སོ་སོར་ཐར་པའི་བཤད་པ་རྣམས་མི་བརྗེད་དྲན་བྱེད་ཙམ་དུ་བྲིས་པ།
འཇམ་དཔལ་གཞོན་ནུར་གྱུར་པ་ལ་ཕྱག་འཚལ་ལོ། །སོ་སོར་ཐར་པའི་བཤད་པ་རྣམས་མི་བརྗེད་དྲན་བྱེད་ཙམ་དུ་བྲིས་པ། ཡང་སོ་སོར་ཐར་པ་བཤད་པ་ཡང་རྣམ་པ་གཉིས་ཀྱི་ཕྱིར་ཏེ། ལོག་པའི་ངང་ཚུལ་སྤང་བར་བྱ་བའི་ཕྱིར་དང༌། ཡང་དག་པའི་ངང་ཚུལ་རྒྱས་ཤིང་བསྟན་པར་བྱ་བའི་ཕྱིར་བཤད་དོ། །དེ་ལ་སྔོན་གྱི་གཏམ་རྒྱུད་མདོ་ཙམ་ཞིག་སྨོས་པར་བྱ་སྟེ། སངས་རྒྱས་བཅོམ་ལྡན་འདས་མངོན་པར་བྱང་ཆུབ་ནས། ཆོས་ཀྱི་འཁོར་ལོ་འཇིག་རྟེན་དུ་ལན་བཅུ་གཉིས་བསྐོར་ཏེ་གཞག་པའི་ཆེ་ལོ་བཅུ་གཉིས་ཀྱི་བར་དུ་ནི་དེ་བཞིན་གཤེགས་པའི་འཁོར་ཉན་ཐོས་ཀྱི་དགེ་སློང་གི་དགེ་འདུན་ལ་ཚུལ་ཁྲིམས་ཀྱི་སྒོ་ནས་སྐྱོན་དང་འཕན་མ་བྱུང་སྟེ། ཚུལ་ཁྲིམས་ཡོངས་སུ་དག་པས་འདུལ་བ་ལ་བསླབ་པའི་གནས་བཅས་པ་ཡང་མེད་དེ། དེའི་ཚེ་དགེ་སློང་རྣམས་ལ་འདུལ་བ་བཤད་ཅིང་དགེ་བའི་ཆོས་རྣམས་བསྒྲུབ་པར་བྱ་བ་དང༌། སྡིག་པ་མི་དགེ་བའི་ཆོས་སྤང་པར་བྱ་བའི་ཆོས་ཐབས་དང་གཉེན་པོ་ཙམ་དུ་བསྟན་པ་ནི། སྡིག་པ་ཐམས་ཅད་མི་བྱ་སྟེ། །དགེ་བ་ཐམས་ཅད་
རྫོགས་པར་བྱ། །རང་གི་སེམས་ནི་ཡོངས་སུ་འདུལ། །འདི་ནི་སངས་རྒྱས་བསྟན་པའོ། །ལུས་ཀྱི་སྡོམ་པ་ལེགས་པ་སྟེ། །ངག་གི་ཡང་ནི་སྡོམ་པ་ལེགས། །ཡིད་ཀྱི་སྡོམ་པའང་ལེགས་པ་སྟེ། །ཐམས་ཅད་སྡོམ་པའི་དགེ་སློང་ནི། །སྡུག་བསྔལ་ཀུན་ལས་རབ་ཏུ་འགྲོལ། །ཞེས་བྱ་བ་ལ་སོགས་པ་སོ་སོར་ཐར་པའི་མཐུག་ནས་འབྱུང་བའི་ཤློ་ཀ་གསུམ་པོ་དེ་ད་ལྟར་གྱི་སོ་སོར་ཐར་པ་དང་འདྲ་བར་གནས་སོ། །དེའི་ཚེ་དགེ་སློང་རྣམས་ཀྱང་དགེ་བའི་ཆོས་རྣམས་ནི་སྒྲུབ། སྡིག་པའི་ཆོས་རྣམས་ནི་སྤོང་ངོ༌། །དེ་ནས་ལོ་བཅུ་གསུམ་དུ་སོགས་པ་ན་ཉན་ཐོས་ཀྱི་དགེ་འདུན་རྣམས་ཀྱིས་ཚུལ་ཁྲིམས་ལ་རྨ་ཕྱུང་སྟེ། ཕས་ཕམ་པ་ལ་སོགས་ཏེ་ལྟུང་བའི་རིགས་ལྔ་ཡང་དང་པོ་ཁོ་ནར་བྱུང་ངོ༌། །ད་ལྟར་བ་ལ་བཅོམ་ལྡན་འདས་ཀྱིས་ཀྱང་འདུལ་བ་རྨ་མེད་པ་ལ་རྨ་བྱུང་སྟེ། སྐྱོན་དང་འཕན་ཐམས་ཅད་དུ་གྱུར་ནས། ཡང་དགེ་སློང་གང་འདི་ལྟ་བུའི་ཆོས་ཤིག་སྤྱད་ཅིང་བྱས་ན་ཉེས་པ་འདིར་འགྱུར་རོ་ཞེས་བཅོམ་ལྡན་འདས་ཀྱིས་འདུལ་བ་ལ་བསླབ་པའི་གནས་བཅས་སོ། །འདི་བསླབ་པའི་གནས་བཅས་ཀྱང༌། དེ་དག་ཙམ་ན་དགེ་སློང་དག་ཀྱང་བསོད་ནམས་ཆེ་ཞིང་དབང་པོ་རྣོ་བས་ཆོས་ཅི་དང་ཅི་བཤད་པ་ཡང་ཡིད་ལ་འཛིན་པ་ཙམ་དུ་ཟད་དོ། །ཡི་གེར་
བྲིས་ཤིང་བག་བག་ལ་གླན་པ་མེད་དོ། །ཕྱིས་དེ་བཞིན་གཤེགས་པ་རྩྭ་མཆོག་གི་གྲོང་ཁྱེར་དུ་མྱ་ངན་ལས་འདས་པའི་ཚེ་འཕགས་པ་ཉན་ཐོས་ལྔ་བརྒྱ་ལ་བཀའ་སྩལ་པ། ངའི་འདུལ་བ་འདི་ཅི་ནས་ཀྱང་ཡུན་རིང་དུ་གནས་པ་དང༌། ལྷ་དང་མི་ལ་སོགས་ཏེ་མ་འོངས་པའི་སྐྱེ་བོ་མང་པོ་ལ་ཕན་ཐོགས་པར་འགྱུར་བའི་ཕྱིར་ངས་སྔོན་ཇི་སྐད་དུ་བཤད་ཅིང་བསླབ་པའི་གནས་བཅས་པ་དེ་བཞིན་དུ་མ་ནོར་བར་གཞུང་དུ་ཡི་གེར་བྲིས་ཏེ་ཞོག་ཅིག་ཅེས་བཅོམ་ལྡན་འདས་ཀྱིས་བཀའ་སྩལ་པ། ཉན་ཐོས་ལྔ་བརྒྱ་པོ་དེ་དག་འདུས་ཏེ་ཇི་སྐད་དུ་གསུངས་པ་བཞིན་གཞུང་དུ་ཡི་གེར་བྲིས་ཏེ་གཞག་གོ །ཡུ་མཉན་དུ་ཡོད་པ་ལ་སོགས་པར་སྔོན་དེ་བཞིན་གཤེགས་པ་ཆོས་འཆད་ཅིང་སྟོན་པ་མཛད་པའི་ཚེ་ཞབས་ཀྱིས་བཅགས་ཤིང་བྱིན་གྱིས་བརླབས་པའི་ཡུལ་ཡང་གྲངས་མ་མཆིས་པ་ཞིག་ཡོད་ན། རྩྭ་མཆོག་གི་གྲོང་ཁྱེར་ཁོ་ནར་མྱ་ངན་ལས་འདས་པར་བསྟན་པ་ཡང་དགོས་པའི་དབང་འགའ་ཞིག་ཡོད་དམ་མེད་ཅེས་ཁ་ཅིག་དཔྱོད་ཀྱང་སྲིད་དེ། དེ་བཞིན་གཤེགས་པའི་དགོངས་པ་དང་ལྡན་པར་མཛད་པས་ན་འདིར་མྱ་ངན་ལས་འདའ་བར་བསྟན་པ་ཡང་ཡུལ་དེ་ན་གྱད་སྟོབས་དང་ལྡན་པ་ཤ་སྟག་གནས་གནས་པས་ཕྱིའི་མུ་སྟེགས་མ་དད་པ་རྣམས་ཀྱིས་བཅོམ་ལྡན་འདས་ཀྱི་སྐུ་གདུང་ཤ་རི་རམ་ཆུད་མི་གསན་ཅིང་གྲོང་ཁྱེར་ཆེན་པོ་དེ་ན་གནས་པའི་སྐྱེ་བོ་མང་པོ་རྣམས་ཐམས་ཅད་ཀྱིས་ཀྱང་ཤ་རི་རམ་མཉམ་པར་ཐོབ་པར་བྱ་བ་དང༌། ཐམས་ཅད་ཀྱིས་བསོད་ནམས་ཐོབ་པ་དང༌། བསོད་ནམས་སྐྱེ་བར་འགྱུར་ཞིང་མཆོད་རྟེན་དུ་གཟུང་བར་བྱ་བར་དགོངས་ནས་ཡུལ་དེར་མྱ་ངན་ལས་འདའ་བར་བསྟན་ཏོ། །འདུལ་བ་སྡུད་པར་མཛད་པ་ནི་འཕགས་པ་ཀུན་དགའ་བོ་མཆིས་ཏེ་སྡུད་པའི་ཕུག་ཆེན་པོའི་རིའི་སྒོར་ཕྱིན་པ་ན་ཉན་ཐོས་ལ་གྱི་ནང་དུ་མ་ཆུད་ནས་ཀུན་དགའ་བོས་བསམས་པ། སྔོན་དེ་བཞིན་གཤེགས་པ་ཞལ་བཞུགས་པའི་ཚེ་བདག་ཀྱང་མང་དུ་ཐོས་པ་དང༌། ཤེས་རབ་དང་ལྡན་ཞིང་ཐོས་པ་འཛིན་པའི་མཆོག་ཉེ་གནས་བགྱིད་ཅིང་ཞ་འབྲིང་ན་རྟག་ཏུ་བསྙེན་བཀུར་བགྱིད་ན་དེ་བཞིན་གཤེགས་པ་མྱ་ངན་ལས་འདས་ནས་རིང་པོ་མ་ལོན་པར་ཉན་ཐོས་དེ་དག་གི་ནང་དུ་ཡང་བདག་གིས་མ་ཆུད་ན་ཉེས་པ་ཅི་ཞིག་བྱས་སྙམ་དུ་མི་དགའ་ཞིང་ངོ་མཚར་ཆེའོ་སྙམ་དུ་བཟུང་ནས་མི་
མི་དགའ་ཞིང་སླར་ལོག་ནས་རང་གི་གནས་སུ་ཕྱིན་ནས་ཏིང་ངེ་འཛིན་དུ་རྩེ་གཅིག་པར་ཞུགས་ཏེ། བསྒོམ་པས་སྤང་བར་བྱ་བའི་ཉོན་མོངས་པའི་སྒྲིབ་པ་རྣམས་སྤངས་ནས། དགྲ་བཅོམ་པ་མངོན་སུམ་དུ་བྱས་སོ། །གཟོད་འཕགས་པ་ཉན་ཐོས་དེ་དག་སྡུད་པར་མཛད་པའི་སྒོར་ཕྱིན་ཏེ། ཏིང་ངེ་འཛིན་གྱི་རྫུ་འཕྲུལ་གྱིས་སྒོའི་བུ་ག་ནས་ཞུགས་པས་ནང་དུ་ཐར་རོ། །དེ་ནས་འཕགས་པ་ཀུན་དགའ་བོ་ལ་སོགས་པ་རྣམས་འདུས་ཏེ་འདུལ་བ་འབུམ་པ་ལ་སོགས་པ་ཡང་གཞུང་བག་བག་ལ་གླན་ནོ། །སོ་སོར་ཐར་པ་ཡང་ཡི་གེར་བྲིས་ཤིང་འདིར་བསྡུས་སོ། །འདི་ལྟར་ཀུན་དགའ་བོ་ནང་དུ་མ་ཆུད་པ་ཡང་ཉན་ཐོས་ལ་ཉོན་མོངས་པ་གཉིས་ཏེ། མཐོང་བའི་ལམ་གྱིས་སྤང་བ་དང༌། །བསྒོམ་པའི་ལམ་གྱིས་སྤང་བར་བྱ་བའོ། །ཀུན་དགའ་བོས་མཐོང་བར་བྱ་བའི་ཉོན་མོངས་པ་ནི་སྤངས་ཀྱི། བཅོམ་ལྡན་འདས་ཀྱི་ཞ་འབྲིང་ན་རྟག་ཏུ་བསྙེན་བཀུར་བྱེད་ཅིང་བསྒོམ་དུ་མི་ཁོམ་བས་ན་བསྒོམ་པའི་ཉོན་མོངས་པ་ནི་མ་སྤངས་པས་དགྲ་བཅོམ་པ་དེ་དག་གི་ནང་དུ་མི་ཆུད་ཅེས་འཆད་དེ། །དེ་ལ་ཁ་ཅིག་ན་རེ་ཀུན་དགའ་བོ་དེ་བཞིན་གཤེགས་པའི་ཞ་འབྲིང་ན་རྟག་ཏུ་གནས་ཏེ། དེ་བཞིན་གཤེགས་པ་མྱ་ངན་ལས་འདས་ཏེ་གཤེགས་ཀར་ད་དུང་མྱ་ངན་ལས་མི་འདའ་ཞིང་སེམས་ཅན་གྱི་དོན་མཛད་ཅིང་བཞུགས་སུ་ཅི་གནང་ཞེས་མ་གསོལ་བ་དང༌། ཉེས་པ་རྣམ་པ་ལྔ་མ་བཤགས་མ་མཐོལ་བས་ཆད་པར་དགྲ་བཅོམ་པ་ལྔ་བརྒྱ་པོ་དེ་དག་གི་ཕྱི་རོལ་དུ་བཞག་ཅེས་ཀྱང་འཆད་དོ། །དེ་ཡན་ཆད་ནི་སྔོན་བྱུང་བའི་གཏམ་རྒྱུད་དང༌། གླེང་བསླང་བ་ཙམ་དུ་ཟད་དོ། །དེ་ནི་ཡང་དག་པར་སྡུད་པ་པོ་འཕགས་པ་རྣམས་ཀྱིས་སོ་སོར་ཐར་པའི་མདོ་སྡུད་པར་འདོད་ནས་འགྲོ་བ་ཐམས་ཅད་ཀྱི་བླ་མ་སངས་རྒྱས་བཅོམ་ལྡན་འདས་དང༌། སོ་སོར་ཐར་པ་ལ་བསྟོད་པ་དང་ཕྱག་འཚལ་བས་མཆོད་པའི་ཕྱིར། ཐམས་ཅད་མཁྱེན་པ་ལ་ཕྱག་འཚལ་ལོ། །སྙན་པའི་བ་དན་འཇིག་རྟེན་གསུམ་དུ་གྲགས། །ཞེས་བྱ་བ་ལ་སོགས་པས་མངོན་པར་བསྟོད་པ་དང༌། ཁ་ཅིག་འདི་སྐད་དུ་རྟོག་ཀྱང་སྲིད་དེ། བཅོམ་ལྡན་འདས་ཀྱིས་བཀའ་སྩལ་ཅིང་བསྟན་པ་ནི་ཡང་དགེ་སློང་དག་ཉིས་པ་འདི་ལྟ་བུ་ཞིག་བྱས་ན་ཕས་ཕམ་པར་འགྱུར་བ་དང༌། ཉེས་བྱས་སུ་འགྱུར་ཞེས་བྱ་བ་ལ་སོགས་ཏེ།
ལྟུང་བ་རིགས་ལྔ་ནི་བཀའ་ཞལ་གྱིས་སྩལ་ཅིང་འདུལ་བ་ལ་བསླབ་པའི་གནས་ཀྱང་བཅས་ཀྱི། སྙན་པའི་བ་དན་ཞེས་བྱ་བ་ལ་སོགས་པ་ཡེ་མ་གསུངས་ན། འདི་སྡུད་ཚིག་གར་དགོས་ཞེས་རྟོག་ཀྱང་སྲིད་དོ། །དེ་ཡང་དེ་བཞིན་གཤེགས་པས་གསུངས་པ་ནི་མ་ཡིན་མོད་ཀྱི། ཡང་དག་པར་སྡུད་པ་པོ་འཕགས་པ་ལྔ་བརྒྱ་པོས་དགོས་པ་དང༌། དོན་དང་བཅས་པར་བྱས་པ་ཡིན་གྱི། དོན་མེད་པའམ། འོལ་རས་སམ། གྱ་ཚོམ་དུ་སྨྲས་པ་ནི་མ་ཡིན་ཏེ། དེ་ཡང་རྣམ་པ་གསུམ་གྱི་ཕྱིར་གཞག་གོ །དེ་ལ་རྣམ་པ་གསུམ་ནི་སྐྱེས་བུ་དམ་པ་རྣམས་ལ་བསྟོད་ཅིང་རྗེས་སུ་མཐུན་པར་བྱ་བ་དང་བདག་ཅག་གིས་ཐོས་པ་མང་བ་བསྒྲག་པ་དང༌། བརྩམས་པ་མཐར་ཕྱིན་ཅིང་བར་ཆད་མེད་པའི་ཕྱིར་བརྩམས་པ་ཡིན་ཏེ། དེ་ཡང་དཔེར་ན་འཇིག་རྟེན་ན་སྐྱེས་བུ་དམ་པ་ཡ་རབས་དག་ནི་གཙུག་ལག་རྩོམ་པ་ལ་སོགས་ཏེ་ལས་ཅི་ཡང་རུང༌། དང་པོ་ཁོ་ནར་རང་གི་ལྷ་དང་སྟོན་པ་ལ་མཆོད་ཅིང་ཕྱག་འཚལ་ནས་རྩོམ་པ་སྲིད་དོ། །སྐབས་འདིར་ཡང་སོ་སོར་ཐར་པའི་མདོ་སྡུད་པར་འདོད་ནས། ཡང་དག་པར་སྡུད་པ་པོ་འཕགས་པས་སངས་རྒྱས་བཅོམ་ལྡན་འདས་དང༌། སོ་སོར་ཐར་པ་ལ་བསྟོད་ཅིང་ཕྱག་འཚལ་བས་མཆོད་ནས་སྡུད་པར་མཛད་དོ། །དེ་ལ་སྙན་པའི་བ་དན་ཞེས་པ་ནས། དར་ལ་བབ་པ་ཡོལ་རྣམས་ཀྱང་བདེ་ཞེས་བྱ་བའི་བར་དུ་སངས་རྒྱས་དང་སོ་སོར་ཐར་པ་ལ་བསྟོད་པའི་སྟོབས་ཡང་དག་པར་ཟློས་པར་བྱེད་པའི་ཚིག་ཡིན་པས་ན་གཙུག་ལག་རྩོམ་མོ་ཅོག་ལ་དགོས་པ་དང༌། དོན་མེད་པར་རྩོམ་མི་སྲིད་དེ། དེ་ཡང་རྣམ་པ་བཞི་ཞིག་གིས་བསྙད་པར་བྱ་སྟེ། དེ་མ་བསྟན་ན་ནི་ཅི་ཉེས་ཤེ་ན། སློབ་མ་ཉན་པ་ལ་བློ་འདུན་པ་རྣམས་སྤྲོ་བ་དང༌། དགོས་པའི་དོན་མེད་པས་ཉན་པ་ལ་བློ་གཡེལ་བས་ན་དེ་བསྟན་ཏོ། །བཞི་ཡང་གང་ཞེ་ན། བཤད་ཅིང་བསྟན་པར་བྱ་བ་དང༌། དགོས་པ་དང༌། འབྲེལ་བ་དང༌། དགོས་པའི་ཡང་དགོས་པའོ། །དེ་ལ་བསྟན་པར་བྱ་བ་ནི་དེ་བཞིན་གཤེགས་པའི་ཡོན་ཏན་དང༌། སོ་སོར་ཐར་པའི་ཡོན་ཏན་ཏེ། དེ་དག་གི་བདག་ཉིད་ཆེ་བའོ། །དགོས་པ་ནི་དེ་གཉིས་ཀྱི་ཡོན་ཏན་གྱི་དོན་ཡོངས་སུ་ཤེས་དགོས་པའོ། །འབྲེལ་བ་ནི་ཚིག་དང་དོན་དུ་འབྲེལ་བ་ལ་བྱ་སྟེ། ཚིག་གིས་མཚོན་ནས་དོན་ཤེས་པར་བྱེད་པས་
གཅིག་ལ་གཅིག་ལྟོས་པའམ་བརྟེན་པས་ན་འབྲེལ་བའོ། །དཔེར་ན་ཐབས་དང་ཐབས་སུ་བྱ་བའམ། རྒྱུ་དང་འབྲས་བུ་ལྟ་བུའམ། ཞགས་པས་གཟུང་བར་བྱ་བ་ལྟ་བུའི་ཕྱིར་འབྲེལ་པའོ། །དགོས་པའི་དགོས་པ་ནི་བརྩམས་པ་མཐར་ཕྱིན་པར་བྱ་བའི་དགོས་པའི་ཕྱིར་དགོས་པའི་ཡང་དགོས་པའོ། །ཡང་ན་རྣམ་པ་བཞི་པོ་འདི་ལྟུང་བ་རིགས་ལྔ་ལ་ཡང་སྦྱར་བར་བྱ་སྟེ། བཤད་པར་བྱ་བ་ནི་ལྟུང་བ་རིགས་ལྔ་བཤད་ཅིང་ལྟུང་བ་ལྕི་ཡང་གི་བྱེ་བྲག་བཤད་པའོ། །དགོས་པ་ནི་དེ་དག་ཤེས་ཤིང་ཉེས་བྱས་ཕྲ་མོ་ཡན་ཆད་ལ་ལྷག་པར་བག་དང་བཅས་ནས་བསྡུ་བ་དགོས་པའོ། །འབྲེལ་བ་ནི་དེ་དག་ཉིད་དོན་དང་གཅིག་ཏུ་འབྲེལ་ཅིང་སྙན་རྣར་གཏད་པ་ལ་ཡང་བྱའོ། །དགོས་པའི་དགོས་པ་ནི་མྱ་ངན་ལས་འདས་པའི་འབྲས་བུ་ཐོབ་པ་ཡང་བྱ་དགོས་པས་ན་དགོས་པའི་ཡང་དགོས་པ་སྟེ། བཞི་པོ་འདི་དག་བསྟན་ན་སློབ་མ་ཉན་པ་རྣམས་དང་བ་སྐྱེ་ཞིང་སྤྲོ་བ་དང༌། ཉན་པ་ལ་འཇུག་པའི་ཕྱིར་འདི་དག་སྨོས་སོ། །དེ་ལ་སྙན་པའི་བ་དན་ཞེས་བྱ་བ་ནས། དར་ལ་བབ་པ་ཡོལ་བ་ཞེས་བྱ་བའི་བར་དུ་སྡུད་པ་པོས་བསྟོད་པ་དེ་ཡང་རྣམ་པ་བདུན་དུ་དབྱེ་བར་བྱའོ། །དེ་ཡང་གང་ཞེ་ན། སངས་རྒྱས་ལ་བསྟོད་པ་དང༌། ཆོས་ལ་བསྟོད་པ་དང༌། སངས་རྒྱས་འབྱུང་བ་བདེ་བའི་རྒྱུར་བསྟན་པ་དང༌། དགེ་བའི་བཤེས་གཉེན་ལ་བརྟེན་པ་བདེ་བར་བསྟན་པ་དང༌། མི་དགེ་བའི་གྲོགས་པོ་སྤངས་ན་བདེ་བ་དང༌། འབྲས་བུ་ཐོབ་པ་བདེ་བར་བསྟན་པ་དང༌། འབྲས་བུ་ཐོབ་པའི་གནས་བསྟན་པའོ། །དེ་ལ་སངས་རྒྱས་ལ་བསྟོད་པ་ནི་དང་པོ་ཤློ་ཀ་གཉིས་དང་སྦྱར་བས་བྱ་སྟེ། དེ་ཡང་དེ་རྣམ་པ་ལྔ་སྟེ་གྲགས་པ་ཕུན་སུམ་ཚོགས་པ་དང༌། བཀའ་ཕུན་སུམ་ཚོགས་པ་དང༌། གཏེར་ཕུན་སུམ་ཚོགས་པ་དང༌། འཁོར་ཕུན་སུམ་ཚོགས་པ་དང༌། ཁྱད་ཞུགས་པ་ཕུན་སུམ་ཚོགས་པའོ། །ད་ནི་སོ་སོར་ཐར་པའི་ཚིག་གཉེར་ལ་བབ་སྟེ། སྙན་པའི་བ་དན་ཞེས་བྱ་བ་ལ་སོགས་པ་སྨོས་སོ། །སྙན་པའི་བ་དན་འཇིག་རྟེན་གསུམ་དུ་གྲགས་པ་ཞེས་བྱ་བས་གྲགས་པ་ཕུན་སུམ་ཚོགས་པ་སྟོན་པ་སྟེ། དེ་ལ་སྙན་པ་ནི་དེ་བཞིན་གཤེགས་པའི་སྐུའི་ཡོན་ཏན་ཏེ། ཕ་རོལ་ཏུ་ཕྱིན་པ་བཅུ་དང༌། སྟོབས་བཅུ་ལ་སོགས་པ་ལ་བྱ་སྟེ། དེ་ཡང་བསོད་ནམས་དང་ཡེ་ཤེས་ཀྱི་ཚོགས་ཡོངས་སུ་རྫོགས་པ་ལས་བྱུང་བས་ན་
རྒྱུ་སྦྱིན་པ་ལ་སོགས་པ་ཤིན་ཏུ་སྙན་པ་དང༌། འབྲས་བུ་སྟོབས་དང་མ་འདྲེས་པ་ལ་སོགས་པ་ཤིན་ཏུ་སྙན་པས་ན་སྙན་པ་ཞེས་ཀྱང་བྱ། དེ་ཡང་ཇི་ལྟར་སྙན་ཅེ་ན། བཅོམ་ལྡན་འདས་ཀྱིས་བཀའ་སྩལ་པའི་མཐར་ཆོས་དང་ཟང་ཟིང་གི་སྦྱིན་པ་བསམ་གྱིས་མི་ཁྱབ་པ་ཡོངས་སུ་གཏོང་བར་མཛད་དོ་ཞེས་འཇིག་རྟེན་དུ་སྙན་པར་གྲགས་པ་དང༌། དེ་བཞིན་དུ་ཚུལ་ཁྲིམས་སྐྱོན་མེད་དེ་ཡོངས་སུ་དག་པ་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ལ་སོགས་པ་མཚུངས་པ་མེད་པར་མཛད་ཅིང་མངའ་ཞེས་འཇིག་རྟེན་དུ་སྙན་པར་སྒྲོགས་ཤིང་གྲགས་པ་སྟེ། དེ་བས་ན་འཇིག་རྟེན་གསུམ་དུ་གྲགས་ཞེས་སྨོན་པ་ཡིན་ནོ། །དེ་བ་དན་ཞེས་སྨོས་པས་ནི་དེ་བཞི་གཤེགས་པའི་ཡོན་ཏན་ཕ་རོལ་ཏུ་ཕྱིན་པ་ལ་སོགས་པའི་དཔེར་བཤད་པ་ཡིན་ཏེ། དེ་ཡང་བ་དན་བཟང་པོ་གང་ན་བཙུགས་པའི་ས་ཕྱོགས་དེ་ན་ཤིན་ཏུ་བཙུན་ཞིང་བརྗིད་པར་གནས་པ་ལྟ་བུའམ། ཡང་སྐྱེ་བོ་ངན་པ་རྣམས་བག་འཁུམས་ཤིང་སྤ་གཞིལ་བ་ལྟ་བུ་འམ། ཡང་ན་དམག་དཔོན་གཡུལ་ངོ་ལས་རྒྱལ་བའི་རྟགས་ལྟ་བུ་འམ། ཡང་ན་གནས་ལ་བརྩོན་པར་བྱེད་པ་ལྟ་བུ་ནི་བ་དན་ཡིན་ཏེ། དེ་དག་དང་འདྲ་བར་བ་དན་བཟང་པོ་བཙུགས་པའི་ས་ཕྱོགས་བཙུན་པར་གནས་པ་ལྟར་དེ་བཞིན་གཤེགས་པའི་ཡོན་ཏན་ཕ་རོལ་ཏུ་ཕྱིན་པ་ལ་སོགས་པའི་ཆོས་ཀྱང་རང་བཞིན་གྱིས་བཙུན་པར་གནས་པའོ། །ཡང་ན་བ་དན་བཟང་པོ་བཙུགས་པས་ངན་པ་རྣམས་སྤ་གཞིལ་ཞིང་བག་འཁུམས་པ་ལྟར་དེ་བཞིན་གཤེགས་པའི་ཡོན་ཏན་གྱི་ཆོས་ཀྱིས་མུ་སྟེགས་ཅན་ངན་པ་ལོག་པའི་ངང་ཚུལ་ཅན་ལ་སོགས་པ་རབ་ཏུ་སྤ་གོང་བར་མཛད་པས་སྤ་གཞིལ་བ་ཞེས་ཀྱང་བྱའོ། །ཡང་ན་སྐྱེས་བུ་གཡུལ་ངོ་ལས་རྒྱལ་བའི་ཚེ་རྒྱལ་མཚན་བཙུགས་པ་ལྟར་བདུད་ཀྱི་དགྲ་ལས་རྒྱལ་བའི་རྒྱལ་མཚན་བཙུགས་པ་ཞེས་ཀྱང་བྱའོ། །ཡང་ན་གནས་ལ་བརྩོན་པར་གྱུར་པས་ཏེ། གང་ན་གཙུག་ལག་ཁང་ཡོད་པ་ན་བ་དན་བཟང་པོ་གཟུགས་པ་དང༌། ཕན་ཆད་རྒྱ་གར་ཡུལ་ལ་སོགས་པ་ན་གང་ན་ཚོང་འདུས་དང༌། ཆང་འཚོང་བ་དང༌། སྨད་འཚོང་བའི་གནས་སུ་བ་དན་གཟུགས་པས་བ་དན་གྱིས་མཚན་པས་ན་གནས་དེ་ཉིད་དུ་མ་སོན་མ་ཕྱིན་དུ་ཟིན་གྱིས་ཀྱང༌། ཕ་གི་ནི་གཙུག་ལག་ཁང་དང༌། །ཆང་
ཚོང་དང་ཚོང་འདུས་ཀྱི་གནས་སོ་ཞེས་ཤེས་པར་ཡང་བྱེད་ཅིང་ཆུད་པར་ཡང་བ་དང་དེས་མཚོན་ནས་ཁོང་དུ་ཆུད་པར་རུང་ངོ༌། །དེ་ལྟར་དེ་བཞིན་དུ་སོ་སོའི་སྐྱེ་བོ་སྒྲིབ་པ་ཆེ་བ་རྣམས་ཀྱི་དེ་བཞིན་གཤེགས་པ་མངོན་སུམ་དུ་མ་མཐོང་དུ་ཟིན་གྱིས་ཀྱང་དེ་བཞིན་གཤེགས་པའི་ཡོན་ཏན་སྟོབས་དང་ཕ་རོལ་ཏུ་ཕྱིན་པ་བཅུ་ལ་སོགས་པའི་ཡོན་ཏན་བཤད་ཅིང་བརྗོད་དེ་མངོན་སུམ་དུ་བསྟན་པ་དང༌། འོ་དེ་ན་འདི་འདྲ་བའི་སྐྱེས་བུ་དམ་པ་ཡོན་ཏན་གྱི་བདག་ཉིད་ཅན་ཞིག་ཡིན་པ་ལྟ་ཞེས་ཀུན་གྱིས་ཤེས་པས་ན་དེ་བས་ན་དེའི་ཕྱིར་མཚོན་པའི་ཕྱིར་བ་དན་ཞེས་བྱ་བ་སྟེ། བ་དན་གྱིས་གཙུག་ལག་ཁང་དང༌། ཚོང་འདུས་ལ་སོགས་པ་ཡང་མཚོན་པ་ལྟར་ཕ་རོལ་ཏུ་ཕྱིན་པ་ལ་སོགས་པ་སྟེ། དེ་བཞིན་གཤེགས་པའི་ཡོན་ཏན་ལ་ཡང་མཚོན་ཅིང་འཇུག་པར་བྱེད་དེ། ཕ་རོལ་ཏུ་ཕྱིན་པའི་ཡོན་ཏན་བཟང་པོ་བ་དན་དང་འདྲ་བས་དེ་བཞིན་གཤེགས་པ་ལ་མཚོན་པར་བྱེད་པ་དེའི་ཕྱིར་དཔེ་དང་དོན་དུ་བཅས་ཏེ། སྙན་པའི་བ་དན་འཇིག་རྟེན་གསུམ་དུ་གྲགས། །ཞེས་སྨོས་སོ། །དེ་ལ་འཇིག་རྟེན་གྱི་སྒྲ་བཤད་དེ། འཇིག་རྟེན་ནི་འཇིག་པ་ཡང་ཡིན་ལ་རྟེན་པ་ཡང་ཡིན་པས་ན་འཇིག་རྟེན་ནོ། །ཡང་ན་འཇིག་རྟེན་གཉིས་ཏེ། སྣོད་ཀྱི་འཇིག་རྟེན་དང༌། བཅུད་ཀྱི་འཇིག་རྟེན་ནོ། །ཡང་ན་འཇིག་རྟེན་གསུམ་ནི་འདོད་པའི་ཁམས་དང༌། གཟུགས་ཡོད་པའི་ཁམས་དང༌། གཟུགས་མེད་པའི་ཁམས་སོ། །དེ་ལ་འདོད་པའི་ཁམས་ནི་ཉི་ཤུ་སྟེ། སེམས་ཅན་དམྱལ་བ་བརྒྱད་དང༌། གླིང་བཞི་དང༌། བྱོལ་སོང་དང༌། ཡི་དགས་དང༌། ལྷའི་ཁམས་དྲུག་གོ །དམྱལ་བ་བརྒྱད་གང་ཞེ་ན། ཡང་སོས་དང༌། ཐིག་ནག་དང༌། ཀུན་དུ་འཇོམས་པ་དང༌། ངུ་འབོད་དང༌། ངུ་འབོད་ཆེན་པོ་དང༌། ཚ་བ་དང༌། རབ་ཏུ་ཚ་བ་དང༌། མནར་མེད་པའོ། །བྱོལ་སོང་དང༌། ཡི་དགས་ནི་དངོས་སུ་ཟད་དོ། །གླིང་བཞི་ལ་འཛམ་བུའི་གླིང་དང༌། ནུབ་ཀྱི་བ་ལང་སྤྱོད་དང༌། བྱང་གི་སྒྲ་མི་སྙན་དང༌། ཤར་གྱི་ལུས་འཕགས་སོ། །འདོད་པའི་ཁམས་ཀྱི་ལྷའི་ཁམས་དྲུག་ལ་གཞན་འཕྲུལ་དབང་བྱེད་པ་དང༌། འཕྲུལ་དགའ་དང༌། དགའ་ལྡན་དང༌། ཐུན་སྤྱོད་པ་དང༌། སུམ་ཅུ་རྩ་གསུམ་པ་དང༌། རྒྱལ་ཆེན་བཞི་པའོ། །གཟུགས་ཡོད་པའི་ཁམས་ན་གནས་བཅུ་དྲུག་ལ་
ཚངས་གནས་པ་དང༌། ཚངས་པའི་མདུན་ན་འདོན་པ་དང༌། འོད་ཆུང་བ་དང༌། ཚད་མེད་འོད་དང༌། འོད་གསལ་བ་དང༌། དགེ་ཆུང་བ་དང༌། ཚད་མེད་དགེ་བ་དང༌། དགེ་རྒྱས་པ་དང༌། སྤྲིན་མེད་པ་དང༌། བསོད་ནམས་ཆེ་བ་དང༌། འབྲས་བུ་ཆེ་བ་དང༌། མི་ཆེ་བ་དང༌། མི་གདུང་བ་དང༌། བདེ་སྣང་བ་དང༌། གྱ་ནོམ་མཐོང་བ་དང༌། འོག་མིན་པའོ། །གཟུགས་མེད་པའི་ཁམས་བཞི་ལ་ནམ་མཁའ་མཐའ་ཡས་སྐྱེ་མཆེད་དང༌། རྣམ་ཤེས་མཐའ་ཡས་སྐྱེ་མཆེད་དང༌། ཅུང་ཟད་ཡོད་མིན་སྐྱེ་མཆེད་དང༌། ཅུང་ཟད་མེད་མིན་སྐྱེ་མཆེད་དོ། །དེ་ལྟར་ན་ཁམས་གསུམ་པོ་དེ་དག་ཏུ་སངས་རྒྱས་ཀྱི་ཡོན་ཏན་ཤིན་ཏུ་སྙན་པར་གྲགས་པས་ན་གྲགས་པ་ཕུན་སུམ་ཚོགས་པ་ཞེས་བྱའོ། །དེ་ལ་ཁ་ཅིག་འདི་སྐད་རྒོལ་བ་ཡང་སྲིད་དེ། གཟུགས་མེད་པའི་ཁམས་ན་གཟུགས་དང་རྣ་བའི་དབང་པོ་ཡང་མེད་ལ། ཚིག་ཏུ་སྨྲ་བ་དང་ཡང་བྲལ་བས་གྲགས་ཞེས་བྱར་ཡང་མི་རུང་ན་ཞེས་ཟེར་ཡང་སྲིད་དེ། དེ་ནི་ཉེས་པ་མེད་དེ་སྔོན་ཐོས་པའི་བག་ཆགས་ཡིད་ལ་ཡོད་པས་ན་རུང་ངོ༌། །ཡང་ན་འཇིག་རྟེན་གསུམ་ཞེས་བྱ་བ་ནི་ལྷ་དང༌། མི་དང༌། ཀླུའི་འཇིག་རྟེན་ལ་བྱ་སྟེ། དེ་དག་ལ་གསུང་རབ་ཀྱི་ཆོས་བཤད་ཅིང་བསྟན་ན་གོའི་གཞན་ལ་སྣོད་དུ་མི་འགྱུར་ཞིང་མི་ཀོ་བས་ན་མ་ཡིན་ནོ་ཞེས་ཁ་ཅིག་དེ་སྐད་ཅེས་ཀྱང་འཆད་དོ། །དམ་པའི་ཆོས་སྨྲ་སེང་གེའི་སྒྲ་བསྒྲགས་པ་ཞེས་པས་བཀའ་ཕུན་སུམ་ཚོགས་པ་དང་སྦྱར་ཏེ། དེ་ལ་དམན་པ་ནི་དེ་བཞིན་གཤེགས་པ་སྟེ། སྒྲིབ་པ་གཉིས་སྤངས་པས་དམ་པ་ཞེས་བྱ་སྟེ། དེས་གསུངས་ཤིང་བསྟན་པའི་ཆོས་ཀྱང་དམ་པ་སྟེ། ཀུན་ནས་བསྐོར་བ་དང་བག་ལ་ཉལ་བའི་ཉོན་མོངས་པ་རྣམ་པ་གཉིས་སྤོང་ཞིང་སེལ་ནུས་པས་དམ་པ་ཞེས་སྨོས་སོ། །དམ་པའི་ཆོས་དངོས་སུ་ན་གང་ལ་བྱ་ཞེ་ན། གསུང་རབ་ཡན་ལག་བཅུ་གཉིས་དང༌། འཕགས་པའི་བདེན་པ་བཞིའི་ཆོས་ལ་བྱའོ། །ཉོན་མོངས་པའི་ཆོས་ལ་རང་གི་མཚན་ཉིད་འཛིན་པའི་ཕྱིར་ཆོས་ཞེས་གདགས་མོད་ཀྱི། དེ་ལ་བྱེ་བྲག་ཏུ་ཉོན་མོངས་པའི་གཉེན་པོར་གྱུར་པས། དམ་པའི་ཆོས་ཞེས་སྨོས་སོ། །ཡང་ན་དམ་པའི་ཆོས་ཞེས་བྱ་བ་རྒྱ་གར་སྐད་དུ་སད་དྷ་རྨཱ་ཞེས་བྱ་སྟེ། སད་ཅེས་བྱ་བ་ནི་ཡོད་པའི་སྒྲར་ཡང་བཤད་དུ་རུང་སྟེ། ཡོད་པར་ལྟ་ན་ཡང་ཇི་ལྟར་གཟུང་ཞེ་ན། མུ་སྟེགས་ཅན་ཁ་ཅིག་གང་གིས་
སྡིག་པ་བྱས་པ་དང༌། གང་གིས་དགེ་བ་བྱས་པའི་འབྲས་བུ་མེད་པར་ལྟ་བའི་ཆོས་དེ་དག་དང་མི་འདྲ་སྟེ། སྡིག་པ་དང་དགེ་བ་བྱས་པའི་འབྲས་བུ་ཆུད་ཟ་བའམ་སྟོར་བར་མི་འགྱུར་ལ། འབྲས་བུ་ཡོད་དོ་ཞེས་སྨྲ་པས་ན། ཡོད་པའི་ཆོས་ཞེས་ཀྱང་བཤད་དོ། །སེང་གེའི་སྒྲ་ནི་དཔེ་བསྟེན་ཏོ། །དེ་བཞིན་གཤེགས་པ་ནི་མིའི་སེང་གེ་ཞེའོ། །དེ་ཡང་ཇི་ལྟར་ན་སེང་གེ་ལ་དཔེ་བླང་ཞེ་ན། རི་དགས་ཀྱི་རྒྱལ་པོ་སེང་གེ་རལ་པ་ཅན་ནགས་དང་གཞོངས་གང་ནས་གང་དུ་རྒྱུ་ཞིང་འགྲོ་བ་དེར་སེང་གེའི་ཕུལ་གྱིས་སྒྲ་འབྱིན་ཅིང་སྒྲོགས་པ་ཙམ་གྱིས་གླང་པོ་ཆེ་དང་རྟ་དང༌། ཝ་ལ་སོགས་ཏེ་རི་དགས་ཕྲ་མོ་རྣམས་ཤིན་ཏུ་སྐྲག་ཅིང་སྡངས་པ་དང༌། བག་འཁུམས་ཤིང་སྤ་གོང་བ་ལྟར་དེ་བཞིན་གཤེགས་པ་སེང་གེ་དང་འདྲ་བས་ཆོས་ཀྱི་གསུང་སྒྲ་སྙན་པ་ཙམ་གྱིས་མུ་སྟེགས་ཅན་རི་དགས་དང་འདྲ་བ་རྣམས་པག་འཁུམས་ཤིང་སྤ་གོང་བ་དང་གཟི་བརྗིད་འཇིལ་བས་དེ་བཞིན་གཤེགས་པ་ནི་སེང་གེ་དང་འདྲའོ་ཞེས་སོ། །བསྒྲགས་ཞེས་བྱ་བ་ནི་གསུངས་ཤེའམ། བསྟན་ཞེ་འམ། བཤད་ཅེས་པའི་ཐ་ཚིག་གོ །དེ་ལྟར་ན་འདི་བཀའ་ཕུན་སུམ་ཚོགས་པ་ཞེས་བྱའོ། །ཕུན་སུམ་ཚོགས་ཞེས་བྱ་བ་ནི་རྫུ་འཕྲུལ་བསམ་གྱིས་མི་ཁྱབ་པས་གསུང་གཅིག་གིས་འགྲོ་བ་ཐ་དད་པའི་སེམས་ཅན་རྣམས་ཡིད་བཞིན་དུ་གོ་བར་མཛད་པས་ན་བཀའ་ཕུན་སུམ་ཚོགས་པ་ཞེས་བྱའོ། །ཐམས་ཅད་མཁྱེན་པ་རིན་ཆེན་མཛོད་བརྙེས་པ་ཞེས་བྱ་བས་ཤེས་རབ་ཁྱད་ཞུགས་ཤིང་གཏེར་ཕུན་སུམ་ཚོགས་པ་བསྟན་ཏེ། འདི་ལ་ཐམས་ཅད་མཁྱེན་པ་ཞེས་བྱ་བ་ནི་མ་ལུས་པར་ཐུགས་སུ་ཆུད་པའི་དོན་ཏེ། འདུས་བྱས་དང་འདུས་མ་བྱས་དང༌། ཟག་པ་དང་ཟག་པ་མེད་པ་དང༌། ཕུང་པོ་དང༌། ཁམས་ལ་སོགས་པའི་ཆོས་རྣམས་སྐྱུ་རུ་རའི་འབྲས་བུ་ལག་མཐིལ་དུ་བཞག་པ་བཞིན་དུ་ཐུགས་སུ་ཆུད་པས་ཐམས་ཅད་མཁྱེན་པ་ཞེས་བྱའོ། །རྣམ་པ་གཞན་དུ་རེ་ཞིག་རྣམ་པ་བཞི་ཞིག་གིས་བསྟན་པར་བྱ་སྟེ། མ་ལུས་པ་དང༌། ཚད་མེད་པ་དང༌། ཐུན་མོང་མ་ཡིན་པ་དང༌། ཕྱིན་ཅི་མ་ལོག་པའོ། །མ་ལུས་པ་ཞེས་བྱ་བ་ནི་ཕྱོགས་འགའ་ཙམ་ཤེས་པ་མ་ཡིན་གྱི་དངོས་པོ་ཀུན་ཆུབ་པར་མཁྱེན་པའོ། །ཚད་མེད་པ་ནི་མདོ་འམ་མ་མོ་འགའ་ཙམ་ཤེས་པ་མ་ཡིན་གྱི་སྡེ་སྣོད་ཚད་མེད་པར་མཁྱེན་པའོ། །
ཐུན་མོང་མ་ཡིན་པ་ནི་ཉན་ཐོས་དང༌། རང་སངས་རྒྱས་དག་དང་ཐུན་མོང་མ་ཡིན་པའི་ཆོས་མ་འདྲེས་པ་བཅོ་བརྒྱད་དང་སྟོབས་བཅུ་དང༌། མི་འཇིགས་པ་བཞི་ལ་སོགས་པ་ཐུགས་སུ་ཆུད་པའོ། །མུ་སྟེགས་ཅན་ཁ་ཅིག་མང་དུ་ཆུད་ཅིང་ཤེས་ཀྱང་ནོར་ཞིང་ཕྱིན་ཅི་ལོག་ཏུ་བཤད་པ་དག་ཡོད་ན། དེ་བཞིན་གཤེགས་པས་ཐུགས་སུ་ཆུད་ཅིང་མཁྱེན་ཀྱང་ནོར་པ་ལྟ་བུ་ཡོད་དམ་མེད་ཅེས་འདྲི་ཡང་སྲིད་དེ་དེ་ན་མེད་དེ་དེ་བཞིན་གཤེགས་པ་ཕྱིན་ཅི་མ་ལོག་པ་ཉིད་དུ་འཆད་དེ། དེ་བས་ན་གཞུང་དག་གི་ནང་ནས་ཀྱང་འཁྲུལ་བ་མེད་པ་ཞེས་འཆད་དོ། །རིན་ཆེན་ཞེས་བྱ་བ་ནི་ཆོས་དཀོན་མཆོག་རིན་པོ་ཆེ་ལ་བྱ་སྟེ། དེ་ཡང་གང་ཞེ་ན། བཤད་པའི་ཆོས་དང༌། སྒྲུབ་པའི་ཆོས་དང༌། འཕགས་པའི་ལམ་རྣམས་ཀྱི་རང་བཞིན་ནོ། །ཡང་ན་ལྷག་པའི་ཚུལ་ཁྲིམས་དང༌། ལྷག་པའི་སེམས་དང༌། ལྷག་པའི་ཤེས་རབ་ལ་ཡང་བྱའོ། །རིན་ཆེན་ཞེས་བྱ་བ་ནི་དཔེ་སྟེ། ཇི་ལྟར་འཇིག་རྟེན་ན་རིན་པོ་ཆེ་ཤིན་ཏུ་དཀོན་པ་དང་རིན་ཆེ་བ་དང༌། མུན་ནག་སེལ་ཅིང་མཚོ་དངས་པར་བྱེད་པ་དང༌། རིན་པོ་ཆེ་སུ་ལ་བདོག་པའི་མི་དེ་བསམ་པ་ཡོངས་སུ་འགྲུབ་པ་དང་འདྲ་བར་ཆོས་དཀོན་མཆོག་རིན་པོ་ཆེ་བསླབ་པ་གསུམ་པོ་ཡང་ཤིན་ཏུ་རྙེད་པར་དཀའ་ཞིང་རིན་ཆེ་བ་དང༌། ཉོན་མོངས་པ་རྣམས་སེལ་ཅིང་རྣམ་པར་གྲོལ་བའི་འབྲས་བུ་ཐོབ་པར་བྱེད་པས་ཆོས་དཀོན་མཆོག་རིན་པོ་ཆེ་ཞེས་བྱའོ། །མཛོད་ཅེས་བྱ་བ་ནི་བཅོམ་ལྡན་འདས་ཉིད་དེ། འདི་འདྲ་བའི་ཆོས་རིན་པོ་ཆེའི་འབྱུང་ཁུང་དུ་གྱུར་པའི་ཕྱིར་མཛོད་ཅེས་བྱའོ། །ཡང་ན་ཐམས་ཅད་མཁྱེན་པས་ཆོས་དཀོན་མཆོག་འབྲས་བུ་འདི་འདྲ་བ་བརྙེས་པས་ན་མཛོད་དང་འདྲ་བས་ན་མཛོད་བརྙེས་པ་ཞེས་ཀྱང་བྱ། མཛོད་ནི་འཕགས་པའི་དགེ་འདུན་ལ་འང་བྱ་སྟེ། ཆོས་དཀོན་མཆོག་གི་མཛོད་དང་གནས་སུ་འོས་པའི་ཕྱིར་མཛོད་ཅེས་སྨོས་ཏེ། དེ་འདྲ་བའི་སློབ་མ་རིན་པོ་ཆེའི་སྣོད་དུ་མཛོད་དང་འདྲ་བའི་བཅོམ་ལྡན་འདས་ཀྱིས་འཁོར་དུ་བརྙེས་པས་ན། ཐམས་ཅད་མཁྱེན་པ་རིན་ཆེན་མཛོད་བརྙེས་པ་ཞེས་བྱའོ། །དེ་ལྟར་ན་ནོར་གྱི་གཏེར་དང་འདྲ་བས་གཏེར་ཕུན་སུམ་ཚོགས་པ་ཞེས་བྱའོ། ཞབས་ལ་ཚངས་དབང་གཙུག་གི་ནོར་བུས་གཏུགས། །ཞེས་བྱ་བ་
པས་འཁོར་ཕུན་སུམ་ཚོགས་པ་བསྟན་ཏེ། དེ་ལ་མུ་སྟེགས་ཅན་ཁ་ཅིག་ཚངས་པ་དང་བརྒྱ་བྱིན་ལ་བཅོམ་ལྡན་འདས་ཐམས་ཅད་མཁྱེན་པ་ཡིན་ནོ་ཞེས་ལྟ་བ་དག་ཡོད་དེ། དེ་ལྟར་ལྟ་བ་སྤང་ཞིང་ཐམས་ཅད་མཁྱེན་པ་དེ་དག་ལས་འཕགས་པར་བསྟན་པའི་ཕྱིར་འཇིག་རྟེན་པའི་གཙོ་བོ་མཆོག་ཕུལ་ཚད་མར་བྱ་བ་ཚངས་པ་མི་མཇེད་ཀྱི་བདག་པོ་དང༌། བརྒྱ་བྱིན་ལྷའི་རྒྱལ་པོ་སྟེ། ཚངས་པ་ཡང་བྱམས་པ་དང༌། སྙིང་རྗེ་དང༌། དགའ་བ་དང༌། བཏང་སྙོམས་དང༌། ཚད་མེད་པ་བཞི་དང་ལྡན་པ་ཡིན་ལ། བརྒྱ་བྱིན་ཡང་ལྷའི་དབང་པོ་ཡིན་ཏེ། འཇིག་རྟེན་ན་གྲགས་པའི་མཚན་མ་རྣམས་ཀྱིས་ཀྱང་རང་གི་ལུས་ཀྱི་ནང་ན་དམ་པ་སྤྱི་བོས་ཀྱང་བཏུད་ལ། བསོད་ནམས་ཀྱིས་ཐོབ་པའི་ནོར་བུ་རིན་པོ་ཆེ་རྒྱན་དང་བཅས་པས་དེ་བཞིན་གཤེགས་པའི་ཞབས་ལ་གཏུགས་ཤིང་ཕྱག་འཚལ་བ་ལ་བལྟས་ན་ལྷག་པར་ཡོན་ཏན་དང་ལྡན་ཞིང་མངའ་དབང་ཕུན་སུམ་ཚོགས་པའམ། ལྷ་དང་བཅས་པའི་འཇིག་རྟེན་གྱིས་མཆོད་ཅིང༌། བསྙེན་བཀུར་བྱེད་པར་འོས་པས་ན། ཞབས་ལ་ཚངས་དབང་གཙུག་གི་ནོར་བུས་གཏུགས། །ཞེས་སྨོས་པ་ཡིན་ཏེ། ཐམས་ཅད་མཁྱེན་པ་ཉིད་དུ་འོས་ཤིང་བསྟན་ཏོ། །ཡང་གཅིག་ཏུ་ན་དེ་བཞིན་གཤེགས་པའི་ཞབས་ཀྱིས་ཚངས་པ་དང༌། དབང་པོའི་གཙུག་གི་ནོར་བུ་ལ་རེག་པར་བྱས་སོ་ཞེས་པར་རྒྱ་གར་སྐད་ལས་དྲང་དུ་ཡང་རུང་ངོ༌། །དེ་ལྟར་ན་བརྒྱ་བྱིན་དང་དབང་པོ་ལ་སོགས་ཏེ་ལྷ་དང་བཅས་པའི་འཇིག་རྟེན་གྱིས་མཆོད་ཅིང་བསྙེན་བཀུར་བ་དང༌། འཁོར་མང་པོ་དང་ལྡན་པས་ན་འཁོར་ཕུན་སུམ་ཚོགས་པ་ཞེས་བྱའོ། །སྡུག་བསྔལ་རྒྱ་མཚོ་ཕ་མཐའ་མེད་རྒལ་བ། །ཞེས་བྱ་བ་ཤློ་ཀ་གཅིག་གིས་ནི་ཡོན་ཏན་ཕལ་ལས་ཁྱད་ཞུགས་པ་བསྟན་ཏེ། སྡུག་བསྔལ་ནི་སྐྱེ་བ་དང༌། རྒ་བ་དང༌། འཆི་བ་ལ་སོགས་ཏེ་སྡུག་བསྔལ་གསུམ་དང་བརྒྱད་ལ་བྱའོ། །ཡང་ན་ལས་དང་ཚེ་དང་ཉོན་མོངས་པ་ཉིད་འཁོར་བའི་རྒྱུ་ཡིན་པས་དེ་ཉིད་སྡུག་བསྔལ་ཡིན་པར་བསྟན་ཏེ། སྡུག་བསྔལ་དེ་ཡང་ཤིན་ཏུ་རྒྱ་ཆེ་ཞིང་མཐའ་ཡས་པའི་ཕྱིར་དཔེ་རྒྱ་མཚོ་དང་འདྲ་ཞེའོ། །ཕ་མཐའ་མེད་པ་ནི་འཁོར་བ་ལ་ཐོག་མ་དང་ཐ་མ་མེད་པའི་ཐ་ཚིག་སྟེ།
དེ་ལྟ་བུ་ལས་སུས་རྒལ་ཞེ་ན། དེ་བཞིན་གཤགས་པ་འགྲོ་བའི་གཙོ་བོས་རྒལ་ཏེ། དེ་བས་ན་བརྒྱ་བྱིན་དང་ཆངས་པ་ནི་སྡུག་བསྔལ་གྱི་རྒྱ་མཚོ་ཉིད་ལ་གནས་པས། དེ་དག་ལས་བཅོམ་ལྡན་འདས་ཁྱད་ཞུགས་པའི་ཕྱིར་སྤྱི་བོས་ཕྱག་འཚལ་ལོ་ཞེས་སྨོས་སོ། །ཡང་ན་འགྲོ་བའི་གཙོ་ནི་སྐྱེ་བོ་ངན་སོང་དུ་འགྲོ་བ་ལས་སྐྱོབ་ཅིང་དགེ་བ་བཅུའི་ཆོས་ལས་བླན་ཏེ། བདེ་བའི་ཆོས་རྣམས་སྟོབས་ཤིང་ཐར་པར་འདྲེན་པས་ན་ཡོན་ཏན་འདི་ལྟ་བུ་དང་ལྡན་ཞིང་སྐྱེ་བ་གཞན་ལ་མེད་པས། འགྲོ་བའི་གཙོ་ལ་ཕྱག་འཚལ་ལོ། །ཞེས་སྨོས་ཏེ། འདི་འདྲ་བའི་ཡོན་ཏན་གྱི་བདག་ཉིད་ཅན་གྲགས་པ་ཕུན་སུམ་ཚོགས་པ་དང་རིན་པོ་ཆེའི་གཏེར་དང་འདྲ་བར་འཁོར་མང་པོ་མངའ་པ་སྡུག་བསྔལ་རྒྱ་མཚོ་ལས་རྒལ་བ་ཡོན་ཏན་གྱི་བདག་ཉིད་ཅན་ལ་ཕྱག་འཚལ་ཞིང་བསྟོད་པ་བརྩམས་ནས་གདོད་སོ་སོར་ཐར་པ་ལ་བསྟོད་པ་བརྩམ་མོ་ཞེས་འཆད་དོ། །དེ་ལ་ཕྱག་འཚལ་བ་ནི་ལུས་དང༌། ངག་དང༌། ཡིད་གསུམ་གྱིས་ཕྱག་འཚལ་བལ་བྱའོ། །དེ་ལྟར་ཕྱག་འཚལ་བ་ཡང་ཅིར་དགོངས་ཤེ་ན། བླ་མ་ལ་མཐུ་བསྟན་པས་བགེགས་དང་བར་ཆད་ཀྱིས་མི་ཟུག་ཅིང་བརྩམ་པ་མཐར་ཕྱིན་པར་འགྱུར་རོ་ཞེའོ། །དེ་ལ་སློབ་དཔོན་ཁ་ཅིག་ན་རེ་སྙན་པའི་བ་དན་ཞེས་བྱ་བ་ནས། ཞབས་ལ་ཚངས་དབང་གཙུག་གི་ནོར་བུས་གཏུགས། །ཞེས་བྱ་བའི་བར་དུ་བཅོམ་ལྡན་འདས་གཞན་གྱི་དོན་ཕུན་སུམ་ཚོགས་པར་མཛད་པའི་སྒོ་ནས་བསྟོད་པའོ། །སྡུག་བསྔལ་རྒྱ་མཚོ་ཕ་མཐའ་རྒལ། །ཞེས་བྱ་བ་ནས། འགྲོ་བའི་གཙོ་ལ་ཕྱག་འཚལ་ལོ། །ཞེས་བྱ་བའི་བར་དུ་རང་གི་དོན་ཕུན་སུམ་ཚོགས་པ་ལ་བསྟོད་པའོ། །ཐམས་ཅད་མཁྱེན་པའི་བསླབ་ཚིག་ཞེས་པ་ནས། འཕགས་པའི་ཚོགས་ཀྱི་དབུས་སུ་དབྱེ། །ཞེས་བྱ་བའི་བར་དུ་སོ་སོར་ཐར་པ་ལ་བསྟོད་ཅིང་བསྟན་པར་དམ་བཅས་པ་སྟེ། དེ་བས་ན་བདག་དང་གཞན་གྱི་དོན་ཕུན་སུམ་ཚོགས་པའི་ཐམས་ཅད་མཁྱེན་པ་ལ་བསྟོད་ཅིང་ཕྱག་འཚལ་ནས། སོ་སོར་ཐར་པ་ལ་བསྟོད་ཅིང་བསྟན་པར་བྱའོ་ཞེའོ། །ཇི་ལྟར་ན་སོ་སོར་ཐར་པའི་བསླབ་པའི་ཚིག་ལ་བསྟོད་ཅེ་ན། དཀོན་མཆོག་ཅེས་བྱ་བ་སྟེ། རྒྱ་གར་སྐད་དུ་རཏྣ་ཞེས་བྱ་བ་སྟེ། རཏྣ་ནི་རིན་པོ་ཆེ་ལ་བྱ་བས་རིན་པོའི་སྣོད་དམ་རིན་པོ་
ཆེའི་མཛོད་དབྱེ་ཞིང་གཞན་ལ་བསྟན་པ་ཡང་དཔེར་ན་བྱ་ན་རིན་པོ་ཆེ་ལ་མཁས་པའམ་རིན་ཐང་འདེབས་ཤེས་ཤིང་སྔོན་ཆད་མཐོང་བའི་མདུན་དུ་དབྱེ་ཞིང་བསྟན་པ་ཡིན་གྱི། རིན་པོ་ཆེ་མ་མཐོང་བ་དང་མི་ཤེས་པའི་མདུན་དུ་བསྟན་ཅིང་ཕྱིར་ཟིན་གྱིས་ཀྱང་བཟང་ངན་བྱེ་བྲག་མི་ཕྱེད་ལ། ཅིར་ཡང་མི་མཁོ་བ་དང་མཚུངས་ཏེ། ཆོས་དཀོན་མཆོག་རིན་པོ་ཆེ་ཡང་འཕགས་པའི་གང་ཟག་ཚུལ་ཁྲིམས་འདི་ལ་འཇུག་ཅིང་སྤྱོད་པར་འགྱུར་བ་དེ་དག་ལ་དབྱེ་ཞིང་བསྟན་པར་བྱའོ། དེ་ལ་མི་འཇུག་པའི་གང་ཟག་ཀུན་ལ་བསྟན་ཀྱང་དགོས་པ་མེད་པའི་ཕྱིར་འཕགས་པའི་ཚོགས་ཀྱི་དབུས་སུ་དབྱེ་བར་བྱའོ་ཞེས་སྨོས་ཏེ། དེས་ནི་སོ་སོར་ཐར་པའི་བསླབ་ཚིག་ལ་བསྟོད་ཅིང་དམ་བཅས་པའོ། །ཐམས་ཅད་མཁྱེན་པ་ནི་གོང་མ་འདྲ། དེས་བསྟན་པས་ན་བསླབ་པ་ཚུལ་ཁྲིམས་དེ་ནི་བསླབ་ཚིག་གོ །དཀོན་མཆོག་ནི་བསླབ་ཚིག་དེ་དཀོན་ཞིང་མཆོག་དམ་པ་ཡིན་པས་ན་དཀོན་མཆོག་གོ །སྣོད་དང་འདྲ་སྟེ་རྣམ་པར་དབྱེ་བ་དང༌། དངོས་པོ་ལ་སོགས་པའི་གཞིའམ་གནས་སུ་གྱུར་བའི་ཕྱིར་སོ་སོ་ཐར་པ་ནི་སྣོད་ཅེས་སྨོས་སོ། །དེ་ཡན་ཆད་སངས་རྒྱས་ལ་བསྟོད་པ་དང་སྦྱར་རོ། །འདི་མན་ཆད་ཆོས་ལ་བསྟོད་པ་དང་སྦྱར་ཏེ། སངས་རྒྱས་ཀྱི་ནི་འདུལ་བ་མཚོ། །ཞེས་བྱ་བ་ལ་སོགས་པ་སྨོས་སོ། །དེ་ལ་སངས་རྒྱས་ནི་མ་རིག་པའི་གཉིད་ལས་སངས་ཤིང་མཁྱེན་པར་བགྱི་བའི་སྤྱོད་ཡུལ་ལ་པད་མོ་ཁ་རྒྱས་པ་བཞིན་དུ་རྒྱས་པ་ལ་བྱ། ཡང་ན་རྒྱ་རྒར་སྐད་དུ་རྒྱས་ཞེས་བྱ་བའི་ཉི་ཚེའི་སྒྲ་ཡོད་དེ། སྒྲིབ་པ་རྣམས་ཡོངས་སུ་བྱང་ནས། མཁྱེན་པར་བྱ་བའི་ཡུལ་ལ་མིག་དང་འདྲ་བའི་ཡེ་ཤེས་ཀྱི་གསལ་ཞིང་རྒྱས་པར་འགྱུར་བའི་ཕྱིར་རྒྱས་པར་ཞེས་ཀྱང་བྱའོ། །ཀྱི་ཞེས་བྱ་བ་ནི་དགར་བའི་ཚིག་སྟེ། མུ་སྟེགས་ཅན་གཏོགས་འདོད་པ་ལ་སོགས་པའི་མ་ཡིན་གྱི་སངས་རྒྱས་ཀྱི་འདུལ་བ་མཚོ་དང་འདྲའོ་ཞེས་པའི་ཐ་ཚིག་གོ །འདུལ་བ་ཞེས་བྱ་བ་ནི་མདོ་སྡེ་དང་མ་མོ་དག་ལས་ཁྱད་པར་དུ་བསྟན་པའོ། །ཡང་ན་ཡོན་ཏན་གྱི་སྒོ་ནས་འདུལ་བ་ཞེས་བྱ་བ་སྨོས་ཏེ། ཀུན་ནས་བསྐོར་བའི་ཉོན་མོངས་པ་འདོན་ཞིང་འདུལ་བར་བྱེད་པས་ན་འདུལ་བའོ། །ཡང་ན་འདོད་ཆགས་དང༌།
ཞེ་སྡང་དང༌། གཏི་མུག་གི་གཉེན་པོར་འགྱུར་ཏེ་འདུལ་བས་ན་འདུལ་བའོ། །འོ་ན་འདི་ལྟ་བུའི་འདུལ་བའི་ལེའུ་མང་ཉུང་ཇི་ཙམ་ཅིག་ཡོད་ཅེ་ན། ཚད་བཟུང་ཞིང་དཔག་དཀའ་བར་བསྟན་པས་དཔེ་རྒྱ་མཚོ་དང་འདྲའོ་ཞེས་སོ། །མཚོ་དང་འདྲ་བར་བསྟན་པ་ནི་ཟབ་པ་དང་རྒྱ་ཆེ་བའི་སྒོ་ནས་བསྟན་པའོ། ཡང་ན་ཇི་ལྟར་ན་མཚོ་ལས་ནོར་བུ་རིན་པོ་ཆེ་འབྱུང་བ་ལྟར་ཚུལ་ཁྲིམས་འདུལ་བའི་གཞི་ལས་ཡོན་ཏན་གྱི་འབྲས་བུ་ཡིད་བཞིན་དུ་འབྱུང་བས་ན་མཚོ་དང་འདྲའོ་ཞེས། མ་ལུས་ཞེས་སྨོས་པ་ནི་འོག་ནས་འགྲེལ་ཏེ། གཏིང་དང་ཕ་རོལ་དུ་མེད་པར་གནས་དང་སྙིང་གི་སྙིང་པོ་ཞེས་པ་དང་སྦྱར་ཏེ། གཏིང་དང་ཕ་རོལ་མེད་པ་ནི་མཚོ་དེ་ཇི་ལྟར་གཏིང་དཔག་དཀའ་ཞིང་ཕ་རོལ་མེད་པ་ལྟར་འདུལ་བ་ཡང་ཚད་གཟུང་དཀའ་བའི་ཕྱིར་རོ། ཕ་རོལ་མེད་པ་ནི་འདི་ནི་ཕ་རོལ་ཏོ། །འདི་ནི་ཚུལ་རོལ་ཏོ་ཞེས་བསྙད་པ་དང་མཐོང་བར་མི་ནུས་པའི་ཕྱིར་ཏེ། འདུལ་བ་ཡང་འདི་ནི་ཐོག་མའི་མཐའོ། །འདི་ནི་ཐ་མའི་མཐའོ་ཞེས་ཚད་མི་ཟིན་པའི་ཕྱིར་རོ། །ཡང་ན་འདུལ་བའི་ཡོན་ཏན་དེ་ལྟར་དཔག་ཅིང་ཚད་གཟུང་བའམ་གཞལ་བར་བྱ་བ་ལ་ཡང་བྱའོ། །གནས་དང་སྙིང་གི་སྙིང་པོ་ནི་འདུལ་བ་མ་ལུས་པ་ཞེས་འདིར་སྦྱར་བར་བྱ་སྟེ། མ་ལུས་པ་ནི་རྣམ་པར་དབྱེ་བ་དང༌། དངོས་པོ་དང༌། ཕྲན་ཚེག་ལ་སོགས་པ་དེ་དག་མ་ལུས་པའི་གནས་སམ། ལུས་དྲན་པར་གྱུར་བས་ན་དེ་བས་ན་སོ་སོར་ཐར་པ་ནི་གནས་ཞེས་བྱའོ། །སྙིང་དང་ཞེས་བྱ་བ་ནི་དམ་པ་ལྟ་བུའི་དཔེ་སྟེ། དཔེར་ན་ལུས་ཀྱི་ནང་ན་དམ་པ་ནི་སྙིང་ངོ༌། །དེ་དང་འདྲ་བར་འདུལ་བ་ཐམས་ཅད་ཀྱི་སྙིང་དུ་གྱུར་བའམ། དམ་པ་ལྟ་བུར་གྱུར་པའི་ཕྱིར་དཔེ་སྙིང་དང་འདྲའོ་ཞེའོ། །སྙིང་པོ་ནི་ཡོངས་སུ་ཡང་གཙོ་བོ་ལྟ་བུའམ། མཐུ་དང་ལྡན་ཞིང་གཞིག་པར་དཀའ་བ་ལྟ་བུའམ་བརྟག་བཟོད་པ་ལྟ་བུའི་ཚིག་སྟེ། ཇི་ལྟར་གཙོ་བོ་ལྟ་བུར་ཞེ་ན། འདུལ་བ་ཐམས་ཅད་ཀྱི་ནང་ན་སོ་སོར་ཐར་པ་ནི་གཙོ་བོའམ་མཆོག་ཏུ་གྱུར་པ་ལྟ་བུའོ། །ཇི་ལྟར་བརྟན་ཞིང་གཞིག་པར་དཀའ་ཞེ་ན། དགེ་སྦྱོང་དང་མུ་སྟེགས་ཅན་ལ་སོགས་པ་ལོག་པར་ལྟ་བ་རྣམས་ཀྱིས་མི་ཕྱེད་ཅིང་གཞིག་པར་མི་ནུས་པའི་ཕྱིར་རོ། །ཇི་ལྟར་ན་བརྟག་བཟོད་པར་བལྟ་ཞེ་ན། དེ་བཞིན་
གཤེགས་པའི་འདུལ་བ་ལ་སྐྱོན་དང༌། དྲི་མ་དང༌། ལྷད་ཀྱིས་མ་ནོར་བས་རང་བཞིན་གྱིས་ཡོངས་སུ་དག་པའི་ཕྱིར་འཇིག་རྟེན་པའི་ཐ་སྙད་ཀྱིས་ཆོས་བརྟག་མི་བཟོད་པ་དང་མི་འདྲ་བས་སྙིང་པོ་ཞེས་བྱའོ། །གནས་དང་སྙིང་པོ་ནི་དོན་གཅིག་སྟེ་ཡོན་ཏན་གྱི་རྣམ་གྲངས་སོ། །དེ་ལྟ་བུ་གང་ཡིན་ཞེ་ན། མདོ་ལས་སོ་སོར་ཐར་པ་ཡིན་ནོ་ཞེས་སྨོས་ཏེ། དེས་ནི་འདུལ་བ་གཞན་དང༌། སྡེ་སྣོད་གཞན་ལས་ཁྱད་པར་དུ་སོ་སོར་ཐར་པ་འདི་ཡིན་ནོ་ཞེས་བསྟན་ཏོ། །དེ་ལ་སོ་སོར་ཐར་པའི་སྒྲ་ནི་ཉོན་མོངས་པ་དང༌། ངན་སོང་གསུམ་དང༌། ལྟུང་བ་རིས་ལྔའི་ཉེས་པ་ལས་ཐར་པར་བྱེད་པའམ། ཉེས་པ་འདི་རྣམས་འདུལ་བར་བྱེད་པས་ན་ཐར་པ་ཞེས་ཀྱང་བྱ། འདུལ་བ་ཞེས་ཀྱང་བྱའོ། །ཡང་ན་སྐྱེ་བོ་ཐ་དད་པ་རྣམས་སོ་སོ་ནས་སྡོམ་པ་ལ་གནས་པ་དེ་དག་སོ་སོར་ཐར་པའི་འབྲས་བུ་ཐོབ་པར་བྱེད་པས་ན་སོ་སོར་ཐར་པ་ཞེས་ཀྱང་བྱའོ། །ཡང་ན་རྒྱ་གར་སྐད་ལས་པྲ་ཏི་ཞེས་བྱ་བའི་ཕྱིར་རམ། ཀུན་དུ་བའི་སྒྲ་ཡང་རུང་སྟེ། ཐར་པའི་ཕྱིར་རམ། ཀུན་དུ་ཐར་པ་སྟེ། ཀུན་ནས་བསྐོར་བའི་བག་ལ་ཉལ་བའི་ཉོན་མོངས་པ་ལས་ཐར་པའི་ཕྱིར་རོ། །དེ་ལ་ཁ་ཅིག་འདི་སྐད་རྟོག་ཀྱང་སྲིད་དེ། བག་ལ་ཉལ་བའི་ཉོན་མོངས་པ་ཡེ་ཤེས་ཀྱིས་སྤོང་བ་ཡིན་ན་ཇི་ལྟར་འདུལ་བས་སྤོང་ཞེས་བྱ། སྤོང་ཞིང་བག་ལ་ཉལ་བའི་ཉོན་མོངས་པ་ཕྲ་མོ་རྣམས་ཡེ་ཤེས་ཀྱིས་སྤོང་ངོ་ཞེས་འབྱུང་མོད་ཀྱི། འདུལ་བ་ཡང་ཆོས་ཐམས་ཅད་ཀྱི་གཞི་དང་གནས་སུ་གྱུར་པས་ཉོན་མོངས་པ་ཡང་བརྒྱུད་དེ་སྤོང་བ་དང༌། མངོན་སུམ་དུ་སྤོང་བ་དང་གཉིས་ཡོད་པས་ན་སྐབས་འདིར་འདུལ་བ་ཡང་བརྒྱུད་དོ་སྤང་བའི་རྒྱུར་འགྲོ་བས་ཉེས་པ་མེད་དོ། །དེ་བས་ན། ཚུལ་ཁྲིམས་ལ་ནི་གནས་བྱ་ཞིང༌། །ཏིང་ངེ་འཛིན་དག་མངོན་པར་བསྒྲུབ། །ཅེས་ཚིགས་སུ་བཅད་པ་ལས་འབྱུང་བ་དག་ཡིན་ཏེ། ཚུལ་ཁྲིམས་ས་དང་འདྲ་བའི་གཞི་མེད་དུ་མི་རུང་བའི་ཕྱིར་རོ། །འོ་ན་མདོ་སྡེ་དང་མངོན་པའི་ཆོས་ཀྱང་སོ་སོར་ཐར་པ་ཞེས་མི་གདགས་སམ་ཞེས་ཟེར་ཡང་སྲིད་དེ། དེ་དག་ལས་ཁྱད་དུ་བསྟན་པའི་ཕྱིར་རྣམ་པ་བདུན་ཞིག་གིས་མདོ་སྡེ་དེ་དག་ལས་བྱེ་བྲག་ཏུ་བསྟན་ཏེ། །རྣམ་པ་བདུན་པོ་ནི་འདུལ་བའི་ལུས་དང༌། འདུལ་བའི་གནས་དང༌། འདུལ་བའི་དམིགས་པ་དང༌། འདུལ་
བའི་རང་བཞིན་དང༌། འདུལ་བའི་མཚན་ཉིད་དང༌། འདུལ་བའི་གླེང་གཞི་དང༌། འདུལ་བའི་འབྲས་བུའོ། །དེ་ལ་ལུས་ནི་སོ་སོར་ཐར་པ་འདི་འདུལ་བ་ཀུན་གྱི་ལུས་ཡིན་ནོ་ཞེའོ། །འདུལ་བའི་གནས་ནི་སོ་སོར་ཐར་པ་དེ་ཉིད་འདུལ་བའི་གནས་སུ་བལྟ་བའམ། ལས་བརྒྱ་རྩ་གཅིག་དང་གསོལ་བ་དང་ཞུ་བའི་གནས་སོ་ཞེའོ། །འདུལ་བའི་དམིགས་པ་ནི་ཉེས་བྱས་ཕྲ་མོ་ཡན་ཆད་ལས་ལྷག་པར་བསམ་པས་བསྲུང་ཞིང་བག་བྱེད་པའི་ཕྱིར་རོ། །ལྟུང་བ་རིས་ལྔ་ནི་འདུལ་བའི་རང་བཞིན་ནོ། །མཚན་ཉིད་ནི་ལས་བརྒྱ་རྩ་གཅིག་ལ་བྱའོ། །འདུལ་བའི་གླེང་གཞི་ནི་ཡུལ་མཉན་དུ་ཡོད་པ་ལ་སོགས་ཏེ། ཡུལ་གང་དུ་བསླབ་པ་བཅས་པ་ལ་བྱའོ། །འདུལ་བའི་འབྲས་བུ་ནི་རྣམ་པར་གྲོལ་བའི་འབྲས་བུ་ཐོབ་པ་ལ་བྱའོ། །རྣམ་པ་བདུན་པོ་དེས་མདོ་སྡེ་དག་ལས་བྱེ་བྲག་ཏུ་བསྟན་ཏོ། །འདི་ནི་དམ་ཆོས་རྒྱལ་པོ་ཡི། ཞེས་པ་དམ་ཆོས་རྒྱལ་པོ་ནི་སོ་སོར་ཐར་པ་ཉིད་ལ་བྱའོ། །ཅིའི་ཕྱིར་མདོ་སྡེ་དང་མངོན་པའི་ཆོས་ལ་རྒྱལ་པོ་ཞེས་མི་བྱའི། འདུལ་བ་ཉིད་ཚེ་ལ་རྒྱལ་པོར་བྱ་ཞེ་ན། འདུལ་བ་ནི་ཆོས་ཐམས་ཅད་ཀྱི་རྟེན་ཏམ་རྩ་བར་གྱུར་ཏེ། ཆོས་ཐམས་ཅད་འདི་ལ་བརྟེན་ཅིང་སྐྱེ་བས་ན་གཙོ་བོར་གྱུ་པའི་ཕྱིར་རྒྱལ་པོ་ཞེས་བྱའོ། །ཡང་ན་དམ་པའི་ཆོས་ཀྱི་རྒྱལ་པོ་ཞེས་བྱ་བ་དེ་བཞི་གཤེགས་པ་ཉིད་ལ་བྱ་སྟེ། ཅིའི་ཕྱིར་ཞེ་ན། ཆོས་ཐམས་ཅད་ལ་མངའ་དབང་མཛད་ཅིང་བདག་པོར་གྱུར་བས་ལྷ་དང་མི་ལ་སོགས་པ་རྣམས་ཐམས་ཅད་ཀྱང་ལུང་དེ་ལས་ནོད་པའི་ཕྱིར་རྒྱལ་པོའོ། །དེ་ལྟ་བུའི་ཆོས་ནི་དམ་པ་བས་ན་དམ་པའི་ཆོས་སོ། །མི་བྲི་བསྡུས་པ་ཞེས་བྱ་བ་ནི་སྔོན་དེ་བཞིན་གཤེགས་པ་མངོན་པར་བྱང་ཆུབ་ནས་ལོ་བཅུ་གསུམ་དུ་སོགས་པ་ན་འདུལ་བ་སྐྱོན་མེད་པ་ལ་རྨ་བྱུང་ནས་འདུལ་བ་ལ་བསླབ་པའི་གནས་བཅས་པ་ཡང་བྱུང་མོད་ཀྱི། དེའི་ཚེ་འཕགས་པའི་དགེ་འདུན་དག་ཀྱང་དབང་པོ་རྣོ་བས་བསླབ་པ་ཡང་ཡིད་ལ་འཛིན་པ་ཙམ་དུ་ཟད་ཀྱི། ཡི་གེར་བྲིས་པ་མེད་པས་མི་བྲི་བསྡུས་པ་ཞེས་སྨོས་པ་ལ་བྱའོ། །ཡང་ན་མདོ་སྡེ་དང༌། མངོན་པའི་ཆོས་ནི་སྡེ་སྣོད་གཅིག་ནས་གཅིག་ཏུ་བརྒྱུད་ཅིང་གནས་པར་བྱ་བ་དང༌། དུས་དུས་སུ་ཀླག་ཅིང་མཆོད་པའི་རྟེན་དུ་བྱ་བའི་ཕྱིར་བྲི་བ་ཡིན་གྱི་འདུལ་བ་རྣམས་ནི་བྲིས་ཏེ་ཀླག་པའམ་བལྟ་བ་ཙམ་དུ་བྱ་བ་མ་ཡིན་གྱི།
ནང་ནུབ་གཉིས་སུ་ཡིད་ལ་དྲན་ཞིང་འདྲིས་པར་གཟུང་བར་བྱའོ་ཞེས་བྱ་བའི་ཐ་ཚིག་ཀྱང་ཡིན་ནོ། །དེའི་ཕྱིར་མི་བྲི་བསྡུས་པ་ཞེས་ཀྱང་བྱའོ། །ཡང་ན་མི་བྲི་བ་ཡང་ཡིན་ལ་བསྡུས་པ་ཡང་ཡིན་ཏེ་མི་བྲི་བ་ནི་སྔ་མ་བཞིན། །བསྡུས་པ་ནི་འདུལ་བ་འབུམ་གྱི་དོན་སོ་སོར་ཐར་པའི་ནང་དུ་བསྡུས་སོ་ཞེའོ། །སུས་བསྡུས་ཤེ་ན། ཆོས་ཀྱི་བདག་པོ་བཅོམ་ལྡན་འདས་ཀྱིས་བཤད་དོ་ཞེའོ། །འདི་ནི་དགེ་སློང་ཚོང་པའི་ཞེས་བྱ་བ་ནི་སོ་སོར་ཐར་པ་ཉིད་ལ་བྱའོ། །དགེ་སོང་ཞེས་བྱ་བ་ནི་རྣམ་པ་ལྔ་སྟེ། ཁས་འཆེས་པའི་དགེ་སློང་དང༌། སློང་བའི་ཕྱིར་དག །མིང་གི་ཕྱིར་དང༌། ཉོན་མོངས་པ་དང་བྲལ་བའི་ཕྱིར་དང༌། གསོལ་བ་དང་ལས་ཀྱིས་བསྙེན་པར་རྫོགས་པའི་དགེ་སློང་སྡེ་ལྔ་འབྱུང་མོད་ཀྱི་སྐབས་འདིར་གང་གསོལ་བ་དང་ལས་ཀྱིས་བསྙེན་པར་རྫོགས་ཤིང་བསླབ་པ་ཆགས་པ་སྐྱོན་མེད་པ་ལ་དགེ་སློང་ཞེས་བྱ་སྟེ། ཅིའི་ཕྱིར་འདི་འབའ་ཞིག་ལ་དགེ་སློང་ཞེས་བྱའི་གཞན་མ་ཡིན་ཞེ་ན། ཉོན་མོངས་པ་དང་བྲལ་བའི་དགེ་སློང་ནི་མྱ་ངན་ལས་འདས་པའི་འབྲས་བུ་རྙེད་ཟིན་པས་བསླབ་ཟོང་ལ་བརྟེན་ཅིང་བསྒྲུབ་མི་དགོས་པའི་ཕྱིར་ཞེའོ། །གཞན་ནི་བསླབ་པ་ལ་མི་གནས་ཤིང་མེད་པས་ན་འདིར་བསླབ་ཟོང་དང་ལྡན་པས་ཞེས་སྨོས་པས་གཞན་ལ་མི་རིགས་སོ། །ཚོང་པ་ཞེས་སྨོས་པ་ནི་དགེ་སློང་བསླབ་པ་ལ་བརྟེན་ཅིང་ཚུལ་ཁྲིམས་ལ་གནས་པས་ཐར་པ་མྱ་ངན་ལས་འདས་པའི་འབྲས་བུ་སྒྲུབ་ཅིང་ཁེ་འཚོལ་བའི་དཔེ་སྟེ། ཚོང་པ་ཟོང་དང་ལྡན་པས་ནོར་གྱི་རྣམ་པ་ཁེ་ཚོལ་བ་དང་འདྲ་བར་དགེ་སློང་ཡང་ཚུལ་ཁྲིམས་མ་ཉམས་མ་རལ་པའི་ཟོང་གིས་ནི་ཐར་པ་མྱ་ངན་ལས་འདའ་བའི་འབྲས་བུ་ཁེ་བཙལ་དུ་ཡོད་ཀྱི། བསླབ་པ་ཉམས་ཤིང་རལ་བ་དག་གིས་མ་ཡིན་ཏེ། རྣམ་པར་གྲོལ་བའི་འབྲས་བུ་ཚོལ་བའི་ཟོང་བསླབ་ཚིག་གིས་བྱས་པས་ན། དགེ་སློང་ཚོང་པ་འདྲའོ་ཞེའོ། །བསླབ་ཟོང་ནི་ཟོང་དང་འདྲ་བའི་ཕྱིར་རོ། །ཚོང་འདུས་ཞེས་བྱ་བ་ནི་ཚོང་པ་ནོར་སྣ་ཚོགས་ཡོད་པ་དེར་གནས་པའམ། ཐམས་ཅད་འདུ་ཞིང་སོ་སོར་རང་རང་ཇི་ལྟར་འདོད་པ་བཞིན་ཁེ་རྙེད་པ་ལྟར་བསླབ་ཚིག་ཚོང་འདུས་དང་འདྲ་བ་དེ་ལ་གནས་ཤིང་བརྟེན་ན། རིགས་དང་ཁ་དོག་དང༌། མིའི་འབྱོར་ལྡན་དང༌། མཐོ་རིས་བཟང་འགྲོའི་བདེ་བའི་རྣམ་པ་དང༌། རྣམ་པར་གྲོལ་
བའི་འབྲས་བུ་དང༌། མྱ་ངན་ལས་འདས་པ་མན་ཆད་ཀྱང༌། འདི་ལ་གནས་ཤིང་བརྟེན་པས་ཐོབ་པའི་ཕྱིར་ཚུལ་ཁྲིམས་བསླབ་པ་ཉིད་ནོར་སྣ་ཚོགས་ཡོད་པའི་ཚོང་འདུས་བཞིན་ནོ་ཞེའོ། །ཐམས་ཅད་དེར་འདུ་བ་ལྟར་སྣང་ན་ཡང་སྐྱེ་བོ་དགེ་བའི་གང་ཟག་བཟང་འགྲོ་བ་དང༌། མྱ་ངན་འདས་འདའ་བ་མན་ཆད་ཐོབ་པར་བྱེད་པ་དེ་དག་ཀྱང་སོ་སོ་ནས་ཚུལ་ཁྲིམས་ཚོང་འདུས་དང་འདྲ་བ་འདི་ལ་མ་གནས་མི་བརྟེན་པའི་འབྲས་བུ་ཐོབ་མི་སྲིད་པའི་ཕྱིར་ཐམས་ཅད་འདུས་པ་ལྟ་བུར་ཡང་བསྟན་པའོ། དེ་ལ་ཁ་ཅིག་འདི་སྐད་ཟེར་ཡང་སྲིད་དེ་གཞུང་དག་གི་ནང་ནས་རྒྱུན་དུ་ཞུགས་པའི་འབྲས་བུ་ལ་སོགས་པ་བསླབ་པ་ལ་མ་བརྟེན་ཏེ། ཁྱིམ་ན་གནས་པས་ཐོབ་པ་སྐད་དུ་ཟེར་བ་དང༌། དགྲ་བཅོམ་པ་ནི་དགེ་སློང་མ་ཡིན་པ་ལས་ཐོབ་པར་མི་སྲིད་དོ་ཞེས་བྱ་བ་ཞིག་ཀྱང་ཡོད་མོད་ཀྱི། དེ་འདུལ་བ་ལ་མི་བརྟེན་པར་ཐོབ་མི་སྲིད་དེ། དགེ་བསྙེན་ལ་སོགས་པ་དགེ་བ་བཅུ་རང་བཞིན་གྱིས་བསྲུང་ངོ་ཞེས་བྱུང་བས་དེ་ནི་བསླབ་པའི་ཚིག་ལ་གནས་པར་རིག་པར་བྱའོ། །དེ་བས་ན་ལུང་དག་ལས་ཀྱང༌། ཚུལ་ཁྲིམས་ཀྱིས་ནི་མཐོ་རིས་བཟང་འགྲོ་འཐོབ། །ཡེ་ཤེས་ཀྱིས་ནི་རྣམ་པར་གྲོལ་བར་འགྱུར། །ཞེས་བཤད་པས། ཚུལ་ཁྲིམས་ཀྱི་ཆ་ལ་མི་གནས་པར་མཐོ་རིས་བཟང་འགྲོ་ཐོབ་མི་སྲིད་ཅེས་འབྱུང་བས་འགལ་བ་མེད་དོ། །ཆེན་པོ་ཞེས་བྱ་བ་ནི་བསླབ་ཟོང་འདི་ལ་བརྟེན་པས་མྱ་ངན་ལས་འདའ་བ་མན་ཆད། ལྷ་དང་མི་ཡན་ཆད་ཀྱི་བར་དུ་འབྲས་བུ་ཡིད་བཞིན་ཐོབ་པར་བྱེད་པས་ཚོང་འདུས་ཆེན་པོ་ཞེས་བྱའོ། །ཡང་ན་བསླབ་ཚིག་ཉུང་ངུ་དེས་མྱ་ངན་ལས་འདའ་བ་འབྲས་བུ་ཆེན་པོ་བརྙེས་པའི་ཕྱིར་ཞེའོ། །ཚུལ་ཁྲིམས་ངན་པས་ཟིན་པ་ཞེས་བྱ་བ་ནི་ཚུལ་ཁྲིམས་ཀྱི་སྒྲ་དང་ཚུལ་ཞེས་ཀྱང་བྱ་བས་ངང་ཚུལ་ངན་པ་ཅན་ནི་བདག་དང་གཞན་གྱི་རྒྱུད་ཤིན་ཏུ་ཉོན་མོངས་པར་བྱེད་པས་སྦྲུལ་གདུག་པས་ཟིན་པ་དང་འདྲའོ་ཞེའོ། །ལོག་པའི་ངང་ཚུལ་ངན་པ་སྲོག་གཅོད་པ་དང༌། མ་བྱིན་པར་ལེན་པ་ལ་སོགས་པ་མི་དགེ་བ་བཅུ་བྱེད་པ་ནི་ཚུལ་ཁྲིམས་ངན་པས་ཟིན་པ་ཞེས་བྱའོ། །ཟིན་པ་ནི་གདུག་པའི་ཡིད་དཔེ་དང་སྦྱར་བར་བྱ་སྟེ། སྲོག་གཅོད་པ་ལ་སོགས་པ་ངང་ཚུལ་ངན་པ་ཅན་འདི་དག་ནི་ཅི་ལྟར་སྐྱེས་བུ་སྦྲུལ་གདུག་པས་ཟིན་པ་བཞིན་ནོ་ཞེས་སྨོས་
སོ། །དེ་ལྟར་སྦྲུལ་གདུག་པས་ཟིན་པ་ལ་སྨན་མ་རྒད་དང༌། ཨ་ཀ་ཏས་སོས་པར་ནུས་པ་བཞིན་དུ་ཚུལ་ཁྲིམས་ངན་པ་ཅན་དེ་དག་ལའང་བསླབ་པ་འདིས་ནད་དང་འདྲ་བའི་ཉེས་པ་སེལ་ཞིང་སྦྱོང་བའམ། འཇིལ་བར་བྱེད་པ་ཡིན་ཏེ། ད་བས་ན་སོ་སོར་ཐར་པ་ནི་སྨན་དང་འདྲའོ་ཞེའོ། །ཡང་གཅིག་ཏུ་གང་ཟག་ཚུལ་ཁྲིམས་ཉམས་པར་གྱུར་པའམ། བསླབ་པ་ཕུལ་བ་རྣམས་སླར་ཚངས་པར་སྤྱོད་པ་སྦྱིན་ཞིང་བསླབ་པ་བྱིན་པ་དང༌། རབ་ཏུ་འབྱུང་དུ་གནས་པས་རང་སྔར་ཚུལ་ཁྲིམས་ཉམས་ཤིང་བསླབ་པ་ཕུལ་བས་མི་དགའ་ཞིང་སེམས་ཚེར་མ་གདུག་པས་བཙུགས་པ་དང་འདྲ་བར་གནས་པ་ལ་ཚུལ་ཁྲིམས་འདིས་ཉེས་པ་སེལ་ཅིང་སྦྱོང་བས་ན། སེམས་ཀྱི་གདུང་བའམ་ཟུག་རྡུ་བ་སྨན་དུ་གྱུར་པས་ན་སྨན་ཞེས་སྨོས་སོ། །ལང་ཚོ་ཞེས་པ་ནི་གཞོན་ནུ་དར་ལ་བབ་པ་དྲེགས་མི་ཐུབ་ཅིང་བདོ་བ་ལ་བྱ་སྟེ། དེ་ལྟ་བུའི་ཚེ་ན་བློ་གཏན་ལ་མི་ཕེབས་ཤིང་རྒྱགས་པར་གྱུར་པས་འཕྲུལ་བའི་ཉེས་པ་ལྷག་པར་འབྱུང་བས་ན་ལང་ཚོ་འཁྲུལ་པ་ཞེས་སྨོས་ཏེ། དཔེ་གླང་པོ་གཞོན་ནུ་དང་འདྲའོ་ཞེའོ། །གླང་པོ་གཞོན་ནུ་གཡུལ་ལ་མ་ཕྱིན་ཅིང་ཞོ་ཤ་བདོ་ཞིང་ཉམས་རྩལ་ཆེ་བའི་ཚེ་ལམ་ནས་ལམ་མ་ཡིན་པར་རྟེན་ཅིང་འབྲོས་པ་ལ་ལྕགས་ཀྱུས་ཁ་ལོ་བསྒྱུར་ཞིང་ལམ་མ་ཡིན་པ་ནས་ལམ་དུ་དགུག་ཅིང་འདུལ་བ་དང་འདྲ་བར་བྱིས་པ་གཞོན་ནུ་བློ་གཏན་ལ་མ་ཕེབས་ཤིང་གནས་མ་ཡིན་པར་འཇུག་ཅིང་སྤྱོད་པ་ལ་མི་དགེ་བའི་ཕྱོགས་ནས་དགེ་བའི་ཕྱོགས་སུ་བསྒྱུར་བར་བྱེད་པར་སོ་སོར་ཐར་པས་བྱེད་པས་ན་གླང་པོ་བསྒྱུར་བའི་ལྕགས་ཀྱུ་དང་འདྲའོ་ཞེའོ། །ངན་འགྲོ་འཁོར་བ་ཟབ་མོ་ཞེས་བྱ་བ་ནི་ངན་པར་འགྲོ་བས་ན་ངན་འགྲོ་སྟེ། བྱོལ་སོང་ངན་པར་འགྲོ་བ་དང༌། ཡི་དགས་དང༌། སེམས་ཅན་དམྱལ་བ་ངན་པར་འགྲོ་བ་སྟེ། ངན་སོང་གསུམ་ལ་བྱའོ། །ཡང་ན་འཁོར་བ་ཉོན་མོངས་པས་འཁོར་བའི་ཕྱིར་རོ། །འཁོར་བའི་འགྲོ་བ་ཀུན་ལ་བྱའོ། །འཁོར་བ་ནི་གཅིག་ནས་གཅིག་ཏུ་བརྒྱུད་ཅིང༌། སྐྱེ་བ་མང་པོ་ལེན་པ་སྟེ། དེ་ཡང་ཐོག་མ་དང་ཐ་མ་མེད་པས་འཁོར་བའོ། །ཟབ་མོ་ནི་འཁོར་བ་ཉིད་མཐའ་མེད་ལ། སྡུག་བསྔལ་གྱི་འཇིགས་པ་ཆེན་པོ་ཉིད་བསྐྱེད་པས་ན་ཤིན་ཏུ་འཇིགས་ཤིང་རྒྱ་
མཚོ་ན་ཆུ་སྲིན་གནས་པ་བཞིན་ནོ། །དེ་ལྟ་བུའི་ཟབ་མོ་ལས་སྒྲོལ་བར་གྱུར་པའི་གཟིངས་དང་འདྲ་བར་གྱུར་པ་གང་ཞེ་ན། སོ་སོར་ཐར་པ་འདི་ཡིན་ནོ་ཞེའོ། །ཇི་ལྟར་གཟིངས་དང་འདྲ་བ་ཇི་ལྟར་རིག་པར་བྱ་ཞེ་ན། ཆུ་བོ་ཆེན་པོ་ལས་རྒལ་བར་བྱ་བའི་ཐབས་ནི་གཟིངས་བཅས་ཏེ་རྒལ་ལོ། །དེ་དང་འདྲ་བར་འཁོར་བ་ཟབ་མོ་པས་རྒལ་བར་འདོད་པའི་མི་དེས་ཀྱང༌། འདུལ་བ་དེ་ལ་མ་བརྟེན་མ་གནས་ན་འཁོར་བ་ལས་རྒལ་བར་མི་ནུས་པས་གཟིངས་དང་འདྲ་བར་འདུལ་བ་འདི་ཉིད་ལྟ་ཞེའོ། །བཟང་འགྲོ་ཞེས་བྱ་བ་ནི་ལྷ་དང་མི་ལ་སོགས་ཏེ། གནས་དམ་པར་འགྲོ་བའི་ཕྱིར་བཟང་འགྲོ་ཞེས་སྨོས་ཏེ། དེ་ཡང་རྣམ་པ་གསུམ་ལ་བྱ་སྟེ། དམ་པར་འགྲོ་བ་དང༌། བཀྲ་ཤིས་པར་འགྲོ་བ་དང༌། མཛེས་པར་འགྲོ་བ་སྟེ། འདི་ནི་བཟང་འགྲོའི་སྒྲའོ། །དེ་ལྟ་བུར་འགྲོ་བའི་སྟེགས་དང༌། ཟམ་པར་བལྟ་བ་གང་ཡིན་ཞེ་ན་འདུལ་བ་དེ་ཉིད་སྟེགས་དང་ཟམ་པའམ། ལམ་ལྟ་བུར་བལྟའོ་ཞེའོ། །སྟེགས་དང་ཟམ་པའང་བགྲོད་ཅིང་ཕྱིན་པར་བྱ་བའི་ཐབས་སུ་ཟད་དེ་དེ་དང་འདྲ་བར་སོ་སོར་ཐར་པ་ཡང་བཟང་འགྲོར་འགྲོ་བའི་ཐབས་ཡིན་པའི་ཕྱིར་རོ། །ངེས་པའོ་ཞེས་སྨོས་པ་ནི་ཅི་སྟེ་འགའ་ཞིག་ན་རེ་སྟེགས་དང་ཟམ་པ་ཡིན་པར་ཅིས་མངོན་ཞེས་ཟེར་ཡང་སྲིད་དེ། དེ་ལྟ་བུའི་དོགས་པ་བསལ་བའི་ཕྱིར་ངེས་པའོ་ཞེས་སྨོས་སོ། །ཅིའི་ཕྱིར་ངེས་པ་ཞེ་ན། དེ་བཞིན་གཤེགས་པ་ནི་ཤོ་བེ་མི་གསུང་གི །མི་སླུ་བའི་བདག་ཉིད་ཅན་ཡིན་པས་དེས་སྟེགས་དང༌། ཟམ་པ་འདྲའོ་ཞེས་གསུངས་པས་ན་ངེས་སོ། །ཉོན་མོངས་ཕམ་བྱེད་ལམ་ཞེས་པ་ཉོན་མོངས་པ་ནི་འདོད་ཆགས་དང༌། ཞི་སྡང་དང༌། གཏི་མུག་གམ་ཡང་ན་ཀུན་ནས་བསྐོར་བའི་ཉོན་མོངས་པ་དང༌། བག་ལ་ཉལ་བའི་ཉོན་མོངས་པ་སྟེ། དེས་ལུས་དང་སེམས་ཀྱི་རྒྱུད་ཤིན་ཏུ་ཉོན་མོངས་པར་བྱེད་པས་ན་ཉོན་མོངས་པའོ། །ཕམ་བྱེད་ཅེས་བྱ་བ་ནི་ཉོན་མོངས་པ་དེ་དག་སྤོང་ཞིང་སེལ་བའི་གཉེན་པོར་གྱུར་པ་སྟེ། སོ་སོར་ཐར་པ་འདི་ཉིད་ཀྱིས་ཉོན་མོངས་པ་རྣམས་མི་རྒྱུ་ཞིང་བཀག་པས་ན་ཕམ་པར་བྱས་སོ་ཞེའོ། །དེ་ལྟར་སོ་སོར་ཐར་པ་ལ་བརྟེན་པའི་རྒྱུས་ན་འཕགས་པའི་ལམ་ཐོབ་པས་ན་ཕམ་བྱེད་ལམ་ཞེས་བྱ་སྟེ། སོ་སོར་ཐར་པ་ནི་ཀུན་ནས་བསྐོར་བའི་ཉོན་
མོངས་པ་འཕྲལ་དུ་མི་སྤྱོད་པ་ཙམ་དུ་སྤོང་གི་འཕགས་པའི་ལམ་གྱི་ཡན་ལག་བརྒྱད་ལ་གནས་ནས། མཐོང་བ་དང་བསྒོམ་པས་སྤང་བར་བྱ་བའི་ཉོན་མོངས་པ་རྣམས་སྤོང་ཞིང་རྣམ་པར་གྲོལ་བ་ཐོབ་པར་བྱེད་པས་ན་ལམ་དེ་ནི་འཇིག་རྟེན་པའི་ལམ་ལས་ཁྱད་ཞུགས་པའི་ཕྱིར་ལམ་དེ་ནི་མཆོག་དམ་པའོ། །ཇི་ལྟར་རྒྱལ་པོ་གཡུལ་ལས་འགྲོ་བ་གང་ནས་གང་དུ་བཟློག་པར་བྱ་བ་དེ་ནས་དེར་ཁ་ལོ་སྒྱུར་ཞིང་ཤིང་རྟ་འདྲེན་པས་ལམ་འདྲེན་པ་དེ་དང་འདྲ་བས་ཉོན་མོངས་པའི་ལམ་སེལ་ཅིང་ཕམ་པར་བྱེད་པ་དང༌། འཕགས་པའི་ལམ་ཐོབ་ཅིང་མྱ་ངན་ལས་འདའ་བའི་ཁང་པར་ཕྱིན་པར་བྱེད་པའི་ཐོག་མར་འགྲོ་བ་ནི་སོ་སོར་ཐར་པ་འདི་ཡིན་པས་འདྲེན་པ་མཆོག་ལྟ་བུར་བསྟན་ཏོ། །དེ་ལ་ཐར་པའི་གྲོང་འཇུག་པ་ཞེས་བྱ་བ་ནི་ཐར་པ་ནི་མྱ་ངན་ལས་འདས་པ་ལ་བྱ་སྟེ། དེ་ཡང་ཇི་ལྟར་ཐོབ་ཅེ་ན། རྡོ་རྗེ་ལྟ་བུའི་ཏིང་ངེ་འཛིན་གྱིས་ཉོན་མོངས་པ་ཤིན་ཏུ་ཕྲ་བའི་ཡང་ཕྲ་བ་བཅོམ་ནས་ཟད་པ་དང་མི་སྐྱེ་བའི་ཡེ་ཤེས་ཐོབ་པ་སྟེ། དེའི་གནས་ནི་ཐར་པའི་གྲོང་དང་འདྲའོ། །འཇིགས་པ་དང་བརྩེ་བ་ཐམས་ཅད་དང་བྲལ་བས་གྲོང་ཁྱེར་བཞིན་ཏེ། ཇི་ལྟར་ར་བས་བསྐོར་བའི་གྲོང་སྒོ་བསྡོམས་ཤིང་བཅས་པ་ལ་དགྲས་འཇིགས་པ་དང་བྲལ་བ་བཞིན་དུ་མྱ་ངན་ལས་འདས་པའི་གྲོང་ཡང༌། ཟད་པ་དང་མི་སྐྱེ་བའི་ཡེ་ཤེས་ཀྱིས་སྒོ་བཅད་པས་ན། ཉོན་མོངས་པའི་དགྲས་མི་འཇིགས་སོ་ཞེའོ། །ཡང་ན་ཐེམ་སྐས་ཀྱི་དཔེས་ན་ཇི་ལྟར་འཇིག་རྟེན་ན་རིམ་པར་འགྲོ་བ་ལ་ཐེམ་སྐས་བཙུགས་ཏེ་འགྲོ་བར་བྱ་སྟེ། དེ་ནི་ཕྱིན་པར་བྱ་བའི་ཐབས་སུ་དགོས་སོ་ཞེའོ། །འདུལ་བ་དེ་ལ་བརྟེན་ཅིང་གནས་པ་དེ་དག་ཀྱང་མྱ་ངན་ལས་འདའ་བའི་གནས་སུ་ཕྱིན་པར་ཡང་འགྱུར་ལ་མྱ་ངན་ལས་འདའ་བའི་གྲོང་ཁྱེར་དུ་ཕྱིན་པར་བྱེད་པའི་ཐབས་ནི་སོ་སོར་ཐར་པ་ཡིན་ནོ་ཞེས་བྱ་བའི་ཐ་ཚིག་གོ །ང་ནི་མྱ་ངན་འདས་གྱུར་ཞེས་བྱ་བ་ལ། ང་ནི་ཞེས་བྱ་བ་ནི་བཅོམ་ལྡན་འདས་ཏེ། བཅོམ་ལྡན་འདས་མྱ་ངན་ལས་འདའ་བར་སྟོན་པ་ལ་དགེ་སློང་དག་གིས་བཅོམ་ལྡན་འདས་ལ་ཞུས་པ། སྟོན་པ་མེད་ན་ཆོས་དང་དགེ་འདུན་ཡང་མེད་དེ་དཀོན་མཆོག་གསུམ་ཡང་ནུབ་པ་ལ་འཇིག་རྟེན་ཡང་སྟོངས་སོ་ཞེས་གསོལ་པ་དང་ལན་བཀའ་སྩལ་པ། ང་མྱ་ངན་ལས་འདས་པའོ་འོག་ཏུ་ས་སོར་ཐར་པ་ནི་
སྟོན་པར་ལྟོས་ཤིག །དྲན་པ་ཉེ་བར་གཞག་པས་ནི་གནས་བརྟན་གྱིས་ཤིག །གང་ཟག་མི་སྲུན་པ་ནི་མི་སྨྲ་བར་འདུལ་ཞིང་ལན་ལོན་ཅིག །མདོ་སྡེའི་མགོ་ལ་ནི་འདི་སྐད་བདག་གིས་ཐོས་པ་ཞེས་བྲིས་ཤིག །ད་འདུག་པའི་ཚེ་བྱ་བ་དང་མི་བྱ་བར་བསྟན་པ་རྣམས་དེ་དེ་བཞིན་དུ་བྱས་ན་ང་འདུག་པ་དང་འདྲའོ་ཞེས་གསུངས་སོ། །མྱ་ངན་ལས་འདས་པ་ཞེས་བྱ་བ་ནི་ཉོན་མོངས་པའམ་འཁོར་བ་ལས་རྒལ་བ་ལ་བྱའོ། །ཁྱོད་ཀྱི་སྟོན་པ་ཞེས་བྱ་བ་ནི་འཁོར་ཉན་ཐོས་དང༌། སོ་སོར་ཐར་པ་ཉིད་ལ་བྱའོ། །དེ་བས་ན་བཅོམ་ལྡན་འདས་འཇིག་རྟེན་ན་བཞུགས་པའི་ཚེ་ཀུན་གྱིས་བསྙེན་བཀུར་བྱེད་པ་ལྟར་འདུལ་བ་ལ་ཡང་བསྙེན་བཀུར་མི་ཆུང་བར་བཅོམ་ལྡན་འདས་དང་འདྲ་བར་ལྟོས་ཤིག་པའོ། རང་བྱུང་ཉིད་ཀྱི་ནན་ཏན་དུ་ཞེས་བྱ་བ་ནི་རང་བྱུང་ནི་དེ་བཞིན་གཤེགས་པ་ཉིད་ལ་བྱ་སྟེ། དེ་བཞིན་གཤེགས་པ་ནི་གཞན་གྱི་དྲིང་དང་མན་ངག་ལ་བརྟེན་ཅིང་གཉེན་པོ་གང་གིས་ཀྱང་རབ་ཏུ་མ་བྱུང་གི་རང་གི་ཡེ་ཤེས་ཀྱིས་ཆོས་རྣམས་རྟོགས་ནས་རང་བྱུང་བའོ། །ཡང་སྐྲ་དང་ཁ་སྤུ་རང་བྱི་ཞིང༌། བསོད་ནམས་ཀྱི་ལྷུན་གྱིས་དཀར་པོ་ཆོས་གཟིགས་ཏེ། མཁན་པོ་དང་སློབ་དཔོན་གྱི་རྒྱུས་མ་ཡིན་གྱི་རང་བྱུང་གི་ཕྱིར་རང་བྱུང་ངོ༌། །ནན་ཏན་དུ་ཞེས་བྱ་བ་ནི་ལེགས་པར་ཞེས་བྱ་བའི་དོན་ཏེ། དེ་ལྟར་དགེ་སློང་རྣམས་ཀྱི་མདུན་དུ་དེ་བཞིན་གཤེགས་པ་དང་འདྲ་བ་འདུལ་བ་ལ་བསྟོད་པའོ། །སངས་རྒྱས་ཞེས་བྱ་བའི་སྒྲ་དེ་ཡང༌། འཇིག་རྟེན་དག་ན་ཤིན་ཏུ་དཀོན། །ཞེས་བྱ་བ་ལ་སོགས་པས་སོ་སོར་ཐར་པ་ལ་མཉན་པ་དང༌། ནན་ཏན་གྱིས་རིམ་གྲོ་དང༌། གུས་པར་བྱེད་དུ་བཅུག་པའི་ཕྱིར་མི་ཁོམ་པར་གྱུར་པ་ལས་བརྩམས་ཏེ་སངས་རྒྱས་ཞེས་བྱ་བ་ལ་སོགས་པ་སྨོས་སོ། །དེ་ལ་འཇིག་རྟེན་དུ་གཤེགས་ཤིང་སངས་རྒྱས་ཀྱི་སྒྲ་ཐོས་པ་ཡང་ཤིན་ཏུ་དཀའ་ན་མཐོང་བ་ལྟ་ཅི་སྨོས། དེ་བཞིན་གཤེགས་པ་བསྐལ་པ་དགུ་བཅུ་རྩ་གཅིག་ནས་འཇིག་རྟེན་དུ་སྟོན་པ་མི་མཛད་དེ་འཇིག་རྟེན་སྟོང་ངོ་ཞེས་འབྱུང་ངོ༌། །ཇི་ལྟར་སངས་རྒྱས་ཀྱི་སྒྲ་ཐོས་པར་ཡང་དཀའ་བ་བཞིན་དུ་མི་ལུས་ཐོབ་པ་ཤིན་ཏུ་དཀའ་བ་དང༌། མི་ལུས་ཐོབ་ཏུ་ཟིན་གྱིས་ཀྱང༌། དགེ་བའི་བཤེས་གཉེན་དང་ཕྲད་ཅིང་རབ་ཏུ་འབྱུང་བ་ཤིན་ཏུ་དཀའ་བ་དང༌། དེ་ལྟར་རབ་ཏུ་བྱུང་དུ་ཟིན་གྱིས་ཀྱང་ཚུལ་
ཁྲིམས་ཡོངས་སུ་དག་པར་ཤིན་ཏུ་དཀའ་སྟེ། སངས་རྒྱས་དང་མི་ལུས་ཐོབ་པ་ལ་སོགས་པ་ཤིན་ཏུ་དཀའ་བའི་དཔེ་ནི་རྒྱ་མཚོ་འཇིང་ནམས་ཀྱི་ནང་ན་རུས་སྦལ་ཞར་བ་གནས་པ་དེ་ལོ་སྟོང་ཞིག་ནས་ཆུའི་སྟེང་དུ་ལན་ཅིག་འབྱུང་ལ། གཉའ་ཤིང་མིག་གཅིག་པ་རྒྱ་མཚོའི་ནང་དུ་བོར་བར་ཡང་ཤར་ནུབ་ཀུན་ཏུ་རླུང་གིས་བདས་པ་དེའི་བུ་གར་རུས་སྦལ་མགྲིན་པ་ཆུད་པ་ནི་སླའི། སངས་རྒྱས་ལ་སོགས་པའི་དགེ་བའི་བཤེས་གཉེན་དང་ཕྲད་ཅིང་བདག་ཉིད་ཁོམ་པ་ཕུན་སུམ་ཚོགས་པ་དང་ལྡན་པ་ནི་ཤིན་ཏུ་དེ་བས་ཀྱང་དཀའ་བས་ན་དེ་ལྟ་བུའི་འབྱོར་པ་དང་ལྡན་པའི་དུས་སུ་བདག་ཉིད་རབ་ཏུ་བྱུང་ཞིང་བསྙེན་པར་རྫོགས་པ་དང༌། སོ་སོར་ཐར་པ་ལ་ནན་ཏན་གྱིས་གུས་པས་ཉན་ཅིང་ཚུལ་ཁྲིམས་སྐྱོན་མེད་པར་འབད་ཅིང་བསྲུང་ངོ་ཞེས་པའི་དོན་ཏོ། །དེ་ལ་སློབ་དཔོན་ཁ་ཅིག་གིས་འདི་སྐད་ཀྱང་འཆད་དེ། སངས་རྒྱས་ཀྱི་ནི་འདུལ་བ་མཚོ། །ཞེས་བྱ་བ་ནས། སོ་སོར་ཐར་པ་མཉན་པར་འབད་པར་བྱ་ཞེས་པའི་བར་དུ་རྣམ་པ་དྲུག་ཏུ་འབྱེད་ཅིང་སྟོན་པ་ཡང་ཡོད་དེ། རྣམ་པ་དྲུག་ནི་མཐོང་བའི་འབྲས་བུ་དང༌། མ་མཐོང་བའི་འབྲས་བུ་དང༌། སོ་སོར་ཐར་པ་ཉིད་ལ་སྟོན་པར་བསྟོད་པ་དང༌། ཁོམ་པ་ཕུན་སུམ་ཚོགས་པ་དང༌། དགེ་བའི་བཤེས་གཉེན་ཕུན་སུམ་ཚོགས་པ་དང༌། སོ་སོར་ཐར་པ་ལ་བསྟི་སྟང་དང་བཅས་པས་བསྲུང་ཞིང་ཉན་པ་ཞེའོ། །དེ་ལ་སངས་རྒྱས་ཀྱི་ནི་འདུལ་བ་མཚོ། །ཞེས་བྱ་བ་མན་ཆད་ནས། གླང་པོ་གཞོན་ནུའི་ལྕགས་ཀྱུའོ། །ཞེས་བྱ་བ་ཡན་ཆད་མཐོང་བའི་འབྲས་བུ་དང་སྦྱར་རོ། །དེ་ནས་ཐེམ་སྐས་བཞི་དང་འདྲ་བར་གནས་ཞེས་པ་ཡན་ཆད་ནི་མ་མཐོང་བའི་འབྲས་བུ་དང་སྦྱར་རོ། །ང་ནི་མྱ་ངན་འདས་གྱུར་ན། །ཞེས་བྱ་བ་ཤློ་ཀ་གཅིག་གིས་ནི་སོ་སོར་ཐར་པ་ལ་སྟོན་པར་བསྟོད་པའོ། །སངས་རྒྱས་ཞེས་བྱ་བའི་སྒྲ་དེ་ཡང་ཞེས་བྱ་བ་ནི་དགེ་བའི་བཤེས་གཉེན་ཕུན་སུམ་ཚོགས་པ་བསྟན་ཏོ། །མི་ལུས་ཐོབ་པ་དང་རབ་ཏུ་བྱུང་བ་ཤིན་ཏུ་དཀོན་པ་དང༌། ཚུལ་ཁྲིམས་ཕུན་སུམ་ཚོགས་པ་ཞེས་བྱ་བས། ཁོམ་པ་ཕུན་སུམ་ཚོགས་པ་བསྟན་ཏོ། །སོ་སོར་ཐར་པ་མཉན་པར་འབད་པར་བྱ་ཞེས་བྱ་བ་ནི་སོ་སོར་ཐར་པ་ལ་བསྟི་
སྟང་དང་བཅས་པས་བསྲུང་ཞེའོ། །དེ་ལྟར་གོང་དུ་སངས་རྒྱས་ཀྱི་སྒྲ་ཐོས་པ་དང༌། མིའི་ལུས་ཐོབ་པ་ཤིན་ཏུ་དཀའ་བ་དང༌། དགེ་བའི་བཤེས་གཉེན་དང་ཕྲད་པ་དང༌། རབ་ཏུ་འབྱུང་བ་ལ་སོགས་པ་རྙེད་པ་ཤིན་ཏུ་དཀའ་བར་བསྟན་པ་བཞིན་དུ་སོ་སོར་ཐར་པ་ཐོས་པ་ཡང་ཤིན་ཏུ་རྙེད་པར་དཀའ་བར་བསྟན་པར་བཞེད་ནས། ཁམ་པ་ཕུན་སུམ་ཚོགས་པ་ཤིན་ཏུ་རྙེད་པར་དཀའ་བའི་ཕྱིར་སྨྲས་པ། བསྐལ་པ་བྱེ་བ་རྣམས་སུ་ཡང༌། །ཞེས་སྨོས་སོ། །བསྐལ་པ་བྱེ་བ་ཞེས་སྨོས་པས་ནི་སོ་སོར་ཐར་པ་ཐོབ་པར་དཀའ་བའི་དཔེ་སྟེ། བསྐལ་པ་བྱེ་བ་འམ། གལ་ཏེ་དེ་ལས་ལྷག་པར་ཡང་སངས་རྒྱས་འཇིག་རྟེན་དུ་མི་འབྱུང་ལ། བརྒྱ་ལ་བྱུང་དུ་ཟིན་གྱིས་ཀྱང་བདག་ཉིད་ཡུལ་གྱིས་བསྐལ་ཏེ་སངས་རྒྱས་དང་མི་ཕྲད་པ་དང༌། སངས་རྒྱས་དང་མི་ལུས་རྙེད་པ་ཤིན་ཏུ་དཀའ་བས་ན་སངས་རྒྱས་འཇིག་རྟེན་དུ་འབྱུང་བ་དང༌། འདུལ་བའི་ཆོས་རྣམས་ཀྱང་ཡོད་ཀྱི་སངས་རྒྱས་མི་འབྱུང་བ་དང༌། གསུང་རབ་ཀྱི་ཆོས་འདུལ་བ་ཡང་མེད་པས་ན་དེའི་ཕྱིར་སོ་སོར་ཐར་པ་གདུང་པ་དང་འཛིན་པ་དཀའོ་ཞེས་བསྟན་ཏོ། །སོ་སོར་ཐར་པ་ཞེས་བྱ་བ་ནི་ཉོན་མོངས་པ་ཆུང་དུའི་ཆུང་དུ་ལ་སོགས་པ་ལས་ཤིན་ཏུ་ཐར་པར་བྱེད་པས་ན། སོ་སོར་ཐར་པ་ཞེས་སྨོས་སོ། །ཐོས་ཞེས་བྱ་བ་ནི་ཚིག་དང་དོན་རྣ་བའི་དབང་པོས་ཐོས་པའོ། །གཟུང་ཞེས་བྱ་བ་ནི་ཤེས་རབ་ཀྱིས་རྟོགས་པའོ། །འཛིན་ཞེས་བྱ་བ་ནི་མི་བརྗེད་པར་དྲན་པས་དེ་ཉིད་ཁ་ཏོན་དུ་སྦྱོར་བ་ལ་སོགས་ཏེ། ཡུན་རིང་དུ་མི་བརྗེད་པའོ། །སྒྲུབ་པར་བྱེད་ཅེས་བྱ་བ་ནི་དེའི་དོན་དུ་ལུས་དང༌། ངག་དང་ཡིད་ཀྱིས་ནན་ཏན་དུ་ཉམས་སུ་ལེན་ཅིང་བྱེད་པའོ། །རྙེད་དཀའ་ཞེས་བྱ་བ་ནི་བསྐལ་པའི་དཔེ་དང་སྦྱར་རོ། །དཀའ་བ་ནི་ཐོས་པས་ཀྱང་ཡིད་ལ་གཟུང་བ་ཤིན་ཏུ་དཀའ། གཟུང་བ་ལས་ཀྱང་ཡིད་ལ་འཛིན་ཅིང་འདྲིས་པར་བྱེད་པ་ཤིན་ཏུ་དཀའ། འཛིན་པ་བས་ཀྱང་ཉམས་སུ་ལེན་ཅིང་སྒྲུབ་པར་བྱེད་པ་ཆེས་དཀའ་སྟེ་ཤིན་ཏུ་དཀོན་ནོ་ཞེས་བསྟན་ཏོ། །སྒྲུབ་པ་ནི་ཚེ་དང་ལྡན་པ་ཀུན་དགའ་བོ་ལྟ་བུ་ཉེས་བྱས་ཤིན་ཏུ་ཕྲ་བ་ལ་ཡང་སྲོག་དང་བསྔོ་ཞིང་འབད་པ་ཆེན་པོ་དང་བཅས་པས་ཀྱང་ཚོགས་ཆེན་པོ་དང་ནན་ཏན་ཆེན་པོས་རྙེད་པའི་ཕྱིར་རོ་ཞེས་སྨོས་
པས་གཞན་ཞིག་སྨོས་ཀྱང་ཅི་དགོས། ཡང་གཅིག་ཏུ་ན་ཐོས་པའི་ཤེས་རབ་དང༌། བསམ་པ་དང༌། བསྒོམ་པའི་ཤེས་རབ་སྟེ། ཤེས་རབ་རྣམ་པ་གསུམ་གྱིས་ནན་ཏན་བྱེད་པ་ཤིན་ཏུ་དཀོན་ཞེས་བསྟན་པའོ། །ཐོས་པ་དང་ཐོས་པའི་ཤེས་རབ་དང་སྦྱར། གཟུང་བ་འཛིན་པ་གཉིས་ནི་བསམ་པའི་ཤེས་རབ་དང་སྦྱར། སྒྲུབ་པར་བྱེད་པ་ནི་བསྒོམ་པའི་ཤེས་རབ་དང་སྦྱར་རོ་ཞེའོ། །དེ་ཡན་ཆད་དུ་ཆོས་ལ་བསྟོད་པ་བསྟན་ཏོ། །དཀོན་མཆོག་གསུམ་འབྱུང་བ་དེ་བདེ་བར་བསྟན་པའི་ཕྱིར་སངས་རྒྱས་རྣམས་ཞེས་བྱ་བ་ལ་སོགས་པ་སྨོས་སོ། །སངས་རྒྱས་ཀྱི་སྒྲ་ནི་གོང་དུ་བཤད་པ་དང་འདྲ་སྟེ། ཅུང་ཟད་དུ་ན་དྲང་སྲོང་ཕྱིང་གི་རི་དང༌། ཨང་གི་རི་ལ་སོགས་པ་མངོན་པར་ཤེས་པ་དང་ལྡན་པ་འཇིག་རྟེན་ན་གྲགས་པ་ཅན་དེ་དག་གིས་དེ་བཞིན་གཤེགས་པའི་མཁྱེན་པ་ལ་བསྐྱེད་དུ་མེད་པས་སངས་རྒྱས་ཞེས་བྱ་བའི་ཐ་ཚིག་གོ །འབྱུང་བ་བདེ་ཞེས་བྱ་བ་ནི་སངས་རྒྱས་འོད་གསལ་ལྷའི་རིས་ནས་ཡུམ་གྱི་ལྷུམས་སུ་གཤེགས་ཏེ། གླང་པོ་དཀར་པོ་ལྟ་བུའི་ཚུལ་དུ་མངལ་གྱི་གཡས་རོལ་དུ་མངལ་གྱི་དྲི་མས་མ་གོས་པར་གཤེགས་པ་དང༌། བལྟམས་སམ། བཙས་པའི་ཚེ་རྒྱལ་པོ་ཆེན་པོ་གཟུགས་ཅན་སྙིང་པོ་ལ་སོགས་པ་བཞི་དང༌། བློན་པོའི་བུ་ལྔ་བརྒྱ་ཙམ་བཙས་ཏེ། དེ་དག་ནི་མངལ་གྱི་སྡུག་བསྔལ་དང་ལྡན་པ་ཡིན་གྱི་དེ་བཞིན་གཤེགས་པ་ནི་སྡུག་བསྔལ་དང༌། དྲི་མས་མ་གོས་ཏེ་བྲལ་བས་ན་མངལ་དུ་གནས་པ་དང་བཅས་པའི་ཆེ་བདེ་བ་ཉིད་དོ་ཞེའོ། །གཅིག་ཏུ་ནི་འོད་གསལ་ལྷའི་རིས་ནས་གཤེགས་པའི་ཚེ་ཞལ་གྱི་སྒོ་ནས་འོད་ཟེར་མང་པོ་བྱུང་ནས་སེམས་ཅན་དམྱལ་བ་ལ་སོགས་པ་དག་ལ་འོད་ཟེར་གྱིས་རེག་པར་བྱས་ནས་དམྱལ་བ་པ་དེ་དག་གིས་བསམས་པ་འདི་འདྲ་བ་སེལ་བར་བྱེད་པ་ནི་སྐྱེས་བུ་མཐུ་ཆེན་པོ་འབའ་ཞིག་འོད་ཟེར་འབྱིན་ཏོ་ཞེས་དད་པ་སྐྱེས་པས་སྡུག་བསྔལ་ལས་ཐར་པ་ལྟ་བུར་སྣང་བ་དང༌། འོན་པ་རྣམས་ཀྱིས་ནི་རྣར་ཐོས། ལོང་བ་རྣམས་ཀྱིས་ནི་མིག་གིས་མཐོང༌། བཟའ་བ་དང་བཏུང་བ་དང་འདོད་པ་རྣམས་ཡིད་བཞིན་དུ་རྙེད་པས་སངས་རྒྱས་འབྱུང་བ་ནི་འཇིག་རྟེན་ན་བདེ་བའི་རྒྱུར་གྱུར་པས་སངས་རྒྱས་འབྱུང་བ་ནི་ཤིན་ཏུ་
བདེའོ་ཞེས་སོ། །ཡང་ན་སངས་རྒྱས་འབྱུང་བ་བདེ། །ཞེས་བྱ་བ་ནི་བྱང་ཆུབ་སེམས་དཔའ་ལས་མངོན་པར་རྫོགས་པར་བྱང་ཆུབ་པའི་ཚེ་རྣམ་པར་གྲོལ་བའི་འབྲས་བུ་རྣམ་པ་མཆོག་ཐམས་ཅད་དང་ལྡན་པས་སངས་རྒྱས་འབྱུང་བ་བདེ་བའོ་ཞེའོ། །དེ་ལ་ཁ་ཅིག་འདི་སྐད་དུ་རྒོལ་ཡང་སྲིད་དེ། མངོན་པར་རྫོགས་པར་སངས་མ་རྒྱས་པའི་དུས་དང༌། ལྷུམས་སུ་བལྟམ་ཞིང་བཙས་པའི་ཚེ་བྱང་ཆུབ་སེམས་དཔའ་ཡིན་ན་ཅིའི་ཕྱིར་སངས་རྒྱས་འབྱུང་བ་བདེ་ཞེས་བྱ། རྣམ་པ་གཅིག་ཏུ་དེ་བཞིན་གཤེགས་པ་སྐྱེ་བ་དང་འབྱུང་བ་དང༌། མངལ་དུ་གཤེགས་ཞེས་བྱ་བ་མི་འཐད་དེ། ཅིའི་ཕྱིར་ཞེ་ན། སྐྱེ་བའི་ཉོན་མོངས་པ་བཅོམ་པ་སྟེ། འཁོར་བ་ལས་རྒལ་བའི་ཕྱིར་རོ་ཞེས་སོ། །དེ་ནི་ཉེས་པ་མེད་དེ། དེའི་ཚེ་དེ་བཞིན་གཤེགས་པ་མ་ཡིན་ཏེ། བྱང་ཆུབ་སེམས་དཔའ་ཡིན་ཀྱང་རྒྱུ་ལ་འབྲས་བུ་བཏགས་ཏེ་བཤད་དེ། དཔེར་ན་འཇིག་རྟེན་ན་ཐགས་འཐག་པ་སྣམ་བུར་མ་ཟིན་པར་ཡང་སྣམ་བུ་འཐག་ཅེས་ཟེར་བ་ལྟ་བུ་དང༌། འབྲས་འཚེད་ཀྱང་ཟན་འཚེད་དོ་ཞེས་ཟེར་བ་དང༌། ཡོས་འཐག་ཀྱང་ཕྱེ་འཐག་གོ་ཞེས་ཟེར་བ་དང་འདྲ་སྟེ། དེ་ཉིད་དུ་མ་གྱུར་ཀྱང་དེར་མངོན་པར་འོང་བ་རྣམས་རྒྱུ་ལ་འབྲས་བུ་བཏགས་པ་སྲིད་པས་འདི་འང་དེའི་ཚེ་བྱང་ཆུབ་སེམས་དཔའ་ཡིན་མོད་ཀྱི། ཕྱིས་སངས་རྒྱས་སུ་མངོན་པར་འགྲུབ་ཅིང་མངོན་པར་འགྱུར་པའི་ཕྱིར་འདི་སྐད་ཅེས་བྱ་བ་ལ་ཉེས་པ་མེད་དོ། །ཆོས་བསྟན་པ་བདེ་བ་ནི་གསུང་རབ་ཡན་ལག་བཅུ་གཉིས་ཀྱི་ཆོས་རྣམས་འཇིག་རྟེན་དུ་བསྟན་ཅིང་བཤད་པས་ཕྱིའི་མུ་སྟེགས་ལ་སོགས་པ་ལྟ་བ་སྣ་ཚོགས་སུ་སྨྲ་བ་རྣམས་སྤོང་ཞིང་ཚར་གཅོད་པ་དང་གསུང་རབ་ཀྱི་ཆོས་རྣམས་རྒྱས་ཤིང་ཡུན་རིང་དུ་གནས་པའི་ཕྱིར་ཆོས་བསྟན་པ་བདེ་བའོ་ཞེའོ། །དགེ་འདུན་ཞེས་བྱ་བ་ནི་གང་ཟག་ཆེན་པོ་བརྒྱད་པོ་ལ་སོགས་ཏེ། བཞི་ཡན་ཆད་མང་པོ་འདུས་པ་ལ་བྱ་སྟེ། དེའི་མཐུན་པ་ནི་ཚུལ་ཁྲིམས་དང༌། ལྟ་བ་དང༌། སྤྱོད་ལམ་དང༌། འཚོ་བ་ལ་སོགས་པ་མཚུངས་པར་གྱུར་ཅིང་བྱ་བ་རྣམས་གཅིག་པ་ནི་མཐུན་པ་བདེ་ཞེས་བྱའོ། །ཡང་ན་བདེ་བ་ནི་མཐུན་པའི་རྒྱུས་མྱ་ངན་ལས་འདས་པ་མན་ཆད་བཟང་འགྲོ་ལ་སོགས་པའི་འབྲས་བུ་ཐོབ་པར་གྱུར་པས་ན་དཔེར་ན་
དེ་བཞིན་གཤེགས་པ་འཇིག་རྟེན་དུ་བྱོན་པའི་མཐུས་འཕགས་པ་ཀཽ་ཎྜི་ནྱ་ལ་སོགས་པ་རྣམ་པར་གྲོལ་བའི་འབྲས་བུ་ཐོབ་པ་ལྟ་བུ་ཡང་ཡིན་ནོ། །ཡང་ན་དགེ་འདུན་མཐུན་པའི་མཐུས་བསླབ་པ་གསུམ་ལ་བསྒྲུབ་ཅིང་ནན་ཏན་དུ་བྱེད་པས་ཉོན་མོངས་པ་ནག་པོའི་ཕྱོགས་སྤོང་བའམ། སེལ་བའམ། བསྲེག་པའམ། གདུང་བར་བྱེད་པ་ནི་དཀའ་ཐུབ་སྟེ། དེ་ལྟར་ལྷག་པའི་ཚུལ་ཁྲིམས་དང༌། ལྷག་པའི་ཤེས་རབ་གནས་པའི་ཉོན་མོངས་པ་ནག་པོའི་ཕྱོགས་སྤོང་བ་དེ་ནི་བདེ་བའོ་ཞེའོ། །ཚིག་སུ་བཅད་པ་འདིས་ནི་དཀོན་མཆོག་གསུམ་འབྱུང་བ་དེ་བ་དང༌། དེའི་དགོས་པ་བདེ་བའི་རྒྱུ་བསྟན་ཏོ། །འཕགས་པ་རྣམས་ནི་མཐོང་བ་བདེ། །ཞེས་བྱ་བས་རྣམ་པ་བདུན་པོའི་ནང་ནས་དགེ་བའི་བཤེས་གཉེན་ལ་བརྟེན་པར་བྱ་བ་བཤད་དེ། དེ་ལ་དགེ་བའི་བཤེས་གཉེན་རྣམ་པ་གཉིས་ཏེ། ཀུན་རྫོབ་ཀྱི་དགེ་བའི་བཤེས་གཉེན་དང༌། དོན་དམ་པའི་དགེ་བའི་བཤེས་གཉེན་ནོ། །དེ་ལ་འཕགས་པ་ཞེས་བྱ་བ་ནི་སྡིག་པའི་ཆོས་དང་ཉོན་མོངས་པའི་ཆོས་ལས་རིང་དུ་གྱུར་པས་ན་འཕགས་པ་ཞེས་བྱའོ། །དམ་པ་ནི་གཞན་ལ་ཕན་འདོགས་པའི་དང་ཚུལ་ཅན་ཡིན་པས་འཕགས་པ་ཉིད་ལ་བྱའོ། །དེ་ལྟ་བུའི་སྐྱེས་བུ་དམ་པ་མཐོང་ན་བདེའོ་ཞེའོ། །ཁ་ཅིག་ན་རེ་མཐོང་བ་ལྟ་ཞིག་ཅི་བདེ་ཞེ་ན། ཟླས་རིག་པར་བྱ་སྟེ། འགྲོགས་པ་དང༌། ལྷན་ཅིག་གནས་པར་འགྱུར་བ་དང་བདེ་ཞེས་ཀྱང་འཆད་དོ། །ཁ་ཅིག་ན་རེ་དཔེར་ན་མི་མི་སྲུན་པ་ནི་མ་མཐོང་ཡང་བླ་ཞེས་བྱ་བ་ཡིན་པས་འཕགས་པ་རྣམས་ནི་མཐོང་ན་དགའ་བ་སྐྱེ་བའི་ཕྱིར་མཐོང་ན་བདེ་ཞེས་ཀྱང་འཆད་དོ། །འགྲོགས་ན་བདེ་བ་ནི་དེ་ལྟ་བུའི་དགེ་བའི་བཤེས་གཉེན་དང་འགྲོགས་ན་མི་དགེ་བའི་ཆོས་དང་བྲལ་ནས་དགེ་བའི་ཆོས་སྟོབས་པ་དང༌། ཉེས་པ་ལས་འབྱིན་ཅིང་སྟོང་ཞིང་གྲོགས་བྱེད་པས་ན་དེ་ལྟ་བུ་དང་འགྲོགས་ཤིང་ལྷན་ཅིག་གནས་ན་འཕྲལ་དུ་བདེ་བ་སེམས་ལ་འཚེར་ཞིང་ཟུག་རྔུ་མེད་པ་དང༌། སེམས་དགའ་ཞིང་དང་བ་སྐྱེ་བ་དང༌། ཡུལ་དང་བསོད་ནམས་བདེ་བར་སྨིན་པར་འགྱུར་བའི་ཕྱིར་དགེ་བའི་བཤེས་གཉེན་དང་འགྲོགས་ན་བདེའོ་ཞེའོ། །བྱིས་པ་རྣམས་ནི་མ་མཐོང་བདེ། །ཞེས་བྱ་བ་ནི་མི་དགེ་བའི་གྲོགས་པོ་སྤོང་བ་སྟོན་ཏེ། །བྱིས་པ་ཞེས་བྱ་བ་ནི་ངན་དུ་སེམས་ཤིང་ངན་དུ་སྨྲ་བ་
དང༌། ངན་དུ་སྤྱོད་པ་སྟེ། དེ་ལྟ་བུ་རྣམས་དང་མི་བསྙེན་མི་འགྲོགས་ན་རྟག་ཏུ་བདེ་ཞེའོ། །དཔེར་ན་འཕར་བ་ཅན་ནི་འདོམ་གྱིས་སྤོང་བ་དང༌། རྭ་ཅན་ནི་རྒྱང་གྲགས་ཀྱིས་སྤང་བ་དང༌། མཆེ་བ་ཅན་ནི་དཔག་ཚད་ཀྱིས་སྤོང་ཞིང་བསྲིང་བ་དང་འདྲ་བར་བྱིས་པ་སྡིག་པ་སྤྱོད་པ་རྣམས་ཀྱང་བསྲིངས་ཤིང་རིང་བར་གྱུར་ན་ཤིན་ཏུ་བདེའོ་ཞེའོ། །དེ་ལ་ཀུན་རྫོབ་ཀྱི་དགེ་བའི་བཤེས་གཉེན་ཡང་རྣམ་པ་གཉིས་ཏེ། ཞི་གནས་ཀྱི་ཡན་ལག་ལ་གནས་པ་དང༌། ལྷག་མཐོང་གི་ཡན་ལག་ལ་གནས་པའོ། །ཚུལ་ཁྲིམས་ལྡན་པ་མཐོང་བ་བདེ། །ཞེས་བྱ་བ་ནི་ཞི་གནས་ཀྱི་ཡན་ལག་ལ་གནས་པ་བསྟེན་ཏེ་ཚུལ་ཁྲིམས་དང་ལྡན་པའི་སྐྱེས་བུ་ནི་ལུས་ཀྱི་ཉེས་པ་དང༌། ངག་གི་ཉེས་པ་དང་བཅས་པ་དང༌། རང་བཞིན་གྱི་ཁ་ན་མ་ཐོ་བ་རབ་ཏུ་བསྲུངས་པས་གཞན་ལ་མི་གནོད་པའི་ཕྱིར་དེ་ལྟ་བུའི་སྐྱེས་བུ་དམ་པ་མཐོང་ན་བདེའོ་ཞེའོ། །ཅིའི་ཕྱིར་ཞེ་ན། དཔེར་ན་རྐུན་པོ་རྣམས་ནི་མ་མཐོང་ཡང་སླ་ཞེས་འབྱུང་བས། དགེ་སློང་ཚུལ་ཁྲིམས་དང་ལྡན་པ་མཐོང་བ་དང་བདག་གི་རྒྱུད་དང་ཕ་རོལ་གྱི་རྒྱུད་ལ་ཡིད་ཆེས་པས་དགའ་བ་ཡིན་ནོ། །མང་དུ་ཐོས་པ་ནི་ཐེ་ཚོམ་སེལ་ཞིང་བདེན་པ་རྟོགས་པ་དང༌། དོགས་པ་རྣམས་མེད་པར་བྱེད་པས་མང་དུ་ཐོས་པ་མཐོང་ན་བདེའོ་ཞེའོ། །འདི་ནི་ལྷག་མཐོང་གི་ཡན་ལག་ལ་གནས་པའོ། །དེ་ལ་སྐབས་འདིར་ཚུལ་ཁྲིམས་ཀྱི་ནང་དུ་ཞི་གནས་དང་ལྷག་མཐོང་གི་ཆ་གཉིས་ཀ་མེད་དམ་ཞེས་ཟེར་ཡང་སྲིད་དེ། དེ་ནི་ཞི་གནས་ཀྱི་ནང་ན་ལྷག་མཐོང་ཡོད། ལྷག་མཐོང་གི་ནང་ནའང་ཞི་གནས་ཡོད་མོད་ཀྱི། ཤས་ཆེ་ཆུང་གི་ཕྱིར་དབྱེ་བ་ཙམ་དུ་ཟད་དེ། དེ་ལ་ཞི་གནས་ནི་གཡེང་བ་ཞི་བའི་ཚུལ་ཁྲིམས་ཀྱང་མི་རྒོད་མི་འཕྱར་བའི་རང་བཞིན་ཏེ་ཞི་བ་ཤས་ཆེ་བས་ཞི་གནས་ཀྱིས་བསྟན་ཏོ། །མང་དུ་ཐོས་པ་ནི་ཐོས་པའི་ཤེས་རབ་སྟེ། ཤེས་པ་ཤས་ཆེ་བས་ན་ལྷག་མཐོང་གིས་བསྟན་ཏེ། ཡན་ལག་ལ་གནས་ཞེས་བྱ་བ་ནི་ཞི་གནས་དང་ལྷག་མཐོང་མཐར་རྫོགས་པར་མ་གྱུར་པའི་ཕྱིར་རོ། །དེ་ལ་དོན་དམ་པའི་དགེ་བའི་བཤས་གཉེན་ལ་ཡང་ཞི་གནས་ཀྱི་མཐའ་ལ་གནས་པ་དང༌། ལྷག་མཐོང་གི་མཐའ་ལ་གནས་པའོ། །ཡང་སྲིད་རྣམ་པར་གྲོལ་བ་ཞེས་བྱ་བ་ནི་ཡང་གི་སྒྲ་ནི་ཕྱིར་ཞེས་པའི་ཐ་ཚིག་སྟེ། སྲིད་པ་ནི་ཁམས་གསུམ་ལ་བྱའོ། །
དེ་བས་ན་ཕྱིར་སྲིད་པར་འགྲོ་བའི་ཉོན་མོངས་པ་ལས་རྣམ་པར་གྲོལ་བས་ན་ཡང་སྲིད་པར་རྣམ་པར་གྲོལ་བ་ཞེས་བྱ་སྟེ། རྣམ་པར་གྲོལ་བ་ནི་ཟག་པ་དང་བཅས་པ་ཉེ་བར་ལེན་པའི་ཕུང་པོ་ཉོན་མོངས་པའི་བཅིངས་པ་ལས་རྣམ་པར་གྲོལ་བའོ་ཞེས་བྱ་བའི་ཐ་ཚིག་ཡིན་ཏེ། དེ་ཡང་གང་ཞེ་ན། དགྲ་བཅོམ་པ་དག་མཐོང་ན་བདེ་ཞེས་འབྱུང་བ་དེ་ཉིད་དེ། དེ་ལྟ་བུའི་རྣམ་པར་གྲོལ་བ་ནི་དགྲ་བཅོམ་པ་ཞེས་གདགས་སོ། །དགྲ་བཅོམ་པ་ནི་ཉོན་མོངས་པའི་དགྲ་བཅོམ་པས་དགྲ་བཅོམ་པ་ཞེས་ཀྱང་བྱ། ཕྱིར་སྐྱེ་བ་དང་འབྱུང་བ་མེད་པས། རྒྱ་གར་གྱི་སྐད་ཀྱིས་འབྱུང་བ་མེད་པ། སྐྱེ་བ་མེད་པ་ཞེས་ཀྱང་བྱའོ། །ཡང་ན་མཆོད་པར་འོས་པ་སྟེ། ཡོན་གྱི་གནས་སུ་གྱུར་ཅིང་དད་པ་དང༌། མ་དད་པས་བྱིན་པའི་ཟས་དང་གོས་ཞུ་བར་འགྱུར་བའི་དགྲ་བཅོམ་པས་དགྲ་བཅོམ་པ་ཞེ་འམ། མཆོད་པར་འོས་པ་ཞེས་བྱའོ། །དེ་ལྟ་བུའི་སྐྱེས་བུ་དམ་པ་ཡོན་ཏན་གྱི་བདག་ཉིད་ཆེ་བ་མཐོང་བ་བདེའོ་ཞེའོ། །དེ་ཡན་ཆད་ཀྱིས་དགེ་བའི་བཤེས་གཉེན་བརྟེན་པར་བྱ་བ་དང༌། མི་དགེ་བའི་གྲོགས་པོ་སྤོང་བ་བཤད་ཟིན་ཏོ། །ད་ནི་རྣམ་པ་བདུན་པོ་ལས་འབྲས་བུ་ཐོབ་པ་བསྟན་ཏེ། དེ་ཡང་གང་གི་རྒྱུས་ཐོབ་ཅེ་ན། སྔར་བསྟན་པའི་དཀོན་མཆོག་གསུམ་འབྱུང་བ་དགེ་བའི་བཤེས་གཉེན་ལ་བརྟེན་པས་རྣམ་པར་གྲོལ་བའི་འབྲས་བུ་ཐོབ་པོ་ཞེའོ། །དེ་ལ་རྣམ་པར་གྲོལ་བ་ཉིད་ཅི་ལྟ་བུ་ཡིན་པ་བསྟན་པར་འདོད་ན་དཔེར་ན། འབབ་སྟེགས་བདེ་བའི་ཆུ་ཀླུང་བདེ། །ཞེས་བྱ་བ་བསྟན་ཏེ། ཅི་ལྟར་ཆུ་བོ་ཆེན་པོ་ལས་རྒལ་བར་འདོད་ན་ཆུ་འགྲམ་ན་ཉམ་ང་བ་མེད་ཅིང༌། གྲོག་པོ་དང༌། ཚེར་གད་དང༌། རྡོ་ལ་སོགས་པ་མེད་པ་ན་ཆུ་འགྲམ་ཉིད་ཀྱང་བདེ་བ་ཡིན་ལ། དེ་རྒལ་བའི་མི་དང་ཆུ་བོ་འབབ་པ་ཉིད་ཀྱང་ཤིན་ཏུ་བདེ་བ་ཡིན་ཏེ། དེ་བཞིན་དུ་ཡོད་པ་དང་མེད་པ་དང༌། རྟག་པ་དང་ཆད་པར་ལྟ་བའི་དྲི་མའི་མུ་དང་བྲལ་བ་དེ་ནི་འཕགས་པའི་ལམ་ཞེས་བྱ་སྟེ། ཆུ་འགྲམ་བདེ་བའི་ལམ་བཟང 
་པོ་དང་འདྲ་བར་མཐའ་ཐམས་ཅད་དང་བྲལ་བའི་འཕགས་པའི་ལམ་གྱིས་ཐོབ་པའི་ཆོས་རྣམ་པར་གྲོལ་བའི་འབྲས་བུ་ཐོབ་པ་དེ་ནི་ཤིན་ཏུ་བདེ་བར་བསྟན་ཏོ། །ཆོས་ལས་རྒྱལ་བའི་སྐྱེ་བོ་བདེ། །ཞེས་བྱ་བ་ནི་དེ་ལྟར་འཕགས་པའི་ལམ་ལ་གནས་ཤིང་
རྣམ་པར་གྲོལ་བའི་འབྲས་བུ་ཐོབ་པས་མི་མཐུན་པའི་ཕྱོགས་ནག་པོའི་ཆོས་རྣམས་སེལ་ཞིང་རྒྱལ་བར་བྱས་པས་ན་ཆོས་ལས་རྒྱལ་བའི་སྐྱེ་བོ་བདེའོ་ཞེའོ། །དོན་དེ་ཉིད་ཕྱེད་འོག་ནས་སྟོན་ཏེ། །ངའོ་ང་རྒྱལ་ཟད་པ་བདེའོ་ཞེས་བསྟན་པ་སྟེ། འཕགས་པའི་ལམ་མ་ཐོབ་པའི་ཤེས་རབ་ཀྱི་རལ་གྲིས་མི་མཐུན་པའི་ཕྱོགས་འཇོམས་ཤིང་གཅོད་པར་བྱེད་པ་ནི་ཤེས་རབ་ཡིན་ཏེ་ཤེས་རབ་མེད་པར་ཉོན་མོངས་པ་སྤོང་བར་མི་ནུས་པས་དེའི་ཕྱིར་ཤེས་རབ་ཐོབ་པ་བདེའོ་ཞེའོ། །དེ་བས་རྒྱུ་བསྟན་ཏེ། ཇི་ལྟར་ཤེས་རབ་ཐོབ་པ་བདེ་ཞེ་ན། ངའོ་ང་རྒྱལ་ཟད་པ་བདེ། །ཞེས་སྨྲས་ཏེ། ངའོ་ང་རྒྱལ་ཡང་ཤེས་རབ་ཀྱི་རལ་གྲིས་ཡོངས་སུ་གཅོད་པར་ནུས་ཀྱི་གཞན་གྱིས་ནི་མ་ཡིན་པའི་ཕྱིར། །ཤེས་རབ་ཐོབ་པ་བདེ་ཞེའོ། །དེའི་སྐབས་སུ་ངའོ་ང་རྒྱལ་ཟད་ཅེས་མི་བྱ་བར་འདོད་ཆགས་ལ་སོགས་པ་ཟད་ཅེས་སྨྲས་ན་ཅི་ཉེས་ཞེས་ཟེར་ཡང་སྲིད་དེ། དེ་ནི་ཉེས་པ་མེད་དེ། ང་རྒྱལ་ནི་ཉོན་མོངས་པ་ཐམས་ཅད་སྐྱེད་པའི་ཕྱིར་རྩ་བ་འམ་གཞི་ལྟ་བུ་ཡིན་པས་དེ་བཅད་པ་དང་འདོད་ཆགས་ལ་སོགས་པ་ཡང་མི་འབྱུང་བར་ཤེས་པར་བྱའོ། །དེ་ལྟར་ཡང་འདོད་ཆགས་ལ་སོགས་པ་ཡང་ང་དང་ང་ཡི་བ་དང༌། བདག་དང་བདག་གི་ཞེས་པའི་བསམ་པ་ངན་པ་ལས་བྱུང་ནས་བདག་ལ་ཆགས་པ་སྐྱེ་ཞིང་ཕ་རོལ་གྱི་ཕྱོགས་ལ་ཞེ་སྡང་སྟེ། དེ་གཉིས་བྱུང་བ་དང་དེའི་ལས་གཏི་མུག་ཀྱང་འབྱུང་བ་ཡིན་བས་ང་རྒྱལ་ཆོད་དང་གཞན་ལྟ་ཞིག་ཟླས་མི་གནས་པར་རིག་པར་བྱའོ། །དེའི་ཕྱིར་ང་རྒྱལ་ཟད་པ་བདེ་བའོ། །དེ་ཡན་ཆད་དུ་འབྲས་བུ་ཐོབ་པ་བདེ་བ་བསྟན་ཟིན་ཏོ། །ད་ནི་འབྲས་བུ་ཐོབ་པའི་གནས་བསྟན་ཏེ། ངེས་པར་བྱས་ཞེས་བྱ་བ་ནི་སྦྱངས་པའི་ཡོན་ཏན་ཅན་རྣམས་ཀྱི་ཐོག་མའི་དག་པ་བསྟན་ཏེ། དགོན་པ་ལ་གནས་པར་བྱ་བར་ཡང་ནུས་ན་ནི་བྱ། མི་ནུས་ན་ནི་གཏོང་ངམ་ཞེ་འམ། བདག་གིས་ཅི་ཙམ་ནུས་པ་ནི་བྱ། དེ་མ་ཡིན་ན་ནི་གཏོང་ཞེས་དམ་བཅའ་བའི་དགོན་པ་ཅན་ནི་དག་པའི་བསམ་པ་ཅན་མ་ཡིན་པས། གང་ཇི་ཙམ་དུ་བདག་གི་དོན་ཡོངས་སུ་མ་རྫོགས་པར་མི་བཏང་མི་ལྡོག་པར་དམ་བཅས་པ་དང༌། ཡི་དམ་ངེས་པར་བྱ་བ་དེ་ནི་བསམ་པ་དག་པ་ཡིན་པས་ངེས་པར་བྱ་བ་ནི་དེ་ལྟ་བུའོ། །
དབང་པོ་ཐུལ་བ་ནི་དབང་པོ་མི་རྒོད་ཅིང་མི་འཕྱར་མི་གཡེང་བའི་ཐ་ཚིག་སྟེ། ཞི་བ་བཅིངས་པ་དེ་ཞེས་བྱ་བའི་ཐ་ཚིག་གོ །དངོས་སུ་ན་འདོད་པ་ལྔའི་ཡོན་ཏན་ལ་སེམས་མི་འབྲང་བ་དེ་ཉིད་དབང་པོ་ཐུལ་བ་ཞེས་བྱའོ། །མང་དུ་ཐོས་པ་དགོན་པ་ཞི་རྣམས་ཞེས་བྱ་བ་ནི་བཅོམ་ལྡན་འདས་ཀྱིས་གསུངས་པ་བསྟན་པ་འཇིག་པ་གཉིས་ཏེ། མང་དུ་ཐོས་པ་གྲོང་ན་གནས་པ་དང༌། ཉུང་དུ་ཐོས་པ་དགོན་པ་ན་གནས་པ་ཞེས་འབྱུང་བས་འཇིག་པར་འགྱུར་རོ། །དགོན་པ་ན་གནས་པ་ཡང་ཚུལ་ཁྲིམས་ལྕི་ཡང་དང་གསོ་སྦྱོང་གི་བྱེ་བྲག་དང༌། མདོ་སྡེའི་གནས་ཤེས་པ་གནས་པར་བྱའི་གཞན་མ་ཡིན། ཉུང་དུ་ཐོས་པ་དགོན་པར་གནས་པ་མི་རིགས་པའི་ཐ་ཚིག་གོ །དགོན་པ་ནི་རྒྱང་གྲགས་གཅིག་ཕན་ཆད་དོ། །ཞི་བ་ནི་འཇིགས་པ་དང་དོགས་པ་དང༌། ཉམ་ང་བའི་ས་མ་ཡིན་པ་ལ་བྱའོ། །འཇིགས་པ་ནི་དགྲས་འཇིགས་པའོ། །དོགས་པ་ནི་གཅན་གཟན་གྱིས་འཚེ་བར་དོགས་པའོ། །ཉམ་ང་བ་ནི་སྦྲང་བུ་ལ་སོགས་པ་ཡོད་པའོ། །དེ་དག་མེད་པའི་གནས་སུ་དགོན་པ་བཅའ་བར་བྱ་བ་ནི་འདི་ལྟར་འདུལ་བ་ལས་གསོལ་བ་དང་ལས་ཀྱིས་གང་ཟག་ཅིག་བསྐོས་ཏེ། དགོན་པའི་གནས་རྟོགས་ཤིག་ཅེས་འབྱུང་བ་ཡིན་ནོ། །གནས་པར་གྱུར་པ་ནགས་སུ་རྒས་པ་བདེ། །ཞེས་པ། གནས་པར་གྱུར་ན་ནི་ཐོག་མའི་བསམ་པ་ངེས་པ་ལ་བྱ་སྟེ་གནས་ཕན་ཆད་འདི་ལྟར་གནས་ལ་མེ་ཏོག་རྒས་ཤིང་རང་ལྷགས་སུ་གནས་པ་དང་འདྲ་བས་ཆེས་བཏགས་ཏེ་གནས་པར་བྱ་བའི་ཚིག་གོ །ཡང་གཅིག་ཏུ་ན་དགོན་པའི་ནགས་སུ་རྒས་པར་གྱུར་གྱི་བར་དུ་གནས་པར་བྱའོ་ཞེས་པ་དང་སྦྱར་རོ། །དེ་ལ་ནགས་འབའ་ཞིག་དགོན་པ་ཡིན་ནམ་ཞེ་ན། དེ་ནི་ཉི་ཚེ་བའི་མཚན་ཉིད་ཙམ་དུ་ཟད་ཀྱི་གྲོང་དང་རྒྱང་གྲགས་གཅིག་ཕན་ཆད་གཞན་ཡང་འདི་དང་འདྲ་བར་རིག་པར་བྱའོ། །དར་ལ་བབ་པ་ཡལ་བ་ནི་རྒས་ཀྱི་བར་དུ་ཞེས་བྱ་བའི་ཐ་ཚིག་གོ །ཡང་ན་ཟླས་རིག་བྱ་ན་ཇི་ལྟར་སྐྱེས་བུ་དར་ལ་བབ་པའི་ཚེ་ཞོ་ཤ་ཆེ་ཞིང་རྩལ་མི་ཐུབ་པ་དང་འདྲ་བར་རྣམ་པར་ཤེས་པ་སྤྲེའུ་དང་འདྲ་བར་འདོད་པའི་ཡོན་ཏན་ལ་གནས་ཤིང༌། ངལ་བ་མེད་པར་སྤྱོད་ཅིང་རྒྱུ་བས་དེའི་གནས་ལས་བཟློག་
སྟེ། དེ་ཤིན་ཏུ་བཏུལ་ནས་གཅིག་ཏུ་ཞི་བར་གནས་ཤིང་ཉོན་མོངས་པའི་གདུང་བ་ཡང་ཡལ་བར་བྱས་པས་ན་མྱ་ངན་ལས་འདས་པ་ཐར་པ་ཐོབ་པར་འགྱུར་བས། དར་ལ་བབ་པ་ཡལ་བ་བདེ། །ཞེས་བཤད་དོ། །དེ་ཡན་ཆད་འབྲས་བུ་ཐོབ་པའི་གནས་བཤད་ཟིན་ཏོ། །ཡང་དག་པར་སྡུད་པ་པོའི་འཕགས་པ་རྣམས་ཀྱིས་འདུལ་བ་ལ་བསྟོད་པའི་སྟོད་ཏྲ་བཟླས་ཟིན་ཏོ། །ཚེ་དང་ལྡན་པ་དག་དཔྱིད་རྣམས་ལས་ཅི་ཙམ་ལུས་ཞེས་བྱ་བ་ནས། དེ་དེ་བཞིན་དུ་འཛིན་ཏོ་ཞེས་བྱ་བ་ཡན་ཆད་དུ་སོ་སོར་ཐར་པའི་གླེང་གཞི་སྟོན་ཏེ། དེ་ཡང་རྣམ་པ་དགུ་ཞིག་ཏུ་དབྱེ་བར་བྱ་སྟེ། དགུ་པོ་ཡང་གང་ཞེ་ན། བཀའ་ལུང་དང༌། མི་འདུར་མི་གནང་བ་དང༌། མི་འདུར་གནང་བ་དང༌། མཆོད་པའི་ཆོ་ག་དང༌། ཡང་དག་པར་འཛིན་དུ་བཅུག་པ་དང༌། ཡང་དག་པར་འཛིན་པའི་ལེགས་པ་དང༌། ཡང་དག་པར་མི་འཛིན་པའི་ཉེས་དམིགས་དང༌། ཡང་དག་པར་བསྒོ་བ་དང༌། འཁོར་རྣམ་པར་དག་པའོ། །དེ་ལ་ཚེ་དང་ལྡན་པ་དག་དཔྱིད་རྣམས་ལ་ཞེས་བྱ་བ་ནས། བག་ཡོད་པས་ཐོབ་པོ་ཞེས་བྱ་བའི་བར་དུ་རྣམ་པ་དགུ་པོའི་ནང་ནས་བཀའ་ལུང་གི་དབང་དུ་བྱས་ཏེ་བསྟན་ཏོ། །ཚེ་དང་ལྡན་པ་ཞེས་བྱ་བ་ནི་སྙན་པར་བོད་པའམ། བཙུན་པར་བོད་པའི་ཚིག་གོ།། དཔྱིད་རྣམས་ཞེས་བྱ་བ་ནི་ལོ་གཅིག་ལ་དུས་གསུམ་དུ་རྣམ་པར་གཞག་སྟེ། དེ་ཡང་དགུན་དང༌། དབྱར་དང༌། དཔྱིད་གསུམ་མོ། །དེ་ལ་སྟོན་ཟླ་ཐ་ཆུངས་ཉ་ནས་དཔྱིད་ཟླ་ར་བ་ཉའི་བར་དུ་ནི་དགུན་གྱི་དུས་ནི་ཤིན་ཏུ་གྲང་བའོ། །དཔྱིད་ཟླ་ར་བ་ཉ་ནས་དབྱར་ཟླ་འབྲིང་པོ་ཉའི་བར་དུ་ནི་དཔྱིད་ཀྱི་དུས་ཏེ་ཆ་བའི་དུས་སོ། །དབྱར་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་དུ་ནི་དབྱར་གྱི་དུས་ཏེ་གྲང་དྲོ་སྙོམས་སོ། །འདིར་དཔྱིད་སྨོས་པ་ནི་ཉེ་བའི་མཚན་ཉིད་ཙམ་དུ་ཟད་དེ། དུས་གསུམ་པོ་གང་ལ་བབ་པའི་ཟླ་བ་དང༌། ཅི་ཙམ་འདས་པའི་སོ་སོར་ཐར་པ་འདོན་པའི་ཚེ་བརྗོད་པར་བྱ་སྟེ། དཔེར་ན་དེ་ནི་དཔྱིད་ཟླ་ར་བ་བཅོ་ལྔ་འདས་ཏེ། ཞག་གཅིག་གིས་མ་ཚང་བའི་ཟླ་བ་ཕྱེད་དང༌། བཞི་འོངས་པ་ལྟར་སོ་སོར་ཐར་པ་འདོན་པས་བརྗོད་པར་བྱའོ། །ཅི་ཙམ་འདས་པ་དང༌། ལྷག་མ་ཇི་ཙམ་དུ་ལུས་པ་དེ་ཡང་དེ་བཞིན་དུ་བརྗོད་དེ། ཅི་ཙམ་ཞེས་བྱ་བ་འདས་པ་དང༌།
མ་འོངས་པ་ལ་ངེས་པ་མེད་པས་ཅི་ཙམ་དུ་དེ་ཉིད་སྨོས་སོ། །དེས་ནི་གང་ཟག་དགེ་བ་ལ་མི་བརྩོན་ཞིང༌། དུས་སྙེམས་པའི་གཉེན་པོར་གསུངས་སོ། །ཆེ་སྙེམས་པའི་གཉེན་པོར་དགའ་བ་དང༌། འཆི་བ་མངོན་པར་འོང་ངོ་ཞེས་བྱ་བ་ལ་སོགས་པ་སྨོས་སོ། །ཅིའི་ཕྱིར་སྲིད་པའི་ཡན་ལག་མྱ་ངན་ལ་སོགས་པ་གཞན་འདིར་མ་སྨོས་པར། རྒ་བ་དང་འཆི་བ་འབའ་ཞིག་སྨོས་ཤེ་ན། ཚངས་པར་སྤྱོད་པ་ཕུན་སུམ་ཚོགས་པར་འགྱུར་བའི་རྒྱུའི་གཙོ་བོ་ཡོངས་སུ་ཉམས་པར་བརྗོད་པའི་སྐབས་ཡིན་པའི་ཕྱིར་རོ། །དེ་ཉམས་པར་གྱུར་པའི་རྒྱུ་གཉིས་ཏེ། ལུས་དང༌། སྐྱེ་གནས་སོ། །དེ་ལ་ལུས་ཉམས་པ་ནི་རྒ་བ་དང་འཆི་བ་སྟེ། རྒས་པ་ནི་བཅོམ་ལྡན་འདས་ཀྱིས་བསྟན་པའི་གསུང་རབ་ཀྱི་ཡན་ལག་འཇིག་རྟེན་གནས་སུ་ཟིན་ཀྱང་ལུས་ཀྱིས་མི་ནུས་ཤིང་མི་ལྕོགས་ལ་ཉམས་ཀྱིས་དཔྱད་མི་བཟོད་པས་སྦྱོར་ཞིང་རྩོལ་མི་ནུས་ཏེ། ཚངས་པར་སྤྱད་པ་ལས་འཕང་བར་འགྱུར་རོ་ཞེའོ། །འཆི་བ་ནི་ཕུང་པོ་རྒྱུན་འཆད་པ་ལ་བྱ་བས་དགེ་བའི་ཆོས་རྣམས་སྤྱད་དུ་མེད་དེ་ཚངས་པར་སྤྱོད་པ་དང་རིང་བར་འགྱུར་རོ། །དེའི་ཕྱིར་སྐྱེ་བའི་གནས་ཉམས་པ་ནི་སྟོན་པའི་བསྟན་པ་འཛིན་པ་ཞེས་བྱ་སྟེ་བསྟན་པ་འཛིན་པ་ནི་གང་ཟག་སྒྲུབ་པ་དང༌། འཛིན་པ་དང་བརྗོད་པ་ཉམས་པའོ། །དེའི་ཕྱིར་དུས་ཇི་ལྟར་འདས་པ་བཞིན་དུ་རྒ་བ་དང་འཆི་བས་གནོད་པར་གྱུར་ཏེ། གསུང་རབ་ཀྱི་ཆོས་ཀྱང་འཇིག་གོ་ཞེས་གསུངས་པས་བག་ཡོད་པ་ལ་རྣལ་འབྱོར་དུ་བྱའོ་ཞེས་སྨོས་སོ། །སྟོན་པ་ནི་དོན་ཕྱིན་ཅི་མ་ལོག་པར་སྟོན་པ་སྟེ་དེ་བཞིན་གཤེགས་པའོ། །བསྟན་པ་ནི་གསུང་རབ་ཡན་ལག་བཅུ་གཉིས་སོ། །ལྷ་དང་མིར་བཅས་པའི་འཇིག་རྟེན་ལ་བཤད་ཅིང་བསྟན་པའི་བག་ཡོད་པ་ནི་དགེ་བའི་ཆོས་ལ་གཟུད་པའི་རྣལ་འབྱོར་ནི་འཇིག་རྟེན་ལས་འདས་པའི་ལམ་ལ་སྦྱོར་དུ་གཟུད་པའི་དོན་ཏེ། ཞི་གནས་དང་ལྷག་མཐོང་ཟུང་དུ་འབྲེལ་བས་འགྲོ་བའི་ལམ་ནི་རྣལ་འབྱོར་ཞེས་བྱའོ། །དེ་ལྟར་བག་བྱས་པས་ཐོབ་པའི་འབྲས་བུ་གང་ཞེ་ན། སངས་རྒྱས་ཀྱི་བྱང་ཆུབ་དང་དགེ་བའི་ཆོས་རྣམས་ཀྱང་བག་ཡོད་པས་ཐོབ་པས་ན་བཅོམ་ལྡན་འདས་ཀྱིས་བག་ཡོད་པ་ལ་རྣལ་འབྱོར་དུ་བྱའོ་
ཞེས་བཀའ་སྩལ་ཏོ། །དེ་བཞིན་གཤེགས་པ་ནི་དེ་བཞིན་དུ་ཐུགས་སུ་ཆུད་དེ་སྟོན་པས་ན། དེ་བཞིན་གཤེགས་པའོ། །ཉོན་མོངས་པའི་དགྲ་མ་ལུས་པར་བཅོམ་སྟེ། གང་ཟག་ཐམས་ཅད་ཀྱིས་མཆོད་པར་འོས་པས་ན་དགྲ་བཅོམ་པའོ། །ཡང་དག་པར་རྫོགས་པ་ནི་ཡང་དག་པ་ཉིད་དུ་མཁྱེན་པར་བྱ་བ་ཡོངས་སུ་རྫོགས་པ་ལ་བྱའོ། །བྱང་ཆུབ་ཀྱི་སེམས་ཞེས་བྱ་བ་ནི་དྲན་པ་ཉེ་བར་གཞག་པ་ལ་སོགས་པ་ལ་བྱའོ། །དེ་ཡན་ཆད་བཀའ་ལུང་འདས་སོ། །ད་ནི་དགེ་འདུན་གྱི་ཐོག་མར་བྱ་བ་ཅི་ཞེ་ན་ཞེས་བྱ་བ་ནས་བྱ་བ་ཉུང་ངོ་ཞེས་བྱ་བ་ཡན་ཆད་དུ་རྣམ་པ་དགུ་པོའི་ནང་ནས་མི་འདུར་མི་གནང་བ་བསྟན་པར་བྱ་སྟེ། དགེ་འདུན་གྱི་ཐོག་མར་བྱ་བ་ཅི་ཞེས་བྱ་བ་ནི་དྲི་ཞིང་བརྟགས་པ་ལྟ་བུའི་ཚིག་གམ། ཡང་ན་མེད་པ་ལྟ་བུའི་ཚིག་ལའང་བྱ་སྟེ། དྲི་མ་ལྟ་བུའི་ཚུལ་དུ་བཤད་ནའང་གསོ་སྦྱོང་བྱ་བའི་གནས་སུ་ཆག་ཆག་བྱ་བ་དང༌། སྐྱང་ནུལ་དང་དཀྱིལ་འཁོར་དང་སྟན་གདིང་བ་ལ་སོགས་པ་དང་པོ་ཁོ་ནར་བྱའོ་ཞེས་བསྟན་པའོ། །མེད་པའི་ཚིག་ལྟར་བཤད་ན་ཡང་ཉན་ཐོས་ཀྱི་དགེ་འདུན་དོན་ཉུང་བ། བྱ་བ་ཉུང་བ་ཡིན་པས་གང་ཟག་གི་སྒོ་སྦྱོང་ལ་སོགས་པ་སྔར་མ་བྱས་ན་དགེ་འདུན་འདུ་བའི་ཚེ་མི་མཐུན་པར་འགྱུར་བས་ན་གསོ་སྦྱོང་ལ་ཆེད་ཆེ་ཞིང་གཅེས་པ་ཅི་ཞིག་ཡོད་ཅེས་དྲི་བ་ལྟ་བུའོ། །ཡང་ན་གསོ་སྦྱོང་ནི་ཕྱིས་བྱ་བའམ། ཤོལ་དུ་མི་རུང་བས་གསོ་སྦྱོང་གི་སྔོན་རོལ་དུ་ལས་ཅི་ཡང་བྱ་བ་མེད་ཅེས་པའི་ཐ་ཚིག་གོ །ཉན་ཐོས་ཞེས་བྱ་བ་ནི་གཞན་ལས་ཐོས་པར་བྱ་བས་ན་ཉན་ཐོས་ཏེ། གཞན་གྱི་དྲིང་ལ་བརྟེན་ཏེ་འབྱུང་བའི་ཕྱིར་རོ། །དེ་ཡང་ཅི་ལྟ་བུ་ཞེ་ན། དཔེར་ན་མཁན་པོ་དང་སློབ་དཔོན་ལས་ཐོས་པར་བྱས་ནས་ལན་གསུམ་རྫོགས་པའི་ཐ་མ་ལ་ཁྱོད་ནི་དགེ་སློང་ངོ༌། །དགེ་སྦྱོང་ངོ་ཞེས་གདགས་པ་ལྟ་བུ་སྟེ། དེའི་ཕྱིར་གཞན་ལ་རག་ལས་ཤིང་བརྟེན་ཏེ་འབྱུང་བས་ན་ཉན་ཐོས་སོ། །དོན་ཉུང་བ་བྱ་བ་ཉུང་བ་ཞེས་བྱ་བས་འདོད་པ་ཆུང་བའི་རྒྱུ་བསྟན་ཏེ། དོན་ཉུང་བ་ནི་ལུས་ཀྱིས་སྒྲུབ་པ་དང༌། ངག་གིས་སྨྲ་བའི་དོན་ཉུང་བའོ། །བྱ་བ་ཉུང་བ་ནི་ཡོད་ཀྱི་བྱ་བ་ཉུང་བ་སྟེ། དངོས་སུ་ན་ཞིང་གི་རྨོ་རྐོ་དང༌། ཚོང་གི་ཁེ་སྤྲུལ་དང༌། ཡུལ་གྱི་རྣམས་ཆོས་སུ་བྱ་བ་མེད་ཅིང་
ཡིད་ཀྱིས་བཙལ་བའི་དོན་ཉུང་བ་སྟེ། དེ་ལྟ་བུའི་ཚུལ་གྱིས་ན་བྱ་བ་གཞན་མེད་པས་དང་པོ་རིངས་པར་བྱ་བ་ཉིད་གསོ་སྦྱོང་ཡིན་པས་ན་དེའི་ཕྱིར་མི་འདུར་མི་གནང་སྟེ། རྐྱེན་ཅི་ལྟ་བུ་བྱུང་ཞིང་བྲེལ་ཀྱང་མི་འདུར་མི་གནང་གི་འདུས་ཤིག་ཅེས་བཀའ་སྩལ་ཏོ། །འདི་སྐད་དུ་བཀའ་སྩལ་པ་ལས་དགེ་སློང་ཁ་ཅིག་བླ་མའི་ཁྱད་པར་ཐོབ་ཏུ་ཉེ་བ་ལས་བར་ཆད་དུ་གྱུར་ཏེ། མ་ཐོབ་པ་དང་ལམ་གྱིས་དུབ་པ་དག་སེམས་རྩེ་གཅིག་ཏུ་འདུག་པར་མི་ནུས་ནས་གྲལ་ན་གཅོག་པ་ལྟ་བ་དང༌། དགེ་སློང་ནད་པ་ཁ་ཅིག་འཕྱེས་འཁྲུད་དེ་གསོ་སྦྱོང་གི་སར་ཕྱིན་པ་དང༌། ཤི་བར་གྱུར་ནས་དེ་ལྟ་བུར་གྱུར་པ་ལ་རྗེས་སུ་གནང་སྟེ། བཀའ་སྩལ་བ། དགེ་སློང་དག་དེ་ལྟ་བུའི་རྐྱེན་བྱུང་བ་རྣམས་ལ་དད་པ་དང་ཡོངས་སུ་དག་པ་ལོངས་ལ་དགེ་འདུན་གྱི་གསོ་སྦྱོང་བར་ཆད་དུ་མི་འགྱུར་བར་གྱིས་ཤིག་ཅེས་བཀའ་སྩལ་ཏོ། །དེ་ལྟ་བས་ན་ཚེ་དང་ལྡན་པ་དག་མ་ལྷགས་པ་རྣམས་ལ་དད་པ་དང་ཡོངས་སུ་དག་པ་དྲིས་ཤིག །དྲིས་ནས་ཀྱང་བརྗོད་པར་བྱའོ་ཞེས་སྨོས་ཏེ། དེ་ནི་རྣམ་པ་དགུ་པོའི་ནང་ནས་མི་འདུར་གནང་བའི་དབང་དུ་བྱས་ནས་བསྟན་ཏོ། །ཚེ་དང་ལྡན་པ་དག་ཅེས་བྱ་བ་ནི་རྒྱལ་པོའི་ཁབ་ན་དགེ་སློང་དག་གཅིག་ལ་གཅིག་ཁྱིམ་པའི་མིང་རུས་ནས་འབོད་པ་ལས་ཁྱིམ་བདག་འཕྱ་བར་གྱུར་ནས་བཀའ་སྩལ་པ། ཚེ་དང་ལྡན་པའམ། བཙུན་པ་ཞེས་བོས་ཤིག་བཅོམ་ལྡན་འདས་ལ་ཡོན་ཏན་གྱི་སྒོ་ནས་འབོད་དོ་ཞེས་གསུངས་སོ། །མ་ལྷགས་པ་རྣམས་ཞེས་བྱ་བ་ནི་གང་དུ་ནད་པ་ལ་སོགས་པ་གསོ་སྦྱོང་སར་འགྲོ་མི་ནུས་ཤིང་མཚམས་ཀྱི་ནང་ན་འཁོད་པ་རྣམས་ལ་བྱའོ། །ནད་ཚབས་ཆེ་སྟེ་སྨྲ་མི་ནུས་ན་ལུས་ཀྱི་བརྡས་ཕུལ་ན་ཡང་ཕུལ་པའོ་ཞེས་བྱའོ། །དེ་སྟེ་ཡང་འབུལ་མ་ནུས་ན་དགེ་འདུན་དེར་དེང་ཤིག །ཡང་ན་དགེ་འདུན་གྱི་ནང་དུ་ནད་པ་བླང་བར་བྱའོ། །ཡོངས་སུ་དག་པར་འདྲི་བ་ནི་དད་པ་དང་འདྲ་བར་བརྗོད་དོ། །འདྲི་བའི་མདུན་དུ་དད་པ་འབུལ་བའི་དགེ་སློང་གིས་གསོ་སྦྱོང་བྱས་ནས་རྒན་གཞོན་ཀྱི་ཚུལ་དུ་ཙོག་ཙོག་པོར་འདུག་ནས་གུས་པར་བདག་ནི་བར་ཆད་ཀྱི་ཆོས་རྣམས་ཡོངས་སུ་གཙང་སྟེ། དགེ་འདུན་ཕྲིན་ལས་མཛད་པ་ལ་དད་པ་དང་
ཡོངས་སུ་དག་པ་དབུལ་ལོ་ཞེས་ལན་གསུམ་དུ་བརྗོད་པར་བྱའོ། །དད་པ་ཕུལ་བ་ནི་དེ་ལྟར་དད་པ་ཕུལ་བས་ན་དགེ་འདུན་དང་མཐུན་པར་འགྱུར་རོ། །ཡོངས་སུ་དག་པ་ཕུལ་བས་ན་བདག་ཉིད་གསོ་སྦྱོང་གི་སྣོད་དུ་འགྱུར་རོ། །དྲིས་ཤིག་ཅེས་བྱ་བ་ནི་དབུལ་དུ་གཞུག་པའོ། །བརྗོད་པར་བྱའོ་ཞེས་བྱ་བ་ནི་དད་པ་བླངས་པའི་དགེ་སློང་གིས་གསོ་སྦྱོང་གི་གནས་སུ་དགེ་འདུན་ཚོགས་པ་ལ་བརྗོད་པའམ། ཡང་ན་དགེ་སློང་གཅིག་ལ་བརྗོད་ན་ཡང་དག་པ་ཕུལ་པ་ཡིན་ནོ། །དད་པ་དང་ཡོངས་སུ་དག་པ་ལེན་པ་ཡང་ནད་པ་དང་ནད་གཡོག་དང༌། དགེ་བའི་ཕྱོགས་ཁྱད་པར་ཅན་ལ་སྦྱོར་བ་དང༌། སོ་སོར་ཐར་པའི་མདོ་གདོན་པ་ལ་ཞུགས་ཤིང་དོན་ཡིད་ལ་བྱེད་པའམ་ལམ་རིང་པོ་ནས་དུབ་ཅིང་འགྲོ་མི་ནུས་པ་དང༌། ནད་ཀྱིས་བཏབ་སྟེ་སོས་ནས་རིང་པོར་མ་ལོན་པ་ལ་སོགས་པ་རྐྱེན་བྱུང་བ་རྣམས་ཀྱིས་དད་པ་ཕུལ་བར་བྱའི། དགེ་བའི་ཕྱོགས་ཅུང་ཟད་ཙམ་བྱེད་པའམ་ཅུང་ཟད་ན་བའི་ཕྱིར་སྙད་བཏགས་ཏེ་དད་པ་འབུལ་བ་ནི་མ་ཡིན་ནོ། །དད་པ་ལེན་པའི་དགེ་སློང་བསྐོ་བ་ནི་བསླབ་པ་བྱིན་པ་དང༌། ཕས་ཕམ་པ་བྱུང་ན་དང་བསླབ་པ་མ་ཆགས་པ་དང༌། རང་བཞིན་དུ་མི་གནས་པའི་དགེ་སློང་མ་ཡིན་པ་དང༌། སྨྱོས་པ་ལ་སོགས་པས་དད་པ་བླང་བར་མི་བྱའོ། །དད་པ་ལེན་པའི་དགེ་སློང་གིས་ཀུན་ཏུ་སྤྱོད་པའི་ནང་དད་པའི་ཚེ་མཚམས་ཀྱི་ཕྱི་རོལ་ནས་ནང་དུ་ཕན་ཚུན་དུ་དབུལ་བར་མི་བྱ་ནམ་མཁའ་ལ་གནས་ཤིང་ས་ལ་དབུལ་བར་མི་བྱ། གཅིག་ནས་གཅིག་ཏུ་བརྒྱུད་དེ་དབུལ་བར་མི་བྱ། དད་པ་བླངས་ནས་རྒྱུག་ཅིང་མཆོད་པར་མི་བྱ། བསམ་གཏན་ལ་འཇུག་ཅིང་ཉལ་བར་མི་བྱའོ། །མཚམས་ནི་གཉིས་ཏེ། ཆེན་པོ་དང་ཆུང་དུའོ། །ཆེན་པོ་ནི་ཐང་ཀ་དང་བླ་འོག་དཔག་ཚད་ཕྱེད་དང་གསུམ་ཁོ་ར་ཁོར་ཡུག་གོ །ཆུང་དུ་ནི་འདི་ཚུན་ཆད་དཀྱིལ་འཁོར་གྱི་བར་དུ་སྟེ། དགེ་འདུན་བཞི་བཅུའི་ལས་ཤོང་བའོ། །ཤཱཀྱ་སེང་གེ་ཞེས་པ་ནས་འདུལ་བ་དེ་ནི་ང་ལས་ཉོན་ཞེས་བྱ་བ་ཡན་ཆད་དུ་རྣམ་པ་དགུ་པོའི་ནང་ནས་མཆོད་པའི་ཆོ་ག་བསྟན་པར་བྱས་ཏེ། སོར་མོ་བཅུའི་ཐལ་སྦྱར་ཞེས་བྱ་བ་ལ་སོགས་པ་སྨོས་ཏེ། དེ་ཡང་རྣམ་པ་གཉིས་ཀྱི་ཕྱིར་ཏེ། དེ་བཞིན་གཤེགས་པ་ལ་ཁྱིམ་པའི་རིགས་དང༌། རབ་ཏུ་བྱུང་བའི་ཡོན་ཏན་ལས་བསྟོད་པ་དང་
སོ་སོར་ཐར་པ་ལ་མཆོད་ཅིང་བསྟོད་པའོ། །ཁྱིམ་པའི་རིགས་ཀྱི་སྒོ་ནས་བསྟོད་པ་ནི་གདུང་གཙང་ཞིང་རིགས་བཙུན་པའི་ཕྱིར་ཤཱ་ཀྱ་ཞེས་སྨོས་སོ། །སེང་གེ་ཞེས་བྱ་བ་ནི་རབ་ཏུ་བྱུང་བའི་ཡོན་ཏན་གྱི་སྒོ་ནས་བསྟོད་པ་སྟེ། ཇི་ལྟར་སེང་གེ་རལ་པ་ཅན་ཕྱོགས་གང་ནས་གང་དུ་འགྲོ་བ་དེར་འཇིགས་པ་དང་བག་ཚ་བ་མེད་པར་འགྲོ་བ་བཞིན་དུ་དེ་བཞིན་གཤེགས་པ་སེང་གེ་དང་མཚུངས་པ་ཡང་མི་འཇིགས་པ་བཞི་དང་ལྡན་པས་མུ་སྟེགས་ཅན་གྱི་ཚོགས་མང་པོ་ཤིན་ཏུ་སྐྲག་པར་མཛད་པས་སེང་གེ་དང་འདྲའོ་ཞེའོ། །ཡང་ན་ཤཱཀྱ་ཞེས་བྱ་བའི་སྒྲ་ནི་ཕོད་པའམ་ནུས་པའམ་ལྕོགས་པ་ལྟ་བུའི་དོན་ཏེ། སྔོན་རྒྱལ་པོ་འཕགས་སྐྱེས་པོའི་བུ་ལས་ཡུལ་ཀ་ཕྱི་ལ་སྡུ་ཞེས་བྱ་བ་སྤུན་གཉིས་ཤིག་སྤྱུགས་པ་ལས་དེ་དག་ཀྱང་མཐུ་སྟོབས་ལྷག་པར་ཆེ་སྟེ། ཡུལ་དང་ལྗོངས་ལ་སོགས་པ་ཡང་བཅོམ་ཞིང་ཕམ། བདག་ཅག་ཉིད་ཀྱང་རྒྱལ་པོའི་བུ་ཞིག་པས་ཀ་ཕྱི་ལ་ཞེས་བྱ་བའི་དྲང་སྲོང་གིས་ཀྱང་རིལ་བ་སྤྱི་བླུགས་ཀྱིས་ཡུལ་གྲུ་བཅད་དེ་བྱིན་ནས། དེ་དག་སྐྱེད་པའི་བདེ་བས་ན་ཕྱོགས་ཀུན་དུ་བདེའོ་ཞེས་གྲགས་ཏེ། ཕྱོགས་གང་ན་རྒྱལ་པོའི་སྲིད་གཏོང་པའི་རྒྱལ་པོའི་ལྟ་བུའམ། རྒྱལ་པོ་ལ་མ་རངས་པའི་བློན་པོ་ལྟ་བུ་ལ་སོགས་ཏེ། ཐམས་ཅད་ཀྱང་འདིར་འདུ་ཞིང་ལྷགས་ནས་རྒྱལ་པོ་འཕགས་སྐྱེས་པོ་ཉིད་པས་ཀྱང་བུ་དེ་དག་ནི་ཤིན་ཏུ་འབྱོར་ཅིང་ནུས་པ་དང༌། ཕོད་ཅིང་ལྕོགས་པ་དང༌། གྲགས་ཆེ་ཞིང་དེ་ལྟ་བུ་ལས་གྱུར་པས་ན་ཤཱ་ཀྱ་ཞེས་བྱ་བ་ཁྱིམ་པའི་རིགས་ཀྱི་སྒོ་ནས་བསྟོད་དོ་ཞེའོ། །སོ་སོར་ཐར་པ་ལ་མཆོད་པ་ཡང་བསྟོད་པས་མཆོད་དེ། ཉོན་མོངས་པ་ལས་ཐར་པར་བྱེད་པས་ན་སོ་སོར་ཐར་པ་ལ་ཞེས་ཡོན་ཏན་གྱིས་མཆོད་པའོ། །བཤད་པར་བྱ་ཞེས་བྱ་བ་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པ་བཤད་པའམ་འདོན་པ་ལ་བྱའོ། །ཐལ་སྦྱར་ཞེས་བྱ་བ་ནི་ལུས་ཀྱིས་ཕྱག་འཚལ་བ་ལ་སོགས་ཏེ། ཕྱག་རྣམ་གསུམ་གྱི་བྱེ་བྲག་གོ །འདུལ་བ་ཞེས་བྱ་བ་ནི་རྣམ་པ་བདུན་གྱིས་བྱེ་བྲག་ཏུ་བསྟན་པ་ཡང་ཡིན་ཏེ། ཡང་ན་འདོད་ཆགས་དང༌། ཞེ་སྡང་དང༌། གཏི་མུག་ལ་སོགས་པའི་ཆོས་རྣམས་ཤིན་ཏུ་འདུལ་བར་བྱེད་པས་ན་འདུལ་བ་ཞེས་ཀྱང་བྱའོ། །མཆོད་པའི་ཆོ་ག་འདས་སོ། །ང་ལ་ཉོན་ཞེས་བྱ་
བ་ནས། སྲབ་འདྲ་སོ་སོར་ཐར་པ་འདིའོ། །ཞེས་བྱ་བའི་བར་དུ་རྣམ་པ་དགུ་པོ་ལས་ཡང་དག་པར་འཛིན་དུ་གཟུད་པ་བསྟན་ཏེ། ང་ལ་ཉོན་ཞེས་བྱ་བ་ལ་སོགས་པ་སྨོས་སོ། །དེ་ཡང་རྣམ་པ་བཞིར་དབྱེ་བར་བྱ་སྟེ། བཞི་པོ་ཡང་གང་ཞེ་ན། ཉན་དུ་གཞུག་པ་དང༌། ཕྱིན་ཅི་མ་ལོག་པར་བསྒྲུབ་པ་དང༌། མི་གཡེལ་བར་སྦྱོར་བ་དང༌། ལྟ་བ་ལ་ཆགས་སུ་མི་གཞུག་པའོ། །ང་ལ་ཉོན་ཞེས་བྱ་བ་ནི་ཉན་དུ་གཞུག་པ་དང་སྦྱར་རོ། །ཁ་ན་མ་ཐོ་ཕྲ་རྣམས་ལ། །སྒྲིམས་ཏེ་གུས་པར་གྱིས་ཤིག་ཅེས་བྱ་བ་ནི་མི་གཡེལ་བར་སྦྱོར་བ་དང་སྦྱར་རོ། །ཐོས་ནས་དྲང་སྲོང་ཆེན་པོ་ཡིན། །གསུངས་པ་ཇི་བཞིན་སྒྲུབ་པར་གྱིས། །ཞེས་པས་ནི་ཕྱིན་ཅི་མ་ལོག་པར་སྒྲུབ་པར་སྦྱར་རོ། །རྟག་པར་ཤིན་ཏུ་བསྟེན་པ་ཡིས། །ཞེས་པ་ནས། སྲབ་འདྲ་སོ་སོར་ཐར་པ་འདིའོ། །ཞེས་བྱ་བའི་བར་དུ་ནི་ལྟ་བ་ལ་ཆགས་སུ་མི་གཞུག་པ་བསྟན་ཏོ། །དེ་ལ་ང་ལ་ཉོན་ཅིག་ཅེས་བྱ་བ་སྟེ། ང་ཞེས་བྱ་བ་ནི་སོ་སོར་ཐར་པ་འདོན་པའི་གང་ཟག་གོ །དེ་ལ་ཅི་ཞིག་མཉན་ཞེ་ན། སོ་སོར་ཐར་པ་མཉན་པའོ། །དེས་ནི་དབང་པོ་གཞན་དུ་མི་གཡེང་ཞིང༌། དྲན་པ་མངོན་སུམ་དུ་བྱོས་ལ་རྣ་བླགས་ཏེ་ཉོན་ཅིག་པ་སྟེ། སོ་སོར་ཐར་པ་འདོན་པ་ལ་བསྟི་སྟང་དང་བཅས་པས་ཉོན་ཅིག་པའོ། །དེ་ལ་ཐོས་ནས་དྲང་སྲོང་ཆེན་པོ་ཞེས་བྱ་བ་དང༌། གསུངས་པ་བཞིན་དུ་སྒྲུབ་པར་གྱིས་ཞེས་བྱ་བ་གཉིས་ཀྱིས་ཕྱིན་ཅི་མ་ལོག་པར་སྒྲུབ་པའོ། །དེས་ཅི་ཐོས་ནས་ཇི་ལྟར་སྒྲུབ་ཅེ་ན། དྲང་སྲོང་ཆེན་པོས་གསུངས་བཞིན་སྒྲུབ་ཅེས་སྨོས་སོ། །དྲང་སྲོང་ནི་དེ་བཞིན་གཤེགས་པ་ལ་བྱའོ། །ཆེན་པོ་ནི་ཚུལ་ཁྲིམས་ཀྱིས་རྒྱས་ཤིང་འཇིག་རྟེན་པའི་མུ་སྟེགས་དང༌། ཉན་ཐོས་དང༌། རང་སངས་རྒྱས་ཀྱི་དྲང་སྲོང་ལས་མངོན་པར་ཤེས་པ་ལ་སོགས་པས་ཁྱད་པར་འཕགས་པའི་ཕྱིར་ཆེན་པོ་ཞེས་སྨོས་སོ། །དེས་ཇི་སྐད་གསུངས་པ་བཞིན་དུ་ཕྱིན་ཅི་མ་ལོག་པར་སྒྲུབ་པའོ་ཞེས་བྱ་བའི་དོན་ཏོ། །ཁ་ན་མ་ཐོ་ཕྲ་རྣམས་ལ། །སྒྲིམས་ཏེ་གུས་པར་གྱིས་ཤིག་པ་ནི་མི་གཡེལ་བར་སྦྱར་བ་སྟེ། ཁ་ན་མ་ཐོ་ཞེས་བྱ་བ་ནི་བརྗོད་པར་མི་རིགས་པའི་ཚིག་སྡུད་པ་སྟེ། སྐྱེས་བུ་དམ་པ་རྣམས་ཀྱིས་སྨད་པའོ། །ཁ་ན་མ་ཐོ་ཞེས་བྱ་བ་ནི་རྣམ་པ་གཉིས་ཏེ། རང་བཞིན་གྱི་དང༌། བཅས་པའི་
ཁ་ན་མ་ཐོ་བའོ། །དེ་ལ་བཅས་པའི་ཁ་ན་མ་ཐོ་བ་ལས་རང་བཞིན་གྱི་ཁ་ན་མ་ཐོ་བ་སྡིག་པ་ཆེ་ཞིང་ལྕི་བས་ན། སྐབས་འདིར་ཕྲ་ཞེས་སྨོས་པས་ན་བཅས་པའི་ཁ་ན་མ་ཐོ་བ་ལ་བྱ་སྟེ། དེ་བས་ན་དགེ་བ་ལ་བརྩོན་པའི་གང་ཟག་གིས་བཅས་པའི་ཁ་ན་མ་ཐོ་བ་ཕྲ་བའི་ཡང་ཕྲ་བ་ལ་བརྙས་པར་མི་བྱ་ཞིང་ཤིན་ཏུ་བསྒྲིམས་ཏེ་བསྲུང་ཞིང་བསྡམས་པར་བྱ་ན་རང་བཞིན་གྱི་ཁ་ན་མ་ཐོ་པ་ལ་སོགས་ཏེ་སྡིག་ཆེ་བ་སྦོམ་པོ་རྣམས་ལྟ་ཅི་སྨོས་ཞེས་བསྟན་ཏོ། །དེས་ནི་བསླབ་པ་ལ་མི་གཡེལ་བར་སྦྱོར་བ་བསྟན་ཏོ། །རྟག་པར་ཤིན་ཏུ་བརྟེན་པ་ཞེས་བྱ་བ་ནི་ཤློ་ཀ་གཅིག་གིས་ནི་ལྟ་བ་ལ་ཆགས་སུ་མི་གཞུག་པ་བསྟན་ཏེ། རྟག་པར་ཤིན་ཏུ་བརྟེན་པ་ཞེས་བྱ་བས་སེམས་རྟ་རྒོད་དང་མཚུངས་པ་ཤིན་ཏུ་གདུལ་དཀའ་བ་དཔེ་རྟ་རྒོད་ལས་བླངས་ཏེ་བསྟན་ཏོ། །རྟ་རྨུ་རྒོད་མ་རུངས་པ་འཇུག་ཅིང་འགྲོ་བར་བྱ་བའི་ལམ་མ་ཡིན་པར། བརྟེན་ཅིང་འཚལ་བའམ། འཐར་བ་ལྟར་སེམས་རྟ་རྒོད་དང་མཚུངས་པ་ཡང་ཉོན་མོངས་པའི་ཆོས་འདོད་པ་ལྔའི་ཡོན་ཏན་ལ་ཤིན་ཏུ་མོས་ཤིང་གྱ་ཚོམ་དུ་འཇུག་པ་ལས་བཟློག་པར་དཀའ་བ་བསྟན་ཏེ། ཅི་ལྟར་རྟ་རྒོད་མ་རུངས་པ་འཇུག་པར་བྱ་བ་ལམ་མ་ཡིན་པར་བརྟེན་ཅིང་འགྲོ་བ་ལ་སྲ་བ་ཀྱིས་ཁ་ལོ་སྒྱུར་ཅིང་དགུག་པ་ལྟར་སེམས་རྟ་རྒོད་དང་མཚུངས་པ་ཡང་གཟུགས་དང༌། སྒྲ་དང༌། དྲི་དང༌། རོ་དང༌། རེག་བྱའི་ཆོས་རྣམས་ལ་སེམས་རབ་ཏུ་གཡེང་བར་སྤྱོད་ཅིང་འཇུག་པ་ལས་བཟློག་པ་དང་ལྡོན་པར་བྱེད་པ་ནི་སོ་སོར་ཐར་པ་དེ་ཡིན་ཏེ། དེ་བས་ན་སོ་སོར་ཐར་པ་སྲ་བ་དང་འདྲའོ་ཞེས་སྨོས་སོ། །དེ་ལ་སེམས་ཞེས་སྨོས་པ་ནི་མུ་སྟེགས་ཅན་བདག་ཏུ་ལྟ་བ་ལས་བྱེ་བྲག་ཏུ་བསྟན་ཞིང་བཟློག་པའི་ཕྱིར་སེམས་ཞེས་སྨོས་ཏེ། ཉོན་མོངས་པའི་གཡུལ་ལ་བརྟེན་ཞིང་འཇུག་ཀྱང་བདག་ཅེས་བྱ་བ་མེད་པས་ན་སེམས་འབའ་ཞིག་གདུལ་བའི་དོན་ཏོ། །དེས་ནི་ཀུན་ནས་ཉོན་མོངས་པ་སྦྱོང་ཞིང་སྤེལ་བར་སྟོན་གྱི། །བདག་རྟག་པ་ཐེར་ཟུག་པ་ནི་རྟག་པར་མི་འགྱུར་བའི་རང་བཞིན་དུ་འདོད་པས་ན་ཀུན་ནས་ཉོན་མོངས་པའང་མེད། རྣམ་པར་བྱང་བ་ཡང་མེད་དེ་དེ་ནམ་མཁའ་དང་འདྲའོ། །དེ་བས་ན་བདག་ཏུ་ལྟ་བ་ལ་ཆགས་སུ་མི་གཞུག་པ་བསྟན་ཏོ། །གཟེར་བུ་རྣོན་པོ་ཞེས་བྱ་བ་ནི་ཆད་པའི་ལས་བྱས་
ཤིང་འགྱོད་པ་དང༌། བཤགས་པ་དང༌། མཐོལ་བའི་ལས་བྱས་ཏེ། སོ་སོར་ཐར་པ་ཉིད་ལ་གནས་ན་མ་འོངས་པའི་ཉོན་མོངས་པ་ངན་སོང་གསུམ་དུ་འགྲོ་ཞིང་ཁྲིད་པར་བྱེད་པའི་ཁ་ན་མ་ཐོ་བ་རྣམས་རབ་ཏུ་གཅོད་པར་བྱེད་པས་ན་ཁ་ན་མ་ཐོ་བའོ། །བརྒྱ་པ་ནི་སོ་སོར་ཐར་པ་ལས་འདའ་བ་རྣམས་ཚེ་འདི་ལ་ཆད་པའི་ལས་ཀྱི་སྒོ་མང་པོ་ནས་འགྱོད་ཅིང་མི་བདེ་བའོ། །དེ་གཉིས་ཀྱིས་མི་སྲབ་ལྟ་བུར་བསྟན་ཏེ། སྲབ་ཅེས་སྨོས་པ་ནི་ངང་ཚུལ་ངན་པ་དང་ལྡན་པའི་གང་ཟག་འདུལ་བ་མ་ཡིན་པ་ལ་ཞུགས་པ་རྣམས་ཁ་དས་གློན་ཞིང་སྣང་བར་བྱ་བའི་ཕྱིར་སྲབ་ཅེས་བསྟན་ཏོ། །འདྲ་ཞེས་བྱ་བ་ནི་འཕགས་པ་དང་མ་རབས་གཉིས་ཀ་དང་མཐུན་ཏེ། བདག་ལ་གནོད་པའི་དཀའ་ཐུབ་སྤངས་མོད་ཀྱི་སྦྱངས་པའི་ཡོན་ཏན་དང་ཡང་མཐུན་པས་ཧ་ཅང་དོག་པ་ཡང་མ་ཡིན། འདོད་པའི་བདེ་བ་སྤངས་མོད་ཀྱི་གང་ཟག་མ་རབས་རྣམས་ཀྱི་སྤྱོད་པ་དང་མཐུན་པས་ཧ་ཅང་སྤངས་པ་ཡང་མ་ཡིན་ན། །ཆེ་བ་གང་དག་ཅེས་བྱ་བ་ཤློ་ཀ་གཅིག་གིས་ནི་ཡང་དག་པར་འཛིན་པའི་ལེགས་པ་བསྟན་ཏེ། དེ་ལ་ཆེ་བ་ཞེས་བྱ་བ་ནི་རྣམ་པར་གྲོལ་བའི་འབྲས་བུ་ཐོབ་པ་དག་ལ་ཆེ་ཞེས་གདགས་པ་ཡང་ཡོད་མོད་ཀྱི། སྐབས་འདིར་ནི་གང་ཚུལ་ཁྲིམས་ཀྱི་བསླབ་པ་ལ་གནས་ཤིང་བསླབ་པ་ལ་འདོད་པ་རྣམས་ལ་བྱ་སྟེ། དེ་ཡང་ངག་གིས་བསྒོ་བ་ཙམ་གྱིས་ལྡོག་པའོ་ཞེའོ། །ངག་ཙམ་ཞེས་བྱ་བ་ནི་རྡོ་དབྱིག་དང་ཁུ་ཚུར་ལ་སོགས་པའི་དྲག་ཤུལ་གྱིས་བདའ་མི་དགོས་ཤིང༌། ངག་གིས་སྨྲས་པ་ཙམ་གྱིས་ཉོན་མོངས་པའི་ཕྱོགས་ལས་ལྡོག་པའོ། །མཚམས་ཞེས་བྱ་བ་ནི་བསླབ་པ་ལ་བྱ་སྟེ། བསླབ་པ་དང་མི་བསླབ་པ་དང༌། བྱ་བ་དང༌། མི་བྱ་བ་དང༌། གནང་བ་དང༌། མི་གནང་པ་ལ་སོགས་པའི་མཚམས་ཤེས་པས་ན་བསླབ་པའི་མཚམས་ལས་མི་འདའ་བ་ཞེས་བྱའོ། །དེ་ལ་མི་རྟ་བཟང་པོ་ཞེས་བྱ་བ་སྨོས་པ་ནི་དཔེ་སྟེ། གོང་མའི་མི་རྟ་ནི་རྡོ་དབྱིག་དང་ཁུ་ཚུར་ལ་སོགས་པས་བདའ་དགོས་པས་ན་བཟང་པོ་མ་ཡིན་ཏེ། དེ་ལ་ངག་ཙམ་གྱིས་ལྡོག་པས་ན་རྟ་ཅང་ཤེས་སམ་མི་ཤེས་བཞིན་ཅན་ལྟ་བུའི་ཕྱིར་མི་རྟ་བཟང་པོའོ། །ཉོན་མོངས་པའི་གཡུལ་ལས་ཐར་ཅེས་པ་ནི་ཇི་ལྟར་ཐབས་དང་ལྡན་པའི་སྐྱེས་བུ་གཡུལ་ངོ་བཟློག་སྟེ་གཡུལ་ལས་རྒྱལ་བ་བཞིན་དུ་བསླབ་
པ་གནས་པའི་སྐྱེས་བུ་ཅང་ཤེས་པ་ནི་ཉོན་མོངས་པ་དང་འཐབ་པའི་གཡུལ་ལས་རྒྱལ་ནས་དགྲ་བཅོམ་པར་ཐར་པ་ལ་བྱའོ། །ཡང་དག་པར་མི་འཛིན་པའི་ཉེས་དམིགས་ཀྱི་དབང་དུ་བྱས་ནས་སུ་ལ་སྲབ་འདི་མེད་ཅེས་བྱ་བ་ལ་སོགས་པ་སྨོས་སོ། །སུ་ལ་མེད་ཅེས་བྱ་བ་ནི་མུ་སྟེགས་ཅན་དང༌། འདོད་པའི་ལོངས་སྤྱོད་ལ་ཞུགས་པ་རྣམས་ཏེ། དེ་དག་ལ་སོ་སོར་ཐར་པའི་སྲབ་འདི་མེད་པས་ན་ནམ་དུའང་མྱ་ངན་ལས་འདས་པར་མི་འགྱུར་རོ་ཞེའོ། །དེ་ལ་ཁ་ཅིག་ན་རེ་མུ་སྟེགས་ཅན་གཅིག་པུར་མ་ཟད་ཀྱི། སངས་རྒྱས་ཀྱི་བསྟན་པ་ལ་ཞུགས་པ་རྣམས་ཀྱང་ཚུལ་ཁྲིམས་ཀྱི་སྐྱོན་དང་བཅས་ཤིང་འདོད་པའི་ལོངས་སྤྱོད་ལ་གྱ་ཚོམ་དུ་འཇུག་པ་དེ་དག་ཀྱང་མྱ་ངན་ལས་འདས་པ་མི་འདོད་པ་དང་འདྲ་བར་ནམ་དུ་ཡང་རྣམ་པར་གྲོལ་བ་ཐོབ་པར་མི་འགྱུར་རོ་ཞེའོ། །དེ་དག་ཉོན་མོངས་གཡུལ་ལས་ཕམ། །ཞེས་བྱ་བ་ནི་ཉོན་མོངས་པ་ནི་འདོད་ཆགས་དང་ཞེ་སྡང་དང༌། གཏི་མུག་ལ་སོགས་པ་དེ་དག་ཚོགས་པའམ་འདུས་པ་ཚིག་བླ་དགས་སུ་གདགས་པ་ནི་གཡུལ་ཞེས་བྱ་སྟེ། བདག་ཉིད་ཉོན་མོངས་པའི་དབང་དུ་གྱུར་ཅིང༌། ཉོན་མོངས་པ་ལས་བདག་ཉིད་ཕམ་པས་ན་ཉོན་མོངས་གཡུལ་ལས་ཕམ་ཞེས་བསྟན་ཏོ། །དཔེར་ན་ཇི་ལྟར་དགྲའི་གཡུལ་གྱིས་བཟློག་པ་བཞིན་པས་གཡུལ་ལས་ཕམ་པའོ། །གཟུངས་མེད་རྣམ་པར་འཁྱམ་པར་འགྱུར། །ཞེས་པ་གང་གིས་གཟུངས་མེད་ཅེ་ན། སོ་སོར་ཐར་པའི་གཟུངས་མེད་པ་ལ་བྱའོ། །རྣམ་པར་འཁྱམ་ཞེས་བྱ་བ་ནི་འགྲོ་བ་ལྔ་སྟེ། སེམས་ཅན་དམྱལ་བ་དང༌། ཡི་དགས་དང༌། བྱོལ་སོང་དང༌། ལྷ་དང་མིའི་ནང་དུ་ཡང་ནས་ཡང་འཐོར་ཞིང་བརྒྱུད་པས། ནམ་དུའང་ཐར་པར་མི་འགྱུར་རོ་ཞེའོ། །འཁྱམ་ཞེས་བྱ་བ་ནི་ཇི་ལྟར་བྱིས་པ་དོན་མེད་པར་འཕྱན་ཅིང་འཁྱམ་པ་ལྟར། སོ་སོར་ཐར་པའི་གཟུངས་མེད་ཅིང་མྱ་ངན་ལས་འདས་པའི་དོན་མི་ཚོལ་བས་རྟག་པར་འཁོར་བ་ཉིད་ཀྱི་ནང་དུ་འཁྱམ་པར་འགྱུར་རོ་ཞེའོ། །དཔེར་ན་རྟ་བརྟོད་ལས་ཤོར་ཏེ། འཁྱམ་པའམ། མཛོ་རུ་དག་མེད་ན་ལས་ཀྱིས་མུ་སྟོར་བ་ལྟ་བུ་ཡིན་ཏེ། དེ་ཡང་སོ་སོར་ཐར་པའི་གཟུངས་མེད་པས་དོན་སྟོར་བར་འགྱུར་རོ་ཞེའོ། །དེ་ཡན་ཆད་ཡང་དག་པར་མི་འཛིན་པའི་ཉེས་དམིགས་བསྟན་ཏོ། །ཡང་དག་པར་བསྒོམ་
པའི་དབང་དུ་བྱས་ནས། དགེ་འདུན་བཙུན་པ་གསོན་ཅིག་ཅེས་བྱ་བ་ལ་སོགས་པ་སྨོས་སོ། །གསོན་ཅིག་ཅེས་བྱ་བ་ནི་འདོད་པ་པོའི་མིས་འཁོར་ཉན་པ་རྣམས་ལ་བོས་ནས་སེམས་གཞན་དུ་མི་གཡེང་བར་ཉན་དུ་གཞུག་པའོ། །དགེ་འདུན་ཞེས་བྱ་བ་ནི་དགེ་འདུན་རྣམ་པ་ལྔ་ལ་བྱ་སྟེ། བཞི་འདུས་པས་ཚུལ་ནས་འབྱུང་བ་དང༌། བསྙེན་པར་རྫོགས་པར་བྱ་བ་དང༌། དགེ་འདུན་གྱི་ལྷག་མའི་ཆད་པ་དབྱུང་བར་མི་འགྱུར་རོ། །ལྔ་འདུས་པས་ནི་བསྙེན་པར་རྫོགས་པ་དང་དབྱུང་བར་མི་བྱའོ། །མཐའ་འཁོབ་ན་ནི་བསྙེན་པར་རྫོགས་པར་ཡང་བྱའོ། །བཅུ་འདུས་པས་ནི་དབྱུང་བར་མི་བྱའོ། །ཉི་ཤུ་དང་ཉི་ཤུ་ལས་ལྷག་པས་ནི་ལས་ཐམས་ཅད་བྱའོ། །གསོ་སྦྱོང་བཅུ་བཞིའམ་བཅོ་ལྔ་ཞེས་སྨོས་པས་ནི། སྔོན་མུ་སྟེགས་ཅན་གཅིག་གིས་དགེ་སློང་དག་ལ་དི་རིང་ཚེས་གྲངས་ནི་དུ་གསོ་སྦྱོང་བྱེད་དམ་མི་བྱེད་ཅེས་དྲིས་པ་དང༌། དགེ་སློང་དག་གིས་མི་ཤེས་པར་གྱུར་ནས་བཅོམ་ལྡན་འདས་ལ་ཞུས་པ་དང༌། དེ་ནི་མུ་སྟེགས་ཟེར་བ་ཡང་བདེན་གྱི་དགེ་སློང་དག་གསོ་སྦྱོང་ཡང་གྱིས་ཤིག །ཚེས་གྲངས་ཀྱང་ཤེས་པར་གྱིས་ཤིག །དེ་ལ་དགུན་གྱི་དུས་ཀྱི་ཟླ་བ་ཕྱེད་པ་རྒྱང་ལ་ཕྱེད་གསུམ་པ་དང༌། བདུན་པ་ནི་བཅུ་བཞི་ཡིན་ཏེ། དེ་ཡང་གང་ཞེ་ན། དགུན་ཟླ་ར་བ་གནམ་སྟོང་དགུན་ཟླ་ཐ་ཆུངས་གནམ་སྟོང༌། དཔྱིད་ཀྱི་དུས་ལ་ཕྱེད་བརྒྱད་ལ་བཅུ་བཞིའི་གསོ་སྤྱོང་དཔྱིད་ཟླ་འབྲིང་པོ་གནམ་སྟོང༌། །དབྱར་ཟླ་ར་བ་གནམ་སྟོང༌། དབྱར་གྱི་ཕྱེད་བརྒྱད་ལ་བཅུ་བཞིའི་གསོ་སྦྱོང་དབྱར་ཟླ་ཐ་ཆུངས་གནམ་སྟོང༌། སྟོན་ཟླ་འབྲིང་པོ་གནམ་སྟོང༌། དུས་ལ་བབ་ཅེས་བྱ་བ་ནི་གསོ་སྦྱོང་གི་དུས་ལ་བབ་པའོ། །དུས་ལ་མ་བབ་པ་དང་དུས་ལས་ཡོལ་བར་བྱས་ན། ཉེས་བྱས་སོ། །བཟོད་ཅེས་བྱ་བ་ནི་གལ་ཏེ་དགེ་སློང་དག་མི་གཙང་ངམ། ལས་ཀྱིས་བྲེལ་ཏམ། མི་མཐུན་པར་འགྱུར་ན་ཁ་ཏོན་དུ་འདོད་པའི་གང་ཟག་ལ་མི་དད་ཅིང་མི་བཟོད་པར་འགྱུར་བས་ན་དེ་ལྟ་བུ་མེད་དེ། བཟོད་ཅིང་དད་ན་སོ་སོར་ཐར་པའི་མདོ་གདོན་ཏོ་ཞེས་བྱ་བའི་ཐ་ཚིག་གོ །གནང་བར་མཛོད་ཅིག་ཅེས་བ་ནི་བདག་འདོན་པར་དགེ་འདུན་གྱིས་གནང་ཤིག་པའོ། །སུས་འདོན་ཞེ་ན། དགེ་འདུན་གྱི་གནས་བརྟན་གྱིས་སོ། །དེ་ཡང་མི་ཤེས་ན་གནས་བརྟན་དང་འོག་གིས་
གདོན་ཏོ། །དེ་ཡང་མི་ཤེས་ན་གསོལ་བ་བཏབ་ནས་འདོན་པ་པོ་བསྐོ་བར་བྱའོ། །འདི་ནི་སོ་སོར་ཐར་པ་འདོན་པ་པོ་ཉིད་ཀྱི་ཚིག་གོ །ཅིའི་ཕྱིར་དགེ་འདུན་ཐམས་ཅད་ཀྱིས་མི་གདོན་ཞེ་ན། ཀུན་གྱིས་མཐུན་པར་ཡང་མི་ཐོན་ལ། ཆོས་ཉན་པའི་ཚུལ་དུ་ཡང་མི་རུང་ལ། རིང་དུ་ཐོགས་པ་དང༌། སྒྲ་ཅ་ཅོས་མ་ཞི་བའི་ཉེས་པར་འགྱུར་བས་ན་གཅིག་གིས་སྟོན་ལ་གཞན་ཆོས་ཉན་ན་དེ་ལྟ་བུའི་ཉེས་པ་ཡང་མེད་ལ་ལྟུང་བ་ཡོད་པ་ཡང་དྲན་པར་འགྱུར་རོ། །རང་རང་གི་གནས་སུ་སོ་སོར་ཐར་པ་གདོན་ན་ཅི་ཉེས་ཤེ་ན། དེ་ཡང་དགེ་འདུན་མ་འདུས་པས་གསོ་སྦྱོང་བྱས་པ་མ་ཡིན་ནོ་ཞེའོ། །འདི་ནི་གསོལ་བའོ་ཞེས་བྱ་བ་ནི་ཤེས་པར་བྱ་བའི་མཐའ་སྟོན་ཏོ། །ཚེ་དང་ལྡན་པ་གསོ་སྦྱོང་བྱ་སྟེ་ཞེས་བྱ་བ་ལ། ཅིའི་ཕྱིར་གསོ་སྦྱོང་བྱ་ཞེ་ན། དཔེར་ན་སྐྱེས་བུ་ལུས་སྣད་པ་འམ་རྨ་དང་ལྡན་པ་ལ་སྨན་པས་སྨན་བྱས་ན་ནད་ལས་སོས་པར་འགྱུར་རོ། །དེ་དག་འདྲ་བར་སེམས་ཀྱི་ནད་དང་རྨ་ནི་མི་དགེ་བའི་ཆོས་སྡིག་པ་ཡིན་ཏེ། དེ་ལ་མི་དགེ་བ་སེལ་ཞིང་བྱ་དགའ་སྦྱིན་པས་ན་གསོ་སྦྱོང་ངོ༌། །ཡང་ན་དེ་ལྟར་གཉེན་པོ་ལ་བརྟེན་ཞིང་བྱས་པས་སྡིག་པའི་ཆོས་རྣམས་སྤོང་ཞིང་དགེ་བའི་ཆོས་རྣམས་བརྟས་པར་བྱེད་པས་ན་དགེ་བརྟས་ཞེས་ཀྱང་བྱའོ། །བྱ་བ་ཇི་ལྟ་བུ་ཞེ་ན། ཐ་ན་བཞི་འདུས་པ་མཐུན་པས་ཀྱང་སོ་སོར་ཐར་པ་གདོན་ཏོ། །བཞི་གནས་པས་དད་པ་མི་བླང་ངོ༌། །གསུམ་མན་ཆད་གནས་པ་ནི་སྟ་གོན་བྱས་ལ་ཁ་ཏོན་བྱ། ཞི་བར་བྱ་སྟེ་དགེ་སློང་གཞན་ཉུང་ན་བྱིན་གྱིས་བརླབ་པོ། །བྱ་བའི་གནས་ནི་སྤངས་ཤིང་དབེན་པར་རོ། །དེའི་ཉིན་མོ་ཟླ་བ་ཕྱེད་ཚུན་ཆད་ཀྱི་ཉེས་པ་བསམ་མོ། །མཐོལ་བ་ནི་ལྟུང་བ་འདྲ་བའི་མདུན་དུ་མི་བྱའོ། །ཐམས་ཅད་ལྟུང་བ་འདྲ་ན་གཅིག་གུད་དུ་མཐོལ་དུ་བཏང་ལ་དེ་ཚངས་ནས་ཀུན་གྱིས་དེ་ལ་བྱའོ། །འགྲོ་བར་སུའང་མ་དད་ན་གསོལ་བས་སྤྱིར་བསྔོའོ། །གསོ་སྦྱོང་དུས་སུ་མ་བྱས་སམ། དུས་མ་ཡིན་པར་བྱས་ན་འདས་པའོ། །དུས་མ་ཡིན་པར་གསོ་སྦྱོང་བྱར་རུང་བ་ནི་བཞི་སྟེ། བར་ཆད་བརྒྱད་ལྟ་བུའི་རྐྱེན་བྱུང་ན་གསུམ་མམ་སྤྱི་སྟེ། དེ་ནི་རྐྱེན་གྱིའོ། །བསྔོ་བའི་ནི་དུས་ཀྱི་ཚེ་མི་བདེ་ན་བསྔོ་བར་བྱའོ། །མཐུན་པའི་རྩོད་པ་སྡུམ་པའི་ཐབས་སམ་ཆད་པས་གསོལ་བའི་ཚེའོ། །
བཀྲ་ཤིས་ཀྱིས་ནི་ལྟས་ངན་ན་མ་ཐན་པའི་ཚེའོ། །སོ་སོར་ཐར་པའི་མདོ་བཤད་པ་གདོན་ཞེས་བྱ་བ་ལ། མདོའི་གདོན་པ་ལྔ་སྟེ། གླེང་གཞི་ནས་ཕས་ཕམ་པ་བཞི་དང༌། གླེང་གཞི་ནས་དགེ་འདུན་ལྷག་མ་ཡན་ཆད་དང༌། གླེང་གཞི་ནས་མ་ངེས་པའི་བར་དུ་བརྗོད་པ་དང༌། གླེང་གཞི་ནས་ཐམས་ཅད་རྫོགས་ཀྱི་བར་དུ་གདོན་པའོ། །གནས་བརྟན་གྱིས་མ་ཐོན་ན་དེ་མན་ཆད་སུས་ཐོན་པས་སོ། །མ་རྫོགས་ན་གཞན་གྱིས་བཏུད་དོ། །སྨྱོན་པས་བཏོན་ན་ཡང་རུང་སྟེ། འཁོར་རྣམ་པར་དག་པའི་དབང་དུ་བྱས་ནས་ཁྱེད་ཅག་སུ་ལ་ཉེས་པ་ཡོད་པ་ཞེས་བྱ་བ་ལ་སོགས་པ་སྨོས་སོ། །ཉེས་པ་ཡོད་པ་ནི་ལྟུང་བ་མ་མཐོལ་བའོ། །མཐོལ་ཅིག་ཅེས་བྱ་བ་ནི་ལ་ལ་ན་རེ་དེར་འཕྲལ་དུ་དྲན་ན། དགེ་འདུན་ནམ་ཡང་ན་དྲུང་ན་གཅིག་ལ་བཤུབས་ཏེ་མཐོལ་ཅིག །ཁ་ཅིག་ན་རེ་དེར་ཡིད་ཀྱིས་བྱིན་གྱིས་བརླབས་ལ་ཕྱིས་མཐོལ་ཅིག་ཅེའོ། །ཁ་ཅིག་ན་རེ་ཁ་ཏོན་འདོན་པས་ནི་ཡིད་ཀྱིས་བྱིན་གྱིས་བརླབ་པོ། །སོ་སོར་དྲིས་ནས་ལན་བཏབ་པ་དེ་བཞིན་དུ་ཞེས་བྱ་བ་ནི་ཇི་ལྟར་མ་ལྷགས་པ་རྣམས་ལ་གནས་སོ་སོར་དྲིས་ན་དེ་དག་གིས་དད་པ་དང་གཙང་མ་ལན་གསུམ་གྱི་བར་དུ་བཟླས་ཏེ། ལན་བཏབ་པ་བཞིན་དུ་འདིར་ཚོགས་པ་རྣམས་ལ་ཡང་ལན་གསུམ་གྱི་བར་དུ་བསྒྲགས་པར་བྱའོ་ཞེའོ། །ལན་གསུམ་ཆུད་པ་ནི་རིང་དུ་ཐོགས་པ་དང་ཡེངས་པས་མི་གོ་བའི་ཉེས་པ་སྤོང་བའི་ཕྱིར་ཧ་ཅང་མི་མང་མི་ཉུང་བའོ། །ལན་གསུམ་གྱི་བར་དུ་དྲི་བའི་ཚིག་ནི་ཚེ་དང་ལྡན་པ་དག་ཅེས་པ་ནས་བསྒྲགས་པར་བྱའོ་ཞེས་བྱ་བའི་བར་དུའོ། །འཁོར་འདི་ལྟ་བུ་ཞེས་བྱ་བ་ནི་འཁོར་གཙང་མ་འདི་ལྟ་བུ་ཞེས་བསྟོད་པའོ། །དྲན་བཞིན་དུ་ཞེས་སྨོས་པ་ནི་དེ་ལྟར་ལན་གསུམ་དུ་དྲིས་ནས་ཉེས་པ་ཡོད་ལ་དྲན་བཞིན་དུ་མཐོལ་ན་བརྫུན་དུ་འགྱུར་གྱི། མི་དྲན་ན་བརྫུན་དུ་མི་འགྱུར་རོ། །བརྫུན་ནི་ཚིག་ཡིན་མོད་ཀྱི། ཡོད་ན་མཐོལ་ཅིག །མེད་ན་མ་སྨྲ་ཤིག་ཅེས་བསྒོ་བ་ལས་ཡོད་བཞིན་དུ་མི་སྨྲ་བས་ན། ཚིག་གིས་གོ་བར་བྱའོ། །དོན་བརྡས་གོ་བར་བྱེད་པས་ན་དེ་ཉིད་བརྫུན་ནོ། །བར་དུ་གཅོད་ཅེས་བྱ་བ་ནི་རྒྱུ་དང་འབྲས་བུའི་བར་དུ་གཅོད་དེ་ཚེ་འདི་ལ་དགེ་བའི་བར་དུའོ། །ཚེ་ཕྱི་མ་ལ་ནི་བདེ་འགྲོ་དང་མྱ་ངན་ལས་འདས་པའི་བར་དུ་གཅོད་དོ། །རྣམ་པར་དག་པ་འདོད་ཅེས་བྱ་བ་ནི་མྱ་
ངན་ལས་འདའ་བར་འདོད་པ་ཡིན་གྱི་ནན་ཏུར་འདོད་པ་མ་ཡིན་ནོ། །ཉེས་པ་ཡོད་ཅེས་བྱ་བ་ནི་མཐོལ་བ་མ་བྱས་པའོ། །དྲན་ཞིང་ཞེས་པ་མ་བརྗོད་པའི་མཐོང་བ་ཞེས་པ་ནི་ལྕི་ཡང་མཐོང་བའོ། །བཤགས་ན་བདེ་བར་འགྱུར་ཞེས་པ་ནི་ལྔ་སྟེ། ལེ་ལོའི་གཉེན་པོ་བརྩོན་འགྲུས་དང༌། ཁ་ན་མ་ཐོ་བ་འབྱུང་བའི་གཉེན་པོ་ཁ་ན་མ་ཐོ་བ་མེད་པ་དང༌། བསླབ་པ་ཁྱད་དུ་གསོད་པའི་གཉེན་པོ་གུས་པ་དང༌། འགྱོད་པའི་གཉེན་པོ་འགྱོད་པ་མེད་པ་དང༌། རྣམ་པར་མ་དག་པའི་གཉེན་པོ་ཏིང་ངེ་འཛིན་དང༌། ཡང་དག་པ་ཇི་ལྟ་བ་བཞིན་དུ་ཤེས་པ་རྣམས་དག་པས་སོ། །གླེང་གཞི་ཞེས་བྱ་བ་ནི་སོ་སོར་ཐར་པ་དེ་ལས་འབྱུང་བའོ། །སོ་སོར་ཐར་པ་དང་པོ་བརྗོད་པ་མི་བརྗེད་པའི་དྲན་བྱེད་ཙམ་དུ་བྲིས་ལ། སོ་སོར་ཐར་པའི་མདོ་གདོན་པ་ལས་བརྩམས་ཏེ། མི་ཚངས་པར་སྤྱོད་པའི་གླེང་གཞི་ནི་ལོ་བཅུ་གཉིས་ཀྱི་བར་དུ་ཉན་ཐོས་ཀྱི་དགེ་སློང་རྣམས་ཚུལ་ཁྲིམས་ཀྱི་སྒོ་ནས་སྐྱོན་དང་འཕེན་མེད་པ་ལས། ལོ་བཅུ་གསུམ་པ་ལ་བབ་པ་དང༌། སངས་རྒྱས་བཅོམ་ལྡན་འདས་ཡུལ་སྤོང་བྱེད་བྲམ་ཟེ་ཀ་ལན་དཀའི་གྲོང་ན་བཞུགས་སོ། །དེའི་ཚེ་ན་ཁྱིམ་བདག་ཀ་ལན་དཀའི་བུ་བཟང་སྦྱིན་ཞེས་བྱ་བ་དེ་ནོར་མང་ཞིང་ལོངས་སྤྱོད་ཆེ་བའི་ཚད་ནི་ངལ་སོ་པོའི་ནོར་ལ་འགྲན་པ་ཞིག་འདུག་པ་དེས་རིགས་མཉམ་པ་ལས་ཆུང་མ་བླངས་ནས་རྩེ་དགའ་ཡོངས་སུ་སྤྱོད་ཅིང་འདུག་པ་ལས་སླད་ཀྱིས་ཁྱིམ་བདག་དེ་སངས་རྒྱས་དང༌། ཆོས་དང༌། དགེ་འདུན་ལ་མངོན་པར་དད་དེ་སྐྱབས་སུ་སོང་ནས་དགེ་སློང་གི་སྔོམ་པ་བླངས་ནས་སྐྲ་དང་ཁ་སྤུ་བྲེགས་ཏེ་འདུག་གོ །དེ་ནས་དུས་ཕྱི་ཞིག་ན་བཟང་སྦྱིན་གྱིས་བསམས་པ། བདག་ཁྱིམ་ནས་ཕྱུང་སྟེ་དགེ་སློང་གི་དངོས་པོར་གྱུར་ཀྱང་གཉེན་བཤེས་དང་འདྲེས་ཏེ་སྔོན་གྱི་ཁྱིམ་པ་བཞིན་དུ་གནས་པ་ནི་ཤིན་ཏུ་མི་རིགས་སོ་སྙམ་ནས་དེ་དག་དང་དཔྲལ་བའི་ཕྱིར་ལྷུང་བ་ཟེད་དང་ཆོས་གོས་ཐོགས་ཏེ་ལྗོངས་རྒྱུར་སོང་བ་དང༌། དེའི་ལོ་ལ་མུ་གེ་བྱུང་ནས་ཕ་མའང་བུ་ལ་མི་སྟེར་བ་ཙམ་དུ་ཟས་དཀོན་པར་གྱུར་ནས་བཟང་སྦྱིན་གྱིས་བསམས་པ། དེ་ལྟར་ཟས་དཀོན་པའི་སྐབས་དེར་བདག་གི་གཉེན་ཕྱུག་པོ་ཀུན་བསོད་ནམས་རྟག་ཏུ་བྱ་མ་ནུས་ཀྱང་དུས་དྲུག་ཙམ་དུ་
ཡང་དགེ་འདུན་དག་ལ་བཤོས་དང་སྤྱན་གཟིགས་དག་སྦྱོར་དུ་གཞུག་གོ་སྙམ་ནས་བདག་གིས་ཡུལ་ཀ་ལན་དཀར་འོངས་ཏེ། དགོན་པའི་གནས་སྤྱིལ་པོ་ཞིག་ན་འདུག་ཅིང༌། དེ་བཞིན་དུ་བསོད་ནམས་དག་ཀྱང་འཕེལ་ཞིང༌། བདག་ཉིད་ཀྱང་སྦྱངས་པའི་ཡོན་ཏན་ཅན་བསོད་སྙོམས་བླངས་པ་ལས་ནང་ཅིག་བདག་གིས་མའི་སྒོར་འོངས་པ་དང་དེར་མ་ཡང་གྲོང་གཞན་ཞིག་ཏུ་སོང་སྟེ་དེ་ནས་སྦྱིན་པ་ཡང་མ་འཐོབ། མི་གཅིག་ཀྱང་མི་སྣང་ནས་སླར་མྱུར་དུ་སོང་བ་དང༌། བྲན་མོ་ཅིག་གིས་མཐོང་ནས་དེས་ཇོ་མོ་ག་ན་བ་དེར་སོང་སྨྲས་ན། མས་བསམས་པ། བདག་གི་བུ་དེ་ནི་སླར་ཁྱིམ་པར་དབབ་འདོད་ཡང་དག་སྙམ་ནས་ཕྱི་བཞིན་བརྒྱུགས་ཏེ་བུའི་གན་དུ་འོངས་ནས་བུ་ཁྱོད་དགེ་སྦྱོང་ལ་སྐྱོ་འམ། ཆགས་པ་འམ། ཐེ་ཚོམ་ཟ་བ་ལྟ་ན་སླར་བཞུད། ཁྱོད་ཀྱི་ཕའི་ནོར་ལ་ལྟ་ཞིག་ཅི་སྨོས་ཀྱི། ཁྱོད་ཀྱི་མའི་ནོར་གསེར་དངུལ་སྤུངས་པ་ཡག་ཕ་རོལ་ན་མི་འགྲེང་བས་ཚུལ་རོལ་ན་འགྲེང་བ་མི་མཐོང༌། ཚུ་རོལ་ན་འགྲེང་བས་ཕ་རོལ་ན་འགྲེང་བ་མི་མཐོང་བ་ནི་ཁྱོད་ཀྱི་མའི་ནོར་ཡིན་ན་འདི་རྣམས་སུས་བསྐུར། འདོད་པ་རྣམས་ལ་སྤྱོད། བསོད་ནམས་ཀྱང་གྱིས་ཤིག་ཅེས་བྱ་བ་དང༌། བཟང་སྦྱིན་གྱིས་ལན་སྨྲས་པ་དང༌། ཟ་ཟ་བདག་དགེ་སྦྱོང་ལ་སྐྱོ་བ་འམ་ཆགས་པ་མ་མཆིས་ཏེ། སླར་མཆིའོ་ཞེས་སྨྲས་ནས། མས་བསམས་པ་ད་བདག་གིས་ཇི་ལྟར་བྱས་ཀྱང་རུང་བ་ལྟ་མ་ཡིན་སྙམ་ནས་སླར་སོང་སྟེ་ཁྱིམ་དུ་འོངས་ནས་མནའ་མ་ལ་སྨྲས་པ། ཁྱོད་ནམ་ཟླ་མཚན་དང་ལྡན་པ་དང་ང་ལ་སྨྲོས་ཤིག་ཅེས་བསྒོ་ནས་ཕྱིས་ཡང་དུས་གཅིག་ན་མནའ་མ་དེ་གོས་དང་དྲི་དང་ཕྲེང་བས་བརྒྱན་ནས་ཆས་ཏེ་ཁྲིད་ཅིང་བུའི་གན་དུ་འོངས་ཏེ་བུ་ཁྱོད་སླར་འོང་དུ་མི་རུང་ན་རབས་འཆད་དོ། །ཁྱོད་ཀྱིས་ནོར་ཀུན་སླར་བཞེས་པ་རེས་ཀྱང་བྱ་སྟེ། ཅི་དང་ཅི་ལ་སྙད་བཏགས་ནས་བུ་མོ་འདི་དུས་ལ་བབ་ཀྱི་ས་བོན་གྱི་ཚུལ་ཅུང་ཟད་ཅིག་བྱིན་ཅིག་བྱས་པ་དང༌། བཟང་སྦྱིན་དེ་ཡང་སྔོན་ནི་བསླབ་པ་མ་བཅས། ངན་སོང་མ་མཐོང་བས་ན། ཆུང་མ་ཤིན་ཏུ་མདོག་བཟང་མོ་མཐོང་བ་དང་སེམས་ལ་འདོད་པ་ཡང་སྐྱེས་ནས། ཟ་ཟ་དེ་ལྟ་བུ་བགྱིད་དབང་ངམ་ཞེས་བྱ་བ་དང༌། བུ་ས་བོན་གྱི་ཆོས་ཙམ་ནི་ཤིན་ཏུ་དབང་ངོ་ཞེས་
སྨྲས་ནས། བཟང་སྦྱིན་གྱིས་ཆོས་གོས་གཞག་སྟེ། ལྐོག་ཏུ་ཁྲིད་དེ་མི་ཚངས་པར་སྦྱོང་བ་ལས་བཅས་སོ། །རྗེས་སུ་བཅས་པ་ནི་སངས་རྒྱས་བཅོམ་ལྡན་འདས་རྒྱལ་པོའི་ཁབ་ན་བཞུགས་པ་ན། དེའི་ཚེ་དགེ་སློང་ཞིག་དགོན་པའི་སྤྱིལ་པོ་ན་གནས་པའི་ཚེ། སྤྲ་མོ་ཞིག་ཁ་ཟས་ཀྱིས་བྲིད་ནས་དེ་ལ་མི་ཚངས་པར་སྤྱོད་དོ། །ཕྱིས་དགེ་སློང་མང་ཞིག་དགོན་པའི་གནས་དག་ཡུལ་ཞིང་དགོན་པར་ལྷགས་ནས་མངོན་དུ་དགའ་བའི་གཏམ་མང་ཞིག་བྱས་ནས་འཁོད་པ་དང༌། སྤྲ་མོ་དེ་ཡང་དེར་འོངས་ནས་དགེ་སློང་དེའི་མདུན་ན་འདུག་སྟེ་རོ་སྨད་བསྙེན་པ་དང་དགེ་སློང་དེ་གྲོགས་མང་བོ་ལ་རབ་ཏུ་ངོ་ཚ་བར་གྱུར་ནས་ལན་གཉིས་ལན་གསུམ་ཕུལ་ཏེ་བསྐྲད་པ་དང༌། དགེ་སློང་དེའི་གདོང་དུ་སྤྲ་མོས་བཟར་ཏེ། སྒྲ་མི་སྙམ་པ་འབྱིན་ཅིང་སོང་ནས་ཕ་ཟད་ནས་ལྟ་ཞིང་ཙོག་བུར་འདུག་གོ །དེ་ནས་དགེ་སློང་དེ་དག་གིས་དེ་ལ་འདིར་དགོན་པའི་སྤྲ་མོ་འདི་ཁྱོད་ལ་འདི་ལྟར་བྱེད། ཁྱོད་ཀྱིས་དེ་ལ་ངོ་ཚ་བའི་ཕྱིར་བསྐྲད། བཅོམ་ལྡན་འདས་ཀྱིས་ཀྱང་འདི་ལྟ་བུ་མི་རིགས་པའི་ཆོས་སྤོངས་ཤིག་ཅེས་མ་བྱུང་ངམ་ཞེས་བྱས་པ་དང༌། དེས་སྨྲས་པ། བཅོམ་ལྡན་འདས་ཀྱིས་བཅས་པ་ནི་མི་ལ་སྟེ། བྱོལ་སོང་ལ་མ་ཡིན་ནོ་ཞེས་སྨྲས་པ་དང༌། དགེ་སློང་དག་གིས་དེ་ལ་བསྔགས་པ་ཡང་མེད། གྱོད་བཏབ་པ་ཡང་མེད་དེ་དོང་བ་བཅོམ་ལྡན་འདས་ལ་ཞིབ་ཏུ་གསོལ་ནས་བཅས་སོ། །དེའི་ཚེ་ན་བཅོམ་ལྡན་འདས་དགེ་སློང་གི་འཁོར་བརྒྱ་སྟོང་ཕྲག་ཏུ་མ་བསྡུས་ཏེ་ཆོས་སྟོན་ཏོ། །འཁོར་དེར་ཚེ་དང་ལྡན་པ་བཟང་སྦྱིན་ཡང་འདུས་པར་གྱུར་ཏེ་འདུག་གོ །བཅོམ་ལྡན་འདས་ཀྱིས་ཉན་ཐོས་རྣམས་ལ་འདོད་ཆགས་དང་ཞེ་སྡང་དང་གཏི་མུག་དང་བྲལ་བའི་ཕྱིར་སེམས་རྣམ་པར་གྲོལ་བ་དང༌། ཤེས་རབ་རྣམ་པར་གྲོལ་བའི་ཆོས་བཤད་པ་དང་ཚེ་དང་ལྡན་པ་བཟང་སྤྱིན་ཐེ་ཚོམ་དང་འགྱོད་པ་སྐྱེས་ནས་རབ་ཏུ་སེམས་ཤིང་འདུག་གོ །དེ་ནས་དུས་གཞན་ཞིག་ན་དགེ་སློང་གནས་ཉུང་བ་དང་ཅིག་བཟང་སྦྱིན་གྱི་གནས་སུ་ཕྱིན་པ་དང༌། བཟང་སྦྱིན་སྔོན་ཆད་ནི་དགེ་སློང་གློ་བུར་དུ་ལྷགས་པ་ལ་མདུན་ནས་བསུ་ཞིང་ཆོས་གོས་དང་འཁར་གསིལ་ལ་སོགས་པ་ཡང་ལེན་ན། ད་ནི་དགེ་སློང་གློ་བུར་དུ་ལྷགས་པ་
རྣམས་མཐོང་ན་དོགས་པ་དང་ཐེ་ཚོམ་སྐྱེ་བར་གྱུར་ན། ཚེ་དང་ལྡན་པ་མི་བདེ་བ་དག་ལྟ་མེད་དམ་ཞེས་སྨྲས་པ་དང༌། བཟང་སྦྱིན་གྱིས་ཀྱང་ཇི་ལྟར་གྱུར་པ་དྲང་བོར་སྨྲས་པ་དང༌། དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་བྱུང་བ་འདི་དང༌། གླེང་གཞི་འདི་དང༌། དེ་ལྟར་གྱུར་པ་དེའི་ཕྱིར་དགེ་སློང་གི་དགེ་འདུན་རྣམས་བསྡུས་སོ། །དེ་བཞིན་གཤེགས་པས་དོན་གྱི་དབང་རྣམ་གཉིས་གཟིགས་པས་དགེ་སློང་གི་དགེ་འདུན་སྡུད་དེ། ངའི་ཉན་ཐོས་རྣམས་དོན་ཀུན་ཤེས་པར་གྱུར་པ་དང༌། ངའི་འདུལ་བ་ལ་བསླབ་པའི་གནས་ཤིན་ཏུ་བཅའ་བར་བྱའོ། །བཅོམ་ལྡན་འདས་ནི་མཁྱེན་བཞིན་དུ་དྲི་ཞིང་དོན་དང་ལྡན་པར་དྲི། དོན་དང་ལྡན་པར་དགོངས་ནས་ཚེ་དང་ལྡན་པ་བཟང་སྤྱིན་ཁྱོད་ཀྱིས་དེ་ལྟ་བུ་མི་རིགས་པར་བྱས་པ་བདེན་ནམ་ཞེས་རྨད་པ་དང༌། བཙུན་པ་མད་དོ་ཞེས་གསོལ་ཏོ། །བཅོམ་ལྡན་འདས་ཀྱིས་སྨད་དེ་དགེ་སློང་གི་བྱ་བ་མ་ཡིན། །མཐུན་པ་མ་ཡིན། རུང་བ་མ་ཡིན། ཚུལ་མ་ཡིན་རབ་ཏུ་བྱུང་བས་བྱ་བ་མ་ཡིན་ནོ། །ཁྱོད་ཀྱིས་སྤྲུལ་མ་རུངས་པའི་ཁར་ཕོ་མཚན་བཙུག་པ་ནི་བླའི། བུད་མེད་དུ་གྱུར་པ་ལ་ནི་མ་ཡིན་ནོ་ཞེས་རྣམ་གྲངས་དུ་མའི་སྦོ་ནས་སྨད་དོ། །དེ་ལྟ་བས་ན་དགེ་སློང་རྣམས་ལེགས་པ་བཅུ་གཟིགས་ནས་ཉན་ཐོས་རྣམས་ལ་འདུལ་བ་ལ་བསླབ་པའི་གནས་བཅའ་བར་བྱའོ། །དེ་འདི་ལྟ་སྟེ་དགེ་འདུན་ཡང་དག་པར་བསླབ་པ་དང༌། དགེ་འདུན་དགེ་བ་དང༌། དགེ་འདུན་བདེ་བ་ལ་རེག་པར་གནས་པར་བྱ་བ་དང༌། གནོད་མི་བཀུར་བའི་གང་ཟག་རྣམས་ལ་ནན་ཏུར་ཆེར་བྱ་བ་དང༌། ངོ་ཚ་ཤེས་པའི་གང་ཟག་རྣམས་བདེ་བ་ལ་རེག་པར་གནས་པར་བྱ་བ་དང༌། མངོན་པར་མ་དད་པ་རྣམས་མངོན་པར་དད་པར་བྱ་བ་དང༌། མངོན་པར་དད་པ་རྣམས་ཕྱིར་ཞིང་འཕེལ་བར་བྱ་བ་དང༌། ཚེ་འདིའི་ཟག་པ་རྣམས་བསྡམ་པར་བྱ་བ་དང༌། ཚེ་ཕྱི་མའི་ཟག་པ་རྣམས་ཡང་དག་པར་གཞོམ་པར་བྱ་བ་དང༌། ངའི་ཚངས་པར་སྤྱད་བ་ཡུན་རིང་དུ་གནས་པར་འགྱུར་བ་སྟེ། ཅི་ཙམ་དུ་ལྷ་དང་མི་དང་སྐྱེ་བོ་མང་པོ་ལ་རྒྱ་ཆེར་རབ་ཏུ་བཤད་དེ། ཡང་དགེ་སློང་གང་ཞེས་བྱ་བ་ལ་སོགས་པ་རྩ་བའི་ཚིག་རྣམས་སྨོས་སོ། །ཡང་དགེ་སློང་གང་ཞེས་བྱ་བ་ནི་རྣམ་པ་ལྔ་སྟེ། མིང་གི་དགེ་སློང་དང༌། ཁས་འཆེ་བའི་དགེ་སློང་དང༌།
སློང་བའི་དགེ་སློང་དང༌། ཉོན་མོངས་པ་དང་བྲལ་བའི་དགེ་སློང་དང༌། གསོལ་བ་དང་བཞིའི་ལས་ཀྱིས་བསྙེན་པར་རྫོགས་པའི་དགེ་སློང་ངོ༌། །དེ་ལ་མིང་གི་དགེ་སློང་ནི་མིང་དུ་བཏགས་པའམ་དགར་བའི་ཚིག་གམ། ཚིག་བླ་དགས་སམ། བརྡར་དགེ་སློང་དུ་མིང་བཏགས་པའོ། །ཁས་འཆེ་བའི་དགེ་སློང་ནི་དགེ་སློང་མ་ཡིན་ཡང་ང་དགེ་སློང་ངོ་ཞེས་ཁས་འཆེ་ཞིང་ཀུན་གནས་སུ་གྱུར་པའོ། །སློང་བའི་དགེ་སློང་ནི་འཕྲལ་ལ་འཚོ་བ་ཙམ་ཚོལ་ཞིང་སློང་བ་ལ་བྱའོ། །ཉོན་མོངས་པ་དང་བྲལ་བའི་དགེ་སློང་ནི། ཁམས་གསུམ་ནས་ཉོན་མོངས་པ་སྤངས་ནས་དགྲ་བཅོམ་པ་ལ་བྱའོ། །དགེ་སློང་བཞི་པོ་མ་གཏོགས་པར་སྐབས་འདིར་ནི་གང་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་མ་འཁྲུགས་པ་སྐྱོན་མེད་པ་དེ་ནི་དགེ་སློང་དུ་དགོངས་ཏེ་དེའི་ཕྱིར་དགེ་སློང་ཞེས་གསུངས་སོ། དགེ་སློང་དང་ལྷན་ཅིག་ཅེས་བྱ་བ་ནི་ཆོས་མཚུངས་པ། ཚངས་པ་མཚུངས་པར་སྤྱོད་པའི་གྲོགས་པོ་རྣམས་སོ། །བསླབ་པ་མཚུངས་པར་གྱུར་ཅེས་བྱ་བ་ནི་བསྙེན་པར་རྫོགས་ནས་ལོ་བརྒྱ་ལོན་པའི་དགེ་སློང་གིས་ཀྱང་བསླབ་པ་འདི་ལ་བསླབ་ལ། དེང་བསྙེན་པར་རྫོགས་པས་ཀྱང་བསླབ་པ་འདི་ལ་བསླབ་པའོ། །དེ་ལྟར་ན་སོ་སོར་ཐར་པའི་མདོ་འཆད་པ་མཚུངས་པ་དེ་ནི་བསླབ་པ་མཚུངས་པར་གྱུར་པ་ཞེས་བྱའོ། །བསླབ་པ་མ་ཕུལ་ཞེས་བྱ་བ་ཇི་ཙམ་གྱིས་བསླབ་པ་མ་ཕུལ་བ་ཡིན་ཞེ་ན། དགེ་སློང་ཁྲོས་པའི་ཟིལ་གྱིས་ནོན་པའམ། སྨྱོས་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བའམ། དབེན་པ་ལ་མི་དབེན་པར་འདུ་ཤེས་པས་སམ། མི་དབེན་པ་ལ་དབེན་པར་འདུ་ཤེས་སམ། འཕགས་པ་ལ་མཐའ་ཁོབ་ཀྱི་སྐད་དམ། ཅ་ཅོའི་ནང་དུ་འམ་གཏོང་བའི་སེམས་ཀྱང་མེད་ལ། དགེ་སློང་དོན་དུ་གཉེར་ལ། ཁྱིམ་གྱི་གནས་དོན་དུ་མི་གཉེར་ལ། རང་བཞིན་དུ་གནས་ཤིང་བརྡ་ཕྲད་པའི་མི་ལ་མ་བྱས་ན་བསླབ་པ་ཕུལ་བ་མ་ཡིན་ནོ། །དགེ་སློང་གིས་ཕ་རོལ་སྨྱོན་པ་དང༌། སེམས་འཁྲུགས་པའམ། ནད་ཀྱིས་གཟིར་བའམ། ལྐུགས་པ་དང༌། འོན་པ་དང༌། མཐའ་ཁོབ་པའི་སྐད་མི་ཤེས་པ་དང༌། གཉིད་ལོག་པ་དང༌། སྙོམས་པར་ཞུགས་པ་དང༌། མི་མ་ཡིན་པའམ། ལྷ་དང༌། སྤྲུལ་པ་
དང༌། བྱོལ་སོང་དང༌། སངས་རྒྱས་ཀྱི་གཟུགས་ལ་བསླབ་པ་ཕུལ་ན་བསླབ་པ་ཕུལ་བ་མ་ཡིན་ནོ། །བསླབ་པ་འཕུལ་བས་གང་ལ་ཕུལ་ན་ཕུལ་བ་ཞེས་བྱ་ཞེ་ན། དགེ་སློང་མི་དགའ་ཞིང་དགེ་སྦྱོང་དོན་དུ་མི་གཉེར་རམ། ཐེ་ཚོམ་ཟ་ཞིང་སྨོད་ན་དགེ་སློང་གི་དྲུང་དུ་སོང་ནས། ཚེ་དང་ལྡན་པ་དགོངས་ཤིག །བདག་མིང་འདི་ཞེས་བགྱི་བ་བསླབ་པ་འབུལ་ལོ་ཞེ་འམ། དཀོན་མཆོག་གསུམ་འབུལ་ལོ་ཞེ་འམ། སྡེ་སྣོད་གསུམ་འབུལ་ལོ་ཞེ་འམ། སློབ་དཔོན་དང་མཁན་པོ་འབུལ་ལོ་ཞེས་བརྡ་ཕྲད་པའི་མི་ལ་སྨྲས་ན། བསླབ་པ་ཕུལ་བ་ཞེས་བྱའོ། །ཡང་ན་བདག་ཁྱིམ་པ་འམ། དགེ་ཚུལ་ལམ། ཟ་མ་དང༌། མ་ནིང་དང༌། དགེ་སློང་མ་སུན་ཕྱུང་བ་འམ། ཕ་བསད་པ་འམ། མ་བསད་པའམ། དགྲ་བཅོམ་པ་བསད་པ་འམ། དགེ་འདུན་གྱི་དབྱེན་བྱས་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། མུ་སྟེགས་ཅན་དང༌། རྐུན་གནས་དང༌། ཐ་དད་དུ་གནས་པ་དང༌། མི་གནས་པ་དང༌། མཐར་ན་ཆོས་མཚུངས་པར་སྤྱོད་པ་ཁྱོད་དང་འགྲོགས་མི་དགོས་སོ་ཞེས་སྨྲས་ནས་བསླབ་པ་ཕུལ་བ་ཞེས་བྱའོ། །དེ་ལ་ཉམས་པར་བྱས་ཞེས་བྱ་བ་ནི་དགེ་སློང་དགེ་སྦྱོང་དོན་དུ་མི་གཉེར་ཞིང་ཐེ་ཚོམ་ཟ་ནས་དགེ་སློང་གི་དྲུང་དུ་སོང་ནས། ཚེ་དང་ལྡན་པ་མཁྱེན་པར་མཛོད་ཅིག་དང༌། ཚངས་པར་སྤྱད་པ་ནི་ཤིན་ཏུ་དཀའོ། །རབ་ཏུ་དབེན་པ་དང༌། གཅིག་པུར་གནས་པ་དང༌། བས་མཐའ་ན་གནས་པ་ནི་ཤིན་ཏུ་དཀའ་སྟེ་སྡུག་བསྔལ་བའོ། །བདག་ནི་ཕ་མ་དང་ཕུ་ནུ་བོ་དང་སྔོན་གྱི་སློབ་དཔོན་དྲན་ནོ། །བདག་གིས་གཉེན་བཤེས་ལ་གཏོད་ཅིག་ཅེས་མི་དགའ་ཞིང་ཆགས་པའི་ཚིག་གིས་གཞན་ལ་གོ་བར་བྱེད་ན། བསླབ་པ་ཉམས་པར་བྱ་བ་ཞེས་བྱའོ། །དེ་ཡང་མཐའ་བཞིར་སྦྱར་ཏེ་ཉམས་པར་བྱས་པ་ལ་བསླབ་པ་མ་ཕུལ་བ་དང༌། བསླབ་པ་ཕུལ་ལ་ཉམས་པར་མ་བྱས་པ་དང༌། བསླབ་པ་ཡང་ཕུལ་ཉམས་པར་ཡང་བྱས་པ་དང༌། བསླབ་པ་ཡང་མ་ཕུལ་ཉམས་པར་ཡང་མ་བྱས་པའོ། །དེ་ལ་ཉམས་པར་བྱས་ལ་བསླབ་པ་མ་ཕུལ་བ་ནི་ཕ་དྲན་ན་མ་དྲན་ནོ་ཞེས་གཞན་ལ་མི་དགའ་བའི་རྟགས་སྣ་ཚོགས་སྨྲ་ལ། བསླབ་པ་འབུལ་ལོ་ཞེས་མི་སྨྲའོ། །དེ་ལ་བསླབ་པ་ཕུལ་ལ་ཉམས་པར་མ་བྱས་པ་ནི་བསླབ་པ་འབུལ་ལོ་ཞེས་བརྡ་ཕྲད་
པའི་མདུན་དུ་གོ་བར་ཕ་མ་མ་དྲན་ནོ་ཞེས་ཉམས་པར་གྱུར་པའི་ཚིག་མི་སྨྲ་བའོ། །དེ་ལ་བསླབ་པ་ཡང་ཕུལ་ཉམས་པར་ཡང་བྱས་པ་ནི་གོང་མ་གཉིས་ཀ་དང་ལྡན་པའོ། །བསླབ་པ་ཡང་མ་ཕུལ་ཉམས་པར་ཡང་མ་བྱས་པ་ནི་གོང་དུ་སྨོས་པ་རྣམས་མ་གཏོགས་པའོ། །མི་ཚངས་པར་སྤྱད་པ་ཞེས་བྱ་བ་ནི་ཚངས་པ་ནི་མྱ་ངན་ལས་འདས་པ་སྟེ། དེ་དང་མི་མཐུན་ཞིང་བསོད་ནམས་མ་ཡིན་པའི་ཆོས་སྐྱེས་པ་དང༌། བུད་མེད་དང་གཉིས་འཁྲིག་པ་ནི་མི་ཚངས་པར་སྤྱོད་པའོ། །ཆོས་ཞེས་བྱ་བ་ནི་རང་གི་མཚན་ཉིད་འཛིན་པས་ཆོས་མ་ཡིན་པ་འདི་ཆོས་ཀྱི་སྒྲར་གསུངས་སོ། །བྱས་ཞེས་བྱ་བ་ནི་སྤྱོད་པའོ། །ཐ་ན་བྱ་བ་ནི་སྦྲ་མོ་དང༌། གཞན་ཡང་འདི་དང་འདྲ་བ་དག་གོ །དེ་ཞེས་བྱ་བ་ནི་ཉེ་བར་བསྟན་པ་དང༌། ཡང་དག་པར་བསྟན་པའི་ཚིག་བླ་དགས་སོ། །དགེ་སློང་ཞེས་བྱ་བ་ནི་གསོལ་བ་དང་ཞུ་བའི་ལས་ཀྱིས་བསྙེན་པར་རྫོགས་ཤིང་བྱ་བ་གྲུབ་པ་གང་དགེ་སློང་གི་དངོས་པོ་ཡོད་པ་ལ་བྱའོ། །ཕས་ཕམ་པ་ཞེས་བྱ་བ་ནི་ལྟུང་བ་ཐ་མ་འདི་ལྟ་སྟེ། ཐ་ཤལ་མི་བཅའ་བའི་ངེས་པ་ཅན་མི་མཚུངས་པ་སྟེ། གང་ལ་དེ་ལྟ་བུའི་ལྟུང་བ་བྱུང་སྟེ། དེ་བྱུང་མ་ཐག་ཏུ་དགེ་སློང་མ་ཡིན་ཤཱཀྱའི་སྲས་མ་ཡིན་ཏེ། དགེ་སློང་གི་དངོས་པོ་དང་བྲལ་བ་འཁྱམས་པ་བཤིག་པ། ལྟུང་བ་ཕས་ཕམ་པ་སྟེ། སླར་དགེ་སློང་དུ་བསླང་དུ་མི་རུང་བའོ། །འདི་ལྟར་དཔེར་ན་ཤིང་ཏ་ལའི་མགོ་བཅད་ན་སྔོན་པོར་མི་འགྱུར་མི་སྐྱེ། འཕེལ་ཞིང་རྒྱས་པར་མི་འགྱུར་བ་དེ་བཞིན་དུ་དགེ་སློང་ཡང་འདི་ལྟ་བུའི་གནས་ཀྱི་ལྟུང་བ་བྱུང་ན། དེ་བྱུང་མ་ཐག་ཏུ་དགེ་སློང་མ་ཡིན། ཤཱཀྱའི་སྲས་མ་ཡིན། དགེ་སྦྱོང་དུ་བསླང་དུ་མི་རུང་སྟེ། དེ་བས་ན་ཕས་ཕམ་པ་ཞེས་གསུངས་སོ། །གནས་པར་མི་བྱའོ། །ཞེས་བྱ་བ་ནི་དེ་དང་དགེ་སློང་དག་གསོ་སྦྱོང་ངམ། ཚུལ་ནས་འབྱུང་བ་འམ། གསོལ་པ་འམ། གསོལ་པ་དང་གཉིས་སམ། གསོལ་བ་དང་བཞིའི་ལས་ལ་མི་གནས་པ་སྟེ། གང་ཟག་བཅུ་གཉིས་ཀྱི་ལས་བསྐོ་བ་ལ་ཡང་མི་ཆུད་པའོ། །དེས་ན་གནས་པར་མི་བྱའོ་ཞེས་གསུངས་སོ། །གཞན་ཡང་མི་ཚངས་པར་སྤྱོད་པའི་སྒོ་ནས་ཕས་ཕམ་པར་འགྱུར་བའི་རྣམ་གྲངས་ལ། གླེང་གཞི་ནི། བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ཁྱིམ་བདག་ཅིག་གི་བུ་རྒྱབ་རབ་ཏུ་
མཉེན་པ་ནི་བྱི་ལའི་རྒྱབ་འདྲ་བ་ཞིག་བཙས་ཏེ། དེ་ཡང་དཀོན་མཆོག་གསུམ་ལ་མངོན་པར་དད་པ་ནས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ༌། །མིང་ཡང་རྒྱབ་མཉེན་དུ་བཏགས་སོ། །དགེ་སློང་རྒྱབ་མཉེན་དེ་སྔ་དྲོའི་དུས་ཀྱི་ཚེ་བསོད་སྙོམས་བླངས་ནས་ཟས་ཟོས་ཏེ། གནས་ཁང་དུ་འོངས་ནས་ནང་དུ་ཡང་དག་འཇོག་པའི་ཕྱིར་འདུག་གོ །དེའི་ཚེ་དབང་པོ་མ་བསྡམས་པས་འདོད་པའི་འདོད་ཆགས་ཀྱིས་ཀུན་ནས་དཀྲིས་པས་རང་གི་ཕོ་མཚན་ལས་སུ་རུང་བར་གྱུར་ཏེ། རང་གི་སྒོ་དང་པོར་སྤྱད་པའི་ཚེ་དགེ་སློང་གནས་ཉུང་བ་དག་གིས་མཐོང་ནས་དེ་དག་གི་ཡིད་མ་མགུ་ནས་རི་མོ་མེད་པར་བྱས་ཏེ། ཚེ་དང་ལྡན་པ་དེ་ལྟ་བུ་བྱེད་དུ་དབང་ངམ་ཞེས་བྱས་པ་དང་དེས་སྨྲས་པ། བཅོམ་ལྡན་འདས་ཀྱིས་བཅས་པ་ནི་ཕ་རོལ་ལ་བྱེད་དུ་མ་གནང་གི་བདག་ཉིད་ལ་ནི་མ་ཡིན་ནོ་ཞེ་ན། དེ་དག་གིས་དེ་ལ་གྱོད་བཏབ་པ་འམ། བསྔགས་པ་ཡང་མེད་དེ། དེ་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ་ནི་གཞན་གྱི་ལའང་སྤངས་ན་རང་གི་ལ་ལྟ་ཅི་སྨོས། སྐྱེས་བུ་གཏི་མུག་ཅན་འདི་ནི་ཕས་ཕམ་པར་གྱུར་ཏོ་ཞེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་ཅིག་གི་བུ་ཕོ་ཕོ་མཚན་ཚད་ལས་འདས་པ་ཞིག་བཙས་ཏེ། དེའི་མིང་ཡང་མཚན་རིངས་སུ་བཏགས་ཏེ། དེའང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་དགེ་སློང་གི་དངོས་པོར་གྱུར་ཏེ། དེས་སྔ་དྲོའི་ཚེ་བསོད་སྙོམས་བླངས་ནས་ཟས་ཟོས་ཟིན་གྱི་འོག་ཏུ་ནང་དུ་ཡང་དག་འཇོག་པ་ལ་ཞུགས་པ་དང༌། འདོད་པའི་འདོད་ཆགས་ཀྱིས་ཀུན་ཏུ་དཀྲིས་ཏེ། རང་གི་ཕོ་མཚན་ལས་སུ་རུང་བས་སྒོ་ཐ་མར་སྤྱད་པ་དང༌། དགེ་སློང་གཞན་ཞིག་གིས་མཐོང་ནས་སྙན་དུ་བདས་ཏེ། དེ་ལྟ་བུ་ཡང་ཕས་ཕམ་པར་འགྱུར་རོ་ཞེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་མཉན་དུ་ཡོད་པ་ན་སྟེ། མཆོག་ཏུ་རྒྱལ་བ་ཞེས་བྱ་བའི་གྲོང་ཁྱེར་ན། དེད་དཔོན་དགའ་བོའི་བུ་དེ་ཤིན་ཏུ་བྱད་བཟང་ཞིང་མཛེས་པ་ཞིག་འདུག་པ་ཡུལ་གཞན་ཞིག་ཏུ་ཚོང་ལ་འགྲོ་བར་ཆས་ཏེ། ཡང་དང་ཡང་དུ་དུས་ཀྱི་ཕ་ལ་གསོལ་ནས་ཕས་ཀྱང་ཡུལ་དེ་ན་ཚོང་པ། འགྲོ་བ་ལྔ་བརྒྱ་ལ་ཡང་
བུའི་གྲོགས་ཀྱིས་ཤིག་ཅེས་གཏད་བུ་ལ་ཡང་གཏམས་ཏེ། འདི་ལྟར་ཚོང་པ་ཡུལ་གཞན་དུ་འགྲོ་བ་ལ་བར་ཆད་གསུམ་སྟེ། རྒྱན་པོ་དང༌། སྟུ་གླ་དང༌། ཆང་རིན་ནོ་ཞེས་བསྒོ་ནས། དེ་དག་ཡུལ་གཅིག་ནས་གཅིག་ཏུ་རྒྱུ་ཞིང་མཉན་དུ་ཡོད་པར་ཕྱིན་ཏོ། །དེ་ནས་སྟུ་འཚོང་མ་བཟང་མོ་ཞེས་བྱ་བ་ཤིན་ཏུ་བཟང་པོ་ཞིག་འདུག་པ་དེས་མཐོང་ནས་བསམས་པ། དེའི་ནོར་ཐམས་ཅད་མ་ཐོབ་ན། ངའི་མིང་བཟང་མོ་ཞེས་མི་བྱ་མོད་སྙམ་ནས། བྲན་མོ་ཞིག་དེའི་གན་དུ་མངགས་ནས་ཚོང་པ་དེ་དག་དང་ཕྲད་པའི་བར་དུ་སྟེ། ཚོང་པ་དེའི་ནོར་ཟད་ཟད་དུ་མོས་བྲིད་ནས་ཚོང་གྲོགས་ཀུན་ཀྱང་སླར་དོང་ནས། ནོར་མེད་པ་དང་མོས་མ་འདོད་དེ། མཛེས་དགའ་འཁྱམས་ཤིང་འགྲོ་བ་དགེ་སློང་ཅིག་དང་ཕྲད་ནས་ཐར་པར་ཞུགས་ཏེ། ཞག་གཉིས་གསུམ་དུ་ཤིན་ཏུ་བསླབས་ནས། དགེ་སློང་དེ་ན་རེ་རི་དགས་ཀྱིས་རི་དགས་མི་སོས་ཀྱི་མཉན་དུ་ཡོད་པ་ནི་བདག་གི་ཡུལ་དང་འདྲས། ཕར་སློང་ཞིང་སོས་ཤིག་ཅེས་བསྒོས་ཏེ་བཏང་ངོ༌། །སྟུ་འཚོང་མ་དེས་ཀྱང་ཕྱིན་ནས་བསམས་པ། བདག་གིས་སྐྱེས་བུ་དེ་ལྟ་བུ་བལྟ་ན་བཟང་བ་ནི་ཕྱིན་ཆད་ཉལ་མི་མྱོང་སྟེ། མཚར་གཅིག་བྱ་སྙམ་ནས་བྲན་མོ་ལ་ཡང་ཕྱིན་ཆད་བྱར་བྱོས་ཤིག་ཅེས་བསྒོ་ནས་མཛེས་དགའ་དེ་ཡང་ཡུལ་རྒྱུས་ལ་མི་མཁས་པས་སླར་ཡང་ཁྱིམ་དེའི་སྒོར་ཕྱིན་པ་དང་བྲན་མོས་རྗེ་མོ་ལ་སྨྲས་པ། རབ་ཏུ་བྱུང་སྟེ་འདིར་ཕྱིན་ཏོ་ཞེས་བྱ་བ་ནས་རབ་ཏུ་བྱུང་ཡང་བླས་ནང་དུ་བོས་ཞེས་བྱ་སྟེ། དེས་བྲང་བརྡུངས་ནས་རྐེད་ནས་འཁྱུད་དེ་དུས་ནས་བདག་གིས་ནོངས་ཀྱིས་བདག་ལ་ད་ཡོངས་སུ་སྤྱོད་ཅིག་ཚུར་བྱོན་ཞེས་བྱས་པ་དང༌། མཛེས་དགས་སྨྲས་པ། ཁྱོད་ཀྱིས་ནོར་དང་གྲོགས་སུ་ཡང་ཕྲལ་ན་ཅི། ང་ཚུལ་ཁྲིམས་དད་ཡང་བྲལ་ལམ་ཞེས་སྨྲས་པ་དང༌། སྟུ་འཚོང་མས་སྨྲས་པ། འཕགས་པ་ཕྱི་རོལ་དུ་བདར་ཅིང་ནང་དུ་བླུགས་སམ། ནང་དུ་སྨྱུགས་ལ་ཕྱིར་ཕོ་ན་ནི་ཚུལ་ཁྲིམས་ངན་པར་མི་འགྱུར་རོ་ཞེས་བྱ་བ་དང༌། དེས་བསམས་པ་དང་མོ་དེ་སྐད་ཟེར་བ་ལས་ནི། དགེ་སློང་གནས་བརྟན་དག་ཀྱང་འདི་ལྟར་བྱ་གོར་མ་ཆག་སྙམ་སྟེ་ཕྱི་རོལ་ཏུ་བདར་ཏེ་ནང་དུ་བླུགས་ནས། ཕྱིས་བཅོམ་ལྡན་འདས་ཀྱིས་རྣམ་པར་གྲོལ་བའི་ཆོས་མང་པོ་བཤད་པའི་ཚེ་མཛེས་དགའ་ཤིན་ཏུ་རོད་ཉམས་པ་སྨན་པས་
བརྟགས་ན་ཡང་སེམས་མི་བདེ་བར་སྣང་སྟེ། དགེ་སློང་དག་གིས་སྨྲས་ན། ཁས་བླངས་པའི་བར་དུ་བཅོམ་ལྡན་འདས་ལ་དགེ་སློང་རྣམས་ཀྱིས་གསོལ་པ། སྐྱེས་བུ་གཏི་མུག་པ་ཉེས་པ་དེ་ལྟར་བྱས་པ་ཡང་ཕས་ཕམ་པར་འགྱུར་རོ་ཞེས་འདུལ་བ་ལ་བསླབ་པའི་གནས་བཅས་སོ། །དགེ་སློང་གིས་བུད་མེད་ལ་གནས་གསུམ་དུ་མི་ཚངས་པར་སྤྱད་ན་ཕས་ཕམ་པར་འགྱུར་རོ། །བུད་མེད་ལ་ཇི་ལྟ་བ་བཞིན་དུ་མ་ནིང་དང༌། མཚན་གཉིས་པ་དང་སྐྱེས་པ་ལ་ཡང་མཚམས་ལས་འདས་ན་ཕས་ཕམ་པར་འགྱུར་རོ། །བུད་མེད་ལ་མི་ཚངས་པར་སྤྱོད་པའི་སེམས་བསྐྱེད་ན་བསྡམ་པར་བྱ་བའི་ཉེས་བྱས་སོ། །གོམ་པ་གཅིག་ནས་གཅིག་ཏུ་བོར་ཏེ་མ་རེག་གི་བར་དུ་ནི་བཤགས་པར་བྱ་བའི་ཉེས་བྱས་སོ། །རེག་པའི་ཚེ་ནི་སྦོམ་པོའོ། །མི་ཚངས་པར་སྤྱད་དེ་ཡན་ལག་བདུན་དང་ལྡན་ན་ཕས་ཕམ་པར་འགྱུར་རོ། །གཅིག་དང་མི་ལྡན་ན་སྦོམ་པོར་འགྱུར་རོ། །དགེ་སློང་གིས་སྔགས་དང་སྨན་གྱིས་བདག་དང་བུད་མེད་གཉིས་ཀའང་རུང་གཅིག་ཀྱང་རུང༌། བྱོལ་སོང་གི་སྐྱེ་གནས་སུ་བསྒྱུར་ཏེ་མི་ཚངས་པར་སྤྱད་ན་ཕས་ཕམ་པར་འགྱུར་རོ། །བུད་མེད་ཕྱེད་དུ་བཤགས་པ་ལ། སྒོ་གསུམ་དུ་སྤྱད་ན་སྔོམ་པོར་འགྱུར་རོ། །བུད་མེད་རྐེད་པ་ཕྱེད་བཅད་པ་ལ་སྒོ་གསུམ་དུ་སྤྱོད་ན་ཕམ་པར་འགྱུར་རོ། །མགོ་བཅད་པ་ལ་སྒོ་གཉིས་སུ་སྤྱད་ན་ཕམ་པར་འགྱུར་རོ། །མི་མ་ཡིན་པའི་བུད་མེད་ལ་ཡང་ཕས་ཕམ་པར་འགྱུར་རོ། །སྒོ་གསུམ་དུ་མ་རེག་པར་སྤྱད་པ་དང་བལྟ་བ་སྟེ་སྤྱད་པ་ནི་སྦོམ་པོར་འགྱུར་རོ། །གཞན་ལ་གཞན་བྱེད་དུ་བཅུག་པ་ནི་གོང་མ་བཞིན་ནོ། །ཡུལ་མེད་པར་བདག་གཅིག་པོར་གནས་པ་ལ་མཐར་འགྱུར་བ་ནི་མཚན་རིངས་དང་རྒྱབ་མཉེན་ལྟ་བུའོ། །ཕྱིང་བུའམ་གྲོ་བ་སྡུག་པོས་དཀྲིས་པའང༌། ལམ་མ་ཉམས་པའམ། ལམ་མ་ཉམས་པ་ལ་ལམ་དུ་འདུ་ཤེས་པའམ། བསྙེན་པར་རྫོགས་ཏེ་བཤམས་ཏེ་བསྙེན་པར་མ་རྫོགས་པ་ན་སྤྱད་པ་ལ་སོགས་པ་ཐམས་ཅད་ཀྱང་ཉེས་པ་སྦོམ་པོར་འགྱུར་རོ། །དར་དང་རས་དང་བེའུ་རས་སྲབ་མོས་གཡོགས་ཏེ་སྤྱད་པ་ནི་མཐར་འགྱུར་རོ། །བསྙེན་པར་མ་རྫོགས་པར་དགེ་སློང་མ་དང༌། དགེ་ཚུལ་མ་དང༌། དགེ་སྦྱོང་ཕས་མི་ཚངས་པར་སྤྱད་ན་ཐམས་ཅད་ཀྱང་ཉེས་བྱས་སུ་འགྱུར་རོ། །དགེ་
སློང་ལ་ཕས་ཕམ་པར་གྱུར་བཞིན་དུ་བསླབ་པ་བྱིན་པ་དང༌། དགེ་སློང་མ་ཡང་ཕས་ཕམ་པར་འགྱུར་རོ། །ཡན་ལག་བདུན་དང་ལྡན་ན་ཕས་ཕམ་པར་འགྱུར་རོ། །བདུན་གང་ཞེ་ན། བསླབ་པ་མནོས་པ་དང༌། བསླབ་པ་མ་ཕུལ་བ་དང༌། ལམ་གསུམ་མ་ཉམས་པ་དང༌། ཡན་ལག་སྐྱེས་མཚམས་ལས་འདས་པ་དང༌། དགའ་བར་ཚོར་བ་དང༌། གནོང་བཀུར་བའི་སེམས་མེད་པ་དང༌། སེམས་ཐ་མལ་པའོ། །བསླབ་པ་མ་མནོས་པ་ནི་དགེ་འདུན་དང༌། སློབ་དཔོན་ལས་ཚུལ་ཁྲིམས་མ་ཐོབ་པའོ། །བསླབ་པ་མ་ཕུལ་བ་ནི་རང་བཞིན་དུ་གནས་པའི་མི་བརྡ་ཕྲད་པ་ལ་མ་ཕུལ་བའོ། །ལམ་གསུམ་མ་ཉམས་པ་ནི་ཕ་རོལ་ཚུ་རོལ་གྱི་མུ་གཉིས་ནས་མ་ཉམས་པའམ་ཡང་ན་རྨ་མ་ཞིགས་པའམ། མ་རུལ་པའམ། སྲིན་བུས་མ་ཟོས་པའོ། ཡན་ལག་སྐྱེས་འཇུག་པ་ནི་གནས་གསུམ་གྱི་མཚམས་ལས་འདས་པའོ། །དགའ་བར་ཚོར་བ་ནི་ཉམས་སུ་བླང་སྟེ། མྱོང་བ་ཡོད་པའོ། །གནོང་མི་བཀུར་བ་ནི་ཁ་ཅིག་མི་ཚངས་པར་སྤྱོད་ཀྱང་གནོང་མི་བཀུར་ཞིང་བཤགས་ཤིང་མཐོལ་བ་ཆེན་པོ་ན་བསླབ་པ་ཕྱིན་ཞིང་དགེ་སྦྱོང་དུ་རུང་སྟེ། དཔེར་ན་དགེ་སློང་ནན་ཏེ་ཀ་ལ་བསླབ་པ་སྦྱིན་ཞིང་དགེ་སློང་ཐམས་ཅད་ཀྱི་མི་འཇུག །དགེ་སློང་ཐམས་ཅད་ཀྱི་ནི་གང་དུ་གཞག་སྟེ་སྔ་དྲོ་ལ་མི་ཚངས་པར་སྤྱད་ནས་འཇིགས་ཤིང་ངོ་ཚ་བ་ཆེན་པོས་བཤགས་ཤིང་འགྱོད་པས་ན་བསླབ་པ་སྦྱིན་པ་ཞེའོ། །ཁ་ཅིག་ན་རེ་ཕས་ཕམ་པའི་སྦོམ་པོའོ་ཞེས་ཟེར་མོད་ཀྱི་ཕས་ཕམ་པའི་མཚན་མ་ཡོད་པས་ན་སྦོམ་པོར་མི་རུང་སྟེ། བསླབ་པ་སྦྱིན་པ་ཉིད་དུ་རིགས་སོ། །ལས་དང་པོ་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་དང༌། སྨྱོན་པ་ལྟུང་བ་མེད་དོ། །ལས་དང་པོ་ལ་ཇི་ལྟ་བུ་ཞེ་ན། ཚེ་དང་ལྡན་པ་བཟང་སྦྱིན་གྱིས་བསླབ་པའི་གནས་མ་བཅས་པ་ན་བདག་གིས་མི་ཚངས་པར་སྤྱོད་པའི་ཆོས་མང་ཞིག་བྱས་ན་ལས་དང་པོ་བ་གང་ཡིན་སྙམ་ཐེ་ཚོམ་དུ་གྱུར་པ་དང༌། བཀའ་སྩལ་པ་བསླབ་པ་མ་བཅས་པ་ན་བཟང་སྦྱིན་གྱིས་སྤྱད་པ་ཐམས་ཅད་ཀྱང་ལས་དང་པོ་པ་ཡིན་ཏེ། ལས་དང་པོ་པ་ཡིན་པས་ཉེས་པ་མེད་དོ། །སྨྱོན་པ་ཞེས་བྱ་བ་ནི་རྣམ་པ་ལྔས་སྨྱོས་པར་འགྱུར་ཏེ། གཉེན་བཤེས་ཟད་པ་དང༌། ལོངས་སྤྱོད་དང་ནོར་ཟད་པ་དང༌།
ཁམས་མི་མཉམ་པ་དང༌། མི་མ་ཡིན་པས་བརླམས་པ་དང༌། སྔོན་གྱི་ལས་ཀྱི་རྣམ་པར་སྨིན་པ་སྟེ་རྣམ་པ་འདི་ལྔས་སྨྱོ་བར་འགྱུར་རོ། །དགེ་སློང་གི་འདུ་ཤེས་ཡོད་ན་ཉེས་པར་འགྱུར་རོ། །འདུ་ཤེས་མེད་ན་ཉེས་པ་མེད་དོ། །སེམས་འཁྲུགས་པ་ནི་རྣམ་པ་ལྔ་སྟེ། མི་མ་ཡིན་པས་བདག་གི་སེམས་དཀྲུག་པ་དང༌། མི་མ་ཡིན་པས་དེ་ལ་བརླམས་པ་དང༌། མི་མ་ཡིན་པས་བདག་གི་མདངས་འཕྲོག་པ་དང༌། ཁམས་མི་མཉམ་པ་དང༌། སྔོན་གྱི་ལས་ཀྱི་རྣམ་པར་སྨིན་པ་སྟེ། རྣམ་པ་དེ་ལྔས་ན་སེམས་འཁྲུགས་པ་ཞེས་བྱ་བ་སྟེ་ཉེས་པ་མེད་དོ། །ནད་ཀྱིས་གཟིར་བ་ནི་རྣམ་པ་ལྔས་ནད་ཀྱིས་གཟིར་བ་སྟེ། དེ་ལ་རླུང་གིས་བསྐྱོད་པ་དང༌། མཁྲིས་པ་དང་བད་ཀན་དང་འདུས་པ་དང༌། དུས་གྱུར་པ་རྣམས་ཏེ། རྣམ་པ་དེ་ལྔས་ན་ནད་ཀྱིས་གཟིར་བ་སྟེ། ཉེས་པ་མེད་དོ། །མི་ཚངས་པར་སྤྱོད་པའི་གླེང་གཞི་ནི་ཡུལ་འབྲི་པའི་ཟི་ནའོ། །གང་ཟག་ནི་ཚེ་དང་ལྡན་པ་བཟང་སྦྱིན་ནོ། །ཉེས་པ་ནི་ལུས་ཀྱིས་སོ། །ཉོན་མོངས་པ་ནི་འདོད་ཆགས་སོ། །མཚན་མ་ནི་ཕས་ཕམ་པ་སྟེ། དེ་ལྟར་ན་ཕས་ཕམ་པ་དང་པོ་ལེགས་པ་བཅུ་སྨོས་པ་དང༌། བསླབ་པ་ཕུལ་བའི་བྱེ་བྲག་དང༌། དགེ་སློང་ཞེས་བྱ་བའི་མིང་གི་རྣམ་གྲངས་དང༌། མཁྱེན་བཞིན་དུ་འདྲི་བ་དང༌། གླེང་གཞི་དང༌། གང་ཟག་དང༌། ལས་དང་པོ་པ་ལ་ཉེས་པ་མེད་པ་རྣམས་བསླབ་ཚིག་དང་པོ་ལ་འདིར་སྨོས་པས་འོག་མ་གཞན་རྣམས་ལ་གང་རིགས་སུ་དེ་བཞིན་དུ་སྦྱར་རོ། །ཕས་ཕམ་པ་དང་པོའི་མི་བརྗེད་པའི་ཚིག་གོ། །།མ་བྱིན་པར་ལེན་པའི་གླེང་གཞི་ནི་སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་སྔོན་རྫ་མཁན་དགེ་སློང་ནོར་ཅན་ཞེས་བྱ་བ་རྒྱལ་པོའི་ཁབ་ཀྱི་དགོན་པོའི་རི་ལ་གནས་སྤྱིལ་པོར་བྱས་ཏེ་འདུག་གོ །དགེ་སློང་ནོར་ཅན་སྔ་དྲོའི་དུས་ཀྱི་ཚེ་རྒྱལ་པོའི་ཁབ་ཏུ་བསོད་སྙོམས་ལེན་དུ་སོང་བའི་འོག་ཏུ་རྒྱལ་པོའི་ཁབ་ཀྱི་མི་བ་ལང་རྫིང་དང༌། ལུག་རྫི་དང་ཤིང་ཐུན་ལ་སོགས་པས་དགེ་སློང་ནོར་ཅན་གྱི་སྤྱིལ་པོ་དྲལ་བཤིག་སྟེ་རྩྭ་ཤིང་ཀུན་ཁྱེར་བར་མཐོང་ངོ༌། །དེ་ནས་ནོར་ཅན་གྱིས་རྩྭ་ཤིང་བསྡུས་ནས་སླར་སྤྱིལ་པོ་བྱས་ནས་ལན་གཉིས་ལན་གསུམ་དུ་བཤིག་ཅིང་ཁྱེར་བའི་ལན་གྲངས་མང་ནས་ནོར་ཅན་གྱིས་བསམས་པ་ཀྱེ་མའོ་མི་བཟོད་དོ། །ཀྱེ་མའོ་
སྡུག་བསྔལ་ལོ། །དེ་ལྟར་སྤྱིལ་པོ་བཤིག་ཅིང་ཁྱེར་མོད་ཀྱི། བདག་གི་ཕའི་བཟོའི་གནས་དང༌། ལས་ཀྱི་གནས་ལ་བདག་མཁས་ཀྱིས་ཅི་ནས་སྲ་བ་ཀུན་ནས་ལས་གནས་ཤིག་བྱའོ་སྙམ་ནས། ས་སྲོག་ཆགས་མེད་པ་ལས་འཇིམ་པ་བྱས་ཏེ་ཁང་བུ་བརྩིགས་ནས་སྐམས་པ་དང་སོ་བཏང་སྟེ། ཤིན་ཏུ་ཁ་དོག་དམར་བ་འཚེར་བ་གཅིག་བྱས་ནས་བདག་གིས་ཤིན་ཏུ་ལེགས་པའི་ཁང་བུ་གྲུབ་སྟེ། ང་འདི་ཁབ་སྲོའོ་སྙམ་ནས་དགེ་སློང་དག་ལ་ཁང་བུ་གཏམས་ཏེ། ལྗོངས་རྒྱུ་ཞིང་སོང་བའི་ཕྱིན་བཅོམ་ལྡན་འདས་དགེ་སློང་མང་པོའི་འཁོར་དང་བཅས་ཏེ་གནས་ཉུལ་ཞིང་གཤེགས་པ་དང༌། བཅོམ་ལྡན་འདས་ཀྱིས་དགེ་སློང་ནོར་ཅན་གྱི་ཁང་པ་ཚོས་ཤིང་ཁ་དོག་ཤིན་ཏུ་དམར་བ་གཟིགས་པ་དང༌། བཀའ་སྩལ་པ། དེ་ལྟ་བུ་སུའི་ཁང་པ་ཡིན། དགེ་སློང་ནོར་ཅན་གྱི་ལགས་སོ་ཞེས་གསོལ་པ་དང༌། བཀའ་སྩལ་པ། དགེ་སློང་དག་ཁང་དུ་འདི་ལྟ་བུ་བྱེད་དུ་མི་གནང་གི་གྲོལ་ཅིག་ཆོམ་ཅིག །དེའི་ཕྱིར་མུ་སྟེགས་ཅན་རྣམས་ཀྱང་འདི་ལྟར་དགེ་སྦྱོང་གཽ་ཏ་མ་འདུག་བཞིན་དུ་ཉན་ཐོས་ཁ་ཅིག་ལ་ཟབ་པའི་གནས་ཀྱི་ཆོས་འབྱུང་ངོ་ཞེས་འཆའོ། །དེ་ནས་དེ་དག་བཤིག་སྟེ་སླར་གཤེགས་པ་དང་དེའི་འོག་ཏུ་ནོར་ཅན་ཡང་སླར་འོངས་ཏེ། ཉེ་འཁོར་གྱི་མི་རྣམས་ལ་ཁང་པ་གར་སོང་ཞེས་སྨྲས་པ་དང༌། བཅོམ་ལྡན་འདས་འཁོར་དང་བཅས་པས་བཅོམ་མོ་ཞེས་སྨྲས་པ་དང༌། ནོར་ཅན་ན་རེ་དེ་ལྟར་ཆོས་ཀྱི་བདག་པོ་བདེ་བར་གཤེགས་པས་བཅོམ་ན་ལེགས་སོ་ཞེས་སྨྲས་ནས། དེའི་འོག་ཏུ་ནོར་ཅན་གྱིས་བསམས་པ་རྒྱལ་པོའི་ཁབ་ཀྱི་གྲོང་ཁྱེར་ན་ཤིང་སྲུང་གི་བློན་པོ་སྔ་ནས་བདག་དང་མཛའ་བས་ན། །བདག་གི་གནས་ཁང་ཐམས་ཅད་ཤིང་ལས་བྱའོ་སྙམ་ནས་ཤིང་སྲུང་གི་བློན་པོའི་གན་དུ་སོང་ནས་ཀྱེ་སྐྱེས་བུ་མཁྱེན་པར་མཛོད་ཅིང་།ལུས་འཕགས་མོའི་བུ་ཡུལ་མཉམ་ཀའི་རྒྱལ་པོ་མ་སྐྱེས་དགྲས་ང་ལ་ཤིང་བྱིན་པ་དེ་འདོད་ཀྱི་བྱིན་ཅིག་ཅེས་བྱས་པ་དང༌། འཕགས་པ་ལྷས་གནང་བ་ཡིན་ན་ནི་ཅི་བདེར་སྣོམས་ཤིག་ཅེས་བྱས་པ་དང་དགེ་སློང་ནོར་ཅན་གྱིས། རྒྱལ་པོའི་ཁབ་ཀྱི་ཞིག་རལ་གསོ་བར་དགོས་པའི་ཤིང་བཞག་པ་སྦས་པ་གཅིག་བསྡམས་ཏེ་ཕྱུང་ནས་ཁྱེར་བ་མཐོང་ངོ༌། །དེ་ནས་གྲོང་སྲུང་གི་སྣ་
བོས་ཤིང་དེ་ལྟ་བུ་གཅེས་པ་སུས་ཁྱེར་ཞེས་སྨྲས་པ་དང༌། དེ་ན་རེ་དགེ་སློང་ནོར་ཅན་གྱིས་ཁྱེར་རོ་ཞེས་བྱས་པ་དང༌། དེ་ནས་གྲོང་སྲུང་གི་སྣ་བོས་དེ་ལྟར་གྱུར་པ་རྒྱལ་པོ་ལ་གསོལ་ཏོ། །དེ་ནས་རྒྱལ་པོས་དགེ་སློང་ནོར་ཅན་དང༌། ཤིང་སྲུང་གི་སྣ་བོ་འགུགས་པར་བཏང་སྟེ། གཉིས་རྒྱལ་པོའི་སྤྱན་སྔར་ལྷགས་སོ། །རྒྱལ་པོས་ནོར་ཅན་ལ་འཕགས་པ་ཤིང་མ་བྱིན་པར་ལེན་དུ་དབང་ངམ་ཞེས་སྨྲས་པ་དང༌། གསོལ་པ། མི་དབང་ངོ༌། །འོ་ན་ཅིའི་ཕྱིར་ཤིང་ཁྱེར། ལྷས་སྩལ་པ་ལགས་སོ། །འཕགས་པ་མི་དྲན་ནོ། །ལྷ་བདག་གིས་དགོངས་པར་བགྱིའོ། །ལྷ་འདི་ལྟར་ཡབ་ཀྱིས་རྒྱལ་སྲིད་སྤྱི་བོ་ནས་དབང་བསྐུར་ནས་རིང་པོར་མ་ལོན་པ་ལྷས་ངའི་ཡུལ་དགེ་བར་གྲགས་པས་དགེ་སློང་དང་བྲམ་ཟེ་དག་ཀྱང་རུང་རྩྭ་དང་ཤིང་དང་ཆུ་རྣམས་དེང་ཕན་ཆད་ཅི་བདེར་སྤྱོད་དུ་གནང་ངོ་ཞེས་འཁོར་མང་པོའི་མདུན་དུ་བསྟན་དུ་རུང་བའི་ཁྱུ་མཆོག་གི་སྒྲ་བསྒྲགས་པ་མི་དགོངས་སམ་འཕགས་པ་དེ་ནི་གཟུང་བ་མེད་པ་ལ་བྱའི། གཟུང་བ་དང་བཅས་པ་ལ་ནི་མ་ཡིན་ནོ། །གཟུང་བ་མ་མཆིས་པ་ལ་ལྷས་མངའ་བགྱིར་ཅི་མཆིས་ཞེས་སྨྲས་པ་དང༌། རྒྱལ་པོ་མ་སྐྱེས་དགྲའང་ཁྲོས་འཁྲུགས། རྔམ་སྟེ་དཔྲལ་བ་ལ་ཁྲོ་གཉེར་གསུམ་བྱུང་བཞིན་བསྒྱུར་མིག་བགྲད་ལག་པ་མཉེས་ནས་འདི་སྐད་སྨྲས་སོ། །གསད་པའི་རིགས་པའི་དགེ་སྦྱོང་ཁྱོད་སོང་ལ་ཕྱིན་ཆད་དེ་ལྟར་མ་བྱེད་ཅིག་ཅེས་བསྒོའོ། །དེ་ནས་དགེ་སློང་ནོར་ཅན་རང་གི་གནས་སུ་སོང་སྟེ་དགེ་སློང་གྲོགས་པོ་རྣམས་ལ་རྒྱལ་པོ་མ་སྐྱེས་དགྲས་ཧད་པོར་དེ་བསད་དེ་བཏང་ངོ་ཞེས་སྨྲས་པ་དང༌། ཅི་ཉེས་ཞེས་བྱས་པ་དང་ཇི་ལྟར་གྱུར་པ་ཞིབ་ཏུ་སྨྲས་སོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་ཁྱོད་དགེ་སློང་ཟླ་ཞིག་ཁྲིད་ལ་རྒྱལ་པོའི་ཁབ་ཀྱི་གྲོང་གི་མངོན་སུམ་མམ། ལམ་གྱི་བཞི་མདོར་སྒྲས་གོ་བར་འགྱུར་བའི་གནས་སུ་འདུག་ལ། རྒྱལ་པོ་མ་སྐྱེས་དགྲའི་བཀའ་ཁྲིམས་ལས་ཅི་ཙམ་ཞིག་མ་བྱིན་པར་བླངས་ན་ཆད་པས་བཅད་ཅིང་སྲོག་དང་དབྲལ་བ་དྲིས་ཤིག །བཙུན་པ་དེ་བཞིན་ནོ་ཞེས་གསོལ་ནས། ཀུན་དགའ་བོས་རྒྱལ་པོའི་མི་དད་པ་དང༌། མ་དད་
བ་ལ་ཅི་ཙམ་གྱིས་ན་སྲོག་དང་དབྲལ་ཞེས་སྨྲས་པ་དང༌། མ་ཤ་ཀ་ལྔ་འམ་ལྔ་ལས་ལྷག་པས་སོ་ཞེས་མཆི་བ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་བྱུང་བ་དེ་དང༌། གླེང་གཞི་དང་དེ་ལྟར་གྱུར་པའི་ཕྱིར་དགེ་སློང་གི་དགེ་འདུན་རྣམས་བསྡུས་སོ། །སངས་རྒྱས་བཅོམ་ལྡན་འདས་ནི་མཁྱེན་བཞིན་དུ་དྲིས་པས། དགེ་སློང་ནོར་ཅན་ལ་ཁྱོད་ཀྱིས་འདི་ལྟ་བུ་མི་རིགས་པ་ཆོས་འདི་འདྲ་བ་བྱས་པ་བདེན་ནམ་ཞེས་སྨྲས་པ་དང༌། བཙུན་པ་མད་དོ་ཞེས་གསོལ་ཏོ། །བཅོམ་ལྡན་འདས་ཀྱིས་དགེ་སྦྱོང་གི་བྱ་བ་མ་ཡིན། རུང་བ་མ་ཡིན། རིགས་པ་མ་ཡིན་མཐུན་པ་མ་ཡིན་ཞེས་རྣམ་གྲངས་དུ་མའི་སྒོ་ནས་སྨད་ནས་འདི་ལྟར་ངའི་ཉན་ཐོས་རྣམས་འདུལ་བ་ལ་བསླབ་པའི་གནས་བཅའོ་ཞེས་རྩ་བའི་ཚིག་ཡང་དགེ་སློང་གང་ཞེས་བྱ་བ་ལ་སོགས་པ་སྨོས་སོ། །ཡང་དགེ་སློང་གང་ཞེས་བྱ་བ་ནི་དགེ་སློང་བཞི་པོ་སྔར་གོང་དུ་བཀག་ཟིན་པས་ན། སྐབས་འདིར་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པར་མ་འཁྲུགས་པ་ཤོལ་བར་མི་འོས་པ་དེ་ནི་དགེ་སློང་དུ་དགོངས་སོ། །གཞན་གྱིས་ཞེས་བྱ་བ་ནི་བུད་མེད་དང༌། སྐྱེས་པ་དང༌། མ་ནིང་དང་མི་རྣམས་ཀྱིའོ། །གྲོང་ན་ཡོད་ཅེས་བྱ་བ་ནི་ར་བའི་ནང་ན་མིའི་ཡོ་བྱད་ཡོད་པའོ། །དགོན་པ་ན་ཡོད་ཅེས་བྱ་བ་ནི་ར་བའི་ཕྱི་རོལ་ན་ནོར་ཡོད་པའོ། །མ་བྱིན་ཞེས་བྱ་བ་ནི་སྐྱེས་པ་དང་བུད་མེད་དང༌། མ་ནིང་དང༌། མི་རྣམས་སུས་ཀྱང་དེ་ལ་མ་བྱིན་པའོ། །རྐུ་བའི་གྲངས་སུ་གཏོགས་ཞེས་བྱ་བ་ནི་གང་མ་བྱིན་པ་དེ་རྐུ་བའི་གྲངས་སུ་གཏོགས་པའོ། །བླངས་ཞེས་བྱ་བ་ནི་ལེན་པའོ། །ཇི་ཙམ་མ་བྱིན་པར་བླངས་པ་ཞེས་བྱ་བ་ནི་ཡུལ་དང་དུས་ཀྱི་མ་ཤ་ཀ་ལྔ་འམ། ལྔ་ལས་ལྷག་པས་སོ། །དེ་ལ་རྒྱལ་པོའི་ཞེས་བྱ་བ་ནི་རྒྱལ་པོ་ཉིད་དམ། བུད་མེད་ལས་རྒྱལ་ཐབས་ཀྱི་དབང་བསྐུར་བ་འམ་རྒྱལ་པོ་རྒྱལ་རིགས་རྒྱལ་ཐབས་སྤྱི་བོ་ནས་དབང་བསྐུར་བ་འམ། ཡང་ན་རྒྱལ་རིགས་སམ། བྲམ་ཟེ་འམ། རྗེའུའི་རིགས་སམ། དམངས་རིགས་ཀྱང་རུང་རྒྱལ་ཐབས་སྤྱི་བོ་ནས་དབང་བསྐུར་བ་ལ་བྱའོ། །བློན་པོ་ཞེས་བྱ་བ་ནི་རྒྱལ་པོ་ལ་གློ་བ་ཉེ་ཞིང་བཀའ་གྲོས་ཀྱིས་འཚོ་བ་དང༌། དབང་པོ་ཆེན་པོ་ཆབ་སྲིད་
འཛིན་པ་དང༌། གང་དེ་ལ་གནས་ཤིང་འཚོ་བར་སེམས་པའོ། །བཟུང་ནས་ཞེས་བྱ་བ་ནི་རྒྱལ་པོ་དད་པ་དང་མ་དད་པ་སྟེ། རྒྱལ་པོ་མ་དད་པས་ནི་བཅིང་བ་དང༌། སྤྱུག་པ་དང༌། སྲོག་དད་དབྲལ་བའི་ཆད་པས་གཅོད་པའོ། །དད་པས་ནི་ཀྱེ་མི་ཁྱོད་རྐུན་མའོ་ཞེས་ཚིག་གིས་སྤྱོ་བའོ། །དེ་ལ་གསོད་ཅེས་བྱ་བ་ནི་སྲོག་དང་འབྲལ་བའོ། །འཆིང་ཞེས་བྱ་བ་ནི་བཅིངས་པ་རྣམ་པ་གསུམ་སྟེ། ལྕགས་སྒྲོག་དང༌། ཤིང་སྒྲོག་དང༌། གྲེས་ཐག་གིས་བཅིང་བའོ། །སྤྱུག་ཅེས་བྱ་བ་ནི་ཡུལ་ས་དང་འབྲེལ་པའོ། །ཀྱེ་མི་ཁྱོད་ནི་རྐུན་མའོ་ཞེས་བྱ་བ་ནི་རྐུ་བས་ན་གླེང་གཞི་དང་བཅས་ཏེ་རྐུན་མའོ་ཞེས་སྤྱོ་བའོ། །བྱིས་པ་ཞེས་བྱ་བ་ནི་ཉེས་པའི་ལས་བྱེད་ཅིང་ཚེ་འདི་ལ་ཉེས་པ་མ་མཐོང་བས་ན་བྱིས་པའོ། །བླུན་པོ་ཞེས་བྱ་བ་ནི་ཚེ་ཕྱི་མའི་ཉེས་པ་མ་མཉེས་པ་ན་བླུན་པའོ། །རྐུ་བ་ཞེས་བྱ་བ་ནི་གཤེ་བ་དང་བཅས་པའི་ཚིག་གོ །འདི་སྐད་ཅེས་ཀྱང་ཟེར་རོ་ཞེས་བྱ་བ་ནི་སྨྲ་བའོ། །དེ་ཡང་ཞེས་བྱ་བ་ནི་ཉེ་བར་བསྟན་པའོ། །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པའོ། །དགེ་སློང་གི་དངོས་པོ་གང་ཞེ་ན། གང་བསྙེན་པར་རྫོགས་པའོ། །བསྙེན་པར་རྫོགས་པ་གང་ཞེ་ན། གང་གསོལ་བ་དང་བཞིའི་ལས་ཀྱིས་བྱ་བ་བྱས་པ་ཡང་དག་པར་རྫོགས་པ་སྟེ། གང་ཟག་དེས་ཀྱང་ཁས་བླངས་ཤིང་མི་སྨོད་མི་སྤོང་བའོ། །ཕས་ཕམ་པ་ཞེས་བྱ་བ་ནི་ལྟུང་བའི་ཐ་མ་ཐ་ཤལ་ངན་པ་མི་བཅའ་བའི་ཉེས་པ་ཅན་གང་དང་ཡང་མི་མཚུངས་ཏེ། ལྟུང་བ་དེ་བྱུང་མ་ཐག་ཏུ་དེ་དགེ་སློང་མ་ཡིན། དགེ་སྦྱོང་མ་ཡིན། ཤཱཀྱའི་སྲས་མ་ཡིན་ཏེ། དགེ་སློང་གི་དངོས་པོ་དང་བྲལ་བ་འཁྱམས་པ་བཤིག་པ། ཕས་ཕམ་པ་སྟེ་དགེ་སྦྱོང་དུ་བསླང་དུ་མི་རུང་བའོ། །དཔེར་ན་ཤིང་ཏ་ལ་མགོ་བཅད་ན་སྔོན་པོར་མི་འགྱུར་མི་སྐྱེ་མི་འཕེལ་རྒྱས་པར་མི་རུང་བ་བཞིན་དུ་དགེ་སློང་ལྟུང་བ་དེ་བྱུང་ན་དགེ་སྦྱོང་དུ་བསླད་དུ་མི་རུང་སྟེ། ཕས་ཕམ་པར་འགྱུར་རོ་ཞེས་བཤད་དོ། །གནས་པར་མི་བྱ་ཞེས་བྱ་བ་ནི་གསོ་སྦྱོང་བྱ་བ་འམ། ཚུལ་ནས་འབྱུང་བ་འམ། གསོལ་བ་དང་གཉིས་སམ། གསོལ་བ་དང་བཞིའི་ལས་ལ་མི་གནས་པ་སྟེ་གང་ཟག་བཅུ་གཉིས་ཀྱི་ལས་བསྐོ་བ་ཡང་མི་ཆུད་པའོ། །དེས་ན་གནས་པར་མི་
བྱའོ་ཞེས་གསུངས་པས་སོ། །གཞན་ཡང་མ་བྱིན་པར་ལེན་པའི་སྒོ་ནས་བསླབ་པའི་གནས་བཅས་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་གདོལ་བ་དང༌། ཆར་ལྡན་ཞེས་བྱ་བ་ཤིན་ཏུ་མཛའ་བ་གཉིས་ཤིག་ལྷན་ཅིག་འཁོད་དེ། གདོལ་བ་ནི་བསོད་ནམས་ཆེ་བས་ཆོས་གོས་དང་ཡོ་བྱད་རྣམས་སུ་ཡང་ལྡན་ནོ། །ཆར་ལྡན་ནི་ཆོས་གོས་ལ་སོགས་པ་ཡང་མེད་དོ། །སྦྱར་མ་ཞིགས་པ་ཞིག་གྱོན་ནས་དགེ་སློང་དག་གིས་ཁྱོད་འདོད་པ་ཆུང་ངུ་ཟིན་གྱིས་ཀྱང་རང་གི་ལུས་སྒྲེན་མོར་སྟོན་པ་མི་རིགས་ཀྱི་གོས་གྱོན་ཅིག་ཅེས་བསྒོ་བ་དང༌། དེ་ན་རེ་ཆོས་གོས་མ་རྙེད་དོ། །འོ་ན་ཁྱོད་ཀྱི་མཛའ་བོ་གདོལ་བ་ལ་ཆོས་གོས་ལྷག་པ་དག་ཡོད་ན་ཅི་ཉེས་དེས་མི་སྟེར་བ་སྙམ་ན་སྟེར་གྱི་སློངས་ཤིག །ཅེས་བསྒོ་བ་དང་དེ་ཡང་གདོལ་བའི་གནས་ཁང་དུ་སོང་སྟེ་ཆོས་གོས་རན་མ་ནི་བླང་དོ་སྙམ་ནས་ཆོས་གོས་སད་ཅིང་འདུག་པ་དང་གདོལ་བས་མཐོང་ངོ༌། །ཁྱོད་ཀྱིས་ནི་ཆོས་གོས་རྐུ་སེམས་ཀྱིས་བླངས་པ་ན་ཕས་ཕམ་པར་འགྱུར་རོ་ཞེས་སྨྲས་པ་དང༌། དེ་ཡང་ཐེ་ཚོམ་སྐྱེས་ནས་དེས་བཅོམ་ལྡན་འདས་ལ་གསོལ་ཏོ། །བཀའ་སྩལ་པ། སད་པར་བསམས་པས་ལྟུང་བ་མེད་དེ་ཕྱིན་ཆད་དགེ་སློང་གིས་ཡིད་གཅུགས་པ་མ་ཡིན་པ་ལ་ཡིད་བརྟན་པ་མ་སྐྱེད་ཅིག །བསྐྱེད་ན་འདས་པ་དང་བཅས་པར་འགྱུར་རོ། །མཛའ་བོ་རྣམ་གསུམ་ལ་ཆུང་ངུ་ན་མཛའ་བ་ལ་ཆུང་ངུ་ཡིད་བརྟན་པར་བྱ་སྟེ། འབྲིང་པོ་དང་ཆེར་མཛའ་བ་ལ་ཡང་དེ་བཞིན་ནོ། །གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་མི་ཕམ་པ་དང་ཟླ་བས་སྦེད་ཅེས་བྱ་བ་ཤིན་ཏུ་མཛའ་བ་གཉིས་ཤིག་འཁོད་དེ། ཟླ་བ་སྦེད་ནི་ཆོས་གོས་དང༌། ལྷུང་བཟེད་དང༌། ཡོ་བྱད་རྣམས་སུ་ཡང་ལྡན་ན། མི་ཕམ་པ་ནི་ཆོས་གོས་དག་དང་མི་ལྡན་ཏེ། སྦྱར་མ་དག་ཀྱང་ངན་ནས་དགེ་སློང་དག་གིས་ཟླ་བ་སྦེད་པ་ལ་དགེ་སློང་སློངས་ཤིག་ཅེས་བསྒོ་ནས། མི་ཕམ་གྱིས་ཟླ་བ་སྦེད་ལ་ལྷུང་བཟེད་བླངས་པས་མ་སྟེར་ཏོ། །འོ་ན་ཆོས་གོས་སློང་ཞེས་བྱས་པ་དང༌། ཚར་ཚར་ཡང་མི་སྦྱིན་ན་ཆོས་གོས་ལྟ་ཅི་སྨོས་སོ། །མི་ཕམ་གྱིས་བསམས་པ་ཆོས་གོས་ཤིག་རྐུའོ་སྙམ་ནས་སྐབས་ཚོལ་
ཞིང་འདུག་པ་དང༌། ཟླ་བ་སྦེད་ཁ་དོག་བསྒྱུར་བའི་ལས་བྱེད་པའི་ཚེ་མི་ཕམ་ན་རེ་ཁ་དོག་བསྒྱུར་བའི་གྲོགས་བྱའོ་ཞེས་སྨྲས་པ་དང༌། དེས་ནི་ཤིན་ཏུ་རྐུ་བར་བཤམས་སོ་སྙམ་དུ་ཚོར་ནས་དེའི་ནུབ་མོ་མི་ཕམ་པ་ཉལ་བའི་སྔས་ནས་ཆོས་གོས་བླངས་ཏེ་བདག་གི་སྔས་སུ་བཅུག་སྟེ་ཉལ་བ་དང་ཐོ་རངས་མི་ཕམ་གྱིས་ཟླ་བ་སྦེད་ཀྱི་སྔས་ནས་ཆོས་གོས་བརྐུས་ཏེ་བྲོས་པ་དང༌། ནམ་ལངས་ནས་བལྟས་པ་ན་བདག་གི་ཆོས་གོས་ཡིན་པར་གྱུར་ནས་ཕས་ཕམ་པའི་ལྟུང་བ་མ་བྱུང་གྲང་སྙམ་དུ་ཐེ་ཚོམ་སྐྱེས་ནས་སྙན་དུ་གསོལ་བ་དང༌། བཀའ་སྩལ་པ་རང་གི་ཡོ་བྱད་རྐུ་སེམས་ཀྱིས་བླངས་ན་ཉེས་པ་སྦོམ་པོར་འགྱུར་རོ་ཞེས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། ཡང་དེའི་ཚེ་དགེ་སློང་མ་ལྷོ་ཕྱོགས་ནས་འོངས་པ་དང༌། ཤར་ཕྱོགས་ནས་འོངས་པ་གཉིས་ཆོས་ཉན་དུ་དོང་བ་ལས་ལྷོ་ཕྱོགས་མའི་ཆོས་གོས་ལྷུང་བ་དང༌། ཤར་ཕྱོགས་མས་ཤར་ཕྱོགས་ཀྱི་སྐད་དུ། ཨ་བ་སད་ད་ཞེས་བྱས་ན། མོས་མ་ཤེས་ནས། ཆོས་གོས་བསྡུས་ཏེ་རང་གི་གནས་ཁང་དུ་བཞག་གོ །སླད་ཀྱི་དགེ་སློང་མ་རྨེད་དུ་འོངས་ནས་བྱིན་པ་དང༌། ཁྱོད་ཀྱིས་བརྐུས་པས་ཕས་ཕམ་པར་འགྱུར་རོ་ཞེས་བྱས་པ་དང༌། དེ་ཡང་ཐེ་ཚོམ་སྐྱེས་ནས་སྙན་དུ་གསོལ་བ་དང༌། བཀའ་སྩལ་བ། ཨ་བ་སད་ད་ཞེས་བྱ་བས་ཉེས་པ་མེད་དེ། ཕྱིན་ཆད་ཡུན་རིང་དུ་བཞག་ན་འདས་པ་དང་བཅས་པར་འགྱུར་རོ། །ཞེས་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཚེ་དང་ལྡན་པ་མཽད་གལ་གྱི་བུས་ཁྱིམ་བདག་མགོན་མེད་ལ་ཁྱོད་ཀྱི་བུ་རྣམས་སངས་རྒྱས་ཀྱི་བཀའ་བསླབ་ཏུ་ཛེ་ཏའི་གཙུག་ལག་ཁང་དུ་ཁྱེ་ཤིག །ཁྱིམ་བདག་གི་བུ་རྣམས་ཀྱང་ཛེ་ཏའི་ཚལ་དུ་དོང་དོང་བ་ལས། སྟོན་ཟླ་ཐ་ཆུངས་ཀྱི་གཡོན་ཅན་གྱིས་བྱིས་པ་རྣམས་ལ་ལམ་དུ་བརྐུས་སོ། །མཽད་གལ་གྱི་བུས་བསམས་པ་བྱིས་པ་རྣམས་ལ་མ་བསམས་ན་བྱིས་པ་ཡང་ཕ་མ་དང་བྲལ་བས་སྡུག་བསྔལ། ཕ་མ་ཡང་བུ་དང་བྲལ་བས་སྡུག་བསྔལ། མ་དད་པ་རྣམས་ཀྱང་སྐབས་རྙེད། དད་པ་རྣམས་ཀྱང་གཞན་དུ་གྱུར་ཏེ་ཕྱིན་ཆད་ཛེ་ཏའི་ཚལ་དུ་སུ་ཡང་འོང་བར་མི་འགྱུར་སྙམ་ནས་རྫུ་འཕྲུལ་གྱིས་རྔ་བརྡུངས་ཏེ་ཕྱོགས་བཞི་ནས་བསྐོར་བ་དང་བྱིས་པ་རྣམས་
སྐྱེའོ། །དེ་ལྟར་གྱུར་པ་དྲུག་སྡེ་རྣམས་ཀྱིས་མཽད་གལ་གྱི་བུ་ལ་ལྟུང་བ་བྱུང་སྟེ་བསྐྲད་པའི་ལས་བྱའོ་ཞེས་གཎྜཱི་བརྡུངས་པ་དང༌། སྙན་དུ་བདས་སོ། །བཀའ་སྩལ་བ། མཽད་གལ་གྱི་བུས་བསམས་པ་འདི་ལྟ་བུ་བྱས་པས་ཉེས་པ་མེད་དོ། །གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་དུ་བཞུགས་སོ། །དེའི་ཚེ་རྒྱལ་པོ་གཟུགས་ཅན་སྙིང་པོ་བཅོམ་ལྡན་འདས་དང༌། དགེ་སློང་གནས་བརྟན་དག་གི་ཞབས་ལ་རྟག་ཏུ་ཕྱག་འཚལ་དུ་འགྲོའོ། །བཅོམ་ལྡན་འདས་ཀྱིས་རྒྱལ་པོ་ལ་ཆོས་བཤད་གཟེངས་བསྟོད་རབ་ཏུ་དགའ་བར་བྱས་སོ། །དེ་ནས་རྒྱལ་པོ་ཚེ་དང་ལྡན་པ་སྲུང་བའི་བུའི་གན་དུ་སོང་ནས་འཕགས་པ་ལག་དར་ཏེ་ཁང་པ་རྩིག་བ་ནི་འོ་བརྒྱལ་བདག་གིས་གཡོག་ལྔ་བརྒྱ་གསོལ་ལོ་ཞེས་སྨྲས་པ་དང༌། སྲུང་བའི་དབང་པོའི་བུས་རྒྱལ་པོ་ཆེན་པོ་བསྙུན་མི་མངའ་བར་གྱུར་ཅིག་ཅེས་བྱས་ནས་དགེ་འདུན་གྱི་དོན་དུ་བླངས་སོ། །དེ་ནས་དུས་གཞན་ཞིག་ན་སྟོན་ཟླ་ཐ་ཆུངས་ཀྱི་གཡོན་ཅན་གྱིས་དགེ་སློང་གི་བྲན་རྣམས་ཀྱི་ཁྱིམ་བརྐུས་སོ། །ཚེ་དང་ལྡན་པ་སྲུང་བའི་བུས་རྫུ་འཕྲུལ་མངོན་པར་བྱས་ནས་གྲོང་ཁྱེར་ཀུན་ལྕགས་ཀྱི་རིས་བསྐོར་ཏོ། །གཡོན་ཅན་དག་གིས་བསམས་པ་མཐུ་བོ་ཆེ་འགའ་ཞིག་གིས་ཀྱལ་ཀ་བྱས་ཡང་དག་སྙམ་ནས་རྫས་ཀུན་བོར་ཏེ་བྲོས་སོ། །དྲུག་སྡེས་དེ་བྱས་པས་ལྟུང་བ་བྱུང་ངོ་ཞེས་བསྐྲད་པའི་ལས་བྱས་པ་དང༌། སྙན་དུ་བདས་ཏེ་བཀའ་སྩལ་བ། གལ་ཏེ་བདག་གིས་གཡོག་པོ་རྣམས་ལ་མ་བསམས་ན་གཡོག་པོ་ཡང་ནོར་དང་བྲལ་བས་སྡུག་བསྔལ་ཆེ། མ་དད་པ་ནི་སྐབས་རྙེད་དད་པ་ནི་གཞན་དུ་གྱུར། གཞན་གྱིས་བྱིན་པ་ལ་མ་བསྲུངས་ན་ཕྱིན་ཆད་ཀྱང་ཤཱཀྱའི་སྲས་དགེ་སྦྱོང་རྣམས་ལ་སུ་ཡང་སྦྱིན་པར་བསམས་པ་མེད་པས་ན་རྫུ་འཕྲུལ་མངོན་པར་བགྱིས་མད་དོ་ཞེས་གསོལ་བ་དང༌། དེ་ལྟ་བུར་བསམས་པས་ཉེས་པ་མེད་དོ་ཞེས་བཀའ་སྩལ་ཏོ། །ཉེས་པ་ཇི་ལྟ་བུ་ཞེ་ན་དགེ་སློང་གིས་ཤོ་གམ་དང་གྲུ་བཙས་མ་བྱིན་པར་འདས་ན་ཕམ་པར་འགྱུར་རོ། །དཀོན་མཆོག་གསུམ་དང་ཕ་མའི་ཕྱིར་ཡང་ཆོས་བཤད་དེ་སྟེར་ན་སོང་ཤིག །མ་སྟེར་དང་ཤོ་གམ་སྦྱིན་པར་བྱའོ། །དགེ་སློང་གིས་
མིའི་ནོར་ཡོ་བྱད་དམ་པ་བདག་གིས་རྐུས་སམ་གཞན་རྐུར་བཅུག་གམ། ཕོ་ཉ་ལས་རྐུར་བཅུག་ཀྱང་རུང་སྟེ། མིའི་ཡོ་བྱད་ནོར་བུ་དང་དཔུང་རྒྱན་དང༌། གདུ་བུ་དང་སེ་མོ་དོ་དང༌། དོ་ཤལ་དང༌། མུ་ཏིག་དང༌། གསེར་དངུལ་ལ་སོགས་པ་བཞག་པ་ལ་བརྐུ་བར་སྦྱོར་ཞིང་ཁྲི་ལས་ལངས་ཏེ་ཤམ་ཐབས་བགོས་ནས་སོང་ན་མ་རེག་གི་བར་དུ་ན་ཉེས་བྱས་སོ། །རེག་ན་ནི་སྦོམ་པོར་འགྱུར་རོ། །གནས་ནས་སྤགས་ཏེ་རིན་ཐང་ཚང་ན་ཕས་ཕམ་པར་འགྱུར་རོ། །སྔགས་སམ་སྨན་གྱིས་གཞན་གྱི་ཡོ་བྱད་བླངས་ནས་ཕས་ཕམ་པར་འགྱུར་རོ། །བདག་པོ་མེད་པའི་བརྐུ་ན་ཉེས་པ་སྦོམ་པོར་འགྱུར་རོ། །གྲུ་བརྐུ་ན་ལྟར་སྣང་གི་བར་དུ་ནི་ཉེས་བྱས་སྦོམ་པོར་འགྱུར་རོ། །མི་སྣང་ན་ནི་ཕས་ཕམ་པར་འགྱུར་རོ། །དངོས་པོ་གསུམ་སྟེ། ཞིང་གི་དངོས་པོ་དང༌། ཁྱིམ་པའི་དངོས་པོ་དང༌། ཚོང་དུས་ཀྱི་དངོས་པོ་སྟེ། དེ་ལ་རྐུ་བས་སྦྱོར་ན་ཤགས་ཁར་འདོར་བ་དང༌། མཐའ་ར་བས་བསྐོར་བའོ། །དེ་ལ་ཤགས་ཁར་འདོར་བ་ནི་ཡུལ་དཔོན་ནམ། ཞལ་ཅེ་གྲ་འམ། རྒྱལ་པོ་ལ་ཤགས་སུ་བགྱི་སྟེ་མི་དབང་བ་ལ་དགེ་སློང་ནམ་རྒྱལ་བ་ན་ཕས་ཕམ་པར་འགྱུར་རོ། །བསྐོར་བ་ནི་ཞིང་སྣ་ཕྲད་པ་འམ་མཐའ་རིབ་མས་བསྐོར་བའོ། །དགེ་སློང་གིས་སྲོག་ཆགས་རྐང་གཉིས་དང༌། རྐང་བཞི་དང༌། རྐང་མངས་དང༌། རྐང་མེད་བརྐུས་ཏེ་རིན་ཐང་ཚང་ན་ཕས་ཕམ་པར་འགྱུར་རོ། །རྐང་བཞི་ནི་རྟ་ལ་སོགས་པ་ཕྱུགས་རྣམས་ཏེ། ནམ་ཁྱུ་ནས་བཀར་ཏེ་བདག་གི་དབང་དུ་གྱུར་པ་ན་ཕས་ཕམ་པར་འགྱུར་རོ། །རྐང་གཉིས་ནི་མི་དང་བྱ་སྟེ། མི་བརྐུ་བ་ནི་རྣམ་པ་གསུམ་སྟེ། དུས་མལ་དང༌། བརྡ་དང༌། མཚན་མའོ། །ནམ་རྣམ་པ་གསུམ་པོས་གོ་སྟེ་བདག་གི་དབང་དུ་གྱུར་པ་ན་ཕས་ཕམ་པར་འགྱུར་རོ། །དགེ་སློང་གིས་རིན་ཐང་མེད་པའི་དངོས་པོ་བརྐུས་ན་ཕས་ཕམ་པར་འགྱུར་རོ། །རིན་ཐང་ཆེ་ཆེས་ཏེ་ཐང་མེད་པའོ། །རིན་ཐང་ཆུང་ངུ་བརྐུས་པ་དང་བསྙེན་པར་རྫོགས་ན་བརྐུས་པར་བཤམས་ལ། མ་རྫོགས་པ་ན་བརྐུས་ན་ཉེས་པ་སྦོམ་པོར་འགྱུར་རོ། །དགེ་སློང་གིས་མ་བྱིན་པར་བླངས་ཏེ་མཚན་གྱུར་ན་ཕས་ཕམ་པར་འགྱུར་རོ། །རྐུ་བ་ལ་རྣམ་པ་དྲུག་སྟེ། སྒྱུས་རྐུ་བ་དང༌།
མཐུས་རྐུ་བ་དང༌། བསྐྱིས་པ་ལས་བརྣོགས་ཏེ་རྐུ་བ་དང༌། གཏམས་པ་ལས་བརྣོགས་ཏེ་རྐུ་བ་དང༌། སྒྱོང་ཞིང་རྐུ་བ་དང༌། ཆོས་རྐུ་བའོ། །རྐུ་བ་དྲུག་པོ་ལ་ཆོས་རྐུ་བ་མ་གཏོགས་པར་ལྷག་མ་རྣམས་ནི་ཕས་ཕམ་པར་འགྱུར་རོ། །ནོར་གྱི་དངོས་པོ་གཅིག་ལ་མི་མང་དུ་རྐུ་ན་ཉེས་པ་སྦོམ་པོར་འགྱུར་རོ། །འོན་ཏེ་སོ་སོར་དགོས་པ་ལ་རེ་རེ་ཡང་མ་ཤ་ཀ་ལྔ་ལྔའི་ཐང་དུ་ཐོབ་ན་ཕས་ཕམ་པར་འགྱུར་རོ། །མ་ཤ་ཀ་ལྔས་ཕམ་པར་འགྱུར་རོ་ཞེས་བྱ་བ་ལ་མ་ཤ་ཀ་གསུམ་གྱིས་ཀྱང་ཕམ་པར་འགྱུར་པ་ཡོད་དོ། །མ་ཤ་ཀ་ལྔ་བརྐུས་ཀྱང་ཕམ་པར་མི་འགྱུར་བ་ཡང་ཡོད་དེ། རེ་རེ་འམ་གཉིས་གཉིས་སམ་གསུམ་གསུམ་དུ་བརྐུས་ཀྱི་ལྔར་མ་ཚང་ནའོ། །ཇི་ལྟར་འཛམ་བུའི་གླིང་དུ་མ་ཤ་ཀ་ལྔས་ཕམ་པར་འགྱུར་བ་བཞིན་དུ། ནུབ་ཀྱི་བ་ལང་སྤྱོད་དང༌། ཤར་གྱི་ལུས་འཕགས་སུ་ཡང་དེ་བཞིན་ནོ། །བྱང་གི་སྒྲ་མི་སྙན་དུ་མ་བྱིན་པར་ལེན་པ་མེད་དོ། །དེ་དེ་རྐུ་བར་སེམས་བསྐྱེད་ན་སྦོམ་པོར་འགྱུར་རོ། །གཞན་ལ་བྱིན་པའི་ཕྱིར་རྐུ་བ་དང༌། མི་མ་ཡིན་པའི་ནོར་བརྐུས་ན་ཉེས་པ་སྦོམ་པོར་འགྱུར་རོ། །མཆོད་རྟེན་གྱི་ཉེ་འཁོར་གྱི་རྒྱན་སྲུང་མ་མེད་པར་བརྐུས་ན་ཉེས་པ་སྦོམ་པོར་འགྱུར་རོ། །དེ་བཞིན་གཤེགས་པའི་རིང་བསྲེལ་དང་གླེགས་བམ་བརྐུས་ཏེ་རིན་ཐང་ཚང་ན་ཕས་ཕམ་པར་འགྱུར་རོ། །ཕྱོགས་བཞིའི་དགེ་འདུན་གྱི་ནོར་བརྐུས་པ་དང༌། གང་ཟག་མང་པོ་རྣམས་ཀྱི་ནོར་བརྐུས་པ་ནི་ཉེས་པ་སྦོམ་པོར་འགྱུར་རོ། །དེ་ལས་སོ་སོར་སྐལ་བ་མ་ཤ་ཀ་ལྔ་བྱུང་བ་བརྐུས་ན་ཕས་ཕམ་པར་འགྱུར་རོ། །སྔར་བསྔོས་པ་ལས་ཕྱིས་བརྐུས་ན་ཕས་ཕམ་པར་འགྱུར་རོ། །ཡོ་བྱད་ཆེན་པོ་བརྐུས་ཀྱང་ཕས་ཕམ་པར་མི་འགྱུར་བ་ཡོད་དོ། །གནས་ཁང་དུ་བཞག་པའི་ས་གཞི་དང་མ་བྲལ་བར་བརྐུས་པའོ། །རྙེད་པ་མི་དབང་བ་ལ་དབང་ངོ་ཞེས་སྨྲས་ན་ཤེས་བཞིན་དུ་བརྫུན་ཟེར་བས་ལྟུང་བར་འགྱུར་རོ། །རྐུ་སེམས་ཡོད་ན་ཉེས་པ་སྦོམ་པོར་འགྱུར་རོ། །དངོས་པོ་གྲུབ་ན་ཕས་ཕམ་པར་འགྱུར་རོ། །ཉེས་པ་གཞན་ནི་འདུལ་བ་རྣམ་པར་འབྱེད་པ་ལས་བྱུང་བ་བཞིན་དུ་གར་རིགས་སུ་སྦྱར། དགེ་སློང་ནོར་ཅན་གྱིས་བསམས་པ་
ལས་དང་པོ་པ་ལ་ཉེས་པ་མེད་དོ་ཞེས་གསུངས་ན། བདག་གིས་བསླབ་པ་མ་བཅས་པ་ལ། ཤིང་མང་པོ་ཞིག་མ་བྱིན་པར་བླངས་ན། ལས་དང་པོ་པ་གང་ལ་བྱ་ཐེ་ཚོམ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་བ། དགེ་སློང་དག་བསླབ་པ་མ་བཅས་པ་ན་དགེ་སློང་ནོར་ཅན་གྱིས་མ་བྱིན་པ་བླངས་པ་ཐམས་ཅད་ཀྱང་མ་བྱིན་པར་བླངས་པ་མ་ཡིན་ཏེ། ལས་དང་པོ་པ་ལ་ཉེས་པ་མེད་དོ། །མ་བྱིན་པར་ལེན་པའི་གླེང་གཞི་ནི་རྒྱལ་པོའི་ཁབ་ནའོ། །གང་ཟག་ནི་དགེ་སློང་ནོར་ཅན་ནོ། །དངོས་པོ་ནི་མ་བྱིན་པར་ལེན་པའོ། །ཉོན་མོངས་པ་ནི་འདོད་ཆགས་སོ། །མཚན་མ་ནི་ཕས་ཕམ་པའོ། །ཡན་ལག་ནི་རྣམ་པ་བདུན་ཏེ། རྐུ་སེམས་ཉེ་བར་གནས་པ་དང༌། དངོས་པོ་མིའི་ནོར་ཡིན་པ་དང༌། མིའི་ནོར་ཡིན་པར་ཡང་འདུ་ཤེས་པ་དང༌། གནས་ནས་གནས་སུ་འཕགས་པ་དང༌། སྦྱོར་བ་གཅིག་པ་དང༌། རང་གི་མ་ཡིན་པ་དང༌། རིན་ཐང་ཚང་བའོ། །ཕས་ཕམ་པར་འགྱུར་བ་གཉིས་པ་མི་བརྗེད་པའི་ཚིག་གོ །མི་གསོད་པའི་གླེང་གཞི་ནི་སངས་རྒྱས་བཅོམ་ལྡན་འདས་ཡུལ་བྲི་ཛིའི་ལྗོངས་ན། ཆུ་བོ་དགའ་སྐྱེད་ཅན་གྱི་འགྲམ་ན་ཐང་ཞིག་གི་ནགས་སྟུག་པོ་ན་བཞུགས་སོ། །དེའི་ཚེ་བཅོམ་ལྡན་འདས་ཀྱིས་འཁོར་དགེ་སློང་གི་དགེ་འདུན་རྣམས་ལ་མི་གཙང་བའི་ཆོས་བཤད་དེ། དགེ་སློང་དག་གིས་མི་གཙང་བ་ལ་བསྒོམས་ནན་ཏན་དུ་བགྱིས་པས་ན་ལུས་རྣག་ཅན་འདིས་ཡིད་བྱུང་ངོ་ཚ་སྒྱིད་ལུག་སེ་རྣམ་པར་སྨོད་ནས། རང་གི་ལུས་ལ་མཚོན་གྱིས་ཀྱང་འདེབས། ཁ་ཅིག་དུག་ཟ་ཞིང་སྲིན་བུས་ཀྱང་འགེག །གཡང་དུ་ཡང་མཆོང༌། གཅིག་གིས་གཅིག་ལ་ཡང་གསོད་པའི་སྟེང་དུ་མུ་སྟེགས་ཅན་གྱི་དགེ་སྦྱོང་རི་དགས་དབྱུག་པ་ཅན་དགེ་སྦྱོང་རི་དགས་སྲུང་བ་ག་ལ་བ་དེར་སོང་ནས། ཀྱེ་བཞིན་བཟངས་དག་ཚུར་ཤོག་ཁྱོད་ཀྱིས་ངའི་སྲོག་ཆོད་ཅིག་དང༌། ཆོས་གོས་དང་ལྷུང་བཟེད་ཀྱང་ཁྱོད་ཀྱིར་འགྱུར་རོ་ཞེས་གཞན་ལ་ཡང་སྲོག་གཅོད་དུ་འཚོལ་བས་ན་རི་དགས་དབྱུག་པ་ཅན་དེས་ཀྱང་དགེ་སློང་དེ་བསད་ནས་རལ་གྲི་ཁྲག་ཅན་མཆན་དུ་བཅུག་ནས་ཆུ་བོ་དགའ་སྐྱེད་ཅན་གྱི་འགྲམ་དུ་ཁྱེར་ཏེ་ཁྲག་ཏུ་འཁྲུ་ཞིང་འདུག་པ་དང༌།
དེ་ན་བདུད་ཀྱི་རིས་ཀྱི་ལྷ་ཞིག་ནམ་མཁའ་ལས་རི་དགས་དབྱུག་པ་ཅན་དགེ་སྦྱོང་སྲུང་བ་ལ་འདི་སྐད་སྨྲས་ཏེ། ལེགས་སོ་བཞིན་བཟངས་ཁྱོད་ཀྱིས་བསོད་ནམས་མང་དུ་སྤེལ་ཏོ། །ཁྱོད་ཀྱིས་ཡོན་ཏན་ཅན་གྱི་དགེ་སྦྱོང་མ་བསྒྲལ་བ་ནི་བསྒྲལ་མ་གྲོལ་བ་ནི་དགྲོལ། དབྱུགས་མ་ཕྱུང་བ་ནི་དབུགས་ཕྱུང༌། ཀུན་ཡོངས་སུ་མྱ་ངན་ལས་འདས་པའི་སྟེང་དུ་ལྷག་པར་དེ་དག་གི་ལྷུང་བཟེད་དང་ཆོས་གོས་ཀྱང་ཁྱོད་ཀྱིར་འགྱུར་རོ་ཞེས་སྨྲས་པ་ཐོས་ནས། དེ་ཡང་ཕྱིས་ཕྱིར་སྡིག་པ་ལ་བལྟ་བར་འགྱུར་བ་རབ་ཏུ་ཐོབ་སྟེ། བདག་གིས་བདེ་མོར་བསོད་ནམས་མང་དུ་བསྐྱེད་དོ། །མྱ་ངན་ལས་མ་འདས་པ་ཀུན་ཀྱང་མྱ་ངན་ལས་འདས་ཀྱི་སྟེང་དུ་ཆོས་གོས་ལ་སོགས་པ་ཀུན་དར་ཞེས་བྱ་བ་ནི་བདས་ཡང་རལ་གྲི་མཆན་དུ་བཅུག་ནས་ཀུན་དགའི་ར་བ་ནས་ཀུན་དགའི་ར་བར། གཙུག་ལག་ཁང་ནས་གཙུག་ལག་ཁང་དུ་ཁང་ཕྲན་ནས་ཁང་ཕྲན་དུ། འཆགས་ནས་འཆགས་སར་བྱུང་སྟེ། དེས་དགེ་སློང་ཕྲད་དོ་ཅོག་ལ་མ་བསྒྲལ་བ་བསྒྲལ་ལོ། །ཡོངས་སུ་མྱ་ངན་ལས་མ་འདས་པ་ཡོངས་སུ་མྱ་ངན་ལས་འདའོ་ཞེས་བྱས་ནས་དགེ་སློང་ཅིག་ལུས་མི་གཙང་བས་སྐྱོ་སྟེ་བསྒོམ་ཞིང་འདུག་པ་ལངས་ནས་ཁང་བུ་ནས་བྱུང་སྟེ་དགེ་སློང་སྲུང་བ་ལ་བཞིན་བཟངས་བདག་མ་བསྒྲལ་གྱིས་སྒྲོལ། མ་ཁྲོལ་གྱིས་ཁྲོལ་ཅིག་ཅེས་བྱས་ནས་དེས་སྲོག་གཅོད་དོ། །དེ་བཞིན་དུ་གཉིས་ནས་གསུམ་ནས་དྲུག་ཅུའི་བར་དུ་སྲོག་བཅད་དོ། །དེའི་ཚེ་བཅོམ་ལྡན་འདས་བཅོ་ལྔའི་གསོ་སྦྱོང་གི་ཚེ་ཉན་ཐོས་ཀྱི་དགེ་སློང་གི་དགེ་འདུན་གྱི་མདུན་དུ་གདན་བཏིང་བ་ལ་བཞུགས་སོ། །འཁོར་དགེ་སློང་རྣམས་ལ་གླང་པོ་ཆེའི་ལྟ་བའི་ཚུལ་གྱིས་གཟིགས་ན། ཉན་ཐོས་ཀྱི་འཁོར་རྣམས་སྔོན་པས་རབ་ཏུ་ཉུང་བ་དང་འགྲིབ་ཅིང་བསྲབས་པར་གྱུར་པ་གཟིགས་སོ། །བཀའ་སྩལ་བ། ཀུན་དགའ་བོ་རྒྱུ་གང་རྐྱེན་གང་གིས་དགེ་སློང་ཉུང་བར་གྱུར། བཙུན་པ་དུས་གཅིག་ན་བཅོམ་ལྡན་འདས་ཀྱིས་དགེ་སློང་རྣམས་ལ་མི་གཙང་བ་བཤད་དེ། མི་གཙང་བ་ལ་བསྒོམ་པ་ནན་ཏན་བྱ་ཞིང་བསྙེན་ན་འབྲས་བུ་ཆེ་ཞིང་ཡོན་ཏན་ཆེན་པོར་འགྱུར་རོ་ཞེས་བཤད་པས་ན།
དགེ་སློང་རྣམས་ཀྱིས་མི་གཙང་བ་ལ་ནན་ཏན་དུ་བྱས་པས་ལུས་རྣག་ཅན་འདི་ཉིད་ཀྱིས་ཡིད་བྱུང་ཞིང་སྒྱིད་ལུག་ནས་དགེ་སློང་དག་རང་གིས་རང་ལ་འགུམས་ཤིང་རི་དགས་དབྱུག་པ་ཅན་ལ་གསོད་དུ་བཅོལ་བས་ཉུང་བར་གྱུར་ཏོ་ཞེས་གསོལ་བ་དང༌། བཀའ་སྩལ་བ། །ཀུན་དགའ་བོ་ཅི་དགེ་སློང་གིས་ཀྱང་དགེ་སློང་གསོད་དམ། བཙུན་པ་འགུམས་སོ་ཞེས་གསོལ་བ་དང༌། དེ་ལྟར་ན་དགེ་སྦྱོང་གི་བྱ་བ་མ་ཡིན། མཐུན་པ་མ་ཡིན་ཚུལ་མ་ཡིན་ཏེ། དེ་ནི་རབ་ཏུ་བྱུང་བས་བྱ་བ་མ་ཡིན་ནོ་ཞེས་བཅོམ་ལྡན་འདས་ཀྱིས་རྣམ་གྲངས་དུ་མའི་སྒོ་ནས་སྨད་དོ། །དེ་བས་ན་དགེ་སློང་དག་ཉེས་པ་དེ་དང་གླིང་གཞི་དེ་དག་དེ་ལྟར་གྱུར་པ་དེའི་ཕྱིར་ལེགས་པ་རྣམ་པ་བཅུ་ལ་གཟིགས་ནས། འདུལ་བ་ལ་བསླབ་པའི་གནས་བཅས་ཏེ། ཡང་དགེ་སློང་གང་ཞེས་བྱ་བ་ལ་སོགས་པ་རྩ་བའི་ཚིག་རྣམས་སོ། །ཡང་དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་སྟེ། གང་གསོལ་བ་དང་ཞུ་བའི་ལས་ཀྱིས་བསྙེན་པར་རྫོགས་པ་ལ་བྱའོ། །མི་འམ་ཞེས་བྱ་བ་ནི་དབང་པོ་དྲུག་དང་ལྡན་པ་སྟེ། མིག་དང༌། རྣ་བ་དང༌། སྣ་དང༌། ལྕེ་དང༌། ལུས་དང༌། ཡིད་ཀྱི་དབང་པོ་སྟེ་དབང་པོ་དྲུག་དང་ལྡན་པ་ལ་མི་ཞེས་བྱའོ། །མིར་ཆགས་ཞེས་བྱ་བ་ནི་གང་མའི་མངལ་དུ་དབང་པོ་གསུམ་ཐོབ་པར་གྱུར་པ་སྟེ། ལུས་ཀྱི་དབང་པོ་དང༌། ཡིད་ཀྱི་དབང་པོ་དང༌། ཚོར་བའི་དབང་པོ་ལ་བྱའོ། །ཆེད་དུ་བསམས་ཏེ་ཞེས་བྱ་བ་ནི་སེམས་ཀྱིས་དཔྱད་ཅིང་བརྟགས་པའོ། །ལག་དར་ཞེས་བྱ་བ་ནི་བདག་རང་གི་ལག་གིས་བསྣུན་ཅིང་བརྒྱབ་པའོ། །སྲོག་བཅད་ཅེས་བྱ་བ་ནི་དེ་སྲོག་དང་བྲལ་བའོ། །མཚོན་འབྱིན་ཏམ་ཞེས་བྱ་བ་ནི་རལ་གྲི་འམ་ཆུ་གྲི་འམ་སྤུ་གྲི་ལ་བྱ་སྟེ། སྔོན་དགེ་སློང་གཉིས་ཤིག་འཁོད་པ་ལས་དགེ་སློང་གཅིག་བདག་རང་འཆིའོ་སྙམ་ནས་དགེ་སློང་གྲོགས་པོ་ལ་གྲི་བརྙེས་ཏེ་རང་གི་གནས་ཁང་དུ་ཞུགས་ཏེ་སྒོ་བཅད་ནས་གནས་ཁང་དུ་སྐྱིལ་མོ་ཀྲུང་དུ་ཙོག་ཙོག་པོར་འདུག་ནས་རང་གི་སྲོལ་སྒོ་གྲིས་བཅད་དེ་གྲི་ཐོགས་བཞིན་དུ་དུས་ལས་འདས་སོ། །དེ་བས་ན་མཚོན་མ་བྱིན་ཅིག་པའོ། །དེ་ལ་མཚོན་ཐོགས་པ་གཉེར་ཏམ་ཞེས་བྱ་བ་ནི་གང་ལ་
གཉེར་ཞེ་ན། སྐྱེས་པ་དང་བུད་མེད་དང་མ་ནིང་རྣམས་ལའོ། །དེ་ལ་འཆིར་འཇུག་ཅེས་བྱ་བ་ནི་ཚུལ་ཁྲིམས་དང༌། ཚུལ་ཁྲིམས་ངན་པ་ཅན་དང༌། ནད་པ་རྣམས་ལའོ། །ཇི་ལྟར་ཚུལ་ཁྲིམས་ངན་པ་ཅན་ལ་ཞེ་ན། དགེ་སློང་གིས་ཚུལ་ཁྲིམས་ངན་པ་ཅན་གྱི་དགེ་སློང་གི་ཆོས་གོས་དང༌། ལྷུང་བཟེད་དང་ཡོ་བྱད་རྣམས་འདོད་དེ་ཚུལ་ཁྲིམས་ངན་པ་ཅན་རིང་དུ་གནས་ན་བདག་གི་ཡོ་བྱད་རྣམས་མི་འཐོབ་ཀྱི་འདི་འཆིར་གཞུག་གོ་སྙམ་ནས་ཚེ་དང་ལྡན་པ་ཚུལ་ཁྲིམས་ངན་པ་ཅན་སྡིག་པའི་ཆོས་ཅན་ཇི་ཙམ་དུ་ཡུན་རིང་དུ་གནས་པ་དེ་ཙམ་དུ་ལུས་ངག་ཡིད་གསུམ་གྱི་སྒོ་ནས་བསོད་ནམས་མ་ཡིན་པ་སྡིག་པ་མང་དུ་སྐྱེས་པས་སེམས་ཅན་དམྱལ་བར་སྐྱེས་བར་འགྱུར་རོ། །དེ་བས་ན་ཚེ་དང་ལྡན་པ་རང་གིས་རང་སོད་ཅིག་རང་གིས་རང་སྲོག་ཆོད་ཅིག་ཅེས་བསྒོ་ནས། རང་གིས་རང་བསད་ན་དགེ་སློང་སྨྲ་སྨྲ་བ་ཕས་ཕམ་པར་འགྱུར་རོ། །རང་གིས་མ་བསད་ན་ཉེས་པ་སྦོམ་པོར་འགྱུར་རོ། །དེ་སྟེ་སླར་འགྱོད་ནས་ཚེ་དང་ལྡན་པ་ངས་གྱི་ནར་སྨྲས་ཀྱི། རང་གིས་རང་མ་བསད་ཅིག་ཅེས་སླར་བསྒོ་ན། དང་པོ་ཉིད་ཀྱིས་ཉེས་པ་སྦོམ་པོར་འགྱུར་རོ། །ཇི་ལྟར་ན་ཚུལ་ཁྲིམས་དང་ལྡན་པ་རྣམས་ཞེ་ན་ཚུལ་ཁྲིམས་དང་ལྡན་པ་འདི་ཇི་སྲིད་དུ་ཡུན་རིང་དུ་འཚོ་བ་དེ་སྲིད་དུ་ཡོ་བྱད་བདག་ལ་མི་སྟེར་གྱི་དེ་འཆིར་གཞུག་གོ་སྙམ་ནས་ཚེ་དང་ལྡན་པ་ཚུལ་ཁྲིམས་ཕུན་སུམ་ཚོགས་པ་ཁྱོད་ཡུལ་ན་གནས་ལོ་ལེགས་པ་དང་འདྲ་བ་ལ། མཐོ་རིས་ནི་རས་ལྟ་བུས་ཆོད། ཐར་པ་ནི་ཡོལ་བ་ལྟ་བུས་ཆོད་དེ་ཁྱོད་ལུས་དང་བྲལ་ན་ལྷའི་ནང་དུ་སྐྱེ་བར་འགྱུར་གྱི་རང་གིས་རང་ལ་སོད་ཅིག་རང་གིས་རང་ལ་སྲོག་ཆོད་ཅིག་བསྒོ་ནས་རང་གིས་རང་བསད་ན་དགེ་སློང་སྨྲ་སྨྲ་བ་ཕས་ཕམ་པར་འགྱུར་རོ། །རང་གིས་རང་མ་བསད་ན་ཉེས་པ་སྦོམ་བོར་འགྱུར་རོ། །ཇི་ལྟར་ན་ནད་པ་ལ་ཞེ་ན། དགེ་སློང་གིས་ནད་པའི་ཆོས་གོས་དང་ཡོ་བྱད་འདོད་པའི་ཕྱིར་ཇི་སྲིད་དུ་ནད་པ་རིང་དུ་གནས་པ་དེ་སྲིད་དུ་བདག་གིས་ཡོ་བྱད་མི་ཐོབ་པོ་སྙམ་ནས། ཚེ་དང་ལྡན་པ་ནད་པ་ཇི་སྲིད་རིང་དུ་གནས་པ། དེ་སྲིད་དུ་ནད་པ་སྡུག་བསྔལ་པས་གཟིར་
ཅིང་ཚོར་བ་མྱོང་བར་འགྱུར་གྱི། རང་གིས་རང་སྲོག་ཆོད་ཅིག་ཅེས་སྨྲས་པ་ལས་རང་གིས་རང་བསད་ན་འདེབས་འདེབས་པ་ཕས་ཕམ་པར་འགྱུར་རོ། །རང་གིས་རང་མ་བསད་ན་ཉེས་པ་སྦོམ་པོར་འགྱུར་རོ། །དེ་ལྟར་ན་འཆིར་འཇུག་པ་ཞེས་བྱའོ། །འཆི་བའི་བསྔགས་པ་བརྗོད་ཅེས་བྱ་བ་ནི། འཆིར་འདོད་པའི་མདུན་དུ་འཆི་བའི་ཡོན་ཏན་དང་བསྔགས་པ་བརྗོད་པའོ། །མི་ཁྱོད་ཅེས་བྱ་བ་དེ་ནི་འབོད་པའི་ཚིག་བླ་དགས་སོ། །སྡིག་པ་དང་མི་གཙང་བ་འཚོ་བ་ངན་པས་ཇི་ཞིག་བྱ་ཀྱེ་མི་ཁྱོད་གསོན་པ་བས་འཆི་བ་བླའོ། །འཆིར་འདོད་པའི་མདུན་དུ་སྨད་པའི་ཚིག་གོ །སྐྱེད་ལ་འདི་སྐད་ཀྱང་ཟེར་ཞེས་བྱ་བ་ནི་སྨྲ་བའོ། །སེམས་ཀྱིས་བརྟགས་ཞེས་བྱ་བ་ནི་སེམས་ཀྱིས་མངོན་པར་འདོད་པའོ། །བརྟགས་ཞེས་བྱ་བ་ནི་འདི་ཤི་ན་ཡོ་བྱད་བདག་གིས་ཐོབ་པར་འགྱུར་རོ་སྙམ་དུ་སེམས་ཀྱིས་བརྟགས་པའོ། །རྣམ་གྲངས་དུ་མར་འཆིར་གཞུག་ཅེས་བྱ་བ་ནི་རྣམ་གྲངས་མང་པོ་དུ་མའི་སྒོ་ནས་འཆིར་བསྟབས་ཤིང་འཆི་བར་འགྱུར་བའོ། །འཆི་བའི་བསྔགས་པ་བརྗོད་ཅེས་བྱ་བ་ནི་འཆི་བའི་མདུན་དུ་རྣམ་གྲངས་དུ་མར་འཆི་བའི་བསྔགས་པ་བརྗོད་ཅིང་ཡང་དང་ཡང་དུ་སྣོན་ཅིང་མི་ཟློགས་པར་བྱེད་པའི་དོན་ཏོ། །དེ་ཡང་ཐབས་དེས་འཆི་བའི་དུས་བྱས་ཞེས་བྱ་བ་ནི་ཐབས་དེ་ཉིད་ཀྱིས་ཡིན་གྱི་གཞན་གྱིས་མ་ཡིན་ནོ། །དེ་ཞེས་བྱ་བ་ནི་ཡང་དག་པར་བསྟན་པའམ་ཉེ་བར་བསྟན་པའི་ཚིག་གོ །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པའོ། །དངོས་པོ་གང་ཞེ་ན་གསོལ་བ་དང་བཞིའི་ལས་ཀྱིས་བསྙེན་པར་རྫོགས་ཤིང་གང་ཟག་ཉིད་ཀྱིས་ཀྱང་མངོན་སུམ་དུ་ཁས་བླངས་ཤིང་མི་འདོར་མི་སྤོང་བའོ། ཕས་ཕམ་པ་ཞེས་བྱ་བ་ནི་ལྟུང་བ་ཐ་ཤལ་ངན་པ་མི་ཆ་བའི་ཉེས་པ་ཅན་མི་མཚུངས་པ་སྟེ་གང་ལ་ལྟུང་བ་བྱུང་ན་བྱུང་མ་ཐག་ཏུ་དགེ་སློང་མ་ཡིན། དགེ་སྦྱོང་མ་ཡིན་ཤཱཀྱའི་སྲས་མ་ཡིན་ཏེ། དཔེར་ན་ཤིང་ཏ་ལའི་མགོ་བཅད་ན་རྒྱས་ཤིང་འཕེལ་བར་མི་འགྱུར་བ་དེ་བཞིན་དུ་དགེ་སློང་ལ་ལྟུང་བ་དེ་བྱུང་ན། དགེ་སློང་མ་ཡིན། ཕས་ཕམ་པར་བཤིག་པ་ལྟུང་བ་ཞེས་གསུངས་སོ་གནས་པར་མི་བྱ་ཞེས་བྱ་བ་ནི་དགེ་སློང་དག་གསོ་སྦྱོང་བྱ་བའམ་
ཚུལ་ནས་བྱུང་བའམ། གསོལ་པའམ་གསོལ་པ་དང་གཉིས་སམ། གསོལ་པ་དང་བཞིའི་ལས་ལ་མི་གནས་པ་སྟེ། གང་ཟག་བཅུ་གཉིས་ཀྱི་ལས་ལ་མི་ཆུད་པས་ན་གནས་པར་མི་བྱའོ་ཞེས་གསུངས། གཞན་ཡང་མི་གསོད་པའི་སྒོ་ནས་འདུལ་བ་ལ་གནས་བཅས་པའི་རྣམ་གྲངས་ལ། གླེང་གཞི་ནི་བཅོམ་ལྡན་འདས་འབྲོག་སྐྱེས་ཀྱི་འབྲོག་དགོན་པ་ན་བཞུགས་སོ། །དེའི་ཚེ་དགེ་སློང་བསོད་སྙོམས་པ་ཅིག་གིས། ཁྱིམ་བདག་ཅིག་དད་པ་སྐྱེས་ནས། ཁྱིམ་བདག་དེས་དགེ་འདུན་གྱི་ཕྱིར་གཙུག་ལག་ཁང་རྩིག་པར་ཁས་བླངས་ནས། དགེ་སློང་དག་གཙུག་ལག་ཁང་རྩིག་པའི་གྲོགས་བྱེད་དེ་དེའི་ཚེ་དགེ་སློང་དག་ཕ་གུ་གཅིག་ནས་གཅིག་ཏུ་དོར་བས་དགེ་སློང་གཅིག་ཕ་གུས་ཀླད་དུ་ཕོག་ནས་དུས་ལས་འདས་སོ། །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། གཅིག་ནས་གཅིག་ཏུ་ཕ་གུ་མ་འདོར་བར་གཅིག་ནས་གཅིག་ཏུ་བརྒྱུད་དེ་བྱིན་ཅིག་ཅེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་བཀའ་སྩལ་པ། བསྲོ་ཁང་དང་མེ་ཁང་རྩིགས་ཤིག་ཅེས་བཀའ་སྩལ་ནས། །དགེ་སློང་དག་གདུང་ཕྱམ་ཕན་ཚུན་བསྐྱོད་ཅིང་བསྒུལ་བ་ལས་ཤིང་ཤོར་ནས་ཤིང་མཁན་གྱི་ཀླད་དུ་བསྣུན་ཏེ་དུས་ལས་འདས་སོ། །དེ་ལྟར་གྱུར་པ་སྙན་དུ་བདས་ནས། དགེ་སློང་ཁྱིམ་པ་དང་བསྡེབས་ཤིང་ཤིང་གདེག་པར་བྱའི་མི་ཐེག་པར་བཏེག་ན་འདས་པ་དང་བཅས་པར་འགྱུར་རོ་ཞེས་བསླབ་པ་ལ་གནས་བཅས་སོ། གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཚེ་དང་ལྡན་པ་འཆར་བས། ཁྱིམ་བདག་གི་བུ་མོ་གཏུམ་མོ་ཞེས་བྱ་བ་ཞིག་བཏུལ་ནས། བསླབ་པའི་གནས་ལ་བཞག་གོ །གཏུམ་མོས་འཆར་བ་ལ་ཡོ་བྱད་ཐམས་ཅད་ཀྱིས་བསྟབ་ན་ལེན་དུ་མ་བཏུབ་ནས་ཡུལ་གཞན་དུ་སོང་ངོ༌། །དེ་ནས་དུས་གཞན་ཞིག་ན་གཏུམ་མོ་ལ་བུ་ཁྱེའུ་ཞིག་བཅས་སོ། །དེ་ནས་བསྒོ་བ་ཁྱེའུ་འདི་ཆུས་ཁྲུས་ལ་གོས་དཀར་པོས་གཡོགས་ཏེ་དྲང་སྲོང་གི་སྟན་ལ་ཞོག་ཤིག་ཅེས་བསྒོ་བ་དང༌། དེས་ཀྱང་སྟན་གྱི་སྟེང་དུ་བསྙལ་ལོ། །དེའི་ཚེ་
འཆར་བས་སྔ་དྲོ་ཡང་བསོད་སྙོམས་བླངས་ནས་མོའི་སྒོར་འོངས། སྟན་ལ་མ་བརྟགས་པར་འདུག་པས། གཏུམ་མོས་འཕགས་པ་བུ་བུ་ཞེས་སྨྲས་བཞིན་ན་མ་སླེབས་ནས་འཆར་བ་ལངས་ཏེ་བལྟས་ན་བུ་དུས་ལས་འདས་སོ། །དེའི་གཉེན་རྣམས་དུས་པ་དང༌། ཀྱེ་མའོ་བཅོམ་ལྡན་འདས་ཀྱིས་འདུས་བྱས་ཐམས་ཅད་མི་རྟག་ཅེས་གསུངས་པ་རེ་མད་ཀྱི། བཅོམ་ལྡན་འདས་ཀྱིས་གསུངས་པ་དང་མི་འགལ་བས་ཉེས་མེད་དོ། །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། སླན་ཆད་སྟན་ལ་མ་བརྟགས་པར་མ་འདུག་ཤིག་ཅེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཁྱིམ་བདག་གཉིས་ཤིག་རབ་ཏུ་བྱུང་ནས་གཅིག་ན་སྟེ། གཅིག་གི་ནད་གཡོག་གཅིག་གིས་བྱེད་དོ། །ཁྱོད་སྔོན་ན་བའི་ཚེ་ན་སྨན་ཇིས་གསོས་ཞེས་སྨྲས་པ་དང༌། ལན་ཚྭས་སོ། །དེས་ཀྱང་རྩ་བ་མོའི་ནང་དུ་ལན་ཚྭ་བཏབ་ནས་བྱིན་པ་དང་དེ་དུས་ལས་འདས་སོ། །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། སྔོན་ནི་ནད་བད་ཀན་གྱུར་པས་ལན་ཚྭས་ཕན་གྱི། ད་ནི་མཁྲིས་པ་དང་རླུང་དུ་གྱུར་པས་གང་སྔོན་ཕན་པ་ད་ལྟ་དུག་ཏུ་གྱུར་ཏོ། །དེས་ན་དགེ་སློང་གིས་སྨན་ཐུག་ཐུ་བ་ཏུ་མ་སྦྱིན་པར་སྨན་པ་ལ་དྲིས་ཤིག །སྨན་པ་མེད་ན་ནད་བུ་ཅན་ནམ་རྒན་པོ་ལ་དྲིས་ཤིག །མ་དྲིས་པར་སྨན་བྱིན་ན་འདས་པ་དང་བཅས་པར་འགྱུར་རོ་ཞེས་འདུལ་བ་ལ་བསླབ་པའི་གནས་སུ་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་མཽད་གལ་གྱི་བུས་ཨུ་པཱ་ལེ་ལ་སོགས་པ་བཅུ་བདུན་སྡེ་རབ་ཏུ་ཕྱུང་ནས། བཅུ་བདུན་སྡེ་རྣམས་ལས་གང་གི་རེས་ལ་བབ་ཀྱང་རུང་སྟེ། ཐམས་ཅད་ཀྱིས་བྱེད་དོ། །དུས་གཅིག་ན་གཅིག་ནི་གཙུག་ལག་ཁང་སྐྱོང་བྱེད་དེ་དུས་ཀྱི་མཆོད་པ་ལ་བབ་སྟེ། གཙུག་ལག་ཁང་རྒྱན་གྱིས་བརྒྱན་ནས་མཚན་ཐོག་ཐག་མེལ་ཚེ་བྱེད་དོ། །གྲོགས་རྣམས་གཅིག་གི་སྙིང་ལམ་ན་གཅིག་བྱེད་སྙམ་ནས་གཅིག་གིས་ཀྱང་མ་བལྟས་པར་ནང་པར་གཙུག་ལག་ཁང་སྐྱོང་ཁྲོས་ཤིང་འདུག་པ་མཐོང་ནས། ཁ་ཅིག་གིས་རྐང་པ་ནས་བཟུང་ཁ་ཅིག་གིས་ལག་པ་ནས་བཟུང་ནས་བཟོད་པར་གསོལ་ཞེས་
བྱས་ན་མ་བཏུབ་པོ། །གཅིག་གིས་ག་ག་ཚིལ་བྱས་པ་དང་ཁོ་དགོད་པར་གྱུར་པ་དང༌། ཐབས་དེ་རུང་ངོ་ཞེས་ཀུན་གྱིས་བྱས་པ་དང༌། དེ་རླུང་གིས་འཚུབ་སྟེ་ཤིའོ། །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། ད་སླན་ཆད་གཅིག་ལ་གག་ཚིལ་མ་བྱེད་ཅིག་ཅེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཁྱིམ་བདག་ཅིག་གིས་དགོན་པའི་གནས་སུ་དགེ་འདུན་གྱི་ཕྱིར་གཙུག་ལག་ཁང་ཞིག་བརྩིགས་ཏེ། དགེ་སློང་མ་ཞིག་གནས་དེར་དབྱར་ཚུལ་དུ་བཞུགས་པ་དང༌། འདིར་གཡོན་ཅན་རྣམས་ཀྱིས་བཅོམ་མོ་སྙན་དུ་བདས་ནས་བཀའ་སྩལ་པ། ད་སླན་ཆད་གཡོན་ཅན་དག་རྐུར་ལྷགས་པ་དང༌། སྒྲ་ཆ་གཎྜཱི་དེ་ཁྱེར་ཏེ་ཤོག །ལྷུང་བཟེད་དང་སྦྱར་མ་ཁྱེར་ཏེ་ཤོག་ཅེས་བོས་ཤིག་དང་གཡོན་ཅན་རྣམས་འབྲོས་པར་འགྱུར་རོ་ཞེས་བཀའ་སྩལ་ཏོ། །དུས་ཕྱི་ཞིག་ན་གཙུག་ལག་ཁང་འདིར་གཡོན་ཅན་རྣམས་སླར་རྐུར་ལྷགས་སོ། །དེའི་ཚེ་དགེ་སློང་རྒན་ཞུགས་ཤིག་མེལ་ཚེ་བྱེད་པས་མཐོང་ནས། དེ་དག་སྒོ་སྟེང་དུ་འཛེག་ཅིང་འཁོད་པ་དང༌། དེས་བསམས་པ་ཅུང་ཞིག་མ་བསྡིགས་ན་ཡོ་བྱད་རྣམས་འཕྲོག་ཏུ་འོད་སྙམ་ནས་སྒོའི་སྟེང་དུ་འཛེགས་ཏེ་གཎྜཱི་ཞིག་ཚོད་ཙམ་དུ་འཕངས་པ་དང་ནང་པར་བལྟས་ནས་གཡོན་ཅན་ཞིག་མགོར་ཕོག་སྟེ་ཤི་ཞིང་འདུག་གོ །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། ཕོག་པར་མི་འཕེན་པར་ཕ་ཟད་ཙམ་ནས་བསྡིགས་ཤིག་ཅེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཁྱིམ་བདག་ཕ་སྤད་གཉིས་ཤིག་སྔོན་ལོངས་སྤྱོད་ཆེ་བ་ལས་སླད་ཀྱིས་ལོངས་སྤྱོད་ཀྱང་འགྲིབས་གཉེན་བཤེས་དག་ཀྱང་ཟད་དེ་ཕ་སྤད་གཉིས་ཀྱང་རབ་ཏུ་བྱུང་ནས་གཙུག་ལག་ཁང་དུ་འཁོད་དོ། །དེ་ནས་དགེ་སློང་དག་གིས་རྟག་པར་ལས་ལ་བསྐོ་ཞིང་བརྩེ་བས་ཕ་སྤད་གཉིས་ཀྱང་ལྗོངས་རྒྱུ་ཞིང་དོང་དོང་བ་དང་གཙུག་ལག་ཁང་དུ་ཕྱིན་དུ་ཉེ་སྟེ། གདུགས་ཚོད་ཀྱི་གཎྜཱི་བརྡུང་བ་མཐོང་ནས་ཕན་ཆད་དེ་འགྲོ་མ་ནུས་པ་དང་བུས་རྒྱབ་ནས་ཕུལ་བ་དང་ཕ་དུས་ལས་འདས་སོ། །དེ་ལྟར་
གྱུར་པ་སྙན་དུ་བདས་ནས་ད་སླན་ཆད་ཕུལ་བར་མི་བྱའི། སྔར་སོང་སྟེ་ཕའི་ཟན་སྐལ་དག་མནོས་ཏེ་སླར་ལམ་དུ་བསྡུ་བར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་བྲན་ཅན་དང་སྐྱོང་པ་པོ་ཞེས་བྱ་བ་གཉིས་ཤིན་ཏུ་མཛའ་བ་གཉིས་ཤིག་འཁོད་དེ་སྐྱོང་བ་པོ་ནད་ཀྱིས་བཏབ་ནས་མཚན་གཅིག་རངས་འབོད་འགྲོགས་སོ། །བྲན་ཅན་གྱིས་སྨྲས་པ། ངས་སྔར་ལངས་ཏེ། སྨན་པ་ལ་སྨན་བསླངས་ནས་འོང་གིས་ཁ་ཟས་ཅང་མ་ཟ་བར་སྡོད་ཅིག་ཅེས་བསྒོ་སྟེ་སོང་བ་དང༌། དེ་ནང་པར་ཁྱིམ་མཚེས་རྣམས་ཀྱིས་མདང་ཁྱོད་འབོད་འགྲོགས་ཏེ་ཅི་ཉེས་བྱས་པ་དང༌། བཀྲེས་སོ། །ཁྱིམ་མཚེས་རྣམས་ཀྱིས་ཤ་དང་ཁུར་བ་དང་ཐུག་པ་མང་ཞིག་བྱིན་ཏེ་ཟོས་སོ། །སླད་ཀྱིས་བྲན་ཅན་སྨན་ཁྱེར་ཏེ་འོངས་ནས། སྐྱོང་བ་སྨན་ཟོ། །དེ་ན་རེ་ངས་ནི་ཟན་ཟོས་ཟིན་ཏེ་མི་འདོད་དོ། །དེ་ན་རེ་ང་ནི་དགེ་བའི་ཕྱོགས་ཉམས་ཉམས་ཁྱོད་ཀྱི་གྲོགས་བྱེད་ན། ཁྱོད་ནི་ནད་དང་མི་མཐུན་པའི་ཁ་ཟས་ཟ་བས་དུག་ཟ་ཡང་བླའོ་ཞེས་བྱས་པ་དང༌། དེ་ཡང་སྣོད་ཀྱི་ནང་ནས་དུག་རྡོག་མ་གཅིག་རྙེད་དེ་ཟོས་པ་དང་དེ་དུས་ལས་འདས་སོ། །དེ་ལྟར་གྱུར་པ་སྙན་དུ་བདས་ནས་བཀའ་སྩལ་པ། ཕྱིན་ཆད་ནད་པ་འཆི་བར་སེམས་པའི་གཏམ་མ་ཟེར་ཅིག་ཅེས་བསླབ་པ་བཅས་སོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་གཉིས་ཤིག་ནི་ལྷུང་བཟེད་བཙས་ཁྱེར་ཏེ་སློང་དུ་མི་རུང་གཅིག་ནི་ཆོས་གོས་རུལ་ནས་བགོར་མི་རུང་ནས་ཚེ་དང་ལྡན་པ་དག་ཆོས་གོས་དང་ལྷུང་བཟེད་མེད་པར་སྤྱད་དུ་མི་རུང་གི་ཆོས་གོས་དྲུབས་ཤིག་ལྷུང་བཟེད་ཚོལ་ཅིག་ཅེས་བྱས་པ་དང༌། དེ་གཉིས་ཀྱིས་སྨྲས་པ་གནས་འདི་ཞེས་བྱ་བ་ན་དགེ་སློང་ནད་ཀྱིས་བཞུས་པ་དེ་ཤི་བ་དང་བདག་ཅག་གིར་འགྱུར་རོ་ཞེས་བྱས་པ་དང་དགེ་སློང་དག་གིས་སྙན་དུ་གསོལ་ཏོ། །བཀའ་སྩལ་པ། གདོལ་པ་ལྟ་བུའི་སེམས་མ་བསྐྱེད་པར་ལྷུང་བཟེད་ནི་མིག་བཞིན་དུ་གླན་པ་དང་བསྲེག་པར་བྱའོ། །ཆོས་གོས་ནི་པགས་པ་བཞིན་དུ་བཙེམ་ཞིང་དྲུབ་པར་བྱའོ་ཞེས་བསླབ་པའི་གནས་སུ་བཅས་སོ། །ཉེས་པ་ཇི་ལྟ་བུ་ཞེ་
ན། དགེ་སློང་གིས་བུད་མེད་དང་སྐྱེས་པ་དང་མ་ནིང་རྣམས་ལ་བསད་པའི་སེམས་ཀྱིས་སོར་མོ་གཅིག་གིས་བསྣུན་ཏེ། ཐབས་དེས་འཆི་བར་གྱུར་ན་ཡང་ཕས་ཕམ་པར་འགྱུར་རོ། །དགེ་སློང་གིས་མི་ལ་དུག་བྱིན་པའམ། གཡང་སར་བཏང་བའམ། སྟག་གཟིག་མང་པོའི་ཡུལ་དུ་བཏང་བའམ། ལྷགས་པ་ཆེ་བ་དང་ཚད་ཁུངས་སུ་བཏང་བའམ། སྔགས་དང་སྨན་གྱི་སྦྱོར་བས་ཀྱང་རུང་སྟེ། གསོད་སེམས་དང་ལྡན་ན་མཐར་ན་ཡུངས་ཀར་འབྲུམ་བུ་གཅིག་གིས་བརྒྱབ་སྟེ་ཤི་ཡང་ཕས་ཕམ་པར་འགྱུར་རོ། །དགེ་སློང་གིས་སྨན་དང་སྔགས་ཀྱིས་བཏབ་བམ་ཕ་རོལ་གཉིས་ཀ་བྱོལ་སོང་གི་སྐྱེ་གནས་སུ་བསྒྱུར་ཏེ་མི་བསད་ན་ཡང་ཕས་ཕམ་པར་འགྱུར་རོ། །དགེ་སློང་གིས་མི་གཞན་པས་བསད་པར་བསམས་པ་ལས་གཞན་ཤི་ན་ཉེས་པ་སྦོམ་པོར་འགྱུར་རོ། །དགེ་སློང་གིས་མི་བསད་ན་ཕས་ཕམ་པར་འགྱུར་རོ། །མི་མ་ལགས་པ་བསད་ན་སྦོམ་པོར་འགྱུར་རོ། །འདི་ཡིན་ནམ་མ་ཡིན་སྙམ་དུ་ཐེ་ཚོམ་ཟ་བཞིན་དུ་བསད་ན་ཕས་ཕམ་པར་འགྱུར་རོ། །རང་གིས་རང་བསད་ན་ཉེས་པ་སྦོམ་པོར་འགྱུར་རོ། །དགྲ་བཅོམ་པ་བསད་པ་ལས་སོ་སོའི་སྐྱེ་བོ་བསད་པ་དང༌། སོ་སོའི་སྐྱེ་བོ་བསད་པར་བྱས་པ་ལས་དགྲ་བཅོམ་པ་ནི་གཉིས་ཀ་ཡང་འདྲ་སྟེ་ཉེས་པ་སྦོམ་པོར་འགྱུར་རོ། །མི་གཅིག་བསད་པར་བྱས་པ་ལས་བྲོས་ཏེ་དགེ་སློང་དང་ཕྲད་དེ་བསྙེགས་མ་ཕྱི་བཞིན་དུ་འོང་སྟེ། དགེ་སློང་གིས་བསད་སེམས་ཉེ་བར་བཞག་ནས་བསྙེགས་མ་ལ་བསྟན་བསྙེགས་མ་དང་ཕྲད་དེ་བསད་ན་ཕས་ཕམ་པར་འགྱུར་རོ། །ཇི་ལྟར་དགེ་སློང་ལ་ཕས་ཕམ་པར་འགྱུར་བ་དེ་བཞིན་དུ་དགེ་སློང་མ་དང་བསླབ་པ་བྱིན་པ་ལ་ཡང་ཕས་ཕམ་པར་འགྱུར་རོ། །དགེ་སྦྱོང་ཕ་དང༌། དགེ་སྦྱོང་མ་དང༌། སློང་མ་ལ་ནི་ཉེས་བྱས་སུ་འགྱུར་རོ། །ཁྱིམ་པ་ལ་ནི་སྡིག་པ་མང་དུ་འགྱུར་རོ། །ཆུ་བོ་དགའ་སྐྱེད་ཅན་གྱི་འགྲམ་ན་འཁོད་པའི་དགེ་སློང་རྣམས་ཀྱིས་བསམས་པ། ལས་དང་པོ་པ་ཉེས་པ་མེད་དོ་ཞེས་བྱུང་ན། བསླབ་པའི་གནས་མ་བཅས་ན་དགེ་སློང་མང་ཞིག་བདག་ཅག་གིས་འཆི་བར་བསྟབས་ན་བདག་
ཅག་གིས་ལས་དང་པོ་པ་གང་ཡིན་སྙམ་དུ་ཐེ་ཚོམ་ཟ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། ཆུ་བོ་དགའ་སྐྱེད་ཅན་གྱི་འགྲམ་ན་དགེ་སློང་དག་གིས་ཉེས་པ་སྤྱད་པ་ཐམས་ཅད་ཀྱང་ལས་དང་པོ་པ་ཡིན་ཏེ། དེ་ལ་ཉེས་པ་མེད་དོ། །ཡན་ལག་ནི་རྣམ་པ་བདུན་ཏེ། །དངོས་པོ་མ་ཡིན་པ་དང༌། གསོད་སེམས་ཉེ་བར་གནས་པ་དང༌། སྦྱོར་བ་གཅིག་པ་དང༌། སྲོག་དང་བྲལ་བ་དང༌། མིར་འདུ་ཤེས་པ་དང༌། བསླབ་པ་བླངས་པ་དང༌། བསླབ་པ་ཕུལ་བའོ། །དེ་ལ་མི་གསོད་པའི་གླེང་གཞི་ནི་ཡུལ་བྲི་ཛིའི་ཆུ་བོ་དགའ་སྐྱེད་ཅན་གྱི་འགྲམ་ནའོ། །གང་ཟག་ནི་དགེ་སློང་མང་པོ་མི་གཙང་བ་བསྒོམ་པ་རྣམས་སོ། །དངོས་པོ་ནི་གསོད་པའོ། །ཉོན་མོངས་པ་ནི་མི་བཟོད་པའོ། །མཚན་མ་ནི་ཕས་ཕམ་པའོ། །ལས་དང་པོ་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་དང༌། སྨྱོས་པ་ལ་ལྟུང་བ་མེད་དོ། །ཕས་ཕམ་པ་གསུམ་པ་ནི་མི་བརྗེད་པའི་ཚིག་གོ། །།དེ་ལ་མིའི་ཆོས་ལས་བླ་མར་གྱུར་པའི་བརྫུན་དུ་སྨྲ་བའི་གླེང་གཞི་ནི་བཅོམ་ལྡན་འདས་ཡུལ་ཡངས་པ་ཅན་ན་བཞུགས་ཤིང་འོད་མའི་གྲོང་གི་བྱང་ཕྱོགས་ན་ཤིང་ཤ་བ་ཞེས་བྱ་བའི་གནས་ན་བཤུགས་སོ། །དེའི་ལོ་ལ་མུ་གེ་བྱུང་ནས་མི་ཀུན་ཀྱང་སྡུག་བསྔལ་ཏེ། མི་མང་པོ་ཤི་བར་གྱུར་ནས་ཟས་དཀོན་ཁྱད་ནི་ཕ་མ་ཡང་རང་གི་བུ་ལ་ཟས་མི་སྟེར་པ་ཙམ་དུ་དཀོན་ཏེ། བཅོམ་ལྡན་འདས་ཀྱིས་ཉ་བ་ལྔ་བརྒྱ་པོ་ལས་རབ་ཏུ་བྱུང་བའི་དགེ་སློང་རྣམས་ལ་འདི་ལྟར་ཟས་དཀོན་པས་ན་ཁྱེད་ཀྱང་ཡུལ་ཡངས་པ་ཅན་དང༌། བྲི་ཛིའི་གྲོང་ཕྱོགས་སུ་དབྱར་ཚུལ་དུ་ཞུགས་ཤིང༌། ང་ཡང་གཡོག་དགེ་སློང་ཀུན་དགའ་བོ་དང་ལྷན་ཅིག་ཏུ་འོད་མའི་གྲོང་འདིར་ཚུལ་དུ་འཇུག་གོ །དེ་ལྟར་མ་བྱས་ན་བསོད་སྙོམས་ཀྱིས་བྲེལ་པར་འགྱུར་རོ་ཞེས་བྱས་པ་དང༌། བཙུན་པ་དེ་བཞིན་ནོ་ཞེས་པ་ནས། ཡངས་པ་ཅན་དུ་སོ་སོར་བཤེས་གཉེན་དག་དང་བསྙེན་ནས་འཁོད་པ་ལས་ཕན་ཚུན་སྨྲས་པ། བཅོམ་ལྡན་འདས་ཀྱིས་འདིར་འཁོད་དང་བདེའོ་ཞེས་གསུངས་ན། འདི་ན་ནི་བདག་ཅག་གི་གཉེན་ཡང་མེད་ན། བདག་ཅག་གི་གཉེན་ནི་
ཉ་བའི་གྲོང་ན་ཡོད་ཀྱི། དེར་དོང་ལ་གཉེན་དག་བལྟས་ཏེ་དེར་འཁོད་དང་བདེའོ་ཞེས་ནས་དེར་དོང་སྟེ་ལྷགས་ནས་དབྱར་ཚུལ་དུ་ཞུགས་ཏེ། དེ་དག་གིས་གྲོས་བྱས་པ། བདག་ཅག་ནི་ཐོས་པ་ཉུང་བས་ཆོས་བཤད་དུ་ནི་ཀུན་གྱིས་ཀྱང་མི་ནུས་ཀྱི། གཉེན་རྣམས་ལྷགས་པ་དང་བདག་ཅག་ཕན་ཚུན་ཡོན་ཏན་བརྗོད་པར་བྱའོ་ཞེས་ནས་དེ་དག་ལྷགས་པ་དང༌། ཀྱེ་ཁྱོད་ཀྱིས་གྲོང་ཕྱོགས་འདིར་དགེ་འདུན་སྦྱིན་གནས་འདི་ལྟ་བུ་དབྱར་ཚུལ་དུ་ཞུགས་པ་ནི་ཁྱོད་ཀྱིས་རྙེད་པ་རབ་ཏུ་རྙེད་དོ། །དགེ་སློང་འདི་ནི་མི་རྟག་པའི་འདུ་ཤེས་ཐོབ་པའོ། །འདི་ནི་བསམ་གཏན་དང་པོའོ། །འདི་ནི་དགྲ་བཅོམ་པའོ་ཞེས་དེ་བཞིན་དུ་ཀུན་ལ་ཡོན་ཏན་རེ་རེ་བསྒྲགས་ནས་དེ་དག་གིས་སྨྲས་པ་འཕགས་པའི་ཡོན་ཏན་གྱི་འབྲས་བུ་བརྙེས་སམ་ཞེས་པ་དང༌། འཇིག་རྟེན་པ་ནི་ཡོན་ཏན་ལ་དགའ་བ་དེ་དག་རང་རང་གི་བུའི་ཁ་ནས་ཀྱང་ཕྲ་ཞིང་བསོད་སྙོམས་འབུལ་ལོ། །དེ་ནས་དབྱར་ཟླ་གསུམ་འདས་པ་དང༌། བཅོམ་ལྡན་འདས་ཀྱི་ཆོས་ཉིད་ཀྱིས་ཉན་ཐོས་ཀྱི་དགེ་འདུན་རྣམས་འདུན་མ་ཆེན་པོ་རྣམ་པ་གཉིས་ཡོད་དེ། གཅིག་ནི་དབྱར་ཟླ་འབྲིང་པོ་ཉ་ལ་འདུན་མ་འདུས་ནས་ལུང་མནོས་ནས་ཚུལ་དུ་འཇུག་གོ །འདུན་མ་གཅིག་ནི་སྟོན་ཟླ་འབྲིང་པོ་ཉ་ལ་ཚུལ་ནས་འབྱུང་བའི་ཚེ་འདུན་མ་འདུ་བའོ། །དགེ་སློང་གཞན་དེ་དག་ཀྱང་བཅོམ་ལྡན་འདས་ལ་ཕྱག་འཚལ་ཞིང་འོད་མའི་གྲོང་ན་བཅོམ་ལྡན་འདས་བཞུགས་པའི་ཕྱོགས་སུ་དོང་ངོ༌། །འོང་བ་དང་ཀུན་དགའ་བོས་མཐོང་སྟེ། བསུ་ནས་ཚུར་སྤྱོན་ཚེ་དང་ལྡན་པ་དག་བདེ་བར་བྱོན་ཏམ། བསོད་སྙོམས་ཀྱིས་བྲེལ་བར་མ་གྱུར་ཏམ་ཞེས་བྱས་ཏེ་བསུ་ན་དེ་དབང་ཤིན་ཏུ་རིད་ཅིང་ཉམ་ཆུང་སྟེ་ལྷགས་ནས་བདག་ཅག་ཡུལ་བྲི་ཛི་ན་དབྱར་བདེ་བར་གནས་མོད་ཀྱི། བསོད་སྙོམས་ཀྱིས་ནི་རྟག་ཏུ་བྲེལ་ཏོ་ཞེས་འཛེར་ཏེ་ལྷགས། དེ་ནས་དགེ་སློང་ལྔ་བརྒྱ་པོ་དེ་དག་ཀྱང་ལྷགས། དེ་བཞིན་དུ་ཀུན་དགའ་བོས་བསུ་སྟེ་དྲིས་ནས། དེ་དག་ཤིན་ཏུ་ཚོ་མདོག་བཟང་སྟེ་ལྷགས་ནས་ཀུན་དགའ་བོ་མད་པར་བདག་ཅག་ཉ་བའི་གྲོང་ན་
ཤིན་ཏུ་བདེ་བར་འཁོད་འཁོད་དེ་བསོད་སྙོམས་ཀྱིས་བྲེལ་ཀྱང་མ་མྱོང་ངོ༌། །འདི་ལྟར་ཟས་དཀོན་པ་ན་ཁྱོད་ཀྱིས་རྒྱུ་རྐྱེན་ཅིས་ཅིས་ན་འབྲེལ་པར་མ་གྱུར། དེ་དག་གིས་སྨྲས་པ། བདག་ཅག་གིས་ཡོན་ཏན་བརྗོད་པར་བགྱིས་ཏེའོ། །ཅི་ཡང་དག་པར་རམ་འོན་ཏེ་བརྫུན་དུ་སྨྲས་པ། བདག་ཅག་གིས་བརྫུན་བགྱིས་མོད། དེས་སྨྲས་པ། ཁྱེད་ཁ་ཟས་ཅུང་ཟད་ཀྱི་ཕྱིར་བརྫུན་དུ་སྨྲར་དབང་ངམ་ཞེས་བྱས་པ་དང༌། དེ་དག་གིས་དབང་ཡང་རུང་མི་དབང་ཡང་རུང༌། བདག་ཅག་གིས་སྨྲས་སོ། །དེ་ནས་དོན་ཉུང་དུ་བའི་དགེ་སློང་རྣམས་འཕྱ་སྟེ། ཟང་ཟིང་ཅུང་ཟད་ཀྱི་ཕྱིར་མིའི་ཆོས་ལས་བླ་མར་གྱུར་པ་མེད་ལ། མེད་བཞིན་དུ་ཅིའི་ཕྱིར་སྨྲ་ཞེས་སྨོད་ཅིང་མི་སྙན་པར་འཛེར་བ། བཅོམ་ལྡན་འདས་ཀྱི་སྙན་དུ་བདས་ནས་འདུལ་བ་ལ་བསླབ་པའི་གནས་བཅས་སོ། །དེ་ལྟར་བཅས་ནས་ཕྱིས་དགེ་སློང་ཕ་མང་ཞིང་དགོན་པ་དང་ནགས་འདབ་དང༌། པས་མཐའི་དགོན་པ་ན་རྣལ་འབྱོར་ལ་བརྩོན་པར་གནས་པ་ལས་འདོད་པའི་འདོད་ཆགས་དང་གནོད་སེམས་མི་སྤྱོད་ཅིང་འཇིག་རྟེན་པའི་ལམ་གྱིས་ཞི་གནས་ཀྱི་མཚན་མ་འགའ་ཞིག་ཡིད་ལ་ཡོད་པ་ལ་བརྟེན་ནས་གནས་གནས་པ་ལས་ཕན་ཚུན་དུ་སྨྲས་ཏེ། ཚེ་དང་ལྡན་པ་དག་བདག་ཅག་གི་སྐྱེ་བ་ནི་ཟད། ཚངས་པར་སྤྱོད་པ་ནི་སྤྱད་བྱས་པ་ནི་བྱས་ཀྱིས་གནས་འདི་སྤངས་ཏེ་གྲོང་འདབ་དུ་དོང་ངོ་ཞེས་ཏེ་དེར་གྲོང་དུ་ལྷགས་པ་དང༌། བུད་མེད་དང༌། ཀུན་དགའི་ར་བ་དང༌། དགེ་ཚུལ་པར་འདྲེས་ཤིང་གནས་པས་ཡང་ཉོན་མོངས་པ་སྐྱེས་ནས་བདག་ཅག་ཕས་ཕམ་པར་མ་གྱུར་ཡང་གྲོང་སྙམ་དུ་སེམས་ཏེ། ཚེ་དང་ལྡན་པ་ཀུན་དགའ་བོ་ལ། བཅོམ་ལྡན་འདས་ལ་ཞུ་བར་ཅི་གནང་ཞེས་གསོལ་ཏོ། །ཀུན་དགའ་བོས་བཅོམ་ལྡན་འདས་ལ་གསོལ་པ་དང༌། བཀའ་སྩལ་པ། མངོན་པའི་ང་རྒྱལ་མ་གཏོགས་སོ་ཞེས་གསུངས་ནས་དེ་ནས་བཅོམ་ལྡན་འདས་ཀྱིས་བསླབ་པ་ལ་འདོད་པ་དང་བསླབ་པ་ལ་གཙོ་བོར་བྱེད་པའི་བསླབ་པ་བརྗོད་དེ། ཡང་དགེ་སློང་མངོན་པའི་ང་རྒྱལ་མ་གཏོགས་ཏེ། སྔ་མ་ནི་བཅས་པའོ། །དེ་ནི་གནང་བའོ། །ཞེས་གསུངས་སོ། །ཡང་དགེ་སློང་གང་ཞེས་བྱ་བ་
ནི་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་ལ་བྱའོ། །མངོན་པར་མི་ཤེས་ཞེས་བྱ་བ་ནི་ཅི་མངོན་པར་མི་ཤེས་ཤེ་ན། ཚོར་བ་དང༌། འདུ་ཤེས་དང༌། འདུ་བྱེད་རྣམས་དང༌། རྣམ་པར་ཤེས་པ་ལ་སོགས་ཏེ་ཡོད་པར་མི་ཤེས་ཤིང་བདག་ཏུ་ལྟ་བའོ། །ཡོངས་སུ་མི་ཤེས་ཞེས་བྱ་བ་ནི་གཟུགས་དང༌། ཚོར་བ་དང༌། འདུ་ཤེས་དང༌། འདུ་བྱེད་དང༌། རྣམ་པར་ཤེས་པ་རྣམས་མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། སྟོང་པས་ཡོངས་སུ་མི་ཤེས་པའོ། །མིའི་ཆོས་ནི་དེ་དག་གིས་ཐོབ་པ་ཡིན་གྱི། ངན་སོང་གསུམ་དང༌། མ་ནིང་དང་མཚན་གཉིས་པས་མི་ཐོབ་པོ། །བླ་མར་གྱུར་ཅེས་བྱ་བ་ནི་འདོད་པའི་ཁམས་པས་གཟུགས་ཀྱི་བླ་མར། གཟུགས་ཀྱི་ཁམས་པས་གཟུགས་མེད་པའི་བླ་མར། ཡང་གཅིག་ཏུ་ན་མིའི་ཆོས་ནི་སྒྲིབ་པ་ལྔ་ལ་བྱ་སྟེ། གང་དེ་དག་སྤངས་པ་དེ་ནི་བླ་མར་གྱུར་པ་ཞེས་བྱ་བའོ། །མཐའ་ཞེས་བྱ་བ་ནི་མྱ་ངན་ལས་འདས་པ་ལ་མཐའ་ཞེས་བྱ་བའོ། །འཕགས་པ་ཞེས་བྱ་བ་ནི་སངས་རྒྱས་དང༌། རང་སངས་རྒྱས་རྣམས་ཀྱི་ཉན་ཐོས་རྣམས་ལ་འཕགས་པ་ཞེས་བྱའོ། །བྱེ་བྲག་ཐོབ་ཅེས་བྱ་བ་ནི་དགེ་སྦྱོང་གི་འབྲས་བུ་བཞི་ལ་བྱ་སྟེ། རྒྱུན་དུ་ཞུགས་པའི་འབྲས་བུ་དང༌། ལན་ཅིག་ཕྱིར་འོང་བའི་འབྲས་བུ་དང༌། ཕྱིར་མི་འོང་བའི་འབྲས་བུ་དང༌། དགྲ་བཅོམ་པའི་འབྲས་བུ་རྣམས་ཏེ་བྱེ་བྲག་ཐོབ་པ་ཞེས་བྱའོ། །ཤེས་པ་ཞེས་བྱ་བ་ནི་ཤེས་པ་བཞི་སྟེ། སྡུག་བསྔལ་ཤེས་པ་དང༌། ཀུན་འབྱུང་ཤེས་པ་དང༌། འགོག་པ་ཤེས་པ་དང༌། ལམ་ཤེས་པའོ། །མཐོང་ཞེས་བྱ་བ་ནི་མཐོང་བ་བཞི་སྟེ། སྡུག་བསྔལ་མཐོང་བ་དང༌། ཀུན་འབྱུང་མཐོང་བ་དང༌། འགོག་པ་མཐོང་བ་དང༌། ལམ་མཐོང་བའོ། །རེག་པར་བྱེད་ཅེས་བྱ་བ་ནི། བསམ་གཏན་བཞི་ལ་རེག་པར་སྤྱོད་ཅེས་བྱ་བ་སྟེ། སྙོམས་པར་འཇུག་པ་ལ་བྱའི་སྒྲུབ་པ་ལ་ནི་མ་ཡིན་ནོ། །མེད་ཅེས་བྱ་བ་ནི་དེའི་དངོས་པོ་མེད་པའོ། །མེད་བཞིན་དུ་ཞེས་བྱ་བ་ནི་བདག་ལ་མེད་པའོ། །མེད་བཞིན་དུ་འདི་ཤེས་ཞེས་བྱ་བ་ཅི་ཤེས་ཤེ་ན། སྡུག་བསྔལ་ལ་སོགས་པ་བདེན་པ་བཞི་ཤེས་པ་ལ་བྱའོ། །མཐོང་ཞེས་བྱ་བ་ནི་ལྷ་དང༌། ཀླུ་དང་
གནོད་སྦྱིན་དང༌། ནམ་མཁའ་ལྡིང་དང༌། དྲི་ཟ་དང༌། ཡི་དགས་དང༌། ཤ་ཟ་དང༌། གྲུལ་བུམ་དང༌། ལུས་སྲུལ་པོ་དང༌། ལྟོ་འཕྱེ་ཆེན་པོ་མཐོང་ངོ་ཞེས་ཟེར་བ་དང༌། དེ་དག་གི་སྒྲ་ཐོས་སོ་ཞེས་སྨྲས་པ་དང༌། དེ་དག་ངའི་གན་དུ་འོངས་སོ་ཞེས་ཟེར་བ་དང༌། དེ་དག་གི་གན་དུ་བདག་རྟག་ཏུ་འགྲོགས་ཤིང་འགྲོའོ་ཞེས་སྨྲས་པ་དང༌། འགོག་པའི་འདུ་ཤེས་དང༌། འདོད་ཆགས་དང་བྲལ་བའི་འདུ་ཤེས་དང༌། མི་སྡུག་པའི་འདུ་ཤེས་དང༌། རྣམ་པར་བསྔོས་པའི་འདུ་ཤེས་དང༌། མི་རྟག་པའི་འདུ་ཤེས་པ་དང༌། སྡུག་བསྔལ་བའི་འདུ་ཤེས་དང༌། སྟོང་པ་ཉིད་ལ་སོ་སོར་རྟོག་པའི་འདུ་ཤེས་མ་ཐོབ་པར་ངས་ཐོབ་པོ་ཞེས་ཟེར་བ་དང༌། བསམ་གཏན་དང་པོ་ནས་བསམ་གཏན་བཞིའི་བར་དུ་ཐོབ་པོ་ཞེས་བརྗོད་པ་དང༌། ཚད་མེད་པ་བཞི་དང༌། ནམ་མཁའ་མཐའ་ཡས་སྐྱེ་མཆེད་ལ་སྙོམས་པར་འཇུག་པ་བཞི་ཐོབ་བོ་ཞེས་བརྗོད་པ་དང༌། དགེ་སྦྱོང་གི་འབྲས་བུ་བཞི་དང༌། རྫུ་འཕྲུལ་གྱི་ཡུལ་དང༌། ལྷའི་རྣ་བ་དང༌། སེམས་ཀྱི་རྣམ་གྲངས་དང༌། སྔོན་གྱི་གནས་དང༌། འཆི་འཕོ་དང༌། སྐྱེ་བ་དང༌། ཟག་པ་ཟད་པ་མ་ཐོབ་པར་ཐོབ་པོ་ཞེས་ཟེར་བ་དང༌། དགྲ་བཅོམ་པ་ལ་སོགས་ཏེ་ཐོབ་ཞེས་ཟེར་བའོ། །ཁས་འཆེས་ཞེས་བྱ་བ་ནི་ཁས་ལེན་པའོ་ཉེས་པ་འབྱུང་ཞེས་བྱ་བ་ནི་དེའི་དངོས་པོ་བྱུང་བའོ། །ཚངས་པར་འདོད་ཅེས་བྱ་བ་ནི་བྲལ་བར་འདོད་པའོ། །དེས་དུས་གཞན་ཞིག་ན་ཞེས་བྱ་བ་ནི་དུས་དེ་མ་ཡིན་པའོ། །དྲིས་ཀྱང་རུང་ཞེས་བྱ་བ་ནི་གཞན་དག་གིས་སོ། །མ་དྲིས་ཀྱང་རུང་ཞེས་བྱ་བ་ནི་བདག་ཉིད་ཀྱང་འགྱོད་པ་སྐྱེས་ནས་དོགས་ཤིང་རྣམ་པར་དོགས་ཏེ་ཡིད་ལ་གཅགས་པའོ། །ཚེ་དང་ལྡན་པ་དག་བདག་གིས་ནི་མི་ཤེས་པར་ཤེས་སོ་ཞེས་སྨྲས་པ་ནི་ཡིད་ཀྱི་རྣམ་པར་ཤེས་པའོ། །མ་མཐོང་བར་མཐོང་ངོ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །གསོབ་ཅེས་བྱ་བ་ནི་བསྒྲུབ་པའི་དོན་མེད་པ་ལ་བྱའོ། །ཟང་ཟིང་ཅུང་ཟད་ཀྱི་ཕྱིར་དགོས་པའི་དངོས་པོ་དང་དོན་མེད་པས་ན་གསོག་གོ །ཡང་དག་པའི་འདུ་ཤེས་བཅབས་ནས་དོན་གཞན་ལ་སྒྲ་བཞིན་དུ་ཚིག་སྨྲ་བ་ནི་བརྫུན་ཞེས་བྱའོ། །མངོན་པའི་ང་རྒྱལ་མ་
གཏོགས་ཞེས་བྱ་བ་ནི་གནས་དབེན་པ་ན་གནས་ཤིང་ཉོན་མོངས་པ་མངོན་དུ་མི་སྤྱོད་པས་ཡང་དག་པའི་དོན་ཆུད་དོ་སྙམ་དུ་སེམས་པའི་ཕྱིར་ན་མ་གཏོགས་སོ། །དེ་ཡང་ཞེས་བྱ་བ་ནི་ཉེ་བར་བསྟན་པའོ། །ཀུན་ཏུ་ཡང་དག་པར་བསྟན་པའི་ཚིག་གོ །དགེ་སློང་ཞེས་བྱ་བ་ནི་གང་ལ་དགེ་སློང་གི་དངོས་པོ་ཡོད་པ་ལ་བྱའོ། །དགེ་སློང་གི་དངོས་པོ་གང་ཞེ་ན། བསྙེན་པར་རྫོགས་པ་སྐྱོན་མེད་ཅིང་བཤོལ་བར་མི་འོས་པ་ལ་བྱའོ། །ཕས་ཕམ་པ་ཞེས་བྱ་བ་ནི་ལྟུང་བ་ཉེས་པ་ཅན་མི་མཚུངས་པ་ཐ་ཤལ་དེ་ལ་བྱ་སྟེ། དེ་བྱུང་ན་བྱུང་མ་ཐག་ཏུ་དགེ་སློང་མ་ཡིན། ཤཱཀྱའི་སྲས་པོ་ཡིན་པས་ཕམ་པའོ་ཞེས་གསུངས་སོ། །གནས་པར་མི་བྱའོ་ཞེས་བྱ་བ་ནི་གང་ལ་ཉེས་པ་དེ་ལྟ་བུ་བྱུང་བའི་གང་ཟག་དགེ་འདུན་གྱི་ནང་དུ་མི་ཆུད་ཅིང་གསོ་སྦྱོང་དང་ཚུལ་དུ་འཇུག་པ་དང་གང་ཟག་བཅུ་གཉིས་ཀྱི་ལས་ལ་མི་ཆུད་པས་ན་གནས་པར་མི་བྱའོ་ཞེས་གསུངས་སོ། །དགེ་སློང་གིས་ཆོས་བཞི་པོ་དེ་དག་ལ་ཞེས་བྱ་བ་ནི་གང་དུ་ཕས་ཕམ་པ་བཞི་པོ་དེ་གང་ཡང་རུང་བའོ། །དང་པོ་ཇི་ལྟ་བུ་བཞིན་ཞེས་བྱ་བ་ནི་ཁྱིམ་པ་ལ་བྱའོ། །གནས་པར་མི་བྱ་བ་ནི་དགེ་སློང་རྣམས་དང་ཆོས་དང༌། ཟང་ཟིང་གི་ལོངས་སྤྱོད་ལ་མི་ཆུད་ཅིང་གནས་ཁང་གཅིག་ཏུ་མི་གནས་པ་ལ་བྱའོ། །ཕས་ཕམ་པའི་རིམ་པ་ཡང་དེ་ལྟར་གཞག་པ་ཡང་ཅིའི་ཕྱིར་གཞག་སྙམ་པ་ལ་ཡང་རྩ་བ་བཞི་ལ་སྡིག་པ་ནི་སྲོག་གཅོད་པ་དང་མ་བྱིན་པར་ལེན་པ་ཆེ་བ་ཡིན་ཞེས་མདོ་སྡེ་དག་ལས་འབྱུང་མོད་ཀྱི་འདིར་དང་པོ་གང་སྔར་བྱུང་བ་དེའི་རིམ་པ་བཞིན་དུ་བཤད་དེ། དེའི་ཕྱིར་ན་དང་པོ་ཁོ་ནར་མི་ཚངས་པར་སྤྱོད་པའི་ཆོས་འཇིག་རྟེན་དུ་བྱུང་ངོ༌། །དེའི་འོག་ཏུ་མ་བྱིན་པར་ལེན་པའི་ཆོས་བྱུང་ངོ༌། །དེའི་ཕྱི་ནས་མི་གསོད་པ་དང་བརྫུན་དུ་སྨྲ་བ་བྱུང་སྟེ། དེ་ལྟར་ན་མི་ཚངས་པར་སྤྱོད་པའི་རྒྱུས་མ་བྱིན་པར་ལེན་ཏོ། །མ་བྱིན་པར་ལེན་པ་དེའི་རྒྱུས་ན་ནོར་གྱི་བདག་པོ་གསོད་དོ། །དེ་ལྟར་གསོད་པའི་རྒྱུས་ན་བརྫུན་དུ་སྨྲ་བ་བྱུང་ངོ༌། །དེ་ལྟར་གཅིག་གི་རྒྱུས་གཅིག་བྱུང་བས་ན་རིམ་པ་དེ་ལྟར་སྦྱར་ཏེ་བཞག་གོ །གཞན་ཡང་བརྫུན་དུ་སྨྲ་བ་ལས་བསླབ་པ་བཅས་པའི་རྣམ་གྲངས་ལ་གླེང་གཞི་ནི་
སངས་རྒྱས་བཅོམ་ལྡན་འདས་ཡུལ་ཡངས་པ་ཅན་གྱི་སྤྲེའུ་རྫིང་གི་ཁང་པ་བརྩིགས་པ་ན་བཞུགས་སོ། །དེའི་ཚེ་ཡུལ་མཉམ་ཀའི་རྒྱལ་པོ་མ་སྐྱེས་དགྲ་དང༌། ཡུལ་ཡངས་པ་ཅན་གྱི་ལི་ཙྪ་བཱི་རྣམས་སུ་འཐབ་ཅིང་འཁྲུགས་པར་གྱུར་ཏོ། །མ་སྐྱེས་དགྲས་ཡན་ལག་བཞི་པའི་དཔུང་གི་ཚོགས་དང༌། རྟའི་ཚོགས་དང༌། ཤིང་རྟའི་ཚོགས་དང༌། དཔུང་བུ་ཆུང་གི་ཚོགས་ཀུན་གོ་བསྐོན་ཏེ། ཡུལ་བྲི་ཛི་གཞོམ་པར་བཤམས་པ་དང༌། ཡུལ་བྲི་ཛི་ན་གནས་པའི་སྐྱེ་བོ་མང་པོ་རྣམས་ཀྱིས་མ་སྐྱེས་དགྲའི་དཔུང་གི་ཚོགས་དག་མཐོང་ནས་ཡངས་པ་ཅན་གྱི་ལི་ཙྪ་བའི་རྣམས་ལ་སྦྲན་ཏེ། ཡངས་པ་ཅན་པ་ཡང་དཔུང་བཞི་དང་ཆས་ཏེ་དོང་ངོ༌། ལི་ཙྪ་བཱི་རྣམས་ཀྱིས་འཕགས་པ་མཽད་གལ་ལ་བདག་གང་རྒྱལ་བར་འགྱུར་ཞེས་དྲིས་པ་དང༌། ལི་ཙྪ་བཱི་རྣམས་རྒྱལ་བར་འགྱུར་རོ་ཞེས་བྱ་བ་ལུང་བསྟན་ཏོ། །དེ་དག་ཀྱང་གཡུལ་སྤྲད་པ་དང༌། སྔར་ནི་ལི་ཙྪ་བཱི་རྣམས་རྒྱལ། སླད་ཀྱིས་ནི་མ་སྐྱེས་དགྲ་རྒྱལ་བར་གྱུར་ཏོ། །འཕགས་པ་མཽད་གལ་གྱི་བུས་མ་རྟོགས་ཞེས་སྐྱེ་བོ་རྣམས་འཕྱ་བར་གྱུར་ཏེ། དྲུག་སྡེ་རྣམས་ཀྱིས་ལྟུང་བ་བྱུང་གི་གཎྜཱི་དེ་བརྡུངས་ཏེ་བསྐྲད་པའི་ལས་བྱས་པ་དང༌། སྙན་དུ་བདས་ཏེ་ཉེས་པ་མེད་དེ། སྔར་ནི་ལི་ཙྪ་བཱི་རྒྱལ་བར་གྱུར་པས་ན། ཕྱིས་གང་རྒྱལ་ཞེས་མ་སྨྲས་པས་མ་ཉེས་སོ་ཞེས་བཀའ་སྩལ་ཏོ། །གླེང་གཞི་ནི་ཡངས་པ་ཅན་ན་སྟེ། དེའི་ཚེ་མུ་སྟེགས་ཅན་གྱིས་ལོ་བཅུ་གཉིས་ཀྱི་བར་དུ་ཆར་མི་འབབ་པོ་ཞེས་ལུང་བསྟན་པ་དང༌། མཽད་གལ་གྱི་བུས་ཞག་བདུན་ན་ཆར་འབབ་པོ་ཞེས་ལུང་བསྟན་པས་སོ་སོ་རང་རང་གི་བང་མཛོད་ནས་འབྲུ་སྣ་ཚོགས་ཕྱུང་སྟེ་ས་བོན་བཏབ་པོ། །ཞག་དྲུག་ལོན་པ་དང་ཕྱོགས་བཞི་ནས་སྤྲིན་ཡང་ལངས། །ཆར་ཡང་ཅུང་ཟད་ཅིག་འབབ་པ་དང༌། དེ་ནས་སེམས་ཅན་གྱི་ལས་ཀྱིས་ཆར་མེད་པར་གྱུར་ཏོ། །ཞག་བདུན་གྱི་ཚེ་ལུང་བསྟན་པ་བཞིན་དུ་འབབ་ལ་ཕྱིས་འབབ་པར་འགྱུར་རམ་མི་འགྱུར་མ་དྲིས་པས་ཉེས་པ་མེད་དོ། །གླེང་གཞི་ནི་ཡངས་པ་ཅན་ན་སྟེ། དེའི་ཚེ་གཅེར་བུ་པའི་ཆུང་མ་ཞིག་རུམ་ན་བུ་ཡོད་པར་གྱུར་ཏེ། མུ་སྟེགས་ཅན་གྱི་ལྟས་མཁན་གྱིས་ནི་བུ་མོར་
ལུང་བསྟན། མཽད་གལ་གྱི་བུས་ནི་ཁྱེ་འུར་ལུང་བསྟན་ཏོ། །སླད་ཀྱིས་བུ་མོ་ཞིག་བཙས་པ་དང༌། མུ་སྟེགས་ཅན་རྣམས་ཀྱིས་འཕྱས་ཏེ། དྲུག་སྡེ་རྣམས་ཀྱིས་བསྐྲད་པའི་ལས་བྱས་པ་དང༌། བཀའ་སྩལ་པ། ཉེས་པ་མེད་དོ། །སེམས་ཅན་གྱི་ལས་བསམ་གྱིས་མི་ཁྱབ་པས་མངལ་གྱི་ནང་ན་ཁྱེའུ་ཡིན་ཏེ། ཕྱིས་ནས་མཚན་གྱུར་ཏེ་བུ་མོར་གྱུར་པས་ན་ཉེས་པ་མེད་དོ། །གླེང་གཞི་ནི་རྒྱལ་པོའི་ཁབ་ན་སྟེ། དེའི་ཚེ་ཁྱིམ་བདག་ཅིག་གིས་ཐོས་པ། དགེ་སློང་གི་དགེ་འདུན་རྣམས་མི་རེ་བར་བཤོས་གསོལ་ན་ལོངས་སྤྱོད་ཆེན་པོར་འགྱུར་རོ་ཞེས་ཐོས་ནས་དགེ་འདུན་ཀུན་སྤྱན་དྲངས་ཏེ། ཟངས་ཁལ་ཚད་མར་གྱིས་བཀང་སྟེ། དེའི་ནང་དུ་ཤ་བཙོས་ནས་ཤ་ཁུ་ལྷུང་བཟེད་རེ་རེ་ཕུལ་ལོ། །དེའི་ཉིན་བར་ཡུལ་ངན་བྱུང་ནས་ལྷུང་བཟེད་རྣམས་ཤ་ཁུས་སྣུམ་པས་ཆུ་དྲོན་གྱི་གན་དུ་ཕྱིན་ནས་འཁྲུ་ཞིང་འཁོད་པ་དང༌། དགེ་སློང་དེས་ཚེ་དང་ལྡན་པ་མཽད་གལ་གྱི་བུ་ལ་ཆུ་དྲོན་འདི་གང་ནས་འབབ་ཅེས་སྨྲས་པ་དང༌། མཽད་གལ་གྱི་བུས་མཚོ་ཆེན་པོ་མ་དྲོས་པ་ནས་འབབ་པོ་ཞེས་བྱས་པ་དང༌། བསྙེན་དགའ་བོས་མཚོ་མ་དྲོས་པ་ནི་ཡན་ལག་བརྒྱད་དང་ལྡན་ཏེ། གྲང་བ་ཡིན་ན་ཅི་སྟེ་ཆུ་ཚ་བར་གྱུར། བརྫུན་དུ་སྨྲས་པ་ཡིན་ནོ་ཞེས་བསྐྲད་པའི་ལས་བྱས་པ་དང༌། སངས་རྒྱས་ཀྱིས་བཀའ་སྩལ་པ། མཽད་གལ་གྱི་བུ་ལ་ལྷུང་བ་མེད་དེ། ཆུ་དེ་ནི་ཚ་བའི་སེམས་ཅན་དམྱལ་བ་བརྒྱད་ཀྱི་སྟེང་ན་འབབ་པས་དྲོ་བ་ཡིན་ནོ། །གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་དང་ལྡན་པ་མཽད་གལ་གྱི་བུས་དགེ་སློང་དག་ལ་སྨྲས་པ། བདག་ཅུང་ཟད་མེད་པའི་སྐྱེ་མཆེད་ལ་བདག་སྙོམས་པར་ཞུགས་པའི་ཚེ་རྫིང་བུ་སྒྲ་བསྐྱུང་གི་འགྲམ་ན་གླང་པོ་ཆེ་བརྒྱ་སྟོང་མང་པོ་སྒྲ་གྲག་པ་བདག་གིས་ཐོས་ཞེས་སྨྲས་པ་དང༌། བསྙེན་དགའ་བོས་ཆོས་ཀྱི་ཚུལ་བཤིག་པར་མ་བྱེད་ཅིག །ཅུང་ཟད་མེད་པའི་སྐྱེ་མཆེད་ལ་སྙོམས་པར་འཇུག་པ་ན་གཟུགས་ཀྱི་འདུ་ཤེས་མེད་ཅིང་སྒྲའི་འདུ་ཤེས་དང་བྲལ་བ་ཡིན་ན། དེ་ལྟར་བྲལ་བ་ལ་གཟུགས་མཐོང་ཞིང་སྒྲ་ཐོས་པར་ཇི་ལྟར་འགྱུར། ལྟུང་བ་བྱུང་ངོ་ཞེས་བསྐྲད་པའི་ལས་བྱས་པ་
དང༌། བཀའ་སྩལ་པ། མཽད་གལ་གྱི་བུ་བསམ་གཏན་དང་པོ་དང༌། རྣམ་པར་ཐར་པ་ལ་སྙོམས་པར་འཇུག་པའི་ཚེ་མྱུར་དུ་སྙོམས་པར་འཇུག་ཅིང་མྱུར་དུ་ལྡང་ངོ༌། །དེ་ལངས་པའི་ཚེ་ཐོས་པས་ན་མཽད་གལ་གྱི་བུ་ལ་ཉེས་པ་མེད་དོ། །ཉེས་པ་དེ་ཇི་ལྟ་བུ་ཞེ་ན། དགེ་སློང་གིས་འདུ་ཤེས་དང་བཟོད་པ་དང༌། བློ་གྲོས་སྦས་ནས་ལྷ་དང་ཀླུ་མཐོང་ངོ༌། །གནོད་སྦྱིན་དང་ལུས་སྲུལ་པོ་རྣམས་མཐོང་ངོ་ཞེས་སྨྲས་ན་ཕས་པར་འགྱུར་རོ། །ཇི་ལྟར་མཐོང་བ་བཞིན་དུ་ཐོས་པ་ལ་ཡང་ངོ༌། །ཐ་ན་རྡུལ་ཁྲོད་ཀྱི་ཤ་ཟ་མཐོང་ངོ་ཞེས་ཟེར་བ་ཡང་ཉེས་པ་སྦོམ་པོར་འགྱུར་རོ། །དགེ་སློང་གིས་གྲོགས་མེད་པའི་དགོན་པ་ན་མི་མ་ཡིན་པས་དགེ་སློང་རྣམས་གཙེས་སོ། །དེ་ན་དགྲ་བཅོམ་པ་རྣམས་ལ་མི་གཙེ་སྟེ། ང་ལ་ཡང་མི་གཙེའོ་ཞེས་ཟེར་ན་ཕས་ཕམ་པར་འགྱུར་རོ། །སྟན་ཁྲ་བོ་ལ་དགྲ་བཅོམ་པ་རྣམས་འདུག་སྟེ། ང་ཡང་འདུག་གོ་ཞེས་ཟེར་ན་ཕས་ཕམ་པར་འགྱུར་རོ། །བདག་བླ་མར་འགྱུར་རོ་ཞེ་འམ། བདག་སྟོན་པའོ་ཞེ་ན་ཉེས་པ་སྦོམ་པོར་འགྱུར་རོ། །བདག་སངས་རྒྱས་ཐམས་ཅད་ལ་སྐྱབས་སུ་སོང་ངོ་ཞེ་ན། སྔ་མའི་རྣམ་པར་གཟིགས་པ་ལ་སྐྱབས་སུ་སོང་ངོ་ཞེ་ན་ཕས་ཕམ་པར་འགྱུར་རོ། །འོན་ཏེ་ཤཱཀྱ་ཐུབ་པ་ལ་སྐྱབས་སུ་སོང་བས་ན། སངས་རྒྱས་ཐམས་ཅད་ལ་སྐྱབས་སུ་སོང་བ་འདྲའོ་ཞེ་ན་སྦོམ་པོར་འགྱུར་རོ། །བདག་མི་སློབ་པའོ་ཞེ་ན་མི་སློབ་པའི་འཕགས་པ་ལུང་བསྟན་ན་ཕས་ཕམ་པར་འགྱུར་རོ། །འོན་ཏེ་འཇིག་རྟེན་བྱ་བ་མི་སློབ་པོ་ཞེ་ན། སྦོམ་པོར་འགྱུར་རོ། །བདག་ལ་ཅུང་ཟད་ཀྱང་མེད་དོ་ཞེ་ན་ཉོན་མོངས་པ་མེད་པར་སྟོན་ན་ནི་ཕས་ཕམ་པར་འགྱུར་རོ། །དེ་མ་ཡིན་ན་ནི་སྦོམ་པོར་འགྱུར་རོ། །བདག་ནི་འཕོས་པའོ། །བདག་ནི་གྲོལ་བའོ། །བདག་ནི་འཇིག་རྟེན་པས་མི་འཇིགས་པའོ་ཞེས་སྨྲ་ན། འཕགས་པའི་སར་བསམས་ཏེ་སྨྲས་ན་ཕས་ཕམ་པར་འགྱུར་རོ། །འོན་ཏེ་གཞན་དུ་ན་ནི་སྦོམ་པོར་འགྱུར་རོ། །བདག་གི་མིང་འདི་ནི་དགྲ་བཅོམ་པའོ་ཞེས་བྲིས་ལ་འདི་སུས་བྲིས་ཞེས་ཟེར་བ་དང༌། གཞན་གྱིས་ཁྱེད་འབྲས་བུ་ཐོབ་བམ་ཞེས་དྲིས་པ་ལ། ཤིང་ཐོག་གི་འབྲས་བུ་མང་ཞིག་ལག་པ་ན་
བཅངས་ལ། ད་དུང་མ་སྨིན་ནོ་ཞེས་སྨྲས་ན་ཉེས་པ་སྦོམ་པོར་འགྱུར་རོ། །བདག་ནི་ཉམས་པའོ་ཞེས་ཟེར་བ་དང་བདག་ནི་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང་ཕྱིར་མི་འོང་བ་དང༌། དགྲ་བཅོམ་པ་མ་ཡིན་ནོ་ཞེ་ན། ཉེས་པ་སྦོམ་པོར་འགྱུར་རོ། །མི་ལ་མི་མ་ལགས་པར་འདུ་ཤེས་ཏེ། བརྫུན་དུ་སྨྲ་བ་དང༌། མི་མ་ཡིན་པ་ལ་མིར་འདུ་ཤེས་ཏེ་སྨྲ་བ་དང༌། མི་མ་ཡིན་པ་ལ་མི་མ་ཡིན་པར་འདུ་ཤེས་ཏེ་སྨྲ་བ་ནི་ཉེས་པ་སྦོམ་པོར་འགྱུར་རོ། །དགེ་སློང་གིས་ཕོ་ཉ་ལས་མི་ལས་བླ་མར་གྱུར་པའི་ཆོས་སྨྲ་བ་དང༌། ཕྲིན་ཡིག་དང༌། ལག་བརྡ་དང༌། གཅིག་ནས་གཅིག་ཏུ་བརྒྱུད་དེ་མི་ལས་བླ་མར་གྱུར་པའི་ཆོས་སྨྲ་ན་ཉེས་པ་སྦོམ་པོར་འགྱུར་རོ། །དེ་བཞིན་སྨྱོས་པ་དང༌། སེམས་འཁྲུགས་པ་དང་ནད་ཀྱིས་གཟིར་བ་དང༌། འོན་པ་དང༌། གླེན་པ་རྣམས་ལ་དགེ་སློང་གིས་མི་ལས་བླ་མར་གྱུར་པའི་ཆོས་སྨྲ་ན་ཉེས་པ་སྦོམ་པོར་འགྱུར་རོ། །དེ་བཞིན་དུ་ར་རོ་བ་དང༌། འགྲོ་བ་གཞན་དུ་གནས་པ་དང༌། མི་དབེན་པ་ལ་དབེན་པར་འདུ་ཤེས་པ་དང༌། སྨན་དང་སྔགས་ཀྱིས་མི་སྣང་བར་སྨྲ་བ་དང༌། འཕགས་པའི་སྐད་ཀྱིས་མཐའ་འཁོབ་པ་ལ་མཐའ་འཁོབ་པའི་སྐད་ཀྱིས་འཕགས་པ་ལ་ཡང་རུང་སྟེ། མིའི་ཆོས་ལས་བླ་མར་གྱུར་པ་སྨྲས་ན་ཐམས་ཅད་ཀྱང་ཉེས་པ་སྦོམ་པོར་འགྱུར་རོ། །ཇི་ལྟར་དགེ་སློང་ལ་ཕས་ཕམ་པར་འགྱུར་བ་དེ་བཞིན་དུ་བསླབ་པ་བྱིན་པ་དང༌། དགེ་སློང་མ་རྣམས་ལ་ཡང་ཕས་ཕམ་པར་འགྱུར་རོ། །དགེ་སློང་མ་དང༌། དགེ་ཚུལ་མ་དང༌། དགེ་སྦྱོང་ལ་ནི་ཉེས་བྱས་སུ་འགྱུར་རོ། །ལས་དང་པོ་པ་དང༌། སྨྱོས་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་ལ་ལྟུང་བ་མེད་དོ། །གླེང་གཞི་ནི་ཡུལ་ཡངས་པ་ཅན་ནའོ། །གང་ཟག་ནི་ཉ་བ་ལྔ་བརྒྱ་པོའོ། །ཉེས་པ་ནི་ངག་གིས་སོ། །ཉོན་མོངས་པ་ནི་ཁེ་དང་བཀུར་སྟིས་སོ། །མཚན་མ་ནི་ཕས་ཕམ་པའོ། །ཡན་ལག་ནི་རྣམ་པ་བདུན་ཏེ། མིའི་ཆོས་ལས་བླ་མར་གྱུར་པ་དང༌། དེར་ཡང་འདུ་ཤེས་པ་དང༌། ཕ་རོལ་མ་ཡིན་པ་དང་མི་ཡིན་པར་འདུ་ཤེས་པ་དང༌། ཚིག་
ཏུ་སྨྲས་པ་དང༌། ཕ་རོལ་གྱི་དོན་གོ་བ་དང༌། འདུ་ཤེས་བཅབས་པའོ། །ཕས་ཕམ་པ་བཞིའི་མི་བརྗེད་པའི་ཚིག་སྟེ། སོ་སོར་ཐར་པའི་མདོ་གདོན་པ་གཉིས་པ་རྫོགས་སོ།། །།སོ་སོར་ཐར་པའི་མདོ་གདོན་པ་གསུམ་པ་ལས་བརྩམས་ཏེ་མདོ་ཞེས་བྱ་བ་ལ་སོགས་པ་སྨོས་སོ། །གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་ཛེ་ཏའི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འཆར་བ་རང་བཞིན་གྱིས་གྲོང་ཁྱེར་རམ་གྲོང་རྡལ་གང་ན་གནས་ཀྱང་རུང་སྟེ། དེ་ནང་པར་སྔར་ལངས་ནས་གཙུག་ལག་ཁང་ཆག་ཆག་བཏབ། ཕྱག་དར་བྱས། སྐྱང་ནུལ་བྱུགས་ནས་དེ་གཙུག་ལག་ཁང་གི་ཕྱི་ལོགས་སུ་བྱུང་སྟེ་རྐང་ལག་བཀྲུས། སོ་ཤིང་འཆོས་ནས་དེ་སྔ་དྲོ་ཆོས་གོས་གྱོན་ལྷུང་བཟེད་ཐོགས་ཏེ་གྲོང་དང་གྲོང་ཁྱེར་དུ་བསོད་སྙོམས་ལ་འཇུག་གོ །དེ་དེ་ལྟར་བསོད་སྙོམས་ལ་ཞུགས་པའི་ཚེ་ལུས་མ་བསྲུངས། དབང་པོ་མ་བསྡམས། དྲན་པ་ཉེ་བར་མ་བཞག་པས། བསོད་སྙོམས་ལས་སླར་ཕྱིན་ནས་ཟས་ཀྱི་བྱ་བ་བྱས་ཏེ། ནང་དུ་ཡང་དག་འཇོག་ལ་ཞུགས་པའི་ཚེ་འགྲོ་བའི་བཟང་མོ་དག་མཐོང་བས་འདོད་པའི་འདོད་ཆགས་ཀུན་ཏུ་བསྐོར་བའི་སེམས་སུ་གྱུར་ནས། དེ་རང་གི་ཡན་ལག་སྐྱེས་ལས་སུ་རུང་བས་ལག་པ་གཉིས་ཀྱིས་བཟུང་སྟེ་བསྐྱོད་ནས་ཁུ་བ་འབྱིན་ཏོ། །དེ་ནས་དགེ་སློང་གནས་ཉུལ་བ་དག །ཚེ་དང་ལྡན་པ་འཆར་བའི་གནས་ག་ལ་བ་དེར་དོང་སྟེ། ཚེ་དང་ལྡན་པ་ཁྱོད་ཅིང་བཟོད་ཅིང་ཉམས་བདེ་འམ། བདེ་བ་ལ་རེག་པར་གནས་སམ། བསོད་སྙོམས་ཀྱིས་བྲེལ་བ་ལྟ་མེད་དམ་ཞེས་སྨྲས་པ་དང༌། ཚེ་དང་ལྡན་པ་བདག་ནི་བསོད་སྙོམས་ཀྱིས་བྲེལ་བ་ཡང་མེད་ལ་བདག་ཉམས་བདེ་ཞིང་བདེ་བ་ལ་རེག་པར་གནས་སོ་ཞེས་སྨྲས་པ་དང༌། དགེ་སློང་དག་གིས་ཚེ་དང་ལྡན་པ་ཁྱོད་ཇི་ལྟར་ཉམས་བདེ་ཞིང་བདེ་བ་ལ་རེག་པར་གནས་ཞེས་སྨྲས་པ་དང༌། བདག་འདོད་པའི་འདོད་ཆགས་ཀྱིས་ཀུན་ཏུ་བསྐོར་བའི་ཚེ་ན་བདག་གི་ཡན་ལག་སྐྱེས་བསྐྱོད་དེ་སྤྱད་པས་ན་འདོད་པའི་འདོད་ཆགས་དང་བྲལ་
རིམས་ནད་དང་གདུང་བ་དང་བྲལ་བར་གྱུར་ཏེ། བུད་མེད་ལ་ཆགས་པའི་བློ་མི་སྐྱེ་བས་བདེ་བ་ལ་རེག་པར་གནས་སོ་ཞེས་སྨྲས་པ་དང༌། དགེ་སློང་གིས་དེ་ལྟར་གྱུར་པ་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་འཆར་བ་ལ་ཁྱོད་ཀྱིས་དེ་ལྟ་བུ་བྱས་པ་བདེན་ནམ་ཞེས་སྨྲས་པ་དང༌། བཙུན་པ་མད་དོ་ཞེས་གསོལ་བ་ནས་འདུལ་བ་ལ་བསླབ་པའི་གནས་བཅས་སོ། །རྨི་ལམ་གྱི་མ་གཏོགས་ཞེས་བྱ་བའི་གླེང་གཞི་ནི་མཉན་དུ་ཡོད་པ་སྟེ། མཚན་མོ་དགེ་སློང་དག་ཅིག་ཉལ་བའི་རྨི་ལམ་ན་མི་གཙང་བ་ཁུ་བ་བྱུང་བར་རྨི་ནས་དེ་དག་འགྱོད་པ་སྐྱེས་ནས་བཅོམ་ལྡན་འདས་ཀྱིས་ཁུ་བ་ཕྱུང་ན་ལྷག་མར་འགྱུར་རོ་ཞེས་བསླབ་པ་བཅས་ན། བདག་ཅག་ལ་ལྟུང་བར་མ་གྱུར་ཏམ་ཞེས་འགྱོད་པ་སྐྱེས་ནས། དགེ་སློང་འདི་དག་གིས་ཀུན་དགའ་བོ་ལ་གསོལ་ཏེ། ཀུན་དགའ་བོས་སྙན་དུ་ཞུས་པ་དང༌། བཀའ་སྩལ་པ། དགེ་སློང་འདི་ལ་བསླབ་པར་འདོད་པ་དང༌། བསླབ་པ་ལ་ནན་ཏན་བྱེད་པ་བསྔགས་པ་བརྗོད་ནས་དགེ་སློང་དེ་དག་ལ་དགའ་བར་ཚོར་བའི་འདུ་ཤེས་ཀྱང་ཡོད་མོད་ཀྱི། དེ་ནི་ཉམས་པར་གྱུར་པས་རྨི་ལམ་གྱི་ལྟུང་བ་མེད་དེ་མ་གཏོགས་སོ། །ཡང་དགེ་སློང་ཞེས་བྱ་བ་ནི་འཆར་བའོ། །བསམས་ནས་ཞེས་བྱ་བ་ནི་སེམས་ཀྱིས་བརྟགས་པ་ལ་བྱའོ། །ཁུ་བ་ཞེས་བྱ་བ་ནི་རྣམ་པ་ལྔ་ལྟ་བུ་ཡོད་དོ། །སྔོན་པོ་དང༌། དམར་པོ་དང༌། སེར་པོ་དང༌། གར་བ་དང༌། སླ་བའོ། །སྔོན་པོ་ནི་འཁོར་ལོས་སྒྱུར་བའི་རྒྱལ་པོ་འམ། དེའི་བུ་ཐུ་བོའི་འོ། །སེར་པོ་ནི་བུ་གཞན་རྣམས་ཀྱིའོ། །དམར་པོ་ནི་བློན་པོ་རྣམས་ཀྱིའོ། །དབང་པོ་སྨིན་པ་རྣམས་ཀྱི་ནི་གར་བའོ། །དབང་པོ་མ་སྨིན་པ་རྣམས་ཀྱི་དང༌། ཁུར་དང་ལམ་གྱིས་དུབ་པ་དང་མཚོན་གྱིས་དུབ་པ་ལ་སོགས་པ་ནི་སླ་བའོ། །རྨི་ལམ་གྱི་མ་གཏོགས་ཞེས་བྱ་བ་ནི་རྨི་ལམ་གྱི་བཀོལ་བའོ། །ཕྱུང་ཞེས་བྱ་བ་ནི་ཕྱུང་མ་ཐག་པའོ། །དགེ་འདུན་གྱི་ལྷག་མ་ཞེས་བྱ་བ་ནི་ལྟུང་བ་དེ་དགེ་འདུན་ལ་དབང་ཡོད་ལ། དགེ་འདུན་ལ་རག་ལས་ལ་དགེ་འདུན་ལ་བརྟེན་པ་སྟེ། ལྟུང་བ་དེ་དགེ་འདུན་གྱིས་
དབྱུང་གི །གང་ཟག་གིས་ནི་མ་ཡིན་ནོ། །ལྷག་མ་ཞེས་བྱ་བ་ནི་ཕས་ཕམ་པ་བཞི་ལ་ལྷག་མ་མེད་ཀྱི་ལྟུང་བ་དེ་ལྷག་མ་དང་བཅས་པས་ན་དགེ་འདུན་གྱི་ལྷག་མ་ཞེས་བཤད་དོ། །ཉེས་པ་ཇི་ལྟ་བུ་ཞེ་ན་ཉེས་པ་ལྔ་སྟེ། བདེ་བར་བྱ་བ་དང་ས་བོན་དང༌། རིག་སྔགས་དང༌། སྨན་དང༌། བརྟག་པའི་ཕྱིར་རོ། དགེ་སློང་གིས་རྣམ་པ་ལྔ་ལྟ་བུའི་ཚུལ་གྱིས་ཁུ་བ་ཕྱུང་ན་ལྷག་མར་འགྱུར་རོ། །མ་ཕྱིན་ན་ལྷག་མའི་སྦོམ་པོར་འགྱུར་རོ། །རྨན་དང་གཡན་པ་དང་མཛེ་དང༌། ཤ་བཀྲ་དང༌། རྔོ་དང༌། སྒོའི་ཐེམ་པ་ལ་འགོང་བ་དང༌། འོབས་ལ་མཆོང་བ་དང༌། གོས་ལ་རེག་པ་དང༌། བུད་མེད་སྡུ་གུ་མཐོང་བ་དང༌། སྔོན་གྱི་སྤྱོད་པ་རྗེས་སུ་དྲན་པ་དང༌། གཅིག་གི་བརླ་ལ་གཅིག་རེག་སྟེ་དགའ་བར་ཚོར་བ་ནི་ཉེས་པ་མེད་དོ། །ལས་དང་པོ་པ་དང༌། སེམས་འཁྲུགས་པ་དང༌། ནད་ཀྱིས་གཟིགས་བ་ལ་ཉེས་པ་མེད་དོ། །དང་པོ་འཛིན་པའི་གླེང་གཞི་ནི་གཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དྲུག་སྡེ་པོ་རང་བཞིན་གྱིས་ཛེ་ཏའི་གཙུག་ལག་ཁང་གི་སྒོ་སྟོང་པར་མི་འཇོག་སྟེ། དེའི་ཚེ་ཚེ་དང་ལྡན་པ་འཆར་བའི་རེས་ལ་བབ་པ་ན་ཛེ་ཏའི་གཙུག་ཁང་གི་སྒོ་ན་སྒོ་སྲུང་ཞིང་འཆག་ཅིང་འདུག་པ་དང༌། ཚེ་དང་ལྡན་པ་འཆར་བ་ནི་གྲོང་ཁྱེར་ཆེན་པོ་དྲུག་གི་མི་རྣམས་ཀྱི་མིའི་རུས་དང༌། རིགས་དང༌། གཟུགས་དང༌། བཟོའི་ལས་དང༌། འཚོ་བ་ལ་སོགས་ཏེ་མི་ཤེས་པའམ། མི་མཐོང་བ་གཅིག་ཀྱང་མེད་པས། དེའི་ཚེ་གྲོང་གི་བུད་མེད་མང་ཞིག་གཙུག་ལག་ཁང་དུ་ལྟ་ཞིང་ཕྱག་འཚལ་དུ་ལྷགས་པ་དང༌། འཆར་བས་འདི་ཞེས་བྱ་བའི་བུ་མོ། འདི་ཞེས་བྱ་བའི་ཆུང་མ། འདི་ཞེས་བྱ་བའི་མནའ་མ། འདི་ཞེས་བྱ་བའི་སྲིང་མོ་ཁྱེད་ཅག་བདེ་བར་ལྷགས་སམ། ཁྱེད་ཅག་གར་འགྲོ་ཞེས་སྨྲས་པ་དང༌། འཕགས་པ་འཆར་བ་བདག་ཅག་ནི་མི་ཁོམ་པ་དགུ་དང་ལྡན་པས། གཞན་ལ་ནི་མི་ཁོམ་པ་བརྒྱད་གསུངས་ན་བདག་ཅག་ཁྱིམ་གྱི་བྱ་བས་བྲེལ་བ་ན་རྟག་ཏུ་མཆིར་ནི་མི་ཁོམ་སྟེ། དེ་བདག་ཅག་ལྷ་ཁང་དུ་ལྟ་ཞིང་ཕྱག་འཚལ་དུ་འོངས་སོ་ཞེས་སྨྲས་པ་དང༌། འཆར་བས་
སྨྲས་པ་ཤིན་ཏུ་ལེགས་ཏེ། གསེར་སྲང་ཁྲི་ཡོན་དུ་ཕུལ་བ་བས་མཆོད་རྟེན་ལ་ཕྱག་འཚལ་བ་བསོད་ནམས་ཆེ་ཞིང་དགེའོ་ཞེའོ། །གོམ་པ་རེ་རེ་བོར་ཡང་འཁོར་ལོས་སྒྱུར་བའི་རྒྱལ་པོར་འགྱུར་རོ། །ཁྱེད་ཅག་འཕགས་པ་རྣམས་ཀྱི་གནས་ཁང་ལ་ཕྱག་འཚལ་བར་འདོད་དམ། ཕྱག་འཚལ་བར་འཚལ་ལོ། །འོ་ན་སུས་བསྟན་པར་བྱ། མར་མེ་ཡོད་བཞིན་དུ་སྒྲོན་མ་གུད་དུ་མི་ཚོལ་ཏེ། འཕགས་པ་ཉིད་ཀྱིས་བསྟན་དུ་གསོལ། འཆར་བས་བསམས་པ། གཙུག་ལག་ཁང་བསྟན་ན་ནི་དགེ་བའི་བར་ཆད་དུ་ཡང་འགྱུར། མ་བསྟན་ན་ནི་མ་རུངས་པ་འདི་དག་གིས་བསོད་སྙོམས་ཀྱང་མི་སྟེར་བའི་སྟེངས་སུ། བཅོམ་ལྡན་འདས་ཀྱིས་ཀྱང་མ་དད་པ་དང་མ་དུལ་བ་རྣམས་དུལ་བ་དང༌། དད་པ་དང་བ་ཕུན་སུམ་ཚོགས་པར་གྱིས་ཤིག་ཅེས་བཀའ་སྩལ་པས་ན་བདག་གིས་བསྟན་དགོས་སོ་སྙམ་ནས། དེ་ནི་སངས་རྒྱས་ཀྱི་གནས་ཁང་ངོ༌། དེ་ནི་ཅང་ཤེས་ཀཽཎྜི་ནྱའིའོ། །དེ་ནི་འོད་སྲུངས་ཆེན་པོའིའོ། །དེ་ནི་ཤཱ་རིའི་སྲས་པོའིའོ། །དེ་ནི་འཕགས་པ་མཽད་གལ་གྱིའོ། །དེ་ནི་འཕགས་པ་མ་འགགས་པའིའོ། །དེ་ནི་ཚེ་དང་ལྡན་པ་ཀུན་དགའ་བོའིའོ། །དེ་ནི་སྒྲ་གཅན་གྱིའོ། །དེ་ནི་དྲུག་སྡེ་རྣམས་ཀྱིའོ། །དེ་ནི་ངའི་གནས་ཁང་ངོ༌། །དེ་ལྟར་ཐར་ཆགས་ཀྱིས་ཀྱང་ཕྱག་འཚལ་དུ་བཅུག་གོ །དེ་ལྟར་ཕྱག་འཚལ་ནས་བུད་མེད་རྣམས་ཀྱིས་འཆར་བ་ལ་ཆོས་བཤད་དུ་གསོལ་ཏོ། །འཆར་བས་ཀྱང་ཆེ་ཞེ་དག་ལེགས་ཀྱི། ཆོས་བཤད་ཀྱི་གདན་བཏིང་ལ་འཁོད་ཅིག་ཅེས་བྱས་པ་དང༌། དེ་དག་གིས་འཆར་བའི་རྐང་པ་ལ་ཕྱག་འཚལ་ནས་འཁོད་དེ། དེ་དག་ལ་འཆར་བ་ཆོས་སྟོན་པ་ལ་ཞུགས་ཏེ། ཇི་ལྟ་ཇི་ལྟ་བུར་ཆོས་སྟོན་པ་དེ་ལྟ་དེ་ལྟ་བུར་ཀུན་དུ་ཆགས་སོ། །ཅི་ལྟར་ཆགས་པ་དེ་ལྟར་ཞེན་ཏོ། །ཅི་ལྟར་ཞེན་པ་དེ་ལྟ་བུར་ལག་ནས་འཛིན་ཅིང༌། ཡན་ལག་དང་ཉིང་ལག་ནས་ནོམ་མོ། །དེ་ལ་གང་དག་དགའ་བར་ཚོར་བ་དེ་དག་ནི་ཀུན་དུ་རྩེ་གད་རྒྱངས་བྱེད་འཛེམ་སྙེས་ལུས་ཀྱིས་སྙོགས་སོ། །གང་དག་དགའ་བར་མ་ཚོར་བ་དེ་དག་ནི་དེ་ནས་བྱུང་སྟེ། འཆགས་དང་སྒོ་ཁང་དག་ན་འཕྱ་སྟེ་བདག་ཅག་
གི་སྐྱབས་ལས་ཀྱང༌། གནོད་པ་དང་འཁྲུགས་པ་དེ་ལྟ་བུ་བྱུང་བ་ལྟ་ཞེས་མི་སྙན་པར་ཟེར་ཞིང་དོང་བ་དང༌། དགེ་སློང་དག་ཅིག་མདུན་ནས་འོང་བ་ཐོས་ཏེ། ཁྱེད་སུ་ལ་ཁ་ཟེར་འཕགས་པ་ཁྱོད་ལའོ། །ངེད་ཀྱིས་ཅི་ཞིག་བྱས་འཕགས་པ་འཆར་བས་བདག་ཅག་གི་ཡན་ལག་དང་ཉིད་ལག་ཁྱིམ་ཐབ་ཀྱིས་ཀྱང་མ་མནམ་མ་རེག་པའི་གནས་ཐམས་ཅད་དུ་རེག་སྟེ་མནམས་པས་ན་གལ་ཏེ་བདག་ཅག་གི་ཕ་མ་དང་མིང་པོས་ཐོས་ན་ཡང་ཛེ་ཏའི་གཙུག་ལག་ཁང་དུ་མིག་གིས་ཀྱང་ལྟར་མི་སྟེར་ན་འགྲོ་བ་ལྟ་ཅི་སྨོས་ཞེས་འཛེར་ཏོ། །དགེ་སློང་དག་གིས་ཆེ་ཞེས་འཆར་བ་ནི་ཚུལ་ཁྲིམས་དང་ལྡན་པ་ཡིན་ཏེ། ཉེ་འཕེན་གྱི་བུ་ལས་རབ་ཏུ་བྱུང་བས་ན། འདོད་ཆགས་ཤས་ཆེ་བས་ན། ཐབས་དེ་ཉིད་ཀྱིས་འདོད་ཆགས་སེལ་ཏོ། །འཆར་བ་ལ་སླན་ཆད་དེ་ལྟ་བུ་མ་བྱེད་ཅིག་ཅེས་བསྒོས་ཆེ་ཞེ་དག་དེ་ལྟ་བུ་མ་ཟེར་བར་དེངས་ཤིག་འཕགས་པ་དག་བསྒོ་ཡང་རུང་མ་བསྒོ་ཡང་རུང་སྟེ། བདག་ཅག་ནི་སླན་ཆད་ཛེ་ཏའི་གཙུག་ལག་ཁང་དུ་མི་མཆིའོ་ཞེས་འཕྱ་བཞིན་དུ་དོང་ངོ༌། །འཆར་བ་ཡང་གཙུག་ལག་ཁང་ནས་དགོད་བཞིན་དུ་ཕྱི་བཞིན་དུ་འོང་ངོ༌། །ཚེ་དང་ལྡན་པ་ཁྱོད་དེ་ལྟ་བུ་མི་མཛེས་པ་བྱས་ཀྱང་བགད་དུ་ཅི་ཡོད་ཅེས་སྨྲས་པ་དང༌། ཅི་ངས་ཆང་འཐུངས་སམ་འོན་ཏེ་སྒོག་པ་ཟོས། ཁྱིམ་བདག་གི་བུད་མེད་རྣམས་ནི་ཁྱོད་ལ་འཕྱ་བཞིན་དུ་དོང་ངོ༌། །འཆར་བས་སྨྲས་པ། ལྷུང་བཟེད་ནག་པོ་ཅན་རྣམས་ཀྱི་རང་བཞིན་གྱིས་དེ་འདྲ་སྟེ། སེར་སྣ་ཆེ་བས་ན་ཆོས་ཚིག་བཞིའི་ལེའུ་གཅིག་ཀྱང་སུ་ལ་ཡང་མི་སྟོན་པའི་སྟེང་དུ་གཞན་སྟོན་ཅིང་སེམས་ཅན་གྱི་དོན་བྱེད་པ་ལ་ཡང་འཕྱའོ། །ཅི་ཁྱོད་ཀྱིས་བདེན་པ་ལ་བཀོད་དམ། འཆར་བས་སྨྲས་པ། དེ་དག་རེ་ཞིག་དབང་པོ་སྨིན་པར་བྱས་ལ་མཐར་གྱིས་བདེན་པ་ཐོབ་པར་འགྱུར་རོ་ཞེས་སྨྲས་པ་དང༌། དགེ་སློང་རྣམས་འཕྱ་སྟེ་གང་གིས་ངོ་ཚ་བ་དེ་ཉིད་ཀྱིས་ང་རྒྱལ་བསྐྱེད་དམ་ཞེས་མི་སྙན་པར་ཟེར་རོ། །དེ་ལྟར་གྱུར་པ་སྙན་དུ་བདས་ནས་འཆར་བ་བཀུག་སྟེ། བཀའ་སྩལ་པ། དེ་ལྟར་གྱུར་པ་བདེན་ནམ་ཞེས་སྨྲས་པ་དང༌། བཙུན་པ་མད་དོ་ཞེས་གསོལ་ཏོ། །བཅོམ་ལྡན་འདས་ཀྱིས་དགེ་སློང་གི་བྱ་བ་མ་ཡིན་
མཐུན་པ་མ་ཡིན་ཞེས་རྣམ་གྲངས་དུ་མའི་སྒོ་ནས་སྨད་ནས་འདུལ་བ་ལ་བསླབ་པའི་གནས་བཅས་ཏེ་ཡང་དགེ་སློང་གང་ཞེས་རྩ་བའི་ཚིག་རྣམས་སོ། །དགེ་སློང་ཞེས་བྱ་བ་ནི་འཆར་བ་སྟེ། གང་གཞན་ཡང་དེ་འདྲའོ། །ཆགས་ཤིང་བརྟུལ་བའི་སེམས་ཀྱིས་ཞེས་བྱ་བ་ནི་ཆགས་པའི་སེམས་ཡོད་ལ་བརྟུལ་པའི་སེམས་མེད་པ་དང༌། བརྟུལ་བའི་སེམས་ཡོད་ལ་ཆགས་པའི་སེམས་མེད་པ་དང༌། ཆགས་པ་ཡང་ཡོད་ལ་བརྟུལ་བ་ཡང་ཡོད་པ་དང༌། ཆགས་པ་ཡང་མེད་ལ་བརྟུལ་བ་ཡང་མེད་པའོ། །ཆགས་པ་ཞེས་བྱ་བ་ནི་བརྟུལ་བ་མ་ཡིན་ཏེ། སེམས་གང་ལ་ཆགས་པའི་དངོས་པོ་ལ་ཀུན་དུ་བསྐོར་བ་ལ་གནས་པའོ། །བརྟུལ་བ་ནི་ཆགས་པ་མ་ཡིན་ཏེ། སེམས་གང་གིས་སྡུག་པ་ལ་ཞེན་པའི་སེམས་སོ། །ཆགས་པ་ཡང་ཡོད་ལ་བརྟུལ་བ་ཡང་ཡོད་པ་ནི་སེམས་གང་ཆགས་ཤིང་ཆགས་པས་ཀུན་ནས་བསྐོར་བ་དང༌། སྡུག་པ་ལ་ཞེན་པའི་སེམས་སོ། །ཆགས་པ་ཡང་མ་ཡིན་བརྟུལ་བ་ཡང་མ་ཡིན་པ་ནི་དེ་ལྟ་བུ་མེད་པའོ། །བུད་མེད་དང་ལྷན་ཅིག་ཅེས་བྱ་བ་ནི་བུད་མེད་གང་གཞོན་ནུ་མ་མི་ཚངས་པར་སྤྱད་པར་རུང་བའོ། །རེག་ཅེས་བྱ་བ་ནི་ལུས་ཀྱིས་སྤྲད་པའོ།། གྱུར་ཏམ་ཞེས་པ་ནི་བྱེད་པའོ། །ལག་པ་ནས་བཟུང་ཞེས་བྱ་བ་ནི་མཁྲིག་མ་མན་ཆད་དོ། །ལན་བུ་ནས་བཟུང་ཞེས་བྱ་བ་ནི་སྐྲ་སྟེ། དེ་དང་ལྷན་ཅིག་ལྡན་པ་ཅོད་པན་ཡང་ངོ༌། །ཡན་ལག་དང་ཉིང་ལག་ཀྱང་རུང་བ་ཞེས་བྱ་བ་ནི་ལག་པའམ་དཔུང་པ་ནས་གཟུང་བ་མ་གཏོགས་པ་གཞན་ནས་བཟུང་བའོ། །ནོམ་ཀུན་དུ་ནོམ་པ་དགའ་བར་ཚོར་ཞེས་བྱ་བ་ནི་ཉམས་སུ་མྱོང་བའོ། །དགེ་འདུན་གྱི་ལྷག་མ་ཞེས་བྱ་བ་ནི་ལྟུང་བ་ཉིད་ལྷག་མ་དང་བཅས་པ་དང་དགེ་འདུན་ལ་རག་ལུས་པས་ན་དགེ་འདུན་གྱི་ལྷག་མ་ཞེས་བཤད་དོ། །དེ་ལ་ཉེས་པ་གང་ཞེ་ན། རྣམ་པ་དགུ་སྟེ། ནོམ་པ་དང༌། ཀུན་དུ་ནོམ་པ་དང༌། འཁྱུད་པ་དང༌། འཛིན་པ་དང༌། འདྲེན་པ་དང༌། ཀུན་དུ་འདྲེན་པ་དང༌། འདེགས་པ་དང༌། འབེབས་པ་དང༌། མངོན་དུ་བཙིར་བའོ། །ནོམ་པ་ཇི་ལྟ་བུ་ཞེ་ན། དགེ་སློང་འདོད་ཆགས་ཀྱིས་བརྟུལ་བའི་སེམས་ཀྱིས་བུད་མེད་གཞོན་
ནུ་མ་མི་ཚངས་པར་སྤྱད་དུ་བཟོད་པ་དེ་ལ་སྤྱི་བོ་ནས་མནམས་ཏེ་གོས་ཀྱིས་མ་ཆོད་ན་ལྷག་མར་འགྱུར་རོ། །ཆོད་ན་ཉེས་པ་སྤོམ་པོར་འགྱུར་རོ། །ཇི་ལྟར་སྤྱི་བོར་ནོམ་པ་དེ་བཞིན་དུ་འཕྲལ་བ་དང་མཁུར་ཚོས་དང༌། མཆུ་དང༌། ཀོ་སྐོ་དང༌། རྣ་བ་དང༌། མགྲིན་པ་དང༌། དཔུང་མགོ་དང༌། རྒྱབ་དང༌། ཐ་ན་རྐང་པའི་མཐེ་བོང་ཡང་རུང་སྟེ། ཐམས་ཅད་དུ་ལྷག་མར་འགྱུར་རོ། །ཇི་ལྟར་ཀུན་དུ་ནོམ་པ་ལ་ཇི་ལྟར་ཉེས་པའི་དམིགས་སུ་འགྱུར་བ་དེ་བཞིན་དུ་ཀུན་དུ་ནོམ་པ་དང༌། འཁྱུད་པ་དང༌། འཛིན་པ་དང༌། འདྲེན་པ་དང༌། འདེགས་པ་དང༌། །འབེབས་པ་དང༌། བཙིར་བ་ལ་ཡང་ཀུན་དུ་ནོམ་པ་བཞིན་སྦྱར་རོ། །གང་སྤྱད་དུ་རུང་བ་ལ་དགེ་འདུན་གྱི་ལྷག་མར་སྦྱར་རོ། །སྤྱད་དུ་མི་བཟོད་པ་ལ་སྦོམ་པོར་འགྱུར་རོ། །སྐྱེས་པ་དང༌། མ་ནིང་དང༌། ཟ་མ་དང༌། མཚན་གཉིས་པ་སྤྱད་དུ་བཟོད་པ་ལ་སྦོམ་པོའོ། །སྤྱད་དུ་མི་བཟོད་པ་ལ་ཉེས་བྱས། བྱོལ་སོང་ལ་ཡང་ཉེས་བྱས་སུ་འགྱུར་རོ། །མ་དང་སྲིང་མོ་དང༌། བུ་མོར་འདུ་ཤེས་པ་ལ་ལྟུང་བ་མེད་དོ། །མེ་འམ་ཆུར་ལྟུང་བ་དང༌། དུག་ཟོས་པ་དང༌། མཚོན་གྱིས་འདེབས་པ་དང༌། གཡང་དུ་ལྷུང་བ་དང༌། ཐག་པས་འགེག་པ་དང༌། འཆིར་ཆས་པ་ལ་ཟློག་པ་ནི་བུད་མེད་ལ་རེག་ཀྱང་ཉེས་པ་མེད་དོ། །བུད་མེད་ལུས་ཀྱི་དབང་པོ་ཉམས་པ་འམ། དགེ་སློང་གི་ལུས་ཀྱི་དབང་པོ་ཉམས་ཀྱང་རུང་སྟེ། རེག་ན་གཉིས་ཀ་ཡང་འདྲ་སྟེ་སྦོམ་པོར་འགྱུར་རོ། །གཉིས་ཀ་ཡང་ཉམས་ལ་གཅིག་ལ་གཅིག་རེག་ན་ཉེས་བྱས་སུ་འགྱུར་རོ། །བུད་མེད་ཡིན་ནམ་མ་ཡིན་སྙམ་དུ་ཐེ་ཚོམ་ཟ་བཞིན་དུ་རེག་ན་སྤོམ་པོར་འགྱུར་རོ། །སོས་སོ་ལ་རེག་པ་དང༌། སྤུས་སྤུ་ལ་རེག་པ་དང༌། རྨ་ལ་རིག་པ་དང༌། སེན་མོ་ལ་རེག་པ་ནི་སྦོམ་པོར་འགྱུར་རོ། །བུད་མེད་མ་ལགས་པར་འདུ་ཤེས་པ་དང༌། བུད་མེད་མ་ལགས་པ་ལ་བུད་མེད་དུ་འདུ་ཤེས་པ་དང༌། གོས་ཀྱིས་གཡོགས་པ་དང༌། མ་གཡོགས་པ་ལ་གཡོགས་པར་འདུ་ཤེས་པ་ནི་ཐམས་ཅད་ཀྱང་སྦོམ་པོར་འགྱུར་རོ། །བུད་མེད་གཞན་ལ་རེག་པར་བྱས་པ་ལས་བུད་མེད་གཞན་ལ་རེག་པ་དང༌། བུད་མེད་ཀྱི་རོ་ལ་རེག་པ་དང༌། འགྲོ་བ་གཞན་
དུ་གནས་པ་ལ་རེག་པ་དང༌། མ་ནིང་ལ་རེག་པ་ལ་སོགས་ཏེ་ཐམས་ཅད་ཀྱང་སྦོམ་པོར་འགྱུར་རོ། །གོས་ཀྱིས་མ་གཡོགས་པ་ལ་བུད་མེད་ཀྱང་ཡིན་ལ་སྤྱད་ཀྱང་བཟོད་པ་དང༌། ལུས་ཀྱང་མ་ཉམས་ལུས་ཀྱིས་ཀྱང་རེག་སྟེ་དགའ་བར་ཚོར་ན་ཡན་ལག་ཚང་བ་ཞེས་བྱའོ། །ཡན་ལག་མ་ཚང་ན་ཐམས་ཅད་ཀྱང་སྦོམ་པོར་འགྱུར་རོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ། །འཁྲིག་ཚིག་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དྲུག་སྡེ་པོ་རྣམས་རང་བཞིན་གྱིས་ཛེ་ཏའི་ཚལ་གྱི་གཙུག་ལག་ཁང་གི་སྒོ་སྟོང་པར་མི་འཇོག་སྟེ། དེའི་ཚེ་ན་ཚེ་དང་ལྡན་པ་འཆར་བ་གཙུག་ལག་ཁང་གི་སྒོ་ན་འཆག་ཅིང་འདུག་པ་དང༌། གྲོང་མིའི་བུད་མེད་རྣམས་གཙུག་ལག་ཁང་དུ་ཕྱག་འཚལ་དུ་ལྷགས་པ་རྣམས་ལ་སོ་སོའི་རྒྱུས་ལ་མཁས་པས་ན། སོ་སོའི་མིང་ནས་ཕྱུང་ཞིང་བདེ་བར་འོངས་སམ་ཞེས་དྲིས་ནས་གཙུག་ལག་ཁང་དང༌། གནས་ཁང་རིམ་གྱིས་བསྟན་པའི་བར་དུ་སྔ་མ་བཞིན་ནོ། །དེས་དེ་ལྟར་ཆོས་སྟོན་པ་ན། སྡིག་པ་ཅན་དབྱུང་བར་མི་འོས་པ་འཁྲིག་པ་དང་ལྡན་པའི་ཚིག་སྨྲས་པ་ལ་ཞུགས་པས་ན་ཁྱིམ་མི་མོ་དེ་དག་མི་སྙན་པར་འཕྱ་ཞིང་དོང་བ་དང༌། དགེ་སློང་དག་གིས་ཆེ་ཞེ་ཁྱེད་ཅག་སུ་ལ་འཕྱ། ཁྱོད་ལའོ། །ངེད་ཀྱིས་ཅི་ཞིག་བྱས། བདག་ཅག་གིས་དྭ་དང༌། རྒྱན་པོ་པ་དང༌། ནལ་གྱི་བུ་ལས་མ་ཐོས་པར་ཁྱེད་འཕགས་པ་འཆར་བ་ལས་ཐོས་སོ། །ཁྱོད་ཅག་མ་ཟེར་ཅིག །ངེད་ཀྱིས་འཆར་བ་ལ་བསྒོ་བར་བྱའོ། །བསྒོ་ཡང་རུང་མ་བསྒོ་ཡང་རུང༌། སླན་ཆད་ཛེ་ཏའི་གཙུག་ལག་ཁང་དུ་མིག་ཀྱང་མི་ལྟའོ། །དེ་ལྟར་གྱུར་པ་དགེ་སློང་དག་གིས་སྙན་དུ་གསོལ་བ་དང༌། བཀའ་སྩལ་པ་འཆར་བ་བཀུག་སྟེ་རྨས་པ་ན། བཙུན་པ་མད་དོ་ཞེས་གསོལ་ནས། དགེ་སྦྱོང་གི་བྱ་བ་མ་ཡིན་ཞེས་བྱ་བ་ནས། ཡང་དགེ་སློང་ཞེས་བྱ་བའི་བར་དུ་རྩ་བའི་ཚིག་རྣམས་སོ། །ཡང་དགེ་སློང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་བ་སྟེ། ཆགས་པ་ཞེས་བྱ་བ་ནི་ཆགས་པས་ཀུན་ནས་བསྐོར་བའོ། །བརྟུལ་བ་ཞེས་བྱ་བ་ནི་ཆགས་པའི་དངོས་པོ་ལ་ཡང་དང་ཡང་དུ་ཞེན་པའོ། །བུད་མེད་ཅེས་
བྱ་བ་ནི་གང་ལེགས་པར་སྨྲས་པ་དང༌། ཉེས་པར་སྨྲས་པའི་དོན་ཤེས་པའོ། །གནས་ངན་ལེན་ཅེས་བྱ་བ་ནི་ཕས་ཕམ་པ་དང༌། དགེ་འདུན་གྱི་ལྷག་མའོ། །འཁྲིག་པ་དང་ལྡན་པ་ཞེས་བྱ་བ་ནི་མི་ཚངས་པར་སྤྱོད་པ་དང་ལྡན་པའོ། །སྐྱེས་བུས་ན་ཆུང་ལ་ཇི་ལྟ་བ་བཞིན་ཞེས་བྱ་བ་ནི་འདི་ལྟ་སྟེ་སྐྱེས་པས་བུད་མེད་ལའོ། །དགེ་འདུན་གྱི་ལྷག་མ་ཞེས་བྱ་བ་ནི་དགེ་འདུན་ལ་རག་ལས་པའོ། །ཉེས་པ་གང་ཞེ་ན། དགུ་སྟེ། བསྔགས་པར་བྱེད་པ་དང༌། བསྔགས་པར་མི་བྱེད་པ་དང༌། བཀུག་པ་དང༌། ཉེ་བར་བཀུག་པ་དང༌། འདྲི་བ་དང༌། ཀུན་དུ་འདྲི་བ་དང༌། སྨྲ་བ་དང༌། བརྗོད་པ་དང༌། གཤེ་བའོ། །བསྔགས་པར་བྱེད་པ་ལ་ཇི་ལྟ་བུ་ཞེ་ན། དགེ་སློང་གིས་ཆགས་ཤིང་བརྟུལ་བའི་སེམས་ཀྱིས་བུད་མེད་ལེགས་པར་སྨྲས་པ་དང༌། ཉེས་པར་སྨྲས་པའི་དོན་གོ་བར་ནུས་པ་ལ། ཆེ་ཞེ་ཁྱོད་ཀྱི་རྨའི་སྒོ་གསུམ་བཟད་བྱུང་ལ་ཤིན་ཏུ་སྤྱོད་དུ་རུང་བའོ་ཞེ་ན། བདེན་ནམ་ཞེས་སྨྲས་ཏེ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བ་སྨྲས་ན་ལྷག་མར་འགྱུར་རོ། །རྒྱའི་རྣ་རུ་ཞེས་མ་སྨྲས་ན་སྦོམ་པོར་འགྱུར་རོ། །བསྔགས་པར་མི་བྱེད་པ་གང་ཞེ་ན། ཁྱོད་ཀྱི་སྒོ་གསུམ་མི་བཟང༌། དབྱི་བས་ཀྱང་མི་བཟང་སྟེ་ཤིན་ཏུ་ངན་ན་རྒྱའི་རྣ་རུ་ཞེས་སྨྲས་ན་གོང་མ་བཞིན་དུ་ཉེས་པའོ། །བཀུག་པ་ཇི་ལྟ་བུ་ཞེ་ན། ཆེ་ཞེ་ཚུར་ཤོག་འདི་དང་འདི་ལྟ་བུ་ཞིག་བྱ་བ་ཞེས་སྨྲས་ཏེ། འཁྲིག་པ་དང་ལྡན་པ་རྒྱའི་རྣ་རུ་ཞེས་བྱ་བ་ནས་གོང་མ་བཞིན་དུ་ཉེས་པའོ། །ཉེ་བར་བཀུག་པ་གང་ཞེ་ན། སྲིང་མོ་བུད་མེད་གང་སྐྱེས་པ་དང་འདི་དང་འདི་བྱེད་པ་འདི་ནི་སུ་ལ་ཡིད་དུ་འོང་བའོ། །སྲིང་མོ་ཡང་ང་དང་འདི་ལྟ་བུ་བྱས་ན་ཡིད་དུ་འོང་ངོ་ཞེས་རྒྱའི་རྣ་རུ་ཞེས་སྨྲས་ན་གོང་མ་བཞིན་ནོ། །འདྲི་བ་ནི་སྲིང་མོ་སྐྱེས་པ་གང་བུད་མེད་ལ་དེ་དང་འདི་བྱེད་པ་ལ། དེ་དེ་ལ་སྡུག་པ་དང་ཡིད་དུ་འོང་བར་འགྱུར་ན་བདག་ཅག་ཀྱང་འདི་བྱས་ན་ཡིད་དུ་འོང་བར་འགྱུར་རོ་ཞེས་རྒྱའི་རྣ་རུ་སྨྲས་ན་གོང་མ་བཞིན་ནོ། །ཀུན་དུ་འདྲི་བ་ནི་སྲིང་མོ་སྐྱེས་པ་གང་བུད་མེད་དང་འདི་དང་འདི་བྱེད་ན་ཡིད་དུ་འོང་ངོ་ཞེ་ན། དེ་ལྟར་ཡིན་ནམ་མ་ཡིན་ཞེས་སྨྲ་ལ་རྒྱའི་རྣ་རུ་ཞེས་སྨྲ་ན་གོང་མ་བཞིན་ནོ། །སྨྲ་
བ་ཅི་ལྟ་བུ་ཞེ་ན། སྲིང་མོ་བདག་ཅག་སྐྱེད་མོས་ཚལ་ག་གེ་མོ་ཞེས་བྱ་བ་ན་བཟའ་བ་དང་བཏུང་བ་དང་བགོ་བ་འདི་འདྲ་བ་ཞིག་བགོ་སྟེ། བདག་ཅག་འདི་དང་འདི་ལྟ་བུ་ཞིག་བྱས་སོ། །ཁྱོད་ཀྱང་འདིར་འོངས་ན་འདི་ལྟ་བུ་ཞིག་བྱའོ་ཞེས་ཟེར་ལ་རྒྱའི་རྣ་རུ་ཞེས་སྨྲས་ན་གོང་མ་བཞིན་ནོ། །བརྗོད་པ་ནི་ལྷན་ཅིག་དེ་ལྟ་བུ་ཞིག་བྱས་ན་མཐོ་རིས་སུ་སོན་པ་དང་འདྲའོ་ཞེས་ཟེར་ལ་རྒྱའི་རྣ་རུ་ཞེས་སྨྲས་ན་གོང་མ་བཞིན་ནོ། །སྤྱོ་བ་ནི་རོ་ལྟ་བུའོ་ཞེས་སྤྱོ་ཞིང་རྒྱའི་རྣ་རུ་ཞེས་སྨྲས་ན་གོང་མ་བཞིན་ནོ། །བུད་མེད་ལེགས་ཉེས་ཀྱི་དོན་གོ་བ་དེ་དགེ་སློང་གི་གན་དུ་སོང་ནས་འཕགས་པ་བདག་གི་རྨའི་སྒོ་གསུམ་ཤིན་ཏུ་བཟང་སྟེ། དོ་ལ་བབ་པོ་ཞེས་ཟེར་ཏེ། དགའ་བར་ཚོར་བ་དགེ་འདུན་གྱི་ལྷག་མར་འགྱུར་ཏེ། དངོས་པོ་ལྷག་མ་བརྒྱད་པོ་ཡང་དེ་བཞིན་དུ་སྦྱར་ཏེ། བུད་མེད་སྤྱད་མི་བཟོད་པ་དང༌། སྐྱེས་པ་དང༌། མ་ནིང་དང༌། མཚན་གཉིས་པ་དང༌། ཟ་མ་ལ་ཡང་ཉེས་པ་སྦོམ་པོར་འགྱུར་རོ། །སྤྱད་མི་བཟོད་པ་དང་བྱོལ་སོང་ལ་ཡང་ཉེས་བྱས་སུ་འགྱུར་རོ། །སྐད་ངེས་པའི་ཚིག་དང༌། ཡུལ་གྱི་ངེས་པའི་ཚིག་དང༌། སྐད་ཟུར་མ་ཕྱིན་པ་ན་ཉེས་པ་མེད་དོ། །མཐའ་འཁོབ་པའི་སྐད་དང་བདག་ཉིད་མི་སྣང་བར་བྱས་ཏེ་སྨྲས་པ་དང༌། བུད་མེད་ལ་གཞན་སྨྲར་གཞུག་པ་དང༌། གཞན་གྱི་སླད་དུ་སྨྲས་པ་དང༌། སྤྲུལ་པའི་བུད་མེད་དང༌། ཕྲིན་ཡིག་དང༌། ལག་བརྡ་དང༌། གཅིག་ནས་གཅིག་ཏུ་བརྒྱུད་པ་ཐམས་ཅད་ཀྱང་ཉེས་པ་སྦོམ་པོར་འགྱུར་རོ། །སྨྱོ་བ་དང༌། ར་རོ་བ་དང༌། སེམས་འཁྲུགས་པ་དང༌། གླེན་མ་དང༌། གཉིད་ལོག་པ་ལ་དགེ་སློང་གིས་གནས་ངན་ལེན་གྱི་ཚིག་སྨྲས་ན་ཐམས་ཅད་ཀྱང་སྦོམ་པོར་འགྱུར་རོ། །ཡན་ལག་ནི་རྒྱའི་རྣ་རུ་ཞེས་སྨྲས་པ་དང༌། དབྱིབས་ཤིན་ཏུ་བཟང་པོའོ་ཞེས་སྨྲས་པ་དང༌། བུད་མེད་སྤྱད་དུ་བཟོད་པ་དང༌། དོན་གོ་བ་སྟེ་རྣམ་པ་དེ་རྣམས་དང་ལྡན་ན་ལྷག་མའོ། །དེ་རྣམས་གཅིག་དང་མི་ལྡན་ན་སྦོམ་པོའོ། །བསྙེན་པར་མ་རྫོགས་པ་རྣམས་ནི་ཐམས་ཅད་ཀྱང་ཉེས་བྱས་སུ་འགྱུར་རོ། །ཀུན་སྤྱོད་ཀྱི་གླེང་གཞི་ནི་
བཅོམ་ལྡན་འདས་མཉན་དུ་ཡོད་པ་ན་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཚེ་དང་ལྡན་པ་འཆར་བས་གཙུག་ལག་ཁང་དུ་ལྟར་ལྷགས་པའི་བུད་མེད་རྣམས་ལ་བདག་གི་ལུས་ཀྱིས་ཀུན་དུ་སྤྱད་པའི་ཕྱིར་བསོད་ནམས་སུ་འགྱུར་བའི་སྒོ་ནས་བསྟོད་ཅིང་བསྒོ་བའོ། །དེ་ལ་བྱེ་བྲག་ནི་དང་པོའི་ལུས་ལ་བཟུང་ངོ༌། །ལུས་ལ་བཟུང་དུ་མ་བཏུབ་ནས་ཕྱི་ནས་འཁྲིག་ཚིག་ཏུ་སྨྲ་ཞིང་བརྗོད་པའོ། །འཁྲིག་ཚིག་ཀྱང་མཉན་དུ་མ་བཏུབ་ནས་བསོད་ནམས་སུ་འགྱུར་བའི་ཚིག་གི་སྒོ་ནས་བརྗོད་པའོ། །ཡང་དགེ་སློང་གང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་བའོ། །ཆགས་ཤིང་བརྟུལ་བ་ནི་གོང་མ་བཞིན་ནོ། །རང་གི་ལུས་ཀྱིས་ཀུན་དུ་སྤྱོད་པའི་ཕྱིར་ཞེས་བྱ་བ་ནི་བདག་གི་ལུས་ཀྱིས་གཡོག་བྱ་བའོ། །བུད་མེད་ཅེས་བྱ་བ་ནི་ལེགས་པ་དང་ཉེས་པར་སྨྲ་བའི་དོན་གོ་བར་ནུས་པའོ། །ད་ལྟ་བུ་དགེ་སློང་ཞེས་བྱ་བ་ནི་ཡང་དག་པར་བསྟན་པའོ། །ཚུལ་ཁྲིམས་དང་ལྡན་པ་ཞེས་བྱ་བ་ནི་ཚུལ་ཁྲིམས་ཀྱི་ཕུང་པོའོ། །དགེ་བའི་ཆོས་ཅན་ཞེས་བྱ་བ་ནི་ཏིང་ངེ་འཛིན་གྱི་ཕུང་པོའོ། །ཚངས་པར་སྤྱད་པ་ཞེས་བྱ་བ་ནི་ཤེས་རབ་ཀྱི་ཕུང་པོའོ། །དེ་ལྟར་ན་ཕུང་པོ་གསུམ་དང་ལྡན་པ་ན་ཡོན་ཏན་དང་ལྡན་པ་ཡིན་པས་ན་དེ་ལྟ་བུའི་གཡོག་བྱེད་ཅིང་མི་ཚངས་པར་སྤྱད་ན་བསོད་ནམས་སུ་འགྱུར་རོ་ཞེས་བསྟན་པའོ། །ཀུན་དུ་སྤྱད་ན་ཞེས་བྱ་བ་ནི་གཡོག་བྱ་བའོ། །ཚེ་ཞེ་དེ་ནི་ཀུན་དུ་སྤྱད་པའི་མཆོག་གོ་ཞེས་བྱ་བ་ནི་འཁྲིག་པའི་ཆོས་ཀྱི་མཆོག་ནི་འདི་ཞེས་བྱའོ། །བསྔགས་པ་ཞེས་བྱ་བ་ནི་བསྟོད་པའོ། །ལྷག་མ་ཞེས་བྱ་བ་ནི་སྔ་མ་བཞིན་ནོ། །ཉེས་པ་ཇི་ལྟ་བུ་ཞེ་ན། དངོས་པོ་ནི་བཅོ་བརྒྱད་དེ། མཆོག་དང༌། གཙོ་བོ་དང༌། བྱེ་བྲག་ཏུ་འཕགས་པ་དང༌། བཟང་པོ་དང༌། མཛེས་པ་དང༌། དགེ་བ་དང༌། མཆོད་པར་འོས་པ་དང༌། བསྟོད་པར་འོས་པ་དང༌། རྒྱ་ཆེ་བ་དང༌། ཆེས་མཆོག་པ་དང༌། ཆེས་གཙོ་བོ་དང༌། ཆེས་བྱེ་བྲག་ཏུ་འཕགས་པ་དང༌། ཆེས་བཟང་པོ་དང༌། ཆེས་བཟང་པོ་མཛེས་པ་དང༌། ཆེས་དགེ་བ་དང༌། ཆེས་མཆོད་པར་འོས་པ་དང༌།
ཆེས་བསྟོད་པར་འོས་པ་དང༌། ཆེས་རྒྱ་ཆེ་བའོ། །དགེ་སློང་ཆགས་བརྟུལ་བའི་སེམས་ཀྱིས་བུད་མེད་ལེགས་པ་དང་ཉེས་པའི་དོན་གོ་ལ། ཆེ་ཞེ་འདི་ལྟ་སྟེ། ང་ལྟ་བུའི་དགེ་སློང་ཚུལ་ཁྲིམས་དང་ལྡན་པ་ལ། ཆོས་འདི་ལྟ་བུ་ཀུན་དུ་སྤྱད་ན་དེ་ནི་མཆོག་གོ་ཞེས་ཟེར་ན་ལྷག་མའོ། །ཚུལ་ཁྲིམས་དང་ལྡན་པ་དང༌། དགེ་བའི་ཆོས་ཅན་ང་ལྟ་བུ་དང་སྦྱར་ན་ཡང་ལྷག་མར་འགྱུར་རོ། །དགེ་བའི་ཆོས་ཅན་ཚངས་པར་སྤྱད་པ་ད་ལྟ་བུ་དང༌། འཁྲིག་པའི་ཆོས་འདི་ལྟ་བུ་སྦྱར་ན་ཡང་ལྷག་མར་འགྱུར་རོ། །ཇི་ལྟར་ཚུལ་ཁྲིམས་དང་ལྡན་པ་ད་ལྟ་བུ་ཞེ་འམ་ཚངས་པར་སྤྱད་པ་ད་ལྟ་བུ་ཞེ་འམ། དགེ་བའི་ཆོས་ཅན་ད་ལྟ་བུ་ཞེས་སྨོས་པའི་ཚིག་གསུམ་པོ་དེ་རེ་རེ་དང༌། དངོས་པོ་བཅོ་བརྒྱད་པོ་དེ་གང་ཡང་རུང་སྟེ་བསྣོར་ཞིང་སྦྱར་རོ། །ཡན་ལག་ནི་ང་ལྟ་བུ་ཞེས་པ་དང༌། ཚུལ་ཁྲིམས་དང་ལྡན་པ་ཞེས་སྨྲས་པ་དང༌། འཁྲིག་པའི་ཆོས་དེ་ལྟ་བུ་བྱས་ན་བསོད་ནམས་ཆེའོ་ཞེས་སྨྲས་པ་དང༌། བུད་མེད་ཀྱིས་དོན་གོ་བའོ། །དེ་དག་དང་ལྡན་ན་ལྷག་མར་འགྱུར་རོ། །དེ་དག་གཅིག་དང་མི་ལྡན་ན་སྦོམ་པོར་འགྱུར་རོ། །དགེ་སྦྱོང་དང༌། དགེ་སྦྱོང་མ་དང༌། དགེ་བསྙེན་པ་དང༌། དགེ་སློབ་མ་དང༌། དགེ་བསྙེན་མ་ལ་ནི་ཐམས་ཅད་ཀྱང་ཉེས་བྱས་སུ་འགྱུར་རོ། །ལས་དང་པོ་པ་ལ་ཉེས་པ་མེད་དོ། །ཉེས་པར་འགྱུར་མི་འགྱུར་གྱི་ལྕི་ཡང་གོང་མ་དང་འདྲའོ། །སྨྱན་བྱེད་པ་བཤད་པར་བྱ་སྟེ། གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་རི་དགས་དགྲའི་བུ་ནག་པོ་ཞེས་བྱ་བ་དེ་ལྟར་ཤེས་པས་བག་མ་ལེན་པ་དང་བག་མ་གཏོང་བའི་ཚེ་ཀུན་ཀྱང་འདི་ལ་དྲིས་ཏེ། ལུང་བསྟན་པ་བཞིན་དུ་བྱས་པས་བག་མ་བླངས་སོ་ཅོག་ཀུན་བཀྲ་ཤིས་ནས་ཀུན་གྱིས་དེ་ལ་ཟས་དང་འཚོ་བའི་ཡོ་བྱད་སྦྱིན་ནོ། །རི་དགས་དགྲའི་བུ་ནག་པོ་རབ་ཏུ་བྱུང་ནས་ཡང་སྔོན་གྱི་ལས་སྡིག་པ་སྨྱན་བྱེད་པ་ལ་ཞུགས་ཏེ། འཚོ་བའི་ཡོ་བྱད་སྦྱོར་བ་སོགས་པ་གཞན་གྱིས་སྦྱར་བས་ན། དྲུག་སྡེ་རྣམས་ཀྱིས་ཀྱང་དེའི་ཁེ་མཐོང་ནས་དྲུག་སྡེ་ཡང་སྨྱན་བྱེད་པ་ལ་ཞུགས་སོ། །དེ་ན་མུ་སྟེགས་ཅན་རྣམས་དགེ་སྦྱོང་ཤཱཀྱའི་བུ་དེ་
རྣམས་བསླབ་པ་བཟུང་ཡང་ཁྱིམ་པ་སྐྱེ་བོ་བཞིན་དུ་སྨྱན་བྱེད་ན། སྐྱེ་བོ་དང་བསམ་པ་དང་བྱེ་བྲག་ཐ་དད་ཅི་ཡོད་ཅེས་མི་སྙན་པ་འཛེར་ཏོ། །དེ་ལྟར་གྱུར་པ་དགེ་སློང་རྣམས་ཀྱིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དྲུག་སྡེ་རྣམས་བཀུག་སྟེ་རྨས་ན། བཙུན་པ་མད་དོ་ཞེས་གསོལ་ཏོ། །བཅོམ་ལྡན་འདས་ཀྱིས་བྱུང་བ་དེ་དང༌། གླེང་གཞི་དེ་དང༌། དེ་ལྟར་གྱུར་པ་དེའི་ཕྱིར་དགེ་སློང་གི་དགེ་འདུན་རྣམས་བསྡུས་ནས། ཡང་དགེ་སློང་གང་ཞེས་བྱ་བ་ལ་སོགས་པ་སྨོས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་རྣམས་ཏེ། གཞན་ཡང་དེ་དང་འདྲ་བའོ། །བུད་མེད་ལས་སྐྱེས་པའི་ཚིག་ཅེས་བྱ་བ་ནི་བུད་མེད་གང་ལ་སྐྱེས་པས་ཀུན་དུ་སྤྱད་པར་སེམས་པའོ། །སྐྱེས་པ་ལ་བུད་མེད་ཀྱི་ཚིག་ཅེས་བྱ་བ་ནི་གང་སྐྱེས་པ་ལ་བུད་མེད་ཡོངས་སུ་སེམས་པའོ། །ཆུང་མ་འམ་མཛའ་ན་མོ་ཞེས་བྱ་བ་ནི་ཆུང་མ་བདུན་དང་མཛའ་ན་མོ་བཅུའོ། །ཆུང་མ་བདུན་གང་ཞེ་ན། ཆུ་སྦྱིན་པའི་ཆུང་མ་དང༌། ནོར་གྱིས་ཉོས་པའི་ཆུང་མ་དང༌། རྒྱལ་མཚན་གྱིས་ཕྲོགས་པའི་ཆུང་མ་དང༌། དགའ་བས་གནས་པར་བྱ་བའི་ཆུང་མ་དང༌། བསྒོ་བས་གནས་པར་བྱ་བའི་ཆུང་མ་དང༌། མཉམ་དུ་འཚོ་བའི་ཆུང་མ་དང༌། དེ་སྐད་ཅིག་མའི་ཆུང་མའོ། །ཆུ་བྱིན་པའི་ཆུང་མ་གང་ཞེ་ན། སྐྱེས་པ་གང་ཕ་མས་ཆུ་བླུད་དེ་འདི་ནི་ཁྱོད་ཀྱི་ཆུང་མའོ་ཞེས་བསྒྲགས་ནས་དེ་ལ་གཞན་གྱིས་སྤྱད་དུ་དོགས་ནས་ཤིན་ཏུ་རྩེ་ཞིང་སྲུང་བའོ། །ཅི་ལྟར་ཆུས་ཉེས་པ་བཞིན་དུ་སླད་མ་དྲུག་པོ་རྣམས་ལ་ཡང་དེ་བཞིན་དུ་སྲུང་ཞིང་སྦ་ཐར་སྦྱར་རོ། །མཛའ་ན་མོ་བཅུ་གང་ཞེ་ན། ཕས་བསྲུངས་པ་དང༌། མས་བསྲུངས་པ་དང༌། མིང་པོས་བསྲུངས་པ་དང༌། ཕུ་ནུ་མོས་བསྲུངས་པ་དང༌། སྒྱུག་མོས་བསྲུངས་པ་དང༌། གྱོས་པོས་བསྲུངས་པ་དང༌། གཉེན་གྱིས་བསྲུངས་པ་དང་རིགས་ཀྱིས་བསྲུངས་པ་དང༌། རུས་ཀྱིས་བསྲུངས་པ་དང༌། འཁྲུག་པ་མེད་པ་དང་བཅུའོ། །མས་བསྲུངས་པ་གང་ཞེ་ན། བུད་མེད་གཞོན་ནུ་མ་ཁྱིམ་ཐབ་ཡུལ་གཞན་དུ་སོང་ངམ་དམག་ལ་སོང་ན། དེའི་ཆུང་མ་གཞོན་ནུ་མ་མི་གཞན་གྱིས་ཡོངས་སུ་སྤྱད་དུ་དོགས་ནས་ཤིན་
ཏུ་སྦ་ཞིང་བསྲུང་བའོ། །མཛའ་ན་མོ་གཞན་རྣམས་ཀྱང་དེ་བཞིན་དུ་སྦྱར་རོ། །སྨྱན་ཞེས་བྱ་བ་ནི་ཕྲིན་ནོ། །བྱེད་ཅེས་བྱ་བ་ནི་སྦྱོར་བའོ། །སྐད་ཅིག་པ་ཞེས་བྱ་བ་ནི་ཐད་ཅིག་པ་ཡང་རུང་ངོ༌། །དགེ་འདུན་ལྷག་མ་ཞེས་བྱ་བ་ནི་སྔ་མ་བཞིན་ནོ། །དགེ་སློང་བདག་ཉིད་ཀྱིས་བཟླུགས་ལ། བདག་ཉིད་ཀྱིས་ལན་བསྐྱལ་ན་ལྷག་མར་འགྱུར་རོ། །དེ་བཞིན་དུ་གཉིས་བདག་གིས། གཅིག་ཐན་གྱིས་སམ། གཅིག་བདག་གིས། གཉིས་ཐན་ཕྲིན་གྱིས་ཀྱང་རུང་སྟེ། ལྷག་མར་འགྱུར་རོ། །ལན་གསུམ་དུ་མ་བསྐྱལ་ལ། ལན་གཉིས་སུ་བླངས་པ་ནི་སྤོམ་པོར་འགྱུར་རེ། །དགེ་སློང་གིས་ཆུང་མ་དང་པོ་གསུམ་པ་ལས་འཐབས་མ་ཐག་སྟེ། འཐབས་ནས་ཅུང་ཟད་ཅིག་ལོན་ལ་རྩྭ་བཅད་པ་དང་རྡོ་གསུམ་བོར་བ་དང༌། ཆུང་མ་ཡིན་ནོ་ཞེས་མ་བསྒྲགས་པ་བསྡུམས་ན་ཉེས་བྱས་སུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་འཐབས་པར་ཡང་གྱུར། རྩྭ་བཅད་པ་ལྟ་བུ་དང༌། རྡོ་གསུམ་པོར་བ་ལྟ་བུ་དང༌། བརྩད་དེ་སྤངས་པ་དང༌། ཆུང་མ་མ་ཡིན་ནོ་ཞེས་བསྒྲགས་པ་སླར་བསྡུམས་ན་དགེ་འདུན་གྱི་ལྷག་མར་འགྱུར་རོ། །དགེ་སློང་གིས་དེ་ལས་གཞན་པ་བུད་མེད་བཅུ་བཞི་ལས་འཐབས་པར་ཡང་གྱུར། ཆུང་མ་མ་ཡིན་ནོ་ཞེས་བསྒྲགས་པ་ལས་སླར་བསྡུམས་ན་དགེ་འདུན་ལྷག་མར་འགྱུར་རོ། །ལྷག་མ་མཛའ་ན་མོ་བཅུ་འཐབས་པར་གྱུར་ནས་སླར་བསྡུམས་ན་དགེ་འདུན་གྱི་ལྷག་མར་འགྱུར་རོ། །དགེ་སློང་གིས་ཁྱེའུ་ཆུང་མ་བླངས་པའི་རིགས་ཤེའམ། བུ་མོ་འདི་བག་མར་ཅི་ཕྱིར་མི་བཏང་ཞེས་བྱས་ན་ཉེས་བྱས་སུ་འགྱུར་རོ། །སྨྱོན་པ་ལས་ཕྲིན་བླངས་ཏེ་རང་བཞིན་དུ་གནས་པ་ལ་བསྐྱལ་ཏམ། རང་བཞིན་དུ་གནས་པ་ལས་བླངས་ཏེ། སྨྱོན་པ་ལ་བསྐྱལ་ན་སྦོམ་པོར་འགྱུར་རོ། །དེ་བཞིན་དུ་སེམས་འཁྲུགས་པ་དང༌། ནད་ཀྱིས་གཟིར་བ་ལ་ཡང་ངོ༌། །དབང་པོ་ཡོད་པ་ལས་ཕྲིན་བླངས་ཏེ་དབང་པོ་མེད་པ་ལ་ཡང་ངམ། མི་དབང་བ་ལས་ཕྲིན་བླངས་ཏེ། དབང་པོ་ལ་ཡང་ཐམས་ཅད་ལ་སྦོམ་པོར་འགྱུར་རོ། །མི་མ་ཡིན་པ་ལས་ཕྲིན་བླངས་ཏེ། བུད་མེད་
ལ་ཡང་ངམ། བུད་མེད་ཤིན་དུ་གཞོན་ནུ་མའམ། བུད་མེད་མངལ་ན་གནས་པ་ལ་སྨྱན་བྱས་ན་ཐམས་ཅད་ཉེས་པ་སྦོམ་པོར་འགྱུར་རོ། །ལས་དང་པོ་པ་དང་སེམས་འཁྲུགས་པ་ལ་ལྟུང་བ་མེད་དོ། །ཡན་ལག་ནི་མི་ཡང་ཡིན་ལ། བུད་མེད་ལས་ཕྲིན་བླངས་པ་དང༌། སྐྱེས་པ་དབང་པོ་ཡོད་པ་ལ་བཟླུགས་པ་དང༌། དེའི་ལན་སླར་བསྐྱལ་བ་སྟེ། ལན་གསུམ་དུ་ཡང་བསྐྱལ་ལ། དངོས་པོ་གྲུབ་ན་ལྷག་མར་འགྱུར་རོ། །ཁང་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་རྣམས་ཡོན་བདག་གིས་གནས་ཁང་དུ་བརྩིགས་ཏེ་བྱིན་པ་དང༌། དགེ་སློང་དག་གིས་འདི་ནི་ཁང་པ་རིང་ཆེས། འདི་ནི་ཧ་ཅང་ཡང་ཐུང་འདི་ནི་ཀུན་དུ་གྲུམས་པ་གསོ་ཞིང་བཅོས་དཀའོ་ཞེས་དེ་དག་བོར་བ་ནས། ཁང་པ་བཅོས་ཤིང་གསར་དུ་ཁང་པ་གཞན་བརྩིགས་པ་དང༌། རྩྭ་ཤིང་དང་མི་བླས་ཁྱིམ་པ་རྣམས་ལ་སློང་བས་ན། ཁྱིམ་པ་དག་ཀྱང་འཕྱ་ནས། དགེ་སློང་ཡང་བྱ་བ་མང་བས་ལུང་དབོག་པ་དང༌། ཆོས་ཀླག་པ་དང༌། ཁ་དོན་བྱ་བ་དང༌། རྣལ་འབྱོར་ཡིད་ལ་བྱེད་པ་རྣམས་སྤངས་ཏེ་བར་ཆད་དུ་གྱུར་པས། ཁྱིམ་པ་དག་འཕྱ་བ་འོད་སྲུངས་ཆེན་པོས་ཐོས་ནས་འོད་སྲུངས་ཆེན་པོས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགེ་སློང་རྣམས་བཀུག་སྟེ། དེ་ལྟར་གྱུར་པ་བདེན་ནམ་ཞེས་རྨས་པ་དང༌། བཙུན་པ་མད་དོ་ཞེས་གསོལ་ནས། བཅོམ་ལྡན་འདས་ཀྱིས་མགུ་དཀའ་བ་ཆོག་མི་ཤེས་པ་ཞེས་རྣམ་གྲངས་དུ་མའི་སྒོ་ནས་སྨད་ནས་དགེ་སློང་གི་དགེ་འདུན་རྣམས་བསྡུས་ནས་འདུལ་བ་ལ་བསླབ་པའི་གནས་བཅས་སོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །བདག་གིས་བསླངས་ཞེས་བྱ་བ་ནི་ཤིང་དང་རྩྭ་དང་མིའི་བླས་སོ། །ཁང་པ་ཞེས་བྱ་བ་ནི་སྤྱོད་ལམ་བཞི་དང་ལྡན་པ་སྟེ། འཆག་པ་དང༌། འགྲེང་བ་དང༌། འདུག་པ་དང༌། ཉལ་བ་ཤོང་པའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །བདག་པོ་མེད་ཅེས་བྱ་བ་ནི་བདག་པོ་གཞན་མེད་དེ། བདག་གི་ཕྱིར་རྩིག་པའོ། །ཚང་བཞིན་དུ་བརྩིགས་ཤིང་ཞེས་བྱ་བ་ནི་ཁང་པ་
དེའི་ཚད་ནི་ནང་སྲིད་དུ་བདེ་བར་གཤེགས་པའི་མཐོ་བཅུ་གཉིས་ཏེ། བཅུ་གཉིས་ལ་མི་ཐ་མལ་པའི་ཁྲུ་བཅོ་བརྒྱད་དོ། །བདེ་བར་གཤེགས་པའི་མཐོ་གང་ལ་ཐ་མལ་པའི་ཁྲུ་ཕྱེད་དང་དོའོ། །ཞེང་དུ་བདེ་བར་གཤེགས་པའི་མཐོ་བདུན་ཞེས་བྱ་བ་ནི་མི་ཐ་མལ་བའི་ཁྲུ་ཕྱེད་དང་བཅུ་གཅིག་གོ །ནང་ཞེས་བྱ་བ་ནི་གལ་ཏེ་ལྷག་པར་བྱས་པའོ། །དགེ་སློང་དེ་ཞེས་བྱ་བ་ནི་ཁང་པ་བརྩིག་པར་འདོད་པའི་དགེ་སློང་སུ་ཡང་རུང་པའོ། །དགེ་སློང་དག་ཁྲིད་ཅིག་ཅེས་བྱ་བ་ནི་དེ་ན་དགེ་སློང་དག་སུ་ཡོད་པ་དག་ཁྲིད་པར་བྱའོ། །བདག་གི་མིག་གིས་མ་བརྟགས་ཀྱི་བར་དུ་དགེ་སློང་དག་མ་ཁྲིད་ཅིག །བདག་གིས་སྔར་བརྟག་པར་བྱ་བ་ནི་ས་གཞི་འདི་ན་སེམས་ཅན་སྤྲུལ་གདུག་པ་དང་སེམས་ཅན་ཤ་ཟན་དང༌། སྡིག་པ་དག་ཀྱང་མེད་པ་དང༌། ས་གཞི་རྒྱལ་པོའི་གཅེས་པ་དང༌། མཆོད་རྟེན་གྱི་གཞིར་དགོས་པ་དང༌། ལམ་ཀ་དང༌། ཁྱིམ་བདག་གི་ས་གཞི་འམ། མུ་སྟེགས་ཅན་གྱི་གཞི་འམ། དགེ་སློང་མའི་དབྱར་མོ་ཁང་ངམ། ཤིང་ཆེན་པོ་བཅད་དགོས་པའི་ས་གཞི་ཞིག་ཡིན་ན་རྩེད་དགོས་པ་དེར་ཡང་མ་གསོལ་ཅིག །ས་གཞི་དེ་ཉེ་འཁོར་ཁྲོན་པའམ། གཡང་སའམ། ལམ་སྲང་ལྟ་བུ་ཡོང་ན་དེ་ཡངས་པའི་གནས་མ་ཡིན་གྱི་མ་གསོལ་ཅིག །དེ་ལྟ་བུ་མི་རུང་བ་དང༌། རྩོད་པ་དང༌། མི་ཡངས་པ་མ་ཡིན་པའི་གནས་སུ་ཁང་པ་བརྩིག་པ་ཞེས་བྱ་སྟེ། དགེ་འདུན་ལ་གསོལ་བར་བྱའོ། །དེས་དགེ་འདུན་ལ་གསོལ་བ་དང་ལས་བྱས་ནས་དགེ་འདུན་རྣམས་ཀྱིས་ཀྱང་དགེ་སློང་དེ་ལ་ཡིད་ཆེས་པར་མ་བྱེད་པར་ཡང་ན་དགེ་འདུན་ཐམས་ཅད་དེར་དེང་ལ་ལྟོས་ཤིག །ཡང་ན་དགེ་སློང་གཅིག་ཅིག་སྐོས་ཤིག །དགེ་སློང་དེས་ཀྱང་དམིགས་ཀྱིས་ལེགས་པར་བརྟགས་ནས་རྩོད་པ་ཡང་མེད། དོག་པ་ཡང་མེད། མི་རུང་བ་ཡང་མ་ཡིན་ན། གདོད་གསོལ་བ་དང་ཞུ་བའི་ལས་ཀྱིས་དགེ་འདུན་ལ་གསོལ་ནས་གདོང་ཁང་པ་བརྩིག་པར་བྱའོ། །དགེ་སློང་ཁྲིད་པའི་དགེ་སློང་དག་གིས་ཞེས་བྱ་བ་ནི་དགེ་སློང་དེ་ན་སུ་འཁོད་པའོ། །ས་གཞི་ཞེས་བྱ་བ་ནི་ཁང་པ་བརྩིག་
པའོ། །ལྟོས་ཤིག་ཅེས་བྱ་བ་ནི་སོ་སོར་བརྟགས་པའོ། །རུང་བ་ཞེས་བྱ་བ་ནི་སྦྲུལ་དང་སྡིག་པ་ལ་སོགས་པ་མེད་པའོ། །མི་རྩོད་ཅེས་བྱ་བ་ནི་འཐབ་མོ་དང་མཚང་འདྲུ་བ་ལ་སོགས་པ་དང་བྲལ་བའོ། །ཡངས་པ་ཞེས་བྱ་བ་ནི་དེའི་འཁོར་ཡུག་འདོམ་གང་ཚུན་ཆད་ཁྲོན་པ་ལ་སོགས་པ་མེད་པའོ། །གལ་ཏེ་མི་རུང་བར་དགེ་སློང་དེས་ཞེས་བྱ་བ་ནི་སྦྲུལ་དང་སྡིག་པ་ལ་སོགས་པ་གནས་པའོ། །རྩོད་པ་ཞེས་བྱ་བ་ནི་འཐབ་པ་དང་མཚང་འདྲུ་བ་དང་འཁྲུག་པ་དང་བཅས་པའོ། །མི་ཡངས་ཞེས་བྱ་བ་ནི་གཙུག་ལག་ཁང་གི་འདོམ་གང་ཁོ་ར་ཁོར་ཡུག་ཉེ་བར་སྤྱོད་དུ་མེད་པའོ། །བདག་གིས་བསླངས་པ་བདག་པོ་མེད་པ་ཞེས་བྱ་བ་ནི། བདག་པོ་གཞན་མེད་པའོ། །གཞི་བསྟན་པའི་ཕྱིར། དགེ་སློང་དག་མ་ཁྲིད་དམ་ཞེས་བྱ་བ་ནི་གཞི་རྟོག་པའི་དགེ་སློང་མ་ཁྲིད་པའོ། ཁྲིད་པ་དག་ལ་མ་བསྟན་ཏམ་ཞེས་བྱ་བ་ནི། དགེ་སློང་འགས་གནས་བརྟགས་པ་དེ་དགེ་འདུན་ལ་མ་བཟླུགས་མ་གསོལ་བའོ། །ཚད་ལས་འདས་ཞེས་བྱ་བ་ནི་ཚད་གསུངས་པ་ལས་ལྷག་པར་བྱས་པའོ། །དགེ་འདུན་ལྷག་མ་ཞེས་བྱ་བ་ནི་དགེ་འདུན་ལ་རག་ལུས་པས་ན་དགེ་འདུན་ལྷག་མ་ཞེས་བཤད་དོ། །ཉེས་པར་འགྱུར་བ་གང་ཞེ་ན། མི་རུང་བའི་གནས་སུ་བརྩིགས་ན་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པར་བརྩིགས་ན་ཉེས་པ་སྦོམ་པོར་འགྱུར་རོ། །མི་ཡངས་པར་བརྩིགས་ན་ཉེས་པར་སྦོམ་པོར་འགྱུར་རོ། །ལུང་མེད་པར་བརྩིགས་ན་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བརྩིགས་ན་ཉེས་པ་སྦོམ་པོར་འགྱུར་རོ། །ཐམས་ཅད་དང་འགལ་བར་བརྩིགས་ན་དགེ་འདུན་ལྷག་མར་འགྱུར་རོ། །དགེ་སློང་གིས་དགེ་སློང་གཞན་ཞིག་ལ་སྐྱོན་རྣམ་པ་ལྔ་པོ་མེད་པས་རྩིགས་ཤིག་ཅེས་བསྒོ་བ་ལས་ཐམས་ཅད་དང་འགལ་བར་བརྩིགས་ན་རྩིག་རྩིག་པ་ལ་ཉེས་པར་འགྱུར་རོ། །ཐམས་ཅད་དང་འགལ་བར་བརྩིགས་པ་ལས་མ་ཟིན་པ་དང༌། ཕྱེད་ཅམ་བགྱིས་ནས་བོར་བ་ནི་ཉེས་པ་སྦོམ་པོར་འགྱུར་རོ། །བསླབ་པ་བྱིན་པ་ལ་ཡང་དགེ་འདུན་
ལྷག་མར་འགྱུར་རོ། །ཡན་ལག་ནི་མི་ཡངས་པ་དང༌། རུང་བ་མ་ཡིན་པ་དང༌། རྩོད་པ་ཅན་དང༌། ལུང་མེད་པས་མ་ཡིན་པ་དང༌། ཚད་ལས་འདས་ན་ལྷག་མར་འགྱུར་རོ། །གཙུག་ལག་ཁང་གི་གླེང་གཞི་ནི་སངས་རྒྱས་བཅོམ་ལྡན་འདས་ཡུལ་ཀཽ་ཤཱམ་བཱི་དགྲ་ཟིན་གྱི་ཀུན་དགའི་ར་བ་ན་བཞུགས་སོ། །དེའི་ཚེ་དགེ་སློང་དྲུག་སྡེ་པོ་རྣམས་གཞན་གྱིས་བརྩིགས་པའི་གཙུག་ལག་ཁང་ན་འཁོད་པ་བཞིན་དུ་དགའ་བོ་བསྙེན་དགའ་བོ་ལྟོས། འདི་ནི་གོགས། འདི་ནི་རལ། འདི་རྩིག་པ་མ་ལེགས་སོ་ཞེས་གཞན་གྱིས་བརྩིགས་པའི་གཙུག་ལག་ཁང་ལ་འཕྱས་འདོགས་པ་ལ་ཞུགས་པ་དང༌། དེ་ན་དགེ་སློང་རྣམས་ཀྱིས་ཁྱོད་ཅག་ཉིད་ཀྱིས་ཕ་གུ་གཅིག་བསླང་ཡང་མི་ནུས་ན། གཞན་གྱིས་བརྩིགས་པ་ལ་འཕྱར་ཅི་ཡོད། དྲུག་སྡེ་པོ་ནང་བགྲོས་པ། ལྷུང་བཟེད་ནག་པོ་ཅན་དེ་དག་བདག་ཅག་ལ་ཤིན་ཏུ་བརྙས་ཀྱི། དེ་དག་གིས་སྔོན་མ་བརྩིགས་པའི་ཁང་པ་གཅིག་བདག་ཅག་གིས་རྩིགས་ཤིག །བདག་ཅག་ཀུན་གྱིས་བརྩིགས་ན་ནི་ཁོ་ཡང་འཕྱ་ན་མ་ལེགས་ཀྱི། བདག་ཅག་གི་ནང་ན་གང་ཁབ་ཀྱི་རྗེས་སུ་གཉའ་ཤིང་ཆུད་པར་ནུས་པ་གཅིག་གིས་བྱའོ་ཞེས་ནས་དེ་དག་གིས་ཚེ་དང་ལྡན་པ་མོས་པ་ཅན་དད་པར་བྱས་སོ། །མོས་པ་ཅན་གྱིས་བསམས་པ། གཞན་ནི་མེད་ན་གྲོང་ཁྱེར་འདི་ན་བྲམ་ཟེ་ཕྱུག་པོ་སེར་སྣ་ཅན་བྱ་རོག་ལ་ཡང་གཏོར་མ་མི་སྟེར་བ་མ་དད་ཅིང་སུའི་ཡོན་བདག་ཏུ་ཡང་མ་བྱས་པ་ཞིག་ཡོད་པ་དེ་ལ་འབྲིད་དོ་སྙམ་དུ་བསམས་ནས་མོས་པ་ཅན་གྱིས་གྲོང་ཁྱེར་གཞན་ནས་བསླངས་པའི་ཕྱེ་ཞིག་ཁྱེར་ཏེ། བྲམ་ཟེ་དེའི་སྒོར་ཕྱིན་པ་དང༌། སྒོ་བསམ་སྟེར་ཏོ། །དེའི་སྒོ་བ་ཡང་རོལ་མོ་ཞིག་ལ་གཡེང་བའི་བར་དུ་ནང་དུ་སོང་ནས་བྲམ་ཟེ་ལ་ཕྱེ་འཚག་ཏུ་བཅོལ་བ་དང༌། དེས་བྲན་མོ་ཕྱེ་འཚག་ཏུ་བཅུག་པ་དང༌། བདག་གི་དྲུང་དུ་ཚོགས་ཤིག་ཅེས་བྱས་སོ། །དེ་དྲུང་ན་འཚག་པའི་ཚེ་ཡང་དེ་ལ་རབ་ཏུ་རྟོག་ནས། བྲམ་ཟེས་ཁྱེད་ཅི་ལ་རྟོག་ཅེས་དྲིས་ན། དེ་ལ་སྲོག་ཆགས་ཡོད་དམ་མེད་རྟོག་གོ །ཡོད་ན་ཅི་བྱ་ཞེས་སྨྲས་པ་དང༌། དེ་ལས་གླེང་ནས་སྲོག་བཅད་དུ་མི་རུང་བ་དགེ་བ་བཅུ་བཤད་པས་བྲམ་ཟེ་དད་པར་བྱས་སོ། །དེ་ནས་བྲམ་ཟེ་དེས་དགེ་སློང་དེ་ལ་ཟས་དང་གོས་ཀྱིས་བསྟབས་ན་དེས་ཕྱིན་ཆད་སྒོ་བཅད་དུ་དོགས་ནས་ལེན་དུ་མ་བཏུབ་པོ། །དེ་ནས་དགེ་སློང་དེས་བསོད་ནམས་སུ་བྱ་བའི་ལེགས་པ་བཤད་པ་དང༌། དེས་
འོ་ན་ངས་ཅི་བྱ་བའི་རིགས་ཞེས་བྱས་པ་དང༌། དགེ་འདུན་གྱི་ཕྱིར་གཙུག་ལག་ཁང་བརྩིག་པའི་རིགས་སོ་ཞེས་བྱས་སོ། །འོ་ན་རྒྱུ་ནི་བདག་གིས་སྦྱོར་ནས་གཞི་མེད་དོ་ཞེས་བྱས་པ་དང་ས་གཞི་ངས་རྒྱལ་པོ་ལ་བསླང་ངོ༌། །ཞལ་ཏ་སུས་བགྱི་ཞེས་དྲིས་ན་ངས་བྱའོ་ཞེས་ཁས་བླངས་སོ། །དེ་ནས་རྒྱལ་པོ་ལ་ས་གཞི་གསོལ་བ་དང༌། རྒྱལ་པོའི་ཕོ་བྲང་འཁོར་མ་གཏོགས་པ་གཞན་གར་དགའ་བར་བརྩིགས་ཤིག་ཅེས་བྱས་སོ། །དེ་ནས་ཀཽ་ཤཱམྦཱི་དང༌། དགྲ་ཟིན་གྱི་བར་ན་བྲམ་ཟེའི་བུ་ལྔ་བརྒྱ་ཙམ་ཡོད་པ་རྟག་པར་སྨྲང་ཀློག་པའི་གྲིབ་ཤིང་ཆེན་པོ་གཅིག་ཡོད་དེ། བྲམ་ཟེའི་བུ་དེ་དག་རྟག་ཏུ་དྲུག་སྡེ་ཡན་མན་འགྲོ་བ་ལ་འཕྱ་བས་ན། དེ་དག་ལ་ཀུ་རེ་བྱ་བའི་ཕྱིར་མཚན་མོ་གྲིབ་ཤིང་ཆེན་པོ་བཅད་དེ་མི་མངོན་པར་བྱས་ནས། དེ་ཉིན་གཅིག་གིས་ལྷ་ཁང་ཟིན་པར་བྱས་ཏེ། སྐར་ཁུང་མ་བཏོད་པ་དེའི་ཕྱི་དེ་ཉིན་ཆར་ཆེན་པོ་བབ་སྟེ། ཁང་པ་འཇིག་པར་འགྱུར་བས་ན་བྲམ་ཟེ་མི་དགའ་ཞིང་ཁྲག་གིས་སྐྱུགས་པར་བཅོམ་ལྡན་འདས་ཀྱིས་མཁྱེན་ནས་དེ་མཚན་གཅིག་ལྷའི་འཁོར་དང་སྲོད་ཀྱི་བར་དུ་ཆོས་བཤད་ནས། ཕྱི་དེ་ཉིན་བྲམ་ཟེ་ཕས་འོངས་པ་ལ་མདུན་ནས་བསུ་སྟེ། མདང་དེ་ལྟར་ཁང་པའི་ནང་དུ་ཆོས་བཤད་དོ་ཞེས་བཀའ་སྩལ་པས་ན། དེ་ཡང་དགའ་བར་གྱུར་ཏོ། །གྲིབ་ཤིང་ཆེན་པོ་བཅད་པས་ན་བྲམ་ཟེའི་བུ་རྣམས་དགེ་སྦྱོང་ཤཱཀྱའི་བུ་རྣམས་མི་སྲུན་པའི་ཚིག་པ་ཅན་གཞན་ལ་གནོད་པར་བྱེད་པ་ཞེས་མི་སྙན་པར་འཛེར་པ་དགེ་སློང་དག་གིས་སྙན་དུ་གསོལ་ཏོ། །བཅོམ་ལྡན་འདས་ཀྱིས་དགེ་སློང་དྲུག་སྡེ་པོ་རྣམས་ལ་རུང་བ་མ་ཡིན་མཐུན་པ་མ་ཡིན་ཞེས་རྣམ་གྲངས་དུ་མའི་སྒོ་ནས་སྨད་ནས། དགེ་སློང་གི་དགེ་འདུན་རྣམས་བསྡུས་ནས་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་ཕོ་རྣམས་ཏེ་གཞན་ཡང་དེ་དང་འདྲ་བའོ། །གཙུག་ལག་ཁང་ཞེས་བྱ་བ་ནི་སྤྱོད་ལམ་བཞི་དང་ལྡན་པའོ། །བདག་པོ་ཡོད་ཅེས་བྱ་བ་ནི་སྐྱེས་པ་དང་བུད་མེད་དང༌། མ་ནིང་དང༌། མཚན་གཉིས་རྣམས་སོ། །དགེ་འདུན་གྱི་ཕྱིར་ཞེས་བྱ་བ་ནི་དེ་བཞིན་གཤེགས་པའི་དགེ་འདུན་ནོ། །དགེ་སློང་འདི་ཞེས་བྱ་བ་ནི་ཆོས་འདི་དང་ལྡན་པའོ། །དགེ་སློང་དག་ཁྲིད་ཅིག་ཅེས་བྱ་བ་ནི་དེ་ན་དགེ་སློང་སུ་ཡོད་པའོ། །བདག་ཉིད་ཀྱིས་མ་བརྟགས་ཀྱི་བར་དུ་དགེ་སློང་དག་སྔར་མ་ཁྲིད་ཅིག་བདག་གིས་
བརྟགས་ཏེ་གནས་རུང་བ་དང༌། ཡངས་པ་དང་མི་རྩོད་པ་ཡིན་ན་དགེ་འདུན་ལ་གསོལ་ནས་དགེ་སློང་གཅིག་གིས་བལྟ་བར་བྱའོ། །དགེ་འདུན་རྣམས་ཀྱིས་རབ་ཏུ་བརྟགས་ནས་གསོལ་བ་དང་ཞུ་བའི་ལས་ཀྱིས་དགེ་འདུན་ལ་གསོལ་ནས་གཞི་རུང་བ་དང༌། མི་རྩོད་པ་དང༌། ལུང་བྱིན་པ་ཡིན་ན་ཐེ་ཚོམ་མེད་པ་ཡིན་གྱིས་རྩིགས་ཤིག །དགེ་འདུན་ལྷག་མ་ཞེས་བྱ་བ་ནི་ལྟུང་བ་དེ་དགེ་འདུན་ལ་རག་ལས་པས་ན་དགེ་འདུན་ལྷག་མའོ་ཞེས་སོ། །ཉེས་པ་ཇི་ལྟ་བུ་ཞེ་ན། གནས་མི་རུང་བར་བརྩིགས་ན་ཉེས་པ་སྦོམ་པོར་འགྱུར་རོ། །རྩོད་པ་ཅན་དུ་བརྩིགས་ན་ཉེས་པ་སྦོམ་པོར་འགྱུར་རོ། །མི་ཡངས་པར་བརྩིགས་ན་ཉེས་པ་སྦོམ་པོར་འགྱུར་རོ། །ལུང་མེད་པར་བརྩིགས་ན་ཉེས་པ་སྦོམ་པོར་འགྱུར་རོ། །ཐམས་ཅད་དང་འགལ་བར་བརྩིགས་ན་དེ་འདུན་ལྷག་མར་འགྱུར་རོ། །དགེ་སློང་གིས་གཞན་ལ་རྩིག་ཏུ་བཅོལ་ན་ཡང་གཉིས་ཀས་དགའ་བར་བརྩིགས་ན་གཉིས་ཀ་ལ་ཉེས་པ་སྦོམ་པོའོ། །དགེ་སློང་ལ་ཇི་ལྟར་ཉེས་པར་འགྱུར་བ་བསླབ་པ་བྱིན་པ་དང༌། དགེ་སློང་མ་ལ་ཡང་དེ་བཞིན་ནོ། །ལས་དང་པོ་ལ་ཡང་ཉེས་པ་མེད་དོ། །རུང་བ་མ་ཡིན་པ་དང༌། ཡངས་པ་དང༌། རྩོད་པའི་སྒྲས་ནི་ཁང་པ་གོང་མ་བཞིན་ནོ། །རྩ་བ་མེད་པའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་ན་གྲོང་ཁྱེར་སྡིག་པ་ཅན་ཞེས་བྱ་བ་ན། གྱད་སྡེ་རྒྱལ་ཞེས་བྱ་བ་ཞིག་ཡོད་དེ། །ཡང་རིགས་མཉམ་པ་ལས་ཆུང་མ་བླངས་ནས་ཡོངས་སུ་སྤྱད་པ་ལས་བུ་གཅིག་ཅིག་བཙས་ཏེ། ཁྱེའུ་དེ་ཡང་མལ་སྟན་ཆེན་པོའི་སྟིང་དུ་བཤང་གཅི་དག་མི་བྱེད་པས་ན་ནོར་དང་འདྲའོ་ཞེས་གྲགས་ཏེ། དེའི་ཕྱིར་ཡང་མིང་གྱད་བུ་ནོར་དུ་བཏགས་སོ། །གྱད་བུ་ནོར་ཡང་སྔོན་དགེ་བའི་རྩ་བས་བསྐུལ་བས་ན་འདི་སྙམ་དུ་སེམས་ཏེ། ལྷ་དང་མིར་བཅས་པ་དགེ་སྦྱོང་དང་བྲམ་ཟེར་བཅས་པའི་འཇིག་རྟེན་ན་རྐང་གཅིག་པ་དང༌། རྐང་གཉིས་པ་དང༌། རྐང་བཞིའི་ནང་ན། སྨན་དང་སྔགས་དང་རིགས་པའི་ཚིག་འཛིན་པ་གང་གིས་བདག་འཁོར་བའི་འབྲོག་དགོན་པ་དེ་ནས་རབ་ཏུ་ཐར་བར་བྱེད་སྙམ་སེམས་སོ། །དེས་མུ་སྟེགས་ཀྱི་མཁན་པོ་དྲུག་ལ་ལུང་མནོས་ན། དེ་དག་ལ་མི་མགུ་ནས་རབ་ཏུ་སེམས་ཤིང་འདུག་པ་དང༌། བར་སྐབས་འདིར་བཅོམ་ལྡན་འདས་ཀྱིས་ཀྱང་མི་མཁྱེན་པའམ་མི་གཟིགས་པ་
མེད་པས་གྱད་བུ་ནོར་ཡང་སྔོན་གྱི་སངས་རྒྱས་ལ་བྱ་བ་བྱས་ལ་རྒྱུད་ཡོངས་སུ་སྨིན་སྤྱོད་ལམ་གྱིས་འདུལ་བར་གཟིགས་ནས་དགེ་སློང་རྟ་ཐུལ་གྱིས་གྱད་བུ་ནོར་རབ་ཏུ་ཕྱུང་ཤིག་པར་བཀའ་སྩལ་ནས། དེས་ཀྱང་རབ་ཏུ་ཕྱུང་ངོ༌། །གྱད་བུ་ནོར་གྱིས་ཁ་དོན་བསླབ་པས་ནི་སྡེ་སྣོད་གསུམ་ལོབས། བསམ་གཏན་བྱས་པས་ནི་གོང་ནས་གོང་དུ་འཕར་བའི་ཁྱད་པར་ཐོབ་བོ། །དེ་ནས་གྱད་བུ་ནོར་བཅོམ་ལྡན་འདས་ལ་ཕྱག་ཚལ་དུ་བཅོམ་ལྡན་འདས་ཀྱི་གན་དུ་ཕྱིན་ཏོ། །བཀའ་སྩལ་པ། གྱད་བུ་ནོར་བདེ་བར་འོངས་མཚུར་ཤོག །ཁྱོད་སུས་ཕྱིན་ཏོ་ཞེས་བཀའ་སྩལ་ཏོ། །དེའི་ཚེ་ན་རྒྱལ་པོའི་ཁབ་ན་དགེ་འདུན་གྱི་གནས་ཁང་དང་མལ་སྟན་དག་མི་མཐུན་པར་འགྱེད་དེ། མདོ་སྡེ་འཛིན་པ་དང་འདུལ་བ་འཛིན་པར། མདོ་སྡེ་འཛིན་པ་དང་ནི་མ་མོ་འཛིན་པར། མ་མོ་འཛིན་པ་དང་ནི་དགེ་སློང་བསམ་གཏན་པར། དེ་ལྟར་ནང་མི་མཐུན་པར་མལ་སྟན་དང་གནས་ཁང་བགོས་པས་ན། གཅིག་ལ་གཅིག་སེམས་མི་སྲུང་ཞིང་མི་མཛེས་པས་ན་དགེ་བ་མི་འཕེལ་ཏེ་མི་བདེ་བར་གནས་པ་ལས། བཅོམ་ལྡན་འདས་ཀྱིས་ཚེ་དང་ལྡན་པ་གྱད་བུ་ནོར་མལ་སྟན་འདིང་བར་བསྐོས་ཏེ། གྱད་བུ་ནོར་གྱིས་མདོ་སྡེ་འཛིན་པ་དང་མདོ་སྡེ་འཛིན་པར། འདུལ་བ་འཛིན་པ་དང་འདུལ་བ་འཛིན་པར། ཆོས་སྨྲ་བ་དང་ཆོས་སྨྲ་བར། བསམ་གཏན་པ་དང་བསམ་གཏན་པར། རྒན་རིམས་སུ་ཐོབ་རྒྱལ་མེད་པར་གནས་ཁང་དང་མཐུན་མཐུན་དུ་བགོས་པས་ན། དགེ་སློང་རྣམས་དགེ་བའི་ཆོས་མངོན་པར་འཕེལ་བ་ནི་ཆུ་ཅན་གྱི་ཨུཏྤ་ལ་བཞིན་ནོ། །གློ་བུར་དུ་མཚན་མོ་ལྷག་པ་རྣམས་ལ་ཡང་རྫུ་འཕྲུལ་གྱིས་རང་གི་མཛུབ་མོ་ལས་མེ་འབར་བར་བྱས་ནས་མལ་སྟན་མཚན་མོ་བཏིང་བས་ན། དགེ་སློང་དེ་དག་ཀྱང་དེ་ལྟར་འདི་འདྲ་བའི་སྟོན་པ་དང་མཚུངས་པས་བདག་ཅག་གིས་མལ་སྟན་བཏིང་བས་ན་བདག་ཅག་ཉལ་བའི་མི་རིགས་ཞེས་ནམ་གྱི་ཆ་སྟོད་དང་ཆ་སྨད་ལ་བརྩོན་པར་དགེ་བར་བྱེད་དོ། །སླད་ཀྱིས་དགེ་སློང་དྲུག་སྡེ་པོ་རྣམས་ཀྱིས་ཁྱིམ་བདག་དད་པས་མགྲོན་དུ་གཉེར་བའི་ཚེ། ཁྱིམ་བདག་ཕྱུག་པོ་དང་ཟས་ཞིམ་པོ་དག་གམ་ཐ་ཤལ་དག་ཏུ་བསྲེས་པས་གྱད་བུ་ནོར་ཟས་འགྱེད་པར་ཡང་བསྐོས་སོ། །གྱད་བུ་ནོར་གྱིས་ཟས་རྣམ་པ་གསུམ་དུ་བསྐོས་ཏེ་ཟས་ཞིམ་རབ་དང༌། བར་མ་དང་ཐ་མའོ། །དགེ་སློང་རྒན་རིམས་ཀྱིས་དང་པོ་ནི་དེར་ཟས་
ཞིམ་པོར་བསྐོ། ཕྱི་དེ་ཉིན་ནི་འབྲིང་པོར་བསྐོའོ། །དེའི་ཡང་ཕྱི་དེ་ཉིན་ནི་ཐར་མར་རོ། །དེའི་ཚེ་ལྷོའི་རི་བོ་ཞེས་བྱ་བ་ནས་དགེ་སློང་མཛའ་བོ་དང་ས་ཅན་ཞེས་བྱ་བ་གཉིས་ལྗོངས་རྒྱུ་ཞིང་རྒྱལ་པོའི་ཁབ་ཏུ་ཕྱིན་ཏོ། །དེ་གཉིས་ཀྱིས་དགེ་འདུན་གྱི་ཟས་འགྱེད་པ་དང༌། མལ་སྟན་འགྱེད་པ་སུ་ཡིན་ཞེས་སྨྲས་པ་དང༌། གྱད་བུ་ནོར་ཡིན་ནོ། །དེ་ནས་གྱད་བུ་ནོར་གྱི་གན་དུ་སོང་ནས་མལ་སྟན་དང་ཟས་ལ་སྐོས་ཤིག་ཅེས་སྨྲས་པ་དང༌། དེའི་ཚེ་མལ་སྟན་དང་ཟས་བསྐོས་ཟིན་པས་ནང་གི་ངན་པ་ཐ་མར་མལ་སྟན་ཐོབ་པོ། །བྲམ་ཟེ་ཕྱུག་པོ་ཞིག་གིས་དེར་ང་ཟས་ལ་བསྐོས་པ་དང་བྲམ་ཟེ་དེ་ཡང་བུ་ཤི་སྟེ་བྲེལ་བ་དང༌། བདག་གིས་དེར་སུ་འོང་ཞེས་དྲིས་ན་མཛའ་བོ་དང་ས་ཅན་འོང་ཞེས་ཐོས་ནས་གནས་ངན་ལེན་དུ་སྤྱོད་པས་ཞལ་ཏ་དང་རིམ་གྲོ་ཆེར་མ་བྱས་ཏེ་ཟས་ངན་པ་ཞིག་བྱིན་ནོ། །དེའི་ཕྱི་དེ་ཉིན་ཟས་འབྲིང་པོར་བསྐོས་པ་དང༌། དེ་དག་གིས་ཀྱང་ཞལ་ཏ་མ་བྱས་ཏེ་ཟས་ངན་པ་བྱིན་ནོ། །དེའི་ཡང་ཕྱི་དེ་ཉིན་ཟས་ངན་པ་བསྐོས་པས་ཟས་ངན་པ་ཐོབ་པོ། །དེ་ནས་དེ་གཉིས་ཀྱིས་བསམས་པ། ཀྱེ་མའོ་བག་ཅག་ལ་གྱད་བུ་ནོར་གྱིས་ཟས་ངན་པ་དང་གོས་ངན་པས་ལན་དུ་མར་མནར་ཏེ། ལུས་ཀྱང་དམས་པར་གྱུར་ན། བདག་ཅག་གཉིས་ཀྱིས་དེ་ལ་གནོད་པ་ཞིག་བྱའོ་སྙམ་ནས། དེའི་མཛའ་མོ་སྲིང་མོ་ཞེས་བྱ་བ་ལ་སྲིང་མོ་ཁྱོད་གྱད་བུ་ནོར་དང་ཉལ་གྱིས་གྱད་བུ་ནོར་ནི་ཕས་ཕམ་པ་བྱུང་ངོ་ཞེས་བཅོམ་ལྡན་འདས་ལ་གསོལ་ཅིག་དང་ངེད་ཀྱིས་ཀྱང་ཆེ་བཞི་བྱའོ། །དགེ་སློང་མ་དེས་ཀྱང་བཅོམ་ལྡན་འདས་ལ་གསོལ་ཏོ། །དེ་ནས་བཅོམ་ལྡན་འདས་ཀྱིས་གྱད་བུ་ནོར་ལ་བཀའ་སྩལ་པ། གྱད་བུ་ནོར་ཁྱོད་ཀྱིས་ཐོས་སམ་དྲན་ནམ། བཙུན་པ་བདག་གིས་མི་དྲན་ནམ། ཁྱོད་ཀྱིས་ཉེས་སམ་བཙུན་པ་བདག་གིས་ནོངས་སམ་མ་ནོངས་པ་བཅོམ་ལྡན་འདས་ཀྱིས་མཁྱེན་ཏོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། གྱད་བུ་ནོར་ནི་ཉེས་པ་མེད་ཅིང་དྲན་པ་དང་ལྡན་པར་ཟུང་ཤིག །དགེ་སློང་མ་མཛའ་མོ་ནི་བདག་རང་གིས་ཁས་ལེན་པ་སྨ་ཕོབ་ཤིག །དགེ་སློང་མཛའ་བོ་དང་ས་ཅན་གཉིས་ཤིན་ཏུ་ལེགས་པར་སྨྲོས་ལ། གང་དུ་མཐོང་ཇི་ལྟར་མཐོང༌། ཁྱོད་གཉིས་དེར་ཇི་ལ་དོང་དོང་བ་ལས་མཐོང་ཞེས་ཞིབ་ཏུ་སྨྲོས་ཤིག །དེ་ནས་དགེ་སློང་རྣམས་ཀྱིས་བཀའ་
སྩལ་པ་བཞིན་དུ་ཞིབ་ཏུ་རྨས་པ་དང༌། མཛའ་བོ་དང་ས་ཅན་གཉིས་ཀྱི་མཆིང་ནས་ཚེ་དང་ལྡན་པ་གྱད་བུ་ནོར་གྱིས་མི་ཚངས་པར་སྤྱོད་ཅིང་ཕས་ཕམ་པར་གྱུར་པ་ནི་མ་མཆིས་ཀྱི་གདུགས་གསུམ་གྱི་བར་དུ་བདག་ལ་ཟས་ཀྱིས་མནར་བས་ན་བདག་ཅག་ཞེ་སྡང་གི་དབང་གིས་སྨྲས་སོ་ཞེས་བྱས་པ་དང༌། དེ་ལྟར་གྱུར་པ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་མཛའ་བོ་དང་ས་ཅན་གཉིས་བཀུག་ནས། སྐྱེས་བུ་གཏི་མུག་ཁྱེད་གཉིས་ཀྱིས་ཟས་ཆུང་ངུའི་ཕྱིར་ཤེས་བཞིན་དུ་བརྫུན་དུ་སྨྲ་ཞེས་རྣམ་གྲངས་དུ་མའི་སྒོ་ནས་སྨད་ནས་ཡང་དགེ་སློང་གང་ཞེས་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང་ས་ཅན་གཉིས་ཏེ། གཞན་ཡང་དེ་དང་འདྲའོ། །ཞེ་སྡང་ཅན་ཞེས་བྱ་བ་ནི་ཁྲོས་པའོ། །ཞེ་སྡང་གིས་གནོད་པར་བྱེད་ཅེས་བྱ་བ་ནི་ཡི་མ་རངས་ནས་གནོད་པར་བྱེད་པའོ། །དགེ་སློང་གཙང་མ་ཞེས་བྱ་བ་ནི་གྱད་བུ་ནོར་ཏེ། གཞན་ཡང་དེ་དང་འདྲའོ། །ཉེས་པ་མེད་ཅེས་བྱ་བ་ནི་རྩ་བའི་ཉེས་པ་མེད་པས་ན་དངོས་པོ་མེད་པའོ། །རྩ་བ་མེད་ཅེས་བྱ་བ་ཡང་གསུམ་སྟེ། མཐོང་བའི་རྩ་བ་དང༌། དོགས་པའི་རྩ་བ་དང༌། ཐོས་པའི་རྩ་བ་གསུམ་མེད་པའོ། །ཕས་ཕམ་པ་ཞེས་བྱ་བ་ནི་ཕས་ཕམ་པ་བཞི་པོ་གང་ཡང་རུང་བའོ། །སྐུར་ཞེས་བྱ་བ་ནི་ཀླང་བཏབ་པའོ། །ཅི་ནས་འདི་ཚངས་པར་སྤྱོད་པ་དང་དབྲལ་ལོ་སྙམ་ཞེས་བྱ་བ་ནི་ཅི་ནས་དགེ་སྦྱོང་གི་དངོས་པོ་དང་དབྲལ་ལོ་སྙམ་པའོ། །དེ་ཡང་དུས་གཞན་ཞིག་ན་ཞེས་བྱ་བ་ནི་ཕྱི་ཞིག་ནའོ། །དྲིས་ཀྱང་རུང་ཞེས་བྱ་བ་ནི་གཞན་གྱིས་སོ། །མ་དྲིས་ཀྱང་རུང་ཞེས་བྱ་བ་ནི་བདག་ཉིད་ཀྱིས་འགྱོད་དེ་མཐོལ་བའོ། །རྩོད་པ་དེ་ཡང་རྩ་བ་མེད་པར་གྱུར་ཞེས་བྱ་བ་ནི་རྩོད་པའི་དངོས་པོ་མེད་པར་གྱུར་པའོ། །རྩོད་པ་རྣམ་པ་བཞི་སྟེ། རྩོད་པས་རྩོད་པ་དང༌། མི་འདོམས་པས་རྩོད་པ་དང༌། ལྟུང་བ་ལ་རྩོད་པ་དང༌། བྱ་བ་ལ་རྩོད་པའོ། །དགེ་སློང་ཡང་ཞེ་སྡང་ལ་གནས་པ་ཞེས་བྱ་བ་ནི་བདག་གིས་སྐུར་བ་གདབ་པར་འདོད་པའོ། །ཁྲོས་ཏེ་སྨྲས་སོ་ཞེས་བྱ་བ་ནི་སྐུར་བ་འདེབས་པ་ཡིན་ནོ། །དགེ་འདུན་ལྷག་མ་ཞེས་བྱ་བ་ནི་དགེ་འདུན་ལ་རག་ལས་ཤིང་ཉེས་པ་ལྷག་མ་དང་བཅས་པའི་ཕྱིར་རོ། །དེ་ལ་ཉེས་པ་གང་ཞེ་ན། ཉེས་པ་བཅུས་ལྷག་མར་འགྱུར་བ་དང༌། ཉེས་པ་ལྔས་ལྷག་མ་མེད་པ་
འགྱུར་རོ། །གང་ཟག་གཙང་མ་ལ་སྐུར་ནའོ། །མ་མཐོང་མ་ཐོས་མི་དོགས་པར་འདུ་ཤེས་དང་བློ་གྲོས་སྦས་ནས་མཐོང་ངོ་ཐོས་སོ་དོགས་སོ་ཞེས་སྨྲས་ན་ལྷག་མ་རེ་རེར་འགྱུར་རོ། །ཐོས་དོགས་ལ་དེ་ཡང་བརྗེད་པར་འགྱུར་ལ། བཟོད་པ་དང་བློ་གྲོས་དང་འདུ་ཤེས་སྦས་ནས་མ་བརྗེད་དོ་ཞེས་སྨྲས་ན་ལྷག་མ་རེ་རེར་འགྱུར་རོ། །ཐོས་ནས་ཡིད་ཆེས་ཏེ་ངས་མཐོང་ངོ་ཞེ་འམ་ཐོས་ནས་ཡིད་མ་ཆེས་པར་མཐོང་ངོ་ཞེས་སྨྲས་སམ་ཐོས་ལ་མི་དོགས་པར་ངས་མཐོང་ངོ་ཞེའམ། ཐོས་ལ་དོགས་པར་ངས་མཐོང་ངོ་ཞེའམ། དོགས་ལ་དོགས་བཞིན་དུ་ངས་མཐོང་ངོ་ཞེས་སྨྲས་ན་ཚིག་རེ་རེ་ཞིང་ལྷག་མ་རེ་རེར་འགྱུར་རོ། །རྣམ་པ་ལྔས་ལྟུང་བ་མེད་པ་གང་ཞེ་ན། མཐོང་བ་དང་ཐོས་པ་དང༌། དོགས་པ་དང༌། དོགས་པ་ཡང་མེད་ལ། འདུ་ཤེས་ཀྱང་མ་སྦས་པའོ། །ངས་དོགས་ཏེ་དེ་ཡང་བརྗེད་ཐོས་ཏེ་དེ་ཡང་བརྗེད་ཅེས་སྨྲས་ན་ལྟུང་བ་མེད་དོ། །གང་ཟག་ཉེས་པ་བྱུང་བ་དྲིལ་བརྡུངས་པ་བཞིན་དུ། གུན་གྱིས་ཤེས་པ་དང༌། རི་མོ་བྲིས་པ་དང༌། བདག་གིས་ཤེས་པ་བཞིན་དུ་འཇིག་རྟེན་ཀུན་གྱིས་ཤེས་པ་ནི་ཉེས་པ་མེད་དོ། །དགེ་སློང་གིས་དགེ་སློང་ལ་ཕྲིན་དང་ཕྲིན་ཡིག་དང་ལག་བརྡ་དང་གཅིག་ནས་གཅིག་དུ་བརྒྱུད་དེ་སྐུར་ན་སྦོམ་པོར་འགྱུར་རོ། །དགེ་སློང་གིས་དགེ་སློང་སྨྱོན་པ་དང་སེམས་འཁྲུགས་པ་དང༌། ནད་ཀྱིས་གཟིར་བ་དང༌། གླན་པ་དང༌། ལྐུགས་པ་དང༌། འོན་པ་དང༌། ར་རོ་བ་ལ་སྐུར་ན་ཉེས་པ་སྦོམ་པོར་འགྱུར་རོ། །མཐའ་འཁོབ་པའི་སྐད་དམ་དབེན་པ་ལ་མི་དབེན་པའི་འདུ་ཤེས་སམ། སྔགས་དང་སྨན་གྱིས་ལུས་མི་སྣང་བར་བྱས་ཏེ་སྨྲས་སམ། ལུས་ཀྱིས་དམིགས་ཏེ་སྐུར་ན་ཉེས་པ་སྦོམ་པོར་འགྱུར་རོ། །དགེ་སྦྱོང་དང་མུ་སྟེགས་ཅན་དང༌། ཁྱིམ་པ་སྐྱེ་བོ་དང་བྲམ་ཟེ་ལ་སྐུར་ན་ཐམས་ཅད་ཀྱང་ཉེས་བྱས་སུ་འགྱུར་རོ། །མི་མ་ཡིན་པ་དང༌། མ་ནིང་དང༌། དགེ་སློང་མ་སུན་ཕྱུང་བ་དང༌། ཕ་མ་དང༌། དགྲ་བཅོམ་པ་བསད་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། མུ་སྟེགས་ཅན་དང༌། མུ་སྟེགས་ཅན་དུ་སོང་བ་དང༌། རྐུན་གནས་སུ་གྱུར་པ་དང་སྔར་འཁྲུགས་པ་ལ་སྐུར་ན་ཉེས་པ་སྦོམ་པོར་འགྱུར་རོ། །དགེ་སློང་གིས་དགེ་འདུན་ལ་སྐུར་པ་དང༌། དགེ་འདུན་བྱེ་བ་དང༌། མི་གནས་པ་དང༌། རྗེས་སུ་ཕྱོགས་པ་དང༌། བསླབ་པ་བྱིན་པ་ལ་སྐུར་ན་ཐམས་ཅད་ཀྱང་ལྷག་མར་འགྱུར་རོ། །ལྟུང་བ་འོག་མ་ལ་
ཡང་དེ་བཞིན་དུ་སྦྱར་རོ། །བག་ཙམ་གྱི་གླིང་གཞི་ནི་སངས་རྒྱས་བཅོམ་ལྡན་འདས་རྒྱལ་པོའི་ཁབ་འོང་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་རྒྱལ་པོའི་ཁབ་ཀྱི་བྱ་རྒོད་སྤུངས་པའི་རི་ལ་རྫིང་བུ་རྡོས་བསྐོར་ཞེས་བྱ་བ་ཞིག་ཡོད་དེ། དེའི་འགྲམ་ཡན་མན་གྱད་བུ་ནོར་ཉིན་པར་དེར་གནས་ཤིང་བསྒོམ་མོ། །དེའི་ཚེ་དགེ་སློང་མ་ཨུཏྤ་ལའི་མདོག་དགེ་བའི་བཤེས་གཉེན་འཕགས་པ་མཽད་གལ་གྱི་བུས་རབ་ཏུ་ཕུང་ངོ༌། །ཚེ་དང་ལྡན་མ་ཨུཏྤ་ལའི་མདོག་སངས་རྒྱས་དང༌། འཕགས་པ་མཽད་གལ་གྱི་བུ་དང༌། འཕགས་པ་གྱད་བུ་ནོར་ལ་སོགས་པ་ལ་རྟག་ཏུ་བསྙེན་བཀུར་བྱེད་ཅིང་ཕྱག་འཚལ་དུ་འགྲོའོ། །དེའི་ཉིན་པར་འཕགས་པ་མཽད་གལ་ལ་སོགས་པ་ལ་ཕྱག་བྱས་ནས། ཚེ་དང་ལྡན་པ་གྱད་བུ་ནོར་ལ་ཡང་ཕྱག་འཚལ་ཏེ་ཆོས་ཉན་པའི་ཕྱིར་མདུན་ན་འདུག་གོ །དེའི་ཚེ་ན་དགེ་སློང་མཛའ་བོ་དང་ས་ཅན་གཉིས་ཀྱང་རྟག་ཏུ་ཀླན་ཀ་ཚོལ་བ་ནན་ཏན་བྱེད་པས་ནང་པར་དེ་གཉིས་ཕྱག་དར་ཁྲོད་པ་མང་ཞིག་བཏུས་ནས་རྫིང་བུ་རྡོས་བསྐོར་དུ་འཁྲུར་ལྷགས་པ་དང༌། དེའི་ཚེ་རི་དགས་ཁྱུ་མང་པོ་ཞིག་རྫིང་བུ་དེར་ཆུ་འཐུང་དུ་ལྷགས་ནས། ཆུ་འཐུངས་ཟིན་པའི་འོག་ཏུ་རི་དགས་རྣམས་གཅིག་ལ་གཅིག་ཞོན་ཞིང་མི་ཚངས་པར་སྤྱོད་པ་དང་མཛའ་བོ་དང་ས་ཅན་གཉིས་ཀྱིས་མཐོང་ནས་གཅིག་ལ་གཅིག་སྨྲས་པ། དགེ་སློང་ཨུཏྤ་ལའི་མདོག་དང་གྱད་བུ་ནོར་གཉིས་མི་ཚངས་པར་སྤྱོད་ཀྱི། དགེ་སློང་དག་ལ་བསྙད་དུ་འདོང་ཞེས་བྱས་པ་དང༌། ཚེ་དང་ལྡན་པ་ཁར་ཉིན་ཡང་བདག་ཅག་ཨང་པོར་དོ་སྤངས་ནས། ད་ཡང་སྤང་བའི་ལས་བྱེད་འདོད་དམ་ཞེས་ས་ཅན་གྱིས་སྨྲས་པ་དང༌། དེས་ཁར་ཉིན་ནིའུ་བུ་ཅག་བརྫུན་གྱི། ད་ནི་བག་ཙམ་གྱི་ཆ་ལས་བླངས་པས་རུང་གིས་དགེ་སློང་དག་ལ་བསྙད་དུ་འདོང་ངོ་ཞེས་བྱས་ནས། དེ་དག་དགེ་སློང་དག་ལ་གྱད་བུ་ནོར་དང་དགེ་སློང་མ་ཨུཏྤ་ལའི་མདོག་མི་ཚངས་པར་སྤྱོད་དོ་ཞེས་སྨྲས་པ་དང༌། དགེ་སློང་དག་གིས་ཚེ་དང་ལྡན་པ་ཁྱོད་གཉིས་ལྷ་དང་མི་ནི་ཤིན་ཏུ་སྤངས་ཀྱི། བྱོལ་སོང་ངང་སེམས་ཅན་དམྱལ་བ་དང༌། ཡི་དགས་ནི་མངོན་པར་བསྙེན་ཏོ་ཞེས་བྱ་བ་དང༌། དགེ་སློང་དག་གིས་ཡང་གོང་མ་བཞིན་དུ་ཅིའི་ཕྱིར་མཐོང༌། གང་དུ་མཐོང་ཁྱེད་ཅག་ཅི་ལ་དོང་དོང་སྟེ་མཐོང་ཞེས་སྨྲས་པ་དང༌། དེ་གཉིས་ཀྱིས་ཅི་ལྟར་གྱུར་པ་ཞིབ་ཏུ་སྨྲས་པ་དང༌། དོན་ཉུང་བའི་
དགེ་སློང་རྣམས་འཕྱ་སྟེ། དགེ་སློང་གཙང་མ་ཉེས་པ་མེད་པ་ལ་གཞན་གྱི་ཆ་མ་ཡིན་པ་ལ་ཕས་ཕམ་པར་སྐུར་ཅེས་སྨོད་ཅིང་མི་སྙན་པར་འཛེར་ཏོ། །དེ་ལྟར་གྱུར་པ་སྙན་དུ་བདས་ནས། ལེགས་པ་རྣམ་པ་བཅུ་ལ་གཟིགས་ནས། ཡང་དགེ་སློང་གང་ཞེས་འདུལ་བ་ལ་བསླབ་པའི་གནས་བཅས་ཏེ་རྩ་བའི་ཚིག་རྣམས་སོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང་ས་ཅན་ཏེ་གཞན་ཡང་དེ་དང་འདྲའོ། །ཞེ་སྡང་ཅན་ཞེས་བྱ་བ་ནི་ཞེ་སྡང་གིས་ཀུན་ནས་བསྐོར་བའོ། །ཁྲོས་ནས་གནོད་པར་བྱེད་ཅེས་བྱ་བ་ནི་ཡི་མ་རངས་ཏེ། འཁྲུགས་པ་མ་བཏང་བའོ། །དགེ་སློང་གཙང་མ་ཞེས་བྱ་བ་ནི་གྱད་བུ་ནོར་རམ་གཞན་ཡང་དེ་དང་འདྲའོ། །མ་ཉས་ཞེས་བྱ་བ་ནི་ཉེས་པ་དེའི་དངོས་པོ་མེད་པའོ། །གཞན་གྱི་ཆ་མ་ཡིན་ཞེས་བྱ་བ་གཞན་གྱི་མྱ་ངན་ལས་འདས་པ་སྟེ། དེའི་ཆ་མ་ཡིན་པ་ནི་བཞི་སྟེ། ཕས་ཕམ་པའི་ཆོས་སོ་ཕས་ཕམ་པ་ཞེས་བྱ་བ་ནི་བཞི་པོ་ལས་གང་གིས་ཀྱང་རུང་ངོ༌། །ཆོས་ཞེས་བྱ་བ་ནི་རང་གི་མཚན་ཉིད་འཛིན་པས་སོ། །སྐུར་ཞེས་བྱ་བ་ནི་ཀླང་བཏབ་བའོ། །དེ་ཅི་ནས་ཀྱང་ཚངས་པར་སྤྱོད་པ་དང་དབྲལ་ལོ་སྙམ་པ་ནི་དེ་ཅི་ནས་ཀྱང་དགེ་སློང་གི་དངོས་པོ་དང་དབྲལ་ལོ་སྙམ་དུ་སེམས་པའོ། །དུས་གཞན་ཞིག་ན་ཞེས་བྱ་བ་ནི་དུས་ཕྱི་ཞིག་ནའོ། །དྲིས་ཀྱང་རུང་ཞེས་བྱ་བ་ནི་གཞན་གྱིས་སོ། །མ་དྲིས་ཀྱང་རུང་ཞེས་བྱ་བ་ནི་བདག་ཉིད་ཀྱིས་ཏེ། རབ་ཏུ་འགྱོད་ཅིང་རྣམ་པར་འགྱེད་པའོ། །གཞན་གྱི་ཆ་མ་ཡིན་ཞེས་བྱ་བ་ནི་མྱ་ངན་ལས་འདས་པ་ལས་གཞན་པ་ཕས་ཕམ་པར་སྨྲས་པའོ། །རྩོད་པ་ནི་རྣམ་པ་བཞི་སྟེ། རྣམ་པར་རྩོད་པས་རྩོད་པ་དང༌། མི་འདོམས་པས་རྩོད་པ་དང༌། ལྟུང་བས་རྩོད་པ་དང་བྱ་བས་རྩོད་པའོ། །གཞན་གྱི་ཆ་མ་ཡིན་པས་རྩོད་པ་ཡང་བག་ཙམ་གྱི་ཆ་ལས་འགའ་ཞིག་ཅེས་བྱ་བ་ནི་རི་དགས་ས་ཕོ་མོས་འཁྲིག་པའི་ཆ་ལས་བླངས་པའོ། །ཆོས་ཞེས་བྱ་བ་ནི་ཆོས་མ་ཡིན་པར་ཆོས་ཀྱི་སྒྲར་གསུངས་སོ། །བླངས་པ་ཡིན་ཞེས་བྱ་བ་ནི་གཟུང་བ་ཡིན་ནོ། །དགེ་སློང་ཡང་ཞེ་སྡང་ལ་གནས་པ་ཞེས་བྱ་བ་ནི་ཀླང་གདབ་པར་འདོད་པའོ། །ཁྲོས་ཏེ་སྨྲས་སོ་ཞེས་བྱ་བ་ནི་ཀླང་འདེབས་པའོ། །དགེ་འདུན་གྱི་ལྷག་མ་ཞེས་བྱ་བ་ནི་སྔ་མ་བཞིན་ན། །ཉེས་པ་གང་ཞེ་ན། དགེ་སློང་གིས་དགེ་སློང་ལ་ཕས་ཕམ་པའི་ལྟུང་བ་བྱུང་བ་མཐོང་ནས་དེས་དེ་ལ་ལྟུང་བ་མ་ཡིན་ནོ་སྙམ་དུ་བལྟས་ལ་འདུ་
ཤེས་དང་བློ་གྲོས་སྦས་ནས་ཕས་ཕམ་པ་བྱུང་བ་མཐོང་ངོ་ཞེས་སྨྲས་ན་ལྷག་མར་འགྱུར་རོ། །དགེ་སློང་གིས་དག་སློང་ལ་ཕས་ཕམ་པ་བྱུང་བ་མཐོང་ན་དེས་དགེ་འདུན་གྱི་ལྷག་མའོ་སྙམ་དུ་བལྟས་ལ་འདུ་ཤེས་དང་བཟོད་པ་སྦས་ན་ཕས་ཕམ་པའི་ལྟུང་བ་བྱུང་ངོ་ཞེས་སྨྲས་ན་ལྷག་མར་འགྱུར་རོ། །དེ་བཞིན་དུ་ལྟུང་བ་རིགས་ལྔ་ལ་ཡང་སྦྱར་རོ། །དགེ་འདུན་གྱི་ལྷག་མ་མཐོང་བ་དང༌། སྤངས་པ་དང༌། ལྟུང་བ་དང༌། སོ་སོར་བཤགས་པ་དང༌། ཉེས་བྱས་བྱུང་བ་མཐོང་བ་ལ་ངེས་འདུ་ཤེས་སྦས་ན་བློ་གྲོས་སྦས་ནས་ཕས་ཕམ་པ་བྱུང་ངོ་ཞེས་བྱ་བ་སྨྲས་ན་ཐམས་ཅད་དུ་ལྷག་མར་འགྱུར་བ་དེ་རེ་རེར་སྦྱོར་ཅིག །ཀུན་གྱིས་ཤེས་པ་དང༌། རི་མོ་བྲིས་པ་འདྲ་བ་དང༌། ལས་དང་པོ་པ་ལ་ཉེས་པ་མེད་དོ། །དགེ་འདུན་གྱི་དབྱེན་གྱི་གླེང་གཞི་ནི་སངས་རྒྱས་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལན་ད་ཀ་གནས་པ་ན་བཞུགས་སོ། །དེའི་ཚེ་དགེ་སློང་ལྷ་སྦྱིན་དང༌། དེའི་གྲོགས་རྗེས་སུ་ཕྱོགས་པ་དགེ་སློང་ཀོ་ཀ་ལི་ཀ་དང༌། ཁཎྜ་དྲ་བ་བྱ་དང༌། ཀ་ཌ་མོ་ར་ཀ་ཏི་ཥྱ་དང༌། རྒྱ་མཚོས་བྱིན་ལ་སོགས་པ་དགེ་འདུན་འདུམ་པ་དབྱེ་བ་ལ་ཞུགས་ནས་གསོལ་པ་དང་ཞུ་བའི་ལས་ཀྱིས་ལན་གསུམ་གྱི་བར་དུ་བཟློག་ཀྱང་མ་བཏུབ་ནས། དེ་བཞིན་གཤེགས་པའི་བཀའ་བཅག་པས་ཉོན་མོངས་པས་ན་དགེ་འདུན་གྱི་ལྷག་མ་བཅུ་པ་དང་བཅུ་གཅིག་པ་བཅས་པའོ། །དེའི་ཚེ་རྒྱལ་པོའི་ཁབ་ན་མུ་གེ་ཆེན་པོ་བྱུང་ནས། ཁ་ཟས་རབ་ཏུ་དཀོན་ཏེ་རྙེད་པར་དཀའ་ནས་དགེ་སློང་རྫུ་འཕྲུལ་ཐོབ་པ་རྣམས་གྱིས་འཛམ་བུའི་གླིང་ནས་ཤིང་འཛམ་བུའི་འབྲུ་དང་སྐྱུ་རུ་རའི་འབྲས་བུ་ལ་སོགས་ལེན། དགེ་སློང་ཁ་ཅིག་གིས་བྱང་གི་སྒྲ་མི་སྙན་གྱི་གླིང་ནས་མ་བཏབ་མ་རྨོས་པའི་འབྲས་ལེན། ཁ་ཅིག་རྒྱལ་ཆེན་བཞི་དང་སུམ་ཅུ་རྩ་གསུམ་དུ་དོང་ནས་ལྷའི་ཟས་ཀྱིས་ལྟུང་བཀང་སྟེ་ཁྱེར་ཏེ་འོངས་ནས་བདག་ཀྱང་ཟ་དགེ་སློང་གཞན་རྣམས་ལ་ཡང་སྦྱིན་ནོ། །དེ་ནས་ལྷ་སྦྱིན་གྱིས་བསམས་པ། ད་ལྟར་ཁ་ཟས་དཀོན་ཞིང་སྡུག་བསྔལ་ཆེ་ན་བདག་གིས་ཀྱང་རྫུ་འཕྲུལ་མངོན་པར་བསྒྲུབས་ལ་བདག་ཀྱང་ཟས་གཞན་ལ་ཡང་སྦྱིན་ནོ་སྙམ་ནས་བཅོམ་ལྡན་འདས་ལ་རྫུ་འཕྲུལ་གྱི་ལམ་ཞིག་དྲིའི་སྙམ་དུ་བསམས་པ་དང༌། བཅོམ་ལྡན་འདས་ཀྱིས་ལྷ་སྦྱིན་ལ་རྫུ་འཕྲུལ་བསྟན་ན་དེ་ལྟ་བུའི་སྡིག་པའི་འདོད་
ཆེན་སྐྱེད་པར་མཁྱེན་ནས་ཕུང་པོ་ལྔ་ལ་རྟོག་ཏུ་བཅུག་ནས་རྫུ་འཕྲུལ་མ་བསྟན་ཏོ། །དེ་བཞིན་དུ་གནས་བརྟན་ལྔ་བརྒྱ་པོ་ལ་དྲིས་པ་དང༌། སེམས་ཀྱིས་བརྟགས་ནས་རྫུ་འཕྲུལ་མ་བསྟན་ཏོ། དེ་ནས་འོད་སྲུངས་སྟོབས་བཅུ་ལ་དྲིས་པ་དང༌། དེས་རྫུ་འཕྲུལ་གྱི་ལམ་བསྟན་ཏེ། ལྷ་སྦྱིན་གྱིས་རྣལ་འབྱོར་ལ་བརྩོན་པར་གནས་པས་རྫུ་འཕྲུལ་མངོན་པར་ཐོབ་སྟེ། ལུས་སྣ་ཚོགས་སུ་བསྒྱུར་ནས་ནམ་མཁའ་ལ་ནི་བྱ་བཞིན། ཆུ་ལ་ནི་ཉ་བཞིན་དུ་རྒྱལ་པོ་མ་སྐྱེས་དགྲ་ཡང་མགུ་བར་བྱས་ཏེ། དེའི་མཆིལ་མ་འཐུངས་ནས་མ་སྐྱེས་དགྲས་ཀྱང་ལྷ་སྦྱིན་གྱི་འཚོ་བ་ཡང་སྦྱར་རོ། །དེ་ནས་ལྷ་སྦྱིན་གྱིས་བཅོམ་ལྡན་འདས་ནི་རྒས་ཐུག་སྟེ། འཁོར་རྣམ་བཞི་ལ་སྟོན་ཀྱང་མི་ནུས་ལ་འོ་བརྒྱལ་གྱིས་འཁོར་རྣམ་བཞི་བདག་ལ་གཏད་པར་གསོལ་ན། བཀའ་སྩལ་པ། ངས་ཤཱ་རིའི་བུ་དང་མཽད་གལ་གྱི་བུ་ལ་ཡང་མ་གཏད་ན་སྐྱེས་བུ་བླུན་པོ་ཁྱོད་ལ་ཅི་སྨོས་ཞེས་མ་གནང་ངོ༌། །དེ་ནས་ལྷ་སྦྱིན་གྱིས་དགེ་སློང་གྲོགས་ཀ་ཌ་མོ་ར་ཀ་ལ་སོགས་པ་ལྔ་པོ་ལ་ཁེ་མོ་ཚུར་ཤོག །དགེ་སྦྱོང་གཽ་ཏ་མ་འདུག་བཞིན་དུ་འཁོར་ཉན་ཐོས་རྣམས་འཁྲུག་པར་བྱའོ། །འུ་བུ་ཅག་འདས་པའི་འོག་ཏུ་ཕྱོགས་ཕྱོགས་སུ་གྲགས་པར་འགྱུར་རོ། །ཞེས་བགྲོས་ནས། གནས་བརྟན་དག་ནི་ལོངས་སྤྱོད་ཀྱིས་ཁ་དྲངས། གཞན་ནི་ལོངས་སྤྱོད་དང་བསླབ་པས་ཁ་དྲངས་ནས། དགེ་སློང་འཁོར་ལྔ་བརྒྱ་ཁ་དྲངས་སོ། །བསླབ་པ་ལྔ་བཅས་ཏེ། འོ་མ་མི་བཏུང་བ་དང༌། ཤ་མི་བཟའ་བ་དང༌། ལན་ཚྭ་མི་བཟའ་བ་དང༌། སྐྱེས་བུའི་མཐུ་རྩལ་ལ་གནོད་པས་རས་ཁ་ཚར་བཅས་པ་མི་གོན་པ་དང༌། བྱིན་པའི་ཆོས་ལོངས་སྤྱོད་བཀག་པས་དགོན་པར་མི་གནས་སོ་ཞེས་བྱ་བ་བཅས་སོ། །དེ་ལྟར་གྱུར་པ་དགེ་སློང་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་ལྷ་སྦྱིན་བཀུག་ནས་ལྷ་སྦྱིན་དེ་ལྟར་བྱེད་པ་བདེན་ནམ་ཞེས་སྨྲས་པ་དང༌། མད་དོ་ཞེས་གསོལ་ཏོ། །དེ་ལྟར་གྱུར་པ་དེའི་ཕྱིར་འདུལ་བ་བསླབ་པའི་གནས་བཅས་ཏེ། ཡང་དགེ་སློང་གང་ཞེས་བྱ་བ་ནི་རྩ་བའི་ཚིག་རྣམས་སོ། །དེ་ནས་བཅོམ་ལྡན་འདས་ཀྱིས་དགེ་སློང་རྣམས་ལ་བཀའ་སྩལ་པ། ལྷ་སྦྱིན་དང་རྗེས་སུ་ཕྱོགས་པའི་དགེ་སློང་དང་གཞན་ཡང་འདི་འདྲ་བའི་ཚིག་བཞམས་ཏེ་བསྒོ་བར་བྱའོ། །དེ་སྟེ་ཡང་གཏོང་དུ་ཡང་མ་བཏུབ་ན་གསོལ་བ་དང་བཞིའི་ལས་ཀྱིས་ལན་གཉིས་ལན་གསུམ་
དུ་བསྒོ་བར་བྱའོ། །ཡང་དགེ་སློང་གང་ཞེས་བྱ་བ་ནི་ལྷ་སྦྱིན་ཏེ་གཞན་ཡང་དེ་དང་འདྲའོ། །མཐུན་པ་ཞེས་བྱ་བ་ནི་རྣམ་པ་དྲུག་སྟེ། ཆ་ལུགས་དང༌། ལས་དང༌། ཚུལ་ཁྲིམས་དང༌། ལྟ་བ་དང༌། འཚོ་བ་དང༌། སྤྱོད་ལམ་མཐུན་པ་དེ་ལྟ་བུ་དྲུག་ཅེས་བྱའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ། །དབྱེན་བྱེད་ཅེས་བྱ་བ་ནི་སྟོན་པ་དང་ལམ་གཞན་དུ་གཟུང་ཅིང་རྣམ་པ་གཉིས་སུ་འབྱེད་པའོ། །དེའི་ཕྱིར་ཞུགས་ཞེས་བྱ་བ་ནི་རྩོད་པར་ཞུགས་པ་སྟེ། ཚུལ་ཁྲིམས་སམ་གསོལ་པ་བྱེད་པའི། །དབྱེ་བའི་ཕྱིར་ཡང་ཞེས་བྱ་བ་ནི་ཟས་ལ་སོགས་པ་བྱིན་པ་དང༌། གྲོགས་པོ་ལ་སོགས་པའོ་།རྩོད་ཅེས་བྱ་བ་ནི་འཁྲུག་པའི་རྩོད་པའོ། །དགེ་སློང་རྣམས་ཞེས་བྱ་བ་ནི་ལས་མ་བྱས་པར་བཞམས་ཏེ་བསྒོ་ཞིང་སླར་བཟློག་པར་བྱའོ། །ཡང་དག་པར་བཟུང་སྟེ་ཞེས་བྱ་བ་ནི་སེམས་ཀྱིས་སོ། །རབ་ཏུ་འཛིན་ཅེས་བྱ་བ་ནི་མངོན་པར་ཆགས་པས་ན་མི་འགྱུར་བའོ། །མཉམ་དུ་ཞེས་བྱ་བ་ནི་ཆོས་དང་ཟང་ཟིང་གི་ལོངས་སྤྱོད་ལ་མཚུངས་པ་འམ། ཕན་ཚུན་དད་པ་ལ་སོགས་པས་སྦྱིན་པ་ལ་མཉམ་དུ་འཚོ་བའོ། །ཀུན་དུ་དགའ་ཞེས་བྱ་བ་ནི་དགེ་བའི་ཚོགས་འཕེལ་བར་དགའ་བའམ། ཏིང་ངེ་འཛིན་བསྒྲུབ་པ་ལ་དགའ་བའོ། །རྩོད་པ་ཞེས་བྱ་བ་ནི་ལྟ་བ་ལོག་པར་གྱུར་པ་ལ་སྤང་བར་བྱའོ། །རྩེ་གཅིག་ཅེས་བྱ་བ་ནི་སེམས་གཞན་དུ་མི་འགྱུར་བར་ཐུབ་པར་བྱའོ། །འདོན་ཅེས་བྱ་བ་ནི་སོ་སོར་ཐར་པའི་མདོ་འདོན་པ་ཐ་དད་དུ་མི་འབྱེད་པས་ནི་གཅིག་པའོ། །ཆུ་དང་འོ་མ་གཅིག་ཏུ་འདེས་ཞེས་བྱ་བ་ནི་གཅིག་ལ་གཅིག་རིམ་གྲོ་བྱེད་ཅིང་སྟོན་པའི་ཕྱིར་རོ། །སྟོན་པའི་བསྟན་པ་རྒྱས་པར་བྱ་བའི་ཕྱིར་ཞེས་བྱ་བ་ནི་གཞན་གྱིས་འགྲན་པར་མི་བྱེད་པས་ན། བཅོམ་ལྡན་འདས་ཀྱིས་གསུང་རབ་བཤད་ཅིང་སྟོན་ཏམ་བཤད་ཅིང་ཕྱེ་ན་རྒྱས་པར་འགྱུར་རོ་ཞེའོ། །དེ་ལྟར་གསུང་རབ་རྒྱས་དང་སློབ་མའི་འཁོར་དགེ་འདུན་རྣམས་ཚེ་འདི་ལ་བདེ་བར་གནས་པར་གྱིས་ཤིག་པའོ། །དེ་ཡང་ཇི་ལྟར་བདེ་ཞེ་ན། ལུས་ནི་བདེ་བའོ། །སེམས་ནི་རེག་པའོ། །བཞམས་ཏེ་བསྒོ་བའི་ཚེ་མ་མཉན་ན་ཉེས་བྱས་སུ་འགྱུར་རོ། །གསོལ་པ་དང་ཞུ་བའི་ལས་ཀྱིས་བསྒོ་སྟེ་ལྡོག་ཏུ་མ་བཏུབ་ན་ཉེས་པ་སྦོམ་པོ་གསུམ་དང་དགེ་འདུན་གྱི་ལྷག་མ་གཅིག་གོ །ལན་གཉིས་ལས་གསུམ་ཞེས་
བྱ་བ་ནི་ཧ་ཅང་ཉུང་ན་ཡང་གཡེངས་པ་ཁ་ཅིག་གིས་མི་གོ་ལ་ཧ་ཅང་མང་ན་ཡང་རིང་དུ་ཐོགས་པའི་ཕྱིར་རོ། །ཡང་དག་པར་བསྒོ་བ་ཞེས་བྱ་བ་ནི་དགེ་བ་ལ་གཞུག་པར་བྱ་བའོ། །ཡང་དག་པར་བསྟན་ཞེས་བྱ་བ་ནི་མི་དགེ་བ་ལས་བཟློག་པར་བྱའོ། །འཁོར་འགྱེད་པར་བསམས་ནས་གཞན་གྱི་འཁོར་ཁ་དྲངས་ན་ཉེས་པ་སྦོམ་པོར་འགྱུར་རོ། །གལ་ཏེ་དགེ་འདུན་འདུས་ནས་ཆོས་བཞིན་དུ་མ་བྱས་ན་སྨྲ་བ་རྫོགས་ཀྱང་ཉེས་པ་མེད་དོ། །ཆོས་བཞིན་དུ་བྱས་ཀྱང་ཚོགས་ན་ལྟུང་བ་མེད་དོ། །འདུས་ཀྱང་ཆོས་ཀྱི་གཟུགས་བརྙན་གྱིས་བསྒོ་ན་ཡང་ཉེས་པ་མེད་དོ། །དགེ་འདུན་ཡང་ཚོགས་ལ་སྟོན་པའི་བསྟན་པ་ཇི་ལྟ་བ་དང༌། འདུལ་བ་ཇི་ལྟ་བ་བཞིན་དུ་བསྒོ་ན་དགེ་འདུན་ལྷག་མར་འགྱུར་རོ། །ཉེས་པ་རབ་ཏུ་མ་བཤགས་མ་མཐོལ་བར་དགེ་འདུན་གྱི་ནང་དུ་འཇུག་ཅིང་གནས་ན་ཐམས་ཅད་དུ་ཉེས་བྱས་སུ་འགྱུར་རོ། །རྗེས་སུ་ཕྱོགས་པའི་གླེང་གཞི་ནི་གོང་མ་དང་གཅིག་གོ །དེ་ནས་བཅོམ་ལྡན་འདས་གདན་དེ་ཉིད་ལ་བཞུགས་བཞིན་དུ་རྗེས་སུ་ཕྱོགས་པའི་བསླབ་པ་བཅའ་བར་དགོངས་ནས་དགེ་སློང་རྣམས་ལ་བཀའ་སྩལ་པ། དགེ་སློང་དག་དགེ་འདུན་གྱི་བྱ་བ་ཅུང་ཟད་ཅིག་ཡོད་ཀྱི་སྐད་ཅིག་སྡོད་ཅིག་ཅེས་བཀའ་སྩལ་པ། བཅོམ་ལྡན་འདས་ཀྱིས་མཁྱེན་བཞིན་དུ་འདྲི་བས་ན། ཀོ་ཀ་ལི་ཀ་དང༌། ཀ་ཌ་མོ་ར་ཀ་ལ་སོགས་པ་ལ་དེ་ལྟ་བུར་རྗེས་སུ་ཕྱོགས་པ་བདེན་ནམ་ཞེས་སྨྲས་པ་དང༌། མད་དོ་ཞེས་གསོལ་ནས། དགེ་སྦྱོང་གི་བྱ་བ་མ་ཡིན་ན་ཞེས་རྣམ་གྲངས་དུ་མའི་སྒོ་ནས་སྨད་ནས། ཡང་དགེ་སློང་ཞེས་བྱ་བ་རྩ་བའི་ཚིག་རྣམས་སོ། །དགེ་སློང་རྗེས་སུ་ཕྱོགས་པ་རྣམས་ལ་དགེ་འདུན་རྣམས་ཀྱིས་ཆོས་དང་མཐུན་པ་འདུལ་བ་དང་མཐུན་པའི་ཚིག་གིས་ལན་གཉིས་ལན་གསུམ་དུ་བསྒོ་བར་བྱ། བསྟན་པར་བྱ་ཡང་དགེ་སློང་ཞེས་བྱ་བ་ནི་ལྷ་སྦྱིན་ནོ། གྲོགས་སུ་གྱུར་ཅེས་བྱ་བ་ནི་ཀོ་ཀ་ལི་ཀ་ལ་སོགས་པའོ། །དབྱེན་བྱེད་པར་ཕྱོགས་ཞེས་བྱ་བ་ནི་ལྟ་བ་དང༌། དེའི་འདོན་པ་དང༌། དེའི་བསམ་པའོ། །གཅིག་གམ་གཉིས་སམ་མང་པོ་ཞེས་བྱ་བ་ནི་དགེ་འདུན་མ་ལོངས་པ་དབྱེན་མི་སྲིད་པས་བཞི་ཡན་ཆད་ལ་བྱའོ། །གལ་ཏེ་དེ་དག་དགེ་སློང་རྣམས་ལ་ཞེས་བྱ་བ་ནི་ཆོས་འདི་ལ་ཞུགས་པའོ། །དེ་སྐད་ཀྱང་ཟེར་ཞེས་བྱ་བ་ནི་སྨྲ་བའོ་།ཚེ་དང་ལྡན་པ་དག་དགེ་སློང་འདི་ལ་ཞེས་བྱ་བ་ནི་ལྷ་སྦྱིན་ལ་བྱའོ། །དགེ་ཡང་རུང་ཞེས་བྱ་བ་
ནི་དགེ་བ་ལ་མ་སྦྱོར་ཅིག་པའོ། །སྡིག་ཀྱང་རུང་ཞེས་བྱ་བ་ནི་སྡིག་པ་ལས་མ་བཟློག་ཅིག་ལའོ། དགེ་སློང་འདི་ནི་ཆོས་སྨྲ་བ་འདུལ་བ་སྨྲ་བ་ཞེས་བྱ་བ་ནི་དེ་དག་གི་དོན་དང་མཐུན་པའོ། །མི་ཤེས་པ་མ་ཡིན་ཞེས་བྱ་བ་ནི་དོན་རྟོགས་པའི་དགེ་སློང་དེ་གང་ལ་དད་པ་བདག་ཅག་ཀྱང་དད་དོ་ཞེས་བྱ་བ་ནི་དགེ་སློང་རྗེས་སུ་ཕྱོགས་པ་ལྔ་པོ་རྣམས། ལྷ་སྦྱིན་གྱི་བསམ་པ་དང་མཐུན་པའོ། །ཡང་དག་པར་བསྟན་ཡང་དག་པར་བསྒོ་ཞེས་བྱ་བ་ནི་སྔ་མ་ཡིན་ནོ། །རྗེས་སུ་ཕྱོགས་པ་ལ་ཞུགས་ན་ཐམས་ཅད་དུ་ཉེས་བྱས་སུ་འགྱུར་རོ། །ཚིག་བཞམས་ཏེ་བསྒོ་ནས་མ་བཏུབ་ན་ཉེས་པ་སྦོམ་པོ་འགྱུར་རོ། །གསོལ་བ་དང་ཞུ་བའི་ལས་ཀྱིས་ལན་གསུམ་དུ་བསྐོ་སྟེ། གཏོང་དུ་མ་བཏུབ་ན་ཉེས་བྱས་གཅིག་དང་སྦོམ་པོ་གསུམ་དང་ལྷག་མ་གཅིག་ཏུ་འགྱུར་རོ། །བསྡུམ་པར་བཞམས་ཏེ་མ་བསྒོ་བར་གསོལ་བ་དང༌། བཞིའི་ལས་ཀྱིས་སྔར་བསྒོ་ན་བསྒོ་བར་ཡང་མི་ཆུད་ལ་དགེ་འདུན་ཡང་ཉེས་བྱས་སོ། །བསྡུམ་པར་བཞམས་ཏེ་སྔར་བསྒོ་ནས་གསོལ་བ་དང་བཞིའི་ལས་ཀྱིས་བསྒོ་ན་བསྒོ་བར་ཡང་ཆུད་དེ་ཉེས་པ་མེད་དོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ། །རིགས་སུན་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་ཡུལ་སྲིན་བུ་རི་ཞེས་བྱ་བ་ན་དགེ་སློང་ཐ་སྐར་སྐྱེས་དང༌། ནབ་སོ་དང༌། དགེ་སློང་དུར་ཁ་དང་ད་མར་ཞེས་བྱ་བའི་དགེ་སློང་རྣམས་འཁོད་དོ། །དེ་དག་རིགས་སུན་པའི་སྡིག་པའི་ཆོས་ཀུན་དུ་སྤྱོད་པ་ནི་འདི་ལྟ་སྟེ། གནས་དང་ལོངས་སྤྱོད་གཉིས་ཀྱི་སྒོ་ནས་རིགས་སུན་པར་བྱེད་དོ། །དེ་དག་ལ་གནས་ཀྱི་སྒོ་ནས་རིགས་སུན་པ་ནི་བུད་མེད་དང་སྟེགས་གད་རྒྱངས་བྱེད། འཛུམ་སྙེགས་ལུས་ཀྱི་སྙོགས་ཤིང་སྟན་གཅིག་ལ་འདུག་པའོ། །དེ་ལ་ལོངས་སྤྱོད་ཀྱི་སྒོ་ནས་རིགས་སུན་པ་ནི་བུད་མེད་དང་སྣོད་གཅིག་གི་ནང་དུ་ཟ། ཕོར་བུ་གཅིག་གི་ནང་དུ་འཐུང༌། གླུ་ལེན། རྔ་རྡུང༌། གར་བྱེད། འཇོང་མོ་དང༌། གླང་པོ་ཆེ་དང༌། རྟ་དང༌། བྱ་གག་དང༌། ངུར་བ་ལྟ་བུའི་སྐད་འབྱིན་དེ་དག་འཐབ་ཏུ་གཟུད། དེ་ལྟར་རྩེ་མོ་སྣ་ཚོགས་བྱེད་པས་ན། དེ་ན་གནས་པའི་སྐྱེ་བོ་རྣམས་མི་དགའ་ཞིང་རིགས་རྣམས་སུན་པས་ན་སྐྱེ་བོ་དེ་དག་ཀྱང་མ་དད་ནས་དེ་ན་གནས་པའི་དགེ་སློང་རྣམས་ལ་ཡང་བསོད་སྙོམས་མི་སྟེར་ཞིང་ཡུལ་གཞན་དུ་སྤོང་བར་བྱེད་ན་གློ་བུར་དུ་ལྷགས་པ་ལ་ལྟ་ཞིག་ཅི་སྨོས། དེ་
ནས་དུས་གཞན་ཞིག་ན་ཚེ་དང་ལྡན་པ་ཀུན་དགའ་བོ་ཡུལ་སྣང་བ་ཅན་དུ་ལྗོངས་རྒྱུ་ཞིང་འགྲོ་བ་ལས་དེའི་ནུབ་མོ་སྲིན་བུའི་རིའི་ནགས་ན་གནས། ནང་བར་གྲོང་ཁྱེར་དུ་བསོད་སྙོམས་ལ་ཞུགས་པ་དང༌། བསོད་སྙོམས་ཀྱང་མ་རྙེད་ལན་ཀྱང་མ་ཐོབ་ནས་ཀུན་དགའ་བོས་བསམས་པ་ཉན་ཐོས་བྱིས་པ་མི་མཁས་པ་མི་གསལ་བ་འགའ་ཞིག་གིས་རིགས་ཀྱི་བུ་མོ་དག་ལ་ཁ་ངན་ནམ་ལུས་ཀྱིས་ཀུན་དུ་རེག་པ་ཞིག་བྱས་སོ་སྙམ་དུ་སེམས་སོ། །དེ་ནས་ཚེ་དང་ལྡན་པ་ཀུན་དགའ་བོས་སྔོན་ཆད་སྲིད་བུ་རིའི་གྲོང་ཁྱེར་དེ་འབྱོར་པ་དང་རྒྱས་པ་དང༌། ལེ་ལོགས་པ་དང༌། སྐྱེ་བོ་དད་པ་མང་པོ་དག་དང་ལྡན་པས་བསོད་སྙོམས་དག་ཀྱང་རྙེད་སླ་ན་ད་ཅི་ཉེས་ཞེས་སྐྱེ་བོའི་ཚོགས་མདུན་མ་པ་ལྔ་བརྒྱ་ཙམ་གྱི་ནང་དུ་དྲིས་པ་དང་དེའི་ནང་ན་དགེ་བསྙེན་ཆུར་འཇུག་ཅེས་བྱ་བས་དགེ་སློང་ཐ་སྐར་ལ་སོགས་པས་རིགས་སུན་པའི་ཆོས་མང་དུ་བྱས་སོ་ཞེས་ཀུན་དགའ་བོ་ལ་རྒྱས་པར་གསོལ་ཏོ། །ཀུན་དགའ་བོ་སྙན་དུ་གསོལ་ནས་བཀའ་སྩལ་བ། དགེ་སློང་གནས་བརྟན་དག་དང༌། ཀུན་དགའ་བོ་ཉིད་སོང་ལ། དགེ་སློང་ཐ་སྐར་སྐྱེས་དང༌། ནབ་སོ་གཉིས་ལ། དགེ་སྦྱོང་གི་ཆོས་མ་ཡིན་པ་རྣམ་པ་སྣ་ཚོགས་ཀྱི་སྒོ་ནས་གླིང་བ་པོའི་དགེ་སློང་གསོལ་བ་དང་ཞུ་བའི་ལས་ཀྱིས་ལམ་དུ་བསྐོས་ཏེ། དེ་རྣམས་བསྐྲད་པར་གྱིས་ཤིག་ཅེས་བཀའ་སྩལ་ནས་དེ་ནས་དགེ་སློང་ཐ་སྐྲ་སྐྱེས་དང༌། ནབ་སོ་གཉིས་པོ་ལ་སྤང་བའི་ལས་བྱས་པ་དང༌། དུར་ཁར་དང་དམར་གྱི་དགེ་སློང་བདག་ཅག་ལ་ཡང་བསྐྲད་པའི་ལས་བྱེད་པར་འོང་གིས་མཉན་དུ་ཡོད་པར་བྲོས་ཏེ་དོང་ངོ་ཞེས་མཉན་དུ་ཡོད་པར་དོང་ནས་ཉེས་པ་རྣམ་བཤགས་ཤིང་མཐོལ། སེམས་ཀྱི་རྣམ་པར་རྟོག་པ་རྣམ་པ་སྣ་ཚོགས་ཀྱང་ཡོངས་སུ་བསྡམས་ནས་དགེ་སློང་རང་བཞིན་དུ་གནས་པ་དང་འདྲ་བར་གནས་སོ། །ཐ་སྐར་སྐྱེས་དང་ནམ་སོ་གཉིས་ཀྱང་སྤང་བའི་ལས་བྱས་པ་དང༌། བདག་ཅག་ཀྱང་ས་ལ་བསྒྱེལ་ན་སླར་ཡང་ས་ལ་བརྟེན་ཏེ་ལྡང་བ་བཞིན་དུ་བཅོམ་ལྡན་འདས་ཉིད་ལ་མཐོལ་ཞིང་བཤགས་ན་ལེགས་སོ་སྙམ་ནས་མཐར་གྱིས་རྒྱུ་ཞིང་མཉན་དུ་ཡོད་པར་ཕྱིན་ཏེ། དགེ་སློང་གནས་བརྟན་དག་དང་དུར་ཁར་དང་དམར་གྱི་དགེ་སློང་དག་དང་ཕྲད་ནས་དེ་ན་གནས་པའི་དགེ་སློང་གཅིག་གིས་ཀྱང་བལྟར་ཡང་མི་བཏུབ་ཕྱག་ཀྱང་མི་འཚལ་ལོ། །དེ་གཉིས་ཀྱིས་སྨྲས་པ། དགེ་སློང་
གཞན་ནི་ཡུས་ན་དུར་ཁ་དང་དམར་གྱི་དགེ་སློང་གཉིས་བདག་ཅག་དང་འདྲ་བར་ཉེས་པ་བྱེད་ན་ཅི་སྟེ་བདག་ཅག་ལ་མི་སྨྲ་ཞེས་བྱས་པ་དང༌། བདག་ཅག་གིས་ཉེས་པ་སྣ་ཚོགས་བྱས་ཏེ། ཀུན་དགའ་བོ་དང༌། གནས་ཞེས་བྱས་པ་དང༌། དེ་གཉིས་ཁྲོས་ཏེ་བདག་ཅག་ཉེས་པ་འདྲས་ཁོ་ན་ལས་ཁ་ཅིག་ནི་བསྐྲད་ཁ་ཅིག་ནི་མ་བསྐྲད་པ་ལས་དགེ་སློང་ཀུན་དགའ་བོ་ལ་སོགས་པ་ཁ་ཅིག་ནི་འདོད་ཆགས་ཀྱི་དབང་དུ་འགྲོ། ཁ་ཅིག་ནི་ཞེ་སྡང་གི་དབང་དུ་འགྲོ། གཏི་མུག་གི་དབང་དུ་འགྲོའོ་ཞེས་འཛེར་བ་དང༌། དགེ་སློང་རྣམས་བདག་ཅག་གིས་ཉེས་པ་སྣ་ཚོགས་བྱས་ཏེ། ཀུན་དགའ་བོ་དང༌། གནས་བརྟན་དག་གིས་གསོལ་བ་དང༌། ཞུ་བའི་ལས་ཀྱིས་བསྐྲད་པར་ཤེས་བཞིན་དུ་དེ་སྐད་འཛེར་ཅེས་འཕྱ་བཞིན་དུ་སྙན་དུ་གསལ་ཏོ། །དེ་ནས་བཅོམ་ལྡན་འདས་ཀྱིས་འདི་སྐད་དུ་སྨྲ་བ་དང་གཞན་ཡང་འདི་འདྲ་བ་ལ་དགེ་འདུན་རྣམས་ཀྱིས་ཚིག་འཇམ་པོས་སྒོ་ཤིག་ཅེས་རྩ་བའི་ཚིག་རྣམས་སོ། །རྩ་བའི་ཚིག་རྣམས་ཀྱིས་བཞམས་ཏེ་བསྒོ་ཡང་གཏོང་དུ་མ་བཏུབ་ན། གསོལ་བ་དང་ཞུ་བའི་ལས་ཀྱིས་ལན་གཉིས་ལན་གསུམ་དུ་བསྒོ་བར་བྱའོ་ཞེས་བཀའ་སྩལ་པ་དང༌། ལན་གཉིས་ལན་གསུམ་དུ་བསྒོ་ཡང་གཏོང་དུ་མ་བཏུབ་པ་དང༌། དེ་ལྟར་གྱུར་པ་དེའི་ཕྱིར་ཡང་དགེ་སློང་གང་རིགས་སུན་པའི་ཆོས་བྱས་ན་དགེ་སློང་ལྷག་མར་འགྱུར་རོ་ཞེས་འདུལ་བ་ལ་བསླབ་པའི་གནས་བཅས་སོ། །དགེ་སློང་དག་ཅེས་བྱ་བ་ནི་ཐ་སྐར་སྐྱེས་དང་ནས་སོ་གཉིས་ཏེ། གཞན་ཡང་དེ་དང་འདྲའོ། །མང་པོ་ཞེས་བྱ་བ་ནི་དགེ་སློང་གཉིས་ཡན་ཆད་ལ་མང་པོ་ཞེས་བྱའོ། །གྲོང་ངམ་གྲོང་རྡལ་ཞེས་བྱ་བ་ནི་སྲིན་བུ་རིའོ། །དེ་དག་ཀྱང་རིགས་སུན་པར་བྱེད་ཅེས་བྱ་བ་ནི་རིགས་ནི་བྲམ་ཟེ་དང༌། ཁྱིམ་བདག་གི་རིགས་ཏེ། དེ་ཡང་རྣམ་པ་གཉིས་ཀྱིས་སུན་པར་བྱེད་དེ་གནས་དང་ལོངས་སྤྱོད་དོ། །སྣང་བ་ཞེས་བྱ་བ་ནི་མིག་གི་རྣམ་པར་ཤེས་པས་སོ། །ཐོས་སོ་ཞེས་བྱ་བ་ནི་རྣ་བའི་རྣམ་པར་ཤེས་པས་སོ། །རབ་ཏུ་ཤེས་ཞེས་བྱ་བ་ནི་དེ་ལས་གཞན་པའི་རྩམ་པར་ཤེས་པས་སོ།། སྡིག་པའི་ཆོས་ཀུན་དུ་སྤྱོད་ཅེས་བྱ་བ་ནི་ཉེས་པ་སྣ་ཚོགས་བྱེད་པའོ། །དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་པ་ལ་ཞུགས་པས་སོ། །ཚིག་འདི་སྐད་སྨྲོས་ཤིག་ཅེས་བྱ་བ་ནི་ཚིག་འཇམ་པོས་བསྒོ་བའོ། །ཇི་སྐད་བསྒོ་བ་ནི་སྔ་མ་བཞིན་ནོ། །ཚིག་འཇམ་པོས་བསྒོ་ན་དངོས་པོ་དེ་གཏོང་བ་ལྟ་ན་ནི་ཞེས་
བྱ་བ་དེ་ལྟར་ལྟ་བ་ཡོངས་སུ་གཏོང་བའོ། །གལ་ཏེ་མི་གཏོང་ཞེས་བྱ་བ་ནི་ཡོངས་སུ་མི་འདོར་བའོ། །ལན་གཉིས་ལན་གསུམ་དུ་ཡང་དག་པར་བསྟན་པར་བྱ་བ་ནི་གསོལ་བ་དང་ཞུ་བའི་ལས་ཀྱིས་བསྟན་ཅིང་བསྒོ་བའོ། །ཉེས་པ་ཇི་ལྟ་བུ་ཞེ་ན། དགེ་སློང་རྣམས་ཀྱིས་སྤངས་པའི་ལས་བྱས་པར་ཤེས་བཞིན་དུ་དེ་དག་ལ་འདོད་པས་ཞེ་སྡང་གིས་གཏི་མུག་གིས་འཇིགས་པས་འགྲོ་ཞེས་ཟེར་ན་ཐམས་ཅད་དུ་ཉེས་བྱས་སུ་འགྱུར་རོ། །ཚིག་འཇམ་པོས་བསྒོ་སྟེ་མ་བཏུབ་ན་ཉེས་བྱས་སུ་འགྱུར་རོ། །གསོལ་པ་དང་ཞུ་བའི་ལས་ཀྱིས་བསྒོ་སྟེ་མ་བཏུབ་ན་སྦོམ་པོ་གསུམ་དང་ལྟག་མར་འགྱུར་རོ། །བཞམས་ཏེ་མ་བསྒོ་བར་གསོལ་བ་དང་ཞུ་བའི་ལས་ཀྱིས་སྔར་བསྒོ་ན་དགེ་འདུན་ལ་ཡང་ཉེས་བྱས་སུ་འགྱུར་ལ་བསྒོ་བར་ཡང་མི་ཆུད་དོ། །བཞམས་ཏེ་ཡང་བསྒོ་ལ་གསོལ་བའི་ལས་ཀྱང་བྱས་ན་བསྒོ་པར་ཡང་ཆུད་དེ་ཉེས་པ་མེད་དོ། །བསྐྲད་པའི་ལས་མ་བྱས་པར་བཞམས་ཏེ་སྔར་བསྒོ་བར་མི་ཆུད་དེ་དགེ་འདུན་ལ་ཉེས་བྱས་སོ། །བསྐྲད་པའི་ལས་བགྱིས་ཤིང་བཞམས་ཏེ་བསྒོ་ན་བསྒོ་བར་ཡང་ཆུད་ལ་ཉེས་པ་ཡང་མེད་དེ། །བསྐྲད་པའི་ལས་མ་བགྱིས་པར་གསོལ་བ་དང་བཞིའི་ལས་ཀྱིས་བསྒོ་ན་བསྒོ་བར་ཡང་མི་ཆུད་དེ་དགེ་འདུན་ལ་ཉེས་བྱས་སོ། །བསྐྲད་པ་ཡང་བྱས་ལ་གསོལ་བ་དང་བཞིའི་ལས་ཀྱིས་བསྒོ་ན་བསྒོ་བར་ཡང་ཆུད་དེ་ཉེས་པ་མེད་དོ། །ལས་དང་པོ་པ་ལ་སོགས་པ་ལ་ཉེས་པ་མེད་དོ་།བཀའ་བློ་མི་བདེ་བའི་གླེང་གཞི་ནི་སངས་རྒྱས་བཅོམ་ལྡན་འདས་ཡུལ་ཀཽ་ཤཱམྦཱི་དགྲ་ཟིན་གྱི་ཀུན་དགའ་ར་བ་ན་བཞུགས་སོ། །དེའི་ཚེ་ཀཽ་ཤཱམྦཱི་ན་དགེ་སློང་མོས་པ་ཅན་ལ་ལྟུང་བ་བྱུང་ནས་ཆོས་བཞིན་དུ་སླར་མི་བྱེད་དེ། དེ་ལྟུང་བ་བྱུང་བ་གྲོགས་པོ་ཁ་ཅིག་གིས་མཐོང་ནས་གྲོགས་པོ་ཕན་པར་འདོད་རྣམས་ཀྱིས་དེ་ལ་བསྐུལ་ཞིང་ལྟུང་བ་ཤོགས་ཤིག་ཅེས་བྱས་ན། སུ་ལ་ལྟུང་བ་བྱུང་བ་དེ་སླར་བྱེད་གྲང་ངས་ནི་ལྟུང་བ་མ་མཐོང་ངོ༌། །ཁྱེད་ལ་ལྟུང་བ་བྱུང་ན་གཞན་དུ་བཤགས་ཏེ། སུ་མཐོང་བ་དེ་ལྟུང་བ་ཆོས་བཞིན་དུ་བཤགས་ཤིང་བྱེད་གྲང༌། ཚེ་དང་ལྡན་པ་དག་དགེ་ཡང་རུང༌། སྡིག་ཀྱང་རུང་ཅུང་ཟད་ཀྱང་ང་ལ་མ་སྨྲ་ཤིག །དགེ་ཡང་རུང་ཞེས་བྱ་བ་ནི་དགེ་བ་ལ་མ་གཞུག་ཅིག་པའོ། །སྡིག་ཀྱང་རུང་ཞེས་བྱ་བ་ནི་སྡིག་པ་ལས་མ་བཟློག་ཅིག་པའོ། །ཁྱེད་རིགས་དང་རུས་ཐ་དད་པ་ལས་རབ་ཏུ་བྱུང་བ་འདབ་མ་རླུང་གིས་བརྡབས་ནས་གཅིག་ཏུ་
སྤུངས་པ་དང་འདྲ་བ་ཁྱེད་ཅག་ཡིན་ན། ངེད་ཀྱི་རིགས་ལས་ནི་བྱང་ཆུབ་ཐོབ་པོ་ཞེས་ཟེར་བ་དོན་ཉུང་བའི་དགེ་སློང་རྣམས་འཕྱ་སྟེ་བདེ་བར་གཤེགས་པའི་མདོར་གཏོགས་པ་རྣམས་ཀྱིས་བསྒོ་ན། ངག་མི་ཉན་ཏོ་ཞེས་སྙན་དུ་གསོལ་ཏོ། །བཀའ་སྩལ་པ། དགེ་སློང་མོས་པ་ཅན་དང་གཞན་ཡང་དེ་དག་དང་འདྲ་བ་ལ་བསླབ་པའི་མདོར་གཏོགས་པ་རྣམས་ཀྱིས་བཞམས་ཏེ་བསྒོ་བར་བྱའོ། །ཞེས་རྩ་བའི་ཚིག་རྣམས་སོ། །དེ་སྟེ་ཡང་ལྟུང་བ་བཤགས་སུ་མ་བཏུབ་ན་གསོལ་བ་དང་བཞིའི་ལས་ཀྱིས་ལན་གཉིས་ལན་གསུམ་དུ་བསྒོ་བར་བྱའོ། །ལན་གཉིས་ལན་གསུམ་དུ་བསྒོ་སྟེ་མ་བཏུབ་ན་ཉེས་བྱས་གཅིག་དང༌། སྦོམ་པོ་གསུམ་དང་དགེ་འདུན་གྱི་ལྷག་མར་འགྱུར་རོ་ཞེས་འདུལ་བ་ལ་བསླབ་པའི་གནས་བཅས་སོ། །དགེ་སློང་འགའ་ཞིག་ཅེས་བྱ་བ་ནི་མོས་པ་ཅན་ཏེ་གཞན་ཡང་དེ་འདྲ་བའོ། །བཀའ་བློ་མི་བདེ་བའི་རང་བཞིན་ཞེས་བྱ་བ་ནི་མཐུན་པ་དང་རིགས་པ་དང་ལེགས་སུ་དགའ་སྟེ་སྨྲས་པ་ལ་ཉན་དུ་མི་བཏུབ་ཅིང་ལོག་པར་འཛིན་པ་ནི་བཀའ་བློ་མི་བདེ་བ་ཞེས་བྱའོ། །བསྟན་པར་གཏོགས་ཞེས་བྱ་བ་ནི་ཕས་ཕམ་པ་བཞི་ནས་རྩོད་པ་ཞི་བ་བདུན་གྱི་བར་དུ་སྟེ། ལྟུང་བའི་རིས་ལྔ་ལ་བྱའོ། །བདེ་བར་གཤེགས་པའི་མདོར་གཏོགས་ཞེས་བྱ་བ་ནི་མདོ་སྡེའམ་མངོན་པའི་ཆོས་ལ་བྱའོ། །དགེ་ཡང་རུང་ཞེས་བྱ་བ་ནི་ཕན་པ་ཅན་ནོ། །དགེ་སློང་རྣམས་ཞེས་བྱ་བ་ནི་ཆོས་འདི་ལ་ཞུགས་པའོ། །ཆོས་དང་མཐུན་ཞེས་བྱ་བ་ནི་མདོ་སྡེ་དང་མ་མོ་ལ་བྱའོ། །འདུལ་བ་དང་མཐུན་ཞེས་བྱ་བ་ནི་འདུལ་བ་དེ་ཉིད་དོ། །བསྒོ་ཞེས་བྱ་བ་ནི་ཆོས་དང་འདུལ་བ་ཇི་ལྟ་བ་བཞིན་དུ་བསྒོ་བའོ། །ཁྱེད་ཀྱིས་བདག་ལ་བསྒོ་བས་ཆོག་གིས་ཞེས་ཟེར་བ་ནི་བཀའ་བློ་མི་བདེ་བ་ལ་གནས་པའོ། །དངོས་པོ་དེ་སྤང་བའི་ཕྱིར་ཚིག་འཇམ་པོས་སྒོ་ཤིག་ཅེས་བྱ་བ་ནི་གསོལ་བ་དང་ཞུ་བའི་ལས་ནི་གོང་མ་དག་དང་འདྲའོ། །བསྟན་པའི་མདོར་གཏོགས་པ་རྣམས་ཀྱིས་བསྒོ་སྟེ་མ་བཏུབ་ན་ཐམས་ཅད་དུ་ཉེས་བྱས་སུ་འགྱུར་རོ། །གསོལ་བ་དང་ཞུ་བ་རེ་རེ་ལ་ཡང་སྦོམ་པོ་རེ་རེར་འགྱུར་རོ། །ཆོས་བཞིན་ལ་མ་ཚོགས་པ་དང༌། ཚོགས་པ་ལས་ཆོས་ཀྱི་གཟུགས་བརྙན་དང༌། ཆོས་ཇི་ལྟ་བ་དང༌། འདུལ་བ་ཇི་ལྟ་བ་བཞིན་དུ་མ་བསྒོ་ན་ཉེས་པ་མེད་དོ། །དགུ་ནི་དང་པོ་དག་ཉིད་ཀྱིས་སོ་ཞེས་བྱ་བ་ནི་བྱུང་མ་ཐག་ཏུ་ལྷག་མར་འགྱུར་རོ། །ལན་གཉིས་ལན་གསུམ་བསྒོ་ནས་ལྷག་མར་འགྱུར་བ་ནི་དབྱེན་དང་རྗེས་སུ་ཕྱོགས་པ་དང༌། རིགས་སུན་པ་
དང་བཀའ་བློ་མི་བདེ་བའོ། །དེ་དག་ལས་གང་ཡང་རུང་ཞེས་བྱ་བ་ནི་ལྷག་མ་བཅུ་གསུམ་པོ་དག་བྱུང་བ་ལ་བྱའོ། །ཇི་སྲིད་དུ་ཞེས་བྱ་བ་ནི་དགེ་འདུན་གྱི་ལྷག་མ་བྱུང་ནས་ཇི་སྲིད་དུ་བཅས་པའོ། །ཇི་སྲིད་དུ་བཅས་པ་དེ་སྲིད་དུ་ཆད་པ་བྱེད་དུ་ཆུག་ཤིག་པའོ། །སེམས་འཁྲུགས་པ་དང༌། ནད་ཀྱིས་གཟིར་བ་དང༌། མི་དྲན་པ་ལ་ཉེས་པ་མེད་དོ། །གང་ཟག་དེའི་ཆད་པ་ནི་དགེ་སློང་རང་བཞིན་དུ་གནས་པ་དང༌། སྟན་གཅིག་ལ་མི་འདུག་ལྷན་ཅིག་མི་འཆག་ཁྱིམ་གཅིག་ན་མི་ཉལ། དགེ་སློང་ཐམས་ཅད་ཀྱི་འཇུག་ཏུ་གཞག །བསིལ་ཡབ་གཡོབ་པ་དང་ལྷུང་བཟེད་བཀྲུ་བར་བྱ། ཆད་པ་བྱས་ནས་ཞག་དྲུག་གི་བར་དུ་དགེ་འདུན་ལ་མགུ་བའི་ལས་བྱའོ། །མ་བཅབས་ན་ཆད་པ་མི་དགོས་ཏེ་མགུ་བར་ཟད་དོ། །ཆད་པ་བྱེད་དུ་གཞུག་པ་ནི་ང་རྒྱལ་མེད་པ་དང་བཅས་པའི་ཉེས་པ་མེད་པའི་ཕྱིར་རོ། །ནང་སྦྱང་བར་བྱ་བའི་ཕྱིར་ཡིད་མགུ་བར་བྱེད་དུ་གཞུག་གོ །ལྟུང་བ་ལས་འབྱིན་པའི་ཕྱིར་འབྱུང་བར་གསོལ་ལོ། །དགེ་འདུན་ལ་རག་ལས་ཞེས་བྱ་བ་ནི་དབང་ཡོད་པའི་དོན་ཏོ། །དགེ་སློང་ཉི་ཤུ་མེད་ཅེས་བྱ་བ་ནི་གྲངས་མ་ཚང་ན་མི་ཕྱིན་ཞེས་བྱ་བའི་དོན་ཏོ། །དེ་ནི་འདུ་ཤེས་ཞེས་བྱ་བ་ནི་ངེས་པའོ། །ཡང་ན་ཕྱིན་པའི་དུས་འདིས་ཞེས་བྱ་བའི་རྒྱུ་སྟེ་གཞུང་འདི་ལ་བྱའོ། །གླེངས་ཤིང་དྲན་པར་བྱས་པ་ལ་བདག་ཉིད་བཀའ་བློ་མི་བདེ་བ་ལ་གནས་ན་ཉེས་བྱས་སོ། །མ་གླེངས་ཤིང་དྲན་པར་མ་བགྱིས་པར་བདག་ཉིད་བཀའ་བློ་མི་བདེ་བ་ལ་གནས་ན་བསྒོ་བ་མི་འཆགས་སོ། །མཚམས་ཀྱི་ནང་རོལ་ནས་བསྒོ་འམ། ཕྱི་རོལ་ནས་བསྒོ་འམ་ས་ལ་འདུག་སྟེ་ནམ་མཁའ་ལ་འཇུག་པའམ། དགེ་འདུན་གྱིས་དགེ་འདུན་ལོངས་པ་ལ་བསྒོ་ན་བསྒོ་བར་མི་ཆུད་དོ། །དགེ་འདུན་ལྷག་མ་བཅུ་གསུམ་མི་བརྗེད་པའི་ཚིག་གོ །གཉིས་མི་མངོན་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་མཉན་དུ་ཡོད་པ་ན་ཚེ་དང་ལྡན་པ་འཆར་བ་པོ་བསོད་སྙོམས་ལས་འཁོར་ཏེ། ཁྱིམ་བདག་གི་ཆུང་མ་སྦེད་མའི་ཁྱིམ་དུ་སོང་ངོ༌། །དེ་སྟན་བཏིང་བ་ལ་འདུག་པ་དང༌། སྦེད་མ་ཡང་འཆར་བ་ལ་ཆོས་ཉན་པའི་ཕྱིར་འཆར་བ་དང་སྟན་གཅིག་ལ་པུས་མོ་སྤྲད་དེ་སྐྱབས་ཡོད་པ་ན་འདུག་ཅིང་ཆོས་འཆད་པ་དགེ་བསྙེན་མ་ས་གས་མཐོང་ནས། དེ་ལྟར་མ་དད་པ་རྣམས་ཀྱིས་མཐོང་ན་ནི་དགེ་སྦྱོང་གི་ཆོས་མ་ཡིན་པ་ཞིག་བྱེད་དུ་གདོན་མི་ཟའོ་ཞེས་སྐུར་པར་ཡང་
འགྱུར་ན་དེ་ལྟ་བུ་མི་མཛེས་པ་ཉན་ཐོས་རྣམས་ལ་སྤངས་པའི་ཕྱིར་དགེ་བསྙེན་མ་དེས་སྙན་དུ་གསོལ་ཏོ། །ལེགས་པ་བཅུ་གཟིགས་ནས་བཀའ་སྩལ་པ། རྣམ་གྲངས་དུ་མའི་སྒོ་ནས་སྨད་ནས། ཡང་དགེ་སློང་གང་ཞེས་འདུ་ལ་བ་ལ་བསླབ་པའི་གནས་བཅས་སོ། །དགེ་སློང་གང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲའོ། །བུད་མེད་ཅེས་བྱ་བ་ནི་མི་ཚངས་པར་སྤྱད་པའི་ཆོས་བཟོད་པའོ། །ལྷན་ཅིག་ཅེས་བྱ་བ་ནི་དེ་དང་ལྷན་ཅིག་པའོ། །གཉིས་ཞེས་བྱ་བ་ནི་སྐྱེས་པ་དང་བུད་མེད་གཉིས་སོ། །དབེན་པ་ཞེས་བྱ་བ་ནི་གང་ན་སྐྱེས་པའམ། བུད་མེད་དམ། མ་ནིང་གཞན་སུ་ཡང་མེད་པའོ། །སྐྱབས་ཡོད་པ་ཞེས་བྱ་བ་ནི་རྩིག་པ་འམ་སབ་མོའམ། ཡོལ་བས་བསྐྱབས་པའོ། །སྟན་ལ་ཞེས་བྱ་བ་ནི་སྟན་གྱི་རྣམ་གྲངས་སུ་གཏོགས་པ་གང་ཡང་རུང་བའོ། །འདུག་ཅེས་བྱ་བ་ནི་འདོམ་གང་གིས་འཁོར་བ་ན་རྐུབ་བཞག་ཅིང་འདུག་པའོ། །འདོད་པ་ཆོག་པ་ཞེས་བྱ་བ་ནི་མི་ཚངས་པར་སྤྱོད་དུ་ཁོམ་པའི་ཕྱིར་ཆོག་པའོ། །དགེ་བསྙེན་མའི་ཚིག་གིས་ངེས་པར་བྱ་བ་ནི་བདེན་པ་བཞི་ལ་ཐེ་ཚོམ་མེད་ཅིང་རྟོགས་ལ་དཀོན་མཆོག་གསུམ་ལ་སྐྱབས་སུ་སོང་བ་མངོན་པར་བཏུལ་བ་སྲོག་གི་ཕྱིར་ཡང་བརྫུན་དུ་མི་སྨྲ་བ་ནི་དགེ་བསྙེན་མ་ཡིད་ཆེས་པས་ཞེས་བྱ་བའོ། །ཆོས་གསུམ་ལས་གང་ཡང་རུང་ཞེས་བྱ་བ་ནི་ཕས་ཕམ་པ་དང་ལྷག་མ་དང་ལྟུང་བ་སྟེ། དེ་དག་ལས་གང་ཡང་རུང་བའོ། །དགེ་སློང་བུད་མེད་དང་སྟན་གཅིག་ལ་འདུག་པའམ། ཆང་འཐུང་བའམ། གོང་དུ་སྨོས་པ་གསུམ་ལས་གང་ཡང་རུང་སྟེ། སྡིག་པའི་ལས་སུ་བྱེད་པ་ཅུང་ཟད་ཅིག་མཐོང་ངོ་ཞེས་དགེ་བསྙེན་མ་སྨྲ་ན་དེ་དག་ལས་གང་དགེ་སློང་གིས་ཁས་ལེན་པ་བྱེད་དུ་ཆུག་ཤིག་ཅེས་བྱེད་དུ་བཅུག་པ་ནི་ལྟུང་བ་བཤགས་ཤིང་བྱེད་དུ་གཞུག་པའོ། །འདི་ནི་མ་ངེས་པའི་ཆོས་སོ་ཞེས་བྱ་བ་ནི་ཆོས་དེ་དག་གཏན་ལ་མ་ཕེབས་པའོ། །དེ་ལ་ཉེས་པ་ནི་དགེ་བསྙེན་ཡིད་ཆེས་པའི་ཚིག་གིས་གང་དང་གང་གླེངས་པ་དེ་དང་དེ་བྱེད་དུ་གཞུག་གོ །དེ་སྟེ་ཁས་མི་ལེན་ན་གསོལ་བ་དང་ཞུ་བའི་ལས་ཀྱིས་ཉེས་པའི་ངོ་བོ་ཉིད་ཚོལ་དུ་གསོལ་ཅིག །ཉེས་པ་མཐོང་ན་ཁས་མི་ལེན་ན་ཉེས་པའི་ངོ་བོ་ཉིད་ཚོལ་བའི་དགེ་སློང་གིས་ཆད་པ་རབ་ཏུ་དབྱུང་བར་མི་བྱ། བསྙེན་པར་རྫོགས་པར་མི་བྱ། དགེ་ཚུལ་གཡོག་བྱེད་དུ་མི་གཞུག །མཚམས་ཀྱི་ནང་ན་དགེ་སློང་ཚུལ་ཁྲིམས་ཉམས་སམ། ལྟ་བ་ཉམས་
པ་འམ། འཚོ་བ་ཉམས་པ་འམ། སྤྱོད་ལམ་ཉམས་པ་ལ་མ་གླེང་ཤིག །དྲན་པར་མ་བྱེད་ཅིག །ལུང་སྟོན་པ་འམ་འདོམས་སུ་མ་གཞུག་ཤིག །འདུལ་བ་འཛིན་པའི་དགེ་སློང་ཡོད་ན་དགེ་འདུན་གྱི་དབུས་སུ་འདུལ་བ་མ་འཆད་ཅིག །གསོ་སྦྱོང་དང་ཚུལ་ནས་འབྱུང་བའི་ཚེ། གསོལ་བ་དང་ལས་ཀྱི་ནང་དུ་མ་གཞུག་ཅིག །དེ་ཀུན་བྱས་ན་ཉེས་བྱས་སུ་འགྱུར་རོ། །མ་ངེས་པ་གཉིས་པའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁང་ན་བཞུགས་སོ། །དེའི་ཚེ་དགེ་སློང་རི་བོ་དང་ཁྱིམ་བདག་གི་ཆུང་མ་ཉེས་སྨན་གཉིས་འདོད་པ་ནི་མི་ཆོག་པར་སྟན་ལ་འདུག་པ་དགེ་བསྙེན་མ་ལེགས་སྐྱེས་མས་མཐོང་སྟེ། དེ་ལྟར་གྱུར་པ་སྙན་དུ་གསོལ་ནས་འདུལ་བ་ལ་བསླབ་པའི་གནས་བཅས་སོ། །འདོད་པ་ཆོག་པར་བྱ་བའི་ཉེས་པ་དེ་མེད་དེ་ཕས་ཕམ་པར་མི་འགྱུར་བས་ན། ཆོག་གཉིས་ཞེས་བྱ་བ་སྨོས་ཏེ། གཉིས་ནི་དགེ་འདུན་གྱི་ལྷག་མ་དང་ལྟུང་བ་སྟེ། དེ་དག་གང་གིས་གླེང་བ་དེ་བྱེད་དུ་གཞུག་གོ །མ་ངེས་པ་ནི་སྔ་མ་གཅིག་པུར་མ་ཟད་ཀྱི་འདི་ཡང་མ་ངེས་པའི་ཆོས་ཡིན་པས་ན་གཏན་ལ་མ་ཕབ་པའི་དོན་ཏོ། །སོ་སོར་ཐར་པའི་མདོ་གདོན་པ་བཞི་པ་མི་བརྗེད་པའི་ཚིག་གོ །སྤང་བའི་ལྟུང་བྱེད་ལས་བརྩམས་ཏེ་འཆང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་དག་དེ་ལྟ་བུའི་གོས་མང་པོར་གྱུར་ཏེ་གོས་ལ་ལོངས་སྤྱོད་དེ། གཙུག་ལག་ཁང་ཆག་ཆག་གདབ་པ་ལ་སོགས་པ་ལས་སྣ་རེ་བྱེད་ཀྱང་གོས་ལན་རེ་བརྗེ་ཞིང་གོན་ནས་ཁ་ཏོན་དང་ལུང་དབོག་པ་དང༌། བསམ་གཏན་བྱེད་པའི་བར་ཆད་དུ་གྱུར་ནས། དགེ་སློང་རྣམས་ཀྱིས་སྙན་དུ་གསོལ་ཏོ། །དེའི་ཚེ་སྨན་པའི་རྒྱལ་པོ་འཚོ་བྱེད་ཀྱིས་རས་བཟང་པོ་གཅིག་སངས་རྒྱས་ལ་ཡོན་དུ་ཕུལ་ནས་ཀུན་དགའ་བོ་ལ་ཆོས་གོས་སུ་དྲུབས་ཤིག་ཅེས་བཀའ་སྩལ་ནས། སངས་རྒྱས་ཀྱི་ཆོས་གོས་གསུམ་དུ་དྲུབས་པ་དང་ལྷག་སྟེ་ཀུན་དགའ་བོ་ཉིད་དང༌། སྲས་རཱ་ཧུ་ལ་གཉིས་ཀྱི་ཡང་སྟོད་གཡོགས་གཉིས་དང་ལྔ་ལོངས་སོ། །དེ་ནས་བཅོམ་ལྡན་འདས་ལོ་སར་གྱི་ལྷགས་པ་ཆེ་བའི་ཡུལ་ཨ་ལ་བྱིར་ཞེས་བྱ་བར་གཤེགས་ནས་དེའི་ནུབ་མོ་སྲོད་ལ་ནི་ཆོས་གོས་ལྔ་པ་གསོལ་ཏོ། དེས་ཀྱང་མི་ཐུབ་སྟེ་གྲང་བར་གྱུར་ནས་གུང་ལ་ཆོས་གོས་བདུན་པ་གསོལ་ཏོ། །དེས་ཀྱང་མི་ཐུབ་ནས་ཐོ་རངས་ཆོས་གོས་སྦྱར་མ་གསོལ་ན་ལྷགས་པ་ཐུབ་པ་དང༌། ང་ལྟ་བུ་ཤ་མདངས་འཇམ་
ཞིང་གཞོན་པ་ཡང་ཆོས་གོས་གསུམ་གྱིས་ཆོག་ན། ཁྱེད་ལ་དེས་ཅིས་མི་ཆོག་ཅེས་འདོད་པ་ཆུང་བ་དང་མགུ་སླ་བ་དང༌། ཡོ་བྱད་ཉུང་དུས་ཆོག་པ་དང༌། ཉུང་དུ་ལ་སོགས་པའི་བསྔགས་པ་བརྗོད་དེ། དགེ་སློང་གོས་མང་དུ་འཆང་ཞིང་ཡོ་བྱད་མང་པོ་ལ་ཆགས་པ་ལ་རྣམ་གྲངས་དུ་མའི་སྒོ་ནས་སྨད་ནས། ཡང་དགེ་སློང་ཆོས་གོས་ཟིན་ཏེ་གཏན་པ་ཕྱུང་ནས་ཆོས་གོས་གསུམ་བཅོས་ཤིག་ཅེས་འདུལ་བ་ལ་བསླབ་པའི་གནས་བཅས་སོ། དེ་ལྟར་བསླབ་པ་བཅས་པ་དང༌། ཁྱིམ་བདག་གཅིག་གིས་ཀུན་དགའ་བོ་ལ་བདག་གིས་སྔ་མོ་ཞིག་ནས་བཙུན་པ་འོད་སྲུངས་ཆེན་པོ་ལྷ་དང་མིའི་མཆོད་པའི་གནས་དེ་ལ་བདག་གིས་བཤོས་དང་གོས་ཤིག་གསོལ་བར་བགྱི་བ་ལས་བདག་ཅག་ཁྱིམ་པ་ལས་ཀྱིས་བྲེལ་ཏེ་ཕྱག་ཏུ་མ་ཕུལ་ན་འདི་ཙམ་ཞིག་ཀུན་དགའ་བོས་འོད་སྲུངས་ཆེན་པོ་ལ་དབུལ་བར་གསོལ་ཞེས་བྱས་པ་དང༌། ཀུན་དགའ་བོས་བསམས་པ་དང༌། བདག་གིས་བླངས་ན་ནི་བསླབ་པ་དང་ཡང་འགལ། མ་བླངས་ན་ནི་འོད་སྲུངས་ཆེན་པོའི་རྙེད་པ་ཡང་ཉམས་ལ་ཁྱིམ་བདག་ཀྱང་བསོད་ནམས་མི་ཐོབ་ན་བདག་གིས་བླངས་ཏེ་སྙན་དུ་གསོལ་ལོ་སྙམ་དུ་བསམས་ནས། བླངས་ཏེ་གསོལ་བ་དང་རྗེས་སུ་གནང་ངོ༌། །དེ་ནས་བཅོམ་ལྡན་འདས་ཀྱིས་བསླབ་པ་ལ་ནན་ཏན་བྱེད་པ་དང༌། གུས་པའི་ཡོན་ཏན་བརྗོད་ནས་ཡང་དགེ་སློང་གང་ཆོས་གོས་ཟིན་ཅེས་བྱ་བ་ལ་སོགས་པ་རྩ་བའི་ཚིག་རྣམས་སོ། །ཆོས་གོས་ཟིན་ཅེས་བྱ་བ་ནི་དགེ་སློང་གི་ཆོས་གོས་བཀྲུ་བ་དང་དྲ་བ་དང་དྲུབ་པ་དང་ཁ་དོག་བསྒྱུར་བ་ལ་སོགས་པ་ཟིན་པ་ལ་བྱའོ། །གཏན་པ་ཕྱུང་ཞེས་བྱ་བ་ནི་ཚུལ་དུ་ཞུགས་པའི་དགེ་འདུན་རྣམས་ཚུལ་ནས་འབྱུང་སྟེ་ཚུལ་ནས་འབྱུང་བའི་ཡོན་ཏན་གཏན་པ་དྲུབ་པ་ཡིན་པས་ན་གཏན་པ་དྲུབས་དང༌། ཞག་བཅུ་ལས་འདས་ཀྱང་སྤང་པའི་ལྟུང་བར་མི་འགྱུར་ཏེ། གཏན་པ་མ་དྲུབས་སམ་གཏན་པ་ཕྱུང་བའི་ཚེ་ཞག་བཅུ་ལས་འདས་ན་སྤང་བའི་ལྟུང་བར་འགྱུར་རོ་ཞེས་བཤད་དོ། །དགེ་སློང་ཞེས་བྱ་བ་ནི་དགེ་སློང་མང་པོ་སྟེ་གཞན་ཡང་དེ་དང་འདྲའོ། །ཞག་བཅུ་ལས་འདས་ཏེ། ཞག་བཅུ་གཅིག་གི་སྐྱ་རེངས་ཤར་ན་སྤང་བར་འགྱུར་རོ། །གོས་ལྷག་ཅེས་བྱ་བ་ནི་བྱིན་གྱིས་བརླབས་པ་ལས་ལྷག་པའོ། །རུང་བ་མ་ཡིན་ཞེས་བྱ་བ་ནི་རུང་བར་མ་བྱས་པའོ། །ཆོངས་ཤིག་ཅེས་བྱ་བ་ནི་བདག་གིར་བྱ་བའོ། །དེ་ལས་འདས་པར་བཅངས་ན་ནི་ཞེས་བྱ་བ་ནི་ཞག་བཅུ་ལས་ཐལ་
བའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། དེ་ལ་ཉེས་པ་ནི་དགེ་སློང་གིས་གོས་ཤིག་རྙེད་ན་ཞག་བཅུ་ཚུན་ཆད་དུ་བྱིན་གྱིས་བརླབ་པར་བྱ། སྤང་བར་བྱ། རུང་བར་བྱ། གཞན་ལ་སྦྱིན་པར་བྱ། དེ་ལྟར་མ་བྱས་ན་ཞག་བཅུ་གཅིག་གི་སྐྱ་རེངས་ཤར་ན་ལྟུང་བར་འགྱུར་རོ། །ལྟུང་བར་འགྱུར་བའི་དངོས་པོ་མ་བཤགས་སམ། བྲལ་བར་མ་བྱས་སམ་མ་སྤངས་ན་དེ་ཚུན་ཆད་དགེ་སློང་གིས་ཡོ་བྱད་ཇི་སྙེད་རྙེད་པ་དེ་ཐམས་ཅད་སྤང་བའི་ལྟུང་བར་འགྱུར་རོ། །ཞག་བཅུ་མ་ལོན་ཡང་སྤང་བའི་ལྟུང་བར་འགྱུར་བ་ཡོད་དེ། སྔ་མ་ཞག་བཅུ་འདས་པའི་རྒྱུན་གྱིས་སྤང་བར་འགྱུར་བའོ། །སྤང་བར་བྱ་བའི་གོས་དེ་ཆུས་ཁྱེར་རམ་མེས་ཚིག་ན་སྤང་དུ་མེད་པས་ཉེས་པ་བཤགས་པར་བྱའོ། །གོས་རྙེད་མ་ཐག་ཏུ་དགེ་སློང་སེམས་འཁྲུགས་སམ། ནད་ཀྱིས་གཟིར་ནས་མི་དྲན་པར་གྱུར་ནས། ནམ་དེའི་སེམས་རྙེད་པ་ནས་ཞག་བཅུ་བ་གྲང་བར་བྱའོ། །གོས་མང་པོ་ཞིག་སྔགས་ཀྱིས་མ་བཏབ་བྱིན་གྱིས་མ་བརླབས་པར་ནམ་འཚོ་བའི་བར་དུ་འཆང་ཡང་ལྟུང་བར་མི་འགྱུར་བ་ཡང་ཡོད་དོ། །ཉི་མ་རེ་རེ་ཞིང་གོས་ལས་སླར་ཕྱུང་ཞིང་གཞན་ལ་བྱིན་གྱིས་རློབ་པའོ། །ཞག་བཅུ་ལས་འདས་ཀྱང་ལྟུང་བར་མི་འགྱུར་བ་ཡང་ཡོད་དེ། གོས་ཀྱི་རྒྱུ་རུང་ལ་སྤུན་མི་རུང་བའམ། རྒྱུ་དང་སྤུན་གཉིས་ཀ་མི་རུང་བ་སྟེ། མི་རུང་བ་ནི་རྔ་མོའི་བལ་དང༌། བ་ལང་དང༌། ར་དང༌། རི་དགས་ཀྱི་བལ་དང་འདྲེས་པ་ནི་ཞག་བཅུ་ལས་འདས་ཀྱང་ལྟུང་བ་མེད་དེ་ཉེས་བྱས་སུ་འགྱུར་རོ། །ཞག་བཅུས་ལྟུང་བར་འགྱུར་བའི་ཚེ་གཅིག་ཏུ་བཅངས་ཀྱང་ལྟུང་བར་མི་འགྱུར་བ་ཡོད་དོ། །ཞག་བཅུ་ཚུན་ཆད་ཀྱིས་དུས་ལས་འདས་པའོ། །ཞག་བཅུ་མ་ལོན་པ་ལ་ཞག་བཅུ་ལོན་པར་འདུ་ཤེས་སམ། ཞག་བཅུ་ལོན་པ་ན་མ་ལོན་པར་འདུ་ཤེས་པ་ནི་ཐམས་ཅད་ཀྱང་ཉེས་བྱས་སོ། །གཏན་པ་ནི་བཏིང་ཡང་ཞག་བཅུ་ལས་འདས་པའི་ཉེས་པ་ཡོད་དེ། དགེ་སློང་གིས་གོས་སྤང་བར་བྱ་བ་མ་སྤངས་མ་བཤགས་པར་དགེ་འདུན་གྱི་གཏན་པ་བཏིང་བའོ། །དགེ་སློང་ལ་ལྟུང་བར་འགྱུར་བདེ་བཞིན་དུ་དགེ་སློང་མ་དང་བསླབ་པ་བྱིན་པ་ལ་ཡང་དེ་བཞིན་ནོ། །འབྲལ་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་དག་མང་ཞིག་རྙེད་པར་གྱུར་ནས། གོས་འཁྲུ་བ་དང༌། དྲ་བ་དང༌། དྲུབ་པ་དང༌། ཁ་དོག་བསྒྱུར་བ་ལ་སོགས་པའི་ལས་བྱས་ནས་པ་དང༌། ཁ་དོག་བསྒྱུར་བ་ལ་སོགས་པའི་ལས་བྱས་ནས་
ཚང་ཐུར་གྱི་ནང་དུ་བཅུག་སྟེ། དགེ་སློང་གཞི་ན་གནས་པ་རྣམས་ལ་བཅོལ་ནས། གཞི་ན་གནས་པ་རྣམས་ཀྱང་གོས་སྐེམ་པ་དང༌། སྡུད་ཅིང་སྦེད་པ་དག་བྱེད་པས་ལུང་དཔོག་པ་དང་ཀློག་པའི་བར་ཆད་དུ་ཡང་གྱུར་ལ་བདག་ཅག་ལྗོངས་རྒྱུར་དོང་བ་རྣམས་ཀྱང་སྟོང་གཡོགས་དང་སྨད་གཡོགས་ཉི་ཚེ་གྱོན་ཞིང་འགྲོ་བས་ན། གོས་ཀྱིས་མ་གཡོགས་པ་སྣང་ཞིང་མི་མཛེས་པར་གྱུར་པས། ཡང་དགེ་སློང་གང་དག་ཆོས་གོས་དང་འབྲལ་དུ་མི་རུང་ངོ་ཞེས་འདུལ་བ་ལ་བསླབ་པའི་གནས་བཅས་སོ། །དེ་ལ་རྗེས་སུ་གནང་བ་ནི་བཅོམ་ལྡན་འདས་རྒྱལ་པོའི་ཁབ་ན་བཞུགས་ཏེ་དེའི་ཚེ་རྒྱལ་པོའི་ཁབ་ཀྱི་སྡེ་ཆེན་པོའི་ཕུག་ན་འོད་སྲུངས་ཆེན་པོ་གནས་ཏེ། བཅོ་ལྔ་དང་བཅུ་བཞིའི་གསོ་སྦྱོང་རྒྱལ་པོའི་ཁབ་ཀྱི་དགེ་འདུན་དང་ལྷན་ཅིག་བྱེད་དོ། །དེ་ནས་བཅོ་ལྔའི་གསོ་སྦྱོང་གི་དུས་ཀྱི་ཚེ། འོད་སྲུངས་ཆེན་པོ་གསོ་སྦྱོང་ལ་སོང་སོང་བ་དང༌། ཆུ་བོ་དབྱར་བཟངས་འབྲུབ་ནས་ཆོས་གོས་སྦྱར་མ་ལ་སོགས་པ་ཡང་གཤེར་ཏེ། དེའི་སྐམ་སྲད་ལ་རིང་མོ་ཞིག་ཐོགས་པས་གསོ་སྦྱོང་སར་ཕྱིས་པར་གྱུར་ཏོ། །དེ་ལྟར་གྱུར་པ་སྙན་དུ་བདས་ནས། འོད་སྲུངས་རྒས་ཐུག་པ་དང༌། ཤཱ་རིའི་སྲས་པོ་རླུང་ནད་ཅན་ལ་སོགས་པ་ཆོས་གོས་དང་འབྲལ་བར་མི་འགྱུར་བར་དགེ་འདུན་གྱི་སྡོམ་པ་བྱིན་ཅིག་ཅེས་སྔོམ་པ་གནང་ངོ༌། །ཆོས་གོས་ཟིན་གཏན་པ་ཕྱུང་ཞེས་བྱ་བ་ནི་གོང་མ་བཞིན་ནོ། །ནུབ་གཅིག་ཅེས་བྱ་བ་ནི་ཞག་གཅིག་སྐྱ་རེངས་ཤར་ན་ལྟུང་བར་འགྱུར་རོ། །ཆོས་གོས་གསུམ་ཞེས་བྱ་བ་ནི་སྦྱར་མ་དང༌། བདུན་པ་དང་ལྔ་པའོ། །ཆོས་གོས་གཞན་ན་འདུག་ལ་དགེ་སློང་མཚམས་ཀྱི་ནང་ན་འདུག་ན་སྐྱ་རེངས་ཤར་ན་སྤང་བའི་ལྟུང་བར་འགྱུར་རོ། །དགེ་འདུན་གྱིས་ཆོས་གོས་བྱིན་གྱིས་བརླབས་ཏེ། ནུབ་གཅིག་མཚམས་ཀྱི་ཕྱི་རོལ་དུ་འབྲལ་ན་ཉེས་པ་བཤགས་པར་བྱའོ། །གོས་ཀྱི་དངོས་པོ་ནི་སྤང་མི་དགོས་སོ། །མཚམས་ཀྱི་ཕྱི་རོལ་ན་ཆོས་གོས་བཞག་སྟེ། དགེ་སློང་མཚམས་ཀྱི་ནང་ན་འདུག་གམ། དགེ་སློང་ནམ་མཁའ་ལ་གནས་ཏེ། ཆོས་གོས་ས་ལ་འདུག་སྟེ། བར་དུ་སྐྱ་རེངས་ཀྱིས་ཆོད་ན་སྤང་བའི་ལྟུང་བར་འགྱུར་རོ། །དགེ་སློང་ཁྱིམ་གཅིག་པའི་གནས་ཤིག་ན་གནས་ནས་ཆོས་གོས་ནང་ན་ཀུན་བཞག་པའམ། ཁྱིམ་གྱི་ཕྱི་རོལ་དུ་འདོམ་གང་ཚུན་ཆད་མི་དག་འདུག་པ་ནི་སྤང་བར་མི་འགྱུར་རོ། །ཡང་ན་ཁྱིམ་དེའི་ཡོས་རྡོ་བ་དང་ཕྱེ་
འཐག་པ་དང༌། ཁྱེའུ་སུས་ཟ་བ་དང༌། སྐོམ་འཐུང་བའི་གནས་དེ་དག་ནི་བདག་གི་འདུག་གནས་ཏེ་ནང་དུ་སྐྱ་རེངས་ཤར་ན་ཡང་སྤང་བའི་ལྟུང་བར་མི་འགྱུར་རོ། །ནང་ངམ་འདུག་གནས་སུ་ཆོས་གོས་བཞག་སྟེ། བདག་ཉིད་གཞན་ན་འདུག་ན་ལྟུང་བར་འགྱུར་རོ། །གྲོང་གཉིས་པ་ལ་ཡང་དེ་བཞིན་དུ་སྦྱར་རོ། །ཤིང་ཐགས་ཀྱིས་བསྐོར་བའི་གྲོང་ན་འདུག་ན་ནི་ནང་ཀུན་དང་ཕྱི་རོལ་འདོམ་གང་ཚུན་ཆད་ཆོས་གོས་བཞག་ལ་བདག་ཀྱང་ནང་ན་ལྟུང་བར་མི་འགྱུར་རོ། །དེ་ལས་འདས་ན་ཉེས་པ་ཉིད་དོ། །གྲོང་རྩིག་པས་བསྐོར་བའི་འདུག་གནས་ན་དང་ཕྱི་རོལ་འདོམ་གང་ཚུན་ཆད་དམ། བ་ལང་འགྲོ་བའི་མིག་རྡུལ་གྲར་རེག་པའམ། མི་རང་བཞིན་གྱིས་ངོ་ཚ་ཤེས་པའི་བཤང་གཅི་ཚུན་ཆད་ནི་འདུག་གནས་ཏེ་འབྲལ་བར་མི་འགྱུར་རོ། །དེ་ལས་འདས་ན་འབྲལ་བར་འགྱུར་རོ། །འོབས་ཀྱིས་བསྐོར་བ་ནི་དེ་ཉིད་འདུག་གནས་ཏེ། བྲལ་བར་མི་འགྱུར་རོ། །གྲོང་གཅིག་པའི་འདུག་གནས་གཅིག་གང་ཞེ་ན། ལྷ་ཁང་ངམ། འདུན་ས་འམ། སྐྱེད་མོ་ཚལ་ལམ། འདུག་གནས་སུ་ཆོས་གོས་བཞག་གམ་ལྷ་ཁང་དུ་ཆོས་གོས་བཞག་ན་ལྟུང་བར་མི་འགྱུར་རོ། །གཞན་དུ་གནས་ན་ལྟུང་བར་འགྱུར་རོ། །སྤུན་མང་པོའི་ཁྱིམ་སྒོ་གཅིག་པ་ཞིག་ན་སྒོ་ཉིད་འདུག་གནས་ཡིན་ཏེ་གྲོང་དུ་གནས་སམ་འདུག་ན་སྤང་བར་མི་འགྱུར་རོ། །ལམ་དུ་ཞུགས་པའི་དགེ་སློང་གིས་འདོམ་བཞི་བཅུ་རྩ་དགུ་ཚུན་ཆད་འབྲལ་བར་མི་འགྱུར་རོ། །འགྲེང་བ་དང་འདུག་པ་དང་ཉལ་བའི་འདོམ་གང་ཁོར་ཁོར་ཡུག་ཚུན་ཆད་མཚམས་སོ། །མཚམས་ཀྱི་བར་དུ་ཉལ་ན་ལུས་དང་བྲལ་མ་ཐག་ཏུ་ཉེས་པར་འགྱུར་རོ། །དགེ་སློང་པ་ལ་ཉེས་པར་འགྱུར་བ་དེ་བཞིན་དུ་དགེ་སློང་མ་དང་བསླབ་པ་བྱིན་པ་ལ་ཡང་དེ་བཞིན་ནོ། །དགེ་སློང་དང༌། དགེ་སློང་མ་དང༌། དགེ་སྦྱོང་མ་ནི་ཉེས་བྱས་སུ་འགྱུར་རོ། །གོས་ཁ་སོགས་འཇོག་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་རྣམས་དེ་ལྟ་བུའི་གོས་མང་དུ་རྙེད་དེ་སྔོན་པོ་དང༌། སེར་པོ་དང་དམར་པོ་དང༌། སྲབ་མོ་སྟུག་པོ་ལ་སོགས་པ་རྙེད་ཀྱང་གོས་སུ་མ་ལངས་ནས་ནམ་དེ་ལྟ་བུ་ཞིག་རྙེད་ན་བྱའོ་སྙན་ནས་རེ་བ་དང་བཅས་པས་སོགས་ཤིང་ཟླ་བ་གཅིག་ལས་འདས་པར་བཞག་པས་ན་དགེ་སློང་དག་གིས་སྙན་དུ་གསོལ་ཏེ། འདོད་པ་མང་བ་མགུ་མི་མྱོང་བ་གསོ་དཀའ་བ་ཞེས་སྨད་ནས་སྦྱངས་པའི་ཡོན་
ཏན་ལ་དགའ་བ་དང་འདོད་པ་ཉུང་བའི་བསྔགས་པ་བརྗོད་ནས་བསླབ་པ་བཅས་ཏེ། ཡང་དགེ་སློང་ཞེས་བྱ་བ་ནི་རྩ་བའི་ཚིག་རྣམས་སོ། །དགེ་སློང་ཆོས་གོས་ཟིན་ཏེ་གཏན་པ་ཕྱུང་ཞེས་བྱ་བ་ནི་གོང་མ་བཞིན་ནོ། །གོས་རྙེད་ཅེས་བྱ་བ་ནི་གཞན་ལས་སོ། །དུས་མ་ཡིན་པའི་གོས་ཞེས་བྱ་བ་ནི་དགེ་སློང་གིས་གོས་རྙེད་པའི་དུས་ནི་གང་ཞེ་ན། གནས་སུ་གཏན་པ་དྲུབས་ཏེ། སྟོན་ཟླ་ཐ་ཆུངས་ནས་དཔྱིད་ཟླ་ར་བའི་བར་དུ་སྟེ། དེ་ནི་གོས་སློང་བའི་དུས་སོ། །དེ་ཕན་ཆད་ནི་དུས་མ་ཡིན་ནོ། །གནས་སུ་གཏན་པ་མ་དྲུབས་ན་ཐམས་ཅད་ཀྱང་གོས་ཀྱི་དུས་མ་ཡིན་ནོ། །འདོད་ཅེས་བྱ་བ་ནི་དགོས་པར་གྱུར་པའོ། །ཟླ་བ་གཅིག་གི་བར་དུ་ཞོག་ཅེས་བྱ་བ་ནི་ཟླ་བ་གཅིག་ཚུན་ཆད་དོ། །གོས་རྙེད་དུ་རེ་བ་ཡོད་ན་ཞེས་བྱ་བ་ནི་དགེ་སློང་གིས་གོས་རེ་བ་གང་ཞེ་ན། ཕ་མ་དང༌། ཕུ་ནུ་པ་དང༌། མཁན་པོ་དང༌། སློབ་དཔོན་གྱི་བྱིན་གྲང་སྙམ་དུ་སེམས་པའམ། ལོ་ལྔ་ལ་རྙེད་པའམ། ལོ་དྲུག་ལ་རྙེད་པའམ། གཙུག་ཕུད་ཀྱི་དུས་སྟོན་དང༌། ཁང་པའི་སྟོན་མོའམ། དུས་སྟོན་ཆེན་པོ་ལ་རྙེད་གྲང་སྙམ་དུ་སེམས་པའོ། །ཁ་མ་ལོངས་པ་ཞེས་བྱ་བ་ནི་སྦྱར་མ་དང་སྟོད་གཡོགས་ཀྱི་ཁ་མ་ལོངས་པ་ལོངས་པར་བྱ་བའི་ཕྱིར་རོ། །དེ་ལས་འདས་པར་བཞག་ན་ཞེས་བྱ་བ་ནི་ཐལ་བའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་བར་བྱའོ། །དགེ་སློང་གིས་ཚེས་གཅིག་ལ་གོས་སྔོན་པོའམ། དམར་པོའམ་སེར་པོ་ཞིག་རྙེད་ན་དེ་ཞག་བཅུ་ཚུན་ཆད་དུ་བྱིན་གྱིས་བརླབ་པར་བྱའོ། །གཞན་ལ་བསྐུར་བར་བྱས་དེ་ལྟར་རུང་བར་མ་བྱས་ན་སྤང་བའི་ལྟུང་བར་འགྱུར་རོ། །དེ་སྟེ་དགེ་སློང་གིས་གོས་སྔོན་པོའམ། དམར་པོ་དང་སེར་པོ་ཞིག་ཚེས་གཅིག་ལ་རྙེད་ནས་དེ་ཁ་མ་ལོངས་ན་རྙེད་དུ་རེ་བ་ཡིན་ན་ཟླ་བ་གཅིག་ཏུ་གཞག་པར་བྱའོ། །དེ་སྟེ་ཚེས་གཅིག་གི་ཉིན་པར་ཁ་སོགས་རྙེད་ན་ཞག་བཅུ་ཚུན་ཆད་དུ་བྱིན་གྱིས་བརླབ་པར་བྱའོ། གཞན་ལ་བསྐུར་བར་བྱ་སྦྱིན་པར་བྱ། དེ་ལྟར་མ་བྱས་ན་སྤང་བའི་ལྟུང་བར་འགྱུར་རོ། །ཇི་ལྟར་གོས་སྔོན་པོ་ལ་སྤང་བའི་ལྟུང་བར་འགྱུར་བ་དེ་བཞིན་དུ་སྦྱར་ཏེ། གོས་ལོངས་བ་ཞིག་ན་ཞག་བཅུ་འདས་ནས་སྤང་བའི་ལྟུང་བར་འགྱུར་རོ། །གོས་ཁ་མ་ལོངས་པ་ཁ་སོགས་ན་མ་རྙེད་པ་ནས་ཞག་བཅུ་ལས་འདས་ན་སྤང་བར་འགྱུར་རོ། །ཁ་སོགས་མ་རྙེད་ན་ཟླ་བ་གཅིག་ལས་འདས་ན་ལྟུང་བར་འགྱུར་རོ། །གོས་ཐ་ན་ལྷག་ཁྲུ་
གང་ཡན་ཆད་ལ་ལྟུང་བར་འགྱུར་རོ། །དགེ་སློང་གིས་ཆོས་གོས་བཀྲུ་བ་དང༌། བརྐྱང་བ་དང༌། དྲ་བ་དང༌། དྲུབས་པ་དང༌། ཁ་དོག་བསྒྱུར་བར་བྱ། སྦྱར་མ་དང༌། བཏིང་བ་ནི་ཉིས་རིམ་དུ་གྱིས་ཤིག །སྟོད་གཡོགས་དང་མཐང་གོས་ནི་ཆིག་རིམ་དུ་གྱིས་ཤིག །སྦྱར་མ་ཉིས་རིམ་ལས་སུམ་རིམ་དུ་སྦྱར་ན་བྱེད་པའི་ཚེ་ཉེས་བྱས་སོ། །ཞག་བཅུ་ལས་འདས་ན་སྤང་བར་འགྱུར་རོ། །ཉིས་རིམ་ལས་ཕྱེ་སྟེ་ཞག་བཅུ་ལས་འདས་ན་སྤང་བར་འགྱུར་རོ། །སྟོད་གཡོགས་དང་མཐང་གོས་ཚིག་རིམ་ལས་ཉིས་རིམ་དུ་སྦྱར་ན་སྤང་བའི་ལྟུང་བར་འགྱུར་རོ། །ཟླ་བ་གཅིག་ལས་གོས་ལྷག་པ་བཅངས་ན་སྤང་བར་འགྱུར་རོ། །ཞེས་འབྱུང་བ། གོས་རྙེད་ནས་དགེ་སློང་སེམས་འཁྲུགས་ན། ནམ་རང་གི་སེམས་རྙེད་ཚུན་ཆད་ཟླ་བ་གཅིག་ཏུ་བརྩིའོ། །ཟླ་བ་གཅིག་འདས་པར་ཉེས་པར་འགྱུར་ལ། ཚེ་གཅིག་ཏུ་བཅངས་ཀྱང་ཉེས་པར་མི་འགྱུར་པ་ཡོད་དེ། ཟླ་བ་གཅིག་ཚུན་ཆད་དུས་བྱས་པའོ། །གོས་ལྷག་ཟླ་བ་དྲུག་ཏུ་བཅངས་ཀྱང་ཉེས་པར་མི་འགྱུར་བ་ཡང་ཡོད་དོ། །གོས་རྙེད་ནས་ཟླ་གཅིག་ལོན་པ་དང༌། དགེ་འདུན་གྱི་གཏན་པ་བཏིང་བར་གྱུར་པའོ། །ཁ་སོགས་ཟླ་བ་གཅིག་ཏུ་ཞོག་ཤིག་ཅེས་བྱ་བ་ཡང༌། ཆོས་གོས་གསུམ་ལ་གཅིག་མ་ཆོག་པ་ལ་ཆོས་གོས་གསུམ་ཚང་བ་ལ་གོས་ལྷག་པ་ཐམས་ཅད་ནི་ཁ་སོགས་སུ་མི་ཆུད་དེ། ཞག་བཅུ་ལས་འདས་ན་སྤང་བར་འགྱུར་བ་ནི་བཅོམ་ལྡན་འདས་ཀྱིས་གནང་བའི་གོས་རྣམ་པ་བདུན་པོ་ལ་བྱའོ། །མི་གནང་བའི་གོས་ལ་ཟླ་བ་གཅིག་ལས་འདས་ཀྱང་སྤང་བར་མི་འགྱུར་ཏེ། མི་གནང་བ་གང་ཞེ་ན། རྒྱུ་རུང་ལ་སྤུན་མི་རུང་བའམ། སྤུན་རུང་ལ་རྒྱུ་མི་རུང་བ་དང༌། གཉིས་ཀ་མི་རུང་བ་སྟེ། རྔ་མོའི་བལ་དང༌། རའི་བལ་དང༌། རི་དགས་ཀྱི་བལ་དང་འདྲེས་པ་ནི་ཟླ་བ་གཅིག་ལས་འདས་ཀྱང་ཉེས་པར་མི་འགྱུར་རོ། །དེ་ལ་ཆོས་གོས་སྦྱར་མ་ནི་རྣམ་པ་དགུ་སྟེ། སྣམ་བུ་དགུ་པ་དང༌། བཅུ་གཅིག་པ་དང༌། བཅུ་གསུམ་པ་དང༌། བཅོ་ལྔ་པ་དང༌། བཅུ་བདུན་པ་དང༌། བཅུ་དགུ་པ་དང༌། ཉི་ཤུ་རྩ་གཅིག་པ་དང༌། ཉི་ཤུ་གསུམ་པ་དང༌། ཉི་ཤུ་ལྔ་པའོ། །ཅིའི་ཕྱིར་ཚར་བུ་ཅན་དུ་བྱ་ཞེ་ན། ཁྱིམ་བདག་མགོན་མེད་ཀྱིས་དགེ་སློང་ལ་ཕྱག་འཚལ་བ་ལས་མུར་འདུག་དང་ནོར་བས་དེ་དང་བྱེ་བྲག་ཏུ་བྱ་བའི་ཕྱིར་ཡུལ་མཉམ་ཀའི་འབྲས་ཞིང་རྣང་ལ་གཟིགས་ནས་ཆོས་གོས་སྣམ་བུ་ཅན་དུ་གྱིས་ཤིག་ཅེས་བཀའ་སྩལ་ཏོ། །འཁྲུ་བའི་གླེང་གཞི་ནི་སངས་རྒྱས་བཅོམ་ལྡན་འདས་
མཉན་དུ་ཡོད་པ་ན་བཞུགས་སོ། །དེའི་ཚེ་མཉན་དུ་ཡོད་པ་ན་ཚེ་དང་ལྡན་པ་འཆར་བ་པོ་ཡང་རབ་ཏུ་ཕྱུང་སྟེ། ཆུང་མ་སྦེད་མ་ཡང་སྐྱེ་དགུའི་བདག་མོ་གཽ་ཏ་མཱི་ས་རབ་ཏུ་ཕྱུང་ནས་གཽ་ཏ་མཱིའི་གན་ནས་ཚེ་དང་ལྡན་པ་འཆར་བ་པོ་འོངས་པ་ཐོས་ནས་དེ་བལྟར་འགྲོའོ་ཞེས་སོང་བ་དང་འཆར་བ་པོའི་གནས་ཁང་ན་གཉིས་སུ་ཆོས་འཆད་པ་ལས། འདོད་ཆགས་སྐྱེས་པ་མོས་ཚོར་བ་དང་བྲོས་ནས་ཕྱི་བཞིན་དུ་བསྙགས་པ་དང༌། ལམ་དུ་ཁུ་བ་བྱུང་ནས་འདོད་ཆགས་ཞི་བ་མཐོང་བ་དང༌། མོ་ཡང་སླར་ལོག་གོ །དེ་ནས་གོས་དེ་མོ་ལ་འཁྲུ་བཅོལ་བ་དང༌། མོས་ཀྱང་ཁུ་བ་བླངས་ནས་མཚན་གྱི་ནང་དུ་བླུགས་པ་དང་ཕྱིས་བུར་ཆགས་ཏེ་བུ་བྱང་བ་ལས། མ་དད་པ་རྣམས་འཕྱ་ཞིང་མི་སྙན་པར་འཛེར་ཏེ། འཆར་བ་བཀུག་སྟེ་རྨས་ན་མད་དོ་ཞེས་གསོལ་ནས་རིགས་པ་མ་ཡིན་ཚུལ་མ་ཡིན་ཞེས་སྨད་ནས། ཡང་དགེ་སློང་ཞེས་བྱ་བ་ནི་འཆར་བ་སྟེ་གཞན་ཡང་དེ་དང་འདྲ་བའོ། །གཉེན་མ་ཡིན་ཞེས་བྱ་བ་ནི་ཕ་དང་མའི་ཟུང་བདུན་ཚུན་ཆད་ནི་གཉེན། དེ་ཕན་ཆད་གཉེན་མ་ཡིན་ནོ། །དགེ་སློང་མ་ཞེས་བྱ་བ་ནི་ཆོས་དེ་ལ་ཞུགས་པའོ། །གོས་རྙིང་པ་ཞེས་བྱ་བ་ནི་སར་པ་ལ་ཉེས་པར་མི་འགྱུར་པས་རྙིང་པ་ཞེས་སྨོས་སོ། །གོས་ཞེས་བྱ་བ་ནི་བལ་ལས་བྱས་པ་དང༌། ཤ་ན་ཀའི་ཤུན་པ་དང༌། ཟར་མའི་ཤུན་པ་དང༌། ཤིང་བལ་གྱི་དང༌། རྩྭ་དུ་གུ་ལའི་དང༌། རྩྭ་ཀོ་པ་ལའི་བལ་དང༌། སྲིན་བལ་ཏེ་རྣམ་པ་བདུན་པོ་ལས་གང་ཡང་རུང་བའོ། །འཁྲུ་ཞེས་བྱ་བ་ནི་ཐ་ན་ཆུའི་ནང་དུ་གཅལ་བ་ཙམ་ཡང་ངོ༌། །འཚེད་ཅེས་བྱ་བ་ནི་ཐ་ན་ཚོན་གྱི་ནང་དུ་བསུབས་པ་ཙམ་མོ། །འཆག་ཅེས་བྱ་བ་ནི་ཐལ་མོ་བརྡབས་པ་ཙམ་མོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །གཉེན་ཡིན་ནམ་མ་ཡིན་ཞེས་ཐེ་ཚོམ་ཟ་བཞིན་དུ་བཅོལ་ན་ཉེས་བྱས་སུ་འགྱུར་རོ། །གཉེན་མ་ཡིན་པའི་དགེ་སློང་མ་ལ་བཅོལ་ཀྱང་ལྟུང་བར་མི་འགྱུར་བ་ཡང་ཡོད་དོ། །ཕྲིན་དང་ཕྲིན་ཡིག་དང༌། ལག་བརྡ་དང་གཅིག་ནས་གཅིག་ཏུ་བརྒྱུད་དེ་བཅོལ་བ་དང༌། དགེ་སློང་མ་སྨྱོན་མ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་དང༌། གླེན་མ་དང༌། ལྐུགས་མ་དང༌། འོན་མ་རྣམས་ལ་འཁྲུར་བཅོལ་ན་ཐམས་ཅད་ཀྱང་ཉེས་བྱས་སུ་འགྱུར་རོ། །མ་ནིང་ངམ། ཕ་མ་དང༌། དགྲ་བཅོམ་པ་བསད་པ་དང༌། སངས་རྒྱས་ལ་ངན་སེམས་ཀྱིས་ཁྲག་ཕྱུང་བ་དང༌། མུ་སྟེགས་ཅན་དང༌། རྐུན་གནས་སུ་གནས་
པ་དང༌། མི་གནས་པ་དང༌། སྔར་འཁྲུགས་པ་དང༌། སྔར་ཉེས་པ་བྱུང་བ་རྣམས་ལ་བཅོལ་ན་ཐམས་ཅད་ལ་ཉེས་བྱས་སུ་འགྱུར་རོ། །དགེ་འདུན་གྱི་གོས་སམ། བཀྲུས་ཟིན་པའམ། ཐུན་མོང་དུ་དབང་བའམ། གཞན་གྱི་ཕྱིར་བཅོལ་བ་ནི་ཐམས་ཅད་དུ་ཉེས་བྱས་སུ་འགྱུར་རོ། །དགེ་འདུན་གྱི་དབྱེན་བྱེད་པ་དང༌། རྗེས་སུ་ཕྱོགས་པ་དང༌། བསླབ་པ་བྱིན་པ་ལ་འཁྲུར་བཅོལ་ན་སྤང་བའི་ལྟུང་བར་འགྱུར་རོ། །འགྲོ་བ་གཞན་དུ་གནས་པའི་བུད་མེད་དང༌། དགེ་སྦྱོང་མ་དང༌། མུ་སྟེགས་མ་དང༌། ཁྱིམ་མི་མོ་ལ་བཅོལ་ན་ཐམས་ཅད་དུ་ཉེས་བྱས་སུ་འགྱུར་རོ། །ལེན་པའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པའི་ཛེ་ཏའི་ཚལ་ན་བཞུགས་སོ། །དེའི་ཚེ་ན་དགེ་སློང་མ་རྣམས་དགོན་པ་ན་གནས་སུ་གནང་སྟེ། དགེ་སློང་མ་ཨུཏྤ་ལའི་ཁ་དོག་མ་འཁོར་དགེ་སློང་མ་ལྔ་བརྒྱ་ཙམ་དང་ལངས་པ་ཚལ་དུ་ཉིན་པར་བསྒོམ་དུ་དོང་བ་ལས་དགེ་སློང་མའི་འཁོར་རྣམས་ནི་མཁན་མོ་ལྟ་རྫུ་འཕྲུལ་གྱིས་བྱོན་གྲང་ཞེས་དེར་བཞག་ནས་རང་རང་གི་གནས་སུ་སླར་ལོག་གོ །མོ་འབའ་ཞིག་འགོག་པའི་སྙོམས་པར་ཞུགས་ཤིང་འདུག་པ་དང༌། དེའི་ནུབ་མོ་མི་རྒོད་དག་ཅིག་ལྷགས་པ་དང༌། དེ་དག་ཀྱང་དད་པ་སྐྱེས་ནས་རས་བཟང་པོ་ཡུག་གཅིག་སྤྱན་གཟིགས་ཀྱིས་བཀང་སྟེ། དེའི་དྲུང་དུ་བཞག་སྟེ་དོང་ངོ༌། །ཕྱི་དེ་ཉིན་མོ་རས་དང་སྤྱན་གཟིགས་ཁྱེར་ཏེ་ཛེ་ཏའི་གཙུག་ལག་ཁང་དུ་དབུལ་བར་བྱས་པ་དང༌། བསྙེན་དགའ་པོ་གཙུག་ལག་ཁང་གི་སྒོ་ན་འཆག་ཅིང་འདུག་པས་སྤྱན་གཟིགས་ནི་གཙང་སྦྱོར་ལ་གཏད་ནས་རང་བསླངས་སོ། །ཕྱིས་ཨུཏྤ་ལའི་ཁ་དོག་ཅན་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་སོང་བ་དང༌། བཅོམ་ལྡན་འདས་ཀྱིས་གོས་ངན་ན་འདིར་དབྱར་གནས་པའི་དགེ་སློང་མ་རྣམས་གོས་ཀྱི་རྙེད་པ་མ་གྲུབ་པ་མ་ཞེས་ཀུན་དགའ་བོ་ལ་སྨྲས་པ་དང༌། བཙུན་པ་རྙེད་མོད་ཀྱི་སྲིང་མོ་འདི་ནི་རང་བཞིན་གྱིས་བསམ་པ་དགེ་བ་ཅུང་ཟད་ཅི་རྙེད་ཀྱང་དཀོན་མཆོག་གསུམ་ལ་དབུལ་ལ། དེ་རིང་ཡང་རས་བཟང་པོ་གཅིག་རྙེད་ན་བསྙེན་དགའ་བོས་བླངས་སོ་ཞེས་གསོལ་པ་དང༌། ཅི་དགེ་སློང་མ་གཉེན་མ་ཡིན་པ་ལས་གོས་ལེན་ཏམ་ཞེས་སྨྲས་པ་དང༌། བཙུན་པ་དེ་བཞིན་ནོ་ཞེས་གསོལ་ནས། གཉེན་ཡིན་ཀྱང་དེ་ལ་སྦྱིན་པའི་འདུ་ཤེས་བསྐྱེད་ཀྱི། གཉེན་མ་ཡིན་པ་ལ་ཆོས་གོས་ལྔ་ཚང་དམ་མི་ཚང་མི་རྟོག་པར་ཐོབ་ཐོབ་ལེན་ཏོ། །གྲོང་ཁྱེར་ཡངས་པའི་མཛོད་ནས་ཆོས་གོས་ཕྱུང་སྟེ། དགེ་སློང་
མ་ཨུཏྤ་ལའི་ཁ་དོག་ལ་བྱིན་ཅིག་ཅེས་བཀའ་སྩལ་ཏོ། །དེ་ལྟར་གྱུར་པ་དེའི་ཕྱིར་ཡང་དགེ་སློང་གང་གཉེན་མ་ཡིན་པ་ཞེས་འདུལ་བ་ལ་བསླབ་པའི་གནས་བཅས་ཏེ་རྩ་བའི་ཚིག་རྣམས་སོ། །བརྗོད་པ་མ་གཏོགས་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་དད་པ་ཁྱོ་ཤུག་གཉིས་ཤིག་གནས་ཏེ། འཇིག་རྟེན་ཕྱི་མའི་ལམ་བརྒྱགས་སོགས་པའི་ཁྱིམ་བདག་གིས་ནི་དེ་འདུན་ཕ་རྣམས་སྤྱན་དྲངས་ཏེ། གོས་རེ་རེ་ཡོན་དུ་ཕུལ། ཁྱིམ་བདག་གི་ཆུང་མས་བཤོས་དང་ན་བཟའ་ཕྲུགས་རེ་རེ་གསོལ་བ་དང༌། དགེ་སློང་མ་རྣམས་གོས་རིན་ཆེན་པོ་རྣམས་ལེན་དུ་མི་གནང་བས་སྙན་དུ་ཞུས་ཏེ་བཀའ་སྩལ་པ། ལོང་ལ་དགེ་སློང་ཕ་དང་བརྗེར་གནང་ངོ༌། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ། གཞན་ཡང་དེ་འདྲ་བའོ། །གཉེན་མ་ཡིན་ཞེས་བྱ་བ་ནི་ཕ་མའི་བདུན་རྒྱུད་ཚུན་ཆད་དེ་ཕན་ཆད་མ་གཏོགས་པའོ། །དགེ་སློང་མ་ཞེས་བྱ་བ་ནི་གང་ལ་དགེ་སློང་མའི་དངོས་པོ་ཡོད་པའོ། །གོས་ཞེས་བྱ་བ་ནི་གོང་དུ་རྣམ་པ་བདུན་སྨོས་པའོ། །བརྗེ་བ་མ་གཏོགས་ཞེས་བྱ་བ་ནི་བཀོལ་པའོ། །དངོས་པོ་སྤངས་ནས་ལྟུང་བ་བཤགས་པར་བྱའོ་ཞེས་གསུངས་སོ། །གཉེན་མ་ཡིན་པ་ལ་ཐེ་ཚོམ་ཟ་བཞིན་དུ་བླངས་ན་ཉེས་བྱས་སོ། །དགེ་འདུན་ལ་ཕུལ་བའི་ནང་དུ་བདག་གཏོགས་པ་དང༌། སྙན་ཚིག་ཏུ་སྨྲས་པ་ལ་བྱིན་པ་དང༌། བསྙེན་པར་རྫོགས་པ་ལ་བྱིན་པ་དང༌། རྐུན་པོས་འཕྲོས་ཀྱིས་དོགས་ཏེ་བྱིན་པ་དང༌། གྲོགས་པོ་དང་བརྗེས་ཏེ་བྱིན་པ་དང༌། གྲགས་པ་དང་བསོད་ནམས་དང་ལྡན་པ་ལ་དགེ་སློང་མས་འདི་འདྲ་བ་ཞིག་ཐུགས་བརྩེ་བའི་སླད་དུ་བཞེས་སུ་གསོལ་ཞེས་ཆགས་པ་མེད་པར་ཕུལ་བ་ལ་ཉེས་པ་མེད་དོ། །གཉེན་མ་ཡིན་པའི་དགེ་སློང་མ་ལས་གོས་བླངས་ཏེ་སྤང་བར་མི་འགྱུར་བ་ཡང་ཡོད་དེ་ཕྲིན་དང༌། ཕྲིན་ཡིག་དང༌། ལག་བརྡ་ང༌། གོས་ཀྱི་རྒྱུ་རུང་ལ་སྤུན་མི་དུང་བ་དང༌། གོས་ཀྱི་རྒྱུ་མི་རུང་ལ་སྤུན་རུང་བ་ལ། གཉིས་ཀ་མི་རུང་བ་དང༌། དགེ་ཚུལ་མ་དང༌། བསྙེན་པར་མ་རྫོགས་པ་དང༌། དེ་རྣམས་ལས་གོས་བླངས་ན་ཐམས་ཅད་དུ་ཉེས་བྱས་སུ་འགྱུར་རོ། །བསླབ་པ་བྱིན་པ་དང༌། དགེ་སློང་མ་དབྱེན་བྱེད་པ་དང༌། རྗེས་སུ་ཕྱོགས་པ་ལ་བསླབས་ན་སྤང་བའི་ལྟུང་བར་འགྱུར་རོ། །སློང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་ཁྱིམ་བདག་ཁྱོ་ཤུག་གཉིས་ཤིག་ཡོད་དེ། ལོངས་སྤྱོད་སྒྲུབ་པར་གྲོས་བྱས་ནས་དེས་ཆུང་མ་ལ་བཟང་མོ།
བརྒྱགས་སྟ་གོན་གྱིས་ཤིག་ཚོང་ལ་འགྲོའོ། །དེས་ཀྱང་ཁྱོ་བརྫངས་ཏེ་བཏང་ངོ༌། །དེ་སོང་བའི་འོག་ཏུ་ཆུང་མ་བརྒྱགས་ཟོང་གིས་རས་བཟང་པོ་ཟུང་གཅིག་བྱས་ནས་ཁྱིམ་ཐབ་ཕྱིར་འོངས་མ་ཐག་ཏུ་བྱིན་ནས། རས་འདི་སུ་ལ་ཡང་མ་སྦྱིན་ཅིག་ཅེས་བསྒོའོ། །དེ་དེ་ནས་ཛེ་ཏའི་གཙུག་ལག་ཁང་དུ་ཕྱག་འཚལ་དུ་སོང་བ་དང༌། ཛེ་ཏའི་སྒོ་བས་ཀྱང་རས་བཟང་པོ་ཞེས་བསྟོད་དོ། །བསྙེན་དགའ་བོ་ཡང་ཛེ་ཏའི་གཙུག་ལག་ཁང་གི་སྒོ་ན་འཆག་ཅིང་འདུག་པས་ཐག་རིང་པོ་ནས་འོང་བ་མཐོང་ནས། གོས་དེ་ནི་བདག་གིས་ཀྱང་མ་ཐོབ་པར་མི་བཏང་ངོ་སྙམ་སྟེ། ཁྱིམ་བདག་ཟླ་བ་ཚེས་པ་ལྟ་སྟེ་འོངས་པ་ལེགས་སོ་ཞེས་སྨྲས་ནས་བསྙེན་དགའ་བོ་ཡང་རང་བཞིན་གྱིས་ཆོས་འཆད་མཁས་པས་དེས་སྦྱིན་པའི་ཡོན་ཏན་བཤད་པ་དང་དད་པ་སྐྱེས་ནས་དེས་འཕགས་པ་གོས་ཤིག་ཡོན་དུ་དབུལ་ལོ་ཞེས་ཁས་བླངས་པ་དང༌། ཁྱེད་ཀྱིས་གྱོན་པ་འདི་བྱིན་ཞེས་བྱས་པ་དང༌། རས་ཡ་གཅིག་བྱིན་ནོ། །བྱིན་པའི་བསོད་ནམས་ནི་ཡོད་ན་སྤྱད་པའི་བསོད་ནམས་ནི་མེད་དེ་གོས་གདང་ལ་བཀལ་བས་དེ་གསང་སྟེ་སོང་ན་ཡ་གཅིག་ཀྱང་གསང་ལ་བྱིན་ཁྱོད་ནི་གཅེར་བུ་པ་དང་འདྲ་བར་ཕྱུགས་རྗེས་ཀྱི་ཕྱི་བཞིན་དུ་རྡུལ་གྱི་ནང་དུ་སོང་ཤིག་ཅེས་ནན་གྱིས་བླངས་ཏེ། དེ་ཡང་དེ་བཞིན་དུ་སོང་བ་དང༌། སྒོ་བ་དང་ཕྲད་དེ་གོས་བཟང་པོ་ག་རེ་ཞེས་དྲིས་ན། དེ་ན་རེ་བསྙེན་དགའ་བོས་ཆོས་ཀྱི་སྒོ་ནས་ཕྲོགས་སོ་ཞེས་བྱས་པ་དང༌། མ་དད་པ་རྣམས་འཕྱ་བར་གྱུར་ཏོ། །དེ་ནས་ཁྱིམ་བདག་མགོན་མེད་ཟས་སྦྱིན་སངས་རྒྱས་ལ་ཕྱག་འཚལ་དུ་ཆས་ཏེ་ཛེ་ཏའི་སྒོར་ཕྱིན་པ་དང༌། སྒོ་བ་ལ་ཅི་མཐོང་ཞེས་སྨྲས་ན། གཞན་ནི་མ་མཐོང་གི །འདིར་རྐུན་པོ་ཞིག་བྱུང་ངོ་ཞེས་སྨྲས་པ་དང༌། བསྙེན་དགའ་བོས་ཁྱིམ་བདག་ལ་ཆོས་བསྒོ་ནས་ཁྱིམ་བདག་ལས་རས་བླངས་སོ་ཞེས་བྱས་པ་དང༌། ཁྱིམ་བདག་མགོན་མེད་ཟས་སྦྱིན་གྱིས་དེ་ལྟ་བུ་མི་རིགས་ཞེས་སྡོམ་པ་བཅའ་བར་སྙན་དུ་གསོལ་ནས་འདུལ་བ་ལ་བསླབ་པའི་གནས་བཅས་ཏེ། ཡང་དགེ་སློང་གང་ཞེ་ན། རྩ་བའི་ཚིག་རྣམས་སོ། །དུས་མ་གཏོགས་ཞེས་བྱ་བ་ནི་པ་ཏིའི་དགེ་སློང་བཞི་བཅུ་ལྗོངས་རྒྱུ་ཞིང་དོང་བ་ལས། ཆོམ་བོས་བཅོམ་ནས་གོས་མེད་དེ། བདག་ཅག་ཁྱིམ་པ་ལས་སློང་དུ་ནི་མི་གནང་བས། ཛེ་ཏའི་ཚལ་དུ་དགེ་སློང་གྲོགས་པོ་རྣམས་ལ་སློང་ངོ༌། །དེ་ལྟར་གྱུར་པ་སྙན་དུ་བདས་ནས་ད་སླན་ཆད་གོས་རྐུན་པོས་ཁྱེར་རམ། རླག་གམ་མེས་ཚིག་གམ་ཆུས་ཁྱེར་ཏེ་མེད་
ན་སློང་བའི་དུས་ཡིན་ཏེ་དུས་མ་གཏོགས་ཞེས་གསུངས་སོ། །ཡང་དགེ་སློང་གང་ཞེས་བྱ་བ་ནི། བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །གྱེན་མ་ཡིན་ཞེས་བྱ་བ་དང༌། གོས་རྣམ་པ་བདུན་ནི་གོང་མ་བཞིན་ནོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཆུང་མ་ནི་བུད་མེད་དོ། །དུས་མ་གཏོགས་ཞེས་བྱ་བ་ནི་བཀོལ་བའོ། །ཆོས་གོས་རྐུན་པོས་ཁྱེར་བ་ལ་སོགས་པ་ནི་གཞན་གྱིས་ཁྱེར་ནས་བདག་ལ་མེད་པའོ། །སྤང་བའི་ལྷུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ཉེས་པ་ནི་རིན་ཐང་དང་ཁ་དོག་དང་ཁྲུའོ། །དགེ་སློང་གིས་ཀཱར་ཥཱ་པ་ཎ་བཅུ་རི་བ་དང་ལྔ་བཅུ་རི་བའི་གོས་བསླངས་ཏེ་གྲུབ་ན་སྤང་བའི་ལྟུང་བར་འགྱུར་རོ། །ཁ་དོག་སྔོན་པོ་དང༌། སེར་པོ་དང༌། དམར་པོ་བླངས་ཏེ། དེ་བཞིན་དུ་གྲུབ་ན་སྤང་བར་འགྱུར་རོ། །ཁྲུ་ལྔ་པ་ལ་ལྔ་བཅུའི་བར་དུ་བསླངས་ཏེ་གྲུབ་ན་སྤང་བར་འགྱུར་རོ། །བསླངས་པ་ལས་ལྷག་པ་མ་རྙེད་པ་ནི་ལྟུང་བ་མེད་དེ་ཉེས་བྱས་སོ། །ཕྲིན་དང་ཕྲིན་ཡིག་གིས་བསླང་བ་དང༌། ཁྱིམ་པ་སྨྱོས་པ་དང༌། སེམས་འཁྲུགས་པ་དང༌། ནད་ཀྱིས་ཟིན་པ་དང༌། གླེན་པ་དང༌། ལྐུགས་པ་དང༌། འོན་པ་དང༌། གཉིད་ཀྱིས་ལོག་པ་དང༌། ཕྱིའི་མུ་སྟེགས་ཅན་དང༌། འགྲོ་བ་གཞན་དུ་གནས་པ་ལས་བསླངས་ན་ཉེས་བྱས་སུ་འགྱུར་རོ། །གོས་ཀྱི་རྒྱུ་རང་ལ་སྤུན་མི་རུང་བ་དང༌། སྤུན་རུང་ལ་རྒྱུ་མི་རུང་བ་དང༌། གཉིས་ཀ་མི་རུང་བ་ནི་ཉེས་བྱས་སུ་འགྱུར་རོ། །སྟོད་གཡོགས་དང་སྨད་གཡོགས་སློང་དུ་གནང་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བསྙེན་དགའ་བོས་སྔོན་ཆད་ནི་དུས་མ་ཡིན་པར་གཉེན་མ་ཡིན་པ་ལ་སློང་དུ་གནང་བ་ལས། ད་ནི་མགོན་མེད་ཟས་སྦྱིན་གྱིས། ཁྱིམ་བདག་ཕོ་ལ་སློང་དུ་མི་གནང་བར་བཅས་པ་ན་རྙེད་པ་ཡང་རབ་ཏུ་ཉུང་ན་ཡུལ་པ་ཏའི་དགེ་སློང་མཉན་དུ་ཡོད་པར་འོངས་པ་ལས་ལམ་དུ་ཆོམ་པོས་བཅོམ་ནས་སྟོད་གཡོགས་དང༌། སྨད་གཡོགས་བསླང་དུ་རྗེས་སུ་གནང་བས། དྲུག་སྡེ་པོ་རྣམས་ཀྱིས་པ་ཏའི་དགེ་སློང་འདི་དག་བསླུས་ཏེ། པ་ཏའི་དགེ་སློང་ལ་སྤྲིན་ནས། དྲུག་སྡེ་པོའི་འཁོར་དང་བཅས་པ་དྲུག་ཅུ་དང་སྤེལ་ཏེ། རྒྱལ་པོ་དང་བཙུན་མོ་ཕྲེང་ལྡན་མ་མན་ཆད་གཉེན་མ་ཡིན་པའི་ཁྱིམ་བདག་གི་ཁྱིམ་རེ་རེར་ཡང་གོས་ཕྲུགས་བཅུ་གསུམ་བཅུ་གསུམ་བསླངས་སོ། །དེ་དག་ལ་ཡོ་བྱད་བཅུ་གསུམ་ཚང་བར་བསླངས་ཏེ་འཁོད་པ་དང༌། གོས་བཟང་དགུ་དྲུག་སྡེ་བོས་བདམས་ཏེ་ཁྱེར་རོ། །
ངན་སྙིགས་ཐམས་ཅད་པ་ཏའི་དགེ་སློང་རྣམས་ལ་བྱིན་ནས་དེ་དག་འཚེམ་ཞིང་འཁོད་པ་དང་དགེ་སློང་དག་གིས་གོས་མང་དུ་རྙེད་པ་ག་རེ་ཞེས་སྨྲས་པ་དང༌། ཅི་ལྟར་གྱུར་པ་ཞིབ་ཏུ་སྨྲས་པ་ལས་སྙན་དུ་བདས་ནས་པ་ཏའི་དགེ་སློང་རྣམས་ལ་བཀའ་སྩལ་པ། ད་ཚོད་མི་ཟིན་པར་སློང་བ་ཉེས་ཞེས་སྨད་ནས། ད་སླན་ཆད་དུས་ལ་བབ་ཀྱང་སྟོད་གཡོགས་དང་སྨད་གཡོགས་ལས་ལྷག་པར་བླངས་ན་སྤང་བའི་ལྟུང་བའོ་ཞེས་བསླབ་པའི་གནས་བཅས་སོ། །དགེ་སློང་གོས་རྐུན་པོས་ཁྱེར་ཞེས་བྱ་བ་ནི་གཡོན་ཅན་གྱིས་ཕྲོགས་པར་གྱུར་པའོ། །གོས་རླག་ཅེས་བྱ་བ་ནི་རླག་པའམ་བརྗེད་དེ་སྟོར་བའོ། །མེ་དང་ཆུ་དང༌། རླུང་ནི་དངོས་སུ་ཟད་དོ། །གཉེན་མ་ཡིན་པ་དང་གོས་ཀྱི་རྒྱུ་རྣམ་པ་བདུན་ནི་གོང་མ་བཞིན་ནོ། །སློང་ཞེས་བྱ་བ་ནི་བསླངས་པའོ། །འདོད་ཅེས་བྱ་བ་ནི་དགོས་པར་གྱུར་པའོ། །སྟོད་གཡོགས་དང་སྨད་གཡོགས་ལས་ལྷག་པར་མ་ལེན་ཅིག་ཅེས་བྱ་བ་ནི་དེ་ལས་ལྷག་པར་ལེན་དུ་མི་གནང་ངོ༌། །སྟོད་གཡོགས་དང་སྨད་གཡོགས་རྣམ་པ་གཉིས་ཏེ། ཁྱིམ་པའི་དང་དགེ་སློང་གིའོ། །དགེ་སློང་གི་སྟོད་གཡོགས་དང་སྨད་གཡོགས་བསླངས་པ་ལས་ལྷག་པར་གྱུར་ན་སློང་བའི་ཚེ་ཉེས་བྱས་སོ། །ཐོབ་ན་སྤང་བར་འགྱུར་རོ། །ཁྱིམ་པའི་སྟོད་གཡོགས་ལ་ཡང་དེ་བཞིན་དུ་སྦྱར་རོ། །སྟོད་གཡོགས་སྨད་གཡོགས་མ་ཆོག་ན་ཡང་སློངས་ཤིག་ལྷག་ན་ཡང་སླར་བྱིན་ཅིག །མ་བྱིན་ན་སྤང་བར་འགྱུར་རོ། །ཁྱིམ་པའི་སྨད་གཡོགས་སྟོད་གཡོགས་བསླངས་པ་ལས་མ་ཆོག་ན་ཡང་མ་སློང་ཤིག །བསླངས་ན་སྤང་བར་འགྱུར་རོ། །ལྷག་ན་ཡང་སླར་མ་བྱིན་ཅིག་དགེ་སློང་གིས་རང་གི་སྟོད་གཡོགས་དང་སྨད་གཡོགས་ལྷག་པར་གྱུར་པ་སླར་མ་བྱིན་ནམ། ལྷག་པར་བསླངས་ན་སྤང་བར་འགྱུར་རོ། །གོས་ཀྱི་རིན་ཁྱིམ་བདག་གིས་སྔར་གཟས་པ་ལས་ལྷག་པར་བསླངས་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་གཞུགས་སོ། །དེའི་ཚེ་ཁྱིམ་བདག་ཁྱོ་ཤུག་གཉིས་ཡོད་དེ། དེ་ཡང་སོ་སོར་འཕྱོ་ཞིང་བྲན་མོ་ལ་བརྡེག་པ་དང༌། བསྙེན་དགའ་བོས་ཁྱིམ་བདག་ལ་ཆོས་དག་བཤད་པས་དེ་གཉིས་ཀྱང་སྔ་མའི་སྐྱོན་ཀུན་སྤངས་ཏེ་བྲན་མོ་ལ་ཡང་མི་རྡེག་པས་རང་གི་ཁྱིམ་སོ་ཡང་ཚུགས་སོ། །དེ་གཉིས་ཀྱིས་བསམ་པ། བདག་ཅག་འདི་ལྟར་འཁོད་པ་ཡང་བསྙེན་དགའ་བོའི་བཀའ་དྲིན་ཡིན་གྱི་འཕགས་པ་བསྙེན་དགའ་བོ་ལ་གོས་རིན་ཞིག་དབུལ་ལོ་ཞེས་སྦགས་པ་དང༌།
བྲན་མོ་དེས་ཐོས་ནས་བྲན་མོ་ནང་གཅིག་བསྙེན་དགའ་བོ་དེར་འོངས་པ་ལ་ཁོའི་དྲིན་སླར་གླན་པའི་ཕྱིར་བསྙེན་དགའ་བོ་ལ་ཟོང་སྤགས་པ་སྦྲན་ཏོ། །དེ་ནས་བསྙེན་དགའ་བོས་ཁྱིམ་བདག་ཁྱོ་ཤུག་ལ། ཁྱེད་ཀྱིས་ང་ལ་སྦྱིན་པར་གཟས་པ་དེ་ང་ལ་བྱིན་ཅིག་ཅེས་སྨྲས་ན་འཕྲལ་དུ་མ་འབྱོར་པ་དང་ཚོང་པ་ཕྱུག་པོ་གཅིག་ལ་ཁྱིམ་བདག་སྐྱིར་སོང་བ་དང༌། བསྙེན་དགའ་བོས་ཐབས་སུ་བྱས་ཏེ། ཚོང་པ་ངན་པ་དེས་རས་བཟང་པོ་ཕྱུང་བ་དང༌། བསྙེན་དགའ་བོས་ནན་གྱིས་འཐེན་ཏེ་ཁྱེར་རོ། །ཁྱིམ་བདག་ད་ལ་རིན་གཞལ་དུ་བཅུག་པ་དང༌། ཕྱིས་དེ་ལ་རིན་མ་འཁོར་ནས། དེའི་ཕྱིར་ཚོང་པས་ཁྱིམ་བདག་བཟུང་སྟེ། ཉི་ཚན་ལ་བཏགས་པ་དང༌། དེའི་མཛའ་བོ་དག་གིས་མཐོང་ནས། ཁྱོད་མར་འཐུངས་སམ། རིམས་ནད་ཀྱིས་བཏབ་བ་མ་ཅི་ཉེས་ཏེ་ཉི་ཚན་ལ་འདུག །བདག་གིས་ནི་མར་ཡང་མ་འཐུངས་ཏེ་བུ་ལོན་གྱི་ཕྱིར་བཟུང་ངོ༌། །ཁྱོད་ཉིད་ཀྱི་ཚེ་འམ་ཕ་མེས་ཀྱི་ཚེ་ཆགས། གང་ཡང་མ་ཡིན་ཏེ་ཤཱཀྱའི་བུ་དག་གིས་ཏེ་གང་བྱིན་པ་དེ་ནི་མི་ལེན་ཏེ་ལྷག་པར་སློང་ངོ༌། །དེ་ལྟར་གྱུར་པ་ལ་སྙན་དུ་བདས་ནས་དགེ་སློང་གི་ཚུལ་མ་ཡིན་ཞེས་སྨད་དེ། གཞན་གྱིས་བཤམས་པ་ལས་ལྷག་པར་སློང་དུ་མི་གནང་བར་བཅས་སོ། །དགེ་སློང་ཞེས་བྱ་བ་ནི་ཤཱཀྱའི་བུ་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །གཉེན་མ་ཡིན་ཞེས་བྱ་བ་ནི་ཕ་མའི་ཟུང་བདུན་རྒྱུད་ཚུན་ཆད་ནི་གཉེན་ནོ། །དེ་ཕན་ཆད་ནི་གཉེན་མ་ཡིན་ནོ། །ཁྱིམ་བདག་ཅེས་བྱ་བ་ནི་སྐྱེས་པ་དང་བུད་མེད་དོ། །གོས་ཀྱི་རིན་ཞེས་བྱ་བ་ནི་གསེར་དང་དངུལ་ལོ། །བདག་གི་གོས་ཀྱི་རིན་དེས་དེ་ལྟར་ན་འདི་འདྲའི་གོས་གྱིས་ཤིག་ཅེས་བྱ་བ་ནི་བལ་ལས་བྱས་པ་དང༌། ཤ་ན་ཀའི་ཤུན་པ་ལས་བྱས་པ་དང༌། ཟར་མའི་ཤུན་པ་ལས་བྱས་པ་དང༌། རྩྭ་དུ་གུ་ལ་ལས་བྱས་པ་དང༌། རྩྭ་ཀོ་ཏམ་པ་ལས་བྱས་པ་དང༌། ཤིང་བར་གྱི་དང༌། སྲིན་བལ་ཏེ་བདུན་པོ་ལས་གང་ཡང་རུང་བའོ། །ཉོས་ལ་ཞེས་བྱ་བ་ནི་ཉོ་བའོ། །དགེ་སློང་མིང་འདི་ཞེས་བྱ་བ་ནི་བསྙེན་དགའ་བོ་སྟེ། དེ་ལས་དུས་སུ་གོས་སྦྱིན་པར་སེམས་པའོ། །སྔར་མ་བསྒོ་ཞེས་བྱ་བ་ནི་སྦྲན་པའོ། །རྣམ་པར་རྟོག་པ་འགའ་ཞིག་བྱུང་ཞེས་བྱ་བ་ནི་གོས་ཚོལ་བར་ཞུགས་པའོ། །གསོ་དེ་ལྟ་བུ་ཞིག་བསྐོས་ན་ལེགས་སོ་ཞེས་བྱ་བ་ནི་བཟང་པོ་འདོད་པའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །དེ་ལ་ཉེས་པ་གང་ཞེ་ན་རིན་ཐང་དང༌། ཁ་དོག་དང༌། ཁྲུ་
ཚད་དོ། །ཀཱ་ར་ཥཱ་པ་ཎ་ལྔ་རི་བ་བསླངས་པ་ལས་ལྷག་པར་ཐོབ་པ་དང༌། ཁྲུག་ལྔ་བ་སྤགས་པ་ལས་ལྷག་པར་ཐོབ་པ་དང༌། ཁ་དོག་སྔོན་པོ་དང༌། སེར་པོ་དང༌། དམར་པོ་བྱིན་པ་ལས་ལྷག་པར་བསླངས་ན་སློང་བའི་ཚེ་ཉེས་བྱས་སོ། །ཐོབ་ན་སྤང་བའི་ལྟུང་བར་འགྱུར་རོ། །དགེ་སློང་གིས་སྔར་མ་སྦྲན་པར་རྣམ་པར་རྟོག་པ་སྐྱེད་ནས་ཕྲིན་དང༌། ཕྲིན་ཡིག་དང༌། ལག་བརྡ་དང༌། གཅིག་ནས་གཅིག་ཏུ་བརྒྱུད་པས་གོས་ཐོབ་ན་ཉེས་བྱས་སོ། །ཁྱིམ་བདག་སྨྱོན་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་དང༌། འོན་པ་དང༌། སྐུགས་པ་དང༌། མུ་སྟེགས་ཅན་དང༌། བྲམ་ཟེར་དང༌། ཀུན་དུ་རྒྱུ་བ་ལ་རྣམ་པར་རྟོག་པ་སྐྱེད་དེ་གོས་ཐོབ་ན་ཉེས་བྱས་སུ་འགྱུར་རོ། །ཁྱིམ་བདག་ལ་རྔ་མོའི་བལ་དང༌། རའི་བལ་དང༌། རི་དགས་ཀྱི་བལ་དང་འདྲེས་པ། རྒྱུ་མི་རུང་བ་བསླངས་ན་ཉེས་བྱས་སུ་འགྱུར་རོ། །མི་མ་ཡིན་པ་ལ་བསླངས་ན་ཉེས་བྱས་སུ་འགྱུར་རོ། །སོ་སོ་ནས་སྤགས་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ཁྱིམ་བདག་ཁྱོ་ཤུག་གཉིས་ཤིག་ཡོད་དེ། དེ་ཡང་སོ་སོར་འཕྱོ་ཞིང་ལོངས་སྤྱོད་ཀྱང་འགྲིབས། བྲན་མོ་ཡང་བརྡེགས་པ་ལས་བསྙེན་དགའ་བོས་བསླབ་པ་ལ་བཞག་པ་ལ་སོགས་པ་ལྟུང་བ་གོང་མ་དང་འདྲ་བའོ། །ཁྱད་པར་ནི་ཁྱིམ་བདག་དང་ཁྱིམ་བདག་གི་ཆུང་མས་དགེ་སློང་ལ་གོས་ཀྱི་རིན་སོ་སོར་བཞག་པ་ཙམ་ཞིག་ཡོད་དོ། །སོ་སོར་ཞེས་བྱ་བ་ནི་ཁྱིམ་བདག་ཀྱང་བདག་རང་གི་ནོར་ཡིན་པ་དང༌། ཆུང་མ་ཡང་རང་གི་ནོར་གུད་པ་ཡིན་པ་ལས་དེ་གཉིས་གཅིག་ཏུ་བསྡུས་ནས་དགེ་སློང་ལ་བྱིན་པ་ནི་སོ་སོ་ནས་ཞེས་བྱའོ། །བདག་ལ་བསྐོན་ཅིག་ཅེས་བྱ་བ་ནི་གཉི་གས་བདག་དུས་སུ་བྱིན་ཅིག་པའི་དོན་ཏོ། །གཉི་གས་ཀྱང་གྱུར་པ་ཞེས་བྱ་བ་ནི་གོས་བཟང་པོ་མཚུངས་པར་བྱ་བར་སོམས་ཤིག་པའོ། །བཟང་པོ་འདོད་པ་ཞེས་བྱ་བ་ནི་བདེ་བར་བསྒྲུབ་པར་བྱ་བའི་རྐྱེན་ཡིན་ཏེ། འཇམ་པ་ལ་སོགས་པའི་ཡོན་ཏན་དང་ལྡན་པར་འདོད་པའོ། །ཕྱིར་ཞེས་བྱ་བ་ནི་རྒྱུ་ལ་བྱའོ། །ཉེས་པར་འགྱུར་བ་གཞན་ནི་གོང་མ་བཞིན་ནོ། །བསྐུར་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་རྒྱལ་པོའི་ཁབ་ན་བསྙེན་དགའ་བོ་འདུག་པའི་སྟེང་དུ་བྲམ་ཟེ་དབྱར་ཕྱེད་ཀྱིས་གོས་ཀྱི་རིན་ཀཱར་ཥཱ་པ་ཎ་དྲུག་ཅུ་སྔར་བྱིན་ནས་བསྙེན་དགའ་བོ་ཉིད་ནི་སངས་རྒྱས་ཀྱི་ཞབས་འབྲིང་དུ་
མཉན་དུ་ཡོད་པར་སོང་ནས། །བྲམ་ཟེད་བྱར་བྱེད་ཀྱིས་གོས་ཀྱི་རིན་ཚོང་པ་ཞིག་ལ་ཕྱི་བཞིན་དུ་ཡོད་པར་བསྐུར་བ་ལས་མཉན་དུ་ཡོད་པར་བསྙེན་དགའ་བོས་ཟོང་ཚོང་བའི་གན་དུ་སོང་སྟེ། ཟོང་ཚོང་བ་ཞིག་གི་ལག་ཏུ་བཞག་གོ །ཕྱིར་ལེན་པར་དུས་བྱས་པ་ལས་བསྙེན་དགའ་བོ་དུས་སུམ་འོངས་ནས་ཚོང་བ་ཡང་བསྙེན་དགའ་བོ་ལ་སྡོད་དེ། མདུན་མ་ཕྱིས་པས་རྒྱལ་པོས་ཆད་པ་ཀཱར་ཥཱ་པ་ཎ་དྲུག་ཅུས་བཅད་དོ་ཞེས་བྱུང་བ་དང༌། འགྲོ་ཁར་བསྙེན་དགའ་བོས་ཟོང་བླངས་ན་ཚོང་པ་ཡང་མདུན་མ་ལ་རིངས་པས་ཟོང་སྣོད་དང་བཅས་ཏེ་བོར་བ་དང་རྒྱ་གོགས་ནས་དེས་ཀླན་ཀ་བཙལ་ཏེ་ཚོང་པ་མ་བཏང་པ་དང༌། ཚོང་པ་ཆད་པས་བཅད་དེ་མ་དད་པར་གྱུར་པ་དང༌། རུང་བ་མ་ཡིན་པར་ལེན་ཅིང་ཕ་རོལ་པའི་སེམས་མི་སྲུང་ལ་ཐོབ་པ་ལ་གཡེང་བར་བྱེད་པས་མ་དད་པར་བྱས་ཏེ། སྤོས་འཚོང་གི་མས་དེ་ལྟར་ཆད་པ་ཀཱ་ར་ཥཱ་པ་ཎ་ལྔ་བརྒྱ་བཅད་པ་དེ་སུས་ལེན་ཞེས་སྨྲས་པ་དང༌། ཤཱ་ཀྱའི་དགེ་སྦྱོང་དག་ལ་དགའ་བས་དེ་ལྟར་གྱུར་ཏོ་ཞེས་འཛེར་བ་དག་སླང་དག་གིས་ཐོས་ཏེ་སྙན་དུ་གསོལ་ཏོ། །དེ་ལྟར་གྱུར་པ་བདེན་ནམ་ཞེས་བསྙེན་དགའ་བོ་ལ་བཀས་སྨྲས་ན་མད་དོ་ཞེས་གསོལ་ནས་རུང་བ་མ་ཡིན་རིགས་པ་མ་ཡིན་ཞེས་བྱ་བ་བཀས་སྨད་ནས་བསླབ་པའི་གནས་བཅས་ཏེ། ཡང་དགེ་སློང་ཞེས་རྩ་བའི་ཚིག་རྣམས་སྨོས་སོ། །དགེ་སློང་གི་ཕྱིར་ཞེས་བྱ་བ་ནི། ཤཱ་ཀྱའི་བུ་བསྙེན་དགའ་བོ་སྟེ། གཞན་ཡང་འདི་དང་འདྲ་བའོ། །རྒྱལ་པོ་ཞེས་བྱ་བ་ནི་རྒྱལ་པོའི་རིགས་ལ་སོགས་པ་རིགས་རྣམ་བཞི་འམ་སྐྱེས་པའམ་བུད་མེད་རྒྱལ་པོར་དབང་བསྐུར་བ་ལ་བྱའོ། །རྒྱལ་པོ་ལ་བཀའ་གྲོས་དབུལ་ཞིང་བརྟེན་པ་ནི་བློན་པོ་ཞེས་བྱའོ། །བྲམ་ཟེ་ནི་གཙང་སྦྲ་ཅན་ནོ། །ཁྱིམ་བདག་ཅེས་བྱ་བ་ནི་ཕྱུག་པའོ། །གཞོངས་ཀྱི་མི་ཞེས་བྱ་བ་ནི་ཡུལ་མིའོ། །ནོར་ཅན་ཞེས་བྱ་བ་ནི་ཕྱུག་པོའོ། །ཚོང་དཔོན་ཞེས་བྱ་བ་ནི་ཐབས་བྱིན་པའོ། །དེད་དཔོན་ཞེས་བྱ་བ་ནི་འགྲོན་པ་མང་པོ་དེད་ཅིང་ལན་གྲངས་མང་དུ་ཕྱིན་པའོ། །ཕོ་ཉའི་ལག་ཏུ་ཞེས་བྱ་བ་ནི་བུད་མེད་དམ་སྐྱེས་པའམ་མ་ནིང་ལའོ། །གོས་ཀྱི་རིན་ཞེས་བྱ་བ་ནི་གསེར་དངུལ་ལོ། །དེ་ནས་ཕོ་ཉས་གོས་ཀྱི་རིན་དེ་ཁྱེར་ཏེ། དགེ་སློང་གལ་པ་དེར་སོང་སྟེ་ཕྱིན་པ་དང༌། དགེ་སློང་ལ་འཕགས་པ་རྒྱལ་པོ་དང་བྲམ་ཟེ་ལ་སོགས་པ་མིང་འདི་ཞེས་བགྱིས་བས་ཁྱོད་ལ་གོས་ཀྱི་རིན་འདི་བསྐུར་གྱིས་འཕགས་པ་ཐུགས་བརྩེ་བའི་སླད་དུ་འདི་དག་བཞེས་སུ་གསོལ་ཞེས་དེ་སྐད་ཟེར་བ་
དང༌། དགེ་སློང་དེས་ཕོ་ཉ་དེ་ལ་ཚེ་དང་ལྡན་པ་ཕོ་ཉ་དགེ་སློང་རྣམས་ནི་གོས་ཀྱི་རིན་ལེན་དུ་མི་རུང་སྟེ་བདག་ཅག་དུས་སུ་གོས་ཤིང་རྙེད་ན་ནི་ལེན་ཏོ་ཞེས་བྱ་བ་དེ་སྐད་སྨྲོས་ཤིག །རུང་བ་ཞེས་བྱ་བ་ནི་སྤྱད་པར་འོས་པའོ། །གལ་ཏེ་ཕོ་ཉ་དེས་དགེ་སློང་དེ་ལ་འཕགས་པ་རྣམས་ཀྱི་ཞལ་ཏ་བགྱིད་པ་འགའ་མཆིས་སམ་ཞེས་དེ་སྐད་ཟེར་བ་དང་གོས་འདོད་པའི་དགེ་སློང་གིས་ཞལ་ཏ་བྱེད་པ་སྟོན་ཅིག །གོས་འདོད་ཅེས་བྱ་བ་ནི་དགོས་པར་གྱུར་པའོ། །ཀུན་དགའི་ར་བ་ཞེས་བྱ་བ་ནི་རུང་བར་བྱེད་པའོ། །དགེ་བསྙེན་ཞེས་བྱ་བ་ནི་སྐྱབས་སུ་སོང་ཞིང་བསླབ་ཚིག་ལྔ་ལ་གནས་པའོ། །ཚེ་དང་ལྡན་པ་ཕོ་ཉ་འདི་ནི་དགེ་སློང་གི་ཞལ་ཏ་བྱེད་པའོ། །དེ་ནས་ཕོ་ཉས་གོས་ཀྱི་རིན་ཁྱེར་ལ་ཞལ་ཏ་པའི་དེར་སོང་སྟེ་ཕྱིན་ནས་ཞལ་ཏ་པ་ལ་ཚེ་དང་ལྡན་པ་ཞལ་ཏ་པ་ཤེས་པར་གྱིས་ཤིག །ཁྱོད་ཀྱིས་གོས་ཀྱི་རིན་འདིས་འདི་འདྲ་བའི་གོས་ཤིག་ཉོས་མིང་འདི་ཞེས་བགྱི་བའི་དགེ་སློང་འོངས་པ་དང༌། དེ་ལ་དུས་སུ་གོས་རུང་བ་སྐོན་ཅིག་རུང་བ་ཞེས་བྱ་བ་ནི་སྤྱད་པར་འོས་པའོ། །དེ་ནས་ཕོ་ཉས་འཕགས་པ་ཞལ་ཏ་བ་བདག་ལ་བསྟན་པ་ལ་གོས་བདག་གིས་ཕུལ་ཅིག་པར་གཏད་པ་ལགས་ཀྱིས་དེར་ལོང་ཞེས་བསྒོ་ཤིག །དེ་ནས་དགེ་སློང་གིས་ཞལ་ཏ་བྱེད་པའི་གན་དུ་སོང་སྟེ། ཚེ་དང་ལྡན་པ་བདག་གིས་གོས་དགོས་སོ་ཞེས་ལན་གཉིས་ལན་གསུམ་སྐུལ་ཅིག །བྱིན་ན་ནི་ལེགས་མ་བྱིན་ན་ལན་ལྔ་དྲུག་ཏུ་སྣང་བའི་ཕྱོགས་སུ་འདུག་ཤིག །སྣང་བའི་ཕྱོགས་ནི་བཞིའོ། །བསྐུལ་བའི་སྒོ་ནི་དྲུག་གོ །སྣང་བའི་ཕྱོགས་གང་ཞེ་ན། འདུག་གནས་པར་ཁྱིམ་དང་ཞིང་དང༌། ལས་བྱེད་པའི་གནས་སོ། །བསྐུལ་བའི་སྒོ་དྲུག་ནི་ཁྱོད་བྱོན་ཏམ་ཞེ་ན། དེའི་ཕྱིར་རོ་ཞེས་བྱ་བ་དང༌། བདེ་བར་བྱོན་ཏམ་ཞེ་ན་ཡང་དོན་དེའི་ཕྱིར་རོ་ཞེས་བྱ་བ་དང༌། གདན་འདི་ལ་བཞུགས་ཤེ་ན་ཡང་དོན་དེའི་ཕྱིར་རོ་ཞེས་བྱ་བ་དང༌། བཅའ་བ་འཆོ་ཞེ་ན་ཡང་དོན་དེའི་ཕྱིར་རོ་ཞེས་བྱ་བ་དང༌། བཟའ་བ་ཟོ་ཞེ་ན་ཡང་དོན་དེའི་ཕྱིར་རོ་ཞེས་བྱ་བ་དང༌། བཏུང་བ་འཐུང་ཞེ་ན་ཡང་དོན་དེའི་ཕྱིར་རོ་ཞེས་བྱ་བ་དང༌། དྲུག་པོ་བསྐུལ་བའི་སྒོ་ཡིན་པར་ཚིག་མྱུར་དུ་སྨྲས་ཏེ། ཕ་རོལ་གྱིས་མ་གོ་ན་སྒོ་དྲུག་མ་རྫོགས་པའོ། །མི་རིངས་པར་དལ་ནས་སྨྲས་ཏེ་ཕ་རོལ་གྱིས་དོན་གོ་ན་སྒོ་དྲུག་རྫོགས་པ་ཉིད་དོ། །གལ་ཏེ་མ་གྲུབ་ན་དེའི་འོག་ཏུ་སྩལ་ཏེ་ཐོབ་ན་སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་
པར་བྱའོ། །དེའི་འོག་ཏུ་གོས་མ་གྲུབ་ན་དང་པོ་གང་ནས་འོངས་པ་དེར་སྦྲོན་ཅིག་ཅེས་བྱ་བ་ནི་བདག་གིས་སློབ་མ་མངག་པར་བྱའོ། །ཚེ་དང་ལྡན་པ་ཁྱོད་ཀྱིས་ཟོང་བསྐུར་བ་བདག་གིས་ཅི་ཡང་མ་གྲུབ་པོ་ཞེས་བྱ་བ་ནི་ནད་པའི་སྨན་ལ་སོགས་པར་ཕན་མ་ཐོགས་པའོ་དེ་ནི་འདུ་ཤེས་བྱ་བ་ནི་དེ་དང་མཐུན་པའི་ཆོས་སོ། །ཉེ་བར་འགྱུར་བ་ནི་བདག་པོ་ཡང་མི། ཕོ་ཉ་ཡང་མི། དགེ་སློང་ཡང་མི་ཡིན་ན་ལྟུང་བར་འགྱུར་རོ། །མིས་བྱིན་པ་ལ་མི་མ་ཡིན་པས་ཕོ་ཉ་བྱས་སམ། མི་མ་ཡིན་པས་བྱིན་ལ་མིས་ཕོ་ཉ་བྱས་ལ་རུང་བར་བྱས་ན་ཉེས་བྱས་སུ་འགྱུར་རོ། །ལན་ལྔ་དྲུག་ཏུ་མ་ཐོབ་པ་ལས་སླད་ཀྱིས་སྩལ་ཏེ་གྲུབ་ན་ལྟུང་བར་འགྱུར་བ་དེ་ལ་གཞན་གྱི་སྒོ་ནས་ལྟུང་བར་མི་འགྱུར་བ་ཡང་ཡོད་དེ། ཕྲིན་དང་ཕྲིན་ཡིག་གིས་ལན་ལྔ་དྲུག་ལས་ལྷག་པར་བརྩལ་ཏེ་གོས་གྲུབ་ན་ཉེས་བྱས་སུ་འགྱུར་རོ། །དེ་བཞིན་ལག་བརྡ་དང་གཅིག་ནས་གཅིག་ཏུ་བརྒྱུད་པའང་ཉེས་བྱས་སུ་འགྱུར་རོ། །དགེ་སློང་གིས་ཁྱིམ་པ་སྨྱོན་པ་དང༌། ར་རོ་བ་དང་ནད་ཀྱིས་གཟིར་བ་དང༌། སེམས་འཁྲུགས་པ་དང༌། གླེན་པ་དང༌། ལྐུགས་པ་དང༌། སྙོམས་པར་ཞུགས་པ་དང༌། མུ་སྟེགས་ཅན་དང༌། འགྲོ་བ་གཞན་དུ་གནས་པ་ལ། ལན་དྲུག་ལས་ལྷག་པར་གོས་བསྒྲུབས་ཏེ་ཐོབ་ཀྱང་ཉེས་བྱས་སུ་འགྱུར་རོ། །གོས་ཀྱི་རྒྱུ་དང་སྤུན་མི་གནང་བའི་ནང་ནས་བླངས་ཀྱང་ཉེས་བྱས་སུ་འགྱུར་རོ། །སྤང་བའི་ཆོས་གོས་ཀྱི་ཚོགས་ཏེ་བཅུ་ཕུང་དང་པོའོ།། །།སྟན་གྱི་ཚོགས་ལས་བརྩམས་ཏེ། སྲིན་བལ་ལས་སྟན་བྱེད་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ཛེ་ཏའི་ཚལ་ན་བཞུགས་སོ། །དེའི་ཚེ་ན་དགེ་སློང་མང་པོ་དག་སྲིན་བལ་གྱིས་སྟན་སར་པ་བྱེད་དུ་འཇུག་སྟེ། བྱ་བ་དང་བྱེད་པ་མང་བས་ཁ་ཏོན་དང་ལུང་འབོགས་པའི་བར་ཆད་དུ་གྱུར་པ་དང༌། སྲིན་བལ་གྱི་སྟན་བཟང་པོ་ལ་ཆགས་པས་བཟང་པོ་འདོད་པའི་ཕྱིར་རིན་ཆེ་ཞིང་དཀོན་པའི་མལ་སྟན་ཚོལ་ཞིང་གཞན་ལ་སློང་པས་ན་དེའི་ཕྱིར་སྲོག་ཆགས་མང་པོ་གསོད་པར་གྱུར་པས། ཕྱིས་མུ་སྟེགས་ཅན་རྣམས་དགེ་སྦྱོང་མགོ་རེག་དེ་ལ་བསོད་སྙོམས་སྦྱིན་པར་སུ་སྤྲོ་ཞེས་མི་སྙན་པར་འཛེར་བ་དགེ་སློང་དག་གིས་སྙན་དུ་གསོལ་ནས། བཀས་སྨྲས་པ། མད་དོ་ཞེས་གསོལ་བ་དང༌། གསོ་དཀའ་དགང་དཀའ་བ་ཞེས་སྨྲས་ནས། ཆོག་ཤེས་པ་དང༌། སྦྱངས་པའི་ཡོན་ཏན་ལ་དགའ་བ་དང་ཡོན་ཏན་བསྔགས་ནས་ཡང་དགེ་སློང་གང་ཡང་ཞེས་
འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་དགེ་སློང་མང་པོ་སྟེ། གཞན་ཡང་འདི་དང་འདྲའོ། །སྟན་སར་པ་ཞེས་བྱ་བ་ནི་སར་པ་ལ་རྣམ་པ་གཉིས་ཏེ། སར་པ་ཉིད་སར་པ་དང༌། རྙེད་པ་ཉིད་སར་པའོ། །སྐབས་འདིར་སར་པ་ཉིད་ལ་བྱའོ། །སྲིན་བལ་གྱིས་སྟན་སར་པ་བྱེད་ཅེས་བྱ་བ་ནི་ནང་ཚངས་ཅན་དང༌། བཅགས་པའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །སྤང་བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ཉེས་པ་ནི་སྲིན་བལ་གྱི་ཕུང་པོ་དང་སྒོ་ན་འབྱེད་དམ་འཇིག་གམ་རྨལ་ཏམ་རྨེལ་དུ་བཅུག་སྟེ། སྟན་མ་ཟིན་བར་དུ་ཉེས་བྱས་སོ། །ཟིན་ནས་སྤང་བའི་ལྟུང་བའོ། །བྱས་པ་རྙེད་པ་དང༌། བྱས་ཟིན་པ་སྤྱོད་པ་དང༌། རྙིང་པ་འཆོས་པ་ལ་ཉེས་པ་མེད་དོ། །གཞན་བགྱིད་དུ་སྩལ་བ་དང༌། གཞན་གྱི་ཕྱིར་བྱེད་པ་དང༌། གཞན་གྱིས་མ་ཟིན་པ་ཟིན་པར་བྱེད་པ་དང༌། ཁྱིམ་པ་ལ་བགྱིད་དུ་སྩལ་བ་ཀུན་ཉེས་བྱས་སུ་འགྱུར་རོ། །བསླབ་པ་བྱིན་པ་དང༌། དགེ་ཚུལ་ཕ་དང༌། དགེ་ཚུལ་མ་དང༌། རྐུན་གནས་ཀྱི་སྲིན་བལ་གྱིས་སྟན་བྱས་ན་ཉེས་བྱས་སུ་འགྱུར་རོ། །འགྲོ་བ་གཞན་དུ་གནས་པ་དང༌། མུ་སྟེགས་ཅན་དང༌། ཀུན་དུ་རྒྱུ་བ་ལ་སྟན་བྱེད་དུ་བཅུག་ན་ཉེས་བྱས་སོ། །རྒྱུ་དང་སྤུན་གཅིག་རུང་ལ་གཅིག་མི་རུང་བ་འདྲེས་བར་སྟན་བྱེད་དུ་བཅུག་ན་ཉེས་བྱས་སུ་འགྱུར་རོ།། སྲིན་བལ་དང༌། ཟར་མའི་བལ་དང་འདྲེས་པར་བྱེད་དུ་བཅུག་པ་དང༌། སྲིན་བལ་དང་སེ་བོ་དང་འདྲེས་པར་བྱེད་དུ་བཅུག་ན་ཉེས་བྱས་སུ་འགྱུར་རོ། །གདིང་བའི་ཚད་བདེ་བར་གཤེགས་པའི་ཚད་དུ་བྱས་ན་ཉེས་བྱས་སུ་འགྱུར་རོ། །གདིང་བ་ཆེན་པོའི་ཚད་ནི་ཁྲུ་ཕྱེད་དང་ལྔའོ། །ཆུང་ངུ་ནི་ཁྲུ་ཕྱེད་དང་གསུམ་མོ། །པར་མ་ནི་འབྲིང་ངོ༌། །བལ་ནག་པོ་འབའ་ཞིག་ལས་སྟན་བྱེད་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་མང་པོ་དག་ལུག་བལ་ནག་པོ་འབའ་ཞིག་ལས་སྟན་བྱེད་དེ་ལུག་བལ་ནག་པོ་ཡང་རིན་ཆེ་ཞིང་རྙེད་དཀའ་སྟེ། ཁྱིམ་བདག་དང་བྲམ་ཟེ་ཀུན་ལ་ཚོལ་ཞིང་སློང་བས་ལུང་དབོག་པ་དང་བསམ་གཏན་བྱེད་པའི་བར་ཆད་དུ་གྱུར་པས། དོན་ཉུང་བའི་དགེ་སློང་རྣམས་ཀྱིས་སྙན་དུ་གསོལ་ནས། གསོ་དཀའ་བ་དགང་དཀའ་བ་ཞེས་སྨད་ནས། སྦྱངས་པའི་ཡོན་ཏན་པ་དགའ་བ་དང་ཚོད་ཟིན་པའི་ལེགས་པ་བསྔགས་ནས་འདུལ་བ་ལ་བསླབ་པའི་གནས་བཅས་ཏེ།
ཡང་དགེ་སློང་ཞེས་རྩ་བའི་ཚིག་རྣམས་སོ། །ཡང་དགེ་སློང་གང་ཞེས་བྱ་བ་ནི་དགེ་སློང་མང་པོ་སྟེ། གཞན་ཡང་དེ་དང་འདྲ་བའོ། །བལ་ནག་པོ་འབའ་ཞིག་ཅེས་བྱ་བ་ནི་ནག་པོ་ལ་རྣམ་པ་བཞི་སྟེ། རང་བཞིན་གྱིས་ནག་པ་དང༌། སྔོན་པོར་བཙོས་པ་དང༌། ས་ནག་གི་ནང་དུ་བཙོས་པ་དང༌། དྲི་མ་ཅན་ལྟ་བུའོ། །སྐབས་འདིར་ནི་རང་བཞིན་གྱིས་ནག་པ་ལ་བྱའོ། །ལུག་པ་ལ་ཞེས་བྱ་བ་ནི་སྤུའོ། །སར་པ་ཞེས་བྱ་བ་ནི་གཉིས་ཏེ། གསར་དུ་བྱས་པ་དང༌། རྙེད་པ་སར་པའོ། །སྐབས་འདིར་ནི་སར་པ་བྱས་པའོ། །སྟན་ཞེས་བྱ་བ་ནི་ནང་ཚངས་ཅན་དང༌། བཅགས་པ་ལ་བྱའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །སྤང་བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ཉེས་པ་ནི་བལ་གྱི་ཕུང་པོ་དང༌། ཀེའུ་དང༌། ཆུན་པོ་བཤིག་གམ་རྨེ་ལ་ཏེ། སྟན་དུ་བྱས་ན་ལྟུང་བར་འགྱུར་རོ། །གཞན་གྱིས་བྱིན་པ་དང༌། བྱས་ཟིན་པ་ལ་སྤྱོད་པ་དང༌། རྙིང་པ་འཆོས་པ་ལ་ནི་ཉེས་པ་མེད་དོ། །ཕྲིན་དང་ཕྲིན་ཡིག་གིས་བྱེད་དུ་བཅུག་པ་ནི་རིམ་པ་གོང་མ་བཞིན་དུ་སྦྱར་རོ། །ཆ་གཉིས་ལས་སྟན་དུ་བྱེད་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་དག་སྔ་མ་བཞིན་དུ་སྟན་ནག་པོ་གཅིག་པུ་བྱེད་དུ་མི་གནང་སྟེ། དེ་ལ་དཀར་པོ་བསྲེས་ཤིག་པར་བཀའ་སྩལ་པ་དང༌། དེ་དག་གིས་བཟང་པོ་འདོད་པའི་ཕྱིར་དཀར་པོ་ཅུང་ཟད་མཚན་མ་ཙམ་ཞིག་བསྲེས་ཤིང་བྱེད་པས་དོན་ཉུང་བའི་དགེ་སློང་རྣམས་འཕྱ་སྟེ། སྙན་དུ་བདས་ནས་རིགས་པ་མ་ཡིན་རུང་བ་མ་ཡིན་ཞེས་སྨད་དེ། དགེ་སློང་སྟན་སར་པ་བྱེད་པ་ན་ཕྱེད་ལུག་བལ་ནག་པོ་འབའ་ཞིག་ལས་ཆུ་ཤིག །བཞི་ཆ་གཅིག་དཀར་པོ་ལས་ཆུག་ཤིག །བཞི་ཆ་གཅིག་འཁོབ་བལ་ལས་ཆུ་ག་ཤིག །དེ་ལྟར་མ་བྱས་ན་སྤང་བར་འགྱུར་རོ་ཞེས་བསླབ་པའི་གནས་བཅས་སོ། །སྟན་སར་པ་ཞེས་བྱ་བ་ནི་རྣམ་པ་གཉིས་ཏེ། གསར་དུ་བྱས་པ་དང༌། རྙེད་པ་སར་པའོ། །སྐབས་འདིར་ནི་གསར་དུ་བྱས་པའོ། །དགེ་སློང་ཞེས་བྱ་བ་ནི་དགེ་སློང་མང་པོ་སྟེ། ཆོས་འདི་ལ་ཞུགས་པའོ། །སྟན་ཞེས་བྱ་བ་ནི་ནང་ཚངས་ཅན་དང་བཅགས་པ་ལ་བྱ་སྟེ། སྐབས་འདིར་བཅགས་པ་ལ་བྱའོ། །བྱེད་ཅེས་བྱ་བ་ནི་བདག་གིས་བྱས་པའམ་གཞན་གྱིས་བྱས་པའོ། །གཉིས་ཀྱི་ཆ་ནག་པོ་ལས་ཆུག་ཤིག་ཅེས་བྱ་བ་ནི་བལ་རང་བཞིན་གྱིས་གནག་པའོ། །བལ་ཞེས་བྱ་བ་ནི་སྤུའོ། །བཞི་ཆ་གཅིག་དཀར་པོ་ལས་ཆུག་ཤིག་ཅེས་བྱ་བ་ནི་སྒང་བལ་ལམ་གཉའ་བལ་ལམ་རྩིབ་ལོགས་
ཀྱི་བལ་ལོ། །བཞི་ཆ་གཅིག་འཁོབ་བལ་ཞེས་བྱ་བ་ནི་མགོ་བལ་དང་ལྟོ་བལ་ལ་འཁོབ་བལ་ཞེས་བྱའོ། །མ་བཅུག་ཅེས་བྱ་བ་ནི་མ་བསྲེས་པའོ། །ལུག་བལ་ནག་པོ་འབའ་ཞིག་ལས་སྟན་བྱས་ན་སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །དེ་ལ་ཉེས་པ་ནི་དགེ་སློང་གིས་བལ་སྲང་བཅུ་ལས་སྟན་གཅིག་བྱེད་ན་དེ་ལ་ལུག་བལ་ནག་པོ་འབའ་ཞིག་ལས་སྲང་ལྔ་ཆུག་ཤིག །སྲང་ཕྱེད་དང་གསུམ་ནི་བལ་དཀར་པོ་ལས་ཆུག་ཤིག །སྲང་ཕྱེད་དང་གསུམ་ནི་འཁོབ་བལ་ལས་ཆུག་ཤིག །གལ་ཏེ་དགེ་སློང་གིས་ཕྱེད་ལུག་བལ་ནག་པོ་ལས་མ་བཅུག་གམ། བཞི་ཆ་གཅིག་དཀར་པོ་ལས་མ་བཅུག་གམ། བཞི་ཆ་གཅིག་འཁོབ་བལ་ལས་མ་བཅུག་པར་སྟན་སར་པ་བྱས་ན་ཟིན་མ་ཐག་ཏུ་སྤང་བའི་ལྟུང་བར་འགྱུར་རོ། །དེ་ལ་བལ་ནག་པོ་སྲང་ཕྱེད་དམ། སྲང་གཅིག་ཙམ་གྱིས་ཁྱེད་པར་བཅུག་ན་ཐམས་ཅད་དུ་ལྟུང་བར་འགྱུར་རོ། །དེ་ལ་སྲོང་བཅུ་པའི་སྟན་ཇི་ལྟ་བ་བཞིན་དུ་སྲང་ཉི་ཤུ་པའམ། ལྔ་བཅུ་པའམ་བརྒྱ་པ་ཡང་རུང་སྟེ། ཕྱེད་ནག་པོ་བཞི་ཆ་གཉིས་འཁོབ་བལ་དང་དཀར་པོ་བསྲེ་བར་རིག་པར་བྱའོ། །སྟན་སར་པ་བྱས་པ་ལོ་དྲུག་མ་ལོན་པར་སྟན་སར་པ་གཞན་བྱེད་དུ་མི་གནང་བའི་གླེང་བཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་དག་མལ་སྟན་ལ་ལོངས་སྤྱོད་དེ་སྟན་དེ་ནི་ཐུང་སྟན་དེ་ནི་རིང་སྟན་དེ་ནི་ཧ་ཅང་ཞེང་ཆུང༌། དེ་ནི་ཧ་ཅང་ཞེང་ཆེས་ཞེས་སྔ་མ་བོར་ཞིང་སྟན་སར་པ་འབའ་ཞིག་བྱེད་པས་བྱ་བ་དང་བྱེད་པ་མང་སྟེ། དགེ་བའི་ཕྱོགས་ཉམས་པར་གྱུར་པས་དགེ་སློང་རྣམས་ཀྱིས་སྙན་དུ་གསོལ་ནས། བཅོམ་ལྡན་འདས་ཀྱིས་གསོ་དཀའ་བ་ཞེས་རྣམ་གྲངས་དུ་མས་སྨད་ནས་ཆོག་ཤེས་པ་དང༌། སྦྱངས་པའི་ཡོན་ཏན་ལ་དགའ་བའི་བསྔགས་པ་བརྗོད་དེ། སྟན་རྙིང་པ་དགེ་སློང་གིས་ལོ་དྲུག་གི་བར་དུ་ཆོངས་ཤིག །ལོ་དྲུག་མ་ལོན་པར་སྟན་སར་པ་གཞན་བྱེད་ན་སྤང་བའི་ལྟུང་བར་འགྱུར་རོ་ཞེས་འདུལ་བ་ལ་བསླབ་པའི་གནས་བཅས་སོ། །དེ་ལ་ལོ་དྲུག་མ་ལོན་པར་སྟན་སར་པ་བྱེད་དུ་རྗེས་སུ་གནང་བའི་གླེང་གཞི་ནི་བཅོམ་ལྡན་འདས་འབྲོག་སྐྱེས་ཀྱི་འབྲོག་བཟང་པོ་ན་བཞུགས་སོ། །དེའི་ཚེ་འབྲོག་དེ་ན་ལྷགས་པ་དང་རླུང་ཆེ་བས་ལས་སར་པ་པའི་དགེ་སློང་སྟན་ལོ་དྲུག་ཏུ་མི་ཐུབ་ནས་རྡོལ་བས་ལས་བྱེད་པ་བཏང་ངོ༌། །དེ་ལྟར་གྱུར་པ་སྙན་དུ་བདས་ནས་ལས་སར་པ་
པའི་དགེ་སློང་གང་ཡང་རུང་སྟེ། དེའི་སྟན་ལོ་དྲུག་ཏུ་མི་ཐུབ་པ་དང༌། ལོ་དྲུག་ཚུན་ཆད་སྟན་སར་པ་བྱ་བར་དགེ་འདུན་ལ་སྡོམ་པ་གསོལ་ཅིག །དགེ་འདུན་གྱིས་ཀྱང་སྟན་ལེགས་པར་རྟོག་པ་ལ་མི་ཐུབ་པ་དང༌། གསོལ་བ་དང་ཞུ་བའི་ལས་ཀྱིས་ལོ་དྲུག་ཚུན་ཆད་སྟན་སར་པ་བྱེད་པའི་སྡོམ་པ་བྱིན་ཅིག །སྟན་སར་པ་ཞེས་བྱ་བ་ལ་གཉིས་ཏེ། གསར་དུ་བྱས་པ་དང༌། རྙེད་པ་སར་པའོ། །སྐབས་འདིར་ནི་གསར་པ་ཉིད་ལ་བྱའོ། །དགེ་སློང་ཞེས་བྱ་བ་ནི་དགེ་སློང་མང་པོ་སྟེ། གཞན་ཡང་དེ་དང་འདྲའོ། །སྟན་ཞེས་བྱ་བ་ནི་བཅགས་པ་ལ་བྱའོ། །བྱེད་ཅེས་བྱ་བ་ནི་བདག་དང་གཞན་གྱིས་བྱས་པའོ། །མི་འདོད་བཞིན་དུ་ཞེས་བྱ་བ་ནི་མ་དད་པར་ལོ་དྲུག་གི་བར་དུ་ཆོངས་ཤིག་པའོ། །སྟན་རྙིང་པ་ཞེས་བྱ་བ་ནི་སྔ་མ་རྙིང་པ་གང་ཡིན་པའོ། །སྤངས་ཀྱང་རུང་མ་སྤངས་ཀྱང་རུང་སྟེ་སྟན་སར་པ་བྱེད་ཅེས་བྱ་བ་ནི་སར་པའི་གཞན་གཉིས་པ་བྱེད་པའོ། །དགེ་འདུན་གྱིས་གནང་བ་མ་གཏོགས་ཞེས་བྱ་བ་ནི་བཀོལ་བའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པའོ། །དགེ་སློང་གིས་ལོ་གང་ལ་སྟན་བྱས་ནས་དེ་ཉིད་ཀྱི་ལོ་ལ་སྟན་ཕྱི་མ་གཉིས་པ་བྱེད་ན་ཉེས་བྱས་སོ་།ཟིན་ན་སྤང་པའི་ལྟུང་བའོ། །སྟན་བྱས་པ་ལས་མ་ཟིན་ཏེ་དེ་ཉིད་བོར་བ་ནི་ཉེས་བྱས་སོ། །དགེ་སློང་ཕྲིན་དང་ཕྲིན་ཡིག་དང་ལག་བརྡ་དང༌། གཞན་གྱི་སླད་དུ་ལོ་དྲུག་ཚུན་ཆད་དུ་སྟན་བྱེད་དུ་བཅུག་ན་ཉེས་བྱས་སོ། །རྒྱུ་རུང་ལ་སྤུན་མི་རུང་བ་དང་གཉིས་ཀ་མི་རུང་བ་ལས་བྱས་ན་ཉེས་བྱས་སུ་འགྱུར་རོ། །རྐུན་གནས་དང༌། སོ་སོར་གནས་པ་དང༌། མུ་སྟེགས་ཅན་དང༌། འགྲོ་བ་གཞན་དུ་གནས་པ་ལ་བྱེད་དུ་བཅུག་ན་ཉེས་བྱས་སུ་འགྱུར་རོ། །གདིང་བ་སར་པ་ལ་རྙིང་པ་མཐོ་གང་གིས་གླན་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་མཉན་དུ་ཡོད་པ་ན་རྒྱལ་པོ་ཟས་གཙང་མའི་བུ་འཁོར་ལོས་སྒྱུར་བའི་རྒྱལ་པོའི་མཚན་ཅན་རྒྱལ་ཐབས་བོར་ནས་རབ་ཏུ་བྱུང་སྟེ། བདུད་རྣམ་པ་བཞི་བཏུལ་ནས་བླ་ན་མེད་པའི་ཡེ་ཤེས་ཐོབ་སྟེ། དབུས་ཀྱི་ཡུལ་དུ་འབྱུང་ངོ་ཞེས་སྒྲ་ཀུན་དུ་གྲགས་པ། བྱང་ཕྱོགས་ཀྱི་ཚོང་པས་ཐོས་ནས། ཚོང་པ་དེ་དག་སངས་རྒྱས་ལ་བསྙེན་བཀུར་བྱ་བ་དང་ཕྱག་འཚལ་བའི་ཕྱིར་དེར་འོངས་པ་དང༌། དེ་ནས་ཁྱིམ་བདག་མགོན་མེད་ཀྱིས་ཚོང་པ་དེ་ཁྲིད་དེ་སངས་རྒྱས་ཀྱི་གམ་དུ་ཕྱག་བྱས་ནས་སླར་འཁོར་ཏེ་དགེ་སློང་གི་གནས་སུ་སོང་བ་དང༌། དགེ་སློང་དག་ཉིན་
པར་བསམ་གཏན་བྱེད་པའི་གནས་ན་དགེ་སློང་དག་ཉིན་པར་སྟན་ལ་སྐྱིལ་མོ་ཀྲུང་བཅས་ཏེ་འདུག་འདུག་པས། དེ་ལྟར་རྡོལ་ཏོ་ཞེས་ཁྱིམ་བདག་མགོན་མེད་ཟས་སྦྱིན་གྱིས་ཚོང་པ་ལ་བྱས་ནས་ཚོང་པ་དད་པ་སྐྱེས་ནས་རས་ཡུག་ལྔ་བརྒྱ་སྟན་རྒྱུར་ཕུལ་ལོ། །དགེ་སློང་དག་གིས་སྟན་རྙིང་པ་རྣམས་བླ་གབ་མེད་པར་ཕྱི་རོལ་ཏུ་བོར་ཏེ། དགེ་སློང་དག་གྲོང་དུ་ཆོས་སྟོན་ལ་སོང་བའི་འོག་ཏུ་བཅོམ་ལྡན་འདས་མལ་སྟན་བྱུལ་བར་བཞེད་དེ་གཙུག་ལག་ཁང་དུ་བྱོན་པ་དང་ཕྱག་དར་ཁྲོད་ན་སྟན་མང་པོ་ལོང་ལོང་པོར་འདུག་པ་གཟིགས་ནས་ཁྱིམ་བདག་དད་པ་དང་བྲམ་ཟེ་ནི་ཤ་ཁྲག་ཟད་ཟད་དུ་དགེ་སློང་དག་ལ་སྦྱིན་ན། དགེ་སློང་དག་ནི་ཚོད་མི་ཟིན་པར་སྤྱོད་དོ་ཞེས་སྨད་ནས། སྦྱངས་པའི་ཡོན་ཏན་ལ་དགའ་བ་དང༌། ཚོད་ཟིན་པའི་བསྔགས་པ་བརྗོད་ནས། སྟན་སར་པ་བྱེད་ན་སྲ་ཞིང་མི་རྡོལ་བར་བྱ་བ་དང༌། སྟན་བཟང་པོ་ལ་ཆགས་པ་མི་སྡུག་པར་བྱ་བའི་ཕྱིར་སར་པ་ལ་རྙིང་པ་མཐོ་གང་གིས་གློན་ཅིག་ཅེས་འདུལ་བ་ལ་བསླབ་པའི་གནས་བཅས་སོ། །སར་པ་ཞེས་བྱ་བ་ལ་རྣམ་པ་གཉིས་ཏེ་བྱས་པ་དང༌། རྙེད་པ་སར་པའོ། །སྐབས་འདིར་ནི་བྱས་པ་སར་པ་ལ་བྱའོ། །སྟན་ཞེས་བྱ་བ་ནི་གདིང་བའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །གདིང་བ་རྙིང་པ་ཀུན་ལ་ཞེས་བྱ་བ་ནི་གལ་ཏེ་སྟན་སར་པ་གཉིས་པ་གཞན་ཡོད་ན་དེ་ལྟར་གྱིས་ཤིག་པའོ། །བདེ་བར་གཤེགས་པའི་མཐོ་གང་ཞེས་བྱ་བ་ནི་བདེ་བར་གཤེགས་པ་ནི་སྟོན་པ་སྟེ། དེའི་མཐོ་གང་ལ་མི་ཚད་མའི་ཁྲུ་ཕྱེད་དང་དོའོ། ཁ་དོག་མི་སྡུག་པར་བྱ་བའི་ཕྱིར་གློན་ཅིག་ཅེས་བྱ་བ་ནི་བཟང་པོ་ལ་ཆགས་པའི་གཉེན་པོ་དང་སྲ་བར་བྱ་བའི་ཕྱིར་རོ་ཞེའོ། མ་གླན་ཏམ་ཞེས་བྱ་བ་ནི་མ་སྦྱར་བ་ལ་བྱའོ། །ཁ་དོག་མི་སྡུག་པར་བྱ་བའི་ཕྱིར་མ་གླན་ན་སྤང་བའི་ལྟུང་བར་འགྱུར་རོ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །གདིང་བ་སར་པ་ལ་རྙིང་པས་མ་གླན་ན་ཐམས་ཅད་དུ་སྤང་བའི་ལྟུང་བར་འགྱུར་རོ། །གདིང་བ་རྙིང་པ་ཞིགས་ཏེ་གླན་དུ་མི་རུང་ན་མ་གླན་ཀྱང་ཉེས་པ་མེད་དོ། །བདེ་བར་གཤེགས་པའི་སོར་གཅིག་གམ་སོར་ཕྱེད་ཕྲི་སྟེ་གླན་ན་སྤང་བར་འགྱུར་རོ། །གཞན་ལ་སྦྱིན་པ་དང་ཁྱིམ་པ་བགྱིད་དུ་བཅུག་པ་ནི་ཉེས་བྱས་སུ་འགྱུར་རོ། །རྒྱུ་དང་སྤུན་མི་རུང་བ་ཕྲི་བའམ་མ་ཕྲི་སྟེ།
གླན་ན་ཉེས་བྱས་སུ་འགྱུར་རོ། །ཕྲིན་དང་ཕྲིན་ཡིག་དང་ལག་བརྡས་བདེ་བར་གཤེགས་པའི་སོར་གཅིག་ཕྲི་སྟེ། བྱད་དུ་བཅུག་ན་ཉེས་བྱས་སུ་འགྱུར་རོ། །ལམ་ན་བལ་ཁྱེར་བའི་གླེང་གཞི་ནི་སངས་རྒྱས་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་འཕགས་པ་དྲུག་སྡེ་པོ་དག་ནང་བགྲོས་པ། ལྷུང་བཟེད་ནག་པོ་ཅན་སྤྲེའུ་ཚིལ་གྱིས་རྐང་པ་བསྐུས་པ་དེ་དག་ནི་འགྲོ་བ་དང་འོང་བའི་ཚེ་ན་ཡང་རྙེད་པ་བསྒྲུབ་ཅིང་སྐྱེ་བོ་མང་པོ་དགའ་བར་གྱུར་ན། བདག་ཅག་ནི་ཁྲོན་པའི་སྦལ་པ་དང་འདྲ་སྟེ་གར་ཡང་མི་འོང་བས་རྙེད་པ་ཡང་ཉུང་ན་རྙེད་པ་སྒྲུབ་ཅིང་འཕགས་པ་འཆར་བ་པོ་ནི་གཞི་ན་གཙུག་ཁང་སྲུང་དུ་བཞག་ལ་བདག་ཅག་ལྔ་ནི་བལ་ཡུལ་དུ་རྙེད་པ་སྒྲུབ་ཏུ་འདོང་ངོ་ཞེས་ནས་ཚོང་པ་དག་ཡུལ་དུ་འགྲོ་བ་དང་ལྷན་ཅིག་ཏུ་བལ་ཡུལ་དུ་སོང་སྟེ། སླར་འཁོར་བའི་ཚེ་ལྷན་ཅིག་ཏུ་དོང་དོང་བ་ལས་ཚོང་པ་དག་གིས་ཤིང་རྟ་བལ་གྱིས་གང་བ་ཤིང་རྟ་ཆག་ནས་བལ་ལམ་དུ་བོར་བ་ལས། འཕགས་པ་དྲུག་སྡེ་བལ་བསླངས་ཏེ། བཞིས་ནི་བལ་ཁུར་རེ་རེ་ཁྱེར། གཅིག་གིས་ནི་བཞི་པོའི་ཡོ་བྱད་རྣམས་ཁུར་ཁྱེར་ཏེ། ཚོང་པ་སྔར་གསེབ་ལམ་དུ་དོང་དོང་བ་ལས། རི་བྲགས་ཀྱི་དགེ་སློང་དང་གྲོང་མི་དག་གིས་མཐོང་ནས། བལ་ལང་གིས་དམག་འོང་ངོ་རི་བྲགས་ཀྱི་གྲོང་མི་རྣམས་འབྲོས་པ་དང༌། དགེ་སློང་ཁུར་ཁྱེར་བ་ལ་མུ་སྟེགས་ཅན་དང་བལ་བདག་འཕྱ་ཞིང༌། མ་དད་པ་དང༌། མཉན་དུ་ཡོད་པར་འོངས་པ་དང༌། ཁུར་ཆེན་པོ་ས་ལ་བཞག་པའི་ཚེ་སྒྲ་ཆེན་པོ་བྱུང་བས། དགེ་སློང་རྣམས་མ་དད་ཅིང་འཕྱ་བར་གྱུར་ཏེ་དེ་ལྟར་གྱུར་པ་སྙན་དུ་བདས་སོ། །དེ་ནས་བཅོམ་ལྡན་འདས་ཀྱིས་དྲུག་སྡེ་པོ་རྣམས་ལ། ཁྱེད་ཀྱིས་མི་མཛེས་པ་དེ་ལྟ་བུ་བྱས་པ་བདེན་ནམ་ཞེས་རྨས་ན། བཙུན་པ་མད་དོ་ཞེས་གསོལ་ནས་དགེ་སྦྱོང་གི་བྱ་བ་མ་ཡིན་དགོས་པ་དང་མཐུན་པ་དང་རིགས་པ་མ་ཡིན་ཞེས་སྨད་ནས། དགེ་སློང་གིས་བལ་ལམ་དུ་ཁྱེར་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །ལམ་དུ་ཞུགས་ཞེས་བྱ་བ་ནི་མྱ་ངན་གྱི་ལམ་མམ། སྐྱེ་བོ་མང་པོ་འགྲོ་བའི་ལམ་མོ། །རྙེད་ཅེས་བྱ་བ་ནི་གཞན་ལས་སོ། །ལུག་གི་བལ་ཞེས་བྱ་བ་ནི་སྤུའོ། །དགེ་སློང་དེས་འདོད་ན་ཞེས་བྱ་བ་ནི་གལ་ཏེ་དགོས་པར་འགྱུར་རོ། །ལོང་ཤིག་ཅེས་བྱ་བ་ནི་བླང་བར་བྱའོ། །བླངས་ནས་དཔག་ཚད་གསུམ་གྱི་བར་དུ་རང་གིས་ཁྱེར་ཅིག་ཅེས་བྱ་བ་ནི་
དཔག་ཚད་གསུམ་ལས་མི་འདའ་བར་བྱའོ། །གཞན་གྱིས་ཁྱེར་པ་མེད་ཅེས་བྱ་བ་ནི་རུང་བར་བྱེད་པའམ་གཡོག་མེད་པའོ། །དེ་ལས་འདས་པར་ཞེས་བྱ་བ་ནི་ཐལ་བའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བཤགས་པར་བྱའོ། །དགེ་སློང་གིས་བལ་ཁྱེར་ནས་དགོན་པའི་ལམ་དུ་ཞུགས་ཏེ། རྒྱང་གྲགས་ཕྱེད་དམ་གྲོང་གཅིག་ནས་གཅིག་ཏུ་བྱུང་ན་ཉེས་བྱས་རེ་རེར་འགྱུར་རོ། །རྒྱང་གྲངས་གཅིག་ཏུ་ཕྱིན་ན་སྤང་པའི་ལྟུང་བར་འགྱུར་རོ། །ཞྭ་དང༌། ལྷམ་དང༌། ལྕག་པོད་ཀྱི་རྒྱུ་ནི་ཁྱེར་ཀྱང་ལྟུང་བ་མེད་དོ། །ལུག་གི་བལ་དཔག་ཚད་གསུམ་ལས་འདས་པར་ཁྱེར་ཡང་ལྟུང་བར་མི་འགྱུར་བ་ཡང་ཡོད་དེ། ཕྲིན་པ་ལ་བསྐུར་བ་དང༌། ཕྲིན་ཡིག་དང༌། ལག་བརྡ་དང༌། གཅིག་ནས་གཅིག་ཏུ་བརྒྱུད་པ་དང༌། སྨྱོན་པ་དང༌། སེམས་འཁྲུགས་པ་དང༌། ནད་ཀྱིས་གཟིར་བ་དང༌། གླེན་པ་དང༌། ལྐུགས་པ་དང༌། འོན་པ་དང༌། དམུས་ལོང་རྣམས་ལ་བསྐུར་ན་ཐམས་ཅད་དུ་ཉེས་བྱས་སུ་འགྱུར་རོ། །བལ་ཁུར་བཅོལ་བ་ལས་སླད་ཀྱིས་མ་གནང་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དྲུག་སྡེ་པོ་རྣམས་བལ་ཡུལ་ནས་རྙེད་པའི་བལ་སྔར་ནི་ལྔར་བགོ་བར་ཆད་པ་ལས་སླད་ཀྱིས་འཆར་བས་གཡོ་བྱས་ནས་དྲུག་ཏུ་བགོས་སོ། །དེ་ནས་འཆར་བས་བསམས་པ་བདག་གིས་བལ་གྱི་སྐལ་བ་འདི་ཁྱིམ་མི་མོ་ལ་བཅོལ་ན་ནི་ཁྱིམ་མི་མོ་ཡང་ཁྲིམས་མེད་པས་བརྐུས་སུའང༌། དགེ་སློང་མ་བཅུ་བདུན་སྡེ་ལ་བཅོལ་ན་ནི་བཟའ་བའི་རིན་འོག་ཏུ་བཏང་ཡང་དག་ན་གཽ་ཏ་མཱི་སྐྱེ་དགུའི་བདག་མོ་ནི་འཁོར་དང་བས་པར་འདུལ་བ་འཛིན་པ་ཡིན་གྱི་དེ་ལ་བཅོལ་ལོ་སྙམ་དུ་བསམས་ནས། འཆར་བ་སོང་སོང་བ་དང་སྐྱེ་དགུའི་བདག་མོ་དང་ལམ་དུ་ཕྲད་ནས་འཆར་བས་སྨྲས་པ་བཅོམ་ལྡན་འདས་ཀྱིས་བསོད་ནམས་དང་ལྡན་པ་ནི་བསམས་པ་བཞིན་དུ་འགྲུབ་བོ་ཞེས་གསུངས་པ་ནི་གཞན་དུ་མི་འགྱུར་ཏེ། བདག་ལ་ཡང་བསོད་ནམས་ཡོད་ལྟ་ཞིག །བདག་ལ་བལ་ཉུང་ཞིག་མཆིས་ན་སྐྱེ་དགུའི་བདག་མོ་ལ་བཅོལ་ལོ་ཞེས་བྱས་པ་དང༌། མོ་ན་རེ་དེ་ལྟར་རུང་གིས་ད་ལྟར་སངས་རྒྱས་ཀྱི་ཞབས་ལ་ཕྱག་འཚལ་དུ་འགྲོ་ཡི་དོན་ནོད་ལེན་པ་བཏང་གིས་སྐུར་ཅིག་ཅེས་བྱས་སོ། །དེ་ནས་དགེ་སློང་མ་གཉིས་ལེན་དུ་བཏང་ན་བལ་ཆུན་པོ་དམ་ཆེས་པས་ཁུར་ལྕི་སྟེ། དགེ་སློང་མ་གཉིས་ཀྱང་ངལ་ཏེ་ཉལ་ཞིང་འདུག་
པ་གཞན་གྱིས་མཐོང་ནས་ཁྱེད་གཉིས་ཅིའི་ཕྱིར་ཉལ་ཞེས་སྨྲས་ན། དེའི་ལོ་རྒྱུས་ཞིབ་ཏུ་དེ་གཉིས་ཀྱིས་སྨྲས་སོ། །དེ་ནས་སྐྱེ་དགུའི་བདག་མོ་ཡང་བལ་མང་པོ་དེ་མཐོང་ནས་བལ་མང་མོད་ཀྱི་སྐྱེས་བུ་དང་དམ་པ་རྣམས་ནི་ཁས་བླངས་པ་རྣམས་ལ་ལྕོགས་པར་བྱ་དགོས། ཡང་ན་ནི་ལེན་དགོས་ཞེས་ནས་འཕྲལ་ལ་སློབ་མ་རྣམས་ཁ་བཀྲམ་ནས་ཀུན་ལ་བཅོལ་ཏེ་བྱས་ནས་ཟིན་ཏེ་འཆར་བའི་སྟེང་དུ་བསྐུར་ཏེ་གཽ་ཏ་མཱི་སྐྱེ་དགུའི་བདག་མོ་ལག་པ་ཤིན་ཏུ་དམར་བ་ནི་བཙོ་བླགས་མཁན་གྱི་ལག་པ་དང་འདྲ་བར་གྱུར་པ་སངས་རྒྱས་ཀྱི་ཞབས་ལ་ཕྱག་འཚལ་བའི་ཚེ། བཅོམ་ལྡན་འདས་ཀྱིས་གཟིགས་ནས་བཀས་རྨས་པ་ཇི་ལྟར་གྱུར། འཆར་བས་བལ་བགྱིད་དུ་སྩལ་ཏོ་ཞེས་གསོལ་ཏོ། །རིགས་པ་མ་ཡིན་ཞེས་སྨད་ནས་བསླབ་པ་བཅས་ནས་ཡང་དགེ་སློང་ཞེས་སྨོས་སོ་དགེ་སློང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་བའོ། །གཉེན་མ་ཡིན་ཞེས་བྱ་བ་ནི་ཕ་མའི་ཟུང་བདུན་རྒྱུད་ཚུན་ཆད་ནི་གཉེན་ཡིན་ནོ། །དེ་ཕན་ཆད་ནི་གཉེན་མ་ཡིན་ནོ། །དགེ་སློང་མ་ཞེས་བྱ་བ་ནི་ཆོས་འདི་ལ་ཞུགས་པའོ། །ལུག་གི་བལ་ཞེས་བྱ་བ་ནི་སྤུའོ། །འཁྲུར་བཅོལ་ཞེས་བྱ་བ་ནི་ཐ་ན་ཆུའི་ནང་དུ་བཅོལ་བ་ཙམ་ཡང་ངོ༌། །འཚེད་དུ་བཅོལ་བ་ཞེས་བྱ་བ་ནི་ཐ་ན་ཚོན་གྱི་ནང་དུ་བསུབས་པ་ཙམ་ཡང་ངོ༌། །རྨེལ་དུ་བཅོལ་ཞེས་བྱ་བ་ནི་ཐ་ན་ཚུམས་གཅིག་ཙམ་མམ། འདབ་མ་གཅིག་ཙམ་མོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ཉེས་པ་གང་ཞེ་ན། དགེ་སློང་གིས་གཉེན་མ་ཡིན་པའི་དགེ་སློང་མ་ལ་གཉེན་མ་ཡིན་པར་འདུ་ཤེས་བཞིན་དུ་ལུག་གི་བལ་འཁྲུར་བཅོལ་ན་སྤང་བའི་ལྟུང་བར་འགྱུར་རོ། །འཚེད་དུ་བཅུག་ན་སྤང་བའི་ལྟུང་བར་འགྱུར་རོ། །རྨེལ་དུ་བཅོལ་ན་སྤང་བའི་ལྟུང་བར་འགྱུར་རོ། །གཉེན་མ་ཡིན་པ་ལ་མ་ཡིན་པའི་འདུ་ཤེས་སམ་ཐེ་ཚོམ་ཟ་བཞིན་དུ་བཅོལ་ན་ཉེས་བྱས་སུ་འགྱུར་རོ། །དགེ་སློང་མ་གཉེན་མ་ལགས་པ་ལ་ཕྲིན་དང་ཕྲིན་ཡིག་དང༌། ལག་བརྡ་དང་གཅིག་ནས་གཅིག་ཏུ་བརྒྱུད་དེ་བཅོལ་བ་ནི་ཉེས་བྱས་སུ་འགྱུར་རོ། །དགེ་སློང་མ་སྨྱོན་མ་དང༌། ནད་ཀྱིས་གཟིར་བ་དང༌། སེམས་འཁྲུགས་པ་དང༌། གླེན་པ་དང༌། ལྐུགས་པ་དང་འོན་པ་ལ་འཁྲུར་བཅོལ་ན་ཉེས་བྱས་སུ་འགྱུར་རོ། །མཚམས་མེད་སྤ་ལྔ་བྱས་པ་དང༌། ཁྱིམ་མི་མོ་ལ་བཅོལ་ན་ཉེས་སུ་འགྱུར་རོ། །དགེ་འདུན་གྱི་དབྱེན་བྱེད་པ་དང༌། བསླབ་པ་བྱིན་པ་ལ་འཁྲུར་བཅོལ་ན་སྤང་བའི་ལྟུང་
བར་འགྱུར་རོ། །མི་རུང་བ་དང་འདྲེས་པ་ནི་རྔ་མོའི་བལ་དང༌། རའི་བལ་དང་རི་དགས་ཀྱི་བལ་དང་འདྲེས་པ་ཞིག་འཁྲུལ་བཅོལ་ན་ཉེས་བྱས་སུ་འགྱུར་རོ། །གཞན་གྱི་བལ་ཞིག་འཁྲུར་བཅོལ་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་ལ་འཁྲུར་བཅོལ་བ་དང༌། དགེ་སློང་མ་དང༌། དགེ་ཚུལ་མ་དང༌། དགེ་བསྙེན་མ་དང༌། ཁྱིམ་པ་མོ་དང༌། མུ་སྟེགས་ཅན་དང༌། འགྲོ་བ་གཞན་དུ་གནས་པ་ལ་འཁྲུར་བཅོལ་ན་ཉེས་བྱས་སུ་འགྱུར་རོ། །ས་ལེ་སྦྲམ་ལེན་དུ་མི་གནང་བའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་བྱ་ཀ་ལན་ད་ཀ་གནས་པའི་འོད་མའི་ཚལ་ན་བཞུགས་སོ། །དེའི་ཚེ་ན་རྒྱལ་པོའི་ཁབ་ན་བློན་པོ་དང་གྲོང་དཔོན་གཙུག་ན་ནོར་བུ་ལ་སོགས་པ་དཔོང་སར་ཚོགས་ནས་རྟོག་ཅིང་དཔྱོད་པ་ལ་ཞུགས་ཏེ། ལ་ལ་ན་རེ་ཤཱཀྱའི་དགེ་སྦྱོང་དག་ལ་གསེར་རུང་ངོ་ཞེས་ཟེར་རོ། ལ་ལ་ནི་མི་རུང་ངོ་ཞེས་ཟེར་རོ། །ལ་ལ་ན་རེ་གསེར་དངུལ་སུ་ལ་རུང་བ་དེ་ལ་ནི་འདོད་པའི་ཡོན་ཏན་ལྔ་དང་ཤིང་རྟ་ལ་སོགས་པ་ཡང་རུང་ངོ༌། །ཞེས་ཟེར་ན་དེ་ཅི་འདྲ་བ་ཞུ་བའི་ཕྱིར་གྲོང་དཔོན་གཙུག་ན་ནོར་བུས་ཆེད་དུ་སོང་སྟེ་སངས་རྒྱས་ལ་ཞུས་ནས། བཀའ་སྩལ་པ། གསེར་དངུལ་ནི་དགེ་སྦྱོང་ལེན་དུ་མི་རུང་ངོ༌། །ཤིང་རྟ་ལ་སོགས་པ་ཡོན་བདག་གིས་ཕུལ་བ་ནི་ལེན་དུ་རུང་ངོ་ཞེས་གནང་བ་དང༌། ཁྱིམ་བདག་སོང་གི་འོག་ཏུ་གསེར་དངུལ་ལེན་དུ་མི་གནང་ངོ་ཞེས་བཀའ་ནི་སྩལ་ན་འདུལ་བ་ལ་བསླབ་པའི་གནས་མ་བཅས་སོ། །སླད་ཀྱིས་བཅོམ་ལྡན་འདས་མཉན་དུ་ཡོད་པ་ན་བཞུགས་པའི་ཚེ་དགེ་སློང་དྲུག་སྡེ་པོ་རྣམས་རང་གི་ལག་གིས་ས་ལེ་སྦྲམ་དང༌། དངུལ་ལེན་ཅིང་ལེན་དུ་འཇུག །ཕུང་པོ་གཅིག་དང༌། ཕུང་པོ་གཉིས་དང༌། ཕུང་པོ་དུ་མང་བྱེད། སྟན་གྱི་སྟེང་དང་ཁྲི་སྟེང་སྐྱེད་ཅིང་འཇོག་པས་ན། མུ་སྟེགས་ཅན་རྣམས་ཀྱང་དགེ་སློང་འདི་དག་ཁྱིམ་པ་དང་ཁྱད་པར་ཅི་ཡོད། བསམ་པ་ནི་ཅི་ཐ་དད་ཅེས་འཕྱ་ཞིང་མི་སྙན་པར་འཛེར་ཏོ། དེ་ལྟར་གྱུར་པ་དགེ་སློང་རྣམས་ཀྱིས་སྙན་དུ་གསོལ་ནས། བཀས་དྲུག་སྡེ་པོ་ལ་རྨས་ན། མད་དོ་ཞེས་གསོལ་ནས་རུང་བ་མ་ཡིན་ཞེས་བྱ་བ་རྣམ་གྲངས་དུ་མའི་སྒོ་ནས་སྨད་ནས། ས་ལེ་སྦྲ་མ་ལེན་དུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་པོ་སྟེ་གཞན་ཡང་དེ་དང་འདྲ་བའོ། །རང་གི་ལག་གིས་ཞེས་བྱ་བ་ནི་ལག་གིས་འཛིན་པས་སོ། །ས་ལེ་སྦྲམ་ཞེས་བྱ་བ་ནི་གསེར་
དང་དངུལ་ལོ། །ལེན་ཞེས་བྱ་བ་ནི་བདག་ཉིད་ཀྱིས་སོ། །ལེན་དུ་བཅུག་ཅེས་བྱ་བ་ནི་གཞན་ལའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ཉེས་པ་ནི་འདི་ནས་ལོང་འདི་སྙེད་ཅིག་ལོང༌། འདི་སྙེད་ཅིག་ཁྱེར་ཤོག་ཅེས་བསྒོ་བའི་ཚེ་ན་ནི་ཉེས་བྱས་སོ། །བླང་ན་ནི་སྤང་བའི་ལྟུང་བར་འགྱུར་རོ། །དགེ་སློང་གིས་གསེར་དང་དངུལ་ལ་རེག་ན་སྤང་བའི་ལྟུང་བར་འགྱུར་རོ། །ནོར་བུ་དང་མུ་ཏིག་དང་བཻཌཱུཪྻ་ལ་རེག་ན་རེ་རེས་ཀྱང་སྤང་བའི་ལྟུང་བར་འགྱུར་རོ། །ཟངས་དང་ལྕགས་དང༌། རོ་ཉེ་དང་ཚོན་མོ་སྟེང་ལ་རེག་ན་ཉེས་པ་མེད་དོ། །དེ་ལ་གསེར་དངུལ་རྗེས་སུ་གནང་བ་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་པའི་ཚེ་ཡུལ་ཙམ་པ་ན་ཁྱིམ་བདག་བསམ་པ་དགེ་བ་ཞིག་གིས་གཙུག་ལག་ཁང་ཞིག་བརྩིགས་ནས་དགེ་སློང་མང་ཞིག་སྤྱན་དྲངས་ཏེ། དབྱར་ཟླ་བ་གསུམ་ཚུལ་དུ་ཞུགས་སོ། །དེ་ནས་དབྱར་ཟླ་བ་གསུམ་འདས་ནས་ཚུལ་ནས་བྱུང་སྟེ་མཉན་དུ་ཡོད་པར་སངས་རྒྱས་གྱི་ཞབས་ལ་ཕྱག་འཚལ་དུ་དོང་བའི་ཚེ་ཁྱིམ་བདག་ལ་གོས་བསླངས་ན་གོས་འཕྲལ་དུ་མ་འབྱོར་ནས་གོས་རིན་ཀཱར་ཥཱ་པ་ཎ་བྱིན་ན་སྟོན་པས་མ་གནང་ནས་མ་བླངས་སོ། །མ་བླངས་པ་དགེ་སློང་དག་ལ་བྱས་པ་དང༌། དགེ་སློང་གིས་སྙན་དུ་གསོལ་ཏེ། ཁྱིམ་བདག་དད་པས་བྱིན་ན་དགེ་སློང་དག་གིས་ལེན་དུ་རུང་བར་ཐུགས་རྗེས་དགོངས་ཏེ། ལོང་ཤིག་བླངས་ནས་སྦྱིན་བདག་གིས་བསྔོས་ཏེ་ཚོངས་ཤིག་ཡང་ན་ཀུན་དགའ་ར་བ་པའམ། དགེ་བསྙེན་ལ་ཞོག་ཤིག །ཡོན་བདག་མ་ཤིའི་བར་དུ་ཡོན་བདག་ལ་བསྔོར་རུང་ངོ༌། །ཡོན་བདག་ཤིའམ་ཡོན་བདག་མེད་ན་གསེར་དངུལ་དགེ་སློང་གཅིག་གི་མདུན་དུ་ཞོག་ལ་དངོས་པོ་རུང་བ་མ་ཡིན་པ་འདི་བདག་གིས་རྙེད་དེ། རུང་བ་མ་ཡིན་པ་འདིས་རུང་བའི་གོས་ཤིག་བསྒྲུབ་པོ་ཞེས་ལན་གཉིས་ལན་གསུམ་དུ་བརྗོད་པར་བྱའོ། །དགེ་སློང་གིས་ཕྲིན་དང་ཕྲིན་ཡིག་དང་གཅིག་ནས་གཅིག་ཏུ་བརྒྱུད་དེ་ལེན་དུ་བཅོལ་ན་ཉེས་བྱས་སུ་འགྱུར་རོ། །ཕ་རོལ་སྨྱོན་པ་དང༌། ནད་ཀྱིས་གཟིར་བ་དང༌། གླེན་པ་དང༌། འོན་པ་དང༌། ལྐུགས་པ་ལ་གསེར་དངུལ་ལེན་དུ་བཅུག་ཀྱང་རུང་སྟེ་ཉེས་བྱས་སུ་འགྱུར་རོ། །གསེར་དངུལ་བླངས་ཀྱང་ཉེས་པར་མི་འགྱུར་བ་ཡོད་དེ། བདག་གིར་བྱ་བའི་སེམས་མེད་དེ། གཞན་ལ་སྦྱིན་པར་བསམ་པ་དང་མི་རུང་བས་རུང་བའི་དངོས་པོ་གཞན་བཙལ་ལོ་སྙམ་མོ། །མཚན་མ་
བཏབ་པ་ཡོ་བྱད་དུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བྱང་ཕྱོགས་ཀྱི་ཚོང་པ་ལ་གཅེར་བུ་པས་ལུང་བསྟན་པ་དང༌། འདིར་ནི་སྔར་གཏམ་ཐོས་པའི་ཉན་ཐོས་ཀྱི་དགེ་འདུན་ཡིན་ནོ་སྙམ་ནས་དེ་ལ་ཚོང་པས་བྱང་ཕྱོགས་ཀྱི་ཤིང་ཏོག་དང་ལ་བ་བཟང་པོ་ཞིག་བྱིན་ནོ། །དེའི་གྲོགས་དག་གིས་ཇེ་ཏའི་ཚལ་དུ་དོམ་དུ་བཏང་བ་དང༌། བསྙེན་དགའ་བོ་ཛེ་ཏའི་སྒོ་ན་འདུག་པས་ཆོས་བཤད་དེ་བདག་གི་ལ་བ་ངན་པ་དང་བརྗེས་པ་དང༌། དེ་ནས་གཅེར་བུ་པའི་གྲོགས་པོ་དག་གིས་འདུག་ཏུ་མ་སྟེར་ཏེ་ན་ན་ཐུར་ཆེར་བྱས་ནས་ཕྱིར་ལེན་དུ་བཅུག་པ་དང༌། མ་སྟེར་ནས་སངས་རྒྱས་ལ་གསོལ་པ་དང༌། མ་བྱིན་ན་ཁྲག་གིས་སྐྱུགས་ཏེ་འཆི་བས་སླར་བྱིན་ཅིག་པར་བཀས་གཏད་དེ་དེས་ཁྱིམ་ཕྱགས་ནས་སླར་བྱིན་ནོ་དེ་ལྟར་མཚན་མ་བཏབ་པས་བཟང་ངན་བརྗེས་པ་དག་བྱུང་མོད་ཀྱི་བསླབ་པ་མ་བཅས་སོ། །སླད་ཀྱིས་མཉན་དུ་ཡོད་པ་ན་དགེ་སློང་དྲུག་སྡེ་པོ་རྣམས་མཚན་མ་བཏབ་པ་རྣམ་པ་སྣ་ཚོགས་ལ་སྤྱོད་ཅིང་སྤོགས་བྱེད་དེ། སྐྱེད་གཏོང་བུན་འགྱེད་ལྷག་ཚོལ་གསེར་དངུལ་བརྡུངས་པ་དང༌། མ་བརྡུངས་པ་གཉིས་བརྗེ་ཞིང་སྤོགས་བྱེད། འབྲས་བུ་དང་ནས་གསར་ཏོག་གཉིས་ལས་གསུམ་མམ། གཅིག་ལས་གཉིས་སུ་བུན་འགྱེད་པ་དང༌། དུང་གིས་མུ་ཏིག་བརྗེ་བ་དང༌། མུ་ཏིག་གིས་ནོར་བུ་རིན་པོ་ཆེ་བརྗེ་བར་ལྷག་ཚོལ། དེ་ལྟར་བྱེད་པས་ན་མུ་སྟེགས་ཅན་རྣམས་འཕྱ་ཞིང་སྨོད་པས་དགེ་སློང་རྣམས་ཀྱིས་སྙན་དུ་གསོལ་ཏེ། ད་སླན་ཆད་མཚན་མ་བཏབ་པ་རྣམ་པ་སྣ་ཚོགས་ལ་སྤྱོད་ཅིང་བཟང་ངན་བརྗེར་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་ཕོ་སྟེ་གཞན་ཡང་དེ་དང་འདྲ་བའོ། །རྣམ་པ་སྣ་ཚོགས་ཞེས་བྱ་བ་ནི་རྣམ་པ་དུ་མའོ། །མཚན་མ་བཏབ་པ་ལ་སྤྱོད་པར་བྱེད་ཅེས་བྱ་བ་ནི་སྤོགས་བྱེད་པ་དང༌། སྐྱེད་གཏོང་བ་དང༌། བུན་འགྱེད་པ་དང༌། ལྷག་ཚོལ་བའོ། །སྤང་བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །དགེ་སློང་གིས་གསེར་དངུལ་ལམ། ཡུལ་ཕྱོགས་སུ་བྲིན་པའི་རྫས་གང་ཡང་རུང་བ་དང༌། ནས་འབྲས་སྐྱེད་དང་བུན་འགྱེད་པའི་ཚེ་ན་ནི་ཉེས་བྱས་སུ་འགྱུར་རོ། །སྤོགས་དང༌། ཁེ་བདག་གི་ལག་པར་ཐོབ་ན་སྤང་བའི་ལྟུང་བར་འགྱུར་རོ། །དཀོན་མཆོག་གསུམ་གྱི་ཕྱིར་རམ་བུ་ལོན་གྱི་འོག་ཏུ་བསབ་པའམ་གཞན་
ལ་སྦྱིན་པ་ནི་ཉེས་པ་མེད་དོ། །ཕྲིན་དང་ཕྲིན་ཡིག་དང་ལག་བརྡ་དང་གཅིག་ནས་གཅིག་ཏུ་བརྒྱུད་དེ། ནོར་སྣ་ཚོགས་སྤོགས་བྱེད་པ་ནི་ཉེས་བྱས་སུ་འགྱུར་རོ། །སེམས་འཁྲུགས་པ་དང༌། ནད་ཀྱིས་གཟིར་བ་དང༌། གླེང་པ་དང༌། འོན་པ་དང༌། ལྐུགས་པ་དང་འགྲོ་བ་གཞན་དུ་གནས་པ་དང༌། ལྷན་ཅིག་ཏུ་ནོར་ལྷག་སྤོགས་བྱེད་ན་ཉེས་བྱས་སོ། །མི་ལ་མིར་འདུ་ཤེས་ན་སྤང་བར་འགྱུར་རོ། །མི་ལ་མི་མ་ལགས་པར་འདུ་ཤེས་ན་ཉེས་བྱས་སོ། །མི་མ་ཡིན་པ་ལ་ཡང་དེ་བཞིན་ནོ། །བསྙེན་པར་རྫོགས་ཁ་དང་བསྙེན་པར་མ་རྫོགས་པ་ན་བཏང་ཡང་ཉེས་བྱས་སོ། །ནོར་སྣ་ཚོགས་ལ་སྤོགས་བྱས་ཀྱང་ཉེས་པར་མི་འགྱུར་བ་ཡང་ཡོད་དེ་རིན་ཐང་འདྲ་མཚུངས་པར་བརྗེས་པའོ། །དགེ་སློང་ལ་སྤང་བར་འགྱུར་བ་བཞིན་དུ་བསླབ་པ་བྱིན་པ་དང༌། དགེ་སློང་མ་ལ་ཡང་དེ་བཞིན་ནོ། །དགེ་སློང་མ་དང་དགེ་ཚུལ་ཕོ་མོ་ལ་ཡང་དེ་བཞིན་ནོ། །བསླབ་པའི་གནས་འདིར་ཇི་ལྟ་བ་བཞིན་དུ་ཉོ་ཞིང་འཚོང་བ་ལ་ཡང་དེ་བཞིན་དུ་སྦྱོར་ཅིག །ཉོ་ཚོང་བྱེད་དུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ཛེ་ཏའི་ཚལ་ན་བཞུགས་སོ། །དེའི་ཚེ་དགེ་སློང་དྲུག་སྡེ་པོ་རྣམས་སྔར་མཚན་མ་བཏབ་པས་སྤོགས་བྱེད་ཅིང་དངོས་སྐྱེད། གཉིས་ཀ་ལེན་པར་མི་གནང་བས་ན་ཉོ་ཞིང་ཚོང་བྱེད་པ་ལ་ཞུགས་ཏེ། དངོས་ནི་རིན་འོག་ཏུ་ཐལ་བྱུང་དུ་གཏོང་ཞིང་སྤོགས་བྱེད་དེ་ཇི་ལྟར་ན་ཉོ་ཞིང་འཚོང་ཞེ་ན། ནམ་རིན་ཐང་ཆུང་བ་དེ་ན་ཉོས་ཏེ་བཞག་ནས་ནམ་རིན་ཆེ་བ་དེ་ན་འཚོང་བའོ། །ལོ་ལེགས་པའི་ཚེ་ནི་ཉོས་ཏེ་བཞག་ནས་ནམ་ལོ་ཉེས་ཤིང་རིན་ཆེ་བའི་ཚེ་ནི་ཕར་འཚོང་བར་བྱེད་དེ། དེ་ལྟར་ཉོ་ཚོང་རྣམ་པ་སྣ་ཚོགས་བྱེད་པས་ན་མུ་སྟེགས་ཅན་རྣམས་འཕྱ་ཞིང་སྨོད་དེ། དགེ་སློང་ཤཱ་ཀྱའི་བུ་རྣམས་སྐྱོ་ཞིང་ཆོག་མི་ཤེས་པ་དེ་དག་ཁྱིམ་པ་སྐྱ་བོ་དང་ནི་བྱེ་བྲག་ནི་ཅི་ཡོད། བསམ་པ་ནི་ཅིས་ཐ་དད་ཅེས་མི་སྙན་པར་ཟེར་བ་དེ་དགེ་སློང་དག་གིས་སྙན་དུ་གསོལ་ཏོ། །དྲུག་སྡེ་རྣམས་དེ་ལྟར་བྱེད་པ་བདེན་ནམ་ཞེས་རྨས་པ་དང༌། མད་དོ་ཞེས་གསོལ་ནས་དགེ་སྦྱོང་གི་བྱ་བ་མ་ཡིན་རིགས་པ་མ་ཡིན་ཞེས་སྨད་ནས་ཉོ་ཚོང་བྱེད་དུ་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་པོ་སྟེ་གཞན་ཡང་དེ་དང་འདྲའོ། །རྣམ་པ་མང་པོ་ཞེས་བྱ་བ་ནི་རྣམ་པ་དུ་མའོ། །ཉོ་བ་དང་འཚོང་བར་བྱེད་ཅེས་བྱ་བ་ནི་ཀུན་དུ་སྤྱོད་པའོ། །སྤང་བའི་ལྟུང་བ་ཞེས་བྱ་བ་
ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ལྟུང་བ་ཇི་ལྟ་བུ་ཞེ་ན། དགེ་སློང་གིས་ཁེའི་ཕྱིར་འཚོང༌། ཁེའི་ཕྱིར་ཉོན་ཉོ་བའི་ཚེ་ཉེས་བྱས་སོ། །བཙོངས་ཏེ་རིན་ཐོབ་ན་སྤང་བའི་ལྟུང་བའོ། །ཁེ་མི་འདོད་པའི་ཕྱིར་ཉོ་ཚོང་བྱེད་ན་ལྟུང་བ་མེད་དོ། །གཞན་ལ་སྦྱིན་པའམ་བུ་ལོན་ཆགས་པའི་ཕྱིར་བསབ་པ་ལ་ཉོ་ཚོད་བྱས་པ་ནི་ལྟུང་བ་མེད་དོ། །དགེ་འདུན་གྱི་ཕྱིར་ཉོ་ཚོང་རྗེས་སུ་གནང་བའི་གླེང་གཞི་ནི་བཅོམ་ལྡན་འདས་ཡུལ་ཡངས་པ་ཅན་གྱི་ཁང་བུ་བརྩེགས་པ་ན་བཞུགས་སོ། །དེའི་ཚེ་ན་བྱང་ཕྱོགས་ཀྱི་ཚོང་པ་སྔོན་ཆད་གཙུག་ལག་ཁང་དག་མ་མཐོང་བས་དེའི་གཙུག་ལག་ཁང་ཆེན་པོ་ཞིག་འདུག་པ་གསར་དུ་མཐོང་ནས་དེ་ན་དགེ་སློང་འཁོད་པ་དག་ལ་འཕགས་པ་དག་ལ་བདག་གིས་བཤོས་གསོལ་ན་བདག་ཅག་གསར་དུ་ལྷགས་པས་འབྲས་མ་མཆིས་ཀྱིས་ཟོང་གིས་འབྲས་འཇལ་ལོ་ཞེས་བྱས་པ་དང༌། བཅོམ་ལྡན་འདས་ཀྱིས་ཉོ་ཚོང་མ་གནང་ངོ་ཞེས་མ་བྱིན་པ་དང་སྙན་དུ་བདས་ཏེ་དགེ་འདུན་གྱི་ཕྱིར་འབྲས་ཚོང་ལ་རིན་ལོང་ཤིག་ཅེས་བཀའ་སྩལ་ཏོ། །དེ་ལྟ་བུ་གསོལ་པ་མང་སྟེ་དེ་བཞིན་དུ་སྦྱིན་པས་དགེ་འདུན་བཤོས་ཆད་པར་གྱུར་ཏེ། བཀའ་སྩལ་པ། ཟོང་གིས་འབྲས་གསར་པ་ཉོས་ལ། རྙིང་པ་ཀུན་ཚོང་གྱིས་ཤིག་ཅེས་རྗེས་སུ་གནང་ངོ༌། །སྤང་བ་ཉི་ཤུ་པ་རྫོགས་སོ།། །།སྤང་བའི་བཅུ་ཕུང་ཐ་མ་ལྟུང་བཟེད་ལྷག་མ་བཅང་དུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བསྙེན་དགའ་བོས་འདི་སྙམ་དུ་བསམས་སོ། །མགོན་མེད་ཟས་སྦྱིན་གྱིས་སྙན་དུ་གསོལ་ནས་བསླབ་པའི་གནས་བཅས་ཏེ། །རྙེད་པ་ཡང་རབ་ཏུ་ཉུང་ནས་མི་དགའ་སྟེ། ཁང་ཐོག་ཏུ་འཛེགས་ཏེ་བལྟས་ནས་སྐྱེད་མོས་ཚལ་ན་སུན་ཟིན་པ་དྲུག་ཅུ་འདུས་ཤིང་འཁོད་པ་མཐོང་ནས་དེར་རྙེད་པ་ཞིག་མ་གྲུབ་ན་བདག་གི་མིང་བསྙེན་དགའ་བོ་ཞེས་མི་བྱ་མོད་སྙམ་དུ་བསམས་ནས་དེར་སོང་སྟེ་དེ་དག་ལ་ཆོས་བཤད་དེ་དད་པར་བྱས་པ་དང༌། དེ་ན་གཅིག་ན་རེ་འཕགས་པ་ལ་ཡོན་ཞིག་འབུལ་ན་ཅི་མཁོ་ཞེས་བྱས་པ་དང༌། བདག་ལ་ལྷུང་བཟེད་མཁོའོ་ཞེས་བྱས་སོ། །ལྷུང་བཟེད་ནི་མ་མཆིས་ན་ཟོང་ཞིག་འབུལ་ན་ཇི་ཙམ་རེ། ཀཱར་ཥཱ་པ་ཎ་དྲུག་ཅུ་རིའོ་ཞེས་བྱས་པ་དང༌། དེས་ཀཱར་ཥཱ་པ་ཎ་དུག་ཅུ་བྱིན་ན་གཞན་ལ་ཡང་དེའི་ཐང་དུ་ཕབ་ནས་ཁྱེར་བ་དང༌། ཕྱིས་སུ་ན་ཟིན་པ་རྣམས་ཀྱིས་བསོད་སྙོམས་པ་ཞིག་ལ་དགེ་སློང་ལ་ལྟུང་བ་ཟེད་དུ་དགོས་ཞེས་སྨྲས་པ་དང༌།
གཅིག་ལས་མི་དགོས་སོ་ཞེས་སྨྲས་པ་དང༌། དགེ་སྦྱོང་ཤཱཀྱའི་བུ་ནི་འདོད་པས་གཟིར་བ་ཞེས་དེ་དག་འཕྱའོ། །དེ་བྱུང་ཡང་དེའི་མོད་ལ་བསླབ་པ་ལ་མ་བཅས་སོ། །སླད་ཀྱིས་བཅོམ་ལྡན་འདས་མཉན་དུ་ཡོད་པ་ན་བཞུགས་པའི་ཚེ། དྲུག་སྡེ་པོ་རྣམས་ལྷུང་བཟེད་མང་དུ་རྙེད་ཅིང་ཐོབ་པ་རྣམས་བསོགས་ཏེ་བདག་ཅག་ཉིད་ཀྱང་མི་སྤྱོད་གཞན་ཡང་སྤྱོད་དུ་མི་སྟེར་ཏོ། །དེ་ལྟར་གྱུར་པ་སྙན་དུ་བདས་ནས། དྲུག་སྡེ་བོ་རྣམས་ལ་བཀས་རྨད་ན། མད་དོ་ཞེས་གསོལ་ནས། དགེ་སློང་གི་བྱ་བ་མ་ཡིན་རིགས་པ་མ་ཡིན་ཞེས་སྨད་ནས། ཞག་བཅུ་ལས་ལྷུང་བཟེད་ལྷག་མ་འཆད་དུ་མ་གནང་བར་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་བོ་སྟེ་གཞན་ཡང་དེ་དང་འདྲ་བའོ། །ལྷུང་བཟེད་ལྷག་མ་ཞེས་བྱ་བ་ནི་བྱིན་གྱིས་བརླབས་པ་ལས་ལྷག་པའོ། །ཆོངས་ཤིག་ཅེས་བྱ་བ་ནི་ཞག་བཅུའི་བར་དུ་བདག་གིར་བཅངས་པའོ། །དེ་ལས་འདས་པར་བཅངས་ན་ཞེས་བྱ་བ་ནི་ཞག་བཅུ་ལས་ཐལ་པའོ། །སྤང་བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །ལྟུང་བར་འགྱུར་བ་གང་ཞེ་ན་དགེ་སློང་གིས་ཚེས་གཅིག་གི་ཉིན་པར་ལྷུང་བཟེད་ལྷག་མ་ཞིག་རྙེད་ན་ཞག་བཅུ་ཚུན་ཆད་བྱིན་གྱིས་རློབས་ཤིག །ཡང་ན་གཞན་དུ་སྐུར་ཅིག །ཡང་ན་གཞན་ལ་བྱིན་ཅིག །དེ་ཚུན་ཆད་དུ་མ་བསྐུར་རམ་གཞན་ལ་མ་བྱིན་ནམ། ཡང་ན་སྡེ་མ་སྤངས་ཏེ་ཕྱི་མ་བྱིན་གྱིས་མ་བརླབས་ན་ཚེས་བཅུ་གཅིག་གི་སྐྱ་རངས་ཤར་ན་སྤང་བའི་ལྟུང་བར་འགྱུར་རོ། །དགེ་སློང་གིས་ལྷུང་བཟེད་ལྷག་པ་དེ་སྤང་བར་བྱ་བ་མ་སྤངས། ཉེས་པ་མ་བཤགས་ན། དེ་ཚུན་ཆད་ཡོ་བྱད་ཅི་སྙེད་པ་ཀུན་སྔ་མའི་རྒྱུན་གྱིས་སྤང་བའི་ལྟུང་བར་འགྱུར་རོ། །ཞག་བཅུ་ལས་ལྷུང་བཟེད་ལྷག་པར་བཅངས་ཀྱང་ཉེས་པ་མེད་དེ། དགེ་སློང་གཞན་གྱིས་ལྷུང་བཟེད་བསྐུར་བའོ། །ལྷུང་བཟེད་ཚད་ལས་ཆེས་པ་དང༌། ཆུང་བ་དང༌། མ་བསྲེགས་པ་དང་དཀར་པོ་བཅངས་ན་ཉེས་བྱས་སོ། །དགེ་སློང་སྨྱོས་པའི་ཚེ་ཞག་ཐལ་བ་ཉེས་པ་མེད་དོ། །ཕྲིན་དང་ཕྲིན་ཡིག་དང་ལག་བརྡ་དང༌། གཅིག་ནས་གཅིག་ཏུ་བརྒྱུད་དེ་ལྷུང་བཟེད་ལྷག་པ་ཞག་བཅུ་ལས་འདས་པར་བཅངས་ཀྱང་ཉེས་བྱས་སུ་འགྱུར་རོ། །ལྷུང་བཟེད་གཅིག་ལས་ལྷག་པ་མེད་ཀྱང་སྤང་བར་འགྱུར་བ་ཡོད་དེ། ལྷུང་བཟེད་བྱིན་གྱིས་མ་བརླབས་པ་བཅངས་པའོ། །ཚེས་གཅིག་ལ་བཅངས་ཀྱང་
ཉེས་པ་མེད་དེ་ཞག་བཅུ་ཚུན་ཆད་ཀྱིས་ཤི་བའོ། །ལྷུང་བཟེད་སྤྱད་བཟོད་པ་ཡོད་བཞིན་དུ་ལྷག་པར་བཟང་པོ་ཚོལ་དུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་མཉམ་དུ་ཡོད་པ་ན་སྤོས་འཚོང་བའི་ཁྱེའུ་ཞིག་གནས་ཏེ། དེའི་ཚོད་འདུས་ན་ལྷུང་བཟེད་སྤྱད་བཟོད་པ་བཟང་པོ་ཞིག་ཡོད་དེ། ཁྱེའུ་དེས་ནང་པར་དགེ་སློང་བསོད་སྙོམས་པ་ཞིག་དེར་འོངས་པ་ལ་ལྷུང་བཟེད་བཙོངས་ན་མ་འདོད་དོ། །ཛེ་ཏའི་ཚལ་ན་དགེ་སློང་གནས་པ་ལྷུང་བཟེད་ཉོ་བ་ལྟ་ཡོད་ན་དེར་བཏང་དུ་བཅོལ་ཞེས་གསོལ་ཏོ། །དགེ་སློང་དེས་ཀྱང་དགེ་སློང་དག་ལ་ལྷུང་བཟེད་དེ་འདྲ་བ་ཞིག་ཡོད་ཅེས་གཏམ་བྱས་པ་དང༌། བསྙེན་དགའ་བོས་ཐོས་ནས་དེས་གཞན་ལ་བྱས་སུ་དོགས་ནས་གཞན་གྱིས་མི་ཐོས་པར་བྱ་བའི་ཕྱིར། ཁྱོད་དེ་ལྟ་བུའི་བྱ་བ་འབའ་ཞིག་བྱེད་ཅིང་ཐན་སྐྱེལ་ཏམ་ཞེས་བྱས་ནས་དེའི་འོག་ཏུ་གཞན་མེད་པ་དང་དེ་ལ་བཞམས་ཏེ་ཁྱིམ་གང་ཙམ་ན་ཡོད་པ་ཞིག་ཏུ་དྲིས་ནས་ཚོང་དུས་སུ་བསྙེན་དགའ་བོ་གོམ་པ་བརྒྱངས་ཏེ་སོང་བ་དང༌། སྤོས་འཚོང་བའི་ཁྱེའུས་ཀྱང་དྲུག་སྡེ་བོ་ཡིན་པར་ཤེས་ནས་ལྷུང་བཟེད་སྦས་སོ། །བསྙེན་དགའ་བོས་མཐོང་ནས་ལྷུང་བཟེད་བླངས་ནས་བཞིན་བཟངས་ནད་མེད་ཅིང་སྦྱིན་པ་འདིས་ཁྱེད་ཀྱི་སེམས་ཀྱི་རྒྱན་དང་སེམས་ཀྱི་ཡོ་བྱད་དང་རྣལ་འབྱོར་ཀྱི་ཚོགས་དང་དོན་གྱི་མཆོག་གྲུབ་ཅིང་ལྷ་དང་མིའི་དོན་དུ་གྱུར་ཅིག་ཅེས་བྱས་པ་དང་འཕགས་པ་ཁྱོད་ཀྱི་ས་མང་ཞིག་སྨྲས་མོད་ཀྱི་རིན་མེད་ཀྱི་བར་དུ་མི་གསོལ་ལོ་ཞེས་མ་སྟེར་བ་དང༌། བསྙེན་དགའ་བོ་དང་བཤེས་པའི་ཚོང་དཔོན་ཞིག་དེར་ཕྱིན་དེ་བསྙེན་དགའ་བོ་ལ་ཕྱག་འཚལ་ལོ་ཞེས་བྱས་པ་དང༌། ཁྱེད་ཀྱི་ཕྱག་སྐམ་པོས་ང་ལ་ཅི་བྱ། ངའི་ཅི་དག་བསྒྲུབས་ཏེ་ཕྱིན་ན་ཕན་མོད་ཅེས་བྱས་པ་དང༌། འོ་ན་ངས་ཅི་བྱ་ལྷུང་བཟེད་དེ་ཉོས་ཏེ་ང་ལ་བྱིན་ན་ཕན་མོད། དེས་ཀྱང་ཉོས་ནས་བྱིན་ནོ། །བསྙེན་དགའ་བོས་ལྷུང་བཟེད་དེ་ཁྱེར་ནས་ལྷུང་བཟེད་བཟང་པོ་གཞན་ལ་སྤྱོམས་ཤིང་ངོམ་པ་དང༌། དགེ་སློང་གཞོན་ནུ་ཞིག་གིས་སྨྲས་པ་གནས་བརྟན་ལྷུང་བཟེད་བཟང་པོ་ཡོད་བཞིན་དུ་གཞན་ལ་བསླང་བའི་རིགས་སམ་ཞེས་བྱས་པ་དང༌། དགེ་སློང་གཞན་གྱིས་ཀྱང་དེ་ནི་བདེན་ནོ་ཞེས་འཕྱ་བར་གྱུར་བ་སྙན་དུ་བདས་ནས། ལྷུང་བཟེད་བཟང་པོ་ཚོལ་དུ་མི་གནང་བར་བཅས་སོ། །དེ་ལྟར་ལྷུང་བཟེད་བཟང་པོ་ཚོལ་དུ་མི་གནང་བ་དང༌། དགེ་སློང་བསོད་སྙོམས་པ་ཞིག་ལྷུང་
བཟེད་རྡོལ་ཏེ་འབྲས་ཁུ་དག་ཟགས་ཏེ། སྦྲང་མ་མང་པོ་འདུ་བར་གྱུར་པ་བྲམ་ཟེའི་བུ་དག་གིས་ཚོང་དཔོན་དང་དེད་དཔོན་འདྲ་བར་འཁོར་མང་པོས་བསྐོར་ཏོ་ཞེས་འཕྱ་བས་བཀའ་སྩལ་པ། ལྷུང་བཟེད་རྡོལ་བ་གློན་ཅིག་དྲུབས་ཤིག །ལྷན་པ་ལྔར་མ་ཚང་གི་བར་དུ་གཞན་ཚོལ་དུ་མི་གནང་བར་བཅས་སོ། །ཡང་དགེ་སློང་ཞེས་བྱ་བ་ནི་བསྙེན་དགའ་བོ་སྟེ། །གཞན་ཡང་དེ་དང་འདྲ་བའོ། །ལྷུང་བཟེད་ལྷན་པ་ལྔ་ལས་ཉུང་བ་ཞེས་བྱ་བ་ནི་ལྔར་མ་ཚང་བའོ། །སྤྱད་བཟོད་པར་ཡོད་བཞིན་དུ་ཞེས་བྱ་བ་ནི་སྤྱད་དུ་རུང་བའོ། །ལྷུང་བཟེད་སར་པ་གཞན་ཚོལ་ཞེས་བྱ་བ་ནི་ལྷུང་བཟེད་གཞན་གཉིས་པ་ཚོལ་བའོ། །སར་པ་ཞེས་བྱ་བ་ནི་རྣམ་པ་གཉིས་སར་པས་སར་པ་དང༌། ཐོབ་པས་སར་པའོ། །སྐབས་འདིར་སར་པ་གཉི་ག་ལ་བྱའོ། །ཚོལ་ཞེས་བྱ་བ་ནི་འཚོལ་བར་བྱེད་པའོ། །བཟང་པོ་འདོད་པའི་ཕྱིར་ཞེས་བྱ་བ་ནི་སྔ་མ་ལས་ལྷག་པར་བཟང་པོ་འདོད་པའོ། །ལྷུང་བཟེད་དེ་གྲུབ་ན་ཞེས་བྱ་བ་ནི་རྙེད་པའོ། །དགེ་སློང་དེས་ཞེས་བྱ་བ་ནི་དགེ་སློང་དེ་ཉིད་དོ། །ལྷུང་བཟེད་དེ་དགེ་འདུན་གྱི་འཁོར་ལ་དབུལ་བར་བྱ་ཞེས་བྱ་བ་ནི་དེ་ན་དགེ་སློང་འཁོད་པའི་འཁོར་དེར་ལྷུང་བཟེད་སུ་ངན་པ་ལ་ཕྲོགས་ཏེ་སྦྱིན་པར་བྱའོ། །ལྷུང་བཟེད་བཟང་པོ་ལྷག་པ་འདྲིམ་པའི་དགེ་སློང་ཕ་གསོལ་བ་དང་ལས་ཀྱིས་བསྐོས་ཤིག །དགེ་སློང་དེས་ལྷུང་བཟེད་ཐོགས་ལ་རྒན་རིམས་སུ་གནས་བརྟེན་དང་གསར་བུའི་བར་དུ་ལྷུང་བཟེད་ཀྱི་ཡོན་ཏན་བསྔགས་ཤིང་འདི་བཞེད་ན་སྣོམས་ཤིག་ཅེས་གནས་བརྟན་དང་པོ་ལ་དབུལ་བར་བྱའོ། །དེས་མ་འདོད་ན་དང་འོག་དང་གསུམ་ལ་དབུལ་བར་བྱའོ། །གང་གིས་ལྷུང་བཟེད་བཟང་པོ་ཁྱེར་བ་དེའི་ལྷུང་བཟེད་ངན་པ་གནས་བརྟན་ནས་གཅིག་ཏུ་བརྗེས་ལ་ནན་གྱིས་དགེ་སློང་གསར་བུ་ལ་བྱིན་ཅིག །དགེ་སློང་ལྷུང་བཟེད་ལྷག་པ་འཆང་བའི་ཆད་པ་ཡང་དགེ་སློང་གི་འཁོར་ཐམས་ཅད་ཀྱི་ལྷུང་བཟེད་ངན་པར་གྱུར་པ་དགེ་སློང་དེ་ལ་བྱིན་ཏེ། ལྷུང་བཟེད་དེ་བྱིན་གྱིས་ཀྱང་མ་བརླབས་གཞན་ལ་ཡང་མ་བསྐུར། གཞན་ལ་ཡང་མ་བྱིན་པར་ཐ་མ་ཆག་པ་ལ་ཐུག་གི་བར་དུ་དལ་བུས་བགས་ཀྱིས་སྤྱད་ཅིག་ཅེས་སྒོ་ཤིག །དེའི་ཆད་པ་དང་མཐུན་པ་ནི་དེ་ཡིན་ནོ། །དགེ་སློང་དེས་ཀྱང་ལྷུང་བཟེད་སྣོད་གཉིས་གྱིས་ལ་སྣོད་གང་བཟང་བའི་ནང་དུ་ནི་ལྷུང་བཟེད་མ་གླན་པ་ཆུག་ཤིག །ངན་པའི་ནང་དུ་ནི་བྱིན་གྱིས་བརླབས་པ་ཆུག་ཤིག །ཟས་བསོད་སྙོམས་དང་འགྲོ་
བའི་ཚེ་ཡ་གཉིས་ཀ་ཐོགས་ལ་ཁ་ཟས་སྐམ་པོ་ཞིག་རྙེད་ན་མ་གླན་པའི་ནང་དུ་ལྡུགས་ཤིག །ཁ་ཟས་གཤེར་བ་ཞིག་རྙེད་ན་བྱིན་གྱིས་བརླབས་པའི་ནང་དུ་ལྡུགས་ཤིག །ལྷུང་བཟེད་དེ་ཡང་ཇི་སྲིད་འཚོ་བའི་བར་དུ་བཅང་བར་བྱ་སྟེ། དེ་ནི་ཆད་པའོ། །སྤང་བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །དགེ་སློང་གིས་ལྷུང་བཟེད་སྤྱད་བཟོད་པ་ཡོད་ལ་ལྷན་པ་ལྔས་མ་བཏབ་པ་ལས་ལྷུང་བཟེད་ལྷག་པ་གཞན་ཞིག་ཚོལ་ན་ཚོལ་བའི་ཚེ་ཉེས་བྱས་སོ། །གྲུབ་ན་སྤང་བའི་ལྟུང་བའོ། །གཉེན་མ་ཡིན་པའི་ཐ་ག་པ་ལ་གོས་འཐག་ཏུ་བཅུག་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་བསྙེན་དགའ་བོས་བསམས་པ་ཁྱིམ་བདག་མགོན་མེད་ཟས་སྦྱིན་གྱིས་སློང་དུ་མི་གནང་བའི་སྡོམ་པ་བཅས་པས་རྙེད་པ་ཡང་རབ་ཏུ་ཉུང་ན་ད་ཅུང་ཟད་རྙེད་པ་དག་སྒྲུབ་པོ་སྙམ་ནས་ཁང་ཐོག་ཏུ་འཛེགས་ཏེ་བལྟས་ན། ཡུགས་ས་མོ་བལ་འཁལ་བ་ལྔ་བརྒྱ་ཙམ་ཞིག་ཛེ་ཏའི་ཚལ་གྱི་ཤར་སྒོ་ན་འདུག་པ་མཐོང་ནས་བསྙེན་དགའ་བོ་དེ་དག་གི་གན་དུ་སོང་བ་དང༌། བུད་མེད་གཅིག་གིས་ནི་ཕྱག་བྱས་ཀྱི་གཞན་གྱིས་ནི་མ་བྱས་སོ། །བསྙེན་དགའ་བོས་བུད་མེད་གཞན་གྱིས་ནི་ཚེ་ཕྱི་མའི་ས་བོན་མ་བཏབ་ཀྱི་བུ་མོ་འདི་གཅིག་པུས་ཚེ་ཕྱི་མའི་ས་བོན་བཏབ་པོ་ཞེས་སྨྲས་པ་དང༌། དེ་ཇི་ལྟ་བུ་ཞེས་བུད་མེད་རྣམས་ཀྱིས་དྲིས་པ་དང༌། དེར་ཆོས་བཤད་པས་དད་པ་སྐྱེས་ཏེ་བུད་མེད་རྣམས་ཀྱིས་འཕགས་པ་ཡོན་ཞིག་འབུལ་ལོ་ཞེས་པ་དང༌། བསྙེན་དགའ་བོས་སྨྲས་པ། སངས་རྒྱས་འཁོར་དང་བཅས་པ་བཤོས་གསོལ་ཅིག །དེ་ནི་མི་ནུས་སོ། །འོ་ན་དྲུག་སྡེ་པོ་རྣམས་སྤྱན་དྲོངས་ཤིག །དེ་ཡང་མི་ནུས་སོ་ཞེས་སྨྲས་པ་དང༌། འོ་ན་ང་ལ་སྐུད་པ་སྲང་ཕྱེད་ཕྱེད་ཙམ་ཞིག་དབུལ་མི་ནུས་སམ་ཞེས་སྨྲས་པ་དང༌། དེ་ནི་ནུས་སོ་ཞེས་ནས་ཀུན་གྱིས་བསྡུས་ཏེ་བྱིན་པ་དང་དེའི་ནང་ནས་གཉིས་འཁལ་མཁས་པས་ན་དེ་གཉིས་ཀ་ལ་བཀལ་དུ་བཅོལ་ཏོ། །དེ་ནས་སྐུད་པ་བཀལ་ཟིན་པ་དང༌། དེ་དེ་ཁྱེར་ཏེ་ཐ་ག་པ་སྤྱི་ཅེར་ལ་འཐག་ཏུ་བཅོལ་ན་དེ་མ་བཏུབ་པ་དང༌། དེས་ཆོས་བཤད་དེ་བྱས་ན་དེའི་ཆུང་མས་ལེན་དུ་བཅུག་སྟེ་བྱས་པ་དང༌། ཕྱིས་རྔན་པ་བདས་ན་མ་སྟེར་ཏོ། །ཕྱིས་ཡང་སྐུད་པ་རྙེད་ནས་སྤྱི་ཅེར་ལ་བཅོལ་པ་དང་སྔ་མའི་རྔན་པ་མ་སྟེར་བས་ཕྱི་མ་ཡང་མ་བཏུབ་ནས་དེ་བཟོ་དཔོན་གྱི་གན་དུ་སོང་སྟེ། དེ་བཟོ་དཔོན་ལ་བྱས་ན་ཐ་ག་པ་གཞན་ལ་བཅོལ་
དུ་མི་རུང་ངམ་ཞེས་དྲིས་པ་དང༌། བསྙེན་དགའ་བཅོས་བསམས་པ་སྦྱིན་ཅེར་ཡང་ཤིན་ཏུ་མཁས་ལ་སྔར་འཐག་ཏུ་མ་བཏུབ་པས་འཁོན་ཡང་ཡོད་པས་སྤྱི་ཅེར་ལ་མི་བཅོལ་དུ་མི་རུང་ངོ་ཞེས་ལན་དུ་མར་ནན་གྱིས་བཟོ་དཔོན་ལ་གསོལ་ནས། ཐ་མར་སྐུད་པ་སྐྱེལ་བའི་རང་མནོས་ནས་རང་རྟས་བཟོ་དཔོན་གྱི་ཚིག་གིས་ཐོགས་ཤིག་པར་བསྒོ་ན། མ་བཏུབ་ནས་ལན་དུ་མར་མཐུས་བསྡིགས་ཤིང་ནན་ཐུར་གྱིས་འཐག་ཏུ་བཅུག་པས་ན་ཐ་ག་པས་བཏགས་ཟིན་པའི་འོག་ཏུ་འཕགས་པ་བདག་ཅག་གིས་ཆང་རིན་ཞིག་འཕགས་པ་ལ་གསོལ་ལོ་ཞེས་བྱས་ན་བཀྲེན་པ་ཁྱོད་ཅི་བཅང་བ་ངའི་ཡིན་ནམ་དུག་འཐུང་ན་ཅི་ཉེས་ཞེས་བསྒོ་བ་དང༌། ཁྱིམ་བདག་དེ་ཡང་མ་དད་པར་གྱུར་ནས་དགེ་སྦྱོང་ཤཱ་ཀྱའི་བུ་དེ་དག་ནི་ཆོས་ཀྱིས་བསྒོ་ནས། རྒྱལ་པོ་དང་བློན་པོའི་མཐུས་འཐག་ཏུ་བཅུག་གོ་ཞེས་མི་སྙན་པར་འཛེར་ཏོ། །དེ་ལྟར་གྱུར་པ་སྙན་དུ་བདས་ནས་བཀས་རྨས་ན། བསྙེན་དགའ་བོས་མད་དོ་ཞེས་གསོལ་ཏེ། དགེ་སྦྱོང་གི་བྱ་བ་མ་ཡིན་ཞེས་རྣམ་གྲངས་དུ་མའི་སྒོ་ནས་སྨད་ནས། གཉེན་མ་ཡིན་པ་ལ་འཐག་ཏུ་མི་གནང་བར་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །བདག་གིས་བསླངས་པའི་སྐུད་པ་ཞེས་བྱ་བ་ནི་ཇི་ཙམ་དུ་དད་པ་སྟེ། ལ་ལས་སྲང་ཕྱེད་ལ་ལས་སྲང་གཉིས། ཁ་ཅིག་ལས་ནི་ཞོ་གཅིག །ཁ་གཅིག་གིས་ནི་ཞོ་ཕྱེད་ཕྱེད་སྦྱིན་པའོ། །གཉེན་མ་ཡིན་ཞེས་བྱ་བ་ནི་གོང་མ་དག་དང་འདྲའོ། །ཐ་ག་པ་ཞེས་བྱ་བ་ནི་གོས་འཐག་པའོ། །འཐག་ཏུ་བཅུག་ཅེས་བྱ་བ་ནི་བལ་གྱི་དང་ཤ་ནའི་ཤུན་པ་དང༌། དུ་གུ་ལའི་དང༌། ཤིང་བལ་གྱི་དང༌། རྩྭ་ཀོ་ཏམ་དང༌། སྲིན་བལ་གྱི་དང་དེ་དག་ལས་གང་ཡང་རུང་བ་འཐག་ཏུ་བཅོལ་བའོ། །གྲུབ་ཅེས་བྱ་བ་ནི་ལག་ཏུ་ཐོབ་པའོ། །སྤང་བའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །གཉེན་མ་ཡིན་པ་ལ་སྐུད་པ་དང་བལ་སློང་བའི་ཚེ་ཉེས་བྱས་སོ། །གཉེན་མ་ཡིན་པ་ལ་འཐག་ཏུ་བཅོལ་ན་སྤང་བའི་ལྟུང་བར་འགྱུར་རོ། །གཉེན་མ་ཡིན་པ་ལས་སྐུད་པ་བསླངས་ཏེ་བདག་ཉིད་ཀྱིས་བཏགས་ན་ཉེས་བྱས་སུ་འགྱུར། གཉེན་ལས་སྐུད་པ་བསླངས་ཏེ་གཉེན་ལ་འཐག་ཏུ་བཅུག་པ་ནི་ཉེས་པ་མེད་དོ། །གླ་བྱིན་པ་ཡང་དེ་བཞིན་ནོ། །ཕྲིན་དང་ཕྲིན་ཡིག་དང་ལག་བརྡ་དང༌། གཅིག་ནས་གཅིག་ཏུ་བརྒྱུད་དེ་བཅོལ་བ་དང༌། གཞན་གྱི་ཕྱིར་བཅོལ་བ་ནི་ཉེས་བྱས་སུ་འགྱུར་རོ། །ཐ་ག་པ་སྨྱོན་པ་དང་སེམས་འཁྲུགས་པ་དང༌། ནད་ཀྱིས་
གཟིར་བ་དང༌། གླེན་པ་དང༌། འོན་པ་དང༌། ལྐུགས་པ་དང༌། མི་མ་ཡིན་པ་ལ་འཐག་ཏུ་བཅུག་ན་ཉེས་བྱས་སུ་འགྱུར་རོ། །རྒྱུ་དང་སྤུན་མི་རུང་བ་དང༌། གཉིས་ཀ་མི་རུང་དང་འདྲེས་པ་འཐག་ཏུ་བཅུག་ན་ཉེས་བྱས་སོ། །འཐག་པ་གཉིས་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་ཁྱིམ་བདག་ཁྱོ་ཤུག་གཉིས་སོ་སོར་འཕྱོ་ཞིང་ཉལ་པོ་བྱེད་པས་ནོར་ཀུན་འཐོར་ཞིང་འགྲིབས་པར་གྱུར་ཏེ། ཁྱོ་ཤུག་གཉིས་ཀྱིས་ལེན་དུ་མར་བྲན་མོར་བརྡེགས་སོ། །དེ་ལྟར་གྱུར་པ་བསྙེན་དགའ་བོས་རིག་ནས་དེ་དག་ལ་ཆོས་བཤད་དེ་ཁྲིམས་ཕོག་གོ །ཁྲིམས་ཕོག་པའི་འོག་ཏུ་ཡང་བྲན་མོ་བརྡེགས་པ་དང༌། དེ་ཆུང་མས་བདག་ཅག་སྔོན་ཆད་དང་མི་འདྲ་བར་ད་བདག་ཅག་བདེན་པ་མཐོང་ན་ཅིའི་ཕྱིར་བརྡེག་ཅེས་སྨྲས་པ་དང༌། ཁོས་དེ་ནི་བདེན་ནོ་ཞེས་ནས་བྲན་མོ་ལ་གོས་ཤིག་བྱིན་ནོ། །ཁྱིམ་བདག་ཕོ་མོ་གཉིས་ཀྱིས་བསམས་པ་བདག་ཅག་བདེན་པ་མཐོང་ཞིང་སྡིག་པའི་དྲི་མ་དང་བྲལ་བ་ནི་འཕགས་པ་བསྙེན་དགའ་བོའི་དྲིན་ཡིན་གྱིས་དེ་ལ་གོས་ཤིག་སྦྱིན་ནོ་ཞེས་སྔར་འཐམ་ཞིང་འཁོད་པ་བྲན་མོས་ཐོས་ནས་བྲན་མོས་བསམས་པ། བདག་ལ་སྔན་ཆད་དེ་བཞིན་མི་བརྡེག་པ་དང་གོས་བྱིན་པ་ཡང་བསྙེན་དགའ་བོའི་བཀའ་དྲིན་ཡིན་ན། བདག་གིས་ལེན་གཞན་ནི་མི་ནུས་ཀྱིས་གཏམ་སྙན་པ་ཙམ་བསྐྱལ་ལོ་སྙམ་ནས་གཏམ་འདི་བསྙེན་དགའ་བོ་ལ་སྦྲན་ནོ་སྙམ་ནས་བསྙེན་དགའ་བོ་དེར་འོངས་པ་ལ་འཕགས་པ་དགའ་བ་སྐྱེད་ཅིག་ཅེས་བྱས་ནས། དེ་ཡང་ཡིད་མ་ཆེས་ཏེ་ཕྱིར་བསྡིགས་ན་འཕགས་པ་མང་དུ་སྨྲ་མི་འཚལ་གྱིས་ཐག་པའི་གན་དུ་བཞུད་ཅིག་ཅེས་བྱས་ནས་ཐག་པ་དད་ཕྲད་ནས་གོས་དེ་ངའི་ཕྱིར་འཐག་པ་ཡིན་གྱིས། ཐག་རན་བཟང་བ་དང་ཡུག་ཁྱིམ་ཆེ་བར་གྱིས་ཤིག་ཅེས་བསྒོ་ནས། བཙུན་མོ་ཕྲེད་ལྡན་མ་ལ་བསོད་སྙོམས་བླངས་པའི་ལ་དུ་ལྷུང་བཟེད་གང་ཐ་ག་བ་ལ་གྲ་རྔན་དུ་བྱིན་ནོ། །དེ་ནས་ཐག་པས་སྐུད་པ་མཆོག་ནས་ཆུང་མ་དང་ཁྱོ་ལས་སོ་སོར་ལན་རེ་བླངས་ཏེ་བསྣན་ནོ། སླད་ཀྱིས་གཉིས་ཀ་ཚོགས་པ་ལ་ཡང་བླངས་པ་དང༌། དེ་རྙེད་གྱི་རྒྱུ་ཞིག་ཁྱེར་ན་ཅི་འདྲ་བ་ཞིག་ཅེས་ཁྱིམ་བདག་གིས་བལྟས་ན། གོས་བཟང་པོ་ཞིག་ནས་དེ་ནི་སྦྱིན་དུ་མི་རུང་གཞན་ཞིག་སྦྱིན་ནོ་ཞེས་ཁྱིམ་བདག་ཁྱོ་ཤུག་གཉིས་ཀྱིས་བགྲོས་པ་ཐ་ག་པས་ཐོས་ནས་བསྙེན་དགའ་བོ་ལ་སྦྲན་ནོ། །བསྙེན་
དགའ་བོ་དང་ཐག་པ་གཉིས་ཀྱིས་ཐབས་བྱས་ནས། བསྙེན་དགའ་བོ་ཁྱིམ་བདག་གི་དེར་ཆོས་བཤད་པའི་ཚེ་ཐ་ག་པས་སྣམ་བུ་ཁྱེར་ཏེ་འོངས་ནས་སྔོན་དུ་ཚོགས་པ་ལ་ཕུལ་ལོ། །བསྙེན་དགའ་བོས་སྦྱིན་པའི་ཚིགས་བཅད་སྔར་བླངས་ཏེ་ཐལ་བྱུང་དུ་ཁྱེར་རོ། །དེ་ནས་ཕྱིས་ཐ་ག་བས་ཁྱིམ་བདག་ལ་གླ་རྔན་བདས་ན་ཁྱོད་ཀྱིས་ངའི་གོས་དངོས་ཀྱང་སྟོར་བར་བྱས་ན། ཕྱིས་གླ་སྦྱིན་པ་ལྟ་ཅི་སྨོས་ཞེས་མ་སྟེར་རོ། །བསྙེན་དགའ་བོ་ལ་གླ་རྔན་བདས་ན་ཁྱོད་ཁྱིམ་བདག་ལས་ལོང་ཤིག་ཅེས་ནས་ལན་དུ་མར་བདས་ན་ཡང་མ་སྟེར་ནས་སླད་ཀྱིས་བདས་ན་ངའི་ལ་དུའི་མར་དང་སྤྲང་རྩི་དང་སྤོད་ཚུན་ཆད་བརྩིས་ན་ཡང་གླ་ལྷག་པར་གྱུར་ན་ཐག་པ་བཟུང་སྟེ་ཉི་ཚན་ལ་གཞག་གོ །དེ་ཡང་གླ་མ་བྱིན་པའི་སྟེང་དུ་དངོས་ཀྱང་བཟུང་བས་འཕྱ་ཞིང་མི་སྙན་པར་འཛེར་བས་དེ་ལྟར་གྱུར་པ་སྙན་དུ་བདས་སོ། །བཀས་རྨས་ན། མད་དོ་ཞེས་གསོལ་ནས། རྣམ་གྲངས་དུ་མའི་སྒོ་ནས་སྨད་དེ། བཟང་པོ་འདོད་པའི་ཕྱིར་ཟས་ཅུང་ཟད་ཙམ་གྱིས་གོས་བསྒྲུབས་ཏེ་གྲུབ་ན་སྤང་བའི་ལྟུང་བའོ་ཞེས་བསླབ་པ་བཅས་སོ། །དགེ་སློང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །གཉེན་ཞེས་བྱ་བ་དང༌། གོས་ཞེས་བྱ་བ་ནི་རྣམ་པ་བདུན་པོ་གོང་མ་དང་འདྲའོ། །ཁྱིམ་བདག་ཅེས་བྱ་བ་ནི་སྐྱེས་པའོ། །ཆུང་མ་ཞེས་བྱ་བ་ནི་བུད་མེད་དོ། །འཐག་ཏུ་བཅོལ་ཞེས་བྱ་བ་ནི་བལ་རྣམ་པ་བདུན་གྱི་སྐུད་པ་ལས་གང་ཡང་རུང་བའོ། །སྔར་མ་བསྒོ་ཞེས་བྱ་བ་ནི་སྔར་གོས་སྦྱིན་ནོ། །ཞེས་མགྲོན་དུ་མ་བྱས་པའོ། །རྣམ་པར་རྟོག་པ་འགའ་ཞིག་བྱུང་ཞེས་བྱ་བ་ནི་གཞན་ལས་ཐོས་པའོ། །དའི་ཕྱིར་ཞེས་བྱ་བ་ནི་བདག་ཉེ་བར་སྟོན་པའོ། །ཐག་རན་བཟང་ཞིང་ཡུག་ཁྱིམ་ཆེ་བ་དང་འཇུར་མདུད་མེད་པ་ནི་སྲིད་དང་ཞེང་འདི་ཙམ་དུ་གྱིས་ལ་བཟང་པོར་གྱིས་ཤིག་པའོ། །བཅའ་བ་ཅུང་ཟད་ཅིག་བྱིན་ནས་གོས་གྲུབ་ཅེས་བྱ་བ་ནི་ལག་པར་ཐོབ་པའོ། །དངོས་པོ་སྤངས་ནས་ལྟུང་བ་བཤགས་པར་བྱའོ། །གོས་གྲུབ་པའི་ཕྱིར་འཐག་པ་ལ་བསྒོ་པའི་ཚེ་ནི་ཉེས་བྱས་སོ། །ཐོབ་ན་ནི་སྤང་བའི་ལྟུང་བའོ། །འདི་ལྟ་བུ་ཞིག་ལོང་ཤིག་པར་བསྒོ་བ་ནི་ཉེས་པ་མེད་དོ། །བྱིན་ཕྲོག་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །སངས་རྒྱས་བཅོམ་ལྡན་འདས་མཉན་དུ་ཡོད་པ་ནས་ཡུལ་ཀོ་ས་ལར་ལྗོངས་རྒྱུ་ཞིང་གཤེགས་པའི་ཚེ་དགེ་སློང་དྲུག་སྡེ་པོའི་ནང་ནས་དགའ་བོ་དང་བསྙེན་དགའ་བོ་གཉིས་སངས་རྒྱས་དང་ཆོས་ཀྱི་
ཡོན་ཏན་སྒྲོགས་ཤིང་སྔར་འགྲོ་བར་དད་དེ་གྲོགས་མེད་ནས་དགའ་བོའི་སློབ་མ་ཆོས་ཅན་མཁན་པོ་ལ་མ་དད་དེ་ཀུན་དགའ་བོའི་གན་ན་འདུག་པ་ཆོས་གོས་སྦྱར་མའི་རྒྱུ་ཞིག་ཁྱེར་ཏེ་མཁན་པོ་ལ་ཞུས་ཏེ་སྦྱར་མར་དྲུབ་པོ་ཞེས་བྱས་པ་དང༌། དེ་བསོད་སྙོམས་པ་ཞིག་དང་ཕྲད་དེ་ཁྱོད་ཆོས་གོས་དྲུབ་ཟིན་པ་དང༌། ང་ལ་རྙིང་པ་སློང་ངོ་ཞེས་བྱས་པ་དང༌། རུང་ངོ་ཞེས་ནས་ཆོས་ཅན་ཀྱིས་མཁན་པོ་ལ་ཆོས་གོས་དྲུབ་པོ་ཞེས་ཞུས་པ་དང༌། དགའ་བོ་དང་བསྙེན་དགའ་བོ་གཉིས་གྲོས་བྱས་ནས་ཆོས་ཅན་ལ་ཆོས་གོས་བྱིན་ནས་གྲོགས་སུ་སྔར་ཁྲིད་པར་བྱ་སྟེ། ཁྱོད་ཀྱི་ཆོས་གོས་དྲུབ་མི་དགོས་ཀྱིས་ཞེས་ནས་ཆོས་གོས་གཅིག་བྱིན་ནོ། །ཆོས་ཀྱི་ཆོས་གོས་རྙིང་པ་ནི་བསོད་སྙོམས་པ་ལ་བྱིན་ནོ། །ཆོས་གོས་ཀྱི་རྒྱུ་རས་སར་པ་ནི་དགེ་འདུན་ལ་ཡོན་དུ་ཕུལ་ལོ། །ཆོས་ཅན་ཡང་གྲོགས་སུ་སྔར་ཁྲིད་པར་བྱས་པ་དང་སླད་ཀྱིས་སངས་རྒྱས་ཀྱི་ཞ་འབྲིང་དུ་འགྲོ་ཞེས་མ་བཏུབ་པ་དང་སྦྱར་མ་ཕྱིར་ཕྲོགས་སོ།། དེ་ནས་ཡུལ་ཀོ་ས་ལར་གཤེགས་ཏེ་ཉན་ཐོས་ཀྱི་འཁོར་རྣམས་ལ་ཆོས་གོས་དང་ཤམ་ཐབས་ལེགས་པར་བགོས་སམ་མ་བགོས་པ་གཡས་ཕྱོགས་སུ་སྐུ་ཐམས་ཅད་ཀྱིས་གླང་པོ་ཆེ་ལྟ་བུའི་ཚུལ་དུ་གཟིགས་པ་དང༌། ཚེ་དང་ལྡན་པ་ཆོས་ཅན་སྟོད་གཡོགས་དང་སྨད་གཡོགས་གཉིས་ཕྱོགས་སུ་དང་ལྗོངས་རྒྱུ་ཞིང་འགྲོ་བར་གཟིགས་ནས་དབྱར་གནས་པའི་དགེ་སློང་གིས་གོས་མ་རྙེད་དམ་ཞེས་ཀུན་དགའ་བོ་ལ་རྨས་པ་དང༌། ཆོས་གོས་ཀྱང་རྙེད་དེ་དེ་ལྟར་ཕྲོགས་སོ་ཞེས་སྙན་དུ་གསོལ་ཏོ། །དགེ་སློང་གི་བྱ་བ་མ་ཡིན་ཚུལ་མ་ཡིན་ཞེས་རྣམ་གྲངས་དུ་མས་སྨད་ནས་སླན་ཆད་བྱིན་ཕྲོགས་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དགའ་བོ་དང༌། བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །དགེ་སློང་ཞེས་བྱ་བ་ནི་ཆོས་ཅན་ནོ། །གོས་ཞེས་བྱ་བ་ནི་བལ་ལ་སོགས་པ་རྣམ་པ་བདུན་ནོ། །བྱིན་ཞེས་བྱ་བ་ནི་སྔར་བྱིན་པའོ། །དེའི་འོག་ཏུ་ཞེས་བྱ་བ་ནི་དུས་གཞན་ནའོ། །ཁྲོས་ཞེས་བྱ་བ་ནི་འཁྲུགས་པ་མ་ཞི་བའོ། །ཕྲོགས་ཞེས་བྱ་བ་ནི་བདག་གིས་སོ། །འཕྲོག་ཏུ་བཅུག་ཅེས་བྱ་བ་ནི་གཞན་གྱིས་སོ། །གོས་ཀྱི་ལྷག་མ་ཡོད་པ་ཞེས་བྱ་བ་ནི་དེའི་ཚེ་ལྷག་མ་ཙམ་ལུས་པའོ། །བྱིན་ཅིག་ཅེས་བྱ་བ་ནི་སླར་བཏང་བའོ། །སྦྱིན་ནས་སྤང་བའི་ལྟུང་བ་ཞེས་བྱ་བ་ནི་སླར་བླངས་མ་ཐག་ཏུ་དངོས་པོ་སྤངས་ནས་ལྟུང་བ་བཤགས་པར་
བྱའོ། །ཉེས་པ་ནི་ལུས་དང་ངག་གི་སྒོ་ནས་བྱིན་ཟིན་པའི་འོག་ཏུ་ཁྱེར་ལ་ཤོག་ཅེས་སྨྲས་སམ། ལུས་ཀྱིས་ཕྲོགས་ཀྱང་རུང་སྟེ་སྤང་པའི་ལྟུང་བར་འགྱུར་རོ། །དེ་ལ་དོན་གཞན་ནམ་གདུལ་བའི་ཕྱིར་ཉེས་པ་མེད་དེ་ཇི་ལྟར་ན་གཞན་གྱི་ཕྱིར་ཞེ་ན། བདག་ལ་གནས་བཅའ་བའམ། །བདག་གི་སློབ་མ་ཡུལ་འཇིགས་པའི་ཕྱོགས་སུ་འགྲོ་བ་ལ་རྐུན་པོ་དང་མི་རྒོད་ཀྱིས་ཕྲོགས་སུ་དོགས་པའི་ཕྱིར་ཕྲོགས་པ་འམ། ཆུས་ཁྱེར་དུ་དོགས་པའི་ཕྱིར་ཕྲོགས་པའོ། །ཇི་ལྟ་ན་སློབ་མ་འདུལ་བའི་ཕྱིར་ཞེ་ན། སློབ་མ་དང་ཉེ་གནས་སྡིག་པ་ཅན་གྱི་ལྟ་བར་གྱུར་ཏེ་བདག་གི་ངག་མི་ཉན་ཏམ། དགེ་བ་ལ་མི་འགྲུས་སམ། གྲོགས་པོ་ངན་པ་སྡིག་པ་ཅན་ལ་བརྟེན་ཅིང་མཁན་པོ་སློབ་དཔོན་སྤོང་བ་ལ་འདུལ་བའི་ཕྱིར་ཕྲོགས་ཀྱང་ཉེས་པ་མེད་དོ། །ཕྲིན་ཡིག་དང་ལག་བརྡ་དང་གཅིག་ནས་གཅིག་ཏུ་བརྒྱུད་པ་དང༌། དགེ་སློང་སེམས་འཁྲུགས་པ་དང༌། ནད་ཀྱིས་གཟིར་བ་དང༌། སྨྱོན་པ་དང༌། གླེན་པ་དང༌། འོན་པ་དང༌། ལྐུགས་པ་དང༌། མུ་སྟེགས་ཅན་དང༌། དགེ་སློང་མ་དང༌། དགེ་སྦྱོང་དང༌། དགེ་སློབ་མ་དང༌། དགེ་བསྙེན་མ་ལ་གོས་བྱིན་ཏེ་ཕྲོགས་ཀྱང་ཐམས་ཅད་དུ་ཉེས་བྱས་སུ་འགྱུར་རོ། །སྟོན་ཟླ་ཐ་ཆུངས་ཀྱི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ཁྱིམ་བདག་ཅིག་གིས་རི་བྲགས་ཤིག་གི་གྲོང་ཞིག་ཏུ་བཙུག་ལག་ཁང་ཞིག་བརྩིགས་ཏེ་དགེ་སློང་དྲུག་ཅུའི་འཚོ་བའི་ཡོ་བྱད་ཅིག་སྦྱར་ནས་གཙུག་ལག་ཁང་དུ་བཀོད་དེ། ཁྱིམ་བདག་དེ་ཡང་སླད་ཀྱིས་དུས་ལས་འདས་ཏེ། དེའི་བུས་ཀྱང་དགེ་སློང་དག་གི་འཚོ་བ་མ་འབྱོར་ནས་དགེ་སློང་གཞན་ནི་སོ་སོར་གྱེས་སོ། །དེ་ལ་རྒན་ཞུགས་གཉིས་ཤིག་བསོད་སྙོམས་སྤྱོད་ཅིང་གཙུག་ལག་ཁང་ན་གནས་པ་དང༌། དེའི་ཚེ་བྱང་ཕྱོགས་ཀྱི་ཚོང་པ་དག་ཅིག་ཡུལ་དེའི་ཕྱོགས་སུ་ལྷགས་ཏེ། ཚོང་བ་རྣམས་ཀྱིས་དགེ་སློང་གཉིས་ལ་འདིར་ཇི་ལྟ་བུ་ཞེས་དྲིས་པ་དང༌། དེ་གཉིས་ཀྱང་ཡོན་བདག་ཤི་བ་དང་བུས་འཚོ་བ་མ་སྦྱོར་བ་ཞིབ་ཏུ་སྨྲས་སོ། །དེ་ནས་ཚོང་པ་དད་པ་དག་གིས་དགེ་སློང་དྲུག་ཅུ་དབྱར་ཟླ་བ་གསུམ་གྱི་འཚོ་བའི་ཟོང་དེ་གཉིས་ལ་བྱིན་ཏེ་དགེ་སློང་སྤྱན་དྲོངས་ཤིག་ཅེས་ཚོང་པ་དག་གིས་བསྒོ་བ་དང༌། རྒན་པོ་གཅིག་ནི་མཉན་དུ་ཡོད་པར་སྤྱན་འདྲེན་དུ་སོང་ན་བསྙེན་དགའ་བོ་དང་སྒོར་ཕྲད་ནས་དེར་དགེ་སློང་གིས་དེ་ལྟར་ཡོན་བདག་གིས་འཚོ་བ་སྦྱར་ཏེ་སྤྱན་འདྲེན་ཏོ་ཞེས་བྱས་པ་དང༌། བསྙེན་དགའ་བོས་
གཞན་དག་དེར་དོང་དུ་དོགས་ནས་ཐབས་ཤིག་བྱས་ཏེ། འདི་ན་དགེ་སློང་གནས་པ་ནི་རྒྱལ་པོས་ཡོན་བདག་བྱས་ཏེ་འཚོ་བ་ཤིན་ཏུ་འབྱོར་བ་དང་ལྡན་པ་ཤ་སྟག་གནས་པས་ཁྱོད་ཀྱི་དེར་སུ་ཞིག་འགྲོ། །ཁྱོད་ནི་དགེ་སློང་རྐུར་འོངས་པས་གཞན་གྱིས་ཐོས་ན་སྤང་བའི་ལས་བྱས་ས་རེ་ཞེས་བསྡིགས་ནས་འོན་ཀྱང་དེད་དྲུག་སྡེ་པོ་འཁོར་བཅུ་བཅུ་སྟེ་དྲུག་ཅུ་ཞིག་འོང་གིས་སྔར་སོང་ལ་ཞལ་ཏ་གྱིས་ཤིག་ཅེས་སངས་རྒྱས་ལ་ཕྱག་བྱེད་དུ་ཡང་མ་སྟེར་བར་མྱུར་དུ་ཕྱིར་བཏང་ངོ༌། ཕྱིས་དྲུག་སྡེ་པོ་འཁོར་དང་བཅས་ཏེ་ལྷགས་ནས་དབྱར་ཕྱི་མར་ཚུལ་དུ་ཞུགས་ཏེ། དབྱར་ཟླ་བ་གསུམ་གྱི་ཡོ་བྱད་བགོས་ནས་ཟླ་བ་གཅིག་ཏུ་ཟད་པར་བྱས་ཏེ་ཕྱིར་དོང་བས་ན་ཕྱིས་ཚོང་པ་དག་གཙུག་ལག་ཁང་དུ་འོངས་ཏེ། དགེ་སློང་རྒན་པོ་གཉིས་ལ་འདིར་དགེ་སློང་སུ་དག་སྤྱན་དྲངས་ཞེས་སྨྲས་ན་དྲུག་སྡེ་པོ་ཞེས་བྱས་པ་དང༌། འཕགས་པ་རྒྱ་མཚོ་ཆེན་པོའི་ནང་དུ་དོང་སྟེ། ནོར་བུ་དོ་ཟན་ཁྱེར་ཏེ་འོངས་སམ། དགེ་སློང་གཞན་དེ་ན་མེད་དམ་ཞེས་དྲུག་སྡེ་པོ་ལམ་དད་པ་དང༌། ཟླ་བ་གསུམ་གྱི་ཡོ་བྱད་ཟླ་བ་གཅིག་ཏུ་བགོས་པ་ན་མ་དད་ཅིང་འཕྱ་བར་གྱུར་པ་ལས་སྙན་དུ་བདས་ནས་སླན་ཆད་ཟླ་བ་གསུམ་མ་ལོན་པར་དབྱར་གྱི་རྙེད་པ་དུས་མ་ཡིན་པར་ལེན་ཅིང་འགྱེད་དུ་མི་གནང་བར་བཅས་སོ། །དེ་ནས་རྒྱལ་པོ་གསལ་རྒྱལ་གྱིས་བློན་པོ་དམག་དཔོན་ཁ་འདའ་ཤག་ཏི་དམག་དཔོན་དུ་བཀའ་སྩལ་ནས། ཡུལ་གཞན་དུ་འགྲོ་བར་ལམ་དུ་ཞུགས་ཏེ། དེས་དགེ་འདུན་ལ་ཚུལ་གྱི་ཚེ་ཡོན་མང་པོ་ཞིག་ཕུལ་བ་དང༌། དགེ་སློང་དག་གིས་ལེན་ཅིང་འགྱེད་པའི་དུས་མ་ཡིན་ནོ་ཞེས་མ་བླངས་པ་དང༌། སྙན་དུ་བདས་ཏེ་བསླབ་པ་ལ་གུས་པ་དང༌། བསླབ་པ་ལ་ནན་ཏན་བྱེད་པའི་བསྔགས་པ་བརྗོད་པས་ཞག་བཅུས་ཚུལ་ནས་མ་བྱུང་བ་ལ་གཏད་པའི་གོས་ལེན་དུ་རྗེས་སུ་གནང་སྟེ། དེ་ལས་སྔར་ལེན་ཞིང་འགྱེད་དུ་མི་གནང་བ་དང༌། དགེ་སློང་དག་གིས་གོས་སྔར་བླངས་ནས་མཛོད་ཀྱི་ནང་དུ་སྦས་པས་གོས་དག་རུལ་བར་གྱུར་ཏོ། །དེ་ལྟར་གྱུར་པ་སྙན་དུ་བདས་ནས། གོས་སྤེད་པའི་དགེ་སློང་ཡོན་ཏན་ལྔ་དང་ལྡན་པའི་དགེ་སློང་ཞིག་བསྐོས་ལ་དབྱར་གྱི་ནང་ལོགས་སུ་ལེན་དུ་ཡང་མི་གནང༌། གོས་འགྱེད་པའི་དུས་ལས་ཡོལ་བར་ཡང་ལེན་དུ་མི་གནང་ངོ་ཞེས་འདུལ་བ་ལ་བསླབ་པའི་གནས་བཅས་སོ། །སྟོན་ཟླ་ཐ་ཆུངས་ཉར་ཞག་བཅུས་མ་ཚང་བ་ཞེས་བྱ་བ་ནི་ཞག་བཅུ་ནས་
ཚུལ་ནས་བྱུང་བར་གྱུར་པའོ། །དགེ་སློང་ཞེས་བྱ་བ་ནི་དྲུག་སྡེ་སྟེ་ཆོས་འདི་ལ་ཞུགས་པའོ། །རྙེད་ཅེས་བྱ་བ་ནི་གཞན་ལས་སོ། གཏད་པའི་གོས་ཞེས་བྱ་བ་ནི་གཏོང་པའི་གོས་ལ་རྣམ་པ་ལྔ་སྟེ། ནད་པས་བྱིན་པ་དང༌། ན་བའི་ཕྱིར་བྱིན་པ་དང༌། འཆི་བའི་ཚེ་བྱིན་པ་དང༌། ཤི་བའི་ཕྱིར་བྱིན་པ་དང༌། འགྲོ་བའི་ཕྱིར་བྱིན་པའོ། །འདོད་ན་ནི་ཞེས་བྱ་བ་ནི་གོས་བགོས་པ་ཞེས་བྱའོ། །གོས་ཞེས་བྱ་བ་ནི་རྣམ་པ་བདུན་ལས་གང་ཡང་རུང་བའོ། །ལོང་ཤིག་ཅེས་བྱ་བ་ནི་བདག་གི་ཕྱིར་རོ། །བླངས་ནས་ཆོས་གོས་འགྱེད་པའི་དུས་ལ་མ་བབ་ཀྱི་བར་དུ་ཆོངས་ཤིག་ཅེས་བྱ་བ་ནི་གཏད་པའི་གོས་དེ་གོས་སྦེད་པའི་ལག་པར་གཞག་པར་བྱའོ། །གོས་ཀྱི་དུས་ནི་གང་དུས་མ་ཡིན་པ་ནི་གང་ཞེ་ན་གནས་སུ་གཏན་པ་མ་དྲུབ་པ་ཞིག་ནི་སྟོན་ཟླ་ཐ་ཆུངས་ཉལ་ཚུལ་ནས་བྱུང་སྟེ། དེའི་ཕྱི་དེ་ཉིན་གོས་འགྱེད་པའི་དུས་ཡིན་ནོ། །ལྷག་མ་རྣམས་ནི་དུས་མ་ཡིན་ནོ། །གནས་སུ་གཏན་པ་ཞིག་དྲུབ་པ་ཞིག་ན་སྟོན་ཟླ་ཐ་ཆུངས་ཉ་ནས་དཔྱིད་ཟླ་ཐ་ཆུངས་ཉའི་བར་དུ་གོས་ལེན་པའི་དུས་ཡིན་ནོ། །ལྷག་མ་རྣམས་ནི་དུས་མ་ཡིན་ནོ། །དེ་ལས་འདས་པར་བཅངས་ན་ཞེས་བྱ་བ་ནི་ཐལ་བའོ། །སྤང་པ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །དབྱར་མ་ཟད་པའི་སྐབས་སུ་དབྱར་གྱི་རྙེད་པ་བགོས་སམ་འགོད་པའི་དུས་ལས་འདས་པར་བཅངས་ན་ཐམས་ཅད་དུ་སྤངས་པའི་ལྟུང་བར་འགྱུར་རོ། །སྦྱིན་བདག་གིས་སྔར་ཕུལ་པ་སླད་ཀྱིས་བདག་རང་གིས་སོ་སོར་དབུལ་ལོ་ཞེས་དུས་ལས་འདས་ཀྱང་ལྟུང་བ་མེད་དོ། །གཏད་པའི་གོས་འགྱེད་པའི་དུས་ལས་འདས་པར་བཅངས་ཀྱང་ཉེས་པར་མི་འགྱུར་བ་ཡང་ཡོད་དེ། དགེ་སློང་གོས་རྙེད་མ་ཐག་ཏུ་སྨྱོས་སམ་སེམས་འཁྲུགས་སམ། གོས་ཀྱི་རྒྱུ་དང་སྤུན་མི་རུང་བ་དང་ཞག་བཅུ་ཚུན་ཆད་དུས་ལས་འདས་པའོ། །དགོན་པར་ཆོས་གོས་དང་བྲལ་དུ་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་རི་བྲགས་ཀྱི་གྲོང་ན་ཁྱིམ་བདག་དད་པ་ཅན་ཞིག་གནས་པ་དེས་དགོན་པའི་གནས་སུ་གཙུག་ལག་ཁང་བཟང་པོ་ཞིག་བརྩིགས་ནས་དགེ་སློང་མང་པོ་ཞིག་སྤྱན་དྲངས་ཏེ། ཡོ་བྱད་དག་སྦྱར་ནས་བཀོད་པ་དང་དགེ་སློང་དག་ཀྱང་ཡུལ་གཞན་དུ་དང་ངོ༌། །ཡུལ་གཞན་ནས་དགེ་སློང་དག་ཅིག་གཙུག་ལག་ཁང་དེར་ལྷགས་སོ། །དེ་དག་ཀྱང་ཡུལ་གུད་དུ་རྒྱུ་ཞིང་སངས་རྒྱས་ལ་ཕྱག་འཚལ་ཞིང་འདོང་བར་བྱས་ནས་ཡོན་བདག་གིས་གསོལ་བ། གཙུག་ལག་ཁང་འདི་བདག་གིས་ཕའི་ཕྱིན་ཡང་མ་བརྩིགས་
མའི་ཕྱིར་ཡང་མ་བརྩིགས་འཕགས་པ་ཁྱེད་ཀྱི་ཕྱིར་བརྩིགས་ན་གུད་དུ་མི་གཤེགས་ཤིང་འདིར་ཚུལ་དུ་འཇུག་པར་ཅི་གནང་ཞེས་གསོལ་ནས་དེའི་སེམས་བསྲུང་བའི་ཕྱིར་དགེ་སློང་དེ་དག་ཀྱང་དེར་གནས་སོ། །ཡུལ་དེ་ཕྱོགས་ན་ལྷ་ཁང་གཞན་མེད་དེ་ཡུལ་གྱི་མི་དད་པ་ཀུན་གྱིས་ཀྱང་ལྷ་ཁང་དེར་ཡོན་ཕུལ་བས་དགེ་སློང་དག་ཀྱང་རྙེད་པ་ཤིན་ཏུ་མང་ངོ༌། །སྟོན་ཟླ་ཐ་ཆུངས་གཡོན་ཅན་གྱི་རྐུན་པོ་དག་གིས་བགྲོས་པ། དེ་དག་གི་ནང་ན་དགེ་སློང་གི་རྒྱུས་ཤེས་པ་གཅིག་ན་རེ་སྒོའི་ཐེམ་པ་བརྒྱ་རྒལ་ཞིང་ལྟོ་འགེངས་པ་དེ་ངག་ལ་ཅང་མེད་པའི་རིགས་ན་ཞེས་བྱས་ན་དེ་བས་ཀྱང་རྒྱུས་མཁས་པ་གཅིག་ན་རེ་དེ་དག་རྙེད་པ་རབ་ཏུ་མང་ངོ་ཞེས་ནས་དེ་ན་ཡོད་དམ་མེད་པ་བརྟགས་པའི་ཕྱིར་གཉིས་ཤིག་ལྷ་ཁང་གི་ནང་དུ་ཞུགས་ཏེ། ཕྱག་བྱས་ནས་བསྐོར་ཞིང་དང་དད་ལྟར་བྱས་ཏེ་དགེ་སློང་གཞན་ནི་མེད་རྒན་ཞུགས་ཤིག་དེ་ན་འདུག་པ་དེ་ལ་འདི་གཙུག་ལག་ཁང་འབྱོར་པའམ་བྲེལ་པའི་གནས་ཞེས་དྲིས་ན་དགེ་སློང་དེས་མ་གོ་ནས་གཙུག་ལག་ཁང་ནི་འབྱོར་པའོ་ཞེས་སྨྲས་ནས་རྒན་ཞུགས་དེས་འདི་ན་བྲེལ་བ་མ་ཡིན་གྱི་ཡོ་བྱད་དང་ལྡན་ཞིང་འབྱོར་པའི་གནས་ཡིན་ཏེ། གོས་གྱི་ཐུམ་པོ་ཀུན་ཀྱང་སྦྱོམས་པའི་ཕྱིར་བསྟན་ཏོ། །རྐུན་པོ་དེ་དག་གིས་ཀྱང་ཤིན་ཏུ་རྟོག་ནས་ནམ་ཚུལ་ནས་བྱུང་བའི་དུས་དང་སྦྱར་ཏེ། དེའི་ཚེ་དགེ་སློང་དག་མཚན་ཐོག་ཐག་ཆོས་འཆད་ཅིང་ཁ་ཏོན་བྱེད་པའི་ཚེ་གཡོན་ཅན་དག་ཆོས་ཉན་པ་འདྲ་བར་སྒོ་བརྡུངས་ཏེ་གཡོན་ཅན་དག་ནད་དུ་ལྷགས་ནས་དགེ་སྤྱོང་དག་གི་གོས་དང་ཡོ་བྱད་མ་ལུས་པར་ཕྲོགས་སོ། །དེ་ནས་དགེ་སློང་འདི་དག་ཀྱང་ཡོན་བདག་ལ་ནི་བ་བཞོས་པ་བཞིན་དུ་བྱ་དགོས་ཀྱི་དོང་ངོ་ཞེས་ནས་གཅེར་བུས་མཉན་དུ་ཡོད་པར་ཕྱིན་ཏེ། དེ་ནས་དགེ་སློང་མཉན་དུ་ཡོད་པ་ན་འཁོད་པ་རྣམས་ཀྱིས་ཆོས་གོས་ལ་སོགས་ཏེ་ཡོ་བྱད་བཅུ་གསུམ་བྱིན་ནས་དེ་ལྟར་གྱུར་པ་སྙན་དུ་བདས་ནས་ང་སླན་ཆད་འཇིགས་ཤིང་དོགས་པའི་གནས་སུ་ཆོས་གོས་གསུམ་ལས་གང་ཡང་རུང་སྟེ་གཅིག་ཞག་དྲུག་གི་བར་དུ་གྲོང་དུ་ཁྱིམ་པའི་དེར་ཞོག་ཅིག་ཅེས་གནད་བ་དང༌། དགེ་སློང་ཆོས་གོས་དང་བྲལ་དུ་དོགས་ནས་མཚན་མོ་ཁྱིམ་རྒྱ་བ་དག་ན་ཉལ་བ་དང༌། ཁྱིམ་པ་དང་བུད་མེད་དག་མཚན་མོ་གཅེར་པར་གཅིན་རྒྱག་དག་འདོར་བ་དང་ཕྲད་ནས་འདི་ན་ཅིའི་ཕྱིར་ཉལ་ཞེས་བྱས་ན་ཆོས་གོས་ཀྱི་ཕྱིར་རོ་ཞེས་ནས་ཁྱོད་ཀྱིས་ཆོས་གོས་དེད་ཀྱིས་རྐུས་རེ་སྐན་ཞེས་དེ་
ལྟ་བུ་ལ་འཕྱ་བར་གྱུར་ནས་སྙན་དུ་བདས་ཏེ། དེ་སླན་ཆད་ཞག་དྲུག་ཚུན་ཆད་དུ་དགོན་པ་བས་ཆོས་གོས་གྲོང་དུ་བཞག་ལ་མཚམས་ཀྱི་ཕྱི་རོལ་ན་འདུག་ཀྱང་རུང་ཉེས་པ་མེད་དོ་ཞེས་གནད་བ་དང་དྲུག་སྡེ་པོ་རྣམས་བསམས་བཞིན་དུ་ཞག་བདུན་ལས་འདས་པར་བྱེད། དེ་ལྟར་བྱེད་པ་བདེན་ནམ་ཞེས་སྨྲས་ན་མད་དོ་ཞེས་གསོལ་ནས་ད་སླན་ཆད་ཞག་བདུན་ལས་འདར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་པོ་སྟེ་གཞན་ཡང་ཆོས་འདི་ལ་ཞུགས་པའོ། །མང་པོ་ཞེས་བྱ་བ་ནི་གཉིས་ཡན་ཆད་དོ། །དགོན་པ་ཞེས་བྱ་བ་ནི་གྲོང་ནས་གཞུ་ལྔ་བརྒྱ་སྟེ། རྒྱང་གྲགས་གཅིག་ཕན་ཆད་དོ། །གནས་ཞེས་བྱ་བ་ནི་གཙུག་ལག་ཁང་ངོ༌། །དབྱར་ཐ་མ་ཞེས་བྱ་བ་ནི་དབྱར་ཕྱི་མར་ཚུལ་དུ་ཞུགས་སོ། །དོགས་པ་དང་འཇིགས་པ་དང་བཅས་ཞེས་བྱ་བ་ནི་རྐུན་པོ་དང་གཅན་གཟན་དང་སྦྲང་བུས་འཇིགས་པའོ། །ཆོས་གོས་གསུམ་ཞེས་བྱ་བ་ནི་སྦྱར་མ་དང་བདུན་པ་དང་ལྔ་པའོ། །ཞོག་ཅིག་ཅེས་བྱ་བ་ནི་གཏམས་པའོ། །རྐྱེན་འདི་འདྲ་བ་བྱུང་ཞེས་བྱ་བ་ནི་དགེ་འདུན་གྱི་འམ་མཆོད་རྟེན་དང་གང་ཟག་གི་དོན་གྱི་ཕྱིར་རོ། །མཚམས་ཀྱི་ཕྱི་རོལ་དུ་འགྲོ་ཞེས་བྱ་བ་ནི་ཆོས་གོས་ཀྱི་མཚམས་ཀྱི་ཉེ་འཁོར་ལས་འདས་པའོ། །ཞག་དྲུག་ཅེས་བྱ་བ་ནི་ཞག་དྲུག་ཚུན་ཆད་ནི་ཉེས་པ་མེད་དོ། །མཚམས་ཀྱི་ཕྱི་རོལ་དུ་བྲལ་ཞེས་བྱ་བ་ནི་ཆོས་གོས་གང་དེར་གཞག་པའོ། །དེ་ལས་འདས་པར་བྲལ་ན་ཞེས་བྱ་བ་ནི་སྐྱ་རེངས་ཀྱིས་ཆོད་པའོ། །སྤང་བའི་ལྟུང་བ་ནི་དངོས་པོ་སྦངས་ནས་ལྟུང་བ་བཤགས་པར་བྱའོ། །ཞག་དྲུག་ལས་མཚམས་ཀྱི་ཕྱི་རོལ་དུ་འདས་ནས་ཆོས་གོས་དང་བྲལ་ན་སྤང་བའི་ལྟུང་བར་འགྱུར་རོ། །བར་ཆད་བརྒྱད་བྱུང་ན་ཆོས་གོས་དང་བྲལ་ཡང་ལྟུང་བ་མེད་དོ། །གོས་རྒྱུ་དང་སྦུན་མི་རུང་བ་དང༌། ཆོས་གོས་མི་འབྲལ་བའི་སྡོམ་པ་བྱིན་པ་དང༌། ཆོས་གོས་ས་ལ་བཞག་ལ་མི་ནམ་མཁའ་ལ་གནས་པ་ནི་ཞག་དྲུག་ལས་འདས་ཀྱང་ལྟུང་བར་མི་འགྱུར་རོ། །དབྱར་གྱི་རས་ཆེན་དུས་ལས་སྔོན་རོལ་དུ་བཙལ་ཏམ་དབྱར་འདས་པར་འཆད་དུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་དགེ་སློང་དག་རྫིང་བུ་དང་ཁྲོན་པ་དག་ན་ཁྲུས་བྱེད་པའི་ཚེ་སྐྱབས་མེད་པར་ཁུས་བྱེད་པས་ནི་ཤིན་ཏུ་མི་མཛེས་པ་རི་དགས་དགྲའི་ལས་གས་མཐོང་ནས་དེ་ལྟ་བུ་མི་མཛེས་པ་དག་གིས་མཐོང་ན་འཕྱ་ན་ཁྲུས་བྱེད་པའི་ཡོལ་བ་གནང་བའི་རིགས་སོ་
ཞེས་སྙན་དུ་གསོལ་ནས་དབྱར་གྱི་རས་ཆོངས་ཤིག་པར་བཀས་གནང་ངོ༌། །དགེ་སློང་རས་ཆེན་འཕྲལ་ལ་མ་འབྱོར་ནས་དབྱར་ཚུལ་དུ་འཇུག་པའི་ཟླ་བ་གཅིག་གི་སྔོན་རོལ་དུ་ཚོལ་གཅིག་པར་གནང༌། དབྱར་ཕྱི་མ་ཡང་རས་ཆེན་སྔར་ཚོལ་ཞིང་སྔ་མ་ལ་ཟླ་བ་བལྟས་ཏེ་རིང་དུ་བཅངས་པ་དང༌། དུས་མ་ཡིན་པར་རས་ཆེན་ཚོལ་ཞིང་བྱེད་པས་ན་བྱ་བ་དང༌། བྱེད་པ་མང་བས་ལུང་འབོགས་པ་དང་ཀློག་པའི་བར་ཆད་དུ་གྱུར་ནས་དབྱར་སྔོན་རོལ་དུ་ཡང་ཚོལ་ལ། དབྱར་ཟད་ནས་ཡང་བཅངས་བས་དོན་ཉུང་བའི་དགེ་སློང་འཕྱ་བ་ལས་སྙན་དུ་བདས་ཏེ། གསོ་དཀའ་བ་དགང་དཀའ་བ་ཞེས་སྨད་ནས་སྔོན་རོལ་དུ་ཚོལ་དུ་མི་གནང་བ་དང༌། དབྱར་ཟད་ནས་ཟླ་བ་ཕྱེད་ལས་འདས་པར་འཆད་དུ་མི་གནང་བར་བསླབ་པ་བཅས་སོ། །དཔྱིད་ཟླ་བ་གཅིག་ལུས་ཞེས་བྱ་བ་ནི་ཟླ་བ་གཅིག་ནས་དབྱར་ཚུལ་དུ་འཇུག་པའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །དབྱར་གྱི་རས་ཆེན་ཞེས་བྱ་བ་ནི་དབྱར་གྱི་ཆར་ཆེན་གྱི་སྐྱབས་བྱེད་པའི་གོས་སོ། །ཚོལ་ཞེས་བྱ་བ་ནི་གཞན་ལས་སོ། །དབྱར་ཟད་ནས་ཟླ་བ་ཕྱེད་ཀྱི་བར་དུ་ཆོངས་ཤིག་ཅེས་བྱ་བ་ནི་ཚུལ་ནས་ཕྱུང་ནས་ཟླ་བ་ཕྱེད་ཀྱི་བར་དུའོ། །དགེ་སློང་གིས་དཔྱིད་ཟླ་བ་གཅིག་གི་སྔོན་ལོགས་ཞེས་བྱ་བ་ནི་དེའི་སྔོན་ལོགས་སུ་རས་ཆེན་ཚོལ་བའོ། །དབྱར་ཟད་ནས་ཟླ་བ་ཕྱེད་ཀྱི་བར་དུ་ཆོངས་ཤིག་ཅེས་བྱ་བ་ནི་དེ་ལས་འདས་པར་རོ། །སྤང་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པར་བྱའོ། །སྔར་ཚུལ་དུ་ཞུགས་པ་དང་དབྱར་ཕྱི་མར་ཚུལ་དུ་ཞུགས་པ་སྟེ། དེ་དག་གིས་ཡུན་རིང་དུ་བཅངས་ན་སྤང་བར་འགྱུར་རོ། །གང་ཕྱིས་ཚུལ་དུ་ཞུགས་པ་དེ་དག་གིས་ཀྱང་སྡར་བཙལ་ཏམ་ཧ་ཅང་རིང་དུ་བཅངས་ན་སྤང་བའི་ལྟུང་བར་འགྱུར་རོ། །དབྱར་གྱི་རས་ཆེན་ཕྲིན་དང་ཕྲིན་ཡིག་དང་ལག་བརྡ་དང་གཅིག་ནས་གཅིག་ཏུ་བརྒྱུད་པས་རིང་དུ་བཅངས་ན་ཉེས་བྱས་སུ་འགྱུར་རོ། །ཁྱིམ་པ་སྨྱོན་པ་དང་སེམས་འཁྲུགས་པ་དང༌། ནད་ཀྱིས་གཟིར་བ་དང༌། ལྐུགས་པ་དང༌། འོན་པ་དང༌། གླེན་པ་དང༌། འགྲོ་བ་གཞན་དུ་གནས་པ་ལ་དེ་བས་སྔོན་རོལ་དུ་བཙལ་ཏམ་དེ་དག་ལས་རྙེད་པ་རིང་དུ་བཅངས་ཀྱང་ཉེས་བྱས་སུ་འགྱུར་རོ། །སྤྱིར་རྙེད་པ་གང་ཟག་གི་ཕྱིར་བསྔོས་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །མཉན་དུ་ཡོད་པ་ན་བསོད་སྙོམས་པ་ཞིག་གིས་ཁྱིམ་བདག་ཅིག་ལ་ཆོས་བཤད་ནས་དད་པར་བྱས་ཏེ། བསོད་སྙོམས་སྤྱིར་བཤོས་གསོལ་
ཏེ་རས་ཡུག་གཅིག་ཅིག་ཡོན་དུ་ཕུལ་ལོ་ཞེས་ནས་ཁྱིམ་བདག་གིས་ཁས་བླངས་སོ། །བསོད་སྙོམས་པས་དགེ་འདུན་སྤྱན་དྲངས་པར་བྱས་ནས་དགེ་འདུན་སྤྱིར་ཕྲིན་གྱིས་གསོལ་བ་དང༌། བསྙེན་དགའ་བོས་གསོལ་ཏེ་ནང་བར་སྔར་ཁྱིམ་བདག་གི་དེར་སོང་སྟེ་ཕྱིན་པ་དང་ཁྱོད་ཀྱིས་རས་སྤྱིར་ཕུལ་བའི་བསོད་ནམས་ནི་ཡོད་ན་སྤྱད་པའི་བསོད་ནམས་ནི་མེད་དོ། །ཅིའི་ཕྱིར་ཞེ་ན་དགེ་འདུན་ལ་ཁ་ཟས་ཕུལ་བ་ནི་ཟེགས་མ་རེ་རེ་ར་ཡང་གོས་ཤིག །གོས་ནི་མར་མེའི་སྙིང་པོ་ཙམ་དུ་ཡང་གོས་ཤིག་ཅེས་བྱུང་བས་ན་ཁྱོད་ཀྱིས་དེ་ཡང་སྤྱད་པའི་བསོད་ནམས་མེད་ཀྱི་ཅིག་ཅར་ཤཱཀྱའི་རིགས་ལས་རབ་ཏུ་བྱུང་བས་ན་སྡེ་སྣོད་གསུམ་དང་ལྡན་པ་ཆོས་སྨྲ་བ་ལ་ཕུལ་བའི་རིགས་སོ་ཞེས་སྨྲས་པ་དང༌། ཁྱིམ་བདག་ན་རེ་འོ་ན་འཕགས་པ་བཞེས་སུ་གསོལ། དེ་ལྟར་བྱས་ན་དོ་ནོད་སུས་ཁྱེར་ཞེས་རྨེད་པར་གྱུར་ན་མ་ལེགས་ཀྱིས་དགེ་འདུན་ཚོགས་པའི་མདུན་དུ་རིམ་གྱིས་སྟོན་ལ་དེའི་འོག་ཏུ་ང་ལ་བྱིན་ཅིག་ཅེས་བྱས་ནས་ཁྱིམ་བདག་གིས་ཀྱང་ཀུན་ལ་རྗེས་སུ་ཡི་རང་བར་བྱས་ཤིག་ཅེས་བསྟན་ཏེ་མཇུག་ཏུ་བསྙེན་དགའ་བོ་ལ་བྱིན་ནོ། །དེ་ནས་ཁང་སྐྱོང་ལ་ཡང་བསྙེན་དགའ་བོས་མ་སྟེར་ཏོ། །དེ་ནས་བསོད་སྙོམས་པས་ཁྱིམ་བདག་ལ་ཁྱེད་ཀྱིས་འབྲུག་གཞན་དུ་བསྒྲགས་ལ། ཆར་གཞན་དུ་ཕབ་པོ་ཞེས་ཁྱིམ་བདག་ལ་གྱོད་བཏབ་པ་དང༌། ཁྱིམ་བདག་གིས་དེའི་རྒྱུས་ཞིབ་ཏུ་སྨྲས་སོ། །དགེ་སློང་གཞན་གྱིས་བསོད་སྙོམས་པ་ལ་གྱོད་བཏབ་པ་དང༌། བསོད་སྙོམས་པས་ཀྱང་བདག་དང་ཁྱིམ་བདག་གིས་ནི་མ་ནོངས་ཏེ། བསྙེན་དགའ་བོས་ཉེས་སོ་ཞེས་བྱས་པ་དང༌། དགེ་སློང་དག་འཕྱ་བ་ལ་ཞུགས་པ་སྙན་དུ་བདས་སོ། །བཀས་བསྙེན་དགའ་བོ་ལ་རྨས་ན། བཙུན་པ་མད་དོ་ཞེས་གསོལ་ནས། གསོ་དཀའ་བ་དགང་དཀའ་བ་ཆོག་མི་ཤེས་པ་དགེ་སྦྱོང་གི་བྱ་བ་མ་ཡིན་ཞེས་རྣམ་གྲངས་དུ་མར་སྨད་ནས། སྤྱིར་བསྔོས་པ་གང་གཟག་བདག་གིར་བྱས་ན་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་བསྙེན་དགའ་བོ་སྟེ། གཞན་ཡང་ཆོས་འདི་ལ་ཞུགས་པའོ། །ཤེས་བཞིན་ཞེས་བྱ་བ་ནི་བདག་ཉིད་ཀྱིས་རིག་པ་འམ་གཞན་གྱིས་བསྒོ་བའོ། །དགེ་འདུན་ཞེས་བྱ་བ་ནི་བཅོམ་ལྡན་འདས་ཀྱི་ཉན་ཐོས་སོ། །རྙེད་པ་ཞེས་བྱ་བ་ནི་རྣམ་པ་གཉིས་ཏེ། གོས་ཀྱི་རྙེད་པ་དང༌། ཁ་ཟས་ཀྱི་རྙེད་པའོ། །སྐབས་འདིར་ནི་གོས་ཀྱི་རྙེད་པ་ལ་བྱའོ། །གང་ཟག་བདག་གིར་བསྔོས་ཞེས་བྱ་བ་ནི་བདག་རང་གི་ཆེད་དུ་བསྔོས་པའོ། །སྤང་
བའི་ལྟུང་བ་ནི་དངོས་པོ་སྤངས་ནས་ལྟུང་བ་བཤགས་པར་བྱ་བའོ། །ཉེས་པ་ནི་གང་ཟག་གཅིག་གི་རྙེད་པ་བདག་གིར་བསྔོས་སམ། གཅིག་གམ་གཉིས་སམ་གསུམ་མམ་མང་པོ་ཡང་རུང་སྟེ། བསྡོས་པའི་ཚེ་ནི་ཉེས་བྱས་སོ། །ཐོབ་ན་སྤང་བའི་ལྟུང་བར་འགྱུར་རོ། །དགེ་སློང་གིས་གང་ཟག་གཅིག་གི་རྙེད་པ་ཕ་རོལ་གཉིས་ལ་བསྔོས་སམ་མང་པོ་ཡང་རུང་སྟེ། འགོད་པའི་ཚེ་ནི་ཉེས་བྱས་སོ། །གང་ཟག་གི་རྙེད་པ་དགེ་འདུན་གྱིར་བསྔོས་ན་འགེད་པའི་ཚེ་ཉེས་བྱས་སོ། །ཐོབ་ན་ཡང་ཉེས་བྱས་སོ། །དེ་བཞིན་དུ་གཙུག་ལག་ཁང་གི་ཡོ་བྱད་དང༌། གཙུག་ལག་ཁང་གི་རྒྱན་གྱི་ཡོ་བྱད་དང་མཆོད་རྟེན་གྱི་ཕང་ལོ་རིམ་བཞིན་དུ་འདུག་པ་ལས་ལྟག་འོག་བསྣོར་ན་ཉེས་བྱས་སོ། །དགེ་འདུན་གྱི་རྙེད་པ་གང་ཟག་བདག་གིར་བསྔོས་ན་ཉེས་པར་མི་འགྱུར་བ་ཡང་ཡོད་དེ་ཕྲིན་པ་དང་ཕྲིན་ཡིག་པ་དང་ལག་བརྡ་དང༌། གཅིག་ནས་གཅིག་ཏུ་བརྒྱུད་པ་དང༌། རྒྱུ་དང་སྤུན་མི་རུང་བ་རྣམས་ནི་ལྟུང་བ་མེད་དེ་ཉེས་བྱས་སོ། །སྨན་གཞག་པའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་འོད་མའི་ཚལ་བྱ་ཀ་ལེན་ད་ཀ་གནས་པ་ན་བཞུགས་སོ། །དེའི་ཚེ་ན་ཚེ་དང་ལྡན་པ་སྲུང་བ་པོའི་བུ་ལ་བརྟེན་ཅིང་གནས་བཅའ་བའི་ཉེ་གནས་ལྷན་ཅིག་སྤྱོད་པའི་དགེ་སློང་དག་གིས་སྨན་བྱིན་ལེན་བྱས་པ་དང༌། བྱིན་ལེན་མ་བྱས་པ་དང་སྔ་དྲོ་བ་དང་ཞག་བདུན་པར་འདྲེས་ཤིང་མི་མངོན་པར་དེ་ལྟ་བུར་དུས་དང་དུས་མ་ཡིན་པར་ཟ་ཞིང་རང་གི་ལག་གིས་བླངས་ནས་ཟ་བས་ན་སྨན་ཞག་བདུན་གྱི་བར་དུ་བྱིན་གྱིས་བརླབས་ལ་གཞག་པར་བྱ། དེ་ལས་འདས་པར་བཅང་བར་མི་གནང་སྟེ་དེ་ལྟར་གྱུར་པ་ལ་དགེ་སློང་དག་འཕྱ་བ་སྙན་དུ་བདས་ནས། བཀས་རྨས་ན་མད་དོ་ཞེས་གསོལ་བ་དང༌། ཆོག་མི་ཤེས་པ་གསོ་དཀའ་བ་དགང་དཀའ་བའོ་ཞེས་སྨད་ནས། སྨན་ཞག་བདུན་གྱི་བར་དུ་དྲིལ་ཞིང་བཟའ་བར་བྱ། དེ་ལས་འདས་པར་བཞག་ན་སྤང་བའི་ལྟུང་བར་འགྱུར་རོ་ཞེས་བསླབ་པ་བཅས་སོ། །ན་བ་ཞེས་བྱ་བ་ནི་མི་བདེ་བའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །ཕན་པ་གང་བྱེད་པའི་ཞེས་བྱ་བ་ནི་དེ་དང་མཐུན་པའོ། །སྨན་དུ་གསུངས་ཞེས་བྱ་བ་ནི་བསྒྲགས་པའོ། །མར་དང་ཏིལ་དང་སྦྲང་རྩི་དང་བུ་རམ་ཞེས་བྱ་བ་ནི་དངོས་སུ་བས་སོ། །འདོད་ཅེས་བྱ་བ་ནི་གལ་ཏེ་འདོད་པར་གྱུར་པའོ། །ཞག་བདུན་གྱི་བར་དུ་ཞེས་བྱ་བ་ནི་ཞག་བདུན་ཚུན་ཆད་དོ། །རང་གིས་བྱིན་གྱིས་རློབས་ཤིག་ཅེས་བྱ་བ་ནི་
བདག་གིས་སོ། །གཞག་པར་བྱ་བའི་བཟའ་བའོ་ཞེས་བྱ་བ་ནི་རང་གིས་བླངས་ནས་བཟའ་བར་བྱ་བའོ། །དེ་ལས་འདས་པར་བཞག་ན་ཞེས་བྱ་བ་ནི་དེ་ལས་འདས་པར་རོ། །སྤང་པའི་ལྟུང་བ་ཞེས་བྱ་བ་ནི་དངོས་པོ་སྤངས་ནས་ལྟུང་བ་བཤགས་པའོ། །ཉེས་པ་ནི་དགེ་སློང་གིས་ཚེས་གཅིག་ལ་སྨན་ཞིག་རྙེད་ན་ཞག་བདུན་ཚུན་ཆད་དུ་བྱིན་གྱིས་རློབས་ཤིག །ཡང་ན་གཞན་ལ་སྐུར་ཅིག །ཡང་ན་བྱིན་ཅིག །དེ་ལྟར་མ་བྱས་ན་ཚེས་བརྒྱད་ཀྱི་སྐྱ་རེངས་ཤར་ནས་སྤང་བའི་ལྟུང་བར་འགྱུར་རོ། །སྨན་ཞག་བདུན་དུ་བྱིན་གྱིས་རློབ་པ་ནི་བདག་ལག་བཀྲུས་ཏེ་སྨན་བྱིན་ལེན་བྱས་ནས་ཚངས་པ་མཚུངས་པར་སྤྱོད་པའི་མདུན་དུ་ཙོག་ཙོག་པོར་འདུག་ལ་འདི་སྐད་དུ་རྗོད་ཅིག་དགོངས་ཤིག །བདག་མིང་འདི་ཞེས་བགྱི་བ་རུང་བའི་སྨན་འདི་ཞག་བདུན་ཚུན་ཆད་དུ་བདག་དང་ཚངས་པ་མཚུངས་པར་སྤྱོད་པའི་ཕྱིར་བྱིན་གྱིས་བརླབ་པར་བགྱིའོ། །དེ་བཞིན་དུ་ལན་གཉིས་ལན་གསུམ་དུ་སྨྲོས་ཤིག །ཇི་ལྟ་བུར་ཟོས་པ་ཡང་ཉིན་གཅིག་བཞིན་དུ་དེ་ནི་བདག་གིས་ཉི་མ་གཅིག་ཟོས་ལྷག་མ་ཡང་བཟའོ་ཞེས་ཚངས་པ་མཚུངས་པར་སྤྱོད་པའི་མདུན་དུ་ཞག་བདུན་གྱི་བར་དུ་རྗོད་ཅིག །དེ་སྟེ་ཡང་སྨན་ལྷག་སྟེ་མ་ཟད་ན་དགེ་སྦྱོང་ངམ་ཀུན་དགའི་ར་བ་ལ་སྦྱིན་པར་བྱའོ། །སྨན་སྤང་བར་བྱ་བ་དེ་མ་སྤངས་སམ་བྲལ་བར་མ་བྱས་སམ་ལྟུང་བ་མ་བཤགས་པར་གཞན་ཞིག་རྙེད་ན་ཡང་སྔ་མའི་རྒྱུན་གྱིས་ཕྱི་མ་རྙེད་པ་ཐམས་ཅད་སྤང་བའི་ལྟུང་བར་འགྱུར་རོ། །ཞག་བདུན་ལས་འདས་ཀྱང་སྤང་བར་མི་འགྱུར་བ་ཡང་ཡོད་དེ། སྨན་དགེ་སློང་འཆད་དུ་མི་རུང་བ་ནི་ཞག་བདུན་ལས་འདས་ཀྱང་སྤང་བའི་ལྟུང་བར་མི་འགྱུར་རོ། །དགེ་སློང་ནད་ཀྱིས་གཟིར་བ་དང་སྨྱོས་པ་དང་སེམས་སྟོར་བ་ནི་ནམ་སེམས་འཁྲུགས་པ་རྙེད་པ་ནས་ཞག་བདུན་བགྲང་བར་བྱའོ། །སྔ་དྲོ་བའི་སྨན་ནི་སྔ་དྲོ་སྤྱད་པར་བྱ་ཕྱི་དྲོ་བའི་སྨན་ནི་ཕྱི་དྲོ་སྤྱད་པར་བྱ། ཞག་བདུན་པ་ཡང་ཞག་བདུན་ཚུན་ཆད་དུ་སྤྱད་པར་བྱ། ཚེས་གཅིག་པའི་སྨན་ཡང་ཚེས་གཅིག་ཚུན་ཆད་དུ་བཅད་པར་བྱ། དེ་ལས་འདས་པར་བཅངས་ན་ཐམས་ཅད་དུ་སྤང་བའི་ལྟུང་བར་འགྱུར་བར་རིག་པར་བྱའོ། །སྤང་བའི་ལྟུང་བ་སུམ་ཅུའི་བསླབ་པའི་གནས་རྫོགས་སོ།། །།ཤེས་བཞིན་དུ་བརྫུན་དུ་སྨྲ་བའི་གླེང་གཞི་ནི་བཅོམ་ལྡན་འདས་རྒྱལ་པོའི་ཁབ་ན་བཞུགས་སོ། །དེའི་ཚེ་ཚེ་དང་ལྡན་པ་སྒྲ་གཅན་ཟིན་ལ་དད་པའི་བྲམ་ཟེ་དང་ཁྱིམ་བདག་རྣམས་ཀྱིས་བཅོམ་ལྡན་འདས་ག་ལ་བཞུགས་ཞེས་དྲིས་ན། བཅོམ་ལྡན་
འདས་འོད་མའི་ཚལ་ན་བཞུགས་ན་ནི་བྱ་རྒོད་ཕུང་པོའི་རི་ལ་བཞུགས་སོ་ཞེས་ཟེར། པི་པི་ལིའི་ཤིང་དྲུང་གི་ཕུག་ན་བཞུགས་ན་ནི་སྡེ་ཆེན་མའི་ཕུག་ན་འོ་ཞེས་ཟེར་ཏེ། དེ་བཞིན་དུ་ཁྱིམ་བདག་གིས་བཙལ་ཀྱང་མ་རྙེད་དོ། །དེ་དག་གིས་སྒྲ་གཅན་ཟིན་ལ་ཁྱོད་ཀྱིས་ཆེད་དུ་བསམས་ཏེ། བདག་ཅག་ལ་ཐོ་འཚམས་སམ་དེ་བཞིན་ནོ་ཞེས་བྱས་པ་དང༌། དེ་དག་འཕྱ་བར་གྱུར་བ་སྙན་དུ་བདས་ནས་ལྕགས་ཀྱི་ཐུ་ལུ་མ་ཟ་བ་ནི་བླའི། འདི་ལྟ་བུ་ནི་མ་ཡིན་ནོ་ཞེས་བཀས་སྨད་ཀྱང་བསླབ་པ་མ་བཅས་སོ། །སླད་ཀྱིས་བཅོམ་ལྡན་འདས་མཉན་དུ་ཡོད་པ་ན་བཞུགས་པའི་ཚེ་མཉན་དུ་ཡོད་པ་ན་ཤཱཀྱའི་བུ་དགེ་སློང་མེ་བཞི་སྐྱེས་ཞེས་བྱ་བ་ཞིག་གནས་ཏེ། དེ་ཡང་ཕྱི་རོལ་གྱི་གཞུང་གཞན་ལ་རབ་ཏུ་མཁས་ཤིང་གཞན་དང་རབ་ཏུ་འགྱེད་པ་ལ་བརྩོན་པ་ཞིག་འདུག་གོ །དེའི་ཚེ་ལྷོའི་ཕྱོགས་ནས་བྲམ་ཟེའི་བུ་ཞིག་སྔགས་ཚོལ་ཞིང་མཉན་དུ་ཡོད་པར་ཕྱིན་ཏེ། སྔར་གནས་པའི་བྲམ་ཟེ་དང་ཅུང་ཟད་འགྱེད་པར་བྱས་པ་ལས། བྲམ་ཟེ་དག་གིས་གཡོ་བྱས་ནས་ཤཱཀྱའི་དགེ་སློང་མེ་བཞི་སྐྱེས་ལ། གཙུག་ལག་གིས་རྒོལ་ཅིག་ཅེས་བྱས་ནས། དེ་གཉིས་ཀྱང་སྐྱེད་མོས་ཚལ་ཞིག་ཏུ་དུས་བྱས་ནས། བྲམ་ཟེ་ནི་དེའི་མཚན་ཐོག་ཐག་བདག་གི་ཕྱོགས་དང་གཞན་གྱི་ཕྱོགས་ལ་སེམས་སེམས་ཏེ་ནམ་ནངས་ནས་དུས་སར་ཕྱིན་པ་དང༌། དགེ་སློང་མེ་བཞི་སྐྱེས་ནི་དེའི་ཉིན་མོ་བསོད་སྙོམས་ལ་སོང་སོང་སྟེ་སླར་ལོག་པ་དང༌། བྲམ་ཟེ་དང་ཕྲད་ནས་ང་ནི་བརྗེད་དོ་ཞེས་བྱས་སོ། །ཕྱི་དེ་ཉིན་དུས་བྱས་པ་དང༌། དགེ་སློང་དེ་ཡང་དུས་དེར་མ་འོངས་ནས་གྲང་གཞན་ན་འགྲོ་བ་བྲམ་ཟེ་དེས་མཐོང་ནས། དགེ་སློང་ཁྱོད་ཅིའི་ཕྱིར་འདིར་མི་འོང་ཞེས་བྱས་པ་དང༌། དོན་དེ་གཅིག་པུར་ཟད་དམ། བདག་ནི་སྟོན་པ་དང༌། བླ་མ་ལ་བསྙེན་བཀུར་བྱ་དགོས། ཁྱིམ་བདག་དང་བྲམ་ཟེ་ལྷགས་པ་རྣམས་ལ་ཆོས་བསྟན་དགོས་སོ་ཞེས་སྨྲས་པ་དང༌། བྲམ་ཟེས་ཁྱོད་ང་ལ་ཆེད་དུ་བསམས་ཏེ་ཐོ་འཚམས་སམ་ཅི་ཞེས་བྱས་པ་དང་དེ་བཞིན་ནོ་ཞེས་སྨྲས་པ་དང༌། བྲམ་ཟེའི་བུ་དག་དགེ་སྦྱོང་དེ་དག་ནི་བཞིན་དུ་བརྫུན་ཟེར་རོ་ཞེས་མི་སྙན་པར་ཟེར་བ་སྙན་དུ་བདས་ནས་རྣམ་གྲངས་དུ་མས་སྨད་ནས་འདུལ་བ་ལ་བསླབ་པ་བཅས་སོ། །ཤེས་བཞིན་ཞེས་བྱ་བ་ནི་བརྟགས་པའོ། །བརྫུན་ཞེས་བྱ་བ་ནི་རྣམ་པ་དགུ་སྟེ། ཕས་ཕམ་པར་འགྱུར་བ་དང་ལྷག་མར་འགྱུར་བ་དང༌། ལྟུང་བར་འགྱུར་བ་དང༌། ཉེས་བྱས་སུ་འགྱུར་བ་དང༌། རྩ་བ་མེད་པ་དང༌། ཚུལ་ཁྲིམས་
ལོག་པར་ཞུགས་པ་དང༌། ལྟ་བ་ལོག་པར་ཞུགས་པ་དང༌། ཆོ་ག་ལོག་པར་ཞུགས་པ་དང༌། འཚོ་བ་ལོག་པར་ཞུགས་པའོ། །ལྟུང་བ་ཞེས་བྱ་བ་ནི་སེམས་ཅན་དམྱལ་བ་དང་བྱོལ་སོང་དང་ཡི་དགས་ངན་འགྲོ་ལོག་པར་བསྲེགས་པ་དང་བཙོ་བར་ལྟུང་བའོ། །དེ་ལ་དགེ་སློང་གི་འདུ་ཤེས་སྦས་ནས་མཐོང་ངོ༌། །དོགས་སོ་ཞེས་སྨྲས་ན་ལྟུང་བའོ། །དགེ་སློང་གིས་མིའི་སྐྱོན་ནས་འབོད་པའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་པོ་གཞན་གྱི་སྐྱོན་ནས་འབོད་པ་ནི་འདི་ལྟ་སྟེ་ཞར་བ་དང་རྐང་དོས་དང་གྱོལ་པོ་དང་སོར་མོ་འཇས་པ་དང༌། རྒུར་པོ་དང་ལྐོག་གློན་ཅན་དང༌། མཆུ་འཕྱང་དང་མགོ་བོ་ཆེ་ལ་སོགས་པའི་སྐྱོན་ནས་བོས་པས་དགེ་སློང་དག་བག་འཁུམས་པ་དང༌། མི་སྤོབས་པ་དང༌། སྤ་གོང་བར་གྱུར་ནས་དགེ་བའི་བར་ཆད་དུ་འགྱུར་བས་སྙན་དུ་བདས་ནས། བཀས་དྲུག་སྡེ་ལ་རྨས་ན་མད་དོ་ཞེས་གསོལ་ནས། དགེ་སྦྱོང་གི་བྱ་བ་མ་ཡིན། རིགས་པ་མ་ཡིན་ཞེས་རྣམ་གྲངས་དུ་མས་སྨད་ནས་བསླབ་པ་བཅས་སོ། །ལྟུང་བ་ཞེས་བྱ་བ་ནི་ངན་སོང་གསུམ་དུ་ལྟུང་བར་བྱེད་པས་ན་ལྟུང་བའོ། །ལྟུང་བ་དེ་མ་བཤགས་ན་དགེ་བའི་ཆོས་རྣམས་སྒྲིབ་པར་བྱེད་པས་ན་ལྟུང་བ་ཞེས་གསུངས་སོ། །དགེ་སློང་གིས་མིའི་སྐྱོན་ནས་འབོད་པར་བསམས་ཏེ། དགེ་སློང་ལ་ཚེ་དང་ལྡན་པ་ཁྱོད་རྒྱལ་རིགས་དང་བྲམ་ཟེའི་རིགས་ལས་རབ་ཏུ་བྱུང་བས་ཁྱོད་ལ་དགེ་སྦྱོང་དང་ཚངས་པ་མེད་དོ་ཞེས་བྱས་ན་དགེ་སྦྱོང་སྤ་གོང་ཡང་རུང་ལ་མ་གོང་ཡང་རུང་སྟེ་ཉེས་བྱས་སུ་འགྱུར་རོ། །ལྷམ་མཁན་དང་སྐུད་རིས་མཁས་དང་ཤིང་མཁན་དང་ཐ་ག་པ་དང༌། འདྲེག་མཁན་དང༌། ཐེང་པོ་དང༌། ལག་སོར་འཁུམས་པ་དང༌། ལྐོག་གློན་ཅན་དང༌། སྐྲངས་པ་ལ་སོགས་པ་ལས་ཁྱོད་རབ་ཏུ་བྱུང་བས་ན་དགེ་སྦྱོང་དང་ཚངས་པ་མེད་དོ་ཞེས་སྨྲས་ན། དགེ་སློང་སྤ་གོང་ཡང་རུང་མ་གོང་ཡང་རུང་སྟེ་ལྟུང་བ་རེ་རེར་འགྱུར་རོ། །ཕྲིན་དང་ཕྲིན་ཡིག་དང་ལག་བརྡ་དང་གཅིག་ནས་གཅིག་ཏུ་བརྒྱུད་པ་དང༌། དགེ་སློང་སྨྱོན་པ་དང༌། སེམས་འཁྲུགས་པ་དང་ར་རོ་བ་ལས་མིའི་སྐྱོན་ནས་བོས་ན་ཉེས་བྱས་སུ་འགྱུར་རོ། །འགྲོ་བ་གཞན་དུ་གནས་པ་དང་མཐའ་འཁོབ་པ་དང༌། འཕགས་པའི་སྐད་ཀྱིས་གཅིག་ལ་གཅིག་བརྡ་མི་འཇལ་བ་དང༌། དགེ་སྦྱོང་དང༌། ཁྱིམ་པ་དང༌། དེ་བཞིན་དུ་ཕ་བསད་པ་དང་མ་བསད་པ་དང་དགྲ་བཅོམ་པ་བསད་པ་དང༌། མུ་
སྟེགས་ཅན་ལ་སོགས་པ་ལ་སྐྱོན་ནས་བོས་ན་ཉེས་བྱས་སུ་འགྱུར་རོ། །ཕྲ་མའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ་།དེའི་ཚེ་ན་དགེ་སློང་དྲུག་སྡེ་པོ་རྣམས་ཕྲ་མ་སྨྲ་བ་ལ་ཞུགས་ནས། དེ་ལྟར་ཕྲ་མ་སྨྲ་བས་ན་དགེ་སློང་དག་ཀྱང་འཁུམས་ཤིང་བག་ཚ་བར་གྱུར་ནས་ལུང་འབོགས་པ་དང་ཁ་ཏོན་བྱེད་པ་ལ་སེམས་བག་ཚ་བས་དགེ་བ་དག་བཏང་བས་མཛའ་ཞིང་སྡུག་པ་ཆོས་བཞིན་དུ་འཁོད་པར་ཡང་མ་གྱུར་ནས་དོན་ཉུང་ངུ་བའི་དགེ་སློང་དག་འཕྱ་བར་གྱུར་པ་སྙན་དུ་བདས་ནས། དགེ་སྦྱོང་གི་བྱ་བ་མ་ཡིན་ཞེས་སྨད་ནས། འདུལ་བ་ལ་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་པོའོ། །ལྟུང་བ་ནི་སྔ་མ་བཞིན་ནོ། །དགེ་སློང་གིས་ཕྲ་མ་བྱ་བར་བསམས་ནས་ཐག་པ་དང༌། ཤིང་མཁན་དང་འདྲེག་མཁན་ལ་སོགས་པ་ལས་རབ་ཏུ་བྱུང་ནས་དགེ་སྦྱོང་དང་ཚངས་པ་ག་ལ་ཡོད་ཅེས་ཟེར་རོ་ཞེས་སྨྲས་ན་ལྟུང་བར་འགྱུར་རོ། །གཞན་ནི་སྐྱོན་གྱི་སྐབས་དང་སྦྱར་རོ། །ཕྲིན་དང་ལག་བརྡ་ཡང་གོང་མ་བཞིན་དུ་སྦྱར་རོ། སྐྱོ་སྡོགས་ཀྱི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་བཞུགས་སོ། །དེའི་ཚེ་ན་དགེ་སློང་དྲུག་སྡེ་པོ་རྣམས་དགེ་སློང་མཁས་པ་དགེ་འདུན་འདུས་པས་ཆེས་བཞིན་དུ་རྩོད་པ་ཞི་བར་བྱས་ཏེ། སྤངས་པར་ཤེས་བཞིན་དུ་སླར་ཡང་དེ་ལས་སུ་མི་རུང་སྟེ་མ་བྱས་ལེགས་པར་མ་སྦྱངས་པས་སླར་སྦྱང་དགོས་སོ་ཞེས་ཡང་ནས་ཡང་དུ་སྐྱོ་སྡོགས་བྱས་ཏེ། བྱ་བ་མང་བྱེད་པ་མང་དུ་གྱུར་པས་དགེ་སློང་དག་འཕྱ་བ་ལས་སྙན་དུ་བདས་ནས། དགེ་སློང་མཁས་པ་ཚོགས་པས་ཆོས་བཞིན་དུ་ལས་བྱས་ཤིང་རྩོད་པ་སྤངས་པ་སླར་སྐྱོར་དུ་མི་གནང་བར་འདུལ་བ་ལ་བསླབ་པ་བཅས་སོ། །དགེ་སློང་གང་ཞེས་བྱ་བ་ནི་དྲུག་སྡེ་སྟེ། གཞན་ཡང་ཆོས་འདི་ལ་ཞུགས་པའོ། །ཤེས་བཞིན་ཞེས་བྱ་བ་ནི་བདག་ཉིད་ཀྱིས་རིག་པའམ། གཞན་གྱིས་བསྒོ་བར་གྱུར་པའོ། །འདུ་ཤེས་ཞེས་བྱ་བ་ནི་དགེ་འདུན་ཚོགས་ཤིང་མཐུན་པའོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ལ་བྱའོ། །ཆོས་ཇི་ལྟ་བ་བཞིན་དུ་ཞེས་བྱ་བ་ནི་འདུལ་བ་དང་མི་འགལ་བ་སྟེ། སྟོན་པས་བསྟན་པ་ཇི་ལྟ་བ་བཞིན་ནོ། །རྩོད་པ་ཞེས་བྱ་བ་ནི་རྩོད་པ་རྣམ་པ་བཞི་སྟེ། འཐབས་ནས་རྩོད་པ་དང་མ་འཐབས་མ་བཅོས་བར་རྩོད་པ་དང༌། ལྟུང་བའི་ཕྱིར་རྩོད་པ་དང༌། བྱ་བའི་ཕྱིར་རྩོད་པའོ། །སྤངས་པ་ཞེས་བྱ་བ་ནི་རྩོད་པ་རྣམ་པ་བཞི་པོ་གང་ཡང་རུང་སྟེ་ཞི་བར་
བྱས་སོ། །ཡང་བྱ་བར་སྐྱོ་སྔོགས་བྱེད་ཅེས་བྱ་བ་ནི་ཕྱི་ཕྱིར་བྱེད་དུ་གཞུག་པའོ། །ལྟུང་བ་ཞེས་བྱ་བ་ནི་སེམས་ཅན་དམྱལ་བར་ལྟུང་བ་ལ་སོགས་ཏེ་སྔ་མ་བཞིན་ནོ། །ཉེས་པ་ཇི་ལྟ་བུ་ཞེན་དགེ་སློང་གིས་འཐབ་པའི་རྩོད་པར་འདུ་ཤེས་ཤིང་སྤངས་པ་ལ་སྤངས་པའི་འདུ་ཤེས་ཀྱིས་ཡང་བྱ་བར་སྐྱོ་སྔོགས་བྱེད་ན་ལྟུང་བར་འགྱུར་རོ། །ཐེ་ཚོམ་ཟ་ན་ཡང་ལྟུང་བར་འགྱུར་རོ། །མ་སྤངས་པ་ལ་ཡང་སྤངས་པའི་འདུ་ཤེས་ཀྱིས་སྐྱོ་སྔོགས་བྱེད་ན་ཉེས་བྱས་སུ་འགྱུར་རོ། །ཐེ་ཚོམ་ཟ་ན་ཡང་ཉེས་བྱས་སུ་འགྱུར་རོ། །ཇི་ལྟར་འཐབ་པ་ལ་རྣམ་པ་བཞིར་སྦྱར་བ་བཞིན་དུ་མི་གདམས་པ་དང༌། ལྟུང་བ་དང་བྱ་བའི་རྩོད་པ་ལ་ཡང་དེ་བཞིན་དུ་སྦྱོར་ཅིག །བུད་མེད་ལ། ཆོས་ཚིག་ལྔ་དྲུག་ལས་ལྷག་པར་འཆད་དུ་མི་གནང་ཞིང་རིག་པའི་སྐྱེས་པ་མེད་པར་ཚིག་ལྔ་དྲུག་ལས་ལྷག་པར་བཤད་པའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་དང་ལྡན་པ་འཆར་བ་རིག་པའི་ནོར་བུ་ཞེས་བྱ་བ་ཡོད་དེ། དེའི་མཐུས་མཚན་གྱི་རིག་པ་ཤེས་ཏེ། སྔ་དྲོ་བྲམ་ཟེ་དང་ཁྱིམ་བདག་དག་གི་རིགས་ཀྱི་དེར་བསོད་སྙོམས་ལ་འཇུག་ཅིང་ཆོས་བསྟན་པའི་འོག་ཏུ་ཁྱིམ་བདག་གི་མནའ་མ་ལ་ཁྱོད་ཀྱི་སྒྱུག་མོ་ཅི་འདྲ་ཞེས་དྲིས་སོ། །དེས་སྨྲས་པ། ཇི་ལྟར་བུང་བུ་མདས་ཕོག་པ་བཞིན་ནོ། །དེ་ནི་དེ་ཉིད་ཀྱི་ཉེས་པ་མ་ཡིན་ཏེ། དེ་ལ་མ་རུངས་པའི་མཚན་ཡོད་དེ། སྨེ་བ་ནག་པོ་དང་དམར་པོ་དང༌། སྦྲང་མ་དང་འདྲ་བ་དང་མཛེར་པ་སྟེ། ནུ་མ་དང་རྐུབ་དང༌། གསང་བའི་བར་ན་ཡོད་པའི་གུན་ནོ་ཞེས་སྨྲས་སོ། །དེའི་འོག་ཏུ་སྒྱུག་མོའི་གན་དུ་སོང་ནས་ཁྱོད་ཀྱི་མནའ་མ་ཅི་འདྲ་ཞེས་དྲིས་ན་དེ་ནི་བདར་གྱིས་སྦྱངས་པ་སྟེ། ལེ་ལོ་ཆེ་སྤྲོ་ཐུང་ཞིང་ཁ་དྲག་ལ་ཁ་ངན་ཟེར་རོ་ཞེས་སྨྲས་པ་དང༌། དེ་ནི་དེ་ཉིད་ཀྱི་ཉེས་པ་མ་ཡིན་ཏེ། དེ་ལ་མཚན་མ་ནི་འདི་ལྟ་བུ་ཡོད་དོ་ཞེས་གསང་བའི་བར་དུ་མཚན་མ་བསྟན་ཏོ། །དེ་ནས་དུས་གཞན་ཞིག་ན་མནའ་མ་དང་སྒྱུག་མོ་དག་གཅིག་ལ་གཅིག་ལུས་མཉེད་ཅིང་ཁྲུས་བྱེད་པའི་ཚེ་དེ་གཉིས་གཅིག་ལ་གཅིག་གསང་བའི་གནས་དག་ཏུ་མཚན་བརྟགས་ན་འཆར་བས་སྨྲས་པ་བཞིན་དུ་ཡོད་དོ། །ནམ་ཕན་ཚུན་དུ་རྩོད་པའི་ཚེ་གཅིག་ལ་གཅིག་མཚང་འདྲུ་སྟེ། ཁྱོད་ཀྱང་འཐབ་མོ་རྒོལ་ཞིང་བསྔོ་བའམ། སྐྱེས་པ་འདི་ལྟ་བུ་དང་འདི་འདྲར་བྱེད་པ་ན་ཅི་ཞེས་བྱས་པ་དང༌། དེ་ལྟ་བུ་ནི་ཡོངས་མ་བྱས་སོ། །འོ་ན་ཁྱོད་ཀྱི་གསང་བའི་བར་ན་མཚན་ཡོད་པ་གཞན་གྱིས་ཇི་ལྟར་ཤེས་ཞེས་བྱས་པ་དང༌།
འོ་ན་ཁྱོད་ཀྱིས་ཀྱང་སྐྱེས་པ་གཞན་གྱིས་ཤེས་སོ་།ནམ་ཕན་ཚུན་དུ་བཟོད་པར་བྱས་ཏེ་མཛའ་བར་གྱུར་པ་དེ་ན་ཁྱོད་ལ་འདི་ལྟ་བུ་སུས་བསྟན་ཅེས་གཅིག་ལ་གཅིག་དྲིས་ན། གཉི་ག་ཡང་མཐུན་ཏེ་འཆར་བས་བསྟན་ཏོ་ཞེས་བྱས་པ་དང༌། དེ་གཉིས་འཕྱ་སྟེ། བདག་ཅག་ནི་འཆར་བས་ཆེད་དུ་བསམས་ཏེ་འཐབ་ཏུ་བཅུག་སྟེ་ཞེས་སྨོད་ཅིང་མི་སྙན་པ་འཛེར་ཏོ། །ཁྱིམ་བདག་གིས་དགེ་སློང་འཆར་བ་ཇི་ལྟ་བུ་ཞེས་དྲིས་ན་འཆར་བ་ནི་ཚུལ་ཁྲིམས་དང་ལྡན་པ་སྟེ་རིག་པའི་མཐུས་བུད་མེད་དག་གི་མཚན་ཤེས་སོ་ཞེས་བྱས་པ་དང༌། ཅི་འཕགས་པ་དེ་ལྟར་ཤེས་སུ་ཟིན་གྱིས་ཀྱང་བུད་མེད་ཀྱི་གསང་བའི་གནས་ངན་ལེན་སྨྲ་བར་མི་རིགས་སོ། །ཞེས་འཕྱ་བར་སྙན་དུ་བངས་ནས་འདི་སྙམ་དུ་དགོངས་ཏེ། ཅུང་ཟད་ཉེས་པའི་དམིགས་སུ་གྱུར་པ་ཡང་དགེ་སློང་བུད་མེད་ལ་ཆོས་བཤད་པ་ལས་བྱུང་ངོ་སྙམ་དུ་དོགས་ནས། དགེ་སློང་བུད་མེད་ལ་ཆོས་མ་འཆད་ཅིག་ཅེས་བཀག་གོ །སླད་ཀྱིས་དགེ་སློང་དག་བསོད་སྙོམས་ལ་ཞུགས་པ་དང༌། བུད་མེད་དག་གིས་ཆོས་བཤད་པར་གསོལ་བ་དང༌། དགེ་སློང་དག་གིས་ཆོས་མ་བཤད་པས་ཟན་མ་སྟེར་ཏོ། །དེ་ལྟ་བུ་སྙན་དུ་བདས་ནས་བཀའ་སྩལ་པ། ཆོས་ཚིག་ལྔ་སྟེ། ཕུང་པོ་ལྔ་བཤད་པར་གནང་ངོ༌། །སླད་ཀྱིས་དེ་བཞིན་དུ་ཉུང་ཞེས་གསོལ་ནས། དབང་པོ་དྲུག་སྟེ་ཚིག་དྲུག་བཤད་པར་གནང་ངོ༌། །ཚིག་དྲུག་གིས་ཀྱང་མི་ཆོག་གིས་ད་རུང་སྟོན་ཅིག་ཅེས་བསྐུལ་བ་དང༌། སླད་ཀྱིས་རིག་པའི་སྐྱེས་པ་ཞོག་ལ་ཆོས་ཤོད་ཅིག་ཅེས་བཀའ་སྩལ་པ་དང༌། དྲུག་སྡེས་རིག་པའི་སྐྱེས་པ་མེད་བཞིན་དུ་སྤྲེའུ་དང་བྱ་བ་ཞག་ནས་ཚིག་ལྔ་དྲུག་ལས་འདས་པར་བཤད་པས་ན་དེ་ལྟར་གྱུར་པ་ལ་སྙན་དུ་བདས་ནས་འདུལ་བ་ལ་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ། གང་གཞན་ཡང་ཆོས་འདི་ལ་ཞུགས་པའོ། །བུད་མེད་ཅེས་བྱ་བ་ནི་ལེགས་ཉེས་ཀྱི་དོན་ཁོང་དུ་ཆུད་ཅིང་དོན་གོ་བར་ནུས་པའོ། །ཚིག་ལྔ་དྲུག་ལས་འདས་ཞེས་བྱ་བ་ནི་ཆོས་ཚིག་ལྔ་བཤད་པར་གནང་བ་ལས་བསམས་བཞིན་དུ་དྲུག་ཏུ་འདས་སམ། ཆོས་ཚིག་དྲུག་འཆད་དུ་གནང་བ་ལས་བསམས་བཞིན་དུ་ཚིག་བདུན་དུ་འདས་པའོ། །ཆོས་ཞེས་བྱ་བ་ནི་སངས་རྒྱས་ཀྱིས་བཤད་པའོ། །སྟོན་ཅེས་བྱ་བ་ནི་འཆད་པའོ། །རིག་པའི་སྐྱེས་པ་མ་གཏོགས་ཞེས་བྱ་བ་ནི་སྐྱེས་པ་གན་ན་ཡོད་པའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་བསམས་བཞིན་དུ་
ཚིག་ལྔ་དྲུག་ལས་འདས་ས་མ་རིག་པའི་སྐྱེས་པ་མེད་པར་བཤད་ན་ལྟུང་བར་འགྱུར་རོ། །མཁས་པ་ཕྱི་ཕྱིར་དྲི་བ་ལ་ལན་ལྡོན་པ་དང་ཁྲིམས་དབོག་པ་དང་ཁ་དོན་ལ་སོགས་པ་ནི་མ་གཏོགས་ཏེ་རིག་པའི་སྐྱེས་པ་མེད་པར་བཤད་ཀྱང་ལྟུང་བར་མི་འགྱུར་རོ། །ཧ་ཅང་མྱུར་ཆེས་ཏེ་ཚིག་ཐལ་བ་ལ་ལྟུང་བ་མེད་དོ། །བསྙེན་པར་མ་རྫོགས་པའི་གང་ཟག་དང༌། ཅིག་ཅར་ཆོས་ཀྱི་ཚིག་གིས་གློག་ཏུ་མི་གནང་བའི་གླེང་གཞི་ནི་བཅོམ་ལྡན་འདས་མཉན་དུ་ཡོད་པ་ན་སྟེ། དེའི་ཚེ་དགེ་སློང་དྲུག་སྡེ་རྣམས་བསྙེན་པར་མ་རྫོགས་པའི་གང་ཟག་དང་གཙུག་ལག་ཁང་གི་ཕྱོགས་གཅིག་ན་ཆོས་ཀྱི་ཚིག་ཅིག་ཅར་ཀློག་པས་སྐྱེ་བོ་མང་པོའི་སྒྲ་མང་པོ་ཚ་ཚིག་བཏོན་པ་ནི་དཔེར་ན་བྲམ་ཟེ་སྨྲང་ཀློག་པའམ་སྐར་མཁན་གྲངས་བགྲང་བ་བཞིན་དུ་སྒྲ་ཆེན་པོ་གྲག་པ་སྙན་དུ་བདས་ཏེ། ཅིག་ཅར་གདོན་དུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ། གང་གཞན་ཡང་ཆོས་འདི་ལ་ཞུགས་པའོ། །བསྙེན་པར་མ་རྫོགས་པའི་གང་ཟག་ཅེས་བྱ་བ་ནི་དགེ་སློང་ཕ་དང་དགེ་སློང་མ་ཞེས་བྱ་བ་མ་གཏོགས་པ་གཞན་ཐམས་ཅད་དོ། །ཚིག་ཅེས་བྱ་བ་ནི་ཚིག་འདྲ་བ་དང་ཐལ་བ་དང༌། ཡི་གེ་མཉམ་པ་དང་ཐལ་བའོ། །ཚིག་མཉམ་པ་ཇི་ལྟ་བུ་ཞེ་ན། སློབ་དཔོན་གྱིས་སྡིག་པ་ཐམས་ཅད་མི་བྱའོ་ཞེས་བྱས་པ་དང༌། སློབ་མས་ཀྱང་དེ་བཞིན་དུ་སྨྲས་པ་ནི་ཚིག་མཉམ་པའོ། །ཚིག་ཐལ་བ་ནི་སློབ་དཔོན་གྱིས་སྡིག་པ་ཐམས་ཅད་མི་བྱའོ་ཞེས་མ་རྫོགས་པར་སློབ་མས་དགེ་བ་ཕུན་སུམ་ཚོགས་པར་བྱའོ་ཞེས་བྱ་བ་ནི་ཐལ་བའོ། །ཡི་གེ་མཉམ་པ་ནི་ཨ་ཞེས་བྱ་བ་ཚིག་མཉམ་དུ་སྟོན་པའོ། །ཡི་གེ་ཐལ་བ་ནི་ཨ་ཞེས་མ་རྫོགས་པར་ཨ་ཞེས་སྔར་རྫོགས་པའོ། །ཆོས་ཞེས་བྱ་བ་ནི་སྡེ་སྣོད་གསུམ་གང་ཡང་རུང་བའོ། །སློབ་དཔོན་གྱིས་སྔར་བྱས་ནས་སློབ་མས་ཕྱིས་བྱས་པ་དང་ཁ་ཏོན་དུ་བཏོན་པ་ལ་ལྟུང་བ་མེད་དོ། །ཉེས་པ་ནི་བསྙེན་པར་མ་རྫོགས་པར་འདུ་ཤེས་བཞིན་དུ་ཀློག་ན་ལྟུང་བར་འགྱུར་རོ། །ཐེ་ཚོམ་ཡང་དེ་བཞིན་ནོ། །བསྙེན་པར་རྫོགས་པ་ལ་མ་རྫོགས་པར་འདུ་ཤེས་ན་ཉེས་བྱས་སོ། །བསྙེན་པར་མ་རྫོགས་པའི་གང་ཟག་ལ་གནས་ངན་ལེན་གྱིས་ཉེས་པ་བརྗོད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་འདོད་ཆགས་དང་མ་བྲལ་བ་ཉོན་མོངས་པ་མ་སྤངས་པ་དག་ཉེས་པ་རྟག་ཏུ་འབྱུང་བ་དང་སླད་ཀྱིས་དགེ་སློང་མདོ་སྡེ་དང་འདུལ་བ་དང་མ་མོ་འཛིན་པ་དག་ལས་ལྟུང་བའི་ཆོས་རྣམས་
མཉན་ནས་དེ་དག་ལྟུང་བ་ཆོས་བཞིན་དུ་སླར་བྱེད་དུ་བཅུག་པ་དང༌། དེ་དག་ཀྱང་དེ་བཞིན་གཤེགས་པའི་དབུ་སྐྲ་དང༌། སེན་མོའི་མཆོད་རྟེན་ལ་ཞལ་ཞལ་དང་དཀྱིལ་འཁོར་བྱེད་པ་དང༌། དགེ་སློང་གནས་བརྟན་དག་ལ་ཡང་ཆུ་འདྲིམ་ཞིང་བསིལ་ཡབ་གཡོབ་པའི་ཚེ་དགེ་སློང་དྲུག་སྡེ་དང་གཞོན་ནུ་དག་དེ་ལྟ་བུའི་ལས་མི་བྱེད་ཅིང་འཁོད་པ་དང༌། ཁྱིམ་བདག་དང་བྲམ་ཟེ་རྣམས་དགེ་སློང་གནས་བརྟན་དག་ནི་ཁྱེད་དང་མི་འདྲ་སྟེ། དད་པ་ཆེ་ཞིང་དགེ་བ་ལ་བརྩོན་ནོ་ཞེས་བྱས་པ་དང༌། དྲུག་སྡེ་པོ་ན་རེ་དེ་དག་ནི་དད་པ་མ་ཡིན་གྱི་ཆད་པའི་ལས་བྱེད་དེ། དེ་དག་གིས་ཉེས་པ་འདི་ལྟ་བུ་འདི་དག་བྱས་སོ་ཞེས་ལག་བརྡ་བསྟན་པ་དང༌། ཁྱིམ་བདག་གིས་དགེ་སློང་གནས་བརྟན་རྒན་པོ་དག་ཀྱང་འདི་ལྟ་བུའི་ཉེས་པ་བྱུང་ཞིང་འདོད་ཆགས་སྐྱེ་ན་དགེ་སློང་གསར་བུ་གཞན་ལྟ་ཞིག་ཅི་སྨོས་ཞེས་འཕྱ་བ་དང་དགེ་སློང་དྲུག་སྡེ་དག་དགེ་སློང་གསར་བུ་དག་ལ་ཁྱེད་ཀྱི་མཁན་པོ་ག་རེ་ཞེས་དྲིས་ན། དེ་དག་ན་རེ་ཁྱེད་དང་མི་འདྲ་སྟེ། །མཆོད་རྟེན་དང་གནས་བརྟན་དག་ལ་མཆོད་པ་བྱེད་དུ་སོང་ངོ་ཞེས་བྱས་པ་དང་དྲུག་སྡེ་དག་ན་རེ་དེ་དག་ནི་དད་པའི་ཕྱིར་མཆོད་པ་བྱེད་པ་མ་ཡིན་གྱི་ཆད་པས་བཅད་དེ་ཆད་པའི་ལས་བྱེད་པའོ་ཞེས་སྨྲས་པ་དང༌། དེ་དག་གིས་མཁན་པོ་དག་ལ་མ་དད་ཅིང་སྤང་བར་འགྱུར་བ་དང་མཁན་པོས་ཁྱེད་སུ་ལས་ཐོས་ཞེས་སྨྲས་པ་དང་དྲུག་སྡེ་ལས་སོ་ཞེས་སྨྲས་པས། དེ་དག་མི་དགའ་བར་གྱུར་པ་སྙན་དུ་བདས་ནས་བསླབ་པའི་གནས་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །བསྙེན་པར་མ་རྫོགས་པར་ཞེས་བྱ་བ་ནི་དགེ་སློང་ཕ་དང་དགེ་སློང་མ་གཉིས་མ་གཏོགས་པར་གཞན་ཐམས་ཅད་དོ། །གནས་ངན་ལེན་ཅེས་བྱ་བ་ནི་ཕས་ཕམ་པ་ལས་བྱུང་བ་དང་ལྷག་མ་ལས་བྱུང་བའོ། །དགེ་འདུན་གྱིས་གནང་བ་མ་གཏོགས་ཞེས་བྱ་བ་ནི་དགེ་འདུན་གྱིས་གནང་བ་བཀོལ་བའོ། །མཉན་དུ་ཡོད་པ་ན་དགེ་སློང་འཕྲལ་པོ་ཆེ་དང་དགེ་སློང་མ་དྲང་མོ་གྲོང་དེ་དག་ཏུ་ལོག་པར་སྤྱད་པས་སྐྱེ་བོ་དེ་དག་མི་དགའ་བར་གྱུར་པས་ན་དེ་དག་གི་ཉེས་པ་རིགས་སོ་སོར་རིག་པར་བྱེད་ཅིང་བསྒོ་བ་ནི་མ་གཏོགས་ཞེས་གསུངས་སོ། །ལྟུང་བ་ནི་སྔ་མ་བཞིན་ནོ། །ཉེས་པ་གང་ཞེ་ན་དགེ་སློང་གིས་སོ་སོར་རིག་པར་མི་བྱ་བར་འདུ་ཤེས་བཞིན་དུ་སོ་སོར་རིག་པར་མ་བྱས་ན་ལྟུང་བར་འགྱུར་རོ། །ཐེ་ཚོམ་ན་ཡང་ངོ༌། །དགེ་སློང་གིས་ཡང་སོ་སོར་རིག་པར་བྱ་བའི་རིགས་རྣམས་ལ་སོ་སོར་རིག་
པར་བྱ་བ་མ་ཡིན་པར་འདུ་ཤེས་སམ། ཐེ་ཚོམ་བཞིན་དུ་སོ་སོར་རིག་པར་བྱས་ན་ཉེས་བྱས་སུ་འགྱུར་རོ། །དགེ་སློང་གིས་ཉེས་པ་དྲིལ་བརྡུངས་པ་བཞིན་དུ་ཀུན་གྱིས་ཤེས་པ་འམ་རི་མོར་བྲིས་པ་ལྟ་བུའམ། བདག་གིས་ཤེས་པ་བཞིན་དུ་འཇིག་རྟེན་གཞན་གྱིས་ཤེས་པ་ལ་ནི་བརྗོད་ཀྱང་ཉེས་པ་མེད་དོ། །མིའི་ཆོས་ལས་བླ་མར་གྱུར་པའི་བདེན་པ་སྨྲར་མི་གནང་བའི་གླེང་གཞི་ནི་ཡུལ་ཡངས་པ་ཅན་སྤྲེའུ་རྫིང་གི་འགྲམ་ནའོ། །དེ་ན་གནས་པའི་ཉ་པ་ལྔ་བརྒྱ་པོ་རྣམས་འབད་བརྩོན་རྩོལ་བས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པར་གྱུར་ཏོ། །དེ་དག་སྔོན་མུ་གེ་བྱུང་བའི་ཚེ་ན་ནི་ཡོན་ཏན་མེད་བཞིན་དུ་སྨྲས་པས་ཕས་ཕམ་པར་བསླབ་པ་བཅས་སོ། །འདིར་ནི་བདེན་པ་མཐོང་བས་ན་མིའི་ཆོས་ལས་གྱུར་པའི་བདེན་པ་བསྙེན་པར་མ་རྫོགས་པ་ལས་སྨྲས་ན་ལྟུང་བར་བཅས་ཏེ། བརྫུན་གྱི་ཕམ་པ་ཇི་སྐད་ཟེར་བ་བཞིན་དུ་སྦྱོར་ཅིག །དགེ་སློང་ཞེས་བྱ་བ་ནི་ཉ་པ་ལྔ་བརྒྱ་སྟེ། གཞན་ཡང་ཆོས་འདི་ལ་ཞུགས་པའོ། །བསྙེན་པར་མ་རྫོགས་པ་ནི་སྔ་མ་བཞིན་ནོ། །བླ་མ་ཞེས་བྱ་བ་ནི་འདོད་པའི་ཁམས་ལས་གཟུགས་ཀྱི་ཁམས་བླ་མའོ། །འདི་ལྟར་སྒྲིབ་པ་ལྔ་ནི་མིའི་ཆོས་ཞེས་བྱའོ། །དེ་ལྔ་སྤངས་པ་བླ་མ་ཞེས་བྱའོ། །སྨྲས་ཞེས་བྱ་བ་ནི་བསྒོ་བའོ། །བདེན་པ་ཞེས་བྱ་བ་ནི་དེའི་དངོས་པོ་བདེན་པའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་དགེ་སློང་གི་འདུ་ཤེས་པ་དང༌། བཟོད་པ་དང་ལྟ་བ་མ་སྦས་པར་ལྷ་མཐོང་ཀླུ་མཐོང་དེ་དག་གི་སྒྲ་ཐོས་ཏེ། སྒྲ་བཅོམ་པ་ནས་ལྷའི་བར་དུ་སྟེ། དེ་དག་མཐོང་ངོ་ཞེའམ་འགྲོགས་སོ་ཞེ་ན་ལྟུང་བར་འགྱུར་རོ། །དགེ་འདུན་གྱི་རྙེད་པ་གང་ཟག་མཛའ་བའི་ཕྱིར་བསྔོས་སོ་ཞེས་ཟེར་བའི་གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་དགེ་འདུན་གྱི་མལ་སྟན་འགྱེད་པ་དང་ཟས་ལ་བསྐོ་བར་བསྐོས་ཏེ། གྱད་བུ་ནོར་ཡང་དག་ལ་བསམས་པ་དགེ་བས་ན་དགེ་འདུན་ལ་ཆོས་བཞིན་དུ་ཞལ་ཏ་གུས་པར་བྱེད་ནས། དཀོན་མཆོག་གསུམ་མམ་གྲོགས་པོ་མཛའ་བ་ལ་མ་བྱིན་པ་ཅུང་ཟད་ཀྱང་མེད་དེ། དེ་ལྟར་དབུལ་ཞིང་སྦྱིན་པས་ན་རང་གི་ཆོས་གོས་སྨད་གསུམ་ངན་ཞིང་ཞིག་པར་གྱུར་ཏོ། །དེ་ནས་དགེ་འདུན་རྣམས་ཀྱིས་བགྲོས་པ། ནམ་དགེ་འདུན་གྱིས་རྙེད་པ་གོས་ཤིག་གྲུབ་ན་གྱད་བུ་ནོར་ལ་སྦྱིན་ནོ་ཞེས་སྙན་དུ་ཞུས་ནས་བཀའ་སྩལ་པ། ཕྱིས་རྩོད་ཅིང་འཁྲུག་པར་མི་འགྱུར་བར་དགེ་འདུན་སྤྱིར་གསོལ་བ་བྱོས་
ཤིག་ཅེས་འབྱུང་སྟེ། དེ་བཞིན་དུ་དགེ་འདུན་མཐུན་པས་གསོལ་བ་བྱས་ཏེ་བྱིན་ན་ཕྱིས་མཛའ་བོ་དང་ས་ཅན་ན་རེ་དགེ་འདུན་གྱི་རྙེད་པ་ཁྱེད་ཅག་གི་སློབ་མ་མཛའ་བ་ལ་བྱིན་ནོ་ཞེས་ཟེར་ནས། དགེ་སློང་དག་གིས་དེ་གཉིས་ལ་ཁྱེད་གཉིས་དེའི་ཚེ་ན་དེར་མ་གཏོགས་སམ་ཞེས་བྱས་ན། ངེད་ཀྱང་དེར་འདུས་སོ། །འོ་ན་ཁྱེད་ཅིའི་ཕྱིར་འཕྱ། ཅི་ངེད་ཅག་ཀྱང་མྱ་ངན་བྱེད་དུ་ཡང་མི་གནང་ངམ་ཞེས་བྱས་པ་དང༌། དགེ་སློང་དག་འཕྱ་བ་ལས་སྙན་དུ་བདས་ནས་འདུལ་བ་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་མཛའ་བོ་དང་ས་ཅན་ཏེ་གཞན་ཡང་དེ་དང་འདྲ་བའོ། །སྔར་མཐུན་ཏེ་རུང་བར་བྱས་ཞེས་བྱ་བ་ནི་སྔར་ཚོགས་པས་མཐུན་པར་བྱིན་པའོ། །དེའི་འོག་ཏུ་ཞེས་བྱ་བ་ནི་དུས་ཕྱི་ཞིག་ནའོ། །འདི་ལྟར་མཛའ་བའི་ཕྱིར་ཞེས་བྱ་བ་ནི་མཛའ་བ་གང་ཞེ་ན། མཁན་པོ་དང་སློབ་དཔོན་གནས་འཆའ་བའོ། །ལྷན་ཅིག་གནས་པ་ནི་མཁན་པོའོ། །སློབ་དཔོན་གཅིག་པ་ཡང་དེ་བཞིན་དུ་སྦྱར་རོ། །རྙེད་པ་ནི་གཉིས་ཏེ་གོས་དང་ཟས་ཏེ། འདིར་གོས་ལ་བྱའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་དགེ་སློང་གིས་སྔར་མཐུན་ཏེ་རུང་བར་བྱས་ལ་དེའི་འོག་ཏུ་ཚེ་དང་ལྡན་པ་དག་གིས་འདི་ལྟར་མཛའ་བའི་ཕྱིར་དགེ་འདུན་གྱི་རྙེད་པར་བསྔོས་པ་གང་ཟག་བདག་གིར་བསྔོས་སོ་ཞེས་ཟེར་ན་ཐམས་ཅད་དུ་ལྟུང་བར་འགྱུར་རོ། །མཛའ་བའི་ཕྱིར་བསྔོས་པ་བདེན་ན་ཉེས་པ་མེད་དོ། །བསླབ་པ་ཁྱེད་དུ་གསོད་པའི་གླེང་གཞི་ནི་མཉན་དུ་ཡོད་པ་ནའོ། །དགེ་སློང་དྲུག་སྡེ་རྣམས་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་བསྟན་པ་འདོན་པའི་ཚེ་ཕས་ཕམ་པ་ཡན་ཆད་འདོན་པའི་ཚེ་ན་ནི་ཅང་མི་སྨྲ་བར་འཁོད་ཅིང་དགེ་འདུན་གྱི་ལྷག་མ་རྟག་ཏུ་བྱུང་བས་ན་ལྷག་མ་མན་ཆད་གདོན་པ་འདོན་པའི་ཚེ་འདི་སྐད་ཟེར་ཏེ། ཚེ་དང་ལྡན་པ་དག་བསླབ་པའི་གནས་ཕྲན་ཚེགས་འདི་ལྟ་བུ་ཟླ་བ་ཕྱེད་ཕྱེད་ཅིང་གདོན་ཅི་དགོས་དགེ་སློང་རྣམས་ཞུམ་པ་དང་བག་འཁུམས་པར་གྱུར་ཏེ། རྨ་རུབ་པ་ཀུན་ཕྱིས་གཞིག་ཅི་དགོས། ཉེས་པ་ཁ་ཅིག་ནི་བཤགས་ཁ་ཅིག་མ་བཤགས་པ་ཡང་ཡོད་དེ། ཁྱོད་ཀྱིས་དེ་དག་གླེངས་པས་ན་བདག་ཅག་ཐེ་ཚོམ་དུ་གྱུར་ཏོ་ཞེས་བསླབ་པ་ལ་སྨོད་ཅིང་ཁྱད་དུ་གསོད་པ་དགེ་སློང་དག་གིས་སྙན་དུ་གསོལ་ནས་འདུལ་བ་ལ་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ་གཞན་ཡང་འདི་ལ་ཞུགས་པའོ། །ཟླ་བ་
ཕྱེད་ཕྱེད་ཅིང་སོ་སོར་ཐར་པའི་མདོ་གདོན་པ་ཞེས་བྱ་བ་ནི་ཕས་ཕམ་པ་ནས་རྩོད་པ་ཞི་བའི་བར་དུ་གདོན་པ་ལྔ་ལ་བྱའོ། །བསླབ་པའི་ཚིག་ཕྲན་ཚེགས་གདོན་ཅི་དགོས་ཞེས་ཟེར་བ་ནི་བསླབ་པ་སྤོང་པའི་རྟགས་སྣ་ཚོགས་སྨྲ་བའོ། །ལྟུང་བ་ནི་སྔ་མ་བཞིན་ནོ། །ཕས་ཕམ་པ་བཞི་འདོན་པའི་ཚེ་གདོན་ཅི་དགོས་ཞེས་ཟེར་ན་ལྟུང་བར་འགྱུར་རོ། །ལྷག་མ་དང་ཉེས་བྱས་ཀྱི་བར་དུ་གདོན་ཅི་དགོས་ཞེས་ཟེར་ན་ལྟུང་བར་འགྱུར་རོ། །དེ་བཞིན་དུ་འདུལ་བ་དངོས་པོ་དང་ཕྲན་ཚེགས་དང༌། གཞུང་བླ་མ་དང༌། འདུལ་བ་སྔ་མ་དང༌། བཅུ་དྲུག་པ་དང༌། འགྲེལ་པ་དང༌། གླེང་གཞི་དང༌། འདུལ་བ་ལྟ་བུའི་རྣམས་གདོན་པའི་ཚེ་གདོན་ཅི་དགོས་ཞེས་ཟེར་ན་ལྟུང་བར་འགྱུར་རོ། །འདུལ་བ་དང་མི་ལྡན་པ་མདོ་སྡེ་ལ་ཁྱད་དུ་གསོད་ན་ཉེས་བྱས་སུ་འགྱུར་རོ། །བརྫུན་གྱི་ཚོགས་བཅུ་ཕུང་དང་པོ་རྫོགས་སོ།། །།ཤིང་གཅོད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་སྔོན་ཤིང་མཁན་ལས་རབ་ཏུ་བྱུང་བའི་དགེ་སློང་རྒན་ཞུགས་བླུན་པོ་མི་མཁས་མི་གསལ་བ་གཅིག་གིས་ལྷ་གནས་པའི་ཤིང་ཞིག་བཅད་དེ་གཙུག་ལག་ཁང་བགྱིས་པ་དང༌། ལྷ་དེ་ཡང་རང་གི་གནས་དང་རྟེན་མ་མཆིས་པས་སྲོད་ལ་བཅོམ་ལྡན་འདས་ཀྱི་སྙན་དུ་གསོལ་ཏེ། བཙུན་པ་དེང་སོང་དགུན་གྱི་དུས་ལ་བབ་སྟེ་ཤིང་གི་ཡལ་ག་ཡང་གས་པ་ཙམ་དུ་རླུང་ལྡང་སྟེ། བདག་གིས་བྱིས་པ་ནི་ཕྲ་བས་གནས་ཀྱང་མ་མཆིས་ན་ཇི་ལྟར་བགྱི་ཞེས་གསོལ་བ་དང༌། བཅོམ་ལྡན་འདས་ཀྱིས་ལྷ་གཞན་ཞིག་ལ་ལྷ་དེའི་གནས་བྱིན་ཅིག་པར་གཏད་ནས་དེའི་ཕྱི་དེ་ཉིན་མོ་དགེ་སློང་གི་དགེ་འདུན་བསྡུས་ཏེ་དེའི་རྒྱུས་ཞིབ་ཏུ་སྨྲས་ནས་ཤིང་གཅོད་དུ་མི་གནང་བར་སྩལ་བ་དང༌། འབྲོག་སྐྱེས་ཀྱི་འབྲོག་དགོན་པ་ན་དགེ་སློང་ལས་སར་པ་བདག་ལས་མི་བྱེད་དེ་སྙན་དུ་བདས་ནས་ད་སླན་ཆད་ལས་སར་པའི་དགེ་སློང་གིས་ཞག་བདུན་ནམ་བརྒྱད་ཀྱི་སྔོན་རོལ་ནས་ཤིང་གི་དྲུང་དུ་དཀྱིལ་འཁོར་དང་གཏོར་མ་དང་མཆོད་པ་བྱས་ནས་ཆོས་བཤད་དེ་གདོད་ཤིང་གཅད་པར་བྱའོ། །མཚན་མ་ལྟ་བུ་བྱུང་ན་གཅོད་དུ་མི་གནང་ཞེས་གསུངས་ཏེ་དེའི་ཚེ་བསླབ་ཕ་མ་བཅས་སོ། །ཕྱིས་མཉན་དུ་ཡོད་པ་ན་དགེ་སློང་དྲུག་སྡེ་རྣམས་རང་གི་ལག་གིས་ཤིང་དང་རྩྭ་དང་མེ་ཏོག་རྣམས་རྔའམ་རྔར་འཇུག །གཅོད་དམ་གཅོད་དུ་འཇུག་པས་ན་ཕྱིའི་མུ་སྟེགས་རྣམས་འཕྱ་བས་
སྙན་དུ་བདས་ཏེ། ས་བོན་གྱི་ཚོགས་ནས་འབྱུང་པོའི་གནས་འཇིག་ཏུ་མི་གནང་བར་བཅས། དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །ས་བོན་ལ་རྣམ་པ་ལྔ་སྟེ། རྩ་བའི་ས་བོན་དང༌། སྡོང་པོའི་ས་བོན་དང༌། མགོ་ཐོགས་ཀྱི་ས་བོན་དང༌། འགས་པའི་ས་བོན་དང༌། ས་བོན་གྱི་ས་བོན་དང་ལྔའོ། །རྩ་བའི་ས་བོན་ནི་གླ་སྒང་དང་ཤུ་དག་དང་ཡུང་བ་རོང་དང་སྒེའུ་གཤེར་དང་གཞན་ཡང་རྩ་བ་བཙུགས་པ་ལས་སྐྱེ་བའོ། །སྡོང་པོའི་ས་བོན་ནི་བུ་རམ་ཤིང་འོད་མ་དང༌། ལྕང་མ་དང༌། གཞན་ཡང་སྡོང་བུ་ལས་སྐྱེས་པ་རྣམས་སོ། །མགོ་ཐོགས་ཀྱི་ས་བོན་བཏབ་པ་ལས་སྐྱེས་པར་གྱུར་པའོ། །བཀས་པའི་ས་བོན་ནི་འཇམ་བྱི་ར་དང་ག་གོན་དང༌། ཁམ་རྩེག་ལ་སོགས་པའོ། །ས་བོན་གྱི་ས་བོན་ནི་ནས་འབྲས་དང་ཁྲེ་ལ་སོགས་པའོ། །འབྱུང་པོའི་གནས་ཞེས་བྱ་བ་ནི་སྲིན་བུ་དང༌། ཕྱེ་མ་ལེབ་དང་སྤྲུལ་དང་ཏྲཻ་ལ་ཏ་ཀ་ལ་སོགས་པ་ནི་འབྱུང་པོ་ཞེས་བྱ་སྟེ་དེ་དག་ཤིང་ལ་གནས་པས་ན་དེ་དག་གི་གནས་བཤིག་གམ་ཕྱུང་ངམ་བཅད་ན་ལྟུང་བར་འགྱུར་རོ་ཞེའོ།།དེ་ལ་གོང་མའི་ས་བོན་རྣམ་པ་ལྔ་པོ་ལས་རྩ་བའི་ས་བོན་དུ་འདུ་ཤེས་ལ། །སྔོ་ལ་སྔོན་པོར་འདུ་ཤེས་དེ་བཅད་དམ་བཅད་དུ་བཅུག་ན་ལྟུང་བར་འགྱུར་རོ། །སྔོ་བ་ལ་ཐེ་ཚོམ་དུ་གྱུར་ན་ཡང་ལྟུང་བར་འགྱུར་རོ། །སྐམ་པོ་ལ་སྔོ་བར་འདུ་ཤེས་ཏེ་བཅད་ན་ཉེས་བྱས་སུ་འགྱུར་རོ། །ཐེ་ཚོམ་ལ་ཡང་ངོ༌། །ཇི་ལྟར་རྩ་བའི་ས་བོན་ལ་རྣམ་པ་བཞིར་སྦྱར་བ་བཞིན་དུ་ས་བོན་ལྷག་མ་བཞི་པོ་ལ་ཡང་རྣམ་པ་བཞིར་སྦྱོར་ཅིག །དགེ་སློང་གིས་ས་བོན་རྣམ་པ་བཞི་པོ་ལ་མེར་བསྲེགས་ཏེ་མ་རུང་བར་གྱུར་ཏམ། ཆུར་བོར་ཏེ་མ་རུང་ངམ་གཏུན་གྱི་ནང་དུ་བརྡུངས་ཏེ་མ་རུང་བར་གྱུར་ན་ཡང་ལྟུང་བ་ལྔ་དང་ཉེས་བྱས་ལྔར་འགྱུར་རོ། །ས་བོན་རྣམ་པ་ལྔ་པོས་སྐམ་པོ་ལ་གཞག་གམ་ཁུ་བ་ཚ་བས་བླུགས་ཤིང་གིས་དྲུད་དེ་སྣད་པར་བྱས་ན་ཡང་སྔ་མ་བཞིན་ནོ། །དགེ་སློང་གིས་ཐབས་གཅིག་གིས་ཤིང་གཅིག་བཅད་ན་ཉེས་བྱས་ཀྱང་གཅིག་ལྟུང་བ་ཡང་གཅིག་ཏུ་འགྱུར་རོ། །ཐབས་གཅིག་གིས་ཤིང་མང་དུ་བཅད་ན་ཉེས་བྱས་གཅིག་དང་ལྟུང་བ་མང་དུ་འགྱུར་རོ། །ཇི་ལྟར་ཐབས་གཅིག་དང་གཉིས་སམ་གསུམ་པའམ་ཐབས་མང་པོ་ཡང་དེ་བཞིན་དུ་སྦྱར་རོ། །མེ་ཏོག་དང་ལོ་མ་དང་ཤིང་གི་ཡལ་ག་ཡང་གོང་མ་བཞིན་དུ་སྦྱར་
ཏེ་སྔོན་པོ་བཅད་ན་ལྟུང་བའོ། །སྐོམ་པོ་ནི་ཉེས་བྱས་སོ། །ཆུའི་ནང་ནས་སྐམ་པོ་ཕྱི་རོལ་ཏུ་ཕྱུང་ངམ། ཤ་མོ་དང་ཕ་བ་དགོ་དགོ་ཕྱུང་ན་ལྟུང་བར་འགྱུར་རོ། །འཕྱ་ཞིང་གཞོགས་འཕྱས་བྱེད་པའི་གླེང་གཞི་ནི་རྒྱལ་པོའི་ཁབ་ནའོ། །དེའི་ཚེ་ན་ཚེ་དང་ལྡན་པ་གྱད་བུ་ནོར་དགེ་འདུན་ལམ་ལ་སྟན་དང་ཟས་འགྱེད་དེ། དེའི་ཚེ་ན་མཛའ་བོ་དང་ས་ཅན་གཉིས་མི་སྡུག་པས་ཟས་དང་གནས་ཁང་མ་ཐོབ་བོ། །སླད་ཀྱིས་གྱད་བུ་ནོར་གྱིས་ངེད་གཉིས་མནར་ཏོ་ཞེས་བྱས་སོ། །ཕྱིས་བསྙེན་དགའ་བོའི་མདུན་དུ་ཁྱོད་ཀྱང་མལ་སྟན་འགྱེད་པར་བསྐོས་ན། གྱད་བུ་ནོར་བཞིན་ངེད་ལ་མནར་བར་བྱེད་དོ་ཞེས་སྨྲས་པ་དང༌། བསྙེན་དགའ་བོ་ན་རེ་ཁྱོད་གཉིས་དེ་སྐད་མ་ཟེར་ཅིག་ཚེ་དང་ལྡན་པ་གྱད་བུ་ནོར་ནི་མལ་སྟན་འདིང་བའི་མཆོག་ཏུ་སངས་རྒྱས་ཀྱིས་བསྔགས་སོ་ཞེས་བྱས་པ་དང༌། དེ་ལྟར་གྱུར་པ་སྙན་དུ་བདས་ནས། གསོལ་བ་དང་ལས་གཉིས་ཀྱིས་འཕྱ་བར་གྲངས་སུ་ཆུག་ཤིག་ཅེས་བཀའ་སྩལ་ནས། དེ་བཞིན་དུ་འཕྱ་བའི་གྲངས་སུ་བཅུག་ཀྱང་ཕྱི་ཕྱིར་གྱད་བུ་ནོར་གྱི་མིང་ནས་ནི་མི་སྨོས་ཀྱི་དགེ་སློང་ཁ་ཅིག་ནི་དེ་བཞིན་དུ་ངེད་ལ་མ་ནར་བར་བྱེད་གྲང་ཞེས་ལྐོག་ན་གཞོགས་འཕྱས་བྱེད་པ་དང་མངོན་སུམ་དུ་འཕྱ་བས་སྙན་དུ་བདས་ཏེ། འཕྱ་བར་མི་གནང་བར་བཅས་འཕྱ་ཞིང་གཞོགས་འཕྱས་བྱེད་ཅེས་བྱ་བ་ནི་འཕྱ་བར་བསམས་ནས་ཚིག་ཏུ་སྨྲས་ན་ལྟུང་བར་འགྱུར་རོ། །ཉེས་པ་ནི་དགེ་འདུན་གྱིས་དགེ་སློང་འཕྱ་བའི་གྲངས་སུ་བཅུག་ཀྱང་དགེ་སློང་དེ་གང་ཟག་བཅུ་གཉིས་ཀྱི་ལས་བྱེད་པ་ལ་འཕྱའམ་གཞོགས་འཕྱས་བྱེད་ན་ལྟུང་བར་རེ་རེར་འགྱུར་རོ། །ལས་ཀྱི་གྲངས་སུ་བཅུག་ཀྱང་དགེ་སློང་གང་ཟག་བཅུ་གཉིས་ཀྱི་ལས་སུ་བསྐོས་པ་ལས་མི་བྱེད་པ་རྣམས་ལ་འཕྱ་ན་ལྟུང་བར་འགྱུར་རོ། །དགེ་འདུན་གྱིས་འཕྱ་བའི་གྲངས་སུ་བཅུག་ཀྱང་དགེ་སློང་གང་ཟག་བཅུ་གཉིས་ཀྱི་ལས་སུ་མ་བསྐོས་ལ་ལས་བྱེད་པ་རྣམས་ལ་འཕྱ་ན་ལྟུང་བར་འགྱུར་རོ། །དགེ་སློང་དེ་འཕྱ་བའི་གྲངས་སུ་མ་བཅུག་ན་དགེ་སློང་ལས་བྱེད་ཀྱང་རུང་མི་བྱེད་པ་རྣམས་ལ་འཕྱ་ན་ཐམས་ཅད་དུ་ལྟུང་བར་འགྱུར་རོ། །བསྒོ་བའི་ལན་ལོག་པར་འདོན་པའི་གླེང་གཞི་ནི་ཀཽ་ཤཱམྦཱིའི་དགྲ་ཟིན་གྱི་ཀུན་དགའ་ར་བ་ནའོ། །དེའི་ཚེ་ན་ཚེ་དང་ལྡན་པ་མོས་པ་ཅན་ལ་ལྟུང་བ་བྱུང་ནས་ཆོས་བཞིན་དུ་སླར་མི་བྱེད་པས་ན། དགེ་སློང་ཕན་པར་འདོད་པ་བདེ་བར་འདོད་པ་དག་གིས་ཚེ་དང་ལྡན་པ་ལྟུང་བ་སླར་ཤོགས་ཤིག་ཅེས་བྱས་ན།
ལྟུང་བ་སུ་ལ་བྱུང་བ་དེ་འཆགས་གྲངས་ངས་ནི་ལྟུང་བ་མཐོང་ངོ༌། །ཁྱེད་ཀྱིས་མཐོང་བས་ན་ཁྱེད་ལ་ལྟུང་བ་བྱུང་གྲང༌། ངེད་ཀྱི་རིགས་ལས་ནི་བྱང་ཆུབ་ཐོབ་པ་ཡོད་ཀྱི། ཁྱེད་ཀྱི་རིགས་ཐ་དད་པ་ལས་རབ་ཏུ་བྱུང་བས་ན་ཁྱེད་ལ་ནི་བྱང་ཆུབ་ཐོབ་པ་སུ་ཡོད་དེས་རློམ་ཞིང་ལན་ལོག་པར་ལྡོན་པས་ན་གསོལ་བ་དང་ལས་གཉིས་ཀྱིས་བསྒོ་བའི་ལན་ལོག་པར་ལྡོན་པའི་གྲངས་སུ་བཅུག་གོ །དེ་ནས་ཀྱང་ངས་ནི་སྨྲས་པས་ཉམས་པ་ལྔ་སྟེ། དཔེར་ན་ནགས་ཀྱི་བྱ་ཡང་རང་གི་སྐད་ཕྱུང་བས་ཚིག་ཟིན་པ་དང་འདྲ་སྟེ། ད་སླན་ཆད་སུ་ཅི་ཟེར་ཡང་མི་སྨྲའོ་ཞེས་ཟེར་ནས་གཞན་ཚངས་པར་སྤྱོད་པ་ཕན་པ་དང་བདེ་བར་འདོད་པ་རྣམས་ཀྱིས་ལྟུང་བར་བཤོགས་ཤིག་ཅེས་ཕྱི་ཕྱིར་གླེངས་ན་བདག་ཉིད་མི་སྨྲ་བས་ན་ལན་མི་ལྡོན་པའི་གྲངས་སུ་བཅུག་གོ །འོན་ཀྱང་ཕྱི་ཕྱིར་མི་སྨྲ་བ་དང༌། ལོག་པར་ལན་ལྡོན་པ་གཉིས་བྱེད་བྱེད་པས་སྙན་དུ་བདས་ཏེ། ལན་ལོག་པར་ལྡོན་དུ་མི་གནང་བར་འདུལ་བ་ལ་བསླབ་པ་བཅས་སོ། །བསྒོ་བའི་ལེན་ལོག་པར་ལྡོན་ཞེས་བྱ་བ་ནི་བསྒོ་བའི་ལེན་ལོག་པར་གླན་པར་བསམས་ནས་གཞན་ལ་ཚིག་གིས་རིག་པར་བྱེད་པའོ། །ཉེས་པ་ནི་དགེ་སློང་རབ་ཏུ་བྱུང་བའོ་ཞེས་དྲིས་པ་དང་རབ་ཏུ་མ་བྱུང་བའོ་ཞེས་ཟེར་ན་ལྟུང་བའོ་དགེ་སློང་ལྟུང་བཟེད་ཐོགས་པ་དག་མཐོང་ངམ་ཞེས་ཟེར་བ་ལས་རྐང་པས་འགྲོ་བ་མཐོང་ངམ་ཞེས་ཟེར་ན་ལྟུང་བར་འགྱུར་རོ། །བུ་རམ་ཤིང་དང་རྩ་ཁུར་ཁྱེར་བ་མཐོང་ངམ་ཞེས་དྲིས་ན་གཞན་དུ་བརྒྱུད་ན་ཡང་ལྟུང་བར་འགྱུར་རོ། །གཤེད་མས་གསོང་བར་ཁྲིད་པ་ལ་སྙིང་རྗེའི་བསམ་པས་འདུས་བྱས་བདག་མེད་པར་བསམས་ནས་མ་མཐོང་ངོ་ཞེས་སྨྲས་བ་ནི་ཉེས་པ་མེད་དོ། །དགེ་འདུན་གྱི་ཁྲི་བླ་གབ་མེད་པ་ན་གདིང་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་རྣམས་ཀྱིས་བླ་གབ་མེད་པ་ལ་དགེ་འདུན་གྱི་ཁྲི་དང་མལ་སྟན་རྣམས་བཏིང་སྟེ་བཞག་པ་དེ་མ་བསྡུས་པར་ཁྱིམ་བདག་གཅིག་གིས་དགེ་སློང་རྣམས་སྤྱན་དྲངས་ན་བཅོམ་ལྡན་འདས་ནི་མལ་སྟན་ཉུལ་བར་བཞེད་ནས་དེར་མ་གཤེགས་ཏེ་དགེ་སློང་དག་གདོང་བའི་འོག་ཏུ་སྤྲིན་ཁ་དོག་ཐ་དད་པ་འདུས་ཤིང་ཆར་རབ་ཏུ་ཉེ་བས་མལ་སྟན་བྱུལ་བ་དང༌། ཀྱེ་མའོ་ཡོན་བདག་དད་པ་ནི་ཤ་ཁྲག་ཟད་ཟད་དུ་སྦྱོར་ཞིང་སྦྱིན་ན་དགེ་སློང་རྣམས་ནི་ཚོད་མི་ཟིན་པར་སྤྱོད་དོ་ཞེས་ནས། མལ་སྟན་དང་ཁྲི་རྣམས་བཅོམ་ལྡན་འདས་ཕྱག་དར་ཏེ་ནང་དུ་བསྡུས་སོ། །ཕྱིས་དགེ་སློང་དག་ལྷགས་པ་དང༌།
སླན་ཆད་མལ་སྟན་མ་བསྡུས་པར་གྲོང་དུ་འགྲོར་མི་གནང་བར་བསླབ་པ་བཅས་སོ། །དགེ་འདུན་ཞེས་བྱ་བ་ནི་ཕྱོགས་བཞིའི་དགེ་འདུན་ནོ། །ཁྲི་འམ་ཁྲིའུ་ཞེས་བྱ་བ་ནི་དངོས་སུ་ཟད་དོ། །སྟན་ནང་ཚངས་ཅན་ནི་ཤིང་བལ་གྱིས་བཀང་བའོ། །གོར་བུ་ཞེས་བྱ་བ་ནི་ཁྲིའུ་གཡོགས་པའོ། །བླ་གབ་མེད་པ་ཞེས་བྱ་བ་ནི་སྟེང་མ་གཡོགས་པའོ། །གདིང་ངམ་ཞེས་བྱ་ནི་བདག་གིས་སོ། །གདིང་དུ་བཅུག་ཅེས་བྱ་བ་ནི་གཞན་ལའོ། །མ་བརྟུལ་ཞེས་བྱ་བ་ནི་བདག་གིས་སོ། །བརྟུལ་དུ་མ་བཅུག་ཅེས་བྱ་བ་ནི་གཞན་ལའོ། །དེ་ནས་སོང་ཞེས་བྱ་བ་ནི་ཉེ་འཁོར་ལས་སོང་བའོ། །དེ་འདྲའི་རྐྱེན་མ་གཏོགས་ཞེས་བྱ་བ་ནི་ཁྱིམ་པ་གཉིས་ཤིག་ཁོ་ན་ཡོད་པ་ལས་མཐུ་ཆུང་བ་དེ་རབ་ཏུ་བྱུང་སྟེ་ལྗོངས་རྒྱུ་ཞིང་བྲོས་ཏེ་སོང་བ་ལས་ནུབ་མོ་ལྷ་ཁང་ཞིག་ཏུ་དགོངས་དེར་མལ་སྟན་དག་བརྙས་ནས་ཉལ་ལོ། །ནང་པར་བདག་ནི་འགྲོ་ཞེས་མལ་སྟན་དག་གཏད་པ་ལས་རིང་དུ་ཐོགས་ནས། ཁྱིམ་བདག་དེས་བསྙགས་པས་སླེབ་པ་དང་བརྡེགས་པ་སྙན་དུ་བདས་ཏེ་དེ་ལྟ་བུའི་ཉེས་པ་བྱུང་བ་དང་བར་ཆད་ཆེན་པོ་བརྒྱད་ལ་སོགས་པ་བྱུང་ན་མ་བརྟུལ་བར་སོང་ཡང་ཉེས་མེད་ཅེའོ། །མལ་སྟན་མ་རུང་བར་གྱུར་པ་རྣམ་པ་གཉིས་ཏེ། རླུང་དང་ཆར་དང་ཉི་མའོ། །དགེ་སློང་གིས་གང་ཟག་ལྔ་ལ་སྟན་བཅོལ་བར་མི་བྱ་སྟེ། ངོ་ཚ་མེད་པ་དང་ཁོ་ན་ཡོད་པ་དང༌། རྒས་པ་དང་ནད་པ་དང༌། བསྙེན་པར་མ་རྫོགས་པ་ཐམས་ཅད་ལའོ། །གདིང་བ་མ་བསྡུས་པར་འགྲོ་བའི་གླེང་གཞི་ནི་མཉན་དུ་ཡོད་པ་ན་སྟེ། ལྷོ་ཕྱོགས་ནས་དགེ་སློང་གཉིས་ཤིག་བཅོམ་ལྡན་འདས་ཀྱི་ཞབས་ལ་ཕྱག་འཚལ་དུ་འགྲོ་བ་མཉན་དུ་ཡོད་པར་ཕྱིན་ཏེ། དེར་དགེ་རྒན་པོ་ནི་མལ་སྟན་དང་གནས་ཁང་ཡང་ཐོབ་པོ། །དགེ་སློང་གསར་བུ་ནི་མལ་སྟན་འགྱེད་པའི་ཚེ་མ་ཐོབ་ནས་གཞོན་ནུ་དེ་ཡང་ནུས་པ་ཞིག་པས་རྩྭ་བརྔས་ཏེ། པུས་མོ་ཙམ་ནུབ་པར་བྱས་ཏེ་ཉལ་ལོ། །རྒན་པོས་ཀྱང་རྩ་བཏིང་ངོ༌། །དེ་གཉིས་ཀས་རྩྭ་མ་བསྡུས། དགེ་སློང་གྲོགས་པོ་ལ་ཡང་མ་བཅོལ་བར་དོང་བའི་འོག་ཏུ་དགེ་སློང་དག་ནི་ཁྱིམ་བདག་དག་གི་སྟེང་དུ་མགྲོན་དུ་གཉེར་ཏོ། །བཅོམ་ལྡན་འདས་ནི་མལ་སྟན་ཉུལ་བར་བཞེད་ནས་བཤོས་གཙུག་ལག་ཁང་དུ་འདྲེན་ཏོ། །གནས་ཁང་དེ་ཡང་ཚན་ཡོད་ཅིང་ས་སྙི་བས་རྩྭ་དེ་ལ་སྲིན་བུ་ཞུགས་ནས་ཁང་པ་ཕྱིན་ནང་དུ་སྲིན་བུས་གང་སྟེ་མ་རུང་བར་གྱུར་ཏོ། །དེ་ནས་བཅོམ་ལྡན་འདས་ཀྱིས་
ཕྱག་དར་ཏེ་རྩྭ་དེ་བསྡུས་ནས་དགེ་འདུན་ཀུན་བསོགས་ཏེ། ད་སླན་ཆད་རྩྭ་བཏིང་བ་མ་བརྟུལ་ཏམ་བརྟུལ་ཏུ་མ་བཅུག་པར་འགྲོར་མི་གནང་བར་བསླབ་པ་བཅས་སོ། །རྐྱེན་མ་གཏོགས་ཞེས་བྱ་བ་ནི་དེ་ནས་སླད་ཀྱིས་དགེ་སློང་མ་ཞིག་འགྲོ་བ་མང་པོ་དང་ལྗོངས་རྒྱུ་ཞིང་དོང་བ་ལས་ནུབ་མོ་གཙུག་ལག་ཁང་ཞིག་ཏུ་ཕྱིན་ནས་རྩྭ་མང་ཞིག་བསྡུས་ནས་བཏིང་སྟེ་ཉལ་ལོ། །དེ་དག་ནང་པར་རྩྭ་སྡུད་ཅིང་འཁོད་པ་ལས་རིང་དུ་ཐོགས་ནས་འགྲོན་པ་མང་པོ་དང་བྲལ་ཏེ་ལམ་དུ་རྐུན་པོས་བཅོམ་པ་སྙན་དུ་བདས་ཏེ། སྔ་མ་ནི་བཅས་པའོ། །འདི་ནི་གནང་བའོ་ཞེས་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་རྒན་གཞོན་གཉིས་ཏེ། གཞན་ཡང་དེ་དང་འདྲ་བའོ། །དགེ་འདུན་ཞེས་བྱ་བ་ནི་ཉན་ཐོས་ཀྱི་དགེ་འདུན་ནོ། །གནས་ཁང་ནི་གང་ན་སྤྱོད་ལམ་བཞི་དང་ལྡན་པ་སྟེ། འགྲོ་བ་དང་འགྲེང་བ་དང༌། འདུག་པ་དང༌། ཉལ་བ་དང་ལྡན་པའོ། །རྩྭ་དང་ལོ་མ་ཞེས་བྱ་བ་ནི་དངོས་སུ་ཟད་དོ། །གདིང་མ་འདིང་དུ་བཅུག་གམ་ཞེས་བྱ་བ་ནི་བདག་དང་གཞན་གྱིས་སོ། །མ་བརྟུལ་ཏམ་བརྟུལ་ཏུ་མ་བཅོལ་ཞེས་བྱ་བ་ནི་བདག་དང་གཞན་ལའོ། །སོང་ཞེས་བྱ་བ་ནི་ཉེ་འཁོར་ལས་འདས་པའོ། །དགེ་འདུན་ལམ་བཅོལ་ཞེས་བྱ་བ་ནི་ཉེ་འཁོར་ན་ཡོད་པའི་དགེ་སློང་ལའོ། །ཉེས་པ་ནི་བདག་གིས་མ་བསྡུས་སམ་བསྡུར་མ་བཅོལ་བར་སོང་ན་ཉེ་འཁོར་ལས་མ་འདས་ཀྱི་བར་དུ་ཉེས་བྱས་སོ། །འདས་ན་ལྟུང་བར་འགྱུར་རོ། །དགེ་སློང་སྐྲོད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཚེ་དང་ལྡན་པ་འཆར་བས་དགེ་སློང་གཞན་དག་གི་སློབ་མ་གསར་བུ་རྣམས་སྤྲོ་བར་བྱས་ཏེ། ཁ་དྲངས་ནས་བདག་ཅག་ལྗངས་རྒྱུ་ཞིང་བདག་ཅག་གིས་གྲགས་པ་ནི་བསྒྲགས། །རྒོལ་བ་ནི་ཚར་བཅད། རྙེད་པ་ནི་སྒྲུབ་པོ། །ཁྱེད་ལ་ཡང་ལུང་དཔོག་པ་དང་ཀློག་པས་མི་བྲལ་བར་བྱའོ་ཞེས་བསྒོ་བ་དང༌། དེ་དག་སོ་སོའི་མི་མཁན་པོ་དང་སློབ་དཔོན་ལ་གསོལ་ཏེ་བཀག་ཀྱང་མ་བཏུབ་ནས་འཆར་བའི་ཕྱི་བཞིན་དུ་དོང་ངོ༌། །དེ་དག་ཀྱང་ཉེ་འཁོར་ལས་འདས་པ་དང་ཡོ་བྱད་སྣ་རེ་རེ་བསྐུར་ཏེ་དོང་བ་དང༌། འཆར་བ་ནི་ལམ་དུ་ཁྱིམ་བདག་དང་གཏམ་བྱེད་ཅིང་འདུག་པ་དང༌། ལྷ་ཁང་ཞིག་ཏུ་གཎྜཱི་བརྡུངས་ཏེ་འཆར་བ་ལ་འདོང་ཞེས་བྱས་ན་དེ་ནི་ལས་ཀྱི་གཎྜཱི་ཞིག་གིས་བདག་ཅག་ངལ་བསོས་ལ་དོང་ངོ༌། །སྔར་དོང་དུ་ཟིན་གྱིས་ཀྱང་ཁོང་གིས་ལས་བྱེད་དུ་བཅུག་
ཏུ་འོང་ངོ་ཞེས་སྨྲས་པ་དང༌། སློབ་དཔོན་འདི་ནི་རྙེད་པའི་གཎྜཱི་ཞིག་ཀྱང་སྲིད་ཀྱིས་འདོང་ཞེས་བྱས་ན་ཁྱེད་སྔར་དེང་ལ་ངའི་སྐལ་བ་ཡང་ནོས་ཤིག་ཅེས་བྱས་ནས་སྔར་དོང་ངོ༌། །འཆར་བ་ནི་ཕྱི་ན་གཏམ་ལ་གཡེངས་ཏེ་སློབ་མ་དག་གིས་སྟན་དང་གནས་མནོས་ཏེ་བསྡད་ན་ནམ་སྲོས་ཀྱང་རིང་ཞིག་ཏུ་མ་འོངས་ནས་སྒོ་བཅད་པའི་འོག་ཏུ་འོངས་ཏེ་འབོད་ནས་ནང་དུ་འོངས་ཏེ། སློབ་དཔོན་ཀུན་སྟ་གོན་བགྱིས་ལགས་ཀྱིས་གཟིམས་ཞེས་བྱས་པ་དང༌། ཁྱེད་ཅག་སུ་ཞིག་ལ་ཞུས་ཏེ་ཉལ། བདག་ཅག་ནི་སློབ་དཔོན་རིང་དུ་མ་བྱོན་ནས་གཅིག་ལ་གཅིག་ཞུས་ཏེ་ཉལ་ལོ། །ཞེས་སྨྲས་པ་དང༌། དེ་ཁྲོས་ཏེ་རིམ་གྲོ་མེད་པ་ཁྱེད་ལ་ལུང་མི་སྦྱིན་གྱིས་ཕྱིར་དེང་ཤིག་ཅེས་སློབ་མ་རྣམས་མཚན་མོ་ཕྱི་རོལ་ཏུ་ལྷགས་པ་ལ་གཞུག་གོ །དེ་ནས་ཕྱི་དེ་ཉིན་སློབ་མ་རྣམས་ཀྱིས་བདག་ཅག་ཕྱི་ཕྱག་འཚལ་ཏེ་མཆིའོ་ཞེས་སྨྲས་པ་དང༌། ཁྱེད་མ་འདོང་བར་འདུག་ཤིག་དང༌། ཁྱེད་ནན་ཡང་ངས་ནད་གཡོག་བྱའོ་ཞེས་བྱས་ན། བདག་ཅག་ནད་མེད་པ་ལས་ཀྱང་ནད་ཡོད་པར་བྱས་ན་ད་ནི་མི་ན་རེའོ། །ཞེས་ནས་མ་བཏུབ་པར་མཉན་དུ་ཡོད་པར་དོང་སྟེ་ལྷགས་པ་དང༌། དགེ་སློང་དག་གིས་དེ་དག་ལ་བདེ་བར་འོངས་སམ་ཞེས་བྱས་ན། དེ་ལྟར་གྱུར་པ་ཞིབ་ཏུ་དགེ་སློང་དག་ལ་བྱས་པ་སྙན་དུ་བདས་པ་དང༌། ཕྱིས་འཆར་བ་ཉིད་སླར་འཁོར་བ་ལ་རྨས་ནས་སྐྲོད་དུ་མི་གནང་བར་བསླབ་པ་བཅས་སོ། །དེ་འདྲ་བའི་རྐྱེན་མ་གཏོགས་ཞེས་བྱ་བ་ནི་མཉན་དུ་ཡོད་པ་ནས་ཕུག་གི་གཙུག་ལག་ཁང་ཞིག་ན་དགེ་སློང་མང་ཞིག་འཁོད་པ་ལས་སྤྲིན་ཁ་དོག་ལྔ་པ་འདུས་ཏེ་ཆར་བབ་ཏུ་ཉེ་ནས་དགེ་སློང་གཞན་ནི་རྡིབ་ཀྱིས་དོགས་ཏེ་ཕྱུང་ངོ༌། །ནད་པ་གཅིག་རང་འབྱུང་མ་ནུས་ཏེ། ཆར་གྱིས་ས་གས་རྡིབ་ནས་དུས་ལས་འདས་ཏེ་དེ་ལྟ་བུའི་རྐྱེན་ཞིག་གིས་མ་དད་བཞིན་དུ་ཕྱི་རོལ་དུ་ཕྱུང་ཞིང་བསྐྲད་པ་ནི་ཉེས་པ་མེད་དོ་ཞེས་གནང་ངོ༌། །དགེ་སློང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་བའོ། །ཁྲོས་འཁྲུགས་ཞེས་བྱ་བ་ནི་ཁྲོས་པའི་ཟིལ་གྱིས་ནོན་པའོ། །གཙུག་ལག་ཁང་ངམ་གནས་ཁང་ཞེས་བྱ་བ་ནི་སྤྱོད་ལམ་བཞིར་ལྡན་པ་སྟེ་སྔ་མ་བཞིན་ནོ། །སྐྲོད་དམ་སྐྲོད་དུ་བཅུག་ཅེས་བྱ་བ་ནི་བདག་དང་གཞན་གྱིས་སོ། །རྐྱེན་ཅེས་བྱ་བ་ནི་བཀལ་བའོ། །དགེ་སློང་སྔ་ན་གནས་ཤིང་འཁོད་པ་ལ་ཕྱིས་འོངས་ཤིང་གནོན་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་འཆར་བས་གཞན་གྱི་སློབ་
མ་ལ་དྲངས་ཏེ་ལྗོངས་རྒྱུ་ཞིང་དོང་བ་ལས་གཙུག་ལག་ཁང་གཞན་ཞིག་ཏུ་གཎྜཱི་བརྡུངས་པ་ལ་སོགས་པའི་གཏམ་བརྒྱུད་ནི་གོང་མ་བཞིན་དུ་སྦྱར་རོ། །བྱེ་བྲག་ནི་འཆར་བས་ཐབས་ཀྱིས་སྒོ་ཕྱེ་སྟེ་ནང་བུ་འོངས་པས་སློབ་མ་ཉལ་བའི་སྟེང་དུ་མནན་ཅིང་བརྫིས་པ་དང༌། དེ་དག་ཤིར་དོགས་ནས་ཕྱིར་ཕྱུང་སྟེ་མཚན་ཐོག་ཐག་ཕྱིར་རོལ་ན་ཉལ་བར་གྲང་བས་ཉེན་ནས་ནང་པར་བདག་ཅག་མཆིའོ་ཞེས་ཕྱི་ཕྱག་འཚལ་ནས་མཉན་དུ་ཡོད་པར་ཕྱིན་ཏེ་དགེ་སློང་རྣམས་ལ་སྨྲས་ནས་སྙན་དུ་བདས་ནས་ཕྱིས་གནོན་དུ་མི་གནང་བར་བཅས་སོ། །ཡང་དགེ་སློང་གང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་བའོ། །ཤེས་བཞིན་དུ་ཞེས་བྱ་བ་ནི་བདག་གིས་སམ་གཞན་གྱིས་བདག་རིམ་པར་བྱས་པའོ། །གཙུག་ལག་ཁང་ཞེས་བྱ་བ་ནི་སྤྱོད་ལམ་བཞི་དང་ལྡན་པའོ། །སྔ་ན་འཁོད་ཅེས་བྱ་བ་ནི་སྔ་ན་གནས་པའོ། །གནོད་པར་བྱེད་ཅེས་བྱ་བ་ནི་མི་བདེ་བར་བྱས་པའོ། །འདི་འགྲོ་ཞེས་བྱ་བ་ནི་གཞན་མ་ཡིན་པར་དེ་ཉིད་ཀྱིས་བྱས་པའོ། །ཅི་ཙམ་དུ་དགེ་སློང་གིས་སུ་ལ་གནོད་པ་དེ་འགྲོ་བར་འགྱུར་བའི་རྐྱེན་དེ་ཉིད་ཀྱིས་དགེ་འདུན་གྱི་གཙུག་ལག་ཁང་ན་དགེ་སློང་སྔ་ན་འཁོད་པར་ཤེས་བཞིན་དུ་ཕྱིས་འོངས་ཏེ་ཉལ་ལམ་འདུག་ན་ལྟུང་བར་འགྱུར་རོ། །གནོད་པར་བྱའོ་སྙམ་ནས་ཆེད་དུ་བསམས་ཏེ་གནོད་པའི་བག་བྱས་ན་ཅིའི་སྒོ་ནས་ཀྱང་རུང་སྟེ་ཐམས་ཅད་དུ་ལྟུང་བར་འགྱུར་རོ། །ཁྲིའི་རྩ་བ་བྱུང་བ་སླ་བ་སྟེང་གི་ཡང་ཐོག་ཏུ་བཞག་ནས་ལྕིད་ཀྱིས་ཕབ་སྟེ་འདུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། འཆར་བ་པོས་སྔན་ཆད་གཞན་གྱི་སློབ་མ་རྣམས་ཁ་དྲངས་ཤིང་གཙེས་པས་སླད་ཀྱིས་ཚེ་དང་ལྡན་པ་བསྙེན་དགའ་བོ་ལྗོངས་རྒྱུ་ཞིང་འགྲོ་བར་དད་དེ་གཞན་གྱི་སློབ་མ་རྣམས་ཁ་དྲངས་ན་གཅིག་ཀྱང་མ་བཏུབ་ནས་བསྙེན་དགའ་བོས་བསོད་སྙོམས་པ་རྒན་ཞུགས་ཞིག་དང་འགྲོ་བར་བྱས་ནས། བསོད་སྙོམས་པས་ཀྱང་བསྙེན་དགའ་བོ་གནས་ངན་ལེན་ཀུན་དུ་སྤྱོད་པར་གྲགས་མོད་ཀྱི། བདག་གནས་འཆའ་ཞིང་ལུང་དཔོག་མི་དགོས་ཏེ་དེས་བྱར་ཅི་ཡོད་སྙམ་དུ་བསམས་སོ། །བསྙེན་དགའ་བོས་བདག་ཅག་གཉིས་ཀྱི་ཐོས་པ་ནི་བསྒྲགས་རྙེད་པ་ནི་བསྒྲུབས། རྒོལ་བ་ནི་ཚར་བཅད་དུ་འདོང་ངོ་ཞེས་ནས་དེ་གཉིས་ཀྱང་འགྲོགས་ཏེ་དོང་ནས་ཉེ་འཁོར་ལས་འདས་པ་དང་བསྙེན་དགའ་བོས་རྒན་པོ་ལ་གནས་འཆར་གཞུག་ཅིང་ཡོ་བྱད་དག་བསྐུར་བར་བྱས་ན་མ་བཏུབ་སྟེ་བདག་ནི་གནས་
དབེན་པ་འཆའོ། །ཡོ་བྱད་འཆང་བ་ནི་སྟོན་པས་སྨད་ལ། བདེན་པ་མཐོང་བ་ལ་སྒྲིབ་པས་མི་བསྐུར་རོ་ཞེས་མ་བཏུབ་པ་དང༌། མི་བསྐུར་བ་ནི་རིགས་ན་ཁྱོད་ཀྱིས་ངལ་གཤེར་ཅི་ཡོད་ཅེས་བསྙེན་དགའ་བོ་ཡང་ཁྲོས་སོ། །དེ་ནས་བསྙེན་དགའ་བོ་ཡང་ལམ་ན་མི་འཕྲད་དོ་ཅོག་དང་གཏམ་ཟླ་ཡོད་ཀྱི་བར་དུ་འཁྱལ་ཞིང་འདུག་གོ །དེ་ནས་གཙུག་ལག་ཁང་དུ་ཕྱིན་དུ་ཉེ་སྟེ་གཎྜཱི་བརྡུངས་པ་དང༌། གཏམ་སྣ་ཚོགས་ལ་དགའ་བ་ནི་སྟོན་པས་སྨད་པ་ཡིན་གྱིས་གཎྜཱི་བརྡུངས་པ་ཡང་རྙེད་པའི་གཎྜཱི་སྲིད་ན་འདོང་ངོ་ཞེས་བྱས་ན་དེ་ནི་ལས་ཀྱི་གཎྜཱི་ཏེ། བདག་ཅག་ངལ་གྱི་སྟེང་དུ་ལས་ཀྱིས་བསྣན་དུ་འོང་ངོ༌། །ཞེས་མ་བཏུབ་ནས་བསོད་སྙོམས་པ་སྔར་སོང་བ་ལས་བསྙེན་དགའ་བོའི་གནས་དང་མལ་ཆ་ཡང་ནོད་དུ་བཅོལ་ལོ། །དེས་ཀྱང་བསྙེན་དགའ་བོའི་གནས་ནི་ཡང་ཐོག་ཏུ་མནོས། བདག་གི་འོག་ཏུ་མནོས་ནས། རིང་ཞིག་བསྡད་ཀྱང་མ་འོངས་ནས་སྒོ་བཅད་དེ་ཉལ་ལོ། །དེ་ཡང་ནམ་སྲོས་ནས་འབོད་བཞིན་དུ་ཐབས་ཀྱིས་སྒོ་ཕྱེ་སྟེ་རྒན་ཞུགས་ལ་མལ་གར་བྱས་ཞེས་དྲིས་ནས་དེ་ཡང་རང་གི་གནས་སུ་སོང་ངོ༌། །དེ་ཡང་རྒན་ཞུགས་ལ་གནོད་པར་བསམས་ནས་ཡང་ཐོག་ནས་རྒན་ཞུགས་ལ་བོས་པ་དང་དེ་གང་ན་ཟེར་བའི་ཐ་དཀར་ཁྲིའི་རྩ་བ་གཟེར་བུ་མེད་པ་འབྱུང་སླ་བའི་སྟེང་དུ་ལྕིད་ཀྱིས་དྲག་ཏུ་ཕབ་སྟེ་འདུག་པས་ཁྲིའི་རྩ་བ་ལྟུང་ནས་རྒན་པོའི་འཕྲལ་པ་ལ་ཕོག་སྟེ། །གནད་ནས་ནད་པར་ཕྱི་ཕྱག་འཚལ་ཏེ་སོང་ནས་ཕྱིར་ཕྱིན་པ་དང༌། དེ་ལྟར་གྱུར་པ་དགེ་སློང་དག་ལ་བྱས་པ་སྙན་དུ་བདས་ནས་ཁྲི་རྩ་བ་འབྱུང་སླ་བ་ལ་འདུག་ཏུ་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་ཉེས་པ་དེ་དང་འདྲ་བའོ། །དགེ་འདུན་དང་གཙུག་ལག་ཁང་ནི་སྔ་མ་བཞིན་ནོ། །ལྕིད་ཀྱིས་ཕབ་པ་ནི་རྐུབ་ཀྱིས་བཙིར་བའོ། །ཉལ་ཞེས་བྱ་བ་ནི་ལུས་ཀྱིས་འཕྲེས་པའོ། །ལྟུང་བ་ནི་སྔ་མ་བཞིན་ནོ། །དགེ་སློང་གིས་ཅི་ཙམ་དུ་གཙུག་ལག་ཁང་གི་ཁང་བུར་ཁྲིའམ་ཁྲིའུ་རྩ་བ་འབྱུང་སླ་བར་ཤེས་བཞིན་དུ་ལུས་ཀྱི་ལྕིད་ཀྱིས་ཕབ་སྟེ་འདུག་ན་ཐམས་ཅད་དུ་ལྟུང་བར་འགྱུར་རོ། །སྤང་ལེབ་ཀྱིས་གཡོགས་པའམ། །ཕ་གུས་གཡོགས་པ་དང་ཁྲིའི་འོག་ཏུ་རྐང་རྟེན་བཅུག་པ་དང༌། ཁྲི་བཀན་ཏེ་འདུག་པ་ལ་ལྕིད་ཀྱིས་ཕབ་ཀྱང་ཉེས་པ་མེད་དོ། །སྲོག་ཆགས་དང་བཅས་པའི་ཆུ་འདེབས་སུ་མི་གནང་བའི་གླེང་གཞི་ནི་
ཀཽ་ཤཱམྦཱིའི་དགྲ་ཟིན་གྱི་ཀུན་དགའ་ར་བ་ན་སྟེ། དེའི་ཚེ་ན་ཚེ་དང་ལྡན་པ་མོས་པ་ཅན་གྱིས་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩྭ་དང་ལྕི་བ་དང་ས་ལ་ཆག་ཆག་འདེབས་ཤིང་འདེབས་སུ་བཅུག་པ་དང༌། དེ་ལ་དགེ་སློང་དག་གིས་ཚེ་དང་ལྡན་པ་མོས་བ་ཅན་དེ་ལྟར་མ་བྱེད་ཅིག་ཅེས་བསྒོ་བ་དང་ལ་ནི་སུས་ཀྱང་གྲངས་ཀྱིས་མ་གཏད་ན། ཁོང་ཉིད་ལྷོ་དང་བྱང་དང་ནུབ་ཀྱི་རྒྱ་མཚོ་དང་ལྟེང་ཀ་དག་ཏུ་དོང་ན་ཅི་ཉེས་ཞེས་ཟེར་བ་དགེ་སློང་དག་འཕྱ་ནས་སྙན་དུ་བདས་ཏེ། དགེ་སྦྱོང་གི་བྱ་བ་མ་ཡིན་ནོ། །ཞེས་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་མོས་པ་ཅན་ཏེ། གཞན་ཡང་དེ་དང་འདྲ་བའོ། །ཤེས་བཞིན་ཞེས་བྱ་བ་ནི་སེམས་ཅན་ཡོད་པར་བདག་གམ་གཞན་གྱིས་བསྒོ་བའོ། །སྲོག་ཆགས་ཞེས་བྱ་བ་ནི་རྣམ་པ་གཉིས་ཏེ་མིག་གིས་སོད་པ་དང་ཆུ་ཚགས་ལ་ཆགས་པའོ། །ཆུ་དང་རྩྭ་ཞེས་བྱ་བ་ལ་སོགས་པ་ནི་ཆུས་སྤྱད་པར་བྱ་བའི་གནས་ཐམས་ཅད་ལ་བྱའོ། །འདེབས་སམ་འདེབས་སུ་གཞུག་ཅེས་བྱ་བ་ནི་བདག་གིས་སམ་གཞན་ལ་འདེབས་སུ་བཅུག་པའོ། །ཉེས་པ་ནི་སྲོག་ཆགས་ཡོད་པའི་ཆུ་ལ་སྲོག་ཆགས་ཡོད་པར་འདུ་ཤེས་སམ་ཐེ་ཚོམ་བཞིན་དུ་འདེབས་སམ་སྤྱོད་ན་ལྟུང་བ་རེ་རེར་འགྱུར་རོ། །སྲོག་ཆགས་མེད་པ་ལ་ཡོད་པར་འདུ་ཤེས་སམ་ཐེ་ཙོམ་ན་ཉེས་བྱས་རེ་རེར་འགྱུར་རོ། །སྲོག་ཆགས་ཡོད་པའི་ཡུར་བའི་ཆུ་ཁ་བསྒྱུར་ན་སེམས་ཅན་ཇི་སྙེད་ཡོད་པ་ཤི་ན་ལྟུང་བ་ཡང་དེ་སྙེད་དུ་འགྱུར་རོ། །མ་ཤི་ན་ཉེས་བྱས་རེ་རེར་འགྱུར་རོ། །ཆུ་ལ་ཇི་ལྟ་བ་བཞིན་དུ་ས་དང་རྩྭ་དང་སྲོག་ཆགས་དང་ལྡན་པ་ལ་ཡང་དེ་བཞིན་དུ་སྦྱར་རོ། །གཙུག་ལག་ཁང་རིམ་པ་གཉིས་ལས་རྩིག་ཏུ་མི་གནང་བའི་གླེང་གཞི་ནི་ཀཽ་ཤཱམྦཱིའི་དགྲ་ཟིན་གྱི་ཀུན་དགའ་ར་བ་ན་སྟེ། དེའི་ཚེ་དགེ་སློང་དྲུག་སྡེ་རྣམས་གཞན་གྱིས་བརྩིགས་པའི་ཁང་པ་ལ་འཕྱ་བ་ལ་ཞུགས་པ་དང༌། དེ་ན་དགེ་སློང་གནས་པ་རྣམས་ཀྱིས་ཁྱེད་ཉིད་རྡོ་གཅིག་བསྒྲེང་ཡང་མི་ནུས་པར་གཞན་གྱིས་བརྩིགས་པའི་ཁང་པ་ལ་འཕྱ་བའི་རིགས་སམ་ཞེས་བྱས་པ་དང༌། དེ་དག་ཀྱང་མོས་པ་ཅན་སྤྲོ་བར་བྱས་ནས་མོས་པ་ཅན་གྱིས་ཀཽ་ཤཱམྦཱི་ན་ཁྱིམ་བདག་སེར་སྣ་ཅན་ཕྱུག་པོ་ཞིག་འདུག་པ་བཏུལ་ནས་གཙུག་ལག་ཁང་རྩིག་པའི་ནོར་སྦྱར་ནས་གླ་ཅན་ཀུན་བསོགས་ཏེ། གཙུག་ལག་ཁང་ཟླུམ་པོ་སྟོར་ཁུང་ལ་སོགས་པ་མ་བཏོད་པ་ཅིག་ཉིན་གཅིག་
གིས་ཟིན་པར་བརྩིགས་སོ། །རྒྱས་པར་ལྷག་མའི་སྐབས་སུ་གཙུག་ལག་ཁང་གི་གླེང་གཞི་བཞིན་དུ་རྒྱས་པར་སྦྱོར་ཅིག་གཙུག་ལག་ཁང་འདི་ཡང་འཇིག་པར་ཐུགས་སུ་ཆུད་ནས་སངས་རྒྱས་ཀྱིས་ལྷ་རྣམས་ལ་སྲོད་ལ་ཆོས་བཤད་དོ། །ནམ་ཕྱེད་ན་ཆར་བབ་ནས་ཞིག་སྟེ་སའི་ཕུང་པོར་གྱུར་ནས་དྲུག་སྡེ་རྣམས་ཀྱང་འབྲོས་པ་དང༌། ཡོན་བདག་ཟས་དང་བཅས་ཏེ་གཙུག་ལག་ཁང་དུ་འོངས་པར་བཅོམ་ལྡན་འདས་ཀྱིས་མི་དགའ་བ་མེད་པར་སྤྲོ་བར་ཆོས་བཤད་དོ། །དེ་ནས་ཡོན་བདག་དགའ་བར་གྱུར་པ་དང༌། དྲུག་སྡེ་ཡང་སླར་ལྷགས་སོ། །ཡོན་བདག་གིས་དེ་དག་ལ་གོས་ཕྲུགས་རེ་རེ་ཞིག་བསྐོན་པ་དང༌། དྲུག་སྡེ་རྣམས་ཀྱང་ངོམ་པ་དགེ་སློང་རྣམས་ཀྱིས་འཕྱ་བ་སྙན་དུ་བདས་ནས་གཙུག་ལག་ཁང་བརྩིགས་ན་ཕ་གུ་དང་འཇིམ་པ་རིམ་པ་གཉིས་གསུམ་ལས་ལྷག་པར་རྩིག་ཏུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །གཙུག་ལག་ཁང་ཞེས་བྱ་བ་ནི་སྤྱོད་ལམ་བཞི་དང་ལྡན་པའོ། །ཆེན་པོ་ཞེས་བྱ་བ་ནི་རྣམ་པ་གཉིས་ཏེ། སྦྱིན་པ་དང༌། ཚད་ཆེ་བའོ། །བརྩིགས་པ་ནི་བདག་དང་གཞན་གྱིས་སོ། །སྒོ་ཁང་དང་གཏན་པའི་གནས་ཞེས་བྱ་བ་ནི་སྒོ་ཁང་དང་གཏན་པའི་གནས་སྔ་ནས་གདོད་པའོ། །སྣང་བ་གདོད་པའི་འདུ་ཤེས་བྱ་བ་ནི་སྐར་ཁུང་དང་ཆུ་ཁུང་གདོད་པའོ། །རྨང་ནས་བཟུང་སྟེ་རིམ་པ་གཉིས་སམ་གསུམ་རྩིགས་ཤིག་ཅེས་བྱ་བ་ནི་ཕ་གུ་དང་འཇིམ་པ་ཉིས་རིམ་དང་གསུམ་རིམ་ལས་རྩིག་ཏུ་མི་གནང་བའོ། །འདས་ན་ལྟུང་བར་རིག་པར་བྱའོ། །སྤེལ་ཞེས་བྱ་བ་ནི་འཇི་བ་དང༌། ཕ་གུ་ཆེ་ཆུང་དགོན་པའི་རྣམ་གྲངས་སོ། །རྩ་བ་ལ་སོགས་པའི་གཙུག་ལག་ཁང་ངམ་སོ་ཕག་དང་རྡོ་ལས་བྱས་པའམ་གཙུག་ལག་ཁང་གི་བདག་པོས་མྱུར་དུ་བྱོས་ཤིག་པ་ནི་ལྟུང་བ་མེད་དོ། །ས་བོན་གྱི་ཚོགས་ཀྱི་ལྟུང་བའི་བཅུ་ཕུང་གཉིས་པ་རྫོགས་སོ།། །།མ་བསྐོས་པར་དགེ་སློང་མ་རྣམས་ལ་ཆོས་སྟོན་པའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་གནས་བརྟན་རྣམས་ལ་བཅོམ་ལྡན་འདས་ཀྱིས་དགེ་སློང་མ་རྣམས་ལ་རེས་ཀྱིས་ལུང་སྟོན་ཅིག་ཅེས་བཀའ་སྩལ་པ་དང༌། དྲུག་སྡེ་རྣམས་ཀྱིས་རེས་མོས་ལ་བབ་སྟེ་དེ་དག་ཅུང་ཟད་ཅིག་ལུང་བསྟན་ནས། དགེ་སློང་མ་རྣམས་ལ་རྩེ་འཛིན་སྙོགས་པ་སྙན་དུ་
བདས་ནས་སླན་ཆད་དྲུག་སྡེ་བསྐོར་མི་གནང་སྟེ། མ་བསྐོས་བཞིན་དུ་རང་དགེ་སློང་མ་རྣམས་ལ་འཆད་ནས་སླན་ཆད་གསོལ་བ་དང་གཉིས་ཀྱིས་སྐོས་ཤིག་ཅེས་འབྱུང་བ་དང༌། དྲུག་སྡེ་ཉི་ཚེ་མཚམས་ཀྱི་ཕྱི་རོལ་དུ་གསོལ་བ་བྱས་ནས་གཅིག་ལ་གཅིག་བསྐོས་ནས་དགེ་སློང་མ་རྣམས་ལ་ཆོས་འཆད་དོ། །དེ་ཡང་མ་གནང་བ་དང་མཚམས་ཀྱི་ནང་དུ་ནད་པ་རྣམས་ལ་ནི་དད་པ་བླངས་གཞན་ནི་བྲེལ་བའི་ནང་དུ་བཅུག་སྟེ། དགེ་སློང་མ་རྣམས་ལ་ཆོས་འཆད་པས་ནད་ཕྱིན་ཆད་དགེ་འདུན་ཚོགས་པས་མཚམས་ཀྱི་ནང་དུ་གསོལ་བ་དང་ལས་ཀྱིས་དགེ་སློང་མའི་སྟོན་པར་མ་བསྐོས་པར་སྟོན་དུ་མི་གནང་བར་བཅས་པ་དང༌། དགེ་སློང་རྣམས་ཀྱིས་དགེ་སློང་མའི་སྟོན་པར་དགེ་སློང་མི་མཁས་མི་གསལ་བ་དག་བསྐོས་པས་བདག་མི་ཤེས་བདག་མ་དུལ་བས་ན་གཞན་ཞི་བར་བྱ་བའི་གནས་མེད་པས་ན་དེ་ཉིད་ཉེས་པའི་དམིགས་སུ་གྱུར་ནས་བཀའ་སྩལ་པ། ཆོས་ལྔ་དང་ལྡན་པར་སྐོས་ཤིག་ཅེས་བཀའ་སྩལ་ཏོ། །ལྔ་གང་ཞེ་ན། ཚུལ་ཁྲིམས་དང་ལྡན་པ་དང༌། མང་དུ་ཐོས་པ་དང༌། གནས་བརྟན་རྒྱལ་པོ་ལྟ་བུ་དང༌། གྲོང་ཁྱེར་གྱི་སྐད་ཤེས་པ་དང༌། དགེ་སློང་མ་རྣམས་ལ་ལུས་མི་སྤྱོད་ཅིང་སུན་མི་འབྱིན་པའོ། །ཚུལ་ཁྲིམས་དང་དན་པ་ནི་ཕས་ཕམ་པ་མ་བྱུང་བའོ། །མང་དུ་ཐོས་པ་ནི་སོ་སོར་ཐར་པ་རྒྱས་པ་འཆད་ནུས་ཤིང་ཁ་ཏོན་དུ་ཤེས་པའོ། །གནས་བརྟན་རྒྱལ་པོ་ལྟ་བུ་ནི་བསྙེན་པར་རྫོགས་ནས་ལོ་ཉི་ཤུ་ལོན་པའམ་དེ་ལས་འདས་པའོ། །གྲོང་ཁྱེར་གྱི་སྐད་ཤེས་ཞེས་བྱ་བ་ནི་མི་མང་པོའི་སྐད་ཤེས་པའོ། །དགེ་སློང་མ་སུན་མ་ཕྱུང་བ་ནི་ལུས་ཀྱིས་མི་སྤྲོད་པ་ཡིན་ཏེ། ཆོས་ལྔ་པོ་དེ་དག་དང་ལྡན་ན་སྟོན་པར་བསྐོའོ། །ཆོས་དེ་ལྟ་བུ་དང་ལྡན་ན་མ་གཏོགས་ཞེས་བྱ་བ་ནི་ཚེ་དང་ལྡན་པ་ལམ་བསྟན་བཅོམ་ལྡན་འདས་ཀྱིས་རྡུལ་ཕྱག་གོ །ཞེ་སྡང་གི་རྡུལ་ཕྱག་གོ་ཞེས་ཆོས་ཚིག་གཉིས་ཟླ་བ་གསུམ་གྱི་བར་དུ་བསླབས་ཀྱང་མ་ལོབས་པ་ལས་ཕྱིས་བཅོམ་ལྡན་འདས་ཀྱིས་ལམ་བསྟན་ཡོངས་སུ་སྦྱངས་ནས་དགྲ་བཅོམ་པ་མངོན་སུམ་དུ་བྱས་སོ། །ལམ་བསྟན་དགེ་སློང་མའི་སྟོན་པར་བསྐོས་པས་དགེ་སློང་མ་རྣམས་བདེན་པ་ལ་བཀོད་དོ། །འཁོར་རྣམས་ཀྱང་དགྲ་བཅོམ་པ་ནས་རྒྱུན་དུ་ཞུགས་པ་ཡན་ཆད་དུ་ཐོབ་པར་བྱས་པས་ན་སྔ་མ་ནི་བཅས་པའོ། །འདི་ནི་རྗེས་སུ་གནང་བའོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །མ་བསྐོས་ཞེས་བྱ་བ་ནི་དགེ་འདུན་
གྱིས་གསོལ་པ་དང་ཞུ་བའི་ལས་ཀྱིས་མ་བསྐོས་མ་བསྐོས་པའོ། །དགེ་སློང་མ་ཞེས་བྱ་བ་ནི་ཆོས་འདི་ལ་ཞུགས་པའོ། །འདོམས་ཞེས་བྱ་བ་ནི་ལྷག་པའི་ཚུལ་ཁྲིམས་དང་ལྷག་པའི་ཏིང་ངེ་འཛིན་དང་ལྷག་པའི་ཤེས་རབ་ཀྱིས་ཆོས་སྟོན་པའོ། །ཆོས་དེ་ལྟ་བུ་མ་གཏོགས་ཞེས་བྱ་བ་ནི་བདེན་པ་མཐོང་ཞིང་འབྲས་བུ་ཡོད་པར་བསྟན་པ་ནི་ལམ་བསྟན་ལྟ་བུ་སྟེ་མ་བསྐོས་ཀྱང་གནང་བའོ། །སྟུད་བ་ནི་སྔ་མ་བཞིན་ནོ། །ཉེས་པ་ནི་གང་ཞེ་ན་དགེ་སློང་དགེ་འདུན་གྱི་མཚམས་ཀྱི་ཕྱི་རོལ་དུ་བསྐོས་ཀྱི་མཚམས་ཀྱི་ནང་དུ་མ་བསྐོས་ན་དགེ་འདུན་ལ་ཉེས་བྱས་སུ་འགྱུར་རོ། །སྟོན་པ་ནི་ལྟུང་བར་འགྱུར་རོ། །མཚམས་ལ་ཇི་ལྟ་བ་བཞིན་དུ་དགེ་འདུན་མ་ཚོགས་པ་དང་གང་ཟག་ཡོན་ཏན་ལྔ་དང་མི་ལྡན་པ་བསྐོས་ནས་གང་ཟག་ལ་ནི་རྣམ་པ་ལྔ་པོ་རེ་རེ་དང་མི་ལྡན་པར་བསྐོས་ན་ལྟུང་བ་རེ་རེར་འགྱུར་རོ། །དགེ་འདུན་ལ་ནི་རེ་རེ་ཞིང་ཡང་ཉེས་བྱས་སུ་འགྱུར་རོ། །ཉི་མ་ནུབ་ཀྱི་བར་དུ་ཆོས་འཆད་དུ་མི་གནང་བ་ནི་མཉན་དུ་ཡོད་པ་ན་སྟེ། སྔོན་ཆད་དགེ་སློང་མ་རྣམས་ལ་ཆོས་སྟོན་པ་ནི་བཅོམ་ལྡན་འདས་ཉིད་ཀྱིས་འཆད་དོ། །ཕྱིས་ནི་དགེ་སློང་གནས་བརྟན་དག་ལ་དགེ་སློང་མ་དག་ལ་ཆོས་སྟོན་ཅིག་ཅེས་བཀའ་སྩལ་ཏོ། །ཚེ་དང་ལྡན་པ་དགའ་བྱེད་ལ་ཆོས་འཆད་པའི་རེས་ལ་བབ་ནས་ཆོས་ཤོད་ཅིག་ཅེས་བསྒོ་ན། བཅོམ་ལྡན་འདས་ཞལ་བཞུགས་སོ་ཞེས་ནས་མ་བཏུབ་པོ། །བཅོམ་ལྡན་འདས་ཀྱིས་ཞལ་གྱི་སྒོ་ནས་དགེ་སློང་མ་རྣམས་ལ་ཆོས་འཆད་དུ་བཅུག་པ་དང༌། དགེ་སློང་མ་ཨུཏྤ་ལའི་མདོག་ཆོས་མཁས་པས་སླར་དྲི་པ་མང་སྟེ་ནམ་སྲོས་ནས་སླར་འཁོར་བ་དང༌། ལྷ་ཁང་གི་སྒོ་བཅད་དེ་མ་ཐར་ནས་མཉན་དུ་ཡོད་པ་དང་མི་རིང་བ་ཞིག་ན་ཀུན་དགའ་རབ་ཞིག་ཡོད་དེ་མཚན་མོ་ཕྱི་རོལ་གྱི་ཤིང་ཁུང་དེར་དགེ་སློང་མ་གནས་ཤིང་འཁོད་པ་དང་རྐུན་པོ་ལྔ་བརྒྱས་ཀྱང་གླགས་བལྟས་པ་དགེ་སློང་མ་ཨུཏྤ་ལའི་མདོག་གིས་བརྟགས་ཏེ་ཚོར་ནས་འཕགས་སྐྱེས་པོའི་དམག་ཏུ་སྤྲུལ་པ་དང༌། གཡོན་ཅན་རྣམས་ཀྱིས་སྐབས་མ་རྙེད་དེ་སླར་དོང་ངོ༌། །ཕྱི་དེ་ཉིན་པར་ནང་དུ་སོང་བ་དང༌། མུ་སྟེགས་ཅན་ལ་སོགས་པ་དག་དགེ་སློང་མ་རྣམས་ཆོས་དགེ་བ་དང་མི་དགེ་བ་འདྲེན་མར་སྤྱོད་དེ། འཕྱོན་མ་ལ་དོང་དོང་ངོ༌། །ཞེས་འཕྱ་བ་ལས་སྙན་དུ་བདས་ནས་ཉི་མ་ནུབ་ཀྱི་བར་དུ་དགེ་སློང་མ་རྣམས་ལ་སྟོན་དུ་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་ཚེ་དང་ལྡན་པ་དགའ་བྱེད་དོ། །
དགེ་འདུན་གྱི་བསྐོས་ཞེས་བྱ་བ་ནི་གསོལ་བ་དང་ལས་ཀྱིས་དགེ་སློང་མའི་སྟོན་པར་བསྐོས་པའོ། །ཉི་མ་ནུབ་ཅེས་བྱ་བ་ནི་དེ་ལྟར་བསྐོས་ཀྱང་ཉི་མ་ནུབ་ཀྱི་བར་དུ་སྟོན་ན་ལྟུང་བར་འགྱུར་རོ། །དགེ་སློང་མ་ལ་འདོམས་ཞེས་བྱ་བ་ནི་བསླབ་པ་གསུམ་བཤད་པའོ། །ལྟུང་བ་ནི་སྔ་མ་བཞིན་ནོ། །ཉི་མ་ནུབ་པ་ནི་ཉི་མ་ནུབ་པར་འདུ་ཤེས་སམ་ཐེ་ཚོམ་ཟ་བཞིན་དུ་འཆད་ན་ལྟུང་བར་འགྱུར་རོ། །ཉི་མ་ནུབ་པ་ལ་མ་ནུབ་པར་འདུ་ཤེས་སམ་ཐེ་ཚོམ་ཟ་ན་སྨད་དེ་ཉེས་བྱས་སུ་འགྱུར་རོ། །མཚན་ཐོག་ཐག་ཆོས་སྟོན་ཏམ་གཙུག་ལག་ཁང་གི་སྒོ་དྲུང་ན་འདུག་གམ་གྲོང་ཁྱེར་གྱི་དབུས་ན་འདུག་སྟེ། སྒོམ་བཅད་པ་ལ་ཉེས་པ་མེད་དོ། །ཁ་ཟས་ཅུང་ཟད་ཙམ་གྱི་ཕྱིར་དགེ་སློང་མ་རྣམས་ལ་སྟོན་ཏོ་ཞེས་སྨྲར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་ཚེ་དང་ལྡན་པ་དགའ་བྱེད་ལ་ཁྱོད་ཀྱིས་དགེ་སློང་མ་རྣམས་ལ་ཆོས་ཤོད་ཅིག་ཅེས་བཀའ་སྩལ་ནས་གཽ་ཏ་མའི་སྐྱེ་དགུའི་བདག་མོ་འཁོར་ལྔ་བརྒྱ་དང་བཅས་པ་དགའ་བྱེད་ལས་ཆོས་མཉན་པ་དང༌། དེ་ནས་དགའ་བྱེད་ཀྱིས་ཆོས་ཟབ་པའི་ཚིག་དང་ཡི་གེ་རྣམས་ཀྱིས་ཆོས་བཤད་དེ། བུད་མེད་ནི་ཡོང་གིས་ཀྱང་ཤེས་རབ་ཆུང་བས་ཁོང་དུ་མ་ཆུད་ཀྱང་སླར་འདྲི་མ་སྦོབས་སོ། །དེ་ནས་སྐྱེ་དགུའི་བདག་མོ་བཅོམ་ལྡན་འདས་ཀྱི་གན་དུ་སོང་ནས་ཕྱག་འཚལ་ན་བཀས་རྨས་པ་དང་བདག་ཅག་མ་འདྲིས་པས་ན་འདྲི་མ་སྤོབས་ཏེ། ཆོས་བཤད་པ་ཁོང་དུ་མ་ཆུད་དོ་ཞེས་གསོལ་པ་དང༌། འདྲིས་པར་བྱ་བའི་ཕྱིར་མཚན་མར་ཟས་སམ་རྫས་ཅུང་ཟད་བྱིན་ཅིག་ཅེས་བཀའ་སྩལ་ནས་ཚེ་དང་ལྡན་པ་དགའ་བྱེད་ཀྱི་གན་དུ་སྐྱེ་དགུའི་བདག་མོས་དགེ་སློང་མ་ཞིག་འོ་ཐུག་སྐྱེལ་དུ་བཏང་བ་དང༌། ཛེ་ཏའི་ཚལ་གཙུག་ལག་ཁང་གི་སྒོ་ན་ཚེ་དང་ལྡན་པ་བསྙེན་དགའ་བོ་འཆག་ཅིང་འདུག་པ་མཐོང་ནས་ཅི་ཡིན་ཞེས་དྲིས་ན་འོ་ཐུག་ཡིན་ཏེ། ཚེ་དང་ལྡན་པ་དགའ་བྱེད་ལ་འབུལ་ལོ་ཞེས་བྱས་པ་དང༌། བསྙེན་དགའ་བོ་ན་རེ་ཚེ་དང་ལྡན་པ་དགའ་བྱེད་ནི་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་ཆོས་སྟོན་ཏོ་ཞེས་སྨྲས་པ་དང༌། དོན་ཉུང་བའི་དགེ་སློང་རྣམས་འཕྱ་བ་ལས་སྙན་དུ་བདས་ནས། དེ་སྐད་སྨྲར་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་བསྟེན་དགའ་བོ་སྟེ་གཞན་ཡང་དེ་དང་འདྲ་བའོ། །ཁ་
ཟས་ཅུང་ཟད་ཙམ་གྱི་ཕྱིར་ཞེས་བྱ་བ་ནི་བཟའ་བ་ལྔ་དང་བཅའ་བ་ལྔ་སྟེ་གང་ཡང་རུང་བའོ། །བཤད་ཅེས་བྱ་བ་ནི་ལྷག་པའི་ཚུལ་ཁྲིམས་དང་ལྷག་པའི་ཤེས་རབ་ལ་བྱའོ། །ལྟུང་ཞེས་བྱ་བ་ནི་སྔ་མ་བཞིན་ནོ། །ཉེས་པ་ནི་དགེ་སློང་རྣམས་ལ་ཁ་ཟས་ཅུང་ཟད་ཙམ་གྱི་ཕྱིར་དགེ་སློང་མ་རྣམས་ལ་ཆོས་སྟོན་ཏོ་ཞེས་ཟེར་ན་ཐམས་ཅད་དུ་ལྟུང་བར་འགྱུར་རོ། །ཁ་ཟས་ཅུང་ཟད་ཀྱི་དབང་དུ་བྱས་ཏེ་བཤད་པ་བདེན་ན་སྨྲས་ཀྱང་ཉེས་པ་མེད་དོ། །གཉེན་མ་ཡིན་པའི་དགེ་སློང་མ་ལ་ཆོས་གོས་སྦྱིན་དུ་མི་གནང་བའི་གླེང་གཞི་ནི་མཉེན་དུ་ཡོད་པ་ན་སྟེ། དེའི་ཚེ་ཁྱིམ་བདག་རྒན་རྒོན་ཁྱོ་ཤུག་གཉིས་ཤིག་ནོར་ཕྱུགས་དང་ལྡན་ཞིང་ལོངས་སྤྱོད་དག་ཆེ་བ་ལས་ཕྱིས་ལོངས་སྤྱོད་དང་ནོར་ཕྱུགས་དག་ཀྱང་འགྲིབ་པར་གྱུར་ནས་ཁྱོ་ཤུག་གཉི་ག་ཡང་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ངོ༌། །ཁྱིམ་བདག་ནི་ཡོ་བྱད་དག་དང་ལྡན་ཏེ་འབྱོར་པར་འགྱུར། ཆུང་མ་དགེ་སློང་མ་ནི་ཆོས་གོས་དང་ཡོ་བྱད་དང་མི་ལྡན་ཏ་ཆོས་གོས་ཀྱང་མེད་དོ། །དགེ་སློང་མ་དེས་ཀྱང་བདག་ནི་རྙེད་པ་ཆུང་སྟེ་ཆོས་གོས་ཀྱང་མེད་དོ་ཞེས་སྨྲས་པ་དང༌། དགེ་སློང་དེས་ཀྱང་ཆོས་གོས་སྦྱར་མ་དམར་སེར་ཞིག་དགེ་སློང་མ་དེ་ལ་བྱིན་ནས། དེའི་འོག་ཏུ་དེ་བཞིན་གཤེགས་པ་འཁོར་རྣམས་དང་ཡུལ་རྒྱུ་ཞིང་གཤེགས་པའི་ཚེ་འཁོར་གྱི་ཉན་ཐོས་རྣམས་ལ་སླར་གཟིགས་ནས་དགེ་སློང་དེ་སྟོད་གཡོགས་དང་སྨད་གཡོགས་ཉི་ཚེ་དང་འོང་བར་གཟིགས་ནས་ཅི་འདིའི་དབྱར་འདི་ན་གནས་པའི་ཚེ་དགེ་སློང་རྣམས་རྙེད་པ་མེད་དམ་ཞེས་སྨྲས་པ་དང༌། བཙུན་པ་མཆིས་སོ། །ཞེས་ཀུན་དགའ་བོས་གསོལ་ཏེ། འོ་ན་ཅིའི་ཕྱིར་དགེ་སློང་འདི་གོས་བྱར་མ་མེད། དགེ་སློང་མ་སྔོན་གྱི་ཆུང་མ་རྙེད་པ་ལ་སྩལ་ཏོ་ཞེས་བྱས་པ་དང༌། ཅི་གཉེན་མ་ཡིན་པའི་དགེ་སློང་མ་ལ་བྱིན་ཞིང་ཕས་ཀྱང་ལེན་ཏམ། སྩལ་ཞིང་ལེན་ཏོ་ཞེས་གསོལ་པ་དང༌། གཉེན་མ་ཡིན་པའི་དགེ་སློང་མ་ལ་སྦྱིན་དུ་མ་གནང་བར་འདུལ་བ་ལ་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་ཆོས་འདི་ལ་ཞུགས་པ་སྟེ། རྒན་ཞུགས་སོ། །གཉེན་ཞེས་བྱ་བ་ནི་ཕ་མའི་ཟུང་བདུན་རྒྱུད་ཚུན་ཆད་དོ། །དགེ་སློང་མ་ནི་ཆོས་འདི་ལ་ཞུགས་པའོ། །གོས་ནི་རྒྱུ་རྣམ་བདུན་ནོ། །སྦྱིན་ཞེས་བྱ་བ་ནི་གཏན་དུ་བྱིན་པའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་གཉེན་མ་ཡིན་པ་ལ་མ་ཡིན་པར་འདུ་ཤེས་དང་ཐེ་ཚོམ་ན་ལྟུང་བར་འགྱུར་རོ། །ཡིན་
པ་ལ་མ་ཡིན་པར་འདུ་ཤེས་དང༌། ཐེ་ཚོམ་ན་ཉེས་བྱས་སུ་འགྱུར་རོ། །གོས་རྐུན་པོས་ཁྱེར་བ་དང་བསྙེན་པར་རྫོགས་པ་ན་བྱིན་པ་ན་རིན་འོག་ཏུ་བྱིན་པ་དང༌། ཆོས་ལེགས་པར་བཤད་པ་ལ་བྱིན་པ་དང༌། དགེ་སློང་མའི་དགེ་འདུན་ལ་སྤྱིར་བྱིན་པ་ལ་ལྟུང་བ་མེད་དོ། །གཉེན་མ་ཡིན་པའི་ཆོས་གོས་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་མ་སྦེད་མ་ཞེས་བྱ་བ་ཆོས་གོས་ལྔ་ཆར་ངན་ཏེ་རས་ཤིག་བཙལ་ཏེ་རྙེད་པ་དང༌། བཙུན་པ་འཆར་བ་ལ་དྲུག་ཏུ་བཅོལ་བ་དང༌། འཆར་བས་བསམས་པ་མ་དྲུབས་ན་ནི་མོ་ཡང་གོས་ཀྱང་མེད་དགེ་བའི་བར་ཆད་དུ་ཡང་གྱུར་པའི་སྟེང་དུ་ཁ་ཟེར། དྲུབས་ན་ནི་སླན་ཆད་ཀྱང་བཅུ་བདུན་སྡེ་དང་ཀུན་འཆོལ་ཞིང་འོང་གིས་ཐབས་ཤིག་བྱའོ་སྙམ་ནས། སླད་ཀྱིས་དྲུག་སྡེ་རྣམས་ཀྱང་འོངས་ཏེ། གོས་ཀྱི་དཀྱིལ་དུ་ཚོན་སྣ་ལྔའི་སྐུད་པས་སྔོན་འཆར་བ་དང་སྦེད་མ་གཉིས་གཅིག་གི་མགུལ་ནས་གཅིག་འཁྱུད་ཅིང་འདུག་པ་དྲུབས་ནས་བལྟ་བ་བཞིན་དུ་དགེ་སློང་མ་རྣམས་ལ་བསྐུར་རོ། །སླད་ཀྱིས་དགེ་སློང་མ་དག་གིས་བལྟས་ན་དེ་ལྟར་འདུག་པ་མཐོང་ནས། ཨ་ལ་ལ་ཕུ་ནུ་མོ་ཞེས་གད་མོས་བཏབ་ནས་འཆར་བ་སྤེད་མ་གཉིས་རིང་ཞིག་ལོན་ན་དག་དོད་ཕྲད་དོ་ཞེས་སྐྱེ་དགུའི་བདག་མོ་ལ་བྱས་པ་དང༌། དྲུག་སྡེ་རྣམས་ནི་རང་བཞིན་གྱིས་གནས་ངན་ལེན་སྤྱོད་པས་འདི་འདྲའོ་ཞེས་འཕྱ་བ་སྙན་དུ་བདས་ནས་རྣམ་གྲངས་དུ་མའི་སྒོ་ནས་སྨད་དེ་བསླབ་པ་བཅས་སོ། །དགེ་སློང་ཞེས་བྱ་བ་ནི་འཆར་བ་སྟེ། གཞན་ཡང་དགེ་སློང་མ་ཞེས་བྱ་བ་དང༌། གོས་དང་བལ་ཞེས་བྱ་བ་ནི་གོང་མ་བཞིན་ནོ། །བྱེད་ཅེས་བྱ་བ་ནི་དྲུབ་པའོ། །གཉེན་མ་ཡིན་པ་ལ་འདུ་ཤེས་དང་ཐེ་ཚོམ་བཞིན་དུ་བྱས་ན་ལྟུང་བ་རེ་རེར་འགྱུར་རོ། །གཉེན་མ་ཡིན་པ་ལ་མ་ཡིན་པར་འདུ་ཤེས་དང་ཐེ་ཚོམ་ན་ཡང་ཉེས་བྱས་རེ་རེར་འགྱུར་རོ། །དགེ་སློང་མའི་འགྲོན་མང་པོ་དང་འགྲོགས་ཤིང་ལམ་དུ་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་དྲུག་སྡེ་པོ་རྣམས་ཀྱིས་བསམས་པ་དོན་ཉུང་བའི་དགེ་སློང་རྣམས་ནི་འགྲོ་བ་དང་འོང་བ་ན་ཡང་རྙེད་པ་མང་དུ་རྙེད་ཅིང་འོང་ན་བདག་ཅག་ནི་ཁྲོན་པའི་སྦལ་བུ་བཞིན་དུ་གར་ཡང་མ་ཕྱིན་ཅིང་རྙེད་པ་ཉུང་ན་བདག་ཅག་རྙེད་པ་སྒྲུབ་ཅིང་ལྗོངས་རྒྱུར་འདོང་ན་བདག་ཅག་གི་སྲིད་མོ་བཅུ་གཉིས་སྡེ་ཡང་དེ་བཞིན་དུ་བྱས་པ་དང༌། ཁྱེད་དོང་ན་ནི་བདག་གི་
ཡུལ་དང་གཙུག་ལག་ཁང་དང་ཆོས་སྟོན་པ་ཡང་མེད་དོ་ཞེས་དུས་ནས། འོ་ན་ཆེ་ཞེ་ཁྱེད་ཅག་ཀྱང་འདོང་ངོ་ཞེས་བྱས་པ་དང༌། དེ་ལྟར་མི་གནང་བ་སྙམ་མོ་ཞེས་སྨྲས་ན། དྲུག་སྡེ་པོས་ནམ་གང་དུ་ཇི་སྐད་དུ་མ་གནང་ཞེས་ནས་འཐམས་ཏེ། དྲུག་སྡེ་པོའི་བརྒྱགས་དང་གཡར་སུས་སྦྱོར་དུ་བཅུག་ནས་བརྒྱགས་སྔ་མ་ནི་གཡར་སུས་དང་དྲོ་ཟན་དུ་ཟད་པར་བྱས་ཏེ་སོང་ནས། ཕོས་མོས་རྒན་གཞོན་སྤེལ་ཏ་དོང་བ་དང༌། སྐྱེ་བོ་རྣམས་འདི་ནི་འདིའི་ཆུང་མ་འདི་ནི་འདིའི་ཁྱོའོ་ཞེས་གཞན་གྱིས་དཔྱས་ན་དེ་དག་ན་རེ་དེ་བཞིན་ནོ་ཞེས་ནས་དེ་དག་གི་ཟླ་ལ་དགེ་སློང་རྒན་ཞུགས་ཤིག་སོང་བ་ཡང་དེ་དག་མ་རངས་ནས་ཕྱིར་ལོག་པར་དགེ་སློང་དེ་དག་ལ་དེ་ལྟ་བུའི་གཏམ་བྱས་པ་དང༌། སྙན་དུ་བདས་ཏེ་དགེ་སློང་མའི་འགྲོན་པ་དང་འགྲོར་མི་གནང་བར་བསླབ་པ་བཅས་སོ། །དུས་ལ་བབ་པ་མ་གཏོགས་ཞེས་བྱ་བ་ནི་དགེ་སློང་མ་གཅིག་མཉན་དུ་ཡོད་པར་འགྲོ་བ་ན་གྲོགས་མེད་དེ་དགེ་སློང་རྣམས་ལ་བསྡད་ན་དགེ་སློང་དག་ཀྱང་འགྲོགས་སུ་མ་བཏུབ་ནས་དགེ་སློང་མ་རྣམས་བཅོམ་པ་དང་དེ་ལྟ་བུའི་རྐྱེན་ནི་རྗེས་སུ་གནང་ངོ༌། །དེས་ན་རྐྱེན་བྱུང་བ་དུས་ཡིན་ནོ་ཞེས་གསུངས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །འགྲོན་པ་མང་པོ་འདོང་བའི་ལམ་ཞེས་བྱ་བ་ནི་དེར་མི་ཉུང་ན་འགྲོ་བར་མི་ནུས་པའོ། །འཇིགས་ཞེས་བྱ་བ་ནི་རྐུན་པོ་དང་གཡོན་ཅན་དང་སྟག་གཟིག་ལ་སོགས་པས་འཇིགས་པའོ། །ཉམ་ང་བ་ནི་སྦྲང་བུ་ཆུ་རིངས་དང༌། སྲིན་བུ་དང་ཉི་མ་ཚ་བའོ། །ཉེས་པ་ནི་དགེ་སློང་མའི་འགྲོན་པ་མང་པོ་དང་ལྷན་ཅིག་ཏུ་འཇུག་ཅིང་འགྲོན་རྒྱང་གྲགས་ཕྱེད་ཕྱེད་ཅིང་ནི་ཉེས་བྱས་རེ་རེར་འགྱུར་རོ། །རྒྱང་གྲགས་རེ་རེ་ཞིང་ནི་ལྟུང་བ་ཡང་རེ་རེར་འགྱུར་རོ། །འཕགས་པའི་ལམ་ཡན་ལག་བརྒྱད་དུ་འཇུག་པ་ལ་ཉེས་པ་མེད་དོ། །དགེ་སློང་མའི་འགྲོན་པ་དང་གྲུག་ཞུགས་ཏེ་ཆུ་འབྱམ་དུ་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་དང་དགེ་སློང་མ་བཅུ་གཉིས་སྡེ་རྣམས་ཏེ་བཅས་པ་སྔ་མ་བཞིན་དུ་རྒྱས་པར་སྦྱོར་ཅིག །བྱེ་བྲག་ནི་སྔར་ལམ་དུ་འགྲོ་ཞིང་འགྲོར་མི་གནང་བ་དང༌། ཕྱིས་ཆུ་འབྱམ་དུ་དོང་བ་དང༌། སྐྱེ་བོ་རྣམས་འཕྱ་བ་དང༌། དགེ་སློང་བསོད་སྙོམས་པས་དགེ་སློང་རྣམས་ལ་བསྙད་ནས་སྙན་དུ་བདས་ནས། དགེ་སློང་མ་དང་ལྷན་ཅིག་གྲུའི་ནང་དུ་ཞུགས་ནས་འདོང་མི་གནང་བར་བསླབ་པ་བཅས་སོ། །ཐད་ཀར་འགྲོ་བ་མ་གཏོགས་ཞེས་བྱ་བ་ནི་མཉན་དུ་ཡོད་པ་ན་ཁྱིམ་
བདག་གཅིག་གིས་ཆུའི་ཕ་རོལ་དུ་གཙུག་ལག་ཁང་ཞིག་བརྩིགས་ནས་དགེ་འདུན་སྡེ་གཉིས་བཤོས་ལ་སྤྱན་དྲངས་པ་དང༌། གྲུ་གཅིག་གི་ནང་དུ་ལྷན་ཅིག་འགྲོར་མི་གནང་བས་སྔ་ཕྱིར་དོད་པས་གདུགས་ཚོད་ཡོལ་ཏེ་ཁ་ཅིག་ཟན་གྱི་བར་ཆད་དུ་གྱུར་ནས་ཐད་ཀར་ཕ་རོལ་དུ་འགྲོར་གནང་ངོ་ཞེས་རྗེས་སུ་གནང་ངོ༌། །དགེ་སློང་ཞེས་བྱ་བ་དང་དགེ་སློང་མ་ནི་སྔ་མ་བཞིན་ནོ། །གྲུ་གཅིག་གི་ནང་དུ་ཞེས་བྱ་བ་ནི་ཤོ་གམ་དང་བསེལ་གླ་དང་གྲུབ་ཅས་གཅིག་པའོ། །ཆུ་འབྱམ་དུ་ཐུར་དུ་འགྲོ་པ་དང་གྱེན་དུ་འགྲོ་བ་དང་ཕར་ཐད་ཀར་འགྲོ་བ་ནི་དངོས་སུ་ཟད་དོ། །ཆུ་འབྱམ་དུ་དོང་ན་རྒྱང་གྲགས་ཕྱེད་ཕྱེད་ཅིང་ཉེས་བྱས་སུ་འགྱུར་རོ། །རྒྱང་གྲགས་རེ་རེ་ཞིང་ལྟུང་བར་འགྱུར་རོ། །དགོན་པ་དང་གྲོང་དུ་འགྲོ་ན་ཡང་གོང་མ་བཞིན་དུ་སྦྱར་རོ། །ཆུ་འགྱུར་པ་ལས་འབྱོལ་ལམ། རབ་མི་བདེ་བ་ལས་འབྱོལ་བའམ། །སྐྱ་བ་དང་གདོས་པ་ཆག་པའམ། མཉེན་པ་ཉན་དུ་མ་བཏུབ་པའམ། །ཆུ་འགྲམ་ཕ་རོལ་ཚུ་རོལ་ན་པར་ཆད་བརྒྱད་ལ་སོགས་པ་ཡོད་པ་ནི་ཆུ་འབྱམ་དུ་སོང་ཡང་ཉེས་པ་མེད་དོ། །ས་དབེན་པ་ན་དེ་སློང་བུད་མེད་དང་འདུག་ཏུ་མི་གནང་བའི་གླེང་ཞི་ནི་མཉན་དུ་ཡོད་པ་ན་སྟེ། དེའི་ཚེ་ན་འཆར་བ་སྔ་དྲོ་ཤམ་ཐབས་དང་ཆོས་གོས་གྱོན་ཏེ་ལྷུང་བཟེད་ཐོགས་ནས་གྲོང་དུ་བསོད་སྙོམས་བླངས་ཏེ། ཆུང་མ་རྙིང་པ་སྦེད་མའི་ཁྱིམ་དུ་ཕྱིན་ཏེ་དེར་སྟན་བཏིང་བ་ལ་འདུག་ནས་སྔོན་ཇི་ལྟར་བསྙེན་པ་དང༌། སྦྱར་བ་དྲན་ཞིང་གཏམ་བྱེད་ཅིང་ས་དབྱེན་པ་ན་སྟན་ལ་འཁོད་པ་དགེ་སློང་གཞན་ཞིག་དེར་བསོད་སྙོམས་ལ་ཕྱིན་པ་དེ་གཉིས་འཁོད་པ་མཐོང་ནས་སྦེད་མས་ཀྱང་དེ་ལ་ཟན་བྱིན་ཏེ། སླར་ལྷ་ཁང་དུ་སོང་བ་དང༌། ཕྱིས་འཆར་བ་ལྷ་ཁང་དུ་འོངས་ན་བསོད་སྙོམས་པ་དང་ཕྲད་པ་དང་ཁྱོད་ཀྱི་སྦེད་མས་ང་ལ་བསོད་སྙོམས་བཟང་དུ་བྱིན་ནོ་ཞེས་བྱས་ན་འཆར་བས་དེ་ནི་ངས་བྱིན་དུ་བཅུག་གོ །འོ་ན་ཁྱོད་གཉིས་པོ་དེ་ལྟར་འཁོང་དུ་དབང་ངམ་ཞེས་བྱས་པ་དང༌། དེ་ནི་དབང་ཡང་རུང་མི་དབང་ཡང་རུང་སྟེ་ངས་ནི་འདུག་པ་བདེན་ཞེས་བྱས་པ་དང༌། དགེ་སློང་དག་མ་དད་དེ་འཕྱ་བ་ལས་སྙན་དུ་བདས་ནས་རྣམ་གྲངས་དུ་མས་སྨད་དེ་སླན་ཆད་བུད་མེད་དང་ལྷན་ཅིག་ཏུ་དབེན་པ་ན་འདུག་ཏུ་མི་གནང་བར་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་འཆར་བ་སྟེ། གཞན་ཡང་དེ་དང་འདྲ་པའོ། །བུད་མེད་ཅེས་བྱ་བ་ནི་
མི་ཚངས་པར་སྤྱད་པའི་ཆོས་བཟོད་པའོ། །དབེན་པ་ཞེས་བྱ་བ་ནི་སྐྱེས་པ་དང་བུད་མེད་གཞན་མེད་པའོ། །སྟན་གཅིག་ཅེས་བྱ་བ་ནི་འདོམ་གང་ཚུན་ཆད་དོ། །སྐྱབས་ཡོད་པ་ཞེས་བྱ་བ་ནི་ས་བ་མ་དང་རྩིག་པ་དང་ཡེལ་བ་ལ་སོགས་པས་བསྐྱབས་པའོ། །སྐྱབས་མེད་པ་ན་འདུག་པ་ནི་ལྟུང་བ་མེད་པའོ། །ས་དབེན་པ་ན་དགེ་སློང་དགེ་སློང་མ་དང་འགྲེང་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་གི་ཆུད་མ་སྦེད་མ་རབ་ཏུ་བྱུང་ནས་དགེ་སློང་མ་རྣམས་ཀྱིས་གཙུག་ལག་ཁང་སྐྱོང་དུ་བསྐོས་པ་ན། དགེ་སློང་མ་གཞན་ནི་གྲོང་དུ་ཁྱིམ་བདག་གིས་མགྲོན་དུ་བོས་ཏེ་སོང་བའི་ཚེ་ན། སྦེད་མ་འབའ་ཞིག་ལྷ་ཁང་ནས་ཕྱག་ཅིང་འདུག་པའི་གན་དུ་ཚེ་དང་ལྡན་པ་འཆར་བ་འོངས་ནས་ཁོང་གཉིས་སྔོན་ཇི་ལྟར་རྩི་ཞིང་དགའ་བ་དང༌། བག་མར་འོངས་པའི་ཚེ་ཡན་ཆད་གྱི་གཏམ་འཛེར་ཅིང་འགྲེང་འགྲེང་ནས་ཕྱིས་རྨོ་ན་རེ་འཕགས་པ་དག་ནི་བཞུད་རན་ནོ། །དགེ་སློང་མ་དག་ཀྱང་འོང་དུ་ཉེ། བདག་ཀྱང་ཕྱག་དར་བྱིའོ། །དེ་ནས་སོང་བའི་འོག་ཏུ་དགེ་སློང་མ་དག་ལྷགས་ནས་ཁྱོད་ཅི་ཉེས་ཏེ་ཕྱག་ངར་མ་བྱས་ཞེས་བྱས་ན། དེང་ནི་ཕྱགས་མ་ཐབས་ཅིག་ཀྱང་ས་ལ་མ་བཞག་གོ །ཞེས་སྦེད་མས་སྨྲས་པ་དང༌། དེ་གཉིས་གཏམ་ཟེར་བའི་དྲུང་ན་ནད་པ་གཅིག་འདུག་པས་གཏམ་ཅི་ཟེར་བ་ཀུན་ཐོས་པས། དེ་ན་རེ་དེ་ཡང་མོ་ཟེར་བ་བདེན་མོད་ཀྱི་དེའང་འཕགས་པ་འཆར་པ་དང་གཏམ་ཤ་སྟག་ཟེར་ཞིང་འགྲེང་འགྲེང་ངོ་ཞེས་བྱས་པ་ལས། དགེ་སློང་མ་རྣམས་འཕྱ་བར་གྱུར་པ་དགེ་སློང་རྣམས་ཀྱིས་ཐོས་ནས་སྙན་དུ་བདས་ཏེ། འཆར་བ་ལ་རྨས་ནས་རྣམ་གྲངས་དུ་མའི་སྒོ་ནས་སྨད་དེ། འདུལ་བ་ལ་འགྲེང་དུ་མི་གནང་བར་བསླབ་པ་བཅས་སོ། །གཞན་ནི་གོང་ན་འདུག་པ་བཞིན་དུ་སྦྱར་རོ། །བྱེ་བྲག་ནི་ལྷན་ཅིག་ཏུ་འདོམ་གང་ཚུན་ཆད་འགྲེང་ན་ལྟུང་བར་འགྱུར་རོ། །དགེ་སློང་མས་ངོས་མགྲོན་སྦྱོར་དུ་བཅུག་པའི་ཟས་ཟར་མི་གནང་བ་ནི་མཉན་དུ་ཡོད་པ་ན་སྟེ། དེའི་ཚེ་མུ་གེ་བྱུང་ནས་དགེ་སློང་རྣམས་སོ་སོའི་གཉེན་དང་ཡོན་བདག་ཚོལ་ཅིག་ཅེས་བཀའ་སྩལ་ནས། དགེ་སློང་གནས་བརྟན་དག་ནི་བྲམ་ཟེ་དང་ཁྱིམ་བདག་དད་པ་ཅན་དག་གིས་བཤོས་སྦྱར་རོ། །ཚེ་དང་ལྡན་པ་དྲུག་སྡེ་པོ་རྣམས་ནི་ཡོན་བདག་མེད་དེ། བཅུ་གཉིས་སྡེའི་དེར་བསོང་སྙོམས་ལ་སོང་ངོ༌། །དེ་རྣམས་ཀྱིས་འཕགས་པ་ཞལ་སུས་གསོལ་ཅིག་ཅེས་བྱས་ན། དེང་ཁྱེད་ཅག་གིས་ཀྱང་བྱིན་སང་སྦྱིན་པ་མེད་པས་དེ་བཞིན་དུ་ཚོལ་
ནི་མི་གནང་སྲིང་མོ་བྲམ་ཟེ་དང་ཁྱིམ་བདག་དད་པ་རྣམས་དགེ་སློང་གནས་བརྟན་དག་ལ་འཚོ་བ་སྦྱིན་པ་དག་ཡོང་ན་དེ་དག་བདག་ཅག་གི་ཡོན་བདག་ཏུ་སྒྱུར་ཅིག་ཅེས་བྱས་པ་དང༌། དེ་ལྟར་བསྒྱུར་དུ་དབང་ངམ་ཞེས་བྱས་པ་དང༌། གང་དུ་མ་གནང་སས་མ་གནང་ཞེས་བྱས་པ་དང༌། དགེ་སློང་མ་སྦོམ་དགའ་མོས་ནང་པར་མཉན་དུ་ཡོད་པར་བསོད་སྙོམས་ལ་ཞུགས་པན་ཅང་ཤེས་ཀཽཎྜི་ནྱ་ལ་སོགས་པ་གནས་བརྟན་དག་གི་ཡོན་བདག་རྣམས་ལ་ཁྱོད་ཀྱིས་ཤཱཀྱའི་རིགས་ལས་རབ་ཏུ་བྱུང་བའི་རིགས་པ་དང་གྲོལ་བའི་སྤོབས་པ་ཅན་སྡེ་སྣོད་གསུམ་གྱི་ཆོས་སྨྲ་བ་རྣམས་ལ་འཚོ་བ་སྦྱིན་ན་ཅི་ཉེས་ཞེས་བྱས་པ་དང༌། དེ་ལྟ་བུ་སུ་ཡིན་ཞེས་སྨྲས་ན་འཕགས་པ་དགའ་བོ་ལ་སོགས་པ་དྲུག་སྡེ་པོ་རྣམས་སོ་ཞེས་བྱས་ནས་དེ་ནས་དེར་ཡང་བླངས་སོ། །གནས་བརྟན་གཞན་གྱི་ཡོན་བདག་རྣམས་ཡང་བསླངས་པས་དྲུག་སྡེ་རྣམས་རྙེད་པ་མང་ཞིང་མཆན་སྒྱེའུ་གང་ཞིང་སླར་སོང་བ་དང༌། དེ་ནས་གཞན་དག་གིས་དེ་སྙེད་ག་ལ་རྙེད་ཅེས་དྲིས་ན། དགེ་སློང་མ་སྦོམ་དགའ་མོ་ལ་སོགས་པ་དེ་དག་གིས་དེ་ལྟར་བྱས་ཏེ། སྲིང་མོ་དེ་དག་གི་བཀའ་དྲིན་ནོ་ཞེས་འཛེར་བ་དང༌། གཞན་གྱིས་དེ་ལྟ་བུ་སློང་དུ་དབང་ངམ་ཞེས་བྱས་པ་དང༌། ཅིས་མི་དབང་ངོ་ཞེས་ངེད་ལྟོགས་ཏེ་འཁོད་དམ་ཞེས་སྨྲས་པ་དང༌། དགེ་སློང་རྣམས་འཕྱ་སྟེ་སྙན་དུ་བདས་ནས། སླན་ཆད་དགེ་སློང་མས་སྦྱོར་དུ་བཅུག་པ་ཟར་མི་གནང་བར་བསླབ་པ་བཅས་སོ། །སྔར་སྦྱོར་དུམ་བཅུག་པ་མ་གཏོགས་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་ཡོད་དེ། དེའི་ལས་ནི་ཞིང་རྨེད་ཅིང་ཚོང་བྱེད་དོ། །དེས་དགོན་པའི་གནས་ཤིག་ཏུ་ཞིང་ཞིག་རྨོས་ཏེ་ཚོང་ལ་སོང་ངོ༌། །དེར་སླར་འཁོར་ཏེ་ཞིང་ལེགས་སམ་མ་ལེགས་བྱུལ་བ་དང་ཞིང་དེའི་དྲུང་ན་དགེ་སློང་བསོད་སྙོམས་པ་ཞིག་སྤྱིལ་བོ་བྱས་ཏེ་གནས་ཤིང་འདུག་པས་ཞིང་དེ་ཡང་སྔོན་དང་མི་འདྲ་བར་ནས་དང་ལྡན་པར་འགྱུར་ཏོ། །ཞིང་བདག་དེས་ཀྱང་བདག་གི་ཞིང་ལེགས་པ་ནི་དགེ་སློང་དེའི་ཡིན་ནོ་སྙམ་ནས། ཁྱིམ་དུ་ཟན་ལ་མགྲོན་དུ་གཉེར་ཏོ། །དེའི་ཕྱི་དེ་ཉིན་མོ་དགེ་སློང་མ་སྦོམ་དགའ་མོ་ཡང་ཁྱིམ་དེར་བསོད་སྙོམས་བསླངས་པ་དང༌། ཁྱིམ་བདག་དེས་དགེ་སློང་བསོད་སྙོམས་པ་ཞིག་དེར་སྤྱན་དྲངས་ཏེ། དེ་ཟན་ཆད་པར་མ་གྱུར་གྲང་ཞེས་བྱས་པ་དང༌། དགེ་སློང་མ་དེ་ན་རེ་བསོད་སྙོམས་པ་དེ་ངས་བོས་ཏེ་འོང་ན་ང་ལ་སྦྱིན་ནམ་ཞེས་
སྨྲས་པ་དང༌། གསོལ་ལོ་ཞེས་ནས་དགེ་སློང་མ་དེ་ཡང་ལམ་དུ་བསྒུགས་པ་དང༌། བསོད་སྙོམས་པ་དང་ཕྲད་དེ། འཕགས་པ་ཁྱིམ་བདག་འདིས་མགྲོན་དུ་གཉེར་བ་ནི་ཁྱོད་ཀྱི་ཡོན་ཏན་བདག་གིས་བསྔགས་པས་སོ། །ཞེས་བྱས་པ་དང༌། ཅི་ངའི་ཡོན་ཏན་ཁྱོད་ཀྱིས་སྦྲོགས་ཤིག་ཅེས་ངས་བསྒོའམ་ཞེས་བདག་ནི་མ་ཟོས་ཀྱང་བླའི་ལྟུང་བ་དང་བསྔོ་ནི་མི་ཕོད་ཅེས་སླར་སོང་ངོ༌། །དེ་ལྟར་གྱུར་པ་སྙན་དུ་གསོལ་ནས། དེ་ནི་སྔར་པོས་པ་མ་གཏོགས་སོ་ཞེས་རྗེས་སུ་གནང་ངོ༌། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །དགེ་སློང་མ་ཞེས་བྱ་བ་ནི་ཆོས་འདི་ལ་ཞུགས་པའོ། །ཟས་སྦྱོར་དུ་བཅུག་ཅེས་བྱ་བ་ནི་རྣམ་པ་གཉིས་ཏེ། ཚུལ་ཁྲིམས་དང་ཐོས་པའི་སྒོ་ནས་སྦྱོར་དུ་བཅུག་པའོ། །ཟས་ཞེས་བྱ་བ་ནི་བཅའ་བ་ལྔ་དང་བཟའ་བ་ལྔའོ། །ཟོས་ཞེས་བྱ་བ་ནི་མགྲིན་པར་མིང་པའོ། །ཉེས་པ་གང་ཞེ་ན། དགེ་སློང་མང་པོ་ཁྱིམ་དུ་འབོད་པ་ལས་དགེ་སློང་མ་ཞིག་དེར་འོངས་ནས་ཁྱོད་ཀྱིས་དགེ་སློང་འདི་ལ་ཅི་སྦྱིན་ཞེས་བྱས་པ་དང༌། འབྲས་བརྡོས་པའི་ཕྱེ་སྦྱིན་ནོ་ཞེས་བྱས་པ་དང་དེ་ལྟར་མ་ཡིན་གྱི་དེ་དག་ལ་ནས་བརྡོས་པའི་ཕྱེ་བྱིན་ཅིག་ཅེའམ། དགེ་སློང་འདི་ནི་རྒྱུན་དུ་ཞུགས་པ་ཡིན་གྱི་དེ་དག་ལ་རའི་མར་མ་སྦྱིན་པར་འབྲི་འམ། བའི་མར་བྱིན་ཅིག་ཅེས་བྱས་ཏེ་ཟོས་ན་ཐམས་ཅད་དུ་ལྟུང་བར་འགྱུར་རོ། །དགེ་སློང་མའི་ཚོགས་ཏེ་བཅུ་ཕུང་གསུམ་པ་རྫོགས་སོ།། །།ཡང་ཡང་ཟར་མི་གནང་བའི་གླེང་གཞི་ནི་ཡུལ་ཡངས་པ་ཅན་ན་སྟེ། ཁྱིམ་བདག་དྲག་ཤུལ་ཅན་གྱིས་དགེ་འདུན་རྣམས་ཁྱིམ་དུ་བཤོས་ལ་སྤྱན་དྲངས་པ་ན། བཅོམ་ལྡན་འདས་ནི་བསླབ་པ་བཅའ་བར་བཞེད་པའི་ཕྱིར་གཤེགས་སུ་མ་གནང་ངོ༌། །དེ་ནས། དྲུག་སྡེ་པོ་རྣམས་དགེ་སློང་རྒ་ན་ཞུགས་ཤིག་དང་འགྲོགས་ཏེ། ལམ་དུ་ཉེ་བར་འགྲོ་བའི་གྲོང་ན་ཤིང་ཨ་སྨྲའི་ཁུ་བ་མང་དུ་ཟོས་ཏེ་དོང་བ་དང༌། སླད་ཀྱིས་ཁྱིམ་བདག་དྲག་ཤུལ་ཅན་གྱི་དེར་ཕྱིན་ཏེ། ཡོན་བདག་གིས་ཁུར་བ་བྲི་མས་པ་དང༌། དྲུག་སྡེ་རྣམས་ཁུར་བ་མི་ཟ་བར་འཁོད་དོ། །དགེ་སློང་རྒན་ཞུགས་དེ་གྲལ་གྱི་ཐ་མ་ན་འདུག་པའི་གམ་དུ་ཁུར་བ་འདྲིམ་པའི་མི་རྣམས་ཕྱིན་ཏེ་འགྲེང་དུ་སྡོད་པ་དང་རྒན་ཞུགས་ཀྱེ་རྨི་ལམ་ན་བདག་གིས་ཁུར་བ་ཟོས་པར་ཤེས་པས་མི་འདྲིམ་གྱིས་ཁོང་གིས་མ་རྨས་པ་སྔ་ནས་བདག་གིས་བསུ་སྟེ་བྱའོ་སྙམ་ནས་ཁྱིམ་བདག་བདག་འབའ་ཞིག་གིས་ཁུར་བ་ཟོས་
པ་མ་ཡིན་གྱི། དགེ་སློང་དྲུག་སྡེ་རྣམས་ཀྱིས་ཀྱང་ཟོས་སོ་ཞེས་བྱས་པ་དང༌། དེ་དག་ན་རེ་ངའི་ཁྱིམ་ན་ཨ་མྲའི་ཁུར་བ་མེད་སྙམ་དུ་དོགས་སམ་ཞེས་ཁྲོས་སོ། །དེ་ནས་དགེ་སློང་རྣམས་ཟས་ཟོས་ཟིན་ནས་ཕྱིར་འཁོར་བ་དང༌། དགེ་སློང་རྣམས་ཚིམ་པར་གྱུར་ཏམ། བདེ་བར་གསོལ་ཏམ་ཞེས་བཀས་རྨས་པ་དང༌། བཤོས་ཚལ་ནི་བཟང་ན་ཁྱིམ་བདག་ནི་འདི་ལྟ་བུའི་ཕྱིར་འཁྲུགས་སོ། །ཞེས་གསོལ་པ་དང༌། ཁྱིམ་བདག་ནི་ཡུས་ཏེ་རིགས་པར་ཁྲོས་སོ་ཞེས་བཀའ་སྩལ་ནས་དྲུག་སྡེ་རྣམས་ལ་རྨས་པ། རྣམ་པ་དུ་མས་སྨད་དེ་ཡང་ཡང་ཟེར་མི་གནང་བར་འདུལ་བ་ལ་བསླབ་པའི་གནས་བཅས་སོ། །ན་བ་དུས་མ་གཏོགས་ཞེས་བྱ་བ་ནི་དགེ་སློང་གཅིག་ཅིག་ནད་ཀྱིས་བཏབ་སྟེ་ཉམ་ཆུང་ནས་སྨན་པ་ལ་དྲིས་བས་ཞལ་སུས་ཟོ་ཤིག་དང་སོས་པར་འགྱུར་རོ། །ཞེས་ནས་སྙན་དུ་བདས་ཏེ། ན་བ་དུས་ནི་དེར་རྗེས་སུ་གནང་ངོ༌། །ན་བ་དུས་ཞེས་བྱ་བ་ནི་དགེ་སློང་ཟས་གཅིག་གིས་འཚོ་བར་མི་ནུས་པའོ། །ལས་དུས་ནི་དགེ་སློང་གཅིག་ཅིག་གཙུག་ལག་ཁང་ཆག་ཆག་དང་དཀྱིལ་འཁོར་དང་དྲི་གཙང་ཁང་ཕྱག་དར་བྱས་ནས་ངལ་ཏེ་ཉལ་ཞིང་འདུག་པ་དང་དེ་ལ་གཞན་དག་གིས་འཕགས་པ་ཅིའི་སླད་དུ་འཕྲེས་ཤིང་གཟིམས། བདག་ནི་ལས་ཆེས་ཏེ་ཉམ་ཆུང་ཞིང་ཉལ་ཞིང་འདུག་གོ ། འཕགས་པ་འོ་ན་ཞལ་སུས་གསོལ་ཅིག་ཅེས་པ་དང༌། སྙན་དུ་བདས་ནས་ལས་དུས་ཞེས་རྗེས་སུ་གནང་ངོ༌། །ལས་དུས་ནི་དགེ་འདུན་གྱི་འམ་མཆོད་རྟེན་གྱི་ཡང་རུང་སྟེ་ལས་བྱས་པ་དང༌། ཐ་ན་རེ་ལྡེ་ཙམ་གྱི་ས་ཕྱགས་པའམ་བའི་གནས་མལ་ཙམ་གྱི་སྐྱང་ནུལ་དཀྱིལ་འཁོར་བྱས་པའོ། །དེ་ལ་ལམ་དུས་ནི་དགེ་སློང་ཞིག་ལམ་དུ་ཞུགས་པ་ལས་ལམ་གྱིས་ངལ་ཏེ་འགྲོ་མ་ནུས་པ་ལས་སྙན་དུ་བདས་ཏེ་ཞལ་སུས་ཟར་གནང་སྟེ་ལམ་གྱི་ཚད་ནི་དཔག་ཚད་གཅིག་ཏུ་སོང་བ་དང༌། དཔག་ཚད་ཕྱེད་ནས་སླར་ལོག་པའོ། །གོས་བྱིན་པ་དུས་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་དགེ་སློང་རྣམས་བཤོས་དང་གོས་ཕྲུགས་རེ་རེ་གསོལ་གྱིས་སྤྱོན་ཅིག་ཅེས་སྤྱན་དྲངས་པ་ལས་བདག་ཅག་ཟས་གཉིས་ཟ་བ་སྤངས་སོ་ཞེས་མ་བཏུབ་པ་ལས། བདག་ཅག་གིས་ཟས་དང་གོས་ཀྱིས་བསྟབས་ཀྱང་འོང་དུ་མ་བཏུབ་ཅེས་འཕྱ་བ་ལས་གོས་དུས་སོ་ཞེས་རྗེས་སུ་གནང་སྟེ་གོས་ནི་རས་དང་རས་དང་རས་ཆེན་རྙེད་པའོ། །ཉེས་པ་ནི་གོས་
དང་ལྡན་པའི་ཁྱིམ་གཉིས་ཤིག་ཏུ་མགྲོན་དུ་བོས་པ་ལས་གཉིས་ཀ་ཟོས་ན་ཡང་ལྟུང་བ་མེད་དོ། །སྔར་གོས་ཡོད་པར་བོས་ལ་ཕྱིས་གོས་མེད་པ་ཞིག་ཏུ་བོས་ན་སྔ་མ་ནི་ཉེས་པ་མེད་དོ། །ཕྱི་མ་ནི་གཞན་ལ་སྦྱིན་པར་བྱ། མ་བྱིན་ཏེ་བདག་ཀྱང་མ་ཟོས་ན་ལྟུང་བ་མེད་དོ། །གོས་དང་གོས་རིན་དུ་བྱས་པ་ཞིག་ཏུ་བོས་པ་ནི་ལྟུང་བ་མེད་དོ། །སྔར་གོས་མེད་པར་བོས་ལ་ཕྱིས་གོས་ཡོད་པར་བོས་ན་ལྟུང་བ་མེད་དོ། །གནས་ཐུན་མོང་བར་དགེ་སློང་ཞག་ལོན་པར་འདུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་ཅིག་གིས་ཕྱོགས་བཞིའི་དགེ་འདུན་དང་ཕྱིའི་མུ་སྟེགས་པའི་དགེ་སྦྱོང་དང་བྲམ་ཟེ་ལ་སོགས་པ་སྤྱིར་གནས་ཐུན་མོང་བ་ཞིག་བརྩིགས་ཏེ། གཙུག་ལག་ཁང་དེར་མུ་སྟེགས་པའི་དགེ་སྦྱོང་གཅེར་བུ་པ་དྲུག་ཅུ་བོས་ནས་འཚོ་བ་དང་ཡོ་བྱད་སྦྱར་ཏེ་དེར་བཀོད་པ་ན། ཁྱིམ་བདག་དེའི་ཤག་པོ་ཡང་ཆོས་ལ་དད་པ་ཞིག་པས་གཙུག་ལག་ཁང་དེའི་དགེ་སློང་རྣམས་ལ་ཕྱག་འཚལ་དུ་སོང་སོང་བ་དང༌། དེ་ན་གནས་པ་དགེ་འདུན་ནི་མ་ཡིན་གྱི། མུ་སྟེགས་པ་ཤ་སྟག་ནས། ཨེ་མའོ་ས་བོན་རེ་བཟང་ན་ཞིང་རེ་ངན། བ་ཚའི་ས་སྡིག་པའི་ས་ངན་པའོ། །འོ་ན་ཞིང་བཟང་ག་ལ་ཡོད། བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ཏེ་མཉན་དུ་ཡོད་པ་ནའོ། །དེ་ནས་ཡོན་བདག་དེས་ཡང་དྲུག་སྡེ་རྣམས་སྤྱན་དྲངས་ནས་ཡོ་བྱད་ཀྱིས་མི་བྲེལ་བར་སྦྱར་ཏེ། ཆུང་མ་ལ་ཞལ་ཏ་གྱིས་ཤིག་ཅེས་བསྒོ་ནས་ཁྱིམ་བདག་དེ་ཡང་དོན་གཞན་ཞིག་གི་ཕྱིར་རི་བྲགས་ཀྱི་གྲོང་དུ་སོང་བའི་འོག་ཏུ་ཆུང་མས་ཟན་འདྲི་མ་པའི་ཚེ་དྲུག་སྡེ་རྣམས་བུད་མེད་ཀྱི་ཡན་ལག་ནས་སྨོས་ཤིང་འཕྱའོ། །དེ་ནས་ཁྱིམ་བདག་ཕྱིར་འོངས་པ་ལ་ཆུང་མས་བྱས་ན་ཡིད་མ་ཆེས་པས་ཁྱིམ་བདག་ཉིད་གུད་དུ་འགྲོ་བ་ལྟར་བྱས་ཏེ་བགོམ་ན་བདེན་པར་གྱུར་ཏེ། ཁྱིམ་བདག་གིས་ཀྱང་དྲུག་སྡེ་རྣམས་བསྐྲད་པའི་ཐབས་ཤིག་བྱའི་སྙམ་ནས་ཉི་མ་རེ་རེ་ཞིང་ཁུར་བ་རེ་རེ་ཕྲི་ནས་གཅེར་བུ་པ་གཅིག་གནས་ཤིང་གཅེར་བུ་པ་གཞན་རྣམས་གུད་དུ་དོང་བ་ལ། ཡོན་བདག་དྲུག་སྡེ་ལ་མ་དད་པ་སྐད་དུ་མ་སྦྲན་ནས། གཅེར་བུ་པ་དྲུག་ཅུ་སླར་ལྷགས་ཏེ་དྲུག་སྡེ་བརྡེགས་སོ། །དེ་དག་ཀྱང་མ་སྣད་ནས་གཅེར་བུ་པ་ངལ་ཞིང་འཁོད་པ་ལ་དྲུག་སྡེ་གཅིག་གིས་ཀྱང་མི་བཅུ་བཅུ་སྟེ་དྲུག་སྡེ་པོས་མ་ཤི་ཙམ་དུ་བརྡེགས་སོ། །དེ་ནས་དྲུག་སྡེ་པོ་ཡང་མཉན་དུ་ཡོད་པར་ཕྱིར་འོངས་ནས་དེའི་ཚེ་ཚེ་དང་ལྡན་པ།
ཤཱ་རིའི་བུས་བྱང་ཕྱོགས་ནས་རྒོལ་དུ་འོངས་པའི་མུ་སྟེགས་ཅན་གྲངས་མེད་པ་བཏུལ་ནས་བདེན་པ་ལ་བཀོད་དོ། །དགེ་སློང་རྣམས་ཀྱི་ས་དྲུག་སྡེ་རྣམས་ལ་ཚེ་དང་ལྡན་པ་ཤཱ་རིའི་བུས་སེམས་ཅན་གྱི་དོན་འདི་ལྟ་བུ་བྱས་སོ་ཞེས་བྱས་པ་དང༌། དྲུག་སྡེ་རྣམས་ཀྱིས་དེ་ནི་ངོ་མཚར་ཅི་ཆེ་ངེད་ཀྱིས་ཀྱང་ད་བར་གཅེར་བུ་པ་དྲུག་ཅུ་ལ་དབྱིག་པས་ཆོས་བཤད་དོ། ཞེས་བྱས་པ་དང༌། གཞན་འཕྱ་བ་ལས་སྙན་དུ་བདས་ཏེ། གནས་ཐུན་མོང་བར་ཟན་ཟ་བ་གཅིག་ལས་ཟར་མི་གནང་བར་བཅས་སོ། །ན་བ་མ་གཏོགས་ཞེས་བྱ་བ་ནི་ཡུལ་དེ་ཉིད་དུ་གཙུག་ལག་ཁང་སྔ་མར་ཏེ། དེར་ཚེ་དང་ལྡན་པ་ཤཱ་རིའི་བུ་ཆོས་འཆད་པར་འབོད་པའི་རིགས་པར་གྲོགས་པོ་དད་པ་དེས་བསྟན་ནས་ཤཱ་རིའི་བུ་དེར་པོས་ཏེ། དེར་ཆོས་བཤད་པས་ན་སྐྱེ་བོ་རྣམས་ཀྱང་དད་པར་གྱུར་ཏེ། ཚེ་དང་ལྡན་པ་ཤཱ་རིའི་བུ་ཡང་རླུང་ཞུགས་ཏེ་ནད་ཀྱིས་བཏབ་ནས། གནས་དེ་ཉིད་དུ་བཞུགས་སུ་གསོལ་ན་མ་གནང་སྟེ་དོང་བ་ལས་མཉན་དུ་ཡོད་པར་ཕྱིན་ཏེ་སྐྱེ་བོ་མང་པོས་ཤཱ་རིའི་བུའི་སློབ་མ་ལ་བདེ་བར་འོངས་སམ་ཞེས་སྨྲས་ན། སེམས་ཅན་མང་པོའི་དོན་བྱས་པ་ནི་བདེ་ན་མཁན་པོ་ནད་ཀྱིས་བཏབ་པ་ནི་མི་བདེའོ་ཞེས་བྱས་པ་དང༌། སྙན་དུ་བདས་ཏེ། ན་བ་དུས་ཏེ་ན་བ་ལ་པུས་འཁྱུད་འཆང་བའང་རྗེས་སུ་གནང་ངོ༌། །གནས་ཐུན་མོང་དུ་ཞག་ལོན་ཏེ་ཞེས་བྱ་བ་ནི་གཅེར་བུ་པ་ནི་ཉན་ཐོས་ཀྱི་གནས་སུའོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་ངོ༌། །མིན་ཞེས་བྱ་བ་ནི་ཤཱ་རིའི་བུ་ལས་དགོངས་ཏེ་གནང་བའོ། །ཟན་ཅིག་ཟོ་ཞིག་ཅེས་བྱ་བ་ནི་དེ་ལས་ལྷག་པར་ཟོས་ན་ལྟུང་བར་འགྱུར་རོ། །ཉེས་པ་ནི་གནས་དེ་ན་གནས་པའི་ཚེ་ནི་ཉེས་བྱས་སོ། །ལྷག་པར་ཟན་ཟོས་ན་ལྟུང་བའོ། །དེ་ན་གནས་ཤིང་གུད་དུ་ཟན་གནས་པ་ལ་ཉེས་བྱས་སོ། །ཟོས་ན་ལྟུང་བར་འགྱུར་རོ། །གུད་དུ་གནས་ཤིང་གུད་དུ་ཟ་བ་ནི་ཉེས་པ་མེད་དོ། །གུད་དུ་གནས་ཤིང་དེར་ཟ་ན་གནས་པ་ལ་ཉེས་པ་མེད་དོ། །དེར་ཟ་ན་ལྟུང་བར་འགྱུར་རོ། །མང་པོའི་དང་གཉེན་གྱི་དང༌། ཡོན་བདག་ན་རེ་འདུག་ཤིག་ཅེ་ན་ལྟུང་བ་མེད་དོ། །ཕྱེ་ལ་སོགས་པ་ལྟུང་བཟེད་གང་བ་གཉིས་གསུམ་ལས་ལེན་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། བྱང་ཕྱོགས་ནས་ཚོང་པ་ལྷགས་པ་དྲུག་སྡེ་རྣམས་ཀྱིས་ཐོས་ནས་དེ་དག་ལ་དྲུག་སྡེས་གོས་དང་ཟས་དག་བསླངས་ཏེ་ཚོད་མ་ཟིན་པ་ལས་ཚོང་པ་དག་བརྒྱགས་ཆད་དེ་ཉེས་པའི་དམིགས་སུ་གྱུར་
པ་དང༌། ཕྱིས་མཉན་དུ་ཡོད་པ་ན་ཁྱིམ་བདག་གཅིག་ཅིག་གནས་པ་དེས་ཆུང་མ་སྔ་ཕྱིར་ལན་བདུན་གྱི་བར་དུ་བླངས་ན་ཡང་ཀུན་དུས་ལས་འདས་ནས་སླད་ཀྱིས་ཆུང་མ་དག་བླངས་ན་སུ་ཡང་མི་སྟེར་ཅིང་འདུག་པ་དར་ཁྱིམ་བདག་གཞན་ཞིག་གི་བུ་མོ་མིག་གཡས་པ་ཞར་མ་ཞིག་ཡོད་དེ། དེ་སུ་ལ་བྱིན་ཡང་མི་འདོད་པ་དེ་ཆུང་མ་ཤི་བའི་མི་དེ་ལ་སྦྱིན་པར་ཁྱིམ་མཚེས་རྒན་མོ་ཞིག་འདུག་པས་སྨྱན་བྱས་ནས་བླང་བར་དུས་བྱས་སོ། །དེའི་གྲོགས་པོ་ཞིག་གིས་བུ་མོ་གཡས་ཞར་མོ་དེ་ཅི་རུང་ལེན་པའི་མི་རིགས་ཀྱི། གུད་ན་ཡུགས་ས་མོ་ཞིག་ཡོད་དེ། དེ་བླང་གིས་སྔ་མ་ཐོང་ཤིག་ཅེས་ནས་སྔ་མ་བཏང་བའི་ཀླན་ཀ་ཚོལ་བའི་བར་དུ་བག་མ་བླང་བའི་དུས་ལ་བབ་སྟེ་ཞག་གྲངས་ཚང་ནས། བུ་མོའི་ཕ་མ་ཡང་བུ་མོ་གཏོང་བའི་བཤོས་ཚལ་དག་ཤོམ་ཞིང་སྦྱོར་བ་དང་ཚེ་དང་ལྡན་པ་དྲུག་སྡེ་རྣམས་ལྷགས་ཏེ། ཆེ་ཞེ་བག་མར་འགྲོ་བའི་ཟན་དེད་ལ་བྱིན་ཅིག་ཅེ་ནས་ཚོད་མ་ཟིན་ཏེ། ཕྱེ་དང་ཁུར་བ་མང་དུ་བླངས་སོ། །དེའི་རྗེས་ལ་དགེ་སློང་མ་བཅུ་གཉིས་སྡེས་ཀྱང་བསླངས་པས་སྟོན་མོའི་རྒྱུ་ཟད་དེ། དེ་དག་གིས་མག་པ་ལ་བཤོལ་བས་དུས་བྱས་ན་བྱིན་ན་ནི་སྔ་མའི་དུས་བཞིན་དུ་བྱིན་ཅིག །དེ་ཡང་ཀླན་ཀའི་སྐབས་རྙེད་དེ། བུ་མོ་བཏང་ནས་ཡུགས་ས་མོ་བླངས་སོ། །དེ་ནས་བུ་མོ་གཡས་ཞར་མོ་ཡང་སུ་ལ་བྱིན་ཡང་མ་འདོད་དོ། །དེ་ལྟར་གྱུར་པ་ཁྱིམ་མཚེས་རྣམས་འཕྱ་སྟེ། བུ་མོ་སུས་ཀྱང་མི་འདོད་པ་ལས་བག་མར་བཏང་བར་བྱས་པ་ལས། དྲུག་སྡེས་བར་ཆད་བྱས་སོ་ཞེས་འཕྱ་བ་ལས་སྙན་དུ་བདས་ནས་དགེ་སྦྱོང་གི་བྱ་བ་མ་ཡིན་ནོ་ཞེས་བཀས་སྨད་དེ། སླན་ཆད་ཁྱིམ་བདག་དད་པས་བསྟབས་ཀྱང་ལྷུང་བ་ཟད་གསུམ་ལས་ལེན་དུ་མི་གནང་བར་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །མང་པོ་ཞེས་བྱ་བ་ནི་གཉིས་ཡན་ཆད་ལ་བྱའོ། །གྲོང་ཞེས་བྱ་བ་ནི་བྲམ་ཟེ་དང་ཁྱིམ་བདག་རྣམས་ཀྱི་ཁྱིམ་མོ། །དང་བཞེས་བྱ་བ་ནི་དཀོན་མཆོག་གསུམ་ལ་མངོན་སུམ་དུ་ཕྱོགས་པའོ། །དུས་ཀྱིས་བདར་ཏེ་འདོད་ཅེས་བྱ་བ་ནི་དགོས་པར་གྱུར་པའོ། །ལྷུང་བཟེད་གསུམ་ལོང་ཤིག་ཅེས་བྱ་བ་ནི་རབ་འབྲིང་གསུམ་སྟེ་ཆེན་པོ་ནི་ཡུལ་མཉམ་ཀའི་འབྲས་སྐམ་དྲུག་ཕུལ་དོའི་ཆན་དང་ཚོད་མར་ཤོང་ཞིང་ཁ་ར་ན་ལ་མཐེབ་མོའི་ངོས་གང་མ་ཐུག་པའོ། །ཆུང་ངུ་ནི་ཡུལ་མཉམ་ཀའི་འབྲས་དྲུག་ཕུལ་གང་གི་ཆན་དང་ཚོད་མར་ཤོང་བའོ། །བར་མ་ནི་དེ་གཉིས་ཀྱི་བར་མ་ལ་
བྱའོ། །དགེ་སློང་ཕྱི་རོལ་ཀུན་དགའ་ར་བར་དེང་ལ་དགེ་སློང་འཁོད་པ་ལ་གོས་ཤིག་ཅེས་བྱ་བའི་སྔ་མ་གཞི་ན་འཁོད་པ་རྣམས་ལའོ། །ཉེས་པ་ནི་གསུམ་ཆར་ལྷུང་བཟེད་ཆེན་པོས་བླངས་ནས་དགེ་སློང་མའི་ཚེ་ན་ཉེས་བྱས་བླངས་ན་ལྟུང་བར་འགྱུར་རོ། །གཉིས་ཆེན་པོ་གཅིག་ཆུང་དུས་བླངས་ན་ཡང་ངོ༌། །གཉིས་ཆེན་པོ་གཅིག་ནི་འབྲིང་དང་ཡང་ངོ༌། །གཉིས་ནི་འབྲིང་པོ་གཅིག་ནི་ཆེན་པོས་ན་ཡང་ངོ༌། །དགེ་སློང་གིས་འབྲས་སྐམ་དྲུག་ཕུལ་ཕྱེད་དང་ལྔའི་ཆན་ལས་ཅུང་ཟད་ཅིང་ལྷག་པར་བླངས་ན་ཐམས་ཅད་དུ་ལྟུང་བར་འགྱུར་རོ། །ཟས་སྤངས་པ་ལས་ལྷག་མར་བྱས་པའི་བཟའ་བ་དང་བཅའ་བ་ཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེ་ན་བཅོམ་ལྡན་འདས་ཀྱིས་འཁོར་གྱི་དགེ་སློང་རྣམས་ལ་སྟན་གཅིག་པར་ཟ་བ་ནི་བྱ་བ་ཉུང་གནོད་པ་ཉུང༌། བདེ་བ་ལ་རེག་པར་གནས་ཤིང་ཡོན་ཏན་གྱི་ཚོགས་ཀྱང་རིག་གིས་དགེ་སློང་ཁྱེད་རྣམས་ཀྱང་སྟན་གཅིག་པར་ཟོ་ཤིག་ཅེས་བཀའ་སྩལ་ནས། དགེ་སློང་དག་སྟན་གཅིག་པར་ཟན་ཟ་བའི་ཚེ་སློབ་དཔོན་དང་མཁན་པོ་དང་བླ་མ་དག་རྒྱུ་བ་ལ་ལངས་ཤིང་ཕྱག་བྱས་པས་ན་ཟས་སྤང་བར་གྱུར་ཏོ་སྙམ་ནས་མ་ཟོས་པས་ཉམ་ཆུང་ཞིང་རིང་པས་མ་བརྟས་པར་གྱུར་ཏེ། སྙན་དུ་བདས་ནས་མ་ལྡང་ཤིག་ཅེས་བཀའ་སྩལ་པ་དང༌། ཡང་ཟས་ཕྱི་མ་འདྲིན་པའི་ཚེ་ཆོག་ཅེས་སྤངས་པས་སྔ་མ་ཡང་སྤངས་པར་འགྱུར་རོ་སྙམ་ནས་མ་ཟོས་པས་ཉམ་ཆུང་ཞིང་རིད་པར་གྱུར་ནས་ཡང་བཀའ་སྩལ་པ། ཕྱི་མ་སྤངས་ཀྱང་སྔ་མ་སྤངས་པར་མི་འགྱུར་གྱི་ཅི་ཙམ་འདོད་ཀྱི་བར་དུ་ཟོ་ཞིག་ཅེས་བཀའ་སྩལ་པ་དང༌། དྲུག་སྡེ་རྣམས་སྤངས་ཀྱང་རུང་མ་སྤངས་ཀྱང་འདྲིས་པར་ཟ་བས་ན་སྙན་དུ་བདས་ནས། དགེ་སློང་གི་བྱ་བ་མ་ཡིན་ཞེས་སྨད་དེ། སྤངས་པའི་ཟས་ཟ་ན་ལྟུང་བར་འགྱུར་རོ། །ཞེས་འདུལ་བ་ལ་བསླབ་པ་བཅས་སོ། །ལྷག་མར་གནང་བ་ནི་ཕྱིས་ཁྱིམ་བདག་ཅིག་གིས་དགེ་སློང་དག་མགྲོན་དུ་བོས་ན། དགེ་སློང་ནད་པ་མང་སྟེ། ནད་པ་རྣམས་ཀྱི་ཟན་བྲིང་བྲང་དུ་མནོས་པ་དང༌། ཟ་མ་ནུས་པའི་ལྷག་མ་རྣམས་ས་ལ་བོར་བ་དང༌། བྱ་ཁྱིས་ཐུ་བའི་སྒྲ་ཙ་རྩི་ཐོས་པ་སྙན་གྱིས་གསན་ནས་ཡོན་བདག་དང་པས་བྱིན་པའི་ཟས་ཆུང་མི་ཟ་བར་བྱ་བའི་ཕྱིར་ལྷག་མར་བྱ་བའི་ཆོ་གནས་ངོ༌། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །ཟས་ཞེས་བྱ་བ་ནི་བཟའ་བ་
ལྔ་དང་བཅའ་བ་ལྔའོ། །བཅའ་བ་ལྔ་ནི་སྤང་བར་བྱ་བ་མེད་དོ། །རྩ་བ་དང་སྡོང་པོ་དང་ལོ་མ་དང༌། མེ་ཏོག་དང་འབྲས་བུ་དང༌། བཟའ་བར་བྱ་བ་ལྔ་ལ་སྤང་བར་བྱ་བ་ཡོད་དེ། །གང་ཞེ་ན་འབྲས་ཆན་དང༌། སྲན་མ་དང༌། ཟན་དང༌། ཤ་དང༌། ཁུར་བ་ལ་བྱའོ། །བཟའ་བ་ལྔ་ཡང་སྤང་བར་འགྱུར་རོ། །ཞེས་གསུངས་པ་དང༌། ལག་པ་ཁུར་བ་སྣུམ་ལ་རེག་པས་ཕྱི་མ་ལ་རག་པས་ཕྱི་མ་ཀུན་སྤངས་སོ་སྙམ་པ་ལ་རྣམ་པ་ལྔས་ན་སྤངས་པར་རིག་པར་བྱ་སྟེ། ཟས་གནང་བ་དང༌། ཟས་འདྲིམ་པར་གནང་བ་དང༌། ཟས་འདྲིམ་པར་གཟས་པར་གནང་བ་དང༌། ཟས་སྤངས་པར་གནང་བ་དང༌། སྤྱོད་ལམ་ལས་ཉམས་པར་གནང་བའོ། །ཟས་གནང་བ་ནི་བཟའ་བ་དང་བཅའ་བ་ལྔ་གནང་བའོ། །ཟས་འདྲིམ་པ་ནི་སྐྱེས་པ་དང་བུད་མེད་གནང་བའོ། །འདྲིམ་པར་གཟས་པ་ནི་ཉེ་འཁོར་ན་བཟའ་བ་ལྔ་གནང་བའོ། །ཟས་སྤངས་པར་གནང་བ་ནི་བཟའ་བ་ལྔ་དང་བཅའ་བ་ལྔ་གནང་བའོ། །སྤྱོད་ལམ་ལས་ཉམས་པ་ནི་གང་ལ་སྟན་འདུག་པ་དེ་ལས་ལངས་པ་སྟེ། དེ་ལྔས་ན་ཟས་སྤངས་པར་རིག་པར་བྱའོ། །དེ་ལས་ལྡོག་པ་ལྔས་ན་མ་སྤངས་པར་རིག་པར་བྱའོ། །གཞན་ཡང་ལྷག་མ་ལུས་པའི་ཚིག་ལྔས་ན་མ་སྤངས་པར་རིག་པར་བྱའོ། །ལྷག་མ་མེད་པའི་ཚིག་ལྔས་ན་སྤངས་པར་རིག་པར་བྱའོ། །ལྷག་མ་ལུས་པའི་ཚིག་ལྔས་ལུས་པ་གང་ཞེ་ན། སྐད་ཅིག་མི་དགོས་སོ་ཞེས་བྱས་པ་དང༌། སྐད་ཅིག་གཞན་ལ་བྱིན་ཅིག་ཅེས་བྱས་པ་དང༌། སྐད་ཅིག་ཕྱིས་ཟོས་སོ་ཞེས་བྱས་པ་དང༌། སྐད་ཅིག་ཆོག་གོ་ཞེས་བྱས་པ་དང༌། སྐད་ཅིག་སྡོད་ཅིག་ཅེས་པ་བྱས་པ་སྟེ། དེ་ལྟར་ན་ལྷག་མ་ལུས་པའི་ཚིག་ལྔའོ། །ལྷག་མ་མེད་པའི་ཚིག་ལྔ་ནི་སྐད་ཅིག་ཅེས་མ་སྨོས་ལ་གོང་མ་ལས་བཟློག་པའི་ཚིག་ལྔས་ནི་ལྷག་མ་མེད་པའི་ཚིག་ལྔར་རིག་པར་བྱའོ། །ཟོས་ན་ཉེས་བྱ་བ་ནི་མགྲིན་པར་མིད་པའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་དགེ་སློང་གིས་སྤངས་པའི་ཟས་སྤངས་པར་འདུ་ཤེས་པ་བཞིན་དུ་ལྷག་མར་མ་བྱས་པའི་བཟའ་བ་དང་བཅའ་བ་ཟོས་ན་ལྟུང་བར་འགྱུར་རོ། །སྤངས་པ་མ་བྱས་པར་སྤངས་པར་འདུ་ཤེས་ན་ལྷག་མར་མ་བྱས་པ་ཟོས་ན་ཉེས་བྱས་སུ་འགྱུར་རོ། །སྤངས་བ་ལ་སྤངས་པར་འདུ་ཤེས་བཞིན་དུ་ལྷག་མར་མ་བྱས་པ་ཟོས་
ན་ལྟུང་བར་འགྱུར་རོ། །སྤངས་པར་མ་བྱས་པར་ཐེ་ཚོམ་ཟ་བཞིན་དུ་ལྷག་མར་མ་བྱས་པ་ཟོས་ན་ཉེས་བྱས་སུ་འགྱུར་རོ། །སྐྱོ་མ་དང་ཐུག་པ་ནི་ཁ་གཟར་བཞག་ན་མི་མཐོང་བ་དང༌། སོར་མོ་ལྔའི་རྗེས་སྣང་ན་སྤངས་པར་འགྱུར་རོ། །སྐོམ་ཟ་བ་ལ་སྤང་བ་མེད་དོ། །ལྷག་མར་བྱས་པ་ནི་དགེ་སློང་བདག་གིས་ཟན་སྤངས་པ་ཕྱིས་ཟ་འདོད་ན་ཡང་དགེ་སློང་ཟན་ཟ་ཞིང་འདུག་པ་སྤྱོད་ལམ་མ་ཉམས་པའི་དྲུང་དུ་སོག་ལ་ཕྱག་རྒྱས་ལ་ཙོག་ཙོག་པོར་འདུག་སྟེ། དགེ་སློང་དེ་ལ་གསོལ་ཏེ་ལྷག་མར་གྱིས་ཏེ་ཟོ་ཞིང༌། དགེ་སློང་གཅིག་གིས་ལྷག་མར་བྱས་ན་ཐམས་ཅད་ལ་ཟར་རུང་ངོ༌། །ཟས་ལྷག་མར་མ་བྱས་པའི་ཟས་སྟོབས་སུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་གཅིག་ཅིག་ལོངས་སྤྱོད་དག་ཀྱང་འགྲིབ་པར་གྱུར་ནས་དགེ་སློང་ཞིག་ལ་གསོལ་ཏེ་རབ་ཏུ་ཕྱུང་ངོ༌། །རྒན་ཞུགས་ཀྱང་དྲན་པ་ཉམས་པ་ཞིག་པས་རྟག་ཏུ་ལྟུང་བ་འབྱུང་ངོ༌། །དེ་མཁན་པོས་མདུན་དུ་ཙོག་ཙོག་འདུག་ཏུ་བཅུག་ནས་དེ་ལྟུང་བ་བཤགས་སུ་བཅུག་གོ །དེ་ཡང་རབ་ཏུ་ཁྲོས་ནས་སླད་ཀྱིས་ཁྱིམ་བདག་གིས་དགེ་འདུན་རྣམས་སྤྱན་དྲངས་སོ། །དགེ་སློང་དག་དེར་བཤོས་གསོལ་བའི་འོག་ཏུ་དགེ་སློང་དེ་གཉིས་ཀྱང་ཟས་ཟོས་ནས་ཉེ་བར་འགྲོ་བའི་གྲོང་དུ་སོང་སྟེ་ཟན་དག་བྱིན་ནས་ཟན་ཟོས་ཞེས་བྱས་ན་དེ་དག་གིས་ལྷག་མར་བྱོས་ལ་ཁྱེར་ཅིག་ཅེས་བྱས་པ་དང༌། དེ་གཉིས་ཀྱིས་བླངས་ནས་མཉན་དུ་ཡོད་པར་ཕྱིན་ཏེ། རྒན་ཞུགས་ནི་ལྷག་མར་བྱེད་དུ་བཅུག །སློབ་དཔོན་ནི་ཆུ་འཚག་ཏུ་སོང་ནས་སླར་འོང་བ་དང༌། ལྷག་མར་བྱས་སམ་ཞེས་སྨྲས་ན་ལྷག་མར་བྱས་སོ་ཞེས་ནས་ཟོས་པའི་འོག་ཏུ་སློབ་དཔོན་ཁྱོད་ནི་ལྷག་མར་མ་བྱས་པའི་ཟས་ཟོས་པས་ལྟུང་བ་བྱུང་ངོ་ཞེས་བྱས་པ་དང༌། ངས་ལྟུང་བ་མ་མཐོང་ངོ་ཞེས་བྱས་པ་ལས་སྙན་དུ་བདས་ནས། དགེ་སློང་གི་བྱ་བ་མ་ཡིན་ཞེས་སྨད་ནས། ད་ཕྱིན་ཆད་ལྷག་མར་མ་བྱས་པའི་ཟས་སྟོབས་སུ་མི་གནང་བར་བསླབ་པ་བཅས་སོ། །དགེ་སློང་གང་ཞེས་བྱ་བ་ནི་རྒན་ཞུགས་ཏེ། གཞན་ཡང་དེ་དང་འདྲ་བའོ། །ཤེས་ཞེས་བྱ་བ་ནི་བདག་རང་གིས་རིག་པ་འམ་གཞན་གྱིས་བསྒོ་བའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་སོ། །ཟན་ཟོས་ནས་སྤངས་པར་ཤེས་ཞེས་བྱ་བ་ནི་འགྲངས་ནས་ཆོག་པར་གྱུར་པའོ། །ལྷག་མར་མ་བྱས་ཞེས་བྱ་བ་ནི་ལྷག་མར་བྱས་པ་སྟེ་
བཟའ་བ་དང་བཅའ་བ་ལྔ་པའོ། །དུས་ཀྱིས་སྟོབས་ཞེས་བྱ་བ་ནི་ཡང་ནས་ཡང་དུ་སྟོབས་ཤིང་ཀླན་ཀ་བཙལ་ཏེ་ལྟུང་བ་དབྱུང་བར་བསམས་པའོ། །རྐྱེན་དེ་ཉིད་ཅེས་བྱ་བ་ནི་གཞན་མ་ཡིན་པའོ། །ལྟུང་བ་ནི་སྔ་མ་བཞིན་ནོ། །དགེ་སློང་མཚམས་ཀྱི་ནང་དུ་འདུས་ཤིང་ཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་ལྷ་སྦྱིན་ཀུན་དགའ་ར་བའི་མཚམས་ཀྱི་ནང་དུ་དགེ་སློང་མང་ཤིག་འདུས་ཤིང་ཟན་ཟ་བ་དང་མི་མཐུན་པའི་མཚན་མ་སྟོན་པས་དགེ་སློང་དག་འཕྱ་བ་སྙན་དུ་བདས་ནས་རྣམ་གྲངས་དུ་མས་སྨད་དེ། འདུས་ཤིང་ཟར་མི་གནང་བར་བསླབ་པ་བཅས་སོ། །ན་བ་དུས་སོ་ཞེས་བྱ་བ་ནི་སླད་ཀྱིས་དགེ་སློང་མང་ཞིག་ན་ནས་སྨན་པ་ལ་དྲིས་ན་ཞལ་སུ་ས་ལོགས་ཤིག་ཏུ་ཟོས་ན་ཕན་ནོ་ཞེས་ནས་ཉན་དུ་གསོལ་ཏོ། །ན་ན་ལོགས་ཤིག་ཏུ་བཟར་གནང་སྟེ་དགེ་སློང་ནད་པ་ཟ་གཅིག་གིས་མི་འཚོ་བའོ། །ལས་དུས་ནི་དགེ་སློང་དག་ཅིག་ཕྱག་དར་དང་དཀྱིལ་འཁོར་དག་བྱས་པས་ཆད་དེ་ཉལ་ཞིང་འདུག་པ་སྙན་དུ་བདས་ནས་རྗེས་སུ་གནང་སྟེ། ལས་མཆོད་རྟེན་དང་དགེ་འདུན་གྱི་ལས་བྱས་པའམ། ཆུང་དུ་ན་པའི་གནས་མ་ལ་ཙམ་གྱི་དཀྱིལ་འཁོར་བྱས་པའོ། །ལམ་གྱི་དུས་ནི་དགེ་སློང་ཞིག་ལམ་དུ་ཞུགས་པ་ལས། དེ་དག་ལམ་གྱིས་ངལ་ཞིང་འགྲོ་མི་ནུས་པ་ལས་རྗེས་སུ་གནང་སྟེ། དཔག་ཚད་གཅིག་ཏུ་སོང་བའམ་དཔག་ཚད་ཕྱེད་ནས་སླར་འཁོར་བའོ། །གྲུར་ཞུགས་པ་ནི་ཆུ་འབྱམ་དུ་དོང་བས་འདུ་མི་ཁོམ་པས་དཔག་ཚད་ཕྱེད་དང་གཅིག་ཏུ་སོང་བའོ། །དུས་སྟོན་ཞེས་བྱ་བ་ནི་སོ་སོའི་དུས་སྟོན་ཆེན་པོའི་འདུར་མི་ཁོམ་པས་སོ་སོར་བྱིན་པའོ། །དགེ་སྦྱོང་གི་ཟས་དུས་ཞེས་བྱ་བ་ནི་ཕྱི་རོལ་གྱི་དཀྱིལ་འཁོར་དུ་རབ་ཏུ་བྱུང་བ་སྟེ། ཀུན་དུ་ཆོས་ཟན་བྱིན་པ་ལ་སོགས་པའོ། །ལྟུང་བ་ནི་སྔ་མ་བཞིན་ནོ། །དུས་ནི་དེ་དག་དང་མཐུན་པ་སྟེ་རྗེས་སུ་གནང་བ་ལ་བྱའོ། །ཉེས་པ་ནི་མཚམས་ཀྱི་ནང་ལ་མཚམས་ཀྱི་ནང་དུ་འདུ་ཤེས་དང་ཐེ་ཚོམ་དུ་བཅས་ཏེ་ཟོས་ན་ལྟུང་བ་རེ་རེར་འགྱུར་རོ། །དགེ་འདུན་དུ་མ་ལགས་སམ་བསྙེན་པར་མ་རྫོགས་པས་གྲངས་སུ་བསྐང་བ་ནི་ཉེས་བྱས་སུ་འགྱུར་རོ། །ཤང་ཙེ་དང་ལན་ཚྭ་ཁ་གཟར་གང་ཙམ་ཡན་མན་བསྲེས་པའམ། ཡོན་བདག་གིས་སོ་སོའི་གནས་སུ་ཕུལ་བ་ནི་ཉེས་པ་མེད་དོ། །དུས་མ་ཡིན་པར་ཁ་ཟས་བཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ།
དེའི་ཚེ་ན་ཚེ་དང་ལྡན་པ་མཽད་གལ་གྱི་བུས་ཨུ་པཱ་ལི་ལ་སོགས་པ་གཞོན་ནུ་བཅུ་བདུན་རབ་ཏུ་ཕྱུང་ཞིང་བསྙེན་པར་རྫོགས་པར་བྱས་ནས་ད་དག་ཀྱང་སྔ་དྲོ་བསོད་སྙོམས་ལ་ཞུགས་པ་དང་བུད་མེད་དག་གིས་མཐོང་ནས། ཨེ་མའོ་ངོ་མཚར་ཆེ་བཙས་མ་ཐག་སྟེ། ཁ་ལན་ཚས་དགང་ཞིང་ཁྲོན་པའི་ནང་དུ་ཞུགས་ཀྱང་མི་ཤེས་སམ་ཞེས་བྱས་པ་དང༌། དེ་དག་ཀྱང་སྐྱེངས་ནས་བདག་ཅག་ཟན་ཆད་པ་བླའི་འདི་ལྟ་བུའི་ཚིག་ངན་པ་ནི་མ་ཐོས་ཀྱང་རུང་ངོ་ཞེས་ནས། དེ་དག་ཀྱང་དེའི་ཉིན་མོ་ཟན་མ་ཟོས་ནས་ནུས་ཀྱི་བར་དུ་ནི་དགེ་བ་ལ་སྤྱོད། མ་ནུས་ནས་འཕྲེས་ཤིང་ཉལ་བ་བསྙེན་དགའ་བོས་མཐོང་ནས་ཁྱེད་ཅག་གཞན་གྱི་ཟས་ཟོས་ནས་དེ་ལྟར་ཉལ་བའི་རིགས་སམ་ཞེས་བྱས་པ་དང༌། ངེད་ཀྱིས་མ་ཟོས་སོ་ཞེས་དེ་ལྟར་གྱུར་པ་རྒྱས་པར་སྨྲས་སོ། །དེའི་ཚེ་གྲོང་ཁྱེར་གྱི་མི་དགའ་སྡེ་རྣམས་ཟས་སྐོམ་བསྡུས་ནས་ཛེ་ཏའི་ཚལ་དུ་དོང་བ་བཅུ་བདུན་སྡེས་མཐོང་སྟེ། ཟས་སྐོམ་སྦྱིན་ན་བསོད་ནམས་སུ་འགྱུར་བ་དག་སྨྲས་པ་དང༌། དེ་རྣམས་ཀྱིས་ཀྱང་བཅུ་བདུན་སྡེ་ལ་ཟས་སྐོམ་བྱིན་ནོ། །དེ་དག་ཀྱང་ཟས་སྐོམ་ཟོས་ནས་འགྲངས་ཏེ། གཉིས་གཉིས་གསུམ་གསུམ་དུ་བཅད་དེ་ཁ་ཏོན་འདོན་པ་ལ་ཞུགས་པ་དང༌། བསྙེན་དགའ་བོས་མཐོང་སྟེ། ཁྱེད་ཅག་ད་ཅི་ནི་ཉལ་ན་ད་ནི་བརྩོན་པ་ལ་ཞུགས་སམ་ཞེས་བྱས་པ་དང༌། ཁ་ཟས་སྦྱིན་པ་ནི་ཡོན་ཏན་ལྔ་སྟེ་ཚེ་བྱིན་པ་དང་མདོག་བྱིན་པ་དང༌། སྟོབས་བྱིན་པ་དང༌། བདེ་བ་བྱིན་པ་དང༌། སྤོབས་པ་བྱིན་པ་སྟེ། བདག་ཅག་ཁྱིམ་བདག་ལ་ཁ་ཟས་བསླངས་ཏེ་ཟོས་སོ་ཞེས་བྱས་པ་དང༌། ཅི་ཁྱེད་དུས་ལས་འདས་པར་ཟན་ཟར་གནང་ངམ་ཞེས་སྨྲས་པ་དང༌། བདག་ཅག་དུས་སུ་ནི་ཟན་མ་རྙེད་དེ། ལྟོགས་ཏེ་འཆི་མི་ཕོད་དོ་ཞེས་ཟེར་བ་སྙན་དུ་བདས་ནས་རྣམ་གྲངས་དུ་མར་སྨད་དེ། དུས་ཡོལ་ནས་ཟར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་བཅུ་བདུན་སྡེ་སྟེ་གཞན་ཡང་དེ་དང་འདྲ་བའོ། །དུས་ཡོལ་ཞེས་བྱ་བ་ནི་དུས་གཉིས་ཏེ། ཉི་མ་ཕྱེད་ཡོལ་ཕན་ཆད་དང༌། སྐྱ་རེངས་མ་ཤར་གྱི་བར་དུ་དུས་མ་ཡིན་ཞེས་གསུངས་སོ། །ན་བ་ནི་མ་གཏོགས་སོ། །ཟོས་ཞེས་བྱ་བ་ནི་བཟའ་བ་ལྔ་དང༌། བཅའ་བ་ལྔ་མགྲིན་པར་མིང་པའོ། །དུས་ཡོལ་བ་ལ་ཡོལ་བར་འདུ་ཤེས་སམ་ཐེ་ཚོམ་ཟ་ན་ལྟུང་བར་འགྱུར་རོ། །དུས་མ་ཡོལ་བ་ལ་ཡོལ་བར་འདུ་ཤེས་སམ་ཐེ་ཚོམ་ཟ་ན་ཉེས་བྱས་སུ་
འགྱུར་རོ། །ཁ་ཟས་ཞག་ལོན་པ་བཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་ནག་པོ་ཞེས་བྱ་བ་གྲོང་ཁྱེར་དང་གྲོང་རྡལ་དག་ན་གནས་ཤིང་སྔ་དྲོ་ཟན་གྱི་ཕྱིར་བསོད་སྙོམ་ལ་འཇུག་གོ །བསོད་སྙོམས་ཀྱི་ཟན་གཤེར་བ་དང་སྐམ་པོ་རྙེད་ན་གཤེར་བ་ནི་འཕྲལ་དུ་ཟ། སྐམ་པོ་ནི་སྣོད་དུ་བཅུ་གནས། ནམ་ཆར་འབབ་ཅིང་རླུང་ལྡང་བ་དང༌། ནམ་རྨུས་པའི་ཚེ་ཆུའི་ནང་དུ་སྤངས་ཤིང་བསོད་སྙོམས་ལ་མི་འཇུག་པར་ཟའོ། །དུས་ཕྱི་ཞིག་ན་བཅོམ་ལྡན་འདས་གཙུག་ལག་ཁང་རྒྱུ་ཞིང་གཤེགས་པ་དང༌། ནག་པོའི་ཟས་སྐམ་པ་ལ་གཟིགས་ནས་སུ་ཡིན་ཞེས་རྨས་པ་དང༌། དགེ་སློང་ནག་པོའི་ལགས་སོ་ཞེས་ཀུན་དགའ་བོས་གསོལ་ཏེ། དགེ་སློང་གིས་ཁ་ཟས་བཞག་པ་བཟའ་བའི་མི་རིགས་མ་བརྟགས་པའོ་ཞེས་སྨད་དེ། བཞག་པའི་ཁ་ཟས་ཟར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་ནག་པོ་སྟེ། གཞན་ཡང་དེ་དང་འདྲ་བའོ། །བཞག་པ་ནི་རྣམ་པ་གཉིས་ཏེ། སྔ་དྲོ་བྱིན་ལེན་བྱས་པའི་ཟས་ནི་ཕྱི་འཕྲེད་ཀྱི་དུས་སུ་བཞག་པར་གྱུར་ཏོ། །ཕྱི་དྲོ་བྱིན་ལེན་བྱས་པ་ནི་སྲོད་ཀྱི་དུས་སུ་བཞག་པར་གྱུར་ཏོ། །མཚམས་ཀྱི་ནང་དུ་ཞག་ལོན་པ་དང་དགེ་སློང་གིས་བཅོས་པ་དང༌། བྱིན་གྱིས་མ་བརླབས་པ་ལ་ཡང་སྦྱར་རོ། །བཅའ་བ་དང་བཟའ་བ་དང་བཏུང་བ་ཞེས་བྱ་བ་ནི་སྔ་མ་བཞིན་དུ་བཞག་པ་ལ་བཞག་པར་འདུ་ཤེས་པ་དང་ཐེ་ཚོམ་ཟ་ན་ཡང་ལྟུང་བ་རེ་རར་འགྱུར་རོ། །མ་བཞག་པ་ལ་བཞག་པར་འདུ་ཤེས་པ་དང་ཐེ་ཚོམ་མ་ཟན་ཉེས་བྱས་རེ་རེར་འགྱུར་རོ། །ལྷུང་བཟེད་བཀྲུ་བ་མ་དག་སྟེ། བཞག་པ་ཡོད་པའམ་ཁ་གཟར་དང་ཚ་སྟེགས་ན་བཞག་པ་ཡོད་པ་དང་སྤགས་པ་ཟོས་ན་ཉེས་བྱས་སུ་འགྱུར་རོ། །ཁ་མ་བཀྲུས་པར་བཏུང་བ་འཐུངས་ན་ཉེས་བྱས་སུ་འགྱུར་རོ། །བཞག་པའི་མེ་ཏོག་དང་འབྲས་བུ་བཞག་པ་ཟོས་ན་ཡང་ལྟུང་བར་འགྱུར་རོ། །དགེ་སློང་བྱིན་ལེན་མ་བྱས་པར་ཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་ནག་པོ་ཡོ་བྱད་དང་འཚོ་བ་ཐམས་ཅད་ཀྱང་དུར་ཁྲོད་ཀྱི་སྟེ། ལྷུང་བཟད་ཀྱང་དུར་ཁྲོད་ཀྱི་རྫ་མ་བོར་བའོ། །གོས་ཀྱང་དུར་ཁྲོད་ཀྱི་མི་ཤི་བའི་གོས་བོར་བ། ཟས་ཀྱང་མི་ཤི་བའི་ཕྱིར་གཉེན་རྣམས་ཀྱིས་ཟན་ཁེངས་པ་བོར་བ་ཟ་བས་དེའི་ཚེ་དང་ལྡན་པ་ནག་པོ་ཆེན་པོ་ནམ་སྐྱེ་བོ་མང་པོ་ཤི་བའི་
ཚེ་ན་ལུས་ཀྱང་བརྟས་ཤིང་བསོད་སྙོམས་ལ་ཡང་མི་འཇུག་གོ །ནམ་མི་ཤིང་བ་ཉུང་བ་ན་གྲོང་དུ་བསོད་སྙོམས་ལ་འཇུག་ལུས་ཀྱང་མ་བརྟས་པར་གྱུར་པས་ན། ཡུལ་མཉན་དུ་ཡོད་པ་ཕྱོགས་སུ་ཚེ་དང་ལྡན་པ་ནག་པོ་ཆེན་པོ་མི་ཤ་བཟའ་བར་ཀུན་དུ་གྲགས་སོ། །བྱིན་ལེན་བྱོས་ལ་ཟོ་ཤིག་པར་བཀའ་སྩལ་པ་ལས་ཚེ་དང་ལྡན་པ་དྲུག་སྡེ་པོ་རྣམས་བྱིན་ལེན་མི་བྱེད་པར་ཟ་བས་ན། བཅོམ་ལྡན་འདས་ཀྱིས་ཉེས་པའི་དམིགས་སུ་གྱུར་པ་ཐམས་ཅད་ཀྱང་བྱིན་ལེན་མ་བྱས་པ་ལས་གྱུར་ཏོ་སྙམ་ནས་དབང་དུ་བྱ་ཞིང་སྐྱེ་བོ་རྣམས་ཡིད་ཆེས་པར་བྱ་བའི་ཕྱིར་བྱིན་ལེན་མི་བྱེད་དུ་མི་གནང་བར་འདུལ་བ་ལ་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །མ་བྱིན་ཞེས་བྱ་བ་ནི་སྐྱེས་པ་དང་བུད་མེད་རྣམས་ཀྱིས་མ་བྱིན་པའོ། །ཁ་ནས་མིད་ཅེས་བྱ་བ་ནི་བཟའ་བ་ལྔ་དང་བཅའ་བ་ལྔའོ། །ཆུ་དང་སོ་ཤིང་མ་གཏོགས་ཞེས་བྱ་བ་ནི་དགེ་སློང་དགོན་པ་རྣམས་ཆུ་དང་སོ་ཤིང་ཡང་མི་སྐྱོད་པ་ལས་སྙན་དུ་བདས་ནས། ཆུ་དང་སོ་ཤིང་མ་གཏོགས་ཞས་རྗེས་སུ་གནང་བའོ། །ལྟུང་བ་ནི་སྔ་མ་བཞིན་ནོ། །བྱིན་ལེན་མ་བྱས་པར་འདུ་ཤེས་པ་དང་ཐེ་ཚོམ་ཟ་ན་ཡང་ལྟུང་བ་རེ་རེར་འགྱུར་རོ། །བྱིན་ལེན་བྱས་པ་ལ་མ་བྱས་པར་འདུ་ཤེས་པ་དང་ཐེ་ཚོམ་ཟ་བཞིན་དུ་ཟོས་ན་ཉེས་བྱས་སོ། །སྤྲེའུ་དང་གླང་པོ་ཆེ་དང་ཅང་ཤེས་དང༌། དྲེད་མོ་ཅང་ཤེས་ལྟ་བུས་བྱིན་པ་ནི་བྱིན་པར་ཆུད་དོ། །སྨོད་པ་ཅན་གྱི་ཡུལ་ན་བྱིན་ལེན་མ་བྱས་པ་ཟར་ཡང་རུང་སྟེ། དཀྱིལ་འཁོར་གྱི་སྟེང་དུ་བཞག་པ་ཡང་གྱོང་གི་སྒྲ་མི་སྙན་ལྟ་བུར་བསྔོས་ཏེ་བཟའོ། །མི་ན་བར་ཟས་བཟང་པོ་གཞན་གྱི་ཁྱིམ་ནས་སློང་ཞིང་ཟར་མི་གནང་བའི་གླེང་གཞི་ནི་གྲོང་ཁྱེར་སེར་སྐྱའི་གནས་ན་སྟེ། དེའི་ཚེ་ནི་ཁྱིམ་བདག་ཤཱཀྱ་མིང་ཆེན་གྱིས་བཅོམ་ལྡན་འདས་ལ་སོགས་པ་དགེ་འདུན་རྣམས་བཤོས་ལ་སྤྱན་དྲངས་པ་དང༌། བཅོམ་ལྡན་འདས་འཁོར་དང་བཅས་པར་གཤེགས་སུ་གནང་སྟེ། བཅོམ་ལྡན་འདས་འཁོར་དང་བཅས་པ་མིང་ཆེན་གྱི་ཁྱིམ་དུ་གཤེགས་ཏེ་བཤོས་གསོལ་ནས། ཁྱིམ་བདག་ལ་ཆོས་བསྟན་གཟེངས་བསྟོད་རབ་ཏུ་དགའ་བར་མཛད་ནས་སླར་གཤེགས་སོ། །དགེ་སློང་དྲུག་སྡེ་རྣམས་ཉེ་བར་འགྲོ་བའི་གྲོང་ན་མར་ཟན་སློང་ཞིང་ཐོགས་པས་འཕྱིས་ཏེ་ཟན་ཡང་མ་སླེབས་གདན་འབྱམ་དག་ཀྱང་བསྡུས་པའི་འོག་ཏུ་མིང་ཆེན་གྱི་ཁྱིམ་དུ་ལྷགས་སོ། །དེར་ཟན་
དག་བསླངས་པ་དང༌། ཁ་ཟས་དག་ཟད་པས་ན་ངན་དོན་ཞིག་སྦྱར་བ་དང༌། དེ་དག་མ་མགུ་ནས་གཞན་དག་གི་ཁྱིམ་ནས་འོ་མ་དང་ཞོ་དང་མར་སར་དང༌། ཉ་དང་ཤ་དང་ཤ་སྐམ་བླངས་ཏེ་ཟོས་ནས་སླར་གཙུག་ལག་ཁང་དུ་དོང་ངོ༌། །དེ་དག་གཙུག་ལག་ཁང་དུ་ལྷགས་པ་དང༌། དགེ་སློང་རྣམས་ཀྱིས་ཁྱེད་ཟན་གར་ཟོས་ཤེ་ན་མིང་ཆེན་གྱི་དེར་རོ། །འོ་ན་ངེད་ཀྱིས་མ་མཐོང་ན་ཞེས་བྱས་པ་དང༌། ངེད་ཕྱིས་ལྷགས་སོ། །དེར་ཁྱེད་ཀྱིས་ཅི་ལྟ་བུ་ཞིག་ཟོས་ཞེས་བྱས་པ་དང༌། འོ་མ་དང་ཤ་དང་ཉ་སྐམ་མོ། །འོ་ན་ངེད་ཀྱིས་མ་ཟོས་ན། ཁྱེད་དེ་ལྟ་བུ་སློང་དུ་དབང་ངམ་ཞེས་བྱས་པ་དང༌། དབང་ཡང་རུང་མི་དབང་ཡང་རུང་བདག་ཅག་གིས་ཟོས་སོ་ཞེས་བྱས་པ་དང༌། དགེ་སློང་གཞན་དག་གིས་འཕྱས་པ་སྙན་དུ་བདས་ཏེ། ཁ་ཟས་བཟང་པོ་དག་གི་ཕྱིར་མི་ན་བར་གཞན་གྱི་ཁྱིམ་ནས་བསླངས་ཏེ་བཟར་མི་གནང་བར་བསླབ་པ་བཅས་སོ། །ན་བ་ལ་གནང་བ་ནི་དགེ་སློང་ཞིག་ནད་ཀྱིས་བཏབ་སྟེ་སྨན་པ་ལ་དྲིས་པ་དང༌། འཕགས་པ་འོ་མ་དང་ཤ་དང་ཉ་སྐམ་གསོལ་ཅིག་དང་སོས་པར་འགྱུར་རོ། །བདག་ལ་སུས་སྦྱིན་གྲོང་དུ་སློངས་ཤིག་དང་སྟེར་བར་འགྱུར་རོ། །བཅོམ་ལྡན་འདས་ཀྱིས་བསླབ་པ་བཅས་སོ། །གྲོང་དུ་སློང་དུ་མི་གནང་ངོ་ཞེས་པ་ལ་སྙན་དུ་བདས་ཏེ། ན་བའི་དུས་སུ་ཞེས་རྗེས་སུ་གནང་ངོ༌། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །གང་བཟང་པོར་གསུངས་ཞེས་བྱ་བ་ནི་འོ་མ་དང་ཞོ་དང་མར་དང་ཉ་དང་ཤ་དང་ཤ་སྐམ་མོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །བདག་གི་ཕྱིར་ཞེས་བྱ་བ་ནི་གཞན་གྱི་མ་ཡིན་གྱི་བདག་གི་ཚེད་དུ་བྱས་པའོ། །མིན་ཞེས་བྱ་བ་ནི་ན་བ་མ་གཏོགས་ཏེ་གནང་བའོ། །གཞན་གྱི་གྲོང་ན་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་གྲོང་ངོ༌། །དགེ་སློང་ཞེས་བྱ་བ་ནི་བདག་གིས་སོ། །ལྟུང་བ་ནི་སྔ་མ་བཞིན་ནོ། །མི་ན་བར་སློང་ཞིང་ཟན་སློང་བའི་ཚེ་ཉེས་བྱས་ཟོས་ན་ལྟུང་བར་འགྱུར་རོ། །མི་ན་བའི་ཚེ་བསླངས་ལ་ན་བའི་ཚེ་ཟོས་ན་སློང་བའི་ཚེ་ཉེས་བྱས་སོ། །ཟོས་ན་ལྟུང་བ་མེད་དོ། །ན་བ་ན་བསླངས་ལ་མིན་པ་ལ་ཟོས་ན་སློང་བ་ལ་ཉེས་པ་མེད་དོ། །ཟོས་ན་ལྟུང་བའོ། །ན་བའི་ཚེ་བསླངས་ཤིང་ན་བའི་ཚེ་ཟོས་ན་ཉེས་པ་མེད་དོ། །དགེ་སློང་བསོད་སྙོམས་ལ་ཞུགས་པ་ན་འཕགས་པ་ཅི་བཞེད་ཅེས་བསྟབས་
པ་ལས་བསླངས་པ་ནི་ཉེས་པ་མེད་དོ། །ཟན་གྱི་ཚོགས་ཏེ་ལྟུང་བ་བཞི་བཅུ་པ་རྫོགས་སོ།། །།སྲོག་ཆགས་དང་བཅས་པའི་ཆུ་ལ་ཤེས་བཞིན་དུ་སྤྱོད་དུ་མི་གནང་བའི་གླེང་གཞི་ནི་ཡུལ་ཀཽ་ཤཱམྦཱི་ཀུན་དགའ་ར་བ་ན་སྟེ། དེའི་ཚེ་ན་ཚེ་དང་ལྡན་པ་མོས་པ་ཅན་སྲོག་ཆགས་དང་བཅས་པའི་ཆུ་ལ་ཤེས་བཞིན་དུ་སྤྱོད་པ་དང༌། དེ་ལ་དགེ་སློང་ཚངས་པར་སྤྱོད་པ་ཕན་པར་འདོད་པ་རྣམས་ཀྱིས་ཚེ་དང་ལྡན་པ་ཁྱོད་སྲོག་ཆགས་དང་བཅས་པའི་ཆུ་མ་སྤྱོད་ཅིག་ཅེས་བསྒོ་ན་ངག་མི་ཉན་ཏེ། ཙིང་ལ་དེ་དག་གྲངས་ཀྱིས་གཏང་ངམ། ལྷོ་བྱང་ཤར་ནུབ་ཀྱི་རྒྱ་མཚོ་དང༌། མཚེའུ་དང་ལྟེང་ཀ་དག་ཏུ་ཅིའི་ཕྱིར་མི་དོང་ཞེས་ཟེར་བ་དགེ་སློང་གཞན་རྣམས་ཀྱིས་ཐོས་ཏེ། འཕྱ་བར་གྱུར་པ་ལས་སྙན་དུ་བདས་ནས། རྣམ་གྲངས་དུ་མས་སྨད་དེ་སྙིང་རྗེ་མེད་པའོ་ཞེས་ནས། སྲོག་ཆགས་དང་བཅས་པའི་ཆུ་ལ་སྤྱོད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་མོས་པ་ཅན་ཏེ་གཞན་ཡང་དེ་དང་འདྲ་བའོ། །ཤེས་བཞིན་ཞེས་བྱ་བ་ནི་བདག་གིས་ཤེས་པ་འམ་གཞན་གྱིས་བསྒོ་བའོ། །སྲོག་ཆགས་ཞེས་བྱ་བ་ནི་རྣམ་པ་གཉིས་ཏེ། བལྟར་སྣང་བ་དང་མི་སྣང་བ་ཆུ་ཚགས་ལ་ཆགས་པའོ། །སྤྱོད་ཅེས་བྱ་བ་ནི་རྣམ་པ་གཉིས་ཏེ། ཕྱིའི་སྤྱོད་པར་བྱ་བ་དང༌། ནང་གི་སྤྱོད་པར་བྱ་བ་སྟེ། ནང་གི་སྤྱོད་པར་བྱ་བ་ནི་བཏུང་བ་དང༌། ཁ་ལག་བཀྲུ་བ་དང༌། ལུས་ཀྱི་སྤྱོད་པ་སྟེ་ཞོ་དང་རྩ་བ་མོ་དང་ཤིང་ཏོག་སྲོག་ཆགས་དང་ལྡན་པ་ལ་ཡང་སྦྱར་རོ། །ཕྱི་རོལ་གྱི་ནི་ལྷུང་བཟེད་དང་གོས་ཀྱི་བཀྲུ་བཤལ་དང༌། ཆག་ཆག་དང་མཎྜལ་ལ་སོགས་པ་བྱ་བའོ། །དེ་བཞིན་དུ་ས་དང་རྩི་ཤིང་དང་མེ་ཏོག་ལ་སོགས་པ་སྲོག་ཆགས་ཡོད་པ་ལ་ཡང་སྦྱར་ཏེ། སྲོག་གཅོད་པའི་ཕས་ཕམ་པ་ལས་ཅི་སྐད་ཅིག་འབྱུང་བ་བཞིན་དུ་སྦྱོར་ཅིག །ལྟུང་བ་གོང་མ་ལས་སྲོགས་ཆགས་དང་བཅས་པའི་ཆུ་ལ་སྤྱོད་པ་དང༌། བྱེ་བྲག་ནི་ལྟུང་བ་གོང་མ་ནི་གཙུག་ལག་ཁང་དང་ཁང་པ་ལ་སོགས་པ་རྩིག་པའི་ཆུར་སྤྱོད་པ་ལ་བྱའོ། །འདིར་ནི་རང་གི་ལུས་ཀྱི་ཕྱི་ནང་དུ་སྤྱད་པ་ལ་བྱའོ། །སྲོག་ཆགས་ཡོད་པ་ལ་ཡོད་པར་འདུ་ཤེས་པ་དང་ཐེ་ཚོམ་ཟ་ན་ཡང་ལྟུང་བར་འགྱུར་རོ། །མེད་པ་ལ་ཡོད་པར་འདུ་ཤེས་པ་དང་ཐེ་ཚོམ་ཟ་ན་ཉེས་བྱས་རེ་རེར་འགྱུར་རོ། །དགེ་སློང་སྨྱེ་ངན་བྱེད་པའི་གནས་སུ་འདུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་
དང་ལྡན་པ་འཆར་བ་པོ་ནང་པར་སྔར་ལངས་ཏེ། ཁ་ལག་བཀྲུས་ནས་བསོད་ཉམས་ལ་གཤེགས་པ་དང༌། མཉན་དུ་ཡོད་པ་ན་ཚོང་དུས་ཞིག་ཡོད་པ་དེ་ན་ཚོང་པ་ཁ་ཅིག་ནི་ཚོང་དུས་སུ་ཟོང་རྣམས་བཀྲམ། ཁ་ཅིག་ནི་གདོད་འོང་ན། སྤོས་འཚོང་གི་ཁྱེའུ་ཞིག་གནས་པ་ཆུང་མ་གསར་དུ་བསླངས་མ་ཐག་པས་ཚུལ་བཞིན་མ་ཡིན་པ་ཡིད་ལ་བྱེད་དེ། མི་ཚངས་པར་སྤྱོད་དོ་སྙམ་ནས་ཚོང་ཁང་གི་སྒོ་གཅོད་ཅིང་འདུག་པ་འཆར་བས་རིག་པའི་ནོར་བུ་ཡོད་པའི་མཐུས་ཚོར་ཏེ། ཆེད་དུ་དེའི་བར་ཆད་དུ་བྱའོ་སྙམ་ནས། འཆར་པ་སྔར་དེའི་ཆུང་མའི་གན་དུ་སོང་ནས་ཆོས་འཆད་ཅིང་འདུག་པ་དང༌། དེའི་ཁྱོ་ཡང་ཕྱི་བཞིན་དུ་འོངས་ནས། ཆུང་མ་ལ་སྨྲས་པ་འཕགས་པ་འཆར་བ་བཤོས་གསོལ་ལ་ཐོང་ཞེས་བྱས་པ་དང་འཆར་བ་ན་རེ། ང་བདག་ནི་དགེ་བའི་བར་ཆད་དུ་གྱུར་པ་བཞིན་དུ་ཁྱེད་ལ་ཆོས་སྟོན་དུ་འོངས་ན། ཁྱོད་ཅིའི་ཕྱིར་ཆོས་མི་ཉན་པར་འདུག་ཆོས་ཉོན་ཅིག་ཅེས་ནས་མ་དད་བཞིན་དུ་ཆོས་བཤད་དོ། །འཆར་བ་སོང་གི་འོག་ཏུ་ཚོང་པ་ངོ་མཚར་ཆེའོ། །བདག་གི་ཆུང་མ་ལ་མི་དབང་བར་གྱུར་ཅེས་འཕྱ་བ་ལས། དགེ་སློང་དག་གིས་ཐོས་པ་སྙན་དུ་བདས་ནས་རྣམ་གྲངས་དུ་མས་སྨད་དེ། ད་ཕྱིན་ཆད་དེ་ལྟ་བུ་ན་འདུག་ཏུ་མི་གནང་བར་འདུལ་བ་ལ་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་འཆར་བ་སྟེ་གཞན་ཡང་དེ་དང་འདྲ་བའོ། །སྨྱེ་ངན་བྱེད་ཅེས་བྱ་བ་ནི་སྐྱེས་པ་དང་བུད་མེད་གཉིས་དབྱེན་བྱེད་པའོ། །གནས་ཞེས་བྱ་བ་ནི་བྲམ་ཟེ་དང་ཁྱིམ་པའི་ཁྱིམ་མོ། །ནན་གྱིས་འཐེན་ཏེ་འདུག་ཅེས་བྱ་བ་ནི་རྐུབ་ས་ལ་བཞག་པ་ཙམ་མོ། །མི་ཤེས་ན་ལྟུང་བ་མེད་དོ། །དགེ་སློང་སྨྱེ་ངན་བྱེད་པར་འགྲེང་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་འཆར་བས་སྔ་མ་བཞིན་དུ་མི་ཚངས་པར་སྤྱོད་པར་རིག་ནས། དེ་གཉིས་འཁྲིག་པ་ལ་བལྟའོ་སྙམ་ནས་ཕྱི་བཞིན་སོང་སྟེ། སྒོ་ལྐོག་ན་གབ་ཅིང་འདུག་པ་དེ་གཉིས་འཁྲིག་པའི་ཚེ་ཆུང་མས་མཐོང་ནས་འཆར་བ་འདུག་གིས་མ་བྱེད་ཅེས་སྨྲས་ན། འཕགས་པ་འཆར་བ་ནི་དེ་ཙམ་རྣམ་པར་གྲོལ་བའི་བསམ་གཏན་བྱེད་ཅིང་འདུག་གོ །འདིར་ཅི་འདོད་ཅེས་བྱས་ནས་མ་བཏུ་པ་སྟེ། སྤྱད་ཟིན་ནས་བལྟས་ན་འཆར་བ་འདུག་པར་མཐོང་ནས། དེ་དག་སྨོད་ཅིང་མི་སྙན་པ་འཛེར་པ་དགེ་སློང་གིས་ཐོས་
པ་སྙན་དུ་བདས་ཏེ། སྨྱེ་ངན་བྱེད་པའི་གནས་སུ་འགྲེང་ཞིང་འདུག་ཏུ་མི་གནང་བའི་བསླབ་པ་བཅས་སོ། །དགེ་སློང་གང་ཞེས་བྱ་བ་ནི་འཆར་བ་སྟེ་གཞན་ཡང་དེ་དང་འདྲ་བའོ། །ཤེས་བཞིན་ཞེས་བྱ་བ་ནི་བདག་ཉིད་ཀྱིས་ཤེས་པའམ། གཞན་གྱིས་བསྟན་པའོ། །སྨྱེ་ངན་ཞེས་བྱ་བ་ནི་གོང་མ་དང་འདྲ། གནས་ཞེས་བྱ་བ་ནི་ཁྱིམ་མོ། །དབེན་པ་ཞེས་བྱ་བ་ནི་གཞན་སྐྱེས་པ་དང་བུད་མེད་མེད་པའོ། །སྐྱབས་ཡོད་པ་ཞེས་བྱ་བ་ནི་ཡོལ་བ་དང༌། སབ་མ་དང༌། རྩིག་པས་བསྐྱབས་པའོ། །འཇིགས་པ་དང་རྐྱེན་བྱུང་བའི་ཚེ་འགྲེང་བ་ནི་ཉེས་པ་མེད་དོ། །གོང་མ་ལས་འདིར་ནི་བྱེ་བྲག་འགྲེང་བ་བཞག་གོ །དགེ་སློང་གིས་གཅེར་པུ་པའམ། གཅེར་བུ་པ་ལ་རང་གི་ལག་ནས་ཟན་སྦྱིན་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཡུལ་ཀོ་ས་ལར་ལྗོངས་རྒྱུ་བ་ལས་མཉན་དུ་ཡོད་པར་བྱོན་པའི་ཚེ། མཉན་དུ་ཡོད་པའི་སྐྱེད་མོས་ཚལ་ན་ཁྱིམ་པ་མོ་ལྔ་བརྒྱ་ཙམ་ཞིག་སྐུད་པ་འཁལ་ཞིང་འཁོད་པ་བཅོམ་ལྡན་འདས་ཀྱིས་ཆོས་བཤད་ནས་བདེན་པ་ལ་རབ་ཏུ་བཀོད་དོ། །དེ་ནས་བུད་མེད་ལྔ་བརྒྱ་པོ་དེ་དག་གིས་བཅོམ་ལྡན་འདས་ལ་བཤོས་གསོལ་ལོ་སྙམ་ནས་རྒྱུ་ཇེ་ཙམ་གྱིས་ཆོག་ཅེས་དྲིས་པ་ན་ཀུན་དགའ་བོས་ཀཱར་ཥཱ་པ་ཎ་ལྔ་བརྒྱས་ཆོག་གོ་ཞེས་ནས། དེ་དག་གིས་ཚེ་དང་ལྡན་པ་ཀུན་དགའ་བོ་ལ་ཀཱར་ཥཱ་པ་ཎ་ལྔ་བརྒྱ་ཕུལ་ཏེ་བདག་ཅག་ནི་བུད་མེད་ཀྱི་བུ་ལགས་པས་སྦྱོར་ཡང་མི་ནུས་པས་སྣོད་སྤྱད་ཀྱང་མ་མཆིས་ཞེས་བྱས་པ་དང༌། ཀུན་དགའ་བོས་ཁྱིམ་བདག་འབྱོར་པ་ཞིག་ལ་བཅོལ་ཅིག་ཅེས་བྱས་པ་དང༌། ཀུན་དགའ་བོས་ཀྱང་ཁྱིམ་བདག་མགོན་མེད་ཟས་སྦྱིན་ལ་བཅོལ་ཏེ། འདྲིམ་པའི་ཚེ་བུད་མེད་རྣམས་ཀྱི་གྲོགས་ཚེ་དང་ལྡན་པ་ཀུན་དགའ་བོས་ཀྱང་བྱས་སོ། །དེའི་ཚེ་གཅེར་བུ་མ་གཉིས་ཤིག་ཟན་སློང་དུ་ལྷགས་ནས་གྲལ་གྱི་མཇུག་ལ་བཞག་པ་དང༌། ཀུན་དགའ་བོས་མ་བསམས་པར་ཁུར་བ་འདྲིམ་པའི་ཚེ་རྒན་མོ་ལ་ནི་གཅིག །གཞོན་ནུ་མ་ལ་གཉིས་བྱིན་པ་དང༌། རྒན་མོ་ན་རེ་གཞོན་ནུ་ཁྱོད་ལ་ཀུན་དགའ་བོ་སྐུགས་ཀྱིས་སྟ་གོན་གྱིས་ཤིག་བྱས་པ་དང༌། གཞོན་ནུ་ན་རེ་རྒྱལ་པོའི་སྲས་ལས་རབ་ཏུ་བྱུང་བ་སྟེ། བཙུན་མོའི་འཁོར་དང་བཟང་མོ་མང་དུ་སྤངས་ཏེ་རབ་ཏུ་བྱུང་ན་ང་ལྟ་བུ་དྲི་མ་ཅན་ལ་འདིས་ཅི་ཞིག་རེར་ཡོད་ཅེས་སྨྲས་པ་དང༌། འོན་དུ་ཟིན་
ཀྱང་སྐྱེས་པ་ཇི་ལྟ་བུ་ལ་དགའ་སྟོན་མེད་བྱས་པ་དང༌། དགེ་སློང་རྣམས་ཀྱིས་ཐོས་ཏེ་སྙན་དུ་བདས་ནས་གཅེར་བུ་མ་ལ་རང་གིས་བྱིན་དུ་མི་གནང་བར་བསླབ་པ་བཅས་སོ། །གཅེར་བུ་ཞེས་བྱ་བ་ནི་གཅེར་བུ་པ་ཁ་ཅིག་འཆོ་བ་དང་མི་ལྡན་ཏེ་ལྟོགས་པ་ལས་དགེ་སློང་རྣམས་ལ་སློང་བའི་ཚེ། དགེ་སློང་རྣམས་ཀྱིས་འཚོ་བ་སྦྱར་ཅིང་བྱིན་པས་ན་དགེ་སློང་རྣམས་ལ་འཕྱ་ཞིང་མི་སྙན་པར་འཛེར་བ་དང༌། ངེད་དགེ་སློང་གི་སྦྱིན་གནས་ཡིན་ཏེ། ངེད་ལ་ཡོན་སྦྱིན་ནོ་ཞེས་སྤྱོམས་པས། རང་གི་ལག་པས་སྦྱིན་དུ་མི་གནང་བར་བཅས་སོ། །དགེ་སློང་ཞེས་བྱ་བ་ནི་ཀུན་དགའ་བོ་སྟེ་གཞན་ཡང་དེ་དང་འདྲ་བའོ། །གཅེར་བུ་མ་ཞེས་བྱ་བ་ནི་གོས་མེད་པའོ། །ཀུན་དུ་རྒྱུ་ཞེས་བྱ་བ་ནི་དེ་ལས་གཞན་པའི་མུ་སྟེགས་སོ། །ལྟུང་བ་ནི་སྔ་མ་བཞིན་ནོ། །ན་བ་དང་སྡིག་པར་ལྟ་བ་ལས་དབྲལ་བའི་ཕྱིར་སྦྱིན་པ་ནི་མ་གཏོགས་སོ། །ཁ་ཟས་བཏུང་བ་ཡང་ཡིན་ལ་རང་གི་ལག་གིས་ཀྱང་སྦྱིན་ན་ལྟུང་བར་འགྱུར་རོ། །བཟའ་བ་དང་བཅའ་བ་ལྔ་རུང་བ་ལ་ཡང་མ་ཡིན་ལ་གཞན་ནས་བརྒྱུད་དེ་བྱིན་ན་ནི་ཉེས་བྱས་སོ། །དགེ་སློང་དམག་ཆས་པ་ལ་བལྟར་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཡུལ་ཀོ་ས་ལའི་རྒྱལ་པོ་ལ་རི་བྲགས་ཀྱི་གྲོང་དག་ཅིག་ལོག་སྟེ་བསྔོས་ནས་རྒྱལ་པོས་རི་བྲགས་ཀྱི་གྲོང་འབེབས་པར་དམག་དཔོན་འཁོར་དང་བཅས་ཏེ་སྔར་བཀྱེ་བ་དང༌། ཕྱིས་ཀྱང་སྣོན་མ་ཞིག་བཀྱེ་ན་མ་ཕེབས་ཏེ་སླར་སྨས་སོ་ཞེས་རྒྱལ་པོའི་སྟེང་དུ་འཕར་མ་འོངས་ནས་རྒྱལ་པོས་ཡུལ་ན་མཚོན་གྱིས་འཚོ་བ་ཐམས་ཅད་སྣོན་དུ་དེངས་ཤིག་ཅེས་ཀུན་དུ་བསྒོ་ནས་དམག་གི་རྟ་པ་དང་རྐང་ཐང་ལ་སོགས་ཏེ། ལྷ་ཁང་གི་སྒོ་ནས་མར་དོང་བ་ལ་དྲུག་སྡེ་རྣམས་གསུས་པོ་ཆེའི་དམག་ལྟར་འདོང་ངོ་ཞེས་སྦྲན་ནས་དམག་ཆས་པ་ལ་ལྟ་ཞིང་བཀྲེན་པ་གླང་པོ་ཆེ་ཕག་འདྲ་འདིས་རི་བྲགས་ཀྱི་གྲོང་ཕེབས་པར་ནི་མི་འགྱུར་གྱི་ཁྱེད་ཆས་ཏེ་འདོད་དུ་ཡོད་ཀྱི་སླར་ལོག་ཏུ་ནི་མེད་དོ་ཞེས་སྨྲས་པས་དེ་དག་ཀྱང་བག་འཁུམས་ཤིང་སྤ་གོང་བས་ལམ་ནས་སླར་འཁོར་ཏོ། །དེ་ནས་རྒྱལ་པོས་ཅིའི་ཕྱིར་འཁོར་ཞེས་བྱས་པ་དང༌། རྒྱལ་པོ་ཁྲོས་ནས་སྙན་དུ་གསོལ་ཏེ། དམག་ཆས་པ་ལ་བལྟར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲའོ། །དམག་ཆས་ཞེས་བྱ་བ་ནི་འཐབ་མོ་
བྱེད་འདོད་པའོ། །དམག་ཅེས་བྱ་བ་ནི་ཡན་ལག་གཅིག་པ་དང༌། ཡན་ལག་གཉིས་པ་དང༌། ཡན་ལག་གསུམ་པ་དང༌། ཡན་ལག་བཞི་པའོ། །ཡན་ལག་གཅིག་པ་ནི་གླང་པོ་ཆེའི་ཚོགས་དང༌། ཡན་ལག་གཉིས་པ་ནི་རྟ་པའི་ཚོགས་སོ། །ཡན་ལག་གསུམ་པ་ནི་ཤིང་རྟའི་ཚོགས་སོ། །ཡན་ལག་བཞི་པ་ནི་རྐང་ཐང་པའི་ཚོགས་སོ། །གཙུག་ལག་ཁང་ལམ་ཀ་ན་འདུག་པའི་ལམ་ཀ་ནས་འདོང་བ་དང༌། དམག་ཉིད་གཙུག་ལག་ཁང་དུ་འོངས་པ་དང༌། རྒྱལ་པོ་དང༌། བློན་པོ་དང༌། དམག་དཔོན་དང༌། ཡུལ་མི་ལ་སོགས་བཀུག་པའམ། བར་ཆད་བརྒྱད་ལ་སོགས་པ་བྱུང་སྟེ། དམག་མཐོང་ན་ནི་ཉེས་མེད་དོ། །ཞག་གཉིས་ལས་ལྷག་པར་དམག་གི་ནང་ན་ལྟ་ཞིང་འདུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། རི་བྲགས་ཀྱི་གྲོང་དེ་ཉིད་ཀྱང་ད་རུང་མ་ཕེབས་ནས་རྒྱལ་པོ་ཡང་ཕྲུ་མ་དེ་ཉིད་དུ་འདུག་གོ །བློན་པོ་རྣམས་ཀྱིས་གྲོས་བཏབ་སྟེ། ཁྱིམ་བདག་མགོན་མེད་ཟས་སྦྱིན་བློ་ཆེ་ལ་མཐུ་ཆེ་བས་ན་ཁྱིམ་བདག་བཀུག་པའི་རིགས་པར་གསོལ་བ་དང༌། དགུག་པར་པོ་ཉ་གཅིག་བཏང་སྟེ་བཀུག་གོ །དེ་ནས་རིང་ཞིག་ལོན་ཀྱང་མ་ཕེབས་ནས། མགོན་མེད་ཀྱང་མི་དགའ་བ་འདྲན་ས་རྒྱལ་པོ་གསལ་རྒྱལ་གྱིས་ཁྱིམ་བདག་བུ་སྨད་དང་བྲལ་བ་མི་དགའ་འམ། ཅི་ཉེས་ཞེས་རྨས་པ་ན་བདག་བུ་སྨད་དང་བྲལ་བ་ནི་མི་དགའ་བ་མེད་ན་འཕགས་པ་དགེ་སློང་དག་མེད་པས་མི་དགའོ། །ཞེས་བྱས་ནས་དེའི་ཕྱིར་གྱལ་པོས་དགེ་སློང་དག་འདིར་ཤོག་ཤིག་པར་ཡི་གེ་སྤྲིངས་ནས་དགེ་སློང་རྒན་པོ་ནི་རྒས་ཏེ་འགྲོ་མི་ནུས། གསར་བུ་དག་ནི་ཆོས་ཁྲིམས་དག་མ་ལོབས་པས་ཉན་ཅིང་འབད་པས་མ་བཏུབ་ཁ་ཅིག་ནི་ན་ནས་འགྲོ་མ་ནུས་པ་དང༌། དྲུག་སྡེ་རྣམས་བདག་ཅག་རྒྱལ་པོ་དང་བློན་པོ་རྣམས་ཆོས་འཆད་དུ་འདོད་ངོ་ཞེས་ཁས་བླངས་ནས། དྲུག་སྡེ་རྣམས་དམག་གི་ནང་དུ་ལྷགས་ཏེ་ཞག་དུ་མར་འཁོད་ཅིང་དམག་བརྒྱུས་པ་ལས་ཕར་ཕུལ་ཞིང་ཀྱལ་ཀ་བྱེད་དེ། བཀྲེན་པ་ཁྱེད་ཀྱིས་གླང་པོ་ཆེ་ཕག་འདྲ་བ། རྟ་བོང་བུ་འདྲ་བ་ཞེས་ནས་མཇུག་མ་ནས་བཟུང་ཞིང་བསྐོར་ཏེ། མི་ལ་རྩྭ་མི་འདྲ་བ་ཞེས་བྱས་ཤིང་གཉའ་བ་ན་ཕུལ་བས་དེ་དག་བབ་འཁུམས་མི་དགའ་བར་གྱུར་ནས་སེམས་ཤིང་འཁོད་པ་ལས་རྒྱལ་པོས་མཐོང་སྟེ། དགེ་སློང་དམག་གི་ནང་ན་ཡུལ་རིང་དུ་འདུག་ཏུ་མི་གནང་བར་གསོལ་ནས་དྲུག་སྡེ་ལ་བཀའ་རྨས་ཏེ། དགེ་
སྦྱོང་གི་བྱ་བ་མ་ཡིན་ཞེས་སྨད་ནས་དམག་གི་ནང་དུ་ཞག་གཉིས་ལས་འདུག་ཏུ་མི་གནང་བར་བསླབ་པ་བཅས་སོ། །དེ་འདྲ་བའི་རྐྱེན་ཅིག་གིས་ཞེས་བྱ་བ་ནི་རྒྱལ་པོ་དང་དམག་དཔོན་དང་ཡུལ་མིས་བོས་པའོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །དམག་ཅེས་བྱ་བ་ནི་ཡན་ལག་གཅིག་ལ་སོགས་ཏེ། གོང་མ་བཞིན་ནོ། །བལྟར་འགྲོ་ན་ཞེས་བྱ་བ་ནི་ལྟ་འདོད་པའི་ཕྱིར་རོ་།ཞག་གཉིས་ལས་འདས་ཞེས་བྱ་བ་ནི་དུས་ལས་ཡོལ་བའོ། །ལྟུང་བ་ཞེས་བྱ་བ་ནི་སྔ་མ་བཞིན་ནོ། །རྒྱལ་པོ་དང་བློན་པོས་འདུག་ཤིག་ཅེས་བསྒོ་བའམ། བར་ཆད་ཆེན་པོ་བརྒྱད་བྱུང་བའི་དབང་གིས་ན་ལྟུང་བ་མེད་དོ། །ཞག་གཉིས་དམག་གི་ནང་ན་གནས་པའི་ཚེ་ཡང་གཡུལ་བཤམས་པ་ལས་དཀྲུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། རྒྱལ་པོ་གསལ་རྒྱལ་གྱིས་རི་བྲགས་གྲོང་ལོག་པ་ད་རུང་མ་ཕེབས་ནས། མགོན་མེད་ཟས་སྦྱིན་ཀྱང་དགེ་སློང་དག་མེད་པས་མ་དགའ་ནས། དགེ་སློང་ཁ་ཅིག་དེར་ཐོང་ཤིག་པར་ཡི་གེ་སྤྲིང་ངོ༌། །དགེ་སློང་གཞན་རྣམས་ནི་སྔ་མ་བཞིན་དུ་བྲེལ་ཏོ། །ཡང་དྲུག་སྡེ་ལྷགས་སོ། །སྔར་ཞག་གཉིས་ལས་རིང་དུ་གནས་སུ་མི་གནང་བ་དང༌། སླད་ཀྱིས་ཞག་གཉིས་ཀྱི་ཚེ་ན་ཡང་གླང་པོ་ཆེའི་ཚོགས་ལ་སོགས་གཡུལ་བཤམས་པ་ལ་སྔ་མ་བཞིན་དུ་དཀྲུགས་ནས་ཁོང་བདག་ཅག་དགྲའི་ལོགས་སུ་སྔར་དོང་ནས་ནགས་ཚང་ཚིང་ན་འཁོད་དེ། དམག་འོང་བ་དང༌། དྲུག་སྡེ་རྔ་བརྡུངས་དུང་བུས་ཁུས་བཏབ་པ་དང༌། གསལ་རྒྱལ་གྱི་དམག་གིས་ཡང་སྐྲག་པར་གྱུར་ཏེ་དེ་དག་གི་སྙིང་ལམ་ན་དགྲ་བྱུང་སྙམ་ནས་སླར་ལོག་སྟེ་བྲོས་སོ། །དེ་ནས་ཡང་མདུན་དུ་བརྒྱུགས་ཏེ། བསྒུགས་ནས་ཁྱེད་ཅིའི་ཕྱིར་འབྲོས་ཞེས་བྱས་ནས། ཁྱེད་ཀྱིས་གཡུལ་དཀྲུགས་པའི་ཕྱིར་བྲོས་སོ་ཞེའོ། །དེད་ཀྱིས་རྩེད་མོ་བྱས་པའི་ཕྱིར་ཡང་སྐྲག་སྟེ་འབྲོས། དགྲ་འོངས་ན་ཇི་ལྟར་རྒོལ་ཞེས་བྱས་པ་དང༌། དེ་དག་གིས་རྒྱལ་པོ་ལ་གསོལ་ནས། རྒྱལ་པོས་ཀྱང་སྙན་དུ་གསལ་ཏེ། ཞག་གཉིས་དམག་གི་ནང་ན་གནས་པའི་ཚེ་ཡང་གཡུལ་བཤམས་པ་དཀྲུག་ཏུ་མི་གནང་བར་འདུལ་བ་ལ་བསླབ་པ་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །དམག་ཅེས་བྱ་བ་ནི་རྟ་པ་ལ་སོགས་པ་སྟེ་སྔ་མ་བཞིན་ནོ། །བཤམས་པ་དཀྲུགས་
ཞེས་བྱ་བ་ནི་གཡུལ་གྱི་ནང་དུ་འཇུག་པའོ། །རྒྱལ་མཚན་ཞེས་བྱ་བ་ནི་སེང་གེ་དང་ཆུ་སྲིན་དང༌། ཁྱུ་མཆོག་གི་རྒྱལ་མཚན་ནོ། །གཡུལ་བཤམས་པ་རྣམ་པ་བཞི་སྟེ། འབྲུའི་ཕུང་པོ་ལྟ་བུ་དང༌། ཤིང་རྟ་དང༌། ཟླ་གམ་དང་ནམ་མཁའ་ལྡིང་གི་འདབ་མ་ལྟ་བུའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་གླང་པོ་ཆེ་དང་རྟ་ལ་སོགས་པ་གོ་བསྐོན་པ་ལོགས་ཤིག་ཏུ་བྱུང་ན་ལྟུང་བར་འགྱུར་རོ། །གོ་མ་བསྐོན་ན་ཉེས་བྱས་སུ་འགྱུར་རོ། །དགེ་སློང་ལ་རྡེག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཚེ་དང་ལྡན་པ་མཽད་གལ་གྱི་བུས་ཨུ་པཱ་ལི་ལ་སོགས་པ་གཞོན་ནུ་བཅུ་བདུན་སྡེ་རབ་ཏུ་ཕྱུང་སྟེ་བསྙེན་པར་རྫོགས་པར་བྱས་པ་དེ་ན་དེ་དག་དྲུག་སྡེའི་རྒྱུས་མི་ཤེས་པས་ཚེ་དང་ལྡན་པ་འཆར་བས་བཅུ་བདུན་སྡེ་གཅིག་ལ་ལས་ཤིག་བཅོལ་ན་ཁྱོད་ངའི་སློབ་དཔོན་དང༌། མཁན་པོ་ནི་མ་ཡིན་ཞེས་མ་བཏུབ་པ་དང་དེས་ཐལ་མོ་ཞིག་བསྣུན་པ་དང་ས་ལ་བསྒྱེལ་ཏེ་ངུས་པ་དང་ཐམས་ཅད་ཀྱང་ས་ལ་འགྱེལ་ཏེ་ངུས་པ་གཞན་དག་གིས་ཁྱེད་ཀྱི་ནང་ནས་གཅིག་བརྡེགས་ན་གཞན་དག་ཅིའི་ཕྱིར་དུ་ཞེས་བྱས་པ་དང༌། བདག་ཅག་ཐམས་ཅད་མ་དུས་ན་ཀུན་ཀྱང་རྡེག་ཏུ་འོང་ངོ་ཞེས་སྨྲས་པ་སྙན་དུ་བདས་ཏེ། དགེ་སློང་ལ་རྡེག་ཏུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་འཆར་བ་སྟེ་གཞན་ཡང་དེ་དང་འདྲ་བའོ། །བརྡེགས་ཞེས་བྱ་བ་ནི་བསྣུན་ཅིང་བརྒྱབ་པའོ། །ལྟུང་བ་ནི་སྔ་མ་བཞིན་ནོ། །དགེ་སློང་ཁྲོས་འཁྲུགས་ཏེ་རྔམ་ནས་དགེ་སློང་ལ་ཐལ་མོ་དང༌། བུ་ཚུར་གྱིས་བསྣུན་ན་ལྟུང་བར་འགྱུར་རོ། །སོར་མོ་ལྔས་བསྣུན་ན་ཡང་ལྟུང་བ་རེ་རེར་འགྱུར་རོ། །ཐ་ན་རྒྱ་ཤུག་གི་འབྲུམ་བུའམ་ཉུངས་ཀར་གྱི་འབྲུམ་བུ་ལུས་ལ་ཕོག་ན་ཅི་རྙེད་ཕོག་པ་ལྟུང་བ་རེ་རེར་འགྱུར་རོ། །དགེ་སློང་གིས་ཐབས་ཀྱི་སྒོ་ནས་བརྡེགས་ན་ཡང་ལྟུང་བར་འགྱུར་རོ། །དགེ་སློང་ལ་རྡེག་པར་གཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་བཅུ་བདུན་སྡེ་དྲུག་སྡེ་ལ་བསྙེན་བཀུར་བྱེད་པ་ན་འཆར་པས་ཡང་ལས་བཅོལ་པ་དང༌། མ་བཏུབ་ནས་རྡེག་ཏུ་གནང་བས་རྡེག་པར་གཟས་ཏེ་ལག་པ་གཟས་པ་ལས། ཀུན་དུས་བ་སྙན་དུ་བདས་ཏེ། གཟར་མི་གནང་བར་འདུལ་བ་ལ་བསླབ་པའི་གནས་བཅས་སོ། །རྡེག་པར་གཟས་ན་ཐ་ན་ཉུངས་ཀར་འབྲུ་གཅིག་གིས་ཀྱང་རུང་སྟེ་ལྟུང་
བར་འགྱུར་རོ། །གཞན་ནི་བསྣུན་པ་ལ་སྦྱར་བ་བཞིན་དུ་རྒྱས་པར་སྦྱོར་ཅིག །ཁྱིམ་པ་ཡང་བསྙེན་པར་མ་རྫོགས་པ་ལ་རྡེག་པར་གཟས་ཀྱང་རུང་སྟེ་ཉེས་བྱས་སུ་སྨད་དོ། །དགེ་སློང་གིས་གནས་ངན་ལེན་འཆབ་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དགའ་བོས་སློབ་མ་ཆོས་ཞེས་བྱ་བ་ཅིག་ཡོད་དེ། དེ་མང་དུ་དགེ་བ་ལ་བརྩོན་པ་ཞིག་པས་ཉིན་པར་དགེ་བ་སྤྱོད་པའི་སར་སྟན་ཁྱེར་ཏེ་འགྲོ་བ་ལས་དགའ་བོ་དང་ཕྲད་ནས་བསྙེན་དགའ་བོ་ན་རེ་ངའི་སྟན་ཡང་ཁྱེར་ཏེ་ཤོག་ཅེས་ནས་དེ་གཉིས་ཀྱང་ལྷན་ཅིག་ཉིན་པར་དགེ་བ་སྤྱོད་པའི་ས་ན་བསམ་གཏན་བྱེད་པ་ལས། བསྙེན་དགའ་བོ་ནི་སེམས་རྒོད་པས་མགོ་གཡོགས་ཏེ་བསམ་གཏན་བྱེད་ན་འོན་ཀྱང་སེམས་མ་འཁྲུགས་ཏེ། དགེ་འདུན་གྱི་ཤིང་ཐགས་ལ་བུ་མོ་ཞིག་ཤིང་རྐུ་ཞིང་འདུག་པ་མཐོང་ནས། ཆོས་ཅན་ལ་སྐྲོད་ཅིག་ཅེས་བྱས་པ་དང༌། སློབ་དཔོན་རྟོག་ཕ་མ་མང་བར་ཛེ་ཏའི་མདོ་སྡེ་ལ་དགོངས་ཤིག་ཅེས་བྱས་པ་དང༌། བླུན་པོ་དགེ་འདུན་གྱི་བཅྭ་ཤིང་ལ་ལྟོས་ཤིག་ཅེས་མ་གསུངས་སམ། ཁྱོད་ཀྱིས་མ་བཏུབ་ན་ང་རང་སྐྲོད་དོ་ཞེས་ནས། བསྙེན་དགའ་བོས་བུ་མོ་བསྐྲད་ན་བུ་མོ་དེ་ཡང་ཕྱིར་བགད་པ་དང༌། བསྙེན་དགའ་བོས་བུ་མོ་དེ་བཟུང་སྟེ་འོག་ཅིག་བྱས་སོ། །དེ་ནས་སླར་འཁོར་ཏེ་ཆོས་ཅན་ལ་ཁྱོད་ཀྱིས་ཅི་མཐོང་ཞེས་སྨྲས་པ་དང༌། ནང་དུ་ཞུགས་པ་གཅིག་པུ་མ་མཐོང་གི་གཞན་ནི་ཐམས་ཅད་མཐོང་ངོ་ཞེས་བྱས་པ་དང༌། འོ་ན་སུ་ལ་ཡང་མ་སྨྲ་ཤིག་ཅེས་བྱས་པ་ན་སུ་དང་མ་ཕྲད་ཀྱི་བར་དུ་མི་སྨྲའོ། །འོ་ན་ཁྱོད་ཀྱི་མཁན་པོ་དགའ་བོའི་ཉེས་པ་བྱུང་ན་ཡང་ངས་རྟག་པར་བཅབ་ན་ངའི་ཡང་ཁྱོད་མི་བཅབ་བམ་ཞེས་བྱས་ན། དེས་མ་བཏུབ་ནས་དགེ་སློང་གཞན་དག་ལ་བྱས་པ་སྙན་དུ་བདས་ཏེ། བཀས་སྨད་ནས། དགེ་སློང་གིས་གནས་ངན་ལེན་འཆབ་ཏུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ།། གནས་ངན་ལེན་ཅེས་བྱ་བ་ནི་དགེ་འདུན་གྱི་ལྷག་མ་ལས་བྱུང་བ་དང༌། ཕས་ཕམ་པ་ལས་བྱུང་བའོ། །ཤེས་བཞིན་ཞེས་བྱ་བ་ནི་བདག་རང་གིས་རིག་པའམ་གཞན་གྱིས་བསྒོ་བའོ། །ལྟུང་བ་ནི་སྔ་མ་བཞིན་ནོ། །གནས་ངན་ལེན་གྱི་ཉེས་པ་བཅབས་ན་སྐྱ་རེངས་མ་ཤར་གྱི་བར་དུ་ཉེས་བྱས་སོ། །སྐྱ་རེངས་ཤར་ན་
ལྟུང་བར་འགྱུར་རོ། །གནས་ངན་ལེན་གྱི་ཉེས་པ་བརྗོད་ན་དགེ་བའི་བར་ཆད་དང་ཚངས་པར་སྤྱོད་པའི་བར་ཆད་དུ་གྱུར་པ་ཙམ་གྱི་ཚོད་ན་བཅབས་ཀྱང་ཉེས་མེད་དོ། །ལྟུང་བ་ལྔ་བཅུ་པ་རྫོགས་སོ།། །།ང་གཅིག་པུ་ན་བདེའོ་ཞེས་དགེ་སློང་བྲ་ན་གཅོད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་དགའ་བོའི་ཉེ་གནས་ཆོས་ཅན་འགྱོད་ཕོང་པ་ཁྲེལ་ཡོད་པ་དེས་བསྙེན་དགའ་བོའི་ཉེས་པ་ཐམས་ཅད་སྨྲས་པས་ན། ད་ནས་དགའ་བོ་ཁྲོས་ཏེ་དེ་ལ་གནོད་པ་ཞིག་བྱའོ་སྙམ་ནས། དགའ་བོ་དང་བསྙེན་དགའ་བོ་གཉིས་གྲོང་དུ་བོས་པ་དང༌། སློབ་མ་ཆོས་ཅན་བསོད་སྙོམས་ལ་འགྲོ་བར་ཆས་པ་དང༌། དེ་གཉིས་ཀྱིས་ངེད་ཀྱི་ཕྱི་བཞིན་དུ་ཤོག་ཤིག་དང་ཟན་སྦྱིན་ནོ་ཞེས་ནས་སློབ་མ་ཡང་དག་གཅོག་མ་ཕོད་ནས་མཁན་པོའི་ཕྱི་བཞིན་དུ་སོང་ངོ༌། །དེ་དག་གྲོང་དུ་ཕྱིན་པ་དང༌། དགའ་བོ་དང་ཆོས་ཅན་ནི་སྡོད་བསྙེན་དགའ་བོ་ནི་གྲོང་དུ་ཟན་པ་སོང༌། བསྙེན་དགའ་བོ་ཕྱིར་འོངས་ནས་ཡང་ཆོས་ཅན་དང་གཉིས་སྡོད། དགའ་བོ་ནི་གྲོང་དུ་ཟན་ལ་སོང་ངོ༌། །ཕྱི་ན་ཆོས་ཅན་གྱིས་བསྙེན་དགའ་བོ་ད་ནི་ཉི་མ་ཡོལ་གྱི་ཟས་ལ་འདོང་ཞེས་དེས་ཡང་དང་ཡང་དུ་བསྐུལ་ན། ང་ནི་གཅིག་པུ་ན་བདེའོ་ཞེས་ནས། ཁྱོད་ཉིད་གར་དགའ་བར་སོང་ཤིག་ཅེས་བསྐྲད་པ་དང༌། ལྷུང་བཟེད་ཁྱེར་ཏེ་མ་འོངས་པས་ཐན་བསླང་དུ་མེད་ནས། སླར་ལྷ་ཁང་དུ་འོངས་ནས་ཉལ་ཞིང་འདུག་པ་དེ་དགེ་སློང་བསོད་སྙོམས་པ་གཞན་དག་གིས་མཐོང་ནས་ཁྱོད་ཅིའི་ཕྱིར་དེ་ལྟར་ཉལ་ཞེས་དྲིས་པ་དང༌། དེའི་རྒྱུས་ཞིབ་ཏུ་སྨྲས་པ་ལས་དགེ་སློང་དག་གིས་སྙན་དུ་བདས་ཏེ། རྣམ་གྲངས་དུ་མས་སྨད་ནས་དགེ་སློང་གི་ཟན་གཅོད་དུ་མི་གནང་བར་འདུལ་བ་ལ་བསླབ་བའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་ཤཱཀྱའི་བུ་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །དགེ་སློང་འདི་ཞེས་བྱ་བ་ནི་ཆོས་ཅན་ཏེ། གཞན་ཡང་ཆོས་འདི་ལ་ཞུགས་པའོ། །གྲོང་དུ་འདོང་ཞེས་བྱ་བ་ནི་ཁྱིམ་བདག་དང་བྲམ་ཟེའི་ཁྱིམ་མོ། །ཁྱོད་ལ་ཟན་སྦྱིན་ནོ་ཞེས་བྱ་བ་ནི་བཟའ་བ་དང་བཅའ་བ་ལྔ་སྦྱིན་པར་ཁས་བླངས་པའོ། །ཁྱོད་དང་ལྷན་ཅིག་པ་བདེ་བ་མེད་ཀྱིས་སོང་ཞིག་པ་ནི་ཟན་བཅད་པར་བསམས་ནས་བསྐྲད་པའོ། །རྐྱེན་དེ་ཉིད་ཅེས་བྱ་བ་ནི་ཟན་བཅད་པར་བསམས་པ་དེ་ཉིད་རྐྱེན་ཡིན་ནོ། །ཆེད་དུ་བསམས་ནས་
ཐབས་གང་གིས་ཀྱང་རུང་སྟེ། དགེ་སློང་གི་ཟན་བཅད་ན་ལྟུང་བར་འགྱུར་རོ། །ན་བའི་ཚེ་ན་སྨན་པས་བསྒོ་བ་ལ་ནི་མ་གཏོགས་སོ། །དགེ་སློང་མེ་འབུད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ནས་རྒྱལ་པོའི་ཁབ་ཏུ་གཤེགས་པའི་ཚེ་སྟེ། དེའི་ཚེ་ན་བཅོམ་ལྡན་འདས་ལྗོངས་རྒྱུ་ཞིང་གཤེགས་པ་ན། ཚོང་པ་ཕལ་པོ་ཆེ་དང་འགྲོགས། དེའི་ནུབ་མོ་འབྲོག་དགོན་པ་ཞིག་ཏུ་ཕྱིན་ནས། ནུབ་མོ་དགོངས་མལ་ཡང་རྒན་རིམས་སུ་གོས་ཤིག་ཅེས་བཀའ་སྩལ་ནས། དེ་བཞིན་དུ་བགོས་པ་དང་དྲུག་སྡེ་ཤིང་སྐོམ་ཞིག་གི་དྲུང་དུ་བབ་སྟེ་མེ་བཏུང་བ་དང༌། ཤིང་ཚིག་ཅིང་དུད་པས་བདུགས་པས། ཤིང་གི་ནང་ན་སྦྲུལ་གདུག་པ་ཞིག་འདུག་པ་བྱུང་སྟེ། ལྷུང་ལ་ཐུག་ཅིང་ཤིང་གི་ཡལ་ག་ལ་འདུག་པ་དང༌། དྲུག་སྡེ་དག་གིས་མཐོང་ནས་ལྷུང་ལྷུང་ཞེས་བྱས་པ་དང༌། ཚོང་པ་རྣམས་ཀྱང་ཀུན་བྲོས་པ་ལས་མེ་འབུད་པ་ལས་ཉེས་དམིགས་སུ་གྱུར་པ་དང༌། ཕྱིས་རྒྱལ་པོའི་ཁབ་ཏུ་གཤེགས་ནས་ཡང་དྲུག་སྡེ་རྣམས་ཀྱིས་མེའི་མགལ་མེ་འཁོར་ལོ་ལྟར་བསྐོར་ཞིང༌། ཉི་མ་དང་ཟླ་བ་ལྟ་བུར་བྱེད་རྒྱུག་རྩེ་རྩེ་བས་ན། དགེ་སྦྱོང་མགོ་རེག་འདི་རྣམས་དང༌། ཁྱིམ་པར་བྱེ་བྲག་དང་ཁྱད་པར་ཅི་ཡོད་ཅེས་མུ་སྟེགས་རྣམས་འཕྱ་པ་ལས་མེ་འབུད་དུ་མི་གནང་བར་འདུལ་བ་ལ་བསླབ་པ་བཅས་སོ། །དེ་ལྟར་མེ་འབུད་དུ་མི་གནང་བའི་དགེ་སློང་དག་མེ་མར་ཡང་མི་འབུད་སྤོས་ཀྱང་ནི་སྲེག་བླ་མ་དང་སློབ་དཔོན་ལ་རིམ་གྲོ་ཡང་མི་བྱེད། །ལྷུང་བཟེད་དང༌། གོས་ཀྱི་ཁ་དོག་མི་བསྒྱུར་བ་དང༌། དགེ་སློང་གཅིག་རུང་ནད་ཀྱིས་བཏབ་ནས་སྨན་པ་ལ་དྲིས་ན་མེ་ལ་ཞུགས་ན་ཕན་ནོ་ཞེས་ནས་སྙན་དུ་བདས་ནས། དེ་ལྟ་བུ་ལ་སོགས་པ་ནི་དུས་ཡིན་ཏེ་གནང་གིས་བྱིན་གྱིས་རློབ་ལ་གྱིས་ཤིག་ཅེས་གསུངས་སོ། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །མི་ན་ཞེས་བྱ་བ་ནི་ན་བ་མ་གཏོགས་སོ། །བདག་གི་ཕྱིར་ཞེས་བྱ་བ་ནི་བདག་རང་གི་ཆེད་དུའོ། །རེག་གམ་ཞེས་བྱ་བ་ནི་བདག་རང་གིས་རེག་པའོ། །རེག་པར་བྱེད་དུ་གཞུག་ཅེས་བྱ་བ་ནི་གཞན་ལ་བཅོལ་བའོ། །ལྟུང་བ་ནི་སྔ་མ་བཞིན་ནོ། །མེ་ཐོགས་ནས་ཉི་མ་དང་ཟླ་བ་ལྟ་བུ་དང་རྒྱུག་ཅིང་རྩེ་ན་ལྟུང་བ་རེ་རེར་འགྱུར་རོ། །མགལ་མེ་བསྐོར་ན་ལྟུང་བར་འགྱུར་རོ། །མེ་འབུད་དམ་གསོད་དམ་མགལ་པ་བཅུག་གམ་ཕྱུང་ངམ། མགལ་པ་བསྡུས་སམ་མགལ་པ་
སྡུད་དམ། མེ་མ་མུར་གློངས་བའི་ཚེ་དུས་ལ་བབ་པོ་སྙམ་དུ་སོམས་ཤིག །དེ་ལྟར་མ་བྱས་ན་ལྟུང་བ་རེ་རེར་འགྱུར་རོ། །དགེ་འདུན་ཆོས་བཞིན་བྱེད་པ་ལས་སྔར་དད་པ་ཕུལ་ནས་དེའི་འོག་ཏུ་དད་པ་མི་སྦྱིན་ནོ་ཞེས་སྨྲར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དྲུག་སྡེ་ལས་ན་བ་སོ་སོ་དང་ཐ་སྐར་སྐྱེས་ནི་ཤི། ཚེ་དང་ལྡན་པ་འཆར་ཀ་ནི་དགྲ་བཅོམ། མོས་པ་ཅན་ནི་ཀཽ་ཤཱམྦཱི་ན་ཅང་མི་བྱེད་པར་འདུག །དགའ་བོ་དང་བསྙེན་དགའ་བོ་གཉིས་ནི་རང་བཞིན་དུ་དགེ་འདུན་གྱི་ནང་ན་གནས་སྟེ། དེའི་ཚེ་ཚེ་དང་ལྡན་པ་བཅུ་བདུན་སྡེ་ཤིན་ཏུ་འབད་ཅིང་བརྩོན་པས་དར་ནས་དེ་དག་གིས་བགྲོས་པ། འུ་བུ་ལ་སྔན་ཆད་དྲུག་སྡེས་གཙེས་པ་ལྟ་བུ་སུས་ཀྱང་མ་གཅོས་ཏེ། དེའི་ནང་ན་ཡང་བསྙེན་དགའ་བོས་གཙེས་ཀྱིས་སྤང་བའི་ལས་བྱས་ན། དགའ་བོ་ཤགས་མཁས་ཀྱིས་དེ་མི་འོང་བའི་ཐབས་ཤིག་བྱའོ་སྙམ་ནས། དགའ་བོ་གོས་ངན་པ་ཞིག་གྱོན་བཞིན་དུ་འདུག་པ་གནས་བརྟན་གོས་ངན་པ་འདི་ངས་བཀྲུའོ་ཞེས་ནས། དེས་གོས་ཐལ་བའི་ནང་དུ་བསྒྲེས་ཏེ་བྱིན་ནོ། །དེའི་འོག་ཏུ་དགེ་འདུན་གྱི་ལས་བྱའོ་ཞེས་ལས་ཀྱི་གཎྜཱི་བརྡུངས་ཏེ། དགའ་བོ་ལ་ནི་དད་པ་བླངས་ནས་བསྙེན་དགའ་བོ་དགེ་འདུན་གྱི་ནང་དུ་བཀུག་སྟེ། ཁྱོད་ཀྱིས་སྔོན་དེད་ལ་བཅུ་བདུན་སྡེའི་རྒྱུ་མས་ཛེ་ཏའི་ཚལ་དཀྲི་བ་ལ་སོགས་པ་དྲན་ནམ་ཞེས་ནས་སྤང་བའི་ལས་བྱས་པ་དང༌། དེ་ཡང་དུ་ཞིང་དགའ་བོའི་གན་དུ་སོང་ནས་ཅིའི་ཕྱིར་དུ་ཞེས་སྨྲས་ན་སློབ་དཔོན་གྱིས་དད་པ་བྱིན་ནས་ཅི་བྱ་བདག་ནི་སྤངས་སོ་ཞེས་བྱས་པ་དང༌། ཁྱོད་ལ་སྤང་བའི་ལས་བྱེད་པ་དེ་གྲོང་དང་གྲོང་ཁྱེར་གྱི་སྤངས་པར་ཤོག་ཤིག །དེ་དག་གིས་ང་མི་ཤེས་ཏེ། ང་མ་འདུས་པར་ལས་བྱས་པས་ལས་འགལ་ཏེ་དད་པ་སླར་བླང་ངོ་ཞེས་སོ། །ངས་མ་ཤེས་ཀྱིས་དད་པ་དེ་ཡང་སླར་བྱིན་ཅིག་ཅེས་སྨྲས་པས། དགེ་འདུན་ཚོགས་པས་ཆོས་བཞིན་དུ་ལས་བྱས་པ་ལས་སྐྱོ་ཞིང་དཀྲུགས་ཏེ། དགེ་སློང་རྣམས་འཕྱ་བར་གྱུར་པ་ལས་སྙན་དུ་བདས་སོ། །དགེ་སློང་གི་བྱ་བ་མ་ཡིན་པ་ཞེས་སྨད་ནས། དད་པ་སླར་བླང་དུ་མི་གནང་བར་འདུལ་བ་ལ་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་ཤཱཀྱའི་བུ་དགའ་བོ་སྟེ། གཞན་ཡང་དེ་དང་འདྲ་བའོ། །དད་པ་ཞེས་བྱ་བ་ནི་དགེ་འདུན་ཆོས་བཞིན་དུ་ལས་བྱེད་པ་ལས་མཐུན་པ་སྦྱིན་ནོ། །དེའི་འོག་ཏུ་ཞེས་བྱ་བ་ནི་དུས་གཞན་ནོ། །འདི་སྐད་
ཀྱང་ཟེར་ཞེས་བྱ་བ་ནི་སྨྲ་བའོ། །དགེ་སློང་སླར་བྱིན་ཁྱེད་ལ་དད་པ་མི་སྦྱིན་ནོ་ཞེས་བྱའི་ཚིག་གོ །ལྟུང་བ་ཞེས་བྱ་བ་ནི་སྔ་མ་བཞིན་ནོ། །དགེ་སློང་གིས་དད་པ་སྦྱིན་ནས་དེའི་འོག་ཏུ་བཟློག་ཅིང་དཀྲུག་པའི་ཚུལ་དུ་བྱེད་དེ། ཁྱོད་ལ་དད་པ་མི་སྦྱིན་གྱིས་སླར་བྱིན་ཅིག་ཅེས་སྨྲས་ན་ཐམས་ཅད་དུ་ལྟུང་བར་འགྱུར་རོ། །བསྙེན་པར་མ་རྫོགས་པ་དང་ཁྱིམ་གཅིག་གི་ནང་དུ་ཉལ་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དག་ཁྱིམ་པ་ལ་རྒྱུན་དུ་ཆོས་འཆད་བར་ཞུགས་པ་དང༌། ཚེས་བརྒྱད་དང་བཅུ་བཞི་ལ་ཆོས་ཤོད་ཅིག་ཅེས་བཀའ་སྩལ་ནས། འོན་ཀྱང་མཚན་རངས་པར་ཆོས་འཆད་པས་ན་ནད་ཞུགས་པར་གྱུར་ནས་ནམ་ཕྱེད་ཚུན་ཆད་ཙམ་ཤོད་ཅིག་ཅེས་བྱུང་ངོ༌། །ནུབ་གཅིག་ཆར་འབབ་པས་ཁྱིམ་པ་ལ་ཆོས་བཤད་པའི་ས་དེ་ཉིད་དུ་ཉལ་བ་དང༌། མེ་འབར་བས་ཁྱིམ་པ་དག་གིས་གསོད་དུ་མ་སྟེར་ཏོ། །དེ་ན་རྒན་ཞུགས་བསོད་སྙོམས་པ་ཞིག་ཉལ་བའི་རྨི་ལམ་ན་བུད་མེད་དང་ཉལ་བར་རྨིས་ནས་མི་ཚངས་པར་སྤྱོད་པའི་ཚུལ་སྨྲས་པས། ཁྱིམ་པ་དེ་དག་གྲོང་དུ་ལྷགས་ནས་འཕྱ་བར་གྱུར་ཏེ། དགེ་སློང་གཞན་དག་གིས་ནི་ཆོས་ལེགས་པར་བཤད་ན་རྒན་ཞུགས་དེས་ནི་མ་ལེགས་པར་བཤད་དོ་ཞེས་སྙན་དུ་བདས་ཏེ། བསྙེན་པར་མ་རྫོགས་པའི་གང་ཟག་དང་ཁྱིམ་གཅིག་གི་ནང་དུ་ནུབ་གཅིག་ལས་ལྷག་པར་ཉལ་དུ་མི་གནང་བར་བསླབ་པ་བཅས་སོ། །ཞག་གཉིས་གནང་དུ་ཡོད་པ་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་སྒྲ་གཅན་འཛིན་ཕྱི་རོལ་དུ་སྤྱོད་དུ་སོང་བའི་ཕྱི་ན། དེའི་གནས་ཁང་དུ་དགེ་སློང་གཞན་བགོས་པས་སྒྲ་གཅན་འཛིན་གནས་མེད་དེ། བཅོམ་ལྡན་འདས་ཀྱི་སྣམ་ཕྱིས་ན་འདུག་པ་དང༌། དེའི་ནུབ་མོ་ཆར་ཆེན་པོ་བབ་སྟེ། སྣམ་ཕྱིས་དང་ཉེ་བ་ཞིག་ན་སྤྲུལ་གདུག་པ་མ་རུང་བ་ཞིག་གནས་ཏེ། སྣམ་ཕྱི་སར་འགྲོ་པས། ཚེ་དང་ལྡན་པ་སྒྲ་གཅན་འཛིན་བཟུང་སྟེ་ཤི་ན་མ་ལེགས་ཏེ། ཤཱཀྱའི་རིགས་ལ་མི་སྙན་པར་ཟེར་བར་དགོངས་ནས་བཅོམ་ལྡན་འདས་ཀྱིས་ཕྱག་བརྐྱང་ནས། སྒྲ་གཅན་འཛིན་བླངས་ནས་བཅོམ་ལྡན་འདས་ཀྱིས་གནས་ཁང་དུ་བཞག་ནས། ཞག་གཉིས་བསྙེན་པར་མ་རྫོགས་པའི་གང་ཟག་དང་ཉལ་དུ་གནང་ངོ༌། །སླད་ཀྱིས་ན་བ་དང་ནད་གཡོག་ཞག་ལོན་དུ་མི་བདེ་བ་ལས་སྙན་དུ་བདས་ཏེ། ནད་པ་དང་ནད་གཡོག་གཉིས་ནི་གནང་ངོ༌། །དེ་ལྟར་ཞག་གཉིས་
ལས་ཉལ་བར་མ་གནང་བ་དང༌། ཚེ་དང་ལྡན་པ་བསྙེན་དགའ་བོ་ཞག་གཉིས་ལས་འདའ་བར་བྱེད་པ་དང༌། དོན་ཉུང་དུ་བའི་དགེ་སློང་རྣམས་འཕྱ་བ་ལས་སྙན་དུ་བདས་ཏེ། བཀས་སྨད་ནས་ཞག་གཉིས་ལས་ལྷག་པར་ཉལ་དུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་རྒན་ཞུགས་དང་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །བསྙེན་པར་རྫོགས་པའི་གང་ཟག་དང་ལྷན་ཅིག་ཅེས་བྱ་བ་ནི་བསྙེན་པར་རྫོགས་ཞེས་བྱ་བ་ནི་དགེ་སློང་ཕ་དང་དགེ་སློང་མའོ། །དེ་མ་གཏོགས་པ་གཞན་ཐམས་ཅད་བསྙེན་པར་མ་རྫོགས་པའོ། །ཞག་གཉིས་ལས་ལྷག་ཅེས་བྱ་བ་ཐལ་བའོ། །ཁྱིམ་གཅིག་གི་ནང་ན་ཉལ་ཞེས་བྱ་བ་ནི་ཁྱིམ་གང་ཆེར་གཡོགས་ལ་ཀུན་བསྐོར་བར་གྱུར་པ་དེ་ལྟ་བུའི་ནང་དུ་ཉལ་ན་ཞག་གསུམ་གྱི་སྐྱ་རེངས་ཤར་ན་ལྟུང་བར་འགྱུར་རོ། །ཤིང་དྲུང་དང་རྩིག་དྲུང་དང་ཕུག་དང༌། ཤིང་གེལ་བའི་དྲུང་དུ་ཉལ་ན་ཉེས་བྱས་སུ་འགྱུར་རོ། །ཉེས་པ་ནི་བསྙེན་པར་མ་རྫོགས་པར་འདུ་ཤེས་ཀྱི་ཁྱིམ་གཅིག་ཏུ་ཉལ་ན་ལྟུང་བར་འགྱུར་རོ། །ཐེ་ཚོམ་ན་ཡང་ངོ༌། །བསྙེན་པར་རྫོགས་པར་འདུ་ཤེས་དང་ཐེ་ཚོམ་ན་ཡང་ཉེས་བྱས་སུ་འགྱུར་རོ། །བར་ཆད་ཀྱི་ཆོས་སུ་མི་འགྱུར་རོ་ཞེས་སྨྲར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་ཨ་རི་ཏ་ཉེས་པ་བྱེད་པ་ལས། དགེ་སློང་དག་གིས་བཟློག་ན་མ་བཏུབ་ནས། བཅོམ་ལྡན་འདས་ཀྱིས་བཤད་པ་ནི་ངས་ཤེས་ཏེ། དེ་ལྟར་སྤྱད་ཀྱང་བར་ཆད་དུ་མི་འགྱུར་རོ་ཞེས་ལོག་པར་ལྟ་བའི་ཕྱིར་གསོལ་བ་དང་བཞིའི་ལས་ཀྱིས་བསྒོ་ན་ལྟ་བ་བཟློག་ཏུ་མ་བཏུབ་ནས་སྙན་དུ་བདས་ཏེ། ལན་གསུམ་དུ་སྒོ་ཤིག་ཅེས་བཀའ་སྩལ་ནས། ལན་གསུམ་དུ་བསྒོ་བ་ལས་མ་བཏུབ་ནས། རྣམ་གྲངས་དུ་མས་སྨད་ནས་འདུལ་བ་ལ་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་ཨ་རི་ཏ་སྟེ་གཞན་ཡང་དེ་དང་འདྲ་བའོ། །འདི་སྐད་དུ་ཅེས་བྱ་བ་ནི་སྨྲ་བའོ། །བཅོམ་ལྡན་འདས་ནི་དེ་བཞིན་གཤེགས་པའོ། །ཆོས་ཞེས་བྱ་བ་ནི་སངས་རྒྱས་དང་ཉན་ཐོས་ཀྱིས་གསུངས་པའོ། །བཤད་ཅེས་བྱ་བ་ནི་བསྒྲགས་པའོ། །བར་དུ་གཅོད་ཅེས་བྱ་བ་ནི་ཕས་ཕམ་པའི་ཆོས་བཞི་གནས་བདུན་ཤིན་ཏུ་ཞི་བའི་བར་དུ་སྟེ། ལྟུང་བ་རིས་ལྔ་རྣམས་སྤྱད་ཀྱང་བར་དུ་མི་གཅོད་ཅེས་སྨྲ་བའོ། །དགེ་སློང་ཞེས་བྱ་བ་ནི་ཨ་རི་ཏའོ། །དགེ་སློང་རྣམས་ཞེས་བྱ་
བ་ནི་ཆོས་འདི་ལ་ཞུགས་པའོ། །དེ་སྐད་དུ་སྒོ་ཤིག་ཅེས་བྱ་བ་ནི་ཚིག་འཇམ་པོས་བསྒོ་བའོ། །དེ་སྟེ་ཡང་དངོས་པོ་དེ་གཏོང་བ་ལྟ་ན་ནི་ལེགས་དེ་སྟེ་ཡང་མི་གཏོང་ན་ལན་གཉིས་ལན་གསུམ་དུ་ཡང་དག་པར་བསྒོ་ཡང་དག་པར་བསྟན་པར་བྱ་ཞེས་བྱ་བ་ནི་གསོལ་བ་དང་ཞུ་བའི་ལས་ཀྱིས་ཡང་དག་པར་བསྒོ་བ་ལ་བྱའོ། །དང་པོ་བར་དུ་གཅོད་པར་མི་འགྱུར་རོ་ཞེས་ཟེར་བའི་ཚེ་ན་ཉེས་བྱས་སོ། །ཚིག་འཇམ་པོ་བསྒོ་སྟེ་མ་བཏུབ་ན་ཡང་ཉེས་བྱས་གཉིས་སུ་འགྱུར་རོ། །གསོལ་བ་དང་ཞུ་བའི་ལས་ཀྱིས་བསྒོ་ནས་མི་གཏོང་ན་ཉེས་བྱས་གསུམ་དུ་འགྱུར་རོ། །གསོལ་བ་དང་ཞུ་བའི་ལས་ཀྱིས་ལན་གཉིས་བསྒོ་སྟེ་མི་གཏོང་ན་ཉེས་བྱས་བཞིར་འགྱུར་རོ། །ཆོས་ཇི་ལྟ་བ་དང་འདུལ་བ་ཇི་ལྟ་བ་དང་སྟོན་པའི་བསྟན་པ་བཞིན་དུ་ལན་གསུམ་རྫོགས་པར་བྱས་ཀྱང་མ་བཏུབ་ན་ལྟུང་བར་འགྱུར་རོ། །ཆོས་བཞིན་དུ་བསྒོ་ཡང་མ་ཚོགས་ན་དགེ་འདུན་དང་གང་ཟག་གཉིས་ཀ་ལ་ཉེས་བྱས་རེ་རེར་འགྱུར་རོ། །ཚོགས་ལ་ཆོས་བཞིན་དུ་མ་བསྒོ་ན་ཡང་ལྟུང་བར་མི་འགྱུར་རོ། །ཚོགས་ལ་ཆོས་ཀྱི་གཟུགས་བརྙན་གྱིས་བསྒོ་བ་དང༌། མ་ཚོགས་པ་ལ་ཆོས་ཀྱི་གཟུགས་བརྙན་གྱིས་བསྒོ་བ་ནི་ལྟུང་བ་མེད་དོ། །དེ་སྟེ་དགེ་སློང་དེ་ལྟུང་བ་རབ་ཏུ་འགྱོད་ཅིང་མ་བ་ཤགས་མ་མཐོལ་ན། དེ་ཕྱིན་ཆད་གསོལ་བ་དང་གཉིས་ཀྱི་ལས་ཀྱིས་ནང་དུ་འཇུག་པ་ན་ཐམས་ཅད་དུ་ཉེས་བྱས་སོ། །དགེ་སློང་སྤངས་པ་དང་ལྷན་ཅིག་གཏམ་སྨྲ་ཞིང་ཁྱིམ་གཅིག་གི་ནང་དུ་ཉལ་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་བུད་བུ་རྫི་ཨ་རི་ཏ་སྡིག་པ་ཅན་གྱི་ལྟ་བ་གཏོང་དུ་མ་བཏུབ་ནས་དགེ་འདུན་རྣམས་ཀྱིས་གསོལ་བ་དང་ཞུ་བའི་ལས་ཀྱིས་སྤངས་པའི་ལས་བྱས་ནས་ངུ་ཞིང་བསྙེན་དགའ་བོའི་གན་དུ་སོང་བ་དང༌། དེ་དེ་དང་ཕྲད་དེ། ཨ་རི་ཏ་ཁྱོད་ཅིའི་དུ་ཕྱིར་དུ་ཞེས་བྱས་ནས། བདག་ནི་ལྷུང་བཟེད་ནག་པོ་ཅན་གྱིས་སྤངས་སོ་ཞེས་བྱས་པ་དང༌། ཁྱོད་ལ་སྤོང་བར་བྱེད་པ་དེ་དག་གྲོང་དང་གྲོང་ཁྱེར་གྱིས་སྤངས་པར་ཤོག་ཤིག་ཅེས་ནས། ཚེ་དང་ལྡན་པ་བསྙེན་དགའ་བོས། དགེ་སློང་ཨ་རི་ཏ་སྡིག་པའི་ལྟ་བ་མ་སྤངས་ཏེ་དགེ་འདུན་གྱིས་ཆད་པས་བཅད་ཅིང་སྤངས་པར་ཤེས་བཞིན་དུ་བསྟེན་ཅིང་གནས་བཅའ་བ་དང༌། ལུང་འབོགས་པ་དང་གནས་ཁང་གཅིག་ཏུ་ཞག་ལོན་པ་དང་ཉལ་ཞིང་གཏམ་སྨྲ་བར་བྱེད་པས་དགེ་
སློང་དགའ་འཕྱ་བ་ལ་སྙན་དུ་བདས་ནས། བཀས་སྨད་དེ་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །ཤེས་བཞིན་ཞེས་བྱ་བ་ནི་བདག་གིས་ཤེས་པ་འམ་གཞན་གྱིས་བསྒོ་བའོ། །འདི་སྐད་སྨྲ་བའི་གང་ཟག་ཅེས་བྱ་བ་ནི་ཨ་རི་ཏའོ། །ཆོས་བཞིན་མ་བྱས་ཞེས་བྱ་བ་ནི་དེ་ལས་མ་གྱུར་པའོ། །མ་བཏང་ཞེས་བྱ་བ་ནི་སྡིག་པ་དེ་ལྟ་བུའི་ལྟ་བར་གྱུར་པ་མ་བཏང་བའོ། །གཏམ་ཟེར་ཞེས་བྱ་བ་ནི་ལུང་འབོགས་པའོ། །ཀུན་དུ་སྨྲ་ཞེས་བྱ་བ་ནི་འདྲིས་པའི་ལུང་སྟོན་པའོ། །གནས་ཞེས་བྱ་བ་གནས་བྱིན་པའོ། །ཀུན་དུ་སྤྱོད་ཅེས་བྱ་བ་ནི་དེ་ལས་བསྙེན་བཀུར་ཉམས་སུ་ལེན་པའོ། །དེ་དང་ལྷན་ཅིག་ཁྱིམ་གཅིག་ན་ཉལ་ཞིང་ཞེས་བྱ་བ་ནི་དེ་དང་ལྷན་ཅིག་ཞག་ལོན་ཏེ་སྐྱ་རེངས་ཤར་ན་ལྟུང་བར་འགྱུར་རོ། །ཉེས་པ་ནི་དེ་སྐད་ཟེར་བའི་གང་ཟག་ཆོས་བཞིན་མ་བྱས་པ་སྡིག་པའི་ལྟ་བ་མ་སྤངས་པ་ལ་གཏམ་བྱས་ན་ལྟུང་བར་འགྱུར་རོ། །ཀུན་དུ་གཏམ་བྱས་ན་ཡང་ལྟུང་བར་འགྱུར་རོ། །ལྷན་ཅིག་གནས་ན་ཡང་ལྟུང་བར་འགྱུར་རོ། །ལྷན་ཅིག་སྤྱོད་ན་ཡང་ལྟུང་བར་འགྱུར་རོ། །འདུག་ན་ཡང་ངོ༌། །ན་བ་དང་སྡིག་པའི་ལྟ་བ་སྤངས་པ་ལ་ཉེས་པ་མེད་དོ། །དགེ་སྦྱོང་སྤངས་པ་དང་ལྷན་ཅིག་བསྟེན་ཅིང་འདུག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཚེ་དང་ལྡན་པ་བསྙེན་དགའ་བོ་ལ་སློབ་མ་དགེ་ཚུལ་ཚེར་མ་ཅན་དང༌། མཆོད་པ་ཅན་ཞེས་བྱ་བ་གཉིས་ཤིག་ཡོད་དེ། དེའི་ཚེ་ན་དགེ་སློང་ཉོན་མོངས་པ་མ་སྤངས་ཤིང་འདོད་ཆགས་དང་མ་བྲལ་བ་དག་ཅིག་དགེ་ཚུལ་དེ་གཉིས་ལ་ཐོ་འཚམས་གད་རྒྱངས་བྱེད་དྲེགས་ཤིང་རྒྱུག་པ་ལ་སོགས་བ་བྱེད་པ་ལ་དུས་ཕྱི་ཞིག་ན་དགེ་ཚུལ་གཉིས་མེ་ཏོག་འཐུ་ཞིང་འཁོད་འཁོད་པ་ལས་སྟེང་གི་ནམ་མཁའ་ལ་གྲི་བ་མ་ཞིག་བབ་ནས་བལྟས་ན་དགེ་སློང་དག་ཅིག་ནམ་མཁའ་ལ་དོང་བ་མཐོང་སྟེ། ཁྱེད་སུ་ཞེས་སྨྲས་ན་ངེད་མིང་འདི་དང་འདི་ཞེས་བྱའོ་ཞེས་བྱས་པ་དང༌། ཁྱེད་ནི་སྔོན་དྲུག་སྡེ་དང་བདག་ཅག་ལྷན་ཅིག་ཏུ་གནས་ངན་ལེན་སྤྱོད་སྤྱོད་ན་ད་ཅིའི་ཕྱིར་ཁྱེད་དེ་ལྟར་གྱུར་ཅེས་བྱས་ན། ངེད་ཀྱིས་སྡིག་པའི་ཆོས་དེ་དག་བཏང་སྟེ་བཤགས་པར་བྱ་བ་ནི་བཤགས། བསྡམ་པར་བྱ་བ་ནི་བསྡམས་ཏེ། འབད་བསྒྲིམས་པས་ན་དགྲ་བཅོམ་པར་བྱས་སོ་ཞེས་བྱས་པ་དང༌། དགེ་ཚུལ་དེ་གཉིས་ན་རེ་གནས་ངན་ལེན་ཀུན་དུ་
སྤྱོད་པ་དེ་དག་གིས་ཀྱང་དགྲ་བཅོམ་པ་ཐོབ་པ་ལ་བལྟས་ན། བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་པར་འགྱུར་རོ་ཞེས་གསུངས་པ་ཡང་བར་དུ་གཅོད་པར་མི་འགྱུར་རོ། །ཞེས་ལྟ་བ་སྐྱེས་ནས། དེ་ལ་དགེ་སློང་རྣམས་ཀྱིས་ལན་གཉིས་ལན་གསུམ་དུ་བསྒོ་ཡང་ལྟ་བ་ངན་པ་གཏོར་དུ་མ་བཏུབ་ནས། དགེ་འདུན་གྱི་མིག་ལམ་ན་ཡང་མི་སྣང་བར་བྱས་ཏེ་སྤངས་པ་བསྙེན་དགའ་བོས་བསྟེན་ཅིང་ཤེད་བསྐྱེད་པ་དང་གནས་དང་ཡོ་བྱང་བྱིན་ཞིང་གནས་འཆར་བཅུག་པ་དགེ་སློང་རྣམས་ཀྱིས་ཐོས་ཏེ། དགེ་ཚུལ་སྡིག་པ་ཅན་མིག་ལམ་ན་མི་སྣང་བར་བྱས་ཏེ་སྤངས་པ་དང་ལྷན་ཅིག་ཏུ་གནས་པར་བྱེད་དོ་ཞེས་འཕྱ་བ་ལས་སྙན་དུ་བདས་ཏེ། གང་ཟག་ཆོས་བཞིན་དུ་མ་བྱས་པས་བསྟེན་དུ་མི་གནང་བར་འདུལ་བ་ལ་བསླབ་པ་བཅས་སོ། །དགེ་ཚུལ་ནི་ཚེར་མ་ཅན་དང་མ་ཆོད་པ་ཅན་ནོ། །འདི་སྐད་དུ་ཟེར་ཞེས་བྱ་བ་ནི་འོག་ནས་འབྱུང་བའི་ཚིག་རྣམས་སོ། །བཅོམ་ལྡན་འདས་ནི་དེ་བཞིན་གཤེགས་པའོ། །ཆོས་ཞེས་བྱ་བ་ནི་བཅོམ་ལྡན་འདས་དང་ཉན་ཐོས་ཀྱིས་གསུངས་པའོ། །བར་དུ་གཅོད་པ་ནི་འདོད་པའི་ཡོན་ཏན་ལྔ་ལ་བྱའོ། །བསྟེན་ཅེས་བྱ་བ་ནི་སྤྱོད་པའོ། །བར་དུ་གཅོད་པར་མི་འགྱུར་ཞེས་བྱ་བ་ནི་དགེ་སྤྱོད་གིར་མི་འགྱུར་པ་མ་ཡིན་པའོ། །འདི་སྐད་སྨོས་ཤིག་ཅེས་བྱ་བ་ནི་ཚིག་འཇམ་པོས་བསྒོ་བའོ། །ལན་གཉིས་ལན་གསུམ་དུ་བསྒོ་བ་ནི་གསོལ་བ་དང་ཞུ་བའི་ལས་ཀྱིས་བསྒོ་བའོ། །དགེ་ཚུལ་ཆོས་བཞིན་དུ་མི་བྱེད་པ་མིག་ལམ་ན་མི་སྣང་བར་སྤངས་པ་ལས་བསྟེན་པ་ནི་ཤཱཀྱའི་བུ་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །ཤེས་བཞིན་ཞེས་བྱ་བ་ནི་བདག་གིས་ཤེས་པའམ། གཞན་གྱིས་བསྒོ་བའོ། །དེ་ལྟར་དགེ་ཚུལ་མིག་ལམ་ན་མི་སྣང་བར་བྱས་ཞེས་བྱ་བ་ནི་ཚེར་མ་ཅན་དང་མཆོད་པ་ཅན་ནོ། །གཞན་ཡང་དེ་དང་འདྲ་བའོ། །གནས་བྱིན་ཞེས་བྱ་བ་ནི་དེ་བཞག་པའོ། །ཡོ་བྱད་བྱིན་ཞེས་བྱ་བ་ནི་ལྷུང་བཟེད་ལ་སོགས་པའོ། །ལུང་འབོགས་ཞེས་བྱ་བ་ནི་གནས་སྦྱིན་ཞིང་ཁ་དོན་དང་ཀློག་པ་སྦྱིན་པའོ། །ཁྱིམ་གཅིག་ཏུ་ཉལ་ཞེས་བྱ་བ་ནི་ཁྱིམ་གྱི་ནང་དུ་སྐྱ་རེངས་ཀྱིས་ཆོད་པའོ། །ཉེས་པ་ནི་དགེ་ཚུལ་མིག་ལམ་ན་མི་སྣང་བར་བྱས་པ་ཤེས་བཞིན་དུ་གནས་དང་ཡོ་བྱད་བྱིན་ནམ་ལྷན་ཅིག་ཁྱིམ་གཅིག་ཏུ་གནས་ན་ལྟུང་བ་རེ་རེར་འགྱུར་རོ། །ན་བ་དང་སྡིག་པར་ལྟ་བ་
ལས་བཟློག་པ་ནི་མ་གཏོགས་སོ། །གཞན་ནི་ལྟུང་བགོར་མ་བཞིན་དུ་སྦྱོར་ཅིག །གོས་ཁ་དོག་མ་བསྒྱུར་བ་དང་ཚོན་ཆེན་པོ་ལ་བཙོས་པ་གྱོན་དུ་མི་གནང་བའི་གླེང་གཞི་ནི་རྒྱལ་པོའི་ཁབ་ན་སྟེ། དེའི་ཚེ་ན་རྒྱལ་པོ་གཟུགས་ཅན་སྙིང་པོའི་ཡུལ་ཁམས་ན་ཀླུའི་རྒྱལ་པོ་རི་བོ་དང་དགའ་སྐྱེད་ཅེས་བྱ་བ་གཉིས་ཤིག་གནས་པས། ཆུ་དྲོན་དང་མཚོ་ལ་སོགས་པ་ཡང་རྒྱས་ཆར་ཡང་དུས་དུས་སུ་བབ་པས་དེའི་ཡུལ་ན་ལོ་ལེགས་ཤིང་འབྱོར་ཏོ། །དེ་གཉིས་ཀླུ་དགའ་བོ་དང་བསྙེན་དགའ་བོ་གཉིས་ལ་ཟླ་བལྟས་ཏེ། དུས་དུས་སུ་བཅོམ་ལྡན་འདས་ལ་བསྙེན་བཀུར་བྱས་པས་འཁོར་འཕེལ་ཏེ། གནས་མེད་པར་རྒྱ་མཚོར་འདོད་བར་སངས་རྒྱས་ལ་གསོལ་ན་མ་གནང་སྟེ། ཁྱེད་གཉིས་རྒྱལ་པོའི་ཡུལ་ན་གནས་པས་ན་རྒྱལ་པོ་ལ་གསོལ་ཅིག་ཅེས་བཀའ་སྩལ་ཏོ། །དུས་གཞན་ཞིག་ན་དེ་གཉིས་ཁྱིམ་བདག་གི་ཆ་ལུགས་སུ་སྤྲུལ་ཏེ། སངས་རྒྱས་ཀྱི་སྤྱན་སྔ་ན་དེ་གཉིས་ཆོས་ཉན་ཅིང་འདུག་པའི་ཚེ། རྒྱལ་པོ་གཟུགས་ཅན་སྙིང་པོ་ཡང་བདག་དེར་འོངས་ནས་དེ་གཉིས་ལངས་སྙམ་ནས་དེ་འོངས་པ་དང༌། མ་ལངས་པས་རྒྱལ་པོ་ཡང་ཁྲོས་ཏེ་བཅོམ་ལྡན་འདས་ཀྱིས་རྒྱལ་པོ་ལ་དེའི་ཆོས་ཀྱང་མ་བཤད་དོ། །རྒྱལ་པོས་མ་ཤེས་ཏེ། ཀླུ་གཉིས་བསྐྲད་པས་དེ་གཉིས་ཀྱང་མཚོ་ཆེན་པོར་དོང་ངོ༌། །དེའི་ཚེ་ན་རྒྱལ་པོའི་ཡུལ་ཕྱོགས་སུ་མཚེའུ་དང་ལྟེང་ཀ་དག་ཀྱང་བསྐམས་ཆར་དག་ཀྱང་དུས་དུས་སུ་མ་བབ་པས་ལོ་ཉེས་སོ། །དེ་ནས་རྒྱལ་པོས་བཅོམ་ལྡན་འདས་ལ་ཇི་ལྟར་ནོངས་པ་ཞུས་པ་དང༌། རྒྱལ་པོས་ཀླུ་ཁྱིམ་བ་དག་གཉིས་ཤིག་བསྐྲད་པ་དྲན་ནམ་ཞེས་བཀས་རྨས་ན་དྲན་ནོ་ཞེས་གསོལ་པ་དང༌། དེ་གཉིས་ཀླུའི་རྒྱལ་པོ་རི་བོ་དང་དགའ་སྐྱེད་གཉིས་ཡིན་ཏེ་དེ་གཉིས་ཁྲོས་པས་རྒྱ་མཚོར་དོད་བས་སོ་ཞེས་བྱས་པ་དང༌། འོ་ན་བཅོམ་ལྡན་འདས་བདག་གི་ཡུལ་དུ་མ་རུང་མོད་ཅེས་གསོལ་པ་དང༌། བཟོད་པ་གསོལ་བའི་དུས་དང་ཕྱིས་དེ་གཉིས་དང་ཕྲད་པར་དུས་བཅོམ་ལྡན་འདས་ཀྱིས་མཛད་དེ། །དེ་གཉིས་དང་གཅིག་ལ་གཅིག་བཟོད་པར་བྱས་ཀྱི་འོག་ཏུ། ཀླུའི་རྒྱལ་པོ་གཉིས་ཀྱིས་ཕྱིར་རྒྱལ་པོའི་ཡུལ་དུ་འོང་བར་གསོལ་བ་བཏབ་ན། དེད་ཅག་གནས་པའི་གནས་ཉིད་དུ་ངེད་ཀྱིས་གཡོག་ཅིག་བཞག་གི །དེ་གཉིས་ཀྱི་ཁང་པ་བརྩིགས་ཤིག་དུས་དུས་སུ་འོང་ངོ་ཞེས་དུས་བྱས་སོ། །དེ་གཉིས་སྤྲོ་བའི་རོལ་མོ་བྱེད་པའི་ཚེ་ཕྱོགས་ནས་རོལ་མོ་མཁན་ཅིག་འོངས་པས། དགེ་སློང་མ་
བཅུ་གཉིས་སྡེ་ལས་བྱང་ཆུབ་སྤྱོད་པ་མཛད་པའི་གར་ཐབས་བསླབས་ཏེ་བྱས་པས་དད་པ་རྣམས་ནི་དགའ་བར་བྱས་སོ། །མ་དད་པ་རྣམས་དགའ་ཞིང་མོས་པར་བྱ་བའི་ཕྱིར། ཚེ་དང་ལྡན་པ་མོས་པ་ཅན་དང་འཆར་བ་ལྟ་བུར་བཅོས་ནས་གཅིག་གི་མདུན་དུ་གཅིག་ཙོག་ཙོག་པོར་འདུག་ནས་གཅིག་ལ་གཅིག་ཟས་ཀྱི་ལྷག་མར་བྱས་ནས། ཐལ་བ་གྱོ་མོ་གང་མགོ་བོར་བསྣུན་ཅིང་དྲུག་སྡེ་པོ་ལ་དཔྱས་པས་མ་དད་པ་རྣམས་ཀྱང་དད་པར་གྱུར། དྲུག་སྡེ་ནི་མི་དགའ་བར་གྱུར་ནས། རོལ་མོ་མཁན་དེ་ལ་གནོད་བཞིག་བྱ་བར་བསམས་ནས། ལྷ་དང་རོལ་མོ་མཁན་གྱི་ཆ་ལུགས་འདྲ་བར་ཡོ་བྱད་དང་གོས་དག་སྦྱར་ནས་ལ་བཟླ་བར་བྱའོ་ཞེས་ཕྱོགས་གཅིག་ཏུ་བྱང་ཆུབ་སྤྱོད་པ་གར་ཐབས་སྦྱར་བས། རོལ་མོ་མཁན་རྣམས་ཀྱང་དྲུག་སྡེ་པོ་རྣམས་ཡིན་ནོ་སྙམ་དུ་འཕྲིགས་ཏེ། ཛེ་ཏའི་ཚལ་དུ་བསྒུགས་ན་བསྙེན་དགའ་བོའི་གདོང་ལ་ས་ཚོན་ཞིག་འདུག་པ་མཐོང་སྟེ། དེ་ཕྱིན་ཆད་བསྙེན་དགའ་བོ་ལ་གར་མི་བྱ་བ་དང་འཕྱས་མི་གདབ་པར་གསོལ་བ་བཏབ་སྟེ། རྔན་པའི་བརྡར་རོལ་མོའི་ཆ་བྱད་བཞག་སྟེ་ཕྱིས་ཅི་རྙེད་པ་དྲུག་སྡེ་ལ་བྱིན་པ་དང༌། གར་མཁན་མི་དགའ་ཞིང་མི་སྙན་པར་ཟེར་བ་ལས། དགེ་སློང་དག་གིས་ཐོས་པ་སྙན་དུ་བདས་ཏེ། དྲུག་སྡེ་ལ་རྨས་ཏེ་བཀས་སྨད་ནས་དེ་ལྟ་བས་ན་ཉེས་པའི་དམིགས་སུ་གྱུར་པ་ཐམས་ཅད་ཀྱང་ཆོས་གོས་ཁ་དོག་མ་བསྒྱུར་བ་དང༌། ཚོན་ཆེན་པོ་ལས་གྱུར་པས་ན་ཁྱིམ་པའི་མ་བརྟགས་པ་དང༌། ཚོན་ཆེན་པོའི་གོས་གྱོན་དུ་མི་གནང་བའི་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །གོས་ཞེས་བྱ་བ་ནི་གོས་ཀྱི་རྒྱུ་རྣམ་པ་བདུན་གསུངས་པ་ལས་གང་ཡང་རུང་བའོ། །གསར་ཞེས་བྱ་བ་ནི་རྣམ་པ་གཉིས་ཏེ། སར་པས་སར་པ་དང༌། གསར་དུ་རྙེད་པས་གསར་བའོ། །ཁ་དོག་རྣམ་པ་གསུམ་དུ་བསྒྱུར་ཅིང་ཞེས་བྱ་བ་ནི་འོག་ནས་འབྱུང་བའི་ཁ་དོག་རྣམས་ལས་གང་ཡང་རུང་བའོ། །སྔོན་པོ་ཞེས་བྱ་བ་ནི་རམས་ཀྱིས་སྔོ་བའོ། །དམར་པོ་ཞེས་བྱ་བ་ནི་བཙག་གོ །ངུར་སྨྲིག་ཅེས་བྱ་བ་ནི་ཤིང་ཤུན་དང་མེ་ཏོག་གིས་བསྒྱུར་བའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་ཁ་དོག་རྣམ་པ་གསུམ་གང་ཡང་རུང་བ་སྟེ། གཅིག་ཏུ་མ་བསྒྱུར་བ་གྱོན་ན་ཐམས་ཅད་དུ་ལྟུང་བར་འགྱུར་རོ། །ཐ་ན་ལྷུང་བཟེད་ཀྱི་སྣོད་ཡན་
ཆད་ཀྱང་ཁ་དོག་མ་བ་སྒྱུར་བར་སྤྱོད་ན་ཐམས་ཅད་དུ་ཉེས་བྱས་སུ་འགྱུར་རོ། །ཚོན་ཆེན་པོ་བརྒྱད་མི་གནང་བ་ནི་རྒྱ་སྐྱེགས་དང༌། བཙོད་དང༌། མ་ཚལ་དང༌། གུར་གུམ་དང༌། མཐིང་ཤིང་དང༌། ལི་ཁྲི་དང༌། རྨ་ཤིང་དང༌། ལེ་བརྒན་ཚོན་ཏེ་དེ་རྣམས་མ་བརྟགས་ན་ཉེས་བྱས་སུ་འགྱུར་རོ་ཞེས་པའི། །རིན་པོ་ཆེ་ལ་རག་ཏུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཆེ་དང་ལྡན་པ་འཆར་ཀས་ཡུལ་མིའི་བྱིས་པ་རྩལ་དང་རོལ་མོ་སློབ་ཅིང་སྦྱོར་བའི་སར་སོང་ནས། དེ་དག་གི་སློབ་དཔོན་གཞན་དུ་སོང་སྟེ་མི་འདུག་པའི་ཕྱི་ན་སློབ་མ་རྣམས་གཙེས་ཏེ། དེ་དག་ལ་འཕོང་དང་རལ་མོ་བྱེད་དུ་བཅུག་པ་དང་མ་མགུ་སྟེ། བཞིན་བསྒྱུར་ཅིང་མིག་བཙུམས་ནས་ཁྱེད་ཀྱི་མཁན་པོ་ཡང་མི་མཁས་ན་ཁྱེད་ལྟ་ག་ལ་ཤེས་ཏེ་ཁྱེད་རྣམས་ནི་ཕུབ་མ་འཕྱར་བ་དང་འདྲ་སྟེ། འབྲས་བུ་མེད་དོ་ཞེས་བྱས་ནས། ཚེ་དང་ལྡན་པ་འཆར་ཀས་འཕོང་རྩ་ལ་དང་གར་ཐབས་དག་བྱས་ཏེ་ལ་བཟླས་པས་བྱིས་པ་རྣམས་ཀྱང་མི་དགའ་ནས་འགྱོད་ཅིང་འཁོད་པ་དང༌། དེ་དག་གི་སློབ་དཔོན་འོངས་པ་ལ་བདག་ཅག་ནི་ཕུབ་མ་འཕྱར་བ་དང་འདྲ་བའོ་ཞེས། འཕགས་པ་འཆར་ཀ་ཟེར་རོ་ཞེས་བྱས་པ་དང༌། འདི་ནི་ཡུས་ཏེ་འཕགས་པ་འཆར་ཀ་པོ་ནི་བྱང་ཆུབ་སེམས་དཔའ་རོལ་མོའི་ཚེ་ཡང་འཕོང་རྩལ་དང༌། རོལ་མོ་མཁན་གྱི་མཆོག་ཡིན་པས་དེ་ལྟ་བུ་ནི་འུ་བུས་མི་ལོབས་མོད་ཀྱི་འོན་ཀྱང་ངས་ཤེས་པ་ཙམ་སློབས་ཤིག་ཅེས་སློབ་མ་རྣམས་ལ་བསྒོ་ནས། སློབ་དཔོན་གྱིས་འཆར་བ་ཡང་སླན་ཆད་མི་གཙེ་བར་གསོལ་ཏེ། དེའི་རྔན་པའི་བརྡར་རོལ་མོ་དང་རྩལ་གྱི་ཆ་སྤྱད་བཞག་པས་བྱིས་པ་རྣམས་མི་སྙན་པར་འཛེར་ཅིང་འཕྱ་བར་གྱུར་པ་དང༌། སླད་ཀྱིས་ཡངས་པའི་གྲོང་ཁྱེར་ན་ལི་ཙྪ་བཱིའི་བྱིས་པ་རྣམས་ཆུ་ལ་འཁྲུ་བའི་ཚེ་རྒྱན་རྣམས་བཀྲོལ་ཏེ་བཞག་པ་དགེ་སློང་བསྙེན་དགའ་བོས་གནོད་སྦྱིན་གྱི་ནོར་རོ་ཞེས་བླངས་པ་བྱིས་པ་རྣམས་ཀྱིས་བསྙགས་ཏེ་འདྲེན་པ་ལ། རྒན་པོ་ཞིག་གིས་མཐོང་ནས་དེས་བྱས་ཏེ་ཕྱིར་བྱིན་པ་དང༌། བྱིས་པས་སས་གཏོར་བ་དང༌། ལྷ་ཁང་དུ་ཕྱིན་ནས་དགེ་སློང་དག་གིས་དེ་ལ་ཅི་ཉེས་ཞེས་དྲིས་ན། དེས་ཀྱང་དེ་བཞིན་དུ་གཏམ་བྱས་ཏེ། དེ་ལྟ་བུའི་ཉེས་པའི་དམིགས་ཀྱང་བྱུང་མོད་ཀྱི་དེའི་ཚེ་འདུལ་བ་ལ་བསླབ་པའི་གནས་མ་བཅས་སོ། །སླད་ཀྱིས་གྲོང་ཁྱེར་ཡངས་པ་ཅན་ན་ལིཙྪ་བཱིའི་སྐྱེད་མོས་ཚལ་སུམ་ཅུ་རྩ་གསུམ་པའི་འདྲེས་པའི་
ཚལ་དང་འདྲའོ་ཞེས་སངས་རྒྱས་ཀྱིས་བསྔགས་པ་དྲུག་སྡེ་དག་གིས་ཐོས་ནས། དེ་ཅི་འདྲ་བ་བལྟའོ་ཞེས་ནང་དུ་ཞུགས་ཏེ། ཁྲུས་ཀྱི་རྫིང་དང་རོལ་མོའི་ཆ་སྤྱད་དག་མ་སྐྱེས་དགྲ་ལ་སོགས་པའི་དགྲ་ཆའི་རྔ་བོ་ཆེ་ཡོད་དེ། ཚེ་དང་ལྡན་པ་དྲུག་སྡེ་རྣམས་ཀྱིས་ཐོག་མར་ནི་ཁྲུས་བྱས། དེའི་འོག་ཏུ་རྡ་བརྡུངས་པས་མ་སྐྱེས་དགྲའི་དམག་འོང་སྙམ་སྟེ་ལི་ཙྪ་བཱི་ཀུན་སྐྲག་སྟེ་སྐྱེད་མོས་ཚལ་དུ་ལྷགས་སོ། །དྲུག་སྡེ་ན་རེ་དགྲ་ནི་མེད་ཀྱི་ངེད་ཀྱིས་ཀུ་རེ་ཞིག་བྱས་སོ་ཞེས་བྱས་པ་དང༌། དེ་ཀུན་ནི་རབ་ཏུ་སྐྲག་ཅིང་དཀྲུགས་ན། ཅི་རྩེད་མོ་ཞིག་ཅེས་མི་སྙན་པར་ཟེར་བ་ལས། རིན་པོ་ཆེ་དང་ཉེ་བའི་རིན་པོ་ཆེ་སྟེ་རོལ་མོ་དང་དགྲ་ཆ་ལ་སོགས་པ་ལེན་ཅིང་སྤྱོད་དོ་ཞེས་སྐྱེ་བོ་རྣམས་མི་སྙན་པར་ཟེར་བ་སྙན་དུ་བདས་ནས་ཐུག་སྡེ་རྣམས་ལ་རྨས་ཏ། རྣམ་གྲངས་དུ་མས་སྨད་ནས་རིན་པོ་ཆེ་དང༌། རིན་པོ་ཆེ་ལྟ་བུ་ལ་རེག་ཏུ་མི་གནང་བའི་འདུལ་བ་ལ་བསླབ་པའི་གནས་བཅས་སོ། །དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །རིན་པོ་ཆེ་ཞེས་བྱ་བ་ནི་ནོར་བུ་དང༌། མུ་ཏིག་དང༌། བཻ་ཌཱུཪྻ་དང༌། མན་ཤེལ་དང༌། གཡས་སུ་འཁྱིལ་པ་དང༌། གསེར་དངུལ་ལ་སོགས་པའི། །རིན་པོ་ཆེ་ལྟ་བུ་ཞེས་བྱ་བ་ནི་འཐབ་མོའི་མཚོན་ཆ་དང༌། རོལ་མོའི་ཆ་སྤྱད་ཐམས་ཅད་ལ་རིན་པོ་ཆེ་ཞེས་བྱའོ། །རང་གི་ལག་གིས་ཞེས་བྱ་བ་ནི་བདག་གིས་བླངས་པའོ། །གནས་ཁང་གི་ནང་དང་ཀུན་དགའ་ར་བའི་ནང་ན་འདུག་པ་མ་གཏོགས་པ་ཞེས་བྱ་བ་ནི། གཙུག་ལག་ཁང་དང་ཀུན་དགའི་མཚམས་ཀྱི་ནང་ན་འདུག་པའོ། །དེ་ཡང་རི་དགས་དགྲའི་མ་ས་ག་བཅོམ་ལྡན་འདས་ལ་ཕྱག་འཚལ་དུ་འོངས་པ་རྐོ་ལོང་དུ་གྱུར་དུ་དོགས་ནས་རྒྱན་རྣམས་བཀྲོལ་ཏེ་སྒོའི་ལྐོག་ཏུ་བཞག་པ་ཚེ་དང་ལྡན་པ་ཀུན་དགའ་བོས་མཐོང་ནས་སྟོར་དུ་དོགས་པས་བླངས་ཏེ་སྙན་དུ་ཞུས་པ་ལས་སླན་ཆད་དེ་ལྟ་བུ་དེ་དག་ལོང་ལ་བདག་པོ་མ་འོངས་ན་ཞག་དྲུག་གི་བར་དུ་ཞོག་ཅིག །དེ་སྟེ་ཡང་མ་འོངས་ན་དགེ་འདུན་གྱི་མཛོད་དུ་བྲུབས་ཤིག་པའོ། །ལྟུང་བ་ནི་ངན་སོང་གསུམ་དུ་ལྟུང་བའོ། །ཉེས་པ་ནི་དགེ་སློང་གིས་ནོར་བུ་དང་དུང་དང་མན་ཤེལ་དང༌། གསེར་དང་དངུལ་དག་བླངས་ན་ལྟུང་བར་འགྱུར་རོ། །རྔ་དང་རོལ་མོའི་ཆ་བྱད་དང་གཞུ་རྒྱུད་མེད་པ་སྤྱད་ན་ཉེས་བྱས་སུ་འགྱུར་རོ། །གཞུ་རྒྱུད་དང་བཅས་པ་དང་མདའ་མདེའུ་ཅན་འཆང་ན་ཡང་ལྟུང་བར་
འགྱུར་རོ། །དུང་འབུད་པ་ལས་བླངས་ན་ལྟུང་བར་འགྱུར་རོ། །སྐུ་གཟུགས་རིང་བསྲེལ་དང་བཅས་པ་ལེན་ན་ལྟུང་བར་འགྱུར་རོ། །རིང་བསྲེལ་མེད་པ་འམ་སྟོན་པར་འདུ་ཤེས་སྐྱེད་ན་ཉེས་བྱས་སུ་འགྱུར་རོ། །ཁྲུས་བྱེད་དུ་སྔར་མི་གནང་སྟེ་སླད་ཀྱིས་ཚ་བའི་དུས་ལ་དགོངས་ནས་གནང་བའི་གླེང་གཞི་ནི་རྒྱལ་པོའི་ཁ་ན་སྟེ། དེའི་ཚེ་ན་རྒྱལ་པོ་གཟུགས་ཅན་སྙིང་པོའི་ཡུལ་ན་ཆུ་དྲོན་གསུམ་བདོག་སྟེ། གཅིག་ཏུ་ནི་རྒྱལ་པོ་ཉིད་ཁྲུས་བྱེད། གཉིས་པར་ནི་བཙུན་མོའི་ཚོགས་རྣམས་ཁྲུས་བྱེད། གསུམ་པར་ནི་འབངས་རྣམས་ཁྲུས་བྱེད་དོ། །དེ་ནས་རྒྱལ་པོས་བསམས་པ། བདག་གིས་བཅོམ་ལྡན་འདས་ཀྱི་དགེ་འདུན་ལ་ཅིས་ཀྱང་བསྟབས་ན་ཆུ་དྲོན་གྱིས་མ་བསྟབས་ཀྱིས་དབུལ་ལོ་སྙམ་ནས་རྒྱལ་པོས་སངས་རྒྱས་ལ་ཆོས་ཉན་པའི་རྗེས་ལ་བཙུན་མོ་འཁྲུ་བ་ནི་དགེ་འདུན་མོ་རྣམས་ལ་འབུལ། བདག་རང་འཁྲུ་བའི་རྫིང་ནི་དགེ་འདུན་ལ་ཕུལ་ཏེ། བདག་འཁྲུ་བའི་ཚེ་ནི་དགེ་འདུན་གཞེས། དགེ་འདུན་འཁྲུ་བའི་ཚེ་ནི་བདག་སྡོང་ངོ་ཞེས་ནས། དེ་བཞིན་དུ་གནང་བ་དང་དྲུག་སྡེ་རྣམས་ཀྱིས་ཀྱལ་ཀ་བྱ་བར་བསམས་ཏེ། རིང་དུ་ཐོགས་པར་བྱ་བའི་ཚེ་རེས་ཀྱིས་སྦྲེང་ཞིང་ཁྲུས་བྱེད། གཅིག་འཁྲུ་བའི་ཚེ་གཅིག་གྲོགས་བྱེད་ནས། རྒྱལ་པོ་འཁྲུར་འོངས་པ་རིང་ཞིག་ཏུ་བསྡད་ན། དྲུག་སྡེ་དག་རིང་དུ་ཐོགས་ནས་གདོད་སྐྱོ་ནས་ཆུ་བཅུས་ཏེ་ཁྲུས་བྱས་སོ། །དེ་ནས་བཅོམ་ལྡན་འདས་ཀྱི་གན་དུ་སོང་སྟེ། ཕྱག་བྱས་ནས་ཁ་རོག་སྟེ་སླར་སོང་ངོ༌། །དེ་ནས་བཅོམ་ལྡན་འདས་ཀྱིས་ཀུན་དགའ་བོ་ལ་སྨྲས་པ། རྒྱལ་པོ་འདི་སྔོན་ནི་ཕྱག་བྱས་ནས་ཆོས་ཀྱང་མཉན་ན། །ད་ནི་ཆོས་ཀྱང་མ་མཉན་པས་སླར་སོང་ན་ཅི་ཉེས་ཞེས་རྨས་ན་དྲུག་སྡེས་ཀྱལ་ཀ་འདི་ལྟ་བུ་བྱས་པས་མ་རངས་པ་འདྲའོ་ཞེས་གསོལ་ནས་ཕྱིན་ཆད་འཁྲུར་མི་གནང་ངོ་ཞེས་བཅས་པ་ལས། ཕྱིས་དགེ་སློང་དག་དྲི་མཆེ་ཞིང་མནམ་ནས། ཁྱིམ་པ་དག་འཕྱ་ཞིང་ཁྱེད་དྲི་མས་གྲོལ་ཐར་ཏམ་ཞེས་འཕྱ་བ་ལས་ཕྱིན་ཆད་ཟླ་བ་ཕྱེད་ཕྱེད་ཅིང་ཁྲུས་བྱེད་པར་གནང་ངོ། །དཔྱིད་ཚ་བའི་ཟླ་བ་གསུམ་ནི་འཁྲུར་གནང་ངོ༌། །སླན་ཆད་ན་བ་དང་རླུང་དང་ཆར་གྱི་ཚེ་དུས་ལ་མ་བབ་པར་ཡང་འཁྲུར་གནང་ངོ༌། །ཟླ་བ་ཕྱེད་ཕྱེད་ཅིང་ཁྲུས་གྱིས་ཤིག་ཅེས་བྱ་བ་ནི་དཔྱིད་ཚ་བའི་དུས་ཏེ་ཟླ་བ་ཕྱེད་ཀྱི་རྗེས་ལ་གནང་བའོ། །སངས་རྒྱས་ནི་དངོས་སུ་ཟད་དོ། །དེ་དང་འགལ་བར་བྱས་
ན་དུས་ལ་བབ་པ་མ་གཏོགས་ཞེས་བྱ་བ་ནི་དུས་ནི་འདི་ཡིན་ཏེ། དཔྱིད་སྨད་ཀྱི་ཟླ་བ་ཕྱེད་དང་གཉིས་ཞེས་བྱ་བ་ནི་ཟླ་བ་ཕྱེད་དང་གཉིས་ན་དབྱར་ཚུལ་དུ་འཇུག་པའོ། །དབྱར་གྱི་དངོས་པོ་ཞེས་བྱ་བ་ནི་ཚུལ་དུ་ཞུགས་ནས་ཟླ་བ་ཕྱེད་ཀྱི་བར་དུ་སྟེ། ཟླ་བ་ཕྱེད་དང་གསུམ་པོ་འདི་དག་ནི་རབ་ཏུ་ཚ་བའི་དུས་སོ། །ལྷག་མ་ན་བ་དུས་ཞེས་བྱ་བ་ནི་དགེ་སློང་ནད་ཀྱིས་བཏབ་པ་ཁྲུས་མ་བྱས་ན་འཚོ་བར་མི་འགྱུར་རོ། །ལས་དུས་ཞེས་བྱ་བ་ནི་དགེ་འདུན་ནམ་མཆོད་རྟེན་གྱི་ལས་ཏེ། ཕྱག་དར་དང་དཀྱིལ་འཁོར་བ་ཀོ་ཙམ་བྱས་ན་འཁྲུར་གནང་ངོ༌། །ལམ་དུས་ཞེས་བྱ་བ་ནི་དཔག་ཚད་ཕྱེད་དམ། གཅིག་ཙམ་ནས་སླར་འཁོར་བའི། །རླུང་དུས་ཞེས་བྱ་བ་ནི་ཐ་ན་རླུང་གིས་ཆོས་གོས་ཀྱི་ཐ་མ་བཟློག་པའམ། །ལུས་ལ་ཆར་གྱི་ཐིགས་པ་གཅིག་གཉིས་ཕོག་པ་ཙམ་ཡང་ངོ༌། །དུས་ཡིན་ཞེས་བྱ་བ་ནི་དེ་དང་མཐུན་པའི་ཆོས་སོ། །དགེ་སློང་ཁྲུས་བྱེད་ན་དུས་ལ་བབ་པོ་སྙམ་དུ་སེམས་ལ་ཁྲུས་ཀྱིས་ཤིག་མ་བསམས་པར་བྱས་ན་ལྟུང་བར་འགྱུར་རོ། །དགེ་སློང་ཀླུང་ཆུ་དང་འབབ་ཆུ་དང༌། རྫིང་བུ་གང་ཡང་རུང་བས་ཁྲུས་བྱེད་ན་ལྟེ་བ་ཁུང་གི་བར་མ་ཕྱིན་གྱི་བར་དུ་ནི་ཉེས་བྱས་སོ། །ཕྱིན་ན་ལྟུང་བར་འགྱུར་རོ། །གཞན་ནི་སྐབས་གཞན་ནས་འབྱུང་བ་དང་སྦྱོར་ཅིག །ལྟུང་བ་དྲུག་ཅུ་པ་རྫོགས་སོ།། །།བྱོལ་སོང་གསོད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་དང་ལྡན་པ་འཆར་ཀ་ནང་པར་ལངས་ནས། གྲོང་དུ་བསོད་སྙོམས་ལ་ཕྱིན་པ་དང༌། མཉན་དུ་ཡོད་པ་ན་འཕོང་རྩལ་སློབ་པ་དག་ཅིག་འདུག་པར་མཐོང་སྟེ། འཕོང་སློབ་པའི་སློབ་དཔོན་ནི་གཞན་དུ་སོང་བའི་སྐབས་སུ་སློབ་མ་དག་གི་གན་དུ་འཆར་ཀ་སོང་སྟེ། དེས་བྱིས་པ་རྣམས་ལ་ཁྱེད་འཕོང་སློབ་པ་ནི་སློབ་པའི་མཆོག་ལ་ཞུགས་པ་ནི་ལེགས་ཏེ། ངས་ལྟ་ཡིས་སྔ་འཕོང་ཕྱི་འཕོང་གཡས་ཀྱི་འཕོང་གཡོན་གྱི་འཕོང་དང་མདའ་ལྡ་འཕངས་པ་དག་ཤེས་སམ་མི་ཤེས་འཕང་དུ་བཅུག་ན་དེ་དག་མི་ཤེས་པ་དང༌། མགོ་བསྒྱུར་ལག་པ་དང་བཞིན་བསྒྱུར་ཏེ་མི་མགུ་ནས། བྱིས་པ་ཁྱེད་རྣམས་ནི་ཕུབ་མ་ཕྱར་བ་དང་འདྲ་སྟེ་དན་མེད་དོ་ཞེས་ནས་ཁོ་བདག་གིས་བྱ་རོག་གཅིག་ནམ་མཁའ་ལ་སོང་བ་དང་མདས་བྱ་རོག་གི་མདུན་རྒྱབ་ཏུ་མདའ་རེ་རེ་འཕངས་ཏེ་པར་སྣང་ལ་འཕངས་པའི་མདའ་གཅིག་གིས་བྱ་རོག་བསད་
ནས་སོང་ངོ༌། །དེ་དག་གི་སློབ་དཔོན་ཕྱིས་འོངས་པ་དང༌། དེ་དག་སེམས་ཁོང་དུ་ཆུད་ཅིང་འཁོད་པ་ལ་རྨས་ན་འཆར་ཀ་འདིར་འོངས་ཏེ། འདི་སྐད་ཅེས་ཟེར་ཏེ་ཁྱེད་ནི་ཕུབ་མ་འཕྱར་བ་དང་འདྲ་སྟེ་དོན་མེད་དོ་ཞེས་ཟེར་རོ། །དེ་ན་རེ་དེ་རབ་ཏུ་མ་བྱུང་ན་འཛམ་བུའི་གླིང་ན་འཕོང་རྩལ་དེ་དེ་ཙམ་ལས་མཁས་པ་མེད་དེ། དེ་དང་བསྔོར་མི་རུང་གིས་རེ་ཞིག་ངས་ཅི་ཤེས་པ་ཙམ་སློབ་ཤིག་ཅེས་བསྒོ་ནས། ཕྱི་ནས་ཡང་གཙེར་དོགས་ནས་ཐབས་ཤིག་བྱ་བར་བསམས་ཏེ་སློབ་མ་དག་ལ་བསྒོ་བ་ཁྱེད་ཀྱིས་ཀྱང་འཆར་ཀ་པོའི་འཕོང་ལོབ་པའི་ཐབས་ཡོད་ཀྱི་བྱ་རོག་གི་རོ་ཤིང་ཀར་ཐོགས་ལ་འཆར་ཀ་གང་ནས་གང་དུ་བསོད་སྙོམས་ལ་འགྲོ་བའི་ཚེ་ཕྱི་བཞིན་དུ་སོང་ལ་འཆར་ཀའི་འཕོང་པ་ལ་ལྟོས་ཤིག་ཅེས་སྒྲོགས་ཤིག་ཅེས་བྱས་ནས། དེ་དག་གིས་ཀྱང་དེ་ལྟར་བྱས་པ་དང༌། དགེ་སྦྱོང་ཤཱཀྱའི་བུ་ནི་རྔོན་པ་དང་འདྲ་སྟེ། སྙིང་རྗེ་མེད་པའོ་ཞེས་འཕྱ་བས་སྙན་དུ་བདས་ནས། བྱོལ་སོང་གསོད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་འཆར་ཀ་སྟེ་གཞན་ཡང་ཆོས་འདི་ལ་ཞུགས་པའོ། །ཆེད་དུ་བསམས་ཞེས་བྱ་བ་ནི་སྲོག་ཆགས་ཡིན་པར་ཡང་འདུ་ཤེས་ལ་གསོད་སེམས་དང་ཡང་ལྡན་པའོ། །བྱོལ་སོང་གི་སྐྱེ་གནས་ཞེས་བྱ་བ་ནི་བྱ་རོག་སྟེ། གཞན་ཡང་བྱོལ་སོང་གང་ཡང་རུང་བའོ། །བསད་ཅེས་བྱ་བ་ནི་སྲོག་དང་དབྲལ་བའོ། །ཉེས་པ་ནི་དགེ་སློང་གིས་བྱོལ་སོང་ཀྱི་སྐྱེ་གནས་སུ་གྱུར་པ་ལ། གསོད་སེམས་ཀྱིས་ཐ་ན་རྒྱ་ཤུག་གི་འབྲུམ་བུ་གཅིག་གམ་ཡུངས་ཀར་གྱི་འབྲུམ་བུ་གཅིག་གིས་བསྣུན་ཏེ་ཤི་ན་ཐམས་ཅད་དུ་ལྟུང་བར་འགྱུར་རོ། །དགེ་སློང་གིས་དགེ་སློང་ལ་འགྱོད་པ་བསྐྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་བཅུ་བདུན་སྡེ་དག་དྲུག་སྡེ་དག་གིས་རྒྱུས་མི་ཤེས་ཀྱི་བར་དུ་དེ་དག་ལ་གནས་འཆའ་ཞིང་བསྙེན་བཀུར་བྱེད་དོ། །དེའི་ཚེ་འཆར་ཀས་གཅིག་ལ་ལས་ཤིག་བཅོལ་ན། ཁྱེད་ནི་ངེད་ཀྱི་སློབ་དཔོན་ནི་མ་ཡིན་ཞེས་མ་བཏུབ་པ་དང༌། འཆར་ཀས་དེ་དག་བསྐྲད་དེ་བཀྱེ་བ་དང་ནད་བགྲོས་པ་བདག་ཅག་ཁོང་གིས་བརྙས་པ་ནི་ཤེས་པ་ཆུང་བས་དེ་དག་གིས་བརྙས་ཀྱིས་ཞེས་ཐོས་པ་ཚོལ་བར་དགེ་སློང་གཞན་ཞིག་གི་གན་དུ་ལུང་ནོད་ཅིང་ཁ་དོན་བྱེད་དོ། །དེ་ནས་བསྙེན་དགའ་བོས་བྱིས་པ་དེ་དག་གར་སོང་ཞེས་སྨྲས་པ་དང་འཆར་ཀས་དེ་དག་ནི་ངག་ཏུ་མ་
བཏུབ་ནས་ངས་བསྐྲད་དོ་ཞེས་བྱས་པ་དང༌། བསྙེན་དགའ་བོ་ན་རེ་དེ་ནི་མ་ལེགས་སྦྲུལ་ཉལ་བ་བསླངས་པ་དང་འདྲ་བ་བསྐྲད་དེ་ཅི་བྱ། བདག་ཅག་ལ་གནོད་པར་འགྱུར་རོ་ཞེས་བྱས་པ་དང༌། འཆར་ཀ་ན་རེ་དེ་ངག་གི་བར་ཆད་བྱ་བར་ངས་ནུས་སོ་ཞེས་ནས་དེ་དག་གི་གན་དུ་སོང་སྟེ་བྱིས་པ་ཁྱེད་རྣམས་ཅི་བྱེད་ཅེས་སྨྲས་པ་དང༌། ངེད་ནི་ཐོས་པ་ཚོལ་ལོ། །ཐོས་པས་ཅི་བྱ་དབང་པོ་སྨིན་པར་འགྱུར་རོ། །དེས་ཅི་ཞིག་བྱ་ཟག་པ་མེད་པའི་ཤེས་རབ་བསྐྱེད་དོ། །དེས་ཅི་བྱ་མྱ་ངན་ལས་འདའ་བ་མངོན་སུམ་དུ་བྱའོ། །འཆར་ཀ་ན་རེ་ཁྱོད་ཀྱིས་ཐོས་པ་ནི་མ་ཐོས་མ་ཐོས་པ་ནི་ཐོས་ཏེ། ཁྱེད་རྣམས་ལོ་ཉི་ཤུ་མ་ལོན་པར་བསྙེན་བར་རྫོགས་པས་ན། ཁྱེད་རྣམས་ཀྱང་བསྙེན་པར་མ་རྫོགས་པ་ལ་དགེ་སློང་དག་ཀྱང་འདས་པ་དང་བཅས་པའོ་ཞེས་མ་གསུངས་སམ། ཁྱེད་དགེ་སློང་དུ་མ་གྱུར་ན་མཉན་ཏེ་ཅི་ཕན་ཞེས་བྱས་པས་དེ་དག་སེམས་ཁོང་དུ་ཆུད་དེ་འགྱོད་ཅིང་འཁོད་པ་དང༌། དེ་དག་གི་སློབ་དཔོན་འོངས་ཏེ་ཁྱེད་ཅིའི་ཕྱིར་སེམས་ཤིང་འཁོད་ཅེས་བྱས་པ་དང༌། འཆར་ཀ་ན་རེ་འདི་སྐད་ཟེར་རོ་ཞེས་ཞིབ་ཏུ་སྨྲས་པ་དང༌། སློབ་དཔོན་ན་རེ་ལས་དང་པོ་ལ་ཉེས་པ་མེད་ཅེས་གསུངས་པས་ན་ཁྱེད་ལ་ཉེས་པ་མེད་དེ། ཐེ་ཚོམ་མ་བྱེད་ཅིག་ཅེས་བསྒོའོ། །དགེ་སློང་རྣམས་ཅིའི་ཕྱིར་དགེ་སློང་ལ་འགྱོད་པ་བསྐྱེད་དུ་གཞུག་ཅེས་འཕྱ་བ་ལས་སྙན་དུ་བདས་ནས། བཀས་རྨད་དེ་དགེ་སློང་ལ་འགྱོད་པ་བསྐྱེད་དུ་མི་གནང་བར་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་འཆར་ཀ་སྟེ་གཞན་ཡང་དེ་དང་འདྲ་བའོ། །ཆེད་དུ་བསམས་ཞེས་བྱ་བ་ནི་སེམས་ཀྱིས་བྱ་བར་སེམས་པའོ། །སྐད་ཅིག་མི་དགའ་བར་བྱ་བར་བསམས་ནས་འགྱོད་པ་བསྐྱེད་ན་ཐམས་ཅད་དུ་ལྟུང་བར་འགྱུར་རོ། །དགེ་སློང་མ་ཡིན་པ་ཕས་ཕམ་པ་ལ་སོགས་པས་དགེ་སློང་འགྱོད་པ་བསྐྱེད་བཅུག་ན་འགྱོད་པ་སྐྱེས་ཀྱང་རུང་མ་སྐྱེས་ཀྱང་རུང་བཞད་གད་ཀྱི་ཕྱིར་ཡང་རུང་ལྟུང་བར་འགྱུར་རོ། །ཚེ་དང་ལྡན་པ་ཁྱོད་ཀྱིས་ཉི་མ་དང་ཟླ་བ་སྤྱང་ཀིས་ཟིན་པ་དང༌། ཚོང་དཔོན་དང་དེ་དཔོན་དང་ནོར་ཅན་དེ་ལྟ་བུ་དག་དྲན་ནམ་མི་དྲན་ཞེས་སྨྲས་པ་ལས། མི་དྲན་ནོ་ཞེས་སྨྲས་པ་ལ། འོན་ཀྱང་ཁྱོད་ཀྱིས་བསྙེན་པར་མ་རྫོགས་སོ་ཞེས་འགྱོད་པ་བསྐྱེད་ན་ཐམས་ཅད་དུ་ལྟུང་བ་རེ་རེར་འགྱུར་རོ། །ཚེ་དང་ལྡན་པ་ཁྱོད་ནི་མཁན་པོ་དང་སློབ་དཔོན་མི་རིགས་པ་ལས་བསྙེན་
པར་རྫོགས་པས་ན་དགེ་སློང་གི་དངོས་པོ་མེད་དོ་ཞེས་བྱ་བའི་འགྱོད་པ་བསྐྱེད་ན་ལྟུང་བར་འགྱུར་རོ། །སྡིག་པར་ལྟ་བ་ལས་བཟློག་པ་འམ་བཅོས་པའི་ཕྱིར་ནི་ཉེས་པ་མེད་དོ། །མཛུབ་མོས་ག་ག་ཚིལ་བྱེད་དུ་མི་གནང་བའི་གླིང་གཞི་ནི་མཉན་དུ་ཡོད་པ་ན་སྟེ། དེའི་ཚེ་བཅུ་བདུན་སྡེ་རྣམས་གཅིག་ལས་སུ་བསྐོས་ན། ཀུན་བསྡོངས་ཤིང་གྲོགས་བྱེད་དོ། །ཕྱིས་གཅིག་ལ་གཙུག་ལག་ཁང་སྐྱོང་གི་རེས་ལ་བབ་ནས། དེས་ཀྱང་ཆོས་འཆད་པའི་སྟན་ཀུན་བཏིང་ནས། བདག་གཅིག་པུ་གཙུག་ལག་ཁང་ཆག་ཆག་གདབ་པ་དང༌། ཕྱག་དར་དང་གཙུག་ལག་ཁང་རྒྱན་གྱིས་བརྒྱན་པ་ལ་སོགས་པ་ཀུན་བྱས་ཏེ། དེའི་ནུབ་མོ་གཅིག་གིས་ཀྱང་གྲོགས་མ་བྱས་ཏེ་ཤ་ཟང་ངོ༌། །བཅུ་བདུན་པོ་གཅིག་ལ་གཅིག་ལྟོས་ལྟོས་པ་ལས་སུས་ཀྱང་གྲོགས་མ་བྱས་ཏེ། གཅིག་པུས་མཚན་གཅིག་ལུས་པས་ནང་པར་དེ་ཁྲོས་པ་ལ་ཀུན་གྱིས་ཟན་ཟོས་ཀྱི་བར་དུ་བཟོད་པར་གསོལ་ན་མ་བཏུབ་ནས། གཅིག་གིས་ག་ག་ཚིལ་བྱས་ན་དེ་ཡང་དགོད་པ་དང༌། ཐབས་དེ་རུང་ངོ་ཞེས་ཀུན་གྱིས་བྱས་པ་དང༌། རླུང་གིས་སུབས་ཏེ་དུས་ལས་འདས་སོ། །དེ་ནས་དེ་རྣམས་ངུ་ཞིང་འཁོད་པ་ལས་དགེ་སློང་དག་གིས་མཐོང་སྟེ་འཕྱ་བ་ལས་སྙན་དུ་བདས་ནས། ག་ག་ཚིལ་བྱེད་དུ་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་བཅུ་བདུན་སྡེའོ། །ག་ག་ཚིལ་བྱེད་ཅེས་བྱ་བ་ནི་གཡའ་བར་འགྱུར་བའོ། །ཆགས་བཞིན་དུ་ག་ག་ཚིལ་བྱས་ན་སོར་མོ་དུས་རེག་པ་ལྟུང་བ་ཡང་དེ་སྙེད་དོ། །རྨ་དང་མཛེ་དང་སྨེ་བ་དང༌། སྤུ་འཁྲིལ་བ་ལ་སོགས་པ་བསྟན་ཅིང་འཕྲུག་པ་ལ་ནི་ཉེས་པ་མེད་དོ། །ཆུ་ལ་དགའ་ཞིང་རྩེར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་བཅུ་བདུན་སྡེའི་ནང་ན་ཨུ་པཱ་ལི་ཞེས་བྱ་བ་ལས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་མངོན་སུམ་དུ་བྱས་སོ། །དེས་གྲོགས་པོ་དག་འདུལ་བར་འདོད་ནས། ཆུ་བོ་ཁྱིམ་ལྡན་ཞེས་བྱ་བའི་ནང་ན་ཁྲུས་བྱེད་པའི་ཚེ་རྩེ་ཞིང་འཁོད་དོ། །ཚེ་དང་ལྡན་པ་ཨུ་པཱ་ལི་ནི་སྐམ་ལ་འདུག་གོ །དེའི་ཚེ་ན་རྒྱལ་པོ་གསལ་རྒྱལ་དང༌། བཙུན་མོ་ཕྲེང་ལྡན་མ་གཉིས་ཁང་པའི་ཡང་ཐོག་ན་འཁོད་པ་བཅུ་བདུན་སྡེ་གཅེར་བུར་བྱུང་ནས་ཆུའི་ནང་ནས་མཛེས་པར་རྩེ་ཞིང་འཁོད་པར་མཐོང་ངོ༌། །རྒྱལ་པོ་གསལ་རྒྱལ་ན་རེ་བཙུན་མོ་ལ་ཁྱོད་
ཀྱི་སྦྱིན་གནས་ཀྱི་མཛེས་པ་ལ་ལྟོས་ཞེས་བྱས་པ་དང༌། བཙུན་མོན་རེ་དེ་དག་ནི་ན་གཞོན་པ་རྩེ་བ་ནི་ངོ་མཚར་མི་ཆེ། རྒྱལ་པོ་བགྲེས་པོ་ཉིད་ཀྱང་ད་རུང་རྩད་མོ་མི་གཏོང་ན་ཞེས་བྱས་སོ། །དེ་ནས་ཚེ་དང་ལྡན་པ་ཨུ་པཱ་ལིས་བདག་ཅག་ཆུ་ལ་རྩེ་བ་ལ་མི་དག་མི་དགའ་བ་མེད་གྲང་ཞེས་ཏིང་ངེ་འཛིན་དུ་ཞུགས་ཏེ་བརྟགས་ན། རྒྱལ་པོ་གསལ་རྒྱལ་མ་དད་པར་མཐོང་ནས། རྒྱལ་པོ་དགའ་ཞིང་དད་པར་བྱ་བའི་ཕྱིར་དགེ་སློང་གཞན་དག་ཆོས་གོས་ལ་འཇུར་བཅུག་སྟེ། སྟེང་གི་ནམ་མཁའ་ལས་རྒྱལ་པོའི་སྟེང་ན་མར་ལྡིང་སྟེ་དོང་བ་ལས་བཙུན་མོས་གྲིབ་མ་ཞིག་མཐོང་སྟེ་བལྟས་ན། ཨུ་པཱ་ལི་ལ་སོགས་པ་བཅུ་བདུན་སྡེ་རྣམས་ཏེ། བཙུན་མོ་དགའ་ནས་རྒྱལ་པོ་ལ་ངན་བུའི་སྦྱིན་གནས་མཛེས་པ་ལ་གཟིགས་ཞེས་བྱས་པ་དང༌། རྒྱ་ལ་པོ་ན་རེ་དེ་དག་དགྲ་བཅོམ་པ་ཐོབ་ཀྱང་རྩེད་མོ་མ་བཏང་ན། ཅི་མཛེས་ཞེས་འཕྱ་བ་ལས་བཙུན་མོས་སྙན་དུ་གསོལ་ནས། བཅོམ་ལྡན་འདས་ཀྱིས་སྨད་ནས་ཆུ་ལ་རྩེར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་བཅུ་བདུན་སྡེ་སྟེ་གཞན་ཡང་དེ་དང་འདྲ་བའོ། །ཆུ་ལ་རྩེ་ཞེས་བྱ་བ་ནི་རྩེ་བར་བསམས་ནས་གང་ལུས་ཀྱི་ལས་དང་ལུས་ཀྱི་བྱེད་པ་དང༌། ལུས་ཀྱིས་བསྐྱོད་པའོ། །ལྟུང་བ་ནི་སྔ་མ་བཞིན་ནོ། །ཉེས་པ་ནི་དགུ་སྟེ་དགའ་བ་དང་དགའ་བར་བྱེད་དུ་འཇུག་པ་དང༌། རྩེ་བ་དང་རྩེར་འཇུག་པ་དང༌། མགུ་པ་དང་མགུ་བར་བྱེད་དུ་འཇུག་པ་དང༌། འཕྱར་བ་དང་སྙེགས་པ་དང༌། ལུས་ལ་འཇོག་པར་བྱེད་དུ་འཇུག་པའོ། །དགེ་སློང་ཆུ་ལ་རྩེ་བར་བསམས་ནས་གོས་ཕུད་དེ་ཆུའི་ནང་དུ་ཞུགས་ཏེ། ཆུའི་ནང་དུ་བྱིའུ་ཟུལ་བྱས་སམ། སྟང་དུ་བྱུང་ངམ། ཕ་རོལ་ཚུ་རོལ་གྱི་འགྲམ་དུའམ། ཆུར་རྔ་བརྡུང་ངམ་ཆུའི་ནང་དུ་སྦལ་སྐད་འབྱིན་པ་ལ་སོགས་པ་བྱེད་ན་ཐམས་ཅད་དུ་ལྟུང་བ་རེ་རེར་འགྱུར་རོ། །ཆུ་ལ་བེམ་རྡོལ་གྱིས་བསྣུན་ཏ་མ། ཚོད་མའི་ཁུ་བ་དང༌། འབྲས་ཀྱི་ཁུ་བ་ལ་རི་མོ་འདྲི་ཞིང་རྩེ་ན་ཉེས་བྱས་སུ་འགྱུར་རོ། །སིམ་ཞིང་བསིལ་བར་བྱ་བ་དང༌། རྐྱལ་སློབ་པ་ལ་ཉེས་མེད་དོ། །བུད་མེད་དང་ཁྱིམ་གཅིག་ཏུ་ཉལ་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་དང་ལྡན་པ་མ་འགགས་པ་བཅོམ་ལྡན་འདས་ཀྱི་གསུང་རབ་ལ་བརྟེན་ཏེ་འབད་རྩོལ་བས་དགྲ་བཅོམ་པ་མངོན་སུམ་དུ་བྱས་སོ། །བཅོམ་ལྡན་འདས་
ཀྱི་བཀའ་དྲིན་བསབ་ཅིང་ལན་གློན་པའི་ཕྱིར་སེམས་ཅན་གྱི་དོན་ལ་ལྗོངས་རྒྱུ་ཞིང་སོང་བ་ལས་ནུབ་མོ་གྲོང་ཞིག་ཏུ་ཕྱིན་ནས། དགོངས་མལ་མེད་ནས་གྲང་མི་བསྟེན་ཏེ། ཁྱེའུ་སྤྱི་བརྟོལ་ཅན་གྱི་ཁྱིམ་དུ་ཉོལ་ཞེས་བྱས་པ་དང༌། ཁྱེའུ་སྤྱི་བརྟོལ་ཅན་གྱིས་དགེ་སློང་མ་འགགས་པ་ཁྲིད་དེ་སོང་ནས་ནུབ་མོ་དེར་བསྙལ་བ་དང༌། དགེ་སློང་ཡང་དེ་ན་ཉལ་ལོ་ཞེས་སྒྲ་ཀུན་དུ་གྲགས་སོ། །དེའི་ནུབ་མོ་ཁྱེའུ་དེའི་མས་དགེ་སློང་ལ་ཟན་དང་རྐང་པ་བསྐུ་བའི་མར་གྱིས་བསྟབས་ཤིང༌། མི་ཚངས་པར་སྤྱོད་པ་རྔོད་ན། དགེ་སློང་དེ་ཡང་མ་བཏུབ་བོ། །བུད་མེད་དེ་ཡང་འདོད་ཆགས་ཀྱིས་ཀུན་དུ་གནོད་པས་ནམ་ཕྱེད་ན་དགེ་སློང་ལ་བསྙེན་ཅིང་གཟུང་བར་བྱས་པ་དང༌། འཕགས་པ་དེས་སྟེང་གི་ནམ་མཁའ་ལ་འཕགས་ཏེ། རྫུ་འཕྲུལ་དང་ཆོ་འཕྲུལ་བསྟན་པ་དང་དེ་ཡང་དད་པར་གྱུར་ཏེ། ཟན་གྱིས་བསྟབས་པ་དང༌། དེ་ཡང་སྒོ་ཆོད་ཅིག་དང་ནང་པར་བཟའོ་ཞེས་ནས། འཕགས་པ་དེ་ཡང་སྒོ་གཅོད་ཅིང་ནང་ན་འདུག་པ་དང༌། བུད་མེད་དེའི་མིང་པོ་གཅིག་ཅིག་ཀྱང་ཁྱིམ་མཚེས་གཞན་དག་དང་རྩོད་ཅིང་འཐབས་པས་ན། ཁྱོད་ཀྱི་སྲིང་མོས་དགེ་སློང་དག་ཀྱང་མ་ཤོར་ཏོ་བྱས་པ་དང་དེ་གཉིས་ཀྱང་ཁྲོས་ཏེ། དགེ་སློང་དང་སྲིང་མོ་གཉི་ག་བསད་དོ་ཞེས་རལ་གྲི་ཐོགས་ཏེ་སོང་བ་དང༌། ཡུལ་གྱི་ལྟད་མོ་ལ་ཡང་མང་དུ་ལྷགས་ནས་དེ་སྒོ་ཕྱེ་སྟེ་བལྟས་པ་དང༌། འཕགས་པ་མ་འགགས་པས་ནམ་མཁའ་ལ་རྫུ་འཕྲུལ་བྱས་པ་དང༌། སྐྱེ་བོ་དག་ཀྱང་དད་པར་བྱས་སོ། །དེ་སླར་ལོག་ནས་མི་རྒོད་ལྔ་བརྒྱ་ལམ་དུ་བཏུལ་ནས་ཕྱིར་མཉན་དུ་ཡོད་པར་ཕྱིན་པ་དང༌། དགེ་སློང་དག་གིས་ཚེ་དང་ལྡན་པ་བདེ་བར་འོངས་སམ་ཞེས་དྲིས་ན་སེམས་ཅན་གྱི་དོན་བྱས་པ་ནི་བདེ་མོད་ཀྱི། ཁྱེའུ་སྤྱི་བརྟོལ་ཅན་གྱི་མའི་མིང་པོ་གཉིས་ཀྱིས་ཧད་པོར་དེའུ་བསད་དོ་ཞེས་བྱས་པ་དང༌། དགེ་སློང་དག་གིས་སྙན་དུ་གསོལ་ནས་བུད་མེད་དང་ཁྱིམ་གཅིག་གི་ནང་དུ་ཉལ་དུ་མི་གནང་བའི་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་མ་འགགས་པ་སྟེ། གཞན་ཡང་དེ་དང་འདྲ་བའོ། །བུད་མེད་ཅེས་བྱ་བ་ནི་གང་བུད་མེད་གཞོན་ནུ་མ་མི་ཚངས་པར་སྤྱོད་པ་འཁྲིག་པའི་ཆོས་བཟོད་པའོ། །ལྷན་ཅིག་ཅེས་བྱ་བ་ནི་དགེ་སློང་དང་བུད་མེད་ལྷན་ཅིག་ཏུ་འདུག་པའོ། །ཁྱིམ་ཞེས་བྱ་བ་ནི་མཐར་བསྐོར་བ་དང་སྟེང་གཡོགས་པའོ། །ལྟུང་བ་ནི་
སྲེག་པ་དང་བཙོ་བ་སྔ་མ་བཞིན་ནོ། །དགེ་སློང་སྟེང་ཁང་ན་ཉལ་ན་བུད་མེད་འོག་ཁང་དུ་ཉལ་ལ། དགེ་སློང་དེས་སྐས་ཕྱུང་ཤིག་ཡང་ན་སྒོ་གཏན་ཆུག་ཤིག་ཡང་ན་བསྲུང་བའི་དགེ་སློང་ཞོག་ཤིག །དེ་ལྟར་མ་བྱས་ན་སྐྱ་རེངས་མ་ཤར་གྱི་བར་དུ་ནི་ཉེས་བྱས་ཤར་ན་ལྟུང་བར་འགྱུར་རོ། །དགེ་སློང་གཅིག་ལ་གཅིག་སྡངས་པར་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཚེ་དང་ལྡན་པ་བཅུ་བདུན་སྡེ་རྣམས་དྲུག་སྡེ་རྣམས་ལ་གནས་འཆའ་ཞིང་བསྟེན་པའི་ཚེ་འཆར་ཀས་གཅིག་ལ་ལས་བཅོལ་ན་མ་བཏུབ་པ་ལས་འཆར་བས་བསྐྲད་དོ། །དེ་དག་ཀྱང་བདག་ཅག་ཐོས་པ་འཛིན་དུ་དོང་ངོ་ཞེས་ཀློག་པ་ལ་ཞུགས་སོ། །འཆར་བས་དེ་ལྟར་ཐོས་པ་འཛིན་ཏོ་ཞེས་བསྙེ་ན་དགའ་བོ་ལ་གཏམ་བྱས་པ་དང༌། བསྙེན་དགའ་བོ་ན་རེ་དེ་ནི་མ་ལེགས་ཏེ་བདག་ཅག་ལ་གནོད་པར་འགྱུར་བའོ། །འཆར་ཀས་བསྙེན་དགའ་བོ་ལངས་དེ་དག་སྔར་ལོབས་པ་ནི་བརྗེད་ལ་ཕྱི་མ་ལ་ནི་མི་ལོབས་པར་བྱ་ནུས་སོ་ཞེས་ནས་ལ་བ་སྤུན་མོ་ཞིག་བ་ཟློག་སྟེ་གྱོན་ནས་བཅུ་བདུན་སྡེ་མེ་མར་དག་བུས་ནས་ཀློག་པ་ལ་ཞུགས་པ་དང༌། འཆར་ཀས་ལ་བ་གྱོན་ནས་འབྱུང་པོ་འབྱུང་པོ་ཞེས་བསྡིགས་པས་དེ་དག་སྐྲག་པས་ཀློག་པ་བཏང་སྟེ་འཁོད་པ་དང༌། དེ་དག་གིས་སློབ་དཔོན་འོངས་པ་ལ་བྱས་ནས་དེ་དག་གིས་འཆར་ཀ་ཡིན་པར་འཕྲིགས་ནས་ཕྱི་དེ་ནུབ་མོ་གྲ་བཞིར་མར་མེ་བཞི་བུས་ཏེ་བཀབ་སྟེ་བཞག་ནས་འདུག་པ་དང༌། ཡང་འཆར་ཀ་འོངས་ཏེ་སྔ་མ་བཞིན་དུ་འབྱུང་པོ་འབྱུང་པོ་ཞེས་བྱས་པ་དང༌། དེ་དག་གིས་སྒོ་བཅད་དེ་མར་མེ་ཕྱུང་སྟེ་བཟུང་ནས་བརྡེགས་སོ། །དེ་ན་རེ་ང་ནི་འཆར་ཀ་པོ་ཡིན་ཞེས་སྨྲས་ན། དེ་དག་ན་རེ་འཆར་ཀ་པོ་ནི་དེ་ལྟར་རྣམ་པར་གྲོལ་བའི་བསམ་གཏན་ལ་འདུག་ན་འདིར་ཅི་འདོད་ཅེས་བརྡེགས་ནས་ཤིན་ཏུ་སྣད་དོ། །ནང་པར་ལུས་མར་གྱིས་སྐུད་ཅིང་མཉེ་བ་ལས་དགེ་སློང་གཞན་དག་གིས་ཅི་ཉེས་ཞེས་དྲིས་ནངས་དེ་བཞིན་དུ་བསྡིགས་པ་ལས་ཁོང་གིས་བརྡེགས་དེ་སྣད་དོ་ཞེས་བྱས་པ་དང༌། དོན་ཉུང་བའི་དགེ་སློང་དག་འཕྱ་སྟེ་ཅིའི་ཕྱིར་དགེ་སློང་གིས་དགེ་སློང་ལ་སྡང་པར་བྱེད་ཅེས་འཕྱ་བ་ལས་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་འཆར་ཀ་སྟེ་གཞན་ཡང་དེ་དང་འདྲ་བའོ། །དགེ་སློང་འདི་ཞེས་བྱ་བ་ནི་ཆོས་འདི་ལ་ཞུགས་པའོ། །སྡངས་པར་བྱེད་ཅེས་བྱ་བ་ནི་བདག་
གིས་བྱེད་པའོ། །བྱེད་དུ་བཅུག་ཅེས་བྱ་བ་ནི་གཞན་ལའོ། །ཐ་ན་རྩེད་མོར་བསམས་ཞེས་བྱ་བ་ནི་རྩེད་མོ་ཡང་ལྟུང་བར་འགྱུར་རོ་ཞེའོ། །དགེ་སློང་གིས་སྡངས་པར་བྱ་བར་བསམས་ནས་ཡིད་དུ་མི་འོང་བའི་གཟུགས་སྲིན་མོ་འདྲ་བའམ། ཡི་དགས་དང་ཤ་ཟ་དང་གྲུལ་བུམ་དང༌། ལུས་སྲུལ་པོ་ལྟ་བུའམ། སྟག་གཟིག་དང་འཕར་སྤྱང་ལྟ་བུའམ། ཁ་དོག་ཡིད་དུ་མི་འོང་ཞིང་སྒྲ་མི་སྙན་པའི་སྒོ་ནས། དགེ་སློང་ལ་སྡངས་པར་བྱེད་དམ་བྱེད་དུ་འཇུག་ན་ཡང་ཐམས་ཅད་དུ་ལྟུང་བར་འགྱུར་རོ། །དགེ་སློང་གིས་དགེ་སློང་ལ་སྡངས་པར་བྱ་བར་བསམས་ནས་ཡིད་དུ་མི་འོང་བའི་གཟུགས་རྒྱལ་པོ་དང་བློན་པོ་དང་ཁྱིམ་བདག་དང་ཚོང་དཔོན་དང༌། ནོར་ཅན་དང་ལྷ་དང་ཀླུ་དང༌། ནམ་མཁའ་ལྡིང་གི་གཟུགས་ལྟ་བུར་སྟོན་ཅིང་དེ་དག་ཁྱོད་ལ་གསོད་པར་བྱེད་དོ་ཞེས་སྨྲས་པ་ལས། དགེ་སློང་འཇིགས་པར་གྱུར་ཀྱང་རུང༌། མ་གྱུར་ཀྱང་རུང་སྟེ་ཉེས་བྱས་སུ་འགྱུར་རོ། །སེམས་ཅན་དམྱལ་བའི་གཏམ་དང་བྱོལ་སོང་དང་ཡི་དགས་དང་ལྷ་དང་མིའི་གཏམ་སྨྲས་པ་ལ་ཉེས་པ་མེད་དོ། །དགེ་སློང་གི་ཡོ་བྱད་དང་གོས་སྦེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། མཽད་གལ་གྱི་བུས་ཨུ་པཱ་ལི་ལ་སོགས་པ་རབ་ཏུ་བྱུང་སྟེ། བསྙེན་པར་རྫོགས་པར་བྱས་ནས། དྲུག་སྡེ་རྣམས་ལ་གནས་འཆའ་ཞིང་བསྙེན་བཀུར་བྱེད་པ་དེ་ན་ཁྱིམ་བདག་ཅིག་གིས་བཅོམ་ལྡན་འདས་ལ་སོགས་པ་དགེ་འདུན་རྣམས་བཤོས་ལ་སྤྱན་དྲངས་ཏེ། སངས་རྒྱས་བཅོམ་ལྡན་འདས་འཁོར་དང་བཅས་པ་གྲོང་དུ་ཆོས་སྟོན་ལ་སྔར་གཤེགས། དྲུག་སྡེ་དང་བཅུ་བདུན་སྡེ་ནི་ཕྱི་ན་མར་དབེན་བཞིན་དུ་འབྲངས་པ་ལས། ལམ་གྱི་བར་དུ་གང་ན་རྫིང་བུ་ཞིག་ཆུས་གང་ཞིག་འདུག་པའི་གན་དུ་ཕྱིན་པ་དང༌། དྲུག་སྡེས་བཅུ་བདུན་སྡེ་ལ་ཀུ་རེ་བྱ་བར་བསམས་ནས་དྲུག་སྡེས་སྨྲས་པ་ཀྱེ་བཅུ་བདུན་སྡེ་ཁྱེད་རྣམས་ནི་ངེད་ཅག་ལ་ཤིན་ཏུ་བསྔོ་བར་བྱེད་ན། ཆུ་འདིའི་ནང་དུ་འུ་བུ་ཅག་ཞུགས་ལ་སུས་ཆུའི་ནང་དུ་དབུགས་རིང་དུ་ཐུབ་པ་ལྟའོ་ཞེས་བྱས་པ་དང༌། བཅུ་བདུན་སྡེས་ཀྱང་དེ་བཞིན་དུ་བྱའོ་ཞེས་ནས་དེ་དག་ཐམས་ཅད་ཆུའི་གཏིང་དུ་ཞུགས་པ་དང་བསྙེན་དགའ་བོ་དེ་མ་ཐག་ཏུ་སླར་བྱུང་ནས་བཅུ་བདུན་སྡེའི་གོས་ཐམས་ཅད་བསྡུས་ནས་ཤིང་དྲུང་གཅིག་ཏུ་སྦས་ཏེ་བཞག་ནས།
དྲུག་སྡེ་རྣམས་རིང་ཤིང་མྱུར་བར་རྫིང་ནས་བྱུང་ནས་བྲོས་སོ། །དེ་ནས་བཅུ་བདུན་སྡེ་རྣམས་སྟེང་དུ་བྱུང་སྟེ་བལྟས་ན་གཅིག་ཀྱང་མི་སྣང་བར་བདག་ཅག་ཕམ་དུ་དོགས་ནས་སླར་ཡང་ཆུའི་ནང་དུ་ཞུགས་སོ། །སླད་ཀྱིས་བལྟས་ན་དྲུག་སྡེ་དང་གོས་བཅས་པར་མི་སྣང་ནས་ཚེ་དང་ལྡན་པ་དག་བདག་ཅག་ལ་དྲུག་སྡེ་དག་གིས་ནི་ཀྱལ་ཀ་ཞིག་བྱས་སོ་ཞེས་ནས་གོས་མེད་དེ་ཆུའི་ནང་དུ་འཁོད་པ་ལས་དེའི་ཚེ་ན་ཚེ་དང་ལྡན་པ་མཽད་གལ་གྱི་བུ་དང་ཤཱ་རིའི་བུ་གཉིས་ཡུལ་རྒྱུ་ཞིང་སོང་བས་བཅུ་བདུན་སྡེ་རྣམས་གཅེར་བུར་ཆུའི་ནང་དུ་འཁོད་པ་མཐོང་ནས་ཤཱ་རིའི་བུས་མཽད་གལ་གྱི་བུ་ལ་ཁྱོད་ཀྱི་སློབ་མ་མཛེས་པ་ལ་ལྟོས་ཞེས་བྱས་སོ། །དེ་ནས་མཽད་གལ་གྱི་བུས་ཏིང་ངེ་འཛིན་དུ་ཞུགས་ཏེ་བརྟགས་ན། དྲུག་སྡེས་གོས་རྣམས་ཤིང་ཚང་ཚིང་ཞིག་གི་ནང་ན་སྦས་པ་རྙེད་དོ། །སློབ་མ་དག་ལ་བྱིན་ནས་ཟན་ལ་དོང་བ་དང་དགེ་སློང་དག་ཟན་ཟོས་ཏེ། གྲོང་ནས་སླར་ལོག་པ་དང་ལམ་དུ་ཕྲད་ནས། ཁྱེད་ཅག་གར་ཇི་ལྟར་ཐོགས་ཐོགས་ཞེས་སྨྲས་ནས། དྲུག་སྡེས་ཇི་ལྟར་བྱས་པའི་གཏམ་བྱས་པ་དང༌། དགེ་སློང་དག་དགེ་སློང་གིས་གོས་སྦེད་ཅེས་མི་སྙན་པར་འཛེར་བ་སྙན་དུ་བདས་ཏེ། བཀས་སྨད་ནས་གོས་སྦེད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །དགེ་སློང་མ་དང་དགེ་ཚུལ་ལ་སོགས་པ་མིང་གིས་སྨོས་པ་རྣམས་ཀྱི་ཡོ་བྱད་སྦས་ན་ཉེས་པར་འགྱུར་གྱི་གཞན་མི་འགྱུར་བའི་དོན་ཏོ། །ལྷུང་བཟེད་དང་ཆོས་གོས་ལ་སོགས་པ་ཡོ་བྱད་སྨོས་པ་རྣམས་དགེ་སློང་འཆང་དུ་དབང་བའི་ཡོ་བྱད་སྦས་ན་ལྟུང་བར་འགྱུར་རོ། །འཆད་དུ་མི་དབང་བ་སྦས་ན་ཉེས་བྱས་སོ། །སྦེད་དམ་ཞེས་བྱ་བ་ནི་བདག་གིས་སོ། །སྦེད་དུ་བཅུག་ཅེས་བྱ་བ་ནི་གཞན་ལའོ། །དེ་དང་འདྲ་བའི་རྐྱེན་མ་གཏོགས་ཞེས་བྱ་བ་ནི་མཉན་དུ་ཡོད་པ་ན་དགེ་སློང་གཅིག་ལ་དགེ་སློང་གཅིག་གིས་ཆོས་གོས་དག་ཅིག་བཅོལ་བ་ལས། དགེ་སློང་དེ་ཡང་རྐྱེན་ཅིག་བྱུང་ནས་ཡུལ་གཞན་དུ་བོས་ཏེ་འགྲོ་བའི་ཚེ་གོས་སྦས་ནས་སོང་བ་ལས་སླད་ཀྱིས་ལྟུང་བར་གྱུར་ཏམ་མ་གྱུར་སྙམ་དུ་ཐེ་ཚོམ་ཟ་བ་ལས་སྙན་དུ་བདས་ནས། གཞན་ལ་གནོད་པར་བྱ་བའི་སེམས་མེད་དེ་རྐྱེན་བྱུང་བའི་ཚེ་སྦེད་པ་ནི་རྗེས་
སུ་གནང་བའོ། །མི་རྒོད་པ་དང་རྐུན་པོས་ཕྲོགས་སུ་དོགས་པ་ལྟ་བུ་དང༌། གོས་སྟོར་ཞིང་ཆུས་ཁྱེར་དུ་ངོགས་པ་ལས་སྦས་པ་ནི་ཉེས་པ་མེད་དོ། །དགེ་སློང་གིས་གོས་གདེང་མེད་པར་གྱོན་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ཚེ་དང་ལྡན་པ་འཆར་ཀ་ནི་དགྲ་བཅོམ་པ་ཐོབ། མོས་པ་ཅན་ནི་ཀཽ་ཤཱམྦཱི་ན་འདུག །ཐ་སྐར་སྐྱེས་དང་ནབ་སོ་ནི་ཤི། དགའ་བོ་དང་བསྙེན་དགའ་བོ་གཉིས་ནི་མཉན་དུ་ཡོད་པ་ན་དགེ་འདུན་གྱི་ནང་ན་གནས་ཏེ། དེ་ཡང་རྒས་འཁོགས་པས་ཉེ་གནས་རྣམས་ཀྱང་ཚིག་ཉན་དུ་མ་བཏུབ་ནས། གོས་ཁ་དོག་བསྒྱུར་ཞིང་འཚེད་པར་ཡང་མི་ནུས་པས་ཐབས་ཤིག་བྱའོ་སྙམ་ནས་གནས་འཆའ་བ་རྣམས་གོས་བྱིན་པ་ལྟར་བྱས་ཏེ། གོས་ཁ་དོག་བསྒྱུར་ཞིང་འཚེད་དུ་བཅུག་པ་དང༌། དེ་དག་གིས་ཀྱང་བདེན་པར་བྱིན་སྙམ་ནས། གོས་རྙིང་པ་ཐམས་ཅད་བཀྲུས། ཁ་དོག་བསྒྱུར་དྲུབས་ནས་འཆང་ཞིང་འཁོད་པ་ལས་དུས་ཕྱི་ཞིག་ན། བཅོམ་ལྡན་འདས་ཡུལ་གཞན་དུ་ལྗོངས་རྒྱུ་ཞིང་གཤེགས་པའི་ཚེ་དེ་དག་ཀྱང་ཞ་འབྲིང་དུ་འགྲོ་བར་ཆད་དེ། གོས་རྣམས་ཕྱིར་བསྙེན་དགའ་བོ་ཉིད་ལ་གཏམས་ནས་དོང་ངོ་།དེ་དག་སོང་བའི་འོག་ཏུ་བསྙེན་དགའ་བོས་གོས་དེ་དག་ཀུན་གྱོན་ཏེ། རྙིངས་པར་བྱས་སོ། །དེ་ནས་དེ་དག་ཕྱིར་འོངས་ནས་གོས་བལྟས་ན་དྲི་མ་ཅན་དུ་གྱུར་ཏེ་གོས་སྔོན་དང་མི་འདྲའོ་ཞེས་བྱས་པ་དང༌། བསྙེན་དགའ་བོ་བསྙོན་ཏོ། །དེ་ནས་བཅོམ་ལྡན་འདས་ཡང་ཡུལ་གཞན་དུ་ལྗོངས་རྒྱུར་གཤེགས་པའི་ཚེ། དེ་དག་གིས་གོས་ངན་ནས་བཅོམ་ལྡན་འདས་ཀྱིས་དགེ་སློང་དེ་དག་གོས་ངན་ན་ཅིའི་ཕྱིར་ཞེས་སྨྲས་པ་དང༌། བསྙེན་དགའ་བོས་སྔར་གོས་བྱིན་ཏེ་དེའི་གདེང་མེད་པར་དེ་ལྟར་གྱོན་ནོ་ཞེས་ཞིབ་ཏུ་གསོལ་བ་དང༌། དགེ་སློང་གི་ཆོས་མ་ཡིན་ཞེས་སྨད་དེ་གདེང་མེད་པར་གོས་གྱོན་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །གོས་ཞེས་བྱ་བ་ནི་ཆོས་གོས་གསུམ་པོ་གང་ཡང་རུང་བའོ། །བྱིན་ཞེས་བྱ་བ་ནི་སྔར་བྱིན་པའོ། །གདེང་མེད་ཅེས་བྱ་བ་ནི་སྔར་བྱིན་པའམ། བརྙར་བྱིན་ཏེ་བགོ་བ་ལ་སོགས་པ་སྤྱད་པར་མ་བྱིན་པའོ། །གོས་གྱོན་པས་དགའ་བར་འགྱུར་རོ་སྙམ་པའམ། མཛའ་བོ་རྣམ་པ་གསུམ་ལྟ་བུའི་གོས་སྤྱད་པ་ནི་ཉེས་པ་མེད་
དོ། །དགེ་སློང་ལ་རྩ་བ་མེད་པར་དགེ་འདུན་ལྷག་མས་སྐུར་དུ་མི་གནང་བའི་གླེང་གཞི་ནི་རྒྱལ་པོའི་ཁབ་ན་སྟེ། དེའི་ཚེ་དགེ་སློང་མ་ཨུཏྤ་ལའི་མདོག་སངས་རྒྱས་ལ་ཕྱག་འཚལ་ནས། གྱད་བུ་ནོར་བྱ་རྒོད་སྤུངས་པའི་རི་ལ་འདུག་པའི་གན་དུ་ཕྱག་འཚལ་དུ་སོང་བའི་ཚེ། གྱད་བུ་ནོར་གྱི་ཆོས་གོས་དྲུང་གིས་བདས་པ། ཨུཏྤ་ལའི་མདོག་གི་མགོ་ལ་རེག་པ་མཛའ་བོ་དང་ས་ཅན་གཉིས་དེའི་ཉེ་འཁོར་ན་ཕྱག་དར་ཁྲོད་འཁྲུ་ཞིང་འདུག་པས་མཐོང་ནས། ས་ཅན་ན་རེ་ཅོད་པན་ལ་རེག་ན་ལྷག་མར་འགྱུར་རོ་ཞེས་བཀའ་སྩལ་ན། ད་ནི་གླེང་བའི་དུས་ལ་བབ་པོ་ཞེས་བྱས་པ་དང༌། མཛའ་བོ་ན་རེ་སྔར་ཀྱང་བདག་ཅག་གིས་སྐུར་པ་བཏབ་པ་ལས་དོ་སྤངས་ན། ད་ཡང་ཅི་སྤངས་པར་འདོད་དམ་ཞེས་པ་དང༌། ས་ཅན་ན་རེ་སྔོན་ནི་མི་བདེན་པས་སོ། །ད་ནི་བདེན་ཡང་རུང་ཞེས་གླེངས་པ་དང༌། དགེ་སློང་གནས་བརྟན་དག་གིས་དམ་དུ་སྨོས་ཤིག་ཅེས་བཀའ་སྩལ་ནས། དགེ་སློང་གནས་བརྟན་དག་གིས་ཞིབ་ཏུ་སྨྲས་པ་དང༌། བདག་ཅག་གིས་སྐུར་པ་བཏབ་པ་བདེན་ནོ་ཞེས་ཁས་བླངས་པ་དང༌། དོན་ཉུང་བའི་དགེ་སློང་དག་འཕྱ་བ་ལས་སྙན་དུ་བདས་ཏེ། རྩ་བ་མེད་པའི་ལྷག་མས་སྐུར་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་མཛའ་བོ་དང་ས་ཅན་ཏེ། གཞན་ཡང་དེ་དང་འདྲ་བའོ། །ཞེ་སྡང་ཅན་ཞེས་བྱ་བ་ནི་ཞེ་སྡང་མ་སྤངས་པའོ། །ཁྲོས་ཞེས་བྱ་བ་ནི་ཡི་མ་རངས་པའོ། །དགེ་སློང་གཙང་མ་ཞེས་བྱ་བ་ནི་གྱད་བུ་ནོར་ཏེ་ཞེས་གཞན་ཡང་དེ་དང་འདྲ་བའོ། །རྩ་བ་མེད་ཅེས་བྱ་བ་ནི་རྩ་བ་གསུམ་སྟེ། མཐོང་བའི་རྩ་བ་དང༌། དོགས་པའི་རྩ་བ་དང༌། ཐོས་པའི་རྩ་བ་མེད་པའོ། །དགེ་འདུན་གྱི་ལྷག་མ་ཞེས་བྱ་བ་ནི། དགེ་འདུན་གྱི་ལྷག་མ་བཅུ་གསུམ་པོའི་ནང་ནས་གང་ཡང་རུང་བའོ། །སྐུར་ཅེས་བྱ་བ་ནི་ཀླང་བཏབ་པའོ། །ལྟུང་བ་ནི་ངན་སོང་གསུམ་དུའོ། །ཉེས་པ་ནི་ཕས་ཕམ་པར་གྱུར་པ་ལྷག་མར་གྱུར་པ་ལས་ཇི་སྐད་དུ་འབྱུང་བ་བཞིན་དུ་འདིར་ཡང་སྦྱོར་ཅིག། སྐྱེས་པ་མེད་པར་བུད་མེད་དང་ལྷན་ཅིག་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་རྒྱལ་པོའི་ཁབ་ན་ཐག་པ་ཞིག་གནས་པ་དེ་མཉན་དུ་ཡོད་པ་ན་ཁྱིམ་བདག་ཅིག་འདུག་པའི་བུ་མོ་ཆུང་མར་བླངས་སོ། །དེ་ཡང་ཁྲོ་ཞིང་གཏུམ་པ་ཞིག་པས། རྟག་ཏུ་བརྡེགས་པས་བྲོས་ཏེ་འགྲོའོ་སྙམ་
ནས། ཁྱིམ་མཚེས་རྒན་མོ་ཞིག་ལ་བྱས་པ་དང༌། རྒན་མོ་ན་རེ་བུ་མོ་མ་བྲོས་ཤིག་དང༌། ངས་ཐག་པ་ལ་མ་བརྡེགས་ཤིག་པར་བསྒོའོ་ཞེས་ནས་དེའི་ཚེ་མ་བྲོས་སོ། །སླད་ཀྱིས་ཐ་ག་པ་ཡང་ར་རོ་སྟེ། ཆང་སྲིན་ཅན་ཞིག་པས་བརྡེགས་པ་དང༌། བུ་མོ་དེ་ཡང་མཉན་དུ་ཡོད་པར་བྲོས་ཏེ་སོང་ངོ༌། །ཐ་ག་པས་ཀྱང་ཕྱི་བཞིན་དུ་བསྙགས་པ་དང༌། དགེ་སློང་ཞིག་མཉན་དུ་ཡོད་པར་འགྲོ་བ་དང་འགྲོགས་ཏེ་སོང་བ་མཐོང་ནས། འཕྲལ་དུ་གཟུང་དུ་ནི་བདག་གཅིག་པུ། ཁོང་ནི་གཉིས་པས་བདག་གིས་མི་གཟུང་ངོ་སྙམ་ནས་དེ་ཐག་པའི་གྲོང་ནས་ཐག་པ་རྣམས་ལ་ངའི་ཆུང་མ་ཤཱཀྱའི་དགེ་སྦྱོང་གིས་འཕྲོགས་ཀྱིས་གྲོགས་གྱིས་ཤིག་ཅེས་བྱས་པ་དང༌། ཐ་ག་པ་རྣམས་ནི་ཡོང་གིས་ཀྱང་བློ་རྩིང་བས། དགེ་སློང་དེ་བཟུང་ནས་ཤིན་ཏུ་བརྡེགས་ནས་ལྷུང་བཟེད་དང༌། ཁར་གསིལ་ནི་བཅག་ཆོས་གོས་ནི་དྲལ་ཏེ་དེའུ་ཤི་བ་ལས། ཐ་ག་པ་དག་གིས་བཟོད་པ་གསོལ་ཏེ་དགེ་སློང་མཉན་དུ་ཡོད་པར་ཕྱིན་པ་དང༌། དགེ་སློང་གཞི་པ་རྣམས་ཀྱིས་བདེ་བར་འོངས་སམ་ཞེས་བྱས་པ་དང༌། ལན་དུ་དེ་ལྟའི་ཕྱིར་བརྡེགས་ཏེ་དེའུ་ཤིའོ་ཞེས་བྱས་པ་དང༌། ཅིའི་ཕྱིར་བུད་མེད་དང་གཞན་དུ་འགྲོགས་ཤིང་འགྲོ་ཞེས་དགེ་སློང་དག་འཕྱ་བ་ལས་སྙན་དུ་བདས་ནས་འདུལ་བ་ལ་བསླབ་པའི་གནས་བཅས་སོ། །སྐྱེས་པ་མེད་ཅེས་བྱ་བ་ནི་སྐྱེས་པ་གཞན་མེད་པའོ། །བུད་མེད་ཅེས་བྱ་བ་ནི་རྒྱ་རྣ་རུ་བཟོད་པའོ། །ལམ་དུ་ཞུགས་ཞེས་བྱ་བ་ནི་འགྲོ་བའོ། །ཐ་ན་གྲོང་བར་ཕྱིན་པར་ཞེས་བྱ་བ་ནི་གྲོང་ཁྱེར་གཅིག་ནས་གཅིག་ཏུ་བརྒྱུད་དེ་སོང་བའོ། །ཉེས་པ་ནི་རྒྱང་གྲགས་རེ་རེ་ཞིང་ལྟུང་བར་འགྱུར་རོ། །རྒྱང་གྲགས་ཕྱེད་ཕྱེད་ཅིང་ཉེས་བྱས་སུ་འགྱུར་རོ། །བུད་མེད་ཀྱི་བསེལ་བྱས་པ་དང་ལམ་མཚོན་བྱས་པ་ལ་ཉེས་པ་མེད་དོ། །ལྟུང་བ་བདུན་ཅུ་པ་རྫོགས་སོ།། །།དགེ་སློང་མགྲོན་པ་ཞིག་རྐུན་མ་དང་ལྷན་ཅིག་འགྲོགས་ཤིང་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་ཞིག་རྒྱལ་པོའི་ཁབ་ན་དབྱར་ཟླ་བ་གསུམ་ཚུལ་དུ་ཞུགས་ནས་དབྱར་ཟླ་བ་གསུམ་འདས་ནས་ཚུལ་ནས་བྱུང་སྟེ། མཉན་དུ་ཡོད་པར་འགྲོ་བའི་གྲོགས་མེད་དེ་གྲོགས་ཆོལ་བ་ལས། ཚོང་པ་ཤོག་མ་ལས་འབྱོལ་བ་དག་ཅིག་མཉན་དུ་ཡོད་པར་འགྲོ་བ་དང་ཕྲད་ནས་དེ་དག་དང་འགྲོགས་ཏེ་གསེབ་ལམ་དུ་ཞུགས་ཏེ་དོང་བ་དང༌། དགེ་སློང་དག་ཚོང་བ་དེ་
དག་པས་ཟུང་ཟད་སྔར་སོང་བ་དང༌། ཤོག་གམ་དག་གིས་ཚོར་ནས་སྔར་མདུན་དུ་བསྒུགས་ཏེ། དགེ་སློང་དེ་མདུན་ནས་དཔགས་ཏེ་འགྲོ་བ་དེ་དག་གིས་མཐོང་ནས། སྔན་ཆད་ཀྱང་དགེ་སློང་དེས་ལམ་དྲངས་སོ་ཞེས་ནས་ཤིན་ཏུ་བརྡེགས་ནས་ཆོས་གོས་ཀྱང་དྲལ་ལྷུང་བཟེད་ཀྱང་བཅག་གོ །དེ་ནས་དགེ་སློང་དེ་མཉན་དུ་ཡོད་པར་བདེ་བར་འོངས་སམ་ཞེས་དགེ་སློང་དེ་དག་གིས་སྨྲས་ན། དེ་ལྟར་གྱུར་པ་ཞིབ་ཏུ་བྱས་པ་དང༌། དགེ་སློང་དག་ཅིའི་ཕྱིར་འགྲོན་པ་རྐུན་མ་དང་འགྲོགས་ཞེས་དགེ་སློང་དག་འཕྱ་བ་ལས་སྙན་དུ་བདས་ནས། བཀས་སྨད་དེ་འགྲོན་པ་རྐུན་མ་དང་འགྲོ་མི་གནང་བར་འདུལ་བ་ལ་བསླབ་པའི་གནས་བཅས་སོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པ་སྟེ། རྒྱལ་པོའི་ཁབ་ནས་མཉན་དུ་ཡོད་པར་འགྲོ་བའོ། །རྐུན་པོ་ཞེས་བྱ་བ་ནི་ཤོ་གམ་ལམ་བྱོལ་བའོ། །ལམ་ཞེས་བྱ་བ་ནི་དགོན་པའི་ལམ་མོ། །ཉེས་པ་ནི་རྒྱང་གྲགས་རེ་རེ་ཞིང་ལྟུང་བར་འགྱུར་རོ། །ཕྱེད་ཕྱེད་ཅིང་ཉེས་བྱས་སོ། །ལོ་ཉི་ཤུ་མ་ལོན་པའི་གང་ཟག་བསྙེན་པར་རྫོགས་སུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་མཽད་གལ་གྱི་བུས་བཅུ་བདུན་སྡེ་ལོ་ཉི་ཤུ་མ་ལོན་པར་རབ་ཏུ་ཕྱུང་ཤིང་བསྙེན་པར་རྫོགས་པར་བྱས་པ་དང༌། དེ་དག་ནུབ་མོ་ཟན་མ་བྱིན་པ་དང་གྲང་བ་དང༌། བཀྲེས་པ་དང་རླུང་དང༌། བྲུ་བས་གཟིར་བས་ན། ཀུན་དགའ་ར་བའི་ནང་ན་ངུ་ཞིང་ཅ་ཅོ་འདོན་པ་སྙན་དུ་བདས་ནས། དེ་དག་སུ་ཡིན་ཞེས་སྨྲས་པ་དང༌། ཚེ་དང་ལྡན་པ་མཽད་གལ་གྱི་བུས་བཅུ་བདུན་སྡེ་ལོ་ཉི་ཤུ་མ་ལོན་པར་བསྙེན་པར་རྫོགས་པར་བྱས་པས་བྱིས་པ་གཞོན་ནུ་གླང་བ་དང༌། བཀྲེས་པ་མི་བཟོད་པས་ངུའོ་ཞེས་གསོལ་བ་དང༌། ཅི་དགེ་སློང་གིས་གང་ཟག་ལོ་ཉི་ཤུ་མ་ལོན་པར་དགེ་སློང་གི་དངོས་པོ་བྱེད་དམ་ཞེས་སྨད་ནས་སླན་ཆད་མི་གནང་བར་འདུལ་བ་ལ་བསླབ་པའི་གནས་བཅས་སོ། །དགེ་སློང་ཞེས་བྱེ་བ་ནི་མཽད་གལ་གྱི་བུ་སྟེ། གཞན་ཡང་དེ་དང་འདྲ་བའོ། །ལོ་ཉི་ཤུ་མ་ལེན་ཞེས་བྱ་བ་ནི་ལོ་ཉི་ཤུ་མ་ཚང་བའོ། །བསྙེན་པར་རྫོགས་ཞེས་བྱ་བ་ནི་གསོལ་བ་དང་བཞིའི་ལས་ཀྱིས་སོ། །གང་ཟག་དེ་ཡང་བསྙེན་པར་རྫོགས་པར་མི་འགྱུར་རོ་ཞེས་བྱ་བ་ནི་དགེ་སློང་གི་དངོས་པོ་གང་ཡིན་པའོ། །དགེ་སློང་འདི་དག་སྨད་པའོ་ཞེས་བྱ་བ་ནི་དགེ་སློང་འདི་ན་འཁོད་པ་ན་བསྙེན་པར་རྫོགས་པར་བྱེད་པ་རྣམས་སོ་དགེ་སློང་གི་ལོ་ཉི་ཤུ་མ་
ལོན་པའི་གང་ཟག་ལོ་ཉི་ཤུ་ལོན་པར་འདུ་ཤེས་པ་དང༌། ཐེ་ཚོམ་ཟ་ན་ལྟུང་བ་རེ་རེར་འགྱུར་རོ། །ལོ་ཉི་ཤུ་ལོན་ནམ་མ་ལོན་ཞེས་དྲིས་ཤིག །དྲིས་ཏེ་མ་ལོན་ཞེས་ཟེར་བ་བསྙེན་པར་རྫོགས་ན་ལྟུང་བར་འགྱུར་རོ། །དགེ་འདུན་ལ་ནི་ཉེས་བྱས་སུ་འགྱུར་རོ། །ད་ནས་བསྙེན་པར་རྫོགས་ཟིན་པའི་འོག་ཏུ་ལོ་ཉི་ཤུ་མ་ཚང་བར་དྲན་ན་མའི་མངལ་ཚུན་ཆད་རྩིས་ཤིག །དེ་སྟེ་ཡང་མ་ཚང་ན་ཕོབ་ཤིག་དེ་ནས་སླད་ཀྱིས་བསྙེན་པར་རྫོགས་པར་གྱིས་ཤིག །དེ་ལྟར་མ་བྱས་ན་གང་ཟག་དེ་རྐུན་གནས་སུ་གྱུར་པ་ཡིན་གྱིས་དགེ་འདུན་གྱིས་ནང་ན་གནས་པར་མི་བྱའོ། །ལོ་ཉི་ཤུ་ཆང་ལ་ཉི་ཤུ་ཚང་བར་འདུ་ཤེས་པ་ནི་ཉེས་པ་མེད་དོ། །དགེ་སློང་ས་རྒོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་དྲུག་སྡེ་པོ་རྣམས་རང་གིས་ས་རྐོ་ཞིང་རྐོར་འཇུག །ཡུར་བ་བྱེད་བྱེད་དུ་འཇུག་པས་མུ་སྟེགས་ཅན་རྣམས་ཀྱིས་ཁྱིམ་པ་དང་བྱེ་བྲག་ཅི་ཡོད་ཅེས་འཕྱའ་བ་ལས་སྙན་དུ་བདས་ནས། བཀས་སྨད་དེ་ས་རྐོར་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲའོ། །ས་རྐོ་ཞེས་བྱ་བ་ནི་བདག་གིས་སོ། །རྐོར་འཇུག་ཅེས་བྱ་བ་ནི་གཞན་ལ་བཅོལ་བའོ། །ས་ཞེས་བྱ་བ་རྣམ་པ་གཉིས་ཏེ། འཐས་པ་དང་མ་འཐས་པའོ་དགེ་སློང་གིས་ས་འཐས་པ་བརྐོས་ན་ལྟུང་བར་འགྱུར་རོ།། ས་ལ་བྲིས་སམ་ས་ལ་བརྐོས་སམ། ས་ལས་བླངས་ན་ལྟུང་བར་འགྱུར་རོ། །ས་ལ་ཕུར་བ་བཏབ་པ་དང༌། ཡུར་བ་དྲངས་པ་དང༌། ས་བཀོགས་པ་དང༌། རྩིག་པ་ལ་ཕུར་བ་བཏབ་ན་ལྟུང་བར་འགྱུར་རོ། །རྩིག་པ་ལ་རི་མོ་བྲིས་སམ། རྩིག་ངོགས་ཙན་ཟོས་པའི་ས་བུད་པ་དང༌། འདམ་རྫབ་གྱི་ནང་རིལ་བ་བཞག་པ་ཕྱུང་བ་དང༌། ས་གྲམ་པ་ཅན་བརྐོས་ན་ཐམས་ཅད་དུ་ཉེས་བྱས་རེ་རེ་རེར་འགྱུར་རོ། །བྱེ་མ་མང་པོ་ལ་ཡང་ཉེས་བྱས་སོ། །སྐར་མའི་ཆོ་ག་ལ་བབ་པ་ལས་སར་བྱེད་པའི་དགེ་སློང་དེས་རུང་བར་བྱེད་པའི་མི་མེད་ན་ས་སོར་བཞི་ཡན་ཆད་ཕུར་བས་བཏབ་པ་ལ་ཉེས་པ་མེད་དོ། །དགེ་སློང་ཟླ་བ་བཞིར་མགྲོན་དུ་བྱས་པ་ལས་རིང་དུ་གནས་སུ་མི་གནང་བའི་གླེང་གཞི་ནི་གྲོང་ཁྱེར་སེར་སྐྱའི་གནས་ན་སྟེ། དེའི་ཚེ་ན་ཤཱཀྱ་མིང་ཆེན་གྱིས་བཅོམ་ལྡན་འདས་ལ་སོགས་པ་ཉན་ཐོས་ཀྱི་འཁོར་རྣམས་ཟླ་བ་བཞིར་བཤོས་དང་གཟིམས་ཆ་ལ་སོགས་པ་སྦྱར་ནས། མགྲོན་དུ་གཉེར་ཅིང་ཞལ་ཟས་ཀྱིས་བསྟབས་པའི་ཚེ། དྲུག་སྡེ་པོ་
རྣམས་ཟླ་བ་བཞི་ལས་འདའ་བར་བྱ་བའི་ཕྱིར་ཐབས་སུ་སྦྱར་ནས། རེས་ཀྱིས་ན་ཞིང་རེས་ཀྱིས་ནད་གཡོག་བྱེད་དེ། ཟླ་བ་བཞི་ཚང་ནས་མཇུག་གཅོད་ཀྱིས་གྱེས་སྟོན་བྱས་ནས། བཅོམ་ལྡན་འདས་དང་དགེ་སློང་རྣམས་དོང་བའི་འོག་ཏུ་དྲུག་སྡེ་རྣམས་ནད་གཡོག་རྣམས་མ་ཐོབ་སྟེ་སྐལ་བ་འདོད་དོ་ཞེས་བྱས་པ་དང༌། ཁྱིམ་བདག་རྣམས་ཀྱིས་སྨྲས་པ། དེ་དག་ཀུན་གྱིས་ཏེ་ཚོགས་ཀྱང་བཤིག་ནས། ཟླ་བ་བཞི་སྟེ་རྒྱུ་མེད་དོ་ཞེས་བྱས་པ་དང༌། དྲུག་སྡེ་པོ་དག་ཁྲོས་ནས་ཅི་ཤཱཀྱ་མིང་ཆེན་གྱིས་མིང་ཙམ་མགྲོན་དུ་བྱས་པས་ཆོག་གམ། དེ་ཙམ་གྱིས་ཆོག་ན་ནི་ངེད་ཀྱིས་ཀྱང་ཉི་མ་རེ་རེ་སྦྱོར་ནུས་སོ་ཞེས་ནས་མེད་དུ་མི་རུང་བར་བསླངས་པས་ཁྱིམ་བདག་དག་འཕྱ་ཞིང་མི་དགའ་བར་གྱུར་བ་ལས་ཟླ་བ་བཞི་ལས་སློང་ཞིང་འདུག་ཏུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཟླ་བ་བཞི་ཞེས་བྱ་བ་ནི་ཟླ་བ་བཞི་ལས་རིང་དུ་མི་འདའ་བའོ། །དགེ་སློང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །མགྲོན་དུ་ཞེས་བྱ་བ་ནི་མགྲོན་དུ་གཉེར་ཞིང་བོས་པའོ། །བདག་གིར་གྱིས་ཤིག་ཅེས་བྱ་བ་ནི་ཟླ་བ་བཞིའི་བར་དུ་ཁས་བླངས་པས་བདག་གིར་བྱའོ། །དེ་ལས་འདས་ན་ཞེས་བྱ་བ་ནི་ཟླ་བ་བཞི་ལས་ལྷག་པའོ། །སོ་སོར་མགྲོན་དུ་བྱས་པ་མ་གཏོགས་ཞེས་བྱ་བ་ནི་སོ་སོར་མགྲོན་དུ་བྱས་པ་ཡིན་ཏེ། ཟླ་བ་བཞི་ལས་ཡོལ་ཡང་དགེ་སློང་ཁ་ཅིག་སོ་སོར་ཐ་དད་པར་བོས་པའོ། །ཡང་དང་ཡང་མགྲོན་དུ་བྱས་པ་མ་གཏོགས་ཞེས་བྱ་བ་ནི་དེ་ལྟར་དགེ་སློང་དེ་དག་ཡང་དང་ཡང་མགྲོན་དུ་བྱས་པའོ། །རྟག་ཏུ་མགྲོན་དུ་བྱས་པ་ནི་དགེ་སློང་དག་ལ་ཡོན་བདག་གིས་རྟག་ཏུ་མགྲོན་དུ་བྱས་ཤིང་བསྟབས་པའོ། །དེ་ནི་དུས་སོ་ཞེས་བྱ་བ་ནི་དེ་དང་མཐུན་པའི་ཆོས་སོ། །ལྟུང་བ་ཞེས་བྱ་བ་ནི་ངན་སོང་གསུམ་དུའོ། །ཉེས་པ་ནི་དགེ་སློང་ལ་མི་ཞིམ་པའི་ཟས་ཤིག་བསྟབས་པ་ལས་ཞིམ་པོ་ཞིག་བསླངས་ན་སློང་བའི་ཉེས་བྱས་སོ། །ཟོས་ན་ལྟུང་བར་འགྱུར་རོ། །དགེ་སློང་ལ་ཞིམ་པོ་ཞིག་བསྟབས་པ་ལས་མི་ཞིམ་པ་ཞིག་བསླངས་པ་ནི་ཉེས་སོ། །ཟོས་ན་ཉེས་མེད་དོ། །ཅི་འདོད་ཅེས་བསྟབས་པ་ལས་བསླངས་པ་ནི་ཉེས་མེད་དོ། །དགེ་སློང་གིས་དགེ་སློང་ལ་བསླབ་པ་འདི་ལ་སློབས་ཤིག་ཅེས་བསྒོ་བ་ལས་བསླབ་པ་འདི་ལ་མི་སློབ་པོ་ཞེས་པའི་གླེང་གཞི་ནི་རྒྱལ་པོའི་ཁབ་ན་སྟེ། སྔོན་ཆད་ནི་བཅོམ་ལྡན་འདས་ཀྱིས་ཉན་ཐོས་དགེ་སློང་ཕ་དང་མ་རྣམས་ཀྱི་སྤྱིར་
འདུལ་བ་ལ་བསླབ་པའི་གནས་བཅས་པ་ན་སྤྱིར་བསོགས་ནས་ཚོགས་པ་ལ་འདུལ་བ་ལ་བསླབ་པའི་གནས་བཅས་སོ། །ཟླ་བ་བཞིར་མགྲོན་དུ་གཉེར་བ་ལས་འདར་མི་གནང་བ་ལས། དགེ་འདུན་སྡེ་གཉིས་ཕྱིར་འཕྱ་བ་ཡིན་ཏེ། བསླབ་པ་འདི་ལ་འཕྱ་བའི་ཚེ་དགེ་སློང་རྣམས་མ་འདུས་ནས་བསྒོར་འགྲོ་བའི་ཚེ་དྲུག་སྡེ་ལ་བསྒོ་ན། གླེན་པ་ཁྱོད་ཀྱི་ཚིག་གིས་དེད་མི་སློབ་པོ་ཞེས་ཟེར་རོ། །དེ་ནས་དགེ་སློང་མ་བཅུ་གཉིས་སྡེ་ལ་བསྒོ་ན་ཡང་མི་སློབ་པོ་ཞེས་ཟེར་རོ། །སྐྱེ་དགུའི་བདག་མོ་གཽ་ཏ་མཱི་ལ་བསྒོ་ན། བཅོམ་ལྡན་འདས་ཀྱི་བཀའ་ནི་གུས་པར་སྤྱི་བོས་ནོད་དོ་ཞེས་མནོས་སོ། །ལམ་བསྟན་ཕྱིར་འཁོར་ནས་ཀུན་དགའ་བོས་བསྒོའམ་ཞེས་དྲིས་ནས། བསྒོ་ནི་བསྒོ་ན་གླེན་པའི་མི་ཞེས་ཁུར་བླངས་སོ། །ཅི་ཉེས་ཞེས་སྨྲས་ན་དྲུག་སྡེ་དང་བཅུ་གཉིས་སྡེ་ནི་གླེན་པ་ཁྱོད་ཀྱི་ཚིག་གིས་སློབས་ཤིག་པ་ནི་མི་ཉན་ཏོ་ཞེས་འཛེར་ཏོ། །དེ་སྐད་ཟར་བ་དགེ་སློང་རྣམས་འཕྱ་བ་ལས་སྙན་དུ་བདས་ཏེ། དྲུག་སྡེ་རྣམས་ལ་བཀས་སྨད་དེ། དེ་སྐད་སྨྲར་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །དགེ་སློང་རྣམས་ཀྱིས་ཞེས་བྱ་བ་ནི་ཆོས་འདི་ལ་ཞུགས་པ་རྣམས་སོ། །བསླབ་པ་འདི་ལ་སློབས་ཤིག་ཅེས་བྱ་བ་ནི། ཕྱིས་བསླབ་པར་བྱ་བའི་ཆོས་དེ་ལ་བྱས་ཏེ་སློབས་ཤིག་པར་བསྒོ་བའོ། །བྱིས་པ་མི་མཁས་ཞེས་བྱ་བ་ནི་མི་གསལ་བའོ། །མི་མཁས་པ་ཞེས་བྱ་བ་ནི་མདོ་སྡེ་དང་འདུལ་བ་དང་མ་མོ་མི་ཤེས། ཉེས་པ་ནི་བསླབ་པ་འདི་ལ་སློབས་ཤིག་ཅེས་བསྒོ་བ་ལས་བྱིས་པ་མི་མཁས་མི་གསལ་བ་ཞེས་ཟེར་ཞིང་སློབ་ཏུ་མི་བཏུབ་ན་ཐམས་ཅད་དུ་ལྟུང་བར་འགྱུར་རོ། །འདུལ་བ་དང་ལྡན་པའི་ཆོས་ཀྱིས་སློབས་ཤིག་པར་བསྒོ་བ་ལས་མི་ཉན་ན་ལྟུང་བའོ། །མདོ་དང་མ་མོ་ལྟ་བུས་བསྒོ་བ་ལས་མི་ཉན་ན་ནི་ཉེས་བྱས་སོ། །གླེན་ཞིང་མི་མཁས་པ་བྱིས་པ་ལྟ་བུ་ནི་ཉེས་མེད་དོ། །དགེ་སློང་འཐབ་མོ་བྱེད་པ་ལ་ཉེན་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་སློང་དྲུག་སྡེ་པོ་རྣམས་སྡེ་ཞིག་ནས་ཅང་མི་སྨྲ་བར་འཁོད་པའི་ཚེ་ན། བཅུ་བདུན་སྡེ་རྣམས་དར་ཏེ་ཁ་ཅིག་ནི་མདོ་སྡེ་འཛིན་ཁ་ཅིག་ནི་འདུལ་བ་འཛིན་ཁ་ཅིག་ནི་མ་མོ་འཛིན་ཏོ། །དེ་དག་ནང་བགྲོས་པས་བདག་ཅག་ལ་དྲུག་སྡེས་གཙེས་པ་ལྟར་སུས་ཀྱང་མ་གཙེས་དེའི་ནང་ནས་ཡང་བསྙེན་དགའ་བོས་གཙེས་ཀྱིས། བསྙེན་དགའ་བོ་
སྤང་བའི་ལས་བྱའོ་ཞེས་གྲོས་བྱེད་པ་དང༌། བསྙེན་དགའ་བོ་ཡང་འཇབ་ཅིང་ཉན་ཏེ། དེ་དག་ཁང་པའི་ནང་ན་གྲོས་བྱེད་ན་བསྙེན་དགའ་བོ་ཡང་སྒོ་ན་ཉན། གཙུག་ལག་ཁང་དུ་གྲོས་བྱེད་ན་སྐར་ཁུང་ན་ཉན་པ་དང༌། དེ་དག་གྲོས་བྱེད་པ་བསྙེན་དགའ་བོས་ཐོས་ནས། ཁྱེད་འདྲ་བས་ང་ལ་སྤང་བ་ལས་གླང་པོ་ཆེ་བཅིངས་པས་ནི་གླང་པོ་ཆེ་གསོད་ནུས་ཀྱིས། གྲེས་ཐག་གིས་ནི་གླང་པོ་ཆེ་བཅིང་བར་མི་ནུས་ཏེ། བཏང་ན་ནི་བཏང་དུ་ཟད་མི་བཏང་ན་ནན་ཐུར་ཆེར་བྱའོ་ཞེས་བྱས་པ་དང༌། དེ་དག་གིས་ཀྱང་སྤང་མ་ནུས་ནས་ངེད་གྲོས་བྱེད་པ་ཁྱེད་ཇི་ལྟར་ཐོས་ཞེས་བྱས་པ་དང༌། ཅིའི་ཕྱིར་དགེ་སློང་འཇབ་ཅིང་ཉན་ཅེས་འཕྱ་བ་ལས་སྙན་དུ་བདས་ནས་བཀས་སྨད་དེ་ཉན་དུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །དགེ་སློང་རྣམས་ཞེས་བྱ་བ་ནི་ཆོས་འདི་ལ་ཞུགས་པའོ། །འཐབ་པ་དང་རྩོད་པ་དང་མི་མཐུན་པར་འགྱུར་རོ་ཞེས་བྱ་བ་ནི་བདག་གི་ཕྱོགས་དང་གཞན་གྱི་ཕྱོགས་ཐ་དད་དུ་འཁོད་པའོ། །ཅང་མི་སྨྲ་བར་བཞབས་ཏེ་ཉན་ཅིང་འདུག་ཅེས་བྱ་བ་ནི་ཅང་མི་ཟེར་བར་འཇབ་པའོ། །དེ་དག་ཅི་ཟེར་ཉན་ནས་དེ་ལྟ་དེ་ལྟ་བུར་སྟ་གོན་བྱའོ་ཞེས་བྱ་བ་ནི་སྔ་ནས་བསམས་ཤིང་སྦྱར་རོ་སྙམ་མོ། །རྐྱེན་དེ་ཉིད་ཅེས་བྱ་བ་ནི་གཞན་མ་ཡིན་པའོ། །ལྟུང་བ་ནི་ངན་སོང་གསུམ་དུའོ། །ཉེས་པ་ནི་དགེ་སློང་བར་ཁང་ངམ་སྒོ་ཁང་ངམ། ཁྱམས་སམ་དགའམ་ཡང་ཐོག་ཀྱང་རུང་སྟེ། དགེ་སློང་གྲོས་བྱེད་པ་མཐོང་ན། དགེ་སློང་དེས་རྐང་པའི་སྒྲའམ་སེ་གོལ་གྱི་སྒྲ་གཏོགས་ཤིག །ཡང་ན་མགུལ་པ་བསལ་བའི་སྒྲ་ཕྱུང་ཤིག །སེ་གོལ་དང༌། མགུལ་པ་བསལ་བའི་སྒྲ་མ་ཕྱུང་ལ་དེ་དག་གི་སྒྲ་ཐོས་ན་ཉེས་བྱས་སོ། །དོན་ཁོང་དུ་ཆུད་ན་ལྟུང་བར་འགྱུར་རོ། །འཁྲུགས་པར་བྱ་བ་མ་ཡིན་ལ་ཞི་བར་བྱ་བའི་ཕྱིར་འོང་བ་ནི་ལྟུང་བ་མེད་དོ། །དགེ་སློང་གྲོས་བྱེད་པ་ལས་ཅང་མི་སྨྲ་བར་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དྲུག་སྡེ་པོ་ལས་དགའ་བོ་དང་བསྙེན་དགའ་བོ་གཉིས་དགེ་འདུན་གྱི་ནང་ན་འདུག་པ་དང༌། བཅུ་བདུན་སྡེ་ལ་སྔན་ཆད་གཙེས་པས། བསྙེན་དགའ་བོ་བཅུ་བདུན་སྡེས་སྤངས་པའི་ལས་བྱས་ན། དགའ་བོས་ཤགས་གདབ་ཅིང་ནོན་བྱ་བར་བཤམས་ནས། བཅུ་བདུན་སྡེས་ཁྱོད་ཀྱང་སྤང་འདོད་དམ་ཞེས་བསྡིགས་ན། དེ་ཡང་ལ་བ་གྱོན་པའི་
ཁྲིའི་སྟེང་ན་བཞག་སྟེ། ཁ་རོག་ལངས་ཏེ་སོང་ངོ༌། །དེ་ནས་བསྙེན་དགའ་བོ་སྤངས་ནས་ངུ་ཞིང་སོང་ནས་དགའ་བོ་ལ་ཁྱོད་ཀྱིས་ངའོ་ནོན་མ་བྱས་སོ་ཞེས་སྨྲས་པ་དང༌། བསྙེན་དགའ་བོ་ཁྱོད་གཞེས་ནས་མི་འདུག་པར་ལས་བྱས་པས་ན་མི་མཐུན་པར་བྱས་པས་ན་མི་བཙན་ནོ་ཞེས་ཟེར་བ་ལས། དོན་ཉུང་ངུ་བའི་དགེ་སློང་དག་འཕྱ་བ་ལས་སྙན་དུ་བདས་ཏེ། ཕྱིན་ཆད་དགེ་འདུན་ཆོས་བཞིན་ལས་བྱེད་པ་དང༌། ཁ་རོག་སྟེ་འགྲོར་མི་གནང་བར་བསླབ་པ་བཅས་སོ། །དགེ་སློང་ཞེས་བྱ་བ་ནི་དགའ་བོ་སྟེ་གཞན་ཡང་དེ་དང་འདྲ་བའོ། །དགེ་འདུན་རྣམ་པར་གདོན་མི་ཟ་བའི་གཏམ་འཛེར་བ་ནི་གསོལ་བ་དང་ཞུ་བའི་ལས་གཉིས་དང་གསོལ་བ་དང༌། བཞིའི་ལས་བྱེད་དོ། །སྟན་ལས་ལངས་ཏེ་འགྲོ་ཞེས་བྱ་བ་ནི་ཐོས་པའི་ཉན་འཁོར་སྤངས་པའོ། །དགེ་སློང་འཁོད་པ་ལས་མ་སྨྲས་ཞེས་བྱ་བ་ནི་དགེ་སློང་དེ་ན་སུ་འཁོད་པ་རྣམས་ལ་མ་སྨྲས་པའོ། །རྐྱེན་མ་གཏོགས་ཞེས་བྱ་བ་ནི་ནད་པ་དང༌། ནད་གཡོག་དང་གཞང་ནང་ཅན་རྣམས་སོ། །ཡང་ན་བཤད་གཅི་ལ་ཉེ་འཁོར་ལས་མ་འདས་པའོ། །ལྟུང་བ་ནི་ངན་སོང་གསུམ་དུའོ། །དགེ་སློང་མི་གུས་སུ་མི་གནང་བའི་གླེང་གཞི་ནི་རྒྱལ་པོའི་ཁབ་ན་སྟེ། དེའི་ཚེ་ན་དགེ་སློང་མང་ཞིག་འདུན་ཁང་དུ་འདུས་ནས། དེ་ནི་ཆོས་སོ་དེ་ནི་འདུལ་བའོ། །དེ་ནི་སྟོན་པས་བསྟན་པའོ། །ཞེས་དགེ་སློང་དག་རྩོད་པ་ཞི་བའི་ལས་བྱེད་པའི་ཚེ། བ་ལང་ཉལ་གྱི་བུ་དགེ་སློང་ནག་པོ་ཞེས་བྱ་བ་དགེ་འདུན་ཆོས་བཞིན་དུ་སྨྲ་བ་ལ་ཉན་དུ་མི་བཏུབ། ཁོ་བོ་འབའ་ཞིག་གིས་དགེ་འདུན་ལ་ལས་བྱར་རུང་ངོ་ཞེས་བཟློག །དགེ་འདུན་གྱིས་ཆོས་བཞིན་མ་བྱས་སོ་ཞེས་ཁ་ངན་ཟེར། དགེ་སློང་མཁས་པ་གཞན་དག་གིས་བསྒོ་ན་ཡང་ཚིག་མ་རྫོགས་པར་སླར་བཟློག །ཉན་དུ་མི་བཏུབ་ན་གུས་པར་མི་བྱེད་པས་ན་དོན་ཉུང་ངུ་བའི་དགེ་སློང་རྣམས་འཕྱ་བ་ལས་སྙན་དུ་བདས་ནས་ནག་པོ་ལ་བཀས་སྨད་ནས་མི་གུས་སུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །མི་གུས་ཞེས་བྱ་བ་ནི་རྣམ་པ་གཉིས་ཏེ། དགེ་འདུན་དང་གང་ཟག་ལའོ། །དེ་ལ་དགེ་འདུན་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ཏེ། དེ་དག་གིས་བསྒོ་བ་ལ་མི་ཉན་པའོ། །གང་ཟག་ནི་སློབ་དཔོན་དང་མཁན་པོས་བསྒོ་བ་ལས་མི་ཉན་པའོ། །དེ་ལ་ཉེས་པ་ནི་དགེ་འདུན་གྱི་ལས་བྱེད་པས་འདུག་ཤིག་ཅེས་བསྒོ་བ་ལས་མི་འདུག་ན་ལྟུང་བའོ། །སོང་ཤིག་བསྒོ་བ་
ལས་འདུག་ན་ལྟུང་བའོ། །གནས་ཁང་དང་མལ་ཆ་མ་ལེན་ཅིག་ཅེས་བསྒོ་བ་ལས་ལེན་ན་ལྟུང་བར་འགྱུར་རོ། །ཇི་ལྟར་ལས་ཁྱེད་པས་བསྒོ་བ་ལ་མ་གུས་པ་བཞིན་དུ་སློབ་དཔོན་དང༌། མཁན་པོ་ལ་མ་གུས་ན་ཡང་ཉེས་བྱས་རེ་རེར་འགྱུར་རོ། །ལྟུང་བ་ནི་ངན་སོང་གསུམ་དུའོ། །ཆང་འཐུང་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཡུལ་སྦལ་དཀར་ཅན་ན་ཁྱིམ་བདག་རྟོགས་ལྡན་ཞེས་བྱ་བ་ཞིག་ཡོད་དེ་དེ་ལ་བུ་ཆུང་ཞིག་བཙས་ཏེ། ཁྱེའུའི་མིང་ཡང་ལེགས་འོངས་སུ་བཏགས་སོ། །ནམ་ལེགས་འོངས་བཙས་པའི་ཚེ་ན་ཕ་དང་མ་དང༌། གཉེན་བཤེས་དང་བྲན་གཡོག་ཀུན་ཀྱང་དུས་ལས་འདས་ཏེ། ཁ་ཅིག་ནི་བྲོས་ནོར་ཕྱུགས་དང་ལོངས་སྤྱོད་དག་ཀྱང་འགྲིབས་ཏེ་མེད་པར་གྱུར་ཏོ། །ལེགས་འོངས་ཡང་མུ་ཏོ་བ་བྱེད་དེ་སློང་མོ་སྤྱོད་པའི་ཚེ་མུ་ཏོ་བ་གཞན་རྣམས་ཀྱིས་ཀྱང་མི་འདོད་ཅིང་བརྡེགས་སོ། །དེ་ཡང་འཁྱམས་འཁྱམས་པ་ལས་སངས་རྒྱས་དང་ཕྲད་དེ། བཅོམ་ལྡན་འདས་ཀྱིས་ལྷུང་བཟེད་ཀྱི་ལྷག་མ་ཡང་བྱིན། ལེགས་པར་གསུངས་པའི་ཆོས་འདུལ་བ་ལ་ཡང་རབ་ཏུ་ཕྱུང་ངོ༌། །དེ་ཡང་འབད་བཙོན་པས་དགྲ་བཅོམ་པ་མངོན་སུམ་དུ་བྱས་སོ། །དེའི་ཚེ་ན་ཡུལ་སྦལ་དཀར་ཅན་ན་ཀླུ་ཨམ་བྷ་ཞེས་བྱ་བ་མུ་སྟེགས་ཅན་ཡུལ་ཏེ་ཕྱོགས་ཀྱི་སྐྱེ་བོ་མང་པོ་ལ་གཙེ་ཞིང་གནོད་པ་མི་ཤ་ཟ་བ་ཞིག་གནས་པ་དེ། ཐུལ་ཅིག་པར་ལེགས་འོངས་ལ་བཅོམ་ལྡན་འདས་ཀྱིས་བཀའ་སྩལ་ནས། ལེགས་འོངས་ཀྱིས་ཀྱང་ཀླུ་དེ་བཏུལ་བས་ན་ཡུལ་ཕྱོགས་རང་གི་ཡུལ་དུ་ལེགས་འོངས་ཀྱི་ཡོན་ཏན་གྲགས་པའི་ཕྱིར་བཅོམ་ལྡན་འདས་ལེགས་འོངས་དང༌། ཡུལ་དེ་ཕྱོགས་སུ་གཤེགས་པ་དང་ཡུལ་དེའི་བྲམ་ཟེ་དང་སྐྱེ་བོ་མང་པོས། བཅོམ་ལྡན་འདས་ལ་སོགས་པ་ལ་བཤོས་གསོལ་ཏེ་ཚིམ་པར་བྱས་སོ། །ལེགས་འོངས་ཀྱི་ཕ་དང་མཛའ་བའི་བྲམ་ཟེ་ཞིག་གིས་ཟན་བྱིན་ནས། ཟན་ཞུ་བར་བྱ་བའི་ཕྱིར་གླང་པོ་ལ་བླུད་པའི་ཆང་གི་ནང་དུ་མཛུབ་མོས་སྨྱུགས་ཏེ་ཕབས་དང་བསྲེས་པ་བྱིན་པས་ན་དེ་ཡང་སྲང་གི་གྲིབ་མ་ཡོལ་གྱི་བར་དུ་ས་ལ་མ་འགྱེལ་ཏོ། །ནམ་གྲིབ་མ་མེད་དེ་ཐང་ལ་བྱུང་བ་དེ་ན་ཉི་མས་ལུས་ལ་ཕོག་པ་དང་ཆང་གི་མཐུས་ས་ལ་འགྱེལ་ཏོ། །བཅོམ་ལྡན་འདས་ཀྱིས་ལོ་མའི་སྤྱིལ་བོ་ཞིག་བྱས་ཏེ་དེའི་སྟེང་དུ་བཞག་གོ །འཁོར་གྱི་དགེ་སློང་རྣམས་ལ་བཀའ་སྩལ་པ། དགེ་སློང་ལེགས་འོངས་ཀླུ་ཨམ་བྷ་འདུལ་ནུས་
པ་ད་དེར་སྦྲུལ་གྱི་ཕྲུ་གུ་དང་སྦལ་པ་ཡང་འདུལ་མི་ནུས་སོ་ཞེས་ནས་ལེགས་འོངས་བསླངས་ནས་ཁྱོད་ཅི་ཉེས་ཞེས་བཀའ་སྩལ་པ་དང༌། བདག་ནི་མ་བརྟགས་པས་སོ་ཞེས་གསོལ་པ་དང༌། དེ་བས་ན་དགེ་སློང་དག་ཉེས་པའི་དམིགས་སུ་གྱུར་པ་ནི་ཆང་འཐུངས་པ་ལས་གྱུར་པས་ན། དགེ་སློང་ཆང་འཐུང་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །འབྲུའི་ཆང་ཞེས་བྱ་བ་ནི་འབྲུ་ལས་གྱུར་པ་དང་ཕྱེ་ལས་གྱུར་པ་སྟེ་ཕབས་དང་བསྲེས་པའོ། །འབྲས་བུའི་ཆང་ཞེས་བྱ་བ་ནི་རྩ་བ་ལས་གྱུར་པ་དང༌། སྡོང་བུ་ལས་གྱུར་པ་དང༌། མེ་ཏོག་དང་ལོ་མ་ལས་གྱུར་པ་ནི་འབྲས་བུའི་ཆང་ཞེས་བྱའོ། །འཐུང་བ་ཞེས་བྱ་བ་ནི་མགྲིན་པར་མིད་པའོ། །ལྟུང་བ་ནི་ངན་སོང་གསུམ་དུ་ལྟུང་བའོ། །ཉེས་པ་ནི་དགེ་སློང་གིས་ཆང་གི་ཁ་དོག་དང༌། ཆང་གི་དྲི་དང་ཆང་གི་ཁུ་བ་འཐུངས་ཏེ་མྱོས་པར་གྱུར་ན་ལྟུང་བའོ། །མ་སྨྱོས་ན་ཉེས་བྱས་སོ། །དགེ་སློང་གིས་འབྲས་བུའི་ཆང་གི་དྲི་དང་ཆང་གི་ཁུ་བ་འཐུངས་ཏེ་མྱོས་པར་གྱུར་ན་ལྟུང་བར་འགྱུར་རོ། །མྱོས་པར་མ་གྱུར་ན་ཉེས་བྱས་སོ། །ཆང་གི་ཁ་དོག་ལྟ་བུ་དང༌། ཚ་ལྟ་བུ་ལ་ཉེས་པ་མེད་དོ། །ཆང་གི་སྙིགས་མ་དང་གར་པོ་འཐུངས་ན་ལྟུང་བར་འགྱུར་རོ། །ཕབས་ཟོས་ན་ཉེས་བྱས་སུ་འགྱུར་རོ། །དགེ་སློང་དུས་མ་ཡིན་པར་གྲོང་དུ་འགྲོ་བར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་ཁྱིམ་བདག་ཞིག་ལ་བུ་མོ་ཞིག་ཡོད་དེ། དེ་ཡང་ཕའི་ཕྱི་བཞིན་དུ་འབྲངས་ཤིང་གཙུག་ལག་ཁང་དུ་སོང་བ་ལས། ཚེ་དང་ལྡན་པ་འཆར་ཀས་བུ་མོ་དེ་བཟུང་ནས་འོ་བྱས་པ་ལས་བུ་མོས་ཕ་ལ་སྦྲན་ཏེ། དེ་གཉིས་ཀྱིས་འཆར་ཀས་མི་ཚངས་པར་སྤྱད་པ་སྐད་དུ་བྲམ་ཟེ་ཀུན་སྦྲན་ནས། བྲམ་ཟེའི་དམག་གིས་བསྐོར་ཏེ། འཆར་ཀ་རྒྱལ་པོ་གསལ་རྒྱལ་དང༌། བཙུན་མོའི་གན་དུ་ཤགས་ལ་ཁྲིད་པ་དང༌། རྒྱལ་པོས་བཙུན་མོ་ཕྲེང་ལྡན་མ་ལ་འཆར་ཀས་ཉེས་སམ་མ་ཉེས་རྟོག་ཏུ་བཅུག་པ་ལས། བཙུམ་མོ་དང་བློན་པོས་བརྟགས་ན་འཆར་ཀས་མ་ཉེས་པར་གྱུར་ཏེ། ལྷག་མ་ཙམ་ཞིག་བྱུང་བར་ཟད་པས་བུ་མོ་དང༌། ཕ་དང་བྲམ་ཟེ་རྣམས་ནི་འཕྲལ་ལ་ཆད་པས་བཅད་དོ། །བཙུན་མོས་འཆར་ཀ་ལ་བསྒོ་བ་སླན་ཆད་དེ་ལྟ་བུའི་བག་མེད་པ་མཛད་པ་མི་རིགས་སོ་ཞེས་བསྒོ་བ་དང༌། འཆར་ཀ་ཡང་དེའི་མདོ་ལ་ངོ་ཚ་ནས་བཅོམ་ལྡན་འདས་ཀྱི་གན་དུ་འགྲོ་མ་ནུས་ཏེ། ཚེ་དང་ལྡན་པ་ཤཱ་རིའི་སྲས་པོའི་གན་དུ་སོང་ནས་སྔར་ཉེས་པ་བྱུང་
བ་རྣམས་བཤགས་ཤིང་འགྱོད་དེ་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ཡང་ཉེས་པ་ཤ་སྟག་བྱུང་སྟེ། ད་ནི་འཁོར་བས་སྐྱོ་ནས། ད་སླན་ཆད་འཁོར་བར་མི་སྐྱེ་བའི་ཐབས་ཅིག་གནང་ཞེས་གསོལ་ནས་ཚེ་དང་ལྡན་པ་ཤཱ་རིའི་བུས་ཀྱང་འཆར་བ་ལ་ཆོས་བཤད་པས་འཆར་ཀས་ཀྱང་འབད་ཅིང་བརྩོན་པས་དགྲ་བཅོམ་པ་མངོན་སུམ་དུ་བྱས་སོ། །དེ་ནས་འཆར་ཀས་བསམས་པ་བཅོམ་ལྡན་འདས་ཀྱི་བཀའ་དྲིན་ལན་གླན་པའི་ཕྱིར་སེམས་ཅན་གྱི་དོན་ལ་འགྲོའོ་སྙམ་ནས། སེམས་ཅན་གྱི་དོན་མང་ཞིག་ནི་བྱས་སོ། །དུས་ཕྱི་ཞིག་ན་མཉན་དུ་ཡོད་པ་ན་བུད་མེད་གཏུམ་མོ་ཞེས་བྱ་བ་ཞིག་ཡོད་དེ་དེའི་བུ་འཆར་ཀ་དང་མཛའ་བས་རྟག་ཏུ་དེར་འགྲོ་ཞིང་ཆོས་འཆད་དོ། །ཕྱི་ཞིག་ན་གཏུམ་མོའི་བུ་ཡུལ་གཞན་དུ་སོང་བའི་འོག་ཏུ་འཆར་ཀ་ཡང་དེའི་ཆུང་མའི་གན་དུ་འགྲོ་ཞིང་ཆོས་འཆད་དོ། །དེའི་ཆུང་མ་དེ་མི་རྒོད་དཔོན་པོ་དང་ཉལ་བ་འཆར་ཀས་ཚོར་ན་ཁྱོ་ལ་བྱས་སུ་དོགས་པས་ན་དེ་སོད་ཅིག་ཅེས་མི་རྒོད་རྦད་ན། མི་རྒོད་ན་རེ་དགེ་སློང་མཐུ་དང་ལྡན་པ་རྒྱལ་པོས་སྲས་ཀྱི་ཐབས་བྱིན་པས་གསང་དུ་མི་རུང་ངོ་ཞེས་བྱས་ན། དགྲ་བཅོམ་པ་ཡང་མ་དགོངས་ཀྱི་བར་དུ་ཡེ་ཤེས་མཐོང་བ་མི་འཇུག་ཅེས་ཟེར་གྱིས་ཐབས་ཤིག་བྱའོ་སྙམ་ནས། མོ་ན་བ་ལྟར་བྱས་ཏེ་ཉལ་བ་དང༌། བྲན་མོ་སྦྲོན་དུ་བཏང་ནས་འོངས་པ་དང་སྒོའི་སྟེང་ནས་འཇབ་སྟེ། རལ་གྲིས་འཆར་ཀའི་མགོ་བཅད་དེ་བསད་དོ། །དེའི་ནུབ་མོ་བཅོ་ལྔའི་གོས་སྦྱོང་ལ་བབ་ནས་འཆར་ཀ་མ་འདུས་ཏེ་གར་སོང་ཞེས་སྨྲ་ན། ཁུངས་མི་ཕྱིན་ཏེ་སླད་དེ་ཉིད་ལ་བཅོམ་ལྡན་འདས་འཁོར་དང་བཅས་ཏེ་འཆར་ཀའི་མགོ་ཕྱག་དར་ཁུང་ནས་ཕྱུང་སྟེ། དགེ་སློང་ལ་ཉེས་པའི་དམིགས་སུ་གྱུར་པ་ནི་དུས་མ་ཡིན་པར་གྲོང་དུ་འགྲོ་བ་ལས་བྱུང་ངོ་ཞེས་ནས། དུས་མ་ཡིན་པར་གྲོང་དུ་འཇུག་ཏུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་འཆར་ཀ་སྟེ་གཞན་ཡང་དེ་དང་འདྲ་བའོ། །དུས་མ་ཡིན་ཞེས་བྱ་བ་ནི་དུས་ལ་རྣམ་པ་གཉིས་ཏེ། སྐྱ་རེངས་མ་ཤར་བ་དང་ཉི་མ་ཡོལ་ཕན་ཆད་དོ། །གྲོང་ཞེས་བྱ་བ་ནི་སྲང་དང་སུམ་མདོ་དང་བཞི་མདོ་གང་ལ་ཡོད་པའོ། །འཇུག་ཅེས་བྱ་བ་ནི་འགྲོ་བའོ། །འཁོད་པའི་དགེ་སློང་ལ་སྨྲོས་ཤིག་ཅེས་བྱ་བ་ནི་གཞི་ན་དགེ་སློང་སུ་འཁོད་པ་རྣམས་ལའོ། །དེ་འདྲ་བའི་རྐྱེན་མ་གཏོགས་ཞེས་བྱ་བ་ནི་དགེ་སློང་གཅིག་
ཅིག་ལྷུང་བཟེད་དང་ཆོས་གོས་གྲོང་དུ་གཏམས་པ་ལ་མེ་ཐར་ཏེ། ཆོས་གོས་དག་མེས་ཚིག་པར་གྱུར་ཏེ་།དགེ་སློང་བྲེལ་བ་དང༌། དགེ་སློང་ནད་པ་དག་སྨན་གྲོང་དུ་མི་ལེན་པ་དང༌། དགེ་འདུན་གྱི་འཚོ་བའི་ཡོ་བྱད་གྲོང་དུ་མི་ཚོལ་བ་ལས་ཐུགས་རྗེར་དགོངས་ཏེ་དེ་ལྟ་བུའི་ཕྱིར་གནང་ནས་གཞན་ནི་ལྟུང་བར་འགྱུར་རོ་ཞེའོ། །ཉེས་པ་དུས་མ་ཡིན་པ་ལ་དུས་མ་ཡིན་པར་འདུ་ཤེས་བཞིན་དུ་འགྲོ་ན་ལྟུང་བར་འགྱུར་རོ། །ཐེ་ཚོམ་ན་ཡང་ངོ༌། །དུས་ཡིན་པ་ལ་མ་ཡིན་པར་འདུ་ཤེས་སམ་ཐེ་ཚོམ་ཡང་ཉེས་བྱས་རེ་རེར་འགྱུར་རོ། །ལྟུང་བ་བརྒྱད་ཅུ་པ་རྫོགས་སོ།། །།ཟས་དང་བཅས་པའི་སྔ་རོལ་དུ་གུད་དུ་འགྲོར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་བསྙེན་དགའ་བོས་ཁྱིམ་བདག་གཞན་ཞིག་ལ་ཆོས་བཤད་ནས་དད་པར་བྱས་ཏེ། ཁྱིམ་བདག་དེས་བསྙེན་དགའ་བོའི་ཕྱིར་བཅོམ་ལྡན་འདས་ལ་བཤོས་གསོལ་བར་ཁས་བླངས་ནས། དགེ་འདུན་བསྙེན་དགའ་བོས་སྤྱན་དྲངས་ནས་ནང་པར་ཁྱིམ་དུ་ཞལ་ཏ་བྱེད་དུ་སོང་པ་དང༌། བསྙེན་དགའ་བོས་ཁྱིམ་བདག་ལ་ང་མ་འོངས་ཀྱི་བར་དུ་བཤོས་མ་འདྲིམ་པར་སྡོད་ཅིག་ཅེས་བྱས་ནས་གྲོང་གཞན་དུ་འཕྱིན་དུ་སོང་ངོ༌། །དེ་ནས་བཅོམ་ལྡན་འདས་འཁོར་དང་བཅས་པ་ཁྱིམ་དེར་གཤེགས་ནས་གདན་ལ་བཞུགས་ཏེ། ཟན་བྲིམས་ཤིག་ཅེས་བྱས་ན་བསྙེན་དགའ་བོ་འོངས་སམ་ཞེས་སམ། །ལན་དུ་མར་བྱས་ཀྱང་འདྲིམ་དུ་མ་བཏུབ་ནས་ཀུན་དགའ་བོ་ལ་བྲིམས་ཤིག་ཅེས་བཀའ་སྩལ་ནས་ཀུན་དགའ་བོས་བྲིམས་ནས་གདུགས་ཚོད་ཡོལ་ནས། དགེ་སློང་གནས་བརྟན་ཁ་ཅིག་ནི་ཟན་ཆད་དོ། །ཁ་ཅིག་ནི་འདྲིམ་བཞིན་དུ་བཅད་དེ་ཟད་པ་དང་བསྙེན་དགའ་བོ་ཡང་འོངས་ནས། དགེ་འདུན་རྣམས་ཀྱིས་འགྱོད་པ་དང༌། དེས་ཀྱང་ཁྱིམ་བདག་ལ་སྔར་འདྲིམ་ན་ཅི་ཉེས་ཞེས་བསྒོ་བ་དང༌། ཁྱིམ་བདག་གིས་ཀྱང་ཁྱོད་ན་རེ་མ་འོངས་ཀྱི་བར་དུ་མ་འདྲིམ་ཤིག་ཅེས་མི་ཟེར་རམ་ཞེས་བྱས་པ་དང༌། བསྙེན་དགའ་བོ་ཡང་སྐྱེངས་ནས། དགེ་སློང་གཞན་དོང་ཡང་ཕྱི་ན་ཁྱིམ་བདག་གི་ཁྱིམ་ན་ཐལ་བྱུང་འདུག་གོ །དེའི་ཚེ་གསོ་སྦྱོང་གི་དུས་ལ་བ་ནས་བསྙེན་དགའ་བོ་དད་པ་མ་བླངས་པར་གྱུར་ཏེ། དགེ་འདུན་རྣམས་ཀྱིས་དེ་སྡོད་སྡོད་ནས་དགེ་འདུན་རྣམས་ཀྱང་མི་དགའ་པར་གྱུར་ཏེ་བསྙེན་དགའ་བོས་སྔ་དྲོ་ནི་ཟས་ཀྱིས་མནར་
ཏོ་ཞེས་དགེ་སློང་དག་མི་སྙེན་པར་ཟེར་བ་སྙེན་དུ་བདས་ནས། ཕྱིན་ཆད་ཟས་ཀྱི་སྔ་རོལ་དང༌། ཟས་ཟོས་ཀྱི་འོག་ཏུ་གྲོང་རྒྱུ་ཞིང་འགྲོར་མི་གནང་བར་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ། གཞན་ཡང་དེ་དང་འདྲ་བའོ། །ཟས་དང་བཅས་པ་ཞེས་བྱ་བ་ནི་གར་བོས་པའོ། །ཁྱིམ་ཞེས་བྱ་བ་ནི་བྲམ་ཟེ་དང་ཁྱིམ་བདག་གི་ཁྱིམ་མོ། །མགྲོན་དུ་བོས་ཞེས་བྱ་བ་ནི་ཟས་ལའོ། །ཟས་ཀྱི་སྔ་རོལ་ཞེས་བྱ་བ་ནི་སྔ་དྲོ་སྟེ་ཁྱིམ་གཉིས་ལས་འདས་ན་ལྟུང་བར་འགྱུར་རོ། །ཟས་ཟོས་ཀྱི་འོག་ཅེས་བྱ་བ་ནི་ཕྱི་དྲོ་སྟེ། ཁྱིམ་གསུམ་ལས་འདས་པར་གྱུར་ན་ལྟུང་བར་འགྱུར་རོ། །རྒྱུ་ཞེས་བྱ་བ་ནི་འགྲོ་བའོ། །ཁྱིམ་པ་འདུག་པ་ལ་མ་སྒོ་ཞེས་བྱ་བ་ནི་ཁྱིམ་དེ་ན་ཁྱིམ་པ་གང་འཁོད་པའོ། །ལྟུང་བ་ནི་སྔ་མ་བཞིན་ནོ། །རྐྱེན་མ་གཏོགས་ཞེས་བྱ་བ་ནི་དགེ་སློང་ནད་པ་དང་ནད་གཡོགས་དང་ཞལ་ཏ་བ་རྣམས་མ་འབྱོར་པར་གྱུར་པ་ལས་སྙན་དུ་བདས་ནས། དེ་ལྟ་བུའི་རྐྱེན་བྱུང་བ་ནི་དུས་ཏེ་གནང་ངོ༌། །ཉེས་པ་ནི་ཟས་ཀྱི་སྔོན་རོལ་དུ་ཁྱིམ་གཉིས་པ་ལས་འདས་སམ་ཟས་ཟོས་ཀྱི་འོག་ཏུ་ཁྱིམ་གསུམ་ལས་འདས་ཤིང་རྒྱུ་ན་ལྟུང་བར་འགྱུར་རོ། །མགྲོན་དུ་མ་བོས་པ་ནི་ཉེས་མེད་དོ། །དགེ་སློང་རེངས་མ་ཤར་བར་རིན་པོ་ཆེ་མ་བསྡུས་པར་རྒྱལ་པོའི་སྒོ་གཏན་ལས་འདར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་རྒྱལ་པོ་གསལ་རྒྱལ་གྱི་ནུ་བོ་ནག་པོ་དང༌། ཁྱིམ་བདག་བཟང་སྦྱིན་ལ་སངས་རྒྱས་ཀྱིས་ཆོས་བཤད་པའི་ཚེ་དེ་དག་ནི་ཆོས་མཁས་པས་ཡང་ནས་ཡང་དུ་འདྲི་ཞིང་ལན་གསོལ་ཏོ། །རྒྱལ་པོ་གསལ་རྒྱལ་ཀྱང་དེར་འདུས་ཏེ་འདུག་གོ །རྒྱལ་པོ་ནི་ཆོས་མི་ཤེས་པས་འདྲི་རྟོག་ཀྱང་མ་ནུས་ནས་འདུག་གོ །ཁྱིམ་བདག་གཉིས་ཆོས་འདྲི་རྟོག་པ་ལ་རྒྱལ་པོ་ཡི་རངས་ནས་བཙུན་མོ་ལ་བཟླས་པ་དང༌། རྒྱལ་པོས་ཀྱང་གསན་པར་རིགས་སོ་ཞེས་བྱས་པ་དང༌། ང་ནི་ཉིན་པར་རྒྱལ་སྲིད་ཀྱི་བྱ་བས་བྲེལ་གྱི་ནུབ་མོ་ཞིང་ཁྱེད་ལ་ཉན་ཏོ། །ཞེས་ནས་བཙུན་མོ་ན་རེ་བདག་ཅག་གིས་མཉན་ཏེ། རྒྱལ་པོ་ལ་གསོལ་ཏོ་ཞེས་ནས། ཕྲེང་ལྡན་མའི་སློབ་དཔོན་དུ་ནི་འཆར་ཀ །བཙུན་མོ་དབྱར་བྱེད་ཀྱི་ནི་ཤཱ་རིའི་བུ་ཡིས་གསོལ་ནས་དེ་གཉིས་ཀྱང་སློབ་དཔོན་དུ་གནང་ངོ༌། །དེར་ཤཱ་རིའི་བུ་ནི་དུས་དུས་སུ་འགྲོའོ། །འཆར་ཀ་ནི་བབ་བབ་ཏུ་འགྲོའོ། །དུས་གཅིག་ན་རྒྱལ་པོ་ཡུལ་གཞན་ཞིག་ཏུ་འགྲོ་སྟེ། ནམ་མ་ལངས་པར་རྟ་དང་
གླང་པོ་ཆེའི་སྒྲ་དང་སྐྱེ་བོ་མང་པོའི་ཅ་ཅོ་ཐོན་པ་དང༌། ཚེ་དང་ལྡན་པ་འཆར་ཀ་ནི་རྨི་ལམ་ན་ནམ་ལངས་སྙམ་ནས་བཙུན་མོའི་གན་དུ་ནང་དུ་སོང་བ་དང༌། བཙུན་མོ་ཉལ་ཞིང་རིན་པོ་ཆེའི་སྒྲོན་མ་དང་བཅས་པའི་གན་དུ་ཕྱིན་ནས་སེ་གོལ་གྱིས་བསླངས་པ་དང༌། བཙུན་མོ་ཡང་བརྟབས་བཞིན་དུ་ལངས་ཏེ་གོས་བརྗེས་བཞིན་དུ་ཞུ་བ་དང༌། ལུང་འབོགས་པ་བྱས་ནས་འཆར་ཀའི་ལྷུང་བཟེད་ཟས་ཀྱིས་བཀང་སྟེ་བྱིན་ནས་འཆར་ཀ་སླར་སོང་བ་དང༌། ཤཱ་རིའི་བུ་ཆུར་འོངས་པ་དང་གཉིས་ལམ་དུ་ཕྲད་ནས། ཤཱ་རིའི་བུས་འཆར་ཀ་ལ་དེ་ལྟ་བུས་ཀྱང་ཟག་པ་ཟད་དམ་ཞེས་བྱས་ནས་འཆར་ཀ་ལྷ་ཁང་དུ་ཕྱིན་ནས་གར་ཕྱིན་ཅེས་དགེ་སློང་གཞན་དག་གིས་དྲིས་ན་རྒྱལ་པོའི་ཕོ་བྲང་དུའོ། །ཅི་ཙམ་ན་ཕྱིན་ཅེས་བྱས་ནས་ནམ་མ་ལོངས་པར་རོ། །འོ་ན་དེ་ལྟར་དབང་ངམ་ཞེས་བྱས་པ་དང༌། མི་དབང་ཡང་རུང་སྟེ། ལྷུང་བཟེད་གང་བ་ལྟོས་ཞེས་བྱ་པ་དང༌། དགེ་སློང་དག་འཕྱ་བ་ལས་སྙན་དུ་བདས་ཏེ། ཕྱིན་ཆད་ནམ་མ་ལངས་རིན་པོ་ཆེའི་སྒྲོན་མ་དང༌། སྐུ་སྲུང་གི་མཚོན་ཆ་མ་བསྡུས་པར་རྒྱལ་པོའི་སྒོ་གཏན་ལས་འདར་མི་གནང་བར་བསླབ་པ་བཅས་སོ། །ཡང་དགེ་སློང་ཞེས་བྱ་བ་ནི་འཆར་ཀ་སྟེ་གཞན་ཡང་དེ་དང་འདྲ་བའོ། །ནམ་མ་ལངས་ཞེས་བྱ་བ་ནི་ནམ་མ་ཟད་པའོ། །སྐྱ་རེངས་མ་ཤར་ཞེས་བྱ་བ་ནི་མ་བྱུང་བ་སྟེ། སྐྱ་རེངས་རྣམ་པ་གསུམ་ཡོད་དེ་ཡོད་དེ་སྔོན་པོ་དང་སེར་པོ་དང་དམར་པོའོ། །སྐྱ་རེངས་སྔོན་པོ་ཞེས་བྱ་བ་ནི་དང་པོ་སྔོ་བར་སྣང་བའོ། །དེའི་འོག་ཏུ་སེར་བར་སྣང་བ་ནི་སྐྱ་རེངས་སེར་པོའོ། །དེའི་འོག་ཏུ་ཡུད་ཙམ་དམར་བར་སྣང་བ་ནི་སྐྱེ་རེངས་དམར་པོ་སྟེ། སྐབས་དེར་ནི་དམར་པོ་ཉིད་མཚན་མར་བཟུང་ངོ༌། །རིན་པོ་ཆེ་ཞེས་བྱ་བ་ནི་ནོར་རིན་པོ་ཆེ་དང་བཻ་ཌཱུཪྻ་དང༌། མུ་ཏིག་ལ་སོགས་པ་ཉལ་བ་ལ་འོད་སྣང་བར་བྱེད་པ་ནི་རིན་པོ་ཆེ་ཞེས་བྱའོ། །རིན་པོ་ཆེ་ལྟ་བུ་ཞེས་བྱ་བ་ནི་རལ་གྲི་དང་མདའ་དང༌། མདུང་དང༌། རོལ་མོའི་ཆ་སྤྱད་ཐམས་ཅད་དང༌། དགྲ་ཆའི་མཚོན་ཆ་ཐམས་ཅད་ནི་རིན་པོ་ཆེ་ལྟ་བུ་ཞེས་བྱའོ། །མ་བསྡུས་ཞེས་བྱ་བ་ནི་དེ་དག་བཙུན་སྲུངས་རྣམས་ཀྱིས་མ་བསྡུས་པའོ། །རྒྱལ་པོ་རྒྱ་རིགས་སྤྱི་བོ་ནས་དབང་བསྐུར་བ་ཞེས་བྱ་བ་ནི་རྒྱལ་རིགས་དང༌། དམངས་རིགས་དང༌། རྗེའུ་རིགས་དང༌། བུད་མེད་གང་ཡང་རུང་སྟེ། རྒྱལ་ཐབས་སྤྱི་བོ་ནས་དབང་བསྐུར་བའོ། །སྒོ་གཏན་ཞེས་བྱ་བ་ནི་རྣམ་པ་གསུམ་སྟེ། རྒྱལ་པོའི་སྒོའི་གཏན་པ་དང༌། བཙུན་མོའི་སྒོའི་གཏན་
པ་དང་གྲོང་ཁྱེར་གྱི་སྒོའི་གཏན་པའོ། །རྒྱལ་པོ་དང་བཙུན་མོའི་སྒོའི་གཏན་པ་ལས་འདས་ན་ལྟུང་བར་འགྱུར་རོ། །རྒྱལ་པོ་དང་བཙུན་མོའི་གནས་སུ་འགྲོ་བ་ལས་གྲོང་ཁྱེར་གྱི་སྒོའི་གཏན་པ་ལས་ཕར་འདས་ན་ཉེས་བྱས་སུ་འགྱུར་རོ། །རྐྱེན་མ་གཏོགས་ཞེས་བྱ་བ་ནི་རྒྱལ་པོ་མ་དད་པ་དང༌། བཙུན་མོ་མ་དད་པ་འདུལ་བ་འམ། བཙུན་མོ་དང་བློན་པོས་བཀུག་པ་ནི་མ་གཏོགས་སོ། །དགེ་སློང་ནམ་མ་ལངས་པ་ལ་ལངས་པར་འདུ་ཤེས་པ་དང༌། ཐེ་ཚོམ་བཞིན་དུ་རྒྱལ་པོ་དང་བཙུན་མོའི་སྒོ་གཏན་ལ་སྐྱ་རེངས་མ་ཤར་བར་འདས་ན་ལྟུང་བ་རེ་རེར་འགྱུར་རོ། །ནམ་ལངས་པ་ལ་མ་ལངས་པར་འདུ་ཤེས་པ་དང༌། ཐེ་ཚོམ་བཞིན་དུ་འདས་ན་ཉེས་བྱས་སུ་འགྱུར་རོ། །བར་ཆད་ཆེན་པོ་བརྒྱད་ཀྱིས་བསྐལ་ཏེ་སྒོའི་གཏན་པ་ལས་འདས་པ་ནི་ལྟུང་བ་མེད་དོ། །སོ་སོར་ཐར་པའི་མདོ་འདོན་པའི་ཚེ་གདོད་ཐོས་སོ་ཞེས་ཟེར་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་རྣམས་ལ་ཟླ་བ་ཕྱེད་ཕྱེད་ཅིང་སོ་སོར་ཐར་པ་བཤད་པར་ཐོན་ཅིག་ཅེས་བཀའ་སྩལ་པས་ན། དགེ་སློང་དྲུག་སྡེ་རྣམས་སོ་སོར་ཐར་པའི་མདོ་འདོན་པའི་ཚེ། རི་མོར་བྱས་ཤིང་ཆོས་མི་ཉན་བླ་མར་མི་བྱེད་སེམས་བ་ཏུད་ཅིང་རྣ་བ་བླགས་ཏེ་མི་ཉན་པས། སླད་ཀྱིས་སོ་སོར་ཐར་པ་འདོན་པའི་ཚེ་དྲུག་སྡེ་དག་ན་རེ་ཚིག་འདི་དག་སོ་སོ་ཐར་པ་ལས་འབྱུང་བར་གདོད་ཤེས་ཞེས་སྔན་ཆད་མ་ཐོས་པ་སྐད་ཟེར་ན། དགེ་སློང་དག་ན་རེ་སྔོན་ཆད་ཀྱང་གསོ་སྦྱོང་གི་སར་ལན་ག་ཉིས་ལན་གསུམ་གྱི་བར་དུ་འདུག་ན་འདི་དག་མ་ཐོས་ཞེས་བྱ་བ་ཡང་གུས་པར་ཉན་པའི་ཕྱིར་རོ་ཞེས་དགེ་སློང་དག་འཕྱ་བ་ལས་སྙན་དུ་བདས་ཏེ། བཅོམ་ལྡན་འདས་ཀྱིས་ཚེ་དང་ལྡན་པ་དག་མ་རྙེད་པའོ། །ལེགས་པར་མ་རྙེད་པའོ་ཞེས་རྣམས་གྲངས་དུ་མས་སྨད་ནས་འདུལ་བ་ལ་བསླབ་པའི་གནས་བཅས་སོ། །ཡང་དགེ་སློང་གན་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲ་བའོ། །ཟླ་བ་ཕྱེ་ཕྱེད་ཅེས་བྱ་བ་ནི་གསོ་སྦྱོང་གི་དུས་ཀྱི་ཚེའོ། །སོ་སོར་ཐར་པའི་མདོ་ཞེས་བྱ་བ་ནི་ཕས་ཕམ་པའི་ཆོས་བཞི་ནས། རྩོད་པ་ཞི་བའི་བར་དུ་ལྟུང་བ་རིས་ལྔ་རྣམས་ལ་བྱའོ། །མདོ་བཤད་པ་ཞེས་བྱ་བ་ནི་ཡང་དག་པར་བཀོད་པ་འམ་མདོ་བཤད་པ་ལ་བྱའོ། །འདོན་པའི་ཚེ་ཞེས་བྱ་བ་ནི་རབ་ཏུ་བསྒྲགས་པའོ། །འདི་སྐད་ཟེར་ཅེས་བྱ་བ་ནི་སྨྲས་པའོ། །ཚེ་དང་ལྡན་པ་བདག་གིས་ད་གདོད་ཤེས་སོ་
ཞེས་བྱ་བ་ནི་ད་ལྟ་ལ་བྱའོ། །ཇི་ལྟར་ཆོས་འདི་མདོའི་ནང་དུ་ཆུད་ཅེས་བྱ་བ་ནི་ཇི་ལྟར་ཆོས་འདི་བཅོམ་ལྡན་འདས་ཀྱིས་གསུངས་པའི་མདོའི་ནང་དུ་ཀླག་པར་བྱའོ། །དེ་སྟེ་དེ་དགེ་སློང་གིས་ཞེས་བྱ་བ་ནི་དགེ་སློང་གང་དེ་ན་འཁོད་པའོ། །ཚེ་དང་ལྡན་པ་སྔོན་འདི་ན་འདུག་ཅེས་བྱ་བ་ནི་དེ་དག་གང་ཡིན་པའོ། །གསོ་སྦྱོང་གི་ལས་ལན་གཉིས་ལན་གསུམ་ཞེས་བྱ་བ་ནི་སོ་སོར་ཐར་པའི་མདོ་ལས་ལན་གཉིས་ལན་གསུམ་དུ་སྟོན་པའི་ཚེ་ཡོད་པའོ། །མི་ཤེས་པས་ཐར་པར་མི་འགྱུར་ཞེས་བྱ་བ་ནི་མི་ཤེས་པས་མི་གྲོལ་ཐར་པ་མེད་པས་ན་མི་ཤེས་སུ་མི་རུང་བའི་དོན་ཏོ། །ལྟུང་བ་ནི་སེམས་ཅན་དམྱལ་བ་བར་རོ། །ཆོས་ལ་བསྟི་སྟང་དང་རི་མོ་དང་གུས་པར་མི་བྱེད་ནས། སོ་སོར་ཐར་པའི་མདོ་ལན་གཉིས་ལན་གསུམ་དུ་ཐོས་པ་ལས་ཕས་ཕམ་པ་ནས་རྩོད་པ་ཞི་བའི་བར་དུ་གདོད་ཐོས་སོ། །ཞེས་སྨྲ་ན་ཐམས་ཅད་དུ་ལྟུང་བ་རེ་རེར་འགྱུར་རོ། །མི་ཤེས་ཡང་དག་པ་ལ་ལྟུང་བ་མེད་དོ། །རྭ་དང་རུས་པ་ལས་ཁབ་རལ་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་བ་སོ་དང་རྭ་འདུས་པའི་ཁབ་རལ་མང་དུ་བྱས་ནས་འཆང་བ་དགེ་སློང་ཀུན་གྱིས་ཀྱང་གླ་རྔན་ནམ་ཟན་བྱིན་པ་ནི་མེད་དེ། ཀུན་གྱིས་ཀྱང་བསླངས་པ་ཟད་པར་གྱུར་ཏེ། རྒྱགས་ཟོང་མེད་པས་ན་དབུལ་པོར་གྱུར་པས་མུ་སྟེགས་ཅན་རྣམས་བ་སོ་མཁན་སྔོན་ངེད་ལ་དད་པའི་ཚེ་ནི་ཕྱུག་ད་ནི་ཤཱཀྱའི་དགེ་སྦྱོང་རྣམས་ལ་དད་པས་དབུལ་པོར་གྱུར་ཏོ་ཞེས་འཕྱ་བ་ལས་སྙན་དུ་བདས་ནས། མགུ་མི་མྱོང་བ་ཆོག་མི་ཤེས་པའོ་ཞེས་བཀས་སྨད་དོ། །རྭ་ལས་ཁབ་རལ་བྱེད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །དགེ་སློང་གང་ཞེས་བྱ་བ་ནི་དགེ་སློང་མང་པོ་སྟེ་གཞན་ཡང་དེ་དང་འདྲ་བའོ། །བ་སོ་ཞེས་བྱ་བ་ནི་སོ་ཉིད་དོ། །ཁབ་རལ་ཞེས་བྱ་བ་ནི་རྣམ་པ་གཉིས་ཏེ། ཁག་པ་ཅན་དང་དོང་བུར་ཅན་ནོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །བཅག་ནས་ཞེས་བྱ་བ་ནི་བཅག་པའི་འོག་ཏུ་གདོད་ལྟུང་བ་བཤགས་པའོ། །ལྟུང་བ་ནི་སེམས་ཅན་དམྱལ་བར་རོ། །གང་གི་མདུན་དུ་ལྟུང་བ་བཤགས་པ་དེས་ཀྱང་ཁབ་རལ་ཁྱོད་ཀྱིས་བཅག་གམ་མ་བཅག་ཅེས་དྲིས་ཤིག་མ་དྲིས་པར་དངོས་པོ་དེ་བཤགས་ན་བཤགས་པ་དང་ཉན་པ་གཉིས་ཀ་ཉེས་བྱས་སུ་འགྱུར་རོ། །ལྟུང་བ་དེ་ཡང་བཤགས་པར་མི་འགྱུར་རོ། །ཁྲིའི་རྐང་པ་ཐུང་ངུ་དང་ཧ་ཅང་རིང་པོ་ལ་ཉལ་དུ་མི་གནང་བའི་གླང་གཞི་ནི་མཉན་དུ་ཡོད་
པ་ན་སྟེ། དེའི་ཚེ་དགེ་སློང་བསོད་སྙོམས་པ་ཞིག་ཁྲི་རྐང་པ་ཐུང་ངུ་ཞིག་གི་སྟེང་ན་འདུག་སྟེ། རྐང་པ་བཀྲུས་ནས་སྒོ་ཁང་གི་གྲིབ་མ་ལ་ཁྲིའི་སྟེང་ན་བསམ་གཏན་བྱེད་ཅིང་འདུག་པ་དང༌། སྦྲུལ་ཚ་བས་གདུངས་པ་ཞིག་ཉེ་བར་འོངས་ཏེ། ཆུའི་ནང་ན་འཁྱིལ་ཞིང་ཉལ་བ་དང་དགེ་སློང་ལམ་གྱིས་ངལ་བས་ཁྲིའི་སྟེང་ན་འཆག་པ་དང༌། ཁྲི་འཚིགས་པའི་སྒྲས་སྦྲུལ་ཁྲོས་ཏེ། དགེ་སློང་དེའི་དཔྲལ་བར་ཟིན་ནས་དགེ་སློང་དེ་ཡང་དུས་ལས་འདས་ཏེ་སུམ་ཅུ་རྩ་གསུམ་ལྷའི་ཁམས་སུ་སྐྱེས་སོ། །དེ་ལྟ་བུའི་ཉེས་པའི་དམིགས་སུ་གྱུར་པ་དང༌། ཁྲིའི་རྐང་པ་ཐུང་ངུ་ལ་མ་ཉལ་ཅིག་ཅེས་བཀའ་སྩལ་པ་དང༌། དྲུག་སྡེ་རྣམས་ཁྲི་རྐང་པ་བཅུ་གཉིས་པ་བྱས་ནས་སྐས་བཙུགས་ཏེ་ཉལ་བ་དང༌། དེ་ཉིད་ཉེས་པའི་དམིགས་སུ་གྱུར་ཏེ་སླན་ཆད་ཁྲུ་གང་ལས་རིང་བར་བྱེད་དུ་མི་གནང་བར་བཅས་སོ། །ཕྱིས་འཆར་ཀ་ལུས་རིང་བས་ཁྲི་ལ་དཀུ་རྟེན་བཅས་པ་དང་པུས་མོ་དང་ཀོ་སྐོར་རེག་པས་བུ་གར་གཞུག་པ་མ་གཏོགས་ཏེ། བདེ་བར་གཤེགས་པའི་སོར་བརྒྱད་ཅེས་བྱ་བ་ནི་ཁྲུ་ཚད་མ་གང་ངོ༌། །ཁྲུ་གང་གཞུག་པ་མ་གཏོགས་ཞེས་བྱ་བ་ནི་གནང་བའོ། །དེ་ལས་ཞེས་བྱ་བ་ནི་འདས་པའོ། །བཅད་ནས་ལྟུང་བ་ཞེས་བྱ་བ་ནི་དངོས་པོ་རིང་བ་དེ་བཅད་ནས་ལྟུང་བ་བཤགས་པར་བྱའོ། །ལྟུང་བ་ནི་ངན་སོང་གསུམ་དུའོ། །གང་གི་མདུན་དུ་བཤགས་པ་དེས་ཁྱོད་ཀྱིས་དངོས་པོ་དེ་བཅད་དམ་མ་བཅད་ཅེས་དྲིས་ཤིག་མ་དྲིས་པར་བྱས་ན་གཉི་ག་ལ་ཉེས་བྱས་སོ། །ལྟུང་བ་དེ་ཡང་བཤགས་པར་མི་འགྱུར་རོ། །དགེ་འདུན་གྱི་ཁྲི་ལ་ཤིང་བལ་བརྡལ་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དགེ་འདུན་གྱི་མལ་སྟན་བགོས་ཟིན་པའི་འོག་ཏུ་དེའི་ནུབ་མོ་དགེ་སློང་བསོད་སྙོམས་པ་རྒན་པ་ཞིག་གློ་བུར་དུ་འོངས་པ་དེས་མལ་མ་ཐོབ་ནས། དགེ་འདུན་རྣམས་ཀྱི་ནང་ན་བསྙེན་དགའ་བོ་གཞོན་པས་ན་དེའི་མལ་སྟན་བསོད་སྙོམས་པ་ལ་བྱིན་ཅིག་ཅེས་བྱས་པ་དང༌། དེས་ཀུ་རེ་སྦྱར་ཏེ་ཁྲི་གཡོགས་ཀྱི་ནང་ཚངས་ཤིང་བལ་བཏོན་ཏེ། ཁྲི་ལ་བརྡལ་ནས་རས་ཀྱིས་གཡོགས་ཏེ་བཞག་གོ །ནམ་སྲོས་པ་དང་རས་བཤུས་ཏེ། ཉལ་དུ་བཅུག་པས། ནང་པར་ལུས་ཀུན་ཤིང་བལ་གྱིས་གོས་པ་ལས་དགེ་སློང་གཞན་རྣམས་ཀྱིས་ཁྱོད་ཅི་འབྲས་ཀྱི་ཡུལ་ན་ཉལ་ཉལ་ལམ་ཞེས་བྱས་པ་དང༌། བསྙེན་དགའ་བོས་དེ་ལྟར་
ཀུ་རེ་བྱས་སོ་ཞེས་སྨྲས་པ་དང༌། དོན་ཉུང་བའི་དགེ་སློང་དག་འཕྱ་སྟེ། ཅིའི་ཕྱིར་དགེ་འདུན་གྱི་ཁྲི་ལ་ཤིང་བལ་བརྡལ་ཞེས་མི་སྙན་པར་འཛེར་བསྙན་དུ་བདས་ནས་དགེ་སློང་གི་བྱ་བ་མ་ཡིན་ཞེས་སྨད་དེ། ཁྲི་ལ་ཤིང་བལ་བརྡལ་དུ་མི་གནང་བར་འདུལ་བ་ལ་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙན་དགའ་བོ་སྟེ་གཞན་ཡང་དེ་དང་འདྲ་བའོ། །དགེ་འདུན་ཞེས་བྱ་བ་ནི་བཅོམ་ལྡན་འདས་ཀྱི་ཉན་ཐོས་སོ། །ཁྲི་དང་ཁྲིའུ་ནི་དངོས་སུ་ཟད་དོ། །ཤིང་བལ་ནི་རྣམ་པ་ལྔ་པོ་ལས་གང་རུང་སྟེ་ཀ་ཤ་དང༌། བུ་ཀ་དང་ཤ་མ་ལི་དང༌། ཀ་ཤ་དང༌། བལ་ཅེས་བྱ་བ་ནི་བདག་ཉིད་ཀྱིས་སོ། །བཅུག་ཅེས་བྱ་བ་ནི་གཞན་ལ་བཅོལ་བའོ། །ལྟུང་བ་ནི་སྔ་མ་བཞིན་ནོ། །ཉེས་པ་གང་གི་མདུན་དུ་བཤགས་པ་དེས་ཁྱོད་ཀྱིས་དངོས་པོ་དེ་བསྡུས་སམ་ཞེས་དྲིས་ཤིག །མ་དྲིས་པར་བཤགས་སམ་ཉམས་སུ་བླངས་ན་གཉིག་ལ་ཉེས་བྱས་སོ། །ལྟུང་བ་དེ་ཡང་མ་བཤགས་པ་ཡིན་གྱིས་སླར་ཤོགས་ཤིག །གདིང་བ་ཚད་ལས་ལྷག་པར་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། བཅོམ་ལྡན་འདས་ཀྱིས་དགེ་སློང་རྣམས་ལ་གདིང་བ་དགེ་འདུན་གྱི་ལམ་སྟན་བཟང་བར་བྱ་བའི་ཕྱིར་གདིང་བ་ཚད་བཞིན་དུ་གྱིས་ཤིག་ཅེས་བཀའ་སྩལ་བ་དང༌། དགེ་སློང་མང་པོ་རྣམས་ཀྱིས་ཚད་ལས་འདས་པར་བྱས་པ་དང་དོན་ཉུང་ངུ་བའི་དགེ་སློང་དག་འཕྱ་ཞིང་མི་སྙན་པར་ཟེར་བསྙན་དུ་བདས་ནས། ཆོག་མི་ཤེས་པ་མགུ་མི་མྱོང་བ་ཞེས་བཀས་སྨད་དེ་གདིང་བའི་ཚད་སྲིད་དུ་བདེ་བར་གཤེགས་པའི་མཐོ་དོ། །ཞེང་དུ་མཐོ་ཕྱེད་དང་དོའི་ཐང་དུ་གྱིས་ཤིག་ཅེས་བསླབ་པ་བཅས་པ་དང༌། ཕྱིས་ཚེ་དང་ལྡན་པ་འཆར་ཀ་པོ་ལུས་རིང་བས་གདིང་བས་མ་སླེབས་ནས་མལ་སྟེང་ཉེས་པར་མི་འགྱུར་བར་བྱ་བའི་ཕྱིར་རྐང་པ་ལོགས་སུ་ལོ་མས་བཏུད་ཅིང་ཉལ་བ། ཕྱིས་བཅོམ་ལྡན་འདས་གཙུག་ལག་ཁང་ཉུལ་བའི་ཚེ་གཟིགས་ནས། དེ་ཅི་ཡིན་ཞེས་དྲིས་པ་དང༌། བཅོམ་ལྡན་འདས་ཀྱིས་གདིང་བའི་ཚད་སྔར་གནང་བས་འཆར་ཀའི་ལུས་རིང་སྟེ་མ་སླེབས་སོ་ཞེས་གསོལ་པ་དང༌། དེ་ལྟར་ན་སྲིད་དུ་བདེ་བར་གཤེགས་པའི་མཐོ་གང་གིས་སྲིངས་ཤིག་པར་གནང་ངོ༌། །གདིང་བ་ཞེས་བྱ་བ་ནི་སྟན་ནོ། །དགེ་སློང་ཞེས་བྱ་བ་ནི་དགེ་སློང་མང་པོ་དང་འཆར་ཀ་སྟེ་གཞན་ཡང་དེ་དང་འདྲ་བའོ། །བྱེད་ཅེས་བྱ་བ་ནི་བདག་དང་གཞན་གང་གིས་བྱས་ཀྱང་རུང་སྟེའོ། །ཚད་བཞིན་དུ་བྱོས་ཤིག་ཅེས་བྱ་བ་ནི་གདིང་
བའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་དོ། །ཞེང་དུ་མཐོ་ཕྱེད་དང་དོའོ། །སྲིད་དུ་ཡང་མཐོ་གང་གིས་སྣོན་ཅིག །འདི་ནི་གདིང་བའི་ཚད་དོ། །བདེ་བར་གཤེགས་པའི་མཐོ་ཞེས་བྱ་བ་ནི་སྟོན་པ་ལ་བྱ་སྟེ། དེའི་མཐོ་དོ་ལ་ཁྲུ་ཚད་གསུམ་མོ། །ཕྱིས་མཐོ་གང་བསྣན་པས་ན་དེ་ལྟར་སྲིད་དུ་ཁྲུ་ཕྱེད་དང་ལྔའོ། །ཞེང་ཞེས་བྱ་བ་ནི་ཐད་ཀར་རོ། །མཐོ་ཕྱེད་དང་དོ་ཞེས་བྱ་བ་ནི་ཁྲུ་ཚད་མ་དོ་དང༌། སོར་དྲུག་གོ །དེ་ལས་ལྷག་པར་བྱེད་ཅེས་བྱ་བ་ནི་ཚད་ལས་འདས་པའོ། །བཅད་ནས་ལྟུང་བ་ཞེས་བྱ་བ་ནི་དངོས་པོ་བཅད་ནས་ལྟུང་བ་ཕྱིས་བཤགས་པར་བྱའོ། །གང་གི་མདུན་དུ་ལྟུང་བ་བཤགས་པ་དེས་ཀྱང་ཁྱོད་ཀྱིས་དངོས་པོ་དེ་བཅད་དམ་མ་བཅད་དྲིས་ཤིག །མ་དྲིས་པར་བཤགས་པ་བྱས་སམ་ཉམས་སུ་བླངས་ན་ཉེས་བྱས་སོ། །ལྟུང་བ་དེ་ཡང་སླར་བཤགས་པར་བྱའོ། །ལྟུང་བ་ནི་ངན་སོང་གསུམ་དུ་ལྟུང་བའོ། །ཉེས་པ་ནི་དགེ་སློང་གིས་གདིང་བ་སྲིད་དུ་ཁྲུ་ཕྱེད་དང་ལྔ་དང༌། ཞེང་དུ་ཁྲུ་དོ་སོར་དྲུག་ལས་ལྷག་པར་བྱས་ན་ཅི་ཙམ་གྱིས་ལྷག་པར་བྱས་པ་ལྟུང་བར་འགྱུར་རོ། །དགེ་སློང་གི་གཡན་པ་དགབ་པ་ཚད་ལས་འདས་པར་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་ན་དགེ་སློང་དག་ལ་གཡན་པ་བྱུང་ནས་ཆོས་གོས་ལ་རེག་པས་ན་ཆོས་གོས་ཀྱང་མ་རུང་སྦྲང་མ་དག་འདུ་བས། སྐྱེ་བོ་དག་འཕྱ་བ་ལས་གཡན་པ་དགབ་པ་ཆོངས་ཤིག་ཅེས་བཀའ་སྩལ་ཏེ། གཡན་པ་དགབ་པ་ཡང་མ་བཀྲུས་པས་སྦྲང་མ་དག་ཀྱང་འདུ་ཤིང་མནམ་པ་ལས་ཁྲུས་ཤིག་འབུད་པའི་ཚེ་ན་གཤེར་བར་བྱོས་ལ་ཕུང་ཅིག་ཅེས་བཀའ་སྩལ་པ་དང༌། དགེ་སློང་དག་གིས་ཧ་ཅང་མ་འོས་པར་ཚད་ལས་འདས་པར་བྱས་པ་དང༌། དོན་ཉུང་བའི་དགེ་སློང་དག་འཕྱ་བ་ལས་སྙན་དུ་བདས་ནས། དགེ་སློང་རྣམས་ལ་མང་དུ་འདོད་པ་མགུ་མི་མྱོང་བ་ཞེས་སྨད་ནས་གཡན་པ་དགབ་པ་ཚད་ལས་འདར་མི་གནང་བར་འདུལ་བ་ལ་བསླབ་པའི་གནས་བཅས་སོ། །གཡན་པ་དགབ་པ་ཞེས་བྱ་བ་ནི་ནད་ཀྱི་གོས་སོ། །དགེ་སློང་ཞེས་བྱ་བ་ནི་ཆོས་འདི་ལ་ཞུགས་པའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །ཚད་བཞིན་དུ་གྱིས་ཤིག་ཅེས་བྱ་བ་ནི་གཡན་པ་དགབ་པའི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་བཞིའོ། །ཞེང་དུ་མཐོ་དོའོ། །སྲིད་དུ་བདེ་བར་གཤེགས་པའི་མཐོ་བཞི་ལ་ཁྲུ་དྲུག་གོ །ཞེང་དུ་
མཐོ་དོ་ལ་ཁྲུ་ཚད་མ་གསུམ་མོ། །དེ་ལས་ལྷག་པར་བྱས་ཞེས་བྱ་བ་ནི་དེ་ལས་འདས་པར་བྱས་པའོ། །བཅད་ནས་ལྟུང་བའོ་ཞེས་བྱ་བ་ནི་དངོས་པོ་སྔར་བཅད་ནས་ལྟུང་བ་བཤགས་པར་བྱ་བའོ། །ལྟུང་བ་ནི་ངན་སོང་གསུམ་དུ་ལྟུང་བའོ། །ཉེས་པ་ནི་ཆུར་ཁྲུ་དྲུག་ཞེང་དུ་ཁྲུ་གསུམ་ལས་ལྷག་པར་བྱས་ན་ཐམས་ཅད་དུ་ལྟུང་བར་འགྱུར་རོ། །གང་གིས་མདུན་དུ་ལྟུང་བ་བཤགས་པ་དེས་བཅད་དམ་མ་བཅད་ཅེས་དྲིས་ཤིག །མ་དྲིས་པར་བཤགས་ན་ཉེས་བྱས་སོ། །རས་ཆེན་ཚད་ལས་ལྷག་པར་བྱེད་དུ་མི་གནང་བའི་གླེང་བཞི་ནི་མཉན་དུ་ཡོད་པ་ན་སྟེ། དགེ་སློང་དག་སྦྲེན་མོར་སྐྱབས་མེད་པ་ན་ཁྲུས་བྱེད་པ་རི་དགས་དགྲའི་མ་ས་གས་མཐོང་ནས། སྐྱེ་བོ་མ་དད་པ་རྣམས་འཕྱར་དོགས་ནས། སླན་ཆད་སྐྱབས་མེད་པར་ཁྲུས་མི་བྱེད་པར་བསླབ་པའི་གཞི་བཅའ་བར་གསོལ་ལོ་སྙམ་ནས། དགེ་བསྙེན་མས་གཉིད་ཀྱིས་དགེ་སློང་ཁྲུས་ཀྱི་ཚེ་ནི་ཡོལ་བ་དབྱར་གྱི་རས་ཆེན་དུ་ཕུལ་ནས་ཕྱིན་ཆད་རས་ཆེན་འཆང་བར་བཅོམ་ལྡན་འདས་ལ་གསོལ་བར་བཀས་གནང་བ་དང༌། དགེ་སློང་དག་གིས་ཧ་ཅང་མ་འོས་པར་ཆེན་པོར་བྱས་པ་དང༌། དོན་ཉུང་ངུ་བའི་དགེ་སློང་དག་འཕྱ་བ་ལས་སྙན་དུ་བདས་ནས། གསོ་དཀའ་བ་དགང་དཀའ་བ་ཞེས་སྨད་ནས་ཚད་ལས་འདས་པར་བྱེད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །དབྱར་གྱི་རས་ཆེན་ཞེས་བྱ་བ་ནི་ཆར་འབབ་པའི་གོས་དང་ཁྲུས་ཀྱི་སྐྱབས་སོ། །དགེ་སློང་ཞེས་བྱ་བ་ནི་དགེ་སློང་མང་པོ་སྟེ་གཞན་ཡང་དེ་དང་འདྲ་བའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །ཚད་བཞིན་དུ་ཞེས་བྱ་བ་ནི་ཚད་ནི་འདི་ཡིན་ཏེ། སྲིད་དུ་བདེ་བར་གཤེགས་པའི་མཐོ་དྲུག་གོ །ཞེང་དུ་མཐོ་ཕྱེད་དང་གསུམ་མོ། །བདེ་བར་གཤེགས་པའི་མཐོ་དྲུག་ལ་ཁྲུ་དགུའོ། །བདེ་བར་གཤགས་པའི་མཐོ་ཕྱེད་དང་གསུམ་ལ་ཁྲུ་ཚད་གསུམ་དང་སོར་བཅོ་བརྒྱད་དོ། །ལྷག་པ་ཞེས་བྱ་བ་ནི་དེ་ལས་འདས་པའོ། །བཅད་ནས་ལྟུང་བ་ཞེས་པ་ནི་དངོས་པོ་བཅད་ནས་ལྟུང་བ་བཤགས་པར་བྱའོ། །ལྟུང་བ་ནི་ངན་སོང་གསུམ་དུའོ། །ཉེས་པ་ནི་དགེ་སློང་གིས་སྲིད་དུ་ཁྲུ་དགུ། ཞེང་དུ་ཁྲུ་གསུམ་དང་སོར་བཅོ་བརྒྱད་ལས་ལྟག་པར་བྱས་ན་ཐམས་ཅད་དུ་ལྟུང་བར་འགྱུར་རོ། །གང་གི་མདུན་དུ་བཤགས་པ་དེས་ཀྱང་དངོས་པོ་བཅད་དམ་མ་བཅད་དྲིས་ཤིག་མ་དྲིས་པར་བཤགས་ན་ཉེས་བྱས་སོ། །དགེ་སློང་གིས་ཆོས་གོས་
བདེ་བར་གཤེགས་པའི་ཆོས་གོས་ཀྱི་ཚད་དང་དེ་ལས་ལྷག་པར་བྱེད་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་བསྙེན་དགའ་བོས་བཟོ་མཁན་ཞིག་ལ་བདག་གི་ཆོས་གོས་བཅོམ་ལྡན་འདས་ཀྱི་ཆོས་གོས་ཀྱི་ཚད་དུ་གྱིས་ཤིག་ཅེས་བཅོལ་བ་དང༌། དེ་ལྟ་བུའི་ཆེན་པོས་ཅི་བྱ་ཞེས་བྱས་ན། ཁྱོད་ལ་ནི་གླ་རྔན་དང་ཟས་དགོས་སུ་ཟད་མདོ། །ཚད་དྲི་ཅི་དགོས་ཞེས་བྱས་པ་དང༌། བཟོ་མཁན་གྱིས་བསམས་པ་དེ་ནི་ཁོ་ཟེར་བ་བདེན་ནོ་སྙམ་ནས་དྲུབས་ཏེ་བྱིན་པ་དང༌། བསྙེན་དགའ་བོ་ཡང་ཆོས་གོས་དེ་གྱོན་ཏེ་ཇི་སྙེད་མ་རྫོགས་པ་ཕྲག་པ་ལ་བཀལ་ནས། གཙུག་ལག་ཁང་གཅིག་ནས་གཅིག་ཏུ་བྱུང་བ་དང་དགེ་སློང་གཞན་དག་གིས་མཐོང་སྟེ། ཕྲག་པ་ལ་བཀལ་བ་འདི་ཅི་ཞིག་དྲིས་ན། བདེ་བར་གཤེགས་པའི་ན་བཟའི་ཚད་དོ་ཞེས་བྱས་པ་དང༌། དེ་དག་ན་རེ་ཅི་ཁྱོད་དེ་ལྟ་བུ་གྱོན་དུ་དབང་ངམ་ཞེས་བྱས་པ་དང༌། དབང་ཡང་རུང་མི་དབང་ཡང་རུང་དགྲའི་ཕྲག་པར་རྡོག་པས་བརྫིས་ཏེ་དབང་ངོ་ཞེས་བྱས་པ་དང༌། དགྲ་སུ་ཞེས་བྱས་ན་དེ་སྐད་ཟེར་བས་ཁྱོད་ཉིད་ངའི་དགྲའོ་ཞེས་ཟེར་བ་ལས་སྙན་དུ་བདས་ནས་བདེ་བར་གཤེགས་པའི་ཆོས་གོས་ཀྱི་ཚད་དུ་བགྱིད་དུ་མི་གནང་བར་བཅས་པ་དང༌། བསྙེན་དགའ་བོ་དེ་བས་ཀྱང་ལྷག་པར་བྱས་ཏེ་གྱོན་པ་ལས་དོན་ཉུང་བའི་དགེ་སློང་རྣམས་འཕྱ་སྟེ། བཅོམ་ལྡན་འདས་ཀྱིས་བདེ་བར་གཤེགས་པའི་ཆོས་གོས་ཀྱི་ཆད་དུ་མ་བྱེད་ཅིག་ཅེས་བཀའ་སྩལ་ནས། ང་དགེ་སློང་གིས་ཅིའི་ཕྱིར་དེ་བས་ཀྱང་ལྷག་པར་བྱེད་ཅེས་མི་སྙན་པར་ཟེར་བ་ལས་སྙན་དུ་བདས་ཏེ། བཀས་རྣམ་གྲངས་དུ་མའི་སྒོ་ནས་སྨད་ནས། བདེ་བར་གཤེགས་པའི་ཆོས་གོས་ཀྱི་ཚད་དང་དེ་ལས་ལྷག་པར་བྱེད་དུ་མི་གནང་བར་འདུལ་བ་ལ་བསླབ་པའི་གནས་བཅས་སོ། །དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །བདེ་བར་གཤེགས་པའི་ཆོས་གོས་ཞེས་བྱ་བ་ལ། བདེ་བར་གཤེགས་པ་ནི་སྟོན་པ་ལ་བྱ་སྟེ། དེའི་ཆོས་གོས་ཀྱི་སྲིད་དུ་ནི་བདེ་བར་གཤེགས་པའི་མཐོ་བཅུ་ལ་ཁྲུ་ཚད་མ་བཅོ་ལྔའོ་ཞེང་དུ་མཐོ་དྲུག་ནི་ཁྲུ་ཚད་མ་དགུའོ། །ཆོས་གོས་ཞེས་བྱ་བ་ནི་རྒྱུ་རྣམ་པ་བདུན་པོའི་ནང་དུ་གང་ཡང་རུང་སྟེ། གསོ་མ་དང་བལ་དང་ཟར་མ་དང་དུ་གུ་ལ་དང་ཀོ་ཏམ་པ་དང༌། ཤིང་བལ་དང༌། སྲིན་བལ་དང༌། སྲིན་བལ་གྱིའོ། །བྱེད་ཅེས་བྱ་བ་ནི་བདག་དང་གཞན་གྱིས་སོ། །ལྷག་ཅེས་བྱ་བ་ནི་དེ་
ལས་འདས་པའོ། །ལྟུང་བ་ནི་ངན་སོང་གསུམ་དུ་ལྟུང་བ་ལ་བྱའོ། །ཉེས་པ་ནི་བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་སམ། དེ་ལས་ལྷག་པར་བྱས་ན་ཐམས་ཅད་དུ་ལྟུང་བར་འགྱུར་རོ། །ལྟུང་བ་དགུ་བཅུ་པ་མི་བརྗེད་པའི་ཚིག་རྫོགས་སོ།། །།སོ་སོར་བཤགས་པ་དང་པོ་སྟེ་གྲོང་དུ་དགེ་སློང་མའི་ལག་ནས་ཟས་སློང་དུ་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། དེའི་ཚེ་དགེ་སློང་མ་ཨུཏྤ་ལའི་མདོག་བསོད་སྙོམས་སྔ་མ་ནི་སྤངས་ཤིང་དགེ་འདུན་ལ་ཕུལ་བར་གྱུར་ཏོ། །ཕྱི་མ་བླངས་པ་ནི་དགེ་སློང་བསོད་སྙོམས་པ་ཟན་མ་རྙེད་པ་ཞིག་དང་ལམ་དུ་ཕྲད་ནས་དེ་ལ་བྱིན་ཏེ་དེའི་ཉིན་མོ་དགེ་སློང་མ་དེའི་ཟན་ཆང་དོ། །བསོད་སྙོམས་པའི་ལག་ན་ཨུཏྤ་ལའི་མདོག་གིས་ཟས་བྱིན་པ་བཟང་པོ་ཞིག་ཁྱེར་བ་བསྙེན་དགའ་བོས་མཐོང་ནས་ཁྱོད་ལ་འདི་སུས་བྱིན་ཞེས་དྲིས་ན་ཨུཏྤ་ལིའི་མདོག་གིས་བྱིན་ནོ་ཞེས་སྨྲས་སོ། །དེའི་ཕྱིར་དེ་ཉིན་ཡང་བསོད་སྙོམས་བླངས་ནས་སྔ་མ་དགེ་འདུན་ལ་ཕུལ་ཕྱི་ནས་བླངས་པ་དག་བཟའ་ཞེས་བྱས་ན་བསྙེན་དགའ་བོས་ལམ་དུ་བསྒུགས་ཏེ་ཟན་བསླངས་པས་ན། དེ་ཉི་མ་གཉིས་སུ་ཟན་ཆད་པ་ལ་ཉི་ཚན་གྱིས་ཕོག་པས་ལུས་རྨྱ་སྟེ། འགྲོ་མ་ནུས་ན་སྲང་དུ་འགྱེལ་བ་དང༌། འཇིག་རྟེན་པ་དག་ན་རེ་དགེ་སློང་མ་ཤཱཀྱ་གཞོན་ནུ་དག་མཐོང་བས་འདོད་ཆགས་ཀྱིས་བརྒྱལ་ལོ་ཞེས་འཕྱ་བ་ལས། ཕྱིན་ཆད་དགེ་སློང་མ་གྲོང་དུ་འགྲོ་བ་ལ་བསོད་སྙོམས་སློང་དུ་མི་གནང་བར་བསླབ་པ་བཅས་སོ། །ཡང་དགེ་སློང་གང་ཞེས་བྱ་བ་ནི་བསྙེན་དགའ་བོ་སྟེ་གཞན་ཡང་དེ་དང་འདྲ་བའོ། །གཉེན་མ་ཡིན་པ་ཞེས་བྱ་བ་ནི་ཕ་མའི་ཟུང་བདུན་རྒྱུད་ཚུན་ཆད་དོ། །དགེ་སློང་མ་ཞས་བྱ་བ་ནི་ཨུཏྤ་ལའི་མདོག་སྟེ་གཞན་ཡང་དེ་དང་འདྲ་བའོ། །མལ་ཞེས་བྱ་བ་ནི་སྲང་ངོ༌། །གྲོང་དུ་བསོད་སྙོམས་སྤྱོད་ཅེས་བྱ་བ་ནི་གང་ན་སྲང་དང༌། སུམ་མདོ་དང༌། བཞི་མདོ་ཡོད་པའི་གྲོང་ངོ༌། །རང་གི་ལག་གིས་ཞེས་བྱ་བ་ནི་ལག་ནས་ལག་ཏུ་ལེན་པའོ། །བཅའ་བ་དང་བཟའ་ཞེས་བྱ་བ་ནི་བཟའ་བ་ལྔ་དང་བཅའ་བ་ལྔ་ལ་བྱའོ། །བླངས་ཞེས་བྱ་བ་ནི་བྱིན་ལེན་བྱས་པའོ། །འཆོས་སམ་ཟོས་ཞེས་བྱ་བ་ནི་མགྲིན་པར་མིད་པའོ། །དགེ་སློང་དེས་ཞེས་བྱ་བ་ནི་གང་ཡིན་པའོ། །ཕྱི་རོལ་གྱི་ཀུན་དགའ་ར་བ་ཞེས་བྱ་བ་ལ། ཕྱི་རོལ་དུ་གྱུར་པ་ནི་གཙུག་ལག་ཁང་སྟེ། གཙུག་ལག་ཁང་དུ་སོང་ཤིག་པའོ། །དགེ་སློང་རྣམས་ཀྱི་གན་དུ་ཞེས་བྱ་བ་ནི་གཙུག་ལག་ཁང་དེ་ན་དགེ་སློང་དུ་འཁོད་པའོ། །
ཤོགས་ཤིག་ཅེས་བྱ་བ་ནི་དེ་ན་དགེ་སློང་ཇི་སྙེད་འཁོད་པ་དེ་ལ་མཐོལ་ཞིང་བཤགས་པར་བྱའོ། །སྨད་པ་ཞེས་བྱ་བ་ནི་ཉེས་པ་བྱུང་བ་དེ་སྨད་པར་རིགས་པས་ན་སྨད་པའོ། །མི་རིགས་ཞེས་བྱ་བ་ནི་འགལ་བའི་སོ་སོར་བཤགས་ཞེས་བྱ་བ་ནི་དགེ་སློང་མང་པོ་ལ་བཤགས་པའོ། །དེ་ལ་ལྟུང་བ་ནི་དགེ་སློང་གིས་གཉེན་མ་ཡིན་པའི་དགེ་སློང་མ་ལམ་ན་འདུག་པའི་བསོད་སྙོམས་ཀྱི་ཕྱིར་འགྲོ་བ་ལ་གཉེན་མ་ཡིན་པའི་འདུ་ཤེས་ཀྱིས་རང་གི་ལག་གིས་བཅའ་བ་དང༌། བཟའ་བ་བླངས་ནས་འཆོས་སམ་ཟོས་ན་སོ་སོར་བཤགས་པར་འགྱུར་རོ། །གཉེན་མ་ཡིན་པ་ལ་ཐེ་ཚོམ་ན་ཡང་བཤགས་པར་འགྱུར་རོ། །གཉེན་ཡིན་པ་ལམ་ཡིན་པར་འདུ་ཤེས་པ་དང༌། ཐེ་ཚོམ་ན་ཡང་ཉེས་བྱས་རེ་རེར་འགྱུར་རོ། །སོ་སོར་བཤགས་པ་དང་པོའོ། །སོ་སོར་བཤགས་པ་གཉིས་པ་སྟེ། དགེ་སློང་མས་དགེ་སློང་ཟན་ཟ་བ་ལ་སྟོབས་པ་དང་སྔ་ནས་སྦྱོར་དུ་བཅུག་པ་ཟར་མི་གནང་བའི་གླེང་གཞི་ནི་མཉན་དུ་ཡོད་པ་ན་སྟེ། ཁྱིམ་བདག་ཅིག་གིས་དགེ་འདུན་བཤོས་ལ་སྤྱན་དྲངས་པ་དང༌། ནང་པར་དྲུག་སྡེ་རྣམས་ཀྱིས་དགེ་སློང་མ་སྦོམ་དགའ་མོ་ལ་སོགས་པ་བཅུ་གཉིས་སྡེའི་དེར་དོད་ནས་འདི་སྐད་བསྒོ་སྟེ་ཁྱིམ་བདག་དད་པ་རྣམས་ཀྱིས་དེར་དགེ་འདུན་སྤྱིར་མགྲོན་དུ་བོས་པས་ན་ཁྱེད་ཀྱིས་ངེད་ལ་བཟའ་བ་དང་བཅའ་བ་ཞིམ་པོ་ལས་མང་དུ་སྦྱིན་ཆུག་ཤིག་ཅེས་བསྒོ་སྟེ། དེས་ཀྱང་དེ་བཞིན་དུ་བྱས་ཏེ་བཤམས་ནས་ཡོན་བདག་ཟན་འདྲིམ་པའི་ཚེ་སྒོམ་དགའ་མོ་རྒན་རིམས་སུ་འདུག་ནས་ཁྱིམ་བདག་ལ་འཕགས་པ་འདི་ནི་ཤཱཀྱའི་རིགས་ལས་རབ་ཏུ་བྱུང་བ་སྡེ་སྣོད་གསུམ་སྨྲ་བ་རིགས་པ་ལ་གྲོལ་བའི་སྤོབས་པ་ཅན་ཡིན་གྱིས། དེ་ལ་ཡང་བྱིན་ཅིག་དེ་བཞིན་དུ་དྲུག་སྡེ་པོ་ཀུན་གྱི་ཡོན་ཏན་བརྗོད་ཅིང་ཟས་ཀྱིས་སྟོབས་སུ་བཅུག་པ་ནས། དེ་ན་དགེ་སློང་ཁ་ཅིག་ནི་ཟན་ཆད། ཁ་ཅིག་ནི་ཁུར་བ་ཆད་ཁ་ཅིག་ནི་ཡེ་ནས་ཟན་མ་ཐོབ་པས། དེ་ན་དགེ་སློང་ཉོན་མོངས་པ་མ་སྤངས་ཤིང་འདོད་པས་གཟིར་བ་རྣམས་ཀྱིས་ཁྱིམ་བདག་ལ་སྤྱོས་ཏེ། རྒྱུ་མེད་ན་ཅིའི་ཕྱིར་བཅོམ་ལྡན་འདས་དང་དགེ་སོང་གི་དགེ་འདུན་བཤོས་གསོལ་ཞེས་བྱས་ན། ཡོན་བདག་གིས་སྨྲས་པ། བདག་གིས་ཞལ་ཟས་མང་ཞིག་སྦྱར་ན། སྦོམ་དགའ་མོས་དགེ་སློང་དྲུག་སྡེ་པོ་ལ་ཡང་ནས་ཡང་དུ་བསྟབས་པས་དེ་ལྟར་འཆད་པར་གྱུར་ཏོ་ཞེས་སྨྲས་པ་དང༌། དེ་ལྟར་དགེ་སློང་དག་གིས་སྙན་དུ་གསོལ་ནས་དེ་ལྟར་ན་དགེ་སློང་
དག་དགེ་སློང་མ་ཤོམ་པ་ལ་དགེ་སློང་ཟས་ཟོས་ཟིན་གྱི་བར་དུ་ཁ་རོག་འདུག་ཞིག་ཅེས་བསྒོ་ཤིག །དེ་ནས་དགེ་སློང་འཁོད་བདག་སུས་ཀྱང་མ་སྨྲས་ན། དགེ་སློང་ཐམས་ཅད་ལ་བཤགས་པར་འགྱུར་རོ། །ཞེས་འདུལ་བ་བསླབ་པའི་གནས་བཅས་སོ། །དགེ་སློང་མང་པོ་ཞེས་བྱ་བ་ནི་གཉིས་ཡན་ཆད་ལ་མང་པོ་ཞེས་བྱའོ། །ཁྱིམ་ནི་བྲམ་ཟེ་དང་ཁྱིམ་བདག་གི་ཁྱིམ་མོ། མགྲོན་དུ་པོས་ཞེས་བྱ་བ་ནི་བཟའ་བ་ལྔ་དང་བཅའ་བ་ལྔ་ལ་བོས་པའོ། །དེ་ན་གལ་ཏེ་དགེ་སློང་མ་ཞིག་བསྒོ་ཞིང་འདུག་པ་ཞེས་བྱ་བ་ནི་སྦོམ་དགའ་མོ་སྟེ། གཞན་ཡང་དེ་དང་འདྲ་བའོ། །དགེ་སློང་གིས་ཞེས་བྱ་བ་ནི་དེ་ན་འཁོད་པ་དག་གོ །དགེ་སློང་མ་ཞེས་བྱ་བ་ནི་སྦོམ་དགའ་མོ་དང་གཞན་ཡང་རུང་ངོ༌། །དེ་ལ་འདི་སྐད་ཅེས་བསྒོ་ཤིག་ཅེས་བྱ་བ་ནི་མོ་ཟེར་བ་བཟློག་པའོ། །ཟན་ཟོས་ཀྱི་བར་དུ་སྡོད་ཅིག་ཅེས་བྱ་བ་ནི་ཟན་ཟོས་ཀྱི་བར་དུ་ཟེར་དུ་མི་གཞུག་པའོ། །དགེ་སློང་གཅིག་གིས་ཀྱང་དགེ་སློང་མ་དེ་ལ་སྨྲ་ར་མ་སྤོབས་ན་ཞེས་བྱ་བ་ནི། དགེ་སློང་ཟན་ཟབ་གཅིག་གིས་ཀྱང་མ་སྨྲས་པའོ། །དགེ་སློང་དེ་དག་ཐམས་ཅད་ཕྱི་རོལ་ཀུན་དགའ་ར་བར་དེང་ཤིག་ཅེས་བྱ་བ་ནི་གྲོང་ལས་ཕྱི་རོལ་དུ་གྱུར་པ་ཞིག་གཙུག་ལག་ཁང་སྟེ། དེར་དེང་ལ་དེ་ན་དགེ་སློང་ཇི་སྙེད་པ་ལ་བཤགས་པར་བྱའོ། །ཉེས་པ་ནི་དགེ་སློང་ཁ་ཅིག་ཡང་ཐོག་ན་ཟ་ཞིང་འཁོད། ཁ་ཅིག་ནི་བར་ཁང་ན་ཟ་ཞིང་འཁོད་ན་དགེ་སློང་མ་དེ་སྐད་ཟེར་བ་དང༌། དགེ་སློང་དག་གིས་དགེ་སློང་མ་མ་ཟེར་ཅིག་ཅེས་བསྒོ་ཤིག །དེ་སྐད་མ་བྱས་ན་སོ་སོར་བཤགས་པར་འགྱུར་རོ། །དགེ་སློང་ཁ་ཅིག་ནི་འོག་ཁང་ན་ཟན་ཟ་ཁ་ཅིག་ནི་སྒོ་ཁང་ན་ཟ་ཞིང་འཁོད་པ་ལས་དེ་ན་དགེ་སློང་མ་ཞིག་བསྒོ་ཞིང་འདུག་ན། དེ་ལ་མ་ཟེར་ཅིག་ཅས་བསྒོ་ཤིག །དགེ་སློང་གཅིག་གིས་ཀྱང་མ་བསྒོ་ན་དགེ་སློང་ཀུན་ལ་སོ་སོར་བཤགས་པར་འགྱུར་རོ། །དགེ་སློང་མ་དེ་ཡོན་བདག་ཡིན་ནམ་གོ་རིམས་སུ་བབ་པ་ལ་སྦྱིན་དུ་བཅུག་པ་ནི་ཉེས་པ་མེད་སོ་སོར་བཤགས་པ་གཉིས་པའོ། །སོ་སོར་བཤགས་པ་གསུམ་པ་སྟེ། དགེ་སློང་གིས་བསླབ་པའི་སྡོམ་པ་བྱིན་པའི་ཁྱིམ་དུ་སློང་དུ་མི་གནང་བའི་གླེང་གཞི་ནི་ཡུལ་ཡངས་པ་ཅན་ན་སྟེ། དེའི་ཚེ་ན་ཁྱིམ་བདག་དེད་དཔོན་སེང་གེ་ཞེས་བྱ་བ་ཞིག་ཡོད་དེ། དེ་སྔོན་ཆད་མུ་སྟེགས་ཅན་ལ་མོས་དད་ཅིང་དགའོ། །ཕྱིས་བཅོམ་ལྡན་འདས་ཀྱིས་དེད་དཔོན་དེ་ལ་ཆོས་བཤད་པས་ན་བདེན་པ་མཐོང་བར་གྱུར་ཏེ། དགེ་སློང་གི་དགེ་འདུན་ལ་མངོན་
པར་དད་པས་མུ་སྟེགས་ཅན་འོང་ན་ཡང་སྒོ་གཅོད་དོ། །ཤཱཀྱའི་དགེ་སློང་དང༌། དགེ་སྦྱོང་དག་འོང་ན་ནང་དུ་བོས་ཏེ་ཅི་འདོད་པ་བྱིན་ཞིང་རྒྱུན་དུ་སྦྱིན་གཏོང་ལ་ཞུགས་ཏེ། ཚོང་དང་ཞིག་གི་ལས་ལ་སོགས་པ་སོ་ནམ་ནི་བཏང་བས་ན་ཁྱིམ་བདག་དེ་ཡང་ལོངས་སྤྱོད་འགྲིབས་ཏེ་དབུལ་པོར་གྱུར་ཏོ། །དེ་ནས་དུས་ཕྱི་ཞིག་ན་ཤཱཀྱའི་མི་རྣམས་ཕོངས་ན་སྤྱོད་པ་ལ་ཞུགས་ཏེ། དེད་དཔོན་སེང་གེ་འདི་ནི་སྔོན་ཆད་མུ་སྟེགས་ཅན་ལ་དད་པའི་ཚེ་ན་ནི་ཕྱུག་ཅིང་ནོར་དང་ལྡན། ད་ནི་ཆོས་ལ་དད་པར་གྱུར་ནས་དབུལ་པོར་གྱུར་ཏོ་ཞེས་མུ་སྟེགས་ཅན་དག་འཕྱའོ་ཞེས་བཅོམ་ལྡན་འདས་ཀྱི་སྙན་དུ་བདས་ནས། དེ་ཉིད་ཉེས་པའི་དམིགས་སུ་གྱུར་ནས་དགེ་སློང་རྣམས་ལ་བཀའ་སྩལ་པ་ཕྱིན་ཆད་ཁྱིམ་བདག་དད་པ་བདེན་པ་མཐོང་བ་དེའི་ཁྱིམ་དུ་འགྲོ་བར་མི་བྱ། ཟན་མི་ཟ་བར་སྔོམ་པ་ཆོས་ཤིག་ཅེས་གསུངས་ནས་དགེ་འདུན་རྣམས་ཀྱིས་གསོལ་པ་དང་ཞུ་བའི་ལས་གྱིས་སྡོམ་པ་བཅས་སོ། །སྡོམ་པ་མ་བཅས་པའི་སྔོན་རོལ་དུ་ཚེ་དང་ལྡན་པ་ཤཱ་རིའི་བུ་དང༌། མཽད་གལ་གྱི་བུ་གཉིས་ལྗོངས་སུ་སོང་བའི་ཚེ། དེད་དཔོན་སེང་གེས་དགེ་སློང་དེ་གཉིས་ཕྱིན་ཆད་པའི་དེར་བཤོས་གསོལ་ཅིག་ཅེས་སྤྱན་དྲངས་སོ། །སྡོམ་པ་བཅས་པའི་འོག་ཏུ་འཕགས་པ་དེ་གཉིས་དེད་དཔོན་སེང་གེའི་གན་དུ་འགྲོ་བ་དྲུག་སྡེས་མཐོང་ནས། འཕགས་པ་གར་བཞུད་ཅེས་དྲིས་ན། དེར་ཟན་ལ་འགྲོའོ་ཞེས་བྱས་སོ། །དེ་དག་ན་རེ་དེའི་ཁྱིམ་དུ་མི་འགྲོ་བར་སྡོམ་པ་བཅས་ན། ད་དེར་འགྲོ་བ་ལ་དབང་གནམ་ཞེས་བྱས་ན། དེ་གཉིས་ན་རེ་སངས་རྒྱས་ལ་ཞུས་ན། སྡོམ་པ་མ་བཅས་པའི་སྔོན་རོལ་དུ་བོས་པས་ན་གནང་ངོ༌། །དེ་ལྟར་སྔར་བོས་པས་གནང་ན་ནི་དེད་ཀྱང་ཁྱིམ་བདག་བདེན་པ་མཐོང་བའི་ཚེ། བོས་ཀྱིས་འགྲོའོ་ཞེས་དྲུག་སྡེ་པོ་ཡང་དེར་དོང་བ་དང༌། སྔར་དགེ་སློང་གཉིས་ཀྱི་ཟན་ལས་མ་སྦྱར་བ་ལས་དྲུག་སྡེས་བསྣན་པས་ཟན་ཀུན་གཏུགས་ལ། དེའི་བྱིས་པ་རྣམས་ཟན་ཆད་དེ་བཀྲེས་པས་འཕྲལ་དུ་སྦྱིན་དུ་མེད་པས་ངུ་ཞིང་ཙ་ཙིའི་འདོན་པ་ལས་སྙན་དུ་བདས་ཏེ། བཅོམ་ལྡན་འདས་ཀྱི་བཀས་སྨད་ནས། དེ་ལྟར་དགེ་འདུན་གྱིས་སྡོམ་པ་བྱིན་པར་ཤེས་བཞིན་དུ་སོང་སྟེ་ཟས་ཟོས་ན་སོ་སོར་བཤགས་པར་འགྱུར་རོ་ཞེས་བསླབ་པ་བཅས་སོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་སོ། །བསླབ་པའི་ཁྱིམ་ཞེས་བྱ་བ་ནི་འཕགས་པའི་རྒྱུན་དུ་ཞུགས་པ་ཡན་ཆད། དགྲ་
བཅོམ་པ་མན་ཆད་སློབ་པའོ། །ཁྱིམ་ཞེས་བྱ་བ་ནི་ཁྱིམ་བདག་དང་བྲམ་ཟེའི་ཁྱིམ་མོ། །བསླབ་པའི་སྡོམ་པ་སྦྱིན་པར་ཤེས་ཞེས་བྱ་བ་ནི་གསོལ་བའི་ལས་ཀྱིས་སོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ་གཞན་ཡང་དེ་དང་འདྲའོ། །དེ་ལྟར་དགེ་འདུན་གྱིས་བསླབ་པའི་སྡོམ་པ་བྱིན་པར་ཤེས་ཞེས་བྱ་བ་ནི་བསྒོ་བའོ། །སྔར་བོས་ཞེས་བྱ་བ་ནི་ཤཱ་རིའི་བུ་ལྟ་བུ་དག་གོ །སྔར་མ་བོས་པ་ནི་དྲུག་སྡེ་དག་གིས་ཕྱིས་སོང་བའོ། །རང་གི་ལག་གིས་ཞེས་བྱ་བ་ནི་རང་གིས་ལེན་ཅིང་ཟ་བའོ། །ཕྱི་རོལ་དུ་ཀུན་དགར་དེངས་ཤིག་ཅེས་བྱ་བ་ནི་གཙུག་ལག་ཁང་ན་དགེ་སློང་གནས་པ་དག་ལ་མཐོལ་བར་བྱའོ། །ལྟུང་བར་འགྱུར་བ་ནི་དགེ་སློང་གི་དགེ་འདུན་གྱི་སློབ་མའི་ཁྱིམ་དུ་གྱུར་པ་བསླབ་པའི་སྡོམ་པ་བྱིན་པར་ཤེས་མ་ཐག་ཏུ་སྔར་མ་པོས་བར་སོང་ནས་རང་གི་ལག་གིས་བཅའ་བ་དང༌། བཟའ་བ་བླངས་ཏེ་ཟོས་སམ་འཆོས་ན་ཐམས་ཅད་དུ་སོ་སོར་བཤགས་པར་འགྱུར་རོ། །སྔར་མགྲོན་དུ་བོས་པ་ནི་མ་གཏོགས་སོ། །སོ་སོར་བཤགས་པ་བཞིའི་གླེང་གཞི་ནི་གྲོང་ཁྱེར་སེར་སྐྱའི་གནས་ན་སྟེ། དེ་ན་དགོན་པའི་ལྷ་ཁང་ཞིག་ཏུ་སངས་རྒྱས་དང་དགེ་འདུན་དག་དབྱར་ཚུལ་དུ་ཞུགས་ནས། དབྱར་ཚུལ་ནས་བྱུང་བའི་ཚེ་ཤཱཀྱ་དག་བཅོམ་ལྡན་འདས་ལ་ཆོས་ཉན་དུ་ལྷགས་ཏེ་ཆོས་བཤད་པ་ན་དད་པ་སྐྱེས་ཏེ་སང་གི་གདུགས་ཚོད་བདག་གིས་སྦྱོར་ཏེ་གསོལ་ན་སང་གུད་དུ་མི་གཤེགས་པར་ཅི་གནང་ཞེས་གསོལ་ན་ཅང་མི་གསུང་བས་དེ་བཞིན་དུ་གནང་ངོ༌། །དེ་དག་གིས་དེའི་ནུབ་མོ་ཁྱིམ་ཟས་ཞིམ་དགུ་སྦྱར་ཏེ། ནང་པར་ཤིང་རྟ་བཀང་ནས་བུད་མེད་དག་མདུན་དུ་བཏང་བ་དང་ལམ་དུ་རྐུན་པོ་དག་གིས་བཅོམ་ནས། ཟས་ནི་མ་ཕྲོགས་ཀྱིས་བུད་མེད་ཀྱི་གོས་དང་རྒྱན་དག་ཕྲོགས་པ་དང༌། བུད་མེད་དག་གིས་ཕྱིར་ཁྱིམ་བདག་སྦྲན་ཏེ། སྐྱེས་པ་དག་ནི་མི་རྒོད་སྙེགས་སུ་དོང་ངོ༌། །བུད་མེད་དག་ནི་ཤིང་ཁྲོད་ན་གབ་ཅིང་འཁོད་ཟས་དང་སྐོམ་ནི་ཤིང་རྟ་བཀང་སྟ་ལ་མཁན་བཞག་གོ །དེ་ནས་དྲུག་སྡེ་རྣམས་ཀྱིས་བསམས་པ་ཤཱཀྱ་དག་ལྟ་ཕྱུག་པས། དེ་ཙམ་སྟོན་མོས་ར་རོ་བར་འཁོད་ཀྱིས། འུ་བུ་ལྟ་བརྗེད་ཀྱིས་བདག་ཅག་བསོད་སྙོམས་ལ་དོང་ཞེས་ནས་དོང་བ་དང༌། ལམ་ཁ་ན་ཤིང་རྟ་ཟས་ཀྱིས་བཀང་བདག་མཐོང་ནས་བུད་མེད་དག་ཀྱང་བཙལ་ཏེ་རྙེད་པས། ནན་གྱིས་མ་དང་བཞིན་དུ་བཀུག་ནས་གཅེར་བུར་ཟས་འདྲིམ་དུ་བཅུག་ཅིང་དེ་དག་གིས་ཀྱང་ཁ་ངན་གྱིས་འཕྱས་
འདོགས་ཤིང་ཟན་ཟོས་ནས་ཕྱིར་ལྷ་ཁང་དུ་སོང་ངོ༌། །དེ་ནས་ཕྱིས་མི་རྒོད་དག་ཟིན་ནས་མི་རྒོད་ནི་སླར་བཏང་སྟེ། ཤཱཀྱ་རྣམས་ལྷ་ཁང་དུ་ལྷགས་ནས་ཟན་འདྲིམ་པ་ལ་ཞུགས་པ་དང༌། བུད་མེད་དག་དྲུག་སྡེ་རྣམས་ལ་མི་འདྲིམ་ནས། ཅིའི་ཕྱིར་དེ་དག་ལ་མི་འདྲིམ་ཞེས་ཁྱིམ་ཐབ་དག་གིས་བྱས་ན། དེ་དག་གིས་ད་ཅི་ཡང་ཟོས་ཟིན་པའི་སྟེང་དུ་ངེད་ལ་མི་སྙན་པ་ཟེར་གྱིས་མི་འདྲིམ་མོ་ཞེས་འདྲིམ་དུ་མ་བཏུབ་པོ། །དེ་ནས་གཞན་དག་གིས་དྲིས་ན་ཟོས་པ་བདེན་ནོ་ཞེས་ཁས་བླངས་སོ། །དེ་ནས་དགེ་སློང་དག་ན་རེ་དེ་ལྟར་བུའི་འཇིགས་པ་ན། དགེ་སློང་ཟན་ཟ་བའི་མི་རིགས་སོ། །ཞེས་མ་དད་པས་ན། ཕྱིན་ཆད་དེ་ལྟ་བུའི་འཇིགས་པ་ན་ཟན་ཟ་ན་སོ་སོར་བཤགས་པར་འགྱུར་རོ་ཞེས་བཅས་སོ། །དགེ་འདུན་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་སོ། །དགོན་པའི་གནས་ཞེས་བྱ་བ་ནི་གཞུ་ལྔ་བརྒྱ་ལ་རྒྱང་གྲགས་གཅིག་སྟེ། དེ་ཙམ་གྱིས་ན་གྲོང་ནས་དེ་ཕན་ཆད་ནི་དགོན་པ་ཞེས་བྱ་སྟེ། དེ་ན་གཙུག་ལག་ཁང་ཅི་ཡོད་པ་ནི་དགོན་པའི་གནས་ཞེས་བྱའོ། །དོགས་པ་དང་བཅས་པར་ཤེས་ཞེས་བྱ་བ་ནི་རྐུན་པོ་དང་གཡོན་ཅན་ཡོད་པར་ཤེས་པའོ། །འཇིགས་པ་དང་བཅས་པར་ཤེས་ཞེས་བྱ་བ་ནི་སེང་གེ་དང་སྟག་གཟིག་ཡོད་པར་ཤེས་སོ། །འཇིགས་ཤིང་ཉམ་ང་བ་ཞེས་བྱ་བ་ནི་ཤ་སྦྲང་དང༌། སྦྲང་བུ་མཆུ་རིངས་དང་རླུང་དང་སྦྲུལ་དག་གིས་རེག་པའོ། །ཡང་དགེ་སློང་གང་ཞེས་བྱ་བ་ནི་དྲུག་སྡེ་སྟེ། གཞན་ཡང་དེ་དང་འདྲ་བའོ། །ནགས་མ་བརྟགས་ཞེས་བྱ་བ་ནི་གསོལ་བ་དང་ཞུ་བའི་ལས་ཀྱིས་ནགས་རྟོགས་པར་བྱེད་པའི་དགེ་སློང་ཞིག་སྐོས་ཤིག་ཅེས་བྱུང་བ་ལས། ནགས་རྟོག་པའི་དགེ་སློང་དེས་ཀྱང་བརྟགས་ན་ནི་ཉེས་པ་མེད་ཀྱིས་མ་བརྟགས་ན་ཉེས་པར་རིག་པར་བྱའོ། །ཀུན་དགའི་ཕྱི་རོལ་ཞེས་བྱ་བ་ནི་གཙུག་ལག་ཁང་གི་ཕྱི་རོལ་ཏོ། །བཟའ་བ་དང་བཅའ་བ་ཞེས་བྱ་བ་ནི། བཟའ་བ་ལྔ་དང་བཅའ་བ་ལྔ་ལ་བྱའོ། །བླངས་ཞེས་བྱ་བ་ནི་བྱིན་ལེན་བྱས་པའོ། །ཟོས་པ་ཞེས་བྱ་བ་ནི་མགྲིན་པར་མིད་པའོ། །དགེ་སློང་དེས་ཞེས་བྱ་བ་ནི་དགེ་སློང་གང་ཡིན་པའོ། །དགེ་སློང་རྣམས་ལ་ཞེས་བྱ་བ་ནི་དགེ་སློང་གང་འཁོད་པའོ། །སོ་སོར་བཤགས་པར་བྱ་བ་ཞེས་བྱ་བ་ནི་མཐོལ་བར་བྱ་བའོ། །སྨད་པའི་གནས་སུ་གྱུར་པ་ཞེས་བྱ་བ་ནི་མི་རིགས་མི་ཚུལ་བའོ། །ཉེས་པ་ནི་དགེ་སློང་ནགས་མ་བརྟགས་པར་འདུ་ཤེས་བཞིན་དུ་ཀུན་
དགའི་ཕྱི་རོལ་དུ་བཅའ་བ་དང་བཟའ་བ་བླངས་ཏེ་འཆོས་སམ་ཟོས་ན་སོ་སོར་བཤགས་པར་འགྱུར་རོ། །མ་བརྟགས་པར་ཐེ་ཚོམ་ན་ཡང་སོ་སོར་བཤགས་པར་འགྱུར་རོ། །བརྟགས་པ་ལ་མ་བརྟགས་པར་འདུ་ཤེས་སམ། ཐེ་ཚོམ་ན་ཡང་ཉེས་བྱས་སུ་འགྱུར་རོ། །ནགས་རྟོག་པར་བྱེད་པ་དེ་ཤིའམ་བྲོས་ན་ལྟུང་བ་མེད་དོ། །སོ་སོར་བཤགས་པའི་མདོ་འདོན་པ་རྣམ་པ་ལྔ་ལས་སོ་སོར་བཤགས་པ་མི་བརྗེད་པའི་ཚིག་གོ། །།སོ་སོར་ཐར་པའི་མདོའི་དོན་པ་ལྔ་པ་ལས་བརྩམས་ཏེ་ཚེ་དང་ལྡན་པ་དག་བསྲབ་པ་མང་པོ་ཆོས་འདི་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ལས་འབྱུང་ངོ་ཞེས་བྱ་བ་སྨྲས་སོ། །བསླབ་པ་མང་པོ་ཞེས་བྱ་བ་ནི་དགེ་སློང་གིས་ཡང་དག་པར་བསླབ་ཅིང་འདུལ་བ་ཕྲན་ཚེགས་ལ་སོགས་ཏེ། བསླབ་པའི་གནས་ཐམས་ཅད་ནས་འབྱུང་བའི་ཉེས་བྱས་ཐམས་ཅད་ཀྱང་བསླབ་པ་འདི་ཉིད་དུ་བསྡུ་བར་ལྟ་ཞིང་གྲངས་གཅིག་ཏུ་མ་ཆད་པའི་ཕྱིར་བསླབ་པ་མང་པོ་ཞེས་བྱའོ། །དགེ་སློང་གིས་གླུ་གར་རོལ་མོ་མི་བྱ་བ་དང་བརྡུང་བར་མི་སྤྱད་པ་དང་མཚལ་མི་ཉུག་པ་དང༌། རྒྱན་གྱིས་ལུས་ལ་མི་ཀླུབ་པ་དང༌། སྐྲ་སོ་མངས་ཀྱི་ས་བཤད་པར་མི་བྱ་བ་དང༌། མེ་ལོང་ལ་སོགས་པ་ལ་གདོང་མི་ལྟ་བ་དང༌། འཐབ་མོའི་ནང་དུ་འགྲོ་ཞིང་འདུག་པར་མི་བྱ་བ་དང༌། རྩེད་མོ་སྣ་ཚོགས་ཀྱི་ནང་དུ་མི་བྱ་བ་ལ་སོགས་པ་སྟེ། འདུལ་བ་ཕྲན་ཚེགས་དང་གཞུང་བླ་མ་དག་ལས་འབྱུང་བའི་བསླབ་པ་རྣམས་ཀྱང་དགེ་སློང་གིས་ཕྱི་ཕྱིར་བསླབ་ཅིང་བསྲུང་བ་ཡིན་མོད་ཀྱི་འདིར་མ་སྨོས་ཀྱི། གཞན་ནས་འབྱུང་བར་རིག་པར་གྱིས་ཤིག་འདིར་ནི་རེ་ཞིག་ཤམ་ཐབས་དང༌། ཆོས་གོས་ཇི་ལྟར་བགོ་བ་དང༌། གྲོང་དུ་ཇི་ལྟར་འཇུག་ཅིང་ཁྱིམ་དུ་འདུག་པར་བྱ་བ་དང༌། བསོད་སྙོམས་བསླངས་པ་དང༌། བཟའ་བ་དང༌། ཆོས་འཆད་ཅིང་བསྟན་པའི་ཐབས་དང༌། བཤང་གཅི་བབ་བབ་ཏུ་མི་བྱ་བ་ལ་སོགས་པ་འཕྲལ་གྱི་བསླབ་པ་ལ་སོགས་པ་ཉུང་ཤས་ཤིག་བསྡུ་བའོ། །ཤམ་ཐབས་ཟླུམ་པོར་བགོ་བར་བྱ་ཞེས་བྱ་བའི་གླེང་གཞི་ནི་བཅོམ་ལྡན་འདས་གྲོང་ཁྱེར་ཁོར་མོ་འཇིག་གི་དྲང་སྲོང་གི་གནས་རི་དགས་རྒྱུ་བ་ན་བཞུགས་སོ། །ནམ་བཅོམ་ལྡན་འདས་ཀྱིས་དགེ་སློང་ལྔ་པོ་རྣམས་སྐྱོན་མེད་དེ་རབ་ཏུ་ཕྱུང་ནས་དངོས་པོར་བྱས་པ་དེ་ན་དེ་དག་ཀྱང་སྔོན་གོམས་པའི་ཚུལ་དུ་ཁྱིམ་པ་བཞིན་དུ་གྱོན་པ་བྲམ་ཟེ་དང་ཁྱིམ་
བདག་གིས་མཐོང་ནས་འཕགས་པ་དག་དེ་ལྟ་བུ་ནི་ནོར་ཅན་དང༌། ཚོང་དཔོན་དག་གྱོན་ན་ཁྱེད་ཀྱང་དེ་བཞིན་ནམ་ཞེས་ཟེར་རོ། །དེ་ལྟ་བུར་གྱུར་བ་དགེ་སློང་དག་གིས་བཅོམ་ལྡན་འདས་ལ་གསོལ་ཏོ། །བཅོམ་ལྡན་འདས་ཀྱིས་དགོངས་པ་ཁྱིམ་བདག་དག་ཟེར་བ་ནི་བདེན་ཏེ། སྔོན་གྱི་ཡང་དག་པར་རྫོགས་པའི་སངས་རྒྱས་ཀྱི་ཉན་ཐོས་དག་གིས་ཤམ་ཐབས་ཇི་ལྟ་བུར་གྱོན་པ་དགོངས་ཏེ་བྱའོ་ཞེས་གསུངས་པ་དང༌། ལྷ་རྣམས་ཀྱིས་གསོལ་པ་བཙུན་པ་འདི་ལྟ་སྟེ། གནས་གཙང་མའི་རིས་ཀྱི་ལྷ་རྣམས་བཞིན་ནོ། །བཅོམ་ལྡན་འདས་ཀྱིས་ཡེ་ཤེས་ཀྱིས་བརྟགས་ན་དེ་བཞིན་དུ་དེ་ནས་བཅོམ་ལྡན་འདས་ཀྱིས་བཀའ་སྩལ་པ། དེ་བས་ན་དགེ་སློང་དག་ངའི་ཉན་ཐོས་རྣམས་ཀྱིས་ཤམ་ཐབས་ཟླུམ་པོར་བགོ་བར་བསླབ་པར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །དགེ་སློང་ལྔ་པོ་དང་ཉེ་བ་ལྔ་པོ་དང་བཟང་པོ་དྲུག་ཅུ་སྡེ་དང་གཞན་ཡང་དགེ་སློང་གཅིག་གིས་གཅིག་རབ་ཏུ་ཕྱུང་བ་རྣམས་ཀྱང་ཤམ་ཐབས་ཟླུམ་པོར་གྱོན་ཞིང་ཚུལ་བཞིན་དུ་གནས་སོ། །ཧ་ཅང་རྩེངས་པ་ཡང་མ་ཡིན། ཞེས་བྱ་བ་ནི་སླད་ཀྱིས་དྲུག་སྡེ་དག་རབ་ཏུ་ཕྱུང་བ་སྟེ། དེ་དག་གིས་ཤམ་ཐབས་རབ་ཏུ་རྩེངས་ཤིང་གྱོན་པ་དང་དད་པའི་བྲམ་ཟེ་དང༌། ཁྱིམ་བདག་གིས་མཐོང་སྟེ། འཕགས་པ་དག་རྒྱན་པོ་པ་དང༌། དྭ་དང་ནལ་གྱི་བུ་དག་ནི་འདི་ལྟར་གྱོན་གྱི་འཕགས་པ་དག་དེ་ལྟར་གྱོན་མི་རིགས་ཀྱིས་ཤམ་ཐབས་བརྫེས་ལམ་གྱོན་ཅིག་བྱས་པ་དང༌། དེ་དག་རྗེ་ཐུར་གྱོན་ནས་ཁྱིམ་བདག་མ་དད་ཅིང་འཕྱ་བ་ལས་སྙན་དུ་བདས་ཏེ། ཁྱིམ་བདག་འཕྱ་བར་བདེན་གྱིས་ཞེས་ཤམ་ཐབས་ཧ་ཅང་རྩེངས་པ་མ་ཡིན་པར་བགོས་པར་བསླབ་པར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །རྩེངས་པ་མ་ཡིན་ཞེས་བྱ་བ་ནི་ཤམ་ཐབས་པུས་མོ་ལས་འདས་པ་ལ་བྱའོ། །ཧ་ཅང་འཇོལ་བ་མ་ཡིན་ཞེས་བྱ་བ་ནི་དྲུག་སྡེ་པོ་རྣམས་ཤམ་ཐབས་ལོང་བུ་ལས་འདས་ཏེ་ནར་བར་གྱོན་པ་ལས་དད་པའི་བྲམ་ཟེ་དང་ཁྱིམ་བདག་གིས་མཐོང་སྟེ་འཕགས་པ་དེ་ལྟ་བུ་ནི་ཡུལ་ཀ་ཏ་ན་ཞེས་བྱ་བ་ནི་རིགས་ཀྱི་མནའ་མ་དང་བུད་མེད་རྣམས་གྱོན་ཏེ། དེ་ལྟ་བུར་མི་རིགས་ཀྱིས་ཧ་ཅང་ནར་བར་མ་གྱོན་ཅིག་ཅེས་འཕྱ་བ་ལས་སྙན་དུ་བདས་ནས། འཕྱ་བ་ཡུས་ཀྱི་ཧ་ཅང་འཇོལ་བར་མི་བགོ་བར་བསླབ་པར་བྱའོ་ཞེས་བཅས་སོ། །གླང་པོ་ཆེའི་སྣ་ལྟར་མ་ཡིན་ཞེས་བྱ་
བ་ནི་དྲུག་སྡེ་རྣམས་ཤམ་ཐབས་མདུན་ལོགས་སུ་སྣ་གཉིས་པ་ལ་ནར་ཞིང་གྱོན་པ་ལས་འཕགས་པ་དག་དེ་ལྟ་བུ་ནི་བྱིས་པ་ཆུང་ངུ་དང༌། ར་རོ་བ་དག་གྱོན་པས་དེ་ལྟ་བུ་ནི་མི་རིགས་ཀྱིས་མ་གྱོན་ཅིག་ཅེས་འཕྱ་བ་ལས་སྙན་དུ་བདས་ནས་གླང་པོ་ཆེའི་སྣ་ལྟར་མ་ཡིན་པར་བསླབ་པ་བཅས་སོ།། ཏ་ལའི་ལོ་མ་ལྟར་མ་ཡིན་ཞེས་བྱ་བ་ནི། དྲུག་སྡེ་པོ་རྣམས་ཤམ་ཐབས་སྟ་ཟུར་པོ་རྣམས་ཀྱི་སྟེང་དུ་མེ་ཏོག་ཁ་གྱེས་པ་ལྟ་བུར་གྱོན་པ་ལས། ཁྱིམ་བདག་དག་འཕྱ་སྟེ་དེ་ལྟ་བུ་ནི་གར་མཁན་མང་པོའི་ནང་དུ་གྱོན་ཞིང་འོངས་ཏེ། འཕགས་པ་དག་དེ་ལྟ་བུ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ནས། ཏ་ལའི་ལོ་མ་ལྟར་མ་ཡིན་པར་ཤམ་ཐབས་བགོ་བར་བསླབ་པར་བྱའོ་ཞེས་བཅས་སོ། །ནས་ཅན་གྱི་ཕུར་མ་ལྟར་མ་ཡིན་ཞེས་བྱ་བ་ནི། དགེ་སློང་དྲུག་སྡེ་རྣམས་ཤམ་ཐབས་སྟ་ཟུར་གྱི་སྟེང་དུ་ཁྱིམ་པ་ལྟར་བསྡུས་ཏེ་ཐུབ་པོར་བྱས་ཏེ་གཞག་པས་ཁྱིམ་བདག་དག་འཕྱ་བར་གྱུར་ཏེ། དེ་ལྟ་བུ་ནོ་ནོར་ཅན་དང་ཚོང་དཔོན་དང་བུད་མེད་དག་ནི་དེ་ལྟར་གྱོན་ཏེ། འཕགས་པ་དག་ཅིའི་ཕྱིར་དེ་ལྟར་གྱོན་ཅེས་འཕྱ་བ་ལས་སྙན་དུ་བདས་ནས། ཤམ་ཐབས་ནས་ཅན་གྱི་ཕུར་མ་ལྟར་མ་ཡིན་པར་བགོ་བར་བྱའོ་ཞེས་བཅས་སོ། །སྦྲུལ་མགོའི་གདེངས་ཀ་ལྟར་མ་ཡིན་ཞེས་བྱ་བ་ནི་དྲུག་སྡེ་རྣམས་ཤམ་ཐབས་བགོས་ནས། ལྟེ་བའི་ཁུང་དུ་ཕྱིར་བཟློག་ཅིང་འཕྱང་བ་སྦྲུལ་མགོ་ལྟ་བུར་གྱོན་པ་དང༌། ཁྱིམ་བདག་དག་འཕྱ་སྟེ། འཕགས་པ་དག་རྒྱན་པོ་པ་ནི་དེ་བཞིན་གྱོན་ཏེ་དེ་ལྟ་བུ་མི་རིགས་སོ་ཞེས་འཕྱ་བ་ལས་སྙན་དུ་བདས་ནས། ཤམ་ཐབས་སྦྲུལ་མགོའི་གདེངས་ཀ་ལྟར་མ་ཡིན་པར་བགོ་བར་བྱ་ཞེས་བཅས་སོ། །ཤམ་ཐབས་རྣམ་པ་བདུན་ལྟ་བུའི་སྐྱོན་སྤངས་ཏེ། ཟླུམ་པོར་བགོ་བར་བསླབ་པར་བྱའོ་ཞེས་བཀའ་སྩལ་པ་དང༌། དགེ་སློང་རྣམས་ཆོས་གོས་ཇི་ལྟར་གྱོན་པ་ནི་མི་ཤེས་ནས། ཆོས་གོས་ཟླུམ་པོར་བགོ་བར་བསླབ་པར་བྱའོ་ཞེས་བཀའ་སྩལ་པ་དང༌། དྲུག་སྡེ་རྣམས་ཆོས་གོས་རྩེངས་པར་གྱོན་ཏེ་ཕུས་མོ་ལས་འདས་པར་གྱོན་པ་མི་མཛེས་ཏེ། དྭ་དང་ནལ་གྱི་བུ་དང༌། རྒྱན་པོ་བ་ནི་དེ་ལྟར་གྱོན་ཏེ་དེ་ལྟ་བུ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། ཁྱིམ་བདག་འཕྱ་བ་ནི་ཡུས་ཏེ་ཆོས་གོས་ཧ་ཅང་མ་རྩེངས་པར་བགོ་བར་བསླབ་པར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །ཆོས་གོས་མ་རྩེངས་པར་གྱོན་ཅིག་ཅེས་བཀའ་སྩལ་པ་དང༌། དྲུག་སྡེ་རྣམས་ཆོས་
གོས་ཧ་ཅང་འཇོག་ཞིང་ཤམ་ཐབས་ལས་མར་ཐལ་བར་གྱོན་པ་དང༌། འཕགས་པ་དག་དེ་ལྟ་བུ་ནི་ཡུལ་ཀ་ཏ་བུད་མེད་དང༌། རིགས་ཀྱི་མནའ་མ་རྣམས་ནི་དེ་ལྟར་གྱོན་ཏེ། དེ་ལྟ་བུ་གྱོན་པ་ནི་མི་རིགས་ཏེ་ཧ་ཅང་ནར་བར་མ་གྱོན་ཅིག་ཅེས་འཕྱ་བ་ལས་སྙན་དུ་བདས་ཏེ། ཁྱིམ་བདག་དག་འཕྱ་བ་ཡུས་ཏེ་ཆོས་གོས་ཧ་ཅང་འཇོལ་བ་མ་ཡིན་པར་བགོ་བར་བསླབ་པར་བྱའོ་ཞེས་བཅས་སོ། །དེ་བས་ན་ཆོས་གོས་ཧ་ཅང་རྩེངས་པ་ཡང་མ་ཡིན། འཇོལ་བ་ཡང་མ་ཡིན་པར་ཟླུམ་པོར་བགོ་བར་བྱའོ་ཞེས་གསུངས་སོ། །ཤིན་ཏུ་བསྡམས་ཞེས་བྱ་བ་ནི་དྲུག་སྡེ་རྣམས་རྐང་ལག་ཀྱོག་ཅིང་ཁྱིམ་པའི་དེར་དོང་བ་དང༌། དད་པའི་བྲམ་ཟེ་དག་ན་རེ་འཕགས་པ་དག་འབྱུང་པོ་དང༌། ཆང་གིས་སྨྱོས་པ་དང༌། ཤ་ཟས་ཟིན་པ་རྣམས་ནི་དེ་ལྟར་འགྲོའོ་ཞེས་འཕྱ་བ་ལས་སྙན་དུ་བདས་ཏེ། ལུས་ཤིན་ཏུ་བསྡམས་ནས་ཁྱིམ་པའི་ཁྱིམ་དུ་འགྲོ་བར་བྱའོ་ཞེས་བཅས་སོ། །ལེགས་པར་བགོས་པར་ཞེས་བྱ་བ་ནི་དྲུག་སྡེ་དག་ཆོས་གོས་བརྟུལ་ཏེ་ཕྲག་པ་ལ་གཟར་ནས་གྲོང་དུ་འགྲོ་བ་དང༌། ཁྱིམ་བདག་རྣམས་ནི་དེ་ལྟར་འགྲོའོ་ཞེས་འཕྱ་སྟེ། འཕགས་པ་དག་གྱད་རྣམས་གྱད་སར་འགྲོ་བ་ནི་དེ་བཞིན་ཏེ། དེ་ལྟར་མི་རིགས་ཀྱིས་མ་འགྲོ་ཞིག་ཅེས་འཕྱ་བ་ལས་སྙན་དུ་བདས་ནས། ལེགས་པར་བགོས་ཏེ་འགྲོ་བར་བྱའོ་ཞེས་འདུལ་བ་ལ་བསླབ་པ་བཅས་སོ། །སྒྲ་བསྐྱུངས་ཞེས་བྱ་བ་ནི་དྲུག་སྡེ་རྣམས་ཅ་ཅོ་འདོན་ཅིང་གྲོང་དུ་འདོང་པ་དང༌། དད་པའི་བྲམ་ཟེ་དང་ཁྱིམ་བདག་དག་འཕྱ་སྟེ། འཕགས་པ་དག་ཅང་གིས་མྱོས་པ་དང༌། བྱིས་པ་ཆུང་ངུ་རྣམས་དེ་བཞིན་འདོང་སྟེ། དེ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། སྒྲ་བསྐྱངས་ལ་ཁྱིམ་པའི་ཁྱིམ་དུ་འགྲོ་བར་བྱའོ་ཞེས་བཅས་སོ། །མིག་གཡེང་བར་མི་བྱ་བ་ནི་དྲུག་སྡེ་རྣམས་མིག་གཡན་མན་དུ་གཡེངས་ཤིང་འགྲོ་བས་ན། དད་པའི་ཁྱིམ་བདག་དག་འཕྱ་བར་གྱུར་པ་ལས་སྙན་དུ་བདས་ནས། མིག་གཡེངས་ཤིང་མ་འགྲོ་ཞིག་ཅེས་བཀའ་སྩལ་པ་དང༌། དྲུག་སྡེ་རྣམས་མིག་བཙུམས་ཤིང་འགྲོ་བ་ལས་རྟ་དང༌། ཤིང་རྟ་འདྲེན་པ་དག་དང་ཐུག་པར་གྱུར་ནས་ས་ལ་འགྱེལ་ཏེ་མི་གཙང་བ་དང༌། འདམ་རྫབ་ཀྱིས་གོས་པར་གྱུར་ཏེ། ཁྱིམ་བདག་དང་བྲམ་ཟེ་དག་འཕྱ་བ་ལས་སྙན་དུ་བདས་ནས། མིག་མི་བཙུམས་མི་གཡེང་བར་གཉའ་ཤིང་གང་ཙམ་དུ་བལྟ་ཞིང་ཁྱིམ་པའི་ཁྱིམ་དུ་འགྲོ་བར་བྱའོ་ཞེས་
གསུངས་སོ། །མགོ་མི་གཡོགས་པ་ཞེས་བྱ་བ་ནི་དྲུག་སྡེ་རྣམས་མགོ་གཡོགས་ནས་ཁྱིམ་དུ་དོང་པ་དང༌། ཁྱིམ་བདག་རྣམས་འཕྱ་སྟེ་རིགས་ཀྱི་མནའ་མ་ན་བ་རྣམས་ནི་དེ་བཞིན་དོང་སྟེ། འཕགས་པ་རྣམས་དེ་ལྟ་བུ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། མགོ་མི་གཡོགས་པར་གྲོང་དུ་འགྲོ་བར་བྱའོ་ཞེས་བཅས་སོ། །མི་བརྫེ་བ་ཞེས་བྱ་བ་ནི་དྲུག་སྡེ་རྣམས་ཤམ་ཐབས་བརྫེས་ཏེ་ཁྱིམ་དུ་འདོང་བ་དང༌། ཁྱིམ་བདག་རྣམས་ཀྱིས་འཕགས་པ་དག་སྐྱེས་པ་བཤང་གཅི་བྱ་བའམ། འདམ་རྫ་བ་དང་ཆུ་ཡོད་ན་དེ་ལྟར་བྱའི་དེ་ལྟ་བུ་མེད་པ་ལ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ནས། མི་བརྫེ་བར་ཁྱིམ་པའི་ཁྱིམ་དུ་འགྲོ་བར་བྱའོ་ཞེས་བསླབ་པ་བཅས་སོ། །གོས་མི་གཟར་བར་འགྲོ་ཞེས་བྱ་བ་ནི་དྲུག་སྡེ་རྣམས་ཆོས་གོས་གྱོན་པ་སླར་གཟར་ཏེ་དང་བ་ལས། ཁྱིམ་བདག་ན་རེ་རྒྱན་པོ་པ་དང༌། ནལ་གྱི་བུ་དག་ནི་དེ་ལྟར་འདོང་གིས་འཕགས་པ་དག་ཅིའི་ཕྱིར་དེ་ལྟར་དོང་ཞེས་འཕྱ་བ་ལས་སྙན་དུ་བདས་ནས། ཆོས་གོས་མི་གཟར་བར་ཁྱིམ་དུ་འགྲོ་བར་བྱའོ་ཞེས་བསླབ་པ་བཅས་སོ། །ཆོས་གོས་གཉའ་གང་དུ་བསྣོལ་ཞིང་འགྲོ་བ་ནི་དྲུག་སྡེ་རྣམས་ཆོས་གོས་བགོས་ནས་གཉའ་གང་དུ་བསྣོལ་ནས་གྲོང་དུ་དོང་བ་དང༌། བྲམ་ཟེ་དང་ཁྱིམ་བདག་དག་འཕྱ་སྟེ། འཕགས་པ་དྭ་དང་ནལ་གྱི་བུ་དག་ནི་དེ་བཞིན་དོང་སྟེ། དེ་ལྟ་བུ་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། གཉའ་གོང་དུ་བསྣོལ་ཏེ་གྲོང་དུ་མི་འགྲོ་བར་བྱའོ་ཞེས་བཅས་སོ། །ཕྲག་པ་གཉིས་ཀར་མི་གཟར་བར་འགྲོ་ཞེས་བྱ་བ་ནི་དྲུག་སྡེ་རྣམས་གོས་ཕྲག་པ་གཉིས་ཀ་ལ་གཟར་ནས་འགྲོ་བ་ལས་ཁྱིམ་བདག་རྣམས་ན་རེ། འཕགས་པ་དག་གཡོག་བྱེད་པ་ནི་དེ་ལྟར་བྱེད་དེ་དེ་ལྟ་བུ་མི་རིགས་སོ་ཞེས་འཕྱ་བ་ལས་སྙན་དུ་བདས་ནས་ཕྲག་པ་གཉིས་ཀ་ལ་མི་གཟར་བར་གྲོང་དུ་འགྲོ་བར་བསླབ་པར་བྱའོ་ཞེས་བསླབ་པ་བཅས་སོ། །བྲང་བས་འགྲོ་བ་མ་ཡིན་ཞེས་བྱ་བ་ནི་དྲུག་སྡེ་རྣམས་རྐང་པའི་བྲང་བས་ཁྱིམ་དུ་དོང་བ་དང༌། ཁྱིམ་བདག་དག་འཕྱ་སྟེ། འཕགས་པ་བྱིས་པ་ཆུང་དུ་ཤིང་ལ་རྩེ་བ་དང༌། རྐང་པའི་མཐིལ་ས་པ་རྣམས་ནི་དེ་ལྟར་འགྲོ་སྟེ། དེ་ལྟ་བུ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། བྲང་བས་གྲོང་དུ་མི་འགྲོ་བར་བྱའོ་ཞེས་བསླབ་པ་བཅས་སོ། །འཇལ་ཐབས་སུ་འགྲོ་བར་མི་བྱ་ཞེས་བྱ་བ་ནི་དྲུག་སྡེ་རྣམས་གོམ་པ་འཇལ་ཐབས་སུ་གྲོང་དུ་དོང་བ་ལ། ཁྱིམ་
བདག་དག་འཕྱ་སྟེ་དེ་ལྟ་བུ་ནི་འཇིག་རྟེན་ན་བཟོ་བོ་དང༌། ཕྱ་མཁན་རྣམས་དེ་ལྟར་བྱེད་དེ་དེ་ལྟར་མ་བཞུད་ཅིག་ཅེས་འཕྱ་བ་ལས་སྙན་དུ་བདས་ཏེ། གྲོང་དུ་གོམ་པ་བརྐྱང་ཞིང་འཇལ་ཐབས་སུ་འགྲོ་བར་མི་བྱའོ་ཞེས་བསླབ་པ་བཅས་སོ། །མི་མཆོད་པར་འགྲོ་བར་བྱ་བ་ནི་དྲུག་སྡེ་རྣམས་ཤིང་ཐགས་དེ་དག་ལ་མཆོད་ཞིང་དོང་བས་བྲམ་ཟེ་དང་ཁྱིམ་བདག་དག་འཕྱ་སྟེ། འཕགས་པ་དག་འཇིགས་ཤིང་སྐྲག་པ་ནི་དེ་ལྟར་དོང་སྟེ། དེ་ལྟ་བུ་མི་རིགས་ཀྱིས་དེ་ལྟར་མ་བྱེད་ཅིག་ཅེས་འཕྱ་བ་ལས་སྙན་དུ་བདས་ཏེ། ཁྱིམ་བདག་འཕྱ་བ་ཡུས་ཀྱི་གོང་བུ་དང༌། ཤིང་ཐགས་ལ་མཆོང་ཞིང་མ་འགྲོ་བར་ལམ་དུ་དེང་ལ་མི་མཆོང་བར་གྲོང་དུ་འགྲོ་བར་བྱའོ་ཞེས་བསླབ་པ་བཅས་སོ། །ཙོག་ཕུར་མ་ཡིན་ཞེས་བྱ་བ་ནི་དྲུག་སྡེ་རྣམས་ཙོག་པུར་འདོང་པས། ཁྱིམ་བདག་དག་འཕྱ་སྟེ་དེ་ལྟ་བུ་ནི་རྒན་པོ་དང་རྐང་ནད་ཅན་དང༌། བྱིས་པ་ཆུང་ངུ་རྣམས་འགྲོ་མི་ནུས་པ་ནི་དེ་བཞིན་དུ་འགྲོ་སྟེ། འཕགས་པ་དག་དེ་ལྟ་བུ་ནི་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། ཙོག་པུར་འགྲོ་ཞིང་གྲོང་དུ་མི་འདོང་བར་བསླབ་པར་བྱའོ་ཞེས་བསླབ་པ་བཅས་སོ། །དཀུར་མི་བརྟེན་པར་འགྲོ་བར་བྱ་ཞེས་བྱ་བ་ནི་དྲུག་སྡེ་རྣམས་དཀུར་བརྟེན་ཞིང་འགྲོ་བ་དང་ཁྱིམ་བདག་དག་འཕྱ་སྟེ། ཚོང་དཔོན་དང་དེད་དཔོན་དག་ནི་དེ་ལྟར་འགྲོ་སྟེ། འཕགས་པ་རྣམས་དེ་ལྟར་འགྲོ་བ་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། དཀུར་མི་བརྟེན་པར་གྲོང་དུ་འགྲོ་བར་བྱའོ་ཞེས་བསླབ་པ་བཅས་སོ། །ལུས་མི་བསྒྱུར་བར་འགྲོ་བར་བྱ་བ་ནི་དྲུག་སྡེ་རྣམས་ལུས་བསྒྱུར་ཞིང་གྲོང་དུ་དོང་བ་དང༌། དད་པའི་ཁྱིམ་བདག་དག་འཕྱ་སྟེ། འཕགས་པ་དག་གཟུགས་ཀྱིས་འཚོ་བ་དང༌། བལ་གླང་མོ་དག་དེ་ལྟར་དོང་སྟེ། དེ་ལྟ་བུ་མི་རིགས་སོ་ཞེས་ཟེར་བ་ལས་སྙན་དུ་བངས་ཏེ། ལུས་མི་བསྒྱུར་བར་ཁྱིམ་པའི་ཁྱིམ་དུ་འགྲོ་བར་བྱའོ་ཞེས་བསླབ་པ་བཅས་སོ། །ལག་པ་མོ་ཀྱོག་པར་འགྲོ་བར་བྱ་ཞེས་བྱ་བ་ནི་དྲུག་སྡེ་རྣམས་ལག་པ་འཁྱུགས་ཀ་བྱེད་ཅིང་གྲོང་དུ་དོང་བས་ཁྱིམ་བདག་དག་འཕྱ་བར་གྱུར་ཏེ། འཕགས་པ་དག་བྱིས་པ་ཆུང་ངུ་དང༌། དྭ་དང་སྨྱོན་པ་རྣམས་ནི་དེ་ལྟར་དོང་སྟེ། མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། ལག་པའི་འཁྱུགས་ཀ་མི་བྱ་བར་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་བཅས་སོ། །མགོ་མི་བསྒྱུར་བར་འགྲོ་
བར་བྱ་ཞེས་བྱ་བ་ནི་དྲུག་སྡེ་རྣམས་མགོ་བསྒྱུར་ཞིང་གྲོང་དུ་དོང་བ་ལས་ཁྱིམ་པ་དག་འཕྱ་སྟེ། འཕགས་པ་དག་གླང་པོ་ཆེ་དང༌། རྩངས་པ་དག་ནི་དེ་ལྟར་འགྲོ་ཞེས་འཕྱ་བ་ལས་སྙན་དུ་བདས་ཏེ། མགོ་མི་བསྒྱུར་བར་ཁྱིམ་པའི་ཁྱིམ་དུ་འགྲོ་བར་བསླབ་པར་བྱའོ་ཞེས་བསླབ་པ་བཅས་སོ། །ཕྲག་པ་མི་སྤྲད་པར་འགྲོའོ་ཞེས་བྱ་བ་ནི་དྲུག་སྡེ་རྣམས་གྲོང་དུ་དོང་བ་དང༌། དེ་ན་མི་ཞིག་སྤོས་ཀྱིས་བསྐུས་མེ་ཏོག་གིས་བཏགས་ཏེ། འགྲོ་བ་དྲུག་སྡེ་དག་གིས་མཐོང་ནས་དགའ་བོ་དང་བསྙེན་དགའ་བོ་བསྐྲན་པ་འདི་མི་དགའ་བར་བྱའོ་ཞེས་ནས་ཕྲག་པ་སྤྲད་དེ་ཕུལ་བས་དེ་ཡང་ས་ལ་འགྱེལ་ཏོ། །དེ་མི་སྙན་པར་འཕྱ་བ་ལས་སྙན་དུ་བདས་ཏེ། ཁྱིམ་པ་འཕྱ་བ་ནི་རིགས་པར་འཕྱས་པས། ཕྲག་པ་སྤྲད་ཅིང་ཁྱིམ་པའི་ཁྱིམ་དུ་མི་འགྲོ་བར་བསླབ་པར་བྱའོ་ཞེས་བསླབ་པ་བཅས་སོ། །ལག་པ་མི་སྤྲེལ་བར་འགྲོ་བར་བྱ་ཞེས་བྱ་བ་ནི་དྲུག་སྡེ་རྣམས་གྲོང་དུ་དོང་བ་དང༌། སྐྱེས་པ་ཞིག་མེ་ཏོག་དང༌། སྤོས་ཀྱིས་བརྒྱན་ནས་འཇིག་རྟེན་ལ་ངོམ་བཞིན་དུ་འོང་བ་དང༌། དྲུག་སྡེ་དག་གིས་མཐོང་ནས་དེ་མི་དགའ་བར་བྱའོ་ཞེས་ནས། དེ་དག་ལག་བ་སྤྲེལ་ཏེ་ཕུལ་བ་དང་ས་ལ་འགྱེལ་ཏོ། །དེ་ཡང་བདག་གིས་ནོངས་པ་ཅི་བགྱིས་ཞེས་སྨོད་པ་ལས་སྙན་དུ་བདས་ནས། ཁྱིམ་པ་འཕྱ་བ་ནི་ཡུས་ཏེ། ལག་པ་སྤྲེལ་བར་ཁྱིམ་པའི་ཁྱིམ་དུ་འགྲོ་བར་མི་བྱའོ་ཞེས་བསླབ་པ་བཅས་སོ། །མ་བསྒོ་བར་ཁྱིམ་པའི་སྟན་ལ་མི་འདུག་ཅེས་བྱ་བ་ནི་མཉན་དུ་ཡོད་པ་ན་བྲམ་ཟེ་ཞིག་གཙང་སྦྲ་ལ་དགའ་སྟེ། མལ་སྒོ་ཁང་དུ་བཅས་ནས་དེར་བུ་མོ་ཞིག་བསྲང་ཡབ་ཐོགས་ཏེ། སྦྲང་མ་སྐྲོད་དུ་བཅུག་པ་དང་བསྙེན་དགའ་བོ་བསོད་སྙོམས་ལ་བྲམ་ཟེ་དེའི་མལ་སྒོར་འོངས་ཏེ་བུ་མོ་སོང་སྟེ། བྲམ་ཟེ་ལ་བསྙེན་དགའ་བོ་སྒོ་ན་འདུག་གི་སྦྲོན་ཅིག་ཅེས་བསྒོ་བ་དང༌། བདག་ནི་སྦྲང་མ་སྐྲོད་པས་མི་མཆིའོ་ཞེས་སྨྲས་པ་དང༌། ངས་སྐད་ཅིག་བསྲུང་གིས་སོང་ཤིག་ཅེས་ནས་དེ་སོང་བ་དང༌། བསྙེན་དགའ་བོས་རྐང་པ་དེའི་མལ་གྱི་སྟེང་དུ་བཞག་སྟེ་འདུག་གོ །བྲམ་ཟེ་ཡང་ནང་ནས་བྱུང་སྟེ་འོངས་པ་དང༌། དེས་རྐང་པ་བཞག་པ་མཐོང་ནས་དེ་ན་རེ་འཕགས་པ་བདག་ནི་གཙང་སྦྲ་ལ་དགའ་བ་ལགས་ཏེ། ཅིའི་ཕྱིར་ལྷག་མ་དང་བཅས་པར་ངའི་མལ་ན་འདུག་ཅེས་འཕྱ་ཞིང་སྨོད་པ་ལས་སྙན་དུ་བདས་ཏེ་འཕྱ་བ་ནི་རིགས་པར་འཕྱས་པས། ད་ཕྱིན་ཆད་ཁྱིམ་པས་མ་བསྒོ་བར་སྟན་ལ་མི་འདུག་པར་བྱའོ་
ཞེས་བསླབ་པ་བཅས་སོ། །སྟན་ལ་མ་བརྟགས་པར་འདུག་པར་མི་བྱ་ཞེས་བྱ་བ་ནི་མཉན་དུ་ཡོད་པ་ན་འཆར་ཀ་སྐབས་སྐབས་སུ་གཏུམ་མོའི་གནས་དེར་ཆོས་འཆད་ཅིང་འགྲོའོ། །ཕྱི་ཞིག་ན་གཏུམ་མོ་ལ་བུ་གཅིག་བཙས་ཏེ། དེའི་ཚེ་རིང་བར་འདུག་པའི་ཕྱིར་རས་དཀར་པོས་གཡོགས་ཏེ། དྲང་སྲོང་གི་སྟན་ལ་བཞག་པ་དང༌། ཕིས་འཆར་ཀ་འོངས་ཏེ། སྟན་ལ་མ་བརྟགས་པར་འདུག་པས་བུ་དེ་དུས་ལས་འདས་སོ། །དེ་དག་མྱ་ངན་བྱེད་ཅིང་མི་སྙན་པར་ཟེར་བ་སྙན་དུ་བདས་ཏེ། ཁྱིམ་པའི་སྟན་ལ་མ་བརྟགས་པར་འདུག་ཏུ་མི་གནང་བར་བཅས་སོ། །ལུས་ཐམས་ཅད་ཀྱི་ལྕིད་ཀྱིས་ཕབ་སྟེ་འདུག་པར་མི་བྱ་བ་ནི་བཅོམ་ལྡན་འདས་མངོན་པར་བྱང་ཆུབ་ནས་སེར་སྐྱའི་གནས་ན། བཙུན་མོ་གྲགས་འཛིན་མའི་དེར་བཤོས་གསོལ་བའི་ཚེ། ཚེ་དང་ལྡན་པ་འཆར་ཀས་གྲགས་འཛིན་མ་བཤོས་འདྲིམ་པའི་རྐང་པ་ལ་རྐང་པས་བརྡེགས་ཏེ་བཏང་ངོ༌། །དེ་ཡང་མི་དགའ་སྟེ་ཕྱིན་ཆད་དེ་ལྟ་བུ་མི་བྱེད་པར་བྱ་བའི་ཕྱིར་གྲགས་འཛིན་མས་ཁྲི་རྒྱུད་མ་བཏགས་པའི་སྟེང་གོས་ཀྱིས་གཡོགས་ནས་བཞག་སྟེ། འཆར་བ་བོས་ཤིག་ཅེས་བུ་མོ་ཞིག་མངགས་ནས་འཆར་ཀ་ཡང་རྙེད་པ་ཞིག་གྲུབ་སྙམ་སྟེ་མྱུར་ཞིང་རེངས་པར་འོངས་ནས། ཁྱེད་ཀྱིས་ང་ལ་ཅི་སྦྱིན་ཞེས་བྱས་པ་དང༌། ཁྲི་ལ་བཞུགས་ཤིག་དང༌། ཕྱེ་དང་ཞོ་ཕོར་གང་གསོལ་ལོ་ཞེས་པ་དང༌། ཁྲི་དེ་ཡང་དབང་མོད་ཅེས་འཆར་ཀས་སྨྲས་ན་ཁྲི་དེ་མི་གསོལ་ལོ་ཞེས་ནས་འཆར་ཀས་ཀྱང་ཕྱེ་དང་ཞོ་ཕོར་གང་ལག་ཏུ་བླངས་ནས། ཁྲིའི་དེ་ཆག་གོ་སྙམ་དུ་བསམས་ཏེ་སྟེང་དུ་ལྗིད་ཀྱིས་ཕབ་སྟེ་དྲག་ཏུ་འདུག་པ་དང༌། ཁྲིའུ་རྒྱུད་མེད་པས་ན་ནུབ་སྟེ། ཕྱེ་ཕོར་གང་དང་ཞོ་ཕོར་གང་ཡང་དེའི་གདོང་དུ་བོ་ནས་དེ་དག་གང་མོ་བྱུང་སྟེ། འཆར་ཀའི་རྐང་པ་ནས་བཟུང་ནས་རྫིང་བུའི་ནང་དུ་བོར་རོ། །འཆར་ཀ་ཡང་ལངས་ཏེ་ཆོས་གོས་གཅུ་ཞིང་འདུག་པ་དང༌། དགེ་སློང་དག་གིས་མཐོང་སྟེ། ཅི་ཉེས་ཞེས་སྨྲས་ན། ངས་ཁར་སོང་རྩེད་མོ་ཞིག་བྱས་ན་དི་རིང་གནོད་པ་དེ་དང་འདྲ་བར་བྱས་ཞེས་བྱས་པ་དང༌། དེ་དང་འདྲ་བས་སྙན་དུ་བདས་ཏེ། ཁྱིམ་པའི་ཁྱིམ་དུ་སྟན་ལ་ལྗིད་ཀྱིས་ཕབ་སྟེ་མི་འདུག་པར་བྱའོ་ཞེས་བཅས་སོ། །རྐང་པ་མི་བསྣོལ་བར་འདུག་པར་བྱ་ཞེས་བྱ་བ་ནི། དྲུག་སྟེ་རྣམས་རྐང་པ་བསྣོལ་ཞིང་འཁོད་པ་དང༌། ཁྱིམ་བདག་དག་གིས་
འཕགས་པ་དག་དྲ་དང་ནལ་གྱི་བུ་དག་ནི་འདི་ལྟར་འཁོད་དེ། དེ་ལྟ་བུ་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། འཕྱ་བ་ཡུས་ཀྱིས་ཁྱིམ་པའི་ཁྱིམ་དུ་རྐང་པ་མི་བསྣོལ་བར་བྱའོ་ཞེས་བཅས་སོ། །བརླ་མི་བསྣོལ་བར་འདུག་ཅེས་བྱ་བ་ནི་དྲུག་སྡེ་རྣམས་བརླ་བསྣོལ་ནས་འཁོད་པ་དང༌། འཕགས་པ་དག་དྭ་དང་ནལ་གྱི་བུ་དག་ནི་དེ་བཞིན་དུ་འཁོད་དེ། དེ་ལྟ་བུ་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། ཁྱིམ་པ་ནི་རིགས་པར་འཕྱའོ་ཞེས་ཏེ། གྲོང་དུ་བརླ་བསྣོལ་ཏེ་མི་འདུག་པར་བསླབ་པར་བྱའོ་ཞེས་བཅས་སོ། །ལོང་བུའི་སྟེང་དུ་ལོང་བུ་མི་གཞག་པར་བྱ་ཞེས་བྱ་བ་ནི་དྲུག་སྡེ་རྣམས་ལོང་བུའི་སྟེང་དུ་ལོང་བུའི་སྟེང་དུ་ལོང་བུ་བཞག་སྟེ་འཁོད་པ་དང༌། ཁྱིམ་བདག་དག་ན་རེ་འཕགས་པ་དག་རྒྱན་པོ་པ་དང་ནལ་གྱི་བུ་དག་ནི་དེ་ལྟར་འཁོད་དེ་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། ཁྱིམ་པ་འཕྱ་བ་ནི་རིགས་པར་འཕྱས། ཁྱིམ་པའི་ཁྱིམ་དུ་ལོང་བུའི་སྟེང་དུ་ལོང་བུ་མི་གཞག་པར་བསླབ་པར་བྱའོ་ཞེས་བཅས་སོ། །རྐང་པ་བཀུག་སྟེ་འདུག་པར་མི་བྱ་ཞེས་བྱ་བ་ནི་དྲུག་སྡེ་རྣམས་རྐང་པ་བཀུག་སྟེ་འདུག་པ་དང༌། དགེ་བསྙེན་མ་རྣམས་ཕྱག་འཚལ་ན་དེ་དག་ནད་མེད་པར་གྱུར་ཅིག་ཅེས་མི་ཟེར་ནས། དེ་དག་གིས་སྨྲས་པ། བདག་ཅག་ལ་ནད་མེད་ཅིག་ཅེས་ཅིའི་ཕྱིར་མི་གསུང་ཞེས་བྱས་པ་དང༌། ངེད་ཀྱི་རྐང་པ་གཉིས་ལ་ཕྱག་མ་བྱས་སོ་ཞེས་བྱས་པ་དང༌། དེ་དག་གིས་རྐང་པ་གཉིས་ལ་ཕྱག་འཚལ་བ་དང༌། དེ་དག་གིས་བུད་མེད་ཀྱི་རྐུབ་ལ་མཐོས་འཇལ་ཞིང་རྐུབ་ཚོས་ཆེ་བ་ལ་ལྟོས་ཞེས་ཟེར་བ་ལས་དེ་དག་ངོ་ཚ་སྟེ་མི་སྨྲ་བར་འཁོད་དེ། དེ་ལྟར་གྱུར་པ་སྙན་དུ་བདས་ཏེ་གྲོང་དུ་རྐང་པ་མི་དགུག་པར་བྱའོ་ཞེས་བཅས་སོ། །རྐང་པ་གདངས་ཤིང་མི་འདུག་པར་བྱ་ཞེས་བྱ་བ་ནི་དྲུག་སྡེ་རྣམས་རྐང་པ་གདངས་ཤིང་འདུག་པ་ལ་དགེ་བསྙེན་མ་དག་ཕྱག་འཚལ་བ་ན་དེ་དག་ནད་མེད་ཅིག་ཅེས་རྫོགས་པར་མི་ཟེར་ནས། འཕགས་པ་ཅིའི་སླད་དུ་མི་གསུང་ཞེས་བྱས་ན། ཁྱེད་ཀྱིས་ངེད་ཀྱི་རྐང་པ་གཉིས་ལ་ཕྱག་མ་བྱས་སོ་ཞེས་པ་དང༌། དེ་དག་ཡང་རྐང་པ་གཉིས་ལ་ཕྱག་བྱེད་པ་དང༌། རྐུབ་ལ་མཐོས་འཇལ་བ་དང་དེ་དག་འཕྱ་བ་སྙན་དུ་བདས་ནས། རྐང་པ་གདངས་ཤིང་འདུག་པར་མི་བྱའོ་ཞེས་བཅས་སོ། །མདོམས་མི་སྣང་བར་འདུག་པར་བྱ་ཞེས་ཟེར་བ་ནི་དྲུག་སྡེ་རྣམས་མདོམས་སྣང་བཞིན་དུ་
གྲོང་ན་འཁོད་ཅིང་སྒྲེན་མོར་འཁོད་པས་ན་བྲམ་ཟེ་དང༌། ཁྱིམ་བདག་དག་འཕྱ་བ་སྙན་དུ་བདས་ནས་མདོམས་མི་སྣང་བར་གྲོང་དུ་འདུག་པར་བྱའོ་ཞེས་བཅས་སོ། །ལེགས་པར་ཟས་བླང་བར་བྱ་ཞེས་བྱ་བ་ནི་ཡུལ་སྦལ་དཀར་ཅན་ན་རྒྱལ་བུ་རྟོགས་ལྡན་གྱིས་ཁང་བཟངས་པད་མོའི་ཚོན་བརྒྱ་རྩ་གཅིག་གིས་ས་གཞི་ལ་བྲིས་པ་ཞིག་བརྩིགས་ཏེ། དེར་དགེ་འདུན་རྣམས་བཤོས་ལ་སྤྱན་དྲངས་པ་དང༌། རྒྱལ་བུ་ཉིད་ནི་ཆོས་ལ་དད་འཁོར་རྣམས་ཆོས་ལ་མ་དད་པས་དེ་དག་གིས་ལ་དུ་འདྲིམ་པའི་ཚེ་ལ་དུ་བསྐྱུར་བས་ལྷུང་བཟེད་ཆག་སྟེ་དྲུག་སྡེ་རྣམས་ཀྱིས་དེ་དག་མི་དགའ་བར་བྱའོ་ཞེས་ནས། འབྲས་དང་ཚོད་མ་འདྲིམ་པའི་ཚེ་ལྷུང་བཟེད་གང་བས་ཚོད་མ་དེ་དག་ས་ལ་བོ་ནས། དེ་དག་གིས་འཕགས་པ་རྒྱལ་བུ་རྟོགས་ལྡན་གྱི་ཁང་བཟངས་ཚོན་སྣ་ཚོགས་བརྒྱ་རྩ་གཅིག་གིས་བྲིས་པ་མ་རུང་བར་གྱུར་ཏོ། །དྲུག་སྡེ་རྣམས་ཀྱིས་སྨྲས་པ། བཀྲེན་པ་ཁྱེད་ཀྱིས་མ་རུང་བར་སེམས་ན། དགེ་འདུན་ད་དག་གི་ལྷུང་བཟེད་ཇི་ལྟར་བྱ་ཞེས་པ་ལས་སྙན་དུ་བདས་ཏེ། ཟས་ལེགས་པར་བླང་བར་བྱའོ་ཞེས་བསླབ་པའི་གནས་བཅས་སོ། །མུ་དང་ཁད་ཆད་དུ་མ་ཡིན་ཞེས་བྱ་བ་ནི་དྲུག་སྡེ་རྣམས་རྟོགས་ལྡན་གྱི་ཁྱིམ་དུ་ལྷུང་བཟེད་གང་བར་བླངས་པས་དེ་དག་ཀྱང་ཚོད་མ་གར་བླུགས་ཞེས་བྱས་པ་དང་དེ་ཉིད་དུའོ་ཞེས་བྱས་ཏེ་བླུགས་པ་དང་བོ་ནས་དེ་དག་གིས་ཁང་བཟངས་མ་རུང་བར་བྱས་ཞེས་པ་ལས་རྟོགས་ལྡན་དང་ཁྱེད་ཅག་ཉིད་ཀྱང་འདི་ལ་ཆགས་པས་ན་ཡི་དགས་ཝ་བ་ཅན་དུ་འགྱུར་རོ་ཞེས་བྱས་པ་དང༌། དེ་དག་མི་དགའ་ཞིང་འཕྱ་བ་ལས་སྙན་དུ་བདས་ཏེ། བཀའ་སྩལ་པ། མུ་དང་ཁ་ད་ཆད་དུ་ཟས་མི་བླང་བར་བྱ་ཞེས་བསླབ་པ་བཅས་སོ། །ཚོད་མ་དང་མཉམ་པར་མ་ཡིན་ཞེས་བྱ་བ་ནི་དྲུག་སྡེ་རྣམས་རྟོགས་ལྡན་གྱི་ཁྱིམ་དུ་ལྷགས་ཏེ། དེ་དག་གི་སྔོན་དུ་ཚོད་མ་བྱིན་ན་ལྷུང་བཟེད་གང་བར་བླངས་སོ། །ཕྱིས་འབྲས་བྱིན་པ་ཡང་དེ་ཉིད་དུ་བཟེད་པ་དང༌། མ་ཤོང་སྟེ་བོ་བས་ན་ཁང་པ་མ་རུང་ཞེས་ཁྱིམ་བདག་འཕྱ་བ་ལས་སྙན་དུ་བདས་ཏེ། བཀའ་སྩལ་པ། ཚོད་མ་དང་མཉམ་པར་མི་བླང་བར་བྱའོ་ཞེས་བསླབ་པ་བཅས་སོ། །ཟས་མཐར་ཆགས་སུ་བླང་བར་བྱ་ཞེས་བྱ་བ་ནི་དྲུག་སྡེ་རྣམས་ཟས་ཟ་བའི་ཚེ་ཆོད་མ་མི་ལེན་ཏེ། ཕྱིས་རིང་དུ་སོང་བ་དང་འབོད་ཅིང་ཚོད་མ་ལེན་པས་ཚོད་མ་སྔ་ཕྱིར་
འཕྲུལ་བར་གྱུར་པ་སྙན་དུ་གསོལ་ནས། བཀའ་སྩལ་པ། ཟས་མཐར་ཆགས་སུ་བླང་བར་བྱའོ་ཞེས་བཅས་སོ། །ལྷུང་བཟེད་བལྟ་ཞིང་བཟའ་བར་བྱ་ཞེས་བྱ་བ་ནི་མཉན་དུ་ཡོད་པ་ན། ཁྱིམ་བདག་ཅིག་གིས་སངས་རྒྱས་འཁོར་དང་བཅས་པ་བཤོས་ལ་སྤྱན་དྲངས་ཏེ། ཡོན་བདག་གིས་ཁུར་བ་འདྲིམ་པའི་ཚེ། འཕགས་པ་དག་ཞལ་ཟས་ཞིམ་པོ་གསོལ་གྱིས་ཕྱེ་མང་དུ་མ་ལེན་ཅིག་ཅེས་བྱས་པ་དང༌། དྲུག་སྡེས་ཕྱེ་མང་དུ་བླངས་སོ། །རྒན་རིམས་ལ་ཁུར་བདག་འདྲིམ་པའི་ཚེ་དྲུག་སྡེ་དག་གི་འོག་ན་རྒན་ཞུགས་ཤིག་འདུག་པ་དེ་གོང་དུ་རྒན་རིམས་ལ་ལྟ་བའི་ཚེ། དྲུག་སྡེས་ཟན་ཆང་ཆང་པོས་ལྷུང་བཟེད་བཀང་ངོ༌། །ཁྱིམ་བདག་དེས་ཁུར་བ་འདྲིམ་པའི་ཚེ་རྒན་ཞུགས་ལ་བྱིན་པ་དང༌། ལྷུང་བཟེད་ལྕི་བས་ས་ལ་ལྷུང་ངོ༌། །ཡོན་བདག་གིས་སྨྲས་པ། འཕགས་པ་ཅིའི་ཕྱིར་ཕྱེ་མང་དུ་ལེན་བདག་གིས་མ་བླངས་སོ། །འོ་ན་སུས་བླངས། དེ་ལྟར་གཏོལ་མེད་དོ་ཞེས་བྱས་པ་དང༌། དྲུག་སྡེ་དག་གིས་སྨྲས་པ། ཁྱིམ་བདག་མ་ཐོས་སམ་རྒྱལ་པོ་དག་ལ་སོ་ཡུལ་དུ་ཞག་བདུན་གྱི་བར་དུ་ནོར་དབྱིག་གི་ཆར་འབབ་པ་དེ་བཞིན་དུ། རྒན་ཞུགས་དེ་ལ་གང་ཟན་ཆང་ཆང་པོར་ཆར་བབ་པོ་ཞེས་བྱས་པ་དང༌། དེ་དག་ཅང་མི་སྨྲ་བར་འདུག་གོ །དེ་ལྟར་གྱུར་པ་སྙན་དུ་བདས་ནས། དེ་ལྟ་བས་ན་ལྷུང་བཟེད་ལ་བལྟ་བར་བྱའོ་ཞེས་བཅས་སོ། །བཟའ་བཅའ་མ་འོངས་པར་ལྷུང་བཟེད་མི་བཟེད་པར་བྱ་ཞེས་བྱ་བ་ནི་དྲུག་སྡེ་རྣམས་བསོད་སྙོམས་ལ་ཞུགས་པ་ན་ཟས་མ་བྱིན་པར་དེ་དག་ལྷུང་བཟེད་སྔར་བཟེད་ཅིང་འཁོད་པས་དད་པའི་བྲམ་ཟེ་དང་ཁྱིམ་བདག་དག་འཕྱ་སྟེ། ཅིའི་ཕྱིར་ན་བཅའ་བ་དང་བཟའ་བ་མ་བྱིན་པར་ལྷུང་བཟེད་བཟེད་ཅེས་འཕྱ་བ་ལ་སྙན་དུ་བདས་ནས། བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་བྱ་ཞེས་བསླབ་པ་བཅས་སོ། །ཡང་འདོད་པའི་ཕྱིར་འབྲས་ཆན་གྱིས་ཚོད་མ་མི་དག་བ་པར་བྱ་ཞེས་བྱ་བ་ནི་མ་ཉན་དུ་ཡོད་པ་ན་སྟེ། ཁྱིམ་བདག་ཅིག་གིས་བཅོམ་ལྡན་འདས་དགེ་སློང་གི་འཁོར་དང་བཅས་པ་བཤོས་ལ་སྤྱན་དྲངས་པ་དེ་ན། ཁྱིམ་བདག་གིས་འབྲས་ནི་མང་ཚོད་མ་ནི་ཉུང་དུ་བྱས་པ་དང༌། དྲུག་སྡེ་རྣམས་ཀྱིས་ཚོད་མ་འབྲས་ཀྱིས་གཡོགས་ཏེ་བཞག་པ་དང༌། ཁྱིམ་བདག་གིས་འབྲས་མཐོང་སྟེ། ཚོད་མ་མཆིས་སམ་ཞེས་སྨྲས་པ་དང༌། ཁྱིམ་བདག་
དེ་ཉིད་ལ་ལྟོས་ཞེས་ནས་ཚོད་མ་ཡང་བྱིན་ནོ། །དགེ་སློང་ལྷ་ཁང་དུ་དོང་སྟེ་ཁྱིམ་བདག་དེའི་ཟན་ནི་བཟང་སྟེ། ཚོད་མ་ནི་ཉུང་ངོ༌། །ཞེས་གཏམ་འཛེར་བ་དེ་ན། དྲུག་སྡེ་རྣམས་ན་རེ་ངེད་ཀྱིས་ནི་མང་དུ་ཐོབ་སྟེ། འབྲས་ཆན་གྱིས་ཚོད་མ་བཀབ་བོ་ཞེས་བྱས་པ་དང༌། དགེ་སློང་དག་འཕྱ་བ་ལས་སྙན་དུ་བདས་ཏེ། འབྲས་ཆན་གྱིས་ཚོད་མ་མི་དགབ་པར་བསླབ་པར་བྱའོ་ཞེས་བསླབ་པ་བཅས་སོ། །ཚོད་མས་འབྲས་ཆན་མི་དགབ་པར་བྱའོ་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་སངས་རྒྱས་འཁོར་དང་བཅས་པ་བཤོས་ལ་སྤྱན་དྲངས་པ་དེ་ན། ཁྱིམ་བདག་གིས་ཚོང་མ་ནི་མང་འབྲས་ཆན་ནི་ཉུང་དུ་བྱས་པས་དྲུག་སྡེ་རྣམས་ཀྱིས་ཚོད་མས་འབྲས་ཆན་བཀབ་པས་ཁྱིམ་བདག་གིས་ཚོད་མ་མཐོང་སྟེ། འཕགས་པ་འབྲས་མ་མཆིས་སམ་ཞེས་བྱས་པ་དང༌། ཁྱིམ་བདག་དེ་ཉིད་ལ་ལྟོས་ཞེས་ནས་དེས་ཡང་འབྲས་བྱིན་ནོ། །དགེ་སློང་དེ་དག་ཡང་ལྷ་ཁང་དུ་ཕྱིན་ནས། ཁྱིམ་བདག་དེས་ཚོད་མ་ནི་མང་དུ་སྦྱར་ན། འབྲས་ཆན་ནི་ཉུང་དུ་ཞེས་པ་དང༌། དྲུག་སྡེ་དག་ན་རེ་ངེད་ཀྱིས་ནི་འབྲས་མང་དུ་ཐོབ་པོ། །དེ་ལྟ་བུ་དབང་ངམ་ཞེས་པ་དང་སྙན་དུ་བདས་ཏེ། ཚོད་མས་འབྲས་ཆན་མི་དགབ་པར་བསླབ་པར་བྱའོ་ཞེས་བསླབ་པ་བཅས་སོ། །ལེགས་པར་ཟས་བཟའ་བར་བྱའོ་ཞེས་བྱ་བ་ནི་དྲུག་སྡེ་རྣམས་སླེ་མ་ཕྱོ་ཞིང་ཟན་ཟ་བ་དང༌། འཕགས་པ་དག་བྱིས་པ་ཆུང་ངུ་དང༌། གཟུགས་ཀྱིས་འཚོ་བ་ནི་དེ་ལྟར་བྱེད་དེ། དེ་ལྟ་བུ་མ་བྱེད་ཅིག་ཅེས་ཁྱིམ་བདག་དག་འཕྱ་བ་ལས་སྙན་དུ་བདས་ཏེ། ལེགས་པར་ཟས་བཟའ་བར་བྱའོ་ཞེས་བསླབ་པ་བཅས་སོ། །ཁམ་ཧ་ཅང་ཆུང་བ་ཡང་མ་ཡིན་པ་ཞེས་བྱ་བ་ནི་དྲུག་སྡེ་རྣམས་གྲོང་དུ་ཟན་ཟ་བ་ན་ཁམ་ཆུང་དུ་ནས་ཟན་ཟ་བས་དད་པའི་ཁྱིམ་བདག་དག་འཕྱ་སྟེ། བྱིས་པ་ཆུང་ངུ་དང་རིགས་ཀྱི་མནའ་མ་དག་ནི་དེ་ལྟར་ཟའོ་ཞེས་འཕྱ་བ་ལས་སྙན་དུ་བདས་ཏེ། ཁམ་ཧ་ཅང་ཆུང་བ་ཡང་མ་ཡིན་པ་ཁམ་རན་པར་བཟའ་བར་བྱའོ་ཞེས་བསླབ་པའི་གནས་བཅས་སོ། །ཁམ་ཧ་ཅང་ཆེན་པོ་ཡང་མ་ཡིན་པར་བཟའ་བ་ཞེས་བྱ་བ་ནི་དྲུག་སྡེ་རྣམས་གྲོང་དུ་ཟན་ཟ་བ་ན་ཁམ་ཧ་ཅང་ཆེར་བཟའ་བས་ཁྱིམ་བདག་དག་འཕྱ་སྟེ། འཕགས་པ་དག་ལྟོགས་པ་དང་སྤྲང་པོ་ནི་དེ་བཞིན་དུ་བཟའ་བས་དེ་ལྟར་མ་གསོལ་ཅིག་ཅེས་འཕྱ་བ་ལས་སྙན་དུ་བདས་ཏེ། ཁམ་ཧ་ཅང་ཆེན་པོ་ཡང་མ་
ཡིན་ཆུང་ངུ་ཡང་མ་ཡིན་པར་ཁམ་རན་པར་བཟའ་བར་བྱའོ་ཞེས་བསླབ་པའི་གནས་བཅས་སོ། །ཁམ་མ་གཟས་པར་ཁ་མི་གདངས་པར་བྱ་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་བཅོམ་ལྡན་འདས་འཁོར་དང་བཅས་པ་བཤོས་ལ་སྤྱན་དྲངས་པ་དང༌། དྲུག་སྡེའི་འོག་ན་རྒན་ཞུགས་ཤིག་འདུག་སྟེ། དེ་ཡང་ཁ་གདངས་ནས་རྒན་རིམས་ལ་ལྟ་བ་དང་བསྙེན་དགའ་བོས་དེའི་ཁར་བོང་བ་གཅིག་བཅུག་སྟེ་སྔར་དེ་ཟོ་ཤིག་ཅེས་བྱས་པ་དང་སྙན་དུ་བདས་ནས། ཁམ་མ་གཟས་པར་ཁ་མི་གདངས་པར་བྱ་བ་ཞེས་བསླབ་པ་བཅས་སོ། །ཁ་ཁམ་གྱིས་བཀང་སྟེ་མི་སྨྲ་བར་བྱའོ་ཞེས་བྱ་བ་ནི་དྲུག་སྡེ་རྣམས་ཁ་ཁམ་གྱིས་བཀང་སྟེ་སྨྲ་བས། །ང་རོ་ཉམས་ཤིང་མི་སྙན་པར་གྱུར་པ་སྙན་དུ་བདས་ཏེ་བཀའ་སྩལ་པ། ཁ་ཁམ་གྱིས་བཀང་སྟེ་མི་སྨྲ་བར་བྱའོ་ཞེས་བསླབ་པ་བཅས་སོ། །ཙུག་ཙུག་མི་བྱེད་ཅེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་བཅོམ་ལྡན་འདས་འཁོར་དང་བཅས་པ་བཤོས་ལ་སྤྱན་དྲངས་པ་དང༌། དེས་ཚོད་མ་ཤིན་ཏུ་མངར་བར་སྦྱར་བས་དྲུག་སྡེ་རྣམས་རྐན་སྒྲ་གཏོགས་པས་ཚོང་མ་ཤིན་ཏུ་སྐྱུར་རོ་ཞེས་བྱས་པ་དང༌། ཁྱིམ་བདག་དེ་སྐྱེངས་པས་སྙན་དུ་བདས་ཏེ། བཀའ་སྩལ་པ། ཙུག་ཙུག་མི་བྱ་བར་བཟའ་བར་བྱའོ་ཞེས་བཅས་སོ། །བལྕག་བལྕག་མི་བྱ་བར་བཟའ་ཞེས་བྱ་བ་ནི་མཉན་དུ་ཡོད་པ་ན་སྟེ། ཁྱིམ་བདག་ཅིག་གིས་བཅོམ་ལྡན་འདས་འཁོར་དང་བཅས་པ་བཤོས་ལ་སྤྱན་དྲངས་པའི་ཚེ། ཚོད་མ་ཤིན་ཏུ་སྐྱུར་བར་སྦྱར་བ་དང༌། དྲུག་སྡེ་རྣམས་རྐན་སྒྲ་ཕྱུང་སྟེ། ཤིན་ཏུ་ཚོད་མ་མདར་རོ་ཞེས་བྱས་པ་ལས། ཁྱིམ་བདག་སྐྱེངས་པས་སྙན་དུ་བདས་ནས་བཀའ་སྩལ་པ། བལྕག་བལྕག་མི་བྱ་བར་ཟས་བཟའ་བར་བྱའོ་ཞེས་བསླབ་པ་བཅས་སོ། །ཧུ་ཧུ་མི་བྱ་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་བཅོམ་ལྡན་འདས་འཁོར་དང་བཅས་པ་བཤོས་ལ་སྤྱན་དྲངས་པ་དེ་ན་ཁྱིམ་བདག་དེ་སྣོད་སྤྱང་ཉུང་བས་འབྲས་ཆན་རྣམས་རྐོན་བུར་བླུགས་ཏེ་བཞག་པས་དྲོད་ཆེ་བར་གྱུར་ཏོ། །དྲུག་སྡེ་རྣམས་འབྲས་དེ་ནི་གྲང་གི་དབུགས་ཀྱིས་བསྲོས་ལ་ཟོ་ཤིག་ཟེར་བ་ཁྱིམ་བདག་གིས་ཐོས་ཏེ་སྐྱེངས་པ་ལས་སྙན་དུ་བདས་ཏེ། བཀའ་སྩལ་པ། ཧུ་ཧུ་མི་བྱ་བར་ཟས་བཟའ་བར་བྱའོ་ཞེས་བསླབ་པ་བཅས་སོ། །ཕུ་ཕུ་མི་བྱ་བར་བཟའ་བར་བྱ་ཞེས་བྱ་བ་ནི་
མཉན་དུ་ཡོད་པ་ན་ཁྱིམ་བདག་ཅིག་གིས་བཅོམ་ལྡན་འདས་འཁོར་དང་བཅས་པ་བཤོས་ལ་སྤྱན་དྲངས་ཏེ། འབྲས་བཅོས་ནས་རེ་ལྡེའི་སྟིང་དུ་བཞག་པ་དང་གྲངས་པར་གྱུར་ཏེ། དྲུག་སྡེ་དག་ན་རེ་འབྲས་དེ་ནི་རབ་ཏུ་ཚ་བས་ཕུ་ཕུ་ཞེས་གྱིས་ལ་ཟོ་ཤིག་ཅེས་བྱས་པ་ལས་ཁྱིམ་བདག་སྐྱེངས་པས་སྙན་དུ་བདས་ནས། ཕུ་ཕུ་མི་བྱ་བར་ཟས་བཟའ་བར་བྱའོ་ཞེས་བསླབ་པ་བཅས་སོ། །ལྕེ་ཕྱུང་སྟེ་ཟས་མི་ཟ་བར་བསླབ་པར་བྱ་ཞེས་བྱ་བ་ནི་ཁྱིམ་བདག་ནི་དེར་ཟན་ཟ་བའི་ཚེ་ལྕེ་ཕྱུང་ནས་བལྟ་ཞིང་མཆུ་ལྡག་པ་དང་དགེ་སློང་དག་གིས་ཚེ་དང་ལྡན་པ་དག་ལྕེ་ཕྱུང་ནས་བལྟར་ཅི་ཡོད་ཅེས་བྱས་པ་དང༌། དེ་དག་གིས་སྨྲས་པ་འགའ་ཞིག་ནང་དུ་མི་འཇུག་གྲང་སྙན་ནས་བལྟས་སོ་ཞེས་བྱས་པ་དང༌། དེ་དག་འཕྱ་བར་གྱུར་པ་ལས་སྙན་དུ་བདས་ཏེ། བཀའ་སྩལ་པ། ལྕེ་ཕྱུང་སྟེ་ཟས་མི་ཟ་བར་བྱའོ་ཞེས་བསླབ་པ་བཅས་སོ། །འབྲུ་ནས་ཐ་དད་དུ་མི་དབྱེ་བར་ཟས་བཟའ་བར་བྱའོ་ཞེས་བྱ་བ་ནི་དྲུག་སྡེ་པོ་རྣམས་གྲོང་དུ་ཟན་ཟ་བ་ན་འབྲས་ཀྱི་འབྲུམ་བུ་གཏོར་ནས་ཐུ་ཞིང་ཟ་བ་དང་དར་བའི་ཁྱིམ་བདག་དག་འཕྱ་སྟེ། བྱིས་པ་ཆང་ངུ་དང་ནལ་གྱི་བུ་ངག་དེ་ལྟར་ཟ་སྟེ། འཕགས་པ་དག་དེ་བཞིན་མ་ཟ་ཅིག་ཅེས་འཕྱ་བ་ལས་སྙན་དུ་བདས་ཏེ། བཀའ་སྩལ་པ། འབྲུ་ནས་ཐ་དད་མི་དབྱེ་བར་བཟའ་བར་བྱའོ་ཞེས་བསླབ་པ་བཅས་སོ། །འཕྱས་མི་གདགས་པར་ཟས་བཟའ་བར་བྱ་ཞེས་བྱ་བ་ནི་དྲུག་སྡེ་རྣམས་ཁྱིམ་བའི་ཁྱིམ་དུ་ཟན་ཟ་བའི་ཚེ། དགའ་བོ་བསྙེན་དགའ་བོ་ཚོད་མ་དེ་ནི་སྐྱུར་རོ། །འདི་ནི་མངར་རེ་ཞེས་བྱུང་བ་ལས་སྙན་དུ་བདས་ཏེ། བཀའ་སྩལ་པ། འཕྱས་མི་གདགས་པར་ཟས་བཟའ་བར་བྱའོ་ཞེས་བསླབ་པ་བཅས་སོ། །མཁུར་བ་མི་སྤོ་བར་ཟས་བཟའ་བར་བྱའོ་ཞེས་བྱ་བ་ནི་དྲུག་སྡེ་རྣམས་གྲོང་དུ་ཟན་ཟ་བའི་ཚེ། ཁམ་འགྲམ་གཡས་གཡོན་དུ་སྤོ་ཞིང་ཟ་བ་དང་ཁྱིམ་བདག་དག་འཕྱ་ཏེ། བྱིས་པ་ཆུང་ངུ་དང་མུ་ཏོ་བ་དག་ནི་དེ་བཞིན་དུ་ཟ་སྟེ། འཕགས་པ་དག་མི་རིགས་སོ་ཞེས་བྱ་བ་ལས་སྙན་དུ་བདས་ཏེ། བཀའ་སྩལ་པ། མཁུར་བ་མི་སྤོ་བར་ཟས་བཟའ་བར་བྱའོ་ཞེས་བསླབ་པ་བཅས་སོ། །རྐན་མི་གཏོགས་ཤིང་ཟས་བཟའ་བར་བྱ་ཞེས་བྱ་བ་ནི་དྲུག་སྡེ་རྣམས་གྲོང་དུ་ཟན་ཟ་བའི་ཚེ་རྐན་སྒྲ་གཏོགས་ཤིང་བཟའ་བ་ཁྱིམ་བདག་དག་འཕྱ་བ་ལས་སྙན་དུ་བདས་ནས། །བཀའ་སྩལ་པ། རྐན་མི་གཏོགས་པར་ཟས་བཟའ་བར་བྱའོ་ཞེས་བསླབ་པ་བཅས་སོ། །ཁམ་འཕྲོར་གཅོད་ཅིང་ཟས་མི་ཟ་བར་བྱའོ་ཞེས་བྱ་བ་ནི་དྲུག་སྡེ་རྣམས་ཁྱིམ་བདག་གི་དེ་ན་ཟན་ཟ་བའི་ཚེ་ཁམ་བླངས་ནས་ཕྱེད་ནི་ཁར་
བཅུག་ཕྱེད་ནི་ལྟུང་བཟེད་དུ་འདོར་བས་ཁྱིམ་བདག་དག་འཕྱ་སྟེ། འཕགས་པ་དག་བྱིས་པ་ཆུང་ངུ་དང་གཟུགས་ཀྱིས་འཚོ་བ་རྣམས་ནི་འདི་ལྟར་བཟའོ་ཞེས་བྱ་བ་ལས་སྙན་དུ་བདས་ཏེ། བཀའ་སྩལ་པ། ཁམ་འཕྲོར་བྱས་ཤིང་ཟས་མི་བཟའ་བར་བྱའོ་ཞེས་བསླབ་པ་བཅས་སོ། །ལག་པ་མི་ལྡག་པར་ཟས་བཟའ་བར་བྱའོ་ཞེས་བྱ་བ་ནི་དྲུག་སྡེ་རྣམས་ཁྱིམ་པའི་ཁྱིམ་དུ་ཟས་ཟ་བའི་ཚེ། ལག་པ་ལ་ཟས་དམ་པ་ཉིང་ཆགས་སོ་ཞེས་ནས་བལྡགས་པ་ལས། དགེ་སློང་དག་གིས་ལག་པ་ལྡག་པར་མི་རིགས་སོ་ཞེས་འཕྱ་བ་ལས་སྙན་དུ་བདས་ཏེ། བཀའ་སྩལ་པ། ལག་པ་མི་ལྡག་པར་ཟས་བཟའ་བར་བྱའོ་ཞེས་བསླབ་པའི་གནས་བཅས་སོ། །ལྷུང་བཟེད་མི་བྱོགས་པར་བྱ་ཞེས་བྱ་བ་ནི་དྲུག་སྡེ་རྣམས་ཀྱིས་གྲོང་ན་ཟན་ཟ་བའི་ཚེ། ལྷུང་བཟེད་ཕྱོགས་པ་དང་ཚེ་དང་ལྡན་པ་དེ་ལྟ་བུའི་མི་མཛེས་པ་ཅི་བྱེད་ཅེས་བྱས་པ་དང༌། གང་ཁ་ཟས་དམ་པ་ཉིད་ནི་འདི་ལ་ལུས་སོ་ཞེས་པ་ལས་སྙན་དུ་བདས་ནས། བཀའ་སྩལ་པ། ལྷུང་བཟེད་མི་བྱོགས་པར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །ལག་པ་མི་སྤྲུགས་པར་བསླབ་པར་བྱ་ཞེས་བྱ་བ་ནི་དྲུག་སྡེ་རྣམས་གྲོང་ན་ཟན་ཟ་བའི་ཚེ་ལག་པ་སྤྲུགས་པ་དང༌། དགེ་སློང་དག་ལ་ལག་པའི་ཆུ་ཟེར་གྱིས་ཕོག་པ་དང༌། དེ་དག་འཕྱ་བ་ལས་སྙན་དུ་བདས་ཏེ། བཀའ་སྩལ་པ། ལག་པ་སྤྲུགས་ཤིང་ཟས་མི་བཟའ་བར་བྱའོ་ཞེས་བསླབ་པའི་གནས་བཅས་སོ། །ལྷུང་བཟེད་མི་བསྐྱམས་པར་བྱ་ཞེས་བྱ་བ་ནི་དྲུག་སྡེ་རྣམས་ཀྱི་གན་ན་དགེ་སྦྱོང་སྦྱར་མ་ངུར་ཁ་ཞིག་གོན་ཞིང་འདུག་པས་དྲུག་སྡེ་རྣམས་ན་རེ་དགའ་བོ་བསྙེན་དགའ་བོ་བཀྲེན་པ་འདིའི་སྙིང་ལམ་ན་སྦྱར་མ་འདི་ལྟ་བུ་བདག་ཅག་གིས་མ་བགོས་སྙན་སེམས་ཀྱིས། དེ་མི་དགའ་བར་བྱའོ་ཞེས་ནས་ལྷུང་བཟེད་བཀྲུ་བའི་ཆུས་ཆོས་གོས་དེ་མ་རུང་བར་བྱས་སོ། །དེ་ནས་དེ་འཕྱ་བ་ལས་སྙན་དུ་བདས་ཏེ། བཀའ་སྩལ་པ། ལྷུང་བཟེད་མི་བསྐྱམས་པར་བྱའོ། །ཞེས་བསླབ་པའི་གནས་བཅས་སོ། །མཆོད་རྟེན་འདྲ་བར་སྦྲུས་ཏེ་ཟས་མི་བཟའ་བར་བྱའོ་ཞེས་བྱ་བ་ནི་མཉན་དུ་ཡོད་པ་ན་ཁྱིམ་བདག་ཅིག་འདུག་པ་དེ་དག་གཅེར་བུ་བ་ལ་མ་དགའ་བ་ལས། ཕྱིས་སངས་རྒྱས་ལ་དགའ་བར་གྱུར་ནས་དགེ་འདུན་སྤྱན་དྲངས་ནས། དེས་ཕྱེ་བྲིམས་པ་དང༌། དྲུག་སྡེ་དག་གིས་ཕྱེ་བ་རྫིས་ཏེ་མཆོད་རྟེན་འདྲ་བར་བྱས་ནས་བཞག་གོ །ཕྱིས་ལ་ཕུག་བྲིམས་པ་དང༌། དེ་ཡང་བུ་གུ་བརྐོས་ནས་སྲོག་ཤིང་འདྲ་བར་བྱས་སོ། །དེ་ནས་ཁུར་བ་བྲིམས་བ་དང༌། དེ་ཡང་ལ་ཕུག་གི་སྟེང་དུ་གདུགས་ལྟ་བུར་བྱས་ནས་དགའ་བོ་བསྙེན་དགའ་བོ་འདི་ནི་ངན་འགྲོ་
རྫོགས་བྱེད་ཀྱི་མཆོད་རྟེན་ནོ་ཞེས་འཛེར་ཏོ། །དེ་ནས་ཡང་དེ་བཤིག་སྟེ་ཟ་བའི་ཚེ། ངན་འགྲོ་རྫོགས་བྱེད་ཀྱི་མཆོད་རྟེན་བཤིག་གོ་ཞེས་འཛེར་ཅིང་ཟ་བ་ཁྱིམ་བདག་གིས་ཐོས་ནས། འཕགས་པ་དག་དེ་ལྟ་བུའི་སྡིག་པའི་ལྟ་བ་ལས་སླར་བཟློག་ནི་ཟིན་ན། ཁྱེད་ཅག་འགྱོད་པ་ད་རུང་མ་བྱང་ངམ་ཞེས་བྱས་བ་དང༌། དེ་དག་ཅང་མི་ཟེར་བར་འཁོད་དོ། །དེ་ལྟར་གྱུར་པ་སྙན་དུ་བདས་ནས། མཆོད་རྟེན་འདྲ་བར་སྤྲུས་ནས་ཟན་མི་བཟའ་བར་བསླབ་པར་བྱའོ་ཞེས་འདུལ་བ་ལ་བསླབ་པའི་གནས་བཅས་སོ། །དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་ཕྱིར་མི་བལྟ་བར་བྱ་ཞེས་བྱ་བ་ནི་དྲུག་སྡེ་རྣམས་གྲོང་ན་ཟན་ཟ་བ་དེ་དག་གིས་གན་ན། དགེ་སློང་ཞིག་མང་དུ་ཟ་བ་ལ་དྲུག་སྡེ་རྣམས་འཕྱ་ནས་དགའ་བོ་བསྙེན་དགའ་བོ་རྒ་ན་ཞུགས་འདི་མང་དུ་ཟ་བ་ལ་ལྟོས་ཞེས་འཛེར་བ་ལས་སྙན་དུ་བདས་ནས་བཀའ་སྩལ་པ། འཕྱ་བར་སེམས་ཤིང་ལྟུང་བཟེད་ལ་མི་བལྟ་བར་བྱའོ་ཞེས་བསླབ་པ་བཅས་སོ། །ལག་པ་ཟས་དང་འབགས་པས་ཆུ་སྣོད་ལ་མི་གཟུང་བར་བྱའོ་ཞེས་བྱ་བ་ནི་དྲུག་སྡེ་རྣམས་ཟན་ཟ་བའི་ཚེ་ལག་པ་ཐས་དང་འབགས་པས་ཆུ་སྣོད་ལ་འཛིན་པ་དང༌། དད་པའི་ཁྱིམ་བདག་དང༌། བྲམ་ཟེ་དག་འཕྱ་སྟེ། དགེ་སློང་ཤཱཀྱའི་བུ་དག་ནི་གཙང་སྤྲ་མེད་པ་ཞེས་འཕྱ་བ་ལས་སྙན་དུ་བདས་ནས་བཀའ་སྩལ་པ། ཟས་དང་འབགས་པའི་ལག་པས་ཆུ་སྣོད་ལ་མི་གཟུང་བར་བྱའོ་ཞེས་བསླབ་པ་བཅས་སོ། །དྲུང་ན་འདུག་པའི་དགེ་སློང་ལ་ཆུ་ཟས་དང་འབགས་པས་མི་གཏོར་བར་བྱ་ཞེས་བྱ་བ་ནི་དྲུག་སྡེ་རྣམས་གྲོང་ན་ཟན་ཟ་བ་ལས་གན་ན་དགེ་སློང་སྦྱར་མ་ངུར་ཁ་ཞིག་གྱོན་ཞིང་འདུག་པ་ལས་དྲུག་སྡེ་རྣམས་ཀྱིས་བཀྲེན་པ་དེའི་རྨི་ལམ་ན་འུ་བུ་ཅག་གིས་སྔོན་མ་གྱོན་སྙམ་གྱིས་མི་དགའ་བར་བྱའོ། །ཞེས་ལག་པ་ཟས་དང་འབགས་པའི་ཆུས་མ་རུང་བར་བྱས་ཏེ། དེ་ལྟར་བྱས་པ་སྙན་དུ་བདས་ཏེ་དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་བར་བྱའོ་ཞེས་བསླབ་པ་བཅས་སོ། །ཁྱིམ་བདག་འདུས་པ་ལ་མ་དྲིས་པར་ཆུ་ཟས་དང་འབགས་པ་ཁྱིམ་པའི་ཁྱིམ་དུ་མི་དབོ་བར་བྱའོ་ཞེས་བྱ་བ་ནི་ཡུལ་སྦལ་དཀར་ཅན་དུ་རྒྱལ་བུ་རྟོགས་ལྡན་གྱིས་དགེ་འདུན་བཤོས་ལ་སྤྱན་དྲངས་ན་བཤོས་གསོལ་བ་དང༌། དྲུག་སྡེ་པོ་རྣམས་ཀྱིས་ལྷུང་བཟེད་ཀྱི་ཆུ་དེ་ཉིད་དུ་ཕོའོ། །ཞལ་ཟས་འདྲིམ་པའི་མི་
རྣམས་འཕྱ་སྟེ་ཚོན་བརྒྱ་རྩ་གཅིག་གིས་བྲིས་པའི་ཁང་བ་མ་རུང་བར་བྱས་སོ་ཞེས་འཕྱ་བ་ལས་སྙན་དུ་བདས་ཏེ། བཀའ་སྩལ་པ། ཟས་དང་འབགས་པའི་ཆུས་ཁྱིམ་པའི་ཁྱིམ་དུ་མིད་པོ་བར་བྱའོ་ཞེས་བསླབ་པ་བཅས་སོ། །མ་དྲིས་ཞེས་བྱ་བ་ནི་ཁྱིམ་པ་འདུག་པས་འདིར་ཕོ་ཤིག་ཅེས་ཟེར་བ་ལ་ཉེས་མེད་དོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་བར་བྱ་བ་ནི། མཉན་དུ་ཡོད་པ་ན་བྲམ་ཟེ་ཞིག་གནས་པའི་བུ་ན་ནས་དེས་སྨན་པ་ལ་དྲིས་པ་དང༌། བྲམ་ཟེ་དེ་ཡང་ཆོས་ལ་དད་པ་ཞིག་པས། ལྷུང་བཟེད་བཀྲུས་པའི་ཆུས་ཁྲུས་བྱོས་ཤིག་ཅེས་བ་སྟན་པས་བྲམ་ཟེས་དགེ་སློང་དྲུག་སྡེ་པོའི་གན་དུ་སོང་ནས་ལྷུང་བཟེད་བཀྲུས་པའི་ཆུ་བསླངས་པ་དང༌། དེ་ཉིད་ན་སྣོད་གཅིག་ཁྱེར་ཏེ་འོང་ངོ་ཞེས་ནས་དེ་ནང་དུ་སོང་སྟེ་ལྷུང་བཟེད་ཀྱི་ནང་དུ་འབྲས་དང་ཕྱེ་དང༌། ཁུར་བ་དང་ཤ་ལྷག་མ་ཆུ་དང་བསྲེས་ཏེ་ཕྱིར་ཕུང་ནས་བྲམ་ཞེ་ལ་བསྟེན་པ་དང༌། འཕགས་པ་བུ་ཤི་ཡང་བླའི་དེ་ལྟ་བུའི་བཙོག་པས་ནི་མི་བཀྲུའོ། །ཞེས་ཟེར་བ་ལས་སྙན་དུ་བདས་ནས་བཀའ་སྩལ་པ། ལྷུང་བཟེད་བཀྲུས་པའི་ཆུ་སློང་བ་ལ་ལྷུང་བཟེད་དུ་ལྷག་མ་བླུགས་ཏེ་མི་སྦྱིན་པར་བསླབ་པར་བྱའོ། །གལ་ཏེ་ལྷུང་བཟེད་ཀྱི་ཆུ་ཞིག་སློང་ན་ལྷུང་བཟེད་ལན་གསུམ་ཁྲུས་ལ་ཞལ་ནས་གསུངས་པའི་ཚིགས་སུ་བཅད་པ་བཀླགས་པས་སྦྱིན་པར་བྱའོ་ཞེས་བསླབ་པ་བཅས་སོ། །འོག་གཞི་མེད་པའི་ས་ལ་ལྷུང་བཟེད་མི་གཞག་པར་བྱ་ཞེས་བྱ་བ་ནི་མཉན་དུ་ཡོད་པ་ན། དགེ་སློང་ཞིག་གིས་འོག་གཞི་མེད་པའི་ས་ལ་ལྷུང་བཟེད་གཞག་པ་ན་བཙས་ཟོས་པ་སྙན་དུ་བདས་ཏེ། བཀའ་སྩལ་བ། འོག་གཞི་མེད་པའི་ས་ལ་ལྷུང་བཟེད་མི་གཞག་པར་བྱའོ་ཞེས་བསླབ་པ་བཅས་སོ། །གད་ཀར་ལྷུང་བཟེད་མི་གཞག་པར་བྱའོ་ཞེས་བྱ་བ་ནི་དགེ་སློང་ཞིག་གིས་ལྷུང་བཟེད་གད་ཀར་བཞག་པ་ལས་སྙན་དུ་བདས་ཏེ་གད་ཀར་ལྷུང་བཟེད་མི་གཞག་པར་བྱའོ་ཞེས་བསླབ་པ་བཅས་སོ། །གཡང་སར་ལྷུང་བཟེད་མི་གཞག་པར་བྱ་ཞེས་བྱ་བ་ནི་དགེ་སློང་རྣམས་ལྷུང་བཟེད་གཡང་སར་བཞག་པ་ལས་རྦབ་ཏུ་སོང་གིས་དོགས་པའི་ཕྱིར། བཀའ་སྩལ་པ། གཡང་སར་མི་གཞག་པར་བྱ་ཞེས་བསླབ་པ་བཅས་སོ། །དཀན་གཟར་པོར་ལྷུང་བཟེད་མི་གཞག་པར་བྱ་ཞེས་བྱ་བ་ནི། དགེ་སློང་རྣམས་ལྷུང་བཟེད་བང་རིམ་གྱི་དེར་བཞག་པས་དེ་ཉིད་ཉེས་
པར་འགྱུར་རོ་ཞས་བཀའ་སྩལ་པ། ལྷུང་བཟེད་བང་རིམ་དུ་མི་གཞག་པར་བྱའོ་ཞེས་བསླབ་པ་བཅས་སོ། །འགྲེང་སྟེ་ལྷུང་བཟེད་མི་བཀྲུ་ཞེས་བྱ་བ་ནི་མཉན་དུ་ཡོད་པ་ན། དགེ་སློང་ཞིག་འགྲེང་ཞིང་ལྷུང་བཟེད་འཁྲུ་བས་མ་བྱེད་ཅིག་ཅེས་དགེ་སློང་དག་གིས་བསྒོ་ན་ཅིར་འགྱུར། ལྷུང་བཟེད་ཆག་པར་འགྱུར་རོ་ཞེས་བྱས་ན་མ་བཏུབ་པས་ལྷུང་བཟེད་ལྷུང་ནས་ཆག་པས་སྙན་དུ་བདས་ཏེ། བཀའ་སྩལ་པ། འགྲེང་སྟེ་ལྷུང་བཟེད་མི་བཀྲུ་བར་བྱའོ་ཞེས་བསླབ་པ་བཅས་སོ། །འབབ་ཆུ་དྲག་པོའི་རྒྱུན་ལས་བཟློག་སྟེ། ལྷུང་བཟེད་ཀྱིས་ཆུ་མི་བཅུ་བར་བྱའོ་ཞེས་བྱ་བ་ནི། དགེ་སློང་རྣམས་ཆུ་བོ་རྒྱུན་དྲག་པོ་ལས་ཡར་བཟློག་སྟེ། ལྷུང་བཟེད་ཀྱིས་ཆུ་བཅུས་པས་ལྷུང་བཟེད་ཆུས་ཁྱེར་བ་ལས་སྙན་དུ་བདས་ཏེ། བཀའ་སྩལ་པ་ཆུའི་རྒྱུན་ལས་ཡར་བཟློག་སྟེ་ལྷུང་བཟེད་ཀྱི་ས་ཆུ་མི་བཅུ་བར་བྱའོ་ཞེས་བསླབ་པ་བཅས་སོ། །གད་ཀ་དང་དཀན་གཟར་པོར་ལྷུང་བཟེད་མི་བཀྲུ་ཞེས་བྱ་བ་ནི། གོང་དུ་གཞག་པར་མི་བྱ་ཞེས་བྱ་བ་དང་སྦྱར་ཏེ་བཀྲུ་བས་བྱེ་བྲག་གོ །མིན་པར་འདུག་པ་ལ་འགྲེང་སྟེ་ཆོས་མི་བཤད་ཅེས་བྱ་བ་ནི་མཉན་དུ་ཡོད་པ་ན་སྟེ། དྲུག་སྡེ་རྣམས་མི་ན་བར་འདུག་པ་ལ་འགྲེང་བཞིན་དུ་ཆོས་སྟོན་པ་དང༌། དད་པའི་བྲམ་ཟེ་དང་ཁྱིམ་བདག་དག་འཕྱ་སྟེ། བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་གྱི་བར་དུ་དཀའ་བ་སྤྱད་དེ་ཕ་རོལ་ཏུ་ཕྱིན་པ་དྲུག་རྫོགས་པས་བླ་ན་མེད་པའི་ཡེ་ཤེས་བསྙེས་ན་ཁྱེད་ནི་གུས་པར་རིམ་གྲོ་མེད་པར་ས་ལ་འདུག་པ་ལ་ཆོས་འཆད་དམ་ཞེས་འཕྱ་བ་ལས་སྙན་དུ་བདས་ཏེ། མིན་བར་འདུག་པ་ལ་འགྲེང་སྟེ་ཆོས་མི་བཤད་པར་བྱའོ་ཞེས་བསླབ་པ་བཅས་སོ། །མི་ན་ངར་ཉལ་བ་ལ་འདུག་སྟེ་ཆོས་མི་བཤད་པར་བྱའོ་ཞེས་བ་ནི་དྲུག་སྡེ་རྣམས་མི་ན་བར་ཉལ་བ་ལ་འདུག་སྟེ་ཆོས་འཆད་པས་ཁྱིམ་བདག་དག་འཕྱ་བ་ལས་སྙན་དུ་བདས་ནས་མི་ན་བར་ཉལ་བ་ལ་འདུག་སྟེ་ཆོས་མི་བཤད་པར་བྱའོ། །ཞེས་བསླབ་པ་བཅས་སོ། །མི་ན་བར་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་ཆོས་མི་བཤད་པར་བྱ་བ་ནི་དྲུག་སྡེ་རྣམས་སྟན་དམའ་བ་ལ་འདུག་ནས་སྟན་མཐོང་པོ་ལ་མི་ན་བར་འདུག་པ་ལ་ཆོས་བཤད་པས་ཁྱིམ་པ་དག་འཕྱ་བ་ལས་སྙན་དུ་བདས་ནས། མི་ན་བར་སྟན་མཐོན་པོ་ལ་འདུག་པ་ལ། སྟན་དམའ་བ་ལ་འདུག་སྟེ་ཆོས་མི་བཤད་པར་བྱའོ་ཞེས་བསླབ་པ་
བཅས་སོ། །མིན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་མི་བཤད་པར་བྱ་ཞེས་བྱ་བ་ནི་དྲུག་སྡེ་རྣམས་མཉན་དུ་ཡོད་པ་ན་མིན་བར་མདུན་དུ་འགྲོ་བ་ལས། ཕྱིས་མི་སླེབས་བཞིན་དུ་ཆོས་འཆད་པ་ལས་ཁྱིམ་པ་འཕྱ་བ་ལས་སྙན་དུ་བདས་ཏེ། མིན་བར་མདུན་དུ་འགྲོ་བ་ལ་ཕྱི་ནས་འགྲོ་ཞིང་ཆོས་མི་བཤད་པར་བྱའོ་ཞེས་བཅས་སོ། །མིན་བར་ལམ་ནས་འགྲོ་བ་ལ་འགྲམ་ནས་འགྲོ་ཞིང་ཆོས་མི་བཤད་པར་བྱའོ་ཞེས་བྱ་བ་ནི་དྲུག་སྡེ་རྣམས་ནི་ལམ་གྱི་འགྲམ་ནས་འགྲོ་ཞིང་མིན་བ་ནི་ལམ་དུ་འགྲོ་བ་ལ་ཆོས་འཆད་པས་ཁྱིམ་པ་དག་འཕྱ་བ་ལས་སྙན་དུ་བདས་ཏེ། མིན་བར་ལམ་དུ་འགྲོ་བ་ལ་ལམ་གྱི་འགྲམ་ནས་འགྲོ་ཞིང་ཆོས་མི་བཤད་པར་བྱའོ་ཞེས་བཅས་སོ། །མིན་པར་མགོ་གཡོགས་པ་ལ་ཆོས་མི་བཤད་པར་བསླབ་པར་བྱ་ཞེས་བྱ་བ་ནི་དྲུག་སྡེ་རྣམས་ཀྱིས་མགོ་གཡོགས་པ་ལ་ཆོས་བཤད་པ་དང༌། བྲམ་ཟེ་དང་ཁྱིམ་བདག་དག་འཕྱ་སྟེ། བཅོམ་ལྡན་འདས་ཀྱིས་བཀའ་སྩལ་པ་གྲངས་མེད་པ་གསུམ་དུ་དཀའ་བ་སྤྱད་པ་བརྒྱ་སྟོང་དུ་མས་ཕ་རོལ་ཏུ་ཕྱིན་པ་དྲུག་རྫོགས་ཏེ། བླ་ན་མེད་པའི་བྱང་ཆུབ་ཐོབ་ན་འདི་དག་རིམ་གྲོ་མེད་པ་ལ་ཆོས་འཆད་དོ་ཞེས་འཕྱ་བ་ལས་སྙན་དུ་བདས་ཏེ། མིན་བར་མགོ་གཡོགས་པ་ལ་ཆོས་མི་བཤད་པར་བྱའོ་ཞེས་བསླབ་པ་བཅས་སོ། །མགོ་གཡོགས་པ་ལ་ཆོས་བཤད་པ་ཇི་ལྟ་བ་བཞིན་དུ་བརྫེས་པ་དང༌། གོས་གཟར་བ་དང༌། གོས་གཉའ་གོང་དུ་བསྣོལ་བ་དང་ཕྲག་པ་གཉིས་ལ་གཟར་བ་ལ་དྲུག་སྡེ་རྣམས་ཆོས་འཆད་པ་ལས་བསླབ་པའི་གནས་བཅས་པ་ནི་མགོ་གཡོགས་པ་ཇི་ལྟ་བ་བཞིན་དུ་སྦྱར་རོ། །དོ་ཀེར་ཅན་དང༌། ཞྭ་གོན་པ་ལ་དྲུག་སྡེ་རྣམས་ཆོས་འཆད་པས་བྲམ་ཟེ་དང༌། ཁྱིམ་བདག་དག་འཕྱ་བ་ལས་སྙན་དུ་བདས་ཏེ། མི་ན་བར་དོ་ཀེར་ཅན་དང་ཞྭ་གྱོན་པ་ལ་ཆོས་མི་བཤད་པར་བྱའོ་ཞེས་བསླབ་པ་བཅས་སོ། །དོ་ཀེར་ཅན་དང་ཞྭ་གྱོན་པ་ལ་ཇི་ལྟ་བ་བཞིན་དུ། ཅོད་པན་ཅན་དང༌། ཕྲེང་བ་ཅན་དང༌། ཐོད་བཅིངས་པ་ལ་མིན་བར་ཆོས་མི་བཤད་པར་བྱའོ་ཞེས་བྱ་བའི་བར་དུ་རྒྱས་པར་སྦྱར་རོ། །མིན་བར་གླང་པོ་ཆེ་ཞོན་པ་ལ་ཆོས་མི་བཤད་པར་བྱ་བ་ནི་དྲུག་སྡེ་རྣམས་གླང་པོ་ཆེ་ཞོན་པ་ལ་ཆོས་བཤད་པ་དང༌། དད་པའི་ཁྱིམ་བདག་དག་འཕྱ་སྟེ། འཕགས་པ་དག་བཅོམ་ལྡན་འདས་ཀྱིས་བསྐལ་པ་གྲངས་མེད་པ་གསུམ་
དུ་དཀའ་བ་སྤྱད་པས་བླ་ན་མེད་པའི་བྱང་ཆུབ་བརྙེས་ན་དེ་ལྟ་བུ་མ་གུས་པར་རིམ་གྲོ་མེད་པ་ལ་ཆོས་འཆད་དམ་ཞེས་འཕྱ་བ་ལས་སྙན་དུ་བདས་ནས། བཀའ་སྩལ་པ། མིན་པར་གླང་པོ་ཆེ་ཞོན་པ་ལ་ཆོས་མི་བཤད་པར་བྱའོ་ཞེས་བཅས་སོ། །མི་ན་བར་གླང་པོ་ཆེ་ཞོན་པ་ལ་ཆོས་བཤད་དུ་མི་གནང་བ་དེ་བཞིན་དུ་རྟ་ཞོན་པ་དང༌། ཁྱོགས་ན་འདུག་པ་དང༌། བཞོན་པའི་སྟེང་ན་འདུག་པ་དང༌། ལྷམ་མཐོན་པོ་གྱོན་པ་ལ་ཆོས་མི་བཤད་པར་ཡང་རྒྱས་པར་སྦྱར་རོ། །མི་ན་བར་ལག་ན་དབྱུག་པ་ཐོགས་པ་ལ་ཆོས་མི་བཤད་པར་བྱ་ཞེས་བྱ་བ་ནི་དྲུག་སྡེ་རྣམས་ལག་ན་དབྱུག་པ་ཐོགས་པ་ལ་ཆོས་བཤད་པས་དད་པའི་བྲམ་ཟེ་དང༌། ཁྱིམ་བདག་གིས་འཕྱ་སྟེ། བཅོམ་ལྡན་འདས་ཀྱིས་བསྐལ་པ་གྲངས་མེད་པ་དུ་མར་དཀའ་བ་སྤྱད་པས་བླ་ན་མེད་པའི་བྱང་ཆུབ་བརྙེས་ན། འཕགས་པ་དག་རིམ་གྲོ་མེད་པ་དང་གུས་པ་མེད་པ་ལ་ཡང་ཆོས་བཤད་དམ་ཞེས་འཕྱ་བ་ལས་སྙན་དུ་བདས་ནས་མི་ན་བར་ལག་ན་དབྱུག་པ་ཐོགས་པ་ལ་ཆོས་མི་བཤད་པར་བྱའོ་ཞེས་བཅས་སོ། །མི་ན་བར་ལག་ན་དབྱུག་པ་ཐོགས་པ་ལ་ཆོས་འཆད་དུ་མི་གནང་བ་དེ་བཞིན་དུ་མི་ན་བར་གདུགས་ཐོགས་པ་དང༌། མཚོན་ཆ་ཐོགས་པ་དང༌། རལ་གྲི་ཐོགས་པ་དང༌། ལག་ན་དགྲ་ཆ་ཐོགས་པ་དང༌། གོ་ཆ་བགོས་པ་ལ་ཡང་ཆོས་མི་བཤད་པར་ཡང་རྒྱས་པར་སྦྱར་རོ། །མི་ན་བར་འགྲེང་སྟེ་བཤད་གཅི་མི་བྱ་ཞེས་བྱ་བ་ནི་མཉན་དུ་ཡོད་པ་ན་བསྙེན་དགའ་བོས་འགྲེང་བཞིན་དུ་བཤད་གཅི་བྱས་པས་སྟོན་པའི་ཉན་ཐོས་རྣམས་ནི་ངོ་ཚ་ཤེས་པ་རྣམས་ཡིན་ན། འདི་ནི་ངོ་ཚད་དང་ཁྲེལ་གྱིས་མི་དོགས་པའི་ཉན་ཐོས་དག་ཅི་ཡིན་ཞེས་བྲམ་ཟེ་དང་ཁྱིམ་བདག་དག་འཕྱ་བ་ལས་སྙན་དུ་བདས་ནས། མི་ན་བར་འགྲེང་ཞིང་བཤད་གཅི་མི་བྱའོ་ཞེས་བསླབ་པ་བཅས་སོ། །མི་ན་བར་ཆུའི་ནང་དུ་བཤད་གཅི་མི་བྱའོ་ཞེས་བྱ་བ་ནི་མཉན་དུ་ཡོད་པ་ན་བསྙེན་དགའ་བོས་གཙོ་བླག་མཁན་ཞིག་གི་གན་དུ་སོང་ནས་ངའི་གོས་འདི་ཁྲུས་ཏེ་བྱིན་ཅིག་ཅེས་བྱས་པ་དང༌། དེས་སྨྲས་པ། འཕགས་པ་སྔོན་ནི་བདག་ཅག་ལ་མགོན་སྐྱབས་དང་བསྲུང་བ་མཛད་ན། ད་ནི་མི་མཛད་ན་མི་བཀྲུའོ་ཞེས་པ་དང༌། བསྙེན་དགའ་བོས་བཀྲེན་པ་སྡོད་ཅིག་ཅེས་མི་དགའ་བར་བྱའོ་སྙམ་ནས། བཀྲུ་སྨན་འཐུངས་ཏེ་རྙོངས་པས་ཆུའི་ནང་དུ་བླུགས་སོ། །བཙོ་བླག་མཁན་ནང་པར་
སྔར་ལངས་ཏེ། གོས་བཀྲུས་ཞེས་བྱ་བ་ནི་རྙོང་བ་མནམ་ནས། དེ་ཀོས་བཙུགས་བཅས་ཏེ་རབ་ཏུ་སེམས་ཤིང་འདུག་པ་དང༌། བསྙེན་དགའ་བོས་ཡང་ཕྱོགས་དེར་འོངས་ནས་བཞིན་བཟངས་ཅི་ཉེས། འཕགས་པ་སུས་བདག་གིས་བཀྲུ་བའི་ཆུའི་ནང་དུ་རྐྱག་པ་བོར་བ་མ་འཚལ། དེ་ནི་ངས་བྱས་ཏེ་བཀྲན་པ་ཁྱོད་མི་དགའ་བར་བྱའོ་ཞེས་བྱས་པ་དང༌། དེ་དག་འཕྱ་བ་ལས་སྙན་དུ་བདས་ནས་མི་ན་བར་ཆུའི་ནང་དུ་བཤད་གཅི་མི་བྱའོ་ཞེས་བསླབ་པ་བཅས་སོ། །མི་ན་བར་ཆུའི་ནང་དུ་བཤད་གཅི་མི་བྱ་བ་བཞིན་དུ་མཆིལ་མ་དང༌། སྣབས་དང༌། སྐྱུགས་པ་དང༌། སྣ་ནས་གཟགས་པ་ཡང་མི་དོར་བར་དེ་བཞིན་དུ་བསླབ་པར་བྱའོ་ཞེས་བཅས་སོ། །མིན་པར་རྩྭ་སྔོན་པོ་ཡོད་པའི་ཕྱོགས་སུ་བཤད་གཅི་མི་བྱ་ཞེས་བྱ་བ་ནི་གྲོང་ཁྱེར་སེར་སྐྱའི་གནས་ན་འདུག་སྟེ། བསྙེན་དགའ་བོ་ལྡུམ་པའི་གན་དུ་སོང་སྟེ། ལྡུམ་བུ་བསླངས་པ་དང་མ་བྱིན་ནོ་དེ་ནས་དེ་མི་དགའ་བར་བྱའོ་ཞེས་ནས་བཀྲུ་སྨན་འཐུངས་ཏེ་རྙོང་པས་གྱོ་མོ་བཀང་སྟེ་ཕྱགས་མ་ཐོགས་ནས་ལྡུམ་ར་ཐམས་ཅད་རྙོང་པས་ཆག་ཆག་བཏབ་སྟེ་མ་རུང་བར་བྱས་སོ། །མི་གཙང་བ་མནམ་པས་ཝ་རྣམས་ཀྱང་འདུས་ཏེ་ཇེ་ཐུར་མ་རུང་བར་བྱས་སོ། །ནང་པར་ལྡུམ་པ་ཚོང་དུས་སུ་ལྡུམ་པ་བཙོང་དུ་འགྲོ་ཞེས་ལྡུམ་རར་བ་ལྟས་ན་མ་རུང་བར་གྱུར་ཏེ་རབ་ཏུ་སེམས་ཤིང་འདུག་པ་དང༌། བསྙེན་དགའ་བོས་མཐོང་སྟེ། ཅིའི་ཕྱིར་སེམས་ཞེས་བྱས་ན་ལྡུམ་རར་རྐྱག་པས་བཀང་སྟེ། སུ་མཆིས་མ་འཚལ་ཏོ་ཞེས་བྱས་པ་དང༌། བཀྲེན་པ་ཁྱོད་མི་དགའ་བར་བྱ་བའི་ཕྱིར་ངས་ཆེད་དུ་བྱས་སོ་ཞེས་བྱས་པ་དང་དེ་ཡང་འཕྱ་བར་གྱུར་པ་སྙན་དུ་བདས་ནས། བཀའ་སྩལ་པ། མི་ན་བར་རྩྭ་སྔོན་པོའི་ས་ཕྱོགས་སུ་བཤད་གཅི་མི་བྱ་བར་བསླབ་པ་བཅས་སོ། །བཤང་གཅི་ཇི་ལྟ་བ་བཞིན་དུ་མཆིས་མ་དང༌། སྣབས་དང༌། སྐྱུགས་པ་དང༌། སྣ་ནས་གཟགས་པ་དག་མི་དོར་བར་བྱའོ་ཞེས་བཅས་སོ། །གནོད་པ་བྱུང་བ་མ་གཏོགས་ཏེ་ཤིང་ལ་མི་གང་ལས་མཐོར་འཛེག་ཏུ་མི་གནང་བ་ནི་མཉན་དུ་ཡོད་པ་ན་ཁྱིམ་བདག་ཅིག་གིས་དགེ་འདུན་རྣམས་བཤོས་ལ་སྤྱན་དྲངས་སོ། །བསྙེན་དགའ་བོས་གཙུག་ལག་ཁང་སྐྱོང་གི་ཟན་མནོས་ནས། ཁང་སྐྱོང་དི་རིང་ཟན་ཆད་པར་བྱའོ་སྙམ་བསམས་ནས་ཛེ་ཏའི་ཚལ་ནས་མཉན་དུ་ཡོད་པའི་བར་དུ་གོམ་པ་དུ་ཡོད་པ་འཇལ་ཞིང་འགྲོ་
བ་དང༌། ཁང་སྐྱོང་གིས་ཀྱང་དྲོ་ཡོལ་དུ་ཉེ་ནས་ཤིང་ལ་འཛེགས་ཏེ་བལྟས་ན། བསྙེན་དགའ་བོ་དལ་གྱིས་འོངས་པ་མཐོང་ནས། གཞིར་ཕྱིན་པ་ལ་ཁྱོད་ཀྱིས་ང་ཟན་བཅད་པར་བསམས་ཏེ་དལ་གྱིས་འོངས་པ་ངས་ཤིང་ལ་འཛེགས་ཏེ་བལྟས་པས་མཐོང་ངོ་ཞེས་སྨྲས་པ་དང༌། སྙན་དུ་བདས་ཏེ། ཤིང་ལ་འཛེག་ཏུ་མི་གནང་བར་བཅས་སོ། །དེ་ལྟར་མི་གནང་བ་དང༌། དགེ་སློང་གོས་ཁ་དོག་བསྒྱུར་བ་དག་ལས་མི་བྱེད་ནས་སླད་ཀྱིས་མི་གང་ཙམ་དུ་འཛེག་ཏུ་གནང་བ་དང༌། མི་གང་ཙམ་དུ་འཛེག་ཏུ་གནང་བ་ལས་དགེ་སློང་ཞིག་འགྲོན་པ་མང་པོ་དང་འགྲོགས་ཏེ་ལམ་དུ་སོང་བ་ལས། དགོན་པའི་ལམ་དུ་སྟག་གིས་འཇིགས་ནས་མཐོར་མ་འཛེགས་ནས་སྟག་གིས་བསད་དོ། །དེ་ལྟར་གྱུར་པ་སྙན་དུ་བདས་ནས། གནོད་པ་བྱུང་བའི་དུས་སུ་མི་གང་ལས་མཐོ་བར་འཛེག་ཏུ་གནང་ངོ༌། །བསླབ་པ་མང་པོ་མི་བརྗེད་པའི་ཚིག་གོ། །།སོ་སོར་ཐར་པའི་སྐབས་ནས་འདུལ་བའི་དངོས་པོ་བམ་པོ་ལྔ་བཅུ་རྩ་བརྒྱད་དང༌། ལྔ་བཅུ་རྩ་དགུ་པ་དང༌། དྲུག་ཅུའི་ནང་ན་རྩོད་པའི་དངོས་པོ་རྒྱ་ཆེར་འཆད་ཀྱིས་དེར་ལྟོས་ཤིག །རྩོད་པ་ཞི་བར་བྱ་བ་བདུན་སྨོས་པ་ལས་བརྩམས་ཏེ་སྨྲས་པ། རྩོད་པ་ཞེས་བྱ་བ་ནི་རྣམ་པ་བཞི་སྟེ། འཐབ་པ་ལ་རྩོད་པ་དང༌། མི་སྟོན་པས་རྩོད་པ་དང༌། ཉེས་པ་འབྱུང་བ་ལས་རྩོད་པ་དང༌། བྱ་བ་ལས་རྩོད་པའོ། དེ་ལ་འཐབ་ཅིང་འཁྲུག་པའི་གླེང་གཞི་ནི་བཅོམ་ལྡན་འདས་གྲོང་ཁྱེར་སེར་སྐྱའི་གནས་ན་བཞུགས་ཏེ། ཕྱི་དྲོ་རྒྱལ་པོ་ཟས་གཙང་མ་དང༌། ཤཱ་ཀྱའི་མིང་ཆེན་པོ་ལ་སོགས་པ་ལ་ཆོས་སྟོན་པར་མཛད་དོ། །སྔ་དྲོ་ནི་སྐྱེ་དགུའི་བདག་མོ་དང༌། ཤཱ་ཀྱ་མིང་ཆེན་གྱི་ཆུང་མ་ལ་སོགས་ཏེ། ཤཱ་ཀྱའི་བུད་མེད་རྣམས་ལ་དེའི་ཚེ་ན་བུ་མོ་གཅིག་ཅིག་རང་གི་མགུལ་ནས་མུ་ཏིག་གི་སེ་མོ་དོ་ཅིག་ཡོད་པ་ཡང་ནས་ཡང་དུ་རྟོག་ཅིང༌། ལག་པས་འཛིན་པ་སྐྱེ་དགུའི་བདག་མོས་མཐོང་སྟེ། དེའི་ང་རྒྱལ་བཅག་པའི་ཕྱིར་རང་གི་མུ་ཏིག་གི་སེ་མོ་དོ་མངག་གཞུག་མ་སྲུང་མ་ཞེས་བྱ་བ་ལེན་དུ་བཏང་བ་དང༌། བུ་མོ་ཡང་ཆོས་ཉན་པའི་བར་ཆད་དུ་བྱས་ཏེ། མི་དགའ་བཞིན་དུ་སོང་བ་ལམ་དུ་བས་བརྡུངས་ཏེ་དུས་ལས་འདས་སོ། །དེ་ཡང་དེ་མ་ཐག་ཏུ་སིང་ག་ལའི་རྒྱལ་པོའི་བུ་མོར་སྐྱེས་ཏེ་དེ་ནམ་སྐྱེས་པའི་ཚེ། དེའི་ཡུལ་མུ་ཏིག་གི་ཆར་བབ་པས་དེའི་མིང་ཡང་མུ་ཏིག་མར་བཏགས་སོ། །དུས་
ཕྱི་ཞིག་ན་ཚོང་པ་ལྔ་བརྒྱ་ཙམ་ཞིག་རྒྱ་མཚོར་ཞུགས་ཏེ་དོང་བ་རླུང་གིས་བདས་པས་ཤིང་ག་ལའི་གླེང་དུ་ཕྱིན་ཏོ། །དེ་དག་སྲོད་དང་ཐོ་རངས་ལ་གསུང་རབ་རྣམས་དབྱུངས་སུ་བཀླགས་པ་དང་བུ་མོ་དེས་ཐོས་ཏེ། ཨེ་མ་ཧོ། །དེ་ལྟ་བུའི་གླུ་སྙན་ཡུལ་སིང་ག་ལའི་མི་ཞེས་བྱ་བ་ནི། དེ་ནི་གླུ་མ་ཡིན་གྱིས་སངས་རྒྱས་ཀྱི་གསུང་རབ་ཀྱི་ཆོས་སོ་ཞེས་བྱས་ནས། སངས་རྒྱས་ཀྱི་ཡོན་ཏན་རྒྱ་ཆེར་བསྟན་པས་བུ་མོས་ཚོང་པ་ལ། ཕྲིན་དང་ཡི་གེ་སངས་རྒྱས་ལ་གསོལ་ཏེ། སངས་རྒྱས་ཀྱི་སྐུའི་རི་མོ་དང༌། ཡན་ལག་བཅུ་གཉིས་ཀྱི་ཚིགས་སུ་བཅད་པ་ཚོང་པ་ལ་བུ་མོ་མུ་ཏིག་མའི་དྲུང་དུ་བསྐུར་ཏེ། དེ་ཡང་བདེན་པ་མཐོང་བར་གྱུར་ཏོ། །དེ་ནས་བུ་མོ་དེས་སྐྱེས་ལན་དུ་སངས་རྒྱས་ལ་སོགས་པ་དཀོན་མཆོག་གསུམ་ལ་མུ་ཏིག་བྲེ་གསུམ་བསྐུར་བ་དང༌། སངས་རྒྱས་ཀྱི་སྐུ་སྐལ་ནི་དྲི་གཙང་ཁང་དུ་སྐྱང་ནུལ་བྱས་སོ། །དགེ་འདུན་གྱི་སྐུ་སྐལ་ནི་སོ་སོར་བགོས་སོ། །ཆོས་ཀྱི་རྙེད་པ་ནི་ཆོས་སྨྲ་བ་དབང་ངོ་ཞས་བྱུང་བ་དང༌། འདུལ་བ་འཛིན་པ་དང༌། མདོ་སྡེ་དང༌། མ་མོ་འཛིན་པ་རྣམས་སོ་སོ་ནས་དེ་དབང་ངོ་ཞེས་འཁྲུག་པ་ལས་འཐབ་ཅིང་རྩོད་པའི་དབང་པོར་བཅས་པ་དང༌། ཕྱིས་མཉན་དུ་ཡོད་པ་ན་སངས་རྒྱས་བཞུགས་པའི་ཚེ། ཡུལ་ཡངས་པ་ཅན་ན་དགེ་སློང་དག་འཐབ་ཅིང་རྩོད་པར་གྱུར་པ་ལས། ཚེ་དང་ལྡན་པ་ཤཱ་རིའི་བུ་དང༌། མཽད་གལ་གྱི་བུས་དེ་དག་སྡུམས་པ་སྙན་དུ་བདས་ཏེ། བཅོམ་ལྡན་འདས་ཀྱི་བཀས་མངགས་ནས། དགེ་སློང་དག་གཞན་ཡང་རྩོད་པ་འདི་ལྟ་བུ་ཞི་བར་བྱའོ་ཞེས་བཀའ་སྩལ་ཏེ། མདོར་རྩོད་པའི་ཆོས་དང་ཆོས་མ་ཡིན་པ་དཔྱོད་པ་ལས་ཕྱོགས་གཉིས་སུ་ཆད་དེ་འཐབ་མོར་གྱུར་པའོ། །འཁྲུག་ཅིང་རྩོད་པས་ན། འཁྲུག་པས་རྩོད་པ་ཞེས་བྱ་སྟེ་འཁྲུག་པ་དེའི་རྩ་བ་ནི་དྲུག་སྟེ། རྩ་བ་དྲུག་དང་དབྱེན་དུ་སྨྲ་བའི་དངོས་པོ་བཅུ་བཞིའོ། །འཁྲུག་པའི་རྩ་བ་དྲུག་པོ་གང་ཞེ་ན། ཁྲོ་ཞིང་ཁོན་དུ་འཛིན་པ་དང༌། འཆབ་ཅིང་འཚིག་པ་དང༌། ཕྲག་དོག་ཅིང་འཇུངས་པ་དང༌། སྒྱུ་བྱེད་ཅིང་གཡོ་བྱེད་པ་དང༌། ངོ་མི་ཚ་ཞིང་ཁྲེལ་གྱིས་མི་དོགས་པ་དང༌། སྡིག་པ་ལ་འདོད་ཅིང་ལོག་པར་ལྟ་བ་ལ་བདག་ཏུ་ལྟ་བ་བསྙེམས་པའོ། །དབྱེན་དུ་འབྱེད་པའི་དངོས་པོ་བཅུ་བཞི་ནི། འདི་ནི་ཆོས་སོ་ཞེས་པ་དང༌། འདི་ནི་ཆོས་མ་ཡིན་ནོ་ཞེས་
པ་དང༌། འདི་ནི་འདུལ་བ་དང༌། འདི་ནི་འདུལ་བ་མ་ཡིན་ནོ་ཞེས་པ་དང༌། འདི་ནི་ཉེས་པའོ་འདི་ནི་ཉེས་པ་མ་ཡིན་ནོ་ཞེས་པ་དང༌། འདི་ནི་ལྕི་བའོ་འདི་ནི་ཡང་བའོ་ཞེས་པ་དང༌། འདི་ནི་ལྷག་མ་ལུས་པའོ་འདི་ནི་ལྷག་མ་ལུས་པའོ་ཞེས་པ་དང༌། འདི་ནི་བསྡམ་པར་བྱའོ། །འདི་ནི་བཤགས་པར་བྱའོ་ཞེས་པ་དང༌། འདི་ནི་འདུལ་བ་ལས་འདས་པའོ་ཞེས་པ་དང་།འདི་ནི་ངན་པར་སྨྲ་བར་གྱུར་པའོ་ཞེས་པ་དང༌། འདི་ནི་དགེ་བ་དང་འདི་ནི་མི་དགེ་བའོ་ཞེས་པ་དང༌། འདི་ནི་ལུང་དུ་མི་སྟོན་པར་བྱེད་པ་ལ་རྣམ་པ་གསུམ་སྟེ། དགེ་བར་འདོད་པ་དང༌། མི་དགེ་བར་འདོད་པ་དང༌། གཉི་གར་མི་འདོད་པ་ཡང་རིམ་བཞིན་དུ་སྦྱར་རོ། །གང་འཁྲུག་པ་དེ་ཉིད་རྩོད་པ་སྟེ། རྣམ་པ་བཞིར་སྦྱར་རོ། །རྣམ་པ་དང་པོ་ནི་མི་མཐུན་པར་སྨྲ་བ་ཙམ་མོ། །གཉིས་པ་ནི་དེ་ལས་གཞན་པའོ། །གསུམ་པ་ནི་གཉི་ག་ལྷན་ཅིག་པའོ། །བཞི་པ་ནི་དེ་རྣམས་མ་གཏོགས་པའོ། །མི་སྟོན་པ་ལས་རྩོད་པའི་གླེང་གཞི་ནི། གང་གླེང་བར་མི་རིགས་པར་གླེང་བ་སྟེ། ངན་པར་མ་གཏོགས་པར་གླེངས་པས་ན་མི་སྟོན་ཅིང་ཀློག་པ་དང༌། ལུང་ལ་སོགས་པ་སྟོན་པ་བཀག་པས་ན་མི་སྟོན་པའི་རྩོད་པ་ཞེས་བྱའོ། །དེ་ཡང་གང་ལྟ་བུ་ལ་བྱ་ཞེ་ན། དཔེར་ན་དགེ་སློང་མ་གྲོགས་མོས་གྱད་བུ་ནོར་ལ་ཕས་ཕམ་པས་སྐུར་ཏེ་གླེངས་པ་དང༌། དེ་ལ་དགེ་སློང་གཞན་གྱིས་ཀྱང་དེ་ཉིད་གླེངས་པ་དང༌། དེ་ཡང་མཉེས་པས་ངོ་ཚ་ནས་མ་བྱས་སོ་ཞེས་ཟེར་བ་དང༌། དགེ་སློང་བྱེ་མ་ཅན་སྨྱོ་ནས་ཅི་ཡང་བྱས་ཏེ་སངས་ནས། དགེ་སློང་གཞན་གྱིས་ཉེས་པ་དེ་ཤོགས་ཤིག་ཅེས་བྱས་ནས། ངས་མ་དྲན་ནོ་ཞེས་ནས་དགེ་སློང་རྣམས་ཀྱིས་དེ་ལ་སྟོན་པ་བཀག་སྟེ་ལུང་མི་སྟེར་བས། སྣ་དེ་ལྟ་བུ་ལ་སོགས་པས་ནི་མི་སྟོན་པ་ལས་རྩོད་པ་བྱུང་བ་ཞེས་བྱའོ། །ཉེས་པ་ལས་རྩོད་པ་བྱུང་ན་ནི་ལྟུང་བའི་རིས་ལྔ་ལས་གླེང་གཞིར་གྱུར་ཏེ། རྩོད་པ་བྱུང་བའོ། །ཉེས་པའི་རྩ་བ་ནི་ལུས་དང་ངག་ཡིད་གསུམ་ཆར་དང་ལྡན་པ་ལས་བྱུང་བ་ཡང་ཡོད། གཉིས་དང་ལྡན་པ་ལས་བྱུང་བ་ཡང་ཡོད། གསུམ་ཆར་ལ་སོ་སོར་རེ་ནས་བྱུང་བ་ཡང་ཡོད། དེ་ལ་ལུས་གཅིག་པུ་ནས་བྱུང་བ་ནི། དཔེར་ན་བསྙེན་པར་མ་རྫོགས་པའི་གང་ཟག་དང༌། ཁྱིམ་གཅིག་ཏུ་ཉལ་བ་ལས་དེ་ཡང་ཕྱིར་མ་བྱུང་བ་དང་ཕྱིར་བྱུང་བར་འདུ་ཤེས་དེ་ཉལ་བ་དང༌། བདག་ཁྱིམ་གྱི་ནང་ན་ཉལ་བ་ལས་བུད་མེད་ཕྱིས་འོངས་ཏེ་ཉལ་བ་ལས། བདག་
གཉིད་ཀྱིས་ལོག་པ་ལས་གཞན་གྱིས་མལ་ལམ་ཁྲི་ཆེན་པོའི་སྟེང་དུ་བཞག་པ་ལྟ་བུ་ནི་ལུས་འབའ་ཞིག་ལས་བྱུང་བའོ། །ངག་འབའ་ཞིག་ལས་བྱུང་བ་ཡང་ཡོད་དེ། ཇི་ལྟར་བུད་མེད་ལམ་བསམས་བཞིན་དུ་ཚིག་ལྔ་དྲུག་གམ་བདུན་ལས་འདས་པས་ཆོས་བཤད་པ་ནི་ངག་འབའ་ཞིག་ལས་བྱུང་བའོ། །སེམས་གཅིག་པུ་ལས་ངེས་པའི་མཐར་འགྱུར་མི་སྲིད་དོ། །དེ་ཅིའི་ཕྱིར་ཞེ་ན། སེམས་ལ་ནི་སྐད་ཅིག་ཏུ་འཇུག་པ་ལས་སྐད་ཅིག་ཏུ་ལྡོག་སྟེ་སེམས་ནི་ཆ་ཕྲ་བས་བསྡམ་པར་བྱ་བའི་ཉེས་བྱས་སོ། །འདིར་མ་སྨོས་སོ། །ལུས་དང་སེམས་གཉིས་ལས་ཉེས་པ་འབྱུང་བ་ནི་ཇི་ལྟར་སྲོག་གཅོད་པ་དང་ཆང་འཐུང་བ་སྟེ། ལུས་དང་སེམས་གཉིས་ལས་ཉེས་པ་བྱུང་བ་ཡིན་ཏེ་ཚིག་ཏུ་མི་སྨྲ་བའོ། །ཚིག་དང་སེམས་གཉིས་ཀྱི་ཡང་ཡོད་དེ། ཇི་ལྟར་བསམས་བཞིན་དུ་ཚིག་ལྔ་འམ་བདུན་ལས་འདས་པར་བུད་མེད་ལ་ཆོས་བཤད་པ་ནི་ཚིག་དང་སེམས་གཉིས་ལས་བྱུང་བའོ། །ལུས་དང་སེམས་དང་ཚིག་གསུམ་ཆར་ལས་ཉེས་པ་བྱུང་བ་ཡང་ཡོད་དེ། དཔེར་ན་སྲོག་གཅོད་པ་ལྟ་བུ་སེམས་ཀྱིས་ཀྱང་བསམས་ལ། ལུས་ཀྱིས་ཀྱང་སྦྱར་ཏེ་ངག་གིས་ཀྱང་གསོད་ཅེས་སྨྲ་ཞིང་ཤི་བ་ལེགས་སོ་ཞེས་སྨྲ་བའོ། །སྤྱི་དེ་ལྟ་བུ་ལས་རྩོད་པ་འབྱུང་ཞིང་གོང་མའི་ལུས་ངག་ཡིད་གསུམ་ལྟ་བུ་ལས་བྱུང་བ་ལས་ནང་འཁྲུག་ཅིང་མི་མཐུན་པར་གྱུར་པ་ལས་རྩོད་པ་བྱུང་བ་དང༌། གཞན་ཡང་ཉེས་པ་གཏན་ལ་མ་ཕེབས་པ་ལས་རྩོད་པ་བྱུང་བ་སྟེ། དེ་ཡང་དཔེར་ན་དགེ་སློང་སློང་མོས་ང་ཅན་ལྟ་བུ་ཉེས་པ་བྱུང་བ་ལས་དགེ་སློང་གཞན་ཕན་པར་དགའ་བ་རྣམས་ཀྱིས་ལྟུང་བ་ཤོགས་ཤིག་ཅེས་བྱས་ན། མ་མཐོང་ངོ་ཞེས་བཀའ་བློ་མི་བདེ་ཞིང་བསྙོན་པ་དང༌། རི་དགས་དགྲའི་བུ་ནག་པོ་ལྟ་བུ་མཉན་དུ་ཡོད་པ་ན་གནས་ཏེ། དེ་ཡང་ཚུལ་དང་ལྡན་པས་ལི་ཙྪ་བཱི་རྣམས་ཀྱིས་བསྙེན་བཀུར་བྱས་པས་ཡངས་པ་ཅན་གྱི་དགེ་སློང་དག་གིས་ཕྲག་དོག་སྐྱེས་ཏེ། དེ་ལ་སྤངས་པའི་ཀླན་ཀ་བཙལ་ནས་དེ་ཡང་དུས་གཅིག་ན་ཀུན་ཁྲུས་བྱེད་པའི་ཚེ་དེས་ཀ་ཤ་ཕུད་དེ་བཞག་པ་ལས། གཞན་གྱི་ཀ་ཤ་དང་ནོར་ཏེ་གྱོན་པ་ལས་ཀླན་ཀ་བཙལ་ཏེ། དེ་ལ་ཡང་མ་གླེངས་དེས་ཀྱང་སྐབས་མ་ཕྱེ་བར་ལྐོག་ཏུ་སྤངས་པའི་ལས་བྱས་པ་དང་དེ་ཡང་མ་རངས་ནས་མཉན་དུ་ཡོད་པར་བཅོམ་ལྡན་འདས་ཀྱི་གན་དུ་སོང་སྟེ། དེ་ལ་བཀས་སྨད་པ་དང༌། ཞིབ་ཏུ་
སྙན་དུ་གསོལ་ན། གཞན་གྱིས་ཀྱང་མ་གླེང་བདག་གིས་ཀྱང་སྐབས་མ་ཕྱེ། མངོན་སུམ་དུ་མ་གྱུར་པར་སྤངས་པའི་ལས་བྱས་པ་ནི་མི་བརྩན་ནོ་ཞེས་བཀའ་སྩལ་ནས་སྤངས་སོ། །དགེ་སློང་ལག་པ་ཅན་ནི་གཞན་གྱིས་གླེངས་ན་ཁས་བླངས་སོ། །དེ་ནས་སྤང་བར་བྱའི་ལས་བྱས་པ་དང་ཡང་བསྙོན་ཏེ། དེ་བཞིན་དུ་ཡང་དང་ཡང་དུ་བསྙོན་ཞིང་ཁས་མི་ལེན་པས་ཉེས་པ་གཏན་ལ་མི་ཕེབས་པ་ན། དེ་ལྟ་བུ་དག་ལས་ཕྱོགས་སུ་ཆད་ཅིང་རྩོད་པ་བྱུང་བ་ནི་ཉེས་པ་དང་ལྟུང་བ་ལ་རྩོད་པ་ཞེས་བྱའོ། །བྱ་བ་ལས་རྩོད་པ་ནི་དགེ་སློང་མཁས་པ་གསལ་བར་དཔྱོད་པ་དག་འདུག་ཤིང་ཚོགས་ནས་ཆོས་དང་འདུལ་བ་བཞིན་དུ་གསོལ་བ་དང་གཉིས་སམ། གསོལ་བ་དང་ལན་གསུམ་སྟེ་བཞི་འམ། གསོལ་བ་རྐྱང་པ་ལ་སོགས་པའི་ལས་བྱེད་པས་ན། ལ་ལ་ན་རེ་འདི་ནི་ཆོས་མ་ཡིན་ནོ་ཞེས་སྨྲས་པ་དང༌། ལ་ལ་ན་རེ་འདི་ནི་ཆོས་བཞིན་ནོ་ཞེས་སྨྲས་པ་དང༌། དགེ་སློང་འགའ་ཞིག་འདིར་མ་འདུས་པ་ལས་རྩོད་པ་དང༌། ཁ་ཅིག་འཕྱིས་ནས་སྔ་མ་བྱས་པ་ལས་སྐྱོ་སྔོགས་བྱས་ཏེ་རྩོད་པ་དང༌། ནང་མི་མཐུན་པ་ལས་རྩོད་པ་དང༌། ཆོས་བཞིན་མ་ཡིན་པ་ལས་རྩོད་དེ་འཐབ་ཅིང་རྩོད་པ་ལས་ཕྱོགས་གཉིས་སུ་གྱེད་ཤིང་ཆད་པ་ལས་འཐབ་མོ་བྱུང་བ་ནི་བྱ་བ་ལས་རྩོད་པ་སྟེ་རྩོད་པ་བཞི་སྨྲས་ཟིན་ཏོ། །ཞི་བར་བྱ་བ་བདུན་སྨྲ་བར་བྱ་སྟེ། གོང་མའི་རྩོད་པ་རྣམ་པ་བཞི་ལྟ་བུར་བྱ་བ་ལ་ཞི་བར་བྱ་བ་རྣམ་པ་བདུན་གྱིས་ཞི་བར་བྱ་བ་ཡང་སོ་སོར་ཁ་བསྟན་པར་བྱ་སྟེ། དེ་ལ་འཁྲུགས་པས་རྩོད་པ་ལ་ནི་མངོན་སུམ་དུ་གདུལ་བར་བྱ་བ་དང༌། ཚུལ་ཤིང་མང་པོ་སྦྱིན་པ་དང༌། གཉིས་ཀྱིས་ཞི་བར་བྱ་ཞིང་འདུལ་བར་འོས་ཏེ་དེ་གཉིས་ཀྱིས་ཞི་བར་བྱའོ། །མངོན་སུམ་དུ་འདུལ་ཞེས་བྱ་བ་ནི། རྩོད་པ་རྣམ་པ་བཞི་ལྟ་བུ་བྱུང་སྟེ། དགེ་འདུན་གྱི་ཕྱོགས་གཉིས་སུ་ཆད་པར་གྱུར་ན་དགེ་སློང་རྣམས་ཀྱིས་དགེ་སློང་གཟུ་བོ་ཞལ་ཆེ་བ་བསྐོ་བར་བྱ་སྟེ། གང་ཟག་གསུམ་མངོན་དུ་གྱུར་པ་སྟེ། དེ་ཡང་གང་ཞེན་རྒོལ་བ་མངོན་སུམ་པ་དང༌། ལན་ལྡོན་པ་དང་མངོན་སུམ་པ་དང༌། གཟུ་བོ་མངོན་སུམ་དུ་གྱུར་པ་དང༌། སྟོན་པའི་བསྟན་པ་ཇི་ལྟ་བ་བཞིན་དུ་སྟོན་གྱིས་དེ་ལས་མི་འགལ་བའོ། །དེ་ལ་རྒོལ་བ་པོས་གནས་བཅུ་དྲུག་ཏུ་དོན་ཤིན་ཏུ་བསམས་ནས་གཟུང་བར་བྱ་སྟེ། བདེན་པ་དང༌། དུས་དང༌། ཚོད་དང༌།
དོན་དུ་དབེན་པ་དང་མཐོང་བ་དང༌། ཐོས་པ་དང༌། དོགས་པ་དང༌། ལུས་དང༌། ངག་དང༌། གྲོང་དང༌། དགོན་པ་དང༌། མཚན་མོ་དང༌། ཉིན་པར་བྱས་པ་དང༌། ལྷག་མ་ལུས་པ་དང༌། ལྷག་མ་མ་ལུས་པ་དང༌། སློང་བར་ནུས་པའོ། དེའི་ཚིག་མི་བརྩན་པ་རྣམ་པ་ལྔ་སྟེ། དོན་གཏན་ལ་མ་ཕེབས་པ་དང༌། གཅིག་ནས་གཅིག་ཏུ་བའི་ཚིག་དང༌། བསྙེན་པར་རྫོགས་པའི་ཚིག་ལས་དོན་འཛིན་པ་དང༌། མདོ་སྡེ་འཛིན་པ་དང༌། གནས་མི་ཤེས་པའོ། །སླར་ལྡོག་པ་ལྔ་ནི་བརྩན་ནོ། །ལན་ལྡོན་པས་ཀྱང་རྣམ་པ་བཅུ་དྲུག་པོ་འདི་རྣམས་སོམས་ལ་སྐབས་དབྱེ་བར་བྱའོ། །ཅི་སྟེ་ཚུལ་ཁྲིམས་དང་ལྡན་པ་ཡིན་ནམ། འགྱོད་པ་ཅན་ནམ། མང་དུ་ཐོས་པའམ། འདུལ་བ་གཏན་ལ་འབེབས་པ་ཡིན་ན། ཅི་མཐོང་བ་ལས་གླེང་བར་བྱེད་དམ་ཞེས་པ་ལ་སོགས་པ་བཅུ་གཉིས་ནི་སྔ་མ་བཞིན་ནོ། །རྣམ་པ་ལྔས་ནི་ཚིག་མི་བརྩན་པར་བྱ་སྟེ། མཚམས་སྦྱོར་བ་ནི་མི་སྨྲ་བ་བ་དང༌། གཞན་ལས་གཞན་དུ་འགྱུར་བ་དང༌། ཕྱོགས་ལ་བསྟན་ཏེ་ཉེས་པ་ཁས་ལེན་པ་ལས་ཀྱང་མཉེས་པར་བསྙོན་པ་དང༌། དགེ་སློང་རྣམས་ལ་སྐུར་པ་འདེབས་པ་དང༌། རིམ་གྲོ་མེད་པའོ། །སླར་བཟློག་པ་ནི་བརྩན་པར་བྱའོ། །རྒོལ་བ་དང༌། ལན་ལྡོན་པ་གཉིས་འཐབ་མོའི་ཉེས་དམིགས་དེ་ཞི་བའི་ཡོན་ཏན་དུ་སྣང་ན་གཉིས་ཀྱིས་གཟུ་བོ་ཆོས་བཅུ་དྲུག་དང་ལྡན་པ་བཙལ་བར་བྱའོ། །ཚུལ་ཁྲིམས་དང་ལྡན་པ་དང༌། སློབ་པ་འདོད་པ་དང༌། ཐོས་པ་མང་བ་དང༌། འདུལ་བ་ལ་མཁས་པ་དང༌། གཟུ་བོའི་ཆོས་བཞིན་དུ་མ་འདྲེས་པ་འདོད་པ་ལ་སོགས་པ་ལྟར་མི་འགྲོ་བ་དང༌། འདོད་ཆགས་དང་ཞེ་སྡང་གི་མ་ཡིན་པ་དང༌། རྒྱལ་བའི་ཚིག་ལས་མི་འདའ་བ་དང༌། མ་བཅས་པ་ལས་མི་འཆའ་བ་དང༌། བཅས་པ་ལས་མི་བསྒྱུར་བ་དང༌། ཆོས་དེ་ཞི་བར་ནུས་པ་དང༌། སློང་བར་ནུས་པའོ། །གཟུ་བོ་ལ་གསུམ་སྟེ། གང་ལུས་དང་ངག་མི་སྡོམ་པར་དེ་ཕྱོགས་གཉི་གའི་ཐད་དུ་བདག་ཉིད་སོང་ནས་དཀྲུགས་མར་བྱེད་པ་དང༌། གང་ངག་བསྡམས་པ་སྟེ། ཕྲིན་ལས་སྦྱོར་བ་དང་གཉི་ག་ལ་ཡང་སྡོམ་པ་སྟེ། དེ་ལྟ་བུ་བསྐོར་བར་བྱའི་སྔ་མ་གཉིས་ནི་མ་ཡིན་ནོ། །བྱིས་པ་ལྟ་བུ་ལྔ་སྟེ་ཆོས་མ་ཡིན་པའི་ཕྱོགས་སུ་འཇུག་པ་དང༌། རྩོད་པར་འགྱུར་བར་
སྟོབས་པ་དང༌། གཟུ་བོ་གཞན་ལས་མདོ་སྡེ་དང་སོ་སོར་ཐར་པས་དགེ་སློང་རྣམས་ལ་སྨན་པ་དང༌། རིམ་གྲོ་མེད་པའོ། །སླར་བཟློག་པ་ལྔ་ནི་གསལ་བའོ། །གཟུ་བོས་རྩོད་པ་ཞི་བར་བྱ་བ་ཉམས་སུ་བླང་བ་དང༌། བདག་ཉིད་ལ་རྣམ་པ་བརྒྱད་དུ་བརྟག་པར་བྱ་སྟེ། ཅི་བདག་གིས་ཐོག་མ་ཅི་ལས་བྱུང་བ་ཤེས་སམ། བདག་ནི་གྲོགས་པོ་གཟུ་བོ་བཞིན་ནམ། སྔོན་འདྲེས་པར་བྱེད་པ་མ་ཡིན་ནམ། ཇི་བདག་གི་ཚིག་བརྩན་ནམ་ཉེས་པ་དེ་དག་རྣམ་པར་བྱང་ནུས་སམ། ལན་གླན་པར་ནུས་སམ། ཆོས་བཞིན་དུ་ཞི་བར་བྱ་ནུས་སམ། ཅི་མི་དགེ་བ་ལས་སློངས་པ་ལ་མཁས་སམ། གཞན་ཡང་རྣམ་པ་བརྒྱད་དེ། འདི་ན་འདི་ལྟར་རྒྱལ་བའི་གསུང་བསྲུང་བ་མདོ་སྡེ་ལ་སོགས་པ་འཛིན་པ་ལྟ་ཡོད་དམ། གང་འཕྱས་འཚོལ་བ་སླར་ཟློག་པར་བྱེད་པའི་གནས་ལ་སོགས་པ་ལྟ་ཡོད་དམ། རྒྱལ་པོ་ལ་བརྟེན་ཏམ། ཁྱིམ་པ་ལ་བརྟེན་ཏམ། ཕྱི་རོལ་པ་ལ་མ་ཡིན་གྱི་དགེ་འདུན་ཡིན་གྱི་དགེ་འདུན་ཉིད་ལས་ཞི་བར་སྦྱོར་བ་ལྟ་ཡོད་དམ་འཆའ་བའོ། །གཟུ་བོ་དེ་དག་གིས་མངོན་སུམ་དུ་འདུལ་བས་རྩོད་པ་ཞི་བར་བྱའོ། །མངོན་སུམ་དུ་བྱ་བ་ལ་རྣམ་པ་གཉིས་ཏེ། གང་ཟག་མངོན་སུམ་དུ་བྱ་བ་དང༌། ཆོས་མངོན་སུམ་དུ་བྱ་བའོ། །གང་ཟག་མངོན་སུམ་དུ་བྱ་བ་ལ་རྣམ་པ་གཉིས་ཏེ། གང་ལ་ཞི་བར་བྱ་བ་དང་གང་གིས་ཞི་བར་བྱེད་པ་དེ་དག་མངོན་སུམ་དུ་གྱུར་པའོ། །ཆོས་མངོན་སུམ་དུ་བྱ་བ་ནི་ཇི་ལྟར་ཆོས་དང་འདུལ་བ་བཞིན་ནོ། །དེས་རྒོལ་བ་ལ་རྣམ་པ་བརྒྱད་དུ་བརྟག་པར་བྱ་སྟེ། ཆོ་ག་དང༌། སྤྱོད་ཡུལ་དང༌། མཛའ་བ་དང་གྲོགས་པོ་དང༌། ལུས་ཀྱི་ལས་དང་དག་གི་ལས་དང༌། འཚོ་བ་དང་ཐོབ་པ་སྟེ། སྡིག་པ་ཅན་དུ་རིག་ན་མ་སྨྲ་ཞིག་ཅེས་བསྒོ་བར་བྱའོ། །དེ་བཞིན་དུ་ལན་ལྡོན་པ་ལ་ཡང་རྣམ་པ་བརྒྱད་དུ་སྟེ། དེ་སྟེ་སྡིག་པ་ཅན་ཡིན་ན་ཁྱོད་ཀྱིས་ངག་གི་ལས་ཐོག་མ་ཇི་ལྟ་བུ་ཡིན་ཞེས་དྲིས་ཤིག །དྲིས་ན་ཡང་ཇི་སྐད་དུ་སྨྲ་བ་དེ་བཞིན་ནོ་གྱིས་ཤིག །རྣམ་པ་དྲུག་ཏུ་སྦྱར་བར་བྱ་སྟེ། རྒྱལ་བ་ཉིད་རིག་པར་བྱ་བ་དང༌། བརྟག་པ་དང༌། འབྱུང་བ་དང༌། དྲི་བ་དང༌། དམ་འཆའ་རུ་ཞུགས་པ་དང༌། སྤྲོ་བར་བྱའོ། །ལན་ལྡོན་པ་ལ་ཡང་དེ་བཞིན་དུའོ། །རྣམ་པ་བཅུ་གཉིས་སུ་ལན་ལྡོན་པ་དང་དམ་འཆར་གཞུག་སྟེ། མདོ་སྡེ་དང་སྦྱར། ཆོས་བཞིན་འདུལ་བ་བཞིན་དུ་རྩོད་པ་སྨྲ་བར་བྱའོ། །དེ་ལ་རྣམ་པ་ལྔས་
ནི་མི་ནུས་པར་འགྱུར་ཏེ། རྗེས་སུ་བསྟན་པའི་ཚིག་ལྔ་མངོན་སུམ་དུ་མི་ཤེས་པའི་ཕྱིར་ཏེ་རྒོལ་བ་དང༌། ལན་ལྡོན་པ་དང༌། ཆོས་བཞིན་དུ་རིགས་པ་དང་ཆོས་བཞིན་དུ་བརྟགས་པ་དང༌། ཆོས་བཞིན་དུ་མ་ཡིན་པར་རྟོག་པ་དང༌། དམ་འཆའ་བ་བཞིན་མི་འཛིན་པའོ། །རྣམ་པ་ལྔས་ཞི་བར་མི་ནུས་ཏེ། རྩོད་པའི་རང་བཞིན་དང༌། འབྱུང་བ་དང༌། གཟུང་བ་དང༌། བཅས་པ་དང༌། ཞི་ནས་ཡང་མི་འབྱུང་བ་མི་ཤེས་པའོ། །གཞན་ཡང་རྣམ་པ་ལྔ་སྟེ་འཁྲུལ་བ་དང༌། གསང་སྟེ་སྨྲས་པ་དང༌། ནོར་བར་སྨྲས་པ་དང༌། གློ་བུར་དུ་སྨྲས་པ་འཛིན་པ་དང༌། སྨྲས་པ་ཡང་ལན་གསུམ་དམ་འཆར་མི་འཇུག་པའོ། །གནས་བཅུ་དྲུག་ཏུ་ལྟུང་བ་བསྟན་པར་བྱ་སྟེ། ལྕི་བ་དང༌། ཡང་བ་དང༌། ལྷག་མ་ལུས་པ་དང༌། ལྷག་མ་མ་ལུས་པ་དང༌། གནས་ངན་ལེན་དང་ལུས་ཀྱི་དང༌། ངག་གི་དང༌། དགེ་བ་དང༌། མི་དགེ་བ་དང༌། ལུང་དུ་མི་སྟོན་པ་དང༌། བཅས་པ་དང༌། བཤགས་པ་དང༌། བསྡམ་པར་བྱ་བ་དང༌། ངན་དུ་སྨྲས་པར་གྱུར་པ་དང༌། འདུལ་བ་ལས་གདའ་བར་འགྱུར་བའི་རྣམ་པ་ལྔ་སྟེ། དེ་ལ་བསྡིགས་པ་ལ་སོགས་པའི་ཆད་པའི་ལས་དང་སྦྱར་རོ། །ཡང་ཆད་པའི་ལས་རྣམ་པ་བཅུ་དྲུག་སྟེ། ཚངས་པའི་དང༌། བསྐྲད་པ་དང༌། ཡོད་དུ་མི་གཞུག་པ་དང༌། མིག་ལམ་དུ་མི་སྣང་བ་དང༌། དེའི་རང་བཞིན་དུ་ཚོལ་དུ་གཞུག་པ་དང༌། སྤྱོ་བར་བྱ་བ་དང༌། སྨད་པར་བྱ་བ་དང༌། སྤང་བར་བྱ་བ་དང༌། ཕྱོགས་མེད་པར་བྱ་བ་དང༌། སྨ་དབབ་པར་བྱ་བ་དང༌། འགྱོད་པ་དང༌། དོགས་པ་དང༌། རབ་ཏུ་འགྱེད་པར་བྱེད་དུ་གཞུག་པ་དང༌། དོགས་པར་བཅས་པ་དང༌། ཟུང་རྔུ་འབྱིན་པ་དང༌། རོ་བཞིན་དུ་བྱའོ།། རྣམ་པ་བཅུ་དྲུག་གི་ལས་བྱས་ཏེ། མངོན་སུམ་དུ་གྱུར་པ་དང༌། སྐབས་ཕྱེ་བ་དང༌། གླེངས་པ་དང༌། དྲན་པར་བྱས་པ་དང༌། རང་གིས་ཁས་བླངས་པ་དང༌། ཕ་རོལ་པོས་ཁས་བླངས་པ་དང༌། བརྟགས་པ་དང༌། བརྟག་མི་དགོས་པ་དང༌། དྲི་བ་དང༌། དྲི་མི་དགོས་པ་དང༌། ཁས་ལེན་དུ་གཞུག་པ་དང༌། དེ་ཁས་ལེན་དུ་མ་བཅུག་ཀྱང་རུང་ངོ༌། །རྣམ་པ་བཅུ་དྲུག་གིས་རྩོད་པ་ཞི་བར་གྱུར་ཏེ། ཆོས་བཞིན་པ་དང༌། དགེ་འདུན་གྱིས་བསྒོ་བ་དང༌། རྒྱལ་བའི་གསུང་དང༌། མཐུན་པ་དང༌། ཕྱོགས་དང༌། ལན་ལྡོན་པའི་ཕྱོགས་ལ་བསྒོ་བ་དང༌། རྒོལ་བ་འདུལ་བ་ལས་མི་འགལ་བ་དང༌། རྩེ་བའི་ཉེས་པ་མི་འཆབ་པ་དང༌། བྱུང་བ་དང་
བཅས་པ་དང༌། རྗེས་སུ་བཅས་པ་དང༌། གནང་བ་དང༌། མི་གནང་བ་སྦྱོང་བ་དང༌། རྒོལ་བ་དང་ལན་ལྡོན་པའི་དམ་ཆ་འཛིན་པ་དང༌། མདོ་སྡེ་སྟོན་པ་དང༌། འདུལ་བ་མཐུན་པ་དང༌། ཆོས་ཀྱི་སྤྱན་འཕེལ་བ་དང༌། ཆོས་དང་འདུལ་བ་བཞིན་ཞི་བར་བྱེད་པའོ། །སླར་བཟློག་པ་ནི་མ་ཞི་བའོ། །མི་ནུས་ན་དགེ་འདུན་རྣམས་ལ་སྤོ་བར་བྱ་སྟེ། དེ་ལ་མངོན་སུམ་དུ་བྱ་བ་ནི་དགེ་འདུན་ལ་མངོན་སུམ་དུ་སྤོས་པ་དང་གསུམ་མོ། །དེས་ཀྱང་མ་ནུས་ན་མཆོག་ལ་གཏད་པར་བྱའོ། །དེ་དག་གིས་ཀྱང་མ་ནུས་ན་མཆོག་གི་ཡང་མཆོག་ལའོ། །དེ་དག་གིས་ཀྱང་མ་ནུས་ན་སླར་དགེ་འདུན་ལ་སྤོ་བར་བྱའོ། །དེ་དག་གིས་གནས་གུད་ནས་གནས་བརྟན་དང་བཅས་སོ་སོར་ཐར་པར་བཅས་པའི་དགེ་འདུན་ལ་རྩོད་པ་ཁྲིད་ནས་གཏོད་པར་བྱེད་པའི་དགེ་སློང་སྒོ་ཤིག །དེས་ཀྱང་ཇི་ལྟར་གྱུར་པ་སྨྲོས་ཤིག །དེས་ཀྱང་མ་ནུས་ན་རྩོད་པ་སྦེད་པར་བྱེད་པ་དེ་ཉིད་ལ་གཏོད་ཅིག་དེས་མདོ་སྡེ་ལ་སོགས་པ་འཛིན་པ་ལ་སྤོབས་ཤིག །དེ་དག་གིས་ཀྱང་མ་ནུས་ན་དེ་ཉིད་ལའོ། །དེས་ཀྱང་གང་ན་གནས་བརྟན་གཙོའམ་གྲགས་པ་དེ་ལ་ཐོག་མ་ནས་སྨྲོས་ལ་གཏོད་ཅིག །དེས་དེ་དག་ལ་ཅི་ཡང་བླང་བར་མི་བྱ། ཁ་དོན་ལ་སོགས་པ་ཡང་སྦྱིན་པར་མི་བྱ། མདུན་ནས་རྒྱབ་ཏུ་འདུག་ལ། མ་འཐབ་ཞིག་གཉིས་ཀ་རྒྱལ་བར་མི་འགྱུར་གྱིས། གཅིག་ལའོ་ཞེས་དེ་སྐད་ཉི་ཚེ་སྨོས་ཤིག །དེ་ཞི་བར་གྱུར་ན་ལེགས་པར་ཞི་བར་བྱ་སྟེ། དེ་ལྟར་ན་མངོན་སུམ་དུ་འདུལ་བ་ཡིན་ནོ། །དེ་སྟེ་གནས་བརྟན་གྱིས་ཀྱང་མ་ནུས་ན། དེས་སྦེད་པར་བྱེད་པ་ལ་གཏོད་ཅིག །དེས་ཀྱང་དགེ་འདུན་ལའོ། །དགེ་འདུན་གྱིས་ཀྱང་ཚུལ་ཤིང་མང་པོ་ལེན་དུ་བཅུག་ནས་ཞི་བར་བྱའོ། །རྣམ་པ་ལྔར་རྒོལ་བ་དང༌། ལན་ལྡོན་པ་པོར་འཛིན་པའི་ཕྱིར་རྩུབ་པ་དང༌། གཏུམ་པར་བྱེད་པའི་ཕྱིར་གཏུམ་པ་དང༌། རབ་ཏུ་དམ་དུ་འཛིན་པའི་ཕྱིར་དམ་དུ་འཛིན་པ་དང༌། དབྱེན་དུ་འགྱུར་པའི་དངོས་པོ་བཅུ་བཞི་འཛིན་པས་ན། དབྱེན་དུ་འགྱུར་བ་དང་དོགས་པ་དང༌། གནས་བརྟན་གྱི་མཐའི་བར་དུ་ཕྱིན་ཀྱང་སྦྱོར་བ་སླར་བཟློག་ཏུ་མི་བཏུབ་པའོ། །ཚུལ་ཤིང་འབྲིམ་པ་ལ་རྣམ་པ་བཞི་སྟེ། གང་ན་གནས་བརྟན་ཆོས་བཞིན་མི་སྨྲ་བ་མང་བ་ན་དགབ་པར་བྱ་བ་དང༌། སླར་བཟློག་པ་དེ་ལ་མི་དགབ་པར་བྱ་བ་དང༌། རྣ་བར་བཤུབས་པ་སྟེ། གང་ན་རྣ་དྲུང་དུ་ཁྱོད་ཀྱི་མཁན་པོ་དེས་ནི་ཆོས་ཀྱི་ཚུལ་ཤིང་བླངས་ཀྱིས། ཁྱོད་
ཀྱིས་ཀྱང་ལོང་ཤིག་ཅེས་བསྒོ་བ་དང༌། མནན་པ་མང་ཤིང་དགེ་འདུན་གྱི་དང་བཞིའོ། །ཚུལ་ཤིང་ཆོས་བཞིན་མ་ཡིན་པར་འདྲིམ་པ་བཅུ་སྟེ། ཆོས་བཞིན་མ་ཡིན་པར་ལེན་པ་དང༌། འདུལ་བར་མི་མཐུན་པ་དང༌། མ་འདུས་པར་ལེན་པ་དང༌། ཅུང་ཟད་ཅིག་གིས་ཉེས་པ་དང་ཆུང་ངུ་དབྱེ་བར་དོགས་པ་དང༌། གནས་བརྟན་གྱི་མཐར་མ་ཕྱིན་པར་སྦྱོར་བ་བཟློག་པ་དང༌། ཤེས་པར་ལྡན་པ་ལ་སྦྱུར་བར་མི་བྱེད་ཅིང་འདུལ་བ་འཛིན་པ་ལ་སོགས་པ་མི་འདྲི་བ་དང༌། དགེ་འདུན་འབྱེད་པར་འདོད་པ་དང༌། དགེ་སློང་ཆོས་བཞིན་མ་ཡིན་པར་སྨྲ་བ་མང་པོར་འདོད་ཅིང༌། དགེ་འདུན་ལ་དབྱེ་བར་འགྱུར་རོ་སྙམ་དུ་ཤེས་པ་དང༌། ཆོས་མ་ཡིན་པར་སྨྲ་བར་འགྱུར་རོ་སྙམ་དུ་ཤེས་སོ། །སླར་བཟློག་པ་བཅུ་ནི་ཆོས་བཞིན་ཡིན་ནོ། །ཚུལ་ཤིང་འདྲིམ་པས་ཚུལ་ཤིང་རྣམ་པ་གཉིས་སུ་སྟེ། ཆོས་ཀྱི་ཚུལ་ཤིང་ནི་དབྱིབས་དང་ཁ་དོག་དང་གཟུགས་སུ་ལྡན་པའོ། །ཆོས་མ་ཡིན་པའི་ཚུལ་ཤིང་སླར་བཟློག་པའོ། །ཆོས་ཀྱི་ཚུལ་ཤིང་ནི་ལག་པ་གཡས་པར་ལོང་ཤིག། ཆོས་མ་ཡིན་པའི་ཚུལ་ཤིང་ནི་ལག་པ་གཡོན་པའོ། །དེ་ནས་མདུན་དུ་འདུག་པ་ལ་བསྔགས་པ་དང༌། མི་བསྔགས་པ་གཉིས་བརྗོད་པར་བྱའོ། །ཆོས་མ་ཡིན་པའི་ཚུལ་ཤིང་ནི་ཕྱིར་ལག་པ་བརྐྱང་བ་དང༌། ཚིག་དང་པོ་གཉིས་ཀྱི་བར་དུ་མ་བྱིན་ཅིག །གསུམ་པ་ལ་སྦྱིན་ཏེ། འདུལ་བ་ལས་འདས་པའི་ཉེས་བྱས་འཆགས་སུ་ཆུག་ཤིག་དེ་སྟེ་ཆོས་ཀྱི་ཚུལ་ཤིང་གཅིག་གིས་ཉུང་བར་གྱུར་ནས། ཀུན་ཤེས་ཀཽཎྜི་ནྱའི་ཕྱིར་ཡང་གཅིག་ལོང༌། དེ་སྟེ་ཆོས་ཀྱི་ཚུལ་ཤིང་མང་པོར་གྱུར་ན། ཆོས་བཞིན་དུ་རྩོད་པ་དེ་ཞི་བ་ཡིན་ཏེ། གང་གིས་བསྐྱོད་པ་དེ་ལྟུང་བའོ། །དེ་སྟེ་ཆོས་མ་ཡིན་པའི་ཚུལ་ཤིང་མང་བར་གྱུར་ན་ཡང༌། ཆོས་བཞིན་མ་ཡིན་པས་ཞི་བ་ཡིན་ཏེ། དེ་ཡང་བསྐྱོད་ན་ཉེས་བྱས་སོ། །དེ་ལྟར་གང་ཚུལ་ཤིང་མང་པོ་བྲིམས་པས་ཞི་བར་གྱུར་པ་ཡིན་ནོ། །མི་སྟོན་པའི་རྩོད་པ་ལ་ཞི་བར་བྱ་བ་རྣམ་པ་གསུམ་གྱིས་བྱ་སྟེ། འཁྲུགས་པས་རྩོད་པ་བཞིན་དུ་མངོན་སུམ་གྱིས་འདུལ་བ་དང༌། དྲན་པས་འདུལ་བ་དང༌། མ་མྱོས་པས་འདུལ་བ་སྦྱིན་པར་བྱ་སྟེ། མངོན་སུམ་གྱིས་འདུལ་བ་ནི་གོང་མ་དང་འདྲ་བར་སྦྱར་རོ། །དྲན་པས་འདུལ་བ་སྦྱིན་པ་ནི་གྱད་བུ་ནོར་ལ་དགེ་སློང་དག་གིས་ཕས་ཕམ་པས་སྐུར་ཏེ་དེ་ལ་གླེངས་པ་དང༌། ངས་བྱས་པ་མི་དྲན་ནོ་ཞེས་ཟེར་བ་ལ་དྲན་ནམ་མི་དྲན་ཞེས་སེམས་སུ་གཞུག་སྟེ། གསོལ་བ་དང་ལས་
གཉིས་ཀྱིས་དྲན་པས་འདུལ་བ་སྦྱིན་པར་བྱའོ། །མ་མྱོས་པས་འདུལ་བ་ནི་ཇི་ལྟར་དགེ་སློང་བྱེ་མ་ཅན་མྱོས་པའི་ཚེ་བྱས་པ་མི་དྲན་པས་གནང་གིས་ནམ་དྲན་པ་ཚུན་ཆད་སྔ་མ་རྗེས་སུ་ཞུགས་ཏེ་བྱས་པ་ནི་ཉེས་པ་བཤགས་དགོས་ཀྱི་ནམ་དྲན་པའི་མཚམས་སོམས་ཤིག་ཅེས་མ་མྱོས་པའི་འདུལ་བ་གསོལ་བ་དང་ལས་གཉིས་ཀྱིས་སྦྱིན་པར་བྱའོ། །གང་མོས་པའི་ཚེ་གླེངས་པ་ནི་ཆོས་བཞིན་དུ་གླེངས་པ་མ་ཡིན་ནོ། །ཉེས་པའི་རྩོད་པ་ལ་ཞི་བར་བྱ་བ་རྣམ་པ་བཞིས་ཞི་བར་བྱ་སྟེ། མངོན་སུམ་གྱིས་ཞི་བར་བྱ་བ་དང༌། ཁས་ལེན་པས་ཞི་བར་བྱ་བ་དང༌། དེའི་ངོ་བོ་ཉིད་ཚོལ་བས་ཞི་བར་བྱ་བ་དང༌། རྩྭ་བཀྲམ་པ་ལྟ་བུས་ཞི་བར་བྱ་བའོ། །དེ་ལ་མངོན་སུམ་གྱིས་ཞི་བར་བྱ་བ་ནི། རི་དགས་དགྲའི་བུ་ནག་པོ་སྤང་བ་ལས་བརྩམས་ཏེ། རྒོལ་བ་དང༌། ལན་ལྡོན་པ་དང༌། ཆོས་བཞིན་བྱ་བ་མངོན་སུམ་དུ་གྱིས་ཤིག་ཅེས་འབྱུང་བའོ། །ཁས་ལེན་པས་ཞི་བར་བྱ་བ་ནི། ཉེས་པ་བྱས་པ་ཕ་རོལ་གྱིས་གླེངས་ཀྱང་རུང་མ་གླེངས་ཀྱང་རུང་སྟེ། རང་གིས་ཆོས་བཞིན་དུ་བཤགས་ཤིང་མཐོལ་བས་ཞི་བར་བྱ་བའོ། །ངོ་བོ་ཉིད་ཚོལ་བས་ཞི་བར་བྱ་བ་ནི་དགེ་སློང་ལག་པ་ཅན་ལྟ་བུ་ཡང་དང་ཡང་སྨྱོན་ཅིང་ཁས་ལེན་པ་ནི་ཉེས་པའི་དམིགས་གཏན་ལ་མ་ཕེབས་ཤིང་གང་ཡིན་པ་གཏོལ་མེད་པས། གང་ཡིན་པ་གཏན་ལ་འབེབས་ཤིང་ངོ་བོ་ཉིད་ཚོལ་བའི་འདུལ་བ་ལས་ན་སྦྱིན་པ་ཡིན་ནོ། །རྩྭ་བཀྲམ་པ་ལྟ་བུས་འདུལ་བ་སྦྱིན་པ་ནི། རྩོད་པ་ཕྱོགས་གཉིས་སུ་ཆད་དེ། གནས་པ་ལ་ཕྱོགས་གཉིས་ཀའི་གཙོ་བོ་གཉིས་རང་རང་གི་ཕྱོགས་ལ་བསྒོ་སྟེ། གཅིག་ལ་གཅིག་བཟོད་པར་གསོལ་ཞིང་ཉེས་པ་བཤགས་ཏེ་བསྡུ་བས་ཞི་བར་བྱའོ། །བྱ་བས་རྩོད་པ་ནི་ལས་བརྒྱ་རྩ་གཅིག་ལས་གླེངས་ཏེ། ལྟུང་བ་རིས་ལྔ་ལས་རྩོད་པ་བྱུང་བ་ན་རྩོད་པ་གོང་མ་ཀུན་ཞི་ནི་འདི་ཡང་ཞི་བར་འགྱུར་ཏེ། དགེ་འདུན་ཀུན་མཐུན་ཞིང་འདུམ་པས་ཞི་བའི་ཕྱིར་ཞི་བར་བྱ་བ་ལྷག་པར་བྱ་བ་མེད་དེ། དེ་ལྟར་ན་རྩོད་པ་བཞི་ལ་ཞི་བར་བྱ་བ་བདུན་ཏེ། མངོན་སུམ་དང༌། ཚུལ་ཤིང་མང་པོ་ལེན་པ་དང༌། དྲན་པ་དང༌། མ་མྱོས་པ་དང༌། ངོ་བོ་ཉིད་ཚོལ་བ་དང༌། རྩྭ་བཀྲམ་པ་དང༌། ཁས་བླང་བར་བྱ་བ་ལྟ་བུས་ཞི་བར་བྱའོ་ཞེའོ། །དེ་དག་གི་དངོས་པོ་ཞི་བར་བྱེད་པས་ན་ཞི་བར་བྱེད་པ་བདུན་པོ་ནི་ཕས་ཕམ་པ་མན་ཆད་ཉེས་བྱས་ཡན་ཆད་ཀྱི་ནང་དུ་མ་གཏོགས་སོ། །རྩོད་པ་ཞི་
པ་མི་བརྗེད་པའི་ཚིག་སྟེ། མིང་མཁན་ཙམ་མོ། །ཚེ་དང་ལན་པ་དག་བདག་གིས་ཡོངས་སུ་དག་པ་རིག་པར་བྱ་སྟེ་ཞེས་བྱ་བ་ནས། དེ་དེ་བཞིན་དུ་འཛིན་ཏོ་ཞེས་བྱ་བ་ཡན་ཆད་ནི་ཡོངས་སུ་དག་ཅིང་གཙང་བར་བྱས་པས་བར་དུ་གཅོད་པར་མི་འགྱུར་ཞིང་ལས་སུ་བྱས་པ་ཡིན་ནོ་ཞེས་བསྟན་པའི་ཐ་ཚིག་གོ །གླེང་གཞི་དང་ཕས་ཕམ་པ་ནས། ལྟུང་བ་རིས་ལྔ་པོ་བཤད་ཟིན་ཏོ་ཞེས་བྱ་བ་ནི་གོང་དུ་ཀུན་སྨྲས་ཟིན་མོད་ཀྱིས། འོན་ཀྱང་གཡེང་བས་ཁ་ཅིག་མགོ་བ་དག་ཡོད་པས། ཡང་བཟླས་ནས་བསྡུས་ཏེ་སྨྲས་པའི་ཐ་ཚིག་གོ །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཞེས་བྱ་བ་དེ་ནི། ཡོན་ཏན་ལས་མཚན་དུ་གསོལ་བ་ནི་གོང་མ་དག་དང་མཐུན་ནོ། །དེའི་མདོར་གཏོགས་ཞེས་བྱ་བ་ནི་འདུལ་བ་འབུམ་གྱི་མདོ་སོ་སོར་ཐར་པ་འདི་ཉིད་དོ་ཞེའོ། །མདོར་བསྡུས་ཞེས་བྱ་བ་ནི་ཚིག་དང་དོན་དུ་འདུས་པ་ལ་བྱའོ། །དེ་དག་ཏུ་ཟད་དོ་ཞེས་བྱ་བ་ནི་མདོར་བསྟན་པ་ལ་བྱའི་རྒྱས་པར་འདུལ་བ་རྣམ་པར་འབྱེད་པ་དང༌། ཕྲན་ཚེགས་ལ་སོགས་པའི་ནང་ནས་འབྱུང་བའང་རིག་པར་བྱའོ། །འོ་ན་བསྒྲུབ་པར་བྱ་བའི་ཆོས་དེར་ཟད་དམ་ཞེ་ན་མ་ཡིན་ཏེ། གང་གཞན་ནས་འབྱུང་བ་ཞེས་བྱ་བ་ལ་སོགས་པ་སྨོས་ཏེ། གཞན་ནས་འབྱུང་བ་ཞེས་བྱ་བ་ནི་འདུལ་བའི་དངོས་པོ་དང་གཞུང་དམ་པ་ལ་སོགས་པ་ལ་བྱའོ། །གཅིག་ཏུ་མཐུན་པའི་ཆོས་ཞེས་བྱ་བ་ནི་ཆོས་ནི་མྱ་ངན་ལས་འདས་པ་ལ་བྱ་སྟེ། དེ་དང་མཐུན་པ་གང་ཞེ་ན། མདོ་སྡེ་དང་མ་མོ་དག་ལས་འབྱུང་བ་བསྒྲུབ་པར་བྱ་བའི་ཆོས་གང་ཡིན་པ་དེ་དག་ལ་ཡང་བསླབ་པར་བྱའོ་ཞེས་བསྟན་ཏོ། །ཁྱེད་རྣམས་ཞེས་བྱ་བ་ནི་གང་བསྟན་པ་ལ་ཞུགས་ཤིང་འཁོར་བ་ནའང་འདུག་པའི་ཉན་ཐོས་རྣམས་ལ་བྱའོ། །འདུམ་པ་ཞེས་བྱ་བ་ནི་ཕན་ཚུན་མི་རྩོད་ཅིང་འཕྲོད་པའོ། །མཐུན་པ་ཞེས་བྱ་བ་ནི་ལྟ་བ་དང་འཚོ་བ་དང༌། ཚུལ་ཁྲིམས་དང་ཆོ་ག་ལ་སོགས་པ་ཐ་དད་པ་མ་ཡིན་ཞིང༌། མྱ་ངན་ལས་འདས་པའི་ཆོས་དང༌། རྣམ་པར་གྲོལ་བའི་ཕྱོགས་སུ་བསྒྲུབ་པར་མཐུན་པའོ། །དགའ་བ་ཞེས་བྱ་བ་ནི་དགེ་བའི་ཕྱོགས་འཕེལ་བར་དགའ་ཞིང་ཏིང་ངེ་འཛིན་མངོན་པར་བསྒྲུབ་པར་ལ་དགའ་བའོ། །མི་རྩོད་པ་ཞེས་བྱ་བ་ནི་འཐབ་མོ་འགྱེད་པའམ། ཤགས་སུ་རྩོད་པའམ། གཅིག་ལ་གཅིག་མ་ཚང་འདྲུ་ཞིང་རྒོལ་བ་མེད་པའོ། །སེམས་ཀུན་དུ་བསྲུང་བ་ཞེས་བྱ་བ་ནི། ཚངས་
པ་མཚུངས་པར་སྤྱོད་པ་རྣམས་ཀྱི་ཡིད་དང་མི་འགལ་བར་སེམས་བསྲུང་བའོ། །དྲན་པ་ཞེས་བྱ་བ་ནི་བྱ་བ་དང་མི་བྱ་བ་གཉིས་ལས་བསམས་པའི་ཐོག་མར་གཏོང་ཞིང་བློས་ཟིན་པའོ། །དགའ་བ་ཞེས་བྱ་བ་ནི་བསྒྲུབ་པ་དང༌། ཚུལ་ཁྲིམས་བསྲུང་བ་ལ་སེམས་སྤྲོ་བར་བྱའོ་ཞེས་བྱ་བའི་དོན་ཏོ། །བརྩོན་པར་བྱའོ་ཞེས་བྱ་བ་ནི་དེ་ལྟར་གོང་དུ་བསྟན་པའི་གནས་རྣམས་ལ་ཡང་བསླབ་ཅིང་བརྩོན་པར་བྱའོ་ཞེའོ། །དེ་ལ་འདི་མན་ཆད་ནི་སྔོན་གྱི་དེ་བཞིན་གཤེགས་པའི་ཉན་ཐོས་རྣམས་ལ། སོ་སོར་ཐར་པ་མང་ཉུང་ངམ་ཁྱད་ཡོད་དམ་མེད་དམ་དེ་དག་གིས་ཉན་ཐོས་ཅིས་འདུལ་ན། དེའི་ཚེ་ད་ལྟར་གྱིས་སོ་སོར་ཐར་པ་འདྲ་བ་མེད་དམ། དེ་དག་གིས་ཅིས་འདུལ་ཞེས་གང་ཡིན་པ་དེ་དག་གིས་སོ་སོར་ཐར་པ་འདྲ་བ་མེད་ཅིང་འདུལ་བ་ཡང་མ་བཤད་མ་བསྟན་ན་ནི། དེ་དག་ཀྱང་ཇི་ལྟར་རྣམ་པར་གྲོལ་ཞེས་དེ་ལྟ་བུའི་རྟོག་པ་བསལ་བ་དང༌། བསྐལ་པ་བཟང་པོ་ཚུན་ཆད་དེ་བཞིན་གཤེགས་པ་རྣམ་པར་གཟིགས་ནས། ད་ལྟར་གྱི་ཤཱཀྱ་ཐུབ་པ་བཞུགས་པ་ཕན་ཆད་དང༌། སངས་རྒྱས་རབས་བདུན་པོ་དེ་དག་གི་ཚེ་ན་སྔོན་གྱི་དེ་བཞིན་གཤེགས་པའི་ཉན་ཐོས་རྣམས་ལ་སོ་སོར་ཐར་པ་ལྔ་པ་རྣམས་ཀྱང༌། དེ་དག་ཅིག་འདུལ་ཇི་ལྟར་རྣམ་པར་གྲོལ་བ་དང༌། སངས་རྒྱས་ཤཱཀྱ་ཐུབ་པའི་ཚེ་སེམས་ཅན་རྣམས་བསོད་ནམས་དམན་པ་དབང་པོ་རྟུལ་བ། ཤེས་རབ་ཞན་པས་བསླབ་པའི་གནས་ཅི་དང་ཇི་ལྟར་བཅས་སྟོན་པར་བཞེད་དེ། བཟོད་པ་དཀའ་ཐུབ་དམ་པ་ཞེས་བྱ་བ་ལ་སོགས་པ་སྟོན་ཏོ། །དེ་ལ་བཟོད་པ་དཀའ་ཐུབ་དམ་པ་ཞེས་པ་ནས་ཤློ་ཀ་གཅིག་གིས་དེ་བཞིན་གཤེགས་པ་རྣམ་པར་གཟིགས་ཀྱི་སྐུ་རིང་ལ། དག་སློང་དག་དང་སེམས་ཅན་དག་ཕལ་ཆེར་ལོག་པའི་བརྟུལ་ཞུགས་ལུས་ཀྱི་དཀའ་ཐུབ་ལ་དད་ནས། ལྟ་བ་དེ་ལས་བཟློག་ཅིང་དེའི་གཉེན་པོར་ཤློ་ཀ་གཅིག་གིས་བསྟན་ཏོ། །དེ་ཡང་རྣམ་པ་བཞི་ལྟ་བུའི་ཚུལ་གྱིས་དད་དེ། བཞི་གང་ཞེ་ན། ལུས་ཀྱི་དཀའ་ཐུབ་ལ་དད་པ་དང༌། དཀའ་ཐུབ་ཀྱི་ནན་ཏན་ལ་དད་པ་དང༌། དཀའ་ཐུབ་ཀྱི་འབྲས་བུ་ལ་དད་པ་དང༌། དཀའ་ཐུབ་སྟོན་པའི་གང་ཟག་ལ་དད་པའོ། །དེ་ལ་ལུས་དཀའ་ཐུབ་ཇི་ལྟར་འདྲ་བ་དག་ལ་སྤྱོད་ཅིང་གནས་ཤེ་ན། ཆུར་མཆོངས་པ་དང༌། ཝའི་བརྟུལ་ཞུགས་དང༌། ཁྱིའི་བརྟུལ་ཞུགས་དང༌། ཚེ་གཅིག་ཏུ་ཐལ་བའི་ནང་དུ་འགྲེང་
ཞིང་ཕུར་བུ་འཛིན་པ་ལྟ་བུའོ། །དེ་ཡང་ཇི་ལྟར་དེ་ལ་དད་ཅེ་ན། མུ་སྟེགས་ཅན་གྱི་ལོག་པའི་དཀའ་ཐུབ་དེ་ལྟ་བུ་དག་བྱས་ན། ལས་རྙིང་པ་ནི་དཀའ་ཐུབ་བྱས་པས་འཕྱ་ཞིང་ཟད་པར་འགྱུར། ལས་སར་པ་ནི་མ་བྱས་མ་སྤྱད་པས་ན་ཆུ་ལོན་བཞིན་ཏེ། ཚེ་ཕྱི་མ་ལ་ཟག་པ་ཟད་པས། ལས་ཟད་པས་སྡུག་བསྔལ་ཟད་དེ། སྡུག་བསྔལ་ཟད་པས་གྲོལ་ཐར་ཅིང་མཐར་ཕྱིན་པར་གྱུར་ཏེ། དེ་ལྟར་སྟོན་པ་ནི་དགེ་སྦྱོང་ཡོན་ནོ་ཞེས་ཟེར་ཏེ། དེའི་གཉེན་པོར་ལོག་པའི་དཀའ་ཐུབ་རྣམ་པ་བཞིར་ལྟ་བ་ལས་ཕྲལ་ནས། ཡང་དག་པའི་དཀའ་ཐུབ་ལྟ་བུ་ལ་བསྟེན་པའི་བྱའོ། །ཞི་གང་ཞེ་ན་འཕགས་པའི་བདེན་པ་བཞི་ལ་དད་པ་དང༌། དཀའ་ཐུབ་ཀྱི་ནན་ཏན་བདེན་པ་བཞིའི་ཡོན་ཏན་ལ་ནན་ཏན་བྱེད་པ་དང༌། དཀའ་ཐུབ་ཀྱི་འབྲས་བུ་ནི་རྒྱུན་དུ་ཞུགས་ནས་དགྲ་བཅོམ་པའི་བར་དག་སྟེ། བདེན་པ་བཞིའོ་འབྲས་བུ་ལ་བྱའོ། །སྟོན་པ་ནི་དེ་བཞིན་གཤེགས་པ་རྣམ་པར་གཟིགས་ལ་དད་པར་བྱའོ་ཞེས་བཀའ་སྩལ་ཏོ། །ད་ལྟ་བས་ན་དཀའ་ཐུབ་ཐམས་ཅད་ཀྱི་ནང་ན་ཆོས་ལ་བཟོད་པ་ནི་དམ་པ་སྟེ། དེ་ལ་ཇི་ལྟར་བཟོད་པ་ཞེ་ན། སེམས་ཀྱིས་འཕགས་པའི་བདེན་པ་བཞིའི་ཆོས་རྣམས་ལ་བཟོད་པ་དང་དེ་ཉིད་དམ་པར་བསྟན་ཏོ། །དེ་ལ་བཟོད་པ་ཡང་གསུམ་སྟེ། གནོད་པ་ལ་མི་མཇེད་པའི་བཟོད་པ་དང༌། སྡུག་བསྔལ་ལ་ཇི་མི་སྙམ་པའི་བཟོད་པ་དང༌། ཆོས་ལ་ངེས་པར་རྟོག་པའི་བཟོད་པའོ། །དེ་ལྟར་བཟོད་པ་རྣམ་པ་གསུམ་གྱི་ནང་ན་ཡང་ཆོས་ལ་ངེས་པར་རྟོག་པའི་བཟོད་པ་དམ་པ་སྟེ། དེ་ལྟར་སེམས་ཀྱིས་འཕགས་པའི་བདེན་པ་བཞི་ལ་ཕྱིན་ཅི་མ་ལོག་པར་ཤེས་པར་བགྱིས་བརྟགས་ཏེ། མི་རྟག་པ་དང༌། སྡུག་བསྔལ་བ་དང༌། སྟོང་བ་དང༌། བདག་མེད་པའི་ཆོས་ལ་སེམས་རྩེ་གཅིག་ཏུ་གནས་པར་བཟོད་པ་དེ་ཉིད་ཀྱིས་མྱ་ངན་ལས་འདའ་བར་འགྱུར་བས་དམ་པ་ཡིན་ནོ་ཞེས་བསྟན་པ་ཡིན་ནོ། །ལུས་ཀྱི་དཀའ་ཐུབ་ཀྱིས་མྱ་ངན་ལས་འདའོ། །ཞེས་སངས་རྒྱས་ཀྱིས་མ་གསུངས་པས་ན། ལུས་ཀྱི་དཀའ་ཐུབ་ནི་མཆོག་དམ་པ་མ་ཡིན་ཏེ། དེ་ལས་འཕགས་པར་བསྟན་པའི་ཕྱིར་དེའི་སེམས་ཀྱི་བཟོད་པ་དེ་ཉིད་ཀྱིས་ན་མྱ་ངན་ལས་འདས་པ་མཆོག་གི་འབྲས་བུ་ཐོབ་པོ་ཞེས་སངས་རྒྱས་ཀྱིས་བཀའ་སྩལ་ཏེ། སངས་རྒྱས་གསུང་ཞེས་བྱ་བ་ནི་ཡིད་ཆེས་པར་བསྟན་པའི་ཚིག་གོ །མྱ་ངན་ལས་འདས་པས་ཞེས་བྱ་བ་ནི་འཁོར་བའི་རྒྱུན་བཅད་དེ། བསྒྲུབ་
པར་བྱ་བའི་མཐར་ཕྱིན་ཅིང༌། ཕུང་པོ་ལྷག་མ་མ་ལུས་པའི་མྱ་ངན་ལས་འདས་པའོ། །དེ་ལྟར་ན་སེམས་ཀྱིས་འཕགས་པའི་བདེན་པ་བཞི་ལ་བརྟེན་ཅིང་བགྲོད་པས་ན། མྱ་ངན་ལས་འདས་པ་མཆོག་གི་འབྲས་བུ་དམ་པ་འཐོབ་ཀྱིས་ལུས་ཀྱི་དཀའ་ཐུབ་དམ་པ་མ་ཡིན་ནོ་ཞེའོ། །མཆོག་ཅེས་བྱ་བ་ནི་མུ་སྟེགས་ཅན་དག་ལུས་ཤིན་ཏུ་སྡུག་བསྔལ་ཞིང༌། ལུས་ཡོངས་སུ་གདུངས་པར་དཀའ་ཐུབ་བྱས་པས་མྱ་ངན་ལས་འདའ་བ་ཐོང་པོ་ཞེས་འཆད་པ་དག་ཀྱང་ཡོད་དོ། །དེ་དག་གི་གཏོལ་མེད་པར་ཉོན་མོངས་པ་ཐམས་ཅད་སྤངས་པ་བདེ་ཞིང་སྐྱོན་མེད་པ་མྱ་ངན་ལས་འདའ་བའི་རང་བཞིན་ཐོབ་པས་ན་མྱ་ངན་ལས་འདས་པ་མཆོག་ཅེས་སྨོས་སོ། །རབ་ཏུ་བྱུང་བ་གཞན་ལ་གནོད་པ་དང༌། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་པ་ཤློ་ཀ་ཕྱེད་ནི་ལུས་ཀྱི་དཀའ་ཐུབ་སྟོན་པ་ལ་དད་པའི་གཉེན་པོར་གསུངས་ཏེ། རབ་ཏུ་བྱུང་བ་ནི་ཁྱིམ་གྱི་གནས་ཐམས་ཅད་སྤངས་ནས། གསོལ་བ་དང་ཞུ་བའི་ལས་ཀྱིས་ལེགས་པར་གསུངས་པའི་ཆོས་འདུལ་བ་ལ་ཞུགས་པ་ནི་རབ་ཏུ་བྱུང་བ་ཞེས་བྱའོ། །དེ་ལྟ་བུར་རབ་ཏུ་བྱུང་བ་ནི་ཕ་རོལ་པོ་གཞན་དག་སྡིག་པ་མི་དགེ་བའི་ཆོས་དང་ཕྲལ་ནས་ཕན་པ་དང་བདེ་བ་སྦྱིན་ཞིང་བསྟན་པའི་རིགས་ཀྱི། ཅི་སྟེ་ལུས་ཀྱི་དཀའ་ཐུབ་གཞན་ལ་གནོད་ཅིང་དོན་མེད་པ་དེ་བཞིན་གཤེགས་པ་རྣམས་ཀྱིས་སྨད་ཅིང་བསྔགས་པ་མ་ཡིན་པ་དེ་ལྟ་བུ་བྱ་བར་སྟོན་པ་ནི་གཞན་ལ་ཡང་དག་པར་གནོད་ཅིང་གཙེ་བ་ཡིན་པས་དེ་བཞིན་གཤེགས་པའི་ལུང་དང་འགལ་བས་ན་དེ་ལྟ་བུ་སྟོན་པ་ནི་དགེ་སྦྱོང་མ་ཡིན་ནོ་ཞེའོ། །འོ་ན་དགེ་སྦྱོང་ཞེས་བྱ་བ་ཇི་ལྟ་བུ་ལ་བྱ་ཞེ་ན། སེམས་ཀྱིས་འཕགས་པའི་བདེན་པ་བཞི་ལ་རྟོག་པར་བཟོད་པ། དགེ་སྦྱོང་གི་འབྲས་བུ་བཞི་མངོན་པར་བསྒྲུབ་ཅིང་ཚུལ་དབྱུང་བ་ཞི་བ། དགེ་བ་ལ་གཅིག་ཏུ་འདུན་ཅིང་གནས་པ་དེ་དག་ལ་དགེ་སྦྱོང་ཞེས་བྱ་སྟེ། དེ་བས་ན་དེ་ལྟ་བུའི་ལུས་ཀྱི་དཀའ་ཐུབ་དོན་མེད་པ་ལ་དང་བར་མི་བྱའོ། སེམས་ཀྱི་དཀའ་ཐུབ་དམ་པ་གང་ཡིན་པ་ལ་དད་པར་བྱའོ་ཞེའོ། །དེ་བཞིན་གཤེགས་པ་གཙུག་ཏོར་ཅན་གྱི་སྐུ་རིང་ལ་དེ་བཞིན་གཤེགས་པ་དེའི་ཉན་ཐོས་དང༌། སེམས་ཅན་དག་ཚུལ་ཁྲིམས་བསྲུང་བ་དང༌། དགེ་བ་སྤྱད་པ་རྣམས་མཐོ་རིས་བཟང་འགྲོར་སྐྱེ་བ་དང༌། མཐོ་རིས་ཀྱི་ལོངས་སྤྱོད་ཐོབ་པར་ཤོག་ཅེས་སྨོན་ལམ་འདེབས་ཤིང་ཚངས་པར་སྤྱད་པས་ན་དེ་ཉིད་མི་རིགས་ཤིང་འགལ་བས་ན།
དེ་ལྟར་ལྟ་བ་བཟློག་པའི་ཕྱིར་གཉེན་པོར་མཐུ་རྩལ་མིག་དང་ལྡན་པར་ཞེས་བྱ་བ་ཤློ་ཀ་གཅིག་གསུངས་སོ། །མཐུ་རྩལ་ཞེས་བྱ་བ་ནི་བསོད་ནམས་དང་ཤེས་རབ་ཀྱི་ཚོགས་ཏེ། མྱ་ངན་ལས་འདས་པའི་མཐུ་རྩལ་ཡོད་པ་ལ་བྱའོ། །མིག་དང་ལྡན་པ་ནི་ཤེས་རབ་ཀྱི་མིག་དང་ལྡན་པ་ལ་བྱ་སྟེ། ཕུང་པོ་མ་ལུས་པའི་མྱ་ངན་ལས་འདའ་བ་ཐོབ་པར་བྱེད་པའི་མིག་དང་ལྡན་པའོ། །མཐུ་རྩལ་དང་མིག་ཅེས་བྱ་བ་ནི་དཔེར་བསྟན་པ་སྟེ། འཇིག་རྟེན་ན་སྐྱེ་བོ་མཐུ་རྩལ་མེད་ཅིང་ཉམ་ཆུང་བ་དང༌། མིག་མེད་ཅིང་མིག་དང་ལྡན་པའི་མི་ནི་གྲོག་པོ་དང་ཚེར་མ་དང་གཡངས་དག་ཏུ་འགྲོ་ཞིང་ལྟུང་བའི་རྒྱུར་འགྱུར་རོ། །སུ་མཐུ་རྩལ་དང་མིག་དང་ལྡན་པའི་སྐྱེ་བོ་ནི་ལམ་མི་བདེ་བ་དང་ཉམ་ང་བ་ཐམས་ཅད་ལས་འབྱོལ་ཞིང་མཐུ་རྩལ་དང་ལྡན་པས་ན་ལ་མཉམ་ང་པ་ཐམས་ཅད་ལས་འདའ་བར་བྱེད་དོ། མིག་དང་ལྡན་པས་ན་གྲོག་པོར་མི་ལྟུང་ཞིང་ལམ་ཉམ་ང་བ་ལས་ཐར་བར་འགྱུར་རོ། །དེ་བས་ན་སྐྱེས་བུ་མིག་དང་ལྡན་པས་ལམ་ཉམ་ང་བ་སྤོང་ཞིང་ལམ་བདེ་བར་འགྲོ་བའི་རིགས་སོས། །དེ་བཞིན་དུ་བསོད་ནམས་ཀྱི་མཐུ་རྩལ་དང་ལྡན་ཞིང་ཤེས་རབ་ཀྱི་མིག་དང་ལྡན་པས་ཀྱང་མྱ་ངན་ལས་འདས་པའི་ཆོས་མཐའ་ཡུན་དུ་བདེ་ཞིང་དཔེ་མེད་པ་བཏང་སྟེ། མཐོ་རིས་བག་མེད་པའི་གནས་གཡངས་དང་འདྲ་བ་ཟད་པའི་མཐའ་ཅན་འཁོར་བའི་རྒྱུ་ཉོན་མོངས་པའི་གནས་ཇི་ལྟར་ལམ་ཉལ་ང་ཞིང་མི་བདེ་བ་དེ་ལྟ་བུར་མཁས་པའི་སྐྱེས་བུ་དམ་པ་དག་དེར་སྒྲུབ་ཅིང་སྨོན་པ་ནི་ཤིན་ཏུ་མི་རིགས་སོ་ཞེས་བསྟན་ཏོ། །ཉམ་ང་བ་དག་ཡོད་པ་ནི་དེ་ལྟར་མ་ཐོ་རིས་སུ་སྨོན་ལམ་འདེབས་པ་ཉིད་ཁམས་གསུམ་དུ་འཁོར་བར་འགྱུར་བས་ན། དེ་ལྟར་སྒྲུབ་ཅིང་སྨོན་པ་ཉིད་ཉམ་ང་བའོ། །ཡོད་པ་ནི་ཉོན་མོངས་པ་སྟེ། སྡུག་བསྔལ་གསུམ་དང༌། འདུ་བྱེད་ཀྱི་སྡུག་བསྔལ་བ་སྟེ། གཟུགས་མེད་པའི་ཁམས་སུ་འགྱུར་བའི་སྡུག་བསྔལ་ཏེ། གཟུགས་ཡོད་པའི་ལྷ་མན་ཆད་འདོད་པའི་ཁམས་མོ་ཡན་ཆད་དོ། །སྡུག་བསྔལ་བའི་ཡང་སྡུག་བསྔལ་བ་སྟེ། བྱོལ་སོང་དང་ཡི་དགས་དང་སེམས་ཅན་དམྱལ་བའོ། །སྡུག་བསྔལ་བརྒྱད་ནི་སྐྱེ་བ་དང༌། རྒ་བ་དང༌། ན་བ་དང༌། འཆི་བ་དང༌། གཉེན་སྡུག་པ་དང་བྲལ་བ་དང༌། དགྲ་སྡང་བ་དང་ཕྲད་པ་དང༌། འདོད་པ་མི་རྙེད་པ་དང༌། ཕུང་པོ་ལྔ་རྒྱས་པའི་སྡུག་བསྔལ་བའོ། །མཁས་པའི་འཚེ་བ་འཇིག་རྟེན་འདིར་ཞེས་བྱ་བ་མཁས་པ་ནི་བསོད་ནམས་དང་
ཤེས་རབ་དང་ལྡན་པའི་སྐྱེས་བུ་དམ་པ་མྱ་ངན་ལས་འདས་པའི་རྒྱུད་ལྡན་ཞིང་ཐོབ་པའི་ཐབས་ལ་མཁས་པའོ། །འཚོ་བ་ནི་ཉེ་བར་ལེན་པའི་ཕུང་པོ་ལྔ་དང་ལྡན་ཞིང་འཇིག་རྟེན་གནས་པའི་གང་ཟག་ཉིད་ལ་བྱའོ། །སྡིག་པ་ཞེས་བྱ་བ་ནི་མཐོ་རིས་སུ་སྨོན་ལམ་འདེབས་པ་ཉིད་ཁམས་གསུམ་གྱི་ལོངས་སྤྱོད་ལ་ཆགས་པས་ན། ཉོན་མོངས་པ་དང་འཁོར་བ་ལས་ནམས་ཀྱང་ཐར་བར་མི་འགྱུར་བས་དེ་ཉིད་སྡིག་པའོ་ཞེའོ། །ཡོངས་སུ་སྤོང་བ་ནི་མིག་དང་ལྡན་པས་ཉོན་མོངས་པ་སྤངས་ནས་མྱ་ངན་ལས་འདས་པར་འགྱུར་རོ། །དེ་བཞིན་གཤེགས་པ་ཐམས་ཅད་སྐྱོབ་ཀྱི་སྐུ་རིང་ལ་དགེ་སྦྱོང་དག་ཕལ་ཆེར་རང་གི་ཚུལ་ཁྲིམས་ཡོངས་སུ་སྡོམ་པ་ཙམ་གྱིས་ཆོག་པར་འཛིན་ཏེ། གཞན་དུ་མུ་སྟེགས་ཅན་གྱི་དགེ་སློང་ལ་འཕྱས་འདོགས་ཤིང་སྐུར་བ་འདེབས་པ་ན། དགེ་སྦྱོང་གི་དོན་དག་ཀྱང་ཆུད་ཟོས་པར་གྱུར་པས་ན། དེའི་གཉེན་པོར་དེ་བཞིན་གཤེགས་པ་ཐམས་ཅད་སྐྱོབ་ཀྱིས། སྐུར་བ་མི་གདབ་གནོད་མི་བྱ། །ཞེས་བྱ་བ་ལ་སོགས་ཏེ། ཤློ་ཀ་ཕྱེད་དང་གཉིས་གསུངས་སོ། །སྐུར་པ་མི་གདབ་པ་ནི་རབ་ཏུ་བྱུང་བས་མུ་སྟེགས་ཅན་གྱི་དགེ་སྦྱོང་ལ་ངག་གི་སྒོ་ནས་སྐུར་བ་མི་གདབ་པར་བསྟན་པའོ། །གནོད་པར་མི་བྱ་བ་ནི་ལུས་ཀྱིས་མི་གཙེ་ཞིང་ཡིད་ཀྱིས་ངན་དུ་མི་བསམས་པ་སྟེ། མདོར་ན་སྒོ་གསུམ་ནས་མུ་སྟེགས་ཅན་དང་སྐྱེ་བོ་ཀུན་ལ་གནོད་པར་མི་བྱེད་ཅིང་མི་འཚེ་བའོ། །སོ་སོར་ཐར་པའི་ནི་འགྲོ་བརྒྱུད་ལྔ་ལས་ཐར་པར་བྱེད་པས་ན་ཐར་པའོ། །བསྡམ་པར་བྱ་བ་ནི་ལྟུང་བ་རིས་ལྔ་ལ་བྱ་སྟེ། དེ་མ་རལ་མི་ཉམས་མི་འཇིག་ཅིང་ཤིན་ཏུ་སྡོམས་ཤིག་པའོ། །ཟས་ཀྱི་ཚོད་ཀྱང་རིག་པར་བྱ་བ་ནི་རྣལ་འབྱོར་སྤྱོད་པས་ཟས་ཀྱི་ཚོད་རིག་པར་བྱ་སྟེ། ཧ་ཅང་འགྲངས་ཆེས་ན་བརྩོན་འགྲུས་ཀྱི་དྲི་མར་འགྱུར་བ་དང༌། ཧ་ཅང་བཀྲེས་ན་ནི་ཉོན་མོངས་པ་མཐར་ལྟུང་བར་འགྱུར་བས་བརྩོན་འགྲུས་ནུས་ཤིང་སེམས་ཡང་བ་དང༌། ཟས་རན་པར་བཟའོ་ཞེའོ། །བས་མཐའི་གནས་སུ་གནས་པར་བྱ། །ཞེས་བྱ་བ་ནི་དགོན་པ་ལ་བྱ་སྟེ། དེ་ལྟ་བུའི་གནས་དབེན་པར་གནས་པར་བྱའོ་ཞེའོ། །དེ་ལྟར་ན་དགེ་སློང་དག་ཚུལ་ཁྲིམས་གྱིས་མགུ་ཞིང་ཚུལ་ཁྲིམས་འཛིན་པ་འབའ་ཞིག་གིས་ཆོག་པར་མི་བྱའོ། །བསམ་གཏན་ལ་སོགས་པ་ཡང་སྒྲུབ་ཅིང་བསྒོམ་པར་བྱའོ་ཞེས་བྱ་བའི་ཚིག་ཏུ། ལྷག་པའི་སེམས་ལ་ཡང་དག་འཇུག །ཅེས་སྨོས་ཏེ། ལྷག་པའི་སེམས་ཞེས་བྱ་བ་ནི་ཉོན་མོངས་པའི་སྲེག་པ་དང་བྲལ་བ་
སྟེ། ལྷག་པའི་ཤེས་རབ་དང༌། ལྷག་པའི་ཏིང་ངེ་འཛིན་དང༌། ལྷག་པའི་ཚུལ་ཁྲིམས་ལ་བྱའོ། །སྐབས་འདིར་ལྷག་པའི་སྐྲས་ནི་བསླབ་པ་གསུམ་ཆར་ཡོངས་སུ་བསྒྲུབ་པར་བྱ་བ་བསྟན་ཏོ། །ཡང་གཅིག་ཏུ་ན་ཚུལ་ཁྲིམས་ཀྱིས་མགུ་ཞིང་ཆོག་པར་འཛིན་པའི་གཉེན་པོར་བསྟན་པས་ལྷག་པའི་ཏིང་ངེ་འཛིན་འབའ་ཞིག་བསྒྲུབ་པར་བྱའོ་ཞེས་ཀྱང་འཆད་དེ། དེ་བས་ན་ལྷག་པའི་ཏིང་ངེ་འཛིན་གྱིས་མ་བསྒྲུབས་སམ། བཙལ་ན་མྱ་ངན་ལས་འདས་པ་མི་ཐོབ་སྟེ། ཚུལ་ཁྲིམས་མ་གོད་མ་རལ་ཏེ། བརྒྱར་ཐུབ་ཏུ་ཟིན་གྱིས་ཀྱང་མཐོ་རིས་བཟང་འགྲོར་སྐྱེའོ་ཞེས་འབྱུང་བས་ན། དེ་བས་ན་ལྷག་པའི་ཏིང་ངེ་འཛིན་མི་སྒྲུབ་ཏུ་མི་རུང་བས་དེའི་གཉེན་པོར། ལྷག་པའི་སེམས་ལ་ཡང་དག་འཇུག །ཅེས་སྨོས་སོ། །ཡང་དག་འཇུག་ཅེས་བྱ་བ་ནི་དགེ་སློང་དགོན་པ་བས་བསླབ་པ་གསུམ་ལ་གནས་ཤིང་བརྩོན་པ་དང་སྤྱད་པར་བྱའོ་ཞེའོ། །འདི་ནི་སངས་རྒྱས་བསྟན་པའོ། །ཞེས་བྱ་བ་ནི་ཡིད་ཆེས་པར་བསྟན་པའོ། །དེ་དེ་བཞིན་གཤེགས་པ་ལོག་པར་དད་སེལ་གྱི་སྐུ་རིང་ལ་དེའི་ཉན་ཐོས་དག་ཕལ་ཆེར་ཁེ་དང་བཀུར་སྟི་དང་རྙེད་པ་ལ་ཆགས་ཤིང་གྲོང་ལ་ལྟ་བར་གྱུར་ནས་འདུ་འཛིན་མང་པོ་ལ་སྤྱོད་པས་ན། ཚུལ་ཁྲིམས་བསྲུང་ཞིང་ཏིང་ངེ་འཛིན་བསྒྲུབ་པ་ལ་གཡེལ་ཞིང་གནོད་པར་གྱུར་ནས་དེ་ལྟར་ལྟ་བ་དེ་བཟློག་ཅིང་དེའི་གཉེན་པོར་དེ་བཞིན་གཤེགས་པ་ལོག་པར་དད་སེལ་གྱིས་གསུངས་པ། ཇི་ལྟར་བུང་བ་མེ་ཏོག་ཅེས་བྱ་བ་ཤློ་ཀ་གཅིག་བསྟན་ཏོ། །བུང་བ་མེ་ཏོག་ཅེས་བྱ་བ་ནི་དཔེར་བསྟན་ཏོ། །བུང་བ་ཞེས་བྱ་བ་ནི་གང་ཟག་ལ་བྱའོ། །མེ་ཏོག་ཅེས་བྱ་བ་ནི་གྲོང་ལ་བྱའོ། །ཁ་དོག་ནི་ཚུལ་ཁྲིམས་ལ་བྱའོ། །དྲི་ནི་ཏིང་ངེ་འཛིན་གྱི་རོལ་བྱའོ། །ཡང་ན་ཁ་དོག་ནི་སྐྱེ་བོའི་ལོངས་སྤྱོད་ནོར་རྫས་ལ་བྱའོ། །དྲི་ནི་འཕྲལ་གྱི་ཟས་ལ་བྱ་སྟེ། མི་གནོད་ཅེས་བྱ་བ་ནི་དཔེར་ན་ཇི་ལྟར་བུང་བས་མེ་ཏོག་གི་ཁུ་བ་གཞི་བས་ཏེ། འགྲོ་ཡང་མེ་ཏོག་གི་དྲི་དང་ཁ་དོག་ལ་མི་གནོད་པར་འགྲོ་བ་བཞིན་དུ་གང་དེ་བཞིན་གཤེགས་པ་ཡང་ཚུལ་ཁྲིམས་ལས་མི་འགལ་ཞིང་ཏིང་ངེ་འཛིན་བསྒྲུབ་པ་ལ་བར་ཆད་དུ་མི་འགྱུར་བ་དང༌། སྐྱེ་བོའི་ལོངས་སྤྱོད་དང་འཕྲལ་གྱི་ཁ་ཟས་ལ་མི་ཆགས་ཤིང་སྐྱེ་བོའི་ལོངས་སྤྱོད་ལ་མི་གནོད་པར་དེ་འདྲ་བའི་ཚུལ་དུ་བསོད་སྙོམས་ལ་གཤེགས་ཤིང་སྤྱོད་དོ། །དེ་བས་ན་ཉན་ཐོས་ཁྱེད་རྣམས་ཀྱང་དེ་བཞིན་གཤེགས་པའི་རྗེས་སུ་སློབ་པ་དང༌།
ཚུལ་ཁྲིམས་དང་ཏིང་ངེ་འཛིན་ལས་མི་ཉམས་ཤིང་སྐྱེ་བོའི་ལོངས་སྤྱོད་ལ་མི་གནོད་ཅིང་མི་ཆགས་པར་བསོད་སྙོམས་ལ་རྒྱུ་ཞིང་སྤྱད་པར་བྱའོ་ཞེས་བསྟན་པའོ། །ཡང་ན་ཐུབ་པ་ཞེས་བྱ་བ་ནི་གང་ཟག་ཉིད་ལ་བྱ་སྟེ། རང་གི་རྒྱུད་ལ་ཉོན་མོངས་པས་མི་འཁོར་ཞིང་ལུས་དང་ངག་ཡིད་གསུམ་ཐུབ་པས་གྲོང་དུ་རྒྱུ་བ་ནི་སྒོ་གསུམ་ནས་ཉེས་པ་མི་འབྱུང་བར་ཐུབ་པ་རྣམས་ཀྱི་གྲོང་དུ་རྒྱུ་བར་བྱའོ་ཞེའོ། །དེ་བས་ན་དགེ་སློང་བསོད་སྙོམས་བླངས་ནས་གྲོང་དུ་མི་གནས་པར་དགོན་པ་ལ་གནས་པར་བྱའོ་ཞེའོ། །དེས་ན་ཁེ་དང་བཀུར་སྟིའི་མཐའ་སྤངས་པར་འགྱུར་ཏེ། བསོད་སྙོམས་ཆོག་པ་ཙམ་ལས་ལྷག་པར་མི་ལེན་པས་ནི་ཁེ་སྤངས་པར་འགྱུར། དགོན་པ་ན་དབེན་པར་གནས་པས་ནི་བཀུར་སྟི་སྤངས་པར་འགྱུར་རོ་ཞེས་བསྟན་ཏོ། །དེ་བཞིན་གཤེགས་པ་གསེར་ཐུབ་ཀྱི་སྐུ་རིང་ལ། དེའི་ཉན་ཐོས་དག་ཐོས་པའི་ལོངས་སྤྱོད་ལ་ཞུགས་ཤིང༌། ཚུལ་ཁྲིམས་ཀྱི་གཏམ་གཏན་ལ་འབེབས་པས་ན། ཁ་ཅིག་གིས་ཡོན་ཏན་བསྔགས་ཤིང་གཞན་མུ་སྟེགས་ཅན་གྱི་རབ་ཏུ་བྱུང་བ་དང༌། སྐྱེ་བོ་དག་ལ་ཁ་ཟེར་ཞིང་འཕྱས་འདོགས་པས་ན། སྐྱེས་བུ་དམ་པའི་ཚུལ་མ་ཡིན་པ་ཆེར་སྤྱོད་དེ་དེའི་གཉེན་པོར་གསུངས་སོ། །བདག་གི་རིགས་དང་མི་རིགས་དང༌། །ཞེས་ཤློ་ཀ་གཅིག་དེ་བཞིན་གཤེགས་པ་གསེར་ཐུབ་ཀྱིས་གསུངས་ཏེ། དེ་ལ་རིགས་པ་ཞེས་བྱ་བ་ནི་དགེ་བ་བསྒྲུབ་ཅིང་སྤྱོད་པའི་རིགས་པའོ། །མི་རིགས་པ་ནི་སྡིག་པ་མི་དགེ་བའི་ཆོས་སྤྱོད་པར་མི་རིགས་པའོ། །བརྟག་པར་བྱ་བ་ནི་གོང་མའི་དགེ་བ་དང་མི་དགེ་བ་གཉིས་བདག་གིས་དགེ་བ་ནི་ཅི་བྱས་ཞེས་བདག་གི་སེམས་ཀྱི་རྒྱུད་ལ་བརྟག་པར་བྱའོ་ཞེའོ། །གཞན་རྣམས་ཀྱིས་མི་མཐུན་པ་ཞེས་པ་གཞན་ཞེས་བྱ་བ་ནི་རབ་ཏུ་བྱུང་བ་འདི་ནི་དགེ་སློང་དང༌། མུ་སྟེགས་ཅན་གྱི་དགེ་སྦྱོང་དང་སྐྱེ་བོ་སྤྱོད་པ་དག་བདག་གི་ཡིད་དུ་མི་འོང་བའོ། །མི་མཐུན་པ་ཞེས་བྱ་བ་ནི་གཞན་རྣམས་ཀྱིས་བདག་དང་མི་མཐུན་པའི་ཆོས་གཞན་གྱིས་སྡིག་པ་བྱས་པ་དང༌། དགེ་བ་བྱས་པ་ལ་བདག་གིས་འདི་ནི་བྱས་པ་ལེགས་སོ། །འདི་ནི་མ་བྱས་པས་ཉེས་ཤིང་འཕྱས་གདགས་ཤིང་སྨད་པར་མི་བྱ་བའི་ཕྱིར། གཞན་གྱིས་བྱས་དང་མ་བྱས་རྣམས་ལ་མིན། །ཞེས་སྨོས་སོ། །མདོར་ན་བདག་གིས་ཉེས་པ་ཅི་བྱས་ལེགས་པ་ནི་གང་བྱས་ཅི་ཡོད། ལེགས་པ་ནི་ཇི་ལྟར་སྒྲུབ། ཉེས་པ་ནི་ཇི་ལྟར་སྤང༌། ཐབས་ཀྱིས་དོར་བ་སེམས་ལ་བརྟགས་ཤིང་དཔྱད་པར་ནི་རིགས་ཀྱི། གཞན་གྱི་ལེགས་པ་ཉེས་པ་ལ་འཕྱས་གདབ་པ་ནི་མི་རིགས་སོ་ཞེས་དེ་བཞིན་གཤེགས་པ་གསེར་
ཐུབ་ཀྱིས་གསུངས་སོ། །དེ་བཞིན་གཤེགས་པ་འོད་སྲུངས་ཀྱི་སྐུ་རིང་ལ། །དེའི་ཉན་ཐོས་ཕལ་ཆེར་འཇིག་རྟེན་གྱི་བསམ་གཏན་བཞིའི་རོལ་ཆགས་ཤིང་མངོན་པར་ཞེན་ནས། གོང་དུ་ཐར་པ་མི་ཚོལ་གཉེན་པོ་ལ་མི་བརྟེན། རྣམ་པར་གྲོལ་བ་སྔ་མའི་ས་དག་ཏུ་རྩོམ་ཞིང་སྒྲུབ་པར་མི་བྱེད་ནས། དེ་ལྟར་ལྟ་བ་སྤང་བའི་ཕྱིར་གཉེན་པོར། ལྷག་པའི་སེམས་ལ་བག་བྱ་སྟེ། །ཞེས་བྱ་བ་ལ་སོགས་པ་ཤློ་ཀ་གཉིས་དེ་བཞིན་གཤེགས་པ་འོད་སྲུངས་ཀྱིས་གསུངས་ཏེ། ལྷག་པ་ཞེས་བྱ་བ་ནི་སོ་སོའི་སྐྱེ་བོ་དང་མུ་སྟེགས་ཅན་ལ་སོགས་པ་ལྷག་པ་སྟེ། འཇིག་རྟེན་གྱི་བསམ་གཏན་བཞིའོ། །བག་བྱ་བ་ནི་དཔེར་ན་ཚིག་ཏུ་འོང་གིས་མེ་ལ་བག་བྱོས་ཤིག་ཅེས་རིང་དུ་སྤང་བའི་དོན་ཏོ། །འཇིག་རྟེན་གྱི་བསམ་གཏན་བཞི་ལ་བག་བྱས་ན་ཁམས་གསུམ་གྱི་ཁྲི་མོན་དུ་མི་འཁོར་རོ་ཞེའོ། །འོ་ན་དེ་ལྟར་འཇིག་རྟེན་གྱི་བསམ་གཏན་བཞི་ལ་བསྲིངས་ཤིང་བག་བྱས་ན་གང་ལ་བསླབ་ཅིང་བསྟེན་པར་བྱ་ཞེ་ན། ཐུབ་པའི་གནས་ལ་བསླབ་པར་བྱའོ། །ཞེའོ། །ཐུབ་པ་ཞེས་བྱ་བ་ནི་ལུས་དང་ངག་ཡིད་གསུམ་ཐུབ་པ་སྟེ། དེ་བཞིན་གཤེགས་པ་ལ་བྱའོ། །དེའི་གནས་ནི་འཕགས་པའི་བདེན་པ་བཞི་དང༌། འཕགས་པའི་ལམ་ཡན་ལག་བརྒྱད་ལ་བྱ་སྟེ། དེ་རྣམས་ལ་བསླབས་ཤིང་ཞུགས་ན། འཇིག་རྟེན་གྱི་བསམ་གཏན་རིང་དུ་སྤོང་བ་དང༌། དེ་ལས་འཕགས་པ་རྣམས་བྱུང་ཞིང་སྐྱེ་བས་ན། ཐུབ་པའི་སྐྱེ་མཆེད་ཅེས་བྱ་སྟེ། དེ་ལས་རྣམ་པར་གྲོལ་བའི་འབྲས་བུ་སྐྱེ་ཞིང་འབྱུང་བའི་ཕྱིར་རོ། །དེ་བས་ན་ཉོན་མོངས་པ་དང་རིང་དུ་གྱུར་པའི་ཕྱིར་ཉེར་ཞི་ཞེས་སྨོས་སོ། །ཉེར་ཞི་རྟག་ཏུ་དྲན་ལྡན་པ་སྟེ་དེ་ལ་ཉེར་ཞི་ནི་སྡུག་བསྔལ་གསུམ་དང་བརྒྱད་ཞི་བ་ལ་བྱའོ། །ཡང་ན་ཁམས་གསུམ་གྱི་མཐོང་བས་སྤང་བར་བྱ་བའི་ཉོན་མོངས་པ་བརྒྱད་ཅུ་རྩ་བརྒྱད་ཞི་བའོ། །རྟག་ཏུ་དྲན་ལྡན་པ་ནི་འབྲི་བ་དང་གང་བ་མེད་པར་རང་བཞིན་གྱིས་ཤེས་བཞིན་དང་ལྡན་པའམ། བདེན་པ་བཞི་དང་འཕགས་པའི་ལམ་ལ་སེམས་རྩེ་གཅིག་པར་གནས་པས་ན་རྟག་ཏུ་དྲན་ལྡན་པར་གནས་པའོ། །སྐྱོབ་བ་མྱ་ངན་མི་མངའ་ཞེས་བྱ་བ་དེ་བཞིན་གཤེགས་པ་དག་ཀྱང་དེ་འདྲ་བའི་ཐུབ་པའི་གནས་ལ་བརྟེན་ཏེ་མྱ་ངན་མི་མངའ་ཞིང་ཉོན་མོངས་པ་མེད་པ་ཡིན་པ་དེ་བས་ན་སྐྱོབ་པ་ཞེས་ཡོན་ཏན་གྱིས་མཚན་དུ་གསོལ་ཏེ། དེའི་ཕྱིར་དེའི་རྗེས་སུ་དོང་ཞིང་ཞུགས་པའི་ཉན་ཐོས་དག་གིས་ཀྱང་དེ་འདྲ་བར་བྱས་ཏེ། ལྷག་པའི་སེམས་ཀྱི་
ཏིང་ངེ་འཛིན་གྱི་རོ་ལ་ཆགས་པ་དེ་སྤོང་ངོ༌། །ཡང་ན་སྐྱོབ་པ་ནི་གང་ཟད་དེ་ཉིད་ལ་བྱ་སྟེ་ཐུབ་པའི་ངས་ལ་སློབ་པའི་གང་ཟག་གང་ཡིན་པ་དེས་ནི་རང་གི་རྒྱུད་ལ་ཉོན་མོངས་པ་ལྡང་ཞིང་འབྱུང་བར་སྐྱོབ་པར་ནུས་པས་སྐྱོབ་པ་ཞེས་བྱ་སྟེ། དེ་ཉིད་སྐྱོབ་པ་མྱ་ངན་མི་མངའོ། །ཞེའོ། །ཚིགས་སུ་བཅད་པ་འདི་གསུམ་གྱིས་འཇིག་རྟེན་གྱི་བསམ་གཏན་བཞིའི་རོ་ལ་ཆགས་པ་ནི་མངོན་པར་སྤངས། འཕགས་པའི་བདེན་པ་བཞིའི་ཆོས་ལ་བརྟེན་ཅིང་བསྒོམས་པས། མཐོང་བའི་ལམ་གྱིས་སྤང་བར་བྱ་བའི་ཉོན་མོངས་པ་བརྒྱད་ཅུ་རྩ་བརྒྱད་ཡོངས་སུ་སྤངས་པས་ན་རྒྱུན་དུ་ཞུགས་པའི་འབྲས་བུ་ཐོབ་པར་འགྱུར་རོ། །དེ་ལྟ་བུའི་གང་ཟག་དེའི་ཡོན་ཏན་ནི་འདིར་འགྱུར་རོ། །ཞེས་བསྟན་པའི་ཕྱིར་རོ། །བྱིས་པ་བསོད་ནམས་རབ་ཏུ་འཕེལ། །ཞེས་བྱ་བ་ལ་སོགས་པ་ཤློ་ཀ་གཅིག་བསྟན་ཏེ། དེ་ལྟར་འཕགས་པའི་བདེན་པ་བཞི་ལ་གནས་པས་ན་འཇུངས་པ་དང༌། སེར་སྣའི་དྲི་ཤིན་ཏུ་སྤངས་ཏེ་ཕྲལ་བས་ན། བདག་གི་ལོངས་སྤྱོད་ལ་མ་ཆགས་ཤིང་གཏོང་བ་སྐྱོང་ཞིང་སྦྱིན་པར་བྱེད་པ་དང༌། གཞན་གྱི་ལོངས་སྤྱོད་ལ་མི་ལྟ་བས་ན་མ་བྱིན་པར་མི་ལེན་ཏོ། །མ་བྱིན་པར་མི་ལེན་པས་ན་བསོད་ནམས་རབ་ཏུ་འཕེལ་ལོ་ཞེའོ། །ཚིགས་སུ་བཅད་པ་རྩ་བ་འདིས་ནི་འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་འདོད་ཆགས་སྤོང་བར་འགྱུར་རོ་།བསྡམས་པས་དགྲ་སོགས་མི་འགྱུར་རོ། །ཞེས་བྱ་བ་འཕགས་པའི་བདེན་པ་བཞི་མཐོང་བས་ན་བསྡམས་པ་ཞེས་བྱ་སྟེ། བསྡམས་པ་ནི་ལུས་དང་ངག་ཡིད་གསུམ་གྱི་སྒོ་ནས་ཉེས་པ་མི་འབྱུང་ཞིང་ཤིན་ཏུ་སྡོམ་པ་སྟེ། ཚུལ་ཁྲིམས་བསྲུང་བའོ། །ཚུལ་ཁྲིམས་བསྲུངས་པས་ན་གཞན་གྱི་སྲོག་མི་གཅོད་དོ། །སྲོག་མ་བཅད་པས་ན་སེམས་ལ་བྱམས་པ་དང་ལྡན་པར་འགྱུར་ཏེ། བྱམས་པའི་བདག་ཉིད་དུ་གྱུར་པས་ཁོང་ཁྲོ་བ་མེད་དོ། །ཚིགས་སུ་བཅད་པ་རྩ་བ་འདིས་ནི་འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་ཁོང་ཁྲོ་བ་སྤངས་པར་སྟོན་ཏོ། །དགེ་དང་ལྡན་པས་སྡིག་པ་སྤོང༌། །ཞེས་བྱ་བ་ནི་འཕགས་པའི་བདེན་པ་བཞི་ལ་སེམས་རྩེ་གཅིག་པར་ཡོངས་སུ་བསྒོམས་པས་ན། སྡིག་པ་མི་སྤྱོད་དེ་དེ་བས་ན་དགེ་བ་དང་ལྡན་པ་ཉིད་དོ་ཞེའོ། །ཚིགས་སུ་བཅད་པ་རྩ་བ་འདིས་ནི་འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་ང་རྒྱལ་དང་མ་རིག་པ་སྤོང་བར་སྟོན་ཏོ། །སྦྱིན་པས་བསོད་ནམས་རབ་ཏུ་འཕེལ། །ཞེས་བྱ་བ་མན་ཆད་ཚིགས་སུ་བཅད་པ་རྩ་བ་
འདི་གསུམ་གྱིས། འདོད་པའི་ཁམས་ཀྱི་བསྒོམ་པས་སྤང་བར་བྱ་བའི་འདོད་ཆགས་དང༌། ཁོང་ཁྲོ་བ་དང་ང་རྒྱལ་དང་མ་རིག་པ་བཞི་གཅིག་ཏུ་བསྡུས་ནས་གསུམ་དུ་བསྡོམས་ཏེ། ཆེན་པོ་དང་འབྲིང་པོ་དང་ཆུང་ངུ་གསུམ་ལ་གཅིག་གསུམ་གསུམ་སྟེ། ཉོན་མོངས་པའི་རིམ་པ་རྣམ་པ་དགུ་ལ་དྲུག་མན་ཆད་སྤངས་པ་ནི་ཕྱིར་འོང་བའི་གང་ཟག་ཅེས་བྱའོ། །དགུ་ཆར་སྤངས་པ་ནི་ཕྱིར་མི་འོང་བའི་གང་ཟག་ཅེས་བྱའོ། །ཉོན་མོངས་ཟད་པ་མྱ་ངན་འདའ། །ཞེས་བྱ་བ་ཚིགས་སུ་བཅད་པ་འདིས་ནི། གཟུགས་དང་གཟུགས་མེད་པའི་ཁམས་ཀྱི་བསྒོམ་པས་སྤང་བར་བྱ་འདོད་ཆགས་དང་ང་རྒྱལ་དང་མ་རིག་པ་དང་གསུམ་ཁམས་གཉིས་ན་གསུམ་གསུམ་སྟེ། དྲུག་ལ་ཡང་ཐུམ་པོ་གཅིག་ཏུ་བྱས་ལ། ཆེན་པོ་དང༌། འབྲིང་པོ་དང༌། ཆུང་ངུ་གསུམ་སྟེ། གཅིག་ལ་ཡང་གསུམ་གསུམ་དུ་བྱ་སྟེ། ཉོན་མོངས་པའི་རིམ་པ་དགུ་སྟེ། དགུ་ཆར་སྤངས་པ་ནི་དགྲ་བཅོམ་པའོ། །དེ་བས་ན་གང་ཟག་བརྒྱད་ལ་བཞི་ནི་དངོས་སུ་བཤད་པས་བཞི་ནི་ཉོན་མོངས་པའི་རིམ་པ་སྤོང་བ་ལ་འཇུག་པ་སྟེ། རྒྱུན་དུ་འཇུག་པ་སྤངས་ཟིན་པ་ནི་རྒྱུན་དུ་ཞུགས་པ་སྟེ། གོང་མ་གསུམ་ཡང་འདི་དང་འདྲའོ། །དེ་བས་ན་གང་ཟག་བརྒྱད་ཀྱི་རིམ་པ་ནི་འདིར་བསྟན་ཟིན་ཏོ། །བཅོམ་ལྡན་འདས་ཤཱཀྱ་ཐུབ་པའི་སྐུ་རིང་ལ་འདུ་ལ་བ་ལ་བསླབ་པའི་གནས་མ་བཅས་ཏེ། འདུལ་བ་འབུམ་དག་མ་བསྟན་པའི་ཚེ་དགེ་སློང་ཉེས་པ་ལ་མིག་ཆེ་ཞིང་མི་དགེ་བའི་ཆོས་ལ་ཉེ་བར་གནས་པ་དང༌། དགེ་བ་ཅུང་ཟད་སྤྱད་པ་ཙམ་གྱིས་ཀྱང་ཐར་པར་འགྱུར་རོ་ཞེས་བསྙེམས་པའི་ཕྱིར། འདི་ལྟ་བུའི་ལྟ་བ་བཟློག་ཅིང་དེའི་གཉེན་པོར་དེ་བཞིན་གཤེགས་པ་ཤཱཀྱ་ཐུབ་བས། སྡིག་པ་ཐམས་ཅད་མི་བྱ་སྟེ། །ཞེས་བྱ་བ་ལ་སོགས་པ་ཚིགས་སུ་བཅད་པ་ཕྱེད་དང་བཞིས་བསྟན་ཏོ། །དེ་ལ། སྡིག་པ་ཐམས་ཅད་མི་བྱའོ། །ཞེས་བྱ་བ་ཤློ་ཀ་གཅིག་གིས་ཉེས་པ་ལ་མིག་ཆེ་བའི་གཉེན་པོར་བསྟན་ཏོ། །དགེ་བ་ཅུང་ཟད་ཙམ་གྱིས་ཀྱང་མགུ་ཞིང་སྡིག་པ་མི་བྱ་བ་ནི་སྲོག་གཅོད་པ་ལ་སོགས་ཏེ། མི་དགེ་བ་བཅུ་དང༌། ལྟུང་བ་རིས་ལྔ་དང༌། ཡང་ན་འཇིག་རྟེན་ན་ཡུལ་ཆོས་ཀྱིས་མི་མཛེས་ཤིང༌། བྱ་བ་མི་རིགས་པ་ཐམས་ཅད་མི་བྱའོ། །མཁས་པར་བསྙེན་པར་རྫོགས་ཞེས་བྱ་བ་ནི་བཅོམ་ལྡན་འདས་ཀྱི་ལུང་གིས་གནང་ཞིང་རབ་ཏུ་འབྱུང་དུ་རུང་བ་དང༌། བསྙེན་པར་རྫོགས་པར་གནང་བ་དེ་ལྟ་བུས་བསྙེན་པར་རྫོགས་པར་བྱའོ་ཞེའོ། །ཡང་ན་མཁས་པ་ཞེས་བྱ་བ་ནི་ཤེས་རབ་དང་ལྡན་པ་ལ་བྱ། བསྙེན་པ་ནི་དགེ་
བ་རྫོགས་པར་བྱ་བའི་དོན་ཡིན་པས་ངག་གིས་མི་བྱ་བ་བཞི་སྟེ། བརྫུན་དང་ཕྲ་མ་དང༌། བྱུང་རྒྱལ་གྱི་ཚིག་དང༌། ཞེ་གཅོད་པར་མི་སྨྲ་ཞིང་ལྷག་པའི་ཤེས་རབ་ཀྱི་ཕུང་པོ་དང༌། ལྷག་པའི་ཤེས་རབ་ལ་རབ་ཏུ་འཇུག་པའོ་ཞེའོ། །རང་གི་སེམས་ཀྱང་ཡོངས་སུ་གདུལ། །ཞེས་བྱ་བ་ནི། ཡིད་ཀྱིས་མི་བྱ་བ་གསུམ་སྟེ། ཆགས་པར་མི་བསམས་པ་དང༌། ངན་དུ་མི་བསམས་པ་དང༌། ལོག་པར་མི་ལྟ་བའོ། །གཞན་དུ་ན་ཏིང་ངེ་འཛིན་གྱི་ཕུང་པོ་དང༌། ལྷག་པའི་ཏིང་ངེ་འཛིན་ལ་རབ་ཏུ་འཇུག་པའོ། །འདི་ནི་སངས་རྒྱས་བསྟན་པ་ཞེས་བྱ་བ་ནི་ཡིད་ཆེས་པར་བྱ་བའི་ཕྱིར་ཤཱཀྱ་ཐུབ་པས་བསྟན་པའོ་ཞེའོ། །དེས་ནི་ཉེས་པ་ལ་མིག་ཆེ་བ་བཟློག་པའི་གཉེན་པོར་བཤད་དོ། །ཉེས་པ་ནི་སྤང་བའི་ཐབས་བཤད་དེ། ལུས་ཀྱི་སྡོམ་པ་ལེགས་པ་སྟེ། །ཞེས་བྱ་བ་ཤློ་ཀ་ཕྱེད་དང་གཉིས་སྨོས་ཏེ། ལུས་དང་ངག་ཡིད་གསུམ་སྡོམ་པ་ནི་གོང་མ་དག་དང་ཡང་སྦྱར། ཡང་ན་ལུས་ཀྱི་ཉེས་པ་དང༌། ངག་གི་ཉེས་པ་དང༌། ཡིད་ཀྱི་ཉེས་པ་འདི་བསྡམས་ན་སྡིག་པ་མི་འཕེལ་བས་ན། དེའི་ཕྱིར་བསྡམ་པར་བྱའོ་ཞེས་སྨོས་སོ། །དེ་བས་ན་ལུས་ཀྱི་སྡོམ་པ་གང་ལེགས་ན། ངག་གི་ལྟ་ཅི་སྨོས། ངག་གིས་སྡོམ་པ་ཡང་ལེགས་པ་ཡིན་ནོ། ཡིད་ཀྱི་སྡོམ་པ་ལྟ་སྨོས་ཀྱང་ཅི་དགོས་ཏེ། དེའི་ཕྱིར་ཐམས་ཅད་བསྡོམ་པར་བྱའོ་ཞེའོ། །ཐམས་ཅད་སྡོམ་པ་ལེགས་པ་ནི་དུས་གསུམ་དུ་ལུས་དང་ངག་ཡིད་གསུམ་སྔོམ་པའོ། །ཀུན་དུ་བསྡོམས་པའི་དགེ་སློང་ནི་ཡུལ་དང༌། དུས་དང་གང་ཟག་ལ་ཆད་པ་མེད་པར་ཚུལ་ཁྲིམས་བསྲུང་བའོ། །སྡུག་བསྔལ་གསུམ་ལས་རབ་ཏུ་གྲོལ། །ཞེས་བྱ་བ་སྡུག་བསྔལ་ནི་གསུམ་དང༌། བརྒྱད་དང༌། ཁམས་གསུམ་གྱི་ཉོན་མོངས་པ་དགུ་བཅུ་རྩ་བརྒྱད་ལས་རྣམ་པར་གྲོལ་ཞིང་འཁོར་བའི་བཙོན་ར་ནས་ཐར་པར་འགྱུར་རོ་ཞེའོ། །དེས་ནི་ཉོན་མོངས་པ་སྤོང་བའི་ཐབས་སུ་བཤད་དོ། །ངག་རྣམས་བསྲུང་ཞིང་ཡིད་ཀྱིས་རབ་བསྡམས་ཞེས་བྱ་བ་ཤློ་ཀ་གཅིག་གིས་དྲན་པ་མི་བརྗེད་པའི་ཐབས་སུ་སྟོན་ཏེ། ངག་གི་སྲུང་བ་ནི་ངག་གིས་མི་བྱ་བ་བཞི་དང༌། གཞན་དུ་ན་རང་གི་ལྟུང་བ་ལྕི་ཡང་ཅི་བྱུང་ན་དགེ་བའི་བཤེས་གཉེན་གྱིས་གླེངས་ཤིང་བསྟན་ན། སླར་འཁྱལ་ཞིང་མི་སྨྲ་བར་དགེ་བའི་བཤེས་གཉེན་གྱི་ཁར་གུས་པར་ཉན་པའོ། །ཡིད་ཀྱིས་བསྡམས་པ་ནི་འགྱོད་ཚངས་བྱེད་པའི་ཚེ། ཚིག་གིས་སྨྲས་པ་མ་ཟད་ཀྱིས། ཡིད་ཀྱིས་སེམས་ཐག་པ་ནས་མཐོལ་བའོ། །ཡང་ན་ཡིད་ཀྱིས་མི་བྱ་བ་དེ་གསུམ་ཕྱིན་ཆད་མི་བྱེད་པར་ཡིད་
དམ་དུ་འཆའ་བའོ། །ལུས་ཀྱིས་མི་དགེ་བ་མི་བྱེད། །ཅེས་བྱ་བ་ནི། ལུས་ཀྱིས་མི་བྱ་བ་ནི་གསུམ་སྟེ། སྲོག་མི་གཅོད་པ་དང༌། མ་བྱིན་པར་མི་ལེན་པ་དང༌། འདོད་པས་ལོག་པར་མི་སྤྱོད་པའོ། །ཡང་ན་ལུས་སྙོགས་པ་དང༌། འཚེ་བ་དང༌། འཚོག་པ་ལ་སོགས་པའི་ལས་རྣམས་མི་བྱེད་པའོ། །རྣམ་པ་གཞན་དུ་ན་ལུས་ཀྱི་སྤྱོད་ཡུལ་མ་ཡིན་པ་ལྔ་སྤང་བར་སྟོན་ཏེ། དེ་ཡང་གང་ཡིན་ཞེ་ན། རྒྱལ་པོའི་ཕོ་བྲང་དང༌། རིགས་ངན་གྱི་ཁྱིམ་དང༌། ཆང་འཚོང་བ་དང་རོལ་མོ་མཁན་གྱི་ཁྱིམ་དང༌། སྨད་འཚོང་གི་ཁྱིམ་རྣམས་སུ་མི་སྤྱོད་པའོ། །ལས་ལམ་གསུམ་པོ་འདི་དག་རབ་སྦྱངས་ནས། །དྲང་སྲོང་གསུངས་པའི་ལམ་ནི་ཐོབ་པར་འགྱུར། །ཞེས་བྱ་བ་ལམ་ཞེས་བྱ་བ་ནི་དཔེ་སྟེ། འདི་ལྟར་ལམ་ལ་སྐྱེ་བོ་ཀུན་རྒྱུ་ཞིང་འགྲོ་བ་ལྟར་ལུས་དང་ངག་ཡིད་གསུམ་གྱི་ལམ་ལ་ཡང༌། དགེ་སྡིག་གི་དངོས་པོ་རྒྱུ་ཞིང་འགྲོ་བར་བྱེད་པས་ལམ་དང་འདྲ་སྟེ། དེ་གསུམ་རབ་ཏུ་སྦྱངས་པས་ན་དྲི་མ་དང༌། སྐྱོན་མེད་པར་སྦྱངས་པས་དྲང་པོའི་ལམ་ཞེས་བྱ་སྟེ། དེས་ཐོབ་པ་ནི་དེ་བཞིན་གཤེགས་པའི་བཀའ་ཡིན་པས་ན། འཕགས་པའི་ལམ་གྱི་ཡན་ལག་བརྒྱད་ལ་ལུང་དང་མཐུན་པར་སྤྱད་པས་ན། གང་ཟག་བརྒྱད་ཀྱི་འབྲས་བུ་ཐོབ་པར་འགྱུར་རོ་ཞེའོ། །དེ་བས་ན་སངས་རྒྱས་ཤཱཀྱ་ཐུབ་པའི་ཚེའི་ཉན་ཐོས་ནི། ལོ་བཅུ་གཉིས་ཀྱི་བར་དུ་ཤློ་ཀ་འདི་རྣམས་ཀྱིས་འདུལ་ཞིང་རྣམ་པར་གྲོལ་བར་འགྱུར་ཞིང་སྤྱོད་དོ། །ལོ་བཅུ་གསུམ་དུ་གྱུར་ནས་ནི་འདུལ་བ་ལ་བསླབ་པའི་གནས་བཅས་སོ། །དེ་ལ་སངས་རྒྱས་རབས་བདུན་པོ་སྨོས་པ་ནི་བསྡུ་བའི་ཚིག་སྟེ། གོང་དུ་སྨྲས་པའི་ཚིག་འོག་ཏུ་འདིའོ་ཞེས་བསྡུས་ནས་ཡང་དག་པར་བསྟན་པའོ། །ཤཱཀྱ་ཐུབ་པ་གཽ་ཏམ། །ཞེས་བྱ་བ་ནི་ཁྱིམ་པའི་ཕྱོགས་ནས་བསྟོད་པ་སྟེ། ཐུབ་པ་ནི་སྒོ་གསུམ་ནས་ཉེས་པ་མི་འབྱུང་བར་ཐུབ་པའོ། །གཽ་ཏམ་ཞེས་བྱ་བ་ནི་ཡོན་ཏན་གྱི་རྣམ་གྲངས་ཀྱི་སྒོ་ནས་བསྟོད་པའོ། །ལྷའི་ལྷ་ཞེས་བྱ་བ་ནི་འཇིག་རྟེན་གྱི་ལྷ་དང་རྣམ་པར་གྲོལ་བའི་ལྷ་གཉིས་ཡོད་པ་ལས། ཤཱཀྱ་ཐུབ་པ་རིགས་ཀྱི་འཇིག་རྟེན་གྱི་ལྷ་ཆེན་པོ་བརྗེད་པའི་ཚེ། རྒྱལ་བུད་དོན་གྲུབ་པ་བཙས་ནས་རྒྱལ་བུ་དོན་གྲུབ་ཀྱིས་ལྷ་དེ་ལ་ཕྱག་བྱས་པ་དང༌། ལྷ་དེ་མགོ་ཚལ་པ་བདུན་དུ་གས་པས། དེ་བས་ཀྱང་འཕགས་པར་གྱུར་པས་ན་ལྷའི་ལྷ་ཞེས་ཤཱཀྱ་ཐུབ་པ་ལ་མཚན་དུ་གསོལ། མི་འདུལ་བ་ནི་ཤཱཀྱ་ཐུབ་པ་འཇིག་རྟེན་དུ་གཤེགས་པའི་ཚེ་དུས་ངན་ཏེ། སྐྱེ་བོ་རྣམས་ཤིན་ཏུ་གདུལ་དཀའ་བའི་ཕྱིར་དེ་ལྟ་བུ་གདུལ་བས་ན་མི་གདུལ་གདུལ་བའོ། །
ཡང་ན་མི་གདུལ་བ་ནི་འདོད་ཆགས་དང་ལྡན་པ་མཛེས་དགའ་དང༌། ཞེ་སྡང་དང་ལྡན་པ་སོར་མོའི་ཕྲེང་བ་དང༌། གཏི་མུག་དང་ལྡན་པ་ལྟེང་རྒྱས་འོད་སྲུང་ལྟ་བུ་ཤིན་ཏུ་གདུལ་དཀའ་བ་ཡང༌། བཅོམ་ལྡན་འདས་ཀྱིས་བཏུལ་ནས་དགེ་བ་ལ་གཞག་པས་ན་མི་འདུལ་བའོ། །ཡང་རྙོག་པ་ལྔ་ནི་སེམས་ཅན་དང་ལྟ་བ་དང༌། ཉོན་མོངས་པ་དང༌། བསྐལ་པ་དང༌། ཚེའི་རྙོག་པའོ། །རྙོག་པ་ལྔའི་ཚེ་མི་འདུལ་བས་ན་མི་འདུལ་བའོ་ཞེའོ། །ཁ་ལོ་སྒྱུར་བ་ནི་ཁམས་གསུམ་གྱི་སེམས་ཅན་ཉོན་མོངས་པ་ལས་འཕགས་པའི་ལམ་དུ་ཁ་ལོ་སྒྱུར་བར་བྱེད་པའོ། །བླ་ན་མེད་པ་ནི་ཉན་ཐོས་མན་ཆད་ཚངས་པ་དང༌། བརྒྱ་བྱིན་གྱིས་གདུལ་བ་རྒྱ་ཆུང་ངུ་ལྟ་བུ་མ་ཡིན་ཏེ། རྒྱ་ཆེ་ཞིང་གོང་ན་མེད་པས་བླ་ན་མེད་པའོ། །འཇིག་རྟེན་མགོན་པོ་སྐྱོབ་པའི་མཆོག །ཅེས་བྱ་བ་འཇིག་རྟེན་ནི་ཉེ་བར་ལེན་པའི་ཕུང་པོ་ལྔ་ལ་བྱའོ། །མགོན་པོ་ནི་སེམས་ཅན་ཐམས་ཅད་ཀྱི་མགོན་དུ་གྱུར་པས་དེ་བཞིན་གཤེགས་པ་ལ་བྱའོ། །དེ་སྐྱོབ་བ་ནི་སྐྱེ་བོ་ངན་པར་སྤྱད་ཅིང་ངན་སོང་དུ་འགྲོ་བ་ལས་སྐྱོབ་ཅིང་ཐར་པར་འདྲེན་པས་སྐྱོབ་པ་ཞེས་བྱའོ། །མཆོག་ནི་སྐྱོབ་པར་བྱེད་པ་མང་མོད་ཀྱི་སངས་རྒྱས་ཀྱི་སྐྱོབ་པ་ལྟ་བུ་གཞན་ལ་མེད་པས་ན། སངས་རྒྱས་ཀྱི་སྐྱོབ་པ་ནི་མཆོག་གོ་ཞེས་བསྟན་ཏོ། །སངས་རྒྱས་བདུན་པོ་ཞེས་སྨོས་པ་དང༌། སྐབས་འདིར་ཁ་ཅིག་ཐེ་ཚོམ་དུ་གྱུར་ཏེ། སངས་རྒྱས་བདུན་པོར་ཟས་ཀྱིས་ཕྱིས་འབྱུང་ངམ་མི་འབྱུང་སྙམ་པ་ལ། ཕྱིས་སངས་རྒྱས་འབྱུང་བར་བསྟན་པའི་གླེང་གཞི་ནི་མདོ་སྡེ་བཟང་པོ་ཞེས་བྱ་བའི་ནང་ནས་འབྱུང་བ་བསྐལ་པ་གསུམ་ཡོད་དེ། མེ་དང་རླུང་དང༌། ཆུའི་བསྐལ་པའོ། །དེ་ལ་ཆུའི་བསྐལ་པ་བདོ་ཞིང་འགྱུར་བའི་ཚེ། འོད་གསལ་ལྷའི་རིས་སུ་འདི་ལྟ་བུའི་ལྟས་བྱུང་སྟེ། དེ་བཞིན་གཤེགས་པ་འཇིག་རྟེན་དུ་འབྱུང་བ་དེ་སྙེད་ཀྱི་པད་མོ་རྫིང་ལས་སྐྱེས་ཏེ། དེའི་ཚེ་རྫིང་ཆེན་པོ་ལས་པད་མ་སྟོད་རྩ་བདུན་བྱུང་ནས། ལྷ་དག་ན་རེ་ཨེ་མའོ། །དེ་བཞིན་གཤེགས་པ་སྟོང་རྩ་བདུན་འབྱུང་བའི་ལྟས་ཤིག་ཅེས་ཟེར་ཏེ། དེ་དག་ལས་སངས་རྒྱས་རབས་བདུན་འདས་ཟིན་ཏེ། རྣམ་པར་གཟིགས་ནས་ཤཱཀྱ་ཐུབ་པ་བཞུགས་པའི་བར་དུའོ། །སྟོད་རྩ་བདུན་ལས་བདུན་གཤེགས་ཟིན་པས་ལྟག་པ་སྟོང་གདོད་གཤེགས་པར་འགྱུར་ཏེ། ཐ་མར་ནི་ཕྱག་ན་རྡོ་རྗེ་བཞེད་པ་ཅན་ཞེས་བྱ་བའི་དེ་བཞིན་གཤེགས་པར་འགྱུར་ཞིང༌། སེམས་ཅན་གྱི་དོན་མཛད་དོ་ཞེས་འབྱུང་ངོ༌། །དཔའ་བོ་ཞེས་བྱ་བ་ནི་སེམས་ཅན་གྱི་དོན་བྱ་བ་ལ་མི་སྐྱོ་མི་ལྡོག་པ་དང༌། ཉོན་མོངས་པ་དང་བདུད་ཀྱི་དགྲ་རྣམས་འཇོམས་པར་བྱེད་པས་
ན་དཔའ་བོའོ། །ཡང་ན་བསྐལ་པ་གྲངས་མེད་པའི་བར་དུ་སེམས་ཅན་གྱི་དོན་མཛད་པས་ན་དཔའ་བོ་ཞེའོ། །བདུན་པོ་ནི་རྣམ་པར་གཟིགས་ནས་ཤཱཀྱ་ཐུབ་པའི་བར་དུ་སྔར་བྱུང་བ་རྣམས་ཀྱི་གྲངས་སོ། །གྲགས་ལྡན་ནི་སངས་རྒྱས་བདུན་པོའི་ཡོན་ཏན་ཏེ། བདུད་བཞི་བཅོམ་ནས་བསོད་ནམས་དང༌། ཡེ་ཤེས་ཕུན་སུམ་ཚོགས་པ་དང་ལྡན་ནོ་ཞེས་འཇིག་རྟེན་དུ་གྲགས་པའོ། །སོ་སོར་ཐར་པ་ནི་སངས་རྒྱས་བདུན་པོས་བཤད་པའི་སོ་སོར་ཐར་བ། བཟོད་བ་དཀའ་ཐུབ་དམ་པ་ཞེས་བྱ་བ་ལ་སོགས་པའོ། །དེ་ནི་རབ་ཏུ་རྒྱས་པར་བཤད། །ཅེས་བྱ་བ་ནི་དེ་ལྟར་ཚིག་ཉུང་ངུ་ཟིན་གྱིས་ཀྱང་དོན་ཀུན་འདིར་འདུས་པས་ན་དེ་དག་གི་ཚེ་དེ་ཙམ་དག་གིས་ཀྱང་ཉན་ཐོས་དེ་དག་རྣམ་པར་གྲོལ་ཞིང་བསླབ་པ་ལས་མི་འདའ་བར་རྒྱས་པ་དང་འདྲ་བར་འབྲས་བུ་ཐོབ་པས་ན་རྒྱས་པ་ཞེས་བཤད་དོ། །འདི་ལ་སངས་རྒྱས་རྣམས་དང་གང༌། །ཞེས་བྱ་བ་ཤློ་ཀ་གཅིག་གིས་སངས་རྒྱས་བདུན་གྱི་ཡོན་ཏན་དང༌། འབྲས་བུ་བསྔགས་པ་སྟོན་ཏེ། འདི་ལ་ཞེས་བྱ་བ་ནི་སངས་རྒྱས་བདུན་གྱིས་གསུངས་པའི་སོ་སོར་ཐར་པ་འདི་ལའོ། །སངས་རྒྱས་ཉན་ཐོས་དག་ཀྱང་གུས། །ཞེས་བྱ་བ་སྔ་མ་འདས་པའི་སངས་རྒྱས་བདུན་པོ་དག་ཀྱང་སོ་སོར་ཐར་པ་ལ་བསྲུང་ཞིང་གུས་པ་དང་བཅས་ཏེ། བླ་མར་བྱས་ཤིང་ཡོངས་སུ་བསྲུང་བས་ན་བླ་ན་མེད་པའི་འབྲས་བུ་ཐོབ་པོ། །དེ་བཞིན་དུ་ཉན་ཐོས་རྣམས་ཀྱང་གུས་པར་བྱེད་དོ། །དེ་ལ་གུས་བཅས་གྱུར་པ་དང༌། །ཞེས་གུས་པ་དང་བཅས་པ་ནི་ཚུལ་ཁྲིམས་སྡོམ་ཞིང་ནན་ཏན་དུ་བསྲུང་བའོ། །འདུས་མ་བྱས་པ་ཐོབ་པར་འགྱུར། །ཞེས་པ་འདུས་མ་བྱས་པ་ནི་བྲག་པ་མེད་པའི་ཆོས་ཏེ། འགོག་པ་དང་ལམ་ལ་བྱའོ། །དེ་ཡང་ཇི་ལྟར་ཐོབ་ཅེ་ན་སོ་སོར་ཐར་པ་བསྲུང་ཞིང་ཡོངས་སུ་བསྡམས་པས་སྡུག་བསྔལ་དང་ཀུན་འབྱུང་ནི་སྤངས། འགོག་པ་དང་ལམ་ནི་མངོན་སུམ་དུ་བྱས་ཤིང་ཡོངས་སུ་བསྒོམས་པས་འདུ་བྱེད་ཐམས་ཅད་ཡོངས་སུ་སྤང་བར་འགྱུར་རོ། །བརྩམ་པར་བྱ་ཞིང་འབྱུང་བར་བྱ། །ཞེས་བྱ་བ་ཤློ་ཀ་གཅིག་ནི་སློབ་དཔོན་ཨུ་པཱ་ལིས་རབ་ཏུ་བྱུང་བ་དང་ཁྱེམ་བའི་ཕྱོགས་དགེ་བའི་ཕྱོགས་ལ་གཞེན་བསྐུལ་གདབ་པ་དང༌། དད་པ་སྐྱེད་ཅིང་སྤྲོ་བར་བྱ་བའི་ཕྱིར་ཐབས་བསྟན་པ་སྟོན་ཏེ། བརྩམ་པར་བྱ་བ་ནི་དེ་བཞིན་གཤེགས་པའི་བསྟན་པ་ལ་དད་ཅིང་མོས་ནས། དེ་ལ་འཇུག་ཅིང་བསླབ་པར་བརྩམས་པའོ། །འབྱུང་བ་ནི་བརྟན་པ་ལ་བསླབས་ནས་དོན་གོ་བ་དང་ཁྱིམ་སྤོང་ཞིང་རབ་བྱུང་བའོ། །སངས་རྒྱས་བསྟན་ལ་འཇུག་པར་བྱ། །ཞེས་པ་སངས་རྒྱས་ཀྱི་བསྟན་པ་ནི་བདེན་པ་བཞི་དང་
སོ་སོར་ཐར་པ་ཉིད་ལ་བྱའོ། །ཁྱིམ་ནས་བྱུང་ཕན་ཆད་སངས་རྒྱས་ཀྱི་བསྟན་པ་ནི་བདེན་པ་བཞི་དང༌། འཕགས་པའི་ལམ་བརྒྱད་དང༌། སོ་སོར་ཐར་པ་ཡང་དག་པར་འཇུག་པ་ཞེའོ། །དེ་ནི་མཐོང་བའི་ལམ་གྱིས་བསྐྱེད་དོ། །འདོམ་བུའི་ཁྱིམ་ན་གླང་ཆེན་བཞིན། །འཆི་བདག་སྡེ་རྣམས་གཞོམ་པར་བྱ། །ཞེས་བྱ་བ་བསྒོམ་པའི་ལམ་གྱིས་བསྐྱེད་པ་སྟེ། གོང་དུ་བདེན་པ་བཞི་དང་འཕགས་པའི་ལམ་བརྒྱད་ཡོངས་སུ་བསྒོམས་པས་འཆི་བདག་གི་སྟེ་སྐྱེ་རྒན་འཆི་རྣམས་སོ་སོར་ཐར་པས་བསྡམས་པ་དང༌། བདེན་པ་བཞི་བསྒོམས་པའི་མཐུས་གཞོམ་པར་བྱེད་པའོ། །དཔེར་ན་ཁྱིམ་རྩྭའི་འམ། འདོམ་བུའི་ཁྱིམ་སྙིང་པོ་མེད་ཅིང་མི་བརྟེན་པ་ལ་གླང་པོས་བཅོམ་པ་བཞིན་དུ་སྐྱེ་རྒ་ན་འཆིའི་སྡེ་རྩྭ་ཁྱིམ་དང་འདྲ་བ་ལ་བསོད་ནམས་དང་ཡེ་ཤེས་ཀྱི་གླང་པོ་དང་འདྲ་བས་འཇོམས་པར་བྱེད་པའོ། །གང་ཞིག་རབ་ཏུ་བག་ཡོད་པ། །ཞེས་པ་ཤློ་ཀ་གཉིས་ཀྱིས་ནི་བསླབ་པ་ལ་ནན་ཏན་བྱེད་པའི་བརྗོད་པ་སྟོན་ཏེ། གང་ཞིག་ཅེས་བྱ་བ་ནི་སྐྱེ་བོ་དགེ་བ་ཅན་ལ་བྱ། བག་ཡོད་པ་ནི་དགེ་བ་ཅན་ཏེ། ཉོན་མོངས་པ་ལ་བག་བྱེད་པའོ། །ཆོས་འདུལ་འདི་ལ་སྤྱོད་འགྱུར་བ། །ཞེས་པ་ཆོས་འདུལ་བ་ནི་སོ་སོར་ཐར་པ་དང་འཕགས་པའི་བདེན་པ་བཞི་ལ་བྱའོ་སྤྱོད་པར་འགྱུར་བ་ནི་སྐྱེ་བོ་དགེ་ཅན་འདི་ལ་སྤྱོད་པར་འཇུག་པའོ། །སྐྱེ་བའི་འཁོར་བར་བ་སྤངས་ཞེས་པ་ཞེས་པ་སྐྱེ་བ་རྣམ་པ་བཞི་ལ་བྱའོ། །འཁོར་བ་ནི་ལམ་རྒྱུད་ལྔ་ལ་བྱ་སྟེ། གང་དུ་སོ་སོར་ཐར་པ་དང་བདེན་པ་ལ་བསྒོམས་པས་རྣམ་པ་དེ་དགུ་སྤངས་པར་འགྱུར་རོ་ཞེའོ། །སྡུག་བསྔལ་ཐ་མར་ཕྱིན་པར་འགྱུར། །ཞེས་པ་གོང་དུ་སྐྱེ་བ་དང༌། འཁོར་བ་ཡོངས་སུ་སྤངས་པས་ན། སྡུག་བསྔལ་གསུམ་དང་བརྒྱད་ལས་ཐར་བར་འགྱུར་ཏེ། མཐོང་བ་དང་བསྒོམ་པའི་ལམ་གྱི་མཐར་ཕྱིན་པ་དེ་འགྱུར་རོ་ཞེའོ། །ཕན་ཚུན་ཁྲིམས་སྲུང་བ་ཞེས་བྱ་བ་ཚུལ་ཁྲིམས་སྲུང་བ་ནི་སྒོ་གསུམ་ནས་ཉེས་པ་མི་འབྱུང་བར་བསྡམས་པ་དང༌། ཉེས་པ་བྱུང་ན་ཡང་གཅིག་ལ་གཅིག་བཤགས་ཤིང་མཐོལ་དང་ཉེས་པ་གསོལ་བའོ། །བསྟན་པ་འཕེལ་བར་འགྱུར་ཞེས་བྱ་བ་ནི་ཉེས་པ་མཐོལ་ཞིང་གསོལ་བས་ན། དེ་བཞིན་གཤེགས་པའི་གསུང་རབ་མི་འགྲིབ་ཅིང་རྒྱས་པ་དང་འཕེལ་བར་འགྱུར་རོ་ཞེའོ། །སོ་སོར་ཐར་པ་བཤད་པས་ནི། །དགེ་འདུན་གྱིས་ནི་གསོ་སྦྱོང་བྱས། །ཞེས་བྱ་བ་ནི་གོང་དུ་སྨོས་པ་ཕན་ཚུན་ཚུལ་ཁྲིམས་མིག་བཞིན་དུ་བསྲུང་བ་དང༌། བསྟན་པ་རྒྱས་པར་བྱ་བའི་ཕྱིར་སོ་སོར་ཐར་པ་བཤད་ཅིང་གསོ་སྦྱོང་བྱའོ་ཞེའོ། །གང་
གི་ཕྱིར་ནི་མདོ་བཤད་ཅེས་བྱ་བ་ཤློ་ཀ་གཅིག་གིས་ཡང་དག་པར་བསྲུང་བ་སྟོན་ཏེ། སྲོག་མི་ཕངས་པར་ཚུལ་ཁྲིམས་བསྲུང་བར་བྱའོ་ཞེའོ། །གང་གི་ཕྱིར་ནི་མདོ་བཤད་ཅེས་བྱ་བ་ནི་ཅིའི་ཕྱིར་སོ་སོར་ཐར་པའི་མདོ་བཤད་ཅེས་བྱ་བའི་དོན་ཏོ། །གང་ཕྱིར་གསོ་སྤྱོད་བྱས་གྱུར་ཞེས་པ་ཚུལ་ཁྲིམས་དམ་དུ་སྲུང་ཞིང་བསྲུང་བར་བྱ་བའོ། །ཚུལ་ཁྲིམས་དེ་ནི་བསྲུང་བྱས་ཞེས་བྱ་བ་ནི་གསོ་སྦྱོང་བྱས་པས་ཆོག་པ་མ་ཡིན་གྱི་ཚུལ་ཁྲིམས་བསྲུང་བ་ལ་ནན་ཏན་སྤྱོད་དུ་གཞུག་པའོ། །གཡག་རྔའི་རྩེ་མོ་ཇི་བཞིན་ནོ། །ཞེས་བྱ་བ་ནི་ཚུལ་ཁྲིམས་མིག་བཞིན་དུ་ཕངས་ཤིང་སྲོག་གི་ཕྱིར་ཡང་མི་དྲལ་བའི་དཔེ་སྟེ། གཞན་ཁ་ཅིག་ན་རེ་ནགས་སྟུག་པོའི་ནང་ན་གནས་པའི་ཚེ་རྔ་མ་ཤིང་ལ་མི་ཐོགས་ཤིང་མི་ཟིན་པ་དང་མི་ཟེགས་མི་གོང་ཅིང༌། ཤིང་ལ་ཐོགས་ཤིང་ཟིན་ན་ཡང་གོད་ཅིང་ཟེགས་སུ་དོགས་ནས་བག་བྱེད་པ་ལྟར་བསླབ་པ་ལ་ཞུགས་པའི་གང་ཟག་ཀྱང་ཚུལ་ཁྲིམས་སྲོག་གི་ཕྱིར་ཡང་མི་དྲལ་ལོ་ཞེས་བསྟན་ཏོ། །སོ་སོར་ཐར་པ་བཤད་པ་འདི་ནས་འཕགས་པ་ལ་ཨུ་པཱ་ལིས་དང་པོ་རྩོམ་པའི་ཚེ་བགེགས་དང་བར་ཆད་ཀྱིས་མི་ཚུགས་པར་བྱ་བ་དང༌། བརྩམས་པ་རྣམས་མཐར་ཕྱིན་པར་བྱ་བའི་ཕྱིར་རང་གི་ལྷ་ཡིད་དུ་འོང་བ་ལ་བརྟེན་ནས། བརྩམས་པ་རྣམས་ཀྱི་མཐར་ཡང་ཕྱིན། བགེགས་དང་བར་ཆད་ཞི་ནས་སྐྱེ་བོ་སོ་སོའི་སྨོན་ལམ་བཏབ་བའོ། །སོ་སོར་ཐར་པ་བཤད་པ་ནི་སོ་སོར་ཐར་པ་བཤད་པའོ། །བསོད་ནམས་གྲུབ་པ་གང་ཡོད་པ་བསོད་ནམས་གྲུབ་པ་ནི་དེའི་བསོད་ནམས་བདག་གིས་ཅུང་ཟད་ཅི་ཐོབ་པ་ལ་བྱའོ། །དེས་ནི་འཇིག་རྟེན་མ་ལུས་པར་དེའི་བསོད་ནམས་མ་ལུས་པ་དེ་ཉིད་ཀྱིས་སོ། །འཇིག་རྟེན་ནི་ཉེ་བར་ལེན་པའི་ཕུང་པོ་མ་ལུས་པ་ནི་ཁམས་གསུམ་མོ། ཐུབ་དབང་གོ་འཕང་ཐོབ་པར་ཤོག །ཅེས་བྱ་བ་ནི། ཐུབ་དབང་ནི་དེ་བཞིན་གཤེགས་པ་སྟེ། ཉན་ཐོས་དང་རང་སངས་རྒྱས་ཀྱི་དབང་པོའོ། །གོ་འཕང་ནི་དེ་བཞིན་གཤེགས་པའི་ཡོན་ཏན་དང་ཐབས་སོ། །ཐོབ་པར་ཤོག་ཅེས་བྱ་བ་ནི་ཁམས་གསུམ་གྱི་སེམས་ཅན་ཐམས་ཅད་ཀྱང་འདི་ལྟར་གྱུར་ཅིག་ཅེས་བྱ་བའོ། །སོ་སོར་ཐར་པའི་མདོ་རྫོགས་པ་ནི་བརྩམས་པ་མཐར་ཕྱིན་ཏེ། ཉན་པ་རྣམས་དབུགས་ཕྱིན་པའི་ཕྱིར་ཞེས་སྨོས་སོ། །སོ་སོར་ཐར་པའི་བཤད་པ་མི་བརྗེད་དྲན་བྱེད་ཙམ་དུ་བྲིས་པ་རྫོགས་སོ། །རྒྱ་གར་གྱི་མཁན་པོ་ཛཱ་རན་དྷ་ར་དང་ཞུ་ཆེན་གྱི་ལོ་ཙཱ་བ་དགེ་སློང་རིན་ཆེན་བཟང་པོས་བསྒྱུར་ཅི་ལ་ཞུས་ཏེ་གཏན་ལ་ཕབ་པ།། །།