ཏེ། ཤེས་པ་གཏི་མུག་གིས་བསྒྲིབས་པ་འབའ་ཞིག་དུག་གིས་མྱོས་པར་འགྱུར་བའི་སེམས་འདོད་པ་ཅན་གྱི་དེ་འདོད་པར་བྱ་བ་ཉིད་ཡིན་པས་དེ་བཞིན་སྦྲང་རྩིའི་བཏུང་བ་བཞིན་དུ་རིགས་ནས་དེའི་གདོང་འབའ་ཞིག་གི་མཆིལ་མའི་བཏུང་བ་འདོད་པ་ལ་བརྒལ་ཞིང་རྟག་པ་མཚུངས་པ་ཡིན་ཏེ། གཉི་གའི་ཡང་རྒྱུ་གཅིག་པུ་བཟའ་བ་དང་བཏུང་བའི་རང་བཞིན་ལས་བྱུང་བ་དེ་ལ་དེ་དག་གི་ནང་ནས་ཁྱེད་མི་གཙང་བ་བཤད་པ་ལ་མི་
དགའ་ཞིང༌། །ཁ་ཆུ་བད་ཀན་གྱི་བཏུང་བ་ལ་ཅིའི་ཕྱིར་དགའ་སྟེ་རྣམ་པ་གང་གིས་གཞན་དུ་མ་ཡིན་པར་དེར་དགའ་བར་འགྱུར་ཏེ། གཉི་ག་ལ་ཡང་རིགས་སོ་ཞེས་དགོངས་སོ། །འོན་ཏེ་དེ་ལྟར་ན་གལ་ཏེ་ཡང་གཉི་ག་ལ་ཡང་རྒྱུ་ཐ་དད་པ་མ་ཡིན་པ་དེ་ལྟར་ན་ཡང་དེ་ལ་ཤིན་ཏུ་དྲི་མི་ཞིམ་པས་ཕྱིར་ཕྱོགས་ཤིང་གཞན་ལ་ནི་དེ་མེད་པས་དགའ་བ་ཡིན་ནོ་ཞེ་ན། འདི་དེ་ལྟར་ན་ཡང་ལེགས་པར་བརྗོད་པ་མ་ཡིན་ནོ་ཞེས་བསྟན་པའི་ཕྱིར། ཤིང་བ་ལ་ཞེས་པ་ལ་སོགས་པ་གསུངས་ཏེ། རས་ལ་སོགས་པའི་བལ་གྱིས་ཡོངས་སུ་བཀང་བའི་ནང་ཚངས་ཅན་ལ་སོགས་པའི་སྔས་རེག་ན་འཇམ་པ་ལ་འདོད་ཅིང་དགའ་བར་མི་བྱེད་དེ་སྡུག་པར་མི་ཕྱེད་པར་མི་གཙང་བ་ལས་བྱུང་བའི་དྲི་ང་བ་འཛག་པ་མ་ཡིན་ནོ་ཞེས་བྱས་ནས་མི་གཙང་བས་ཡོངས་སུ་གང་བའི་བུད་མེད་ཀྱི་ལུས་པོ་ཉིད་ལ་ཅིའི་ཕྱིར་དགའ་བར་བྱེད། དེ་ལྟར་ནའང་ཅིའི་ཕྱིར་འདོད་ལྡན་ཏེ་འདོད་པའི་བདེ་བ་འདོད་པས་གང་ལས་མི་གཙང་བ་ལ་རྨོངས་ཏེ། འདི་ནི་གཏན་ཚིགས་ཀྱི་ཚིག་ཡིན་ལ། མི་གཙང་བ་སྟེ་ཡུལ་མི་གཙང་བའམ་མི་གཙང་བས་རྨོངས་པའོ། །མི་གཙང་བ་ལ་སྟེ། གཙང་བ་ལས་བཟློག་པ་དེ་ཉིད་ལས་ཤིན་ཏུ་ཡང་མངོན་པར་དགའ་བར་ཉམས་སུ་མྱོང་བར་འགྱུར། དེ་ལྟ་བས་ན་གལ་ཏེ་རང་མི་གཙང་བ་ཉིད་བུད་མེད་ཀྱི་ལུས་མི་གཙང་བ་ཉིད་དང་ཐུན་མོང་པ་དེ་ལྟར་ན་ཡང་དེ་གཅིག་ནི་བསྒྲིབས་པ་ཡིན་ལ། གཞན་ནི་མ་གཡོགས་པ་ཡིན་ཏེ། དེའི་ཕྱིར་གཅིག་ཡོངས་སུ་སྤངས་པས་འདི་ལ་ཆགས་པར་བྱེད་དོ་ཞེ་ན། གང་ལ་གཡོགས་ན་ཞེས་པ་ལ་སོགས་པ་གསུངས་ཏེ། མི་གཙང་བའི་རང་བཞིན་གཡོགས་པ་གང་ལ་ཅི་མཐོང་ན་ཡང་འདི་ལྟ་བུ་མངོན་པར་ཞེན་པ་སྟེ་མ་གཡོགས་བར་མཐོང་བར་གྱུར་ན་ཤིན་ཏུ་འདོད་པ་སྐྱེ་བར་རིགས་ཏེ། དེ་ལྟ་བུར་གྱུར་པ་ལ་ཅིའི་ཕྱིར་འདོད་པར་མི་བྱེད། འོན་ཏེ་དེ་ལྟ་བུར་གྱུར་པ་ལ་རྣམ་པ་ཐམས་ཅད་དུ་ཅུང་ཟད་ཀྱང་དགོས་པ་མེད་པས་ཕྱིར་ཕྱོགས་པ་ཉིད་ཡིན་ནོ་ཞེ་ན། གང་དེ་ལྟར་ན་ཅིའི་ཕྱིར་ན་རྒྱུ་ཅི་གཡོགས་པ་བྱེ་བྲག་ཏུ་ཚོལ་ཏེ། དེ་གཞན་སྤངས་ནས་དེ་ཉིད་དང་ཕྲད་པ་ལ་འབད་པར་བྱེད། གཞན་ཡང་ཁྱོད་ལ་འདི་འདྲི་བར་བྱ་སྟེ། ཅི་ཁྱོད་མི་གཙང་བ་ལ་
ཆགས་པ་དང་བྲལ་བའམ་མ་ཡིན་ཞེས་སོ། །འདི་རྣམ་པར་རྟོག་པ་དང་པོའི་དབང་དུ་བྱས་ཏེ། གལ་ཏེ་མི་གཙང་ཞེས་པ་ལ་སོགས་པ་གསུངས་ཏེ། གལ་ཏེ་ཁྱོད་མི་གཙང་བ་ལ་མ་ཆགས་ཤིང་རྣམ་པ་ཐམས་ཅད་དུ་ཞེན་པ་མེད་ན་འོན་ཅིའི་ཕྱིར་གཞན་ཐ་དད་པ་པང་དུ་འཁྱུད། འདི་ཅི་ལྟ་བུ་ཞེ་ན། ཤའི་འདམ་ཞེས་གསུངས་ཏེ། ཤ་ཉིད་འདམ་དང་འདྲ་སྟེ་ཞལ་ཞལ་དུ་ཆོས་མཐུན་པའི་ཕྱིར་ལ། དེས་ཞལ་ཞལ་བྱས་པ་ནི་ཉེ་བར་བསྐུས་པའོ། །ཅིའི་ཕྱིར་དེ་ལྟར་གྱུར་པ་ཡིན་ཞེ་ན། རུས་གཟེབ་རྒྱུས་པས་སྤྲེལ་བ་ལ། །ཞེས་གསུངས་ཏེ། རྒྱུས་པས་སྤྲེལ་བ་ནི་བཅིངས་ཤིང་དབང་དུ་བྱས་པ་ཡིན་ལ། རུས་གཟེབ་ནི་རུས་པ་མཐའ་དག་ཡིན་ཏེ། གཞན་དུ་ན་དུམ་བུར་འཐོར་པར་འགྱུར་རོ། །དེ་ལྟར་འདོད་ཆགས་དང་བྲལ་བའི་ཡུལ་དུ་སྟོན་པར་བྱེད་དོ། །འོན་ཏེ་མི་གཙང་བ་ལ་ཆགས་པ་ཡིན་ནོ་ཞེས་རྣམ་པར་རྟོག་པ་གཉིས་པ་ཁས་ལེན་ན། དེ་ལ་ཁྱོད་ཉིད་ཅེས་པ་ལ་སོགས་པ་གསུངས་སོ། །ཡང་ན་གཞན་དུ་སྦྱར་བར་བྱ་སྟེ། གང་བརྗོད་པ་པགས་པ་ལ་སོགས་པ་གཞན་གྱིས་གཡོགས་པ་ལ་ཆགས་པར་གྱུར་ན་མ་གཡོགས་པ་དེ་ལ་ཡང་གལ་ཏེ་ཞེས་པ་ལ་སོགས་པ་གསུངས་ཏེ། གལ་ཏེ་པགས་པ་ལ་སོགས་པས་གཡོགས་པའི་ཕྱིར་རྒྱུ་དེས་ཁྱོད་མི་གཙང་བ་ལ་ཆགས་པར་གྱུར་ན་དེའི་ཚེ་ཅིའི་ཕྱིར་གཞན་ཏེ་གཞན་གྱི་རུས་པ་ལ་འཁྱུད་པར་བྱེད། གཞན་ནི་སྔར་བཞིན་དུའོ། །འདི་ལ་ཡང་ཅིའི་ཕྱིར་མི་རིགས་ཞེས། ཁྱོད་ཉིད་ཅེས་པ་ལ་སོགས་པ་གསུངས་ཏེ། རང་ཉིད་དེ་བདག་ཉིད་མི་གཙང་བ་ཤིན་ཏུ་མང་བ་ནི་མཆིལ་མ་དང་སྣབས་དང་གླང་རྒྱས་དང་གཅི་བ་དང་བཤད་པ་རྣམས་ཁྱེད་ལ་ཡོད་པ་ཡིན་ལ། མི་གཙང་བ་དེ་ཉིད་ཀྱིས་དགའ་བར་གྱིས་ཤིག །དེའི་ཕྱིར་མི་གཙང་བའི་རྐྱལ་པ་སྟེ་བཤད་པ་འབྱུང་བ་ཡིན་ལ། གཞན་ནི་ཐ་དད་པ་བུད་མེད་ཀྱི་ལུས་ཀྱི་རང་བཞིན་མི་གཙང་ཞིང་བཙོག་པའི་བཤད་པ་ཟ་བའི་རང་ཚུལ་ཅན་ཡིན་ལ། རྣམ་དྲན་བྱེད་ན་ཡིད་ལ་བསམ་པར་བྱེད་བའོ། །བདག་གི་ཤ་འདི་ལ་ཞེས་པ་ལ་སོགས་པས་ཡང་སྤང་བའི་ཆེད་དུ་གཞན་གསུངས་པ་ཡིན་ལ། གང་གི་ཤ་ལ་དགའ་བ་འདི་ནི་ཤ་ལ་དགའ་བ་སྟེ།
བདག་ཡིན་ལ་འདི་ནི་རུས་གོང་གིའོ། །ཡང་ན་ཤ་ལ་དགའ་བ་ནི་ཤ་ལ་དགའ་བ་ཡིན་ལ་སྔར་བཞིན་དུ་བདག་ནི་འདི་ལའོ་ཞེས་ཏེ་བདག་འདིའི་ཤ་ལ་དགའ་བ་ཡིན་ནོ་ཞེས་པའི་ཐ་ཚིག་གོ །དེ་ལྟར་ན་དེ་ལ་ཞེན་པའི་ཕྱིར་རམ་སླར་ཕན་འདོགས་པའི་བློས་རེག་དང་ལྟ་བར་འདོད་པ་སྟེ། མཐོང་བ་དང་རེག་པ་ལ་དགའ་བའོ། །འདིར་གསུངས་པ་སེམས་མེད་པ་ནི་སེམས་ཀྱིས་སྟོང་པ་ཡིན་ཏེ་འཇིམ་གོང་བཞིན་དུ་རང་བཞིན་གྱིས་ཐ་མལ་པའོ། །ཡང་སེམས་དང་ལྡན་པས་སེམས་སོ་ཞེས་ཇི་ལྟར་གཞན་གྱིས་བརྗོད་པ་དེ་ལྟར་ཤ་ལ་ཁྱོད་ནི་ཞེས་པ་ལྟར་རང་བཞིན་མ་ཡིན་པ་ནི་མ་ཡིན་ནོ། །འདོད་པ་ཅན་ཁྱོད་དེ་ཅིས་མི་འདོད། དེ་འདོད་པ་ན་འཇིམ་པའི་དུམ་བུ་ལ་ཡང་འགྱུར་ལ་དེ་བཞིན་དུ་ཡང་ཁྱོད་ཀྱང་སེམས་དང་བྲལ་བར་འགྱུར་རོ། །དེ་ལ་སེམས་ཀྱི་རང་བཞིན་གྱི་སེམས་ཡོད་པ་དེ་ལ་ངེས་འདོད་པ་ཡིན་ནོ་ཞེས་པ་ནི། གལ་ཏེ་སེམས་ནི་ཞེས་པ་ལ་སོགས་པ་གསུངས་ཏེ། གལ་ཏེ་སེམས་དེ་སེམས་ཀྱི་རང་བཞིན་འདོད་ན་དེ་གཟུགས་མེད་པའི་ཕྱིར་བལྟ་བར་མི་ནུས་ལ། ལུས་མེད་པའི་ཕྱིར་རེག་བར་མི་ནུས་ཏེ། གང་ཤ་དང་རུས་པའི་རང་བཞིན་གྱི་ལུས་རེག་པ་དང་བལྟ་བར་ནུས་ཤིང་གྲུབ་པ་ལ་དེ་དང་ལྡན་པའི་ཤེས་པ་མེད་པ་ཡིན་ཏེ། སེམས་དང་བྲལ་བའི་ཕྱིར་རོ། །དེའི་ཕྱིར་ཅི་ཞིག་ཅེས་ཏེ། སེམས་མེད་པ་དེ་ལ་འཁྱུད་པར་བྱེད་ཅིང་སྦྱོར་བར་བྱེད། རྨོངས་པ་ཞེས་པ་ནི་འབྲས་བུ་མེད་པ་ཉིད་དུ་འཁྱུད་པར་རིགས་པ་མ་ཡིན་ནོ་ཞེས་པའི་ཐ་ཚིག་སྟེ། གཞན་དུ་ན་བོང་བ་ལ་སོགས་པ་ལ་ཡང་འཁྱུད་པར་ཐལ་ལོ། །གཞན་ཡང་འདི་ཡང་ཤིན་ཏུ་སྨད་པ་ཡིན་ནོ་ཞེས་བསྟན་པའི་ཕྱིར་མི་གཙང་ཞེས་པ་ལ་སོགས་པ་གསུངས་ཏེ། གཞན་གྱི་ལུས་ལ་མི་གཙང་བའི་རང་བཞིན་དུ་གང་མི་རྟོགས་པ་དེ་ལ་ངོ་མཚར་ཅུང་ཟད་ཀྱང་མེད་པར་རིགས་པ་ཉིད་དེ། གཞན་གྱི་རྒྱུད་ཀྱི་རིགས་པ་དེ་བདག་ཉིད་ལ་བསྐལ་པ་ཡིན་པའི་ཕྱིར་རོ། །འདི་ནི་ཤིན་ཏུ་ཡང་ངོ་མཚར་བའི་གནས་ཡིན་ཏེ། རང་སྟེ་བདག་ཉིད་ལ་མི་གཙང་བའི་རང་བཞིན་གང་ཡིན་པའི་ལུས་ཁྱོད་ཀྱིས་རྟོགས་པར་མ་གྱུར་ཏེ་མ་གོ་བའོ། །ད་ནི་བསྟན་བཅོས་མཛད་པ་དེ་ལ་སྐྱོ་བར་མཛད་པ། སྤྲིན་བྲལ་ཞེས་པ་ལ་སོགས་པ་གསུངས་ཏེ། སྤྲིན་བྲལ་ཉི་ཟེར་གྱིས་བྱེ་བ་
ནི་གསལ་བར་བྱས་པ་སྟེ་དེ་ལྟ་བུའི་པདྨ་གཞོན་ནུ་སྟེ་མངོན་པར་གསར་བའི་མཚོ་སྐྱེས་བོར་ནས་མི་གཙང་ཞེན་པའི་སེམས་ཀྱིས་མི་གཙང་བའི་གཟེབ་ལ་སུ་ཞིག་དགའ་སྟེ་རིགས་པ་མ་ཡིན་ནོ་ཞེས་པའི་ཐ་ཚིག་གོ །གཞན་ཡང་ཞེས་པ་ལ་སོགས་པ་གསུངས་པ་ལ། སོགས་པའི་སྒྲས་ནི་གོས་པ་ལ་སོགས་པ་ཡིན་ལ། མི་གཙང་གིས་གོས་པའི་ཕྱིར་གལ་ཏེ་རེག་པར་མི་འདོད་ན། གང་ལས་ཏེ་ལུས་ལས་ཡིན་ལ་དེ་བྱུང་བ་ནི་མི་གཙང་བ་འཐོན་པ་སྟེ་ལུས་དེ་ལ་ཅི་ལྟར་ཁྱོད་རེག་པར་འདོད། དེ་ལྟར་གྱུར་ན་ཡང་བདག་ལ་བརྒལ་ཞིང་བརྟག་པ་འདི་རིགས་པའི་ངོ་བོ་མ་ཡིན་ཏེ། གང་གི་ཕྱིར་མི་གཙང་བ་གཅིག་ལ་ཡང་མངོན་པར་ཞེན་པ་མེད་དོ་ཞེས་གལ་ཏེ་ཞེས་པ་ལ་སོགས་པ་གསུངས་པ་ལ། མི་གཙང་བའི་ཞིང་ནི་མའི་མངལ་ཡིན་ཏེ་མི་གཙང་བ་དུ་མའི་གནས་ཡིན་པའི་ཕྱིར་རོ། །དེར་བྱུང་བ་སྟེ་དེར་སྐྱེས་པའོ། །དེའི་ས་བོན་ནི་མི་གཙང་བ་དེ་ཉིད་དེ་ཕ་དང་མའི་ཁུ་བ་དང་ཁྲག་གི་རང་བཞིན་གང་གི་ས་བོན་ཡིན་པ་དེ་ལ་དེ་སྐད་ཅེས་བརྗོད་དོ། །དེས་བསྐྱེད་པ་ཞེས་པ་ནི་མས་འཐུངས་པ་དང་ཟོས་པ་སྐྱུགས་པ་དང་འདྲ་བའི་མི་གཙང་བའི་རོ་དེས་འཕེལ་བར་བྱས་པ་སྟེ། མངལ་ན་གནས་པ་བསྐྱེད་པའོ། །ཕྱིར་བྱུང་བ་ན་ཡང་རང་གིས་ཟས་ཟོས་པ་དང་འཐུངས་པའི་ཡོངས་སུ་སྨིན་པའི་མི་གཙང་བའི་རོས་ཀྱང་བསྐྱེད། གཞན་ཁྱོད་ཅིའི་ཕྱིར་བར་དུ་འཁྱུད་ཅེས་པ་དང་འབྲེལ་ཏེ་གཞན་གྱི་བུད་མེད་ཀྱི་ལུས་སོ། །དེ་ལྟར་ན་ཁྱེད་ལ་བརྒལ་ཞིང་བརྟག་པ་ཡོད་དོ། །འོན་ཏེ་བདག་མི་གཙང་པ་ལ་ཆགས་པ་མེད་དོ་ཞེས་པའི་ཕྱོགས་ཁས་ལེན་ན་དེའི་ཚེ་ཡང་བརྒལ་ཞིང་བརྟག་པ་མཚུངས་པ་ཉིད་དོ་ཞེས་མི་གཙང་ལས་བྱུང་ཞེས་པ་ལ་སོགས་པ་གསུངས་ཏེ། བཤད་པ་ལ་སོགས་པ་མི་གཙང་བའི་རྫས་ལས་བྱུང་བའི་སྲོག་ཆགས་ཀྱི་རིགས་སྲིན་བུ་ཡང་མི་འདོད་དེ་ཞེན་པར་མི་བྱེད་པར་ཡང་མའི་ལུས་ཀྱི་ཚོགས་མི་གཙང་བ་ཤིན་ཏུ་མང་བའི་རང་བཞིན་མི་གཙང་བ་ལས་བྱུང་བ་ལས་བྱུང་བ་ལ་ཡང་སྔར་གྱི་རིམ་པ་བཞིན་དུ་འདོད་པར་བྱེད། འོན་ཏེ་འདི་ལྟར་ཡང་འགྱུར་ཏེ་འདིར་ལན་ཅི་ཞིག་འདེབས་པར་བྱེད། གང་གི་ཕྱིར་བདག་ཀྱང་དེའི་ལུས་དེ་ལྟ་བུ་ཡིན་ལ།
དེས་ན་མི་གཙང་བ་མི་གཙང་བ་དང་ཕྲད་པ་ལ་ཉེས་པ་ཅི་ཡོད་དེ་གནོད་སྦྱིན་ཇི་ལྟ་བར་གཏོར་མ་ལ་དེ་བཞིན་ནོ་ཞེ་ན། འདིར་ཁྱོད་ནི་ཞེས་པ་ལ་སོགས་པ་གསུངས་ཏེ། འདིར་ནི་རྨོངས་པ་ཆེན་པོའི་མཐུས་བདག་ཉིད་ལ་ཡོད་པའི་མི་གཙང་བའི་རང་བཞིན་གང་ལ་རེ་ཞིག་སྨད་པར་མི་བྱེད་ཅིང༌། སླར་ཡང་གཞན་གྱི་མི་གཙང་བའི་རྐྱལ་པ་ལ་འདོད་པར་བྱེད་དེ། འདི་ནི་དོན་དང་བྲལ་བ་ཤིན་ཏུ་སྨད་པའི་གནས་ཡིན་ནོ། །མི་གཙང་རྐྱལ་པ་ཞེས་སྤྱོ་བའི་ཚིག་གིས་དེ་ཉིད་ལ་འབོད་པ་ཡིན་ནོ། །ད་ནི་མི་གཙང་བའི་རང་བཞིན་མངོན་སུམ་དུ་བྱས་པར་བསྟན་པའི་ཕྱིར། ག་བུར་ཞེས་པ་ལ་སོགས་པ་གསུངས་ཏེ། གཙང་ཞིང་གཙང་སྦྲའི་དངོས་པོ་འདི་ལྟ་བུ་གང་ཕྱོགས་གཅིག་དང་ཕྲད་པ་ལས་བྱུང་བའི་མི་གཙང་བའི་རང་བཞིན་དུ་གྱུར་པའི་དངོས་པོ་དེ་རེ་ཞིག་གཞག་སྟེ་དེ་དང་ཕྲད་པ་ལས་གཞི་གཙང་བའི་རང་བཞིན་ཡང་མི་གཙང་བ་ཉིད་དུ་འགྱུར་རོ། །དེ་ལྟར་རེ་ཞིག་ཐ་སྙད་འདི་མངོན་སུམ་གྱིས་གྲུབ་པ་དེ་ལྟ་ན་ཡང་གལ་ཏེ་མི་རྟོག་ཅིང་ཡིད་མི་ཆེས་ན་སྟེ་མཐོང་ཡང་དད་པར་མ་གྱུར་ན་ཞེས་པའི་དོན་ཏོ། །དེའི་ཚེ་དུར་ཁྲོད་དུ་སོ་སོར་གནས་པ་ན་བལྟ་བར་གྱིས་ཤིག །ཇི་ལྟ་བུར་གྱུར་པ་ལ་ཞེ་ན། འཇིགས་པ་སྟེ། རྣམ་པར་ཟོས་པ་དང༌། རྣམ་པར་མྱགས་པ་དང། རྣམ་པར་རྣགས་པ་ལ་སོགས་པའི་རང་བཞིན་གྱིས་འཇིགས་སུ་རུང་བའམ་འཇིགས་པར་བྱེད་པའོ། །གཞན་ཡང་ཞེས་པ་ནི་འདི་བས་ལྷག་པའོ། །གཞན་ཡང་རང་བཞིན་གྱིས་མི་སྡུག་པ་ཐམས་ཅད་དུ་སྦྱར་ཏེ་ལུས་པོ་འདི་ཉིད་མི་དགའ་བའི་གནས་སུ་སྦྱར་རོ་ཞེས་བསྟན་པར་འདོད་ནས། གང་ཞིག་པགས་པའི་ཁ་ཕྱེ་ཞེས་པ་ལ་སོགས་པ་གསུངས་ཏེ། ཁ་ཕྱེ་བ་ནི་རྣམ་པར་བྲལ་བ་སྟེ། གང་ལས་ཞེས་པ་ནི་ལུས་ལས་སོ། །དེའི་ཚེ་འཇིགས་པ་ཆེན་པོ་སྐྱེ་བར་འགྱུར་རོ། །ཇི་ལྟ་བུར་གྱུར་པ་ཞེ་ན། འདི་ལྟ་བུར་གྱུར་པའི་རང་བཞིན་ཤེས་ཀྱང་ཇི་ལྟར་དེ་ཉིད་ཀྱི་གནས་ལ་འཇིགས་པའི་གནས་སུ་ནམ་ཞིག་ན་ཡང་མ་རྟོགས་པར་ཕྱིར་ཞིང་དགའ་ཞིང་མངོན་པར་ཞེན་པ་སྐྱེ་བར་འགྱུར་ཏེ། དེ་ལྟར་གྱུར་ན་ཡང་མི་གཙང་བའི་རང་བཞིན་གྱི་ལུས་སུ་གལ་ཏེ་མངོན་སུམ་དུ་གྱུར་པ་དེ་ལྟ་ན་ཡང༌། ཙནྡན་ལ་སོགས་པ་དང་ཤུག་པར་ལུས་པོ་
ལ་བསྐུས་པས་འདི་འདོད་པར་བྱ་བ་ཉིད་དུ་འགྱུར་རོ་ཞེ་ན། ལུས་ཡང་བསྐུས་པ་ཞེས་པ་ལ་སོགས་པ་གསུངས་ཏེ། ལུས་ལ་བསྐུས་པ་ཡང་ཙནྡན་ལ་སོགས་པ་ལས་བྱུང་བའི་དྲི་འདིས་གང་ལ་བསྒོས་པའི་ལུས་ལ་འདོད་པར་བྱ་བའི་བློ་སྐྱེ་བར་འགྱུར་ཏེ། ཙནྡན་འབའ་ཞིག་ལས་ཡིན་ལ། གཞན་མིན་ན་ཞེས་པ་ནི་ལུས་ཀྱི་མ་ཡིན་པའོ། །དེའི་ཕྱིར་གཞན་གྱི་དྲི་ཙནྡན་ལ་སོགས་པ་ལས་བྱུང་བས་འདིར་དྲི་ཞིམ་པར་མི་འགྱུར་བ་གཞན་དག་ལ་ཅིའི་ཕྱིར་མངོན་པར་དགའ་བར་བྱེད། གཞན་ཡང་ཙནྡན་ལ་སོགས་པའི་ལེགས་པར་སྦྱར་བས་ཀྱང་བདག་ཉིད་ལ་གནོད་པ་འབའ་ཞིག་ཏུ་འགྱུར་ཏེ། ཕན་པའི་ཆེད་དུ་ནི་མ་ཡིན་ནོ་ཞེས་བསྟན་པའི་ཕྱིར། གལ་ཏེ་རང་བཞིན་ཞེས་པ་ལ་སོགས་པ་གསུངས་ཏེ། རང་བཞིན་གྱིས་དྲིང་བ་ནི་ལྷན་ཅིག་སྐྱེས་པའི་རུལ་བའི་རང་བཞིན་གྱི་ཕྱིར་རོ། །འདིར་ཞེས་པ་ནི་ལུས་ལའོ། །གལ་ཏེ་འདོད་ཆགས་མ་སྐྱེས་ན་དེའི་ཚེ་ལེགས་མིན་ནམ་སྟེ་ལེགས་པ་ཉིད་དུ་འགྱུར་རོ། །འདི་ལྟ་བུའི་ཡོན་ཏན་ཡོད་བཞིན་དུ་དོན་མེད་པ་ལ་སྲེད་པའི་འཇིག་རྟེན་རྒྱུ་ཅིས་ལུས་དེ་ལ་དྲིས་སྐུད་པར་བྱེད་དེ་རྣམ་པ་ཐམས་ཅད་དུ་དེ་རིགས་པ་མ་ཡིན་ནོ་ཞེས་པའི་དོན་ཏོ། །སྟོང་ཕྲག་དུ་མས་མངོན་པར་འདུ་བྱས་ཀྱང་རང་བཞིན་གཞན་དུ་འགྱུར་བ་མ་ཡིན་ནོ་ཞེས་འོན་ཏེ་དྲི་ཞིམ་ཞེས་པ་ལ་སོགས་པ་གསུངས་ཏེ། ལུས་པོ་རང་བཞིན་གྱིས་དྲིང་བ་ལས་ཅི་ཞིག་བྱུང་སྟེ་ཅི་ལྟ་བུར་གྱུར་པ་ཅུང་ཟད་ཀྱང་བྱུང་བ་མ་ཡིན་ནོ། །དྲི་ཞིམ་ཙནྡན་ན་ཞེས་པ་ནི་གང་ལ་མཛེས་པའི་དྲི་ཡོད་པ་ཞེས་འབྲུ་མང་པོ་པ་སྟེ་དེ་ལྟ་ན་ཡང་དེའི་རང་བཞིན་ལ་ཉམས་པ་མེད་དོ་ཞེས་པའི་ཐ་ཚིག་གོ །འོན་ཏེ་དེའི་དབང་གིས་དེ་ལ་འདོད་པར་བྱ་བ་ཉིད་དུ་བཟུང་ནས་མངོན་པར་འདོད་པ་སྐྱེ་བའོ་ཞེ་ན། གཞན་གྱི་དྲི་ཡིས་ཞེས་པ་ལ་སོགས་པ་གསུངས་ཏེ། འདི་ལྟར་ཡང་མཁས་པ་མ་ཡིན་ནོ་ཞེས་པའི་དོན་ཏོ། །སྐྲ་ལ་སོགས་པ་མངོན་པར་འདུ་བྱས་པའི་སྒོ་ནས་ཀྱང་ལུས་འདི་དོན་མེད་པའི་རྒྱུ་ཡིན་ནོ་ཞེས་ཚིགས་སུ་བཅད་པ་གཉིས་ཀྱིས་བསྟན་པའི་ཕྱིར། གལ་ཏེ་འདི་སྐྲ་སེན་ཞེས་པ་ལ་སོགས་པ་གསུངས་ཏེ། རིང་བ་ན་ལྷན་ཅིག་སྐྱེས་པ་མ་བཅད་པ་ཞེས་པའི་དོན་ཏོ། །སོ་སྐྱེ་བ་ནི་བྲིང་བ་དང་བཅས་
པས་ཏེ་སོ་ཤིང་དང་སོག་ལེ་ལ་སོགས་པས་འདུས་མ་བྱས་པས་སོ། །འདམ་གྱི་དྲིས་བསྒོས་ནི་དྲི་མ་ཉིད་འདམ་སྟེ་རྫབ་ཡིན་ལ་དེས་བསྒོས་པ་དེ་ལ་དེ་སྐད་ཅེས་བྱ་སྟེ། ཁྲུས་དང་བྱུག་པ་ལ་སོགས་པ་དང་བྲལ་བས་སོ། །གཅེར་བུ་ཞེས་བྱ་བ་ནི་གོས་དང་བྲལ་བའི་ཕྱིར་རོ། །ཇི་ལྟར་སྐྱེས་བུ་བཞིན་དུ་སྟེ་ཇི་ལྟར་གྱུར་པས་གནས་པའོ། །གལ་ཏེ་ལུས་རང་བཞིན་གྱིས་འཇིགས་པ་ཡིན་ན་ཡི་དགས་བཞིན་དུ་རང་བཞིན་གྱིས་འཇིགས་པར་བྱེད་པ་ལ་འབད་པས་ཏེ་སྐྲ་དང་སེན་མོ་ལ་སོགས་པ་བཅོམ་པའི་ཁྱད་པར་དང༌། སོ་ཤིང་དང་སོ་རྩི་དང་ཁྲུས་དང་བྱུག་པ་ལ་སོགས་པ་རྣམས་ཀྱིས་འདི་ལྟ་བུར་གྱུར་པ་དེ་ཅིའི་ཕྱིར་བྱི་དོར་བྱེད། ཇི་ལྟ་བུར་ཞེ་ན། རང་ལ་གནོད་པས་མཚོན་བཞིན་ཏེ་བདག་ཉིད་ལ་གནོད་པའི་དོན་དུ་རལ་གྲི་ལ་སོགས་པས་ཇི་ལྟར་འདུས་བྱས་པ་དེ་ལྟར་རོ། །འདི་ལྟ་བུ་རྣམས་རྨོངས་པའི་དབང་དུ་གྱུར་བའི་སྤྱོད་པ་ལ་མྱ་ངན་མཛད་པ། བདག་ལ་རྨོངས་ཞེས་པ་ལ་སོགས་པ་གསུངས་ཏེ། འབད་པ་དང་ལྡན་པའི་སྨྱོན་པ་སེམས་རང་བཞིན་དུ་མི་གནས་པས་བདག་ཉིད་ཀྱིས་བསམས་ནས་བདག་ཉིད་ལ་རྨོངས་པ་བསྐྱེད་ཅིང་ཡང་འདི་ལྟར་ཕྱིན་ཅི་ལོག་གི་ལམ་ཉམས་སུ་བླངས་པས་ཉོན་མོངས་པ་འདི་རྣམས་སེམས་རང་བཞིན་དུ་མི་གནས་སོ་ཞེས་བསྟན་བཅོས་མཛད་པས་མྱ་ངན་མཛད་པའོ། །འདི་ན་བདག་ཉིད་ཤེས་པ་འགའ་ཡང་ཡོད་པ་མ་ཡིན་ཏེ། སྨྱོན་པས་འཁྲུགས་པ་སྟེ་ས་ཡོངས་སུ་གང་བ་ཡིན་ནོ། །དྲིས་པ་ལ་ཞར་ལ་བྱུང་བས་ལན་བཏབ་ནས་སྐབས་སུ་བབ་པ། རུས་གོང་ཞེས་པ་ལ་སོགས་པ་གསུངས་པ་ལ། རོ་རྣམས་ཀྱི་རུས་གོང་འགའ་ཞིག་སྟེ་སོ་སོ་ན་གནས་པའོ། །འདི་སྐད་བརྗོད་པར་འགྱུར་ཏེ། གང་ལས་པགས་པ་ཕྲལ་བྱས་ནི། །ཞེས་པ་ལ་སོགས་པ་གསུངས་ནས། གང་ཤེས་ཀྱང་ཇི་ལྟར་ཞེས་པ་ལ་སོགས་པ་གསུངས་པ་དེར་གཞན་གྱི་ལེན་ཡིན་ནོ། །གང་གིས་དེ་བཞིན་དུ་འདི་ལ་ཡང་ཆགས་པར་མི་འགྱུར་བ་དུར་ཁྲོད་ཀྱི་ལུས་དང་འདྲ་བ་ཡོད་པ་མ་ཡིན་ཏེ། དུར་ཁྲོད་དུ་དེ་མི་གཙང་བའི་གནས་ཡིན་ལ་འདིར་ནི་མ་ཡིན་ནོ་ཞེས་སོ། །འདིར་བརྗོད་པར་བྱ་བ་ནི་རུས་གོང་ཞེས་པ་ལ་སོགས་པ་ཡིན་ནོ། །གྲོང་གི་དུར་ཁྲོད་ཅེས་པ་ལ་འདིར་
ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། དུར་ཁྲོད་དུ་བཙོག་པའི་གནས་ནི་ལུས་པོ་དེ་ཉིད་ཡིན་ལ། གྲོང་དུ་ཡང་ཡིན་ཏེ་མངོན་པར་དགའ་བའི་གནས་གང་ཡིན་ཞེས་ཟུར་གྱིས་འདྲི་བའོ། །འདི་ལ་མཁས་པའི་བློ་ཅན་གྱིས་མཉམ་པར་རིགས་སོ་ཞེས་བསམས་པའོ། །གཡོ་བའི་རུས་གོང་གིས་ཁྱབ་པ་ཞེས་པ་འདིས་དེ་ཉིད་སྟོན་པ་ཡིན་ནོ། །འདི་ཙམ་ཁྱད་པར་ཡིན་གྱི་ཁྱད་པར་འདིས་མི་གཙང་བའི་རང་བཞིན་གྱིས་མི་གཙང་བའི་རྒྱུ་ལས་བཟློག་པ་ནི་མ་ཡིན་ཏེ། གང་གིས་ནི་འཇུག་པའི་ཡན་ལག་གི་རང་བཞིན་དུ་འགྱུར། ཁྱབ་པ་ནི་ཡོངས་སུ་འཁྲུགས་པའོ། །འདི་ལྟ་བུའི་མི་གཙང་བའི་རང་བཞིན་ཡང་ཕག་ལ་སོགས་པ་རྣམས་ལ་བཞིན་དུ་མངོན་པར་དགའ་བའི་གནས་སུ་གྱུར་ན་ཡང་དེ་ལྟ་ན་ཡང་རྣམ་པ་དེ་ལྟ་བུ་དེ་ནོར་དང་བྲལ་བས་རྙེད་པར་སླ་བ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། རིན་མེད་པར་དེ་ནོར་དང་བྲལ་བས་རྙེད་ཅིང་ཐོབ་པར་མི་འགྱུར་ལ། དེའི་ཕྱིར་དེ་དོན་དུ་གཉེར་བས་དང་པོ་ཁོ་ནར་ནོར་ཉིད་བསགས་པར་བྱ་སྟེ། དེ་སོགས་པ་ལ་ངལ་བའི་སྒོ་ནས་སོན་མ་དང་ཚོང་དང་བསྙེན་བ་ལ་སོགས་པ་ལ་ཡང་དག་པར་བརྟེན་པས་ཡོངས་སུ་ངལ་བ་ལས་འདི་ཉིད་དུ་ཆོས་མ་ཡིན་པས་ཀྱང་ཚོལ་བའི་ཕྱིར་དམྱལ་བ་ལ་སོགས་པ་རྣམས་སུ་སྡུག་བསྔལ་སྐྱེད་པར་བྱེད་དོ། །དེ་ལྟར་དེ་ཚོལ་བ་ནི་འཇིག་རྟེན་གཉི་གར་དོན་མེད་པའི་རྒྱུ་ཉིད་ཡིན་ནོ། །བསགས་པ་དེས་བདེ་བ་འཐོབ་པ་ཡང་མ་ཡིན་ཏེ། སྡུག་བསྔལ་ཉིད་འབའ་ཞིག་ཡིན་ནོ་ཞེས་བསྟན་པའི་ཕྱིར། བྱིས་པ་ཞེས་པ་ལ་སོགས་པ་གསུངས་ཏེ། བྱིས་པའི་གནས་སྐབས་ན་གནས་པ་ལ་ནོར་སྤེལ་བའི་ནུས་པ་མེད་དེ། བྱིས་པ་ཉིད་ཀྱིས་ནོར་གང་གིས་སམ་རྣམ་པ་གང་གིས་བྱིས་པ་འདི་དར་ལ་བབ་པ་སྟེ་ལང་ཚོལ་བབ་པའི་གནས་སྐབས་ནའོ། །བདེ་བར་འགྱུར་ཏེ་ནོར་དང་བྲལ་བས་ཅུང་ཟད་ཀྱང་མ་ཡིན་ནོ་ཞེས་པའི་དོན་ཏོ། །གང་ཡང་ཕ་དང་མེས་པོ་ལ་སོགས་པས་བསགས་པའི་ནོར་གྱིས་ལང་ཚོལ་བབ་པ་ན་བདེ་བ་ཉིད་ཐོབ་པ་དེ་ལྟ་ན་ཡང་ཐམས་ཅད་ལ་སོ་སོར་ངེས་པ་ཉིད་ནི་མ་ཡིན་ནོ། །འདིར་སྔར་བརྗོད་པའི་སྡུག་བསྔལ་གཉིས་ལས་གྲོལ་བར་ཡང་མ་ཡིན་ནོ། །དང་པོར་ནོར་སོག་པ་ཉེ་བར་མཁོ་བ་ཉིད་ཡིན་ཏེ།
བདེ་བ་སྒྲུབ་པའི་ཐབས་ཡིན་པའི་ཕྱིར་དེ་བསགས་པ་ཉིད་ན་ཡང་ལང་ཚོ་ལས་ཉམས་པ་ལས་འགའ་ཞིག་ལ་ཡང་མཁོ་བའི་ཡུལ་མ་ཡིན་ནོ། །འོན་ཏེ་དེ་ལྟར་གྱུར་ན་ཡང་དེ་སོགས་པ་ན་འདོད་པའི་བདེ་བ་མྱོང་བར་བྱེད་དོ་ཞེ་ན། འདོད་ལྡན་ཞེས་པ་ལ་སོགས་པ་སྨོས་ཏེ། འགའ་ཞིག་དམན་པའི་འདོད་པ་ལ་གཡེངས་པའི་སེམས་ཀྱིས་ཤིང་དང་རྩྭ་དང་ལོ་མ་ལ་སོགས་པ་ལེན་པ་བྲན་གྱི་ལས་བྱེད་པའི་ཉི་མའི་མཐས་གཏུགས་པར་ལས་ཁུར་གྱིས་ལུས་སེམས་དུབ་སྟེ་སྤྲོ་བ་མེད་ལ། ཉི་མ་ནུབ་པ་ན་རང་གི་ཁྱིམ་དུ་འོངས་ནས་རོ་དང་འདྲ་བར་གཉིད་ལོག་པས་ཉལ་བར་གྱུར་པའོ། །ཡང་ཐོ་རངས་ལངས་ནས་དམན་པའི་ལས་དེ་ཉིད་ལ་སྦྱོར་རོ། །གྱུར་ཞེས་པའི་སྒྲ་ནི་ཚིག་གི་རྒྱན་ཡིན་ཏེ། འདས་པའི་དོན་ཡུལ་ཡིན་པའི་ཕྱིར་རོ། །འདོད་པ་ཅན་འགའ་ཞིག་དེ་ལྟར་ཚེ་འདུས་བྱས་པས་སྐྱེལ་བར་བྱེད་ཀྱི་འདོད་པའི་བདེ་བའི་རོ་ནི་མྱང་བ་མ་ཡིན་ནོ། །གཞན་བསྟན་པའི་དབང་དུ་བྱས་ཏེ། ཚར་གཅོད་ཅེས་པ་ལ་སོགས་པ་གསུངས་ཏེ། ཁ་ཅིག་ནི་སྔར་གྱི་རྣམས་ལས་གཞན་ངན་པ་ལ་ཆགས་པ་ཅན་ཡིན་ཏེ་བསྟེན་པ་པོ་ཞེས་པའི་དོན་ཏོ། །ཚར་གཅོད་བགྲོད་པ་ལ་སོགས་པ་རྣམས་ཀྱིས་གཞན་གྱི་དཔུང་ལས་རྒྱལ་བའི་དོན་དུ་བགྲོད་པ་སྟེ་འགྲོ་བའམ། གཞན་གྱི་ཡུལ་གྱི་ནོར་བླངས་པའི་དོན་དུ་འགྲོ་བའོ། །དེ་ལ་སོགས་པས་གང་དག་མགྲོན་དུ་བཏང་བ་ལ་སོགས་པ་རྣམས་མཐར་གྱིས་ཡུལ་གཞན་དུ་བགྲོད་པས་ཉོན་མོངས་པས་ཡོངས་སུ་ངལ་བ་ཡིན་ལ། དེས་སྡུག་བསྔལ་གྱིས་ཡོངས་སུ་གདུང་བ་ཅན་ཡིན་ནོ། །རྣམ་པ་ཐམས་ཅད་དུ་དེ་ལྟར་གྱུར་པས་ཁྱུད་ཀོར་ལས་ཀྱང་སྟེ་དུ་མར་ཟད་པར་གྱུར་ཀྱང་བུ་དང་ཆུང་མ་མི་མཐོང་སྟེ་སྤྱོད་ཡུལ་དུ་མ་གྱུར་ཏོ། །འདོད་བཞིན་དུ་ཞེས་པ་ནི་དེས་བུ་དང་ཆུང་མ་ལ་སོགས་པ་རྣམས་དོན་དུ་གཉེར་བས། དེ་ལ་འདོད་པ་རྣམས་ཡིན་ལ་སྟེ་དེའི་དོན་ཉིད་དུ་གཞན་བསྟེན་པ་ལ་སོགས་པ་ཁས་བླངས་པའོ་ཞེས་པའི་དོན་ཏོ། །ཀྱེ་མ་འདི་རྣམས་འབྲས་བུ་མེད་པར་ཉམས་སུ་ལེན་པ་ཡིན་ནོ་ཞེས་ཤིན་ཏུ་མྱ་ངན་མཛད་པར་བདག་ནི་ཞེས་པ་ལ་སོགས་པ་གསུངས་ཏེ། བདག་ཉིད་འདོད་པས་བསླུས་པས་གང་གི་དོན་ཏེ་བདེ་བ་ཐོབ་པའི་རྒྱུ་མཚན་དུ་བཙོངས་ཤིང་གཞན་གྱི་བྲན་བྱས་ནས། དེ་མ་ཐོབ་པ་ནི་བདེ་བ་དེ་མ་ཐོབ་པ་ཡིན་ལ། ཚོའི་འདུ་བྱེད་པ་ཉིད་ཁོ་ན་
དོན་མེད་པར་གཞན་གྱི་ལས་ཉམས་སུ་ལེན་པར་ཟད་པར་བྱས་པ་སྟེ། ལེགས་པའི་ལས་འགའ་ཞིག་ལ་ནི་སྦྱར་བ་མ་ཡིན་ནོ་ཞེས་པའི་དོན་ཏོ། བདེ་བ་ཐོབ་པར་འདོད་པས་ཞུགས་པ་རྣམས་སླར་སྡུག་བསྔལ་དེ་ཉིད་ལ་འདི་རྣམས་ལྷུང་ངོ་ཞེས་བསྟན་པའི་ཕྱིར། ལ་ལ་ཞེས་པ་ལ་སོགས་པ་གསུངས་ཏེ། གང་གི་བདེ་བར་སྤྱད་པར་འདོད་པས་གཞན་རྣམས་ལ་བཙོངས་ཏེ་གཞན་གྱི་དབང་དུ་བྱས་པ་ཡིན་ཏེ། རང་གི་ལུས་གང་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལྟར་གཞན་དེ་རྣམས་ཀྱིས་ཡིན་ནོ་ཞེས་པའི་དོན་ཏོ། །དེ་ཉིད་ཀྱི་ཕྱིར་རྟག་ཏུ་སྐུལ་བར་བྱེད་པའི་ངང་ཚུལ་ཅན་དག་བདག་པོ་གཞན་ཕ་རོལ་པོའི་དགོས་པ་ལ་འགྲོ་བ་ན་བུད་མེད་རྣམས་ལམ་ཉིད་དུ་བུ་བྱུང་བར་འགྱུར་རོ། །ཤིང་དྲུང་དགོན་སོགས་བབ་བབ་ཅེས་པ་ལ། སོགས་པའི་སྒྲས་ནི་རིའི་ཕྲག་གམ་ཆུ་ཀླུང་གི་འགྲམ་ལ་སོགས་པ་དཀའ་བའི་གནས་རྣམས་སུའོ། །དེ་རྣམས་ལ་གཞན་ཕྱིན་ཅི་ལོག་འདི་ཡང་ཡོད་པ་མ་ཡིན་ནོ་ཞེས་བསྟན་པར་འདོད་ནས། འདོད་པས་ཞེས་པ་ལ་སོགས་པ་གསུངས་ཏེ། རང་གི་དངོས་པོ་བཙོངས་ནས་མཆེ་བ་བཞི་འཁྲིགས་པའི་ཡུལ་དུ་འཇུག་གོ །ཇི་ལྟ་བུར་གྱུར་པ་ཅིག་ཅེ་ན། སྲོག་སྟོར་དོགས་བཞིན་པས་ཏེ། དེར་ཞུགས་པས་ན་གསོན་པར་འགྱུར་རམ་མི་འགྱུར་ཞེས། སྟོར་དོགས་པས་འདི་ལྟར་བྱས་ནས་སོ། །འདིར་རྙེད་པ་ཐོབ་པས་འཚོ་བའི་རྒྱུར་བརྟགས་ཤིང་འཚོ་བར་བྱའོ་ཞེས་པའི་ཐ་ཚིག་གོ །ཁེངས་ཕྱིར་བྲན་དུ་འགྲོ་བར་བྱེད། །ཅེས་པ་ནི་སྟོབས་དང་ལྡན་པ་འགའ་ཞིག་གིས་གནོད་པ་བྱས་པའི་དུས་སུ་རང་གི་ང་རྒྱལ་དབྱུང་བའི་ཕྱིར་སོར་མོ་བཅད་པ་དང། དུས་ཀྱི་ཚོད་འཛིན་པས་བསྙེན་པ་ཁས་ལེན་པའི་ཕྱིར་རོ། །རྨོངས་པ་ནི་ཤེས་རབ་ཀྱི་མིག་གཏི་མུག་གིས་མུན་པར་བྱས་པའོ། །དེ་གང་ཡིན་ཞེ་ན། འདོད་པས་བསླུས་པ་རྣམས་ཏེ་འདོད་པའི་ཆེད་དུའམ་འདོད་པས་བསླུས་པ་སྟེ་སྤྱོས་པའོ། །འདོད་པ་ལ་ཞེན་པའི་སེམས་དང་ལྡན་པ་རྣམས་ལ་སྐྱེ་བ་འདི་ཉིད་ལའང་སྡུག་བསྔལ་མཐོང་བ་དེ་བསྟན་པའི་ཕྱིར། འདོད་ལྡན་ཞེས་པ་ལ་སོགས་པ་གསུངས་ཏེ། གཞན་གྱི་ཆུང་མ་དང་ནོར་འཕྲོག་པ་ལ་སོགས་པའོ། །ལྷག་མ་ནི་གོ་སླའོ། །གཞན་ཡང་འདི་བདེ་བ་སྒྲུབ་པ་ཉིད་ཀྱིས་ནོར་ལེན་པར་བྱེད་པ་ན་ཡང་
དོན་མེད་པ་རྒུད་པ་སྐྱེ་བར་འགྱུར་བའི་རྒྱུ་ཉིད་དོ་ཞེས་བསྟན་པར་འདོད་ནས། བསགས་པ་དང་ཞེས་པ་ལ་སོགས་པ་གསུངས་ཏེ། སོགས་པ་ནི་མེད་པ་ལ་སོགས་པར་བྱེད་པའོ། །བསྲུང་བ་ནི་དཀའ་བས་བསགས་པ་དེ་ཡང་ཆུ་དང་མེ་ལ་སོགས་པ་ཆུད་ཟ་བར་བྱེད་པ་ལྔ་ལས་ཡོངས་སུ་སྐྱོང་བར་བྱེད་པའོ། །ཤིན་ཏུ་དཀའ་བ་དེ་ལྟར་སྲུང་བ་ཡང་བརྒྱ་ལ་རྐུན་མ་ལ་སོགས་པ་རྣམས་ཀྱིས་བརླག་པར་བྱེད་པས་གདུང་ཞིང་ཡིད་མི་བདེ་བ་སྡུག་བསྔལ་བའི་རྒྱུ་ནི་ཕུང་ཁྲོལ་ཡིན་ལ་དེ་ཉིད་དོན་མེད་པ་རྒུད་པའི་རྒྱུ་ཡིན་པའི་ཕྱིར་རྒྱུ་ལ་བརྟགས་ནས་ནོར་ཉིད་ཕུང་ཁྲོད་དུ་བརྗོད་དོ། །བསགས་པ་ལ་སོགས་པས་རྟག་ཏུ་རྣམ་པར་གཡེངས་པའི་ཕྱིར་དང༌། ནོར་ལ་ཞེན་པའི་སེམས་ཀྱིས་སྐད་ཅིག་ཙམ་ཡང་ཏིང་ངེ་འཛིན་ལ་བརྟད་པའི་སྐབས་མེད་པའི་ཕྱིར་འཁོར་བ་ལ་བརྟེན་པའི་སྐྱེ་བ་ལ་སོགས་པའི་སྡུག་བསྔལ་ལས་གྲོལ་བའི་སྐབས་མེད་དེ། རྟག་ཏུ་དེ་ལ་ཡིད་ཞུགས་པ་ཉིད་ཀྱིས་ཚེ་འདུ་བྱེད་ཟད་པའི་ཕྱིར་རོ། །འདི་ཐམས་ཅད་མཇུག་བསྡུས་ནས་འདོད་པ་ལ་ཞེན་པ་ཡོངས་སུ་སྤང་བའི་ཆེད་དུ་སྐྱོ་བའི་གཏམ་གྱིས་སྤྲོ་བར་བྱེད་པ། འདོད་ལྡན་རྣམས་ལ་ཞེས་པ་ལ་སོགས་པ་གསུངས་ཏེ། དེ་ལྟ་
བུ་ནི་བརྗོད་པའི་རྣམ་པ་ལ་བལྟའོ། །ཉེས་དམིགས་ནི་ཕུང་ཁྲོལ ་ཡིན་ཏེ་མང་བ་ནི་རྣམ་པ་དུ་མ་ཡིན་ལ། འདིར་བདེ་བ་སྐྱེད་པར་བྱེད་པ་ནི་གཏམ་ཙམ་ཡང་མེད་དེ། དེ་ལྟར་ན་ཡང་ཕྱིན་ཅི་ལོག་ལས་བརྒྱ་ཞིག་ལ་འདི་ནི་བདེ་བའོ་ཞེས་སྣང་སྟེ། དེ་ལྟར་ན་གྱི་ནའོ། །ཤིན་ཏུ་ལྕི་བའི་ཁུར་གྱིས་མནན་པ་བས་ངལ་བའི་ལུས་དང་ལྡན་པའི་ཕྱུགས་རྩྭ་ཅུང་ཟད་ཙམ་འཛིན་པ་བཞིན་དུ་ཤིན་ཏུ་གསོག་གྱུར་ཅིང་མནོག་ཆུང་བའི་བདེ་བའི་ཆ་འདི་ལྟ་བུར་གྱུར་པ་དེ་ཕྱུགས་དང་ཡང་ཐུན་མོང་བ་གང་ཡིན་པ་དེའི་དོན་དུ་སྟེ། དེའི་རྒྱུ་མཚན་དལ་འབྱོར་ཕུན་སུམ་ཚོགས་པ་སྟེ་མི་ཁོམ་པ་བརྒྱད་ལས་གྲོལ་བ་འདི་བཅོམ་ཞིང་ཉམས་པར་བྱས་ཏེ། དོན་མེད་པར་བྱས་སོ་ཞེས་པའི་དོན་ཏོ། །ཁྱད་པར་ཇི་ལྟ་བུ་ཞེ་ན། རྙེད་དཀའ་བ་ཡིན་ཏེ་བཤད་ཟིན་ཏོ། །གང་གིས་ཞེ་ན། ལས་ཀྱིས་མནར་བ་སྟེ་ལས་ནི་སྔོན་གྱི་ལས་ཡིན་ལ། དེས་མནར་བའི་ནི་ཕན་པ་དང་མི་ཕན་པ་ཤེས་པ་ལ་ཕྱིན་ཅི་ལོག་པའི་བློ་ཡིན་ཏེ་རྨོངས་པས་བྱས་ཞེས་པའི་དོན་ཏོ། །འདི་དངོས་པོ་ལ་ནི་སྤྱོད་པའི་ཚིག་
ཡིན་ཏེ་བསྐལ་པ་མནར་བ་ཉིད་དུ་བརྗོད་དོ། །ངེས་པར་འཇིག་ཅིང་ཆུང་གྱུར་པ། །ཞེས་པ་ལ་སོགས་པ་ཚིགས་སུ་བཅད་པ་གཉིས་ཀྱིས་ཕྱིན་ཅི་ལོག་གི་ངོ་བོ་ཉིད་དུ་སྟོན་པར་བྱེད་དེ། ངེས་པར་འཇིག་ཅིང་ཞེས་པ་ནི་མི་བརྟེན་པའི་རང་བཞིན་ཡིན་ལ། ཆུང་བ་ནི་འཇིག་རྟེན་ལས་འདས་པ་ལ་ལྟོས་ནས་ཡིན་ཏེ། ཤིན་ཏུ་ཁྱད་ཞུགས་པས་ཆུང་བ་ཡིན་ནོ། །དམྱལ་ལ་སོགས་པར་ལྷུང་བྱེད་ཅིང༌། །ཞེས་པ་ནི་དཔག་ཏུ་མེད་པའི་སྡུག་བསྔལ་བསྟེན་པས་རང་གི་བདེ་བ་སྐྱེད་པ་ལ་ཡང་ནུས་པ་མེད་དོ་ཞེས་བྱ་བའི་དོན་ཏོ། །ལུས་ནི་རང་གི་ལུས་ཏེ་འདིའི་དོན་ནི་བདེ་བ་སྐྱེད་པའི་ཆེད་དུའོ། །གང་འདི་ནི་དམྱལ་བ་ལ་སོགས་པའི་སྡུག་བསྔལ་མ་བརྩིས་པར་བྱས་པ་སྟེ་དུས་ཐམས་ཅད་དུ་འཁོར་བར་སྔར་བྱས་པའི་བྱེ་བར་ཡོངས་སུ་ང་ལ་ཞིང་ཉོན་མོངས་པ་ཡིན་ལ། དེ་ལས་ཏེ་བྱེ་བའི་བརྒྱའི་ཆ་ཡོངས་སུ་ངལ་བས་སངས་རྒྱས་ཉིད་དུ་འགྱུར་ལ། དེ་ལ་ལྟོས་ནས་ཤིན་ཏུ་ཆུང་བའི་ཚེ་ཡིས་སངས་རྒྱས་ཉིད་འཐོབ་སྟེ། དེ་ལྟར་ན་དེའི་དོན་དུ་བློ་གྲོས་དམན་པ་རྣམས་སྤྲོ་བར་མི་བྱེད་དོ་ཞེས་པའི་དོན་ཏོ། །འོན་ཏེ་བྱང་ཆུབ་ཀྱི་སྤྱད་པ་སྤྱོད་པ་ཡང་དཀའ་བ་བརྒྱས་རྩོམ་པའི་ཕྱིར་ཤིན་ཏུ་སྡུག་བསྔལ་སྟོང་ཕྲག་དུ་མ་སྐྱེད་པའི་ཕྱིར་རོ་ཞེ་ན། འདོད་ལྡན་ཞེས་པ་ལ་སོགས་པ་གསུངས་ཏེ། གང་ཞིག་འདོད་པའི་དོན་དུ་འཁོར་བར་སྤྱོད་པ་ནི་བྱང་ཆུབ་སྤྱོད་པའི་སྡུག་བསྔལ་ལ་ལྟོས་ནས་འདི་ཉིད་སྡུག་བསྔལ་ཤིན་ཏུ་ཆེན་པོ་ཡིན་ཏེ། དེ་རྣམས་མནར་མེད་པར་ལྷུང་བར་བྱེད་པའི་ཕྱིར་དང༌། གཞན་གྱི་དབང་གིས་ཡུན་རིང་པོར་ཉམས་སུ་མྱོང་བའི་ཕྱིར་ལ། བྱང་ཆུབ་སེམས་དཔའ་རྣམས་ལ་ནི་དུས་སོ་སོར་ངེས་པར་རང་ཉིད་འདོད་པས་ཉམས་སུ་མྱོང་བ་ཉིད་ཡིན་པས་ན་དེ་ལྟ་མ་ཡིན་ནོ། །དེ་ལྟར་ན་གང་བྱང་ཆུབ་སེམས་དཔའ་རྣམས་གཞན་གྱི་དོན་དུ་སྡུག་བསྔལ་ཉམས་སུ་མྱོང་བ་དེ་ནི་བྱང་ཆུབ་ཏུ་འགྱུར་བ་ཡིན་ལ། འདོད་པ་དང་ལྡན་པ་རྣམས་ཀྱིས་འདོད་པའི་དོན་དུ་སྡུག་བསྔལ་མྱོང་བ་ནི་བྱང་ཆུབ་ཏུ་འགྱུར་བ་མ་ཡིན་ནོ་ཞེས་པའི་དོན་ཏོ། ཡང་ཁྱད་པར་དུ་འདོད་པའི་རྒྱུས་སྡུག་བསྔལ་བ་ཉིད་དུ་རབ་ཏུ་བསྟན་པའི་ཕྱིར། དམྱལ་སོགས་ཞེས་པ་ལ་སོགས་པ་གསུངས་ཏེ། མཚོན་ལ་སོགས་པ་འདི་རྣམས་སྡུག་བསྔལ་སྐྱེད་པར་བྱེད་པའི་རྒྱུ་ཉིད་དུ་རབ་ཏུ་གྲགས་
པ་དང༌། འདོད་པ་རྣམས་མཚུངས་པར་འགྱུར་བ་ནི་མ་ཡིན་ནོ། །ཅིའི་ཕྱིར་ཞེ་ན། དམྱལ་བ་ལ་སོགས་པ་ངན་འགྲོའི་སྡུག་བསྔལ་ལུང་ལས་བཤད་པ་དྲན་པ་ལས་ཏེ། དྲན་པས་ཡུལ་དུ་བྱས་པ་ལས་སོ། །མཚོན་ཆ་ལ་སོགས་པ་ཡང་དུས་ངེས་པར་འཆི་བ་ལ་སོགས་པ་འདི་རྣམས་སྡུག་བསྔལ་སྐྱེད་པར་བྱེད་པ་པོ་ཡིན་ལ། འདོད་པ་ནི་དུས་ཡུན་རིང་པོར་དམྱལ་བ་ལ་སོགས་པའི་སྡུག་བསྔལ་མི་བཟད་པའི་རྒྱུ་རྣམས་ཡིན་ཏེ། ཇི་ལྟ་བུར་དེ་རྣམས་ཀྱི་དཔེར་འགྱུར། དེ་ལྟར་ལུས་རྣམ་པར་དབེན་པའི་རྗེས་ལ་སེམས་རྣམ་པར་དབེན་པ་བརྗོད་ནས། སྐབས་སུ་བབ་པ་ལ་སྦྱར་བའི་ཆེད་དུ། ད་ལྟར་འདོད་པ་ཞེས་བྱ་བ་ལ་སོགས་པ་གསུངས་ཏེ། འདོད་པ་སྟེ་འཇིག་པའི་རྒྱུ་རྣམས་སོ། །དེ་ལྟར་བརྗོད་པའི་རིམ་པས་སྐྱོ་ཞིང་སྐྲག་པར་བྱས་ནས་སྔར་བརྗོད་པའི་དབེན་པའི་དགའ་བ་ལ་མངོན་པར་དགའ་བ་བསྐྱེད་པར་བྱའོ། །གང་དུ་གནས་ནས་བྱ་ཞེ་ན། དེ་ལ་གསུངས་པ། རྩོད་པ་དང་ཞེས་པ་ལ་སོགས་པ་གསུངས་ཏེ། འགྲན་ཟླ་མེད་པས་དེ་རྩོད་པས་སྟོང་པ་དག་ཡིན་ལ། སྟག་དང་རི་དགས་དང་སྦྲུལ་དང་རྐུན་པོ་ལ་སོགས་པ་དང་བྲལ་བས་དགའ་བ་ཡིན་ནོ། །དེའི་ཕན་ཡོན་སྐལ་ལྡན་ཞེས་པ་ལ་སོགས་པ་གསུངས་པ་ལ། སྐལ་ལྡན་ནི་ལེགས་པར་སྤྱོད་པ་རྣམས་ཡིན་ལ། ཟླ་བ་ནི་ཟླ་བ་ཉིད་ཡིན་ལ། འོད་ནི་འོད་ཟེར་ཡིན་ཏེ། དེ་ཉིད་དཀར་ཞིང་བསིལ་བར་ཆོས་མཐུན་པས་ཙནྡན་ཡིན་ལ། གང་རླུང་བསིལ་བ་རྣམས་དང་ལྡན་པའི་རྡོ་ལེབ་དེ་རྣམས་ལ་འཆག་བར་བྱེད་ཅེས་པ་དང་འབྲེལ་ཏོ། །ཁྱད་པར་ཅི་ལྟ་བུ་དང་ལྡན་པ་ཞེ་ན། ཉམས་དགའ་བར་ཏེ། རང་བཞིན་གྱིས་གཙང་ཞིང་དག་པ་རྩུབ་པ་ལ་སོགས་པའི་ཉེས་པ་དང་བྲལ་བ་རྣམས་སོ། །ཡངས་པའི་རྡོ་ལེབ་ཁང་བཟངས་ནི་ཁང་བཟངས་དང་འདྲ་བ་སྟེ་ཡངས་པ་རྣམས་སོ། །ཇི་ལྟ་བུར་གྱུར་པའི་དམ་པས་འཆག་པར་བྱེད་ཅེ་ན། སྒྲ་མེད་པ་སྟེ། མི་མཐུན་པའི་སྒྲ་དང་བྲལ་བས་སོ། །ཞི་བདེ་རྩུབ་པ་མ་ཡིན་པ་བདེ་བའི་རེག་པ་དང་ལྡན་པས་ཞེས་པའི་དོན་ཏོ། །ནགས་ཀྱི་རླུང་ནི་གཡོབ་པར་བྱེད་པའི་རླུང་ངོ༌། །འཆག་པར་བྱེད་པ་ནི་ཡང་དང་ཡང་དུ་དལ་བས་འཆག་པའོ། །འཆག་པ་ཙམ་འབའ་ཞིག་ནི་མ་ཡིན་ཏེ། འོན་ཀྱང་གཞན་ལ་ཕན་པའི་ཆེད་དུ་སེམས་ཅན་རྣམས་
ལ་བདེ་བ་སྐྱེད་པའི་སེམས་པའང་ཡིན་ནོ། །རྣལ་འབྱོར་བ་རྣམས་ཀྱིས་ནི་འདི་ཐམས་ཅད་འབད་པ་མེད་པར་འགྲུབ་པ་ཡིན་ལ། འདོད་པ་ཅན་རྣམས་ཀྱིས་ནི་འབད་པས་བསྒྲུབ་པར་བྱ་བ་ཡིན་ནོ། །དེ་ལྟར་ན་འདིས་ནི་རྣམ་པར་དབེན་པའི་བདེ་བ་དབང་ཕྱུག་གི་བདེ་བ་ལས་ཀྱང་ཁྱད་པར་དུ་འཕགས་པར་བསྟན་ཏོ། །དབེན་པར་གནས་པ་རྣམས་ལ་བདེ་བ་ཐུན་མོང་མ་ཡིན་པ་གཞན་འདི་ཡང་ཡོད་པར་བསྟན་པའི་ཕྱིར། ཁང་སྟོང་ཞེས་པ་ལ་སོགས་པ་སྨོས་ཏེ་གོ་སླའོ། །རང་དབང་སྤྱོད་ཅིང་ཞེས་པ་ལ་སོགས་པ་ནི་བཤད་པ་ཉིད་ཀྱི་དོན་གསལ་བར་བྱེད་དེ། བདག་ནི་རང་ཉིད་ཡིན་ལ་རང་དབང་དུ་སྤྱོད་པ་ནི་འདོད་པ་ཡིན་ཏེ། དེས་རང་དབང་དུ་སྤྱོད་པའི་དང་ཚུལ་གང་ལ་ཡོད་པ་དེ་ནི་རང་དབང་དུ་སྤྱོད་པ་ཞེས་པའི་དོན་ཏོ། །དེ་ལྟར་རྣམ་པར་དབེན་པའི་ཡོན་ཏན་བཤད་དེ། སྐབས་སུ་བབ་པ་བཤད་པར་འདོད་ནས། དེ་ལས་ཞེས་པ་ལ་སོགས་པ་གསུངས་ཏེ། དེ་ལས་ཞེས་བྱ་བ་ནི་སྔར་བརྗོད་པའི་རིམ་པ་སྟེ། སོགས་པའི་སྒྲས་ནི་གཞན་ཡང་དེ་ལྟར་ཡིན་ལ། རྣམ་པ་ཡིས་ཞེས་པ་ནི་ལུས་དང་སེམས་ཀྱིས་རྣམ་པར་དབེན་པ་ཡིན་ལ། ཡོན་ཏན་བསྒོམ་པ་ནི་འདི་ལྟར་ཡང་བདེ་བ་ཕུན་སུམ་ཚོགས་པ་ཐམས་ཅད་ཀྱི་རྒྱུ་ནི་བདེ་བ་ཡིན་ནོ་ཞེས་སེམས་ལ་ཡང་ནས་ཡང་དུ་མངོན་དུ་བྱས་པའི་རྒྱུས་སོ། །རྣམ་པར་རྟོག་པའི་རྒྱུ་ཉེ་བར་ཞི་བ་ནི་གང་གི་དམ་པ་མ་ཡིན་པའི་ཡིད་ལ་བྱེད་པ་དེ་ལྟར་གྱུར་པ་ན་བྱང་ཆུབ་ཀྱི་སེམས་བསྒོམ་པར་བྱ་སྟེ། འདི་ལྟར་སེམས་ཡོངས་སུ་བྱང་བ་བསྒོམ་པ་ན་བྱང་ཆུབ་ཀྱི་སེམས་ཕུལ་དུ་ཕྱིན་པའི་གོ་འཕང་སྐྱེ་བར་འགྱུར་རོ་ཞེས་ནིའི་སྒྲས་ཁྱད་པར་སྟན་ཏོ། །དེ་ལ་རེ་ཞིག་གཅིག་ཏུ་གཞན་དུ་བདག་ཉིད་མ་བྱས་པ་དེ་སྲིད་དུ་གཞན་ལ་ཕན་པ་དང་བདེ་བའི་སེམས་ཕུན་སུམ་ཚོགས་པར་མི་འགྱུར་ཏེ། བདག་ཏུ་འཛིན་པ་ནི་བདག་ཉིད་ལ་ཁྱད་པར་དུ་འཇུག་པའི་ཕྱིར་རོ། །དེའི་ཕྱིར་འདི་བཟློག་པར་བྱ་བའི་ཆེད་དུ་དང་པོར་ཏེ་ཐོག་མར་བདག་དང་གཞན་དུ་མཉམ་པོ་བསྒོམ་པར་བྱ་སྟེ། ཕྱི་ནས་ནི་བདག་དང་གཞན་དུ་བརྗེ་བའོ་ཞེས་པའི་དོན་ཏོ། །འདི་ལྟར་ཞེས་པ་ནི་འཆད་པར་འགྱུར་བའི་ཚུལ་གྱིས་སོ། །འབད་པས་ཞེས་པ་ནི་མངོན་པར་ཞེན་པ་ཆེན་པོས་སོ། །བདེ་དང་སྡུག་བསྔལ་མཉམ་
པས་ཞེས་པ་ནི་དེ་ཉིད་ཀྱི་རྣམ་པ་སྟོན་པ་ཡིན་ནོ། །བདག་ལས་འདི་དག་ལ་ཁྱད་པར་ཅུང་ཟད་ཀྱང་ཡོད་པ་མ་ཡིན་ཏེ། གང་ལས་ཇི་ལྟར་བདག་སྡུག་བསྔལ་ཞིང་གནོད་པ་དེ་བཞིན་དུ་འདི་རྣམས་ལ་ཡང་ངོ༌། །ཇི་ལྟར་བདག་གི་བདེ་བ་ཡོངས་སུ་བཟུང་བ་སྟེ། དེ་བཞིན་དུ་འདི་རྣམས་ལ་ཡང་ཞེས་སྲོག་ཆགས་ཐམས་ཅད་ལ་བདེ་བ་དང་སྡུག་བསྔལ་མཉམ་པར་འགྱུར་བ་ཡིན་ཏེ། དེའི་ཕྱིར་བདག་བཞིན་དུ་བདག་གིས་བསྐྱང་བར་བྱ་སྟེ། དཔེར་ན་བདག་སྡུག་བསྔལ་དང་སྡུག་བསྔལ་གྱི་རྒྱུ་ལས་འབྱིན་པ་དེ་བཞིན་དུ་སེམས་ཅན་གཞན་ཡང་གནོད་པར་བྱ་བ་དང་དཔེར་ན་བདག་ཉིད་རྣམ་པ་ཐམས་ཅད་དུ་བདེ་བར་འདོད་པ་དེ་བཞིན་དུ་གཞན་ཡང་བདག་བཞིན་དུ་ཡོངས་སུ་བསྲུང་བར་བྱའོ། །འོ་ན་བདག་ཉིད་ལས་འགྲོ་བ་དུ་མའི་རྣམ་པ་ཐ་དད་པའི་སེམས་ཅན་རྣམས་གཅིག་ཏུ་འགྲུབ་པར་མི་འགྱུར་བ་མ་ཡིན་ནམ། བདེ་བ་དང་སྡུག་བསྔལ་ཐ་མི་དད་པར་ཡང་ཇི་ལྟར་འདོད་པར་འགྱུར་ཞེ་ན། འདི་ལ་ལག་པ་ལ་སོགས་པ་ཞེས་པ་ལ་སོགས་པ་གསུངས་པ་ལ། ལག་པ་དང་རྐང་པ་དང་མགོ་བོ་ལ་སོགས་པ་དབྱེ་བ་རྣམ་པ་མང་པོ་ཇི་ལྟར་ལུས་གཅིག་ཏུ་ཞེན་པས་ཡོངས་སུ་བསྲུང་བར་བྱ་བར་འགྱུར་ཏེ། སྡུག་བསྔལ་ལས་བཟློག་པའི་ཕྱིར་དང༌། བདེ་བ་ལ་གཏོད་པའི་ཕྱིར་རོ། །དེ་བཞིན་དུ་འགྲོ་བ་སྟེ་སེམས་ཅན་གྱི་འཇིག་རྟེན་ཐ་མི་དད་ཅིང་གཅིག་པ་ཉིད་དུ་ཞེན་པས་བདག་གིས་ཡོངས་སུ་བསྲུང་བར་བྱ་བ་ཉིད་དུ་འགྱུར་རོ། །བདེ་བ་དང་སྡུག་བསྔལ་ཐ་མི་དད་པར་ཡང་གི་སྒྲ་མི་མངོན་པར་བྱས་པས་སྟོན་ཏོ། །དེ་ལྟར་ལག་པ་ལ་སོགས་པའི་དབྱེ་བ་བཞིན་དུ་འདི་ཐམས་ཅད་ཅེས་ཏེ་རྣམ་པ་མང་པོའི་འགྲོ་བའི་བྱེ་བྲག་ཐ་དད་པ་ཡང་ངོ༌། །བསམ་པ་ནི་འདི་ཡིན་ཏེ། ལུས་པོ་འདི་ལ་གཅིག་པ་ཉིད་མེད་ཀྱང་ཇི་ལྟར་གོམས་པས་གཅིག་ཏུ་ཞེན་པ་དེ་བཞིན་དུ་འགྲོ་བ་རྣམ་པ་དུ་མ་ལས་ཡང་ཡིན་ཏེ། ཁྱད་པར་ཅུང་ཟད་ཀྱང་མེད་དོ། །འདི་དེ་ལྟར་དུ་གྱུར་ན་གལ་ཏེ་ཁྱེད་དང་ལྷན་ཅིག་ཏུ་འགྲོ་བ་གཅིག་གི་རང་བཞིན་ཡིན་པ་དེའི་ཚེ་ཇི་ལྟར་ཁྱེད་ཀྱི་སྡུག་བསྔལ་གཞན་གྱི་རྒྱུད་ལ་གནོད་པར་མི་འགྱུར་ལ། དེ་བཞིན་དུ་བཟློག་པ་ལ་ཡང་སྦྱར་བར་བྱའོ་ཞེས་དོགས་ནས། གལ་ཏེ་གཞན་གྱི་ལུས་ཞེས་བྱ་བ་ལ་སོགས་པ་གསུངས་ཏེ། གལ་ཏེ་གཞན་གྱི་ལུས་ཏེ་གཞན་གྱི་
ལུས་པོ་དག་ལ་བདག་གི་སྡུག་བསྔལ་གལ་ཏེ་གནོད་པར་མ་གྱུར་པ་དེ་ལྟར་ན་ཡང་སྡུག་བསྔལ་དེ་ཉིད་བདག་གི་ཡིན་ནོ། །ཅིའི་ཕྱིར་ཞེ་ན། བདག་ལ་ཆགས་པས་བཟོད་པར་དཀའ་བ་ཡིན་ཏེ་མི་ནུས་སོ་ཞེས་པ་སྟེ་འདི་ནི་གཏན་ཚིགས་ཀྱི་ཚིག་ཡིན་ལ། ཆའི་སྒོ་ནས་འཇུག་ན་ཡང་སྡུག་བསྔལ་གྱི་རང་བཞིན་ཉིད་མི་འདོར་རོ་ཞེས་པའི་དོན་ཏོ། །དེ་བཞིན་དུ་བཟློག་པ་ཡང་བཤད་པར་བྱའོ། །དེའི་ཕྱིར་རང་དང་གཞན་གྱི་ཁྱད་པར་དོར་ནས་སྡུག་བསྔལ་གྱི་རང་བཞིན་ཉིད་བཟློག་པའི་གཏན་ཚིགས་བདག་གིས་ཞེས་པ་ལ་སོགས་པ་གསུངས་པ་ལ་གང་སྡུག་བསྔལ་ཡིན་པ་དེ་བདག་གིས་བསལ་བར་བྱ་སྟེ། བདག་གི་སྡུག་བསྔལ་བཞིན་ནོ། །སེམས་ཅན་གཞན་གྱི་སྡུག་བསྔལ་ཡིན་པས་ཞེས་པ་ནི་རང་བཞིན་གྱི་གཏན་ཚིགས་ཀྱི་སྦྱོར་བ་ཡིན་ཏེ། སྡུག་བསྔལ་གྱི་རང་བཞིན་ཙམ་འབྱུང་བར་འགྱུར་བ་སྤོང་བར་བྱ་བ་ཉིད་དོ། །གཏན་ཚིགས་མ་གྲུབ་པ་ཡང་མ་ཡིན་ཏེ། སྡུག་བསྔལ་གྱི་རང་བཞིན་ཉིད་དུ་ཁྱད་པར་མེད་པར་བསྒྲུབ་པའི་ཕྱིར་རོ། །མ་ངེས་པ་ཡང་མ་ཡིན་ཏེ། །ཁྱད་པར་མེད་པའི་ཕྱིར་བདག་གི་སྡུག་བསྔལ་ཡང་སྤང་བར་བྱ་བ་མ་ཡིན་པར་འགྱུར་རོ་ཞེས་པ་ནི་བཟློག་ན་གནོད་པ་ཅན་ནོ། །འདི་ཉིད་ཀྱི་ཕྱིར་འགལ་བ་ཡང་མ་ཡིན་ནོ། །དེ་བཞིན་དུ་སྦྱོར་བ་གཞན་འདི་ཡང་ཡིན་ཏེ། གང་སེམས་ཅན་ཡིན་པ་དེ་ཐམས་ཅད་ལ་བདག་གིས་ཕན་པར་བྱ་སྟེ། ཇི་ལྟར་སེམས་ཅན་བདག་ཉིད་བཞིན་ནོ། །སྲོག་ཆགས་གཞན་ཡང་སེམས་ཅན་ཡིན་པ་ཞེས་པ་ནི་རང་བཞིན་གྱི་གཏན་ཚིགས་ཉིད་དེ། སེམས་ཅན་གྱི་བདག་ཉིད་ཙམ་འབྱུང་བར་འགྱུར་བ་ལ་ཕན་གདགས་པར་བྱའོ། །འདི་ཡང་མ་གྲུབ་པ་མ་ཡིན་ཏེ། སེམས་ཅན་གྱི་བདག་ཉིད་ཀྱི་ཕྱོགས་གྲུབ་པའི་ཕྱིར་རོ། །བདག་ཉིད་ལ་ཡང་ཕན་མི་འདོགས་པར་ཐལ་བར་འགྱུར་བས་མ་ངེས་པ་ཡང་མ་ཡིན་ལ། སྔར་བཞིན་དུ་འགལ་བ་ཡང་མ་ཡིན་ནོ། །སྡུག་བསྔལ་ལ་མངོན་པར་ཞེན་པ་ཞེས་པ་བདག་དང་གཞན་ལ་ཁྱད་པར་ཡོད་པ་མ་ཡིན་ནམ། དེའི་ཕྱིར་དེ་ལྟར་ན་གཏན་ཚིགས་ནི་མ་ངེས་པ་ཡིན་ནོ་ཞེ་ན། གང་ཚེ་བདག་དང་ཞེས་པ་ལ་སོགས་པ་གསུངས་པ་ལ། བདེ་
བ་སྟེ་དགའ་བ་འདོད་པར་མཚུངས་ཤིང་མཉམ་པ་ཉིད་ལ་དེ་དག་དང་གཞན་ལ་ཁྱད་པར་ཅི་ཡོད་དེ་ཅུང་ཟད་ཀྱང་མེད་དོ། །གང་གི་ཕྱིར་བདག་ཉིད་ལ་བདེ་བ་བསྐྱེད་པར་བྱ་བའི་ཕྱིར་བརྩོན་ལ་གཞན་ལ་མ་ཡིན་ཞེས་པའི་དོན་ཏོ། །གཏན་ཚིགས་དང་པོ་ལ་མ་ངེས་པ་ཉིད་སྤང་བའི་ཕྱིར། གང་ཚེ་བདག་དང་ཞེས་པ་ལ་སོགས་པ་གསུངས་ཏེ། འཇིགས་པ་ནི་སྡུག་བསྔལ་གྱི་རྒྱུ་ཡིན་ལ། གཞན་མིན་ཞེས་པ་ནི་གཞན་ལ་མ་ཡིན་པའོ། །དེ་ལྟར་གྱུར་ན་ཡང་སྡུག་བསྔལ་གཅིག་གི་བདག་ཉིད་དུ་ཁྱད་པར་མེད་པར་གྱུར་པ་དེ་ལྟ་ན་ཡང༌། གང་ལ་སྡུག་བསྔལ་གྱིས་གནོད་པ་དེ་ཉིད་ཀྱིས་བསྲུང་བར་འོས་ཀྱི་གཞན་གྱིས་ནི་མ་ཡིན་ནོ་ཞེ་ན། གལ་ཏེ་དེ་ལ་ཞེན་པ་ལ་སོགས་པ་གསུངས་ཏེ། གཞན་དེའི་སྡུག་བསྔལ་གྱིས་བདག་ལ་གནོད་པ་དང་གདུང་བ་མེད་པའི་ཕྱིར་རྒྱུ་འདིས་གལ་ཏེ་གཞན་མ་བསྲུངས་ན་གཞན་འདི་ཉམས་པར་འགྱུར་ཏེ། གང་གི་ཕྱིར་མ་འོངས་པ་སྟེ་འཇིག་རྟེན་ཕ་རོལ་གྱི་ལུས་དམྱལ་བར་སྐྱེས་པའི་སྡུག་བསྔལ་གྱི་བདག་ཉིད་འདིར་སྐྱེས་པའི་ལུས་པོ་འདི་ལ་ཅུང་ཟད་ཀྱང་གནོད་པར་མི་སྲིད་དེ། དེ་གཞན་ཡིན་པའི་ཕྱིར་རོ། །དེ་ཞེས་པ་ནི་འཇིག་རྟེན་པའི་བརྗོད་པའམ་དེའི་དོན་ཏོ། །གང་གི་ཕྱིར་དེ་ལྟར་ཡིན་པ་དེའི་ཕྱིར་བསམ་པ་གང་གིས་འདིར་བསྲུང་བ་ལུས་ཀྱི་རང་བཞིན་ཡིན་པའི་ཕྱིར་ཏེ། སྡིག་པ་ལས་ལྡོག་པའི་ཕྱིར་དང་དགེ་བ་ལ་འཇུག་པའི་ཕྱིར་རོ། །བདག་ནི་དུས་ཐམས་ཅད་དུ་གཅིག་ཡིན་ཏེ། ལུས་ངག་ལ་ཐ་དད་པ་ཡོད་པ་མ་ཡིན་ལ། དེའི་ཕྱིར་ཉེས་པ་འདི་མེད་དོ་ཞེ་ན། བདག་གིས་ཞེས་བྱ་བ་ལ་སོགས་པ་གསུངས་ཏེ། བདག་ནི་འགེགས་པར་འགྱུར་བའི་ཕྱིར་དང༌། ཅུང་ཟད་བཀག་པའི་ཡང་ཕྱིར་གང་ཞིག་ངའོ་ཞེས་རྟོག་པའི་ཡུལ་དུ་འགྱུར། དེའི་ཕྱིར་ངའོ་ཞེས་ཤེས་པའི་ཡུལ་གང་ལ་ཡང་གཅིག་ཅེས་པ་མེད་པའི་ཕྱིར་ཞེན་པའི་རྣམ་པར་རྟོག་པ་འདི་ནི་ལོག་པའོ།། བདག་ཉིད་དེའི་ཚེ་ཡང་ཞེས་པ་ནི་འདི་སྲིད་པ་གཞན་ཡིན་ལ། སྒྱུ་མ་ལྟ་བུ་ཉེ་བར་ལེན་པའི་ཕུང་པོ་ལྔ་ཙམ་དམིགས་པའི་ཕྱིར་རོ། །འདི་ཡང་ཞེན་པའི་དབང་གིས་བརྗོད་པ་ཡིན་ཏེ། ཡང་དངོས་པོ་ལ་ནི་དམིགས་པ་ཅུང་ཟད་ཀྱང་ཡོད་པ་མ་ཡིན་ཏེ་རྣམ་པར་རྟོག་པའི་བདག་ཉིད་ཡིན་
པའི་ཕྱིར་རོ། །ཡང་འདི་ཅིའི་ཕྱིར་རྣམ་པར་རྟོག་པ་ལོག་པ་ཡིན་ཞེ་ན། འདི་ལྟར་ཤི་བཞེས་པ་ལ་སོགས་པ་གསུངས་ཏེ། བདག་གཅིག་ཏུ་ཕུང་པོ་ལྔ་པོ་ཙམ་ཉིད་ཡིན་ལ། གང་གི་ཚེ་བདག་ལ་སོགས་པ་འགའ་ཞིག་འཇིག་རྟེན་ཕ་རོལ་དུ་འགྲོ་བར་སྲིད་པ་ཐ་མ་མ་ཡིན་པ་དེའི་ཚེ་ངེས་པར་ཕུང་པོ་དེ་འདི་ཉིད་དུ་འཇིག་པར་འགྱུར་བ་ནི་མ་ཡིན་ཏེ། དེ་ཉིད་འཇིག་རྟེན་ཕ་རོལ་དུ་སྐྱེ་བར་འགྱུར་རོ། །འོན་ཀྱང་སྔ་མ་འགགས་ནས་དེས་རྐྱེན་འདིས་ཁྱད་པར་དུ་གྱུར་པའི་ལས་དང་ཉོན་མོངས་པས་འདུས་བྱས་པ་བར་མ་དོའི་སྲིད་པ་སྔར་མེད་པའི་རྒྱུད་སྐྱེད་པར་འགྱུར་ཏེ། དེའི་ཕྱིར་ཐོག་མ་མེད་པའི་འཁོར་བ་ནས་འཇུག་པའི་ལོག་པའི་རྣམ་པར་རྟོག་པ་ལ་གོམས་པའི་བག་ཆགས་ཀྱི་དབང་ལ་སོགས་པའི་རྐྱེན་གྱིས་ཕྱིར་ཕྱིན་ཅི་ལོག་པ་ཉིད་སྐྱེ་བར་འགྱུར་རོ། །གཞན་ཡང་གནོད་པར་བྱེད་པ་གཞན་འདི་ཡིན་ནོ་ཞེས་གང་གི་ཚེ་ཞེས་པ་ལ་སོགས་པ་གསུངས་ཏེ། གང་གི་ཚེ་འབྱུང་བར་འགྱུར་བའི་ལུས་ཀྱི་སྡུག་བསྔལ་བསྲུང་བའི་དོན་རེ་ཞིག་ཞོག་ལ། འདིར་ལུས་པོ་གཅིག་ལ་ཡན་ལག་ཐ་དད་པས་སྡུག་བསྔལ་ཐ་དད་པ་ཡིན་ཏེ། དེའི་ཕྱིར་གང་གཞན་གྱི་སྡུག་བསྔལ་གཞན་གྱིས་བསྲུང་བ་ལ་འབད་བར་མི་རིགས་ན། རྐང་པ་ལ་སོགས་པ་ལ་ཕངས་པ་གང་ཞིག་མཐོང་བ་ན་ཅིའི་ཕྱིར་ལག་པ་ལ་སོགས་པས་སྐྱོང་བར་བྱེད་དེ། གཞན་ཉིད་དུ་ཁྱད་པར་མེད་པའི་ཕྱིར་འདི་རིགས་པ་མ་ཡིན་ནོ་ཞེས་པའི་དོན་ཏོ། །འོན་ཏེ་འདི་རིགས་པ་ཡིན་ན་ཡང་ལུས་པོ་འདི་ལ་བདག་གིར་འཛིན་པ་སྟེ། བདག་ཅེས་པ་བདག་ཏུ་འཛིན་པ་ལས་བདག་མེད་ཀྱང་འཇུག་པར་འགྱུར་ཏེ། རྐང་པ་ལ་སོགས་པ་ལ་བསྲུང་བའི་ཡིད་ལ་བྱེད་པ་འབྱུང་བར་འགྱུར་རོ་ཞེ་ན། འདི་ཡང་ལེགས་པ་མ་ཡིན་ཏེ། ཇི་ལྟར་གང་མི་རིགས་པ་སྟེ་རིགས་པ་དང་མི་མཐུན་པ་དེ་བཟློག་པར་བྱ་སྟེ། བདག་དང་གཞན་གྱི་ཡང་བསལ་བར་བྱ་སྟེ། ནན་གྱིས་ནི་ནུས་པ་ཅི་ལྟ་བར་རོ། །ནུས་པ་དང་བྲལ་བས་ནི་འདིར་བཏང་སྙོམས་ཉིད་དུ་བྱ་བར་རིགས་སོ་ཞེས་པའི་དོན་ཏོ། །གལ་ཏེ་བདག་ལ་སོགས་པ་མེད་པར་གྱུར་པ་དེ་ལྟ་ན་ཡང་རྒྱུད་ཅེས་པ་གཅིག་ཡོད་པ་ཡིན་ཏེ། དེ་བཞིན་དུ་ལག་པ་དང་
རྐང་པ་ལ་སོགས་པ་མང་པོ་རྣམས་ལ་ཡང་ཚོགས་པའི་ལུས་གཅིག་ཡོད་པ་ཡིན་ལ། གཉིས་པོ་འདི་འཇིག་རྟེན་འདི་དང་འཇིག་རྟེན་ཕ་རོལ་དུ་ཇི་ལྟར་སྲིད་པར་བདག་སྡུག་བསྔལ་ཁྱེར་བར་བྱེད་པ་ལ་སོགས་པའི་ངེས་པར་བྱེད་པར་འགྱུར་ཏེ། དེའི་ཕྱིར་ཁྱད་པར་ཅི་ཞིག་ཡོད་ཅེས་པའི་གཏན་ཚིགས་མ་གྲུབ་པ་ཡིན་ལ། སྔ་མ་ནི་མ་ངེས་པ་ཡིན་ནོ་ཞེས་དོགས་ནས་རྒྱུ་དང་ཞེས་པ་ལ་སོགས་པ་གསུངས་ཏེ། རྒྱུད་ཅེས་པ་འགའ་ཞིག་དོན་དམ་པར་སྲིད་པ་མ་ཡིན་ཏེ། འོན་ཀྱང་རྒྱུ་དང་འབྲས་བུའི་དངོས་པོ་འཇུག་པ་སྐད་ཅིག་བརྒྱུད་པའི་རྒྱུན་གྱི་རང་བཞིན་ཉིད་འདི་ཡིན་ཏེ། དེ་ལ་ཐ་དད་པ་དེ་མ་དམིགས་པའི་ཕྱིར་རོ། །དེའི་སྐད་ཅིག་མ་འདི་རྣམས་ཚིག་གཅིག་གིས་བློའི་ཐ་སྙད་བྱ་བའི་དོན་དུ་རྒྱུད་ཅེས་བརྡར་བྱས་པ་ཡིན་ཏེ། དེ་ལྟར་ན་འདི་ནི་བརྟགས་པར་ཡོད་པ་ཉིད་ཡིན་ལ། དེས་ན་འདིར་མངོན་པར་ཞེན་པ་སྤོང་བར་བྱ་སྟེ། གཞན་དུ་ན་གང་གིས་ཁས་མི་ལེན་པར་འགྱུར་བ་བདག་གིས་གནོད་པ་ཅི་ཞིག་བྱས། དེ་བཞིན་དུ་ཚོགས་པ་ཅན་ལ་སོགས་པའི་དངོས་པོ་གཅིག་པུར་གྱུར་པ་ཡོད་པ་ནི་མ་ཡིན་ཏེ། དེ་རྣམས་ལས་དེ་ཐ་དད་པར་མ་དམིགས་པའི་ཕྱིར་ལ། དེ་ཉིད་དང་གཞན་དུ་བརྟགས་པའི་ཆ་ཤས་ཀྱི་རྣམ་པར་དཔྱད་པས་མི་གནས་པའི་ཕྱིར་འདིར་བརྗོད་པར་མི་བྱ་སྟེ། དེའི་ཕྱིར་འདི་ཡང་སྔར་བཞིན་དུ་ཀུན་རྫོབ་ཏུ་ཡོད་པ་ཉིད་དོ། །འདི་དག་གོ་རིམས་ཇི་ལྟ་བར་དཔེར་བརྗོད་པ། ཕྲེང་བ་དམག་ཅེས་པ་ལ་སོགས་པ་གསུངས་ཏེ། རྒྱུད་ནི་ཕྲེང་བ་བཞིན་དུ་ཡིན་ལ། ཚོགས་པ་ནི་དམག་ལ་སོགས་པ་བཞིན་ཡིན་པ་ལ་སོགས་པའི་སྒྲས་ཕྲེང་བ་དང༌། ནགས་ལ་སོགས་པ་བཟུང་ངོ༌། །ཇི་ལྟར་གྲོག་མོ་ལ་སོགས་པ་དུ་མ་འདི་རྣམས་སྔ་ཕྱིའི་རིམ་པས་གནས་པ་རྣམས་ལ་རང་གི་ངོ་བོ་ལས་མ་གཏོགས་པ་མེ་ཏོག་བརྒྱུས་པ་བཞིན་དུ་རྒྱུད་གཅིག་ནི་ཡོད་པ་མ་ཡིན་ནོ། །གང་གི་ཚེ་གླང་པོ་ཆེ་དང་རྟ་དང་རྐང་ཐང་ལ་སོགས་པ་བསྡུས་པ་རྣམས་ལས་ཐ་དད་པའི་དམག་ལ་སོགས་པ་གཞན་ཅུང་ཟད་ཅིག་ཀྱང་དེར་ཡོད་པ་མ་ཡིན་ཏེ། དེ་བཞིན་དུ་ཚོགས་པའང་ཡིན་ལ་འདི་ཡང་གཞན་དུ་རྒྱས་པར་དཔྱད་པས་འདིར་དཔྱད་པར་མི་བྱའོ། །དེའི་ཕྱིར་ཤེས་པ་འདི་ནི་བརྫུན་པ་ཡིན་ཏེ། རྟག་
ཏུ་དངོས་པོར་དམིགས་པ་དང་བྲལ་བའི་ཕྱིར་དོན་ལ་དཔྱད་མི་བཟོད་པའི་ཕྱིར་རོ། །དེ་དེ་ལྟར་ན་བདག་ལ་སོགས་པ་བདག་པོ་གང་ཡང་མེད་པས་གང་དང་འབྲེལ་པའི་སྡུག་བསྔལ་ལ་སོགས་པ་ཡང་མེད་དོ། །དེའི་ཕྱིར་སྡུག་བསྔལ་དེའི་བདག་པོར་གང་ཞིག་འགྱུར་ཏེ་གང་ཡང་མ་ཡིན་ནོ་ཞེས་པའི་དོན་ཏོ། །གལ་ཏེ་བདག་ལ་སོགས་པ་མེད་ན་དེའི་ཚེ་བདག་སྡུག་བཞིན་ཞེས་པ་དང༌། སེམས་ཅན་ཡིན་ཕྱིར་བདག་ལུས་བཞིན། །ཞེས་བྱ་བའི་དཔེ་ཇི་ལྟར་འཐད་ཅེ་ན། འདི་ནི་བདེན་ཏེ་འོན་ཀྱང་ཕོངས་པའི་སྒོ་ནས་སྒྲུབ་པར་བྱེད་པ་ནི་མ་ཡིན་ཏེ། འོན་ཀྱང་གཞན་ལ་བདག་ཏུ་འཛིན་པའི་མངོན་པར་ཞེན་པ་སྤང་བར་བྱ་བའི་དོན་དུ་ཡིན་ཏེ། གལ་ཏེ་གཞན་གྱི་བདག་ཏུ་འཛིན་པའི་མངོན་པར་ཞེན་པ་དེ་ལྡོག་པ་ཉིད་དུ་ཡིན་པ་དེའི་ཚེ་རྗེས་སུ་དཔག་པའི་སྦྱོར་བ་ལ་དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །འོན་ཏེ་མ་ལོག་པ་དེའི་ཚེ་བསམ་པ་དེ་ཉིད་ཀྱིས་རང་གི་ཆ་དང་གཞན་གྱི་ཆར་བྱས་ནས་དེ་རྟོགས་པར་བྱ་བའི་དོན་དུ་སྒྲུབ་པར་བྱེད་པ་དང་དཔེ་དགོད་པར་བྱ་བ་སྟེ། དེ་ལྟར་ན་དཔེ་མ་གྲུབ་པ་ཡིན་ཏེ། ཐ་སྙད་ལ་འཇུག་པར་བྱ་བའི་དོན་ཡིན་པས་སོ། །གཞན་ཡང་ཟིན་པའི་ཕུང་པོ་ཉིད་ལ་དགོངས་ནས་དཔེ་མཛད་པ་ལ་ཉམས་ཅུང་ཟད་ཀྱང་མེད་པས་འདི་ཉིད་དུ་བདག་གི་སྒྲ་འཇུག་པར་མཛད་དོ། །ད་ནི་སྐབས་སུ་བབ་པ་བསྡུ་བར་བཞེད་ནས། སྡུག་བསྔལ་དཔག་ཏུ་མེད་པ་ཞེས་བྱ་བ་ལ་སོགས་པ་གསུངས་པ་ལ། གསུངས་པའི་རིམ་པས་གང་རྣམས་ལ་བདག་པོ་མེད་པ་ཞེས་པའི་ཚིག་སྡུད་པ་ཡིན་ཏེ། བདག་གི་བ་མ་ཡིན་པ་གང་དང་ཡང་འབྲེལ་པ་མ་ཡིན་ནོ་ཞེས་པའི་དོན་ཏོ། །གང་ཅུང་ཟད་ཐམས་ཅད་ཉིད་ཀྱིས་མ་ཡིན་ནོ་ཞེས་ཁྱད་པར་དུ་བྱེད་དེ། གང་དུ་ཡང་གང་གི་ཡང་བདག་གི་བ་ཉིད་ཡོད་པ་མ་ཡིན་ལ་འདི་ལས་ཁྱད་པར་ཡོད་པ་མ་ཡིན་པའི་ཕྱིར་སྡུག་བསྔལ་ཉིད་བདག་དང་གཞན་གྱིར་དབྱེ་བ་མ་བྱས་པར་བཟློག་པར་བྱ་བ་ཉིད་དུ་འགྱུར་ལ་དེ་ལ་བདག་གི་བ་ལ་སོགས་པ་རྒྱུ་མཚན་གཞན་ནི་ཡོད་པ་མ་ཡིན་ཏེ་དེས་ན་གང་གི་བདག་གིས་བདག་གི་པ་ཉིད་ནི་བཟློག་པར་བྱ་བ་ཡིན་ལ། གཞན་དག་གིས་ནི་མ་ཡིན་ཞེས་པ་འདི་ངེས་པར་འགྱུར་བར་གང་གིས་བྱས་
ཏེ་ཁྱད་པར་གང་གིས་བྱས། དེ་ལྟར་ན་སྡུག་བསྔལ་ཉིད་ཀྱི་ཕྱིར་ཞེས་བྱ་བའི་གཏན་ཚིགས་ངེས་པ་མ་ཡིན་ནོ་ཞེས་སྨྲས་པ་ཡིན་ནོ། ཅི་སྟེ་སྡུག་བསྔལ་ཅན་འགའ་ཞིག་ཀྱང་འཁོར་བ་ན་གལ་ཏེ་ཡོད་པ་ཡིན་ན། དེ་ལྟ་ན་སྡུག་བསྔལ་བཟློག་པར་བྱ་བ་མ་ཡིན་པ་ཉིད་དུ་འགྱུར་ཏེ། སྙིང་རྗེའི་ཞིང་སྡུག་བསྔལ་ཅན་འགའ་ཡང་ཡོད་པ་མ་ཡིན་པའི་ཕྱིར་ཞེས་དོགས་ནས། ཅིའི་ཕྱིར་སྡུག་བསྔལ་ཞེས་བྱ་བ་ལ་སོགས་པ་གསུངས་ཏེ། བཟློག་པར་བྱ་བ་མ་ཡིན་པ་ཉིད་ཡིན་ཏེ། བདག་མེད་པའི་ཕྱིར་རོ་ཞེས་གལ་ཏེ་སེམས་ན། དེའི་ཚེ་འདིར་རིགས་པ་མ་ཡིན་ནོ། །ཅིའི་ཕྱིར་ཞེ་ན། ཐམས་ཅད་རྩོད་མེད་ཕྱིར་ཏེ། རྒོལ་བ་ཐམས་ཅད་ལ་རྩོད་པ་མེད་པའི་ཕྱིར་ལ་ལོག་པ་མེད་པར་རྟོགས་པ་མེད་པའི་ཕྱིར་རོ། །ཚུ་རོལ་མཛེས་པ་ཡང་འདིར་རང་གི་སྡུག་བསྔལ་སྤོང་བར་ཞུགས་པའི་ཕྱིར་རོ། །དེ་རྣམས་ཀྱིས་བདག་ཁས་བླངས་པ་ཉེས་པར་མ་གྱུར་པ་ནི་མ་ཡིན་ཏེ། དེའི་རང་བཞིན་མ་དམིགས་པས་སོ། །ཁས་བླངས་པ་ཙམ་གྱི་སྒོ་ནས་དེ་ཡོད་པར་གྲུབ་པ་ནི་མ་ཡིན་ཏེ། དེ་ལ་སྒྲུབ་པར་བྱེད་པ་མེད་པའི་ཕྱིར་དང༌། གནོད་པར་བྱེད་པ་དུ་མ་བརྗོད་པའི་ཕྱིར་རོ། །དེ་ལྟར་ན་སྡུག་བསྔལ་ཐམས་ཅད་བཟློག་པར་བྱ་བ་ཡིན་པ་དེའི་ཚེ་ཐམས་ཅད་བཟློག་པར་བྱའོ། །གལ་ཏེ་བཟློག་པར་བྱ་བ་མ་ཡིན་ན་དེའི་ཚེ་བདག་ཉིད་ཀྱང་སྟེ་ཟིན་པའི་ཕུང་པོ་ལྔའི་རང་བཞིན་གྱི་སྡུག་བསྔལ་ཡང་བཟློག་པར་བྱ་བ་མ་ཡིན་ཏེ། ཐམས་ཅད་དུ་ཁྱད་པར་མེད་པའི་ཕྱིར་རོ་ཞེས་མཇུག་སྡུད་དོ། །ཅི་སྟེ་ཐམས་ཅད་ཀྱི་སྡུག་བསྔལ་བསལ་བར་བྱ་བའི་ཕྱིར་བརྩོན་པ་སྙིང་རྗེ་གཞན་གྱི་དབང་དུ་གྱུར་པས་གཞན་སྡུག་བསྔལ་བས་སྡུག་བསྔལ་བ་ཡིན་པ་དེ་ལྟ་ན་ལྷུར་སྡུག་བསྔལ་ཐམས་ཅད་ཀྱི་རྒྱུ་དེ་ཉིད་དང་པོ་ཉིད་དུ་བསྐྱེད་པར་བྱ་བ་ཉིད་དུ་སྦྱར་བར་མི་རིགས་སོ་ཞེས་གཞན་གྱི་ཚིག་གིས་དོགས་པར་བྱས་ནས། སྙིང་རྗེ་ཞེས་བ་ལ་སོགས་པ་གསུངས་ཏེ། ནན་གྱིས་ཞེས་པ་ནི་རྩོལ་བས་སོ། །འདིར་ལན་གསུངས་པ། འགྲོ་བའི་སྡུག་བསྔལ་ལ་སོགས་པས་བྱས་པའི་རྣམ་པ་མང་པོ་བསམ་པར་བྱས་ན་སྙིང་རྗེ་བྱས་པའི་སྡུག་བསྔལ་འདི་ཅི་ལྟར་མང་སྟེ། སྙིང་རྗེ་ཅན་གྱི་སྡུག་བསྔལ་ནི་མང་བ་མ་ཡིན་ནོ་ཞེས་དགོངས་སོ། །གཞན་ཡན་
ལན་འདི་ཡང་ཡོད་དོ་ཞེས། གལ་ཏེ་སྡུག་བསྔལ་གཅིག་གིས་ཞེས་པ་ལ་སོགས་པ་གསུངས་ཏེ། སྐྱེས་བུ་གཅིག་གི་སྡུག་བསྔལ་གྱིས་གལ་ཏེ་སེམས་ཅན་མང་པོ་རྣམས་ཀྱི་སྡུག་བསྔལ་མེད་པར་འགྱུར་ཞིང་བཟློག་པར་འགྱུར་ན་དེའི་དེ་ལྟ་བུའི་སྡུག་བསྔལ་བསྐྱེད་པར་བྱ་ཞིང་བསྒྲུབ་པར་བྱའོ། །སྙིང་རྗེའི་བདག་ཉིད་ཅན་གྱི་དམ་པས་རང་དང་གཞན་གཉི་གའི་སྡུག་བསྔལ་བསལ་བར་བྱའོ། །བརྟགས་པ་ནི་མ་ཡིན་ནོ་ཞེས་བསྙད་པའི་ཕྱིར། དེས་ན་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་སྙིང་རྗེ་ཅན་གྱིས་རང་གཞན་གྱི་སྡུག་བསྔལ་བསྐྱེད་པར་བྱ་བ་ཉིད་དེ། དེའི་ཕྱིར་བྱང་ཆུབ་སེམས་དཔའ་མེ་ཏོག་ཟླ་མཛེས་ཀྱིས་རྒྱལ་པོ་ཉམས་པ་སྟེ་རྒྱལ་པོ་ལས་ཉམས་ཏེ་ཤེས་ཤིང་གོ་ཡང་ངོ༌། །བདག་གི་སྡུག་བསྔལ་མ་བསལ་བ་ནི་མ་བཟློག་པ་ཡིན་ཏེ་བཏང་སྙོམས་སུ་བྱས་ཞེས་པའི་ཐ་ཚིག་གོ །དེ་བཞིན་དུ་རྒྱལ་པོའི་ཕྱིར་མའི་སྡུག་བསྔལ་ཡང་ངོ༌། །སྡུག་བསྔལ་ཐམས་ཅད་ཀྱིས་མི་ཟད་བྱས་པ་སྟེ། །སྡུག་བསྔལ་གྱིས་ཞེས་སྐབས་སུ་བབ་པ་ལ་དྲུག་པའི་མཐའ་ཅན་གྱིས་འབྲེལ་ཏོ། །གང་མེ་ཏོག་ཟླ་མཛེས་ཀྱི་དེ་ལྟ་བུ་བྱུང་བའི་ལས་འདི་ལྟར་ཡང་འདས་པའི་དུས་ན་རིན་པོ་ཆེ་པད་མའི་རྣམ་པར་དག་པ་མངོན་པར་འཕགས་པའི་རྒྱལ་པོ་ཞེས་བྱ་བའི་དེ་བཞིན་གཤེགས་པ་བྱུང་ཞིང་རྒྱལ་པོ་ཡང་བྱུང་བར་གྱུར་པ་ན་བཅོམ་ལྡན་འདས་དེ་ཡང་སངས་རྒྱས་ཀྱི་མཛད་པ་མཛད་ཅིང་ཡུན་རིང་དུ་བཞུགས་ནས་ཡོངས་སུ་མྱ་ངན་ལས་འདས་སོ། །དེའི་ཚེ་ཡོངས་སུ་མྱ་ངན་ལས་འདས་ནས་བསྟན་པ་ནུབ་པར་གྱུར་པ་ན་རྒྱལ་པོ་དཔས་བྱིན་ཞེས་བྱ་བ་བྱུང་བར་གྱུར་ཏེ། དེའི་ཕོ་བྲང་འཁོར་ནི་རིན་ཆེན་ལྡན་པ་ཞེས་བྱ་བ་ཡིན་ལ། དེའི་ཚེ་དེའི་དུས་ན་སེམས་ཅན་རྣམས་ལྟ་བ་ལོག་པར་གྱུར་ཏོ། །དེ་རྣམས་ལ་ཐུགས་བརྩེ་བའི་དོན་དུ་བྱང་ཆུབ་སེམས་དཔའ་རབ་ཏུ་བྱུང་བ་མང་པོ་བྱུང་བར་གྱུར་ཏེ་ཡུལ་འཁོར་དང་གྲོང་རྡལ་དེ་ལས་དེ་རྣམས་ཀྱང་བསྐྲད་ནས་ཆོས་སྨྲ་བ་མེ་ཏོག་ཟླ་མཛེས་དང་ལྷན་ཅིག་ཏུ་ཀུན་ཏུ་བཟང་པོ་ཞེས་བྱ་བའི་དགོན་པའི་ནགས་ཁྲོད་ན་བརྟེན་ཅིང་གནས་སོ། །དེ་ནས་ཡང་བྱང་ཆུབ་སེམས་དཔའ་མེ་ཏོག་ཟླ་མཛེས་སེམས་ཅན་རྣམས་
ལ་སྙིང་རྗེའི་བསམ་པས་དབེན་པར་ནང་དུ་ཡང་དག་འཇོག་ལ་ཞུགས་ཏེ། བདག་གིས་གྲོང་དང་གྲོང་རྡལ་དང་ཡུལ་འཁོར་དུ་སོང་ལ་སེམས་ཅན་ལམ་ངན་པར་ཞུགས་པ་རྣམས་དགེ་བའི་ལམ་ལ་གཞག་པར་བྱའོ་ཞེས་སེམས་ལ་རྣམ་པར་རྟོག་པ་སྐྱེས་ཏེ། ཚངས་པ་མཚུངས་པར་སྤྱོད་པ་རྣམས་ལ་དོན་དེ་སྨྲས་སོ། །དེ་རྣམས་ཀྱིས་བཀག་པར་གྱུར་ཀྱང་བདག་ཉིད་ཉམས་པ་དང་རྒྱལ་པོ་ཡང་ཉམས་པར་ཤེས་བཞིན་དུ་ནགས་ཁྲོད་དེ་ལས་བྱུང་བར་གྱུར་ཏེ། རིམ་གྱིས་ཆོས་སྟོན་ཅིང་རྒྱལ་པོ་དེའི་ཕོ་བྲང་གི་འཁོར་དུ་ཕྱིན་པར་གྱུར་ཏོ། །དེས་རྒྱལ་པོའི་བུ་དང༌། བློན་པོ་དང། མདུན་ན་འདོན་ལ་སོགས་པ་སེམས་ཅན་མང་པོ་རྣམས་ལ། ཇི་ལྟར་འདུལ་བར་ཐབས་རྣམ་པ་དུ་མས་ཡང་དག་པའི་ལམ་ལ་འཇོག་པའི་ཚེ་རྒྱལ་པོ་དེ་རྒྱལ་པོའི་ལམ་དུ་མཐོང་བ་བཞིན་དུ་ཁྲོས་ཏེ། ཕྲག་དོག་གིས་བསླངས་པའི་སེམས་ཀྱིས་འདིས་སྐྱེ་བོ་ཐམས་ཅད་རངས་པར་བྱས་སོ་སྙམ་ནས་བསད་པའི་དོན་དུ་རང་གི་བུ་རྣམས་ལ་བསྒོ་བ་དང༌། དེ་རྣམས་ཀྱང་དེ་གསོད་པ་ལ་ཕྱིར་ཕྱོགས་པར་གོ་ནས་གསོད་པའི་གཤེད་མ་དགའ་བྱེད་ལ་བཀའ་བསྒོ་བའོ། །དེས་ཀྱང་རྒྱལ་པོའི་བཀའ་བཞིན་དུ་བྱེད་པས་ལག་པ་དང༌། རྐང་པ་ལ་སོགས་པ་རིམ་གྱིས་བཅད་ནས་མིག་དག་ཀྱང་སྐམ་པས་བྱུང་སྟེ། སྲོག་དང་བྲལ་བར་བྱས་སོ། །དེ་ནས་དགེ་སློང་དེ་རྒྱལ་པོའི་ལམ་དུ་སྲོག་དང་བྲལ་བའི་ལུས་ལས་ངོ་མཚར་རྨད་དུ་བྱུང་བ་དུ་མ་དེ་མཐོང་ནས། དགེ་སློང་འདི་ནི་བྱང་ཆུབ་སེམས་དཔའ་ཉིད་དོ་ཞེས་རྒྱལ་པོས་ཆོ་ངེ་བྱས་ནས་ཡོངས་སུ་གདུང་བར་གྱུར་ཏེ། རྣམ་པ་དུ་མས་སྨྲེ་སྔགས་འདོན་ཏོ། །དེ་ལྟར་མེ་ཏོག་ཟླ་མཛེས་ཀྱི་དེ་ལྟ་བུ་བྱུང་བ་ཅུང་ཟད་འདིར་མདོར་བསྡུས་ནས་བརྗོད་པ་ཡིན་ཏེ། ཡང་རྒྱས་པར་ནི་ཏིང་ངེ་འཛིན་རྒྱལ་པོའི་མདོར་བསྟན་པས་དེ་ཉིད་དུ་རིག་པར་བྱའོ། །ཕ་རོལ་སྡུག་བསྔལ་བས་སྡུག་བསྔལ་བའི་སྙིང་རྗེ་ཅན་རྣམས་ནི་སྡུག་བསྔལ་ཆེན་པོས་ཀྱང་གནོད་པར་འགྱུར་བ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་རྒྱུད་ནི་ཞེས་པ་ལ་སོགས་པ་གསུངས་ཏེ། དེ་ལྟར་ནི་བདག་དང་གཞན་དུ་མཉམ་པའོ། །རྒྱུད་བསྒོམས་པ་ནི་སེམས་ཀྱི་རྒྱུད་ལྷུན་གྱིས་གྲུབ་པས་འཇུག་པའོ། །
གཞན་གྱི་སྡུག་བསྔལ་ཞི་ཞིང་མཉམ་པར་དགའ་བ་སྟེ། །བདེ་བའི་རྒྱུ་གང་ལ་ཡོད་པ་དེ་ལ་དེ་སྐད་ཅེས་བྱ་སྟེ། བདག་གི་བདེ་བ་ཡང་གཞན་གྱི་སྡུག་བསྔལ་བས་སྡུག་བསྔལ་བ་ཉིད་གང་རྣམས་ཀྱིས་ཡིན་པ་ཞེས་པའི་དོན་ཏོ། །དེ་རྣམས་མནར་མེད་པར་འཇུག་པ་རྣམས་ནི་གཞན་སྡུག་བསྔལ་ལས་གདོན་པའི་དོན་དུ་སྡུག་བསྔལ་དེ་ཉིད་ལ་བདེ་བར་སེམས་པ་རྣམས་སོ། །འདི་ཉིད་འདིར། པདྨའི་མཚོ་རུ་ངང་པ་ལྟར། །ཞེས་གསུངས་ཏེ། མནར་མེད་པའི་སྡུག་བསྔལ་ཡང་བདེ་བ་ཉིད་ཡིན་ཏེ། གང་རྣམས་ཀྱི་གཞན་གྱི་སྡུག་བསྔལ་གྱི་དོན་དུ་ཡིན་པས་སྡུག་བསྔལ་གྱི་རྒྱུ་གཞན་གང་གིས་སྡུག་བསྔལ་བར་འགྱུར། གཞན་ཡང་དེ་རྣམས་ཀྱི་བདེ་བ་ཡང་ཐུན་མོང་མ་ཡིན་པ་ཉིད་གཞན་གྱི་སྡུག་བསྔལ་གྱིས་སྐྱེ་བར་འགྱུར་ཏེ། དེ་བས་ན་བསྟན་པའི་ཕྱིར། སེམས་ཅན་རྣམས་ནི་གྲོལ་བ་ན། །ཞེས་གསུངས་ཏེ། སེམས་ཅན་རྣམས་ལ་སྡུག་བསྔལ་གྱི་འཆིང་བ་ལས་གྲོལ་བར་བྱེད་པ་ཡོད་པ་ལའོ། །གང་ཡིན་དེ་ཞེས་པ་ནི་དེ་རྣམས་ཉིད་ཀྱིས་ཉམས་སུ་མྱོང་བས་གྲུབ་པའི་ཕྱིར་འདི་ཙམ་ཞེས་བརྗོད་པར་ནུས་པ་མ་ཡིན་ལ། དེ་ཉིད་ཀྱི་ཕྱིར་དགའ་བའི་རྒྱ་མཚོ་ཡིན་ཏེ་མགུ་བའི་རྒྱ་མཚོ་སྙིང་རྗེ་དང་ལྡན་པའི་རྒྱུད་རྣམས་ལ་སྐྱེ་བར་འགྱུར་རོ། །དགའ་བའི་རྒྱ་མཚོ་དེ་ཉིད་ཀྱིས་མཐར་ཕྱིན་པ་ནི་བདེ་བ་གཞན་ལ་ཕྱིར་ཕྱོགས་པ་ལས་ཡོངས་སུ་ཐོབ་པ་སྟེ། བདེ་བ་ཐམས་ཅད་སྤངས་པ་ཡིན་ནོ་ཞེས་བྱ་བའི་ཐ་ཚིག་གོ །ཅི་སྟེ་དེ་ཉིད་བདེ་བའི་མཐར་ཐུག་པ་ཅི་ལྟར་ཡིན་ཏེ། གཅིག་ཏུ་ཉོན་མོངས་པའི་ཡོངས་སུ་གདུང་བ་ཉེ་བར་ཞི་བས་རྣམ་པར་གྲོལ་བའི་བདེ་བ་ཡིན་པའི་ཕྱིར་ཤིན་ཏུ་ལྷག་པ་ཡིན་ནོ་ཞེ་ན། རོ་བྲལ་ཐར་པ་ཞེས་པ་ལ་སོགས་པ་གསུངས་ཏེ། ཐར་པ་ཡང་དེ་ལ་ལྟོས་ནས་དེ་རྣམས་རོ་དང་བྲལ་བ་ཉིད་དུ་སྣང་ངོ༌། །དགོངས་པ་ནི་འདི་ཡིན་ཏེ། གཞན་ལ་ཕན་པ་དང་བདེ་བ་བསྒྲུབ་པ་ཉིད་དེ་རྣམས་ཀྱི་རོའི་མཆོག་ཉིད་ཀྱིས་ཞུགས་པའི་ཕྱིར་དེ་ལ་མངོན་པར་ཞེན་པ་ཡིན་ལ། སྙིང་རྗེ་དང་ལྡན་པ་རྣམས་ལ་བདེ་བ་དེ་ཉིད་དགོས་པ་ཡིན་གྱི་ཐར་པ་ནི་མ་ཡིན་ནོ། །དེ་གལ་ཏེ་ཉམས་སུ་ལེན་པ་ལ་ཆེད་ཆེར་བྱེད་ན་ཐར་པ་ཡང་མངོན་དུ་གྱུར་ན་ཡང་གཞན་གྱི་དོན་དེ་
ཉིད་ལ་ཆེད་དུ་གཉེར་བ་ནི་མ་ཡིན་ནོ། །གང་གསུངས་པ། འགྲོ་བ་མ་ལུས་རང་བཞིན་མངོན་དུ་མཛད་གང་གི །དེ་བཞིན་གཤེགས་པ་ཉིད་ནི་ཞར་ལ་བྱུང་བ་སྟེ། །གཞན་དབང་གྱུར་པ་ཁྱོད་ཀྱི་ཡོན་ཏན་རྣམས་ལས་ནི། །ཅུང་ཟད་ཙམ་ཞིག་ཚིག་གི་རྗོད་བྱེད་སྙན་དང་གས་མཁན། །ཞེས་སོ། གང་གི་ཕྱིར་ཐར་པ་ལ་རིངས་པ་མེད་པ་དེའི་ཕྱིར་ཏེ། རྒྱུ་འདི་ལས་གཞན་གྱི་དོན་བྱས་ཀྱང་སྟེ། དེ་ལ་སེམས་གཞོལ་བར་ཞུགས་པས་རློམ་སེམས་དང་རྒྱགས་པ་མ་ཡིན་ལ། ངོ་མཚར་བ་ཡང་མེད་དེ་དཀའ་བ་སྤྱད་པས་རྨད་དུ་བྱུང་བའི་བློ་ཡང་དེ་རྣམས་ལ་སྐྱེ་བར་འགྱུར་བ་མ་ཡིན་ཏེ། བདག་གིས་དམ་པའི་ལས་བྱས་པ་འདིའི་ལས་ཀྱི་རྣམ་པར་སྨིན་པའི་འབྲས་བུ་འཇིག་རྟེན་ཕ་རོལ་དུ་འབྱུང་བར་འགྱུར་རོ་ཞེས་པ་དང༌། རྣམ་པར་སྨིན་པའི་འབྲས་བུ་ལ་འདོད་པ་ཡང་སྐྱེ་བ་མ་ཡིན་ནོ། །འདིའི་རྒྱུ་གཅིག་ཏུ་གཞན་དོན་ལ་དགའ་བས་ཞེས་གསུངས་ཏེ། གང་གཞན་གྱི་དོན་རྣམས་ལ་གཅིག་ཏུ་སྟེ། དགོས་པ་གཞན་ལ་ལྟོས་པ་མེད་པས་ཁྱད་པར་དུ་ཤིན་ཏུ་དགའ་བ་ཡིན་ཏེ་དེ་ཉམས་སུ་ལེན་པ་ལ་ཚིམ་པ་མེད་པ་ཡིན་ལ་རྒྱུ་དེས་སོ། །འདིས་ནི་བདག་དང་གཞན་དུ་མཉམ་པའི་འབྲས་བུའི་སྐབས་ཀྱི་ཁྱད་པར་དེ་བསྟན་པར་འགྱུར་རོ། །དེ་ལྟར་ན་ཞར་ལ་བྱུང་བ་དེ་ལྟར་བརྗོད་ནས་སྐབས་སུ་བབ་པ་མཇུག་བསྡུ་བའི་སྒོ་ནས་བསྟན་པར་བྱ་བའི་ཕྱིར། དེ་བས་ཞེས་བྱ་བ་ལ་སོགས་པ་གསུངས་ཏེ། གང་གི་ཕྱིར་བརྗོད་པའི་རིམ་པས་བདག་དང་གཞན་ལ་ཁྱད་པར་ཅུང་ཟད་ཀྱང་མེད་པ་དེ་བས་ནའོ། །ཆུང་ངུ་ན་ཞེས་པ་ནི་སྡུག་བསྔལ་གྱི་རྒྱུ་ཅུང་ཟད་ཙམ་མི་སྙན་པ་ལས་ཀྱང་བདག་བསྲུང་ཞིང་སྦ་བར་བྱའོ། །དེ་ལྟར་གྱུར་ན་ཡང་བདག་དང་གཞན་དུ་མཉམ་པར་བསྒྲུབ་པ་ཞེས་བྱ་བ་འདི་ཉམས་སུ་བླང་བར་མི་ནུས་པ་ཉིད་ཡིན་ལ། དེ་བས་ཀྱང་བདག་དང་གཞན་དུ་བརྗེ་བ་ནི་ཤིན་ཏུ་ཡང་མི་ནུས་པ་ཡིན་ཏེ། དེ་ཇི་ལྟར་ན་བླང་བར་བྱ་བ་ཡིན་ཞེ་ན། གོམས་པ་ཡིས་ནི་ཞེས་བྱ་བ་ལ་སོགས་པ་གསུངས་པ་ལ། དེ་བཞིན་དུ་བརྗོད་པའི་རིམ་པས་འདིར་དངོས་པོ་གོམས་པའི་སྤྱོད་ཡུལ་དུ་འགྱུར་བ་ནི་དཀའོ་ཞེས་པའི་བློ་བསྐྱེད་པར་མི་བྱ་སྟེ། གང་གི་ཕྱིར་གཞན་དག་སྟེ་ཕ་མ་དང་འབྲེལ་པའི་ཁུ་བ་ཁྲག་གི་
ཐིགས་པ་ལ་ལུས་ཞེས་ཞེན་པ་རྣམས་ལ་གོམས་པས་བདག་གོ་ཞེས་ཤེས་པར་འགྱུར་ཏེ་བསྟན་པ་ཉིད་ཀྱིས་འཇུག་གོ །འོན་ཏེ་བདག་གི་ཞེས་ཤེས་པའི་རྒྱུ་མཚན་གཞན་ཡོད་པ་ཡིན་ཏེ། ཅིའི་ཕྱིར་འདིར་མི་འཐད་ཅེ་ན་དངོས་པོ་མེད་པར་གྱུར་ཀྱང་ཞེས་པ་ལ་སོགས་པ་གསུངས་ཏེ། བདག་ལ་སོགས་པའི་དངོས་པོའི་རྒྱུ་མཚན་དུ་གྱུར་པ་མེད་ན་ཡང་གོམས་པ་འབའ་ཞིག་ལས་དེ་ལྟར་སྒོམ་པར་བྱེད་པས་གཞན་ལ་ཡང་ངེས་པ་ཉིད་དུ་འགྱུར་རོ། །དེ་ཉིད་དེ་བཞིན་ཞེས་པ་ལ་སོགས་པ་གསུངས་ཏེ། བདག་ཅེས་ཅིའི་ཕྱིར་མི་བཟུང་སྟེ་གཟུང་བར་བྱ་བ་ཉིད་དུ་ཤིན་ཏུ་ནུས་པ་ཡིན་ལ། དེའི་རང་བཞིན་ཉིད་དུ་རང་གི་ལུས་གྲུབ་པ་ཉིད་དོ། །གཞན་དུ་ན་དེ་དང་མཉམ་པ་ཉིད་དུ་ཡང་མི་འགྱུར་ཏེ། དེ་ལྟར་ན་བདག་དང་གཞན་དུ་བརྗེ་བ་བཀའ་བས་བསྒྲུབ་དགོས་པ་མ་ཡིན་ནོ། །དེ་ལྟར་བདག་དང་གཞན་དུ་མཉམ་པ་བསྟན་ནས། བདག་དང་གཞན་དུ་བརྗེ་བ་བསྟན་པར་བཞེད་ནས། བདག་ཉིད་སྐྱོན་བཅས་ཞེས་བྱ་བ་ལ་སོགས་པ་གསུངས་ཏེ། རྟོགས་པ་དང་ལྡན་པ་རྣམས་ཀྱིས་ཡོན་ཏན་དང་སྐྱོན་བླང་བ་དང་དོར་བ་དག་གི་རྒྱུ་མཚན་བདག་དང་གཞན་ལ་དེ་མཐོང་ནས་བླང་བ་དང་དོར་བར་བྱ་བ་དག་བསྒོམ་ཞིང་གོམས་པར་བྱའོ། །བདག་ལུས་ཡོངས་སུ་དོར་བ་ནི་བདག་ཉིད་ལ་གཞན་དུ་བྱའོ། །གཞན་བླང་བ་ཞེས་པ་ནི་གཞན་རྣམས་ལ་བདག་ཉིད་དུའོ། །དེ་ལྟར་ན་འདིས་བདག་དང་གཞན་དུ་བརྗེ་བའི་ཐབས་གཞན་བསྟན་པར་འགྱུར་རོ། །དེ་ལྟར་གྱུར་ན་སེམས་ཅན་རྣམ་པ་ཐ་དད་པ་མང་པོ་རྣམས་ལ་ཇི་ལྟར་སོ་སོར་བདག་དང་གཞན་དུ་བརྗེ་བ་བསྒོམ་པར་ནུས་ཤེ་ན། ཇི་ལྟར་ལག་པ་ལ་སོགས་པ། །ཞེས་པ་ལ་སོགས་པ་གསུངས་ཏེ། གང་སྟེ་ཡང་ལག་པ་ལ་སོགས་པ་ཐ་དད་པ་ཡིན་པ་དེ་ལྟ་ན་ཡང་ལུས་སུ་ཞེན་པའི་ཡན་ལག་ཉིད་ཀྱིས་སུ་ཞེས་དེ་ལ་གཅིག་ཏུ་ཡུལ་དུ་བྱེད་པ་དེ་བཞིན་དུ་འགྲོ་བ་ཡང་མ་ལུས་པ་གཅིག་ཉིད་དུ་ཞེན་པས་དེའི་ཡན་ལག་ཉིད་ཀྱིས་སྲོག་ཆགས་ལ་འགྲོ་བ་ཞེས་གཅིག་ཉིད་དུ་དེ་ཅིའི་ཕྱིར་མི་འཛིན། བདག་དང་གཞན་དུ་བརྗེ་བ་འདི་ལ་དཀའ་བའི་བློ་གྲོས་མི་བྱ་སྟེ། གོམས་པས་ཐོབ་པ་ཡིན་ནོ་ཞེས་
བསྟན་པའི་ཕྱིར། ཇི་ལྟར་བདག་མེད་ཅེས་པ་ལ་སོགས་པ་གསུངས་ཏེ། དོན་བཤད་ཟིན་པ་ལ་བདག་དང་གཞན་དུ་བརྗེས་པ་ན་འཇིག་རྟེན་ཕ་རོལ་དུ་འབྲས་བུ་ལ་འདོད་པ་སྐྱེས་པ་མ་ཡིན་ནོ། །གང་དང་འདྲ་བར་ཞེ་ན། བདག་ཉིད་ཀྱི་ཟས་ཟོས་ནས་ཏེ། སྦྱིན་པ་འདིས་བདག་དང་སེམས་ཅན་ལོངས་སྤྱོད་ཕུན་སུམ་ཚོགས་པར་གྱུར་ཅིག་ཅེས་འབྲས་བུ་མི་འདོད་པ་བཞིན་ནོ། །དེ་བཞིན་དུ་ནི་དེ་ལྟར་རོ། །དེ་ལྟར་ན་འདི་གོམས་པའི་ཡུལ་ཉིད་དུ་བསྟན་ནས། བཟློག་པ་ལ་གོམས་པར་བྱ་བར་རང་གི་སེམས་སྦྱར་བའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ། འདོད་པ་ནི་མངོན་པར་འདོད་པའི་དངོས་པོ་ཐོབ་པའི་ཆེད་དུ་གདུང་བ་སྟེ། སེམས་ཀྱི་ཆོས་ཡིན་པའམ་ལུས་ཀྱི་སྡུག་བསྔལ་ཡིན་པ་ནི་དཔེར་ན་འགོ་བའི་ནད་ལྟ་བུའོ། །མྱ་ངན་ནི་སྡུག་བསྔལ་དང་བྲལ་བ་ལ་སོགས་པས་བྱས་པའི་སྡུག་བསྔལ་ལོ། །སོགས་པའི་སྒྲས་ནི་ལུས་དང་སེམས་ཀྱི་སྡུག་བསྔལ་གཞན་བཟུང་ངོ༌། །དེ་ཉིད་དཔེའི་སྒོ་ནས་བསྟན་པར་བྱ་བའི་ཕྱིར། དེ་བས་མགོན་པོ་ཞེས་པ་ལ་སོགས་པ་གསུངས་ཏེ། དེ་ཉིད་ཀྱི་ཕྱིར་བཅོམ་ལྡན་འདས་འཕགས་པ་སྤྱན་རས་གཟིགས་དབང་ཕྱུག་གིས་རང་གི་མཚན་ཡང་བྱིན་གྱིས་བརླབས་ཏེ། འཕགས་པ་སྤྱན་རས་གཟིགས་དབང་ཕྱུག་ཅེས་བདག་ཉིད་ཀྱི་མཚན་བྱིན་གྱིས་བརླབས་པ་དང་ལྡན་པ་ཡིན་ལ། འཁོར་གྱི་འཇིགས་པ་ནི་སྐྲག་པ་ཡིན་ཏེ། སེམས་བསྐུམས་ནས་འཇུག་པ་ཡིན་ལ། སྤོབས་པ་དང་བྲལ་ཞེས་པའི་བར་དུའོ། །འགྲོ་བ་ནི་འཇིག་རྟེན་པ་ཡིན་ལ་དེ་ལས་འཇིགས་པའམ་དེ་ཉིད་ཀྱིས་འཇིགས་པའོ། །དེ་བསལ་བའི་ཕྱིར་ནི་དེ་སྤོང་བའི་དོན་དུའོ། །མཚན་གང་སེམས་ཅན་འགའ་ཞིག་སེམས་མོས་པས་ཀྱང་བདག་གི་མིང་འཛིན་པར་བྱེད་ན་དེ་ལ་སྡུག་བསྔལ་ཐམས་ཅད་རྣམ་པ་ཐམས་ཅད་དུ་འབྱུང་བར་མི་འགྱུར་ལ། ཐ་ན་འཁོར་གྱིས་འཇིགས་ཤིང་སྐྲག་པ་ཡང་འབྱུང་བར་མི་འགྱུར་རོ་ཞེས་བྱིན་གྱིས་བརླབས་སོ། །གཞན་ཡང་དཀའ་བའི་ཚོར་བ་ལ་ཡང་གོམས་པས་དགའ་བར་འགྱུར་བས་ན་བདག་ཅག་གི་ལྡོག་པར་མི་རིགས་པ་ཉིད་དོ་ཞེས་བསྟན་པའི་ཕྱིར་དཀའ་ལས་ཤེས་པ་ལ་སོགས་པ་
གསུངས་ཏེ། འདི་ནི་མི་ནུས་སོ་ཞེས་ནས་ལྡོག་པར་མི་བྱའོ། །ཅིའི་ཕྱིར་ཞེ་ན། གང་ལས་གོམས་པའི་སྟོབས་འདིར་མཐོང་སྟེ། གང་གིས་ཐོས་ནས་འཇིགས་པ་ཞེས་པ་ནི་རྣ་བའི་ལམ་དུ་གྱུར་ན་སྐྲག་པ་དང་འཇིགས་པ་སྐྱོ་བར་འགྱུར་བ་ལ། ཕྱི་ནས་རྒྱུ་ཅུང་ཟད་ཐོབ་པ་ལས་སྡུག་པར་གོམས་པའི་དབང་གིས་འཇིགས་པའི་རྒྱུ་དེ་ཉིད་ཀྱིས་མེད་པར་གྱུར་ན་མི་དགའ་བར་འགྱུར་རོ། །གཞན་ཡང་དགོས་པ་འདི་ཡང་ཡོད་པར་མཐོང་བ་ཡིན་ཏེ། དེ་ལ་གུས་པའི་སྒོ་ནས་གོམས་པའི་དབང་དུ་གྱུར་པར་བྱའོ་ཞེས་བསྟན་པའི་ཕྱིར། གང་ཞིག་བདག་དང་ཞེས་པ་ལ་སོགས་པ་གསུངས་ཏེ། གང་ཞིག་མྱུར་ཞིང་མགྱོགས་པ་ཉིད་དུ་སྡུག་བསྔལ་གྱི་འཇིགས་པ་ཐམས་ཅད་ལས་བསྐྱབ་ཅིང་བསྲུང་བར་འདོད་པས་དེ་སྤྱད་པར་བྱ་སྟེ། བདག་དང་གཞན་དུ་བརྗེ་བའོ། །ཅི་ལྟ་བུར་གྱུར་པ་ཞེ་ན། གསང་བའི་དམ་པ་སྟེ་དེའི་རིགས་ཅན་མ་ཡིན་པ་རྣམས་སྐྲག་པའི་རྒྱུ་ཡིན་པའི་ཕྱིར་རམ། མ་དད་པ་བསལ་བའི་ཕྱིར་ཤིན་ཏུ་ཡང་གསང་བར་བྱ་སྟེ། གཞན་དུ་ན་དེས་སྤངས་པས་དེ་རྣམས་ངན་སོང་དུ་འགྲོ་བར་འགྱུར་རོ། །གང་བདག་ཉིད་སྐྱོན་བཅས་ཞེས་པ་ལ་སོགས་པ་གསུངས་པའི་བདག་ཉིད་དང་གཞན་གྱི་བདག་ཉིད་ཉེས་པ་དང་ཡོན་ཏན་དེ་རྣམས་རྒྱས་པར་བསྟན་པའི་ཕྱིར། བདག་ལུས་ཞེས་པ་ལ་སོགས་པ་གསུངས་ཏེ། བརྟན་ཆགས་པས་ཞེས་པ་ནི་བདག་ཏུ་འཛིན་པས་བསྐྱེད་པའི་མངོན་པར་ཞེན་པས་སོ། །ཆུང་ཞེས་པ་ནི་འཁོར་གྱི་འཇིགས་པ་སྐད་ཅིག་མ་ཅུང་ཟད་ལས་ཀྱང་ངོ༌། །འཁོར་གྱི་འཇིགས་པའི་རྒྱུ་ཡིན་པས་ན་འཇིགས་པའམ། རྣམ་པར་རྟོག་པས་བརྟགས་པའི་འཇིགས་པ་འདི་འཇིགས་པ་ཞེས་བརྗོད་དོ། །འདི་ལྟ་བུར་གྱུར་བའི་བདག་ཉིད་ལ་སེམས་དང་ལྡན་པ་སུ་ཞིག་སྡང་བར་གྱུར་པའི་བདག་ཉིད་ལ་སེམས་དང་ལྡན་པ་སུ་ཞིག་སྡང་བར་མི་བྱེད་དེ་སྡང་བར་བྱ་བ་ཉིད་དེ་ཞེས་པའི་དོན་ཏོ། །དེ་གང་ཡིན་ཞེ་ན། དགྲ་བཞིན་དུ་གང་གི་འཇིགས་པ་སྐྱེད་པར་བྱེད་པ་སྟེ། བརྗོད་པའི་རིམ་པས་དགྲ་བཞིན་དུ་གང་ཞིག་འཇིགས་པ་སྐྱེད་པར་བྱེད་པའོ། །བསམ་པ་ནི་འདི་ཡིན་ཏེ། དགྲ་ལ་ཡང་སྡང་བར་བྱེད་དོ། །སྡུག་བསྔལ་སྐྱེད་པར་
བྱེད་པ་ཡིན་པའི་ཕྱིར་རོ། །དེ་འདི་ལ་ཡང་ཡོད་པས་ཅིའི་ཕྱིར་མི་འཇིགས་ཏེ། འཇིགས་པར་བྱ་བའོ། །དེ་ལ་ཉེས་པ་གཞན་ཡང་བརྗོད་པའི་ཕྱིར། དམན་གང་ཞེས་པ་ལ་སོགས་པ་གསུངས་ཏེ། དམན་པ་ནི་ནད་པ་ཡིན་ལ། བཀྲེས་པ་ནི་བྲུ་བ་ཚ་བ་ཡིན་ཞིང༌། སྐོམ་པ་ནི་ལྟུང་བ་འདོད་པ་ཡིན་ལ། སོགས་པའི་སྒྲས་ནི་གོས་ལ་སོགས་པ་དང་བྲལ་བའོ། །འདི་རྣམས་ལས་གསོ་བའི་ཆོ་ག་ནི་སྤྱིར་འཆོས་པ་ཡིན་ཏེ། ཉེ་བར་ཞི་བར་བྱེད་པའི་ཐ་ཚིག་གམ། འདི་དག་གི་ཕྱིར་འཆོས་པ་སྟེ། དེ་གསོ་བར་བྱེད་འདོད་པ་དེས་གང་ཞིག་ན་བའི་ཟས་དང་སྨན་ལ་སོགས་པའི་རྒྱུ་མཚན་གྱིས་བྱ་དང་ཉ་དང་རི་དགས་དག་གསོད་པར་བྱེད་དེ་སྲོག་དང་བྲལ་བར་བྱེད་པའོ། །མཁས་པ་སུ་ཞིག་ལུས་དེ་ལ། །འདོད་ཅིང་ཞེས་པ་ལ་སོགས་པ་འཆད་པར་འགྱུར་བ་དང་འབྲེལ་ཏོ། །ལམ་སྒུག་པར་བྱེད་པས་གནས་ཏེ། ལམ་མ་ཡིན་པ་ནས་འཇུག་པར་བྱེད་པར་འགྱུར་བའི་རྐུན་མོ་ཉིད་ལ་བརྗོད་དེ། །གཞན་གྱི་རྫས་འཕྲོག་པར་བྱེད་དོ་ཞེས་པའི་ཐ་ཚིག་གོ །དེ་བཞིན་དུ་ཕ་དང་མ་ཡང་སྟེ་དེ་དག་ཀྱང་བདག་ཉིད་ཀྱི་རྙེད་པའི་རྒྱུ་དང་རིམ་གྲོའི་རྒྱུས་ཀྱང་གསོད་པར་བྱེད་དེ། འདི་དག་གསོན་པའི་དོན་གྱིས་རྙེད་པའམ་བཀུར་སྟི་བདག་གིར་གྱུར་ཅིག་ཅེས་བསམས་ནས་གསོད་པར་བྱེད་དོ། །དཀོན་མཆོག་གསུམ་གྱིས་ནི་སངས་རྒྱས་དང་ཆོས་དང་དགེ་འདུན་གྱི་བདག་ཉིད་ཀྱི་ཡིན་ཏེ། དཀོར་ནི་ནོར་ཡིན་ལ། བརྐུས་ནས་ནི་བླངས་ནས་སོ། །སྔར་བརྗོད་པའི་རྒྱུ་མཚན་དུ་འདིར་ཡང༌། མཁས་པ་སུ་ཞིག་ལུས་དེ་ལ། །ཞེས་བྱ་བ་དང་འབྲེལ་ཏོ། །གང་གིས་ཏེ་ཕ་བསད་པ་ལ་སོགས་པ་བྱས་པས་མནར་མེད་པ་ལ་སོགས་པའི་མེས་དེའི་ལས་ཀྱིས་སྐྱེས་པ་སྟེ་སྲེག་པར་འགྱུར་ཏེ། འདི་ནི་མཚོན་པ་ཙམ་ཡིན་ལ། དེ་ལས་གཞན་པའི་དམྱལ་བའི་བུད་ཤིང་གིས་ཀྱང་སྲེག་གོ །ཡང་ན་དཀོན་མཆོག་གསུམ་གྱི་དཀོར་རྐུ་བར་བྱེད་པ་དེ་རབ་ཏུ་ཚ་བ་ལ་སོགས་པའི་སྡུག་བསྔལ་ཡིན་ཏེ། མནར་མེད་པའི་སྡུག་བསྔལ་དང་འདྲ་བའི་ཕྱིར་རོ། །འདི་ལྟར་ཉེས་པ་འདི་མཐོང་བ་ན་མཁས་པ་སྟེ། རིག་པ་དང་ལྡན་པ་སུ་ཞིག་གིས་དེ་ལྟ་བུའི་སྡུག་བསྔལ་ཐམས་ཅད་ཀྱི་རྒྱུ་བདག་ཉིད་འདོད་ཅིང་དེ་ལ་དགའ་བའོ། །
སྲུང་བ་སྟེ་ཡོངས་སུ་སྐྱོང་བ་དང་མཆོད་པར་བྱེད་པ་སྟེ་རྙེད་པས་མཆོད་པར་བྱེད། འདི་ལ་དགྲ་བཞིན་དུ་ལྟ་བར་མི་བྱད་དེ་འོན་ཀྱང་དེ་བཞིན་དུ་བདེ་བླག་ཏུ་དེ་ལྟ་བར་རིགས་ཏེ། སྡུག་བསྔལ་ཐམས་ཅད་ཀྱི་རྒྱུ་ཡིན་པའི་ཕྱིར་ཞེས་ཟུར་གྱིས་སྟོན་པ་ཡིན་ནོ། །འདི་ལྟར་སྤྱོ་བའི་གནས་ལ་སུ་ཞིག་སྟེ་མཁས་པ་གང་ཞིག་བརྙས་པར་མི་བྱེད་ཅིང་བསྟེན་པར་བྱེད་ཅེས་པའི་ཐ་ཚིག་གོ །དེ་ལྟར་བདག་གི་ཉེས་བ་བརྗོད་ནས་བདག་དང་གཞན་གྱི་ཉེས་པ་དང་ཡོན་ཏན་རྣམས་བསྟན་པར་བཞེད་པས། གལ་ཏེ་བྱིན་ན་ཞེས་པ་ལ་སོགས་པ་གསུངས་ཏེ། དངོས་པོ་འདི་ལ་རྙེད་ནས་དོན་དུག་ཉེར་བ་ཡང་འོངས་པར་གྱུར་པ་ན་དེ་ལ་ཅི་འདི་སྦྱིན་པའམ་འོན་ཏེ་སྤྱད་པར་བྱ་ཞེས་རྣམ་པར་རྟོག་པས་ངེས་པར་བྱེད་དོ། །གལ་ཏེ་སྦྱིན་ན་དེའི་ཚེ་ཅི་ཞིག་སྤྱད་པར་བྱ་སྟེ། གཞན་གྱིས་རྣམ་པ་ཐམས་ཅད་དུ་དབང་དུ་བྱས་པའི་ཕྱིར་རོ། །དེ་ལྟར་ན་བདག་གི་དོན་དུ་སྟེ་རང་གི་བདེ་བ་བསྒྲུབ་པའི་ཕྱིར་གཞན་ལ་རྒྱབ་ཀྱིས་ཕྱོགས་པས་འཇུག་པར་འདོད་པ་རྣམས་ཀྱི་འགྲོ་བར་གསུངས་པ་ཡིན་ཏེ། སེར་སྣ་གཙོ་བོར་གྱུར་པའི་ཕྱིར་རོ། །འདི་ལས་བཟློག་པ་གསུངས་པ་ནི་གལ་ཏེ་ཞེས་པ་སྟེ། འོན་ཏེ་གལ་ཏེ་སྤྱད་ན་འོན་ཅི་ཞིག་སྦྱིན་པར་བྱ་སྟེ་དེའི་དུས་ལ་ལྟོས་ནས་ད་ལྟར་བྱུང་བའི་སྒྲའོ། །དེའི་ཕྱིར་འདི་ལྟར་རང་དོན་ལ་ལྟོས་པ་མེད་པ་གཞན་གྱི་བདེ་བ་བསྒྲུབ་པའི་ཆེད་དུ་ཞུགས་པ་རྣམས་ལྷའི་རྒྱལ་པོ་སྟེ་ལྷའི་དབང་ཕྱུག་གོ །དེ་ལྟར་གཞན་ལ་ཕན་པ་དང་མི་ཕན་པ་དག་བརྗོད་ནས་གཞན་དང་བདག་གི་གནོད་པ་དང་ཕན་པ་དག་གི་སྐྱོན་དང་ཡོན་ཏན་རྣམས་ཇི་ལྟར་སྲིད་པ་བསྟན་པའི་ཕྱིར། བདག་ཕྱིར་ཞེས་པ་ལ་སོགས་པ་གསུངས་ཏེ། བདག་གི་བདེ་བ་ཡིད་ལ་བྱེད་བས་ལུས་དང་ངག་གི་ཆད་པ་རྣམས་ཀྱིས་གཞན་ལ་གནོད་པར་བྱས་ནས་དམྱལ་བ་ལ་སོགས་པའི་ངན་འགྲོ་རྣམས་སུ་སྡུག་བསྔལ་མྱོང་བར་འགྱུར་རོ། །བཟློག་པས་ནི་འཇིག་རྟེན་པ་དང་འཇིག་རྟེན་ལས་འདས་པའི་ཕུན་སུམ་ཚོགས་པར་འགྱུར་རོ། །བདག་དང་གཞན་ལ་སེམས་ཙམ་གྱིས་ཀྱང་ཕན་པ་དང་གནོད་པར་བྱེད་པར་འདོད་པ་ལས་ཡོན་ཏན་དང་སྐྱོན་གང་ཡིན་པ་བསྟན་པའི་ཕྱིར། བདག་ཉིད་ཅེས་པ་ལ་སོགས་པ་གསུངས་ཏེ། མཐོ་བ་ནི་ལང་ཚོ་དང་གཟུགས་དང་ནོར་ལ་སོགས་པ་རྣམས་ཀྱིས་གཞན་ལས་མཆོག་ཡིན་ནོ་ཞེས་མངོན་པར་ང་རྒྱལ་བ་གང་ཞིག་དེ་རྣམས་ཉིད་མཐོ་བར་འདོད་ཅིང་གཞན་ལ་སྟེ་ཕ་རོལ་ལ་སྤོ་བ་སྟེ་འཕོ་བར་བྱས་ན་སྔར་གྱི་ལས་བཟློག་པར་འགྱུར་རོ། །བདག་དང་གཞན་
ལ་ངག་ཙམ་དུ་ཡང་བདེ་བའི་རྒྱུ་མ་ཡིན་པ་ཉིད་པོ་ཞེས་བསྟན་པའི་ཕྱིར། བདག་གི་དོན་དུ་ཞེས་པ་ལ་སོགས་པ་གསུངས་ཏེ། སོགས་པའི་སྒྲས་ནི་བདག་གི་དངོས་པོ་མི་སྡུག་པ་ལ་སོགས་པ་དང་རྗེ་དཔོན་ཉིད་ལ་སོགས་པ་ཞེས་པ་འདིར་ཡང་སོགས་པའི་སྒྲས་རིགས་ལ་སོགས་པ་དང༌། གཟུགས་བཟང་བ་ལ་སོགས་པའོ། །ད་ནི་བརྗོད་པའི་དོན་ཉིད་བསྡུས་ནས་བསྟན་པའི་ཕྱིར། འཇིག་རྟེན་ཞེས་པ་ལ་སོགས་པ་གསུངས་ཏེ། བདག་བདེ་བར་འདོད་པས་ཀྱང་དེ་ལྟར་བསྒྲུབ་པ་ཐམས་ཅད་བྱ་བ་མ་ཡིན་པ་ལ་ཡང་བྱ་བ་ཉིད་དུ་ཞེན་པར་བྱེད་དོ། །དེའི་ཕྱིར་དེའི་ལས་ཀྱི་སྒྲིབ་པ་ལས་འཇིག་རྟེན་ཕ་རོལ་དུ་མི་འདོད་པའི་ལས་ལས་བྱུང་བའི་སྡུག་བསྔལ་སྐྱེ་བར་འགྱུར་རོ། །བདེ་བ་ཞེས་ཏེ་བདེ་བ་དང་འབྲེལ་པ་ཡིན་ལ། གཞན་བདེ་འདོད་ཅེས་པ་ནི་ཕ་རོལ་པོ་རྣམས་ལ་ཕན་པ་དང་བདེ་བ་ལ་སྦྱར་བའི་ཆེད་དུ་བསྒྲུབས་པའི་ཕྱིར་རོ། །ད་ནི་བསྟན་པའི་དོན་ཉིད་དཔེས་མདོར་བསྡུས་ཏེ་བསྟན་པའི་སྒོ་ནས་བསྟན་པར་བྱ་བའི་ཕྱིར། མང་དུ་ཞེས་པ་ལ་སོགས་པ་གསུངས་ཏེ། རྒྱས་པས་བཤད་པ་ཅི་ཞིག་བྱ་སྟེ། འདི་ཉིད་འདིར་མདོར་བསྡུས་པས་གསལ་བར་དཔེར་བརྗོད་པ་རྟོགས་པར་བྱས་པ་ལ་བདག་ལ་གཞན་དུ་བརྗེ་བ་ལ་འབད་པར་བྱའོ། །འདི་ལྟར་ཡང་སོ་སོའི་སྐྱེ་བོ་བདག་ཉིད་ཀྱི་དགོས་པ་ལ་ཞུགས་པའི་ཡིད་ཅན་དང་ཐུབ་པ་སྟེ། སངས་རྒྱས་བཅོམ་ལྡན་འདས་གཞན་གྱི་དོན་དུ་གཞན་དབང་དུ་གྱུར་པའི་ཁྱད་པར་འདི་བྱེ་བྲག་ཏུ་ལྟོས་ལ་ངེས་པར་ཟུང་ཤིག །ཅི་ལྟར་ལུང་ལས་དཔེ་ཡོད་པ་ཡིན་པར་བསྟན་པ་དེ་ལྟར་འདི་རྟོགས་པར་བྱ་སྟེ། དེའི་ལས་བཟློག་པ་ལ་སེམས་དང་ལྡན་པས་ཀྱང་ཅིའི་ཕྱིར་ཡང་སྤྲོ་བ་མེད་པར་འགྱུར་རོ། །དེ་ལྟར་ན་ཡང་སངས་རྒྱས་དོན་དུ་གཉེར་བའི་གལ་ཏེ་ལམ་འདི་ཉིད་ཡིན་ན་ཡང༌། གང་རྣམས་འཁོར་བའི་བདེ་བ་ཙམ་འདོད་པ་དེ་རྣམས་ལ་དེ་ཇི་ལྟར་བདེ་བའི་ལམ་ཡིན་ཞེ་ན། བདག་བདེ་ཞེས་པ་ལ་སོགས་པ་གསུངས་ཏེ། སངས་རྒྱས་ཉིད་དེ་བྱང་ཆུབ་བསྒྲུབ་པར་བྱ་བ་སྟེ། རྫོགས་པར་བྱ་བ་ནི་བདག་དང་གཞན་དུ་བརྗེ་བའི་ལམ་བླང་བར་བྱ་བ་ཡིན་ཏེ། སྐྱེས་བུ་མཆོག་གི་དོན་ཡིན་པས་སོ། །འདི་འབའ་ཞིག་བདག་དང་གཞན་དུ་བརྗེ་བ་མེད་པར་མི་འགྲུབ་པ་ཡིན་ལ།
འཁོར་བ་ན་ཡང་ལྷ་དང་མི་དག་གི་བདེ་བ་ཕུན་སུམ་ཚོགས་པའི་མཚན་ཉིད་དེ་ཇི་ལྟར་འགྱུར་བ་ཡིན་ཏེ་མ་ཡིན་པ་ཉིད་དོ། །གང་གིས་མི་འགྱུར་ཞེ་ན། བདག་བདེ་བ་ཞེས་གསུངས་ཏེ། བདག་གི་བདེ་བ་དང་གཞན་གྱི་སྡུག་བསྔལ་བརྗེ་བར་ངེས་པར་མ་བྱས་པའིའོ། །བདག་གི་བདེ་བ་གཞན་གྱི་ཡིན་པ་དང༌། གཞན་གྱི་སྡུག་བསྔལ་བདག་གི་ཡིན་ནོ་ཞེས་འཕོ་བར་མ་བྱས་སོ་ཞེས་པའི་དོན་ཏོ། །ཇི་ལྟར་གལ་ཏེ་བྱིན་ན་ཅི་སྤྱད་ཅེས། །ཞེས་པ་ལ་སོགས་པ་གསུངས་སོ། །གཞན་ཡང་བདེ་བ་གཞན་ཡང་སྐྱེ་བ་འདི་ཉིད་ལ་གཞན་ལ་ཕན་བཏགས་པ་མེད་པར་མི་འབྱུང་ངོ་ཞེས་བསྟན་པའི་ཕྱིར་འཇིག་རྟེན་ཕ་རོལ་ཞེས་པ་ལ་སོགས་པ་སྨོས་ཏེ། གང་འཇིག་རྟེན་ཕ་རོལ་དུ་གཞན་ལ་ཕན་པ་བཏགས་པ་མེད་པར་བདེ་བར་མི་འགྱུར་རོ་ཞེས་བྱ་བ་འདི་རེ་ཞིག་གཞག་སྟེ་ནི་རེ་ཞིག་དེ་ལྟར་གྱུར་ཀྱང་སྟེ། དེ་ནི་ཤིན་ཏུ་ལྐོག་ཏུ་གྱུར་པ་ཡིན་པའི་ཕྱིར་རོ། །གང་ཡང་སྐྱེ་བ་འདི་ཉིད་ལ་མཐོང་བ་སྟེ་གྲུབ་པའི་དོན་ཡིན་ལ་མངོན་པར་འདོད་པའི་བསྒྲུབ་བྱའི་མཚན་ཉིད་མི་གྲུབ་སྟེ་མི་རྫོགས་ལ། དེར་ལོག་པར་རྟོགས་པ་མེད་པའི་ཕྱིར་ཅེ་ཞིག་བརྗོད་པར་བྱ། གང་གིས་མི་འགྲུབ་ཅེ་ན། བྲན་གཡོག་ཅེས་པ་ལ་སོགས་པ་སྨོས་ཏེ། རྗེ་དཔོན་ནི་བདག་པོ་ཡིན་ལ་བྲན་གཡོག་ནི་ལས་ཀྱི་འབྲས་བུ་ལེན་པ་བྲན་གྱིས་རྗེས་སུ་འཚོ་བ་ཡིན་ཏེ། དེའི་ལས་མ་བྱས་པ་ན་གཉི་ག་ཡང་མཐོང་བའི་ཆོས་ལ་མི་འགྲུབ་པར་དེ་མཐོང་བ་ཉིད་དོ། །དེ་ཡང་གོ་རིམས་ཇི་ལྟ་བ་བཞིན་དུ་དེའི་བསྒྲུབ་པར་བྱ་བ་བསྙེན་བཀུར་གྱི་བདེ་བ་ལ་སོགས་པ་དང་དེ་ལས་བྱུང་བའི་ཟས་དང་གོས་ལ་སོགས་པ་ཡིན་ནོ། །འདི་ལྟར་ཤེས་ཀྱང་བདག་དང་གཞན་ལ་ཡོད་པའི་སྤྱོད་པ་ཕྱིན་ཅི་ལོག་ནི་རྨོངས་པའི་མཐུ་ཡིན་ནོ་ཞེས་བསྟན་པའི་ཕྱིར། མཐོང་དང་ཞེས་བྱ་བ་ལ་སོགས་པ་གསུངས་ཏེ། ཕན་ཚུན་བདེ་བ་སྐྱེད་པ་ནི་བདེ་བསྒྲུབ་པར་བྱེད་དོ། །ཅི་ལྟ་བུར་གྱུར་བ་ཞིག་ཅེ་ན། མཐོང་དང་མ་མཐོང་བདེ་འགྲུབ་པ་སྟེ། མཐོང་བ་དང་མ་མཐོང་བའི་འཇིག་རྟེན་དུ་བདེ་བ་འགྲུབ་པ་སྟེ་ཆེན་པོ་ཉིད་ཡིན་ལ། བདེ་བའི་དགའ་སྟོན་གྱི་དགའ་བ་གང་ལ་ཡོད་པ་དེ་ལ་དེ་སྐད་ཅེས་བྱའོ། །དེ་བོར་ནས་ཕན་ཚུན་དུ་མི་འདོད་པ་བྱས་པས་སྡུག་བསྔལ་བའི་ཕྱིར་
སྡུག་བསྔལ་སྐྱེད་པར་བྱེད་པ་ཡིན་པས་སྡུག་བསྔལ་ལེན་ཅིང་འཛིན་པ་ཡིན་ནོ། །མི་བཟད་པས་ནི་དམྱལ་བ་ལ་སོགས་པར་བྱས་པའི་ཤིན་ཏུ་འཇིགས་སུ་རུང་བའི་རང་བཞིན་ཡིན་པའི་ཕྱིར་རོ། །རྨོངས་པ་ཞེས་པ་ནི་སྨད་པ་ཡིན་ཏེ། རྨོངས་པའི་དབང་གིས་ཕན་པ་དང་མི་ཕན་པ་མ་མཐོང་བ་ཡིན་ལ། ཡང་ན་རྨོངས་པ་ཞེས་པ་ནི་འདིར་གཏན་ཚོགས་ཀྱི་ཚིག་ཡིན་ནོ། །གང་གི་ཕྱིར་རྨོངས་པ་ཡིན་པ་དེའི་ཕྱིར་འདི་རྣམས་ཕྱིར་ཅི་ལོག་གི་འཇུག་པ་ཡིན་ཏེ། དེ་ལྟར་ན་རྨོངས་པ་འདི་ཉིད་སེམས་ཅན་རྣམས་ལ་གནོད་པར་བྱེད་པ་ཡིན་ནོ་ཞེས་བསྟན་བཅོས་མཛད་པས་སྙིང་བརྩེ་བར་མཛད་དོ། །འདི་ཡིད་ལ་བྱས་པས་ཀྱང་བདག་ཏུ་འཛིན་པའི་མངོན་པར་ཞེན་པ་མི་བྱའོ་ཞེས་བསྟན་པའི་ཕྱིར། འཇིག་རྟེན་དག་ན་ཉེར་གནོད་ཅེས་པ་ལ་སོགས་པ་གསུངས་པ་ལ་ཉེ་བར་གནོད་པ་ནི་ཡིད་མི་བདེ་བའི་རྒྱུ་གནོད་པ་ཡིན་ནོ། །སྡུག་བསྔལ་བ་རྣམས་ནི་ལུས་ཀྱི་ཚོར་བ་རྣམས་སོ། །འཇིགས་པ་ནི་སྡུག་བསྔལ་གྱི་རྒྱུ་རྣམས་ལ་སྐྲག་པའོ། །འདི་ཐམས་ཅད་ཀྱི་རྒྱུ་ནི་བདག་ཏུ་འཛིན་པ་ཡིན་ནོ། །གང་གི་ཕྱིར་དེ་ལྟར་ཡིན་པ་དེ་བས་ན་སྡུག་བསྔལ་གྱི་རྒྱུ་ཡོངས་སུ་བཟུང་བ་འདིས་ཅི་ཞིག་བྱ་སྟེ། དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟར་ན་བདག་ཏུ་འཛིན་པ་ནི་སྡུག་བསྔལ་ཐམས་ཅད་ཀྱི་རྒྱུ་ཡིན་པའི་ཕྱིར་དེ་ཡོད་ན་སྡུག་བསྔལ་ལ་ལྡོག་པ་མེད་དོ་ཞེས་འཇིག་རྟེན་དག་ན་ཞེས་པ་ལ་སོགས་པ་སྨོས་ཏེ། བདག་ནི་བདག་ཏུ་འཛིན་པ་ཡིན་ལ་བདག་ཡོངས་སུ་དོར་བ་འདི་ཉིད་བདག་ཏུ་འཛིན་པ་ཡོངས་སུ་དོར་བ་ཡིན་ནོ། །དེ་ལྟར་ན་བདག་ཏུ་འཛིན་པ་ཡོངས་སུ་མ་དོར་བ་དེ་ཉིད་བདག་ཏུ་འཛིན་པ་གང་ཡིན་པ་ཉིད་དོ། །དེའི་ཕྱིར་བདག་ཏུ་འཛིན་པ་ཡོངས་སུ་མདོར་ན་སྡུག་བསྔལ་ལྡོག་པ་མེད་དོ་ཞེས་རིག་པར་བྱའོ། །འདིར་རྗེས་མཐུན་པའི་དཔེ་ཇི་ལྟར་མེ་ནི་ཞེས་པ་ལ་སོགས་པ་གསུངས་ཏེ། གང་ཞིག་སྲེག་པ་མི་འདོད་ཅིང་མེ་ཡོངས་སུ་མ་དོར་ན་དེའི་སྲེག་པ་ལྡོག་པར་ཡང་མི་འགྱུར་ཏེ། རྒྱུ་ལ་ནུས་པ་དེ་ཡོད་ན་འབྲས་བུམ་སྐྱེ་བར་རིགས་པ་མ་ཡིན་ཏེ། དེའི་འབྲས་བུ་ཉིད་ཡིན་ལ་ཉམས་པར་ཐལ་བའི་ཕྱིར་དང༌། རྣམ་པ་ཐམས་ཅད་མི་སྐྱེ་བར་ཐལ་བར་འགྱུར་བའི་ཕྱིར་རོ། །དེའི་ཕྱིར་སྡུག་བསྔལ་ལྡོག་པར་
འདོད་པས་བདག་ཏུ་འཛིན་པར་མི་བྱའོ། །དེ་ལྟར་ཞེས་པ་ལ་སོགས་པ་སྐབས་སུ་བབ་པ་མཇུག་སྡུད་པ་སྟེ། གང་གི་ཕྱིར་བདག་ཏུ་འཛིན་པ་འདི་ནི་བདག་ལ་སྡུག་བསྔལ་ཐམས་ཅད་སྐྱེད་པར་བྱེད་པ་ཡིན་ལ། གཞན་ལ་ཡང་སྡུག་བསྔལ་སྐྱེད་པར་བྱེད་པ་དེ་ལྟ་བས་ན་བདག་ཉིད་གཞན་ལ་གཏང་བྱ་སྟེ། བདག་ལ་གཞན་ཉིད་དུ་གཟུང་བར་བྱ་སྟེ་བདག་ཉིད་གཞན་ཡིན་ལ། གཞན་ནི་མ་ཡིན་ནོ་ཞེས་པའམ། གཞན་གྱི་དབང་དུ་བྱའོ་ཞེས་ཏེ་དེ་བརྟེན་པ་ལྷུར་བྱེད་པའི་ཕྱིར་རོ། །དེ་བཞིན་དུ་གཞན་ཕ་རོལ་པོ་གཟུང་བར་བྱ་བ་ནི་ཁས་བླང་བར་བྱ་བ་ཡིན་ལ། བདག་བཞིན་དུ་གཞན་ལ་བདག་གི་དངོས་པོར་གཟུང་བར་བྱ་སྟེ། འདི་ཉིད་བདག་ཡིན་ལ་བདག་ནི་བདག་མ་ཡིན་ནོ་ཞེས་སོ། །འདི་ནི་འདིར་བསྡུས་པའི་དོན་ཡིན་ཏེ། ཇི་ལྟར་སྔར་ཡོངས་སུ་མ་ཤེས་པས་བདག་ལ་ཡོངས་སུ་ངལ་བས་ཕན་པ་དང་བདེ་བ་སྐྱེད་པའི་ཕྱིར་སྤྱད་ལ། ད་ནི་གཞན་རྣམས་དང་བདག་གི་ལུས་ཡོངས་སུ་བརྗེ་བ་སྤྱད་པར་བྱ་སྟེ། དཔེར་ན་གཞན་ལ་སྔར་སྤྱད་པ་དེ་བཞིན་དུ་བདག་ལ་གཞན་ཉིད་དུ་བརྗེས་པས་ན་སྤྱད་པར་བྱའོ། །ཅི་སྟེ་ཅི་ལྟར་བདག་མེད་པས་བདག་ལ་བདག་ཉིད་འཁྲུལ་པ་ཡིན་པ་དེ་བཞིན་དུ་གཞན་ལ་ཡང་ཡིན་ཏེ། དེ་ལ་ཡང་དེ་མེད་པའི་ཕྱིར་དེ་ལ་ཇི་ལྟར་ན་འཁྲུལ་པར་ཁྱད་པར་མེད་པ་ལ་འབྲས་བུ་ལ་ཁྱད་པར་ཡོད་ཅེ་ན། འཁྲུལ་པར་ཁྱད་པར་མེད་པ་ལ་ཡང་འབྲས་བུའི་ཁྱད་པར་མཐོང་བ་མ་ཡིན་ནམ། དཔེར་ན་མར་མེའི་འོད་ལ་ནོར་བུ་ཞེས་ཞེན་པས་དེའི་ཡུལ་དུ་ཕྱིན་པ་ན་ནོར་བུ་དང་ཕྲད་པ་མེད་ལ། ཡང་གཞན་དུ་ནོར་བུའི་འོད་ལ་ནོར་བུ་མཐོང་ངོ་ཞེས་ཡིད་ལ་བྱས་ནས་དེའི་ཡུལ་དུ་ཕྱིན་པས་ནོར་བུ་དང་ཕྲད་པར་འགྱུར་ཏེ། དེ་ལ་གཉི་ག་ལ་ཡང་འཁྲུལ་བ་ཞེས་པ་ཡོད་དེ་འཁྲུལ་པར་ཁྱད་པར་མེད་ཀྱང་འབྲས་བུ་ལ་ཁྱད་པར་ཡོད་པ་ཡིན་ནོ། །དེ་ལྟར་ཡང༌། མར་མེ་ནོར་བུའི་འོད་དག་ལ། །ནོར་བུ་བློ་ཡིས་མངོན་རྒྱུག་པ། །ལོག་པའི་ཤེས་པར་ཁྱད་མེད་པར། །ཇི་ལྟར་དོན་བྱེད་ལ་ཁྱད་ཡོད། །ཅེས་གང་བརྗོད་པའོ། །དེ་ལྟར་ན་ཡང་ཇི་སྲིད་དུ་གང་བུ་བརྒྱུད་པ་ཡོད་པ་དེ་སྲིད་དུ་ཤེས་པ་དངོས་པོ་དང་འབྲེལ་པ་ཡོད་པ་དེར་ཐོབ་པ་ཡོད་ལ། གང་དུ་ཤེས་པ་དང་དངོས་པོ་ལ་བརྒྱུད་པས་ཀྱང་འབྲེལ་པ་མེད་པ་ན་དེར་ཐོབ་པ་ཡོད་པ་མ་ཡིན་ལ་ཐོབ་པར་
བྱ་བར་ཐོབ་པར་བྱས་པའི་ཁྱད་པར་ཡོད་པ་ནི་རིགས་པ་ཉིད་ཡིན་ཏེ། འདིར་ཡང་དེ་བཞིན་དུ་ཡོད་པ་མ་ཡིན་ཏེ། གཉི་ག་ལ་ཡང་ཁྱད་པར་མེད་པའི་ཕྱིར་ལ། དེ་ལྟར་ན་འདི་ནི་དཔེ་དང་མི་མཐུན་པ་ཡིན་ནོ་ཞེ་ན། དེ་ནི་རིགས་པ་མ་ཡིན་ཏེ། འཁྲུལ་པར་ཁྱད་པར་མེད་ཀྱང་འབྲས་བུ་ལ་ཁྱད་པར་མཐོང་སྟེ། འདི་ཙམ་གྱི་ཁྱད་པར་གྱིས་དཔེར་བརྗོད་པ་དང་མཐུན་པ་ཡིན་ཏེ། གང་འཁྲུལ་ལ་དེ་ཐམས་ཅད་ལ་འབྲས་བུ་ཐུན་མོང་བ་མ་ཡིན་ནོ་ཞེས་ཁྱབ་པ་དྲན་པ་ཙམ་འདིར་མངོན་པར་འདོད་པ་ཡིན་ནོ། །དཔེའི་ཆོས་དང་ཐམས་ཅད་དུ་མཐུན་པར་ནི་སྦྱར་བར་བྱ་བ་ཡང་མ་ཡིན་ནོ། །དེ་ལ་གལ་ཏེ་དཔེ་དང་མཐུན་པ་མ་ཡིན་པ་དེ་ལྟ་ན་ཡང་ཅི་ལྟར་ཡང་དཔེ་དང་མཐུན་པར་ཡོད་པས་ཉིས་པ་མེད་དོ། །ཤིན་ཏུ་ལྐོག་ཏུ་གྱུར་པའི་དོན་ལ་རྟོགས་པ་དང་ལྡན་པ་རྣམས་བཅོམ་ལྡན་འདས་ཀྱི་བཀའ་ཉིད་ཀྱིས་འཇུག་པར་བྱའོ། །དེ་ལྟར་འདིར་འཁྲུལ་པ་ཁྱད་པར་མེད་ཀྱང་དེ་ལྟ་བུའི་འབྲས་བུ་བསྒྲུབས་པ་ལ་ནུས་པ་ཡོད་ལ། འགའ་ཞིག་གི་ཡིན་གྱི་ཐམས་ཅད་ཀྱི་མ་ཡིན་ནོ་ཞེས་བྱ་བ་དེ་ནི་ལུང་ཉིད་ཀྱིས་རྟོགས་པར་བྱ་སྟེ། རྟེན་ཅིང་འབྲེལ་པར་འབྱུང་བ་བསམ་གྱིས་མི་ཁྱབ་པའི་ཕྱིར་ཡང་ངོ༌། །ཇི་ལྟར་ཡང་གཞན་གྱི་དོན་མེད་པར་རང་གི་དོན་ཀྱང་མི་འགྲུབ་སྟེ། དེ་ལྟར། བྲན་གཡོག་ལས་བྱེད་མི་བཏུབ་ལ། །ཞེས་བྱ་བ་ལ་སོགས་པས་མཐོང་བའི་ཆོས་ཀྱི་ཅུང་ཟད་བསྟན་པ་ཡིན་ནོ། །འདིར་ཀུན་རྫོབ་ཏུ་རྒྱུ་དང་འབྲས་བུ་ཡོད་པ་ལ་ནི་ཅུང་ཟད་ཀྱང་འཁྲུལ་བ་ཡོད་པ་མ་ཡིན་ཏེ། དེ་ལྟར་ལོག་པའི་ཀུན་རྫོབ་ཏུ་བྱས་པ་དང་ཁྱད་པར་ཡོད་པ་མ་ཡིན་ནོ། །རྣལ་འབྱོར་སྤྱོད་པའི་གཞུང་གིས་ཀྱང་རྒྱུ་དང་འབྲས་བུ་ཐམས་ཅད་ཀྱི་ཐ་སྙད་ནི་འཁྲུལ་པ་ཉིད་ཡིན་ཏེ། ཕྱི་རོལ་གྱི་དོན་ལ་བརྟེན་པའི་ཕྱིར་དང༌། དམིགས་པ་ཐམས་ཅད་འཁྲུལ་བ་ཡིན། །ཞེས་པའི་ཚིག་ལས་སོ། །དེའི་ཕྱིར་འཁྲུལ་པ་ཁྱད་པར་མེད་ཀྱང་རྒྱུ་མཚན་ལ་ཁྱད་པར་ཡོད་པས་ཐམས་ཅད་འཚམ་མོ། །དེ་ལྟར་ན་མཐར་ཐུག་པའི་བསམ་པས་བསྐུལ་ནས་རང་གི་སེམས་བྱ་བ་དེ་ཉིད་ལ་སྦྱར་བར་བྱའོ་ཞེས། བདག་ནི་གཞན་གྱི་དབང་གྱུར་ཞེས་པ་ལ་སོགས་པ་གསུངས་ཏེ། ཡིད་ཁྱོད་ངེས་པར་ཞེས་པ་ནི་འདིར་ཐེ་ཚོམ་དང་ཕྱིན་ཅི་ལོག་ཏུ་མི་བྱའོ་ཞེས་པ་ཡིན་ཏེ། འདི་ནས་བཟུང་ནས་ཁྱོད་ཀྱིས་སེམས་ཅན་ཐམས་ཅད་ཀྱི་དགོས་པ་
ལས་མ་གཏོགས་པར་རང་གཞན་དེ་རང་གི་དགོས་པ་ལ་སོགས་པ་བསམ་པར་མི་བྱ་སྟེ། ཡིད་ཀྱིས་ཀྱང་མི་བྱ་ཞེས་པའི་དོན་ཏོ། །ཅིའི་ཕྱིར་ཡང་རང་གི་དགོས་པ་ཡང་བསམ་པར་མི་བྱ་ཞེ་ན། གཞན་ནི་ཞེས་པ་ལ་སོགས་པ་གསུངས་ཏེ། རང་གི་དོན་ནི་རང་གི་དགོས་པའོ། །མིག་སྟེ་ལྟ་བར་བྱེད་པ་དང་སོགས་པའི་སྒྲས་ཉན་པ་ལ་སོགས་པ་ཡང་ཡིན་ནོ། །དེའི་སྟེ་གཞན་གྱི་ཡིན་ལ་མིག་ལ་སོགས་པས་རྣ་བ་ལ་སོགས་པ་གཞན་ཡང་གཟུང་ངོ༌། །ལག་པ་ལ་སོགས་པ་ཞེས་པ་འདིར་ཡང་རྐང་པ་ལ་སོགས་པ་ཡང་གཟུང་ངོ༌། །གང་གིས་གཞན་དང་འབྲེལ་པར་ཁྱེད་ཀྱིས་ངེས་པ་ན་རྒྱུ་དེ་ཉིད་ཀྱིས་སེམས་ཅན་གཙོ་བོར་བྱས་ཏེ། སེམས་ཅན་གཞན་གྱི་དབང་དུ་བྱས་ནས་དེའི་དགོས་པ་ལ་ཞུགས་པའི་ཞེས་པའི་ཐ་ཚིག་གོ །བདག་གི་ལུས་ལ་ཞེས་པ་ནི་དེ་ལ་རྟེན་པར་གྱུར་པ་ཡིན་ཏེ། གང་དང་གང་གོས་ལ་སོགས་པ་བདེ་བའི་ཡོ་བྱད་མཐོང་ཞིང་རྟོགས་པ་དེ་དང་དེ་ཞེས་ཟློས་པའི་ཚིག་གིས་ཁྱད་པར་གསུངས་པ་ཡིན་ཏེ། ཐམས་ཅད་ཉིད་ཡིན་ལ་ཅུང་ཟད་ཙམ་ནི་མ་ཡིན་ནོ་ཞེས་པའི་དོན་ཏོ། །རང་གི་ལུས་ལས་ཕྲོགས་ཤིང་ཕྲལ་ནས་ཕན་ཞིང་འདོད་པའི་དངོས་པོ་སྦྱར་རོ། །ད་ནི་དམན་པ་ལ་སོགས་པ་རྣམས་ལ་ང་རྒྱལ་ལ་སོགས་པའི་སེམས་ཀྱི་སྡིག་པ་བསལ་བར་བསྐྱེད་ནས། དམན་སོགས་ཞེས་པ་ལ་སོགས་པ་གསུངས་ཏེ། དམན་པ་ལ་ལྟོས་ནས་ང་རྒྱལ་དང༌། མཉམ་པ་ལ་ལྟོས་ནས་འགྲན་པ་དང༌། མཆོག་ལ་ལྟོས་ནས་ཕྲག་དོག་སྐྱེ་བར་འགྱུར་བ་འདི་ནི་བྱིས་པའི་ཆོས་ཡིན་ཏེ། གང་སྔར། མཐོ་ལ་ཕྲག་དོག་མཉམ་ལ་འགྲན། །ཞེས་གསུངས་པའོ། །འདི་ཐམས་ཅད་ཉོན་མོངས་པའི་རྒྱུ་ཡིན་ཡང་བདག་དང་གཞན་དུ་བརྗེས་པས་རྣམ་པར་བྱང་བའི་རྒྱུ་ཉིད་དུ་སྒྱུར་བར་བྱེད་དོ། །དེ་ལྟར་ན་འདི་ཉིད་རྣམ་རྟོག་མེད་པའི་ཞེས་པ་ལ་སོགས་པས་བརྗོད་པར་བྱ་སྟེ། རྣམ་རྟོག་མེད་པ་ཞེས་པ་ནི་ཐེ་ཚོམ་མེད་པས་སོ། །བསྒོམ་པར་བྱ་བ་ནི་འཆད་པར་འགྱུར་བའི་ཚུལ་གྱིས་སོ། །ཕྲག་དོག་བསྒོམ་པ་དེ་ཉིད་འཆད་པར་འགྱུར་བའི་གཞུང་གིས་སྟོན་པ་ནི། འདི་ནི་ཞེས་པ་ལ་སོགས་པ་གསུངས་པ་ཡིན་ཏེ། ཚུལ་ཁྲིམས་དང་ཡོན་ཏན་ལ་སོགས་པས་བདག་ཏུ་མཐོ་བ་དང་གཞན་ནི་དེ་
དང་བྲལ་བས་དམའ་བ་ཉིད་དུ་མཐོང་བར་བྱས་པས། བདག་ལ་འདི་ནི་བཀུར་བྱས་ཞེས་པ་ལ་སོགས་པའི་རྣམ་པས་ཕྲག་དོག་བསྒོམ་པར་བྱའོ། །འདི་ནི་ཞེས་པ་ནི་བདག་དང་གཞན་དུ་བརྗེས་པ་ཉིད་ཡིན་ཏེ། གཞན་ཉིད་ལ་ང་ཞེས་བསྟན་པ་ཡིན་ནོ། །འཆད་པར་འགྱུར་བ་ཐམས་ཅད་ལ་གཞན་དང་བདག་ཏུ་བརྗེས་ནས་ཡོད་པ་ལ་སྦྱར་བར་བྱའོ། །བསྟོད་པ་ཞེས་པ་ནི་ཡོན་ཏན་བསྒྲགས་པའི་སྒོ་ནས་བསྔགས་པའོ། །བདག་ལ་སྨོད་པ་ཞེས་པ་ནི་དམན་པ་ཉིད་ཀྱི་སྒོ་ནས་སྨད་པར་བྱ་བའོ། །ལས་རྣམས་བདག་གིས་བྱེད་པ་ནི་དམན་པའི་ལས་ཁུར་ཁྱེར་བ་ལ་སོགས་པ་བྱེད་པའོ། །བདེ་བར་གནས་པ་ཞེས་པ་ནི་སེམས་བདེ་བར་གནས་པའང་ཡིན་ནོ། །འདི་འཇིག་རྟེན་ལ་ཆེ་བར་གྲགས་པ་ནི་འདིས་ཆེན་པོ་ཉིད་ཀྱང་གོམས་ཤིང་འབད་པས་བསྒྲུབ་པར་བྱ་བ་ཡིན་ཏེ། དེ་བཞིན་དུ་གཞན་གྱིས་ཀྱང་ཁྱོད་དང་འདྲ་བར་རྙེད་དཀའ་བ་མ་ཡིན་ནོ། །གོང་མ་གོང་མ་མཐོང་བས་ན་ཁྱེད་ཆེན་པོ་ཕུལ་དུ་བྱུང་བར་ཡང་གནས་པ་མ་ཡིན་ཏེ། ཚུ་རོལ་མཐོང་བ་ཐམས་ཅད་དམན་པ་ཡིན་པའི་ཕྱིར་རོ། །དེ་ལྟར་ན་ཇི་ལྟར་བདག་ཀྱང་ཡོན་ཏན་ཆེན་པོ་དང་ལྡན་པ་ཉིད་དུ་འགྱུར་བ་དེ་ལྟར་བདག་གིས་བྱ་སྟེ། གྲགས་པའི་སྒྲས་ནི་འདི་གཉི་ག་ལ་ཡང་བྱ་དོག་གི་ལྟ་སྟངས་ཀྱིས་སྦྱར་བར་བསྟན་པ་ཡིན་ནོ། །དེ་ལྟར་གྱུར་ན་ཡང་བདག་གི་ཡོན་ཏན་མེད་པ་ཅི་ཞིག་བྱ་སྟེ། ཡོན་ཏན་དང་ལྡན་པ་ཉིད་དུ་བྱའོ་ཞེས་བ་བསྐྱང་ངོ༌། །དགོས་པ་ཅུང་ཟད་ཀྱང་མེད་པས་བདག་ཉིད་ལ་ཡོན་ཏན་དང་ལྡན་པ་ཉིད་དུ་ངེས་པར་བྱང་པ་འདི་ཉིད་ཀྱིས་མཆོག་སྟེ། གང་གཞན་སུ་ལ་ཡང་འདིར་ཡོན་ཏན་གྱི་ཆ་ཤས་ཉིད་ཀྱང་ཡོད་པ་མ་ཡིན་ལ། གང་གི་ཕྱིར་བདག་ཡོན་ཏན་ཐམས་ཅད་ལྡན་པ་ཡིན་ཏེ། སེམས་ཅན་གཞན་ལ་ནི་ཡོད་པ་མ་ཡིན་ཞིང་རྣམ་པ་ཐམས་ཅད་དུ་ཡོན་ཏན་དང་ལྡན་པ་ཡང་ཡིན་ཏེ། ལྟ་བས་ཕོངས་པས་ཀྱང་ཡོན་ཏན་ཐོབ་པར་འགྱུར་རོ་ཞེས་པའི་ཚིག་ལས་སོ། །གཞན་ཡང་མཐོན་པོ་དང་དམའ་བ་དག་ནི་ལྟོས་པས་བྱས་པ་ཡིན་ཏེ། འདི་རྣམས་ལས་བདག་ཉིད་མཐོན་པོར་བྱས་པའི་སྐྱེ་བུ་དམ་པ་དེ་ནི་ཡོད་པ་མ་ཡིན་ལ། བདག་ལས་ཤིན་ཏུ་ངན་པའི་དམན་པ་ཡང་ཡོད་པ་ཡིན་ཞིང༌། གང་ལ་ལྟོས་ནས་བདག་ཀྱང་མཆོག་ཡིན་ཏེ་གང་རྣམས་ལས་བདག་ཉིད་
དམ་པའོ། །དེ་ལྟར་ན་ཐམས་ཅད་ལས་བདག་ནི་དམན་པ་མ་ཡིན་ཏེ། འདི་ནི་ཐམས་ཅད་ལས་མཐོ་བ་ཡང་མ་ཡིན་ནོ། །དེ་ལྟར་ན་ཡང་ཁྱེད་ནི་ཚུལ་ཁྲིམས་ལ་སོགས་པས་ཕོངས་པས་སྡིག་པ་དང་བཅས་པའི་རང་བཞིན་ཡིན་པའི་ཕྱིར་དམན་པ་ཡིན་ལ། བདག་ལ་ནི་དེ་ཡོད་པ་མ་ཡིན་པས་དམན་པ་མ་ཡིན་ནོ་ཞེ་ན། ཚུལ་ཁྲིམས་ལྟ་བས་ཞེས་པ་ལ་སོགས་པ་གསུངས་པ་ལ། ཚུལ་ཁྲིམས་ཀྱིས་ཕོངས་པ་ནི་སོ་སོར་ཐར་པའི་སྡོམ་པ་བླངས་པ་ཉམས་པ་ཡིན་ལ་ལྟ་བས་ཕོངས་པ་ནི་འཇིག་ཚོགས་ལ་ལྟ་བ་ལ་སོགས་པ་རྣམ་པ་ལྟ་བ་ལྔ་པོ་ཡིན་ཏེ་དེ་ཉིད་ཕོངས་པ་ཡིན་པའམ། དེ་རྣམས་ཀྱིས་ཕོངས་པར་བྱས་པ་ཡིན་ཏེ། སོགས་པའི་སྒྲས་ནི་སྤྱོད་པས་ཕོངས་པ་ལ་སོགས་པ་ཡང་གཟུང་ངོ༌། །འདི་ཐམས་ཅད་ཉོན་མོངས་པ་རྣམས་ཀྱི་སྟོབས་ཀྱིས་བདག་ཉིད་ཀྱི་འདོད་པའི་དབང་དུ་གྱུར་པ་མ་ཡིན་ནོ། །དེ་ལ་གལ་ཏེ་ཁྱེད་སྙིང་རྗེ་དང་ལྡན་པ་ཡིན་ན་དེའི་ཚེ་བདག་གསོ་བར་བྱ་བ་ཡིན་ཏེ་ཁྱེད་ལ་གང་དང་གང་དུ་གསོ་བའི་ནུས་པ་ཡོད་པ་ཅི་ལྟ་བ་བཞིན་དུ་སྟེ། གང་གི་ཉེས་པ་དང་བྲལ་བར་བསྒྲུབ་པར་བྱ་བའི་བློ་ཡོད་ན་ཞེས་པའི་དོན་ཏོ། །ཡང་ན་ནུས་པ་ཅི་ལྟ་བར་བདག་གིས་གནོད་ཀྱང་དང་དུ་བླང་ངོ་ཞེས་ཕྱི་མ་དང་འབྲེལ་ཏེ། བརྟུལ་ཞུགས་དང་ངེས་པའི་དཀའ་བའི་བྱ་བ་ལ་སོགས་པའི་མཚན་ཉིད་ཀྱིས་སྡུག་བསྔལ་བའོ། །གལ་ཏེ་ཁྱེད་ལ་བདག་གིས་གསོ་བའི་བློ་ཅུང་ཟད་ཡོད་ན་དེ་ཡང་བདག་གིར་ཁས་བླང་བར་བྱའོ། །དེ་ལྟར་གྱུར་ན་ཡང་གཅིག་ཏུ་ཁྱོད་ལ་འདི་གསོ་བའི་ནུས་པ་ཡོད་པ་མ་ཡིན་ཏེ། བསྒྲུབ་བྱའི་ཉེས་པ་དང་ལྡན་པའི་ཕྱིར་འདི་རིགས་སོ་ཞེ་ན། འོན་ཏེ་ཞེས་པ་ལ་སོགས་པ་གསུངས་ཏེ། འོན་ཏེ་ཞེས་པ་ནི་རྣམ་པ་གཞན་དགོད་པ་ཡིན་ཏེ། གལ་ཏེ་འདི་ལ་བདག་གསོ་བའི་ནུས་པ་མེད་ན་དེ་རྒྱུ་ཅིས་བདག་ནི་མཐོལ་འདི་ནི་དམའ་བ་ཡིན་ནོ་ཞེས་འདི་ནུས་པ་མེད་པར་ཡང་བདག་ལ་བརྙས་པར་བྱེད། འོན་ཏེ་གལ་ཏེ་ཡང་གསོ་བའི་ནུས་པ་དང་བྲལ་བ་དེ་ལྟ་ན་ཡང་གཞན་གྱི་ཡོན་ཏན་དེ་ཡིས་བདག་ལ་ཅི་ཞིག་བྱ་སྟེ། དགོས་པ་ཅུང་ཟད་ཀྱང་མེད་ལ་རྣམ་པ་ཐམས་ཅད་དུ་ཉེ་བར་མཁོ་བ་དང་བྲལ་བའི་ཕྱིར་རོ། །འདི་ཉིད་འབའ་ཞིག་གི་དབང་དུ་བྱས་ཏེ། གང་ལས་བདག་ཉིད་དེ་རང་ཉིད་ཀྱི་ཡོན་ཏན་དང་ལྡན་པ་འདི་ཡིན་ལ། དེ་ལས་ཡོན་ཏན་གྱི་ཆ་ཅུང་ཟད་ཀྱང་བདག་ལ་ཡོད་པ་མ་ཡིན་ནོ། །དེ་ལྟར་
གྱུར་ན་ཡང་སྙིང་རྗེའི་ཡོན་ཏན་དང་ལྡན་པས་དེ་ལས་གཞན་ལ་ཡང་དེའི་ཡོན་ཏན་ཉེ་བར་མཁོ་བ་ཡིན་ནོ་ཞེ་ན། སྙིང་རྗེ་ཡང་དངོས་པོ་ལ་མཐོང་བ་མ་ཡིན་ནོ་ཞེས་བསྟན་པའི་ཕྱིར། ངན་འགྲོ་ཞེས་པ་ལ་སོགས་པ་གསུངས་ཏེ། གང་ཞིག་སྡིག་པ་བྱེད་པ་དེ་ངན་འགྲོར་ངེས་པའི་ཕྱིར་ངན་འགྲོའི་ཁར་གནས་པར་བརྗོད་དོ། །ཡང་ན་ངན་འགྲོར་གནས་པས་འདིར་ཁ་ཞེས་པ་དང་འབྲེལ་ཏོ། །ཡང་ན་ངན་འགྲོ་ནི་དམན་པའམ་མཁོ་བའི་ཡོ་བྱད་དང་བྲལ་བ་དེར་གནས་པ་ཡིན་ནོ། །གདུག་པའི་ཁར་གནས་ཞེས་པ་ལ་གདུག་པ་ནི་སྦྲུལ་དང་གཅན་གཟན་གཏུམ་པོ་ལ་ཡང་བརྗོད་དོ། །དེ་རྣམས་ཀྱི་ཁར་གནས་པའི་སྐྱེ་བོ་ལ་སྙིང་རྗེ་བའི་ཡིད་ཀྱིས་སྙིང་རྗེ་མ་ཡིན་ཏེ། དེ་སྡུག་བསྔལ་དང་བྲལ་བར་འབད་པར་བྱེད་པ་མ་ཡིན་ནོ། །དེ་ཙམ་འབའ་ཞིག་ནི་ཡོད་པ་མ་ཡིན་ལ་ཁྱད་པར་འདི་ཡང་ཡིན་ཏེ། གང་ཡོན་ཏན་རློམ་བས་ཏེ་ཡོན་ཏན་ལྷག་པ་ཡིན་ནོ་ཞེས་ནམ་ཡང་མཁས་པ་རྣམས་ལ་རྒྱལ་བར་བསྔོ་སྟེ་རྒྱལ་བར་འདོད་དོ། །དེ་ལྟར་རེ་ཞིག་མཐོ་ལ་ཕྲག་དོག་བཤད་ནས། མཉམ་པ་ལ་བརྗོད་པའི་ཕྱིར་བདག་དང་མཉམ་པ་ལ་ཞེས་པ་ལ་སོགས་པ་གསུངས་ཏེ། གཞན་དང་ལྷན་ཅིག་ཏུ་ཡོན་ཏན་ལ་སོགས་པས་བདག་མཉམ་པར་བལྟས་ཤིང་གསལ་བར་བྱས་ནས། གང་དེ་ལས་ལྷག་པར་བྱ་བའི་ཕྱིར་ཏེ། གཞན་ལས་ཡོན་ཏན་རྣམས་ཀྱིས་བདག་ལྷག་པར་བྱ་བའི་ཕྱིར་འབད་པར་བྱའོ། །གལ་ཏེ་རྙེད་པ་དང་བཀུར་སྟི་འདི་ལ་ལྷག་པ་མཐོང་ན་དེའི་ཚེ་འདི་ལས་ཕྲོགས་ནས་གཟུང་བར་བྱའོ། །དེ་ལྟར་ནའང་མི་སྟེར་ན་རྩོད་པ་དང་མཚང་འབྲུ་བ་ལ་སོགས་པས་ཀྱང་བསྒྲུབ་པར་བྱ་སྟེ། བདག་གི་རྙེད་པ་དང་བཀུར་སྟི་ཞེས་ཟླས་དབྱེ་བ་ཡིན་པའི་ཕྱིར་མ་ནིང་གི་རྟགས་སོ། །བདག་གི་ཞེས་པ་ནི་རང་གི་གང་ཡིན་པ་སྟེ། ཇི་ལྟ་འདི་བཟུང་ནས་འདུག་ཅེས་པའི་དོན་ཏོ། །གཞན་ཡང་གལ་ཏེ་རྙེད་པ་ལ་སོགས་པའི་ཡོན་ཏན་མཐོང་བ་རྣམས་ཀྱིས་འདི་མཆོད་པ་དེ་ལྟར་བདག་གིས་བྱའོ། །གང་གིས་རྙེད་པ་ལ་སོགས་པའི་རྒྱུ་འདི་འགྲིབ་པར་འགྱུར་བར་བྱའོ་ཞེས། ཡང་ནི་བདག་གི་ཡོན་ཏན་ཞེས་པ་ལ་སོགས་པ་གསུངས་ཏེ། ཡང་ནི་ཞེས་པ་ནི་བརྟག་པ་བཟུང་བའི་ཚིག་དག་གོ །ཇི་ལྟར་བདག་གི་ཡོན་ཏན་གསལ་བར་འགྱུར་བ་དེ་ལྟར་བདག་གིས་བརྩམ་པར་བྱ་སྟེ། བདག་གི་ནུས་པ་
བརྟན་པར་བྱ་ཞེ་ན། བདག་གི་སྐྱོན་ཡང་ཞེས་པ་ལ་སོགས་པ་གསུངས་ཏེ། ཡང་ནི་སྔར་བཞིན་ནོ། །འདིས་ཀྱང་ཅིར་འགྱུར་ན་བདག་ནི་མཆོད་འགྱུར་འདི་ལ་མིན་པར་འགྱུར་རོ། །དེས་ཀྱང་ཅིར་འགྱུར་ཞེ་ན་ཞེས་དོགས་ནས་བདག་དེང་རྙེད་པ་ཞེས་པ་ལ་སོགས་པ་གསུངས་ཏེ། གང་གིས་བདག་ནི་བཀུར་འགྱུར་འདི་ལ་མིན་ཏེ། ཤིན་ཏུ་ལེགས་པར་རྙེད་པ་དེས་བདག་གིས་ཐོབ་ཅེས་བདག་ཉིད་ལ་བསྟོད་པ་སྟོན་པར་བྱེད་དེ་བསྒྲུབ་བྱ་གྲུབ་པའི་ཕྱིར་རོ། །སླར་ཡང་ཤིན་ཏུ་དགའ་བ་གསལ་བར་བྱ་བའི་ཕྱིར། འདི་ནི་མ་རུངས་ཞེས་པ་ལ་སོགས་པ་གསུངས་ཏེ། རྒྱས་པའི་མིག་དང་ལྡན་པའི་གདོང་དང་ཡིད་རབ་ཏུ་དགའ་བར་རེ་ཞིག་བལྟའོ། །དེ་ལྟར་རྙེད་པ་འདོད་པས་མ་རུངས་པས་བྱས་པ་རྙེད་པ་བཀུར་སྟི་ལས་ཕྱི་རོལ་དུ་བྱ་སྟེ་བསལ་བར་བྱའོ་ཞེས་པའི་དོན་ཏོ། །ཡུན་རིང་པོ་ནི་དུས་ཤིན་ཏུ་རིང་བར་རོ། །ནམ་ཡང་འདི་ལ་བརྟེན་ནས་ཁོ་བོ་ཅག་ལ་འདི་ལྟར་དགའ་བ་སྐྱེ་བར་མ་གྱུར་པའོ། །འདིས་ཀྱང་མ་རུངས་པར་བྱས་པ་ཞེས་བསྟན་པའི་ཕྱིར་འགྲོ་བ་ཀུན་གྱིས་ཞེས་པ་ལ་སོགས་པ་གསུངས་ཏེ། དེའི་ཉེས་པ་བརྗོད་པས་གཞད་གད་དུ་བྱེད་པའོ། །དེ་དེར་ཞེས་པ་ནི་ཕྱོགས་ཐམས་ཅད་དུའོ། །འདིར་ཡང་བལྟ་ཞེས་པ་དང་འབྲེལ་ཏོ། །ད་ནི་ལྷག་པ་ཐོབ་པར་གྱུར་པས་སེམས་རངས་པས་བདག་ཉིད་དམན་པ་ཉིད་དུ་བསྒོམ་པར་བྱའོ་ཞེས་བསྟན་པའི་ཕྱིར། ཉོན་མོངས་འདི་ཡང་ཞེས་པ་ལ་སོགས་པ་གསུངས་ཏེ། འདི་ཡང་ནི་དེ་ལྟར་སྤྱོ་བའི་གནས་ཐམས་ཅད་དུ་དམན་པ་ལ་འདུག་པ་ཡང་ཡིན་ཏེ། དེ་ཉིད་ཀྱི་ཕྱིར་ན་ཉོན་མོངས་པ་ཡིན་ལ་བདག་དང་ལྷན་ཅིག་ཏུ་འགྲན་ཏེ་མཉམ་པོར་བྱེད་པར་གྲགས་སོ། །གྲགས་ཞེས་པ་ནི་མི་འདོད་པ་དང་འདི་མི་རིགས་ཞེས་པ་ཉིད་དོ། །ཇི་ལྟར་མི་རིགས་ཤེ་ན། འདི་བདག་ཅེས་པ་ལ་སོགས་པ་གསུངས་ཏེ། ཐོས་པས་ནི་བསྟན་བཅོས་ལ་སོགས་པ་རྣམས་ཐོས་པ་ཡིན་ལ། རེ་ཞིག་འདི་དང་བདག་མཉམ་མམ་ཅི་ཞེས་ཏེ། ཤེས་རབ་ནི་བློ་ཁྱད་པར་དུ་གྱུར་པ་ཡིན་ལ། གཟུགས་རིགས་ནོར་གྱིས་ཀྱང་མཉམ་མམ་ཞེས་པའི་ཐ་ཚིག་གོ །དེ་ལྟར་ཉིད་དུ་སྐྱེ་བོ་རྣམས་ཀྱིས་ཀྱང་བདག་གི་ཡོན་ཏན་ཕྱོགས་བཅུར་བསྒྲགས་པ་ཐོས་ཤིང་མཉན་ནས་སྤུ་ལྡང་བ་སྐྱེས་པར་གྱུར་པ་སྟེ་ལུས་ལ་བ་སྤུ་ལྡང་བ་
དང་ལྡན་པའོ། །དགའ་བ་ནི་ཡིད་རབ་ཏུ་དགའ་བ་དང་ལྡན་ཞིང་ཡོངས་སུ་ལོངས་སྤྱོད་པ་སྟེ་བདེ་བའི་དགའ་སྟོན་ནོ། །འོན་ཏེ་བརྒྱ་ལ་འགའ་ཞིག་ནས་འདིས་བག་མེད་པས་རྙེད་པར་གྱུར་ན་དེའི་ཚེ་ཇི་ལྟར་ཞེ་ན། གལ་ཏེ་འདི་ལ་རྙེད་ཡོད་ཀྱང༌། །ཞེས་པ་ལ་སོགས་པ་གསུངས་ཏེ། དེ་ལྟར་འདིའི་རྙེད་པ་ལ་བར་དུ་གཅད་པའི་ཕྱིར་འབད་པར་བྱས་ཀྱང་གལ་ཏེ་ཅི་ལྟར་ཡང་འདི་ལ་རྙེད་པ་ཡོད་ན་དེའི་ཚེ་འདིའི་སྐེ་ལ་རྡོག་པས་མནན་ནས་བླང་བར་བྱ་སྟེ། བདག་གིས་འདི་ལ་སྟོབས་ཀྱིས་བླང་ངོ༌། །ཅི་སྟེ་རྣམ་པ་ཐམས་ཅད་དུ་འདིའི་སྲོག་དང་བྲལ་བར་བྱ་བ་ཡིན་ནམ་ཞེ་ན། ངའི་ལས་ནི་ཞེས་པ་ལ་སོགས་པ་གསུངས་ཏེ། འཚོ་བ་ཙམ་ཞིག་ནི་རེ་ཞིག་སྲོག་འཛིན་པ་དེ་ཙམ་འདི་ལ་བྱིན་ནས་གཞན་ཐམས་ཅད་བདག་གིས་ཡོངས་སུ་གཟུང་བར་བྱའོ། །དེ་ལྟ་ན་ཡང་ནམ་ཞིག་ངའི་ལས་ནི་བྱེད་ཅེ་ན་ཞེས་ཏེ། གལ་ཏེ་འདི་ཁོ་བོའི་བཀའ་ཉན་པ་ལ་སྦྱོར་ནའམ་མ་སྨྲས་ཀྱང་རྗེས་སུ་མཐུན་པར་བྱེད་ན་དེའི་ཚེ་འདི་ལ་འཚོ་བ་ཙམ་ཞིག་སྦྱིན་པར་བྱ་སྟེ། གཞན་དུ་ནི་མ་ཡིན་ནོ། །ཡང་འདི་ཇི་ལྟར་ན་དམན་པའི་གནས་སྐབས་སུ་ཁྱེར་བར་བྱེད་ཅེ་ན། གང་འདི་བདེ་ལས་ཞེས་པ་ལ་སོགས་པ་གསུངས་ཏེ། གང་ཞེས་པ་ནི་གང་ལས་ཏེ་བདེ་བ་ལས་ཡིན་ལ། ཉམས་པར་བྱ་བ་ནི་བྲལ་བར་བྱའོ། །འདི་ཙམ་གྱིས་གཏོང་བར་བྱ་བ་ནི་མ་ཡིན་ཏེ་འོན་ཀྱང་བདག་གིས་གནོད་ལ་རྟག་ཏུ་སྦྱར་བར་བྱ་སྟེ་དུས་ཐམས་ཅད་དུ་བདག་གི་སྡུག་བསྔལ་གྱི་ཁུར་འདིའི་སྤྱོ་བར་ཡང་དག་པར་བཞག་སྟེ་དེའི་ཕྱིར་འདི་ལ་དེ་ལྟར་བྱའོ། །ཡང་ཅིའི་ཕྱིར་འདི་ལྟར་ཁྱོད་འདི་ལ་ཞེ་སྡང་བར་བྱེད་ཅེ་ན། འདི་ཡིས་ཞེས་པ་ལ་སོགས་པ་གསུངས་ཏེ། སྡང་བའི་སེམས་ཅན་འདིས་སྔར་འཁོར་བ་ཐམས་ཅད་དུ་བདག་ལ་ལན་གྲངས་བརྒྱ་ཕྲག་དུ་མར་གནོད་པ་བྱས་པ་ཡིན་ཏེ། བཅིང་བ་དང་བསད་པ་དང་བརྡེག་པ་ལ་སོགས་པ་རྣམས་ཀྱིས་སྡུག་བསྔལ་བར་བྱས་པ་ཡིན་ནོ། །ད་ནི་སྡུག་བསྔལ་འདི་བཟོད་པར་མ་ནུས་ཏེ་བརྒྱ་ལ་འདི་ལས་སེམས་ལྡོག་པར་དོགས་ནས་ཐབས་སླ་བའི་རིམ་པས་དེ་ཉིད་ལ་སྦྱར་བར་བྱ་བའི་ཆེད་དུ་ཉེ་བར་སྟོན་པ་ནི་ཡིད་ཁྱོད་ཅེས་པ་ལ་སོགས་པ་གསུངས་ཏེ། ཐོག་མ་མེད་པའི་འཁོར་བར་གཞལ་བར་མི་ནུས་པའི་བསྐལ་པར་རང་གི་དོན་བྱེད་འདོད་པས་ཏེ་གོམས་པས་ངལ་བ་ཆེན་པོས་དུབ་པར་གྱུར་པས་སྡུག་བསྔལ་
ཆེན་པོ་དུས་ཡུན་རིང་པོར་མྱོང་བར་གྱུར་པའི་མཚན་ཉིད་ཀྱིས་སྡུག་བསྔལ་ཉིད་བསྒྲུབས་པ་ཡིན་ཏེ། ལས་དེ་དང་དེ་ལས་དགོས་པ་ཅུང་ཟད་ཀྱང་ཐབ་པ་མ་ཡིན་ནོ། །བྱུང་བར་གྱུར་པ་དེ་དང་དེ་རེ་ཞིག་བཟློག་པར་བྱ་བ་མ་ཡིན་པར་གྱུར་ན་ཡང་ད་ལྟ་འོང་བ་ལ་ཅི་ལྟར་རིགས་ཤེ་ན། དེ་ལྟར་བདག་གིས་གསོལ་པ་འདེབས་པ་ཞེས་བྱ་བ་ལ་སོགས་པ་གསུངས་ཏེ། གསོལ་བ་འདེབས་པ་ནི་བསྙེན་བཀུར་སྔོན་དུ་སོང་བའི་ཚིག་བརྗོད་པ་ཉིད་ཀྱིས་ཏེ། ཇི་ལྟར་སྔར་རང་ཉིད་ཀྱི་ལས་དེ་དང་དེ་ལ་ཞུགས་པ་དེ་ལྟར་བདག་དང་གཞན་དུ་བརྗེ་བ་ལ་གོམས་པ་འདི་ལ་ཡང་འཇུག་པར་གྱིས་ཤིག །དཔྱོད་པ་མེད་པ་ཞེས་བྱ་བ་ཤིན་ཏུ་ལྐོག་ཏུ་གྱུར་བའི་དོན་ལ་དཔྱོད་པ་དང་བྲལ་བའི་ཕྱིར་རོ། །ཅི་སྟེ་བསྒྲུབ་བྱའི་དོན་རྟོགས་པ་མེད་པར་ཅི་ལྟར་འདི་ལ་འཇུག་པ་ཉིད་དུ་འགྱུར་ཞེ་ན། ཐུབ་པའི་བཀའ་ཞེས་པ་ལ་སོགས་པ་གསུངས་ཏེ། ཕྱིས་ནི་དུས་ཕྱིས་ནས་རྟོགས་པར་འགྱུར་ཏེ། དེའི་སྟེ་བདག་གི་ཚིག་གིས་ཞུགས་པ་འམ་བདག་དང་གཞན་དུ་བརྗེ་བའི་ཡོན་ཏན་ལས་སོ། །དེ་ཁྱོད་ཀྱིས་ཉམས་སུ་བླངས་ནས་དེར་འགྱུར་རོ། །ཇི་ལྟར་ཤེས་ཤེ་ན། ཐུབ་པའི་བཀའ་ནི་ཡང་དག་པ་ཡིན་པ་སྟེ། ཡང་དག་ཕྱིན་ཅི་མ་ལོག་པ་རྟོགས་པར་བྱེད་པ་ཡིན་ཏེ། གང་གི་ཕྱིར་བཅོམ་ལྡན་འདས་ཀྱི་བཀའ་ཡིན་པ་དེའི་ཕྱིར་ཤེས་སོ། །དེ་ལྟར་གྱུར་ན་ཡང་བདག་གིས་ལས་འདི་དུ་མར་བྱས་ཀྱང་དེ་ལྟར་ན་ཡང་ཁྱད་པར་ཅུང་ཟད་ཀྱང་མ་རྟོགས་སོ་ཞེས་དོགས་ནས་གལ་ཏེ་ཁྱོད་ཀྱིས་ཞེས་པ་ལ་སོགས་པ་གསུངས་ཏེ། ཁྱོད་ནི་བདེན་པར་སྨྲ་བ་མ་ཡིན་ཏེ་གཞན་དུ་གལ་ཏེ་ལས་འདི་སྔར་བྱས་ནས་དེ་ཚེ་བྱེད་ལ་ལས་ཀྱི་འབྲས་བུ་ཡང་འབྱུང་བར་འགྱུར་རོ། །དེ་ལ་སངས་རྒྱས་ཀྱི་ཕུན་སུམ་ཚོགས་བའི་བདེ་བ་སངས་རྒྱས་ཉིད་མ་ཡིན་པ་སངས་རྒྱས་ཉིད་ཀྱི་བདེ་བ་པོར་ནས་སྲིད་པར་མི་འགྱུར་ཏེ། གནས་སྐབས་ངན་པ་འདིའི་སྐབས་མི་སྲིད་དོ། །ལས་དེ་མ་བྱས་ན་འབྲས་བུ་ཡང་སྐྱེ་བར་འགྱུར་བ་མ་ཡིན་ནོ། །ད་ནི་མཇུག་བསྡུ་བའི་ཚུལ་གྱིས་རང་གི་སེམས་དེ་ཉིད་ལ་བསྟན་པར་བྱ་བའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ། གང་ལས་འདི་ལྟ་བུའི་འབྲས་བུ་འདི་གོམས་པ་ལས་སྐྱེ་བར་འགྱུར་བ་དེའི་ཕྱིར་བྱས་ཤིང་བསྒྲུབས་པ་དེ་ལྟར་རོ། །དེའི་ཕྱིར་བརྗོད་པའི་འབྲས་བུ་འདོད་པས་དེའི་བྱ་བ་ལ་སྐྱོ་བ་
བསལ་ནས་རང་བཞིན་ཉམས་སུ་བླང་བར་བྱའོ་ཞེས་བསྟན་པའི་ཕྱིར་གཞན་གྱི་ཞེས་པ་ལ་སོགས་པ་གསུངས་སོ། །སེམས་ཅན་གཞན་གྱི་རྟོག་མཁན་ཞེས་པ་ལ་སོགས་པ་གསུངས་ཏེ། རབ་ཏུ་སྦས་ནས་དེའི་དགོས་པར་བྱེད་པ་ཡིན་ནོ། །ད་ནི་བདག་དང་གཞན་དུ་བརྗེ་བ་བོར་ནས་སླར་ཡང་ཕྲག་དོག་བསྒོམ་པ་ལ་རང་གི་སེམས་སྦྱང་བའི་ཕྱིར། བདག་སྐྱེད་པ་ལ་སོགས་པ་གསུངས་ཏེ། དེ་བས་གནས་པའི་ཕྱིར་སྐྱིད་པ་ཡིན་ལ་སྡུག་བསྔལ་གྱི་གནས་པས་མི་སྐྱིད་པ་ཡིན་ནོ། །དེ་ལྟར་ཕྲག་དོག་གྱིས་ཤིག་ཅེས་རང་གི་སེམས་ལ་འདི་ལྟར་གསུངས་པ། བདག་ནི་ཞེས་པ་ལ་སོགས་པ་གསུངས་ཏེ། བདག་ནི་ཞེས་པ་ནི་བདག་གི་ལུས་ལའོ། །གང་ཚེ་ཞེས་པ་ནི་དུས་ནམ་ཞིག་ནའོ། །ཅི་བྱེད་ཅེས་པ་ནི་རང་གི་དོན་ནམ། གཞན་ཡི་དོན་ནམ། དམ་པའི་ལས་སམ། དམ་པ་མ་ཡིན་པའི་ལས་སམ། ཐ་མལ་པའི་ལས་ཅི་བྱེད་ཅིང་གནས་ཞེས་སོ། །དེ་ལྟར་འདིའི་ལུས་ལ་གླགས་བརྟགས་ཏེ་བཙལ་ལོ། །འོན་ཏེ་གང་གི་ཚེ་འདི་ལ་གླགས་མ་རྙེད་ན་དེའི་ཚེ་ཇི་ལྟར་བྱ་ཞེ་ན། གཞན་གྱི་ཞེས་པ་ལ་སོགས་པ་གསུངས་པ་ལ། གཞན་གྱིས་བྱས་པའི་ཉེས་པ་འདི་ཡང་ཁྱོད་ཉིད་ཀྱི་ཉེས་པར་སྤྱད་པ་ཡིན་ནོ་ཞེས་གང་གིས་འདིའི་སྤྱོད་པ་ཡིན་ནོ་ཞེས་དེ་ལྟར་འདི་ཉིད་ཀྱི་ལུས་ཀྱི་མགོ་ལ་བསྒྱུར་བར་བྱོས་ཤིག །ཡང་ན་གཞན་གྱིས་བྱས་པའི་ཉེས་པ་ཡང་འདི་ཉིད་ཞེས་བྱ་བ་ནི་ཉེས་པར་སྤྱོད་པ་ཡང་འདི་ཉིད་ཀྱི་མགོ་བོ་ལ་བསྒྱུར་བར་བྱོས་ཤིག་ཅེས་དེའི་ལས་ཀྱི་འབྲས་བུའི་ཆ་ཉིད་དུ་གྱིས་ཤིག་པའོ། །གང༌། འགྲོ་བའི་སྡུག་བསྔལ་གང་ཅིའང་རུང༌། །དེ་ཀུན་བདག་ལ་སྨིན་གྱུར་ཅིག ། བྱང་ཆུབ་སེམས་དཔའི་དགེ་འདུན་གྱིས། །འགྲོ་བ་བདེ་ལ་གནས་པར་ཤོག །ཅེས་འཆད་པར་འགྱུར་རོ། །གང་གི་ཚེ་ཡང་ཉེས་པ་ཆུང་ངུ་ཡང་འདི་ལ་མཐོང་ན་དེའི་ཚེ་སྦ་བར་མི་བྱའོ་ཞེས་བདག་གིས་ཉེས་པ་ཞེས་བྱ་བ་ལ་སོགས་པ་གསུངས་ཏེ། ཆུང་ངུ་སྟེ་ལུས་འདིའི་ཤིན་ཏུ་ཕྲ་བའི་ཡང་ཉེས་པ་རབ་ཏུ་ཤོགས་ཞེས་ཏེ་མངོན་པར་གྱིས་ཤིག་པའོ། །ཐུབ་པ་ཆེན་པོ་ནི་སངས་རྒྱས་བཅོམ་ལྡན་འདས་ཏེ་དེའི་སྤྱན་སྔར་རོ། །གང་གིས་འདི་འཇིགས་པས་སླར་ཡང་མི་བྱེད་པའི་སྡོམ་པ་ཉིད་ཀྱིས་གནས་སོ། །གལ་ཏེ་འདིའི་སྙན་པ་གསལ་བར་གྱུར་པ་མཐོང་ན་དེ་ལ་གསུངས་པ། གཞན་གྱི་
ཞེས་པ་ས་སོགས་པ་སྟེ། འདིའི་གྲགས་པ་གཞན་རྣམས་ཀྱི་དེ་བས་ལྷག་པའི་གྲགས་པ་གསལ་བར་དྲི་མ་ཅན་དུ་གྱིས་ཤིག་ཅེས་དེ་རྙོག་པ་དང་བཅས་པར་གྱིས་ཤིག་པ་དང་སྦ་བར་གྱིས་ཤིག་ཅེས་པའི་དོན་ཏོ། །འདི་ལ་སྙིང་རྗེའི་སེམས་ཅུང་ཟད་ཙམ་ཡང་བསྐྱེད་པར་མི་བྱའོ་ཞེས་བདག་ནི་བྲན་གྱིས་ཞེས་པ་ལ་སོགས་པ་གསུངས་ཏེ། ངེས་པར་དམན་པའི་བྲན་གྱི་ཐ་མ་ལྟར་གཞན་གྱི་དགོས་པ་སེམས་ཅན་གྱི་དོན་རྣམས་ལ་འདི་ལྟར་བཀོལ་བར་གྱིས་ཤིག་སྟེ་ཁུར་ཁྱེར་བ་ལ་སྦྱོར་བའོ། །གལ་ཏེ་འདི་ལ་ཡོན་ཏན་གྱི་ཆ་ཅུང་ཟད་མཐོང་བ་དེའི་ཚེ་ཅི་བསྟོད་པ་བྱ་བའམ་ཞེ་ན། འདི་ནི་སྐྱོན་ཅན་ཞེས་པ་ལ་སོགས་པ་གསུངས་ཏེ། བརྒྱ་ལ་ཡོན་ཏན་ལྷག་པ་ལྷན་ཅིག་སྐྱེས་པ་ཡོད་ན་ཡང་འདི་ནི་བསྟོད་པར་བྱ་བ་མ་ཡིན་པ་ཉིད་དོ། །ཅིའི་ཕྱིར་ཞེ་ན། གང་གི་ཕྱིར་འདི་ནི་ཉེས་པ་དུ་མའི་བདག་ཉིད་ཡིན་པའི་ཕྱིར་རོ། །གཞན་ཡང་ཡོན་ཏན་རྟོགས་པའི་སྒོ་ནས་བསྟོད་པར་བྱ་བར་འགྱུར་ན་འདི་ཉིད་རྩ་བ་དང་བཅས་པ་ཉམས་པ་ཡིན་ནོ་ཞེས་འདིའི་ཡོན་ཏན་ཞེས་བྱ་བ་ལ་སོགས་པ་གསུངས་སོ། །འདིར་ཡང་མང་དུ་བརྗོད་པས་ཅི་ཞིག་བྱ་སྟེ། མདོར་ན་འདི་ལ་ཆད་བའི་ལས་བྱའོ་ཞེས་བསྟན་པའི་ཕྱིར། མདོར་ན་ཞེས་བྱ་བ་ལ་སོགས་པ་གསུངས་ཏེ། གནོད་པ་ཞེས་པ་ནི་སྡུག་བསྔལ་བའམ་གནོད་པ་བྱེད་པའོ། །འདི་ལྟར་གལ་ཏེ་ཡང་བདག་གིས་སྡུག་བསྔལ་གྱིས་ཁུར་ཁྱེར་བར་མི་ནུས་སོ་ཞེས་སྨྲས་ན་དེའི་ཚེ་འདིར་ཅི་ལྟར་འཇུག་པར་བྱ་ཞེ་ན། གང་གིས་ངག་རྩུབ་གྱུར་ཚུལ་དུ། །ཞེས་པ་ལ་སོགས་པ་གསུངས་ཏེ། གང་གིས་ངག་རྩུབ་པར་འགྱུར་བ་ནི་ཕོད་པ་ཆེ་བ་ཡིན་དང་པོ་ཉིད་དུ་འདི་ལ་དེ་ལྟར་སྐབས་དབྱེ་བར་མི་བྱའོ། །འོན་ཀྱང་གཞག་པར་བྱ་སྟེ་གཟུང་བར་བྱའོ། །བག་མ་གསར་བའི་འཇུག་པ་བཞིན་དུའོ། །དེ་ཉིད་གསུངས་པ། འཇིགས་དང་ཞེས་ཏེ་ནམས་པ་ལས་སྐྲག་པའོ། །ངོ་ཚ་ཞེས་པ་ནི་བྱ་བ་མ་ཡིན་པ་ལ་ངོ་ཚ་བའོ། །ཐམས་ཅད་དུ་མི་མཐུན་པ་ལ་འཇུག་པ་ལས་བཟློག་པ་ལ་བརྩོན་པར་བྱ་ལ། ད་ལྟར་གནས་པ་ན་ཡང་རྣམ་པ་ཐམས་ཅད་ལྕགས་ཀྱུ་མེད་པར་མི་བྱའོ་ཞེས་བསྟན་པའི་ཕྱིར། འདི་ལྟར་གྱིས་ཤིག་ཅེས་པ་ལ་སོགས་པ་གསུངས་ཏེ། འདི་ལྟར་བཀའ་ཉན་པ་ལ་འཇུག་པར་བྱས་ནས་ལུས་འདི་དབང་དུ་གྱུར་པར་བྱ་སྟེ།
རང་ལ་རག་ལས་པས་གཞག་པར་བྱ་སྟེ། རྟ་དུལ་བ་བཞིན་ནོ། འོན་ཏེ་འདི་ལྟར་དབང་དུ་མ་གྱུར་ན་དེའི་ཆད་པས་གཅད་པར་བྱ་སྟེ། དེ་ལས་འདས་ན་སྟེ་གལ་ཏེ་ཁྱོད་བཀའ་ལས་འདས་པས་འཇུག་ན་དེའི་ཚེ་ཆད་པས་གཅད་པར་བྱ་སྟེ་སྤྱོ་བར་བྱ་བའམ། ཚར་གཅད་པར་བྱའོ། །ད་ནི་བདག་གི་སེམས་དང་བདག་ཐ་དད་པ་བཞིན་དུ་ཡོངས་སུ་བརྟགས་ནས་བརྟན་པས་བསྡུ་བའི་ཕྱིར་གསུངས་པ། འོན་ཏེ་དེ་ལྟར་ཞེས་པ་ལ་སོགས་པ་སྟེ། གལ་ཏེ་ཡང་ཁྱོད་འདི་ལ་རབ་ཏུ་ཞུགས་པར་གྱུར་ཏེ། བརྒྱ་ལ་ཉམས་པར་གྱུར་ན་དེའི་ཚེ་ཉེས་པ་དེས་ཁྱོད་ཉིད་ཚར་གཅད་པར་བྱའོ། །ཅིའི་ཕྱིར་ཞེ་ན། ཉེས་པ་ཐམས་ཅད་ཁྱོད་ལ་བརྟེན་པ་ཡིན་ཏེ། རང་ཉིད་སེམས་ལུས་མེད་པར་གྱུར་པ་ཡང་ཁྱོད་ཉིད་ཀྱི་བསམ་པ་ཉིད་ཀྱིས་འདི་ཐམས་ཅད་དུ་འཇུག་པར་བྱེད་དེ། དེས་གང་འགའ་ཞིག་ཏུ་ངན་གཡོ་ཅན་དུ་རྟེན་པར་བྱེད་དོ། །དེར་ཁྱོད་ཀྱིས་དྲང་པོ་མ་ཡིན་ནོ་ཞེས་བསམ་པའོ། །དེ་ནས་མི་བཟོད་པས་རང་གི་སེམས་ཉིད་ལ་བསྡིགས་པ་ཁྱོད་ཀྱིས་ཞེས་པ་ལ་སོགས་པ་གསུངས་ཏེ། བསྡིགས་པ་འདི་ནི་འཇིག་རྟེན་པའི་བརྗོད་པའོ། །གང་དུ་འགྲོ་བ་ཁོ་བོས་བལྟ། །ཞེས་པ་ནི་དེ་ནི་ཁྱོད་ཀྱིས་གང་དུ་འབྲོས་པར་བྱེད་ཅེས་སོ། །ཇི་ལྟར་ཁྱོད་ཀྱིས་མི་ཤེས་པ་ན་གླགས་རྙེད་པ་དེ་ལྟ་ནི་ནུས་པ་མ་ཡིན་ཏེ། ད་ནི་རང་བཞིན་ཡོངས་སུ་ཤེས་པས་བདག་ཉིད་སྟོབས་དང་ལྡན་པ་ཡིན་ཏེ། དེ་ཉིད་གསུངས་པ། དྲེགས་པ་ཐམས་ཅད་གཞོམ་བྱ་སྟེ། ཞེས་པ་ནི་ཁྱོད་ཀྱི་སྲོག་བླང་བར་བྱའོ། །འོན་ཏེ་འདི་ལྟར་ཁྱོད་ཀྱིས་སྔར་བཞིན་དུ་བདག་ལ་ད་ལྟར་ཡང་སྟོབས་ཡོད་དོ་ཞེས་སེམས་པ་བསམ་པར་མི་བྱ་སྟེ། ཁྱོད་ཀྱིས་གང་དུ་ཁོ་བོ་བརླག་པ་སྟེ། ལམ་མ་ཡིན་པར་བྲིད་པ་ནི་གང་གི་ཕྱིར་སྔོན་གྱི་དུས་ཡུན་རིང་པོ་གཞན་ཡིན་ལ། ད་ནི་དུས་འདི་གཞན་ཡིན་ཏེ། སྔོན་དང་འདྲ་བ་མ་ཡིན་ནོ། །ད་ནི་སྔོན་གྱི་དུས་མ་ཡིན་ནོ་ཞེས་ཅི་ལྟར་ཤེས་པར་བྱ་ཞེ་ན། ད་དུང་ཞེས་པ་ལ་སོགས་པ་གསུངས་ཏེ། སྔར་ནི་རང་གི་དོན་ལ་ཞེས་པའི་སེམས་ཉིད་ཀྱིས་ཁྱོད་ཀྱིས་ཁོ་བོ་བསླུས་པ་ཡིན་ལ། དེ་ཡང་བདག་ལ་ད་ལྟ་ཡང་ཡོད་དོ་ཞེས་ཡིད་ལ་མ་བྱེད་ཅིག །འདི་ལྟར་ཤེས་པར་བྱས་ནས་སེམས་ཅན་མང་པོའི་དོན་ལ་རབ་ཏུ་ཞུགས་ཤིག །སྐྱོ་བར་སེམས་ཏེ་དཀའ་བའི་བློ་པོར་ཅིག་པའོ། །ཡང་ན་སེམས་ཅན་གྱི་དོན་གྱི་ཁུར་ཁྱད་པར་
སེམས་པ་ན། སྡུག་བསྔལ་བའི་བློས་དོར་བར་མ་བྱེད་ཅིག །ཅིའི་ཕྱིར་ཞེ་ན། བདག་གིས་གཞན་ལ་ཁྱོད་བཙོངས་ཀྱིས། །ཞེས་ཏེ། སྔར་ཉིད་དུ་བདག་དང་གཞན་དུ་ཡོངས་སུ་བརྗེས་པ་ན། ཁྱོད་བདག་གིས་གཞན་ལ་རག་ལས་པ་ལ་སྦྱར་བ་ཡིན་ནོ། །དེ་ལྟ་ན་ཡང་བདག་ཉེས་པ་མ་བྱས་པ་ལ་ཡང་ཁྱེད་ཡོངས་སུ་མ་མགུ་བ་གང་གིས་ཡོངས་སུ་གཏང་བའི་བློ་སྐྱེད་ཅེས་དོགས་ནས། གལ་ཏེ་བག་མེད་ཅེས་པ་ལ་སོགས་པ་གསུངས་ཏེ། གལ་ཏེ་ཡང་ཇི་ལྟར་བག་མེད་པར་གྱུར་ཏེ། བློ་སྟོར་བས་བག་མེད་པའམ་དྲན་པ་ཉམས་ཏེ་སེམས་ཅན་རྣམས་ལ་སེམས་ཁྱོད་མ་བྱིན་ཏེ། རང་ཉིད་ཀྱིར་བྱས་ན་དེའི་ཚེ་ཁྱོད་ཀྱིས་ཁོ་བོ་དམྱལ་བའི་སྲུང་མ་རྣམས་ཏེ། དམྱལ་བའི་སྡུག་བསྔལ་སྐྱེད་པ་ལ་སྦྱར་བ་གཤིན་རྗེའི་སྐྱེས་བུ་རྣམས་ལ་བྱིན་པར་ངེས་ཏེ་ཐེ་ཚོམ་ཡོད་པ་མ་ཡིན་ནོ། །དེ་ལྟར་རྗེས་སུ་མཐུན་པར་བྱས་ཀྱང་ཁྱོད་རྗེས་སུ་མི་མཐུན་པ་ཡིན་ཏེ། དེའི་ཕྱིར་ཁྱེད་ལ་གཏོང་བའི་བློར་འགྱུར་རོ། །འོན་ཏེ་གང་གིས་ན་དེ་ལྟར་རྗོད་པར་བྱེད་པ་བརྒྱ་ལ་དེ་ལྟར་གྱུར་ཏམ་ཞེ་ན། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ཞེས་པ་ནི་ཁྱོད་ལ་རྗེས་སུ་མཐུན་པ་སྤྱད་པ་ལས་ཏེ། ལན་གྲངས་དུ་མར་ཁྱོད་ཀྱིས་ཁོ་བོ་སྡུག་བསྔལ་འབའ་ཞིག་གི་སྣོད་དུ་བྱས་པ་ཡིན་ལ། ཡུན་རིང་བ་ནི་དུས་རིང་པོར་རོ། །ཅི་ཞིག་བྱས་ནས་ཤེ་ན། དམྱལ་བ་རྣམས་ལ་བྱིན་ནས་སོ། །ཁོན་རྣམས་ཏེ་སྔར་གྱི་དགྲ་སྟེ་དགྲ་ཉིད་དུ་གྱུར་པ་རྣམས་ཡིན་ཏེ། ད་ནི་དེ་རྣམས་དྲན་པར་བྱས་ལ་གཞོམ་པར་བྱ་སྟེ། རྩ་བ་དང་བཅས་པ་བརླག་པར་བྱའོ། །རང་གི་དོན་ཏེ་ཁོ་ལ་དང་བྲན་ཉིད་ཡིན་ཏེ། དུས་ཐམས་ཅད་དུ་དེའི་དབང་དུ་གྱུར་པའི་ཕྱིར་རོ། །དེ་ལྟར་ན་རང་གི་སེམས་དེ་ལ་དྲག་ཏུ་བསྣུན་ནས་སླར་ཡང་ཞི་བའི་རིམ་པས་བསླབ་པར་བྱ་བའི་ཕྱིར་དེའི་ཚེ་བདག་ནི་ཞེས་པ་ལ་སོགས་པ་གསུངས་ཏེ། གལ་ཏེ་ཁྱོད་བདག་ཉིད་ཡུན་རིང་པོ་ངེས་པར་ལེགས་པ་འདོད་པའི་ཡིན་ན་དེའི་ཚེ་བདག་ཉིད་ལ་དགའ་བར་མི་བྱ་སྟེ་སྤང་བར་བྱའོ་ཞེས་པའི་ཐ་ཚིག་སྟེ། གཞན་དུ་ན་བདག་ཉིད་ལ་དགའ་བ་ཉིད་དུ་བྱས་པར་མི་འགྱུར་རོ། །གལ་ཏེ་ཡང་བདག་ཉིད་ལ་ཁྱོད་ཀྱིས་འཇིགས་པ་ཐམས་ཅད་ལས་བསྲུང་བའི་བློ་ཡོད་ན་དེའི་ཚེ་ལུས་འདི་བསྲུང་བར་རིགས་སོ་ཞེས་རང་གི་སེམས་ལ་བརྗོད་དོ། །ཅི་སྟེ་དེ་
ལྟ་ན་ཡང་འདི་ལ་རྗེས་སུ་གཟུང་བར་བྱ་བར་རིགས་པ་ཉིད་དོ་ཞེ་ན། ཅི་ལྟ་ཇི་ལྟར་ཞེས་པ་ལ་སོགས་པ་གསུངས་ཏེ། འདི་ནི་ཞེས་པ་ནི་རང་བཞིན་ཕྱིན་ཅི་ལོག་ཏུ་གྱུར་པའི་ལུས་སོ། །ཅི་ལྟ་ཅི་ལྟར་ཏེ་རྣམ་པ་གང་དང་གང་གིས་ཅི་སྲིད་དེ་སྲིད་དུ་དེ་དང་དེའི་བདེ་བའི་ཡོ་བྱད་བསྒྲུབས་པས་འཕེལ་བར་བྱེད་པར་འདོད་པ་ནི་ཡོངས་སུ་སྐྱོང་བར་བྱེད་པ་ཡིན་ནོ། །དེ་ལྟ་དེ་ལྟར་ཤིན་ཏུ་ནི་རང་བཞིན་ཤིན་ཏུ་གཞོན་པར་གྱུར་པས་ལྟུང་བར་འགྱུར་བ་ཉིད་དེ། རྣམ་པ་ཐམས་ཅད་དུ་ལས་ཐམས་ཅད་ལ་ལས་སུ་མི་རུང་བར་འགྱུར་རོ། །ཅི་སྟེ་གལ་ཏེ་ལྷུང་ན་ཡང་ལྷུང་དུ་ཆུག་མོད་ཉམས་པ་ཅི་ཡོད་དེ། དེ་ལྟར་ན་ཡང་མངོན་པར་འདོད་པ་ཐམས་ཅད་དུ་འགྱུར་བ་ལས་ལྡོག་པར་འགྱུར་རོ་ཞེ་ན། འདི་ནི་དེ་ལྟར་ཞེས་པ་ལ་སོགས་པ་གསུངས་ཏེ། འདི་ཞེས་པ་ནི་ལུས་ཡིན་ལ། དེ་ལྟར་ཞེས་པ་ནི་བདེ་བ་འདོད་པ་སྟེ་ལྟུང་བར་གྱུར་པ་ནས་གཞི་འདི་དག་ཐམས་ཅད་ནི་འཛམ་གླིང་འདི་ཐམས་ཅད་དོ། །འདོད་པ་ཆོག་པ་མེད་པ་ནི་འདོད་པ་སྟེ་མངོན་པར་འདོད་པ་ཡིན་ལ། ཆོག་པར་འགྱུར་བའི་ནུས་པ་དང་ལྡན་པ་མ་ཡིན་ཏེ། དཔེར་ན་རྒྱལ་པོ་ང་ལས་ནུ་འཛམ་བུའི་གླིང་གི་བདག་པོར་གྱུར་པས་ངོམས་པར་མ་གྱུར་ནས་ཡང་གླིང་བཞིའི་བདག་པོ་ཐོབ་པར་གྱུར་ཅིང་བརྒྱ་བྱིན་གྱི་སྟན་ཕྱེད་ཐོབ་པ་ལས་ཀྱང་ཆོག་པ་མེད་པ་བཞིན་ནོ། །གང་གི་ཕྱིར་ད་ལྟར་སུ་ཞིག་སྟེ་དགང་དཀའ་བའི་ལུས་འདི་འདོད་པ་བྱེད་པར་འགྱུར་ཏེ་མ་ཡིན་ནོ། །ཇི་ལྟར་ཤིན་ཏུ་ཐལ་ཆེས་པ་ནི་མི་རིགས་ལ། ཅུང་ཟད་ཙམ་གྱི་སྐབས་ཡིན་པ་ལ་ཉེས་པ་ཅི་ཡོད་ཅེ་ན། མི་ནུས་འདོད་ལ་ཞེན་པ་ལ་སོགས་པ་གསུངས་ཏེ། རྙེད་པར་དཀའ་ཞིང་མི་ནུས་པར་འདོད་དེ་མངོན་པར་འདོད་ན་ཉོན་མོངས་པ་སྟེ་མ་ལུས་པའི་མངོན་པར་ཞེན་པ་དང༌། དེ་ཐོབ་པའི་གེགས་བྱེད་པ་ལ་ཞེ་སྡང་བ་དང༌། བསམ་པ་ཉམས་པ་ཡང་འབྱུང་བར་འགྱུར་ཏེ། དེ་ལས་ཡིད་མི་བདེ་བར་འགྱུར་རམ་བསམ་པ་ནི་འདི་ཡིན་ཏེ། ཅུང་ཟད་ཙམ་ལ་རྗེས་སུ་ཞུགས་ནས་སླར་ཡང་གོང་ནས་གོང་དུ་ལྷག་པ་མངོན་པར་འདོད་པ་ལ་འཇུག་པས་བཟློག་པར་མི་ནུས་པའི་འདོད་པ་འཕེལ་བ་ཡང་ཡིན་ཏེ། སྲེད་པ་ལ་ངེས་པ་མེད་པའི་ཕྱིར་འདོད་པ་འདི་ཙམ་ཞེས་པ་མེད་པར་འགྱུར་རོ། །སླར་ཡང་གང་ཞིག་དང་པོ་ཉིད་དུ་རྣམ་པ་ཐམས་ཅད་དུ་ཡུལ་ཐམས་ཅད་ལ་སྐབས་མེད་པར་བྱས་ན་དེའི་ཕུན་སུམ་ཚོགས་པ་མ་ཞུམ་པ་མ་ཡིན་ཏེ། ཡི་གར་མི་
འོང་བ་སྐྱེད་པར་བྱེད་པའི་ཕྱིར་དང༌། དེ་ལ་སེམས་འཇུག་པར་མི་བྱེད་པའི་ཕྱིར་རོ། །གང་གི་ཕྱིར་ཅུང་ཟད་ལ་ཡང་འདོད་པས་ཚིམ་པ་མེད་པ་ཉིད་ཡིན་པ་དེ་ལྟ་བས་ན་ལུས་ཀྱི་འདོད་པ་འཕེལ་བའི་ཕྱིར་སྐབས་དབྱེ་བར་མི་བྱའོ་སྟེ། ཅི་སྟེ་ཡུལ་དམ་པ་དེ་ལྟ་བུ་ལས་སེམས་ཇི་ལྟར་བཟློག་པར་མི་ནུས་ཤེ་ན། གང་གིས་ཡིད་འོང་ཞེས་པ་ལ་སོགས་པ་གསུངས་ཏེ། སྔར་འདི་ཉིད་དུ་བརྗོད་པ། རང་ཉིད་ཀྱིས་ནི་འགྲོ་ཉིད་ལ། །བརྟེན་པར་བྱས་ཏེ་རབ་ཏུ་རྟོགས། །ཞེས་གང་གསུངས་པའོ། །གཞན་ཡང་གང་འདོད་པར་བྱ་བ་ཉིད་མི་འཛིན་པ་དེ་ཉིད་ནི་དངོས་པོ་བཟང་པོ་ཡིན་ཏེ། གཞན་དུ་ན་སྡུག་བསྔལ་གྱི་ཕུང་པོ་ཆེན་པོ་ཉིད་འཕེལ་བར་འགྱུར་རོ། །གཞན་ཡང་རྒྱུ་མཚན་མེད་པ་ཉིད་དུ་མི་བདེན་པ་ལ་མངོན་པར་ཞེན་པས་བདག་གིས་སྡུག་བསྔལ་བསག་པར་བྱ་བ་ཡིན་ཞེས་ཁྱོད་རང་ཉིད་ཀྱིས་དཔྱད་པར་བྱའོ་ཞེས། ཐ་མར་ཐལ་བའི་ཞེས་པ་ལ་སོགས་པ་གསུངས་ཏེ། ཐ་མར་ཐལ་པའི་གནས་སྐབས་ཡིན་ལ། མཐར་གཏུགས་པ་ནི་དེ་ལ་ཐུག་པ་ཡིན་ཏེ། འདི་གང་གི་ཡིན་པ་དེ་ལ་དེ་སྐད་ཅེས་བྱའོ། །ཤི་བར་གྱུར་པ་ན་ལུས་པོ་འདིའི་མཐར་ཐུག་པ་ནི་ཐ་མར་ཐལ་བ་ཡིན་ཏེ། དེ་ལས་གཞན་པའི་རྟེན་ཡོད་པ་མ་ཡིན་ནོ་ཞེས་དགོངས་པའོ། །མི་གཙང་ལུས་འདི་ལུས་ཀྱི་རྣམ་པ་གཟུང་བ་ཡིན་ལ། མི་བཟད་པ་ནི་འཇིགས་སུ་རུང་བའམ་འཇིགས་པར་བྱེད་པ་ཡིན་ཏེ། འཇིགས་པ་ཐམས་ཅད་ཀྱི་རྒྱུ་ཡིན་པའི་ཕྱིར་རོ། །མི་གཡོ་བ་ནི་བོང་བ་དང་ཤིང་ལྟ་བུ་ཡིན་ནོ། །རང་ཉིད་བྱེད་པ་མེད་པ་ཡིན་ན་འདི་འགྲོ་བ་དང་འཆག་པ་ལ་སོགས་པར་ཅིར་འགྱུར་ཞེ་ན། གཞན་གྱིས་བསྐྱོད་པ་ཡིན་ཏེ། གཞན་ཡིད་ཀྱིས་བྱེད་པས་འདི་བྱ་བ་དང་ལྡན་པ་བཞིན་དུ་དམིགས་པ་ཡིན་ནོ། །ཞེན་པའི་རྒྱུ་མཚན་མེད་པའི་ཕྱིར་རྒྱུ་ཅིས་ལུས་པོ་འདི་ལ་བདག་ཏུ་འཛིན་ཏེ་རྗེས་སུ་འཇུག་པ་སྐྱེ་བར་འགྱུར། གཞན་འདི་ཡང་ཁྱོད་ཀྱིས་དཔྱད་པར་བྱའོ་ཞེས་བསྟན་པའི་ཕྱིར། ཅིའི་ཕྱིར་ཞེས་པ་ལ་སོགས་པ་གསུངས་ཏེ། འཁྲུལ་འཁོར་འདི་སྟེ་ལུས་ཀྱི་བདག་ཉིད་ཀྱིས་སོ། །གསོན་པའམ་ཤི་བ་ཡང་རུང་སྟེ། བདག་ལ་ཅི་ཞིག་བྱ་སྟེ། བདག་ལས་ཐ་དད་པ་ཡིན་པའི་ཕྱིར་དང༌། འདིར་རང་ཉིད་ལ་བྱ་བ་མེད་པའི་ཕྱིར་རོ། །དེའི་ཕྱིར་བོང་བ་ལ་སོགས་པ་དང་ཁྱད་ཕར་ཅི་
ཡོད་དོ་ཞེས་སྟོན་པར་བྱེད་དོ། །འོན་ཏེ་བདག་ཏུ་འཛིན་པའི་གཞི་ཉིད་ཀྱིས་ཁྱད་ཡོད་དོ་ཞེ་ན། འདིར་གསུངས་པ། ཀྱི་ཧུད་ང་རྒྱལ་སེལ་མི་བྱེད་དེ། འདི་ལྟར་བརྟགས་ན་ཡང་ཡུན་རིང་པོ་ནས་འདྲིས་པར་གྱུར་པའི་ཕྱིར་རོ། ཁྱོད་ཇི་ལྟར་འཇིགས་པར་མི་བྱེད་ཅིང་ཇི་ལྟར་ཡང་བརླག་པར་མི་བྱེད་ཅེས་བའི་ཐ་ཚིག་གོ །དེ་ཉིད་བསྟན་པར་འདོད་ནས། ལུས་ཞེས་པ་ལ་སོགས་པ་གསུངས་ཏེ། འདི་ནི་བདག་གི་ལུས་ཡིན་ནོ་ཞེས། བདག་ཏུ་འཛིན་པའི་མངོན་པར་ཞེན་པས་ཁྱོད་ཀྱི་རྒྱུ་མཚན་མེད་པ་ཉིད་དུ་སྡུག་བསྔལ་གྱི་ཕུང་པོ་ང་རྒྱལ་ལ་སོགས་པར་བྱེད། ཡང་ཅིའི་ཕྱིར་འདི་ལྟར་བརྗོད་ཅེ་ན། རྗེས་སུ་ཆགས་པ་དང་ཞེས་པ་ལ་སོགས་པ་གསུངས་ཏེ། བོང་བ་དང་འདྲ་བའི་ལུས་པོ་འདི་ལ་རྒྱུ་མཚན་མེད་པར་ཞེ་སྡང་སྟེ་ཁོང་ཁྲོ་བ་དང༌། རྗེས་སུ་ཆགས་པ་སྟེ་མངོན་པར་ཞེན་པས་ཅི་ཞིག་བྱ་སྟེ་ཅུང་ཟད་ཀྱང་མ་ཡིན་ནོ། །ཅིའི་ཕྱིར་ཡང་འདི་ལྟར་ཡིན་ཞེ་ན། བདག་གིས་ཞེས་པ་ལ་སོགས་པ་གསུངས་ཏེ། འདི་ལྟར་ཐམས་ཅད་རྗེས་སུ་གཟུང་བའི་རྣམ་པས་བསྐྱངས་ཤིང་གསོས་པའམ། བྱ་རྒོད་དང་ཅེ་སྦྱང་ལ་སོགས་པ་རྣམས་ཀྱིས་ཟ་བ་ན་ཡང་ཕན་པ་མེད་པ་དེ་ལ་ཆགས་པར་བྱེད། གནོད་པར་བྱེད་པའི་བྱ་རྒོད་ལ་སོགས་པ་རྣམས་ལ་ཡང་གང་ལ་ཞེ་སྡང་བ་མེད་པའོ། །དེ་ལྟ་བུ་ཤིང་དང་མཚུངས་པ་སེམས་མེད་པ་དེ་ཉིད་ལ་ཆགས་པར་བྱེད། ཤིང་དང་མཚུངས་པ་ཉིད་དུ་བསྟན་ནས། དེ་མ་བཟུང་བས་འབྲས་བུ་དང་བཅས་པར་བསྟན་པའི་ཕྱིར། གང་ཞིག་ཅེས་པ་ལ་སོགས་པ་གསུངས་ཏེ། ལུས་བདག་གིར་མ་བྱས་ཤིང་སྤངས་པ་ལས་ཁྲོ་བ་སྟེ་ཞེ་སྡང་བ་འདི་ལ་མེད་པ་དང་གང་ལ་ཡང་མཆོད་པ་སྟེ་བསྙེན་བཀུར་བྱས་པས་མགུ་བ་སྟེ། རབ་ཏུ་དགའ་བ་བདག་ལ་སྐྱེ་བར་འགྱུར་བ་མ་ཡིན་ཏེ། དེ་ཉིད་ལ་སེམས་མེད་པའི་ཕྱིར་མི་ཤེས་པ་ཡིན་ཏེ། རྟོགས་པ་མ་ཡིན་ནོ། །དེ་ལ་བརྟེན་ནས་ཁོང་ཁྲོ་བ་དང་རྗེས་སུ་ཆགས་པའི་བདག་ཉིད་ཀྱིས་ངལ་ཞིང་དུབ་པས་གང་ལ་བྱས་པས་བདག་ལ་ཅུང་ཟད་ཀྱང་དགོས་པ་མེད་དོ་ཞེས་པའི་དོན་ཏོ། །དེ་ལྟར་ཁྱེད་ཀྱིས་བསླབ་པར་བྱའོ། །དེ་ལྟར་རང་གི་སེམས་རྟོགས་པར་བྱས་ནས་བདག་དང་གཞན་དུ་བརྗེ་བའི་རང་བཞིན་མཇུག་བསྡུས་ཏེ་བསྟན་པའི་ཕྱིར། གང་ཞིག་ལུས་འདི་ཞེས་པ་ལ་སོགས་པ་གསུངས་ཏེ། འདི་ཞེས་
པ་ནི་བདག་གི་སྟེ། འགའ་ཞིག་གིས་ལུས་འདོད་པ་སྟེ་ཕན་པ་དང་བདེ་བ་བསྒྲུབ་པར་འདོད་པའམ། ཡིད་བདེ་བར་མཐོང་བའོ། །དེ་ཡང་བདག་གི་བཤེས་ཡིན་ཏེ་སྡུག་ཅིང་ཆགས་པའི་ཡུལ་ཡིན་ནོ་ཞེས་པའི་ཐ་ཚིག་གོ །ཡང་གི་སྒྲས་ནི་བདག་ཉིད་འབའ་ཞིག་གི་མ་ཡིན་ནོ། །ཁོ་བོ་ཞེས་པ་ནི་རིགས་པས་བརྟགས་ན་མི་བདེན་པ་ཉིད་དོ། །དེ་ལྟ་ཡིན་དུ་ཆུ་ག་ན་ཡང་གཞན་དང་ཡང་ཐུན་མོང་ཡིན་ནོ་ཞེས་རིགས་པ་ཉེ་བར་བསྟན་པའི་ཕྱིར། ཐམས་ཅད་རང་གི་ལུས་ཞེས་པ་ལ་སོགས་པ་གསུངས་ཏེ། གལ་ཏེ་རང་གི་ལུས་ལ་རྗེས་སུ་ཆགས་པའི་རྒྱུ་མཚན་གྱིས་ཞན་པ་གཞན་ཏེ་དེ་ལས་གཞན་པའི་སེམས་ཅན་ཡང་རང་གི་ལུས་འདོད་དོ། །བརྗོད་པའི་རིམ་པ་རྒྱུ་མཚན་ལ་ཁྱད་པར་མེད་པས་དེ་རྣམས་ལ་བདག་ཅིའི་ཕྱིར་མི་དགའ་སྟེ། བདག་ལ་ནི་རྒྱུའི་ཁྱད་པར་སྔར་ཉིད་དུ་བསལ་བའི་ཕྱིར་དེ་རྣམས་ལ་ཡང་བདག་དགའ་བར་རིགས་སོ་ཞེས་པའི་དོན་ཏོ། །ད་ནི་བསྟན་པའི་དོན་མཇུག་བསྡུ་བའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ། གང་གི་ཕྱིར་བདག་ལ་ཞེན་པ་མ་སྤངས་པར་འགྲོ་བའི་དོན་རྫོགས་པར་བྱེད་མི་ནུས་པའི་སྤོབས་པ་མེད་པ་ཐམས་ཅད་ཀྱི་ཐམས་ཅད་ལ་ལྟོས་པ་སྤངས་པས་སོ། །འགྲོ་ལ་ཕན་པ་ཞེས་པ་ནི་སེམས་ཅན་ཐམས་ཅད་ལ་ཕན་པ་བསྒྲུབ་པའི་དོན་དུ་གང་ལས་འགྲོ་བ་ལ་ཕན་པ་དང་ལྡན་པ་དེས་ན་ལུས་པོ་འདི་ལ་ཉེས་པ་མང་ཡང་སྟེ། ཉེས་པ་དུ་མའི་གནས་ཡིན་ཡང་ལས་བྱེད་པའི་སྤྱད་བཞིན་དུ་གཟུང་བར་བྱ་སྟེ། གཞག་པར་བྱ་བའམ་བསྲུང་བར་བྱ་སྟེ་དགོས་པའི་དོན་ལ་མཁོ་བའི་དངོས་པོ་བཞིན་དུའོ། །གང་གསུངས་པ། བསམ་པ་གཞན་ནི་ཀུན་བཏང་སྟེ། བདག་གི་སེམས་ནི་མཆོག་གཅིག་བུས། །ཞེས་པ་ལ་སོགས་པ་དེ་མཇུག་བསྡུ་བའི་ཕྱིར་དེས་ན་ཞེས་པ་ལ་སོགས་པ་གསུངས་ཏེ། གང་ལ་སེམས་མཉམ་པར་གཞག་པ་མེད་ན་ཉོན་མོངས་པ་སྤོང་བར་མི་འགྱུར་བ་དེས་ན་འཇིག་རྟེན་གྱི་སྤྱོད་པས་ཆོག་སྟེ་དགོས་པ་ཅུང་ཟད་ཀྱང་ཡོད་པ་མ་ཡིན་ནོ། །འཇིག་རྟེན་གྱི་སྤྱོད་པ་ནི་དོན་མེད་པའི་རྒྱུ་ཡིན་པའི་ཕྱིར་རོ། །དེའི་ཕྱིར་མཁས་པ་སྟེ་དེ་ཁོ་ན་ཉིད་མཁྱེན་པའི་སངས་རྒྱས་དང་བྱང་ཆུབ་སེམས་དཔའ་རྣམས་དང༌། དེ་ལས་གཞན་དེའི་བསྟན་པ་ལ་གནས་པ་རྣམས་ཀྱི་རྗེས་སུ་བསྙེགས་ཏེ་དེའི་བསླབ་པ་ལ་རྗེས་སུ་སློབ་བོ། །ཇི་
ལྟར་ཞེ་ན། བག་ཡོད་གཏམ་ནི་དྲན་བྱས་ནས་ཏེ། ལེ་འུ་བཞི་པ་དང་བདུན་པར་བརྗོད་པ་དང༌། གཞན་ཡང་བསླབ་པ་ཀུན་ལས་བཏུས་པ་ལ་སོགས་པར་བརྗོད་པའོ། །བག་མེད་པ་ནི་ལུས་དང་སེམས་ཀྱི་རྣམ་པར་གཡེང་བ་ཡིན་ལ་དེ་ལས་བཟློག་པ་ནི་བག་ཡོད་པ་ཡིན་ཏེ། དེ་ལ་བག་ཡོད་པའི་དོན་དུ་བག་མེད་པ་བཟློག་པའི་གཏམ་སྟེ། དེ་སྟོན་པར་བྱེད་པའི་གཞུང་དྲན་པར་བྱས་ནས་ཏེ་སེམས་ལ་བཞག་ནས་ཇི་ལྟར་བརྩམས་པའི་དོན་ལ་འཁྲུལ་པར་མི་འགྱུར་ཏེ། གཉིད་དང་རྨུགས་པ་ཟློག་པར་བྱེད་ལ། རྨུགས་པ་ནི་ལུས་པོ་ཞུམ་པ་ཡིན་ཏེ། ལེ་ལོ་ཞེས་པའི་ཐ་ཚིག་གོ །གཉིད་ནི་གཉིད་ཀྱིས་སེམས་དམན་པར་བྱས་པ་ཡིན་ལ། དེ་བཟློག་པ་ན་མཁས་པའི་རྗེས་སུ་འབྲང་བར་བྱའོ་ཞེས་པ་དང་འབྲེལ་ཏོ། །དེ་ལྟར་མཉམ་པར་གཞག་པ་ལ་མི་མཐུན་པའི་ཕྱོགས་སྤངས་ནས་མཉམ་པར་གཞག་པ་ལ་གཅིག་ཏུ་གཞོལ་བར་བྱའོ་ཞེས་བསྟན་པའི་ཕྱིར། དེ་བས་ཞེས་པ་ལ་སོགས་པ་གསུངས་ཏེ། སྒྲིབ་པ་ནི་ཉོན་མོངས་པ་ལ་སོགས་པ་ཡིན་ལ། བསལ་བ་ནི་འཆད་པར་འགྱུར་བའི་ཚུལ་གྱིས་དེ་དག་སྤོང་བར་འདོད་པ་སྟེ། མཉམ་པར་གཞག་པ་སྟེ་ཞི་གནས་ལ་འབྲེལ་པར་བྱའོ། །རྣམ་པ་གང་གིས་ཤེ་ན། ལོག་པའི་ལམ་ལས་ཞེས་པ་ལ་སོགས་པ་གསུངས་ཏེ། སྔར་བརྗོད་པའི་འདོད་པའི་རྣམ་པར་རྟོག་པ་ལ་སོགས་པ་རྣམས་ལས་སོ། །ཡང་ན་ལོག་པའི་ལམ་ནི་ལེ་ལོ་ལ་སོགས་པའི་ཉོན་མོངས་པ་རྣམས་ལ་བརྗོད་དེ། ཇི་ལྟར་མདོར་བསྡུས་ན་ཏིང་ངེ་འཛིན་ཐམས་ཅད་ཀྱི་ཉེས་པ་ནི་རྣམ་པ་དྲུག་ཡིན་ཏེ། ལེ་ལོ་དང༌། དམིགས་པ་ལ་བརྗོད་ངེས་པ་དང༌། བྱིང་པ་དང། རྒོད་པ་དང༌། མི་རྩོལ་བ་དང༌། རྩོལ་བའོ། །འདི་རྣམས་ཀྱི་གཉེན་པོ་སྤོང་བའི་འདུ་བྱེད་བསྒོམ་པར་བྱ་བ་ཡིན་ཏེ། འདི་ལྟར་དད་པ་དང༌། འདུན་པ་དང༌། རྩོལ་བ་དང༌། ཤིན་ཏུ་སྦྱངས་པ་དང༌། དྲན་པ་དང༌། ཤེས་བཞིན་དང༌། སེམས་པ་དང་བཏང་སྙོམས་རྣམས་སོ། །དེ་ལ་དང་པོ་བཞི་ནི་ལེ་ལོའི་གཉེན་པོའོ། །འདི་ལྟར་ཏིང་ངེ་འཛིན་གྱི་ཡོན་ཏན་རྣམས་ལ་མངོན་པར་ཡིད་ཆེས་པའི་མཚན་ཉིད་ཀྱི་དད་པས་རྣལ་འབྱོར་པ་དེ་ལ་མངོན་པར་འདོད་པ་སྐྱེ་ལ། མངོན་པར་འདོད་པ་དེ་ལས་བརྩོན་འགྲུས་རྩོམ་ཞིང༌། བརྩོན་འགྲུས་ཀྱི་སྟོབས་དེ་ལས་ལུས་དང་སེམས་
ལས་སུ་རུང་བ་སྒྲུབ་པར་བྱེད་དེ། དེ་ལས་ནི་ཤིན་ཏུ་སྦྱངས་པའི་ལུས་དང་སེམས་ཡིན་ཏེ། ལེ་ལོ་ཟློག་པར་བྱེད་དོ། །དེས་ན་དད་པ་ལ་སོགས་པ་རྣམས་ལེ་ལོ་སྤང་བའི་ཆེད་དུ་བསྒོམ་པར་བྱའོ། །དྲན་པ་ལ་དམིགས་པ་ནི་བརྗེད་པའི་གཉེན་པོ་ཡིན་ལ། ཤེས་བཞིན་ནི་བྱིང་པ་དང་རྒོད་པའི་གཉེན་པོ་ཡིན་ཏེ། ཡང་དག་པའི་ཡོན་ཏན་ཉེ་བར་མཚོན་པའི་ཕྱིར་རོ། །བྱིང་བ་དང་རྒོད་པའི་རབ་ཏུ་ཞི་བའི་དུས་ན་ཡང་མི་རྩོལ་བ་ཉེས་པ་ཡིན་ཏེ། དེའི་གཉེན་པོར་བྱིང་བ་དང་རྒོད་པ་རབ་ཏུ་ཞི་བ་ན་སེམས་པ་བསྒོམ་པར་བྱའོ། །གང་གི་ཚེ་སེམས་གདུལ་དཀའ་བ་དེའི་ཚེ་རྩོལ་པ་ཉེས་པ་ཡིན་ནོ། །ད་ནི་དེའི་གཉེན་པོར་བཏང་སྙོམས་བསྒོམ་པར་བྱ་སྟེ། སྤོང་བའི་འདུ་བྱེད་བརྒྱད་པོ་འདི་རྣམས་དང་ལྡན་པའི་ཏིང་ངེ་འཛིན་མཆོག་ཏུ་ལས་སུ་རུང་བར་འགྱུར་རོ་ཞེས་རྒྱས་པར་གསུངས་སོ། །དེ་ལྟར་འདིའི་ཕྱིར་ལོག་པའི་ལམ་ལས་སེམས་བླན་ཏེ་བཟློག་ནས་སོ། །འདིས་ནི་དམ་པའི་ལས་ཀྱི་སྦྱོར་བ་བཤད་པ་ཡིན་ནོ། །རང་བཞིན་ཅི་ཡིན་ཞེ་ན། ཡང་དག་དམིགས་ལ་རྟག་པ་སྟེ། གང་ཅུང་ཟད་དམིགས་པ་མདོར་བསྡུས་པས་སམ་རྒྱས་པས་སེམས་ཀྱི་ངེས་པ་དེ་ལ་བརྟན་པ་ཡིན་ཏེ། མི་མཐུན་པའི་ཕྱོགས་ཀྱི་སེམས་པར་མཆོད་པར་ཏེ་དེའི་བར་ཆོད་དང་བྲལ་བ་ཞེས་བྱ་བའི་ཐ་ཚིག་གོ །འདིས་ནི་མཉམ་པར་གཞག་པའི་རང་བཞིན་བརྗོད་དོ། །སེམས་རྩེ་གཅིག་པ་དེའི་རང་བཞིན་ཡིན་པའི་ཕྱིར། རྒྱན་མི་འཆད་པའི་སྦྱོར་བ་ཡང་བརྗོད་པ་ཡིན་ནོ། །ཞི་གནས་བསྒོམ་པ་བསྒྲུབ་པའི་རིམ་པ་འདི་ཡང་ཀ་མ་ལ་ཤཱི་ལའི་བསྒོམ་པའི་རིམ་པ་ལས་གསལ་བར་བསྟན་ཏེ། དེར་བརྗོད་པ་ནི་འདི་ལྟར་ཚུལ་ཁྲིམས་ལ་སོགས་པ་ཞི་གནས་ཀྱི་ཆོགས་རྣམས་ལ་གནས་ནས་ཡིད་དང་རྗེས་སུ་མཐུན་པའི་གནས་རྣམས་སུ་སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་བ་ལ་སོགས་པ་བྱས་ནས། སྡིག་པ་བཤགས་པ་དང་བསོད་ནམས་ལ་རྗེས་སུ་ཡི་རང་བ་ཡང་བྱས་ཏེ་འགྲོ་བ་མཐའ་དག་གདོན་པའི་བསམ་པས་སྙིང་རྗེ་ཆེན་པོ་ཉིད་མངོན་དུ་བྱས་ཏེ། བདེ་བའི་སྟན་ལ་འདུག་ནས་ལུས་དྲང་པོར་བསྲང་སྟེ་སྐྱིལ་མོ་ཀྲུང་བཅས་ནས་ཏིང་ངེ་འཛིན་བསྐྱེད་པར་བྱའོ། །དེ་ལ་དང་པོར་རེ་ཞིག་གང་དངོས་པོ་དེ་ལ་དཔྱད་པར་བྱ་སྟེ། ཇི་སྲིད་དུ་རྣམ་པ་གང་གིས་དངོས་པོ་དངོས་པོ་
མཐའ་དག་བསྡུས་པར་གྱུར་པ་དེ་ལ་སེམས་བརྟན་པར་བྱའོ། །ཡང་མདོར་བསྡུས་ན་དངོས་པོ་ཐམས་ཅད་ནི་གཟུགས་དང་གཟུགས་མེད་པའི་དབྱེ་བས་རྣམ་པ་གཉིས་ཡིན་ཏེ། དེ་ལ་ཡང་ལས་དང་པོ་པའི་རྣམ་པར་གཡེང་བའི་ཉེས་པ་སྤང་བའི་ཕྱིར་རེ་ཞིག་མདོར་བསྡུས་པ་ལ་དམིགས་པར་རིགས་སོ། །གལ་ཏེ་ཡིད་ལ་བྱེད་པ་དུལ་བར་གྱུར་ན། དེའི་ཚེ་ཕུང་པོ་དང་ཁམས་ལ་སོགས་པའི་དབྱེ་བས་རྣམ་པར་སྦྱངས་ཏེ་རྒྱས་པ་ལ་ཡང་དམིགས་པར་བྱ་བ་ཉིད་དོ། །ཇི་སྲིད་དུ་དེ་ལས་ངེས་པར་བྱས་ནས་དངོས་པོ་ཐམས་ཅད་བསྡུས་པ་དེ་ཉིད་ལ་ཡང་སེམས་ཀྱི་རྒྱུན་བསྡམ་པར་བྱའོ། །གང་གི་ཚེ་བར་སྐབས་སུ་འདོད་ཆགས་ལ་སོགས་པས་སེམས་ཀྱི་ཕྱི་རོལ་དུ་རྣམ་པར་གཡེངས་པ་དེའི་ཚེ་རྣམ་པར་གཡེངས་པར་ཚོར་བར་བྱས་ལ། མྱུར་དུ་མི་སྡུག་པ་བསྒོམ་པ་ལ་སོགས་པས་རྣམ་པར་གཡེང་བ་ཞི་བར་བྱས་ནས་མྱུར་དུ་དེ་ཉིད་ལ་སེམས་ཕྱིར་ཞིང་འཇུག་པར་བྱའོ། །གང་གི་ཚེ་དེ་ལ་སེམས་མངོན་པར་མི་དགའ་བར་མཐོང་བ་དེའི་ཚེ་ཏིང་ངེ་འཛིན་གྱི་ཡོན་ཏན་མཐོང་བ་དེ་ལ་མངོན་པར་དགའ་བ་བསྒོམ་པར་བྱའོ། །རྣམ་པར་གཡེང་བ་ལ་ཉེས་པར་མཐོང་བས་ཀྱང་མི་དགའ་བ་རབ་ཏུ་ཞི་བར་བྱའོ། །ཅི་སྟེ་རྨུགས་པ་དང་གཉིད་ཀྱིས་ནོན་ཏེ་རྒྱུ་བ་མི་གསལ་བས་སེམས་བྱིང་བའམ་བྱིང་དུ་དོགས་པར་མཐོང་བ་དེའི་ཚེ་སྣང་བའི་འདུ་ཤེས་སངས་རྒྱས་ཀྱི་ཡོན་ཏན་ལ་སོགས་པ་མཆོག་ཏུ་དགའ་བའི་དངོས་པོ་ཡིད་ལ་བྱེད་པས་མྱུར་དུ་བྱིང་བ་ཞི་བར་བྱས་ལ། ཡང་དམིགས་པ་དེ་ཁོ་ན་ཉིད་ཤིན་ཏུ་བརྟན་པོར་གཟུང་བར་བྱའོ། །ཅི་སྟེ་གང་གི་ཚེ་སྔོན་དགོད་པ་དང་རྩེས་པ་རྗེས་སུ་དྲན་པར་གྱུར་པས་བར་སྐབས་བར་སྐབས་སུ་སེམས་འཕྱར་བའམ། རྒོད་དུ་དོགས་པར་མཐོང་བ་དེའི་ཚེ་གོང་མ་བཞིན་དུ་མི་རྟག་པ་ལ་སོགས་པ་ཡིད་འབྱུང་བར་འགྱུར་བའི་དངོས་པོ་ཡིད་ལ་བྱས་ལ། གཡེང་བ་ཞི་བར་བྱ་ཞིང༌། དེ་ནས་ཡང་དེ་ཁོ་ན་ཉིད་ལ་སེམས་མངོན་པར་འདུ་བྱ་བ་མེད་པར་འཇུག་པར་འབད་པར་བྱའོ། །གང་གི་ཚེ་བྱིང་བ་དང་རྒོད་པ་དང་བྲལ་བར་གྱུར་ནས་མཉམ་པར་ཞུགས་ཏེ། དེ་ཁོ་ན་ཉིད་དེ་ཉིད་ལ་སེམས་རང་གི་ངང་གིས་འཇུག་པར་གྱུར་པ་དེའི་ཚེ་རྩོལ་བ་གློད་དེ་བཏང་སྙོམས་སུ་བྱའོ། །གལ་ཏེ་སེམས་མཉམ་
པར་ཞུགས་པ་ལ་བརྩལ་བར་བྱས་ན་དེའི་ཚེ་སེམས་རྣམ་པར་གཡེང་བར་འགྱུར་རོ། །ཡང་གང་གི་ཚེ་དམིགས་པ་དེ་ལ་མངོན་པར་འདུ་བྱེད་པ་མེད་པར་འཇུག་པས་ཇི་ལྟར་འདོད་པར་འཇུག་པར་འགྱུར་ཏེ། དེའི་ཚེ་ཞི་གནས་གྲུབ་པར་རིག་པར་བྱའོ། །འདི་ཡང་ཞི་གནས་ཐམས་ཅད་ཀྱི་ཐུན་མོང་གི་མཚན་ཉིད་ཡིན་ཏེ། སེམས་རྩེ་གཅིག་པ་ཙམ་གྱི་རང་བཞིན་ཡིན་པའི་ཕྱིར་རོ། །ཞི་གནས་ཀྱི་དམིགས་པ་ཡང་མ་ངེས་པ་དེ་ཉིད་ཡིན་ནོ་ཞེས་རྒྱས་པར་བཤད་དོ། །འདིས་དམིགས་པ་ལ་བར་མེད་པ་ཉིད་དུ་བཤད་པའམ། མི་མཐུན་པའི་ཕྱོགས་བསལ་བ་ཡང་བསྟན་པ་ཡིན་ནོ། །བྱང་ཆུབ་སེམས་དཔའི་སྤྱོད་པ་ལ་འཇུག་པའི་དཀའ་འགྲེལ་ཤེས་རབ་འབྱུང་གནས་བློ་གྲོས་ཀྱིས་མཛད་པ་ལས་བསམ་གཏན་གྱི་ལེའུ་སྟེ་བརྒྱད་པའོ།། །།འཕགས་པ་འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །གང་དག་གོས་པ་མེད་པ་ཉིད་ཀྱིས་སྤྲོས་པ་ཀུན་སྤངས་བླ་མེད་གོ་འཕང་ལྡན། །ཤེས་རབ་ལ་སོགས་ཕ་རོལ་ཕྱིན་པར་ཀུན་རྫོབ་ཚིག་གིས་བརྗོད་དེ་ཟག་པ་མེད། །གང་ཞིག་ཡང་དག་རྟོགས་པས་དྲི་མེད་བློ་དག་མྱ་ངན་འདས་མཆོག་བརྙེས་དེ་ལ། །ཕྱག་འཚལ་ནས་ནི་དེ་ཡི་འགྲེལ་པར་བབ་ཏུ་གསལ་བའི་ཚིག་གིས་རིམ་པ་བཞིན་དུ་བྱ། །ཡོན་ཏན་གཏེར་གྱུར་སློབ་དཔོན་ཞི་བའི་ལྷ་འདིས་གང་དུ་གསལ་བར་ནི། །གསུང་རབ་རྒྱ་མཚོ་ཆེན་པོའི་ཕ་རོལ་སོན་པས་བརྗོད་པར་སྤྱོད་པ་ཡིན། །བློ་གྲོས་རྨོངས་པ་བདག་གིས་དེ་དོན་ཇི་ལྟར་བརྗོད་ནུས་དེ་ལྟ་ནའང༌། །ཤེས་རབ་གོམས་པས་ལེགས་བྱས་གང་ཕྱིར་མཉམ་མེད་དེས་ན་དེ་ལ་འཇུག །ཡོན་ཏན་ཕྲ་བ་འགའ་ཡི་བག་ཆགས་བློ་གྲོས་མེད་པ་སྟེ། །བདག་ལ་སྤོབས་པའི་ཡོན་ཏན་བསགས་པ་ཡོད་པ་མ་ཡིན་ལ། །དེ་ལྟ་མོད་ཀྱི་གང་ཕྱིར་བཤེས་གཉེན་དམ་པ་བསྟན་པ་ཡི། །འབྲས་བུ་དེ་ལྟར་དེ་ལྟ་བུ་ལ་ངག་ནི་རབ་ཏུ་རྒྱས། །དེ་ལ་གང་ཞིག་རིགས་ཀྱི་ཁྱད་པར་འགའ་ལས་དགེ་བའི་བཤེས་གཉེན་བསྟེན་པ་ཉིད་ཀྱིས་འགྲོ་བ་གསུམ་གྱི་ནང་དུ་གཏོགས་པའི་སྐྱེ་བོ་མ་ལུས་པ་སྡུག་བསྔལ་གྱིས་སྡུག་བསྔལ་ཕར་གྱུར་པའི་སྲོག་འཛིན་པ་ཐམས་ཅད་སྡུག་བསྔལ་མ་ལུས་པ་ལས་གདོན་པའི་བསམ་པས་བདག་ཉིད་ཀྱི་
སྡུག་བསྔལ་ཁྱད་དུ་བསད་དེ། དེ་ཞི་བའི་ཐབས་སུ་གྱུར་པ་སངས་རྒྱས་ཡིན་པར་འདི་ལྟར་བསམས་ནས། དེ་ཐོབ་པར་འདོད་པས་བྱང་ཆུབ་ཀྱི་སེམས་བསྐྱེད་པའི་ཆེ་བའི་བདག་ཉིད་བདེ་བར་གཤེགས་པ་སྒྲུབ་པའི་ཐབས་སུ་གྱུར་པ་ཚོགས་གཉིས་ཡོངས་སུ་རྫོགས་པའི་དོན་དུ་སྦྱིན་པ་ལ་སོགས་པ་རྣམས་ལ་རིམ་གྱིས་འཇུག་སྟེ། དེ་དེ་ལྟར་ཞུགས་པ་ན་ཞི་གནས་དང་ཡང་དག་པར་ལྡན་པར་གྱུར་པས་བདག་ཀྱང་སྦྱིན་པ་ལ་སོགས་པ་ཤེས་རབ་དང་བྲལ་བ་ཉིད་ཀྱིས་འགྲོ་བའི་དོན་བསྒྲུབ་པའི་རྒྱུས་སངས་རྒྱས་ཉིད་ཐོབ་པ་མ་ཡིན་པར་བསམས་ནས་འཁོར་བའི་སྡུག་བསྔལ་ལས་ངེས་པར་འབྱུང་བར་འདོད་པས་ཤེས་རབ་བསྐྱེད་པའི་དོན་དུ་འབད་པར་བྱ་སྟེ། ཇི་སྐད་དུ། ཞི་གནས་རབ་ཏུ་ལྡན་པའི་ལྷག་མཐོང་གིས། །ཞེས་བྱ་བ་ལ་སོགས་པ་གསུངས་པས་སོ། །དེ་ལ་ཞི་གནས་བསྟན་ནས། ད་ནི་དེའི་རྗེས་ལ་ཐོབ་པའི་ལྷག་མཐོང་གི་མིང་ཅན་ཤེས་རབ་ཀྱི་ཕ་རོལ་ཏུ་ཕྱིན་པ་བསྟན་པའི་ཕྱིར། ཡན་ལག་འདི་དག་ཐམས་ཅད་ཅེས་པ་ལ་སོགས་པ་གསུངས་ཏེ། འདི་དག་ཅེས་པ་ནི་བསྟན་བཅོས་འདིར་བརྗོད་མ་ཐག་པའི་མཚན་ཉིད་ཅན་སྦྱིན་པ་ལ་སོགས་པའོ། །འདི་ཞེས་པ་ནི་མངོན་སུམ་དུ་གྱུར་བ་ཉིད་ལ་དཔྱོད་པར་བྱེད་དོ། །ཡན་ལག་འདི་དག་ཅེས་པ་ནི་འཁོར་ཏེ་རིས་ཡིན་ལ་ཚོགས་ཞེས་པའི་ཐ་ཚིག་གོ །བརྗོད་པ་དང་རྗོད་པའི་རྣམ་པ་དང་གཞན་ཡང་སྟེ། ཤེས་རབ་དོན་དུ་ཐབ་པས་གསུངས། །ཞེས་པ་དང་འབྲེལ་ཏོ། །ཤེས་རབ་ནི་ཇི་ལྟར་གནས་པའི་རྟེན་ཅིང་འབྲེལ་པར་འབྱུང་བའི་དངོས་པོའི་དེ་ཁོ་ན་ཉིད་རབ་ཏུ་རྣམ་པར་འབྱེད་པའི་མཚན་ཉིད་ཅན་ཡིན་ལ་དེ་ཉིད་དོན་ཡིན་ཏེ། བྱང་ཆུབ་ཀྱི་རྒྱུའི་དངོས་པོ་ཡང་དག་པར་འདྲེན་པར་བྱེད་པས་གང་གི་སྦྱིན་པ་ལ་སོགས་པའི་མཚན་ཉིད་ཀྱི་ཡན་ལག་ནི་དགོས་པ་ཡིན་པ་དེ་ལ་དེ་སྐད་ཅེས་བརྗོད་དོ། །སྦྱིན་པ་ལ་སོགས་པའི་ཕ་རོལ་ཏུ་ཕྱིན་པའི་དངོས་པོ་རྣམས་ལས་ཆོས་རྣམ་པར་འབྱེད་པའི་རང་བཞིན་གྱི་ཤེས་རབ་གཙོ་བོ་ཡིན་པའི་ཕྱིར་རོ། །དེ་ལྟར་ཡང་སྦྱིན་པ་ནི་སངས་རྒྱས་ཀྱི་བྱང་ཆུབ་ཐོབ་པའི་ཕྱིར་རྒྱུའི་དང་པོ་ཡིན་ཏེ། བསོད་ནམས་ཀྱི་ཚོགས་སུ་གཏོགས་པའི་ཕྱིར་རོ། །དེ་ཡང་ཚུལ་ཁྲིམས་ཀྱི་རྒྱུན་དུ་བྱས་པ་ཉིད་བདེ་འགྲོ་བརྒྱུད་པར་བདེ་བའི་ལོངས་སྤྱོད་ཀྱི་ཉེ་བར་མཁོ་བ་ཕུན་སུམ་ཚོགས་
པ་འབྱུང་བར་འགྱུར་བས་བླ་ན་མེད་པའི་ཡེ་ཤེས་འབྱུང་བའི་རྒྱུ་ཡིན་ནོ། །བཟོད་པ་ཡང་དེའི་མི་མཐུན་པའི་ཕྱོགས་སུ་གྱུར་པ་ཁོང་ཁྲོའི་གཉེན་པོ་ཉིད་ཀྱིས་སྦྱིན་པ་དང་ཚུལ་ཁྲིམས་ཀྱིས་ལེགས་པར་སྤྱད་པའི་རང་བཞིན་གྱི་ཚོགས་རྗེས་སུ་སྐྱོང་བར་བྱེད་པ་ཡིན་ཏེ་བདེ་འགྲོ་ཉིད་ཐོབ་པའི་ཆེད་དུ་རབ་ཏུ་འཇུག་གོ །སྦྱིན་པ་ལ་སོགས་པ་གསུམ་པོ་ལས་བྱུང་བའི་བསོད་ནམས་ཀྱི་ཚོགས་སུ་བརྗོད་པ་འདི་ཡང་དགེ་བ་ཡིན་ཏེ། བསམ་གཏན་ལ་སོགས་པ་ལས་བྱུང་བ་ནི་ཡེ་ཤེས་ཀྱི་ཚོགས་ཞེས་པ་ཡིན་ལ། དེ་དག་བརྩོན་འགྲུས་མེད་པར་མི་འབྱུང་བས་དེ་ལྟར་ན་ཡང་ཚོགས་གཉིས་ཀའི་རྒྱུ་ཡིན་པས་སྒྲུབ་པ་ཐམས་ཅད་སྤོང་བའི་ཆེད་དུ་བྱུང་བ་ཡིན་ནོ། །སེམས་མཉམ་པར་གཞག་པས་ཡང་དག་པ་ཇི་ལྟ་བ་བཞིན་ཤེས་པར་འགྱུར་བས་བསམ་གཏན་གྱི་ཕ་རོལ་ཏུ་ཕྱིན་པ་ཡང་བླ་ན་མེད་པའི་ཡེ་ཤེས་ཐོབ་པའི་རྒྱུ་རུ་འགྱུར་བ་ཡིན་ནོ། །དེ་ལྟར་སྦྱིན་པ་ལ་སོགས་པ་འདི་རྣམས་གུས་པར་བྱས་པས་བསྒྲུབས་ན་ཡང༌། ཤེས་རབ་དང་བྲལ་ན་བླ་ན་མེད་པའི་གོ་འཕང་ཐོབ་པའི་རྒྱུར་མི་འགྱུར་ཞིང་ཕ་རོལ་ཏུ་ཕྱིན་པའི་མིང་ཡང་ཐོབ་པ་མ་ཡིན་ཏེ། ཤེས་རབ་ཀྱིས་དག་པར་བྱས་པ་ལ་བསྟེན་པས་དེ་ཡང་བར་ཆད་མེད་པར་རྒྱ་ཆེ་བ་ལ་འཇུག་པས་དེའི་རྗེས་སུ་འཇུག་པ་ན་དེའི་རྒྱུའི་དངོས་པོ་ཐོབ་པར་འགྱུར་རོ། ཕ་རོལ་ཏུ་ཕྱིན་པའི་མིང་ཡང་ཐོབ་པར་འགྱུར་རོ། །དེ་བཞིན་དུ་གཏོང་བ་པོ་དང༌། སྦྱིན་པར་བྱ་བ་དང༌། ལེན་པ་པོ་ལ་སོགས་པ་གསུམ་པོ་རྣམས་མི་དམིགས་པའི་སྦྱོར་བས་ཤེས་རབ་ཀྱིས་ཡོངས་སུ་སྦྱངས་ཏེ། གུས་ཤིང་པར་ཚད་མེད་པར་དུས་ཡུན་རིང་པོར་གོམས་པར་བྱས་པས་རབ་ཀྱི་མཐར་ཐུག་པར་འགྲོ་ཞིང༌། །མ་རིག་པས་བསྐྱེད་པའི་རྣམ་པར་རྟོག་པའི་དྲ་བ་མཐའ་དག་དང་བྲལ་ཏེ། ཉོན་མོངས་པ་དང་ཤེས་བྱའི་སྒྲིབ་པ་ལས་གྲོལ་བའི་བདག་མེད་པ་རྣམ་པ་གཉིས་ཐུགས་སུ་ཆུད་པའི་རང་བཞིན་བདག་དང་གཞན་ལ་ཕན་པ་ཐམས་ཅད་ཀྱི་གཞིར་གྱུར་པ། དོན་དམ་པའི་དེ་ཁོ་ན་ཉིད་ཀྱི་བདག་ཉིད་དེ་བཞིན་གཤེགས་པའི་ཆོས་ཀྱི་སྐུ་མངོན་པར་ཐོབ་པར་བྱེད་པས་ཤེས་རབ་ནི་གཙོ་བོ་ཡིན་ལ། སྦྱིན་པ་ལ་སོགས་པ་ནི་ཕལ་པར་བརྗོད་དོ། །སྦྱིན་པ་ལ་སོགས་པ་ལས་ཤེས་རབ་གཙོ་བོ་ཡིན་ན་བྱང་ཆུབ་སྒྲུབ་པར་བྱེད་པའི་རྒྱུ་དེ་ཉིད་
འབའ་ཞིག་ཞོག་ལ། སྦྱིན་པ་ལ་སོགས་པ་རྣམས་ཀྱིས་ཅི་ཞིག་བྱ་ཞེས་ནི་བརྗོད་པར་མི་བྱ་སྟེ། དེ་ལས་གཞན་གྱི་དགོས་པ་བརྗོད་ཟིན་པའི་ཕྱིར་རོ། །སྦྱིན་པ་ལ་སོགས་པ་འབའ་ཞིག་ནི་མིག་དང་བྲལ་བ་ཡིན་ཏེ། ཤེས་རབ་ཀྱི་མིག་དང་ལྡན་པ་ཉིད་ཀྱིས་ཇི་ལྟར་མངོན་པར་འདོད་པའི་བདེ་བར་གཤེགས་པ་ཉིད་ཀྱིས་སར་འགྲོ་བར་འགྱུར་བར་བྱེད་པའི་ཕྱིར་ཤེས་རབ་ལ་འདྲེན་པར་བརྗོད་དེ། ཤེས་རབ་འབའ་ཞིག་ཀྱང་ཡང་དག་པར་རྫོགས་པའི་བྱང་ཆུབ་སྒྲུབ་པར་བྱེད་པ་ནི་མ་ཡིན་ནོ། །དེ་ལྟ་བས་ན་སྦྱིན་པ་ལ་སོགས་པའི་འཁོར་ནི་ཤེས་རབ་ཀྱི་དོན་དུ་གྲུབ་བོ། །རྣམ་པར་རྟོག་པ་ཐམས་ཅད་སྤངས་པའི་ཕྱིར་རམ། སྒྲོ་འདོགས་པ་དང་སྐུར་པ་འདེབས་པའི་མཐའ་གཉིས་པོ་མི་གསུང་བའི་ཕྱིར་རམ། མི་སློབ་པའི་ལུས་དང་ངག་དང་ཡིད་ཀྱི་ལས་ཀྱི་མཚན་ཉིད་ཐུབ་པ་གསུམ་དང་འབྲེལ་པའི་ཕྱིར་ཐུབ་པ་ནི་སངས་རྒྱས་བཅོམ་ལྡན་འདས་སོ། །སྡུག་བསྔལ་གསུམ་གྱིས་སྡུག་བསྔལ་བའི་འགྲོ་བ་ཐམས་ཅད་ཡོངས་སུ་བསྐྱབ་པའི་དགོངས་པས་གསུངས་ཏེ་གསུངས་པ་དང་ལྡན་ནོ་ཞེས་བྱ་བའི་ཐ་ཚིག་གོ །ཤེས་རབ་ཀྱི་ཕ་རོལ་ཏུ་ཕྱིན་པ་ལ་སོགས་པའི་མདོ་རྣམས་སུ་ཤེས་རབ་ཀྱི་དོན་དུ་རིམ་པས་སྦྱིན་པ་ལ་སོགས་པའི་འཁོར་གསུངས་པ་ཡིན་ནོ། །ཇི་སྐད་དུ་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་སྟོང་ཕྲག་བརྒྱ་པ་ལས། རབ་འབྱོར་འདི་ལྟ་སྟེ་དཔེར་ན། ཉི་མའི་དཀྱིལ་འཁོར་དང་ཟླ་བའི་དཀྱིལ་འཁོར་ནི་གླིང་བཞིར་ལས་བྱེད་ཅིང༌། གླིང་བཞིའི་རྗེས་སུ་འགྲོའོ། །གླིང་བཞིའི་རྗེས་སུ་འབྲང་ངོ༌། །རབ་འབྱོར་དེ་བཞིན་དུ་ཤེས་རབ་ཀྱི་ཕ་རོལ་ཏུ་ཕྱིན་པ་ཡང་ཕ་རོལ་ཏུ་ཕྱིན་པ་ལྔར་ལས་བྱེད་ཅིང༌། ཕ་རོལ་ཏུ་ཕྱིན་པ་ལྔའི་རྗེས་སུ་འགྲོའོ། །ཕ་རོལ་ཏུ་ཕྱིན་པ་ལྔའི་རྗེས་སུ་འབྲང་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ན་ཕ་རོལ་ཏུ་ཕྱིན་པ་ལ་ཕ་རོལ་ཏུ་ཕྱིན་པའི་མིང་མི་འཐོབ་བོ། །རབ་འབྱོར་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོ་དང་བྲལ་ན། རིན་པོ་ཆེ་སྣ་བདུན་གྱིས་འཁོར་ལོས་སྒྱུར་བའི་མིང་མི་འཐོབ་བོ། །རབ་འབྱོར་དེ་བཞིན་དུ་ཕ་རོལ་ཏུ་ཕྱིན་པ་ལྔ་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་དང་བྲལ་ན་ཕ་རོལ་ཏུ་ཕྱིན་པའི་མིང་མི་འཐོབ་བོ། །རབ་འབྱོར་འདི་ལྟ་སྟེ་དཔེར་ན་ཆུ་ཀླུང་གང་ཅི་སྙེད་ཅིག་ཡོད་པ་དེ་དག་ཐམས་ཅད་ནི་ཆུ་ཀླུང་ཆེན་པོ་གངྒཱ་
གང་ན་བ་དེར་འདོང་ངོ༌། །དེ་དག་ཆུ་ཀླུང་གངྒཱ་དང་འགྲོགས་ཤིང་རྒྱ་མཚོ་ཆེན་པོའི་ནང་དུ་འདོང་ངོ༌། །རབ་འབྱོར་དེ་བཞིན་དུ་ཕ་རོལ་ཏུ་ཕྱིན་པ་ལྔ་ཡང་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་ན་རྣམ་པ་ཐམས་ཅད་མཁྱེན་པ་ཉིད་གང་ན་བ་དེར་འདོང་ངོ་ཞེས་རྒྱ་ཆེར་གསུངས་སོ། །དེ་ཡང་ཇི་སྐད་དུ། ཀཽ་ཤི་ཀ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པ་འདིས་ནི་སྦྱིན་པའི་ཕ་རོལ་ཏུ་ཕྱིན་པ་ཟིལ་གྱིས་གནོན་ཏོ། །ཚུལ་ཁྲིམས་ཀྱི་ཕ་རོལ་ཏུ་ཕྱིན་པ་དང༌། བཟོད་པའི་ཕ་རོལ་ཏུ་ཕྱིན་པ་དང༌། བརྩོན་འགྲུས་ཀྱི་ཕ་རོལ་ཏུ་ཕྱིན་པ་དང༌། བསམ་གཏན་གྱི་ཕ་རོལ་ཏུ་ཕྱིན་པ་ཟིལ་གྱིས་གནོན་ཏོ། །ཀཽ་ཤི་ཀ་འདི་ལྟ་སྟེ་དཔེར་ན་དམུས་ལོང་བརྒྱའམ་སྟོང་ངམ་བརྒྱ་ཕྲག་སྟོང་ཡང་རུང་སྟེ། དམིགས་བུ་མེད་པར་ལམ་དུ་འཇུག་པར་ཡང་མི་ནུས་ན་གྲོང་ཁྱེར་དུ་འགྲོ་བར་ལྟ་ག་ལ་ནུས། ཀཽ་ཤི་ཀ་དེ་བཞིན་དུ་ཕ་རོལ་ཏུ་ཕྱིན་པ་ལྔ་པོ་འདི་དག་ནི་དམུས་ལོང་ལྟ་བུར་གྱུར་པ་སྟེ། ཤེས་རབ་ཀྱི་ཕ་རོལ་ཏུ་ཕྱིན་པ་མེད་ན་དེ་དག་ལ་དམིགས་བུ་མེད་པས་བྱང་ཆུབ་ཀྱི་ལམ་ཡང་སྐྱེད་པར་མི་ནུས་ན་རྣམ་པ་ཐམས་ཅད་མཁྱེན་པ་ཉིད་ཀྱི་གྲོང་ཁྱེར་དུ་འཇུག་པར་ལྟ་ག་ལ་ནུས། ཀཽ་ཤི་ཀ་ཕ་རོལ་ཏུ་ཕྱིན་པ་ལྔ་ནམ་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་ཟིན་པར་གྱུར་པ་དེའི་ཚེ་མིག་དང་ལྡན་པར་གྱུར་ཏེ། ཕ་རོལ་ཏུ་ཕྱིན་པ་ལྔ་པོ་འདི་དག་ནི་ཤེས་རབ་ཀྱི་ཕ་རོལ་ཏུ་ཕྱིན་པས་ཡོངས་སུ་བཟུང་ན་ཕ་རོལ་ཏུ་ཕྱིན་པའི་མིང་མི་འཐོབ་པོ་ཞེས་རྒྱ་ཆེར་གསུངས་པ་ཡིན་ནོ། །དེ་བཞིན་དུ་གཞན་ཡང་འདིར་མདོ་གཞན་གྱི་རྗེས་སུ་འབྲངས་ནས་ཇི་ལྟ་བ་བཞིན་དུ་གོ་བར་བྱའོ། །འདི་སྐད་དུ། དྲེ་མེད་སྨད་པ་མེད་ཁྱོད་ལ། །ཕ་རོལ་ཕྱིན་པ་ཐམས་ཅད་རྣམས། །ཐམས་ཅད་དུ་ནི་རྗེས་འབྲང་སྟེ། །ཟླ་བའི་རྗེས་སུ་རྒྱུ་སྐར་བཞིན། །ཞེས་གསུངས་པ་ཡིན་ནོ། །ཡང་ན་འདི་དག་ཅེས་གསུངས་པ་ཡིན་ནོ། །དེ་བཞིན་དུ་གཞན་ཡང་བ་ནི་འདས་མ་ཐག་པའི་ཞི་གནས་ཀྱི་བདག་ཉིད་ཀྱི་རྒྱུར་རོ། །ཡང་ལག་ཅེས་པ་ནི་ཤེས་རབ་ཀུན་ནས་སློང་བར་བྱེད་པ་ཉིད་ཀྱིས་དེའི་རྒྱུ་ཚོགས་སམ་གཞི་ཡིན་ནོ། །ཤེས་རབ་དོན་དུ་ཞེས་པ་ནི་སྔར་བརྗོད་པའི་ཤེས་རབ་དེ་ཉིད་དགོས་པ་ཡིན་ཞིང་བསྒྲུབ་པར་བྱ་བ་ཉིད་ཀྱིས་གང་གི་ཡིན་པ་ནི་ཞི་གནས་ཀྱིས་ཡོངས་སུ་
དག་པར་བྱས་པའི་སེམས་ཀྱི་རྒྱུན་ལ་ཤེས་རབ་སྐྱེ་བའི་ཕྱིར། ལེགས་པར་སྦྱངས་པའི་ཞིང་ལས་འབྲུ་སྐྱེ་བ་དང་འདྲའོ། །ཇི་ལྟར་བསླབ་པ་ཀུན་ལས་བསྡུས་པར་ཡང་ཞི་གནས་འདིའི་བདག་ཉིད་ཆེ་བ་ཇི་ལྟ་ཞེ་ན། ཡང་དག་པ་ཇི་ལྟ་བ་བཞིན་དུ་ཤེས་པ་སྐྱེད་པར་ནུས་པ་ཡིན་ཏེ། གང་གི་ཕྱིར་མཉམ་པར་གཞག་པས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ་ཞེས་བརྗོད་དེ་ཐུབ་པས་གསུངས་སོ་ཞེས་པ་ཡིན་ནོ། །འདི་ཡང་འཕགས་པ་ཆོས་ཡང་དག་པར་སྡུད་པ་ལས། མཉམ་པར་གཞག་པའི་སེམས་ཀྱིས་ཡང་དག་པ་ཇི་ལྟ་བ་བཞིན་མཐོང་བར་འགྱུར་རོ། །ཡང་དག་པ་ཇི་ལྟ་བ་བཞིན་དུ་མཐོང་བའི་བྱང་ཆུབ་སེམས་དཔའ་སེམས་ཅན་རྣམས་ལ་སྙིང་རྗེ་ཆེན་པོ་འཇུག་སྟེ། བདག་གིས་སེམས་ཅན་ཐམས་ཅད་ལ་ཏིང་ངེ་འཛིན་གྱི་སྒོ་འདི་བསྒྲུབ་པར་བྱའོ། །སྙིང་རྗེ་ཆེན་པོ་དེས་བསྐུལ་བས་ལྷག་པའི་ཚུལ་ཁྲིམས་དང་ལྷག་པའི་སེམས་དང་ལྷག་པའི་ཤེས་རབ་ཀྱི་བསླབ་པ་ཡོངས་སུ་རྫོགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་རྫོགས་པར་བྱའོ་ཞེས་རྒྱས་པར་གསུངས་སོ། །ནི་ཞེས་པ་ནི་གང་གི་ཕྱིར་ཏེ། སྦྱིན་པ་ལ་སོགས་པའི་འཁོར་རམ་ཞི་གནས་ཀྱི་བདག་ཉིད་ཀྱི་འཁོར་ཤེས་རབ་ཀྱི་དོན་དུ་ཡིན་པར་ཐུབ་པས་གསུངས་ཏེ། དེ་ལྟ་བས་ན་ཤེས་རབ་བསྐྱེད་པར་བྱའོ་ཞེས་སྦྱར་བར་བྱའོ། །བསྐྱེད་པར་བྱའོ་ཞེས་པ་ནི་བསྒྲུབ་པར་བྱའོ་ཞེས་པའམ་མངོན་སུམ་དུ་བྱ་བའམ། བསྒོམ་པར་བྱ་བའམ། བསྟེན་པར་བྱ་བའམ། མང་ཆེད་དུ་བྱ་བའོ། །ཤེས་རབ་དེ་ཡང་རྣམ་པ་གཉིས་ཏེ། རྒྱུར་གྱུར་པ་དང༌། འབྲས་བུར་གྱུར་པའོ། །རྒྱུར་གྱུར་པའང་རྣམ་པ་གཉིས་ཏེ། མོས་པས་སྤྱོད་པ་དང༌། ས་ཐོབ་པའི་བྱང་ཆུབ་སེམས་དཔའིའོ། །འབྲས་བུར་གྱུར་པ་ཡང་མཚན་མ་མེད་པའི་སྦྱོར་བས་རྣམ་པ་ཐམས་ཅད་ཀྱི་མཆོག་དང་ལྡན་པའི་ཆོས་ཐམས་ཅད་ཀྱི་སྟོང་པ་ཉིད་རྟོགས་པའི་རང་བཞིན་ནོ། །དེ་ལ་དང་པོར་རྒྱུར་གྱུར་པ་ནི་ཐོས་པ་དང་བསམ་པ་དང་བསྒོམ་པའི་རིམ་པ་གོམས་པས་ས་ལ་རབ་ཏུ་ཞུགས་པའི་ཤེས་རབ་སྐྱེད་པར་བྱེད་པ་ཡིན་ཏེ། དེ་ཡང་ས་གཞན་དང་གཞན་འཐོབ་པའི་སྦྱོར་བས་མཆོག་ཏུ་འཕེལ་བར་གྱུར་པ་ཡིན་ཏེ། ཇི་སྲིད་དུ་སྒྲིབ་པ་གཉིས་དང་བྲལ་བ་རྟོག་པའི་དྲ་བ་མཐའ་དག་སྤངས་པའི་སངས་རྒྱས་ཉིད་ཀྱི་ཤེས་རབ་ཀྱི་རང་བཞིན་ཡོངས་སུ་རྫོགས་པར་
བྱེད་དེ། དེ་ཉིད་ཀྱི་ཕྱིར། སྡུག་བསྔལ་ཞི་བར་འདོད་པས་ཞེས་གསུངས་ཏེ། སྡུག་བསྔལ་ནི་འཁོར་བའི་འགྲོ་བ་རིས་ལྔས་ཡང་དག་པར་བསྡུས་པའི་སེམས་ཅན་གྱི་ཕུང་པོར་གཏོགས་པའི་བདག་ཉིད་ལ་ཡོད་པའི་སྐྱེ་བ་དང༌། ནད་པ་དང༌། རྒ་བ་དང༌། འཆི་བའི་རང་བཞིན་དང༌། སྡུག་པ་དང་བྲལ་བ་དང༌། མི་སྡུག་པ་དང་ཕྲད་པ་དང༌། འདོད་པ་ཚོལ་བའི་གེགས་བྱེད་པའི་མཚན་ཉིད་དང༌། མདོར་ན་ཉེ་བར་ལེན་པའི་ཕུང་པོའི་བདག་ཉིད་ཀྱང་ངོ༌། །ཞི་བ་ནི་མྱ་ངན་ལས་འདས་པ་ཡིན་ཏེ། སླར་མི་སྐྱེ་བའི་ཉེ་བར་ཞི་བའི་ཆོས་ཉིད་ཀྱིས་ཤིན་ཏུ་རྒྱུན་ཆད་པ་ཞེས་པའི་དོན་ཏོ། །དེ་ལ་འདོད་པ་ནི་མངོན་པར་འདོད་པ་དང་འདུན་པ་ཞེས་པའི་ཐ་ཚིག་གོ ། །འདི་ལྟར་ཕྱིན་ཅི་ལོག་པའི་འདུ་ཤེས་ཅན་མི་བདེན་པའི་དེ་ཁོ་ན་ཉིད་དུ་སྒྲོ་འདོགས་པའི་མངོན་པར་ཞེན་པའི་སྟོབས་ཀྱིས་བདག་གི་བར་འཛིན་པར་འཇུག་པས་ཚུལ་བཞིན་མ་ཡིན་པའི་ཡིད་ལ་བྱེད་པ་ལས་བྱུང་བ། འདོད་ཆགས་ལ་སོགས་པ་ཉོན་མོངས་པའི་ཚོགས་ཡང་དག་པར་སྐྱེ་བར་འགྱུར་རོ། །དེ་ལས་ནི་ལས་ཡིན་ལ། དེ་ལས་སྐྱེ་བ་ཡིན་ཞིང་དེ་ལས་ཀྱང་ནད་དང་རྒ་ཤི་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་དང༌། ཡིད་མི་བདེ་བའི་ཡོངས་སུ་ངལ་བ་ཡང་འབྱུང་བར་འགྱུར་རོ། །དེ་ལྟར་ན་འདི་འབའ་ཞིག་ལས་སྡུག་བསྔལ་ཀྱི་ཕུང་པོ་ཆེན་པོ་འབྱུང་བར་འགྱུར་རོ། །དེ་ལས་དེ་ལྟར་ལུགས་ལས་བཟློག་པའི་རྣམ་པས་རྟེན་ཅིང་འབྲེལ་པར་འབྱུང་བ་ལ་ཡང་དག་པའི་ཤེས་རབ་ཀྱིས་དམིགས་པར་བྱེད་པས། ཡང་དེ་ཉིད་བདག་ཉིད་མེད་པ་དང༌། བདག་པོ་མེད་པ་དང༌། སྒྱུ་མ་དང༌། སྨིག་རྒྱུ་དང༌། དྲི་ཟའི་གྲོང་ཁྱེར་དང༌། རྨི་ལམ་དང༌། གཟུགས་བརྙན་ལ་སོགས་པ་དང་མཚུངས་པའི་རྣམ་པ་ཉིད་ཀྱིས་དོན་དམ་པར་རང་བཞིན་མེད་པར་མཐོང་བས་ཡང་དག་པ་ཇི་ལྟ་བ་བཞིན་དུ་ཡོངས་སུ་ཤེས་ཤིང་དེའི་མི་མཐུན་པའི་ཕྱོགས་ཀྱི་བདག་ཉིད་རྨོངས་པའི་རང་བཞིན་གྱི་མ་རིག་པ་སྲིད་པའི་ཡན་ལག་ཟློག་པར་བྱེད་ལ། མ་རིག་པ་འགགས་པས་དེའི་རྐྱེན་ཡིན་པའི་ཕྱིར་འདུ་བྱེད་འགག་གོ །དེ་ལྟར་རྒྱུར་གྱུར་པ་སྔ་མ་སྔ་མ་རྣམས་འགགས་པས་འབྲས་བུར་གྱུར་པ་ཕྱི་མ་ཕྱི་མ་རྣམས་འགག་པར་རིག་པར་བྱ་སྟེ། ཇི་སྲིད་དུ་སྐྱེ་བ་འགགས་པས་རྒ་ཤི་དང་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་
མི་བདེ་བས་ཡོངས་སུ་ངལ་བ་ཡང་འགག་པར་འགྱུར་རོ། །དེ་ལྟར་ན་གཅིག་ཏུ་སྡུག་བསྔལ་གྱི་ཕུང་པོ་ཆེན་པོ་འདི་འགག་པར་འགྱུར་རོ། །དེ་ལ་མ་རིག་པ་དང་སྲེད་པ་དང་ལེན་པ་ནི་ཉོན་མོངས་པའི་ལམ་དུ་རྣམ་པར་ཆད་ལ་འདུ་བྱེད་དང་སྲིད་པ་ནི་ལས་ཀྱི་ལམ་དུ་རྣམ་པར་ཆད་དེ། ཡན་ལག་ལྷག་མ་རྣམས་ནི་སྡུག་བསྔལ་ཀྱི་ལམ་དུ་རྣམ་པར་ཆད་ཅིང༌། སྔོན་དང་ཕྱི་མའི་མཐའ་འགགས་པ་ནི་འགོག་པའི་ལམ་དུ་རྣམ་པར་ཆད་དོ། །དེ་ལྟ་ཉིད་དུ་ལམ་གསུམ་ནི་བདག་མེད་པ་མ་ཡིན་ལ། བདག་དང་བདག་གི་བ་མེད་པ་སྟེ། སྐྱེ་བའི་སྦྱོར་བས་སྐྱེ་བར་འགྱུར་ཞིང་འགག་པའི་སྦྱོར་བས་འགག་པར་འགྱུར་ཏེ། དངོས་པོ་ལ་སྨྱུག་མའི་ཚིགས་དང་འདྲའོ། །འདི་ཡང་ཕྱི་ནས་རིགས་པ་དང་ལུང་གིས་རྒྱས་པར་བསྟན་པར་བྱའོ། །དེ་བས་ན་འདི་ལྟར་འདུས་བྱས་ལ་ཤེས་རབ་ཀྱིས་རྨི་ལམ་དང་སྒྱུ་མ་ལ་སོགས་པའི་རང་བཞིན་དུ་སོ་སོར་རྟོག་པ་ན་ཆོས་ཐམས་ཅད་དང་རང་བཞིན་མེད་པར་རྟོགས་པས་དོན་དམ་པར་ཁོང་དུ་ཆུད་པ་ལས་བག་ཆགས་དང་བཅས་པའི་ཉེས་པའི་ཕུང་པོ་ལྡོག་པར་འགྱུར་ཞིང༌། སྡུག་བསྔལ་ཐམས་ཅད་ཉེ་བར་ཞི་བའི་རྒྱུ་ཤེས་རབ་སྐྱེ་བར་འགྱུར་ཏེ། འདིས་ཇི་ལྟར་ལུང་དང་རིགས་པ་དག་གིས་དཔྱོད་པ་ན་དངོས་པོའི་དེ་ཁོ་ན་ཉིད་ཕྱིན་ཅི་མ་ལོག་པ་གསལ་བར་བྱེད་པའི་ཕྱིར་རོ། །ཀུན་རྫོབ་དང་མ་རིག་པ་དང་རྨོངས་པ་དང་ཕྱིན་ཅི་ལོག་ཅེས་བྱ་བ་ནི་རྣམ་གྲངས་ཡིན་ནོ། །མ་རིག་པ་ཡང་མི་བདེན་པའི་དོན་གྱི་རང་བཞིན་སྒྲོ་འདོགས་པར་བྱེད་པ་ཡིན་ལ། རང་བཞིན་མཐོང་བ་ལ་བསྒྲིབས་པས་ན་ཀུན་རྫོབ་ཏུ་འཐད་དོ། །གང་སཱ་ལུ་ལྗང་པ་ལས་གསུངས་པ། གཞན་ཡང་དེ་ཁོ་ན་ཉིད་མ་རིག་པ་དང་ལོག་པར་རྟོགས་པ་ནི་མི་ཤེས་པ་དང་མ་རིག་པ་ཡིན་ནོ་ཞེས་སོ། །ཡང་གསུངས་པ། མ་རིག་སྐྱེས་པ་ཉིད་ཀྱིས། །ཡང་དག་མིན་པའི་དོན་སྣང་ཞིང༌། །ཡང་དག་སྒྲིབ་པར་བྱེད་ལ་འཇུག །མིག་སེར་གྱིས་ནི་གནོད་པ་བཞིན། །ཞེས་སོ། །དེས་ཉེ་བར་བསྟན་པ་ཡང་རྟེན་ཅིང་འབྲེལ་པར་འབྱུང་བའི་དངོས་པོའི་རང་བཞིན་ཡིན་པ་དེ་ཀུན་རྫོབ་ཅེས་བྱ་སྟེ། དེ་ཉིད་ལ་འཇིག་རྟེན་པའི་ཀུན་རྫོབ་ཀྱི་བདེན་པ་ཞེས་བརྗོད་ལ། འཇིག་རྟེན་པ་ཉིད་ཀྱི་ཀུན་རྫོབ་ཀྱིས་དེ་ལ་བདེན་པ་ཞེས་བྱ་བ་ལས་སོ། །གང། གཏི་མུག་ཀུན་རྫོབ་ཡིན་ཏེ་རང་བཞིན་ལ་བསྒྲིབས་པས། །གང་ཞིག་བཅོས་མ་ཁོ་ན་དེ་ཡིས་བདེན་པར་
སྟོན། །དངོས་པོའི་དོན་དང་བྱས་པ་ཡང་ནི་ཀུན་རྫོབ་ཏུ། །འདི་ནི་ཀུན་རྫོབ་བདེན་པ་ཞེས་བྱར་ཐུབ་པས་གསུངས། །ཞེས་བརྗོད་པའོ། །ཀུན་རྫོབ་དེ་ཡང་འཇིག་རྟེན་པ་ཉིད་ཀྱིས་རྣམ་པ་གཉིས་སུ་འབྱེད་དེ། ལོག་པའི་ཀུན་རྫོབ་དང༌། ཡང་དག་པའི་ཀུན་རྫོབ་ཅེས་སོ། །འདི་ལྟར་ཡང་གང་ཅུང་ཟད་རྐྱེན་ལས་སྐྱེས་པའི་དངོས་པོ་སྔོན་པོ་ལ་སོགས་པའི་རང་བཞིན་སྐྱོན་མེད་པའི་དབང་པོས་དམིགས་པ་ནི་འཇིག་རྟེན་པ་ཉིད་ལས་བདེན་པ་ཉིད་ཡིན་ལ། རྟེན་ཅིང་འབྲེལ་པར་འབྱུང་བ་ལས་སྐྱེས་པ་ཡིན་ཡང་སྒྱུ་མ་དང༌། སྨིག་རྒྱུ་དང༌། གཟུགས་བརྙན་ལ་སོགས་པ་རྣམས་དབང་པོ་ཉེས་པ་དང་ལྡན་པས་མཐོང་བ་དང༌། ཇི་ལྟར་མུ་སྟེགས་ཅན་གྱི་རང་གི་གྲུབ་མཐས་ཡོངས་སུ་བརྟགས་པ་ཡང་འཇིག་རྟེན་པ་ཉིད་ལས་ལོག་པ་ཡིན་ཏེ། དེ་བརྗོད་པ། གལ་ཏེ་དབང་པོ་ཉམས་པར་མ་གྱུར་པའི། །དྲུག་པོ་རྣམས་ཀྱིས་འཇིག་རྟེན་ཡུལ་རྟོག་བྱེད། །དེ་ནི་འཇིག་རྟེན་ཉིད་ལ་བདེན་ཡིན་ཏེ། །ལྷག་མ་བརྟགས་པ་འཇིག་རྟེན་ཉིད་ལ་བརྫུན། །ཞེས་སོ། །དེ་ལྟར་དེ་གཉི་ག་ཡང༌། ཡང་དག་པ་གཟིགས་པའི་འཕགས་པ་རྣམས་ལ་ནི་བརྫུན་པ་ཡིན་ཏེ། དོན་དམ་པའི་གནས་སྐབས་སུ་ཀུན་རྫོབ་ཀྱི་བདེན་པ་ནི་འཁྲུལ་པ་ཡིན་པའི་ཕྱིར་རོ། །འདི་དེ་མ་ཐག་ཉིད་དུ་རིགས་པའི་སྒོ་ནས་རྟོགས་པར་བྱ་སྟེ། དེ་ལྟ་བས་ན་མ་རིག་པ་དང་ལྡན་པ་ལ་དངོས་པོའི་རང་བཞིན་མི་སྣང་ངོ༌། །དམ་པ་ནི་མཆོག་ཡིན་ལ། དོན་ནི་དམ་པའི་དོན་ཡིན་ཏེ། མ་བཅོས་པ་དངོས་པོའི་རང་བཞིན་གང་གི་རྟོག་པས་སྒྲིབ་པའི་བག་ཆགས་དང་རྗེས་སུ་འབྲེལ་བའི་ཉོན་མོངས་པ་སྤོང་བར་འགྱུར་པའོ། །ཆོས་ཐམས་ཅད་ངོ་བོ་ཉིད་མེད་པ་དང༌། སྟོང་པ་ཉིད་དང་དེ་བཞིན་ཉིད་དང༌། ཡང་དག་པའི་མཐའ་དང་ཆོས་ཀྱི་དབྱིངས་ཞེས་པ་ནི་རྣམ་གྲངས་ཡིན་ལ། རྟེན་ཅིང་འབྲེལ་པར་འབྱུང་བའི་དོན་ཐམས་ཅད་རང་བཞིན་མེད་པ་དོན་དམ་པའི་ངོ་བོ་ཡིན་ཏེ། ཇི་ལྟར་སྣང་བའི་ཀུན་རྫོབ་ནི་མི་འཐད་པའི་ཕྱིར་རོ། །འདི་ལྟར་ཡང་རེ་ཞིག་ཇི་ལྟར་མཐོང་བའི་ངོ་བོས་དངོས་པོ་ཡོད་པའི་རང་བཞིན་མ་ཡིན་ཏེ། དེའི་རྗེས་ཀྱི་དུས་ན་མི་གནས་པའི་ཕྱིར་རོ། །རང་བཞིན་ཡང་ཐམས་ཅད་དུ་གློ་བུར་བ་མ་ཡིན་པས་མི་གཡོ་བའི་རང་བཞིན་ཡིན་པའི་ཕྱིར་རོ། །གང་ཞིག་གང་གི་རང་བཞིན་ཡིན་པ་དེ་ནི་ཇི་ལྟར་ནམ་ཡང་ལྡོག་པ་མ་ཡིན་ཏེ། གཞན་དུན་
དེའི་རང་བཞིན་ཉམས་པར་ཐལ་བར་འགྱུར་བས། རང་བཞིན་མེད་པ་ཉིད་དུ་འགྱུར་རོ། །དེ་སྐྱེ་བ་ན་ཡོད་པའི་ངོ་བོས་འགའ་ཞིག་ནས་འོངས་པའམ། འགགས་པ་ན་འགའ་ཞིག་ཏུ་སོང་བར་གྱུར་པ་ཡང་མ་ཡིན་ཏེ། འོན་ཀྱང་སྒྱུ་མ་བཞིན་དུ་རྒྱུ་དང་རྐྱེན་ཚོགས་པའི་རང་བཞིན་གྱིས་སྐྱེའོ། །དེ་མ་ཚང་བ་ལས་འགག་པར་འགྱུར་བ་ཡང་ཡིན་ཏེ། རྒྱུ་དང་རྐྱེན་གྱི་ཚོགས་པ་ཚང་བ་ལས་བྱུང་ཞིང་གཞན་ལ་རག་ལས་པས་བདག་ཉིད་ཐོབ་པ་ནི་གཟུགས་བརྙན་ཉིད་དུ་གྱུར་པ་ཡིན་ལ་ཇི་ལྟར་དེའི་རང་བཞིན་ཡིན་ཏེ་གང་གི་དོན་ཡང་དོན་དམ་པ་མ་ཡིན་ལ། རྒྱུ་དང་རྐྱེན་གྱི་ཚོགས་པ་ལས་བྱུང་བ་སྲིད་པ་མ་ཡིན་ཏེ། དེ་ཡང་གཞན་ལ་རག་ལས་པས་ཚོགས་པ་གཞན་ལས་བྱུང་བའི་བདག་ཉིད་ལས་ངོ་བོ་ཐོབ་པ་རྣམས་ནི་རང་བཞིན་མེད་པ་ཡིན་པའི་ཕྱིར་རོ། །དེ་བཞིན་དུ་གཞན་གང་ཞིག་སྔ་མ་སྔ་མ་ལས་རང་རང་གི་རྒྱུའི་ཚོགས་པ་ལས་སྐྱེ་བས་རང་བཞིན་མེད་པ་ཉིད་དུ་བལྟ་བར་བྱའོ། །རྒྱུ་དང་འབྲས་བུ་རྗེས་སུ་མཐུན་པ་འདོད་པ་རྣམས་ཀྱིས་ཇི་ལྟར་དངོས་པོ་མེད་པ་ལས་དངོས་པོའི་རང་བཞིན་སྐྱེ་བར་ཁས་བླང་བར་བྱ། གང་འཆད་པར་འགྱུར་བ། སྒྱུ་མས་སྤྲུལ་པ་གང་ཡིན་དང༌། །རྒྱུ་རྣམས་ཀྱིས་ནི་གང་སྤྲུལ་པ། །དེ་ནི་གང་ལས་འོངས་གྱུར་ཅིང༌། །གང་དུ་འགྲོ་བ་བརྟག་པར་གྱིས། །གང་ཞིག་གང་ནི་ཉེ་བ་ཡིས། །མཐོང་འགྱུར་དེ་མེད་ན་མིན་པ། །བཅོས་བུ་གཟུགས་བརྙན་དང་མཚུངས་པ། །དེ་ལ་བདེན་ཉིད་ཅི་ལྟར་ཡོད། །ཅེས་པ་དང༌། ཡང་བརྗོད་པ། གང་ཞིག་རྐྱེན་ལས་སྐྱེས་པ་དེ་མ་སྐྱེས། །དེ་ལ་སྐྱེ་བའི་རང་བཞིན་ཡོད་མ་ཡིན། །རྐྱེན་ལ་རག་ལས་གང་དེ་སྟོང་པར་བཤད། །གང་གི་སྟོང་ཉིད་ཤེས་དེ་བག་ཡོད་མིན། །ཞེས་པ་དང༌། སྟོང་པ་ཁོ་ནའི་ཆོས་རྣམས་ལས། །སྟོང་པའི་ཆོས་རྣམས་འབྱུང་བར་འགྱུར། །ཞེས་པས་སོ། །རང་དང་གཞན་དང་གཉི་གའི་རྒྱུ་དང་འབྲེལ་པ་དང༌། རྒྱུ་མེད་པ་དང་འབྲེལ་པ་ལས་དངོས་པོ་སྐྱེ་བ་ནི་ཤིན་ཏུ་ལེགས་པར་འཐད་པ་མ་ཡིན་ཏེ། འདི་ལྟར་ཡང་རང་གི་བདག་ཉིད་དངོས་པོ་རྣམས་རང་སྐྱེ་བའི་རྒྱུ་མཚན་གལ་ཏེ་ཡིན་ན་སྐྱེས་པའམ་མ་སྐྱེས་པ་ལ་ཡིན། སྐྱེས་པ་ནི་རེ་ཞིག་མ་ཡིན་ཏེ། རང་གི་བདག་ཉིད་རྒྱུ་ཡིན་པ་ན་དེའི་བདག་ཉིད་ཐམས་ཅད་རང་ཉིད་ཀྱིས་སྐྱེས་པའི་ཕྱིར་རོ། །གང་དུ་ཡང་འདི་ལ་བྱ་བ་དང་ལྡན་པར་འགྱུར་བ་བསྐྱེད་པར་
བྱ་བ་ཡང་འདི་ལམ་སྐྱེས་པ་གཞན་གྱི་རང་བཞིན་མེད་པའི་ཕྱིར་ཏེ། གཅིག་པོ་འདི་ལ་ཆ་ཤས་དང་ལྡན་པའི་ཕྱིར་རོ། །ཕྱིས་སྐྱེ་བར་འགྱུར་བ་གཞན་འདི་ནི་དེའི་རང་བཞིན་དུ་རིགས་པ་མ་ཡིན་ཏེ། དེ་གྲུབ་པ་དང་མ་གྲུབ་པ་ནི་དེའི་རང་བཞིན་མ་ཡིན་པའི་ཕྱིར་རོ། །དེ་བས་ན་རང་གི་བདག་ཉིད་ལས་སྐྱེས་པ་ནི་ཅུང་ཟད་ཀྱང་སྲིད་པ་མ་ཡིན་ནོ། །ཡང་རང་ལས་སྐྱེ་བའི་ཕྱོགས་ལ་གང་ཡང་འཐད་པ་མ་ཡིན་ཏེ། སྔར་གྲུབ་པའི་རང་བཞིན་ལ་གཅིག་ལ་གཅིག་བརྟེན་པའི་ཉེས་པར་ཐལ་བར་འགྱུར་བས་སོ། །དེ་མ་གྲུབ་པ་ལས་ཀྱང་མ་ཡིན་ཏེ། ནམ་མཁའི་མེ་ཏོག་དང་འདྲ་བར་ནུས་པ་མཐའ་དག་གིས་སྟོང་པ་ནི་རང་གྲུབ་པའི་རྒྱུའི་དངོས་པོར་འགྲོ་བར་རིགས་པ་མ་ཡིན་ནོ། །གཞན་དུ་ན་བོང་བུའི་རྭ་ཡང་རང་རང་གི་དངོས་པོ་བསྐྱེད་པའི་རྒྱུ་ཉིད་དུ་ཐལ་བའི་ཕྱིར་རོ། །གཞན་ལས་ཞེས་པའི་ཕྱོགས་འདི་ཡང་མ་ཡིན་ཏེ། ཉི་མ་ལས་ཀྱང་མུན་པའམ་ཐམས་ཅད་ལས་ཐམས་ཅད་སྐྱེ་བར་ཐལ་བར་འགྱུར་བའི་ཕྱིར་དང༌། བསྐྱེད་པར་བྱ་བ་དང་སྐྱེད་པར་བྱེད་པར་མི་འདོད་པ་དག་མངོན་པར་འདོད་པའི་འབྲས་བུ་ལ་ལྟོས་པ་སྟེ་གཞན་ཉིད་དུ་ཁྱད་པར་མེད་པའི་ཕྱིར་རོ། །བསྐྱེད་པར་བྱ་བ་དང་སྐྱེད་པར་བྱེད་པ་རྒྱུ་གཅིག་པ་སོ་སོར་ངེས་པ་ཡང་འབྲས་བུ་མ་སྐྱེས་པ་ན་བརྟགས་པ་ཉིད་ཀྱིས་དངོས་པོ་ལ་རིགས་པ་མ་ཡིན་ནོ། །མ་འོངས་པའི་ཆོས་གནས་པ་ལ་ལྟོས་ནས་འབྲས་བུ་ལ་སོགས་པའི་ཐ་སྙད་དངོས་པོ་མ་ཡིན་ཏེ། དངོས་པོའི་རང་བཞིན་དུ་ཡོད་པ་དཔྱོད་པར་འགྱུར་བའི་ཕྱིར་རོ། །ས་བོན་གནས་པ་རྣམས་ལ་མྱུ་གུ་ཡོད་པ་ལྟོས་པ་ནི་ས་བོན་ལས་གཞན་ཉིད་ཡིན་པར་བརྟགས་པ་ནི་ཡོད་པ་མ་ཡིན་ཏེ། རྒྱུ་ལ་འབྲས་བུ་ཡོད་པ་ཉིད་ནི་འགེགས་པར་འགྱུར་བ་ཡིན་པའི་ཕྱིར་རོ། །གང་དུ་མཐོང་བ་ཉིད་ཀྱི་དངོས་པོ་རྣམ་པར་དཔྱད་པས་གནས་པ་མ་ཡིན་ན་དེར་མ་འོངས་པ་ལ་སོགས་པ་རྣམས་སྲིད་པའི་བསམ་པའང་ཅི་ཡོད། གཉི་གའི་ཕྱོགས་ཀྱང་མ་ཡིན་ཏེ། སོ་སོའི་ཕྱོགས་ལ་བརྗོད་པས་གཉི་གའི་ཕྱོགས་ལ་སྐྱོན་དུ་འགྱུར་བའི་ཕྱིར་རོ། །འབྲས་བུ་མ་སྐྱེས་པ་ན་ཡང་གཉི་གའི་རྒྱུའི་ངོ་བོ་དོན་དམ་པར་མེད་པའི་ཕྱིར་རོ། །སྐྱེས་པ་ལ་ཡང་ཅུང་ཟད་ཀྱང་བསྐྱེད་པར་བྱར་མེད་པས་གང་ལ་གཉི་གའི་ངོ་བོའི་རྒྱུའི་བྱ་བ་དང་ལྡན་པར་འགྱུར། རྒྱུ་མེད་པ་
ལས་ཞེས་པའི་རྣམ་པར་རྟོག་པ་ཡང་མ་ཡིན་ཏེ། གང་གི་ཕྱིར་མེད་པར་དགག་པའི་བདག་ཉིད་ཀྱིས་འདི་རྒྱུ་མེད་པ་ལས་ཞེས་པ་ནི་འཐད་པ་མ་ཡིན་ཏེ། རྒྱུ་མེད་པ་ན་དངོས་པོ་རྣམས་ཀྱི་ཡུལ་དང་དུས་ཀྱི་ངེས་པ་མེད་པར་ཐལ་བར་འགྱུར་བའམ། རྟག་ཏུ་ཡོད་པ་དང་མེད་པར་ཐལ་བར་འགྱུར་བ་དང། ཐབས་ལས་བྱུང་བ་འདོད་པས་ཀྱང་སོ་སོར་ངེས་པའི་ཐབས་ཉམས་སུ་ལེན་པར་ཡང་མི་འགྱུར་རོ། །གཙོ་བོ་དང་དབང་ཕྱུག་ལ་སོགས་པ་རྣམས་རྒྱུ་ཡིན་པ་ཉིད་འདི་འགེགས་པར་འགྱུར་བའི་ཕྱིར་རོ། །རྒྱུ་མེད་པ་ལས་དངོས་པོའི་རང་བཞིན་ཐོབ་པ་ནི་མ་ཡིན་ནོ། །དེ་ལྟ་བས་ན་དངོས་པོ་རྣམས་རང་དང་གཞན་དང་གཉི་ག་དང་རྒྱུ་མེད་པ་ལས་ཡོད་པ་སྐྱེ་བ་མི་འཐད་དོ། །དེ་སྐད་དུ་ཡང༌། རང་ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དང་གང་ན་ཡང༌། །སྐྱེས་པ་ནམ་ཡང་ཡོད་མ་ཡིན། །ཞེས་གསུངས་སོ། །གཅིག་དང་དུ་མ་དང་བྲལ་བ་དཔྱད་པས་ཀྱང་དངོས་པོ་ཐམས་ཅད་རང་བཞིན་དང་བྲལ་བས་ཡོད་པའི་དངོས་པོ་ནི་མ་ཡིན་ནོ། དེ་ལྟ་བས་ན་རྨི་ལམ་དང་སྒྱུ་མ་དང་གཟུགས་བརྙན་ལ་སོགས་པ་དང་འདྲ་བ་རྐྱེན་ལས་བྱུང་བ་ཙམ་ཉིད་འདི་མ་བརྟགས་ན་ཉམས་དགའ་བར་གཞག་སྟེ་ཇི་ལྟར་སྡུག་བསྔལ་ཐམས་ཅད་ཀྱི་རྒྱུར་གྱུར་པ་མངོན་པར་ཞེན་བས་ཅི་ཞིག་བྱ་སྟེ། དགོས་པ་ཡོད་པ་མ་ཡིན་ནོ། །དེའི་ཕྱིར་འདི་ནི་དོན་གྱི་དེ་ཁོ་ན་ཉིད་ཡིན་ཏེ། བདག་དང་གཞན་སྨྲས་དངོས་འདི་དག །ཡང་དག་ཏུ་ན་གཅིག་པ་དང༌། །དུ་མའི་རང་བཞིན་བྲལ་བའི་ཕྱིར། །རང་བཞིན་མེད་དེ་གཟུགས་བརྙན་བཞིན། །ཞེས་སོ། །དེ་ལྟར་ན་རང་བཞིན་མེད་པ་ཉིད་དངོས་པོ་རྣམས་ཀྱི་གཉུག་མ་ཡིན་ཏེ་དོན་དམ་པའི་རང་བཞིན་གྱིས་གནས་པ་མ་ཡིན་ནོ། །དེ་ཉིད་ལ་སྐྱེས་བུའི་དགོས་པའི་མཆོག་དང་ཁྱད་པར་དུ་འཕགས་པར་བརྗོད་དོ། །འདི་ལ་ཡང་མངོན་པར་ཞེན་པར་མི་བྱའོ། །གཞན་དུ་ན་དངོས་པོ་ལ་མངོན་པར་ཞེན་པ་ལ་ཁྱད་པར་དུ་ཅུང་ཟད་ཀྱང་ཡོད་པ་མ་ཡིན་ཏེ། གཉི་ག་ཡང་བརྟགས་པའི་བདག་ཉིད་ཀྱིས་བསྒྲིབས་པ་ཡིན་པའི་ཕྱིར་རོ། །མེད་པར་བརྟགས་པའི་རང་བཞིན་གྱིས་རང་གི་ངོ་བོ་ཅུང་ཟད་ནི་ཡོད་པ་མ་ཡིན་ལ། དངོས་པོ་ལོག་པ་ཡང་དངོས་པོ་མེད་པ་མ་ཡིན་ཏེ། ལོག་པ་ནི་རང་བཞིན་
མེད་པ་ཡིན་པའི་ཕྱིར་རོ། །གལ་ཏེ་ཡང་དངོས་པོ་མ་ཡིན་ཏེ། ལོག་པ་ནི་རང་བཞིན་ཉིད་འགའ་ཞིག་གི་རང་བཞིན་ཡིན་ན། དེའི་ཚེ་བཀག་པའི་བདག་ཉིད་ཀྱང་དངོས་པོ་མེད་པར་འགྱུར་རོ། །དངོས་པོའི་རང་བཞིན་མེད་དོ་ཞེས་བསྟན་པ་ཉིད་ཡིན་ནོ། །དེའི་ཕྱིར་དངོས་པོ་ལོག་པའི་ངོ་བོ་དངོས་མེད་ཅེས་བྱ་བ་ཅུང་ཟད་ཀྱང་ཡོད་པ་མ་ཡིན་ནོ། །དངོས་པོ་དང་དངོས་པོ་མེད་པ་དག་བརྗོད་པའི་རིམ་པས་མེད་པར་བསྟན་པ་ན། དེ་གཉིས་འདྲེས་པའི་བདག་ཉིད་དམ་གཉི་ག་བཀག་པའི་རང་བཞིན་ཉིད་ནི་ཡོད་པ་མ་ཡིན་ཏེ། དངོས་པོའི་རྣམ་པར་རྟོག་པ་ཉིད་རྣམ་པར་རྟོག་པ་མཐའ་དག་གི་རྒྱུ་ཡིན་པའི་ཕྱིར་དེ་བཀག་པ་ན་འདི་རྣམས་ཐམས་ཅད་ཉིད་དགག་པ་གཅིག་གིས་བསལ་བ་ཡིན་ནོ། །དེའི་ཕྱིར་ཡོད་པ་དང༌། ཡོད་པ་མ་ཡིན་པ་དང༌། ཡོད་པ་དང་མེད་པ་གཉི་ག་དང༌། གཉི་གའི་བདག་ཉིད་ཀྱང་མ་ཡིན་པ་ལ་ཅུང་ཟད་ཀྱང་མངོན་པར་ཞེན་པའི་ཡུལ་དུ་བརྟག་པར་མི་བྱའོ། །དེ་འཕགས་པ་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པ། རབ་འབྱོར་གྱིས་སྨྲས་པ། ཚེ་དང་ལྡན་པ་ཤ་ར་དྭ་ཏིའི་བུ་འདི་ལ་བྱང་ཆུབ་སེམས་དཔའི་ཐེག་པ་པའི་རིགས་ཀྱི་བུའམ་རིགས་ཀྱི་བུ་མོ་ཐབས་མི་མཁས་པས་གཟུགས་སྟོང་པའོ་ཞེས་ཡང་དག་པར་ཤེས་པ་ནི་ཞེན་པའོ། །ཚོར་བ་སྟོང་པའོ་ཞེས་ཡང་དག་པར་ཤེས་ན་ཞེན་པའོ། །འདུ་ཤེས་སྟོང་པའོ་ཞེས་ཡང་དག་པར་ཤེས་ན་ཞེན་པའོ། །འདུ་བྱེད་སྟོང་པའོ་ཞེས་ཡང་དག་པར་ཤེས་ན་ཞེན་པའོ། །རྣམ་པར་ཤེས་པ་སྟོང་པའོ་ཞེས་ཡང་དག་པར་ཤེས་ན་ཞེན་པའོ། །དེ་བཞིན་དུ་མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཇི་སྲིད་དུ་ཆོས་ཀྱི་བར་དུ་སྟོང་པའོ་ཞེས་ཡང་དག་པར་ཤེས་ན་ཞེན་པའོ་ཞེས་རྒྱས་པར་རོ། །ཇི་སྐད་དུ་ཡང༌། ཀུན་རྟོག་ཐམས་ཅད་སྤང་བའི་ཕྱིར། །སྟོང་ཉིད་བདུད་རྩི་སྟོན་མཛད་ལ། །གང་ཞིག་དེ་ལ་ཞེན་གྱུར་ན། །དེ་ཉིད་ཁྱེད་ཀྱིས་ཤིན་ཏུ་སྨད། །ཅེས་གསུངས་པ་ཡིན་ནོ། །ཡོད་མིན་མེད་མིན་ཡོད་མེད་མིན། །གཉིས་ཀྱི་བདག་ཉིད་དུ་ཡང་མེད། །མཐའ་བཞི་དག་ལས་ངེས་གྲོལ་བ། །དེ་ཉིད་དབུ་མར་མཁས་རྣམས་བཞེད། །ཅེས་སོ། །དེ་ལྟར་མཐའ་བཞི་ལས་གྲོལ་བ་གདོད་མ་ནས་ཞི་བ་མ་སྐྱེས་པ་མ་འགགས་པ་རྟག་པ་དང་ཆད་པ་མེད་པ་ལ་སོགས་པའི་རང་བཞིན་གྱིས་སྤྲོས་པ་དང༌།
བྲལ་བའི་ཕྱིར་ནམ་མཁའ་བཞིན་དུ་ཆགས་པ་མེད་པ་གནས་མེད་པར་འགྲོ་བ་མ་ལུས་པར་བལྟ་བར་བྱའོ། །འདི་ནི་བདེན་པ་གཉིས་སུ་འདོད། །ཅེས་ཏེ། གང་ཞེ་ན། ཀུན་རྫོབ་དང་ནི་དོན་དམ་སྟེ། །ཞེས་འོག་ཏུ་སྦྱར་བར་བྱའོ། །ཀུན་རྫོབ་ནི་གཅིག་ཡིན་ལ་བདེན་པ་ནི་ཕྱིན་ཅི་མ་ལོག་པ་ཡིན་ནོ། །ཡང་དོན་དམ་པ་སྟེ་བདེན་པ་གཞན་ཡིན་ལ། དང་གི་སྒྲས་ནི་བདེན་པ་ཙམ་དུ་མཚུངས་པར་སྡུད་པར་བྱེད་དོ། །དེ་ལ་ཀུན་རྫོབ་ཀྱི་བདེན་པ་ནི་འཇིག་རྟེན་པའི་ཕྱིན་ཅི་མ་ལོག་པའི་ངོ་བོ་ཡིན་ལ་དོན་དམ་པའི་བདེན་པ་ལ་ཡང་བདེན་པ་ནི་སླུ་བར་མི་བྱེད་པ་ཡིན་ནོ། །དེ་ཁོ་ན་ཉིད་ནི་འཕགས་པ་རྣམས་ཀྱིའོ་ཞེས་པ་ནི་ཁྱད་པར་རོ། །དོན་གྱི་ཁྱད་པར་འདི་ལྟ་བུ་མཐོང་བས་ཀྱང་དང་གི་སྒྲ་ནི་རིགས་པ་ཡིན་ནོ། །འདི་སྐད་བརྗོད་པར་འགྱུར་ཏེ། ཕྱི་རོལ་དང་ནང་གི་བདག་ཉིད་ཀྱི་དངོས་པོ་འདི་ཐམས་ཅད་རང་བཞིན་རྣམ་པ་གཉིས་འཛིན་པས་ཡང་དག་པར་སྐྱེ་བར་འགྱུར་ཏེ། འདི་ལྟ་སྟེ་ཀུན་རྫོབ་དང་དོན་དམ་པ་ཞེས་པའོ། །དེ་ལ་གཅིག་ནི་མ་རིག་པའི་རབ་རིབ་ཀྱིས་བསྒྲིབས་པའི་མིག་ཅན་ཡང་དག་པ་མ་ཡིན་པའི་བདག་ཉིད་མཐོང་བའི་སོ་སོའི་སྐྱེ་བོ་རྣམས་ཀྱིས་ཡུལ་བརྫུན་པར་མཐོང་བ་ཉིད་ན་ཡང་དག་པར་མཐོང་བར་ཞེན་ཏོ། །གཞན་ནི་རྣམ་པར་འབྱེད་པའི་མིག་སྨན་གྱི་ཐུར་མས་མ་རིག་པའི་ལིང་ཏོག་བསལ་བས་ཡང་དག་པའི་ཤེས་པའི་མིག་ཅན་དེ་ཁོ་ན་ཉིད་རིག་པའི་འཕགས་པ་རྣམས་ཀྱིས་ཡང་དག་པའི་ཤེས་པའི་ཡུལ་དུ་གྱུར་པས་རང་བཞིན་རྣམ་པར་གཞག་པ་ཡིན་ནོ། །དེ་ལྟར་དངོས་པོ་འདི་དག་ཐམས་ཅད་རང་བཞིན་གཉིས་འཛིན་པ་ཡིན་ནོ། །རང་བཞིན་འདི་དག་ལས་བྱིས་པ་བརྫུན་པ་མཐོང་བ་རྣམས་ཀྱི་ཡུལ་དེ་ནི་ཀུན་རྫོབ་ཀྱི་བདེན་པ་ཡིན་ལ། གང་ཡང་དག་པའི་གནས་སྐབས་ཀྱི་དེ་ཁོ་ན་ཉིད་རྟོགས་པ་རྣམས་ཀྱི་ཡུལ་དེ་ནི་དོན་དམ་པའི་བདེན་པ་ཞེས་བསྟན་བཅོས་རིགས་པས་རྣམ་པར་གཞག་གོ །གང་གསུངས་པ། ཡང་དག་དང་ནི་བརྫུན་པའི་དངོས་མཐོང་བ། །འཐོབ་པས་དངོས་ཀུན་ངོ་བོ་གཉིས་འཛིན་ལ། །ཡང་དག་གཟིགས་ཡུལ་གང་དེ་དེ་ཉིད་དེ། །བརྫུན་པ་མཐོང་བ་ཀུན་རྫོབ་བདེན་པར་བརྗོད། །ཅེས་སོ། །དེ་ལྟར་གཉིས་བསྡུས་པ་ལ་གཉིས་སོ་ཞེས་རིགས་སོ། །འདོད་ཅེས་པ་ནི་མངོན་པར་བཞེད་པའོ། །གང་རྣམས་ཤེ་ན། སྒྲིབ་པ་སྤངས་
པའི་ཐུགས་དང་ལྡན་པ་སངས་རྒྱས་བཅོམ་ལྡན་འདས་རྣམས་དེའི་རྗེས་སུ་ཞུགས་པའི་འཕགས་པ་ཉན་ཐོས་དང་རང་སངས་རྒྱས་དང་བྱང་ཆུབ་སེམས་དཔའ་རྣམས་སོ། །འདི་ཉིད་བདེན་པ་གཉིས་ཡིན་ཏེ། གཞན་བདེན་པ་ནི་ཡོད་པ་མ་ཡིན་ནོ་ཞེས་དང་གི་སྒྲ་ངེས་པར་གཟུང་བའི་དོན་དུ་ཡང་འཐད་དོ། །དེ་སྐད་དུ། བདེན་པ་གཉིས་ལ་བརྟེན་ནས་ནི། །སངས་རྒྱས་རྣམས་ཀྱི་ཆོས་བསྟན་པ། །འཇིག་རྟེན་ཀུན་རྫོབ་བདེན་པ་དང༌། །དམ་པའི་དོན་གྱི་བདེན་པའོ། །ཞེས་གསུངས་སོ། །ཡབ་སྲས་མཇལ་བ་ལས་ཀྱང༌། འཇིག་རྟེན་མཁས་པའི་བདེན་པ་འདི་གཉིས་ཏེ། །ཁྱེད་ཀྱིས་གཞན་ལས་མ་གསན་རང་གིས་གཟིགས། །དེ་ནི་ཀུན་རྫོབ་བདེན་དང་དོན་དམ་སྟེ། །བདེན་པ་གསུམ་པ་གང་ཡང་མ་མཆིས་སོ། །ཞེས་གསུངས་སོ། །བཅོམ་ལྡན་འདས་ཀྱིས་འཕགས་པ་བདེན་པ་བཞི་པོ་སྡུག་བསྔལ་དང་ཀུན་འབྱུང་བ་དང་འགོག་པ་དང་ལམ་གྱི་མཚན་ཉིད་ཆོས་མངོན་པ་ལས་གསུངས་པ་མ་ཡིན་ནམ། དེ་ཇི་ལྟར་ན་བདེན་པ་གཉིས་ཁོ་ན་ཡིན་ཞེ་ན། བདེན་ཏེ་འོན་ཀྱང་གདུལ་བྱའི་བསམ་པ་དང་བག་ལ་ཉལ་གྱི་དབང་གིས་གཉིས་པོ་ཉིད་བཞིར་བྱས་ནས་བསྟན་པ་ཡིན་ཏེ། འདི་རྣམས་གཉིས་པོ་ཉིད་དུ་འདུས་པའི་ཕྱིར་རོ། །འདི་ལྟར་ཡང་སྡུག་བསྔལ་དང་ཀུན་འབྱུང་བ་དང་ལམ་རྣམས་ནི་ཀུན་རྫོབ་ཀྱི་བདེན་པའི་རང་བཞིན་གྱིས་ཀུན་རྫོབ་ཀྱི་བདེན་པར་འདུས་ལ། འགོག་པའི་བདེན་པ་ནི་དོན་དམ་པའི་བདེན་པ་ཡིན་ཏེ། ཅུང་ཟད་ཀྱང་འགལ་བ་མེད་དོ། །དེ་ལྟར་གྱུར་ན་ཡང་ཀུན་རྫོབ་ནི་མ་རིག་པས་ཉེ་བར་བསྟན་པས་ཡང་དག་པ་མ་ཡིན་པའི་སྒྲོ་བཏགས་པའི་རང་བཞིན་ཡིན་པའི་ཕྱིར་རྣམ་པར་དཔྱད་པ་ལས་ལན་བརྒྱ་ཕྲག་ཏུ་ཉམས་པར་གྱུར་ན་ཡང་ཅི་ལྟར་བདེན་པ་ཡིན་ཞེ་ན། དེ་ལ་ཡང་བདེན་མོད་ཀྱི། འོན་ཀྱང་འཇིག་རྟེན་པའི་ཞེན་པ་ལས་ཀུན་རྫོབ་ཀྱི་བདེན་པ་ཞེས་བརྗོད་དེ། འཇིག་རྟེན་པ་ཉིད་ཀུན་རྫོབ་ཀྱི་བདེན་པ་ཞེས་འདོད་ཅིང༌། དེའི་རྗེས་སུ་འབྲངས་ནས་བཅོམ་ལྡན་འདས་ཀྱིས་ཀྱང་དེ་ཁོ་ནའི་དོན་དེ་ཉིད་བཏང་སྙོམས་སུ་གཞག་ནས་ཀུན་རྫོབ་ཀྱི་བདེན་པ་ཞེས་གསུངས་ཏེ། དེ་ཉིད་ཀྱི་ཕྱིར། འཇིག་རྟེན་ཀུན་རྫོབ་བདེན་པ་དང༌། །ཞེས་བསྟན་བཅོས་སུ་ཁྱད་པར་དང་བཅས་པས་སློབ་དཔོན་གྱི་ཞལ་སྔ་ནས་ཀྱིས་གསུངས་སོ། །
དངོས་པོ་ལ་ནི་དོན་དམ་པའི་བདེན་པ་གཅིག་པུ་ཁོ་ན་ཡིན་ཏེ། དེ་བས་ན་ཅུང་ཟད་ཀྱང་ཉམས་པ་མེད་དོ། །ཇི་སྐད་དུ་བཅོམ་ལྡན་འདས་ཀྱིས། དགེ་སློང་དག་འདི་ནི་གཅིག་པུ་སྟེ་དོན་དམ་པའི་བདེན་པའོ། །འདི་ལྟ་སྟེ་མི་བསླུ་བ་མྱ་ངན་ལས་འདས་པའི་ཆོས་ཡིན་ལ། འདུས་བྱས་ཐམས་ཅད་ནི་བརྫུན་པ་བསླུ་བའི་ཆོས་སོ་ཞེས་གསུངས་སོ། །འདི་ནི་བདེན་པ་གཉིས་སུ་བརྗོད་པ་ཡིན་ནོ། །དེ་ལ་མ་རིག་པས་བསླང་བའི་སེམས་དེའི་རང་བཞིན་གྱིས་ཀུན་རྫོབ་ཀྱི་བདེན་པ་ཡིན་ནོ་ཞེས་རྟོགས་ལ། དོན་དམ་པའི་བདེན་པ་ནི་ཇི་ལྟ་བུ་དང་མཚན་ཉིད་གང་ཡིན་པ་དང་རང་བཞིན་གང་ཡིན་པ་མ་ཤེས་པས་དེའི་ཚེ་མཚན་ཉིད་བརྗོད་པར་བྱ་སྟེ། འདི་ལྟར། དོན་དམ་བློ་ཡི་སྤྱོད་ཡུལ་མིན། །ཞེས་གསུངས་སོ། །བློ་ནི་ཤེས་པ་ཐམས་ཅད་ཡིན་ཏེ། ཤེས་པ་ཐམས་ཅད་ཀྱི་ཡུལ་ལས་འདས་པའི་ཕྱིར་སྤྱོད་ཡུལ་མ་ཡིན་པ་སྟེ་ཡུལ་མ་ཡིན་པའོ། །བློ་དེ་ཐམས་ཅད་ཀྱི་རྣམ་པ་གང་གིས་ཀྱང་ཡུལ་དུ་བྱ་བར་མི་ནུས་པ་ཡིན་ནོ་ཞེས་པའི་ཐ་ཚིག་སྟེ། ཇི་ལྟར་དེའི་རང་བཞིན་དེ་ལྟར་བསྟན་པར་ནུས། འདི་ལྟར་ཡང་སྤྲོས་པ་ཐམས་ཅད་ལས་རྣམ་པར་གྲོལ་བའི་རང་བཞིན་དེ་བཞིན་ཉིད་དོན་དམ་པའི་བདེན་པའི་དེ་ཁོ་ན་ཉིད་ཡིན་པ་དེའི་ཕྱིར་ཇི་ལྟར་ཡང་རྣམ་པར་རྟོག་པས་མཐོང་བ་མ་ཡིན་ཏེ། ཁྱད་པར་ཐམས་ཅད་དང་བྲལ་བའི་ཕྱིར་རོ། །བརྟགས་པ་ལས་འདས་པའི་རང་བཞིན་ཡང་སྒྲ་རྣམས་ཀྱི་སྤྱོད་ཡུལ་མ་ཡིན་ཏེ། སྒྲ་ནི་རྣམ་པར་རྟོག་པས་བསྐྱེད་པ་ཡིན་ལ་ཡུལ་མ་ཡིན་པ་ལ་རྣམ་པར་རྟོག་པའི་བློ་འཇུག་པ་མ་ཡིན་ནོ། །དེ་ལྟ་བས་ན་རྣམ་པར་རྟོག་པའི་བརྗོད་པ་ཐམས་ཅད་དང་བྲལ་བས་སྒྲོ་མ་བཏགས་པ་ཀུན་རྫོབ་མ་ཡིན་པ་བརྗོད་དུ་མེད་པ་ནི་དོན་དམ་པ་དེ་ཁོ་ན་ཉིད་ཇི་ལྟར་ན་འདི་ལྟར་བསྟན་པར་ནུས། དེ་ལྟ་ན་ཡང་སྣོད་དང་ལྡན་པའི་ཉན་པ་པོ་རྣམས་ཇི་ལྟར་ཡང་རྗེས་སུ་གཟུང་བའི་དོན་དུ་ཡོངས་སུ་བརྟག་པ་བཟུང་ནས་ཀུན་རྫོབ་ཀྱི་བདེན་པ་དཔེ་ཉེ་བར་བསྟན་པས་ཅུང་ཟད་བརྗོད་པ་ཡིན་ཏེ། དཔེར་ན་རབ་རིབ་ཅན་ལ་རབ་རིབ་ཀྱི་མཐུས་ནམ་མཁའི་ཕྱོགས་ཐམས་ཅད་དུ་སྐྲ་ཤད་ཀྱིས་ཁྱབ་པར་མཐོང་ནས་དེ་དང་དེར་གདོང་སྒྱུར་བར་བྱེད་དེ། དེ་ལྟར་བྱེད་པ་དེ་རབ་རིབ་མེད་པས་རིག་ནས་འདི་ཅི་བྱེད་ཅེས་དེའི་གནད་དུ་སོང་ནས་དེ་མ་མཐོང་བའི་སྒྲའི་ཡུལ་དུ་མིག་ཕྱེ་ནས་
བལྟས་ཀྱང་སྐྲའི་གཟུགས་ནི་མཐོང་བར་མ་གྱུར་ལ། སྐྲ་ཤད་དེ་གཞིར་གྱུར་པའི་དངོས་པོ་དང་དངོས་པོ་མེད་པའི་ཁྱད་པར་རྣམས་ཡོངས་སུ་རྟོགས་པ་མ་ཡིན་ནོ། །གང་གི་ཚེ་ཡང་རབ་རིབ་ཅན་གྱིས་རབ་རིབ་མེད་པ་ལ་འདི་ནི་སྐྲ་ཡོད་དོ་ཞེས་རང་གི་བསམ་པས་སྟོན་པར་བྱེད་པ་དེའི་ཚེ་དེའི་རྣམ་པར་རྟོག་པ་སྤང་བའི་དོན་དུ་དེ་ལ་འདི་ན་སྐྲ་ཤད་ཅུང་ཟད་ཀྱང་ཡོད་པ་མ་ཡིན་ནོ་ཞེས་ཡང་དག་པ་ཇི་ལྟ་བ་བཞིན་དུ་འདི་སྟོན་པར་བྱེད་དེ། །རབ་རིབ་ཅན་གྱིས་མཐོང་བའི་ངོར་དགག་པ་ལྷུར་བྱེད་པ་ཉིད་ཀྱི་ཚིག་འདི་སྨྲས་པ་ཡིན་ཏེ། དེ་རྣམས་ཀྱིས་དེ་སྐད་སྨྲས་པ་ན་ཡང་དགག་པའམ་བསྒྲུབ་པར་བྱས་པ་ནི་ཡོད་པ་མ་ཡིན་ནོ། །སྐྲ་ཤད་ཀྱི་དེ་ཁོ་ན་ཉིད་དེ་ཡང་རབ་རིབ་ཅན་གྱིས་མཐོང་བ་གང་ཡིན་པ་དེ་རབ་རིབ་མེད་པས་མཐོང་བ་ནི་མ་ཡིན་ནོ། །དེ་བཞིན་དུ་མ་རིག་པའི་རབ་རིབ་ཀྱིས་ཉམས་པ་དང་ལྡན་པས་དེ་ཁོ་ན་ཉིད་མ་མཐོང་བའི་བྱིས་པས་གང་ཕུང་པོ་དང་ཁམས་དང་སྐྱེ་མཆེད་ཀྱི་རང་བཞིན་འདི་དམིགས་པ་མ་ཡིན་ཏེ། དེ་རྣམས་ཀྱི་ཀུན་རྫོབ་ཀྱི་ངོ་བོ་ཕུང་པོ་ལ་སོགས་པ་དེ་རྣམས་རང་བཞིན་གང་གིས་རབ་རིབ་མེད་པས་མཐོང་བའི་ཚུལ་གྱིས་མ་རིག་པའི་བག་ཆགས་མཐའ་དག་སྤངས་པའི་སངས་རྒྱས་བཅོམ་ལྡན་འདས་ཀྱིས་འཇིགས་པ་དེ་ནི་དེ་རྣམས་ཀྱི་དོན་དམ་པའི་བདེན་པ་ཡིན་ནོ། །ཇི་སྐད་དུ། བསྟན་བཅོས་མཁྱེན་པས། གང་ཞིག་རབ་རིབ་སྣང་བས་རྣམ་བརྟགས་པ། །སྐྲ་སོགས་ངོ་བོ་དེ་ཉིད་ཕྱིན་ཅི་ལོག །མཐོང་དག་གང་གིས་ཡང་དག་མཐོང་དེ་ནི། །དེ་ཉིད་ཡིན་ཏེ་དེ་བཞིན་འདིར་ཤེས་བྱ། །ཞེས་གསུངས་པ་ཡིན་ནོ། །དེ་ལྟར་དོན་དམ་པ་བརྗོད་པར་བྱ་བ་མ་ཡིན་ཡང༌། དོན་དམ་པའི་དེ་ཁོ་ན་ཉིད་གཟིགས་པའི་སྒོ་ནས་ཉེ་བར་བརྟགས་པ་བཟུང་སྟེ། ཀུན་རྫོབ་ཇི་ལྟར་ཡང་བསྟན་པ་ཡིན་ལ། ཀུན་རྫོབ་ཀྱི་ཐ་སྙད་མ་ལུས་པ་སྤངས་པ་དེས་དངོས་པོའི་རང་བཞིན་སྨྲ་བར་ནུས་པ་ནི་མ་ཡིན་ཏེ། ཇི་སྐད་དུ། ཡི་གེ་མེད་པའི་ཆོས་རྣམས་ལ། །ཉན་པ་པོ་གང་སྟོན་པ་གང༌། །དོན་གང་ཉན་ཅིང་སྟོན་བྱེད་པ། །སྒྲོ་བཏགས་པས་ན་ཡི་གེ་མེད། །ཅེས་གསུངས་སོ། །དེ་ལྟ་བས་ན་ཐ་སྙད་པའི་བདེན་པ་ཉིད་ལ་བརྟེན་ནས་དོན་དམ་པ་སྟོན་པ་ཡིན་ཏེ། དོན་དམ་པ་བསྟན་པ་རྟོགས་པས་ཀྱང་དོན་དམ་
པ་མངོན་དུ་བྱེད་པ་ཡིན་ཏེ། དེ་ཉིད་དེའི་ཐབས་ཡིན་པའི་ཕྱིར་རོ། །གང་བསྟན་བཅོས་ལས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་མེད་པར། །མྱ་ངན་འདས་པ་འཐོབ་མ་ཡིན། །ཞེས་གསུངས་སོ། །དེ་ལྟར་དོན་དམ་པ་བསྟན་པ་ནི་ཐབས་ཡིན་ལ། དོན་དམ་པ་རྟོགས་པ་ཡང་ཐབས་ལས་བྱུང་བ་ཡིན་ཏེ། གཞན་དུ་ན་དེ་བསྟན་པར་མི་ནུས་པའི་ཕྱིར་རོ། །ཅི་སྟེ་ཡང་དེ་ལྟ་བུར་གྱུར་པ་ཡང་དེ་ལྟ་བུར་གྱུར་པའི་བློའི་ཡུལ་ཡིན་ཏེ། དོན་དམ་པར་ཅིའི་ཕྱིར་མི་འགྱུར་ཞེ་ན། འདི་ལ། བློ་ནི་ཀུན་རྫོབ་ཡིན་པར་བརྗོད། །ཅེས་གསུངས་པ་ཡིན་ཏེ། བློ་ལ་སྣང་བ་དང་མི་སྣང་བ་ཉིད་ཀྱི་ཐམས་ཅད་བརྟགས་པའི་རང་བཞིན་ཡིན་ཏེ། རྟོག་པ་ཡང་ཐམས་ཅད་དུ་མ་རིག་པའི་རང་བཞིན་ཡིན་ཏེ། དངོས་པོ་མེད་པ་འཛིན་པའི་ཕྱིར་རོ། །གང་རྣམ་པར་རྟོག་པ་འདི་རང་ཉིད་ཀྱིས་མ་རིག་པའི་ངོ་བོར་གྱུར་ཞེས་གསུངས་སོ། །མ་རིག་པ་ཡང་ཀུན་རྫོབ་ཡིན་ཏེ། དེའི་ཕྱིར་བརྒྱ་ལ་ཡང་བློ་ནི་དོན་དམ་པའི་རང་བཞིན་འཛིན་པར་དོན་དམ་པར་འཐད་པ་ནི་མ་ཡིན་ནོ། །གཞན་དུ་ན་ཀུན་རྫོབ་བློའི་གཟུང་བར་བྱ་བ་ཡིན་པས་དོན་དམ་པའི་རང་བཞིན་ཉིད་དེ་ཉམས་པར་འགྱུར་ཏེ། དངོས་པོ་ལ་དོན་དམ་པ་ནི་ཀུན་རྫོབ་ཀྱི་ཤེས་པའི་ཡུལ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་འཕགས་པ་བདེན་པ་གཉིས་ལ་འཇུག་པ་དེར་ཡང༌། ལྷའི་བུ་གལ་ཏེ་དོན་དམ་པའི་བདེན་པ་ལུས་དང་ངག་དང་ཡིད་ཀྱི་སྤྱོད་ཡུལ་དུ་གྱུར་ན་དེ་དོན་དམ་པའི་གྲངས་སུ་མི་འགྲོ་ཞིང་ཀུན་རྫོབ་ཀྱི་བདེན་པ་ཉིད་དུ་འགྱུར་རོ། །ལྷའི་བུ་འོན་ཀྱང་དོན་དམ་པའི་བདེན་པ་ནི་ཐ་སྙད་ཐམས་ཅད་ལས་འདས་པ་དང༌། ཡང་དག་པར་མ་སྐྱེས་པ་དང༌། མ་འགགས་པ་དང༌། བརྗོད་པར་བྱ་བ་དང༌། རྗོད་པར་བྱེད་པ་དང༌། ཤེས་བྱ་དང༌། ཤེས་པ་དང་བྲལ་བ་ཡིན་ཏེ། ཇི་སྲིད་དུ་རྣམ་པ་ཐམས་ཅད་ཀྱི་མཆོག་དང་ལྡན་པའི་ཐམས་ཅད་མཁྱེན་པའི་ཡེ་ཤེས་ཀྱི་ཡུལ་ལས་འདས་པ་ནི་དོན་དམ་པའི་བདེན་པ་ཡིན་ནོ་ཞེས་རྒྱས་པར་གསུངས་སོ། །དེ་ཉིད་ཀྱི་ཕྱིར་རྣམ་པར་རྟོག་པ་རྣམས་ཀྱི་ཡུལ་མ་ཡིན་ཏེ། གང་དངོས་པོ་དང་དངོས་པོ་མེད་པ་ཡིན་པ། རང་དང་གཞན་གྱི་དངོས་པོ་དང༌། བདེན་པ་དང་བདེན་པ་མ་ཡིན་པ་དང༌། རྟག་པ་དང༌། ཆད་པ་དང༌། རྟག་པ་དང༌། མི་རྟག་པ་དང༌། བདེ་བ་དང༌། སྡུག་བསྔལ་བ་དང༌། གཙང་བ་དང༌། མི་གཙང་བ་དང༌། བདག་དང༌།
བདག་མེད་པ་དང༌། སྟོང་པ་དང༌། སྟོང་པ་མ་ཡིན་པ་དང༌། གཅིག་དང་དུ་མ་དང༌། སྐྱེ་བ་དང༌། འགག་པ་ལ་སོགས་པའི་ཁྱད་པར་རྣམས་དེ་ཁོ་ན་ཉིད་དུ་སྲིད་པ་མ་ཡིན་ཏེ། འདི་རྣམས་ཀུན་རྫོབ་ཀྱི་ཆོས་ཡིན་པའི་ཕྱིར་རོ། །འདི་ཡང་བཅོམ་ལྡན་འདས་ཀྱིས་ཡབ་དང་སྲས་མཇལ་བའི་མདོ་ལས་ཇི་སྐད་དུ། འདི་ལྟར་དེ་བཞིན་གཤེགས་པས་ཀུན་རྫོབ་དང༌། དོན་དམ་པ་གཉིས་ཐུགས་སུ་ཆུད་དེ། ཤེས་པར་བྱ་བ་ཡང་ཀུན་རྫོབ་དང༌། དོན་དམ་པ་འདིར་ཟད་དོ། །དེ་ཡང་བཅོམ་ལྡན་འདས་ཀྱིས་སྟོང་པ་ཉིད་དུ་རབ་ཏུ་གཟིགས། རབ་ཏུ་མཁྱེན། ལེགས་པར་མངོན་དུ་མཛད་པས་དེའི་ཕྱིར་ཐམས་ཅད་མཁྱེན་པ་ཞེས་བྱའོ། །དེ་ལ་ཀུན་རྫོབ་ནི་འཇིག་རྟེན་གྱི་སྤྱོད་པར་དེ་བཞིན་གཤེགས་པས་གཟིགས་སོ། །དོན་དམ་པ་གང་ཡིན་པ་དེ་ནི་བརྗོད་དུ་མེད་པ་སྟེ། ཤེས་པར་བྱ་བ་མ་ཡིན་པ། རྣམ་པར་ཤེས་པར་བྱ་བ་མ་ཡིན་པ། ཡོངས་སུ་ཤེས་པར་བྱ་བ་མ་ཡིན་པ། མ་བསྟན་པ། རབ་ཏུ་མ་བསྟན་པ་ནས་བྱ་བ་མེད་པའི་བར་དང༌། བྱེད་པ་མེད་པ་ནས་ཇི་སྲིད་དུ་ཐོབ་པ་མ་ཡིན་པ། མ་ཐོབ་པ་མ་ཡིན་པ། བདེ་བ་མ་ཡིན་པ། སྡུག་བསྔལ་བ་མ་ཡིན་པ། སྙན་པ་མ་ཡིན་པ། མི་སྙན་པ་མ་ཡིན་པ། གཟུགས་མ་ཡིན་པ། གཟུགས་མེད་པ་མ་ཡིན་པ་ཞེས་པ་ལ་སོགས་སོ། །དེ་ལྟར་ན་ཀུན་རྫོབ་ཀྱི་ཁྱད་པར་མཐའ་དག་ནུབ་པ་ཁྱད་པར་མ་ལུས་པ་དང་བྲལ་བ་ལ་དངོས་པོ་མཐའ་ཡས་ཤིང་ཡངས་པ་ཁྱབ་པའི་ཡེ་ཤེས་ཀྱི་སྣང་བ་ལ་གསལ་བའི་ནང་གི་བདག་ཅན་བཅོམ་ལྡན་འདས་ཀྱིས་དོན་དམ་པའི་བདེན་པའོ་ཞེས་གསུངས་སོ། །འདི་འཕགས་པ་རྣམས་ཉིད་ཀྱིས་རང་རིག་པའི་རང་བཞིན་ཡིན་པས་སོ་སོ་རང་གིས་རིག་པ་ཡིན་ཏེ། དེའི་ཕྱིར་དེ་ཉིད་འདི་ལ་ཚད་མ་ཡིན་ནོ། །ཀུན་རྫོབ་ཀྱི་བདེན་པ་ནི་འཇིག་རྟེན་པའི་ཐ་སྙད་ལ་བརྟེན་ནས་བསྟན་པ་ཡིན་ནོ། །དེ་འདི་ལྟར་རྣམ་པར་དབྱེ་བ་ཇི་ལྟ་བར་བདེན་པ་གཉིས་ཤེས་པས་ཕྱིན་ཅི་མ་ལོག་པར་ཆོས་རྣམ་པར་འབྱེད་པ་སྐྱེ་བར་འགྱུར་རོ། །དེ་ལྟར་ཀུན་རྫོབ་དང་དོན་དམ་པའི་དབྱེ་བས་བདེན་པ་གཉིས་སུ་རྣམ་པར་གཞག་ནས། དེ་ལ་དབང་བའི་འཇིག་རྟེན་ཡང་རྣམ་པ་གཉིས་ཉིད་དོ་ཞེས་བསྟན་པའི་ཕྱིར། དེ་ལ་འཇིག་རྟེན་ཞེས་པ་ལ་སོགས་པ་གསུངས་ཏེ། དེ་ལ་ནི་དེ་དག་ལ་སྟེ། ཀུན་རྫོབ་དང་དོན་དམ་པའི་བདེན་པ་ལ་དབང་བར་གནས་
པའི་བདེན་པ་གཉིས་རྟོགས་པར་བྱེད་པ་པོ་ཞེས་བྱ་བའི་ཐ་ཚིག་གོ །འཇིག་རྟེན་ནི་སྐྱེ་བོ་ཡིན་ལ་གཉིས་ནི་རྣམ་པ་གཉིས་ཡིན་ཏེ། ཀུན་རྫོབ་དང་དོན་དམ་པའི་བདེན་པ་རྟོགས་པ་དག་གོ །འཇིག་རྟེན་ཞེས་པ་ནི་སྤྱིའི་ཚིག་ཡིན་པ་དེས་ན་ཕུང་པོ་གཉིས་ཡིན་ནོ་ཞེས་པའི་དོན་ཏོ། །མཐོང་བ་ནི་ལུང་དང་རིགས་པས་རྟོགས་པའོ། །ཇི་ལྟར་ན་རྣམ་པ་གཉིས་སུ་བྱས་ཤེ་ན། རྣལ་འབྱོར་པ་དང་ཕལ་པའོ་ཞེས་པ་སྟེ། རྣལ་འབྱོར་ནི་ཏིང་ངེ་འཛིན་ཡིན་ལ། ཆོས་ཐམས་ཅད་མ་དམིགས་པའི་མཚན་ཉིད་ཡིན་ཏེ། དེ་གང་ལ་ཡོད་པ་དེ་ནི་རྣལ་འབྱོར་བ་ཡིན་ལ། འཇིག་རྟེན་ཞེས་ཕུང་པོ་རྣམས་གཅིག་ཏུ་བྱས་སོ། །དེ་བཞིན་དུ་ཕལ་པ་ནི་འཁོར་བར་འཇུག་པའི་རྒྱུ་མ་རིག་པ་དང་སྲིད་པ་ཡིན་ལ། དེ་ལས་བྱུང་བ་ནི་ཕལ་པ་ཡིན་ཏེ། ཕལ་པ་ཉིད་ཕལ་པ་ཡིན་ལ་འཇིག་རྟེན་ནི་གཉིས་པའོ། །དེ་ལ་རྣལ་འབྱོར་པ་ཉིད་ནི་གཙོ་བོ་ཡིན་ཏེ་ཕྱིན་ཅི་མ་ལོག་པར་མཐོང་བ་ཡིན་ནོ། །ཕལ་པས་དངོས་པོ་ཕྱིན་ཅི་ལོག་ཏུ་མཐོང་བ་ཡིན་ཏེ་འཁྲུལ་པའི་ཕྱིར་རོ། །དེ་ལྟར་ན་ཡང་གཉི་གས་རང་གི་དེ་ཁོ་ན་ཉིད་ཅི་ལྟ་བ་མཐོང་བས་གང་ཞིག་མ་འཁྲུལ་པ་ཅན་ཡིན་ཞེ་ན། གང་ཉིད་ལ་གཞན་གྱིས་གནོད་པའོ། །ཡང་འདི་དག་ལས་གང་གིས་གནོད་པ་ཡིན་ཞེ་ན། དེ་ལ་ཞེས་པ་ལ་སོགས་པ་གསུངས་ཏེ། དེ་ལ་ཞེས་པ་ནི་བདུན་པའི་མཐའ་ཅན་སྤྱིར་བཏང་བའི་ཚིག་དང་དམིགས་ཀྱིས་དགའ་བ་ལ་བདུན་པའོ། །དེ་ལ་རྣལ་འབྱོར་པ་དང་འཇིག་རྟེན་ཕལ་པ་དེ་དག་གི་ནང་ནས་འཇིག་རྟེན་ཕལ་པ་ནི་ཕལ་པའི་རིགས་ཀྱི་སྤྱི་ལས་དམིགས་ཀྱིས་བསལ་བ་ཡིན་ཏེ། དམིགས་ཀྱིས་བསལ་ནས་ཀྱང་གནོད་ཅེས་པ་ནི་གནོད་པར་བརྗོད་དོ། །གང་ལས་ལྟོས་ནས་ཤེ་ན། རྣལ་འབྱོར་འཇིག་རྟེན་ཞེས་བྱ་བ་ལ་སོགས་པ་གསུངས་ཏེ། རྣལ་འབྱོར་པ་ཉིད་འཇིག་རྟེན་ཡིན་ཏེ་རྣལ་འབྱོར་པའི་འཇིག་རྟེན་པའོ། །དེས་གནོད་པ་ནི་ཕྱིན་ཅི་ལོག་གི་བློར་རྣམ་གཞག་བྱེད་པའོ། །ཇི་ལྟར་ཞེ་ན། བློ་ཁྱད་ཀྱིས་ཞེས་པ་སྦྱར་བར་བྱ་སྟེ། རྣལ་འབྱོར་བ་ལ་ནི་འཇིག་རྟེན་པས་གནོད་པ་མ་ཡིན་ནོ། །འདིར་བསམ་པ་ནི་འདི་ཡིན་ཏེ། ཇི་ལྟར་འཁྲུལ་པས་བསྐྱེད་པའི་དངོས་པོར་རབ་རིབ་ཀྱིས་ཉམས་པར་བྱས་པའི་མིག་ཅན་གྱི་མི་བདེན་པའི་སྐྲ་ཤད་མཐོང་བའི་ཤེས་པ་ལ་ནི་དངོས་པོ་ཇི་ལྟར་གནས་པའི་དེ་ཁོ་ན་ཉིད་འཛིན་པ་རབ་རིབ་མེད་
པ་ཅན་གྱི་ཤེས་པས་གནོད་དོ། །དེ་བཞིན་དུ་རབ་རིབ་མེད་པ་ཅན་གྱི་ཤེས་པ་ལ་ནི་རབ་རིབ་ཅན་གྱི་ཤེས་པས་མི་གནོད་དེ། དེ་བཞིན་དུ་མ་རིག་པའི་དྲི་མིའི་རབ་རིབ་ཀྱིས་བློའི་མིག་སྐྱོན་ཅན་དུ་བྱས་པས་དངོས་པོའི་རང་བཞིན་ཕྱིན་ཅི་ལོག་ཏུ་འཛིན་པ་ནི་ཕལ་པའི་ཤེས་པ་ཡིན་ལ། ཤེས་རབ་ཀྱི་ཆུས་བཀྲུས་པའི་མཚན་ཉིད་ཅན་དྲི་མ་དང་བྲལ་བ་ཟག་པ་མེད་པའི་མིག་དག་གིས་དངོས་པོ་གཉུག་མའི་དེ་ཁོ་ན་ཉིད་རིག་པའི་རྣལ་འབྱོར་བས་འཇིག་རྟེན་པའི་ཤེས་པ་ལ་གནོད་ལ། སླར་ཙིག་ཤོས་ཀྱིས་ནི་རྣལ་འབྱོར་བའི་ཤེས་པ་ལ་གནོད་པ་མ་ཡིན་ནོ། །ཇི་ལྟར་མཐོང་བའི་རབ་རིབ་མིག་ཅན་གྱིས། །རབ་རིབ་མེད་པའི་ཡེ་ཤེས་ལ་གནོད་མིན། །དེ་བཞིན་ཤེས་པ་དྲི་མའི་དབང་གྱུར་པས། །དྲི་མེད་བློ་ལ་གནོད་པ་ཡོད་མ་ཡིན། །ཞེས་གསུངས་ཏེ། དེ་བས་ན་ཕལ་པའི་ཤེས་པ་འཁྲུལ་པ་ཉིད་ལ་གནོད་དོ། །འོན་ཏེ་ཅི་ཕལ་པ་ཉིད་ལ་རྣལ་འབྱོར་པ་རྣམས་ཀྱིས་གནོད་དམ། འོན་ཏེ་རྣལ་འབྱོར་བ་ལ་གནོད་ཅེ་ན། གོང་མ་ཞེས་པ་ལ་སོགས་པ་གསུངས་ཏེ། རྣལ་འབྱོར་པ་ལ་ཡང་རྣལ་འབྱོར་པ་གཞན་དང་གཞན་གྱིས་གནོད་དེ། ཕལ་བ་འབའ་ཞིག་ལ་ནི་མ་ཡིན་ནོ་ཞེས་བྱ་བ་ནི་ཡང་གི་སྒྲའི་དོན་ཏོ། །ཇི་ལྟ་བུར་གྱུར་བ་ཞེ་ན། གོང་མ་གོང་མའི་ཞེས་ཏེ། གོང་མ་ལས་ཀྱང་གོང་མ་དེ་རྣམས་ཀྱིས་སོ། །ཡོན་ཏན་གྱི་ཁྱད་པར་ཞེས་གོང་ནས་གོང་དུ་གནས་པའི་དབྱེ་བས་ཁྱད་པར་ཐོབ་པ་སྟེ་ལྷག་ཅིང་ལྷག་པས་ཞེས་པའི་དོན་ཏེ། དེ་ལ་ལྟོས་ནས་ཡོན་ཏན་ཆུང་བར་གྱུར་པ་འོག་མའི་གནོད་པར་བྱེད་པ་ཡིན་ལ། ཡེ་ཤེས་ཀྱི་ཆེ་བའི་བདག་ཉིད་ལ་སོགས་པ་རྣམས་ཀྱིས་ཟིལ་གྱིས་གནོན་ཏོ། །ཇི་ལྟར་ཞེ་ན། བློ་ཁྱད་ཀྱིས་ཏེ། བློ་ནི་ཡེ་ཤེས་ཡིན་ཏེ་ཤེས་རབ་ཀྱི་ཁྱད་པར་དེས་སྒྲིབ་པ་དེ་དང་བྲལ་བས་མཆོག་ཏུ་གྱུར་པ་ཡིན་ལ་འདི་ཡང་མཚོན་པ་ཙམ་སྟེ་བསམ་གཏན་དང་ཏིང་ངེ་འཛིན་དང་སྙོམས་པར་འཇུག་པ་ལ་སོགས་པའི་ཁྱད་པར་རྣམས་ཀྱིས་ཀྱང་ཡིན་ནོ། །འདི་ལྟར་ཡང་ས་དང་པོ་རབ་ཏུ་དགའ་བར་གྲགས་པ་ཐོབ་པའི་བྱང་ཆུབ་སེམས་དཔའི་ཤེས་རབ་ལ་སོགས་པའི་ཡོན་ཏན་ལ་ལྟོས་ན་དེའི་གོང་མ་དྲི་མ་མེད་པར་བརྗོད་པའི་ས་གཉིས་པ་ཐོབ་པའི་བྱང་ཆུབ་སེམས་དཔའི་ཡེ་ཤེས་ཀྱི་སྟོབས་ལ་སོགས་པ་རྣམས་ཀྱི་ཡོན་ཏན་ཁྱད་པར་དུ་འཕགས་སོ། །དེ་བཞིན་དུ་ས་གོང་མ་གོང་མ་གཞུན་
འཐོབ་པ་རྣམས་ལ་ཡང་རིག་པར་བྱའོ། །དེ་བཞིན་དུ་བསམ་གཏན་དང་པོ་ལ་སོགས་པ་ཐོབ་པ་རྣམས་ལ་ཡང་གོང་མ་གོང་མས་གནོད་པར་སྦྱར་བར་བྱ་སྟེ། ཟག་པ་དང་བཅས་པ་རྣམས་ལ་ཟག་པ་མེད་པ་རྣམས་ཀྱིས་ཞེས་པའི་བར་དུའོ། །དེ་ལྟར་བདེན་ན་ཡང་རྣལ་འབྱོར་བའི་བློའི་ཁྱད་པར་ལས་ཕལ་པའི་ཤེས་པ་འཁྲུལ་བ་ཡིན་ནོ་ཞེས་ཇི་ལྟར་རྟོགས་པར་ནུས་ཤེ་ན། གཉི་ག་ཡང་ནི་འདོད་པའི་དཔེས། །ཞེས་གསུངས་ཏེ། རྣལ་འབྱོར་བ་དང་ཕལ་པ་གཉི་ག་འདོད་ཅིང་མངོན་པར་འདོད་པའི་དཔེ་སྟེ་ཉེ་བར་སྦྱར་བ་དེས་སོ། །གང་འདིར་མདོ་རྣམས་སུ་བཅོམ་ལྡན་འདས་ཀྱིས་སྒྱུ་མ་དང་སྨིག་རྒྱུ་དང་དྲི་ཟའི་གྲོང་ཁྱེར་དང༌། གཟུགས་བརྙན་ལ་སོགས་པའི་དཔེ་གསུངས་པ་ཡིན་ཏེ། དེ་ཡང་གཉི་ག་ལ་རང་བཞིན་མེད་པར་གྲུབ་པ་ཡིན་ལ། དེ་དང་ཆོས་མཐུན་པས་ཆོས་ཐམས་ཅད་རང་བཞིན་མེད་པ་ཉིད་དུ་སྟོན་པའི་ཕྱིར་རོ། །འདི་ལྟར་རེ་ཞིག་སྐྱེ་བོ་ཐམས་ཅད་ཀྱིས་རྟོགས་པའི་གཟུགས་ལ་སོགས་པ་རྣམས་རྣལ་འབྱོར་བ་དེ་དག་ཉིད་ཀྱིས་རང་བཞིན་མེད་པ་ཉིད་དུ་རྟོགས་པ་ཡིན་ཏེ། དོན་དམ་པའི་བདེན་པ་རྟོགས་པའི་ཕྱིར་རོ། །ཡང་གང་དག་གིས་འདི་རྣམས་སྒྱུ་མ་ལ་སོགས་པར་དམིགས་པ་དེ་རྣམས་ཕལ་བ་རྣམས་ལ་ཡང་འགྲུབ་སྟེ། དེའི་ཕྱིར་གཉི་ག་ལ་ཡང་ལོག་པར་རྟོགས་པ་མེད་པའི་ཕྱིར་དཔེའི་ཆོས་རྣམས་ཉམས་པ་མེད་དོ། །ཡང་དཔྱོད་པ་ལ་སོགས་པ་གང་རྣམས་ཡུལ་དང་དུས་གཞན་གྱི་བདག་ཉིད་དངོས་པོ་ཉིད་དེ་དེ་བཞིན་དུ་སྣང་བ་ཡིན་ནོ་ཞེས་འདོད་དེ། དེ་རྣམས་ཀྱང་གཞན་དུ་སུན་ཕྱུང་བའི་ཕྱིར་དེའི་འདོད་པ་འདིར་འགེགས་པ་མ་ཡིན་ནོ། །རང་གི་སྡེ་པ་གང་དག་ཀྱང་སེམས་ཀྱི་དངོས་པོ་ཡོད་པ་ཉིད་རྨི་ལམ་ལ་སོགས་པ་རྣམས་ལ་དེ་ལྟར་སྣང་བར་འདོད་དེ། དེ་རྣམས་ཀྱང་སྐབས་ཇི་ལྟ་བར་འོག་ནས་རང་རིག་པ་འགེགས་པར་སུན་འབྱིན་པར་འགྱུར་རོ། །རིགས་པས་གྲུབ་པ་ཡང་གཉི་ག་ལ་གྲུབ་པ་ཡིན་ནོ། །དེའི་ཕྱིར་དཔེ་དེས་ཕྱིན་ཅི་ལོག་གི་དངོས་པོའི་རང་བཞིན་འཛིན་པ་ཐ་མ་ལ་པའི་ཤེས་པ་འཁྲུལ་པ་ཞེས་རྣམ་པར་འཇོག་གོ །དེ་བཞིན་དུ་རྣལ་འབྱོར་བའི་ཤེས་པ་ལ་ཡང་ཇི་ལྟར་རིགས་པར་ཤེས་པར་བྱའོ། །གལ་ཏེ་དངོས་པོ་ཐམས་ཅད་རང་བཞིན་མེད་པ་ཞེས་པ་དངོས་པོའི་དེ་ཁོ་ན་ཉིད་ཡིན་ན། འོ་ན་སེམས་ཅན་ཐམས་ཅད་གདོན་པའི་བསམ་
བས་སྦྱིན་པ་ལ་སོགས་པའི་ཚོགས་ཡོངས་སུ་རྫོགས་པའི་དོན་དུ་དེ་ཁོ་ན་ཉིད་རྟོགས་པའི་བྱང་ཆུབ་སེམས་དཔའ་ཡང་ཇི་ལྟར་འཇུག་པར་འགྱུར་ཏེ། དེ་རྣམས་ཀྱང་རང་བཞིན་མེད་པ་ཡིན་པའི་ཕྱིར་རོ་ཞེ་ན། དེའི་ཕྱིར། དགོས་པའི་དོན་དུ་མ་དཔྱད་ཕྱིར། །ཞེས་པ་ལ་སོགས་པ་གསུངས་ཏེ། དགོས་པ་ནི་བསྒྲུབ་བྱ་དང་བླང་བྱ་དང་འབྲས་བུར་བརྗོད་ལ་དེའི་དོན་ནི་དེའི་རྒྱུ་མཚན་དུའོ། །མ་དཔྱད་པ་ནི་མ་བརྟགས་པར་དེའི་རྒྱུ་ལ་འཇུག་པའི་ཕྱིར་ཏེ། དེ་ལྟར་གྱུར་ན་ཡང་དེ་ལ་འདི་ནི་རྟེན་ཅིང་འབྲེལ་པར་འབྱུང་བའི་ངེས་པ་ཡོད་པའི་ཕྱིར་རྒྱུ་དང་འབྲས་བུ་ལ་འགལ་བ་མེད་དོ། །འདི་སྐད་དུ། གལ་ཏེ་ཡང་སྒྱུ་མ་ལ་སོགས་པ་རང་བཞིན་མེད་པས་སྦྱིན་པ་ལ་སོགས་པ་རྣམས་རང་བཞིན་མེད་པ་དེ་ལྟ་ན་ཡང་འཁོར་གསུམ་ཡོངས་སུ་དག་པས་གུས་པ་ལ་སོགས་པའི་སྦྱོར་བ་ཡོངས་སུ་གོམས་པ་ན། དོན་དམ་པ་རྟོགས་པའི་ཆེད་དུ་དེ་ལྟ་བུར་གྱུར་པ་ཡང་རྒྱུའི་དངོས་པོ་ཉིད་དུ་འགྱུར་ཏེ། །དེ་རྣམས་ཀྱི་ཐབས་ཡིན་པའི་ཕྱིར་དང༌། རྟེན་ཅིང་འབྲེལ་བར་འབྱུང་བ་ཡང་བསམ་གྱིས་མི་ཁྱབ་པ་ཡིན་པའི་ཕྱིར་རོ། །འདི་ལྟ་བུ་ནི་འབྲས་བུར་རྟོགས་ཏེ་དེ་དེའི་ཐབས་ལས་བྱུང་བ་ཡིན་པའི་ཕྱིར་རོ་ཞེས་བརྗོད་པར་བྱའོ། །དེ་སྐད་དུ། ཐབས་སུ་གྱུར་བ་ཐ་སྙད་བདེན་པ་དང༌། །ཐབས་ལས་བྱུང་བའི་དོན་དམ་བདེན་པ་དག །ཅེས་གསུངས་སོ། །འདི་ནི་ངེས་པར་དེ་ལྟར་ཡིན་ཏེ། གཞན་དུ་ན་དྲི་མ་དང་བཅས་པའི་གནས་སྐབས་ན་ལམ་ལ་སོགས་པ་མེད་ན་དྲི་མ་དང་བཅས་པའི་གནས་སྐབས་ལས་དྲི་མ་མེད་པ་ལ་གནས་པ་དང༌། རྟོག་པ་དང་བཅས་པའི་གནས་སྐབས་ལས་རྟོག་པ་མེད་པར་ཇི་ལྟར་སྐྱེ་བར་འགྱུར་ཏེ། དེ་དོན་དམ་པར་དེའི་རང་བཞིན་ཡིན་པའི་ཕྱིར་རོ། །འདི་ནི་གཞན་དུ་ཡང་མཚུངས་པ་ཡིན་ཏེ། ཆོས་ཐམས་ཅད་དོན་དམ་པར་རང་བཞིན་མེད་པའི་ཕྱིར་རོ། །རྒྱུ་ཉིད་དང་དེའི་རང་བཞིན་ཐམས་ཅད་ལ་འབྲས་བུར་འདོད་དོ། །དེའི་ཕྱིར་ཀུན་རྫོབ་རང་བཞིན་མེད་པ་ལས་ཀྱང་རང་བཞིན་མེད་པའི་རྟོགས་པ་ཉིད་འབྲས་བུ་ཡིན་ནོ། ཇི་ལྟར་འདུས་བྱས་པའི་ལམ་ལས་གཞན་འདུས་མ་བྱས་པའི་མྱ་ངན་ལས་འདས་པ་ཐོབ་པར་འགྱུར་ཏེ། དེ་ལྟར་ན་སྦྱིན་པ་ལ་སོགས་པ་དངོས་པོ་ལ་རང་བཞིན་མེད་པ་ཡིན་ན་ཡང་དོན་དམ་པའི་དེ་ཁོ་ན་ཉིད་རྟོགས་པའི་ཆེད་དུ་
སེམས་ཅན་རྣམས་ལ་བྱང་ཆུབ་སེམས་དཔའ་རྣམས་ཀྱི་ཐུགས་རྗེས་འཛིན་པར་མཛད་དེ། གཞན་དུ་ན་དོན་དམ་པ་རྟོག་པ་དང་བྲལ་བའི་ཕྱིར་རོ། །དེས་ན་སྦྱིན་པ་ལ་སོགས་པ་ལ་འཇུག་པ་མ་བཀག་པ་ཉིད་དེ། དེ་བས་ན་འདོད་པ་དང་མི་འདོད་པའི་འབྲས་བུ་ཐོབ་པ་དང་སྤོང་བར་འདོད་པས་དགེ་བ་དང་མི་དགེ་བ་དག་ལ་འཇུག་པ་དང་ལྡོག་པར་བྱ་སྟེ། འདི་ཡང་ཕྱི་ནས་གསལ་བར་བྱེད་བར་འགྱུར་རོ། །དེ་ལྟར་གྱུར་ན་སྒྱུ་མ་ལ་སོགས་པ་དང་མཚུངས་པའི་དངོས་པོའི་རང་གི་ངོ་བོའི་རང་བཞིན་རྣལ་འབྱོར་པ་རྟོགས་པ་དེ་ཉིད་སྐྱེ་བོ་ཕལ་པས་རྟོགས་ན་ཇི་ལྟར་གོང་དུ་ལོག་པར་རྟོགས་པ་ཡོད་པར་འགྱུར་ཞེ་ན། འཇིག་རྟེན་ཞེས་པ་ལ་སོགས་པ་གསུངས་ཏེ། འཇིག་རྟེན་པ་ནི་སྐྱེ་བོ་ཕལ་པ་སྟེ་རྒྱུ་དང༌། རྐྱེན་ལ་བརྟེན་ནས་དངོས་པོ་རྣམས་རང་བཞིན་ཐོབ་བོ་ཞེས་སོ། །དེ་ལྟར་ན་དངོས་པོའི་སྒྲས་ནི་ཡོད་པའི་རང་བཞིན་གྱིས་དངོས་པོ་མེད་པ་བརྗོད་པ་ཉིད་དུ་རྟོགས་སོ། །མཐོང་བ་འབའ་ཞིག་ནི་མ་ཡིན་གྱི་ཡང་དག་པ་ཉིད་དུ་རྟོག་པར་བྱེད་པའང་ཡིན་ཏེ། ཇི་ལྟར་རང་བཞིན་རྟོགས་པ་ཉིད་དོན་དམ་པར་ཞེན་པར་བྱེད་དོ་ཞེས་པའི་དོན་ཏོ། །གང་འདི་ནི་བདག་གི་རྟོགས་པའི་སྤྱོད་ཡུལ་དུ་གྱུར་པའི་ངོ་བོ་ཡིན་ཏེ། དེ་དངོས་པོ་ཉིད་ཡིན་ནོ་ཞེས་ཞེན་པའི་ཕྱིར་ལ་སྒྱུ་མ་བཞིན་དུ་ནི་མ་ཡིན་ཏེ། ཡང་ཇི་ལྟར་རྣལ་འབྱོར་པས་སྒྱུ་མ་བཞིན་དུ་སྟེ། སྒྱུ་མ་ལྟ་བུར་དོན་དམ་པའི་རང་བཞིན་མཐོང་བ་དེ་བཞིན་དུ་རྟོགས་པ་མ་ཡིན་ནོ། །དེའི་ཕྱིར་འདིར་ཞེས་ཏེ་འདི་ལ་སྤྱོད་པ་སྟེ་ལོག་པར་རྟོགས་པ་ཡིན་ལ། རྣལ་འབྱོར་བ་དང་འཇིག་རྟེན་པ་སྤྱོད་དེ་རྣལ་འབྱོར་པ་དང་འཇིག་རྟེན་པ་ལྷན་ཅིག་ཏུའོ་ཞེས་པའི་དོན་ཏོ། །དེས་རྟོགས་པའི་དངོས་པོའི་དེ་ཁོ་ན་ཉིད་ལ་འཇིག་རྟེན་པས་མ་རྟོགས་པས་ཡང་འཇིག་རྟེན་དང་ལྷན་ཅིག་ཏུ་དེ་རབ་ཏུ་རྟོགས་པ་ལ་རྣལ་འབྱོར་པས་ཇི་ལྟ་བའི་དོན་འགེགས་པའི་ཕྱིར་རོ། །བསམ་པ་ནི་འདི་ཡིན་ཏེ། དངོས་པོ་ཐམས་ཅད་ལ་ཀུན་རྫོབ་དང་དོན་དམ་པའི་བདེན་པ་ངོ་བོ་ཉིད་ཡོད་པ་ཡིན་ཏེ། དེ་ལ་གང་ཀུན་རྫོབ་ཀྱི་བདེན་པ་དེ་ཉིད་ནི་འཇིག་རྟེན་པས་རྟོགས་པ་ཡིན་ལ་གང་དོན་དམ་པའི་བདེན་པ་དེ་ནི་རྣལ་འབྱོར་པས་རྟོགས་སོ་ཞེས་བརྗོད་དོ། དཔེར་ན་སྒྱུ་མ་མཁན་གྱིས་སྤྲུལ་བའི་གླང་པོ་ཆེ་ལ་སོགས་པའི་གཟུགས་ཉིད་སྔགས་ལ་སོགས་པའི་མཐུས་བསླད་པའི་མིག་ཅན་གྱི་སྐྱེ་བོ་རྣམས་ཀྱིས་
མཐོང་སྟེ། སྒྱུ་མ་མཁན་གྱིས་ནི་དེའི་རང་བཞིན་ལ་སོགས་པ་གཉུག་མའི་གཟུགས་མཐོང་ངོ༌། །དེ་བཞིན་དུ་རྣལ་འབྱོར་པ་དང་འཇིག་རྟེན་པས་ཀྱང་ཡིན་ཏེ་ཇི་ལྟར་རིགས་པར་རྟོགས་པར་བྱའོ། །དེ་ལྟར་གྱུར་ན་ཡང་གང་སྐྱེ་བོ་མ་ལུས་པ་ལ་ཐུན་མོང་དུ་མངོན་སུམ་གྱི་ཚད་མས་མཐོང་བའི་དངོས་པོའི་རང་བཞིན་དེ་དོན་བྱེད་ནུས་པ་ཡིན་ལ། དེ་ལ་ཇི་ལྟར་བསྙོན་པར་ནུས་ཞེས་གཞན་གྱི་སེམས་ཀྱི་དོགས་པ་བསུ་ནས། གཟུགས་སོགས་མངོན་སུམ་ཞེས་པ་ལ་སོགས་པ་གསུངས་ཏེ། གཟུགས་ལ་སོགས་པ་གང་ཞིག་མངོན་སུམ་དུ་བྱས་ན་ཡང་ངོ༌། །སོགས་པའི་སྒྲས་ནི་སྒྲ་ལ་སོགས་པ་དང་ཚོར་བ་ལ་སོགས་པ་གཟུང་ངོ༌། །དེ་ཡང་ཡོངས་སུ་གྲགས་པ་ཡིན་ཏེ། འཇིག་རྟེན་པའི་ཡོངས་སུ་གྲགས་པ་ཡིན་ལ་ཚད་མས་མིན་ཏེ། ཚད་མས་རྟོགས་པ་མངོན་སུམ་གྱི་གཟུགས་ལ་སོགས་པ་ཡོད་པ་མ་ཡིན་ནོ་ཞེས་པ་དང་འབྲེལ་ཏེ། མངོན་སུམ་ལ་སོགས་པ་ཐ་སྙད་པའི་ཚད་མ་ཉིད་ཡིན་པའི་ཕྱིར་རོ། །དེས་རྟོགས་པའི་གཟུགས་ལ་སོགས་པ་ཡང་ཀུན་རྫོབ་ཉིད་ཡིན་ཏེ། འཇིག་རྟེན་པའི་ཚད་མས་ཡང་དག་པར་རྟོགས་པར་བྱ་བ་དེ་ཁོ་ན་ཉིད་ཀྱི་རང་བཞིན་ནི་མ་ཡིན་ཏེ། སྐྱེ་བོ་ཐམས་ཅད་ཀྱིས་དེ་ཁོ་ན་ཉིད་རྟོགས་པར་ཐལ་བའི་ཕྱིར་རོ། །གང་གསུངས་པ། གང་ཞིག །དབང་པོས་གང་ཞིག་དམིགས་པ་དེ། །གལ་ཏེ་དེ་ཉིད་ཡིན་གྱུར་ན། །བྱིས་ལ་དེ་ཉིད་རྟོགས་སྐྱེ་བས། །དེ་ཚེ་དེ་ཉིད་ཤེས་ཅི་དགོས། །ཞེས་སོ། །དེ་ལྟ་བས་ན་མངོན་སུམ་ཡིན་ཡང་ཚད་མས་རྟོགས་པ་མ་ཡིན་ནོ། །གཟུགས་ལ་སོགས་པའི་དེ་ཁོ་ན་ཉིད་མངོན་སུམ་ཡིན་ན་ཡང་གལ་ཏེ་ཚད་མས་མ་རྟོགས་ན་དེ་ཇི་ལྟར་རབ་ཏུ་གྲགས་པར་འགྱུར། རབ་ཏུ་གྲགས་པ་ན་ཡང་ཇི་ལྟར་བརྫུན་པ་ཡིན་ཞེ་ན། མི་གཙང་ཞེས་པ་ལ་སོགས་པ་གསུངས་ཏེ། ཇི་ལྟར་ཡང་དོན་དམ་པར་བུད་མེད་ཀྱི་ལུས་ལ་སོགས་པ་མི་གཙང་བ་ལ་ཕྱི་ཅི་ལོག་ཏུ་ཞེན་པའི་སེམས་ཀྱིས་དེ་ལ་གཙང་བའི་བློ་སྐྱེ་བར་འགྱུར་རོ། །སོགས་པའི་སྒྲས་མི་རྟག་པ་ལ་སོགས་པ་ལ་རྟག་པ་ལ་སོགས་པའི་བློ་སྐྱེ་བ་གཟུང་ངོ༌། །དེ་ཡང་དེ་མ་ཡིན་པ་དེར་འཛིན་པས་བརྫུན་པ་ཡིན་ཏེ། ཕྱིན་ཅི་ལོག་ཏུ་འཛིན་པ་ཡིན་ནོ་ཞེས་པའི་དོན་ཏོ། །དེ་བཞིན་དུ་གཟུགས་ལ་སོགས་
པ་རྣམས་ལ་ཡང་ཁྱད་པར་མེད་དོ། །གལ་ཏེ་མངོན་སུམ་གྱི་ཚད་མས་དེ་མ་གྲུབ་ན་འོན་ཀྱང་ལུང་ལས་གྲུབ་པར་འགྱུར་ཏེ། འདི་ལྟར་ཕུང་པོ་དང་ཁམས་དང་སྐྱེ་མཆེད་ལ་སོགས་པའི་རང་བཞིན་གྱིས་ཡོད་པར་བཅོམ་ལྡན་འདས་ཀྱིས་མདོ་སྡེ་ལས་བསྟན་པ་དང༌། སྐད་ཅིག་མ་ལ་སོགས་པའི་རང་བཞིན་ཡང་བསྟན་ཏོ། །དེར་གསུངས་པ་ནི་འདི་ཡིན་ནོ། །བྲམ་ཟེ་ཐམས་ཅད་ཐམས་ཅད་ཅེས་བྱ་བ་ནི་ཕུང་པོ་ལྔ་རྣམས་དང་སྐྱེ་མཆེད་བཅུ་གཉིས་པོ་རྣམས་དང་ཁམས་བཅྭ་བརྒྱད་དོ་ཞེས་པའི་བར་དུ་བཅོམ་ལྡན་འདས་ཀྱིས་གསུངས་པ་དང༌། འདི་ལྟར་ཡང༌། འདུས་བྱས་ཐམས་ཅད་སྐད་ཅིག་མ། །མི་གནས་བྱ་བ་ག་ལ་ཡོད། །འདི་དག་བྱུང་བ་དེ་ཉིད་ནི། །བྱ་བ་དེ་ཉིད་བྱེད་པར་བརྗོད། །ཅེས་སོ། །སྒྱུ་མ་ལ་སོགས་པའི་རང་བཞིན་རྣམས་ལ་སྐད་ཅིག་མ་དང་སྐད་ཅིག་མ་ཡིན་པ་ལ་སོགས་པའི་ཆོས་བསྟན་པར་རིགས་པ་མ་ཡིན་ཏེ། རང་བཞིན་མེད་པ་རྣམས་ལ་རང་བཞིན་ཅུང་ཟད་ཀྱང་ཡོད་པ་མ་ཡིན་པའི་ཕྱིར་དེ་ཇི་ལྟར་འདི་རྣམས་དོན་དམ་པར་ཡོད་པ་མ་ཡིན་ཞེ་ན། འཇིག་རྟེན་གཞུག་པའི་དོན་དུ་ཡང༌། །ཞེས་པ་ལ་སོགས་པ་གསུངས་ཏེ། འཇིག་རྟེན་ནི་དངོས་པོ་ལ་མངོན་པར་ཞེན་པ་ཕུང་པོ་ལ་སོགས་པ་བསྟན་པས་གདུལ་བར་བྱ་བའི་སེམས་ཅན་རྣམས་ཡིན་ཏེ། རེ་ཞིག་སྟོང་པ་ཉིད་བསྟན་པ་ལ་མི་དབང་བར་གྱུར་པ་རྣམས་ཡིན་ནོ། །སྟོང་པ་ཉིད་ལ་གཞུག་པའི་དོན་དུ་རིམ་པ་བཞིན་དུ་འཇམ་པོས་གཞུག་པའི་ཆེད་དུ་ཡིན་ནོ། །ཡང་ནི་གཏན་ཚིགས་ཡིན་ཏེ། གང་གི་ཕྱིར་ཕུང་པོ་དང་ཁམས་ལ་སོགས་པའི་མཚན་ཉིད་ཅན་གྱི་ཆོས་རྣམས་དངོས་པོ་ལ་རང་བཞིན་མེད་པ་ཡིན་པའི་ཕྱིར་རོ། །མགོན་པོས་ནི་དམྱལ་བ་ལ་སོགས་པའི་སྡུག་བསྔལ་ལས་སེམས་ཅན་རྣམས་ཡོངས་སུ་སྐྱོབ་པས་མངོན་པར་མཐོ་བ་དང་ངེས་པར་ལེགས་པའི་བདེ་བ་ཐོབ་པར་འདོད་པ་ལ་སོགས་པའི་བསམ་པ་མཁྱེན་པའི་སངས་རྒྱས་བཅོམ་ལྡན་འདས་ཀྱིས་བསྟན་པ་ཡིན་ཏེ། གསལ་བར་མཛད་པ་ཡིན་གྱི་དོན་དམ་པར་ནི་མ་ཡིན་པ་དེ་ལྟ་བས་ན་མདོ་འགལ་བ་ནི་མ་ཡིན་ནོ། །དེ་སྐད་དུ། རྒྱལ་བས་བདག་དང་བདག་གི་ཞེས། །དགོས་པའི་དབང་གིས་གསུངས་པ་ལྟར། །དེ་བཞིན་ཕུང་པོ་སྐྱེ་མཆེད་ཁམས། །དགོས་པའི་དབང་གིས་གསུངས་པ་ཡིན། །ཞེས་གསུངས་སོ། །གལ་ཏེ་
དོན་དམ་པར་གསུངས་པ་མ་ཡིན་ན་འོ་ན་དེ་རྣམས་ཇི་ལྟར་སྐད་ཅིག་མ་ཡིན་ཞེ་ན། དེ་ཉིད་དུ། དེ་དག་སྐད་ཅིག་མ་ཉིད་མིན། །ཞེས་གསུངས་ཏེ། དེ་ཁོ་ན་ཉིད་དུ་སྟེ་དོན་དམ་པར་ཡིན་ལ། རང་བཞིན་མེད་པའི་ཕྱིར་སྐད་ཅིག་མ་ཡང་མ་ཡིན་ནོ། །དེ་དག་ནི་དངོས་པོ་འདི་རྣམས་ཏེ། སྐད་ཅིག་མ་ལ་སོགས་པས་བསྟན་པའི་གདུལ་བྱ་རྣམས་ལ་དེའི་རང་བཞིན་བསྟན་པའི་ཕྱིར་རོ། །གལ་ཏེ་དེ་ཁོ་ན་ཉིད་དུ་སྐད་ཅིག་མ་མ་ཡིན་ན། འོན་ཡང་ཇི་ལྟར་བསྟན་ཞེས་ཡིད་ལ་བཞག་ནས། ཀུན་རྫོབ་ཅེས་སྨོས་ཏེ། གལ་ཏེ་ཀུན་རྫོབ་ཏུ་སྐད་ཅིག་མར་བསྟན་ཏོ་ཞེས་བརྗོད་ན་ཞེས་ལན་གྱི་དོགས་པ་བྱས་ན་དེའི་ཚེ་འགལ་བར་འགྱུར་ཞེས་ཏེ། ཀུན་རྫོབ་ཏུ་སྐད་ཅིག་མ་ཡིན་ཞིང་དོན་དམ་པར་མ་ཡིན་ནོ་ཞེས་འགལ་བར་འགྱུར་ཏེ་འབྲེལ་པར་མི་འགྱུར་ལ། སྐད་ཅིག་མ་མ་ཡིན་པར་རྟོགས་པ་དང་འགལ་ལོ། །ཐ་སྙད་པ་རྣམས་ཀྱིས་སྐད་ཅིག་མ་མ་ཡིན་པའི་དེ་ཁོ་ན་ཉིད་དུ་རྟོགས་པ་དང༌། ཀུན་རྫོབ་ཀྱི་རང་བཞིན་ཞེས་པ་ནི་འགལ་ལོ་ཞེས་པའི་དོན་ཏོ། །འདི་གྲུབ་པའི་མཐའ་གསུང་བས་སྤོང་བ་ནི། རྣལ་འབྱོར་ཀུན་རྫོབ་ཉེས་མེད་དེ། །ཞེས་པ་ལ། འདི་ལ་རྟོགས་པ་དང་འགལ་བའི་ཉེས་པ་མེད་དོ། །ཅིའི་ཕྱིར་ཞེ་ན། གང་ཟག་ལ་བདག་མེད་པའི་ཏིང་ངེ་འཛིན་ཐོབ་པའི་རྣལ་འབྱོར་པ་རྣམས་ཀྱི་ཀུན་རྫོབ་ཀྱི་ཐ་སྙད་ཡིན་ཏེ། དེས་སྐད་ཅིག་མ་ཉིད་དུ་རྟོགས་སོ། །བསམ་པ་ནི་འདི་ཡིན་ཏེ། ཚུ་རོལ་མཐོང་བ་རྣམས་ཀྱིས་གལ་ཏེ་སྐད་ཅིག་མ་ཉིད་མ་རྟོགས་མོད་ཀྱི་དེ་ལྟ་ན་ཡང་རྣལ་འབྱོར་པའི་ཐ་སྙད་ཀྱི་ཡུལ་ཡིན་ལ། རྣལ་འབྱོར་པའི་ཐ་སྙད་དུ་ཡང་ཀུན་རྫོབ་ཀྱི་རང་བཞིན་སྤོང་བ་མ་ཡིན་ཏེ། བློ་ནི་ཀུན་རྫོབ་ཡིན་པར་བརྗོད། །ཅེས་པའི་ཚིག་ལས་སོ། །རྟོགས་པ་དང་འགལ་བ་ཡང་གནོད་པ་མ་ཡིན་པ་ཉིད་དེ། དེ་ལྟ་བུའི་རྟོགས་པ་ནི་ཚད་མ་མ་ཡིན་པ་ཉིད་ཀྱི་ཕྱིར་རོ། །ཅིའི་ཕྱིར་ཀུན་རྫོབ་ཏུ་ཡང་སྐད་ཅིག་མ་ཉིད་ལ་སོགས་པ་རྣལ་འབྱོར་པ་ཉིད་ཀྱིས་མཐོང་གི་ཚུ་རོལ་མཐོང་བ་རྣམས་ཀྱིས་མ་མཐོང་ཞེན་གསུངས་པ། འཇིག་རྟེན་ལས་ཏེ་ཚུ་རོལ་མཐོང་བའི་བདག་ཉིད་ལས་སོ། །དེ་རྣམས་ནི་རྣལ་འབྱོར་པ་དེ་ཁོ་ན་ཉིད་མཐོང་བ་ཡིན་ཏེ། དབང་པོ་ལས་འདས་པ་མཐོང་བ་ཡིན་ལ། འདི་ནི་གཏན་ཚིགས་ཀྱི་ཚིག་ཡིན་ནོ། །གང་གི་ཕྱིར་དེ་རྣམས་ཀྱིས་དེ་ཁོ་
ན་ཉིད་མཐོང་བ་དེའི་ཕྱིར་སྐད་ཅིག་མའི་བདག་ཉིད་ལ་སོགས་པ་འཇིག་རྟེན་པ་རྣམས་ཀྱིས་མ་རྟོགས་ཀྱང་འདིས་རྟོགས་པ་ཡིན་ནོ། །དེ་ཉིད་ཀྱི་ཕྱིར་དེ་རྣམས་ལ་འཇིག་རྟེན་གྱི་རྟོགས་པས་གནོད་པ་ཡོད་པ་མ་ཡིན་ནོ། །ངེས་པར་འདི་ཁས་བླང་བར་བྱའོ་ཞེས་གཞན་དུ་ཞེས་པ་ལ་སོགས་པ་གསུངས་ཏེ། གཞན་དུ་ན་གལ་ཏེ་འདི་ལྟ་བུ་ཁས་མི་ལེན་ན་དེའི་ཚེ་ཁྱེད་ཀྱིས་ཁས་བླངས་པ་ལ་འཇིག་རྟེན་གྱིས་གནོད་པར་འགྱུར་རོ། །གང་དུ་ཞེ་ན། བུད་མེད་མི་གཙང་བར་ངེས་པར་རྟོག་པ་ན་སྟེ་མི་གཙང་བར་བསྒོམ་པའི་དུས་ན་འདོད་པར་བྱ་བའི་བུད་མེད་འདི་མི་གཙང་ངོ་ཞེས་ངེས་པར་རྟོག་སྟེ། བསྒོམ་པའི་དུས་ན་འཇིག་རྟེན་གྱིས་གནོད་འགྱུར་ཏེ། འཇིག་རྟེན་གྱི་གྲགས་པས་གནོད་པར་འགྱུར་ལ། འཇིག་རྟེན་པས་བུད་མེད་ཀྱི་ལུས་གཙང་བ་ཉིད་དུ་ཞེན་པའི་ཕྱིར་རོ། །དེ་ལྟ་བས་ན་འཇིག་རྟེན་པའི་རྟོགས་པས་རྣལ་འབྱོར་པའི་མཐོང་བ་ལ་སོགས་པ་ལ་གནོད་པ་མ་ཡིན་ནོ། །འདི་ཉིད་དུ། འདི་ལྟར་རབ་རིབ་ཀྱིས་མཐོང་བ། །ཞེས་པ་ལ་སོགས་པ་ལྷག་པའི་གཏན་ཚིགས་འདིར་སྦྱར་བར་བྱའོ། །ལུང་གིས་ཀྱང་དངོས་པོ་རྣམས་ཀྱི་དེ་ཁོ་ན་ཉིད་གྲུབ་པ་མ་ཡིན་ནོ། །དེ་ལྟ་བས་ན་ཆོས་ཐམས་ཅད་ནི་སྒྱུ་མ་དང་རྨི་ལམ་ལ་སོགས་པའི་རང་བཞིན་ཡིན་ནོ་ཞེས་འདི་ངེས་པ་ཡིན་ནོ། །དེ་ལྟར་ན་ཡང་གལ་ཏེ་སྒྱུ་མའི་རང་བཞིན་གྱིས་ཐམས་ཅད་ལ་ཁྱབ་པ་ཡིན་ནོ། །འོ་ན་ནི་སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུར་འགྱུར་རོ། །འདི་ནི་བཅོམ་ལྡན་འདས་མར་གསུངས་ཏེ། དེ་སྐད་ཅེས་སྨྲས་པ་དང༌། ཚེ་དང་ལྡན་པ་རབ་འབྱོར་གྱིས་ལྷའི་བུ་དེ་དག་ལ་འདི་སྐད་ཅེས་སྨྲས་སོ། །ལྷའི་བུ་དག་སེམས་ཅན་དེ་དག་ནི་སྒྱུ་མ་ལྟ་བུ། སེམས་ཅན་དེ་དག་ནི་རྨི་ལམ་ལྟ་བུ་སྟེ། ལྷའི་བུ་དག་དེ་ལྟར་སྒྱུ་མ་དང༌། སེམས་ཅན་དེ་དག་ནི་གཉིས་སུ་མེད་དེ་གཉིས་སུ་བྱར་མེད་དོ། །ལྷའི་བུ་དག་ཆོས་ཐམས་ཅད་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། །རྒྱུན་དུ་ཞུགས་པ་ཡང་སྒྱུ་མ་ལྟ་བུ་རྨི་ལམ་ལྟ་བུའོ། །རྒྱུན་དུ་ཞུགས་པའི་འབྲས་བུ་ཡང་སྒྱུ་མ་ལྟ་བུ་རྨི་ལམ་ལྟ་བུའོ། །དེ་བཞིན་དུ་ལན་ཅིག་ཕྱིར་འོང་བ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པ་དང༌། དགྲ་བཅོམ་པ་ཉིད་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། །
རང་སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། །རང་སངས་རྒྱས་ཉིད་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། །ཡང་དག་པར་རྫོགས་པའི་སངས་རྒྱས་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ། །ཡང་དག་པར་རྫོགས་པའི་སངས་རྒྱས་ཉིད་ཀྱང་སྒྱུ་མ་ལྟ་བུ་རྨི་ལམ་ལྟ་བུའོ་ཞེས་པ་ནས་ཇི་སྲིད་དུ་མྱ་ངན་ལས་འདས་པ་ཡང་སྒྱུ་མ་ལྟ་བུ་རྨི་ལམ་ལྟ་བུའོ། །མྱ་ངན་ལས་འདས་པ་ལས་ཁྱད་པར་དུ་འཕགས་པའི་ཆོས་གཞན་ཞིག་ཡོད་ཀྱང་དེ་ཡང་སྒྱུ་མ་ལྟ་བུ་རྨི་ལམ་ལྟ་བུའོ་ཞེས་སྨྲའོ་ཞེས་ཏེ་དེ་ལྟར་ན་དེ་ལ་ཕན་པ་དང་གནོད་པ་དག་ལས་ཇི་ལྟར་བསོད་ནམས་དང་སྡིག་པ་སྐྱེ་བར་འགྱུར་རོ་ཞེས་སེམས་ཤིང་དོགས་ནས། སྒྱུ་འདྲའི་ཞེས་པ་ལ་སོགས་པས་གསུངས་ཏེ། གལ་ཏེ་བཅོམ་ལྡན་འདས་ཀྱང་སྒྱུ་མ་ལྟ་བུའི་རང་བཞིན་ཡིན་ན་དེའི་ཚེ་སྒྱུ་མ་ལྟ་བུར་རང་བཞིན་མེད་པའི་རྒྱལ་བ་སྟེ་བཅོམ་ལྡན་འདས་ལ་བསོད་ནམས་ཏེ། མཆོད་པ་དང་བསྙེན་བཀུར་དང་ཞབས་ལ་ཕྱག་འཚལ་བ་ལ་སོགས་པ་རྣམས་ཀྱིས་ལེགས་པར་སྤྱད་པ་ཇི་ལྟར་ཏེ། གང་དང་འདྲ་བར་འགྱུར་ཞེས་སེམས་ཏེ། འདི་ཡང་མཆོད་པ་ཙམ་ཡིན་ལ། དེ་ལ་གནོད་པ་བྱས་པ་ལས་སྡིག་པར་ཡང་ཇི་ལྟ་བུར་འགྱུར་ཞེས་བལྟ་བར་བྱ་སྟེ། སྒྱུ་མ་མཁན་གྱིས་སྤྲུལ་པའི་སྐྱེས་བུ་ལ་བཀུར་སྟི་བྱས་པ་དང༌། གནོད་པ་བྱེད་པ་དག་ལས་བསོད་ནམས་དང་སྡིག་པ་སྐྱེ་བར་རིགས་པ་མ་ཡིན་ནོ་ཞེས་པ་ནི་གཞན་གྱི་བསམ་པ་ཡིན་ནོ། །འདིར་སྔར་བརྗོད་པ་ཉིད་ལན་ཡིན་ལ། དེ་བཞིན་དུ་འདིར་གཞན་ལ་འདི་སྐད་དྲི་བར་བྱ་སྟེ། དངོས་ཡོད་ལ་སྟེ་ཇི་ལྟར་ཏེ་ཇི་ལྟ་བུར་ཞེས་པའོ། །ཡོད་པ་སྟེ་དོན་དམ་པར་ཡོད་པའི་བཅོམ་ལྡན་འདས་ལ་ཡང་ཇི་ལྟར་ཏེ་ཇི་བཞིན་དུ་ཞེས་གཉི་ག་ལ་སྦྱར་བར་བྱའོ། །དགོངས་པ་ནི་འདི་ཡིན་ཏེ། དཔེར་ན་དོན་དམ་པར་ཡོད་པའི་རྒྱལ་བ་འགའ་ཞིག་ལས་དོན་དམ་པའི་བསོད་ནམས་སྐྱེ་བར་འགྱུར་བ་དེ་བཞིན་དུ་གཞན་ལ་ཡང་སྒྱུ་མ་ལྟ་བུ་ལས་སྒྱུ་མ་ལྟ་བུ་ཉིད་ཡིན་ལ། ཁྱེད་དང་ཁོ་བོ་ཅག་ལ་ཁྱད་པར་ཅུང་ཟད་ཀྱང་མེད་དེ། འདི་རྟེན་ཅིང་འབྲེལ་པར་འབྱུང་བ་ཙམ་དུ་གཉི་ག་ལ་ཐུན་མོང་ཡིན་པའི་ཕྱིར་རོ། །དེས་ན་གང་ཁྱེད་ཀྱི་ལན་ཡིན་པ་དེ་ཉིད་བདག་ཅག་གི་ཡང་ཡིན་ཏེ། ཁྱད་པར་ཅུང་ཟད་ཡོད་པ་མ་ཡིན་ནོ། །རིགས་པས་གྲུབ་པ་
དོན་དམ་པར་ཡོད་པའི་དངོས་པོའི་རང་བཞིན་ནི་ཅུང་ཟད་ཀྱང་ཡོད་པ་མ་ཡིན་ནོ་ཞེས་བསྒྲུབས་ཟིན་ཏོ། །སྒྱུ་མ་ལྟ་བུའི་རྒྱལ་བ་ལས་བསོད་ནམས་སྐྱེར་ཆུག་པ་དེ་ལྟ་ན་ཡང་འདི་ལ་ལན་འདི་ཇི་ལྟར་འདེབས་ཞེས། གལ་ཏེ་སེམས་ཅན་ཞེས་པ་ལ་སོགས་པ་སྨོས་སོ། །ཡང་ན་གཞན་དུ་སྦྱར་བར་བྱ་སྟེ། གལ་ཏེ་རྒྱལ་བ་ཡང་སྒྱུ་མ་ལྟ་བུ་ཡིན་ན་དེ་ལྟར་ན་འཁོར་བའི་སེམས་ཅན་རྣམས་ལ་ཇི་ལྟར་བརྗོད་དེ། དེ་རྣམས་ཀྱང་དེ་བཞིན་དུ་བརྗོད་དེ། ལྷའི་བུ་སེམས་ཅན་དེ་རྣམས་ཀྱང་སྒྱུ་མ་ལྟ་བུའི་ཞེས་བྱ་བའི་ཚིག་ལས་སོ། །དེ་ལྟར་ན་ཉེས་པ་ཆེན་པོར་ཐལ་བར་འགྱུར་རོ་ཞེས་པ། གལ་ཏེ་སེམས་ཅན་ཞེས་པ་ལ་སོགས་པ་གསུངས་ཏེ། གལ་ཏེ་སྒྱུ་མ་ལྟ་བུ་སྒྱུ་མའི་རང་བཞིན་དང་འདྲ་བའི་ཆོས་སེམས་ཅན་སྲོག་ཆགས་རྣམས་ཡིན་ན་ཤི་ནས་ཇི་ལྟར་སྐྱེ་ལ་ཇི་ལྟར་ཞེས་པ་ནི་འདྲི་བའམ་མི་བཟོད་པའོ། །ཤི་བ་ནི་རིགས་མཐུན་པས་ལས་ཉམས་པ་ཡིན་ལ། ཇི་ལྟར་སྐྱེ་སྟེ་ཡང་འབྱུང་བར་འགྱུར་ཞེས་འདིར་རྒྱུ་མཚན་བརྗོད་པར་བྱ་བ་འདི་རིགས་པ་མ་ཡིན་ནོ་ཞེས་སོ། །སྒྱུ་མའི་སྐྱེས་བུ་ཞིག་ནས་སྐྱེ་བ་ནི་ཡོད་པ་མ་ཡིན་ཏེ། དེ་ལྟ་བས་ན་དོན་དམ་པར་ཡོད་པའི་དངོས་པོ་ཡིན་ནོ་ཞེས་ཁས་བླང་བར་བྱའོ། །འདི་ཁས་བླང་བར་མི་བྱའོ་ཞེས་པ་ཇི་སྲིད་ཅེས་པ་ལ་སོགས་པ་གསུངས་ཏེ་དུས་ཇི་སྲིད་དུ་རྐྱེན་རྣམས་ཏེ་རྒྱུ་རྣམས་ཡིན་ལ། སྔགས་དང་སྨན་ལ་སོགས་པའི་ཚོགས་པའི་དུས་པ་སྣ་ཚོགས་པར་གྱུར་ཅིང་རྒྱུ་ཡིན་པ་ན་དུས་དེ་སྲིད་དུ་སྒྱུ་མ་ཡང་འཇུག་པ་ཡིན་ཏེ་སྔར་ལྡོག་པ་ནི་མ་ཡིན་ལ། དེ་ལས་ཕྱིས་ཀྱང་འཇུག་པ་མ་ཡིན་ནོ། །དེ་བཞིན་དུ་ཇི་སྲིད་དུ་མ་རིག་པ་དང་ལས་དང་སྲིད་པའི་རང་བཞིན་གྱི་ཚོགས་པ་དེ་སྲིད་དུ་སེམས་ཅན་གྱི་རྒྱུད་ཀྱི་སྒྱུ་མ་ཡང་འབྱུང་བར་འགྱུར་ཏེ། གང་རྐྱེན་རྣམས་གང་ཡིན་པ་ནི་འཇུག་པའི་ཕྱིར་རོ། །གལ་ཏེ་དོན་དམ་པར་སེམས་ཅན་མེད་ན་འཁོར་བ་ཇི་སྲིད་དུ་སེམས་ཅན་གྱི་རྒྱུན་རྣམས་ཇི་ལྟར་འཇུག་པར་འགྱུར་ཏེ། སྒྱུ་མ་བཞིན་དུ་ཡུན་ཐུང་བར་འབྱུང་བ་ནི་མ་ཡིན་ནོ་ཞེ་ན། འདི་ལ་བརྗོད་པ། ཇི་སྲིད་རྐྱེན་རྣམས་ཚོགས་གྱུར་བ། །དེ་སྲིད་སྒྱུ་མ་འབྱུང་བར་འགྱུར། །ཞེས་སོ། །གཞན་ཡང་ཡུན་རིང་དུ་གནས་པས་ཀྱང་ཡང་དག་པ་ཉིད་དུ་རྣམ་པར་གཞག་པའི་རྒྱུ་མ་ཡིན་ནོ་ཞེས། རྒྱུན་རིང་ཙམ་གྱིས་ཞེས་པ་ལ་སོགས་པ་གསུངས་ཏེ། རྒྱུན་རིང་སྟེ་དུས་རིང་པོར་གནས་པའི་
རྒྱུད་འབྱུང་བ་དེ་ཉིད་དེ་ལྟ་བུ་ཙམ་འགའ་ཞིག་དེས་ཇི་ལྟར་ཏེ་རྣམ་པ་གང་གི་སྒོ་ནས་སེམས་ཅན་ཡོད་ཅིང་བདོག་ཅེས་འདྲི་བའོ། །ཡོད་པ་ནི་དོན་དམ་པར་རོ། །འདི་ལྟ་བུའི་ཁྱད་པར་ཡོད་པས་གང་ལ་ཡུན་རིང་པོར་གནས་པའི་རྒྱུ་དང་རྐྱེན་གྱི་ཁྱད་པར་ཡོད་པ་དེ་ཡུན་རིང་པོར་འཇུག་པ་ཡིན་ལ། གང་ལ་དེ་བཞིན་དུ་མེད་པ་དེ་རྗེས་སུ་ལྡོག་པ་ཡིན་ཏེ། དེ་ཙམ་གྱིས་ཡང་དག་པ་དང་ལོག་པ་ནི་མ་ཡིན་ནོ། །དེ་ལྟ་བས་ན་སྒྱུ་མའི་རང་བཞིན་ཡིན་ན་ཡང་སླར་མི་སྐྱེ་བ་ནི་མ་ཡིན་ནོ། །དེ་ལྟ་ན་འོ་ན་སྒྱུ་མའི་སྐྱེས་བུ་བསད་པ་ལ་སོགས་པ་ལ་སྲོག་གཅོད་པ་མེད་པ་དེ་བཞིན་དུ་དེ་ལས་གཞན་པའི་སྐྱེས་བུ་བསད་པ་ལ་སོགས་པ་ལ་ཡང་མི་འགྱུར་ཏེ། རང་བཞིན་ཐ་དད་པ་མ་ཡིན་པའི་ཕྱིར་རོ་ཞེ་ན། སྒྱུ་མའི་སྐྱེས་བུ་ཞེས་པ་ལ་སོགས་པ་གསུངས་ཏེ། སྒྱུ་མའི་སྐྱེས་བུ་བསད་པ་སོགས་ལ་སྟེ་སྲོག་དང་བྲལ་བ་ལ་སོགས་པ་ལའོ། །སོགས་པའི་སྒྲས་ནི་འདི་ལ་མ་བྱིན་པར་བླངས་པ་ལ་སོགས་པ་ཡིན་ལ་རང་བཞིན་མེད་པ་ཉིད་དུ་མཚུངས་ན་ཡང་སེམས་ཏེ་རྣམ་པར་ཤེས་པ་སྒྱུ་མའི་སྐྱེས་བུའི་རྒྱུད་ལ་མེད་པ་སྟེ་མི་སྲིད་པའི་ཕྱིར་སྡིག་མེད་དེ་མི་དགེ་བ་སྐྱེ་བར་མི་འགྱུར་རོ། །དེ་ལ་ཡང་བསད་པའི་བསམ་པས་བརྒྱབ་པ་ལས་མི་དགེ་བར་འགྱུར་བ་ཁོ་ནར་ཏེ། སྲོག་གཅོད་པ་ནི་མ་ཡིན་ནོ། །སྒྱུ་མའི་སྐྱེས་བུ་ལས་གཞན་ལ་ནི་སྲོག་གཅོད་པར་ཇི་ལྟར་འགྱུར་ཞེ་ན། སྒྱུ་མའི་སེམས་ཞེས་པ་ལ་སོགས་པ་གསུངས་ཏེ། སེམས་ཉིད་སྒྱུ་མ་ཡིན་ཏེ་སྒྱུ་མའི་སེམས་ཡིན་ལ་དེ་དང་མཚུངས་ཏེ་ལྡན་པ་ལའོ། །སྒྱུ་མའི་རང་བཞིན་གྱི་སེམས་དང་འབྲེལ་ཞེས་པའི་དོན་ཏོ། །ནིའི་སྒྲས་ནི་སྔར་ལས་ཁྱད་པར་དུ་བྱེད་པའི་དོན་ཏོ། །བསོད་ནམས་དང་སྡིག་པ་ནི་བསོད་ནམས་དང་སྡིག་པ་དག་སྟེ། ཕན་པ་དང་གནད་པ་དག་གི་ཉེས་པར་དཔྱད་པ་དང་ལེགས་པར་དཔྱད་པ་ལས་བྱུང་བ་ནི་ཚོགས་པའི་ཁྱད་པར་ལས་འབྲས་བུའི་ཡིན་ཏེ། དཔེར་ན་ལྕི་བ་དང་གཞན་ལས་སྐྱེས་པའི་མྱུ་གུ་དག་རྣམ་པར་མཚུངས་པ་ཡོད་ཀྱང་རྒྱུའི་ཁྱད་པར་ལས་རང་བཞིན་གྱི་ཁྱད་པར་ཡིན་པ་དེ་བཞིན་རུ་འདི་ལ་ཡང་བརྗོད་པའི་ཉིས་པ་ཡོད་པ་མ་ཡིན་ནོ། །གང་སྒྱུ་མའི་སེམས་དང་ལྡན་པ་ལ་ཞེས་བརྗོད་པ་ན་དེ་ལ་གཞན་གྱི་ཉམས་པར་འགྱུར་རོ་ཞེས་སྔགས་སོ་ཞེས་པ་ལ་སོགས་པ་སྨོས་ཏེ།
སྔགས་ལ་སོགས་པའི་སྒྲས་ནི་སྨན་ལ་སོགས་པའི་ཡིན་ལ་སེམས་བསྐྱེད་པ་ལ་ནུས་པ་མེད་པས་ཏེ། བྱ་བ་མི་བྱེད་པའི་ཕྱིར་སྒྱུ་མ་ལ་སེམས་འབྱུང་བ་མེད་ཅིང་སྒྱུ་མའི་རང་བཞིན་ནི་སེམས་སུ་འགྱུར་བ་མ་ཡིན་ཏེ་དཔེར་ན་གཞན་རྨོངས་པའི་རྒྱུ་མཚན་ཅན་རྣམས་ལ་སྒྱུ་མ་མཁན་གྱིས་རབ་ཏུ་སྦྱར་བའི་སྔགས་ལ་སོགས་པའི་མཐུས་གླང་པོ་ཆེ་ལ་སོགས་པའི་རྣམ་པར་འགྲུབ་ལ་དེ་བཞིན་དུ་སེམས་ཡོད་པ་ནི་མ་ཡིན་ནོ་ཞེས་བྱ་བ་ནི་གཞན་གྱི་བསམ་པ་ཡིན་ནོ། །འདིའི་ལན། སྣ་ཚོགས་རྐྱེན་ཞེས་པ་ལ་སོགས་པ་གསུངས་ཏེ། ཡང་གི་སྒྲས་ནི་ངེས་པར་གཟུང་བའམ་རིམ་པ་གཞན་དུ་སྦྱར་བ་ཡིན་ཏེ། སྒྱུ་མ་དེ་སྣ་ཚོགས་ཉིད་དེ་རྣམ་པ་སྣ་ཚོགས་པ་ཉིད་ཡིན་ལ། ཤིན་ཏུ་ཡང་རྐྱེན་སྣ་ཚོགས་ལས་བྱུང་བ་ཡིན་ཏེ། སྣ་ཚོགས་པའི་རྐྱེན་རྣམ་པ་དུ་མ་ལས་བྱུང་ཞིང་སྐྱེས་པ་གང་ཡིན་པ་དེ་ལ་དེ་སྐད་ཅེས་བྱའོ། །དགོངས་པ་ནི་འདི་ཡིན་ཏེ། གལ་ཏེ་ཡང་སྒྱུ་མ་སྒྱུ་མ་ཞེས་བྱ་བའི་སྒྲ་མཚུངས་པ་དེ་ལྟ་ན་ཡང་དེའི་རྒྱུ་ལ་ཐ་དད་པ་མེད་པ་མ་ཡིན་ཏེ། སྒྱུ་མའི་རང་བཞིན་ཡིན་ན་ཡང་འབྲས་བུ་སྣ་ཚོགས་པའི་རང་བཞིན་ཡིན་པའི་ཕྱིར་རོ། །འབྲས་བུ་གཅིག་པ་རྒྱུ་གཅིག་པས་འབྲས་བུའི་སྒྲ་མཚུངས་པའི་ཕྱིར་ཐམས་ཅད་དུ་དེ་ཉིད་ཡིན་ནོ་ཞེས་བརྟག་པར་རིགས་པ་ནི་མ་ཡིན་ཏེ། འོན་ཀྱང་སྒྲ་མཚུངས་པ་ན་ཡང་འགའ་ཞིག་ལ་འགའ་ཞིག་གི་ནུས་པའི་རང་བཞིན་ཐ་དད་པའི་ཕྱིར་རོ། །དེ་ཉིད་བསྟན་པའི་ཕྱིར་རྐྱེན་གཅིག་གིས་ནི་ཞེས་བྱ་བ་ལ་སོགས་པ་གསུངས་ཏེ། གཅིག་གི་ནུས་པ་འགའ་ཞིག་ལ་མཐོང་བའི་རྐྱེན་གཅིག་སྟེ་རྒྱུ་ཐམས་ཅད་ཀྱིས་པས་འབྲས་བུ་ཐམས་ཅད་ལ་ནུས་པ་ཡོད་པ་ནི་སྲིད་པ་མ་ཡིན་ཏེ། འགའ་ཞིག་ཏུ་མཐོང་ཞེས་བྱས་ནས་གང་ན་ཡང་སྟེ་དུས་འགའ་ཞིག་གམ་ཡུལ་འགའ་ཞིག་ཏུ་མཐོང་བའམ་འདོད་པ་མ་ཡིན་ནོ། །དེའི་ཕྱིར་སྒྱུ་མ་འགའ་ཞིག་སྔགས་པ་ལ་སོགས་པའི་ནུས་པས་གྲུབ་པའི་རང་བཞིན་དང་འགའ་ཞིག་ཡང་ཐོག་མ་མེད་པའི་འཁོར་བ་ནས་འཇུག་པའི་ཆེ་བའི་བདག་ཉིད་མ་རིག་པ་ལས་བྱུང་བས་རབ་ཏུ་འཇུག་གོ །དེ་ལྟ་བས་ན་ཐམས་ཅད་ལ་ནི་སྔགས་ལ་སོགས་པ་ལས་ནུས་པ་ཡོད་པ་མ་ཡིན་ནོ། །འདི་ཐམས་ཅད་འཇིག་རྟེན་པའི་ཐ་སྙད་ཀྱི་རྗེས་སུ་འབྲང་སྟེ་རྟོག་པས་སྤྲུལ་པའི་ཀུན་རྫོབ་ཀྱི་དངོས་པོའི་དེ་ཁོ་ན་ཉིད་
ལ་བརྟེན་ནས་བྱུང་བ་ཡིན་གྱི་དོན་དམ་པར་ནི་མ་ཡིན་ཏེ། དོན་དམ་པའི་གནས་སྐབས་ན་སྐྱེ་བ་དང་འཆི་བ་དང་འབྱུང་བ་དང་འགག་པ་དང་རྒྱུ་དང་འབྲས་བུ་དང་དངོས་པོ་དང་དངོས་པོ་མེད་པ་ལ་སོགས་པའི་བརྟགས་པ་མེད་པའི་ཕྱིར་ན་ཆོས་ཐམས་ཅད་རང་བཞིན་གྱིས་ལྡོག་པའི་ཕྱིར་རོ། །འདི་ལས་མ་བཟོད་ནས་གཞན་ཡང་སླར་ཡང་ཐལ་བར་འགྱུར་བ་བརྗོད་པ་ནི་གལ་ཏེ་དོན་དམ་ཞེས་པ་ལ་སོགས་པའོ། །མྱ་ངན་ལས་འདས་པ་ནི་རང་བཞིན་གྱིས་སྟོང་པ་ཡིན་པའི་ཕྱིར་སྐྱེ་བ་དང་འགག་པ་ལ་སོགས་པ་དང་བྲལ་བ་ཡིན་ལ། དོན་དམ་པར་ནི་དོན་དམ་པའི་བདེན་པ་ཡིན་ཏེ། རང་བཞིན་གྱིས་མྱ་ངན་ལས་འདས་པར་གདོད་མ་ནས་ཞི་བའི་ཕྱིར་རོ། །གལ་ཏེ་ཀུན་རྫོབ་ནི་ཀུན་རྫོབ་ཀྱི་བདེན་པས་ཏེ། བརྟགས་པ་ཉིད་ཀྱིས་སོ། །འཁོར་བར་འགྱུར་བ་ནི་སྐྱེ་བ་དང་རྒ་ཤི་ལ་སོགས་པ་དང་ལྡན་པར་གྱུར་པ་ཡིན་ལ། དེའི་ཚེ་འགལ་བ་ཆེན་པོར་འགྱུར་རོ་ཞེས་སངས་རྒྱས་ཀྱང་ནི་འཁོར་འགྱུར་བས་ཞེས་བརྗོད་དེ། འདི་ལྟར་ཁས་བླངས་པ་ན་སྒྲིབ་པ་ཐམས་ཅད་དང་བྲལ་བས་མྱ་ངན་ལས་འདས་པའི་སངས་རྒྱས་ཀྱང་འཁོར་བར་འགྱུར་ཏེ། སྐྱེ་བ་ལ་སོགས་པའི་ཆ་དང་ལྡན་པར་འགྱུར་རོ། །གང་གི་ཕྱིར་དེ་ལྟར་ན་རྒྱུ་དེས་བྱང་ཆུབ་ཀྱི་སྤྱོད་པས་ཅི་ཞིག་བྱ་སྟེ། བྱང་ཆུབ་པའི་ཆེད་ནི་སངས་རྒྱས་ཀྱི་ཆེད་དུ་སྤྱོད་པ་སྟེ་ལག་པ་དང་རྐང་པ་དང་མགོ་བོ་ལ་སོགས་པ་སྦྱིན་པ་སྔོན་དུ་འགྲོ་བའི་སྡུག་བསྔལ་དུ་མའི་མཚན་ཉིད་ཀྱིས་ཅི་ཞིག་བྱ་ཞིང་དགོས་པ་ཅུང་ཟད་ཀྱང་ཡོད་པ་མ་ཡིན་ཏེ། བརྗོད་པའི་རང་བཞིན་མེད་པའི་ཕྱིར་རོ། །དེ་ཡང་འཁོར་བའི་ཆོས་ཐམས་ཅད་ལྡོག་པའི་ཆེད་དུ་ཡོན་ཏན་ཐམས་ཅད་བསྡུས་པ་ལ་བརྟེན་ཏེ་སངས་རྒྱས་ཐོབ་པར་བྱ་བའི་ཕྱིར་ཡང་དག་པར་བརྟེན་ལ་དེ་ལྟ་ན་ཡང་འཁོར་བའི་ཆོས་མ་ལོག་ན་བསྒྲུབས་པས་ཅི་ཞིག་བྱ་ཞེས་བསམས་པའོ། །འདི་ཡང་ཇི་སྲིད་རྐྱེན་རྣམས་ཚོགས་པར་གྱུར་པ་ཞེས་བྱ་བ་ལ་སོགས་པ་བསལ་བ་ཡིན་ཏེ། སླར་ཡང་ཁྱད་པར་བསྟན་པའི་ཕྱིར། རྐྱེན་རྣམས་རྒྱུན་ནི་མི་ཆད་ན། །ཞེས་བྱ་བ་ལ་སོགས་པ་གསུངས་ཏེ། རྐྱེན་རྣམས་ཏེ་རྒྱུ་རྣམས་རྒྱུན་མ་ཆད་ཅིང་མ་ཉམས་ནའོ། །ནི་ཞེས་པ་ནི་གང་གི་ཕྱིར་ཏེ་སྒྱུ་མའང་ཡིན་ཏེ་འཁོར་བ་འགའ་
ཞིག་ནི་མ་ཡིན་ལ། འང་གི་སྒྲས་ནི་སྡུད་པ་ཡིན་ཏེ་རྒྱུན་ཆད་ཅིང་ལྡོག་པར་མི་འགྱུར་རོ། །རྐྱེན་རྣམས་ཏེ་རྒྱུ་རྣམས་རྒྱུན་ཆད་པའི་ཕྱིར་ལྡོག་པས་ན་ཀུན་རྫོབ་ཀྱང་རྟག་པ་ཉིད་དེ། ཐ་སྙད་ཉིད་དུ་ཡང་འཁོར་བ་སྲིད་པ་མ་ཡིན་ནོ། །རྐྱེན་རྣམས་རྒྱུན་ཆད་པ་ཡང་དེ་ཁོ་ན་ཉིད་ལ་གོམས་པར་བྱས་པས་མ་རིག་པ་ལ་སོགས་པ་རིམ་གྱིས་འགལ་བར་འགྱུར་བར་ཤེས་པར་བྱའོ། །དེ་ཇི་ལྟར་སཱ་ལུ་ལྗང་པའི་མདོ་ལས་འདི་སྐད་དུ། བྱང་ཆུབ་སེམས་དཔའ་སེམས་དཔའ་ཆེན་པོ་བྱམས་པས་ཚེ་དང་ལྡན་པ་ཤཱ་རིའི་བུ་ལ་འདི་སྐད་ཅེས་སྨྲས་སོ། །བཅོམ་ལྡན་འདས་ཆོས་ཀྱི་རྗེ་ཐམས་ཅད་མཁྱེན་པས་གང་འདི་སྐད་དུ། དགེ་སློང་དག་གང་གིས་རྟེན་ཅིང་འབྲེལ་པར་འབྱུང་བ་མཐོང་བ་དེས་ཆོས་མཐོང་ངོ༌། །གང་གིས་ཆོས་མཐོང་བ་དེས་སངས་རྒྱས་མཐོང་ངོ་ཞེས་གསུངས་པ་དེ་ལ་རྟེན་ཅིང་འབྲེལ་པར་འབྱུང་བ་གང་ཞེ་ན། འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས། འདུ་བྱེད་ཀྱི་རྐྱེན་གྱིས་རྣམ་པར་ཤེས་པ། རྣམ་པར་ཤེས་པའི་རྐྱེན་གྱིས་མིང་དང་གཟུགས། མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག །སྐྱེ་མཆེད་དྲུག་གི་རྐྱེན་གྱིས་རེག་པ། རེག་པའི་རྐྱེན་གྱིས་ཚོར་བ། ཚོར་བའི་རྐྱེན་གྱིས་སྲེད་པ། སྲེད་པའི་རྐྱེན་གྱིས་ལེན་པ། ལེན་པའི་རྐྱེན་གྱིས་སྲིད་པ། སྲིད་པའི་རྐྱེན་གྱིས་སྐྱེ་བ། སྐྱེ་བའི་རྐྱེན་གྱིས་རྒ་ཤི་དང་མྱ་ངན་དང༌། སྨྲེ་སྔགས་འདོན་པ་དང༌། སྡུག་བསྔལ་བ་དང༌། ཡིད་མི་བདེ་བ་དང༌། འཁྲུག་པ་རྣམས་འབྱུང་སྟེ། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འབའ་ཞིག་འབྱུང་བར་འགྱུར་རོ། །དེ་ལ་མ་རིག་པ་འགགས་པས་འདུ་བྱེད་འགག་ཅེས་པ་ནས། དེ་ལྟར་སྡུག་བསྔལ་གྱི་ཕུང་པོ་ཆེན་པོ་འདི་འགག་པར་འགྱུར་ཏེ། འདི་ལ་རྟེན་ཅིང་འབྲེལ་པར་འབྱུང་བ་ཞེས་བརྗོད་དོ། །སྔ་མ་བཞིན་དུ་འདི་ནི་རྟེན་ཅིང་འབྲེལ་པར་འབྱུང་བ་ཡིན་ཏེ། རྟག་པ་དང༌། སྲོག་མེད་པ་དང༌། སྲོག་དང་བྲལ་བ་དང༌། ཇི་ལྟ་བུ་ཉིད་དང༌། མ་ནོར་བ་དང༌། མ་སྐྱེས་པ་དང༌། མ་བྱུང་བ་དང༌། མ་བྱས་པ་དང༌། འདུས་མ་བྱས་པ་དང༌། ཐོགས་པ་མེད་པ་དང༌། དམིགས་པ་མེད་པ་དང༌། ཞི་བ་དང༌། འཇིགས་པ་མེད་པ་དང༌། མི་འཕྲོགས་པ་དང༌། རྣམ་པར་ཞི་བ་མ་ཡིན་པའི་རང་བཞིན་གྱིས་མཐོང་བ་དེས་ཆོས་ཐམས་ཅད་མཐོང་ངོ༌། །གང་གིས་འདི་ལྟར་རྟག་པ་དང་སྲོག་མེད་པ་ནས་རྣམ་པར་ཞི་བ་མ་ཡིན་
པའི་རང་བཞིན་དུ་མཐོང་བ་དེས་བླ་ན་མེད་པའི་ཆོས་ཀྱི་སྐུར་སངས་རྒྱས་མཐོང་བ་ཞེས་གོང་མ་བཞིན་དུའོ། །དེ་ལ་མ་རིག་པ་གང་ཞེ་ན། ཁམས་དྲུག་པོ་འདི་དག་ཉིད་ལ་གང་གཅིག་པུར་འདུ་ཤེས་པ་དང༌། རིལ་པོར་འདུ་ཤེས་པ་དང༌། རྟག་པར་འདུ་ཤེས་པ་དང༌། བརྟན་པར་འདུ་ཤེས་པ་དང༌། ཐེར་ཟུག་ཏུ་འདུ་ཤེས་པ་དང༌། བདེ་བར་འདུ་ཤེས་པ་དང༌། བདག་ཏུ་འདུ་ཤེས་པ་དང༌། སེམས་ཅན་དུ་འདུ་ཤེས་པ་དང༌། སྲོག་ཏུ་འདུ་ཤེས་པ་དང༌། སྐྱེ་བར་འདུ་ཤེས་པ་དང༌། ཤེད་བུར་འདུ་ཤེས་པ་དང༌། ཤེད་ལས་སྐྱེས་སུ་འདུ་ཤེས་པ་དང༌། བདག་ཏུ་ང་རྒྱལ་དང༌། བདག་གི་བར་འདུ་ཤེས་པ་སྟེ། འདི་ལྟ་བུ་ལ་སོགས་པ་སྣ་ཚོགས་པ། མི་ཤེས་པ་ལ་མ་རིག་པར་བརྗོད་དོ། །དེ་ལ་མ་རིག་པ་ཡོད་པས་ཡུལ་རྣམས་ལ་འདོད་ཆགས་དང༌། ཞེ་སྡང་དང༌། གཏི་མུག་འཇུག་པ་སྟེ། དེ་ལ་ཡུལ་རྣམས་ལ་འདོད་ཆགས་དང༌། ཞེ་སྡང་དང༌། གཏི་མུག་གང་ཡིན་པ་འདི་ནི་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱའོ། །དངོས་པོ་སོ་སོར་རྣམ་པར་རིག་པ་ནི་རྣམ་པར་ཤེས་པའོ། །འབྱུང་བ་ཆེན་པོ་བཞི་པོ་ཉེ་བར་བཟུང་ནས། གཟུགས་གཅིག་པོ་ནི་གཟུགས་སོ། །རྣམ་པར་ཤེས་པ་དང་ལྷན་ཅིག་བྱུང་བ་ཉེ་བར་ལེན་པའི་ཕུང་པོ་བཞི་པོ་གཟུགས་ཅན་དུ་མ་ཡིན་པའི་ཉེ་བར་ལེན་པའི་ཕུང་པོ་ནི་མིང་སྟེ། དེ་དང་དེ་ནི་མིང་དང་གཟུགས་སོ། །མིང་དང་གཟུགས་ལ་བརྟེན་པའི་དབང་པོ་རྣམས་ནི་སྐྱེ་མཆེད་དྲུག་གོ །ཆོས་གསུམ་འདུས་པ་ནི་རེག་པའོ། །རེག་པ་མྱོང་བ་ནི་ཚོར་བའོ། །ཚོར་བ་ལ་ཞེན་པ་ནི་སྲེད་པའོ། །སྲེད་པ་འཕེལ་བ་ནི་ལེན་པའོ། །ལེན་པ་ལས་སྐྱེས་པ་ཡང་སྲིད་པ་སྐྱེས་པའི་ལས་ནི་སྲིད་པའོ། །རྒྱུ་དེ་ལས་ཕུང་པོ་བྱུང་བ་ནི་སྐྱེ་བའོ། །སྐྱེས་ནས་ཕུང་པོ་སྨིན་པ་ནི་རྒས་པའོ། །རྒས་ནས་ཕུང་པོ་འཇིག་པ་ནི་འཆི་བའོ། །འཆི་ཞིང་མྱོང་སྟེ་མངོན་པར་ཆགས་པ་དང་བཅས་པའི་ནང་གི་ཡོངས་སུ་གདུང་བ་ནི་མྱ་ངན་ནོ། །མྱ་ངན་ལས་བྱུང་བའི་ཚིག་ཏུ་སྨྲ་བ་ནི་སྨྲེ་སྔགས་འདོན་པའོ། །རྣམ་པར་ཤེས་པ་ལྔའི་ཚོགས་དང་ལྡན་པའི་མི་བདེ་བ་མྱོང་བ་ནི་སྡུག་བསྔལ་མྱོང་བའོ། །ཡིད་ལ་བྱེད་པ་དང་ལྡན་པའི་ཡིད་ཀྱི་སྡུག་བསྔལ་ནི་ཡིད་མི་བདེ་བའོ། །གཞན་ཡང་འདི་ལྟ་བུ་ལ་སོགས་པ་ཉོན་མོངས་པ་
གང་ཡིན་པ་ནི་འཁྲུག་པ་ཞེས་བྱའོ། །དེ་ལ་མུན་པ་ཆེན་པོའི་ཕྱིར་མ་རིག་པའོ། །མངོན་པར་འདུ་བྱེད་པའི་ཕྱིར་འདུ་བྱེད་རྣམས་སོ། །རྣམ་པར་རིག་པའི་ཕྱིར་རྣམ་པར་ཤེས་པའོ། །རློམ་པའི་ཕྱིར་མིང་དང་གཟུགས་སོ། །སྐྱེ་བའི་སྒོའི་ཕྱིར་སྐྱེ་མཆེད་དྲུག་གོ །རེག་པའི་དོན་གྱིས་རེག་པའོ། །མྱོང་བའི་ཕྱིར་ཚོར་བའོ། །སྐོམ་པའི་ཕྱིར་སྲེད་པའོ། །ཉེ་བར་ལེན་པའི་ཕྱིར་ལེན་པའོ། །ཡང་སྲིད་པ་སྐྱེད་པའི་ཕྱིར་སྲིད་པའོ། །ཕུང་པོ་འབྱུང་བའི་ཕྱིར་སྐྱེ་བའོ། །ཕུང་པོ་སྨིན་པའི་ཕྱིར་རྒས་པའོ། །འཇིག་པའི་ཕྱིར་འཆི་བའོ། །མྱ་ངན་བྱེད་པའི་ཕྱིར་མྱ་ངན་ནོ། །ཚིག་གི་སྨྲེ་བའི་ཕྱིར་སྨྲེ་སྔགས་འདོན་པའོ། །ལུས་ལ་གནོད་པའི་ཕྱིར་སྡུག་བསྔལ་པའོ། །སེམས་ལ་གནོད་པའི་ཕྱིར་ཡིད་མི་བདེ་བའོ། །ཉོན་མོངས་པའི་ཕྱིར་འཁྲུག་པའོ་ཞེས་རྒྱས་པར་གསུངས་སོ། །དེ་ལྟར་ཉེ་བར་བསྟན་པའི་རྐྱེན་རྣམས་རྒྱུན་མ་ཆད་ན་འདུ་བྱེད་ཉམས་པ་མེད་པར་འཇུག་སྟེ། རྟེན་ཅིང་འབྲེལ་པར་འབྱུང་བ་ཡན་ལག་བཅུ་གཉིས་པོ་དེ་ཉིད་འདུ་བྱེད་པ་ཡིན་པའི་ཕྱིར་རོ། །སློབ་དཔོན་གྱི་ཞལ་སྔ་ནས། ཇི་ལྟར་འབངས་བཞིན་རིམ་གྱིས་རྒྱུན། །སྐྱེས་ནས་ལས་དང་ཉོན་མོངས་ཀྱིས། །འཇིག་རྟེན་ཕ་རོལ་དག་ཏུ་འགྲོ། །སྲིད་པའི་འཁོར་ལོ་ཐོག་མ་མེད། །དེ་ནི་རྟེན་ཅིང་འབྲེལ་འབྱུང་བའི། །ཡན་ལག་བཅུ་གཉིས་ཆ་གསུམ་མོ། །ཞེས་གསུངས་པ་ཡིན་ནོ། །རྐྱེན་རྣམས་ཡང་རྒྱུན་ཆད་ན་རྣམ་པ་ཐམས་ཅད་དུ་འཁོར་བ་མེད་པར་འགྱུར་ཏེ། རྒྱུ་མ་ཚང་བའི་ཕྱིར་རོ། །དེའི་ཕྱིར་སངས་རྒྱས་ཀྱང་འཁོར་བར་ཐལ་བར་འགྱུར་བ་དེ་ནི་མ་ཡིན་ནོ། །དེ་ལྟར་རེ་ཞིག་མདོ་སྡེ་པ་ལ་སོགས་པའི་བརྒལ་བ་བསལ་ནས། རྣལ་འབྱོར་སྤྱོད་པའི་ལོག་པར་རྟོག་པ་བསལ་བའི་ཆད་དུ་དེའི་ལུགས་ཀྱི་ཉེས་པ་བརྗོད་པ་ནི། གང་ཚེ་འཁྲུལ་པ་ཞེས་པ་ལ་སོགས་པ་སྨོས་ཏེ། གང་གི་ཚེ་དབུ་མར་སྨྲ་བ་རྣམས་ཀྱིས་འགྲོ་བ་ཐམས་ཅད་སྒྱུ་མའི་བདག་ཉིད་ཀྱི་རང་བཞིན་གྱིས་སྟོང་པར་ཁས་བླངས་པ་ན་ཕྱི་རོལ་བཞིན་དུ་སྒྱུ་མའི་རང་བཞིན་ཀུན་རྫོབ་འཛིན་པར་བྱེད་པའི་བློ་ཡང་ཁྱེད་ལ་ཡོད་པ་མ་ཡིན་ལ། དེའི་ཚེ་སྒྱུ་མ་གང་གིས་དམིགས་པར་འགྱུར་ཏེ། གང་གིས་རྟོགས་པར་འགྱུར་ཏེ་འཛིན་པ་དངོས་པོ་ཡོད་པའི་ཤེས་པ་མ་གཏོགས་
པ་ཅུང་ཟད་ཀྱང་ཡོད་པ་མ་ཡིན་ནོ་ཞེས་པའི་དོན་ཏོ། །གང་གི་ཡང་རང་གི་སེམས་ཉིད་དོན་དམ་པར་ཡོད་པ་མ་ཡིན་ལ། ཕྱི་རོལ་གྱི་རང་བཞིན་ཉིད་ཀྱི་འཁྲུལ་པས་དེ་བཞིན་དུ་སྣང་སྟེ། དེ་ལ་ནི་ཉེས་པ་ཡོད་པ་མ་ཡིན་ནོ་ཞེས་པ་ནི་བསམས་པའོ། །དེ་ལྟ་བུ་བསལ་བའི་དོན་དུ་གང་ཚེ་ཁྱོད་ལ་ཞེས་པ་ལ་སོགས་པ་གསུངས་ཏེ། གླང་པ་ལ་སོགས་པའི་རྣམ་པར་འཇུག་པས་གཟུང་བར་བྱ་བ་ཉིད་ཀྱིས་གང་གི་ཚེ་སྒྱུ་མ་ཉིད་ཁྱོད་དེ། རྣམ་པར་ཤེས་པར་སྨྲ་བ་ཁྱེད་ཅག་ལ་ཡོད་པ་མ་ཡིན་ཏེ། འགྲོ་བ་སེམས་ཙམ་དུ་ཁས་ལེན་པས་ཕྱི་རོལ་གྱི་དོན་མེད་པའི་ཕྱིར་དེའི་ཚེ་ཅི་ཞིག་དམིགས་ཏེ། དེའི་ཚེ་འདིར་ཅི་ཞིག་སྣང་བར་འགྱུར། ཕྱི་རོལ་གྱི་དོན་མེད་པའི་ཕྱིར་ཡུལ་ལ་སོགས་པར་རྣམ་པར་ཆད་པའི་སྣང་བ་རིགས་པ་མ་ཡིན་ནོ་ཞེས་པའི་དོན་ཏོ། །དེ་ལ་གཞན་གྱི་བསམ་པའི་དོགས་པས་གལ་ཏེ་དངོས་པོར་ཞེན་པ་ལ་སོགས་པ་གསུངས་ཏེ། རང་གི་སེམས་ཉིད་འཁྲུལ་པས་ཕྱི་རོལ་གྱི་གཟུགས་ཉིད་དུ་གླང་པོ་ཆེ་ལ་སོགས་པའི་རྣམ་པར་སྣང་བ་ཡིན་ནོ་ཞེས་གསུངས་སོ་ཞེ་ན། གསུངས་པ་ཉིད་ཡིན་ཏེ་འོན་ཀྱང་སེམས་ཉིད་རྣམ་པར་ཤེས་པ་ཉིད་ཡིན་ཏེ། དེ་ནི་ཞེས་པ་ནི་ཡུལ་ལ་སོགས་པ་ཆད་པར་གཟུང་བར་བྱ་བ་ཉིད་ཀྱིས་རབ་ཏུ་སྣང་བ་དང་ལྡན་པ་ཡིན་ལ། རྣམ་པ་ནི་སྣང་བ་ཡིན་ཏེ། གཞན་ཞེས་པ་ནི་ནང་གི་འཛིན་པའི་སེམས་ཀྱི་རྣམ་པ་གཞན་ཡིན་ལ། ཡོད་པ་ནི་བདོག་པ་སྟེ་དེ་ཁོ་ན་ཉིད་ཀྱི་དངོས་པོ་ཡིན་ལ་གལ་ཏེ་ཡང་ཞེས་པ་ནི་ཁས་བླངས་པ་བརྗོད་པ་ཡིན་ཏེ། དེ་ལྟ་ན་ཡང་འདི་ནི་འབྲེལ་པ་མ་ཡིན་ནོ་ཞེས་བསྟན་པའི་ཕྱིར། གང་ཚེ་སེམས་ཉིད་སྒྱུ་མ་ནི། །ཞེས་པ་ལ་སོགས་པ་གསུངས་ཏེ། སེམས་ཉིད་རྣམ་པར་ཤེས་པ་ཉིད་ཡིན་ཏེ། རིག་པར་བྱེད་པ་པོ་ཉིད་དུ་ཁས་བླངས་པ་ཡིན་ལ་གང་གི་ཚེ་སྒྱུ་མ་ལས་གཞན་མ་ཡིན་པའི་རིག་པ་པོ་སེམས་ལས་ཐ་དད་པ་སྔ་མ་ཞེས་བྱ་བ་འགའ་ཡང་ཡོད་པ་མ་ཡིན་ཏེ། དེའི་བདག་ཉིད་ཡིན་པས་དེ་དེ་ལྟར་སྣང་བ་ཁས་བླངས་པའི་ཕྱིར་རོ། །དེ་ཚེ་གང་ཞིག་གང་གིས་མཐོང༌། །ཞེས་ཏེ། གང་ཞིག་གང་གིས་རྟོགས་པར་འགྱུར་ཏེ། མཐོང་བ་ཉིད་འབའ་ཞིག་ཡོད་ཀྱི་མཐོང་བར་བྱ་བ་ནི་མེད་ལ། མཐོང་བར་བྱ་བ་མེད་པར་མཐོང་བ་ཡང་ཡོད་པ་མ་ཡིན་ཏེ་དེ་ནི་མཐོང་བར་བྱ་
བ་ལ་ལྟོས་པའི་ཕྱིར་རོ། །དེའི་ཕྱིར་གང་གིས་ཅུང་ཟད་ཀྱང་མཐོང་བ་མ་ཡིན་ཏེ། དེ་ལྟ་བས་ན་འགྲོ་བ་མཐའ་དག་ལོང་བ་ཉིད་ཐོབ་པར་འགྱུར་རོ་ཞེས་དགོངས་པ་ཡིན་ནོ། །གལ་ཏེ་དེ་ལྟར་གྱུར་ན་ཡང་གལ་ཏེ་ཤེས་པའི་བདག་ཉིད་མྱོང་བ་མ་ཡིན་པར་འགྱུར་ལ། འོན་ཀྱང་རང་རིག་པ་ཉིད་ཀྱིས་རང་གི་ངོ་བོ་མྱོང་བ་ནི་དེ་ལས་ཐ་མི་དད་པའི་སྒྱུ་མ་ལ་སོགས་པ་ཡང་རྟོགས་པ་ཡིན་ཏེ། དེ་ལྟར་གྱུར་ན་ཡང་ཅུང་ཟད་ཀྱང་ཉམས་པ་མེད་དོ་ཞེས་རྣམ་པར་ཤེས་པར་སྨྲ་བའི་བསམ་པའི་དོན་དམ་པས་གསུངས་པ། འཇིག་རྟེན་གྱི་ནི་མགོན་པོས་ཀྱང༌། །ཞེས་པ་ལ་སོགས་པ་གསུངས་ཏེ། འགྲོ་བ་རང་བཞིན་གྱིས་སྟོང་པ་ཉིད་དུ་གང་གི་ཚེ་རིགས་པས་བསྟན་པ་དེའི་ཚེ། གང་གིས་གང་གི་རང་བཞིན་གྱི་དངོས་པོ་ཞེས་གང་ཞིག་གང་གིས་རྟོགས་པར་འགྱུར། བཅོམ་ལྡན་འདས་ཀྱིས་ཆོས་ཐམས་ཅད་སྟོང་པ་ཡིན་ཏེ། སྟོང་པ་ཉིད་ཀྱི་མཚན་ཉིད་སེམས་ཡིན་ཞིང་ཆོས་ཐམས་ཅད་རྣམ་པར་དབེན་པ་དང༌། རྣམ་པར་དབེན་པའི་མཚན་ཉིད་ཀྱང་སེམས་ཡིན་ནོ་ཞེས་གསུངས་སོ། །གཞན་ཡང་འཇིག་རྟེན་གྱི་མགོན་པོས་ཀྱང་གསུངས་ཤིང་བཀའ་སྩལ་པ་ཡིན་ཏེ། འཇིག་རྟེན་ནི་སེམས་ཅན་ཐམས་ཅད་ཡིན་ལ། མགོན་པོས་ཞེས་པ་ནི་སྐབས་ཏེ་སངས་རྒྱས་བཅོམ་ལྡན་འདས་ཀྱིས་སོ། །ཅི་ཞིག་གསུངས་ཤེ་ན། སེམས་ཀྱིས་སེམས་མི་མཐོང་ཞེས་ཏེ། སེམས་ཀྱི་བདག་ཉིད་ནི་སེམས་ཀྱིས་ཤེས་པ་མ་ཡིན་ཏེ། དངོས་པོ་དེ་ཁོ་ན་ཉིད་དུ་ཡོད་ཀྱང་བདག་ཉིད་ལ་བྱེད་པ་འགལ་བའི་ཕྱིར་རོ། །ཅི་ལྟ་བུ་ཞེ་ན། རལ་གྲིའི་སོ་ནི་རང་ལ་རང༌། །ཞེས་ཏེ། ཇི་ལྟར་ཤིན་ཏུ་རྣོ་བའི་རལ་གྲིའི་སོས་གཞན་བཞིན་དུ་བདག་ཉིད་དེ་རང་གི་ལུས་མི་གཅོད་ཅིང་གཅོད་པར་མི་བྱེད་དེ། བདག་ཉིད་ལ་བྱེད་པ་འགལ་བའི་ཕྱིར་རོ། །དེ་བཞིན་དུ་ཡིད་ཀྱང་རལ་གྲིའི་སོ་བཞིན་དུ་བདག་ཉིད་ཀྱི་སེམས་ཀྱིས་བདག་ཉིད་མི་མཐོང་ངོ་ཞེས་སྦྱར་རོ། །ཤེས་པ་གཅིག་པོ་དེ་ལ་རིག་པར་བྱ་བ་དང་རིག་པར་བྱེད་པ་དང༌། རིག་པའི་བདག་ཉིད་གསུམ་མི་རིགས་ཏེ། ཆ་ཤས་མེད་པ་གཅིག་ལ་རང་བཞིན་གསུམ་མི་འཐད་པའི་ཕྱིར་རོ། །དེ་ལ་འདི་འཕགས་པ་གཙུག་ན་རིན་པོ་ཆེའི་མདོ་ལས། དེ་སེམས་ཀུན་ཏུ་ཚོལ་བ་ན་སེམས་ནང་ན་ཡང་དག་པར་རྗེས་སུ་མི་
མཐོང། སེམས་ཕྱི་རོལ་ན་ཡང་དག་པར་རྗེས་སུ་མི་མཐོང་ཞེས་པ་དང༌། ཕུང་པོ་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་ཁམས་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང༌། སྐྱེ་མཆེད་རྣམས་ལ་ཡང་སེམས་ཡང་དག་པར་རྗེས་སུ་མི་མཐོང་ངོ༌། །དེས་སེམས་ཡང་དག་པར་རྗེས་སུ་མ་མཐོང་བས། སེམས་གང་ལས་བྱུང་ཞེས་སེམས་ཀྱི་རྒྱུན་ཀུན་དུ་ཚོལ་ཞིང་དེ་འདི་སྙམ་དུ་སེམས་ཏེ། དམིགས་པ་ཡོད་པ་ལས་སེམས་འབྱུང་བར་འགྱུར་རོ་སྙམ་མོ། །དེ་ཡང་འདི་སྙམ་དུ་སེམས་ཏེ། ཅི་དམིགས་པ་དེ་ཡང་གཞན་ལ། སེམས་དེ་ཡང་གཞན་ནམ། འོན་ཏེ་དམིགས་པ་གང་ཡིན་པ་དེ་ཉིད་སེམས་ཡིན། གལ་ཏེ་དམིགས་པ་ཡང་གཞན་ལ་སེམས་ཀྱང་གཞན་ན་ནི་སེམས་དེ་གཉིས་སུ་འགྱུར་རོ། །འོན་ཏེ་དམིགས་པ་གང་ཡིན་པ་དེ་ཉིད་སེམས་ཡིན་ན་སེམས་ཀྱིས་སེམས་དེ་ཇི་ལྟར་མཐོང་བར་འགྱུར་ཏེ། སེམས་ཀྱིས་སེམས་མཐོང་བར་མི་རུང་ངོ༌། །འདི་ལྟ་སྟེ་དཔེར་ན། རལ་གྲིའི་སོ་དེ་ཉིད་ཀྱིས་རལ་གྲིའི་སོ་དེ་ཉིད་བཅད་པར་མི་ནུས་པ་དང༌། སོར་མོའི་རྩེ་མོ་དེ་ཉིད་ཀྱིས་སོར་མོའི་རྩེ་མོ་ལ་རེག་པར་མི་ནུས་པ་དེ་བཞིན་དུ་སེམས་དེ་ཉིད་ཀྱིས་སེམས་དེ་ཉིད་མཐོང་བར་མི་ནུས་སོ་ཞེས་རྒྱས་པར་གསུངས་སོ། །འདིར་སེམས་ཙམ་ཉིད་དུ་སྨྲ་བས་རང་ལ་བྱེད་པ་འགལ་བ་བསལ་བར་འདོད་ཅིང་རང་གི་ཕྱོགས་བསྒྲུབ་པའི་ཆེད་དུ་དཔེ་བརྗོད་པ་ཇི་ལྟར་མར་མེ་ཞེས་པ་ལ་སོགས་པ་གསུངས་ཏེ། རང་གི་དངོས་ནི་རང་གི་རང་བཞིན་ཡིན་ཏེ། དཔེར་ན་མར་མེ་བཞིན་དུ་སྟེ་མར་མེ་ལྟར་ཡང་དག་པར་གསལ་བར་བྱེད་ཅིང་མངོན་པར་བྱེད་དོ། །འདི་ལྟར་ཡང་ངེས་པས་མུན་པས་བསྒྲིབས་པའི་བུམ་པ་ལ་སོགས་པའི་དངོས་པོ་རྟོགས་པར་བྱ་བའི་ཆེད་དུ་མར་མེ་འདེགས་པར་བྱེད་ལ། དེ་བཞིན་དུ་མར་མེ་གསལ་བར་བྱ་བའི་ཆེད་དུ་ནི་མར་མེ་གཞན་མ་ཡིན་ཏེ། འོན་ཀྱང་བུམ་པ་ལ་སོགས་པ་གསལ་བར་བྱེད་པ་གང་ཡིན་པ་དེ་ཉིད་ཀྱིས་བདག་ཉིད་ཀྱང་གསལ་བར་བྱེད་ལ། དེ་བཞིན་དུ་སྐབས་སུ་བབ་པའི་རང་རིག་པ་ལ་ཡང་གོ་བར་བྱ་ཞིང་ཅུང་ཟད་ཀྱང་འགལ་བ་ཡོད་པ་མ་ཡིན་ནོ་ཞེས་ཐམས་ཅད་དུ་སྦྱར་བར་བྱ་སྟེ། དེ་ལྟ་བས་ན་མར་མེ་བཞིན་དུ་འགལ་བ་མེད་པ་ཉིད་དོ་ཞེ་ན། གལ་ཏེ་དེ་ལྟར་སེམས་ན་དེའི་ཚེ་འདི་སྐད་སྨྲ་བར་མི་བྱའོ། །ཅིའི་
ཕྱིར་ཞེ་ན། མར་མེ་ཞེས་པ་ལ་སོགས་པ་གསུངས་ཏེ། གསལ་བར་བྱ་བ་མ་ཡིན་པ་ཉིད་ཡིན་ཏེ། བུམ་པ་ལ་སོགས་པ་བཞིན་དུ་གསལ་བར་བྱ་བ་མ་ཡིན་པ་ཁོ་ནའོ། །གང་གི་ཕྱིར་མར་མེ་མུན་གྱིས་བསྒྲིབས་པ་མེད་དེ་མུན་པས་གཡོགས་པ་མ་ཡིན་ནོ། །སྒྲིབ་པར་བྱེད་པ་ཡོད་པ་སེལ་བ་ནི་གསལ་བ་ཡིན་ནོ། །དེའི་ཕྱིར་བུམ་པ་ལ་སོགས་པ་གསལ་བ་ནི་དེ་རྣམས་སྔར་ཡོད་པའི་ཕྱིར་ལ། དེ་ལྟར་མར་མེ་ནི་མ་ཡིན་ཏེ། དེ་སྔར་མེད་པའི་ཕྱིར་རོ། །མེད་པ་ཡང་གསལ་བར་རིགས་པ་མ་ཡིན་ཏེ། མེད་པ་ཉིད་ཀྱི་ཕྱིར་རོ། །དེའི་ཕྱིར་འདི་ལྟར་མར་མེ་ནི་གསལ་བར་བྱ་བ་མ་ཡིན་ཏེ། འདི་ལྟར་མི་འདྲ་བའི་ཕྱིར་རོ། །མར་མེའི་དཔེས་ནི་བསྒྲུབ་བྱ་འགྲུབ་པ་མ་ཡིན་ནོ། །དེ་ལྟར་གྱུར་ན་ཡང་ཇི་ལྟར་མར་མེ་ཞེས་པ་ལ་སོགས་པས་མར་མེའི་བདག་ཉིད་གང་ཡིན་པ་ནི་མུན་པས་བསྒྲིབས་པ་གསལ་བར་བྱེད་པ་ཡིན་ནོ་ཞེས་འདི་སྐད་དུ་བརྗོད་པ་ནི་མ་ཡིན་ལ། འོན་ཀྱང་དེའི་རང་བཞིན་གྱི་དབང་དུ་བྱས་ཏེ། གཞན་ལ་ལྟོས་པ་མ་ཡིན་པ་ཙམ་ཡིན་ནོ་ཞེས་བརྗོད་པར་བྱའོ། །འདི་ཉིད་བསྟན་པའི་ཕྱིར། ཤེལ་བཞིན་དུ་ཞེས་པ་ལ་སོགས་པ་གསུངས་ཏེ། ནི་ཞེས་བྱ་བ་ནི་གང་གི་ཕྱིར་ཏེ། ཇི་ལྟར་ཤེལ་རྡོ་རང་བཞིན་སྔོན་པོ་མ་ཡིན་པར་ཡོད་པ་ཡོན་ཏན་སྔོན་པོ་ཉིད་དུ་སྐྱེད་པ་ལ་རྒྱུ་མཚན་གཞན་གྱི་ཁྱད་པར་འདབ་མ་སྔོན་པོ་ལ་སོགས་པ་ཉེ་བ་ལ་ལྟོས་ལ་དེ་བཞིན་དུ་དངོས་པོ་རང་ཉིད་ཀྱིས་སྔོན་པོ་ཡིན་པ་དེ་ལྟ་ན་ཡང་སྔོན་པོ་ཉིད་དུ་བྱ་བ་ལ་ཁྱད་པར་གཞན་ལ་ལྟོས་པ་ནི་མ་ཡིན་ནོ། །དེ་བཞིན་ཞེས་ཏེ་རྣམ་པ་དེས་བུམ་པ་ལ་སོགས་པའི་དངོས་པོ་ཅུང་ཞིག་མར་མེ་ལ་སོགས་པ་གཞན་ལ་ལྟོས་པས་གསལ་བ་མཐོང་ལ་མར་མེ་ལ་སོགས་པ་འགའ་ཞིག་ཡང་གཞན་ལ་ལྟོས་པ་མ་ཡིན་ཞིང་རང་ཉིད་གསལ་བའི་བདག་ཉིད་དུ་མཐོང་སྟེ་དམིགས་པ་ཡིན་ལ། འདི་ཙམ་ཉིད་བརྗོད་པར་འདོད་པ་ཡིན་ནོ། །དེ་བཞིན་དུ་རྣམ་པར་ཤེས་པ་ཙམ་དུ་སྨྲ་བས་ཁྱད་པར་བརྗོད་པ་ལ། འགྲུབ་པའི་མཐའ་སྨྲ་བས་སྔོན་པོ་ཉིད་རེ་ཞིག་གཞན་ལ་ལྟོས་པ་མེད་པར་དཔེའི་སྒོ་ནས་བསྟན་པ་དགག་པའི་ཕྱིར། སྔོ་ཉིད་མིན་ལ་ཞེས་པ་ལ་སོགས་པ་གསུངས་ཏེ། དཔེ་འདི་ཡང་འདྲ་བ་མ་ཡིན་ཏེ། གང་གི་ཕྱིར་སྔོན་པོ་ཡང་སྔོན་པོ་ཉིད་དུ་བྱེད་པ་ལ་ཤེལ་བཞིན་དུ་གཞན་ལ་མ་ལྟོས་པ་
མ་ཡིན་ཏེ། དེའི་ངོ་བོར་འགྱུར་བ་ལ་རང་གི་རྒྱུ་དང་རྐྱེན་ལ་ལྟོས་པའི་ཕྱིར་རོ། །འདི་ཡང་ནམ་གྱི་ཚེ་གཞན་ལ་ལྟོས་པ་ཡོད་པར་འགྱུར་ཞེ་ན། གལ་ཏེ་སྔོན་པོ་མ་ཡིན་པ་ཉིད་དུ་རང་གི་རྒྱུ་ལས་སྐྱེས་ན་ཡང་དེར་འགྱུར་བ་ལས་གཞན་ལ་མ་ལྟོས་པར་རང་ཉིད་ཀྱི་སྔོན་པོའི་བདག་ཉིད་དུ་བྱེད་ན་སྟེ་དེ་ཡང་ཡོད་པ་མ་ཡིན་ནོ། །གང་གི་ཕྱིར་སྔོན་པོ་མ་ཡིན་ཏེ་སྔོན་པོའི་ཡོན་ཏན་དང་བྲལ་བ་ནི་མ་ཡིན་ནོ་ཞེས་འགེགས་པར་བྱེད་དེ། དེ་ཞེས་བྱ་བ་ནི་སྔོན་པོར་འདོད་པའི་དངོས་པོ་ཡིན་ལ། སྔོན་པོ་སྟེ་སྔོན་པོའི་ཡོན་ཏན་དང་ལྡན་པ་ཡིན་ཞིང༌། བདག་ཉིད་དེ་རང་གི་ངོ་བོ་བདག་ཉིད་ཀྱི་རང་བཞིན་གྱིས་བྱེད་པ་མ་ཡིན་ལ། སྔར་བཞིན་དུ་བྱེད་པར་ནུས་པ་མ་ཡིན་ཏེ། བདག་ཉིད་ལ་བྱེད་པ་འགལ་བའི་ཕྱིར་རོ། །དེའི་ཕྱིར་སྔོན་པོ་ཡང་སྔོན་པོ་ཉིད་དུ་བྱེད་པ་ལ་ཤེལ་བཞིན་དུ་གཞན་ལ་མ་ལྟོས་པ་མ་ཡིན་ཏེ། འདི་ལྟར་ཤེལ་རྡོ་ཡང་དངོས་པོ་གནས་པའི་ངོ་བོ་ཉིད་ཁྱད་པར་གཞན་དང་ཉེ་བས་སྔོན་པོར་བསྒྱུར་བར་གྱུར་བ་ཡིན་ཏེ། འོན་ཀྱང་ཐམས་ཅད་རང་གི་ཉེ་བར་ལེན་པའི་སྐད་ཅིག་མ་དང་སྔོན་པོའི་ཁྱད་པར་ལྷན་ཅིག་བྱེད་པའི་རྐྱེན་ལས་ཀྱང་སྔ་མ་རང་ཉིད་ཀྱིས་འགགས་ནས། ཤེལ་རྔོ་སྔོན་པོའི་ཡོན་ཏན་གྱིས་བསྒྱུར་བ་གཞན་ཉིད་སྐྱེ་བར་འགྱུར་རོ་ཞེས་པ་ནི་གྲུབ་པའི་མཐའ་ཡིན་ནོ། །དེ་ལ་ཡོན་ཏན་སྐྱེད་པ་ལ་རྒྱུ་དང་རྐྱེན་ལ་རག་ལས་པར་ནི་འདི་དག་ཐུན་མོང་ཉིད་ཡིན་ལ། དེ་བཞིན་དུ་སྐབས་སུ་བབ་པའི་བསྒྲུབ་བྱ་ལ་ཡང་ཁྱད་པར་ཅུང་ཟད་ཀྱང་ཡོད་པ་མ་ཡིན་ནོ། །འོ་ན་ནི་མཛའ་བོས་ཡིད་དུ་འོང་བ་བསྒྲུབས་པ་ཡིན་ཏེ། གང་གི་ཕྱིར་རང་གི་རྒྱུ་དང་རྐྱེན་ལས་བེམས་པོའི་རང་བཞིན་ལས་བཟློག་གི་བདག་ཉིད་དུ་བསྐྱེད་པའི་ཤེས་པ་ཉིད་གསལ་བ་གཞན་ལ་མ་ལྟོས་པར་བདག་ཉིད་གསལ་བ་ལ་རང་རིག་པར་བརྗོད་དེ། འདི་ཉིད་ནི་ཁོ་བོས་ཀྱང་སྔོན་པོའི་བདག་ཉིད་དཔྱད་པས་བསྒྲུབས་པ་ཡིན་ནོ། །འདི་ཙམ་ཉིད་ཀྱིས་མར་མེ་ཡང་དཔེར་བྱས་པ་ཡིན་ལ། ཡང་ཁོ་བོ་ཅག་རྣམས་ཀྱིས་ལས་དང་བྱེད་པ་པོ་དང་བྱ་བ་ཐ་དད་པས་ཤེས་པའི་བདག་ཉིད་གསལ་བར་ནི་ཡོད་པ་མ་ཡིན་ཏེ། ཡོད་པ་གཅིག་ལ་ལས་ལ་སོགས་པའི་རང་བཞིན་གསུམ་མི་རིགས་པའི་ཕྱིར་རོ། །དེ་བྱ་བ་ཐ་དད་
པའི་སྒོ་ནས་སྐྱོན་བརྗོད་ན་ཡང་ཁོ་བོ་ནི་ཅུང་ཟད་ཀྱང་སུན་ཕྱུང་བ་མ་ཡིན་ཏེ། རང་གི་རྒྱུ་ལས་སྐྱེས་པའི་བདག་ཉིད་ཀྱི་གསལ་བ་མ་ཉམས་པའི་ཕྱིར་རོ། །དེ་ལྟར་ན་བདག་ཉིད་རིག་པ་ལ་སྐྱོན་བརྗོད་པས་ཐལ་བ་མེད་དོ། །དེ་བརྗོད་པ། རྣམ་ཤེས་བེམས་པོའི་རང་བཞིན་ལས། །བཟློག་པ་རབ་ཏུ་སྐྱེ་བ་སྟེ། །བེམས་མིན་རང་བཞིན་གང་ཡིན་པ། །དེ་ཉིད་བདག་ཉིད་ཤེས་པ་ཡིན། །གཅིག་ལ་ཆ་མེད་རང་བཞིན་ལ། །གསུམ་གྱི་བདག་ཉིད་མི་འཐད་ཕྱིར། །འདི་ཡི་རང་བཞིན་རིག་པ་ནི། །བྱ་དང་བྱེད་པོའི་དངོས་པོར་མིན། །ཞེ་ན། འདི་ལ་བརྗོད་པར་བྱ་སྟེ། བྱ་བ་དང་བྱེད་པ་པོའི་ཁྱད་པར་གྱི་ཐ་སྙད་ལས་གྲུབ་པའི་སྒྲའི་དོན་རྟོགས་པས་ཉེས་པ་བརྗོད་པ་ཡིན་ཏེ། རང་རིག་པའི་སྒྲས་དེའི་དོན་བརྗོད་པའི་ཕྱིར་རོ། །གལ་ཏེ་ཡང་ཉེས་པས་འཇིགས་ནས་འཇིག་རྟེན་ལ་གྲགས་པའི་སྒྲའི་དོན་ཡོངས་སུ་སྤོང་ན། དེའི་ཚེ་ཁྱེད་ལ་འཇིག་རྟེན་པ་ཉིད་ཀྱིས་གནོད་པོར་འགྱུར་ལ། འདིས་ཀྱང་རང་རིག་པ་དོན་དམ་པ་འགྲུབ་པ་མ་ཡིན་ཏེ། དེ་བཞིན་དུ་རྒྱུ་དང༌། རྐྱེན་ལས་སྐྱེས་པའི་གཟུགས་བརྙན་རང་བཞིན་མེད་པ་ཉིད་དུ་བརྗོད་ལ། དེ་ལྟར་རང་རིག་པའི་ཤེས་པ་ནི་ཤིན་ཏུ་ཡང་མེད་པ་ཡིན་ཏེ། དེ་ཁོ་ན་ཉིད་དུ་གཉུག་མའི་རང་བཞིན་དུ་མེད་པའི་ཕྱིར་རོ། །རང་བཞིན་མེད་པར་ཡང་ནམ་མཁའི་ཨུཏྤལའི་བདག་ཉིད་རང་རིག་པར་ཡང་རིགས་པ་མ་ཡིན་ནོ། །དབུ་མར་སྨྲ་བ་པོ་རྣམས་ཀྱི་དབང་དུ་བྱས་ཏེ་བེམས་པོའི་རང་བཞིན་ཡོད་པ་མ་ཡིན་ཞིང༌། གང་གིས་བེམས་པོའི་ལས་བཟློག་པ་བེམས་པོ་མ་ཡིན་པའི་རང་རིག་པར་འགྱུར་བ་དོན་དམ་པར་གང་ཞིག་ཀྱང་ཡོད་པ་མ་ཡིན་ནོ། །དེ་ལྟ་བས་ན་དངོས་པོར་སྨྲ་བ་གཞན་ཉིད་ཀྱི་དབང་དུ་བྱས་ཏེ། འདི་སྨྲ་བར་རིགས་པ་ཡིན་ནོ། །དེའི་ཕྱིར་ན་རང་བཞིན་མེད་པ་ཉིད་ཀྱིས་ནམ་ཡང་རང་རིག་པ་གྲུབ་པ་མ་ཡིན་ནོ། །འདི་ཡང་ཕྱི་ནས་དྲན་པ་ཉེ་བར་གཞག་པ་སྟོན་པའི་སྐབས་སུ་རྒྱས་པར་བསྟན་པར་བྱའོ། །ད་ནི་མར་མེ་རང་ཉིད་གསལ་བར་ཁས་བླངས་ནས་བློ་ལ་རང་རིག་པ་མ་ཡིན་ནོ་ཞེས་བསྟན་པའི་ཆེད་དུ་མར་མེ་ཞེས་པ་ལ་སོགས་པ་གསུངས་ཏེ། མར་མེ་རབ་ཏུ་གསལ་བའི་བདག་ཉིད་དུ་གྱུར་པ་དེ་ལྟ་ན་ཡང་བློ་རང་རིག་པར་བསྒྲུབ་པ་ལ་འདྲ་བའི་དཔེ་མ་ཡིན་ནོ་ཞེས་པ་ནི་བསྡུས་པའི་དོན་ཏོ། །མར་མེ་གསལ་
བར་བྱེད་དོ་ཞེས་པ་ནི་གསལ་བར་བྱེད་པ་གཞན་ལ་མི་ལྟོས་པར་རང་ཉིད་ཀྱིས་གསལ་བ་ཡིན་ནོ་ཞེས་ཤེས་པར་བྱས་ནས་ཏེ། ཤེས་པས་གོ་བར་བྱས་ནས་བློས་རྗོད་པར་བྱེད་ཅིང་རབ་ཏུ་རྟོགས་པར་བྱེད་དེ། མར་མེ་ཤས་པའི་ཡུལ་ཡིན་པའི་ཕྱིར་རོ། །བློ་ནི་ཤེས་པ་ཡིན་ལ་གསལ་བ་ཉིད་ཅེས་པར་གང་བརྗོད་པ་དེ་ཡང་གང་གིས་ཤེས་ནས་ཏེ་གོ་བར་བྱས་ནས། བརྗོད་ཅེས་གཞན་ལ་དྲིས་པ་ཡིན་ཏེ། འདིར་ཡང་བློ་རྟོགས་པར་བྱེད་པའི་རྒྱུ་མཚན་ཅུང་ཟད་ཀྱང་ཡོད་པ་མ་ཡིན་ནོ་ཞེས་པའི་སྒྲ་ནི་མི་སྲིད་པ་སྟོན་པར་བྱེད་པ་ཡིན་ནོ། །རེ་ཞིག་ཤེས་པ་སྔ་མས་ནི་དེ་རྟོགས་པ་མ་ཡིན་ཏེ། དེའི་དུས་ན་མ་སྐྱེས་པའི་ཕྱིར་དེ་མེད་པས་སོ། །དུས་ཕྱིས་འབྱུང་བས་ཀྱང་མ་ཡིན་ཏེ། དེའི་ཚེ་སྐད་ཅིག་མ་ཡིན་པ་ཉིད་ཀྱིས་གཟུང་བར་བྱ་བ་འདས་པའི་ཕྱིར་རོ། །དེ་དང་དུས་མཉམ་པར་གྱུར་པས་ཀྱང་མ་ཡིན་ཏེ། དེས་དེ་ལ་ཕན་མི་འདོགས་པའི་ཕྱིར་ལ། ཕན་མི་འདོགས་པ་ཡང་ཡུལ་གྱི་དངོས་པོ་མ་ཡིན་ཏེ། རྒྱུ་མ་ཡིན་པ་ནི་ཡུལ་མ་ཡིན་ནོ་ཞེས་པའི་ཚིག་གིས་སོ། །རང་གིས་ཀྱང་མ་ཡིན་ཏེ་དེ་ཉིད་ལ་ལོག་པར་རྟོགས་པས་དེ་ཇི་ལྟར་དེས་རྟོགས་ཞེས་མི་ཤེས་སོ། །རྣམ་པ་ཐམས་ཅད་དུ་བློས་མ་རྟོགས་པ་དེའི་རང་རིག་པ་ཤིན་ཏུ་ཡང་མི་རིགས་སོ་ཞེས། གསལ་བའམ་ཞེས་པ་ལ་སོགས་པ་གསུངས་ཏེ། གསལ་བའམ་སྟེ། མར་མེ་བཞིན་དུ་གསལ་བའི་བདག་ཉིད་དམ། མི་གསལ་བ་ནི་བུམ་པ་བཞིན་དུ་མི་གསལ་བ་མ་ཡིན་ལ། ཕན་ཚུན་བསྡུ་བའི་ཕྱིར་འམ་གྱི་སྒྲ་གཉིས་སོ། །བློ་ནི་གང་ཆེ་སུས་ཀྱང་མཐོང་བ་མེད་པ་སྟེ། རྟོགས་པ་པོ་འགའ་ཡང་མེད་ལ་རྟོགས་པ་ཅུང་ཟད་ཀྱང་མེད་དེ་རང་དང་གཞན་གཉི་གས་ཀྱང་མ་ཡིན་ནོ། །གང་ཚེ་ཞེས་པའི་ཚིག་གིས་དེ་ཚེ་ཞེས་པ་འདྲེན་པར་བྱེད་དེ། དེའི་ཚེ་མོ་གཤམ་ནི་མི་སྐྱེ་བའི་ཆོས་ཅན་གྱི་བུད་མེད་ཡིན་ལ། དེའི་བུ་མོའི་རོལ་པ་ནི་སྒེག་པ་ཉིད་ཡིན་ཏེ། དེ་བཞིན་དུ་བརྗོད་ཀྱང་སྟེ་བསྟན་ཀྱང་ངོ༌། །དེ་དོན་མེད་པ་ནི་སྟེ་དོན་དང་བྲལ་བའོ། །མོ་གཤམ་གྱི་བུ་མོ་མེད་པ་ཉིད་ཀྱིས་མ་རྟོགས་པའི་ཕྱིར་དེའི་རོལ་པ་ཤིན་ཏུ་ཡང་མི་རྟོགས་པ་ཡིན་ནོ། །ཡང་ན་མ་སྐྱེས་པ་དང་མ་འགགས་པའི་རང་བཞིན་ཡིན་པས་མོ་གཤམ་གྱི་བུ་མོ་ལྟ་བུ་ནི་བློ་ཡིན་ལ། མ་རྟོགས་པའི་རང་
བཞིན་ཡིན་པས་དེའི་རོལ་པ་དང་འདྲ་སྟེ། རང་རིག་པ་དེས་མ་རྟོགས་པའི་ཕྱིར་དེའི་རྟོགས་པ་ཡང་མེད་དོ། །དེ་ནི་རང་རིག་པ་ཡིན་ལ། དེ་ལྟར་ན་བརྗོད་ཀྱང་རིགས་པ་དང་བྲལ་བའི་ཚིག་ཙམ་གྱིས་དོན་མེད་པ་ནི་བླང་བར་བྱ་བ་མ་ཡིན་པའི་ཕྱིར་དགོས་པ་མེད་པ་ཡིན་ནོ། །དེ་ལྟ་མོད་ཀྱི་འདི་ནི་རིགས་པས་སྟོང་ཞིང་ཚིག་ཙམ་མ་ཡིན་ཏེ། གང་གི་ཕྱིར་འདི་ལ་རིགས་པ་འདི་ཡོད་དོ་ཞེས་བརྗོད་པ། གལ་ཏེ་ཞེས་པ་ལ་སོགས་ཏེ། །གལ་ཏེ་རང་རིག་ཡོད་མིན་ན། །ཞེས་ཏེ། གལ་ཏེ་རང་རིག་པའི་རྣམ་པར་ཤེས་པ་མེད་ཅིང་ཡོད་པ་མ་ཡིན་པ་དེའི་ཚེ་རྣམ་ཤེས་ཇི་ལྟར་དྲན་པར་འགྱུར་ཏེ། རྣམ་པར་ཤེས་པ་ལ་རང་རིག་མེད་པའི་ཕྱིར་དུས་ཕྱིས་དྲན་པར་མི་འགྱུར་ལ། ཉམས་སུ་མ་མྱོང་བ་ནི་དྲན་པར་མི་ནུས་ཏེ། ཧ་ཅང་ཐལ་བར་འགྱུར་བས་སོ། །དེ་ལྟ་བས་ན་ཉམས་སུ་མྱོང་བའི་འབྲས་བུ་དྲན་པ་དུས་ཕྱིས་དམིགས་པའི་ཕྱིར་རང་རིག་པའི་ཤེས་པ་ཡོད་དོ་ཞེས་དཔག་པར་བྱའོ། །འདི་ཡང་སྒྲུབ་པར་བྱེད་པ་ཡིན་པས་འདིས་བསྒྲུབ་པར་བྱ་བ་མ་ཡིན་ཏེ། གང་གི་ཕྱིར་རང་རིག་པའི་འབྲས་བུ་ཉིད་དུ་དྲན་པ་ངེས་པར་འགྱུར་ན། མེ་དང་དུ་བ་བཞིན་དུ་དྲན་པས་རང་རིག་པ་སྒྲུབ་པར་བྱེད་པར་འགྱུར་ཏེ། ཚད་མས་རང་རིག་པ་མ་གྲུབ་ན་དྲན་པ་དེའི་འབྲས་བུར་འཛིན་པ་མ་ཡིན་ཏེ། ཐམས་ཅད་དུ་རྒྱུ་དང་འབྲས་བུ་རྟོགས་པ་ནི་གཉི་ག་རྟོགས་པ་མེད་པ་མ་ཡིན་ནོ། །མིག་ལ་སོགས་པ་ལ་རྣམ་པར་ཤེས་པ་བཞིན་དུ་མ་མཐོང་ཡང་དྲན་པ་དེའི་འབྲས་བུར་ནི་གྲུབ་པ་མ་ཡིན་ཏེ། མིག་མེད་པར་སྔོན་པོ་ལ་སོགས་པའི་ཤེས་པ་མེད་པས་ལྡོག་པའི་སྒོ་ནས་དེའི་འབྲས་བུར་རྗེས་སུ་དཔོག་གོ །དྲན་པ་ནི་རང་རིག་པའི་ཤེས་པ་མེད་ཀྱང་འབྱུང་ངོ་ཞེས་འཆད་པར་འགྱུར་རོ། །དེའི་ཕྱིར་རང་རིག་པའི་འབྲས་བུ་ཉིད་དུ་ངེས་པ་མེད་པར་དྲན་པ་ནི་དེ་མེད་པ་ཡང་འབྱུང་བས་རང་རིག་པ་གྲུབ་པ་མ་ཡིན་ནོ། །དེའི་ཕྱིར་དྲན་པ་ཡང་རྣམ་པར་ཤེས་པ་ཡིན་པའི་ཕྱིར་ཇི་ལྟར་གྲུབ་པར་འགྱུར་ཞེས་བརྗོད་པར་བྱའོ། །རང་ལ་རྟགས་མ་གྲུབ་པར་ནི་གཞན་གྱི་ཤེས་པར་བྱེད་པ་མ་ཡིན་ལ། དྲན་པ་ནི་རང་རིག་པ་ལ་མངོན་སུམ་ཉིད་ཀྱིས་འཛིན་པ་མ་ཡིན་ཏེ། དེ་དང་དེ་བཞིན་ཡིན་པའི་ཕྱིར་རོ། །ཤེས་པ་ནི་ཤེས་པ་གཞན་གྱི་ཡུལ་མ་ཡིན་ཏེ་ཕྱི་རོལ་གྱི་དོན་བཞིན་དུ་འབྲེལ་པ་མ་
གྲུབ་པ་ལ་སོགས་པའི་ཉེས་པར་འགྱུར་བས་སོ། །གཞན་ཉིད་དུ་ཁྱད་པར་མེད་པས་རྒྱུ་གཞན་གྱི་དངོས་པོ་དེ་ཡང་དྲན་པས་འཛིན་པར་འགྱུར་རོ། །འོན་ཏེ་དེས་སྔར་ཉམས་སུ་མ་མྱོང་བས་ན་དྲན་པར་མི་འགྱུར་རོ་ཞེ་ན། རྒྱུད་གཅིག་ཏུ་གྱུར་པ་ཡང་སྔར་ཉམས་སུ་མ་མྱོང་བའི་ཐལ་བར་འགྱུར་པ་མཚུངས་སོ། །རྒྱུ་དང་འབྲས་བུ་ན་ཡང་དེ་ལ་ངེས་བྱེད་རིགས་པ་མ་ཡིན་ཏེ། དོན་དམ་པར་རྒྱུད་དང་འབྲས་བུ་ཉིད་མེད་པའི་ཕྱིར་རོ། །ཤེས་པ་ཐམས་ཅད་ལ་དེ་ཡོད་ཀྱང་རང་ཉིད་རྟོགས་པ་ལ་མཐར་ཐུག་པ་ཡིན་པའི་ཕྱིར་དང༌། དེ་འཛིན་པར་མི་ནུས་པའི་ཕྱིར་རོ། །ཇི་ལྟར་ཐ་སྙད་ཁས་བླངས་པ་ན་བརྟགས་པ་ཉིད་ཡིན་ཏེ། བརྟགས་པ་ཉིད་ཡིན་པ་ན་ཡང་ཐ་སྙད་ཐམས་ཅད་རྟོགས་པས་སྤྲུལ་པ་ཡིན་པའི་ཕྱིར་ཀུན་རྫོབ་བསྒྲུབ་བྱ་ཡིན་པས་དོན་དམ་པ་མ་བསྒྲུབས་པར་འགྱུར་རོ། །དེ་ལྟར་དྲན་པས་རང་རིག་པ་གྲུབ་པ་མ་ཡིན་ནོ། །ཇི་ལྟར་ཁྱེད་ལ་ཡང་རང་རིག་པ་མེད་པར་དྲན་པ་ཇི་ལྟར་འགྲུབ་ཅེ་ན། གཞན་མྱོང་བ་ན་འབྲེལ་པ་ལས་ཞེས་པ་ལ་སོགས་པ་གསུངས་ཏེ། འདིར་ཤེས་པ་ལས་གཞན་གཟུང་བར་བྱ་བའི་དངོས་པོ་ཡུལ་དུ་གྱུར་བ་ཉམས་སུ་མྱོང་བ་ནི་ཤེས་པ་ལ་དྲན་པ་སྐྱེ་བར་འགྱུར་རོ། །གཞན་མྱོང་བས་གཞན་དྲན་པ་ནི་རིགས་པ་མ་ཡིན་ཏེ། ཤིན་ཏུ་ཐལ་བར་འགྱུར་པའི་ཕྱིར་རོ་ཞེ་ན། འབྲེལ་པ་ལས་ཞེས་གསུངས་ཏེ། ཡུལ་དྲན་པ་ན་འབྲེལ་པ་ལས་ཤེས་པ་དྲན་པར་འགྱུར་རོ། །རྣམ་པར་ཤེས་པ་ཡང་དེའི་འཛིན་པ་ཉིད་ཡིན་པས་དེ་དང་འབྲེལ་པ་ཡིན་ཏེ། དེའི་ཕྱིར་རྣམ་པར་ཤེས་པ་དྲན་པ་ཡིན་ཏེ་གཞན་དུ་མ་ཡིན་ནོ། །འབྲེལ་པ་བདེན་ཡང་འདི་མ་མྱོང་ན་གཞན་དྲན་པ་ནི་བསླད་པའི་དྲན་པར་འགྱུར་རོ་ཞེ་ན། མ་ཡིན་ཏེ། སྔར་ཉམས་སུ་མྱོང་བའི་ཡུལ་ཕྱིས་རྗེས་སུ་དྲན་པ་ན་མྱོང་བ་ཁྱད་པར་ཅན་དེ་ཉིད་དྲན་པ་ཡིན་ཏེ། དེས་ཁྱད་པར་དུ་བྱས་པ་དེ་འཛིན་པའི་ཕྱིར་རོ། །ཤེས་པ་ཉིད་ཡུལ་ཉམས་སུ་མྱོང་བ་ཡིན་ལ་གཞན་མ་ཡིན་པའི་ཕྱིར་ཡུལ་ཉམས་སུ་མྱོང་བ་དྲན་པ་ལས་དེ་དང་འབྲེལ་པས་ཤེས་པ་དྲན་པར་བརྗོད་པར་བྱའོ། །ཡུལ་སྤངས་པའི་ཤེས་པ་ཉིད་འབའ་ཞིག་ནི་དྲན་པ་མ་ཡིན་པའི་ཕྱིར་ཉེས་པ་མེད་དོ། །ཅི་སྟེ་མྱོང་བའི་ཤེས་པས་གཞག་པའི་དྲན་པས་བག་ཆགས་ཀྱི་ས་བོན་མེད་པར་ཕྱིས་དྲན་
པ་སྐྱེད་པ་ཇི་ལྟ་བུ་ཞེ་ན། བྱི་བའི་དུག་ཅེས་གསུངས་ཏེ། བྱི་བའི་དུག་ནི་ཇི་ལྟར་འབྲེལ་པར་ཕྱིས་སྐྱེ་བར་འགྱུར་པ་དེ་བཞིན་དུ་དྲན་པ་ཡང་ཡིན་ནོ་ཞེས་པའི་དོན་ཏོ། །འདི་ལྟར་བྱི་བའི་དུག་སྐད་ཅིག་མ་གཅིག་ལ་ལུས་ལ་འཕོས་ནས་ཡང་དུས་གཞན་དུ་འབྲུག་གི་སྒྲའི་རྐྱེན་དང་ཕྲད་པ་ལས་རང་རིག་པས་གཞག་པའི་དྲན་པའི་བག་ཆགས་ཀྱི་ས་བོན་མེད་པར་ཡང་རྐྱེན་དང་ཕྲད་པ་ཉིད་ཀྱི་ཕྱིར་སྐད་ཅིག་མ་གཞན་དུ་རྣམ་པར་འགྱུར་བ་ཐོབ་སྟེ། དེ་བཞིན་དུ་སྐབས་སུ་བབ་པ་ལ་ཡང་སྐྱོན་མེད་དོ་ཞེས་དགོངས་སོ། །སླར་ཡང་རྣམ་པར་ཤེས་པ་ཙམ་དུ་སྨྲ་བས་རང་རིག་པ་གྲུབ་པར་བྱ་བའི་ཆེད་དུ་རྣམ་པ་གཞན་བསྟན་པའི་ཕྱིར་རྐྱེན་གཞན་དག་དང་ཞེས་པ་ལ་སོགས་པ་གསུངས་ཏེ། རྐྱེན་གཞན་ནི་དུས་གཞན་ཡིན་ཏེ། ལྟ་བའི་རིག་པ་ལ་སོགས་པ་དང་གཞན་གྱི་སེམས་ཤེས་པ་ལ་སོགས་པའི་མངོན་པར་ཤེས་པ་དག་དང་ལྡན་པས་དེའི་ཚོགས་པ་དང་འབྲེལ་པའི་སེམས་མཐོང་བའི་ཕྱིར་ཏེ། སྣང་བའི་ཕྱིར་རྣམ་པར་ཤེས་པ་རང་ཉིད་གསལ་ཏེ་རང་བཞིན་གསལ་ཞིང་རིག་པ་ཡོད་དོ་ཞེས་པའི་དོན་ཏོ། །གལ་ཏེ་ཡང་དེ་ཐམས་ཅད་དུ་ལྐོག་ཏུ་གྱུར་པའི་རང་བཞིན་ཡིན་ན་ཇི་ལྟར་ཚོགས་པའི་ཁྱད་པར་ལས་བརྒྱ་ལ་ཡང་དམིགས་པ་མ་ཡིན་ཏེ། དེའི་ཕྱིར་དཔེར་ན་ཚོགས་པའི་ཁྱད་པར་ལས་གཞན་གྱི་སེམས་དམིགས་པ་དེ་བཞིན་དུ་དེ་མ་ཐག་པའི་རྐྱེན་དང་དམིགས་པའི་རྐྱེན་ལ་སོགས་པ་ལས་རང་གི་སེམས་ཀྱང་དམིགས་པ་ཡིན་ནོ་ཞེས་བསམས་པའོ། །འདིས་ཀྱང་ཤེས་པའི་རིག་པ་སྒྲུབ་པ་མ་ཡིན་ནོ་ཞེས་བསྟན་པའི་ཕྱིར་གྲུབ་པའི་མིག་སྨན་ཞེས་པ་ལ་སོགས་པ་གསུངས་ཏེ། གྲུབ་པ་ཡང་ཡིན་ལ་མིག་སྨན་ཡང་ཡིན་པས་གྲུབ་པའི་མིག་སྨན་ནོ། །དེའི་སྦྱོར་བ་ནི་རྣམ་པར་སྦྱོར་བའམ་རབ་ཏུ་སྦྱོར་བའོ། །དེ་ལས་མཐོང་བ་ནི་བུམ་པའམ་གཏེར་ལ་སོགས་པ་ཡིན་ལ། དེ་འདི་ལྟར་མིག་སྨན་ཉིད་འགྱུར་མིན་ཏེ། བུམ་པ་ལ་སོགས་པ་མིག་སྨན་དུ་འགྱུར་བ་མ་ཡིན་ལ། གང་ལས་རྟོགས་པ་དེ་དེར་འགྱུར་བ་ནི་མ་ཡིན་ཏེ། དེ་བཞིན་དུ་ལྟ་བ་པོའི་རིགས་པ་ལ་སོགས་པ་དང་ལྷན་ཅིག་པའི་ཤེས་པས་གཞན་གྱི་སེམས་བུམ་པ་ལ་སོགས་ལྟར་མཐོང་ན་རེ་ཞིག་དེ་རིགས་པར་གྲུབ་པར་མི་འགྱུར་ཏེ། དེ་ལྟ་བས་ན་འདི་ནི་བསྒྲུབ་བྱ་ལ་མ་ཁོ་བའི་སྒྲུབ་
པར་བྱེད་པ་མ་ཡིན་ནོ། །གལ་ཏེ་ཤེས་པ་རིག་པའི་ངོ་བོར་མ་གྱུར་ན་དོན་ཡང་རྟོགས་པར་མི་འགྱུར་བ་མ་ཡིན་ན་མ་ཤེས་པ་ནི་མི་གསལ་བ་གསལ་བར་བྱེད་པའི་ཕྱིར་ཏེ་དོན་ནི་གསལ་བ་མ་ཡིན་ལ། དེ་མ་རྟོགས་པ་ལ་དོན་ཅི་ལྟར་རྟོགས་པར་འགྱུར་ཏེ། འདི་ལྟར་རང་རིག་པ་བཀག་པའི་ཕྱིར་དང༌། གཞན་གྱིས་གཞན་འཛིན་པ་ཡང་མི་རིགས་པའི་ཕྱིར་ཕྱི་མ་ཕྱི་མས་འཛིན་པར་ཁས་བླངས་པ་ན་ཡང་མ་རྟོགས་པ་རྟོགས་པར་བྱ་བའི་ཆེད་དུ་ཤེས་པ་གཞན་དོན་དུ་གཉེར་བས་ཐུག་པ་མེད་པར་ཐལ་བར་འགྱུར་བའི་ཡང་ཕྱིར་ཇི་ལྟར་ཡང་དོན་རྟོགས་པ་མ་ཡིན་ཏེ། དེས་ན་གང་གཞན་མྱོང་བ་ལ་སོགས་པ་ཞེས་བརྗོད་པ་དེ་རིགས་པ་མ་ཡིན་ཏེ། དོན་ཉམས་སུ་མྱོང་བ་མེད་པའི་ཕྱིར་འཇིག་རྟེན་ན་མཐོང་བའི་ཐ་སྙད་འདི་ཐམས་ཅད་མེད་པར་འགྱུར་རོ་ཞེ་ན། ཇི་ལྟར་མཐོང་ཐོས་ཞེས་པ་ལ་སོགས་པ་གསུངས་ཏེ། གང་མཐོང་བ་ལ་སོགས་པའི་ཐ་སྙད་མེད་པར་འགྱུར་རོ་ཞེས་པ་དེ་དོན་དམ་པའམ། ཀུན་རྫོབ་ཏུ་མེད་པར་འགྱུར། དེ་ལ་གལ་ཏེ་དོན་དམ་པར་མེད་པར་འགྱུར་རོ་ཞེས་བརྗོད་ན་དེའི་ཚེ་འདི་ནི་བདག་འདོད་པ་མ་ཡིན་ཏེ། ཀུན་རྫོབ་ཏུ་དོན་དམ་པ་ལ་དཔྱད་པ་འཇུག་པ་ཡོད་པ་མ་ཡིན་ནོ། །འོན་ཏེ་འཇིག་རྟེན་གྱི་གྲགས་པས་ཡིན་ན་དེའི་ཚེ། ཇི་ལྟར་མཐོང་ཐོས་ཤེས་པ་ཀུན། །འདིར་ནི་དགག་པ་བྱ་མིན་ཏེ། །ཞེས་སོ། །ཇི་ལྟར་མཐོང་བ་ཞེས་མིག་ལ་སོགས་པའི་ཤེས་པས་མངོན་སུམ་དུ་མཐོང་བ་ཡིན་ལ། ཐོས་པ་ཞེས་པ་ནི་གང་ཟག་གཞན་ལས་དང་ལུང་ལས་སོ། །ཤེས་པ་ཞེས་པ་ནི་ཚུལ་གསུམ་པའི་རྟགས་ལས་སྐྱེས་པའི་རྗེས་སུ་དཔག་པར་ངེས་པའོ། །དེ་ཉིད་འདིར་ཐ་སྙད་ཐམས་ཅད་ལ་བརྟེན་ཏེ་དགག་པར་བྱ་མིན་ཞེས་པ་མི་བཟློག་པའོ། །གང་ཇི་ལྟར་འཇིག་རྟེན་ན་རབ་ཏུ་གྲགས་པ་དེ་དེ་བཞིན་ཉིད་དུ་མ་དཔྱད་པའི་ངོ་བོ་ཁས་བླངས་ནས་འཇིག་རྟེན་ན་གྲགས་པ་ཡིན་ཏེ་དོན་དམ་པ་ནི་མ་ཡིན་ནོ། །དེས་ན་ཤེས་པའི་རིག་པ་མེད་པས་དོན་རྟོགས་པ་ལ་སོགས་པ་མེད་ཅེས་པའི་ཉེས་པ་དོན་དམ་པའི་ཕྱོགས་སྨྲ་བ་ལ་འདིར་གླགས་མི་རྙེད་དོ། །གལ་ཏེ་དེ་དེ་བཞིན་དུ་ཁས་ལེན་པ་ན་དེ་ཁོ་ན་ཇི་ལྟ་བུ་ཞིག་འགགས་ཤེ་ན། འདིར་ནི་སྡུག་བསྔལ་ཞེས་པ་ལ་སོགས་པ་གསུངས་ཏེ། བདེན་པ་ནི་དོན་
དམ་པ་ཡིན་ཏེ་རྟོགས་པས་སྒྲོ་བཏགས་པ་མ་ཡིན་པ་ཡང་ཞེས་པའི་དོན་ནི་སླར་གྱི་དོན་ཏོ། །དེ་ཡང་འདིར་སྤྱོད་པའམ་གྲུབ་མཐའ་བཟློག་པར་བྱ་བ་ཡིན་ཏེ། དགག་པར་བྱ་བ་ཡིན་ནོ། །ཅིའི་ཕྱིར་ཞེ་ན། སྡུག་བསྔལ་གྱི་ཞེས་ཏེ། འདི་ནི་རྒྱུའི་ཚིག་ཡིན་ལ། གང་གི་ཕྱིར་སྡུག་བསྔལ་གྱི་རྒྱུ་སྟེ་བྱེད་པ་ཡིན་པ་དེའི་ཕྱིར་ཞེས་པའི་དོན་ཏོ། །ཉེ་བར་ལེན་པའི་ཕུང་པོ་རྣམས་ཡོད་པ་དང་མེད་པ་ལ་སོགས་པ་བརྟགས་པས་གཞག་པ་འཇུག་པའི་རྒྱུ་ཉིད་ནི་འཁོར་བ་ཡིན་ཏེ། སྡུག་བསྔལ་ཀུན་འབྱུང་འཇིག་རྟེན་དང༌། །ལྟ་གནས་སྲེད་པའང་དེ་དག་ཉིད། །ཅེས་པའི་ཚིག་ལས་དེ་ལྟར་བདེན་པར་རྟོགས་པ་ནི་སྡུག་བསྔལ་གྱི་རྒྱུ་ཡིན་ནོ། །དེ་ལྟ་བས་ན་འདིར་ནི་བདེན་པ་མ་ཡིན་པའི་འདོགས་པ་རྟོགས་པའི་མངོན་པར་ཞེན་པ་དགག་པ་ཙམ་བཞེད་པ་ཡིན་ལ། དངོས་པོ་ཅུང་ཟད་གཅིག་ནི་འདིར་དགག་པ་མ་ཡིན་ནོ། དེའི་ཕྱིར་དེ་ལྟར་ན་རང་རིག་པའི་ཤེས་པ་ཅུང་ཟད་ཀྱང་རིགས་པ་མ་ཡིན་ཏེ། རྟོགས་བྱ་རྟོགས་བྱེད་རྣམ་པའི་སེམས། །དེ་བཞིན་གཤེགས་པས་གཟིགས་པ་མེད། །གང་དུ་རྟོགས་དང་རྟོགས་བྱེད་པ། །དེ་ལ་བྱང་ཆུབ་སེམས་ཡོད་མིན། །ཞེས་གསུངས་སོ། །གང་དེར་ཅུང་ཟད་བཅོམ་ལྡན་འདས་ཀྱིས་སེམས་ཙམ་ཉིད་དུ་ཡོད་པར་གསུངས་པ་དེ་ཕུང་པོ་དང་སྐྱེ་མཆེད་ལ་སོགས་པ་བཞིན་དུ་དྲང་བའི་དོན་ཉིད་ཡིན་པར་བཤད་པར་འགྱུར་རོ། །ད་ནི་ཞར་ལ་བྱུང་བ་ཡོངས་སུ་རྫོགས་པར་བྱས་ནས། སྐབས་སུ་བབ་པ་ལ་སྦྱར་བའི་ཕྱིར། སེམས་ལས་སྒྱུ་མ་ཞེས་པ་ལ་སོགས་པ་གསུངས་ཏེ། འདི་ལྟར་སེམས་ལས་སྒྱུ་མ་གཞན་ཡིན་པར་འགྱུར་བའམ། གཞན་མ་ཡིན་པར་འགྱུར་བའམ། གཉི་གའི་རང་བཞིན་ཡིན་པའམ། གཉི་གའི་རང་བཞིན་མ་ཡིན་པ་ཞེས་བརྟག་པ་བཞིའོ། །དེ་ལ་རེ་ཞིག་ཕྱོགས་དང་པོ་ནི་མ་ཡིན་ཏེ། སེམས་ལས་གཞན་ཁས་ལེན་ན་ཡང་འགྲོ་བ་སེམས་ཙམ་དུ་འདོད་པའི་གྲུབ་མཐའ་དང་འགལ་བར་འགྱུར་རོ། །རྣམ་པར་རྟོག་པ་གཉིས་པ་ལ་ཡང་གང་གི་ཚེ། ཁྱོད་ལ་སྒྱུ་མ་ཉིད་མེད་ན། །ཞེས་པ་ལ་སོགས་པ་བསྟན་པ་ཉིད་ཀྱིས་ཉེས་པ་ཡོད་དོ། །རྣམ་པ་གསུམ་པ་ཡང་མི་འཐད་དོ། །གཅིག་ལ་ཕན་ཚུན་འགལ་བ་མི་སྲིད་པའི་ཕྱིར་རོ། །འོན་ཏེ་བརྟག་པ་བཞི་པ་ཡིན་ན་དེ་ཡང་འབྲེལ་པ་མ་ཡིན་ལ། དེ་ཉེ་
བར་བཟུང་ནས་བརྗོད་པར་བྱ་སྟེ། སེམས་ལས་སྒྱུ་མ་གཞན་མིན་ཞིང༌། །ཞེས་པས་གཞན་ཉིད་འགེགས་སོ། །འོ་ན་གཞན་མ་ཡིན་པ་ཡང་ཡིན་ནོ་ཞེ་ན། གཞན་མིན་པར་ཡང་མི་རྟག་ན། །ཞེས་ཏེ། དེ་ཉིད་ཡིན་པའང་འགེགས་པ་ཡིན་ལ། དེ་ལྟར་ན་གཉི་ག་བཀག་པའི་ཕྱོགས་ཡིན་ནོ་ཞེས་རྟོག་ཅིང་རྣམ་པ་གཞན་བྱེད་ན། དེ་ཡང་རིགས་པ་མ་ཡིན་ཏེ། ཕན་ཚུན་སྤངས་པ་དང་ལྡན་པ་ནི་གཅིག་བཀག་པ་གཅིག་བསྒྲུབ་པ་མེད་ན་མི་འབྱུང་བ་ཡིན་པའི་ཕྱིར་ཏེ། དེ་དག་གཅིག་ལ་མི་སྲིད་པའི་ཕྱིར་བརྟག་པ་བཞི་པ་ཡང་མི་འཐད་དོ། །ཡང་དངོས་ན་ཞེས་ཏེ་གལ་ཏེ་སྒྱུ་མ་དེ་དངོས་པོ་ཡིན་ན། ཇི་ལྟར་དེ་གཞན་མིན་ཏེ་སེམས་ལས་གཞན་དུ་མི་འགྱུར། འོན་ཏེ་གལ་ཏེ་གཞན་མིན་ཞེ་ན། སེམས་ཉིད་སྒྱུ་མ་ཡིན་ཏེ། དེའི་ཚེ་དངོས་པོར་མེད་དེ། དོན་དམ་པར་ཡོད་པ་མ་ཡིན་པ་དེ་ལ་སྟེ་དེའི་རང་བཞིན་ཡིན་པའི་ཕྱིར་རོ། །སེམས་འབའ་ཞིག་ཡིན་པ་ཞེས་པ་འདི་ཉིད་འོངས་པ་ཡིན་ཏེ། གང་ཚེ་ཁྱོད་ལ་སྒྱུ་མ་ཉིད། །མེད་ན་དེ་ཚེ་ཅི་ཞིག་དམིགས། །ཞེས་གསུངས་པ་ཡིན་ནོ། །ད་ནི་སྐབས་སུ་བབ་པའི་བསྒྲུབ་བྱ་བྱ་བསྒྲུབས་ནས་མཇུག་བསྡུ་བའི་ཕྱིར། ཇི་ལྟར་སྒྱུ་མ་ཡོད་མིན་ཡང༌། །ཞེས་པ་ལ་སོགས་པ་གསུངས་ཏེ། དམིགས་པར་བྱ་བའི་སྒྱུ་མ་གླང་པོ་ཆེ་ལ་སོགས་པ་ལྟར་དངོས་པོ་མེད་པའམ་མེད་པའི་རང་བཞིན་ཡིན་པ་སྟེ། དེ་ལྟ་བུ་ཡང་ཇི་ལྟར་བལྟ་བྱ་སྟེ་མཐོང་བའི་ཡུལ་སྒྱུ་མ་ཡིན་པ་ལྟར་དེ་བཞིན་ལྟ་བྱེད་ཡིན་ཀྱང་ཡིན་ཏེ། མེད་པའི་སྒྱུ་མ་དེ་ཉིད་བལྟ་བར་བྱ་བ་དང༌། ལྟ་བ་དེ་བཞིན་དུ་ཡིད་ཡིན་ཏེ། དོན་དམ་པར་མེད་པའི་རང་བཞིན་ཡིན་ན་ཡང་མཐོང་བའི་ནུས་པར་འགྱུར་རོ། །དེས་ན། གང་ཚེ་འཁྲུལ་པའང་ཡོད་མིན་ན། །ཞེས་པ་ལ་སོགས་པ་ཕ་རོལ་གྱིས་གང་བརྗོད་པ་དེས་བསྒྲུབ་པར་བྱ་བ་མཇུག་བསྡུས་ནས་བསྟན་ཏོ། །གཞན་ཡང་རྣམ་པ་གཞན་གྱི་དོན་དམ་པར་ཡོད་པའི་རྣམ་པར་ཤེས་པ་བསྒྲུབ་པའི་ཆེད་དུ་གཞན་གྱིས་འབད་པའི་བསམ་པས། གལ་ཏེ་འཁོར་བ་དངོས་རྟེན་ཅན། །ཞེས་སྨྲས་ཏེ། འདི་ལྟར་ཀུན་ནས་ཉོན་མོངས་པ་དང་རྣམ་པར་བྱང་བ་དོར་བར་བྱ་བ་དང་བླང་བར་བྱ་བ་ཉིད་ཀྱིས་འདི་གཉིས་ཡིན་པར་ཇི་ལྟ་བ་བཞིན་དུ་རྟོགས་པར་བྱ་སྟེ། དེ་ལ་འདོད་ཆགས་ལ་སོགས་པའི་དྲི་མས་བསྒྲིབས་
པའི་སེམས་ལ་ཀུན་ནས་ཉོན་མོངས་པ་ཞེས་བརྗོད་ལ། དེ་ཡང་ཡང་དག་པ་མ་ཡིན་པའི་སྒྲོ་བཏགས་པའི་སྟོབས་ཀྱིས་བསྐྱེད་པའི་ཕྱིར་གློ་བུར་བའི་སེམས་ལ་བརྟེན་ནས་འཇུག་གོ །དེ་ལས་བྱུང་བའི་ལས་དང་སྐྱེ་བ་བརྒྱུད་པ་ལས་བྱུང་བའི་འཁོར་བ་སྐྱེ་བར་འགྱུར་ཏེ། དེ་ཉིད་སེམས་ཡིན་ཏེ་དོན་དམ་པར་རང་བཞིན་གྱིས་འོད་གསལ་བ་གློ་བུར་མ་ཡིན་པ་ཡང་དག་པ་མ་ཡིན་པའི་ཀུན་ཏུ་རྟོག་པ་ལས་བྱུང་བ། གཟུང་བ་དང་འཛིན་པ་ལ་སོགས་པ་གཉིས་སུ་སྒྲོ་འདོགས་པའི་མངོན་པར་ཞེན་པའི་བག་ཆགས་ཀྱིས་སྟོང་པ་གཉིས་སུ་མེད་པའི་རང་བཞིན་གློ་བུར་བའི་ཉེས་པ་ལས་གྲོལ་བ་གནས་གྱུར་པ་ལ་རྣམ་པར་བྱང་བ་ཞེས་བརྗོད་དོ། །དེའི་ཕྱིར་དེ་ལྟར་ན་ཀུན་ནས་ཉོན་མོངས་པ་དང་རྣམ་པར་བྱང་བ་དག་ཡོད་པར་གྱུར་པའི་དངོས་པོའི་སེམས་མེད་པར་རྣམ་པར་གཞག་པ་མི་འཐད་དོ་ཞེས་སེམས་ཏེ། འཁོར་བ་དང་མྱ་ངན་ལས་འདས་པ་ཡང་སེམས་ཀྱི་ཆོས་ཡིན་པའི་ཕྱིར་ལ། སེམས་ཉིད་ཀུན་ནས་ཉོན་མོངས་ཤིང་སེམས་ཉིད་རྣམ་པར་བྱང་བའོ་ཞེས་པའི་ཚིག་ལས་སོ། །དེ་ལྟར་ན་འདི་ནི་གཞན་གྱི་འདོད་པར་ངེས་པར་བྱེད་པ་ཡིན་ཏེ། དངོས་པོ་ཉིད་ཡང་དག་པར་གྱུར་པའི་དངོས་པོའི་སེམས་ཉིད་ལ་བརྟེན་པ་གང་ཡིན་པ་ཞེས། གལ་ཏེ་ཞེས་ཏེ་དངོས་རྟེན་པ། །ཞེས་འཁོར་བ་རྣམ་པར་འཇིག་པར་བྱེད་དོ་ཞེ་ན། དེའི་ཚེ་འཁོར་བ་གཞན་དུ་འགྱུར་ཏེ། སེམས་ལས་གཞན་ཡིན་པར་འགྱུར་རོ། །དངོས་པོ་ལས་གཞན་ཡིན་ན་དངོས་པོ་མེད་པར་འགྱུར་ཏེ། སེམས་ཉིད་དངོས་པོ་ཡིན་པའི་ཕྱིར་རོ། །ཅི་ལྟ་བུ་ཞེ་ན། མཁའ་འདྲར་ཏེ་ནམ་མཁའ་བཞིན་དུའོ། །འདི་སྐད་དུ་གང་འདི་སེམས་ལ་རྟེན་པ་ལ་འཁོར་བ་ཞེས་བརྗོད་ན་དེ་ཅི་དངོས་པོ་ཡིན་ནམ་དངོས་པོ་མེད་པ་ཡིན། དངོས་པོ་ཡིན་ན་ཡང་སེམས་ཡིན་ནམ་དེ་ལས་གཞན་ཡིན། དེ་ལ་གལ་ཏེ་དངོས་པོ་སེམས་ཉིད་ཡིན་ན་དེའི་ཚེ་སེམས་ལས་འཁོར་བ་གཞན་མ་ཡིན་ཏེ། དེ་ལ་བརྟེན་པ་ནི་སེམས་ཉིད་ཡིན་ནོ། །སེམས་དེ་ཡང་རང་བཞིན་གྱིས་འོད་གསལ་བ་ཡིན་པའི་ཕྱིར་རྣམ་པར་བྱང་བའི་རང་བཞིན་ཡིན་པས་སྤང་བར་བྱ་བ་མ་ཡིན་ལ། འོན་ཏེ་སེམས་ལས་གཞན་ཡིན་ན་དེའི་ཚེ་སེམས་ལས་ཐ་དད་པ་གཞན་ཁས་བླངས་པས་གྲུབ་མཐའ་ཉམས་པ་ཡིན་ནོ། །འོན་ཏེ་དངོས་པོ་
མེད་པ་ཡིན་ན་དེའི་ཚེ་འཁོར་བ་ཞེས་པ་ཅུང་ཟད་ཀྱང་ཡོད་པ་མ་ཡིན་ཏེ། རི་བོང་གི་རྭ་བཞིན་ནོ། །དེ་ཉིད་ཀྱི་ཕྱིར་མཁའ་འདྲར་འགྱུར། །ཞེས་གསུངས་ཏེ། དཔེར་ན་ནམ་མཁའ་རྟགས་སུ་ཡོད་པ་ཙམ་ནི་མེད་པའི་དངོས་པོས་ཅུང་ཟད་ཀྱང་དོན་བྱེད་ནུས་པ་ཡོད་པ་མ་ཡིན་ཏེ། དེ་བཞིན་དུ་ཁྱེད་ཀྱི་འཁོར་བ་ཡང་ཡིན་པར་འགྱུར་རོ། །ཡང་ན་མཁའ་འདྲར་འགྱུར་ཞེས་པ་ནི་རང་བཞིན་མེད་པ་ཡིན་པའི་ཕྱིར་ཁོ་བོ་ཅག་གི་གྲུབ་པའི་མཐར་ཞུགས་པ་ཡིན་ནོ་ཞེས་བརྗོད་པར་འགྱུར་རོ། །དེ་ལྟ་ཡིན་ན་ཡང་གལ་ཏེ་ཡང་དངོས་པོ་ཡིན་དུ་ཆུག་མོད། དེ་ལྟ་ན་ཡང་ཡོད་པའི་དངོས་པོར་གྱུར་པའི་སེམས་ལ་བརྟེན་པས་དེ་དོན་བྱེད་ནུས་པར་འགྱུར་རོ་ཞེ་ན། དངོས་མེད་དངོས་ལ་བརྟེན་པས་ཞེས་པ་ལ་སོགས་པ་གསུངས་ཏེ། མེད་པའི་རང་བཞིན་ནི་འགའ་ཞིག་ལ་ཡང་བརྟེན་པར་རིགས་པ་མ་ཡིན་ཏེ། རྟེན་དང་བརྟེན་པའི་དངོས་པོ་ནི་རྒྱུ་དང་འབྲས་བུའི་ངོ་བོ་ཡིན་པའི་ཕྱིར་རོ། །དངོས་པོ་མེད་པ་ནི་གང་གི་ཡང་འབྲས་བུ་མ་ཡིན་ཏེ། བསྐྱེད་པར་བྱ་བ་མ་ཡིན་པར་ཁྱད་པར་མེད་པའི་ཕྱིར་རོ། །དེ་ལྟ་ཡིན་དུ་ཆུག་སྟེ། དེ་ལྟ་ན་ཡང་དངོས་པོ་ལ་བརྟེན་པས་ཏེ། དངོས་པོ་ཡོད་པར་གྱུར་པའི་སེམས་ལ་བརྟེན་པས་དངོས་པོ་མེད་པའི་བདག་ཉིད་བྱེད་པ་དང་ལྡན་པ་དོན་བྱེད་པ་ཉིད་དུ་ཇི་ལྟར་འགྱུར་ཏེ། ནམ་ཡང་རིགས་པ་མ་ཡིན་ནོ་ཞེས་པའི་དོན་ཏོ། །གཞན་དུ་ན་དེ་དངོས་པོ་ཡོད་པར་འགྱུར་ཏེ་ནུས་པ་ནི་དངོས་པོའི་མཚན་ཉིད་ཡིན་ལ། ནུས་པ་ཐམས་ཅད་དང་བྲལ་བ་ནི་དངོས་པོ་མེད་པའི་མཚན་ཉིད་ཡིན་ནོ་ཞེས་པའི་ཚིག་ལས་སོ། །ད་ནི་ཤིན་ཏུ་དཔྱད་པ་ན་ཁྱེད་ལ་ཅི་ཞིག་གནས་པར་འགྱུར་ཞེ་ན། ཁྱོད་ཀྱི་སེམས་ནི་གྲོགས་མེད་པ། །ཞེས་པ་ལ་སོགས་པ་གསུངས་ཏེ། མེད་པ་ཉིད་དངོས་པོ་དང་བྲལ་བ་འདིའི་གྲོགས་ཡིན་པས་གྲོགས་པོ་མེད་པ་ཡིན་ཏེ། ནི་ཞེས་པ་ངེས་པར་གཟུང་བས་སོ། །ཁྱེད་སེམས་གཅིག་པུ་དོན་དམ་པར་སྨྲ་བས་གཅིག་པུ་ཉིད་དེ། གཉིས་མ་ཡིན་པ་ཉིད་ཡིན་ནོ། །ཅི་སྟེ་གཟུང་བ་དང་འཛིན་པའི་རྣམ་པ་དང་བྲལ་བ་གཉིས་སུ་མེད་པའི་མཚན་ཉིད་ཀྱི་སེམས་སུ་བརྗོད་པ། དེ་ལྟར་ན་སེམས་གཅིག་ཉིད་དུ་བསྒྲུབས་པས་ཁོ་བོ་ཅག་ཅུང་ཟད་ཀྱང་མི་འདོད་པ་མ་ཡིན་ནོ་ཞེ་ན། དེ་ནི་
རིགས་པ་མ་ཡིན་ཏེ། ཀུན་ནས་ཉོན་མོངས་པ་སྤང་བའི་ཆེད་དུ་དངོས་པོ་ཉིད་བརྗོད་པ་ཡིན་ལ་དེ་སེམས་གཅིག་པུ་ཉིད་ཡོད་པར་གྱུར་པ་དེ་ལྟ་ན་ཡང་གནོད་པར་བྱེད་པ་ལས་གྲོལ་བ་མ་ཡིན་ནོ་ཞེས། གང་ཚེ་སེམས་ནི་གཟུང་བྲལ་བ། །ཞེས་པ་ལ་སོགས་པ་གསུངས་ཏེ། གཟུང་བ་ཞེས་པ་ནི་ཉེ་བར་མཚོན་པ་ཡིན་ཏེ། འཛིན་པ་ལ་སོགས་པ་དང་བྲལ་བ་ཡང་རིག་པར་བྱའོ། །ཡང་ན་གཟུང་བ་ལ་སོགས་པ་ལ་རག་ལས་པ་ནི་འཛིན་པ་ཡིན་ནོ་ཞེས་པས་དེ་དང་བྲལ་བའི་ཕྱིར་འཛིན་པ་མེད་པ་ཡིན་ལ། འཛིན་པ་མེད་ན་ཡང་དེས་ཉེ་བར་བརྟགས་པའི་མངོན་པར་བརྗོད་པ་མེད་པས་བརྗོད་པར་བྱ་བ་མེད་དོ་ཞེས་བསྟན་པའི་ཕྱིར་གཟུང་བྲལ་བ་ཞེས་བརྗོད་པ་ཡིན་ནོ། །གཟུང་བ་ལ་སོགས་པ་དང་བྲལ་བ་གཉིས་སུ་མེད་པའི་རང་བཞིན་གང་གི་ཚེ་འགྲོ་བ་ཐམས་ཅད་ཀྱི་སེམས་ཡིན་པ་དེའི་ཚེ་དེའི་སེམས་སུ་སེམས་ཅན་ཐམས་ཅད་ཀྱི་རྒྱུད་ནང་དུ་འདུས་པའི་ཕྱིར་འཁོར་བའི་སེམས་ཅན་ཐམས་ཅད་ཀྱིས་དེ་བཞིན་གཤེགས་ཏེ། སངས་རྒྱས་བཅོམ་ལྡན་འདས་ཉིད་ཐོབ་ལ། འགའ་ཡང་སོ་སོའི་སྐྱེ་བོར་མི་འགྱུར་ཏེ། དེའི་ཕྱིར་ཡང་ཀུན་ནས་ཉོན་མོངས་པ་སྤང་བའི་ཆེད་དུ་གཞན་ལམ་བསྒོམ་པ་དོན་མེད་པར་ཐལ་ལ། དེ་ལྟར་ཡང་མ་ཡིན་ཏེ། དེ་ལྟ་བས་ན་གཟུང་བ་དང་འཛིན་པ་དང་བྲལ་བ་ཡོད་ན་ཡང་དངོས་པོ་ལ་མངོན་པར་ཞེན་པ་དེ་བཞིན་དུ་གནས་པས་ཉོན་མོངས་པ་སྤང་བར་མི་འགྱུར་རོ་ཞེས་དགོངས་ནས། དེ་ལྟར་ན་ཡང་ཞེས་པ་ལ་སོགས་པ་གསུངས་ཏེ། དེ་ལྟར་ཞེས་པ་ནི་ཚིག་ཕྲད་སྡུད་པ་ཡིན་ལ་དེ་ལྟར་ཡིན་ན་ཡང་དོན་འདི་ལ་ཡང་ཞེས་ཏེ་འང་གི་དོན་ཏོ། །དེ་ལྟར་ཁས་བླངས་ན་ཡང་ཡོན་ཏན་ཅི་ཞིག་ཡོད་དེ། ཅུང་ཟད་ཀྱང་ཡོད་པ་མ་ཡིན་ཏེ། སེམས་ཙམ་ཞེས་པ་ནི་རྣམ་པར་རིག་པ་ཙམ་ཉིད་དུ་ཡང་བརྟགས་པ་ལ་སྟེ། རྟོག་པས་བརྟགས་པ་ན་གཉིས་སུ་མེད་པའི་དེ་ཁོ་ན་ཉིད་ཡོངས་སུ་ཤེས་པ་དང་འབྲེལ་པ་ཡིན་ན་ཡང༌། སེམས་ཅན་ཐམས་ཅད་ཀྱི་རྒྱུད་ལ་འདོད་ཆགས་ལ་སོགས་པ་ཡོངས་སུ་གནས་པའི་ཕྱིར་རོ། །ཅི་སྟེ་ཁྱེད་དབུ་མར་སྨྲ་བ་དང་ཡང་མཚུངས་པ་ཡིན་ནོ་ཞེས་སྐྱོན་མཚུངས་པ་ཉིད་དུ་བརྗོད་པའི་ཕྱིར། སྒྱུ་མ་ལྟ་བུར་ཤེས་ན་ཡང༌། །ཞེས་པ་ལ་སོགས་པ་སྨོས་ཏེ། སྒྱུ་མ་
སྟེ་སྒྱུ་མའི་རང་བཞིན་ཉིད་དུ་ཡང་འགྲོ་བས་ཤེས་ན། ཇི་ལྟར་ཉོན་མོངས་ལྡོག་འགྱུར་ཏེ། །ཇི་ལྟར་འདོད་ཆགས་ལ་སོགས་པའི་ཉོན་མོངས་པ་སྤོང་བར་འགྱུར་ཞེས་འབྲིའོ། །འདིར་ཉོན་མོངས་པ་སྤོང་བ་ལ་མི་འཐད་པའི་རྒྱུ་ཅི་ཞིག་ཡོད་ཅེས་གང་ཞིག་འདྲི་ན། གང་ཚེ་སྒྱུ་མའི་ཞེས་པ་ལ་སོགས་པ་སྨོས་ཏེ། འདིར་མི་སྤོང་བའི་འཐད་པའི་ས་བོན་མཐོང་སྟེ། གང་གི་ཚེ་སྒྱུ་མའི་བུད་མེད་སྟེ་གང་ཞིག་སྒྱུ་མ་མཁན་གྱིས་སྤྲུལ་པའི་བུད་མེད་ལ་ཆགས་པ་སྟེ། ཞེན་པའི་སེམས་སྐྱེ་སྟེ་འབྱུང་ངོ༌། །དེ་བྱེད་ཉིད་ཀྱང་ངོ་ཞེས་ཏེ། གང་རྨོངས་པར་བྱ་བའི་ཆེད་དུ་དེ་སྤྲུལ་པ་དེ་རྣམས་འབའ་ཞིག་ལ་ནི་སྐྱེ་བ་མ་ཡིན་གྱི། འོན་ཀྱང་སྒྱུ་མའི་བུད་མེད་དེའི་བྱེད་པ་པོ་ལ་ཡང་སྐྱེའོ། །དེ་ལྟར་འདི་ནི་ཀྱང་གི་སྒྲའི་དོན་ཏོ། །གང་གི་ཚེ་གཞན་གྱི་སེམས་འཁྲུལ་པ་བསྐྱེད་པའི་དོན་དུ་ཤིན་ཏུ་དེའི་རྣམ་པར་འཁྲུལ་པ་ལ་མཁས་པའི་སྒྱུ་མ་མཁན་པོ་འགའ་ཞིག་ཡུལ་གྱི་བཟང་མོའི་བུད་མེད་ཉེ་བར་སྟོན་པར་བྱེད་དེ། དེ་ཡང་སྔགས་དང་སྨན་གྱི་མཐུས་སྤྲུལ་པའི་ཡན་ལག་དང་ཉིད་ལག་ཐམས་ཅད་ཀྱི་ཆ་ཤས་ཡོངས་སུ་རྫོགས་པའི་མཚན་ཉིད་ལང་ཚོགས་ར་ལ་བབ་ཅིང་མཛེས་པ་ཕུན་སུམ་ཚོགས་པ་ཡང་དག་པར་རྫོགས་ཤིང་གསལ་ལ་ཡིད་དུ་འོང་བའི་ཁ་དོག་ཅན་འཇམ་ཞིང་མཉེན་པས་མཛེས་པར་གྱུར་པ་སྤྲུལ་པ་མཐོང་བས་དེའི་ཚེ་གཞན་འབའ་ཞིག་ལ་འདོད་པའི་ལྷའི་མདངས་བསྣུན་པའི་སེམས་ཀྱི་སྡུག་བསྔལ་སྐྱེ་བ་ནི་མ་ཡིན་ཏེ། འོན་ཀྱང་བདག་རང་ཉིད་ཀྱིས་འདི་སྤྲུལ་ལོ་ཞེས་དེའི་རང་བཞིན་ལ་མཁས་པ་དེས་ཀྱང་གནོད་པར་བྱ་བའི་མཛེས་པ་ཕུན་སུམ་ཚོགས་པ་འདོད་པའི་བྱ་བ་ལ་མཁས་པའི་ཆགས་པའི་ལུས་མངོན་པར་སྤྲུལ་ཏེ། འདོད་པའི་བྱ་བ་མཆོག་གི་གནས་སྐབས་ཐོབ་པ་ན་དེས་ཇི་ལྟར་ཡང་སེམས་ངེས་པར་གཟུང་བར་མི་ནུས་ན། དེ་ཇི་ལྟར་ན་སྒྱུ་མ་ཉིད་དུ་ངེས་ན་ཡང་འཁོར་བའི་རྒྱུན་གཅོད་པར་འགྱུར་ཞེ་ན། འདི་སྤང་བའི་ཕྱིར་དེ་བྱེད་པ་ནི་ཞེས་པ་ལ་སོགས་པ་གསུངས་ཏེ། ཁོ་བོ་ཅག་ལ་ཉེས་པ་འདིར་ཐལ་བོར་འགྱུར་བ་མ་ཡིན་ཏེ། དེ་བྱེད་པ་ནི་སྒྱུ་མའི་བུད་མེད་སྤྲུལ་པ་པོ་ཡིན་ལ། གང་གི་ཕྱིར་མ་སྤངས་ཤིང་མ་བཟློག་པ་ཡིན་ནོ། །ཅི་ཞིག་མ་སྤངས་ཤེ་ན། ཤེས་བྱ་དང༌། ཉོན་མོངས་བག་ཆགས་
ཏེ། ཤེས་བྱ་དང་ཉོན་མོངས་པའི་རང་བཞིན་དང་བཅས་པར་སྒྲོ་འདོགས་པ་ལས་ཞེན་པ་ལ་སོགས་པའམ། དངོས་པོར་སྒྲོ་བཏགས་པ་ཡིན་ཏེ། ཤེས་བྱའི་སྒྲིབ་པ་ཞེས་པའི་ཐ་ཚིག་གོ །དེའི་དབང་གིས་ཐོག་མ་མེད་པའི་འཁོར་བར་སྐྱེ་བ་བརྒྱུད་པར་གོམས་པ་ལོག་པའི་རྣམ་པར་རྟོག་པ་ལས་བྱུང་བ་དང་དེ་ས་བོན་དུ་གྱུར་བའི་སེམས་ཀྱི་རྒྱུན་གྱིས་འདུས་བྱས་པ་ཡིན་ནོ། །དེ་མ་སྤངས་པའི་ཕྱིར་རོ། །ཅི་སྟེ་ལན་འདི་ནི་རྣམ་པར་ཤེས་པར་སྨྲ་བ་ཙམ་ལ་ཡང་མཚུངས་པ་ཡིན་ཏེ། དེ་ལ་ཡང་གཉིས་སུ་མེད་པའི་དེ་ཁོ་ན་ཉིད་ཡོད་ཀྱང༌། གློ་བུར་བའི་ཉོན་མོངས་པའི་བག་ཆགས་མ་སྤངས་པའི་ཕྱིར་ཐམས་ཅད་དེ་བཞིན་གཤེགས་པར་མི་འགྱུར་རོ་ཞེ་ན། འདི་ནི་མཚུངས་པ་མ་ཡིན་ཏེ། གང་གི་ཕྱིར་མེད་པའི་བདག་ཉིད་ཀྱི་དྲི་མ་ནི་འབྲས་བུའི་ཚོགས་པ་དང་བྲལ་བ་ནི་སྒྲིབ་པར་རིགས་པ་མ་ཡིན་ནོ་ཞེས་བརྗོད་ཟིན་པ་ཉིད་དོ། །ཁོ་བོ་ཅག་ལ་ནི་རང་བཞིན་མེད་པ་ཉིད་བསྐྱེད་པར་བྱ་བ་དང་སྐྱེད་པར་བྱེད་པ་ཡིན་པས་མཚུངས་པ་ཡིན་ཏེ། གང་གི་ཕྱིར་དེ་མ་སྤངས་པ་དེས་ན་རྒྱུ་འདི་ལས་དེ་མཐོང་དུས་ན། དེ་ཤེས་བྱའི་རང་བཞིན་དུ་མཐོང་སྟེ་དམིགས་པ་ཡིན་ལ། དེའི་དུས་ནའམ་སྒྱུ་མའི་བུད་མེད་དེ་མཐོང་བའི་དུས་ན་སྟེ་དམིགས་པའི་དུས་ནའོ། །དེ་ཞེས་པ་ནི་ཉོན་མོངས་པའི་བག་ཆགས་མ་སྤངས་པའི་མཐོང་བ་པོའོ། །སྟོང་པའི་བག་ཆགས་ཉམ་ཆུང་ཞེས་པ་ལ། སྟོང་པ་སྟེ་དངོས་པོའི་དེ་ཁོ་ན་ཉིད་དམ་སྟོང་པ་ཉིད་ཅེས་ཚིག་བསྡུས་ཏེ་སྡེབ་སྦྱོར་གྱི་ངོར་དངོས་པོའི་རྐྱེན་བསུབས་ནས་སྟོང་པ་ཞེས་བསྟན་ཏོ། །བག་ཆགས་ནི་འདུས་བྱས་པས་གཞག་པ་ཡིན་ལ། དེ་ཉམ་ཆུང་བ་ནི་ནུས་པ་དང་བྲལ་བ་ཡིན་ཏེ། བརྟགས་པའི་ངོ་བོ་མཐོང་བའི་ཕྱིར་རོ། །དེའི་ཕྱིར་དེའི་ཚེ་དངོས་པོ་སྟོབས་དང་ལྡན་པ་ཡིན་ནོ། །འོ་ན་ཇི་ལྟར་དེ་བཟློག་པར་འགྱུར་ཞེ་ན། སྟོང་ཉིད་ཅེས་པ་ལ་སོགས་པ་གསུངས་ཏེ། སྟོང་ཉིད་ནི་སྒྱུ་མའི་རང་བཞིན་མེད་པ་ཉིད་ཡིན་ལ། བག་ཆགས་ནི་དེས་གཞག་པའི་ཤུགས་ཡིན་ཏེ། གོམས་པའི་སྟོབས་ཀྱིས་བརྟེན་པར་འགྱུར་ཞེས་པའི་ཐ་ཚིག་གོ །དེས་ན་འགལ་བའི་རྐྱེན་གྱིས་སྤོང་བར་འགྱུར་ཏེ། མེ་དང་ཉེ་བར་གྱུར་བས་གྲང་བའི་རེག་པ་བཞིན་ཟློག་པར་བྱེད་
དེ། ཅི་ཞིག་ཅེ་ན། དངོས་པོའི་བག་ཆགས་ཏེ། ཐོག་མ་མེད་པའི་འཁོར་བ་ནས་གོམས་པས་དངོས་པོར་འཛིན་ཅིང་ཞེན་པ་ནི་བག་ཆགས་ཡིན་ལ། དེ་ཡང་དག་པའི་དོན་ཡིན་པའི་ཕྱིར་དང་དངོས་པོའི་རང་བཞིན་ཡིན་པའི་ཕྱིར་དང༌། གཞན་ནི་བརྫུན་པ་ཡིན་པས་གློ་བུར་བ་ཡིན་པའི་ཕྱིར་རོ། །དངོས་པོ་ལ་མངོན་པར་ཞེན་པའམ། སྟོང་པ་ཉིད་དུ་མངོན་པར་ཞེན་པ་དག་མངོན་པར་ཞེན་པར་ཁྱད་པར་ཅུང་ཟད་ཀྱང་མེད་པ་མ་ཡིན་ནམ། དེ་ཡང་རྟོག་པ་ལས་མ་འདས་པའི་ཕྱིར་ཏེ། གང། སྟོང་ཉིད་ལྟ་བ་ཐམས་ཅད་ལས། །ངེས་པར་འབྱིན་པར་རྒྱལ་བས་གསུངས། །གང་དག་སྟོང་པ་ཉིད་ལྟ་བ། །དེ་དག་གསོ་བྱ་མིན་པར་གསུངས། །ཞེས་གསུངས་པ་ཡིན་ནོ་ཞེ་ན། འདི་སྤང་བར་འདོད་ནས་ཅི་ཡང་མེད་ཅེས་པ་ལ་སོགས་པ་གསུངས་ཏེ། ཅུང་ཟད་ཅེས་པ་ནི་དངོས་པོའམ་སྟོང་པ་ཉིད་དོ། །མེད་པ་ནི་ཡོད་པ་མ་ཡིན་ལ་ཡང་གི་སྒྲ་ནི་སྔ་མ་ལ་ལྟོས་པས་སྡུད་པ་ཡིན་ནོ། །དེའི་ཕྱིར་དེ་ལྟར་གོམས་པས་བག་ཆགས་དེ་སྤངས་པ་ཕྱི་ནས་སྟོང་པ་ཉིད་ཀྱི་བག་ཆགས་ཀྱང་སྤོང་བར་འགྱུར་ཏེ་བཟློག་པར་འགྱུར་རོ། །བསམ་པ་ནི་འདི་ཡིན་ཏེ་སྟོང་པ་ཉིད་རྟོགས་པ་ནི་དངོས་པོ་ལ་མངོན་པར་ཞེན་པའི་གཉེན་པོ་ཡིན་པའི་ཕྱིར་སྤོང་བའི་ཐབས་སུ་གྱུར་པ་ཡིན་ལ། ཐབས་ལས་བྱུང་བ་རྟོགས་ནས་གང་གཟིངས་དང་འདྲ་བ་ཡིན་པའི་ཕྱིར་ཐབས་ཀྱང་ཕྱི་ནས་སྤང་བར་ཉམས་སུ་བླང་ངོ༌། །འདི་ཉིད་གསུངས་པ། རྣམ་རྟོག་ཐམས་ཅད་སྤང་པའི་ཕྱིར། །སྟོང་ཉིད་བདུད་རྩི་བསྟན་པ་ཡིན། །གང་ཞིག་དེ་དུ་འཛིན་པ་ཡང༌། །འདི་ནི་ཁྱེད་ཀྱིས་སྤངས་པ་ལགས། །ཞེས་སོ། །དེ་ལྟར་གྱུར་ན་ཡང་གལ་ཏེ་ཅུང་ཟད་ཀྱང་ཡོད་པ་མ་ཡིན་ནོ་ཞེས་ཡིད་ལ་བྱེད་པ་གོམས་པ་ལས་སྟོང་པ་ཉིད་ཀྱི་བག་ཆགས་སྤོང་བར་འགྱུར་བ་ཡིན་ལ་དེ་ལྟ་ན་ཡང༌། དེ་གོམས་པས་ཡན་དངོས་པོ་མེད་པའི་རྣམ་པར་རྟོག་པ་འཇུག་པ་བཟློག་པར་མི་ནུས་ཏེ། དེས་ན་བླ་བ་བཅུག་པ་ལས་མི་འབྲས་འབྱུང་བ་བཞིན་དུ་ཁྱེད་ཀྱི་ཉེས་པ་དེ་བཞིན་དུ་གནས་པ་ཡིན་ནོ་ཞེ་ན། གང་ཚེ་ཞེས་པ་ལ་སོགས་པ་སྨོས་ཏེ། འདི་ཡང་དཔྱད་ན་གནས་པ་མ་ཡིན་ནོ་ཞེས་སྟོན་པར་བྱེད་དེ། གང་ཞིག་དངོས་པོ་མེད་
དོ་ཞེས་རབ་ཏུ་རྟོག་ཅིང་གང་གིས་དངོས་པོ་འགེགས་པར་བྱེད་ན་དེ་གང་གི་ཚེ་རྟོག་པ་ན་རབ་རིབ་ཅན་གྱིས་མཐོང་བའི་སྐྲའི་དོགས་པ་བཞིན་དུ་རང་བཞིན་མི་རྙེད་དེ། མི་འཐོབ་པོ། དེ་ཚེ་རྟེན་བྲལ་བ་ཞེས་པ་ལ། གང་གི་དངོས་པོ་འདི་ཡོངས་སུ་རྟོག་པ་ན་དེ་དང་འབྲེལ་པའི་དངོས་པོ་མེད་པའི་ཕྱིར་མི་དམིགས་པ་ཡིན་ཏེ། མེད་པ་ཡིན་ནོ། །རྟོག་པས་བསྟན་པའི་ལུས་ཇི་ལྟར་བློའི་མདུན་ན་གནས་ཏེ། ཇི་ལྟར་འདི་བརྟགས་པས་བློའི་མདུན་དུ་སྣང་བར་འགྱུར། དངོས་པོ་རང་ཉིད་ཀྱིས་དངོས་པོ་མེད་པར་ལྡོག་པར་འགྱུར་རོ། །ཡང་ན་གཞན་དུ་བཤད་པར་བྱ་སྟེ། སྟོང་པ་ཉིད་ཀྱི་སྟོབས་ཀྱིས་གཞག་པས་དངོས་པོའི་བག་ཆགས་ལྡོག་ཏུ་ཆུག་ན་ཡང་དེ་ལ་འགེགས་པ་མེད་པའི་ཕྱིར་དངོས་པོ་མེད་པའི་མངོན་པར་ཞེན་པ་གང་གིས་ལྡོག་པར་བྱེད་ཅེ་ན། གང་ཚེ་ཞེས་པ་ལ་སོགས་པ་གསུངས་ཏེ། གཞན་ཐམས་ཅད་ནི་སྔ་མ་བཞིན་ནོ། །འདི་ནི་འདིར་བསྡུས་པའི་དོན་ཡིན་ཏེ། དངོས་པོ་ལ་མངོན་པར་ཞེན་པ་ནི་ཆོས་ཐམས་ཅད་སྟོང་པ་ཉིད་ཀྱིས་སྤོང་བར་བརྗོད་ལ། སྟོང་པ་ཉིད་དེ་ཡང་སྟོང་པ་ཉིད་མངོན་དུ་བྱེད་པ་ལས་ཕྱི་ནས་སྤོང་བར་འགྱུར་རོ། །གང་ཡང་ཇི་ལྟར་ཡང་དངོས་པོར་རྟོག་པ་སྐྱེ་བར་འགྱུར་ན། དེ་ཡང་དེ་མ་ཐག་ཏུ་དཔྱོད་པར་འགྱུར་བས་བཟློག་པར་འགྱུར་ཏེ། དེ་ཉིད་ཀྱི་ཕྱིར་རྣམ་པར་རྟོག་པའི་ཚོགས་དུ་མ་བཟློག་པའི་ཆེད་དུ་བཅོམ་ལྡན་འདས་ཤེས་རབ་ཀྱི་ཕ་རོལ་ཏུ་ཕྱིན་མར་ནང་སྟོང་པ་ཉིད་ལ་སོགས་པ་སྟོང་པ་ཉིད་བཅོ་བརྒྱད་རྒྱས་པར་གསུངས་ཏེ། སྟོང་པ་ཉིད་ནི་དངོས་པོ་ལས་གཞན་མ་ཡིན་ཏེ། དངོས་པོ་ཉིད་དེའི་རང་བཞིན་ཡིན་པའི་ཕྱིར་རོ། །གཞན་དུ་ན་སྟོང་པ་ཉིད་ཆོས་རྣམས་ལས་ཐ་དད་པ་ཡིན་ན། ཆོས་རྣམས་དངོས་པོ་མེད་པར་མི་འགྱུར་ཏེ། དངོས་པོ་མེད་པ་ནི་དེའི་རང་བཞིན་ཡིན་ནོ་ཞེས་སྔར་བསྒྲུབས་པ་ཡིན་ནོ། །འདི་ཡང་ཤེས་རབ་ཀྱི་ཕ་རོལ་ཏུ་ཕྱིན་པ་ལས་གསུངས་པ་གཞན་ཡང་རབ་འབྱོར་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ན་རྣམ་པ་ཐམས་ཅད་མཁྱེན་པ་ཉིད་དང་ལྡན་པ་ཡིད་ལ་བྱེད་པས་འདི་ལྟར་རྟོགས་ཏེ་གཟུགས་ཀྱི་སྟོང་པ་ཉིད་ཀྱིས་གཟུགས་སྟོང་པ་ཉིད་མ་ཡིན་ཏེ་གཟུགས་ཉིད་སྟོང་པའོ། །སྟོང་པ་ཉིད་གཟུགས་སོ། །ཚོར་
བའི་སྟོང་པ་ཉིད་ཀྱིས་ཚོར་བ་སྟོང་པ་མ་ཡིན་ཏེ། ཚོར་བ་ཉིད་སྟོང་པའོ། །སྟོང་པ་ཉིད་ཚོར་བའོ། །འདུ་ཤེས་ཀྱི་སྟོང་པ་ཉིད་ཀྱིས་འདུ་ཤེས་སྟོང་པ་མ་ཡིན་ཏེ། འདུ་ཤེས་ཉིད་སྟོང་པའོ། །སྟོང་པ་ཉིད་འདུ་ཤེས་སོ། །འདུ་བྱེད་ཀྱི་སྟོང་པ་ཉིད་ཀྱིས་འདུ་བྱེད་སྟོང་པ་མ་ཡིན་ཏེ། འདུ་བྱེད་ཉིད་སྟོང་པའོ། །སྟོང་པ་ཉིད་འདུ་བྱེད་དོ། །རྣམ་པར་ཤེས་པའི་སྟོང་པ་ཉིད་ཀྱིས་རྣམ་པར་ཤེས་པ་སྟོང་པ་མ་ཡིན་ཏེ། རྣམ་པར་ཤེས་པ་སྟོང་པའོ། །སྟོང་པ་ཉིད་རྣམ་པར་ཤེས་པའོ་ཞེས་རྒྱས་པར་རོ། །ཡང། གང་ཞིག་རྟེན་ཅིང་འབྲེལ་པར་འབྱུང༌། །དེ་ཉིད་ཁྱེད་ཀྱིས་སྟོང་པར་བཤད། །དངོས་པོ་རང་དབང་ཅན་མེད་ཅེས། །ཁྱེད་ཀྱིས་སེང་གེའི་སྒྲ་མཚུངས་མེད། །ཅེས་གསུངས་པ་ཡིན་ནོ། །དེ་ལྟར་ན་སྟོང་པ་ཉིད་ནི་ཆོས་རྣམས་ལས་ཐ་དད་པ་མ་ཡིན་ནོ། །དེ་ལྟ་བས་ན་སྟོང་པ་ཉིད་ལ་ཡང་མངོན་པར་ཞེན་པར་མི་བྱའོ། །དེ་ལྟར་རྣམ་པར་རྟོག་པ་ཐམས་ཅད་ནུབ་པའི་ཕྱིར་སྒྲིབ་པ་མཐའ་དག་ལས་གྲོལ་བ་སྐྱེ་བོ་ཞེས་བསྟན་པའི་ཕྱིར། གང་ཚེ་དངོས་དང་ཞེས་པ་ལ་སོགས་པ་གསུངས་ཏེ། གང་ཚེ་དངོས་པོ་དོན་དམ་པར་ཡོད་པའི་རང་བཞིན་ཡོད་པ་མ་ཡིན་ཏེ། བློ་ནི་བློ་གྲོས་ཡིན་ལ་མདུན་ནི་སྔུན་ཏེ། ཡང་དག་པར་གནས་པ་ཡིན་ནོ། །དངོས་མེད་ཀྱང་མ་ཡིན་ཏེ། དངོས་པོ་དང་བྲལ་བའི་མཚན་ཉིད་དངོས་པོ་མེད་པ་ཡང་མ་ཡིན་ནོ། །གང་ཚེ་བློའི་མདུན་ན་གནས་པ་དེ་ཚེ་རྣམ་པ་གཞན་མེད་པས་ཤེས་ཏེ། དགག་པ་དང་བསྒྲུབ་པ་གཞན་མེད་པའི་ཕྱིར་ཏེ། གཉི་ག་དང་གཉི་ག་མ་ཡིན་པའི་ཕྱོགས་གཉིས་པོ་འདི་བསྒྲུབ་པ་དང་དགག་པའི་བདག་ཉིད་ཡིན་པའི་ཕྱིར་འདི་དག་ལས་མ་གཏོགས་པ་འདི་གཉིས་ཀྱི་ནང་དུ་འདུས་ལ་དེར་འདུས་པས་ཀྱང་རྟེན་མེད་པ་ཡིན་ཏེ། ཡོད་པ་དང་མེད་པ་དམིགས་པ་དང་བྲལ་བའི་ཕྱིར་རོ། །བློ་རབ་ཏུ་ཞི་བ་ཡིན་ལ་རྣམ་པར་རྟོག་པ་ཐམས་ཅད་ཉེ་བར་ཞི་བའི་ཕྱིར་ཞི་བ་ཡིན་ཏེ། མེ་བཞིན་དུ་འདས་པ་ནི་མ་ཡིན་ནོ་ཞེས་པའི་དོན་ཏོ། །གལ་ཏེ་ཇི་ལྟར་རྣམ་པར་རྟོག་པ་མཐའ་དག་དང་བྲལ་བས་བསྐལ་པ་གྲངས་མེད་པ་ནས་འདོད་པའི་གཞན་གྱི་དོན་ཕུན་སུམ་ཚོགས་པའི་ཐབས་སུ་གྱུར་པའི་སངས་རྒྱས་ཉིད་ཐོབ་ནས་བཅོམ་ལྡན་འདས་
ཀྱིས་གཞན་གྱི་དོན་མངོན་པར་རྫོགས་པར་བྱེད་པར་ཅི་ལྟར་འགྱུར་ཞེ་ན། འདིར་ཡིད་བཞིན་ནོར་བུ་ཞེས་པ་ལ་སོགས་པ་གསུངས་ཏེ། ཡིད་བཞིན་ནོར་བུ་ཞེས་པ་ནི་བསམས་པའི་འབྲས་བུ་སྟེར་བའི་རིན་པོ་ཆེའི་ཁྱད་པར་རོ། །དཔག་བསམ་གྱི་ཤིང་ཞེས་པ་ནི་བསམས་པའི་འབྲས་བུ་སྟེར་བའི་ཤིང་གི་ཁྱད་པར་ཡིན་ཏེ། དེ་ཇི་ལྟར་རྣམ་པར་རྟོག་པ་མེད་ཀྱང་སྣོད་ཇི་ལྟ་བར་འཇིག་རྟེན་པ་རྣམས་ཀྱི་རེ་བ་ཡོངས་སུ་རྫོགས་པ་ཡིན་ཞིང་འདོད་པ་ཐོབ་པར་བྱེད་པ་ཡིན་ཏེ། དེ་བཞིན་རྒྱལ་བའི་སྐུར་སྣང་ངོ༌། །ཞེས་པ་དང་འབྲེལ་ཏོ། །རྒྱལ་བ་ནི་བདུད་བཞི་ལས་རྒྱལ་བའི་ཕྱིར་རམ་སྡིག་པའི་ཆོས་ལས་རྒྱལ་བས་རྒྱལ་བ་སྟེ། བཅོམ་ལྡན་འདས་སོ། །རྒྱལ་བ་སངས་རྒྱས་བཅོམ་ལྡན་འདས་ཀྱི་སྐུ་ནི་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་མཛེས་པར་བྱས་པའི་ལུས་སོ། །དེ་བཞིན་དུ་སྟེ་རྣམ་པ་དེས་སྣང་སྟེ། རྣམ་པར་རྟོག་པ་ཐམས་ཅད་མེད་ཀྱང་གཞན་ལ་ཕན་པ་དང་བདེ་བ་བསྒྲུབ་པར་ནུས་པ་རྟོགས་སོ། །ཡང་ཇི་ལྟར་ན་འདོད་པ་ཙམ་གྱིས་གྲུབ་པར་འགྱུར་ཞེ་ན། གདུལ་བྱ་སྨོན་ལམ་དག་གིས་ནི། །ཞེས་གསུངས་ཏེ། གདུལ་བྱའི་དབང་གིས་ཡིན་ཏེ། གང་སངས་རྒྱས་བཅོམ་ལྡན་འདས་རྣམས་གདུལ་བྱ་དེ་རྣམས་ཀྱི་འབྲས་བུའི་ཁྱད་པར་ཐོབ་པའི་རྒྱུ་དགེ་བའི་ལས་ཀྱི་རྣམ་པར་སྨིན་པ་དེའི་དབང་གིས་སོ། །སྨོན་ལམ་གྱི་དབང་གིས་ཏེ། གང་བཅོམ་ལྡན་འདས་ཀྱིས་བྱང་ཆུབ་སེམས་དཔའི་གནས་སྐབས་ན་རྣམ་པ་དུ་མས་སེམས་ཅན་གྱི་དོན་བསྒྲུབ་པའི་སྨོན་ལམ་དེས་འཕངས་པའི་དབང་གིས་རྫ་མཁན་གྱི་འཁོར་ལོ་འཁོར་བའི་ཚུལ་གྱིས་ལྷུན་གྱིས་གྲུབ་པའི་འཇུག་པས། སེམས་ཅན་ཐམས་ཅད་ལ་ཕན་པ་དང་བདེ་བ་བསྒྲུབ་པར་འཐད་པ་ཡིན་ནོ། །གང་གི་ནུབ་མོ་དེ་བཞིན་གཤེགས་པ་མངོན་པར་རྫོགས་པར་སངས་རྒྱས་ནས་གང་དུ་མྱ་ངན་ལས་འདས་པའི་བར་འདིར་དེ་བཞིན་གཤེགས་པས་ཡི་གེ་གཅིག་ཀྱང་མ་གསུངས་ཏེ། དེ་ཅིའི་ཕྱིར་ཞེ་ན། བཅོམ་ལྡན་འདས་ནི་རྟག་ཏུ་མཉམ་པར་གཞག་པ་ཡིན་ནོ། །གང་ཡང་ཡི་གེ་དང་དབྱངས་དང་སྒྲ་ནི་དེ་བཞིན་གཤེགས་པའི་ཞལ་དང་མཛོད་སྤུ་དང༌། གཙུག་ཏོར་ལས་བྱུང་བའི་སྒྲ་སེམས་ཅན་དེ་རྣམས་ཀྱིས་ཐོས་སོ་ཞེས་པ་ལ་སོགས་པ་གསུངས་
སོ། །ཡང༌། ཏིང་འཛིན་དེ་ལ་མཉམ་གཞག་པ། །ཡིད་བཞིན་ནོར་བུ་བཞིན་དུ་གནས། །ཇི་ལྟར་འདོད་བཞིན་རྩིག་སོགས་ལས། །སྒྲོན་མའི་སྒྲ་ནི་འབྱུང་བ་ཡིན། །དེ་དག་ཤེས་པར་འདོད་དོན་རྣམས། །མི་རྣམས་ཀྱིས་ནི་ཐམས་ཅད་རྟོགས། །སྐལ་པ་བཞིན་དུ་ཕན་པར་ཡང༌། །མྱུར་དུ་ཐོབ་པར་འགྱུར་བ་ཡིན། །ཞེས་གསུངས་སོ། །བསྟོད་པ་བཞི་པ་ལས་ཀྱང༌། །གཙོ་བོ་ཁྱེད་ཀྱིས་འགའ་ཞིག་ཏུ། །ཡི་གེ་གཅིག་ཀྱང་མ་གསུངས་ཏེ། །ཆོས་ཀྱི་ཆར་གྱིས་གདུལ་བྱ་ཡི། །འགྲོ་བ་མ་ལུས་ཚིམ་པར་མཛད། །ཅེས་གསུངས་སོ། །དེ་ལྟར་ཐུན་མོང་མ་ཡིན་པའི་རྒྱུ་བཤད་ནས་ཡང་གཞན་དུ་རྒྱུའི་གནས་སྐབས་ཉིད་གང་ལྷུན་གྱིས་གྲུབ་པས་གཞན་གྱི་དོན་སྒྲུབ་པར་བྱེད་པའི་ནུས་པའི་འབྲས་བུ་སྐྱེ་བར་འགྱུར་བ་དེ་ལྟ་བུའི་ཚིགས་སུ་བཅད་པ་གཉིས་ཀྱིས་བསྟན་པའི་ཕྱིར་དཔེར་ན་ནམ་མཁའ་ལྡིང་གི་ནི། །ཞེས་པ་ལ་སོགས་པ་གསུངས་ཏེ། དཔེར་ན་ནམ་མཁའ་ལྡིང་གི་ནི། །ཞེས་ཏེ། དུག་གི་དེ་ཁོ་ན་ཉིད་ཀྱི་རིག་པ་སྔགས་ཀྱི་ནུས་པ་ཐོབ་པས་ཤིང་གི་རང་བཞིན་ནམ་རྡོ་བའམ་གཞན་གྱི་ཡང་རུང་སྟེ། མཆོད་སྡོང་བསྒྲུབས་ན་སྔགས་ཀྱིས་མངོན་པར་སྦྱངས་ཏེ། ཁོ་བོ་མེད་ཀྱང་འདི་ཉིད་དུག་ལ་སོགས་པ་ཐམས་ཅད་སེལ་བ་ལ་ནུས་པ་དང་ལྡན་པར་འགྱུར་རོ་ཞེས་ནས་འདས་པར་གྱུར་ཏེ། རང་ཉིད་བྱ་བ་དང་བྲལ་བར་འགྱུར་རོ། །མཆོད་སྡོང་དེ་ལ་དེས་སྔགས་བཏབ་སྟེ་མཁའ་ལྡིང་ཅན་དེ་འདས་ནས་ཡུན་རིང་ལོན་ཡང་སྟེ། ཡུན་རིང་པོར་བྱ་བ་དང་བྲལ་ཡང་དུག་ལ་སོགས་པ་ཞི་བར་བྱེད་ལ་སོགས་ཀྱི་སྒྲས་ནི་གདོན་ལ་སོགས་པའི་རྣམ་པར་འགྱུར་བ་ཡང་འཇོམས་པར་བྱེད་དོ། །དེ་ལྟར་དཔེ་ཉེ་བར་བསྟན་ནས། དོན་ལ་སྦྱར་བའི་ཕྱིར་བྱང་ཆུབ་སྤྱོད་ཅེས་པ་ལ་སོགས་པ་གསུངས་ཏེ། དཔེར་ན་ཞེས་པའི་སྒྲས་དེ་བཞིན་དུ་ཞེས་པ་འདྲེན་པར་བྱེད་དེ། དེ་བཞིན་དུ་བྱང་ཆུབ་ལ་བྱང་ཆུབ་ཀྱི་རྒྱུ་མཚན་སངས་རྒྱས་ཀྱི་ཆེད་ཀྱི་སྤྱོད་པ་ནི་བྱང་ཆུབ་ཀྱི་སྤྱོད་པའོ། །བྱང་ཆུབ་སེམས་དཔའ་འདས་གྱུར་ཀྱང༌། །ཞེས་ཏེ། བྱང་ཆུབ་ནི་སངས་རྒྱས་ཉིད་ཡིན་ཏེ། གཅིག་དང་དུ་མ་དང་བྲལ་བ་སྐྱེ་བ་མེད་པ། འགག་པ་མེད་པ། ཚད་པ་མེད་པ། རྟག་པ་མེད་པ། སྤྲོས་པ་ཐམས་ཅད་དང་བྲལ་བ། ནམ་
མཁའ་དང་མཉམ་པ། ཆོས་ཀྱི་སྐུར་གྲགས་པ་ལ་དོན་དམ་པའི་དེ་ཁོ་ན་ཉིད་དུ་བརྗོད་དོ། །དེ་ཉིད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་དང༌། སྟོང་པ་ཉིད་དང༌། དེ་བཞིན་ཉིད་དང༌། ཡང་དག་པའི་མཐའ་དང༌། ཆོས་ཀྱི་དབྱིངས་ལ་སོགས་པའི་སྒྲས་ཀུན་རྫོབ་ཀྱི་བདེན་པ་ལ་བརྩམས་ནས་བརྗོད་དོ།། འདི་ཉིད་ལས་དགོངས་ནས། སངས་རྒྱས་རྣམ་ནི་ཆོས་ཉིད་བལྟ། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་པར་བྱ་མིན་པས། །དེ་ནི་རྣམ་པར་ཤེས་མི་ནུས། །ཞེས་གསུངས་སོ། །ཡང༌། མཚན་ཉིད་མེད་ཅིང་མ་སྐྱེས་པ། །དག་གི་ལམ་ནི་འདུས་མ་བྱས། །ནམ་མཁའ་དང་མཉམ་བྱང་ཆུབ་སེམས། །བྱང་ཆུབ་གཉིས་མེད་མཚན་ཉིད་ཡིན། །ཞེས་གསུངས་ཏེ། དེ་ལ་སེམས་དཔའ་ནི་གང་གི་བསམ་པ་ཡིན་པ་དེ་ལ་བྱང་ཆུབ་སེམས་དཔའ་ཞེས་བྱའོ། །དེ་འདས་པར་གྱུར་ཀྱང་ངོ༌། །ཡང་གི་སྒྲ་ནི་རིམ་པ་གཞན་དུ་ཡིན་ཏེ། མི་གནས་པའི་མྱ་ངན་ལས་འདས་པས་དོན་དམ་པ་ཞི་བར་གྱུར་ཀྱང་ངོ༌། །རྒྱུའི་གནས་སྐབས་ལོག་ཅིང་འབྲས་བུའི་གནས་སྐབས་ཐོབ་པ་ན་ཡང་ཞེས་པའི་དོན་ཏོ། །དེ་ལྟར་གཉི་གར་ཡང་རྟོག་པ་དང་ཐམས་ཅད་དུ་བྲལ་ཡང་གཞན་གྱི་དོན་སྒྲུབ་པ་ཉམས་པ་མེད་པར་བསྟན་པ་ཡིན་ནོ། །དེ་ལྟར་གྱུར་ན་ཡང་གལ་ཏེ་བཅོམ་ལྡན་འདས་རྣམ་པར་རྟོག་པའི་དམིགས་པ་ཐམས་ཅད་དང་བྲལ་བས་སེམས་དང་སེམས་ལས་བྱུང་བ་ཐམས་ཅད་ཀྱི་བྱ་བ་འདས་པ་ཡིན་ཏེ། འོ་ན་ཇི་ལྟར་དེ་བཞིན་གཤེགས་པ་ལ་མཆོད་པ་འབྲས་བུ་ཆེན་པོར་བསྔགས་ཞེས་དོགས་ནས། སེམས་མེད་ཅེས་པ་ལ་སོགས་པ་སྨོས་ཏེ། ཀུན་རྫོབ་ཀྱི་སེམས་དང་བྲལ་བའི་བཅོམ་ལྡན་འདས་ལ་མཆོད་པ་སྟེ་མཆོད་བ་བྱས་པ་ལས་ཤེས་པར་བྱེད་པའི་ཁྱད་པར་རོ། །ཇི་ལྟར་འབྲས་བུར་ལྡན་པར་འགྱུར་ཏེ་འབྲས་བུ་དང་བཅས་པར་འགྱུར། ལོངས་སྤྱོད་པར་བྱེད་པ་མེད་པ་དེ་ལ་སྦྱིན་པ་པོ་དང་སྦྱིན་བདག་རྣམས་ལ་ཇི་ལྟར་བསོད་ནམས་སུ་འགྱུར་ཞེ་ན། འདི་ལ་ལན་ནི་གང་ཕྱིར་བཞུགས་པའམ་ཞེས་པ་ལ་སོགས་པ་གསུངས་ཏེ། མཚུངས་ཤིང་མཉམ་པ་ཉིད་དུ་བཤད་དེ་ལུང་ལས་བསྟན་ཏོ། །གང་གི་ཕྱིར་བཞུགས་པའམ། མྱ་ངན་ལས་འདས་པ་དེ་ལའང་དེའི་ཕྱིར་འབྲས་བུ་དང་ལྡན་པར་འགྱུར་རོ་ཞེས་སྦྱར་རོ། །ཞུགས་པ་
པ་ནི་མྱ་ངན་ལས་མ་འདས་པ་ཡིན་ལ། མྱ་ངན་ལས་འདས་པ་ནི་ཕུང་པོ་ལྷག་མ་མེད་པའི་མྱ་ངན་ལས་འདས་པར་གྱུར་པ་ཡིན་ཏེ། བསོད་ནམས་ལ་ཁྱད་པར་ཡོད་པ་མ་ཡིན་ནོ། །བསམ་པ་ནི་འདི་ཡིན་ཏེ། བསོད་ནམས་ནི་རྣམ་པ་ཡིན་ལ། གཏོང་བ་དང་རྗེས་སུ་འབྲེལ་པ་ནི་གཏོང་བ་ཉིད་ལས་གང་སྐྱེས་པའོ། །ཡོངས་སུ་ལོངས་སྤྱོད་པ་དང་རྗེས་སུ་འབྲེལ་པ་ནི་སྦྱིན་པར་བྱ་བའི་ཆོས་ཡོངས་སུ་ལོངས་སྤྱོད་པ་ལས་གང་སྐྱེས་པའོ། །དེ་ལ་གལ་ཏེ་བཅོམ་ལྡན་འདས་མྱ་ངན་ལས་འདས་པ་ལ་ལེན་པ་མེད་པས་ཡོངས་སུ་ལོངས་སྤྱོད་པའི་བསོད་ནམས་སུ་མི་འགྱུར་ཡང་གཏོང་བ་དང་ཡོངས་སུ་འབྲེལ་པ་གང་གིས་བཟློག་པར་བྱ། ཅི་སྟེ་ཡོངས་སུ་མ་བླངས་ན་གང་ལ་ཡང་ཇི་ལྟར་ཡོངས་སུ་གཏོང་བ་དང་འབྲེལ་པའི་བསོད་ནམས་སུ་འགྱུར་ཞེ་ན། ལེན་པ་པོ་ཡོད་ན་བསོད་ནམས་སུ་འགྱུར་ལ། མེད་ན་ནི་མ་ཡིན་ནོ་ཞེས་པ་རྒྱུ་ཅི་ཡིན། ཡང་ཅི་སྟེ་ལེན་པ་པོ་འགའ་ཡང་མེད་པའི་ཕྱིར་རོ་ཞེ་ན། དེ་ནི་རྒྱུ་མ་ཡིན་པ་ཉིད་ཡིན་ཏེ། གང་ཕྱིར་ཞེས་ཏེ། བསོད་ནམས་གཞན་ཡོངས་སུ་ལེན་པ་ཉིད་ཀྱིས་འགྱུར་ན་བྱམས་པ་ཚད་མེད་པ་ལ་སོགས་པ་དང་ཡང་དག་པའི་ལྟ་བ་བསྒོམ་པ་ལ་བསོད་ནམས་མེད་པར་འགྱུར་རོ། །དེ་ལྟ་བས་ན་རང་གི་སེམས་ཀྱི་མཐུས་གཞན་ཡོངས་སུ་ལེན་པ་མེད་པར་ཡང་བསོད་ནམས་ཡོད་པར་འདོད་པར་བྱ་སྟེ། དེས་ན་ཡོན་ཏན་དང་ལྡན་པ་འདས་པ་ལ་ཡང་དེ་ལ་གུས་པར་བྱས་པས་རང་གི་སེམས་ལ་བསོད་ནམས་སུ་འགྱུར་བ་ལ་འགལ་བ་མེད་དོ། །གཞན་ཡང་བསོད་ནམས་དང་སྡིག་པ་ཐམས་ཅད་ཡོད་པ་དག་ལ་ལུང་དབང་པོ་ཉིད་དུ་ལུང་ལས་བཤད་ཅེས་ཏེ། འདིར་འཐད་པ་གཞན་གྱིས་ཅི་ཞིག་བྱ། ལུང་ལས་ཏེ་བཅོམ་ལྡན་འདས་ཀྱིས་བཀའ་ལས་ཡིན་ལ། འབྲས་བུ་ནི་བཅོམ་ལྡན་འདས་ལ་མཆོད་པ་བྱས་པས་ལོངས་སྤྱོད་ཆེན་པོ་ལ་སོགས་པའི་མཚན་ཉིད་རྟོགས་པར་འགྱུར་རོ། །དེ་ལ་ཞེས་པ་ནི་མྱ་ངན་ལས་འདས་པའམ་མྱ་ངན་ལས་མ་འདས་པའི་བཅོམ་ལྡན་འདས་ལ་མཆོད་པའི་ཁྱད་པར་འདི་དག་ཡིན་ཏེ། ཁ་ཅིག་ནི་འབྲས་བུ་ཀུན་རྫོབ་ཡིན་ལ། ཁ་ཅིག་ནི་ཡང་འབྲས་བུ་དོན་དམ་པ་ཡིན་ནོ་ཞེས་འདོད་དོ། །འདི་ལྟར་དཔྱད་པ་བཏང་སྙོམས་སུ་བྱས་
ནས་ཁྱད་པར་དུ་བརྗོད་པར་བྱ་སྟེ། ཀུན་རྫོབ་བམ་དེ་ཉིད་དུའང་རུང་སྟེ། བསོད་ནམས་དང་སྡིག་པ་བྱས་པའི་འབྲས་བུ་བཅོམ་ལྡན་འདས་ཀྱི་བཀའ་ལས་རྟོགས་པ་ཡིན་ཏེ། དེ་ལ་ཡང་ཁྱེད་དང་ཁོ་བོ་ཅག་ལ་རྩོད་པ་མེད་པ་ཉིད་དོ། །དེ་ལ་འདི་བཅོམ་ལྡན་འདས་ཀྱིས་མེ་ཏོག་བརྩེགས་པའི་གཟུངས་ལས། སེང་གེ་རྣམ་པར་རྩེ་བ་འགའ་ཞིག་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཡོན་ཏན་གྱི་ཚོགས་དཔག་ཏུ་མེད་པ་དང་ལྡན་པ་དེའི་ཕྱིར་དེ་ལ་མཆོད་པའི་རྣམ་པར་སྨིན་པ་དེ་ཡང་དཔག་ཏུ་མེད་པར་བྱའོ། །སེང་གེ་རྣམ་པར་རྩེ་བ་གང་ལ་ལ་དག་དེ་བཞིན་གཤེགས་པ་བཞུགས་ཀྱང་རུང༌། ཡོངས་སུ་མྱ་ངན་ལས་འདས་ཀྱང་རུང༌། མཆོད་པར་བྱེད་པ་དེ་དག་ཐམས་ཅད་ནི་འདི་ལྟ་སྟེ། ཐེག་པ་གསུམ་ལས་ཐེག་པ་གཅིག་གིས་ཡོངས་སུ་མྱ་ངན་ལས་འདའ་བར་འགྱུར་རོ། །སེང་གེ་རྣམ་པར་རྩེ་བ་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མཐོང་ནས་སེམས་དང་བར་འགྱུར་ལ། དང་བའི་སེམས་ཀྱིས་རྙེད་པ་དང༌། ན་བཟའ་དང༌། ཞལ་ཟས་དང༌། གཟིམས་ཆ་དང༌། སྙུན་གསོལ་དང༌། ཡོ་བྱད་དང༌། བདེ་བར་སྦྱར་བ་ཐམས་ཅད་ཀྱིས་བསྟི་སྟང་དུ་བྱས་ཤིང་རི་མོར་བྱས་ཏེ། མཆོད་ཅིང་རྗེད་ལ་རིམ་གྲོར་བྱས་པ་དང༌། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་རིང་བསྲེལ་ཡུངས་འབྲུ་ཙམ་གྱི་མཆོད་རྟེན་ལ་མཆོད་པ་བྱ་བའི་རྣམ་པར་སྨིན་པ་ནི་མཉམ་པར་ཤེས་པར་བྱ་སྟེ། བྱེ་བྲག་གམ་ཐ་དད་དུ་བྱ་བ་དེ་བཞིན་གཤེགས་པའི་མཆོད་པ་ལ་མེད་དོ་ཞེས་གསུངས་པ་ཡིན་ཏེ། གང་ཞིག་བཞུགས་ལ་མཆོད་པ་དང༌། །མི་གནས་མྱ་ངན་འདས་པ་ལ། །སེམས་ནི་མཉམ་པར་དང་བ་ཡིས། །བསོད་ནམས་ལ་ནི་ཁྱད་པར་མེད། །ཡང་འདི་གསུངས་པ་ཡིན་ཏེ། གང་ཡང་སེང་གེ་རྣམ་པར་རྩེ་བ་དེ་བཞིན་གཤེགས་པ་ལ་ལོ་བརྒྱ་འམ། ལོ་སྟོང་ཡང་རུང་སྟེ། བདེ་ལའི་ཡོ་བྱད་ཐམས་ཅད་ཀྱིས་བསྙེན་བཀུར་བྱས་པ་དང༌། གང་ཞིག་གིས་དེ་བཞིན་གཤེགས་པ་ཡོངས་སུ་མྱ་ངན་ལས་འདས་པའི་མཆོད་རྟེན་ལ། བྱང་ཆུབ་ཀྱི་སེམས་ཀྱིས་ཡང་དག་པར་
ཟིན་པས་མེ་ཏོག་འགའ་འབུལ་ལམ། ཆུ་སྙིམ་པ་གང་ཙམ་འཐོར་རམ། བྱུག་པའི་ཐིག་ལེ་འདྲིའམ། མེ་ཏོག་གི་ཉལ་ཉིལ་འཕྱག་གམ། བྱུག་པ་འབུལ་ལམ། མར་མེ་འབུལ་ཞིང་ཕུལ་ནས་དགའ་བའི་སེམས་ཀྱིས་གོམ་པའི་གནས་སྐབས་འགའ་བོར་ཏེ་སངས་རྒྱས་བཅོམ་ལྡན་འདས་དེ་ལ་ཕྱག་འཚལ་ལོ་ཞེས་སྨྲ་བ་ཙམ་ལ་སེང་གེ་རྣམ་པར་རྩེ་བ་བསྐལ་པའམ། བསྐལ་པ་བརྒྱར་རམ། བསྐལ་པ་སྟོང་དུའམ། བསྐལ་པ་འབུམ་དུའམ། ངན་འགྲོ་ལོག་པར་ལྟུང་བར་འགྲོ་བར་འགྱུར་བ་དེའི་གནས་མེད་དེ། འདི་ལ་དོགས་པའམ་ཡིད་གཉིས་སམ་ཐེ་ཚོམ་ཟ་བར་མི་བྱའོ་ཞེས་གསུངས་སོ། །འདི་ངེས་པར་ཁས་བླང་བར་བྱའོ་ཞེས། དཔེར་ན་བདེན་པའི་ཞེས་པ་ལ་སོགས་པ་གསུངས་ཏེ། བདེན་པའི་སངས་རྒྱས་ཏེ་དོན་དམ་པར་ཡོད་པའི་བཅོམ་ལྡན་འདས་ལ་མཆོད་པ་བྱས་ནའོ། །འབྲས་བུར་བཅས་ཞེས་པ་ནི་བསོད་ནམས་དང་བཅས་པ་ཡིན་ན་ཡང་ཇི་ལྟར་ཞེས་ཏེ་ཇི་ལྟ་བ་བཞིན་དུ་དཔེར་བརྗོད་པ་སྟོན་པར་བྱེད་དོ། །འདིར་དཔེར་བརྗོད་པ་ལུང་ལས་གཞན་ཡོད་པ་མ་ཡིན་ནོ། །དེ་ལྟ་བས་ན་བཅོམ་ལྡན་འདས་ཀྱིས་མཆོད་པའི་འབྲས་བུ་ཡོད་པ་རྣམ་པ་ཐམས་ཅད་དུ་ལུང་ལས་གོ་བར་བྱའོ། །སྟོང་ཉིད་བག་ཆགས་བསྒོས་པ་ལས། །ཞེས་བྱ་བ་ལ་སོགས་པ་གང་གསུངས་པ་དེ་ལ། བྱེ་བྲག་ཏུ་སྨྲ་བ་ལ་སོགས་པ་རྣམས་ཆོས་ཐམས་ཅད་ཀྱི་སྟོང་པ་ཉིད་ཀྱིས་སྒྲིབ་པ་ཐམས་ཅད་སྤོང་བར་མི་བཟོད་པས་འཕགས་པའི་བདེན་པ་བཞི་མཐོང་བ་དང་བསྒོམ་པ་ནི་དེའི་ཐབས་སུ་འདོད་པས། བདེན་པ་མཐོང་བས་ཞེས་པ་ལ་སོགས་པ་སྨོས་ཏེ། འཕགས་པའི་བདེན་པ་བཞི་པོ་རྣམས་ནི་སྡུག་བསྔལ་བ་དང༌། ཀུན་འབྱུང་བ་དང༌། འགོག་པ་དང༌། ལམ་གྱི་མཚན་ཉིད་རྣམས་ཡིན་ལ། མཐོང་བ་ནི་དམིགས་པ་ཡིན་ཏེ། མངོན་སུམ་དུ་བྱས་པས་ཞེས་པའི་དོན་ཏོ། །མཐོང་བས་ཤེས་པ་ནི་མཚོན་པ་ཡིན་ཏེ། བསྒོམས་པས་ཤེས་པ་ཡང་བལྟ་བར་བྱའོ། །དེ་སྐད་དུ། བདེན་པ་མཐོང་དང་བསྒོམས་པ་ལས། །ཉོན་མོངས་སྤོང་བར་བཤད་པ་ཡིན། །ཞེས་བརྗོད་པ་ཡིན་ན། དེ་ལ་ཞུགས་པས་ཐོས་པ་དང་བསམ་པ་དང་ལྡན་པ་བསྒོམ་པ་
ལ་ཞུགས་པ། མི་གཙང་བ་དང་དབུགས་འབྱུང་བ་དང་རྔུབ་པ་དྲན་པ་དང༌། དྲན་པ་ཉེ་བར་གཞག་པ་བསྒོམ་པ་གྲུབ་པའི་རིམ་པས་མི་རྟག་པ་དང༌། སྡུག་བསྔལ་བ་དང༌། སྟོང་པ་དང༌། བདག་མེད་པ་ཞེས་པ་རྣམ་པ་བཅུ་དྲུག་པོ་འདི་རྣམས་ཀྱིས་སྡུག་བསྔལ་གྱི་བདེན་པ་ལ་སོགས་པ་མཐོང་སྟེ། དྲོ་བར་གྱུར་པ་ལ་སོགས་པ་ངེས་པར་འབྱེད་པའི་ཆ་དང་མཐུན་པའི་སྒོ་ནས་སྡུག་བསྔལ་ལ་ཆོས་ཤེས་པའི་བཟོད་པ་ལ་སོགས་པ་སྐད་ཅིག་མ་བཅོ་ལྔའི་མཚན་ཉིད་ནི་མཐོང་བའི་ལམ་ཡིན་ལ། དེའི་རྗེས་ལ་བསྒོམ་པའི་ལམ་ཐོབ་པས་མཐོང་བ་དང་བསྒོམས་པས་སྤོང་བར་བྱ་བའི་ཁམས་གསུམ་གྱི་ཉོན་མོངས་པ་དང་ཉེ་བའི་ཕུང་པོ་སྤངས་པས་ཟད་པ་དང་མི་སྐྱེ་བའི་ཤེས་པས་སྐྱེ་བར་འགྱུར་ཏེ། དེ་ལྟ་ན་འཕགས་པའི་བདེན་པ་རྣམས་མངོན་པར་རྟོགས་པའི་རིམ་པ་མདོར་བསྡུས་པ་ཡིན་ནོ། །འདིས་འཕགས་པའི་བདེན་པ་མཐོང་བ་ལས་གྲོལ་བར་བརྗོད་པ་ཡིན་ནོ། །དེ་ལྟ་བས་ན་གྲོལ་བ་འདི་ཉིད་ཀྱིས་ཆོག་པས་སྟོང་ཉིད་མཐོང་བས་ཅི་ཞིག་བྱ་སྟེ། སྟོང་པ་ཉིད་ནི་ཆོས་ཐམས་ཅད་ཀྱི་རང་བཞིན་མེད་པ་ཡིན་པ་མཐོང་བས་ཏེ་རྟོགས་པ་དང་མངོན་སུམ་དུ་བྱས་པས་སོ། །རེ་ཞིག་དགོས་པ་ཅུང་ཟད་ཀྱང་ཡོད་པ་མ་ཡིན་ཏེ། ཐར་བའི་ཐབས་དེ་ལས་གཞན་ཡོད་པའི་ཕྱིར་རོ་ཞེ་ན། འདི་ལ་གང་གི་ཕྱིར་ལུང་ལས་ཞེས་པ་ལ་སོགས་པ་གསུངས་ཏེ། ཐབས་གཞན་མེད་པ་དེའི་ཕྱིར་ཞེས་པའི་ཐ་ཚིག་གོ །འདི་ཉིད་དོན་གྱི་དེ་ཁོ་ན་སྟེ། འདི་ལྟར་ཐམས་ཅད་ཉིད་དངོས་པོར་སྒྲོ་བཏགས་པ་དང་མ་བཏགས་པ་ཞེས་ངོ་བོ་གཉིས་སུ་འགྱུར་རོ། །དེ་ལ་གང་མ་རིག་པས་འཕངས་པའི་སྒྲོ་བཏགས་པའི་ངོ་བོ་དེ་ནི་སྐྱེ་བོ་ཐམས་ཅད་ཀྱི་ཐུན་མོང་མ་ཡིན་ལ། དེ་དམིགས་པའི་ཉོན་མོངས་པ་སྤང་བར་མི་འཐད་དེ། གཞན་དུ་བྱིས་པའི་སྐྱེ་བོ་ཐམས་ཅད་དེ་བཞིན་གཤེགས་པར་འགྱུར་རོ་ཞེས་སྔར་བསྟན་པའི་ཐལ་བར་འགྱུར་བ་ཡིན་ནོ། །དེ་བས་ན་སྒྲོ་མ་བཏགས་པའི་དེ་ཁོ་ན་ཉིད་མི་དམིགས་པའི་སྦྱོར་བས་དེ་ཁོང་དུ་ཆུད་དེ། མི་ཤེས་པ་དང་ཟག་པ་ཟད་པའི་ཆེད་དུ་ནུས་པ་ཐོབ་པ་ཡིན་ཏེ། དེ་ཡང་ཤེས་རབ་ཀྱིས་རྣམ་པར་འབྱེད་པ་ན་ཆོས་ཐམས་ཅད་མི་དམིགས་པའི་མཚན་ཉིད་རྟོགས་པས་ཆོས་ཐམས་ཅད་ཀྱི་སྟོང་
པ་ཉིད་ཁོ་ནས་རྣམ་པར་འཁྲུལ་པའི་སྒྲིབ་པ་ཐམས་ཅད་སྤོང་བའི་དོན་དུ་ནུས་པ་དང་ལྡན་པར་རྟོགས་པར་བྱའོ། །དེ་ལྟར་རིགས་པ་སྔར་བརྗོད་ལ་ཕྱིས་ཀྱང་སྟན་ལ་འབེབས་པར་འགྱུར་རོ། །ཡང་འདིར་ལུང་ཉིད་ཀྱིས་འདིའི་དོན་རྟོགས་པར་བྱ་བའི་ཕྱིར། གང་ཕྱིར་ལུང་ལས་ལམ་འདི་ནི། མེད་པར་བྱང་ཆུབ་མེད་ཅེས་ལུང་ལས་གསུངས་ཏེ། གང་ཤེས་རབ་ཀྱི་ཕ་རོལ་ཏུ་ཕྱིན་པ་ལས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པའི་ཚེ་གཟུགས་དངོས་པོ་ཡོད་ཅེས་བྱ་བར་མི་སྒོམ་མོ། །ཚོར་བ་དངོས་པོ་ཡོད་ཅེས་བྱ་བར་མི་སྒོམ་མོ། །འདུ་ཤེས་དངོས་པོ་ཡོད་ཅེས་བྱ་བར་མི་སྒོམ་མོ། །འདུ་བྱེད་དངོས་པོ་ཡོད་ཅེས་བྱ་བར་མི་སྒོམ་མོ། །རྣམ་པར་ཤེས་པ་དངོས་པོ་ཡོད་ཅེས་བྱ་བར་མི་སྒོམ་མོ་ཞེས་བྱ་བ་ནས། ལམ་གྱི་རྣམ་པ་ཤེས་པ་ཉིད་དངོས་པོ་ཡོད་ཅེས་བྱ་བར་མི་སྒོམ་མོ། །རྣམ་པ་ཐམས་ཅད་མཁྱེན་པ་ཉིད་དངོས་པོ་ཡོད་ཅེས་བྱ་བར་མི་སྒོམ་མོ། །བག་ཆགས་ཀྱི་མཚམས་སྦྱོར་བའི་ཉོན་མོངས་པ་སྤངས་པ་དངོས་པོ་ཡོད་ཅེས་བྱ་བར་མི་སྒོམ་མོ། །དེ་ཅིའི་ཕྱིར་ཞེ་ན། རབ་འབྱོར་དངོས་པོའི་འདུ་ཤེས་ཅན་ལ་ཤེས་རབ་ཀྱི་ཕ་རོལ་ཏུ་ཕྱིན་པ་སྒོམ་པ་མེད་དོ་ཞེས་བྱ་བ་ནས། དངོས་པོའི་འདུ་ཤེས་ཅན་ལ་སྦྱིན་པའི་ཕ་རོལ་ཏུ་ཕྱིན་པ་སྒོམ་པ་མེད་དོ། །དངོས་པོའི་འདུ་ཤེས་ཅན་ལ་ནང་སྟོང་པ་ཉིད་སྒོམ་པ་མེད་དོ་ཞེས་བྱ་བ་ནས། དངོས་པོའི་འདུ་ཤེས་ཅན་ལ་དངོས་པོ་མེད་པའི་ངོ་བོ་ཉིད་སྟོང་པ་ཉིད་སྒོམ་པ་མེད་དོ། །དངོས་པོའི་འདུ་ཤེས་ཅན་ལ་མངོན་པར་ཤེས་པ་དྲུག་སྒོམ་པ་མེད་དོ་ཞེས་བྱ་བ་ནས། ཏིང་ངེ་འཛིན་ཐམས་ཅད་དང༌། གཟུངས་ཀྱི་སྒོ་ཐམས་ཅད་དང༌། དེ་བཞིན་གཤེགས་པའི་སྟོབས་དང༌། མི་འཇིགས་པ་དང༌། སོ་སོ་ཡང་དག་པར་རིག་པ་དང༌། བྱམས་པ་ཆེན་པོ་དང༌། སྙིང་རྗེ་ཆེན་པོ་དང༌། སངས་རྒྱས་ཀྱི་ཆོས་མ་འདྲེས་པ་སྒོམ་པ་མེད་དོ་ཞེས་པ་ནས། བག་ཆགས་ཀྱི་མཚམས་སྦྱོར་བའི་ཉོན་མོངས་པ་སྤོང་བ་མེད་དོ། །དེ་ཅིའི་ཕྱིར་ཞེ་ན། འདི་ལྟར་དེ་དངོས་པོ་ལ་འདི་བདག་གོ་ཞེས་བྱ་བར་མཐའ་གཉིས་ལ་ཆགས་ཏེ། སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌།
བརྩོན་འགྲུས་དང༌། བསམ་གཏན་དང༌། ཤེས་རབ་ལ་འདི་ནི་བདག་གོ་ཞེས་མཐའ་གཉིས་ལ་ཆགས་པར་གྱུར་ཏོ། །ནང་སྟོང་པ་ཉིད་དང་ཞེས་བྱ་བ་ནས་དངོས་པོ་མེད་པའི་ངོ་བོ་ཉིད་སྟོང་པ་ཉིད་དང་མངོན་པར་ཤེས་པ་དྲུག་དང་ཞེས་པ་ནས། བག་ཆགས་ཀྱི་མཚམས་སྦྱོར་བའི་ཉོན་མོངས་པ་སྤངས་པ་ལ་འདི་ནི་བདག་གོ་ཞེས་བྱ་བར་མཐའ་གཉིས་ལ་ཆགས་པར་གྱུར་པས་དེ་ལ་ནི་ཐར་པ་མེད་དེ། དེ་ཅིའི་ཕྱིར་ཞེ་ན། རབ་འབྱོར་དངོས་པོའི་འདུ་ཤེས་ཅན་ལ་སྦྱིན་པ་མེད་ཅེས་བྱ་བ་ནས། ཤེས་རབ་ཀྱང་མེད། ལམ་ཡང་མེད། ཡེ་ཤེས་ཀྱང་མེད། ཐོབ་པ་ཡང་མེད། མངོན་པར་རྟོགས་པ་ཡང་མེད། མཐུན་པའི་བཟོད་པ་ཡང་མེད། གཟུགས་ཀྱང་ཡོངས་སུ་ཤེས་པ་མེད། ཚོར་བ་ཡང་ཡོངས་སུ་ཤེས་པ་མེད་ཅེས་པ་ནས། རྟེན་ཅིང་འབྲེལ་པར་འབྱུང་བ་ཡང་ཡོངས་སུ་ཤེས་པ་མེད་ཅེས་པ་ནས། བདག་དང༌། སེམས་ཅན་དང༌། སྲོག་དང༌། སྐྱེ་བ་པོ་དང༌། གསོ་བ་དང༌། སྐྱེས་བུ་དང༌། གང་ཟག་དང༌། ཤེད་ཅན་དང༌། ཤེད་བདག་དང༌། བྱེད་པ་པོ་དང༌། ཚོར་བ་པོ་དང༌། ཤེས་པ་པོ་དང༌། མཐོང་བ་པོའི་འདུ་ཤེས་ཀྱང་ཡོངས་སུ་ཤེས་པ་མེད་ཅེས་པ་ནས། བག་ཆགས་ཀྱི་མཚམས་སྦྱོར་བའི་ཉོན་མོངས་པ་ཐམས་ཅད་སྤང་བ་ཡང་ཡོངས་སུ་ཤེས་པ་མེད་ན་དེ་ཐར་པར་འགྱུར་བ་ལྟ་ག་ལ་འོང་ཞེས་གསུངས་སོ། །ཡང་དེ་ཉིད་ལས། བཅོམ་ལྡན་འདས་ཀྱིས་བཀའ་སྩལ་པ། ཀཽ་ཤི་ཀ་དེ་དེ་བཞིན་ནོ། །དེ་དེ་བཞིན་ཏེ། འདས་པའི་དུས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་སྙེད་ཅིག་བྱུང་བ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་སོ། །མ་འོངས་པའི་དུས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་སྙིད་ཅིག་འབྱུང་བ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཅིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ད་ལྟར་བྱུང་བའི་ཕྱོགས་བཅུའི་འཇིག་རྟེན་གྱི་ཁམས་ཚད་མེད་གངས་མེད་པ་དག་ན་དེ་བཞིན་གཤེགས་པ་དགྲ་
བཅོམ་པ་ཡང་དག་པར་རྫོགས་པའི་སངས་རྒྱས་གང་ཇི་སྙེད་ཅིག་བཞུགས་ཤིང་འཚོ་སྐྱོང་བ་དང༌། ཆོས་སྟོན་པ་དེ་དག་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ། །འདས་པའི་དུས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཉན་ཐོས་གང་ཇི་སྙེད་ཅིག་བྱུང་བ་དང༌། མ་བྱོན་པའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཉན་ཐོས་གང་ཇི་སྙེད་ཅིག་འབྱུང་བ་དང༌། ད་ལྟར་བྱུང་བའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་ཀྱི་ཉན་ཐོས་གང་ཇི་སྙེད་ཅིག་ཡོད་པ་དེ་དག་གིས་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ། རྒྱུན་ཏུ་ཞུགས་པའི་འབྲས་བུ་ཐོབ་བོ། །འཐོབ་བོ། །འཐོབ་པར་འགྱུར་རོ། །ཞེས་པ་ནས་དགྲ་བཅོམ་པ་ཉིད་ཐོབ་བོ། །འཐོབ་བོ། །འཐོབ་པར་འགྱུར་རོ། །འདས་པའི་དུས་ཀྱི་རང་སངས་རྒྱས་གང་ཇི་སྙེད་ཅིག་འབྱུང་བ་དང་ཞེས་པ་ནས། ཤེས་རབ་ཀྱི་ཕ་རོལ་ཏུ་ཕྱིན་པ་འདི་ཉིད་ལ་བརྟེན་ཏེ་རང་བྱང་ཆུབ་ཐོབ་བོ། །འཐོབ་བོ། །འཐོབ་པར་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་འདིར་ཐེག་པ་གསུམ་པོ་ཐམས་ཅད་རྒྱ་ཆེར་བསྟེན་ཏོ། །དེ་དག་ཀྱང་མཚན་མ་མེད་པའི་ཚུལ་དང༌། སྐྱེ་བ་མེད་པའི་ཚུལ་དང༌། འགག་པ་མེད་པའི་ཚུལ་དང༌། ཀུན་ནས་ཉོན་མོངས་པ་མེད་པའི་ཚུལ་དང༌། རྣམ་པར་བྱང་བ་མེད་པའི་ཚུལ་དང་ཞེས་པ་ཇི་སྲིད་དུ་འཇིག་རྟེན་གྱི་ཐ་སྙད་ཀྱིས་ཡིན་ཏེ་དོན་དམ་པའི་ཚུལ་གྱིས་ནི་མ་ཡིན་ནོ་ཞེས་བྱ་བའི་བར་དུ་རྒྱས་པར་གསུངས་སོ། །གང། སངས་རྒྱས་རྣམས་དང་རང་སངས་རྒྱས། །ཉན་ཐོས་རྣམས་ཀྱིས་ངེས་བསྟེན་པའི། །ཐར་ལམ་གཅིག་པུ་ཁྱོད་ལགས་ཏེ། །གཞན་དུ་ངེས་པ་མ་མཆིས་སོ། །ཞེས་གསུངས་སོ། །ཐེག་པ་ཆེན་པོའི་ཚིག་འདི་མ་བཟོད་ནས། གལ་ཏེ་ཐེག་ཆེན་ཞེས་པ་ལ་སོགས་པ་སྨོས་ཏེ། ཀྱེ་སྟོང་པ་ཉིད་དུ་སྨྲ་བ་དེ་ཐེག་པ་ཆེན་པོ་ནི་བཀའ་ཉིད་དུ་ཁོ་བོ་ཅག་མ་གྲུབ་སྟེ། འདོད་པ་མ་
ཡིན་ལ་སྒྲུབ་པར་བྱེད་པ་ཉིད་དུ་དེ་བརྗོད་པ་ནི་ལེགས་པ་མ་ཡིན་ནོ། །འདིར་གཞན་དང་ལན་མཚུངས་པའི་སྒོ་ནས་སུན་དབྱུང་བའི་ཕྱིར། ཁྱོད་ཀྱི་ལུང་ནི་ཞེས་པ་ལ་སོགས་པ་གསུངས་ཏེ། གལ་ཏེ་ཐེག་པ་ཆེན་པོ་དེ་མ་གྲུབ་ན་ཇི་ལྟར་ཏེ་རྣམ་པ་གང་གིས་ཁྱོད་ཀྱི་ལུང་བཅོམ་ལྡན་འདས་ཀྱི་བཀར་གྲུབ། དེར་ལུང་ཉིད་དུ་སྒྲུབ་པར་བྱེད་པའི་ཚད་མ་ལྷག་པ་འགའ་ཞིག་ནི་མཐོང་བ་མ་ཡིན་ནོ། །གཞན་གྱིས་ལན་གང་ཕྱིར་ཞེས་བྱ་བ་ལ་སོགས་པ་བརྗོད་དེ། རྒྱུ་གང་གི་ཕྱིར་བདག་གི་ལུང་འདི་ལུང་ཉིད་དུ་གྲུབ་པ་ཁྱོད་དང་ཁོ་བོ་ཅག་གཉིས་ལ་ངེས་པ་ཡིན་ཏེ། བདག་གི་ལུང་ལ་ཁྱེད་ཀྱང་ཐེག་པ་ཆེན་པོའི་རྗེས་སུ་འཇུག་པ་སངས་རྒྱས་ཀྱི་བཀའ་ཉིད་དུ་ལོག་པར་རྟོག་པ་ཡོད་པ་མ་ཡིན་ལ། དེ་ལྟ་བས་ན་འདི་གྲུབ་པ་ཡིན་ནོ། ཐེག་པ་ཆེན་པོ་ལ་ནི་བདག་གིས་ཡང་དག་པར་རྟོག་པ་ཡོད་པ་མ་ཡིན་པས། གང་གིས་ནི་ལན་འདིར་འགྱུར་བ་ཡིན་ཞེ་ན། གྲུབ་པའི་མཐའ་སྨྲ་བས་དང་པོ་ཁྱོད་ལ་འདིར་མ་གྲུབ་ཅེས་གསུངས་ཏེ། གལ་ཏེ་ཁྱོད་ཀྱིས་ལུང་ལུང་ཉིད་དུ་གཉི་ག་ལ་གྲུབ་པ་རྒྱུ་ཡིན་ན་དེའི་ཚེ་འདི་བརྗོད་པར་མི་བྱ་སྟེ། མ་གྲུབ་པའི་ཕྱིར་རོ། །གང་གི་ཕྱིར་ཁྱོད་ཉིད་ལ་འདི་ལུང་ཉིད་དུ་གྲུབ་པ་མ་ཡིན་ནོ། །གང་གི་ཚེ་ཞེ་ན། དང་པོར་ཏེ། དེ་ཁས་ལེན་པ་ལས་དང་པོ་སྟེ་སྔོན་རོལ་དུའོ། །ཁས་བླངས་པ་ལས་དང་པོར་ཁྱོད་ལ་ཇི་ལྟར་ཡང་གྲུབ་པ་མ་ཡིན་ནོ། །དེ་ལྟ་བས་ན་གཉི་ག་ལ་གྲུབ་པ་ཞེས་པ་མ་གྲུབ་པའི་ཕྱིར་སྒྲུབ་པར་བྱེད་པ་མ་ཡིན་ནོ། །གལ་ཏེ་གཉི་ག་ལ་གྲུབ་པ་མ་གྲུབ་ན། འདི་ལྟར་སྒྲུབ་པར་བྱེད་པ་འདི་ཡོད་པ་ཡིན་ཏེ། སངས་རྒྱས་ཀྱི་གསུང་རབ་ཉིད་དུ་བླ་མ་དང་སློབ་མ་བརྒྱུད་པ་ལས་བྱུང་བ་ཡིན་ལ། གང་ཡང་མདོ་སྡེ་ལ་འཇུག །འདུལ་བ་ལ་སྣང་བའི་རྒྱུ་མཚན་བླང་བར་བྱ་ཞིང་གུས་པར་བྱ་བར་བརྗོད་པ་ཡིན་ནོ། །དེར་ཞེས་པ་ནི་རང་གི་ལུང་ལ་ཡིན་ལ་ཆོས་ཉིད་དང་མི་འགལ་བ་དེ་སངས་རྒྱས་ཀྱི་བཀའ་ཡིན་ཏེ། གཞན་ནི་མ་ཡིན་ནོ་ཞེ་ན། རྐྱེན་གང་གིས་ཞེས་པ་ལ་སོགས་པ་གསུངས་སོ། །རྐྱེན་ཏེ་རྒྱུ་མཚན་གང་གིས་འདི་ལ་ཡིད་ཆེས་པ་ཡིན་པ་དེ་ནི་དེ་སྐད་དུ། གང་གིས་རྐྱེན་གྱིས་ཡིད་ཆེས་པའི་རྒྱུ་མཚན་བླང་བར་
བྱ་ཞིང་གུས་པར་བྱ་བར་བརྗོད་པ་ཡིན་ནོ། །དེར་ཞེས་པ་ནི་རང་གི་ལུང་ལ་ཡིན་ལ། རེ་ཞིག་ཡིན་ཡིད་ཆེས་པ་དེ་འབའ་ཞིག་འདིར་ཐེག་པ་ཆེན་པོ་ལ་ཡང་བྱོས་ཤིག་ཅེས་ཏེ། ཐེག་པ་ཆེན་པོ་ལ་ཡང་བརྗོད་པའི་ཡིད་ཆེས་པ་ཡོད་པའི་ཕྱིར་རོ། །འདི་ནི་ཡང་སངས་རྒྱས་ཀྱི་བཀའ་ཐམས་ཅད་ལ་ཐུན་མོང་བའི་མཚན་ཉིད་མ་འཁྲུལ་བ་ཡིན་ནོ། །གང་ལྷག་པའི་བསམ་པ་བསྐུལ་བའི་མདོ་ལས། བྱམས་པ་གཞན་ཡང་རྒྱུ་བཞིས་ནི་སྤོབས་བ་ཐམས་ཅད་ནི་སངས་རྒྱས་ཀྱིས་གསུངས་པར་རིག་པར་བྱའོ། །བཞི་གང་ཞེ་ན། བྱམས་པ་འདི་ལ་སྤོབས་པ་དོན་དང་ལྡན་པ་ཡིན་གྱི་དོན་དང་མི་ལྡན་པ་མ་ཡིན་པ་དང༌། ཆོས་དང་ལྡན་པ་ཡིན་གྱི། ཆོས་དང་མི་ལྡན་པ་མ་ཡིན་པ་དང༌། ཉོན་མོངས་པ་ཟད་པར་བྱེད་པ་ཡིན་གྱི། ཉོན་མོངས་པ་འཕེལ་བར་བྱེད་པ་མ་ཡིན་པ་དང༌། མྱ་ངན་ལས་འདས་པའི་ཡོན་ཏན་དང༌། ཕན་ཡོན་སྟོན་པ་ཡིན་གྱི་འཁོར་བའི་ཡོན་ཏན་དང༌། ཕན་ཡོན་སྟོན་པར་བྱེད་པ་མ་ཡིན་ནོ། །བྱམས་པ་རྒྱུ་བཞི་པོ་འདི་དག་དང་ལྡན་ན་སྔར་བཞིན་དུ་རིག་པར་བྱའོ། །བྱམས་པ་དགེ་སློང་ངམ། དགེ་སློང་མའམ། དགེ་བསྙེན་ནམ། དགེ་བསྙེན་མ་གང་སུ་ཡང་རུང་སྟེ། རྒྱུ་བཞི་པོ་འདི་དག་གི་སྤོབས་པས་སྤོབས་པའམ། སྤོབས་པར་འགྱུར་ཡང་རུང་སྟེ། དེ་ལ་རིགས་ཀྱི་བུའམ་བུ་མོ་དད་པ་ཅན་དག་གིས་དེ་དག་ལ་སངས་རྒྱས་སུ་འདུ་ཤེས་བསྐྱེད་པར་བྱ་ཞིང༌། སྟོན་པར་འདུ་ཤེས་བྱས་ནས་དམ་པའི་ཆོས་ཉན་བར་བྱའོ། །དེ་ཅིའི་ཕྱིར་ཞེ་ན། བྱམས་པ་ལེགས་པར་སྨྲས་པ་གང་ཅི་ཡང་རུང་བ་དེ་དག་ཐམས་ཅད་ནི་སངས་རྒྱས་ཀྱིས་གསུངས་པ་ཡིན་པའི་ཕྱིར་རོ། །བྱམས་པ་དེ་ལ་གང་ཟག་ལ་དང་བའི་ཕྱིར་འདི་དག་ནི་སངས་རྒྱས་ཀྱིས་གསུངས་པ་མ་ཡིན་ནོ་ཞེས་སྤོབས་པ་བཞི་པོ་དེ་དག་སྤོང་ཞིང་དེ་དག་ལ་མ་གུས་པ་སྐྱེད་པར་བྱེད་པ་དེས་ནི་སངས་རྒྱས་ཀྱིས་གསུངས་པའི་སྤོབས་པ་ཐམས་ཅད་སྤངས་པ་ཡིན་ཏེ། ཆོས་སྤངས་ནས་ཆོས་ཀྱིས་ཕོངས་པར་འགྱུར་བའི་ལས་མངོན་པར་འདུ་བྱེད་པས་ངན་སོང་དུ་འགྲོ་བར་འགྱུར་རོ། །བྱམས་པ་དེ་ལྟ་བས་ན་རིགས་ཀྱི་བུའམ། རིགས་ཀྱི་བུ་མོ་དད་པ་ཅན་གང་
ཆོས་ཀྱིས་ཕོངས་པར་འགྱུར་བའི་ལས་ལས་ཡོངས་སུ་གྲོལ་བར་འདོད་པས། གང་ཟག་ལ་སྡང་བའི་ཕྱིར་ཆོས་ལ་སྡང་བར་མི་བྱའོ། །དེ་ལ་ཆོས་ཉིད་དང་མི་འགལ་བ་ཉིད་ནི་ཡང་དག་པའི་མཚན་ཉིད་ཡིན་ནོ། །གང་ཞིག་དོན་ལྡན་ཆོས་དང་ཉེར་འབྲེལ་ཅིང༌། །ཁམས་གསུམ་ཀུན་ནས་ཉོན་མོངས་སྤོང་བྱེད་གསུང༌། །ཞི་བའི་ཕན་ཡོན་སྟོན་པར་མཛད་པ་གང༌། །དེ་ནི་དྲང་སྲོང་གསུང་ཡིན་བཟློག་པ་གཞན། །ཞེས་གསུངས་སོ། །འདི་ཐེག་པ་ཆེན་པོ་ལ་ཡོད་པས་ཇི་ལྟར་བླང་བར་བྱ་བ་མ་ཡིན་པར་འགྱུར། གང་དང་པོར་ཁྱོད་ལ་འདི་མ་གྲུབ་ཅེས་པ་དེ་ལ་གཞན་གྱིས་ཁྱད་པར་བརྗོད་དེ། གང་གི་ཚེ་ཁྱོད་དང་ཁོ་བོ་ཅག་གཉི་ག་ལ་གྲུབ་པ་ཞེས་མི་སྨྲའོ། །འོན་ཀྱང་འུ་བུ་ཅག་ལས་གཞན་པ་གཉི་ག་ལ་གྲུབ་པའི་བདག་ཉིད་ལུང་ནི་བླང་བར་བྱ་བ་ཡིན་ལ། ཐེག་པ་ཆེན་པོ་ནི་མ་ཡིན་ཏེ། དེ་ལས་བཟློག་པ་ཡིན་པའི་ཕྱིར་ལ་དེས་ན་བླང་བར་བྱ་བ་མ་ཡིན་ནོ་ཞེ་ན། གཞན་གཉིས་འདོད་པས་བརྟེན་ན་ནི་ཞེས་པ་ལ་སོགས་པ་གསུངས་ཏེ། གལ་ཏེ་འུ་བུ་ཅག་རྩོད་པ་དང་བཅས་པའི་ཕྱིར་འུ་བུ་ཅག་ལས་གཞན་པ་གང་སུ་དག་གཉི་ག་ལ་གྲུབ་པ་དེ་དག་འདོད་ཅིང་མངོན་པར་འདོད་པ་དང་ཡང་དག་པར་འདོད་པའི་བར་དུ་སྟེ་དེ་བདེན་པ་ཇི་ལྟ་བའི་དོན་ཡིན་ཞིང་ཁས་བླངས་བ་ན་རིག་བྱེད་སོགས་ཀྱང་བདེན་པར་འགྱུར་ཏེ། རིག་བྱེད་ཀྱི་ངག་སྐུལ་བར་བྱེད་པའི་མཚན་ཉིད་ཀྱང་བདེན་པར་འགྱུར་ཏེ། སོགས་པའི་སྒྲས་གཟེགས་ཟན་ལ་སོགས་པའི་ཚིག་ཀྱང་བདེན་པར་འགྱུར་ལ་བརྫུན་པ་མ་ཡིན་པར་འགྱུར་ཏེ། དེ་ཡང་རྒོལ་བ་དང་ཕྱིར་རྒོལ་བ་དག་ལས་གཞན་གཉི་གས་འདོད་པ་སྲིད་པའི་ཕྱིར་ཁྱེད་ལ་བླང་བར་བྱ་བར་འགྱུར་རོ། །དེ་ལྟ་བས་ན་འདི་ལ་ནི་ཁྱད་པར་ཡོད་པ་མ་ཡིན་ནོ། །དེ་ལྟར་གྱུར་ན་ཡང་ཁོ་བོ་ཅག་གི་ལུང་ལ་སངས་རྒྱས་ཀྱི་བཀའ་ཉིད་དུ་རྩོད་པ་ཡོད་པ་མ་ཡིན་ལ། ཐེག་པ་ཆེན་པོ་ལ་ནི་མ་ཡིན་པ་དེས་ན་དེ་ནི་བླང་བར་བྱ་བ་ཡིན་ལ་ཅིག་ཤོས་ལ་ནི་མ་ཡིན་ནོ་ཞེས་དོགས་ནས། ཐེག་ཆེན་རྩོད་བཅས་ཞེས་བྱ་བ་ལ་སོགས་པ་སྨོས་ཏེ། རྩོད་པ་དང་བཅས་པ་ནི་ལོག་པར་རྟོག་པ་དང་བཅས་པ་ཡིན་ཏེ་ཁ་ཅིག་ནི་སངས་རྒྱས་ཀྱི་བཀའ་ཉིད་ཀྱིས་
འཇུག་པའི་ཡན་ལག་ཏུ་འདོད་ལ། ཁ་ཅིག་ནི་ཕྱིན་ཅི་ལོག་གི་སྒྲོ་བཏགས་པ་ཉིད་དུ་འདོད་དེ། རྒྱུ་དེའི་ཕྱིར་གལ་ཏེ་གཟུང་བར་བྱ་བ་མ་ཡིན་ནོ་ཞེ་ན། དེའི་ཚེ་ལུང་དོར་བྱར་འགྱུར་ཏེ་རང་གི་ལུང་ཡང་དོར་བར་བྱ་སྟེ། དེ་ཡང་འཇུག་པའི་ཡན་ལག་མ་ཡིན་པར་འགྱུར་རོ། །ཅིའི་ཕྱིར་ཞེ་ན། མུ་སྟེགས་ཏེ་དཔྱོད་པ་པ་ལ་སོགས་པ་རྣམས་དང་རྩོད་པ་དང་བཅས་པ་ཡིན་ལ་ལོག་པར་རྟོག་པ་སྲིད་པའི་ཕྱིར་དོར་བར་བྱ་བར་རིགས་སོ། །མུ་སྟེགས་ཅན་འབའ་ཞིག་དང་ནི་མ་ཡིན་ཏེ། འོན་ཀྱང་རང་གི་སྡེ་པ་དང་ཡང་ཡིན་ནོ་ཞེས་རང་དང་ཞེས་གསུངས་ཏེ། བཅོམ་ལྡན་འདས་ཀྱིས་བསྟན་པ་ནི་སྡེ་པ་བཞི་ལས་བཅྭ་བརྒྱད་དུ་གྱིས་པ་ཡིན་ཏེ། དེ་ལ་སྡེ་པ་གཅིག་ལ་ཡང་དུ་མར་གྱེས་པ་སྲིད་པའི་ཕྱིར་རང་གི་སྡེ་པ་ལས་ཡང་ཕན་ཚུན་དུ་རྩོད་པ་སྲིད་པ་རང་ཞེས་ཏེ། རང་གི་སྡེ་པའི་ནང་གི་གྱེས་པའི་ཁྱད་པར་ལ་གནས་པ་ཡིན་ལ། གཞན་གྱི་ཞེས་པ་ནི་སྡེ་པ་གཞན་ལ་གནས་པ་ཡིན་ཏེ། དང་གི་སྒྲས་ནི་སྔ་མ་དང་ཕྱི་མའི་དོན་སྡུད་པ་ཡིན་ནོ། །རྩོད་བཅས་ཡིན་ཕྱིར་ལུང་དོར་བར་བྱའོ་ཞེས་འབྲེལ་ཏེ་ཁྱོད་ཀྱིས་ཁས་བླངས་པའི་ལུང་ལས་གཞན་གྱི་ལུང༌། ལུང་གི་ཁྱད་པར་དེ་ཡང་རྩོད་པ་དང་བཅས་པ་ཡིན་པའི་ཕྱིར་ཁས་བླངས་པར་འོས་པ་མ་ཡིན་ནོ། །ཁྱོད་ཀྱིས་ལུང་ཡང་གཞན་ལ་ལྟོས་ནས་རྩོད་པ་དང་བཅས་པ་ཡིན་ཏེ། སྤང་བར་བྱ་བ་ཉིད་དུ་རིགས་པ་མཚུངས་པ་ཡིན་ནོ། །ཡང་ན་རང་ཞེས་པ་ནི་གྱེས་པ་གཅིག་ལ་གནས་པའི་མདོ་སྡེ་དང༌། མངོན་པ་ཕན་ཚུན་དུ་རྩོད་པ་དང་བཅས་པའི་ཕྱིར་མདོ་སྡེ་དང་འདུལ་བ་དང་ཆོས་མངོན་པ་ཡོངས་སུ་དོར་བར་རིགས་ཏེ། གྱེས་པ་གཅིག་ལ་གནས་པ་མདོ་སྡེ་པ་ལ་སོགས་པ་ལ་ཕན་ཚུན་དུ་རྩོད་པ་ཡོད་པ་ཡིན་ནོ། །གཞན་ཞེས་པ་ནི་སྡེ་པ་གཅིག་ལ་གནས་པ་ལ་གྱེས་པ་གཞན་ཡིན་ནོ། །འདིས་ནི་གང་བླ་མ་བརྒྱུད་པའི་རིམ་པས་སངས་རྒྱས་ཀྱི་བཀའ་ཡིན་ནོ་ཞེས་བརྗོད་པ་དེ་འདི་ཉིད་ཀྱིས་བསལ་བ་ཡིན་པར་རིག་པར་བྱའོ། །དྲན་པ་མ་ཉམས་པའི་མན་ངག་དང་ལྡན་པ་རྣམས་ལ་ཕན་ཚུན་དུ་རྩོད་པར་རིགས་པ་མ་ཡིན་ནོ། །ཐམས་ཅད་མཁྱེན་
བའི་བཀའ་རྣམས་ལ་ཕན་ཚུན་གནོད་པ་ཡོད་པ་མ་ཡིན་ནོ། །མདོ་སྡེ་དང་ཆོས་མངོན་པ་དང༌། འདུལ་བ་རྣམས་ལ་ཕན་ཚུན་དག་གཅིག་པ་ཉིད་དུ་ཁྱེད་ལ་སྲིད་པ་མ་ཡིན་ལ། དེ་ལ་ཇི་ལྟར་མདོ་སྡེ་ལ་སོགས་པ་དང་མཐུན་པ་སངས་རྒྱས་ཀྱི་བཀའ་རྒྱུ་མཚན་དུ་བརྗོད་པ་དེ་ལྟ་བས་ན་ཅུང་ཟད་ཀྱང་མ་ཡིན་ནོ། །དེ་ལྟར་ན་ལན་དང་སུན་འབྱིན་པ་མཚུངས་པར་བརྗོད་ནས་ཡང་གཞན་གྱིས་བླངས་པ་ལ་ཁྱད་པར་གྱི་སྒོ་ནས་སུན་འབྱིན་པ་བརྗོད་པའི་ཕྱིར། བསྟན་རྩ་ཞེས་པ་ལ་སོགས་པ་གསུངས་པས་ཉེ་བར་རྩོམ་པ་ཡིན་ཏེ། བསྟན་པ་ནི་བཅོམ་ལྡན་འདས་ཀྱིས་ཕན་པ་དང་ཕན་པ་མ་ཡིན་པ་ལེན་པ་དང་ཡོངས་སུ་སྤོང་བ་སྟོན་པའི་མཚན་ཉིད་དོ། །དེ་ལ་ཡང་དགེ་སློང་རྩ་བ་ཡིན་ནོ། །ཡང་ན་ལུང་ལ་ལོག་པར་རྟོགས་པ་ཞར་ལ་བསལ་ནས། བདེན་པ་མཐོང་བས་གྲོལ་འགྱུར་གྱི། །སྟོང་ཉིད་མཐོང་བས་ཅི་ཞིག་བྱ། །ཞེས་གང་བརྗོད་པ་དེ་སུན་དབྱུང་བའི་ཕྱིར། བསྟན་རྩ་ཞེས་བྱ་བ་ལ་སོགས་པ་གསུངས་ཏེ། བསྟན་པ་ནི་འདི་ནི་བྱ་བའོ་འདི་ནི་མི་བྱའོ་ཞེས་བཀའ་ལ་གཞོལ་བ་ལ་དགེ་སློང་ཉིད་རྩ་བ་ཡིན་ཏེ་དེ་ལ་དགེ་སློང་གི་དངོས་པོ་ཉིད་དགེ་སློང་ཡིན་ལ། དེ་ཉིད་རྩ་བ་ཡིན་ཏེ། གང་གི་རྩ་བ་ཡིན་པ་དེ་ལ་དེ་སྐད་ཅེས་བྱ་སྟེ། དེ་ལ་གནས་པ་ཡིན་པའི་ཕྱིར་རོ། །ཇི་ལྟར་རྩ་བ་བརྟན་པའི་ཤིང་ཡུན་རིང་དུ་གནས་པ་ཉམས་སུ་མྱོང་བ་ན་སྡོང་བུ་དང༌། ཡལ་ག་དང༌། ཡལ་ག་ཕྲེའུ་དང༌། ལོ་མ་དང༌། འབྲས་བུ་དང༌། གྲིབ་མས་གདུང་བ་སེལ་བར་བྱེད་པ་ལ་སོགས་པ་ཉེ་བར་མཁོ་བ་ལ་ནུས་པ་དང་ལྡན་པར་འགྱུར་རོ་ཞེས་གྲགས་པ་དེ་བཞིན་དུ་བཅོམ་ལྡན་འདས་ཀྱིས་བསྟན་པ་ཡང་དཔག་བསམ་གྱི་ཤིང་དགེ་སློང་ཉིད་ཀྱི་རྩ་བ་ལ་བརྟེན་ནས་དྲན་པ་ཉེ་བར་གཞག་པ་དང༌། ཡང་དག་པར་སྤོང་བ་དང༌། རྫུ་འཕྲུལ་གྱི་རྐང་པ་དང༌། དབང་པོ་དང༌། སྟོབས་དང༌། བྱང་ཆུབ་ཀྱི་ཡན་ལག་དང༌། གཟུགས་མེད་པའི་ཏིང་ངེ་འཛིན་ལ་སྙོམས་པར་འཇུག་པ་དང༌། བྱང་ཆུབ་ཀྱི་ཕྱོགས་རྣམས་དང་མཐུན་པ་དང༌། འཕགས་པའི་ལམ་ཡན་ལག་བརྒྱད་དང༌། དགེ་སློང་གི་འབྲས་བུ་ཕུན་སུམ་ཚོགས་པ་དང༌། རྫུ་འཕྲུལ་གྱི་ཆོ་འཕྲུལ་ལ་སོགས་པ་རྣམས་ཀྱིས་ཉོན་མོངས་པའི་གདུང་བ་
ལ་སོགས་པ་སེལ་ནུས་པར་འགྱུར་རོ། །དེ་ལྟར་ན་དགེ་སློང་ཉིད་རྩ་བ་དང་ཆོས་མཚུངས་པ་ཡིན་ཏེ། དེ་ལ་མིང་གི་དགེ་སློང་དང༌། ཁས་འཆེ་བའི་དགེ་སློང་དང༌། སློང་པའི་ངང་ཚུལ་གྱི་དགེ་སློང་དང༌། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་དང༌། ཉོན་མོངས་པ་བཅོམ་པས་དགེ་སློང་སྟེ། དེ་ལྟར་ན་དགེ་སློང་ནི་རྣམ་པ་ལྔ་ཡིན་ནོ། །དེ་ལས་བཞི་པ་དང་ལྔ་པ་གཉིས་ནི་མཆོག་ཡིན་ལ། གཞན་རྣམས་ནི་མི་མཚུངས་པ་ཙམ་གྱི་བརྗོད་བྱ་ཡིན་པའི་ཕྱིར་རོ། །དེ་ལས་གཉིས་པོ་ཡང་བསྟན་པ་གནས་པའི་རྒྱུ་ཉིད་དུ་འགལ་བ་ཡིན་ནོ། དེ་ལ་ཡང་ཉོན་མོངས་པ་བཅོམ་པའི་དགེ་སློང་ཉིད་གཙོ་བོ་ཡིན་ཏེ། དེ་ཉིད་འདིར་བཟུང་ལ། དེའི་དངོས་པོ་དགེ་སློང་ཉིད་ཡིན་ལ། དེ་ཡང་འཕགས་པའི་བདེན་པ་མཐོང་བ་དེས། དེ་ལྟར་འཐད་པར་འགྱུར་བ་མ་ཡིན་ནོ། །དགེ་སློང་ཉིད་ནི་ཉོན་མོངས་པ་བཅོམ་པ་ཡིན་ཏེ་ཉོན་མོངས་པ་སྤངས་པ་ཡིན་ནོ་ཞེས་བྱ་བའི་བར་དུའོ། །ཀྱང་གི་སྒྲ་ནི་བཤད་པ་གཞན་སྡུད་པ་སྟེ་ཐར་པ་ཉིད་དུ་འཇུག་ལ་གང་གི་ཕྱིར་དགེ་སློང་དེ་ཉིད་དཀའ་བས་གནས་པ་ཡིན་ཏེ། སྟོང་པ་མཐོང་བ་ཉིད་མེད་པར་འཚམ་པ་མ་ཡིན་ལ་བདེན་པ་མཐོང་བ་འབའ་ཞིག་གིས་རིགས་པ་མ་ཡིན་ལ། དེ་ལྟ་བས་ན་བདེན་པ་མཐོང་བས་གྲོལ་བ་མ་ཡིན་ཏེ། དེས་ན་བརྗོད་པར་མི་བྱའོ་ཞེས་བསམས་པ་ཡིན་ནོ། །ཇི་ལྟར་དཀའ་བས་གནས་པ་ཡིན་ཞེ་ན། སེམས་ནི་དམིགས་པར་བཅས་རྣམས་ཀྱི། །ཞེས་བྱ་བ་ལ་སོགས་པ་གསུངས་ཏེ། དམིགས་དང་བཅས་པ་སྟེ་དངོས་པོ་ལ་མངོན་པར་ཞེན་པས་འཇུག་པ་ནི་དམིགས་པ་དང་བཅས་པ་ཡིན་ཏེ། དེ་ནི་དེ་ལྟ་བུར་གྱུར་པའི་སེམས་ཡིན་ནོ། །གང་རྣལ་འབྱོར་པ་དེ་རྣམས་ཀྱི་ཡིན་པ་དེ་ལ་དེ་རྣམས་ཀྱི་ཞེས་བརྗོད་པར་བྱའོ། །གང་གི་ཕྱིར་སྡུག་བསྔལ་ལ་སོགས་པའི་བདེན་པ་དེ་རྣམས་ཀྱིས་ཉོན་མོངས་པ་དང་བྲལ་བ་ལ་ཡང་དངོས་པོ་ཉིད་དུ་དམིགས་པས་ཞེས་ཁྱེད་འདོད་པ་ཡིན་ལ། དེའི་ཕྱིར་དམིགས་པ་དང་བཅས་པར་ལྟ་བ་རྣམས་ལ་དཀའ་བར་གནས་པ་ཡིན་ནོ། །སེམས་དམིགས་པ་དང་བྲལ་བ་རྣམས་ལ་ནི་མ་ཡིན་ནོ། །གང་སླར་
བརྗོད་པ་བདེན་པ་མཐོང་བས་གྲོལ་ཞེས་བརྗོད་པ་དེ་ལ་བརྟག་པར་བྱ་སྟེ། བདེན་པ་མཐོང་བ་རྣམ་པ་གཉིས་སྲིད་ལ། དོན་དམ་པའམ་ཀུན་རྫོབ་པོ། །དེ་ལ་གལ་ཏེ་བརྟག་པ་དང་པོ་ལྟར་ན་དེའི་ཚེ་ཁོ་བོ་ཅག་ལ་ལོག་པར་རྟོགས་པ་མེད་དེ། ཁོ་བོ་ཅག་གི་ཕྱོགས་གཙོ་བོ་ཡིན་པའི་ཕྱིར་ལ། ཁོ་བོ་ཅག་རྣམས་ཀྱི་ཆོས་ཐམས་ཅད་དོན་དམ་མཐོང་བར་ཁས་བླངས་པའི་ཕྱིར་རོ། །འོན་ཏེ་གཉིས་པ་ཡིན་ན་དེ་ལ་མི་བཟོད་དེ། རིགས་པ་དང་འགལ་བའི་ཕྱིར་ཏེ། ཀུན་རྫོབ་ཀྱི་བདེན་པ་མཐོང་བས་གྲོལ་བ་ནི་རིགས་པ་མ་ཡིན་ཏེ། སེམས་ཅན་ཐམས་ཅད་གྲོལ་བར་ཐལ་བར་འགྱུར་བའི་ཕྱིར་ལ། འདི་ལྟར་ལུང་དང་རིགས་པ་དག་གིས་དེ་ཁོ་ན་ཉིད་དང་དེ་ཁོ་ན་མ་ཡིན་པ་རྣམ་པར་ཕྱེ་བའི་ཕྱིར། དོན་དམ་པའི་བདེན་པ་ཉིད་ཀྱིས་ཉོན་མོངས་པ་སྤོང་བའི་དོན་དུ་ངེས་པ་ཡིན་ཏེ། ཀུན་རྫོབ་ཀྱིས་ནི་མ་ཡིན་ནོ། །དེ་ཡང་ཆོས་ཐམས་ཅད་མི་དམིགས་པའི་མཚན་ཉིད་ཡིན་ལ། དེ་མེད་པར་ཉོན་མོངས་པ་ལྡོག་པར་འཐད་པ་མ་ཡིན་ནོ། །ཇི་སྲིད་དུ་དངོས་པོ་ལ་མངོན་པར་ཞེན་པ་དེ་སྲིད་དུ་རྣམ་པར་རྟོག་པ་ལྡོག་པ་མ་ཡིན་ལ། ཇི་སྲིད་དུ་རྣམ་པར་རྟོག་པ་ཡོད་པ་དེ་སྲིད་དུ་ནུས་པ་ཉམས་པ་མ་ཡིན་ཏེ། ཉོན་མོངས་པའི་སེམས་ཀྱི་རྒྱུན་གནས་པ་ཡིན་ལ། ཇི་སྲིད་དུ་ཉོན་མོངས་པ་ཡོད་པ་དེ་སྲིད་དུ་ལས་ཀྱིས་སྤྲུལ་པའི་སྐྱེ་བ་བརྒྱུད་པས་རབ་ཏུ་གནས་པ་ཡིན་ཏེ། འཁོར་བ་ཡང་མཆོག་ཏུ་ཉམས་པ་མེད་པར་མཐའ་ཡས་པར་འཇུག་གོ །དེའི་ཕྱིར་ཆོས་ཐམས་ཅད་ཀྱི་སྟོང་པ་ཉིད་ཁོ་ན་མ་རིག་པའི་གཉེན་པོ་ཡིན་པའི་ཕྱིར་འཁོར་བའི་རྒྱུན་གཅོད་པའི་རྒྱུར་གཏོགས་པར་བྱས་ལ། བདེན་པ་མཐོང་བ་འབའ་ཞིག་གིས་ནི་མ་ཡིན་ནོ། །འདི་ཉིད་སློབ་དཔོན་གྱི་ཞལ་སྔ་ནས་ཀྱིས། སྟོང་ཉིད་མཐོང་བས་གྲོལ་འགྱུར་གྱི། །སྒོམ་པ་ལྷག་མ་དེ་དོན་ཡིན། །ཞེས་གསུངས་སོ། །ཇི་ལྟར་འཕགས་པའི་བདེན་པ་རྣམས་ནི་བདེན་པ་གཉིས་སུ་འདུས་པ་ཡིན་ཏེ། དེ་བཞིན་དུ་སྔར་བསྟན་པ་ཉིད་ཡིན་ནོ། །དེ་ལྟར་ན་ཤིན་ཏུ་སྤྲོས་པས་ཆོག་གོ །གཞན་ཡང་སེམས་ནི་དམིགས་པར་བཅས་རྣམས་ཀྱི། །མྱ་ངན་ལས་འདས་པ་ཡང་དཀའ་བར་གནས། །ཞེས་
ཏེ། །དགེ་སློང་འབའ་ཞིག་ནི་མ་ཡིན་ལ་འོན་ཀྱང་མྱ་ངན་ལས་འདས་པ་ཡང་ཡིན་ནོ་ཞེས་འང་གི་དོན་ཡིན་ཏེ། མྱ་ངན་ལས་འདས་པ་ཉོན་མོངས་པ་དང་བྲལ་བས་ཕུང་པོ་ལྷག་མ་མེད་པར་དཀའ་བར་གནས་པ་ཡིན་ཏེ། འཐད་པ་མ་ཡིན་ནོ། །དེ་ལ་རེ་ཞིག་དགེ་སློང་ཉིད་མི་འཐད་པར་ཉོན་མོངས་པ་སྤངས་པས་ཞེས་པ་ལ་སོགས་པ་གསུངས་ཏེ། གལ་ཏེ་འཕགས་པའི་བདེན་པ་མཐོང་བས་ཉོན་མོངས་པ་སྤོང་བར་འགྱུར་ན། དེ་ལས་གྲོལ་བའི་ངོ་བོ་སྐྱེ་བར་འགྱུར་ཏེ། དེའི་ཚེ་དེ་མ་ཐག་ཏུ་ཉོན་མོངས་སྤངས་པའི་ཕྱིར། དེ་མ་ཐག་ཉིད་དུ་གྲོལ་བར་འགྱུར་བ་ཉིད་དོ། །སུ་ཞིག་གིས་ཀྱང་གཞན་དུ་ཡིན་ནོ་ཞེས་སྨྲ་བ་འདི་ཡང་ཡོད་པ་མ་ཡིན་ཏེ། ཅིའི་ཕྱིར་འདི་ལྟར་ཡིན་ཞེ་ན། ཉོན་མོངས་མེད་ཀྱང་ཞེས་པ་ལ་སོགས་པ་གསུངས་ཏེ། མཐོང་ཞིང་རྟོགས་པའི་ལུང་ལས་ཏེ་གང་གི་ཕྱིར་ཉོན་མོངས་པ་དེ་རྣམས་སྤངས་ན་ཡང་འཕགས་པ་མཽད་གལ་གྱི་བུ་དང༌། འཕགས་པ་སོར་ཕྲེང་ཅན་ལ་སོགས་པ་རྣམས་ལ་ནུས་པ་སྟེ་འབྲས་བུ་འབྱིན་པའི་ནུས་པ་ཡོད་པ་དེ་ལྟ་བས་ན་དེ་མ་ཐག་ཏུ་གྲོལ་བ་ཡོད་པ་མ་ཡིན་ནོ། །གང་གིས་ནུས་པ་མཐོང་ཞེ་ན། ལས་ཀྱིས་ཏེ་དགེ་བ་དང་མི་དགེ་བའི་མཚན་ཉིད་ཅན་གྱིའོ། །གང་ཡིན་ཞེ་ན། སྔར་འཕགས་པ་མ་ཡིན་པའི་གནས་སྐབས་ན་ཉོན་མོངས་པ་དང་བཅས་པའོ། །ཉོན་མོངས་པ་མེད་ཀྱང་ཡིན་ནོ་ཞེས་བསྟན་པའི་ཕྱིར། ཉོན་མོངས་མེད་ཀྱང་ཞེས་གསུངས་ཏེ། ལྷན་ཅིག་བྱེད་པའི་ཉོན་མོངས་པ་དང་བྲལ་ན་ཡང་ལས་ཀྱི་ནུས་པ་མཐོང་བ་ཡིན་ནོ། །ཅི་སྟེ་ཡང་བདེན་པ་མཐོང་བ་ལས་མ་རིག་པ་སྤོང་བ་ཡིན་ཏེ། དེ་སྤངས་པ་ལས་འདུ་བྱེད་ལ་སོགས་པ་སྤོང་བའི་རིམ་པས་སྲེད་པ་ཡང་སྤོང་བར་འགྱུར་བ་ཡིན་ལ། སྲེད་པ་དང་ཕྱིན་ཅི་ལོག་དང་ལྡན་པ་ནི་སླར་སྐྱེ་བའི་རྒྱུ་མཚན་ཡིན་ཏེ། དེའི་ཕྱིར་དེ་དག་བྲལ་བས་ཤུན་ཕྲགས་མེད་པའི་ས་བོན་བཞིན་དུ་ལས་ཡོད་ན་ཡང་ཅུང་ཟད་ཀྱང་ཉམས་པ་མེད་པ་ཡིན་ནོ། །དེ་སྐད་དུ་ཡང༌། ལོག་ཤེས་དང་ནི་ངེས་སྐྱེད་སྲེད། །བཅས་པའི་སེམས་ཀྱི་དབང་གིས་ནི། །དམན་པའི་གནས་སུ་སྐྱེ་བ་ཡིན། །དེ་སྤངས་པས་ནི་སྐྱེ་བ་མེད། །ཅེས་
གསུངས་ཏེ། ཡང་ན་སྲེད་པ་ཉིད་འབའ་ཞིག་ཡང་སྲིད་ཀྱི་རྒྱུ་ཡིན་ཏེ། ཀུན་འབྱུང་བ་རྒྱུ་ཡིན་པའི་ཕྱིར་བཅོམ་ལྡན་འདས་ཀྱིས་ཀྱང་དེ་ལ་ཀུན་འབྱུང་བ་འཕགས་པའི་བདེན་པ་གང་ཞེ་ན། གང་སྲེད་པ་ནི་གང་འབྱུང་བ་ལ་མངོན་པར་དགའ་བ་དང༌། འདོད་ཆགས་དང་བཅས་པས་དེ་དང་དེ་ལ་མངོན་པར་དགའ་བ་ཡིན་ཏེ། འདི་ལྟ་སྟེ་འདོད་པའི་སྲེད་པ་དང༌། སྲིད་པའི་སྲེད་པ་དང༌། ལོངས་སྤྱོད་ཀྱི་སྲེད་པ་ཡིན་ནོ། །དེ་ལྟར་ན་གང་སྲེད་པ་མེད་པ་དེ་ལ་རྒྱུ་ཀུན་འབྱུང་བ་སྤངས་ཤིང་མེད་པའི་ཕྱིར་ཡང་སྐྱེ་བ་སྲིད་པ་མ་ཡིན་ནོ་ཞེས་གསུངས་སོ། །གཞན་གྱི་བསམ་པ་བླངས་ནས། རེ་ཞིག་ཉེར་ལེན་ཞེས་པ་ལ་སོགས་པ་གསུངས་ཏེ། མ་རིག་པ་སྤངས་པས་སྲེད་པ་ཡང་སྲིད་ཀྱི་ཉེ་བར་ལེན་པའི་རྒྱུ་ཡིན་པ་མེད་ཅིང༌། ཡོད་པ་མ་ཡིན་ཏེ་ཞེ་ན་ཞེས་གལ་ཏེ་བསྟན་ཞིང་ངེས་པར་བྱེད་ནའོ། །དེའི་ཚེ་འདི་སྐད་བརྗོད་པར་མི་བྱ་སྟེ། གང་གི་ཕྱིར་དམིགས་པ་དང་བཅས་པའི་ལྟ་བ་པ་རྣམས་ལ་མ་རིག་པ་སྤོང་བ་ཉིད་འཐད་པ་མ་ཡིན་ཏེ། དེ་ཡོད་པས་སྲེད་པ་སྤངས་པ་ཡང་ཡོད་པ་མ་ཡིན་པའི་ཕྱིར་རོ། །ཡིན་དུ་ཆུག་ན་ཡང་ཡང་འདི་ལྟར་བརྗོད་པར་བྱ་སྟེ། སྲིད་པ་འདི་ཞེས་པ་ལ་སོགས་པ་གསུངས་པ་ལ། ཉོན་མོངས་ཅན་མ་ཡིན་པ་ཡོད་ན་སྟེ། ཉོན་མོངས་པ་དང་མཚུངས་པར་མི་ལྡན་པའི་སྲེད་པ་འདི་ཁྱེད་ཀྱི་རྣལ་འབྱོར་པ་རྣམས་ལ་མེད་པ་ཇི་ལྟར་སྲིད་དེ་ཅི་སྟེ་མེད། ཇི་ལྟ་བུ་ཞེ་ན། རྨོངས་པ་བཞིན་དུ་སྟེ། ཉོན་མོངས་པ་ཅན་མ་ཡིན་པའི་ཤེས་པ་བཞིན་དུའོ། །འདིས་ཀྱང་སྲིད་པ་སྤང་བར་མི་ནུས་སོ་ཞེས་ཚོར་བའི་རྐྱེན་གྱིས་ཞེས་པ་ལ་སོགས་པ་གསུངས་ཏེ། རེག་པའི་རྐྱེན་གྱིས་ཚོར་བ་ཡིན་ལ་ཚོར་བའི་རྐྱེན་གྱིས་སྲེད་པ་ཡིན་ཏེ། སྲེད་པའི་རྒྱུ་ཚོར་བ་དེ་ཡང་ཡོད་པ་མིན་པས་ཉམས་པ་མེད་པའི་རྒྱུ་ཡོད་ན་དེའི་འབྲས་བུ་ཡོད་པ་མ་ཡིན་ནོ་ཞེས་ཇི་ལྟར་བརྗོད་པར་ནུས། ཁ་ན་མཐོ་བ་མེད་པའི་ཚོར་བ་མེད་ན་ཡང་སྲེད་པ་ཡོད་པ་མ་ཡིན་ནོ་ཞེ་ན། དངོས་པོ་ལ་མངོན་པར་ཞེན་པ་ཅན་ལ་ཁ་ན་མ་ཐོ་བ་མེད་པ་ཉིད་ཀྱང་འགྲུབ་པ་མ་ཡིན་ནོ་ཞེས་བརྗོད་པ་ཡིན་ནོ། །དེའི་ཕྱིར་གལ་ཏེ་ཉོན་མོངས་པ་ཅན་མ་ཡིན་པའི་མི་ཤེས་པ་ཡོད་ཀྱང་སྲེད་པ་ཁས་མི་ལེན་པ་དེ་ལྟ་ན་ཡང་སྟོང་པ་ཉིད་མཐོང་བ་དང་བྲལ་བས་རིགས་པའི་སྟོབས་ཀྱིས་ཐོབ་པ་
ཡིན་ནོ། །འདིར་འདི་ནི་བསྡུས་པའི་དོན་ཡིན་ཏེ། གང་གི་ཚེ་རྒྱུད་གྲོལ་བ་ཡིན་ན་ཡང་ལས་འབྲས་བུས་སྟེར་བ་ལ་ནུས་པ་དང་ལྡན་པར་མཐོང་བ་ཡིན་ལ། སྲེད་པ་ཡང་ཚོར་བ་ཡོད་པ་ཡིན་པ་ན་དེའི་ཚེ་ཉོན་མོངས་པ་སྤངས་པ་ལ་ཡང་ཐེ་ཚོམ་ཟ་བས་ཇི་ལྟར་གྲོལ་བར་ངེས་པར་བྱ། དེ་ལྟ་བས་ན་སྟོང་པ་ཉིད་མེད་པར་དགེ་སློང་ཉིད་ལེགས་པར་གནས་པར་སྣང་བར་འགྱུར་ཞེས་པའོ། །གང། སེམས་ནི་དམིགས་པར་བཅས་རྣམས་ཀྱིས། །མྱ་ངན་འདས་པའང་དགའ་བས་གནས། །ཞེས་པ་དེ་བརྗོད་པའི་ཕྱིར། དམིགས་པ་དང་ནི་ཞེས་པ་ལ་སོགས་པ་གསུངས་ཏེ། དམིགས་པ་དང་བཅས་པ་ནི་ཉེ་བར་དམིགས་པ་དང་བཅས་པའི་སེམས་ཀྱིས་སོ། །གནས་པ་ནི་ཞེན་པའོ། །འགའ་ཞིག་ལ་ནི་མངོན་པར་ཞེན་པའི་གནས་འཕགས་པའི་བདེན་པ་ལ་སོགས་པ་དེ་དང་དེ་ལའམ། དེ་བསྒོམས་པའི་འབྲས་བུ་རྣམས་ལ་ཞེན་པ་སྲིད་པས་ཡང་སྐྱེ་བ་ལྡོག་པ་ནི་མ་ཡིན་ནོ། །ཡང་སྐྱེ་བ་སྲིད་པ་རྣམས་ལ་ཇི་ལྟར་མྱ་ངན་ལས་འདས་པ་ཡང་ཐེ་ཚོམ་མི་ཟ་བར་འགྱུར། དེའི་ཕྱིར་བརྗོད་པའི་སྟོང་པ་ཉིད་མྱ་ངན་ལས་འདས་པའི་རྒྱུ་ཡིན་པར་བརྗོད་པའི་ཕྱིར། སྟོང་པ་ཉིད་དང་བྲལ་བའི་ཞེས་པ་ལ་སོགས་པ་གསུངས་ཏེ། སྟོང་པ་ཉིད་མེད་པར་སེམས་ཏེ་རྣམ་པར་ཤེས་པ་དམིགས་པ་དང་བཅས་པའོ། །འགགས་པ་ནི་དམིགས་པ་ལ་ཞེན་པའི་ཞགས་པས་བསྡམས་པར་འགྱུར་བའོ། །ཡང་སྐྱེ་བར་འགྱུར་ཏེ། ཏིང་ངེ་འཛིན་གྱི་སྟོབས་ཀྱིས་དུས་ཅུང་ཟད་ཅིག་ཏུ་ལོན་ན་ཡང་སླར་སྐྱེ་བ་དང་ལྡན་པར་འགྱུར་རོ། །ཡང་གང་དུ་ཡང་འདི་ལྟ་བུ་མཐོང་ཞེ་ན། ཇི་ལྟར་ཤེས་མེད་པའི་ཞེས་པ་ལ་སོགས་པ་གསུངས་ཏེ། དཔེར་ན་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་པ་ན་དུས་རེ་ཞིག་སེམས་དང་སེམས་ལས་བྱུང་བ་ལོག་ན་ཡང་སླར་ཡང་སྐྱེ་བར་འགྱུར་ཏེ། དེ་བཞིན་དུ་གཞན་དུ་ཡང་ངོ་ཤེས་པའི་དོན་ཏོ། །འདི་ནི་ཉེ་བར་མཚོན་པ་ཡིན་ཏེ། དཔེར་ན་འགོག་པའི་སྙོམས་པར་འཇུག་པ་བཞིན་ནོ་ཞེས་ཀྱང་བལྟ་བར་བྱའོ། །ཡང་ན་འདུ་ཤེས་མེད་པའི་སྙོམས་པར་འཇུག་པ་ལ་སྙོམས་པར་ཞུགས་ནས་འདུ་ཤེས་མེད་པའི་ལྷ་རྣམས་སུ་སྐྱེས་པ་ན་བསྐལ་པ་བརྒྱ་ཕྲག་དུ་མར་
ཇི་སྲིད་འགགས་པར་གྱུར་ན་ཡང་སྙོམས་པར་འཇུག་པའི་རྣམ་པར་སྨིན་པ་ཡོངས་སུ་རྫོགས་པ་ན་སེམས་དང་སེམས་ལས་བྱུང་བ་སླར་སྐྱེ་བ་དེ་བཞིན་ནོ། །གང་གི་ཕྱིར་སྟོང་པ་ཉིད་མེད་པར་དགེ་སློང་ཉིད་དང་མྱ་ངན་ལས་འདས་པ་མི་འཐད་དེ། དེ་ལ་གཉི་ག་དོན་དུ་གཉེར་བ་རྣམས་ཀྱིས་སྟོང་པ་ཉིད་བསྒོམ་པར་བྱའོ་ཞེས་དེས་ན་སྟོང་པ་ཉིད་ཅེས་པ་ལ་སོགས་པ་གསུངས་སོ། །རྒྱུ་གང་མེད་པ་ན་ཡང་སྟོང་པ་ཉིད་དང་འབྲེལ་པའི་སེམས་སྐྱེ་བར་འགྱུར་ཏེ། རྒྱུ་དེས་ན་ཡང་མྱ་ངན་ལས་འདས་པ་ལ་སོགས་པ་དོན་དུ་གཉེར་བས་སྟོང་པ་ཉིད་བསྒོམ་པར་བྱའོ། །དེ་བསྒོམ་པ་ནི་ཉོན་མོངས་པ་སྤངས་པ་དང༌། མྱ་ངན་ལས་འདས་པ་ཡང་ཐོབ་པར་འགྱུར་གྱི། གཅིག་ཏུ་བདེན་པ་ལ་སོགས་པ་བསྒོམ་པས་ནི་མ་ཡིན་ནོ་ཞེས་པའི་དོན་ཏོ། །དམིགས་པ་དང་བཅས་པའི་ཕྱིར་རོ། །གང་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་གཅོད་པ་ལས། རབ་འབྱོར་འདི་ཇི་སྙམ་དུ་སེམས། རྒྱུན་དུ་ཞུགས་པ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་བོ་སྙམ་དུ་སེམས་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་དེ་ནི་ཅི་ལ་ཡང་ཞུགས་པ་མ་མཆིས་པའི་སླད་དུ་སྟེ། དེས་ན་རྒྱུན་དུ་ཞུགས་པ་ཞེས་བགྱིའོ། །གཟུགས་ལ་ཡང་མ་ཞུགས། སྒྲ་ལ་མ་ལགས། དྲི་ལ་མ་ལགས། རོ་ལ་མ་ལགས། རེག་བྱ་ལ་མ་ལགས། ཆོས་རྣམས་ལ་ཡང་མ་ཞུགས་ཏེ། དེས་ན་རྒྱུན་དུ་ཞུགས་པ་ཞེས་བགྱིའོ། །བཅོམ་ལྡན་འདས་གལ་ཏེ་རྒྱུན་དུ་ཞུགས་པ་དེ་འདི་སྙམ་དུ་བདག་གིས་རྒྱུན་དུ་ཞུགས་པའི་འབྲས་བུ་ཐོབ་པོ་སྙམ་དུ་སེམས་པར་གྱུར་ན་དེ་ཉིད་དེའི་བདག་ཉིད་དུ་འཛིན་པར་འགྱུར་ལགས་སོ། །སེམས་ཅན་དུ་འཛིན་པ་དང༌། སྲོག་ཏུ་འཛིན་པ་དང༌། གང་ཟག་ཏུ་འཛིན་པར་འགྱུར་ལགས་སོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་འདི་ཇི་སྙམ་དུ་སེམས། དགྲ་བཅོམ་པ་འདི་སྙམ་དུ་བདག་གིས་དགྲ་བཅོམ་པ་ཉིད་ཐོབ་པོ་སྙམ་དུ་སེམས་སྙམ་མམ། རབ་འབྱོར་གྱིས་གསོལ་པ། བཅོམ་ལྡན་འདས་དེ་ནི་མ་ལགས་སོ། །ཅིའི་སླད་དུ་ཞེ་ན། གང་དགྲ་བཅོམ་པ་ཞེས་བགྱི་བའི་ཆོས་དེ་གང་ཡང་མ་མཆིས་པའི་སླད་དུའོ། །བཅོམ་ལྡན་འདས་གལ་ཏེ་དགྲ་
བཅོམ་པ་འདི་སྙམ་དུ་བདག་གིས་དགྲ་བཅོམ་པ་ཉིད་ཐོབ་པོ་སྙམ་དུ་སེམས་པར་གྱུར་ན། དེ་ཉིད་དེའི་བདག་ཏུ་འཛིན་པར་འགྱུར་ལགས་སོ། །སེམས་ཅན་དུ་འཛིན་པ་དང༌། སྲོག་ཏུ་འཛིན་པ་དང༌། གང་ཟག་ཏུ་འཛིན་པར་འགྱུར་བ་ལགས་སོ་ཞེས་པར་བསྒྲེ་བར་བྱའོ། །བཅོམ་ལྡན་འདས་ཀྱིས་བཀའ་སྩལ་པ། རབ་འབྱོར་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོས་འདི་ལྟར་མི་གནས་པར་སེམས་བསྐྱེད་པར་བྱའོ། །ཅི་ལ་ཡང་མི་གནས་པར་སེམས་བསྐྱེད་པར་བྱའོ། །གཟུགས་ལ་ཡང་མི་གནས་པར་སེམས་བསྐྱེད་པར་བྱའོ། །སྒྲ་དང༌། དྲི་དང༌། རོ་དང༌། རེག་བྱ་དང༌། ཆོས་ལ་ཡང་མི་གནས་པར་སེམས་བསྐྱེད་པར་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་སྟོང་པ་ཉིད་ནི་བྱང་ཆུབ་ཀྱི་ལམ་ཡིན་ནོ་ཞེས་གནས་སོ། །གང་ཞིག་མདོ་སྡེ་ལ་འཇུག་ཚིག །ཅེས་པ་ལ་སོགས་པའི་ཚིགས་སུ་བཅད་པ་གསུམ་ནི་འགའ་ཞིག་གིས་བསྣན་པ་ལྟ་བུར་མཚོན་པར་བྱ་སྟེ། སྐབས་སུ་བབ་པ་མ་ཡིན་པའི་ཕྱིར་ལུང་ལ་ལོག་པར་རྟོག་པར་སྤྱད་པའི་སྐབས་སུ་ཡིན་ནོ། །བསྟན་རྩ་དགེ་སློང་ཉིད་ཡིན་ནོ། །ཞེས་བྱ་བ་ལ་སོགས་པའི་ལུང་རྣམས་ལ་རྩོད་པ་ལས་སྐབས་གཞན་ཡིན་པའི་ཕྱིར་སྔ་མ་ཉིད་དུ་བརྗོད་པར་རིགས་སོ། །འདིས་བརྗོད་མ་ཐག་པའི་རྩོད་པ་ཡང་བརྗོད་པའི་སྐབས་སུ་ནི་གཞུང་རྩོམ་པ་པོ་སྐབས་སུ་བབ་པ་ལ་མི་མཁས་པར་འགྱུར་ཏེ་རྐྱེན་གང་གིས་ནི་ཞེས་བྱ་བ་ལ་སོགས་པས་སྔར་བརྗོད་པའི་ཚིགས་སུ་བཅད་པ་གཉིས་ཀྱིས་བརྗོད་པའི་ཕྱིར་རོ། །འོད་སྲུངས་ཆེན་པོ་ཞེས་པ་ལ་སོགས་པའི་ཚིག་མ་འབྲེལ་པའི་ཕྱིར་གཞུང་རྩོམ་པ་པོས་སྦྱར་བ་མ་ཡིན་ནོ་ཞེས་ངེས་སོ། །དེ་ལྟ་བས་ན་འདི་བཅུག་པ་ཉིད་ཡིན་ནོ། །དེ་ལྟར་གྱུར་ན་ཡང་ཇི་ལྟར་དམིགས་པ་དང་བཅས་པའི་སེམས་ལ་ཞེན་པ་སྲིད་པའི་ཕྱིར་ཐར་པ་མེད་པར་འགྱུར་ན། དེ་བཞིན་དུ་སྟོང་པ་ཉིད་ལ་ཡང་འཇིགས་པ་སྐྱེ་བར་འགྱུར་ཏེ། །དེ་ལྟ་བས་ན་གཉི་ག་སྤངས་ཏེ་འཁོར་བ་ན་གནས་པ་ཉིད་མཆོག་ཡིན་པར་རིགས་སོ་ཞེས། ཆགས་འཇིགས་ལས་ནི་མ་གྲོལ་བ་ལས་ཞེས་ཏེ་ཆགས་པ་ནི་ཞེན་པ་ཡིན་ལ། འཇིགས་པ་ནི་སྟོང་པ་ཉིད་ཀྱི་སྒྲ་ཐོས་པས་སྐྲག་པ་སྟེ། དེའི་
དོན་མ་ཤེས་པའི་ཕྱིར་རོ། །ཆགས་འཇིགས་ཞེས་པ་ནི་ཟླས་དབྱེ་བའི་བསྡུ་བ་ཡིན་ནོ། །དེའི་ཕྱིར་གཉི་གའི་ཕྱོགས་སྤངས་ནས་འཁོར་བ་སྟེ་ཁམས་གསུམ་པའི་རང་བཞིན་འགྲུབ་སྟེ། གནས་པའི་གནས་སྐབས་སྐྱེ་བར་འགྱུར་རོ། །ནིའི་སྒྲས་ནི་ཉེས་པ་སྤང་བའི་དོན་དུ་སྟེ། འདི་ནི་སྟོང་པ་ཉིད་ཁས་ལེན་པ་ལ་ཉེས་པར་འགྱུར་ཏེ། སྐྱོན་ཐུན་མོང་མ་ཡིན་ནོ་ཞེས་པའི་ཐ་ཚིག་གོ །ཅིའི་ཕྱིར་ཞེ་ན། མ་གྲོལ་བས་ཞེས་གཏན་ཚིགས་ཀྱི་དོན་གྱི་གསུམ་པ་སྟེ། ཐར་པ་མེད་པའི་ཕྱིར་རོ་ཞེས་པའི་དོན་ཏོ། །འདི་ཇི་ལྟ་བུ་ཞེ་ན། སྡུག་བསྔལ་ཅན་ཞེས་ཏེ། འགྲོ་བ་ལྔའི་འཁོར་བ་རྣམས་སུ་སྐྱེ་བ་ལ་སོགས་པའི་སྡུག་བསྔལ་གྱིས་གདུངས་པར་གྱུར་པས་གནས་པའོ། །ཇི་ལྟར་ཞེ་ན། དོན་དུ་ཞེས་ཏེ་དོན་གྱི་ཡུལ་ལའོ། །རྨོངས་པས་ཞེས་ཏེ་མ་རིག་པས་ཡིན་ལ། དམིགས་པའི་ཞེན་པས་ཞེས་པའི་དོན་ཏོ། །དེའི་ཕྱིར་འདི་ནི་སྟོང་པ་ཉིད་ཀྱི་འབྲས་བུ་ཡིན་ཏེ། གང་གིས་སླར་ཡང་མྱ་ངན་ལས་འདས་ནས་འཁོར་བར་གནས་པར་འགྱུར་བའོ། །བསམ་པ་ནི་འདི་ཡིན་ཏེ། ཇི་ལྟར་སྟོང་པ་ཉིད་མེད་པར་དམིགས་པ་ཅན་གྱི་ལྟ་བས་གྲོལ་བར་མི་འགྱུར་ལ། དེ་བཞིན་དུ་ཡུལ་ལ་ཆགས་པའི་བདེ་བའི་སེམས་ཆོས་ཐམས་ཅད་ཀྱི་ཀྱི་སྟོང་པ་ཉིད་ཀྱིས་འཇིགས་ཤིང་སྐྲག་སྟེ། སྔར་བའི་བྱིས་པ་རྣམས་འཁོར་བ་ཉིད་དུ་གནས་པ་མཆོག་གོ་ཞེས་སེམས་པས་ཞི་བའི་བདེ་བ་ལས་ཕྱིར་ཕྱོགས་ཏེ། སྐྱེ་བ་ལ་སོགས་པའི་སྡུག་བསྔལ་ཉམས་སུ་མྱོང་བས་སླར་ཡང་དེ་ཉིད་ལ་གནས་པ་ཡིན་པས་འདི་ཅི་ཞིག་བསྒྲུབས་ཞེས་སོ། །གཞན་དག་གིས་ནི། ཆགས་དང་འཇིགས་མཐའ་ལས་གྲོལ་བས། །ཞེས་པའི་ཚིག་ཏུ་སེམས་པས་འདི་ལྟར་སེམས་པར་བྱེད་དེ། ཞེན་པའི་རྒྱུ་ཡིན་པའི་ཕྱིར་ཚོགས་པ་ནི་ཞེན་པའི་གནས་སོ། །འཇིགས་པའི་རྒྱུ་ཡིན་པའི་ཕྱིར་འཇིགས་ཤིང་སྐྲག་པའི་གནས་སོ། །དེ་དག་ཉིད་མཐའ་ཡིན་ཏེ་ཆགས་པ་དང་འཇིགས་པའི་གནས་ཡིན་ལ། རྟག་པ་དང་ཆད་པའི་མཐའ་ཞེས་པའི་དོན་ཏོ། །འདི་ལྟར་རྟག་པའི་ལྟ་བ་ལས་ཆགས་པ་དང༌། ཆད་པའི་ལྟ་བ་སྐྲག་པ་དག་སྐྱེ་བར་འགྱུར་རོ། །དེ་དག་ལས་གྲོལ་བ་ནི་གྲོལ་བས་ཞེས་སྔ་མ་བཞིན་དུ་
གསུམ་པའོ། །གང་ཞིག་དོན་དམ་པར་དཔྱད་པས་རྟག་པའི་མཐའ་སྤངས་ཤིང༌། ཀུན་རྫོབ་ཀྱི་བདེན་པ་ཁས་བླངས་པས་ཆད་པའི་མཐའ་སྤངས་པས་སྒྲོ་འདོགས་པ་དང་སྐུར་པ་འདེབས་པའི་མཐའ་སྤངས་པའི་ཕྱིར་དབུ་མའི་རྟོག་པ་འདི་བསྟན་པར་འགྱུར་རོ། །དེ་ལྟར་ན་ཅི་ཞིག་འཐོབ་པར་འགྱུར་ཞེ་ན། འཁོར་བར་གནས་པ་གྲུབ་པ་ནི། །ཞེས་གསུངས་ཏེ། ཤེས་རབ་ཀྱིས་འཁོར་པའི་ཉེས་པས་མ་གོས་པ་དང༌། སྙིང་རྗེས་གཞན་དབང་དུ་གྱུར་པས་འཁོར་བ་ཡང་གྲུབ་པར་འགྱུར་ཏེ། གནས་པ་ནི་ཡང་དག་པར་གནས་པའོ། །ཅིའི་ཕྱིར་ཞེ་ན། སྡུག་བསྔལ་ཅན་གྱི་དོན་དུ་སྟེ། སྡུག་བསྔལ་གྱིས་སྡུག་བསྔལ་བར་གྱུར་པའི་སྡུག་བསྔལ་ཅན་འཁོར་བ་པའི་དོན་དུ་དེའི་སྡུག་བསྔལ་ལས་གདོན་པར་འདོད་པས་སོ། །ཅི་སྟེ་འཁོར་བ་པའི་དོན་དམ་པར་ཡོད་པ་མ་ཡིན་ཏེ། དེ་ཇི་ལྟར་གནས་པ་ཡིན་ཞེ་ན། རྨོངས་པས་ཏེ་ཕྱིན་ཅི་ལོག་གིས་ཡིན་ལ། སེམས་ཅན་ཀུན་རྫོབ་ལ་དམིགས་པས་སོ། །འདི་ཡང༌། སྡུག་བསྔལ་ཉེ་བར་ཞི་དོན་དུ། །འབྲས་བུ་རྨོངས་པ་བཟློག་མི་བྱ། །ཞེས་འདིར་ཕྱིར་གསལ་བར་བྱེད་པར་འགྱུར་རོ། །དེ་ལྟ་བས་ན་སྟོང་པ་ཉིད་ཀྱི་འབྲས་བུ་ནི་འདི་ཡིན་ཏེ། གང་སྙིང་རྗེས་འཁོར་བར་གནས་ན་ཡང་སྟོང་པ་ཉིད་མཐོང་བས་འཁོར་བའི་ཉེས་པས་མི་གོས་པ་ཡིན་ནོ། །འདི་ནི་མི་གནས་པའི་མྱ་ངན་ལས་འདས་པ་ཡིན་ཏེ་སྟོང་པ་ཉིད་ཀྱི་འབྲས་བུ་ཡིན་ལ། སྟོང་པ་ཉིད་མེད་ན་འདི་མེད་པའི་ཕྱིར་རོ། །དེ་ལྟ་བས་ན་འཁོར་བ་ཇི་སྲིད་དུ་སེམས་ཅན་གྱི་དོན་གནས་པར་འདོད་པ་རྣམས་ཀྱིས་སྟོང་པ་ཉིད་བསྒོམ་པར་བྱའོ། །འདི་དག་ཐམས་ཅད་མཇུག་བསྡུ་བའི་སྒོ་ནས་བཤད་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། དེ་ནི་འདི་ཡིན་ལ། ལྟར་ནི་བརྗོད་པའི་རིམ་པས་ཡིན་ཏེ། སྟོང་པ་ཉིད་ལ་སྐྲག་པས་འཁོར་བ་ན་གནས་པའི་མཚན་ཉིད་ཡིན་ནོ་ཞེས་སྟོང་པ་ཉིད་ཕྱོགས་ལ་སུན་འབྱིན་པ་ནི་འཐད་པ་མ་ཡིན་ཏེ། འཆད་པར་འགྱུར་བས་ལན་འདེབས་པའི་ཕྱིར་རོ། །འདི་ལྟར་དང་པོའི་ཕྱོགས་ལ་སྦྱར་བར་བྱ་སྟེ། གང་གི་ཕྱིར་དེ་ལྟར་ཡིན་པ་དེས་ན་སྟེ་ཐེ་ཚོམ་མི་ཟ་བར་སྟོང་པ་ཉིད་བསྒོམ་པར་བྱ་བ་ཉིད་ཡིན་ལ། ཐེ་ཚོམ་མི་ཟ་བ་སྟེ་ཐེ་ཚོམ་དང་
བྲལ་བ་དང༌། སོམ་ཉི་དང་བྲལ་བས་སོ། །དེ་ལྟར་གནས་པས་བསྒོམ་པར་བྱ་བ་ཉིད་དེ་གོམས་པར་བྱ་བ་ཉིད་དོ། །སྟོང་པ་ཉིད་ནི་ཆོས་ཐམས་ཅད་རང་བཞིན་མེད་པ་ཉིད་དེ། རང་བཞིན་གྱིས་མི་དམིགས་པའི་སྦྱོར་བས་སོ། །འདིས་ནི་གང་ལམ་འདི་མེད་པར། །ཞེས་པའི་མཇུག་བསྡུ་བར་གྱུར་པ་ཡིན་ནོ། །ཡང་སྟོང་པ་ཉིད་མཐོང་བས་ཅི་ཞིག་བྱ་ཞེས་སྨྲས་པ་དེ་ལ་སྟོང་པ་ཉིད་ཀྱི་ཁྱད་པར་བརྗོད་པ་ཉོན་མོངས་ཤེས་བྱའི་ཞེས་པ་ཡིན་ཏེ། ཉོན་མོངས་པ་ནི་འདོད་ཆགས་ལ་སོགས་པ་ཡིན་ལ། ཤེས་བྱ་ནི་རྣམ་པ་ལྔ་ཡིན་ཏེ། སྒྲིབ་ཅེས་པའི་སྒྲ་ནི་གཉི་ག་དང་འབྲེལ་ཏོ། །ཉོན་མོངས་པ་རྣམས་ཉིད་སྒྲིབ་པ་ཡིན་ལ། ཤེས་བྱ་ལ་ནི་སྒྲིབ་པར་བྱེད་པས་སྒྲིབ་པ་རྣམས་སོ་ཞེས་རྣམ་པར་ཕྱེ་ནས་སྦྱར་བར་བྱ་སྟེ། ཤེས་བྱ་ཉིད་ལ་སྒྲོ་བཏགས་པའི་རང་བཞིན་ཡིན་པའི་ཕྱིར་རོ། །སྒྲིབ་པ་དེ་ཉིད་ནི་མུན་པ་ལྟར་མུན་པ་ཡིན་ཏེ། དངོས་པོའི་དེ་ཁོ་ན་ཉིད་ལ་སྒྲིབ་པར་བྱེད་པའི་ཕྱིར་རོ། །དེའི་གཉེན་པོ་ནི་སྤོང་བའི་གཉེན་པོ་ཡིན་ནོ། །ཉིད་ཅེས་པ་ནི་གང་གི་ཕྱིར་ཏེ། སྟོང་པ་ཉིད་ཡིན་པས་དེའི་ཕྱིར་མྱུར་ཞིང་མགྱོགས་པར་ཐམས་ཅད་མཁྱེན་པ་སྟེ་སངས་རྒྱས་ཉིད་ལ་འདོད་ཅིང་མངོན་པར་འདོད་པ་གང་གིས་ཡིན་པ་དེ་ལ་དེ་སྐད་ཅེས་བརྗོད་དོ། །ཐམས་ཅད་མཁྱེན་པ་ལ་འདོད་པས་ཞེས་ཐམས་ཅད་མཁྱེན་པ་འདོད་པའོ། །དེ་ཇི་ལྟར་སྒོམ་མི་བྱེད་ཅེས་ཏེ། སྟོང་པ་ཉིད་དེ་ཇི་ལྟར་སྒོམ་པར་མི་བྱེད་དེ་གོམས་པར་མི་བྱེད། འོན་ཀྱང་འབད་པ་ཆེན་པོས་བསྒོམ་པར་བྱ་བ་ཉིད་དོ། །གང་ཡང་བརྗོད་པ། སྐྲག་པས་སྟོང་པ་ཉིད་ལ་འཇུག་པར་མི་འགྱུར་རོ་ཞེས་པ་དེ་ཡང་རིགས་པ་མ་ཡིན་པར། དངོས་གང་སྡུག་བསྔལ་སྐྱེད་བྱེད་པ། །ཞེས་པ་ལ་སོགས་པ་གསུངས་ཏེ། ཕྱོགས་གཉིས་པ་ལ་སླར་ཡང་འདི་ལྟར་སྦྱར་བར་བྱ་སྟེ། སྟོང་པ་ཉིད་ལ་ཕན་ཡོན་འདི་ཡོད་པ་ཡིན་ཏེ། འོན་ཀྱང་དང་པོ་ཉིད་དུ་དེ་ལ་སྐྲག་པས་འཇུག་པར་མི་འགྱུར་རོ་ཞེ་ན། དངོས་གང་སྡུག་བསྔལ་ཞེས་པ་ལ་སོགས་པ་གསུངས་ཏེ། དངོས་པོ་གང་སྡུག་བསྔལ་སྐྱེད་པར་བྱེད་ཅིང་གདུང་བར་བྱེད་པའི་དངོས་པོ་དེ་ལས་འཇིགས་ཤིང་སྐྲག་པ་སྐྱེ་སྟེ་འབྱུང་བར་འགྱུར་ན་ཡང༌། སྟོང་པ་ཉིད་ནི་སླར་ཡང་སྡུག་
བསྔལ་དེ་ཞི་བར་བྱེད་པ་ཡིན་ཏེ་འཁོར་བ་པོ་ཐམས་ཅད་ཀྱི་སྡུག་བསྔལ་སྤོང་བར་བྱེད་པ་ཡིན་ནོ། །དེ་ལས་ཏེ་སྟོང་པ་ཉིད་དེ་ལ་ཇི་ལྟར་ཞེས་ཏེ་མི་འཇིགས་པའི་གནས་ལས་སྔར་བར་གྱུར་བའི་སྐྱེ་བོ་འཇིགས་པ་ཇི་ལྟར་སྐྱེ་བར་འགྱུར་ཏེ། ཡོན་ཏན་ཐམས་ཅད་ཀྱི་འབྱུང་གནས་ཡིན་པའི་ཕྱིར་དེ་ལ་དགའ་བ་ཉིད་དུ་རིགས་སོ་ཞེས་བསམས་པ་ཡིན་ནོ། །བདག་ཏུ་འཛིན་པ་ལས་བྱུང་ཞིང་ངར་འཛིན་པ་ལས་སྐྱེས་པར་གྱུར་པ་ལས་ནི་འཇིགས་པ་ཡིན་ཏེ། དེ་ཁོ་ན་ཉིད་མ་རིག་པ་རྣམས་ལ་སྐྱེ་བར་འགྱུར་རོ། །དེ་ཡང་བདག་ཏུ་བརྟགས་པས་སྒྲོ་བཏགས་པའི་ངོ་བོ་ཞེས་ངར་འཛིན་པ་ཡང་དེ་ལ་མེད་པའི་ཕྱིར་གནས་མ་ཡིན་ནོ་ཞེས་བསྟན་པའི་དོན་དུ་གལ་ཏེ་བདག་ཅེས་པ་ལ་སོགས་པ་གསུངས་ཏེ། ཅི་ཡང་རུང་ལས་འཇིགས་པ་ནི་འཇིགས་པའི་གནས་ལས་ཏེ་འཇིགས་པར་འགྱུར་མོད། ནམ་གྱི་ཚེ་ཞེ་ན། གལ་ཏེ་བཞེས་པ་ཅུང་ཟད་པའོ་སྙམ་པའི་བདག་ཅེས་པའི་ཡུལ་དུ་བརྗོད་པ། བདག་ཅེས་པ་བདག་ཏུ་འཛིན་པའི་ཤེས་པས་རིགས་པར་བྱ་བ་འབའ་ཞིག་སྟེ་ཅུང་ཟད་ཅིག་ཡོད་པར་གྱུར་ན་དེའི་ཚེ་འཇིགས་པར་རིགས་པ་ཉིད་ཡིན་ཏེ། གང་གི་ཚེ་ཡང་བདག་ཉིད་ཅུང་ཟད་ཀྱང་དངོས་པོ་ཡོད་པ་དཔྱོད་པར་ན་བདག་ཅུང་ཟད་སྒྲ་དང་རྣམ་པར་རྟོག་པ་ལས་གཞན་པ་གལ་ཏེ་ཡོད་པར་གྱུར་ན། དེའི་ཚེ་བདག་གང་ཞེས་འདི་མེད་པའི་ཕྱིར་འཇིགས་པར་འགྱུར་ཏེ། སྐྱེ་བར་འགྱུར་ན་འདི་ལྟར་དཔྱད་པས་འཇིགས་པ་ཞི་བར་འགྱུར་རོ་ཞེས་བསམས་པ་ཡིན་ནོ། །དེ་སྐད་དུ་ཡང༌། བདག་ཡོད་མ་ཡིན་འབྱུང་འགྱུར་མིན། །བདག་གི་བ་མེད་ཡོད་མི་འགྱུར། །འདི་ལྟར་བྱིས་པ་སྐྲག་འགྱུར་ཏེ། །མཁས་པ་ཡི་ནི་འཇིགས་པ་ཟད། །ཅེས་གསུངས་སོ། །ཇི་ལྟར་ཡང་བདག་ཤེས་པའི་ཡུལ་དུ་གྱུར་པས་རྟོགས་པ་ཙམ་གྱིས་ཉེ་བར་བསྟན་པའི་ཕྱིར་མེད་པ་དེ་ལྟར་བསྟན་པར་བཤད་པས། སྐྲ་དང་སེན་མོ་ཞེས་པ་ལ་སོགས་པ་གསུངས་ཏེ། སོ་དང་སྐྲ་སེན་བདག་མིན་ཏེ། །འདི་དག་སོ་སོ་ལ་བདག་ཏུ་ཤེས་པའི་ཡུལ་དུ་འགྱུར་བ་མ་ཡིན་ནོ། །བདག་ནི་རུས་པ་ཁྲག་མ་ཡིན་ཏེ། རུས་པ་དང་ཁྲག་གཉིས་པོ་འདི་ཡང་བདག་མ་ཡིན་ནོ། །སྣབས་མིན་བད་ཀན་བདག་མིན་ཏེ།
སྣབས་དང་བད་ཀན་བདག་མ་ཡིན་ལ། །ཆུ་སེར་ནི་རྨའི་རློན་པ་ཡིན་ཏེ། རྣག་ནི་རྨར་ཁྲག་ཡོངས་སུ་སྨིན་པའོ། །དེ་དག་ཀྱང་བདག་མ་ཡིན་ནོ། །བདག་ནི་ཞག་དང་རྡུལ་མ་ཡིན་ཏེ། ཞེས་པ་ལ། ཞག་ནི་ལུས་ཀྱི་སྣུམ་ཡིན་ལ། །རྔུལ་ནི་རབ་ཏུ་རྔུལ་བའོ། །ཚིལ་ནི་ཁམས་བཞི་བ་ཡིན་ཏེ་འདི་དག་ཀྱང་བདག་མ་ཡིན་ནོ། །ནང་ཁྲོལ་ཡང་ནི་བདག་མིན་ཏེ། །ཞེས་པ་ལ། ནང་ཁྲོལ་དང་ནི་གྲགས་པ་ཉིད་དེ། དེ་ཡང་བདག་མ་ཡིན་ནོ། །ཞག་ཀྱང་བདག་མ་ཡིན་ནོ། །བདག་ནི་ཕྱིས་གཅིན་མ་ཡིན་ཏེ། ཡོངས་སུ་གྲགས་པ་དེ་ཉིད་ཀྱང་བདག་མ་ཡིན་ནོ། །ཤ་དང་རྒྱུས་པ་བདག་ཡིན་ཏེ། རྩ་རྒྱུས་ནི་རྒྱུས་པ་ཡིན་ལ། དྲོ་བ་ནི་ལུས་ཀྱི་མེའི་ཁམས་ཡིན་ཏེ་འདི་ཡང་བདག་མ་ཡིན་ནོ། །རླུང་ཡང་བདག་མ་ཡིན་ཏེ། རླུང་ནི་འབྱུང་བ་དང་རྔུབ་བའི་དབུགས་ཀྱི་མཚན་ཉིད་ཡིན་ལ་དེ་ཡང་བདག་མ་ཡིན་ནོ། །བུ་ག་དགུ་ཡང་བདག་མིན་ཏེ། །བུ་ག་དགུ་ནི་མིག་ལ་སོགས་པ་རྣམས་ཡིན་ལ། དེ་དག་ཀྱང་བདག་མ་ཡིན་ནོ། །རྣམ་ཤེས་དྲུག་ནི་མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ཀྱི་རྣམ་པར་ཤེས་པ་རྣམས་ཏེ། དེ་རྣམས་ཀྱང་རྣམ་ཀུན་དུ་སྟེ། རྣམ་པ་ཐམས་ཅད་དུ་བདག་མ་ཡིན་ཏེ་སོ་སོར་རམ་འདུས་པ་བདག་མ་ཡིན་ནོ། །སོ་ལ་སོགས་པ་འདུས་པའི་བདག་ཉིད་ལ་བདག་ཏུ་དམིགས་ལ། དེ་ཡང་སོ་སོར་བདག་ཏུ་ཤེས་པས་རིག་པར་འགྱུར་བ་མ་ཡིན་ཏེ། སོ་སོར་བདག་ཏུ་འཛིན་པའི་ཤེས་པའི་ཡུལ་དུ་དེ་རྣམས་མེད་པའི་ཕྱིར་རོ། །གཞན་དག་ལ་ཡང་སྐྲ་ལ་སོགས་པ་རེ་རེ་ལ་ཡང་བདག་ཏུ་ཤེས་པས་རིག་པར་བྱ་བ་མ་ཡིན་ལ་བསྡུས་པ་དེ་ཉིད་འབའ་ཞིག་ཡིན་ཏེ་སྔར་བཞིན་ནོ། །དེ་རྣམས་བསྡུས་པ་ལ་ཡང་གཅིག་སྲིད་པ་མ་ཡིན་ཏེ། དེ་འགེགས་པར་འགྱུར་བའི་ཕྱིར་རོ། །དུ་མ་བསྡུ་བ་ཡང་ཤེས་པ་གཅིག་གི་ཡུལ་དུ་རིགས་པ་མ་ཡིན་ལ། དུ་མ་རྣམས་ལ་ཡང་གཅིག་ཏུ་འཛིན་པའི་ཤེས་པ་མ་འཁྲུལ་པར་ཡང་རིགས་པ་མ་ཡིན་ནོ། །འཁྲུལ་པ་ལ་དེ་ཁོ་ན་ཉིད་ཀྱི་རྣམ་པར་གཞག་པ་ཡང་རིགས་པ་མ་ཡིན་ནོ། །དེ་ལྟ་བས་ན་བདག་གོ་ཞེས་པ་འདི་ནི་བརྟགས་པ་ཙམ་ཉིད་དེ། སྟོང་ཞིང་དངོས་པོ་མེད་པ་ཡིན་ནོ་ཞེས་ངེས་སོ། །འདི་ཡང་བསླབ་པ་ཀུན་ལས་བཏུས་པར་མི་སྡུག་པ་བསྒོམ་པའི་སྐབས་སུ་བཤད་པ་ཡིན་ཏེ། འདི་ལྟ་སྟེ་ལུས་འདི་ལ་སྐྲ་དང༌། སྤུ་དང༌། སོན་མོ་དང༌།
སོ་དང༌། རྡུལ་དང༌། དྲི་མ་དང༌། པགས་པ་དང༌། ཤ་དང༌། རུས་པ་དང༌། རྒྱུས་པ་དང༌། རྩ་དང༌། མཁལ་མ་དང༌། སྙིང་དང༌། མཆིན་པ་དང༌། གློ་བ་དང༌། རྒྱུ་མ་དང༌། གཉེ་མ་དང༌། ཕོ་བ་དང༌། སུལ་མངས་དང༌། ལོང་ཀ་དང༌། མཆེར་པ་དང༌། ཕྱིས་དང༌། མཆི་མ་དང༌། མིག་རྡུལ་དང༌། སྣབས་དང༌། ངར་སྣབས་དང༌། ཞག་དང༌། ཆུ་སེར་དང༌། རྐང་དང༌། ཚིལ་དང༌། མཁྲིས་པ་དང༌། བད་ཀན་དང༌། རྣག་དང༌། ཁྲག་དང༌། གླད་པ་དང༌། གླད་རྒྱས་དང༌། གཅིན་དག་ཡོད་དེ། དངོས་པོ་དེ་དག་ལ་བྱང་ཆུབ་སེམས་དཔའ་ཡོངས་སུ་རྟོག་པའི་རང་བཞིན་ཅན་ཡིན་ཏེ་ཞེས་གསུངས་པའོ། །དེ་ཡང་ལུས་རྗེས་སུ་དྲན་པའི་མཐར་ཕྱིས་སྟོན་པར་འགྱུར་རོ། །དེ་ལྟར་ན་ངར་འཛིན་པ་ལ་ནི་ཡུལ་མེད་པ་ཉིད་དོ། །གལ་ཏེ་དེ་ལྟར་ན་ཡང་སྒྲ་ལ་སོགས་པ་རྣམས་ངར་འཛིན་པའི་རིག་པར་བྱ་བ་གལ་ཏེ་ཡིན་པར་འགྱུར་བ་དེ་ལྟར་ན་ཡང་འདི་ནི་ཡུལ་མེད་པར་མི་འགྱུར་ཏེ། གང་གི་ཕྱིར་ནང་གི་བྱེད་པ་དང་ལྡན་པའི་སྐྱེས་བུ་ངར་འཛིན་པའི་སྤྱོད་ཡུལ་ཉིད་དུ་ཁོ་བོ་ཅག་གིས་འདོད་དོ་ཞེས་རིགས་པ་ཅན་ལ་སོགས་པ་རྣམས་བརྗོད་དོ། །དེ་ཡང་མི་འཐད་དེ། གང་གི་ཕྱིར་བདག་ནི་དཀར་ཤམ་དང་སྐེམ་པ་དང༌། རིད་པ་དང་འགྲོ་བའོ་ཞེས་པ་ལ་སོགས་པའི་རྣམ་པར་དཔྱོད་པའི་བདག་ཉིད་དུ་ཤེས་པ་འདི་ལ་སྣང་བ་ཡིན་ཏེ། ཕ་རོལ་པོ་རྣམས་ཀྱིས་འདི་དག་ལ་བདག་ཏུ་འདོད་པ་མ་ཡིན་ལ་རྣམ་པ་གཞན་པའི་ཤེས་པས་གཞན་འཛིན་པ་ནི་མི་རིགས་ཏེ། ཧ་ཅང་ཐལ་བར་འགྱུར་བའི་ཕྱིར་རོ། །འདི་ལྟར་ཡང་དེ་དང་ལྡན་པ་འདི་ནི་འདིའོ་ཞེས་མཚན་ཉིད་ཡིན་པར་གཞན་རྣམས་ཀྱིས་བརྗོད་པ་ཡིན་ཏེ། དེ་ལ་རིགས་པ་ཅན་གྱིས་རྟག་པ་དང༌། ཐམས་ཅད་ལ་ཁྱབ་པ་དང༌། སྲོག་ཆགས་སོ་སོ་ལ་ཐ་དད་པ་དང༌། སེམས་པ་མེད་པ་དང༌། སེམས་པ་དང་འབྲེལ་བས་སེམས་པ་ཅན་དང༌། བདེ་བ་ལ་སོགས་པ་ཡོན་ཏན་རྒྱུའི་རྟེན་དང༌། དགེ་བ་དང་མི་དགེ་བའི་ལས་ཀྱི་བྱེད་པ་པོ་དང༌། དེའི་འབྲས་བུ་ལོངས་སྤྱོད་པ་པོ་དང༌། འཇིག་རྟེན་ཕ་རོལ་དུ་འགྲོ་བ་ཞེས་པ་ལ་གཏུགས་པར་བདག་འདོད་དེ། རིགས་པ་ཅན་བཞིན་དུ་བྱེ་བྲག་པ་ཡང་འདོད་པ་ཡིན་ལ། གཞན་དག་འདི་ལྟར་བདག་འདོད་དེ། །འདོད་པ་ལ་སོགས་པ་ཡི་རྟེན། །རང་ཉིད་སེམས་པ་མེད་པ་དང༌། །དེ་བཞིན་
རྟག་དང་ཀུན་དུ་སོན། །དགེ་དང་མི་དགེའི་ལས་བྱེད་དང༌། །དེའི་འབྲས་ལ་ནི་ལོངས་སྤྱོད་དང༌། །སེམས་དང་འབྲེལ་པས་སེམས་ལྡན་ཏེ། །རང་གི་ངོ་བོས་མ་ཡིན་ནོ། །ཞེས་བརྗོད་དོ། །ཡང་རྒྱལ་དཔོག་པས་ནི་ལྡོག་པ་དང་རྗེས་སུ་འགྲོ་བའི་བདག་ཉིད་དང༌། བློའི་གཟུགས་སུ་ཡོངས་སུ་འགྱུར་བ་དང༌། སེམས་པ་དང་ལྡན་པའི་ངོ་བོར་བདག་ཉིད་འདོད་དོ། །སེམས་པ་དང་ལྡན་པ་དེ་ཡང་བློའི་རང་བཞིན་ཡིན་ལ། དེ་ཡང་འཇུག་པ་དང་ལྡོག་པ་དག་ནི་མ་ཡིན་ལ། དེ་གཉིས་ཀའི་རྗེས་སུ་འགྲོ་བའི་རང་བཞིན་ཡིན་པའི་ཕྱིར་རོ། །འདི་ལྟར་འཁྱིལ་བའི་སྦྲུལ་ལོག་སྟེ་དྲང་པོའི་གནས་སྐབས་སུ་གྱུར་པ་ན་སྤྲུལ་ཉིད་ནི་གཉི་ག་ལ་ཡང་རྗེས་སུ་འཇུག་པ་ཡིན་ནོ། །ཇི་སྐད་དུ། གཞན་གྱིས་བདག་གི་མཚན་ཉིད་དང༌། །ལྡོག་དང་རྗེས་འགྲོའི་བདག་ཉིད་དང༌། །སེམས་ལྡན་བློ་ཡི་མཚན་ཉིད་དེ། །སེམས་དང་ལྡན་པའི་ངོ་བོར་འདོད། །དཔེར་ན་སྦྲུལ་ནི་འཁྱིལ་པའི་སྐབས། །དོར་ནས་དེའི་རྗེས་དྲང་པོ་ཡི། །གནས་སྐབས་སུ་ནི་འགྱུར་སྲིད་དོ། །སྦྲུལ་ཉིད་ལྡོག་པར་མི་འགྱུར་རོ། །དེ་བཞིན་བདག་གི་རང་བཞིན་ཡང༌། །རྟག་པ་དང་ནི་སེམས་ལྡན་དང༌། །གཟུགས་ནི་མ་ལུས་དང་འབྲེལ་དང༌། །ཀུན་གྱི་རྗེས་སུ་འགྲོ་བའང་ཡིན། །ཞེས་བརྗོད་དེ་འདི་ནི་ཁྱད་པར་རོ། །གཞན་ཐམས་ཅད་ནི་སྔ་མ་དང་འདྲའོ། །རྒྱལ་བ་པས་རྒྱལ་དཔོག་པའི་བཞིན་དུ་སེམས་དང་བཅས་པའི་བདག་ཏུ་འདོད་དེ། རྫས་དང་རྣམ་གྲངས་ཀྱི་ངོ་བོ་ཇི་ལྟར་རིགས་པར་རྗེས་སུ་འགྲོ་བ་དང༌། ལྡོག་པའི་བདག་ཉིད་ཡིན་ཏེ། དེ་ལྟར་ཡང༌། རྒྱལ་དཔོག་པ་བཞིན་རྒྱལ་བ་པས། །སེམས་ཀྱི་མཚན་ཉིད་རྒྱུ་དང་ནི། །རྫས་དང་རྣམ་གྲངས་ངོ་བོ་ཡིས། །ལྡོག་དང་རྗེས་འགྲོའི་བདག་ཉིད་ཅན། །ཞེས་བརྗོད་དོ། །སེར་སྐྱ་པས་ནི་རྟག་པ་དང་ཁྱབ་པ་དང་ཡོན་ཏན་དང་བྲལ་བ་དང༌། རང་ཉིད་སེམས་པ་ཅན་དུ་བདག་འདོད་དེ་བློ་དང་འབྲེལ་པས་ནི་མ་ཡིན་ལ། བློ་ནི་རང་ཉིད་རིག་པ་མེད་པའི་ཕྱིར་རོ། །རང་གི་ངོ་བོ་ནི་སེམས་པ་དང་ལྡན་པའི་ངོ་བོ་ཡིན་ནོ་ཞེས་བརྗོད་པའི་ཕྱིར་རོ། །འབྲས་བུའམ་འགའི་ཡང་རང་ཉིད་བྱེད་པ་པོ་མ་ཡིན་ཞིང༌། དེའི་འབྲས་བུ་ལོངས་སྤྱོད་པ་པོ་ཡང་མ་ཡིན་ཏེ། བྱ་བ་དང་བྲལ་བའི་ཕྱིར་རོ། །རང་བཞིན་ཉིད་བྱེད་པ་པོ་ཡིན་
ཏེ། བདག་དེ་ལ་འབྲས་བུ་སྟོབས་པར་བྱེད་པ་ཡིན་ནོ། །ཡང་ཕྱིན་ཅི་ལོག་གི་དབང་གིས་འདི་ཉིད་ལ་དེར་སྒྲོ་འདོགས་པ་ཡིན་ནོ། །འདི་ལྟར་ཡང་གང་གི་ཚེ་སྐྱེས་བུའི་སྒྲ་ལ་སོགས་པ་ནི་ཡུལ་ལ་ལོངས་སྤྱོད་པའི་རྣམ་པར་འདོད་པ་སྐྱེ་བར་འགྱུར་ཏེ། དེའི་ཚེ་རང་བཞིན་གྱིས་སྐྱེས་བུའི་འདོད་པ་ཡོངས་སུ་ཤེས་ནས་སྐྱེས་བུ་དང་སྦྱོར་བར་བྱེད་དོ། །དེ་ནས་སྒྲ་ལ་སོགས་པ་འབྱིན་པར་བྱེད་དོ། །ཡིད་ཀྱིས་བྱིན་གྱིས་བརླབས་པའི་ཉན་པ་ལ་སོགས་པའི་འཇུག་པ་རྣམས་ཀྱིས་ཡོངས་སུ་གཟུང་བའི་སྒྲ་ལ་སོགས་པའི་ཡུལ་རྣམས་ལ་བློ་ཞེན་པར་བྱེད་དོ། །དེ་ནས་བློ་ཞེན་པའི་དོན་ལ་སྐྱེས་བུས་སེམས་པར་བྱེད་དོ། །དེ་བཞིན་དུ་སེམས་དང་ལྡན་པའི་ངོ་བོ་ཡིན་པའི་ཕྱིར་ཡོན་ཏན་དང་བྲལ་བ་ཡིན་ལ་ཁྱབ་པའི་ཕྱིར་བྱ་བ་མེད་པ་ཡིན་ཏེ། གྲངས་ཅན་གྱི་སྐྱེས་བུའི་ཁྱད་པར་ཡིན་ནོ། །དེ་སྐད་དུ་ཡང༌། གཞན་དག་བློ་ཡི་རང་བཞིན་ལས། །སེམས་པ་ཅན་ནི་ཐ་དད་འདོད། །བདག་གི་གཉུག་མའི་གཟུགས་ཉིད་ནི། །སེམས་པ་ཅན་དུ་དེ་རྣམས་རྟོག །གཙོ་བོ་ཡིས་ནི་གཏད་པ་ཡི། །འབྲས་ལ་ལོངས་སྤྱོད་འབའ་ཞིག་ཡིན། །བྱེད་པ་པོ་ཉིད་དེ་ལ་མེད། །རང་བཞིན་ཉིད་ལ་དེ་འདོད་དོ། །ཞེས་སོ། །ཡོན་ཏན་འདི་རྣམས་རང་བཞིན་འཇུག་པ་ལས། །སེམས་པ་ཅན་ལ་མུན་བསྒྲིབས་ཕྱིན་ཅི་ལོག །རྩ་རྩེ་འགུགས་པ་ཙམ་ལ་དབང་མེད་ཀྱང༌། །བདག་གིས་བྱས་ཞེས་མི་ཤེས་ན་ཡང་སེམས། །ཞེས་བརྗོད་དོ། །རིག་བྱེད་ཀྱི་མཐའ་གསང་བར་སྨྲ་བས་ཀྱང་སྲོག་ཆགས་མ་ལུས་པའི་རྒྱུད་ལ་ཡོད་པ་དང་གཅིག་པུ་ཉིད་དང༌། ཁྱབ་པ་དང་རྟག་པའི་ཤེས་པར་འདོད་དོ། །དེ་རྣམ་པར་གྱུར་པ་ཉིད་ཀྱིས་དང་ཆུ་དང་མེ་དང་རླུང་ལ་སོགས་པ་མ་ལུས་པར་འགྲོ་བ་འདི་སྣང་བ་ཡིན་ལ། དེའི་རང་བཞིན་ཉིད་ཀྱང་བདག་ཉིད་ཡིན་ཏེ། ཕྱི་རོལ་ནི་མ་ཡིན་ལ། ཆ་ཤས་ཅན་དང་རྡུལ་ཕྲ་རབ་ལ་སོགས་པ་ཅུང་ཟད་ནི་གཟུང་བར་བྱ་བ་མ་ཡིན་ལ། རྟག་དང་ཤེས་པའི་རྣམ་འགྱུར་འདི། །ས་དང་མེ་དང་ཆུ་སོགས་ནི། །བདག་ཡིན་དེ་ཡི་བདག་ཉིད་ཅེས། །གཞན་གྱིས་ཡང་དག་བརྗོད་པ་ཡིན། །གཟུང་བའི་མཚན་ཉིད་དང་ལྡན་པ། །འདོད་ན་ཅུང་ཟད་ཡོད་མ་ཡིན། །འདི་ནི་རྣམ་ཤེས་ཡོངས་གྱུར་ཏེ། །
དེས་ན་ཐམས་ཅད་ཡང་དག་མཐོང༌། །ཞེས་བརྗོད་པ་ཡིན་ནོ། །ཡང་གང་ཟག་ཏུ་སྨྲ་བ་ནང་གི་མུ་སྟེགས་ཅན་རྣམས་ཀྱིས་ཕུང་པོ་རྣམས་ལས་དེ་ཉིད་དང་གཞན་དུ་བརྗོད་དུ་མེད་པའི་གང་ཟག་བའི་བདག་འདོད་དེ། གཞན་དུ་ན་མུ་སྟེགས་ཅན་གྱི་གྲུབ་མཐའ་ལ་མངོན་པར་ཞེན་པའི་ལྟ་བར་འགྱུར་རོ། །འདིར་ཡང༌། བདེར་གཤེགས་པ་འགའ་ཁ་ཅིག་ནི། །གཞན་ཡང་བདག་ཏུ་རབ་རྗོད་བྱེད། །ཅེས་བརྗོད་པ་ཡིན་ནོ། །དེའི་ཕྱིར་ཇི་ལྟར་ན་བདག་ངར་འཛིན་པའི་ཤེས་པའི་ཡུལ་དུ་འགྱུར་ཏེ། རང་རང་གི་ངོ་བོས་དེ་ལ་མི་སྣང་བའི་ཕྱིར་ལ་དེ་ཇི་ལྟར་ན་ངར་འཛིན་པའི་ཤེས་པའི་ཡུལ་དུ་བདག་སྣང་བར་འགྱུར། དེ་ལྟ་བས་ན་འདི་ནི་སྣང་བར་རྟོག་པ་ཙམ་སྟེ་ཡུལ་མེད་པར་སྐྱེ་བ་ཡིན་ནོ་ཞེས་གནས་པ་ཡིན་ནོ། །དེ་ནི་སེམས་ཀྱིས་རང་བཞིན་གྱི་བདག་ཏུ་སྨྲ་བ་གྲངས་ཅན་ལ་སོགས་པ་རྣམས་རྣམ་པར་ཤེས་པ་དྲུག་པོ་རྣམས་ལ་བདག་འགེགས་པ་མ་བཟོད་ནས་བརྗོད་པ། སྒྲ་ལ་སོགས་པའི་ཤེས་པ་སེམས་ཀྱིས་བདག་ཉིད་ལ་བདག་ཉིད་དུ་ཁོ་བོ་ཆག་གིས་བརྗོད་དེ། དེ་ཇི་ལྟར་ན་འདིའི་འདོད་པས་འགེགས་ཞེས་རྗོད་པར་བྱེད་ཅེ་ན། དེ་ལྟར་གཞན་གྱི་བསམ་པ་བླངས་ནས་གྲུབ་པའི་མཐའ་སྨྲ་བས་ཐལ་བར་འགྱུར་བར་བརྗོད་པའི་ཕྱིར་གལ་ཏེ་སྒྲའི་ཤེས་ཞེས་པ་ལ་སོགས་པ་གསུངས་ཏེ། གལ་ཏེ་སྒྲའི་ཤེས་པའི་བདག་ཉིད་ཡིན་ནོ། །དེ་རྟག་པ་ཡིན་པའི་ཕྱིར་སྒྲའི་ཤེས་པ་རྟག་པར་འགྱུར་ལ། དེ་ཚེ་སྒྲ་དེ་ཡོད་པ་དང་མེད་པའི་དུས་ན་ཡང་རྟག་ཏུ་འཛིན་པར་འགྱུར་ཏེ། སྒྲ་འཛིན་པའི་རང་བཞིན་དེ་ཡོད་པ་དང་མེད་པའི་དུས་ན་རྟག་ཏུ་འཇུག་པའི་ཕྱིར་རོ། །གཞན་དུ་ན་དེ་རྟག་པ་ཉིད་ཉམས་པར་འགྱུར་རོ། །འདི་ལྟར་འགྱུར་བ་ཉིད་དོ་ཞེ་ན། ཤེས་བྱ་མེད་ན་ཞེས་པ་ལ་སོགས་པ་གསུངས་ཏེ། ཤེས་བྱ་ཉིད་ནི་བདག་ཏུ་ཉེ་བར་གནས་པ་ཡིན། སྒྲ་ནི་རེས་འགའ་བ་ཡིན་པའི་ཕྱིར་རྣམ་པ་ཐམས་ཅད་དུ་མངོན་བས་བསལ་བ་མ་ཡིན་ནོ། །དེའི་ཕྱིར་དེ་མེད་པའི་དུས་ན་ཤེས་བྱ་མེད་པ་སྟེ་ཡུལ་མེད་པ་ན་ཤེས་པ་དེས་ཅི་ཞིག་རིག་པར་བྱ་སྟེ་ཅི་ཞིག་ཤེས་པར་བྱ། གང་གི་སྒྲས་ནི་མེད་པའི་དུས་ལ་འདྲི་བའི་ཁྱད་པར་ལ་འཇུག་གོ །གང་ཤེས་པར་བྱ་བས་སྟོང་ན་ཡང་ཤེས་པར་ཇི་ལྟར་བརྗོད་དེ། མངོན་པར་རྗོད་པར་བྱེད། ཤེས་བྱ་ཤེས་པས་ནི་
ཤེས་པར་བརྗོད་ལ་དེ་མེད་ན་ཇི་ལྟར་ཤེས་པ་ཡིན་ཞེས་དགོངས་སོ། །དེ་ཉིད་གལ་ཏེ་ཤེས་མེད་ཅེས་པ་ལ་སོགས་པ་གསུངས་ཏེ། གང་ཡུལ་མི་ཤེས་པ་དེ་ལྟ་ན་ཡང་གལ་ཏེ་ཤེས་པར་བརྗོད་ན་དེའི་ཚེ་ཤེས་པ་མེད་པའི་རང་བཞིན་གྱི་ཤིང་ཡང་ཤེས་པར་ཐལ་བར་འགྱུར་རོ། །གང་གིས་ན་མི་ཤེས་པར་འགྱུར་བ་དེས་ཉེས་པ་བྱས་པ་ནི་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟ་བས་ན། དཔེར་ན་ཡུལ་ཡོངས་སུ་ཤེས་པ་མེད་ཅིང་ཤེས་པར་མི་འགྱུར་བ་དེ་བཞིན་དུ་གཞན་ཡང་མི་འགྱུར་རོ་ཞེ་ན། དེས་ན་ཞེས་པ་ལ་སོགས་པ་གསུངས་ཏེ། གང་གིས་ཡུལ་མེད་པར་ཤེས་པར་མ་གྱུར་པའི་རྒྱུ་དེས་ནའོ། །ཤེས་བྱ་ཉེ་བར་གནས་པ་མེད་པ་སྟེ། ཉེ་བ་མ་ཡིན་པ་ནི་རུང་བའི་ཡུལ་ན་མི་གནས་པ་ཤེས་པར་བྱ་བ་ནི་གཟུང་བའི་ཡུལ་གང་གི་ཡིན་པ་དེ་ལ་དེ་སྐད་ཅེས་བརྗོད་པར་བྱ་སྟེ། ཤེས་པ་མེད་དེ་ཡོད་པ་མ་ཡིན་ནོ། །ངེས་པ་ནི་གཅིག་ཏུ་འདི་ལ་ལྟོས་པའི་ཕྱིར་རོ། །དེ་ལྟར་གྱུར་པ་ཡང་སྒྲ་རྟག་པ་ཡོད་པ་མ་ཡིན་པའི་ཕྱིར་སྒྲའི་ཤེས་པ་ཡུལ་མི་ཉེ་བ་མ་ཡིན་ཏེ། བརྒྱ་ལ་མི་འཛིན་པ་ནི་གསལ་བ་རེས་འགའ་ཡིན་པའི་ཕྱིར་ཐལ་བར་འགྱུར་བ་བརྗོད་པའི་ཉེས་པ་ཡོད་པ་མ་ཡིན་ནོ་ཞེ་ན། འདི་ཡོད་པ་མ་ཡིན་ཏེ། གང་གི་ཕྱིར་ཤེས་པ་གང་གིས་ཡོངས་སུ་གཅད་པར་བྱ་བའི་ངོ་བོ་གསལ་བ་ཞེས་བརྗོད་ལ་དེར་རྟག་ཏུ་ཉེ་བ་མ་ཡིན་པའི་ཡུལ་ཡིན་པས་འཛིན་པར་བྱེད་པ་ཤེས་པ་མ་ཡིན་པར་བརྗོད་པར་བྱའོ། །སྒྲ་ནི་རྟག་ཏུ་ཡོད་པ་དང་མེད་པར་བརྗོད་པར་འདོད་པ་མ་ཡིན་ཏེ། ཤེས་པ་ནི་བརྒྱ་ལ་འཛིན་པར་བྱེད་པ་མ་ཡིན་པར་ཞེས་པ་འདི་ཉིད་ཀྱིས་བསྒྲུབ་བྱ་འགྲུབ་བོ། །དེ་ལྟ་བས་ན་ཤེས་པར་བྱ་བ་མི་ཉེ་བ་འདིས་ཤེས་པ་འཛིན་པར་བྱེད་པ་མ་ཡིན་པར་སྒྲུབ་པོ། །གང་གི་ངོ་བོས་ཤེས་པའི་གཟུང་བར་བྱ་བའི་ཡུལ་དེ་རྟག་ཏུ་ཉེ་བ་མ་ཡིན་པས་ན་ཐལ་བར་འགྱུར་བ་བརྗོད་པའི་ཉེས་པ་ཇི་ལྟར་མི་འགྱུར། སྒྲ་ཇི་ལྟར་རྟག་ཏུ་ཡོད་པ་མ་ཡིན་པར་གཞུང་མངས་པའི་འཇིགས་པས་མ་བརྗོད་དོ། །གཞན་ཡང་གལ་ཏེ་སྒྲ་ཤེས་པ་ཉིད་བདག་ཡིན་ན་དེའི་ཚེ་འཛིན་པའི་བདག་ཉིད་ཡིན་པའི་ཕྱིར་དེ་གཟུགས་ལ་འཛིན་པར་མི་འགྱུར་རོ། །དེ་ནི་ཡོད་པ་མ་ཡིན་ཏེ། གང་གི་ཕྱིར་དེ་ཉིད་གཟུགས་འཛིན་པར་འདོད་དོ་ཞེ་ན། འདི་ལ་དེ་ཉིད་ཀྱིས་ཞེས་པ་ལ་སོགས་པ་
གསུངས་ཏེ། དེ་ཉིད་ནི་སྒྲའི་ཤེས་པ་ཉིད་ཡིན་ཏེ། གལ་ཏེ་གཟུགས་ཤེས་པར་འདོད་ན་དེའི་ཚེ་ཐོས་པ་ཡང་ཅི་སྟེ་མིན། དེའི་ཚེ་སྟེ་གཟུགས་འཛིན་པའི་དུས་ན་ཅི་སྟེ་ཐོས་པ་མ་ཡིན། སྒྲ་ཡང་ཅིའི་ཕྱིར་ན་མི་འཛིན་ཏེ། སྒྲའི་ཤེས་པ་ཡིན་པའི་ཕྱིར་རོ། །འོན་ཏེ་སྒྲ་མི་ཉེ་བ་དེའི་ཕྱིར་ན་དེའི་ཤེས་པ་སྟེ་སྒྲ་དེའི་ཤེས་པ་ཡང་མེད་ཅིང་ཡོད་པ་མ་ཡིན་ཏེ། འདི་ལྟར་སྒྲའི་ཤེས་པ་ཉིད་དུ་དེ་མི་འགྱུར་རོ་ཞེས་པའི་དོན་ཏོ། །གཞན་ཡང་གལ་ཏེ་སྒྲའི་ཤེས་པ་ཡིན་ན་དེའི་ཚེ་གཟུགས་འཛིན་པའི་བདག་ཉིད་མི་འཐད་དོ་ཞེས་བསྟན་པའི་ཕྱིར་སྒྲ་འཛིན་ཞེས་པ་ལ་སོགས་པ་གསུངས་ཏེ། སྒྲ་འཛིན་རང་བཞིན་ནི་སྒྲ་འཛིན་པའི་རང་གི་ངོ་བོ་ཡིན་ཏེ། སྒྲའི་འཛིན་པ་པོ་ཞེས་པའི་ཐ་ཚིག་གོ །གང་ཞིག་ཤེས་པ་དེ་སྒྲ་འཛིན་པ་གཟུགས་འཛིན་པའི་བདག་ཉིད་དུ་ཇི་ལྟར་འགྱུར་ཏེ། ཅུང་ཟད་ཀྱང་མ་ཡིན་ཏེ། ཆ་ཤས་མེད་པ་གཅིག་ལ་གཟུགས་གཉིས་མི་རིགས་པའི་ཕྱིར་རོ། །ཅི་སྟེ་དཔེར་ན་གཅིག་འགའ་ཞིག་ལ་ལྟོས་ནས་ཕ་ཡིན་ལ། འགའ་ཞིག་ལ་ལྟོས་ཏེ། དེ་ཉིད་དུ་བུ་ཡིན་པར་འགྱུར་ལ། དེ་བཞིན་དུ་སྐབས་སུ་བབ་པ་ལ་ཡང་གཟུགས་གཉིས་པོ་དག་གཅིག་ཏུ་འགྱུར་རོ་ཞེ་ན། གཅིག་ནི་ཕ་དང་ཞེས་པ་ལ་སོགས་པ་གསུངས་ཏེ། གཅིག་ཁོ་ན་ཕ་ཡིན་ཏེ་སྐྱེད་པ་པོ་ཡིན་ལ་བུ་ཡང་བསྐྱེད་པར་བྱ་བ་ཡིན་ཏེ། དེ་ཉིད་འདི་ཡིན་ཞེས་པ་ནི་བརྟགས་པ་ཡིན་ནོ། །དེ་ཡང་དེ་ལ་ལྟོས་པ་ནི་བརྟགས་པར་རྣམ་པར་གཞག་པར་བྱ་སྟེ། ཡང་དག་ཉིད་མིན་དེ་དོན་དམ་པ་མ་ཡིན་ལ། གཅིག་གི་རང་བཞིན་ཉིད་གཉི་གའི་རང་བཞིན་དུ་རྟོགས་པའི་སྒྲོ་བཏགས་པ་ཡིན་ཏེ་གཟུགས་ཐ་དད་པས་ཡང་གཅིག་ཉིད་དེ་བཞིན་དུ་སྒྲ་སྣ་ཚོགས་པར་སྒྲ་སྣ་ཚོགས་ཀྱིས་བརྗོད་པར་བྱ་བ་མིན་ནོ། །དངོས་པོ་པའི་རང་བཞིན་གཉིས་གཅིག་ཏུ་སྦྱར་བར་བྱ་བ་ཡིན་ལ། དེ་ཡང་ནམ་ཡང་རིགས་པ་མ་ཡིན་ནོ། །རང་བཞིན་གཉིས་ཐ་དད་པ་ཡིན་པས་དངོས་པོ་ཡང་གཉིས་སུ་ཐལ་བར་འགྱུར་རོ། །དེ་ལྟ་བས་ན་ཇི་ལྟར་དངོས་པོ་གཅིག་གཉིས་ཡིན་པ་ལ་དཔེའི་ཆོས་ཅན་ཡོད་པ་མ་ཡིན་ནོ། །གང་ཡང་བརྟགས་པས་ཡོད་པ་དེ་ནི་སྐབས་སུ་བབ་པ་ལ་མཁོ་བ་མ་ཡིན་ཏེ། །འདི་ནི་ཅུང་ཟད་ཀྱང་མ་ཡིན་ནོ། །འདིའི་ཕྱིར་ཡང་འདི་དོན་དམ་པར་མ་ཡིན་ནོ་ཞེས་བསྟན་པའི་ཕྱིར། འདི་ལྟར་སྙིང་སྟོབས་ཞེས་པ་ལ་སོགས་པ་གསུངས་ཏེ། འདི་ཡང་ཁྱོད་ཀྱིས་ཁས་
བླང་བར་བྱ་སྟེ། གྲངས་ཅན་གྱི་གཞུང་ལུགས་ཀྱིས་འགྲོ་བ་ཡོན་ཏན་གསུམ་གྱི་བདག་ཉིད་ཡིན་ལ། དེའི་ཕྱིར་སྙིང་སྟོབས་དང་རྡུལ་དང་མུན་པ་ཡང་ཞེས་ཚིག་ཕྲད་བསྡུས་པ་ནི་སྡུད་པའི་དོན་ཏོ། །འདི་ལྟར་ཞེས་ཏེ་གང་གི་ཕྱིར་ཡོན་ཏན་འདི་རྣམས་རང་གི་ངོ་བོས་གནས་པ་ཡིན་ཏེ། སོ་སོར་རམ་བསྡུས་ནས་སོ། །དེ་ལྟ་བས་ན་དོན་དམ་པར་ཕ་ཡང་མ་ཡིན་ལ། བུ་ཡང་མ་ཡིན་ཏེ། ཐམས་ཅད་དུ་ཡོན་ཏན་གཅིག་ཁོ་ནར་ཡོད་པ་ཡིན་ནོ། །དོན་ནི་འདི་ཡིན་ཏེ། བུའི་གནས་སྐབས་ན་གང་ཞིག་སྙིང་སྟོབས་དང་རྡུལ་དང་མུན་པའི་མཚན་ཉིད་ཀྱིས་ཡོན་ཏན་དེ་ཉིད་སྐྱེད་པར་བྱེད་པའི་དངོས་པོར་ཡང་འགྱུར་ཏེ། དེས་ན་སྔ་མ་དང་ཕྱི་མའི་དུས་དག་ཏུ་ཁྱད་པར་མེད་པའི་དངོས་པོ་ཡིན་ནོ། །དེ་ལྟ་བས་ན་དེ་ལ་ལྟོས་ནས་ཕ་དང་བུ་རུ་བརྗོད་པར་བྱ་སྟེ། དེ་ལ་ཁྱད་པར་ནི་ཡོད་པ་མ་ཡིན་ནོ། །དེ་ལྟ་བས་ན་འདི་ནི་རྟག་པ་ཉིད་ཀྱི་ཐ་སྙད་ཡིན་ནོ། །གལ་ཏེ་ཡང་གཟུགས་འཛིན་པའི་དུས་ན་ཡང་སྒྲ་འཛིན་པའི་ཤེས་པ་དེ་གཅིག་ཉིད་ཡིན་ན་དེའི་ཚེ་དེའི་རང་བཞིན་དམིགས་པར་འགྱུར་ན་དམིགས་པ་ཡང་མ་ཡིན་ནོ། །དེ་ལྟ་བས་ན་དེ་འཛིན་པའི་བདག་ཉིད་མ་ཡིན་ནོ་ཞེས་བསྟན་པའི་ཕྱིར། དེ་ནི་སྒྲ་འཛིན་ཞེས་པ་ལ་སོགས་པ་གསུངས་ཏེ། སྒྲ་འཛིན་དང་ལྡན་པ་ནི་འབྲེལ་བ་ཡིན་ལ་ནིའི་སྒྲས་ནི་ཁྱད་པར་བརྗོད་པ་ཡིན་ནོ། །རང་བཞིན་དེ་ནི་གཟུགས་འཛིན་པ་པོ་ཡིན་ཏེ། ཤེས་པ་དེ་མཐོང་བ་མ་ཡིན་ཏེ། རྟོགས་པ་མ་ཡིན་ནོ། །དེའི་ཕྱིར་དེའི་ཚེ་སྒྲ་འཛིན་པའི་བདག་ཉིད་དེ་ཡོད་པ་མ་ཡིན་ནོ་ཞེས་ངེས་པར་བྱའོ། །དེ་ལྟར་གྱུར་ན་ཡང་གལ་ཏེ་རྟོགས་པར་མ་གྱུར་པ་དེ་ལྟ་ན་ཡང་དེ་ཉིད་དེ་ཡིན་ནོ་ཞེ་ན། དེ་ལྟར་ན་ཇི་ལྟར་གཟུགས་འཛིན་པར་འགྱུར་ཞེ་ན། དེ་ཉིད་ཅེས་པ་ལ་སོགས་པ་སྨོས་ཏེ། དེ་ཉིད་སྒྲ་ཤེས་པ་ཡིན་ལ་གཞན་གྱི་གཟུགས་ཀྱི་རང་བཞིན་གཟུགས་འཛིན་པའི་བདག་ཉིད་ཀྱི་གཟུགས་འཛིན་པ་ཡིན་ནོ་ཞེས་པ་ནི་ལྷག་མའོ། །དེ་ཇི་ལྟ་བུར་ཆོས་མཐུན་པས་ཆོས་མཐུན་པ་ཡིན་ཞེ་ན། གར་མཁན་ལྟ་བུ་ཞེས་ཏེ། ཇི་ལྟར་གཞན་གར་གྱི་དུས་ན་གར་གྱི་ས་གཞིར་སོང་སྟེ། གར་མཁན་གཅིག་པུ་ཉིད་སྣ་ཚོགས་པའི་གཟུགས་ཀྱིས་འཇུག་པ་དེ་བཞིན་དུ་སྐབས་སུ་བབ་པ་ལ་ཡང་ཉེས་པ་མེད་དོ་ཞེ་ན། འདི་ལ་བརྗོད་པ། དེ་ཡང་རྟག་པ་མིན་ཏེ་ཞེས་ཏེ། མི་རྟག་པ་ཡིན་ལ་སྔ་མའི་
རང་བཞིན་ཡོངས་སུ་དོར་ནས་ངོ་བོ་གཞན་ཐོབ་པ་ཡིན་ནོ། །སྔ་མ་དང་ཕྱི་མ་དག་རང་བཞིན་གཅིག་པ་ཉིད་མ་ཡིན་ཏེ། གར་མཁན་སྣ་ཚོགས་པའི་གཟུགས་ཡིན་པའི་ཕྱིར་རོ། །གཞན་དུ་ན་དེའི་གཟུགས་གཉིས་པོ་ཡང་གཅིག་ཏུ་སེམས་ལ་སྣང་བར་འགྱུར་རོ། །དེའི་ཕྱིར་བསྒྲུབ་བྱ་མེད་པའི་དཔེ་ལྟར་སྣང་བ་ཡིན་ནོ། །འོན་ཏེ་དེ་ལྟ་ན་ཡང་དངོས་པོ་དེ་དེ་ཉིད་ཀྱི་རང་བཞིན་སླར་ཡང་གཞན་དང་གཞན་དུ་སྐྱེ་ཞིང་འགག་པ་དེས་ན་ཉེས་པ་འདི་མེད་དོ་ཞེ་ན། འདི་ལ་གལ་ཏེ་ཚུལ་གཞན་ཞེས་པ་ལ་སོགས་པ་གསུངས་ཏེ། དེ་ཉིད་ནི་བདག་གམ་གར་མཁན་ནོ། །ཚུལ་གཞན་ནི་རང་བཞིན་གཞན་ཡིན་པར་གལ་ཏེ་བརྗོད་ནའོ། །དེའི་ཚེ་གཅིག་པུ་འདི་ཉིད་སྔོན་མེད་པ་སྟེ། འདི་ནི་སྔར་མ་བྱུང་བ་སྔར་མ་མཐོང་བ་འདི་ལྟ་བུའི་གཅིག་པ་ཡིན་ནོ། །དེའི་དངོས་པོ་གཞན་སྐྱེས་པ་ན་ཡང་གཅིག་པ་ཉིད་ཡིན་ཞིང་ཐ་མི་དད་པའི་བདག་ཉིད་ཡིན་ན་འདི་ལྟར་དེ་ཉིད་འདི་ཡིན་ནོ་ཞེས་པ་དང༌། ཡང་གཞན་གྱི་ངོ་བོ་ཡིན་ནོ་ཞེས་དེ་ཉིད་གཞན་ཉིད་ཡིན་པར་བརྗོད་ན་ཕན་ཚུན་འགལ་བའི་ཆོས་གཉིས་པོ་འདི་གཅིག་རིགས་པ་མ་ཡིན་ནོ། །གང་གིས་དེ་སྐྱེ་བ་དང་འགག་པར་འགྱུར་བ་ན་ཡང་དངོས་པོ་ལ་དེ་དག་མི་འགྱུར་བ་དངོས་པོ་ཞེས་བྱ་བ་རང་བཞིན་ངོ་བོ་ལས་གཞན་མ་ཡིན་ནོ། །དེ་ཐ་མི་དད་པའི་རང་བཞིན་སྐྱེ་བ་དང་འགག་པ་དག་གི་དངོས་པོ་དེའི་གནས་སྐབས་སུ་རིགས་པ་ཡང་མ་ཡིན་ཏེ། ཐ་དད་པ་མ་ཡིན་པ་མེད་པར་ཐལ་བར་འགྱུར་བའི་ཕྱིར་རོ། །ཐ་དད་པ་ལ་འབྲེལ་པ་གྲུབ་པ་མ་ཡིན་ནོ་ཞེས་བསམས་པ་ཡིན་ནོ། །དེ་ལྟར་གྱུར་ན་ཡང་གལ་ཏེ་བདག་འདི་རང་བཞིན་གཉིས་སུ་བདེན་པ་ཡིན་ན་ཐལ་བ་འདིར་འགྱུར་བ་སྟེ། འོན་ཀྱང་འདིའི་རང་བཞིན་གཉུག་མ་བོར་ནས་གཞན་གྱི་ངོ་བོ་དེ་ཁོ་ན་ཉིད་མ་ཡིན་པའི་ཕྱིར། དེས་ན་ཐལ་བར་འགྱུར་བ་བརྗོད་པ་ཡོད་པ་མ་ཡིན་ནོ་ཞེས་པའི་དོགས་པས། གལ་ཏེ་ཚུལ་ཞེས་པ་ལ་སོགས་པ་གསུངས་ཏེ། གཞན་གྱི་གཟུགས་དེའི་ཡུལ་གྱི་ཁྱད་པར་ཅན་ཤེལ་གྱི་རྡོ་བཞིན་དུ་འདི་གཅིག་པ་ཡིན་ནོ་ཞེས་གལ་ཏེ་ཟེར་ན། དེ་ལྟར་ན་དེའི་རང་བཞིན་སྨོས་ཞེས་ཏེ། རང་བཞིན་གཉུག་མའོ། །དེའི་བདག་གི་ངོ་བོའི་དེ་ཁོ་ན་ཉིད་བརྗོད་ཅིང་སྨྲ་བར་གྱིས་ཤིག །དེའི་གཟུགས་གཞན་ཡོད་པ་ཉིད་ཡིན་ཏེ། དེ་གང་ཞེ་ན། ཤེས་པ་ཉིད་ཅེ་ན་
ཞེས་ཏེ། ཤེས་པའི་བདག་ཉིད་དེ་དུས་སྔ་མ་དང་ཕྱི་མ་ལ་རྗེས་སུ་འགྲོ་བ་ཅན་ནི་དེའི་གཉུག་མའི་རང་བཞིན་ཅན་ཏེ། གཞན་ནི་ཅི་ཞིག་བརྗོད་པར་བྱ། དེའི་གཟུགས་ཀྱི་སྔ་མ་དང་ཕྱི་མ་དག་ཏུ་གཟུགས་གཞན་དང་འབྲེལ་པ་ན་ཡང་ཤེལ་བཞིན་དུ་འདི་གཅིག་པ་ཡིན་ནོ་ཞེས་གལ་ཏེ་ཟེར་ནའོ། །དེ་ལྟར་ན་སྐྱེས་བུ་ཀུན་གཅིག་ཏུ་ཐལ་བར་འགྱུར་ཏེ། དེ་ལྟར་ན་དེ་ཤེས་པ་ཉིད་དུ་ཐུན་མོང་བའི་ཆོས་ཡིན་པས་སོ། །དཔེར་ན་སྔ་མ་དང་ཕྱི་མའི་དུས་ཀྱི་སྒྲ་དང་གཟུགས་ཀྱི་ཤེས་པ་དག་དེའི་རྣམ་པ་ཐ་དད་པས་ཐ་དད་པ་ཡིན་ན་ཡང་གཅིག་ཡིན་པ་དེ་ལྟར་ན་སེམས་ཅན་ཀུན་ཏེ། སྲོག་ཆགས་ཀྱི་རྒྱུད་དུ་གཏོགས་པ་རྣམས་བདག་གཅིག་ཏུ་ཐལ་བར་འགྱུར་བ་ཐོབ་པར་འགྱུར་ལ། དངོས་པོ་ཐ་དད་ན་ཡང་ཁྱད་པར་མེད་པའི་ཕྱིར་རོ། །དེ་ལྟར་ན་ཡང་ཐལ་བ་འདིར་འགྱུར་བ་ཡིན་ཏེ་ཞེས་བསྟན་པའི་ཕྱིར། སེམས་དང་ཞེས་བྱ་བ་ལ་སོགས་པ་གསུངས་ཏེ། གལ་ཏེ་བར་སྐབས་ཀྱི་ཐ་དད་པའི་རྒྱུ་མཚན་གྱི་ཁྱད་པར་སྤངས་ནས་རྣམ་པ་ཅུང་ཞིག་ལ་བརྟེན་ནས་གཅིག་ཏུ་བརྗོད་ནས། དེའི་ཚེ་སེམས་དང་ལྡན་པ་སྐྱེས་བུའི་ཆོས་དང་སེམས་མེད་པའི་རང་བཞིན་གྱི་ཆོས་སོ། །ཀྱང་གི་སྒྲས་ནི་ཉེས་པ་གཞན་སྡུད་པ་ཡིན་ཏེ། དེ་རྣམས་ཀྱང་གཅིག་ཅིང་ཐ་དད་པ་མེད་པའི་དངོས་པོར་འགྱུར་རོ། །ཇི་ལྟར་ཞེ་ན། སེམས་དང་ལྡན་པ་དང༌། མི་ལྡན་པ་དེ་དག་གང་གི་ཕྱིར་ཏེ་རྒྱུ་མཚན་གང་གིས་ཡོད་པ་སྟེ། བདོག་པ་དེ་ཡང་དངོས་པོ་རྣམས་ཀྱི་གཉུག་མའི་གཟུགས་སུ་མཚུངས་པ་སྟེ་གཉིས་པོ་དང་འདྲ་བ་ཡིན་ནོ། །ཅི་སྟེ་འདི་ལ་ཡང་དངོས་པོ་ཐ་དད་ན་ཡང་འདྲ་བའི་རྒྱུ་མཚན་གྱིས་གཅིག་པ་ཉིད་ཡིན་ཏེ་དེ་ལྟ་བས་ན་གང་འདོད་པའི་དངོས་པོ་བསྒྲུབས་པས་ཉེས་པ་མེད་དོ་ཞེ་ན། གང་ཚེ་བྱེ་བྲག་ཅེས་པ་ལ་སོགས་པ་སྨོས་ཏེ། ཉེས་པ་གཞན་བསལ་བར་བྱེད་པས་འང་གི་སྒྲ་ཡིན་ནོ། །བྱེ་བྲག་ནི་ཐ་དད་པའི་དངོས་པོ་ཐམས་ཅད་ངེས་པ་མེད་པས་གང་གི་ཚེ་ལོག་པ་ཡིན་ཞིང་མི་བདེན་པ་གཉུག་མའི་གཟུགས་ཡིན་པ་དེའི་ཚེ་འདྲ་བའི་རྟེན་གང་ཡིན་ཏེ། གང་ལ་བརྟེན་ནས་འདྲ་བར་རྣམ་པར་གཞག་པར་བྱེད། ཁྱད་པར་ཡོད་ན་ཡང་ཆོས་མཐུན་པ་ཅུང་ཟད་ཙམ་གྱིས་འདྲ་བར་འགྱུར་རོ། །ཁྱད་པར་མེད་ན་ཡང་དེ་ཉིད་དུ་འགྱུར་ལ། འདྲ་བ་ནི་མ་ཡིན་ཏེ། བ་ལང་དད་པ་མིན་དག་ལ་ཁྱད་
པར་ཉམས་སུ་མྱོང་བ་མེད་ན་བ་མེན་བ་ལང་དང་འདྲ་བར་མི་འགྱུར་ཏེ། འོན་ཀྱང་བ་ལང་ཉིད་དུ་འགྱུར་རོ། །དེའི་ཕྱིར་བྱེ་བྲག་ཉིད་འདྲ་བའི་རྟེན་ཡིན་ལ་དེ་ཡང་གང་གི་ཚེ་དོན་དམ་པར་མི་འགྱུར་ན། དེའི་ཚེ་གང་འདྲ་བར་འགྱུར་ཏེ། མཚུངས་པའི་རྣམ་པ་ཉིད་སྐྱེས་བུའང་གཞན་དག་ལ་བརྟེན་པའི་རྒྱུ་མཚན་དུ་གྱུར་པ་ཅུང་ཟད་ཀྱང་ཡོད་པ་མ་ཡིན་ནོ་ཞེས་པའི་དོན་ཏོ། །དེའི་ཕྱིར་དངོས་པོ་ལ་གཅིག་ཉིད་དུ་འགྱུར་བ་ཡིན་ཏེ། ཁྱེད་ཀྱི་འདྲ་བས་བྱས་པ་ནི་མ་ཡིན་ལ། དེ་ཇི་ལྟར་ན་གྲུབ་པ་ལ་སྒྲུབ་པའི་ཕྱིར་ཉེས་པ་མེད་དོ་ཞེས་རྗོད་པར་བྱེད། དེ་བཞིན་དུ་སེར་སྐྱ་པ་དང༌། རྒྱལ་དཔོག་པས་ཡོངས་སུ་བརྟགས་པའི་སེམས་ཀྱི་རང་བཞིན་གྱི་བདག་ཡོད་པར་མ་གྲུབ་པོ། །རིག་བྱེད་ཀྱི་མཐའ་གསང་བར་སྨྲ་བས་བརྟགས་པ་ལ་ཡང་ཇི་ལྟར་སྲིད་པས་སུན་དབྱུང་བ་བརྗོད་པར་བྱའོ། །ད་ནི་རིགས་པ་ཅན་ལ་སོགས་པས་བརྟགས་པའི་སེམས་མེད་པའི་བདག་གི་ཡོད་པའི་ཐ་སྙད་དགག་པའི་ཆེད་དུ་སེམས་མེད་པ་ཡང་ཞེས་པ་ལ་སོགས་པ་གསུངས་ཏེ། སེམས་དང་ལྡན་པའི་བདག་རེ་ཞིག་བརྗོད་པའི་རིགས་པ་མི་འཐད་ལ། སེམས་མེད་ཀྱང་བདག་མ་ཡིན་པར་བསྟན་པའི་ཆེད་དུ་མིན་ཏེ་ཞེས་ཏེ། མི་རིགས་སོ་ཞེས་པ་ནི་འང་གི་སྒྲའི་དོན་ཏེ། ཅིའི་ཕྱིར་ཞེ་ན། སེམས་མེད་ཕྱིར་ཏེ། སེམས་དང་མི་ལྡན་པའི་ཕྱིར་རོ། །སེམས་མེད་པ་གང་གི་ཡིན་པ་དེ་ནི་སེམས་མེད་པའོ། །དེ་ལྟ་བས་ན་སེམས་མེད་པ་དེའི་ཕྱིར་ཞེས་པའི་དོན་ཏོ། །ཇི་ལྟ་བུ་ཞེ་ན། སྣམ་སོགས་བཞིན་ཞེས་ཏེ། ཇི་ལྟར་སྣམ་བུ་དང༌། ཤིང་དང་རི་ལ་སོགས་པ་རྣམས་སེམས་དང་བྲལ་བའི་ཕྱིར་བདག་མ་ཡིན་པ་དེ་བཞིན་དུ་མངོན་པར་འདོད་པ་ཡང་སྟེ་ལས་དང་བྱེད་པ་པོ་ལ་སོགས་པ་རྣམས་སུ་ཁས་བླངས་པའི་ཕྱིར་རོ། །གཞན་དུ་ན་དེས་ཅུང་ཟད་ཀྱང་དགོས་པ་ཡོད་པ་མ་ཡིན་ནོ། །སེམས་མེད་པ་ཡང་དེར་རིགས་པ་མ་ཡིན་ཏོ། དཔེར་ན་སྣམ་བུ་ལ་སོགས་པ་ཡིན་ནོ། །གལ་ཏེ་ཡང་འདིའི་རང་ཉིད་སེམས་དང་ལྡན་པ་མ་ཡིན་པ་དེ་ལྟར་ན་ཡང་བློའི་སེམས་ཀྱིས་སེམས་དང་ལྡན་པར་བྱེད་དེ། དེས་ན་ཉེས་པ་འདི་མེད་ཅེས་གཞན་གྱི་བསམ་པས་སྲིད་པས་འོན་ཏེ་སེམས་དང་ལྡན་པའི་ཕྱིར། ཤེས་ན་ཞེས་སྨོས་ཏེ། འོན་ཏེ་ཞེས་པ་ནི་འདྲི་བའོ། །འོན་ཏེ་བདག་འདི་སེམས་དང་ལྡན་པའི་ཕྱིར་ཏེ། བློ་དང་འདུལ་བ་ལས་རང་ཉིད་སེམས་དང་མི་
ལྡན་པ་ན་ཡང་ཤེས་པར་འགྱུར་ནའོ། །ཤེས་པར་བྱེད་པས་ན་ཤེས་པ་ཡིན་ནོ། །དེ་ལྟར་ཁས་ལེན་པ་ན་མི་ཤེས་འཇིགས་པར་ཐལ་ཏེ། གང་གི་ཚེ་འདི་ལྟར་ར་རོ་བ་དང་བརྒྱལ་བ་ལ་སོགས་པའི་གནས་སྐབས་ན་སེམས་དང་ལྡན་པ་ལོག་པ་ན་བདག་ཉིད་མི་ཤེས་པ་སྟེ། ཅུང་ཞིག་ཀྱང་མི་ཤེས་པ་དེའི་ཚེ་འཇིགས་པར་འགྱུར་ཏེ། སྔར་སེམས་དང་ལྡན་པ་དང་འབྲེལ་པའི་རང་བཞིན་ཡོངས་སུ་གཏོང་བས་ཡོངས་སུ་འཇིགས་པར་ཐལ་བར་འགྱུར་རོ། །ཅི་སྟེ་སེམས་དང་འབྲེལ་པ་དང་མ་འབྲེལ་པའི་དུས་ན་རང་བཞིན་གཅིག་ཉིད་ཡིན་པས་ཉེས་པ་མེད་དོ་ཞེས་ཕ་རོལ་པོའི་དགོས་པས་ཅི་སྟེ་བདག་ལ་ཞེས་པ་ལ་སོགས་པ་སྨོས་ཏེ། ཅི་སྟེ་སེམས་དང་ལྡན་པ་སྐྱེ་བ་དང་འགག་པ་དག་འགྱུར་བ་མེད་པ་ཉིད་ཡིན་ཏེ། མ་སྐྱེས་པ་དང་མ་འགགས་པའི་རང་བཞིན་ཉིད་བདག་ཡིན་ནོ་ཞེས་སོ། །གལ་ཏེ་དེ་ལྟར་ན་སེམས་པས་དེ་ལ་ཅི་ཞིག་བྱ་སྟེ། སེམས་པ་དང་བྲལ་བ་དུས་ཐམས་ཅད་དུ་འགྱུར་བ་མེད་པར་གནས་ན། བདག་འདི་སེམས་དང་ལྡན་པའི་བློ་དང་འདུ་བས་ཅི་ཞིག་བྱས་ལ། ཁྱད་པར་ལྷག་པ་ཅི་ཞིག་བསྒྲུབས་ཏེ་ཅུང་ཟད་ཀྱང་མ་ཡིན་ནོ། །བློ་དང་འདུ་བ་ཡིན་ན་ཡང་སྔར་གྱི་རང་བཞིན་དེ་ལྟ་བུ་ཉིད་མ་ཉམས་པའི་གནས་སྐབས་ཉིད་ཡིན་པས་བདག་ནི་སེམས་དང་བཅས་པ་ཉིད་ཡིན་ནོ། །དེ་ལྟར་གནས་ན་ཡང་ཁྱོད་ཀྱིས་ཅི་ཞིག་བསྒྲུབ་པ་ཡིན་ཞེས། དེ་ལྟར་སེམས་མེད་ཅེས་པ་ལ་སོགས་པ་གསུངས་ཏེ། མི་ཤེས་པ་ནི་ཕན་པ་དང་མི་ཕན་པ་ཅུང་ཟད་ཀྱང་ཤེས་པར་མི་བྱ་བ་ཡིན་ལ། བྱ་བ་དང་བྲལ་བ་ནི་བྱ་བ་ལས་ཕྱི་རོལ་དུ་གྱུར་པ་ཡིན་ཏེ། བྱ་བ་མེད་པའོ། །དེ་ནི་ཕྱིར་བཅོས་པ་ཐམས་ཅད་དང་བྲལ་ཞིང༌། བྱ་རྒྱུ་ཐམས་ཅད་ལ་ཁྱད་པར་མི་བྱེད་པའོ། །ཡང་ན་ལུས་ཐམས་ཅད་ལ་ནུས་པ་དང་བྲལ་བའམ་འགྲོ་བ་ལ་སོགས་པའི་བྱ་བས་སྟོང་པ་ཡིན་ཏེ། ནམ་མཁའ་སྐབས་སུ་བབ་པ་ལ་ཉེ་བར་མཁོ་བ་མ་ཡིན་པའི་ཕྱིར་ན་ནམ་མཁའ་དང་འདྲ་བ་ཡིན་ཏེ། འདི་ལྟར་ཡིན་པ་ན་བདག་ནི་བདག་ཉིད་ཀྱི་རང་བཞིན་ཏེ། རྣམ་པར་གཞག་པ་ཡིན་ནོ། །འདི་ཡང་རང་གི་འདོད་པ་ལ་མཇུག་སྡུད་པ་ཡིན་ཏེ། ཇི་ལྟར་རང་བཞིན་མེད་པ་ཉིད་ཀྱིས་བྱ་བ་ཐམས་ཅད་ཀྱིས་སྟོང་པ་ལ་བརྟགས་པ་ཙམ་གྱིས་ནམ་མཁའ་བཞིན་དུ་བདག་ཀྱང་ཡིན་ནོ་ཞེས་པའི་
དོན་ནམ། གཞན་གྱི་འདོད་པ་ཡིན་ཏེ། ཇི་ལྟར་ལས་དང་བྱེད་པ་ལ་སོགས་པ་ལ་ཡིན་པའི་ངོ་བོ་ནི་ནམ་མཁའ་ཡིན་ཏེ། སེམས་པ་མེད་པའི་ཕྱིར་དང༌། བྱ་བ་མེད་པའི་ཕྱིར་རོ། །ད་ནི་ཡང་གཞན་དུ་བདག་འགེགས་པར་བྱེད་པའི་གནོད་པ་བསྟན་པར་འདོད་ནས་གཞན་གྱི་གཞུང་ལུགས་དགོད་པ་ནི། གལ་ཏེ་བདག་ནི་ཡོད་མིན་ན། །ཞེས་བྱ་བ་ལ་སོགས་པ་གསུངས་ཏེ། གལ་ཏེ་འཇིག་རྟེན་ཕ་རོལ་པོ་འགའ་ཡང་མེད་པར་འགྱུར་ན། དེའི་ཚེ་བདག་འཇིག་རྟེན་ཕ་རོལ་དུ་འགྲོ་བ་ཡོད་པ་མ་ཡིན་ཞིང་མེད་ན་ལས་འབྲས་འབྲེལ་པར་མི་རིགས་ཏེ། ལས་ནི་དགེ་བ་དང་མི་དགེ་བ་ཡིན་ལ། འབྲས་བུ་ནི་དེ་ཉིད་འདོད་པ་དང་མི་འདོད་པ་ཡིན་ནོ། །དེ་དང་འབྲེལ་པའམ་ལས་བྱས་པ་འབྲས་བུ་དང་འབྲེལ་པ་ཡིན་ནོ། །གང་ཉིད་ཀྱིས་ལས་བྱས་པ་དེ་ཉིད་ཀྱིས་དེའི་འབྲས་བུ་ཐོབ་པ་ཡིན་ཏེ། གཞན་གྱིས་ནི་མ་ཡིན་ལ། དེ་ཅིས་འཐད་པ་ཡིན་ཏེ། མི་རིགས་ཤིང་འཐད་པ་མ་ཡིན་ནོ། །འཇིག་རྟེན་ཕ་རོལ་དུ་ལས་དང་འབྲས་བུ་འབྲེལ་པ་ནི་འདོད་པ་ཡང་ཡིན་ནོ། །འདི་ལ་ཡང་བདེ་བར་གཤེགས་པ་པ་རྣམས་དང་ཡང་རྩོད་པ་མེད་དོ། །དེ་ལྟར་ཡང་མདོ་ལས། འདི་ཉིད་ཀྱིས་བྱས་པའི་ལས་ཇི་ལྟར་གཞན་གྱིས་མྱོང་བར་འགྱུར། དགེ་སློང་དག་བྱས་ཤིང་བསགས་པའི་ལས་ནི་སའི་ཁམས་ལ་སྨིན་པར་འགྱུར་བ་མ་ཡིན། ཆུའི་ཁམས་ལ་མ་ཡིན། མེའི་ཁམས་ལ་མ་ཡིན། རླུང་གི་ཁམས་ལ་མ་ཡིན། ཟིན་པའི་ཕུང་པོ་དང་ཁམས་དང་སྐྱེ་མཆེད་འདི་ཉིད་ལ་སྨིན་པ་ཡིན་ནོ་ཞེས་རྒྱས་པར་གསུངས་པ་ཡིན་ནོ། །ཡང་གསུངས་པ། ལས་རྣམས་བསྐལ་པ་བརྒྱར་ཡང་ནི། །ཆུད་མི་ཟ་ཞིང་ཚོགས་དང་དུས། །རྙེད་ནས་ལུས་ཅན་རྣམས་ལ་ནི། །འབྲས་བུ་དག་ཏུ་ངེས་པར་འགྱུར། །ཞེས་སོ། །དེ་ལྟ་བས་ན་ལས་དང་འབྲས་བུ་འབྲེལ་པ་ཁྱེད་ཀྱིས་ཀྱང་སྤང་བ་མ་ཡིན་ལ། དེ་ལྟ་བས་ན་ངེས་པར་བདག་ཁས་བླང་བར་བྱ་སྟེ། གཞན་དུ་ན་འདི་ཐམས་ཅད་མི་རིགས་པར་འགྱུར་ཏེ། བདག་མེད་ན་ལས་དང་འབྲས་བུ་འབྲེལ་པར་ཇི་ལྟར་འཐད་པར་འགྱུར་ཞེས། ལས་བྱས་ནས་ནི་ཞེས་པ་ལ་སོགས་པ་སྨོས་སོ། །ནིའི་སྒྲས་ནི་གང་གི་ཕྱིར་ཏེ། དགེ་བ་དང་མི་དགེ་བའི་མཚན་ཉིད་ཀྱི་ལས་བྱས་ཏེ། ལས་བསྐྱེད་ནས་ཞིག་པ་ན་ཞེས་ཏེ། ཞིག་ཅིང་ལས་བྱེད་པ་འགགས་པ་ན་འབྲས་བུ་ག་ལ་འགྱུར་ཏེ། བདག་མེད་པ་ན་འཇིག་རྟེན་ཕ་རོལ་དུ་འགྲོ་བ་སུ་ཡང་མེད་པའི་ཕྱིར་རོ། །གང་གི་སེམས་
ཀྱི་སྐད་ཅིག་མས་བྱས་པའི་ལས་དེ་སྐད་ཅིག་མ་ཡིན་པས་དེ་ལས་བྱས་པའི་དུས་ཉིད་ན་འགགས་པའི་ཕྱིར་ལས་བྱས་པའི་འབྲས་བུ་བདེ་འགྲོ་འམ། ངན་འགྲོ་ལ་བདེ་བ་དང་སྡུག་བསྔལ་འཇིག་རྟེན་པ་གང་གི་ཡིན་པར་འགྱུར་ཞིང་སྐྱེ་བར་ཏེ། གང་གི་ཡང་མ་ཡིན་ནོ། །འཇིག་རྟེན་ཕ་རོལ་དུ་ཡང་ལས་བྱས་པ་ཉིད་ཀྱི་འབྲས་བུ་དང་ལྡན་པ་གཞན་འགའ་ཞིག་སྐྱེས་པའི་ཕྱིར་རོ། །དེ་ལྟར་ན་བྱས་པ་ཆུད་ཟ་ཞིང༌། མ་བྱས་པ་དང་ཕྲད་པར་འགྱུར་རོ། །འདི་ནི་མཚོན་པ་ཙམ་ཡིན་ཏེ། དྲན་པ་དང་ངོ་ཤེས་ཀྱི་ཤེས་པ་དང༌། ཐེ་ཚོམ་དང༌། ངེས་པ་དང༌། རང་གི་བཅོལ་བ་ལེན་པ་དང༌། མཐོང་བའི་དོན་ལ་ངོ་མཚར་དང་བྲལ་བ་དང༌། རྒྱུ་དང་འབྲས་བུ་ཉིད་དང་དེ་རྟོགས་པའི་ཚད་མ་དང༌། བཅིངས་པ་དང༌། ཐར་པ་ལ་སོགས་པ་དག་ཏུ་ཡང་མི་འགྱུར་རོ་ཞེ་ན་སྟེ་གལ་ཏེ་དེ་ལྟར་འདོད་ན། དེ་རིགས་པ་མ་ཡིན་ནོ་ཞེས་བྱ་བ། འབྲས་བཞི་ཞེས་པ་ལ་སོགས་པ་གསུངས་ཏེ། ཁྱོད་དང་ཁོ་བོ་ཅག་གཉིས་ལ་སྟེ། བདག་ཏུ་སྨྲ་བ་ཁྱེད་དང༌། བདག་མེད་པར་སྨྲ་བ་ངེད་ཅག་ལ་གྲུབ་ཅིང་ངེས་པ་ཡིན་ནོ། །ཅི་ཞིག་གྲུབ་ཅེ་ན། བྱ་བ་འབྲས་བུ་བཞི་ཐ་དད་པར་གསུངས་ཏེ། ལས་ནི་བྱ་བ་ཡིན་ཏེ། འཇིག་རྟེན་འདི་ལའོ། །འཇིག་རྟེན་ཕ་རོལ་དུ་དེའི་འབྲས་བུའོ། །གཞི་ཐ་དད་པ་དེ་དག་ལ་སྟེ། རྟེན་སྣ་ཚོགས་དེ་དག་ལ་གྲུབ་པོ། །འདི་ལྟར་ཡང་ལུས་ངག་གིས་སྐྱེ་བ་དེ་ཉིད་ལ་ལས་བྱེད་པ་ནི་མ་ཡིན་ཏེ། དེ་ཉིད་ཀྱིས་འཇིག་རྟེན་ཕ་རོལ་དུ་འབྲས་བུ་ལ་ལོངས་སྤྱོད་པ་ཡིན་ནོ། །དེའི་ཕྱིར་ལས་བྱེད་པ་གཞན་ཉིད་ཡིན་ལ། ལོངས་སྤྱོད་པ་པོ་ཡང་གཞན་ཡིན་ནོ། །དེ་ལྟ་བས་ན་གཞི་ཐ་དད་པ་ལ་བྱ་བ་དང་འབྲས་བུ་དག་ཏུ་འགྱུར་ལ་འདི་ལ་ཡང་འུ་བུ་ཅག་ལ་རྩོད་པ་ཡོད་པ་མ་ཡིན་ནོ། །དེ་ལྟར་གྱུར་ན་ཡང་བདག་དེའི་བྱ་བ་མེད་པར་དེ་ཉིད་བྱེད་པ་པོ་ཉིད་དང༌། ལོངས་སྤྱོད་པ་པོ་ཉིད་དག་ཏུ་མི་འགྱུར་རོ་ཞེ་ན། འདི་ལ་བརྗོད་པ་དེར་བདག་བྱེད་པ་མེད་ཅེས་པ་ལ་སོགས་པ་གསུངས་ཏེ། བྱེད་པ་མེད་པ་ནི་བྱེད་པ་དང་བྲལ་བ་ཡིན་ལ། དེ་ལ་ཞེས་པ་ནི་ལས་བྱེད་པ་དང་འབྲས་བུ་ལ་ལོངས་སྤྱོད་པ་དག་ལའོ། །བདག་བྱེད་པ་མེད་པ་ཉིད་ནི་སེམས་པ་མེད་པའི་ཕྱིར་དང༌། རྟག་པའི་ཕྱིར་གང་ལ་ཡང་བྱེད་པ་ལ་ནུས་པ་ཡོད་པ་མ་ཡིན་ནོ། །གང་ཡང་བརྗོད་པ། ཤེས་པ་ཙམ་སོགས་གང་འབྲེལ་པ། །དེ་
ལ་བྱེད་པ་པོ་ཉིད་བརྗོད། །བདེ་དང་སྡུག་བསྔལ་སོགས་རིགས་པ། །འདུ་བ་ལས་ནི་ཟ་བ་པོ། །ཞེས་སོ། །དེ་ཡང་བརྗོད་པའི་རིམ་པས་སྔ་མ་དང་ཕྱི་མའི་དུས་དག་ཏུ་མི་གཡོ་བའི་རང་བཞིན་དུ་རིགས་པ་མ་ཡིན་ནོ། །རྒྱུ་དེས་ན་འདིར་ནི་བདག་ལ་བྱེད་པ་མེད་པ་ཉིད་ཡིན་ལ། རྩོད་པ་ནི་རྣམ་པར་རྩོད་པ་ཡིན་ལ་གང་དོན་དེ་ཁས་བླངས་ལ་ནི་དོན་མེད་ཅིང་འབྲས་བུ་མེད་པ་ཡིན་ཏེ། དེ་ལ་དེ་ཉེ་བར་མཁོ་བ་མ་ཡིན་པའི་ཕྱིར་རོ། །མ་ཡིན་ནམ་ཞེས་པ་ནི་གཞན་ལ་བོད་པའི་ཚིག་གོ །གལ་ཏེ་བདག་མེད་ན་འོ་ན་ཇི་ལྟར་བྱས་པ་ཆུད་ཟོས་པ་ལ་སོགས་པའི་ཉེས་པར་མི་འགྱུར། དེ་ལྟ་བས་ན་རྩོད་པ་དོན་མེད་པ་མ་ཡིན་ནོ་ཞེ་ན། འདི་ལ་རྒྱུ་ལྡན་ཞེས་བྱ་བ་གསུངས་ཏེ། གང་རྒྱུ་དང་ལྡན་པ་ནི་ལས་དང་ལྡན་པ་ཡིན་ལ་དེ་ཉིད་འབྲས་བུ་དང་ལྡན་པ་ཡིན་ཏེ། འབྲས་བུ་དང་བཅས་པའི་ཕྱིར་རོ་ཞེས་བྱ་བ་ནི་འདི་ལྟར་མཐོང་བ་དེ་ནི་སྲིད་པ་མ་ཡིན་ལ་དམིགས་པ་མ་ཡིན་ཏེ། གང་གི་ཕྱིར། འཇིག་རྟེན་འཆི་བ་གཞན་ཉིད་ལ། །སྐྱེ་བ་ཡང་ནི་གཞན་ཉིད་དོ། །དེའི་ཕྱིར་རྒྱུ་དང་ལྡན་པ་འབྲས་བུ་དང་བཅས་པ་མ་ཡིན་ནོ། །འོ་ན་འདི་ཉིད་ཀྱིས་ནི་བྱས་པའི་ལས། །གཞན་གྱིས་ཇི་ལྟར་མྱོང་བར་འགྱུར། །ཞེས་བརྗོད་པ་དེ་ཇི་ལྟར་རྟོགས་པར་བྱ་ཞེ་ན། འདི་ལ་རྒྱུད་གཅིག་ལ་ནི་ཞེས་པ་ལ་སོགས་པ་གསུངས་ཏེ། རྒྱུད་གཞན་དང་གཞན་སྐད་ཅིག་མ་དུ་མ་བརྒྱུད་པའི་མཚན་ཉིད་འབྲས་བུ་དང་རྒྱུའི་དངོས་པོས་འཇུག་པ་འབའ་ཞིག་ལ་བརྟེན་ནས་དུ་མ་རྣམས་ལ་འཇིག་རྟེན་པའི་ཞེན་པས་གཅིག་ཉིད་དུ་སྒྲོ་བཏགས་པ་ཉིད་ཀྱི་རྒྱུ་མཚན་གྱིས་བྱེད་པ་པོ་དང་ཟ་བ་པོ་ཞེས་བསྟན་པ་ཡིན་ནོ། །ལས་བྱེད་པ་པོ་གང་ཡིན་པ་དེ་ཉིད་ལོངས་སྤྱོད་པ་པོ་ཡང་ཡིན་ནོ་ཞེས་བསྟན་པ་འདི་གདུལ་བྱའི་བསམ་པའི་དབང་གིས་བཅོམ་ལྡན་འདས་ཀྱིས་བསྟན་པ་ཡིན་ལ། གཞན་དུ་ན་སྐྱེ་བོས་ལས་དང་འབྲས་བུ་རྒྱུན་ཆད་པར་སེམས་ལ་རེ་ཞིག་སེམས་ཅན་འཇིག་རྟེན་གཉི་གའི་རྗེས་སུ་འཇུག་པར་བཤད་པ་མ་ཡིན་ནོ། །དེ་ཉིད་ཀྱི་ཕྱིར་དེ་ཉིད་དུ་ཟིན་པའི་ཕུང་པོ་དང་ཁམས་དང་སྐྱེ་མཆེད་འདི་ཉིད་སྨིན་པར་འགྱུར་རོ་ཞེས་གསུངས་སོ། །དེ་བཞིན་དུ་སེམས་པའི་ལས་ཀྱིས་བསམས་པས་བསམས་པའི་ལས་ཡིན་ནོ་ཞེས་གསུངས་པས་སོ། །དེ་སྐད་དུ་གསུངས་པ། ལས་རྒྱས་འཇིག་རྟེན་སྣ་ཚོགས་སྐྱེ། །ལས་ནི་སེམས་པ་དང་དེས་བྱས།།
སེམས་པ་ཡིད་ཀྱི་ལས་ཡིན་ཏེ། །དེས་བསྐྱེད་ལུས་དང་ངག་གི་ལས། །ཞེས་སོ། །གཞན་ཡང་སེམས་ཅན་འཇིག་རྟེན་སྣོད་ཀྱི་འཇིག་རྟེན་ནི། །སྣ་ཚོགས་སེམས་ཉིད་ཀྱིས་ནི་སྤྲུལ་པ་ཡིན། །ལས་ནི་སེམས་ལས་མ་གཏོགས་ཡོད་མིན་དང༌། །འགྲོ་བ་མ་ལུས་སེམས་ལས་སྐྱེ་བར་གསུངས། །ཞེས་སོ། །དེ་ལྟ་བས་ན་སེམས་ལས་མ་གཏོགས་པའི་ལས་གཞན་ནི་ཡོད་པ་མ་ཡིན་ལ། དེ་ཡང་དགེ་བ་དང་མི་དགེ་བའི་སེམས་སྐྱེས་ནས་འགག་པ་ན་རང་གི་ཉེ་བར་ལེན་པ་ལས་བྱུང་བའི་སེམས་ཀྱི་སྐད་ཅིག་ལ། དགེ་བ་དང་མི་དགེ་བ་ལ་སོགས་པའི་འདུ་བྱེད་པའི་བག་ཆགས་འཇོག་གོ །དེ་ཡང་དེས་གཞག་པའི་བག་ཆགས་གཞན་དང་གཞན་དེས་མངོན་པར་འདུ་བྱས་པའི་སྐད་ཅིག་མ་གཞན་དང་གཞན་རྒྱུན་མཆད་པས་འཇུག་པ་ན་ཡོངས་སུ་གྱུར་བའི་ཁྱད་པར་ཉེ་བར་སྐྱེའོ། །ལས་ཀྱི་ཁྱད་པར་དང་རྗེས་སུ་མཐུན་པ་དེ་ལྟ་བུའི་རྣམ་པ་བདེ་བ་ལ་སོགས་པའི་རང་བཞིན་གྱི་སེམས་ཀྱི་བདག་ཉིད་ཀྱི་འབྲས་བུ་འཇིག་རྟེན་ཕ་རོལ་དུ་སྐྱེད་པར་བྱེད་དོ་ཞེས་བརྗོད་དོ། །དཔེར་ན་དེ་ནི་ས་དང་ས་བོན་ལ་སོགས་པ་ཕན་ཚུན་ཚོགས་པའི་རྐྱེན་གྱི་ཁྱད་པར་ལས་ཐོབ་པའི་ཁྱད་པར་དུ་གྱུར་པས་སྐད་ཅིག་མ་དང་པོ་ལས་བསྐྱེད་པའི་རང་གི་ཉེ་བར་ལེན་པའི་འབྲས་བུར་གྱུར་པ་སྐད་ཅིག་མ་གཉིས་པར་གྱུར་པའི་ཚོགས་པ་ལ་འབྲས་བུ་བསྐྱེད་པའི་རྗེས་སུ་མཐུན་པའི་བྱད་པར་སྐྱེད་པར་གྱུར་ནས་ཕྱི་མ་ཕྱི་མ་ཁྱད་པར་དུ་འབྱུང་བའི་རྒྱུད་ཡོངས་སུ་གྱུར་པའི་ཁྱད་པར་ལས་མཐའི་སྐད་ཅིག་མའི་མཚན་ཉིད་ཕུལ་དུ་བྱུང་བ་སྐྱེད་པ་ཐོབ་པོ། །ས་བོན་དང་རྗེས་སུ་མཐུན་པའི་སཱ་ལུ་དང༌། ཀོཊ་བའི་མྱུ་གུ་སྐྱེད་པར་བྱེད་དེ། ཇི་ལྟར་ཡང་རྒྱ་སྐྱེགས་ཀྱི་ཁུ་བས་ཡོངས་སུ་བསྒོས་པ་མ་ཏུ་ལུང་གལ་སོགས་པའི་ས་བོན་བཏབ་པས་དེ་མངོན་པར་འདུ་བྱས་པ་རྒྱུད་པས་འཇུག་པ་མེ་ཏོག་ལ་སོགས་པ་རྣམས་དམར་པོར་འབྱུང་བ་ཡིན་ནོ། །དེ་ལ་ཅུང་ཟད་ཀྱང་སྔ་མ་དང་ཕྱི་མིའི་དུས་སུ་གཅིག་འཇུག་པ་ནི་མ་ཡིན་ནོ། །དགེ་བ་དང་མི་དགེ་བ་དང་མཚུངས་པ་ལ་ཡང་རྣམ་པར་རྟོག་པས་གཞག་པའི་ཕྱིར་ཉེ་བར་དགོད་པ་ནི་མི་རིགས་སོ། །དེ་ལྟར་ཡང༌། གང་གི་རྒྱུད་ནི་འདི་ཉིད་ལ། །ལས་ཀྱི་བག་ཆགས་གཞག་པ་ལས། །འབྲས་བུ་དེ་ཉིད་ལ་འགྱུར་ཏེ། །རས་བ་ལ་དམང་པོ་བཞིན་ནོ། །དེ་ལྟ་བས་ན་ས་
བོན་ལ་སོགས་པ་རྣམས་ལ་བདག་མེད་ན་ཡང་འབྲས་བུ་སོ་སོར་ངེས་པ་ཡིན་ཏེ་ངེས་སྐྱེ་བ་ཡང་རིམ་གྱིས་སྐྱེ་བར་འགྱུར་རོ། །དེ་བཞིན་དུ་སྐབས་སུ་བབ་པ་ལ་ཡང་འཇིག་རྟེན་ཕ་རོལ་དུ་འགྲོ་བ་གཅིག་པུ་གཅིག་མེད་ན་ཡང་རྒྱུ་དང་འབྲས་བུའི་དངོས་པོའི་ངེས་པ་ཉིད་ཀྱི་ཕྱིར་འབྲས་བུའི་ངེས་པ་ཉིད་ཡིན་ཏེ། ལས་དང་ཉོན་མོངས་པས་འདུས་བྱས་པའི་རྒྱུད་མ་ཆད་པར་འཇུག་པས་འཇིག་རྟེན་ཕ་རོལ་དུ་འབྲས་བུ་ཐོབ་པར་འགྱུར་བར་བརྗོད་དོ། །དེའི་ཕྱིར་མ་བྱས་པ་དང་ཕྲད་པར་བྱས་པ་ཆུད་ཟོས་པའི་ཉེས་པ་མེད་དོ། །དེའི་ཕྱིར་བདག་མེད་ཀྱང་ལས་དང་འབྲས་བུའི་འབྲེལ་པར་མི་འཐད་པ་མེད་དོ། །ཇི་ལྟར་ཡང་བདག་ཡོད་པར་མི་འཐད་པ་དེ་ལྟར་སྤྲོས་ན་ཤིན་ཏུ་རྒྱས་པར་འགྱུར་བས། འདིར་རྒྱས་པར་མ་བརྗོད་དོ། །དེ་ལྟར་ཡང༌། བདག་མེད་ཕུང་པོ་ཙམ་ཉིད་ལ། །ཉོན་མོངས་ལས་ཀྱིས་མངོན་དུ་བྱས། །སྲིད་པ་བར་མའི་རྒྱུད་ཀྱིས་ནི། །མར་མེ་བཞིན་དུ་མངལ་དུ་འཇུག །ཅེས་གསུངས་སོ། །གང་ཟག་ཏུ་སྨྲ་བ་དེ་རྣམས་ཀྱིས་ཀྱང་དེ་ཉིད་དང་གཞན་དུ་འགེགས་པའི་ཕྱོགས་ཁས་བླངས་པའི་ཕྱིར་རང་ཉིད་ཀྱིས་དངོས་པོ་དགག་པ་ཡིན་ཏེ། དངོས་པོ་ནི་འདི་ཉིད་དང་གཞན་གྱི་ཁྱད་པར་ལས་མ་འདས་པའི་ཕྱིར་རོ། །ཕན་ཚུན་སྤངས་པ་དང་ལྡན་པ་གཅིག་དགག་པ་ནི་གཞན་སྤངས་པ་མེད་ན་མེད་པའི་ཕྱིར་རོ། །ཁུར་ཁྱེར་བ་ལ་སོགས་པའི་མདོ་སྡེ་ཡང་དོན་འདི་ལ་གསལ་བ་ཡིན་ནོ། །དེ་ལྟ་བས་ན་བཅོམ་ལྡན་འདས་ཀྱིས་དགོངས་ཏེ་གསུངས་པ་མི་ཤེས་པ་རྣམས་ཀྱིས་འདི་ཡོངས་སུ་བརྟགས་པ་ཡིན་ཏེ། དངོས་པོར་ཡོད་པ་ནི་མ་ཡིན་ནོ། །དངོས་པོས་བླངས་པ་ན་ཡང་གཞན་མ་ཡིན་ནོ་ཞེས་བདག་བཀག་པ་ཉིད་ཀྱིས་བསལ་བ་ཡིན་ནོ། །དེ་ལྟ་བས་ན་འདིར་ཁྱད་པར་དུ་བཀག་པ་མ་ཡིན་ནོ། །དེ་ལྟར་ཡང་བཅོམ་ལྡན་འདས་ཀྱིས་དགེ་སློང་དག་ལས་ཡོད་ན་འབྲས་བུ་ཡོད་ཀྱི་བྱེད་པ་པོ་ནི་མ་དམིགས་སོ། །ཕུང་པོ་འདི་བོར་ནས་ཕུང་པོ་གཞན་ཉེ་བར་ལེན་པ་ཆོས་ཀྱི་བརྡར་བྱས་པ་ལས་གཞན་ནི་མེད་དོ། །འདིར་ཡང་འདི་ཆོས་ཀྱི་བརྡ་ཡིན་ཏེ། འདི་ལྟ་སྟེ་འདི་ཡོད་པས་ན་འདི་འབྱུང་བར་འགྱུར་ཞིང༌། འདི་སྐྱེས་པས་ན་འདི་སྐྱེ་བར་འགྱུར་རོ་ཞེས་གསུངས་པ་ཡིན་ནོ། །དེ་ལྟར་ན་བཅོམ་ལྡན་འདས་ཉིད་ཀྱིས་རྐྱེན་འདི་བཙམ་གྱི་མཚན་ཉིད་རྒྱུ་དང་འབྲས་བུའི་དངོས་པོ་ཡང་བསྟན་པ་ཉིད་ཡིན་ནོ། །འདི་
ཡང་རྒྱུན་ཅིག་ཅེས་པས་ཐ་སྙད་ཇི་ལྟ་བ་བཞིན་དུ་མ་བརྟགས་པའི་ངོ་བོར་བསྟན་པ་ཉིད་དེ། རྒྱུད་ཀྱི་ཚིག་གིས་ནི་རྐྱེན་འདི་བཙམ་ཁས་བླངས་པའི་ཕྱིར་རོ། །གཞན་དུ་རྒྱུད་ཉིད་མེད་པར་འགྱུར་རོ། །དེས་ན་དངོས་པོ་ལ་གྲུབ་པའི་རྒྱུ་དང་འབྲས་བུའི་དངོས་པོ་ལ་ཡོད་པའི་སྐྱོན་གྱིས་གོས་པ་མ་ཡིན་ནོ། །འདི་ཉིད་སློབ་དཔོན་གྱི་ཞལ་སྔ་ནས་ཀྱང་གསུངས་པ་ཡིན་ཏེ། ཐམས་ཅད་ནུས་པ་མེད་ཅེ་ན། །ས་བོན་སོགས་ནི་མྱུག་སོགས་ལ། །ནུས་མཐོང་གལ་ཏེ་དེ་ཀུན་རྫོབ། །འདོད་ན་ཇི་ལྟར་དེ་ལྟར་འགྱུར། །ཞེས་གསུངས་སོ། །རྒྱུ་དང་འབྲས་བུའི་དངོས་པོ་སོ་སོར་ངེས་པ་ཉིད་ཀྱིས་དྲན་པ་མེད་པ་ཡང་སྤངས་པ་ཡིན་ནོ། །གཅིག་རྗེས་སུ་འགྲོ་བའི་བདག་ནི་ཡོད་པ་མ་ཡིན་པའི་ཕྱིར་དྲན་པ་པོ་འགའ་ཞིག་ཀྱང་འདིར་ཡོད་པ་མ་ཡིན་ཏེ། འོན་ཀྱང་སྒྲོ་བཏགས་པའི་དབང་གིས་དྲན་པ་འབའ་ཞིག་ཙམ་ཡིན་ནོ། །དངོས་པོའི་ཡུལ་དྲན་པར་བྱ་བ་ཡང་འདིར་དྲན་པ་བོ་མེད་ན་ཡང་ཉམས་པར་འགྱུར་བ་མ་ཡིན་ནོ། །ཉམས་སུ་མྱོང་བའི་དངོས་པོ་ལ་རྣམ་པར་ཤེས་པའི་རྒྱུད་ལ་དྲན་པའི་ས་བོན་གཞག་པ་ལས་དུས་ཕྱིས་ཏེ་ཡོངས་སུ་སྨིན་པའི་རྒྱུ་ལས་དྲན་ཞེས་བྱ་བའི་འབྲས་བུ་སྐྱེ་བར་འགྱུར་རོ། །དེ་བཞིན་དུ་ངོ་ཤེས་པ་ལ་སོགས་པ་ཡང་བལྟ་བར་བྱའོ། །དེ་ལྟར་ན་ཤིན་ཏུ་མངས་པས་འཇིགས་པས་སོ་སོར་འདིར་བརྗོད་པ་མ་ཡིན་ནོ། །དེ་བསྒྲུབས་པ་ནི་གཞན་དུ་རྒྱས་པར་བཤད་པས་དེར་གོ་བར་བྱའོ། །འདི་ཐམས་ཅད་ནི་ཀུན་རྫོབ་ཀྱི་བདེན་པ་ལས་བརྩམས་ཏེ་བསྒྲུབ་པ་ཡིན་ནོ། །དོན་དམ་པར་ཆོས་ཐམས་ཅད་རང་བཞིན་མེད་པ་ཡིན་པའི་ཕྱིར་དང། རྣམ་པར་རྟོག་པ་ཐམས་ཅད་རྒྱུན་ཆད་པའི་ཕྱིར་ཅུང་ཟད་ཀྱང་སྐྱེ་བ་དང༌། འགག་པ་དང༌། རྒྱུ་དང་འབྲས་བུ་བདག་དང་བཅས་པ་དང༌། བདག་མེད་པ་ཡོད་པ་མ་ཡིན་ནོ། །རྣམ་པར་དཔྱད་པ་ན་ལས་དང་འབྲས་བུ་ཡོད་པ་མ་ཡིན་ལ། འཇིག་རྟེན་འདི་དང་འཇིག་རྟེན་ཕ་རོལ་དུ་ཅུང་ཟད་ཀྱང་ཡོད་པ་མ་ཡིན་ཏེ་རྟོག་པས་སྤྲུལ་པའི་ཕྱིར་རོ། །དེ་ལྟ་བས་ན་འདི་ཐམས་ཅད་གཟུགས་བརྙན་དང་མཚུངས་པ་ཡིན་ཏེ། རང་བཞིན་མེད་པ་སྐྱེ་ཞིང་འགག་པ་དང༌། རྒྱུ་དང་འབྲས་བུ་དང༌། བདག་དང་བཅས་པ་དང༌། བདག་མེད་པ་དང༌། རྟག་པ་དང་མི་རྟག་པར་བརྗོད་དོ། །རྨི་ལམ་བཞིན་དུ་ལས་དང༌།
བྱེད་པ་པོ་དང༌། དེའི་འབྲས་བུ་ལོངས་སྤྱོད་པ་པོ་དང༌། འཇིག་རྟེན་འདི་དང༌། འཇིག་རྟེན་ཕ་རོལ་དང༌། བདེ་འགྲོ་དང༌། ངན་འགྲོར་འགྲོ་བ་ཡང་ཡིན་ཏེ། རྟོག་པ་རྣམས་མ་སྤངས་པ་ཡིན་པའི་ཕྱིར་རོ། །དེ་ལྟར་ན་ཐམས་ཅད་ལེགས་པར་གནས་པ་ཡིན་ཏེ། གང་འཆད་པར་འགྱུར་བ། དེ་ལྟར་འགག་པ་ཡོད་མིན་ཞིང༌། །དངོས་པོ་ཡང་ཡོད་མིན་དེའི་ཕྱིར། །འགྲོ་བ་འདི་དག་ཐམས་ཅད་ནི། །རྟག་ཏུ་མ་སྐྱེས་མ་འགགས་ཉིད། །འགྲོ་བ་རྨི་ལམ་ལྟ་བུ་སྟེ། །ཆུ་ཤིང་བཞིན་དུ་སྙིང་པོ་མེད། །ཅེས་བྱ་བ་ལ་སོགས་པ་གསུངས་པ་ཡང་ཡིན་ཏེ། བྱེད་པ་རང་དབང་ལས་ཀྱང་ནི། །ཐ་སྙད་དུ་ནི་ཁྱེད་ཀྱིས་གསུངས། །ཕན་ཚུན་ལྟོས་ནས་གྲུབ་པ་ནི། །གཉིས་པོ་དེ་དག་བཞེད་པ་ཡིན། །བྱེད་པོ་མེད་ཅིང་ཟ་བ་མེད། །བསོད་ནམས་ཡོད་མིན་རྐྱེན་འབྱུང་བ། །བརྟེན་ནས་འབྱུང་བ་མ་སྐྱེས་ཤེས། །ཚིག་གི་དབང་པོ་ཁྱེད་ཀྱིས་གསུངས། །ཞེས་སོ། །ཇི་ལྟར་ན་ཆོས་ཐམས་ཅད་བདག་མེད་པ་ལ་ལས་དང་འབྲས་བུ་འབྲེལ་པ་མི་འགལ་བ་ཡང་ཡིན་ལ། རང་བཞིན་མེད་པ་ཡང་ཡིན་ཏེ། ཇི་ལྟར་མཐོང་བའི་ཆོས་མི་འགལ་བ་ཡང་ཡིན་ཏེ། དེ་ལྟར་ཡང་ཡབ་དང་སྲས་མཇལ་བ་ལས་གསུངས་པ་ཡིན་ཏེ། ཅི་སྐད་དུ། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་དེ་བཞིན་དུ་བྱིས་བ་སོ་སོའི་སྐྱེ་བོ་ཐོས་པ་དང་མི་ལྡན་པ་ཡང་མིག་གིས་གཟུགས་མཐོང་ན་བཏང་སྙོམས་སུ་འགྱུར་བ་རྣམས་ལ་ཡང་མངོན་པར་ཞེན་པར་འགྱུར་ཏེ། མངོན་པར་ཞེན་ནས་ཤིན་ཏུ་རྨོངས་པར་འགྱུར་རོ། །ཤིན་ཏུ་རྨོངས་ནས་ཀུན་ནས་ཉོན་མོངས་པར་འགྱུར་རོ། །ཀུན་ནས་ཉོན་མོངས་ནས་གཏི་མུག་ལས་བྱུང་བའི་ལས་ལུས་ཀྱིས་ནི་རྣམ་པ་གསུམ། ངག་གིས་རྣམ་པ་བཞི། ཡིད་ཀྱིས་རྣམ་པ་གསུམ་མངོན་པར་འདུ་བྱེད་དེ། ལས་མངོན་པར་འདུ་བྱས་ན་དེ་ཡང་ཐོག་མ་ཉིད་ནས་ཟད་ཅིང་འགགས་ལ་བྲལ་ཞིང་རྣམ་པར་འགྱུར་བ་སྟེ། ཤར་ཕྱོགས་སུ་བརྟེན་ཏེ་གནས་པ་མ་ཡིན་ཏེ། ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། འོག་དང༌། སྟེང་དང༌། ཕྱོགས་མཚམས་རྣམས་སུ་བརྟེན་ཏེ་གནས་པ་ཡང་མ་ཡིན་ནོ། །འདི་ན་མ་ཡིན། ཕ་གི་ན་མ་ཡིན། བར་དོན་མ་ཡིན་ཏེ། དུས་གཞན་ན་འཆི་བའི་དུས་དང༌། ཚོད་ཉེ་བར་གནས་པའི་ཚེ་སྤོག་གི་དབང་པོ་འགགས་ཉེ། ཚེ་ཡོངས་
སུ་ཟད་ཅིང་དེ་དང་སྐལ་པ་འདྲ་བའི་ལས་རྣམས་ཀྱང་ཟད་ནས། རྣམ་པར་ཤེས་པ་ཐ་མ་འགགས་པའི་ཚེ། འདི་ལྟ་སྟེ་དཔེར་ན་ཉལ་ཉལ་བ་ལས་སད་པས་ཡུལ་གྱི་བཟང་མོ་ཡིད་ཀྱིས་དམིགས་པར་འགྱུར་རོ། །རྒྱལ་པོ་ཆེན་པོ་དེ་ལ་རྣམ་པར་ཤེས་པ་ཐ་མའི་དབང་དང༌། ལས་དམིགས་པ་དེ་དང་རྐྱེན་གཉིས་ཀྱིས་སྐྱེ་བའི་ཆར་གཏོགས་པའི་རྣམ་པར་ཤེས་པ་དང་པོ་དེ་འབྱུང་བ་སྟེ། དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷ་མ་ཡིན་གྱི་ཚོགས་སམ། མི་རྣམས་སམ། ལྷ་རྣམས་སུ་དང་པོའི་རྣམ་པར་ཤེས་པ་སྐྱེ་བར་འགྱུར་ཏེ། རྣམ་པར་ཤེས་པ་དང་པོ་སྐྱེ་བའི་ཆར་གཏོགས་པ་དེ་འགགས་མ་ཐག་ཏུ་བར་མ་ཆད་པར་གང་ལ་རྣམ་པར་སྨིན་པ་མྱོང་བར་འགྱུར་བ་མངོན་པའི་སེམས་ཀྱི་རྒྱུད་སྐལ་པ་དང་འདྲ་བར་འབྱུང་ངོ༌། །དེ་ལ་གང་རྣམ་པར་ཤེས་པ་ཐ་མ་འགགས་པ་དེ་ནི་འཆི་འཕོ་ཞེས་བྱ་བའི་གྲངས་སུ་འགྱུར། གང་རྣམ་པར་ཤེས་པ་དང་པོ་འབྱུང་བ་དེ་ནི་སྐྱེ་བ་ཞེས་བྱ་སྟེ། རྒྱལ་པོ་ཆེན་པོ་དེ་ལྟར་ན་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་འཕོ་བ་ཡང་མེད་ལ། འཆི་འཕོ་བ་དང༌། སྐྱེ་བར་མངོན་པ་ཡང་ཡོད་དོ། །རྒྱལ་པོ་ཆེན་པོ་རྣམ་པར་ཤེས་པ་ཐ་མ་དེ་སྐྱེ་བའི་ཚེ་གང་ནས་ཀྱང་མོ་འོང༌། འགག་པའི་ཚེ་གང་དུ་ཡང་མི་འགྲོའོ། །ལས་དེ་ཡང་སྐྱེ་བའི་ཚེ་ཡང་གང་ནས་ཀྱང་མི་འོང༌། འགག་པའི་ཚེ་ཡང་གང་དུ་ཡང་མི་འགྲོའོ། །རྣམ་པར་ཤེས་པ་དང་པོ་དེ་ཡང་སྐྱེ་བའི་ཚེ་གང་ནས་ཀྱང་མི་འོང༌། འགག་པའི་ཚེ་ཡང་གང་དུ་ཡང་མི་འགྲོའོ། །དེ་ཅིའི་ཕྱིར་ཞེ་ན། ངོ་བོ་ཉིད་མེད་པའི་ཕྱིར་ཏེ། རྣམ་པར་ཤེས་པའི་ཐ་མ་ནི་རྣམ་པར་ཤེས་པ་ཐམས་སྟོང༌། ལས་ནི་ལས་ཀྱིས་སྟོང༌། རྣམ་པར་ཤེས་པ་དང་པོ་ནི་རྣམ་པར་ཤེས་པ་དང་པོས་སྟོང༌། འཆི་འཕོ་ནི་འཆི་འཕོས་སྟོང༌། སྐྱེ་བ་ནི་སྐྱེ་བས་སྟོང་ལ། ལས་རྣམས་འབྲས་བུ་མེད་པར་མི་འགྱུར་བར་ཡང་མངོན་ཞིང་རྣམ་པར་སྨིན་པ་མྱོང་བར་མངོན་པ་ཡང་ཡོད་དེ། དེ་ལ་མིང་གི་བརྡ་ཙམ་གཏོགས་པར་བྱེད་པ་པོའམ། ཟབ་པོ་གང་ཡང་མེད་དོ་ཞེས་རྒྱས་པར་གསུངས་སོ། །དེ་བཞིན་དུ་ཞེ་སྡང་དང་གཏི་མུག་གི་ལས་རྣམས་ཀྱིས་འདུས་བྱས་པ་ཇི་ལྟར་རིག་པར་བརྗོད་པར་བྱའོ། །སཱ་ལུ་ལྗང་པའི་མདོ་ལས་ཀྱང་
གཞན་ཡང་དེ་ཁོ་ན་མི་རྟོགས་ཤིང་ལོག་པར་ཤེས་ཏེ་མི་ཤེས་པ་ནི་མ་རིག་པའོ། །དེ་ལྟར་མ་རིག་པ་ཡོད་ན་འདུ་བྱེད་རྣམ་གསུམ་མངོན་པ་ལ་འགྲུབ་སྟེ། བསོད་ནམས་སུ་ཉེ་བར་འགྲོ་བ་དང༌། བསོད་ནམས་མ་ཡིན་པར་ཉེ་བར་འགྲོ་བ་དང༌། མི་གཡོ་བར་ཉེ་བར་འགྲོ་བའོ། །དེ་ལ་བསོད་ནམས་སུ་ཉེ་བར་འགྲོ་བའི་འདུ་བྱེད་རྣམས་ལས་བསོད་ནམས་སུ་ཉེ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་ཏེ། འདི་དག་ནི་མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱའོ། །བསོད་ནམས་མ་ཡིན་པར་ཉེ་བར་འགྲོ་བའི་འདུ་བྱེད་རྣམས་ལས་བསོད་ནམས་མ་ཡིན་པར་ཉེ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་ཏེ། འདི་ནི་འདུ་བྱེད་ཀྱི་རྐྱེན་གྱིས་རྣམ་པར་ཤེས་པ་ཞེས་བྱའོ། །མི་གཡོ་བར་ཉེ་བར་འགྲོ་བའི་འདུ་བྱེད་རྣམས་ལས་མི་གཡོ་བར་འགྲོ་བའི་རྣམ་པར་ཤེས་པ་ཉིད་དུ་འགྱུར་ཏེ། འདི་ཉིད་རྣམ་པར་ཤེས་པའི་རྐྱེན་གྱིས་མིང་དང་གཟུགས་ཞེས་བྱའོ། །མིང་དང་གཟུགས་རྣམ་པར་འཕེལ་བས་སྐྱེ་མཆེད་དྲུག་གི་སྒོ་ནས་བྱ་བ་བྱེད་པ་རྣམས་འབྱུང་སྟེ། དེ་ནི་མིང་དང་གཟུགས་ཀྱི་རྐྱེན་གྱིས་སྐྱེ་མཆེད་དྲུག་ཅེས་བྱའོ། །སྐྱེ་མཆེད་དྲུག་པོ་དག་ལས་རེག་པའི་ཚོགས་དྲུག་འབྱུང་སྟེ། དེ་ནི་སྐྱེ་མཆེད་དྲུག་གི་རྐྱེན་གྱིས་རེག་པ་ཞེས་བྱའོ། །ཇི་ལྟ་བུར་རེག་པ་འབྱུང་བ་དེ་ལྟ་བུར་ཚོར་བ་འབྱུང་སྟེ། དེ་ནི་རེག་པའི་རྐྱེན་གྱིས་ཚོར་བ་ཞེས་བྱའོ། །ཚོར་བའི་བྱེ་བྲག་དེ་དག་མྱོང་བ་དང༌། མངོན་པར་དགའ་བ་དང༌། ལྷག་པར་ཞེན་པ་དང༌། ལྷག་པར་ཞེན་ནས་འདུག་པ་དེ་ནི་ཚོར་བའི་རྐྱེན་གྱིས་སྲེད་པ་ཞེས་བྱའོ། །མྱོང་བ་དང༌། མངོན་པར་དགའ་བ་དང༌། ལྷག་པར་ཞིན་ནས་འདུག་པ་ལས་བདག་སྡུག་པའི་ངོ་བོ་དང༌། བདེ་བའི་ངོ་བོ་དང་འབྲལ་བར་མ་གྱུར་ཅིག་སྙམ་དུ་ཡོངས་སུ་མི་གཏོང་བར་ཕྱིར་ཞིང་སྨོན་པ་འདི་ནི་སྲེད་པའི་རྐྱེན་གྱིས་ལེན་པ་ཞེས་བྱའོ། །དེ་ལྟར་སྨོན་ཅིང་ཡང་སྲིད་པ་སྐྱེ་བའི་ལས་ལུས་དང་ངག་དང་ཡིད་ཀྱིས་ཀུན་ནས་སློང་བ་དེ་ནི་ལེན་པའི་རྐྱེན་གྱིས་སྲིད་པ་ཞེས་བྱའོ། །ལས་དེ་ལས་སྐྱེས་པའི་ཕུང་པོ་ལྔ་གང་ཡིན་པ་དེ་ནི་སྲིད་པའི་རྐྱེན་གྱིས་སྐྱེ་བ་ཞེས་བྱའོ། །སྐྱེ་མ་ནས་མངོན་དུ་གྲུབ་པའི་ཕུང་པོ་རྣམས་ཀྱི་འཕེལ་བ་ཡོངས་སུ་སྨིན་པ་དང༌། འཇིག་པར་འགྱུར་བ་དེ་ནི་སྐྱེ་བའི་རྐྱེན་གྱིས་རྒ་ཤི་ཞེས་བྱའོ། །གཞན་ལའང་
འདྲེའོ། །དེ་ལ་རྣམ་པར་ཤེས་པ་ནི་ས་བོན་གྱི་རང་བཞིན་གྱིས་རྒྱུ་བྱེད་དོ། །ལས་ནི་ཞིང་གི་རང་བཞིན་གྱིས་རྒྱུ་བྱེད་དོ། །མ་རིག་པ་དང་སྲེད་པ་ནི་ཉོན་མོངས་པའི་རང་བཞིན་གྱིས་རྒྱུ་བྱེད་དོ། །དེ་ལ་ལས་དང་ཉོན་མོངས་པ་དག་ནི་ས་བོན་རྣམ་པར་ཤེས་པ་བསྐྱེད་དོ། །དེ་ལ་ལས་ནི་ས་བོན་རྣམ་པར་ཤེས་པའི་ཞིང་གི་བྱ་བ་བྱེད་དོ། །སྲེད་པ་ནི་ས་བོན་རྣམ་པར་ཤེས་པ་བརླན་པར་བྱེད་དོ། །མ་རིག་པ་ནི་ས་བོན་རྣམ་པར་ཤེས་པ་འདེབས་ཏེ། རྐྱེན་འདི་དག་མེད་ན་ས་བོན་རྣམ་པར་ཤེས་པ་མངོན་པར་འགྲུབ་པར་མི་འགྱུར་རོ། །དེ་ལ་ལས་ཀྱང་འདི་སྙམ་དུ་བདག་གིས་ས་བོན་རྣམ་པར་ཤེས་པའི་ཞིང་གི་བྱ་བ་བྱའོ་སྙམ་དུ་མི་སེམས་སོ། །སྲེད་པ་ཡང་འདི་སྙམ་དུ་བདག་གིས་ས་བོན་རྣམ་པར་ཤེས་པ་བརླན་པར་བྱའོ་སྙམ་དུ་མི་སེམས་སོ། །མ་རིག་པ་ཡང་འདི་སྙམ་དུ་བདག་གིས་ས་བོན་རྣམ་པར་ཤེས་པ་གདབ་བོ་སྙམ་དུ་མི་སེམས་སོ། །ས་བོན་རྣམ་པར་ཤེས་པ་ཡང་འདི་སྙམ་དུ་བདག་ནི་རྐྱེན་འདི་དག་གིས་བསྐྱེད་དོ་སྙམ་དུ་མི་སེམས་ཏེ། འོན་ཀྱང་ས་བོན་རྣམ་པར་ཤེས་པ་ལས་ཀྱི་ཞིང་ལ་བརྟེན་པ་སྲེད་པའི་རླན་གྱིས་བརླན་པ་མ་རིག་པའི་ལུད་ཀྱིས་བྲན་པ་སྐྱེ་བ་ན་སྐྱེ་བའི་གནས་ཉིང་མཚམས་སྦྱོར་བ་མའི་མངལ་དེ་དང་དེར་མིང་དང་གཟུགས་ཀྱི་མྱུ་གུ་མངོན་པར་འགྲུབ་སྟེ། མིང་དང་གཟུགས་ཀྱི་མྱུ་གུ་དེ་ཡང་བདག་གིས་མ་བྱས། གཞན་གྱིས་མ་བྱས། གཉི་གས་མ་བྱས། དབང་ཕྱུག་གིས་མ་བྱས། དུས་ཀྱིས་མ་བསྒྱུར། རང་བཞིན་ལས་མ་བྱུང༌། བྱེད་པ་ལ་རག་ལས་པ་མ་ཡིན། རྒྱུ་མེད་པ་ལས་ཀྱང་མ་སྐྱེས་ཏེ། འོན་ཀྱང་ཕ་དང་མ་ཕྲད་པ་དང༌། དུས་དང་ལྡན་པ་དང༌། རྐྱེན་གཞན་ཡང་ཚོགས་ན་བདག་པོ་མེད་པའི་ཆོས་བདག་གི་མེད་པ་འཛིན་པ་མེད་པ་ནམ་མཁའ་དང་མཚུངས་པ། སྒྱུ་མའི་མཚན་ཉིད་ཀྱི་རང་བཞིན་དག་ལ་རྒྱུ་དང་རྐྱེན་མ་ཚང་བ་མེད་པའི་ཕྱིར་སྐྱེ་བའི་གནས་ཉིད་མཚམས་སྦྱོར་བ་མའི་མངལ་དེ་དང་དེར་མྱོང་བ་དང་ལྡན་པའི་ས་བོན་རྣམ་པར་ཤེས་པ་མིང་དང་གཟུགས་ཀྱི་མྱུ་གུ་མངོན་པར་བསྒྲུབ་བོ། །གཞན་ལ་ཡང་བསྒྲེའོ། །དེ་ལ་ཆོས་གང་ཡང་འཇིག་རྟེན་འདི་ནས་འཇིག་རྟེན་ཕ་རོལ་དུ་མི་འཕོ་མོད་ཀྱི། རྒྱུ་དང་རྐྱེན་མ་ཚང་བ་མེད་པའི་ཕྱིར་ལས་ཀྱི་འབྲས་བུ་མངོན་པ་ཡང་ཡོད་དོ། །གཞན་
ལ་ཡང་བསྒྲེའོ། །འདི་ལྟ་སྟེ་དཔེར་ན་མེ་ནི་རྒྱུ་དང་རྐྱེན་མ་ཚང་ན་མི་འབར་གྱི་རྒྱུ་དང་རྐྱེན་ཚོགས་པ་ལས་འབར་རོ། །དེ་བཞིན་དུ་བདག་པོ་མེད་པའི་ཆོས་བདག་གི་མེད་པ་འཛིན་པ་མེད་པ་ནམ་མཁའ་དང་མཚུངས་པ་སྒྱུ་མའི་མཚན་ཉིད་ཀྱི་རང་བཞིན་དག་པ་རྒྱུ་དང་རྐྱེན་དུ་མས་མ་ཚང་བ་མེད་པའི་ཕྱིར་སྐྱེ་བའི་གནས་ཉིང་མཚམས་སྦྱོར་བ་མའི་མངལ་དེ་དང་དེར་ས་བོན་རྣམ་པར་ཤེས་པ་ལས་དང་ཉོན་མོངས་པ་རྣམས་ཀྱིས་བསྐྱེད་པའི་མིང་དང་གཟུགས་ཀྱི་མྱུ་གུ་མངོན་པར་བསྒྲུབས་ཏེ། དེ་ལྟར་ནང་གི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །དེ་ལ་ནང་གི་རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟ་སྟེ། ལྔ་གང་ཞེ་ན། རྟག་པར་མ་ཡིན་པ་དང༌། ཆད་པར་མ་ཡིན་པ་དང༌། འཕོ་བར་མ་ཡིན་པ་དང༌། རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་བ་དང་དེ་དང་འདྲ་བའི་རྒྱུད་དུའོ། །ཇི་ལྟར་རྟག་པར་མ་ཡིན་ཞེ་ན། གང་གི་ཐ་མ་འཆི་བའི་ཕུང་པོ་རྣམས་ཀྱང་གཞན་ལ་སྐྱེ་བའི་ཆར་གཏོགས་པ་རྣམས་ཀྱང་གཞན་ཏེ། ཐ་མ་འཆི་བའི་ཕུང་པོ་གང་ཡིན་པ་དེ་ཉིད་སྐྱེ་བའི་ཆར་གཏོགས་པ་རྣམས་ཡིན་གྱི། ཐ་མ་འཆི་བའི་ཕུང་པོ་རྣམས་ཀྱང་འགག་པ་སྐྱེ་བའི་ཆར་གཏོགས་པའི་ཕུང་པོ་རྣམས་ཀྱང་འབྱུང་བས་དེའི་ཕྱིར་རྟག་པ་མ་ཡིན་ནོ། །ཇི་ལྟར་ཆད་པར་མ་ཡིན་ཞེ་ན། ཐ་མའི་འཆི་བའི་ཕུང་པོ་རྣམས་སྔོན་འགགས་པ་ལས་སྐྱེ་བའི་ཆར་གཏོགས་པའི་ཕུང་པོ་རྣམས་འབྱུང་བ་མ་ཡིན། མ་འགགས་པ་ལས་ཀྱང་མ་ཡིན་གྱི་ཐ་མའི་འཆི་བའི་ཕུང་པོ་རྣམས་ཀྱང་འགགས་ལ་དེ་ཉིད་ཀྱི་ཚེ་སྐྱེ་བའི་ཆར་གཏོགས་པའི་ཕུང་པོ་རྣམས་སྲང་མདའི་མཐོན་དམན་བཞིན་དུ་འབྱུང་བར་འགྱུར་ཏེ། དེའི་ཕྱིར་ཆད་པར་མ་ཡིན་ནོ། །ཇི་ལྟར་འཕོ་བར་མ་ཡིན་ཞེ་ན། སེམས་ཅན་གྱི་རིགས་མི་འདྲ་བས་ན་དེ་སྐལ་པ་མཉམ་པའི་སྐྱེ་བ་སྐྱེ་བར་གྲུབ་པས་དེའི་ཕྱིར་འཕོ་བ་མ་ཡིན་ནོ། །ཇི་ལྟར་རྒྱུ་ཆུང་ངུ་ལས་འབྲས་བུ་ཆེན་པོ་འབྱུང་ཞེ་ན། ལས་ཆུང་ངུ་བྱས་པ་ལས་འབྲས་བུ་ཆེན་པོ་རྣམ་པར་སྨིན་པ་མྱོང་སྟེ། དེའི་ཕྱིར་རྒྱུ་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་བོ། །ཇི་ལྟར་དེ་དང་འདྲ་བའི་རྒྱུད་ཡིན་ཞེ་ན། ཇི་ལྟར་མྱོང་བར་འགྱུར་བའི་ལས་བྱས་པ་དེ་ལྟ་བུར་མྱོང་བར་འགྱུར་བའི་རྣམ་པར་སྨིན་པ་མྱོང་བས་དེའི་ཕྱིར་དེ་དང་འདྲ་བའི་
རྒྱུད་དོ། །དེ་ལྟར་ན་ནང་གི་རྟེན་ཅིང་འབྲེལ་པར་འབྱུང་བའི་རྣམ་པ་ལྔ་ཡིན་ནོ་ཞེས་རྒྱ་ཆེར་གསུངས་པ་ཡིན་ནོ། །དེ་ལྟ་བས་ན་བདག་ལ་སོགས་པ་མེད་ཀྱང་ལས་དང་འབྲས་བུའི་འབྲེལ་པ་མ་ཉམས་པར་མདོ་ལས་བཅོམ་ལྡན་འདས་ཉིད་ཀྱིས་གསུངས་པ་ཡིན་ནོ་ཞེས་བསྟན་པར་འགྱུར་རོ། །དེ་ལྟར་ན་གཅིག་པུ་ཞིག་གཉི་གང་འགྲོ་བ་ཡོད་པ་མ་ཡིན་པ་ཡང་ཅུང་ཟད་ཀྱང་འགལ་བ་མེད་དོ། །གལ་ཏེ་ཇི་ལྟར་ཡང་བདག་མེད་ན་འོ་ན། བདག་ཉིད་བདག་གི་མགོན་ཡིན་གྱི། །གཞན་ནི་སུ་ཞིག་མགོན་དུ་འགྱུར། །བདག་ཉིད་ལེགས་པར་དུལ་བ་ཡིས།། མཁས་པས་མཐོ་རིས་ཐོབ་པར་འགྱུར། །ཞེས་ཚིགས་སུ་བཅད་པ་ཇི་ལྟར་གསུངས་ཤེ་ན། སེམས་ཉིད་བདག་ཏུ་འཛིན་པའི་རྟེན་ཡིན་པའི་ཕྱིར་འདི་ལ་བདག་གི་སྦྲར་གསུངས་པ་ཡིན་ནོ། །མདོ་སྡེ་གཞན་དུ། སེམས་འདུལ་བ་ནི་ལེགས་པ་སྟེ། །སེམས་འདུལ་བས་ནི་བདེ་བ་འཐོག ། ཅེས་སེམས་འདུལ་བ་གསུངས་པའི་ཕྱིར་རོ། །དེ་ཡང་བདག་ཏུ་ལྟ་བའི་མངོན་པར་ཞེན་པར་གྱུར་པ་ལ་གཞན་དུ་བདག་འཛིན་པ་རྣམ་པར་རྟོག་པ་སྤོང་བའི་དོན་དུ་དང་བའི་དོན་གྱིས་ཀུན་རྫོབ་ཏུ་སེམས་ལ་བདག་ཅེས་བསྟན་པ་ཡིན་ཏེ། དོན་དམ་པར་མ་ཡིན་ནོ། །འདིས་ནི་འཕགས་པ་ལང་ཀར་གཤེགས་པར་གསུངས་པ། གང་ཟག་རྒྱུད་དང་ཕུང་པོ་དང༌། །རྐྱེན་དང་རྒྱུ་དང་དེ་བཞིན་དུ། །གཙོ་བོ་དབང་ཕྱུག་བྱེད་པ་པོ། །སེམས་ཙམ་ཉིད་དུ་ང་སྨྲའོ། །ཞེས་པས་དེ་ཡང་བསྒྲུབ་པར་འགྱུར་བ་ཡིན་ནོ། །གང་གི་ཕྱིར་དེས་ཀྱང་གཞན་དུ་གང་ཟག་ཏུ་མངོན་པར་ཞེན་པ་དགག་པའི་ཆེད་དུ་གསུངས་པ་ཡིན་ཏེ། སེམས་དོན་དམ་པར་ཡོད་པ་ཁོ་ནར་གསུངས་པ་ནི་མ་ཡིན་ནོ། །དེ་བཞིན་དུ་ཕུང་པོ་ལ་སོགས་པ་རྣམས་ལ་བདག་བསྟན་པ་ཡང་དྲང་བའི་དོན་ཡིན་ནོ། །དེའི་ཕྱིར་དངོས་པོ་ལ་སེམས་ཀྱང་ངའོ་སྙམ་ནས་ཤེས་པའི་ཡུལ་མ་ཡིན་ནོ། །སེམས་དོན་དམ་པར་ཡོད་པ་ཡིན་པ་དེ་ལྟ་ན་ཡང་དངོས་པོ་ལ་དེ་ངར་འཛིན་པའི་སྤྱོད་ཡུལ་མ་ཡིན་ནོ་ཞེས་ཉེ་བར་བསྟན་པའི་ཕྱིར། འདས་དང་ཞེས་པ་ལ་སོགས་པ་གསུངས་སོ། །ཡོངས་སུ་བརྟག་པ་ཉེ་བར་བཟུང་ནས་སེམས་ནི་རྣམ་པ་གསུམ་དུ་སྲིད་དེ། འདས་པ་དང༌། མ་འོངས་པ་དང༌། ད་ལྟར་བྱུང་བའོ། །དེ་ལ་
འདས་པ་དང༌། མ་འོངས་པ་ནི་ཞིག་པ་དང༌། མ་སྐྱེས་པ་ཡིན་ལ། དེའི་སེམས་ནི་བདག་ཡིན་ཏེ། བདག་ཏུ་མཐོང་བའི་ཡུལ་མ་ཡིན་ནོ། །ཅིའི་ཕྱིར་ཞེ་ན། འདི་ནི་གང་གི་ཕྱིར་གྱི་དོན་ཏེ། འདས་པ་དང་མ་འོངས་པའི་སེམས་དེ་ནི་དེ་ལྟར་ཡོད་པ་མ་ཡིན་ཏེ། ཞིག་པ་དང་མ་སྐྱེས་པའི་ཕྱིར་རོ། །གང་འདས་པ་དེ་ནི་ཟད་ཅིང་འགགས་ལ་བྲལ་ཞིང་ཡོངས་སུ་གྱུར་པ་ཡིན་ནོ། །གང་མ་འོངས་པ་དེ་ནི་མ་ཐོབ་པ་ཡིན་ནོ། །དེ་ལྟར་ན་ད་ལྟར་བྱུང་བའི་སེམས་བདག་ཏུ་འགྱུར་ཞེས། འོན་ཏེ་སྐྱེས་ཞེས་པ་ལ་སོགས་པ་གསུངས་ཏེ། ཇི་ལྟར་སྐྱེས་པའི་ད་ལྟར་བྱུང་བའི་སེམས་བདག་ཡིན་པ་དེ་ལྟར་ཡང་འཐད་པ་མ་ཡིན་ཏེ། གང་གི་ཕྱིར་དེ་ནི་ཞིག་ན་རང་བདག་མེད་དེ། ཡང་འདི་ལ་ད་ལྟར་བྱུང་བའི་སེམས་ཞིག་སྟེ། སྐད་ཅིག་མ་གཉིས་པ་ལ་འདས་ན་ཡང་བདག་ཡོད་པ་མ་ཡིན་ལ། ཡང་ཕྱི་ནས་སྔར་འཛིན་པའི་སེམས་ཀྱང་ཞིག་པར་འགྱུར་ཏེ། ད་ལྟར་བྱུང་བ་གནས་པར་དམིགས་པ་མ་ཡིན་ནོ། །དེ་ལྟ་བས་ན་གང་གིས་དམིགས་པར་འགྱུར་བའི་སེམས་ཇི་ལྟར་དམིགས་པར་འགྱུར། དེ་ལྟ་བས་ན་སེམས་དམིགས་པ་ཡང་ཡོད་པ་མ་ཡིན་ལ། དམིགས་པ་མེད་པ་ཉིད་དུ་ངར་འཛིན་པ་སྐྱེ་བར་འགྱུར་རོ། །དེ་བཞིན་དུ་བདག་མེད་དེ་བདག་ཡོད་པ་མ་ཡིན་ལ། དུས་གསུམ་དུ་འབྱུང་བའི་སེམས་ཉིད་དེའི་ཡུལ་ཡིན་པའི་ཕྱིར་རོ། །སེམས་བདག་ཏུ་འཛིན་པའི་ཡུལ་མ་ཡིན་པར་བསྒྲུབས་ནས། མཇུག་བསྡུ་བའི་ཕྱིར། དཔེར་ན་ཆུ་ཤིང་ཞེས་བྱ་བ་ལ་སོགས་པ་གསུངས་ཏེ། དཔེར་ན་ཆུ་ཤིང་གི་སྡོང་པོ་སྟེ། ཆུ་ཤིང་སྡོང་བུའི་དུམ་བུའོ། །ཕྱེ་ཞིང་སོ་སོར་ཆ་ཤས་སུ་ཕྱེ་སྟེ་རྣམ་པར་གཞིག་པ་བྱས་ན་དངོས་པོ་ཅུང་ཟད་ཡོད་པ་ཡང་མི་རྙེད་དེ། དེ་བཞིན་དུ་བདག་ཡོད་པར་འགྱུར་བ་ཡང་མ་ཡིན་ལ། ཆུ་ཤིང་བཞིན་དུ་འགྱུར་རོ། །བདག་ཀྱང་བདག་ཏུ་འཛིན་པའི་ཤེས་པའི་ཡུལ་དུ་གྱུར་པ་ཡོད་པར་གྱུར་པ་མ་ཡིན་ཏེ། ཡོད་པ་མ་ཡིན་པའི་མོ་གཤམ་གྱི་བུ་དང་འདྲའོ། །འདི་ལ་ཁྱད་པར་ཅུང་ཟད་ཡོད་པ་མ་ཡིན་ནོ་ཞེས་དགོངས་པ་ཡིན་ནོ། །ཇི་ལྟར་ཞེ་ན། བཙལ་ཞིང་བརྟགས་ཏེ་ངེས་པར་དཔྱད་པ་ནའོ། །གཞན་ཡང་བདག་ལ་གནོད་པར་བྱེད་པ་དགག་པའི་ཆེད་དུ་ཐལ་བར་འགྱུར་བ་བརྗོད་པ། གལ་ཏེ་སེམས་ཞེས་པ་ལ་སོགས་པ་གསུངས་
ཏེ། གལ་ཏེ་རྣམ་པ་ཐམས་ཅད་དུ་སེམས་ཅན་དང་བདག་དང་གང་ཟག་རྣམ་པར་དཔྱད་པ་ན་ཡོད་མིན་ཏེ། མེད་ན་དེའི་ཚེ་བྱང་ཆུབ་སེམས་དཔའ་རྣམས་ཀྱིས་སྙིང་རྗེ་ཞིང་བརྩེ་བ་བསྒོམ་པར་བྱ་སྟེ། སེམས་ཅན་མེད་པར་གང་ལ་དམིགས་ནས་འཇུག་པར་འགྱུར། སྙིང་རྗེ་ཡང་ཡང་དག་པར་རྫོགས་པའི་བྱང་ཆུབ་སྒྲུབ་པར་བྱེད་པ་ཡིན་ཏེ། དེ་སྔོན་དུ་སོང་བའི་ཚོགས་རྒྱུར་གྱུར་པའི་སྦྱིན་པ་ལ་སོགས་པ་ལ་འཇུག་པའི་ཕྱིར་རོ། །དེ་ལྟ་བས་ན་སྙིང་རྗེ་སྔོན་དུ་སོང་བའི་སངས་རྒྱས་དང་ཆོས་ཐམས་ཅད་རབ་ཏུ་འཇུག་པ་ཡིན་ནོ། །དེ་ལྟར་ཡང་འཕགས་པ་ཆོས་ཡང་དག་པར་སྡུད་པ་ལས་གསུངས་པ་ཡིན་ཏེ། དེས་ན་ཡང་བྱང་ཆུབ་སེམས་དཔའ་ཆེན་པོ་འཕགས་པ་སྤྱན་རས་གཟིགས་དབང་ཕྱུག་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔས་ཆོས་མང་པོ་རྣམས་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔས་ཆོས་ཤིན་ཏུ་མང་པོ་ལ་བསླབ་པར་མི་བགྱིའོ། །བཅོམ་ལྡན་འདས་བྱང་ཆུབ་སེམས་དཔས་ཆོས་གཅིག་རབ་ཏུ་གཟུང་ཞིང་རབ་ཏུ་རྟོགས་པར་བགྱིས་ན་བཅོམ་ལྡན་འདས་སངས་རྒྱས་ཀྱི་ཆོས་ཐམས་ཅད་དེའི་ལག་མཐིལ་དུ་མཆིས་པ་ལགས་སོ། །ཆོས་གཅིག་པོ་གང་ཞེ་ན། འདི་ལྟ་སྟེ་སྙིང་རྗེ་ཆེན་པོའོ། །བཅོམ་ལྡན་འདས་སྙིང་རྗེ་ཆེན་པོས་ནི་སངས་རྒྱས་ཀྱི་ཆོས་ཐམས་ཅད་བྱང་ཆུབ་སེམས་དཔའ་རྣམས་ཀྱི་ལག་མཐིལ་དུ་མཆིས་པ་ལགས་སོ། །བཅོམ་ལྡན་འདས་འདི་ལྟ་སྟེ་དཔེར་ན་འཁོར་ལོས་སྒྱུར་བའི་རྒྱལ་པོའི་འཁོར་ལོ་རིན་པོ་ཆེ་གང་དུ་མཆིས་པ་དེར་དཔུང་གི་ཚོགས་ཐམས་ཅད་མཆིའོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའི་སྙིང་རྗེ་ཆེན་པོ་གང་དུ་མཆིས་པ་དེར་ཡང་སངས་རྒྱས་ཀྱི་ཆོས་ཐམས་ཅད་མཆིའོ། །བཅོམ་ལྡན་འདས་འདི་ལྟ་སྟེ་དཔེར་ན་སྲོག་གི་དབང་པོ་མཆིས་ན་དབང་པོ་གཞན་རྣམས་འབྱུང་བར་འགྱུར་རོ། །བཅོམ་ལྡན་འདས་དེ་བཞིན་དུ་སྙིང་རྗེ་ཆེན་པོ་མཆིས་ན་བྱང་ཆུབ་པར་བྱེད་པའི་ཆོས་གཞན་རྣམས་ཀྱང་འབྱུང་བར་འགྱུར་རོ། །འཕགས་པ་ག་ཡ་མགོ་རི་ལས་ཀྱང༌། འཇམ་དཔལ་བྱང་ཆུབ་སེམས་དཔའ་རྣམས་ཀྱི་སྤྲོད་པ་གང་ལ་བརྩམ་པར་བྱ་ཞིང༌། གང་ལ་
བརྟེན་པར་བྱ། འཇམ་དཔལ་གྱིས་སྨྲས་པ། ལྷའི་བུ། བྱང་ཆུབ་སེམས་དཔའ་རྣམས་ཀྱི་སྤྱོད་པ་ནི་སྙིང་རྗེ་ཆེན་པོ་ལ་བརྩམས་ཏེ། སེམས་ཅན་ལ་བརྟེན་པའོ་ཞེས་རྒྱ་ཆེར་གསུངས་སོ། །དེ་ལྟ་བས་ན་ངེས་པར་དང་པོར་སེམས་ཅན་ལ་དམིགས་པའི་སྙིང་རྗེ་ཁས་བླང་བར་བྱ་སྟེ། སྡུག་བསྔལ་བའི་སེམས་ཅན་ལ་བརྟེན་ནས་དེ་འབྱུང་བར་འགྱུར་བས་སོ། །སེམས་ཅན་མེད་ན་དེར་མི་འགྱུར་རོ་ཞེ་ན་ཞེས་པ་ནི་གལ་ཏེ་དེ་ལྟར་སེམས་ནའོ། །དེའི་ཚེ་འདི་བརྗོད་པར་མི་བྱའོ་ཞེ་ན། འབྲས་བུ་དོན་དུ་ཞེས་པ་ལ་སོགས་པ་གསུངས་ཏེ། དགོས་པ་ནི་མངོན་པར་འདོད་པའི་བསྒྲུབ་བྱ་སྟེ། སྐྱེས་བུའི་དོན་ཞེས་བརྗོད་དོ། །དེའི་དོན་དུ་ཁས་བླངས་པས་སྟེ། དེས་ན་ཁས་བླང་བར་བྱའོ། །རྨོངས་པས་ཀུན་རྫོབ་ཏུ་བཏགས་པ་གང་ཡིན་པ་སྟེ། སྒྲོ་བཏགས་པ་ཡིན་ལ། སེམས་ཅན་དེ་ལའོ་ཞེས་པའི་དོན་ཏོ། །འདི་ལྟར་ཡང་རྣམ་པར་རྟོག་པ་ཐམས་ཅད་དང་བྲལ་ཞིང༌། སྒྲིབ་པ་ཐམས་ཅད་ལས་རྣམ་པར་གྲོལ་བ་སྐྱེས་བུ་མཆོག་གི་དོན་ཡིན་པས་སངས་རྒྱས་ཉིད་འདིར་བསྒྲུབ་པར་བྱའོ། །དེ་ཡང་ཆོས་ཐམས་ཅད་ཀྱི་མི་དམིགས་པ་དང་བྲལ་ནས་ཐོབ་པར་མི་འགྱུར་རོ། །དེ་ཡང་ཤེས་རབ་ཕུལ་དུ་ཕྱིན་པས་འགྲུབ་པར་འགྱུར་རོ། །དེ་ཡང་གུས་ཤིང་བར་མཆོད་པ་ཡུན་རིང་པོར་གོམས་པར་བྱས་པ་ལས་སྐྱེ་བར་འགྱུར་རོ། །དེ་རྩོམ་པ་ཡང་སྙིང་རྗེའི་དབང་གིས་འབྱུང་བར་འགྱུར་ཏེ། དེ་ཡང་དང་པོར་སྡུག་བསྔལ་བའི་སེམས་ཅན་རྣམས་ལ་འཇུག་པ་ན་ཚོགས་ཀྱི་རྒྱུ་རྩོམ་པར་འགྱུར་རོ། །དེ་ལྟར་ན་འབྲས་བུའི་དོན་དུ་རྨོངས་པ་ཀུན་རྫོབ་ཀྱི་བདེན་པའི་ངོ་བོ་ཁས་བླངས་པ་ཡིན་ནོ། །དེའི་ཕྱིར་དང་པོར་སེམས་ཅན་ལ་དམིགས་པ་ཉིད་ཀྱི་སྙིང་རྗེ་ཡིན་ལ། དེ་ནས་གཞན་དོན་ལ་དམིགས་པ་དང༌། དམིགས་པ་མེད་པ་ཡིན་ནོ། །བསམ་པ་ནི་འདི་ཡིན་ཏེ་རྣམ་པ་ཐམས་ཅད་དུ་སེམས་ཅན་ཡོད་པ་མ་ཡིན་ལ། ཕུང་པོ་ལ་སོགས་པ་རྣམས་ལ་ཀུན་རྫོབ་ཏུ་བདག་གི་སྒྲས་བརྗོད་དོ། །ཇི་སྐད་དུ་བཅོམ་ལྡན་འདས་ཀྱིས། དགེ་སྦྱོང་ངམ་བྲམ་ཟེ་གང་ལ་ལ་དག་བདག་ཅེས་ཡང་དག་པར་མཐོང་བས་ཕུང་པོ་ལྔ་པོ་འདི་རྣམས་ཉིད་མཐོང་བ་ཡིན་ནོ་ཞེས་གསུངས་པ་དེའི་ཕྱིར་གལ་ཏེ་ཡང་ཤེས་རབ་ཀྱིས་དཔྱད་ན་དོན་དམ་པར་སེམས་མི་དམིགས་པ་ཡིན་ཏེ། དེ་
ལྟར་ན་ཡང་ཀུན་རྫོབ་ཏུ་འགེགས་པ་མ་ཡིན་ནོ། །ཇི་སྐད་དུ། གང་གིས་ཤེས་རབ་དོན་དམ་དང་ནི་ཀུན་རྫོབ་ཐུགས་རྗེ་བསྟེན་པར་བཞེད། །ཁྱེད་ནི་འགྲོ་བ་རང་བཞིན་མེད་པར་ཇི་ལྟར་དོན་ལ་འཇལ་བར་འགྱུར། །གང་གི་ཚེ་ན་སྟོབས་བཅུ་སྐྱེད་པར་མཛད་མ་ཐུགས་རྗེ་དང་ལྡན་པ། །དེ་ཚེ་ཁྱོད་ནི་བུ་སྡུག་བསྔལ་ལ་ཕ་བཞིན་འགྲོ་ལ་བརྩེ་བར་འགྱུར། །ཞེས་གསུངས་སོ། །བསྟོད་པ་བཞི་པ་ལས་ཀྱང༌། མགོན་ཁྱོད་སེམས་ཅན་འདུ་ཤེས་ལ། །རྣམ་པ་ཀུན་ཏུ་འཇུག་མ་ཡིན། །སེམས་ཅན་སྡུག་བསྔལ་གྱིས་ཉེན་ལ། །ཁྱོད་ནི་ཤིན་ཏུ་ཐུགས་རྗེའི་བདག ། ཅེས་གསུངས་སོ། །དེ་ལྟ་བས་ན་གཟུགས་ལ་སོགས་པ་རྣམས་ལ་འདི་ལྟར་ཀུན་རྫོབ་ཀྱི་བདེན་པའི་སྒྲས་བརྗོད་དེ། དེ་བས་ན་སྙིང་རྗེ་ནི་ཡུལ་མེད་པ་མ་ཡིན་ནོ། །ཅི་སྟེ་དོན་དམ་པར་སེམས་ཅན་མེད་ན་གང་གི་འབྲས་བུ་ཡིན། དེས་ན་དེ་བསྒྲུབ་པའི་དོན་དུ་འགའ་ཞིག་འཇུག་པར་འགྱུར་ཞེས་བསམས་ནས། སེམས་ཅན་མེད་འབྲས་ཞེས་པ་ལ་སོགས་པ་སྨོས་ཏེ། སེམས་ཅན་མེད་ན་ཞེས་པ་ནི་གང་གི་ཚེ་སེམས་ཅན་མེད་ནའོ། །དེའི་ཚེ་གཅིག་རྗེས་སུ་འགྲོ་བ་མེད་པས་གཟུགས་ལ་སོགས་པ་རྣམས་སྐྱེས་ནས་ཞིག་པའི་ཕྱིར་འབྲས་བུ་སུའི་ཡིན། སུའི་ཡང་མ་ཡིན་ནོ་ཞེས་པའི་དོན་ཏོ། །བདེན་ཞེས་ཁས་ལེན་པ་ཡིན་ཏེ། འདི་དེ་ལྟར་ཡིན་ནོ། །འདོད་ཅེས་པ་ནི་འདི་ལྟར་ཁོ་བོ་ཅག་འདོད་པ་ཉིད་དེ། ཅུང་ཟད་ཅིག་ཀྱང་དོན་དམ་པར་འབྲས་བུ་ཡོད་པ་མ་ཡིན་ཏེ། ཆོས་ཐམས་ཅད་བདག་པོ་མེད་པའི་ཕྱིར་རོ། །གལ་ཏེ་དེ་ལྟར་ན་དེ་བསྒྲུབ་པའི་དོན་དུ་དང་པོར་ཅིའི་ཕྱིར་འཇུག་ཅེ་ན། འདིར་ནི་ཞེས་ཏེ་འདི་ལྟ་བུའི་སྤྱོད་པ་ནི་འབྲས་བུ་དེ་དོན་དུ་གཉེར་བས་རྨོངས་པས་བྱ་བ་དང་ལྡན་པ་ཡིན་ནོ། །བདག་གི་འདི་ཁོ་ན་འབྲས་བུར་འགྱུར་རོ་ཞེས་གཅིག་ཏུ་ཞེན་པས་སེམས་ཅན་མེད་ན་ཡང་ཀུན་རྫོབ་ཏུའོ། །རྟེན་ཅིང་འབྲེལ་བར་འབྱུང་བ་ལས་མ་གཏོགས་པ་སྒྱུ་མའི་རང་བཞིན་ཉིད་ཀྱིས་ཆོས་ཐམས་ཅད་ལ་དངོས་པོ་ལ་འདོད་པ་མེད་པའི་ཕྱིར་རོ། །ཇི་སྐད་དུ། འདོད་པ་མེད་པ་སྟོང་པ་ཉིད། །སྒྱུ་མ་བཞིན་དུ་རྐྱེན་ལས་འབྱུང༌། །མགོན་པོ་ཁྱོད་ཀྱིས་ཆོས་རྣམས་ནི། །རང་བཞིན་མེད་པར་རབ་ཏུ་བསྟན། །ཞེས་གསུངས་སོ།།
དེ་ལྟ་བས་ན་ཀུན་རྫོབ་ཉིད་དུ་འབྲས་བུའི་དོན་དུ་བྱ་བ་དང་ལྡན་པ་ཡིན་ནོ། །ཅི་སྟེ་ཡང་གཏི་མུག་མ་རིག་པའི་རང་བཞིན་ཡིན་པས་རྣམ་པ་ཐམས་ཅད་དུ་བླང་བར་བྱ་བ་མ་ཡིན་པ་ཡིན་ཏེ། ཇི་ལྟར་ན་སླར་ཡང་དེ་ཉིད་ཁས་ལེན་པར་བྱེད་ཅེ་ན། སྡུག་བསྔལ་ཞེས་པ་ལ་སོགས་པ་གསུངས་ཏེ། རྨོངས་པ་ནི་རྣམ་པ་གཉིས་ཏེ། འཁོར་བར་འཇུག་པའི་རྒྱུ་དང༌། དེ་ཉེ་བར་ཞི་བའི་རྒྱུའོ། །དེ་ལ་གང་འཁོར་བའི་རྒྱུ་ཡིན་པ་དེ་ནི་སྤང་བར་བྱ་བ་ཉིད་དོ། །གང་གཞན་ནི་སྡུག་བསྔལ་བརྒྱུད་པ་ཉེ་བར་ཞི་བར་བྱ་བའི་དོན་དུ་ཡིན་ཏེ། སེམས་ཅན་ཐམས་ཅད་ཀྱི་སྐྱེ་བ་ལ་སོགས་པ་གདུང་བ་ལྡོག་པའི་རྒྱུ་མཚན་ཡིན་ལ། འབྲས་བུ་རྨོངས་པ་སྟེ། འབྲས་བུ་དོན་དམ་པའི་བདེན་པའི་མཚན་ཉིད་རྟོགས་པའི་ཆེད་དུ་ཡིན་ལ། རྨོངས་པ་དེ་ཡང་བཟློག་པར་མི་བྱ་སྟེ། དགག་པར་མི་བྱ་བ་ཡིན་ལ། བླང་བར་བྱ་བ་ཉིད་ཡིན་ཏེ། དོན་དམ་པ་ལ་མཁོ་བ་ཡིན་པའི་ཕྱིར་རོ། །བསམ་པ་ནི་འདི་ཡིན་ཏེ། དགོས་པ་དེ་ཡང་ཆེན་པོ་རྣམས་ཀྱིས་བདག་ཉིད་བདེ་བ་འདོད་པས་ལེགས་པ་མ་ཡིན་ལ། འོན་ཀྱང་སེམས་ཅན་ཐམས་ཅད་ཀྱི་མཐར་ཐུག་པའི་སྡུག་བསྔལ་ཐམས་ཅད་བཅད་པའི་དོན་དུ་ཡིན་ཏེ། དེ་ཡང་ཐབས་སུ་གྱུར་པ་དོན་དམ་པར་རྟོགས་པ་ཡིན་ནོ། །དེའི་ཡང་ཐབས་སུ་གྱུར་པ་ནི་ཀུན་རྫོབ་ཀྱི་བདེན་པ་ཡིན་ཏེ། ཀུན་རྫོབ་མེད་པར་དོན་དམ་པ་མི་རྟོགས་པའི་ཕྱིར་རོ། །དེ་ལྟར་ན་སྡུག་བསྔལ་ཉེ་བར་ཞི་བའི་དོན་ནི་རྨོངས་པའི་འབྲས་བུ་ཡིན་ནོ། །འབྲས་བུ་འདི་ནི་དགོས་པའི་དོན་དུ་མ་དཔྱད་པར་ཞེས་པའི་སྐབས་སུ་སྔར་བསྟན་པ་ཉིད་ཡིན་ཏེ། སླར་ཡང་འདི་སྤྲོས་ནས་བརྗོད་པ་ཡིན་ནོ། །གལ་ཏེ་དེ་ལྟར་ན་ཡང༌། ཇི་ལྟར་སྡུག་བསྔལ་ཞི་བའི་རྒྱུ་ཡིན་པའི་ཕྱིར་འབྲས་བུ་རྨོངས་པའི་མ་རིག་པའི་རང་བཞིན་ཁས་ལེན་པ་དེ་བཞིན་དུ་བདག་ཏུ་རྨོངས་པ་ཡང་གཞག་པར་བྱ་སྟེ། དེའི་རྒྱུ་ཡིན་པའི་ཕྱིར་ལ། དེ་ཇི་ལྟར་བདག་འགེགས་པར་འབད་པའི་སྒོ་ནས་བྱེད། དེ་ཡོད་ན་བདག་བསྒོམས་པས་ངར་འཛིན་པ་ཟད་པའི་ཕྱིར་འཁོར་བ་བཟློག་པར་འགྱུར་ལ། དེ་ལྟ་བས་ན་བདག་མེད་པ་བསྒོམས་པས་ཅི་ཞིག་བྱ་ཞེ་ན། སྡུག་བསྔལ་རྒྱུ་ཡི་ཞེས་པ་ལ་སོགས་པ་གསུངས་ཏེ། ཇི་ལྟར་འབྲས་བུ་རྨོངས་པ་སྡུག་བསྔལ་ཞི་བའི་རྒྱུ་
དེ་བཞིན་དུ་གཉིས་པ་བདག་ཏུ་རྨོངས་པ་ནི་མ་ཡིན་ནོ། །དེ་ཡོད་པས་ན་ངར་འཛིན་པ་ཟད་པར་མི་འགྱུར་བའི་ཕྱིར་རོ། །སླར་ཡང་བདག་ཏུ་རྨོངས་པར་འགྱུར་ཏེ། བདག་མེད་པ་ལ་ཕྱིན་ཅི་ལོག་ཏུ་མཐོང་བའི་ཕྱིར་རོ། །སླར་ང་རྒྱལ་འཕེལ་བར་འགྱུར་ཏེ། འཕེལ་བ་ཉེ་བར་སྐྱེ་བར་འགྱུར་རོ། །ཇི་ལྟ་བུར་གྱུར་པ་ཞེ་ན། སྡུག་བསྔལ་གྱི་རྒྱུ་སྟེ་སྡུག་བསྔལ་བའི་འཁོར་བའི་སྡུག་བསྔལ་གསུམ་གྱི་འཁོར་བའི་རྒྱུ་སྟེ་བྱེད་པའི་རྒྱུ་ཡིན་ལ། ངར་འཛིན་པ་ཟད་པ་ལས་ཀྱང་སྡུག་བསྔལ་ཞི་བར་འདོད་དོ། །བདག་ཏུ་ལྟ་བ་ཡོད་ན་ཇི་ལྟར་འདི་ལྡོག་པར་འགྱུར་ཏེ། རྒྱུའི་ནུས་པ་མ་ཚང་བ་མེད་པ་ལ་འབྲས་བུ་ལྡོག་པ་མི་རིགས་པའི་ཕྱིར་རོ། །དེས་ན་སྡུག་བསྔལ་ཀྱང་མི་ལྡོག་གོ །འདི་ལྟར་ཡང་བདག་མཐོང་བས་འདུས་བྱས་ཀྱི་ཕུང་པོ་དང་ཁམས་དང་སྐྱེ་མཆེད་རྣམས་ལ་བདག་གོ་ཞེས་ཞེན་པའི་དྲན་པ་སྐྱེ་བར་འགྱུར་རོ། །དེས་ན་སྡུག་བསྔལ་ཕྱིར་བཅོས་པར་འདོད་ཅིང༌། བདེ་བ་འདོད་པའི་ཉེས་རྣམས་བསྒྲིབས་ནས་དེ་དོན་དུ་གཉེར་བས་ཡོན་ཏན་དུ་སྒྲོ་བཏགས་པས་དེ་བསྒྲུབ་པ་རྣམས་ལ་འཇུག་སྟེ། ཁོ་བོ་ལ་ཕན་པ་བྱེད་པའོ་ཞེས་བློ་སྐྱེ་བར་འགྱུར་རོ། །ང་དང་བདག་ཅེས་མཐོང་བའི་ཕྱིར་གགས་བྱེད་པའི་ཞེ་སྡང་དུ་འགྱུར་ལ། དེས་ན་སྡུག་བསྔལ་མཐའ་དག་གི་རྒྱུ་ཉོན་མོངས་པ་དང་ཉེ་བའི་ཉོན་མོངས་པ་ཐམས་ཅད་ཉིད་ཐོབ་ཅིང་རྒྱས་པར་འཇུག་གོ །དེ་ལྟར་ན་བདག་ཏུ་རྨོངས་པ་རབ་ཏུ་འཇུག་པས་སྡུག་བསྔལ་གྱི་རྒྱུ་ངར་འཛིན་པར་འགྱུར་རོ། །དེ་སྐད་དུ། སློབ་དཔོན་གྱི་ཞལ་སྔ་ནས། གང་ཞིག་བཞེས་བདག་མཐོང་བ། །དེ་ལ་རྟག་པ་ཉིད་དུ་ཆགས། །ཆགས་པས་བདེ་ལ་སྦེད་འགྱུར་ཞིང༌། །སྲེད་པས་སྐྱོན་རྣམས་སྦེད་པར་བྱེད། །ཡོན་ཏན་མཐོང་བ་ཡོངས་སུ་སྲེད། །ང་ཡི་ཞེས་དེའི་སྒྲུབ་བྱེད་ལེན། །དེས་ན་ཇི་སྲིད་བདག་སྔོན་ཆགས། །དེ་སྲིད་དེ་ནི་འཁོར་བ་ཡིན། །བདག་ཡོད་ན་ནི་གཞན་དུའང་ཤེས། །བདག་གཞན་ལ་ཆགས་འཛིན་དང་སྡང༌། །འདི་དག་དང་ནི་ཀུན་འབྲེལ་ལས། །ཉེས་པ་ཐམས་ཅད་འབྱུང་བར་འགྱུར། །ཞེས་གསུངས་སོ། །འདི་ལྟར་བདག་ལ་ཆགས་པའི་ངར་འཛིན་པ་བཟློག་པར་ནུས་པ་མ་ཡིན་ནོ། །དེ་ལས་ཀྱང་བཟློག་
མེད་ཅེ་ན་ཞེས་པ་ལས། དེ་ལས་ཀྱང་ཞེས་བྱ་བ་ནི་བདག་མཐོང་བ་ལས་ཀྱང་ངོ༌། །བཟློག་མེད་པ་ནི་བཟློག་པར་མི་ནུས་པའོ། །གལ་ཏེ་བདག་ཏུ་འཛིན་པ་ཡིན་ན། དེའི་ཚེ་བདག་མེད་དུ་བསྒོམས་པས་མཆོག་ཡིན་ནོ། །བདག་མེད་པ་ནི་གང་ཟག་ལ་སོགས་པ་དང་བྲལ་བ་ཡིན་ལ། བསྒོམ་པ་ནི་གོམས་པའོ། །མཆོག་ནི་གཙོ་བོ་ཡིན་ཏེ། བདག་ཏུ་ལྟ་བའི་མི་འཇུག་པ་ན་ངར་འཛིན་པ་ལྡོག་པའི་རྒྱུ་ཡིན་པའི་ཕྱིར་རོ། །འདི་ཡང་རེ་ཞིག་བཞག་ནས་ཕྱི་ནས་སྤོང་བར་འགྱུར་ཏེ། དངོས་པོར་དམིགས་པ་ཡིན་པའི་ཕྱིར་རོ། །འདི་ལྟར་ཡང་བསྒོམ་པ་རབ་ཀྱི་མཐར་ཕྱིན་པ་ལས། མངོན་སུམ་དུ་བདག་མེད་པ་མཐོང་བའི་ཕྱིར་དེ་དང་འགལ་བའི་འཇིག་ཚོགས་ལ་ལྟ་བ་ལྡོག་པར་འགྱུར་རོ། །དེ་ལོག་ན་ཡང་གཅིག་ཏུ་རྗེས་སུ་འགྲོ་བ་མཐོང་བ་མེད་པའི་ཕྱིར་ཕྱི་མ་དང་སྔ་མ་ངོ་བོས་སྟོང་པའི་སྐད་ཅིག་ཙམ་མཐོང་བ་ཡིན་ནོ། །དེ་ལྟ་བས་ན་སྔ་མ་དང་ཕྱི་མར་སྒྲོ་འདོགས་པ་དང་བྲལ་བས་བདག་ལ་མ་འོངས་པའི་བདེ་བསྒྲུབ་པར་བྱེད་པ་གཞན་ཅུང་ཟད་ཀྱང་མཐོང་བ་མ་ཡིན་ནོ། །དེ་ལྟ་བས་ན་དེ་ཡུལ་འགའ་ལ་ཡང་ཆགས་པ་སྐྱེ་བར་མི་འགྱུར་རོ། །དེ་དང་འགལ་བ་ལ་ཞེ་སྡང་བ་ཡང་མ་ཡིན་ཏེ། ཞེན་པ་མེད་པ་ཉིད་ཡིན་པས་སོ། །གནོད་པ་བྱེད་པ་ལ་ལེན་དུ་གནོད་པ་བྱེད་པའི་གནས་སུ་མཐོང་བ་ཡང་མ་ཡིན་ཏེ། གང་གིས་གང་ལ་གནོད་པ་བྱེད་པ་གཉིས་པོ་དེ་དག་ལ་ཡང་སྐད་ཅིག་མ་གཉིས་པ་མེད་པའི་ཕྱིར་རོ། །གཞན་གྱིས་གནོད་པ་བྱེད་པ་ལ་རྟོགས་པ་དང་ལྡན་པས་དགྲ་གཞན་འཇོམས་པར་བྱེད་པ་རིགས་པ་མ་ཡིན་ནོ། །གང་ལ་དེས་བྱས་པ་དེ་ལ་ཡང་ངོ༌། དེ་ལྟར་འདོད་ཆགས་ལ་སོགས་པ་ལོག་པ་དང༌། གཞན་དེ་ལས་བྱུང་བའི་ཉོན་མོངས་པ་དང་ཉེ་བའི་ཉོན་མོངས་པ་སྐྱེ་བར་མི་འགྱུར་རོ། །དངོས་པོ་ལ་ནི་གནོད་པར་བྱ་བ་དང་གནོད་པར་བྱེད་པ་ཡོད་པ་མ་ཡིན་ཏེ། ཡང་ན་འདི་ལ་བརྟེན་ནས་འདི་སྐྱེའོ་ཞེས་རྟེན་ཅིང་འབྲེལ་པར་འབྱུང་བ་ལས་དམིགས་པས་སོ། །འདི་ལྟར་ཡང་གང་ཟག་གིས་སྟོང་པ་དང༌། འཇིག་ཚོགས་ལ་ལྟ་བའི་ལོག་པ་ལ་ཉོན་མོངས་པ་སྤྱོད་པར་མི་འགྱུར་ཏེ། རྩ་བ་བཅད་པའི་ཕྱིར་རོ། །ཇི་སྐད་དུ་འཕགས་པ་དེ་བཞིན་གཤེགས་པ་གསང་བའི་མདོ་ལས། ཞི་བའི་བློ་གྲོས་
འདི་འདི་ལྟ་སྟེ། ཤིང་གི་རྩ་བ་བཅད་པའི་ཡལ་ག་དང་ལོ་མ་དང་འདབ་མ་ཐམས་ཅད་སྐམ་པར་འགྱུར་རོ། །ཞི་བའི་བློ་གྲོས་དེ་བཞིན་དུ་འཇིག་ཚོགས་ལ་ལྟ་བ་ཉེ་བར་ཞི་བས་ཉོན་མོངས་པ་ཐམས་ཅད་ཉེ་བར་ཞི་བར་འགྱུར་རོ་ཞེས་གསུངས་སོ། །དེ་ལྟ་བས་ན་བདག་མེད་པ་བསྒོམ་པ་མཆོག་ཡིན་ནོ། །ཞར་ལ་བྱུང་བ་རྫོགས་སོ།། །།དེ་ནི་ཡང་བདག་ཏུ་འཛིན་པའི་ཡུལ་སྤྱོད་པ་ལ་འཇུག་གོ །དེ་ལྟར་འགྱུར་མོད། གལ་ཏེ་དེ་ལྟར་ན་ཡང་བདག་དཔྱད་པས། བོང་བུའི་རྭ་དང་འདྲ་བར་བདག་འཛིན་པའི་ཡུལ་མེད་པ་དེ་ལྟ་ན་ཡང་ཡན་ལག་ཅན་གྱི་ལུས་དེའི་ཡུལ་དུ་འགྱུར་རོ་ཞེ་ན། འདི་ལ་ལུས་ནི་ཞེས་པ་ལ་སོགས་པ་གསུངས་ཏེ། ལུས་ཀྱང་རྣམ་པར་དཔྱད་པས་གཅིག་པ་ཉིད་ཅུང་ཟད་ཀྱང་ཡོད་པ་མ་ཡིན་ནོ་ཞེས་སྟོན་པར་བྱེད་དེ། འདི་ལྟར་ཡང་ལག་པ་དང་རྐང་པ་ལ་སོགས་པའི་ཆ་ཉིད་འབའ་ཞིག་མཐོང་སྟེ། ལུས་གཅིག་ཅེས་པའི་མཐོང་བ་མ་ཡིན་ནོ། །དེ་རྣམས་ལས་གཞན་པའི་ལུས་པོ་ཡང་རིག་པ་མ་ཡིན་ནོ། །གང་གི་ཕྱིར་ལུས་ནི་རྐང་པ་མིན་ཏེ། རྐང་པ་དག་མ་ཡིན་ནོ། །བྱིན་པ་ཡང་ལུས་སུ་མི་འགྱུར་ལ། བརླ་ཡང་མིན་ཏེ། བྱིན་པའི་ཕྱོགས་ཀྱི་ཁྱད་པར་ནི་ལུས་མ་ཡིན་ནོ། །རྐེད་པ་ཡང་མ་ཡིན་ནོ། །རྐེད་པ་ཡང་ལུས་མ་ཡིན་པ་ཁོ་ནའོ། །ལྟོ་བ་ཡང་མ་ཡིན་ཏེ། གསུས་པ་ཡང་མ་ཡིན་ནོ། །རྒྱབ་འདི་ཡང་ལུས་མ་ཡིན་ཏེ། ལུས་འདི་ནི་རྒྱབ་མ་ཡིན་པ་ཉིད་དོ། །བྲང་ཡང་མ་ཡིན་ཏེ། བྲང་གི་དཀྱིལ་འཁོར་ཡང་ལུས་མ་ཡིན་ནོ། །དཔུང་པ་ཡང་མ་ཡིན་ཏེ། དཔུང་པ་དེ་ཡང་ལུས་སུ་མི་འགྱུར་རོ། །ལག་པ་ཡང་མ་ཡིན་ཏེ། ལག་པ་དག་ལུས་མ་ཡིན་ནོ། །རྩིབ་ལོགས་འདི་ཡང་ལུས་མ་ཡིན་ཏེ། འདིའི་རྩིབ་ལོགས་དག་ཀྱང་ལུས་མ་ཡིན་ནོ། །མཚན་ཁུང་ཡང་མ་ཡིན་ནོ། །ལག་པའི་རྩ་ཡང་ལུས་མ་ཡིན་ནོ། །འཕྲག་པའི་མཚན་ཉིད་ཀྱང་མ་ཡིན་ཏེ། ཕུང་པོའི་རང་བཞིན་ལུས་མ་ཡིན་ནོ། །མགྲིན་པ་ཡང་ལུས་མ་ཡིན་ཏེ། སྐེ་མ་ཡིན་ནོ། །མགོ་བོ་ཡང་ལུས་མ་ཡིན་ཏེ། མགོ་བོའི་ལུས་སུ་མི་འགྱུར་རོ། །རྐང་པ་ལ་སོགས་པ་ཡང་འཆད་པར་འགྱུར་བའི་བརྟགས་
བས་རྡུལ་ཕྲ་རབ་ཀྱང་མི་གནས་པའི་ཕྱིར་རོ། །ལག་པ་དང་རྐང་པ་ལ་སོགས་པ་གཞན་ཞིག་བཅད་ན་ལུས་པོ་ཞིག་པས་ཤི་བར་ཐལ་བར་འགྱུར་བའི་ཕྱིར་དང༌། གཞན་གྱིས་ཁས་བླངས་པ་མེད་པའི་ཕྱིར་ལུས་འདི་རྣམས་སོ་སོར་བདག་མ་ཡིན་ནོ། །དེ་བཞིན་དུ་གང་གི་ཚེ་ལུས་འདི་རྣམས་སོ་སོའི་རང་བཞིན་མ་ཡིན་པས་འདི་དག་བསྡུས་པ་ཙམ་ལུས་ཡིན་ནོ། །འདི་ལ་ལུས་ནི་གང་ཞིག་ཡིན་ཞེས་ཏེ། ཡང་འདི་ལ་སྟེ་རྐང་པ་ལ་སོགས་པའི་དབྱེ་བ་འདི་རྣམས་མདུན་གནས་ཤིང་ལུས་སུ་རྟོགས་པའི་རྒྱུ་མཚན་འདི་རྣམས་ལ་གང་ཞིག་ལུས་སུ་འགྱུར་ཏེ། ཅུང་ཟད་ཀྱང་མ་ཡིན་ལ། གཅིག་ཀྱང་ངེས་པར་དཔྱད་པ་ན་ལུས་ཀྱི་བདག་ཉིད་གང་ཡང་མི་དམིགས་སོ་ཞེས་པའི་ཐ་ཚིག་གོ །འོན་ཏེ་དེ་ལྟ་ན་ཡང་འདི་ལྟར་རྐང་པ་ལ་སོགས་པ་རྣམས་སོ་སོར་ལུས་སུ་བརྗོད་པར་བྱ་བ་མ་ཡིན་གྱི། འོན་ཀྱང་ཡན་ལག་ཐམས་ཅད་ལ་ཁྱབ་པར་བྱེད་པ་ཡིན་པའི་ཕྱིར་ཡན་ལག་ཅན་དང༌། ཡན་ལག་ཐམས་ཅད་ལ་འཇུག་པར་འགྱུར་རོ་ཞེ་ན། །འདི་ལ་གལ་ཏེ་འདི་ཞེས་པ་ལ་སོགས་པ་གསུངས་ཏེ། ཡན་ལག་ཐམས་ཅད་ལ་འདི་འཇུག་པ་ན་ཕྱོགས་གཅིག་གིས་འཇུག་གམ། དུས་གཅིག་ཏུ་བདག་ཉིད་ཐམས་ཅད་ཀྱིས་འཇུག །དེ་ལ་གལ་ཏེ་ལག་པ་དང་རྐང་པ་ལ་སོགས་པ་ཡན་ལག་ཐམས་ཅད་ལ་ལུས་འདི་སྟེ་ཡན་ལག་ཅན་གྱི་ལུས་འདིའོ། །ཕྱོགས་དེ་ཡིས་ནི་གནས་གྱུར་ན། །ཞེས་ཏེ། ཆ་འགའ་ཞིག་གིས་ཆ་ཤས་འགའ་ཞིག་ལ་ཁྱབ་པར་འགྱུར་ན་བདག་ཉིད་ཐམས་ཅད་ཀྱིས་ཐམས་ཅད་ལ་མ་ཡིན་ནོ་ཞེས་པའི་དོན་ཏོ། །དེའི་ཚེ་འདི་སྐད་བརྗོད་པར་མི་བྱ་སྟེ། གང་གི་ཕྱིར་གང་གི་ཕྱོགས་གཅིག་ཉིད་ཀྱིས་ཆ་ཤས་རྣམས་ལ་འཇུག་པ་ན་དེ་རྣམས་ལ་ཡང་ཕྱོགས་རེ་རེ་ལ། གཞན་གྱི་ཕྱོགས་གཅིག་གིས་འཇུག་གམ། བདག་ཉིད་ཐམས་ཅད་ཀྱིས་འཇུག་ཅེས་རྣམ་པར་རྟོག་པ་མི་ལྡོག་གོ །དེ་ལ་ཡང་སླར་ཕྱོགས་གཅིག་གིས་འཇུག་པའི་རྣམ་པར་བརྟག་པ་ཐུག་པ་མེད་པར་ལྡོག་པར་མི་འགྱུར་རོ། །གཞན་ཡང་དེ་ལ་གོ་སྐབས་མེད་པ་ཉིད་ཀྱི་ཕྱིར་ཆ་ཤས་རྣམས་ལ་འཇུག་པ་མ་ཡིན་ནོ་ཞེ་ན། ཆ་ཤས་རྣམས་ཞེས་པ་ལ་སོགས་པ་གསུངས་ཏེ། ཆ་ཤས་རྣམས་ཏེ་དུམ་བུ་རྣམས་ཆ་
ཤས་རང་རང་གི་གནས་པ་ལ་གནས་པར་འགྱུར་ཏེ། རྣམ་པར་གནས་པ་ཡིན་ལ། དངོས་པོ་རྣམས་རང་རང་གི་གནས་པ་ཡིན་པའི་ཕྱིར་རོ། །དེ་རང་ཉིད་གང་ན་གནས་ཞེས་པ་ནི་དེ་ཡན་ལག་ཅན་རང་ཉིད་གང་ན་གནས་ཞེས་པ་མི་རིག་གོ །འོན་ཏེ་རྣམ་པར་རྟོག་པ་གཉིས་པ་ཡིན་ན། དེ་ལ་བདག་ཉིད་ཀུན་གྱིས་ཞེས་པ་ལ་སོགས་པ་གསུངས་ཏེ། བདག་ཉིད་ཐམས་ཅད་ཀྱང་འཇུག་པ་སྲིད་པ་ན་ཆ་ཤས་རྣམས་ལ་སྐབས་མེད་པའི་ཕྱིར། དེ་ཡང་གང་དུ་རང་ཉིད་གནས་ཞེས་ཐལ་བར་འགྱུར་བ་གེགས་མེད་པར་འཇུག་གོ །དེ་ལྟར་ན་ཡང་སླར་ཡང་གཞན་བརྗོད་པར་བྱ་སྟེ། བདག་ཉིད་ཀུན་གྱིས་ཏེ་དངོས་པོ་ཐམས་ཅད་ཀྱིས་ཡིན་ཏེ། ཕྱོགས་གཅིག་གིས་མ་ཡིན་པའོ། །ཐམས་ཅད་དུ་ལག་པ་ལ་སོགས་པ་ཡན་ལག་ཐམས་ཅད་ལའོ། །སོགས་པའི་སྒྲས་རྐང་པ་ལ་སོགས་པའི་རྣམས་ལ་ཡིན་ཏེ། གནས་ཤིང་ཡན་ལག་ཅན་གྱི་ལུས་གལ་ཏེ་འབྲེལ་པ་ཡིན་ཞེ་ན། དེའི་ཚེ་སླར་ཡང་ཉེས་པ་གཞན་འདིར་འགྱུར་རོ་ཞེས་བསྟན་པའི་ཕྱིར། ལག་སོགས་ཞེས་པ་ལ་སོགས་པ་གསུངས་ཏེ། ལུས་ཞེས་པ་ནི་ཡན་ལག་ཅན་གྱི་ལུས་ཡིན་ལ། དེ་རྙེད་པ་དེ་ཉིད་དུ་འགྱུར་ཏེ། དེའི་གྲངས་ཡོངས་སུ་བཅད་པ་དེ་ཉིད་ཐོབ་པར་འགྱུར་རོ། །ཇི་ཙམ་དུ་ཞེ་ན། ཇི་སྙེད་པ་སྟེ། ལག་པ་ལ་སོགས་པ་དེ་རྣམས་ནི། ལག་པ་དང་རྐང་པ་ལ་སོགས་པ་ཡན་ལག་ཇི་སྙེད་པ་དེ་རྣམས་སུ་འགྱུར་ཏེ། དེའི་གྲངས་ཡོངས་སུ་བཅད་པ་རྣམས་དང་དེ་འབྲེལ་པའི་ཡན་ལག་ཅན་རྣམས་ཀྱང་དེ་སྙེད་པ་རྣམས་སུ་འགྱུར་ཏེ། དེ་ཆ་ཤས་མེད་པ་ཉིད་ཐམས་ཅད་ཀྱིས་དེ་རྣམས་ལ་ཡོངས་སུ་རྫོགས་པའི་ཕྱིར་རོ། །དེ་དུ་མ་དང་འབྲེལ་ལས་དུ་མ་ཡིན་པའི་ཕྱིར་གཞན་དུ་གཅིག་ཏུ་འགྱུར་བ་མ་ཡིན་ནོ། །ཐལ་བར་འགྱུར་བ་འདི་དུ་མ་ཡུལ་གཅིག་ཏུ་འཇུག་པའི་ཕྱོགས་ལ་ཡང་སྦྱར་བར་བྱ་སྟེ། དེ་བཞིན་དུ་ཁ་བསྒྱུར་བ་དང༌། མ་བསྒྱུར་བ་དང༌། བསྒྲིབས་པ་དང༌། མ་བསྒྲིབས་པ་དང༌། གཡོ་བ་དང༌། མི་གཡོ་བ་ལ་ཡང་ཇི་ལྟར་རིགས་པར་བརྗོད་པར་བྱའོ། །དེ་ལྟར་ན་མངོན་སུམ་ལ་སོགས་པའི་ཚད་མས་རྟོགས་པར་བྱ་བའི་ལུས་ཡོད་པ་མ་ཡིན་ཏེ། གནོད་པར་བྱེད་པའི་
བརྗོད་མ་ཐག་པ་ཡོད་པས་ཞེས་བསྒྲུབ་པའི་དོན་དུ་མཇུག་བསྡུ་བ། ཕྱི་དང་ནང་ན་ཞེས་པ་ལ་སོགས་པ་གསུངས་ཏེ། ནང་གི་བྱེད་པའི་སྐྱེས་བུ་ནི་སྤར་བཀག་པའི་ཕྱིར་རོ། །ཤ་དང་ཁྲག་ལ་སོགས་པ་རྣམས་རྣམ་པར་དཔྱད་པའི་ཕྱིར། དེ་ནི་ནང་གི་ལུས་མ་ཡིན་ནོ་ཞེས་ཏེ། ད་ནི་ཡང་ཡན་ལག་ཅན་དགག་པའི་ཕྱིར་ཕྱི་རོལ་ཏེ་མངོན་སུམ་ལ་སོགས་པའི་སྤྱོད་ཡུལ་དུ་གྱུར་པའི་ཕྱི་རོལ་དུ་ས་མ་ཡིན་ནོ། །དེ་ལྟར་ན་ཇི་ལྟར་ན་ལུས་ལག་པ་ལ་སོགས་པ་རྣམས་ལ་རྣམ་པར་གཞག་པར་བྱེད། འོན་ཏེ་ལག་པ་ལ་སོགས་པ་ལས་ཐ་དད་པར་འགྱུར་རོ་ཞེ་ན། ལག་སོགས་ཞེས་པ་ལ་སོགས་པ་གསུངས་ཏེ། ལག་པ་ལ་སོགས་པའི་ཡན་ལག་རྣམས་ལས་གཞན་ཐ་དད་པ་དམིགས་པའི་མཚན་ཉིད་དུ་གྱུར་པ་ཡོད་པ་མ་ཡིན་ཏེ། དམིགས་པ་མ་ཡིན་ནོ། །ལག་པ་ལ་སོགས་པ་འབའ་ཞིག་དམིགས་པ་ཡིན་ནོ། །དེ་ལྟར་ན་གང་ཡན་ལག་ལ་སོགས་པའི་རང་བཞིན་མ་ཡིན་ལ། དེ་ལ་བརྟེན་པའི་འབྲེལ་པ་ཡང་མེད་དོ། །ནང་ཡང་ཡོད་པ་མ་ཡིན་ནོ། །དེ་ལ་ཐ་དད་ཡང་ཡོད་པ་མ་ཡིན་ནོ། །དེ་ཞེས་ཏེ་ལུས་སོ། །ཇི་ལྟར་ཉིད་དུ་ཡོད་མིན་ཞེས་ཏེ། ཇི་ལྟར་ཞེས་པ་ནི་ཇི་ལྟར་ཡང་ལུས་མ་དམིགས་པ་ན་དེ་ཡོད་པ་མ་སྲིད་པ་ཉིད་ཀྱིས་འདྲི་བར་བྱེད་དོ། །ཇི་ལྟར་རྣམ་པ་གང་གིས་ཞེས་སོ། །ཀྱེ་ཞེས་རྣམ་པར་དཔྱོད་པའོ། །ཡོད་ཅེས་ཏེ། དེ་ཡོད་པ་རྣམ་པར་གཞག་པའོ། །གང་གི་ཚེ་འདི་ལྟར་རྣམ་པར་དཔྱད་པས་ལུས་རྣམ་པར་གཞག་པར་མི་ནུས་པ་དེའི་ཚེ། མེད་པ་ཉིད་དུ་དེ་ལ་ཐ་སྙད་བྱའོ་ཞེས་མཇུག་བསྡུ་བའི་ཕྱིར། དེས་ན་ཞེས་པ་ལ་སོགས་པ་གསུངས་ཏེ། དེས་ན་ལུས་མེད་ཅེས་པ་ནི་གང་གི་ཕྱིར་རྣམ་པར་དཔྱད་པ་བརྗོད་པས་མ་དམིགས་པ་དེའི་ཕྱིར་དམིགས་པའི་མཚན་ཉིད་དུ་གྱུར་པའི་མ་དམིགས་པ་ལས་ལུས་ཡོད་པ་མ་ཡིན་ནོ། །གལ་ཏེ་མེད་ན་འོ་ན་ཇི་ལྟར་ལག་པ་ལ་སོགས་པ་རྣམས་ལ་ལུས་ཀྱི་བློར་འགྱུར་ཞེ་ན། རྨོངས་ལས་ཞེས་པ་ལ་སོགས་པ་གསུངས་ཏེ། རྨོངས་ལས་ནི་མ་རིག་པའི་དབང་ལས་སོ། །ཀྱང་ཞེས་པ་ལག་པ་ལ་སོགས་པ་རྫས་གཅིག་དང་བྲལ་བ་རྣམས་ལ་ལུས་ཀྱི་བློར་འགྱུར་ཏེ། དོན་དམ་པར་ནི་མ་ཡིན་ནོ། །ཡང་ན་ཀྱང་གི་སྒྲ་
ནི་ངེས་པར་གཟུང་བ་ཡིན་ཏེ། འདི་ལྟར་ཡང་འཁོར་བ་ཐོག་མ་མེད་པ་ནས་འཇུག་པ་སྐྱེ་བ་བརྒྱུད་པར་ལོག་པར་གོམས་པ་བསགས་པའི་དབང་གིས་དངོས་པོ་ཇི་ལྟར་གནས་པའི་དེ་ཁོ་ན་ཉིད་རབ་ཏུ་རྟོགས་ཀྱང་དེ་ལས་ཕྱིན་ཅི་ལོག་ཏུ་སྒྲོ་འདོགས་པའི་རྣམ་པར་རྟོག་པ་སྐྱེ་བར་འགྱུར་རོ། །དེ་དང་ཉེ་བར་འབྲེལ་པས་འཇིག་རྟེན་ན་ལུས་ལ་སོགས་པའི་ཐ་སྙད་འདི་འཇུག་སྟེ། དོན་དམ་པར་ནི་མ་ཡིན་ནོ། །ཇི་ལྟར་གཞན་དུ་མི་འགྱུར་ཞེ་ན། འདི་ལ་གསུངས་པ། དབྱིབས་སུ་བཀོད་པ་སྟེ། ལག་པ་དང་རྐང་པ་ལ་སོགས་པའི་དབྱིབས་སུ་དགོད་པ་ལའོ། །དེ་ཉིད་ཀྱི་ཁྱད་པར་གཞན་ལ་ཐ་དད་པའོ། །འཁྲུལ་པའི་རྒྱུ་ཞེས་ལག་པ་ལ་སོགས་པ་ཉིད་ལ་ཡིན་གྱི། ཐམས་ཅད་ལ་ནི་མ་ཡིན་ཏེ། ཡུལ་སོ་སོར་ངེས་པ་ཉིད་འཁྲུལ་པའི་འདོད་པས་ཇི་ལྟ་བུར་ཞེ་ན། མཐོ་ཡོར་ལ་ནི་མི་བློ་བཞིན་ནོ་ཞེས་ཏེ། ཇི་ལྟར་མཐོ་ཡོར་ལ་མིའི་རང་བཞིན་མེད་ཀྱང་སྐྱེས་པ་དང་མཚུངས་པའི་གྱེན་དུ་འགྲེང་བ་ལ་སོགས་པའོ། །དབྱིབས་ཀྱི་ཁྱད་པར་དམིགས་པ་དང་ལྡན་པ་ན་རིང་པོ་ནས་ཁྱད་པར་ཁོང་དུ་མ་ཆུད་པ་གཞན་གྱི་ཁྱད་པར་འགའ་ཞིག་གི་འཁྲུལ་པས་སྐྱེས་བུའི་བློར་འགྱུར་རོ། །དེ་བཞིན་དུ་སྐབས་སུ་བབ་པ་ལ་ཡང་ཡིན་ནོ་ཞེས་པའི་དོན་ཏོ། །དེ་ལྟར་ན་ཡང་ཇི་ལྟར་ཡང་འདི་ཉིད་ལ་བརྟེན་ཏེ་རྨོངས་པ་ཉིད་ཀྱིས་ལུས་ཀྱི་བློ་ཡིན་ལ། དངོས་པོ་མ་ཡིན་ཞེས་པས་ཇི་ལྟར་ཞེ་ན། འདི་ལ་ཇི་སྲིད་རྐྱེན་ཞེས་པ་ལ་སོགས་པ་གསུངས་ཏེ། དེ་ཇི་སྲིད་དུ། གང་དུས་ཀྱི་མཚམས་སུ་བཅད་པའི་རྐྱེན་རྣམས་ཏེ། རྒྱུ་རྣམས་ཡིན་ལ། ས་ལ་སོགས་པའི་ཁམས་དྲུག་དང༌། རེག་པ་ལ་སོགས་པའི་སྐྱེ་མཆེད་དྲུག་དང༌། ཡིད་ཀྱི་ཉེ་བར་རྒྱུ་བ་བཅོ་བརྒྱད་ཀྱི་བདག་ཉིད་ལས་ལ་རག་ལས་པའི་ཚོགས་ཀྱི་བསྒྲུབ་པ་དུས་དེ་སྲིད་ཀྱི་མཚམས་སུ་ལུས་ནི་སྐྱེས་བུ་ལྟ་བུ་སྟེ། དཔེར་ན་སྐྱེས་བུའི་རང་བཞིན་གྱིས་དོན་དམ་པར་སྟོང་པ་ཡང་ཡོངས་སུ་བརྟགས་པའི་ངོ་བོ་སྐྱེས་བུའི་རང་བཞིན་དུ་རབ་ཏུ་སྣང་བ་དང་ཐ་སྙད་ཀྱང་བྱེད་དོ། །འདི་ནི་མཚོན་པ་ཙམ་ཡིན་ཏེ། བུད་མེད་བཞིན་དུ་ཞེས་པ་ལྟ་བར་བྱའོ། །སྔར་གྱི་ནུར་ནུར་པོ་ལ་སོགས་པའི་གནས་སྐབས་ན་མ་ཡིན་ལ། བྱི་ནས་ཀྱང་མ་ཡིན་ཏེ།
རྣམ་པར་འཐོར་བའི་ཕྱིར་རོ། །ཐལ་བ་ལ་སོགས་པའི་གནས་སྐབས་ན་ཡང་མ་ཡིན་ཏེ། གཉུག་མའི་རང་བཞིན་མེད་པའི་ཕྱིར་རོ། །འདིར་འདི་དང་ཡང་མཚུངས་པར་བསྟན་པའི་ཕྱིར། དེ་བཞིན་ཞེས་པ་ལ་སོགས་པ་གསུངས་ཏེ། དཔེར་ན་རྐྱེན་ཚོགས་པར་ཡོད་པའི་ལུས་སྐྱེས་བུ་བཞིན་དུ་སྣང་ལ། དེ་མེད་པ་ན་མི་སྣང་ལ། དེ་བཞིན་དུ་སྟེ་ཇི་ལྟར་ལག་པ་ལ་སོགས་པ་ཇི་སྲིད་དུ་རྐྱེན་ཚོགས་པ་དེ་སྲིད་དུ་ལུས་ནི་ལག་པ་ལ་སོགས་པར་སྣང་སྟེ། རྟོག་པའི་དབང་གིས་རབ་ཏུ་སྣང་ལ། དོན་དམ་པར་ནི་མ་ཡིན་ནོ། །དེ་ལྟ་བས་ན་ལུས་ཀྱི་བློ་ནི་ཚོགས་པ་ཚང་བ་ལ་འགྱུར་ལ། དེ་མ་ཚང་ན་མ་ཡིན་ནོ། །དེ་ལྟ་བས་ན་རྨོངས་པ་ཉིད་ལས་ལག་པ་ལ་སོགས་པ་ལ་ལུས་ཀྱི་བློ་ཡིན་ནོ་ཞེས་ངེས་སོ། །འདིར་བསྡུས་པའི་དོན་ནི་འདི་ཡིན་ཏེ། རྐྱེན་གྱི་ཚོགས་པ་འདི་དང་འདི་ཡོད་པ་ན་དངོས་པོ་དེ་དང་དེ་མེད་པར་ཡང་འགྱུར་རོ། །དེ་ཁོ་ན་ཉིད་མཐོང་བ་པོ་ནི་འཁྲུལ་བའི་དབང་གིས་རྣམ་པར་རྟོག་པ་འདི་སྐྱེ་བར་འགྱུར་རོ། །དེའི་དབང་གིས་དབྱིབས་ཀྱི་ཁྱད་པར་རྣམས་ལ་བུད་མེད་དང་སྐྱེས་པ་ལ་སོགས་པའི་ལུས་ཀྱི་ཐ་སྙད་འཇུག་པར་འགྱུར་རོ། །དེ་ལྟ་བས་ན་ཐལ་བ་ལ་སོགས་པའི་གནས་སྐབས་ན་ཚོགས་པ་མ་ཚང་བས་ལྡོག་པར་འགྱུར་རོ། །དེ་ལྟ་བས་ན་ལུས་ལ་སོགས་པའི་ཐ་སྙད་དངོས་པོ་པ་ནི་མ་ཡིན་ནོ་ཞེས་འཆགས་པར་འགྱུར་རོ། །དེ་སྐད་དུ་ཡང༌། གང་ཞིག་གནས་སྐབས་སྤང་བ་ཡི། །ལུས་ཀྱི་རང་བཞིན་སྨྲ་བར་བྱ། །མེར་མེར་པོ་དང་ཐལ་བ་ལས། །དེ་མིད་ཕྲ་མོ་དངོས་པོ་ཡིས། །དེ་རགས་སྤངས་པས་གནས་ཤེ་ན། །རང་ཉིད་བསྟན་དུ་མེད་པར་འཐོབ། །ལུས་སུ་བརྗོད་པར་ཇི་ལྟར་འགྱུར། །ཞེས་བརྗོད་དོ། །དེ་སྐད་དུ། གང་གི་རྒྱུ་ནི་སྲིད་འགྱུར་བ། །རྐྱེན་ནི་མེད་ན་གནས་མིན་ཏེ། །རྐྱེན་དང་བྲལ་བས་བྲལ་འགྱུར་ལ། །དེ་ཡོད་ཅེས་ནི་ཇི་ལྟར་རྟོག །ཅེས་གསུངས་སོ། །གཞུང་ཁ་ཅིག་ལས། ཇི་སྲིད་རྐྱེན་ཚོགས་དེ་སྲིད་དུ། །ཤིང་ནི་སྐྱེས་པ་ལྟར་སྣང་བ། །ཞེས་སོ། །དེ་ལ་བཤད་པ་ནི་འདི་ཡིན་ཏེ། ཇི་སྲིད་དུ་ཕྱིན་ཅི་ལོག་གི་ཤེས་པ་ཚོགས་པ་དེ་སྲིད་དུ་སྡོང་དུ་མ་ལ་སྐྱེས་བུ་བཞིན་དུ་རྟོགས་པ་ཡིན་ཏེ། སྡོང་དུམ་གྱི་རང་བཞིན་
ལ་སྐྱེས་པ་ལྟར་ཏེ་སྐྱེས་བུ་བཞིན་དུ་རྟོགས་པ་ཡིན་ནོ། །དེ་མེད་ན་ནི་མ་ཡིན་ཏེ། དེ་བཞིན་དུ་ལག་པ་ལ་སོགས་པ་ལའོ། །ཇི་སྲིད་དུ་རྐྱེན་ཚོགས་པ་དེ་སྲིད་དུ་ལག་པ་ལ་སོགས་པ་འདི་ལ་ལུས་སུ་སྣང་སྟེ། རབ་ཏུ་གསལ་བ་ཡིན་ལ། ཕྱི་ནས་ནི་མ་ཡིན་ནོ། །དེའི་ཕྱིར་གཏི་མུག་ཉིད་ལས་ལུས་ཀྱི་བློ་ཡིན་ནོ་ཞེས་ངེས་པ་ཡིན་ནོ། །གལ་ཏེ་ལུས་མེད་ན་ཡང་ལག་པ་དང་རྐང་པ་རྣམས་ཀྱི་ཡན་ལག་རྣམས་མངོན་སུམ་གྱིས་མཐོང་བའི་ཕྱིར་དགག་པར་མི་ནུས་སོ་ཞེས་དགོངས་ནས། ལག་པ་ལ་སོགས་པ་རྣམས་ལ་གཞན་གྱིས་བརྟགས་པའི་རང་བཞིན་ཉིད་དོ་ཞེས་བསྟན་པའི་ཕྱིར། དེ་བཞིན་སོར་མོའི་ཞེས་པ་ལ་སོགས་པ་གསུངས་ཏེ། ཇི་ལྟར་རྣམ་པར་དཔྱད་པ་ན་ལུས་མེད་པ་དེ་བཞིན་དུ་ལག་པ་དང་རྐང་པ་ལ་སོགས་པ་ཡང་ཡོད་པ་མ་ཡིན་ནོ། །གང་གི་ཕྱིར་སོར་མོ་རྣམས་ཀྱི་ཚོགས་ཏེ་བསྡུས་པ་རྣམས་ཡིན་ལ། སོར་མོ་རྣམས་ཞེས་པ་ཉེ་བར་མཚོན་པ་ཡིན་ཏེ། རྟིང་པ་ལ་ཡང་བལྟ་བར་བྱའོ། །དེའི་དངོས་པོ་ནི་དེ་ཉིད་དོ། །དེ་ལྟ་བས་ན་དེའི་རང་བཞིན་ཞེས་པའི་དོན་ཏོ། །རྐང་པ་ཡང་གང་ཞིག་ཡིན་འགྱུར་ཏེ། དེ་དག་བསྡུས་པ་མ་གཏོགས་པར་རྣམ་པར་དཔྱད་པ་ན་ཅུང་ཟད་ཀྱང་མ་ཡིན་ནོ་ཞེས་དགོངས་སོ། །སོར་མོའི་ཚོགས་ཀྱང་རང་བཞིན་གཅིག་པ་མ་ཡིན་ནོ་ཞེས་གསུངས་པ། དེ་ཡང་ཞེས་པ་ལ་སོགས་པ་སྟེ། དེ་ཡང་ནི་སོར་མོའི་ཚོགས་ཀྱང་ངོ༌། །རྣམ་པར་དཔྱད་པ་ན་དངོས་པོར་ཡོད་པ་མ་ཡིན་ནོ། །ཅིའི་ཕྱིར་ཞེ་ན། ཚིགས་ཀྱི་ཚོགས་རྣམས་བསྡུས་པ་ཡིན་པའི་ཕྱིར་རོ། །གང་ཞིག་ཡིན་ཞེས་པའི་རང་བཞིན་དང་འབྲེལ་ཏེ། ཚིགས་ཀྱང་སོ་སོར་དངོས་པོ་མ་ཡིན་ནོ་ཞེས་གསུངས་པ་ཚིགས་ཀྱང་ཞེས་ཏེ་དངོས་པོ་མ་ཡིན་ནོ། །ཅིའི་ཕྱིར་ཞེ་ན། ཆེ་ཕྱེ་བས་སོ། །རང་གིས་ཏེ་བདག་ཉིད་ཀྱིས་ཆ་ཤས་རྣམས་ཕྱེ་བས་ཏེ་རྣམ་པར་ཕྱེ་བས་སོ། །ཆ་ཡང་དེ་ཁོ་ན་ཉིད་དུ་མེད་དོ་ཞེས་གསུངས་པ། ཆ་ཡང་སྟེ་རྡུལ་ཕྲ་རབ་ཕྱེ་བས་སོ། །ཆ་ནི་ཚོགས་ཀྱི་ཆུའོ། །ཡང་ནི་རྡུལ་ཕྲ་རབ་ཕྱེ་བས་ཏེ། རྡུལ་ཕྲ་རབ་ཀྱི་ཆའི་རྣམ་པར་ཕྱེ་བས་ཕྱིར་བཏགས་པ་ཉིད་ཀྱི་རྡུལ་ཕྲ་རབ་རྣམས་ཀྱང་སོ་སོར་དོན་དམ་པར་ཡོད་པ་མ་ཡིན་ནོ་ཞེས་གསུངས་པ། རྡུལ་
དེ་ལ་ཡང་ཆའི་དབྱེ་བ་ཡིས་ཞེས་ཏེ། ཕྱོགས་ནི་ཤར་དང་ནུབ་དང་ལྷོ་དང་བྱང་དང་སྟེང་དང་འོག་གི་ཕྱོགས་རང་བཞིན་རྣམས་ཏེ་དབྱེ་བའི་ས་སྣ་ཚོགས་པའི་ཕྱིར་རོ། །དེ་ནི་རྣམ་པར་དབྱེ་བས་ཕྱེ་བ་ཉིད་ཀྱི་རྡུལ་ཕྲ་རབ་རྣམས་ཆ་དྲུག་ཏུ་འགྱུར་རོ། །ཕྱོགས་དབྱེ་སྟེ་ཕྱོགས་རེ་རེ་སོ་སོ་ན་གནས་པ་སྣ་ཚོགས་པའི་གཟུགས་ཀྱི་ཆ་རྡུལ་ཕྲ་རབ་རྣམས་དེ་ལས་ཕྱེ་བས་དེའི་རང་བཞིན་གནས་པ་མ་ཡིན་ནོ། །ཕྱོགས་ཀྱི་ཆ་དབྱེ་བ་གང་ལ་ཡོད་ཀྱང་དེ་ལ་གཅིག་ཏུ་མི་རིགས་སོ་ཞེས་པས་སོ། །འདི་ལྟར་ཡང་ཤར་དང་ནུབ་ལ་སོགས་པའི་ཕྱོགས་གནས་པའི་རྡུལ་ཕྲ་རབ་ལ་མངོན་པར་ཕྱོགས་པ་གང་ཡིན་པའི་རྡུལ་ཕྲ་རབ་དབུས་ན་གནས་པའི་རང་བཞིན་གྱི་རྡུལ་ཕྲ་རབ་དེ་གཅིག་ཉིད་ཡིན་ནམ། གཞན་དང་གཞན་ཡིན། གལ་ཏེ་གཅིག་ཡིན་ནོ་ཞེས་པའི་ཕྱོགས་ཡིན་ན་དེའི་ཚེ་བསྐོར་བར་གནས་པའི་རྡུལ་ཕྲ་རབ་ཐམས་ཅད་གཅིག་ཏུ་ཐལ་བར་འགྱུར་རོ། །གང་གི་ཕྱིར་ཤར་ཕྱོགས་ན་གནས་པའི་རྡུལ་ཕྲ་རབ་ཀྱི་ཡུལ་དེ་མེད་པར་ནུབ་ཕྱོགས་ལ་སོགས་པ་ན་གནས་པའི་རྡུལ་ཕྲ་རབ་ཤར་གྱི་ཡུལ་ན་གནས་པའི་མངོན་པར་ཕྱོགས་པའི་ངོ་བོའི་མངོན་པར་ཕྱོགས་པར་མི་འགྱུར་རོ། །གཞན་དུ་ན་རང་བཞིན་ཐ་དད་པར་ཐལ་བར་འགྱུར་བས་ཡུལ་གཅིག་ན་གནས་པ་ཡང་ཡིན་ནོ། །དེ་ཁོངས་སུ་འདུས་པ་མེད་པ་ན་ཤར་ཕྱོགས་ན་གནས་པ་མ་ཡིན་ནོ། །རྡུལ་ཕྲ་རབ་གཞན་དང་གཞན་དག་དང༌། རྡུལ་ཕྲ་རབ་བདག་ཉིད་ཐམས་ཅད་དང་འབྲེལ་བས་དེའི་རང་བཞིན་དུ་འདུས་པའི་ཕྱིར་རྫས་རྡུལ་ཕྲ་རབ་ཙམ་དུ་འགྱུར་རོ། །དེ་ལྟར་ཡིན་ན་ཡང་བསགས་པའི་ངོ་བོའི་ངོ་བོ་ལ་སོགས་པར་མི་འགྱུར་རོ། །དེའི་ཕྱིར་ས་ལ་སོགས་པ་རྣམས་ཀྱི་ཚོགས་འདོད་པ་རྣམས་ཀྱི་ཕྱོགས་གཉིས་པ་ཉིད་ཁས་བླང་བར་བྱའོ། །དེའི་ཚེ་ཡང་གཞན་དང་གཞན་དྲུག་པོ་རྣམས་དང་དུས་གཅིག་ཏུ་འབྲེལ་བས་དབུས་ན་གནས་པའི་རྡུལ་ཕྲ་རབ་ཆ་དྲུག་ཏུ་འགྱུར་རོ། །དེ་དང་དེ་ན་གནས་པའི་རྡུལ་ཕྲ་རབ་གཞན་དང་གཞན་དག་འབྲེལ་བས་རྡུལ་ཕྲ་རབ་དེའི་རང་བཞིན་ཐ་དད་པའི་ཕྱིར་འདི་ལྟར་རྡུལ་ཕྲ་རབ་ཀྱང་གཅིག་ཏུ་མི་འཐད་དོ། །དེ་ལྟར་ཡང་སློབ་དཔོན་གྱི་ཞལ་སྔ་ནས། །དྲུག་གིས་ཅིག་ཅར་སྦྱར་བས་ན། །ཕྲ་རབ་
རྡུལ་ཆ་དྲུག་ཏུ་འགྱུར། །དྲུག་པོ་དག་ནི་གོ་གཅིག་ན། །གོང་བུ་རྡུལ་ཕྲན་ཙམ་དུ་འགྱུར། །ཞེས་གསུངས་སོ། །དེ་རྣམས་ཀྱང་ཆ་ཕྲ་བ་རྣམས་ཡིན་ནོ། །དེ་བཞིན་དུ་དཔྱད་པ་ན་བདག་མེད་པ་ཉིད་ཀྱི་ནམ་མཁའི་རང་བཞིན་དུ་རྟོགས་པར་བྱེད་པས། ཕྱོགས་དབྱེ་ཡང་ཞེས་པ་ལ་སོགས་པ་གསུངས་ཏེ། ཕྱོགས་ཀྱི་དབྱེ་བ་ཡང་ཕྱོགས་ཀྱི་དབྱེ་བ་རྡུལ་ཕྲ་རབ་རྣམས་ཀྱི་རྡུལ་ཕྲ་རབ་ཀྱི་ཆ་ཡང་སྔར་བཞིན་དུ་ཆ་དྲུག་ཏུ་ཕྱེ་བ་ན་ཅི་ཞིག་ཡིན་པར་འགྱུར་ཏེ། དངོས་པོ་ཅུང་ཟད་ཀྱང་མ་ཡིན་ནོ། །སྔ་མ་ཐམས་ཅད་ལ་སྦྱར་བར་བྱའོ། །ཅིའི་ཕྱིར་ཞེ་ན། ཆ་ཤས་དང་བྲལ་བའི་ཕྱིར་ཏེ། ཆ་མེད་པའི་ཕྱིར་རོ། །དེའི་ཕྱིར་མངོན་པར་ཕྱེ་བ་དང༌། རང་བཞིན་མེད་པ་ཉིད་ཀྱིས་ནམ་མཁའ་སྟོང་པ་ཉིད་ཡིན་ནོ། །དེ་རྒྱུ་དེས་ན་རྡུལ་ཡང་མེད་དོ། །རྡུལ་ཕྲ་རབ་མེད་པའི་ཕྱིར་འདི་ལྟར་ལག་པ་ལ་སོགས་པ་ཡང་རྣམ་པར་དཔྱད་པས་རང་བཞིན་མེད་པར་བལྟ་བར་བྱའོ། །དེས་ན་ལུས་ཀྱང་དོན་དམ་པར་ཅུང་ཟད་ཀྱང་ཡོད་པ་མ་ཡིན་ཏེ། གཅིག་དང་དུ་མ་དང་བྲལ་བར་བསྟན་པའི་ཕྱིར་རོ། །དེ་ལྟར་ན་ཡང་སྒྲ་ལ་སོགས་པ་རྣམས་བདག་ཀྱང་མ་ཡིན་ལ་སེམས་ཀྱང་མ་ཡིན་ཞིང༌། ལུས་དངོས་པོ་ལ་ངར་འཛིན་པའི་ཡུལ་མ་ཡིན་ནོ། །དེ་ལྟ་བས་ན་མ་རིག་པས་ཀུན་ནས་བསླང་བའི་བདག་ཉིད་ཀྱིས་བདག་ལ་སོགས་པ་ལ་ཡོད་པ་མ་ཡིན་ཡང་བདག་ཅེས་འཇུག་པར་འགྱུར་བས། ཤེས་པ་ནི་ཡུལ་མེད་པ་ཉིད་དུ་སྐྱེ་བར་འགྱུར་རོ། །དེས་ནི་ཇི་སྐད་དུ། བདག་ཉིད་གང་ཡང་ཡོད་མིན་པས། །འཇིགས་པར་འགྱུར་བ་སུ་ཞིག་ཡིན། །ཞེས་བས་བསྒྲུབས་པ་ཡིན་ནོ། །འདི་དག་ཐམས་ཅད་ཀྱིས་ལུས་དྲན་པ་ཉེ་བར་གཞག་པ་བསྟན་པར་འགྱུར་རོ། །གང་གསུངས་པ་ཆོས་ཡང་དག་པར་སྡུད་པ་ལས། རིགས་ཀྱི་བུ་གཞན་ཡང་བྱང་ཆུབ་སེམས་དཔའ་ཉིད་འདི་ལྟར་ལུས་འདི་ནི་རྐང་པ་དང༌། རྐང་སོར་དང༌། བྱིན་པ་དང༌། བརླ་དང༌། བཅུ་དྲུག་མདོ་དང༌། ལྟོ་བ་དང༌། ལྟེ་བ་དང༌། སྒལ་ཚིགས་དང༌། སྙིང་དང༌། རྩིར་ལོགས་དང༌། རྩིབ་མ་དང༌། ལག་པ་དང༌། ལག་ངར་དང༌། དཔུང་པ་དང༌། ཐལ་གོང་དང༌། མཇིང་པ་དང༌། འགྲམ་པ་དང༌། དཔྲལ་བ་དང༌། མགོ་བོ་དང༌། མགོ་བོའི་ཐོད་པ་འདུས་
པ་ཙམ་སྟེ་ལས་འབྱུང་བའི་བྱེད་པས་བསགས་པ། ཉོན་མོངས་པ་དང་ཉེ་བའི་ཉོན་མོངས་པ་དང༌། ཀུན་ཏུ་རྟོག་པ་དང་རྣམ་པར་རྟོག་པ་ཐ་དད་པ་བརྒྱ་སྟོང་གི་གནས་སུ་གྱུར་བའོ། །འདིར་རྫས་མང་པོ་འདུས་པ་འདི་ལྟ་སྟེ། སྐྲ་དང༌། སྤུ་དང༌། སེན་མོ་དང༌། སོ་དང༌། རུས་པ་དང༌། པགས་པ་དང༌། ཤ་དང༌། ཤའི་ཕྱི་དང༌། རྒྱུས་པ་དང༌། ཚིལ་དང༌། ཞག་དང༌། ཆུ་སེར་དང༌། མཆེར་པ་དང༌། གཅིན་དང༌། ཕྱི་ས་དང༌། ཕོ་བ་དང༌། ལོང་ཀ་དང༌། ཁྲག་དང༌། སྣབས་དང༌། མཁྲིས་པ་དང༌། རྣག་དང༌། མཆིལ་མ་དང༌། གླང་པ་དང༌། གླང་རྒྱས་རྣམས་ཏེ། དེ་ལྟར་ན་རྫས་མང་པོ་འདུས་པ་ཡིན་ན་འདི་ལ་ལུས་ཞེས་ཇི་སྐད་དུ་བྱ་སྙམ་དུ་ལུས་དྲན་པ་ཉེ་བར་འཇོག་གོ །དེ་སོ་སོར་རྟོག་པ་ན་འདི་སྙམ་དུ་སེམས་ཏེ། ལུས་འདི་ནི་ནམ་མཁའ་དང་མཚུངས་སོ་སྙམ་ནས་དེ་ལུས་ལ་ནམ་མཁའ་ལྟར་དྲན་པ་ཉེ་བར་འཇོག་གོ །དེ་ཐམས་ཅད་ནམ་མཁའ་ལྟར་མཐོང་ངོ༌། །དེ་ལུས་ཡོངས་སུ་ཤེས་པའི་ཕྱིར་ཡང་གང་དུ་ཡང་དྲན་པ་མི་འཇུག་གོ །རྣམ་པར་མི་འཇུག་གོ །རྣམ་པར་མི་འཇུག་གོ །རྣམ་པར་མི་འཕྲོའོ་ཞེས་འབྱུང་ངོ༌། །ཡང་གསུངས་པ། ལུས་འདི་ནི་སྔོན་གྱི་མཐའ་ནས་ཀྱང་མ་འོངས། ཕྱི་མའི་མཐའ་ཡང་མི་འཕོ། སྔོན་གྱི་མཐའ་དང་ཕྱི་མའི་མཐའ་ལས་ཀྱང་མི་གནས་ཏེ། གཞན་དུ་ན་ཡང་དག་པ་མ་ཡིན་པའི་ཕྱིན་ཅི་ལོག་ལས་བྱུང་བ་བྱེད་པ་པོ་དང༌། ཚོར་བ་པོ་མེད་པ། ཐོག་མ་དང་ཐ་མ་དང་དབུས་མེད་པ། རྩ་བ་གནས་པ་མེད་པ། བདག་པོ་མེད་པ། ང་ཡི་བ་མེད་པ། ཡོངས་སུ་འཛིན་པ་མེད་པ་སྟེ། ཚིགས་ཞེས་བྱ་བ་དང༌། ལུས་ཞེས་བྱ་བ་དང༌། ལོངས་སྤྱོད་ཅེས་བྱ་བ་དང༌། གནས་ཞེས་བྱ་བ་དང༌། རོ་ཞེས་བྱ་བ་དང༌། སྐྱེ་མཆེད་ཅེས་ཡ་བ་ནི་གློ་བུར་གྱི་ཐ་སྙད་རྣམས་ཀྱི་ཐ་སྙད་བཏགས་པའོ། །ལུས་འདི་ནི་སྙིང་པོ་མེད་པ་སྟེ། ཕ་མའི་ཁུ་བ་དང༌། ཁྲག་ལས་བྱུང་བའི་མི་གཙང་བ་རུལ་པ། རང་བཞིན་གྱིས་དྲི་མི་ཞིམ་པ། འདོད་ཆགས་དང༌། ཞེ་སྡང་དང༌། གཏི་མུག་ལས་འཇིགས་པ་དང༌། སྒྱིད་ལུག་པའི་རྐུན་པོས་དཀྲུགས་པ། རྟག་ཏུ་འཇིགས་པས་འབྲུལ་བ་བྲལ་བ། རྣམ་པར་འཇོམས་པའི་ཆོས་ཅན། ནང་ཐ་དད་
པ་བརྒྱ་སྟོང་གི་ཚང་ངོ་སྙམ་དུ་ལུས་དྲན་པ་ཉེ་བར་འཇོག་གོ་ཞེས་འབྱུང་ངོ༌། །དེ་བཞིན་དུ་གང་གི་ཚེ་རྣམ་པར་དཔྱད་པ་ན་སྟོང་པ་ཉིད་ཀྱི་རང་བཞིན་གྱིས་ནམ་མཁའ་དང་འདྲ་བར་རྣམ་པ་ཐམས་ཅད་དུ་ལུས་ཡིན་ན། དེའི་ཚེ་ལོག་པ་ཉིད་ཀྱི་དངོས་པོའི་དེ་ཁོ་ན་ཉིད་དུ་སྒྲོ་བཏགས་ནས། འདོད་ཆགས་ལ་སོགས་པ་བསྐྱེད་པས་བྱིས་པ་རྣམས་འཁོར་ཉེ་བར་འཕེལ་བ་ཡིན་ནོ་ཞེས་བསྟན་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ཞེས་པ་སྟེ་བརྗོད་པའི་རིམ་པས་སོ། །རྨི་ལམ་ལྟ་བུ་ནི་རྨི་ལམ་ལ་དམིགས་པ་ཉིད་ཀྱི་དངོས་པོ་ལ་ཡིད་མི་བདེ་བའི་གནས་ལ་སུ་ཞིག་ཆགས་པར་འགྱུར་ཏེ། གང་ཞིག་ཞེན་པར་འགྱུར། འདི་ཡང་མཚོན་པ་ཙམ་ཡིན་པའི་ཕྱིར་སུ་ཞིག་ཞེ་སྡང་བར་འགྱུར་ཞིང་སུ་ཞིག་རྨོངས་པར་འགྱུར་ཞེས་ཀྱང་རིག་པར་བྱའོ། །དེ་བཞིན་དུ་ཡིད་བདེ་བའི་གནས་རྣམས་ལ་མིག་དག་གིས་གཟུགས་སྣ་ཚོགས་མཐོང་ནས་ཆགས་པ་སྐྱེ་བར་འགྱུར་རོ། །ཡིད་མི་བདེ་བའི་གནས་རྣམས་ལ་མིག་དག་གིས་གཟུགས་རྣམས་སུ་མཐོང་ནས་ཞེ་སྡང་སྐྱེ་བར་འགྱུར་རོ། །བཏང་སྙོམས་ཀྱི་གནས་རྣམས་ལ་མིག་དག་གིས་གཟུགས་རྣམས་མཐོང་ནས་གཏི་མུག་སྐྱེ་བར་འགྱུར། །གང་དེ་དག་ཡིད་དང་རྗེས་སུ་མི་མཐུན་པ་མེད་པའི་གཟུགས་དང་རྗེས་སུ་མཐུན་པར་སྤྱོད་དེ། དེས་འདི་ལ་ཆགས་པ་སྐྱེ་བར་འགྱུར་རོ། །ཡིད་དང་རྗེས་སུ་མི་མཐུན་པའི་གཟུགས་རྣམས་ལ་ནི་མི་མཐུན་པར་སྤྱོད་དེ། དེས་འདི་ལ་ཞེ་སྡང་སྐྱེ་བར་འགྱུར་རོ། །རྗེས་སུ་མཐུན་པར་ཡང་མ་ཡིན། རྗེས་སུ་མི་མཐུན་པ་ཡང་མ་ཡིན་པ་རྣམས་ལ་རྨོངས་པས་སྤྱོད་དེ། དེས་འདི་ལ་གཏི་མུག་སྐྱེ་བར་འགྱུར་རོ། །དེ་བཞིན་དུ་སྒྲ་ལ་སོགས་པ་རྣམས་ལ་རྣམ་པ་གསུམ་དུ་དམིགས་ཤིང་ཉམས་སུ་མྱོང་བ་སྔར་བཞིན་ནོ། །དེ་ལ་གང་དཔྱོད་ལྡན་སུ་ཞིག་ཅེས་ཏེ། ཤིན་ཏུ་ཡང་མིག་གི་སྐྱེ་མཆེད་ཀྱི་རང་བཞིན་གྱིས་སྟོང་ངོ༌། །དེས་སྔོན་གྱི་མཐའ་ཡང་མི་དམིགས་ལ། ཕྱི་མའི་མཐའ་ཡང་མི་དམིགས་ཤིང༌། དབུས་ཀྱང་མི་དམིགས་ཏེ། རང་བཞིན་གྱིས་སྟོང་པའི་ཕྱིར་རོ། །དེ་བཞིན་དུ་རྣ་བ་ལ་སོགས་
པ་གཞན་ལ་ཡང་རིག་པར་བྱའོ། །དེ་བཞིན་དུ་ཤིན་ཏུ་ཡང་གཟུགས་ཀྱི་སྐྱེ་མཆེད་གཟུགས་ཀྱི་རང་བཞིན་གྱིས་སྟོང་ངོ་ཞེས་སྔར་བཞིན་ནོ། །དེ་བཞིན་དུ་སྒྲ་ལ་སོགས་པ་ཡང་བརྗོད་པར་བྱའོ། །དེ་ལྟར་ན་དབང་པོ་རྣམས་ནི་སྒྱུ་མ་ལྟ་བུ་ཡིན་ལ། ཡུལ་རྣམས་ནི་རྨི་ལམ་ལྟ་བུ་གང་གི་ཡིན་པ་དེ་ལ་ཇི་ལྟར་འདོད་ཆགས་ལ་སོགས་པ་སྐྱེ་བར་འགྱུར་རོ། །དེ་ཉིད་ཀྱི་ཕྱིར་གསུངས་པ། དཔྱོད་ལྡན་ཞེས་ཏེ། དཔྱོད་པ་པོ་མཁས་པ་དེ་བཞིན་དུ་འདི་ཡང་དག་པ་ཇི་ལྟ་བ་བཞིན་དུ་ཡང་དག་པ་ཇི་ལྟ་བ་བཞིན་དུ་ཡང་དག་པའི་ཤེས་རབ་ཀྱིས་མཐོང་བ་སུ་ཞིག་ཆགས་པར་འགྱུར་ཏེ། སྡང་བའམ་རྨོངས་པར་འགྱུར། འདི་ཡང་རྨི་ལམ་ན་མཐོང་བའི་ཡུལ་གྱི་བཟང་མོ་ལ་སོགས་པ་བཅོམ་ལྡན་འདས་ཀྱིས་དཔེ་གསུངས་པ་ཉེ་བར་བསྟན་པར་བྱའོ། །ལུས་མེད་ན་ཡང་བུད་མེད་ལ་སོགས་པ་རྟོགས་པས་ཀྱང་ཆགས་པར་རིགས་པ་མ་ཡིན་ནོ་ཞེས་བསྟན་པའི་ཕྱིར། ལུས་ཞེས་པ་ལ་སོགས་པ་གསུངས་ཏེ། ཀྱང་གི་སྒྲས་ནི་གཏན་ཚིགས་སྡུད་པའོ། །གང་གི་ཕྱིར་བུད་མེད་ལ་སོགས་པ་བརྟགས་པས་ཆགས་པར་མི་འགྱུར་རོ། །གང་གི་ཚེ་ལུས་འདི་ལྟར་བརྗོད་པའི་རིགས་པས་མེད་དེ། རང་བཞིན་མེད་པ་དེའི་ཚེ་ལུས་མེད་པའི་ཕྱིར་བུད་མེད་གང་ཞིག་ཡིན་ཏེ། ཆགས་བྱེད་མ་གང་ཞིག་ཆགས་པར་བྱ་བ་ཉིད་ཀྱི་སྐྱེས་བུ་ལ་ཇི་ལྟར་ཆགས་པར་འགྱུར། སྐྱེས་བུ་ཡང་གང་ཞིག་ཡིན་ཏེ། ཆགས་པ་པོ་གང་ཞིག་དགའ་བར་བྱ་བ་ཉིད་ཀྱི་བུད་མེད་ལ་ཆགས་པར་འགྱུར། །བུད་མེད་ཀྱང་བདག་ཉིད་ལ་བུད་མེད་ཅེས་བརྟགས་ནས་ཕ་རོལ་གྱི་སྐྱེས་བུ་ལ་སྐྱེས་བུ་ཞེས་ཆགས་པ་སྐྱེད་པར་བྱེད་དོ། །དེ་བཞིན་དུ་སྐྱེས་བུ་ཡང་བདག་ཉིད་ལ་སྐྱེས་བུ་ཞེས་བརྟགས་ནས། བུད་མེད་ལ་བུད་མེད་ཅེས་བརྟགས་ནས་ཆགས་པ་སྐྱེད་དོ། །ལུས་མེད་ན་ཡང་བུད་མེད་ལ་བུད་མེད་ཅེས་ཡོད་པ་མ་ཡིན་ནོ། །སྐྱེས་པ་ལ་སྐྱེས་བ་ཡོད་པ་མ་ཡིན་ནོ། །གང་ཡང་རང་བཞིན་གྱིས་ཡོད་པ་མ་ཡིན་ཏེ། བུད་མེད་ཡོད་པ་མ་ཡིན་ཞིང་སྐྱེས་བ་ཡོད་པ་མ་ཡིན་ནོ། །དེ་ལྟ་བས་ན་ལུས་པོ་མེད་པ་ལ་བུད་མེད་ལ་སོགས་པར་བརྟགས་པས་བྱས་པའི་ཆགས་པར་རིགས་པ་
མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་མཚན་མ་དང་བྲལ་བའོ། །ཇི་ལྟར་འདི་གཙོར་བསྟན་པ་དེ་བཞིན་དུ་ཕྲེང་བ་དང་ཙནྡན་ལ་སོགས་པ་ལ་ཡང་རིག་པར་བྱའོ། །དེ་བཞིན་དུ་ཞེ་སྡང་དང་གཏི་མུག་གི་ཡུལ་ཡང་ངོ༌། །དེ་སྐད་དུ་ཡབ་དང་སྲས་མཇལ་བ་ལས་བསྟན་ཏེ། རྒྱལ་པོ་ཆེན་པོ་སྐྱེས་བུ་གང་ཟག་འདི་ནི་ཁམས་དྲུག་པ། རེག་པའི་སྐྱེ་མཆེད་དྲུག་པ། ཡིད་ཀྱི་ཉེ་བར་འཁོར་བ་བཅོ་བརྒྱད་པ་སྟེ། སྐྱེས་བུ་འདི་ནི་ཁམས་དྲུག་པ་གང་སྨྲས་བ་དེ་ཅིལ་བརྟེན་ཏེ་སྨྲས་ཤེ་ན། རྒྱལ་པོ་ཆེན་པོ་ཁམས་དྲུག་ནི་འདི་དག་གོ ། དྲུག་གང་ཞེ་ན། འདི་ལྟ་སྟེ། སའི་ཁམས་དང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང༌། ནམ་མཁའི་ཁམས་དང༌། རྣམ་པར་ཤེས་པའི་ཁམས་སོ། །རྒྱལ་པོ་ཆེན་པོ་དེ་དག་ནི་ཁམས་དྲུག་སྟེ། སྐྱེས་བུ་འདི་ཁམས་དྲུག་པོ་ཞེས་གདངས་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །སྐྱེས་བུ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་སྨྲས་བདེ་ཅི་ལ་བརྟེན་ཏེ་སྨྲས་ཞེ་ན། རྒྱལ་པོ་ཆེན་པོའི་ག་པའི་སྐྱེ་མཆེད་དྲུག་ནི་འདི་དག་སྟེ་དྲུག་གང་ཞེ་ན། གཟུགས་རྣམས་ལ་བལྟ་བའི་ཕྱིར་མིག་གི་རེག་པའི་སྐྱེ་མཆེད་དང༌། སྒྲ་རྣམས་ལ་ཉན་པའི་ཕྱིར་རྣ་བའི་རེག་པའི་སྐྱེ་མཆེད་དང༌། དྲི་རྣམས་ལ་སྣོམ་པའི་ཕྱིར་སྣའི་རེག་པའི་སྐྱེ་མཆེད་དང༌། རོ་རྣམས་ལ་མྱང་བའི་ཕྱིར་ལྕེའི་རེག་པའི་སྐྱེ་མཆེད་དང༌། རེག་བྱ་རྣམས་ལ་རེག་པའི་ཕྱིར་ལུས་རེག་པའི་སྐྱེ་མཆེད་དང༌། ཆོས་རྣམས་རྣམ་པར་ཤེས་པའི་ཕྱིར་ཡིད་རེག་པའི་སྐྱེ་མཆེད་དོ། །རྒྱལ་པོ་ཆེན་པོ་དེ་དག་ནི་རེག་པའི་སྐྱེ་མཆེད་དྲུག་སྟེ། སྐྱེས་པ་འདི་ནི་རེག་པའི་སྐྱེ་མཆེད་དྲུག་པའོ་ཞེས་གང་སྨྲས་པ་དེ་ནི་དེ་ལ་བརྟེན་ཏེ་སྨྲས་སོ། །རྒྱལ་པོ་ཆེན་པོ་སྐྱེས་བུ་འདི་ནི་ཡིད་ཀྱི་ཉེ་བར་འཁོར་བ་བཅོ་བརྒྱད་པོ་ཞེས་གང་སྨྲས་པ་དེ་ཅི་ལ་སྟེ་སྨྲས་ཤེ་ན། རྒྱལ་པོ་ཆེན་པོ་ཡིད་ཀྱི་ཉེ་བར་འཁོར་བ་བཅོ་བརྒྱད་ནི་འདི་དག་སྟེ། བཅོ་བརྒྱད་གང་ཞེ་ན། འདི་ལ་མིག་གིས་གཟུགས་མཐོང་བ་ན་ཡིད་བདེ་བ་དང༌། ཡིད་མི་བདེ་བ་དང༌། བཏང་སྙོམས་སུ་འགྱུར་བར་གཟུགས་ལ་ཉེ་བར་སྤྱོད་དོ། །དེ་བཞིན་དུ་རྣ་བ་ལ་སོགས་པ་ལ་ཡང་བརྗོད་པར་བྱའོ། །རྒྱལ་པོ་ཆེན་པོ་བཅོ་བརྒྱད་པོ་དེ་ལ་
གང་དག་ཡིད་བདེ་བ་ཉེ་བར་སྤྱོད་པ་དྲུག་དང༌། གང་དག་ཡིད་མི་བདེ་བར་ཉེ་བར་སྤྱོད་པ་དྲུག་དང༌། གང་དག་བཏང་སྙོམས་སུ་གྱུར་པ་ཉེ་བར་སྤྱོད་པ་དྲུག་པོ་དེ་དག་གཅིག་ཏུ་བསྡུས་ནས་ཡིད་ཀྱི་ཉེ་བར་སྤྱོད་པ་བཅོ་བརྒྱད་དུ་འགྱུར་རོ། །རྒྱལ་པོ་ཆེན་པོ་བཅོ་བརྒྱད་པོ་དེ་དག་ནི་ཡིད་ཀྱི་ཉེ་བར་སྤྱོད་པ་སྟེ། དེ་བཞིན་དུ་སྦྱར་ཏེ། རྒྱལ་པོ་ཆེན་པོ་གང་གི་སའི་ཁམས་གང་ཞེ་ན། གང་ཅི་ཡང་རུང་སྟེ། ལུས་འདི་ལ་ནང་གི་ཁང་ན་སྲ་བ་དང༌། མཁྲང་བའི་རྣམ་པ་དང༌། ཉེ་བར་འགྱུར་བ་དང༌། ཟིན་པའོ། །དེ་ཡང་གང་ཞེ་ན། འདི་ལྟ་སྟེ། སྐྲ་དང༌། སྤུ་དང༌། སེན་མོ་དང༌། ཞེས་པ་ལ་སོགས་པའོ། །རྒྱལ་པོ་ཆེན་པོ་ཕྱི་རོལ་གྱི་སའི་ཁམས་གང་ཞེ་ན། གང་ཅི་ཡང་རུང་སྟེ་ཕྱི་རོལ་གྱི་སྲ་བ་དང་མཁྲང་བའི་རྣམ་པ་དང༌། ཉེ་བར་མ་གྱུར་པ་དང༌། མ་ཟིན་པ་འདི་ནི་ཕྱི་རོལ་གྱི་སའི་ཁམས་ཞེས་བྱའོ། །རྒྱལ་པོ་ཆེན་པོ་དེ་ལ་ནང་གི་སའི་ཁམས་འབྱུང་བའི་ཚེ་གང་ནས་ཀྱང་མི་འོང༌། འགག་པའི་ཚེ་གང་དུ་ཡང་སོགས་པར་མི་འགྲོའོ། །རྒྱལ་པོ་ཆེན་པོ་བུད་མེད་ནང་དུ་བདག་ནི་བུད་མེད་དོ་ཞེས་རྟོག་ཅིང༌། དེ་ནང་དུ་བུད་མེད་ཅེས་བརྟགས་ནས་ཕྱི་རོལ་དུ་སྐྱེས་པ་ཞེས་རྟོག་གོ །དེའི་ཕྱི་རོལ་དུ་སྐྱེས་པ་སྐྱེས་པ་ཞེས་བརྟགས་ནས་ཆགས་པར་འགྱུར་ཏེ། ཕྱི་རོལ་གྱི་སྐྱེས་པ་དང་ཕྲད་པར་འདོད་དོ། །སྐྱེས་པ་ཡང་ནང་དུ་བདག་སྐྱེས་པ་ཞེས་རྟོག་སྟེ། དེ་ནང་དུ་བདག་ནི་སྐྱེས་བ་ཞེས་བརྟགས་ནས། ཕྱི་རོལ་དུ་བུད་མེད་ལ་བུད་མེད་ཅེས་རྟོག་གོ །ཕྱི་རོལ་དུ་བུད་མེད་ལ་བུད་མེད་ཅེས་བརྟགས་ནས་ཆགས་པར་འགྱུར་ཏེ། ཕྱི་རོལ་གྱི་བུད་མེད་དང་ཕྲད་པར་འདོད་དོ། །ཕྲད་པར་འདོད་པས་ཕྲད་པར་འགྱུར་རོ། །ཕྲད་པའི་རྐྱེན་གྱིས་མེར་མེར་པོ་སྐྱེ་བར་འགྱུར་བའི་དུས་དེ་ཡོད་དོ། །རྒྱལ་པོ་ཆེན་པོ་གང་ལ་ཀུན་དུ་བརྟགས་པ་དང༌། གང་ཀུན་དུ་རྟོག་པ་དེ་གཉིས་ཀ་ཡང་མེད་དོ། །བུད་མེད་ལ་ནི་བུད་མེད་མེད་དོ། །སྐྱེས་པ་ལ་ནི་སྐྱེས་པ་མེད་དོ།། དེ་ལྟར་མེད་ཅིང་ཡང་དག་པ་མ་ཡིན་པར་ཀུན་དུ་རྟོག་པ་སྐྱེས་ཏེ། ཀུན་དུ་རྟོག་པ་དེ་ཡང་ངོ་བོ་ཉིད་ཀྱིས་མེད་དོ། །ཀུན་དུ་རྟོག་པ་ཇི་ལྟ་བ་བཞིན་དུ་ཕྲད་པ་དང༌། མེར་མེར་པོ་ཡང་ངོ་བོ་ཉིད་ཀྱིས་མེད་དོ། །གང་ངོ་བོ་ཉིད་ཀྱིས་མེད་པ་དེ་ཇི་ལྟར་སྲ་བ་སྐྱེ་བར་འགྱུར་རོ། །རྒྱལ་པོ་ཆེན་
པོ་དེ་ལྟར་ཀུན་དུ་རྟོག་པ་ཤེས་པར་བྱས་ནས་སྲ་བ་ཉིད་རྟོགས་པར་བྱ་སྟེ། ཅི་ནས་སྲ་བ་ནི་སྐྱེ་བའི་ཚེ་གང་ནས་ཀྱང་མི་འོང་བར་ཤེས་པར་བྱའོ། །རྒྱལ་པོ་ཆེན་པོ་འདི་ལྟར་གང་ལུས་འདི་དུར་ཁྲོད་ཀྱི་མཐར་འགྱུར་བའི་དུས་དེ་ཡོད་དེ། དེའི་སྲ་བ་དེ་འཇིག་ཅིང་འགག་པར་འགྱུར་བའི་ཚེ་ཤར་ཕྱོགས་སུ་མི་འགྲོ། ལྷོ་ཕྱོགས་དང༌། ནུབ་ཕྱོགས་དང༌། བྱང་ཕྱོགས་དང༌། སྟེང་དང༌། འོག་དང༌། ཕྱོགས་མཚམས་རྣམས་སུ་ཡང་མི་འགྲོ་སྟེ། རྒྱལ་པོ་ཆེན་པོ་ནང་གི་སའི་ཁམས་ནི་དེ་ལྟར་བལྟའོ། །སྔ་མ་བཞིན་དུ་དེ་ལ་རྒྱལ་པོ་ཆེན་པོ་དེ་ལྟར་སའི་ཁམས་ཏེ་འབྱུང་བ་ཡང་སྟོང༌། སའི་ཁམས་འཇིག་པ་དང༌། འབྱུང་བ་ཡང་ངོ་བོ་ཉིད་ཀྱིས་སྟོང་ངོ༌། རྒྱལ་པོ་ཆེན་པོ་སའི་ཁམས་ནི་ཐ་སྙད་ཙམ་མ་གཏོགས་པར་སའི་ཁམས་ཉིད་མི་དམིགས་ཏེ། ཐ་སྙད་དེ་ཡང་བུད་མེད་མ་ཡིན། སྐྱེས་པ་མ་ཡིན་གྱི། རྒྱལ་པོ་ཆེན་པོ་དེ་ལྟར་དེ་ཡང་དག་པ་ཇི་ལྟ་བ་བཞིན་གྱི་ཤེས་རབ་ཀྱིས་རྟོགས་ཤིག་ཅེས་གསུངས་སོ། །དེས་ན་ཅི་ཞིག་ལ་དཔྱད་པར་བྱ་སྟེ། དཔྱད་པར་བྱ་བའི་ཡུལ་མ་ཡིན་ནོ། །དེ་ཅིའི་ཕྱིར་ཞེ་ན། ཆོས་ཐམས་ཅད་ནི་དཔྱད་པ་དང་བྲལ་བའོ་ཞེས་སོ། །དེ་ལྟར་ལུས་དྲན་པ་ཉེ་བར་གཞག་པ་བསྟན་ནས། ཚོར་བ་དྲན་པ་ཉེ་བར་གཞག་པ་བསྟན་པའི་ཕྱིར། ཚོར་བ་རྣམ་པར་དཔྱད་པ་གསུངས་སོ། །ཚོར་བ་ནི་རྣམ་པ་གསུམ་སྟེ། བདེ་བའི་ཚོར་བ་དང༌། སྡུག་བསྔལ་གྱི་ཚོར་བ་དང༌། སྡུག་བསྔལ་ཡང་མ་ཡིན་བདེ་བ་ཡང་མ་ཡིན་པའི་ཚོར་བའོ། །དེ་ལ་གཟུགས་བཞིན་དུ་ཚོར་བ་ཡང་དོན་དམ་པར་ཡོད་པ་མ་ཡིན་ནོ། །ཇི་ལྟར་ཞེ་ན། གལ་ཏེ་སྡུག་བསྔལ་དེ་བདེ་བ་མ་ཡིན་པའི་མྱོང་བ་ཡིན་ལ། དེ་ཉིད་དུ་སྟེ་དོན་དམ་པར་ཡོད་པ་ཡིན་ན་དེའི་ཚོར་བ་དགའ་ལ་མི་གནོད་དེ། དགའ་བ་དང་ལྡན་པའི་རྣམས་ཅིའི་ཕྱིར་ན་སྡུག་བསྔལ་བར་མི་འགྱུར། བདེ་བ་ཡང་གལ་ཏེ་དོན་དམ་པར་ཡོད་ན། དེའི་ཚེ་མྱ་ངན་གདུང་སོགས་ལ་སྟེ། སོགས་པའི་སྒྲས་ནི་འདོད་པ་དང༌། འཇིགས་པ་དང༌། སྨྱོས་བ་ལ་སོགས་པས་གདུངས་པ་ལའོ། །ཞིམ་སོགས་ནི་གལ་ཏེ་བདེ་བ་ཡིན་ནའོ། །ཞིམ་པ་ལ་སོགས་པ་ནི་རོ་མཆོག་གི་བཟའ་བ་དང་བཏུང་བ་ལ་སོགས་པའོ། །སོགས་པའི་སྒྲས་ནི་མེ་ཏོག་དང་
ཙནྡན་ལ་སོགས་པའི་བདེ་བ་བཟུང་སྟེ། བདེ་བའི་རྒྱུ་ཡིན་པའི་ཕྱིར་རོ། །གལ་ཏེ་བདེ་བ་ཡིན་ན་ཅི་སྟེ་དགའ་བར་མི་བྱེད། གལ་ཏེ་དངོས་པོ་ཡོད་པའི་རང་བཞིན་ནོ། །བརྒྱ་ལ་ཡང་བཟློག་པར་སྤྲོ་བ་ཡང་མ་ཡིན་ནོ། །དེ་ལྟ་བས་ན་བདེ་བ་དང་སྡུག་བསྔལ་མྱོང་བར་བྱ་བ་ནི་རྟོགས་པས་གཞག་པ་ཉིད་ཡིན་ནོ། །དེ་བརྗོད་པ་ནི་ཅི་སྟེ་རབ་དགའ་ལ་མི་གནོད་ཅེས་སོ། །དེ་ལ་གཞན་གྱིས་ལན་འདེབས་པ་ནི་སྟོབས་དང་ལྡན་པ་ཞེས་སྨོས་སོ། །རབ་ཏུ་དགའ་བའི་གནས་སྐབས་ན། སྡུག་བསྔལ་རྣམ་པ་ཐམས་ཅད་དུ་མེད་པ་ནི་མ་ཡིན་ཏེ། འོན་ཀྱང་ཕུལ་དུ་བྱུང་བའི་འཇུག་པའི་བདེ་བས། མི་མངོན་པར་བྱས་པ་ལས་ཡོད་ཀྱང་ཉམས་སུ་མྱོང་བ་མ་ཡིན་ནོ། །སྟོབས་དང་ལྡན་པ་ནི་ཤིན་ཏུ་སྟོབས་དང་ལྡན་པས་སོ། །ཟིལ་མནན་ཕྱིར་ནི་མངོན་པར་ཟིལ་གྱིས་མནན་ཅིང་ཉེ་བར་བཅོམ་པས་སོ། །དེ་གལ་ཏེ་ཡོད་ན་ཡང་བདེ་བ་མྱོང་བ་མ་ཡིན་ཏེ། རིག་པར་བྱ་བ་མ་ཡིན་ནོ་ཞེས་བརྗོད་དོ། །དེའི་ཚེ་འདི་ནི་རིགས་པ་མ་ཡིན་ནོ་ཞེས། གང་ཞིག་ཉམས་མྱོང་ཞེས་པ་ལ་སོགས་པ་སྨོས་ཏེ། མྱོང་བ་ཉིད་ནི་ཚོར་བའི་རང་བཞིན་ཉིད་དོ། །ཇི་ལྟར་ཏེ་རྣམ་པ་གང་གིས་སོ། །བདེ་བ་བདེ་བའི་གསལ་བ་གང་ཞིག་ཉམས་མྱོང་བ་དག་ཉིད་མིན་ན་སྟེ། གང་གིས་ཉམས་སུ་མྱོང་བའི་རང་བཞིན་མ་ཡིན་ནའོ། །མྱོང་བར་བྱེད་པས་མྱོང་བ་ཞེས་བརྗོད་དོ། །མྱོང་བ་ནི་ཉམས་སུ་མྱོང་བ་ཞེས་བྱ་བའི་ཚིག་ལས་སོ། །གལ་ཏེ་ཡང་མྱོང་བར་བྱ་བ་མ་ཡིན་པ་ཡང་མྱོང་བར་འགྱུར་ན། དེའི་ཚེ་ཅུང་ཟད་ཀྱང་མྱོང་བ་མ་ཡིན་པ་མེད་པར་ཐལ་བར་འགྱུར་རོ། །འོན་ཏེ་དེ་ལྟར་ན་ཡང་རྣམ་པ་ཐམས་ཅད་དུ་མ་མྱོང་བ་ནི་མ་ཡིན་ཏེ། འོན་ཀྱང་ཉམས་སུ་མྱོང་བ་ན་ཡང་ཕྲ་བས་ཉམས་སུ་མ་མྱོང་བ་དང་འདྲ་བ་ཡིན་ནོ་ཞེ་ན། སྡུག་བསྔལ་ཞེས་པ་ལ་སོགས་པ་སྨོས་ཏེ། ཕྲ་མོ་ཉིད་དེ་ཉེ་བར་མཚོན་པ་ཉིད་ཀྱིས་སོ། །སྡུག་བསྔལ་ཡོད་ཅིང་བདོག་པའོ། །འོ་ན་བདེ་བ་སྟོབས་དང་ལྡན་པ་འདི་ལ་ཅི་ཞིག་བྱ་ཞེ་ན། འདི་ཡི་རགས་པ་གསལ་ཡིན་ནམ། །ཞེས་ཏེ། རབ་ཏུ་དགའ་བའི་གནས་སྐབས་ན་རབ་ཏུ་འཇུག་པའོ། །སྟོབས་དང་ལྡན་པའི་བདེ་བས་རགས་ཤིང་སྟོབས་དང་ལྡན་པས་སྡུག་བསྔལ་འདི་བསལ་ཞིང་ཟིལ་
གྱིས་མནན་པ་མ་ཡིན་ནམ་ཞེས་པ་ནི་གཞན་ལ་འབོད་པའོ། །ཀྱེ་གལ་ཏེ་ཁྱོད་དེ་ལྟར་འདོད་ན། ཕྲ་བ་ཞེས་བྱ་བའི་སྡུག་བསྔལ་བདེ་བ་ཉམས་སུ་མྱོང་བའི་དུས་ན། ཅུང་ཞིག་ཀྱང་དམིགས་པ་མ་ཡིན་ཏེ། དེས་ན་ཅི་ཞིག་དེའི་ཕྲ་བ་ཡིན་ཞེས་བརྗོད་པར་བྱ་ཞེ་ན། འོན་ཏེ། དེ་ནི་དེ་ལས་གཞན་དགའ་ཙམ། །ཞེས་ཏེ། དེ་ལས་ནི་ཕུལ་དུ་བྱུང་བའི་བདེ་བ་ལས་སོ། །གཞན་དགའ་ཙམ་ནི་གཉིས་པ་བདེ་བ་ཙམ་སྟེ། ཤིན་ཏུ་ཆུང་བའི་བདེ་བའི་ཆ་ཙམ་དུ་གྱུར་པ་སྟེ། སྡུག་བསྔལ་ཕྲ་བར་འགྱུར་རོ་ཞེས་གལ་ཏེ་མངོན་པར་འདོད་དོ་ཞེ་ན། ཅི་སྟེ་དེའང་དེའི་ཕྲ་ཉིད་དེ། གཞན་རབ་ཏུ་དགའ་བ་ཙམ་བདེ་བ་འདིའི་ཕྲ་བ་ཙམ་ཡིན་ན་སྡུག་བསྔལ་བ་མ་ཡིན་ཏེ། དགའ་བ་བདེ་བའི་རིགས་ཡིན་པའི་ཕྱིར་རོ། །དེའི་ཕྱིར་སྡུག་བསྔལ་གྱི་ཕྲ་བ་ཉིད་ནི་བདེ་བ་མྱོང་བའི་རང་བཞིན་གྱི་དུས་ན་མེད་དོ་ཞེས་ངེས་པ་ཡིན་ནོ། །དེ་ལྟར་ན་ཡང་སྡུག་བསྔལ་ནི་བརྟགས་པས་གློ་བུར་བ་ཡིན་ཏེ། འདི་ལྟར་རྒྱུ་མ་ཚང་བའི་ཕྱིར། བརྒྱ་ལ་དམིགས་པ་མ་ཡིན་ནོ་ཞེས་པའོ། །འདིར་གལ་ཏེ་འགལ་རྐྱེན་ཞེས་པ་ལ་སོགས་པ་སྨོས་ཏེ། སྡུག་བསྔལ་དང་འགལ་བའི་བདེ་བའི་རྐྱེན་ནི་རྒྱུ་སྟེ་གང་རིག་པའོ། །དེས་སྐྱེས་པས་ཏེ། མངོན་པར་ཕྱོགས་པ་ཡོད་པ་ནའོ། །ཡང་ན་འགལ་བའི་རྐྱེན་བདེ་བའི་རྒྱུ་སྐྱེས་ཤིང་སྐྱེ་བ་ནའམ། འགལ་བའི་རྐྱེན་གང་གི་ཡིན་པ་ཞེས་པའོ། །དེ་སྐྱེས་པ་ན་ཡང་སྟེ་རབ་ཏུ་དགའ་བའི་གནས་སྐབས་ན་རྒྱུ་དང་བྲལ་བའི་ཕྱིར་སྡུག་བསྔལ་མི་སྐྱེ་བ་ནི་སྡུག་བསྔལ་མ་སྐྱེས་པར་བརྗོད་དོ་ཞེ་ན། དེའི་ཚེ་རྟོག་པས་མངོན་པར་ཞེན་པ་ཉིད་ཀྱི་ཚོར་བ་ཞེས་པ་འོངས་པ་ཉིད་མ་ཡིན་ནམ། ཅི་སྟེ་གང་དེ་ཉིད་ནི་ཁོ་བོ་ཅག་གིས་བརྗོད་པ་དེ་ཉིད་ད་ལྟར་གྲུབ་ཅིང་འོངས་པ་ཡིན་ཏེ། ཅི་ཞིག་རྟོག་པས་མངོན་པར་ཞེན་ཅིང་རྟོག་པས་བྱས་པའི་མངོན་པར་ཞེན་པར་བྱེད། ཉིད་ཅེས་པ་ནི་ངེས་པར་གཟུང་བའི་དོན་ཏེ། དེ་ཉིད་ཚོར་བ་བདེ་བ་དང༌། སྡུག་བསྔལ་དང༌། དེ་དག་ལས་གཞན་པ་ཡིན་ཏེ། གཞན་དངོས་པོའི་བདེ་བ་ལ་སོགས་པའམ། བདེ་བ་ལ་སོགས་པའི་རྒྱུ་ཡོད་པ་མ་ཡིན་ནོ། །འདི་ལྟར་ཡང་གཉུག་མའི་རང་བཞིན་དང་བྲལ་བ་ན་ཡང་གང་ཞིག་བདེ་བའི་
རྒྱུ་ཉིད་དུ་ཡོངས་སུ་བརྟགས་པ་དེ་མངོན་པར་ཞེན་པ་ལས་བདེ་བ་མྱོང་ངོ་ཞེས་སྐྱེ་བར་འགྱུར་ཏེ། གཞན་འདི་ལས་གཞན་ནོ། །གཞན་དུ་ན་ཇི་ལྟར་གང་ཉིད་གཞན་སྡུག་བསྔལ་གྱིས་སྒྲུབ་པར་བྱེད་པ་དེ་ཉིད་གཞན་བདེ་འགའ་ཞིག་གིས་སྒྲུབ་པར་བྱེད་པར་འགྱུར། གཅིག་པོ་དེའི་གང་ཞིག་སྒྲ་ཐོས་པ་ལས་ཀྱང་སྡུག་བསྔལ་དུ་འགྱུར་ན་ཡང་དུས་གཞན་དུ་མཐོང་བ་ལས་དགའ་བའི་ངོ་བོ་སྐྱེ་བར་འགྱུར་ཏེ། དེ་ལྟ་བས་ན་བདེ་བ་ལ་སོགས་པ་དང༌། དེའི་སྒྲུབ་པའི་ཐབས་ནི་བརྟགས་པ་ཡིན་ཏེ། དངོས་པོ་པ་མ་ཡིན་ནོ་ཞེས་གསུངས་པ་ཡིན་ཏེ། སྦྲུལ་ནི་རྨ་བྱའི་བདེ་བའི་ཆེད་དུ་སྐྱེ་འགྱུར་ཏེ། །དུག་ལ་གོམས་དང་ལྡན་པས་དུག་ནི་བཅུད་ལེན་ཡིན། །ཚོར་བས་རྔ་མོའི་ཁ་ཡི་ཟུག་རྡུ་ནི། །དགའ་བའི་ཁྱད་པར་གྱི་ནི་རྒྱུ་རུ་འགྱུར། །ཞེས་སོ། །ཚོར་བར་མངོན་པར་ཞེན་པའི་རང་བཞིན་ཡིན་པས་རྣམ་པར་དཔྱད་པ་ཉིད་ཀྱིས་ལྡོག་ནུས་སོ་ཞེས་བསྟན་པའི་ཕྱིར། དེ་ཉིད་ཕྱིར་ན་ཞེས་པ་ལ་སོགས་པ་གསུངས་ཏེ། གང་ཉིད་ཀྱི་ཕྱིར་ཚོར་བ་མངོན་པར་ཞེན་པ་དེ་ཉིད་ཀྱི་ཕྱིར་རྣམ་པར་དཔྱོད་པ་འདི་ནི་རྣམ་པར་རྟོག་པ་འདི་ཡིན་ལ། བདེ་བ་ལ་སོགས་པ་མངོན་པར་ཞེན་པའི་ངོ་བོ་འདིའི་གཉེན་པོ་སྟེ། འགལ་འགེགས་ཀྱི་རྒྱུ་ཡིན་པའི་ཕྱིར་རོ། །བསྒོམ་པ་ནི་སེམས་པར་བྱེད་པ་ཡིན་ལ། དེའི་སྒྲུབ་པར་བྱེད་པ་མེད་ན་དེའི་མངོན་པར་ཞེན་པ་མེད་པའི་ཕྱིར་རོ། །གཞན་ཡང་འདིས་ཀྱང་ཚོར་བ་མངོན་པར་ཞེན་པ་ཡིན་ནོ་ཞེས་བསྟན་པའི་ཕྱིར། རྣམ་རྟོག་ཅེས་པ་ལ་སོགས་པ་གསུངས་ཏེ། དེ་ཉིད་ཀྱི་ཕྱིར་ཞེས་པ་ནི་འདིར་ཡང་འབྲེལ་ཏོ། །རྣམ་པར་རྟོག་པ་ཉིད་ཞིང་ཡིན་ཏེ། སྐྱེ་བའི་ས་ཡིན་པའི་ཕྱིར་རོ། །དེར་སྐྱེས་པ་ནི་ཡང་དག་པར་བྱུང་བའོ། །བསམ་གཏན་ནི་འདོད་པ་དང་བྲལ་བ་དང༌། སྡིག་པ་མི་དགེ་བའི་ཆོས་རྣམས་དང་བྲལ་བས་རྟོག་པ་དང་བཅས་པ་དང་དཔྱོད་པ་དང་བཅས་པ་དང༌། ཏིང་ངེ་འཛིན་ལས་བྱུང་བའི་དགའ་བ་དང་བདེ་བ་ཞེས་པ་ལ་སོགས་པའི་བསམ་གཏན་ནི་བསྒོམ་པ་ཡིན་ནོ། །ཏིང་ངེ་འཛིན་ནི་སྙོམས་པར་འཇུག་པ་ཡིན་ནོ། །རྣམ་པར་རྟོག་པ་ལས་བྱུང་བ་ཡིན་པའི་ཕྱིར་རོ། །དེ་ཉིད་ཟས་ཡིན་ལ་ལུས་ཚིམ་པར་བྱེད་པའི་རྒྱུ་ཡིན་
པའི་ཕྱིར་ཏེ། གང་རྣམས་ཀྱི་དེ་དག་ཡིན་པ་དེ་ལ་དེ་སྐད་ཅེས་བྱའོ། །གང་རྣམས་ཀྱིས་ཤེ་ན། རྣལ་འབྱོར་བའི་སྟེ། འདི་ནི་གང་གི་ཕྱིར་ཏེ། རྟོག་པས་སྤྲུལ་པའི་དགའ་བ་དང་བདེ་བའི་ཟས་ཀྱིས་གཟུང་བའི་ལུས་ནི་རྣལ་འབྱོར་བའི་ཡིན་ནོ། །དེ་ལྟ་བས་ན་ཚོར་བ་ནི་རྟོག་པའི་མངོན་པར་ཞེན་པ་ཡིན་ནོ་ཞེས་གྲུབ་བོ། །དེ་ལྟར་རྒྱུ་ཁས་བླངས་ནས་ཚོར་བར་མངོན་པར་ཞེན་པ་བསྟན་པའི་ཕྱིར་ནི་རྒྱུ་ཉིད་མི་སྲིད་པའི་ཕྱིར་ཚོར་བ་དངོས་པོ་ལ་ཡོད་པ་ཉིད་དུ་མི་རིགས་པར་བསྟན་པའི་ཕྱིར་རོ། །གང་གི་དབང་དོན་ཞེས་བྱ་བ་ལ་སོགས་པ་གསུངས་ཏེ། འདིར་བསྡུས་པའི་དོན་ནི་འདི་ཡིན་ཏེ། རེག་པའི་རྐྱེན་གྱིས་ཚོར་བ་ཡིན་ལ། ཡུལ་དང་དབང་པོ་དང་རྣམ་པར་ཤེས་པ་གསུམ་པོ་དག་འདུས་པ་ནི་རེག་པ་ཡིན་ཏེ། རེག་པ་དྲུག་འདུས་པ་ལས་བྱུང་ཞེས་པའི་ཚིག་ལས་སོ། །གསུམ་འདུས་པ་ལས་བྱུང་བའི་རེག་པ་ཉིད་དེ་ཡང་རིགས་པ་མ་ཡིན་ལ། དེའི་རྐྱེན་གྱིས་ཚོར་བ་གང་ལས་འགྱུར། འདིར་ཡང་དབང་དོན་བར་དང་བཅས་པར་འགྱུར་བའམ། དེ་བར་མེད་པར་འགྱུར་བ་ཡིན། དེ་ལ་དབང་པོ་དང་ཡུལ་ཏེ་དབང་པོ་དང་ཡུལ་དག་པར་དང་བཅས་པ་སྟེ། བར་དང་བཅས་པ་གལ་ཏེ་ཡིན་ན་དེའི་ཚེ་ཕྲད་པ་སྟེ། འདུས་ཤིང་ཚོགས་པ་གང་ལས་འགྱུར། དབང་པོ་དང་དོན་འདི་དག་ཕྲད་པར་རིགས་པ་མ་ཡིན་ཏེ། རེག་པ་ཡང་འདུས་པ་ལ་བརྗོད་ལ་བར་ཆོད་པ་ཡིན་ན་ཡང་དེར་ཇི་ལྟར་འགྱུར་ཞེས་དགོངས་པ་ཡིན་ནོ། །འོན་ཏེ་གཉིས་བའི་རྣམ་པ་ཡིན་ན་དེ་ཡང་རིགས་པ་མ་ཡིན་ནོ་ཞེས་བསྟན་པའི་ཕྱིར། བར་མེད་ན་ཡང་ཞེས་པ་ལ་སོགས་པ་གསུངས་ཏེ། བར་མེད་ན་ཡང་བར་ཆད་པ་མེད་པ་ཡིན་པས་གཅིག་ཉིད་ཡིན་ཏེ། དབང་པོ་དང་ཡུལ་དག་དེའི་བདག་ཉིད་ཡིན་ནོ། །ཆ་ཆུང་ཞིག་གིས་གྱང་གལ་ཏེ་ཚོད་པ་མ་ཡིན་ན་དེ་ལྟ་ན་ཡང་བདག་ཉིད་ཐམས་ཅད་ཀྱིས་བར་མེད་པར་འགྱུར་རོ། །བདག་ཉིད་ཐམས་ཅད་ཀྱིས་དེར་འདུས་པ་ཡིན་ན་ཡང་དེ་ཉིད་ཡིན་ནོ། །དེ་ལྟར་ན་ཡང་གང་ཞིག་གང་དང་ཕྲད་པར་འགྱུར་ཏེ། གཅིག་ཡིན་ན་ཐ་དད་པ་མེད་པའི་ཕྱིར། གང་ཞིག་གང་དང་ཕྲད་བར་འགྱུར།
བདག་ཉིད་བདག་དང་ཕྲད་པ་ནི་རིགས་པ་མ་ཡིན་ནོ། །དེ་ལྟར་ན་ཡང་རྡུལ་ཕྲ་རབ་རྣམས་ཆ་ཤས་མེད་པ་ཉིད་དངོས་པོ་ལ་ཕྲད་པ་ཡིན་ལ། དེ་ལ་ཆ་ཤས་དང་ལྡན་པའི་ཕྲད་པ་མ་ཡིན་ཏེ། རགས་པ་ཉིད་ལ་དེ་སྲིད་པའི་ཕྱིར་རོ། །དེ་ལ་ཡང་ཕྲད་པ་སུན་ཕྱུང་བ་ཉིད་ཀྱིས་ཅུང་ཟད་ཅིག་སུན་ཕྱུང་བ་མ་ཡིན་ནོ་ཞེ་ན། འདི་ལ་རྡུལ་ཕྲན་ཞེས་པ་ལ་སོགས་པ་གསུངས་ཏེ། རྡུལ་ཕྲ་རབ་རྣམས་ལ་ཡང་འདི་ལྟར་ཕྲད་པར་རིགས་པ་མ་ཡིན་ཏེ། གང་གི་ཕྱིར་རྡུལ་ཕྲ་རབ་གཅིག་ཀྱང་རྡུལ་ཕྲ་རབ་གཞན་ལ་འཇུག་པ་མེད་དེ། ནང་དུ་འཇུག་པ་ཡོད་པ་མ་ཡིན་ནོ། །ཅིའི་ཕྱིར་ཞེ་ན། དེ་ནི་གང་གི་ཕྱིར་ཏེ། སྐབས་མེད་ཅིང་རྡུལ་ཕྲ་རབ་ལ་མཚམས་མེད་པའོ། །མཉམ་པ་དེ་མཚུངས་པ་ཡིན་ཏེ། མཐོ་བ་དང་དམའ་བ་མེད་པའི་ཕྱིར་རོ། །དེའི་ཕྱིར་ཇི་ལྟར་ཆ་མེད་པ་ལ་ཕྲད་པ་ཡོད་དོ། །དེ་ལྟར་ཡིན་ན་ཡང་རྡུལ་ཕྲ་རབ་རྡུལ་ཕྲ་རབ་ལ་འཇུག་པར་མ་གྱུར་མོད། ཕྲད་པ་ཙམ་འབའ་ཞིག་ནི་ཡོད་པ་ཡིན་ཏེ། དེ་ལྟ་བས་ན་བསྒྲུབ་བྱ་གྲུབ་པ་མ་ཡིན་ནོ་ཞེ་ན། མ་ཞུགས་ཞེས་པ་ལ་སོགས་པ་གསུངས་ཏེ། རྡུལ་ཕྲ་རབ་ནི་བདག་ཉིད་ཐམས་ཅད་ཀྱིས་འབྲེལ་པ་ནི་ཕྲད་པ་ཡིན་ཏེ། གཞན་དུ་ན་ཆ་ཤས་དང་བཅས་བར་ཐལ་བར་འགྱུར་པའི་ཕྱིར་རོ། །དེ་ལྟར་ན་ཡང་དེའི་རང་བཞིན་བདག་ཉིད་ཐམས་ཅད་ཀྱིས་ཁྱབ་པ་ཡིན་ཏེ། དེ་ལྟར་ན་དེའི་རང་བཞིན་མ་འདྲེས་པ་ལ་ཕྲད་པ་མེད་པར་འགྱུར་རོ། །དེ་ལ་འདྲེས་པ་ཉིད་ནི་དེ་ལ་ཞུགས་པ་མེད་པར་འགྱུར་པ་མ་ཡིན་ནོ། །འདིར་མ་ཞུགས་ཤིང་ཞུགས་པ་མེད་པ་ཡིན་ན་འདྲེས་པ་མ་ཡིན་ལ། ཐ་དད་པའི་རང་བཞིན་མ་ཡིན་ན། མ་འདྲེས་པ་ལ་སྟེ་འདྲེས་པ་མེད་པ་ལ་ཕྲད་ཅིང་ཚོགས་པ་མ་ཡིན་ནོ། །ཆ་མེད་པ་ཡང་རྣམ་པ་ཐམས་ཅད་དུ་ཕྲད་པར་རིགས་པ་མ་ཡིན་ནོ་ཞེས་བསྟན་པའི་ཕྱིར། ཆ་མེད་པའང་ཞེས་པ་ལ་སོགས་པ་གསུངས་ཏེ། ཆ་མེད་པ་ནི་སྟོང་པ་ཉིད་ཀྱི་དངོས་པོ་ཡིན་ལའང་ཞེས་པ་ནི་ཉེས་པའི་གཞན་སོགས་པ་ཡིན་ནོ། །ཕྲད་པ་ནི་ཚོགས་པ་ཞེས་བྱ་བ་ཡིན་ལ། དེ་ཇི་ལྟར་འཐད་བར་འགྱུར་ཏེ་ཞེས་སྨོས་པ་ནི་སྲིད་པའི་ཚིག་སྟེ། ཇི་ལྟར་ཕྲད་པར་རིག་པར་འགྱུར། ཕྲ་བ་ཐམས་ཅད་ཀྱང་
ངེས་པར་ཆ་གཅིག་གི་སྒོ་ནས་འགྱུར་བར་བྱའོ། །ཡང་གང་ལ་ཆ་མེད་པ་ཉིད་དེའི་ལུས་ཀྱི་ཆ་མེད་པ་ལས་མེད་པ་ཉིད་ཐོབ་བོ་ཞེས་དགོངས་སོ། །འདི་ལ་ཆ་ཙམ་ཡང་ཚད་མས་རྟོགས་པ་གང་ན་ཡང་ཡོད་པ་མ་ཡིན་ནོ་ཞེས་བསྟན་པའི་ཕྱིར། རྣམ་ཤེས་ལུས་མེད་པ་ཞེས་པ་ལ་སོགས་པ་གསུངས་ཏེ། ནི་ཞེས་པ་ནི་ཤིན་ཏུ་བསྒྲུབ་པ་སྟེ། རྣམ་པར་ཤེས་པ་ནི་ཡུལ་རྣམ་པར་རིག་པ་ཡིན་ལ། ཡང་ཕྲད་པར་འཐད་པ་མ་ཡིན་ཏེ། རིགས་པ་མ་ཡིན་ནོ། །ཅིའི་ཕྱིར་ཞེ་ན། ལུས་མེད་པའི་ཕྱིར་ཞེས་ཏེ། འདི་གཏན་ཚིགས་ཀྱི་ཚིག་ཡིན་ལ། ལུས་ཀྱིས་སྟོང་བའི་རྣམ་པར་ཤེས་པ་ནི་སྟེ། ལུས་མེད་པའི་ཕྱིར་ཞེས་པའི་དོན་ཏོ། །ཕན་ཚུན་འབྲེལ་བ་ཉིད་ནི་ཕྲད་པ་ཡིན་ལ། དེ་ཡང་ལུས་དད་ལྡན་པ་ཉིད་ལ་ཡོད་དོ། །གང་ལ་ཡང་ལུས་མེད་པ་དེ་ལ་ཇི་ལྟར་ཕྲད་པར་འགྱུར། དེ་ལྟར་ན་གསུམ་ཀ་ལ་ཡང་ཕྲད་པ་བཀག་ནས། ད་ནི་ཚོགས་པ་ཉིད་དངོས་པོ་ལ་ཡོད་པ་མ་ཡིན་ནོ་ཞེས་བསྟན་པའི་ཕྱིར། ཚོགས་པ་ཞེས་པ་ལ་སོགས་པ་གསུངས་ཏེ། འང་གི་སྒྲས་ནི་ཉེས་པ་གཞན་སྡུད་པ་ཡིན་ལ། ཚོགས་པ་འང་སྟེ་འདུས་པ་ཡང་ངོ༌། །རྟའི་རྭ་བཞིན་དུ་དངོས་པོ་མེད་པའི་ཕྱིར་ཏེ། དངོས་པོ་དེ་ཁོ་ན་ཉིད་དང་བྲལ་བའི་ཕྱིར་ཕྲད་པ་ཉིད་དུ་རིགས་པ་མ་ཡིན་ནོ་ཞེས་རང་བཞིན་དང་འགྲེལ་ཏེ་ཚོགས་པ་ཉིད་མེད་པའི་ཕྱིར་རོ། །ཇི་ལྟར་ཡང་དངོས་པོ་མེད་པ་ཉིད་ཡིན་ཞེ་ན། སྔར་ནི་ཇི་ལྟར་རྣམ་དཔྱད་བཞིན། །ཞེས་ཏེ། ཇི་ལྟར་སྔར་གཏན་ལ་ཕབ་པ་བཞིན་ཡིན་ཏེ། དེ་བཞིན་སོར་མོའི་ཚོགས་ཉིད་ཅེས་པ་ལ་སོགས་པ་གསུངས་སོ། །རྒྱུ་མེད་པ་ཉིད་མཇུག་བསྡུ་བའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟ་བས་ན་བསྟན་པའི་རིམ་པས་རེག་པ་ཡོད་མིན་ཏེ། གསུམ་འདུས་པ་མེད་པ་ན་ཚོར་བ་མེད་པ་ཡིན་ལ། ཚོར་བ་ནི་བདེ་བ་ལ་སོགས་པའི་ངོ་བོ་ཡིན་ཏེ། འབྱུང་བ་ནི་སྐྱེ་བ་ཡིན་ལ། དེ་གང་ལས་རིགས་པར་འགྱུར་བ་ཡིན་ཏེ། རྒྱུ་མེད་པ་ན་འབྲས་བུ་སྲིད་པ་མ་ཡིན་ནོ། །དེའི་ཕྱིར་དོན་དམ་པར་ཚོར་བ་མེད་པར་ཕན་པ་དང་ཕན་པ་མ་ཡིན་པའི་ཡུལ་མེད་པའི་
ཕྱིར་ཅིའི་དོན་དུ་ངལ་བ་འདི་ཡིན། བདེ་བ་དང་སྡུག་བསྔལ་སྤང་བའི་ཆེད་དོན་དག་ཏུ་ངལ་བ་བྱེད་པ་ཡིན་ན། དེ་ཅིའི་ཕྱིར། ནམ་མཁའ་ལྡང་བའི་དོན་བཞིན་དུ་རིགས་པ་མ་ཡིན་ཞེས་དགོངས་སོ། །བདེ་བ་བསྒྲུབ་པའི་ཆེད་དུ་ངལ་བར་མ་གྱུར་མོད། སྡུག་བསྔལ་ཤིན་ཏུ་བཟོད་པར་མི་ནུས་པའི་ཕྱིར་རོ། །དེ་སྤང་བའི་དོན་དུ་འགྱུར་རོ་ཞེ་ན། གང་ལས་གང་ལ་གནོད་པར་འགྱུར། །ཞེས་གསུངས་ཏེ། ཚོར་བ་རྣམ་པར་དཔྱད་པས་རང་བཞིན་མེད་པའི་ཕྱིར་ཇི་ལྟར་གནོད་པའི་ཡིན་ཏེ་རྣམ་བར་དཔྱད་པས་སོ། །བདག་ལ་སོགས་པ་སྔར་བསལ་བའི་ཕྱིར་ཚོར་བ་པོ་མེད་པའི་ཡིན་ནོ། །དགོད་པར་བྱེ་དཔའི་རྒྱུ་ཡང་རྣམ་པར་རྟོག་བས་བརྟགས་པའི་ཕྱིར་དོན་དམ་པར་ཡོད་པའི་མ་ཡིན་ནོ། །དེའི་ཕྱིར་དེ་ལྟར་ན་གང་གིས་གནོད་པར་འགྱུར་ཏེ། སྡུག་བསྔལ་གྱི་ཚོར་བ་དང་བྲལ་བའི་ཕྱིར་གནོད་པར་བྱེད་པའི་རྒྱུ་དང་བྲལ་བའི་ཕྱིར་གང་ལས་འགྱུར་ཏེ། དོན་དམ་པར་གང་གི་ཡང་གང་ལས་ཀྱང་འགྱུར་བ་མ་ཡིན་ནོ། །དེ་ལྟ་བས་ན་ཚོར་བ་པོ་མེད་པའི་ཕྱིར་ཚོར་བ་ཡང་རིགས་པ་མ་ཡིན་ནོ། །དེ་ནི་ཚོར་བ་མེད་པའི་ཕྱིར་དེའི་རྐྱེན་ལས་བྱུང་བའི་སྲིད་པ་ཡང་རྒྱུ་དང་བྲལ་བའི་ཕྱིར་དོན་དམ་པར་སྐྱེ་བར་རིགས་པ་མ་ཡིན་ནོ་ཞེས་བསྟན་པའི་ཕྱིར། གང་གི་ཚེ་ཞེས་པ་ལ་སོགས་པ་གསུངས་ཏེ། གང་གི་ཚོར་བ་མྱོང་བ་དེ་ནི་ཚོར་བ་པོ་ཡིན་ལ། གང་གི་ཚེ་བདག་ལ་སོགས་པ་ཅུང་ཟད་ཀྱང་ཡོད་པ་མ་ཡིན་ཏེ། དེ་མེད་པའི་ཕྱིར་དང༌། དེ་མ་ཐག་ཏུ་དཔྱད་ཟིན་པའི་ཕྱིར་ཚོར་བ་ཡོད་པ་མ་ཡིན་ལ། དེའི་ཚེ་གནས་སྐབས་འདི་ལྟ་སྟེ། རྣམ་པ་འདི་ལྟ་བུ་ལའོ། །གང་གི་སྐྱེ་བ་དང་བྲལ་བ་མཐོང་ནས་སྟེ། དམིགས་ནས་སྲེད་པ་ཅིའི་ཕྱིར་ལྡོག་མི་འགྱུར་ཏེ། དེའི་སྡུག་བསྔལ་བས་སྡུག་བསྔལ་བར་འགྱུར་ན་ཡང༌། ལྟོས་པ་མེད་པ་ཉིད་དུ་ཅིའི་ཕྱིར་ལྡོག་པར་མི་འགྱུར། གང་ཞིག་ད་ལྟར་ཡང་དེ་དང་བདག་བྲལ་ཞིང་ལྡོག་པ་ཉིད་དུ་ཅི་སྟེ་དོར་བར་མི་བྱེད། དེ་ལྟ་གྱུར་ན་ཡང་གལ་ཏེ་ཚོར་བར་བྱེད་པ་པོ་མེད་པར་ཚོར་བ་ཡང་མེད་པ་ཡིན་ན། གང་གིས་ན་འདི་ལྟར་བདེ་བསྒྲུབ་པར་བྱེད་པ་ཉིད་ཀྱིས་དངོས་པོ་རྣམས་ལ་མཐོང་བ་ལ་སོགས་པའི་ཐ་སྙད་འཇུག་པར་
འགྱུར་ཞེ་ན། འདི་ལ་མཐོང་བ་ཞེས་པ་ལ་སོགས་པ་གསུངས་ཏེ། མཐོང་བ་ཡང་གང་མིག་གི་དབང་པོས་སོ། །རེག་པ་ཡང་ལུས་ཀྱི་དབང་པོ་ལས་སྐྱེས་པའི་སེམས་ཀྱིས་ཤེས་པས་སོ། །གལ་ཏེ་དེ་ལྟར་ན་སེམས་ཀྱིས་ཚོར་བ་པོ་དངོས་པོ་ལ་ཡོད་དོ་ཞེ་ན། རྨི་ལམ་སྒྱུ་འདྲའི་བདག་ཉིད་ཀྱིས། །ཞེས་གསུངས་ཏེ། རང་བཞིན་གྱིས་རྨི་ལམ་ལྟ་བུ་ཡིན་ལ། རང་བཞིན་གྱིས་སྒྱུ་མ་ལྟ་བུ་ཡིན་ནོ། །རྟེན་ཅིང་འབྲེལ་པར་འབྱུང་བ་ལས་སྐྱེས་པའི་སེམས་ཉིད་ཀྱིས་ཡིན་གྱི། དོན་དམ་པར་ཡོད་པ་མ་ཡིན་ནོ། །ལན་འགའ་ཡང་དེ་ལས་ཐ་དད་པ་སེམས་ཀྱིས་མཐོང་བ་ནི་མ་ཡིན་ལ། ལྷན་ཅིག་སྐྱེས་པའི་ཕྱིར་ཏེ། སེམས་དང་ལྷན་ཅིག་སྐྱེས་པ་ཉིད་དུ་དེ་མཐོང་བ་ཡིན་ཏེ། ཚོགས་པ་གཅིག་ལ་འབྲེལ་པའི་ཕྱིར་དང༌། རྟེན་ཅིང་འབྲེལ་པར་འབྱུང་བ་བསམ་གྱིས་མི་ཁྱབ་པའི་ཕྱིར་རོ། །དོན་དམ་པར་མཐོང་བ་ནི་ཡོད་པ་ནི་མ་ཡིན་ལ། གང་གིས་འདི་ལྟར་མཐོང་བའི་ཐ་སྙད་དུ་འགྱུར་བ། ཚོར་བ་དེ་ཡིས་མཐོང་བ་མ་ཡིན་ཏེ། གང་གིས་བདེ་བ་སྒྲུབ་པར་བྱེད་པ་ལ་སོགས་པའི་ཐ་སྙད་མཐོང་བ་ཡང་གཞན་ཉིད་ཡིན་པའི་རྒྱུ་དེས་ན་ཚོར་བ་མཐོང་བ་མ་ཡིན་ཏེ། དངོས་པོ་ལ་མཐོང་བ་མ་ཡིན་ནོ། །འོན་ཏེ་དེ་ལྟར་ན་ཡང་ལྷན་ཅིག་སྐྱེས་པ་མཐོང་བ་མ་ཡིན་ལ། འོན་ཀྱང་ཤེས་པ་ཡུལ་གྱི་རྣམ་པ་ཅན་གྱིས་དེ་སྐྱེ་བར་འགྱུར་བ་དུས་ཕྱི་མ་ལ་འཛིན་པར་བརྗོད་དོ་ཞེ་ན། འདི་སུན་དབྱུང་བའི་དོན་དུ་སྔར་དང་ཤེས་པ་ལ་སོགས་པ་གསུངས་ཏེ། ངེས་པར་ལྷན་ཅིག་ཏུ་སྐྱེས་པའི་ཚོར་བ་ཡིན་ཏེ། གཞན་དུ་ན་སྔར་ཏེ་སྔར་བྱུང་བ་དང༌། ཕྱི་མར་ཏེ་ཕྱིས་ཀྱི་དུས་ཀྱི་ཡིན་ལ། སྐྱེས་པ་སྟེ་བྱུང་བའི་ཤེས་པ་དེས་དྲན་པར་འགྱུར་གྱི་མྱོང་བ་མ་ཡིན་ཏེ། མྱོང་བ་མ་ཡིན་ལ་དྲན་པའི་ངོ་བོས་ཡུལ་དུ་བྱེད་པ་ཡིན་ལ་མངོན་སུམ་དུ་རིགས་པ་མ་ཡིན་ཏེ། ཤེས་པ་དེའི་དུས་ན་དེ་འདས་པའི་ཕྱིར་རོ། །འདས་པའི་ནི་རང་གི་ངོ་བོ་མྱོང་བར་རིགས་པ་མ་ཡིན་ཏེ། མེད་པ་ཉིད་ཡིན་པའི་ཕྱིར་རོ། །མྱོང་བ་ནི་རང་གི་ངོ་བོ་ཉམས་སུ་མྱོང་བ་ཡིན་ཏེ། དེ་ལྟ་བས་ན་འདི་ནི་ན་པ་ཙམ་ཡིན་ལ། དེ་ལ་རང་གི་ངོ་བོ་མྱོང་བ་ནི་རིགས་པ་མ་ཡིན་ནོ། །ཚོར་བ་ནི་
རང་གི་ངོ་བོ་རྣམ་པར་འཇོག་པར་བྱེད་པའི་མཚན་ཉིད་དུ་རིགས་པ་མ་ཡིན་ནོ་ཞེས་བསྟན་པའི་ཕྱིར། རང་གི་བདག་ཉིད་ཅེས་པ་ལ་སོགས་པ་གསུངས་ཏེ། རང་གི་བདག་ཉིད་དེ་རང་གི་ངོ་བོ་ཡིན་ལ། མྱོང་མིན་ལ་སྟེ། རིག་པ་མ་ཡིན་ཏེ། རང་རིག་པ་སྔར་སུན་ཕྱུང་བའི་ཕྱིར་རོ། །དེ་ལྟར་ན་ཤེས་པ་གཞན་དེས་ཚོར་བ་མྱོང་བ་ཡིན་ནོ་ཞེས། གཞན་དག་གིས་ཀྱང་མྱོང་བ་མ་ཡིན་ཞེས་གསུངས་ཏེ། གཞན་ཉིད་ཀྱིས་ནི་མ་ཡིན་ཏེ། དེ་དང་མཚུངས་པའི་དུས་དུས་སུ་བྱུང་བའི་ཞེས་པས་མྱོང་བ་མ་ཡིན་ཞིང་རིག་པ་མ་ཡིན་ཏེ། ཤེས་པ་བཞིན་ཤེས་པ་གཞན་གྱིས་མྱོང་བ་མེད་པའི་ཕྱིར་རོ། །ཚོར་བ་པོ་ཡང་ཡོད་པ་མ་ཡིན་ཏེ། གང་ལ་ཞེ་ན། ཚོར་བ་ཅུང་ཟད་ཀྱང་མ་མྱོང་བ་ལས་ཏེ། སེམས་སམ་གཞན་གྱིས་མྱོང་བ་ཚོར་བ་པོ་འགའ་ཡང་ཡོད་པ་མ་ཡིན་ནོ། །དེས་ན་རྒྱུ་འདིར་ཚོར་བ་མེད་པ་ཡིན་ཏེ། ཚོར་བའི་མཚན་ཉིད་ཀྱིས་སྟོང་པའི་ཕྱིར་རོ། །མངོན་པར་ཞེན་པ་ལས་མ་གཏོགས་པ་ཚོར་བ་འདིར་དེ་ཁོ་ན་ཉིད་དུ་ཡོད་པ་མ་ཡིན་ལ། དོན་དམ་པར་ཡོད་པ་མ་ཡིན་ནོ། །དེའི་རང་བཞིན་ངོ་བོ་རྟོགས་པར་བྱེད་པ་ཅུང་ཟད་ཀྱང་ཡོད་པ་མ་ཡིན་པའི་ཕྱིར་རོ། །དེ་སྐད་དུ་འཕགས་པ་བློ་གྲོས་མི་ཟད་པའི་མདོ་ལས། འོན་ཀྱང་ཡང་ཚོར་བ་ནི་མངོན་པར་ཞེན་པའོ། །ཚོར་བ་ནི་ཡོངས་སུ་འཛིན་པའོ། །ཚོར་བ་ནི་ཉེ་བར་ལེན་པའོ། །ཚོར་བ་ནི་དམིགས་པའོ། །ཚོར་བ་ནི་རྣམ་པར་རྟོག་པའོ་ཞེས་བྱ་བ་ལ་སོགས་པ་གསུངས་སོ། །ཆོས་ཡང་དག་པར་བསྡུ་བའི་མདོ་ལས་ཀྱང་གསུངས་ཏེ། ཚོར་བ་མྱོང་བ་རབ་བསྟན་པ། །ཚོར་བ་པོ་ལས་ཚོར་བ་གཞན། །གུད་ན་ཡོད་པ་མ་ཡིན་ན། །གང་གིས་དེ་ནི་ཚོར་བར་འགྱུར། །བྱང་ཆུབ་ཅི་འདྲ་དེ་བཞིན་དུ། །ཞི་ཞིང་ངག་ལ་འོད་གསལ་བར། །ཚོར་བ་འདི་ལ་མཁས་པ་རྣམས། །དྲན་པ་དེ་འདྲ་ཉེ་བར་གཞག །ཅེས་གསུངས་སོ། །དེ་ལྟ་བས་ན་ཚོར་བ་པོ་དང༌། ཚོར་བའི་རང་བཞིན་སྟོང་པ་ཉིད་ཡིན་ལ། ཅི་དེ་ལྟ་བས་ན་རྟེན་ཅིང་འབྲེལ་པར་འབྱུང་བ་ཡིན་ལ་བྱ་བ་མེད་པ་ཡིན་ཞིང༌། བདག་པོ་མེད་པ་སྒྱུ་མ་སྤྲོས་པ་བཞིན་དུ་དམིགས་པའི་སྤྱོད་ཡུལ་དུ་གྱུར་པའི་ལུས་འདི་སྣང་ངོ༌། །དེའི་ཕྱིར་བདེ་བའམ་
སྡུག་བསྔལ་བདག་གིར་འགྱུར་བ་ཡོད་པ་མ་ཡིན་ནོ་ཞེས་བསྟན་པའི་ཕྱིར། དེ་ལྟར་བདག་མེད་ཅེས་པ་ལ་སོགས་པ་གསུངས་ཏེ། བདག་མེད་པ་ལ་གང་གི་ཡང་བདག་ལ་སོགས་པའི་རིགས་པ་པོ་མེད་པས་བདག་པོ་མེད་པའི་ཚོགས་འདི་ལ་གཅིག་རྗེས་སུ་འགྲོ་བ་མེད་པའི་ཕྱིར་རྟེན་ཅིང་འབྲེལ་པར་འབྱུང་བ་ཙམ་འདི་ལ་སྒྱུ་མའི་རང་བཞིན་དང་འདྲ་བ། དམིགས་པའི་སྤྱོད་ཡུལ་དུ་ཉེ་བར་གྱུར་པ་ཉིད་མིག་འཕྲུལ་བཞིན་དུ་མཐོང་བ་ན། རྨད་དུ་འབྱུང་བ་སྨྲ་བ་ནི། འདི་ཅི་སྟེ་གནོད་པར་བྱ་ཞེས་ཏེ། འདིས་ཇི་ལྟར་བརྗོད་པའི་རིམ་པས་མྱོང་བ་པོ་འགའ་ཡང་མེད་པ་དང༌། ཚོར་བ་ཡང་འགའ་ཡང་མེད་ན། དོན་དམ་པར་ཚོར་བ་འདིས་གང་ལ་གནོད་པར་བྱ་སྟེ། སྡུག་བསྔལ་བར་བྱ་ལ། རྣམ་པར་དཔྱད་ན་ཅུང་ཟད་ཀྱང་མ་ཡིན་ནོ། །དེ་ལྟ་བས་ན་འདི་ནི་ཕྱིན་ཅི་ལོག་གི་རྣམ་པར་རྟོག་པ་ཉིད་ཀྱིས་བདེ་བ་ལ་སོགས་པའི་སྒྲུབ་པར་བྱེད་པར་ཞེན་པ་ཡིན་ནོ། །དེ་ལྟར་ན་འདི་ནི་ཚོར་བ་དྲན་པ་ཉེ་བར་གཞག་པ་བསྟན་པ་ཡིན་ནོ། །ད་ནི་སེམས་དྲན་པ་ཉེ་བར་གཞག་པ་བསྟན་པའི་ཕྱིར། ཡིད་ནི་དབང་རྣམས་ཞེས་པ་ལ་སོགས་པ་གསུངས་ཏེ། དེ་ལ་དྲུག་པོའི་མཐའ་ཡིད་ཀྱི་རྣམ་པར་ཤེས་པ་ལ་རྟོག་པར་མཛད་པ་ཡིན་ཏེ། འདི་ལྟར་ཡང་གང་ན་ཡིད་ཀྱི་རྣམ་པར་ཤེས་པ་འདི་ཉེ་བར་གནས་པར་འགྱུར་ཏེ། དེ་ལ་རེ་ཞིག་དབང་པོ་རྣམས་ཏེ། མིག་ལ་སོགས་པ་རྣམས་ལ་ཡིད་གནས་ཤིང༌། ཉེ་བར་གནས་པར་འགྱུར་བ་མ་ཡིན་ནོ། །གཟུགས་ལ་སོགས་པའི་ཡུལ་རྣམས་ལ་ཡིད་ཉེ་བར་གནས་པ་མ་ཡིན་ལ། བར་ནའང་མ་ཡིན་ཏེ་དབང་པོ་དང་ཡུལ་གྱི་བར་ཏེ། དབུས་ན་ཡང་གནས་པ་མ་ཡིན་ཏེ། གཅིག་ཏུ་ཡང་ངེས་པའི་རང་བཞིན་མ་ཡིན་པའི་ཕྱིར་རོ། །ནང་ཡང་སེམས་མིན་ཕྱི་མིན་ཞིང༌། །ཞེས་ཏེ། ནང་སྟེ་ལུས་ཀྱི་དབུས་ན་སེམས་མ་ཡིན་ཞིང༌། ཕྱི་མིན་ཏེ་ཕྱི་རོལ་གྱི་ལུས་ཀྱི་ཡན་ལག་རྣམས་ལ་ཡང་སེམས་རྙེད་པ་མ་ཡིན་ནོ། །གཞན་དུ་ཡང་ནི་རྙེད་མ་ཡིན། །ཞེས་བརྗོད་མ་ཐག་པའི་གནས་རྣམས་ལས་ཡུལ་གཞན་འགའ་ཞིག་ཏུ་ཡང་མ་ཡིན་ནོ། །གང་དུ་མ་རྙེད་པ་ན། རྣམ་པར་བརྟགས་པ་ཐོབ་པ་མ་ཡིན་ནོ། །
དེ་བཞིན་དུ་ནང་དུ་ཇི་ཞིག་ལྟར་འགྱུར་བ་ཡིན་ནོ། །དེ་ལྟར་ན་ཇི་ལྟར་དེ་དགག་པར་བྱེད་ཅེ་ན། གང་ཞིག་ལུས་མིན་ཞེས་པ་ལ་སོགས་པ་གསུངས་ཏེ། སེམས་གང་ཞིག་ལུས་མ་ཡིན་ཏེ། ཕྱི་རོལ་དང་ནང་གི་ལུས་ལ་མ་ཡིན་ནོ། །གཞན་དུ་ཡང་མ་ཡིན་ཏེ། ལུས་ལས་གཞན་ཕྱི་རོལ་གྱི་དངོས་པོ་ལ་ཡང་མ་ཡིན་ནོ། །འདྲེས་མིན་ཞེས་པ་ནི་བྱ་བའི་བྱེ་བྲག་གོ །ནང་དང་ཕྱིའི་བདག་ཉིད་གཉིས་པོ་དང་འདྲིས་པ་ལ་ཡང་གནས་པ་མ་ཡིན་ནོ། །སེམས་གང་ཞིག་གསུམ་པོ་ལ་སོགས་སུ་མ་ཡིན་ནོ། །ཐ་དད་པ་ཡང་མ་ཡིན་ནོ། །རང་དབང་ཅན་ཡང་འགའ་ཡང་གནས་པ་མེད་དེ། སེམས་གང་ཞིག་དོན་དམ་པར་ཅུང་ཟད་ཀྱང་ཡོད་པ་མ་ཡིན་ནོ། །འདི་དངོས་པོར་ཡོད་པ་མ་ཡིན་ཏེ། རྟོག་པས་བརྟགས་པ་ཉིད་ཡིན་ནོ། །འཁོར་བ་ཇི་སྲིད་དུ་སེམས་སྒྱུ་མ་དང་འདྲ་བར་རབ་ཏུ་སྣང་བ་ཡིན་ཏེ། རང་བཞིན་མེད་པའི་ཕྱིར་རོ།། དེའི་ཕྱིར་ཞེས་ཏེ། རྒྱུ་དེས་ན་སེམས་དང་སྲོག་རྣམས་རང་གི་ངོ་བོ་ཉིད་ཀྱིས་མྱ་ངན་ལས་འདས་པ་ཡིན་ལ། ཡོངས་སུ་གྲོལ་བའི་རང་བཞིན་ཡིན་ཞིང༌། རང་བཞིན་མེད་པའི་མཚན་ཉིད་རང་བཞིན་གྱིས་མྱ་ངན་ལས་འདས་པ་སེམས་ཅན་ཐམས་ཅད་ཀྱི་རྒྱུད་ལ་རྟག་ཏུ་ཡོད་པའི་ཕྱིར་རོ། །རང་ཉིད་ནི་བདེན་པ་མ་ཡིན་ཡང་ཡང་དག་པ་མ་ཡིན་པའི་རྣམ་པར་རྟོག་པའི་དབང་གིས་བདེན་པར་སྒྲོ་བཏགས་ནས་ཉོན་མོངས་པའི་བག་ཆགས་ཀྱིས་ཉམས་པར་བྱས་པའི་སེམས་ཀྱི་རྒྱུད་རྣམས་འཁོར་བའི་བཙོན་རར་འགལ་བར་བཀག་པས་རང་དབང་དུ་འཇུག་པ་རྣམས་ཡོངས་སུ་མ་གྲོལ་བར་བརྗོད་དེ། དོན་དམ་པར་ནི་མ་ཡིན་ནོ། །འདི་ལྟར་ཡིད་རྣམ་པར་དཔྱད་ཀྱང་མིག་ལ་སོགས་པའི་རྣམ་པར་ཤེས་པ་རྣམས་དཔྱད་པའི་ཆེད་དུ། ཤེས་བྱ་ལས་ཞེས་པ་ལ་སོགས་པ་གསུངས་ཏེ། འདི་ལྟར་ཡང་ཤེས་པ་ནི་གང་དུ་ཡང་ཡོད་པ་དང་མེད་པའི་དངོས་པོ་གནས་པ་མ་ཡིན་ལ། འོན་ཀྱང་མིག་ལ་སོགས་པའི་ཚོགས་པའི་རྐྱེན་ལས་བྱུང་བའི་གཟུགས་ལ་སོགས་པ་ཤེས་བྱའི་འཛིན་པ་པོར་བརྗོད་དོ། །དེ་ལྟར་གཞན་གྱི་བསམ་པ་དོགས་པར་བྱས་ནས་རྟོགས་པར་མཛད་དོ། །དེ་ཡང་ཤེས་པར་བྱ་བ་ལས་སྔར་འགྱུར་རམ།
ཤེས་བྱ་དང་དུས་མཚུངས་པའམ། ཤེས་བྱ་ལས་ཕྱིས་འགྱུར་བ་ཡིན་ཞེས་སོ། །དེ་ལ་གལ་ཏེ་རྣམ་པར་རྟོག་པ་དང་པོ་ཡིན་ན་དེ་ལ་གསུངས་པ་ཤེས་བྱ་ལ་སྟེ་གཟུང་བར་བྱ་བའི་ལུས་ལས། སྔར་ཏེ་སྔ་མ་ཉིད་དུ་ཤེས་བྱ་མ་སྐྱེས་པ་ཉིད་ན་གལ་ཏེ་ཤེས་པ་སྐྱེས་པར་བརྗོད་ནས། དེའི་ཚེ་དེ་ནི་ཅི་ལ་དམིགས་ཏེ་སྐྱེས། སྔར་ཤེས་བྱ་དམིགས་པ་མེད་པར་ཅི་ལ་དམིགས་པས་ཏེ། ཅི་ལ་བརྟེན་ནས་འབྱུང་ཞིང་སྐྱེ་བར་འགྱུར། ཕྱོགས་གཉིས་པ་ལ་བརྟེན་ཏེ་གསུངས་པ། ཤེས་བྱ་སྟེ་གཟུང་བར་བྱ་བའི་ཡུལ་དང་ལྷན་ཅིག་སྟེ། དུས་མཚུངས་པར་གལ་ཏེ་ཤེས་པ་ཡིན་ན། དེ་ནི་ཅི་ལ་དམིགས་ཏེ་འདི་སྐྱེ་བར་འགྱུར་ཏེ། དུས་མཚུངས་པའི་ཤེས་པར་བྱ་བ་ནི་རྒྱུ་མ་ཡིན་པ་ཉིད་དེ། དམིགས་པའི་མ་ཡིན་པའི་ཕྱིར་ཡུལ་ནི་རྒྱུ་མ་ཡིན་ཞེས་པའི་ཚིག་ལས་སོ། །རྣམ་པ་གསུམ་པ་ཁས་ལེན་ན། འོན་ཏེ་ཤེས་བྱ་ཞེས་པ་ལ་སོགས་པ་གསུངས་ཏེ། འོན་ཏེ་ཞེས་པ་ནི་འདྲི་བ་ཡིན་ལ། ཤེས་ལས་ཞེས་པ་ནི་སྔར་གྱི་ཤེས་པའོ། །ཕྱིས་ཞེས་པ་ནི་དེའི་རྗེས་ལ་ཡིན་ཏེ། ཤེས་བྱ་འགགས་པའི་དུས་ལ་ཤེས་པ་སྐྱེ་ཞིང་འབྱུང་བར་འགྱུར་ན། དེའི་ཚེ་ཤེས་པ་གང་ལས་སྐྱེས་ཏེ། ཤེས་པའི་དུས་ན་ཤེས་བྱ་འགགས་པའི་ཕྱིར་གང་ལ་དམིགས་ནས་ཤེས་པར་འགྱུར་ཏེ། གང་ལ་བརྟེན་ནས་སྐྱེ་བར་འགྱུར། དེ་ལྟ་བས་ན་ཡུལ་ལ་སོགས་པའི་ཚོགས་པ་ལས་ཀྱང་ཤེས་པ་དོན་དམ་པར་མི་འགྲུབ་བོ། །སེམས་དྲན་པ་ཉེ་བར་གཞག་པ་འདི་ནི་དཀོན་མཆོག་བརྩེགས་པ་ལས་ཇི་སྐད་དུ་གསུངས་པ་ལྟ་བུ་སྟེ། དེ་འདི་ལྟར་སེམས་ཡོངས་སུ་ཚོལ་ཏེ། འདོད་ཆགས་པར་གྱུར་པའམ། ཞེ་སྡང་བར་འགྱུར་བའམ། གཏི་མུག་པར་འགྱུར་བའི་སེམས་དེ་གང་ཡིན་ཅི་འདས་པའམ། མ་འོངས་པའམ། ད་ལྟར་བྱུང་བ་ཞིག་ཡིན་ནམ། དེ་ལ་སེམས་འདས་པ་གང་ཡིན་པ་དེ་ནི་ཟད་པའོ། །མ་འོངས་པ་གང་ཡིན་པ་དེ་ནི་མ་ཕྱིན་པའོ། །ད་ལྟར་བྱུང་བ་ནི་གནས་མེད་དོ་སྙམ་མོ། །འོད་སྲུངས་སེམས་ནི་ནང་ན་ཡང་མེད། ཕྱི་རོལ་ན་ཡང་མེད། གཉིས་ཀ་ན་མེད་པ་ལ་ཡང་མི་དམིགས་སོ་།འོད་སྲུངས་
སེམས་ནི་དཔྱད་དུ་མེད་པ། བསྟན་དུ་མེད་པ། རྟེན་མ་ཡིན་པ། སྣང་བ་མེད་པ། རྣམ་པར་རིག་པ་མེད་པ་གནས་པ་མེད་པའོ། །འོད་སྲུངས་སེམས་ནི་སངས་རྒྱས་ཐམས་ཅད་ཀྱིས་ཀྱང་མ་གཟིགས་མི་གཟིགས་གཟིགས་པར་མི་འགྱུར་རོ། །ལོག་པར་ཞུགས་པའི་འདུ་ཤེས་ལས་ཆོས་རྣམས་འབྱུང་བ་མ་གཏོགས་པར་སངས་རྒྱས་ཐམས་ཅད་ཀྱིས་ཀྱང་མ་གཟིགས། མི་གཟིགས། གཟིགས་པར་མི་འགྱུར་བ་གང་ཡིན་པ་དེའི་རྒྱུ་བ་ཅི་འདྲ་བར་རིག་པར་བྱ་ཞེ་ན། འོད་སྲུངས་སེམས་ནི་སྒྱུ་མ་དང་མཚུངས་ཏེ། ཡང་དག་པ་མ་ཡིན་པ་ཀུན་དུ་བརྟགས་པས་སྐྱེ་བ་རྣམ་པ་མང་པོ་ཡོངས་སུ་འཛིན་ཏོ། །འོད་སྲུངས་འབབ་ཆུའི་རྒྱུན་དང་མཚུངས་ཏེ། མི་གནས་པ་སྐྱེས་ནས་འཇིག་ཅིང་འཇུག་པའོ། །འོད་སྲུངས་སེམས་རླུང་དང་མཚུངས་ཏེ། རིང་དུ་འགྲོ་ཞིང་གཟུང་དུ་མེད་པར་རླུང་རྒྱུ་བའོ། །འོད་སྲུངས་སེམས་ནི་མར་མེའི་འཕྲོ་བ་དང་མཚུངས་ཏེ། རྒྱུ་དང་རྐྱེན་ལས་བྱུང་བའོ། །འོད་སྲུངས་སེམས་ནི་ནམ་མཁའ་དང་མཚུངས་ཏེ། ཉེ་བའི་ཉོན་མོངས་པ་གློ་བུར་བ་རྣམས་ཀྱིས་ཉེ་བར་ཉོན་མོངས་པའོ། །འོད་སྲུངས་སེམས་ནི་གློག་དང་མཚུངས་ཏེ། སྐད་ཅིག་ཏུ་འཛིན་ཅིང་མི་གནས་པའོ། །དེ་བཞིན་དུ་སྦྱར་ཏེ། འོད་སྲུངས་སེམས་ནི་ཀུན་དུ་བཙལ་ན་མི་རྙེད་དོ། །གང་མི་རྙེད་པ་དེ་ནི་མི་དམིགས་པའོ། །གང་མི་དམིགས་པ་དེ་ནི་འདས་པ་ཡང་མ་ཡིན། མ་འོངས་པ་ཡང་མ་ཡིན། ད་ལྟར་བྱུང་བ་ཡང་མ་ཡིན་པ་དེ་ནི་དུས་གསུམ་ལས་ཡང་དག་པར་འདས་པའོ། །གང་དུས་གསུམ་ལས་ཡང་དག་པར་འདས་པ་དེ་ནི་ཡོད་པ་ཡང་མ་ཡིན། མེད་པ་ཡང་མ་ཡིན་ནོ་ཞེས་བྱ་བ་ལ་སོགས་པ་འབྱུང་ངོ༌། །དེ་ལྟར་སེམས་དྲན་པ་ཉེ་བར་གཞག་པ་བསྟན་ནས། ཆོས་དྲན་པ་ཉེ་བར་གཞག་པ་བསྟན་པའི་ཕྱིར། བརྗོད་པའི་རིམ་པས་སྦྱར་བར་གསུངས་པ། དེ་ལྟར་ན་ཡང་ཞེས་པ་ལ་སོགས་པ་གསུངས་ཏེ། འང་གི་སྒྲ་ནི་ཁོ་ནའི་དོན་ཏེ། འདི་ལྟར་ཁོ་ནར་ཇི་ལྟར་བརྗོད་པའི་ཚུལ་གྱིས་ཆོས་ཀུན་ཏེ། དངོས་པོ་ཐམས་ཅད་སྐྱེ་ཞིང་འབྱུང་བར་རིག་པར་བྱ་བ་མ་ཡིན་ཏེ། རྟོགས་པ་མ་ཡིན་ནོ། །དེ་རྣམས་ཀྱང་རང་གི་རྒྱུ་ལས་སྔར་རམ།
དུས་མཚུངས་པའམ། ཕྱི་ནས་སྐྱེ་བ་ལ་སྐྱོན་འདི་ཉིད་ཡིན་པར་ཇི་ལྟར་སྲིད་པ་བཟློག་པར་བྱའོ། །སྐྱེ་བ་དང་བྲལ་བའི་ཕྱིར་འགག་པ་ཡང་རིགས་པ་མ་ཡིན་ཏེ། མ་སྐྱེས་པ་ལས་སྐྱེ་བ་མི་རིགས་པའི་ཕྱིར་རོ། །འདི་ཉིད་ཀྱི་ཕྱིར། མ་སྐྱེས་པ་དང་མ་འགགས་པའི་རང་བཞིན་ཉིད་ཀྱིས་སྤྲོས་པ་དང་བྲལ་བའི་ཕྱིར་ཆོས་ཐམས་ཅད་ཀྱི་རྣམ་པར་ཐར་པའི་སྒོ་དང༌། ཆོས་ཀྱི་དབྱིངས་སུ་ངེས་པ། ནམ་མཁའི་ཁམས་ཀྱི་མཐས་གཏུགས་པ། མ་བརྟགས་པ། ཐ་སྙད་དང་བྲལ་བ། བརྗོད་དུ་མེད་པ། བརྗོད་པར་བྱ་བ་མ་ཡིན་པ་ཞེས་བརྗོད་དོ། །དེ་ལྟར་ཆོས་དྲན་པ་ཉེ་བར་གཞག་པ་བརྗོད་པ་ཆོས་ཐམས་ཅད་ལ་ཞེན་པ་མེད་པར་སྐྱེ་བར་འགྱུར་རོ། །ཆོས་ཐམས་ཅད་དྲན་པ་ཉེ་བར་གཞག་པ་བསྒོམ་པ་ཡང༌། འཕགས་པ་བློ་གྲོས་མི་ཟད་པའི་མདོ་ལས་ཇི་སྐད་གསུངས་པ་ལྟ་བུ་སྟེ། བྱང་ཆུབ་སེམས་དཔའ་ཆོས་ལ་ཆོས་ཀྱི་རྗེས་སུ་ལྟ་ཞིང་གནས་པ་གང་ལ་སངས་རྒྱས་ཀྱི་ཆོས་མེད་པ་དང༌། གང་ལ་བྱང་ཆུབ་མེད་པ་དང༌། གང་ལ་ལམ་མེད་པ་དང༌། གང་ལ་ཐར་པ་མེད་པ་དང༌། གང་ལས་འབྱུང་བ་མེད་པའི་ཆོས་དེ་གང་ཡང་མི་མཐོང་ངོ༌། །དེས་ཆོས་ཐམས་ཅད་འབྱུང་བ་ཤེས་ནས་སེམས་ཅན་རྣམས་ལ་སྒྲིབ་པ་མེད་པར་ཤེས་པར་བྱ་བའི་ཕྱིར་སྙིང་རྗེ་ཆེན་པོའི་ཏིང་ངེ་འཛིན་གྱི་སྒོ་ཐོབ་པར་འགྱུར་རོ། །དེས་ཆོས་ཐམས་ཅད་དང༌། ཉོན་མོངས་པ་ཐམས་ཅད་ལ་ཡང་སྒྱུ་མར་འདུ་ཤེས་པ་ཐོབ་སྟེ། ཆོས་འདི་དག་ནི་ཉོན་མོངས་པ་མེད་པ་འདི་དག་ནི་ཉོན་མོངས་པ་དང་བཅས་པ་མ་ཡིན་པའོ། །དེ་ཅིའི་ཕྱིར་ཞེ་ན། འདི་ལྟར་དེ་དག་ནི་ངེས་པའི་དོན་གྱི་དོན་ལ་བརྟེན་ཏེ་ཉོན་མོངས་པའི་ཚོགས་ཀྱང་མེད། ཕུང་པོར་གྱུར་བ་ཡང་མེད། འདོད་ཆགས་ཀྱི་དངོས་པོ་ཡང་མེད། ཞེ་སྡང་གི་དངོས་པོ་ཡང་མེད། གཏི་མུག་གི་དངོས་པོ་མེད་ཀྱི་ཉོན་མོངས་པ་འདི་དག་རྟོགས་པའི་ཕྱིར་བྱང་ཆུབ་སྟེ། ཉོན་མོངས་པའི་ངོ་བོ་ཉིད་གང་ཡིན་པ་བྱང་ཆུབ་ཀྱི་ངོ་བོ་ཉིད་ཀྱང་དེ་བཞིན་ནོ་ཞེས་དེ་ལྟར་དྲན་པ་ཉེ་བར་འཇོག་གོ་ཞེས་འབྱུང་ངོ༌། །དེ་སྐད་དུ་ཡང༌། གང་ལས་སྐྱེ་བ་ཡོད་མིན་ཉིད། །དེ་ལ་མྱང་འདས་ག་ལ་ཡོད། །འགྲོ་བ་སྒྱུ་
མར་གསལ་བའི་ཕྱིར། །དང་པོ་ནས་གཞི་འབད་མེད་པར། །གང་ཞིག་རྟེན་ཅིང་འབྲེལ་པར་འབྱུང༌། །དེ་ལ་ཁྱོད་ནི་སྟོང་ཉིད་བཞེད། །དེ་བཞིན་དུ་ནི་དམ་ཆོས་ཏེ། །དེ་དང་མཚུངས་པ་དེ་བཞིན་གཤེགས། །དེ་ནི་དེ་ཉིད་དོན་མེད་པའང༌། །དེ་བཞིན་ཉིད་ཀྱི་རྫས་སུ་བཞེད། །ཡང་དག་དེ་ནི་མི་སླུ་ལ། །དེ་རྟོགས་པ་ནི་སངས་རྒྱས་བརྗོད། །ཅེས་གསུངས་སོ། །དེ་ལྟར་ཆོས་དྲན་པ་ཉེ་བར་གཞག་པ་བསྟན་པས། །ཆོས་ཐམས་ཅད་མ་སྐྱེས་ཤིང་མ་འགགས་པར་བསྟན་པ་ཡིན་ལ། དེ་ལྟར་ན་ཡང་ཀུན་རྫོབ་ཀྱི་བདེན་པ་མི་འཐད་པར་འགྱུར་ཏེ། དེའི་ཕྱིར་བདེན་པ་གཉིས་ཀྱི་རྣམ་པར་གཞག་པ་མི་འཐད་དོ་ཞེས་ཡོངས་སུ་སྤང་བར་འདོད་ནས། རྒོལ་བ་ཉེ་བར་དགོད་པ་ན། གལ་ཏེ་དེ་ལྟར་ཞེས་པ་ལ་སོགས་པ་སྨོས་ཏེ། གལ་ཏེ་དོན་དམ་པར་ཆོས་ཐམས་ཅད་མ་སྐྱེས་པ་དང༌། མ་འགགས་པའི་རང་བཞིན་ཡིན་ན་དེ་ལྟ་ན་ཡང་ཀུན་རྫོབ་མེད་དེ། ཡོད་པ་མ་ཡིན་ལ་ཐ་སྙད་མེད་པར་འགྱུར་ཞིང་དོན་དམ་པའི་བདེན་པ་གཅིག་ཉིད་དུ་འགྱུར་རོ། །དེའི་ཕྱིར་ཀུན་རྫོབ་མེད་པས་ན་བདེན་པ་གཉིས་ཏེ། ཀུན་རྫོབ་ཀྱི་བདེན་པ་དང༌། དོན་དམ་པའི་བདེན་པ་ཡང་ངོ༌། །གང་བརྗོད་པ། ཀུན་རྫོབ་དང་ནི་དོན་དམ་ཡང། །འདི་ནི་བདེན་པ་གཉིས་སུ་བཞེད། །ཅེས་སོ། །དེ་ལ་བདེན་པ་གཉིས་པོ་འདི་ག་ལ་ཡོད་དེ། འདི་ལྟར་མི་འགྱུར་རོ། །དེ་མེད་པས་ཀྱང་འཇིག་རྟེན་ཕ་རོལ་དུ་འགྲོ་བའི་ལས་དང་བྱ་བའི་འབྲས་བུ་དང་འབྲེལ་བའི་རང་བཞིན་ཉེ་བར་སོགས་པ་ལ་སོགས་པར་མི་འགྱུར་ཏེ། ཐ་སྙད་ཐམས་ཅད་མེད་པའི་ཕྱིར་རོ། །འོན་ཏེ་དེ་ལྟར་ན་གལ་ཏེ་མེད་ན་ཡང་དེ་བཞིན་དུ། སྨིག་རྒྱུ་ལ་ཆུར་གཏོགས་པ་ཉིད་ཀྱིས་ཀུན་རྫོབ་ཀྱི་རང་བཞིན་གྱིས་རྣམ་པར་རྟོག་པའི་བློས་རྣམ་པར་གཞག་པ་ཡིན་ཏེ། དེའི་ཕྱིར་བདེན་པ་གཉིས་འཐད་པ་ཡིན་ནོ་ཞེས་དོགས་པ་ལ། བརྗོད་པ་འོན་ཏེ་དེ་ཡང་ཞེས་པ་ལ་སོགས་པ་སྟེ། འོན་ཏེ་ཞེས་པ་ནི་འདྲི་བ་ཡིན་ལ། དེ་ཡང་ཞེས་པ་ནི་ཀུན་རྫོབ་ཡིན་ཏེ། གཅིག་ཏུ་དོན་དམ་པའི་བདེན་པ་ནི་མ་ཡིན་ནོ་ཞེས་པ་ནི་ཡང་གི་དོན་ཏོ། I།གཞན་ཀུན་རྫོབ་ཀྱི་རྣམ་པར་རྟོག་པའི་ངོ་བོས་རྣམ་པར་འཇོག་ནའོ། །ཡང་ན་ཡང་གི་སྒྲ་
ནི་ངེས་པར་གཟུང་བ་དང༌། རིམ་པ་ཐ་དད་པ་ཉིད་ཡིན་ལ། གཞན་ཉིད་ཀྱིས་ཀུན་རྫོབ་ཅེས་སྦྱར་བར་བྱའོ། །དེ་ལྟར་ན་གཅིག་བསྒྲུབས་ན་གཞན་ཉམས་པར་འགྱུར་བ་ཡིན་ཞེས་བསྟན་པའི་ཕྱིར། སེམས་ཅན་མྱ་ངན་ག་ལ་འདའ། །ཞེས་གསུངས་ཏེ། གལ་ཏེ་དོན་དམ་པར་དེའི་རང་བཞིན་གྱིས་སྟོང་ཡང་བློའི་ཡུལ་དུ་བྱས་པའི་ཕྱིར་ཀུན་རྫོབ་ཏུ་བརྗོད་ན་གང་ཞིག་འདི་ལྟར་ཆོས་ཐམས་ཅད་རང་བཞིན་མེད་པའི་མཚན་ཉིད་དོན་དམ་པའི་བདེན་པ་མི་དམིགས་པའི་སྦྱོར་བས་རྟོགས་ན་སྤྲོས་པ་ཐམས་ཅད་དང་བྲལ་བའི་ཕྱིར་མྱ་ངན་ལས་འདས་པ་ཐོབ་པར་འགྱུར་ན། དེ་ཡང་སེམས་ཅན་ཡོངས་སུ་མྱ་ངན་ལས་འདས་ཤིང་ཡོངས་སུ་གྲོལ་བ་གང་ལས་འགྱུར་ཏེ་མ་ཡིན་པ་ཉིད་དེ། །དེ་ཡང་བློའི་ཡུལ་དུ་བྱས་པའི་ཕྱིར་ལ། བློ་ཡང་ཐམས་ཅད་ཉིད་དུ་ཀུན་རྫོབ་ཀྱི་རྣམ་པར་རྟོག་པའི་རང་བཞིན་ཡིན་པའི་ཕྱིར་ཏེ། བློ་ནི་ཀུན་རྫོབ་ཉིད་དུ་བརྗོད། །ཅེས་གསུངས་པའི་ཕྱིར་མྱ་ངན་ལས་འདས་པ་ཡང་ཀུན་རྫོབ་ཏུ་འགྱུར་རོ་ཞེ་ན། འདི་ལ་ལན། དེ་ནི་གཞན་སེམས་ཞེས་པ་ལ་སོགས་པ་གསུངས་ཏེ། གཞན་ནི་མྱ་ངན་ལས་འདས་པའི་སེམས་ཅན་ལས་གཞན་པ་སེམས་ཅན་གྱི་སེམས་དེའི་རྣམ་པར་རྟོག་པ་ནི་དེ་ཡིན་ཏེ། གང་ཞིག་མྱ་ངན་ལས་འདས་པ་བློའི་ཡུལ་དུ་བྱས་པ་ཡིན་ལ། གཞན་གྱི་སེམས་ཀྱི་རྣམ་པར་རྟོག་པས་གཞན་ཀུན་རྫོབ་ཏུ་བརྗོད་པ་ནི་མ་ཡིན་ནོ། །དེ་ལྟ་བས་ན་གཞན་གྱི་བློའི་ཡུལ་དུ་བྱས་ནས། ཡང་འདི་ནི་མྱ་ངན་ལས་འདས་པ་ཉིད་ཡིན་ནོ། །ཅིའི་ཕྱིར་ཞེ་ན། གང་གི་ཕྱིར་དེ་ནི་རང་གི་ཀུན་རྫོབ་མིན་ཞེས་ཏེ། སྔ་མ་ལས་ཁྱད་པར་བྱས་པ་རང་གི་ཀུན་རྫོབ་སྟེ། གཉུག་མའི་ཀུན་རྫོབ་རང་གི་རྣམ་པར་རྟོག་པས་དེ་ཞེས་པ་མྱ་ངན་ལས་འདས་པ་མིན་ཏེ། ཡོད་པ་མ་ཡིན་ལ། མྱ་ངན་ལས་འདས་པ་ཉིད་ཡིན་ཏེ། འདི་རང་ཉིད་ནི་རྣམ་པར་རྟོག་པ་ཐམས་ཅད་དང་བྲལ་བའི་ཕྱིར་རོ། །དེ་ལྟར་ན་གཞན་དུ་ཡང་གཞན་ཀུན་རྫོབ་ཀུན་རྫོབ་ཏུ་ཇི་ལྟར་འགྱུར་ཞེ་ན། ཕྱིས་དེ་ངེས་པར་ན་ཞེས་པ་ལ་སོགས་པ་གསུངས་ཏེ། འདི་ཡོད་ན་འདིར་འགྱུར་ཏེ། འདི་སྐྱེས་པ་ལས་འདི་སྐྱེས་པ་ཞེས་པ་ནི་འདིའི་རྐྱེན་ལས་བྱུང་བ་
ཙམ་ཀུན་རྫོབ་བོ། །དེ་ལྟར་ན་ཆོས་རྣམས་སྐྱེ་བ་ནི་ཕྱི་ནས་བྱུང་བའི་ཡོད་པ་ཡིན་ནོ། །དེ་ལྟ་བས་ན་ཕྱི་ནས་ངེས་པའི་ཆོས་གལ་ཏེ་ཡོད་པ་མ་ཡིན་ན་དེའི་ཚེ་ཀུན་རྫོབ་ཡོད་པ་ཉིད་ཡིན་ནོ། །དེ་གལ་ཏེ་ཡོད་པ་མ་ཡིན་པ་ཡིན་ཞེ་ན། དེའི་ཚེ་ཀུན་རྫོབ་མེད་པ་ཉིད་ཡིན་ཏེ། ནམ་མཁའི་ཨུཏྤ་ལ་སྔོན་པོ་ལ་སོགས་པ་རྣམས་རྐྱེན་འདི་མེད་པའི་ཕྱིར་རོ། །འདི་སྐད་བརྗོད་པར་འགྱུར་བ་ཡིན་ཏེ། གལ་ཏེ་ཡང་མྱ་ངན་ལས་འདས་པ་བློའི་ཡུལ་དུ་བྱས་ནས། གཞན་གྱིས་རྣམ་པར་རྟོག་པ་ཙམ་གྱིས་དེ་མྱ་ངན་ལས་འདས་པར་མི་འགྱུར་བ་ཁོ་ན་ནི་མ་ཡིན་ཏེ། འདི་རང་གི་རྣམ་པར་རྟོག་པ་སྤྲོས་པ་ཉེ་བར་ཞི་བའི་ཕྱིར་རོ། །ཆགས་པ་དང་བཅས་པའི་སེམས་ཀྱི་དམིགས་པས་རང་ཉིད་ཀྱི་ཉོན་མོངས་པའི་སྒྲིབ་པ་སྤངས་པའི་འདོད་ཆགས་དང་བྲལ་བ་ཡང་འདོད་ཆགས་དང་བྲལ་བ་མ་ཡིན་པར་མི་འགྱུར་རོ། །དེ་ལྟ་བས་ན་རྣམ་པར་རྟོག་པ་དང་ཐམས་ཅད་དང་བྲལ་བའི་ཕྱིར་གཞན་གྱི་ཀུན་རྫོབ་ཀྱིས་དམིགས་ན་ཡང་རང་ཉིད་འདི་དོན་དམ་པར་མྱ་ངན་ལས་འདས་པ་ཉིད་ཡིན་ནོ། །དེ་ཉིད་ཀྱི་ཕྱིར་ཆོས་ཐམས་ཅད་རང་ཉིད་ཀྱིས་རྣམ་པར་རྟོག་པ་དང་བྲལ་བའི་ཕྱིར་མ་སྐྱེས་པ་དང༌། མ་འགགས་པའི་རང་བཞིན་ཡིན་པའི་ཕྱིར་རང་བཞིན་གྱིས་མྱ་ངན་ལས་འདས་པ་དང༌། གདོད་ནས་ཞི་བ་ཡིན་ནོ་ཞེས་བརྗོད་དོ། །དེ་ལྟར་ན་ཡང་དེ་ལྟ་བུ་རྣམས་ཉིད་ལས་དེ་ལྟ་བུའི་ཆོས་གཞན་སྐྱེ་བ་དང་འགག་པར་ཡང་འགྱུར་ཏེ། སྒྱུ་མའི་རང་བཞིན་བཞིན་ནོ། །དེས་ན་ཡང་རང་བཞིན་གྱིས་རྣམ་པར་རྟོག་པའི་དབང་ལས་ཡང་དམིགས་པ་ན། ཀུན་རྫོབ་ཡིན་ཏེ། དངོས་པོའི་ངོ་བོ་མེད་པའི་ཕྱིར་མ་སྐྱེས་པ་དང་མ་འགགས་པར་བརྗོད་དེ། བོང་བུའི་རྭ་བཞིན་ནོ། །དེ་གསུངས་པ། སྟོང་པ་ཉིད་ཀྱི་ཆོས་རྣམས་ལས། སྟོང་པའི་ཆོས་རྣམས་འབྱུང་བར་འགྱུར། །ཞེས་སོ། །འཕགས་པ་རྒྱ་ཆེར་རོལ་པ་ལས་ཀྱང་གསུངས་པ་ཡིན་ཏེ་འདུ་བྱེད་མར་མེའི་འོད་ཅེས་སོ། །དེ་ལྟ་བས་ན་དོན་དམ་པར་སྐྱེ་བ་དང༌། འགག་པ་མེད་ན་ཡང་ཀུན་རྫོབ་ཀྱི་བདེན་པ་ལ་སོ་འགལ་བ་མ་ཡིན་ཏེ། ཐམས་ཅད་འཐད་པ་ཡིན་ནོ། །གལ་ཏེ་དོན་དམ་པར་ཆོས་ཐམས་ཅད་མ་སྐྱེས་པ་དང་མ་འགགས་པ་ཡིན་ན་དེའི་ཚེ་དངོས་པོ་ལ་
ཤེས་པ་མེད་ཅིང༌། ཤེས་བྱ་ཡོད་པ་མ་ཡིན་ནམ། དེ་ལྟ་ན་འདིར་གང་ཞིག་གང་གིས་འགེགས་པར་འགྱུར་ཏེ། རྣམ་པར་དཔྱོད་པ་ཡང་མེད་པར་གྱུར་ལ། དེ་ལྟ་བས་ན་ཅང་མི་སྨྲ་བར་གནས་བར་བྱའོ་ཞེ་ན། རྟོག་ཅེས་བ་ལ་སོགས་པ་གསུངས་ཏེ། རྟོག་པ་ནི་སྒྲོ་འདོགས་པའི་བློ་ཡིན་ལ། བརྟགས་པ་དེ་དེས་སྒྲོ་བཏགས་པ་ཡིན་ནོ། །འང་ཞེས་པ་ནི་སྡུད་པ་ཡིན་ཏེ། གཉིས་པོ་འདི་དག་གཉི་ག་ཕན་ཚུན་རྟེན་ཅིང་ཡང་དག་པར་བརྟེན་པ་ཡིན་ནོ། །རྟོག་པ་ལ་ལྟོས་ནས་བརྟགས་པ་ཡིན་ལ། བརྟགས་པ་ལ་ལྟོས་ནས་རྟོག་པ་ཡིན་ཏེ། ཇི་ལྟར་འཇིག་རྟེན་ལ་གྲགས་པའི་ཐ་སྙད་ལ་བརྟེན་ནས་ཏེ་བཟུང་ནས་རྣམ་པར་དཔྱོད་པ་ཡིན་ནོ་ཞེས་བྱ་བའི་དོན་ཏོ། །ཐམས་ཅད་བརྗོད་པ་ནི་མངོན་པར་བརྗོད་པའོ། །ཐམས་ཅད་ཅེས་པ་ནི་འགའ་ཞིག་མ་ཡིན་པ་ཉིད་དོ། །རྣམ་པར་དཔྱོད་པ་ཡང་ཀུན་རྫོབ་ཀྱི་བདེན་པ་མ་ལ་བརྟེན་ནས་སྤྲས་པ་ཡིན་ལ། དོན་དམ་པའི་བདེན་པ་ལ་མ་ཡིན་ཏེ། དེ་ནི་ཐ་སྙད་ཐམས་ཅད་ལས་འདས་པའི་ཕྱིར་ཞེས་པའི་དོན་ཏོ། །རྣམ་པར་དཔྱོད་པ་ཡང་རྣམ་པར་དཔྱོད་པ་ཡང་རྣམ་པར་དཔྱད་པར་བྱ་བ་བཞིན་དུ་བརྟགས་པའི་རང་བཞིན་ཡིན་པའི་ཕྱིར་དཔྱད་པ་བྱའོ་ཞེ་ན། དཔྱད་པ་པོ་ལ་དཔྱད་པར་མི་ནུས་པའི་ཕྱིར་ཞེས་དགོངས་ནས། གང་ཚེ་རྣམ་པར་དཔྱོད་པ་ཞེས་པ་ལ་སོགས་པ་གསུངས་ཏེ། རྣམ་པར་དཔྱོད་པས་ཏེ། ཡོངས་སུ་རྟོག་པ་ཡང་གང་གི་ཚེ་རྣམ་པར་དཔྱོད་པས་རྣམ་པར་དཔྱད་ཅིང༌། །ངེས་པར་བྱེད་ན་དེའི་ཚེ་ཐུག་པ་མེད་པར་ཏེ། མི་གནས་པར་ཐལ་བར་འགྱུར་རོ། །ཅིའི་ཕྱིར་ཞེ་ན། རྣམ་དཔྱོད་དེ་ལ་ཡང་རྣམ་པར་དཔྱོད་པའི་ཕྱིར་ཏེ། གང་ཞིག་འདི་ལ་རྣམ་པར་དཔྱད་པ་ན་ཡང་རྣམ་པར་དཔྱད་པའི་དོན་དུ་རྣམ་པར་དཔྱོད་པ་ཉེ་བར་བྱེད་ན་རྣམ་པར་དཔྱོད་པ་ལ་ཡང་རྣམ་པར་དཔྱོད་པའི་རྒྱུས་སོ། །རྣམ་པར་དཔྱད་པར་བྱ་བ་ལ་ཇི་ལྟར་དཔྱད་པ་ན་ཇི་ལྟར་ཐུག་པ་མེད་པ་འདིར་མི་འགྱུར་ན། །དཔྱད་བྱ་ཞེས་བྱ་བ་ལ་སོགས་པ་གསུངས་ཏེ། དཔྱད་པར་བྱ་བ་ལ་སྟེ། ཡོངས་སུ་བརྟག་པར་བྱ་བ་ལ་ཡང་དངོས་པོ་རྣམ་པར་དཔྱད་པར་བྱས་ནས་ཏེ། གཏན་ལ་ཕབ་པ་ནི་རྣམ་པར་དཔྱད་ཅིང་གཏན་ལ་
ཕབ་པ་ཡང་དུས་ཕྱིས་རྣམ་པར་དཔྱད་པའི་གཞི་ཡོད་པ་མ་ཡིན་ནོ། །གང་ལ་བརྟེན་ནས་ཡང་དཔྱོད་ཅིང་ཚོལ་བ་ལ་ཐུག་པ་མེད་པ་མ་ཡིན་ཏེ། རྣམ་པར་དཔྱད་པར་བྱ་བ་ལ་དཔྱད་པད་དོན་བྱས་པའི་ཕྱིར་ན་ཡང་འདོད་པ་མེད་པའི་ཕྱིར་རོ། །དེ་ཉིད་ཀྱི་ཕྱིར། རྣམ་དཔྱོད་ལ་ནི་རྟེན་མིན་ཏེ། །ཞེས་ཏེ། རྟེན་མེད་པའི་ཕྱིར་ཡང་དཔྱོད་པར་བྱེད་པ་མ་ཡིན་ནོ། །སྒྲོ་འདོགས་པ་ཐམས་ཅད་དགག་པ་བྱས་ནས་དངོས་པོའོ། །དེ་ཁོ་ན་ཉིད་ཡོངས་སུ་ཤེས་པས་བྱ་བ་བྱས་པའི་ཕྱིར། འཇུག་པའི་ལྡོག་པ་མེད་པའི་ཕྱིར་གང་ལ་ཡང་རེ་བ་མེད་པ་སྟེ། གང་ལ་ཡང་འདོད་པ་མ་ཡིན་ལ། དེ་ཡང་མྱ་ངན་ལས་འདས་པར་བརྗོད་དེ། ཐ་སྙད་ཐམས་ཅད་ལོག་པའི་ཕྱིར་རོ། །ཐམས་ཅད་དུ་བྱ་བ་མེད་པའི་ཕྱིར་རང་བཞིན་གྱིས་ཞི་བས་དེ་ཉིད་ལ་མྱ་ངན་ལས་འདས་པར་བརྗོད་དོ། །རྟོག་པའི་ཡུལ་ལ་ཐམས་ཅད་དུ་ངེས་པར་དཔྱོད་པར་བྱེད་པ་ཡིན་ཏེ། དོན་དམ་པར་མ་ཡིན་ནོ་ཞེས། གང་གིས་ལྟར་ན་ཞེས་པ་ལ་སོགས་པ་གསུངས་ཏེ། གང་གི་ཡང་དོན་དམ་པར་ཡོད་པར་སྨྲ་བའི་གཉིས་པོ་འདི་དཔྱོད་པར་དང་དཔྱད་པར་བྱ་བ་ཞེས་པ་འདི་གཉི་ག་ཡང་བདེན་པ་ཡིན་ཏེ། དོན་དམ་པའི་བདེན་པ་ཡིན་ཞིང༌། ཀུན་རྫོབ་མ་ཡིན་ལ་དེ་ཉིད་དངོས་པོའི་རང་བཞིན་དུ་སྨྲ་བ་ལ་ཤིན་དུ་དཀའ་བར་གནས་པ་ཡིན་ཏེ། ཤིང་ཏུ་ནི་ཆེས་ཤིན་ཏུའོ། །དཀའ་བས་གནས་པ་ནི་སྡུག་བསྔལ་གྱི་སྒོ་ནས་གནས་པ་ཡིན་ཏེ། དཀའ་བའི་བྱེད་པ་ཡིན་པའི་ཕྱིར་རོ། །འདི་ཉིད་ཉེ་བར་བསྟན་པའི་ཕྱིར། གལ་ཏེ་ཞེས་པ་ལ་སོགས་པ་སྨོས་པ་ཡིན་ཏེ། གལ་ཏེ་ཞེས་དབང་ལ་སྟེ། ཤེས་པ་ཚད་མའི་དབང་ལས་ཏེ་མཐུ་ལས་ཏེ་མཐུ་ལས་སོ། །དོན་ཏེ་གཞལ་བྱ་རྣམ་པར་འཇོག་ན། དེའི་ཚེ་ཡིན་དུ་ཆུག་ན་ཡང༌། ཚད་མ་ལས་གཞལ་བྱ་བ་རྣམ་པར་འཇོག་པ་ཞེས་བྱ་བ་གང་གིས་ཟློག་པར་བྱེད་པ་ཡིན་ཏེ། འོན་ཀྱང་འདིར་འདི་དཔྱད་པར་བྱ་བ་ཡིན་ཏེ། ཤེས་ཡོད་ཉིད་ལ་རྟེན་ཅི་ཡོད། །ཤེས་བ་ཚད་མ་ལ་ཡང་ཡོད་དོ་ཞེས་གང་ལ་ངེས་པར་ཡོད་ཅེས་བརྗོད་པར་བྱ་སྟེ། རང་རིག་པ་མེད་པའི་ཕྱིར་ཚད་མ་གཞན་ཚོལ་བ་ན་ཐུག་པ་མེད་པར་ཐལ་བར་འགྱུར་བས་རྟེན་ཅི་ཅིག་ཡོད་དེ། བརྟེན་པར་
བྱ་བའོ། །དེ་ལྟར་ན་ཡང་གལ་ཏེ་ཤེས་པ་ཡོད་པ་ལ་ཚད་མ་གཞན་ཚོལ་བར་བྱེད་ན་ཐུག་པ་མེད་པར་འགྱུར་ལ། འོན་ཀྱང་གཞལ་བྱ་ཉིད་ལས་ཚད་མ་རྣམ་པར་འཇོག་སྟེ། དེ་ཇི་ལྟར་ཐུག་པ་མེད་པར་འགྱུར་ཞེས་དོགས་ནས། འོན་ཏེ་ཞེས་པ་ལ་སོགས་པ་སྨོས་ཏེ། འོན་ཏེ་ཞེས་པ་ནི་གཞན་གྱི་བསམ་པ་བསལ་པར་བྱེད་པ་ཡིན་ནོ། །འོན་ཏེ་ཤེས་པར་བྱ་བ་སྟེ། གཞལ་བའི་དབང་གིས་ཞེས་པ་རྣམ་པར་གཞག་བྱེད་ནའོ། །དེ་ལྟར་ན་ཤེས་བྱ་ཡོད་ལ་རྟེན་ཅི་ཡོད། །ཅེས་ཏེ། གལ་ཏེ་ཤེས་བྱའི་དབང་གིས་ཤེས་པའི་རྣམ་གཞག་བྱེད་ན། དེའི་ཚེ་ཤེས་བྱས་ཤེས་པ་ཡོད་པར་གཞག་པའི་རྒྱུ་མཚན་དུ་འགྱུར་ན། དེ་ཡང་ཚད་མ་གང་ལས་གྲུབ་ཅེས་འདྲི་བར་བྱེད་དོ། །ཤེས་བྱ་ཡོད་པ་ཉིད་ལ་བརྟེན་ཅིང་ཡོད་ཅེས་གཞལ་བྱ་གྲུབ་པའི་ཆེད་དུ་ཤེས་པ་གཞན་ཚོལ་བ་ལས་ཤེས་པ་གཞན་དེ་ཡང་གང་ལས་གྲུབ་ཅེས་བརྗོད་པར་བྱའོ། །དེ་ལྟ་བས་ན་ཤེས་པར་བྱ་བ་ལས་སོ་ཞེ་ན། ཤེས་པར་བྱ་བ་གང་ལས་གྲུབ་པ་ཡིན་ཏེ། དེ་གྲུབ་པ་ལ་ཤེས་པ་གཞན་ཚོལ་ན་ཡང་ཐུག་པ་མེད་ཅིང་མཐར་ཐུག་པ་མེད་པར་འགྱུར་རོ། །དེ་ལྟར་གྱུར་ན་ཡང༌། གལ་ཏེ་ཤེས་པའམ་ཤེས་བྱ་གྲུབ་པའི་ཆེད་དུ་དེ་ཤེས་པ་གཞན་ལྟོས་པར་གྱུར་ན་དེར་འགྱུར་ཏེ། འོན་ཀྱང་ཕན་ཚུན་དུ་གཅིག་ལ་གཅིག་གིས་གྲུབ་ན་དེའི་ཕྱིར་བརྗོད་པའི་ཉེས་པར་ཐལ་བར་ཇི་ལྟར་འགྱུར་ཞེས་གཞན་གྱི་བསམ་པ་སྔོན་དུ་སོང་བས། ཅི་སྟེ་ཕན་ཚུན་ཞེས་པ་ལ་སོགས་པ་གསུངས་ཏེ། ཅི་སྟེ་ཡང་འདི་ལྟར་རྗོད་པར་བྱེད་ན་ཕན་ཚུན་དུ་སྟེ། ཤེས་པ་དང་ཤེས་བྱ་ཡང་ཕན་ཚུན་གྱི་དབང་གིས་ཏེ། སྟོབས་ཀྱིས་ཤེས་པ་དང་ཤེས་པར་བྱ་བ་དག་ཀྱང་ཡོད་པ་ཉིད་དུ་ངེས་པར་བྱེད་ན་ནི། ཤེས་པའི་དབང་གིས་ཤེས་བྱ་དང༌། ཤེས་བྱའི་དབང་གིས་ཤེས་པའོ་ཞེས་པའི་ཐ་ཚིག་གོ་ཞེ་ན། དེ་དེ་ལྟར་ཡིན་ན་གཉི་ག་ཡང་ནི་མེད་པར་འགྱུར་ཏེ། ཤེས་པ་དང་ཤེས་བྱ་གཉི་ག་ཡང་མེད་པར་འགྱུར་ལ། གཅིག་ཀྱང་མེད་ཅིང་གྲུབ་པ་མེད་ན་གཅིག་ལ་གཅིག་བརྟེན་པའི་ཕྱིར་གཅིག་མ་གྲུབ་ན་གཉིས་པ་ཡང་གྲུབ་པར་མི་འགྱུར་
རོ། །འདིར་རང་བཞིན་དང་མཐུན་པའི་དཔེ་བསྟན་པའི་ཕྱིར། གལ་ཏེ་ཕ་མིང་ཞེས་པ་ལ་སོགས་པ་གསུངས་ཏེ། ཕ་ནི་སྐྱེད་པར་བྱེད་པ་ཡིན་ལ། གལ་ཏེ་བུད་མེད་དེ། བུ་མེད་པར་གྱུར་ནའོ། །བུ་སྐྱེད་བ་ལ་སྟོས་ནས་འདི་ཐ་སྙད་ཡིན་ལ། དེ་ལྟར་ན་གང་ལས་བུ་འབྱུང་བ་ཡིན་གང་སྟེ་གང་གི་ཕྱིར་ཕ་མེད་པའི་ཕྱིར་བསྐྱེད་པར་བྱ་བའི་བུ་འབྱུང་ཞིང་སྐྱེ་བ་ཡོད། ཅིའི་ཕྱིར་ཞེ་ན། བུ་མེད་པར་ནི་ཕ་མེད་པས། །ཞེས་པ་འདི་ནི་གཏན་ཚིགས་ཀྱི་ཚིག་ཡིན་ནོ། །གང་གི་ཕྱིར་བུ་མེད་དེ་ཡོད་པ་མ་ཡིན་ན་ཕ་ཡོད་པ་ནི་མ་ཡིན་ཏེ། ཕར་མི་འགྱུར་ལ། ཕས་ཀྱང་བུ་བསྐྱེད་པར་བྱ་བ་མ་ཡིན་ལ། དེ་ཡང་བུ་ཇི་སྲིད་དུ་སྐྱེད་པར་བྱེད་པ་མ་ཡིན་ན་དེ་སྲིད་དུ་ཕ་ཉིད་དུ་མི་འགྱུར་ཏེ། དེ་སྲིད་དུ་བུ་ལས་བུར་འགྱུར་བར་སྲིད་པ་མ་ཡིན་པའི་ཕྱིར་གཅིག་ལ་གཅིག་བརྟེན་པས་ན་གཅིག་མེད་པས་གཞན་མེད་པར་འགྱུར་རོ་ཞེས། གཉི་ག་ཡང་ནི་མེད་པར་འགྱུར། །ཞེས་ཏེ། བསྡུས་པའི་དོན་ཏོ། །དོན་འདི་དཔེ་ལས་བྱུང་བ་ལ་སྦྱར་བའི་ཕྱིར། དེ་བཞིན་ཞེས་གསུངས་ཏེ། ཇི་ལྟར་འདིར་ཕ་དང་བུ་དཔེར་བརྗོད་པ་དེ་བཞིན་དུ་ཤེས་པ་དང་ཤེས་བྱའི་གཉིས་པོ་དེ་དག་ཡོད་པ་མ་ཡིན་ཏེ། དེ་བཞིན་དུ་དངོས་པོ་མ་ཡིན་ཏེ། འདི་ལྟར་ཡང་ཤེས་པར་བྱ་བའི་ཤེས་པ་ལ་ཤེས་བྱར་ཡང་བརྗོད་དོ། །ཤེས་པ་ཡོངས་སུ་གཅད་པར་བྱ་བས་ཀྱང་ཤེས་བྱ་ཡིན་ནོ་ཞེས་སོ། །ཇི་སྲིད་དུ་ཤེས་པ་མ་གྲུབ་པ་དེ་སྲིད་དུ་ཡོངས་སུ་ཤེས་པ་མི་གྲུབ་ལ། དེ་སྲིད་དུ་དེའི་ཡོངས་སུ་གཅད་པར་བྱ་བ་ཉིད་ཀྱིས་ཤེས་པར་བྱ་བ་མི་འགྲུབ་པས་གཅིག་ལ་གཅིག་བརྟེན་པ་ཉིད་ཀྱི་ཕྱིར་གཉི་ག་མེད་པར་འགྱུར་རོ་ཞེས་དགོངས་པ་ཡིན་ནོ། །དེ་ལྟར་གྱུར་ན་ཡང་ཕན་ཚུན་གྱི་དབང་གིས་གྲུབ་པོ་ཞེས་མི་སྟེ་འོན་ཀྱང་ཤེས་བྱའི་འབྲས་བུ་ཤིས་པ་ཡིན་ལ། ཤེས་པ་དེ་ལས་མྱུ་གུ་དང་ས་བོན་བཞིན་དུ་ཤེས་པ་གྲུབ་ཅེས་གཞན་གྱི་བསམ་པ་དགོད་པའི་ཆེད་དུ། མྱུ་གུ་ས་བོན་ལས་སྐྱེ་ཞིང༌། །ཞེས་པ་ལ་སོག་པ་གསུངས་ཏེ། ས་བོན་གཤོང་དང་བུ་གའི་ནང་དུ་ཆུད་པའི་ལས་ཏེ། ས་བོན་དེ་ཉིད་ལས་མྱུ་གུ་སྐྱེས་པར་བརྗོད་ཅིང་གོ་བར་བྱེད་པ་ཇི་ལྟར་ཡིན་པ་དེ་བཞིན་དུ་འདིར་ཤེས་བྱ་སྟེ། གཞལ་བྱ་བས་སོ། །
ཤེས་པ་སྐྱེས་ཏེ་གྲུབ་པ་ཡིས་སོ། །དེ་ཡོད་པ་སྟེ་ཤེས་པར་བྱ་བ་དེ་ཡོད་ཅིང་ཡང་དག་པར་ཡོད་པའོ། །ཅིས་མི་རྟོགས་ཏེ། འདིར་ཡང་ས་བོན་དང་མྱུ་གུ་བཞིན་དུ་རྒྱུ་དང་འབྲས་བུ་དངོས་པོ་ཡོད་པ་ཡིན་པའི་ཕྱིར་རོ། །འདི་ནི་དཔེ་དང་འདྲ་བ་མ་ཡིན་ཞེས་བསྟན་པའི་ཕྱིར། མྱུ་གུ་ཞེས་པ་ལ་སོགས་པ་གསུངས་ཏེ། མྱུ་གུ་སྟེ་འབྲས་བུ་ལས་ས་བོན་ཡོད་ཅེས་རྟོགས་ན། དེ་འདི་ཉིད་འབའ་ཞིག་གི་མཐུ་མ་ཡིན་ཏེ། འོན་ཀྱང་གཞན་ཏེ་མྱུ་གུ་ལས་ཐ་དད་པའི་ཤེས་པ་ལས་དེ་ཡོད་དོ་ཞེས་རྟོགས་པ་སྟེ། འདི་ལྟར་རུང་བ་ཙམ་གྱིས་རྒྱུ་འབྲས་བུས་རྟོགས་པར་བྱེད་པ་མ་ཡིན་ཏེ། གཞན་དུ་ན་ས་བོན་ཉིད་མྱུ་གུ་སྐྱེད་བ་མ་གཏོགས་པས་ཀྱང་གོ་བར་བྱེད་པ་ཉིད་དུ་འགྱུར་རང་གི་ངོ་བོ་རྟོགས་པ་ཙམ་གྱིས་མ་གཏོགས་པའི་འབྲས་བུ་དང་རྒྱུའི་དངོས་པོ་ཡང་རྟོགས་པར་ཐལ་བར་འགྱུར་བའི་ཕྱིར་ཏེ། འོན་ཀྱང་མེད་ན་མི་འབྱུང་བ་ཉིད་ཀྱི་ངེས་པ་ཡིན་ནོ། །དེའི་ཕྱིར་སྔར་རྒྱུ་དང་འབྲས་བུ་དངོས་པོ་རྟོགས་པ་ལ་ཡང་ཕྱི་ནས་འགའ་ཞིག་ཏུ་ས་བོན་ལས་བྱུང་བའི་མྱུ་གུ་དམིགས་པ་དང་ལྡན་པས་ས་བོན་དུ་ཞེན་པའི་བདག་ཉིད་རྗེས་སུ་དཔག་པ་སྐྱེ་བར་འགྱུར་རོ། །དེས་ས་བོན་ཡོད་དེ་ཞེས་ཞེན་པར་བྱེད་དོ། །དེ་ལྟ་བས་ན་ཤེས་པས་ཡུལ་དུ་བྱས་པའི་འདི་ལྟར་མྱུ་གུ་ས་བོན་རྟོགས་པའི་རྒྱུ་ཡིན་ལ། ཤེས་པ་ཡོད་པ་ཉིད་དེ། ཤེས་པ་དངོས་པོ་ལ་ཡོད་པ་གང་ལས་ཏེ། གང་གིས་ཤེས་པ་ཡོད་པར་རྟོགས་པར་བྱེད་དེ། རང་རིག་པ་མེད་པའི་ཕྱིར་དང་ཐུག་པ་མེད་པའི་འཇིགས་པས་ཤེས་པ་གཞན་མི་ཚོལ་བའི་ཕྱིར་རོ། །ཤེས་བྱ་གང་ཞིག་དེ་ཡིས་གོ་བར་འགྱུར་བ་གང་ལས་ཏེ། ཤེས་པར་བྱ་བ་ཤེས་པས་ཤེས་བྱའི་འབྲས་བུ་དེས་གོ་ཞིང་ཞེན་པར་འགྱུར། རང་ཉིད་མ་ངེས་བའི་རྟགས་པ་སྒྲུབ་བྱ་གོ་བར་བྱེད་བའི་རིགས་པ་མ་ཡིན་ནོ།། གས་པར་བྱེད་པའི་རྒྱུ་འདི་ཤེས་བྱའི་གོ་བར་བྱེད་པ་ཡིན་ནོ། །དེ་ལྟ་བས་ན་དངོས་པོའི་ཕྱོགས་ལ་ཤེས་པ་དང་ཤེས་བྱ་གྲུབ་པས་དཔྱད་པར་ནུས་པ་མ་ཡིན་ཏེ། བརྟགས་པའི་ཕྱོགས་ལ་ནི་ཇི་ལྟར་གྲགས་པ་བཞིན་དུ་ཐ་སྙད་ལ་བརྟེན་ནས་ནུས་པ་ཡིན་ནོ་ཞེས་ངེས་སོ། །ད་ནི། རང་
ལས་མ་ཡིན་གཞན་ལས་མིན། །གཉིས་ལས་མ་ཡིན་རྒྱུ་མེད་མིན། །དངོས་པོ་གང་དག་གང་ན་ཡང༌། །སྐྱེས་པ་ནམ་ཡང་ཡོད་མ་ཡིན། །ཞེས་པའི་དོན་བསྒྲུབ་པའི་དོན་དུ་རྒྱུ་མེད་པ་ཡང་མ་ཡིན་ནོ་ཞེས་པ་མཐའ་བཞི་པ་བསྒྲུབ་པའི་དོན་དུ་རེ་ཞིག་དངོས་པོར་སྨྲ་བའི་འདོད་པ་དགག་པའི་ཕྱིར། རེ་ཞིག་འཇིག་རྟེན་ཞེས་པ་ལ་སོགས་པ་གསུངས་ཏེ། འདི་ལྟར་ཡང་དེ་རྣམས་ཀྱིས་རང་དང་གཞན་གྱི་རང་བཞིན་གྱི་རྒྱུ་ལ་མ་ལྟོས་པ་ཉིད་དངོས་པོའི་ཚོགས་རྣམ་པ་སྣ་ཚོགས་པ་སྐྱེ་བར་འགྱུར་རོ་ཞེས་སྐྱེ་བར་བྱེད་དོ་ཞེས་རྗོད་པར་བྱེད་དོ། །གང་གི་ཕྱིར་པདྨ་ལ་སོགས་པ་རྣམས་ཀྱི་རྩ་བ་དང་འདབ་མ་དང་ཡལ་ག་དང༌། ཟེའུ་འབྲུལ་སོགས་པ་རྣམ་པ་དུ་མའི་ཁྱད་པར་ཐ་དད་པ་རྣམ་པ་སྣ་ཚོགས་པ་སེམས་དང་བྲལ་བའི་ཆུ་དང་འདམ་ལ་སོགས་པ་ལས་བསྐྱེད་པར་མི་ནུས་སོ་ཞེས་སོ། །སེམས་པ་དང་ལྡན་པ་གཞན་འགའ་ཞིག་ལས་དེ་ལྟ་བུས་སྤྲུལ་པ་ལས་གཞོལ་བ་དམིགས་པ་ཡང་མ་ཡིན་ལ། གུས་པར་བྱེད་པ་ཡང་མ་ཡིན་ཏེ། ལས་ལ་མཐར་ཐུག་པ་མེད་པའི་ཕྱིར་དང༌། དུས་གཅིག་ཏུ་མཐར་ཐུག་པ་མེད་པའི་ཁྱད་པར་རྣམས་ལ་བྱ་བ་དང་ལྡན་པའི་ཕྱིར་རོ། །དེ་ལྟ་བས་ན་རྒྱུ་ཆུང་ཟད་ཀྱང་མེད་པར་འགྲོ་བ་འདི་ཐམས་ཅད་རྣམ་པ་སྣ་ཚོགས་པར་སྐྱེའོ་ཞེས་པ་ནི་དེ་རྣམས་ཀྱི་ལུགས་སོ། །དེ་སྐད་དུ་ཡང༌། རང་བཞིན་སྨྲ་བ་དེ་རྣམས་ཀྱིས། །རང་ཉིད་ཀྱང་ནི་རྒྱུ་རུ་བརྗོད། །ཐམས་ཅད་རྒྱུ་ལ་རེ་མེད་པར། །དངོས་པོ་རྣམས་ཀྱི་སྐྱེ་བ་ཡང༌། པདྨ་ཉི་མ་གེ་སར་སོགས། །སྣ་ཚོགས་གང་གིས་བྱེད་པ་ཡིན། །རྨ་བྱའི་མདོངས་ལ་སོགས་པ་ཡང༌། །སྣ་ཚོགས་གང་གིས་སྤྲུལ་པ་ཡིན། །ཇི་ལྟར་ཚེར་མ་ལ་སོགས་པའི། །རྣོ་བ་ལ་སོགས་རྒྱུ་བྱེད་དམ། །གློ་བུར་ཡིན་ཕྱིར་དེ་བཞིན་དུ། །སྡུག་བསལ་ལ་སོགས་རྒྱུ་མེད་ཉིད། །ཅེས་བརྗོད་དོ། །དེ་ལ་འདི་ལྟར་སྨྲ་བ་ལ་ནི་འཇིག་རྟེན་གྱི་རྟོག་པ་ཉིད་ཀྱིས་རྒྱུ་ལ་ནུས་པ་མེད་པ་ཉིད་ལ་གནོད་པར་འགྱུར་རོ་ཞེས་སྟོན་ཏེ། འཇིག་རྟེན་པ་ནི་སྐྱེ་བོ་ཐམས་ཅད་ཡིན་ལ། མངོན་སུམ་གྱི་དབང་པོ་ལ་བརྟེན་པ་ནི་ཤེས་པའི་ཡིན་ལ། མངོན་སུམ་ཞེས་པ་འདི་ཉེ་བར་མཚོན་པ་
ཡིན་པའི་ཕྱིར་རྗེས་སུ་དཔག་པས་ཀྱང་ཡིན་ཏེ། དེ་རྟོགས་པའི་ཕྱིར་ན་མངོན་སུམ་དང་རྗེས་སུ་དཔག་པ་ཡིན་ཞེས་པའི་ཐ་ཚིག་གོ །ཐམས་ཅད་ནི་རྣམ་པ་དུ་མ་ཡིན་ལ། རྒྱུ་ནི་འཇིག་རྟེན་སྣ་ཚོགས་པའི་རྒྱུ་ཡིན་ལ། མཐོང་བ་ནི་དེའི་རྗེས་སུ་འགྲོ་བ་དང༌། ལྡོག་པའི་བྱེད་པ་ཡང་འབྲས་བུ་སྐྱེད་པར་མཐོང་ལ། འབྲས་བུ་ནི་གང་ཞིག་ཡོད་ན་ཡོད་ལ། དེ་མེད་ན་མེད་པར་རྟོགས་པ་དེ་ནི་དེའི་རྒྱུ་ཡིན་ནོ་ཞེས་ངེས་པ་ཡིན་ནོ། །དེའི་ཕྱིར་འཇིག་རྟེན་གྱི་རྟོགས་པ་ཉིད་ཀྱི་རྒྱུའི་བྱེད་པ་ལས་རྒྱུ་མེད་པའི་དམ་བཅའ་བ་ཉིད་ལས་གནོད་པར་བྱེད་ལ། དེ་ཉེ་བར་བསྟན་པའི་ཕྱིར། པདྨའི་སྡོང་པོ་ཞེས་པ་ལ་སོགས་པ་གསུངས་ཏེ། པདྨའི་སྡོང་པོ་ལ་སོགས་པ་གང་ཡིན་པ་དེ་རྣམས་ཏེ། ལོ་མ་དང༌། འདབ་མ་དང༌། ཡལ་ག་དང༌། ཟེའུ་འབྲུ་ལ་སོགས་པ་དེ་རྣམས་ལ་དེ་སྐད་ཅེས་བརྗོད་དེ། གང་གི་ཕྱིར་དེ་རྣམས་ཀྱི་ཁྱད་པར་སྣ་ཚོགས་པ་ཉིད་ཡིན་ནོ། །རྒྱུའི་དབྱེ་བས་ཞེས་པའི་རྒྱུ་སྟེ་རྒྱུའི་དབྱེ་བ་ལས་ཁྱད་པར་སྐྱེ་བར་གྱུར་ཏེ་འབྱུང་བར་འགྱུར་ལ། གཞན་དུ་ནི་མ་ཡིན་ཏེ། ངེས་པ་མེད་པར་ཐམས་ཅད་དུ་འབྱུང་བར་ཐལ་བའི་ཕྱིར་རོ། །དེའི་ཕྱིར་གང་གང་གིས་རྗེས་སུ་འགྲོ་བ་ལྡོག་པའི་རྗེས་སུ་བྱེད་པར་རྟོགས་པ་དེ་ཉིད་ཀྱི་འབྲས་བུ་ཡིན་ཏེ། དེ་གཞན་ལས་མ་བྱུང་ཞེས་ཁས་བླང་བར་བྱ་བ་ཡིན་ནོ། །དེ་ལྟ་བས་ན་རྒྱུ་སོ་སོར་ངེས་པ་ཉིད་ལས་ཁྱད་པར་སོ་སོར་ངེས་པར་སྐྱེ་བ་ཡིན་ཏེ། དེའི་ཁྱད་པར་གྱི་ཁྱད་པར་ཡིན་པའི་ཕྱིར་རྒྱུ་མེད་པ་ནི་མ་ཡིན་ནོ། །ཅི་སྟེ་གལ་ཏེ་རྒྱུ་ཉིད་ལ་རང་ཉིད་ཀྱི་ཁྱད་པར་འདི་གྲུབ་པ་ཡིན་ལ། འོན་ཀྱང་དེ་ཉིད་གང་ལས་སྲིད་པར་འགྱུར་ཞེས་བརྗོད་པར་བྱ་སྟེ། ཁྱད་པར་མེད་པ་ལས་ཁྱད་པར་སྐྱེ་བ་མ་ཡིན་ཏེ། ཡང་རྒྱུ་མེད་པར་ཐལ་བར་འགྱུར་བའི་ཕྱིར་རོ་ཞེས་པའི་དོགས་པ་འདི་སྤང་བའི་ཕྱིར། རྒྱུ་དབྱེ་གང་གིས་ཞེས་པ་ལ་སོགས་པ་དོགས་པ་སྤང་བ་སྨོས་ཏེ། གང་གིས་བྱས་ཞེས་པ་ནི་སུ་ཞིག་བྱས་ཤིང༌། གང་ལས་བྱུང་ཞེས་པའོ། །རྒྱུའི་དབྱེ་བས་བྱས་ཤེས་ན། གང་གིས་རྒྱུའི་དབྱེ་བ་ཁྱད་པར་ཡིན་ནོ་ཞེས་བརྗོད་ནའོ། །སྔར་གྱི་རྒྱུ་དབྱེ་བ་ཉིད་ལས་སོ་ཞེས་ཏེ། སྔར་གྱི་སྟེ། སྔ་མ་ཉིད་
ལས་ཡིན་ལ། དེ་སྐྱེད་པར་བྱེད་པའི་རྒྱུ་དབྱེ་བ་ལས་ཏེ། ཁྱད་པར་གྱི་དབྱེ་བ་ལས་སོ། །དེའི་ཡང་རྒྱུ་སྔ་མ་གང་ལས་ཁྱད་པར་དུ་འགྱུར་ཞེ་ན། དེ་ལ་ཡང་སླར་རྒྱུའི་ཁྱད་པར་ལས་ཞེས་བརྗོད་པར་བྱ་སྟེ། དེ་ལྟར་ཕྱི་མ་ཕྱི་མའི་ཁྱད་པར་འདོད་པ་རྣམས་ལ་སྔ་མ་སྔ་མའི་ཁྱད་པར་ལས་ཞེས་ལན་བརྗོད་པར་བྱ་ལ། ཐུག་པ་མེད་པ་མི་འདོད་པ་ཅུང་ཟད་དུ་ཡང་འགྱུར་བ་མ་ཡིན་ཏེ། འཁོར་བ་ལ་ཐོག་མ་མེད་པའི་སྔོན་གྱི་མཐའ་ཤེས་པར་འགྱུར་བ་མ་ཡིན་ཞེས་ཁས་བླངས་པའི་ཕྱིར་རོ། །དེ་ཉིད་ཀྱི་ཕྱིར་ན་འབྲས་བུ་ཕྱིན་ཅི་ལོག་པ་ཡང་རང་གི་ལས་མ་ཡིན་ནོ་ཞེས་བསྟན་པའི་ཆེད་དུ་གཞན་གྱིས་དོགས་པ་ཅིའི་ཕྱིར་ཞེས་པ་ལ་སོགས་པ་སློང་བ་སྨོས་ཏེ། རྒྱུ་གང་ལས་འབྲས་བུ་སྐྱེད་པའི་ཁྱད་པར་འབྲས་བུ་འབྱིན་པའི་མཐུ་སྟེ་རྒྱུ་ཡིན་ཞེ་ན། སྔར་གྱི་རྒྱུའི་མཐུ་ལས་ཡིན་ཏེ། སྔར་གྱི་དེ་སྐྱེད་པར་བྱེད་པའི་རྒྱུ་ལས་ཏེ། མཐུ་ལས་སོ། །གང་གིས་ན་ལྷན་ཅིག་བྱེད་པའི་ཁྱད་པར་གྱིས་སྐྱེད་པ་འབྲས་བུ་སྐྱེས་པའི་ཡོན་ཏན་གྱི་ཁྱད་པར་ཕན་ཚུན་ཡོངས་སུ་གྱུར་པའི་ལྷག་པར་གྱུར་པ་ནི་གགས་དང་མ་ཚང་བ་མི་སྲིད་ན། དེ་ལྟ་བུའི་རྣམ་པ་ཉིད་ཀྱིས་འབྲས་བུ་སྐྱེད་པར་བྱེད་དོ། །དེ་ལྟ་བས་ན་ཕྱིན་ཅི་མ་ལོག་པའི་འབྲས་བུ་སྐྱེད་པར་ཡང་རང་གི་རྒྱུའི་ནུས་པས་སྐྱེད་པ་ཉིད་ཡིན་ནོ། །དེས་ན་མངོན་པར་མཐོ་བ་དང་ངེས་པར་ལེགས་པའི་སྒྲུབ་པར་བྱེད་པའི་རྒྱུ་ལས་གོ་རིམས་ཇི་ལྟ་བ་བཞིན་དུ་མངོན་པར་མཐོ་བ་དང་ངེས་པར་ལེགས་པའི་འབྲས་བུ་སྐྱེ་བར་འགྱུར་རོ། །དེ་ཕྱིན་ཅི་ལོག་པ་ལའང་ཕྱིན་ཅི་ལོག་པ་ཡིན་ནོ་ཞེས་པ་བརྒྱ་ལ་ཡང་ཕྱིན་ཅི་ལོག་པ་མ་ཡིན་ནོ། །འདི་ཡང་ངེས་པར་རང་བཞིན་དུ་སྨྲ་བ་རྒྱུ་དང་བཅས་པར་མི་འདོད་ན་ཡང་ཁས་བླང་བར་བྱ་བ་སྟེ། གཞན་དུ་ན་གཏན་ཚིགས་མེད་པར་དངོས་པོ་རྣམས་ཀྱི་རྒྱུ་མེད་པར་དམ་འཆའ་བ་ཇི་ལྟར་གྲུབ་པར་འགྱུར་ཏེ། དམ་བཅས་པ་ཙམ་གྱིས་དེ་སུ་ཞིག་གིས་ཀྱང་འཛིན་པ་མ་ཡིན་པའི་ཕྱིར་རོ། །གཏན་ཚིགས་ཀྱི་བྱེད་པས་དེ་སྒྲུབ་པར་བྱེད་པ་རང་ཉིད་ཀྱིས་སླར་ཡང་རྒྱུ་དང་བཅས་པ་ཉིད་དུ་ཁས་བླངས་པའི་ཕྱིར་མོ་གཤམ་ཡང་ཡིན་ལ། བདག་གི་མ་ཡང་ཡིན་ནོ་ཞེས་སྨྲ་བ་བཞིན་དུ་དམ་བཅས་པ་ལ་རང་གི་ཚིག་གིས་གནོད་པར་
འགྱུར་ཏེ། དེའི་ཕྱིར་ངོས་གཉིས་ཀྱིས་ཐག་པའི་ཞགས་པ་བཞིན་དུ་དོགས་པར་སྡུག་པ་འདི་ཆུད་པ་ཡིན་ནོ། །དེ་སྐད་དུ་ཡང༌། རྒྱུ་ནི་མེད་ཅེས་བརྗོད་པ་གཏན་ཚིགས་དང་ལྡན་པར། །དམ་བཅས་རང་ཉིད་ཀྱིས་ནི་བསལ་བ་མ་ཡིན་ནམ། །འོན་ཏེ་གཏན་ཚིགས་བརྗོད་ལ་ལེ་ལོར་གྱུར་ན་ནི། །དམ་བཅའ་འབའ་ཞིག་གིས་ནི་འདི་ལ་ཅི་ཞིག་འགྱུར། །ཞེས་གསུངས་སོ། །དེ་ལྟ་བས་ན་འདི་ལྟ་བ་ངན་པས་སྤྲུལ་པ་ཉིད་ཡིན་ཏེ། ཚད་མས་གནོད་པའི་ཕྱིར་རོ། །དེ་ལྟར་ན་རང་བཞིན་དུ་སྨྲ་བ་བསལ་ནས། རྣམ་པ་གཉིས་པ་བསྒྲུབ་པའི་ཆེད་ཉིད་དུ་དབང་ཕྱུག་འགྲོ་བའི་རྒྱུ་ཡིན་པ་ཉིད་དུ་བསྟན་པའི་ཆེད་དུ་དེ་སློང་བར་བྱེད་པས་དབང་ཕྱུག་ཅེས་པ་ལ་སོགས་པ་སྨོས་ཏེ། དབང་ཕྱུག་རྒྱུར་སྨྲས་བས་ཀྱང་རང་བཞིན་དུ་བྱེད་པའི་འདོད་པ་སུན་ཕྱུང་བ་ཐོས་ནས་ཁུར་ཕྱེད་ཕྱོགས་པར་བསམས་ནས། ཁྱད་པར་བརྗོད་པའི་ཆེད་དུ་ཁྱེད་རྣམས་ཀྱིས་གྲོགས་ཉིད་བྱས་པ་ཡིན་ཏེ་ཞེས་སྨྲས་ཏེ། རྒྱུ་མེད་པར་འགྲོ་བ་རྣམ་པ་སྣ་ཚོགས་སུ་འབྱུང་བ་མ་ཡིན་ཏེ། ཡུལ་ལ་སོགས་པ་ངེས་པ་མེད་པར་ཐལ་བའི་ཕྱིར་ལ། སེམས་པ་མེད་པ་འབའ་ཞིག་གིས་ཆུ་དང་འདམ་ལ་སོགས་པ་འདི་རྣམས་ཀྱིས་རྣམ་པ་སྣ་ཚོགས་པ་ནུས་པ་མ་ཡིན་ཏེ། ཞེས་པ་འདི་བརྗོད་པ་ནི་རིགས་པ་ཡིན། དེ་ལ་བཅོམ་ལྡན་འདས་རྣམ་པ་སྣ་ཚོགས་པ་སྤྲུལ་པ་ལ་མཁས་པ་འགྲོ་བའི་དེད་དཔོན་གཅིག་པུ། འགྲོ་བ་མཐའ་དག་གི་དང་པོར་གྱུར་པ་རྟག་པའི་བདག་ཉིད་ཀྱིས་རྣམ་པ་ཐམས་ཅད་དུ་ཉམས་པ་མེད་པའི་ནུས་པའི་མཐུ་དང་ལྡན་པས་དངོས་པོ་ཐམས་ཅད་ཀྱི་རྒྱུ་དང་འབྲས་བུའི་དངོས་པོ་ལ་སོགས་པ་དེ་ཉིད་མཁྱེན་པ་དབང་ཕྱུག་གི་ཚེ་བའི་བདག་ཉིད་ཚུ་རོལ་མཐོང་བ་མཐའ་དག་གི་སྤྱོད་ཡུལ་མ་ཡིན་པའི་རྒྱུ་དེས་ན་གཡོ་བ་དང་མི་གཡོ་བ་འདི་མཐའ་དག་རྒྱུ་དང་བཅས་པའི་འགྲོ་བ་ཞེས་སེམས་དང་བཅས་པ་ལས་གཞན་དུ་སྨྲ་བར་ནུས་ཞེས་རིགས་པ་ཅན་ལ་སོགས་པས་ཁྱིམ་དུ་འགྲོ་བས་དབང་ཕྱུག་འགྲོ་བའི་རྒྱུ་ཡིན་ནོ་ཞེས་སྨྲ་བར་བྱེད་དོ། །དབང་ཕྱུག་ཅེས་པ་ནི་བདེ་བྱེད་དུ་གྲགས་པ་ཡིན་ལ་དེ་ཉིད་འགྲོ་བས་ཏེ། སྣ་ཚོགས་རྒྱུ་ཡིན་ལ་འབྱིན་པ་དང་གནས་པ་དང་འཇིག་པར་བྱེད་པའི་རྒྱུ་ཡིན་ནོ། །
དེ་ལྟ་བས་ན་སྣ་ཚོགས་མ་ལུས་པ་འདི་ཉིད་སྐྱེ་བར་འགྱུར་ལ། གཞན་དུ་ན་སེམས་མེད་པ་རྒྱུ་ཡིན་པའི་ཕྱིར་རི་དང་ཆུ་ཀླུང་དང་ས་གཞི་དང་རྒྱ་མཚོ་ལ་སོགས་པ་སྐྱེ་བ་ལ་བརྟེན་པ་ཇི་ལྟར་འགྱུར། སེམས་དང་ལྡན་པས་བྱིན་གྱིས་བརླབས་པ་ལས་སླར་ཡང་འདི་རྣམས་སྐྱེད་པར་ནུས་པ་ཡིན་ཏེ། དེའི་བྱེད་པ་ཉིད་ཀྱིས་སྒྲུབ་པར་བྱེད་པའི་ཕྱིར་རོ། །དེ་སྐད་དུ་ཡང༌། སྐྱེད་ལྡན་གཞན་མ་ཐམས་ཅད་ཀྱི། །དབང་ཕྱུག་རྒྱུ་རུ་རྗོད་པར་བྱེད། །རི་ལ་སོགས་པ་སེམས་མེད་པས། །རང་ཉིད་ཀྱིས་ནི་བརྩོན་ནུས་མིན། །དབང་ཕྱུག་རྫ་མཁན་བཞིན་དུ་སྣ་ཚོགས་སྤྲུལ་པ་བྱེད་པར་མ་གྱུར་ན། །རི་རབ་འདི་ནི་འགྲུབ་ཅིང་ས་གཞི་འདི་མིན་རྒྱ་མཚོ་མ་ཡིན་ཉིད། །ཉི་ཟླ་གཟའ་སྐར་ལྡན་འདིར་དགོད་པ་མིག་ཡུལ་འདི་དག་ཏུ་མི་འགྱུར། །ཡོད་པའི་ཕྱིར་ན་དབང་ཕྱུག་འགྲོ་བའི་བྱེད་པ་ཡིན་ཞེས་འགའ་ཞིག་སྨྲ། །ཞེས་བརྗོད་དོ། །དེ་ལྟ་བས་ན་འགྲོ་བ་ཉིད་སེམས་པ་མེད་པ་ཉིད་དང༌། སྣ་ཚོགས་པའི་དངོས་པོའི་རྒྱུ་དབང་ཕྱུག་ཡིན་ནོ་ཞེས་བདག་ཉིད་བརྗོད་དོ་ཞེ་ན། འདི་ལ་བརྗོད་པར་བྱ་སྟེ། འདིས་རང་གི་ཁྱིམ་དུ་བརྟགས་པའི་གཞལ་ཡས་དགོད་པ་དང༌། ཚིག་གིས་དགོད་པ་སྤྲོས་པའི་ཚོགས་ཀྱིས་འདི་ལྟར་བརྗོད་པ་ལ་ཡང་རང་གི་གྲུབ་པའི་མཐའ་ལ་མངོན་པར་ཞེན་པའི་བློ་གྲོས་རྟུལ་པོ་རྣམས་ལ་དགའ་བར་བྱེད་པ་ཡིན་ལ། ཚད་མ་དང་བྲལ་བ་ལ་མཁས་པ་རྣམས་ལ་དགའ་བ་སྐྱེ་བ་མ་ཡིན་ནོ། །འདི་ལྟར་ཡང་འདི་གལ་ཏེ་སྙིང་རྗེ་དང་ལྡན་པ་ཡིན་ན་ཡང་ཅིའི་ཕྱིར་སྲོག་ཆགས་རྣམས་ལ་དམྱལ་བ་ལ་སོགས་པ་རྣམས་སུ་གདུང་བར་བྱེད། དེ་ལྟར་གྱུར་ན་ཡང་སྙིང་རྗེ་དང་ལྡན་པ་ཉིད་དང་པས་རྟོགས་པར་བྱ་བ་ཉིད་དུ་འགྱུར་རོ། །རང་གིས་བྱས་པའི་དམ་པ་མ་ཡིན་པའི་ལས་ཀྱི་འབྲས་བུ་ཉེ་བར་ལོངས་སྤྱོད་པས་དེ་ལ་གཏོད་པ་དང༌། སེལ་བ་ལ་གང་ཞིག་འཇུག་པར་འགྱུར་བས་ཇི་ལྟར་སྙིང་རྗེ་མེད་པར་འགྱུར་ཞེ་ན། གང་གིས་མི་འདོད་པའི་འབྲས་བུ་མྱོང་བ་འདིའི་ལས་སྙིང་རྗེ་དང་ལྡན་པས་མི་བྱེད་པར་འགྱུར་བ་ཇི་ལྟར་མི་བྱེད་དེ། དེ་ལ་ཡང་དེའི་བྱ་བ་ལྡན་པའི་ཕྱིར་ལ། སྐྱེ་བ་དང་ལྡན་པ་ཐམས་ཅད་ཀྱི་རྒྱུ་མཚན་ཡིན་པའི་ཕྱིར་རོ། །གཞན་ཡང་དེ་ལ་བྱ་བ་བྱེད་པ་
མ་ཡིན་ན་ལས་དེའི་འབྲས་བུ་ལ་ལོངས་སྤྱོད་པ་ཡིན་ནམ་མ་ཡིན། གལ་ཏེ་ཕྱོགས་དང་པོ་ཡིན་ན། དེ་སྐད་དུ། རང་གི་བདེ་བ་སྡུག་བསྔལ་ལ། །མི་ཤེས་སྐྱེ་བོ་རང་དབང་མིན། །མཐོ་རིས་དང་ནི་གཡང་ས་རུ། །དབང་ཕྱུག་གིས་བསྐུལ་འགྲོ་བར་འགྱུར། །ཞེས་བརྗོད་པ་དེར་ཇི་ལྟར་འགྱུར། འབྲས་བུ་ཐམས་ཅད་ལ་ཡང་དེའི་བྱེད་པ་ཁས་བླངས་པ་ལ་འདི་ཉིད་ཀྱིས་མ་ངེས་པར་ཐལ་བར་འགྱུར་རོ། །འོན་ཏེ་ཕྱོགས་གཉིས་པ་ཡིན་ན་དེའི་ཚེ་འདི་སྙིང་རྗེ་དང་ལྡན་པ་ཡིན་ན། གལ་ཏེ་འབད་པས་གྲོགས་ཉིད་དུ་དེ་ལ་རྟོག་པར་བྱེད་ན། དེ་ལ་བཏང་སྙོམས་ཅིའི་ཕྱིར་སྒོམ་པར་མི་བྱེད། འོན་ཏེ་བྱས་པའི་ལས་ཆུད་ཟོས་པར་འགྱུར་བའི་ཕྱིར་ངེས་པ་དེས་དེའི་འབྲས་བུ་མྱོང་བར་བྱ་ཞེས་དེ་ལོངས་སྤྱོད་པའི་ཆེད་དུ་བྱེད་པ་ཡིན་ནོ་ཞེ་ན། ཡང་འདི་ལ་བྱ་བ་མི་བྱེད་ན་ངེས་པར་དེས་ཇི་ལྟར་ཉམས་སུ་མྱོང་བར་བྱ་སྟེ། ཚོགས་པ་དང་བྲལ་བའི་ཕྱིར་རོ། །ཡང་འདི་ལྟར་ཆུད་ཟོས་ན་ཡང་ཉེས་པ་ཇི་ལྟར་འགྱུར་ཏེ། འབད་པ་ཉིད་ཀྱིས་སྙིང་རྗེ་ཅན་དེས་འགྲུབ་པར་རིགས་པ་ཡིན་ཏེ། འདི་ལྟར་ཡང་དེ་འདོད་པས་འཇུག་པ་ཉིད་ཀྱིས་དེ་མ་སྨིན་པའི་ཕྱིར་ཏེ། དེས་ན་དབང་ཕྱུག་གིས་བསྟན་པ་ཉིད་དུ་དེ་ལ་འགྱུར་རོ། །འོན་ཏེ་སེམས་ཅན་རྣམས་ཀྱི་ལས་དེས་བསྐུལ་བ་དེ་ཡང་སྙིང་རྗེ་དང་ལྡན་པས་གནས་པར་ནུས་པ་མ་ཡིན་ནོ་ཞེ་ན། ཀྱེ་མ་དབང་ཕྱུག་རང་ཉིད་ཀྱིས་འདི་ལྟར་གཞན་དུ་ཆེད་གསལ་བར་འགྱུར་ན་འགའ་ཞིག་ལས་ཀྱིས་ཡང་དག་པར་དྲངས་པའི་བདག་ཉིད་དབང་དུ་གྱུར་པ་ཐོབ་པར་མ་གྱུར་པའི་འདི་ལྟར་དབང་ཕྱུག་ལས་ཀྱང་ལས་ཉིད་ནུས་པ་ཆེན་པོ་དང་ལྡན་པ་ཉིད་དུ་གསལ་བར་བྱས་པར་འགྱུར་རོ། །གང་ཞིག་སྟོབས་ཀྱིས་ཡང་དག་པར་འདྲེན་པ་ན་དབང་ཕྱུག་ཆེན་པོ་ཡང་གནས་པར་མི་ནུས་ཏེ། དེས་ན་ལྷུར་ལས་ཉིད་རྟེན་པར་གྱིས་ཤིག །དེ་ལྟ་བས་ན་འདི་ནི་ཉམས་པ་མེད་པ་ཉིད་དེ། སྐྱེད་པ་པོ་ཡང་གང་རྣམས་ལ། །ནུས་མེད་པས་བདེན་ལ་ཕྱག་འཚལ། །ཞེས་པས་བསྟན་པར་བྱའོ། །འོན་ཏེ་སྙིང་རྗེ་ཅན་མ་ཡིན་ན་དེའི་ཚེ་འདི་འདོད་ཆགས་དང་བྲལ་བ་མིན་ནམ། འདོད་ཆགས་དང་བཅས་པ་ཡིན། གལ་ཏེ་རྣམ་པར་རྟོག་པ་དང་པོ་ཡིན་ན་དེའི་ཚེ་གལ་ཏེ་ཡང་སྙིང་རྗེ་དང་
བྲལ་བའི་ཕྱིར་འགྲོ་བ་ལ་བདེ་བ་སྟེར་བར་མི་བྱེད་ཅིང༌། སྡུག་བསྔལ་བ་ཅིའི་ཕྱིར་སྐྱེད་པར་བྱེད་ཅེས་བརྗོད་པར་བྱའོ། །སྡུག་བསྔལ་ཡང་འདོད་ཆགས་ལ་སོགས་པའི་དབང་གིས་འགའ་ཞིག་ལ་གཏོད་པར་བྱེད་པ་ཡིན་ལ། དེ་ཡང་འདི་ལ་མེད་ལ། ཇི་ལྟར་ན་རྒྱུ་མེད་པ་ཉིད་དུ་འགྲོ་བ་སྡུག་བསྔལ་བར་བྱེད། རོལ་པའི་དོན་དུ་སྡུག་བསྔལ་བར་བྱེད་དོ་ཞེ་ན། རོལ་པའི་དོན་དུ་འདོད་ཆགས་དང་བྲལ་བ་འཇུག་པས་འདི་ངེས་པར་འདོད་ཆགས་དང་བྲལ་བ་ཡིན་ཏེ། འདོད་ཆགས་ལ་སོགས་པ་དང་ལྡན་པའི་དབང་པོ་ཐུལ་བ་རྣམས་ཀྱང་རོལ་པའི་དོན་དུ་འཇུག་པ་མ་མཐོང་ན། ཆགས་པ་དང་བྲལ་བ་འདི་ཅིའི་ཕྱིར་ཡང་འཇུག་པར་འགྱུར། ཤ་ཟག་ཏུམ་པོ་ལ་སོགས་པ་མ་ཡིན་པ་གཞན་གྱིས་གཞན་སྡུག་བསྔལ་བས་རོལ་པ་ཡང་སྲིད་པ་མ་ཡིན་ནོ། །འོན་ཏེ་འདོད་ཆགས་དང་མ་བྲལ་བའི་ཕྱོགས་ཡིན་ན་དེའི་ཚེ་འདི་སྐྱེ་བོ་གཞན་དང་ཐུན་མོང་བ་ཡོད་ན། ཇི་ལྟར་དབང་ཕྱུག་མ་ཡིན་པར་མི་རིགས་ཏེ། འདོད་ཆགས་ལ་སོགས་པའི་ཉོན་མོངས་པའི་ཞགས་པའི་དབང་དུ་གྱུར་པས་འཇུག་པའི་འགྲོ་བ་དབང་ཕྱུག་མ་ཡིན་པའི་ཕྱིར་རོ། །གཞན་དུ་ན་དེའི་ཚེ་དེ་ལྟ་བུ་དང་མཚུངས་པ་གཞན་དེ་ཡང་ཐལ་བར་འགྱུར་བའི་ཕྱིར་རོ། །འཁོར་བའི་བཙོན་རར་བཅིངས་པ་དང་རང་དབང་ཅན་མ་ཡིན་པ་ལ་དེ་ལས་གཞན་བཞིན་དུ་རྣམ་པ་སྣ་ཚོགས་པ་སྤྲུལ་པ་ལ་མཁས་པར་རིགས་པ་ཡང་མ་ཡིན་ནོ། །གང་ཞིག་རྣམ་པ་འདི་ལྟ་བུ་ཡང་ཇི་སྲིད་དུ་དབང་ཕྱུག་ཏུ་ཁས་ལེན་པ་ཡོད་པ་དེ་ལྟར་དེ་ཉིད་ཀྱིས་ཁྱེད་བསླུ་བར་འགྱུར་རོ། །དེ་ལྟ་བུའི་བྱེད་པ་པོར་གྱུར་ན་འགྱུར་བ་ཡང་ཡིན་ནོ། །དེ་ལྟར་ན་ཡང་འདིའི་རང་བཞིན་དུ་གནས་པའམ། རང་བཞིན་གནས་པ་མ་ཡིན་པ་ཡིན། གལ་ཏེ་རང་བཞིན་དུ་གནས་པ་ཡིན་ན་ཅིའི་ཕྱིར་འགྲོ་བ་དོན་མེད་པར་སྡུག་བསྔལ་བར་བྱེད། རང་བཞིན་དུ་གནས་པ་ནི་གནོད་པར་བྱེད་པ་མེད་པར་སྐྱེ་བོ་སྡུག་བསྔལ་བར་བྱེད་པ་མ་མཐོང་ངོ༌། །འོན་ཏེ་ལོག་པའི་ལམ་དུ་འགྲོ་བ་ཉིད་དུ་གནོད་པ་བྱས་ཀྱང་གདུང་བར་བྱེད་པ་ཡིན་ནོ་ཞེ་ན། ལོག་པའི་ལམ་དུ་འགྲོ་བ་ཡང་འདི་ཉིད་ཀྱིས་བྱེད་པ་ཡིན་ལ། དེ་ལྟར་གྱུར་པར་ཡང་བྱས་ནས་ཡང་གདུང་བར་
བྱེད་པ་དེ་ནི་འཇིག་རྟེན་གྱི་དབང་ཕྱུག་བསྟེན་པ་བས་ཀྱང་ཤིན་ཏུ་ཡང་སྨད་པ་ཡིན་ནོ། །དེ་རྣམས་ཀྱི་རང་ཉིད་ཀྱིས་ཉེས་པ་བྱས་པ་ཉིད་ཀྱིས་ཉེས་པ་པོ་ལ་ཆད་པའི་ལས་བྱེད་དོ། །སླར་ཡང་འདི་ནི་རང་ཉིད་ཀྱིས་བྱེད་དུ་བཅུག་པས་ན་ཁྱད་པར་ཆེའོ། །འོན་ཏེ་རང་བཞིན་དུ་མི་གནས་པ་ཡིན་ན་དེའི་ཚེ་མཐོ་རིས་དང་ཐར་པ་དོན་དུ་གཉེར་བའི་རྟོགས་པ་དང་ལྡན་པ་རྣམས་ཀྱིས་དེ་བརྟེན་པ་ལ་འཇུག་པ་ལེགས་པ་ཡིན་ཏེ། སྨྱོན་པ་བསྟེན་པ་ནི་སྨྱོན་པ་ལས་གཞན་གྱིས་བྱེད་པ་རིགས་པ་མ་ཡིན་ནོ། །འདི་ལྟར་ཡང་མཐོ་རིས་ལ་སོགས་པའི་འབྲས་བུ་འདོད་པས་རྟོགས་པ་དང་ལྡན་པ་རྣམས་རབ་ཏུ་འཇུག་པར་བྱེད་དེ། དེ་ཡང་ཡོངས་སུ་མ་ངེས་པའི་རང་བཞིན་ཡིན་པས་དེ་ལས་འབྱུང་བ་མ་ཡིན་ནོ། །དེ་བསྟེན་པའི་ཕྱིན་ཅི་ལོག་ཀྱང་སྲིད་པ་ཡིན་ནོ། །དེ་སྟེར་བ་ལ་འཇུག་པས་དད་པ་བརྟན་པའི་དབང་གིས་སྨྱོན་པ་ལ་བརྟེན་པས་བདག་ཉིད་ཀྱང་སྨྱོན་པ་ཉིད་དུ་སྟོན་པ་ཡིན་ཏེ། གཞན་དུ་ན་དེ་བསྟེན་པ་ལ་ཇི་ལྟར་འཇུག་པར་འགྱུར། དེ་ལ་སྨྱོན་པ་གཞན་གྱིས་ཉེས་པ་ཅི་ཞིག་བྱས་ཏེ། གང་གིས་ན་དེས་སྟེན་པར་མི་བྱེད། དེ་རྣམས་ནི་ནུས་པ་ཁྱད་པར་ཅན་དང་བྲལ་བའི་ཕྱིར་རོ་ཞེ་ན། སྐབས་སུ་བབ་པ་ལ་ཡང་ཁྱད་པར་དུ་གྱུར་པའི་ནུས་པ་མཐོང་བ་ཡང་མ་ཡིན་ནོ། །འགྲོ་བ་ཐམས་ཅད་ཁྱད་པར་དུ་ནུས་པའི་སྨྱོན་པ་ཞེས་པ་ནི་སྨྱོན་པ་ལས་གཞན་གྱིས་སྨྲ་བར་རིགས་པ་མ་ཡིན་ནོ། །དེ་ལ་འདི་ཤིན་ཏུ་རྣམ་པར་དཔྱད་པ་ན་འགའ་ཞིག་ཏུ་གནས་པའི་རྙེད་པ་མ་ཡིན་ནོ། །དེ་བས་ན་བློ་གྲོས་ངན་པ་རྣམ་པར་གཡོ་བ་ལ་གུས་པས་ཅི་ཞིག་བྱ་སྟེ། དེ་ལྟ་བས་ན་འདི་ལེགས་པར་དཔྱད་པ་ཡིན་ནོ། །གང་བརྗོད་པ། བདེ་དང་སྡུག་བསྔལ་ལ་ནི་འབྱིན་བྱེད་མེད། །གཞན་གྱིས་ཕྱུང་ཞེས་པ་འདི་བློ་ངན་ཡིན། །འཇིག་རྟེན་རང་གི་ལས་ཀྱི་ཞགས་པས་མདུད། །བྱེད་པར་འགྱུར་ཞེས་ང་རྒྱལ་དོན་མེད་ཡིན། །ཞེས་སོ། །དེ་ལྟ་བས་ན་རྒྱུ་གཞན་མཐོང་བ་ལས་གཞན་པའི་རང་དབང་ཅན་སེམས་པ་དང་ལྡན་པའི་བྱེད་པ་པོ་འགའ་ཡང་ཡོད་པ་མ་ཡིན་ནོ། །འདི་ཉིད་རྒྱས་པར་བསྟན་པའི་ཕྱིར། གྲུབ་པའི་མཐའ་སྨྲ་བས་རེ་ཞིག་དབང་ཕྱུག་གང་
ཡིན་སྨྲོས་ཞེས་གསུངས་ཏེ། དབང་ཕྱུག་རྒྱུར་སྨྲ་བ་ལ་འདྲི་བ་ཡིན་ལ། སྨྲོས་ཞེས་པ་ནི་བརྗོད་ཅིག་པའོ། །གང་ཡིན་ཞེས་པ་ནི་ཁྱེད་འདོད་པའི་དབང་ཕྱུག་གོ །རེ་ཞིག་གི་སྨྲས་འདི་བརྗོད་པ་ཡིན་ཏེ། ས་ལ་སོགས་པ་གང་རྣམས་དང༌། རྗེས་སུ་འགྲོ་བ་དང་ལྡོག་པ་ལས་ཀྱི་འབྲས་བུ་མཐོང་བ་དེ་ལ་ཁྱེད་རྣམས་ཀྱིས་དབང་ཕྱུག་ཏུ་བརྗོད་པ་དེ་གང་ཡིན་ལ། མ་དམིགས་པའི་རྗེས་སུ་འགྲོ་བ་དང་ལྡོག་པའི་བྱ་བ་དང་ལྡན་པའི་རྒྱུ་རུ་བརྟགས་པར་རིགས་པ་མ་ཡིན་ཏེ། ཤིན་ཏུ་ཐལ་ཆེས་པའི་ཕྱིར་རོ། །དེ་ལྟ་བས་ན་དེ་ཉིད་འདོད་པས་མཐོང་བའི་རྗེས་སུ་འགྲོ་བ་དང་ལྡོག་པའི་ཁྱད་པར་ཉིད་ཁས་བླང་བར་བྱའོ། །ས་དང་ས་བོན་ལ་སོགས་པ་ལས་ཐ་དད་པའི་རྗེས་སུ་བྱེད་པའི་འབྲས་བུ་མཐོང་བ་མ་ཡིན་ནོ། །དེ་ཇི་ལྟར་ན་དེའི་འབྲས་བུ་ལ་མཁོ་བ་རྣམ་པར་གཞག །དེ་སྐད་དུ། གང་དག་ཡོད་ན་གང་ཉིད་འགྱུར། །དེ་དག་ལས་གཞན་རྟོག་པ་ན། །དེ་རྒྱུ་ཉིད་དུ་ཐམས་ཅད་ན། །རྒྱུ་རྣམས་ཐུག་པ་མེད་པར་འགྱུར། །ཞེས་བརྗོད་དོ། །འོན་ཏེ་ས་ལ་སོགས་པའི་འབྱུང་བ་རྣམས་ཉིད་དབང་ཕྱུག་ཡིན་ནོ་ཞེས་གཞན་གྱིས་བསམ་པ་ལེན་པས་འབྱུང་བ་རྣམས་ཤེ་ན་ཞེས་སྨོས་ཏེ། གལ་ཏེ་འབྱུང་བ་རྣམས་ཏེ་ས་ལ་སོགས་པ་རྣམས་དབང་ཕྱུག་ཏུ་བརྗོད་ན། དེའི་ཚེ་ཁས་ལེན་པ་ཉིད་ཡིན་ཏེ། དེ་ལྟ་མོད་ཅེས་པ་ནི་འདི་ཉིད་ཡོད་དུ་ཆུག་ཅིག །འདི་ལ་ཁོ་བོ་ལོག་པར་རྟོགས་པ་མ་ཡིན་ནོ། །ས་ལ་སོགས་པ་དང་རྗེས་སུ་འགྲོ་བ་དང་ལྡན་པ་ལ་འབྲས་བུ་མཐོང་བའི་ཕྱིར་རོ། །གཅིག་ཏུ་མིང་ཙམ་ལ་ཡང་ཅི་ཞིག་ངལ་ཏེ། མིང་འགའ་ཞིག་དོན་གྱིས་དབྱེ་བ་སྟོང་པའི་མིང་ཙམ་ལའོ། །ཡང་ཞེས་པ་ནི་ངེས་པར་གཟུང་བའོ། །མིང་ཙམ་ཉིད་ལ་འདིར་རྩོམ་པ་ཆེན་པོས་དེ་སྒྲུབ་པའི་ཆེད་དུ་ཅིའི་ཕྱིར་ངལ་བར་བྱེད། ངའི་ས་ལ་སོགས་པར་བརྗོད་ལ། ཁྱོད་ཀྱིས་ཡང་དེ་ཉིད་ལ་འབྱུང་བ་ཆེན་པོའི་དབང་ཕྱུག་ཅེས་པ་ལ་དོན་ལ་ཁྱད་པར་ཅུང་ཟད་ཀྱང་ཡོད་པ་མ་ཡིན་ནོ། །ལོག་པར་རྟོགས་པའི་དོན་གྱིས་སྟོང་པ་འདི་ལ་འབྲས་བུ་ཅུང་ཟད་ཀྱང་དམིགས་པ་མ་ཡིན་ནོ། །འོན་ཏེ་དོན་གྱི་ཁྱད་པར་ཡོད་ན། དེའི་ཚེ་འདི་དབང་ཕྱུག་ཉིད་དུ་རིགས་པ་མ་ཡིན་ནོ་ཞེས་
བསྟན་པའི་ཕྱིར། འོན་ཀྱང་ཞེས་པ་ལ་སོགས་པ་གསུངས་ཏེ། འོན་ཀྱང་ཞེས་པའི་སྒྲས་ལྷག་བློ་གྲོས་ཆེན་པོ་ཅན་ས་ལ་སོགས་པ་རྣམས་ལ། ཁྱེད་རྣམས་ཀྱིས་དབང་ཕྱུག་ཉིད་དུ་བརྟག་པར་རིགས་པ་མ་ཡིན་ཏེ། དེའི་མཚན་ཉིད་དང་མི་ལྡན་པའི་ཕྱིར་རོ། །ཇི་ལྟར་བྱས་པ་ཞེ་ན། དུ་མ་སྟེ་སྣ་ཚོགས་པའི་རང་བཞིན་ཡིན་ལ་མི་རྟག་པ་ནི་འཇིག་པའི་དངོས་པོ་ཡིན་ཞིང༌། གཡོ་བ་མེད་པ་སྟེ། ཤེས་པ་ཉིད་ཀྱིས་བྱ་བ་དང་བྲལ་བ་ཡིན་ལ། ལྷ་མིན་ཏེ་བསྟེན་པར་བྱ་བའི་རང་བཞིན་མ་ཡིན་ལ། བསྒོམ་བྱ་ཉིད་དེ་འདའ་བར་བྱ་བ་ཉིད་ཡིན་ལ། གུས་པ་མ་ཡིན་པའི་ཕྱིར་རོ། །མི་གཙང་བ་ཡང་ཡིན་ཏེ། བཙོག་པའི་ཕྱིར་ས་ལ་སོགས་པ་རྣམས་ལ་ཡང་ས་ལ་སོགས་པར་སྲིད་པའི་ཕྱིར་རོ། །ས་ལ་སོགས་པ་རྣམས་ནི་ས་ལ་སོགས་པའི་ཆུ་དང་མེ་དང་རླུང་གང་ཡིན་པ་དེ་རྣམས་ལ་དེ་སྐད་ཅེས་བརྗོད་དེ། །དེ་དབང་ཕྱུག་དེ་ལྟ་བུའི་རང་བཞིན་དུ་མི་འགྱུར་ཏེ། རྣམ་པ་དྲུག་པོ་འདི་ཕྱིན་ཅི་ལོག་ཡིན་པའི་ཕྱིར་རོ། །གལ་ཏེ་ས་ལ་སོགས་པ་དབང་ཕྱུག་མ་ཡིན་ནའོ་ན་ནམ་མཁའ་དབང་ཕྱུག་ཡིན་ནོ་ཞེ་ན། དབང་ཕྱུག་མཁའ་མིན་ཞེས་པ་ལ་སོགས་པ་གསུངས་ཏེ། ནམ་མཁའ་ཡང་དབང་ཕྱུག་ཏུ་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། གཡོ་མེད་ཕྱིར་ཏེ་རང་བཞིན་དང་བྲལ་བ་ཡིན་པས་གཡོ་བ་མེད་པའི་ཕྱིར་ཏེ། གཞན་གྱི་འདོད་པས་ཀྱང་བྱ་བྱེད་མེད་པའི་ཕྱིར་རོ། །འོན་བདག་ཡིན་ནོ་ཞེ་ན། བདག་མིན་ཏེ། སྔར་བཀག་ཟིན་པའི་ཕྱིར་ལ། སྔར་ཉིད་དུ་རྒྱས་པར་བདག་བཀག་པའི་ཕྱིར་རང་བཞིན་མེད་པ་ཡིན་ཏེ། འདི་རི་བོང་གི་ར་དང་འདྲ་བའོ། །འོན་ཏེ་དེ་ལྟར་ན་ཡང་བརྟག་པར་བྱ་བ་མ་ཡིན་ན་ཆེ་བའི་བདག་ཉིད་ལས་འདི་ཚུ་རོལ་མཐོང་བས་འདི་འདི་ལྟར་ཡིན་ནོ་ཞེས་དེའི་ཕྱིར་རང་བཞིན་རྣམ་པར་དབྱེ་བར་མི་ནུས་སོ་ཞེ་ན། བསམ་མིན་པའི་ཞེས་པ་ལ་སོགས་པ་གསུངས་ཏེ། གལ་ཏེ་འདི་བསམ་པ་ལས་འདས་པའི་བདག་ཉིད་ཆེན་པོ་ཡིན་ན། དེའི་ཚེ་བསམ་པ་ཡིན་པ་ཡང་བསམ་པའི་ལམ་ལས་ཤིན་ཏུ་འདས་པའི་དབང་ཕྱུག་བྱེད་པ་པོ་སྟེ། དུས་གཅིག་ཏུ་སྐྱེད་པར་བྱེད་པ་ཡང་བསམ་མིན་པ་སྟེ། དཔྱད་པར་བྱ་བ་མ་ཡིན་པ་བརྗོད་པས་ཅི་ཞིག་བྱ་སྟེ། བརྗོད་པ་ཅི་
དགོས་འདི་བྱེད་པ་པོ་ཉིད་ཀྱང་བསམ་གྱིས་མི་ཁྱབ་པ་ཡིན་པའི་ཕྱིར་བརྗོད་པར་རིགས་པ་མ་ཡིན་ནོ། །དེ་ལྟར་ཡིན་མོད་འདི་ཤིན་ཏུ་མཚོན་པར་དཀའ་བའི་རང་བཞིན་ཡིན་པའི་ཕྱིར་བསམ་པར་ནུས་པ་མ་ཡིན་ལ། འབྲས་བུ་དེ་ནི་སྐྱེ་བ་པོ་ཐམས་ཅད་ཀྱི་ཐུན་མོང་དུ་རྟོགས་པའི་ཕྱིར་བསམ་གྱིས་མི་ཁྱབ་པ་ཡིན་ནོ་ཞེས་སྨྲ་བའི་དབང་དུ་བྱས་ནས། དེས་སྐྱེད་ཅེས་པ་ལ་སོགས་པ་གསུངས་ཏེ། དེའི་འབྲས་བུ་བསམ་གྱིས་མི་ཁྱབ་པ་ཡིན་དུ་ཆུག་མོད། དེ་ལྟར་ན་ཡང་གང་གིས་ན། །དེས་སྐྱེད་འདོད་པ་གང་ཞིག་ཡིན། །ཞེས་ཏེ། དབང་ཕྱུག་བསམ་གྱིས་མི་ཁྱབ་ཆེ་བའི་བདག་ཉིད་འབྲས་བུ་ཅི་ཞིག་སྐྱེད་ཅིང་སྤྲུལ་པ་འདོད་དོ། །མངོན་པར་འདོད་པ་ཡང་ཡིན། གཞན་གྱི་དོགས་པ་དགོད་པའི་ཚུལ་གྱིས་བདག་ཡིན་ནོ་ཞེ་ན། བདག་དེས་སྐྱེད་པ་ཡིན་ནོ་ཞེས་བདག་འདོད་ན་དེ་འགེགས་པར་བྱེད་པ་ཡིན་ཏེ། འདི་རྟག་པ་མ་ཡིན་ནམ། ཀྱེ་འདི་རྟག་པ་མ་ཡིན་ཏེ། ཁྱེད་རྟག་པར་འདོད་པ་ཡིན་ན་དེས་ཇི་ལྟར་མི་བྱེད་འགྱུར། གཞན་དུ་ན་དེ་རྟག་པ་ཉིད་ཉམས་པར་འགྱུར་རོ། །ཡོད་ཅིང་རྒྱུ་མེད་པ་ནི་རྟག་པ་ཡིན་ནོ་ཞེས་པའི་མཚན་ཉིད་མེད་པར་ཐལ་བར་འགྱུར་བས་སོ། །གཞན་ལ་ཡང་དེའི་སྐྱེད་པའི་བྱ་བ་མ་དམིགས་སོ་ཞེས་བསྟན་པའི་ཕྱིར། འདིར་ས་སོགས་ཞེས་པ་ལ་སོགས་པ་གསུངས་ཏེ། སོགས་པའི་སྒྲས་ཆུ་དང་མེ་དང་རླུང་དང་ནམ་མཁའ་དང་དུས་དང་ཕྱོགས་དང་ཡིད་རྣམས་གཟུང་བར་བྱའོ། །དེ་རྣམས་ཀྱི་རང་བཞིན་རྟག་པ་ཡིན་ཏེ། དེ་ཡང་དེས་བྱེད་པ་མ་ཡིན་ཏེ། ས་ལ་སོགས་པའི་རྡུལ་ཕྲ་རབ་རྣམས་རྟག་པར་ཁས་བླངས་པའི་ཕྱིར་རོ། །རགས་པའི་གཟུགས་ལ་ཡང་དེའི་བྱ་བ་འགེགས་པར་འགྱུར་བའི་ཕྱིར་རོ། །ནམ་མཁའ་ལ་སོགས་པ་ཡང་བརྟག་པ་ཡིན་པའི་ཕྱིར་རོ། །ཡོན་ཏན་ལ་སོགས་པ་ཡང་དཔྱད་པར་བྱ་བ་ཡིན་པའི་ཕྱིར་རོ། །དབང་ཕྱུག་ཅེས་པ་ནི་དབང་ཕྱུག་ཀྱང་རྟག་པ་ཡིན་པའི་ཕྱིར་འདིས་བདག་ཉིད་བྱེད་ཕ་མ་ཡིན་ནོ། །ཤེས་པ་ཤེས་བྱ་ལ་སྐྱེས་དང༌། །ཞེས་པ་ལ། ཤེས་པའང་ཤེས་བྱ་ལས་སྐྱེས་པ། །འང་ཞེས་པ་ནི་འཁོར་བ་ཇི་སྲིད་ཀྱི་བར་དུ་ཤེས་བྱ་ལ་དམིགས་ནས་རབ་ཏུ་འཇུག་པའི་ཕྱིར་དེ་ཡང་དེས་བྱེད་པ་མ་
ཡིན་ནོ། །བདེ་སྡུག་ལས་ལ་ཡིན་ཞེས་པ་ནི་ལས་ནི་དགེ་བ་དང་མི་དགེ་བས་ཏེ། ཇི་ལྟར་སྲིད་པར་བདེ་བ་དང་སྡུག་བསྔལ་བར་ཡང་འགྱུར་རོ། །འདོད་པ་དང་མི་འདོད་པའི་རྣམ་པར་སྨིན་པ་ལས་བྱུང་བ་དེ་ལ་ཡང་དེའི་བྱ་བ་ཡོད་པ་མ་ཡིན་ནོ། །དེ་ལྟར་ཡིན་པས་ན། དེ་ཡིས་གང་ཞིག་བསྐྱེད་པ་སྨོས། །ཞེས་ཏེ། ད་ནི་དབང་ཕྱུག་དེས་ཅི་ཞིག་སྤྲུལ་ཅིང་སྤྲོས་པ་ཡིན་པ་སྨྲོས་ཤིག །དེ་ལྟར་ན་དེའི་ནུས་པ་ནི་འགའ་ཞིག་ཏུ་ཡང་དམིགས་པ་མ་ཡིན་ན་དེ་ཇི་ལྟར་འགྲོ་བའི་སྐྱེད་པ་པོར་བརྗོད། ད་ནི་ཐམས་ཅད་ཐུན་མོང་བའི་སྐྱོན་རྒྱུ་ལ་ཞེས་པ་ལ་སོགས་པ་སྨོས་ཏེ། འདི་ལྟར་ཡང་འགྲོ་བའི་རྒྱུར་རྟག་པའམ་མི་རྟག་པ་འགྱུར་བ་ཡིན། རྟག་པ་ཉིད་དུ་དེ་སྨྲ་བ་རྣམས་ཀྱིས་འདི་ཡོངས་སུ་བརྟགས་པ་ཡིན་ཏེ། དེ་ལ་གལ་ཏེ་རྟག་པ་ཡིན་ན་རྒྱུ་སྟེ་བྱེད་པ་པོ་ལ་ཐོག་མ་ཡོད་པ་མ་ཡིན་ནོ། །དེའི་ཚེ་འབྲས་བུ་ལ་ཐོག་མག་ལ་ཡོད་དེ། དེ་ལ་འབྲས་བུའི་དང་པོ་ག་ལས་ཡོད། དེའི་འབྲས་བུའི་བསྐྱེད་པར་བྱ་བ་རྟག་ཏུ་འཇུག་པའི་ཕྱིར་ཐོག་མ་ག་ལས་འགྱུར་ཏེ། མ་ཡིན་ནོ་ཞེས་པའི་དོན་ཡིན་ལ། རྟག་ཏུ་ཉེ་བར་གནས་པའི་གྲུབ་པའི་རང་བཞིན་གྱི་རྒྱུ་ལས་འབྲས་བུ་ཡང་སྟེ་དེའི་བསྐྱེད་པར་བྱ་བ་རྒྱུན་མ་ཆད་པར་སྐྱེ་བར་འགྱུར་རོ། །དེའི་ཕྱིར་དེའི་ནུས་པ་ཐོགས་པ་མེད་པའི་འབྲས་བུ་རྟག་ཏུ་སྐྱེ་བར་འགྱུར་རོ། །དེ་གང་གིས་ན་རྟག་ཏུ་མི་བྱེད་དེ། འབྲས་བུ་ཐམས་ཅད་སྐྱེད་པར་མི་བྱེད། དེ་ལྟར་ན་འགའ་ཞིག་གིས་འབྲས་བུ་བརྒྱལ་ཆད་པར་གལ་འགྱུར། ཡང་ན་གཞན་དུ་བཤད་པར་བྱ་སྟེ། གལ་ཏེ་དབང་ཕྱུག་འགྲོ་བའི་བྱེད་པ་པོ་མ་ཡིན་པར་འགྱུར་ན། ཇི་ལྟར་ཞིག་པའི་རྗེས་ལ་དང་པོར་འདི་ཆགས་པའི་ཆར་འགྱུར་ཞེ་ན། འདི་ལ་རྒྱུ་ལ་ཞེས་པ་ལ་སོགས་པ་གསུངས་ཏེ། ཐོག་མ་མེད་པ་ནས་བྱུང་པའི་འཁོར་བ་ཡིན་ལ། རྒྱུ་དེ་ལས་ལས་དང་ཉོན་མོངས་པ་ལ་སོགས་པའི་མཚན་ཉིད་ཀྱི་ཐོག་མ་སྟེ། སྔོན་གྱི་མཐའ་གལ་ཏེ་ཡོད་པ་མ་ཡིན་ན། འབྲས་བུ་སྟེ་སེམས་ཅན་གྱི་འཇིག་རྟེན་དང༌། སྣོད་ཀྱི་འཇིག་རྟེན་ཆགས་པ་ལ་སོགས་པའི་མཚན་ཉིད་ཀྱི་ཐོག་མ་དང་པོའི་རྩོམ་པ་གང་ལས་ཡོད་དེ། ཡོད་པ་མ་ཡིན་ནོ་ཞེས་པའི་དོན་ཏོ། །
ཐོག་མ་མེད་པའི་འཁོར་བ་ཡང་སེམས་ཅན་རྣམས་ལས་ཀྱི་དབང་གིས་གནས་ཤིང་ཆགས་པ་དང་འཇིག་པའི་བདག་ཉིད་རྣམས་འཇུག་པའི་ཕྱིར་རོ། །དེ་བརྗོད་པ་ཉིད་ཡིན་ཏེ། བདེ་སྡུག་ལས་ལས་ཡིན་ཞེས་པ་འདིས་བསྟན་པ་ཡིན་ནོ། །ཡང་ན་འདིར་ཡང་དབང་ཕྱུག་ཉིད་ལས་བསམས་ནས་རྒྱུ་ཞེས་སྨོས་པ་ཡིན་ཏེ། རྒྱུ་དབང་ཕྱུག་ལ་ཐོག་མ་ཡོད་པ་མ་ཡིན་ན་འཇིག་པའི་དུས་ན་ཡང་དེའི་ནུས་པ་མ་ཉམས་པ་ཉིད་ཀྱིས་ཆེ་བའི་བདག་ཉིད་ཁས་བླངས་པའི་ཕྱིར་འབྲས་བུ་དེས་བྱས་པའི་ཆགས་དང་འཇིག་པའི་ཐོག་མའི་མཚན་ཉིད་ཀྱི་དང་པོར་ག་ལས་འགྱུར། རྟག་པ་ཉིད་ཡིན་པས་དེའི་རྒྱུ་རྟག་ཏུ་ནུས་པ་དང་ལྡན་པའི་ཕྱིར་ཆགས་པ་ལ་སོགས་པ་ཡང་རྟག་པ་ཉིད་དུ་འགྱུར་རོ། །དེས་ན་རྟག་པ་ནུས་པ་དང་ལྡན་པ་ལ་དེར་འཆགས་པ་ལ་སོགས་པའི་ཐོག་མར་མི་འགྱུར་རོ། །དེས་ན་ཇི་ལྟར་འཆགས་པ་ལ་སོགས་པ་ལ་དེའི་བྱ་བར་འགྱུར། གཞན་ཡང་འདི་བྱེད་པ་པོར་འགྱུར་ན་དེའི་ཚེ་རྟག་པ་ཡིན་པའི་ཕྱིར་ཅིའི་ཕྱིར་རྟག་ཏུ་མི་བྱེད་ཅེས་ཏེ། འཆགས་པ་ལ་སོགས་པ་ནི་ཞེས་པ་ནི་ལྷག་མའོ། །འདི་ལྟར་ཡང་གལ་ཏེ་འཆགས་པར་བྱེད་ན་དེའི་ཚེ་དེའི་རྒྱུ་བྱེད་པའི་རང་བཞིན་ཡིན་པས་རྟག་ཏུ་དེ་ཉིད་བྱེད་པར་འགྱུར་རོ། །དེ་བཞིན་དུ་གནས་པ་དང་འཇིག་པ་ཡང་བརྗོད་པར་བྱ་སྟེ། དུས་གཅིག་ཏུ་འམ་འཆགས་པ་ལ་སོགས་པའི་བྱ་བ་དེ་ཡིར་འགྱུར་རོ། །དེ་ཉིད་ཀྱི་ཕྱིར་རྒྱུ་ལ་རྒྱུན་ཆད་པ་མེད་པ་དེའི་འབྲས་བུ་ཡང་རྒྱུན་མི་འཆད་པར་འགྱུར་ཏེ། གཞན་སྔ་མ་ཡིན་ནོ། །འོན་ཏེ་དེ་ལྟར་ན་ཡང་འདི་རྟག་ཏུ་ནུས་པའི་རང་བཞིན་གལ་ཏེ་ཡིན་པ་ལྟ་ན་ཡང་བརྒྱ་ལ་ལྷན་ཅིག་བྱེད་པའི་རྐྱེན་དང་བྲལ་བས་མི་བྱེད་དོ་ཞེ་ན། དེ་ནི་གཞན་ལ་ལྟོས་པ་མིན། །ཞེས་ཏེ། ནུས་པའི་རང་བཞིན་གྱི་རྒྱུའི་དབང་ཕྱུག་དེའོ། །ནི་ཞེས་པ་ནི་གང་གི་ཕྱིར་ཏེ། གཞན་ལྷན་ཅིག་བྱེད་པའི་རྒྱུ་ལ་མི་ལྟོས་ཏེ། རྟག་པ་ནུས་པའི་རང་བཞིན་གྱིས་ཡོད་ན་དེའི་ལྟོས་པ་མི་རིགས་པའི་ཕྱིར་རོ། །རྟག་པ་ཉིད་ཀྱིས་ཁྱད་པར་དུ་བོགས་བྱར་མེད་པ་ཡིན་ཏེ། གཞན་ལ་ལྟོས་པ་ཞེས་པའམ། ཁྱད་པར་གཞན་འབྱུང་བ་ནི་དེ་ལ་ཐ་དད་པའི་རང་བཞིན་གཞན་དེ་ལས་སྐྱེས་པར་ཐལ་བར་འགྱུར་བའི་ཕྱིར་རོ། །ཁྱད་
པར་ལས་ཐ་དད་པ་ཉིད་ཀྱིས་འབྲས་བུ་སྐྱེས་པས་དེ་རྒྱུ་ཉིད་མ་ཡིན་པར་འགྱུར་རོ། །འདི་དེའི་ཁྱད་པར་ཡིན་ནོ་ཞེས་པ་འབྲེལ་བར་སེམས་པ་ན་ནི་ཐུག་པ་མེད་པ་ཉིད་དང་འབྲེལ་པ་མ་གྲུབ་པར་འགྱུར་རོ། །དེ་སྐད་དུ་ཡང༌། གལ་ཏེ་བྱ་བ་ཅུང་ཟད་ཅིག །ཡོད་ན་གཞན་ལ་ལྟོས་འགྱུར་ན། །དངོས་གང་ཅུང་ཟད་མི་བྱེད་ལ། །ཅི་ཕྱིར་འགའ་ཞིག་གིས་ལྟོས་འགྱུར། །ཞེས་བརྗོད་དོ། །ལྷན་ཅིག་བྱེད་པ་ཡོད་པ་ཡིན་པས་དེ་ལྟ་ན་ཡང་དེ་རྟག་པའམ་མི་རྟག་པར་འགྱུར་བ་ཡིན། རེ་ཞིག་གང་རྣམས་རྟག་པ་ཡིན་ན་རྡུལ་ཕྲ་རབ་ལ་སོགས་པ་དེ་རྣམས་ཡོད་པའི་དངོས་པོ་མ་ཚང་བ་མི་སྲིད་དོ། །དེ་ལ་རག་ལས་པའི་ཉེ་བ་རྣམས་ཉེ་བ་དང་བྲལ་བ་མ་ཡིན་ནོ། །མི་རྟག་པ་རྣམས་ཀྱང་དེ་ལ་རག་ལས་པས་སྐྱེ་བོའི་ཉེ་བ་རྣམས་ཡིན་ཏེ། གང་གིས་ན་ལྷན་ཅིག་བྱེད་པའི་རྒྱུ་དང་བྲལ་བས་མི་བྱེད་དོ་ཞེས་བརྗོད་པ། ཅིའི་ཕྱིར་ན་མ་ཚང་བ་ཞེས་བྱ་བ་ཡིན། དེས་ན་འདི་འདིར་ལེན་མ་ཡིན་ནོ། །དེ་ཉིད་ཀྱི་ཕྱིར། དེས་བྱས་མིན་ཞེས་པ་ལ་སོགས་པ་གསུངས་ཏེ། དེས་ཏེ་དབང་ཕྱུག་གིས་སོ། །མ་བྱས་པ་སྟེ་སྐྱེད་པ་དང་ལྡན་པ་དེས་མ་བྱས་པ་ཡིན་ལ། དེ་ཉིད་ཡོད་པ་མ་ཡིན་ཏེ། ཡོད་པ་མ་ཡིན་ནོ། །གཞན་ནི་འགྲོ་བ་གཞན་ཡིན་ནོ། །རྒྱུ་དེས་ན་དེ་ལ་རག་ལས་ནས་འཇུག་པའི་ལྷན་ཅིག་བྱེད་པ་རྣམས་རྟག་ཏུ་ཉེ་བ་རྣམས་ཡིན་པའི་ཕྱིར་རྟག་པར་བྱེད་པ་པོ་འདི་ལྟོས་པར་ཇི་ལྟར་འགྱུར་ཏེ། ཇི་ལྟར་ལྟོས་པ་དང་ལྡན་པ་ཡིན། བརྒྱལ་ཡང་འབྲས་བུ་མེད་པར་མི་འགྱུར་རོ། །དེ་ལྟར་ན་བརྒྱལ་ཡང་དེ་ལ་ལྟོས་པ་མེད་པའི་ཕྱིར་རྟག་ཏུ་འབྲས་བུ་བྱེད་པ་ན་འགྱུར་བའི་ཕྱིར་རོ། །འོན་ཏེ་དེ་ལྟར་འགྱུར་ན་ཡང་འདུ་བའི་རྒྱུ་དང་འདུ་བ་མ་ཡིན་པའི་རྒྱུ་དང༌། རྒྱུ་མཚན་གྱི་རྒྱུ་ཡང་ཡིན་ཏེ། རྒྱུ་གསུམ་པོ་རྣམས་ལས་འབྲས་བུ་འབྱུང་ལ། དེ་འདིའི་རྒྱུ་མཚན་གྱི་རྒྱུ་པས་ཚོགས་པ་ལ་ལྟོས་ནས་འབྲས་བུ་མེད་པ་ན་བརྗོད་པའི་ཐལ་བར་འགྱུར་བ་ཡོད་པ་མ་ཡིན་ནོ་ཞེས་གཞན་གྱིས་བསམས་པའི་དོགས་པ་བླངས་ནས། གལ་ཏེ་ལྟོས་ནས་ཞེས་པ་ལ་སོགས་པ་གསུངས་ཏེ། གལ་ཏེ་ཡང་འདི་རྟག་ཏུ་འབྲས་བུ་ཐམས་ཅད་བྱེད་པར་ནུས་པ་དེ་ལྟར་ན་ཡང༌། ཚོགས་པ་ལ་ལྟོས་པ་
ཡིན་ཏེ། ཚོགས་བ་མེད་པར་ཡོད་ན་ཡང་ནུས་པའི་བྱེད་པ་པོ་འབྲས་བུ་སྐྱེད་པ་ཡོད་པ་མ་ཡིན་ཏེ། ཇི་ལྟར་སྣམ་བུ་སྐྱེད་པ་ལ་ནུས་པ་ཡོད་པ་ཡིན་ན་ཡང་སྣ་ལམ་དང༌། འུལ་བུ་དང་ཐག་བཟངས་ལ་སོགས་པ་མེད་པར་སྣམ་བུ་འབྱུང་བར་ཡོད་པ་མ་ཡིན་ལ། དེ་བཞིན་དུ་སྐབས་སུ་བབ་པ་ལ་ཡང་འགྱུར་བར་གལ་ཏེ་ཞེས་གསུངས་ཏེ། ཡང་དབང་ཕྱུག་མ་ཡིན་ལ། གལ་ཏེ་ཚོགས་པ་ཡོད་པས་བྱེད་ལ་དེ་མེད་ན་མི་བྱེད་དོ་ཞེས་ཁས་བླངས་པ་ཡིན་ལ། དེའི་ཚེ་དབང་ཕྱུག་རྒྱུ་རུ་མི་འགྱུར་ཏེ། ཚོགས་པ་ཉིད་ལས་སྐྱེས་པའི་ཕྱིར་རོ། །དེ་ལས་ཀྱང་སྐྱེས་བ་མ་ཡིན་པའི་ཕྱིར་ཏེ། དེ་ཡོད་པ་དང་མེད་པ་དག་ལས་འབྲས་བུ་ཡོད་པ་དང་མེད་པ་མཐོང་བའི་ཕྱིར་རོ། །དབང་ཕྱུག་ཡོད་པ་དང་མེད་པས་ནི་མ་ཡིན་ལ། ཚོགས་པའི་དུས་ན་ཡང་དེ་གཞན་གྱི་ངོ་བོས་བྱེད་པ་པོའི་ངོ་བོ་ཡང་འདིའི་སྔར་ཉིད་དུ་ནུས་པ་ཡིན་ནོ། །ཇི་ལྟར་ནམ་ཞིག་ན་བྱེད་པ་རྒྱུན་ཆད་པར་འགྱུར། གང་ཡང་ཐག་པ་ལ་སོགས་པ་བཞིན་དུ་བརྒྱལ་བྱེད་པ་ཡིན་ནོ་ཞེས་གང་བརྗོད་པ་དེ་ཡང་རིགས་པ་མ་ཡིན་ཏེ། །གང་གི་ཕྱིར་ཐག་པ་ལ་སོགས་ལ་རྣམས་སྔར་ནུས་པ་མེད་པ་ཉིད་ཡིན་ལ་ཡང་ཕྱི་ནས་ཐག་བཟངས་ལ་སོགས་པའི་ཚོགས་པ་རྙེད་པ་ལས་སྔར་མེད་པའི་ཚོགས་པ་རྙེད་པ་ཐོབ་པས་སྣམ་བུ་ལ་སོགས་པ་ཚོགས་པ་འབྲས་བུ་བྱེད་པ་ཡིན་ནོ། །གཞན་དུ་ན་དེ་རྣམས་ཀྱང་སྔར་དེའི་ནུས་པ་ཡོད་པ་ན་དེ་བྱེད་པར་ཐལ་བར་འགྱུར་བ་བཟློག་ནུས་པ་མ་ཡིན་པས་དཔེ་བསྒྲུབ་བྱས་སྟོང་པ་ཡིན་ནོ། །གཞན་ཡང་ཚོགས་པས་བསྐྱེད་ན་ཡང་དེ་ཉིད་རྒྱུ་ཡིན་ཏེ། དེ་ཐམས་ཅད་དུ་ཉེ་བའི་རང་བཞིན་ཡིན་པས་ཇི་ལྟར་བརྒྱ་ལ་འདི་ཚོགས་པ་དང་བྲལ་བ་ཡང་ཡིན། དེ་ཉིད་ཀྱི་ཕྱིར་འདི་བསྟན་པའི་དོན་དུ། ཚོགས་ན་མི་སྐྱེད་དབང་མེད་ཅིང༌། །ཞེས་པ་ལ་སོགས་པ་གསུངས་ཏེ། མི་བྱེད་པ་ལ་དབང་བ་མ་ཡིན་ཏེ། བྱེད་པར་མི་ནུས་པ་མ་ཡིན་ནོ། །ཚོགས་པ་སྟེ་ཚོགས་པའི་ཡུལ་ལ་འབྲས་བུ་ཐམས་ཅད་བྱེད་པ་ལ་ནུས་པ་དང་བྲལ་བའི་ཕྱིར་ཚོགས་པ་སྐྱེད་པ་ལ་ཡང་བཏང་སྙོམས་སུ་འདུག་པར་ནུས་པ་མ་ཡིན་ནོ། །སྐྱེད་པ་ན་ཡང་འདི་ལྟར་ཚོགས་པ་ཡིན་ནོ་ཞེ་ན། དེ་མེད་པར་ནི་སྐྱེད་པ་མིན། །ཞེས་གསུངས་ཏེ། བསྐྱེད་པ་ལ་
ཡང་ཚོགས་པ་ལ་དབང་བ་ཡིན་ནོ། །ཅིའི་ཕྱིར་ཞེ་ན། དེ་མེད་པའི་ཕྱིར་ཏེ། དེའི་ཚོགས་པ་མེད་པས་མེད་པའི་ཕྱིར་རོ། །མེད་པའི་རང་བཞིན་ལ་མོ་གཤམ་གྱི་བུ་བཞིན་དུ་བྱེད་པའི་ནུས་པ་ཅུང་ཟད་ཀྱང་ཡོད་པ་མ་ཡིན་ཏེ། རང་བཞིན་མེད་པའི་ཕྱིར་རོ། །གང་འཆད་པར་འགྱུར་བ། བྱེ་བ་བརྒྱ་ཕྲག་རྒྱུ་ཡིས་ཀྱང༌། །དངོས་པོ་མེད་ལ་རྒྱུ་རུ་མེད། །ཅེས་སོ། །ཚོགས་པ་ཡོད་པ་ན་བྱེད་པ་ཡོད་པར་གྱུར་དུ་ཆུག་པ་དེ་ལྟ་ན་ཡང་ཅི་ཚོགས་པའི་སྟོབས་ཀྱིས་རང་ཉིད་མི་འདོད་ཀྱང་དྲངས་ནས་བྱེད་པ་ཡིན་ནམ། འོན་ཏེ་འདོད་ནས་ཡིན་ཞེས་རྣམ་པར་བརྟག་པ་ཡིན་ཏེ། དེ་ལ་དང་པོའི་རྣམ་པར་རྟོག་པའི་དོགས་པ་ནི། དབང་ཕྱུག་མི་འདོད་བཞིན་ཞེས་པ་ལ་སོགས་པ་གསུངས་ཏེ། མི་འདོད་བཞིན་དུ་སྟེ་འདོད་པ་མ་ཡིན་པ་དབང་ཕྱུག་ཏུ་འདོད་ནའོ། །འབྲས་བུ་བྱེད་ཅིང་བསྒྲུབ་པ་ཡིན་ལ། གཞན་གྱི་དབང་དུ་ཐལ་ཏེ། གཞན་ལ་རག་ལས་ཤིང་གཞན་གྱི་དབང་དུ་ཐལ་ཏེ་ཡོངས་སུ་ཐལ་བ་ཡིན་ནོ། །ཚོགས་པའི་དབང་གིས་མི་འདོད་ན་ཡང་བྱེད་པ་ནི་དེའི་དབང་དུ་གྱུར་པར་ཐལ་བར་འགྱུར་རོ། །གཞན་གྱི་དབང་དུ་མྱོང་བ་ཡང་མ་ཡིན་ཏེ། དབང་ཕྱུག་ཉིད་དོར་བར་ཐལ་བར་འགྱུར་བའི་ཕྱིར་རོ། །རྣམ་པར་རྟོག་པ་གཉིས་པའི་དབང་དུ་བྱས་ཏེ་གསུངས་པ། འདོད་ནའང་འདོད་ལ་རག་ལས་འགྱུར། །ཞེས་སོ། །འོན་ཏེ་འདོད་ནས་བྱེད་དོ་ཞེས་པའི་ཕྱོགས་ཁས་ལེན་ན། དེའི་ཚེ་ཡང་འདོད་ལ་རག་ལས་པར་འགྱུར་ཏེ། འདོད་པ་ཡོད་ན་འབྲས་བུ་བྱེད་པ་ཡོད་པའི་ཕྱིར་ལ། དེ་ལ་ལྟོས་པ་ཡོད་པའི་ཕྱིར་རོ། །དེའི་ཕྱིར་ཞེ་ན། དབང་ཕྱུག་གང་ལ་ཡིན་ཏེ། འདི་ལྟར་བྱེད་ཅིང་འབྲས་བུ་སྒྲུབ་པར་བྱེད་པ་ཡིན་ན་དེ་ཇི་ལྟར་ན་དབང་ཕྱུག་ཡིན་ཏེ། གང་ལས་དབང་ཕྱུག་ཡིན། འདིས་ནི་གང་བརྗོད་པ་འགའ་ཞིག་གིས་བློ་དང་ལྡན་པ་ཡིན་པའི་ཕྱིར་དབང་ཕྱུག་ལ་ཉེས་པ་འདི་མེད་ལ། བློས་སྟོང་པ་ལ་ནི་རང་ཉིད་ཡོད་པ་ཙམ་གྱིས་བསྐྱེད་པར་བྱ་བར་རིམ་མ་མ་ཡིན་པ་ཉིད་ཀྱིས་འབྲས་བུ་བྱེད་ལ། བློ་དང་ལྡན་པ་ལ་ནི་བྱེད་པ་ལ་དབང་བ་ལ་ཡང་མི་འདོད་ན་བྱེད་པ་མ་ཡིན་ཏེ། དེའི་ཕྱིར་འདི་ལ་ཅིའི་ཕྱིར་བརྒལ་ཞིང་བརྟག་པར་
བྱེད་ཅེས་པ་དེ་ཡང་བསལ་བ་ཡིན་ནོ། །དེ་ལྟར་ཡང་འདོད་པ་དེ་ནི་རང་ཉིད་ཡོད་པ་ཙམ་རྒྱུ་མཚན་ཡིན་པས་ཅིའི་ཕྱིར་མི་བྱེད། དེ་ལྟ་བས་ན་ཀླན་ཀ་དེ་ཉིད་སོན་གནས་སོ། །གཞན་ཡང་གལ་ཏེ་ལྷན་ཅིག་བྱེད་པའི་རྒྱུ་མ་ཡིན་ན་ཅིའི་ཕྱིར་དེ་རྣམས་དང་བྲལ་བས་མི་བྱེད། ལྷན་ཅིག་བྱེད་པའི་རྒྱུ་དང་བྲལ་ན་ཡང་འབྲས་བུ་བྱེད་པ་ལ་ཐམས་ཅད་དུ་དེ་དབང་དུ་གྱུར་པའི་ཕྱིར་རོ། །ལྷན་ཅིག་བྱེད་པས་ཡིན་ནོ་ཞེ་ན། དེ་ལྟ་ན་ཡང་ཡོད་པས་ཀྱང་འབྲས་བུ་ཐམས་ཅད་ཅིའི་ཕྱིར་མི་བྱེད། ལྷན་ཅིག་པའི་རྒྱུ་ཚང་བས་ནུས་པའི་ཕྱིར་འབའ་ཞིག་པ་ནུས་པ་མེད་པ་ནི་བྱེད་པ་པོ་མ་ཡིན་ནམ་ཞེ་ན། དེ་ལ་འདི་ཅི་གཞན་གྱི་ངོ་བོས་བྱེད་པ་པོ་ཡིན་ནམ། དེ་བཞིན་དུ་ཡིན་ནོ་ཞེ་ན། བྱེད་པ་པོ་མ་ཡིན་པ་ཉིད་ཡིན་ཏེ། བྱེད་པ་པོ་ཞེས་བྱ་བ་ནི་རང་གི་ངོ་བོས་མི་བྱེད་པ་མ་ཡིན་ནོ། །རང་གི་ངོ་བོ་འདི་ཡང་གཉུག་མའི་ནུས་པ་སྒྲའི་བརྗོད་བྱ་ཡིན་ཏེ། འབྲས་བུ་ལ་མཁོ་བ་ཡིན་ནོ་ཞེ་ན། དགོས་པ་མེད་པ་ཡིན་ཏེ། དེ་ནི་གློ་བུར་བའི་ནུས་པ་མེད་པ་རྣམས་ལ་ལྟོས་པས་སོ། །ནུས་པ་ཡོད་པ་འདི་ཡང་རང་བཞིན་གྱིས་ལྷན་ཅིག་བྱེད་པའི་རྒྱུ་དང་ཉེ་བ་མ་ཡིན་ན་བྱེད་པ་པོ་མ་ཡིན་ནོ་ཞེ་ན། མ་ཡང་ཡིན་ལ་རང་བཞིན་གྱིས་མོ་གཤམ་ཡང་ཡིན་ནོ་ཞེས་པ་འདི་ཡང་འདི་ལྟར་ལྷ་རྣམས་དགའ་བར་བརྗོད་པར་བྱ་སྟེ། དེའི་ཕྱིར་རེ་ཞིག་གཞག་གོ །མི་རྟག་པ་ཡིན་པར་ཡང་རྒོལ་བ་དེ་རྣམས་འདོད་པ་མ་ཡིན་ནོ། །དེ་ལྟར་ཡོད་ན་ཡང་གཞན་མཐུན་མོང་བའི་རང་བཞིན་ནི་ཇི་ལྟར་དབང་ཕྱུག་ཉིད་ཡིན། དེ་ལྟར་ན་འགྲོ་བ་སྣ་ཚོགས་པ་དབང་ཕྱུག་གི་འབྲས་བུ་མ་ཡིན་ནོ་ཞེས་གྲུབ་པ་ཡིན་ནོ། །གལ་ཏེ་བློ་དང་ལྡན་པའི་འགྲོ་བའི་བྱེད་པ་པོ་མ་ཡིན་ན་འོན་ཀྱང་འགྲོ་བ་རྡུལ་ཕྲ་རབ་ཀྱི་ཕུང་པོ་རང་བཞིན་རྡུལ་ཕྲ་རབ་གཉིས་པ་ལ་སོགས་པའི་རིམ་པས་ས་དང༌། ཤིང་དང་རི་ལ་སོགས་པའི་དོན་དུ་འགྱུར་རོ་ཞེས་གང་དག་ཅེས་པ་ལ་སོགས་པ་སྨོས་ཏེ། གང་དག་དཔྱོད་པ་ལ་སོགས་པའི་རྒོལ་བ་རྣམས་རྡུལ་ཕྲ་རབ་རྣམས་རྟག་པ་ཡིན་ཏེ་རྡུལ་ཕྲ་མོ་རྣམས་སོ། །སྨྲ་བ་ནི་འགྲོ་བ་སྣ་ཚོགས་པའི་རྒྱུ་ཞེས་སྨྲས་པའོ། །རྒོལ་བ་དེ་དག་ཀྱང་སྔར་ཆ་ཤས་ཡང་རྡུལ་དུ་ཕྱེ་བའི་ཞེས་པ་ལ་སོགས་པས་རྡུལ་
ཕྲ་རབ་དཔྱོད་པའི་དུས་སུ་དེ་བཀག་པས་བཟློག་པའི་ཡིན་ཏེ། བསལ་བ་ཡིན་ནོ། །དེའི་ཕྱིར་རྟག་པའི་རྡུལ་ཕྲ་རབ་ཀྱི་རང་བཞིན་ཡང་འགྲོ་བ་འདིའི་རྒྱུ་མ་ཡིན་ནོ། །དེ་ལྟར་དེ་དབང་ཕྱུག་རྒྱུ་ཡིན་པ་དང་བར་སྐབས་སུ་ཚིགས་སུ་བཅད་པ་ཕྱེད་ཀྱིས་རྡུལ་ཕྲ་རབ་རྟག་པའི་རང་བཞིན་ཡང་འགྲོ་བའི་རྒྱུ་ཡིན་པས་བསལ་ཏེ། རྣམ་པ་བཞི་པ་དེ་ཉིད་བསྒྲུབ་པའི་ཆེད་དུ་གཙོ་བོ་ཡོངས་སུ་གྱུར་པའི་རང་བཞིན་བསལ་བར་འདོད་པས་གྲངས་ཅན་གྱི་འདོད་པ་དགོད་པའི་ཕྱིར། གྲངས་ཅན་ཞེས་པ་ལ་སོགས་པ་གསུངས་ཏེ། གྲངས་ཅན་ནི་སེར་སྐྱ་སྟེ། གཙོ་བོ་ནི་རང་བཞིན་ཞེས་མིང་གཞན་གཟུང་བ་ཡིན་ལ། འདོད་པ་ནི་སེམས་པའོ། །རྟག་པ་ནི་འཇིག་རྟེན་པའི་རྒྱུ་ཡིན་ཏེ། དེ་ཡང་རྟག་པ་མི་འཇིག་པའི་རང་བཞིན་ནོ། །འཇིག་རྟེན་ཏེ་གཡོ་བ་དང་མི་གཡོ་བའི་འགྲོ་བ་ཐམས་ཅད་ཡིན་ལ། རྒྱུ་ནི་ཡོངས་སུ་གྱུར་པའི་ངོ་བོས་རྒྱུ་རུ་འདོད་དོ། །གཙོ་བོ་ཞེས་བྱ་བ་འདི་ཅི་ཞིག་ཅེ་ན། སྙིང་སྟོབས་ཞེས་པ་ལ་སོགས་པ་གསུངས་ཏེ། སྙིང་སྟོབས་རྡུལ་དང་མུན་པ་ཞེས་པ་ནི་ཡོན་ཏན་གསུམ་པོ་འདི་མཉམ་པར་གནས་པ་རྣམས་མཉམ་པར་གནས་པའི་གནས་སྐབས་ཐོབ་པ་ན་གཙོ་བོ་ཞེས་བརྗོད་དེ། གཙོ་བོ་ཞེས་པ་སྨྲས་སོ། །འདི་རྣམས་རེ་ཞིག་རང་བཞིན་གྱི་གནས་སྐབས་ཡིན་ལ། མི་མཉམ་འགྲོ་བར་བརྗོད་ལ། མི་མཉམ་པར་གནས་པ་ཐོབ་པས་ཡང་ཡོན་ཏན་འདི་རྣམས་འགྲོ་བས་བརྗོད་ལ། སྣ་ཚོགས་ཤིང་རྣམ་པ་སྣ་ཚོགས་པར་ཡོངས་སུ་གྱུར་པ་བརྗོད་དོ། །འདི་ལྟར་དེ་རྣམས་ཀྱི་རྒྱུ་ནི་གང་གི་ཚེ་སྐྱེས་བུ་ཡུལ་ལ་ལོངས་སྤྱོད་པའི་རྣམ་པར་འདོད་པ་སྐྱེ་བ་དེའི་ཚེ་སྐྱེས་བུའི་འདོད་པ་རང་བཞིན་གྱིས་ཡོངས་སུ་ཤེས་ནས། སྐྱེས་བུ་དང་སྦྱོར་བར་བྱེད་དོ། །དེའི་ཚེ་ཡང་སྒྲ་ལ་སོགས་པ་འབྱིན་པའི་ངོ་བོས་ཡོངས་སུ་གྱུར་པས་ཉེ་བར་འགྱུར་རོ། །དེའི་ཚེ་རིམ་པ་ནི་འདི་ཡིན་ནོ། །རང་བཞིན་ལས་ནི་ཆེན་པོ་དེ་ལས་ནི། །ངར་འཛིན་དེ་ལས་ཚོགས་ནི་བཅུ་དྲུག་ཡིན། །བཅུ་དྲུག་པོ་ཡི་ནང་ནས་ལྔ་པོ་རྣམས། །དེ་ལས་ཀྱང་ནི་འབྱུང་བ་ལྔ་རྣམས་ཡིན། །འདི་ཡི་དོན་ནི་འདི་ཡིན་ཏེ། རང་བཞིན་ལས་ཆེན་པོ་ནི་གཙོ་བོ་ལས་ཆེན་པོ་ཡིན་ལ། ཆེན་པོ་ཞེས་པ་ནི་གློ་བུར་དུ་
བརྗོད་པ་ཡིན་ནོ། །དེ་ལས་ཞེས་ཏེ་ཆེན་པོ་ལས་ངར་འཛིན་པ་ཡིན་ཏེ། ངར་ཞེས་པའི་ཤེས་པའོ། །ངར་འཛིན་པ་དེ་ལས་ཚོགས་བཅུ་དྲུག་ཡིན་ནོ། །ཚོགས་བཅུ་དྲུག་ཞེས་པ་ནི་དབང་པོ་བཅུ་གཅིག་དང་དེ་ཙམ་ལྔ་རྣམས་ཡིན་ཏེ། །དེ་ལ་ལས་ཀྱི་དབང་པོ་ལྔ་པོ་ནི་ཁ་དང་རྐང་པ་དང་ལག་པ་དང་གཅི་བ་དང་བཤང་བའི་ལམ་རྣམས་སོ། །བློའི་དབང་པོ་ལྔ་ནི་རྣ་བ་དང་ལུས་དང་མིག་དང་ལྕེ་དང་སྣའོ། །གཉི་གའི་བདག་ཉིད་ནི་ཡིད་ཡིན་ཏེ། འདི་ལྟར་བཅུ་གཅིག་ཏུ་འགྱུར་རོ། །ཡང་དེ་ཙམ་ལྔ་ནི་སྒྲ་དང་རེག་བྱ་དང་གཟུགས་དང་རོ་དང་དྲིའོ། །ལྔ་པོ་རྣམས་ལས་འབྱུང་བ་ལྔ་རྣམས་ནི་སྒྲ་ལ་སོགས་པ་ལྔ་རྣམས་ལས་འབྱུང་བ་ལྔ་རྣམས་སུ་འགྱུར་ཏེ། འབྱུང་བ་ལྔ་རྣམས་ནི་ནམ་མཁའ་དང་རླུང་དང་མེ་དང་ཆུ་དང་སར་གྲགས་པ་རྣམས་སོ། །དང་པོའི་རང་བཞིན་ནི་རྒྱུ་ཉིད་ཡིན་ཏེ་འབྲས་བུ་མ་ཡིན་ནོ། །ཆེན་པོ་དང་ངར་འཛིན་པ་དང་སྒྲ་ལ་སོགས་པ་ལྔ་ནི་འབྲས་བུ་ཡང་ཡིན་ལ་རྒྱུ་ཡང་ཡིན་ནོ། །དབང་པོ་བཅུ་གཅིག་པོ་རྣམས་དང༌། ནམ་མཁའ་ལ་སོགས་པ་ལྔ་པོ་རྣམས་འབྲས་བུ་ཉིད་ཡིན་ལ། རྒྱུ་ནི་མ་ཡིན་ནོ། །སྐྱེས་བུ་ནི་ཡང་གཉི་གའི་རང་བཞིན་སྤངས་པ་ཡིན་ནོ། །གང་བརྗོད་པ། རྩ་བའི་རང་བཞིན་ལས་ནི་འགྱུར་བ་མེད། །ཆེན་སོགས་བདུན་པོ་རྒྱུ་དང་འགྱུར་བ་ཡིན། །བཅུ་དྲུག་པོ་ནི་རྣམ་པར་འགྱུར་བ་སྟེ། །སྐྱེས་བུ་རང་བཞིན་མ་ཡིན་རྣམ་འགྱུར་མིན། །ཞེས་སོ། །གཙོ་བོ་དེ་ཡང་འབྲས་བུ་མ་ལུས་པ་ནུས་པའི་རང་བཞིན་ཉིད་ཡོན་ཏན་གསུམ་གྱི་རང་བཞིན་ཁོ་ནས་འབྲས་བུ་སྒྲུབ་པར་བྱེད་པ་ཡིན་ཏེ། གཞན་དུ་ན་ཇི་ལྟར་དེ་ལ་ཡོད་པ་མ་ཡིན་པ་འབྲས་བུ་སྣ་ཚོགས་པའི་གཟུགས་སྐྱེད་པར་བྱེད། དེ་སྐད་དུ་ཡང༌། མ་ལུས་ནུས་པའི་ཚོགས་རྣམས་ཀྱི། །རང་བཞིན་འགའ་ཞིག་ཁོ་ན་ལས། །འབྲས་བུའི་ཁྱད་པར་འཇུག་པ་ནི། །དངོས་པོ་དེ་ཡི་རང་བཞིན་ནོ། །གལ་ཏེ་རྒྱུ་ཡི་བདག་ཉིད་ལ། །ནུས་པའི་ངོ་བོར་འབྲས་མེད་ན། །དེ་ཉིད་བྱེད་པར་ནུས་ཡིན་ཏེ། །མེད་ཕྱིར་ནམ་མཁའི་པདྨ་བཞིན། །ཞེས་སོ། །འདི་ལྟར་གཙོ་བོ་ལ་ངེས་པ་ཁོ་ནར་འབྲས་བུའི་གཟུགས་ཀྱིས་འགྲོ་བ་འཇུག་པ་དང་ལྡོག་པར་བྱེད་དོ་ཞེས་སེར་སྐྱ་ཟེར་རོ། །
འདི་ལྟར་དེ་དག་ཐམས་ཅད་ནམ་མཁའ་ལ་མངོན་པར་སྤྲས་པའི་རི་མོ་བཞིན་དུ་སང་བ་ཡིན་ཞེས་བསམས་ནས། གྲུབ་པའི་མཐའ་སྨྲ་བས་སུན་དབྱུང་བར་བཞེད་ནས། གཅིག་ལ་ཞེས་པ་ལ་སོགས་པ་གསུངས་ཏེ། གཅིག་ཏུ་ཡོད་ན་རང་བཞིན་གསུམ་ཉིད་ནི་ཞེས་ཏེ། རྡུལ་དང་མུན་པ་དང་སྙིང་སྟོབས་ཡོན་ཏན་གྱི་དབྱེ་བ་གསུམ་གྱི་བདག་ཉིད་རིགས་པ་མིན་ཏེ་འཐད་པ་མ་ཡིན་ནོ། །རྒྱུ་དེས་ན་ཡོན་ཏན་གསུམ་གྱི་གཙོ་བོ་དེ་ཡོད་མིན་ཏེ། མེད་པ་ཡིན་ནོ། །གཅིག་དང་དུ་མའི་རང་བཞིན་དུ། །ཞེས་པ་འདི་ནི་ཕན་ཚུན་འགལ་བ་ཡིན་ནོ། །དེའི་ཕྱིར་དེ་ཉིད་སུན་ཕྱུང་བ་ན་དེའི་འབྲས་བུ་ཐམས་ཅད་སུན་ཕྱུང་བར་འགྱུར་རོ། །མ་གྱུར་མོད་གཅིག་གི་རང་བཞིན་དེ་ཡོན་ཏན་གསུམ་གྱི་བདག་ཉིད་དེ། ཡོན་ཏན་དེའི་རང་བཞིན་གྱི་ཡོད་པ་ཡིན་ནོ་ཞེ་ན། དེ་བཞིན་ཞེས་པ་ལ་སོགས་པ་གསུངས་ཏེ། དེ་བཞིན་དུ་སྟེ་གཙོ་བོ་བཞིན་དུའོ། །ཡོན་ཏན་ཏེ་སྙིང་སྟོབས་དང་རྡུལ་དང་མུན་པའི་རང་བཞིན་ཏེ་ཡོད་མིན་ནོ། །དེ་ཡང་གསུམ་སྟེ། གང་གི་ཕྱིར་ཡོན་ཏན་དེ་རྣམས་ཀྱང་སོ་སོ་རེ་རེ་ལ་གསུམ་སྟེ་རྣམ་པ་གསུམ་གསུམ་མོ། །དེ་བཞིན་དུ་ཐམས་ཅད་ཡོན་ཏན་གསུམ་གྱི་བདག་ཉིད་ཡིན་ནོ་ཞེས་སྨྲ་བ་ལ། སོ་སོར་ཡང་ཡོན་ཏན་གསུམ་གྱི་རང་བཞིན་གྱིས་ཡོན་ཏན་གསུམ་གྱི་བདག་ཉིད་ཐོབ་པོ། །དེ་བཞིན་དུ་དེའི་ཡོན་ཏན་ཡང་ཡོན་ཏན་གསུམ་གྱི་བདག་ཉིད་ཀྱིས་གཅིག་གི་རང་བཞིན་ཡོད་པ་མ་ཡིན་ནོ། །གང་གི་ཚེ་ཡང་འདི་ལྟར་རྣམ་པར་དཔྱད་པ་ན་ཡོན་ཏན་རྣམས་ཡོད་པ་མ་ཡིན་ལ། དེའི་ཚེ་དེ་ལས་གྱུར་པའི་སྤྲ་ལ་སོགས་པ་ཡང་རིགས་པ་མ་ཡིན་ནོ། །ཡོན་ཏན་མེད་ན་ཞེས་པ་ལ་སོགས་པ་གསུངས་ཏེ། ཡོན་ཏན་ཏེ་སྙིང་སྟོབས་ལ་སོགས་པ་རྣམས་ཡིན་ལ། མེད་དེ་ཡོད་པ་མ་ཡིན་ནོ། །ཀྱང་ཞེས་པ་ནི་ཉེས་པ་གཞན་སོགས་པ་ཡིན་ཏེ། སྒྲ་ལ་སོགས་པ་སྟེ་སོགས་པའི་སྒྲ་སྨོས་པས་རེག་བྱ་ལ་སོགས་པ་གཟུང་ངོ༌། །ཡོད་པ་ཉིད་དེ་ཡོད་པ་ནི་དངོས་པོའོ། །ཤིན་ཏུ་རིང་དུ་སྟེ། རྣམ་པ་ཐམས་ཅད་དུ་རིགས་པ་མ་ཡིན་ལ། རྒྱུ་མེད་པ་ལ་འབྲས་བུ་ཡོད་པ་ཉིད་དུ་མི་རིགས་པའི་ཕྱིར་རོ། །དེ་ཡང༌། འདི་དག་བདེ་སོགས་དང་ལྡན་པ། །
གསལ་བ་གསལ་པོར་མཐོང་བ་ཡིན། །བདེ་དང་སྡུག་བསྔལ་བཏང་སྙོམས་སོགས། །རང་བཞིན་གཅིག་པོ་དམིགས་པ་ལས། །ཞེས་བརྗོད་དེ། དེ་ཡང་མི་རིགས་སོ་ཞེས་བསྟན་པའི་ཕྱིར། སེམས་མེད་ཅེས་པ་ལ་སོགས་པ་གསུངས་ཏེ། འང་གི་སྒྲ་ནི་སྔ་མ་བཞིན་ཡིན་ཏེ། སེམས་མེད་པ་ནི་བེམས་པོའི་ངོ་བོ་ཡིན་པ་ལའོ། །གོས་ལ་སོགས་པ་སེམས་མེད་པའི་སྣམ་བུ་ལ་སོགས་པ་ལའོ། །བདེ་སོགས་ཀྱང་སེམས་ཀྱི་བདག་ཉིད་དེ། བདག་ཉིད་གཅིག་པོར་སྲིད་པའང་མིན་ཏེ་ཡོད་པ་མ་ཡིན་ནོ། །གང་གི་ཕྱིར་སྙིང་སྟོབས་དང་རྡུལ་དང་མུན་པའི་བདག་ཉིད་ནི་བདེ་བ་དང་སྡུག་བསྔལ་དང་བཏང་སྙོམས་སུ་བརྗོད་པ་ཡིན་ལ། དེ་རྣམས་ལ་ཡང་ཡོན་ཏན་ཡོད་པ་མ་ཡིན་ལ། དེ་ཇི་ལྟར་ན་དེ་ལ་བདེ་བ་ལ་སོགས་པར་འགྱུར་བ་ཡིན། དེ་ལྟར་གྱུར་ན་ཡང་བདེ་བའི་བདག་ཉིད་ཡིན་པའི་ཕྱིར་སྣམ་བུ་ལ་སོགས་པ་རྣམས་བདེ་བའི་རང་བཞིན་ཡིན་ནོ་ཞེས་ནི་མི་སྨྲའི། འོན་ཀྱང་བདེ་བ་ལ་སོགས་པ་དེ་ལས་སྐྱེས་པར་དོགས་ནས་དེ་དངོས་ཞེས་པ་ལ་སོགས་པ་གསུངས་ཏེ། དེ་ནི་བདེ་བ་ལ་སོགས་པ་ཡིན་ལ། རྒྱུའི་ངོ་བོ་ནི་བྱེད་པ་པོའི་རང་བཞིན་ཕྱི་རོལ་དུ་གྱུར་པ་ཡིན་པར་སྣམ་བུ་ལ་སོགས་པ་ཡང་གལ་ཏེ་འདོད་ནའོ། །དངོས་པོ་རྣམས་དཔྱད་ཟིན་ནམ་ཞེས་ཏེ། སྣམ་བུ་ལ་སོགས་པ་འདི་རྣམས་ཡན་ལག་ཅན་གྱི་ངོ་བོ་མ་ཡིན་ལ། རྡུལ་ཕྲ་རབ་ཀྱི་རང་བཞིན་ཡང་མེད་ཅིང༌། ཡོན་ཏན་གསུམ་གྱི་བདག་ཉིད་དུ་མེད་དེ། འདི་ལྟར་དངོས་པོ་རྣམ་པར་དཔྱད་ཅིང་བརྟགས་པ་ན་རིགས་པས་དངོས་པོ་སྣང་བ་རྣམས་ཀྱང་སྒྱུ་མ་ལྟ་བུ་ཡིན་ཏེ། རང་བཞིན་མེད་པའི་ཕྱིར་རོ། །དེ་ལ་དངོས་པོ་འདི་ཇི་ལྟར་ན་བདེ་བ་ལ་སོགས་པའི་རྒྱུའི་ངོ་བོར་འགྱུར། གཞན་ཡང་གསལ་བ་བདེ་བ་ལ་སོགས་པའི་རང་བཞིན་ཡིན་ན་སྣམ་བུ་ལ་སོགས་པ་ཉིད་བདེ་བ་ལ་སོགས་པའི་བསྐྱེད་པར་བྱ་བར་འགྱུར་རོ་ཞེས་ཁྱོད་ཀྱིས་བདེ་སོགས་ཞེས་པ་ལ་སོགས་པ་གསུངས་ཏེ། སྣམ་བུ་ཡང་བདེ་བ་ལ་སོགས་པ་ཉིད་ཀྱི་རྒྱུ་ཡིན་ཏེ། ཁྱོད་དེ་ཁྱོད་ཅག་ལ་རྒྱུ་ཉིད་དུ་འགྱུར་ཏེ། གསལ་བ་ནི་བདེ་བ་ལ་སོགས་པའི་རྒྱུ་ཡིན་
པའི་ཕྱིར་རོ། །དེ་ལྟ་ན་ཡང་དེ་ལ་སྣམ་སོགས་ཏེ། སོགས་པའི་སྒྲས་ནི་ཙནྡན་གྱི་ཕྲེང་བ་ལ་སོགས་པ་གཟུང་ངོ༌། །སླར་འདི་ཕྱིན་ཅི་ལོག་ཏུ་དམིགས་པ་ཡིན་ནོ་ཞེས་སྣམ་སོགས་ཞེས་པ་ལ་སོགས་པ་སྨོས་ཏེ། སོགས་པའི་སྒྲས་ནི་ཙནྡན་ལ་སོགས་པ་ཡིན་ལ། བདེ་སོགས་ཡིན་ཏེ་སོགས་པའི་སྒྲས་སྡུག་བསྔལ་ལ་སོགས་པར་འགྱུར་རོ། །དེ་མེད་ཕྱིར་ན་སྟེ་སྣམ་བུ་ལ་སོགས་པ་མེད་པའི་ཕྱིར་རོ། །བདེ་སོགས་མེད་པ་ཡིན་ཏེ། སྣམ་བུ་ལ་སོགས་པའི་འབྲས་བུ་ཡིན་པའི་ཕྱིར་རོ། །བདེ་བ་ལ་སོགས་པར་མི་འགྱུར་རོ། །དེའི་རྗེས་སུ་འགྲོ་བ་ལྡོག་པའི་རྗེས་སུ་བྱེད་པའི་ཕྱིར་བདེ་བ་ལ་སོགས་པ་དེའི་འབྲས་བུ་ཉིད་ཡིན་ནོ། །སྙིང་སྟོབས་ལ་སོགས་པའི་ཡོན་ཏན་གྱི་བདག་ཉིད་ཡིན་པས་གང་ཡང་བདེ་བ་ལ་སོགས་པ་རྟག་པར་འདོད་པ་ན། དེ་ཡང་ཡང་དག་པ་མ་ཡིན་ནོ་ཞེས་བསྟན་པའི་ཕྱིར། བདེ་སོགས་ཀྱང་ཞེས་པ་ལ་སོགས་པ་གསུངས་ཏེ། བདེ་བ་དང་སྡུག་བསྔལ་དང་བཏང་སྙོམས་ཀྱང་ངོ༌། །ཀྱང་གི་སྒྲས་ནི་ཉེས་པ་ལྷག་པ་བརྗོད་པར་འདོད་པ་ཡིན་ནོ། །རྟག་པ་ཉིད་ནི་རྟག་པའི་རང་བཞིན་ཉིད་ཡིན་ལ། ནམ་ཡང་དམིགས་པ་ཡོད་པ་མ་ཡིན་མཐོང་བ་མ་ཡིན་ཏེ། ཡོན་ཏན་ལ་སོགས་པ་མེད་པའི་ཕྱིར་ལ། དེ་རྣམས་རྟག་པ་ལ་སོགས་པར་མི་རིགས་པའི་ཕྱིར་རོ། །གལ་ཏེ་ཡང་བདེ་བ་ལ་སོགས་པ་རྣམས་རྟག་པར་གྱུར་ན་དེའི་ཚེ་རྟག་ཏུ་དམིགས་པར་འགྱུར་རོ་ཞེས་བསྟན་པའི་ཕྱིར། བདེ་བའི་གསལ་བ་ཉིད་ཡོད་ན། །ཞེས་ཏེ། གལ་ཏེ་བདེ་བ་ལ་སོགས་པ་རྟག་པའི་རང་བཞིན་དུ་གནས་པ་ཡིན་ན། དེའི་ཚེ་ཇི་ལྟར་ནམ་ཞིག་བདེ་བའི་རང་བཞིན་ཡིན་པ་དེ་བཞིན་དུ་ནམ་ཡང་ཞེས་པ་ནི་རྟག་ཏུ་དེ་རིགས་པར་འགྱུར་ཏེ། དེའི་རང་བཞིན་ཡོངས་སུ་མདོར་བའི་ཕྱིར་རོ་ཞེས་པ་ནི་བསྡུས་པའི་དོན་ཏོ། །བདེ་བའི་བདེན་ཡོད་ཉིད་ཡིན་ན་ཡང་བདེ་བའི་གསལ་བ་འགའ་ཞིག་ན་གྱུར་པའི་བདེ་བ་རྟག་པ་ཡིན་ན། མྱོང་བ་ཅིའི་ཕྱིར་འཛིན་པ་མ་ཡིན་ཏེ། བདེ་བའི་མྱོང་བར་ནི་ཐམས་ཅད་དུ་ཅིའི་ཕྱིར་མི་འགྱུར། ཐམས་ཅད་དུ་མྱོང་བ་ཡང་མ་ཡིན་ནོ། །དེ་ལྟ་བས་ན་ནམ་ཞིག་ན་མི་དམིགས་པ་དེ་ན་དེའི་ཚེ་ཡོད་པ་
མ་ཡིན་ནོ་ཞེས་ཇི་ལྟར་རྟག་པ་ཉིད་དུ་ངེས་པ་ཡིན། དེ་ལྟར་གྱུར་ན་ཡང་རྟག་ཏུ་གསལ་བའི་ངོ་བོར་གྱུར་ན་ཉེས་པ་འདིར་འགྱུར་ན། གང་གི་ཚེ་ཡང་དེ་ཉིད་ནུས་པའི་ངོ་བོ་ཉིད་ཀྱིས་མི་མངོན་པར་གྱུར་པའི་ཚེ་ཉེས་པ་མེད་དོ་ཞེས། དེ་ཉིད་ཕྲ་མོ་ཞེས་པ་ལ་སོགས་པ་གསུངས་ཏེ། དེ་ཉིད་གསལ་བར་གནས་པར་བྱས་ནས་དངོས་པོ་ལ་བརྟེན་པས་ཕྱེ་ནས་མི་དམིགས་པའི་དུས་ན་ཕྲ་མོར་འགྱུར་བ་ཡིན་ཏེ། ཉིན་མོའི་སྐར་མ་ལ་སོགས་པ་བཞིན་དུ་མི་དམིགས་པའི་རང་བཞིན་ལ་ཡང་དག་པར་བརྟེན་པ་ཡིན་ནོ་ཞེ་ན། དེ་ནི་རིགས་པ་མ་ཡིན་ནོ། །ཅིའི་ཕྱིར་ཞེ་ན། གང་སྟེ་གང་གི་ཕྱིར་རགས་པ་གསལ་བའི་ངོ་བོ་རང་བཞིན་དུ་ཡོད་ན་ཕྲ་བ་ཇི་ལྟར་ཡིན་ཏེ། དེ་ལྟར་མི་གསལ་བའི་རང་བཞིན་བདེ་བ་ལ་སོགས་པ་དེ་རྟག་པ་ཡིན་པས་གཅིག་པུ་ནི་དུ་མའི་རང་བཞིན་ཉིད་དུ་གཅིག་པུ་མི་རིགས་སོ་ཞེས་བསམས་པ་ཡིན་ནོ། །འོན་ཏེ་དེ་ལྟ་ན་ཡང་ཕན་ཚུན་འགལ་བ་དག་དུས་གཅིག་ཏུ་གཅིག་ལ་རིགས་པ་མ་ཡིན་ཏེ། སྔར་གྱི་ཆོས་ལོག་ན་ཡང་ཆོས་གཞན་སྐྱེས་པས་ཉེས་པ་མེད་དོ་ཞེས། རགས་པ་དོར་ནས་ཞེས་པ་ལ་སོགས་པ་གསུངས་ཏེ། རགས་པ་མངོན་པར་གྱུར་པའི་ངོ་བོ་དོར་ནས་ཏེ། ཡོངས་སུ་བོར་བར་གྱུར་ན་མི་མངོན་པར་གྱུར་པ་ཡིན་ནོ་ཞེ་ན། འདི་ལྟར་ཁས་ལེན་པ་ན། ཕྲ་རགས་དེ་དག་མི་རྟག་ཉིད། །ཅེས་ཏེ། སྐྱེ་བ་དང་འཇིག་པའི་དབང་དུ་གྱུར་པའི་ཕྱིར་རོ། །རགས་པ་བསྟན་པ་མ་ཡིན་པ་ཕྲ་བ་ཉིད་དུ་འགྱུར་རོ། །གྱུར་དུ་ཆུག་ན་ཡང་རྟག་པ་ལ་ཉམས་པ་ཅི་ཞིག་ཡོད་ཅེ་ན། དེ་བཞིན་དངོས་པོ་ཐམས་ཅད་ནི། །ཞེས་པ་ལ་སོགས་པ་གསུངས་ཏེ། དངོས་པོ་ཐམས་ཅད་ནི་དེ་ཁོ་ན་ཉིད་ཉི་ཤུ་རྩ་ལྔའི་མཚན་ཉིད་ཡིན་ལ། དེ་བཞིན་དུ་སྟེ། རགས་པ་ཕྲ་བ་བཞིན་དུ་མི་རྟག་ཉིད་དུ་ཅེས་མི་འདོད་དེ། ཅིའི་ཕྱིར་རྗེས་སུ་འགྲོ་བ་མེད་པ་ཉིད་ཀྱི་འཇིག་པར་ཁས་མི་ལེན། བསམ་པ་ནི་འདི་ཡིན་ཏེ། རགས་པ་དང་ཕྲ་བ་དག་ཀྱང་རྗེས་སུ་འགྲོ་བ་མེད་པའི་འཇིག་པ་སྐྱེ་བ་མེད་པར་མངོན་པ་དང་མི་མངོན་པའི་དངོས་པོར་རིགས་པ་མ་ཡིན་ནོ། །གཞན་དུ་ན་བརྒྱ་ལ་འགའ་ཞིག་གི་ངོ་བོས་གནས་པའི་ཕྱིར་སྔ་མ་བཞིན་དུ་ཡང་མངོན་པར་ཐལ་བར་འགྱུར་རོ། །དེ་ལྟ་བས་ན་ངེས་པར་དེ་དག་རྗེས་
སུ་འགྲོ་བ་མེད་པར་འཇིགས་པ་ཡང་དག་པར་སྐྱེ་བ་ཉིད་དུ་ཁས་བླང་བར་བྱའོ། །དེ་ལྟར་ན་ཡང་དེ་དག་འདི་ལྟར་གྱུར་པ་ན་དེ་བཞིན་དུ་གཞན་ཡང་ཁྱད་པར་མེད་པའི་ཕྱིར་འགྱུར་བ་ཡིན་ནོ། །གཞན་ཡང་གལ་ཏེ་རགས་པ་དང་ཕྲ་བ་དག་འཇིག་པ་དང་སྐྱེ་བར་འདོད་ན། དེའི་ཚེ་བདེ་བ་ལ་སོགས་པ་རྣམས་མི་རྟག་པར་ཐལ་བར་འགྱུར་ཏེ། འདི་ལྟར་ཡང་རགས་པ་དེ་བདེ་བ་ལ་ཐ་དད་པའམ་ཐ་མི་དད་པར་འགྱུར། དེ་ལ་གལ་ཏེ་ཐ་དད་པ་ཡིན་ན་དེའི་ཚེ་དེར་ལོག་ན་ཡང་སྔར་བཞིན་དུ་བདེ་བའི་མྱོང་བར་འགྱུར་རོ། །སྣམ་བུ་ལོག་ན་ཡང་བུམ་པ་མི་དམིགས་པ་རིགས་པ་མ་ཡིན་ཏེ། དེ་ནི་འདི་ཞེས་འབྲེལ་བ་རྟོགས་པ་ལ་ཐུག་པ་མེད་པར་ཐལ་བས་སོ། །འབྲེལ་བ་ཡོད་ན་ཡང་རྒྱུ་མ་ཡིན་པ་ལོག་པས་གཞན་ལྡོག་པ་ཡོད་པར་རིགས་པ་མ་ཡིན་ཏེ། བ་ལང་ལོག་པས་དེའི་བདག་པོ་མི་ལྡོག་པ་བཞིན་ནོ། །བདེ་བའི་རྒྱུ་ཡང་དེ་མ་ཡིན་ཏེ། སྣམ་བུ་ལ་སོགས་པ་ཉིད་ལས་བདེ་བ་སྐྱེད་པའི་ཕྱིར་རོ། །དེ་ཡང་རྒྱུ་མ་ཡིན་ཏེ། དེ་ནི་བདེ་བ་ལ་སོགས་པ་དང་དུས་མཉམ་པ་ཉིད་ཀྱི་ཕྱིར་རོ། །འོན་ཏེ་ཐ་དད་པ་མ་ཡིན་ནོ་ཞེས་བྱ་བའི་ཕྱོགས་ཡིན་ན། འདི་ལ་བརྗོད་པར་བྱ་སྟེ། རགས་པ་བདེ་བ་གཞན་མིན་ཞེས་ཏེ། གལ་ཏེ་རགས་པ་བདེ་བ་ལས་གཞན་ཏེ་ཐ་དད་པ་ཡིན་ན་དེའི་ཚེ་འདི་བདེ་བ་ཉིད་དུ་འགྱུར་རོ། །དེའི་ཚེ་བདེ་བ་གསལ་བར་མི་རྟག་ཉིད་ཡིན་ཏེ། དེའི་རང་བཞིན་ཡིན་པས་རགས་པ་འགགས་པ་ན་བདེ་བ་ཡང་འགགས་པའི་ཕྱིར་བདེ་བ་མི་རྟག་པ་ཉིད་དེ། འཇིག་པ་ཉིད་དུ་གསལ་ཏེ་ངེས་པ་ཡིན་ནོ། །གལ་ཏེ་དེ་ལྟར་གྱུར་ན་ཡང་གལ་ཏེ་རྣམ་པ་ཐམས་ཅད་དུ་ཞིག་པར་འགྱུར་ན། དེའི་ཚེ་བདེ་བ་སླར་སྐྱེ་བར་མི་འགྱུར་ཏེ། གཏན་མེད་པ་ནི་ནམ་མཁའི་ཨུཏྤལ་བཞིན་དུ་སྐྱེ་བར་མི་རིགས་པའི་ཕྱིར་རོ་ཞེས་གཞན་གྱི་འདོད་པར་དགོད་པའི་ཕྱིར། གལ་ཏེ་མེད་པ་ཞེས་པ་ལ་སོགས་པ་སྨོས་ཏེ། གལ་ཏེ་རྣམ་པ་ཐམས་ཅད་དུ་རྒྱུ་མེད་པའི་བདག་ཉིད་ལ་ཡོད་པ་མ་ཡིན་པ་དེ་ནི་སྐྱེ་བ་མ་ཡིན་ཏེ། དཔེར་ན་ནམ་མཁའི་པདྨ་བཞིན་ནོ། །དེ་བཞིན་དུ་གལ་ཏེ་གཞན་ཡང་ཡིན་པར་གྱུར་ན་དེའི་ཚེ་སྐྱེ་བ་མ་ཡིན་ནོ། །དེའི་ཕྱིར་
མེད་པ་ནི་ཅུང་ཟད་ཀྱང་སྐྱེས་བ་མ་ཡིན་ལ། གཏན་མེད་པའི་རང་བཞིན་ཅུང་ཞིག་སྐྱེ་བ་མ་ཡིན་ནོ། །ཅིའི་ཕྱིར་ཞེ་ན། མེད་པའི་ཕྱིར་ཏེ། ཡོད་པ་མ་ཡིན་པའི་ཕྱིར་ལ། དེ་ལྟར་གལ་ཏེ་འདོད་ནའོ། །འདི་ལྟར་གལ་ཏེ་འདོད་ན་དེའི་ཚེ་འདི་བརྗོད་པར་མི་བྱའོ་ཞེས་གསལ་བར་ཞེས་པ་ལ་སོགས་པ་སྨོས་ཏེ། གསལ་བར་མེད་པ་ཡིན་ཏེ། སྔར་ཡོད་པའི་གནས་སྐབས་ན་ཡོད་པ་མ་ཡིན་པའི་གསལ་བ་སྐྱེ་བ་སྟེ། ཕྱི་ནས་སྐྱེ་བར་མི་འདོད་ཀྱང་སྟེ། འདོད་པ་མ་ཡིན་པ་ཡང་ཁྱོད་དེ་ཡོད་པར་སྨྲ་བ་ཁྱོད་ལ་གནས་པ་ཉིད་དེ་ཡོད་པ་ཡིན་ནོ། །གཞན་དུ་ན་སྔར་ཡང་དེ་ཡོད་པ་ཡིན་ན་ཕྱི་མ་བཞིན་དུ་སྔར་ཡང་དེ་དམིགས་པར་ཐལ་བར་འགྱུར་རོ། །ཇི་ལྟར་གསལ་བ་མེད་པ་སྐྱེས་པ་དེ་བཞིན་དུ་གལ་ཏེ་གཞན་ཡང་ཡིན་པ་དེའི་ཚེ་འགལ་བ་ཅུང་ཟད་ཀྱང་ཡོད་པ་མ་ཡིན་ནོ། །གཞན་ཡང་ཡོད་པ་འབྲས་བུར་སྨྲ་བ་ལ་རྒྱུའི་གནས་སྐབས་ན་འབྲས་བུ་ཡོད་པའི་ཕྱིར་ཉེས་པ་གཞན་དུ་ཡང་འགྱུར་རོ་ཞེས་བརྗོད་པའི་ཕྱིར། གལ་ཏེ་རྒྱུ་ལ་ཞེས་པ་ལ་སོགས་པ་གསུངས་ཏེ། བཟའ་བར་བྱ་བའི་དོན་གྱིས་ན་ཟས་ཡིན་ལ། ཟས་ཟ་བ་པོ་མི་གཙང་བར་འགྱུར་ཏེ། བཙོག་པ་ཟ་བར་འགྱུར་རོ། །ཇི་ལྟར་ཞེ་ན། གལ་ཏེ་རྒྱུ་ལ་འབྲས་གནས་ན་སྟེ། འབྲས་བུ་གལ་ཏེ་རྒྱུ་ལ་ཡོད་པའི་རང་བཞིན་ཡིན་ནའོ། །འདི་ལྟར་ཡོད་པར་སྨྲ་བ་ལ་ཡང་ཟས་ཀྱི་འབྲས་བུ་མི་གཙང་བ་ཉིད་ཡིན་ན་དེ་ཡང་ཟས་ཀྱི་གནས་སྐབས་ཉིད་ན་ཡོད་པ་ཡིན་ནོ། །དེའི་ཕྱིར་ཟས་ཟ་བས་ན་དེ་ཟ་བའི་དོགས་པར་འགྱུར་རོ། །གཞན་ཡང་ཐལ་བར་འགྱུར་བ་གཞན་འདི་ཡང་ཡོད་པ་འབྲས་བུར་སྨྲ་བ་ལ་བརྗོད་པའི་ཕྱིར། རས་ཀྱི་རིན་ཞེས་པ་ལ་སོགས་པ་གསུངས་ཏེ། གལ་ཏེ་རྒྱུ་ལ་འབྲས་བུ་གནས་ན་ཞེས་པ་དང་འབྲེལ་ཏེ། རས་བལ་གྱི་ས་བོན་ཏེ་རྒྱུ་ལ་འབྱུང་བར་འགྱུར་བའི་འབྲས་བུ་རས་ཡོད་པའི་ཕྱིར། རས་ཀྱི་རིན་གྱིས་ཏེ། དེ་ཉོ་བའི་རིན་གྱིས་རས་བལ་གྱི་ས་བོན་ཉོས་ལ་སྟེ། བཟུང་ནས་བགོ་བར་གྱིས་ཏེ། གོས་སུ་གྱིས་ཤིག །འོན་ཏེ་དེ་ལྟར་ན་གལ་ཏེ་དོན་དམ་པར་རྒྱུ་ལ་འབྲས་བུ་ཡོད་པ་དེ་ལྟར་ན་ཡང་འདི་ཀུན་རྫོབ་ཏུ་མ་རིག་པའི་རབ་རིབ་ཀྱིས་ཡེ་ཤེས་ཀྱི་མིག་
ཉམས་པར་བྱས་པའི་ཐ་སྙད་པའི་འཇིག་རྟེན་པས་འདི་མི་མཐོང་བ་ཡིན་ནོ་ཞེས་འཇིག་རྟེན་རྨོངས་པས་ཞེས་པ་ལ་སོགས་པ་གསུངས་ཏེ། རྨོངས་པས་ཏེ་མི་ཤེས་པས་སོ། །དངོས་པོའི་དེ་ཁོ་ན་ཉིད་ཡོད་ན་ཡང་མི་མཐོང་སྟེ་འཇིག་རྟེན་གྱིས་མཐོང་བ་མ་ཡིན་ལ། དེའི་ཕྱིར་བརྗོད་པའི་ཉེས་པར་ཐལ་བར་མི་འགྱུར་རོ། །གལ་ཏེ་བརྗོད་དོ་ཞེ་ན། དེ་ཁོ་ན་ཉིད་ཤེས་པ་ཡང་གནས་པ་མ་ཡིན་ནམ། གལ་ཏེ་ཡང་འཇིག་རྟེན་པས་མ་མཐོང་བས་དེ་ལྟར་ཐ་སྙད་བྱེད་པ་མ་ཡིན་ན་དེ་ཁོ་ན་ཉིད་ཤེས་པ་ལ་རིགས་པ་ཡིན་ཏེ། གང་གི་ཕྱིར་དེ་ཁོ་ན་ཉིད་ཤེས་པས་ཀྱང་རྒྱུ་ལས་འབྲས་བུ་ཡོད་དོ་ཞེས་ཤེས་པ་མ་ཡིན་པའི་ཕྱིར་རོ། །དོན་དམ་པར་རིགས་པའི་གྲངས་ཅན་དེ་ཡང་ཡོད་པ་ཡིན་ཏེ། དེ་ཉིད་ཐ་སྙད་པའི་སྐྱེ་བོ་ཐམས་ཅད་པའི་ཐུན་མོང་དུ་གནས་པ་ཡིན་ལ། དེ་རྣམས་ཀྱང་ཟས་ཟ་བ་ལ་སོགས་པ་ནི་འཇུག་པ་དང༌། རས་དོན་དུ་གཉེར་བས་རས་བལ་གྱི་ས་བོན་བསྙོན་པར་བྱ་བ་མ་མཐོང་བ་ཡིན་ནོ། །འདི་ནི་འདི་ལན་དུ་རིགས་པ་མ་ཡིན་ནོ་ཞེས་འཇིག་རྟེན་ཞེས་པ་ལ་སོགས་པ་གསུངས་ཏེ། འཇིག་རྟེན་པ་སྟེ་ཐ་སྙད་པའི་སོ་སོའི་སྐྱེ་བོ་ལ་ཡང་ཤེས་པ་གང་གིས་རྒྱུ་ལ་འབྲས་བུ་ཡོད་དོ་ཞེས་རྟོགས་པ་དེ་ཡོད་ལ་དེ་ཁོ་ན་ཉིད་ཤེས་པ་འབའ་ཞིག་ལ་ནི་མ་ཡིན་ནོ། །དེ་ལྟར་ཡང་འབྲས་བུ་མཐོང་ནས་རྒྱུ་ལ་དེ་ཡོད་དོ་ཞེས་དེ་ཁོ་ན་ཉིད་ཤེས་པ་དང༌། འཇིག་རྟེན་པ་གཉི་ག་ལ་ཐུན་མོང་དུ་ངེས་པ་ཡིན་ནོ། །དེས་འཇིག་རྟེན་པས་རྒྱུ་གང་གིས་མི་མཐོང༌། དེ་ལ་འཇིག་རྟེན་པས་མི་མཐོང་བ་ལ་རྒྱུ་མཚན་བརྗོད་པར་བྱའོ། །འཇིག་རྟེན་པའི་མཐོང་བ་ཚད་མ་ཡིན་ནོ་ཞེས་འཇིག་རྟེན་ཞེས་པ་ལ་སོགས་པ་གསུངས་ཏེ། ཚད་མ་ཉིད་མིན་ཏེ་དེའི་ཤེས་པ་ཚད་མ་མ་ཡིན་པ་ཉིད་ལ་གསལ་བར་མཐོང་བ་ཡང་མེད་པ་ཉིད་དོ། །གསལ་བར་མཐོང་བར་གྱུར་པའི་རང་བཞིན་མཐོང་བ་དེ་ཡང་ཡོད་པ་མ་ཡིན་པ་སྟེ། ཚད་མ་མ་ཡིན་པར་འགྱུར་རོ། །དེ་ལྟ་བས་ན་དངོས་པོའི་དེ་ཁོ་ན་ཉིད་ཀྱིས་རྣམ་པར་གཞག་པ་ཐེག་པ་མ་ཡིན་ནོ། །འདི་ཡང་ཁོ་བོ་ཅག་གིས་འདོད་པ་ཉིད་ཡིན་ཏེ། ཐ་སྙད་པའི་ཚད་མ་ཐམས་ཅད་དོན་དམ་པར་ཚད་མ་མ་ཡིན་པའི་ཕྱིར་རོ། །དེ་བཞིན་དུ་ཡང་ཁྱེད་ཅག་ཀྱང་
ཁོ་བོ་ཅག་གི་ཕྱོགས་སུ་ལྷུང་བ་ཡིན་ནོ། །དེ་ལྟར་ཡོངས་སུ་གནས་པ་ལ་སེར་སྐྱ་གྲུབ་པའི་མཐའ་སྨྲ་བ་ཡང་ཉེས་པ་མཚུངས་པར་རྒོལ་བས། གལ་ཏེ་ཚད་མ་ཞེས་པ་ལ་སོགས་པ་གསུངས་ཏེ། གལ་ཏེ་ཚད་མ་ཡང་དོན་དམ་པར་ཚད་མར་མི་འགྱུར་རོ་ཞེས་པ་ཁྱེད་ཀྱིས་ཕྱོགས་ཡིན་ན། དེ་གཞལ་བརྫུན་པར་མི་འགྱུར་རམ། ཚད་མ་ཚད་མ་མ་ཡིན་པ་ཉིད་ཡིན་ན་དེས་གཞལ་བ་སྟེ། ཚད་མ་དེས་ཡོངས་སུ་བཅད་པ་བརྫུན་ཞིང་བདེན་པ་མ་ཡིན་པ་ཐོབ་བོ། །གཞན་ཅིར་འགྱུར་ཞེ་ན། དེའི་ཕྱིར་དེ་ཉིད་དུ་དངོས་རྣམས་སྟོང་པ་ཉིད་ནི་འཐད་པ་མ་ཡིན། གལ་ཏེ་ཚད་མ་མ་ཡིན་དེ་ཉིད་ཡིན་ན། དེས་བཅལ་བ་ཡང་བརྫུན་པ་ཡིན་ནོ། །དེའི་ཚེ་གང་འདིར་དེ་ཉིད་དུ་སྟེ། དོན་དམ་པ་ཡིན་ལ། དངོས་པོ་རྣམས་ནི་ཆོས་ཡིན་ཏེ། སྟོང་པ་ཉིད་ནི་ཆོས་ཐམས་ཅད་རང་བཞིན་མེད་པ་ཡིན་ལ། ཚད་མ་དེའི་ངེས་པ་དེ་ཡང་འཐད་པ་མ་ཡིན་ཞིང༌། རིགས་པ་མ་ཡིན་ཏེ། ཚད་མ་ཐམས་ཅད་ཀྱིས་ཉེ་བར་བསྟན་པ་ཡང་བརྫུན་པ་ཡིན་པས་སོ། །ཆོས་ཐམས་ཅད་གང་ན་མེད་པ་དེ་ཡང་དེ་དཔྱོད་པའི་ཚད་མ་ཉེ་བར་བཀོད་པས་རིགས་པ་མཚུངས་པ་ཡིན་ནོ་ཞེ་ན། འདིར་ལན། བརྟགས་པའི་ཞེས་པ་ལ་སོགས་པ་གསུངས་ཏེ། བརྟགས་ཏེ་རྟོག་པས་སྒྲོ་བཏགས་པའོ། །དངོས་པོ་ནི་ཆོས་ཡིན་ལ། མ་རེག་པ་སྟེ། རྟོག་པའི་བློས་མ་བཟུང་བར་དེའི་དངོས་པོ་འཛིན་པ་མ་ཡིན་ཏེ། དམིགས་པ་མ་ཡིན་ནོ། །འདི་ལྟར་ཡང་བུམ་པ་བཏགས་པའི་ངོ་བོས་ཡོངས་སུ་བརྟགས་ནས་དེ་དང་འབྲེལ་བ་བུམ་པ་མེད་པ་འཇིག་རྟེན་པས་རྟོགས་ཏེ། བུམ་པ་ལ་རྣམ་པར་དཔྱད་པས་འཇིག་རྟེན་ལ་གྲགས་པ་ཉིད། གང་གི་ཚེ་ཅུང་ཟད་ཀྱིས་ངོ་བོར་མི་གནས་པ་དེའི་ཚེ་མེད་པ་ཉིད་ཡིན་ཏེ། དེ་ལས་ཕྱིན་ཅི་ལོག་གི་ངོ་བོ་ཤིན་ཏུ་འགའ་ཡོད་པ་མ་ཡིན་ནོ། །དེ་ཉིད་བརྟགས་པ་བསྟན་པའི་ཕྱིར། དེའི་ཕྱིར་ཞེས་པ་ལ་སོགས་པ་གསུངས་ཏེ། གང་གི་ཕྱིར་བརྟགས་པའི་དངོས་པོའི་དབྱེ་བས་དངོས་པོ་མེད་པ་འཛིན་པ་མ་ཡིན་པ་དེའི་ཕྱིར་བརྫུན་པའི་གང་ལ་དངོས་པོ་གང་ན་མེད་པའི་དངོས་པོ་གང་ཡིན་པའོ། །དེ་ཡི་དངོས་མེད་གསལ་བར་བརྫུན། །དེའི་སྟེ་དངོས་པོ་མེད་པའི་རང་བཞིན་
གྱིས་དངོས་པོ་མེད་ཅིང་བྲལ་བ་གསལ་བ་སྟེ། ངེས་པར་བརྫུན་ཞིང་བདེན་པ་མ་ཡིན་པ་ཡིན་ཏེ། དེ་ཡང་ཡོངས་སུ་བརྟགས་པའི་དངོས་པོ་ཡིན་པའི་ཕྱིར་རོ། །འདི་ལྟར་ཡང་དངོས་པོ་དང་དངོས་པོ་མེད་པ་དག་ཡོངས་སུ་བརྟགས་པའི་ངོ་བོ་ལ་ཆོས་ཐམས་ཅད་རང་བཞིན་མེད་པ་ཉིད་ཀྱིས་གནས་པ་ཡིན་ནོ། །ཡང་འདི་ཉིད་མཇུག་བསྡུ་བའི་ཟུར་གྱིས་གསལ་བར་བསྟན་པའི་ཕྱིར། དེས་ན་རྨི་ལམ་ཞེས་བ་ལ་སོགས་པ་གསུངས་ཏེ། གང་གི་ཕྱིར་ན་དངོས་པོ་དང་དངོས་པོ་མེད་པ་བརྟགས་པའི་ཉེ་བར་གཞག་པའི་ཕྱིར་བརྫུན་པའི་དོན་ཡིན་པ་དེ་ལྟ་བས་ན་རྨི་ལམ་སྟེ། གཉིད་ཀྱིས་སེམས་མནན་པའི་གནས་སྐབས་སུ་བུ་སྐྱེས་ཏེ། ཞིག་པ་ན་བུ་མེད་དོ་ཞེས་པའི་རྣམ་པར་རྟོག་པ་ནི་དེ་མེད་པའི་རྣམ་པར་རྟོག་པའོ། །ཅི་ཞིག་བྱེད་ཅེ་ན། དེ་ཡོད་རྣམ་རྟོག་སྐྱེ་བའི་བགེགས་ཡིན་ཏེ། དེ་ཡོད་ན་ནི་བུ་ཡོད་པའོ། །དེ་ཡོད་པ་ནི་དངོས་པོ་ཉིད་དོ། །དེའི་རྣམ་པར་རྟོག་པ་ནི་སྒྲོ་འདོགས་པ་ཡིན་ཏེ། དེ་རྣམས་སྐྱེས་ཤིང་བྱུང་བ་ཡིན་ལ། དེ་བགེགས་ཡིན་ཏེ། འགེགས་པར་བྱེད་པ་ཡིན་ནོ། །དེ་ལྟ་བུ་དེ་ཉིད་དེ་ཡིན་ནོ་ཞེ་ན། བརྫུན་པ་ཡིན་ཏེ་དེ་བརྟགས་པ་ཡིན་ནོ། །དེ་ཡོད་པར་རྟོག་པ་འགེགས་པ་ཡང་བརྫུན་ཡིན་ལ། བདེན་པ་མ་ཡིན་ཏེ། རྨི་ལམ་གྱི་བུ་ནི་མ་སྐྱེས་པ་དང་མ་འགགས་པའི་ཕྱིར་རོ། །ཡང་ན་བདེན་པར་མངོན་པར་འདོད་པའི་བུ་ཉིད་རྨི་ལམ་དུ་ཤི་བ་ལ་འདི་ཐམས་ཅད་སྦྱར་བར་བྱའོ། །དེ་ལྟར་ན་ཆོས་ཐམས་ཅད་ཀྱི་སྐྱེ་བ་དང་འགག་པ་རྟོགས་པས་བརྟག་པར་བལྟ་བར་བྱའོ། །འདི་བརྗོད་པར་འགྱུར་ཏེ། དཔེར་ན་རྨི་ལམ་ནི་མཐོང་བའི་དངོས་པོ་མ་སྐྱེས་པ་དང་མ་འགགས་པ་རྟོག་པས་ཉེ་བར་བསྟན་པའི་དངོས་པོ་དང་དངོས་པོ་མེད་པ་དག་དོན་དམ་པར་ཡོད་པ་མ་ཡིན་ཏེ། འོན་ཀྱང་རྣམ་པར་རྟོག་པས་ཐ་སྙད་ཀྱི་ཡུལ་དུ་ཉེ་བར་གྱུར་པ་རབ་ཏུ་སྣང་ལ། རྟོག་པ་དེ་ཡང་མེད་པའི་ཡུལ་ཅན་ཡིན་པས་ཚད་མ་མ་ཡིན་ཏེ། དེའི་ཡུལ་ཡང་དོན་དམ་པར་རང་བཞིན་མེད་པའི་ཕྱིར་རོ། །དེ་བཞིན་དུ་སད་པའི་གནས་སྐབས་ན་དམིགས་པ་ཡང་དངོས་པོ་དང་དངོས་པོ་མེད་པའི་ཐ་སྙད་ཀྱི་ལམ་ལ་ཞུགས་པ་དག་ལ་རྣམ་པར་རྟོག་པས་བསྟན་པའི་རྣམ་པར་གཞག་པ་ཡིན་ནོ། །དེ་ལྟར་
ན་དེ་ཚད་མ་མ་ཡིན་པ་ལ་ཡང་ཆོས་ཐམས་ཅད་རང་བཞིན་མེད་པས་མི་འགལ་ལོ་ཞེས་གང་གསུངས་པ། སྐྱེ་དང་གནས་དང་འཇིག་པ་ཡང༌། །འཇིག་རྟེན་བསམ་པས་ཁྱེད་ཀྱིས་གསུངས། །དེ་ཕྱིར་བརྟགས་པ་ཙམ་ཉིད་དུ། །ཆོས་རྣམས་ཐམས་ཅད་བསྟན་པ་ཡིན། །གང་གི་སྟོང་ཉིད་རྣམས་བརྟགས་པས། །རྟོག་པའང་མེད་པར་བརྗོད་པའོ། །ཞེས་ཏེ། ཐམས་ཅད་འཚམ་པ་ཡིན་ནོ། །དེ་ལྟར་རྒྱུར་མེད་པའི་རང་བཞིན་དང༌། དབང་ཕྱུག་དང༌། གཙོ་བོས་བྱས་པ་ཉིད་ཀྱིས་འགྲོ་བ་བསལ་བས། རྒྱུ་མེད་པ་ལས་ཀྱང་མ་ཡིན་ནོ་ཞེས་བྱ་བའི་དོན་བསྒྲུབས་ནས། མཇུག་བསྡུ་བའི་ཕྱིར། དེ་བས་དེ་ལྟར་ཞེས་པ་ལ་སོགས་པ་གསུངས་ཏེ། གང་གི་ཕྱིར་རང་བཞིན་ལ་སོགས་པ་ལས་གྱུར་པའི་འབྲས་བུ་ཅུང་ཟད་ཀྱང་སྐྱེ་བ་མ་ཡིན་ནོ། །དེའི་ཕྱིར་དེ་ལྟར་རྣམ་པར་དཔྱད་པ་སྟེ། བརྗོད་མ་ཐག་པའི་རྣམ་པར་དཔྱད་པས་སོ། །འགའ་ཡང་རྒྱུ་མེད་ཡོད་མ་ཡིན་ཏེ། རང་གི་ངོ་བོ་ལ་སོགས་པ་རྒྱུ་མ་ཡིན་པ་ལས་སྐྱེས་པའི་འབྲས་བུ་འགའ་ཞིག་ཡོད་པ་མ་ཡིན་ཏེ། མེད་པ་ཡིན་ནོ། །འདི་ནི་ཉེ་བར་མཚོན་པ་ཡིན་ནོ། །སྐྱེས་བུ་དང༌། དུས་ལ་སོགས་པས་བྱས་པ་ཡང་ཡོད་པ་མ་ཡིན་ཏེ། དེ་རྣམས་ཀྱང་རྒྱུ་མེད་པའི་ཕྱིར་རོ། །དེའི་ཕྱིར་རྒྱུ་མེད་པ་ཡང་མ་ཡིན་ཞེས་གྲུབ་པ་ཡིན་ནོ། །ཅི་སྟེ་གལ་ཏེ་རང་བཞིན་དང༌། དབང་ཕྱུག་དང༌། གཙོ་བོ་ལ་སོགས་པའི་རྒྱུ་མེད་པ་ལས་འགའ་ཞིག་མེད་པ་དེ་ལྟར་ན་ཡང་མཐོང་བའི་རྒྱུ་འདི་ལས་དོན་དམ་པ་སྐྱེ་བ་ཡིན་ཏེ། དེ་ལྟར་ན་ཐམས་ཅད་རང་བཞིན་མེད་པར་ཇི་ལྟར་གྲུབ་པར་འགྱུར་ཞེས་གཞན་གྱི་དོགས་པ་བསུ་ནས། རང་ལས་མ་ཡིན་གཞན་ལས་མིན། །གཉིས་ལས་མ་ཡིན་ཞེས་པའི་མུ་གསུམ་གྱིས་དོན་བསྟན་པའི་ཕྱིར། སོ་སོ་འམ་ནི་ཞེས་པ་ལ་སོགས་པ་གསུངས་ཏེ། སོ་སོ་འམ་འདུས་པ་རྣམས་ལ་ཞེས་ཏེ། སོ་སོ་བ་རྣམས་དང་འདུས་པ་རྣམས་ལ་མ་ཡིན་པ་ཉིད་དོ། །དེ་ལ་སོ་སོ་བ་རྣམས་ནི་རེ་རེར་རང་དང་གཞན་ལས་མ་ཡིན་ནོ། །འདུས་པ་རྣམས་ལའང་མ་ཡིན་ཏེ། རང་དང་གཞན་གཉིས་པོ་དག་རྐྱེན་རྣམས་ཏེ། རྒྱུ་རྣམས་ལའོ། །གནས་པ་སྟེ་སྐྱེས་པའི་ངོ་བོས་གནས་
ཅུང་ཟད་ཀྱང་མ་ཡིན་ནོ། །དེ་ལ་རེ་ཞིག་རང་ལས་དངོས་པོ་རྣམས་སྐྱེ་བ་མ་ཡིན་ཏེ། སྐྱེ་བ་ལས་སྔར་དེའི་རང་བཞིན་མེད་པའི་ཕྱིར་གང་ལས་སྐྱེ་བར་འགྱུར། སྐྱེས་པ་ན་ཡང་ངོ་བོ་ཡོད་པ་དེ་ཡང་གྲུབ་པའི་ཕྱིར་ཅི་ཞིག་སྐྱེ་བར་འགྱུར། གཞན་ཡང་ཉིད་ལས་སྐྱེ་བ་ལ་སྐྱེས་པ་ཉིད་སླར་ཡང་སྐྱེས་པར་འགྱུར་ལ། དེ་ཡང་རིགས་པ་མ་ཡིན་ཏེ། བྱས་པ་ལ་ཡང་བྱེད་པ་མི་འཐད་པའི་ཕྱིར་རོ། །སྐྱེས་པ་ཡང་སྐྱེ་བ་ལ་ནི་ས་བོན་ལ་སོགས་པ་ཉིད་འཁོར་བ་ཇི་སྲིད་དུ་འཇུག་པའི་ཕྱིར་མྱུ་གུ་ལ་སོགས་པ་རྣམས་བརྒྱ་ལ་ཡང་བསྐྱེད་པ་ལ་ཡང་སྐབས་ལ་ཡོད་པ་ཡང་མ་ཡིན་ན། འདི་ཁས་བླངས་པ་ན་ཡང་འཇིག་རྟེན་པའི་ཉམས་སུ་མྱོང་བས་གྲུབ་པ་མ་ཡིན་ཏེ། ས་བོན་ལ་སོགས་པ་ལ་མྱུ་གུ་ལ་སོགས་པ་སྐྱེ་བ་མཐོང་བའི་ཕྱིར་རོ། །ས་བོན་དང་མྱུ་གུ་གཅིག་པ་ནི་མ་ཡིན་ཏེ། གཉིས་ཀ་ཡང་གཟུགས་དང་རོ་དང་ནུས་པ་དང་སྨིན་པར་བྱེད་པ་ཐ་དད་པའི་ཕྱིར་རོ། །རང་གི་ངོ་བོ་བསྐྱེད་བར་བྱ་བ་ཡིན་ན་ཡང་འགའ་ཞིག་སྐྱེ་བར་ཡང་མི་འགྱུར་ཏེ། གཅིག་ལ་གཅིག་བརྟེན་པ་ཡིན་པའི་ཕྱིར་རོ། །འདི་ལྟར་རེ་ཞིག་རང་གི་ངོ་བོར་མ་གྱུར་པ་དེ་སྲིད་དུ་སྐྱེ་བ་མི་འཐད་ལ། ཇི་སྲིད་སྐྱེས་པར་མ་གྱུར་པ་དེ་སྲིད་དུ་རང་གི་ངོ་བོར་མི་འགྱུར་ཏེ། དེའི་ཕྱིར་གཅིག་ལ་གཅིག་བརྟེན་པ་ཡིན་ནོ། །དེ་ལྟ་བས་ན་རང་ལས་སྐྱེ་བ་ཅུང་ཟད་ཀྱང་ཡོད་པ་མ་ཡིན་ནོ། །གཞན་ལས་ཀྱང་མ་ཡིན་ཏེ། གཞན་ལས་སྐྱེ་བར་འདོད་པས་ན་ས་བོན་གྱིས་ཀྱང་ཁྲེའི་མྱུ་གུ་བསྐྱེད་པར་ཐལ་ཏེ། སཱ་ལི་དང་ཁྲེ་དག་ཀྱང་ཁྲེའི་མྱུ་གུ་ལ་ལྟོས་ནས་གཞན་ཉིད་དུ་ཁྱད་པར་ཡོད་པ་མ་ཡིན་ནོ། །ཐམས་ཅད་ལས་ཀྱང་ཐམས་ཅད་སྐྱེ་བར་འགྱུར་ཏེ། ཐམས་ཅད་གཞན་དང་གཞན་དུ་ཁྱད་པར་མེད་པའི་ཕྱིར་རོ། །འོན་ཏེ་གལ་ཏེ་གཞན་ཡིན་པར་ཁྱད་པར་མེད་ཀྱང་དེ་ལྟ་ན་ཡང་རྒྱུ་དང་འབྲས་བུ་དག་ཕན་ཚུན་དུ་བསྐྱེད་པར་བྱ་བ་དང༌། སྐྱེད་པར་བྱེད་པའི་དངོས་པོ་ངེས་པ་ཡིན་པའི་ཕྱིར་ཐམས་ཅད་སྐྱེ་བ་མ་ཡིན་ནོ་ཞེ་ན། འབྲས་བུ་མ་སྐྱེས་པ་ལ་ཡང་གང་གིས་ནུས་པ་ཞེས་བརྗོད་པར་བྱ། སྐྱེས་པ་ལ་ཡང་རྒྱུ་དང་འབྲས་བུ་མེད་པའི་ཕྱིར་གང་གིས་ནུས་པ་ཞེས་བརྗོད་པར་བྱ། རྒྱུ་དང་འབྲས་བུ་དག་དུས་མི་མཚུངས་པའི་ཕྱིར་བསྐྱེད་པར་བྱ་བ་དང༌། སྐྱེད་པར་བྱེད་པའི་དངོས་པོ་
སོ་སོར་ངེས་པ་འགའ་ཞིག་ཀྱང་ཡོད་པ་མ་ཡིན་ནོ། །དེ་ཉིད་ཀྱི་ཕྱིར་རྒྱུན་གཅིག་ཏུ་ངེས་པ་ཡིན་པར་ཡང་རིགས་པ་མ་ཡིན་ཏེ། རྒྱུ་དང་འབྲས་བུ་མེད་པར་རྒྱུན་མི་སྲིད་པའི་ཕྱིར་ཏེ། དེ་སྐད་ཅིག་མ་གཅིག་ཏུ་གནས་པ་ཡིན་པའི་ཕྱིར་རྒྱུན་ཞེས་བྱ་བ་ཅི་ཞིག་ཡིན། སྔ་མ་དང་ཕྱི་མར་སྐད་ཅིག་མར་འཇུག་པ་ཡང་རྟོག་པས་སྒྲོ་བཏགས་པ་ཡིན་པའི་ཕྱིར་དངོས་པོར་གྱུར་པའི་རྒྱུན་ཡོད་པ་མ་ཡིན་ནོ། །འདིས་ནི་འདྲ་བའི་ངེས་པར་བྱེད་པ་ཡང་འདིར་གསལ་བ་ཡིན་ཏེ། དེ་ལྟར་ན་ཡང་འགའ་ཞིག་དང་འགའ་ཞིག་ན་རྒྱུན་དུ་གྱུར་པའམ་འདྲ་བའམ་བསྐྱེད་པར་བྱ་བ་དང་སྐྱེད་པར་བྱེད་པའི་དངོས་པོའི་ངེས་ཡོད་མ་ཡིན་ཏེ། བསྐྱེད་པར་བྱ་བ་དང་སྐྱེད་པར་བྱེད་པ་ཡང་འདིར་དཔྱད་པར་བྱ་བ་ཡིན་པའི་ཕྱིར་ཇི་ལྟར་འདིས་དེ་ལན་དུ་འགྱུར་བ་ཡིན། དེ་ལྟ་བས་ན་གཞན་ལས་ཀྱང་ཅུང་ཟད་ཀྱང་སྲིད་པ་མ་ཡིན་ལ། གཉི་ག་ཡང་མ་ཡིན་ཏེ། སོ་སོའི་ཕྱོགས་ལ་བརྗོད་པའི་ཕྱོགས་ངེས་པར་ཐལ་བར་འགྱུར་བའི་ཕྱིར་རོ། །སོ་སོའི་གཉིས་པོ་ལ་ནུས་པ་མེད་པ་ཚོགས་པ་ལ་ཡང་ནུས་པ་མེད་པའི་ཕྱིར་རོ། །ལོང་བ་གཅིག་གིས་མ་མཐོང་བའི་ལམ་མང་པོ་རྣམས་ཀྱིས་ཀྱང་མཐོང་བར་ནུས་པ་མ་ཡིན་ནོ། །བྱེ་མ་སོ་སོ་ལ་མར་ཁུ་འབྱིན་པའི་ནུས་པ་མེད་ན་ཚོགས་པ་ལ་ཡང་དེའི་ནུས་པ་ཡོད་པར་མི་འགྱུར་རོ། །དེའི་ཕྱིར་ཕྱོགས་གཉི་ག་ལ་བརྗོད་པ་དེར་ཐལ་བར་འགྱུར་བའི་ཕྱིར་གཉི་ག་ལས་ཀྱང་སྐྱེ་བ་མ་ཡིན་ནོ། །དེ་ལྟར་ན་རང་དང་གཞན་དང་གཉི་ག་ལས་སྐྱེས་པ་དང༌། རྒྱུ་མེད་པ་ལས་སྐྱེས་པ་ཡང་དེ་ཁོ་ན་ཉིད་དུ་ཡོད་པ་མ་ཡིན་ནོ། །དེ་བས་ན་དོན་དམ་པར་མ་སྐྱེས་པ་དང་མ་འགགས་པའི་རང་བཞིན་སྒྱུ་མ་དང་སྨིག་རྒྱུ་མཚུངས་བརྟེན་ཅིང་འབྲེལ་པར་འབྱུང་བ་རང་བཞིན་གྱིས་སྟོང་པ་ཉིད་སྣ་ཚོགས་པ་ཐམས་ཅད་ཀྱི་ངོ་བོར་སྣང་ངོ༌། །རྐྱེན་འདི་པ་ཙམ་འདི་ནི་འདིར་ཀུན་རྫོབ་ཏུ་འགེགས་པ་མ་ཡིན་ནོ། །གང་བཅོམ་ལྡན་འདས་ཀྱིས་སཱ་ལུ་ལྗང་པའི་མདོ་ལས་གསུངས་པ་ཡིན་ཏེ། དེ་ལ་རྟེན་ཅིང་འབྲེལ་པར་འབྱུང་བ་མཐོང་བ་ཇི་ལྟ་བུ་ཞེ་ན། འདི་ལ་བཅོམ་ལྡན་འདས་ཀྱིས་སུས་རྟེན་ཅིང་འབྲེལ་པར་འབྱུང་བ་རྟག་པ་དང༌། སྲོག་མེད་པ་དང༌། སྲོག་དང་བྲལ་བ་དང༌། ཇི་ལྟ་བུ་ཉིད་དང༌། མ་ནོར་བ་ཉིད་དང༌། མ་སྐྱེས་པ་དང༌།
མ་བྱུང་བ་དང༌། མ་བྱས་པ་དང༌། འདུས་མ་བྱས་པ་དང༌། ཐོགས་པ་མེད་པ་དང༌། དམིགས་པ་མེད་པ་དང༌། ཞི་བ་དང༌། འཇིགས་པ་མེད་པ་དང༌། མི་འཕྲོགས་པ་དང༌། རྣམ་པར་འགྱུར་བ་མ་ཡིན་པའི་རང་བཞིན་དུ་མཐོང་བ་དེས་ཆོས་མཐོང་བ་ཡིན་ཏེ། གང་གིས་ཚུལ་འདི་དང་འདྲ་བར་ཆོས་ལ་ཡང་རྟག་པ་དང༌། སྲོག་མེད་པ་དང༌། སྲོག་དང་བྲལ་བ་ཞེས་པ་ལ་སོགས་པ་ནི་སྔ་མ་བཞིན་ནོ། །ཇི་སྲིད་དུ་རྣམ་པར་འགྱུར་བ་མ་ཡིན་པའི་རང་བཞིན་དུ་མཐོང་བ་དེ་འཕགས་པའི་ཆོས་ཉེ་བར་རྟོགས་ཏེ། ཡང་དག་པའི་ཡེ་ཤེས་དང་ལྡན་པའི་བླ་ན་མེད་པ་ཆོས་ཀྱི་སྐུ་སངས་རྒྱས་མཐོང་ངོ་ཞེས་གསུངས་སོ། །སྨྲས་པ་ཅིའི་ཕྱིར་རྟེན་ཅིང་འབྲེལ་པར་འབྱུང་བ་ཞེས་བྱ། སྨྲས་པ་རྒྱུ་དང་བཅས་རྐྱེན་དང་བཅས་པ་ལ་བྱའི། རྒྱུ་མེད་རྐྱེན་མེད་པ་ལ་ནི་མ་ཡིན་ཏེ། སྔ་མ་བཞིན་དུའོ། །འདི་ལྟར་ཡང་རྟེན་ཅིང་འབྲེལ་པར་འབྱུང་བ་འདི་གཉིས་ཀྱིས་ཕྱིར་འབྱུང་སྟེ། གཉིས་གང་ཞེ་ན། འདི་ལྟ་སྟེ། རྒྱུ་དང་འབྲེལ་པ་དང༌། རྐྱེན་དང་འབྲེལ་བའི་ཕྱིར་རོ། །དེ་ཡང་ཕྱི་དང་ནང་གི་རྣམ་པ་གཉིས་སུ་བལྟའོ། །དེ་ལ་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྒྱུ་དང་འབྲེལ་པ་གང་ཞེ་ན། འདི་ལྟ་སྟེ། ས་བོན་ལས་མྱུ་གུ། མྱུ་གུ་ལས་འདབ་མ། འདབ་མ་ལས་སྡོང་བུ། སྡོང་བུ་ལས་སྤུ་གུ། སྤུ་གུ་ལས་སྙིང་པོ། སྙིང་པོ་ལས་མེ་ཏོག །མེ་ཏོག་ལས་འབྲས་བུའོ། །ས་བོན་མེད་ན་མྱུ་གུ་མི་འབྱུང་སྟེ། མེ་ཏོག་མེད་ན་འབྲས་བུའི་བར་དུ་ཡང་མི་འབྱུང་ངོ༌། །ས་བོན་ཡོད་ན་མྱུ་གུ་མངོན་པར་འགྲུབ་པར་འབྱུང་སྟེ། དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་མངོན་པར་འགྲུབ་པར་འགྱུར་རོ། །དེ་ལས་ས་བོན་ནི་འདི་སྙམ་དུ་བདག་གིས་མྱུ་གུ་མངོན་པར་བསྒྲུབ་བོ་སྙམ་དུ་མི་སེམས་སོ། །མྱུ་གུ་ཡང་འདི་སྙམ་དུ་བདག་ནི་ས་བོན་གྱིས་མངོན་པར་བསྐྱབས་སོ་སྙམ་དུ་མི་སེམས་སོ། །དེ་བཞིན་དུ་མེ་ཏོག་ཀྱང་འདི་སྙམ་དུ་བདག་གིས་འབྲས་བུ་མངོན་པར་བསྒྲུབ་པོ་སྙམ་དུ་མི་སེམས་པའི་བར་དུ་སྟེ། འབྲས་བུ་ཡང་འདི་སྙམ་དུ་བདག་ནི་མེ་ཏོག་གིས་མངོན་པར་བསྒྲུབས་སོ་སྙམ་དུ་མི་སེམས་མོད་ཀྱིས། འོན་ཀྱང་ས་བོན་ཡོད་དེ་མྱུ་གུ་མངོན་པར་བསྒྲུབ་ཅིང་འབྱུང་
བར་འགྱུར་བས་ན་དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་ཡང་མངོན་པར་འགྲུབ་ཅིང་འབྱུང་བར་འགྱུར་ཏེ། དེ་ལྟར་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྒྱུ་དང་འབྲེལ་པར་བལྟའོ། །ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་བར་ཇི་ལྟར་ལྟ་ཞེ་ན། ཁམས་དྲུག་འདུས་པའི་ཕྱིར་ཏེ། ཁམས་དྲུག་པོ་གང་དག་འདུས་པའི་ཕྱིར་ཞེ་ན། འདི་ལྟ་སྟེ། ས་དང་ཆུ་དང་མེ་དང་རླུང་དང་ནམ་མཁའ་དང༌། དུས་ཀྱི་ཁམས་རྣམས་འདུས་པ་ལས་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྐྱེན་དང་འབྲེལ་པར་བལྟའོ། །དེ་ལ་སའི་ཁམས་ནི་ས་བོན་བརྟེན་པའི་བྱ་བ་བྱེད་དོ། །ཆུའི་ཁམས་ནི་ས་བོན་བརླན་པའི་བྱ་བ་བྱེད་དོ། །མེའི་ཁམས་ནི་ས་བོན་ཡོངས་སུ་དྲོ་བའི་བྱ་བ་བྱེད་དོ། །རླུང་གི་ཁམས་ནི་ས་བོན་འབུ་བའི་བྱ་བ་བྱེད་དོ། །ནམ་མཁའི་ཁམས་ནི་ས་བོན་ལ་མི་སྒྲིབ་པའི་བྱ་བ་བྱེད་དོ། །དུས་ནི་ས་བོན་འགྱུར་བའི་བྱ་བ་བྱེད་དོ། །རྐྱེན་ནི་འདི་རྣམས་མེད་པར་ས་བོན་ལས་མྱུ་གུ་མངོན་པར་འགྲུབ་པར་མི་འགྱུར་གྱི། ནམ་ཕྱི་རོལ་གྱི་སའི་ཁམས་མ་ཚང་བ་མེད་པར་འགྱུར་ལ། དེ་བཞིན་དུ་ཆུ་དང་མེ་དང་རླུང་དང་ནམ་མཁའ་དང་དུས་ཀྱང་མ་ཚང་བ་མེད་པར་འགྱུར་ཏེ། ཐམས་ཅད་འདུས་པ་ལ་ས་བོན་འགག་པ་ན་དེ་ལས་མྱུ་གུ་མངོན་པར་འགྲུབ་པར་འགྱུར་རོ། །དེ་ལ་སའི་ཁམས་ཀྱང་འདི་སྙམ་དུ་བདག་གིས་ས་བོན་བརྟེན་པའི་བྱ་བ་བྱའོ་སྙམ་དུ་མི་སེམས་སོ། །དེ་བཞིན་དུ་ཆུའི་ཁམས་ཀྱང་འདི་སྙམ་དུ་བདག་གིས་ས་བོན་བརླན་པར་བྱའོ་སྙམ་དུ་མི་སེམས་སོ། །མེའི་ཁམས་ཀྱང་འདི་སྙམ་དུ་བདག་གིས་ས་བོན་ཡོངས་སུ་དྲོ་བར་བྱའོ་སྙམ་དུ་མི་སེམས་སོ། །རླུང་གི་ཁམས་ཀྱང་འདི་སྙམ་དུ་བདག་གིས་ས་བོན་འབུ་བར་བྱའོ་སྙམ་དུ་མི་སེམས་སོ། །ནམ་མཁའི་ཁམས་ཀྱང་འདི་སྙམ་དུ་བདག་གིས་ས་བོན་ལ་མི་སྒྲིབ་པའི་བྱ་བ་བྱའོ་སྙམ་དུ་མི་སེམས་སོ། །དུས་ཀྱང་འདི་སྙམ་དུ་བདག་གིས་ས་བོན་བསྒྱུར་བའི་བྱ་བ་བྱའོ་སྙམ་དུ་མི་སེམས་སོ། །ས་བོན་ཡང་འདི་སྙམ་དུ་བདག་གིས་མྱུ་གུ་མངོན་པར་བསྒྲུབ་པོ་སྙམ་དུ་མི་སེམས་སོ། །མྱུ་གུ་ཡང་འདི་སྙམ་དུ་བདག་ནི་རྐྱེན་འདི་དག་གིས་མངོན་པར་བསྒྲུབས་སོ་སྙམ་དུ་མི་
སེམས་མོད་ཀྱི་འོན་ཀྱང་རྐྱེན་འདི་དག་ཡོད་ལ་ས་བོན་འགག་པ་ན་མྱུ་གུ་མངོན་པར་འགྲུབ་པར་འགྱུར་རོ། །དེ་བཞིན་དུ་མེ་ཏོག་ཡོད་ན་འབྲས་བུའི་བར་དུ་ཡང་མངོན་པར་འགྲུབ་པར་འགྱུར་ཏེ། མྱུ་གུ་ཡང་བདག་གིས་མ་བྱས། གཞན་གྱིས་མ་བྱས། གཉིས་ཀས་མ་བྱས། དབང་ཕྱུག་གིས་མ་བྱས། དུས་ཀྱིས་མ་བསྒྱུར། རང་བཞིན་ལས་མ་བྱུང༌། རྒྱུ་མེད་པ་ལས་ཀྱང་མ་སྐྱེས་ཏེ། འོན་ཀྱང་ས་དང་ཆུ་དང་མེ་དང་རླུང་དང་ནམ་མཁའ་དང་དུས་ཀྱི་ཁམས་རྣམས་འདུས་པས་ས་བོན་འགགས་པ་ན་མྱུ་གུ་མངོན་པར་འགྲུབ་པར་འགྱུར་ཏེ། དེ་ལྟར་ཕྱི་རོལ་གྱི་རྟེན་ཅིང་འབྲེལ་བར་འབྱུང་བ་རྐྱེན་དང་འབྲེལ་བར་བལྟའོ། །དེ་ལྟར་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟ་སྟེ། ལྔ་གང་ཞེ་ན། རྟག་པ་མ་ཡིན་པ་དང༌། ཆད་པ་མ་ཡིན་པ་དང༌། འཕོ་བ་མ་ཡིན་པ་དང༌། རྒྱུ་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་པ་དང༌། དེ་དང་འདྲ་བའི་རྒྱུད་དུའོ། །ཇི་ལྟར་རྟག་པ་མ་ཡིན་ཞེ་ན། གང་གི་ཕྱིར་མྱུ་གུ་ཡང་གཞན་ལ་ས་བོན་ཡང་གཞན་ཏེ། མྱུ་གུ་ཡང་ཡིན་པ་དེ་ཉིད་ས་བོན་མ་ཡིན་ལ། ས་བོན་འགགས་པས་མྱུ་གུ་འབྱུང་བ་མ་ཡིན། མ་འགགས་པས་ཀྱང་མ་ཡིན་ཏེ། ས་བོན་ཡང་འགགས་ལ། དེ་ཉིད་ཀྱི་ཚེ་མྱུ་གུ་འབྱུང་སྟེ། དེའི་ཕྱིར་རྟག་པར་མ་ཡིན་ནོ། །ཇི་ལྟར་ཆད་པར་མ་ཡིན་ཞེ་ན། སྔོན་འགགས་པའི་ས་བོན་ལས་མྱུ་གུ་སྐྱེ་བ་མ་ཡིན། མ་འགགས་པ་ལས་ཀྱང་མ་ཡིན་གྱིས། ས་བོན་ཡང་འགགས་ལ། དེ་ཉིད་ཀྱི་ཚེ་སྲང་མདའི་མཐོན་དམན་བཞིན་དུ་མྱུ་གུ་སྐྱེ་བས་དེའི་ཕྱིར་ཆད་པར་མ་ཡིན་ནོ། །ཇི་ལྟར་འཕོ་བར་མ་ཡིན་ཞེ་ན། གང་གི་ཕྱིར་མྱུ་གུ་ཡང་གཞན་ས་བོན་ཡང་གཞན་ལ། མྱུ་གུ་གང་ཡིན་པ་དེ་ཉིད་ས་བོན་མ་ཡིན་ཏེ། དེའི་ཕྱིར་འཕོ་བར་མ་ཡིན་ནོ། །ས་བོན་ཆུང་ངུ་བཏབ་ཕ་ལ་འབྲས་བུ་ཆེན་པོ་མངོན་པར་གྲུབ་པར་འགྱུར་ཏེ། དེའི་ཕྱིར་ཆུང་ངུ་ལས་འབྲས་བུ་ཆེན་པོ་མངོན་པར་འགྲུབ་བོ། །ས་བོན་ཇི་ལྟ་བུ་བཏབ་པ་དེ་ལྟ་བུའི་འབྲས་བུ་མངོན་པར་འགྲུབ་པ་དེའི་ཕྱིར་དེ་དང་འདྲ་བའི་རྒྱུད་དུ་སྟེ། དེ་ལྟར་ཕྱི་རོལ་གྱི་རྟེན་ཅིང་འབྲེལ་པར་འབྱུང་བ་རྣམ་པ་ལྔར་བལྟའོ། །དེ་བཞིན་དུ་ནང་གི་རྟེན་ཅིང་འབྲེལ་པར་འབྱུང་བ་སྔར་གྱི་རྒྱས་པར་བཤད་
པ་ཉིད་ཀྱིས་བསྟན་པ་ཡིན་ཏེ། འདི་ཡང་སྦྱར་བར་བྱའོ། །འདི་ལྟར་དོན་དམ་པར་དཔྱད་པ་ན་ཀུན་རྫོབ་འགེགས་པ་མ་ཡིན་པ་ཉིད་དོ། །ཅི་སྟེ་དངོས་པོ་ནི་གཏན་མེད་པའི་དངོས་པོར་འགྱུར་བ་ནི་མ་ཡིན་གྱི་འོན་ཀྱང་རྒྱུ་དང་རྐྱེན་གྱི་སྟོབས་ཀྱིས་མ་འོངས་པའི་དུས་ལས་ད་ལྟར་བྱུང་བའི་དུས་སུ་འགྱུར་ལ། སླར་ཡང་མི་རྟག་པ་ཉིད་ཀྱི་སྟོབས་ཀྱིས་ད་ལྟར་བྱུང་བ་ལས་འདས་པའི་དུས་སུ་འགྱུར་ཏེ། འདི་ལྟར་སྐྱེ་བ་དང་གནས་པ་དང་འཇིག་པར་བརྗོད་ལ། རྟེན་ཅིང་འབྲེལ་པར་འབྱུང་བ་ཡང་ཇི་ལྟ་བ་བཞིན་དུ་འདི་ལྟར་འགྱུར་རོ་ཞེས་དེ་ལྟར་དུས་གསུམ་དུ་སྨྲ་བའི་དོགས་པ་བླངས་ནས། གཞན་ནས་ཤེས་པ་ལ་སོགས་པ་གསུངས་ཏེ། གཞན་ནས་ནི་ཡུལ་དང་དུས་ལས་སོ། །འོངས་པ་མ་ཡིན་པ་ནི་ཅུང་ཟད་ཀྱང་མ་འོངས་པའོ། །འགྲོ་བ་ཡང་མ་ཡིན་པ་ནི་ད་ལྟར་བྱུང་བའི་དུས་ལས་འགར་ཡང་འགྲོ་བ་མ་ཡིན་པའོ། །རང་བཞིན་དེ་གཅིག་པོ་དེ་ཉིད་ཀྱིས་གང་དུ་ཡང་གནས་པ་མ་ཡིན་ནོ། །འདི་ལྟར་ཡང་གལ་ཏེ་མ་འོངས་པའི་དུས་ན་ད་ལྟར་བྱུང་བར་འགྱུར་ཞིང་ད་ལྟར་བྱུང་བ་ལས་འདས་བ་ཡིན་ན་དེའི་ཚེ་འདུས་བྱས་པ་ཡང་རྟག་པར་འགྱུར་ཏེ། ཐམས་ཅད་དུ་ཡོད་པའི་ཕྱིར་རོ། །མི་རྟག་ཅེས་བྱ་བ་ཡོད་མིན་ཏེ། དེ་ཆོས་རྟག་པ་མ་ཡིན་ནོ་ཞེས་པ་དེ་ཇི་ལྟར་འགྱུར། འོན་ཏེ་སྔ་མ་དང་ཕྱི་མའི་དུས་བྱེད་པས་སྟོང་པས་དུས་རྣམས་སུ་ཆོས་ཀྱི་ཁྱད་པར་ཡིན་ཏེ། འདི་ལྟར་གང་གི་ཚེ་བྱེད་པ་མ་ཐོབ་པ་ཅི་བྱ་བ་མི་བྱེད་པ་དེའི་ཚེ་མ་འོངས་པ་ཞེས་བརྗོད་དོ། །གང་གི་ཚེ་བྱེད་པ་དེའི་ཚེ་ད་ལྟར་བྱུང་བ་ཡིན་ལ། གང་གི་ཚེ་བྱས་ན་ལྡོག་པ་དེའི་ཚེ་འདས་པ་མ་ཡིན་པས་ཁྱད་པར་ཡོད་པ་ཡིན་ནོ་ཞེ་ན། འདི་ཡང་ཅུང་ཟད་ཀྱང་མ་ཡིན་ཏེ། བདག་ཉིད་དེ་ཉིད་ཀྱི་དེའི་ཚེ་ཡང་དེ་ཡོད་པའི་ཕྱིར་བྱེད་པ་ཡང་ཅིའི་ཕྱིར་བྱེད་པར་མི་འགྱུར་ཞེས་བརྗོད་པར་བྱའོ། །རྐྱེན་གཞན་ལ་ལྟོས་པ་ཡང་རྟག་ཏུ་གནས་པའི་ངོ་བོ་ལས་འཐད་པ་མ་ཡིན་ནོ། །བྱེད་པས་སྟོང་པ་ཡང་དངོས་པོ་ཡིན་ན་རྟའི་རྭ་ལ་སོགས་པ་ཡང་དེ་ཁོ་ན་ཉིད་དུ་ཐལ་བར་འགྱུར་རོ། །བྱེད་པ་ཡང་ཇི་ལྟར་འདས་པ་དང་མ་འོངས་པ་དང་ད་ལྟར་བྱུང་བ་ཡང་རྗོད་པར་བྱེད་དེ། ཅི་དེ་ལས་གཞན་པའི་བྱེད་
པ་ཡོད་པས་སམ། རང་ཉིད་ཀྱིས་ཡིན། སྔ་མ་ལ་ནི་ཞུགས་པ་མེད་པ་ཡིན་ལ། ཕྱི་མ་ལ་ཡང་ཆོས་ཀྱང་རང་ཉིད་ཀྱིས་འདས་པ་ལ་སོགས་པའི་རྣམ་པར་གཞག་པ་ལ་ཉམས་པ་ཅུང་ཟད་ཀྱང་མེད་དོ། །གལ་ཏེ་ཡང་ཇི་ལྟར་ད་ལྟར་བྱུང་བ་རྫས་སུ་ཡོད་ཅིང༌། དེ་བཞིན་དུ་འདས་པ་དང་མ་འོངས་པ་ཡང་ཡོད་ན་དེའི་ཚེ་འདི་ལྟར་རང་བཞིན་གྱིས་ཡོད་པའི་ཆོས་ཡིན་པར་ཇི་ལྟར་མ་སྐྱེས་པ་དང་འཇིག་པའི་རང་བཞིན་ཡིན། ཅི་འདི་ལྟར་མ་བྱུང་བ་གང་མེད་པ་ལས་སྐྱེས་བ་ཡིན་ནོ་ཞེས་རྗོད་པར་བྱེད་དོ། །གཞན་ཡང་ཕྱི་ནས་མེད་པ་ཡིན་ཏེ། གང་མེད་པས་ན་ཞིག་པ་ཞེས་བརྗོད། དེ་ཉིད་ཀྱིས་ཀྱང་བདག་ཉིད་སྔ་མ་དང་ཕྱི་མའི་དུས་རྟག་ཏུ་ཡོད་པ་ན། ད་ལྟར་བྱུང་བ་བཞིན་དུ་དམིགས་པ་ལ་སོགས་པར་ཐལ་བར་འགྱུར་རོ། །དེ་ལྟ་བས་ན་མ་བྱུང་བའི་ཕྱིར་མེད་པའི་ཆོས་འགྲོ་བ་མ་ཡིན་ཏེ། ཇི་ལྟར་ཡང་དུས་གསུམ་དང་ལྡན་པའི་དེ་ལོ་ན་ཉིད་ཁས་ལེན་པ་ན་འདས་པ་ལ་སོགས་པ་ཡོད་པ་མ་ཡིན་ནོ། །དེ་ལ་འདི་ནི་འདིར་བསྡུ་བའི་ཚིགས་སུ་བཅད་པ་ཡིན་ཏེ། རང་བཞིན་ཐམས་ཅད་དུ་ཡོད་ལ། དངོས་པོ་རྟག་པར་ཡང་མི་འདོད། །དངོས་ལས་དངོས་མིན་གཞན་མིན་པ། །གསལ་བར་དབང་ཕྱུག་སྤྱོད་པ་ཡིན། །ཞེས་པའོ། །གང་ཡང་འདས་པའི་ལས་ཡོད་པ་མ་འོངས་པའི་འབྲས་བུ་ཡོད་དོ་ཞེས་མདོའི་ཚིག་ལས་འདས་པ་ལ་སོགས་པའི་དངོས་པོ་བརྗོད་པ་དེ་ཡང་རྒྱུ་དང་འབྲས་བུ་ལ་སྐུར་བ་འདེབས་པའི་ལྟ་བ་དེ་བཟློག་པའི་ཆེད་དུ་བཅོམ་ལྡན་འདས་ཀྱིས་ཏེ། འདས་པ་ཡོད་དོ་མ་འོངས་པ་ཡོད་དོ་ཞེས་གསུངས་པ་ཡིན་ཏེ། འདས་པ་ནི་གང་སྔར་བྱུང་ཞིང་སྐྱེས་པ་ཞིག་པ་ཡིན་ལ། མ་འོངས་པ་ནི་གང་རྒྱུ་ཡོད་ན་འབྱུང་བར་འགྱུར་བ་ཡིན་ལ། དེ་ལྟར་རྒྱུ་ལ་སོགས་པ་ཡོད་དོ་ཞེས་བརྗོད་པ་ཡིན་ཏེ། ཡོད་པའི་སྒྲ་ཚིག་ཕྲད་ཡིན་པའི་ཕྱིར་དུས་གསུམ་དུ་འཇུག་པ་ཡིན་ནོ། །དེའི་ཕྱིར་འདི་འདི་ལྟར་དོན་དམ་པར་སྟོང་པ་ཉིད་དུ་བཅོམ་ལྡན་འདས་ཀྱིས་གསུངས་པ་ཡིན་ཏེ། དགེ་སློང་དག་མིག་སྐྱེ་བ་ན་གང་ནས་ཀྱང་འོངས་པ་མེད་དོ། །འགག་པ་ན་གང་དུ་ཡང་འགྲོ་བ་མེད་དོ། །འདི་ལྟར་དགེ་སློང་དག་མིག་མ་བྱུང་བ་ལས་འབྱུང་བར་འགྱུར་ཞིང་བྱུང་ནས་ཀྱང་འགག་པར་
འགྱུར་རོ་ཞེས་གསུངས་སོ། །གལ་ཏེ་ཡང་མིག་མ་འོངས་པ་ན་ཡོད་པ་ཡིན་ན་མ་འོངས་པ་ལས་བྱུང་བ་ཡིན་ནོ་ཞེས་མི་བརྗོད་པར་འགྱུར་རོ། དེ་ལྟ་བས་ན་དུས་གསུམ་དུ་འཕོ་བ་མ་ཡིན་ནོ། །གལ་ཏེ་ཡང་དེ་བཞིན་དུ་གང་ནས་འོངས་པའམ། འགྲོ་བ་ཞེས་པ་མ་ཡིན་ནོ། །མིག་ཡོར་དང་མཚུངས་པ་དེ་ལྟར་འབྱུང་བའི་དངོས་པོ་རང་བཞིན་མེད་པ་ཡིན་ཏེ། ཅུང་ཞིག་ཀྱང་རྣམ་པར་དཔྱད་པས་མི་གནས་སོ། །དེའི་ཚེ་སྒྱུ་མ་ལས་ནི་ཁྱད་ཅི་ཡོད། སྒྱུ་མ་ལས་དེ་མིག་འཕྲུལ་མཁན་གྱིས་སྤྲུལ་པའི་གླང་པོ་ཆེ་ལ་སོགས་པའི་ངོ་བོ་མིག་ཡོར་དང་མཚུངས་པ་ཡང་རང་བཞིན་མེད་པ་ཉིད་དུ་ཁྱད་པར་ཅི་ཡོད་དེ། ཅུང་ཟད་ཀྱང་ཡོད་པ་མ་ཡིན་ནོ། །འདི་ཞེས་པ་ནི་རྒྱུ་དང་རྐྱེན་གྱིས་བསྐྱེད་བའི་དངོས་པོའི་ངོ་བོ་ཡོངས་སུ་སྣང་བའོ། །ཅིའི་ཕྱིར་ཁྱད་པར་མེད་ཅེ་ན། ཡང་འདི་ཉིད་གསལ་པོར་བཤད་པར་བཞེད་པས་སྒྱུ་མས་ཞེས་བྱ་བ་ལ་སོགས་པ་གསུངས་ཏེ། སྒྱུ་མའི་སྒྲས་འདིར་སྒྱུ་མས་སྤྲུལ་པའི་སྒྱུ་མར་ཤེས་པ་ལ་སོགས་པའི་ཁྱད་པར་བརྗོད་པར་བྱ་སྟེ། རྒྱུ་ལས་འབྲས་བུ་བཏགས་པའི་ཕྱིར་རྒྱུ་དང་སྒྱུ་མའི་རང་བཞིན་རྟོགས་པར་བྱ་བའི་ཕྱིར་དོན་དང་དེས་སྤྲུལ་པ་ཡང་རྟོགས་པར་བྱ་བའི་ཆེད་དུ་སྒྱུ་མའི་རྒྱུས་སྒྱུ་མའི་རང་བཞིན་གྱིས་གང་ཞིག་སྤྲུལ་པ་ཞེས་པའི་ཐ་ཚིག་གོ །གང་ཡང་དངོས་པོའི་ངོ་བོ་རྒྱུ་རྣམས་ཀྱིས་ཏེ། འཇིག་རྟེན་ལས་གྲགས་པའི་རྒྱུ་རྣམས་ཀྱིས་སྤྲུལ་ཅིང་བསྐྱེད་པའོ། །ཡང་དང་དང་གི་སྒྲ་གཉིས་ནི་ཕན་ཚུན་སྡུད་པའི་ཆེད་དུའོ། །སྤྲུལ་པ་ནི་བྱུང་བའོ། །དེ་ལྟ་བས་ནི་སྒྱུ་མ་སྤྲུལ་པའམ། རྒྱུའི་སྤྲུལ་པ་དངོས་པོའི་རང་བཞིན་ནི་གང་ན་སྟེ། གང་ལས་སོ། །གང་དུ་འགྲོ་བ་སྟེ་ཞིག་པར་གྱུར་པ་ན་གང་དུ་འདི་འགྲོ་བར་འགྱུར། དེའི་ཕྱིར་འདི་ལྟར་བརྟག་པར་གྱིས་ཏེ། གལ་ཏེ་དེ་གང་ནས་འོངས་པའམ། གང་དུ་འགྲོ་བར་དམིགས་པ་ཞིབ་པའི་ལྟ་བས་བརྟག་པར་གྱིས་ཤིག་།ཅི་སྟེ་རྒྱུ་དང་རྐྱེན་གྱི་མཐུས་བྱུང་བ་དངོས་པོའི་ངོ་བོ་དེའི་ཚེ། ཇི་ལྟ་བུར་འཁྲུལ་པར་འགྱུར་ཞེ་ན། དེ་ཉིད་ཀྱི་ཕྱིར་བརྫུན་པ་ཡིན་ནོ་ཞེས་བསྟན་པའི་ཕྱིར། གང་ཞིག་གཞན་དང་ཞེས་པ་ལ་སོགས་པ་གསུངས་ཏེ། གང་ཞིག་དངོས་པོའི་ངོ་བོ་གཞན་རྒྱུ་དང་རྐྱེན་ཉེ་བར་མཐོང་
བ་སྟེ། དམིགས་པར་གྱུར་པ་དེ་མེད་ན་མིན་པ་སྟེ། དེ་ལས་གཞན་པ་མེད་ནམ་མཐོང་བ་ཡིན་ཏེ། དེ་གཞན་ལ་རག་ལས་ནས་འཇུག་པ་ཡིན་ཏེ་དེའི་ཕྱིར་རོ། །གཟུགས་བརྙན་དང་མཚུངས་པ་ནི་མེ་ལོང་གི་དཀྱིལ་འཁོར་ལ་མཐོང་བའི་གཟུགས་བརྙན་གདོང་པ་ལ་སོགས་པ་དང་འདྲ་བས་མཚུངས་པར་གྱུར་པས་གདོང་ལ་སོགས་པའི་གཟུགས་བརྙན་མེ་ལོང་གི་དཀྱིལ་འཁོར་ལ་སོགས་པ་ལ་ཉེ་བ་ན་གཟུགས་བརྙན་སྣང་བ་ཡིན་ལ། དེ་མེད་ན་ནི་སྣང་བ་མ་ཡིན་ལ། དེ་བཞིན་དུ་དངོས་པོའི་ངོ་བོ་ཡང་རྒྱུ་དང་རྐྱེན་ཉེ་བ་དང་མི་ཉེ་བ་དག་གོ །འདི་ལྟ་བུར་གྱུར་པའི་དངོས་པོ་བཅོས་སུ་གཞན་ལ་རག་ལས་པས་འཇུག་པས་རང་བཞིན་མེད་པ་ལ་བདེན་པ་ཉིད་དེ་བརྫུན་མ་ཡིན་པ་ཇི་ལྟར་ཡོད་དེ་རིགས་པ་མ་ཡིན་ནོ། །གཞན་གྱི་ཁྱད་པར་གྱི་རང་བཞིན་ལས་བཅོས་མ་མ་ཡིན་པ་ནི་མི་རིགས་སོ། །དེ་སྐད་དུ། གང་དག་རྒྱུ་ལས་འབྱུང་བ་རྣམས།། དེ་མེད་པར་ནི་ཡོད་མིན་གང༌། །དེ་རྣམས་གཟུགས་བརྙན་དང་མཚུངས་པར། །གསལ་བར་ཅི་ཡི་ཕྱིར་མི་བཞེད། །ཅེས་གསུངས་པ་ཡིན་ནོ། །དེ་ལྟ་བས་ན་རྒྱུ་དང་རྐྱེན་གྱིས་བསྐྱེད་པ་ནི་དོན་དམ་པར་ཅུང་ཟད་ཀྱང་ཡོད་པ་མ་ཡིན་ནོ། །རྒྱུ་དང་རྐྱེན་རྣམས་ལ་ཡང་ནུས་པ་གང་ན་ཡང་ཡོད་པ་སྲིད་པ་མ་ཡིན་ནོ། །འདི་ལྟར་རང་དང་གཞན་དང་གཉི་གའི་བདག་ཉིད་རྒྱུ་རྣམས་ཀྱི་དངོས་པོ་ཡོད་པ་དང༌། དངོས་པོ་མེད་པ་གཉི་གའི་རང་བཞིན་བྱེད་པ་དེ་ལ་མེད་པ་ནི་བྱེད་པ་མ་ཡིན་ནོ་ཞེས་བསྟན་པའི་ཕྱིར་དངོས་པོ་ཡོད་པར་ཞེས་པ་ལ་སོགས་པ་གསུངས་ཏེ། ཡོད་པ་ལ་རྒྱུའི་བྱེད་པ་མེད་པའི་ཕྱིར་སྔ་མ་ཉིད་དུ་རང་བཞིན་ཡོད་པ་ལ་རྒྱུ་ཡིན་ཏེ། རྒྱུ་རྣམས་ཀྱི་དགོས་པ་ཅི་ཞིག་ཡོད་དེ། འབྲས་བུ་གྲུབ་པའི་བདག་ཉིད་ཡིན་པས་བསྒྲུབ་པར་བྱ་བའི་རང་བཞིན་མེད་པས་ན་རྒྱུའི་བྱེད་པ་ཉེ་བར་མཁོ་བ་མ་ཡིན་པའི་ཕྱིར་རོ། །རྟག་པ་གཉིས་པའི་དབང་དུ་བྱས་ཏེ། འོན་ཏེ་དེ་ནི་ཞེས་བྱ་བ་ལ་སོགས་པ་གསུངས་ཏེ། འོན་ཏེ་ཞེས་པ་ནི་རྣམ་པ་གཞན་གསལ་བར་བྱེད་པ་ཡིན་ཏེ། དེ་མེད་པ་ནི་མེད་པའི་རང་བཞིན་ཡིན་ནོ། །འོ་ན་རྒྱུའི་དགོས་པ་ཅི་ཞིག་ཡོད་དེ། དེའི་ཚེ་ཡང་ཅི་ཡང་ཡོད་པ་མ་ཡིན་ཏེ། དེ་ཡང་མེད་པའི་རང་བཞིན་ཡིན་པའི་ཕྱིར་
དེ་ལ་རྒྱུའི་བྱེད་པ་མེད་པའི་ཕྱིར་རོ། །དེ་ལྟར་ན་ཡང་གལ་ཏེ་ཡང་ཡོད་པ་ནི་གྲུབ་པའི་ཕྱིར་རྒྱུའི་བྱེད་པ་མེད་པས་རྒྱུ་ཡོད་ན་ཡང་དགོས་པ་ཡོད་པ་མ་ཡིན་ལ། མེད་པ་ལ་ཡང་ཅིའི་ཕྱིར་མི་འབྱུང་ཞེ་ན། བྱེ་བ་བརྒྱ་ཞེས་བྱ་བ་ལ་སོགས་པ་གསུངས་ཏེ། དངོས་པོ་མེད་པ་སྟེ། ཡོད་པ་ནི་མ་ཡིན་པའི་རང་བཞིན་ལ་བསྒྱུར་དུ་མེད་པ་ཡིན་ཏེ། དངོས་པོའི་རང་བཞིན་ཉིད་ལ་གཞན་ཉིད་ཡོད་པ་མ་ཡིན་ལ་དཔྱད་པ་ཉིད་ཀྱིས་དེ་ལ་ཡང་བྱ་རྒྱུ་མེད་པའི་ཕྱིར་རོ། །བྱེ་བ་བརྒྱ་ཕྲག་རྒྱུ་ཡིས་ཀྱང་སྟེ། རེ་ཞིག་རྒྱུ་བརྒྱ་དང༌། རྒྱུ་སྟོང་རྣམས་གཞག་སྟེ། བྱེ་བ་བརྒྱའི་རྒྱུ་ཡིས་ཀྱང་དེ་རང་བཞིན་མེད་པ་ཡིན་པས་རྣམ་པར་བསྒྱུར་པར་མི་ནུས་པའི་ཕྱིར་རོ། །རྣམ་པར་འགྱུར་བ་མེད་དུ་ཆུག་མོད་དངོས་པོའི་རང་བཞིན་དུ་འགའ་ཞིག་འདི་ཡོད་པ་ཡིན་ནོ་ཞེ་ན། འདི་ལ་གནས་སྐབས་དེ་ཞེས་པ་ལ་སོགས་པ་གསུངས་ཏེ། གནས་སྐབས་དེ་ཡོངས་སུ་འདོར་བ་མེད་པའི་རང་བཞིན་ཉིད་ནི་དངོས་པོར་མི་འགྱུར་རོ། །མེད་པ་ཉིད་དངོས་པོར་འགྱུར་བ་མ་ཡིན་ཏེ། འོན་ཀྱང་མེད་པའི་རང་བཞིན་ལོག་པ་ན་དངོས་པོའི་རང་བཞིན་དུ་འགྱུར་རོ། །འདིར། དངོས་འགྱུར་གཞན་ཡང་གང་ཞིག་ཡིན། །ཞེས་གསུངས་ཏེ། གལ་ཏེ་སྔར་མེད་པ་དངོས་པོའི་རང་བཞིན་དུ་མི་འགྱུར་ན་འོ་ན་གང་ཞིག་དེ། མེད་པ་ལ་གཞན་མེད་པ་ཉིད་ལས་ཐ་དད་པར་གྱུར་བ་མེད་པ་ཡོངས་སུ་བོར་ནས་དངོས་པོར་གྱུར་པ་གང་ཞིག་ཡིན། གཞན་ཅུང་ཟད་ཀྱང་རྟོགས་པར་གྱུར་པ་མ་ཡིན་ཏེ། །རྒྱུ་འབྲས་བུའི་རང་བཞིན་ཡིན་པ་སྔ་མ་ཉིད་དུ་བཀག་པའི་ཕྱིར་རོ། །དེ་ལྟར་གྱུར་ན་ཡང་གཞན་འགའ་ཞིག་དངོས་པོར་འགྱུར་བ་མ་ཡིན་གྱི། འོན་ཀྱང་དངོས་པོ་མེད་པ་དང་འགལ་བ་ཡོད་པ་ལས་སྔར་ཡོད་པའི་དངོས་པོར་འགྱུར་བ་ནི་མ་ཡིན་ལ། ཕྱི་ནས་ཡང་དེ་དང་བྲལ་བར་འགྱུར་རོ་ཞེ་ན། མེད་ཚེ་དངོས་ཡོད་ཅེས་པ་ལ་སོགས་པ་གསུངས་ཏེ། མེད་པའི་རྒྱུན་གྱི་དུས་ན་དངོས་ཡོད་མིན་ཏེ། གལ་ཏེ་དངོས་པོར་མི་འགྱུར་ན། དངོས་པོ་ཡོད་པར་ནམ་ཞིག་འགྱུར་ཏེ། མེད་པའི་དུས་ན་དངོས་པོ་མ་སྐྱེས་པ་ཡིན་ན་བརྒྱ་ལ་ཡང་དངོས་པོར་མི་འགྱུར་ཏེ། དངོས་པོ་མེད་པའི་འགལ་བས་རྟག་ཏུ་གེགས་བྱེད་པའི་ཕྱིར་རོ། །དེ་ཉིད་ཀྱིས་བསྐྱེད་པས་ན་དངོས་པོས་དངོས་པོ་མེད་པ་ཉམས་
པར་འགྱུར་རོ་ཞེ་ན། དངོས་པོ་སྐྱེས་པར་ཞེས་པ་ལ་སོགས་པ་གསུངས་ཏེ། ན་ཞེས་པ་ནི་གང་གི་ཕྱིར་ཏེ། སྐྱེས་པར་མ་གྱུར་ཅིང་འབྱུང་བར་མ་གྱུར་ན། དངོས་མེད་དང་ནི་བྲལ་མི་འགྱུར་ཏེ། སྔ་ན་མེད་པའི་ངོ་བོ་དང་མི་འབྲལ་ཞིང་བྲལ་བ་མ་ཡིན་ནོ། །འོན་ཏེ་དེ་ལྟར་གྱུར་ན་ཡང་མེད་པ་དང་བྲལ་བར་མི་འགྱུར་མེད། དེ་དང་མ་བྲལ་བ་ཉིད་དུ་དངོས་པོ་འགྱུར་བར་འགྱུར་ཏེ། དངོས་པོས་བྱུང་ན་ཡང་དངོས་པོ་དང་དངོས་པོ་མེད་པ་དག་ཕན་ཚུན་སྤངས་པའི་ཕྱིར་ཕྱི་ནས་དངོས་པོ་མེད་པ་ཉིད་དང་བྲལ་བར་འགྱུར་རོ་ཞེ་ན། དངོས་མེད་ཅེས་པ་ལ་སོགས་པ་གསུངས་ཏེ། གལ་ཏེ་སྔར་དངོས་པོ་ཉིད་དུ་གྱུར་ན་རིམ་པ་འདིར་འགྱུར་བ་ཞིག་ན། འདི་ཡང་ཡོད་པ་མ་ཡིན་ནོ། །ཡང་ནི་གང་གི་ཕྱིར་ཏེ། མ་བྲལ་བ་ཉིད་ཡིན་ཞིང་མ་འགགས་པ་ཡིན་ན། དངོས་པོ་མེད་པ་ལ་དངོས་པོ་ཡོད་པའི་སྐབས་མི་སྲིད་ལ། སྐབས་ཡོད་པ་མ་ཡིན་ཏེ། དེར་འགྱུར་ཞིང་དངོས་པོ་ཡོད་པ་སྲིད་པ་མ་ཡིན་ཏེ། དངོས་པོ་འབྱུང་བ་དང་འགལ་བ་དངོས་པོ་མེད་པ་ཉིད་ཡོད་པའི་ཕྱིར་རོ། །རྒྱུ་ཉིད་ཀྱིས་མེད་པའི་དངོས་པོ་དེ་ཟློག་པར་བྱེད་དོ་ཞེ་ན། མ་ཡིན་ཏེ། རྒྱུ་དེ་ནི་འབྲས་བུ་ཉིད་ལ་བྱེད་པའི་ཕྱིར་རོ། །གང་འབྲས་བུ་བསྐྱེད་བ་དེ་ཉིད་ཀྱིས་དེ་མེད་པ་ཡང་ཟློག་པར་བྱེད་པ་ཡིན་ནོ་ཞེ་ན། འབྲས་བུ་སྐྱེད་པར་བྱེད་པ་དེ་ཉིད་ཀྱིས་གལ་ཏེ་དེ་དང་འགལ་བའི་མེད་པ་བཟློག་པ་བསྐྱེད་པར་གྱུར་ན་འགྱུར་བ་ཡིན་མོད་ཀྱིས་དེ་ལ་ནུས་པ་མ་ཉམས་པ་ལ་དེའི་འབྲས་བུ་སྐྱེད་པར་ནུས་པ་མ་ཡིན་ནོ། །རྒྱུ་ཡིས་དེ་མེད་པ་དེ་དང་འགལ་བ་བྱེད་པ་མ་ཡིན་ཏེ། རྒྱུའི་དུས་ན་ཡང་སྔ་ན་མེད་པ་དེ་ཡོད་པས་ན་ལྷན་ཅིག་གནས་པའི་ཕྱིར་རོ། །དེ་ལྟ་བས་ན་ཡོད་པའི་བདག་གམ་མེད་པའི་བདག་ཉིད་ཀྱིས་འབྲས་བུ་ལ་རྒྱུའི་བྱེད་པ་མི་འཐད་དོ། །གཉི་ག་དང་གཉི་ག་མ་ཡིན་པའི་ཕྱོགས་ལ་ཡང་མི་འཐད་དེ། ཕྱོགས་དེ་ཉིད་སོ་སོ་བཀག་པ་ཉིད་ཀྱིས་རྒྱུའི་བྱེད་པ་དགག་པ་བྱས་པར་འགྱུར་རོ་ཞེས་བལྟ་བར་བྱའོ། །དེ་དག་སྲིད་པ་ཡང་མ་ཡིན་ནོ། །འགལ་བ་དག་གཅིག་ལ་དུས་གཅིག་ན་དགག་པ་དང་སྒྲུབ་པའི་དངོས་པོ་མེད་པ་དང༌། དངོས་པོ་དག་མི་རིགས་པའི་ཕྱིར་རོ། །དེ་སྐད་དུ་ཡང༌། དངོས་པོ་ཡོད་པ་མི་སྐྱེ་ཞིང༌། །མེད་པའང་མ་ཡིན་
ཡོད་མེད་མིན། །རང་ལས་མ་ཡིན་གཞན་ལས་མིན། །གཉི་ག་ལས་མིན་ཇི་ལྟར་སྐྱེ། །ཞེས་གསུངས་སོ། །དེ་ལྟར་རེ་ཞིག་དོན་དམ་པར་དངོས་པོ་སྐྱེ་བ་ཇི་ལྟར་ཡང་རིགས་པ་མ་ཡིན་ལ། སྐྱེས་པ་ཡང་ཇི་ལྟར་རང་བཞིན་ཉམས་པར་མི་རིགས་སོ་ཞེས་དངོས་པོའང་ཞེས་པ་ལ་སོགས་པ་གསུངས་ཏེ། འང་གི་སྒྲས་ནི་སྔ་མ་ལ་ལྟོས་ནས་ཡིན་ཏེ། ཇི་ལྟར་དངོས་པོ་མེད་པ་དངོས་པོར་མི་འགྱུར་བ་དེ་བཞིན་དུ་དངོས་པོ་ཡང་མེད་པར་འགྱུར་བ་མ་ཡིན་ནོ། །ཅིའི་ཕྱིར་ཞེ་ན། རང་བཞིན་གཉིས་སུ་ཐལ་ཕྱིར་ཏེ། དངོས་པོར་ཡོད་པ་གང་གི་ཚེ་དངོས་པོ་མེད་པའི་རང་བཞིན་དུ་འགྱུར་ན་དེའི་ཚེ་དངོས་པོ་གཅིག་ཉིད་རང་བཞིན་གཉིས་སུ་ཐལ་བར་འགྱུར་ཏེ། གཅིག་ཉིད་དངོས་པོ་དང་དངོས་པོ་མེད་པའི་ངོ་བོ་ཡིན་པའི་ཕྱིར་རོ། དངོས་པོ་ཉིད་ཡོངས་སུ་སྤངས་ནས་དངོས་པོ་མེད་པའི་ངོ་བོར་འགྱུར་རོ་ཞེས་པ་བརྗོད་པར་མི་རིགས་སོ། །དེའི་ཚེ་ཡང་དངོས་པོ་ཉིད་དངོས་པོ་ཡིན་པའི་ཕྱིར་གང་ཞིག་མེད་པའི་དངོས་པོར་འགྱུར་རོ་ཞེས་པ་ནི་རིགས་པ་མ་ཡིན་ལ། ཡོད་པའི་རང་བཞིན་དོན་དམ་པ་མ་ཡིན་ན་ལྡོག་པར་རིགས་པ་མ་ཡིན་ཏེ། དོན་དམ་པ་ཉིད་མེད་པར་ཐལ་བར་འགྱུར་བའི་ཕྱིར་རོ། །དེ་ལྟར་དངོས་པོ་སྐྱེ་བ་དང་འཇིག་པ་དག་དོན་དམ་པར་མེད་པར་བསྒྲུབས་ནས། མཇུག་བསྡུ་བའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ཏེ་བརྗོད་པའི་རིམ་པས་སྐྱེ་བ་དང་འགག་པ་མི་རིགས་པའི་ཕྱིར་རོ། །འང་ཞེས་པ་ནི་གཏན་ཚིགས་ཏེ། གང་གི་ཕྱིར་འགག་པ་མེད་དེ། འཇིག་པ་མེད་པ་ཡིན་ལ། དངོས་པོ་ཡང་ཡོད་ཡིན་ཏེ། ཡང་གི་སྒྲས་ནི་སྡུད་པ་ཡིན་ཏེ། ཐམས་ཅད་ཀྱི་ཚེ་ཐམས་ཅད་ཀྱི་དུས་ན། དེ་བཞིན་གཤེགས་པ་རྣམས་བྱུང་ཡང་རུང༌། དེ་བཞིན་གཤེགས་པ་རྣམས་མ་བྱུང་ཡང་རུང༌། ཆོས་རྣམས་ཀྱི་ཆོས་ཉིད་འདི་ནི་གནས་པ་ཡིན་ཏེ། ཆོས་མཉམ་པ་ཉིད་དང༌། ཆོས་གནས་པ་ཉིད་དང༌། ཆོས་ངེས་པ་ཉིད་དང༌། ཆོས་ཀྱི་དབྱིངས་ཉིད་དང༌། དེ་བཞིན་ཉིད་དང༌། ཕྱིན་ཅི་མ་ལོག་པའི་དེ་བཞིན་ཉིད་དང་ཞེས་པ་ལ་སོགས་པ་གསུངས་པའི་ཕྱིར་རོ། །དེ་ཉིད་ཀྱི་ཕྱིར་འགྲོ་བ་འདི་དག་ཐམས་ཅད་ནི་རྟག་ཏུ་མ་སྐྱེས་མ་འགགས་པ་ཉིད་ཡིན་ཏེ། དོན་
དམ་པར་མ་སྐྱེས་པ་ནི་མ་བྱུང་བ་ཉིད་ཡིན་ལ། མ་འགགས་པ་ནི་མ་ཞིག་པ་ཡིན་ནོ། །དེ་ལྟ་བས་ན་སྔར་བརྗོད་པའི་སྐྱེ་བ་དང༌། འགག་པ་དང་བྲལ་བས་མ་ལུས་པ་འདི་དག་ཐམས་ཅད་རང་བཞིན་མེད་པ་དང་གཞི་མཐུན་པ་ཡིན་ནོ། །འགྲོ་བ་ནི་སྣ་ཚོགས་པ་ཡིན་ཏེ། སེམས་ཅན་དང་སྣོད་ཀྱི་འཇིག་རྟེན་གྱི་མིང་ཅན་ནམ་གཡོ་བ་དང་མི་གཡོ་བ་ཡིན་ལ། སྒྱུ་མ་སྐྱེ་བ་དང་འགག་པ་བཞིན་དུ་ཐ་སྙད་ཀྱི་དབང་གིས་ཡང་སྐྱེ་བ་དང་འགག་པ་གཉི་ག་ཡིན་ནོ། །འདི་ནི་ཀུན་རྫོབ་ཀྱི་བདེན་པ་མི་འགག་གོ་ཞེས་བསྟན་པ་ཡིན་ཏེ། ཆོས་ཡང་དག་པར་སྡུད་པར་ཡང་དེ་སྐད་དུ། རིགས་ཀྱི་བུ་དེ་བཞིན་ཉིད་ཅེས་བྱ་བ་ནི་སྟོང་པ་ཉིད་ཀྱི་ཚིག་བླ་དགས་ཏེ། སྟོང་པ་ཉིད་དེ་ནི་མི་སྐྱེ་མི་འགག་གོ །སྨྲས་པ་གང་འདི་བཅོམ་ལྡན་འདས་ཀྱིས་འདི་སྐད་དུ་ཆོས་ཐམས་ཅད་ནི་སྟོང་པའོ་ཞེས་གསུངས་ཏེ། དེ་བས་ན་ཆོས་ཐམས་ཅད་ནི་མི་སྐྱེ་མི་འགག་གོ །བྱང་ཆུབ་སེམས་དཔའ་རྩོམ་པ་མེད་ཀྱིས་སྨྲས་པ། རིགས་ཀྱི་བུ་དེ་དེ་བཞིན་ནོ། །ཇི་ལྟར་ཁོང་དུ་ཆུད་པ་བཞིན་ཏེ། ཆོས་ཐམས་ཅད་མི་སྐྱེ་ཞིང་མི་འགག་གོ །སྨྲས་པ། གང་འདི་བཅོམ་ལྡན་འདས་ཀྱིས་འདུས་བྱས་ཀྱི་ཆོས་ཐམས་ཅད་ནི་སྐྱེའོ་འགག་གོ་ཞེས་གསུངས་ན། དེ་བཞིན་གཤེགས་པས་འདི་ཅི་ལ་དགོངས་ཏེ་གསུངས། སྨྲས་པ། རིགས་ཀྱི་བུ་འཇིག་རྟེན་གནས་པ་སྐྱེ་བ་དང༌། འགག་པ་ལ་མངོན་པར་ཆགས་པས་དེ་ལ་དེ་བཞིན་གཤེགས་པ་ཐུགས་རྗེ་ཆེན་པོས་འཇིག་རྟེན་སྐྲག་པའི་གནས་བསལ་བའི་ཕྱིར། ཐ་སྙད་ཀྱི་དབང་གིས་སྐྱེའོ་འགག་གོ་ཞེས་གསུངས་ཏེ། འདི་ལ་ཆོས་གང་ཡང་སྐྱེ་བ་དང་འགག་པ་མེད་དོ་ཞེས་གསུངས་སོ། །དེ་ལྟ་བས་ན་ཆོས་ཐམས་ཅད་མ་སྐྱེས་པ་དང་མ་འགགས་པའི་རང་བཞིན་ཡིན་པས་གདོད་མ་ནས་ཞི་བ་རང་བཞིན་གྱིས་མྱ་ངན་ལས་འདས་པ་ཡིན་ཏེ། དེ་ལྟར་ན་འགྲོ་བ་རང་བཞིན་མེད་པ་ཉིད་ཡིན་ལ་དེའི་ཁོངས་སུ་གཏོགས་པའི་དམྱལ་བ་ལ་སོགས་པའི་འགྲོ་བ་རྣམས་ཀྱང་རང་བཞིན་མེད་པ་ཉིད་ཡིན་ནོ་ཞེས་བསྟན་པའི་ཕྱིར། རྨི་ལམ་ཞེས་པ་ལ་སོགས་པ་གསུངས་ཏེ། རྨི་ལམ་དང་མཚུངས་པ་གང་རྣམས་ཡིན་པ་དེ་རྣམས་ལ་དེ་སྐད་ཅེས་བརྗོད་དེ། དེས་ཉིད་ཅེས་
པ་ནི་ངེས་པར་གཟུང་བའོ། །རྨི་ལམ་ན་མཐོང་བའི་རང་བཞིན་གྱི་འགྲོ་བ་རྣམས་ནི་དམྱལ་བ་དང༌། ཡི་དགས་དང༌། དུད་འགྲོ་དང༌། མི་དང༌། ལྷའི་རིགས་མཐུན་པའི་ཁྱད་པར་རྣམས་སོ། །དཔེར་ན་རྨི་ལམ་ན་ཡུལ་གཞན་ལ་སོགས་པར་འགྲོ་བ་དང༌། འོང་བ་དང་བདེ་བ་དང༌། སྡུག་བསྔལ་བ་ལ་སོགས་པ་མྱོང་བ་དེ་བཞིན་དུ་དོན་དམ་པའི་དེ་ཁོ་ན་ཉིད་ཁོང་དུ་མ་ཆུད་པ་དམྱལ་བ་ལ་སོགས་པ་རྣམས་སུ་རིག་པར་བྱ་སྟེ། དེ་ཁོ་ན་ཉིད་ནི་མ་ཡིན་ནོ། །ཇི་ལྟར་ཞེ་ན། རྣམ་པར་དཔྱད་ན་ཆུ་ཤིང་དང་མཚུངས་པ་ཡིན་ཏེ། འདི་ནི་གཏན་ཚིགས་ཀྱི་ཚིག་ཡིན་ནོ། །ཆོས་ཐམས་ཅད་རང་བཞིན་མེད་པ་ཉིད་ཀྱིས་རྣམ་པར་དཔྱད་ཅིང་རྣམ་པར་བརྟགས་པ་ན་གང་གི་ཕྱིར་ཆུ་ཤིང་དང་མཚུངས་པ་ཡིན་ཏེ། ཆུ་ཤིང་བཞིན་དུ་སྙིང་པོ་མེད་པའི་འགྲོ་བ་རྣམས་ཡིན་ནོ་ཞེས་པའི་དོན་ཏོ། །འདིས་ནི་སྔར་བརྗོད་པའོ། །འདི་ནི་སྒྱུ་འདྲ་དེ་ཕྱིར་སྙིང་ལ་འཇིགས་སྤོང་ཤེས་ཕྱིར་བརྩོན་པ་བསྟེན། །ཞེས་པ་ལ་སོགས་པ་དེ་ཡང་བསྒྲུབ་པར་བསྟན་པར་འགྱུར་རོ། །གང་གི་ཕྱིར་ཆོས་ཐམས་ཅད་མ་སྐྱེས་པ་དང་མ་འགགས་པ་དེའི་ཕྱིར་མྱ་ངན་དང་ཞེས་བྱ་བ་ལ་སོགས་པ་གསུངས་ཏེ། མྱ་ངན་ལས་འདས་པའི་ཆེད་དུ་ཆོས་ཐམས་ཅད་ཀྱི་སྒྲིབ་པ་སྤངས་པས་འཆིང་བ་ཐམས་ཅད་ལས་གྲོལ་བ་ཡིན་ནོ། །མྱ་ངན་ལས་མ་འདས་པ་ནི་འདོད་ཆགས་ལ་སོགས་པའི་ཉོན་མོངས་པའི་ཞགས་པའི་དབང་དུ་གྱུར་པའི་སེམས་ཀྱི་རྒྱུད་འཁོར་བའི་བཙོན་རའི་ནང་དུ་ཆུད་པ་ཡིན་ནོ། །དེ་དག་གཉི་ག་ཡང་ཁྱད་པར་མེད་དེ། ཐ་དད་པ་ཡོད་པ་མ་ཡིན་ལ། སྲིད་པ་མ་ཡིན་ནོ། །ཇི་ལྟར་ཞེ་ན། དངོས་པོ་ལ་སྟེ་དོན་དམ་པར་ཆོས་ཐམས་ཅད་དོན་དམ་པར་རང་བཞིན་མེད་པ་ཉིད་ཀྱིས་རང་བཞིན་གྱིས་མྱ་ངན་ལས་འདས་པ་ཡིན་པའི་ཕྱིར་རོ། །ཡང་ཀུན་རྫོབ་ཏུ་ནི་ཁྱད་པར་ཡོད་པ་ཡིན་ནོ་ཞེས་ལན་གྲངས་དུ་མར་བསྟན་པ་ཡིན་ནོ། །དེ་ཉིད་ཀྱི་ཕྱིར་གསུངས་པ། སངས་རྒྱས་རྣམས་དང་སེམས་ཅན་ཁམས། །དོན་གྱིས་དེ་དང་ཐ་དད་མེད། །བདག་ཉིད་ཀྱང་ནི་གཞན་རྣམས་ཀྱང༌། །དེ་དང་མཉམ་པར་ཁྱོད་བཞེད་ལེགས། །ཞེས་སོ། །དེའི་ཕྱིར་བྱིས་པའི་སྐྱེ་བོ་དོན་དམ་པའི་དེ་ཁོ་ན་ཉིད་ཡོངས་སུ་མ་ཤེས་པ་མངོན་པར་ཞེན་པས་སྒྲོ་བཏགས་པས་འགྲོ་
བའི་ཚོགས་ཉེ་བར་བརྟགས་ནས་བདག་ཉིད་ཀྱིས་བདག་ཉིད་འཁྲུག་པར་བྱེད་དོ་ཞེས་ཉེ་བར་བསྟན་པའི་ཕྱིར། དེ་ལྟར་ཞེས་པ་ལ་སོགས་པ་གསུངས་ཏེ། འདི་ལྟར་བཤད་པའི་ཚུལ་གྱིས་སྟོང་པ་སྟེ། རང་བཞིན་མེད་པ་རྣམས་ལ་ཐོབ་པ་ཅི་ཡོད་དེ། རྙེད་པ་གང་གིས་གར་འགྱུར་བ་ཅུང་ཟད་གང་ལས་ཀྱང་ཐོབ་པ་མ་ཡིན་ནོ། །ཤོར་ཅི་ཡོད་དེ། རྙེད་པ་གང་ཞིག་ཤོར་བས་ཁྲོ་བར་འགྱུར་བ་ཅི་ཞིག་གང་གིས་ཡང་ཤོར་བར་འགྱུར། རིམ་གྲོ་བྱས་པ་ནི་མཆོད་པ་ཡིན་ལ། ཡོངས་སུ་བརྙས་པ་ནི་གནོད་པ་བྱས་པ་ཡང་ཡིན་ཏེ། གང་གིས་གང་ཞིག་སྲིད་པར་འགྱུར། །དངོས་པོའི་རང་བཞིན་མེད་པ་ན། །གང་གིས་གང་ལའང་མ་ཡིན་ནོ། །ཞེས་པའི་དོན་ཏོ། །ཅིའི་ཕྱིར་ཞེ་ན། བདེ་བ་དང་སྡུག་བསྔལ་གང་ལས་ཡིན་ཏེ། སྡུག་བསྔལ་གྱི་རྒྱུ་མེད་པའི་ཕྱིར་རོ། །འང་གི་སྒྲས་ནི་གཉི་ག་ཕན་ཚུན་བསྡུ་བའི་དོན་ཏོ། །གང་ཞིག་ཐོབ་པ་དང་སྤང་བའི་དོན་དུ་འབད་པ་བྱེད་པ་དགའ་བ་ཅི་ཡོད་དེ། དེ་དགའ་བའི་རང་བཞིན་ཉིད་ཀྱིས་ཕོངས་པ་ཅི་ཞིག་ཡོད་དེ། བརྟགས་པའི་ངོ་བོ་ཡིན་པའི་ཕྱིར་རོ། །མི་དགའ་བ་ཅི་ཡོད་དེ། འདོད་པར་བྱ་བ་མ་ཡིན་པ་ཅི་ཞིག་ཡོད། འདོད་པར་བྱ་བ་མ་ཡིན་པ་ཡང་དོན་དམ་པར་ཅུང་ཟད་ཀྱང་མེད་དོ། །དེ་ལྟར་ན་ཅིའི་དོན་དུ་སྡུག་པ་དང༌། མི་སྡུག་པ་དང་ཕྲད་པ་དང་བྲལ་བའི་དོན་དུ་འབད་པར་བྱེད། གང་ཞིག་སྲིད་དེ་སྐྱེ་བོ་གང་ཞིག་རྙེད་པའི་དོན་དུ་སྲེད་པར་བྱེད། གང་ལ་དེ་སྲེད་པར་བྱེད་དེ། ཞེན་པའི་གནས་ཀྱི་དངོས་པོ་འགའ་ཞིག་ལ་སྲེད། དེ་ཉིད་དུ་ནི་བཙལ་བྱས་ནས་ཏེ། རང་བཞིན་གྱིས་ཡོངས་སུ་བཙལ་བས་སོ། །དེའི་ཡུལ་མེད་པའི་ཕྱིར་ཡུལ་མེད་པ་ཉིད་ཀྱིས་དེ་ཡང་མེད་པ་ཡིན་ནོ། །གང་གི་དབང་གིས་ལས་དེ་དང་དེ་སོགས་པ་ན། རྣམ་པར་དཔྱད་པ་ན་སྟེ། དོན་དམ་པར་རང་བཞིན་གྱིས་ངོ་བོ་ངེས་པར་དཔྱད་པ་ནའོ། །གསོན་པའི་འཇིག་རྟེན་ནི་སེམས་ཅན་གྱི་འཇིག་རྟེན་ནའོ། །གང་ཞིག་ཏེ་འགའ་ཞིག་ཉིད་མ་ཡིན་པ་ཡིན་ཏེ། དེ་མེད་པའི་ཕྱིར་རོ། །གང་ཞིག་འདིར་ནི་འཆི་འགྱུར་ཏེ། །གསོན་པའི་འཇིག་རྟེན་ལ་དཔྱད་པས་སེམས་ཅན་གྱི་འཇིག་རྟེན་མེད་པའི་ཕྱིར་རོ། །གང་ཞིག་འདིར་གསོན་པའི་འཇིག་རྟེན་འཆི་འགྱུར་ཏེ། སྲོག་གི་དབང་པོ་རྒྱུན་ཆད་
པར་འགྱུར། འབྱུང་འགྱུར་གང་ཡིན་ཏེ། གང་ཞིག་སྐྱེ་བར་འགྱུར་བ་ཡིན། བྱུང་གྱུར་གང་ཡིན་ཏེ། སྔར་སྐྱེས་པར་འགྱུར་རོ། །དེ་ལྟར་ན་འདས་པ་ལ་སོགས་པའི་ཐ་སྙད་ནི་བརྟགས་པ་ཉིད་ཡིན་ནོ། །གཉེན་གང་བཤེས་ཀྱང་གང་ཞིག་ཡིན། །གང་གིས་གང་སྡུག་པ་ཡིན། གང་གིས་གང་བཤེས་ཡིན་ཏེ། འདིར་ཞེས་པ་ནི་ཐམས་ཅད་དུ་སྦྱར་བར་བྱའོ། །གང་ཞིག་མངོན་པར་ཞེན་པས་མི་དགེ་བ་ཡང་འགྲང་བར་མི་བྱེད། དེ་ལྟར་རང་བཞིན་གྱིས་སྟོང་པ་ཉིད་ཡིན་པའི་ཕྱིར་རྟོགས་པས་སྒྲོ་བཏགས་པ་ཉིད་དེ་དེ་ཁོ་ན་ཉིད་ཡིན་ནོ་ཞེས་བསྟན་པའི་ཕྱིར་ཐམས་ཅད་ཅེས་པ་ལ་སོགས་པ་གསུངས་ཏེ། ཐམས་ཅད་ནི་བརྗོད་པ་འདི་དང་གཞན་ཡང་ངོ༌། །ནམ་མཁའ་འདྲ་བ་ནི་བརྟགས་པའི་དེ་ཁོ་ན་ཉིད་སྟོང་པ་ཉིད་ཡིན་པའི་ཕྱིར་ནམ་མཁའ་དང་མཚུངས་པ་ཡིན་ནོ། །ཡོངས་སུ་གཟུང་བར་གྱིས་ཞེས་པ་ནི་མེད་པ་ཉིད་ལ་ཡང་རང་གི་ངོ་བོ་སྒྲོ་བཏགས་སོ། །བདག་འདྲས་ཞེས་པ་ནི་གཞུང་རྩོམ་པ་པོ་བདག་ཉིད་དཔེར་བརྗོད་པར་མཛད་པ་ཡིན་ནོ། །བདག་འདྲ་ནི་དོན་དམ་པའི་དེ་ཁོ་ན་ཉིད་ཡོངས་སུ་ཤེས་པའི་བྱིས་པའི་སྐྱེ་བོ་རྣམས་སོ། །མི་བདེན་པའི་རྣམ་པར་རྟོག་པས་དཀྲུགས་པའི་སེམས་རབ་ཏུ་འཁྲུག་པར་བྱེད་དོ། །ལོག་པའི་མངོན་པར་ཞེན་པ་ཁྲོ་བར་བྱེད་དེ། དགའ་བར་བྱེད་པ་ནི་བརྫུན་པའི་རྙེད་པ་དང་མ་བྲལ་བས་རབ་ཏུ་དགའ་བར་འགྱུར་བ་ཡིན་ནོ། །གང་རྣམས་ཀྱིས་ཤེ་ན། འཐོབ་དང་སྤྲོ་བའི་རྒྱུ་རྣམས་ཀྱིས་ཏེ། འཐོབ་པའི་རྒྱུ་རྣམས་ཀྱིས་ནི་རྩོད་པའི་རྒྱུ་རྣམས་ཀྱིས་སོ། །སྤྲོ་བའི་རྒྱུ་རྣམས་ཀྱིས་ཏེ། དགའ་བའི་རྒྱུ་རྣམས་ཀྱིས་ཡིན་ལ། ཇི་ལྟར་རིགས་པར་སྦྱར་བར་བྱའོ། །དེ་ལྟ་བས་ན་དོན་དམ་བའི་དེ་ཁོ་ན་ཉིད་ཀུན་རྫོབ་ཉིད་ཀྱིས་དངོས་པོའི་རང་བཞིན་ལ་བདེན་པ་ཉིད་དུ་མངོན་པར་ཞེན་པ་རྣམས་འདི་དག་ཐམས་ཅད་འདོད་པར་བྱེད་དེ། དོན་དམ་པར་རྟོག་པ་རྣམས་ཀྱིས་ནི་མ་ཡིན་ནོ། །དེ་སྐད་དུ་ཡང༌། འདི་རྙེད་ཁོ་ན་ཤེས་པར་བྱ་སྟེ། འདི་ལྟ་སྟེ། ཀུན་རྫོབ་དང་དོན་དམ་པའོ། །དེ་ཡང་བཅོམ་ལྡན་འདས་ཀྱིས་སྟོང་པ་ཉིད་དུ་ལེགས་པར་གཟིགས། ལེགས་པར་མཁྱེན། ལེགས་པར་མངོན་སུམ་དུ་མཛད་པ་ཡིན་ཏེ། དེའི་ཕྱིར་ཐམས་ཅད་མཁྱེན་པ་ཞེས་བརྗོད་དོ། །དེ་ལ་ཀུན་རྫོབ་ནི་འཇིག་རྟེན་པའི་སྤྱོད་པ་ཡིན་ལ། དེ་བཞིན་གཤེགས་པས་གཟིགས་པ་གང་ཞིག་ནི་ཡང་དོན་དམ་པར་ཡིན་ཏེ།
དེ་ནི་བརྗོད་དུ་མེད་པ་ཤེས་པར་བྱ་བ་མ་ཡིན་པ་དང༌། རྣམ་པར་ཤེས་པར་བྱ་བ་མ་ཡིན་པ་དང༌། བསྟན་པ་མ་ཡིན་པ་དང༌། རབ་ཏུ་བསྟན་པར་བྱ་བ་མ་ཡིན་པ་ཡིན་ཏེ། ཇི་སྲིད་དུ་བྱ་བ་མ་ཡིན་པ་དང་བྱེད་པ་མ་ཡིན་པ་ནས། རྙེད་པ་མ་ཡིན་མི་རྙེད་པ་མ་ཡིན། བདེ་བ་མ་ཡིན། སྡུག་བསྔལ་མ་ཡིན། གྲགས་པ་མ་ཡིན། མ་གྲགས་པ་མ་ཡིན། གཟུགས་ཅན་མ་ཡིན། གཟུགས་ཅན་མ་ཡིན་པ་མ་ཡིན་ནོ་ཞེས་པ་ལ་སོགས་པའོ། །དེ་ལ་རྒྱལ་བས་འགྲོ་བའི་དབང་བྱས་ནས། །འཇིག་རྟེན་ལ་ནི་ཕན་ཕྱིར་ཀུན་རྫོབ་བསྟན། །གང་གིས་འགྲོ་བ་བདེ་གཤེགས་ལ་བསྙེན་ཏེ། །བདེ་བའི་ཆེད་དུ་དང་བ་སྐྱེ་བར་འགྱུར། །མི་ཡི་སེང་གེས་ཀུན་རྫོབ་བཅས་པ་ཡི། །སེམས་ཅན་གྱུར་པ་འགྲོ་བ་དྲུག་ཏུ་གསུངས། །དམྱལ་བ་དུད་འགྲོ་དེ་བཞིན་ཡི་དགས་དང༌། །ལྷ་མིན་མི་དང་ལྷ་ཡི་ཚོགས་རྣམས་དང༌། །དམན་པའི་རིགས་དང་དེ་བཞིན་རིགས་མཐོ་དང༌། །ཕྱུག་པོའི་རིགས་དང་དབུལ་པོའི་རིགས་རྣམས་སོ། །ཞེས་བྱ་བ་ལ་སོགས་པའོ། །འདི་ཡང་དེ་ཁོ་ན་ཉིད་ཤེས་པའི་འབྲས་བུ་ཡིན་ནོ་ཞེས་བསྟན་པའི་ཕྱིར། མྱ་ངན་འབད་རྩོལ་ཞེས་བྱ་བ་ལ་སོགས་པ་གསུངས་ཏེ། བུ་དང་བུ་མོ་ལ་སོགས་པ་དང་བྲལ་བས་བྱས་པའི་མྱ་ངན་དང་བདེ་བ་དང་སྡུག་བསྔལ་སྤང་བ་དང་ཐོབ་པའི་རྒྱུ་མཚན་གྱིས་ཡོངས་སུ་ངལ་བའི་དུབ་པ་དང༌། མྱ་ངན་དང་བྲལ་བ་དེ་རྣམས་ཀྱིས་བདག་དང་འདྲ་བའི་འཚོ་བར་བྱེད་པ་ཡིན་ཏེ། ཚེགས་ཆེན་གྱིས་ཞེས་པ་དང་འབྲེལ་ཏོ། །མི་དགའ་བ་ཡང་ཡིན་ཏེ། རྙེད་པ་དང་བཀུར་སྟི་ལ་སོགས་པ་དང་བྲལ་བ་ནི་མི་དགའ་བ་སྟེ། ཡིད་མི་བདེ་བ་ཡང་ཡིན་ནོ། །ཕན་ཚུན་གཅོད་པ་དང་འབིགས་པ་དང་ཞེས་པ་ལ། ཕན་ཚུན་ཏེ་ཕན་ཚུན་དུའོ། །གཅོད་པ་ནི་རྐང་པ་དང་ལག་པ་དང་མགོ་བོ་དང་སྣ་དང་རྣ་བ་ལ་སོགས་པ་རྣམས་སོ། །འབིགས་པ་ནི་ཕྱི་རོལ་གྱི་བྱིན་པ་དང་བླ་དང་བྲང་དང་རྩི་བ་ལོགས་དང་དཔུང་བ་ལ་སོགས་པ་རྣམས་སོ། །དང་གི་སྒྲ་རྗེས་སུ་འཇུག་པ་ཡིན་ནོ། །གཅོད་པ་དང་འབིགས་པ་དེ་རྣམས་ཀྱིས་ཀྱང་འཚོ་བར་བྱེད་པ་ཡིན་ཏེ། དུས་ཀྱི་རིམ་པས་ཚོའི་འདུ་བྱེད་པ་འཕན་པ་ཡིན་ནོ། །ཚོགས་ཆེན་ནི་དཀའ་བ་ཆེན་པོ་སྟེ། ཇི་ལྟར་ཐོབ་
པའི་ཟས་དང་གོས་ལ་སོགས་པའོ། །ཇི་ལྟར་གྱུར་པའི་རྒྱུད་ཀྱིས་ཤེ་ན། སྡིག་གི་བདག་ཉིད་བདེར་འདོད་རྣམས། ཞེས་པ་ལ། སྡིག་གིས་ཏེ། མི་དགེ་བའི་ལས་རྣམས་ཀྱིས་སོ། །བདག་ཉིད་དེ་རང་ཉིད་ཡིན་ལ། བདེ་བ་འདོད་པ་ནི་བདེ་བ་འདོད་པའི་ངང་ཚུལ་ལོ། །ཇི་ལྟར་གྱུར་པ་དང་ཡང་དག་པར་དཔྱད་པར་གྱིས་ཀྱང་ཤི་ནས་ལྟུང་བ་ཡིན་ཏེ། གང་གང་རྣམས་སུ་འཆི་བ་ནི་སྲོག་གི་དབང་པོ་བོར་བ་ཡིན་ལ། ལྟུང་བ་ནི་འགྲོ་བ་ཡིན་ནོ། །ངན་སོང་རྣམས་ནི་དམྱལ་བ་དང༌། །ཡི་དགས་དང༌། དུད་འགྲོ་རྣམས་སོ། །ཇི་ལྟ་བུར་གྱུར་པ་རྣམས་སུ་ཞེ་ན། ཡུན་རིང་མི་བཟད་རྣམས་སུ་སྟེ། །ཡུན་རིང་བ་ནི་དུས་རིང་པོར་གྱུར་པའོ། །མི་བཟད་པ་ནི་ཤིན་ཏུ་བཟོད་པར་མི་ནུས་པ་མྱོང་བར་བྱ་བའི་རྣམ་པར་སྨིན་པ་ཡིན་པའི་ཕྱིར་རོ། །དེ་བཞིན་དུ་ངན་སོང་དེ་རྣམས་སུ་དེ་རྣམས་ཡིན་པ་དེ་ལ་དེ་སྐད་དུ་བརྗོད་དོ། །དེ་རྣམས་སུ་ཡང་ཡིན་ཏེ། འང་གི་སྒྲས་ནི་བརྗོད་པ་སྡུད་པའམ། ཐ་དད་པའི་རིམ་པ་ཡིན་ནོ། །རྣམ་པ་གང་གིས་ཤེ་ན། ཡང་དང་ཡང་འོངས་ཏེ་ཞེས་པ་ལ་སོགས་པ་གསུངས་ཏེ། བདེ་བ་མང་པོ་སྦྱང་སྤྱད་ནས། །ཞེས་པ་ནི་བདེ་བ་བསྐྱེད་པར་གྱུར་ནས་སོ། །ཇི་ལྟར་ཞེ་ན། བདེ་འགྲོ་ཡང་དང་ཡང་འོངས་ནས་ཏེ། མཛེས་པའི་ལྷ་དང་མིའི་འགྲོ་བའོ། །སླར་ཡང་དང་ཡང་ཐོབ་ནས་དེ་ལྟ་བུར་གྱུར་བ་རྣམས་ཀྱི་སྡུག་བསྔལ་བརྒྱུད་པའི་རྒྱ་མཚོ་མི་མངོན་པར་གྱུར་བ་དང༌། མངོན་པར་གྱུར་པ་ཡིན་ནོ་ཞེས་བསྟན་པའི་ཆེད་དུ་སྲིད་པ་ན་ཞེས་པ་ལ་སོགས་པ་གསུངས་ཏེ། སྲིད་པ་ནི་འཁོར་བ་ཡིན་ཏེ། འདོད་པ་དང་གཟུགས་དང༌། གཟུགས་མེད་པའི་རང་བཞིན་དུའོ། །གཡང་ས་དང་ཡང་ཤིན་ཏུ་མང་བའི་ཉེ་བར་གནོད་པའོ། །དེར་ནི་འདི་ཉིད་མི་འདྲ་ཞེས་པ་ལ། དེར་ནི་སྲིད་པའམ། གཡང་སའོ། །དེ་ཉིད་མིན་འདི་འདྲ་བ་ནི་རྨོངས་པས་བསླུ་བ་འདི་ལྟ་བུ་སྟེ། སྐྱེ་བོ་ཐམས་ཅད་ཀྱི་ཐུན་མོང་མ་ཡིན་ལ་རྣམ་པ་ཇི་ལྟ་བར་བསྟན་པའམ་ཡོངས་སུ་སྣང་བཞིན་པའོ། །དེར་ཡང་ཕན་ཚུན་འགལ་བས་ན་སྟེ་དོར་ཡང་རྣམ་པ་འདི་ལྟར་དེ་ཁོ་ན་ཉིད་མ་ཡིན་ན་ཕན་ཚུན་འགལ་བས་ཏེ་ལོག་པར་རྟོགས་པ་ཡིན་ནོ། །རྒྱུ་གང་གིས་ཤེ་ན། སྲིད་པ་འདི་ཉིད་འདྲ་བ་མེད། །ཅེས་ཏེ། དེ་ལྟ་བས་ན་དངོས་པོའི་རང་བཞིན་ནི་འདི་ལྟ་བུ་ཡིན་ཏེ།
རྣམ་པ་དུ་མར་སྒྲོ་བཏགས་པའི་ཕྱིར་རོ། །དེར་ཡང་དཔེ་མེད་པའི་མི་བཟད་པ་མཐའ་ཡས་པའི་སྡུག་བསྔལ་གྱི་རྒྱ་མཚོའོ། །དེར་ཡང་འདི་ལྟ་བུ་དཔེ་དང་བྲལ་བ་ཡིན་ནོ། །དེ་དང་གཞན་འདི་འདྲ་བའི་སྡུག་བསྔལ་མེད་པས་ན་དཔེར་བརྗོད་པར་མི་ནུས་པ་མི་བཟད་པ། བཟོད་པར་དཀའ་བའི་ཚོར་བའོ། །མཐའ་ཡས་པ་ནི་དུས་ཆད་པ་མེད་པར་རྣམ་པར་སྨིན་བས་ཐར་གཏུགས་པ་མེད་པའི་སྡུག་བསྔལ་རྣམས་ཤིན་ཏུ་དྲག་པའི་ཕྱིར་ཐེག་པ་ཆེན་པོ་མ་གཏོགས་པ་རྣམས་ཀྱིས་ཐར་པར་མི་ནུས་པའི་ཕྱིར་རྒྱ་མཚོ་ཡིན་ནོ། །དེ་ལྟར་ན་ཡང་ཇི་ལྟར་ཡང་བརྩོན་འགྲུས་ཆེན་པོས་དགེ་བའི་ཕྱོགས་བསགས་པས་དུས་ཡུན་རིང་པོ་ནས་བདེ་གཤེགས་ཐོབ་ནས་གནས་པར་ནུས་པ་ཡིན་ནོ་ཞེས་དོགས་པས། དེར་ནི་ཞེས་པ་ལ་སོགས་པ་གསུངས་ཏེ། དེར་དེ་ལྟ་བུའི་གཟུགས་ཀྱིས་ཞུགས་པ་ན་འདི་ལྟར་ཡོངས་སུ་མཐོང་བར་གྱུར་པའི་གཟུགས་སྟོབས་ཆུང་བ་དང༌། བརྩོན་འགྲུས་དམན་པ་ཞེས་པའི་ཐ་ཚིག་སྟེ། དེར་ཡང་ཚེ་ཐུང་བ་དང༌། དེར་ཡང་འདི་ལྟ་བུར་གྱུར་པ་ཡོད་པ་ཡིན་ན་ཡང༌། ཐུང་བ་སྟེ་རིང་བ་མ་ཡིན་པའོ། །ཚེ་ནི་ཚེའི་འདུ་བྱེད་པ་རྣམས་སོ། །དེར་ཡང་གསོན་པ་དང་ནད་མེད་པའི་བྱེད་པ་རྣམས་ཀྱིས་སོ། །གསོན་པ་ནི་ཡུན་རིང་པོའི་དུས་སུ་འཚོ་བའི་བྱ་བ་རྣམས་ཀྱིས་ཏེ། ཁྲུས་དང་བསྐུ་བྱུག་ལ་སོགས་པ་རྣམས་ཀྱིས་སོ། །ནད་མེད་པ་ནི་ནད་མེད་པའི་ཤུགས་ཏེ། ནད་ཉེ་བར་ཞི་བའི་དོན་དུ་བྱ་བའི་ཁྱད་པར་དགེ་བའི་རྩ་བ་བསགས་པ་མེད་པར་ཚ་བ་དང་ཁ་བ་དང་བསྐ་བ་ལ་སོགས་པའི་སྨན་རྣམས་ཀྱིས་སོ། །ཚེ་ནི་དོན་མེད་མྱུར་འདའ་ཞེས་པ་འཆད་པར་འགྱུར་བ་དང་འབྲེལ་ཏེ། །དེ་བཞིན་དུ་བཀྲེས་ནི་ངལ་བ་དང་སྟེ། བཀྲེས་པ་ནི་ལྟོགས་པ་ཡིན་ནོ། །ན་བ་ནི་ནད་པའོ། །ངལ་བ་ནི་ལམ་གྱིས་དུབ་པ་ལ་སོགས་པ་སྟེ། དེ་རྣམས་ཀྱིས་སོ། །གཉིད་དང་འཚེ་བ་ཞེས་ཏེ། གཉིད་ནི་རྨི་ལམ་མོ། །འཚེ་བ་ནི་རྒོད་པ་དང༌། རབ་ཏུ་རྒོད་པ་དང༌། རྣམ་པར་འཚེ་བ་ལ་སོགས་པ་བྱས་པའོ། །སྤྲུལ་དང་སྟག་དང་རི་དགས་དང་སྤྲང་བུ་དང་ཤ་སྦྲང་ལ་སོགས་པ་རྣམས་ཀྱིས་བྱས་པའི་བསད་པ་དང༌། བཅིངས་པ་དང༌། བརྡེགས་པ་ལ་སོགས་པའི་མཚན་ཉིད་ཀྱིས་དེ་བཞིན་དུ་ཡིན་ནོ། །
བྱིས་དང་འགྲོགས་པ་དོན་མེད་ཀྱི། །དེ་བཞིན་དུ་ཡིན་ཏེ། བྱིས་པ་རྣམས་ནི་སོ་སོའི་སྐྱེ་བོ་རྣམས་ཡིན་ལ། འགྲོགས་པ་ནི་འབྲེལ་པའོ། །ཇི་ལྟ་བུར་གྱུར་པས་ཤེ་ན། དོན་མེད་ཀྱིས་ཏེ། བདག་ལ་བསྟོད་པ་ལ་སོགས་པ་དག་འཁྱལ་པ་ལ་སོགས་པ་མང་པོ་རྣམས་ཀྱིས་སོ། །དེ་བཞིན་དུ་ཞེས་པ་ནི་སྔར་བརྗོད་པའི་རིམ་པ་འབའ་ཞིག་གིས་མ་ཡིན་གྱི། འདིས་ཀྱང་དོན་མེད་པར་ཚེ་ནི་དོན་མེད་འགྱུར་བ་ཡིན་ནོ། །དོན་མེད་པ་ནི་འབྲས་བུ་མེད་པ་ཉིད་ཡིན་ཏེ། དགེ་བའི་ཕྱོགས་བསགས་པ་དང་བྲལ་བའི་ཕྱིར་རོ། ཚེ་དོན་མེད་པར་འདའ་བ་ནི་འགྲོ་བའོ། །མྱུར་བ་ནི་མགྱོགས་པ་དེ་དམ་པ་མ་ཡིན་པའི་བྱ་བ་ལ་ཞུགས་པས་མྱུར་བ་ཉིད་དུ་ཡོངས་སུ་ཟད་པའི་ཕྱིར་རོ། །དེ་ལྟར་ན་ཡང་ད་ལྟར་བྱུང་བའི་དུས་སུ་ཡང་རྣམ་དཔྱོད་ཤིན་ཏུ་རྙེད་པར་དཀའ་སྟེ། རྣམ་པར་དཔྱོད་པ་ནི་བླང་བར་བྱ་བ་དང་དོར་བར་བྱ་བ་ཤེས་པའམ། རྣམ་པར་གཡེངས་པ་དོར་བའོ། །རྙེད་པར་དཀའ་བ་ནི། ཇི་ལྟར་ནི་ཤིན་ཏུ་དཀའ་བས་ཀྱང་མི་རྙེད་པའོ། །དེ་ལྟར་གྱུར་པ་དེ་ལྟར་ན་ཡང་གལ་ཏེ་བརྒྱ་ལ་མཉམ་པར་གཞག་པ་སྐྱེ་བར་འགྱུར་ལ། དེའི་ཚེ་དགེ་བར་འགྱུར་ན། དེ་ཡང་མེད་དོ་ཞེས་བསྟན་པའི་ཕྱིར། དེར་ཡང་ཞེས་བྱ་བ་ལ་སོགས་པ་གསུངས་ཏེ། དེར་ཡང་དེ་དེ་ལྟ་བུའི་གནས་སྐབས་སུ་གྱུར་པ་ནའོ། །རྣམ་པར་གོམས་པ་ནི་ཡོངས་སུ་འདྲིས་པའི་རྒོད་པའོ། །དེ་བཟློག་པ་ནི་ཞི་བར་བྱེད་པའོ། །འགྲོ་བ་དེར་གྱུར་བ་ན་གང་ལས་ཀྱང་ཡོད་པ་མ་ཡིན་ནོ། །དེར་ཡང་དོན་མེད་པ་བརྒྱུད་པས་གནས་པ་རྣམས་བརྒྱ་ལ་དགེ་བའི་ཕྱོགས་ལ་རྟོག་ཅིང་སྐྱེད་པར་བྱེད་པ་ནི་ངན་སོང་ཆེན་པོར་ཉོན་མོངས་པའི་བདུད་དམ་ལྷའི་བུའི་བདུད་ལྟུང་ཕྱིར་བརྩོན་པར་བྱེད་དོ། །ངན་སོང་ཆེན་པོར་ལྟུང་བར་བྱེད་པའི་ཕྱིར་ཏེ། ལྟུང་བའི་རྒྱུ་མཚན་དུ་ཡིན་ལ་མནར་མེད་པའི་དམྱལ་བ་ལ་སོགས་པ་རྣམས་སུ་དོར་བའི་དོན་ཏོ་ཞེས་པའི་ཐ་ཚིག་གོ །དེ་ལྟར་ཡང་བརྒྱལ་བདེན་པ་དང༌། དཀོན་མཆོག་ལ་སོགས་པ་ལ་མངོན་པར་ཡིད་ཆེས་པའི་དབང་གིས་ཇི་ལྟར་ཡང་དགེ་བས་ཉེ་བར་སྐྱེ་བར་འགྱུར་རོ་ཞེ་ན། དེར་ནི་ལོག་པའི་ལམ་ཞེས་པ་ལ་སོགས་པ་གསུངས་ཏེ། །དེར་འདི་ལྟ་བུའི་གནས་སྐབས་ཐོབ་པར་འགྱུར་ཏེ། ཡང་དག་པའི་ལྟ་བའི་མི་མཐུན་པའི་ཕྱོགས་ལོག་
པའི་ལམ་ཚུ་རོལ་མཛེས་པ་དང༌། སྤྱོད་པ་ལ་སོགས་པས་ཡོངས་སུ་བསྟན་པ་མང་བའི་ཕྱིར་ཏེ། མེ་ཆེ་བའི་ཕྱིར་རོ། །ཐེ་ཚོམ་ནི་ཡང་དག་པའི་ལམ་ལ་མ་ཡིན་ཏེ། བློ་གྲོས་ཕྱིན་ཅི་ལོག་པ་ཡང་ཡིན་ནོ། །བརྒལ་དཀའ་སྟེ་བརྒྱ་ལ་བདེ་འགྲོ་ཐོབ་ཀྱང་བརྒྱ་ལ་ཡང་ཐེ་ཚོམ་དོར་བར་ནུས་པ་མ་ཡིན་ནོ། །སླར་ཡང་དལ་བ་རྙེད་དཀའ་བ་ཡིན་ཏེ། མི་ཁོམ་པ་བརྒྱད་དང་བྲལ་བ་རྙེད་པར་དཀའ་ཞིང་མཆོག་ཏུ་རྙེད་པར་དཀའ་བ་ཉིད་ཡིན་ཏེ། རྒྱ་མཚོ་ཆེར་ཡངས་པའི་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་ལྟར་ཡིན་ནོ། །བརྒྱ་ལམ་ཞིག་ན་དལ་བ་གཞན་ཡོད་ཀྱང༌། །སངས་རྒྱས་འབྱུང་བ་ཤིན་ཏུ་དཀའ་སྟེ། སངས་རྒྱས་བཅོམ་ལྡན་འདས་འགྲོ་བ་མཐའ་དག་སྣང་བར་མཛད་པ་སྡུག་བསྔལ་ཐམས་ཅད་ཀྱི་རྩ་བར་གྱུར་པ་ཉོན་མོངས་པའི་ཟུག་རྡུ་འབྱིན་པ་འབྱུང་བ་སྟེ། སྐྱེ་བ་ཤིན་ཏུ་རྙེད་པར་དཀའ་བ་ཡིན་ཏེ། ཇི་ལྟར་ཡང་འགའ་ཞིག་ཏུ། ཨུདུམྺཱ་རའི་མེ་ཏོག་བཞིན་དུ་འཁོར་བའི་རྒྱ་མཚོ་ལས་ཐར་པའི་ཐབས་སུ་གྱུར་པ་རྙེད་པར་དཀའ་བ་ཡིན་ནོ། །ཇི་ལྟར་ཡང༌། སངས་རྒྱས་འབྱུང་བ་ཡོད་ན་ཡང༌། །ཉོན་མོངས་ཆུ་བོ་སྤང་དཀའ་སྟེ། །ཉོན་མོངས་པ་རྣམས་ནི་འདོད་ཆགས་ལ་སོགས་པ་ཡིན་ལ། ཆུ་བོ་ནི་རྒྱུན་མི་ཆད་པར་འབབ་པ་ཡིན་ཏེ། དེ་ཡང་དཀའ་བ་ཡིན་ཏེ། སྡུག་བསྔལ་བས་ཀྱང་སྤོང་བར་མི་ནུས་པ་མ་ཡིན་ནོ། །དེའི་ཕྱིར་ཨེ་མ་སྡུག་བསྔལ་བརྒྱུད་པར་འགྱུར་ཏེ། དེའི་ཕྱིར་དེ་ལྟར་ན་ཀྱེ་མ་ཞེས་སྐྱེ་བའོ། །སྡུག་བསྔལ་ཏེ་དཀའ་བ་བརྒྱུད་པ་ཡིན་ནོ། །སྡུག་བསྔལ་གཅིག་ལས་ཐར་ཡང་སྡུག་བསྔལ་གཞན་དུ་ལྟུང་པའི་ཕྱིར་རོ། །ད་ནི་སེམས་ཅན་རྗེས་སུ་སྡུག་བསྔལ་བར་གྱུར་པ་རྣམས་ཉིད་བལྟས་ནས་སྙིང་རྗེས་གདུངས་པའི་ཐུགས་དང་ལྡན་པ་གཞན་སྡུག་བསྔལ་བས་སྡུག་བསྔལ་བར་གྱུར་པའི་བསྟན་བཅོས་མཛད་པའི་སེམས་ཅན་རྣམས་ཀྱིས་སྡུག་བསྔལ་ལ་མྱ་ངན་མཛད་པས། ཀྱེ་མ་སྡུག་པ་ཞེས་པ་ལ་སོགས་པ་གསུངས་ཏེ། ཀྱེ་མ་དང་སྡུག་ཅེས་པ་ནི་སྐྱོ་བ་ལ་སྡུད་པའི་ཚིག་ཡིན་ནོ། །ཤིན་ཏུ་མྱ་ངན་འོས་ནི་ཤིན་ཏུ་ཡང་མྱ་ངན་དུ་བྱ་བར་འོས་པ་ཡིན་ཏེ། ཕན་པ་དང་མི་ཕན་པ་ངོ་མི་ཤེས་པའི་སེམས་ཅན་འདི་རྣམས་སྡུག་བསྔལ་གྱི་རྒྱ་མཚོ་དེའི་དཔའ་རླབས་བརྒྱུད་པར་སྐྱེ་བ་དང་
འཇིག་པས་དཀྲུགས་པའི་སེམས་དང་ལྡན་པ་རྣམས་སོ། །མྱ་ངན་བྱ་བར་འོས་པའི་སེམས་ཅན་འདི་རྣམས་གང་ཞེ་ན། དེ་ལྟར་ཤིན་ཏུ་སྡུག་བསྔལ་ཡང༌། །ཞེས་བྱ་བ་ལ་སོགས་པ་གསུངས་ཏེ། སེམས་ཅན་གང་དག་མ་རིག་པས་ལོང་བར་བྱས་པས་ཡེ་ཤེས་ཀྱི་མིག་གིས་མི་མཐོང་བར་གྱུར་བ་དེ་རྣམས་སོ། །རང་སྡུག་པར་གནས་པ་མི་མཐོང་བ་ཡིན་ནོ། །རང་ནི་བདག་ཉིད་ཡིན་ལ། སྡུག་བསྔལ་བར་གནས་པ་ཉིད་ཀྱང་ཤིན་ཏུ་སྡུག་བསྔལ་བར་གནས་པའོ། །དེ་ལྟར་ཞེས་པ་ནི་བརྗོད་པའི་རིམ་པས་སོ། །སྡུག་པས་གནས་པ་ནི་ཤིན་ཏུ་སྡུག་བསྔལ་བར་གནས་པ་སྟེ། སྡུག་བསྔལ་ནི་ཉེ་བར་ཐོབ་པ་ཡིན་ནོ་ཞེས་བྱ་བའི་ཐ་ཚིག་གོ །འདིའི་རྗེས་སུ་མཐུན་པའི་དཔེས་གསལ་བར་བསྟན་པའི་ཕྱིར། དཔེར་ན་འགའ་ཞིག་ཅེས་པ་ལ་སོགས་པ་གསུངས་ཏེ། ཡང་ཡང་ཁྲུས་བྱས་པ་ནི་ཆུའི་ནང་དུ་ཁྲུས་བྱས་ཤིང་བྱས་ནས་སོ། །དཔེར་ན་འགའ་ཞིག་སྟེ། བློ་ཉམས་པ་གྲང་བས་ཉེན་པའི་བདེ་བ་འདོད་པ་འདུག་པ་ཡིན་ནོ། །རབ་ཏུ་འཇུག་པ་ཡིན་ནོ། །ཡང་དང་ཡང་ཞེས་པ་ནི་སྐད་ཅིག་མ་སོ་སོ་འམ། ཡང་ནས་ཡང་དུའོ། དེ་ལྟར་ཞེས་པ་ནི་སེམས་ཅན་རང་ཉིད་བདེ་བར་གནས་པ་བདག་ཉིད་བདེ་བ་ཕུན་སུམ་ཚོགས་པར་སེམས་ཤིང་གོ་བ་ཡིན་ནོ། །དེ་བཞིན་དུ་ཡང་སྡུག་བསྔལ་བར་གནས་པ་ཡིན་ནོ། །དེ་ལྟར་ཞེས་པ་ནི་བརྗོད་པའི་རིམ་པས་སོ། །སྡུག་པར་གནས་པ་ནི་སྡུག་བསྔལ་གྱི་མེ་འབར་བའི་ནང་དུ་ཞུགས་པ་ཡིན་ནོ། །ཀྱེ་མ་སྡུག་བསྔལ་ཤིན་ཏུ་མང་བའི་མི་ཤེས་པའི་མུན་པས་མནན་པ་འདི་རྣམས་བདག་ཉིད་ལ་ཡོད་པར་གྱུར་པའི་བག་མེད་པ་ཡང་མི་མཐོང་ངོ་ཞེས་བསྟན་པའི་ཕྱིར་རོ། །རྒ་དང་ཞེས་པ་ལ་སོགས་པ་གསུངས་ཏེ། རྒས་ཤིང་གོག་པ་གང་རྣམས་ལ་མེད་པ་དེ་ནི་རྒ་བ་མེད་པ་ཡིན་ལ། འཆི་བ་དང་བྲལ་བ་ནི་འཆི་བ་མེད་པ་ཡིན་ཏེ། དེ་རྣམས་ནི་རྒ་བ་དང་འཆི་བ་མེད་པ་བཞིན་དུ་ཚོལ་བའི་སྤྱོད་པས་གནས་པ་གང་རྣམས་ཡིན་པ་དེ་རྣམས་ལ་དེ་སྐད་ཅེས་བརྗོད་དོ། །དེ་རྣམས་ཉིད་ནི་རོལ་ལ་འདིས་གནས་ཤིང་ངེས་པར་སྤྱོད་པས་གནས་པ་རྣམས་ལ་འོང་བར་འགྱུར་བ་ཡིན་ཏེ་བསྟེན་པར་བྱེད་དོ། །རྒུད་པ་ནི་དེ་རྣམས་ཐམས་ཅད་ཀྱི་སྡུག་བསྔལ་གྱི་རྒྱུ་དག་པ་དང༌། ནད་ལ་
སོགས་པས་རྒུད་པར་བྱས་པའོ། །ཇི་ལྟར་འགྲོ་བར་འགྱུར་ཞེ་ན། དང་པོ་ཉིད་དུ་བསད་བྱས་ནས། །ཞེས་ཏེ། མཐར་ཕྱིས་བཅོས་སུ་མེད་ཅིང་སྤང་དུ་མེད་པ། དང་པོར་བསད་པར་བྱས་ནས་ཏེ། སྔར་བྱས་ནས་སོ། །དེ་ལྟར་ཡང་བཅོམ་ལྡན་འདས་ཀྱིས་རྒྱལ་པོ་ལ་གདམས་པའི་མདོ་ལས། རྒྱལ་པོ་ཆེན་པོ་འདི་ལྟ་སྟེ་དཔེར་ན་ཕྱོགས་བཞི་ནས་རི་ཆེན་པོ་སྲ་བ། བརྟན་པ། སྙིང་པོ་དང་ལྡན་པ། མ་ཞིག་པ། མ་གས་པ། འཕན་མེད་པ། ཤིན་ཏུ་མཁྲེགས་པ། གཅིག་ཏུ་སྟུག་པ། གཞི་ནམ་མཁར་ལ་རེག་ཅིང་ས་བཟློག་པ་སྟེ། རྩྭ་དང་ཤིང་དང་ཤིང་གེལ་པ་དང་ཡལ་ག་དང་ལོ་མ་ཐམས་ཅད་སེམས་ཅན་སྲོག་ཆགས་འབྱུང་པོ་ཐམས་ཅད་ཕྱེ་མར་འཐག་ཅིང་འོང་བ་དེ་དག་ནི་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བཟློག་པའམ། རྫས་དང་སྔགས་དང་སྨན་རྣམས་ཀྱིས་བཟློག་པར་སླ་བ་མ་ཡིན་ནོ། །རྒྱལ་པོ་ཆེན་པོ་དེ་བཞིན་དུ་འཇིག་པ་ཆེན་པོ་བཞི་འདི་དག་འོངས་ཏེ། དེ་དག་ལས་མགྱོགས་པས་འབྲོས་པས་སྟོབས་ཀྱིས་བཟློག་པའམ། ནོར་གྱིས་བཟློག་པའམ། རྫས་དང་སྔགས་དང་སྨན་གྱིས་བཟློག་པར་སླ་བ་མ་ཡིན་ནོ། །བཞི་གང་ཞེ་ན། རྒ་བ་དང༌། ན་བ་དང༌། འཆི་བ་དང༌། རྒུད་པའོ། །རྒྱལ་པོ་ཆེན་པོ་རྒ་བ་ནི་དར་ལ་བབ་པ་འཇོམས་ཤིང་འོང༌། ནད་ནི་ནད་མེད་པ་འཇོམས་ཤིང་འོང༌། རྒུད་པ་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང༌། འཆི་བ་ནི་སྲོག་འཇོམས་ཤིང་འོང༌། དེ་དག་ལས་མགྱོགས་པས་འབྲོས་པའམ། སྟོབས་ཀྱིས་བཟློག་པའམ། ནོར་གྱིས་བཟློག་པའམ། རྫས་དང་སྔགས་དང་སྨན་རྣམས་ཀྱིས་ཞི་བར་བྱ་བར་སླ་བ་མ་ཡིན་ནོ། །རྒྱལ་པོ་ཆེན་པོ་འདི་ལྟ་སྟེ་དཔེར་ན་རི་དགས་ཀྱི་རྒྱལ་པོ་སེང་གེ་ནི་རི་དགས་ཀྱི་ཚོགས་ནང་དུ་ཞུགས་ནས་རི་དགས་བཟུང་སྟེ། ཇི་ལྟར་འདོད་པ་བཞིན་དུ་བྱ་བ་བྱེད་དོ། །རི་དགས་དེ་ནི་སྟོབས་ཆེ་བའི་ཁ་མི་བཟད་པར་བཟུང་བས་དབང་མེད་པར་འགྱུར་རོ། །རྒྱལ་པོ་ཆེན་པོ་དེ་བཞིན་དུ་འཆི་བ་དག་གི་གསལ་ཤིང་གིས་ཟུག་སྟེ་རྒྱགས་དང་ནི་བྲལ། མགོན་ནི་མེད། སྐྱབས་ནི་མེད། དཔུང་གཉེན་ནི་མེད། ཤི་བས་ནི་འཇིགས། ཚིགས་ནི་འཕྱེ་ཞིང་བྲལ། ཤ་དང་ཁྲག་ནི་སྐམ། ལུས་ནི་ནད་ཀྱིས་གདུང༌། སྐོམ་ནི་སྐོམ། བཞིན་ནི་གྱུར།
རྐང་ལག་ནི་གཡོ་བ། ལས་ནི་མི་ནུས། མཐུ་ནི་མི་བྱེད། ཁ་ཆུ་དང༌། སྣབས་དང༌། གཅིན་དང༌། ངན་སྐྱུགས་ཀྱིས་ནི་ལུས་ལ་གོས། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་དབང་པོ་ནི་འགགས། སྐྱིགས་བུ་ནི་འབྱུང༌། སྒྲ་ངར་ངར་པོ་ནི་འདོན། སྨན་པས་ནི་བོར། སྣམ་དང༌། ཁ་ཟས་དང་བཟའ་བ་དང༌། ཐུག་པ་ཐམས་ཅད་ཀྱིས་ནི་གླེས་ལ་བོར་ཏེ། འགྲོ་བ་མཐའ་དག་ཏུ་ནི་འགྲོ། མལ་གྱི་ཐ་མ་ལ་ནི་ཉལ། ཐོག་མ་མེད་པའི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། འཁོར་བའི་རྒྱུད་དུ་ནི་ནུབ། སྲོག་ནི་ཅུང་ཟད་ཅིག་ལུས། གཤིན་རྗེའི་མིས་ནི་འཇིགས་སྐྲག །བྱུར་གྱི་དབང་དུ་ནི་སོང༌། དབུགས་རྒྱུ་བ་ནི་ཆད། ཁ་དང་སྣ་ནི་འགགས། སོ་ནི་གཙིགས། སྦྱིན་པ་སྦྱིན་ནོ་ཞེས་དེ་སྐད་གསོལ་བ་ནི་འདེབས། ལས་ཀྱི་སྲིད་པ་ལས་ཡང་སྲིད་པ་ལ་ནི་འཇུག །ང་གཅིག་པུ་གཉིས་སུ་མེད་ཅིང་གྲོགས་ནི་མེད་དེ། འཇིག་རྟེན་འདི་ནི་འདོར། འཇིག་རྟེན་ཕ་རོལ་དུ་ནི་འགྲོ། ལམ་ཆེན་པོར་ནི་འཇུག །མུན་པ་ཆེན་པོར་ནི་ཞུགས། གཡང་ས་ཆེན་པོར་ནི་ལྷུང༌། ཁྲོད་སྟུག་པོར་ནི་འཇུག །དགོན་པ་ཆེན་པོར་ནི་འགྲོ། རྒྱ་མཚོ་ཆེན་པོས་ནི་ཁྱེར། ལས་ཀྱི་རླུང་གིས་ནི་བདས། ས་ཚུགས་མེད་པའི་ཕྱོགས་སུ་འགྲོ། གཡུལ་ངོ་ཆེན་པོར་ནི་འཇུག །གདོན་ཆེན་པོས་ནི་ཟིན། ནམ་མཁའ་ལ་ནི་འཆེལ། ཕ་མ་དང༌། ཕུ་ནུ་དང༌། སྲིད་མོ་དང༌། བུ་དང་བུ་མོས་ནི་བསྐོར། དབུགས་ནི་ཆད། ནོར་བགོ་བཤའ་བྱ་ཞེས་ནི་ཟེར། ཀྱི་ཧུད་མ། ཀྱི་ཧུད་མ། ཀྱི་ཧུད་བུ་ཞེས་ཐར་ཏེ། སྐྲ་ནི་བཤིག་སྟེ། སྦྱིན་པ་དང༌། དགའ་ཐུབ་དང༌། ཆོས་འབའ་ཞིག་གྲོགས་སུ་གྱུར་པ་ན། ཆོས་མ་གཏོགས་པར་སྐྱབས་གཞན་མེད། མགོན་གཞན་མེད། གནས་གཞན་མེད། དཔུང་གཉེན་གཞན་མེད་དོ། །རྒྱལ་པོ་ཆེན་པོ་དེའི་ཚེ་དེའི་དུས་ན་ཆོས་ནི་གླིང་དང༌། གནས་དང༌། མགོན་དང༌། བཞོན་པ་དང༌། ཉལ་བས་མ་ལ་འཇམ་པོ་དང༌། སྐོམ་པ་ལ་ཆུ་གྲང་མོ་དང༌། ཤིན་ཏུ་བཀྲེས་པ་ལ་ཁ་ཟས་བཟང་པོ་དང༌། མྱ་ངན་གྱིས་གནོད་པ་ལ་དབུགས་འབྱིན་པ་དང༌། གདུངས་པ་ལ་ཚིམ་པ་དང༌། དགོན་པར་ལམ་སྟོར་བ་ལ་ལམ་སྟོན་པ་དང༌། ནད་ཀྱིས་བཏབ་པ་ལ་སྨན་དང༌། སྨན་པ་དང་ནད་གཡོག་བྱེད་པ་དང༌། ཆུས་ཁྱེར་བ་ལ་གཟིངས་དང༌། འདམ་བུ་བྱིང་བ་ལ་འཇུས་
དང། བརྒལ་དཀའ་བའི་ཟམ་པ་དང༌། ཉམ་ང་བ་ལ་འབབ་སྟེགས་དང༌། མུན་ཁུང་ལ་སྒྲོན་མ་དང༌། རྒྱ་མཚོ་ཆེན་པོ་ལ་གྲུ་དང༌། ལྷགས་པས་ཉེན་པ་ལ་རླུང་མེད་པའི་གནས་དང༌། ཡུལ་གཞན་དུ་འགྲོ་བ་ལ་ལམ་རྒྱགས་དང༌། དབུལ་པོ་ལ་ནོར་དང༌། བྱེད་པར་འདོད་པ་ལ་གྲོགས་དང༌། གཅད་པར་འདོད་པ་ལ་ལག་ཆ་དང༌། གཞིག་པར་འདོད་པ་ལ་རྡོ་རྗེ་དང༌། གཡུལ་ངོར་ཞུགས་པ་ལ་གོ་ཆ་དང༌། འཇིགས་པ་ལ་སྟོབས་དང༌། ལྡན་པའི་གྲོགས་དང༌། འཐབ་པ་ལ་དཔུང་གཉེན་དང༌། དོགས་པ་ལ་གོ་འབྱེད་པ་དང༌། མུ་གེ་ལ་ནོར་དང་ལྡན་པ་དག་མགོན་དང༌། སྐྱབས་དང༌། གནས་དང༌། རྟེན་དུ་གྱུར་པ་དེ་བཞིན་དུ་ཞེས་བྱ་བ་ལ་སོགས་པ་རྒྱ་ཆེར་གསུངས་པ་ཡིན་ནོ། །དེ་ལྟ་བས་ན་འཇིགས་པ་འདི་དག་སྤོང་བའི་དོན་དུ་དགེ་བའི་ཕྱོགས་ཉིད་ཤེས་རབ་ཀྱིས་དག་པར་བྱ་བ་རྣམས་ལ་འབད་པར་བྱའོ། །ད་ནི་སྐྱེ་བ་ལ་སོགས་པའི་སྡུག་བསྔལ་གྱིས་སྡུག་བསྔལ་བ་རྣམས་ཀྱི་སྡུག་བསྔལ་བསལ་བའི་ཆེད་དུ་རང་གི་བསམ་པས་སྨོན་པས། དེ་ལྟར་ཞེས་པ་ལ་སོགས་པ་གསུངས་ཏེ། དེ་ལྟར་ཞེས་པ་ནི་སྔར་བརྗོད་མ་ཐག་པའི་ཚུལ་གྱིས་སོ། །སྡུག་བསྔལ་མེས་གདུངས་ལ་ཞེས་པ་ནི་སྡུག་བསྔལ་ཉིད་མེ་ཡིན་ཏེ། དེས་གདུངས་པའི་སེམས་ཅན་རྣམས་སོ། །ཞི་བ་སྟེ་སྐྱེ་བ་ལ་སོགས་པའི་སྡུག་བསྔལ་གྱི་མེའི་གདུང་བ་ཞི་བར་བྱེད་པར་བདག་ནམ་ཞིག་འགྱུར་ཏེ། དུས་ནམ་བྱེད་ཅིང་བསྒྲུབ་པར་འགྱུར། ཇི་ལྟར་ཞེ་ན། རང་གི་བདེ་བའི་ཡོ་བྱད་ཀྱིས། །ཞེས་ཏེ། བདེ་བའི་ཡོ་བྱད་ནི་བདེ་བ་སྒྲུབ་པར་བྱེད་པའི་གོས་དང༌། རྒྱན་དང༌། བྱུག་པ་དང༌། མལ་སྟན་ལ་སོགས་པ་རྣམས་སོ། །ཇི་ལྟ་བུ་ཞིག་ཏེ་བར་བསགས་པས་ཡིན་ལ་གཞན་གྱིས་མ་ཡིན་ཞེ་ན། རང་གི་ས་ཏེ་རང་གིས་བདག་ཉིད་ཀྱིས་ཡིན་ལ། བདག་རང་ཉིད་ཀྱིས་ཉེ་བར་བསགས་པས་ཡིན་ནོ་ཞེས་པའི་དོན་ཏོ། །ཅི་སྤྲུལ་པ་ལ་སོགས་པ་བསྟན་པས་ཡིན་ནམ། གཞན་གྱིས་ཡིན་ཞེ་ན། བསོད་ནམས་སྤྲིན་ལས་ལེགས་བྱུང་བས། །ཞེས་ཏེ། བསོད་ནམས་ཉིད་སྤྲིན་ཡིན་ཏེ། སྡུག་བསྔལ་གྱིས་གདུང་བ་ཐམས་ཅད་ཀྱིས་ཉེན་པ། ཞི་བ་བདེ་བའི་ཡོ་བྱད་བསིལ་བའི་ཆར་བ་སྦྱིན་པའི་རྒྱུ་ཡིན་པའི་ཕྱིར་རོ། །དེ་རྣམས་ལས་ལེགས་པར་བྱང་བ་ནི་ངེས་པར་
འབྱུང་བ་སྟེ་དེ་རྣམས་ཀྱིས་སོ། །དེ་ལྟར་མངོན་པར་མཐོ་བ་ཕུན་སུམ་ཚོགས་པར་གཞན་རྣམས་ཀྱིས་སེམས་བྱས་ནས། ངེས་པར་ལེགས་པ་ཕུན་སུམ་ཚོགས་པ་བསྟན་པའི་ཕྱིར། ནམ་ཞིག་དམིགས་པ་ཞེས་པ་ལ་སོགས་པ་གསུངས་ཏེ། ནམ་ཞིག་ཅེས་པ་ནི་དུས་ནམ་ཞིག་ནའོ། །དམིགས་པའི་ལྟ་བ་ཅན་རྣམས་དངོས་པོ་ལ་འཛིན་པའི་མངོན་པར་ཞེན་པ་ཅན་རྣམས་ལ་བསྟན་པར་བྱ་སྟེ། རབ་ཏུ་བསྟན་པར་བྱའོ། །སྟོང་པ་ཉིད་ནི་ཆོས་ཐམས་ཅད་རང་བཞིན་མེད་པ་ཉིད་དོ། །ཇི་ལྟར་ཞེ་ན། ཀུན་རྫོབ་ཀྱི་ཐ་སྙད་ཀྱིས་ཡིན་ཏེ། གཞན་དུ་ན་རྣམ་པར་རྟོག་པའི་ཡུལ་དུ་གྱུར་པས་དོན་དམ་པར་སྟོང་པའི་སྟོང་བ་ཉིད་བསྟན་པར་མི་ནུས་པའི་ཕྱིར་རོ། །དེ་ལྟར་ངེས་པར་ལེགས་པའི་རྒྱུ་ཡེ་ཤེས་ཀྱི་ཚོགས་ཀྱི་རྒྱུ་མཚན་ཉེ་བར་བསྟན་ནས། དེའི་རྒྱུ་བསོད་ནམས་ཀྱི་ཚོགས་ཀྱི་རྒྱུ་ཉེ་བར་བསྟན་པའི་ཕྱིར། བསོད་ནམས་ཞེས་པ་ལ་སོགས་པ་གསུངས་ཏེ། བསོད་ནམས་ནི་སྦྱིན་པ་ལ་སོགས་པ་ཡིན་ལ། ཚོགས་པ་ནི་ཕུང་པོ་ཡིན་ནོ། །དེ་ནམ་ཞིག་དམིགས་པའི་ལྟ་བ་ཅན་རྣམས་ལ་སྟོན་པར་འགྱུར་ཞེས་པ་དང་འབྲེལ་ཏེ། །གུས་པར་ཞེས་པ་ནི་གུས་པ་ཆེན་པོས་ཏེ། བཀུར་སྟིས་ཡིན་གྱིས་ཇི་ལྟར་ཡང་རུང་བས་ནི་མ་ཡིན་ནོ། །རྣམ་པ་གང་ཞིག་གིས་ཤེ་ན། དམིགས་པ་མེད་པའི་ཚུལ་གྱིས་ཏེ། སྦྱིན་པ་དང༌། གཏོང་བ་པོ་དང༌། ལེན་པ་པོ་ལ་སོགས་པ་མི་དམིགས་པ་ལ་སོགས་པའི་སྦྱོར་བས་ཏེ། འཁོར་གསུམ་ཡོངས་སུ་དག་པས་ཞེས་པའི་ཐ་ཚིག་གོ །དེ་ལྟར་བསོད་ནམས་ཀྱི་ཚོགས་ཉེ་བར་བསགས་པས་སངས་རྒྱས་ཉིད་ཐོབ་པར་འགྱུར་རོ། །དེ་ཉིད་ནི་འདི་དག་ཐམས་ཅད་ཀྱིས་ཉོན་མོངས་པ་མ་ལུས་པའི་རྒྱ་སྒྲོ་འདོགས་པ་མཐའ་དག་གི་གཉེན་པོ་ཉིད་ཀྱིས་སྒྲིབ་པ་ཐམས་ཅད་སྤོང་བའི་ཐབས་ཡིན་པའི་ཕྱིར་དང༌། དེ་བཞིན་གཤེགས་པའི་མ་ལུས་པ་ཐོབ་པའི་རྒྱུ་ཉིད་ཡིན་པའི་ཕྱིར། སྡུག་བསྔལ་ཐམས་ཅད་ཉེ་བར་ཞི་བའི་ཐབས་སུ་གྱུར་པ་ཤེས་རབ་སྐྱེ་བར་འགྱུར་ཞེས་བསྟན་པར་འགྱུར་རོ། །གང་རྣམས་ཀྱིས་ནི་ཟབ་མོའི་ཚུལ་རྟོགས་ཤེས་རབ་སྒྲིན་པོས་འཁྲུལ་པ་རབ་སྤངས་པ། །ཀུན་ནས་ཉོན་མོངས་རྣམ་བྱང་ཕྱོགས་ལ་དྲི་མེད་མཁྱེན་པ་མཐོ་བའི་དཔའ་བོ་རྣམས། །མཁས་ལ་དེ་
རྣམས་ཀྱིས་ནི་ཡོན་ཏན་སྐྱོན་ནི་འདྲེས་ལས་དེ་ཡིས་སྙིང་པོ་བླང༌། །གལ་ཏེ་ཉེས་པ་བརྗོད་ན་དྲི་མ་ཐམས་ཅད་དུག་བཞིན་དུ་ནི་དོར་བར་བྱ། །བདག་གིས་འདིར་ནི་རིགས་པ་མ་ཡིན་བརྗོད་པ་དང༌། །བདག་གིས་འཁྲུལ་པ་དེ་ཉིད་མཆོག་ཏུ་སྐྱེས་གྱུར་པ། །འདིར་ནི་བདག་གིས་བློ་གྲོས་མཁས་པ་རྣམས་ཀྱིས་ནི། །རང་གིར་བྱས་ཏེ་དེ་ལྟར་གཟུང་བར་བྱ་མིན་ནམ། །ཀུན་རྫོབ་གང་ཞིག་བརྒྱ་ལ་ཡིད་ཀྱིས་སྤྱོད་ཡུལ་དུ་ནི་གྱུར་པ་ཡི། །དེ་འདྲའི་དོན་ལ་བདག་འདྲའི་བློ་གྲོས་གང་གིས་མི་འཁྲུལ་ཡིན། །དེ་ཕྱིར་ལེགས་གསུངས་དོན་ནི་ངེས་པ་དང་ལྡན་དབུ་མའི་ལུགས་བསྟན་པ། །འདིར་ནི་ཡོན་ཏན་ཕྲ་བ་ཅུང་ཟད་མཐོང་བླང་བྱ་ཡིས་གློ་བུར་འགྱུར། །ཡང་དག་ཤེས་པ་མི་མཐུན་ཕྱོགས་ཀྱི་ལྟ་བ་སྡུག་པའི་རྨོངས་པ་ཞི་བར་བྱ་ཆེད་དུ། །ཤེས་རབ་ཀྱིས་ནི་གསལ་བར་རྣམ་པར་བཤད་པའི་ཚིག་གི་འགྲེལ་པ་བྱས་པ་ཡིས། །བདག་གིས་བསོད་ནམས་གང་ཞིག་ཉེར་བསགས་ཕན་པའི་འབྲས་བུ་དེ་ཡིས་མྱུར་བར་སྐྱེ་བོ་ཀུན། །འཇམ་དཔལ་བཞིན་དུ་ཡོན་ཏན་དམ་པ་གཅིག་གིས་གནས་ལ་ཤེས་རབ་འབྱུང་གནས་སྐྱེ་བར་ཤོག །བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས་ཤེས་རབ་ཀྱི་ལེའུའི་རྒྱ་ཆེར་བཤད་པ། དགེ་སློང་མཁས་པ་ཤེས་རབ་འབྱུང་གནས་བློ་གྲོས་ཀྱིས་མཛད་པ་རྫོགས་སོ།། །།བྱང་ཆུབ་སེམས་དཔའི་སྤྱོད་པ་ལ་འཇུག་པའི་འགྲེལ་བཤད་ལས་ལེའུ་དང་པོ་གཉིས་དང༌། བརྩོན་འགྲུས་བསམ་གཏན་ཤེས་རབ་ཀྱི་ཊཱི་ཀ་མཁས་པ་ཆེན་པོ་སུ་མ་ཏི་ཀཱི་རྟི་དང༌། ལོ་ཙཱ་བ་དར་མ་གྲགས་ཀྱིས་བསྒྱུར་བའོ། །དབུ་རུ་བྱང་ངོས་སྐྱུར་ཀ་མཁར་གྲགས་སུ། །མཁས་པ་ཆེན་པོ་བློ་གྲོས་བཟང་གྲགས་པ། །ལྡོང་སྟོང་མཆོད་གནས་རྒྱ་སྒོམ་མཆེད་གྲོགས་ཀྱིས། །གསོལ་བཏབ་དགེ་སློང་དར་མ་གྲགས་ཀྱིས་བསྒྱུར།། །།