འདུལ་བའི་མདོའི་འགྲེལ་པ་མངོན་པར་བརྗོད་པ་རང་གི་རྣམ་པར་བཤད་པ་ཞེས་བྱ་བ།
ཡོན་ཏན་འོད།
གང་ལ་ཤིང་བལ་གྱིས་གོས་པར་བྱ་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཤིང་བལ་གྱིས་གོས་པར་བྱས་པ་ལའོ་ཞེས་བྱ་བ་སྨོས་ཏེ། དགེ་འདུན་གྱི་ཁྲིའམ་ཁྲིའུ་དག་ལ་ཞེས་བྱ་བ་ནི་གོང་དུ་བསྟན་ཟིན་ཏོ། །ཅི་རང་ཉིད་ཀྱིས་གོས་པར་བྱས་པ་ལ་འམ་ཞེ་ན། དེའི་ཕྱིར་རང་ངམ་བསྐོས་པས་སོ་ཞེས་བྱ་བ་སྨོས་སོ། །འདིར་ཤིང་བལ་ཇི་ལྟ་བུ་ཡིན་པར་རིག་པར་བྱ་ཞེ་ན། དེའི་ཕྱིར་ཤིང་བལ་ནི་ལྔ་སྟེ། ཤམ་ལའི་དང༌། ཨརྐའི་དང༌། སྤྲ་བའི་དང༌། ཨེར་ཀའི་འོ་ཞེས་བྱ་བ་སྨོས་ཏེ། འདི་ནི་འདྲེས་པས་ཉམས་པར་བྱེད་པ་སྟེ། ཚིག་དེ་དག་ནི་གོས་དང་ལུས་མ་རུངས་པར་གྱུར་པ་དགག་པའི་ཕྱིར་རོ། །ཤིང་བལ་གྱིས་གོས་པར་བྱས་པའི་ལྟུང་བྱེད་དོ། །ཚད་ལས་ལྷག་པར་བྱེད་དམ་བྱེད་དུ་འཇུག་ན་རྐང་པའི་བསླབ་པའི་གཞི་ལས་བསླབ་པའི་གཞི་གསུམ་པ་ཞེས་བྱ་བར་བརྗོད་དོ།། དེ་ལ་གང་གིས་ཞེས་བྱ་བ་ལྟོས་པ་ལ་བརྗོད་པར་བྱ་སྟེ་གདིང་བའིའོ་ཞེས་བྱ་བ་སྨོས་ཏེ། དེའི་ཚད་གང་ཞེ་ན། དེའི་ཕྱིར་འདིའི་ཚད་ནི་སྲིད་དུ་ཁྲུ་གསུམ་མོ་ཞེས་བྱ་བ་སྨོས་སོ། །མི་ཆོག་ན་ཁྲུ་ཕྱེད་དང་
དོ་མན་ཆང་བཀྱེད་དོ་ཞེས་བྱ་བ་ནི་གང་ལ་ཁྲུག་སུམ་གྱིས་མི་ཆོག་པ་དེས་ཇི་ཙམ་བཀྱེད་པས་དོན་འགྲུབ་པ་དེ་ཙམ་བཀྱེད་པར་བྱ་སྟེ། ཁྲུ་ཕྱེད་དང་དོ་མན་ཆད་བཀྱེད་པར་བྱའོ། །ཆེན་པོ་དང་བར་མ་དང་ཁྲུ་ཕྱེད་ལས་བསྒྲུབ་པར་མི་བྱ་བའི་དོན་ཏོ། །འདིའི་ཞེང་དུ་ནི་ཁྲུ་དོ་དང་སོར་དྲུག་གོ་ཞེས་བྱ་བ་ནི་འདིའི་ཚད་ཅེས་བྱ་བ་དང་སྦྱར་རོ། །དེ་ཆུང་དུ་ལ་བྱིན་གྱིས་རློབ་ན་ནི་ཉེས་བྱས་སོ་ཞེས་བྱ་བ་ནི་གདིང་བ་དེའོ། །འོག་མ་གཉིས་ལ་ཡང་ངོ་ཞེས་བྱ་བ་ནི་གཡན་པ་དགབ་པ་ལས་གྱུར་པ་དང༌། དབྱར་གྱི་རས་ཆེན་ལས་གྱུར་པ་ཞེས་བྱ་བ་གཉིས་ལ་ཡང་ཚད་པས་ཆུང་བ་ལ་བྱིན་གྱིས་བརླབས་པ་ལ་ཉེས་བྱས་སུ་འགྱུར་བའོ། །བྲམ་ཟེའི་བུ་མོ་ལས་མདོ་གཉིས་པོ་འདི་ཡིན་ཏེ། འོག་མ་གཉིས་ལ་དེར་ཚིག་སྦྱར་ཏེ། དབྱར་གྱི་རས་ཆེན་ཆུང་དུ་ལ་བྱིན་གྱིས་རློབ་ན་ཉེས་བྱས་སོ། །དེ་བཞིན་དུ་གཡན་པ་དགབ་པ་ཡང་དེ་དང་འདྲའོ་ཞེས་གསུངས་པ་ཡིན་ཏེ། དེའི་རྗེས་སུ་འབྲང་བས་གདིང་བ་ལ་ཡང་དེ་སྐད་ཅེས་སྨྲས་སོ། །གཞན་འདི་ཚད་ལས་འདས་པའི་རྣམ་པར་གཞག་པ་ནི་ཉེས་བྱས་འདི་གཞན་དུ་རིག་པར་བྱ་སྟེ། འདིར་གཏོགས་པ་ནི་མ་ཡིན་ནོ། །གདིང་བ་ལས་གྱུར་པའི་ལྟུང་བྱེད་དོ། །ཚད་ལས་ལྷག་པར་བྱེད་དམ་བྱེད་དུ་འཇུག་པ་ལ་ལྟུང་བྱེད་བཞི་པ་གང་ཡིན་པ་བརྗོད་
པ། དེ་ལ་གང་གིས་ཞེས་བྱ་བ་ལ་ལྟོས་ནས་བརྗོད་པར་བྱ་སྟེ། དེའི་ཕྱིར་གཡན་པ་དགབ་པའི་འོ་ཞེས་བྱ་བ་སྨོས་སོ། །དེའི་ཚད་ཇི་ཙམ་ཞེ་ན། དེའི་ཕྱིར་ཁྲུ་དྲུག་དང་གསུམ་མོ་ཞེས་བྱ་བ་སྨོས་ཏེ། སྲིད་དུ་ནི་ཁྲུ་དྲུག་གོ །ཞེང་དུ་ནི་གསུམ་མོ། །གཡན་པ་དགབ་པ་ལས་གྱུར་པའི་ལྟུང་བྱེད་དོ། །ལྔ་པ་གང་གིས་ཚད་ལས་ལྷག་པར་བྱེད་དམ་བྱེད་དུ་འཇུག་ན་ལྟུང་བྱེད་དོ། །དེ་ལ་གང་ཞིག་ཞེས་བྱ་བ་འདི་ལ་བརྗོད་པར་བྱ་སྟེ། དེའི་ཕྱིར་དབྱར་གྱི་རས་ཆེན་གྱིའོ་ཞེས་བྱ་བ་སྨོས་ཏེ། དེའི་ཚད་ཇི་ཙམ་ཞེ་ན། དེའི་ཕྱིར་དགུ་དང་གསུམ་དང་སོར་བཅོ་བརྒྱད་དོ་ཞེས་བྱ་བ་སྨོས་ཏེ། ཁྲུ་ཞེས་བྱ་བར་སྦྱར་རོ། །སྲིད་དུ་ནི་ཁྲུ་དགུའོ། །ཞེང་དུ་ནི་ཁྲུ་གསུམ་དང་སོར་བཅོ་བརྒྱད་དོ། །དབྱར་གྱི་རས་ཆེན་ལས་གྱུར་པའི་ལྟུང་བྱེད་དོ།། །།སྟོན་པ་རང་གི་ཁྲུ་ལྔ་དང་གསུམ་པའི་ཆོས་གོས་སོ་ཞེས་བྱ་བ་ནི་གང་དུ་བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེའི་ལུས་ཙམ་མེད་པར་དེའི་ཚད་དམ་ལྷག་པའི་ཆོས་གོས་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨོས་ཏེ། བདེ་བར་གཤེགས་པའི་ཆོས་གོས་ཀྱི་ཚད་དམ། དེ་ལས་ལྷག་པར་བྱེད་དམ་བྱེད་དུ་བཅུག་པ་ལའོ། །ཅི་བདེ་བར་གཤེགས་པའི་ཆོས་གོས་ཀྱི་ཚད་ཐམས་ཅད་ལ་བྱེད་དམ་བྱེད་དུ་བཅུག་པ་ལ་ལྟུང་བྱེད་དུ་འགྱུར་རམ་ཞེ་ན། དེའི་ཕྱིར་དེའི་ལུས་ཙམ་མེད་པར་ཞེས་བྱ་བ་སྨོས་ཏེ། གང་ལ་བདེ་བར་གཤེགས་པའི་སྐུའི་ཚད་ཙམ་གྱི་ལུས་མེད་པ་དེས་སོ། །བདེ་བར་གཤེགས་པའི་སྐུའི་ཚད་ཀྱི་ལུས་ཡོད་པ་ལ་ནི་ལྟུང་བ་མེད་དོ། །དེའི་འོག་ཏུ་ལྷག་པ་ལ་ནི་ཅི་རིགས་པར་ཁ་ན་མ་ཐོ་བར་འགྱུར་རོ་ཞེས་བྱ་བའི་དོན་ཏོ། །གང་ལ་བདེ་བར་གཤེགས་པའི་སྐུའི་ཚད་ཙམ་གྱི་ལུས་མེད་པ་དེས་དེ་ལ་ཆོས་གོས་ཀྱི་ཚད་ལ་ སོགས་པ 
་བྱེད་དམ་བྱེད་དུ་བཅུག་པ་ལ་ལྟུང་བྱེད་དོ། །བདེ་བར་གཤེགས་པའི་ཆོས་གོས་ལས་ནི་ཆུང་ལ་རང་གི་ལུས་ལས་ནི་ཆེ་བའི་ཆོས་གོས་བྱེད་དམ་བྱེད་དུ་བཅུག་པ་ལ་ཉེས་བྱས་སོ། །གང་ལ་བདེ་བར་གཤེགས་པའི་སྐུའི་ཚད་ཙམ་མམ། དེ་ལས་ལྷག་པའི་ལུས་ཡོད་པ་དེས་རང་གི་ཁྲུ་སུམ་འགྱུར་ལ་
སོགས་པ ་བྱེད་དམ་བྱེད་དུ་བཅུག་ན་ལྟུང་བྱེད་དེ་སུམ་འགྱུར་དུ་མ་ཆོག་པ་ལ་ཉེས་བྱས་ཞེས་
བྱ་བར་འདིར་རྣམ་པར་གཞག་པར་རྟོགས་པར་བྱའོ། །འདིར་གཞུང་ནི་གཏམ་གྱི་གཞི་ལས་ཚད་དང་ལྡན་པར་བགྱིད་པ་ལ་ལྟུང་བར་འགྱུར་བ་དང༌། ཚད་དང་ལྡན་པར་མི་བགྱིད་པ་ལ་ལྟུང་བར་མི་འགྱུར་བ་འགའ་མཆིས་སམ། བཅོམ་ལྡན་འདས་ཀྱིས་བཀའ་སྩལ་པ། ཡོད་དེ། བདེ་བར་གཤེགས་པའི་ཆོས་གོས་ཀྱི་ཚད་དུ་བྱེད་ན་ལྟུང་བྱེད་དོ། །དཀྱིལ་འཁོར་གྱི་ཚད་དུ་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་བཅང་བར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་བདེ་བར་གཤེགས་པའི་ཆོས་གོས་སམ་བདེ་བར་གཤེགས་པའི་ཆོས་གོས་ལས་ལྷག་པ་བྱེ་བྲག་མ་སྨོས་པའི་ཕྱིར་རོ། །ལུས་དང་འབྲེལ་པས་སམ་གཞན་ཡང་རུང་སྟེ། བྱིན་གྱིས་བརླབས་ནས་སམ་རྣམ་པར་བརྟགས་ནས་སམ། རྣམ་པར་མ་བརྟགས་པར་བཅང་བར་མི་བྱའོ། །འདིར་གཞུང་ནི་གོས་ཀྱི་གཞི་ལས་བཙུན་པ་བདེ་བར་གཤེགས་པའི་ཆོས་གོས་ཙམ་ལས་དེ་འདིར་གསུངས་པ་ཡིན་ཏེ། དེ་ནི་ཆོ་གའི་རྗེས་སུ་འབྲང་བར་འོག་མ་ཡང་ཁོངས་སུ་བསྡུས་པར་རིག་པར་བྱའོ། །བདེ་བར་གཤེགས་པའི་ཆོས་གོས་ཀྱི་ཚད་ལས་གྱུར་པའི་ལྟུང་བྱེད་དོ། །ལྟུང་བྱེད་འབའ་ཞིག་ཏུ་གྱུར་པ་རྣམས་རྫོགས་སོ།། །།དགེ་སློང་མ་ལས་བསོད་སྙོམས་ལེན་པའི་སོ་སོར་བཤགས་པར་བྱ་བ་ལ་བྱེད་པ་པོ་ཉིད་གང་ཡིན་ཞེ་ན། དེའི་ཕྱིར་ཤེས་གཙོ་བོ་ཞེས་བྱ་བ་སྨོས་ཏེ། འདུ་ཤེས་གཙོ་ཆེར་བྱེད་པ་ཡིན་ཞེ་ན། དེའི་ཕྱིར་དགེ་སློང་མ་ཉེ་དུ་མ་ཡིན་པ་ཉིད་ལའོ་ཞེས་བྱ་བ་སྨོས་སོ། །ཅི་ཞིག་རྗེས་སུ་སྒྲུབ་ན་དེ་བྱེད་པ་པོ་ཉིད་ཡིན་ཞེ་ན། དེའི་ཕྱིར་རང་གིས་མི་འདྲི་མ་པར་བསྒྲུབས་པའི་བཅའ་བ་དང་བཟའ་བ་བདག་ཉིད་གྲོང་ན་འདུག་པས་བླངས་ཏེ་ཟོས་ནའོ་ཞེས་བྱ་བ་སྨོས་ཏེ། དགེ་སློང་མ་གྲོང་ངམ་གཞན་གང་ཡང་རུང་བ་ན་འདུག་པས་རང་གི་ལག་གིས་མི་འདྲིམ་པའི་རྣམ་པས་དགེ་སློང་བདག་ཉིད་གྲོང་ན་འདུག་པས་རང་གི་ལག་གིས་བླངས་ཏེ་བཅའ་བ་དང་བཟའ་བ་དག་ཞེས་པའི་དོན་ཏོ། །རང་གིས་ཞེས་བྱ་བ་ནི། བྱིན་ལེན་བྱེད་པ་པོ་ལ་སྨོས་སོ། །རང་གི་ལག་གིས་ཞེས་བྱ་བ་ནི་སྦྱིན་བདག་ཉེད་མ་ཡིན་པས་ཏེ། དེའི་རྗེས་སུ་འབྲངས་ནས་འདི་བྱས་པ་ཡིན་ནོ། །རྗེས་སུ་
མཐུན་པ་གཞན་ལ་ལེན་པ་ལ་ཀུན་ནས་ཆགས་པའི་དམིགས་ཀྱིས་བསལ་བ་ཞེས་བྱ་བ་རང་གི་གཟུང་བ་ལ་ཡོངས་སུ་ཤེས་པའོ། །འདིར་གཞུང་ནི་ཞུ་བ་ལས་བཙུན་བ་རེ་ཞིག་དགེ་སློང་མའི་དབྱར་ཁང་ན་མཆིས་པ་ན་དགེ་སློང་མ་གྲོང་ན་གནས་པས་མཆིས་སམ་བཅའ་བ་དང་བཟའ་བ་རྩོལ་ལ། དེས་དེ་ན་མཆིས་པ་ལས་ལེན་ཅིང་བླངས་ནས་འཚལ་བར་བགྱིད་ན་ལྟུང་བཅིར་འགྱུར། ལྟུང་བ་མེད་དོ་ཞེས་གསུངས་པ་ཡིན་ནོ། །དེ་བས་ན་འདིར་ལེན་པ་པོ་གྲོང་ན་གནས་པའི་ཉིད་རྟེན་ཏོ། །སྦྱིན་པ་མོ་ལ་ནི་ཁྱད་པར་མེད་དོ། །གཉིས་ཀ་ལ་ཡང་འདིའི་ཡན་ལག་ཉིད་ལ་འདིར་ཉེས་བྱས་སུ་རྣམ་པར་གཞག་པའོ། །གང་ཞིག་ལམ་ལ་བརྟེན་པས་གྲོང་དུ་བསོད་སྙོམས་ཀྱི་ཕྱིར་ཞུགས་པ་ནི་ཞེས་བྱ་བ་གསུངས་ན་དགེ་སློང་ལ་གྲོང་ན་གནས་པ་ཉིད་འདི་ལ་བསྟན་པའི་དོན་དུ་ཚུལ་འདི་ཞུ་བའི་གཞུང་འདི་ཉིད་ལས་ཤེས་པར་བྱའོ། །གང་ཞིག་འདི་རྫས་ཞེས་བྱ་བའི་ཚིག་འདི་ལས་རང་གིས་མི་འདྲིམ་པར་ཞེས་བྱ་བ་མདོར་བྱས་པས་བསོད་སྙོམས་སྡུད་པ་ལ་འདི་བསྟན་པ་ཡིན་གྱི་མི་མཐུན་པའི་རྣམ་པ་ཉིད་ཀྱང་འདིར་རྣམ་པར་གནས་པ་ཡིན་ནོ། །དབྱར་ཁང་ནི་གྲོང་ཉིད་མ་ཡིན་ནོ་ཞེས་བྱ་བའི་གཞུང་ནི་ཞུ་བ་ལས། ལྟུང་བ་མེད་དོ་ཞེས་སྔར་བསྟན་མ་ཐག་པ་ཡིན་ནོ། །དགེ་སློང་གི་གནས་ཀྱང་མ་ཡིན་ནོ་ཞེས་བྱ་བ་ནི་གྲོང་ཉིད་མ་ཡིན་པའོ། །འདིར་གཞུང་ནི་ཞུ་བ་ལ་ སོགས་པའི་གཞུང་ཁ་ཅིག་ལས། བཙུན་པ ་རེ་ཞིག་གནས་ཙམ་དུ་འཛིན་པ་ཡོད་དེ་དགེ་སློང་དག་དགེ་སློང་མ་ཉེ་དུ་མ་ཡིན་པའི་ཁྱིམ་གཞན་དུ་ཞུགས་པ་ལས་བཅའ་བ་དང་བཟའ་བ་བླངས་ཏེ་འཆོས་ཤིང་འཚལ་ན་ལྟུང་བར་མི་འགྱུར་བ་འགའ་མཆིས་སམ། ཡོད་དེ་དགེ་སློང་གནས་ན་འདུག་པས་དགེ་སློང་མའི་ཁྱིམ་གཞན་ན་འདུག་པ་ལས་ལེན་ནའོ་ཞེས་གསུངས་པ་ཡིན་ནོ། །དགེ་སློང་མའི་གནས་ལས་དགེ་སློང་གི་གནས་ལ་དགོས་པའི་ཁྱད་པར་འདི་ཡོད་པ་མ་ཡིན་ཏེ། དེ་བས་ན་སྔ་མ་ལས་ཀྱང་འདི་ཐོབ་པའོ། །ནམ་མཁའ་ནི་ཕྱེད་ཉིད་དོ་ཞེས་བྱ་བ་ནི་གྲོང་གི་སྟེང་གི་ནམ་མཁའ་ལ་འདུག་པ་བླངས་ཏེ་ཟ་ན་ཉེས་བྱས་སུ་འགྱུར་བ་ཞེས་བྱ་བའི་དོན་ཏོ། །འཇོག་པར་བྱེད་པ་ཉེ་བར་མི་གནས་ན་གཞག་པ་ལེན་པ་ནི་དེ་ལས་མ་ཡིན་ནོ་ཞེས་བྱ་བའི་ཚིག་ནི་འཇོག་པར་བྱེད་པས་བཟའ་བར་
བྱ་བ་གང་ཡིན་པ་འཇོག་པར་བྱེད་པ་ཉེ་བར་མི་གནས་པ་ལ་དེ་ལེན་པར་བྱེད་ཀྱང་འཇོག་པར་བྱེད་པ་དེའི་དྲུང་ནས་ཞེས་བྱ་བའི་དོན་ཏོ། །འདིར་གཞུང་ནི་དགེ་སློང་མས་གྲོང་དུ་བཞག་པར་གྱུར་པ་དགེ་སློང་གིས་ཡིད་གཅུགས་པས་བླངས་ཏེ་ཟ་བར་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །གལ་ཏེ་ཡིད་གཅུགས་པ་མེད་པས་ལེན་ན་ནི་ཁ་ན་མ་ཐོ་བ་འདིར་མི་འགྱུར་ཏེ། འོན་ཀྱང་མ་བྱིན་པར་ལེན་པར་གཏོགས་པའོ། །དེ་ལྟ་བས་ན་ཡིད་ཆེས་པའི་ཚིག་འདི་ལ་བྱེད་པའོ། །དགེ་སློང་མ་ལས་ཟས་ལེན་པའི་སོ་སོར་བཤགས་པར་བྱ་བ་སྟེ་དང་པོའོ།། །། བཤགས་པར་བྱ་བ་གཉིས་པ་ལ་བྱེད་པ་པོ་གང་ཡིན་ཞེ་ན། དེའི་ཕྱིར་དེའམ་དགེ་སློང་གཞན་དག་ལ་བཟའ་བའམ་བཏུང་བ་འམ་སྲན་ཚོད་དམ། བཅའ་བའམ་ཡང་བྱིན་ཅིག་ཅེས་བྱ་བ་ལ་ སོགས་པས་བསྐོ་ཤམ་བྱེད་པ ་ལ་ཞུགས་པའི་དགེ་སློང་མ་འདུག་པ་ནི་བྱེད་པ་པོ་ཡིན་ནོ་ཞེས་བྱ་བ་སྨོས་ཏེ། སོགས་པ ་ཞེས་བྱ་བའི་སྒྲས་ནི་ཟས་ལྷག་མ་དག་སྟོབས་པ་ཡང་བསྡུས་པའི་ཕྱིར་རོ། །བསྐོ་ཤམ་བྱེད་པ་ཞེས་བྱ་བ་འདིས་འདི་ལ་འབྲེལ་པ་ཡིན་ཏེ། དེའི་འདི་ངོ་བོ་ཉིད་བརྗོད་པ་ཡིན་ནོ། །བསྐོ་ཤམ་བྱེད་པ་ལ་ཞུགས་པའི་དགེ་སློང་མ་འདུག་པ་ལ་ནི་དེ་བས་ན་ཚིག་འདིའོ། །དེའམ་དགེ་སློང་གཞན་ལ་ཞེས་བྱ་བ་ལ། དེའམ་ཞེས་བྱ་བ་ལྟུང་བ་འབྱིན་པ་པོ་ཉིད་ལ་མངོན་པར་བརྟེན་པའི་དགེ་སློང་གཟུང་བའོ། །ཅི་དགེ་སློང་མ་དེ་ལྟ་བུར་གྱུར་པ་ཐམས་ཅད་ཀྱི་འདུག་པ་དེ་བྱེད་པ་པོ་ཡིན་ནམ་ཞེ་ན། དེའི་ཕྱིར་གལ་ཏེ་དེའི་ཚིག་གིས་སམ། དེའི་ཉེ་དུས་མགྲོན་དུ་བོས་པ་མ་ཡིན་ནའོ་ཞེས་བྱ་བ་སྨོས་ཏེ་བསྐོ་ཤམ་བྱེད་པ་ལ་ཞུགས་པའི་དགེ་སློང་མ་དེ་ལ་ཉེ་དུས་མགྲོན་དུ་བོས་པ་མ་ཡིན་ནའོ། །འདིར་གཞུང་ནི་ཞུ་བ་ཁ་ཅིག་ལས། དེའི་ཚིག་གིས་ཉེ་དུའི་གནས་ནས་ལྟུང་བ་མེད་དོ་ཞེས་གསུངས་པ་ཡིན་ནོ། །བསྐོ་ཤམ་བྱེད་པ་ལ་སྤྱིར་གཏང་བ་བསྟན་ནས་དམིགས་ཀྱིས་བསལ་བ་བསྟན་པའི་ཕྱིར་བྱུག་རིས་སྟོན་པ་དང༌། མ་བྱིན་པ་ལ་བྱིན་དུ་འཇུག་པ་མ་གཏོགས་སོ་ཞེས་བྱ་བ་སྨོས་ཏེ། རེ་ཞིག་འདིར་བྲིམས་ཤིག་ཅེས་བྱ་བ་ལ་ སོགས་པས་གྲལ་རིམས་བཞིན་དུ་མདུན་དུ་བྱུག་རིས་སྟོན་པར་བྱེད་པའོ། །མ་བྱིན་པ ་ལ་སྦྱིན་དུ་འཇུག་པ་ནི། མ་བྱིན་པ་ལ་སྦྱིན་དུ་འཇུག་པའོ། །
ཅི་ཞིག་བྱས་ན་དེ་བྱེད་པ་པོ་ཡིན་ཞེ་ན། དེའི་ཕྱིར་དེ་ལ་དགེ་སློང་གང་ཡང་རུང་བས་ལྷན་ཅིག་མི་ཟ་བས་ཀྱང་རུང་བས་སྲིང་མོ་ཁྱོད་དགེ་སློང་རྣམས་ཟན་ཟོས་ཀྱི་བར་དུ་རེ་ཞིག་སྡོད་ཅིག་ཅེས་མ་བསྒོ་བར་དགེ་སློང་གསུམ་ལ་ སོགས་པ ་མགྲོན་དུ་བོས་པས་ཟོས་ནའོ་ཞེས་བྱ་བ་སྨོས་ཏེ། སྡོད་ཅིག་ཅེས་བྱ་བ་ནི་འདི་ནི་བཟློག་པའི་དོན་ལ་མཚོན་པ་ཡིན་ཏེ། སུས་མ་བསྒོ་བར་ཞེ་ན། དེའི་ཕྱིར་དགེ་སློང་གིས་ཞེས་བྱ་བ་སྨོས་ཏེ། ཅི་ལྟུང་བ་འབྱིན་པར་བྱེད་པ་ཁོ་ནས་སམ་ཞེ་ན། མ་ཡིན་ཏེ། དེའི་ཕྱིར་གང་ཡང་རུང་བས་སོ་ཞེས་བྱ་བ་སྨོས་སོ། །སྔར་ལངས་པ་དེས་བསྐོ་བ་བྱས་ན་ཡང་དེ་ལ་བསྒོ་བ་ཉིད་ཡིན་པས་དེའི་ཕྱིར་ལྷན་ཅིག་མི་ཟ་བས་ཀྱང་རུང་བས་ཞེས་བྱ་བ་སྨོས་ཏེ། འདིར་གཞུང་ནི་དགེ་སློང་གཞན་དག་ཟོས་ཏེ་འབྱུང་ཞིང་གཞན་དག་འཇུག་པས་ཞེས་གསུངས་པ་ཡིན་ནོ། །ཐམས་ཅད་ལངས་པར་གྱུར་ཟིན་ཅིང་གཞན་དག་འཁོད་པར་གྱུར་ན་འདུག་པའི་མདུན་རོལ་དུ་ཞུགས་པ་མ་ཡིན་ཏེ། དེའི་ཕྱིར་འདིར་ཟན་གཅིག་པ་ཉིད་མི་འཐད་པའོ། །དེ་བས་ན་ཟ་བ་པོ་ཐམས་ཅད་མ་ལངས་པ་ཉིད་ལ་སུ་ཞིག་གིས་ལངས་ན་ཞེས་བྱ་བའི་དོན་ཏོ། །འདིར་ཟན་གཅིག་པའི་དབང་དུ་བྱས་ཏེ་འདི་བརྗོད་པར་རྣམ་པར་གནས་པ་ཡིན་ནོ། །དགེ་སློང་གསུམ་ལ་ སོགས་པ ་མགྲོན་དུ་བོས་ནའོ་ཞེས་བྱ་བ་ནི། དེ་ཟོས་པ་ལའོ།། ཅི་མགྲོན་དུ་བོས་པ་གང་ཡང་རུང་བ་ཟོས་པ་ལའམ་ཞེ་ན། དེའི་ཕྱིར་ཁྱིམ་དུའོ་ཞེས་བྱ་བ་སྨོས་ཏེ། གལ་ཏེ་བྲམ་ཟེ་དང་ཁྱིམ་བདག་གི་ཁྱིམ་དུ་མགྲོན་དུ་བོས་པ་དེས་སོ། །ཁྱིམ་ཉིད་དུ་ཟོས་ན་སྟེ་གཞན་དུ་མ་ཡིན་ཞེས་བྱ་བའི་དོན་ཏོ། །གང་ཞིག་དགོན་པ་དང་གཙུག་ལག་ཁང་ལ་ སོགས་པ ་སྦྱིན་བདག་ཁྱིམ་གྱི་མི་ཐམས་ཅད་འདུས་པའམ་དེས་བསྐོས་པ་ལ་ སོགས་པ ་ཉེ་བར་གནས་པས་ཟ་བས་ཏེ། དེའི་ཁྱིམ་དུ་ནི་མ་ཡིན་ཞེས་ཤེས་པར་བྱའོ། །ཁྱིམ་ཞེས་སྨོས་པས་ནི་དེས་ཁོངས་སུ་བསྡུ་བ་འགྲུབ་པའི་ཕྱིར་རོ། །འདིར་རང་གི་ཚོགས་རྣམས་ལས་དམན་པ་བདག་ཉིད་གནས་པས་མ་མོའི་ཚོགས་ཀྱི་ཆོས་སོ། །རིགས་འདི་གང་གིས་འདི་ཉེས་པར་སྤྱོད་པ་དེ་བས་ན་ཤིན་ཏུ་དམན་པར་ཁས་ལེན་པར་གྱུར་པ་འདིའི་ཟང་ཟིང་འཕྲོག་པ་ཉིད་རྟེན་དུ་གྱུར་པ་ཟང་ཟིང་གི་གཙོ་བོ་ཉིད་དུ་རྗེས་སུ་འགྲོ་བར་གྱུར་པ་གང་ཞིག་བདག་པོར་མ་གྱུར་ཀྱང་བདག་པོ་བཞིན་དུ་རང་གི་ཚོགས་ཀྱི་ཁོངས་སུ་བསྡུས་པ་མ་མོའི་
ཚོགས་ཟང་ཟིང་ལ་འཇུག་པར་གྱུར་པ་ལྷག་པར་གནས་ཏེ་ཟང་ཟིང་དེ་ལ་ཉེ་བར་ལོངས་སྤྱོད་པ་དེ་བས་ན་འདི་ནི་ཁ་ན་མ་ཐོ་བའོ། །མང་པོར་གྱུར་པ་རྣམས་ལ་དེ་ལྟར་མི་བརྟེན་པ་འདིར་ཡོངས་སུ་གྱུར་པ་ཁྱིམ་གྱི་ཟས་ལས་གཞན་པས་འདིར་ཤིན་ཏུ་དཀའ་བ་ཉིད་གྱི་ཕྱིར་ཉེ་བར་གནས་པ་ལ་ཡང་ཁྱིམ་གྱི་སྐྱེ་བོ་ལ་འདིར་ཤིན་ཏུ་རྫོགས་པར་གྱུར་པ་ཉིད་ཀྱིས་གསོལ་བ་ཉམས་པའོ། །དེ་བས་ན་འདི་རྣམས་ལ་འདིར་ཁྱད་པར་རྣམས་བརྟེན་པའོ། །ཁྱིམ་གྱི་ཟན་ལས་གཞན་ པ་གཙུག་ལག་ཁང་ལ་སོགས ་པའི་ཟན་ལ་གཅིག་གམ་གཉིས་ཟ་བར་བྱེད་ན་རྗེས་སུ་འབྲངས་པས་རྟོགས་པར་བྱའོ། །འདིར་དགེ་སློང་མ་ཐག་ཇི་སྲིད་ན་འདུག་པར་གྱུར་པ་ན་ཁ་ན་མ་ཐོ་བ་ཇི་ལྟ་བུའི་བྱེད་པ་པོ་ཡིན་ཞེ་ན། དེའི་ཕྱིར་གལ་ཏེ་ཚིག་དེ་ཉེ་བར་གདགས་སུ་རུང་བ་ན་དངོས་གཞིའོ། །གལ་ཏེ་མི་རུང་ན་ཉེས་བྱས་ཀྱིའོ་ཞེས་བྱ་བ་སྨོས་ཏེ་སྲིང་མོ་ཁྱོད་སྡོད་ཅིག་ཅེས་བྱ་བ་སྨོས་ན་གལ་ཏེ་དགེ་སློང་མ་འདི་ཉེ་བར་སྤྱོད་པ་ཐོབ་པར་འགྱུར་ཏེ། གང་དུ་སྨྲ་བར་ནུས་ན་ལྟུང་བ་དངོས་གཞིའི་བྱེད་པ་པོ་ཡིན་ནོ། །གལ་ཏེ་ཉེ་བར་མ་གདམས་ཤིང་མ་བསྒོ་ན་ཉེས་བྱས་ཀྱི་བྱེད་པ་པོ་ཡིན་ནོ་ཞེས་བྱ་བའི་དོན་ཏོ། །སྔ་མ་དག་གི་སོ་སོར་བཤགས་པར་བྱ་བ་ལ་འདིར་ཉེས་བྱས་ཀྱི་གཞུང་ནི་གང་དག་བར་མའི་ས་ལ་ཟ་བར་བྱེད་པ་རེ་རྣམས་ཀྱིས་དྲི་བར་བྱའོ། །དགེ་སློང་མ་དེ་ལ་བསྒོའམ་ཞེས་དྲི་བར་བྱ་སྟེ། མ་དྲིས་པར་ཟ་ན་ཉེས་བྱས་སུ་འགྱུར་རོ། །གང་དག་སྒོ་ཁང་ན་ཟ་བ་དེ་དག་གིས་དགེ་སློང་མ་དེ་ལ་བསྒོའམ་ཞེས་དྲི་བར་བྱ་སྟེ། མ་དྲིས་པར་ཟ་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདིར་དངོས་གཞིའི་གཞུང་ནི་དགེ་སློང་དག་ཁ་ཅིག་ནི་ཁང་ཐོག་ན་ཟ་བར་བྱེད་ལ། ཁ་ཅིག་ནི་བར་ཁང་ན་ཟ་བར་བྱེད་ལ། དེ་ལ་གལ་ཏེ་དགེ་སློང་མ་བསྐོ་ཤམ་བྱེད་ཅིང་འདུག་པར་གྱུར་ན་དགེ་སློང་དེ་རྣམས་ཀྱིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟན་ཟ་ན་སོ་སོར་བཤགས་པར་འགྱུར་རོ། །འདིར་གཞུང་དགགས། དགེ་སློང་དག་ཁ་ཅིག་ནི་འོག་ཁང་ན་ཟ་བར་བྱེད་ལ། ཁ་ཅིག་ནི་སྒོ་ཁང་ན་ཟ་བར་བྱེད་ལ། དེ་ན་གལ་ཏེ་དགེ་སློང་མ་བསྐོ་ཤམ་བྱེད་ཅིང་འདུག་པར་གྱུར་ན་དགེ་སློང་དེ་དག་གིས་དགེ་སློང་མ་དེ་ལ་བསྒོ་བར་བྱའོ། །མ་བསྒོ་བར་ཟ་ན་སོ་སོར་བཤགས་པར་འགྱུར་རོ་ཞེས་གསུངས་པ་ཡིན་
ནོ། །གང་ཞིག་འདིར་དྲི་བར་བྱ་བ་ཉིད་ཀྱི་ཚིག་འདུ་ཤེས་པས་བསྒོ་བར་བྱེད་པ་ཉིད་དུ་རྣམ་པར་གནས་པ་དེ་བས་ན་འདི་འདྲི་བར་བྱ་བ་ཉིད་ཅེས་བྱ་བ་དེ་ལ་འདི་སྟོན་པར་བྱེད་པ་ཡིན་ནོ། །དེ་ཉིད་བརྗོད་པར་བྱ་སྟེ་འདི་ལ་བསྒོ་བ་ཉིད་དུ་རྣམ་པར་གནས་པ་ནི་ཤེས་གཙོའོ། །དེའི་ཕྱིར་དྲི་བ་ལ་བརྩོན་པར་བྱའོ་ཞེས་བྱ་བ་སྨོས་ཏེ། ཤེས་གཙོའོ་ཞེས་བྱ་བ་ནི་གང་གི་ཕྱིར་འདུ་ཤེས་གཙོ་ཆེར་བྱེད་པ་པོ་ཉིད་ཡིན་པའི་ཕྱིར་བསླབ་པའི་གཞི་ལ་བསྒོ་བ་རྣམ་པར་གཞག་པ་ལའོ། །འདི་ལ་རྒན་པ་མི་འཇུག་ན་གསར་བུས་འཇུག་པར་བྱའོ་ཞེས་བྱ་བ་ནི་དྲི་བ་འདི་ལ་རྒན་པས་འཇུག་པར་བྱའོ། །དེ་མི་འཇུག་ན་གསར་བུས་འཇུག་པར་བྱའོ། །གྲལ་རིམས་སུ་མ་ཕེབས་པར་འདྲིམ་དུ་འཇུག་པ་མ་བཟློག་པར་ཟ་བའི་སོ་སོར་བཤགས་པར་བྱ་བ་སྟེ་གཉིས་པའོ།། །།དད་པ་ཅན་གལ་ཏེ་བྱིན་ན་དེ་ཕོངས་པར་འགྱུར་བ་ལྟ་ན་ཁྱིམ་གྱི་བསླབ་པའི་སྡོམ་པ་སྦྱིན་པར་བྱའོ་ཞེས་བྱ་བ་ལ། དད་པ་ཅན་ཞེས་བྱ་བ་ནི་ཁྱིམ་བདག་སྟེ། དེ་ལ་ཁྱིམ་གྱི་བསླབ་པའི་སྡོམ་པ་སྦྱིན་པར་བྱའོ་ཞེས་བྱ་བར་སྦྱར་རོ། །གལ་ཏེ་སྦྱིན་ན་ཕོངས་པར་གྱུར་པ་ལྟ་ན་ཞེས་བྱ་བ་ནི་གལ་ཏེ་སྦྱིན་པ་བྱིན་ན་དད་པ་ཅན་དེ་ཡོ་བྱད་རྣམས་ཀྱིས་ཕོངས་པར་འགྱུར་བ་ལྟ་ན་དེ་ན་སྡོམ་པ་སྦྱིན་པར་བྱ་ཞེས་བྱ་བའི་དོན་ཏོ། །འདིར་ཕལ་ཆེར་ཁས་བླངས་ཏེ་སྐྱེ་བའི་དབང་གིས་བསླབ་པ་རྣམས་བརྗོད། འདིར་ཕལ་ཆེར་འཕགས་པ་ལ་སྦྱིན་པ་ལ་དད་པ་འཇུག་པར་བྱེད་པར་འགྱུར་བ་ཡིན་ཏེ། དེ་བས་ན་སོ་སོའི་སྐྱེ་བོ་ལ་ཡང་ཆོ་ག་འདི་ཡིན་ནོ། །དད་པ་ཅན་བཟང་པོ་དེ་དགེ་བའི་བསམ་པ་དང་ལྡན་པ་དེ་ལ་ཅུང་ཟད་མི་སྟེར་བ་དང་མི་འདིར་བར་ཡོངས་སུ་འདོར་མི་ཕོད་པ་ཡོད་པ་ཡིན་ཏེ། སངས་རྒྱས་ལ་ཞེས་བྱ་བ་ལ་ སོགས་པས་དད་པ ་ཙམ་གྱིས་འབུལ་བ་ཁས་བླངས་པས་ཤིན་ཏུ་བདེ་བླག་ཏུ་ཡང་སོ་སོའི་སྐྱེ་བོ་ལ་བསྲུང་བར་བྱ་བ་ཉིད་དུ་རྣམ་པར་ངེས་ཏེ་འདིར་དད་པ་ཙམ་ཞེས་སྨོས་པས་སློབ་བཞིན་པའི་དད་པ་ལ་ནི་མ་ཡིན་ནོ། །ཁྱིམ་གྱི་ཞེས་བྱ་བ་ལ་ཁྱིམ་ལ་ལྷག་པར་གནས་པའི་བསླབ་པ་ནི་ཁྱིམ་གྱི་བསླབ་པའོ། །དེའི་སྡོམ་པ་ནི་སྡོམ་པར་གྱུར་ཅིང་ངེས་པ་ཡིན་པས་དགེ་སློང་རྣམས་ལ་སྡོམ་པ་དེ་སྦྱིན་པར་བྱའོ། །ཇི་ལྟར་འཇུག་ཅིང་སྦྱིན་པར་བྱ་ཞེ་ན། དེའི་ཕྱིར་གསོལ་བས་སོ་ཞེས་བྱ་བ་སྨོས་ཏེ། གསོལ་བ་འབའ་ཞིག་གི་ལས་ཀྱིས་སོ་ཞེས་བྱ་བའི་དོན་ཏོ། །ཇི་ལྟར་བག་ཡངས་སུ་བྱ་
ཞེ་ན། དེའི་ཕྱིར་བག་ཡངས་སུ་བྱ་བ་ཡང་ངོ་ཞེས་བྱ་བ་སྨོས་ཏེ། འདི་ཡང་གསོལ་བ་འབའ་ཞིག་གི་ལས་ཀྱིས་བྱ་བའོ་ཞེས་བྱ་བའི་དོན་ཏོ། །བྱིན་པ་དེའི་སེམས་རྟོགས་ནས་ཁྱིམ་དུ་འགྲོ་བ་དང༌། སྟན་ལ་འདུག་པ་དང་ཆོས་བསྟན་པ་དག་བྱའོ་ཞེས་བྱ་བ་ལ་བྱིན་བ་དེའི་ཞེས་བྱ་བ་ནི་གང་ལ་ཁྱིམ་གྱི་བསླབ་པའི་སྡོམ་པ་དེ་བྱིན་པ་དེ་ནི་བྱིན་པ་དེ་ཞེས་བྱ་བ་སྟེ་དེའི་སེམས་རྟོགས་པས་སོ། །ལྷུང་བཟེད་སྟོང་པས་འཇུག་པར་མི་བྱའོ་ཞེས་བྱ་བ་ནི། བསླབ་པའི་སྡོམ་པ་བྱིན་པའི་ཁྱིམ་དུ་འཇུག་པར་མི་བྱའོ། །དེའི་བྱིས་པ་སློང་བ་དག་ལ་བསོད་སྙོམ་ལས་སྣུམ་ཁུར་སྦྱིན་པར་བྱ་ཞིང་རིལ་གྱིས་ནི་སྦྱིན་པར་མི་བྱའོ་ཞེས་བྱ་བ་ནི། རིལ་པོ་དང་རིལ་པོ་མ་ཡིན་པ་ཞེས་བྱ་བའི་ཁྱད་པར་མ་བརྗོད་པས་ཐལ་ཆེས་པ་ལ་རིལ་པོ་མ་ཡིན་པ་ཞེས་བྱ་བ་སྨོས་སོ། །གང་དུ་ཁྱིམ་གྱི་བསླབ་པའི་སྡོམ་པ་འདི་ལ་བག་ཡངས་སུ་བྱའམ་ཞེ་ན། དེའི་ཕྱིར་འདོད་ན་བག་ཡངས་སུ་བྱའོ་ཞེས་བྱ་བ་སྨོས་ཏེ། གལ་ཏེ་དད་པ་ཅན་དེ་བག་ཡངས་སུ་བྱ་བ་དེ་འདོད་པར་གྱུར་ན་དེའི་ཚེ་དེ་ལ་ཁྱིམ་གྱི་བསླབ་པའི་སྡོམ་པ་དེ་བག་ཡངས་སུ་བྱ་ཞིང་གཞིག་པར་བྱའོ། །གང་ལ་བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་འབྱུང་བར་འགྱུར་ཞེ་ན། དེའི་ཕྱིར་དེའི་སྦྱིན་པའི་མདུན་དུ་མགྲོན་དུ་མ་བོས་པས། བསླབ་པའི་སྡོམ་པ་སྦྱིན་པའི་ཁྱིམ་ནས་བཅའ་བ་དང་བཟའ་བ་དག་བླངས་ཤིང་ཟོས་པ་ལས་ཏེ། ག་གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་གཏོགས་སོ་ཞེས་བྱ་བ་སྨོས་ཏེ། ཇི་སྲིད་དུ་གཅིག་ཏུ་སྦྱིན་པ་ཉིད་དེ་སྲིང་ངུ་འདིར་ཁྱིམ་གཅིག་པ་ཉིད་དོ། །འདིར་ཁྱིམ་ནི་མཚོན་ པ་ཙམ་ཡིན་ཏེ། ཡོངས་སུ་གཟུང་བ་མེད་པར་དགེ་སློང་ལ་སོགས ་པས་སློབ་མ་ལ་ སོགས་པ ་གསོ་བར་བྱེད་པ་ལ་ཆོ་ག་འདི་ཡིན་ནོ། །བསླབ་པའི་སྡོམ་པ་སྦྱིན་པའི་རིགས་པས་གཟུང་སྟེ། བཅའ་བར་བྱ་བ་དག་ཟ་བར་བྱེད་ན་ཞེས་བྱ་བ་དེ་ལྟར་འདི་འབྲེལ་པའོ། །ཅི་འདི་ཐམས་ཅད་ལ་བཤགས་པར་བྱའོ་ཞེས་བྱ་བ་འདི་ལ་སྦྱིན་པའི་སྔ་རོལ་དུ་སྤྱན་མ་དྲངས་པ་ཞེས་བྱ་བའི་ཐ་ཚིག་གོ །བསླབ་པའི་སྦྱིན་པ་ལས་སྔ་རོལ་དུ་སྤྱན་དྲངས་པ་ལ་བསླབ་པ་བྱིན་ནས་ཟ་བར་བྱེད་པ་ལ་ལྟུང་བ་མེད་དོ། །ཅི་བཅའ་བར་བྱ་བ་ཐམས་ཅད་ཟ་བར་བྱེད་པ་ཡིན་ནམ་ཞེ་ན། དེའི་ཕྱིར་ག་གོན་དང་ལ་ཕུག་དང་ལྡམ་ལྡུམ་མོད་པ་དག་ནི་མ་
གཏོགས་སོ་ཞེས་བྱ་བ་སྨོས་ཏེ། དེ་རྣམས་ཟ་བར་བྱེད་པ་ལ་ལྟུང་བ་མེད་དོ། །འདི་ནི་ཧ་ཅང་ཡང་འདོད་པ་ཆེ་བ་ཡིན་ཏེ་གང་ཞིག་ཁྱད་པར་ཅན་གྱི་བསླབ་པ་ཉམས་པར་བྱས་ནས་འཇུག་པ་ཞེས་བྱ་བ་སྨོས་པ་ནི་ལྟུང་བ་རྣམ་པར་གཞག་པའོ། །བསླབ་པ་དྲལ་ཏེ་ཁྱིམ་དུ་འཇུག་པའི་སོ་སོར་བཤགས་པར་བྱ་བ་སྟེ་གསུམ་པའོ།། །།ནགས་ཉུལ་བའི་དགེ་སློང་བསྐོ་བར་བྱའོ་ཞེས་བྱ་བ་ནི་འདིར་གཞན་ལ་ཡིད་ཆེས་པར་བྱ་བ་མ་ཡིན་ཏེ། དེ་བས་ན་དགེ་སློང་ལ་འདི་ལྟར་བརྟེན་པའོ། །དེ་གང་གི་ཕྱིར་བསྐོ་བ་དེའི་ལས་བསྟན་པའི་ཕྱིར་དེས་དཔག་ཚད་ཕྱེད་ཁོ་ར་ཁོར་ཡུག་ཏུ་བརྟག་པར་བྱའོ། །འཇིགས་པ་དང་བཅས་པ་ཉིད་ཡིན་ན་དུད་བརྔ་བཏུལ་བར་བྱའོ། །བ་དན་སྔོན་པོ་བསྒྲེང་བར་བྱའོ། །འདབ་མའི་ཆང་བུ་ལམ་ཀར་གཞག་པར་བྱའོ། །གཞན་དུ་ན་དཀར་པོ་དག་གོ །འདོད་པ་ཉིད་ཡིན་ན་ནི་དེ་ལ་ཁྱེའུ་སུས་དང་གྲོགས་དག་ཀྱང་སྦྱིན་པར་བྱའོ་ཞེས་བྱ་བ་ནི་ནགས་ཉུལ་བ་དོན་དུ་གཉེར་བ་ཡོད་པར་གྱུར་ན་སྦྱིན་པར་བྱའོ། །ཤེས་གཙོའོ་ཞེས་བྱ་བ་ནི་འདུ་ཤེས་གཙོ་ཆར་བྱེད་པ་པོ་ཉིད་དོ། །གང་ལ་འདུ་ཤེས་པ་ཡིན་ཞེ་ན། དེའི་ཕྱིར་ནགས་མ་ཉུལ་བ་ཉིད་ལའོ་ཞེས་བྱ་བ་སྨོས་ཏེ། རེ་ཞིག་བདག་གི་དོན་ནི་གྲུབ་ཟིན་གྱི། དགེ་འདུན་གྱི་དང་སྦྱིན་པ་པོའི་གནོད་པ་བསྲུང་བ་འདིས་ཁོ་བོ་ལ་ཅི་ཞིག་བྱ་ཞེས་བྱ་བ་བདག་ཉིད་བཀང་བ་ཙམ་གྱིས་ཆོག་པར་འཛིན་ཅིང་འཇིགས་པ་དང་བཅས་པའི་གནས་སུ་ཟས་བླངས་ཏེ་ཟ་བ་ལ་ཁ་ན་མ་ཐོ་བ་འདིར་འགྱུར་རོ། །དེ་ལྟར་ཡང་གཞུང་ནི་དགེ་འདུན་གྱི་དགོན་པའི་གནས་དོགས་པ་དང་བཅས་པར་གྲགས་པ། འཇིགས་པ་དང་བཅས་པར་གྲགས་པ། འཇིགས་པ་ཐ་དད་པས་འཇིགས་སུ་རུང་བ་དང་བཅས་པར་གྲགས་པ་ཞིག་ཏུ་ཞེས་གསུངས་པ་ཡིན་ནོ། །དེ་བཞིན་དུ་བསྲུང་བ་བསྒྲུབ་པ་དང༌། འཇིགས་པའི་གནས་གཞན་ལ་འཇུག་པར་གྱུར་པ་ཉིད་ལ་ན་སྨད་པར་བརྗོད་པ་དེ་བས་ན་འཇིགས་པ་དང་བྲལ་བ་ཉིད་ཀྱིས་མ་ལུས་པར་ཤེས་པ་ཉིད་ལས། འདིར་ནགས་ལ་ཞེས་བྱ་བ་འདིའི་དོན་རྟོགས་པར་བྱའོ། །དགོན་པར་གྱུར་པ་ཉིད་ཙམ་ལས་དགོངས་ཏེ་གསུངས་པ་ཡིན་གྱི་ཤིང་ལྗོན་པའི་ཚོགས་ཐིབས་པོ་འབའ་ཞིག་ལ་མི་བྱའོ། །འཇུག་པ་གང་ལ་འདི་བྱེད་པ་པོ་ཡིན་ཞེ་ན། ཀུན་དགའ་ར་བའི་ཕྱི་རོལ་གྱི་དགོན་པར་བཅའ་བ་དང་བཟའ་བ་བླངས་ཏེ་ཟོས་ནའོ་ཞེས་བྱ་བ་སྨོས་ཏེ། དགོན་པ་
ནས་རྒྱང་གྲགས་ཀྱི་མཐའ་གང་ཡིན་པ་དེ་ནི་གྲོང་དང་ཀུན་དགའ་ར་བ་ལ་ སོགས་པ ་དགེ་སློང་རྣམས་ཀྱི་སྤྱི་ལ་པོའི་གནས་སོ། །དེའི་ཕྱི་རོལ་དུ་བཅའ་བར་བྱ་བ་དང་བཟའ་བར་བྱ་བ་དག་སོ་སོར་བླངས་ཏེ། གང་ཡང་རུང་བར་དེ་དག་ཟོས་ན་ཞེས་བྱ་བའི་དོན་ཏོ། །བསྲུང་བ་བསྒྲུབས་ན་ཕྱེད་ཉིད་དོ་ཞེས་བྱ་བ་ནི། འཇིགས་པ་མེད་པ་ཉིད་དུ་བྱུལ་བས་དགོན་པའི་བསྲུང་བ་བསྒྲུབས་པར་གྱུར་པ་དེའི་ཚེ་བཅའ་བ་དང༌། བཟའ་བ་དག་ཟོས་ན་ཕྱེད་ཉིད་དེ་མ་ཆོག་པས་ཉེས་བྱས་བྱེད་པ་ཉིད་ཡིན་ནོ་ཞེས་བྱ་བའི་དོན་ཏོ། །འདིར་མདོ་སྔ་མ་དང་འདི་གཉིས་ཀྱི་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གི་ཀུན་དགའ་ར་བའི་ཕྱི་རོལ་དུ་རང་གི་ལག་པས་བཅའ་བ་དང་བཟའ་བ་བླངས་ཏེ་འཚལ་བར་བགྱིད་ཅིང༌། ཆོམ་རྐུན་པ་དག་ཀྱང་སླར་བཟློག་པར་བགྱིད། སྦྱིན་པ་པོ་དང་སྦྱིན་བདག་ཀྱང་བདེ་བར་ཀུན་དགའ་ར་བར་འཇུག་པར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་བྱ་བ་གསུངས་པ་ནི་མདོ་སྔ་མའི་གཞུང་ཡིན་ནོ། །བཤུལ་གྱི་ཕྱེད་དུ་མཆིས་ཏེ་འཚལ་ན་ལྟུང་བ་ཅིར་འགྱུར། ཉེས་བྱས་སོ་ཞེས་བྱ་བ་གསུངས་པ་ཡིན་ནོ། །འཇིགས་པ་དང་བཅས་པའི་གནས་ལས་གཞན་དུ་གྱུར་པ་ཉིད་དུ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲ་ནི་ཟ་བ་ལ་ཡང་ཕྱེད་ཉིད་དོ་ཞེས་བྱ་བའི་རྗེས་སུ་བསྙགས་པའི་ཕྱིར་སྨོས་སོ། །སོ་སོར་བཤགས་པར་བྱ་བ་གསུམ་པོ་རྣམས་ལ་ཡང་རང་གིས་ཤེས་པ་མ་སྨོས་པས་སྤྲིང་ཡིག་ལ་ སོགས་པ ་དང་མངགས་པས་བླངས་པ་ལ་ཡང་ཁ་ན་མ་ཐོ་བ་འདྲ་བར་རིག་པར་བྱའོ། །ནགས་བརྟག་པ་ལས་གྱུར་པའི་སོ་སོར་བཤགས་པར་བྱ་བ་སྟེ་བཞི་པའོ། །སོ་སོར་བཤགས་པ་རྣམས་རྫོགས་སོ།། །།ཤམ་ཐབས་ཅི་ནས་ཀྱང་ཟླུམ་པོར་འཇུག་པར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་ལ། འདུག་པ་ཞེས་བྱ་བ་ནི་མཉམ་པར་འདུག་པའོ། །ཧ་ཅུང་རྩེངས་པ་མ་ཡིན་པར་ཡང་ངོ༌། །ཧ་ཅང་འཇོལ་བ་མ་ཡིན་པར་རོ་ཞེས་བྱ་བ་ནི་ཟླུམ་བོར་ཞེས་བྱ་བ་འདི་ལ་མ་བསམས་པར་གྱུར་པ་འདི་མཆོག་ཏུ་གྱུར་པ་ཞེས་བྱ་བ་ལ་ སོགས་པ ་གཞན་དང་འབྲེལ་པ་ཞེས་བྱ་བའི་དོན་འདི་ཤེས་པར་བྱ་བའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །གྲྭ་གླང་པོ་ཆེའི་སྣ་ལྟར་ནར་བ་མ་ཡིན་བར་རོ་ཞེས་བྱ་བ་ལ། གྲྭ་ཞེས་
བྱ་བ་ནི་ཕྱོགས་གཅིག་སྟེ་འོག་མ་ལ་ཡང་འདི་དང་འབྲེལ་བར་རིག་པར་བྱའོ། །གླང་པོ་ཆེའི་སྣ་ལྟར་ཞེས་བྱ་བ་འདི་ལ་འདིར་ཁ་ཚར་དང་ཕུན་ཚར་གྱི་མཐའ་མ་བཅད་པའི་གྲྭ་དག་ལ་ཤིན་ཏུ་འབྱུང་བའོ། །གོང་དུ་མ་ལྟེབས་པར་རོ་ཞེས་བྱ་བ་ནི་ལྟེ་བའི་གོང་རོལ་དུ་ལྟེབས་ཤིང་གནས་པའོ། །སྤྲུལ་མགོའི་གདེངས་ཀ་ལྟར་ཕྱིར་བྱུང་བ་མ་ཡིན་པར་རོ་ཞེས་བྱ་བའི་རྣམ་པ་འདི་ནི་མདུན་གྱི་ནང་ན་འབྲེལ་པའི་རིམ་པ་ལ་གོང་དུ་མ་ལྟེབས་པར་རོ་ཞེས་བྱ་བའི་རྣམ་པ་འདི་དག་རིག་པར་བྱའོ། །ཕུར་མ་ལྟར་འདུག་པ་མ་ཡིན་པར་རོ་ཞེས་བྱ་བ་ནི། འདི་ནི་སྟེང་གི་ཁ་ལོགས་ན་གནས་པའི་རྣམ་པ་ཡིན་གྱི། གློ་ནས་ཕྱི་རོལ་གྱི་རིམ་པ་དང་འབྲེལ་པ་ནི་མ་ཡིན་པའོ། །ཆོས་གོས་ཅི་ནས་ཀྱང་དང་པོ་གསུམ་ལྟར་འགྱུར་བ་དེ་ལྟར་བགོ་བར་བྱའོ་ཞེས་བྱ་བ་ལ། ཆོས་གོས་ཞེས་བྱ་བ་ནི་བླ་གོས་དང་སྣམ་སྦྱར་རོ། །ཤམ་ཐབས་བྱིན་གྱིས་བརླབས་པ་ལ་ སོགས་པ ་དག་ལ་ཡང་རྣམ་པ་འདི་དག་རིག་པར་བྱའོ། །དང་པོ་གསུམ་ཞེས་བྱ་བ་ནི་ཟླུམ་པོར་འདུག་པ་དང་ཧ་ཅང་རྩེངས་པ་མ་ཡིན་པ་དང༌། ཧ་ཅང་འཇོལ་བ་མ་ཡིན་པ་ཞེས་བྱ་བ་དེ་དག་གོ །ཤིན་ཏུ་བསྡམས་ཤིང་ཁྱིམ་གཞན་དུ་འགྲོ་བར་བྱའོ་ཞེས་བྱ་བ་ནི་རྣམ་པར་རབ་ཏུ་བརྟག་པ་ལ་ངེས་པར་སྦྱར་བ་སྟེ། ལེགས་པར་བགོས་ཤིང་ངོ༌། །སྐྲ་བསྐྱུང་ཞིང་ངོ༌། །མིག་གཡེང་བར་མི་བྱ་ཞིང་ངོ༌། །གཉའ་ཞིང་གང་ཙམ་དུ་བལྟ་ཞིང་ངོ་ཞེས་བྱ་བ་ནི་མིག་གི་དབང་པོ་གཡེང་བར་མི་བྱ་ཞེས་བྱ་བའི་དོན་ཏོ། །དེ་ལྟར་ཡོད་པར་འགྱུར་བ་མ་ངེས་པས་ཐམས་ཅད་དུ་བལྟ་བར་བྱ་བའམ་སྙམ་པའི་ཐལ་བ་སྤངས་པའི་ཕྱིར་གཉའ་ཞིང་གང་ཙམ་དུ་བལྟ་ཞིང་ངོ༌། །མགོ་མི་གཡོགས་པའི་རྣམ་པས་སོ། །མི་བརྫེ་བར་རོ་ཞེས་བྱ་བ་སྟེ། རྣམ་པས་སོ་ཞེས་བྱ་བ་ནས་བརྫེས་ཏེ་འགྲོ་བར་མི་བྱ་ཞེས་བྱ་བའི་དོན་དུ་སྦྱར་བར་བྱའོ། །དེ་ལྟ་བས་ན་ཐ་མ་ལ་བར་གནས་པ་ཆར་ པ་ལ་སོགས ་པའི་གནོད་པ་བྱུང་ཡང་ཤམ་ཐབས་དང་ཆོས་གོས་བརྫེས་ཏེ་འགྲོ་བར་མི་བྱ་སྟེ། སྲོག་གི་བར་ཆད་ནི་མ་གཏོགས་སོ་ཞེས་བྱ་བར་རྟོགས་པར་བྱའོ། །མ་ཉམ་པའི་གནས་སྐབས་སུ་ཤིན་ཏུ་མཆོག་མ་ཡིན་ནོ་ཞེས་བྱ་བ་དེ་ཉིད་ཀྱིས་གྲུབ་པའི་ཕྱིར་མི་གཟར་བར་རོ་ཞེས་བྱ་བ་སྨོས་ཏེ། སོ་སོར་གཟར་ཏེ་སྟེང་དུ་བགོས་ཏེ་གཟར་བ་ནི་ཆོས་གོས་ཀྱི་དངོས་པོའོ། །དགེ་སློང་དག་ལ་ནི་ཕྲག་པ་གཡོན་པར་
གཟར་བ་ཉིད་ཡིན་ལ། གང་ཞིག་དེ་རྣམས་ལ་ངོས་གཉིས་ཀར་སོར་བཅུ་གཉིས་ཀྱི་རྣམ་པ་ཉིད་ཀྱིས་མི་གཟར་བའོ། །གཉའ་གོང་དུ་མི་བསྣོལ་བར་རོ་ཞེས་བྱ་བ་ནི་དལ་བ་འམ་ཤིན་ཏུ་མྱུར་བར་ལག་ པ་བརྐྱང་ཞིང་གཉའ་བ་ལ་སོགས ་པར་དཔུང་པའམ་ལག་ངང་གཞག་པས། གང་ཞིག་ཀུན་ནས་འདུག་པས་ལག་པ་ཕན་ཚུན་བསྣོལ་ཞིང་དེ་ལྟར་བྱས་ནས་ནི་མ་ཡིན་ནོ། །ལྟག་པར་མི་བསྣོལ་བར་རོ་ཞེས་བྱ་བ་ནི་ལྟག་པའི་ཕྱོགས་སུ་ལག་པ་ཕན་ཚུན་ནས་སྤྲད་དེ་སོར་མོ་བསྣོལ་བ་ནི་ལྟག་པར་བསྣོལ་བ་ཞེས་བྱ་སྟེ། དེ་ལྟར་མི་བསྣོལ་བར་རོ། །མི་བརྐྱང་བར་ངོ་ཞེས་བྱ་བ་ནི་སྒྱིད་པ་གཉིས་ཀས་སམ། གཉིས་ཀས་མ་ཡིན་པས་བརྐྱང་བསྐུམ་བྱེད་ཅིང་འགྲོ་བར་མི་བྱའོ། །མི་མཆོང་བར་རོ་ཞེས་བྱ་བ་ནི་མཆོང་ཞིང་མཆོང་ཞིང་འགྲོ་བར་མི་བྱའོ། །ཙོག་པུས་མ་ཡིན་པར་རོ་ཞེས་བྱ་བ་ནི་ཙོག་པུས་འགྲོ་བར་མི་བྱའོ། །བྲང་བས་མ་ཡིན་པར་རོ་ཞེས་བྱ་བ་ནི་བྲང་བས་འདིས་བྱས་པ་ཞེས་བྱ་བར་སྦྱར་ཏེ། བྲང་བས་བྱས་པ་ཞེས་བྱ་བའི་དོན་ཏོ། །དཀུར་མི་བརྟེན་པར་རོ་ཞེས་བྱ་བ་ནི་ལག་པ་གཉིས་རྐེད་པའི་ཕྱོགས་སུ་བརྟེན་ཏེ་གྲུ་མོའི་ཕྱོགས་སུ་སྨྱུང་སྨྱུང་པོར་བྱས་ཏེ་འགྲོ་བར་མི་བྱའོ། །ལུས་མི་བསྒྱུར་བར་རོ་ཞེས་བྱ་བ་ནི་གང་དུ་འགྲོ་བ་དེར་ལུས་བསྒྱུར་ཞིང་འགྲོ་བ་ནི་ལུས་བསྒྱུར་ཞིང་འགྲོ་བ་ཞེས་བྱ་སྟེ་དེ་ནི་བྱ་བའི་བྱེ་བྲག་ཡིན་པས་དེ་ལ་འབྲེལ་པ་དེ་འདིས་ནི་འོག་མ་དག་ཀྱང་བཤད་པའོ། །ལག་པོ་མི་ཀྱོག་པར་རོ། །མགོ་མི་སྒྱུར་བར་རོ། །ཕྲག་པ་མི་སྤྲད་པར་རོ་ཞེས་བྱ་བ་ནི་ཕྲག་པ་གཉིས་སྤྲད་པས་མ་ཡིན་ནོ། །ལག་པ་མི་སྒྲེལ་བར་རོ་ཞེས་བྱ་བ་ནི་ལག་པ་སྦྲེལ་བ་བཀག་པ་མ་སྦྲེལ་བའི་རྣམ་པས་གང་ཞིག་སྦྲེལ་བ་ཞེས་བྱ་བར་རྟོགས་པའོ། །ཁྱིམ་གཞན་དུ་འགྲོ་བར་བྱའོ་ཞེས་བྱ་བ་ནི་ལེགས་པར་བགོས་ཤིང་ཞེས་བྱ་བ་ལ་ སོགས་པ ་འདིའི་མཐར་ཐུག་པར་སྦྱར་བར་བྱའོ། །དེར་མ་བསྒོ་བར་སྟན་ལ་འདུག་པར་མི་བྱའོ་ཞེས་བྱ་བ་ལ་དེར་ཞེས་བྱ་བ་ནི་ཁྱིམ་གྱི་ནང་དུའོ། །སྟན་ལ་མ་བརྟགས་པར་མི་བྱའོ་ཞེས་བྱ་བ་ནི་འདུག་པར་མི་བྱའོ། །ལུས་ཐམས་ཅད་ཀྱི་ལྗིད་ཀྱིས་མི་དབབ་པར་རོ་ཞེས་བྱ་བ་ནི་ཁྱིམ་གཞན་དེ་སྟན་ལ་ཟོན་ཡོད་པར་དལ་བུས་ལུས་ཕབ་སྟེ་འདུག་པར་བྱའི། གྱ་ཚོམ་དུ་ལུས་ཐམས་ཅད་ཀྱི་ལྗིད་ཀྱིས་ཕབ་སྟེ་
ཁྲིག་ཅེས་བྱ་བར་འདུག་པར་མི་བྱ་སྟེ། གང་གི་ཕྱིར་དལ་བུ་དལ་བུས་སྟན་ལ་འདུག་པར་བྱའོ་ཞེས་བྱ་བའི་དོན་ཏོ། །རྐང་བ་མི་བསྣོལ་བར་རོ། །བརླ་མི་བསྣོལ་བར་རོ། །ལོང་བུའི་སྟེང་དུ་ལོང་བུ་མི་གཞག་པར་རོ་ཞེས་བྱ་བ་ལ། མི་བསྣོལ་བར་རོ་ཞེས་བྱ་བ་འདི་གཉིས་ཀ་ལ་སྦྱར་བར་བྱའོ། །རྐང་པ་མི་དགུག་པར་རོ། །རྐང་པ་མི་གདང་བར་རོ། །མདོམས་མི་སྣང་བར་རོ་ཞེས་བྱ་བ་འདིས་ནི་བརླ་གཉིས་སམ་བྱིན་པ་གཉིས་སམ་རྐང་པ་གཉིས་སམ་ཡང་ན་ཐམས་ཅད་ཀྱང་རུང་སྟེ། ཐད་ཀར་གདངས་ཏེ་འདུག་པར་མི་བྱ་བ་བསྟན་ཏོ། །ལག་པ་འགྲམ་པ་ལ་བརྟེན་ཏེ་མི་བྱའོ་ཞེས་བྱ་བ་ནི་དགེ་སློང་མའི་རྣམ་པར་འབྱེད་པ་ལས་རྣམ་པ་འདི་ལ་རྣམ་འབྱེད་དུ་གྱུར་པ་དང་མདོར་གྱུར་པའི་གཞུང་མཐོང་བར་ཡིན་ནོ། །སྟན་ཐབས་བསྐུར་བར་མི་བྱའོ་ཞེས་བྱ་བ་ནི་སྟན་གང་ལ་འདུག་འདུག་པ་དེ་རྒྱབ་ཀྱིས་ཁུར་ཞིང་འགྲོ་བར་མི་བྱའོ་ཞེས་བྱ་བའི་དོན་དེ་འདི་ཡང་དགེ་སློང་མའི་རྣམ་པར་འབྱེད་པ་ལས་སོ། །ཐམས་ཅད་དུ་ལེགས་པར་ཟས་བླང་བར་བྱའོ་ཞེས་བྱ་བ་ནི་གྲོང་ཁྱེར་འབའ་ཞིག་ཏུ་མ་ཟད་ཀྱི་འོན་ཀྱང་འདི་ནི་གཞན་འོག་མ་རྣམས་ཐམས་ཅད་ལ་སློབ་པ་རྣམས་ཀྱི་དབང་དུ་བྱས་པ་ཡིན་ནོ། །བླང་བར་བྱའོ་ཞེས་བྱ་བ་ནི་གཞན་གྱི་དོན་ལ་ཡང་བསླབ་པ་ནི་འདི་ཡིན་ནོ། །དེ་ལྟ་བས་ན་གཞན་གྱི་དོན་ཅན་གྱི་ཚིག་གིས་བསྟན་པའོ། །མུ་དང་ཁ་ད་ཆད་དུ་མ་ཡིན་པར་ངོ་ཞེས་བྱ་བ་ལ་མུ་ཞེས་བྱ་བའི་སྒྲ་ནི་ཁ་ལོགས་ཀྱི་མུལ་བྱ་སྟེ། ཅི་ནས་ཀྱང་མུ་དང་ཁ་ད་ཆད་དུ་འགྱུར་བ་དེ་ལྟར་བླང་བར་མི་བྱ་སྟེ་འདི་ནི་འཇུག་པའི་ལམ་ཞེས་བྱ་བའི་འཇུག་པ་འདིས་སོ། །ཇི་ལྟར་དེ་དང་མཉམ་པ་གཞན་འགྱུར་བ་དེ་ལྟར་བླང་བར་མི་བྱ་ཞེས་བྱ་བའི་དོན་ཏོ། །མ་ཆོག་པ་ཉིད་ཇི་སྙེད་མ་ཉིད་ལ་མ་ཆོག་པར་བཏགས་པ་དེ་སྙེད་པ་ཉིད་ནི་འདིར་ལྟུང་བ་མེད་པར་བྱས་པ་ཉིད་ལ་མཐར་ཐུག་པར་རིག་པར་བྱའོ། །མཐེ་བོའི་ལྟོ་གང་གིས་མུ་ལ་རེག་པར་མི་བྱ་ཞེས་བྱ་བ་དང་འགལ་བར་འདི་ལྟར་ཤེས་པར་བྱ་བ་མ་ཡིན་ཏེ། དེ་ནི་དོན་ལ་ལྷུང་བཟེད་ཀྱི་ཚད་ལ་རིགས་པ་མ་ཡིན་པས་དེའི་ཕྱིར་ཚིག་འདིའོ། །ཚོད་མ་དང་མཉམ་པ་མ་ཡིན་པར་རོ་ཞེས་བྱ་བ་ནི་བཟའ་བ་གང་ལ་ཚོད་མ་དང་མཉམ་པ་དེ་ནི་ཚོད་མ་དང་མཉམ་པ་སྟེ། དེ་ལྟར་བླང་བར་མི་བྱའོ། །འདིར་ཚོད་མ་ཞེས་བྱ་བ་ནི་བྱ་ན་ཐམས་ཅད་ཀྱི་དཔེ་ཡིན་ནོ། །ཚོད་
མ་ཇི་ཙམ་གྱི་མུ་དང་ཁ་ད་ཆད་དུ་འགྱུར་བ་སྟེ། འདིར་དགག་པ་ནི་མ་ཡིན་ཏེ་དེ་བས་ན་ཚིག་འདིའོ། །སྔ་མ་ཁོ་ནས་བྱས་པ་ཉིད་ཀྱི་ཕྱིར་འདིར་ཐམས་ཅད་གྲུབ་ཅིང་སྨིན་པར་བཟའ་བར་བྱ་བ་ཐམས་ཅད་བསོད་སྙོམས་ཉིད་དུ་བསྟན་པ་རྣམ་པར་གནས་པ་ཡིན་ནོ། །དེའི་ཕྱིར་ལུས་དང་སྦྱར་བས་རང་ལ་དགོས་པའི་ཚད་ལས་ལྷག་པར་ཚོད་མ་ལེན་པ་དེ་བཀག་པ་ཡིན་ནོ། །འདིར་ཚོད་མ་སྨོས་པ་ནི་མཚོན་པ་ཙམ་ཡིན་གྱི། ཚོད་མ་ལ་ཡང་རྣམ་པ་འདི་ཡིན་ཏེ། དེ་ལྟར་ཡང་འདིར་གཞུང་ནི་མ་མོ་ལས་ཇི་ཙམ་གྱིས་དེ་འཚོ་བར་གྱུར་པ་དེ་ལས་ལྷག་པར་ལེན་ཏམ་ཟ་ན་ཐ་ན་ཁམ་གཅིག་ཙམ་དུ་ཟིན་ཀྱང་དང་པས་སྦྱིན་པར་བྱ་བ་ཆུད་གསན་པར་བརྗོད་པར་བྱའོ་ཞེས་གསུངས་པ་ཡིན་ནོ། །མ་མོ་ལས་གང་གི་ཚེ་ཚོད་འཛིན་བར་མི་ནུས་སམ་ཕྱིར་བཟློག་པར་མི་ནུས་པས། ཡོན་བདག་གིས་ནན་གྱིས་བླུགས་པ་དང་རྗེས་སུ་སྙིང་བརྩེ་བས་ལེན་ན་དེའི་ཚེ་འབྲས་ཆན་ལ་ སོགས་པ ་ལྷག་པར་ལེན་ཅིང་གཞན་ནམ་སུ་ཡང་རུང་བ་ལ་སྦྱིན་ནོ་སྙམ་པ་དེ་ལ་ནི་ལྟུང་བ་མེད་བར་རིག་པར་བྱའོ། །མཐར་ཆགས་སུའོ་ཞེས་བྱ་བ་ནི་སྟན་ལ་ཅི་ལྟར་འདུག་པའི་གྲལ་གྱི་རིམ་པ་བཞིན་དུ་ཟན་བླང་བར་བྱའོ། །འདིར་རྒན་རིམས་སུ་བྱ་བ་ནི་མ་ཡིན་གྱི་དེ་བས་ན་ཇི་ལྟར་རྒན་རིམས་ཀྱིས་འདུག་པ་ལ་ཉེས་པ་འདི་མི་བསྐྱེད་པའོ། །འདིར་ཉེས་དམིགས་འདི་ནི་མཉམ་པ་ཡིན་ཏེ། གང་དུ་ཐ་སྙད་འདིའོ། །དེ་ནི་སྔོན་དྲུག་སྡེ་རྣམས་ཟན་ཟབ་ན་ཚོད་མ་འཕྲལ་དུ་བྲི་མ་པ་མི་ནོད་པར་འོག་ཏུ་ཐག་རིང་དུ་ཐལ་བ་དང་འདོད་པས་བྲི་མ་པ་འཁྲུགས་ཤིང་ལོང་ལོང་དུ་གྱུར་པའི་ཉེས་དམིགས་དེ་ལྟ་བུ་བསལ་བའི་ཕྱིར་རོ། །ལྷུང་བཟེད་ལ་ལྟ་ཞིང་ངོ་ཞེས་བྱ་བ་ལ་འདིར་ལྷུང་བཟེད་ལ་བལྟ་བ་ཞེས་བྱ་བ་ནི་འདིར་ཡིད་ཀྱིས་བལྟ་བ་ལ་བྱའོ། །མིག་གི་དབང་པོས་ནི་མ་ཡིན་ནོ། །དེ་ལྟ་བས་ན་ལྷུང་བཟེད་དང་འབྲེལ་པའི་ཡིད་ཀྱིས་ཟས་ལེན་པར་བླང་བར་བྱ་བ་ཡིན་གྱི། ཐ་སྙད་ལས་བྱུང་བ་ནི་གཉའ་ཞིང་གང་ཙམ་དུ་ལྟ་བའི་སྐབས་སུ་བཀག་ཟིན་ཏོ། །བཅའ་བ་དང་བཟའ་བ་མ་འོངས་པར་ལྷུང་བཟེད་མི་བཟེད་པར་རོ་ཞེས་བྱ་བ་ནི་ལྷུང་བཟེད་དོ། །སྟེང་དུ་བཟུང་བར་མི་བྱའོ་ཞེས་བྱ་བ་ནི་བཅའ་བ་དང་བཟའ་བ་ལ་ལྷུང་བཟེད་དོ། །ལེགས་པར་ཟས་བཟའ་བར་བྱའོ། །ཁམ་ཧ་ཅང་
ཆུང་བར་མ་ཡིན་པར་རོ། །ཁམ་ཧ་ཅང་ཆེ་བར་མ་ཡིན་པར་རོ་ཞེས་བྱ་བ་ལ། ཁམ་ཞེས་བྱ་བ་ནི་ཁར་ཁམ་ཚད་དུ་གཞུག་ཅིང་མིད་པར་བྱ་བའི་ཕྱིར་ཁམ་ཞེས་བྱ་བ་སྟེ་དེ་བས་ན་ཁམ་རན་པར་རོ། །ཁམ་མ་གཟས་པར་ཁ་མི་གདང་ངོ༌། །ཁ་ཁམ་གྱིས་བཀང་སྟེ་མི་སྨྲ་བར་བྱའོ། །ཡང་འདོད་པའི་ཕྱིར་འབྲས་ཆན་གྱིས་ཚོད་མ་མིད་དགབ་ཚོད་མས་འབྲས་ཆན་མི་དགབ་པར་རོ། །ཙུག་ཙུག་མི་བྱའོ་ཞེས་བྱ་བ་ནི་ཙུག་ཙུག་ཟེར་ཞིང་ཟས་བཟའ་བར་མི་བྱའོ། །དགབ་པ་དང་གདང་བ་ཞེས་བྱ་བ་འདི་དག་ལ་འདི་ལ་ནུས་པ་མེད་པའི་ཕྱིར་འབྲེལ་པ་མེད་པ་ཉིད་དོ། །དེ་བས་ན་འདིར་མངོན་པར་འབབ་པའོ། །དེ་ཙམ་གྱིས་འདི་ལ་རྟོགས་པ་ཉིད་ཀྱི་ཕྱིར། རྣམ་པ་འདི་དག་བར་དུ་བཅད་པའི་ཕྱིར་བརྟག་པ་མ་ཡིན་ནོ། །ཅག་ཅག་མི་བྱའོ། །ཧུ་ཧུ་མི་བྱའོ། །ཕུ་ཕུ་མི་བྱའོ་ཞེས་བྱ་བ་ནི་དེ་སྐད་ཟེར་ཞིང་བསོད་སྙོམས་བཟའ་བར་མི་བྱའོ། །ཁ་ཁམ་གྱིས་བཀང་སྟེ་མི་སྨྲ་བར་བྱའོ། །འབྲུ་ནས་ཐ་དད་མི་བྱའོ་ཞེས་བྱ་བ་ནི་དེ་ལྟར་བྱས་ཏེ་བསོད་སྙོམས་བཟའ་བར་མི་བྱའོ། །འདིར་རིགས་པ་ནི་དེ་མ་ཐག་ཏུ་སྨོས་པ་དེ་ཉིད་ཡིན་ཏེ། དེ་རྣམས་ནི་ཁའི་རྣམ་པར་འགྱུར་བའི་སྒྲའི་བྱེ་བྲག་ཡིན་པས་འདི་ནི་རྣམ་པར་འགྱུར་བ་བྱེད་པའི་ཕྱིར་དགག་པ་ཡིན་གྱི། དེ་བརྟག་པའི་ཕྱིར་དགག་པ་ནི་མ་ཡིན་པར་ཤེས་པར་བྱའོ། །འཕྱས་མི་གདགས་སོ། །མཁུར་བ་མི་སྤོའོ། །ཁམ་འཕྲོར་མི་གཅད་དོ། །ལྕེ་ཕྱུང་སྟེ་ཟས་མི་ཟའོ། །མཆོད་རྟེན་འདྲ་བར་བྱ་སྟེ་མི་གཞོམ་མོ། །ལག་པ་མི་བལྡག་གོ །ལྷུང་བཟེད་མི་བྱོག་གོ །ལག་པ་མི་སྤྲུག་གོ །ལྷུང་བཟེད་མི་བསྐྱམ་མོ། །རྐན་མི་གཏོག་གོ་ཞེས་བྱ་བ་ལ་འདི་ནི་གཟུང་བའི་ཚིག་ཡིན་ཏེ་ལག་པ་མི་བལྡག་པ་དང་ལྷུང་བཟེད་མི་བྱོག་པ་དང༌། ལག་པ་མི་སྤྲུག་པ་དང༌། ལྷུང་བཟེད་མི་བསྐྱམ་པ་དང༌། རྐན་མི་གཏོག་པ་ཞེས་བྱ་བ་ནི་འདིར་དགེ་སློང་མའི་རྣམ་པར་འབྱེད་པ་ལས་སོ། །ལྷུང་བཟེད་ཀྱི་འདུ་ཤེས་ཅན་ཁ་ཟས་ཡང་དག་པར་ཤེས་ཤིང་ལྷུང་བཟེད་དང་འབྲེལ་པའི་མིག་གིས་ཞེས་བྱ་བའི་དོན་ཏོ། །འདིར་མིག་ནི་ཡིད་ཡིན་ཏེ། དེ་བས་ན་དེ་དང་འབྲེལ་པའི་ཡིད་ཅེས་བྱ་བ་དེ་ལ་འདི་བསྟན་པའོ། །ལྷུང་བཟེད་ཀྱི་དགོས་པ་ལ་བསྟན་པར་རིགས་པ་མ་ཡིན་ཏེ།
དེ་བས་ན་དེའི་དབང་གིས་འདིར་ལྟ་བའི་རྣམ་པར་རྟོག་པར་བྱེད་བ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །དྲུང་ན་འདུག་པའི་དགེ་སློང་གི་ལྷུང་བཟེད་ལ་འཕྱས་གདགས་པའི་བདག་ཉིད་ཅན་གྱི་དོན་ལ་རྗེས་སུ་བསྒྲུབ་པ་མཐོང་ཞིང་བལྟ་བའོ། །ལག་པ་ཟས་དང་འབགས་པས་ཆུ་སྣོད་ལ་མི་བཟུང་ངོ༌། །དྲུང་ན་འདུག་པའི་དགེ་སློང་ལ་ཟས་དང་འབགས་པའི་ཆུས་མི་གཏོར་རོ། །ཁྱིམ་པ་འདུག་པ་ལམ་དྲིས་པར་དེའི་ཁྱིམ་དུ་མི་དབོའོ་ཞེས་བྱ་བ་ལ་དེ་ཞེས་བྱ་བ་ནི་ཟས་དང་འབགས་པའི་ཆུའོ། །ལྷུང་བཟེད་ཀྱི་ནང་དུ་ཟས་ཀྱི་ལྷག་མ་བླུགས་ཏེ་མི་དོར་རོ། །ལྷུང་བཟེད་ལེན་གསུམ་བཀྲུས་ཏེ་གཙུག་ལག་ཁང་གི་ཚིགས་སུ་བཅད་པ་དག་གིས་བཟླས་བརྗོད་བྱས་པའི་ལྷུང་བཟེད་ཀྱི་ཆུ་སྦྱིན་པར་བྱའོ། །འོག་གཞི་མེད་བའི་ས་ཕྱོགས་སུ་ལྷུང་བཟེད་མི་གཞག་པར་རོ། །འགྲེང་སྟེ་ལྷུང་བཟེད་མི་བཀྲུ་བར་རོ། །དེ་གཉིས་དེ་གསུམ་དུ་མི་བྱ་བར་རོ་ཞེས་བྱ་བ་ལ་གཉིས་པོ་ནི་བཀྲུ་བ་དང་གཞག་པའོ། །གང་ཀམ་ཡིན་པར་རོ། །གཡང་ས་མ་ཡིན་པར་རོ། །དཀན་གཟར་པོ་མ་ཡིན་བར་རོ། །ལམ་གྱི་བཞི་མདོར་མི་བྱའོ། །དེས་འབབ་ཆུ་དྲུག་པོའི་རྒྱུན་ལས་བཟློག་སྟེ་ཆུ་མི་བཅུ་བར་རོ། །བཤང་གཅི་ཡན་ཆད་ནི་མི་ན་བ་ལའོ། །ལངས་ཏེ་བཤང་གཅི་མི་བྱའོ་ཞེས་བྱ་བ་འདིའི་གོང་རོལ་དུ་དེ་དག་ལ་ནི་མིན་བའོ་ཞེས་བྱ་བར་སྦྱར་བར་བྱའོ། །དེར་བཤང་བ་དང་གཅི་བ་ལ་དེ་དང་ཡང་དག་པར་ལྡན་པའི་རྣམ་པ་དེ་རྣམས་ལ་མི་བྱའོ་ཞེས་སྦྱར་བར་བྱའོ། །འདུག་པ་ལ་འགྲེང་སྟེ་ཆོས་མི་བཤད་པར་རོ། །ཉལ་བ་ལ་འདུག་སྟེ་མི་བཤད་པར་རོ། །སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་སྟེ་མི་བཤད་པར་རོ་ཞེས་བྱ་བ་ལ། འདིར་སྟན་ཞེས་པས་ནི་འདུག་པའི་ས་ཕྱོགས་ཀྱང་གཟུང་བར་རིག་པར་བྱའོ། །ངན་པ་དང་བཟང་པོ་ཡང་དེ་བཞིན་ནོ་ཞེས་བྱ་བས་ནི་མཐོན་པོ་དང་དམའ་བ་གཉིས་གཏོགས་པར་བྱའོ། །རྒྱ་ཆེ་བའི་སྟན་ལ་འདུག་ཅིང་ཆོས་ཉན་པར་བྱེད་ཅིང་བདག་ཉིད་ཤིན་ཏུ་དམའ་བ་ལ་འདུག་ཅིང་ཆོས་སྟོན་པར་བགྱིད་ན་སྒུར་མཆོག་གིས་ཞུས་པ་ལས། དེ་ལྟར་ཆོས་བསྟན་པར་མི་བྱའོ་ཞེས་གང་ཞིག་བཅོམ་ལྡན་འདས་ཀྱིས་གསུངས་པ་དེ་བས་ན་མདོ་འདིའོ། །མདུན་དུ་འགྲོ་བ་ལ་
ཕྱི་ནས་འགྲོ་ཞིང་མི་བཤད་པར་རོ་ཞེས་བྱ་བ་ནི་ཇི་ལྟར་ལམ་མ་ཡིན་བ་ནས་སོ། །ལམ་ནས་འགྲོ་བ་ལ་ལམ་གྱི་འགྲམ་ནས་འགྲོ་ཞིང་མི་བཤད་པར་རོ། །མགོ་གཡོགས་པ་ལ་ སོགས་པ ་མ་ཡིན་ནོ་ཞེས་བྱ་བ་ལ་སོགས་པའི་སྒྲས་ནི་མཆོང་བ་ལ་ སོགས་པ ་རྣམ་པར་འབྱེད་པའི་གཞུང་ལས་གཟང་བ་རྣམས་སོ། །གླང་པོ་ཆེ་དང་རྟ་ཞོན་བ་དང་ཁྱོགས་དང་བ་ཞོན་པའི་སྟེང་ན་འདུག་པ་དང༌། མཆིལ་ལྷམ་གྱོན་པ་ལ་མི་བཤད་པར་རོ་ཞེས་བྱ་བ་ནི་གླང་པོ་ཆེ་ལ་ཞོན་པ་ན་ཞེས་བྱ་བ་ལ་ སོགས་པ ་ལ་རེ་རེ་ནས་བཞོན་པའི་སྒྲས་འབབ་པ་མ་ཡིན་ཏེ། ང་རྒྱལ་གྱི་གནས་སུ་འབྲེལ་པ་ཉིད་ཀྱི་ཕྱིར་འདི་བཀག་པ་ཡིན་གྱི་མཐོན་པོའི་གནས་དང་འབྲེལ་པ་ཉིད་ཀྱིས་ནི་མ་ཡིན་ཏེ། དེར་བཀག་ཟིན་པ་ཉིད་ཀྱི་ཕྱིར་དེ་བས་ན་གནས་སྐབས་ཐམས་ཅད་དུ་འདི་བཀག་པའོ། །མགོ་དོ་ཀེར་ཅན་དང༌། ཞྭ་གྱོན་པ་དང་ཅོད་པན་ཅན་དང་ཕྲེང་བ་ཅན་དང་དཀྲིས་པ་ལ་མི་བཤད་པར་རོ། །ལག་ན་ཁར་བ་དང་གདུགས་དང་མཚོན་དང༌། རལ་གྲི་དང་དགྲ་སྟ་ཐོགས་པ་དང་གོ་ཆ་གྱོན་པ་ལ་མི་བཤད་པར་རོ། །འགྲེང་སྟེ་བཤད་གཅི་མི་བྱ་བར་རོ། །རྩྭ་སྔོན་པོ་ཡོད་པའི་ས་ཕྱོགས་སུ་ཡང་མི་བྱ་མི་དོར་བར་རོ་ཞེས་བྱ་བ་ནི་བཤང་གཅི་མི་བྱ་ཞེས་བྱ་བར་སྦྱར་རོ། །མི་དོར་བར་རོ་ཞེས་བྱ་བ་ནི་རྩྭ་སྔོན་པོ་ཡོད་པའི་ས་ཕྱོགས་སུ་བཤད་གཅིའོ། །མཆིལ་མ་དང་སྣབས་དང༌། སྐྱུགས་པ་དང་རླུགས་པ་ཡང་ངོ་ཞེས་བྱ་བ་ནི་དེ་ཡང་རྩྭ་སྔོན་པོ་ཡོད་པའི་ས་ཕྱོགས་སུ་མི་བྱ་མི་དོར་བའོ། །ཆུའི་ནང་དུ་མི་བྱ་བར་རོ་ཞེས་བྱ་བ་ནི་བཤང་གཅིག་དང་མཆིལ་མ་ལ་ སོགས་པ ་མི་བྱ་བ་དང་མི་དོར་པའོ། །གནོད་པ་བྱུང་བ་མ་གཏོགས་པར་ཤིང་ལ་མི་གང་ཙམ་ལས་མཐོང་མི་འཛེག་པར་རོ་ཞེས་བྱ་བ་ནི་མི་གང་ཙམ་ལས་མཐོར་མི་འཛེག་ཅེས་བྱ་བའི་དོན་ཏོ། །བསླབ་པ་རྣམས་ཀྱིས་ཡུལ་གྱི་རབ་ཏུ་དབྱེ་བ་ནི་མདོར་བསྡུ་ན་རྣམ་པ་དགུ་སྟེ། གོས་བགོ་བ་དང་སྤྱོད་ཡུལ་དུ་འགྲོ་བ་དང༌། དེར་སྟན་ལ་འདུག་པ་དང༌། ཟས་བླང་བ་དང༌། ཟན་བཟའ་བ་དང༌། ལྷུང་བཟེད་སྤྱོད་པ་དང༌། ཆོས་བསྟན་པ་དང༌། སྒྲུབ་པའི་ཚུལ་དང་རྒྱུ་བ་སྟེ། དེ་རྣམས་གོ་རིམས་བཞིན་དུ་སྦྱར་བར་བྱའོ། །བསླབ་པ་རྣམས་སོ། །དགེ་སློང་གི་རྣམ་པར་འབྱེད་
པ་རྫོགས་སོ།། །།འདིར་གང་ཞིག་བྱེ་བྲག་མེད་བར་ཚུལ་ཁྲིམས་བཤད་ཟིན་པ་དང༌། འཆད་པར་འགྱུར་བ་ལ་ཐམས་ཅད་དུ་བསྙེན་པར་རྫོགས་པ་དང་བཅས་པ་ལ་དེ་རིག་པར་བྱ་སྟེ། བྱེ་བྲག་མེད་པའི་ཕྱིར་ཐམས་ཅད་དུ་ལུས་ཀྱི་བསྙེན་པར་རྫོགས་པར་བྱ་བ་མ་ཡིན་པ་ཐམས་ཅད་ལས་ལྡོག་བ་དང༌། བྱ་བ་ཐམས་ཅད་ལ་ཡང་དག་པར་ཞུགས་པ་ལ་རྣམ་བར་གཞག་པ་ཞེས་བྱ་བ་འདིའི་ངོ་བོའོ། །གང་ཞིག་འདིར་འགའ་ཞིག་ཏུ་ཚུལ་ཁྲིམས་རྣམ་པར་གཞག་པ་ལ་མི་སྲིད་པའི་ཕྱིར། དེ་ལྟ་བུའི་རྟེན་འདི་གང་གི་ཕྱིར་འདིར་ཡོད་བ་ལ་ཉེས་དམིགས་སུ་འགྱུར་རོ་སྙམ་པ་དེ་ལྟ་བུ་ལ་སེམས་འཇོག་པ་འདི་ནི་བྱ་བ་དང་བྱ་བ་མ་ཡིན་པར་གྱུར་པ་གང་ཞིག་ཉེས་པ་ཆུང་བ་ཉིད་རྣམ་པར་གཞག་པ་དེ་ནི་ཤིན་ཏུ་ཆེ་བ་སྤོང་བའི་དོན་དུ་ནི་མ་ཡིན་ནོ། །གང་ཞིག་ཉེས་པ་ཆེ་བ་ཉིད་དུ་རྣམ་པར་གཞག་པ་ཡང་ཡོད་དེ། དེ་ནི་ཤིན་ཏུ་ཆེན་པོ་སློང་བའི་ཕྱིར་རོ། །དེ་བས་ན་དགེ་སློང་མ་ལ་ཡང་འདི་ཇི་ལྟར་སྲིད་པར་ཚུལ་ཁྲིམས་གཏོགས་པར་བྱའོ། །དེ་ལ་གང་ཞིག་རྣམ་པར་འབྱེད་པར་གཏོགས་པ་མི་སྲིད་པའི་ཕྱིར་དང༌། བར་དུ་གཅོད་པར་བྱེད་པའི་ཕྱིར་འདི་ལ་རྣམ་པར་གཞག་པ་མ་བྱས་པ་གང་ཞིག་ཡང་ཉེས་པ་མང་ཉུང་གིས་གང་མི་མཚུངས་པ་ཉིད་དུ་རྣམ་པར་གཞག་པ་དེ་རྣམས་ཐམས་ཅད་བརྗོད་པར་བྱ་སྟེ། དེ་ལ་ལྟུང་བ་ལ་སྦྱོང་བའི་ཚིག་ཡན་ཆད་དགེ་སློང་མ་རྣམས་ཀྱིའོ་ཞེས་བྱ་བ་ནི་འདི་ནས་བརྩམས་ཏེ། འོག་ནས་ཉམས་པ་དང་མ་སྐྱེས་པ་དག་ལྟུང་བ་ལ་སྦྱོར་ན་ཉེས་བྱས་སོ་ཞེས་འབྱུང་བའི་ཚིག་ཡན་ཆད་ནི་དགེ་སློང་མར་གྱུར་པ་ལ། དེ་རྟོགས་པ་པོའམ་བྱེད་པ་པོ་ལ་ལྟ་བར་བྱའོ། །རེ་ཞིག་ཕམ་པར་འགྱུར་བ་རྣམས་ལ་གསུངས་པ་ཐམས་ཅད་འདིར་བལྟ་བར་བྱ་བ་སྟེ། བཞི་པོ་དག་གོ་ཞེས་བྱ་བ་ནི་མི་ཚངས་པར་སྤྱོད་པ་ལ་ སོགས་པ ་བཞི་ནི་དགེ་སློང་བཞིན་དུ་དགེ་སློང་མ་ལ་ཡང་ངོ༌། །གཞན་གྱི་ལྟུང་བ་འཆབ་བ་དང་སྤངས་པའི་རྗེས་སུ་ཕྱོགས་བ་དག་གིས་ཚུལ་ཁྲིམས་གང་ལ་ལ་ཞིག་དང་ལུས་ཀྱི་རེག་བའི་འཇུག་པ་ཐམས་ཅད་ལ་ཕམ་པར་འགྱུར་བ་ཉིད་དོ། །དེ་ལ་གང་ལ་རེག་པའི་ཕམ་པར་འགྱུར་ཞེ་ན། དེའི་ཕྱིར་བདག་གིར་བྱེད་པ་ལའོ་ཞེས་བྱ་བ་སྨོས་སོ། །ཡན་ལག་གང་གིས་ཤེ་ན། དེའི་ཕྱིར་མིག་ནས་པུས་མོའི་བར་གྱིས་
སོ་ཞེས་བྱ་བ་སྨོས་ཏེ་མིག་གི་གནས་མན་ཆད་ནས་བུས་མོའི་ལྷ་ང་ཡན་ཆད་ཀྱི་བར་དེས་སོ། །དེ་ཅི་ཞིག་བདག་གིར་བྱེད་པ་ལ་ཞེ་ན་དེའི་ཕྱིར་རེག་པའོ་ཞེས་བྱ་བ་སྨོས་ཏེ། ནོམ་བར་བྱེད་ཉུག་པར་བྱེད་ལ་ཞེས་གསུངས་པ་ནི་འདིའི་དཔེ་ཡིན་ཏེ། འདི་ལྟར་ནོམ་པར་བྱེད་ཉུག་བར་བྱེད་ལ་ཞེས་བྱ་བ་དེའི་རྣམ་པར་འབྱེད་པ་ནི་ལུས་ལ་ལུས་ཀྱིས་ཉེ་བར་གཞོལ་བར་བྱས་ལ་ཞེས་གསུངས་པ་ཡིན་ནོ། །གང་གི་རེག་པ་ཞེ་ན། དེའི་ཕྱིར་ཕོའི་འོ་ཞེས་བྱ་བ་སྨོས་སོ། །ལུས་ཀྱི་དབང་པོའི་ཕྱོགས་ཀྱིས་བདག་གིར་བྱེད་པ་ལ་གསུངས་པ་དེ་ལ་བསམ་པ་གང་གིས་ཤེ་ན། དེའི་ཕྱིར་འཁྲིག་པའི་འདོད་ཆགས་ཀྱིས་སོ་ཞེས་བྱ་བ་སྨོས་ཏེ། བདེ་བ་ཉམས་སུ་མྱོང་བར་འདུན་པས་དེའི་ཀུན་ཏུ་ཆགས་པ་དང་མཚུངས་པར་ལྡན་པས་གང་ཞིག་འདི་སྐད་སྨོས་པ་དེ་ལ་ཚིག་འདིའོ། །ལུས་ཀྱི་དབང་པོའི་ཕྱོགས་ཀྱིས་བདག་གིར་བྱེད་པ་ལ་གསུངས་པ་དེ་ལ་བསམ་པ་གང་གིས་ཤེ་ན། འདིར་མདོ་གཞན་ལས་སྐྱེས་པ་ཆགས་བར་འགྱུར་བ་ཞེས་བྱ་བ་ནི་ཆགས་པ་དང༌། ཀུན་ནས་ཆགས་པ་དང༌། ཀུན་ནས་འཁྲིག་ཅིང་འདོད་པའི་འདོད་ཆགས་ཀྱིས་ཟིལ་གྱིས་ནོན་པ་གང་ཡིན་པའོ་ཞེས་བྱ་བ་རྣམ་པར་འབྱེད་པ་ལས་འབྱུང་ངོ༌། །གལ་ཏེ་ཡང་འདིར་ཆགས་པར་འགྱུར་བས་ཞེས་བྱ་བ་སྐྱེས་པ་ལ་ཡང་ཆགས་པར་གྱུར་པའི་ཚིག་ཏུ་བྱས་པ་དེ་ལྟར་ཡང་ཆགས་པར་མ་གྱུར་པའི་སྐྱེས་བ་ལ་ཡང་རྣམ་པར་འབྱེད་པ་ལས་ཆགས་པར་འགྱུར་བ་སྐྱེས་པ་མ་ཆགས་པས་པུས་མོ་ཡན་ཆད་མིག་མན་ཆད་ནོམ་པར་བྱེད་ཉུག་པར་བྱེད་པ་བདག་གིར་བྱེད་ན། ལྟུང་བ་ཕམ་པར་འགྱུར་རོ་ཞེས་གསུངས་པའི་ཕྱིར། ཕམ་པ་ཉིད་ཅེས་བྱ་བ་ལ་ཕོ་ལ་འདིར་ཆགས་པ་མངོན་པར་མི་བསྟན་ནོ། །ཡན་ལག་གཞན་གྱིས་ནི་སྦོམ་པོའོ་ཞེས་བྱ་བ་ནི་མིག་ནས་པུས་མོའི་བར་ལས་གཞན་པའི་ཡན་ལག་གིས་ཕོའི་རེག་པ་འཁྲིག་པའི་འདོད་ཆགས་ཀྱིས་བདག་གིར་བྱེད་པ་ལ་ནི་ཉེས་པ་སྦོམ་པོར་འགྱུར་རོ། །སྐྲ་དག་དང་དེ་དང་འབྲེལ་པའི་གོས་ཀྱིས་བར་དུ་མི་ཆོད་པར་རེག་ན་དངོས་གཞིར་འགྱུར་བ་ལ་བར་དུ་ཆོད་པར་རེག་ན་སྦོམ་པོའོ་ཞེས་བྱ་བ་འདིར་དགེ་སློང་དུ་གཏོགས་བ་ལ་རེག་པའི་བསླབ་པའི་གཞིར་བཏགས་པ་ལས་རྟོགས་པར་བྱའོ། །སེམས་གཞན་གྱིས་ནི་ན་སྨད་དོ་ཞེས་བྱ་བ་ནི་
འཁྲིག་པའི་འདོད་ཆགས་ཀྱི་སེམས་མ་ཡིན་པས་བདག་གིར་བྱེད་པ་ལ་ནི་གང་ལ་ཕམ་པར་འགྱུར་བར་གསུངས་པ་དེ་ལ་ནི་སྦོམ་པོར་ན་སྨད་ན་གང་ལ་སྦོམ་པོར་གསུངས་པ་དེ་ལ་ནི་ཉེས་བྱས་སུ་ན་སྨད་དོ་ཞེས་བྱ་བའི་དོན་ཏོ། །ཅི་ཐམས་ཅད་ལ་རྣམ་པ་དེ་དང་འདྲའམ་ཞེ་ན། དེའི་ཕྱིར་གལ་ཏེ་དེའི་ཚེ་དེ་ལས་སྐྱེས་པའི་དེས་ཤེས་པ་ནའོ་ཞེས་བྱ་བ་སྨོས་ཏེ། གལ་ཏེ་དུས་དེའི་ཚེ་དགེ་སློང་མ་དེ་ལ་འདོད་པའི་འདོད་ཆགས་ཀྱིས་བདག་ཉིད་ཀྱི་སེམས་དེ་ཡོད་པར་དགེ་སློང་མ་དེས་སྐྱེས་པ་འདི་བདག་ལ་ཆགས་སོ་སྙམ་དུ་འདུ་ཤེས་པ་དེ་ལ་འདི་ཆོ་ག་ཡིན་ནོ་ཞེས་བྱ་བའི་དོན་ཏོ། །དེས་སྐྱེས་པ་འདི་བདག་ལ་ཆགས་སོ་སྙམ་དུ་འདུ་ཤེས་པར་གྱུར་ཏེ། འདོད་པའི་འདོད་ཆགས་ཀྱིས་སེམས་མངོན་སུམ་དུ་མ་གྱུར་དུ་ཟིན་ཀྱང་རང་ལ་བསམ་པའི་ཉེས་པ་ཡོད་པ་ཁོ་ན་ཡིན་ཏེ། དེའི་ཕྱིར་འདིར་སྐྱེས་པའི་འདོད་ཆགས་ཡན་ལག་ཉིད་ཡིན་ནོ། །གལ་ཏེ་མེད་ན་ནི་དེ་ལས་ཀྱང་ངོ་ཞེས་བྱ་བ་ནི་གལ་ཏེ་དེའི་ཚེ་སྐྱེས་པ་ལ་འདོད་པའི་འདོད་ཆགས་མེད་དམ་ཞེས་ཡོད་ན་ཡང་དེ་ལ་མ་ཡིན་ནམ། དེ་མ་ཡིན་ན་ཡང་མི་ཤེས་ན་ནི་དེའི་ཚེ་ན་སྨད་པ་དེ་ལས་ཀྱང་ན་སྨད་པར་བྱ་སྟེ། གང་ལ་ན་སྨད་པ་ལས་སྦོམ་པོར་འགྱུར་བ་དེ་ལ་ནི་ཉེས་བྱས་སུ་འགྱུར་ལ་གང་ལ་ཉེས་བྱས་སུ་འགྱུར་བ་དེ་ལ་ནི་ཉེས་བྱས་ཕྲ་མོར་འགྱུར་རོ་ཞེས་བྱ་བའི་དོན་ཏོ། །བདག་གིར་མི་བྱེད་པ་ལ་ནི་ལྟུང་བ་མེད་དོ་ཞེས་བྱ་བ་ནི་ཇི་ལྟར་ཡང་བདག་གིར་མི་བྱེད་ཅིང་དང་དུ་མི་ལེན་པ་དེ་ལ་ནི་བཅའ་བ་འདིར་གཏོགས་པའི་ཁ་ན་མ་ཐོ་བའི་ལྟུང་བ་ནི་མེད་དོ། །བུ་ལ་རེག་པ་ལ་ནི་སྐྱོན་ཆགས་པ་མེད་དོ་ཞེས་བྱ་བ་ནི་འདོད་ཆགས་དང་བྲལ་བ་ལ་ནི། འདིར་མས་བུ་ལ་བྱམས་པའི་སེམས་གཞན་མ་ཡིན་པ་དང༌། རྣམ་པར་འགྱུར་བར་ནུས་པ་མ་ཡིན་ནོ། །དེ་ལྟ་བས་ན་བུ་ལ་བྱམས་པ་ཉིད་ཀྱིས་རེག་པ་ལ་སྐྱོན་ཆགས་པ་མེད་པའི་ཚིག་འདིའོ། །རྣམ་པར་འགྱུར་བ་མེད་པའི་སེམས་ཀྱིས་གཞན་གྱི་ཡིན་ན་བྱིས་པ་ལ་ཡང་རེག་པར་མི་བྱའོ་ཞེས་བྱ་བ་ནི་ཕོ་ནུའམ་ཕ་ཁུ་འམ་མཚན་ཞང་ངམ་བུ་ཚ་ལ་ སོགས་ཕ་ལ་བྱམས་པའི་སེམས་ལྟ་བུའམ། དགེ་བའམ་ལུང་དུ་མ་བསྟན་པའི་སེམས་ཀྱིས་ཁྱད་པར་མེད་པ ་ཉིད་ཀྱི་ཕྱིར་རྟོག་པའོ། །མདོ་འདི་གཉིས་ཀྱི་གཞུང་ནི་ཕྲན་ཚེགས་དག་ལས་རིག་པར་བྱའོ། །འདོད་པ་
དང་ལྡན་པ་ལ་བརྟེན་པ་དང་ཚིག་ལ་དེ་དང་ལྡན་པའི་དོན་ཡོངས་སུ་ཤེས་པར་བྱ་བའི་མཐུ་ཡོད་པ་ཉིད་ཀྱི་ཕོ་ནི་ཡོངས་སུ་རྫོགས་པར་བྱེད་པ་ཉིད་ཡིན་ནོ་ཞེས་བྱ་བ་ནི་འདོད་པ་དང་ལྡན་པའི་བསླབ་པའི་གཞི་ལ་ནི་བསྟེན་པའི་མཐུ་ཡོད་པ་ཉིད་ཀྱི་སྐྱེས་པ་ཉིད་ནི་ཡོངས་སུ་རྫོགས་པར་བྱེད་པ་ཉིད་དོ། །ཆོས་བསྟན་པ་ལ་ སོགས་པ ་ལ་ནི་དེ་དང་ལྡན་པའི་དོན་འདོད་པ་དང་ཚིག་བརྗོད་པའི་དོན་ཡོངས་སུ་ཤེས་ཤིང་གོ་བར་བྱ་བའི་མཐུ་ཡོད་པ་ཉིད་ཀྱི་སྐྱེས་པ་ནི་ཡོངས་སུ་རྫོགས་པར་བྱེད་པ་ཉིད་ཡིན་ནོ། །མཐུ་མེད་པ་ཉིད་ནི་བྱེད་པ་ཉིད་མ་ཡིན་ནོ་ཞེས་དོན་གྱིས་བརྗོད་པར་འགྱུར་རོ། །དགེ་སློང་གི་རྣམ་པར་འབྱེད་པ་ལས་འདིའི་ཚིག་གང་ཡིན་པ་དེའི་རྗེས་སུ་འབྲངས་ནས་འདིར་ཡང་དེ་ལ་བརྟེན་ཏོ། །རེག་པའི་ཕམ་པར་འགྱུར་བའོ། །གང་ལ་ལུས་ཀྱི་བཀན་པའི་ཕམ་པར་འགྱུར་ཞེ་ན། དེའི་ཕྱིར་ལུས་བཀན་པ་ལའོ་ཞེས་བྱ་བ་སྨོས་ཏོ། །འདིར་ལུས་ཀྱིས་ལུས་སུ་ཞེས་བརྗོད་པ་ཡིན་ནོ། །ཀང་དང་འབྲེལ་པ་ཞེ་ན། ཉེ་བར་གནས་པའི་དགོས་པ་དང་བཅས་པའི་ཚིག་ལས་འདི་ལ་རུང་བ་ཉིད་ཡོད་པ་ལ་ལྟུང་བ་འབྱིན་པ་པོ་ནི་འདི་ལྟར་འདིར་དགེ་སློང་མ་ཉེ་བར་གནས་པ་དེ་བས་ན་དེ་དང་འབྲེལ་པ་ཞེས་བྱ་བ་ཤུགས་ཀྱིས་མངོན་པའོ། །སེམས་ཇི་ལྟ་བུས་ཤེ་ན། དེའི་ཕྱིར་ཆགས་པར་གྱུར་པས་བསྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པའི་ཕྱིར་རོ་ཞེས་བྱ་བ་སྨོས་ཏེ། ལྟུང་བ་འབྱིན་པར་བྱེད་པའི་དགེ་སློང་མ་དེ་ལ་བརྟེན་པའི་ཕྱིར་ཉེ་བར་གནས་པའི་སྐྱེས་པ་ལ་ལུས་བཀན་ན་དེ་ཕམ་པར་འགྱུར་རོ་ཞེས་བྱ་བའི་དོན་ཏོ། །ཐམས་ཅད་དུ་སོ་སོར་གནས་པའི་ཕྱིར་ཆགས་པར་ལུས་བཀན་པར་འགྱུར་རོ་སྙམ་དུ་ནི་ཤེས་པར་བྱ་བ་མ་ཡིན་ཏེ་དེ་བས་ན་ཆགས་པར་འགྱུར་བ་ཞེས་བྱ་བའི་ཚིག་དོན་མེད་པར་འགྱུར་རོ་ཞེ་ན། དོན་མེད་པ་མ་ཡིན་ཏེ། གང་གི་ཕྱིར་དེ་ལ་སྲན་པའི་ཕྱིར་ཡང་བདག་འདི་ལྟུང་བ་ནི། རེ་ཞིག་བཙུན་པ་ཁྱེད་ལ་ལན་འགའ་སྲན་པའི་ཕྱིར་གལ་ཏེ་ཁྱོད་ཁོ་མོ་ལ་ཞོན་ཕོད་ན་ཁོ་མོ་ཉལ་ལོ་ཞེས་ལུས་བཀན་པ་ཡང་སྲིད་པས་དེའི་ཕྱིར་དེ་ལ་འཇིགས་པའི་དབང་གིས་ལུས་བཀན་པ་ལ་ནི་ལྟུང་བ་མེད། སྲན་པའི་ཕྱིར་ནི་ཉེས་བྱས་སོ་ཞེས་བྱ་བ་འཐོན་པ་ཡིན་ནོ། །ཁྱད་པར་ཇི་ལྟ་བུ་དང་ལྡན་པའི་འགལ་ཟླའི་ཕྱིར་བཀན་
པ་ཞེ་ན། དེའི་ཕྱིར་དེ་ལ་བརྟེན་པའི་ཕྱིར་ཉེ་བར་གནས་པའི་སྐྱེས་པ་ཆགས་པའི་ཕྱིར་རོ་ཞེས་བྱ་བ་སྨོས་ཏེ། བརྟེན་པའི་ཕྱིར་ཉེ་བར་གནས་པ་ལ་ཆགས་པའི་བུད་མེད་དེ་ལ་ཞེས་བྱ་བའི་ཚིག་འདི་དོན་མེད་དོ་སྙམ་དུ་ཡང་ཤེས་པར་བྱ་བ་མ་ཡིན་ནོ་ཞེ་ན། དེ་ནི་མ་ཡིན་ཏེ། གང་གི་ཕྱིར་སྔར་ཉེ་བར་གནས་པའི་བུད་མེད་མཚན་ཉིད་དང་བྲལ་བ་ལ་ཡུན་རིང་ཞིག་སྡོད་སྡོད་པས་དེ་ལ་ཡང་གནས་སྐབས་དེ་ལ་བལྟ་བར་གྱུར་པ་ལ་རྨི་ལམ་འགྱུར་བའམ། སེམས་གཞན་ཉིད་དུ་འགྱུར་བ་དེ་བས་ན་དོན་མེད་པ་ཉིད་ནི་མ་ཡིན་ནོ། །ཅི་ཐམས་ཅད་དུ་ལུས་བཀན་པ་ཇི་སྐད་བསྟན་པ་དེ་ལ་ཁ་ན་མ་ཐོ་བ་འདིར་འགྱུར་རམ་ཞེ་ན། དེའི་ཕྱིར་དེ་སྤྲད་དུ་རུང་བ་ཉིད་ལའོ་ཞེས་བྱ་བ་སྨོས་ཏེ་སྤྲད་དུ་རུང་བ་ཉིད་ཡིན་ན་སྟེ། ཆགས་པ་ཅན་དེ་དག་ལྷན་ཅིག་ཏུ་བསྟེན་པ་དེ་ཉེ་བར་གནས་པའི་སྐྱེས་པ་ཞེས་བྱ་བའི་དོན་ཏོ། །སྐྱེས་པས་བུད་མེད་བགྲོད་དུ་རུང་བ་དེ་ལྟ་བུའི་ཕྱོགས་སུ་ལུས་བཀན་ན་ཞེས་བྱ་བ་ནི་འདི་ལ་མདོ་འདི་ཡིན་ཏེ་དེ་ལྟ་བུའི་ཕྱོགས་སུ་ཞེས་བྱ་བ་ནི་ཕྱིར་བཟློག་ཏུ་མེད་པའི་གནས་སུའོ། །ལུས་བཀན་པ་ཞེས་བྱ་བ་ནི་ཉལ་ན་སྟེ། དེ་ལྟར་གང་དུ་སྐྱེས་པས་བུད་མེད་བགྲོད་དུ་རུང་བ་ལ་ཞེས་བྱ་བ་རྣམ་པར་འབྱེད་པ་ལས་སོ། །ཇི་སྐད་དུ་ལྟུང་བ་བསྟན་པ་ལས་ཕྱིར་བཟློག་ཏུ་མེད་པའི་གནས་སུ་ལུས་བཀན་པར་བྱེད་ན་གང་དུ་སྐྱེས་པས་བུད་མེད་ལ་བགྲོད་པར་བྱ་བར་འགྱུར་ན་ཕམ་པར་འགྱུར་རོ་ཞེས་གསུངས་པ་ཡིན་ནོ། །ཆགས་པར་གྱུར་པས་ཆགས་པར་གྱུར་པ་དང་ལྷན་ཅིག་གཞོགས་སྟེགས་བྱེད་ན་སྦོམ་པོའོ་ཞེས་བྱ་བ་ལ། འདིར་གཞུང་ནི། ཆགས་པར་གྱུར་པས་སྐྱེས་པ་ཆགས་པར་གྱུར་པ་དང་ལྷན་ཅིག་གཞོགས་སྟེགས་བྱེད་པ་ཉེས་པ་སྦོམ་པོར་འགྱུར་རོ། །བུད་མེད་བྱེད་དམ་བྱེད་དུ་འཇུག་ན་ཉེས་པ་སྦོམ་པོར་འགྱུར་རོ། །སྐྱེས་པས་འགྲོ་བ་དང་འོང་བ་དང་འོང་བ་བདག་གིར་བྱེད་ན་ཇི་སྲིད་དུ་ཉེས་པ་སྦོམ་པོར་འགྱུར་ཞེས་བྱ་བའི་བར་དུ་གསུངས་པ་ཡིན་ནོ། །ཕྱར་གཡེང་ངོ་ཞེས་བྱ་བ་ནི་འདིར་གཉིས་ཀ་ཡང་ཆགས་པས་ཞེས་བྱ་བ་དང་སྦྱར་བར་བྱའོ། །ཕྱར་གཡེང་ངོ་ཞེས་བྱ་བ་ནི་འཇུག་པ་ཤིན་ཏུ་མྱུར་བ་མ་ཡིན་པ་དང༌། བརྟན་པ་མ་ཉམས་པ་དང་ཧྲལ་བག་བྱེད་པའི་བྱ་བར་རིག་པར་བྱའོ། །ཙབ་ཧྲལ་ལོ་ཞེས་བྱ་
བ་ནི་ཤིན་ཏུ་མྱུར་བའི་འགྲོ་བ་དང་བརྟན་པ་ཉམས་པ་དང༌། བཙུན་སྤུ་ཉམས་ཤིང་བསྟན་པའི་གཞོལ་བ་ལ་ངོ་ཚ་མེད་པར་ཞུགས་ཤིང་ཟེ་ལངས་པར་གྱུར་ནས་ལུས་དང་ངག་གི་ལས་སོ། །དེ་ལས་དུས་མལ་མནོས་ན་ཡང་ངོ་ཞེས་བྱ་བ་ནི་སྐྱེས་པ་ཆགས་པར་གྱུར་པ་དེ་ལ་སྐྱེད་མོས་ཚལ་ཆེ་གེ་མོ་ཞིག་ཏུ་ཤོག་ཤིག་ཅེའམ། ཁྱོད་ཀྱི་ཁྱིམ་ག་གེ་མོ་ཞིག་ཏུ་ཁོ་མོ་འོང་ངོ་ཞེས་དུས་མལ་ཚིག་གིས་ནོད་པ་དང༌། སྐྱེས་པ་ཆགས་པར་གྱུར་པས་ཁོ་མོ་སྐྱེད་མོས་ཚལ་ཆེ་གེ་མོ་ཞིག་ཏུ་འོང་གིས་ཁྱོད་ཀྱང་གནས་དེར་ཤོག་ཤིག་ཅེས་དུས་མལ་བཏབ་པའི་ཚིག་གིས་ནོད་ན་སྦོམ་པོའོ་ཞེས་བྱ་བའི་དོན་ཏོ། །ལུས་ཀྱི་བྱ་བས་དང་དུ་ཐེན་ན་ཉེས་བྱས་སོ། །གང་ཞེ་ན། འདིར་གཞུང་ནི་སྤྱིར་བསྟན་པ་ལས། ཚིག་གིས་ཞེས་གསུངས་པ་ཡིན་ནོ། །བརྡའོ་མཚན་མའོ་ཞེས་བྱ་བ་ནི་སྐྱེས་པ་ཆགས་པ་ལ་བྱེད་པ་དང་ནོད་པ་ལ་ཞེས་བྱ་བར་སྦྱོར་རོ། །བརྡ་ཞེས་བྱ་བ་ནི་དུས་ཚོད་ཀྱི་བརྡ་སྟེ། ཁོ་མོ་སྔ་དྲོ་སྟ་གོན་བྱེད་དོ་ཞེས་བྱ་བ་ལ་སོགས་པའི་དུས་ཚོད་ཀྱི་བརྡས་དུས་འདེབས་པར་བྱེད་པར་རིག་པར་བྱའོ། །མཚན་མས་ཞེས་བྱ་བ་ནི་ཁོ་མོ་གོས་འདི་ལྟ་བུ་གོན་ པ་ཁྱོད་ཀྱིས་མཐོང་ན་སྟ་གོན་གྱིས་ཤིག་ཅེས་བྱ་བ་ལ་སོགས ་པའི་མཚན་མ་བྱེད་པར་རིག་པར་བྱའོ། །དེའི་འོང་བ་དང་འགྲོ་བའི་འཇུག་པ་བདག་གིར་བྱེད་ནའོ་ཞེས་བྱ་བ་ལ། འོང་བ་ཞེས་བྱ་བ་ནི་གང་ན་དེ་འདུག་པ་དེར་འོང་བའོ། །འགྲོ་བ་ཞེས་བྱ་བ་ནི་དུས་མལ་བཏབ་པའི་གནས་སུ་འགྲོ་བའོ། །སྐྱེས་པ་ཆགས་པར་གྱུར་པ་དེའི་འོང་བ་དང་འགྲོ་བའི་འཇུག་པ་བདག་གིར་བྱེད་ན་དགེ་སློང་མ་ལ་ནི་སྦོམ་པོར་འགྱུར་རོ་ཞེས་བྱ་བར་སྦྱར་རོ། །ལུས་བཀན་པ་ནི་དགེ་སློང་ལ་ནི་སྦོམ་པོ་སྟེ། གཞན་ནི་ཚིག་ཏུ་མ་སྨྲས་ན་ནི་ཉེས་བྱས་སོ་ཞེས་བྱ་བ་དེའི་རྗེས་སུ་འབྲངས་ནས་ཤེས་པར་བྱའོ། །བུད་མེད་ལ་ཚིག་ཏུ་སྨྲས་ན་ནི་དགེ་འདུན་ལྷག་མའོ། །ལུས་བཀན་པའི་ཕམ་པར་འགྱུར་བའོ། །གང་ལ་ཁ་ན་མ་ཐོ་བ་འཆབ་པའི་ཕམ་པར་འགྱུར་ཞེ་ན། དེའི་ཕྱིར་དགེ་སློང་མའི་ཕམ་པར་འགྱུར་བ་འཆབ་པ་ལའོ་ཞེས་བྱ་བ་སྨོས་ཏེ། དགེ་སློང་མ་དང་འབྲེལ་པའི་བརྒྱད་པོ་དག་ལས་གང་ཡང་རུང་བ་ལ་ཡང་ངོ༌། །སུའི་ཕམ་པར་འགྱུར་བ་ཞེ་ན། དེའི་ཕྱིར་འདིར་དགེ་སློང་མའི་ཞེས་སྨོས་ཏེ། འདིར་ཉིན་མཚན་གྱི་མཐར་ནི་ཁ་ན་མ་ཐོ་བ་རྫོགས་པར་འགྱུར་ལ། མདུན་རོལ་དུ་ནི་ན་སྨད་དོ། །འདིར་
གཞུང་ནི་གཏམ་གྱི་གཞི་ལས། དགེ་སློང་མ་མི་ཚངས་པར་སྤྱོད་པ་བྱེད་པ་མཐོང་ལ་དེ་བཅབས་ཤིང་འདུ་ཤེས་སྦས་ན་སྐྱ་རེངས་ཤར་ན་ཕམ་པར་འགྱུར་རོ་ཞེས་གསུངས་པ་ཡིན་ནོ། །འདི་ལ་ན་སྨད་ན་སྦོམ་པོ་སྟེ། དེ་བས་ན་སྡེ་པ་འདི་ལ་སྦོམ་པོ་ཞེས་རྟོགས་པར་བྱའོ། །འཆབ་པའི་ཕམ་པར་འགྱུར་བའོ། །ཅི་ཞིག་བྱས་ན་བཟློག་པའི་ཕམ་པར་འགྱུར་ཞེ་ན། དེའི་ཕྱིར་དགེ་སློང་གནས་ནས་ཕྱུང་བ་བཟོད་པ་གསོལ་བར་ངེས་པ་ཕྱག་བྱ་བའི་འོས་མ་ཡིན་པའི་སྡོམ་པ་བྱིན་པར་ཤེས་བཞིན་དུ་དེ་ལས་བཟློག་པ་ཉིད་མི་གཏོང་ནའོ་ཞེས་བྱ་བ་སྨོས་ཏེ། འདི་སྐད་བསྟན་ཏེ་དགེ་སློང་གྲེ་སྐྱེས་དགེ་སློང་མ་རྣམས་དང་འདྲེ་ཞིང་གནས་ནས་བཅོམ་ལྡན་འདས་ཀྱི་བཀས་དགེ་སློང་གི་དགེ་འདུན་གྱིས་གནས་ནས་ཕྱུང་བའི་ལས་བྱས་ཤིང་དགེ་སློང་མའི་དགེ་འདུན་གྱིས་ཀྱང་ཕྱག་བྱ་བའི་འོས་མ་ཡིན་པའི་སྡོམ་པ་བྱས་ནས། གཉིས་ཀའི་དགེ་འདུན་གྱིས་ཕྱི་རོལ་དུ་བྱས་པའི་དགེ་སློང་གི་དགེ་འདུན་ལ་བཟོད་པར་གསོལ་ལོ་ཞེས་ངེས་པར་གྱུར་ནས། སྦོམ་དགའ་མོས་དོན་དེ་ཤེས་བཞིན་དུ་ཕྱིར་བཟློག་པ་དེ་ལ་དགེ་སློང་མའི་དགེ་འདུན་གྱིས་བཞམས་ཏེ་བསྒོ་བ་ལ་ སོགས་པ ་གསོལ་བ་དང༌། བཞིའི་ལས་ཀྱིས་བསྒོ་བ་ནི་བཟློག་པ་དེ་ཉིད་མ་གཏོང་བ་དེ་ལ་ཕམ་པར་འགྱུར་བ་བཅས་པ་ཡིན་ཏེ། དེ་བས་ན་འདིར་མདོ་འདི་བྱས་པ་ཡིན་ནོ། །ཕྱག་བྱ་བ་མ་ཡིན་པའི་སྡོམ་པ་བྱས་ནས་ཞེས་བྱ་བ་ནི། དགེ་སློང་མ་རྣམས་ཀྱིས་བྱས་པ་ནི་ཕྱག་བྱ་བའི་འོས་མ་ཡིན་པའི་སྡོམ་པ་འདི་ལ་དེ་ལྟ་བས་ན་ཕྱག་བྱ་བའི་འོས་མ་ཡིན་པའི་སྡོམ་པ་བྱིན་བའོ། །དགེ་སློང་གནས་ནས་ཕྱུང་བ་ཞེས་བྱ་བ་ནི། ཕྱག་བྱ་བའི་འོས་མ་ཡིན་པའི་སྡོམ་པ་བྱིན་པར་ཤེས་བཞིན་དུ་དགེ་འདུན་གྱིས་གནས་ནས་ཕྱུང་བ་བཟོད་པར་གསོལ་བར་ངེས་པར་ཤེས་ནས། དེ་ལས་བྱུང་བ་བཟོད་པར་གསོལ་བར་ངེས་ནས་དེ་ལས་བཟློག་པ་ཉིད་གང་ཡིན་པ་དེ་མི་གཏོང་ན་ཕམ་པར་ཞེས་བྱ་བའི་དོན་ཏོ། །ཇི་ལྟར་མི་གཏོང་བ་ལ་ཞེ་ན། དེའི་ཕྱིར་དབྱེན་ལ་བརྟུལ་བ་ཉིད་དང་འདྲའོ་ཞེས་བྱ་བ་སྨོས་ཏེ། ཇི་ལྟར་དགེ་འདུན་གྱི་དབྱེན་ལ་བརྟུལ་བར་བྱེད་པ་དེ་མི་གཏོང་བ་ལ་ལྟུང་བར་འགྱུར་བ་དེ་དང་འདྲའོ་ཞེས་བྱ་བའི་དོན་ཏོ། །དེ་དང་འདྲ་བར་བཞམས་པ་དང་གསོལ་བ་
མངོན་དུ་བཏང་བའི་ལས་བྱས་ཏེ། ཇི་སྲིད་འདའ་བར་བྱེད་པ་དེ་སྲིད་ཐ་དད་པར་བརྗོད་པ་བསྒོ་བ་དང་འབྲེལ་པའི་རིམ་པ་དང༌། དེའི་རྒྱུ་མཚན་འཇུག་པ་དང་འབྲེལ་པ་དེ་ཐམས་ཅད་འདིར་ཅི་རིགས་པར་རྟོགས་པར་བྱའོ། །དགེ་སློང་མ་བཟློག་པ་ལ་ནི་འདི་ལ་ལྟུང་བྱེད་ཁོ་ནར་རིག་པར་བྱའོ། །བཟློག་པའི་ཕམ་པར་འགྱུར་བའོ། །དགེ་སློང་མའི་ཕམ་པར་འགྱུར་བ་རྣམས་རྫོགས་སོ།། །།ཁུ་བ་འབྱིན་པར་གཏོགས་པའི་དགེ་འདུན་ལྷག་མ་དགེ་སློང་མ་རྣམས་ཀྱི་ལྟུང་བྱེད་དུ་རྣམ་པར་གཞག་ཟིན་ཏོ། །རེག་པར་གཏོགས་པའི་ཕམ་པ་འཇུག་པ་ཉིད་ཀྱིས་སོ། །དེ་བཞིན་དུ་བརྗོད་པ་དང་འབྲེལ་པའི་བསྙེན་བཀུར་བསྔགས་པ་འབྱུང་བའོ། །གང་གི་ཕྱིར་བསྙེན་བཀུར་བསྔགས་པ་དང་འཁྲིག་པ་ལ་ནི་བུད་མེད་དོ། །བསྙེན་བཀུར་བྱེད་པར་འགྱུར་བ་ལ་ནི་མ་ཡིན་ནོ། །འདིར་སྐྱེས་པ་ནི་གཡོག་ཕྲན་གྱི་ཆ་དང་བུད་མེད་ཀྱི་ཁང་པ་དང་གཙུག་ལག་ཁང་དང་འབྲེལ་པའི་འཇུག་པ་ལའོ། །ཤིན་ཏུ་ཡང་འབྱུང་བ་མ་ཡིན་ཏེ། གང་གི་ཕྱིར་འདི་དག་ལ་མཐུ་དང་ལྡན་པའི་བྱེད་པ་པོ་ཉིད་ཡོད་པ་མ་ཡིན་ནོ། །བྱེད་དུ་བཅུག་པ་ཉིད་ཀྱང་ཡོད་པ་མ་ཡིན་ཏེ། བདག་པོ་མེད་པ་ཉིད་ཀྱི་ཕྱིར་རོ། །བུད་མེད་རྣམས་ལ་ཁྱིམ་བྱེད་པའི་ཉོན་མོངས་པ་ལ་ནི་ཤིན་ཏུ་ཡང་གནས་པ་མ་ཡིན་ཏེ། སྐྱེས་པ་ནི་སྟོབས་དང་ལྡན་པ་ཉིད་དོ། །དགེ་འདུན་གྱི་ལྷག་མ་འཇུག་པའི་ལྷག་མ་རྣམས་ནི་འདི་ལ་ཁ་ན་མ་ཐོ་བ་མཆོག་པ་ལྷག་མ་རྣམས་དང༌། ཁ་ན་མ་ཐོ་བ་མེད་པ་རྣམས་ལ་ནི་དགེ་སློང་ལ་དགེ་འདུན་གྱི་ལྷག་མ་འཇུག་པ་ཉིད་ཀྱིས་རྣམ་པར་གཞག་པ་བྱས་པ་ཡིན་ནོ། །དེ་གཉིས་ཀྱང་བརྗོད་པར་བྱ་སྟེ་དེ་ལ་ཐུན་མོང་བ་ནི་མིང་ཙམ་རྣམ་པར་གཞག་པ་དག་ཅི་བསྟན་པའི་ཕྱིར་སྨྱན་བྱེད་པའོ་ཞེས་བྱ་བ་སྨོས་ཏེ། གཞན་སྨྱན་བྱེད་པ་ནི་ངོ་བོ་བསྟན་པས་སོ། །དགེ་འདུན་ལྷག་མ་ཁ་ན་མ་ཐོ་བ་འདིའི་མཚན་ཉིད་སྔར་ཇི་སྐད་བསྟན་པ་དེ་ཉིད་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །སྐབས་འདི་དང་འོག་མ་དག་ལས་ཆོས་འདི་ནི་དང་པོས་ལྟུང་བར་འགྱུར་ལ་ཞེས་གསུངས་པའི་ཚིག་དེའི་རྣམ་པར་འབྱེད་པ་ནི་མདོ་ལས་ལྟུང་བར་འགྱུར་རོ་ཞེས་གསུངས་པ་ཡིན་ཏེ། དེའི་དོན་ནི་སྤྱད་པ་ཙམ་གྱིས་ཁ་ན་མ་ཐོ་བ་འདིར་འགྱུར་གྱི། ཡང་དང་ཡང་དུ་ཕྱིར་བཟློག་ཅིང་མི་གཏོང་བ་ལ་ནི་མ་ཡིན་པར་རིག་པར་བྱའོ། །འབྱུང་བར་འགྱུར་
བས་ཏེ་ཞེས་བྱ་བ་ནི་གང་ཞིག་ལྟུང་བ་ལས་འབྱུང་བ་དང་རྗེས་སུ་མཐུན་པ་དེ་ནི་ཕམ་པར་འགྱུར་བ་དག་ལྟར་ཕྱིར་བཅོས་སུ་མི་རུང་བ་མ་ཡིན་ནོ། །དེ་ལྟར་ཡང་དེའི་རྣམ་པར་འབྱེད་པ་ནི་ལྟུང་བ་དང་བཅས་པའོ་ཞེས་གསུངས་པ་ཡིན་ནོ། །འདིར་ཅུང་ཟད་དགེ་སློང་མ་ལ་བརྟེན་ཏེ་ཕྲན་ཚེགས་དག་ལས་ཅུང་ཟད་ལྷག་པར་གསུངས་པ་དག་བསྟན་པའི་ཕྱིར་དགེ་སློང་མ་ལ་ཁྱིམ་པ་མོ་ཉིད་ཀྱི་བསྔགས་པ་བརྗོད་ན་སྦོམ་པོའོ་ཞེས་བྱ་བ་སྨོས་ཏེ། བསྔགས་པ་བརྗོད་པ་ཞེས་བྱ་བ་ནི་གང་ཞིག་འབྲེལ་པ་བསྟན་པས་ཡང་དག་པར་འཛིན་དུ་འཇུག་པའོ། །འདི་ཡང་འདོད་པ་ལ་བརྟེན་པ་དང་ཕན་ཡོན་བསྟན་པས་གང་ཡང་རུང་བའི་མངོན་པར་འདོད་པ་གླེང་གཞི་ལས་རྟོགས་པའོ། །རབ་ཏུ་འབྱུང་བ་འདོད་པ་རྣམས་ལ་བརྟེན་པར་མཛོད་ཅིག་ཅེས་བྱ་བ་ཉོན་མོངས་པ་དག་གིས་གནོད་པར་འགྱུར་བ་རྣམས་ཀྱིས་གོ་བར་བྱས་པ་ན་སྦོམ་དགའ་མོས་ཚིག་དེ་སྐད་བརྗོད་པ་ལས། འདི་བཅས་ཏེ་དེ་ནི་སྨྱན་བྱེད་པ་དང༌། རིགས་མཐུན་པ་ཉིད་ཡིན་པའི་ཕྱིར་འདི་དང་འབྲེལ་པ་ཉིད་ཀྱིས་འདི་རྣམས་ཤེས་པར་བྱའོ། །དགེ་སློང་མ་སྨད་འཚོང་མར་འགྱུར་བ་སུ་ཞིག་ལ་འགའ་ཞིག་ཏུ་ཉེས་པ་མེད་པ་ཉིད་ནི་མ་ཡིན་ཏེ། དེ་བ་ན་དགེ་སློང་ལ་ཡང་དེའི་རྗེས་སུ་འབྲངས་པས་ཉེས་པ་སྦོམ་པོར་འགྱུར་བར་ཤེས་པར་བྱའོ། །གཞན་སྨན་འཚོང་མ་ཉིད་བྱེད་དུ་འཇུག་པ་ལ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲ་ནི་སྦོམ་པོ་ཞེས་བྱ་བ་ལ་བསྙེག་པའི་དོན་དུའོ། །བདག་ཉིད་ལ་བུད་མེད་གཞན་སྨད་འཚོང་མ་ཉིད་དུ་བྱེད་དུ་འཇུག་ན་སྦོམ་པོར་འགྱུར་རོ། །སྨད་འཚོང་མ་ཞེས་བྱ་བའི་སྒྲ་ནི་འཇུད་མཐུན་མ་ཞེས་བྱ་བ་སྟེ། འཇུད་པ་ཞེས་བྱ་བ་ནི་ཕོའི་དབང་པོ་ལ་བྱས་ཏེ། འཇུད་པར་བྱེད་པ་ཡིན་པས་འཇུད་པ་སྟེ། དེས་འཇུད་པ་གང་ལ་ཡོད་པ་དེ་ནི་འཇུད་མཐུན་མ་ཡིན་ཏེ་སྨད་འཚོང་མའོ། །བྲན་མོ་ཟོང་ཉིད་དུ་གཏོང་བ་ནི་དེ་ལས་ཕྱི་རོལ་དུ་གྱུར་པ་ཉིད་མ་ཡིན་ནོ་ཞེས་བྱ་བ་ནི་དགེ་སློང་མས་བྲན་མོ་ཟོང་གི་ཕྱིར་སླར་གཏོང་བ་གང་ཡིན་པ་དེ་ལ་སྨད་འཚོང་མ་ཉིད་དུ་འཇུག་པ་ཞེས་བསྟན་པ་དེ་ལས་ཕྱི་རོལ་དུ་གྱུར་པ་ཉིད་མ་ཡིན་ཏེ། དོན་འདྲ་བས་འདི་ལ་ཡང་ཉེས་པ་སྦོམ་པོར་འགྱུར་རོ་ཞེས་བྱ་བའི་དོན་ཏོ། །འདི་ལྟར་ཟོང་འགྲེམས་པའི་ཚུལ་གྱིས་
འཇུག་པ་འདི་ནི་གྲགས་པའི་དབང་གིས་འདི་ལྟར་མདོར་བྱས་པའོ། །དགེ་སློང་མ་སྨྱན་བྱེད་པའི་དགེ་འདུན་ལྷག་མའོ།། །།གཞི་མེད་པའོ། །བག་ཙམ་མོ་ཞེས་བྱ་བ་ནི་དགེ་འདུན་གྱི་ལྷག་མ་དང་བཅས་པའི་ཁ་ན་མ་ཐོ་བ་འདི་དག་ཇི་ལྟར་སྨོས་པ་དེ་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །བུད་མེད་སྐྱེས་པ་ཉིད་དང་བཅས་པ་འདི་ལ་ སོགས་པ ་ཐམས་ཅད་ལ་བྱེ་བྲག་ནི་འདི་ཡོད་པར་རིག་པར་བྱ་སྟེ། ཕོ་ཉིད་ལ་ནི་མོ་ཉིད་དོ། །དེ་ལ་ཕོ་ཉིད་དོ་ཞེས་བྱ་བ་ནི་ཕོའི་རྟགས་ཀྱི་གནས་སུ་ནི་མོའི་རྟགས་བལྟ་བར་བྱ་ལ། མོའི་རྟགས་ཀྱི་གནས་སུ་ནི་ཕོའི་རྟགས་བལྟ་བར་བྱའོ་ཞེས་བྱ་བའི་དོན་ཏོ། །གཞི་མེད་པ་དང་བག་ཙམ་གྱི་དགེ་འདུན་ལྷག་མ་གཉིས་སོ། །གང་ལ་ཅི་ཡང་རུང་བ་ལེན་པའི་དགེ་འདུན་ལྷག་མར་གྱུར་ཞེ་ན། དེའི་ཕྱིར་ཅི་ཡང་རུང་བ་བདག་གིར་བྱེད་པ་ལའོ་ཞེས་བྱ་བ་སྨོས་ཏེ། དངོས་པོའི་ཚོགས་གང་ཡིན་པ་དེ་ནི་ཕྱག་དར་ནས་བརྩམས་ཏེ་ཅི་ཡང་རུང་བའོ། །ཀ་ཡིག་ནི་སྨོད་པ་ལའོ། །འཁྲིག་པའི་དངོས་པོ་ཉིད་ཀྱི་ཕྱིར་རྣམ་པ་འདི་ལ་འཁྲིག་པ་ལ་ལྟོས་པའི་དབང་གིས་སྦྱིན་པར་བྱ་བ་ཉིད་ལ་རྣམ་པར་གནས་པ་ཉིད་ལ་འདིར་སྨོས་པ་ཞེས་བྱ་བར་ཤེས་པའོ། །བདག་གིར་བྱེད་པ་ཞེས་བྱ་བ་ནི་རང་ཉིད་ཀྱིས་མངོན་པར་བསྟན་པར་གྱུར་པ་སྟེ་ལེན་པར་བྱེད་པའོ། །དེ་ལྟར་ཡང་རྣམ་པར་འབྱེད་པ་ལས་བདག་གིར་བྱེད་པ་ནི་ལེན་པར་བྱེད་པའོ་ཞེས་གསུངས་པ་ཡིན་ནོ། །ཇི་ལྟ་བུར་གྱུར་པས་ཤེ་ན། དེའི་ཕྱིར་དགེ་སློང་མ་ཆགས་པར་གྱུར་པས་སོ་ཞེས་བྱ་བ་སྨོས་ཏེ། འདི་དང་འོག་མ་དག་ལས་འཁྲིག་པའི་འདོད་ཆགས་ཀྱིས་ཆགས་པར་གྱུར་པས་ཞེས་བྱ་བའི་དོན་རྟོགས་པའོ། །གང་ལས་བདག་གིར་བྱེད་ཅེ་ན་དེའི་ཕྱིར་སྐྱེས་པ་ཆགས་པར་འགྱུར་བ་ལས་སོ་ཞེས་བྱ་བ་སྨོས་ཏེ། ཇི་ལྟ་བུ་ལས་ཤེ་ན། དེའི་ཕྱིར་ཆགས་པར་མ་གྱུར་པས་ནི་པོའོ། །ཆགས་པར་མ་གྱུར་པ་ལ་ནི་ཉེས་བྱས་སོ་ཞེས་བྱ་བ་སྨོས་ཏེ། དགེ་སློང་མ་ཆགས་པར་མ་གྱུར་པས། སྐྱེས་པ་ཆགས་པ་ལས་ཅི་ཡང་རུང་བ་དང་དུ་ལེན་པར་བྱེད་པ་ལ་ནི་སྦོམ་པོའོ། །ཆགས་པར་མ་གྱུར་པ་ལས་ནི་ཉེས་བྱས་སོ་ཞེས་བྱ་བའི་ཚིག་གིས་ཆགས་པ་ལས་ཞེས་བྱ་བ་གོང་མ་ལས་ཤེས་
པར་བྱའོ། །ཅུང་ཟད་ཀྱང་མི་ཤེས་པར་གྱུར་པ་ལ་སྐྱེས་པ་ཆགས་པར་གྱུར་པས་བསམ་པ་སྐྱོན་ཅན་དུ་གྱུར་པ་དང་མཐུ་དང་ལྡན་པ་ཉིད་ལ་འདི་བྱེད་པ་པོ་ཉིད་དོ། །མེད་པ་ལ་མེད་པར་ཤེས་པ་ཉིད་ཀྱིས་དེ་ལ་མངོན་པར་ཆགས་པས་ཀྱང་ལྕི་བ་ཉིད་དོ། །བསམ་པའི་ཉེས་པ་ལའོ། །དེ་ལྟ་བས་ན་ཅི་ཡང་རུང་བ་བདག་གིར་བྱེད་པ་དང༌། སྐྱེས་པ་ཆགས་པར་གྱུར་པ་འདི་གཉིས་ནི་ཤེས་ཀྱང་རུང་དོགས་ཀྱང་རུང༌། ཡོད་ཀྱང་རུང་མེད་ཀྱང་རུང་སྟེ། ཡོད་པ་ཉིད་ལ་བརྟེན་པར་གྱུར་ན། དེ་ལྟ་ན་ཇི་སྐད་བསྟན་པ་ཉིད་དོ། །དེ་ལ་ སོགས་པ ་བཅུ་གསུམ་ཁ་ཅིག་ཏུ་རྒྱུ་བའི་བཞི་པོ་དག་ལ་ནི། དགེ་སློང་རྣམས་ལ་གཅིག་པུ་འགྲོ་བ་ལ་ལྟུང་བ་མེད་དོ། །ལྷག་མ་ལ་ནི་ཉེས་བྱས་སུ་རྣམ་པར་གནས་པ་ཡིན་ནོ། །འགའ་ཞིག་ཏུ་ནི་ལྟུང་བྱད་དུ་འགྱུར་རོ། །ཡང་ན་ལྟུང་བ་མེད་པ་ནི་དཔེར་ན་ཤི་བའི་ནོར་ལེན་པ་ལྟ་བུའོ། །ཆོས་གོས་ཀྱི་རིན་བཀུར་བ་ལས་བླང་བའི་ཆོ་ག་གང་ཡིན་པ་དེ་ལས་འདས་ན་ནི་སྤང་བའི་ལྟུང་བྱེད་དུ་འགྱུར་ལ། མ་འདས་ན་ནི་ལྟུང་བ་མེད་དོ། །ཅི་ཡང་རུང་བ་ལེན་པའི་དགེ་འདུན་ལྷག་མའོ། །གང་ལ་ཅི་ཡང་རུང་བ་ལེན་དུ་འཇུག་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་ཆགས་པར་མ་གྱུར་པས་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱེད་པ་ལ་ཉེས་པ་མེད་དོ་ཞེས་དགེ་སློང་མ་ལ་གོ་བར་བྱེད་པ་ལའོ་ཞེས་བྱ་བ་སྨོས་ཏེ། ཆགས་པར་མ་གྱུར་པས་ཞེས་བྱ་བ་ནི་འདིར་འདོད་ཆགས་མངོན་སུམ་དུ་མ་གྱུར་པ་ལ་བྱའི་མི་ལྟོས་པ་ཉིད་ལ་ནི་མ་ཡིན་ནོ། །དགེ་སློང་མ་ཆགས་པར་མ་གྱུར་པས་སྐྱེས་པ་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱེད་པ་ལ་ཁ་ན་མ་ཐོ་བ་མེད་དོ་ཞེས་གསུངས་པ་ཡིན་ནོ། །དེ་བཞིན་དུ་དགེ་སློང་མ་ལ་གོ་བར་བྱེད་པ་ལ་ཞེས་བྱ་བའི་དོན་ཏོ། །དེ་ལྟར་ཡང་སྦོམ་དགའ་མོས་གཙུག་དགའ་མོ་ལ་ཀྱེ་ཁྱོད་ཆགས་པར་མ་གྱུར་ན། ཁྱོད་ཆགས་སུ་མེད་པས་ཆགས་པར་གྱུར་པ་ལས་ཅི་ཡང་རུང་བ་བདག་གིར་བྱ་བ་རུང་ངོ་ཞེས་ཉེས་པ་སྦོམ་པོ་ཡང་དག་པར་ལེན་དུ་བཅུག་པ་དེ་ལ་ཁ་ན་མ་ཐོ་བ་འདིར་གསུངས་པ་ཡིན་པས། དེའི་ཕྱིར་ཆགས་པར་གྱུར་པ་ལས་བདག་ཏུ་བྱ་བ་ཅི་ཡང་རུང་བ་ལེན་དུ་འཇུག་པ་ལ་ཤིན་ཏུ་ལྕི་བ་ཉིད་ཀྱི་ཕྱིར་ཁ་ན་མ་ཐོ་བ་འདིར་གཏོགས་པར་བྱའོ། །ལྟོས་
པ་མེད་པས་གཟུང་བ་ལན་དུ་འཇུག་པ་ལ་བར་དུ་གཅོད་པ་མེད་པ་ཉིད་ཀྱི་ཕྱིར་ཁ་ན་མ་ཐོ་བའི་ཚིག་ཅན་འདི་ལ་སྦོམ་པོར་རྟོགས་པར་བྱའོ། །ཅི་ཡང་རུང་བ་ལེན་དུ་འཇུག་པའི་དགེ་འདུན་ལྷག་མའོ། །འོག་མ་བཞི་པོ་དག་ལ་ནི་དགེ་སློང་མ་མེད་པར་རོ་ཞེས་བྱ་བ་ནི་མཚན་མོ་འབྲལ་བ་ལ་ སོགས་པ ་རྣམས་ལ་འདིའི་འོག་མ་བསླབ་པའི་གཞི་བཞི་པོ་དག་ལ་དགེ་སློང་མ་མེད་པར་འགྲོ་ན་ཚིག་འདི་རྟོགས་པར་བྱའོ། །དགེ་སློང་མ་ཉིད་ནི་སུམ་ཆ་དང་བྲལ་བ་ཉིད་ཡིན་ནོ་ཞེས་བྱ་བ་ནི་སུམ་ཆ་དང་བྲལ་ཞིང་སུམ་གཉིས་ཡོད་པ་མ་ཡིན་ཏེ། གང་གི་ཕྱིར་དགེ་སློང་མ་སུམ་ཆ་མ་ཡིན་ཏེ། དགེ་སློང་མ་མ་ཡིན་པ་མ་ཡིན་ཏེ་དེ་དགེ་སློབ་མ་ལས་སུམ་ཆ་གཉིས། དགེ་སློང་མ་དང་བྲལ་བས་རྗེས་སུ་བསྒྲུབ་པར་མི་འགྱུར་ཞེས་བྱ་བའི་དོན་ཏོ། །འདིར་སུམ་ཆར་གྱུར་བའི་སུམ་ཆའི་ཚིག་ལ་དངོས་གཞིའི་ཁ་ན་མ་ཐོ་བའི་ཉེས་བྱས་སུ་འགྱུར་རོ། །དེ་མ་ཐག་པའི་ཚིག་ལ་ཉེས་བྱས་ཕྲ་མོར་འགྱུར་རོ། །གསུམ་པ་ལ་ཤིན་ཏུ་མ་ཆོག་པ་དེ་བས་ན་དེ་ལ་འདི་བསྟན་པའོ། །དགེ་ཚུལ་མ་ནི་སུམ་ཆའོ་ཞེས་བྱ་བ་ནི་དགེ་ཚུལ་མ་དེ་ནི་དགེ་སློང་མ་དང་ལྷན་ཅིག་འགྲོགས་པའི་སུམ་ཆ་རྗེས་སུ་བསྒྲུབ་ཅིང་དགེ་སློང་མ་དང་བྲལ་བ་ལ་རྗེས་སུ་བསྒྲུབ་པར་འགྱུར་ཏེ། གཉིས་པོ་ནི་རྗེས་སུ་མ་གྲུབ་པར་འགྱུར་རོ། །དེ་བས་ན་འདིར་སྦོམ་པོ་ཆ་གཅིག་རྗེས་སུ་བསྒྲུབ་པ་ལ་ཁ་ན་མ་ཐོ་བ་ཆུང་བར་འགྱུར་བ་ཞེས་བྱ་བའི་དོན་ཏོ། །མི་འདོད་བཞིན་དུ་འབྲལ་བ་ལ་ནི་ཉེས་པ་མེད་དོ་ཞེས་བྱ་བ་ལ་ཉེས་པ་མེད་དོ་ཞེས་བྱ་བ་ནི་དེ་ལྟ་བུར་གྱུར་བའི་བྲལ་བ་ལ་ལྟུང་བ་མི་སྐྱེད་དོ་ཞེས་བྱ་བའི་དོན་ཏོ། །འདིར་གཞུང་ནི། གལ་ཏེ་ཕྱི་བཞིན་དུ་འབྲང་བའི་དགེ་སྦྱོང་མ་བརྡེགས་སམ། ཤིའམ་ཉམས་སམ་ལྟུང་བར་གྱུར་ཏམ། གཞན་གྱི་ཡུལ་འཁོར་རམ་གཞན་གྱི་ཡུལ་དུ་བྲོས་པར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །མི་འདོད་པ་ལས་སྐྱེས་པ་བྲལ་བ་རྩེ་གཅིག་པ་ཉིད་དུ་འདིར་རྣམ་པར་གནས་པ་ཡིན་ནོ། །འདིར་རྒྱུ་མཚན་གཞན་ཡང་འཕྲོག་པ་དང་ཉམས་པ་ལ་ སོགས་པ ་ཡོང་པ་མ་ཡིན་ཏེ། དེ་བས་ན་དེ་སྐད་ཅེས་སྨོས་སོ། །ཁྱིམ་པའི་དངོས་པོར་གཏོགས་པ་ལ་འདིར་དགེ་སློང་མ་ཉིད་དུ་གཏོགས་པ་ལ་ཉམས་པ་ལ་ཞེས་སྨོས་
སོ། །ལྟུང་བ་ཞེས་བྱ་བ་འདིས་ནི་ལྟུང་བ་ཉིད་བསྟན་པ་ཡིན་ཏེ། ལྟུང་བ་ཞེས་བྱ་བ་ནི་ཕམ་པར་འགྱུར་བའོ། །བར་ཆད་བྱུང་བའི་དབང་ཉིད་ཀྱིས་ཀྱང་ངོ་ཞེས་བྱ་བ་ནི་དགེ་སྦྱོང་གི་ཚུལ་དང༌། ཚངས་པར་སྤྱོད་པའི་བར་ཆད་བྱུང་བའི་དབང་ཉིད་ཀྱིས་ཁྲིམས་ཟླ་དང་བྲལ་བ་ལ་ཡང་ཉེས་པ་མེད་དོ་ཞེས་བྱ་བའི་དོན་ཏོ། །དུས་དང་འབྲེལ་པ་ལས་མཐའ་ཉིད་ཀྱི་མདུན་རོལ་ནི་སྦྱོར་བ་ཉིད་དོ་ཞེས་བྱ་བ་ནི་དུས་འགའ་ཞིག་ལ་བརྟེན་པའི་བྱ་བའི་ཁྱད་པར་གང་ཞིག་བརྗོད་པ་ནི་འདི་ལྟ་སྟེ། དཔེར་ན་མཚན་མོ་དང་ཉིན་མོའི་དུས་ཀྱི་མཐའི་སྐད་ཅིག་མ་ལ་བྱ་བ་གང་འབྱུང་བ་དེ་ལ་ནི་དངོས་གཞི་ཉིད་དུ་འགྱུར་རོ། །མདུན་རོལ་དུ་ནི་དེའི་གང་ཞིག་དེ་མ་ཐག་པའི་ཚིག་ཉིད་ཀྱི་དོན་ཏོ། །དུས་ཀྱི་ཁོངས་སུ་གཏོགས་པ་ལས་གང་ཞིག་མདུན་རོལ་གྱི་དུས་སུ་བྱ་བ་གང་ཡིན་པ་དེ་ལ་ནི་སྦྱར་བ་ཉིད་དོ། །མཐའི་དུས་སུ་གྱུར་པ་ཉིད་ལ་བྱ་བ་གང་ཡིན་པ་དེ་ལ་ནི་དངོས་གཞི་ཉིད་ཡིན་ནོ། །དེ་གང་ལ་ཤེས་ཤེ་ན། དེའི་ཕྱིར་དབྱར་ཁང་དང་བྲལ་བར་གྱུར་ཅིང་གཞན་དུ་མཚན་མོ་སྐྱ་རེངས་འཆར་བར་བྱེད་ནའོ་ཞེས་གསུངས་པ་ལ་སྟེ། དགེ་སློང་མ་གཅིག་པུ་དབྱར་ཁང་གི་ཕྱི་རོལ་གཞན་དུ་མཚན་མོ་སྐྱ་རེངས་འཆར་བར་བྱེད་ན་ཐམས་ཅད་དུ་དགེ་འདུན་ལྷག་མར་འགྱུར་རོ་ཞེས་གསུངས་པ་དེ་གཉིས་ཀྱིས་ནི་འདིར་ཉིན་མོ་འབྲལ་བ་དང༌། མཚན་མོ་འབྲལ་བ་གཉིས་བསྟན་ཏོ། །འདིར་མཐར་ཙམ་ལ་དངོས་གཞིར་གསུངས་པས་དེའི་ཕྱིར། མདུན་རོལ་གྱི་དུས་ལ་ནི་སྦྱོར་བ་ཉིད་ཁོ་ནར་སྦྱར་ཏེ། དེ་བས་འདི་ལྟར་ཉེ་བར་འབྲེལ་པའོ། །ཉི་མ་ནུབ་པའི་མཐའ་ནི་ཉིན་མོའི་མཐའ་ཡིན་ནོ་ཞེས་བྱ་བ་ནི། ཉི་མ་ནུབ་ཀར་འཇུག་པའི་མཐའ་ནི་ཉིན་མོའི་མཐའོ། །དེ་ཕན་ཆད་ནི་མཚན་མོར་གཏོགས་པའི་ཁ་ན་མ་ཐོ་བར་འགྱུར་རོ་ཞེས་བྱ་བའི་དོན་ཏོ། །འོག་མ་བཞི་པོ་དག་གི་ཐུན་མོང་གི་མཚན་ཉིད་བཤད་ཟིན་ཏོ། །ད་ནི་སོ་སོར་རྟོགས་པ་བརྗོད་པར་བྱ་སྟེ། གང་ལ་མཚན་མོ་འབྲལ་བའི་དགེ་འདུན་ལྷག་མར་འགྱུར་རོ་ཞེ་ན། དེའི་ཕྱིར་མཚན་མོ་དབྱར་ཁང་ལས་ཕྱི་རོལ་དུ་གྱུར་པའོ་ཞེས་བྱ་བ་སྨོས་ཏེ། འདིར་དབྱར་ཁང་ན་གནས་པ་ནི་གནས་ཉིད་ཀྱི་ཉེ་བར་མཚོན་པ་ཡིན་ཏེ།
ཁྱིམ་གྱི་ནང་དུ་ཡང་འདིར་གནས་པ་ཉིད་དུ་བརྟེན་ པ་འཕེན་པའོ། །གྲོང་དང་སྐྱེད་མོས་ཚལ་ལ་སོགས ་པའི་ཕྱི་རོལ་གྱི་གནས་ལ་བསྙེགས་པའོ། །དགོན་པ་ལ་ཡང་དོན་དང་བཅས་པའི་ས་ཕྱོགས་ཀྱི་ཕྱོགས་གཅིག་ལ་ སོགས་པ ་ཡང་བསྙེགས་པའོ། །བུད་མེད་འཇུག་པ་ལ་ཡང་འདི་རྣམ་པར་སྦྱོར་བ་གང་ཞིག་དེ་ལ་ སོགས་པ ་ངེས་པ་བཞི་པོ་རྣམས་སོ། །དེ་བས་ན་འདིར་ཕྱི་རོལ་གྱི་ངོས་ནི་དབྱར་ཁང་གི་མཚམས་སོ། །གལ་ཏེ་འདི་ལ་སྐོར་བ་ཡོད་ན་ནི་དེ་ཉིད་ལའོ། །གལ་ཏེ་མེད་ན་ནི་དེ་ཉིད་ལའོ། །མཚན་མོ་འབྲལ་བའི་དགེ་འདུན་ལྷག་མའོ། །གང་ལ་ཉིན་མོ་བྲལ་བའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་ཉིན་མོའི་ཞེས་བྱ་བ་སྨོས་ཏེ། དབྱར་ཁང་ལ་ཕྱི་རོལ་དུ་གྱུར་ནའོ་ཞེས་བྱ་བར་སྦྱོར་རོ། །གཅིག་པུ་ཉེ་དུའི་ཁྱིམ་དུ་ཟན་གྱི་ཕྱིར་ལོ་ཉེས་བྱུང་བའི་ཕྱིར་ཉེ་དུ་རྣམས་དང་ལྷན་ཅིག་འབྲེལ་པའི་ཉེ་བར་སྤྱོད་པའི་གནང་བ་ཐོབ་ན་འགྲོ་བར་བྱའོ་ཞེས་བྱ་བ་ནི་གླེང་གཞི་དག་ལས། ཉེ་དུ་རྣམས་ཀྱི་ལུས་དང་ལྷན་ཅིག་འབྲེལ་པའི་ཉེ་བར་སྤྱོད་པ་གནང་བ་ཐོབ་ནའོ། །དེའི་དོན་དུ་འགྲོ་བ་ན་དགེ་སློང་མའི་དགེ་འདུན་ལས་ཐོབ་པར་གྱུར་ན་དགེ་སློང་མ་གཅིག་པུ་གཉེན་འདུན་གྱི་ཁྱིམ་རྣམས་སུ་བཟའ་བའི་ཕྱིར་འགྲོ་བར་བྱའོ། །ཅི་དུས་ཐམས་ཅད་དུའམ་ཞེ་ན། མ་ཡིན་ཏེ། དེའི་ཕྱིར་ལོ་ཉེས་བྱུང་བའི་ཚེའོ། །དེ་སྦྱིན་པར་བྱའོ་ཞེས་བྱ་བ་སྨོས་ཏེ། ལོ་ཉེས་བྱུང་བའི་ཚེ་ཉེ་དུ་རྣམས་དང་ལྷན་ཅིག་འབྲེལ་བར་ཉེ་བར་སྤྱོད་པ་གནང་བའོ། །ཉིན་མོ་འབྲལ་བའི་དགེ་འདུན་ལྷག་མའོ། །གང་ལ་ལམ་དུ་འཇུག་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་ལམ་དུ་འཇུག་པ་ལའོ་ཞེས་བྱ་བ་སྨོས་ཏེ། དེའི་ཕྱིར་གྲོང་གི་ཉེ་འཁོར་ལས་འདས་ན་ལམ་དུ་ཞུགས་པ་ཡིན་ནོ། །འདིར་གྲོང་མེད་པ་ཉིད་ལ་ཁྱིམ་གྱི་གནས་ནི་གྲོང་ཉིད་དོ། །དོན་དང་བཅས་ པ་ཉིད་ལ་གྲོང་ལ་སོགས ་པའི་ཉེ་འཁོར་དང་བཅས་པ་ལ་ཆོས་གོས་དང་བྲལ་བའི་སྐབས་སུ་ཇི་སྐད་བསྟན་པ་རྣམས་ཐམས་ཅད་འདིར་ཡང་དེ་བཞིན་དུ་གཟུང་བར་བྱའོ། །སྐྱེད་མོས་ཚལ་དང་ལྷའི་གནས་དང་ཚོགས་པའི་ནང་ལ་ སོགས་པ ་ནི་མ་གཏོགས་ཏེ། གལ་ཏེ་སྐྱེད་མོས་ཚལ་ལ་ སོགས་པ ་གྲོང་གི་ཉེ་འཁོར་དང་འབྲེལ་ པ་ཡིན་ན། དེ་ཡང་གྲོང་ལ་སོགས ་པས་བསྐོར་བ་ཉེ་འཁོར་
ཉིད་ཡིན་ཏེ། ཐག་རིང་པོས་བར་དུ་ཆོད་པ་ལ་ཉེ་བར་སྤྱོད་པ་ཉིད་དོ། །སྦོམ་དགའ་མོ་གཅིག་པུ་གྲོང་ཁྱེར་ཆེན་པོ་དྲུག་པོ་དག་ཏུ་འཕྱེན་པའི་གླེང་གཞི་དེ་ལས་བསླབ་པའི་གཞི་འདི་བཅས་སོ། །ལམ་དུ་འཇུག་པའི་དགེ་འདུན་ལྷག་མའོ། །གང་ལ་ཆུ་རྒལ་བའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་ཆུ་ཀླུང་གི་ཕ་རོལ་དུ་རྒལ་བ་ལའོ་ཞེས་བྱ་བ་སྨོས་ཏེ། ལམ་དུ་འགྲོ་བ་ལ་ཁ་ན་མ་ཐོ་བ་འདི་ཡིན་ནོ། །དེ་ལྟ་བས་ན་གྲུ་ཚུགས་ཙམ་ལས་འདས་ན་ཁ་ན་མ་ཐོ་བ་འདི་ཡོངས་སུ་རྫོགས་པར་འགྱུར་རོ། །རྒྱུན་ཕྱོགས་སམ་རྒྱུན་ལས་བཟློག་ཕྱོགས་སུ་འགྲོ་ན། འདིར་ཕ་རོལ་དུ་ཞེས་བརྗོད་པ་ནི་དཔེ་ཙམ་དུ་རྟོགས་པར་བྱའོ། །ལག་རྐྱལ་དག་གིས་ཕ་རོལ་དུ་ཕྱིན་ནའོ་ཞེས་བྱ་བ་ནི་ཆུ་ཀླུང་གི་ཕ་རོལ་དུ་རྒལ་བ་ལ་གྲུ་ཚུགས་ཙམ་ལས་འདའ་བར་བྱེད་ན་དགེ་འདུན་ལྷག་མའི་ལྟུང་བ་འདིའི་ཕ་རོལ་ཏུ་ཕྱིན་ན་ཞེས་བྱ་བའི་དོན་ཏོ། །ལག་པ་གཉིས་ཀྱིས་ལག་རྐྱལ་དག་གིས་རྒལ་བ་ནི་ཕ་རོལ་དུ་སོན་པ་ཁོ་ན་ལ་ནི་དངོས་གཞི་རྣམ་པར་གཞག་པའོ། །མདུན་རོལ་དུ་ནི་སྦོམ་པོ་ཞེས་བྱ་བ་ནི་གཅིག་པུ་ལག་རྐྱལ་དག་གིས་ཆུ་ཀླུང་གི་ཕ་རོལ་དུ་འགྲོ་བ་ན་ཕ་རོལ་དུ་ཕྱིན་པའི་མདུན་རོལ་དུ་ནི་སྦོམ་པོའོ་ཞེས་བྱ་བའི་དོན་ཏོ། །ཡུན་ཕྲན་ཕ་རོལ་དུ་ནི་ཉེས་བྱས་སོ་ཞེས་བྱ་བ་ནི་ཕྱིན་ན་ཞེས་བྱ་བར་སྦྱར་རོ། །ཡུལ་ཕྲན་ཞེས་བྱ་བ་ནི། གང་ཞིག་མཆོངས་པས་རྒལ་བར་ནུས་པས་ཏེ། དེ་ལ་ཡུར་ཕྲན་ཉིད་དུ་མངོན་པར་བརྟེན་པ་ཉིད་དུ་རྣམ་པར་གནས་པ་ཡིན་ནོ། །རྒྱུན་ལྷག་མ་རྣམས་ལ་ནི་སྔ་མ་བཞིན་ཅི་རིགས་པར་སྦྱར་རོ། །ཆུ་རྒལ་བའི་དགེ་འདུན་ལྷག་མའོ། །གང་ལ་རབ་ཏུ་འབྱིན་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་རབ་ཏུ་འབྱིན་པ་ལའོ་ཞེས་བྱ་བ་སྨོས་ཏེ། འདིར་རབ་ཏུ་བྱུང་བ་འདི་པ་དང་སྐལ་བ་མཉམ་པ་ཉིད་དུ་བྱེད་ པ་གཙོ་བོ་ཡིན་ནོ། །དེ་བས་ན་གལ་ཏེ་དང་པོ་ཁོ་ནར་དགེ་ཚུལ་མ་ལ་སོགས ་པའི་དངོས་པོར་བྱེད་ན་ཡང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །འདིར་ཉེ་བར་སྡུད་པ་ལ་ སོགས་པ ་ནི་འདིར་སྦྱོར་བའི་སྦྱོར་བ་ཉིད་དེ་ཉེས་བྱས་སོ། །ཞུ་བ་ལ་ སོགས་པ ་ནི་འདིར་སྦྱོར་བ་ཉིད་དེ་སྦོམ་པོ་ཞེས་རྣམ་པར་གནས་པ་ཡིན་ནོ། །གང་ཞིག་ཅེ་ན། དེའི་ཕྱིར་ཚོགས་པ་ཡིད་མཐུན་པ་བདག་པོས་ཡོངས་སུ་བཏང་བ་རྒྱལ་པོས་རྗེས་སུ་གནང་བའོ་ཞེས་བྱ་བ་སྨོས་ཏེ། བུད་མེད་དུ་
འགྱུར་བའི་གང་ཟག་གང་ལ་ཚོགས་པའི་ཡིད་མཐུན་པ་ཉིད་དང་བདག་པོས་ཡོངས་སུ་བཏང་བ་ཉིད་དང༌། རྒྱལ་པོས་རྗེས་སུ་གནང་བ་ཉིད་ཀྱི་ཆོས་གསུམ་པོ་དེ་དག་ཡོད་པའི་བུད་མེད་དེ་ལྟ་བུ་ལ་ཞེས་བྱ་བའི་དོན་ཏོ། །ཡན་ལག་དེ་དག་ལས་གཅིག་ཡོད་ན་ནི་སྦོམ་པོ་ཁོ་ནར་འགྱུར་བར་རིག་པར་བྱའོ། །དོན་གང་ལ་ཚོགས་པ་ཡིད་མཐུན་པ་ཉིད་ལ་ སོགས་པ ་དག་ཅི་ཞིག་གི་ཕྱིར་ཞེ་ན། དེའི་ཕྱིར་གསད་པའི་ཕྱིར་རོ་ཞེས་བྱ་བ་སྨོས་སོ། །སྦྱོར་བ་གང་གིས་རབ་ཏུ་འབྱིན་ཞེ་ན། དེའི་ཕྱིར་མཁན་མོ་ཉིད་ཀྱིས་སོ་ཞེས་བྱ་བ་སྨོས་ཏེ། འདིར་གཞན་དེ་ལ་སྦྱོར་བ་དེ་ལ་ཉེས་བྱས་སུ་མཐོང་བ་ཡིན་ནོ། །ཅི་ལྟ་བུ་ཞིག་གིས་རབ་ཏུ་བྱུང་བ་ཡིན་ཞེ་ན། དེའི་ཕྱིར་དེ་ཤེས་པ་ཉིད་ཀྱིས་སོ་ཞེས་བྱ་བ་སྨོས་ཏེ། ཚོགས་པ་ཞེས་བྱ་བ་ལ་ སོགས་པ ་གསུམ་ཉིད་དུ་རྣམ་པར་གཞག་པ་ལ་དེ་ལས་འདའ་བར་བྱེད་པ་ཉིད་དུ་རྣམ་པར་གནས་པ་ཡིན་ནོ། །གླེང་གཞི་ནི་སྡེ་བྱེད་ཀྱི་བུ་མོ་མཻ་ན་ཀ་ཞེས་བྱ་བ་སྐྱེས་པ་གཞན་རྣམས་ཀྱིས་ལོངས་སྤྱད་པར་བྱེད་དེ། བུད་མེད་འདི་གསད་པའི་ཕྱིར་ཚོགས་པ་ཡིད་མཐུན་པ་དང༌། བདག་པོས་ཡོངས་སུ་བཏང་བ་དང༌། རྒྱལ་པོས་རྗེས་སུ་གནང་བའི་གཞི་དེ་དག་ཤེས་པ་ཉིད་ཀྱིས་སོ་ཞེས་གསུངས་པ་ཡིན་ནོ། །རབ་ཏུ་འབྱིན་པའི་དགེ་འདུན་ལྷག་མའོ། །གང་ལ་ནོར་ལེན་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་ཤི་བའི་ནོར་ལེན་པ་ལའོ་ཞེས་བྱ་བ་སྨོས་ཏེ། ཐོ་འཚམས་པའི་བློ་འདི་སོ་སོར་གནས་པ་ཡིན་ཏེ། འདི་ནི་བུད་མེད་རྣམས་ལ་ཚེགས་དང་བཅས་པ་དེ་བས་ན་འདི་ནི་ཁ་ན་མ་ཐོ་བར་འགྱུར་རོ། །ཤི་བའི་ནོར་དེད་པ་ཁོ་ན་ལ་སྟེ། ཐོབ་པའི་དུས་འབའ་ཞིག་ཏུ་ནི་མ་ཟད་དོ། །དེད་པའི་དུས་དེ་ནི་ཐོ་འཚམས་པ་སྟེ། དེ་བས་ན་ཤི་བའི་ཞེས་སྨོས་པ་ནི་འདིར་ནོར་གྱི་བདག་པོ་མེད་པ་གཙོ་བོ་ཡིན་ཏེ། བདག་པོ་དང་བཅས་པ་ཉིད་ལ་ལེན་པ་དེ་དང་འདྲ་བ་ཉིད་ཀྱིས་སྦོམ་པོར་རྣམ་པར་གནས་པ་ཡིན་ནོ། །གཞན་ལེན་དུ་བཅུག་ན་ནི་འདིར་ན་སྨད་པའོ། །དགེ་འདུན་ལ་ཡང་རྙེད་པ་རྣམ་པ་འདི་ལྟ་བུར་འགྱུར་རམ་ཞེ་ན། དེ་དམིགས་ཀྱིས་བསལ་བའི་ཕྱིར་དགེ་འདུན་གྱི་ལ་ནི་ལྟུང་བ་མེད་དོ་ཞེས་བྱ་བ་སྨོས་ཏེ། དགེ་འདུན་གྱིས་ཐོབ་པ་ནི་དགེ་འདུན་གྱིས་ཏེ། ཤི་བའི་ནོར་དེ་ལེན་པ་ལ་ནི་ལྟུང་བ་མེད་དོ། །ཅི་རྣམ་པ་ཐམས་ཅད་དུའམ་ཞེ་ན། དེའི་ཕྱིར་གལ་ཏེ་ཚེགས་ཆུང་དུས་ནའོ་ཞེས་
སྨོས་ཏེ། དེ་དེད་ཅིང་ལེན་པ་ལ་ལྟུང་བ་མེད་ཅེས་བྱ་བའི་དོན་ཏོ། །འདིར་ཚེགས་ཆུང་དུས་ཞེས་བྱ་བ་ནི་ཆོས་གོས་ཀྱི་རིན་ཆུང་བ་མ་ཡིན་པ་བཀུར་བ་ཞེས་བྱ་བ་ལ་ སོགས་པ ་ལྟ་བུ་རིགས་པ་ལས་མི་འདའ་བར་རིག་པར་བྱའོ། །གཞན་དུ་ན་གལ་ཏེ་ཚེགས་དང་བཅས་ཤིང་རང་གི་དོན་དང་བཅས་པ་ཉིད་དུ་ལེན་ན་ནི་དགེ་འདུན་གྱི་ལྷག་མའོ། །གཞན་གྱི་དོན་ཉིད་ཙམ་དུ་ཟད་ཀྱི་མངོན་པར་མི་འདོད་པ་ཉིད་ལ་རང་གི་ཆ་དང་འབྲེལ་པའི་བསམ་པ་མེད་པ་ཉིད་ལ་ནི་སྦོམ་པོར་རྣམ་པར་གནས་པ་ཡིན་ནོ། །ཤི་བའི་ནོར་ལེན་པའི་དགེ་འདུན་ལྷག་མའོ། །གང་ལ་བཟོད་པ་གསོལ་དུ་འཇུག་པའི་དགེ་འདུན་གྱི་ལྷག་མར་འགྱུར་ཞེ་ན། དེའི་ཕྱིར་མཚམས་ཀྱི་ཕྱི་རོལ་དུ་བཟོད་པ་གསོལ་དུ་འཇུག་པ་ལའོ་ཞེས་བྱ་བ་སྨོས་ཏེ། བསྡིགས་ པ་ལ་སོགས ་པའི་ཆད་པའི་ལས་ལ་རྣམ་པར་གཞག་པའི་དགེ་སློང་མ་མཚམས་ཀྱི་ཕྱི་རོལ་དུ་བཟོད་པ་གསོལ་དུ་འཇུག་ནའོ་ཞེས་བྱ་བའི་དོན་ཏོ། །འདིར་མཚམས་ཀྱི་ནང་དུ་བཟོད་པར་གསོལ་དུ་འཇུག་པ་ལ་ནི་སྡིག་ཤིན་ཏུ་ཆེ་བར་སྣང་སྟེ། དེ་བས་ན་དགེ་འདུན་ནམ་ཆད་པའི་ལས་བྱེད་པ་པོ་རྣམས་མེད་པ་ན་དེ་ལ་འདི་གཙོ་བོ་ཆེ་བ་ཡིན་ནོ། །འདི་ལྟར་དེ་ནི་དབྱེན་གྱི་རྣམ་པར་ཚོགས་པ་མི་འཇིག་པར་འགྱུར་བའོ། །བུད་མེད་རྣམས་ཀྱི་བསྒྲུབ་པ་ལ་ནི་སྟོབས་དང་ལྡན་པ་སྟེ། དེ་བཞིན་དུ་མཐུན་པ་འབྱེད་པར་འགྱུར་བ་ནི་ཤིན་ཏུ་ཡང་སྨད་པར་བྱ་བས་ན། འདི་རྣམས་ཤིན་ཏུ་སྤྱི་བརྟོལ་ཆེ་བ་ཡིན་པས། དེའི་ཕྱིར་ཁ་ན་མ་ཐོ་བར་འགྱུར་བའོ། །ཡང་དགེ་སློང་བ་གང་ཞིག་དགེ་སློང་མ་གང་ལ་དགེ་སློང་མའི་དགེ་འདུན་མཐུན་པས་གནས་ནས་དབྱུང་བར་བྱ་བའི་ལས་བྱས་པར་ཤེས་བཞིན་དུ་དེ་མཚམས་ཀྱི་ཕྱི་རོལ་དུ་ཁྲིད་དེ་བཟོད་པར་བྱེད་ན། དགེ་འདུན་ལྷག་མའི་ལྟུང་བར་འགྱུར་རོ། །དེའི་ཕྱིར་འདིར་གནས་ནས་དབྱུང་བའི་ལས་ཞེས་སྨོས་པ་ནི་ཆད་པའི་ལས་དག་གི་དཔེ་ཙམ་དུ་ཟད་དོ། །དེ་བས་ན་དེ་ཉིད་སྐྱེད་པའི་དབང་གིས་རྣམ་པར་གནས་པ་ཡིན་ནོ། །གཞན་དུ་ན་ཆད་པའི་ལས་བྱས་པར་འཇུག་པ་འདི་ཉམས་པ་ཉིད་ཀྱི་ཕྱིར་འདིར་གནས་ནས་དབྱུང་བར་བྱ་བའི་ལས་བྱེ་བྲག་ཏུ་མ་སྨོས་སོ། །བཟོད་པ་གསོལ་དུ་འཇུག་པའི་དགེ་འདུན་ལྷག་མའོ། །གང་ལ་སྤོང་བའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་དཀོན་མཆོག་གཏོང་ངོ༌། །འདི་དང་མཚུངས་པ་ཉིད་ཀྱི་དགེ་སློང་གཞན་དག་
ཀྱང་ཡོད་ཀྱི། དེ་དག་ལ་ཚངས་པར་སྤྱད་པ་ཉིད་སྤྱོད་དོ་ཞེས་བྱ་བའི་ཚིག་དེ་ལ་ཞུགས་པ་མི་གཏོང་བ་ལའོ་ཞེས་བྱ་བ་སྨོས་ཏེ། དཀོན་མཆོག་གཏོང་ངོ་ཞེས་བྱ་བ་ནི་གཞན་མུ་སྟེགས་ཅན་ལས་རབ་ཏུ་བྱུང་བའི་དགེ་སློང་མ་ནག་མོ་ཞེས་བྱ་བ་དགེ་སློང་མ་རྣམས་དང་ལྷན་ཅིག་འཐབ་ཀྲོལ་བྱེད་ཅིང་སངས་རྒྱས་གཏོང་ངོ༌། །ཆོས་གཏོང་ངོ༌། །དགེ་འདུན་གཏོང་ངོ་ཞེས་ཟེར་བ་དེ་ཉིད་ཡིན་ནོ། །དེ་བས་ན་འདི་དང་མཚུངས་པ་ཉིད་ཀྱིས་ཞེས་སྨོས་པ་ཡིན་ནོ། །དགེ་སྦྱོང་གཞན་དག་ཀྱང་ཡོད་ཀྱི་ཞེས་བྱ་བ་ནི་ཤཱཀྱའི་བུའི་དགེ་སྦྱོང་དག་ཉིད། ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དེས་པ། དགེ་བའི་ཆོས་ཅན་མ་ཡིན་གྱི། དགེ་སྦྱོང་དང༌། བྲམ་ཟེ་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་དེས་པ། དགེ་བའི་ཆོས་ཅན་གཞན་དག་ཀྱང་ཡོད་ཀྱི་ཞེས་ཟེར་བ་ཡིན་ནོ། །དེ་དག་ལ་ཚངས་པར་སྤྱད་པ་ཉིད་སྤྱོད་དོ་ཞེས་བྱ་བ་ལ་དེ་དག་ལ་ཞེས་བྱ་བ་ནི་དགེ་སྦྱོང་དང་བྲམ་ཟེ་གཞན་དེ་དག་ལའོ། །ཚངས་པར་སྤྱད་པའི་དངོས་པོ་ཉིད་ཚངས་པར་སྤྱད་པ་ཉིད་སྤྱད་པ་སྟེ། དེ་དག་གི་དྲུང་དུ་ཚངས་པར་སྤྱད་པ་ཉིད་སྤྱད་དོ་ཞེས་ཟེར་བ་དེ་བསྡུ་བའོ། །གང་ཡང་རུང་བ་སྨོས་པ་ལ་དེ་དག་ཐམས་ཅད་སྨོས་པར་འགྱུར་ཞེས་བྱ་བ་ཕྱོགས་གཅིག་རུ་སྨོས་པ་འདི་ལ་ཡང་དངོས་གཞིའི་ལྟུང་བ་བྱེད་པ་པོ་ཉིད་དོ། །ཚིག་དེ་ལ་ཞུགས་པ་གང་ཡིན་པ་དེ་ནི་མིག་གཏོང་བ་ལ་ཁ་ན་མ་ཐོ་བ་འདིར་འགྱུར་རོ། །ཇི་ལྟར་མི་གཏོང་ཞེ་ན། དེའི་ཕྱིར་དགེ་འདུན་གྱི་དབྱེ་ན་ལ་ཞུགས་པ་ལྟར་རོ་ཞེས་བྱ་བ་སྨོས་ཏེ། ཇི་ལྟར་དེ་ལ་སྦྱོར་བའི་ལྟུང་བ་རྣམས་དངོས་གཞིར་འགྱུར་བ་ལྟར་འདི་ལ་ཡང་དེ་བཞིན་ནོ་ཞེས་བྱ་བ་འདི་ལ་འདའ་བར་བྱེད་པ་ཉིད་ཀྱིས་བསྟན་པར་རིག་པར་བྱའོ། །འོག་མ་དག་ལ་ཡང་ངོ་ཞེས་བྱ་བ་ནི་འདི་ནས་བརྩམས་ཏེ། འོག་མའི་འཇུག་པ་རྣམས་ལས་དགེ་འདུན་གྱི་དབྱེན་ལ་ཞུགས་པ་ལྟར་མི་གཏོང་བ་ལ་དགེ་འདུན་གྱི་ལྷག་མར་འགྱུར་རོ། །སྤོང་བའི་དགེ་འདུན་ལྷག་མའོ། །གང་ལ་འཐབ་ཀྲོལ་བྱེད་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་དགེ་སློང་མ་རྣམས་ལ་འདུན་ པ་ལ་སོགས ་པས་འགྲོ་བ་ཉིད་དུ་རྗེས་སུ་སྦྱོར་བ་ལའོ་ཞེས་བྱ་བ་སྨོས་ཏེ། མི་གཏོང་བ་ལའོ་ཞེས་བྱ་བ་ལ་ སོགས་པ ་སྔར་བསྟན་པའོ། །སོགས་པའི་སྒྲས་ནི་ཞེ་སྡང་དང་གཏི་མུག་དང་འཇིགས་པས་འགྲོ་བ་ཞེས་བྱ་བ་དག་ཀྱང་བསྡུས་པ་སྟེ། དེ་དག་གིས་ཁྱིམ་
སུན་འབྱིན་པའི་དགེ་འདུན་ལྷག་མའི་རྗེས་སུ་འབྲངས་པས་ཤེས་པར་བྱའོ། །ཤིན་ཏུ་ངོ་ཚ་བ་དང་བྲལ་བར་གྱུར་པའི་བུད་མེད་ཀྱི་ཚོགས་ཀྱི་མདུན་དུ་འདིར་འདི་རྒུད་པ་ཆེན་པོ་ཡིན་ཏེ། ཁྱད་པར་གྱི་མཐར་ཐུག་པའོ། །འདི་ལས་ལྡོག་པ་དང་མི་འདོད་པ་དང་ཉེ་བར་ཕྲད་པས། ཉེ་བར་གནས་པ་གང་ཡིན་པ་དེ་ལ་དགེ་འདུན་སྨྲ་བར་བྱེད་པའི་མི་གཏོང་བ་དེ་བས་འདི་ཁ་ན་མ་ཐོ་བའོ། །དོན་གང་ལ་འདུན་ པ་ལ་སོགས ་པས་འགྲོ་བ་ཉིད་ལ་ཞེ་ན། དེའི་ཕྱིར་དགེ་སློང་མ་རྣམས་དང་ལྷན་ཅིག་འཐབ་ཀྲོལ་དང་མཚང་འབྲུ་བ་དང༌། རྩོད་པ་དང་འགྱེད་པ་བཟློག་པ་ལའོ་ཞེས་བྱ་བ་སྨོས་ཏེ། འཐབ་ཀྲོལ་ཞེས་བྱ་བ་ནི་རྩུབ་མོ་སྨྲ་བ་དང་ཕྱིར་སྨྲ་བའོ། །མཚང་འབྲུ་བ་ཞེས་བྱ་བ་ནི་རྩུབ་ཀྱང་རུང་འཇམ་པོ་ཡང་རུང་བའི་ཚིག་གི་བྱ་བས་ཅོ་འདྲི་བའོ། །རྩོད་པ་ཞེས་བྱ་བ་ནི་ཁོན་དུ་འཛིན་ཅིང་གནས་པའོ། །འགྱེད་པ་ཞེས་བྱ་བ་ནི་ཤགས་འགྱེད་པའོ། །གང་དང་ལྷན་ཅིག་འཐབ་ཀྲོལ་ལ་ སོགས་པ ་བྱེད་པ་ལ་ཞེ་ན། དེའི་ཕྱིར་དགེ་སློང་མ་རྣམས་དང་ཞེས་བྱ་བ་སྨོས་ཏེ། འདིར་དགེ་སློང་དང་ལྷན་ཅིག་ལྕི་བའི་ཆོས་ཀྱི་ཁ་ན་མ་ཐོ་བར་རིག་པར་བྱའོ། །གང་ཟག་གཞན་དང་ལྷན་ཅིག་ཏུ་འཐབ་རྩོད་ལ་ སོགས་པ ་བྱེད་པ་ལ་ནི་ཉེས་བྱས་སོ། །འཐབ་ཀྲོལ་བྱེད་པའི་དགེ་འདུན་ལྷག་མའོ།། གང་ལ་བུད་མེད་དང་བསྟེན་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་སྡེ་ཞིང་གནས་པ་ལའོ་ཞེས་བྱ་བ་སྨོས་ཏེ། མི་གཏོང་བ་ལའོ་ཞེས་བྱ་བ་དང༌། དགེ་འདུན་གྱི་དབྱེན་ལ་ཞུགས་པ་ལྟར་རོ་ཞེས་བྱ་བའི་རྗེས་སུ་སྦྱར་རོ། །སུ་དང་སྡེ་ཞིང་གནས་པ་ལ་ཞེ་ན། དེའི་ཕྱིར་དགེ་སློང་མ་དང་པོ་ཞེས་བྱ་བ་སྨོས་ཏེ། ལྷན་ཅིག་ཅེས་བྱ་བ་བདག་ཏུ་བྱ་བས་རྟོགས་པར་བྱའོ། །གླེང་གཞིའི་དབང་གིས་དགེ་སློང་མ་དང་ཞེས་གསུངས་པར་ཟད་ཀྱི་ཁྱིམ་པ་མོ་དང་མུ་སྟེགས་ཅན་མོ་དང་དགེ་ཚུལ་མ་དང་དགེ་སློབ་མ་དང་ལྷན་ཅིག་སྡེ་ཞིང་གནས་པ་ནི་ཤིན་ཏུ་སྡིག་ཆེ་བའི་ཕྱིར་སྨོས་པ་ཡིན་ནོ། །ཁྱིམ་པ་མོ་དང་མུ་སྟེགས་ཅན་མོ་དག་ལ་འདིར་སྡུག་བསྔལ་བ་དོན་འདིར་དགེ་སློང་མ་སྡེ་ཞིང་གནས་པ་ཞེས་བྱ་བ་འབྱུང་བར་དགའ་བ་ཉིད་ཀྱི་ཕྱིར་ཡང་མི་བསྟན་པའོ། །སྐྱེས་པ་དང་ལྷན་ཅིག་སྡེ་ཞིང་གནས་པ་ལ་ཕམ་པའི་སྦྱོར་བ་ཉིད་དུ་རིག་པར་བྱའོ། །རྣམ་པ་ཇི་ལྟར་སྡེ་ཞིང་གནས་པ་ལ་ཞེ་ན། དེའི་ཕྱིར་གཞོགས་སྟེགས་དང་
འཕྱར་གཡེང་དང་རྩབ་ཧྲལ་གྱི་རྒྱུར་འགྱུར་བ་དག་གིས་སོ་ཞེས་བྱ་བ་སྨོས་ཏེ། འདིར་གཞོགས་སྟེགས་ལ་ སོགས་པ ་རྣམས་ཀྱི་དོན་ཐོ་འཚམས་པ་དང་ཀུན་དུ་རྩེ་བ་དང༌། ཀུན་དུ་ཅ་ཅོ་འདོན་པ་རྣམ་གྲངས་ཇི་ལྟ་བ་བཞིན་དུ་དོན་བརྗོད་པའོ། །ཆགས་དང་བཅས་པ་ཐམས་ཅད་ལ་འདུ་འཛིའི་སྐྱོན་ལ་འདིས་བསྡུས་པ་ཉིད་དུ་རིག་པར་བྱའོ། །མཚན་ཉིད་ཇི་ལྟ་བར་ཡང་འདིར་ལྟུང་བ་ཞན་རྣམས་སྐྱེས་པའོ། །བུད་མེད་དང་བསྟེན་པའི་དགེ་འདུན་ལྷག་མའོ། །གང་ལ་བུད་མེད་དང་བསྟེན་དུ་འཇུག་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་སྡེ་པ་དེ་ཡང་དག་པར་འཛིན་དུ་འཇུག་པ་ལའོ་ཞེས་བྱ་བ་སྨོས་ཏེ། གཞོགས་སྟེགས་ལ་ སོགས་པའི་རྒྱུར་འགྱུར་བའི་རྒྱུན་སྔར་བསྟན་མ་ཐག་པ ་དག་གིས་དགེ་སློང་མ་དང་ལྷན་ཅིག་སྡེ་པ་དེ་ཡང་དག་པར་འཛིན་དུ་འཇུག་པ་ལ་མི་གཏོང་བ་ལའོ་ཞེས་བྱ་བ་དང་དགེ་འདུན་གྱི་དབྱེན་ལ་ཞུགས་པ་ལྟར་རོ་ཞེས་བྱ་བར་སྦྱར་རོ། །ཡང་དག་པར་འཛིན་དུ་འཇུག་པའི་དགེ་འདུན་ལྷག་མའོ། །གང་ལ་དགེ་འདུན་གྱི་དབྱེན་ལ་ སོགས་པའི་དགེ་འདུན་གྱི་ལྷག་མ་བཞི་པོར་འགྱུར་ཞེ་ན། དེའི་ཕྱིར་དགེ་འདུན་འབྱེད་པ ་ལ་ སོགས་པ ་བཞི་པ་ནི་དགེ་སློང་མའི་སྐབས་ལས་སོ་ཞེས་བྱ་བ་སྨོས་ཏེ། དགེ་སློང་མའི་དགེ་འདུན་འབྱེད་པའི་དགེ་སློང་མའི་རྗེས་སུ་འཇུག་པས་དགེ་སློང་མ་རྣམས་ལ་ལོག་པའི་འཇུག་པ་རྗེས་སུ་སྦྱར་བས་དགེ་སློང་མ་རྣམས་ལ་མི་སྨྲ་བ་ཉིད་དུ་བྱེད་པས་མི་གཏོང་བ་ལ་དགེ་འདུན་འབྱེད་པ་ལ་ཞུགས་པ་ལྟར་ཞེས་བྱ་བའི་དོན་ཏོ། །དགེ་སློང་མའི་དགེ་འདུན་ལྷག་མ་རྣམས་རྫོགས་སོ།། །།སྡོམ་གྱི་ཚིགས་སུ་བཅད་པ་དང་པོ་ལས། འཆང་བ་ལ་ སོགས་པ ་ཇི་སྐད་གསུངས་པའི་རིམ་པས་སྤང་བ་རྣམས་ལ་དགེ་སློང་གི་རྣམ་པར་འབྱེད་པར་གཏོགས་པ་རྣམས་སྔར་ཇི་སྐད་བསྟན་པ་བཞིན་དུ་བལྟ་བར་བྱ་སྟེ། གསེར་དང་དངུལ་ལ་རེག་པ་དང༌། མངོན་མཚན་ཅན་གྱི་སྤྱོད་པ་དང༌། ཉོ་ཚོང་བྱེད་པ་དང༌། ལྷུང་བཟེད་ཚོལ་བ་དང༌། འཐག་ཏུ་འཇུག་པ་དང༌། འཐག་པ་བསྐྱེད་པ་དང༌། འཕྲོག་པ་དང༌། བསྔོས་པ་ལས་བསྒྱུར་བ་དང༌། སོག་འཇོག་ལས་གྱུར་པའོ་ཞེས་བྱ་བ་སྟེ། འདིར་གྱུར་པ་ཞེས་བྱ་བའི་སྒྲས་ནི་རེ་རེ་དང་སོ་སོར་སྦྱར་ཏེ། གསེར་དངུལ་ལ་རེག་པ་ལས་གྱུར་པ་ཞེས་བྱ་བའི་
བྱེ་བྲག་ནི་སྔར་གྱི་མདོ་འདི་ལ་བརྟེན་ཏེ། ཕོ་ཉིད་ལ་ནི་མོ་ཉིད་དོ། །དེ་ལ་ཕོ་ཉིད་དོ་ཞེས་བསྟན་པ་བཞིན་དུ་ཤེས་པར་བྱའོ། །བྱེ་བྲག་འདི་ནི་འཁྲུར་འཇུག་པ་ལ་ སོགས་པ ་ལ་དམིགས་ཀྱིས་བསལ་བ་བསྟན་པའི་ཕྱིར་གཞན་དུ་གསལ་བ་ཉིད་ཀྱི་དོན་དུ་བསྡུས་པ་ལ་ཆུང་བ་ཉིད་ཀྱི་ཕྱིར་བསྟན་ པ་དེ་བས་ན་ཉེ་བར་བསྟན་པར་བྱ་སྟེ། འཁྲུ་བ་ལ་སོགས ་པའི་དགེ་སློང་གིའོ་ཞེས་བྱ་བ་ནི་གང་ཞིག་དགེ་སློང་མས་དགེ་སློང་དབང་བའི་གོས་གང་ཡིན་པ་དེ་གོས་འཁྲུ་བ་ལ་ སོགས་པ ་སྤང་བའི་ལྟུང་བྱེད་དོ། །དེ་ལས་ལེན་ནའོ་ཞེས་བྱ་བ་ནི་དགེ་སློང་ལས་བླངས་ན་སྤང་བར་འགྱུར་པ་ཡིན་གྱི་དགེ་སློང་མ་ལས་ནི་མ་ཡིན་ཏེ་དགེ་སློང་ལ་ཞེས་བྱ་བའི་དོན་ཏོ། །འོ་ན་གང་ཞིག་དགེ་སློང་ལ་ཁ་ན་མ་ཐོ་བ་དེ་ཉིད་འདིར་སྨོས་ན། འདིར་འཁྲུ་བ་ལ་ སོགས་པའི་སྤང་པའི་ལྟུང་བ་ཉིད་རྟེན་ནམ་ཞེ་ན་མ་ཡིན་ཏེ། དེའི་ཕྱིར་རྣམ་པ ་བདུན་པོ་དང་པོར་སྲིན་བལ་གྱི་སྟན་བྱེད་པ་ནས་བལ་རྨེལ་དུ་འཇུག་པའི་མཐར་ཐུག་པ་དག་དང༌། བཅུ་པ་གསུམ་པ་ལས་ལྷུང་བཟེད་འཆང་བ་དང༌། བརྟད་པ་ལས་བྱུང་བ་དང༌། ཞག་བདུན་ན་འབྲལ་བ་དང༌། དབྱར་གྱི་རས་ཆེན་གྱི་སྤང་བ་ཞེས་བྱ་བ་བཞི་པོ་དག་སྟེ། རྣམ་པ་བཅུ་གཅིག་པོ་དེ་དག་ནི་འདིར་སྤངས་པའོ། །ལྷ་རྟེན་བཅད་བར་མི་བྱའོ་ཞེས་བྱ་བ་ནི་སྦོམ་དགའ་མོ་མཉན་ཡོད་དུ་བསོད་སྙོམས་ལ་ཞུགས་པ་ན། དེས་ལྷ་བོན་མོ་ལྷ་རྟེན་ཐོགས་ཤིང་རྒྱུ་བ་ཞིག་མཐོང་ནས། སྦོམ་དགའ་མོས་བསམས་པ། ཐབས་འདི་ནི་བཟང་པོ་ཞིག་ཡིན་པས། བདག་གིས་སང་ཤེས་པར་བྱའོ་སྙམ་ནས། དེའི་ཕྱི་དེའི་ཉིན་པར་ལྷ་རྟེན་ཐོགས་ཏེ། མཉན་ཡོད་དུ་ཞུགས་ནས། ཁྱེའུ་དང་བུ་མོ་དག་ལ་སྲུང་སྐྱོབ་བྱེད་ཅིང་དེས་གང་དང་གང་ལ་སྲུང་སྐྱོབ་བྱས་པ་དེ་དང་དེ་དག་བདེ་བར་གནས་པར་གྱུར་ནས། དེའི་ཕྱིར་གང་དང་གང་དག་ལ་སྲུང་སྐྱོབ་བྱ་དགོས་པར་གྱུར་པ་དེ་དག་ཐམས་ཅད་ཀྱིས་སྦོམ་དགའ་མོ་སྲུང་སྐྱོབ་བྱེད་དུ་འཇུག་པར་བྱེད་ན་ལྷ་བོ་ན་མོ་འཕྱ་བར་གྱུར་པ་ནས། ཇི་སྲིད་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་མས་ལྷ་རྟེན་བཅང་བར་མི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །ལྷ་རྟེན་ཞེས་བྱ་བ་ནི་སྲུང་སྐྱོབ་བྱ་བ་དེའི་ཕྱིར་སྣོད་ཟ་མ་ཏོག་གིས་བརྒྱན་ཅིང་ས་ལས་བྱས་པའི་གཟུགས་
ཀྱིས་བཀང་བ་ཡིན་ནོ་ཞེས་ཟེར་རོ། །གང་ལ་ལྷུང་བཟེད་འཆང་བའི་སྤག་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལྷུང་བཟེད་ལྷག་པ་ཞག་གཅིག་ལས་འདས་པར་འཆང་བ་ལའོ་ཞེས་བྱ་བ་སྨོས་ཏེ། བུད་མེད་རྣམས་ནི་ཡོ་བྱད་ལ་ལྷག་པར་ཆགས་པ་ཤིན་ཏུ་དམ་པས་ན་དེའི་ཕྱིར་ཞག་གཅིག་ལས་འདས་པར་འཆང་བ་ལ་ཁ་ན་མ་ཐོ་བ་འདིར་རྣམ་པར་གཞག་གོ །ལྷུང་བཟེད་འཆང་བའི་སྤང་བའོ། །གང་ལ་བྱིན་གྱིས་མི་རློབ་པའི་སྤང་བར་འགྱུར་ཞེ་ན། དེའི་ཕྱིར་བྱིན་གྱིས་བརླབ་ཏུ་རུང་བ་ཉི་མ་དང་པོ་ལའམ། ཟླ་བ་ཕྱེད་ཕྱེད་ཅིང་བྱིན་གྱིས་མ་བརླབས་པ་ལའོ་ཞེས་བྱ་བ་སྨོས་ཏེ། འདིར་ཕྱེད་ཕྱེད་ཀྱི་སྒྲས་ནི་ལན་གཉིས་སུ་བརྗོད་པའོ། །ཟླ་བ་ཕྱེད་ཕྱེད་ཅེས་བྱ་བ་ལྔ་པོ་མེད་པ་ཉིད་ཀྱིས་ཉི་མ་གང་ལ་ཆོས་གོས་གང་ཡང་རུང་བ་ཞིག་རྙེད་ན་ཉི་མ་དེ་ཉིད་ལ་བྱིན་གྱིས་བརླབ་པར་བྱ་སྟེ། དེ་ཡང་དེ་ཕྱིན་ཆད་ཟླ་བ་ཕྱེད་ཕྱེད་ཅིང་བྱིན་གྱིས་བརླབ་པར་བྱའོ་ཞེས་བྱ་བ་འདི་འདིར་རྣམ་པར་གཞག་པའོ། །དེར་མེད་པ་ཉིད་ལ་ཆོས་གོས་རྙེད་པའི་ཞག་ལ་བྱིན་གྱིས་མི་རློབ་ནའོ། །ཡོད་པ་ཉིད་ལ་ནི་ཟླ་བ་ཕྱེད་ཕྱེད་ཅིང་བྱིན་གྱིས་མ་བརླབས་ན་སྤང་བར་འགྱུར་རོ། །ཆོས་གོས་བྱིན་གྱིས་བརླབས་པ་དེ་ཉིད་ཀྱང་ཉིན་ཞག་པར་མ་ཆད་པ་དེ་ཉིད་དང་པོར་བྱ་སྟེ། ཐོག་མ་ཉིད་དུ་མངོན་པར་བསྟན་ནས་ཉི་མ་དང་པོ་དེ་ལ་ཟླ་བ་ཕྱེད་ཕྱེད་དུ་ཆོས་གོས་བྱིན་གྱིས་བརླབ་རྒྱུ་བྱིན་གྱིས་མ་བརླབས་ན་ཞག་བཅུ་དྲུག་པ་ལ་ཞེས་བྱ་བའི་དོན་ཏོ། །འདིར་དགེ་སློང་ལ་ནི་ཆོས་གོས་བྱིན་གྱིས་བརླབ་ཏུ་རུང་བ་མེད་ན་འདི་དང་བྲལ་བའི་སྐྱ་རེངས་ཤར་བ་སྤང་བར་མི་འགྱུར་བ་དེ་བས་ན་ཉེས་བྱས་སུ་རིག་པར་བྱ་སྟེ། གཞན་ལ་ནི་ལྟུང་བ་མེད་དོ། །སྤོང་བ་འོག་མ་རྣམས་ལ་ཡང་ཐ་མ་གཉིས་ནི་ལྟུང་བ་མེད་དེ་གཞན་ལ་ནི་ཉེས་བྱས་སུ་འགྱུར་རོ། །བྱིན་གྱིས་མི་རློབ་པའི་སྤང་བའོ། །གང་ལ་འབྱིན་པའི་སྤང་བར་འགྱུར་ཞེ་ན། དེའི་ཕྱིར་དཔྱིད་ཟླ་ར་བའི་ཉའི་ཉིན་མོའི་མདུན་རོལ་དུ་སྲ་བརྐྱང་འབྱིན་པ་ལའོ་ཞེས་བྱ་བ་སྨོས་ཏེ། དཔྱིད་ཟླ་ར་བའི་ཉའི་ཉིན་མོ་གང་ཡིན་པ་དེའི་མདུན་རོལ་ཕན་ཆད་ཀྱི་དུས་གང་ཡང་རུང་བར་སྲ་བརྐྱང་འབྱིན་པའི་དགེ་འདུན་མ་རྣམས་ལ་ཞེས་བྱ་བའི་དོན་ཏོ། །ཤིན་ཏུ་སྟོབས་དང་ལྡན་པ་ཉིད་ཀྱི་ཕྱིར་བུད་མེད་རྣམས་ཀྱི་རྙེད་པ་ལ་ཐ་སྙད་འདི་ནི་
དགེ་འདུན་བྱེད་པ་པོ་ཉིད་ཡིན་གྱི་གང་ཟག་ལ་ནི་མ་ཡིན་ནོ། །དེ་ལྟ་བས་ན་དགེ་འདུན་ཐམས་ཅད་ལ་སོ་སོར་འདི་བསྐྱེད་པར་འགྱུར་རོ། །དགེ་འདུན་མའི་ཚད་རྣམ་པར་ཆད་པ་ལ་སྤང་བའི་ལྟུང་བྱེད་བསྐྱེད་པའོ། །དེ་བས་ན་རྣམ་པར་འབྱེད་པ་མ་ཡིན་པ་ལས་འདི་ནི་སྤང་བ་ཉིད་དོ། །དེའི་ཚེ་ན་སྒྲུབ་པ་མ་བྱས་པ་དང་རྣམ་པར་མ་ཕྱེ་བ་ལ་སྤང་བར་བྱ་བ་ཉིད་མེད་དོ། །དགེ་སློང་མ་ཆོམ་རྐུན་པས་ཀྱང་བཅོམ་པའི་དོན་ཉིད་དུ་ནི་ལྟུང་བ་མེད་དོ་ཞེས་བྱ་བར་ནི་འདིར་དོན་གཅིག་ལ་མདུན་རོལ་དུ་སྲ་བརྐྱང་འབྱིན་པ་ལ་ལྟུང་བ་མེད་དོ་ཞེས་བྱ་བ་སྨོས་ཏེ། །གང་གི་ཚེ་དགེ་སློང་མ་ཆོམ་རྐུན་པ་དག་གིས་བཅོམ་པར་གྱུར་ན་དེའི་དོན་དུ་ཉིད་དུ་ཉེས་བྱས་སུ་ཞེས་བྱ་བ་ནི་བྱེ་བྲག་བཤད་མཚོ་ལས་ཤེས་པར་བྱའོ། །སྲ་བརྐྱང་འབྱིན་པའི་སྤང་བའོ། །གང་ལ་མི་འབྱིན་པའི་སྤང་བར་འགྱུར་ཞེ་ན། དེའི་ཕྱིར་མི་འབྱིན་པ་ལའོ་ཞེས་བྱ་བ་སྨོས་ཏེ། སྲ་བརྐྱང་ཞེས་བྱ་བར་སྦྱར་རོ། །མི་འབྱིན་པ་ཞེས་བྱ་བ་ནི་ཚོགས་པ་སྦྱིན་པར་མི་བྱེད་པར་རྣམ་པར་གནས་པ་ཡིན་ནོ། །དེ་ལ་ཞེས་བྱ་བ་ནི་གང་ཞིག་སྲ་བརྐྱང་འབྱིན་པའི་དོན་དུ་སྲ་བརྐྱང་འབྱིན་པའི་ལས་ལ་ཚོགས་པ་སྦྱིན་པ་ཞེས་བྱ་བ་ལྟུང་བྱེད་འབའ་ཞིག་པར་རྣམ་པར་གཞག་པ་དེ་ནས་འདི་ལ་དུས་ཀྱི་བྱེ་བྲག་ཙམ་གྱི་བྱེ་བྲག་ཤེས་པར་བྱའོ། །སྲ་བརྐྱང་དབྱུང་བའི་དོན་དུ་ཚོགས་པ་སྦྱིན་པར་མི་བྱེད་པ་ལ་སྤང་བའི་ལྷུང་བྱེད་དོ། །རྙེད་པའི་རྒྱུ་མཚན་རྗེས་སུ་མ་གནང་བ་ལ་ནི་མེད་པའི་ཕྱིར་རོ། །སྲ་བརྐྱང་འབྱིན་པའི་དོན་དུ་ཚོགས་པ་སྦྱིན་པར་མི་བྱེད་པ་ལ་ནི་ལྟུང་བྱེད་འབའ་ཞིག་ཏུ་འགྱུར་རོ། །གང་གི་ཕྱིར་འདིར་རྙེད་པའི་རྒྱུ་མཚན་དུ་གྱུར་པ་མ་བྱས་པ་སྟེ། དེ་བས་ན་ཅི་སྙེད་པ་འདིར་ཚོགས་པ་སྦྱིན་པར་མི་བྱེད་པ་དེ་འདི་སྙེད་རྣམས་ལ་ལྟུང་བ་འདི་སྐྱེད་པ་ཡིན་པར་རིག་པར་བྱའོ། །དུས་ནམ་གྱི་ཚེ་ན་མི་འབྱིན་པ་ཡིན་ཞེ་ན། དེའི་ཕྱིར་དཔྱིད་ཟླ་ར་བའི་ཉའི་མདུན་རོལ་དུའོ་ཞེས་བྱ་བ་སྨོས་སོ། །སྲ་བརྐྱང་མི་འབྱིན་པའི་སྤང་བའོ། །གང་ལ་རིན་པོ་ཆེ་སློང་བའི་སྤང་བར་འགྱུར་ཞེ་ན། དེའི་ཕྱིར་དབྱིག་དང་གསེར་སློང་བ་ལའོ་ཞེས་བྱ་བ་སྨོས་ཏེ། འདི་ལྟར་མདོ་འདི་ལས་མངོན་མཚན་ཅན་ཞེས་བྱ་བ་སྨོས་ཏེ། ཡང་དགེ་སློང་མ་བདག་གི་ཕྱིར་མངོན་མཚན་ཅན་སློང་ན་སྤང་བའི་ལྟུང་
བྱེད་དོ་ཞེས་གསུངས་མོད་ཀྱི་དེའི་རྣམ་པར་འབྱེད་པ་ལས་ངོ་བོ་འདི་བཤད་པའོ། །མངོན་མཚན་ཅན་ཞེས་བྱ་བ་ནི་དབྱིག་གམ་གསེར་ཞེས་གསུངས་ཏེ། དེ་དག་ཐམས་ཅད་ཀྱང་རིན་པོ་ཆེ་མཚོན་པའི་དོན་དུ་བྱེ་བྲག་མེད་པའི་ཕྱིར་ཏེ། དེ་ལ་གཙོ་བོར་རྣམ་པར་གནས་པ་ཡིན་ནོ། །དེ་བས་ན་རིན་པོ་ཆེ་ཐམས་ཅད་ལ་འདིས་བསྟན་པ་ཉིད་དུ་ཤེས་པར་བྱའོ། །འདིར་རིན་པོ་ཆེ་འགའ་ཞིག་ལ་མངོན་པར་བརྟེན་པ་ནི་མི་རིགས་པ་ཡིན་ཏེ། ཁྱད་པར་མེད་པའི་ཕྱིར་རོ། །སློང་བ་སྔོན་དུ་བཏང་ནས་སྤང་བའི་ཡོད་པ་ཉིད་ནི་གླགས་རྙེད་པ་མ་ཡིན་ཏེ། འདིར་སློང་བ་གྲུབ་ལ་སྤང་བ་ཉིད་ཀྱི་ཡོད་པ་ཉིད་གླགས་རྙེད་པ་ནི་མ་ཡིན་ནོ། །དེ་བས་ན་སློང་བ་ཉིད་ལ་ཐབས་ཀྱིས་འདི་བསྟན་པའོ། །དེ་བས་ན་གང་ཞིག་འདིར་སློང་བའི་ཚིག་གོ །གང་དུ་སློང་བ་སྔོན་དུ་བཏང་ནས་ལེན་པ་ལ་ནི་སྤང་བར་བརྗོད་པ་དེ་ལ་ནི་འབྲས་བུ་དང་བཅས་པ་ཉིད་དོ། །གནག་དུ་འདིར་ཡང་མ་བླངས་པ་ལ་དབྱར་ཁང་གི་དགོས་པའི་དབང་གིས་སློང་བ་དང༌། ལེན་པ་ལ་ཉེས་པ་མེད་དོ། །དེ་བས་ན་འདིར་ཞུགས་པའོ། །རིན་པོ་ཆེ་སློང་བའི་སྤང་བའོ། །གང་ལ་གོས་ཟ་བ་ལས་གྱུར་པའི་སྤང་བར་འགྱུར་ཞེ་ན། དེའི་ཕྱིར་གཞན་གྱི་ཆེད་དུ་རྙེད་པའི་གོས་ཟས་སུ་བྱས་ཏེ་བཟའ་བའི་ཕྱིར་འཇོག་པ་ལའོ་ཞེས་བྱ་བ་སྨོས་ཏེ། ཟས་ལས་གཞན་པ་གླེགས་བམ་བྲིས་ པ་ལ་སོགས ་པའི་ཆེད་དུ་རྙེད་པའི་གོས་ཟས་སུ་བསྒྱུར་ཞིང་བྱས་ཏེ། ཚོང་གིས་བསྒྱུར་བ་བཟའ་བར་བྱའོ་ཞེས་དེའི་ཕྱིར་ངེས་པར་འཇོག་པར་བྱེད་པའི་དོན་འདི་རྣམ་པར་ངེས་པ་ཞེས་བྱ་བའི་དོན་ཏོ། །འདིར་དོན་གཞན་ཉིད་ལ་ནི་ཁྱད་པར་ཡོངས་སུ་བཟུང་བ་ཡོད་པ་མ་ཡིན་ཏེ། གཞན་གྱི་དངོས་པོ་ཞེས་བྱ་བ་ནི་འདིར་མདོའི་ཚིག་སྟེ། གཞན་གྱི་དངོས་པོ་ཞེས་བྱ་བ་ནི། དངོས་པོ་གཞན་ལ་ཡོངས་སུ་བསྔོས་པས་ཞེས་བྱ་བ་འདིའི་རྣམ་པར་འབྱེད་པའོ། །དེ་བས་ན་འདིར་དོན་གཞན་ཉིད་ཙམ་ཁས་བླངས་པ་སྟེ། འདིར་ཁས་བླངས་པ་ཡིན་གྱི་ཁྱད་པར་བསྟན་པ་ནི་མ་ཡིན་ནོ། །གོས་ཟ་བ་ལས་གྱུར་པའི་སྤང་བའོ། །གང་ལ་གོས་ཀྱི་རྒྱུ་ཟ་བ་ལས་གྱུར་པ་དང༌། མལ་ཆ་ཟ་བ་ལས་གྱུར་པ་དང༌། དབྱར་ཁང་རྒྱུ་ཟ་བ་ལས་གྱུར་པའི་སྤང་བ་གསུམ་དུ་འགྱུར་ཞེ་ན། དེའི་ཕྱིར་གོ་རིམས་བཞིན་དུ་གོས་
དང་མལ་ཆ་དང་དབྱར་ཁང་གི་ཆེད་དུ་ཡང་ངོ་ཞེས་བྱ་བ་སྨོས་ཏེ། ཡོ་བྱད་གང་ཡང་རུང་བ་རྙེད་པ་ཟས་སུ་བྱ་སྟེ། བཟའ་བའི་ཕྱིར་འཇོག་པ་ལའོ་ཞེས་བྱ་བའི་རྗེས་སུ་བསྙེགས་པའི་ཕྱིར་མདོ་སྔ་མ་ལས་ཡང་ངོ་ཞེས་བྱ་བའི་སྒྲ་སྨོས་སོ། །གང་ཡང་རུང་བའོ་ཞེས་བྱ་བ་ནི་གོས་གཅིག་པུ་ལ་ནི་མ་ཡིན་ཏེ། སྒྲའི་རྗེས་སུ་འབྲངས་པས་འཇུག་པར་གྱུར་པ་རྣམས་བསལ་བའི་དོན་དུ་ཐ་སྙད་འདི་གདགས་སོ། །གོས་རྒྱུ་ལ་ སོགས་པ ་ཟ་བ་ལས་གྱུར་པའི་སྤང་བའོ།། །།གང་ལ་གང་གིས་བསྔོས་པ་བྱིན་གྱིས་རློབ་པའི་སྤང་བར་འགྱུར་ཞེ་ན། དེའི་ཕྱིར་དགེ་སློང་མའི་སྐྱེ་བོ་མང་པོའི་ཕྱིར་སྦྱོར་དུ་བཅུག་ནས་རང་ལ་ཡོངས་སུ་བསྒྱུར་བ་ལའོ་ཞེས་བྱ་བ་སྨོས་ཏེ། དགེ་སློང་མའི་བདག་ཉིད་ཀྱི་སྐྱེ་བོ་མང་པོའི་ཕྱིར་དངོས་པོ་སྦྱོར་དུ་བཅུག་པ་གང་ཡིན་པ་དེ་བདག་ལ་ཡོངས་སུ་སྒྱུར་བར་བྱེད་པ་ལ་ཞེས་བྱ་བའི་དོན་ཏོ། །སྐྱེ་བོ་རྣམས་ཀྱི་ཚོགས་ནི་སྐྱེ་བོ་སྟེ། སྐྱེ་བོ་བཞི་ཡན་ཆད་ལ་སོགས་པའོ། །དེ་ལྟ་བས་ན་བཞི་ལ་ སོགས་པ ་ནི་སྐྱེ་བོ་མང་པོར་རྟོགས་པར་བྱའོ། །དེ་ལྟར་ཡང་རྣམ་པར་འབྱེད་པ་ལས། སྐྱེ་བོ་མང་པོ་ཇི་ལྟ་བ་བཞིན་དུ་དགེ་སློང་མའི་དགེ་འདུན་གྱི་ཕྱིར་ཡང་དེ་བཞིན་ནོ་ཞེས་གསུངས་པ་ཡིན་ནོ། །དགེ་སློང་མའི་དགེ་འདུན་གྱི་དོན་དུ་ཞེས་བྱ་བ་ཚིག་ཏུ་མ་སྨོས་པའི་ཕྱིར་དེའི་གནས་ཀྱི་ས་དང་ཉེ་བར་འགྲོ་བའི་དགེ་འདུན་ལས་ཕྱེད་བཅད་པའི་ཚོགས་ལས་ཇི་ལྟར་ཡིད་ཆེས་པར་འགྱུར། དེའི་ཁྱིམ་གྱི་གནས་དང་ཉེ་བར་འགྲོ་བའི་དགེ་འདུན་ཐམས་ཅད་ལ་མངོན་པར་བརྟེན་པན་ཡིད་ཀྱིས་རྟོགས་པར་མ་གྱུར་ཅིག་ཅེས་བྱ་བའི་ཕྱིར་དང༌། འོག་ནས་ཀྱང་དགེ་འདུན་ཞེས་སྨོས་པར་བྱའོ། །དགེ་སློང་གི་ཕྱིར་དང་རབ་ཏུ་བྱུང་བ་འདི་ལ་བསྙེན་པར་རྫོགས་པའི་ཕྱིར་དང༌། མུ་སྟེགས་ཅན་རབ་ཏུ་བྱུང་བའི་ཕྱིར་དང༌། ཁྱིམ་པའི་ཕྱིར་སྦྱོར་དུ་བཅུག་པ་རང་ལ་ཡོངས་སུ་བསྒྱུར་བ་ན་ཉེས་བྱས་སུ་ཤེས་པར་བྱའོ། །སྐྱེ་བོ་མང་པོ་ལ་བསྔོས་པ་བྱིན་གྱིས་རློབ་པའི་སྤང་བའོ། །གང་ལ་རང་ལ་ཡོངས་སུ་བསྒྱུར་བའི་སྤང་བར་འགྱུར་ཞེ་ན། དེའི་ཕྱིར་དགེ་འདུན་གྱི་ཕྱིར་ཡང་ངོ་ཞེས་བྱ་བ་སྨོས་ཏེ། ཡང་ངོ་ཞེས་བྱ་བ་སྒྲས་ནི་ཕྱིར་སྦྱོར་དུ་བཅུག་ནས་རང་ལ་ཡོངས་སུ་བསྒྱུར་བ་ནའོ་ཞེས་བྱ་བའི་རྗེས་བསྙེགས་པའི་ཕྱིར་རོ། །
འདིར་ཡང་རྣམ་པར་འབྱེད་པའི་ཚིག་ཉིད་ལས། དགེ་འདུན་གྱི་ཞེས་སྨོས་པ་ནི་དགེ་སློང་མའི་དགེ་འདུན་གྱི་ཕྱིར་ཞེས་གསུངས་པ་ཡིན་ཏེ། དེ་བས་ན་དགེ་སློང་མའི་ཚིག་གོ །འདི་ཡང་དོན་གཞན་ཉིད་ལ་ནི་སྔ་མ་བཞིན་དུ་ཉེས་བྱས་སུ་རིག་པར་བྱའོ། །འདིར་དགེ་འདུན་ཞེས་སྨོས་པ་ནི་གྲངས་ཆད་པ་མེད་པར་དགེ་འདུན་མ་སྤྱི་ཕྱིར་སྦྱོར་དུ་བཅུག་པ་ཡིན་ནོ་ཞེས་བྱ་བ་བསླབ་པའི་གཞི་སྔ་མ་ལས་ཤེས་པའོ། །དེའི་ཕྱིར་གྲངས་ཆད་པ་མེད་པའི་ཚོགས་ཀྱི་ཕྱིར་སྦྱོར་དུ་བཅུག་པ་བདག་གཅིག་པུས་སྤྱོད་པ་ལ་ནི་སྔ་མར་གཏོགས་པའི་བྱ་བར་རིག་པར་བྱའོ། །དགེ་འདུན་ལ་བསྔོས་པ་བྱིང་ཡིས་བརླབ་པའི་སྤང་བའོ། །གང་ལ་བཅིངས་པ་འགྲོལ་དུ་འཇུག་པའི་སྤང་བར་འགྱུར་ཞེ་ན། དེའི་ཕྱིར་ཚིག་ཉན་དུ་གཞུག་པའི་ཕྱིར་རྫས་བཅིངས་པ་འགྲོལ་དུ་གཞུག་པ་ལའོ་ཞེས་བྱ་བ་སྨོས་ཏེ། འདིར་གཞུང་ནི་གཙུག་ལག་དག་དགའ་མོས་སྤོས་འཚོང་གི་ཁྱེའུ་ལ་ཆགས་ནས་དེས་དེའི་ཚིག་ཉན་དུ་གཞུག་པའི་ཕྱིར་དེ་ལས་རྫས་ཉོ་ཞིང་ཐུམ་བུ་བཅིངས་ཤིང་བཅིངས་ཤིང་ཡང་དང་ཡང་འགྲོལ་དུ་བཅུག་ན་ཐམས་ཅད་སྤང་བའི་ལྟུང་བྱེད་དུ་འགྱུར་ཞེས་གསུངས་པ་ཡིན་ནོ། །འདིར་ཚིག་ཉན་དུ་གཞུག་པའི་ཕྱིར་ཞེས་བྱ་བའི་གཞུང་ནི་ལྟུང་བ་བསྟན་པ་ལས། དགེ་སློང་མས་དེ་ཚིག་ཉན་དུ་གཞུག་པའི་ཕྱིར་ཇི་ཙམ་དུ་ཐུམ་བུ་བཅིང་དུ་བཅུག་ཅིང་ཡང་དང་ཡང་འགྲོལ་དུ་བཅུག་ན་ཐམས་ཅད་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །དོན་ལ་བདེན་པར་གནས་པའི་དོན་དུ་དེ་ལྟ་བུའི་ཟླ་བོ་ལ་བཅིངས་པ་འགྲོལ་དུ་འཇུག་པ་ལ་ཉེས་པར་རིགས་པ་མ་ཡིན་ཏེ། དེ་བས་ན་འདི་ཉེ་བར་བསྡུའོ། །འཁྲིག་པའི་རོ་ཉེ་བར་གོས་བར་བྱེད་པ་ནི་བདག་ཏུ་བྱེད་པའོ། །མཚན་ཐ་དད་པ་མ་ཡིན་པ་སྐྱེས་པ་བསྟེན་པའི་མཐུ་ཡོད་པ་དེ་ལྟ་བུ་ལ་འཁྲིག་པ་ཉེ་བར་སྡུད་པ་འདུལ་བ་ལས་འགལ་བའི་ཟླ་ནི་མངོན་པར་གྲགས་པ་སྟེ། དེ་བས་ན་འདི་ལ་ཡང་འདིས་བསྟན་པ་ཉིད་དོ། །མཚན་མཐུན་པ་ལ་ སོགས་པ ་ལ་ནི་ཉེས་བྱས་སོ་ཞེས་བྱ་བའི་རྗེས་སུ་འབྲངས་པས་རྟོགས་པའོ། །རྫས་བཅིངས་པ་ཞེས་བྱ་བའི་ཚིག་འགྲོལ་བའི་ངོ་བོ་བསྟན་པའི་དོན་དུའོ། །འདིར་ཐུན་བུ་ཞེས་སྨོས་པ་ནི་ཐམས་ཅད་དུ་ནང་གི་བདག་ཉིད་ཀྱི་སྙིམ་པ་ལ་ སོགས་པ ་འདི་དང་ཕྱི་རོལ་གྱི་སྤྲོག་མ་ལ་ སོགས་པ ་དག་ནི་རྫས་ཉིད་
དུ་བཟུང་བའོ། །འོ་ན་སྤང་བའི་སྙིམ་པ་ལ་ སོགས་པ ་འགྲོལ་དུ་བཅུག་པ་འགལ་ལོ་ཞེ་ན། འདི་ནི་མ་ཡིན་ཏེ་ཐམས་ཅད་མ་ཡིན་པ་གསལ་བའི་ཕྱིར་ཆོས་ཀྱིས་ཀྱང་སྤྱིའི་འགྲེལ་པ་ཉེ་བར་བསྟན་པའི་ཕྱིར་ནུ་མ་བཞི་དང་ལྡན་པའི་བ་ལང་གི་རིགས་ཞེས་བྱའོ། །གཞན་དབང་པའི་ཐུམ་བུ་བཅིང་བ་དང་འགྲོལ་དུ་བཅུག་པ་ལ་ཡང་དོན་མེད་པར་འགྲོལ་དུ་འཇུག་ན་ཤིན་ཏུ་སྡིག་ཆེ་བ་ཉིད་ཀྱི་ཕྱིར་འདི་ཁ་ན་མ་ཐོ་བ་ཡོངས་སུ་རྫོགས་པ་རྣམ་པར་གནས་པ་ཉིད་དོ། །དེ་བས་ན་གཞན་གྱིས་བཅིངས་པ་འགྲོལ་དུ་བཅུག་པ་དང་ཐུམ་བུ་འགྲོལ་དུ་བཅུག་པ་བྱེ་བྲག་ཅུང་ཟད་ཀྱང་ཡོད་པ་མ་ཡིན་ནོ། །དེ་ལྟ་བས་ན་སྐྱེ་བའི་དབང་གིས་འདིར་མཚོན་པ་ཙམ་ཉིད་ཀྱི་དགོངས་པ་ཙམ་ཐུམ་བུའི་ཚིག་གོ །དེ་བས་ན་འདིར་འདི་ཁོངས་སུ་བསྡུ་བ་མ་ཡིན་ནོ། །བཅིངས་པ་འགྲོལ་དུ་འཇུག་པའི་སྤང་བའོ། །གང་ལ་གོས་ལྕི་བ་བསྟན་པའི་སྤང་བར་འགྱུར་ཞེ་ན། དེའི་ཕྱིར་སྲང་བརྒྱ་པ་ལ་ སོགས་པ ་ནས་ཀཱར་ཥཱ་པ་ཎ་ཉི་ཤུ་ལ་ སོགས་པ ་རི་བའི་གོས་བདག་གིར་བྱེད་པ་ལའོ་ཞེས་བྱ་བ་སྨོས་ཏེ། བསླབ་པའི་གཞི་འདི་ནི་མཆོད་སྦྱིན་གྱིས་རལ་གྱི་མཐུ་ཅན་གྱིས་ཁྲོམ་ནས་ལ་བ་རིན་པོ་ཆེ་རིན་ཐང་ཆེན་པོ་རྙེད་ནས་དེས་ཀྱང་སྦོམ་དགའ་མོ་ལ་བྱིན་པས། དེས་དེ་གྱོན་ཏེ་བསོད་སྙོམས་ལ་ཞུགས་པ་དེ་ལས་བཅས་ཏེ། ཡང་དགེ་སློང་མ་གོས་ལྕི་བ་དང་རིན་ཐམས་ཆེན་པོ་འཆག་བར་བྱེད་ན་སྤང་བའི་ལྟུང་བྱེད་དོ་ཞེས་བྱ་བ་འདི་དང༌། འོག་མའི་ཡང་མདོ་ཡིན་ཏེ། འཆང་དུ་འཇུག་ན་ཞེས་བྱ་བ་འདི་ནི་ལྟུང་བ་བསྟན་པ་ལས་སོ། །འཆང་བར་བྱེད་ན་ཞེས་བྱ་བའི་རྣམ་པར་འབྱེད་པ་ནི་བདག་གིར་བྱེད་ཅེས་གསུངས་པ་ཡིན་ནོ། །དེའི་ཕྱིར་བདག་གིར་བྱེད་པ་ལས་ཞེས་བྱ་བ་སྨོས་པ་དང༌། འདིར་བརྗེ་བའི་ཕྱིར་ལྟུང་བ་མེད་དོ་ཞེས་གསུངས་པ་ཡིན་ནོ། །དགེ་སློང་མས་གོས་རིན་ཐང་ཆེན་པོ་བརྗེ་བའི་ཕྱིར། བདག་ཏུ་བྱའོ་ཞེས་བྱ་བ་འདིས་བསྟན་པར་རིག་པར་བྱའོ། །བཙོང་ པ་ལ་སོགས ་པའི་ཕྱིར་བདག་གིར་བྱེད་པ་ལ་ནི་ཐམས་ཅད་དུ་སྤང་བར་འགྱུར་རོ། །གཞན་གྱིས་གོན་པ་ལས་ཡང་སྤང་བར་བྱ་བའི་དངོས་པོ་མེད་དུ་ཟིན་ཀྱང་ཁ་ན་མ་ཐོ་བ་ནི་ཡོངས་སུ་རྫོགས་པར་འགྱུར་རོ། །དེ་ལས་སྐྱེས་པའི་རིན་པོ་ཆེ་ཡང་འདི་ལས་ལྗིད་དང་རིན་ཐང་ཆེན་པོ་ཞེས་བྱ་བ་རིན་གྱིས་རྙེད་
པར་བྱ་བ་ཉིད་ཀྱི་ཕྱིར་རོ། །དེ་བས་ན་བརྟགས་པ་གང་དག་གིས་རིན་པོ་ཆེ་ལེན་པ་དེ་རྣམས་ཀྱིས་འདི་ལེན་པ་ལ་ལྟུང་བ་མེད་དོ་ཞེས་རྟོགས་པར་བྱའོ། །བུད་མེད་ནི་གོས་བཟང་པོ་གྱོན་ན་གསོ་རོ་སྐྱེ་བས་དེའི་ཕྱིར་གོས་འདི་གཉིས་བཀག་པ་ཡིན་ནོ། །འདིར་ལེན་པ་ནི་སྤྱད་པའི་ཕྱིར་བདག་ཏུ་བྱའོ། །དེ་བས་ན་གོས་ལ་ཡང་ཁ་ན་མ་ཐོ་བ་འདིའོ། །འདིར་གཞན་གྱིས་གྱོན་པ་ལ་ཡང་སྤང་བར་བྱ་བའི་དངོས་པོ་མེད་དུ་ཟིན་ཀྱང་གཅིག་པའི་དངོས་པོ་མེད་པས་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །སྲང་བརྒྱལ་ སོགས་པ ་དག་ཅེས་བྱ་བ་ནི་མེ་ཏོག་དང་སྣ་མ་བུ་དང་བླངས་པའི་ལ་བ་ལ་ སོགས་པ ་དེའི་རིགས་ཅན་ལའོ། །ཀཱར་ཥཱ་པ་ཎ་ལ་ སོགས་པ ་གཉི་གའི་ སོགས་པ ་ཞེས་བྱ་བའི་སྒྲ་སྨོས་པ་ནི་འོག་མ་ལ་ཡང་དེ་བཞིན་དུ་ཤེས་པར་བྱ་བའི་ཕྱིར། དེ་ཡུལ་གྱི་ཐ་སྙད་ཀྱིས་རྣམ་པར་གཞག་པ་ཞེས་བྱ་བ་འདི་མ་བྱིན་པར་ལེན་པའི་ཕམ་པའི་རྗེས་སུ་འབྲངས་ནས་ཤེས་པར་བྱའོ། །གོས་ཞེས་བྱ་བ་ནི་ཀ་ཤི་ཀའི་རས་ཕྲན་དང་དར་ལ་དང༌། དར་གོས་ལ་ སོགས་པ ་གཞན་ཡང་རུང་བ་སྟེ་གང་ཞིག་རྣམ་པར་འབྱེད་པ་ལས་སྨོས་པ་དེ་ནི་འདིར་མཚོན་པ་ཙམ་ཡིན་ཏེ། རིན་ཐང་ཆེན་པོ་འདིར་རིན་ཐང་ཆེན་པོ་གཞན་ལས་དངོས་པོ་འདི་ལ་ཁྱད་པར་མེད་པས་རྣམ་པར་གནས་པ་ཡིན་ཏེ། དེ་ལྟ་བས་ན་ཁས་མ་བླངས་སོ། །གོས་ལྕི་བ་བསྟེན་པའི་སྤང་བའོ། །གང་ལ་གོས་ཡང་བ་བསྟེན་པའི་སྤང་བར་འགྱུར་ཞེ་ན། དེའི་ཕྱིར་སྲང་ལྔ་པའི་མཐར་ཐུག་པའོ་ཞེས་བྱ་བ་སྨོས་ཏེ། སོགས་པ ་ཞེས་བྱ་བའི་སྒྲས་ནི་ཀཱར་ཥཱ་པ་ཎ་ཉི་ཤུ་ལ་ སོགས་པ ་རི་བའི་གོས་བདག་གིར་བྱེད་པ་ལའོ་ཞེས་བྱ་བའི་རྗེས་བསྙེགས་པའི་ཕྱིར་རོ། །འདིར་མཐར་ཐུག་པའི་སྒྲས་ནི་སྐྱེ་པོའི་གྲངས་བཟུང་བར་བྱས་པར་རིག་པར་བྱའོ། །འདིར་གཞུང་ནི་སྤང་བ་ཞེས་བྱ་བ་ནི་སྤང་ལྔའམ་ལྔ་ལས་ཆུང་བའོ་ཞེས་བྱ་བ་གསུངས་པ་ཡིན་ཏེ། འདིས་ནི་འདི་ལྟ་སྟེ་བུད་མེད་ནི་གོས་བཟང་པོ་གྱོན་ན་གསོ་རོ་སྐྱེ་བས་དེའི་ཕྱིར་འདི་གཉིས་བཀག་པའོ། །གོས་ཡང་བ་བསྟེན་པའི་སྤང་བའོ། །སྤང་བའི་ལྟུང་བྱེད་རྣམས་རྫོགས་སོ།། །།ད་ནི་དགེ་སློང་མ་རྣམས་ཀྱི་ལྟུང་བྱེད་འབའ་ཞིག་ཏུ་འགྱུར་བ་དག་བཤད་པར་བྱ་སྟེ། དེ་ལ་བདུན་ཅུ་རྩ་གཉིས་སོ་ཞེས་བྱ་བ་ནི་སྔར་དགེ་སློང་གི་རྣམ་པར་འབྱེད་པའི་སྐབས་སུ་བསྟན་ཟིན་ཏོ། །དེ་དག་ཀྱང་གང་
ཞེ་ན། མ་བསྐོས་པ་ལ་ སོགས་པ ་བཅུ་དང༌། སྐྲོད་པ་དང༌། ཡང་ཡང་ཟ་བ་དང༌། ཟས་བསོད་པ་སློང་བ་དང༌། འདུག་པ་དང༌། འགྲེང་བ་དང༌། ཕྱིར་མ་བླངས་པ་སྤྱོད་པ་དང༌། མ་ལོན་པ་དང་དབྱར་གྱི་རས་ཆེན་ལས་གྱུར་པ་ནི་མ་གཏོགས་སོ་ཞེས་བྱ་པ་སྨོས་ཏེ། ལྟུང་བྱེད་དགུ་བཅུ་པོ་འདི་དག་ལས་བཅོ་བརྒྱད་པོ་འདི་དག་མ་གཏོགས་པ་ལྷག་མ་ཇི་སྙེད་པར་གྱུར་པ་རྣམས་ཞེས་བྱ་བའི་དོན་ཏོ། །འདིར་ཁ་ཅིག་ནི་མི་སྲིད་པའི་ཕྱིར་དགེ་སློང་མ་རྣམས་ཀྱི་ལྟུང་བར་མི་གཞག་པ་ཡང་ཡོད་དེ། འདི་ལྟ་སྟེ་མ་བསྐོས་པར་སྟོན་པ་ལ་ སོགས་པ ་རྣམས་ཏེ། གང་གི་ཕྱིར་དགེ་སློང་མ་རྣམས་ཀྱིས་དགེ་སློང་དག་ལ་བསྟན་པར་བྱ་བ་མ་ཡིན་པའི་ཕྱིར་རོ། །ཁ་ཅིག་ནི་ཤིན་ཏུ་སྨད་པར་བྱ་བ་མ་ཡིན་པའི་ཕྱིར་རོ། །འདི་ལྟ་སྟེ་བླངས་པ་ཟ་བའི་ལྟུང་བྱེད་དེ་གང་གི་ཕྱིར་སྐྱེས་པས་བླངས་པ་ཟ་བ་ལ། བུད་མེད་ཀྱིས་ཟ་བ་ནི་སྨད་པར་བྱ་བ་མ་ཡིན་ཏེ། དེ་བཞིན་དུ་གཞན་དུ་ཡང་ཇི་ལྟར་རིག་པར་རྟོགས་པར་བྱའོ། །དགེ་སློང་མའི་ལྟུང་བྱེད་རྣམས་ལ། དགེ་སློང་གི་ཅུང་ཟད་འཇུག་པ་མཉམ་པ་ཁོ་ན་ཡིན་ཏེ། འདི་ལྟ་སྟེ་དཔེར་ན། སྐྲོད་པའི་ལྟུང་བྱེད་ལྟ་བུའོ། །ཅུང་ཟད་མེད་པ་ནི་འདི་ལྟ་སྟེ། མ་བསླབས་པའི་བསླབ་པ་ལ་བསྙེན་པར་རྫོགས་པ་རྣམ་པར་མ་བཞག་པའི་ཕྱིར། སྐྱེས་པ་བསླབ་པ་སྤྱོད་པ་ལའོ། །འགའ་ཞིག་ཏུ་ལྟུང་བ་མེད་དོ། །ཉེས་པའི་གླགས་མི་རྙེད་པ་ཉིད་ཀྱི་ཕྱིར་རོ། །འདི་ལྟ་སྟེ་ལོ་ར་རེར་རབ་ཏུ་འབྱིན་ཏུ་བཅུག་པ་ལ་གང་གི་ཕྱིར་བུད་མེད་ཀྱི་ཚོགས་ལ་ཉེ་བའི་ཉོན་མོངས་པ་སྲེད་པ་ཤས་ཆེ་བ་ཡིན་གྱི་སྐྱེས་པ་ལ་ནི་དེ་ལྟ་མ་ཡིན་ནོ། །འགའ་ཞིག་ཏུ་ཇི་ལྟར་ཐོབ་པའི་ཉེས་བྱས་ནི་འདི་ལྟ་སྟེ་ཁྲི་གཅིག་ལ་དགེ་སློང་དག་ཉལ་པ་ལྟར་ཀུན་ནས་རེག་པར་འགྱུར་ནའོ། །འདིར་ནི་ཕྱོགས་ཙམ་ཞིག་བསྟན་པ་ཡིན་གྱི། རྒྱས་པར་ནི་བྱེ་བྲག་བཤད་མཚོ་ལས་ཤེས་པར་བྱའོ། །ཆོས་ཡོངས་སུ་ཞུས་པ་ལས་དགེ་སློང་ལས་དགེ་སློང་མས་ཟང་ཟིང་ཉེ་བར་བསྒྲུབ་ཏུ་རུང་ངོ་ཞེས་བྱ་བ་འདི་གནས་ལས་ཐོབ་པ་ཕྲན་ཚོགས་དག་ལས་སྡུད་པ་པོ་རྣམས་ཀྱིས་ཡང་དག་པར་བཅུག་པ་དེ་བསྟན་པར་བྱ་སྟེ། དགེ་སློང་གིས་རབ་ཏུ་བྱུང་བ་མོའི་ཕྱིར་ཟང་ཟིང་ཉེ་བར་སྒྲུབ་ཏུ་རུང་སྟེ། ཆུང་མར་གྱུར་པ་ཉིད་ལ་ཡང་ངོ་ཞེས་བྱ་བ་ནི་སྔོན་ཁྱིམ་པར་གནས་པའི་ཚེ་གང་ཞིག་
ཆུང་མར་གྱུར་པ་ཉིད་ལས་ཏེ། དེ་ལ་ཡང་དགེ་སློང་མ་ཉིད་དུ་གྱུར་ཟིན་པ་ལ་དགེ་སློང་གིས་ཉེ་བར་བསྒྲུབ་ཏུ་རུང་བ་ཁོ་ན་སྟེ། དེ་ནི་རུང་བ་མ་ཡིན་པར་ཤེས་པར་བྱ་ཞེས་བྱ་བའི་དོན་ཏོ། །དེས་བླང་དུ་རུང་ངོ་ཞེས་བྱ་བ་ནི་དགེ་སློང་མ་དེས་ཟང་ཟིང་ཉེ་བར་སྒྲུབ་པར་བྱེད་པའི་དགེ་སློང་དེ་ལས་ཟང་ཟིང་བླང་དུ་རུང་བ་ཁོ་ན་ཡིན་པའོ། །ཕྲན་ཚེགས་དག་ལས་སྐྱེས་པ་རྣམས་དང་ལྷན་ཅིག་མལ་དུ་གཏོགས་པ་ཡང་དག་པར་ཞུགས་པ་བརྗོད་པར་བྱ་སྟེ། བུ་ཆུང་དུ་དང་ལྷན་ཅིག་ཉལ་པ་ལ་ནི་མ་གཏོགས་པ་ཉིད་མ་ཡིན་ནོ་ཞེས་བྱ་བ་ནི་བྱིས་པ་གང་མ་མེད་པར་མཚན་མོ་ཉལ་མི་ནུས་པ་དེ་ནི་བུ་ཆུང་ངུ་ཞེས་བྱ་བར་རྣམ་པར་གནས་པ་ཡིན་ཏེ། རང་གི་བུ་ཆུང་དུ་དེ་དང་ལྷན་ཅིག་གནས་པའི་དོན་དུ་འདི་རྗེས་སུ་གནང་བ་ནི་གླེང་གཞི་དང་དོན་ལས་གཏོགས་པར་འགྱུར་བའི་ཕྱིར་རོ། །ཅི་དགེ་སློང་མ་ཐམས་ཅད་ལས་མ་གཏོགས་པ་ཉིད་མ་ཡིན་ནམ་ཞེ་ན། དེའི་ཕྱིར་གནང་བ་ཐོབ་པ་ལའོ་ཞེས་བྱ་བ་སྨོས་ཏེ། བུ་ཆུང་དུ་མ་ཡིན་པ་དང་གང་གིས་ལྷན་ཅིག་ཉལ་བའི་གནང་བ་ཐོབ་པར་གྱུར་པ་དེ་ལས་མ་གཏོགས་པ་ཉིད་མ་ཡིན་ཞེས་བྱ་བའི་དོན་ཏོ། །དེ་ལ་གནང་བ་དེ་སྦྱིན་པ་ཆོས་དང་མཐུན་པ་ཉིད་རིགས་སམ་ཞེ་ན། དེའི་ཕྱིར་དེ་སྦྱིན་པར་བྱའོ་ཞེས་བྱ་བ་སྨོས་ཏེ། འདི་ལ་དགེ་སློང་མའི་དགེ་འདུན་གྱིས་གནང་བ་སྦྱིན་པ་ལ་ནི་ཆོས་དང་མཐུན་པ་ཉིད་ཡིན་ཏེ། ངེས་པར་སྦྱིན་པ་དང༌། ངེས་པར་ལེན་པ་དང༌། ཡང་དག་པར་བསྒྲུབ་པ་དང༌། ཚངས་པར་སྤྱད་པ་དང༌། ཡོ་བྱད་དང༌། རྩེ་བ་དང༌། འཇོ་སྒེག་དང༌། སྟན་གདིང་བ་དང༌། བཟའ་བ་དང༌། གོས་དང༌། སེར་སྣ་བྱེད་པ་དང༌། གནས་ཁང་ན་འདུག་པར་འགྲོ་བ་དང༌། ངེས་པར་འབྱུང་བ་ལ་གཏོགས་པའི་འཇུག་པ་རྣམས་ལས་གཞན་པའི་ལྟུང་བྱེད་འབའ་ཞིག་ཏུ་འགྱུར་བ་བརྒྱ་རྩ་བརྒྱད་པ་དག་ནི་ཡུལ་དུ་གྱུར་པའི་སྤྱོད་པ་དེ་དག་ལ་རྣམ་པར་གཞག་པ་ཡིན་ནོ། །ད་ནི་འདི་མན་ཆད་རྣམ་པར་བཤད་པར་བྱ་སྟེ། གང་ལ་བདག་ཉིད་ཀྱི་མ་ལོན་པ་འཇོག་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་རབ་ཏུ་འབྱིན་པ་དང༌། བསྙེན་པར་རྫོགས་པར་བྱེད་པ་ལའོ་ཞེས་བྱ་བ་སྨོས་ཏེ། །གནས་སྐབས་གན་ལ་ཞེ་ན། དེའི་ཕྱིར་ལོ་བཅུ་གཉིས་མ་ལོ་ན་པ་ཉིད་ལའོ་ཞེས་བྱ་བ་སྨོས་སོ། །གང་གིས་ཤེ་ན་དེའི་ཕྱིར་བདག་ཉིད་བསྙེན་པར་རྫོགས་པས་སོ་ཞེས་བྱ་བ་སྨོས་
ཏེ། བདག་ཉིད་བསྙེན་པར་རྫོགས་ནས་ལོ་བཅུ་གཉིས་མ་ལོན་པར་རབ་ཏུ་འབྱིན་པ་དང༌། བསྙེན་པར་རྫོགས་པར་བྱེད་དུ་འཇུག་པ་ལ་ལྟུང་བྱེད་འདི་རྣམ་པར་གཞག་གོ །མ་ལོན་པས་ཉེ་བར་འཇོག་པའི་ལྟུང་བྱེད་དོ། །འཁོར་དང་འཁོར་མང་པོ་ཉེ་བར་གཞག་པའི་གནང་བ་སྦྱིན་པར་བྱའོ་ཞེས་བྱ་བ་ནི། འཁོར་ཉེ་བར་གཞག་པའི་གནང་བ་དང༌། འཁོར་མང་པོ་ཉེ་བར་གཞག་པའི་གནང་བ་དགེ་སློང་མ་རྣམས་ཀྱིས་སྦྱིན་པར་བྱ་ཞེས་བྱ་བའི་དོན་ཏོ། །འདིར་མེའི་སྒྲ་ནི་མང་པོ་ལས་ཏེ། དེ་བས་ན་འཁོར་མང་པོ་གཞན་ཞེས་བྱ་བ་འདི་ལས་རྟོགས་པ་མང་པོས་ཚོལ་བ་ཉིད་དོ། །མེའི་ཆོས་རྣམས་གང་ཡིན་པ་དེ་དང་རྟོགས་པ་མང་པོ་ཉིད་ཀྱི་རྒྱུ་མཚན་གྱིས་འདིར་མེའི་སྒྲ་འདི་འཇུག་པ་ཡིན་ནོ། །ཅི་དགེ་སློང་མ་ཐམས་ཅད་ལ་སྦྱིན་པར་བྱའམ་ཞེ་ན། དེའི་ཕྱིར་དེ་ཉེ་བར་འཇོག་ནུས་པ་ལའོ་ཞེས་བྱ་བ་སྨོས་ཏེ། འཁོར་དེ་ཉེ་བར་འཇོག་པ་དང་འཇོག་ནུས་པའི་གནང་བ་སྦྱིན་པའོ། །འདིར་ནུས་ཞེས་བྱ་བ་ནི་གཉིས་ཀ་ལ་ཡང་ནད་གཡོག་དང་འགྱོད་པ་བསལ་བ་ཞེས་བྱ་བ་ལ་ སོགས་པ ་སྨོས་པ་གང་ཡིན་པ་དེ་སྔ་མ་ལ་གཏོགས་པར་བྱའོ། །ཕྱི་མ་བསྒྲུབ་པའི་ཕྱིར་འབྱུང་བ་རྣམས་ཀྱི་ནུས་པའོ། །འདིར་གཞུང་ནི་གང་གིས་འཁོར་ཉེ་བར་གཞག་པར་ནུས་པ་དེས་དགེ་འདུན་ལ་འཁོར་ཉེ་བར་གཞག་པའི་གནང་བ་ཐོབ་ནས་འཁོར་ཉེ་བར་གཞག་པར་བྱའོ་ཞེས་གསུངས་པ་ཡིན་ཏེ། དགེ་སློང་མ་མིང་འདི་ཞེས་བགྱི་བ་ལོ་བཅུ་གཉིས་ལོན་ལགས་ཏེ། འཁོར་ཉེ་བར་གཞག་པར་སྤྲོ་ནས་ཞེས་བྱ་བ་ཡང་སྔ་མ་དང་ཕྱི་མ་ལ་གང་ཞིག་དང་ལྡན་པ་དེས་འཁོར་མང་པོ་ཉེ་བར་གཞག་པའི་གནང་བ་གསོལ་ན་ཞེས་བྱ་བ་ལ་ སོགས་པ ་ཡིན་ནོ། །བདག་མིང་འདི་ཞེས་བྱ་བ་ལོ་བཅུ་གཉིས་ལོན་ལགས་ཏེ། འཁོར་མང་པོ་ཉེ་བར་གཞག་པ་སྤྲོ་ནས་འཁོར་མང་པོ་ཉེ་བར་གཞག་པའི་གང་བ་གསོལ་ནས་བདག་མིང་འདི་ཞེས་བགྱི་བ་ལོ་བཅུ་གཉིས་ལོན་པ་འཁོར་མང་པོ་གཞག་པའི་དོན་དུ་སྤྲོ་བ་ཞེས་བྱ་བ་ཡང་ངོ༌། །ཅི་ནུས་པ་ཐམས་ཅད་ལ་གནང་བ་དེ་སྦྱིན་པར་བྱའམ་ཞེ་ན། དེའི་ཕྱིར་བསྙེན་པར་རྫོགས་ནས་ལོ་བཅུ་གཉིས་ལོན་པ་ཉིད་ལའོ་ཞེས་བྱ་བ་སྨོས་ཏེ། འདིར་ལུང་ནི་གནང་བ་སློང་བའི་སྔགས་རྣམས་ལ་བསྙེན་པར་རྫོགས་ནས་ལོ་བཅུ་གཉིས་ལོན་ པ་ཞེས་བྱ་བ་ལ་སོགས ་པའོ། །བསླབ་པའི་གཞི་སྔ་མ་
བཅས་པ་ལ་ཡང་འདི་ཐོབ་པའོ། །གནས་སྦྱིན་པ་ལ་ཡང་ལོ་བཅུའི་གནས་ལ་ཡང་ལོ་བཅུ་གཉིས་ལོན་པ་ཉིད་དགེ་སློང་མ་རྣམས་ལ་འདི་ལས་སྐྱེས་པ་ཉིད་དུ་རིག་པར་བྱའོ། །གཞན་གྱིས་གསོལ་བར་མི་བྱའོ་ཞེས་བྱ་བ་ནི་མི་ནུས་པ་ལོ་བཅུ་གཉིས་མ་ལོན་པས་གནང་བ་འདི་དག་གསོལ་བར་མི་བྱའོ་ཞེས་བྱ་བའི་དོན་ཏོ། །འདིར་ཡང་ཚིག་འདི་དག་ཉིད་མདོ་ལས་རྟོགས་པར་བྱའོ། །གང་ཡང་ནུས་པ་ཞེས་བྱ་བ་དེ་འདིར་དངོས་ཀྱི་ཚིག་སྟེ། དོན་གཞན་དང་གཞན་ལས་ཐོབ་པར་བྱེད་པའོ། །གང་ལ་འཁོར་ཉེ་བར་འཇོག་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་གནང་བ་མ་ཐོབ་པ་ལའོ་ཞེས་བྱ་བ་སྨོས་ཏེ། དགེ་སློང་མ་གང་གིས་སྔར་འཁོར་ཉེ་བར་གཞག་པའི་གནང་བ་མ་ཐོབ་པ་དེ་ལའོ། །འཇུག་པ་གང་ལ་ཅི་ཞིག་བྱ་ན་དེ་ལ་དེར་འགྱུར་ཞེ་ན། དེའི་ཕྱིར་འཁོར་ཉེ་བར་འཇོག་ནའོ་ཞེས་བྱ་བ་སྨོས་ཏེ། སླར་དེ་ཉེ་བར་གཞག་པ་ནི་རབ་ཏུ་འབྱིན་པ་དང་བསྙེན་པར་རྫོགས་པར་བྱེད་པ་དང༌། དགེ་སློབ་མར་བྱེད་པ་དང༌། གནས་སྦྱིན་པ་ཞེས་བྱ་བ་རྣམ་པ་བཞི་པོ་དག་གིས་ཤེས་པར་བྱ་བ་ཁྱད་པར་མེད་པ་ཉིད་ཀྱི་ཕྱིར་རིག་པར་བྱའོ། །འཁོར་ཉེ་བར་འཇོག་པའི་ལྟུང་བྱེད་དོ། །གང་ལ་འཁོར་མང་པོ་ཉེ་བར་འཇོག་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཅིག་ཤོས་ནི་འཁོར་མང་པོ་ཞེས་བྱ་བ་སྨོས་ཏེ། ཉེ་བར་འཇོག་པ་ལའོ་ཞེས་བྱ་བར་སྦྱར་རོ། །སྔར་གནང་བ་མ་ཐོབ་པ་ལའོ་ཞེས་བྱ་བ་དང༌། འཁོར་མང་པོ་ཉེ་བར་འཇོག་ནའོ་ཞེས་བྱ་བ་གཉིས་ཀྱང་དོན་གྱིས་བསྒྱུར་ཏེ། འཁོར་མང་པོ་ཉེ་བར་འཇོག་པའི་ལྟུང་བྱེད་དོ་ཞེས་བྱ་བའི་དོན་ཏོ། །འཁོར་མང་པོ་ཉེ་བར་འཇོག་པའི་ལྟུང་བྱེད་དོ། །གང་ལ་ལོ་བཅུ་གཉིས་མ་ལོན་པར་ཉེ་བར་སྡུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཁྱིམ་སོ་བཟུང་བ་ལོ་བཅུ་གཉིས་ཉིད་ཀྱི་མདུན་རོལ་དུ་བསྙེན་པར་རྫོགས་པར་བྱེད་པ་ལའོ་ཞེས་བྱ་བ་སྨོས་ཏེ། སྔར་བསྙེན་པར་རྫོགས་པའི་ལོ་རྣམས་ཀྱི་དང་པོ་ནི་བཅུ་གཉིས་ཉིད་དོ་ཞེས་བསྟན་པས་དེའི་ཕྱིར། བུད་མེད་ཁྱིམ་སོ་བཟུང་བ་བག་མར་བཏང་བ་ནི་ན་ཚོད་བཅུ་གཉིས་ལོན་པའི་མདུན་རོལ་དུ་བསྙེན་པར་རྫོགས་པར་བྱེད་ན་ལྟུང་བྱེད་དུ་འགྱུར་རོ། །ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་དོ། །གཞན་དུ་གང་ལ་ཡིན་ཞེ་ན། དེའི་ཕྱིར་གཞན་ནི་ལོ་ཉི་ཤུའི་འོ་ཞེས་བྱ་བ་སྨོས་ཏེ། མདུན་རོལ་དུ་
བསྙེན་པར་རྫོགས་པར་བྱེད་ན་ཉེ་བར་ལྟུང་བའོ། །ལོ་ཞེས་སྨོས་པ་ནི་ལོ་རྣམས་ནི་ལོ་སྟེ་ཞེས་བྱ་བ་དོན་གྱིས་ཉེ་བར་བསྐྱུར་བ་ལ་ཉེ་བར་ལྟུང་བའོ། །ཁྱིམ་སོ་བཟུང་བ་ལས་གཞན་པའི་ཁྱིམ་སོ་མ་བཟུང་བ་ནི་ན་ཚོད་ལོ་ཉི་ཤུ་ལོན་པའི་མདུན་རོལ་དུ་བསྙེན་པར་རྫོགས་པར་བྱེད་ན་ཞེས་བྱ་བའི་དོན་ཏོ། །འདིས་ནི་བྱེ་བྲག་ཙམ་བསྟན་པ་ཡིན་ཏེ། འདི་ལས་གཞན་པ་ཐམས་ཅད་འདི་དག་གི་བསྙེན་པར་རྫོགས་པའི་དངོས་པོ་ལྟུང་བྱེད་དུ་བསྒྲུབ་པར་རྟོགས་པར་ཤེས་པར་བྱའོ། །ལོ་ཉི་ཤུ་མ་ལོན་པར་བསྙེན་པར་རྫོགས་པར་བྱེད་པའི་ལྟུང་བྱེད་དོ། །གང་ལ་ཚིག་ལས་བཟླས་པའི་ལྟུང་བྱེད་གཉིས་སུ་འགྱུར་ཞེ་ན། དེའི་ཕྱིར་བསླབ་པ་མ་བྱིན་པ་གཉིས་མཁན་པོ་ཉིད་ཀྱིས་སོ་ཞེས་བྱ་བ་སྨོས་ཏེ། ཁྱིམ་སོ་བཟུང་བ་དང་བསླབ་པ་གནང་བ་མ་བྱིན་པ་ཉིད་མཁན་མོ་ཉིད་ཀྱིས་བསྙེན་པར་རྫོགས་པར་བྱེད་ན་ལྟུང་བྱེད་གཉིས་སུ་རྣམ་པར་གཞག་པ་ཡིན་ནོ། །སྦོམ་དགའ་མོས་བུད་མེད་ཁྱིམ་སོ་བཟུང་བ་ལོ་བཅུ་གཉིས་ལོན་པ་ཞིག་དང༌། ཁྱིམ་སོ་མ་བཟུང་བ་ལོ་ཉི་ཤུ་ལོན་པ་གཅིག་བསླབ་པའི་སྡོམ་པ་མ་བྱིན་པར་བསྙེན་པར་རྫོགས་པར་བྱས་པ་ལས། བསླབ་པའི་གཞི་གཉིས་སོ་སོར་བཅའ་བ་མཛད་པ་གང་ཡིན་པ་དེ་ལ་སྐྱེས་པའི་དབང་གིས་ཡུལ་ཐ་དད་པ་ལ་བརྟེན་ནས་བཅའ་བ་གཉིས་མཛད་པ་ཡིན་ནོ། །དེའི་རྗེས་སུ་འགྲོ་བས་བསླབ་པའི་གཞི་གཉིས་བསྟན་པ་མཛད་པ་འདི་ཡུལ་ཐ་དད་པ་ལ་བརྟེན་པའོ། །བུད་མེད་ལ་ནི་ཚིགས་གསུམ་ཡོད་དེ། དགེ་ཚུལ་མ་ཉིད་དང༌། དགེ་སློབ་མ་ཉིད་དང༌། དགེ་སློང་མ་ཉིད་རྣམས་སོ། །དེ་ལྟ་བས་ན་ཚིགས་གཅིག་ལས་འདས་པར་འགྱུར་བ་ཞེས་བྱ་བ་དོན་གྱིས་འདི་དག་ལ་མིང་དང་ཚིགས་ལས་འདའ་བར་བྱེད་པ་ཞེས་བྱ་བའོ། །ཚིགས་ལས་འདས་པའི་ལྟུང་བྱེད་གཉིས་སོ། །གང་ལ་སྤྱད་པ་ལས་འདའ་བར་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེ་ལས་མ་སྤྱད་པ་ཉིད་དོ་ཞེས་བྱ་བ་སྨོས་ཏེ། བསླབ་པ་འདི་ལ་ལོ་གཉིས་སུ་ཇི་ལྟར་བྱས་པའི་མ་སྤྱད་པ་ཉིད་ལ་མཁན་མོ་ཉིད་ཀྱིས་བསྙེན་པར་རྫོགས་པར་བྱེད་ན་ཞེས་བྱ་བའི་དོན་ཏོ། །བསླབ་པའི་གཞི་འདི་ནི་སྦོམ་དགའ་མོས་གཞོན་ནུ་མ་ལོ་བཅོ་བརྒྱད་ལོན་པ་རབ་ཏུ་ཕྱུང་སྟེ། ལོ་གཉིས་སུ་དགེ་སློབ་མའི་བསླབ་པའི་སྡོམ་པ་བྱིན་ནས་ལོ་གཉིས་མ་ལོན་པ་ཁོ་ནར་བསྙེན་པར་རྫོགས་པར་བྱས་པ་ལས་བཅས་པ་ཡིན་ནོ། །བསླབ་པ་ལམ་བསླབས་
པ་བསྙེན་པར་རྫོགས་པར་བྱེད་པའི་ལྟུང་བྱེད་དོ། །གང་ལ་གཞན་བསླབ་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སྤྱད་པ་ཉིད་མི་བྱེད་པ་ལའོ་ཞེས་བྱ་བ་སྨོས་ཏེ། ལོ་གཉིས་སུ་དགེ་སློབ་མའི་བསླབ་པ་ལ་སྤྱད་ཟིན་པ་ཉིད་ལ་མཁན་མོ་ཉིད་ཀྱིས་བསྙེན་པར་རྫོགས་པར་མི་བྱེད་ན་ཞེས་བྱ་བའི་དོན་ཏོ། །དེ་ལྟར་ཡང་དགེ་སློང་མ་གང་གིས་ཆོས་དྲུག་དང་རྗེས་སུ་མཐུན་པའི་ཆོས་དྲུག་པོ་རྣམས་ལ་བསླབས་པ་བསྙེན་པར་རྫོགས་པར་མི་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །འདིར་རྐྱེན་མ་ཚང་བའི་ཕྱིར་བསྙེན་པར་རྫོགས་པར་མི་བྱེད་པ་ལ་ནི་ཉེས་པ་རིགས་པ་མ་ཡིན་ཏེ། དེ་ལྟ་བས་ན་རྗེས་སུ་མི་མཐུན་པར་འབྱུང་བ་བསྙེན་པར་རྫོགས་པ་མ་ཡིན་པ་འདིའི་ངོ་བོའོ། །འདི་ནི་བསླུ་བར་གྱུར་པ་ཡིན་ཏེ། གང་ཞིག་བརྟུལ་ཞུགས་རྫོགས་པ་ཉིད་ལ་གང་གི་དོན་དུ་བརྟུལ་ཞུགས་སྦྱིན་པ་དེ་མ་གྲུབ་པའོ་སྙམ་པ་དེ་བས་ན་འདི་ཁ་ན་མ་ཐོ་བའོ། །བསླབ་པ་ལ་བསླབ་པ་བསྙེན་པར་རྫོགས་པར་མི་བྱེད་བའི་ལྟུང་བྱེད་དོ། །གང་ལ་ཆོས་འཚོང་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་གལ་ཏེ་ཁོ་མོ་ལ་གོས་བྱིན་པ་ལྟ་ན་དེའི་ཕྱིར་ཁྱོད་བསྙེན་པར་རྫོགས་པར་བྱའོ་ཞེས་བསྙེན་པར་རྫོགས་པར་འདོད་པ་ལ་ཟེར་བ་ལའོ་ཞེས་བྱ་བ་སྨོས་ཏེ། ད་ལྟར་ཡོད་པར་གྱུར་པ་ལ་ཆོས་གང་འཚོང་བར་འགྱུར་ཞེས་བྱ་བ་ཆོས་འཚོང་བའི་ཞེས་བྱ་བ་འདི་བརྗོད་པའི་དོན་ཉིད་ནི་རྙེད་པ་སྟེ། འདིར་མཐུ་དང་ལྡན་པའི་ཆོས་ལ་སྒྱིད་ལུག་པ་དེ་བས་ན་འདིར་ཁ་ན་མ་ཐོ་བའོ། །དེའི་ཕྱིར་འདིར་གོས་ཞེས་སྨོས་པ་ནི་མཚོན་པ་ཙམ་ཡིན་ཏེ། ཤིན་ཏུ་མཆོག་ཏུ་གྱུར་པའི་དོན་ཁས་བླངས་པ་ལ་ཁ་ན་མ་ཐོ་བ་འདིར་འགྱུར་ཏེ། དེར་སེར་སྣའི་ཆོས་ལ་ཤིན་ཏུ་སྟོབས་དང་ལྡན་པ་ཉིད་ཀྱི་ཕྱིར་རོ། །ཤིན་ཏུ་དམན་པའི་ཐ་མ་རྐང་པ་ཉེད་པ་ལ་ཡང་ལྟུང་བྱེད་ཁོ་ནའོ། །འདིར་ཤིན་ཏུ་ཡང་ཆོས་ལ་ལྟུང་བ་ཉིད་སྐྱེ་བར་འགྱུར་རོ། །བདེ་བར་གཤེགས་པའི་ཆོས་སུ་འགྱུར་བའི་དོན་འདི་ལ་སངས་རྒྱས་ཀྱི་བཀའ་ཀློག་པ་ལ་ སོགས་པ ་ལ་ཉེས་བྱས་སུ་རྣམ་པར་གནས་པ་ཡིན་ནོ། །སྡོམ་པ་གཞན་སྦྱིན་པའི་ཕྱིར་ཀློག་པ་ལ་ སོགས་པ ་སྟེ། དེ་ཁོ་མོ་ལ་ཆོས་གོས་སྟེར་བལྟ་ན་དེའི་ཕྱི་ཁྱོད་རབ་ཏུ་དབྱུང་བར་བྱའོ་ཞེའམ། ཀློག་ཏུ་གཞུག་གོ་ཞེས་བྱ་བ་ལ་ སོགས་པ ་ཟེར་བ་ལ་ནི་ཉེས་བྱས་སུ་རྣམ་པར་གནས་པ་ཡིན་ནོ། །བུད་མེད་
རྣམས་ཀྱི་ཉེས་པ་ཅི་ཡང་རུང་བ་དང༌། སེར་སྣའི་ཆོས་ལ་ཡང་དག་པར་གནས་པ་དེ་དང་འདྲ་བའི་སྐྱེས་པ་དགེ་སློང་འདིར་ན་སྨད་པའོ། །ཆོས་འཚོང་བ་ཞེས་བྱ་བའི་ལྟུང་བྱེད་དོ། །གང་ལ་འདྲིད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་རབ་ཏུ་དབྱུང་བ་དང་མཐུན་པ་བསྟན་པས་ཁྱིམ་རྒྱས་པར་བྱ་བ་སྤོང་དུ་བཅུག་ནས་རབ་ཏུ་མི་འབྱིན་པ་ལའོ་ཞེས་བྱ་བ་སྨོས་ཏེ། བསླབ་པའི་གཞི་འདི་ནི་གཽ་ཏ་མ་སྐེམ་མོས་ཕྱུག་པོའི་ཡུགས་ས་མོ་གཞན་མྱ་ངན་གྱི་ཟུག་རྔུས་གཟིར་བ་ཞིག་ལ་ཅིའི་ཕྱིར་རབ་ཏུ་མི་འབྱུང་ཞེས་སྨྲས་པ་དང༌། དེ་ན་རེ་གལ་ཏེ་འཕགས་མས་རབ་ཏུ་དབྱུང་བར་གནང་ན་བདག་རབ་ཏུ་འབྱུང་ངོ་ཞེས་ཟེར་བ་ལ། དེས་དེ་ལ་ཁྱིམ་རྒྱས་པར་བྱ་བ་འདི་དག་སྤོང་ན་དེ་བས་ན་ཁྱོད་རབ་ཏུ་འབྱུང་བར་འགྱུར་བ་མི་དཀའོ་ཞེས་སྨྲས་པ་དང༌། ཁྱིམ་རྒྱས་པར་བྱ་བ་སྤངས་པ་ན་དེས་དེ་རབ་ཏུ་མ་བྱུང་བ་ལས་བཅས་པ་ཡིན་ནོ། །འདིས་ནི་ཁས་མ་བླངས་པ་མ་ཡིན་ཏེ། གང་ཞིག་ཕྱིས་ཁྱོད་ལ་དཀའ་བར་མི་འགྱུར་བ་ཞེས་བྱ་བའི་ཚིག་དལ་འདི་བསྟན་པར་ཤེས་པར་བྱའོ། །དེ་ལ་ཁྱིམ་རྒྱས་པར་བྱ་བ་འདི་དག་སྤོང་ན་ཁོ་མོས་ཁྱོད་རབ་ཏུ་འབྱུང་བར་འགྱུར་བ་ཞེས་བྱ་བ་གང་ཞིག་གསལ་པོར་ཁས་བླངས་པ་དེ་ནི་རྗེས་སུ་མི་མཐུན་པར་ཁས་བླངས་པ་བསྟན་པ་མ་ཡིན་ནོ། །དེ་ལྟ་བས་ན་དེ་ལ་འདིས་མ་བསྡུས་པ་ཉིད་མ་ཡིན་ནོ། །འདིའི་རྗེས་སུ་འབྲངས་བས་གཞན་དག་འདྲིད་པ་ལ་ནི་ཉེས་བྱས་སུ་རྟོགས་པར་བྱའོ། །འདྲིད་པའི་ལྟུང་བྱེད་དོ། །གང་ལ་འཁོར་མང་པོ་ སོགས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལོའི་རྗེས་སུ་རབ་ཏུ་འབྱིན་པ ་ལའོ་ཞེས་བྱ་བ་སྨོས་ཏེ། རབ་ཏུ་བྱུང་བ་གཞན་གཉིས་པ་ཞེས་བྱ་བའི་དོན་ཏོ། །འདིར་མཐར་ཐུག་པའི་གཙོ་བོ་ལོ་གཞན་གཟུང་བ་རྣམས་གནས་པ་ཡིན་ནོ། །དེ་བས་ན་ལོ་དང་པོ་ལ་དེ་དང་ལྷན་ཅིག་གམ་ཕྱིས་རབ་ཏུ་བྱུང་བ་ལ་ལྟུང་བྱེད་དུ་རྟོགས་པར་བྱའོ། །ལོ་གསུམ་པ་ལ་ སོགས་པ ་དག་ལྟུང་བ་མེད་པར་རིག་པར་བྱའོ། །འཁོར་མང་པོ་སོགས་པའི་ལྟུང་བྱེད་དོ། །གང་ལ་མ་གནང་བ་སྡུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་བདག་པོས་མ་གནང་བ་རབ་ཏུ་འབྱིན་པ་ལའོ་ཞེས་བྱ་བ་སྨོས་ཏེ། རབ་ཏུ་འབྱིན་པ་ལའོ་ཞེས་བྱ་བ་ནི་འདིར་འོག་མ་བཞི་པོ་རྣམས་ལ་ཡང་སྦྱར་བར་བྱའོ། །བདག་
པོ་ལ་ནི་ཇི་ལྟར་ཆུང་མ་རབ་ཏུ་ཕྱུང་ན་གནོད་པར་འགྱུར་བ་དེ་ལྟ་བུ་རབ་ཏུ་ཕྱུང་ན་གནོད་པར་མི་འགྱུར་ཏེ། དེ་ལྟར་ཆུང་མ་སྤང་ངོ༌། །གང་གི་ཕྱིར་སྲོག་དང་བྲལ་བར་གྱུར་པ་མཆོག་ཏུ་ཕན་པའི་དངོས་པོ་འདི་གཅོད་པའི་རྣམ་པ་འཇུག་པ་དེ་བས་ན་འདིར་ལྕི་བའི་ཁ་ན་མ་ཐོ་བ་ཉིད་ཤེས་པའོ། །མ་གནང་བ་སྡུད་པའི་ལྟུང་བྱེད་དོ། །སྐྱོན་ཅན་སྡུད་པ་ལས་གྱུར་པའི་ལྟུང་བྱེད་བཞི་པོ་དག་ལས་གང་ལ་འཁྲུལ་པ་མོ་སྡུད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་འཁྲུལ་པ་མོའོ་ཞེས་བྱ་བ་སྨོས་ཏེ། རབ་ཏུ་འབྱིན་པ་ལ་ཞེས་བྱ་བར་སྦྱར་རོ། །གཉིས་པ་གང་ཡིན་ཞེ་ན་དེའི་ཕྱིར་སྦྲུམ་མའོ་ཞེས་བྱ་བ་སྨོས་ཏེ། རབ་ཏུ་འབྱིན་པ་ལ་ཞེས་བྱ་བར་སྦྱར་རོ། །གསུམ་པ་གང་ཡིན་ཞེ་ན། དེའི་ཕྱིར་མྱ་ངན་གྱིས་གཟིར་བའོ་ཞེས་བྱ་བ་སྨོས་ཏེ། རབ་ཏུ་འབྱིན་པ་ལ་ཞེས་བྱ་བར་སྦྱོར་རོ། །བཞི་པ་གང་ཡིན་ཞེ་ན། དེའི་ཕྱིར་ཙབ་ཀྲོལ་ཅན་ནོ་ཞེས་བྱ་བ་སྨོས་ཏེ། རབ་ཏུ་འབྱིན་པ་ལ་ཞེས་བྱ་བའི་དབང་དུ་བྱས་པའོ། །ཙབ་ཀྲོལ་ཅན་རབ་ཏུ་འབྱིན་པ་ཁོ་ན་ལ་ལྟུང་བྱེད་དུ་འགྱུར་བར་མ་ཟད་དོ། །འོ་ན་གང་ལ་ཞེ་ན། དེའི་ཕྱིར་བསྙེན་པར་རྫོགས་པར་བྱེད་པ་ལ་ཡང་ངོ༌། །སྦྲུམ་མ་ལ་སྣོད་མི་སྲིང་བ་ཉིད་ནི་མ་གནང་བ་སྡུད་པའི་ལྟུང་བྱེད་དུ་རིག་པར་བྱའོ། །འདིར་བསྙེན་པར་རྫོགས་པར་བྱེད་པ་ནི་རྒྱུ་མཚན་འདིས་ཉེས་བྱས་སུ་རིག་པར་བྱའོ། །མཐར་བྱས་པའི་དགེ་འདུན་ལ་དེ་ཞེས་བྱ་བ་འདིར་ལྟུང་བྱེད་འདི་ལ་རྣམ་པར་གཞག་པའོ། །བུད་མེད་མ་རུངས་པ་རབ་ཏུ་དབྱུང་བར་མི་བྱའོ་ཞེས་བྱ་བ་ཙབ་ཀྲོལ་བྱེད་པ་ཅན་གྱི་མདོ་ལས་སོ། །རྣམ་པར་འབྱེད་པ་ལས་ཙབ་ཀྲོལ་ཅན་ཞེས་བྱ་བ་ནི་བུད་མེད་མ་རུངས་མའོ་ཞེས་བྱ་བ་གསུངས་པ་ཡིན་ནོ། །གླེང་གཞི་ལས་ཀྱང་བུད་མེད་གཞན་དེ་མཐོང་བ་ནི་མ་རུངས་པ་ཁྲོ་བ་རྩུབ་པོ་སྨྲ་བ། གཞན་ལ་ནང་སྟོན་པར་བྱེད་པ་བུད་མེད་གཞན་དང་ལྷན་ཅིག་ཏུ་རྩོད་པར་བྱེད་ཅིང་དེ་རྩོད་པར་བྱེད་པ་ན་སྐྲ་རྣམས་ཞིག་པར་གྱུར་ཅིང་དེས་དེ་ལ་བསྡིགས་པའི་ཕྱིར་ཅེ་སྦྱང་མོའི་སྐད་འདོན་པ་དང༌། དེས་ཀྱང་དེའི་སྐད་ཐོས་པ་ལ་འགྱེལ་བ་དེ་མཐོང་ནས་སྦོམ་དགའ་མོ་འདི་སྙམ་དུ་སེམས་ཏེ། སྟོབས་དང་ལྡན་པ་འདི་ལྟ་བུའི་གྲོགས་མོ་རྩོད་པར་བྱེད་པ་མོ་འདི་གང་གི་ཕྱིར་བདག་གིས་རབ་ཏུ་དབྱུང་བར་བགྱིའོ། །དེ་དེས་རབ་ཏུ་ཕྱུང་ནས་སྐྱེ་དགུའི་
བདག་མོ་ཆེན་མོ་སྐྲ་རང་གིས་འཇར་བར་བྱེད་པའི་བར་དུ་འདི་ནི་གནོད་པ་སྟེ། ཨུཏྤ་ལའི་མདོག་ཅན་གྱིས་གྲོང་ཁྱེར་ཆེན་པོ་དྲུག་ཏུ་སྨད་འཚོང་མར་གྱུར་པ་ན་ཆོས་སྦྱིན་མའི་ཕོ་ཉ་བསྙེན་པར་རྫོགས་པར་བྱས་པས། གཽ་ཏ་མ་སྐེམ་མོའི་ཁྱོས་བཟུང་བ་དང༌། བུའི་ཤ་ཟོས་པས་དེ་ལ་འདི་ནི་གནད་པའོ། །དེ་ཐོས་ནས་སྦོམ་དགའ་མོའི་གྲོགས་མོ་མ་རུངས་པ་དང་རྩོད་པ་ན་དགེ་སློང་མ་ཙབ་ཀྲོལ་བྱེད་པ་དང༌། དེ་ནས་དགེ་སློང་མ་རབ་ཏུ་མང་པོ་རྣམས་འདི་སྐད་ཅེས་ཡང་མ་རུངས་མ་ཁྲོ་བས་སྨྲ་བ་དང་བཅས་ནས་སྨྲ་བར་བྱེད་པ་གང་གིས་རབ་ཏུ་ཕྱུར་ཞེས་ཟེར་རོ། །དེ་བས་ན་མ་རུངས་པ་འདི་ལ་ཙབ་ཀྲོལ་བྱེད་པ་ཉིད་ཚད་མ་ཞེས་བྱ་བ་ཡིད་ཆེས་པའོ། །ཤིན་ཏུ་མཐུན་པ་ཉིད་སྟོབས་དང་ལྡན་པའི་ཉེས་དམིགས་སུ་གྱུར་པ། ཙབ་ཀྲོལ་བྱེད་པ་དེ་པས་ན། ཙབ་ཀྲོལ་བྱེད་པ་ཐམས་ཅད་ལ་ཆོ་ག་འདི་རྣམ་པར་གཞག་པར་རིག་པར་བྱའི་ཁྲོ་བས་སྨྲ་བ་ཉིད་ལ་ནི་མ་ཡིན་ནོ། །བསྙེན་པར་རྫོགས་པ་ཉིད་ལ་ཤིན་ཏུ་སྟོབས་དང་ལྡན་པ་ཉིད་མནན་པ་ལ་དགེ་སྦྱོང་དུ་མེད་པའི་ཆོས་དང་མཐུན་པ་ཉིད་གཤེ་བ་མཚང་འདྲུ་བ་ཞེས་བྱ་བ་ལ་བསྙེན་པར་རྫོགས་པ་ལ་འདི་བཀག་པའོ། །སྐྱོན་ཅན་སྡུད་པ་ལས་གྱུར་པའི་ལྟུང་བྱེད་དུ་གཏོགས་པའོ། །ཡལ་བར་འདོར་བ་ལས་གྱུར་པའི་ལྟུང་བ་བཞི་པོ་དག་ལས། དེ་རྣམས་ཀྱི་དང་པོ་གང་ཡིན་ཞེ་ན། དེའི་ཕྱིར་རབ་ཏུ་ཕྱུང་བ་དང་བསྙེན་པར་རྫོགས་པར་བྱས་པ་དག་ལ་ཕན་མི་འདོགས་པ་ལའོ་ཞེས་བྱ་བ་སྨོས་ཏེ། མཁན་མོ་ཉིད་ཀྱིས་ཞེས་བྱ་བ་ཐམས་ཅད་ཀྱི་དབང་དུ་བྱས་པར་རིག་པར་བྱའོ། །རབ་ཏུ་བྱུང་བ་དང་བསྙེན་པར་རྫོགས་པར་བྱ་བ་དག་ལ་གདམས་ངག་ལ་ སོགས་པས་ཡོངས་སུ་མི་སྐྱོང་ཞིང༌། ཕན་མི་འདོགས་པ ་དག་ལ་ལྟུང་བྱེད་དུ་འགྱུར་རོ། །གང་ལ་བསླབ་པའི་གཞི་གཉིས་པར་འགྱུར་ཞེ་ན། དེའི་ཕྱིར་བར་ཆད་མཐོང་བ་ནི་མི་འདྲེན་པ་ལའོ་ཞེས་བྱ་བ་སྨོས་ཏེ། བདག་པོ་ལ་ སོགས་པ ་དག་གིས་བར་ཆད་དུ་འགྱུར་བ་མཐོང་ན་རབ་ཏུ་བྱུང་བ་དང༌། བསྙེན་པར་རྫོགས་པ་དག་བར་ཆད་ཀྱི་གནས་དེ་ལས་མི་འདྲེན་ཏམ། དེ་ཉིད་དུ་འཇིགས་པ་མེད་པའི་གནས་སུ་མི་འདྲེན་ན་ལྟུང་བྱེད་དོ།། །གང་ལ་བསླབ་པའི་གཞི་གསུམ་པར་འགྱུར་ཞེ་ན། དེའི་ཕྱིར་དགེ་སློང་མའི་བསླབ་པ་ལ་
མི་སློབ་བ་ལའོ་ཞེས་བྱ་བ་སྨོས་ཏེ། གང་ཞིག་མཁན་མོ་ཉིད་ཀྱིས་རབ་ཏུ་བྱུང་བ་དང༌། བསྙེན་པར་རྫོགས་པར་བྱས་པ་དག་ལ་མི་སློབ་པ་དེ་ལ་ལྟུང་བྱེད་དུ་འགྱུར་རོ་ཞེས་བྱ་བར་རྣམ་པར་གཞག་པ་ཡིན་ནོ། །གང་ལ་བཞི་པ་བཏང་སྙོམས་སུ་གཏོགས་པ་ཡིན་ཞེ་ན། དེའི་ཕྱིར་ནད་པ་དག་ལ་ནད་གཡོག་མི་བྱེད་པ་ལའོ་ཞེས་བྱ་བ་སྨོས་ཏེ། རབ་ཏུ་ཕྱུང་བ་དང་བསྙེན་པར་རྫོགས་པར་བྱས་པ་དག་གིས་ཞེས་བྱ་བར་སྦྱར་རོ། །དེ་དག་གཅིག་པུར་མ་ཟད་ཀྱི་འོན་ཀྱང་འདི་ལྟར་ཉེ་གནས་དང་བཅས་པས་ཀྱང་ངོ་ཞེས་བྱ་བ་སྨོས་ཏེ། གནས་སྦྱིན་པའི་གནས་ཉིད་དུ་གཞག་པའི་ཉེ་གནས་ནད་པ་དག་ལ་ནད་གཡོག་མི་བྱེད་པ་ལ་ཡང་ལྟུང་བྱེད་ཁོ་ན་སྟེ། རབ་ཏུ་བྱུང་བའི་བར་ཆད་མཐོང་བ་ལ་སྦོམ་དགའ་མོ་དང་ལྷན་ཅིག་གནས་པ་ཡུལ་གཞན་དུ་མ་ཁྲིད་པས། དེ་ཇོ་བོས་འགྲོས་མེད་པར་རབ་ཏུ་འབྱིན་དུ་བཅུག་པ་ལས་བསླབ་པའི་གཞི་བཅས་པ་ཡིན་ནོ། །སྒོ་ཁང་ལ་ སོགས་པ ་རྣམས་སུ་མགོན་མེད་རྣམས་བཅད་ནས། དེ་ཉིད་ཀྱིས་རབ་ཏུ་འབྱིན་པ་རྣམས་ཉེ་བར་མ་བསྡུས་པའོ། །དེ་ལྟར་རབ་ཏུ་བྱུང་བའི་བསླབ་པ་དང་ནད་པ་རྣམས་ཀྱི་ནད་གཡོག་མི་བྱེད་པའོ། །ཡལ་བར་འདོར་བ་ལས་གྱུར་པའི་ལྟུང་བྱེད་བཞིའོ། །གང་ལ་འདོད་པ་བསྟེན་པ་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་རང་གི་བསྟེན་པར་བྱ་བའི་ནང་དུ་རྒྱ་སྐྱེགས་ཀྱི་ཆང་བུ་འཇུག་པ་ལའོ་ཞེས་བྱ་བ་སྨོས་ཏེ། རང་གིས་ཞེས་བྱ་བ་ནི་རང་འཛུད་པ་ལ་བྱའི། གཞན་དང་གཞན་གྱིས་འཛུད་དུ་བཅུག་པ་མ་ཡིན་ཏེ། བསྟེན་པར་བྱ་བའི་ནང་དུ་གཞན་འཛུད་དུ་བཅུག་པ་ལ་ནི་མི་ཚངས་པར་སྤྱད་པར་གཏོགས་པའི་སྦོམ་པོར་རྣམ་པར་གཞག་པའི་ཕྱིར་རོ། །བསྟེན་པར་བྱ་བ་ཞེས་བྱ་བ་ནི་མོའི་དབང་པོའོ། །ནང་དུ་ཞེས་བྱ་བ་ནི་བསྟེན་པར་བྱ་བའི་དོན་དུའོ། །རྒྱ་སྐྱེགས་ཀྱི་ཆང་བུ་ཞེས་བྱ་བ་ནི་མདོ་ལས་གྲོགས་པོ་རྒྱ་སྐྱེགས་ཀྱིས་བསྐུས་པ་འཆང་ན་ཞེས་གསུངས་པ་ཡིན་ནོ། །རྣམ་པར་འབྱེད་པ་ལས་ཀྱང་གྲོགས་པོ་རྒྱ་སྐྱེགས་ཀྱི་ཚིགས་མས་བསྐུས་པའི་རྒྱ་སྐྱེགས་ཀྱི་ཚིགས་མའི་ཆང་བུ་བདག་ཉིད་འཆང་ན་ཞེས་གསུངས་པས། བསྟེན་པར་བྱ་བའི་ནང་དུ་འཆང་ན་ཞེས་རྣམ་པར་གནས་པ་ཡིན་ནོ། །དེ་བས་ན་ཉེ་བར་འཇོག་ན་ཞེས་དེ་ལྟར་ཉེ་བར་འབྲེལ་པའོ། །དགེ་སློང་མ་རྣམས་ལ་ཁུ་བ་འབྱིན་པའི་ཁ་ན་མ་ཐོ་བ་
གཞན་དུ་རྣམ་པར་གཞག་པའི་ཕྱིར་རོ། །ནང་དུ་འཛིན་པར་ནུས་པ་ཁ་ན་མ་ཐོ་བ་ཞེས་བྱ་བ་མཐོང་བ་ཡིན་ནོ། །འདི་ལྟར་དངོས་སུ་ཡང་གཏམ་གྱི་གཞི་ལས། དགེ་སློང་གིས་བསམས་བཞིན་དུ་ཁུ་བ་ཕྱུང་ན་དགེ་འདུན་ལྷག་མའོ། །དགེ་སློང་མས་ཕྱུང་ན་ལྟུང་བྱེད་དོ་ཞེས་གསུངས་པ་ཡིན་ནོ། །རང་གིས་རྩོལ་བར་བྱེད་ན་བུད་མེད་རྣམས་ལ་སྟོབས་དང་ལྡན་པའི་སྐུད་པ་སྟེ། དེ་བས་ན་འདིར་དགེ་འདུན་གྱི་ལྷག་མར་རྣམ་པར་གཞག་པའོ། །མི་ཚངས་པར་སྤྱོད་པ་ལས་གྱུར་པའི་འཇུག་པ་འདི་ཞེས་བྱ་བ་ནི། རྒྱ་སྐྱེགས་ཀྱི་ཚིགས་མའི་ཆང་བུ་བཅུག་པ་ཙམ་ལ་ནི་ལྟུང་བྱེད་ཁོ་ནར་འགྱུར་རོ། །འདིར་དེ་ཡན་ཆད་དུ་བྱེད་པ་ལས་ཐམས་ཅད་ནི་རྩོམ་པ་གཅིག་ཏུ་གྱུར་པས་བྱེད་ན་ནི་ལས་སུ་གཅིག་པ་ཡིན་ཏེ། ཁུ་བ་ཕྱུང་བའི་མཐར་ལྟུང་བྱེད་ཁོ་ནར་ཤེས་པར་བྱའོ། །བཀྲུ་བའི་ཕྱིར་སོར་གཉིས་ཙམ་གཞུག་པ་རྗེས་སུ་གནང་བའི་ཕྱིར་དེ་ཡན་ཆད་ནི་འདིར་དང་པོ་ཡིན་གྱི། པགས་པའི་རིམ་པ་ནི་དང་པོ་མ་ཡིན་ནོ་ཞེས་བྱ་བར་ཤེས་པའོ། །འདྲི་རྒྱ་སྐྱེགས་ཀྱི་ཆང་བུ་ཞེས་སྨོས་པ་ནི་དཔེ་ཙམ་དུ་རྣམ་པར་གནས་པ་ཡིན་ནོ། །འཇམ་པ་དང་ཧ་ཅང་ཕྲ་མོ་མ་ཡིན་པ་ཉིད་དང༌། མི་འཇམ་པ་དང་ཧ་ཅང་ཕྲ་མོ་ཉིད་ལ་ནི་འདིར་དངོས་གཞིའི་མཐར་ཉེས་བྱས་སོ། །ཕོ་ལ་ནི་ཇི་ཙམ་དུ་རེག་པ་ཚོར་གྱི་བར་དུ་འདིར་དེ་ཙམ་འཇམ་པ་ཉིད་ལ་མཐར་རྣམ་པར་གནས་པ་ཡིན་ཏེ། ཇི་ཙམ་དུ་འདོད་པ་ཉམས་སུ་མྱོང་བར་གྱུར་པའི་བར་དུ་ནི་སྦོམ་པོར་འགྱུར་རོ། །ཕོ་ལ་ནི་རྒྱ་སྐྱེགས་ཀྱི་ཚིགས་མའི་ཆང་བུ་གཞུག་པའི་གནས་གཉིས་ཡོད་དེ། ཁ་དང་བཤང་བའི་ལམ་སྟེ། འདིར་ཤིན་ཏུ་སྟོབས་དང་ལྡན་པ་ཉིད་ཀྱི་ཕྱིར་སྐྱེས་པ་ལ་སྐུད་པས་དགེ་སློང་ལ་ནི་ཉེས་པ་སྦོམ་པོར་རིག་པར་བྱའོ། །རྒྱུན་ལས་བཟློག་ཕྱོགས་སུ་བརྩལ་བར་མི་བྱའོ་ཞེས་བྱ་བ་ནི། དེ་ལ་ སོགས་པ ་འདི་མན་ཆད་ནི་ཉེས་བྱས་སུ་རིག་པར་བྱའོ། །འདི་དག་ནི་ཕྲན་ཚེགས་དག་ལས་འབྱུང་སྟེ། འདི་དག་ཀྱང་འདི་ལྟ་བུ་དང་མཐུན་པ་གཞན་དག་གི་དཔེ་ཡིན་ནོ། །མདོ་འདི་ནི་སྦོམ་དགའ་མོ་ཆུ་ཀླུང་གནས་ཅན་གྱི་ནང་དུ་ཞུགས་ཏེ། རྒྱུན་ལས་བཟློག་ཕྱོགས་སུ་རྩོལ་བར་བྱེད་པ་ན། དེ་དགེ་སློང་མ་རྣམས་ཀྱིས་ཅི་བྱེད་ཅེས་དྲིས་པ་དང༌། རེག་པ་བདག་གིར་བྱེད་དོ་ཞེས་ཟེར་བ་ལས་བསྡུས་པ་
ཡིན་ཏེ། དེ་བས་འདི་བསྟན་པ་ཡིན་ནོ། །མངལ་གྱི་སྒོར་ཁུ་ཆུ་བླུགས་པར་མི་བྱའོ་ཞེས་བྱ་བ་དེ་ནི། སྦེད་མའི་གླེང་གཞི་ལས་སོ། །རྐེད་བཅིངས་ཀྱིས་གློ་བཅིང་བར་མི་བྱའོ་ཞེས་བྱ་བ་ནི་གློ་གཉིས་ཕྲ་མོར་འདུག་པར་བྱ་བའི་ཕྱིར་རྐེད་བཅིངས་འཆད་བའོ། །འདིར་གློ་བཅིང་བར་བྱ་བའི་ཕྱིར་རྐེད་བཅིངས་ལ་སོགས་པའི་རྫས་གང་ཡང་རུང་བ་ཐམས་ཅད་ལས་སྤྱིར་རྐེད་བཅིངས་ཞེས་བྱའོ། །བྲང་བཅིངས་ཀྱིས་ནུ་མ་གཉིས་མི་བྱའོ་ཞེས་བྱ་བ་ཡང་བཅིངས་པར་ཞེས་བྱ་བར་སྦྱར་རོ། །ནུ་མ་གཉིས་འཆིང་བའི་དོན་ཅན་རྐེད་དཀྲིས་ཐམས་ཅད་ལ་བྲང་བཅིངས་ཞེས་བྱ་སྟེ། ནུ་མ་གཉིས་འཕྱང་དུ་མི་གཞུག་པའི་དོན་དུ་དེ་འཆང་བའོ། །མཛེས་འགྱུར་གྱི་བར་ཆད་ཀྱིས་བར་དུ་གཅད་པར་མི་བྱའོ་ཞེས་བྱ་བ་ཡང་ནུ་མ་གཉིས་མི་བྱའོ་ཞེས་བྱ་བར་སྦྱར་རོ། །ནུ་མ་གཉིས་ཕན་ཚུན་དུ་མི་འབྱར་བའི་དོན་དུ་བར་དུ་གཅོད་པའི་གོས་ནི་མཛེས་འགྱུར་གྱི་བར་ཆད་ཅེས་བྱ་སྟེ། དེས་ནུ་མ་གཉིས་ཀྱི་བར་དུ་གཅད་པར་མི་བྱའོ་ཞེས་བྱ་བའི་དོན་ཏོ། །འདིར་དེ་གསུམ་གྱི་གཞུང་ནི། དགེ་སློང་མས་རྐེད་བཅིང་སྐྱིས་གློ་བཅིང་བ་རྨི་བྱའོ། །བཅིངས་ན་འགལ་ཚབས་ཅན་དུ་འགྱུར་རོ། །དགེ་སློང་མས་བྲང་ཆིངས་དང་མཛེས་འགྱུར་གྱི་བར་ཆད་བཅང་བར་མི་བྱའོ། །བཅངས་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དེ་དག་ནི་དཔེའོ་ཞེས་བྱ་བ་ནི་རྐེད་བཅིངས་དེ་གཙོ་བོར་གྱུར་པ་གློའི་སྐ་རགས་དང་མཛེས་འགྱུར་གྱི་བར་ཆད་གསུམ་པོ་གང་ཡིན་པ་དེ་ནི་དཔེ་ཙམ་དུ་རིག་པར་བྱའོ། །འདིས་རྐེད་བཅིང་སླ་ སོགས་པ ་ཐམས་ཅད་ལ་དེའི་འབྲས་བུ་སྒྲུབ་པར་བྱེད་པ་འཕངས་ པ་ཉིད་དེ། །གཞན་གྱིས་ཀྱང་རྐེད་འཆིངས་ལ་སོགས ་པར་གྱུར་པས་དོན་འདི་བསྒྲུབས་པས་ཁ་ན་མ་ཐོ་བ་མཉམ་པ་ཉིད་དོ་ཞེས་བྱ་བའི་དོན་ཏོ། །འདོད་པ་བསྟེན་པའི་ལྟུང་བྱེད་དོ། །གང་ལ་འདོད་པ་བསྟེན་པ་ལྟར་འཆོས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སོར་མོའི་ཚིགས་གཉིས་ལས་ལྷག་པར་མོ་མཚན་གྱི་ནང་འཁྲུ་བ་ལའོ་ཞེས་བྱ་བ་སྨོས་ཏེ། འདིར་སོང་མོ་རྣམས་ཀྱི་ཚིགས་ནི་ཚིགས་ཉིད་ལ་བྱ་སྟེ། ཚིགས་ཀྱི་བར་རྣམས་ནི་མ་ཡིན་ནོ། །དྲི་མར་གྱུར་པ་བསལ་བར་བྱ་བ་འདི་ཙམ་མེད་པའི་ཕྱིར་ཞེས་རྟོགས་པར་བྱའོ། །གང་གི་ཕྱིར་སོར་མོ་རེང་བ་ཉིད་ཀྱི་ཚིགས་གཉིས་ཀྱིས་ཤེས་པར་གྱུར་པ་ལ་ཤིན་ཏུ་རིང་བ་བཅུག་པར་ཐལ་
བར་འགྱུར་རོ། །དེ་ཡང་ཆེ་བ་ཉིད་ཀྱིས་མི་འདྲ་བ་སྟེ་འདིའི་ཚད་ཀྱི་ཐ་སྙད་དོ། །དེ་ལ་དབུས་མའི་ཆེ་བ་ཉིད་ལ་ཚིག་འདི་སྨོས་སོ། །འདིར་ཡང་རང་གིས་ཞེས་བྱ་བར་སྦྱར་ཏེ། གཞན་བྱེད་དུ་བཅུག་པ་ལ་ནི་མི་ཚངས་པར་སྤྱོད་པར་གཏོགས་པའི་ཁ་ན་མ་ཐོ་བར་རྣམ་པར་གཞག་པའི་ཕྱིར་རོ། །འདི་ནི་སྦོམ་དགའ་མོས་རྨའི་སྦུབས་སུ་ལག་པ་བཅུག་སྟེ་རྩོལ་བ་ལས་མདོར་བྱས་པ་གང་ཡིན་པ་དེས་སོ། །འདོད་པ་བསྟེན་པ་ལྟར་བཅོས་པའི་ལྟུང་བྱེད་དོ། །གང་ལ་འདོད་པ་བསྟེན་པ་ལྟར་གནོད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེ་ལ་ལག་མཐིལ་གྱི་ཐལ་ལྕག་གིས་བསྣུན་པ་ལའོ་ཞེས་བྱ་བ་སྨོས་ཏེ། དེ་ལ་ཞེས་བྱ་བ་ནི་མོ་མཚན་ལའོ། །བསྣུན་པ་ལའོ་ཞེས་བྱ་བ་ནི་བྱེ་བྲག་མ་སྨོས་པའི་ཕྱིར་ཆགས་པ་ཅན་ནམ། མ་ཆས་པའི་སེམས་ཀྱིས་ལྟུང་བྱེད་ཅེས་བྱ་བ་ཡིད་ཆེས་པའོ། །འདོད་པ་བསྟེན་པ་ལྟར་གནོད་པའི་ལྟུང་བྱེད་དོ། །གང་ལ་མཚན་མ་ཉེ་བར་འཆོས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དེ་ལ་སྤུ་འཐོག་པར་བྱེད་དམ་བྱེད་དུ་འཇུག་པ་ལའོ་ཞེས་བྱ་བ་སྨོས་ཏེ། དེ་ལ་ཞེས་བྱ་བ་ནི་མོ་མཚན་ནོ། །མདོ་ལས་གནོད་པ་ཅན་གྱི་གནས་ལ་སྤུའི་ལས་བྱེད་ནའོ་ཞེས་གསུངས་པ་ཡིན་ནོ། །འདིར་རྣམ་པར་འབྱེད་པ་ལས་གནོད་པ་ཅན་གྱི་གནས་ལ་ཞེས་བྱ་བ་ནི་གསང་བའི་གནས་པའོ། །སྤུའི་ལས་ཞེས་བྱ་བ་ནི་སྤུ་འཐོག་པ་སྟེ་ལྟུང་བྱེད་ཀྱིས་སྲེག་པར་བྱེད་ཅེས་བྱ་བའི་དོན་ཏོ། །འདིར་རེག་པའི་ཁ་ན་མ་ཐོ་བར་རྣམ་པར་མི་གཞག་སྟེ། འདིར་ཇི་ལྟར་བྱས་པ་ཉིད་འདི་བསྒྲུབས་པས་ལྟུང་བྱེད་དོ། །འོན་ཀྱང་བཅོས་ཟིན་པ་ལ་མཉམ་པ་ཉིད་དུ་འདི་ལ་རང་དང་གཞན་གྱི་སྟེ། དེ་ལྟ་བས་ན་བྱེད་པ་དང་བྱེད་དུ་འཇུག་པ་ཞེས་བྱ་བ་གཉིས་ཀ་བསྟེན་པའོ། །འདིར་བཅོས་ཟིན་པ་ནི་དོན་ཏོ། །དེ་བས་ནི་འདིར་སྤུ་གཅིག་བཏོགས་པ་ལ་ཡང་དངོས་གཞིའོ། །གང་ཞིག་ཡང་བྱས་པ་ཉིད་ཀྱིས་འདིར་རྣམ་པར་གཞག་པར་རིགས་པ་དེ་དེ་ལས་ཡང་དག་པར་བྱས་པ་ཉིད་ཀྱིས་མོ་མཚན་ལ་ནི་འདིར་དངོས་གཞིའོ། །རྩོམ་པ་གཅིག་པར་འགྱུར་བ་ཉིད་ཀྱིས་ལྷག་པའི་རྗེས་སུ་འགྲོ་བར་རིག་པར་བྱའོ། །འདིར་སྐྱེས་པ་ལ་འདིར་རྒུད་པ་མེད་དེ། བུད་མེད་ལ་ཇི་ལྟ་བ་དེ་བས་ན་དེ་ལ་འདིར་འཇུག་ན་ཉེས་བྱས་སུ་རྣམ་པར་
གཞག་པ་ཡིན་ནོ། །ལག་པས་སྟེང་དུ་ཐལ་ལྕག་གིས་བསྣུན་པ་ནི་གལ་ཏེ་འདོད་ཆགས་ཀྱིས་བྱེད་ན་ནི་སྦོམ་པོའོ། །གལ་ཏེ་འདོད་ཆགས་མེད་ན་ནི་ཉེས་བྱས་སོ་ཞེས་རིག་པར་བྱའོ། །བསྟེན་པར་བྱ་བ་འཆོས་པའི་ལྟུང་བྱེད་དོ།། །།ད་འདི་མན་ཆད་ནི་རེག་པར་བྱ་བ་མ་ཡིན་པ་དང༌། བསྟེན་པའི་ལྟུང་བྱེད་བཅུ་གཅིག་པོ་རྣམས་སྟོན་ཏེ། དགེ་སློང་མས་སྐྱེས་པ་རེག་པར་བྱ་བ་མ་ཡིན་པ་དེ་དང་ལྷན་ཅིག་རེག་པའི་ཚུལ་གྱིས་བསྟེན་པ་གང་ཡིན་པ་དེ་རྣམས་ལ་རེག་པར་བྱ་བ་མ་ཡིན་པ་དང་བསྟེན་པའི་ལྟུང་བྱེད་རྣམས་ཤེས་པར་བྱའོ། །དེ་ལ་དེ་དག་གི་དང་པོ་ཇི་བཤད་པར་བྱ་སྟེ། དེའི་ཕྱིར་ཁྱིམ་པ་དང་ལྷན་ཅིག་དབེན་པ་སྐྱབས་ཡོད་པ་ན་འགྲེང་བ་ལའོ་ཞེས་བྱ་བ་སྨོས་ཏེ། འདོམ་གང་གི་ནང་ཚུན་ཆད་ཅེས་བྱ་བ་དེ་དགེ་སློང་གི་དབང་དུ་བྱས་པའི་ཆོ་གའི་རྗེས་སུ་འབྲངས་ནས་ཤེས་པར་བྱའོ། །འདུག་པ་ལ་ཡང་ལྟུང་བྱེད་འདི་ཡིན་ཏེ། འཇུག་པ་དེ་ལ་ཤིན་ཏུ་ལྕི་བ་ཉིད་ཀྱི་ཕྱིར་རོ། །མི་ཚངས་པར་སྤྱད་པའི་ཡན་ལག་ཏུ་གྱུར་པ་དེ་ཐམས་ཅད་ལ་མི་ཚངས་པར་སྤྱོད་པ་དང་འབྲེལ་པ་ལ་སྟོབས་དང་ལྡན་པ་ཉིད་ལ་འགལ་ཟླར་རྣམ་པར་གནས་པ་ཉིད་དོ། །དེ་བས་ན་སྟོབས་དང་མི་ལྡན་པ་ཉིད་དེ་ནི་འདིར་ན་སྨད་པར་རིག་པར་བྱའོ། །ཇི་ཙམ་དབེན་པ་སྐྱབས་ཡོད་པར་བརྗོད་པར་བྱ་ཞེ་ན། དེའི་ཕྱིར་རྩིག་པ་དང་སབ་མོ་དང་ཡོལ་བ་དང༌། ཐིབས་པོ་དང་མུན་པ་དག་གིས་ནི་དེ་ཉིད་འགྲུབ་བོ་ཞེས་བྱ་བ་སྨོས་ཏེ། ལྔ་པོ་འདི་རྣམས་ཀྱིས་དབེན་པ་སྐྱབས་ཡོད་པར་གྲུབ་པོ། །འདིར་རྩིག་པའི་སྒྲས་ནི་རྩིག་པ་ཉིད་བརྗོད་དོ། །འདི་མན་ཆད་ནི་རེག་པར་བྱ་བ་མ་ཡིན་པ་དང་བསྟེན་པ་གང་ཡིན་ཞེ་ན། དེའི་ཕྱིར་དགེ་སློང་དང་ངོ་ཞེས་བྱ་བ་སྨོས་ཏེ། དགེ་སློང་དང་ལྷན་ཅིག་དབེན་པ་སྐྱབས་ཡོད་པ་ན་འགྲེང་བ་ལའོ་ཞེས་བྱ་བར་སྦྱར་རོ། །གསུམ་པ་གང་དུ་ཡིན་ཞེ་ན། དེའི་ཕྱིར་བླ་གབ་མེད་པར་སྔ་མ་དང་ངོ་ཞེས་བྱ་བ་སྨོས་ཏེ། གང་དུ་བླ་གབ་མེད་པར་ཞེས་བྱ་བ་སྒྲིབ་པ་མེད་པའི་ཕྱོགས་ནི་སྔ་མ་དང་ངོ་ཞེས་བྱ་བ་ནི་ཁྱིམ་པ་དང་ལྷན་ཅིག་འགྲེང་བ་ལ་ཞེས་བྱ་བའི་དོན་ཏོ། །བཞི་པ་གང་ལ་ཡིན་ཞེ་ན། དེའི་ཕྱིར་ཕྱི་མ་དང་ངོ་ཞེས་བྱ་བ་སྨོས་ཏེ། བླ་གབ་མེད་པར་དགེ་སློང་ཕྱི་མ་དང་ལྷན་ཅིག་གནས་པ་ལའོ་ཞེས་བྱ་བའི་དོན་ཏོ། །གསུམ་པོ་དེ་རྣམས་ལ་ནི་འདུག་པ་ལ་ཡང་ལྟུང་བྱེད་ཁོ་ནར་འགྱུར་རོ། །དེ་གྲོགས་དང་བཅས་པ་
ཉིད་ཡིན་ན་ལྟུང་བ་མེད་དོ་ཞེས་བྱ་བ་ལ། དེ་ལ་ཞེས་བྱ་བ་ལ་དགེ་སློང་ལའོ། །གྲོགས་དང་བཅས་པ་ཉིད་ཡིན་ན་ཞེས་བྱ་བ་ནི་གཉིས་དང་བཅས་པ་ཉིད་ལ་ནི་ལྟུང་བ་མེད་དོ། །འདིར་གཞུང་ནི། གལ་ཏེ་དགེ་སློང་གྲོགས་དང་བཅས་པ་ཉིད་ཡིན་ན་ཞེས་བྱ་བའི་དོན་ཏོ། །དགེ་སློང་མ་ཁྲིམས་ཟླ་དང་བཅས་པ་གཅིག་ཡིན་ན་ཡང་ངོ་ཞེས་བྱ་བ་ཡང་ལྟུང་བ་མེད་དོ་ཞེས་བྱ་བ་དང་སྦྱར་རོ། །ཐག་ཇི་སྲིད་ཀྱི་དབང་གིས་གྲོགས་དང་ཐ་དད་པ་ཉིད་མ་ཡིན་པར་གནས་པའི་ཐག་དེ་ཙམ་ན་གྲོགས་འདུག་ན་ཁྲིམས་ཟླ་དང་བཅས་པ་ཉིད་ཡིན་ཏེ། དེ་ཕྱི་ནས་འབྲང་བའི་དགེ་སྦྱོང་ཉིད་དུ་གཏོགས་པར་བྱའོ། །གང་ལ་བསླབ་པའི་གཞི་ལྔ་པར་འགྱུར་ཞེ་ན། དེའི་ཕྱིར་ཁྱིམ་པའི་རྣར་བཤུབ་ཅིང་སྨྲ་བ་ལའོ་ཞེས་བྱ་བ་སྨོས་ཏེ། བྱེ་བྲག་མ་བསྟན་པས་དབེན་པ་སྐྱབས་ཡོད་པ་ཡང་རུང༌། བླ་གབ་མེད་པ་ཡང་རུང༌། གྲོགས་ཡོད་པ་ཡང་རུང༌། གཅིག་པུ་བྱང་རུང་བ་ཤེས་པར་བྱའོ།། འདིར་སྨྲ་བ་ལའོ་ཞེས་བྱ་བ་ནི་གང་ཡང་རུང་བ་འབྲེལ་བའི་དོན་དང་འབྲེལ་པ་མེད་པའི་དོན་ནམ་དོན་དང་བཅས་པའམ། དོན་མེད་པའི་ཚིག་སྨྲ་བ་ལ་ཁ་ན་མ་ཐོ་བ་འདི་ཡིན་ནོ། །དབེན་པར་སྨྲ་བ་ཉམས་སུ་མྱོང་བ་འདིར་གཙོ་བོ་ཉིད་དུ་རྣམ་པར་གཞག་པས་དཔུང་མགོའི་ཕྱི་རོལ་གྱི་མཐའ་ལས་སྨྲ་བ་མོའི་ཀོ་སྐོའི་མཐའ་ཆ་འདས་ན་དེ་ནི་རྣར་བཤུབ་ཅིང་ཉེ་བར་འབྲེལ་པའི་ལྟུང་བྱེད་ཀྱི་དང་པོར་རྣམ་པར་གནས་པ་ཡིན་ནོ། །མདུན་རོལ་དུ་སྙིང་གའི་རུས་པ་དང༌། ཕྱི་ནས་མཆན་ཁུང་གི་ཕྱོགས་ནས་སྨྲ་སྟེ་གོ་ནའོ། །དྲུག་པ་གང་ཞེ་ན་དེ་ལས་དེས་དེ་ཉན་པ་ལའོ་ཞེས་བྱ་བ་ནི། དེས་སྨྲས་པ་དེ་ཅུང་ཟད་པ་ལ་མཐའ་ཞེས་བྱ་བའོ། །དེ་བཞིན་དུ་རྣ་བ་དང་ཉེ་བར་སྨྲ་བ་འདི་བཟུང་བ་ལ་ཁྱིམ་པ་དེ་ལས་རྣར་བཤུབ་ཅིང་སྨྲ་བ་ལའོ། །བདུན་པ་ནི་དགེ་སློང་གིའོ་ཞེས་བྱ་བ་སྟེ། རྣར་བཤུབ་ཅིང་སྨྲ་བ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བར་སྦྱར་རོ། །བསླབ་པའི་གཞི་བརྒྱད་པ་ནི་དེ་ལས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲས་ནི་རྣར་བཤུབ་ཅིང་སྨྲ་བ་ཉན་པ་ལའོ་ཞེས་བྱ་བའི་རྗེས་སུ་བསྙེགས་པའི་ཕྱིར་རོ། །དེ་ལས་ཀྱང་ངོ་ཞེས་བྱ་བ་ཡང་སྒྲས་འདིས་དགེ་སློང་དང་ཁྱིམ་པ་གཉིས་ཀ་ཡང་བཟུང་བ་ཡིན་ཏེ། གཉིས་པོ་དེ་དག་གི་དྲུང་དུ་རྣར་བཤུབ་ཅིང་སྨྲ་བ་ཉན་པ་ལ་ལྟུང་བྱེད་དུ་
བལྟ་བར་བྱའོ། །ཁྱིམ་པ་དང་ལྷན་ཅིག་པ་ཉིད་ལ་རྣམ་པ་འདིར་འགྱུར་བའམ་བྱེ་བྲག་མེད་བར་རོ། །དེ་ལ་ཁྱིམ་པ་དང་ལྷན་ཅིག་པའི་རྣམ་པའམ་དགེ་སློང་དང་ལྷན་ཅིག་ཏུ་གྱུར་པ་ལ་ལྟུང་བ་མེད་པ་ཐོབ་པའོ། །བྱེ་བྲག་མེད་པར་སྨྲ་བ་ལ་དགེ་སློང་དང་ལྷན་ཅིག་པ་ཉིད་ནི་དགེ་འདུན་གྱི་ཁོངས་སུ་འདུས་པ་ཉིད་ཀྱི་ཕྱིར་འདི་ལ་ཉེས་པ་མེད་དོ། །དེ་ལྟ་བས་ན་དགོས་པ་འདི་ལ་ལྟུང་བ་མེད་ཅེས་བྱ་བའོ། །དེ་བས་ན་ཁྱིམ་པ་དང་དགེ་སློང་གི་དབྱེ་བ་ལ་ སོགས་པ ་ལ་བརྟན་ནས་བཅས་པ་འདི་རྣམས་མཛད་དོ། །དགེ་སློང་དང་ལྷན་ཅིག་པ་ཉིད་ལ་དགེ་ཚུལ་ལ་འདིར་དགེ་སློང་ཉིད་ཅེས་སྨོས་ཏེ། ཉེས་དམིགས་མཚུངས་པ་ཉིད་ཀྱི་ཕྱིར་འདིར་ཡོངས་སུ་རྫོགས་པ་ཉིད་དང༌། འདིར་ཕྱི་རོལ་པའི་རབ་ཏུ་བྱུང་བ་ལ་ཁྱིམ་པ་ཉིད་ཅེས་གོ་བར་བྱའོ། །དགུ་པ་གང་ལ་ཡིན་ཞེ་ན། དེའི་ཕྱིར་ཁྱིམ་པ་ལས་རིག་པ་ལེན་པ་ལའོ་ཞེས་བྱ་བ་སྨོས་ཏེ། དགེ་སློང་མས་ཁྱིམ་པ་ལས་རིག་པ་གང་ཡང་རུང་བ་ལ་ལྷུང་བྱད་འདིར་འགྱུར་རོ། །འདི་ནི་སྦོམ་དགའ་མོས་ཆགས་པར་གྱུར་པས་སྐྱེས་པ་ལས་རིག་པ་བླངས་ནས། དེའི་ཚེག་ཉན་དུ་གཞུག་པའི་ཕྱིར། ཡང་དང་ཡང་དུ་ཟླས་པ་འཆོལ་བར་བྱེད་པ་དེ་ལས་བཅས་པ་ཡིན་ན། །བཅུ་པ་ནི་དེ་ལས་དེ་ཀློག་པ་ལའོ་ཞེས་བྱ་བ་ལ། དེ་ལས་ཞེས་བྱ་བ་ནི་ཁྱིམ་པ་ལའོ། །དེ་ཞེས་བྱ་བ་ནི་རིག་པའོ། །ཀློག་པ་ལ་ནི་ལྷུང་བྱེད་དོ། །འདིར་རིག་པ་ཞེས་བྱ་བ་ནི་དཔེ་ཙམ་དུ་རྣམ་པར་གནས་པ་ཡིན་ནོ། །བསྒོམ་པར་བྱ་བ་མ་ཡིན་པ་ཐམས་ཅད་ལ་ཡོངས་སུ་རྫོགས་པ་ཉིད་ཀྱི་ཕྱིར་རོ། །ཁ་ན་མ་ཐོ་བ་འདི་བྱེད་དུ་བཅུག་ནས་དགེ་སློང་དང་ལྷན་ཅིག་པ་ཉིད་དུ་འདིར་དགེ་སློང་མ་དང་དགེ་སློབ་མ་སློབ་དཔོན་དུ་རིགས་པ་ཉིད་ཀྱི་ཕྱིར་ལྷུང་བ་མེད་པའོ། །འདིར་ཡང་དགེ་སློང་དང་ལྡན་པ་ཉིད་ནི་དགེ་ཚུལ་ལ་རྣམ་པར་གནས་པ་ཡིན་ནོ། །འདི་དང་ཡང་ལྷན་ཅིག་ཏུ་རིགས་པ་ཉིད་ཀྱི་ཕྱིར། །དགེ་སློབ་མས་སློབ་མ་དང་སློབ་དཔོན་ཉིད་དུ་ཕྱི་རོལ་བའི་རབ་ཏུ་བྱུང་བ་ལ་ཁྱིམ་པ་ཉིད་ཡོངས་སུ་རྫོགས་པ་ཁོ་ནའོ། །གང་དུ་བཅུ་གཅིག་པ་འདི་ལ་རིག་པར་བྱ་བ་མ་ཡིན་པ་དང༌། བསྟེན་པ་ལས་གྱུར་པའི་ལྷུང་བྱེད་དུ་འགྱུར་ཞེ་ན། དེའི་ཕྱིར་རྒྱུར་ཐབས་ཀྱིས་རྨ་བཅིངས་ཤིང་འགྲོལ་དུ་འཇུག་པ་ལའོ་ཞེས་བྱ་བ་སྨོས་ཏེ། སྒྱུ་ཐབས་ཀྱིས་ཞེས་
བྱ་བ་ནི་ཉོན་མོངས་པ་ཅན་གཙོ་བོ་ཉིད་ཀྱིས་སོ། །རྨ་བཅིངས་ཤིང་ཞེས་པ་ནི་བཅིངས་ཤིང་བཅིངས་ཤིང༌། སྐྱེས་པ་ལ་འགྲོལ་དུ་འཇུག་ན་དངོས་གཞིའོ། །སྒྱུ་ཐབས་ཀྱིས་བུད་མེད་འགྲོལ་དུ་འཇུག་པ་ལ་ནི་ཉེས་བྱས་སོ། །འདི་ནི་གཙུག་དགའ་མོའི་དཔུང་པ་གཡས་པར་ཕོལ་མིག་བྱུང་བའི་རྨ་དེ་སྨན་པས་ཟན་གྱིས་གླན་ནས་རས་མས་བཅིངས་པ་དང༌། དེས་ཧ་ཅང་ལྷོད་དོ། །ཧ་ཅང་དམ་མོ། །ཞེས་ཟེར་ཞིང་ཡང་དང་ཡང་འགྲོལ་དུ་བཅུག་པ་དེ་གང་ཡིན་པ་ལས་བཅས་པ་ཡིན་ནོ། །དེའི་ཕྱིར་དོན་བདེན་པ་ཉིད་ལ་ནི་ལྟུང་བ་མེད་དོ་ཞེས་བྱ་བ་ནི། གང་གི་ཕྱིར་སྒྱུ་ཐབས་ཀྱིས་འགྲོལ་དུ་འཇུག་པ་འདི་ལ་ལྟུང་བྱེད་ཡིན་པ་དེའི་ཕྱིར་དམ་ཡང་དག་གམ། ལྷོད་པ་ལས་ སོགས་པ ་བཅིངས་པ་ཉིད་ཀྱི་ཡང་དག་པའི་དོན་བདེན་པ་ཉིད་ལ་ནི་ལྟུང་བ་མེད་པར་བལྟ་བར་བྱའོ། །འདིར་རེག་པ་ལ་གཞན་འདྲེན་མའི་ཁ་ན་མ་ཐོ་བའི་མཚན་ཉིད་ཇི་ལྟ་བར་རྟོགས་པར་བྱའོ། །འདིར་དགེ་སློང་ལ་ཆུང་བ་ཉིད་ཀྱི་ཕྱིར་འདི་དང་འབྲེལ་བའི་རྒྱུད་ལ་སྐྱེས་པ་ལ་ནི་ཉེས་བྱས་སུ་རིག་པར་བྱའོ། །འདིར་ཡང་བྱ་བ་ཙམ་གཙོ་བོ་ཡིན་ཏེ། དེ་བས་ན་ཕྱེད་འགྲོལ་དུ་བཅུག་པ་ལ་ཡང་ལྟུང་བྱེད་འདིའོ། །ལྷན་མང་པོ་འགྲོལ་དུ་འཇུག་ཅིང་སྒྱུ་ཐབས་ཀྱིས་བཀྲོལ་བ་ཇི་སྙེད་པ་དེ་རྣམས་ལ་ལྟུང་བྱེད་དུ་འགྱུར་རོ། །རེག་པར་བྱ་བ་མ་ཡིན་པ་དང་བསྟེན་པ་ལས་གྱུར་པའི་ལྟུང་བྱེད་དེ་བཅུག་ཅིག་གོ །གང་ལ་བུ་འཚོ་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་བུ་འཚོ་བ་ལའོ་ཞེས་བྱ་བ་སྨོས་ཏེ། བུ་ཕྲུག་འཚོ་ཞིང་རྩེ་བ་ལའོ། །འདིར་གླེང་གཞི་ལས་ཁྱེའུ་ཞེས་སྨོས་པ་ནི་བུ་མོ་དང་མ་ནིང་གི་དཔེ་ཡིན་ཏེ། རྣམ་པར་འབྱེད་པ་ལས་ཀྱང་ཚིག་འདི་ཉིད་དོ། །བུ་བཅང་བར་བྱ་སྟེ་ཁྱེའུ་ལ་ཉེ་གནས་བྱའོ། །བུ་མོ་དང་མ་ནིང་དག་ལ་ནི་འཇུག་པའི་ཚུལ་འདྲའོ། །དེ་ལྟ་བས་ན་འཇུག་པ་ཙམ་གཙོ་བོས་ཏེ། གླེང་གཞི་ལས་ནི་ཁྱེའུའི་ཚིག་གོ །དེའི་རྗེས་སུ་འགྲོ་བས་མཚོན་པ་ཙམ་གྱི་བསམ་པས་རྣམ་པར་འབྱེད་པ་ལས་བཤད་པའོ། །བུ་ཐམས་ཅད་ནི་ཉེས་པ་ཡོངས་སུ་རྫོགས་པ་ཉིད་ཅེས་བྱ་བར་རིག་པར་བྱའོ། །འདིར་ཡང་འཚོ་བར་ནི་ཁྱེའུ་དུ་བར་ཤེས་པར་བྱའི་ངོ་བོའམ་རྩེད་མོ་ལ་ སོགས་པས་ཉེ་བར་གནས་པ ་གང་ཡིན་པ་དེ་ལ་རྟོགས་པར་བྱའོ། །
གང་གི་བུ་ལ་རེག་པ་རྗེས་སུ་གནང་བའི་ཕྱིར་རང་གི་བུ་འཚོ་བ་ལ་ནི་ཉེས་པ་མེད་དོ། །འདིར་དགེ་སློང་ལ་དམན་པ་ཉིད་ཀྱི་ཕྱིར་སྐྱེས་པ་ལ་མ་གྲུབ་པས་ཉེས་བྱས་སུ་རིག་པར་བྱའོ། །བུ་འཚོ་བའི་ལྟུང་བྱེད་དོ།། །།ད་ནི་འདི་མན་ཆད་ནི་གནོད་པར་འགྱུར་བའི་སྒོ་སྤང་བའི་ལྟུང་བྱེད་བཤད་པར་བྱ་སྟེ། སྐྱེས་པས་གནོད་པར་གྱུར་པ་གང་ཡིན་པ་དེ་འཇུག་པར་གྱུར་པའི་སྒོ་གང་ཡིན་པ་སྤང་བའི་ཕྱིར་རོ། །གང་ལ་དེ་རྣམས་ཀྱི་དང་པོ་ཡིན་ཞེ་ན། དེའི་ཕྱིར་ཁྱིམ་བདག་ལ་མ་དྲིས་པར་ཁྱིམ་གཞན་དུ་མཚན་མོ་འདའ་བར་བྱེད་པ་ལའོ་ཞེས་བྱ་བ་སྨོས་ཏེ། རང་གིས་ཀྱང་གནོད་བར་འགྱུར་བའི་ཁྱིམ་བདག་མ་མཐོང་བར་འདོད་ལ་རྩེ་གཅིག་པ་དེའི་ཁྱིམ་དུ་གཏོགས་པ་རྩིག་ པ་ལ་སོགས ་པས་བསྐོར་བའམ། གཞན་དུ་བཟློག་པའི་ཕྱི་ཅི་ནས་ཀྱང་རྩོམ་པ་མེད་པ་ཞེ་བྱ་བ་འདི་བཏགས་སོ། །བསྐོར་བ་ཙམ་གྱི་ཁྱིམ་ཉིད་གང་ཡིན་པ་དེ་ནི་འདིར་ཡན་ལག་ཏུ་རྣམ་པར་གནས་པ་ཡིན་ནོ། །འདིར་བསྒྲིབས་པ་ཉིད་ནི་ཡན་ལག་མ་ཡིན་ཏེ། ཡང་གང་ཞིག་འདིར་བསྐོར་བ་ཉིད་དེ་ནི་ཁྱིམ་གྱི་མཐར་ཐུག་པར་རིག་པར་བྱའོ། །ཕྱུགས་ལྷས་སམ་མགྲོན་ཁང་ལ་ སོགས་པ ་ལ་ཡང་ཁ་ན་མ་ཐོབ་འདི་འགྲུབ་པའོ། །བུད་མེད་ལ་རག་ལས་བ་ཉིད་ཡིན་ན་དེ་ལ་དྲིས་ན་ལྟུང་བ་མེད་དོ་ཞེས་བྱ་བ་ནི། ཁྱིམ་གང་བུད་མེད་དབང་ཆེ་ཞིང་ཁྱིམ་བདག་གི་བུད་མེད་ཀྱི་ཚིག་ལས་འདའ་བར་མི་ནུས་པ་དེ་ནི་བུད་མེད་ལ་ག་ལས་པ་ཉིད་ཅེས་བྱ་སྟེ། དེར་བུད་མེད་ལ་དྲིས་ནས་ཁྱིམ་བདག་ལམ་དྲིས་པར་མཚན་མོ་འདའ་བར་བྱེད་པ་ལ་ལྟུང་བ་མེད་པའོ། །གང་ལ་ལྟུང་བྱེད་གཉིས་པར་འགྱུར་ཞེ་ན། དེའི་ཕྱིར་མཚན་མོ་མ་བརྟགས་པར་སྐྱབས་ཡོད་པར་འདའ་བར་བྱེད་པ་ལའོ་ཞེས་བྱ་བ་སྨོས་ཏེ། སྐྱབས་ཡོད་པ་ཞེས་བྱ་བ་ནི། །རྣམ་པ་གང་ཡང་རུང་བས་མི་སྣང་བ་ཉིད་སྒྲུབ་པར་བྱེད་པ། མུན་ཁུང་དང་ཐིབས་པོ་ལ་ སོགས་པ ་འདིར་སྐྱབས་ཉིད་དུ་རིག་པར་བྱའོ། །རྟེན་ཉིད་ལ་ནི་མ་ཡིན་ནོ། །མ་མཐོང་བ་གནས་པའི་སྐྱེས་པ་ཡོད་པ་དང༌། མེད་པ་ཉིད་ཤེས་པར་བྱ་བའི་ཕྱིར་བརྟགས་པ་འདིའོ། །དེ་ལྟ་བས་ན་སྐྱབས་ཡོད་པ་ལ་སོ་སོར་བརྟག་པར་བྱ་བ་མ་བྱས་པར་མཚན་མོ་འདའ་བར་བྱེད་པ་ལ་ལྟུང་བྱེད་དོ་ཞེས་བྱ་བའི་དོན་ཏོ། །གང་ལ་བསླབ་པའི་གཞི་གསུམ་པར་འགྱུར་ཞེ་ན། དེའི་ཕྱིར་གནས་ཁང་དུ་དགེ་
སློང་མ་གཞན་མེད་པར་མཚན་མོ་འདའ་བར་བྱེད་པ་ལའོ་ཞེས་བྱ་བ་སྨོས་ཏེ། མཚན་མོ་གནས་ཁང་དུ་དགེ་སློང་མ་གཞན་མེད་པར་གཅིག་པུ་ཉལ་ཞིང་འདའ་བར་བྱེད་པ་ལ་ལྟུང་བྱེད་ཅེས་བྱ་བའི་དོན་ཏོ། །འདིར་གནས་ཁང་ཞེས་སྨོས་པ་ནི་དཔེ་ཙམ་དུ་ཟད་ཀྱི། གཡོགས་བའི་ཕྱོགས་ཀྱི་གནས་ཁང་གཞན་ཡང་བསྡུས་པ་ཡིན་ནོ། །དུས་འདེབས་པ་དང་སྐྱེས་པས་གནོད་པར་འགྱུར་བའི་གཞན་དང་ལྷན་ཅིག་ཉེས་དམིགས་མཉམ་པ་ཉིད་ཀྱི་ཕྱིར་རོ། །ཇི་ལྟར་འོས་པས་རྗེས་སུ་འགྲོ་བར་གྱུར་ཅིག་ཅེས་བྱ་བས་དེའི་གནས་ཁང་ཞེས་སྨོས་སོ། །མཚན་མོ་གསུམ་པའི་ཆ་གསུམ་པ་ལ་ལྟུང་བྱེད་དོ། །མདུན་རོལ་དུ་ནི་ཉེས་བྱས་སོ་ཞེས་གསུངས་པ་ཡིན་ནོ། །ཉིན་མཚན་གྱི་དང་པོ་མ་ཡིན་པ་ལ་མཚན་མོ་མཐའི་སྐད་ཅིག་ལ་ནི་ཡོད་པ་ཉིད་དང་སྦྱར་བ་ཙམ་ཉིད་བདེན་པ་ཉིད་དུ་ཤེས་པར་བྱའོ། །དེ་ཤི་བ་ལ་ སོགས་པ ་ལ་ནི་ལྟུང་བ་མེད་དོ་ཞེས་བྱ་བ་ནི། དགེ་སློང་མ་གཞན་དེ་ནི་ཤི་བའམ། བབས་སམ། ཡུལ་གཞན་ལ་ སོགས་པར་སོང་ངམ། རྐྱེན་གཞན་གྱིས་མེད་པར་གྱུར་ན་གཅིག་པུ་གནས་ཁང་དུ་མཚན་མོ་འདའ་བར་བྱེད་པ ་ལ་ལྟུང་བ་མེད་པ་ཡིན་ཏེ། དེས་ནི་མི་འདོད་བཞིན་དུ་བྲལ་བར་བསྟན་ཏོ། །གནོད་པར་འགྱུར་བའི་སྒོ་སྤང་བའི་ལྟུང་བྱེད་གསུམ་མོ། །གང་ལ་མལ་གཅིག་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་མ་དང་ཁྲི་གཅིག་ལ་སྟན་གཅིག་རེག་པ་དང་བཅས་ཤིང་མཚན་མོ་ཉལ་བ་ལའོ་ཞེས་བྱ་བ་སྨོས་ཏེ། འདིར་དགེ་སློང་མ་ཞེས་བྱ་བ་ནི་བུད་མེད་དུ་གྱུར་པ་ལ་དཔེ་ཙམ་དུ་ཟད་དེ་བུད་མེད་གཞན་ལ་ནི་ཤིན་ཏུ་སྐྱོན་དང་ལྡན་པ་ཉིད་ཀྱི་ཕྱིར་རོ། །རེག་པ་དང་བཅས་ཤིང་ཞེས་བྱ་བ་ནི་རེག་པ་དང་བཅས་ཤིང་འཇུག་པ་ལ་རེག་པ་དང་བཅས་ཤིང་ཞེས་བྱ་བའི་བསྡུ་བའོ། །མ་རེག་པར་ཉལ་བ་ལ་ལྟུང་བ་མེད་དོ་ཞེས་སྨོས་པའི་ཕྱིར་འདིར་རེག་པ་ལ་ནི་ཁ་ན་མ་ཐོ་བ་རྫོགས་པའོ། །དེ་དང་ངམ་དུ་མ་དང་ལྷན་ཅིག་ཀྱང་རུང་སྟེ། གཏུར་བུ་ལ་ སོགས་པས་བར་དུ་བཅད་ཅིང་དྲན་པ ་ཉེ་བར་གཞག་སྟེ། ལུས་ཀྱི་རེག་པའི་རོ་མྱང་བ་མེད་པར་ཁྲི་མི་འཁྲུལ་པ་ཐ་མལ་པའམ་སྟན་ལ་ནི་ལྟུང་བ་མེད་དོ་ཞེས་བྱ་བ་ལ། དེ་དང་ངམ་ཞེས་བྱ་བ་ནི་དགེ་སློང་མས་སོ། །དུ་མ་དང་ཞེས་བྱ་བ་ནི་དགེ་སློང་མ་གཅིག་པུ་ཉིད་དུ་མ་ཟད་ཀྱི། འོན་
ཀྱང་གཉིས་ལ་སོགས་པས་ཀྱང་ཞེས་བྱ་བའི་དོན་ཏོ། །ཅི་དེ་ཙམ་ཉིད་ཀྱིས་ཡིན་ནམ་ཞེ་ན། དེའི་ཕྱིར་བར་དུ་བཅད་ཅིང་ཞེས་བྱ་བ་སྨོས་སོ། །གང་གིས་ཤེ་ན་དེའི་ཕྱིར་གཏུར་བུ་ལ་སོགས་པས་ཞེས་བྱ་བ་སྨོས་ཏེ། གཏུར་བུ་དང་ལྷུང་བཟེད་དང་འདྲ་བ་ལ་ སོགས་པས་བར་དུ་བཅད་པ ་བྱས་པར་འགྱུར་བ་ལའོ། །དྲན་པ་ཉེ་བར་གཞག་སྟེ་ཞེས་བྱ་བ་ཀུན་དུ་ལོངས་འཆོས་པར་གཏོགས་པའི་ཉེ་བའི་ཉོན་མོངས་པའི་སྐྱོན་ཉེ་བར་བསལ་བའི་ཕྱིར་བསླབ་པའི་གཞི་འདིའོ། །དེ་བས་ན་དྲན་པའི་རྣམ་པ་ལྟ་བུར་ལོངས་འཆོས་པར་གཏོགས་པའི་ཉེ་བའི་ཉོན་མོངས་པ་དེའི་ཆ་ཅན་ལ་ཉེ་བར་ལྟུང་བ་བསལ་བར་ནུས་པའི་དྲན་པ་དེ་ལྟ་བུས་དྲན་པ་ཉེ་བར་གཞག་གོ་ཞེས་བྱ་བའི་དོན་ཏོ། །ལུས་ཀྱི་རེག་པའི་རོ་མྱང་བ་མེད་པར་ཞེས་བྱ་བ་ནི། ལུས་ཀྱི་རེག་པ་ཡོངས་སུ་བསལ་བ་ནི་བར་དུ་གཅོད་པའི་དོན་ཏོ། །དེའི་ཕྱིར་བར་དུ་གཅོད་བ་ལས་ཡང་རྐྱེན་གྱི་དབང་གིས་བརྒྱ་ལ་ལུས་རེག་པར་འགྱུར་ན་ལུས་རེག་པ་དེའི་རོ་མྱང་བ་མེད་པར་བྱེད་པའོ། །གང་དུ་འདི་དང་ལྷན་ཅིག་ལྟུང་བར་མི་འགྱུར་ཞེ་ན། དེའི་ཕྱིར་ཁྲི་མི་འཁྲུལ་བའམ། ཐ་མལ་པའམ། སྟན་ཞེས་བྱ་སྟེ། འདི་རྣམས་ལ་ལྷན་ཅིག་ཉལ་བ་ལ་ལྟུང་བ་མེད་དོ། །འདིར་གཞུང་ནི་ཁྲི་མི་འགུལ་བ་ལ་གཏུར་བུ་ལ་ སོགས་པས་བར་དུ་བཅད་ཅིང་དྲན་པ ་ཉེ་བར་གཞག་སྟེ། ལུས་ཀྱི་རེག་པའི་རོ་མྱང་བ་མེད་པ་དང༌། ཁྲི་ཐ་མལ་པ་དང་དེ་བཞིན་དུ་སྟན་ལ་ཡང་ངོ་ཞེས་གསུངས་པ་ཡིན་ནོ། །ཡོད་ན་ཉེས་བྱས་སོ་ཞེས་བྱ་བ་ནི། མལ་སོ་སོར་བྱ་བའི་སྐབས་ཡོད་ན་བར་དུ་བཅད་ པ་ལ་སོགས ་པས་ཀྱང་ལྷན་ཅིག་ཉལ་བ་ལ་ནི་ཉེས་བྱས་ཀྱི་ཁ་ན་མ་ཐོ་བར་འགྱུར་རོ། །ལོངས་སྤྱོད་ཅིང་གནས་པ་བཏང་བའི་ལྟུང་བྱེད་དོ།། །།འདི་མན་ཆད་ནི་བྱི་དོར་བྱེད་པ་ལས་གྱུར་པའི་ལྟུང་བྱེད་བརྒྱད་སྟོན་ཏེ། གང་ལ་དེ་རྣམས་ཀྱི་དང་པོར་འགྱུར་ཞེ་ན། དེའི་ཕྱིར་རང་གི་ལུས་ཀྱི་དྲིལ་ཕྱིས་དགེ་སློང་མས་བྱེད་དུ་འཇུག་པ་ལའོ་ཞེས་བྱ་བ་སྨོས་སོ། །བསླབ་པའི་གཞི་གཉིས་པ་ནི། དགེ་སློང་མ་ལའོ་ཞེས་བྱ་བ་སྟེ། རང་གི་ཡན་ལག་གི་དྲིལ་ཕྱིས་དགེ་སློབ་མ་ལ་བྱེད་དུ་འཇུག་པ་ཞེས་བྱ་བ་ལྔ་པོ་དེ་རྣམས་ལས་ཡང་རིག་པར་བྱའོ། །གསུམ་པ་ནི་དགེ་ཚུལ་མས་སོ། །བཞི་པ་ནི་ཁྱིམ་པ་མོའོ། །ལྔ་པ་ནི་མུ་སྟེགས་ཅན་མའོ་ཞེས་བྱ་བ་ལ། རང་གི་ཡན་ལག་
རྣམས་ལ་དྲིལ་ཕྱིས་བྱེད་དུ་འཇུག་ན་ལྟུང་བྱེད་དོ། །ཅིའི་ཕྱིར་སླར་དེ་ཐ་དད་པས་བཅའ་བ་མཛད་ཅེ་ན། འདིར་ལྟུང་བ་ལྔ་པོ་རྣམས་ལ་འཇུག་པའི་ཕྱིར་ཆིག་ཙམ་གྱི་རྗེས་སུ་འཇུག་པ་ཉིད་ཀྱིས་དགེ་སློང་མས་རང་གི་ལུས་ལ་དྲི་མ་ཕྱི་བར་མི་བྱའོ་ཞེས་བྱ་བའི་བཅས་པ་འདི་ཡོད་པ་ལ། དགེ་སློང་མ་ལ་ སོགས་པ ་རྣམས་ཀྱིས་རང་གི་ལུས་ལ་དྲི་མ་ཕྱིས་པ་ལ་ཉེས་པ་མེད་དོ། །དེ་ལྟར་འཇུག་པར་གྱུར་པ་རྣམས་ལ་ལྔ་པོ་འདི་རྣམས་བཅས་པའོ། །དྲུག་པ་བྱི་དོར་བྱེད་པའི་ལྟུང་བྱེད་ནི་བཀྲུ་བཤལ་བྱེད་དུ་འཇུག་པ་ལའོ་ཞེས་བྱ་བ་སྟེ། འདིར་བུད་མེད་ཀྱིས་ཞེས་བྱ་བ་རྟོགས་པར་བྱའོ། །སྐྱེས་པས་བྱེད་དུ་བཅུག་པ་ལ་རེག་པའི་ཁ་ན་མ་ཐོ་བ་ཤིན་ཏུ་ལྕི་བར་རྣམ་པར་གཞག་པའི་ཕྱིར་རོ། །རྫས་གཞན་གང་ཡང་རུང་བས་དྲིལ་ཕྱིས་བྱས་པ་ལ་སྔ་མ་ལྔ་པོ་རྣམས་བཅས་པ་ཡིན་ནོ། །འདི་ནི་ཆུ་འབའ་ཞིག་གིས་བཀྲུ་བཤལ་བྱེད་དུ་འཇུག་པ་ལས་བཅས་པ་ཡིན་ཏེ། བྱེ་བྲག་ནི་དེ་ཡིན་ནོ། །དེ་ལྟར་ཡང་བཀྲུ་བཤལ་བྱེད་དུ་འཛུད་ན་ཞེས་གསུངས་པ་དེའི་རྣམ་པར་འབྱེད་པ་ནི་ཆུས་བཀྲུ་བཤལ་བྱེད་ན་ཞེས་གསུངས་པ་ཡིན་ནོ། །བསླབ་པའི་གཞི་བདུན་པ་ནི་རྫས་དྲི་ཞིམ་པོས་རང་གི་ལུས་སྐུད་པ་ལའི་ཞེས་བྱ་བ་ལ། །འདིར་དྲི་དག་གིས་ཞེས་བྱ་བ་ནི། མདོའི་ཚིག་གོ །རྫས་དྲི་ཞིམ་པོ་དག་གིས་ཞེས་བྱ་བ་ནི་རྣམ་པར་འབྱེད་པའི་ཚིག་གོ །གང་ལ་ལྟུང་བྱེད་བརྒྱད་པར་འགྱུར་ཞེ་ན། དེའི་ཕྱིར་འབུར་མར་གྱི་ཚིགས་མས་སོ་ཞེས་བྱ་བ་སྨོས་ཏེ། རང་གི་ལུས་སྐུད་པ་ལའོ་ཞེས་བྱ་བར་སྦྱར་རོ། །འདིར་རང་གི་བྱེད་པའི་རྫས་དྲི་ཞིམ་པོས་རང་གི་ལུས་ལ་སྐུད་པ་ནི་དྲིལ་ཕྱིས་ཞེས་སྨོས་པ་ཡིན་ནོ། །གཞན་བྱེད་དུ་འཇུག་པ་ལ་ཡང་ཞེས་བྱ་བའི་བྱེ་བྲག་མ་སྨོས་པས་རྟོགས་པའོ། །བུད་མེད་སྐུད་དུ་འཇུག་པ་དང་གཞན་གྱིས་བྱས་པ་དང་གཞན་གྱིས་བྱས་པ་མ་ཡིན་པ་ཞེས་བྱ་བ་ནི་ལྟུང་བ་སྦོམ་པོ་དང༌། དེར་ཕམ་པ་སྐྱེས་པས་འདིར་དགེ་སློང་གིས་དྲི་འཆང་བ་ལ་ནི་ཉེས་བྱས་ཁོ་ནའོ། །མཚན་མཐུན་པ་བྱི་དོར་བྱེད་དུ་འཇུག་པ་ལ་ནི་ལྟུང་བ་མེད་དོ། །བྱི་དོར་བྱེད་པ་ལས་བྱུང་བའི་ལྟུང་བྱེད་བརྒྱད་པའོ།། །།གང་ལ་ཆུ་ལ་ལོངས་སྤྱོད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལག་པ་སྦྲེལ་ཏེ་ཁྲུས་བྱེད་པ་ལའོ་ཞེས་བྱ་བ་སྨོས་ཏེ། བུད་མེད་དང་ལྷན་ཅིག་གོ །སྐྱེས་པ་དང་མ་ཡིན་ནོ། །འདིར་སྦོམ་པོ་དང་ཕམ་པ་སྨོས་པས་ཤེས་
པའོ། །འདིར་ལྟེ་བར་སོན་ན་དངོས་གཞིའོ། །མདུན་རོལ་དུ་ཉེས་བྱས་སོ། །བྱི་དོར་བྱེད་པ་ལས་ཀྱང་རྣམ་པར་གཞག་པ་འདི་ཉིད་རིག་པར་བྱའོ། །ཆུ་ལ་ལོངས་སྤྱོད་པའི་ལྟུང་བྱད་དོ།། །།ད་ནི་འདི་མན་ཆད་ཀྱིས་འཆོས་པ་ལས་གྱུར་པའི་ལྟུང་བྱེད་དྲུག་སྟེ། གང་ལ་ལྔ་པོ་དེ་རྣམས་སུ་འགྱུར་ཞེ་ན། དེའི་ཕྱིར་བཅོས་པའི་ཕྱིར་པུ་ཤེལ་ཙི་འཆང་བ་ལའོ། །སོ་མངས་དང་སྨྱིག་ཤད་དང༌། གསུམ་ཞེས་བྱ་བ་དང༌། སྐྲ་བརྙན་གྱིས་ཀྱང་ངོ་ཞེས་བྱ་བ་སྨོས་ཏེ། བཅོས་པའི་ཕྱིར་འཆད་པ་ལའོ་ཞེས་བྱ་བའི་རྗེས་བསྙེག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །སོ་མངས་དང་སྨྱིག་ཤད་དང༌། གསུམ་ཞེས་བྱ་ལ་དང༌། སྐྲ་བརྙན་གྱིས་ཀྱང་ངོ་ཞེས་སྨོས་པས་སོ། །གསུམ་ཞེས་བྱ་བ་ནི་པུ་ཤེལ་ཙི་ལ་སོགས་པའི་མིང་འདི་ལ་ཡོད་པས་ན་གསུམ་ཞེས་བྱའོ། །དེ་དག་གིས་སྐྲ་ཤད་ པ་ལ་སོགས ་པའི་རྣམ་པ་གང་གིས་འཆོས་པར་བྱེད་ཅིང་རྗེས་སུ་དག་ པ་ལ་སོགས ་པས་སྐྲ་བརྙན་གྱིས་མགོ་ལ་བཙུགས་ཅིང་དེ་བསྒྲུབ་པར་གྱུར་པ་དེ་རྣམས་ལ་བྱ་བ་སྟེ། བཅོས་པའི་ཕྱིར་ཉེས་པར་སྦྱོར་བ་སྟེ། ངེས་པར་སྦྱོར་བ་དེ་ལ་ཁ་ན་མ་ཐོ་བ་འདི་རྣམས་སོ། །བརྩམས་པ་ཙམ་གྱིས་བྱས་པ་ཉིད་དེ་བཅོས་པ་ལ། དེའི་བྱ་བ་རྩོམ་པ་གཅིག་ཏུ་གྱུར་པའི་ཕྱིར་རོ། །ཇི་སྲིད་དུ་མ་བཏང་གི་བར་དུ་ལོག་པར་གྱུར་ན་ལྟུང་བ་གཅིག་ཉིད་དོ། །འདིར་མདོ་ནི་པུ་ཤེལ་ཙི་འཆང་ངམ། སོ་མངས་འཆང་ངམ། སྨྱིག་ཤད་འཆང་ངམ། སྐྲ་བརྙན་འཆང་ན་ཞེས་གསུངས་པ་ཡིན་ནོ། །འདི་རྣམས་ཀྱི་རྣམ་པར་འབྱེད་པ་ནི་འཆོས་པར་བྱེད་ན་ཞེས་གསུངས་ པ་ཡིན་ཏེ། དེ་ལ་འཆོས་པའི་ཕྱིར་འཆང་བ་ལ་སོགས ་པར་བྱེད་ན་ཞེས་བྱ་བ་ནི། དོན་གཉིས་ཀ་ལ་ཡང་རྣམ་པར་གནས་པ་ཡིན་ནོ། །དེ་ལྟར་མདོ་དང་རྣམ་པར་འབྱེད་པ་དག་ལ་དོན་གཅིག་པ་ཉིད་དུ་འགྱུར་བ་དེ་བས་ན་དེ་ཁོ་ན་ཉིད་དུ་ཉེ་བར་འབྲེལ་པའོ། །སྐྲ་བཅོས་པ་ཉིད་ནི་དེ་རྣམས་ལ་གྲགས་བའི་ཕྱིར་སྐྲ་རྣམས་ཞེས་བྱ་བ་འདི་ལ་བཅོས་པ་དང་འབྲེལ་པ་ཉིད་དུ་ཤེས་བཞིན་པའོ། །དེའི་ཕྱིར་དེ་གྲུབ་པས་མདོ་མ་བྱས་སོ། །མཆན་ཁུང་དང་གསང་བའི་སྤུ་འཆོས་པ་ལ་ནི་ཉེས་བྱས་སུ་རིག་པར་བྱའོ། །ཡང་མགོ་འཆོས་པ་སྤངས་པ་ལ་ཞེས་བྱ་བ་ནི་བཅོས་པའི་ཕྱིར་ཆོ་ག་དང་འབྲེལ་པ་
ཉིད་ཀྱི་ཚིག་མེད་པས་འདིར་ཡང་མདོར་མ་བྱས་པ་ནི་གཟུགས་ཉིད་ལས་ཤེས་པའི་ཕྱིར་རིག་པར་བྱའོ། །གང་ལ་ལྟུང་བྱེད་དྲུག་པར་འགྱུར་ཞེ་ན། དེའི་ཕྱིར་ཁྱིམ་པའི་རྒྱན་ཐོགས་པ་ལའོ་ཞེས་བྱ་བ་སྨོས་ཏེ། ཡང་མགོ་འ་ཆོས་པ་སྤངས་པ་ལ་ཞེས་བྱ་བ་ནི། ཆོས་གོས་ལ་ སོགས་པ ་རབ་ཏུ་བྱུང་བའི་ཡོ་བྱད་རྣམས་ཀྱང་རབ་ཏུ་བྱུང་བའི་རྒྱན་ཉིད་དེ་ཁྱིམ་པའི་རྒྱན་ནི་མ་ཡིན་ནོ། །འདི་ལྟར་དེ་རྣམས་ཞི་བའི་དགའ་བའི་བློ་སྐྱེ་བས་དེ་རྣམ་པར་བཅད་པའི་ཕྱིར་ཁྱིམ་པའི་ཞེས་སྨོས་པས་འདི་ནི་རབ་ཏུ་བྱུང་བ་རྣམས་ལ་བཞད་གད་དུ་འགྱུར་བ་ཡིན་གྱི་རྒྱན་དུ་འགྱུར་བ་ནི་མ་ཡིན་ནོ་ཞེས་བྱ་བ་བསྟན་པའི་དོན་དུའོ། །ཁྱིམ་པའི་རྒྱན་རིན་པོ་ཆེའི་རང་བཞིན་ལ་ནི་རྒྱན་ཉིད་དུ་ཡོངས་སུ་རྫོགས་པ་སྟེ། དེ་བས་ན་དེས་འདི་བསྡུས་པ་ཡིན་ནོ། །དེ་ལྟར་ཡང་ཁྱིམ་པའི་རྒྱན་ནི་མགུལ་རྒྱན་དང་གདུ་བུ་རྒྱན་ཅན་དང༌། དཔུང་རྒྱན་དང༌། དོ་ཤལ་དང༌། སེ་མོ་དོ་དང༌། མུ་ཏིག་གི་ཆུན་པོ་དག་གོ་ཞེས་བྱ་བ་རྣམ་པར་འབྱེད་པ་ལས་གསུངས་སོ། །རིན་པོ་ཆེ་མ་ཡིན་པའི་རྒྱན་ལ་ནི་ཉེས་བྱས་སོ། །འདི་ལ་རིན་པོ་ཆེ་ལ་རིག་པའི་ཁ་ན་མ་ཐོ་བ་འདིར་རྫས་ཇི་ལྟ་བར་གཞན་རིག་པར་བྱའོ། །འཆོས་པ་ལས་གྱུར་པའི་ལྟུང་བྱེད་དྲུག་པའོ།། །།ད་འདི་མན་ཆད་ལྟུང་བྱེད་གསུམ་སྟོན་ཏེ། དེ་རྣམས་ཀྱི་དབང་པོ་གང་ལ་འགྱུར་ཞེ་ན། དེའི་ཕྱིར་བྲོ་བརྡུང་བ་ལའོ་ཞེས་བྱ་བ་སྨོས་སོ། །ཇི་ལྟར་ཞེ་ན་དེའི་ཕྱིར་གང་ཡང་རུང་བས་སོ་ཞེས་བྱ་བ་སྨོས་ཏེ། ཐ་ན་སྨིན་མ་བསྐྱོད་ པ་ལ་སོགས ་པའི་བྱ་བས་ཀྱང་ངོ་ཞེས་བྱ་བའི་དོན་ཏོ། །བསླབ་པའི་གཞི་གཉིས་པ་བསྟན་པ་ནི། གླུ་ལེན་པ་ལའོ་ཞེས་བྱ་བ་སྨོས་ཏེ། ཇི་ལྟར་ཞེ་ན། དེའི་ཕྱིར་དེའི་བསམ་པས་མགྲིན་འགྱུར་གང་ཡང་རུང་བས་སོ་ཞེས་བྱ་བ་ལ། དེའི་བསམ་པས་ཞེས་བྱ་བ་ནི་གླུའི་བསམ་པས་སོ། །གང་ཡང་རུང་བ་ཞེས་བྱ་བ་ནི། ཐ་ན་ཚིགས་སུ་བཅད་པ་ཙམ་འདོད་པ་ལ་ཡང་ངོ༌། །གང་ལ་གསུམ་པར་འགྱུར་ཞེ་ན། དེའི་ཕྱིར་རོལ་མོ་བྱེད་པ་ལའོ་ཞེས་བྱ་བ་སྨོས་ཏེ། འདི་ལྟར་བུད་མེད་ལ་གར་དང་གླུ་ལ་ སོགས་པ ་རྗེས་སུ་མི་མཐུན་པ་དེ་ལྟར་སྐྱེས་པ་རྣམས་ལ་ནི་མ་ཡིན་ནོ། །དེ་བས་ན་འདིར་དགེ་སློང་ལ་ཉེས་བྱས་སུ་རིག་པར་བྱའོ། །རྒྱ་གས་པ་ལས་གྱུར་པའི་ལྟུང་བྱེད་གསུམ་མོ།། །།ད་འདི་མན་
ཆད་ནི་ལོངས་འཆོས་པ་ཉིད་ལས་གྱུར་པའི་ལྟུང་བྱེད་གསུམ་སྟོན་ཏེ། དེ་རྣམས་ཀྱི་དང་པོ་ནི་ལོངས་སྤྱོད་དུ་གྱུར་པའི་གདུགས་ཐོགས་པ་ལའོ་ཞེས་བྱ་བ་སྨོས་ཏེ། བདག་གིར་བྱེད་པ་ཙམ་ལ་ནི་དངོས་གཞི་མ་ཡིན་ཏེ། འོན་ཀྱང་ཡོངས་སུ་ལོངས་སྤྱད་པར་གྱུར་པ་ལ་ཞེས་བྱ་བའི་དོན་ཏོ། །གལ་ཏེ་གང་ཞིག་ལམ་ལ་དབང་བ་ཉིད་ངོས་སུ་འདུད་པ་ལ་ཞེས་བྱ་བ་སྨོས་པ་དེ་ལ་ཡང་མ་བྱས་པས། དམིགས་ཀྱིས་བསལ་བ་འདི་གཏོགས་པའོ། །སྦྱོར་བ་གཅིག་ཡིན་ན་ཤིན་ཏུ་རིང་པོར་ཐོགས་པ་འདི་དང་འོག་མ་ལ་ཡང་ལྟུང་བ་གཅིག་ཁོ་ནར་ཟད་དོ། །གང་ལ་གཉིས་པ་དེ་བརྗོད་པར་བྱ་སྟེ། དེའི་ཕྱིར་མཆིལ་ལྷམ་གྱོན་པ་ལ་ཡང་ངོ་ཞེས་བྱ་བ་སྨོས་ཏེ། ལོངས་སྤྱོད་དུ་གྱུར་པའི་གདུགས་ཐོགས་པ་ལའོ་ཞེས་བྱ་བའི་རྗེས་སྙེགས་པའི་ཕྱིར། ཡང་ངོ་ཞེས་བྱ་བའི་སྒྲ་སྨོས་སོ། །དབྱར་ཁང་དུ་མལ་སྟན་བསྲུང་པའི་ཕྱིར་ནི་ལྟུང་བ་མེད་དོ་ཞེས་བྱ་བ་ནི་དབྱར་ཁང་ལ་གནས་གཞན་དུ་མལ་སྟན་ལ་བག་བྱ་བའི་ཕྱིར་མཆིལ་ལྷམ་གྱོན་པ་ལ་ལྟུང་བ་མེད་དོ། །དེ་ལས་གཞན་པ་ཐམས་ཅད་ལ་ནི་ལྟུང་བྱེད་ཁོ་ནར་འགྱུར་རོ། །འདིར་དགེ་སློང་གི་གནས་ལ་མཚོན་པའམ་དེ་ཉིད་ཀྱིས་དབྱར་ཁང་གི་འཕངས་པར་རིག་པར་བྱ་བ་ཡིན་ཏེ། དེ་ཡང་རྗེས་སུ་མི་མཐུན་པ་ཉིད་ཀྱི་ཕྱིར་བུད་མེད་རབ་ཏུ་བྱུང་བ་རྣམས་ལ་མཆིལ་ལྷམ་གྱོན་པ་འཇུག་པའི་ཕྱིར་རོ། །གསུམ་པ་བསྟན་པ་ནི་ཁྲིའུའི་བསྙེན་བཀུར་ཉམས་སུ་མྱོང་བར་བྱེད་པ་ལའོ་ཞེས་བྱ་བ་སྟེ། འདི་ནི་སྦོམ་དགའ་མོ་དགེ་སློང་རྣམས་ལ་སྟོན་པར་བྱེད་ཅིང་དེས་དགེ་སློང་མ་འོངས་ཤིང་ལྷགས་པ་རྣམས་ལ་ཁོ་མོའི་ཕྱིར་ཕྱོགས་ག་གེ་མོ་ཞིག་ཏུ་ཁྲིའུ་ཤོམས་ལ་འདུག་ཏུ་ཆུག་ཤིག་ཅེས་བསྒོ་ཞིང༌། ཡང་ཕྱོགས་ག་གེ་མོ་ཞིག་དང༌། གནས་ཁང་གི་ཉེ་འཁོར་དང་ཁྱམས་དང་ཁང་སྟེང་ངམ་ཆེ་གེ་མོ་ཞིག་ཏུ་ཁྲིའུ་ཁྱེར་ལ་ཁོ་མོ་འདུག་ཏུ་ཆུག་ཤིག་ཅེས་ཟེར་བ་ལས་བཅས་པ་སྟེ། དེས་ཁྲིའུས་བསྙེན་བཀུར་བྱེད་དུ་འཇུག་པའི་ངོ་བོ་ཉིད་ཀྱང་བསྟན་པ་ཡིན་པར་རིག་པར་བྱའོ། །ལོངས་འཆོས་པ་ཉིད་ལས་གྱུར་པའི་ལྟུང་བྱེད་གསུམ་མོ།། །།གང་ལ་ཐུག་ཐུབ་ཏུ་ཕྱིས་གནོན་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཁྱིམ་གཞན་དུ་མ་བསྒོ་བར་སྟན་ལ་འདུག་པ་ལའོ་ཞེས་བྱ་བ་སྨོས་ཏེ། རྩྭའི་
ཆུན་པོ་དང་ཤིང་གི་དུམ་བུ་དང་སོ་ཕག་ལ་ སོགས་པ ་ལ་གལ་ཏེ་རྡོལ་བ་ཡིན་ན། ཐུག་ཐུབ་ཏུ་བསྟན་པ་མི་སྐྱེད་པ་ཁོ་ནའོ། །གལ་ཏེ་མ་ཡིན་ན་ཡོངས་སུ་མ་རྫོགས་པ་འདི་བསྐྱེད་པའོ། །དེ་བས་ན་སྔ་མ་ལ་ནི་ལྟུང་བ་མེད་དོ། །ཕྱི་མ་ལ་ཉེས་བྱས་སོ། །བཞད་གད་ཀྱི་ཆེད་དུ་རྩྭའི་ཆུན་པོ་དང་ཤིང་གི་དུམ་བུ་དང༌། ས་དང་བ་གླང་གི་ལྕི་བའི་རང་བཞིན་ཀུན་ནས་འཚོ་བར་བྱེད་པ་བསྒྲུབ་ པ་ཤིང་གི་དུམ་བུ་ཞེས་བྱ་བ་ལ་སོགས ་པའི་མ་རྡོལ་བ་ལས་ཡོངས་སུ་རྫོགས་པའི་ཐུག་ཐུབ་བསྐྱེད་པའོ། །རྡོལ་བ་ལ་ན་ནི་སྨད་པ་བསྐྱེད་པའོ། །དེ་བས་ན་འདིར་སྔ་མ་ལ་ལྟུང་བྱེད་དོ། །ཕྱི་མ་ལ་ནི་ཉེས་བྱས་སོ། །མལ་སྟན་ལ་ཡང་འདི་བསྟན་ཞེས་སྨོས་པས་བསྡུས་པར་རིག་པར་བྱ་སྟེ། གོས་ལ་ཡང་འཕངས་པར་རིག་པར་བྱའོ། །དགོས་པ་མེད་པ་དང་འདྲ་བའི་རྩྭའི་ཆུན་པོ་ལ་ སོགས་པ ་ལ་སྨོས་པའི་ཆོ་ག་རྣམས་རྣམ་པར་གཞག་པའོ། །འདུག་པ་ལ་ནི་ཤིན་ཏུ་རིང་པོར་རྗེས་སུ་འགྲོ་བའི་ཕྱིས་གནོན་དུ་གྱུར་པ་ཉིད་དུ་རིག་པར་བྱའོ། །དེ་བས་ན་འདིར་ཉལ་བ་དག་ལ་ཁ་ན་མ་ཐོ་བ་དེ་ཡོངས་སུ་རྫོགས་པར་འགྱུར་ཏེ། ཤིན་ཏུ་རིང་པོར་མ་སོང་བ་ལ་འདི་ནི་ཐུག་ཐུབ་ཆེས་ཤིན་ཏུ་ཆེ་བའི་ཕྱིར་རོ། །གང་ཞིག་རྐང་པ་དག་གིས་འཛེགས་ནས། ཙོག་ཅོག་པོར་རམ་གཞན་དུ་གནས་པའོ། །དེ་བས་ན་འདིར་ཡང་ཁ་ན་མ་ཐོ་བ་ཡོངས་སུ་རྫོགས་པ་འདིའོ། །ཐུག་ཐུབ་ཏུ་ཕྱིས་གནོན་བྱེ་པའི་ལྟུང་བྱེད་དོ།། །།གང་ལ་ལོག་ཐབས་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཆོས་ཉན་དུ་གཞུག་པའི་གནས་སྐབས་སུ་ཁྱིམ་པའི་སྟན་སྤྱད་པའི་ཁྱིམ་པ་ལ་མ་སྦྲན་པར་བོར་ཏེ་འགྲོ་བ་ལའོ་ཞེས་བྱ་བ་སྨོས་ཏེ། ཆོས་ཉན་དུ་གཞུག་པའི་ཚེ་ཁྱིམ་པའི་སྟན་ཡོངས་སུ་ལོངས་སྤྱད་པའི་ཁྱིམ་པ་ལ་མ་སྦྲན་པར་བོར་ཏེ་འགྲོ་བ་ལ་ལྟུང་བྱེད་དུ་འགྱུར་ཏེ། འདི་ནི་སྦོམ་དགའ་མོ་ཁྱིམ་བདག་གི་ཁྱིམ་དག་ཏུ་སོང་སྟེ། ཁྱིམ་བདག་གི་ཆུང་མ་དག་གིས་ཀྱང་སྟན་དག་བཤམས་པ་ན་དེ་དེ་ལ་འདུག་སྟེ། རྒྱ་ཆེར་ཆོས་བསྟན་པར་བརྩམས་པ་དང༌། དེ་རྣམས་ཀྱང་འདི་ནི་ལས་མེད་པ་ཞིག་གོ་སྙམ་ནས་ལངས་ཏེ། དོང་བའི་ཚེ་དེས་ཀྱང་སྟན་དག་མ་སྦྲན་པར་གཅིག་པུ་ལངས་ཏེ་སོང་བ་དང༌། སྟན་དེ་
དག་རྐུན་པོ་དག་གིས་ཁྱེར་ནས་ཁྱིམ་མི་དག་གིས་སྟན་བརྩལ་ན་མ་རྙེད་དེ། སྦོམ་དགའ་མོ་ལ་འཕགས་མ་སྟན་དག་ཅིར་བགྱིས་ཞེས་པ་དང༌། དེས་སྨྲས་པ། ཇི་ལྟར་ཁྱེད་ཅག་གིས་ཁོ་མོ་ལ་མ་སྦྲན་པར་དོང་བ་དེ་བཞིན་དུ་ཁོ་མོས་ཀྱང་དེ་བཞིན་ནོ་ཞེས་ཟེར་བ་ལ་གཞི་དེ་ལས་བཅས་པ་ཡིན་ནོ། །འདི་ནི་སྙིང་ནས་ལོག་ཐབས་བྱེད་པ་ནི་ཉེས་པ་ཉིད་དོ། །ཁྱིམ་པའི་དོན་ལ་ཡོངས་སུ་རྫོགས་པ་ཉིད་འཇུག་པ་འདི་ལ་ཡིན་ཏེ། དེ་བས་ན་འདིར་ནི་ཁྱིམ་པ་ལ་བརྟེན་པའོ། །གཞན་རབ་ཏུ་བྱུང་བ་འདི་པ་དང༌། ཕྱི་རོལ་པའི་རབ་ཏུ་བྱུང་བ་དབང་བ་ཉིད་ལ་འདིར་ཉེས་བྱས་སུ་རྣམ་པར་གནས་པ་ཡིན་ནོ། །གང་གི་ཚེ་དངོས་གཞིར་གྱུར་པའི་སོང་བའི་མཐར་ཐུག་པ་ཡོངས་སུ་རྫོགས་པའི་བདག་ཉིད་ལ་དངོས་གཞིའི་དུས་སུ་འགྱུར་ཞེ་ན། དེའི་ཕྱིར་སྤངས་པའི་ཉེ་འཁོར་གྱི་མཐའ་ལའོ་ཞེས་བྱ་བ་སྨོས་ཏེ། སྔར་གནས་མལ་སྤངས་ཏེ་འགྲོ་བའི་ཉེ་འཁོར་གྱི་མཐར་ཐུག་ན་རྫོགས་པ་ཡིན་ནོ་ཞེས་བྱ་བའི་དོན་ཏོ།། ཁྱིམ་པ་ལ་ལོག་ཐབས་བྱེད་པའི་ལྟུང་བྱེད་དོ།། །།ད་འདི་མན་ཆད་ནི་ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་སྟེ། གང་ལ་དེ་རྣམས་ཀྱི་དབང་པོར་འགྱུར་ཞེ་ན། དེའི་ཕྱིར་སྐུད་པ་འཁལ་བ་ལའོ་ཞེས་བྱ་བ་སྨོས་ཏེ། རྒྱུད་ཀྱི་རང་གཞན་གང་ཡང་རུང་བ་བསྒྲུབ་པ་བྱས་ན་སྐུད་པ་འཁལ་བ་ཉིད་ཡིན་ཏེ། རི་མོ་ཙམ་བྱས་པ་ལ་རི་མོ་བྱས་པ་ཉིད་སྨོས་པར་རྟོགས་པའོ། །འདི་ལྟར་རྣམ་པར་འབྱེད་པ་ལས། བདུན་པོ་དག་ལས་གང་ཡང་རུང་བ་ཞེས་གསུངས་མོད་ཀྱི། དེ་ནི་དཔེ་ཙམ་དུ་ཟད་དེ་རུང་བ་མ་ཡིན་པའི་སྐུད་པ་འཁལ་བ་ལ་ཡང་ཐམས་ཅད་དུ་བཟོ་སྟོན་པའི་ཉེས་བ་འདྲ་བའི་ཕྱིར། འདི་ནི་ཐམས་ཅད་མཉམ་པ་ཡིན་ནོ། །དེ་བས་ན་ཐམས་ཅད་དུ་སྐུད་པ་ལ་ཀུན་ནས་བརྟེན་པའོ། །རྒྱ་ཅང་དང་ལྕག་པོད་ཀྱི་དོན་དུ་དབེན་པའི་ཕྱོགས་སུ་ནི་ལྟུང་བ་མེད་དོ་ཞེས་བྱ་བ་ནི་དེའི་ཆེད་དུ་ཆོས་དང་ལྡན་པའི་དགོས་པའི་དབང་གིས་ཚངས་པར་སྤྱོད་པ་དང་བཅས་པའི་འཇར་བ་བཞིན་དུ་འདི་ལ་ཉེས་པ་མེད་པ་བཞིན་དུ་རིག་པར་བྱའོ། །དབེན་པའི་ཞེས་བྱ་བ་ནི་དབེན་པའི་ས་ཕྱོགས་སུ་དང་བ་མི་སྐྱེ་པའི་དངོས་པོ་བྱས་པས་ཞེས་བྱ་བ་འདི་ལ་སྤྲོས་པ་འདིའོ། །གང་ཞིག་ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་ཞེས་སྨོས་པ་དེ་རྣམས་ལས་ཕྱི་མ་གཉིས་པོ་
སྤངས་ནས་རང་བཞིན་གྱི་རྣམ་པར་འགྱུར་བའི་དངོས་པོ་འདི་ལྟར་སྐུད་པ་དང་གོས་གཉིས་ནི་སྣམ་དུ་བྱ་བའི་རྒྱུ་དང་འབྲས་བུའི་ངོ་བོ་ཉིད་དུ་འབྲེལ་བའི་ཕྱིར་དང༌། རྣམ་པར་བསྒྲུབ་པར་འདྲ་བའི་ཕྱིར་བཟོ་བསྟན་པའི་ལྟུང་བྱེད་དང་པོ་འདི་དང་མངོན་པར་འབྲེལ་པའི་དབང་གིས་དེ་ལས་ཕྱི་མ་བདག་ཏུ་མི་བྱེད་པ་ལ་དགེ་སློང་མའི་ཚོགས་ཀྱི་གོས་བདག་གིར་བྱེད་པ་འདི་རྣམ་པར་གཞག་པའོ། །དེའི་རྗེས་སུ་གཞན་བྱས་པ་ལ་ཟས་འཚོང་བ་ཞེས་བྱ་བ་འདི་ལ་ཐོ་འཚམས་པར་བྱེད་པས། ཇི་ལྟར་དགེ་སློང་མའི་ཚོགས་ཀྱི་གོས་བདག་གིར་བྱེད་པ་དེ་དང་འདྲ་བའི་ཕྱིར་རྣམ་པར་གཞག་པའོ།། ད་ནི་དེ་གཉིས་ཀྱི་དང་པོ་ཇེ་བསྟན་པར་བྱ་སྟེ། གང་ལ་དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་མའི་ཚོགས་ཀྱི་གོས་བདག་གིར་བྱེད་པའོ་ཞེས་བྱ་བ་སྨོས་ཏེ། འདི་ནི་དགེ་སློང་མ་སྦོམ་དགའ་མོས་བཙུན་མོ་ཕྲེང་ལྡན་མ་ལ་བཅོམ་ལྡན་འདས་ཀྱིས་བདག་ཅག་ལ་རྨེ་གབ་བཅང་བར་རྗེས་སུ་གནང་ན་བདག་ཅག་ལ་དེ་མི་བདོག་པས། དེ་ཁྱེད་ཁྱིད་བརྩལ་བར་རིགས་སོ་ཞེས་སྨྲས་པ་དང༌། དེས་གོས་ཀྱི་སྒྲོ་མ་ཐམས་ཅད་དགེ་སློང་མ་རྣམས་ལ་བྱིན་པ་དེ་སྦོམ་དགའ་མོས་བདག་གིར་བྱས་སོ། །དེས་ན་དགེ་སློང་མ་རབ་ཏུ་མང་པོ་དག་གིས་བཙུན་མོ་ཕྲེང་ལྡན་མ་ལ་སྨྲས་པ། བདག་ཅག་ལ་རྨེ་གབ་ཀྱི་གོས་བྱིན་ཅིག །དེས་སྨྲས་པ། དགེ་སློང་མ་ཐམས་ཅད་ལ་བདག་གིས་བྱིན་ནོ། །དེ་རྣམས་ཀྱིས་སྨྲས་པ་དང༌། གང་གིས་ཁྱེར་ཞེས་ཟེར་རོ། །དེས་སྨྲས་པ། སྦོམ་དགའ་མོས་ཁྱེར་རོ། །དེ་ནས་དགེ་སློང་མ་དེ་རྣམས་ཀྱིས་སྦོམ་དགའ་མོ་ལ་བླངས་པ་དང༌། ངེས་མ་སྟེར་བའི་གླེང་གཞི་ལས་བཅས་པ་ཡིན་ནོ། །གཞག་པའི་རྫས་འདི་ལ་སྦྱིན་པར་བྱའོ་སྙམ་ནས་མ་འོངས་པ་བདག་ཏུ་བྱེད་པ་ལ་གལ་ཏེ་དངོས་པོ་ཡོངས་སུ་ཚང་ན་ཕམ་པར་འགྱུར་རོ། །གལ་ཏེ་མ་ཡིན་ན་ལྟུང་བ་སྦོམ་པོར་འགྱུར་རོམ། དེ་བས་ན་འདིར་མ་ཐོབ་པ་ཞེས་བྱ་བ་ཡོངས་སུ་བརྟགས་པ་སྟེ། མ་འོངས་པ་མ་ཡིན་པ་འདིར་བདག་ཏུ་བྱེད་པས་བསྔོས་པའི་རང་བཞིན་དུ་འགྱུར་བ་འདིར་འཇུག་པ་བསྟན་པ་ཞེས་བྱ་བ་རྫོགས་པར་བྱའོ། །འདིར་ཚོགས་ཞེས་བྱ་བའི་སྒྲ་ནི་དགེ་འདུན་ལ་བྱ་སྟེ། དེ་
དང་མ་བྲལ་བའི་ཕྱིར་ཡང་ཡོངས་སུ་རྫོགས་པར་འགྱུར་བ་ཉིད་ཀྱི་ཕྱིར་རོ། །དེ་ལྟར་ཡང་རྣམ་པར་འབྱེད་པ་ལས། ཚོགས་ཀྱི་གོས་ནི་དགེ་འདུན་གྱིའོ་ཞེས་གསུངས་པ་ཡིན་ནོ། །དགེ་སློང་མ་གཅིག་གམ་གཉིས་སམ་གསུམ་པོ་འདིའི་རྗེས་སུ་འབྲངས་ནས་ཁ་ན་མ་ཐོ་བ་ཤིན་ཏུ་ཆུང་བ་ཉིད་དོ། །དེ་དག་ཀྱང་བསླུ་བའི་རྣམ་པ་དང་འདྲ་བའི་ཕྱིར་སྔ་མ་ཉིད་དང་འབྲེལ་པར་ཤེས་པར་བྱའོ། །དགེ་སློང་མའི་ཚོགས་ཀྱི་གོས་བདག་གིར་བྱེད་པའི་ལྟུང་བྱེད་དོ།། །།གཉིས་པ་ནི་ཟས་བཙོང་བ་བྱས་པ་ལའོ་ཞེས་བྱ་བ་སྟེ། ཟས་དེ་དག་ཇི་ཙམ་བྱས་ཀྱང་རུང་སྟེ་བྱས་པ་ཉིད་ཡིན་ཏེ་བྱེ་བྲག་མ་སྨོས་པར་ཤེས་པའོ། །ཐ་སྙད་འདི་རྫོགས་པའི་དུས་ནི་དངོས་གཞིའི་དུས་སུ་རིག་པར་བྱའོ། །ཀུན་དུ་སྤྱོད་པ་ཙམ་ཉིད་ལ་ཁ་ན་མ་ཐོ་བ་ནི་ཡིན་ཏེ། རྙེད་པ་བསྒྲུབ་པ་ལ་ནི་མ་ཡིན་ནོ། །དེ་ཁོ་ན་ཉིད་ཡོད་པ་ལ་འདིར་སྤངས་པའི་ལྟུང་བྱེད་ཀྱི་ཁ་ན་མ་ཐོ་བ་གཞན་བསྐྱེད་པར་རིག་པར་བྱའོ། །སྐབས་སུ་སྤྱད་པའི་ལྟུང་བྱེད་གཉིས་བསྟན་ནས། ད་ནི་ཁྱིམ་པ་མོ་ལ་བཟོ་སྟོན་པའི་ལྟུང་བྱེད་གཉིས་པོ་གང་ཡིན་པ་དེ་བརྗོད་པར་བྱ་སྟེ། དེའི་ཕྱིར་ཁྱིམ་གྱི་བྱ་བ་ཡང་ངོ་ཞེས་བྱ་བ་སྨོས་ཏེ། །བྱས་པ་ལའོ་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དེ་དག་ཇི་ཙམ་བྱས་ཀྱང་རུང་སྟེ་བྱས་པ་ཉིད་ཡིན་ནོ། །ཁྱིམ་དུ་ཆུས་ཆག་ཆག་གདབ་པ་དང་ཕྱག་དར་བྱས་པས་དག་པར་བྱས་པ་དང༌། རྫ་ལས་བྱས་པའི་སྣོད་རྣམས་བཤལ་བ་དང༌། བཟའ་བ་དང་བཏུང་བ་དང༌། བལྡག་ པ་ལ་སོགས ་པའི་སྒྲུབ་པ་བསྒྲུབ་པར་བྱས་ཏེ་གཡོ་བ་དང༌། ལག་པ་དང་རྐང་པ་ལ་ སོགས་པ ་བཀྲུ་བ་དང༌། རིགས་ཀྱི་ལྷ་རྣམས་མཆོད་པ་དང༌། བདུག་སྤོས་དང་གཏོར་མའི་ལས་བྱ་བ་ནི་ཁྱིམ་གྱི་བྱ་བའི་ངོ་བོ་གླེང་གཞི་ལས་འབྱུང་བ་ཡིན་ཏེ། བལྟ་བ་དང་དྲུག་པ་དང༌། སྐམ་པ་དང༌། བཏག་པ་དང༌། ཤིང་ལམ་བཀྲུ་བ་དང༌། གཞག་པ་དང༌། མལ་ཆ་དང༌། སྟན་སྤྲུག་པ་དང༌། གཞག་པ་དང༌། བཤམས་པ་ལ་ སོགས་པ ་རྣམས་དང༌། མཆིལ་ལྷམ་དང་ཁྲུས་རས་འབུལ་བ་དང༌། གོས་གཟུང་བ་དང༌། ཁྲུས་ཀྱི་གོས་འབུལ་བ་དང༌། བཙིར་བ་དང་ཞུགས་པའི་སྐྱེ་བོ་ལ་ཆུ་དང་དྲི་འབུལ་བ་དང༌། ཀུན་ནས་འཇུག་ཏུ་བཅུག་པ་དང༌། སྣོད་བཀྲུ་བ་ལ་ སོགས་པ ་ཡང་དེ་ཞེས་
བྱ་བར་གྲགས་པའི་ཕྱིར་རྟོགས་པར་བྱའོ། །རྗེན་པ་འཚོད་པ་ལ་ སོགས་པ ་ཆོ་གའི་ཡུལ་ཡིན་པས་ལྷག་མ་འདི་རྣམས་ཞེས་བྱ་བར་རིག་པར་བྱའོ། །ཆང་གི་ལས་མི་བྱའོ་ཞེས་བྱ་བ་ནི། མནན་པ་ལ་ སོགས་པ ་ཆང་གི་ཡོ་བྱད་དེ་ལ་ཉེ་བར་མཁོ་བའི་ལས་མི་བྱའོ། །བསླབ་པའི་བྱེ་བྲག་དང་འབྲེལ་བའི་ལས་འདི་རེས་འགའ་ཙམ་ཡིན་ཏེ། དེ་ལ་རེས་འགའ་ཙམ་འབྱུང་བ་ཡིན་ནོ། །བཟའ་བ་སྐམ་པོ་འཚོད་པ་ལྟར་འདི་ལ་ཁྱིམ་གྱི་བྱ་བ་ལ་ཁོངས་སུ་མ་འདུས་པའི་ཕྱིར་ཆོ་ག་འདི་བསྟན་པ་ཡིན་ནོ། །མདོ་འདི་དང་མདོ་འོག་མ་ནི་ཕྲན་ཚེགས་དག་ལས་འབྱུང་ངོ༌།། ཆང་ཁང་བྱེད་དུ་མི་གཞུག་གོ་ཞེས་བྱ་བ་ནི་གཞན་བྱེད་དུ་འཇུག་པ་བཀག་པ་སྟེ། རང་གིས་བྱེད་པ་ནི་ཆེས་ཤིན་ཏུ་ལྕི་བ་དེ་བས་ན་འདི་ལ་ཡང་དེས་བཀག་པ་ཐོབ་པར་བྱེད་པ་ཉིད་དོ། །ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་པ་བརྗོད་པར་བྱ་སྟེ། དེའི་ཕྱིར་རྗེན་པ་འཚོད་པའིའོ་ཞེས་བྱ་བ་སྨོས་ཏེ། མི་སྙི་བ་རྣམས་ཀྱི་སུམ་ཆ་བངས་པ་ཉིད་ཀྱི་མདུན་རོལ་དུ་དེ་ཉིད་ཡིན་ཏེ་མ་ཚོས་པའི་ཕྱིར་རོ། །སྙི་བ་རྣམས་ཀྱི་ཁ་དོག་གྱུར་པའིའོ། །ཁུ་བ་རྣམས་ཀྱི་ནི་ལན་གཉིས་ཁོལ་བར་གྱུར་པའིའོ་ཞེས་སྨོས་པ་ཡིན་ཏེ། འདི་རྗེན་པ་ཉིད་ཀྱི་ཕྱིར་རྣམ་པར་གནས་པ་ཡིན་ནོ། །གང་ཡང་རུང་བ་ལ་དེ་བཏགས་པའི་དབང་གིས་མེ་ལས་ཁྱད་པར་བསྒྲུབ་པ་ཉིད་ལ་འཚོད་པ་ལས་སྐྱེས་པ་ཉིད་རྩོམ་པ་གཅིག་པར་གྱུར་པ་ཉིད་ཀྱིས་ཆ་གཞན་དེར་ཞུགས་པའོ། །བཏགས་པ་ལ་ནི་སྦྱོར་བ་ཉིད་དེ་སྔ་མ་ལ་དེ་སྦྱོར་བ་མ་ཡིན་པའི་སྦྱོར་བ་ཉིད་དོ། །དགེ་སློང་གི་དགེ་འདུན་དང༌། མཁན་པོ་དང། སློབ་དཔོན་དང༌། ཚངས་པ་མཚུངས་པར་སྤྱོད་པ་རྣམས་ཀྱི་ཕྱིར་དབེན་པའི་ཕྱོགས་སུ་ནི་ལྟུང་བ་མེད་དོ་ཞེས་བྱ་བའི་ཚིག་ནི། སློབ་དཔོན་གང་ལ་ངེས་པ་ཉེ་བར་གཞག་པར་བྱ་བ་ཉིད་ནི་དེའི་མ་གཞན་ལ་ཡང་ངོ༌། །ཚངས་པ་མཚུངས་པར་སྤྱོད་པ་རྣམས་ཀྱི་ཞེས་བྱ་བ་ནི། རྣམ་པ་འདི་ལ་མངོན་པར་བརྟེན་ནས་འདིར་ཚངས་པ་མཚུངས་པར་སྤྱོད་པ་དང་བཅས་པ་ཉིད་ཀྱི་ཚིག་གིས་བཟུང་བ་བསྒྲུབ་པ་ཡོད་པ་ལ་ཐ་དད་པའི་ཞེས་སྨོས་སོ། །དེ་བས་ན་འདི་ནི་མཚོན་པ་ཙམ་ཡིན་ཏེ། སློབ་དཔོན་ཡང་འདིས་འཕངས་པ་ཉིད་ཡིན་ནོ། །འདིར་ཚངས་པ་མཚུངས་པར་སྤྱོད་
པ་ཞེས་སྨོས་པས་ནི་ཆོས་འདི་པའི་རབ་ཏུ་བྱུང་བ་ཉིད་དང༌། སློབ་དཔོན་སྨོས་པས་རབ་ཏུ་བྱུང་བ་བསྡུས་པར་རྣམ་པར་གནས་པ་ཡིན་ཏེ། ཁྱིམ་པ་རྣམ་ལ་མ་ཡིན་ཞེས་བྱ་བར་རིག་པར་བྱའོ། །ཕྱིར་ཞེས་བྱ་བ་ནི་འཚོད་པ་ཉིད་ལ་ཆོས་དང་ལྡན་པའི་དོན་གྱི་དབང་གིས་འཚོད་པ་ལ་ནི་ལྟུང་བ་མེད་པར་རིག་པར་བྱའོ། །ཁྱིམ་པ་མོའི་བཟོ་སྟོན་པའི་ལྟུང་བྱེད་གསུམ་མོ།། །།གང་ལ་ལྟོ་འདུན་ལས་གྱུར་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཟས་ཟོས་ནས་སྟན་ལས་ལངས་ཏེ་ཡང་ཟབ་ལའོ་ཞེས་བྱ་བ་སྨོས་ཏེ། གནས་བཏང་བར་བྱས་ནས་བཟའ་བར་བྱ་བ་གང་ཡང་རུང་བ་ཟོས་པ་ལ་ལྟུང་བྱེད་འདི་ལྷག་པོར་མ་བྱས་པ་ཟ་བའི་ལྟུང་བྱེད་དུ་རྣམ་པར་གཞག་པ་མ་ཡིན་པ་སྟེ། འོན་ཀྱང་འདི་ནི་ཟས་གཅིག་ཁོ་ན་ལ་ཉེ་བར་བཏགས་པའི་བཟའ་བར་བྱ་བ་ཟ་བ་དང་ལྡན་པ་ཉིད་ཡོད་པ་ལ་ལྷག་པོར་མ་བྱས་པར་སྟན་པས་ལངས་ཏེ་ཡང་ཟ་བ་ལ་ལྟུང་བ་གཅིག་ཏུ་འགྱུར་རོ། །ངེས་པར་བྱས་པ་ཞེས་བྱ་བ་ལྟུང་བྱེད་གཉིས་སོ། །དེ་ཉིད་ལ་སྤངས་ཤིང་ལྷག་པོར་མ་བྱས་པར་ཟ་ན་ནི་ལྟུང་བ་འདི་ཡིན་པ་དེ་བས་ན། ཟ་བ་གཅིག་པ་ཉིད་ཀྱིས་ཉེ་བར་བརྟགས་པ་ལས་ལངས་ཤིང་ལངས་ཏེ། ཡང་ཡང་ཟ་བ་དེ་ཉིད་ལྟོ་འདུན་ལས་གྱུར་པའི་ལྟུང་བྱེད་དོ། །དེ་ལྟར་འདིར་གླེང་གཞི་ལས། དགེ་སློང་མ་སྦོམ་དགའ་མོ་ནང་པར་སྔར་ལངས་ཏེ། བསོད་སྙོམས་བླངས་ནས་རང་གི་ཉེན་འཁོར་དུ་གཞག་སྟེ། ལྷུང་བཟེད་ཡང་བླངས་ཡང་བླངས་ཡང་ཟོས་ཡང་ཟོས་ཤིང་འཆག་པར་བྱེད་ཅིང༌། བཅགས་ནས་ཡང་ཟ་བར་བྱེད་དོ། །ཡང་འཆག་པར་བྱེད་ཡང་ཟ་བར་བྱེད་ཅིང་དྲོའི་བར་དུ་མ་སྤངས་པར་དེ་ལྟར་བྱེད་པ་ལས་བཅས་པ་ཡིན་ཏེ། སྐྱེས་པ་ནི་ལྟོ་འདུན་ལས་གྱུར་པའི་གདུངས་པ་དང༌། བརྐམ་ཆགས་ཆུང་བ་ཞེས་གསུངས་པ་ཡིན་ནོ། །དགེ་སློང་ལ་ནི་ལྷག་བོར་མ་བྱས་ཤིང་ཟ་བ་གཅིག་པ་ཉིད་ཀྱིས་ཉེ་བར་བརྟགས་པ་ལ་སྟན་ལས་ལངས་ནས་ཡང་དང་ཡང་དུ་ཟ་བ་ན་ཉེས་བྱས་སོ། །ལྟོ་འདུན་ལས་གྱུར་པའི་ལྟུང་བྱེད་དོ། །གང་ལ་ཚོགས་པར་དབྱུང་བ་མ་ཡིན་པའི་དྲི་བསྟན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སྒོག་སྐྱའོ་ཞེས་བྱ་བ་སྨོས་ཏེ། ཟ་བ་ལའོ་ཞེས་བྱ་བར་སྦྱར་རོ། །དེ་དག་ཅི་ཙམ་ལ་ཡང་རུང་སྟེ་ཞེས་བྱ་བ་བྱེ་བྲག་
མ་སྨོས་པས་རྟོགས་པར་བྱའོ། །ན་བའི་ཕྱིར་ནི་ལྟུང་བ་མེད་དོ། །བཙོང་དང་སྒོག་སྐྱ་དག་ལ་བྱེ་བྲག་སྨོས་པས་ཇི་ལྟར་ཐོབ་པའི་ཉེས་བྱས་སུ་རིག་པར་བྱའོ། །ཀུན་དོང་ཀེའུ་དག་ཟ་བ་ལ་ནི་དྲི་ཆུང་བའི་ཕྱིར་ཉེས་བྱས་སོ། །ཚོགས་པར་དབྱུང་བ་མ་ཡིན་པའི་དྲི་བསྟན་པའི་ལྟུང་བྱེད་དོ།། །།ད་འདི་མན་ཆད་དུ་ནི་བསུ་བེལ་བ་ལས་གྱུར་པའི་ལྟུང་བྱེད་གསུམ་སྟོན་ཏེ། དེ་རྣམས་ཀྱི་དང་པོ་བསྟན་པ་དེའི་ཕྱིར། རྨིག་བ་མི་འཆང་བ་ལའོ་ཞེས་སྨོས་ཏེ། ལོངས་སྤྱོད་པར་བྱེད་པ་སྣང་དུ་རུང་བའི་གོས་ངན་པ་མི་འདོག་པ་བསལ་བའི་ཕྱིར་འདི་ཡིན་ཏེ། བསུ་བེལ་བ་ཞེས་བྱ་བ་ནི་གོས་མ་རུངས་པར་གྱུར་པ་དེ་གཞན་དག་གིས་ཚོར་བ་ལ་བྱའོ། །དེ་བས་ན་དེ་ལྟ་བུར་གྱུར་པའི་ལུས་འོག་མའི་གོས་སྤང་པར་བྱ་ཞེས་བྱ་བའི་དོན་ཏོ། །ཇི་ལྟར་བརྗོད་པའི་ཉེས་པ་ཡོངས་སུ་སྤང་བའི་དོན་དུ་རྨེག་པ་བཅང་བར་བྱའོ། །སྐྱེ་གནས་ཀྱི་སྒོར་འདི་མ་བརྟགས་པ་ཉིད་ལ་ལྟུང་བྱེད་དོ། །དེ་ཐིག་གུས་བཏགས་ཏེ་བཞག་གོ་ཞེས་བྱ་བ་ལ། དེ་ཞེས་བྱ་བ་ནི་རྨེ་གབ་དེའོ། །མདོ་དེ་གཉིས་ཀྱི་ལུང་ནི་ཕྲན་ཚོགས་དག་ལས་ཁ་བསྒྱུར་བར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །དེ་དུས་དུས་སུ་བཀྲུ་བ་དང་ཁ་བསྒྱུར་བར་བྱའོ་ཞེས་བྱ་བ་ནི། རྨེག་བ་དེ་ཞེས་བྱ་བར་སྦྱར་རོ། །གང་ལ་བསླབ་པའི་གཞི་གཉིས་པ་དེ་བརྔོད་པར་བྱ་སྟེ། ཆུ་གོས་ཀྱང་ངོ་ཞེས་བྱ་བ་ལ། ཀྱང་གི་སྒྲ་ནི་མི་འཆང་བ་ལའོ་ཞེས་བྱ་བར་སྦྱར་རོ། །གང་གི་ཚོ་ལུས་གཤེར་བར་གྱུར་པ་དེའི་ཚོ། གང་གིས་ཆུ་གོས་མི་འཆང་མི་གོན་ཞིང་དེ་ལ་ཞེས་བྱ་བའི་དོན་ཏོ། །མདོམས་ཀྱི་སྤུ་མན་ཆད་ནས། པུས་མོའི་ལྷང་ང་ཡན་ཆད་ཀྱི་ཕྱོགས་མི་འགེབས་པ་ལ་དངོས་གཞིའོ། །གཞན་གཉའ་བ་མན་ཆད་ནས་ལོང་བུ་ཡན་ཆད་ཀྱི་ལུས་མགྲིན་པའི་བར་དུ་ལུས་ཀྱི་ཕྱོགས་མི་འགེབས་པ་ལ་ནི་ཉེས་བྱས་སོ། །འདིར་གླེང་གཞི་ལས་དགེ་སློང་མ་རབ་ཏུ་མང་པོ་དག་བུད་མེད་ཁྱིམ་པ་མོ་དག་དང་ལྷན་ཅིག་ཏུ་ཆུ་ཀླུང་གནས་ཅན་གྱི་ནང་དུ་ཁྲུས་བྱེད་ཅིང་དེ་དག་ཁྲུས་བྱེད་པ་ན་བུད་མེད་དག་མཛུབ་མོས་སྟོན་ཅིང་རབ་ཏུ་བྱུང་བ་མོ་ཆེ་གེ་མོ་དག་གི་ནུ་མ་གཉིས་ནི་འདི་འདྲའོ། །ཆེ་གེ་མོ་ཞིག་གི་ལྟོ་བ་ནི་སྤྱང་ཁྱི་འདྲའོ།།
ཆེ་གེ་མོ་ཞིག་གི་རྐེད་པ་ནི་སྦོམ་མོ། །ཆེ་གེ་མོ་ཞིག་གི་བརླ་ནི་གླང་པོ་ཆེའི་སྣ་འདྲའོ་ཞེས་ལུས་ཀྱི་ཡན་ལག་དང་གསང་བའི་ཕྱོགས་དག་གི་བརྗོད་པ་རྣམ་པ་མང་པོས་བསྙད་འདོགས་པ་ལས་འདི་བཅས་པ་ཡིན་ནོ། །འདིས་ནི་རོ་སྟོད་མ་གཡོགས་པའི་ཁ་ན་མ་ཐོ་བ་ཉིད་དུ་ཤེས་པར་བྱ་སྟེ་ཞེས་བྱ་བ་འདིས་ཤེས་པར་བྱའོ། །ཆུ་གོས་དང་ཁྲུས་རས་ཞེས་བྱ་བ་འདིའི་རྣམ་པར་འབྱེད་པ་ལས་སོ། །ཆུ་གོས་འདི་དུས་ཐམས་ཅད་དུ་ཕྱི་རོལ་པ་ཉིད་ཀྱི་ཕྱིར་རོ། །དེའི་ཕྱིར་དགེ་སློང་མ་རྣམས་ལ་དབྱར་གྱི་གོས་རས་ཆེན་མ་གསུངས་ཏེ། དེ་ཉིད་ཀྱིས་ཆོག་པའི་ཕྱིར་རོ། །དེ་གཉིས་བཅང་བར་བྱའོ་ཞེས་བྱ་བ་ནི་རྨེག་པ་དང་ཆུ་གོས་དག་གོ །རང་ཉིད་ཀྱང་ཉེ་བར་གནས་པ་བཅའ་བ་བསྒྲུབ་པའི་ཕྱིར་བཅང་བར་བྱའོ། །གང་ལ་རྨིག་པ་འཆང་བར་གཏོགས་པའི་ལྟུང་བྱེད་གསུམ་པར་འགྱུར་བ་དེ་བརྗོད་པར་བྱའོ། །དེའི་ཕྱིར་བཀུར་བཤལ་བ་ལ་གོས་འཁྲུར་འཇུག་པ་ལའོ་ཞེས་བྱ་བ་སྨོས་ཏེ། རང་གི་གོས་བྱིན་གྱིས་བརླབས་པ་རྙིང་པ་བཀྲུ་བར་འོས་པ་ཆོས་གོས་དང་གདིང་བ་དག་བཀྲུ་བཤལ་བ་ལ་འཁྲུར་འཇུག་པ་ལ་ཞེས་བྱ་བ་འདིས་ནི་འདིའི་བྱེ་བྲག་ཞིབ་ཏུ་ནི་འཁྲུར་འཇུག་པའི་སྤང་བའི་ལྟུང་བྱེད་ཀྱི་རྗེས་སུ་འབྲངས་ནས་ཤེས་པར་བྱའོ། །གང་གི་ཕྱིར་ཁ་ན་མ་ཐོ་བ་ནི་རྣམ་པ་གཉིས་ཏེ། དེ་དང་འདྲ་བའི་ཉེས་དམིགས་ལ་ནི་བཅས་པའོ། །འདིར་གླིང་གཞི་ནི། དགེ་སློང་མ་བཅུ་གཉིས་སྡེ་དག་རྨི་ལམ་ན་གནོད་པ་མཐོང་བས་མི་གཙང་བས་གོས་དག་ལ་གོས་པར་གྱུར་ནས་བཀྲུ་བཤལ་བ་ལ་འཁྲུར་འཇུག་པ་དང༌། བཀྲུ་བཤལ་བ་དག་གིས་བླངས་ཏེ། ཁྱིམ་པའི་གོས་དག་དང་ལྷན་ཅིག་བཀྲུས་པས་ན། དེ་དག་གིས་འབགས་པ་ཁྱིམ་པའི་གོས་དཀར་པོ་དག་མི་གཙང་བས་མ་རུངས་པར་གྱུར་པ་དང༌། ཁྱིམ་པ་རྣམས་ཀྱིས་བཀྲུ་བཤལ་བ་ལ་བདག་ཅག་གི་གོས་གང་གིས་འབགས་ཞེས་ཟེར་ཞིང་དྲིས་པ་དང༌། དེས་སྨྲས་པ། དགེ་སློང་མ་རྣམས་ཀྱི་གོས་བདག་གིས་བཀྲུ་བའི་ཕྱིར་བླངས་ཏེ། དེ་དང་འབྲེལ་པས་འདི་རྣམས་འབགས་པ་ཡིན་ནོ་ཞེས་དེ་སྐད་ཅེས་ཟེར་བ་དེ་ཐོས་པས་ཁྱིམ་པ་རྣམས་འཕྱ་ཞིང་རབ་ཏུ་བྱུང་བར་དག་ནི་ཉེ་བར་མ་ཞིའོ་ཞེས་ཟེར་བའི་བར་ལས་བཅས་པ་ཡིན་ནོ། །ཕྱོགས་གཅིག་
བཀྲུས་ན་ཡང་བཀྲུས་པ་ཉིད་ཡིན་ནོ། །བྱས་པ་ཉིད་ལ་བྱེད་དུ་བཅུག་པ་ཉིད་ཡིན་ནོ་ཞེས་བྱ་བ་དང༌། འབྲས་བུའི་མཐའ་ཚུན་ཆད་གཅིག་ཉིད་དོ། །བཤང་བ་དང་གཅིག་བ་དང༌། ལྗན་ལྗིན་དང་འདམ་རྫབ་ལ་ སོགས་པས་མ་རུངས་པ ་འཁྲུར་བཅུག་པ་ལ་ཡང་ན་སྨད་པ་མེད་དོ་ཞེས་སྔར་བསྟན་པ་དག་ཀྱང་འདིར་དེ་བཞིན་དུ་རིག་པར་བྱའོ། །འདིར་གོས་ཁ་བསྒྱུར་བ་དང་མ་བསྒྱུར་བ་བཙོ་བླག་མཁན་ལ་ཁ་བསྒྱུར་དུ་བཅུག་པ་ནི་ཇི་ལྟར་ཐོབ་པ་ལས་ཉེས་བྱས་སུ་རིག་པར་བྱའོ། །བསུ་བེལ་བ་ལས་གྱུར་པའི་ལྟུང་བྱེད་གསུམ་མོ།། །།གང་ལ་ཆོས་ཀྱི་རྒྱལ་མཚན་ལ་མི་གུས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སྦྱོང་གི་གོས་ཁྱིམ་པ་ལ་བགོ་བའི་ཕྱིར་སྦྱིན་པ་ལའོ་ཞེས་བྱ་བ་སྨོས་ཏེ། ཚད་དང་ལྡན་པའི་གོས་རྣམ་སྦྱར་དང་བླ་གོས་ལ་ སོགས་པ ་ཁྱིམ་པ་ལ་བགོ་ཞིང་བསྐོན་པའི་ཕྱིར་སྦྱིན་པ་ལ་ཞེས་བྱ་བའི་དོན་ཏོ། །འདིར་མདོ་ལས་བྱིན་ན་ཞེས་གསུངས་པ་དེའི་རྣམ་པར་འབྱེད་པ་ནི། །བགོ་བར་བྱེད་ཅིང་བསྐོན་པར་བྱེད་ན་ཞེས་གསུངས་པ་ཡིན་ནོ། །བསྐོན་པ་ལ་ངེས་པར་སྦྱོར་བར་འགྱུར་བས་སྦྱིན་པར་བྱའོ་སྙམ་པ་འདི་ནི་དོན་ལ་རྣམ་པར་གནས་པ་ཡིན་ནོ། །ཚད་ནི་འཁོར་གསུམ་ཁེབས་པའི་མཐར་ཐུག་པ་ཡན་ཆད་ལ་ལྟུང་བྱེད་དོ། །ཁྲུ་གང་ཡན་ཆད་ལ་ནི་ཉེས་བྱས་སོ། །དེ་བས་ན་ཆུང་བ་གཞན་ལ་ནི་ལྟུང་བ་མེད་དོ་ཞེས་བྱ་བ་འདིར་རྣམ་པར་གཞག་པ་རིག་པ་ཡིན་པར་ཤེས་པར་བྱའོ། །གང་ཞིག་བསྲུང་བའི་དོན་དུ་བྱིས་པ་དག་ལ་མགྲིན་པར་གོས་བཏགས་ཏེ། ཆ་ལུགས་བསྒྱུར་བའམ་ཞེས་བྱ་བ་སྨོས་པས་ལྟུང་བ་བསྐྱེད་པའི་ཚད་དང་ལྡན་པ་ལ་ཡང་དེར་ཉེས་པ་མེད་པར་རིག་པར་བྱའོ། །དེ་ཡང་རབ་ཏུ་བྱུང་བའི་ཕྱོགས་ལ་གཞག་པ་ཉིད་ཀྱི་ཕྱིར་ཞེས་བྱ་བར་རིག་པར་བྱའོ། །ཆོས་ཀྱི་རྒྱལ་མཚན་ལ་མི་གུས་པའི་ལྟུང་བྱེད་དོ། །གང་ལྕི་བའི་ཆོས་ལས་འདའ་བར་བྱེད་པའི་ཕྱོགས་དང་མཉམ་པར་བྱེད་པར་གྱུར་པས་རང་གི་ཕྱོགས་ཀྱིས་ལྕི་བའི་ཕྱོགས་ལ་རྒྱལ་མཚན་བརྗེ་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་དང་ལྷན་ཅིག་སྣམ་སྦྱར་བརྗེ་བ་ལའོ་ཞེས་བྱ་བ་སྨོས་ཏེ། ཆོས་གོས་ཆེན་པོ་ཉིད་ཀྱི་ཕྱིར་རོ། །དེ་བས་ན་ཁ་ན་མ་ཐོ་བ་འདི་སྐྱེད་
པའོ། །འདིར་གཞན་ལས་ལེན་ཡང་ཁ་ན་མ་ཐོ་བ་འདིར་འགྱུར་གྱི་སྦྱིན་པ་ལ་ནི་མ་ཡིན་ནོ། །དེ་ལྟ་བས་ན་བཟང་ངན་བརྗེ་བ་མ་གཏོགས་པར་དགེ་སློང་ལ་སྣམ་སྦྱར་ལེན་པ་ལ་ལྟུང་བྱེད་འདི་རྣམ་པར་གཞག་པ་ཁོ་ནའོ། །བརྗེ་བ་ཞེས་བྱ་བ་ནི་ལེན་པའི་དཔེ་ཙམ་དུ་ཟད་དོ། །རྒྱལ་མཚན་པ་རྗེ་བའི་ལྟུང་བྱེད་དོ།། །།ད་འདི་མན་ཆད་སེར་སྣ་བྱེད་པའི་ལྟུང་བྱེད་ལྔ་སྟོན་ཏེ། གང་ལ་དེ་རྣམས་ཀྱི་དང་པོར་འགྱུར་ཞེ་ན། དེའི་ཕྱིར་བསྔགས་པ་ལ་སེར་སྣ་བྱེད་པ་ལའོ་ཞེས་བྱ་བ་སྨོས་ཏེ། དགེ་སློང་མ་གཞན་དག་གི་བསྔགས་པ་བརྗོད་པ་ལ་སེར་ནས་བྱེད་པར་འགྱུར་བ་ལ་ལྟུང་བྱེད་ཅེས་བྱ་བའི་དོན་ཏོ། །གང་ལ་ལྟུང་བྱེད་བཞི་པོར་འགྱུར་ཞེ་ན། དེ་བརྗོད་པར་བྱ་སྟེ་ཁྱིམ་དང༌། གནས་དང༌། རྙེད་པ་དང་ཆོས་ལ་སེར་སྣ་བྱེད་པ་ལའོ་ཞེས་བྱ་བ་སྨོས་ཏེ། ལའོ་ཞེས་བྱ་བའི་སྒྲ་ནི་འདིར་ཁྱིམ་ལ་ སོགས་པ ་རེ་རེ་ལ་སེར་སྣ་བྱེད་པ་ལའོ་ཞེས་བྱ་བར་སྦྱར་རོ། །སྡོམ་པར་བྱེད་པ་ཐམས་ཅད་ལ་ཉེས་བྱས་ཉིད་དེ་བསྡམ་པར་བྱ་བ་ཐམས་ཅད་ཀྱང་ཡིད་ཀྱི་ལྟུང་བ་ཐམས་ཅད་ལ་ཞེས་བྱ་བར་རྣམ་པར་གཞག་པའོ། །འདིར་ཡིད་ཙམ་གྱི་སེར་སྣ་བྱེད་པ་ན་བསྡམ་པར་བྱ་བ་ཉིད་ཡིན་ཏེ་ཉེས་བྱས་སོ། །དེ་བས་ན་འདིར་གཞན་ལ་བསྔགས་པ་ལ་ སོགས་པ ་ལྷག་པར་སྤྱོད་པའི་གཉེན་པོར་གྱུར་པ་ན་ལུས་དག་ལ་སེར་སྣའི་དབང་གིས་བསྔགས་ པ་ལ་སོགས ་པའི་གེགས་སུ་གྱུར་པ་ཉིད་ཀྱིས་བསྔགས་ པ་ལ་སོགས ་པའི་སེར་སྣའི་སྒྲ་སྨོས་པ་ཡིན་གྱི་སེར་སྣའི་དྲི་མ་ལ་ནི་མ་ཡིན་ནོ། །འདིར་ནི་བསྒྲུབ་པ་བསྔགས་པ་ལ་ སོགས་པ ་ལ་སེར་སྣ་བྱེད་པ་ལ་ཡིན་གྱི་སེམས་ཀྱི་དྲི་མ་ལ་ནི་མ་ཡིན་ནོ། །དེ་ལྟར་ཡང་འདིར་གླེང་གཞི་ལས་སྦོམ་དགའ་མོས་དགེ་སློང་གཞན་དག་གིས་ཡོན་ཏན་ཡང་དག་པར་བརྗོད་པ་ཐོས་པ་དང་སྨོད་པར་བྱེད་དེ། དེ་ལ་དགེ་སློང་མ་རྣམས་ཀྱིས་འཕགས་མ་ཅིའི་ཕྱིར་སྨོད་པར་བྱེད་ཅེས་སྨྲས་པ་དང༌། སྦོམ་དགའ་མོས་སྨྲས་པ། བདག་ནི་ཤཱཀྱའི་རིགས་སུ་སྐྱེས་པས་སྡེ་སྣོད་གསུམ་གྱི་ཆོས་སྨྲ་བར་རིགས་པ་དང༌། གྲོལ་བའི་སྤོབས་པ་དང་ལྡན་པ་ཁོ་མོའི་བསྔགས་པ་མི་བརྗོད་པར་གཞན་དག་གི་བསྔགས་པ་བརྗོད་དམ་ཞེས་བྱ་བ་དང༌། སྦོམ་དགའ་མོས་དགེ་སློང་མ་གཞན་དག་ལ་ཁྱེད་ཀྱིས་གང་ན་
བསོད་སྙོམས་བསོད་པ་རྙེད་ཅེས་དྲིས་པ་དང༌། དགེ་སློང་མ་རྣམས་ཀྱིས་ཐམས་ཅད་སྨྲས་པ་དང༌། དེ་ནས་སྦོམ་དགའ་མོ་སྨོད་ཅིང་དེ་དག་ཟློག་པར་བྱེད་དོ། །ཁྱིམ་ག་གེ་མོ་ཞིག་ཏུ་ཁྱེད་ཅག་མ་འགྲོ་ཤིག་ཅེས་བྱ་བའི་བར་དང༌། སྦོམ་དགའ་མོས་དེ་དགེ་སློང་མའི་དབྱར་ཁང་བྱེད་དུ་བཅུག་ནས། དེ་ན་དགེ་སློང་མ་རྣམས་གནས་ཤིང་ས་གཉིས་པ་གཞན་ལ་སྦོམ་དགའ་མོ་གནས་ཏེ། དེ་རྣམས་དེས་བག་ཡངས་སུ་རྐང་པ་དག་གིས་འཆག་ཅིང་སྤྱོད་པའི་སྒྲ་ཆེན་པོ་དག་གིས་གྲག་པར་གྱུར་ནས། སྦོམ་དགའ་མོ་དེ་རྣམས་ལ་སྨོད་ཅིང་འདི་ལྟར་རྣམ་པར་འགྱུར་བར་བྱེད་དོ། །རྣམ་པར་འགྱུར་བ་དག་གིས་སྒེག་པ་དང་བཅས་པས་འཆག་པ་དེ་རྣམས་སུ་ཡིན་ཞེས་ཟེར་ནས། ཇི་ལྟར་བ་ལང་མོ་རྣམས་འཆག་པར་བྱེད་པ་ལྟར་མ་བསྡམས་པའི་སྒྲ་གང་གི་ཕྱིར་བྱུང་བར་གྱུར་ཏོ། །དགེ་སློང་མ་རྣམས་ཀྱིས་འཕགས་མ་ཁྱོད་གནས་ལ་སེར་སྣ་བྱེད་དམ་ཞེས་སྨྲས་པ། ཅིའི་ཕྱིར་ཁོ་མོ་མི་བྱེད་བདག་གིས་བླངས་ཤིང་གཙུག་ལག་ཁང་བྱེད་དུ་བཅུག་སྟེ་ཆོས་བསྟན་པས་ལྕེ་ལ་ཆུ་བུར་བྱུང་བྱུང་གི་བར་དུ་བསྒྲུབས་པ་ཡིན་ནོ། །བདག་གིས་སའི་ལས་བྱས་པས་རྐང་པ་བརྡོལ་ཞིང་ལག་པ་གཉིས་ལ་ཆུ་བུར་བསྐྱེད་པ་དེའི་ཕྱིར་བདག་སེར་སྣ་བྱེད་དོ། །སྦོམ་དགའ་མོ་འདི་སྙམ་དུ་དགེ་སློང་མ་འདི་རྣམས་སྔ་མར་བསོད་སྙོམས་ལ་རབ་ཏུ་འཇུག་པས། ཁོ་མོས་རྙེད་པ་གང་ལ་ཐོབ་སྙམ་ནས། ད་ཐབས་ཅུང་ཟད་བྱས་ཏེ། གང་གིས་བདག་ཁོ་ན་སྔར་ཞུགས་ལ་ཕྱིས་འདི་རྣམས་འཇུག་གོ་སྙམ་ནས། དེས་དེ་རྣམས་གདམས་ངག་དང་རྗེས་སུ་བསྟན་པ་སྟེར་བར་བྱེད་དེ་ཁྱེད་ཅག་ནི་ཟས་ཙམ་ལ་རྩེ་གཅིག་པ་ཟས་དང་འབྲེལ་པའི་སེམས་ཀྱིས་མཚན་མོ་འདའ་བར་བྱེད་དོ་ཞེས་ཟེར་ཞིང༌། ཁྱེད་ཅག་རྣམས་ནི་མཁན་མོ་མ་ཡིན་ཏེ། ཉེ་གནས་དང་བསྙེན་བཀུར་གྱིས་ཤིག །ཁྱེད་ཅག་རྣམས་ནི་བཅོམ་ལྡན་འདས་ལ་མཎྜལ་དང་བསྟོད་པར་སྨྲ་བར་མི་བྱེད་དེ། གཅིག་པུ་ལྟུང་བྱེད་དེ་བླངས་ནས་སྔ་བར་བསོད་སྙོམས་ལ་རབ་ཏུ་ཞུགས་སོ་ཞེས་བྱ་བ་དང༌། དེ་རྣམས་ཀྱི་བསམས་པ་འཕགས་མ་དེ་བཞིན་དུ་རིགས་སོ་ཞེས་ཟེར་ཏེ། དེ་རྣམས་འགྲོ་བར་མ་བརྩམས་པ་དང༌། སྦོམ་དགའ་མོས་ཀྱང་སྐྱ་རེངས་ཤར་བའི་དུས་ཀྱི་ཚེ་བསོད་སྙོམས་ལ་ཞུགས་པ་ན། བྲམ་ཟེ་
གཞན་དག་བཀྲ་ཤིས་དོན་དུ་གཉེར་བ་ཡུལ་གཞན་དུ་འགྲོ་བར་འདོད་པས་ཁྱིམ་ནས་བྱུང་བ་དང༌། དེས་དེ་མཐོང་ནས་མགོ་རེག་མཐོང་ན་བཀྲ་མི་ཤིས་སོ་ཞེས་ཟེར་ཏེ། བཟུང་ནས་ཤིན་ཏུ་བརྡེགས་སོ་ཞེས་བྱ་བའི་བར་དང༌། སྦོམ་དགའ་མོ་ལ་དགེ་སློང་མ་རྣམས་ཀྱིས་འཕགས་མས་བདག་ཅག་རྣམས་ལ་ལུང་དབོག་པར་འཚལ་ན། གལ་ཏེ་ཁྱེད་ཀྱིས་བདག་ཅག་ལ་གནང་བ་སྟེར་ན་ལུང་དབོག་ཏུ་གསོལ་ཞེས་གསོལ་བ་བཏབ་པ་དང༌། དེས་ཐོས་ནས་ལུང་དབོག་པའི་དུས་དགེ་སློང་མ་དེ་རྣམས་འོངས་པ་དང༌། དེས་ཁོ་མོ་རོ་རྒྱབ་ནས་ཤས་དུགས་གྱིས་ཤིང་ཅེས་ལས་བྱེད་དུ་འཇུག་པ་དང༌། དེ་རྣམས་བྱེད་ཅིང་བདག་གི་གོས་རྣམས་དྲི་མ་ཅན་དུ་གྱུར་པས་ན། འཚེད་པའི་ལས་གྱིས་ཤིག་ཆུ་ལོང་ཅིག་ཅེས་བྱ་བ་ལ་ སོགས་པ ་འདི་ལྟར་བྱ་བ་མཐའ་ཡས་པ་ཡིན་ཏེ། དེ་རྣམས་ཀྱིས་འདི་ལྟར་བསམས་ཏེ། འཕགས་མ་ནི་ངེས་པར་ཆོས་ལ་སེར་སྣ་བྱེད་དོ་སྙམ་ནས་དེ་དག་གིས་དྲིས་པ། གཅིག་པུ་ཁོ་མོ་ཅག་ལ་ལས་བྱེད་དུ་བཅུག་སྟེ་གང་གིས་ཁོ་མོ་ཅག་ལ་གནང་བར་མི་བྱེད་དེ། དེས་སྨྲས་པ། ཁོ་མོ་ཅིའི་ཕྱིར་མི་བྱེད་ཅེས་བྱ་བའི་བར་དུའོ། །སེར་སྣ་བྱེད་པ་ལས་གྱུར་པའི་ལྟུང་བྱེད་ལྔའོ།། །།ད་འདི་མན་ཆད་ནི་སྐྲོད་པ་ལས་གྱུར་པའི་ལྟུང་བྱེད་གཉིས་བསྟན་ཏེ། དེ་གཉིས་ཀྱི་དང་པོ་ནི་དབྱར་ཁང་ནས་དགེ་སློང་མ་གང་ཡང་རུང་བས་སྐྲོད་པ་ལའོ་ཞེས་བྱ་བ་སྟེ། གང་ཡང་རུང་བས་ཞེས་བྱ་བ་ནི་གཅིག་ཉིད་ལ་གཞན་གྱི་ངེས་པ་རྣམས་སོ། །བཀྲུ་བའི་དོན་དུ་རང་གི་ལུས་སམ་དག་གིས་གཞན་ལ་བཅོལ་བའམ། སྤྲིང་ཡིག་ལ་ སོགས་པའི་རྣམ་པ ་གང་ཡང་རུང་བས་ཞེས་བྱ་བའི་དོན་ཏོ། །འདིར་སྦོམ་དགའ་མོས་དགེ་སློང་མ་སྔ་ནས་འཁོད་པ་དག་རྐང་པ་དང༌། ལག་པ་དག་གིས་མནན་པ་དང༌། དེ་དག་གིས་སྨྲས་པ། འཕགས་མ་ཅིའི་ཕྱིར་གནོད་པ་བྱེད། དེས་སྨྲས་པ། སུ་ལ་གནོད་པ་དེ་དག་འགྲོ་ལ་རག་གོ །དེ་རྣམས་ཀྱིས་ཕན་ཚུན་སྨྲས་པ། སྦོམ་དགའ་མོ་ནི་སྟབས་དང་ལྡན་པ་སྟེ། དུས་ནམ་གྱི་ཆེ་བདག་ཅག་ལ་རྒྱབ་ཏུ་རྐང་པའི་རྡོག་པ་དང༌། ལག་པ་རྣམས་ཀྱིས་སྲོག་དང་འབྲལ་བ་འོང་ངོ་སྙམ་ནས་སྟན་ལས་ལངས་ཤིང་བདག་ཅག་རྣམས་འགྲོ་བར་བྱའོ་ཞེས་ཟེར་ཏེ། དེ་ལྟར་དགེ་སློང་མ་རྣམས་ཐམས་ཅད་དོང་བ་ལས་བཅས་པ་ཡིན་ཏེ། ཕྱི་མའི་གླེང་གཞི་
གང་ཡིན་པ་དེ་འདིར་ཡང་སྦྱར་བར་རིག་པར་བྱའོ། །བུད་མེད་རྣམས་ལ་འཇུག་པ་འདི་ནི་ཤིན་ཏུ་སྟོབས་དང་ལྡན་པ་མི་མཐུན་པ་ཞེས་བྱ་བ་འདིར་འདི་ཤེས་པའོ། །ལྷག་མ་ནི་དགེ་སློང་སྐྲོད་པའི་ལྟུང་བྱེད་དང་འབྲེལ་པ་དེར་གཏོགས་པ་ཐམས་ཅད་འདིར་ཤེས་པར་བྱའོ། །གང་དུ་གཉིས་པ་དེ་བརྗོད་པར་བྱ་སྟེ། དེའི་ཕྱིར་ཁྱིམ་གཞན་ནས་དགེ་སློང་མ་སྔ་ན་གནས་པ་སྐྲོད་པ་ལ་ཡང་ངོ་ཞེས་བྱ་བ་སྨོས་ཏེ། ཡང་ངོ་ཞེས་བྱ་བའི་སྒྲས་ནི་དགེ་སློང་མ་གང་ཡང་རུང་བས་སྐྲོད་པ་ལའོ་ཞེས་བྱ་བར་སྦྱར་རོ། །སྐྲོད་པ་ལས་གྱུར་བའི་ལྟུང་བྱེད་གཉིས་སོ།། །།གང་ལ་ཆོས་ལ་རྨོངས་པས་ཐོ་འཚམས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལེགས་པར་མ་མཐོང་བ་ལ་ སོགས་པས་གླེང་བ་ལའོ་ཞེས་བྱ་བ་སྨོས་ཏེ། དགེ་སློང་མ་ལའོ་ཞེས་བྱ་བར་སྦྱར་རོ། །སོགས་པ ་ཞེས་བྱ་བའི་སྒྲས་ནི། ལེགས་པར་མཐོས་པ་དང་ལེགས་པར་མི་དོགས་པ་གཉིས་སུ་བསྡུའོ། །གཞི་ལེགས་པ་མེད་པ་ལས་གཞི་མེད་པ་ཉིད་ཆེས་སྡིག་ཆེ་བས་དེའི་ཕྱིར་འདིར་ཡང་ཁ་ན་མ་ཐོ་བ་འདིའོ། །ཕམ་པར་འགྱུར་བ་དང་དགེ་འདུན་ལྷག་མ་གཉིས་གླེང་བ་སྔར་བསྟན་ཟིན་པའི་ཕྱིར་ལྷག་མས་གླེང་བ་ཡིན་ནོ། །དྲན་པར་བྱ་བ་ཡང་གླེང་བའི་རྣམ་པ་ཡིན་པས། དེ་བས་ན་འདིར་ཡང་གླེང་པ་དང་འབྲེལ་པ་འདི་ལ་ཐ་དད་པར་རྩོམ་པ་ཉིད་མེ་དཔས་ལྷག་མ་འདི་ནི་འདིའི་ཡུལ་ལོ། །གླེང་བ་ལས་གདམས་ངག་ལ་ སོགས་པ ་འཇོག་པ་དང༌། གྱོད་ལ་བཏགས་པ་ཆེས་སྡིག་ཆེ་བས་དེ་བས་ན་གཉིས་པོ་འདི་དག་ཀྱང་གཞི་ལེགས་པ་མེད་པ་དང་གཞི་མེད་པ་དག་ལ་འདིའོ། །འདིར་གླེང་གཞི་ནི། དེ་དག་གིས་ལེགས་པར་མ་མཐོང་བ་དང༌། ལེགས་པར་མི་ཐོས་བ་དང༌། ལེགས་པར་མི་དོགས་པས་དགེ་སློང་མ་ལ་གླེང་བར་བྱེད་པ་དང་དྲན་དུ་བཅུག་པའོ། །དགེ་སློང་མ་ཆེ་གེ་མོ་ཞིག་འདི་འདྲའོ་ཞེས་གླེང་བར་བྱེད་ཅིང་དེ་རྣམས་ལ་གསོ་སྦྱོང་དང་དགག་དབྱེ་འཇོག་པར་བྱེད་པ་དང༌། དེ་བཞིན་དུ་གཞི་མེད་པར་བརྫུན་གྱིས་དགེ་སློང་མ་རྣམས་ལ་གླེང་གཞི་མི་མཐུན་པར་གནས་པར་བྱེད་ཅེས་བྱའོ། །དེ་བཞིན་དུ་འདིར་རང་ལ་ཡང་ཁ་ན་མ་ཐོ་བ་རྣམས་ལ་མཚོན་པ་ཉིད་ཀྱིས་འདིར་གླེང་གཞི་མི་མཐུན་པར་གནས་པར་བྱེད་དོ་ཞེས་བྱ་བ་འདི་ལས་ཤེས་པར་རོ། །ཐོ་འཚམས་པ་ལས་གྱུར་པའི་ལྟུང་བྱེད་དོ།། །།གང་ལ་རབ་ཏུ་བྱུང་བའི་
བསམ་པ་ལོག་པར་སྟོན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་མནའ་དོར་བ་ལའོ་ཞེས་བྱ་བ་སྨོས་ཏེ། རབ་ཏུ་བྱུང་བ་རྣམས་ཀྱི་བསམ་པ་ནི་བདེན་པས་འཇུག་པ་ཡིན་ན། དེ་མནས་ལོག་པར་སྟོན་པ་སྟེ། ཁོ་མོ་ཐམས་ཅད་བདེན་པས་འཇུག་པ་མ་ཡིན་གྱི། འདི་ལྟར་གང་ལ་མནའ་དོར་བར་འཇུག་པ་དེ་གཅིག་པུ་བདེན་ནོ་ཞེས་བྱ་བར་གྱུར་པས་སོ། །གཞན་གྱི་མདུན་མ་ཡིན་པར་མནའ་དོར་བ་ནི་ཚིག་ཀྱལ་པ་ཙམ་དུ་ཟད་པས། སྔ་མའི་རྗེས་སུ་འབྲད་བས་ན་འདི་ཉེས་བྱས་སུ་ཤེས་པར་བྱེད་པའོ། །འདི་ལ་ཤེས་པ་གཞན་ལ་དངོས་གཞི་འབྱུང་བའོ། །རྗེས་སུ་སྤྲོ་བ་ལ་ནི་ཉེས་བྱས་སོ། །གཞན་ཉེ་བར་གནས་པ་ནི་ཚིག་ཀྱལ་པ་ཙམ་དུ་རིག་པར་བྱའོ། །ལོག་པར་སྟོན་པའི་ལྟུང་བྱེད་དོ། །གང་ལ་མི་བརྟན་པས་རྣམ་པར་འགྱུར་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཁྲོ་བས་བདག་ཉིད་ལ་གནོད་པར་བྱེད་པ་ལའོ་ཞེས་བྱ་བ་སྨོས་ཏེ། གནོད་པ་བྱེད་པའི་སྒྲ་ནི་རྡེག་པ་ལའོ། །བདག་ཉིད་ལ་གནོད་པར་བྱེད་ཅེས་བྱ་བའི་རྣམ་པར་འབྱེད་པ་ནི་རྡེག་པར་བྱེད་པའོ་ཞེས་གསུངས་པ་ཡིན་ནོ། །མི་བརྟན་པས་རྣམ་པར་འགྱུར་བ་ཞེས་བྱ་བ་འདི་ནི་འདི་ཡིན་ཏེ། དེ་བས་ན་མི་བརྟན་པ་རྣམ་པར་འགྱུར་བ་ཉིད་ཀྱིས་འདི་བརྗོད་པའོ། །མི་བརྟན་པས་རྣམ་པར་འགྱུར་བའི་ལྟུང་བྱེད་དོ།། །།ད་འདི་མན་ཆད་ནི་བླ་མར་གྱུར་པ་ལ་བརྙས་ཐབས་བྱེད་པའི་ལྟུང་བྱེད་གསུམ་སྟོན་ཏེ། དེ་རྣམས་ཀྱི་དང་པོ་ནི་དགེ་སློང་མའི་ཚོགས་པ་ལ་བརྙས་ཐབས་བྱེད་པ་ལའོ། །ཚོགས་ཀྱི་སྒྲ་ནི་དགེ་འདུན་འདི་དང་འོག་མ་ལའོ། །དགེ་སློང་མའི་ཚོགས་ཞེས་བྱ་བའི་རྣམ་པར་འབྱེད་པ་ནི་དགེ་སློང་མའི་དགེ་འདུན་ཞེས་གསུངས་པ་ཡིན་ནོ། །གསུམ་མམ་གཉིས་སམ་གཅིག་པོ་རྣམས་ཀྱི་རྗེས་སུ་འབྲངས་པས་ཉེས་བྱས་སུ་རིག་པར་བྱའོ། །བརྙས་ཐབས་བྱེད་པ་ཞེས་བྱ་བའི་མདོ་འདི་རྣམ་པར་འབྱེད་པ་ནི་བརྙས་ཐབས་བྱེད་པ་ལ་ཡང་ངོ་ཞེས་བྱ་བ་སྟེ། དེ་བས་ན་འདིར་བརྙས་ཐབས་བྱེད་པ་ལ་ཡང་ངོ་ཞེས་བྱ་བ་སྨོས་སོ། །རྣམ་པ་སྣ་ཚོགས་དག་གིས་སྨོན་པར་བྱེད་དེ། ཚུལ་འཆོས་པ་དང༌། ཁ་གསག་དང༌། གཞོགས་སློང་དང༌། ཐོབ་ཀྱིས་འཇལ་གྱིས་འཚོ་བར་བྱེད་དོ། །མིག་སལ་བ་རྨོངས་པ་མི་མཁས་པ་ཡིན་ནོ། །ལྟུང་བ་
ཡང་མི་ཤེས་ལྟུང་བ་མེད་པ་ཡང་མི་ཤེས་པ་ཡིན་ནོ། །འདི་ལ་བྱིན་པའམ་བྱས་པའམ། བསྙེན་བཀུར་ཀུན་དུ་སྤྱད་པས་ཅི་བྱ། ལོག་པའི་ཆོས་ཀྱིས་ཀུན་ཏུ་དཀྲིས་པ་ཡིན་ནོ་ཞེས་གླེང་གཞི་ལས་གསུངས་པ་ཡིན་ནོ། །དེ་བས་ན་འདི་ལྟ་བུའི་བརྙས་ཐབས་བྱེད་པ་ལ་ཡང་འདིའི་ངོ་བོ་ཞེས་བྱ་བར་རྟོགས་པར་བྱའོ། །གང་ལ་བསླབ་པའི་གཞི་གཉིས་པ་དེ་བརྗོད་པར་བྱ་སྟེ། དེའི་ཕྱིར་སྤྱོ་བ་ལ་ཡང་ངོ་ཞེས་བྱ་བ་སྨོས་ཏེ། དགེ་སློང་མའི་ཚོགས་ལ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲས་སྨོས་སོ། །དགེ་སློང་མའི་ཚོགས་ལ་སྤྱོད་པར་བྱེད་པའི་གླེང་གཞི་ནི། འདིར་འཚོ་བའི་ཕྱིར་མགོ་བྲེགས་པ། མུ་གེའི་ཕྱིར་མགོ་བྲེགས་པ། སྡིག་པའི་ལས་ཅན། འཕགས་པ་མ་ཡིན་པ། ཟོལ་པ་མོ། །ཕ་རོལ་སླུ་བ་ཡང་དག་པར་སྡོམ་པ་མ་ཡིན་པ་ཚུལ་ཁྲིམས་འཆལ་པའོ་ཞེས་གསུངས་པ་ཡིན་ཏེ། དེ་བས་ན་སྤྱོད་བའི་རང་བཞིན་ནི་འདི་རྣམས་ཡིན་ནོ་ཞེས་རྟོགས་པར་བྱའོ། །སྤྱོ་བའི་ཚིག་འདི་རྣམས་ལ་དོན་ཐ་དད་པ་ཉིད་དེ་ལོག་པའི་འཚོ་བའི་ཁོངས་སུ་ཚུལ་ཁྲིམས་འཆལ་བ་བསྡུས་པའི་ཕྱིར་རོ། །དེ་བས་ན་ཐ་དད་པའི་ངེས་པ་ནི་སེམས་ཐ་དད་པའི་དབང་གིས་ཚིག་ལའོ། །དེ་བས་ན་བརྙས་ཐབས་དང་སྤྱོད་བ་དག་ལ་དོན་ཐ་དད་པ་ཞེས་བྱ་བར་རྟོགས་པར་བྱའོ།། གང་ལ་བསླབ་པའི་གཞི་གསུམ་པ་དེ་བརྗོད་པར་བྱ་སྟེ། དེའི་ཕྱིར་འཁོར་གཙོ་བོ་ལ་ཆུས་འཐོར་བ་ལའོ་ཞེས་བྱ་བ་སྨོས་ཏེ། འཁོར་གཙོ་བོ་ཞེས་བྱ་བའི་སྒྲས་ནི། འདིར་དགེ་སློང་ལ་བརྗོད་དོ། །འཁོར་གཙོ་བོ་ཞེས་བྱ་བ་རྣམ་པར་འབྱེད་པ་ལས་དགེ་སློང་ཞེས་གསུངས་པའི་ཕྱིར་རོ། །ལུས་ལ་ཐིགས་པ་ཙམ་གྱིས་ཕོག་པར་གྱུར་ན་ཡང་དེའི་ཚེ་ཆུས་གཏོར་བ་ཡིན་ནོ། །བརྒྱལ་བ་ལ་ནི་ལྟུང་བ་མེད་དོ་ཞེས་བྱ་བ་ནི་དགེ་སློང་བརྒྱལ་བ་ལ་ཆུ་གཏོར་བ་ལ་ལྟུང་བ་མེད་དོ། །ཁ་ན་མཐོ་བ་འདི་ནི་ལོག་པར་བསྒྲུབ་པར་གྱུར་པའི་གཏོང་བ་ལ་ཞེས་བསྟན་པར་རིག་པར་བྱའོ། །དགེ་སློང་ལ་ཐུ་ཞེས་མི་བྱའོ་ཞེས་བྱ་བ་ནི། འདིར་གཞུང་ནི། ཕྲན་ཚེགས་རྣམས་ལས་ཐུ་ཞེས་མི་བྱའོ་ཞེས་བྱ་བའི་དང་པོ་འདི་ནས་བསྟན་པ་ཞེས་བྱ་བའི་བར་དུ་གསུངས་པ་ཡིན་ནོ། །རབ་ཏུ་བྱུང་བ་འདི་པ་ལ་སྤྱོད་བར་མི་བྱའོ་ཞེས་བྱ་བ་ནི་དགེ་སློང་མའི་ཚོགས་ལ་སྤྱོད་བའི་ལྟུང་བྱེད་སྔར་ལོགས་ཤིག་ཏུ་བསྟན་ཟིན་པའི་ཕྱིར་རོ། །
ཆོས་འདི་པའི་རབ་ཏུ་བྱུང་བ་དགེ་སློང་ལ་ སོགས་པ ་ལ་ཆོས་འདི་པ་རབ་ཏུ་བྱུང་བའི་ཚིག་གིས་བསྡུས་ཏེ། འདི་ལ་སྤྱོད་བ་ལ་ཉེས་བྱས་སུ་རྣམ་པར་གཞག་པ་ཡིན་ཏེ། ལྕི་བའི་ཆོས་མ་ཡིན་པའི་ཕྱིར་མགུ་བར་སྤྱད་པ་ཡིན་ནོ། །མགུ་བར་སྤྱད་པ་ཞེས་སྨོས་པས་ཟླ་བ་ཕྱེད་སྤྱད་པར་བྱའོ། །དེ་ལ་གཉིས་ཀ་ཡང་ངོ་ཞེས་བྱ་བ་ནི་གང་ཞིག་རབ་ཏུ་བྱུང་བ་འདི་པ་དེ་ལ་སྤྱོ་པར་མི་བའོ་ཞེས་བྱ་བ་སྨོས་པ་དེ་ལ་བརྙས་ཐབས་དང་སྤྱོད་བ་གཉིས་ཀ་ལ་ཡང་རིག་པར་བྱའོ། །རབ་ཏུ་བྱུང་བ་འདི་པ་ལ་བརྙས་ཐབས་མི་བྱའོ་ཞེས་བྱ་བ་འདི་ཡང་འདིས་འཕངས་སོ་ཞེས་བྱ་བའི་དོན་ཏོ། །དགེ་སློང་གི་མདུན་དུ་སྤྱོད་ཡུལ་དུ་རྒྱུ་བར་མི་བྱའོ། །ཟམ་པ་མི་བརྟན་པར་དགེ་སློང་དང་ལྷན་ཅིག་འགྲོ་བར་མི་བྱའོ་ཞེས་བྱ་བ་ནི་ཟམ་པ་བརྟན་པ་དང་མི་ལྡེག་པས་ལྟུང་བའི་བདག་ཉིད་ཅན་གྱི་ཉེས་དམིགས་མི་སྲིད་པས་ན་ལྟུང་བ་མེད་དོ། །དགེ་སློང་མཐོང་མ་ཐག་ཏུ་སྟན་ལས་ལྡང་བར་བྱའོ། །འདུག་པས་དེ་འགྲེང་བས་ཧ་ཅང་ཡུན་རིང་དུ་འདའ་བར་བྱེད་ན་སྟན་ལ་འདུག་ཏུ་གཞུག་གོ་ཞེས་བྱ་བ་ལ། འདུག་པས་ཞེས་བྱ་བ་ནི་སྟན་ལ་འདུག་ཏུ་གཞུག་གོ་ཞེས་བྱ་བ་དང་འབྲེལ་ལོ། །དེ་ཞེས་བྱ་བ་ནི་དགེ་སློང་མའོ། །གནས་སྐབས་གང་དུ་འཇུག་པར་འགྱུར་ཞེ་ན། དེའི་ཕྱིར་འགྲེང་བ་ཞེས་སྨོས་ཏེ། གནས་པས་ཞེས་བྱ་བའི་སྤྱོད་ལམ་གྱིས་དུས་འདའ་བར་བྱེད་པ་ལའོ། །གནས་སྐབས་ཇི་ལྟ་བུས་དེ་སྟན་ལ་འདུག་ཏུ་གཞུག་ཅེ་ན། དེའི་ཕྱིར་འདུག་པས་ཞེས་བྱ་བ་སྨོས་སོ། །དགེ་སློང་ཞེས་བྱ་བ་འདི་ལ་འདིར་དགེ་སློང་རྣམས་ཀྱིས་ཞེས་བྱ་བ་ཡོངས་སུ་གྱུར་པ་ལ་བྱེད་པ་པོ་ཉིད་ཀྱི་ཚིག་གིས་འབྲེལ་ཏོ་སྙམ་དུ་ཤུགས་ཀྱིས་རྟོགས་པའོ། །མི་བྱེད་ན་འདུག་པའི་ཕྱིར་ཞུགས་ཏེ་དེ་ལ་འདུག་པར་བྱའོ་ཞེས་བྱ་བ་ལ། མི་བྱེད་ན་ཞེས་བྱ་བ་ནི་དགེ་སློང་མ་སྟན་ལ་འདུག་པར་མ་བྱས་པ་ལ། འདི་ལ་དེས་འདུག་པ་ལ་ངེས་པར་སྦྱར་བ་ཞེས་བྱ་བའི་དོན་ཏོ། །མཐོང་མ་ཐག་ཏུ་ཞེས་བྱ་བ་ཉིད་དགེ་སློང་དེའོ། །དེ་ལ་འདུག་པར་བྱའོ་ཞེས་བྱ་བ་ནི་དགེ་སློང་གིས་སོ། །ཞུས་ཏེ་ཞེས་བྱ་བ་ནི་གནང་ན་སྟན་དེ་ལ་འདུག་པར་བྱ་སྟེ། དགེ་སློང་མས་ཞེས་བྱ་བའི་དོན་གྱིས་རྟོགས་པར་བྱའོ། །བླ་མར་གྱུར་པ་ལ་བརྙས་ཐབས་བྱེད་པའི་ལྟུང་བྱེད་གསུམ་མོ།། །།གང་ལ་འཁྲུག་ལང་ཡལ་
བར་དོར་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་མ་རྣམས་ཀྱིས་རྩོད་པ་མཐུ་ཡོད་བཞིན་དུ་ཉེ་བར་ཞི་བར་མི་བྱེད་པ་ལའོ་ཞེས་བྱ་བ་སྨོས་ཏེ། ཉེ་བར་ཞི་བར་བྱ་བའི་མཐུ་ཡོད་བཞིན་དུ་རྩོད་པ་ཉེ་བར་ཞི་བར་མི་བྱེད་པ་ལ་ཁ་ན་མ་ཐོ་བ་འདི་བསྒྲུབ་པར་འགྱུར་རོ། །གལ་ཏེ་གང་གི་ཚེ་དེའི་འོག་ཏུ་མ་བྲལ་བ་ཉིད་ལ་དེའི་སེམས་ལ་དེ་དང་འབྲེལ་པ་རྣམ་པར་ངེས་པའམ། བསམ་པ་བཏང་ནས་ཡང་བསམ་པ་གཞན་བསྐྱེད་པ་ལྟུང་བ་ཐམས་ཅད་ཀྱི་བསམ་པ་མ་བཏང་བ་ཉིད་ལ། ལྟུང་བ་གཅིག་པ་ཉིད་ཀྱི་བསམ་པ་དོར་ནས་སླར་ཡང་མངོན་པར་བསྟེན་པ་ལ་ལྟུང་བྱེད་གཞན་བསྐྱེད་པར་འགྱུར་རོ། །འཁྲུག་ལོང་ཡལ་བར་དོར་བའི་ལྟུང་བྱེད་དོ། །གང་ལ་བློ་མཐུན་པར་མི་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ཞག་ལོན་པའི་མི་འདུན་པ་སྦྱིན་པ་ལའོ་ཞེས་བྱ་བ་སྨོས་ཏེ། ཉི་མ་སྔ་མ་གཞན་ལ་འདུན་པ་ཕུལ་བ་དེ་ཉིད་དུ་ཡང་ཡོད་པས། འདུན་པ་སྔ་མ་དེ་གང་གི་ཕྱིར་བདག་གིས་དང་དུ་མ་བླངས་པས་ཡང་ཅིའི་ཕྱིར། ད་ལྟར་འདུན་པ་ཕུལ་བ་དེ་བདག་གིས་མ་བླངས་སོ་ཞེས་ཟེར་ཞིང་ཟག་ལོན་པའི་འདུན་པ་སྦྱིན་པའོ། །ཕྱིས་ཉི་མ་གཞན་ལ་འདུན་པ་སྦྱིན་པ་ལ་ཞེས་བྱ་བ་འདིས་བྱེ་བྲག་པ་ཉིད་བསྟན་པར་རིག་པར་བྱའོ། །ལས་གང་ལ་སྦྱིན་པ་ཉིད་དེ། དེའི་ཚེ་ལས་མ་བྱས་པ་ཉིད་ལ་མདུན་དུ་དེའི་ལས་བྱ་བའི་དོན་སླར་བསྡུས་པའི་རྣམ་པ་འདི་ལ་གོ་སྐབས་སོ། །དེ་ལྟར་འདིར་གླེང་གཞི་ནི་སྦོ་མ་དགའ་མོ་ལ་དགེ་སློང་མ་རྣམས་ཀྱིས་འཕགས་མ་དགེ་སློང་མའི་དགེ་འདུན་འཚོགས་ཀྱིས་ཚུར་ཤོག་ཅིག་ཅེས་བྱས་པ་དང༌། དེས་སྨྲས་པ་ཆོས་བཞིན་དུ་བྱེད་པའི་ལས་ལ་འདུན་པ་འབུལ་ལོ། །བྱ་བ་དེ་ཡང་མ་བྱས་སོ། །ཡང་ཕྱི་དེ་ཉིན་ཕར་དགེ་སློང་མའི་དགེ་འདུན་འདུས་ནས་སྦོམ་དགའ་མོ་ལ་སྦྲན་པ་དང༌། དེ་འོང་དུ་མ་བཏུབ་ནས་དགེ་སྐོས་མོས་ཅི་འཕགས་མ་འདུན་པ་འབུལ་མི་འདོད་དམ་ཞེས་སྨྲས་པ་དང༌། དེས་སྨྲ་པ་ཁོ་མོས་འདུན་པ་ཕུལ་ཟིན་ཏོ། །ནམ་ཕུལ་ཉི་མ་སྔ་མ་ལའོ། །འཕགས་མས་ཞག་ལོན་པའི་འདུན་པ་འབུལ་དུ་རུང་ངམ། དེས་སྨྲས་པ་ཆག་གམ་རྡུལ་ཏམ་ཅི་ཉེས་ཞེས་ཟེར་བ་ལས་བཅས་པ་ཡིན་ནོ། །བློ་མཐུན་པར་མི་བྱེད་པའི་ལྟུང་བྱེད་དོ། །བློ་མཐུན་པ་ལ་རྩེ་བར་གྱུར་པ་ཉིད་ཀྱི་ཕྱིར། ལྕི་བའི་ཆོས་ལ་འདས་པའི་ལྟུང་བྱེད་གསུམ་དང༌། ལྕི་བའི་
ཆོས་དང་འབྲེལ་པའི་ལྟུང་བྱེད་ཆོས་ལས་འདས་པ་ཞེས་བྱ་བའི་ལྟུང་བྱེད་འོག་མ་བཞི་པོ་སྟེ། དེ་རྣམས་ཀྱི་དང་པོ་ནི་ཟླ་བ་ཕྱེད་ཕྱེད་ཅིང་དགེ་སློང་རྣམས་ལས་གདམས་ངག་དང་རྗེས་སུ་བསྟན་པ་དག་ཉམས་སུ་མྱོང་བར་མི་བྱེད་པ་ལའོ་ཞེས་བྱ་བ་ནི་གསོ་སྦྱོང་གི་ཉིན་མོ་གདམས་དག་དང་རྗེས་སུ་བསྟན་པ་ཉམས་སུ་མྱོང་བར་བྱས་པ་ཉིད་དོ། །དེ་བས་ན་གསོ་སྦྱོང་གི་ཉིན་མོ་ལས་འདས་ན་ཁ་ན་མ་ཐོ་བ་འདི་སྐྱེད་པའོ། །རྐྱེན་བྱུང་ན་སོ་སོར་ཉམས་སུ་མྱོང་བར་བྱ་བ་ཉིད་མ་ཡིན་ནོ། །ཉམས་སུ་མྱོང་བ་ནི་ལས་ཉིད་མ་ཡིན་པ་མ་ཡིན་ནོ། །གསོ་སྦྱོང་གི་དུས་ཀྱང་འདིའི་དུས་སོ། །དེ་ལྟ་བས་ན་འདིར་ཉི་མ་འཆར་བའི་དུས་ལས་འདའ་བར་བྱེད་ན་འདས་པ་ཞེས་བྱ་བ་འདི་ལ་ན་སྨད་པ་འཇུག་གོ །གཉིས་པ་ནི་གང་ལ་དགེ་སློང་དག་མེད་པར་གསོ་སྦྱོང་བྱེད་པ་ལའོ་ཞེས་བྱ་བ་སྟེ། དགེ་སློང་མའི་དགེ་འདུན་གྱིས་སྔར་དགེ་འདུན་ལས་འདུན་པའི་གསོ་སྦྱོང་བླངས་ནས་འཚོགས་པ་སྒྲུབ་པར་མི་བྱེད་པ་དེ་ནི་འདིར་གསོ་སྦྱོང་བྱེད་པ་ལ་ཡན་ལག་ཏུ་རྣམ་པར་གཞག་པ་དེ་བས་ན་ཚོགས་པ་སྒྲུབ་པར་མི་བྱེད་པ་དེ་ནི་འདིར་དགེ་སློང་དག་མེད་པར་གསོ་སྦྱོང་བྱེད་པར་རིག་པར་བྱའོ། །འདི་ན་འདིར་ལྕི་བའི་ཆོས་དང་འབྲེལ་པའི་ཆོས་ལས་འདས་པའི་ཁ་ན་མ་ཐོ་བ་པའོ། །འདིར་གླེང་གཞི་ལས་དགེ་སློང་མ་ཁྱོད་ཀྱིས་དགེ་སློང་དག་མེད་པར་གསོ་སྦྱོང་དག་བྱས་པ་བདེན་ནམ་ཞེས་གསུངས་པ་དང་ཡང་དགེ་སློང་མ་གང་དགེ་སློང་མེད་པར་གསོ་སྦྱོང་བྱེད་ན་ལྟུང་བྱེད་དོ་ཞེས་མདོ་ལས་གསུངས་པ་ཡིན་ནོ། །དགེ་སློང་མའི་ཚིག་འདི་ནི་རིགས་ཀྱི་དགོངས་པ་ཅན་ཡིན་ནོ། །གསུམ་པ་ནི་གང་ལ་དགེ་སློང་མེད་པའི་གནས་སུ་དབྱར་གནས་པར་ཁས་ལེན་པ་ལའོ་ཞེས་བྱ་བ་སྨོས་ཏེ། དགེ་སློང་མེད་པའི་གནས་ཞེས་བྱ་བ་ནི། གང་ལ་ལས་རྣམས་ཐམས་ཅད་མི་བྱེད་པའོ་ཞེས་བྱ་བའོ། །འདིའི་རྣམ་པར་འབྱེད་པ་ནི་གང་ན་ལས་གཅིག་ཀྱང་མི་ཤེས་པ་ཞེས་བྱ་བའི་དོན་ཏོ། །གནས་གང་ན་རང་བཞིན་དུ་གནས་པའི་དགེ་སློང་བཞི་ཡན་ཆད་གནས་ཤིན་གླས་བྱེད་པ་མེད་པ་དེ་ནི་དེ་ལས་འདིས་བྱས་སོ།། འདིའི་དོན་ནི་གསོ་སྦྱོང་དང༌། གདམས་དག་དང་རྗེས་སུ་བསྟན་པ་དག་ལས་མ་ཉམས་པ་དང༌། ལྕི་བའི་ཆོས་རྣམས་བཟུང་བ་ཉིད་དོ། །དེ་ལྟ་བུར་གྱུར་པའི་དགེ་སློང་རྣམས་ལ་འདི་ཙམ་ཉིད་ལ་གཉིས་པོ་འདི་བསྒྲུབ་པ་ཞེས་བྱ་བ་འདི་ཡོངས་སུ་བཟུང་བའོ། །གང་ཞིག་དབྱར་གནས་པར་གྱུར་པ་ལ་གནས་པ་མི་
རིགས་པ་དང༌། བུད་མེད་ཀྱི་ཚོགས་ལ་བརྟེན་པ་མེད་པས་འདུག་པ་མི་རིགས་པ་ཞེས་བྱ་བ་འདིར་ལྕི་བའི་ཆོས་བཟུང་བ་ལ་ཀུན་ནས་བརྟེན་པ་འདི་ནི་གནས་ཡིན་ནོ། །བཞི་པ་ནི་གང་ལ་དབྱར་གནས་པས་གཉིས་ཀའི་དགེ་འདུན་ལ་གནས་གསུམ་གྱིས་དགག་དབྱེ་མི་བྱེད་པ་ལའོ་ཞེས་བྱ་བ་སྨོས་ཏེ། དགག་དབྱེའི་ཉིན་མོ་ལས་འདས་པ་ལས་ཁ་ན་མ་ཐོ་བ་ནི་གསོ་སྦྱོང་དང་འདྲའོ། །ལྕི་བའི་ཆོས་ལས་འདས་པ་ལས་གྱུར་བའི་ལྟུང་བྱེད་དོ།། །།ད་འདི་མན་ཆད་ནི་གཞན་ལ་གནོད་པར་བྱེད་པའི་ལྟུང་བྱེད་གསུམ་སྟེ། དེ་རྣམས་ཀྱི་དང་པོ་ནི་གང་ཞེན་དབུལ་པོ་སྲ་བརྐྱང་སྦྱོར་དུ་བཅུག་པ་ལའོ་ཞེས་བྱ་བ་སྨོས་ཏེ། གལ་ཏེ་འདིར་སྦྱིན་པ་དང་སྦྱོར་དུ་འཇུག་པ་དང༌། བསོད་ནམས་ལྷག་པར་སྦྱོང་པའི་སྒོ་ནས་གཉིས་ཀའི་དོན་དུ་སྲ་བརྐྱང་སྦྱོར་དུ་འཇུག་ན་བྱས་སམ་བྱེད་དུ་འཇུག་ན་ཐབ་ན་དངོས་གཞིའོ། །མདུན་རོལ་དུ་ནི་ཉེས་བྱས་སོ། །གཞན་ལ་ཡང་ཆོས་གོས་གཏན་པའི་ཟོང་ཙམ་དགེ་འདུན་གྱི་དོན་དུ་དབུལ་པོ་སྦྱོར་དུ་བཅུག་ན་ཡང་ལྟུང་བྱེད་དོ། །ཆོས་གོས་གཏན་པ་ཞེས་བྱ་བ་ནི་འདིར་དཔེ་ཙམ་དུ་རྣམ་པར་གནས་པར་གྱུར་པར་རིག་པར་བྱ་སྟེ་མ་ཆོག་པ་ལ་ནི་ཉེས་པས་སོ། །དུ་མ་སྦྱོར་དུ་བཅུག་པ་ལ་ནི་རེ་རེ་ལས་ཁ་ན་མ་ཐོ་བ་རེ་རེར་འགྱུར་རོ། །གཉིས་པ་ནི་གང་ལ་ཆོས་གོས་གཏན་པ་དབྱུང་བའི་ཕྱིར་བག་ཡངས་སུ་བྱ་བའི་ཚོགས་པ་ལ་མི་སྦྱིན་པ་ལའོ་ཞེས་བྱ་བ་སྨོས་ཏེ། དུས་སུ་དབྱུང་བའི་ཕྱིར་ཚོགས་པ་མི་སྦྱིན་པ་ལ་ནི་སྤང་བའི་ལྟུང་བྱེད་དུ་རྣམ་པར་གཞག་པའི་ཕྱིར་བག་ཡངས་སུ་བྱ་བ་ཞེས་བྱ་བ་འདི་ཡང་དག་པར་བསྟན་པའོ། །དཔྱིད་ཟླ་ར་བའི་ཉ་ཚུན་ཆད་གློ་བུར་དུ་སྲ་བརྐྱང་འབྱིན་པར་རྗེས་སུ་གནང་བའི་དུས་དེར་རམ་གཞན་ལ་དགོས་པའི་དབང་འགའ་ཞིག་གིས་སྲ་བརྐྱང་དབྱུང་བའི་ཕྱིར། བག་ཡངས་སུ་བྱ་བ་གང་ཡིན་པ་དེ་ལའོ་ཞེས་བྱ་བའི་དོན་ཏོ། །དེ་ལྟ་བས་ན་དུས་ཐ་དད་པ་ཙམ་གྱིས་འདི་ནི་སྤང་བའི་ལྟུང་བྱེད་ལས་ཐ་དད་པར་རིག་པར་བྱའོ། །འདིར་སྤང་བ་ཉིད་ལ་རྙེད་པ་མ་བྱས་པའི་རྒྱུ་མཚན་ཡིན་པ་དེ་བས་ན་འདི་རྣམ་པར་མ་བཞག་གོ །དགེ་སློང་མའི་དགེ་འདུན་ཚོགས་པ་ཉིད་ལ་ཆོས་གོས་གཏན་པ་དབྱུང་བའི་ཕྱིར་དེ་ཐོབ་པའི་ཞུ་བ་ཉིད་ཞུ་བ་མི་བྱེད་པར་མཚམས་ལས་འདའ་བར་བྱེད་པ་ལ་
ཚོགས་པ་མི་སྦྱིན་པའི་སེམས་ཀྱིས་འདི་དང་འོག་མ་ལ་ཁ་ན་མ་ཐོ་བར་རྣམ་བར་གནས་པ་ཡིན་ནོ། །གང་ལ་གསུམ་པ་དེ་བརྗོད་པར་བྱ་སྟེ། དེའི་ཕྱིར་གོས་འགྱེད་པའི་ཕྱིར་ཡང་ངོ་ཞེས་བྱ་བ་སྨོས་ཏེ། ཚོགས་པ་མི་སྦྱིན་པ་ལ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །རང་གི་རྙེད་པ་གཞན་ལ་བགོ་བའི་ཕྱིར་རྒྱུ་མཚན་འདི་ཡིན་པ་དེ་བས་ན་འདིར་ཡང་བ་ཉིད་མེད་པའོ། །འདིར་གོས་སྨོས་པ་ནི། དཔེ་ཙམ་དུ་ཟད་དེད་ལྟར་ཡང༌། ཆོས་དང་ལྡན་པའི་རྙེད་པ་གཞན་ལ་བགོ་བའི་ཕྱིར་ཁ་ན་མ་ཐོ་བ་འདི་རྣམ་པར་གནས་པ་ཡིན་ནོ་ཞེས་རིག་པར་བྱའོ། །འདིས་ལེན་མི་འདོད་པ་ཉིད་ནི་མ་བྱས་པ་ཉིད་དོ་ཞེས་བྱ་བ་ལ། འདིས་ཞེས་བྱ་བ་ནི་ཚོགས་པ་མི་སྦྱིན་པ་ལའོ། །ལེན་མི་འདོད་པ་ཉིད་ཅེས་བྱ་བ་ནི་ཤུགས་ཀྱིས་སྐལ་བ་ཞེས་བྱ་བར་རྟོགས་པར་བྱའོ། །ལེན་མི་འདོད་པ་ཉིད་ལ། ཚོགས་པ་མི་སྦྱིན་པ་ལ་བྱས་པ་ཉིད་དོ། །དེ་བས་ན་ལེན་མི་འདོད་པ་ལ་འདིར་ལྟུང་བ་མེད་ཅེས་བྱ་བའི་དོན་ཏོ། །གཞན་ལ་གནོད་པར་སྤྱོད་པ་ལས་གྱུར་པའི་ལྟུང་བྱེད་གསུམ་མོ།། །།གང་ལ་དབྱར་ཁང་ཡལ་བར་འདོར་བ་ལས་གྱུར་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དབྱར་ཁང་མ་གཏད་པར་འགྲོ་བ་ལའོ་ཞེས་བྱ་བ་སྨོས་ཏེ། དགེ་འདུན་གྱིའམ། གང་ཟག་གི་ཡང་ཞེས་བྱ་བ་བྱེ་བྲག་མ་སྨོས་པའོ། །ཤིན་ཏུ་སྟོབས་དང་ལྡན་པ་ལ་དགེ་འདུན་གྱི་ལས་ལོག་པར་རྟོགས་པ་ལ་ཉེས་བྱས་སུ་རྣམ་པར་གཞག་པའི་བྱིར་རོ། །གནས་མལ་གྱི་རྣམ་པ་ལ་དབྱར་ཁང་འདི་ཡིན་ཏེ། དེ་བས་ན་འདི་ལ་གནས་མལ་བཞིན་དུ་བལྟ་བར་བྱ་བ་ཡིན་ཏེ། དེ་འདིར་མ་གཏད་པ་དེ་ལ་བྱ་བ་ཉིད་དོ། །གལ་ཏེ་གནས་དེ་ལ་ཉེ་གནས་པ་ཉིད་ཡོད་ན་བྱ་བ་ཉིད་དོ། །གལ་ཏེ་མེད་ན་ཁྱིམ་པ་འདི་ལ་ཞེས་བྱ་བར་རྣམ་པར་གཞག་པར་རིག་པར་བྱའོ། །བརྩམས་པའི་ཆ་གང་ལ་ཡིན་ཞེ་ན། དེའི་ཕྱིར་ཉེ་འཁོར་བཏང་ནའོ་ཞེས་བྱ་བ་སྨོས་ཏེ། དབྱར་ཁང་གི་འཕྲལ་གྱི་བྱ་བ་རྣམས་ཀྱི་ཡང་དག་པར་སྲིད་པར་གྱུར་པའི་ཕྱོགས་ནི་འདིར་ཉེ་ཁོར་དུ་རྣམ་པར་གནས་པ་ཡིན་ནོ། །དབྱར་ཁང་སླར་མི་གཏོང་ངོ༌། །ཁང་ཁྱིམ་གྱི་གཞི་དང་ཚོང་ཁང་གི་གཞི་ཡང་ངོ་ཞེས་བྱ་བ་ལ། སླར་མི་གཏོང་ངོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་
སོ། །འདིར་མདོ་དེ་གཉིས་ཀྱི་གཞུང་ནི་ཕྲན་ཚེགས་དག་ལས། དེ་ལྟ་བས་ན་དགེ་སློང་མས་དབྱར་ཁང་སླར་མི་གཏོང་ངོ༌། །གཏོང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དབྱར་ཁང་ཡལ་བར་འདོར་བ་ལས་གྱུར་པའི་ལྟུང་བྱེད་དོ།། །།ད་འདི་མན་ཆད་ནི་འགྲོ་བ་དང་མི་འགྲོ་བ་ལས་གྱུར་པའི་ལྟུང་བྱེད་བཞི་སྟོན་ཏེ། དེ་རྣམས་ཀྱི་དང་པོ་ནི་གང་ལ་དབྱར་གྱི་ནང་དུ་ལྗོངས་རྒྱུ་ཞིང་འགྲོ་བ་ལའོ་ཞེས་བྱ་བ་སྨོས་ཏེ། བྱེ་བྲག་མ་སྨོས་པའི་ཕྱིར་ཁས་མི་ལེན་པ་ཉིད་ལ་ཡང་ཞེས་བྱ་བས་རྟོགས་པའོ། །བྱ་བས་འགྲོ་བ་ནི་ལྗོངས་རྒྱུ་ཞིང་འགྲོ་བ་ནི་མ་ཡིན་ཏེ། དེ་བས་ན་བྱིན་གྱིས་བརླབས་ཏེ་འགྲོ་བ་ལ་འདིས་གནོད་པ་མ་ཡིན་ནོ། །བུད་མེད་ཀྱི་ཚོགས་ལ་ནི་ཤིན་ཏུ་འཕྱན་པ་ཉིད་འདི་ཡིན་ཏེ་དུས་གང་གི་ཚེ་སྐྱེས་པས་ཀྱང་འཕྱན་པར་མི་བྱ་སྟེ། དེར་ཡང་འགྲོ་བ་དེ་བས་ན་ཁ་ན་མ་ཐོ་བ་འདིའོ། །ལམ་དུ་ཞུགས་པའི་ཚེ་ནི་ལྟུང་བྱེད་འདི་རྟོགས་པར་བྱའོ། །བར་ཆད་ཉེ་བར་གནས་པ་ནི་ལྟུང་བ་མེད་དོ་ཞེས་བྱ་བ་ནི་བར་ཆད་བརྒྱད་པོ་དག་ལས་གང་ཡང་རུང་བ་བྱུང་ན་དབྱར་གྱི་ནང་ལོགས་སུ་འགྲོ་བ་ལ་ནི་ལྟུང་བ་མེད་དོ། །གཉིས་པ་ནི་གང་ལ་དབྱར་གནས་པའི་འོག་ཏུ་དེར་མི་འགྲོ་བ་ལའོ་ཞེས་བྱ་བ་སྨོས་ཏེ། །དེར་ཞེས་བྱ་བ་ནི་ལྗོངས་རྒྱུ་ཞིང་མི་འགྲོ་བ་ལའོ། །དགག་དབྱེ་བྱས་པའི་འོག་ཏུ་ལམ་མི་འདའ་བར་བྱེད་པ་ལ་ཁ་ན་མ་ཐོབ་བ་འདི་སྐྱེད་པར་བྱེད་པའོ། །ཕྱོགས་ཀུན་ནས་འཇིགས་པ་དང་བཅས་པ་ཉིད་ཀྱིས་མི་འགྲོ་བ་ལ་ལྟུང་བ་མེད་དོ་ཞེས་བྱ་བའི་འོག་མ་དག་གི་ཚོགས་རྟོགས་པའོ། །ནུས་པ་གང་དང་ལྷན་ཅིག་ཏུ་འགྲོ་བ་ལ་དོགས་པ་དང་འགལ་བ་གཉིས་མི་སྲིད་པས་དེ་ལྟ་བུའི་ལམ་གྲོགས་དང་འཕྲད་པ་ལ་མི་འགྲོ་ན་ལྟུང་བར་འགྱུར་རོ། །ཚེས་བཅུ་དྲུག་གི་འོག་རོལ་དུ་ལམ་གྲོགས་ལ་སྡོད་པ་ལ་ནི་ལྟུང་བ་མེད་དོ། །གསུམ་པ་ནི་གང་ལ་ཡུལ་འཁོར་དོགས་པ་དང་བཅས་པར་འགྲོ་བ་ལའོ་ཞེས་བྱ་བ་སྨོས་ཏེ། ལྗོངས་རྒྱུ་ཞིང་ཞེས་བྱ་བར་སྦྱོར་རོ། །དོགས་པ་དང་བཅས་པ་ཉིད་ནི་ཆོམ་རྐུན་པའི་འཇིགས་པས་འཇིགས་པ་དང་བཅས་པ་ཉིད་དོ། །བཞི་པ་གང་ཡིན་པ་དེ་ནི་བརྗོད་པར་བྱ་སྟེ། དེའི་ཕྱིར་མི་མཐུན་པ་དང་བཅས་པར་ཡང་ངོ་ཞེས་བྱ་བ་སྨོས་ཏེ། ཡུལ་འཁོར་དུ་འགྲོ་བ་ལའོ་ཞེས་བྱ་བའི་ཕྱིར་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཡུལ་འཁོར་གང་
ན་དགྲ་བོ་མི་མཐུན་པ་ཡོད་པ་དེ་ནི་མི་མཐུན་པ་དང་བཅས་པ་ཡིན་ཏེ། ཕྱོགས་འདིར་སུ་ཡང་འགྲོ་བར་མི་བྱའོ་ཞེས་བྱ་བ་ལ་ སོགས་པ ་འགྲོ་བ་དགག་པའི་ཁྲིམས་སུ་བྱས་པའི་རྣམ་པར་གཞག་པའི་རྒྱུ་མཚན་ཡིན་གྱི། སྐྱེས་ པ་ཉིད་ལ་སོགས ་པའི་དོགས་པའི་རྒྱུ་མཚན་དུ་གྱུར་པ་ནི་མ་ཡིན་ནོ། །གང་དུ་འཇིགས་པ་དང་བཅས་པ་ཉིད་དང༌། མི་མཐུན་པ་དང་བཅས་པ་གཉིས་པོ་དེ་ལ་ཁ་ན་མཐོ་བ་གཉིས་པོ་འདིར་དག་ཀྱང་བསྐྱེད་པའོ། །འཇིགས་པ་དང་བཅས་པའི་གནས་ཐོབ་པ་ནི། དོགས་པ་དང་བཅས་པའི་ལྟུང་བྱེད་བསྐྱེད་པའི་དུས་ཡིན་ནོ། །མི་མཐུན་པ་དང་བཅས་པའི་ལྟུང་བྱེད་ལ་མི་མཐུན་པ་དང་བཅས་པ་ཉེ་བའི་གནས་ཐོབ་པ་བསྐྱེད་པའི་དུས་སོ། །འགྲོ་བ་དང་མི་འགྲོ་བ་ལས་གྱུར་པའི་ལྟུང་བྱེད་བ་ཞི་པའོ།། །།ད་འདི་མན་ཆད་ནི་སྨྲ་བ་ལས་གྱུར་པའི་ལྟུང་བྱེད་གཉིས་སྟོན་ཏེ། དེ་གཉིས་ཀྱི་དང་པོ་ནི་གང་ལ་ལྷའི་གནས་ལ་ སོགས་པ ་དང༌། མུ་སྟེགས་ཅན་གྱི་གནས་སུ་སོང་སྟེ། རྩོད་པར་བྱེད་པ་ལའོ་ཞེས་བྱ་བ་སྨོས་ཏེ། གང་གི་དོན་གཅིག་རྟོགས་པའི་དུས་ན་ལྟུང་བྱེད་འབྱུང་བའོ། །སྨྲ་བ་གཞན་ལ་རྩོམ་པ་གཅིག་པར་གྱུར་པ་ཉིད་ཀྱིས་དེ་ལ་ཞུགས་པའོ། །འདྲ་བ་གཞན་ལ་རྣམ་པར་ངེས་པར་རྟོགས་པ་ལ་རྩོད་པ་ནི་མ་ཡིན་ནོ། །དེ་ལྟར་རྣམ་པར་འབྱེད་པ་ལས། རྩོད་པ་ནི་འཐབ་ཀྲོལ་ཞེས་གསུངས་པའི་ཕྱིར་རོ། །གཉིས་པ་བསྟན་པ་ནི་དེའི་ཕྱིར་སྐབས་མ་ཕྱེ་བར་དྲི་བ་ལའོ་ཞེས་བྱ་བ་སྨོས་ཏེ། གང་གི་ཚིག་གི་སྐབས་མ་ཕྱེ་བར་དྲི་བ་དེ་དྲིས་པ་ལ་ལྟུང་བྱེད་ཅེས་བྱ་བའི་དོན་ཏོ། །འདིར་གླེང་གཞི་ལས་དགེ་སློང་ལ་གསུངས་མོད་ཀྱིས་ལྟུང་བ་རྣམ་པར་གཞག་པ་ལས། སྤྱིར་བསྟན་གྱི་བྱེ་བྲག་འདི་བསྟན་པ་མ་ཡིན་ནོ། །ཁྱིམ་པ་དང་མུ་སྟེགས་པ་དག་ལ་ཤིན་ཏུ་ཉེས་པ་སྟོབས་དང་ལྡན་པ་རྣམ་པར་གཞག་པ་ཞེས་བྱ་བ་འདི་སྤྱིར་ཐམས་ཅད་ཁྱད་པར་མེད་པར་འཕངས་པའོ། །སྟན་པ་ཏིང་སྟེ་ཕན་ཚུན་ཀུན་དགའ་བར་བྱས་ནས་ལུང་འདྲི་བའི་སྦྱོར་བས་སྐབས་འབྱེད་དུ་གཞུག་པར་བྱའོ་ཞེས་བྱ་བ་ནི་འདི་ལ་ལུང་འདྲི་བའི་སྦྱོར་བ་ཡོད་པས་ན་ལུང་འདྲི་བའི་སྦྱོར་བ་དྲི་བར་བྱའོ། །འདིར་གཞུང་ནི་ཆོས་མངོན་པ་དང་འདུལ་བའི་ལུང་ཅི་དག་བཀླགས་ཞལ་སྟོན་ཅིང་མཁྱེན་ཞེས་དྲི་བས་སོ་ཞེས་གསུངས་པ་ཡིན་ནོ། །སྨྲ་བ་ལས་གྱུར་པའི་
ལྟུང་བྱེད་གཉིས་སོ།། །།ད་འདི་མན་ཆད་ནི་བཤང་བ་དང་འབྲེལ་པའི་ལྟུང་བྱེད་གསུམ་སྟོན་ཏེ། ཕྱི་སར་གཅིག་པུ་འགྲོ་བ་ལའོ་ཞེས་བྱ་བ་སྨྲས་ཏེ། འདིར་གཅིག་བའི་ས་ནི་ཕྱིས་སའོ། །དབྱར་ཁང་གི་ཉེ་འཁོར་འདོམ་གང་ལས་ལོགས་ཤིག་པ་ནི་ཕྱི་རོལ་གྱི་དངོས་པོའོ། །འདིར་དབྱར་ཁང་གི་ཉེ་འཁོར་ལས་འདའ་བ་ནི་དངོས་གཞིའི་དུས་ཏེ། བུད་མེད་དུ་གྱུར་པ་ལ་གྲོགས་ཉིད་དོ། །ནུས་པ་གང་ཡང་རུང་བ་ལེན་དུ་བཅུག་པ་དགེ་སློང་མའམ་རབ་ཏུ་བྱུང་བ་ཁོ་ན་ལའོ། །གཉིས་པ་བསྟན་པ་ནི་དེའི་ཕྱིར་རྩྭ་སྔོན་པོའི་སྟེང་དུ་བཤང་བ་དོར་བ་ལའོ་ཞེས་བྱ་བ་སྨོས་ཏེ། མི་འདོར་བ་ལ་ལྟུང་བ་མེད་དོ། །འདིར་མི་འདོར་བ་ཞེས་བྱ་བ་ནི་བཤང་བ་མེད་པ་ཞེས་ཤེས་པར་བྱའོ། །སྔོན་པོ་ལ་མི་གཙང་བས་ཕོག་པ་ནི་འདིར་དངོས་གཞིའི་དུས་སོ། །ནད་པ་ལ་ནི་ལྟུང་བ་མེད་དོ། །རྩྭ་སྔོན་པོ་ཐམས་ཅད་ལ་ཁྱབ་པ་ཉིད་ལ་ཡང་ངོ་ཞེས་བྱ་བ་ནི། ལྟུང་བ་མེད་དོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །གང་ལ་གསུམ་པ་དེ་བརྗོད་པར་བྱ་སྟེ་དེའི་ཕྱིར་རྩིག་པའི་ཕག་ཏུ་མ་བལྟས་པར་བཤད་བ་དོར་བ་ལའོ་ཞེས་བྱ་བ་སྨོས་ཏེ། ཉེས་བྱས་སུ་འགྱུར་པའོ། །རྩིག་པ་པུ་ཤུ་བཏགས་པ་ལ་ནི་ལྟུང་བ་མེད་དོ་ཞེས་བྱ་བ་ནི། ར་བའི་ཕྱི་རོལ་དུ་མི་སློབ་པར་གྱུར་ན། དེའི་ཚེ་ཕག་ཏུ་མ་བལྟས་པར་བཤང་བ་དོར་བ་ལ་ཉེས་པ་མེད་དོ། །དེ་གནས་པ་ལ་འཇུག་པ་མ་ཡིན་ཏེ། བལྟ་བར་ནུས་པ་ཉིད་ལ་འདིར་བསྒྲུབ་པ་རིགས་པ་ཡིན་ཏེ། གལ་ཏེ་བསྒྲུབ་པར་མི་ནུས་པ་ཉིད་ཡིན་ན་ཉེས་པ་མི་རིགས་པ་ཉིད་ཡིན་ནོ། །མི་གཙང་བ་ལ་བོང་རྡོག་འཕངས་བར་མི་བྱའོ། །ཞེས་བྱ་བ་ལ་གཞུང་ནི་ཕྲན་ཚེགས་དག་ལས་ཆོ་དང་ལྡན་པ་འོད་སྲུངས་ཆེན་པོ་ལྷན་ལྗིན་གྱི་དྲུང་དུ་འགྲོ་བ་དེ་སྦོམ་དགའ་མོས་མཐོང་ནས། དེ་མྱུར་བ་མྱུར་བར་སོང་ནས། ལྗན་ལྗིན་དེའི་སྟེང་དུ་བོང་ཅར་ཅེས་ཟེར་བ་བསྣུན་པས་ཚེ་དང་ལྡན་པ་འོད་སྲུངས་ཆེན་པོའི་ཆོས་གོས་དང་ལྷུང་བཟེད་སྣོད་མི་གཙང་བའི་ཟེག་མས་མ་རུངས་པར་གྱུར་པ་ནས། བཅོམ་ལྡན་འདས་གྱིས་བཀའ་སྩལ་པ། དེ་ལྟ་བས་ན་དགེ་སློང་མས་དགེ་སློང་ལ་མི་གཙང་བས་མ་རུངས་པར་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །བཤང་བ་ལས་གྱུར་པའི་ལྟུང་བྱེད་དག་སུམ་མོ། །ལྟུང་བྱེད་འབའ་ཞིག་ཏུ་གྱུར་པ་རྣམས་རྫོགས་སོ།། །།
གང་ལ་འོ་མ་སློང་བའི་སོ་སོར་བཤགས་པར་འགྱུར་ཞེ་ན། དེའི་ཕྱིར་གཞན་གྱི་ཁྱིམ་ནས་བདག་གི་དོན་དུ་འོ་མ་བླངས་ཏེ་འཐུང་བ་ལའོ་ཞེས་བྱ་བ་སྨོས་ཏེ། ཅིག་ནས་སྐབས་གང་ལ་འཐུང་བ་ལ་ཞེ་ན། དེའི་ཕྱིར་མི་ནབས་སོ་ཞེས་བྱ་བ་སྨོས་ཏེ། གནས་སྐབས་གང་དང་ལྡན་པས་བླངས་པའི་གནས་སྐབས་དེ་དང་ལྡན་པས་ཞེས་བྱེ་བྲག་མ་སྨོས་པས་རྟོགས་པའོ། །དེས་བསླངས་པའི་ཚེ་ཉེས་བྱས་སོ་ཞེས་བྱ་བ་ལ་དེ་ཞེས་བྱ་བ་ནི། མི་ན་བ་དེས་བླངས་ཤིང་ཟ་བ་ལ་ལྟུང་བྱེད་ཅེས་བྱ་བ་འདིས་བྱས་པར་རིག་པར་བྱའོ། །གང་ལ་སོ་སོར་བཤགས་པར་བྱ་བ་གཞན་དགུ་པོ་དག་ཏུ་འགྱུར་ཞེ་ན། དེའི་ཕྱིར་ཞོ་དང༌། ཞུན་མར་དང༌། འབྲུ་མར་དང༌། སྦྲང་རྩི་དང༌། བུ་རམ་གྱི་ལྦུ་བ་དང༌། ཉ་ཤ་དང་ཤ་སྐས་རྣམས་ཀྱང་ངོ་ཞེས་བྱ་བ་སྨོས་ཏེ། གཞན་གྱི་ཁྱིམ་ནས་བདག་གི་དོན་དུ་བླངས་ཏེ་འཐུངས་ཟོས་པ་ལའོ་ཞེས་བྱ་བའི་རྗེས་སྙེག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དེ་དག་ལ་གཞན་བསླངས་པ་ལས་གཞན་ཐོབ་པ་ལ་ནི་ན་སྨད་པ་མེད་དོ་ཞེས་བྱ་བ་ནི། འདིར་འོ་མ་ལ་ སོགས་པ ་སྔར་བསྟན་པ་དེ་དག་ལས་གང་ཡང་རུང་བ་གཞན་པ་བསླང་པ་ལས་གང་ཡང་རུང་བ་གཞན་ཐོབ་ཅིང་ཟོས་པ་ལ་ནི་ཉེས་པ་ན་སྨད་པ་མེད་དོ། །མི་བསོད་པ་ལ་ཡང་ངོ་ཞེས་བྱ་བ་ནི་བསླངས་ཏེ་ཐོབ་པ་ལ་ན་སྨད་པ་མེད་དོ་ཞེས་བྱ་བར་སྦྱར་ཏེ། འོ་མ་ལ་ སོགས་པ ་བསོད་པ་སློང་བ་ལ་མི་བསོད་པ་ཐོབ་པ་ལ་ཡང་ན་སྨད་པ་མེད་དོ་ཞེས་བྱ་བའི་དོན་ཏོ། །དེར་རྟོགས་པ་ལ་དེ་ཐོབ་པ་ལ་ཡང་ངོ་ཞེས་བྱ་བ་ལ་ན་སྨད་པ་མེད་དོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མི་བསོད་པར་བསོད་པ་དེ་བསླངས་པ་ལས་འོ་མ་ལ་ སོགས་པ ་བསོད་པ་དེ་ཐོབ་ཅིང་ཟོས་སམ་འཐུངས་པ་ལ་ཡང་ཉེས་པ་ན་སྨད་པ་མེད་དོ་ཞེས་བྱ་བའོ་དོན་ཏོ། །འདིར་ཐམས་ཅད་དུ་འདིར་བ་ཟའ་བ་ཉེ་བར་མཚོན་པའི་རྙེད་པའི་ཞེས་སྨོས་པར་རིག་པ་བྱའོ། བསོད་པ་རྒྱུ་མཚན་གྱི་ཐོབ་པ་དང་བསླངས་པ་ལ་བསོད་པ་སློང་བའི་རྒྱུ་མཚན་ལ་མི་བསོད་པ་རྙེད་པ་ལ་ན་སྨད་པར་བརྗོད་དོ། །དེ་ལ་འདིར་ཅིང་གིས་གཞན་ལ་བསླངས་པས་ཐོབ་པ་ལ་གཞན་བསླངས་པའི་རྒྱུས་ཐོབ་པ་ལ་ཁན་མ་ཐོབ་ཡོངས་སུ་རྫོགས་པའོ། །གང་ལ་ན་སྨད་པ་མེད་པའི་ཞེས་སྨོས་པ་དེ་བརྗོད་པར་བྱ་སྟེ། དེའི་ཕྱིར་དེ་ནི་ཉེས་བྱས་བྱེད་པ་ཉིད་དོ་ཞེས་བྱ་བ་སྨོས་ཏེ། དེ་ནི་ཞེས་བྱ་བ་ནི་བསླངས་པའི་རྒྱུས་
ཐོབ་པ་ལའོ། །བྱེ་བྲག་མ་སྨོས་པ་སྦྱོར་བ་ལ་དངོས་གཞི་ཞེས་བྱ་བ་རྟོགས་པར་བྱའོ། །འདིར་ལྷག་མ་ཐམས་ཅད་ནི་བསོད་པ་སློང་བའི་ལྟུང་བྱེད་ཀྱི་སྐབས་སུ་ཤེས་པར་བྱའོ། །སོ་སོར་བཤགས་པར་བྱ་བ་བཅུ་གཅིག་པ་བསྟན་པར་བྱ་བའི་ཕྱིར་སེང་གེ་ལས་གྱུར་པའོ་ཞེས་བྱ་བ་སྨོས་ཏེ། དམག་དཔོན་སེང་གེའི་གླེང་གཞི་ལས་དགེ་སློང་རྣམས་ཀྱིས་སོ་སོར་བཤགས་པར་བྱ་བ་གང་ཡིན་པ་དེ་ནི་དགེ་སློང་མ་རྣམས་ཀྱི་ཡང་ཡིན་པར་རིག་པར་བྱའོ། །སོ་སོར་བཤགས་པར་བྱ་བ་རྣམས་རྫོགས་སོ།། །།ཤམ་ཐབས་སྐེད་པར་སྣང་བར་བགོ་བར་མི་བྱའོ། །ཆགས་པར་གྱུར་ཅིང་ཁྱིམ་གཞན་དུ་འགྲོ་བར་མི་བྱའོ། །ཞེས་བྱ་བ་སྨོས་ཏེ། མི་འདོད་བཞིན་དུ་རྐྱེན་གྱི་དབང་གིས་འགྲོ་དགོས་པ་ལ་སྐད་ཅིག་རེ་རེ་རྩེ་གཅིག་པར་ལྷག་པར་མི་གནས་པ་ལ་ལྟུང་བ་མེད་པར་ཤེས་པར་བྱའོ། །འགྲོ་བར་མི་བྱའོ། །ཞེས་བྱ་བའི་ཚིག་ནི་དཔེ་ཙམ་དུ་ཟད་དེ་སོང་ཟིན་པའི་གནས་སྐབས་ལ་ཡང་ཁ་ན་མ་ཐོ་བར་འགྱུར་རོ། །དེ་ལྟར་ཡང་གླེང་གཞི་ནི་དེ་རྣམས་ལེགས་པར་ཞུགས་པ་ན་དེ་དག་གིས་སྐྱེས་བུ་གཟུགས་བཟང་བ་མཛེས་པ་བལྟ་ན་སྡུག་པ་མཐོང་བ་དང༌། དེ་རྣམས་མཐོང་ནས་ཆགས་པར་གྱུར་ཏོ་ཞེས་གསུངས་པ་ཉིད་འདིར་རིག་པར་བྱའོ། །དགེ་སློང་དག་ལས་གྱུར་པ་བཞིན་ནོ་ཞེས་བྱ་བ་ནི། གང་དག་དགེ་སློང་རྣམས་ལ་བརྗོད་པར་བྱས་པ་གཞན་བསླབ་པར་རྣམས་བལྟ་བར་བྱའོ་ཞེས་བྱ་བའི་དོན་ཏོ། །རྗེས་སུ་དག་ནང་བ་ཉིད་ནི་སྟན་ལ་ཁྱིམ་གྱི་ནང་དུ་འདུག་པ་དང་རྩྭ་སྔོན་པོ་ཡོད་པའི་ས་ཕྱོགས་སུ་བཤང་བ་འདོར་བ་ལ་ལྟུང་བྱེད་ཀྱི་རྣམ་པའོ་ཞེས་བྱ་བའི་ཆོག་འདི་ལ་གནོད་པ་ཉིད་དུ་རིག་པར་བྱའོ། །བསླབ་པ་རྣམས་སོ། །དགེ་སློང་མའི་རྣམ་པར་འབྱེད་པ་རྫོགས་སོ།། །།ཞུ་པར་གཏོགས་པ་ལ་སོ་སོ་བ་དང་ཐུན་མོང་བ་རྣམ་པར་གནས་པ་གཉིས་ལས། སོས་སོ་བ་གང་ཡིན་པ་དེ་འདིར་མ་སྨོས་ཀྱང་ཐམས་ཅད་དུ་རིགས་པ་མཉམ་པ་ཉིད་ཀྱི་ཕྱིར་ཐམས་ཅད་དུ་འགྲོ་བ་ཉིད་ཀྱིས་རྣམ་པར་ཤེས་ནས་ཐམས་ཅད་དུ་རང་གི་ཡུལ་ལ་དབང་དུ་བྱེད་པ་ཉིད་ཀྱིས་ཉེ་བར་འབྲེལ་པའོ། །ད་འདི་མན་ཆད་ནི་ཕལ་ཆེར་རྣམ་པར་འབྱེད་པ་ལ་གཏོགས་པ་ཉིད་ཀྱིས་བཤད་པར་བྱ་སྟེ། དེའི་ཕྱིར་ཉམས་པ་དང་མ་སྐྱེས་པ་གཉིས་ལྟུང་བ་ལ་སྦྱོར་བ་ལ་ནི་ཉེས་བྱས་སོ་ཞེས་
བྱ་བ་སྨོས་ཏེ། ཉམས་པ་ཞེས་བྱ་བ་ནི་ཕམ་པར་གྱུར་པ་སྟེ། འདི་ལ་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི་དགོས་པ་མེད་པ་ཉིད་དུ་འགྱུར་ཏེ། བསྙེན་པར་རྫོགས་པ་ཉིད་དང༌། དགེ་ཚུལ་ཉིད་ཀྱི་ལམ་ལ་གནས་པའོ། །མ་སྐྱེས་པ་ཞེས་བྱ་བ་ནི་སྡོམ་པ་མཐོ་པ་སྟེ། ལྟུང་བའི་གྲངས་དང་མི་སྤྱོད་པ་དང་ལྡན་པ་ལ་ཉེས་བྱས་སོ། །ཉམས་པ་ལ་ནི་དམིགས་ཀྱིས་བསལ་བ་སྟེ། བསྙེན་པར་རྫོགས་པ་ཅན་ཉིད་ཀྱི་ཕྱིར་མ་སྐྱེས་པ་ནི་སྒྲུབ་པ་ཡིན་ཏེ། གང་ལ་འདི་དང་འགྲོ་བ་ལ་བདག་ཉིད་ཀྱིས་ཉེ་བར་བསྟན་པ་དེ་ནི་དེ་དང་རྗེས་སུ་མཐུན་པ་ཡིན་ཏེ། དེ་བས་ན་མ་སྐྱེས་པ་ལ་ཉེས་པ་འདི་འབྱུང་ངོ༌། །ཕམ་པར་གྱུར་པ་ལ་ནི་སྡོམ་པ་ཡོད་དུ་ཟིན་ཀྱང་དེ་ལྟ་མོད་ཀྱི། དགོས་པ་མེད་པ་ཉིད་དུ་འགྱུར་རོ། །འདིར་སྡོམ་པ་མེད་པ་དང་འདྲ་བ་ཉིད་དུ་རྟོགས་པའི་རྒྱུ་ཞེས་བྱ་བར་བརྗོད་དོ། །འདིར་གཞུང་ནི། སྡར་ལྟུང་བ་བྱུང་བ་དང༌། རྐུ་ཐབས་སུ་གནས་པ་དང༌། དང་པོ་འཁྲུགས་པ་དང༌། མ་ནིང་དང༌། དགེ་སློང་མ་སུན་ཕྱུང་བས་ཉམས་པར་བྱས་པ་ནི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདིར་རྐུ་ཐབས་སུ་གནས་པ་ཞེས་བྱ་བ་ལ་ སོགས་པ ་སྨོས་པ་ནི་མ་སྐྱེས་པ་ཐམས་ཅད་ཀྱི་དཔེ་ཙམ་དུ་ཟད་དོ། །དེ་བས་ན་ཐམས་ཅད་མ་སྐྱེས་པའི་ཁོངས་སུ་བསྡུ་བར་བྱས་སོ། །སྔར་ལྟུང་བ་བྱུང་བ་ཞེས་བྱ་བ་ནི་འདི་ལྟར་སྔར་བསྙེན་པར་རྫོགས་པ་ཉིད་ཀྱི་ཚེ་ན་ལྟུང་བ་བྱུང་བར་རིག་པར་བྱ་བའོ། །བསྙེན་པར་མ་རྫོགས་ཤིང་རབ་ཏུ་བྱུང་བས་བླངས་པ་ལས་འདས་པ་ལ་ཡང་ངོ་ཞེས་བྱ་བ་ལ་ཉེས་བྱས་སོ་ཞེས་བྱ་བའི་རྗེས་སུ་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་དགེ་ཚུལ་དང༌། དགེ་ཚུལ་མ་དང༌། དགེ་སློང་མ་རྣམས་ཀྱིས་ཡང་དག་པར་བླངས་པའི་སྤྱོད་པ་ལས་འདའ་བར་བྱེད་པ་ནི་ཉེས་བྱས་སོ་ཞེས་བྱ་བའི་དོན་ཏོ། །ལྟུང་བ་ལ་སྦྱོར་བ་ལ་ནི་ཉེས་བྱས་སོ་ཞེས་སྔར་སྨོས་པས་འདིར་ཡང་ལྟུང་བ་དེ་དག་ཐམས་ཅད་ལ་ཡང་ཐལ་བ་བསལ་བའི་ཕྱིར་བླངས་པ་ལས་འདས་པ་ལ་ཞེས་གསུངས་སོ།། །དེའི་ཕྱོགས་དང་མཐུན་པ་ལ་ནི་ཡིད་ཀྱིའོ་ཞེས་བྱ་བ་ནི་བསྙེན་པར་མ་རྫོགས་ཤིང་རབ་ཏུ་བྱུང་བ་བླངས་པའི་ཕྱོགས་དང་མཐུན་པའི་ལྟུང་བྱེད་རྣམས་གང་ཡིན་པ་མ་བླངས་ཀྱང་བླངས་པའི་ཕྱོགས་ལ་བརྟན་པ་སྟེ། དེ་དག་ལས་འདས་ཤིང་འགལ་བར་བྱས་པ་ནི་ཡིད་ཀྱིས་ཉེས་བྱས་སུ་འགྱུར་ཏེ། བསྡམ་པར་བྱ་བའི་ཉེས་བྱས་ཞེས་བྱ་བའི་
དོན་ཏོ། །དེའི་ཕྱོགས་དང་མཐུན་པ་དག་གང་ཞེ་ན། དེ་བསྟན་པའི་ཕྱིར་དགེ་སློབ་མའི་ནི། འཆང་བ་དང་ནི་འབྲལ་བ་དང༌། །མེ་ལ་རེག་དང་སྤངས་པ་དང༌། །ཟས་དང་ས་བོན་འཇིག་པ་དང༌། རྩྭ་སྔོན་ཡོད་པའི་ས་ཕྱོགས་སུ། །མི་གཙང་འདོར་དང་ཤིང་འཛེག་དང༌། །བླངས་པ་མདོར་གཏོགས་དགེ་སློབ་བའི། །དགེ་ཚུལ་གཉིས་ཀྱིས་རིན་ཆེན་རེག །སོག་འཇོག་བྱས་པ་ཟ་བ་དང༌། །བྱིན་ལེན་མ་བྱས་ས་བརྐོ་དང༌། །སྐྱེ་བ་འཇིག་དང་བཅས་པ་དང༌། །མདོར་གཏོགས་པ་ནི་མ་གཏོགས་པར། །དབྱར་གནས་གཅིག་ཏུ་གནས་པ་དང༌། །གསོ་སྦྱོང་དགག་དབྱེ་བཅས་པ་དང༌། །དེ་ལ་ སོགས་པ ་དེ་ཡིས་ནི། །བླངས་པའི་ཕྱོགས་དང་མཐུན་པ་ཡིན། །རྟགས་དང་སློང་དང་སྣོད་དང་ནི། །ལོངས་སྤྱོད་འཕྱར་གཡེང་འདོད་པ་དང༌། །གནོད་པ་དང་ནི་གནས་པ་དང༌། །མི་གུས་མི་སྦྱོང་གཞི་ལས་བྱུང༌། །ཞེས་བྱ་བ་སྨོས་སོ། །དེ་ལ་འཆང་བ་ཞེས་བྱ་བ་ནི་ཆོས་གོས་དང༌། ལྷུང་བཟེད་ལྷག་མ་འཆང་བའོ། །འབྲལ་བ་ཞེས་བྱ་བ་ནི་ཆོས་གོས་དང་འབྲལ་བའོ། །མེ་ལ་རེག་པ་ཞེས་བྱ་བ་ནི་མེ་འབུད་པ་ལ་ སོགས་པ ་དང་འབྲེལ་པའོ། །སྤངས་བ་ཟ་བ་ཞེས་བྱ་ནི་ཟས་སྤངས་པ་ཟ་བའོ། །ས་བོན་གྱི་ཚོགས་འཇིག་པ་ཞེས་བྱ་བ་ནི། རུང་བར་མ་བྱས་པའི་ས་བོན་གྱི་ཚོགས་འཇིག་པའོ། །རྩྭ་སྔོན་པོའི་ཕྱོགས་སུ་མི་གཙང་བ་འདོར་བ་ཞེས་བྱ་བ་ནི། རྩྭ་སྔོན་པོ་ཡོད་པའི་ས་ཕྱོགས་སུ་བཤང་བ་ལ་ སོགས་པ ་འདོར་བའོ། །ཤིང་ལ་འཇིག་པ་ཞེས་བྱ་བ་ནི་ཤིང་ལ་མི་གང་ཙམ་ལས་མཐོར་འཇོག་པའོ་ཞེས་བྱ་བ་འདི་ནི་བསླབ་པ་རྣམས་སོ། །བསླབ་པ་མདོར་གཏོགས་ཞེས་བྱ་བ་ནི་དགེ་སློབ་མ་དོར་ནས་སོ། །མདོར་གཏོགས་པ་ནི་དགེ་ཚུལ་དང་དགེ་ཚུལ་མ་དག་གིས་ས་ལེ་སྦྲམ་ལ་ སོགས་པ ་འཆང་བའོ། །སོག་འཇོག་བྱས་པ་ཟ་བ་ཞེས་བྱ་བ་ནི་ཉེ་བར་གནས་པའོ། །བྱིན་ལེན་མ་བྱས་པ་ཞེས་བྱ་བ་ནི་གཞན་གྱིས་བྱིན་ལེན་མ་བྱས་པའི་ཟས་ཟ་བའོ། །ས་རྐོ་བ་ཞེས་བྱ་བ་ནི་ས་རྐོ་བ་འམ་རྐོང་འཇུག་པའོ། །སྐྱེ་བའི་ཚོགས་འཇིག་པ་ཞེས་བྱ་བ་ནི་ཤིང་ལྗོན་པ་ལ་ སོགས་པ ་གཅོད་པའོ། །བཅས་པ་ནི་འདི་དང་བཅས་པའོ། །བླངས་པ་ནི་དགེ་ཚུལ་དང་དགེ་ཚུལ་མ་དང༌། དགེ་སློང་མ་འདི་རྣམས་ཀྱིས་ཡང་དག་པར་བླངས་པའོ། །མདོར་གཏོགས་པ་
ཞེས་བྱ་བ་ནི། དགེ་སློང་དང་དགེ་སློང་མའི་སོ་སོར་ཐར་པའི་མདོ་དག་ལས་འདོན་པ་དོར་ནས་ལྷག་མ་སོ་སོར་ཐར་པའི་མདོ་ལ་གཏོགས་པའོ། །དབྱར་གནས་ཞེས་བྱ་བ་ནི་དབྱར་གནས་པར་ཁས་བླངས་པའོ། །གསོ་སྦྱོང་ལ་ སོགས་པ ་ཞེས་བྱ་བ་ནི་གསོ་སྦྱོང་དང་དགག་དབྱེ་ལ་སོགས་པའོ། །དེ་ལ་ སོགས་པ ་དེ་ཡིན་ཞེས་བྱ་བ་ནི་རབ་ཏུ་བྱུང་བ་བསྙེན་པར་མ་རྫོགས་པ་ལ་བླངས་པའི་ཕྱོགས་དང་མཐུན་པར་རིག་པར་བྱའོ། །གང་ཞིག་དེ་དག་ལས་འདའ་བར་བྱེད་པ་ལ་ཡིད་ཀྱི་ཉེས་བྱས་སོ། །འདིར་རྣམ་ པ་གང་གིས་དེ་རྣམས་ནི་སོགས ་པའི་སྒྲས་འཕངས་པའོ། །དེ་བསྟན་པའི་དོན་དུ་འདིར་རྟགས་ལ་སོགས་པའི་གཞི་བརྗོད་པའོ། །འདིར་གཞིའི་སྒྲ་ནི་རེ་རེ་ཞིང་སྦྱར་བར་བྱའོ། །རྟགས་ཀྱི་གཞི་ལས་བྱུང་བ་དང༌། སློང་བའི་གཞི་ལས་བྱུང་བ་དང༌། སྣོད་ཀྱི་གཞི་ལས་བྱུང་བ་དང༌། འཕྱར་གཡེངས་ཀྱི་གཞི་ལས་བྱུང་བ་དང༌། འདོད་པའི་གཞི་ལས་བྱུང་བ་དང༌། གནོན་པའི་གཞི་ལས་བྱུང་བ་དང༌། མི་གུས་པའི་གཞི་ལས་བྱུང་བ་དང༌། མི་སྦྱང་བའི་གཞི་ལས་བྱུང་བའོ། །དེ་ལ་རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་སྨོས་པའི་ཚིག་གང་ཡིན་པ་དེ་ནི་རེ་ཞིག་བླངས་པ་ཡིན་པ་དང༌། དེའི་ཕྱིར་མུ་སྟེགས་འཆང་བ་ལ་ནི་ཇི་ལྟར་ཁྱིམ་པའི་རྟགས་འཆང་བ་བཞིན་དུ་རབ་ཏུ་བྱུང་བའི་རྟགས་ཡང་དག་པར་བླངས་པ་ལས་འདས་པ་ཡིན་པས་དེ་ལ་ནི་བཤགས་པར་བྱ་བའི་ཉེས་བྱས་སུ་འགྱུར་རོ། །རྗེས་རུང་བ་མ་ཡིན་པ་ཆོས་གོས་ཚད་ལས་ཆུང་བ་དང་ཆེ་བའི་བདག་ཉིད་ཀྱི་ཡོ་བྱད་རྣམས་ལ་འཆང་བ་དང་འཆང་བར་བྱེད་དུ་བཅུག་པའམ། སེན་མོ་བཅོས་པ་རྗེས་སུ་མ་གནང་བ་དག་དང༌། ཆ་ལུགས་ཉམས་པར་གྱུར་པ་སྐྲ་ཆན་པས་བྲེགས་པར་གྱུར་པ་དག་དང༌། རྗེས་སུ་དག་ནང་བའི་ཕྱོགས་ཀྱི་སྤུ་བྲགས་པ་ལ་ སོགས་པ ་རྣམས་ནི་རྟགས་བླངས་པ་དེའི་ཕྱོགས་དང་མཐུན་པའི་ཚིག་གོ །ལྷུང་བཟེད་རུང་བ་མ་ཡིན་པ་ཐོགས་ཤིང་བསོད་སྙོམས་ལ་རྒྱུ་བ་ནི། རྟགས་སུ་གྱུར་པ་ཡིན་པ་དེ་ཡང་རབ་ཏུ་བྱུང་བ་གཞན་གྱི་རྟགས་སུ་གྱུར་པ་དང༌། ཁྱིམ་པའི་རྟགས་པ་དང་འདྲ་བའི་ལྷུང་བ་བཟེད་འཆང་བ་ཡང་རྟགས་ཡང་དག་པར་བླངས་པ་ལས་འདས་པར་རིག་པར་བྱའོ། །རྫས་གཞན་ལས་བྱས་པ་དང༌། ཆད་ལས་ཆུང་བ་དང་ཆེ་བ་དང་ཆེ་བ་དང་སྐྱ་བ་འཆང་བ་
གང་ཡིན་པ་དེ་ནི་རྟགས་བླངས་པ་དེའི་ཕྱོགས་དང་མཐུན་པའོ། །སློང་བའི་སྣོད་ཀྱི་གཞི་ལས་འབྱུང་བ་གང་ཡིན་པ་དེ་རྣམས་ནི་ས་ལེ་སྦྲ་མ་དང་དངུལ་ལ་ སོགས་པ ་ནི་མ་བྱིན་པ་ལེན་གྱི་ཕྱོགས་དང་མཐུན་པ་རྣམས་སོ། །སློང་བའི་གཞི་ལས་བྱུང་བ་ནི་ཆོས་གོས་ལ་ སོགས་པ ་སློང་བའོ། །སྣོད་ཀྱི་གཞི་ལས་བྱུང་བ་གང་ཡིན་པ་དེ་རྣམས་ནི་ཁབ་ར་ལ་ སོགས་པ ་བྱེད་དུ་བཅུག་པའོ། །ལོངས་སྤྱོད་ཀྱི་གཞི་ལས་བྱུང་བ་གང་ཡིན་པ་དེ་རྣམས་ནི་བཙོང་ཟ་བ་ལ་ སོགས་པ ་དུས་མ་ཡིན་པར་ཟ་བའི་ཕྱོགས་ཉིད་དོ། །འཕྱར་གཡེང་གི་གཞི་ལས་བྱུང་བ་རྣམས་ནི། རྒྱུག་པ་དང༌། མཆོང་པ་དང༌། ཆུ་ལ་རྩེ་བ་ལ་ སོགས་པ ་རྣམས་ལ་གླུ་གར་དང༌། རོལ་མོའི་སྒྲ་དང༌། མེ་ཏོག་ཕྲེང་བ་དང༌། དྲིས་བྱུག་པ་དང༌། ཁ་དོག་འཆང་བ་དང༌། མལ་སྟན་མཐོན་པོ་དང༌། མལ་སྟན་ཆེན་པོའི་ཕྱོགས་དང་མཐུན་པ་ཉིད་དོ། །གང་ཞིག་འདི་ནི་ཁྱིམ་བྱེད་དུ་བཅུག་པའི་ཁ་ན་མཐོ་བ་སྟེ། ཁང་པ་དང་ཁང་ཆེན་རྩིག་པར་གཏོགས་པར་འདོད་པའི་ཕྱོགས་དང་མཐུན་པ་ཉིད་དོ། །ཁྱིམ་གྱི་འདོད་པའི་ཕྱོགས་ནི་དེའི་ཕྱིར་དེ་ལ་འདོད་པའི་དངོས་པོ་ཉིད་ལ་ཞུགས་པར་གྱུར་པ་ཉིད་ཀྱིས་འདི་ལ་རབ་ཏུ་བྱུང་བ་ཡང་དག་པར་བླངས་པའི་ཉམས་པའི་ཕྱོགས་དང་མཐུན་པ་ཉིད་དོ། །ཁུ་བ་འབྱིན་པ་དང༌། བཟང་བ་དང་འཁྲིག་པ་ཀུན་ཏུ་སྤྱོད་པ་རྣམས་ནི་འདོད་པའི་དངོས་པོ་ཉིད་དོ། །གནོད་པའི་གཞི་ཉིད་ནི་མི་ཚངས་པར་སྤྱོད་པའི་ཕྱོགས་ཉིད་དོ། །ཐལ་ལྕག་བརྡེགས་པ་དང་མཆིལ་ལྷམ་སྦ་བ་ལ་ སོགས་པ ་རྣམས་ནི་སྲོག་གཅོད་པའི་ཕྱོགས་དང་མཐུན་པ་ཉིད་དོ། །ཁྲོ་བ་ལ་ སོགས་པ ་རྣམས་ལ་བརྫུན་དུ་སྨྲ་བའི་ཕྱོགས་ཉིད་དོ། །དགེ་འདུན་འབྱེད་ པ་ལ་སོགས ་པའི་འཇིག་པ་གསུམ་ནི་གནོད་པའི་གཞི་ཉིད་དང་མཐུན་པ་ཉིད་དོ། །གནས་པའི་གཞི་ལས་བྱུང་བ་ཞེས་བྱ་བ་ནི་གང་ཞིག་དགེ་འདུན་གྱིས་སྤངས་པའི་གང་ཟག་ནི་དགེ་འདུན་ལ་ཡང་མི་གུས་པར་གྱུར་པ་ཉིད་དང༌། ཆོས་ལ་ཡང་མི་གུས་པར་གྱུར་པ་ཉིད་དོ། །གང་ཞིག་བསྙེན་པར་མ་རྫོགས་པ་ཉིད་དང་ལྷན་ཅིག་ཉལ་བའི་བདག་ཉིད་ཅན་དེ་ལ་འདོད་ཆགས་དང་བྲལ་བ་མི་མཐུན་པའི་ཕྱོགས་སུ་གྱུར་པ་ཉིད་ཀྱིས་སྦང་བར་བྱ་བ་ཉིད་ཀྱི་ཕྱིར། སྡོམ་པ་མ་ལུས་པ་ཉམས་པའི་ཕྱོགས་དང་མཐུན་པ་ཉིད་དོ། །ཁྱིམ་པ་དང་མུ་སྟེགས་བ་དང་ལྷན་ཅིག་ཉལ་བའི་
གནས་ལ་རིག་པར་བྱ། མཚན་མི་མཐུན་པ་དང་ལྷན་ཅིག་ཏུ་གང་ཞིག་ཉལ་བའི་བདག་ཉིད་ཅན་གྱི་གནས་པ་ནི་དེ་ལ་མི་ཚངས་པར་སྤྱོད་པའི་ཕྱོགས་དང་མཐུན་པ་ཉིད་དོ། །དེ་ཡང་གནས་པ་མ་ཡིན་པའི་གཞི་ཉིད་དོ། །མ་གུས་པའི་གཞི་ལས་བྱུང་བ་ཉིད་ནི་སངས་རྒྱས་དང༌། ཆོས་དང༌། དགེ་འདུན་གྱི་ཕྱིར་མ་གུས་པས་སྐྱབས་སུ་འགྲོ་བ་ཞེས་བྱའོ། །གང་ཞིག་རབ་ཏུ་བྱུང་བ་ཉིད་དང༌། རབ་ཏུ་བྱུང་བའི་སྔོམ་པ་དག་གི་ཡན་ལག་དེ་ལ་ཉམས་པའི་ཕྱོགས་དང་མཐུན་པ་ཉིད་དོ། །གལ་ཏེ་གང་ཟག་གི་ཕྱིར་བརྟེན་པ་ཡིན་ན་སྔོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཉིད་དོ། །མཁན་པོའི་ཕྱོགས་འདི་ནི་བདག་གི་མཁན་པོའི་ཞེས་བྱ་བས་བླངས་པ་སྔོན་དུ་འགྲོ་བ་ཅན་གྱི་ཁས་བླངས་པ་གང་ཡིན་པ་དེ་ནི་འཇིག་པའི་ཕྱོགས་དང་མཐུན་པ་ཉིད་དོ། །གལ་ཏེ་གང་ཟག་གཞན་ཡིན་ན་དེའི་ཕྱོགས་དང་མཐུན་པ་འདི་ལ་མ་གུས་པའི་ཕྱོགས་དང་མཐུན་པ་ཉིད་དོ། །མི་སྦྱོང་བའི་གཞི་ནི་སྦྱོང་བར་མི་བྱེད་པ་སྟེ། བདག་ཉིད་དག་པར་བྱ་བའི་ཕྱིར་གསོ་སྦྱོང་དང་དགག་དབྱེ་དག་མི་བྱེད་པའོ། །མི་གནས་པར་འདུག་ པ་ལ་སོགས ་པས་སྦྱོང་བར་མི་བྱེད་པའོ། །གཞན་དུ་ན་འཇུག་པ་ཉིད་འགྲུབ་པར་མི་འགྱུར་རོ་ཞེས་བྱ་བ་འདི་རྣམས་ཀྱི་བྱ་བ་ཉིད་དོ། །དེ་ལྟ་བས་ན་འདི་རྣམས་ལ་སྔོམ་པ་ཐམས་ཅད་འཇིག་པའི་ཕྱོགས་དང་མཐུན་པ་ཉིད་དུ་རིག་པར་བྱ་སྟེ། གསོ་སྦྱོང་བྱེད་པ་ལ་ནི་མ་ཡིན་ནོ། །འདིའི་ཚིག་མེད་པའི་ཕྱིར་རྗེས་སུ་བསྒྲུབ་པར་བྱ་བ་ཤེས་པར་བྱའོ། །དེ་ཉིད་ཀྱི་ཕྱིར་གཞན་དུ་ན་འཇུག་པ་བསྒྲུབ་པ་ཉིད་དུ་མི་འགྱུར་རོ་ཞེས་བྱ་བའི་རིགས་པ་ལས་ཐོབ་པའི་ཕྱིར་དང་དགག་དབྱེ་བསྒྲུབ་པའི་རྗེས་སུ་འབྲངས་པས་སྦྱོང་བར་རིག་པར་བྱའོ། །མཚན་མཐུན་པ་བསྙེན་པར་རྫོགས་པ་ལ་གསོ་སྦྱོང་བྱེད་པ་འདི་རྣམ་པར་གནས་པ་ཡིན་ནོ། །སྔགས་ནི་འདི་ཡིན་ཏེ། ཆེ་གེ་མོ་ཞིག་དགོངས་སུ་གསོལ། དེང་དགེ་འདུན་གྱི་གསོ་སྦྱོང་བཅོ་ལྔ་པ་ལགས་ཏེ། བདག་དགེ་ཚུལ་མིང་འདི་ཞེས་བགྱི་བའི་གསོ་སྦྱོང་ཡང་གསོ་སྦྱོང་བཅོ་ལྔ་པ་ལགས་ན། བདག་དགེ་ཚུལ་མིང་འདི་ཞེས་བགྱི་བ། བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་བདག་ཉིད་ཆེ་ཞེས་བྱ་བ་ལ་ སོགས་པ ་ཡོད་པའི་ཕྱིར་རོ། །བསླབ་པ་བྱིན་པ་ནི་འདྲ་བ་ཉིད་དོ་ཞེས་བྱ་བ་ནི་ལྟུང་བ་ལ་སྦྱོར་བ་དགེ་སློང་དང་
འདྲ་བ་ཉིད་དོ་ཞེས་བྱ་བར་སྦྱར་རོ། །འདིར་འདི་ལ་དགེ་སློང་མ་ཡང་དེ་བཞིན་དུ་ཕན་ཚུན་འདྲ་བ་ཉིད་དུ་རིག་པར་བྱའོ། །དགེ་སློང་བཞིན་དུ་འདིས་ལྷག་པར་སྤྱོད་པ་ལ། དགེ་སློང་བཞིན་དུ་ཡང་གཞན་ལ་བརྡེག་པ་དང༌། གཟས་པ་དང༌། འགྱོད་པ་བསྐྱེད་ པ་ལ་སོགས ་པས་ལྟུང་བ་རྣམས་བསྐྱེད་དོ་ཞེས་བྱ་བའི་དོན་ཏོ། །བསྙེན་པར་མ་རྫོགས་པ་དང་ལྡན་པ་ཉིད་ཀྱང་ངོ་ཞེས་བྱ་བ་ནི། འདི་ལ་རྣམ་པ་འདིས་དགེ་སློང་དང་མཉམ་པ་ཉིད་ཡོད་པར་གྱུར་ཀྱང་གང་ལ་བྱིན་ལེན་བྱེད་པ་དང་ལྷན་ཅིག་ཉལ་བའི་ལྟུང་བྱེད་ལ་ སོགས་པ ་བསྙེན་པར་མ་རྫོགས་པ་ལ་བསྐྱེད་པ་དེ་ལ་དེ་ལས་མ་ཡིན་ཏེ། གང་ལ་ཡང་བསྙེན་པར་རྫོགས་པ་གཞན་ལས་སྐྱེས་པ་རང་གི་བདག་ཉིད་ལ་ཡང་སྐྱེས་པ་ཉིད་ཉེ་བར་གནས་པ་ཉིད་དང༌། འཛིན་པ་ཉིད་ལས་སྐྱེས་པ་ཡིན་ནོ། །དེ་ལ་འདིར་ཉམས་པ་དང་འདྲ་བ་ཉིད་ཀྱི་ཕྱིར་རོ། །དེ་ལ་ནི་མ་ཡིན་ནོ་ཞེས་བྱ་བ་ནི་བསླབ་པ་བྱིན་པ་དེ་ལ་བསྙེན་པར་རྫོགས་པ་དང་ལྡན་པ་ཉིད་ནི་མ་ཡིན་ཏེ། ཕྱོགས་གཅིག་པ་ཉིད་ཀྱི་ཕྱིར་རོ། །འདིར་གཞུང་ནི་ཞུ་བ་ལས། བཙུན་པ་རེ་ཞིག་དགེ་སློང་ལ་རྒྱུ་དུས་གསོག་འཇོག་བགྱིས་པར་འགྱུར། གསུམ་གྱིས་ཏེ། གསུམ་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། དགེ་སློང་གིས་གསོག་འཇོག་བྱས་པ་དང༌། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་དགེ་སློང་མ་ལ་རྒྱུ་དུས་གསོག་འཇོག་བྱས་པར་འགྱུར། གསུམ་གྱིས་ཏེ། གསུམ་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། དགེ་སློང་མས་གསོག་འཇོག་བྱས་པ་དང༌། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་ལ་རྒྱུ་དུས་གསོག་འཇོག་བྱས་པར་འགྱུར། བཞི་སྟེ། བཞི་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། བསླབ་པ་བྱིན་པས་གསོག་འཇོག་བྱས་པ་དང༌། དགེ་སློང་གིས་གསོག་འཇོག་བྱས་པ་དང༌། དགེ་སློང་གི་དགེ་འདུན་གྱིས་གསོག་འཇོག་བྱས་པའོ། །བཙུན་པ་རེ་ཞིག་བསླབ་པ་བྱིན་པ་མོ་ལ་ཞེས་བྱ་བ་ནས། བཞི་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། བསླབ་པ་བྱིན་པ་མོས་གསོག་འཇོག་བྱས་པ་དང༌། དགེ་སློང་མས་གསོག་
འཇོག་བྱས་པ་དང༌། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་གསུངས་པ་ཡིན་ནོ། །དགེ་སློབ་མ་ལ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲས་ནི་བསྙེན་པར་མ་རྫོགས་པ་དང་ལྡན་པ་ཉིད་མ་ཡིན་ནོ་ཞེས་བྱ་བར་སྦྱར་རོ། །འདིར་གཞུང་ནི་ཞུ་བ་ལས། བཙུན་པ་རེ་ཞིག་དགེ་སློབ་མ་ལ་ཞེས་བྱ་བ་ནས་ལྔ་སྟེ། ལྔ་གང་ཞེ་ན། བདག་ཉིད་ཀྱིས་གསོག་འཇོག་བྱས་པ་དང༌། དགེ་སློབ་མས་གསོག་འཇོག་བྱས་པ་དང༌། བསླབ་པ་བྱིན་པ་མོས་གསོག་འཇོག་བྱས་པ་དང༌། དགེ་སློང་མས་གསོག་འཇོག་བྱས་པ་དང༌། དགེ་སློང་མའི་དགེ་འདུན་གྱིས་གསོག་འཇོག་བྱས་པའོ་ཞེས་གསུངས་པ་ཡིན་ནོ། །འགྲོ་བ་གཞན་གྱི་རྣམ་པ་བསྟེན་པ་ན་དགེ་སློང་གི་འདུ་ཤེས་ཡོད་པ་ལའོ་ཞེས་བྱ་བ་ལྟུང་བ་ལ་སྦྱོར་བ་འདྲ་བ་ཉིད་དོ་ཞེས་བྱ་བར་སྦྱར་རོ། །དགེ་སློང་སྔགས་དང་སྨན་ལ་སོགས་པའི་དབང་གིས་འགྲོ་བ་གཞན་གྱི་རྣམ་ པ་ཞེས་བྱ་བ་དུད་འགྲོ་ལ་སོགས ་པའི་གཟུགས་སུ་བསྒྱུར་ནས་བྱ་བ་མ་ཡིན་པ་བྱེད་པ་ཡིན་ པ་དེ་ལ་དེར་ལྟུང་བ་ཉིད་དོ། །གལ་ཏེ་བྱེད་པའི་དུས་ན་དགེ་སློང་ལ་སོགས ་པའི་འདུ་ཤེས་མ་བརྗེད་པར་གྱུར་ན་ལྟུང་བ་འདྲ་བ་ཉིད་དོ། །མེད་ན་ནི་སྨད་པའོ་ཞེས་བྱ་བ་དེའི་ཚེ་ལྟུང་བ་འབྱིན་པ་དེ་ལ་བདག་ཉིད་དགེ་སློང་ཡིན་པའི་འདུ་ཤེས་མེད་ཅིང་བརྗེད་པར་གྱུར་པ་ཉིད་ཡིན་ན་ནི་ལྟུང་བ་ལ་སྦྱོར་བ་དེའི་ཚིག་འོག་མར་ན་སྨད་པ་ཡིན་ནོ། །ཚིག་སྔར་མར་སྦྱོར་བ་བྱས་པ་ལ་ཡང་ངོ་ཞེས་བྱ་བ་ནི་ན་སྨད་པ་ཉིད་དོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཁྱིམ་པ་ཉིད་དུ་སྦྱོར་བ་ཙམ་གྱི་དབང་གིས་གང་ཞིག་དགེ་ཚུལ་ཉིད་ལ་ཚིག་སྔ་མར་སྦྱོར་བ་བྱས་པ་ཙམ་གྱི་དབང་གིས་བསྙེན་པར་རྫོགས་པ་ཉིད་ལ་དེ་ལ་ཡང་མ་རྫོགས་པ་ཉིད་ནི་ན་སྨད་པ་ཉིད་ཡིན་ཏེ། དེ་མ་ཐག་པའི་ཚིག་ཉིད་དོ། །དེ་ལྟར་ཡང་འདིར་གཞུང་ནི་བསྙེན་པར་མ་རྫོགས་པས་བརྐུ་བ་ལ་སྦྱོར་ཞིང་བསྙེན་པར་མ་རྫོགས་པའི་ཕྱིར་རྐུ་བར་བྱེད་ན་ཉེས་བྱས་སུ་འགྱུར་རོ། །བསྙེན་པར་མ་རྫོགས་པ་བརྐུ་བ་ལ་ཇི་སྲིད་དུ་བསྙེན་པར་རྫོགས་པའི་ཕྱིར་རྐུན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་ སོགས་པ ་ཡིན་ནོ། །འདིར་དེའི་ཕྱིར་ཞེས་བསྟན་པར་ཤེས་པར་བྱ་སྟེ། ཚིག་སྔ་མར་སྦྱོར་བ་ཙམ་གྱི་དབང་ཁོ་ན་ལས་མེད་ན། དེའི་ཚེ་སྦྱོར་བ་ན་སྨད་པའོ། །སྦྱོར་བ་ཡོད་ན་ནི་དེའི་ཚེ་བྱས་པ་ཉིད་ལ་དངོས་པོ་ལ་ན་སྨད་པ་མི་རིགས་
པའི་ཕྱིར་ལེན་པའི་དབང་དང་རྟེན་གྱི་བྱེ་བྲག་གི་དབང་གིས་འདི་ཚིག་འོག་མར་གཏན་དུ་བའི་སྦྱོར་བ་ལ་ལྟུང་བར་འགྱུར་བའི་རྣམ་པར་རིག་པར་སྐྱེས་པའི་བདག་གི་དངོས་པོའི་དབང་དུ་བྱས་པ་ལ་ལྟུང་བྱེད་དུ་རྣམ་པར་གནས་པ་ལ་ལྕི་བ་ཉིད་ནི་ཡང་བསྙེན་པར་རྫོགས་པ་ཉིད་ལ་ཡང་རྣམ་པར་གཞག་པའོ། །ན་སྨད་པའི་སྦྱོར་བ་དེའི་ཚོན་མེད་པས་དེ་བཞིན་དུ་འོག་མའི་ཚིག་སྦྱོར་བའི་དབང་གིས་ཚིག་སྔ་མ་ལ་འཆད་པར་འགྱུར་བའི་ལྟུང་བར་འགྱུར་བའི་རྣམ་པར་རིག་པ་ལས་སྐྱེས་པ། བདག་གི་དངོས་པོ་རྣམ་པར་འགྱུར་བ་ལ་ལྟུང་བྱེད་དུ་རྣམ་པར་གཞག་པ་ལ་ཡང་བ་ཉིད་ནི་ཡང་དགེ་ཚུལ་ཉིད་ལ་ སོགས་པ ་ལ་རྣམ་པར་གཞག་པའོ། །འདིར་སྦྱོར་བ་གང་ཡིན་པ་དེ་ལ་མཚན་ཉིད་ཇི་ལྟ་བར་ལྟུང་བ་དང་ལྟུང་བ་མེད་པར་རིག་པར་བྱའོ། །ཕྱི་མ་ཡང་དེ་དང་ལྡན་པ་ཉིད་ཡིན་ནོ་ཞེས་བྱ་བ་ནི། འདིར་གང་དུ་ཚིག་ཕྱི་མ་སྟེ། དགེ་ཚུལ་ཉིད་ལ་ སོགས་པ ་ལ་བསྙེན་པར་རྫོགས་པའི་གནས་སྐབས་ཀྱི་སྦྱོར་བ་ཙམ་གྱི་དབང་གིས་བསྒྲུབ་པ་ནི་དེ་དང་ལྡན་པ་ཉི་དང་ཚིག་སྔ་མ་ཉིད་དེ་ལ་ཉེས་བྱས་ཡོངས་སུ་རྫོགས་པར་བསྐྱེད་དོ་ཞེས་བྱ་བའི་དོན་ཏོ། འདི་ཡང་བསྙེན་པར་རྫོགས་པའི་གནས་སྐབས་ལ་སྦྱོར་བ་བྱས་པ་གང་ཡིན་པ་དེ་ལ་མཚན་ཉིད་ཇི་ལྟ་བར་ལྟུང་བ་རྣམ་པར་གཞག་པ་རིག་པར་བྱའོ། །རྫས་བཀག་པས་བཟང་པོ་ལ་ཡང་དེ་དང་ལྡན་པ་ཉིད་ཡིན་ནོ་ཞེས་བྱ་བ་ནི་བཀག་པ་ལས་ཤིན་ཏུ་ཁྱད་པར་འཕགས་པའི་རྫས་གང་ཡིན་པ་དེ་ལ་ཡང་གང་ཞིག་གཞན་ཉིད་ནི་དེ་དང་ལྡན་པར་འགྱུར་བ་ཉིད་བཀག་པར་གྱུར་པ་ནི། དཔེར་ན་བལ་ནག་པོ་འབའ་ཞིག་ལས་སྟན་བྱེད་ནས་སྤང་བའི་ལྟུང་བྱེད་དུ་འགྱུར་བ་དེ་བཞིན་དུ་དེ་ལས། དེ་བཞིན་དུ་སྲིན་བལ་དང་རྫས་རིན་པོ་ཆེ་ལས་སྟན་བྱེད་པ་ལས་ཡང་བཀག་སྟེ། སྤང་བའི་ལྟུང་བྱེད་ཁོ་ནར་འགྱུར་ཞེས་བྱ་བའི་དོན་ཏོ། །འདྲ་བ་ལ་ཡང་ངོ་ཞེས་བྱ་བ་ནི་རྫས་བཟང་ངན་འདྲ་བ་ལ་ཡང་བཀག་པ་ཉིད་ཀྱིས་སྙིང་པོ་དང་ལྡན་པ་ཉིད་ཀྱིས་སྤང་བའི་ལྟུང་བ་ཁོ་ནར་འགྱུར་རོ། །གང་ཞིག་བལ་གྱི་གོས་དང་འདྲེས་པའི་སྲིན་བལ་དང་བལ་ནག་པོ་འབའ་ཞིག་གམ། བལ་དཀར་པོ་དང་བཅས་པའམ་བལ་དཀར་པོའི་སྟན་བྱེད་པ་ལ་ཡང་སྤང་བ་ཁོ་ནར་འགྱུར་རོ། །མཚན་གྱུར་པ་ནི་དེའི་ཞིང་ཉིད་ཡིན་ནོ་ཞེ་བྱ་བ་ནི་ལྟུང་བ་དེའི་ཞིང་ཉིད་ཡིན་ནོ་ཞེས་བྱ་བར་སྦྱར་རོ། །
ཞིང་ཉིད་གང་ཡིན་པ་དེ་ནི་ལྟུང་བ་ཞེས་བྱ་བའི་དོན་ཏོ། །དེ་བས་ན་མཚན་གྱུར་པ་ཞེས་བྱ་བ་ནི་མཚན་མ་སྔ་མ་ཉིད་སྦྱོར་བ་ཙམ་གྱི་དབང་གིས་བསྒྲུབ་པར་གྱུར་པའི་ལྟུང་བྱེད་དོ། །གང་ཞིག་ལྟུང་བ་ལ་དེའི་མཚན་མ་ཉིད་ཞིང་དུ་གྱུར་པ་ན་གལ་ཏེ་དེ་ཉིད་ལ་ཞིང་ཉིད་གང་གི་དོན་དུ་སྦྱོར་བ་དང་བཅས་པ་དེ་ཉིད་དོ། །གལ་ཏེ་ན་སྨད་པ་ཉིད་ཡིན་ན་སྨད་པའོ། །འདི་ལ་དམིགས་ཀྱིས་བསལ་བ་བྱས་པ་ནི་ན་སྨད་པའི་དོན་གྱི་སྦྱོར་བ་གང་ཡིན་པ་ཉིད་ལས་སོ་ཞེས་བྱ་བ་སྨོས་ཏེ། ལྟུང་བ་ན་སྨད་པ་ཉིད་དོན་ཡིན་ཏེ། མཚན་མ་གཞན་གཏོགས་པའི་སྦྱོར་བ་ལས་མཚན་གྱུར་པ་དེ་ལ་ནི་ལྟུང་བ་གང་གི་སྦྱོར་བ་བྱས་པའི་ལྟུང་བ་དེ་ཉིད་བྱས་སོ། །འདི་ལྟ་སྟེ་དཔེར་ན་དགེ་སློང་གཉིས་ཁྲི་གཅིག་ལ་རེག་པ་དང་བཅས་བཞིན་དུ་དགེ་སློང་མ་ཉིད་དུ་གྱུར་པ་ན་སྐྱ་རེངས་མ་ཤར་བའི་མདུན་རོལ་དུ་ཉལ་བ་ལ་ཉེས་བྱས་ཁོ་ནར་ཟད་ཀྱིས་ལྟུང་བྱེད་དུ་ནི་མི་འགྱུར་བ་ལྟ་བུའོ། །བྱས་པ་ནི་དེ་ཉིད་ཡིན་ནོ་ཞེས་བྱ་བ་ནི་མཚན་མ་གྱུར་པའི་གནས་སྐབས་སུ་ཁ་ན་མ་ཐོ་བ་གང་བྱས་པ་དེ་ནི། ཕྱིས་མཚན་གྱུར་ན་ཡང་ཁ་ན་མ་ཐོ་བ་གང་ཡིན་པ་དེའི་མཚན་གྱུར་པ་ཉིད་ལ་ཞིང་ཉིད་ནི་དེའི་ཁ་ན་མ་ཐོ་བ་ཉིད་དོ། །དགེ་འདུན་ལྷག་མར་གཏོགས་པའི་སྦོམ་པོར་འགྱུར་ཏེ། དགེ་སློང་ཉིད་དུ་གྱུར་པའི་དགེ་སློང་མ་ལ་རེག་པའི་ཕམ་པ་གང་ཡིན་པ་དེའི་སྦྱོར་བ་ལ་ཉེས་བྱས་ཉིད་དོ། །སྦོམ་པོ་ཉིད་ནི་ལུས་བཀན་པར་གྱུར་པའི་ཕམ་པར་གྱུར་པ་ཉིད་ལའོ། །འཆབ་པའི་ཕམ་པར་གྱུར་པ་ལ་ནི་ཉེས་བྱས་ཉིད་དེ་ལྟུང་བྱེད་དུ་འགྱུར་བ་ཉིད་ལ་ནི་མ་ཡིན་ཏེ། མཚན་ཐ་དད་དུ་གྱུར་པ་འཆབ་པ་ལ་དེའི་ཚེ་འདི་ཡོད་པའི་ཕྱིར་རོ། །རྗེས་སུ་ཕྱོགས་པའི་ལྟུང་བྱེད་གང་ཡིན་པ་དེ་ཉིད་འབྱིན་པ་བཞིན་དུ་མཚན་གྱུར་ཅིང་དགེ་སློང་མར་གྱུར་ན་རྗེས་སུ་ཕྱོགས་པའི་ལྟུང་བྱེད་ནི་མཚན་ཐ་དད་པ་ལའོ། །འདིར་དགེ་སློང་མ་ལ་ན་སྨད་པར་གྱུར་པ་ཉིད་ཁུ་བ་འབྱིན་པ་དགེ་འདུན་ལྷག་མ་དགེ་སློང་མ་ཉིད་དུ་གྱུར་པ་ལ་ལྟུང་བྱེད་ཅེས་བྱའོ། །ན་སྨད་པ་ནི་རང་གི་ཉིད་དོ་ཞེས་བྱ་བ་ནི་མཚན་གྱུར་པ་གཞན་ཉིད་ལ་ནི་ན་སྨད་པ་ཉིད་དེ་ཁ་ན་མ་ཐོ་བ་བྱས་པ་ཡིན་པ་དེ་གྱུར་པ་ལ། མཚན་གྱུར་ན་རང་གི་ཁ་ན་མ་ཐོ་བ་ཉིད་དུ་འགྱུར་ཏེ། ལྟུང་བྱེད་ཁོ་ནར་འགྱུར་རོ། །དགེ་སློང་དུ་གྱུར་ན་ཁུ་བ་འབྱིན་པའི་ལྟུང་བྱེད་དུ་འགྱུར་རོ། །ཇི་ལྟར་རྗེས་སུ་མཐུན་པའི་མཚན་གྱུར་པའི་དབང་གིས་ནི་ན་སྨད་པ་མི་
རིགས་པ་དེ་བཞིན་དུ་ལྷག་མ་ཉིད་དུ་མི་འགྱུར་རོ། །ལྷག་པར་སྤྱོད་པ་འདི་ལས་རྣམ་པར་གཞག་པའོ། །འདིར་དེའི་ལྷག་པར་སྤྱོད་པ་མེད་པ་དེ་བས་ན་འདིས་ཤེས་པའོ། །ཞག་བཅུར་མ་ལོན་པ་ནི་ཆ་ཉིད་དོ་ཞེས་བྱ་བ་ནི་འདི་ནི་ཡོད་པ་ལ་སྟེ། ཞག་བཅུ་མ་ལོན་པའི་བདག་ཉིད་ཀྱི་དུས་ཡོད་པ་ལ་དེའི་མཚན་གྱུར་ཏེ། འཆང་བའི་དུས་གང་ཡིན་པ་དེ་ལ་ཆ་ཉིད་དོ། །དེ་ཉིད་ནི་དེའི་དུས་ཉིད་མ་ཡིན་ནོ། །འདིར་ཡོངས་སུ་རྫོགས་པ་ལ་ཇི་ལྟར་རྙེད་པའི་དེ་ཉིད་དོ། །འདིའི་ཡུལ་ནི་ལྷུང་བཟེད་འཆང་བ་སྟེ། གཞན་དུ་ཆོ་ག་ཐ་དད་པ་མེད་པའི་ཕྱིར་རོ། །འདིར་དུ་མ་ལ་ སོགས་པ ་དགུའི་མཐར་ཐུག་པའི་གཞག་རྣམས་ལས་འདས་ན་དེ་དགེ་སློང་མ་ཉིད་དུ་གྱུར་ན། ཞག་དགུ་པོ་དེ་དག་ཞག་གཅིག་པོའི་ཁོངས་སུ་གཏོགས་པས་དོན་མེད་པ་ཉིད་ཐོབ་པར་བྱེད་པའོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ལྷུང་བཟེད་རྙེད་པ་ན་མཚན་གྱུར་ཏེ་དགེ་སློང་མར་གྱུར་ནས་དགུང་གཅིག་ལས་ལྷག་པར་འཆང་ན་ལྟུང་བ་ཅིར་འགྱུར། སྤང་བའི་ལྟུང་བྱེད་དུ་འགྱུར་རོ། །དགེ་སློང་གིས་དུས་དང་ལྷན་ཅིག་ཏུ་ལྷག་པར་འཆང་བ་ནི། དགུང་གཅིག་གི་ཆ་ལས་གྱུར་པ་ཉིད་ཀྱིས་ལྷག་པར་གནས་པས་སྨོས་པར་རྣམ་པར་གནས་པ་ཡིན་ནོ། །འདིར་ཡང་ལྷན་ཅིག་རྙེད་པ་འཆང་བ་ལ་བཙུན་པ་དགེ་སློང་གིས་ལྷུང་བཟེད་ལྷག་པ་དགུང་གཅིག་ལས་ལྷག་པར་འཆང་བ་ལས་སྤང་བའི་ལྟུང་བྱེད་དུ་འགྱུར་བ་མཆིས་སམ། ཡོད་དེ་དགེ་སློང་གིས་ལྷུང་བཟེད་རྙེད་པ་ན་མཚན་གྱུར་ཏེ་དགེ་སློང་མར་གྱུར་ནའོ་ཞེས་གསུངས་པ་ཡིན་ནོ། །རིགས་ལ་ནི་ཕན་ཚུན་གནས་ཐོབ་པ་ཉིད་འདིར་ཞག་བཅུ་དང་ཞག་གཅིག་ལ་འཆང་བ་འདི་ཐུན་མོང་བ་ཉིད་དོ། །ཞིང་མ་ཡིན་པ་ཉིད་ལས་ནི་ཉམས་སུ་ཞེས་བྱ་བ་ནི་མཚན་གྱུར་པ་གང་ལ་དེའི་མཚན་གྱུར་པ་ཉིད་ལ་ལྟུང་བའི་ཞིང་མ་ཡིན་པ་ཉིད་དོ། །ཐུན་མོང་མ་ཡིན་པ་སྔར་གནང་བ་མ་ཐོབ་པར་འཁོར་ཉེ་བར་འཇོག་པ་ལའོ། །ཤམ་ཐབས་རྐེད་པ་སྣང་བ་བགོ་བར་མི་བྱའོ་ཞེས་བྱ་བའི་བསླབ་པ་ལ་ སོགས་པ ་ལས་འདས་ཏེ་སྔོན་གྱི་མཚན་མ་ཉིད་དུ་བྱས་པ་ནི་མ་གཏོགས་པའོ། །འདིར་གཞུང་ནི། གཏམ་གྱི་གཞི་ལས་དགེ་སློང་ལྟུང་བ་ཐུན་མོང་མ་ཡིན་པ་སྡེ་བཞི་པོ་དག་བྱུང་བ་དེ་མཚན་གྱུར་ཏེ། དགེ་སློང་མར་གྱུར་པ་ལྟུང་བ་དེ་
དག་ལས་འབྱུང་བར་བརྗོད་པར་བྱའོ། །དགེ་སློང་མ་ལྟུང་བ་ཐུན་མོང་མ་ཡིན་པ་སྡེ་ལྔ་པོ་དག་བྱུང་བ་དེ་མཚན་གྱུར་ཏེ་དགེ་སློང་དུ་གྱུར་ན་དེ་དག་ལས་བྱུང་བར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་ལ་ཉེས་པ་བཅས་པ་མ་ཡིན་ནོ་ཞེས་བྱ་བ་ནི་གང་ཞིག་དེ་ཉིད་ཞིང་མ་ཡིན་པ་ཉིད་ལ་ནི་ཉམས་སོ་ཞེས་བྱ་བ་སྨོས་པ་དེ་ལ་ནི་འཆབ་པའི་ཉེས་པ་དོགས་པར་མི་བྱའོ། །མཚན་ཐ་དད་པ་མ་ཡིན་པའི་དོན་དུ་ནི་འདི་སྐྱེས་པ་སྟེ། དེའི་ཕྱིར་མཚན་གཞན་གྱུར་པ་དེ་དང་མཉམ་པ་ནི་འདིར་ཞིང་ཉིད་མ་ཡིན་ནོ། །མགུ་བ་སྤྱད་པ་ནི་དོན་མེད་པ་ཉིད་ཡིན་ནོ་ཞེས་བྱ་བ་ནི་རྣམ་པ་ཐམས་ཅད་དང་རྣམ་པ་ཐམས་ཅད་མ་ཡིན་པ་ཞེས་བྱ་བ་བྱེ་བྲག་མ་སྨོས་པས་རྟོགས་པར་བྱའོ། །འདིར་གཞུང་ནི་སྤོ་བའི་གཞིའི་ཞུ་བ་ལས། བཙུན་པ་རེ་ཞིག་དགེ་སློང་དབྱུང་བ་ལ་ སོགས་པ ་ཐུག་པ་མཚན་གྱུར་ཏེ་དགེ་སློང་མར་གྱུར་ན། ཅི་དེས་གཉིས་ཀའི་དགེ་འདུན་ལ་ཟླ་བ་ཕྱེད་མགུ་བ་སྤྱད་པ་སྤྱད་པར་བགྱིད་འཚལ་ལམ། སྤྱད་པར་བྱ་དགོས་སོ། །བཙུན་པ་རེ་ཞིག་དགེ་སློང་མ་གཉིས་ཀའི་དགེ་འདུན་ལ་མགུ་བ་སྤྱོད་པ་མཚན་གྱུར་ཏེ། དགེ་སློང་དུ་གྱུར་ན་ཅི་དེས་དགེ་འདུན་ལ་ཞག་དྲུག་མགུ་བ་སྤྱད་པ་སྤྱད་པར་བགྱིད་འཚལ་ལམ། སྤྱད་པར་བྱ་དགོས་སོ་ཞེས་གསུངས་པ་ཡིན་ནོ། །མདོ་སྔ་མ་ཤོས་ཀྱིས་ནི་ལུས་ཀྱི་ཉེས་པ་བཅབས་པ་ཉམས་པ་བསྟན་པར་རིག་པར་བྱའོ། །ཕྱི་མའི་སྤྱད་པ་ཡང་སྤྱད་པར་བྱ་བ་ཉིད་དོ། ཡང་གང་གི་ཕྱིར་བྱས་པ་ནི་དེ་ཉིད་ཡིན་ནོ། །ཞིང་མ་ཡིན་པ་ཉིད་ལ་ནི་ཉམས་སོ། །དེའི་ཚེ་ན་འབྱུང་བའི་མཚན་མ་ལོངས་སྤྱོད་པ་རྣམས་ཀྱིས་མཚན་མ་འདི་ལ་བྱ་བ་ཉིད་དོ་ཞེས་བྱ་བ་ནི་འདིར་རྣམས་པར་གཞག་པའོ། །འདི་ལ་ཆོ་ག་རྣམས་གྱུར་ཏོ་ཞེས་བྱ་བ་ལ། འདི་ལ་ཞེས་བྱ་བ་ནི་མཚན་གྱུར་པ་ལའོ། །མཚན་གྱུར་པ་འདི་ལ་ཆོ་ག་སྤྱད་པ་རྣམས་གྱུར་པ་དེའི་ཕྱིར། དེ་དག་རྣམ་པར་གཞག་པར་མཛད་དོ་ཞེས་བྱ་བའི་དོན་ཏོ། །དེའི་ཚེ་ལུས་བྱེད་པ་པོ་ཉིད་ཡིན་ནོ་ཞེས་བྱ་བ་ནི་གང་གི་ཚེ་དེའི་ཚེ་ན་འབྱུང་བའི་གཞིའི་དགོས་པ་དེ་ནི་བདག་ཉིད་གང་ཡིན་པ་དེའི་དབང་གིས་ལྟུང་བ་དང་ལྟུང་བ་མེད་པ་སྐྱེས་པའོ། །འདི་ལྟ་སྟེ་དཔེར་ན་གསད་པར་བྱ་བ་དགྲ་བཅོམ་པ་ཉིད་མ་ཡིན་པའི་གནས་སྐབས་ལ་གསད་པའི་སྦྱོར་བ་བརྩམས་ནས། དགྲ་བཅོམ་པ་ཉིད་ཐོབ་པའི་
གནས་སྐབས་སུ་གསད་པའི་མཚམས་མེད་པ་ལས་ཀྱི་བྱེད་པ་པོ་ཉིད་ཡིན་ནོ། །སྐྱེས་པའི་ལུས་ལ་རེག་པའི་སྦྱོར་བ་བརྩམས་པ་ན་བུད་མེད་ཉིད་དུ་འགྱུར་ན། དེའི་ལུས་ལ་རེག་པ་ལས་སྙོམས་པར་ཞུགས་པ་ལ་བུད་མེད་ལ་རེག་པའི་ལྟུང་བ་གང་ཡིན་པ་དེ་འགྲུབ་པར་འགྱུར་རོ།། བུད་མེད་ལ་སྦྱར་བར་སྐྱེས་པར་གྱུར་ན། དེར་སྙོམས་པར་ཞུགས་པ་ལས་སྐྱེས་པ་ཉིད་ལ་གང་ཡིན་པ་འདི་དང༌། སྐྱེས་པར་གྱུར་པ་ལ་སྦྱར་ནས་བུད་མེད་ཀྱི་གནས་སྐབས་ལ་སྙོམས་པར་ཞུགས་པ་ལ་བུད་མེད་ཉིད་ལ་གང་ཡིན་པ་འདི་བུད་མེད་དུ་གྱུར་པ་ལ་སྦྱར་ཏེ། སྐྱེས་པའི་གནས་སྐབས་སུ་སྙོམས་པར་ཞུགས་པ་དང༌། སྐྱེས་པ་ཉིད་ལ་གང་ཡིན་པ་འདི་ཞེས་བྱ་བ་ལ་ སོགས་པའོ། །གཞན་ལས་སྐྱེས་པ ་ནི་རང་གི་འགྲོ་བ་ཉིད་མ་ཡིན་པ་མ་ཡིན་ནོ་ཞེས་བྱ་བ་ནི་འགྲོ་བ་གཞན་མ་ཡིན་པ་ཞིང་དུ་གྱུར་པ་ལས་སྐྱེས་པའམ། གང་གི་འགྲོ་བར་གྱུར་པ་འདི་ནི་སྒྲུབ་པ་དེའི་འགྲོ་བ་ཉིད་མ་ཡིན་པ་དེ་བས་ན། མི་མ་ཡིན་པ་ཉིད་ལས་རང་གིས་ཕྲོགས་པ་ལ་ཕམ་པའོ། །མིའི་འགྲོ་བ་པའི་བདག་ཉིད་དུ་གྱུར་པའམ། དུད་འགྲོ་མོའི་མངལ་ལས་སྐྱེས་པ་ལས་མི་མ་ཡིན་མོ་ཉིད་དོ། །མི་མ་ཡིན་པའི་ངོ་བོ་འདི་ལ་སྦོམ་པོའོ། །དུད་འགྲོའི་བདག་ཉིད་ཅན་ལ་ལྟུང་བྱེད་ཅེས་བྱ་བ་ལ་ སོགས་པའོ། །འགྲོ་བ་གཞན་གྱི་རྣམ་པ ་བསྟེན་པ་གསད་པ་ལ་ཡང་ངོ་ཞེས་བྱ་བ་ལ། རང་གི་འགྲོ་བ་ཉིད་མ་ཡིན་ནོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དཔེར་ན་མི་སྨན་དང་སྔགས་ལ་ སོགས་པའི་དབང་གིས་འགྲོ་བ་གཞན་གྱི་ལུས་ཀྱི་རྣམ་པ ་བསྟེན་པ་མ་ཡིན་ནོ། །གང་འདི་ལ་སྐྱེ་བ་པོའི་འགྲོ་བ་ཉིད་མ་ཡིན་ནོ། །ཡང་དེ་གསད་པ་ལ་ཡང་དུད་འགྲོའི་རྣམ་པ་དང༌། མི་མ་ཡིན་པའི་རྣམ་པ་དང་ལྡན་པ་ལ་མིའི་འགྲོ་བ་པ་དེའི་འདུ་ཤེས་ཀྱིས་སོ། །དེའི་ཚེ་འབྱུང་བའི་རྣམ་པར་འགྲོ་བའི་འདུ་ཤེས་ཀྱི་ཡན་ལག་ཉིད་ལས་འགྲོ་བར་འདུ་ཤེས་པ་ལ་དེའི་འགྲོ་བའི་སྟོབས་ཀྱིས་སངས་རྒྱས་ཉིད་དང་དགྲ་བཅོམ་པ་ཉིད་དང་མ་དང་པ་ཉིད་ཀྱི་བློ་དང་འདྲ་བར་མཚམས་མེད་པའི་ལས་ལ་ཡན་ལག་མ་ཡིན་པ་ཉིད་ཀྱི་ཕྱིར་མངོན་པར་འདོད་པའི་སྲོག་ཆགས་ཙམ་པོ་ལ་འདིར་ཡན་ལག་ཉིད་ཀྱི་ཕྱིར་ལྟུང་བ་དངོས་གཞིའོ། །སྦྱོར་བ་ནི་མིའི་འགྲོ་བར་འདུ་ཤེས་ན་སྦོམ་པོའོ། །
དེའི་ཚེ་ན་འབྱུང་བའི་རྣམ་པའི་འགྲོ་བར་འདུ་ཤེས་པ་ལ། འདུ་ཤེས་ཀྱི་སྦྱོར་བའི་ཡན་ལག་གོ །དེ་བས་ན་ཉེས་བྱས་སོ། །དུད་འགྲོ་མི་མ་ཡིན་པའི་རྣམ་པ་དང་ལྡན་པ་དུད་འགྲོའི་འདུས་ཤེས་ཀྱིས་དེའི་ཚེ་ན་འབྱུང་བའི་རྣམ་པ་ལ་འགྲོ་བའི་འདུ་ཤེས་ཀྱི་ཡན་ལག་ལས་ལྟུང་བའི་དངོས་གཞིའོ། །སྦྱོར་བའི་སྔོན་རོལ་དུ་ཉེས་བྱས་སོ། །འོག་མ་ལ་ནི་གྲངས་ཇི་ལྟ་བ་བཞིན་དུ་ཉེས་བྱས་དང་སྦོམ་པོའི་ལྟུང་བ་དག་གོ །མི་མ་ཡིན་པ་དུད་འགྲོའི་རྣམ་པ་དང༌། མི་ཡིན་པའི་རྣམ་པ་དང་ལྡན་པ་ལ་མི་མ་ཡིན་པའི་འདུ་ཤེས་ཀྱིས་དེའི་ཚེ་ན་འབྱུང་བའི་རྣམ་པས་གནོད་པར་བྱེད་ཅིང་དངོས་གཞིའི་དུས་ན་སྦོམ་པོ་སྟེ། སྦོམ་པོའི་སྔོན་རོལ་དུ་ནི་ཉེས་བྱས་སོ། །ཕྱི་མ་ལ་ནི་གྲངས་ཇི་ལྟ་བར་ཉེས་བྱས་དང་སྦོམ་པོའོ། །མ་བྱིན་པར་ལེན་པ་དང༌། ལུས་ཀྱིས་རེག་པ་དང་སློང་བ་དང་སྟན་རྣམས་ལ་འགྲོ་བའི་འདུ་ཤེས་ཀྱིས་བདག་ཉིད་ཀྱི་གང་ཡིན་པ་དེ་ལ་འགྲོ་བ་གཞན་གྱི་རྣམ་པ་ལ་བརྟེན་དུ་ཟིན་ཀྱང༌། འགྲོ་བ་དེ་ཉིད་དུ་རྣམ་པར་གཞག་པར་རྣམ་པར་གནས་པ་ཡིན་ཏེ། དེའི་རང་བཞིན་གྱིས་འདི་ལ་བདག་པོ་ཉིད་ལ་ སོགས་པ ་དང་བཟའ་བ་དག་ལ་བརྟེན་པའི་ཕྱིར་རོ། །གནས་སྐབས་གཞན་ཐོབ་པ་ནི་གཞན་ཉིད་མ་ཡིན་ནོ་ཞེས་བྱ་བ་ནི། དགྲ་བཅོམ་ པ་ལ་སོགས ་པའི་གནས་སྐབས་གཞན་ཐོབ་པ་ན། དེའི་རྒྱུད་ནི་གཞན་ཉིད་མ་ཡིན་པ་ནི་སེམས་ཅན་དེ་ལ་སེམས་ཅན་གཞན་ཉིད་མ་ཡིན་ནོ། །སེམས་ཅན་གཞན་དུ་མཐར་ཐུག་པ་མངོན་པར་འདོད་པ་ཡིན་པ་ནི། མཐུར་ཐུག་པ་བྱས་པ་ཉིད་མ་ཡིན་ནོ། །དེ་བཞིན་དུ་གནས་སྐབས་གཞན་ལ་སྦྱོར་བ་བྱས་ནས། སྦྱོར་བ་གཞན་གྱི་སྐབས་སུ་མཐར་ཐུག་པ་ཉིད་དོ། །དགྲ་བཅོམ་པ་མ་ཡིན་པའི་གནས་སྐབས་སུ་སྦྱོར་བ་བྱས་ན་དགྲ་བཅོམ་པ་ཉིད་ཐོབ་པ་ནི་གསོད་པར་བྱེད་ན་དེ་ལ་ཕམ་པ་སྐྱེད་པར་བྱེད་པ་མ་ཡིན་པར་འགྲུབ་བགོ་ཞེས་བྱ་བ་ལ་ སོགས་པའོ། །ཉེས་པ ་དེ་མེད་པ་ཉིད་ལ་འོང་བ་ནི་ཐ་དད་དོ་ཞེས་བྱ་བ་ནི་དེ་ལ་ནི་དེའི་ལས་ཀྱི་ཉེས་པ་སྐྱེད་པ་མ་ཡིན་པ་དེ་བས་ན་ཉེས་པ་དེ་མེད་པའོ། །དེ་ཉིད་ཀྱི་གནས་སྐབས་ཅན་དུ་གྱུར་པ་ནི་ཐ་དད་པའོ། །གང་ཞིག་དེར་དེའི་ཉེས་པ་ཉིད་ལ་བྱས་པ་དང༌། གང་ཡང་དེའི་ཉེས་པ་ཉིད་མ་ཡིན་པ་དང༌། གང་ཡང་སླར་དེའི་འོག་ཏུ་ཉེས་པ་དེ་ཡོད་པ་ལ་
དེ་དག་ནི་ཕན་ཚུན་ཐ་དད་པར་ཤེས་པར་བྱའི་གཅིག་པ་ཉིད་མ་ཡིན་ནོ། །དུས་མ་ཡིན་པ་ཁོ་ན་སྟན་བརྩམས་ནས་ངལ་སོ་བར་བྱེད་པ་དེ་ཡང་བསྙེན་པར་རྫོགས་པར་བྱས་ནས་དུས་མ་ཡིན་པ་ཁོ་ནར་ཟིན་པར་བྱེད་པའོ། །བུད་མེད་དུ་གྱུར་ནས་ཡང་སྐྱེས་པ་ཉིད་ཐོབ་ན་ཐ་དད་པ་ཉིད་དོ། །གལ་ཏེ་ཡང་བསམ་པ་ཐག་པ་ནས་གཏང་བ་གང་ཡིན་པ་དེ་ནི་མ་སྐྱེས་པ་ཉིད་དུ་གྱུར་ནས་དེ་ལྟ་བུ་ཡང་ཐ་དད་པ་ཉིད་ཀྱིས་སྔ་མ་དང་ཕྱི་མའི་ཆ་གང་དག་ལས་ལྟུང་བའི་བྱེད་པ་པོ་ཉིད་དོ། །གཙོ་བོ་མ་ཡིན་པས་བཏང་བ་དང༌། གང་ཞིག་དེའི་སྔ་མ་ཕྱེད་བྱས་སམ་བྱེད་པ་ལ་གང་ཞིག་དེའི་ཕྱི་མ་དང་རབ་ཏུ་བྱུང་ནས་ཡང་བསྙེན་པར་རྫོགས་པ་ལ་ཐོག་མ་ཉིད་དུ་སྟན་གཞན་བྱས་པའི་དབང་གིས་དུས་མ་ཡིན་པ་ཉིད་དུ་རིག་པར་བྱའོ། །དགེ་སློང་མ་ཉིད་ལས་ཡང་ལྟུང་བར་སྔར་བྱས་པ་ལ་ཡང་ངོ༌། །བཏང་བ་ལ་ཡང་ངོ་ཞེས་བྱ་བ་ནི་ལས་གང་བརྩམས་པ་དེ་མ་ཟིན་པར་དེ་ཡང་དེའི་ཆད་པའོ། །སྔར་བྱས་པ་ལ་དེ་ཙམ་ཉིད་དོ། །ཡང་ལས་གཞན་ཉིད་ནི་བྱས་པ་ནས་བརྩམས་ཏེ་ཁང་པའམ་སྟན་བརྩམས་ནས་བཏང་སྟེ། ཡང་བྱེད་ན་སྔ་མ་དང་ཕྱི་མ་ཉིད་ལ་ལྟུང་བའི་བྱེད་པ་པོ་ཉིད་དོ། །གཞི་གཅིག་ལ་དུ་མ་ཉིད་བཅས་པ་ལ་ནི་ཇི་སྙེད་ཀྱི་ཉེས་པར་འགྱུར་རོ་ཞེས་བྱ་བ་ནི་གང་དུ་གཞི་གཅིག་ལ་དུ་མ་ཉིད་ཐོབ་པར་འགྱུར་བ་ནི་འདི་ལྟ་སྟེ་དཔེར་ན་བརྫུན་དུ་སྨྲ་བ་དང༌། སྐྱོན་ནས་སྨྲ་བ་དགག་པ་ལ་ནི་མ་ཡིན་ནོ། །བསྙིལ་བ་དང་ལྷན་ཅིག་ཞག་གསུམ་ཉལ་བ་ལའོ། །དགེ་ཚུལ་བསྙིལ་བ་དང་བུད་མེད་བསྙེན་པར་མ་རྫོགས་པ་དང་ལྷན་ཅིག་ཞག་གསུམ་ཉལ་བ་ལ་བཅས་པ་སྟེ། དེ་ལ་ལྟུང་བྱེད་དོ། །འདིར་གཞུང་ཁ་ཅིག་ལས་ནི། ཞར་བ་ལོངས་ཤིག་ཅེས་ཟེར་བ་ལ་ཞེར་བ་མ་ཡིན་ན་ལྟུང་བྱེད་གཉིས་སུ་འགྱུར་ཏེ། ཤེས་བཞིན་དུ་བརྫུན་སྨྲ་བ་དང་མིའི་སྐྱོན་ནས་སྨྲ་བ་ལས་སོ། །དགེ་སློང་གིས་དགེ་སློང་མ་བྲམ་ཟེའི་རིགས་ཅན་མོ་ལ་ཁྱོད་ཀྱིས་འདྲེག་མཁན་གྱི་ལས་བྱས་སོ་ཞེས་སྨྲས་ན་ལྟུང་བྱེད་དང་ཉེས་བྱས་སུ་འགྱུར་ཏེ། ཤེས་བཞིན་དུ་བརྫུན་དུ་སྨྲ་བ་ལས་ལྟུང་བྱེད་དང་སྐྱོན་ནས་སྨྲ་བ་ལ་ཉེས་བྱས་སོ། །དགེ་སློང་མ་རྒྱལ་རིགས་ཀྱི་རིགས་ཅན་མོ་ལ་ཡང་དེ་བཞིན་ནོ་ཞེས་གསུངས་པ་དང༌། དགེ་སློང་བསྙེན་པར་མ་རྫོགས་པའི་གང་ཟག་དང་ལྷན་ཅིག་དགུང་
གསུམ་ཉལ་བ་ལ་ལྟུང་བྱེད་གཉིས་འབྱུང་བ་འགའ་མཆིས་སམ། ཡོད་དེ་ཞག་གཉིས་དགེ་ཚུལ་དང་ཉལ་བ། ཞག་གསུམ་པ་ལ་ཁྱིམ་པ་མོ་དང་ལྷན་ཅིག་ཉལ་བ་ལའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །དེའི་ཆ་ནི་དེར་གཏོགས་སོ་ཞེས་བྱ་བ་ནི་གང་ཞིག་ཁ་ན་མ་ཐོ་བ་ནི་དེའི་ཆ་ཞེས་བྱ་བ་ཤན་ནམ་ལྷག་མ་ནི་དེ་དང་གཞན་མ་ཡིན་ནོ། །མི་ཚངས་པར་སྤྱོད་པའི་ཆ་གང་ཞེ་ན། ཁུ་བ་འབྱིན་པ་དང༌། ལུས་ཀྱི་རེག་པ་དང༌། འཁྲིག་པ་དང་ལྡན་པ་སྨྲ་བ་དང༌། ཀུན་སྤྱོད་བསྔགས་པ་དང༌། སྨྱན་བྱེད་པ་དང༌། དགེ་སློང་མ་ཉེ་དུ་མ་ཡིན་པ་ལ་གོས་རྙིང་པ་འཁྲུར་འཇུག་པ་དང༌། ལེན་པ་དང་དེ་ལས་གཞན་པའི་གོས་ཀྱི་ལས་བྱེད་པ་དང༌། འདིས་བལ་རྨེལ་དུ་འཇུག་པ་དང༌། རིག་པའི་སྐྱེས་བུ་མེད་པར་ཚིག་དྲུག་གམ་ལྔ་ལས་ལྷག་པར་ཆོས་སྟོན་པ་དང༌། མ་བསྐོས་པར་གདམས་ངག་ལ་ སོགས་པ ་སྟོན་པ་བཅུ་དང༌། བཟའ་བ་ཟ་བའི་དུས་སུ་ཁྱིམ་དུ་འདུག་ཅིང་མི་གནས་པ་དང༌། ཁྱིམ་དུ་ཟ་བའི་ཕྱིར་འདུག་སྟེ་མི་གནས་པ་དང༌། དགེ་ཚུལ་དང༌། དགེ་ཚུལ་མ་ལ་བྱིན་པ་དང༌། ཁྱིམ་དུ་ལྷན་ཅིག་ཉལ་བ་དང༌། ལམ་དུ་འགྲོ་བ་དང༌། སྐྱེས་པ་མེད་པར་བུད་མེད་དང་ལྷན་ཅིག་གྲོང་དུ་འཇུག་པ་དང༌། ཉེ་དུ་མ་ཡིན་པའི་གྲོང་དུ་འགྲོ་བ་དང། དགེ་སློང་ལས་བླངས་ཏེ་ཟ་བ་དང༌། དགེ་སློང་མའི་མིང་གིས་ངེས་པ་དང་བཅས་པས་ཁྱིམ་དུ་འགྲོ་བ་དེས་བྱ་བ་ལ་པའོ། །སྔར་མ་གནང་བའི་སྟན་ལ་འདུག་པ་ལ་འདུག་པ་ལ་འདི་ཡིན་ནོ། །མ་བྱིན་པར་ལེན་པའི་ཆ་གང་ཡིན་ཞེ་ན། བྱིན་པ་ཕྲོགས་ཏེ་སྤྱོད་པ་དང༌། མ་གནང་བར་སྟན་ལ་འདུག་པ་དང༌། ཕྱིར་མ་བླངས་པར་སྤྱོད་པ་དང༌། སོ་སོར་བསྡུས་ནས་ལོངས་སྤྱོད་པ་དང༌། བསྔོས་པ་ལས་བསྒྱུར་བ་དང༌། སྐྲོད་པ་དང༌། སྦེད་པ་དང༌། རྐུན་མ་དང་ལྷན་ཅིག་ལམ་དུ་འགྲོ་བའོ། །མི་གསོད་པའི་ཆ་གང་ཞེ་ན། རྩོད་པ་དང་བཅས་པའི་གཞི་མི་གཏོང་བ་དང༌། ས་བོན་གྱི་ཚོགས་དང༌། སྐྱེ་བའི་ཚོགས་འཇིག་པ་དང༌། མཐོ་འཚམས་པ་དང༌། ཕྱིས་གནོན་བྱས་ནས་འདུག་པ་དང༌། བསྒོ་བ་བཅག་པ་དང༌། རྩ་བ་འབྱུང་བ་ལ་འདུག་པ་དང༌། སྲོག་ཆགས་དང་བཅས་པ་ལ་སྤྱོད་པ་དང༌། དམག་ལ་ལྟ་བ་དང༌། དམག་གི་ནང་ན་གནས་པ་དང༌། བཤམས་པ་
དཀྲུག་པ་དང༌། བརྡེག་པ་དང༌། གཟས་པ་དང༌། ཟས་གཅོད་དུ་འཇུག་པ་དང༌། དུད་འགྲོ་གསོད་པ་དང༌། འགྱོད་པ་སྐྱེད་པ་དང༌། ག་ག་ཚིལ་བྱེད་པ་དང༌། སྔས་པར་བྱེད་པ་དང༌། ས་བརྐོ་བའོ། །མིའི་ཆོས་བླ་མ་སྨྲ་བའི་ཆ་གང་ཞེ་ན། འདི་ལྟ་སྟེ་དཔེར་ན་ཕམ་པར་འགྱུར་བ་དང༌། དགེ་འདུན་ལྷག་མ་གཉིས་ཀྱིས་འདུན་པ་ལ་ སོགས་པ ་འགྲོ་བར་བརྗོད་པའི་ཚིག་སྟེ། ཇི་ལྟར་བརྩམས་པས་བཤེས་ངོར་བྱེད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། དགེ་འདུན་གྱི་དབྱེན་དང༌། བརྫུན་གྱི་ལྷག་མ་དང༌། མིའི་ཆོས་བླ་མ་བདེན་པར་སྨྲ་བའོ། །ཕམ་པར་འགྱུར་བས་སྐུར་པ་འདེབས་པའི་ཆ་གང་ཞེ་ན། དགེ་འདུན་ལྷག་མས་སྐུར་པ་འདེབས་པའོ། །དགེ་འདུན་གྱི་དབྱེན་བྱེད་པའི་ཆ་གང་ཞེ་ན། དགེ་སློང་ལ་ཕྲ་མ་བྱེད་པ་དང༌། སྐྱོ་སྡོགས་བྱེད་པ་དང༌། དད་པའི་ཕྱིར་བསྒྱུར་བ་དང༌། ལས་ལས་འདའ་བར་བྱེད་པ་དང༌། ལྟ་བར་གྱུར་པ་མི་འདོར་བ་དང༌། བསླབ་པ་ལ་མ་གུས་པ་དང། འདུས་ཤིང་ཟ་བ་དང༌། སྤངས་པའི་རྗེས་སུ་ཕྱོགས་པ་དང༌། ཚིག་མི་སྙན་པས་བསླབ་པ་ལ་ཁྱད་དུ་གསོད་པའོ། །གསོག་འཇོག་བྱས་པ་ཟ་བའི་ཆ་ནི་དགེ་སློང་གིས་བཙོས་པ་ཟ་བའི་མཐར་ཐུག་པའོ། །དེ་ལྟ་བས་ན་ཆའི་ངོ་བོ་ཉིད་ཅེས་བྱ་བ་ནི་མི་ཚངས་པར་སྤྱོད་པ་སྤྱད་པའི་ཕྱིར་འགྲོ་བ་གང་ཡིན་པ་དེ་ནི་ཉེས་བྱས་སོ། །བདག་ཉིད་ཀྱི་ཀུན་དུ་སྤྱོད་པ་བསྔགས་པ་གང་ཡིན་པ་དེ་ནི་དགེ་འདུན་ལྷག་མའོ། །གནས་ངན་ལེན་སྨྲ་བ་གང་ཡིན་པ་དེ་ནི་གཞན་མ་ཡིན་ནོ། །བདག་ཉིད་ཀྱི་དོན་དུ་བུད་མེད་ལ་གཞོལ་བ་གང་ཡིན་པ་དེ་ནི་ཕམ་པར་འགྱུར་བར་གཏོགས་པའི་སྦོམ་པོའོ། །ཀུན་དུ་སྤྱོད་པ་བསྔགས་པའི་དགེ་འདུན་ལྷག་མར་གཏོགས་པའི་ཉེས་བྱས་སོ། །འཁྱུད་པ་དང་འོ་བྱེད་པ་དང་ཉལ་བ་དང་མཚམས་ཀྱི་ཕྱི་རོལ་དུ་འགྱུར་བ་དག་གང་ཡིན་པ་དེ་ནི་ལུས་ཀྱི་རེག་པའི་བདག་ཉིད་གཞན་ཡིན་ནོ། །མཚན་གྱི་ནང་དུ་རེག་པ་ལ་ཉལ་ཏེ་རྨ་ཉམས་པ་མ་ཡིན་པ་གང་ཡིན་པ་དེ་ནི་ཕམ་པར་འགྱུར་རོ། །གལ་ཏེ་ཉམས་པ་ཡིན་ན་གཞན་དང་ལྷན་ཅིག་རྩོད་པ་ན་མ་བྱུང་བའི་མདུན་རོལ་དུ་ནི་སྦོམ་པོའོ། །བྱུང་ན་ནི་དགེ་འདུན་ལྷག་མའོ། །མདོ་འདིས་ནི་དེའི་ཆ་མ་བརྗོད་པ་ཅུང་ཟད་ཀྱང་མ་བརྗོད་ཀྱི་ཧ་ཅང་ཐལ་བ་དེ་དམིགས་ཀྱིས་བསལ་བར་བྱེད་དེ་ཁུ་བ་འབྱིན་པ་ལ་ སོགས་པ ་མི་ཚངས་པར་སྤྱོད་པ་སྤྱད་པར་གཏོགས་པའི་སྦོམ་པོ་ལ་
སོགས་པ ་ལ་ཁ་ན་མ་ཐོ་བ་གཞན་དུ་ཐལ་བར་འགྱུར་བ་སྟེ། དེའི་ཆ་ནི་དར་གཏོགས་སོ་ཞེས་བྱ་བའི་མདོ་འདིས་སྦོམ་པོ་ལ་ སོགས་པ ་ཁ་ན་མ་ཐོ་བ་གཞན་དུ་འགྱུར་བ་དམིགས་ཀྱིས་བསལ་བ་འདི་བྱས་པ་ཡིན་ནོ། །ཕྱུང་བ་ཐམས་ཅད་ལ་མཐའ་ཉིད་མ་གཏོགས་པ་ནི་དགེ་འདུན་ལྷག་མའོ་ཞེས་བྱ་བ་ནི་དཔེར་ན་སྤྱད་མི་བཟོད་པའི་བུད་མེད་དང་ལྷན་ཅིག་ཉམས་པར་བྱེད་པ་དང༌། མགོ་བཅད་པའི་ཁ་ལ་ སོགས་པ ་དག་ཏུ་ཉམས་པར་བྱེད་པ་ནི་སྦོམ་པོར་འགྱུར་རོ་ཞེས་བྱ་བ་ལ་ སོགས་པ ་ཞུ་བ་ཁ་ཅིག་དང་གཞན་དག་ལས་ཁུ་བ་འབྱིན་པའི་རྣམ་པ་གསུངས་པ་དག་གམ། དེ་ཐམས་ཅད་ལ་ཐ་མ་ཉིད་མེད་པ་ལ་ཁུ་བ་འབྱིན་པའི་འདུན་པས་ཁུ་བ་འབྱིན་པ་ལ་ཕམ་པ་ཉིད་མ་ཡིན་པ་ཐམས་ཅད་དུ་ནི་ཁུ་བ་འབྱིན་པའི་དགེ་འདུན་ལྷག་མར་ཤེས་པར་བྱའོ། །མདོ་འདི་ནི་སྔར་དེའི་ཆ་ནི་དེར་གཏོགས་སོ་ཞེས་བསྟན་པ་དེའི་སྤྲོས་པ་འདི་ཡིན་ནོ། །འདིར་གང་དག་དགེ་འདུན་གྱི་ལྷག་མར་མི་འགྱུར་ཏེ། མི་ཚངས་པར་སྤྱོད་པའི་སྐབས་ཉིད་ཀྱི་ཕྱིར་འདི་སྙམ་དུ་སེམས་པ་དེའི་བསམ་པ་བཟློག་པའི་ཕྱིར་སྨོས་སོ། །སྦྱོར་བ་གང་ལ་ལྟུང་བ་རྣམ་པར་མ་བཞག་པ་དེ་ལ་ན་སྨད་པའི་ལྟུང་བ་རྣམ་པར་གཞག་པ་ཡང་ཡོད་དེ། གང་དུ་རྣམ་པར་གཞག་པ་དེར་ལྟུང་བྱེད་དོ། །མི་ཚངས་པར་སྤྱོད་པའི་བསམ་པས་བུད་མེད་ཀྱི་ཚོགས་ལ་རེག་པ་ལ་ནི་དགེ་འདུན་ལྷག་མ་ཡིན་ཏེ། སྦྱོར་བ་དེར་གཏོགས་པ་གང་ཞེ་ན། གང་ནས་བརྩམས་ཏེ་དེ་དང་འདྲ་བའི་ཁུ་བ་འབྱིན་པའི་མཐར་ཐུག་པ་ཉིད་དེ་ནས་བརྩམས་ཏེ། དགེ་འདུན་ལྷག་མར་འགྱུར་བ་དང༌། སྦྱོར་བ་སྔ་མ་ནི་ཕམ་པར་འགྱུར་བའི་སྦྱོར་བ་ཞེས་བྱའོ། །དེ་ལྟར་དེ་ལ་ཉེས་པ་སྦོམ་པོ་གཉིས་སུ་འགྱུར་ཏེ། ཕམ་པར་འགྱུར་བ་དང་དགེ་འདུན་ལྷག་མར་འགྱུར་བའི་ཞེས་བྱ་བར་རིག་པར་བྱའོ། །འདིར་གཞུང་ཁ་ཅིག་ལས། གཞི་ཐམས་ཅད་ལ་འདི་འབྱུང་བ་ཡིན་ཏེ། བུད་མེད་ཇི་ལྟ་བུ་དང་མི་ཚངས་པར་སྤྱོད་པར་བགྱིད་ན་མཐར་འགྱུར་ལགས། ཡན་ལག་ཐམས་ཅད་དང་དུ་བླང་དུ་རུང་བ་གང་ཡིན་པ་དང་ངོ༌། །དེ་བཞིན་དུ་དུད་འགྲོའི་སྐྱེ་གནས་ལ་ཡང་བརྗོད་པར་བྱའོ། །གལ་ཏེ་དང་དུ་བླང་དུ་མི་རུང་ན་དེ་དང་ལྷན་ཅིག་ཉམས་པར་བྱེད་པ་དེ་ལ་ཁུ་བ་འབྱུང་ན་ནི་དགེ་འདུན་ལྷག་མར་འགྱུར་རོ། །གལ་ཏེ་ཁུ་བ་མ་ཕྱུང་ན་ནི་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །
གཞུང་གཞན་ལས་ཀྱང་རེ་ཞིག་ཇི་ཙམ་གྱིས་ན་སྦུབས་ཉམས་པར་བརྗོད་པར་བགྱིད། གང་གི་ཕྱིར་དེའི་རྨའི་ཐན་ཀོར་ཉམས་པར་འགྱུར་ན་སྟེ། དེ་ཉམས་པར་བྱེད་ན་ཉེས་པ་སྦོམ་པོར་འགྱུར་རོ། །ཁུ་བ་འབྱིན་པ་ན་ནི་དགེ་འདུན་ལྷག་མར་འགྱུར་རོ་ཞེས་གསུངས་པ་ཡིན་ནོ། །བྱ་བ་དུ་མའི་འབྲས་བུས་ལྟུང་བ་རྣམ་པར་མི་གཞག་གོ་ཞེས་བྱ་བ་ནི་བྱ་བ་འབྲས་བུ་ཐ་དད་པས་བར་དུ་ཆོད་པའི་འབྲས་བུ་ཐ་དད་པ་གྲུབ་པ་དུ་མ་དག་གིས་འབྲས་བུ་གཅིག་ཏུ་བསྡུས་པས་དངོས་གཞིའི་ལྟུང་བ་རྣམ་པར་མི་གཞག་སྟེ། དེ་དག་གི་འབྲས་བུ་ནི་ཐ་དད་པ་ཉིད་ཡིན་ནོ། །དཔེར་ན་ཉུང་དུ་ཉུང་དུར་བརྐུས་པ་གཅིག་ཏུ་བསྡོམས་པས་མ་ཤ་ཀ་ལྔ་ལ་ སོགས་པའི་ཚད་དུ་ཆོག་པ ་གང་ཡིན་པ་དེས་ཕམ་པར་མི་འགྱུར་བ་ལྟ་བུ་དང༌། ཁང་པ་ཆུང་ངུ་མ་བཞི་བསྡོམས་ནས་ཚད་ལས་ལྷག་པར་གྱུར་པ་གང་ཡིན་པ་དེས་དགེ་འདུན་ལྷག་མར་མི་འགྱུར་བ་ལྟ་བུ་དང༌། དེ་བཞིན་དུ་གོས་ཀྱི་དུམ་བུ་ཚད་དུ་མི་ཆོག་པ་དུ་མ་ཚང་བར་བཅངས་ཏེ། དུས་ལས་འདས་པར་སྒྲུབ་པ་རྣམས་ལ་སྤང་བའི་ལྟུང་བྱེད་དུ་མི་འགྱུར་བ་ལྟ་བུ་དང༌། ཉུང་དུ་ཉུང་དུ་ནས་རྫོགས་པར་གྱུར་པའི་དོན་རྣམས་ལ་དེ་བཞིན་དུ་ལམ་ན་བལ་ཐོགས་པ་ཡང་ཉིན་རེ་ཞིང་ཅུང་ཟད་ཅུང་ཟད་དུ་ཁྱེར་བའི་ལམ་སྤྱིར་བསྡོམས་པས་རྒྱང་གྲགས་ལས་འདའ་བའོ། །དུས་གཞན་དང་གཞན་དུ་ཚིག་རེ་རེ་སྨྲས་པའི་ཚིག་རྣམས་སྤྱིར་བསྡོམས་པས་ཚིག་ལྔ་འམ་དྲུག་ལས་འདས་པར་ཆོས་སྟོན་པ་ལྟུང་བྱེད་དུ་མི་འགྱུར་བ་ལྟ་བུའོ། །འདིར་གཞུང་ནི་མ་བྱིན་པར་ལེན་པ་ལས། བཅོམ་ལྡན་འདས་ཀྱིས་དགེ་སློང་གིས་མ་ཤ་ཀ་ལྔ་བརྐུས་ནས་མཐར་འགྱུར་རོ་ཞེས་གསུངས་པ་དེ་ལ། བཙུན་པ་རེ་ཞིག་དགེ་སློང་གིས་བརྐུས་པ་དེ་ལ་མ་ཤ་ཀ་བརྒྱ་འམ་སྟོང་སྙེད་བརྐུས་ཀྱང་མཐར་མི་འགྱུར་བ་མཆིས་སམ། ཡོད་དེ་མ་ཤ་ཀ་བ་ནི་བཞི་རྐུ་ཞིང་ནམ་ཡང་ལྔ་མ་ཡིན་ཏེ། སྦྱོར་བ་ལ་ནི་ཉེས་པ་སྦོམ་པོ་རེ་རེར་འགྱུར་རོ་ཞེས་གསུངས་པ་ཡིན་ནོ། །བྱེ་བྲག་མེད་པའི་ཕྱིར་ཐམས་ཅད་ཀྱི་དབང་དུ་ཉེ་བར་སྦྱར་རོ། །ཕྱེད་བྱས་པ་ལ་བྱེད་པ་ནི་ཕྱེད་ཉིད་དོ་ཞེས་བྱ་བ་ལ་འདིར་ཕྱེད་བྱས་པ་ལ་ཞེས་བྱ་བའི་ཕྱེད་ཀྱི་སྒྲ་ནི་ཡན་ལག་གི་ཚིག་སྟེ། ལས་བརྩམས་པ་ཕྱེད་བྱས་པ་དེ་ལ་བྱེད་པ་ཞེས་བྱ་བ་ལ་ལྷག་མ་སྒྲུབ་པར་བྱེད་པ་དེ་ལ་ཕྱེད་ཉིད་དོ། །དེ་ལས་དེའི་སྒྲུབ་པ་ཕྱེད་བྱས་པ་ཉིད་ཡིན་ནོ། །བྱ་བ་མ་བརྩམས་པ་ལ་ཉེས་པ་གང་ཡིན་པ་དེའི་རྗེས་ལ་དེའི་ཚིག་ཅེས་བྱ་བ་འདི་ལ་དེ་སྒྲུབ་པར་བྱེད་པའོ། །དཔེར་ན་གོས་
རྙིངས་པ་ཅུང་ཟད་བཅགས་པ་ཞིག་དགེ་སློང་མ་ཉེ་དུ་མ་ཡིན་པ་ལ་འཆག་ཏུ་བཅོལ་ན་ཉེས་བྱས་སུ་འགྱུར་བ་ལྟ་བུ་དང༌། ལུག་གི་བལ་ཅུང་ཟད་བཀྲུས་སམ་ཕྱེད་བཀུར་བར་བྱས་པ་དག་རྨེལ་དུ་བཅོལ་ན་ཉེས་བྱས་སུ་འགྱུར་བ་ལྟ་བུ་དང༌། འཁྲུར་བཅོལ་ཏམ་འཚེད་དུ་བཅོལ་བ་འདི་གཉིས་ཀ་དང༌། བཀྲུས་པ་དང་བཙོས་པ་གཉིས་ཀ་དག་ལ་རང་བཞིན་རྣམ་པར་འགྱུར་བ་སྲིན་བལ་རྙིད་པ་དང་ལུག་གི་བལ་རྙིང་པ་དང༌། ལུག་གི་བལ་རྙིང་པ་ནག་པོ་ལས་བྱས་ན་ཉེས་བྱས་སུ་འགྱུར་བ་ལྟ་བུའོ། །ཁ་ན་མ་ཐོ་བ་སྨད་པ་དག་གིས་ཆ་ཉིད་ནི་ན་སྨད་པ་ཉིད་ཡིན་ནོ་ཞེས་བྱ་བ་ནི་དེ་ལྟ་བུའི་ཁ་ན་མ་ཐོ་བ་དག་གི་ཆ་ནི་ན་སྨད་པ་ཉིད་ཡིན་ཏེ། ན་སྨད་པའི་ཆར་གྱུར་པ་ཉིད་དུ་བལྟ་བར་བྱའོ། །དཔེར་ན་ཉེས་པ་སྦོམ་པོ་དང༌། ལྟུང་བྱེད་དང༌། སོ་སོར་བཤགས་པར་བྱ་བ་དང་ཉེས་བྱས་རྣམས་ཀྱིས་སྐུར་བ་བཏབ་པ་ལས་ཉེས་བྱས་སུ་འགྱུར་བ་ལྟ་བུའོ། །མཚམས་མེད་པ་གསུམ་པོ་ཕ་བསད་པ་དང༌། མ་བསད་པ་དང༌། དགྲ་བཅོམ་པ་བསད་པ་རྣམས་ཀྱིས་སྐུར་པ་འདེབས་པ་གང་ཡིན་པ་དེ་ལ་ནི་དགེ་འདུན་ལྷག་མར་འགྱུར་རོ། །དགེ་འདུན་གྱི་དབྱེན་བྱེད་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བའི་མཚམས་མེད་པ་གཉིས་པོ་དག་གིས་སྐུར་པ་འདེབས་པ་དེ་ལ་སྦོམ་པོའི་ལྟུང་བར་མི་འགྱུར་ཏེ། དེ་ལ་ནི་ཉེས་བྱས་ཉིད་ཡིན་ནོ། །ཐམས་ཅད་ལ་ཐེ་ཚོམ་ཟ་བས་ཞུགས་པ་ནི་བསམ་པ་དང་བཅས་པ་ཡིན་ནོ་ཞེས་བྱ་བ་ནི་ཐེ་ཚོམ་ཟ་བཞིན་དུ་འདི་ཡིན་ནམ་འོན་ཏེ་མ་ཡིན། འདི་བདག་གི་ཕ་ཡིན་ནམ་འོན་ཏེ་མ་ཡིན། འདི་དགྲ་བཅོམ་པ་ཡིན་ནམ་འོན་ཏེ་མ་ཡིན། འདི་དེ་ཡིན་ནམ་འོན་ཏེ་མ་ཡིན་ཞེས་བྱ་བ་ལ་ སོགས་པར་གཞི་ཐམས་ཅད་ལ་ཞུགས་པ ་གང་ཡིན་པ་དེ་ནི་བསམ་པ་དང་བཅས་པས་གནས་པ་ཡིན་ནོ། །གང་ཞིག་ཡང་དེའི་མདུན་དུ་སྟེ། ཐམས་ཅད་དུ་མ་ཡིན་ནོ། །དེ་ལ་ཡང་དེའི་ཚེ་ན་གནས་པ་ཞེས་བྱ་བའི་དོན་ཏོ། །བསམ་པ་དང་བཅས་པ་ནི་དགོས་པ་སྟེ་ངེས་པའི་བསམ་པའོ། །ངེས་པར་འདི་ལ་དེར་ཡང་ཉེ་བར་མི་སྡུད་པ་ནི། གང་ཡང་དེ་ཡིན་ཡང་རུང་མ་ཡིན་ཡང་རུང་གིས་སྙམ་པའི་བསམ་པས་གནས་པ་སྟེ། དེ་འདི་ཡིན་ནམ་འོན་ཏེ་མ་ཡིན་སྙམ་ནས་གསོད་པ་ལ་ཇི་ལྟར་གསོད་པར་བྱེད་པ་ལ་ལྟུང་བྱེད་དོ། །འདི་ནི་མི་ཁོ་ན་སྟེ། འདི་ནི་མི་མ་ཡིན་སྙམ་པས་གསོད་པ་ལ་ཕམ་པ་ཁོ་ན་ཡིན་ཏེ། འདི་ནི་མི་ཡིན་ཏེ་མི་མ་ཡིན་པ་མ་ཡིན་སྙམ་ནས། འདི་ནི་དགྲ་
བཅོམ་པ་སྟེ། དགྲ་བཅོམ་པ་མ་ཡིན་པ་ནི་མ་ཡིན་ནོ་སྙམ་པས་མ་ལ་ སོགས་པ ་གསོད་པ་ལ་མཚམས་མེད་པའི་ལས་ཀྱང་ངོ༌། །གང་ལ་བདག་ཆགས་པ་དེ་འདི་ཡིན་ནམ་འོན་ཏེ་མ་ཡིན། འདི་ནི་བུད་མེད་ཡིན་ནམ་འོན་ཏེ་མ་ཡིན་སྙམ་དུ་དངོས་པོ་ཇི་ལྟ་བར་འདུ་ཤེས་པར་མ་གྱུར་པའོ། །སྦྱོར་བ་ལ་ནི་འདུ་ཤེས་ཡན་ལག་ཡིན་ནོ་ཞེས་བྱ་བ་ནི་སྦྱོར་བ་ལ་འདུ་ཤེས་ཡན་ལག་ཡིན་གྱི་དོན་ཉིད་མ་ཡིན་ཏེ། དཔེར་ན་དུད་འགྲོ་ནི་མིར་འདུ་ཤེས་པས་བསད་ན་དེའི་དོན་གྱི་སྦྱོར་བ་ལ་སྦོམ་པོ་ཉིད་དུ་འགྱུར་བ་དང༌། མི་མ་ཡིན་པ་ལ་མིར་འདུ་ཤེས་པའི་ཕྱིར་དེ་ཉིད་ཀྱིས་བསད་ན་སྦྱོར་བ་སྦོམ་པོར་འགྱུར་བ་དང། དེ་མ་བྱིན་པར་ལེན་པ་དང༌། ཆོས་བླ་མ་དང་ལུས་ཀྱི་རེག་པ་ལ་ སོགས་པ ་དག་ལ་ཡང་དེ་བཞིན་དུ་ཅི་རིགས་པར་སྦྱར་རོ། །བསམས་པ་ནི་དེ་ཉིད་དོ་ཞེས་བྱ་བ་ནི་སེམས་ཅན་ནམ་རྫས་ལ་བསམས་ཏེ། ཞུགས་གང་ཡིན་པ་ལ་ནི་བསམས་པའི་དོན་གྱིས་རང་གི་ངོ་བོ་ཉིད་ཡན་ལག་དེ་ཉིད་དོ། །གལ་ཏེ་དོན་དེ་ཉིད་ཡིན་ན་གང་ལ་བརྩམས་ཏེ། འཇུག་ཅིང་བསམས་ཏེ་ཞུགས་པའི་ཡན་ལག་དེ་ཉིད་ཡན་ལག་ཡིན་ནམ། དེའི་ཚེ་དངོས་གཞིའི་ལྟུང་བ་འགྲུབ་པར་འགྱུར་རོ། །འདི་ལྟ་སྟེ་དཔེར་ན་གཉིས་འཁོད་པ་ལས་གཅིག་གསད་པར་བྱའོ་སྙམ་པ་ལས་ཅིག་ཤོས་བསད་པ་དང༌། དགྲ་བཅོམ་པ་གསད་པར་བྱའོ་སྙམ་པ་ལས་དགྲ་བཅོམ་པ་མ་ཡིན་པ་བསད་པ་དང༌། མ་ཞེས་བྱ་བ་ཕ་མ་གཉིས་དང་དགྲ་བཅོམ་པ་ལ་ སོགས་པ ་ཞེས་བྱ་བ་དགྲ་བཅོམ་པ་ལ་ སོགས་པ ་ལའོ། །མི་གསད་པར་བྱའོ་སྙམ་པ་ལས་མི་མ་ཡིན་པ་བསད་པ་དང༌། མི་མ་ཡིན་པ་གསད་པར་བྱའོ་སྙམ་པ་ལས་མི་བསད་པ་ལ་ སོགས་པ ་ནི་སྦྱོར་བའི་ལྟུང་བ་ཁོ་ན་ཡིན་གྱི་དངོས་གཞིར་མི་འགྱུར་རོ། །དེ་བཞིན་དུ་དུད་འགྲོ་བསད་དོ་སྙམ་པ་ལས་མི་བསད་ན་ཡང་ཉེས་བྱས་སོ། །རྩིག་པ་དང༌། ཀ་བ་དང་ཤིང་ལྗོན་པ་ལ་ སོགས་པ ་སེམས་མེད་པ་གཅད་དོ་སྙམ་པ་ལས། མ་ལ་ སོགས་པ ་བསད་ན་ཡང་སྦྱོར་བའི་ཉེས་བྱས་སོ། །ཀ་བ་ལ་བརྡེག་པར་མི་བྱ་ཞེས་བྱ་བའི་མཚན་ཉིད་དེར་གཏོགས་པའི་སྦྱོར་བའི་ཉེས་བྱས་སོ། །མི་ལ་ སོགས་པ ་བསད་པ་ལ་ནི་སྦྱོར་བར་ཡང་མི་འགྱུར་ལ། དངོས་གཞིར་ཡང་མི་འགྱུར་རོ། །མི་ཚངས་པར་སྤྱོད་པ་དང་ཁུ་བ་འབྱིན་པ་གཉིས་ལ་ནི་དེར་མ་ཟད་དོ་ཞེས་བྱ་བ་ནི། གཉིས་པོ་དེ་དག་ལ་ནི་བསམ་པ་འབའ་ཞིག་ཡན་ལག་མ་ཡིན་པར་མ་ཟད་
ཀྱི། བསམ་པས་མ་ཡིན་པའི་དོན་གཞན་བུད་མེད་ལ་ སོགས་པ ་བསྟེན་པ་ལ་ཡང་ཕམ་པའོ། །བསམ་པ་མ་ཡིན་པའི་བྲམ་ཟེའི་བུ་མོས་ཡན་ལག་ལ་དྲུད་པས་ཁུ་བ་བྱུང་བ་ལ་ཡང་དགེ་འདུན་ལྷག་མར་འགྱུར་ལ། སེམས་ཅན་དུ་བགྲང་བ་མ་ཡིན་པ་ལ་ཡང་སྦོམ་པོར་འགྱུར་རོ། །རེག་པ་བདག་གིར་བྱེད་པ་འདི་གཉིས་པ་དེ་དང་ལྡན་པ་ཉིད་ཀྱི་ཕྱིར་རོ། །མི་བདེན་པ་ལ་ནི་ཉན་པ་པོ་ཡང་ངོ་ཞེས་བྱ་བ་ལ་དེར་མ་ཟད་དོ་ཞེས་བྱ་བའི་རྗེས་བསྙག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མི་བདེན་པ་ལ་ཞེས་བརྫུན་དུ་སྨྲ་བའི་ཡུལ་ཡང་བསམས་པ་ཡན་ལག་ཡིན་པར་མ་ཟད་ཀྱི། མ་བསམས་པ་ཡང་ཡན་ལག་ཡིན་ཏེ། ཉན་བ་པོ་མ་བསམས་པ་གཞན་ལ་ཡང་མི་ཆོས་བླ་མར་འགྱུར་བའི་བརྫུན་དུ་སྨྲས་ན་དེ་ཡང་ཕ་མ་པར་འགྱུར་ལ། གཞན་དག་ལ་ནི་ལྟུང་བྱེད་དུ་འགྱུར་རོ། །ཡན་ལག་ཐམས་ཅད་དང་དུ་བླང་དུ་རུང་བདག་ནི་བསྟེན་པའི་ཕྱིར་མཐུ་དང་ལྡན་པ་ཉིད་ཡིན་ནོ་ཞེས་བྱ་བ་ནི་མི་ཚངས་པར་སྤྱོད་པ་དང་ལུས་ཀྱི་རེག་ པ་ལ་སོགས ་པའི་ཡུལ་ལ་དེ་བསྟེན་པའི་ཕྱིར་དང་མཐུ་དང་ལྡན་པ་ཉིད་ཡིན་པར་ཁས་བླངས་པ་དེ་ནི་དེའི་ངོ་བོའོ། །འོག་མ་དག་ལ་ནི་གཞན་ལ་ནི་སྨད་པ་ཉིད་དོ་ཞེས་བྱ་བ་ནི་འདི་མན་ཆད་ནས་འོག་གི་མདོ་ལས་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་ཉིད་ཡིན་ནོ་ཞེས་བྱ་བ་ལ་ སོགས་པའི་ཕྱིར་བསྟན་པ ་རྫོགས་པའི་བར་གྱི་མདོ་འོག་མ་དག་ལས་དེ་གཞན་ལ་ན་སྨད་པ་ཉིད་དོ། །དུ་མ་མ་ཚང་བ་ལ་ནི་དེ་བས་ཀྱང་ངོ་ཞེས་བྱ་བ་ནི་དེ་ལས་ཀྱང་མ་ཚང་བས་ཡན་ལག་ཏུ་མ་ཚང་བ་ལ་ནི་ན་སྨད་པ་དེ་བས་ཀྱང་ན་སྨད་དོ། །འདི་ལྟ་སྟེ་དཔེར་ན་ལུས་ཀྱི་རེག་པ་དང༌། ག་ག་ཚིལ་བྱེད་པའི་ཁ་ན་མ་ཐོ་བ་ཉིད་གཉིས་ལ་རེག་པར་བྱེད་པ་དང༌། རེག་པར་བྱེད་པའི་ལུས་གཉིས་ཀ་ལ་ཡན་ལག་ཡིན་པས་རྣམ་པར་འགྱུར་བ་གཅིག་པ་འདི་ལ་དེ་མ་ཐག་པའི་ཚིག་གོ །དེ་མ་ཐག་པ་དེ་ལས་གཞན་ཞེས་བྱ་བ་འདི་དང་སྔ་མ་བྱེད་པའོ། །རྣམ་པར་འགྱུར་བ་གཉིས་ཀ་ལ་ཡང་འདིས་ན་སྨད་པར་བྱས་པའོ། །མི་ལ་དུད་འགྲོ་ཡང་ངོ་ཞེས་བྱ་བ་ནི་མིའི་གནས་སུ་དུད་འགྲོ་ཞེས་སྨོས་པ་ལ་ཡང་ན་སྨད་པ་དེ་སྦྱོར་རོ། །དུད་འགྲོ་དང་འབྲེལ་པ་ལ་ཉེས་བྱས་སུ་འགྱུར་རོ། །འདི་སྨྲ་བ་དང་བདག་ཉིད་ཀྱི་ཀུན་དུ་སྤྱོད་པ་བསྔགས་པ་ལ་ཉེས་བྱས་སུ་འགྱུར་གྱི། ཇི་ལྟར་མི་མ་ཡིན་པ་མཐུ་མེད་པ་དང་ལྷན་ཅིག་ཏུ་ལུས་ཀྱི་རེག་པ་ལ་ སོགས་པ ་བྱེད་པ་ལ་ན་སྨད་དེ། སྦོམ་པོར་
འགྱུར་བ་ལྟ་བུ་མ་ཡིན་ཏེ། དེ་བས་ཀྱང་ན་སྨད་པ་ཉིད་ཡིན་པའོ། །དེ་བཞིན་དུ་རྫུ་འཕྲུལ་གྱི་ཆོས་ཅན་ཉིད་མ་ཡིན་པ་ནི་རེག་པ་མ་ཡིན་པའི་ཡན་ལག་ཡིན་ནོ་ཞེས་བྱ་བ་ནི་འདི་བསྟེན་པ་ལ་དེ་ནི་རེག་པ་མ་ཡིན་པའི་ཡན་ལག་ཡིན་ནོ། །འདིར་གཞུང་ནི། འདུལ་བྱེད་དག་ལས་འདི་ནི་དེའི་རིམ་པ་ཞེས་བྱ་བ་འདིས་ནི་འདིར་བསྡུས་པའོ། །སྨྲ་བའི་སྐབས་ནས་རྫུ་འཕྲུལ་གྱིས་རྣམ་པར་འཕྲུལ་པའི་ཆོས་ཅན་མོ་ལ་སྨྲས་ན་སྦོམ་པོར་འགྱུར་རོ། །རྫུ་འཕྲུལ་གྱིས་རྣམ་པར་འཕྲུལ་བའི་ཆོས་ཅན་མོ་མ་ཡིན་པས་སྨྲ་ན་དགེ་འདུན་ལྷག་མའོ་ཞེས་གསུངས་པ་ཡིན་ནོ། །དེ་ལ་དང་པོ་རྫུ་འཕྲུལ་རྣམ་པར་འཕྲུལ་པའི་ཆོས་ཅན་ལ་མེད་པས་ན་སྨད་པ་འདི་ཤེས་སོ་ཞེས་བྱ་བ་རྣམ་པར་གནས་པ་ཡིན་ནོ། །དེ་བས་ན་གཅིག་ལ་རེག་པས་འདིར་རེག་པ་སྤང་བ་ཉིད་ཀྱི་ཕྱིར་ཆོས་འདི་ལ་འཇུག་པའི་སྦྱོར་བ་འདི་གཞན་འགའ་ཞིག་བསྟེན་པ་དང་འབྲེལ་པ་ལ་ནི་མ་ཡིན་ནོ་ཞེས་བྱ་བ་ཐམས་ཅད་དུ་འདུ་ཤེས་པའོ། །སྨྲ་བ་ལ་ སོགས་པ ་རྣམས་ལ་རྫུ་འཕྲུལ་གྱིས་རྣམ་པར་འཕྲུལ་པའི་ཆོས་ཅན་ལ་ནི་སྦོམ་པོར་འགྱུར་རོ། །རེག་པ་ལ་ནི་དགེ་འདུན་ལྷག་མ་ཁོ་ནར་འགྱུར་རོ། །རེག་པར་བྱ་བ་ཉིད་ནི་མ་ཉམས་པའོ་ཞེས་བྱ་བ་ནི་བསྟེན་པར་བྱ་བའི་ལུས་ཞེས་བྱ་བར་སྦྱར་རོ། །འདིར་ལུས་ཀྱི་རེག་པའི་བདེ་བ་ཉམས་སུ་མྱོང་བ་གཙོ་བོ་ཡིན་པའི་ཕྱིར་རོའི་རྣམ་པར་གཞག་ པ་འདིའོ། །འདིར་དཔེར་ན་རྨ་དང་ནད་ལ་སོགས ་པས་ཉམས་པས་མཚན་མི་མཐུན་པའི་ཡན་ལག་གིས་ལུས་ལ་རེག་ན་སྦོམ་པོར་འགྱུར་རོ། །ཤུ་བ་དང་གཡན་པ་ཅན་དང་ཁྱི་རྔོ་ཅན་གྱིས་རེག་ན་ཡང་དེ་བཞིན་དུ་སྦོམ་པོའོ། །བདག་ཉིད་ཀྱི་ལུས་དེ་ལྟར་འགྱུར་ན་ནི་ཉེས་བྱས་སོ། །རྣམ་པར་བསྔོས་པ་ལ་འཁྱུད་པ་ལ་ནི་སྦོམ་པོའོ། །དེ་བཞིན་དུ་རྣམ་པར་རངས་པ་མོ་དང༌། རྣམ་པར་འབུས་གཞིག་པ་མོ་དང༌། རྣམ་པར་བམ་པ་མོ་དང༌། རྣམ་པར་ཟོས་པ་མོ་དང༌། རྣམ་པར་དམར་བ་མོ་དང༌། རྣམ་པར་འཐོར་བ་མོ་ནས་མི་ཚངས་པར་སྤྱོད་པའི་ཕམ་པར་འགྱུར་བ་འབྱུང་བ་དེ་ཙམ་གྱི་བར་དུ་འདིར་དམ་དུམ་དུ་འཐོར་བ་ཉིད་ཡིན་པ་ཁས་བླངས་པར་རིགས་སོ། །མཐུ་དང་ལྡན་པ་ཉིད་ཡན་ལག་ཉིད་ཡིན་པ་དེ་བས་ན་འདིར་རོ་ཉིད་ལ་ནི་སྨད་པ་མེད་པའི་ཕྱིར། དེས་ན་རྣམ་པར་བསྔོས་པ་ལ་ སོགས་པ ་དག་ལ་སྦོམ་པོར་གསུངས་སོ། །ག་ག་ཚིལ་བྱེད་པ་ལ་ཡང་ངོ་ཞེས་བྱ་བ་
ནི། སོར་མོས་ག་ག་ཚིལ་བྱེད་པ་ལ་ཡང་རེག་པར་བྱ་བ་ལ་ཡན་ལག་ཉིད་ནི་མ་ཉམས་པའོ་ཞེས་བྱ་བའི་རྗེས་སྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདི་ཡང་འདི་ལྟ་བུའི་ཡན་ལག་རྣམས་ལ་ག་ག་ཚིལ་བྱེད་པ་ལ་ནི་ན་སྨད་པ་ཉིད་དོ། །གཉིས་ཀའི་ལུས་ཇི་སྙེད་བསྟན་པ་དེ་ལྟ་བུ་ཉིད་ལ་ཉམས་པ་ལ་ སོགས་པ ་རྣམ་པར་གྱུར་པ་ལ་འདིར་དོན་ཉིད་ཀྱི་ཕྱིར། དེ་ལྟ་བུའི་རེག་པར་བྱ་བ་ལ་ཡོངས་སུ་མ་རྫོགས་པ་གྲུབ་པ་ལ་དེ་ལྟ་བུའི་རེག་པར་བྱ་བ་ལས་ཀྱང་གྲུབ་པའོ། །སེན་མོ་དང་སོ་དང་ཤ་མེད་པའི་རུས་པ་དང་སྤུ་དག་ནི་གཞན་དང་ལྡན་པ་ཉིད་དོ་ཞེས་བྱ་བ་ནི་བསྟན་པ་དང་ག་ག་ཚིལ་བྱེད་པ་གཉིས་པོ་འདི་ནི་རྣམ་པར་འགྱུར་བ་ཉིད་ཡིན་ནོ། །སེན་མོ་དང་སོ་དང་ཤ་མེད་པའི་རུས་པ་དང་ཀེང་རུས་སུ་གྱུར་པ་གཞན་དང༌། སྤུ་རྣམས་ལ་ཡང་ཡན་ལག་གཞན་གྱིས་རེག་པ་དང༌། ག་ག་ཚིལ་བྱེད་པ་དག་ལ་ནི་གོ་རིམས་བཞིན་དུ་སྦོམ་པོ་དང་ཉེས་བྱས་སུ་འགྱུར་རོ། །འདི་རྣམས་ཀྱིས་ཀྱང་ཡན་ལག་གཞན་ལ་སེན་མོ་ལ་ སོགས་པ ་རྣམས་ལ་རེག་པ་དང་ག་ག་ཚིལ་བྱེད་པ་དག་ལ་ཉེས་བྱས་དང་ཉེས་བྱས་ཕྲ་མོར་འགྱུར་རོ། །འདི་རྣམས་ལ་ནི་མངོན་པར་ཞེན་པ་ཡོངས་སུ་རྫོགས་པར་འགྱུར་པ་དང་ཉམས་ པ་ལ་སོགས ་པའི་རྣམ་པར་འགྱུར་བ་མེད་པའི་ཕྱིར་ཉེས་བྱས་དང་ཉེས་བྱས་ཕྲ་མོར་འགྱུར་རོ། །མིའི་འགྲོ་བ་ནི་ཐ་སྙད་དུ་བྱ་བ་ཉིད་ཡིན་ནོ་ཞེས་བྱ་བ་ནི། མིའི་འགྲོ་བ་འདི་ལ་ཡོད་པས་ན་མིའི་འགྲོ་བ་པའོ། །སྲོག་ཆགས་དང་ལྡན་པ་དེ་ལ་ཐ་སྙད་དུ་བྱ་བ་ཉིད་དོ། །སྣོད་དུ་གྱུར་པའི་དོན་དང་འབྲེལ་པ་སྲོག་ཆགས་སུ་གྱུར་པ་རྣམས་ལ། འདི་ལྟར་མིའི་འགྲོ་བར་སྐྱེས་པ་རྣམས་བསྡུས་པར་རིག་པར་བྱའོ། །དེ་དང་འབྲེལ་པ་ལྷག་པར་སྤྱོད་པ་ལ་ནི་ཐ་སྙད་དུ་རྫོགས་པར་འགྲུབ་པ་ཞེས་བྱ་བའི་དོན་ཏོ། །།དེའི་ཕྱིར་མི་མ་ཡིན་པ་མཐུ་དང་མི་ལྡན་པ་ལ་ཀུན་དུ་སྤྱོད་པ་བསྔགས་པ་ནི་སྦོམ་པོའོ། །དེ་ལ་འཁྲིག་པ་དང་ལྡན་པ་སྨྲ་བ་དང༌། བདག་ཉིད་ལ་ཀུན་དུ་སྤྱོད་པ་བསྔགས་པ་དང༌། འདི་ལ་སྨྱན་བྱེད་པ་དང༌། དེ་ལ་བརྟེན་པར་བྱ་བ་ཉིད་དང༌། རྟེན་པར་བྱེད་པ་ཉིད་གཉིས་ཀ་ལ་ཡང་འདིར་ཉེས་བྱས་སོ། །ལྷ་དང༌། ཀླུ་དང༌། གནོད་སྦྱིན་དང༌། དྲི་ཟ་དང༌། མི་འམ་ཅི་དང༌། ཡི་དགས་དང༌། ཤ་ཟ་དང༌། གྲུལ་བུམ་དང༌། ལུས་སྲུལ་པོ་ལ་ སོགས་པ ་རྣམས་ལ་སློང་བ་དང༌། སོ་སོ་ནས་སྤགས་པ་སློང་བའི་རྣམ་པར་རྟོག་པས་གོས་ཐོབ་པའོ། །དེ་རྣམས་དང་
ལྷན་ཅིག་ཏུ་མངོན་མཚན་ཅན་གྱི་སྤྱོད་པ་དང༌། ཉོ་ཚོང་བྱས་ཏེ་ཐོབ་པ་དང༌། དེ་དག་ལས་རྒྱུ་སྤུན་སློང་པ་དང༌། རིག་པའི་ཕོ་དེ་རྣམས་དང་ལྷན་ཅིག་སྟོན་པ་དང༌། ཉེ་བར་སྟོན་པ་དང༌། ཀློག་པ་དང༌། གནས་ངན་ལེན་བརྗོད་པའི་ལྟུང་བྱེད་དོ། །འདིར་སྟོན་པའི་མིའི་ཆོས་བླ་མ་བརྗོད་པ་དེ་དག་མོ་དང་ལྷན་ཅིག་དབེན་པ་ལ་འདུག་པ་དང༌། དེ་དག་གིས་བྱེད་དུ་བཅུག་པའམ། དེ་དག་དབང་བའི་འདུག་གནས་གཅིག་ཏུ་ལྷས་ལ་ སོགས་པ ་བྱེད་དུ་བཅུག་པ་དང༌། ལྷས་ལ་ སོགས་པ ་དང་འབྲེལ་བའི་ཁྱིམ་དུ་ཟན་ཟོས་པ་དང༌། དེའི་འོག་ཏུ་དེ་དག་ལ་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དང༌། དེ་དག་ལས་ཟས་བསོད་པ་སློང་བ་དང༌། དེ་དག་ལས་བཟའ་བ་དང་བཅའ་བ་ཉིད་དང་འདུག་པ་དང༌། མི་མ་ཡིན་མོ་དང་ལྷན་ཅིག་ཁྱིམ་དུ་ཉལ་བ་དང༌། དེ་དག་དང་ལྷན་ཅིག་ལམ་དུ་འགྲོ་བ་དང༌། མི་མ་ཡིན་པའི་ཁྱིམ་དུ་སྒོའི་གཏན་པ་ལས་འདས་པའི་འགྲོ་བ་ལ་ནི་ཉེས་བྱས་སོ། །རང་བཞིན་ཉམས་པ་ནི་མ་ཡིན་ནོ་ཞེས་བྱ་བ་ནི། མིའི་འགྲོ་བ་པ་ཡིན་ཡང་རང་བཞིན་ཉམས་པ་སྨྱོན་པ་དང་སེམས་འཁྲུགས་པ་དང༌། ཚོར་བས་ཉན་པ་རྣམས་ནི་ཐ་སྙད་དུ་བྱ་བའི་ཡན་ལག་མ་ཡིན་ནོ། །གོ་བར་བྱ་བའི་ཕྱིར་ཐ་སྙད་བྱེད་པ་ན་རང་བཞིན་དུ་མི་གནས་པའི་དྲུང་ནས། ཕྲིན་བླངས་ཏེ་ཐ་མལ་པར་གནས་པ་ལ། ཕྲིན་པར་བསྐྱལ་ཞིང་སྨྱོན་པ་ལ། ཕྲིན་ཕྱིར་བསྐྱལ་བ་དང༌། སྨྱོན་པའི་དྲུང་ནས་ཕྲིན་བླངས་ཏེ་ཕྲིན་ཕར་བསྐྱལ་ཞིང་སྨྱོན་པ་ལ་ཕྲིན་ཕྱིར་བསྐྱལ་བ་ལ་ནི་སྨྱན་བྱེད་ པ་ལ་སྦོམ་པོ་ཞེས་བྱ་བ་ལ་སོགས ་པར་སྦྱར་བ་འདི་རྟོགས་པར་བྱའོ། །བླངས་ཏེ་ཐ་མལ་པར་གནས་ པ་ལ་སོགས ་པས་གནོན་ པ་སོགས ་ལ་ནི་རང་བཞིན་དུ་གནས་པ་སྦོམ་པོའོ། །གཞན་ཉིད་ལ་ནི་ཉེས་བྱས་སོ། །གཞི་མེད་པ་དང་བག་ཙམ་གྱིས་སྐུར་པ་འདེབས་པ་ནི་སྨྱོན་པ་ལ་ སོགས་པ ་འདི་དག་གི་དྲུང་ན་སྦོམ་པོའོ། །མི་སྨྱོན་པ་དག་དང་ལྷན་ཅིག་མངོན་མཚན་ཅན་གྱི་སྤྱོད་པ་དང་ཉོ་ཚོང་བྱས་ཏེ་ཐོབ་པ་དག་ལ་ཉེས་བྱས་སོ། །དེ་དག་གི་སྐྱོན་ནས་སྨྲ་བ་དང༌། དེ་དག་གི་རྩོད་པ་ལ་སྐྱོ་སྔོགས་བྱེད་པ་དང༌། རིགས་པའི་སྐྱེས་པ་དེ་རྣམས་དང་ལྷན་ཅིག་བུད་མེད་ལ་ཆོས་སྟོན་པ་དང༌། དེ་དག་དང་ཚིག་རེ་རེ་ནས་ཀློག་པ་དང༌། མིའི་ཆོས་བླ་མ་བརྗོད་པ་དང༌། དེ་རྣམས་དབང་བའི་རྙེད་པའམ་དེ་རྣམས་ཀྱི་རྙེད་པ་ཡོངས་སུ་
སྔོ་བར་བྱེད་པ་དང༌། སྐུར་པ་འདེབས་པ་དང༌། འདིར་བསླབ་པ་ལ་ཁྱད་དུ་གསོད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། བསྒོ་བ་བཅག་པ་དང༌། སྐྲོད་པ་དང༌། དེ་ལྟ་བུའི་དགེ་སློང་མ་རྣམས་ལ་སྟོན་པ་དང༌། ཅུང་ཟད་ཙམ་གྱི་ཕྱིར་སྟོན་ཏོ་ཞེས་གཞན་ལ་སྐུར་པ་འདེབས་པ་དང༌། གོས་སྦྱིན་པ་དང་བྱེད་པ་དག་ལས་དེ་ལྟ་བུའི་དགེ་སློང་མ་དག་དང་ལྷན་ཅིག་ལམ་དུ་འགྲོ་བ་དང༌། གྲུར་འཇུག་པ་དང༌། དེ་ལྟ་བུའི་བུད་མེད་དང༌། དགེ་སློང་མ་དང་དབེན་པ་ན་འདུག་པ་དང༌། འདི་རྣམས་ཀྱིས་མགྲོན་དུ་བོས་པ་བདག་གིར་བྱེད་པ་དང༌། དེ་ལྟ་བུའི་འདུག་གནས་སུ་ཉི་མ་གཉིས་པར་ཟན་ཟ་བ་དང༌། འདུག་པ་དང༌། འགྲེང་བ་དང་དེ་ལྟ་བུ་དག་གིས་དམག་ལ་བལྟ་བ་དང༌། བསྙེན་པར་རྫོགས་པ་དང་བཅས་པ་འདི་རྣམས་ལ་ཡང་བསྡིགས་པ་དང༌། ཡོ་བྱད་སྦེད་པ་དང༌། གཞི་མེད་པར་སྐུར་པ་འདེབས་པ་དང༌། ཕྱིར་མ་བླངས་པར་སྤྱོད་པ་དང༌། རྐུན་མ་འདི་རྣམས་དང་ལྷན་ཅིག་ལམ་དུ་འགྲོ་བ་ལ་ནི་ཉེས་བྱས་སོ། །མ་ནིང་དང་མཚན་གཉིས་པ་དག་ནི་དེ་དང་ལྡན་པ་ཉིད་དོ་ཞེས་བྱ་བ་ནི། དེ་གཉིས་ནི་སྨྱོན་པ་ལ་ སོགས་པ ་དང་ལྡན་པ་ཉིད་ཡིན་ཏེ། ཇི་ལྟར་སྨྱོན་པ་ལ་ སོགས་པ ་དག་ལ་ཐ་སྙད་དུ་བྱས་པ་མ་ཡིན་པ་བཞིན་དུ་དེ་དག་ལ་ཡང་ཞེས་བྱ་བའི་དོན་ཏོ། །དེ་གཉིས་ཀྱི་ལུས་ལ་འདི་དག་མ་ཡིན་པ་ཉིད་ཀྱི་ཕྱིར། སེམས་ལ་ཡང་ཉམས་པ་འདི་དག་རོ་ལྟ་བུའི་ལུས་སུ་ཡིད་ལ་སྣང་ངོ༌། །སེམས་ནི་གདོན་གྱིས་བརླམས་པ་དང་འདྲ་བར་མི་མ་ཡིན་པ་ཉིད་ཀྱི་ཡིད་ལ་ངེས་པར་འབྲེལ་རྒྱུ་བར་དཀའ་བ་ནད་པ་མ་ཡིན་པར་གྱུར་པ། སེམས་གྲགས་པས་འགྲོ་བཞིན་པ་མ་ཡིན་ནོ། །དེ་ལྟར་ཡང་རྣམ་པ་འདི་གང་ཡང་ཡིན་ཏེ། གང་ཟག་འདི་རང་གི་སེམས་ལ་མི་གནས་ཞེས་བྱ་བ་ལ་ སོགས་པ ་འདི་རྣམས་ནི་འཇིག་རྟེན་པ་རྣམས་ནི་སྣང་བ་ཡིན་ནོ། །ཟ་མ་ནི་དེ་ལྟ་བུ་མ་ཡིན་ཏེ། དེ་བས་ན་འདིར་ཡང་ཆོ་ག་འདི་མེད་པའོ། །མཚན་མེད་པ་ནི་དེ་ལྟ་བུ་ཉིད་མ་ཡིན་པ་སྟེ། མ་ནིང་དེ་ལས་ལྷག་པ་མེད་པས་མ་སྨོས་སོ། །འགྲོ་བ་མ་ཡིན་པ་ལས་རྣམ་པར་འགྱུར་བ་བསྟན་པའི་དུས་ན་ལྟུང་བའི་བྱེད་པ་པོ་མ་ཡིན་ཏེ། དེའི་ཕྱིར་འདི་ལ་མིའི་འགྲོ་བར་བྱས་པ་རྣམ་པར་འགྱུར་བ་བསྟེན་པའི་དུས་ན། དེ་ཡང་ཐ་སྙད་དུ་བྱར་མི་རུང་བ་ཉིད་ཡིན་ནོ། །བུད་མེད་དང་ལྡན་པའི་ལུས་ཀྱི་རེག་པ་ལ་ སོགས་པ ་བསླབ་པའི་གཞི་འདི་རྣམས་ལ་མ་ནིང་དང་
མཚན་གཉིས་པ་དག་གི་རྣམ་པ་བསྟན་ཏོ། །རྣམ་པ་དེ་ལྟ་བུའི་མཚན་གཞན་དོན་མེད་དོ་ཞེས་བྱ་བ་ནི། མཚན་གཉིས་པ་ལ་དོན་མེད་པའོ། །མ་ནིང་ནི་མ་ནིང་ཕོ་དང༌། མ་ནིང་མོ་དང༌། སྤྲུལ་བ་ཡང་དེ་བཞིན་ནོ་ཞེས་བསྟན་པ་ཡིན་ཏེ། དེ་ལས་གོས་ལ་ སོགས་པ ་སློང་བའི་ཕྱིར་མདོ་འདི་བྱས་སོ། །དེའི་ཕྱིར་དེའི་སྐབས་ཀྱི་དཔེ་བརྗོད་པར་བྱ་སྟེ། ཁྱིམ་བདག་དང་ཆུང་མ་མ་ནིང་དང་མཚན་གཉིས་པ་ལ་གོས་སློང་བ་སྔོན་དུ་འགྲོ་བའམ། རྣམ་པར་རྟོག་པ་སྔོན་དུ་འགྲོ་པས་གོས་རྙེད་ན་ཉེས་བྱས་སོ། །སྦྱིན་བདག་དེ་གཉིས་སམ་ཐ་ག་པ་གཉིས་ལས་རིན་ཐང་སོ་སོ་བ་དང༌། འཐག་ཏུ་འཇུག་པ་དང༌། འཐག་པ་སྐྱེད་པ་དང༌། མ་ནིང་མོ་དང༌། མ་ནིང་ཕོ་དང༌། གླེ་འདམས་པ་དང་མཚན་གཉིས་པ་ཉལ་པོ་བྱེད་པར་ཤམ་པའི་ཁྱིམ་ན་འདུག་པ་དང༌། འགྲེང་བ་དང༌། དེ་དག་ལ་བརྡེག་པ་དང༌། གཟས་པ་དང༌། མ་ནིང་ཕོ་དང༌། མ་ནིང་མོ་དང༌། མཚན་གཉིས་པ་དང་ལྷན་ཅིག་ཉལ་བ་དང༌། འདིར་མ་ནིང་ཕོ་དང་མ་ནིང་མོ་གླེ་འདམས་པ་དང༌། མཚན་གཉིས་པ་དང་ལྷན་ཅིག་ལམ་དུ་འགྲོ་བ་ལ་ཉེས་བྱས་སོ། །རེག་པ་ནི་ཐ་དད་དང་འདྲའོ་ཞེས་བྱ་བ་ནི་གསོང་པོར་སྨྲ་བར་གྱུར་པས་སྨྲ་བ་དང༌། ཀུན་སྤྱོད་བསྔགས་པར་གྱུར་པ་ནི་གོ་བར་གྱུར་པ་ཡིན། ཉལ་པོ་བྱེད་པར་ཤམ་པའི་ཁྱིམ་ན་འདུག་པ་དང༌། སློང་བ་དང༌། དགའ་བར་བྱེད་པ་དང༌། ལད་མོ་བྱེད་པ་དང༌། དགའ་བའི་རིམ་པ་འདི་གང་ཡིན་པ་དེར་འདི་མེད་པ་སྟེ་དེའི་ཕྱིར་མདོ་འདི་བྱས་སོ། །མི་མ་ཡིན་པ་མཐུ་མེད་པ་ལ་རེག་པ་དང༌། སྨྱོས་པ་དང༌། སེམས་འཁྲུགས་པ་དང༌། ཚོར་བས་ཉེན་པ་ལ་རེག་པ་ལ་ཞེས་བྱ་བ་འདི་བསྟེན་པའོ། །ཕྱི་རོལ་པའི་རབ་ཏུ་བྱུང་བ་དང༌། མ་སྐྱེས་པ་དང་ཉམས་པ་དག་ནི་ཕྱེད་ཉིད་ཁྱིམ་པའོ་ཞེས་བྱ་བ་ནི་མ་སྐྱེས་པ་དང་བྲལ་བ་དང༌། ཉམས་པ་དག་གི་ཕྱེད་ཉིད་ཁྱིམ་པའོ་ཞེས་བྱ་བ་ནི་མ་སྐྱེས་པ་དང༌། སྐྱེ་བ་མ་བྲལ་བ་དང༌། ཉམས་པ་འདི་པའི་རྟགས་ཅན་ཁྱིམ་པའོ་ཞེས་བྱ་བ་སྨོས་པས་རབ་ཏུ་འབྱུང་བ་ལྟུང་བ་མེད་པར་བྱས་པ་ཉིད་དེ་འདི་རྣམས་ལ་ནི་དེ་མ་ཐག་པའི་ཚིག་བྱས་པ་ཉིད་བྱ་བའི་དོན་ཏོ། །མུ་སྟེགས་ཅན་གྱི་དགེ་སློང་ལས་ཆོས་གོས་དང་ལྷུང་བཟེད་བླངས་ཏེ་ཐོབ་པ་དང༌། རིན་ཐང་དང༌། སོ་སོ་བ་དང༌། བསྐུར་བ་དང༌། སྦྱིན་བདག་དང༌། ཕོ་ཉ་དང༌། ཞལ་ལྟ་བ་གང་ཡང་རུང་བ་
གཅིག་གམ་དུ་མ་ཕྱི་རོལ་པའི་རྟགས་ཅན་རབ་ཏུ་བྱུང་བ་ཉིད་དང༌། དེ་བྱེད་པའི་ཁྱིམ་དུ་བསོད་སྙོམས་གཉིས་པ་ཟ་བ་དང༌། སྔོན་ལྟུང་བ་བྱུང་བ་དང༌། དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། མ་ནིང་དང༌། དགེ་སློང་མ་སུན་ཕྱུང་བ་རྣམས་དང༌། ལྷན་ཅིག་མངོན་མཚན་ཅན་གྱི་སྤྱོད་པ་དང༌། ཉོ་ཚོང་བྱས་ཏེ་སྙོམས་པར་ཐོབ་པ་ལ་ཡང་ཉེས་བྱས་སོ། །ཕྱི་རོལ་པའི་རབ་ཏུ་བྱུང་བ་ལས་ལྷུང་བཟེད་དོ་གསུམ་ཙམ་ལས་ལྷག་པར་བླངས་ཏེ་ཟོས་པ་ལ་ཡང་ཉེས་བྱས་སོ། །དེ་རྣམས་དང་ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང་འགྲེང་བ་ལ་ཡང་ཉེས་བྱས་སོ། །དགེ་སློང་དང་དགེ་སློང་མ་བསྙེན་པར་རྫོགས་པ་ཅན་མ་ཉམས་པ་ཉིད་ནི་བསླབ་པ་དག་ལ་ཡན་ལག་ཡིན་ནོ་ཞེས་བྱ་བ་ནི། ཆོས་གཞན་པའི་རབ་ཏུ་བྱུང་བ་ཉིད་ཀྱང་མ་ཡིན་ལ་དགེ་ཚུལ་ལ་ སོགས་པ ་ཉིད་ཀྱང་མ་ཡིན་པ་ནི་བསླབ་པ་རྣམས་ལ་ཡན་ལག་སྟེ། མ་སྐྱེས་པ་དང་མ་བླངས་པ་དང་ཉམས་པ་བསྙེན་པར་རྫོགས་པའི་རྟགས་ཅན་ཉིད་ཀྱང་མ་ཡིན། དེའི་དགེ་སློང་མ་སུན་ཕྱུང་བ་དང༌། སྔོན་བསྙེན་པར་རྫོགས་ནས་ཕམ་བར་གྱུར་པ་བྱུང་བ་ཉིད་ཀྱང་རབ་ཏུ་བྱུང་ཞིང་བསྙེན་པར་རྫོགས་པ་ལ་གཞི་མེད་པ་དང༌། བག་ཙམ་དག་གིས་སྐུར་པ་འདེབས་པ་ལ་ནི་སྦོམ་པོའོ། །དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། མི་མ་ཡིན་པ་དང༌། ལྷ་དང༌། ཀླུ་དང༌། གནོད་སྦྱིན་དང༌། སྲིན་པོ་དང༌། ཤ་ཟ་དང༌། གྲུལ་བུམ་དང༌། ལུས་སྲུལ་པོ་དང༌། ཡི་དགས་ལ་ སོགས་པ ་རབ་ཏུ་བྱུང་ཞིང་བསྙེན་པར་རྫོགས་པ་རྣམས་དང༌། འདི་ལས་ཕྱི་རོལ་པའི་དགེ་སློང་རྣམས་དང༌། འདི་པའི་དགེ་སློང་མ་དང༌། དགེ་ཚུལ་དང༌། དགེ་ཚུལ་མ་རྣམས་ལ་གཞི་མེད་པ་དང༌། བག་ཙམ་གྱིས་སྐུར་པ་འདེབས་པ་ལ་ཡང་སྦོམ་པོ་ཁོ་ནའོ། །སྔོན་ལྟུང་བ་བྱུང་བའི་དགེ་སློང་མས་གོས་རྙིང་པ་འཁྲུ་བ་ལ་ སོགས་པ ་དང༌། སྔོན་རབ་ཏུ་བྱུང་བ་མོ་དང༌། དང་པོ་འཁྲུགས་པ་མོ་དང༌། དགེ་སློང་སུན་ཕྱུང་བ་མོ་དང༌། མི་མ་ཡིན་པ་མོ་རབ་ཏུ་བྱུང་ཞིང་བསྙེན་པར་རྫོགས་པ་དང༌། དགེ་སློང་མ་དང༌། དགེ་ཚུལ་མ་དང༌། ཀུན་དུ་རྒྱུ་མོ་ལ་ སོགས་པ ་འདི་ལས་ཕྱི་རོལ་པའི་དགེ་སྦྱོང་མོ་ལ་སོ་སོར་ལེན་པ་དང༌། དེ་ལས་རྣམ་པར་རྟོག་པ་ཐོབ་པ་ལ་ཉེས་བྱས་སོ། །སྔོན་ལྟུང་བ་བྱུང་བ་དང༌། དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། མ་ནིང་དང༌།
དགེ་སློང་མ་སུན་ཕྱུང་བ་རྣམས་ལས་བྱིན་ཕྲོགས་བྱེད་པ་དང༌། དེ་དག་གི་སྐྱོན་ནས་སྨྲ་བ་དང༌། དེ་དག་ལས་ཕྲ་མ་བྱེད་པ་དང༌། དེ་དག་གི་རྩོད་པ་ལ་སྐྱོ་སྔོགས་བྱེད་པ་དང་འདི་ལ་རང་གི་ཕྱོགས་ལ་བསྙེན་པར་རྫོགས་པ་ཉིད་ཡོད་པ་ལ་ཡང་དེའི་གནས་ངན་ལེན་པ་དང༌། སྔོན་ལྟུང་བ་བྱུང་བ་དང༌། དགེ་སློང་མ་སུན་ཕྱུང་བ་དག་གི་དྲུང་དུ་འདི་དང་ཕྱི་མའི་མིའི་ཆོས་བླ་མ་བརྗོད་པ་དང༌། དགེ་འདུན་དེ་དང་འབྲེལ་པ་ཉིད་དང༌། འདི་རྣམས་སྐུར་པ་ཐོབ་པར་བྱེད་པ་ཉིད་ཀྱིས་སྐུར་པ་འདེབས་པ་དང༌། དེ་རྣམས་ལ་དེའི་བསླབ་པ་ལ་ཁྱད་དུ་གསོད་པ་དང༌། དེ་དག་ལ་འཕྱ་བ་འམ་གཞོགས་འཕྱས་བྱེད་པ་དང༌། དེ་དག་གི་རྩོད་པ་ལ་སྐྱོ་སྔོགས་བྱེད་པ་དང༌། དེ་དག་གི་གཙུག་ལག་ཁང་དུ་གནས་མལ་མ་བརྟུལ་བར་འགྲོ་བ་དང༌། བཏིང་བ་མ་དོར་བར་འགྲོ་བ་དང༌། དེ་དག་གི་གཙུག་ལག་ཁང་དུ་དེ་དག་ལ་ཕྱིས་གནོད་པ་བྱེད་པ་དང༌། དགེ་འདུན་གྱི་གཙུག་ལག་ཁང་ནས་དགེ་སློང་མ་ཉམས་པ་ལ་ཕྱིས་གནོད་པར་བྱེད་པ་དང༌། དེ་དག་གི་གཙུག་ལག་ཁང་ནས་དགེ་སློང་མ་ཉམས་པ་སྐྲོད་པ་དང༌། དེ་དག་གི་གཙུག་ལག་ཁང་ནས་ཁྲིའུ་རྩ་བ་འབྱུང་བ་ལ་འདུག་པ་ཡང་ཉེས་བྱས་སོ། །སྔོན་ལྟུང་བ་བྱུང་བ་མོ་དང༌། དང་པོ་འཁྲུགས་པ་མོ་དང༌། རྐུ་ཐབས་སུ་གནས་པ་མོ་དང༌། དགེ་སློང་སུན་ཕྱུང་བ་མོ་དང༌། འགྲོ་བ་གཞན་དུ་གཏོགས་པའི་དགེ་སློང་མ་ལ་མ་བསྐོས་པར་སྟོན་པ་དང༌། ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དགེ་སློང་མ་དང༌། དགེ་ཚུལ་མ་དང༌། སྔོན་ལྟུང་བ་བྱུང་བའི་དགེ་སློང་རྣམས་ལ་གོས་བྱིན་པ་དང༌། དེ་དག་གི་གོས་བྱེད་པ་དང༌། དེ་རྣམས་དང་ལྷན་ཅིག་ལམ་དུ་གྲུར་འགྲོ་བ་དང༌། དབེན་པ་ན་འདུག་པ་དང་འགྲེང་བ་དང༌། དེ་དག་གིས་སྦྱོར་དུ་བཅུག་པའི་ཟས་ཟ་བ་དང༌། དེ་དག་ལ་བརྡེག་པ་དང༌། གཟས་པ་དང༌། གནས་ངན་ལེན་འཆབ་པ་དང༌། ཟན་གཅོད་དུ་བཅུག་པ་དང༌། དེ་རྣམས་ལས་འདུན་པ་ཕྱིར་བསྒྱུར་བ་དང༌། འགྱོད་པ་བསྐྱེད་པ་དང༌། ག་ག་ཚིལ་བྱེད་པ་དང༌། སྡངས་པར་བྱེད་པ་ཡང་ཉེས་བྱས་སོ། །ཡོ་བྱད་སྦེད་པ་ནི་ཆོས་འདི་པའི་རབ་ཏུ་བྱུང་བ་དང༌། བསྙེན་པར་རྫོགས་པ་མ་གཏོགས་པའི་གཞན་ཐམས་ཅད་ཀྱི་སྦེད་པ་ལ་ཉེས་བྱས་སོ། །ཆོས་འདི་པའི་སྦེད་པ་ལ་ནི་ལྟུང་བྱེད་དོ། །དེ་དག་ལས་ནི་བྱིན་ཕྲོགས་བྱེད་པ་དང༌། གཞི་མེད་པར་
སྐུར་པ་འདེབས་པ་དང༌། བསླབ་པ་ལ་ཉེ་བར་འཇོག་པ་སྤོང་བ་ལ་ཉེས་བྱས་སོ། །དགེ་ཚུལ་དང༌། དགེ་ཚུལ་མ་དང༌། དགེ་སློང་མ་རྩོད་པའམ། དེ་དག་དང་དགེ་སློང་དག་རྩོད་པ་ལ་ཉན་རྣ་བྱེད་པ་ལ་ཡང་ཉེས་བྱས་སོ། །མི་མ་ཡིན་པ་རབ་ཏུ་བྱུང་ཞིང་བསྙེན་པར་རྫོགས་པ་དང༌། རྩོད་པ་ལ་ཉན་རྣ་བྱེད་པ་ལ་ཡང་ཉེས་བྱས་སོ། །དགེ་ཚུལ་དང༌། དགེ་ཚུལ་མ་དང༌། མ་ནིང་མོ་དང༌། རྐུ་ཐབས་སུ་གནས་པ་མོ་དང་དང་པོ་འཁྲུགས་པ་མོ་དང་དེའི་དོན་དུ་སྨྲ་བ་ནས་བླངས་ཏེ། འཆོས་སམ་ཟོས་ན་ཡང་ཉེས་བྱས་སོ། །མཚན་དང་ཁས་བླངས་པ་དག་གིས་ནི་རང་གི་ཕྱོགས་ཉིད་ཀྱི་ཁོངས་སུ་གཏོགས་སོ་ཞེས་བྱ་བ་ནི། ཕོ་དང་མོའི་མཚན་དང་ལྟ་བ་མཉམ་པ་ཁས་བླངས་པ་དང་མ་བླངས་པ་དག་གི་རང་གི་ཕྱོགས་ཀྱི་ཁོངས་སུ་གཏོགས་པའི་བསྙེན་པར་རྫོགས་པ་གང་ཡིན་པ་ལ་བརྟེན་པའི་ཁ་ན་མ་ཐོ་བའི་བར་གྱུར་པར་རིག་པར་བྱའོ། །ཇི་ལྟར་རང་གི་ཕྱོགས་ལས་ལོག་པར་བསྒྲུབ་པ་སྨད་པ་ཉིད་ཡིན་པ་དེ་ལྟར་གཞན་ལ་ལོག་པར་བསྒྲུབ་པ་ནི་སྨད་པར་བྱ་བ་ཉིད་མ་ཡིན་པའི་ཕྱིར་རྣམ་པ་དེ་ལས་འདི་ལྟར་ཤེས་སོ། །དེ་ལྟར་དགེ་སློང་མ་རྣམས་ལ་ཡང་ཐམས་ཅད་རྣམ་པ་འདི་བཞིན་དུ་རིག་པར་བྱའོ། །འདིར་དཔེ་རྣམས་བརྗོད་པར་བྱ་སྟེ། ཁས་བླངས་པས་ཁས་མ་བླངས་པ་ལ་གོས་བྱིན་ནས་ཕྲོགས་པ་དང༌། ཁས་མ་བླངས་པས་ཁས་མ་བླངས་པ་ལ་གོས་བྱིན་ནས་ཕྲོགས་པ་དང༌། དགེ་སློང་མ་དང་དགེ་སློབ་མ་དག་ལ་སྐྱོན་ནས་བརྗོད་པ་དང༌། དེ་གཉིས་ལ་ཕྲ་མ་བྱས་པ་དང༌། སྐྱོ་སྔོགས་བྱས་པ་དང༌། སྨྲ་བ་དང༌། དགེ་དག་གི་གནས་ངན་ལེན་བརྗོད་པ་དང༌། དགེ་སློང་མའི་དགེ་འདུན་དབང་བའི་རྙེད་པ་དགེ་སློང་མས་བཤེས་ངོར་བྱས་ཏེ་གཞན་དུ་བསྒྱུར་རོ་ཞེས་སྐུར་པ་འདེབས་ན་ཉེས་བྱས་སོ། །དེ་རྣམས་ཀྱི་བསླབ་པ་ལ་ཁྱད་དུ་གསོད་པ་དང༌། དགེ་སློང་མའི་དགེ་འདུན་གྱི་གཙུག་ལག་ཁང་གི་གནས་མལ་མ་བརྟུལ་བར་འགྲོ་བ་དང༌། དགེ་སློང་མའི་གཙུག་ལག་ཁང་དུ་ཕྱིས་གནོན་བྱེད་པ་དང༌། དེ་ནས་སྐྲོད་པ་དང༌། དེར་རྩ་བ་འབྱུང་བ་ལ་འདུག་པ་དང༌། ཁས་བླངས་པས་ཁས་མ་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང༌། གོས་བྱིན་པ་དང༌། གོས་བྱིན་པ་གཉིས་དང༌། ཁས་མ་བླངས་པས་ཁས་བླངས་པའི་དགེ་སློང་མ་རྣམས་ལ་མ་བསྐོས་པར་སྟོན་པ་དང༌། གོས་སྦྱིན་པ་དང༌། གོས་བྱེད་པ་དག་པ་དང༌། ཁས་མ་བླངས་པས་ཁས་བླངས་
པ་ལ་ཟང་ཟིང་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། ཁས་མ་བླངས་པས་ཁས་མ་བླངས་པ་ལ་ཁས་བླངས་པ་མོ་དང་ལྷན་ཅིག་ལམ་དང་གྲུར་འགྲོ་བ་དང༌། ཁས་བླངས་པས་ཁས་མ་བླངས་པ་མོ་དང་ཁས་བླངས་པ་མོས་སྦྱོར་དུ་བཅུག་པ་ཟ་བ་དང༌། ཁས་མ་བླངས་པས་སྦྱོར་དུ་བཅུག་པ་ཟ་པ་དང༌། ཁས་མ་བླངས་པས་ཁས་བླངས་པའི་ཁྱིམ་ནས་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དང༌། ཁས་བླངས་པས་ཁས་མ་བླངས་པའི་ཁྱིམ་ནས་ལྷུང་བཟེད་དོ་གསུམ་ཙམ་ལས་ལྷག་པར་ལེན་པ་དག་ནི་ཉེས་བྱས་སོ། །བྱིན་ལེན་ནི་རྣམ་པ་ཐམས་ཅད་དུ་རང་གི་ཕྱོགས་ཀྱི་ཁོངས་སུ་གཏོགས་པ་མ་ཡིན་པས་བྱས་ན་མ་བྱས་པ་ཉིད་དོ། །ཁས་མ་བླངས་པས་ཁས་བླངས་པའི་ཟས་བསོད་པ་བླངས་པ་ཟོས་པ་དང༌། ཁས་བླངས་པའི་ཟས་བསོད་པ་ཁས་བླངས་པས་ཟོས་པ་དང༌། དགེ་སློང་མ་དང༌། བསླབ་པ་བྱིན་པ་མོ་ལ་བརྡེག་པ་དང༌། གཟས་པ་དག་དང༌། དེ་གཉིས་ཀྱི་གནས་ངན་ལེན་བཅས་པ་དང༌། ཁས་བླངས་པས་ཁས་མ་བླངས་པ་ལ་འདུན་པ་བྱིན་ནས་ཁས་བླངས་པས་ཁས་མ་བླངས་པ་ལ་ཕྱིར་བསྒྱུར་བ་དང༌། ཁས་མ་བླངས་པས་ཁས་བླངས་པ་ལ་དགེ་སློང་མ་དང་བསླབ་པ་མོ་ལ་འགྱོད་པ་བསྐྱེད་པ་དང་སྡངས་པར་བྱེད་པ་དང༌། སྐུར་པ་འདེབས་པ་དག་དང༌། ཁས་བླངས་པས་ཁས་མ་བླངས་པའི་ཡོ་བྱད་སྦེད་པ་དང༌། བྱིན་ཕྲོགས་བྱེད་པ་དང༌། ཁས་མ་བླངས་པས་ཁས་བླངས་པའི་ཡོ་བྱད་སྦེད་པ་དང༌། བྱིན་ཕྲོགས་བྱེད་པ་དང༌། ཁས་བླངས་པས་ཁས་མ་བླངས་པའི་བསླབ་པ་ལ་ཉེ་བར་འཇོག་པ་སྤོང་བ་དང༌། ཁས་མ་བླངས་པས་བླངས་པ་ལ་ཉེ་བར་འཇོག་པ་སྤོང་བ་དང༌། དག་སློང་མ་དང་ལྷན་ཅིག་དགེ་སློང་རྩོད་པ་བྱེད་པ་དང༌། དགེ་སློང་མ་རྣམས་ཀྱིས་ཐུན་མོང་མ་ཡིན་པ་སྟོན་པ་ལ་ཁོ་བོ་འདི་ལ་མི་སློབ་བོ་ཞེས་ཟེར་བ་དག་ཀྱང་ཉེས་བྱས་སོ། །འདིར་གཏོགས་པ་ལ་ཁྱིམ་པ་ལ་ནི་རྟགས་ཅན་ཉིད་ཀྱིས་ན་སྨད་དོ་ཞེས་བྱ་བ་ནི། དགེ་སློང་དང༌། དགེ་སློང་མ་ཉིད་ཀྱི་རྒྱུ་མཚན་གྱི་ཁ་ན་མ་ཐོ་བ་འདིར་གཏོགས་པ་ལ་ཁྱིམ་པ་རབ་ཏུ་མ་བྱུང་བའི་གང་ཟག་གི་རྟགས་ཅན་ནི་ན་སྨད་པར་ཡོངས་སུ་མ་རྫོགས་པ་ཉིད་དོ། །ཇི་ལྟར་འདིར་ཕྱི་རོལ་པའི་རབ་ཏུ་བྱུང་བ་ལ་ན་སྨད་པ་བཞིན་དུ་ཕྱི་རོལ་པའི་རབ་ཏུ་བྱུང་བའི་རྒྱུ་མཚན་ལས་ན་སྨད་པ་དེ་བས་ཀྱང་ཁྱིམ་པ་ལ་ཆེས་ན་སྨད་པར་
ཤེས་པར་བྱ་ཞེས་བྱ་བའི་དོན་ཏོ། །གཞི་མེད་པ་དང་བག་ཙམ་དག་གིས་ནི་ཉེས་བྱས་ཕྲ་མོར་འགྱུར་རོ། །ཁྱིམ་པར་གྱུར་པའི་སྐྱེས་པ་དང་བུད་མེད་ལ་སྐུར་བ་བཏབ་པ་མ་ཡིན་པ་ཞེས་བྱ་བ་འདིས་འཇུག་པ་ཀུན་ནས་ཐོབ་པའི་དོན་དུམ་དོ་འདི་བྱས་སོ། །མི་མ་ཡིན་པ་རྟགས་ཅན་མ་ཡིན་པ་ལ་སྐྱོན་ནས་སྨྲས་པ་དང་ཕྲ་མ་བྱས་པ་ལ་ནི་ཉེས་བྱས་ཕྲ་མོའོ། །མི་མ་ཡིན་པའི་ཁྱིམ་པ་རྣམས་ལ་འཕྱ་བ་དང༌། ཁྱིམ་པའི་གནས་མལ་མ་བརྟུལ་བར་འགྲོ་བ་དང༌། གང་ཟག་ལ་ནི་གང་ཞིག་ཉེས་བྱས་སུ་བྱས་པ་དེའི་བསོད་ནམས་མ་ཡིན་པར་རིག་པར་བྱའོ། །མི་མ་ཡིན་པ་ཁྱིམ་པ་རྣམས་སྐྲོད་པ་དང༌། དེ་རྣམས་ལ་བརྡེག་པ་དང༌། གཟས་པ་དག་དང༌། ཁྱིམ་པ་གཞན་གཉིས་ཀ་ལ་ཡང་སྦྱོར་དུ་བཅུག་པ་ཟ་བ་དང༌། དེ་དག་ལ་འགྱོད་པ་སྐྱེད་པ་དང༌། ག་ག་ཚིལ་བྱེད་པ་དང་སྐུར་པ་འདེབས་པ་ཡང་ཉེས་བྱས་ཕྲ་མོའོ། །འདིར་མི་མ་ཡིན་པ་དག་དང་ལྷན་ཅིག་པའི་དཔེ་དག་ལ་རྒྱུ་གཉིས་ཀྱིས་ན་སྨད་པར་ཤེས་པར་བྱ་སྟེ། ཁྱིམ་པ་ཉིད་ཡིན་པའི་ཕྱིར་དང་མི་མ་ཡིན་པ་ཉིད་ཡིན་པའི་ཕྱིར་རོ། །རབ་ཏུ་བྱུང་བའི་རྫས་དག་ལ་ནི་རུང་བ་ཉིད་དང་ཚད་དང་ལྡན་པ་ལ་ སོགས་པ ་ཉིད་དོ་ཞེས་བྱ་བ་ནི། གཉིས་པོ་འདི་དག་ནི་དེ་རྣམས་ཀྱི་ཡན་ལག་གོ །སོགས་པའི་སྒྲས་ནི་མ་ཆོག་པ་ལན་སྨད་པའི་བྱེད་པ་པོ་ཉིད་ཡིན་གྱི། ལྷག་པ་ལ་ནི་མ་ཡིན་ཞེས་བྱ་བའི་དོན་ཏོ། །འདིར་ཚད་ལས་ལྷག་པ་ཡན་ལག་ཡིན་པའི་གཞུང་ནི། སྲིན་བལ་གྱི་སྟན་གྱི་སྐབས་ནས་བདེ་བར་གཤེགས་པའི་གདན་དང་ཚད་བགྱིད་ན་ལྟུང་བ་ཅིར་འགྱུར། སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །འདིར་དགེ་ཚུལ་ལ་ སོགས་པ ་དབང་བའི་རྫས་རྣམས་ལ་ཡང་ཡོ་བྱད་སྦེད་པ་དང༌། གོས་འདྲ་བ་ལ་ སོགས་པ ་ལ་ཆོ་ག་འདི་གཞུག་པའི་དོན་དུ་རབ་ཏུ་བྱུང་བའི་རྫས་དག་ལ་ཞེས་སྨོས་སོ། །བསྙེན་པར་རྫོགས་པའི་ཞེས་མ་སྨོས་སོ། །ཆོས་གོས་གང་ཞིག་ཚད་ལས་ཆུང་བ་དང༌། རུང་བ་མ་ཡིན་པ་ཉིད་ཀྱི་བ་གླང་དང་རྔ་མོ་ལས་བྱུང་བ་དང༌། རི་དགས་ཀྱི་སྤུ་དང་ཨ་ར་ཀའི་ཤིང་བལ་གྱི་རང་བཞིན་ཉིད་ཀྱིས་དེ་དང་འདྲེས་པ་འདི་དག་ལས་གཞན་པ་གཉིས་སམ་གང་ཡང་རུང་བས་མི་རུང་བ་བྱིན་གྱིས་བརླབ་པ་དེ་བགོས་པ་ལ་ནི་ཉེས་བྱས་སོ། །ཞག་བཅུ་ལས་ལྷག་པར་འཆང་བ་དང་རྙིང་པ་དགེ་སློང་མ་ཉེ་དུ་མ་ཡིན་པ་ལ་ཁྲུར་བཅོལ་བ་དང༌། དགེ་སློང་མ་ཉེ་དུ་མ་ཡིན་པ་
ལས་བླངས་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་བླངས་པ་དང༌། བ་གླང་གི་སྤུ་དང་གསོ་མ་ལ་ སོགས་པ ་དང་བསྲེས་པའི་སྲིན་བལ་དང༌། ལུག་གི་བལ་ནག་པོ་ཤས་ཆེ་བའི་སྟན་བྱེད་པ་དང༌། ཐ་ག་པས་མ་བཏགས་པའི་གོས་དང་འདྲེས་བའི་སྟན་བྱེད་པ་ལ་མ་ཆོག་པ་ཉིད་ལས་ཀྱང་ན་སྨད་པར་རིག་པར་བྱའོ། །ཁྲུས་བྱེད་པ་ལ་ སོགས་པ ་ལ་བ་གླང་གི་སྤུ་དང་གསོ་མ་ལ་ སོགས་པ ་དང་བསྲེས་པའི་ལུག་གི་བལ་རྣམས་དང༌། ལྷུང་བཟེད་ཁ་མ་བསྒྱུར་བ་དཀར་པོ་དག་ཞག་བཅུ་ལས་ལྷག་པར་འཆང་བ་དང༌། འཁྲུ་བ་ལ་རུང་བ་དང༌། རུང་བ་མ་ཡིན་པ་འདི་དཔེ་བསྟན་པ་ལ་ཡང་ལྟུང་བྱེད་འབའ་ཞིག་ཏུ་མ་ཟད་ཀྱི། སྦྱིན་པར་བྱེད་པ་ལ་ཉེས་བྱས་སོ། །བརྟད་བ་ལས་བྱུང་བ་ཞག་བཅུ་ལས་ལྷག་པར་འཇོག་པ་དང༌། དབྱར་གྱི་རས་ཆེན་རུང་བ་མ་ཡིན་པ་དུས་ལས་སྔར་ཚོལ་བ་དང༌། དུས་ལས་ཡོལ་བར་འཇོག་པ་དང༌། གནས་མལ་མ་གུས་པར་འགྲོ་བ་དང༌། ཁྲི་དང་ཁྲིའུ་རུང་བ་མ་ཡིན་པའི་རུང་བ་ཁྲིའུ་རྐང་པ་སོར་བརྒྱད་ལས་ལྷག་པར་བྱེད་པ་དང༌། དེ་བཞིན་དུ་རིན་པོ་ཆེའི་ཁྲིའམ་ཁྲིའུ་བྱེད་པ་དང༌། ཟས་རུང་བ་མ་ཡིན་པ་གསོག་འཇོག་བྱས་པ་དང༌། བཟའ་བ་དང་བཅའ་བ་རུང་བ་མ་ཡིན་པ་གཅེར་བུ་དང༌། གཅེར་བུ་མ་ལ་སྦྱིན་པ་དང༌། སྦྱིན་དུ་འཇུག་པ་པོ་འབའ་ཞིག་ལམ་ཟད་ཀྱི་སྦྱིན་པར་བྱེད་པ་ལ་ཡང་ཉེས་བྱས་སོ། །གོས་རུང་བ་མ་ཡིན་པ་དང༌། ཆུང་བ་ཁ་མ་བསྒྱུར་བར་གྱོན་པ་ལ་ཡང་ཉེས་བྱས་སོ། །ལྷུང་བཟེད་རིན་པོ་ཆེ་ལས་བྱས་པ་དང༌། ལྷུང་བཟེད་ཆུང་བ་དང༌། ཆུང་བ་རུང་བ་མ་ཡིན་པའི་ཆོས་གོས་དང་རིན་པོ་ཆེ་ལ་ སོགས་པ ་ལས་བྱས་པའི་ཁབ་རལ་ལ་ སོགས་པ ་བྱེད་པ་དང༌། ཡོ་བྱད་རུང་བ་མ་ཡིན་པ་སྦེད་པ་དང༌། ནོར་བུ་དང༌། བ་སོ་དང༌། རིན་པོ་ཆེ་ལས་བྱས་པའི་ཁྲི་རྐང་ཚད་ལས་ལྷག་པར་བྱེད་པ་དང༌། རིན་པོ་ཆེ་ལ་ སོགས་པ ་རུང་བ་མ་ཡིན་པ་ལས་བྱས་པའི་ཁྲི་དང་ཁྲིའུ་ལ་ཤིང་བལ་གྱིས་གོས་པར་བྱེད་པ་དང༌། གོས་རུང་བ་མ་ཡིན་པ་དང༌། ཨརྐའི་ཤིང་བལ་དང༌། རྔ་མོའི་བལ་ལ་ སོགས་པ ་རུང་བ་མ་ཡིན་པའི་སྟན་ལ་ སོགས་པ ་བྱེད་པ་ལ་ཡང་ཉེས་བྱས་སོ། །གོས་རུང་བ་མ་ཡིན་པ་ཚད་ལས་ཆུང་བ་ཞག་བཅུ་ལས་ལྷག་པར་འཆང་བ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་ལེན་པ་དང༌།
ལྷུང་བཟེད་གཅིག་སློང་བ་དང༌། གོས་གཅིག་འཁྲུར་འཇུག་པ་ལ་ཡང་ཉེས་བྱས་སོ། །གཞན་གྱི་དོན་དུ་བྱིན་ཕྲོགས་བྱེད་པ་དང༌། བརྟད་པ་ལས་བྱུང་བ་ཞག་བཅུ་ལས་ལྷག་པར་འཇོག་པ་དང༌། དབྱར་ཀྱི་རས་ཆེན་ཆུང་ངུ་སྔར་ཚོལ་བ་དང༌། ཕྱིས་འཆང་བ་དང༌། གཉིས་ཀ་ལས་གཅིག་ལེན་པ་ལ་ཡང་ཉེས་བྱས་སོ། །རང་གི་དོན་དེ་ཉིད་གཙོ་ཆེར་ཡོད་པའོ་ཞེས་བྱ་བ་ནི། རང་གི་དོན་དེ་ཉིད་གཙོ་ཆེར་ཡོད་པ་དེ་ནི་དེ་ཉིད་གཙོ་ཆེར་ཡོད་པ་དེ་ལ་རང་གི་དོན་ཉིད་ཡན་ལག་སྟེ། གང་གི་ཕྱིར་བསྒྲུབ་པར་གྱུར་པ་ཡོངས་སུ་རྫོགས་པའི་དོན་འདི་ཡིན། དེ་ཡོངས་སུ་རྫོགས་པ་ལས་ཀྱང་དངོས་གཞི་དང་མཐའ་གནས་པར་རྣམ་པར་གཞག་པའོ། །འདིར་དཔེ་བརྗོད་པར་བྱ་སྟེ། གཞན་གྱི་དོན་དུ་སྤྲོད་པ་ལས་བྱུང་བ་འཁྲིག་པ་དང་ལྡན་པ་སྨྲ་བ་དང༌། ཀུན་སྤྱོད་བསྔགས་པ་དག་ནི་སྦོམ་པོའོ། །འཁྲུར་འཇུག་པ་ལ་ སོགས་པ ་དག་ལ་ནི་ཉེས་བྱས་སོ། །གོས་དང་བལ་རྣམས་ལ་དགེ་འདུན་གྱི་དོན་དུ་བྱེད་དུ་འཇུག་པ་ཡང་གཞན་གྱི་དོན་ཁོ་ན་ཡིན་ཏེ། རང་དང་གཞན་གཉིས་ཀའི་དོན་དུ་དགེ་སློང་གཞན་གཅིག་གམ་དུ་མའི་དོན་དུ་ཉེ་བར་འདུ་བྱས་པའི་གོས་ལ་ནི་ཉེས་བྱས་སོ། །དེའི་འོག་ཏུ་ཡོ་བྱད་གང་རྣམས་ལ་རྣམ་པར་རྟོག་པས་ཐོབ་པ་ལ་ཡང་ཉེས་བྱས་སོ། །དེ་བཞིན་དུ་དགེ་སློང་མ་དང་དགེ་སློབ་མ་དང༌། དགེ་ཚུལ་དང་དགེ་ཚུལ་མ་དང༌། དགེ་སྦྱོང་དང་བྲམ་ཟེ་གཞན་དག་དང༌། སྔོན་ལྟུང་བ་བྱུང་བ་ལ་ སོགས་པ ་དག་གི་དོན་དུ་བྱེད་དུ་བཅུག་པ་ལ་ཡང་ངོ༌། །དགེ་སློང་གཞན་གཅིག་གམ་དུ་མའི་དོན་དུ་སྲིན་བལ་དང་བལ་ནག་པོ་འབའ་ཞིག་དང་ཆ་གཉིས་ལས་ལྷག་པར་སྟན་བྱེད་དུ་འཇུག་པ་ལ་ཡང་ཉེས་བྱས་སོ། །གཞན་གྱི་དོན་དུ་ལྷུང་བཟེད་ལྷག་པར་ཚོལ་བ་དང༌། འཐག་ཏུ་འཇུག་པ་དང་འཐག་པ་སྐྱེད་པ་དང༌། ཁབ་རལ་བྱེད་དུ་འཇུག་པ་དང༌། ཤིང་བལ་གྱིས་གོས་པར་བྱེད་དུ་འཇུག་པ་ལ་ སོགས་པ ་ལ་ཡང་ཉེས་བྱས་སོ། །དགེ་སློང་མ་ལ་དེས་སྨྲས་པ་ལས་ལེན་པ་ལ་ཡང་ཉེས་བྱས་སོ། །རྣམ་པར་རིག་བྱེད་ལ་ནི་དོན་གོ་བའོ་ཞེས་བྱ་བ་ནི། གང་གི་རྣམ་པར་རིག་བྱེད་ཀྱིས་སྨྲས་པ་དང༌། གཞན་གྱིས་གོ་བ་ཉིད་ནི་ཡན་ལག་སྟེ། དེའི་འབྲས་བུ་ཉིད་ཀྱི་ཕྱིར་སྙོམས་པར་ཞུགས་པ་ལ་འཁྲིག་པ་དང་ལྡན་པར་སྨྲ་བ་དང༌། ཀུན་དུ་སྤྱོད་པ་
བསྔགས་པ་དག་ལ་སྦོམ་པོའོ། །འདིར་གཞུང་ནི། གཅིག་ལས་འགོག་པ་ལ་སྙོམས་པར་འཇུག་པའི་དགེ་སློང་མ་ལ་སྨྲ་བར་བྱེད་ན་ཞེས་གསུངས་པ་ཡིན་ནོ། །གཞན་ལས་ནམ་སྙོམས་པར་འཇུག་པའི་དགེ་སློང་མ་ལ་ཞེས་བྱ་བའི་དཔེས་སྙོམས་པར་འཇུག་པའི་གཞུང་སྔ་མ་གང་ལས་སྒྲ་བྱེད་ པ་ལ་སོགས ་པས་ལྡང་བར་མི་ནུས་པ་ཉིད་དུ་གྱུར་པ་དང༌། སྙོམས་པར་ཞུགས་པ་ལ་ཡང་རིགས་པ་ཡིན་ཏེ། དེ་བས་ན་གཉིས་ཀས་བསྡུས་པའོ། །དེ་བཞིན་དུ་གཉིད་ལོག་པ་དང༌། སྙོམས་པར་ཞུགས་པ་དང༌། གླེན་པ་དང་འོན་པ་དག་ལས་གཞི་མེད་པ་དང༌། བག་ཙམ་གྱིས་སྐུར་པ་འདེབས་པ་ལ་ཡང་སྦོམ་པོའོ། །གླེན་པ་དང་འོན་པ་དག་དང་ལྷན་ཅིག་མངོན་མཚན་ཅན་གྱི་སྤྱོད་པ་དང༌། ཉོ་ཚོང་བྱེད་པ་ལ་ནི་ཉེས་བྱས་སོ། །འཐག་པ་དང་འཐག་པ་སྐྱེད་དུ་འཇུག་པའི་ཕྱིར་གཉིས་ལ་གོ་བར་བྱེད་པ་དབུས་པ་དང༌། མཐའ་འཁོབ་པ་དག་ལ་སྐད་གཞན་གྱིས་སྐྱོན་ནས་སྨྲས་ཏེ། དོན་མ་གོ་ན་ཡང་ཉེས་བྱས་སོ། །དེ་གཉིས་ལས་ཕྲ་མ་བྱེད་པ་དང༌། གླེན་པ་དང་འོན་པ་གཉིས་ལ་སྐྱོ་སྡོགས་བྱེད་པ་དང༌། དེ་བཞིན་དུ་བུད་མེད་གཉིད་ལོག་པ་ལ་ཆོས་སྟོན་པ་དང༌། སྐྱེས་པ་རྐུན་མ་དང་མཐའ་འཁོབ་པ་དང་གླིང་གཞན་ལས་སྐྱེས་པ་དང༌། གཉིད་ལོག་པ་དང༌། མྱོས་པ་དང༌། བག་མེད་པ་དང༌། སྙོམས་པར་ཞུགས་པ་དང༌། གླེན་པ་དང༌། འོན་པ་དག་དང་ཚིག་མཐུན་པ་དང༌། ཚིག་ལྷག་པར་ཟློས་པ་ལ་ཡང་ཉེས་བྱས་སོ། །ངོ་ཚ་མེད་པ་དང༌། མཐའ་འཁོབ་པ་དང་དབུས་པ་རྣམས་ལ་སྐད་གཞན་གྱིས་གནས་ངན་ལེན་བརྗོད་པ་དང༌། འོན་པ་དང་གླེན་པ་དག་ལ་མིའི་ཆོས་བླ་མ་བརྗོད་པ་དང༌། ངོ་ཚ་མེད་པ་དང༌། མཐའ་འཁོབ་པ་དང༌། དབུས་པ་དག་ལ་སྐད་གཞན་གྱིས་བཤེས་ངོར་བྱས་སོ་ཞེས་སྐུར་པ་འདེབས་པ་དང༌། གླེན་པ་དང་འོན་པ་དག་དང་དེ་བཞིན་དུ་བསླང་པ་ལ་ཁྱད་དུ་གསོད་པ་དང༌། འཕྱ་བ་དང་གཞོགས་འཕྱས་བྱེད་པ་བསྒོ་བ་གཅོག་པ་ལ་ཡང་ཉེས་བྱས་སོ། །དགེ་སློང་མ་ལམ་བསྐོས་པར་སྟོན་པ་དང༌། དེ་དག་ལ་ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། སྦྱོར་དུ་བཅུག་པ་ཟ་བ་དང༌། མེ་འབུད་དུ་བཅུག་པ་དང༌། འགྱོད་པ་སྐྱེད་པ་དང༌། སྡངས་པར་བྱེད་པ་
དང། གཞི་མེད་པར་སྐུར་པ་འདེབས་པ་དང༌། སྐད་གཞན་གྱིས་བསླབ་པ་ལ་ཉེ་བར་འཇོག་པ་སྤོང་བ་ཡང་ཉེས་བྱས་སོ། །སྨྲ་བ་པོ་ཉིད་ལ་ཡོད་པ་སྟེ་གསོད་པ་དང་རང་གི་དོན་དུ་རྐུ་བ་དག་ལས་གཞན་པའི་འོ་ཞེས་བྱ་བ་ནི་འོན་ཀྱང་སྨྲ་བའི་དངོས་པོ་ནི་སྨྲ་བ་ཉིད་དུ་གང་ཞིག་རྣམ་པར་གནས་པ་སྨྲ་བ་ཉིད་དང་རྗེས་སུ་འབྲེལ་པའི་གནོད་པ་ཡིན་གྱི། ལྐུགས་པ་ལ་ནི་མ་ཡིན་ནོ་ཞེས་བྱ་བ་རྗེས་སུ་མ་ཞུགས་པའི་དེ་དག་དང་འབྲེལ་པ་སྨྲ་མི་ཤེས་ཤིང༌། གང་ཞིག་འདི་རྗེས་སུ་ཞུགས་པར་གྱུར་པ་གང་ཡིན་པ་དེ་ནི་རྣམ་པར་རིག་བྱེད་རྫོགས་པར་གྱུར་བ་མ་ཡིན་པ་ཉིད་དོ། །མི་ནུས་པ་ལ་སྨྲ་བའི་ཕྱིར་དང༌། འགྲོ་བའི་ཕྱིར་རྗེས་སུ་ཞུགས་པར་གྱུར་པ་ཉིད་ཀྱང་མ་ཡིན་ནོ། །དེ་ཡང་མི་གསོད་པ་དང་རང་གི་དོན་དུ་རྐུ་བ་དག་ལས་གཞན་པ་དག་ལ་གཞི་མེད་པ་དང༌། བག་ཙམ་དག་གིས་སྐུར་པ་འདེ་བས་པ་ལ་ནི་སྦོམ་པོའོ། །ལྐུགས་པ་དང་ལྷན་ཅིག་མངོན་མཚན་ཅན་གྱི་སྤྱོད་པ་དང༌། ཉོ་ཚོང་བྱེད་པ་ལ་ནི་ཉེས་བྱས་སོ། །འབྱུང་བའི་དོན་དུ་འདི་ཞུ་བར་བྱེད་པ་འམ་མ་ཚང་བ་ཉིད་ཀྱིས་སྨྲས་པ་ལ་ཉེས་བྱས་སོ། །སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང་ཀློག་པ་དག་དང༌། དེ་དག་ལ་གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དང༌། བཤེས་ངོར་བྱས་སོ་ཞེས་སྨྲ་བ་དང༌། བསླབ་པ་ཁྱད་དུ་གསོད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། བགོ་བ་གཅོག་པ་དང༌། དེ་དག་ལ་མ་བསྐོས་པར་སྟོན་པ་དང༌། དེ་དག་ལ་ཟང་ཟིང་ཅུང་ཟད་ཀྱི་ཕྱིར་སྟོན་ཏོ་ཞེས་སྐུར་བ་འདེབས་པ་དང༌། སྦྱོར་དུ་བཅུག་པ་ཟ་བ་དང༌། དེ་དག་མེ་འབུད་དུ་བཅུག་པ་དང༌། མི་ཉན་པར་བྱེད་པ་དང༌། དེ་དག་གིས་བསླབ་པ་ལ་ཉེ་བར་འཇོག་པ་སྤོང་བ་ཡང་ཉེས་བྱས་སོ། །ཡང་དག་པར་ལེན་པར་བྱེད་པ་ལ་ནི་དེར་མ་ཟད་དོ་ཞེས་བྱ་བ་ནི། གང་ཞིག་འདི་དེ་མ་ཐག་པ་སྨྲ་བ་པོ་ཉིད་ལ་གནས་པ་ཞེས་བྱ་བ་སྨོས་པ་དེ་ནི་འདི་ལེན་པ་པོའི་ཡན་ལག་མ་ཡིན་ཏེ། འདི་ལྟར་གོ་བར་བྱེད་པ་ལྐུགས་པའམ་སྨྲ་བ་པོ་ཉིད་མ་ཡིན་པ་གཞན་དག་ལ་ཡང་སྲོག་གཅོད་པ་སྤོང་བ་ལ་ སོགས་པ ་ལ་ཡང་དག་པར་ལེན་པ་འབྱུང་བའི་ཕྱིར་རོ། །དེ་ནི་སྣོད་ཡིན་ནོ་ཞེས་བྱ་བ་ནི། དེས་སྨྲ་བ་པོ་དོན་གོ་བར་
ནུས་པའི་གང་ཟག་གང་ཡིན་པ་དེ་ནི་ཡན་ལག་ཡིན་གྱི། གླེན་པ་དང་འོན་པ་དག་ཀྱང་མ་ཡིན་ལ། དེ་བརྡ་མི་ཕྲད་པ་དང༌། རྣ་བའི་ཤུགས་བཀག་པ་དང༌། སོར་མོ་དང་དེས་བརྔ་བྱས་ན། ལྐུགས་པ་དང༌། རྒྱུ་གཞན་གྱིས་སྨྲ་མི་ཤེས་པ་དག་ཀྱང་རྣམ་པར་རིག་བྱེད་ཀྱི་ཡན་ལག་མ་ཡིན་ནོ། །འདི་ལྟར་མདོ་འདི་དག་ཐམས་ཅད་སྔར་སྨྲ་བ་པོ་ལ་ཡོད་པ་སྟེ་ཞེས་པའི་མདོ་དེས་གྲུབ་ཟིན་མོད་ཀྱི་སྨྲ་བ་པོ་ཉིད་ལ་དོན་གོ་བར་ཡོད་པ་གང་ཡིན་པ་དེ་ནི་རྣམ་པར་རིག་བྱེད་ཀྱི་ཡན་ལག་ཡིན་ནོ་ཞེས་བྱ་བ་འདིས་བརྗོད་པ་དོན་མེད་པ་ཙམ་ཞིག་བསྟན་པར་ཟད་དོ། །དེར་ཞུ་བ་མི་བྱེད་པ་དེ་ལ་ཉེས་པ་མེད་པར་བསྟན་པ་དེའི་ཕྱིར་མདོ་འདི་བྱས་སོ། །འོ་ན་བདག་ཉིད་ལྟུང་བ་བཤགས་པ་དང༌། བྱིན་གྱིས་བརླབ་པ་གཉིས་ཀྱི་ཕྱིར་གསོ་བར་བྱའོ་ཞེས་གསུངས་ན་མ་བརྗོད་པ་ལ་ཉེས་པ་མེད་པ་ཇི་ལྟར་རུང་ཞེ་ན། དེ་ལྟ་བུ་ཡང་ཡོད་མོད་ཀྱི། འོན་ཀྱང་མི་འགྱུར་བའི་ཕྱིར་རོ། །ངག་གིའོ་ཞེས་བྱ་བ་ནི། དག་གི་རྣམ་པར་རིག་བྱེད་ཡན་ལག་ཡིན་གྱི། སྤྲིང་ཡིག་དང་ལག་ཡིག་དང་ལག་རྩིས་ལ་ སོགས་པ ་ནི་མ་ཡིན་ཏེ། གཞན་གྱིས་ནི་དོན་གོ་བར་གསལ་བར་མི་ནུས་པའི་ཕྱིར་ཆོ་ག་འདི་ཡིན་ནོ། །རང་གིའོ་བདག་ཉིད་དང་འབྲེལ་པར་རོ་ཞེས་བྱ་བ་ནི། དང་པོ་གཞན་ལ་གོ་བར་བྱེད་པའི་སྐད་ཅིག་མ་ལ་ཤེས་པར་བྱེད་པ་ལ་དངོས་གཞི་བསྐྱེད་པའོ། །གལ་ཏེ་དེ་ལྟར་ཡང་དེ་ཐམས་ཅད་བྱ་བ་ཞུ་བར་གཏོགས་པས། དེ་དེ་བཞིན་དུ་སེམས་ཀྱིས་བརྗོད་པར་འདོད་པའི་ཚིག་ཇི་སྙེད་པས་བརྗོད་པ་དེ་བྱེད་པ་དང་གཡོ་བ་ལས་གཞན་ལ་ཇི་སྲིད་དེའི་དོན་ཉིད་དུ་གཡོ་བར་བྱེད་པ་གཅིག་གམ། དུ་མའི་ཡན་ལག་གིས་དེར་གཏོགས་པ་ཡོད་པ་ལ་དངོས་གཞིའི་ནང་དུ་འདུས་པ་ཡིན་ནོ། །དངོས་གཞིའི་ཆོ་ག་བྱེད་པར་གྱུར་ན་སྐུལ་ཞིང་བསྐུལ་བར་གྱུར་པ་ནི། མངོན་དུ་ཕྱོགས་པ་གང་ཡིན་པ་དེ་ནི་འདིར་དང་པོར་དོན་མ་གོན་ནི་ལུས་བསྐུལ་བ་དང༌། ཚིག་གི་ཇི་ཉོན་ཅིག་སེམས་གཏོད་ཅེས་བྱ་བ་ལ་ སོགས་པ ་ལྷག་མ་ཐམས་ཅད་ཀྱང་སྦྱོར་བ་ཡིན་པར་རིག་པར་བྱ་སྟེ། ཐམས་ཅད་རྩོམ་པ་གཅིག་ཏུ་གྱུར་པ་ཉིད་ཡིན་པའི་ཕྱིར་རོ། །འདིར་དཔེ་ནི་སྤྲིང་ཡིག་དང་ལག་ཡིག་དང་ལག་རྩིས་དག་གིས་སྤྲོད་པ་ལས་བྱུང་བ་དང་ལྡན་པར་སྨྲ་བ་དང༌། ཀུན་སྤྱོད་བསྔགས་པ་དང༌། གཞི་མེད་པ་དང༌། བག་
ཙམ་གྱིས་སྐུར་པ་འདེབས་པ་གོ་བར་བྱེད་པ་ལ་ནི་སྦོམ་པོའོ། །དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་ སོགས་པ ་དང༌། དེ་དག་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལས་སློང་པ་དང༌། རིན་སྤགས་པ་དང༌། སོ་སོ་ནས་སྤགས་པ་ཐོབ་པ་དང༌། ལྷུང་བཟེད་ཚོལ་པ་དང༌། འཐག་ཏུ་འཇུག་པ་དང༌། འཐག་པ་སྐྱེད་པ་དང༌། འཕྲོག་པ་དང༌། བརྫུན་དུ་སྨྲ་བ་དང༌། སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང༌། ཟློས་པ་དང༌། གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་རྣམས་དང༌། བཤེས་ངོར་བྱས་སོ་ཞེས་ཟེར་བ་དང༌། བསླབ་པ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། བསྒོ་བ་གཅོག་པ་དང༌། སྤྲོད་པ་དང༌། རིམ་པ་གསུམ་ལས་ལྷག་པར་བརྩིགས་པ་དང༌། མ་བསྐོས་པར་སྟོན་པར་བྱེད་པ་དང༌། ཟས་ཅུང་ཟད་ཙམ་ཀྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་བཅུག་པ་ལ་ནི་ཉེས་བྱས་སོ། །དེ་བཞིན་དུ་མེ་ལ་རེག་ཏུ་འཇུག་པ་དང༌། འགྱོད་པ་སྐྱེད་པ་དང༌། སྔངས་པར་བྱེད་པ་དང༌། ཡོ་བྱད་སྦེད་པ་དང༌། སྐུར་པ་འདེབས་པ་དང༌། དགེ་སློང་མའི་ལག་ནས་ཟས་ལེན་པ་དང༌། མ་བཟློག་བར་ཟ་བ་རྣམས་ལ་ཉེས་བྱས་སོ། །རང་གིའོ་ཞེས་བྱ་བ་ནི་རང་གི་ངག་གི་རྣམ་པར་རིག་བྱེད་ཡན་ལག་ཡིན་གྱི་མངགས་པ་གཅིག་ནས་གཅིག་ཏུ་བརྒྱུད་པ་མངགས་པས་མངགས་པ་ལ་ སོགས་པ ་དག་ནི་སྦོམ་པོའོ། །སྐུར་པ་འདེབས་པ་ནི་གཞི་མེད་པ་དང༌། བག་ཙམ་གྱིས་སྐུར་པ་འདེབས་པ་ལ་ཡང་སྦོམ་པོའོ། །ཉེ་དུ་མ་ཡིན་པའི་དགེ་སློང་མ་ལ་གོས་འཁྲུར་འཇུག་པ་ལ་ སོགས་པ ་དང༌། དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་དག་ལ་སློང་བ་དང༌། རིན་སྤགས་པ་དང༌། སོ་སོ་ནས་སྤགས་པ་ཐོབ་པ་དང༌། ལྷུང་བཟེད་ཚོལ་བ་དང༌། འཐག་ཏུ་འཇུག་པ་དང༌། འཐག་པ་སྐྱེད་པ་དང༌། འཕྲོག་པ་དང༌། བརྫུན་དུ་སྨྲ་བ་དང༌། སྐྱོན་ནས་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྔོགས་བྱེད་པ་དང༌། སྟོན་པ་དང༌། ཟློས་པ་དང༌། གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དག་དང༌། བཤེས་
༄༅། ངོར་བྱས་སོ་ཞེས་ཟེར་བ་དང༌། བསླབ་པ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། བསྒོ་བརྣ་ལ་གཟོན་པ་དག་སྐྲོད་པ་དང༌། རིམ་པ་གསུམ་ལས་ལྷག་པར་བརྩིགས་པ་དང༌། མ་བསྐོས་པར་སྟོན་པར་བྱེད་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟན་གཅོད་དུ་འཇུག་པ་དང༌། མེ་ལ་རེག་ཏུ་འཇུག་པ་དང༌། འགྱོད་པ་སྐྱེད་པ་དང༌། སྡངས་པར་བྱེད་པ་དང༌། ཡོ་བྱད་སྦེད་པ་དང༌། སྐུར་པ་འདེབས་པ་དང༌། ས་རྐོ་བ་དང༌། ཤིང་བལ་གྱིས་གོས་པར་བྱེད་པ་དང༌། དགེ་སློང་མའི་ལག་ནས་ཟན་ལེན་པ་དང༌། མ་བཟློག་པར་ཟ་བ་དག་ཀྱང་ཉེས་བྱས་སོ། །བདག་ཉིད་དང་འབྲེལ་པའོ་ཞེས་བྱ་བ་ནི། དེ་ལྟ་བུར་གྱུར་པ་ཡན་ལག་ཡིན་གྱི་གཞན་ལ་བསྙད་འདོགས་ པ་ནི་མ་ཡིན་ནོ། །སྤྲིང་ཡིག་ལ་སོགས ་པས་དེ་སྐད་ཟེར་རོ་ཞེའམ། ཆེ་གེ་མོ་ཞིག་འདི་སྐད་ཟེར་རོ་ཞེས་བྱ་བ་ལ་ སོགས་པ ་དང༌། འདིར་རང་གིས་བྲིས་པ་ལ་བྱེ་བྲག་འགའ་ཡང་དོགས་པར་བྱ་བ་མ་ཡིན་ཏེ། གཞན་ལ་བསྙད་འདོགས་པའི་ཚིག་ནི་རང་གི་དོན་དུ་གྱུར་ཏེ། དེ་བས་ན་རང་གི་དོན་ཉིད་གཙོ་ཆེར་ཡོད་པའི་ཞེས་སྨོས་པ་དེ་ཉིད་ཀྱིས་འགྲུབ་པའོ། །འདིར་ཡང་དཔེ་བརྗོད་པར་བྱ་སྟེ། གཞན་ལ་བསྙད་འདོགས་པས་སྤྲོད་པ་ལས་བྱུང་བ་དང་ལྡན་པ་སྨྲ་བ་དང༌། ཀུན་སྤྱོད་བསྔགས་པ་དང༌། གཞི་མེད་པ་དང་བག་ཙམ་གྱིས་སྐུར་པ་འདེབས་པ་ལ་ནི་སྦོམ་པོའོ། །དགེ་སློང་མ་ཉེ་དུ་མ་ཡིན་པ་ལ་གོས་འཁྲུར་འཇུག་པ་ལ་ སོགས་པ ་དང༌། དེ་ལས་གོས་ལེན་པ་དང༌། ཁྱིམ་བདག་དང་ཁྱིམ་བདག་གི་ཆུང་མ་ལས་སློང་བ་དང༌། རིན་སྤགས་པ་དང༌། སོ་སོ་ནས་སྤགས་པ་ཐོབ་པ་དང༌། ལྷུང་བཟེད་ཐོབ་པ་དང༌། འཐག་ཏུ་འཇུག་པ་དང༌། འཐག་པ་སྐྱེད་པ་དང༌། འཕྲོག་པ་དང༌། བརྫུན་དུ་སྨྲ་བ་དང༌། ཕྲ་མ་བྱེད་པ་དང༌། སྐྱོ་སྡོགས་བྱེད་པ་དང༌། སྟོན་པ་དང༌། ཟློས་པ་དང། གནས་ངན་ལེན་བརྗོད་པ་དང༌། མིའི་ཆོས་བླ་མ་བརྗོད་པ་དག་དང༌། བཤེས་ངོར་བྱས་སོ་ཞེས་ཟེར་བ་དང༌། བསླབ་པ་ཁྱད་དུ་གསོད་པ་དང༌། ཤིང་ལྗོན་པ་གཅོད་པ་དང༌། འཕྱ་བ་དང༌། གཞོགས་འཕྱས་བྱེད་པ་དང༌། བསྒོ་བ་གཅོག་པ་དང༌། སྐྲོད་པ་དང༌། རིམ་པ་གསུམ་ལས་ལྷག་པར་
བརྩིགས་པ་དང༌། མ་བསྐོས་པར་སྟོན་པ་དང༌། ཟས་ཅུང་ཟད་ཙམ་གྱི་ཕྱིར་སྟོན་ཏོ་ཞེས་སྐུར་པ་འདེབས་པ་དང༌། དགེ་སློང་མས་སྦྱོར་དུ་བཅུག་པའི་ཟས་ཟ་བ་དང༌། ཟས་གཅོད་དུ་འཇུག་པ་དང༌། མེ་ལ་རེག་ཏུ་བཅུག་པ་དང༌། འགྱོད་པ་སྐྱེད་པ་དང༌། སྡངས་པར་བྱེད་བ་དང༌། ཡོ་བྱད་སྦེད་པ་དང༌། ས་བརྐོ་བ་དང༌། ཤིང་བལ་གྱིས་གོས་པར་བྱེད་པ་དང༌། དགེ་སློང་མའི་ལག་ནས་ཟན་ལེན་པ་དང༌། མ་བཟློག་པར་ཟ་བ་དག་ཀྱང་ཉེས་བྱས་སོ། །རང་གིས་བསྐོས་པ་ཉིད་བྱེད་དུ་བཅུག་པ་ཡིན་ནོ་ཞེས་བྱ་བ་ནི། གསོད་པ་དང༌། རང་གི་དོན་དུ་རྐུ་བ་དག་ལས་གཞན་པའོ་ཞེས་བྱ་བར་སྦྱར་རོ། །གསོད་པ་དང་རང་གི་དོན་དུ་རྐུ་བ་དག་ལས་གཞན་བའི་དོན་ལ་མངགས་ པ་ལ་སོགས ་པས་དེ་ལ་རང་གིས་བསྐོས་པ་ཉིད་ཡན་ལག་ཡིན་ཏེ། དེ་དང་འདྲ་བའི་ཚིག་གིས་བརྗོད་པ་དང༌། ལུས་འཁྲུས་པས་གཞན་ལས་ནི་མ་ཡིན་ནོ་ཞེས་བྱའོ། །འདིར་ཡང་དཔེ་བརྗོད་པར་བྱ་སྟེ། རང་གིས་མངོན་སུམ་དུ་བསྐོས་པ་མ་ཡིན་པ་ལ་ནི་ཤིང་ལྗོན་པ་དང༌། བསྒོ་བ་རྣ་ལ་གཟོན་པ་དང༌། རིམ་པ་གསུམ་ལས་ལྷག་པར་བརྩིགས་པ་དང༌། ཤིང་བལ་གྱིས་གོས་པར་བྱེད་པ་དང༌། རིན་པོ་ཆེ་ལ་རེག་ཏུ་འཇུག་པ་དང༌། ས་རྐོར་འཇུག་པ་ལ་ སོགས་པ ་ཉེས་བྱས་སོ། །རྣམ་པར་འབྱེད་པར་གཏོགས་པ་ཕལ་ཆེ་བ་ཕྱིར་བསྟན་པ་རྣམས་རྫོགས་སོ།། །། སྤྱོད་ཡུལ་དུ་ཞུགས་པ་རྣལ་འབྱོར་བསྒོམ་པར་མི་བྱའོ་ཞེས་བྱ་བ་ལ། འདིས་ནི་བཅོམ་ལྡན་འདས་ཀྱིས་རྣལ་འབྱོར་བསྒོམ་པར་བྱའོ་ཞེས་གསུངས་པ་དང༌། དགེ་སློང་དག་སྤྱོད་ཡུལ་དུ་ཞུགས་ནས་ཡང་སྒོམ་པར་བྱེད་པ་དང༌། དེ་དག་གླང་པོ་ཆེ་འཁྲུལ་པ་དང་ལྷན་ཅིག་འགྲོ་ནས་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྤྱོད་ཡུལ་དུ་ཞུགས་པས་རྣལ་འབྱོར་བསྒོམ་པར་མི་བྱའོ་ཞེས་བྱ་བའི་བར་དུ་གསུངས་པ་དེ་བསྡུས་པ་ཡིན་ནོ། །འདིར་ནི་གོམས་པར་བྱེད་པ་བཀག་པ་ཡིན་གྱི། དེ་ལྟ་བུའི་གནས་སྐབས་ཅན་ལ་གང་དུ་རྣམ་པར་འགྱུར་བ་མིག་བཙུམ་པ་ཤེས་པར་འགྱུར་བའི་འདུལ་བའི་དོན་དུ་རྫུ་འཕྲུལ་གྱི་རྣམ་པར་འཕྲུལ་པ་ལ་ སོགས་པ ་བསྟན་པའི་ཕྱིར་དེ་ལ་སྐྱོན་ཆགས་པ་མེད་དོ། །མངོན་པར་འདུལ་བར་ཡང་མི་བྱའོ་ཞེས་བྱ་བ་རྣལ་འབྱོར་བསྒོམ་པར་མི་བྱའོ་ཞེས་བྱ་བར་སྦྱར་རོ། །འདིར་གཞུང་ནི་དགེ་སློང་དག་སྒོ་ཁང་དུ་རྣལ་འབྱོར་སྒོམ་པར་བྱེད་ན་དེ་དག་སྐུར་པ་དང༌། མ་དད་པ་དག་འདི་སྐད་ཅེས་
འཕགས་པ་དག་ཅི་ཁྱེད་ཅག་འདུ་བར་ཉལ་བའི་བརྟུལ་ཞུགས་ཅན་ཡིན་ནམ་ཞེས་ཅོ་འདྲི་བར་བྱེད་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། སྒོ་ཁང་དུ་རྣལ་འབྱོར་བསྒོམ་པར་མི་བྱའོ། །དེ་རྣམས་ཁྱམས་སུ་སྒོམ་པར་བྱེད་ན་ཡང་དེ་ཉིད་ཀྱི་ཉེས་དམིགས་སུ་གྱུར་པས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཁྱམས་སུ་ཡང་བསྒོམ་པར་མི་བྱའོ་ཞེས་བྱ་བ་འདིས་བསྡུས་པ་ཡིན་ནོ། །གཙུག་ལག་ཁང་གི་ཕྱི་རོལ་དུ་ཀུན་ནས་བསྐོར་བའི་གཙུག་ལག་ཁང་གི་རྫིང་བུ་ལ་ཞེས་བྱ་བ་ལ་ སོགས་པ ་ལ་ཡང་མཚུངས་པ་ཉིད་ཀྱི་ཕྱིར་འདིར་རིགས་པ་ཡིན་ནོ། །སྒོ་བཅད་ན་ནི་ཁྱམས་ལ་ སོགས་པ ་དག་ཏུ་མངོན་པར་འདུ་བ་ཉིད་དུ་རྒྱུན་ཆད་པར་འགྱུར་བས་ཉེས་བ་མེད་པ་དེ་གཉིས་བསྟན་པའི་དོན་དུ་སྟེ་དེ་ལྟར་བསྟན་པའོ། །དེ་ལྟར་ཡང་སྒོ་ཁང་དུ་མཚན་མོ་སྲོག་ཆགས་འབྱུང་བར་འགྱུར་རོ། །མཚན་མོ་སྦྲུལ་གྱིས་བཟུང་བས་ཤི་བར་གྱུར་པ་དང་ཞེས་བྱ་བ་ལ་ སོགས་པ ་ཡིན་ནོ། །རྣམ་པར་གཡེང་བར་བྱེད་པ་དང༌། གཏུམ་པོ་དང་གྱ་ཚོམ་པ་རྣམས་ཡོངས་སུ་སྤང་བར་རིགས་སོ་ཞེས་བྱ་བ་ནི། སྔ་མ་ལ་ནི་ཤིན་ཏུ་འབྱུང་བ་ཉིད་ཀྱི་ཕྱིར་མི་བྱ་བ་ཉིད་སྨོས་ཏེ། འདིར་ནི་འདི་ཤིན་ཏུ་མ་ཡིན་ཞེས་བྱ་བ་རིགས་པ་དེ་བས་ན་གསུངས་པ་ནི་རྣམ་པར་གཡེངས་པ་ཞེས་སྨོས་པས་དེ་རྣམས་གནས་ཁང་དུ་སྒོམ་པར་བྱེད་པ་ན་བསམ་གཏན་དག་གི་ཚེར་མ་ནི་སྒྲ་ཡིན་པས་སེམས་རྩེ་གཅིག་ཏུ་མི་གནས་པས་ན་སྐབས་དེ་ལ་བཅོམ་ལྡན་འདས་ཀྱིས་བཀའ་སྩལ་པ། གནས་ཁང་དུ་རྣལ་འབྱོར་བསྒོམ་པར་མི་བྱའོ་ཞེས་བྱ་བའི་བར་དུ་གསུངས་པ་དེ་བསྡུས་པ་ཡིན་ནོ། །རྣམ་པར་གཡེང་བར་བྱེད་པ་ཞེས་བྱ་བ་ནི། གནས་ཁང་དེ་འགྱུར་བས་རྣམ་པར་གཡེང་བར་བྱེད་པའི་ཕྱིར་རོ། །གཏུམ་པོ་ཞེས་བྱ་བ་སྨོས་པས་ནི་དེ་དག་དགོན་པར་བསྒོམ་པར་མི་བྱའོ་ཞེས་བྱ་བར་གསུངས་པ་དེ་བསྡུས་པ་ཡིན་ནོ། །འདིར་སེང་གེ་ལ་ སོགས་པ ་གཏུམ་པོ་རྣམས་འབྱུང་བར་འགྱུར་བ་དེའི་ཕྱིར་འདི་སྤང་པར་བྱའོ། །གྱ་ཚོམ་ཞེས་སྨོས་པ་ནི་དེ་དག་གྲོང་གི་ཉེ་འཁོར་དུ་དོར་ཏེ་སྒོམ་པར་བྱེད་པ་ན། མ་དད་པའི་གྱ་ཚོམ་བྱེད་པ་དག་འདི་སྐད་དུ་འཕགས་པ་དག་ཅི་ཁྱེད་འགའ་ཞིག་ཤི་བ་དང་ལྡན་པ་ཡིན་ནམ་ཞེས་ཅོ་འདྲི་བར་བྱེད་པ་ནས། བཅོམ་ལྡན་འདས་ཀྱིས་བཀའ་སྩལ་པ། ས་ཕྱོགས་
དེར་ཡལ་བར་དོར་བ་རྣམས་དང༌། ཀི་ཏ་ཀ་དང༌། ཀི་ལེན་ཛ་རྣམས་ཀྱིས་བསྐོར་བར་བྱའོ། །ས་ཕྱོགས་དེ་ཇི་སྲིད་དུ་ཡལ་ག་རྣམས་ཀྱིས་བསྐོར་བར་གྱུར་གྱི་བར་དུ་གྱ་ཚོམ་པ་མ་དད་པ་དག་འདི་སྐད་ཅེས་འཕགས་པ་དག །ཅི་ཁྱེད་འགའ་ཞིག་རས་བལ་གྱི་ལྡུམ་ར་བྱེད་དམ་ཞེས་ཅོ་འདྲི་བར་བྱེད་པའི་སྐབས་དེ་ས་ཕྱོགས་དེར་ཚེར་མ་དང༌། ཆུའི་འོབས་དག་གིས་བསྐོར་བར་བྱའོ། །ས་ཕྱོགས་ཚེར་མ་དག་ཆུའི་འོབས་ཀྱིས་བསྐོར་བར་གྱུར་པ་དང༌། གྱ་ཚོམ་པ་མ་དད་པ་དག་འདི་སྐད་ཅེས་ས་བོན་གྱིས་བཀང་བའི་ལྡུམ་ར་ཡིན་ནམ། འོན་ཏེ་སེའུ་འབྲུའི་ལྡུམ་ར་ཡིན་ཞེས་བྱ་བ་ནས། སྤོང་ཁང་བརྩིག་པར་བྱའོ་ཞེས་བྱ་བའི་བར་དུ་གསུངས་པ་ཡིན་ཏེ། མདོ་འདིས་ནི་དེ་དག་བསྡུས་པ་ཡིན་ནོ། །དེའི་ཕྱིར་སྤོང་ཁང་གི་སྐབས་ཡིན་པས་ན། གྲོང་དང་ཉེ་བ་ལ་ སོགས་པར་སྤོང་ཁང་བརྩིག་པར་བྱའོ་ཞེས་བྱ་བ་ལ། དེའི་རྣམ་པ ་ཅི་འདྲ་ཞེ་ན། དེའི་ཕྱིར་གནས་ཁང་གཉིས་ཀྱི་བར་དུ་སྲང་གདོད་དོ་ཞེས་བྱ་བ་སྨོས་ཏེ། ངོས་ཡ་གཅིག་ཏུ་ཡང་གནས་ཁང་བརྩིག་ལ། ངོས་གཞན་ལ་ནི་གཞན་བརྩིག་ཅིང་བར་དུ་སྲང་གདོད་པར་བྱ་བ་སྟེ། འདི་ནི་སྤོང་ཁང་ཆུང་དུའི་རྣམ་པ་ཡིན་ནོ། །བར་དུ་སྲང་གདོད་དོ་ཞེས་བྱ་བར་སྦྱར་ཏེ། ངོས་ཡ་གཅིག་ཏུ་ཡང་གནས་ཁང་ལྔ་བརྩིག་ལ། ངོས་གཞན་ལྔ་བརྩིག་ཅིང་བར་དུ་སྲང་གདོད་པར་བྱ་བའམ། ངོས་ཡ་གཅིག་ཏུ་ཡང་དྲུག་བརྩིག་ལ། ངོས་གཞན་ལ་ཡང་དྲུག་བརྩིག་ཅིང་བར་དུ་སྤང་གདོད་པར་བྱ་སྟེ། འདི་ནི་སྤོང་ཁང་ཆེན་པོའི་རྣམ་པ་ཡིན་ནོ། །སྤོང་ཁང་གཉིས་པོ་འདི་དག་ནི་ཆུང་དུ་དང་ཆེན་པོ་སྟེ། ཆུང་དུ་ནི་གནས་ཁང་གཉིས་པ་སྟེ་བར་དུ་སྲང་གདོད་པར་བྱའོ། །འདིར་ཆེན་པོ་ནི་གནས་ཁང་བཅུ་པའམ། གནས་ཁང་བཅུ་གཉིས་པ་ཞེས་གསུངས་པ་ཡིན་ནོ། །བར་མ་ནི་རྣམ་པར་གཞག་པ་སྟེ། འདི་མི་རིགས་པ་མ་ཡིན་ཏེ། བརྗོད་པ་ལ་དཔེ་གཉིས་ཀྱི་ཕྱིར་ཞེས་བྱའོ། །སྒོ་གླེགས་སྒྲ་མི་འབྱུང་བ་དང་དྲང་བའི་ཐབས་ཀྱང་ཞེས་བྱ་བ་ནི་བརྩིག་པར་བྱའོ་ཞེས་བྱ་བར་སྦྱར་ཏེ། འོག་ནས་སྒོ་ཁང་བྱའོ་ཞེས་འབྱུང་བ་ཡན་ཆད་ཀུན་ལ་འདི་རྗེས་སུ་སྦྱར་རོ། །དེའི་དང་པོ་བྱས་ནས་བརྩིག་པར་བྱའོ་ཞེས་བྱ་བའི་སྒྲས་བཤད་པ་འདི་བྱས་པ་ཞེས་བྱ་བ་དེ་ཙམ་ཞིག་འདིར་བརྗོད་པའོ། །འདིར་འདོད་པས་འཇུག་པ་ན། གལ་ཏེ་ཕོངས་པ་མ་ཡིན་པའི་དོན་ལ་འཇུག་ན་གལ་ཏེ་མ་ཡིན་ན་ཇི་ལྟར་མངོན་པར་འདོད་པས་འཇུག་པར་བྱའོ། །
འདིས་ནི་བཅོམ་ལྡན་འདས་ཀྱིས་བཀའ་སྩལ་པ། སྒོ་གདོད་པར་བྱའོ། །དགེ་སློང་དག་སྒོ་གླེགས་མི་འཇུད་ནས། བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །བཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། འཕགས་པ་དག་ལག་གཟུངས་གདབ་པར་བྱའོ། །སྒྲ་འཁྲོལ་ནས་བཅོམ་ལྡན་འདས་ཀྱིས་བཀའ་སྩལ་པ། འོག་ཏུ་ཀོ་བའི་དུམ་བུ་གཞུག་པར་བྱའོ། །དབྱེ་དཀའ་ན་བཅོམ་ལྡན་འདས་ཀྱིས་བཀའ་སྩལ་པ། འཕགས་པ་དག་ལག་གཟུངས་གདབ་པར་བྱའོ། །དབྱེ་བ་ན་སྒྲ་ཁྲིག་ནས་བཅོམ་ལྡན་འདས་ཀྱིས་བཀའ་སྩལ་པ། རས་མས་དཀྲི་བར་བྱའོ་ཞེས་བྱ་བ་གསུངས་པ་དེ་རྣམས་བསྡུས་པ་ཡིན་ནོ། །དེ་ལ་སྒྲ་མི་འབྱུང་བའི་ཐབས་ཞེས་བྱ་བ་ནི་འོག་ཏུ་ཀོ་བའི་དུམ་བུ་གཞུག་པར་བྱའོ་ཞེས་བྱ་བ་དང༌། རས་མས་དཀྲི་བར་བྱའོ་ཞེས་གསུངས་པ་དེ་རྣམས་བསྡུས་པ་ཡིན་ནོ། །དྲང་བའི་ཐབས་ཞེས་བྱ་བ་ནི་ཕྱི་ནང་གཉིས་ནས་ལག་གཟུངས་གདབ་པར་བྱའོ་ཞེས་གསུངས་པ་བསྡུས་པ་ཡིན་ནོ། །གོང་དུ་སུམ་ཆ་བོར་བར་སྐར་ཁུད་ཕྱི་རུབ་ལ་ནང་ཡངས་པ་ཡང་བཟང་ངོ་ཞེས་བྱ་བ་ལ། གོང་དུ་ཞེས་བྱ་བ་ནི་རྩིག་ངོས་ཀྱི་གོང་གི་སུམ་ཆ་བོར་ཞིང་སུམ་གཉིས་ལུས་པའི་ཕྱོགས་གང་ཡང་རུང་བ་དེར་སྐར་ཁུང་བཏོད་ན་བཟང་སྟེ། དམས་ན་ནི་ཆོམ་རྐུན་ པ་དང༌། གཡོན་ཅན་དང་སེང་གེ་ལ་སོགས ་པས་འཛུལ་བའི་ཕྱིར་རོ། །མཐོས་ན་ནི་སྣང་བ་གསལ་བར་མི་འགྱུར་རོ། །གོང་དུ་སུམ་ཆ་བོར་བ་ལ་ སོགས་པའི་དོན་དུ་འདི་བྱས་སོ། །དེ་ཉིད་ནི་འཇིག་རྟེན་པ ་ལ་གྲུབ་པའི་ཕྱིར་རོ། །དྲ་བ་དང༌། སྒོ་གླེགས་དང༌། འཕྲེད་གཏན་དང༌། གནམ་གཟེར་དང༌། འཁོར་གཏན་དང༌། དབྱུག་གུ་སྐམ་ཁ་ཉེ་བར་གཞག་པར་བྱའོ་ཞེས་བྱ་བར་སྦྱར་རོ། །འདིས་ནི་ཁྲ་དང༌། མཆིལ་པ་དང༌། ཕོ་རོག་དག་འཇུག་ནས། བཅོམ་ལྡན་འདས་ཀྱིས་བཀའ་སྩལ་པ། སྐར་ཁུད་དྲ་བ་ཅན་དུའོ། །སྦྲང་བུ་ཏྲྱཻ་མ་བུག་དང༌། ཏྲྱེ་ལ་ཀ་དག་འཇུག་ནས་བཅོམ་ལྡན་འདས་ཀྱིས་བཀའ་སྩལ་པ། སྒོ་གླེགས་གཞུག་པར་བྱའོ། །རླུང་གིས་ཕྱེ་ནས་བཅོམ་ལྡན་འདས་ཀྱིས་བཀའ་སྩལ་པ། འཕྲེད་གཏན་གཞུག་པར་བྱའོ། །བཅད་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། གནམ་གཟེར་དང་འཁོར་གཏན་
གཞུག་པར་བྱའོ། །དབྱེ་དཀའ་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུ་གུ་སྐམ་ཁ་ཉེ་བར་གཞག་པར་བྱའོ་ཞེས་གསུངས་པ་དེ་འདིར་བསྡུས་པ་ཡིན་ནོ། །དྲ་བ་དང་ཞེས་བྱ་བ་ནི་བུག་པ་ཕྲ་མོ་བསྟན་པའི་དོན་དུ་ཅན་གྱི་སྒྲ་སྦྱར་རོ། །མི་ཤོང་ན་སྟེང་དུ་ཁང་མོ་ཆེ་བྱའོ། །ཡང་ན་ཡང་ཐོག་གོ་ཞེས་བྱ་བ་ལས། ཁང་མོ་ཆེ་ཞེས་བྱ་བ་ནི། སྤོང་ཁང་རྣམས་ཀྱི་སྟེང་དུའོ། །གལ་ཏེ་སྤོང་ཁང་ལ་སྤོང་ཁང་རྣམས་ཀྱི་ཚད་དུ་མི་འགྱུར་ན་སྟེང་དུ་ཁང་པ་མི་བྱ་སྟེ། ཁང་པ་གཞན་ལས་ཞེས་བྱ་བའི་དོན་ཏོ། །གཞུང་ཁ་ཅིག་ལས་དེ་དག་དེར་མི་ཤོང་ནས་སྟེང་དུ་རིམ་ཁང་གཉིས་པ་བྱའོ་ཞེས་གསུངས་པ་དང༌། དེ་གཉིས་ཀ་ཡང་འགལ་བ་མེད་པས་མདོ་འདིར་བསྡུས་པའོ། །འཛེག་པའི་ཕྱིར་ཐེམ་སྐས་སོ་ཞེས་བྱ་བ་ནི། བྱའོ་ཞེས་བྱ་བར་སྦྱར་ཏེ་འཛེག་པའི་ཕྱིར་དེར་ཐེམ་སྐས་བྱའོ་ཞེས་བྱ་བའི་དོན་ཏོ། །མི་ལྟུང་བར་བྱ་བའི་ཕྱིར་ཁ་ཁྱེར་གྱིས་བསྐོར་བར་བྱའོ། །དེ་མི་འགུལ་བར་བྱ་བའི་ཕྱིར་ལྕགས་ཀྱི་གཟེར་བུ་དག་གིས་གདབ་བོ་ཞེས་བྱ་བ་ནི། དེ་རྣམས་ཀྱིས་ནི་ཁ་ཁྱེར་དེ་དག་ལ་འཛེག་དཀའ་ནས། བཅོམ་ལྡན་འདས་ཀྱིས་བཀའ་སྩལ་པ། ཐེམ་སྐས་བྱའོ། །ལྟུང་བར་གྱུར་ནས། ཁ་ཁྱེར་གྱིས་བསྐོར་བར་བྱའོ། །དེ་འགུལ་ནས་བཅོམ་ལྡན་འདས་ཀྱིས་བཀའ་སྩལ་པ། ལྕགས་ཀྱི་གཟེར་བུ་དག་གིས་གདབ་པར་བྱའོ་ཞེས་གསུངས་པ་དེ་འདིས་བསྡུས་པ་ཡིན་ནོ། །ཕྱི་རོལ་དུ་སྤོང་ཁང་ཆེན་པོ་འམ་གནས་ཁང་གི་ཚར་དག་ཀྱང་ངོ་ཞེས་བྱ་བ་ནི། བྱའོ་ཞེས་བྱ་བའི་རྗེས་བསྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་ཡང་ངམ་ཞེས་བྱ་བའི་སྒྲ་ནི་ཚིག་གཉིས་ཀ་ཡང་བསྡུས་པའི་ཕྱིར་རོ། །རབ་ཏུ་བྱུང་བ་འདི་ནི་ཕན་ཚུན་མི་སྣང་བའི་ཕྱིར་ནི་མ་ཡིན་ཏེ། གནས་ཁང་གི་ཚར་དག་ཀྱང་ཞེས་བྱ་བ་དེ་ཡང༌། སྔར་ལྟར་ཚིག་གཉིས་ཀ་བསྡུ་བའི་ཕྱིར་ཀྱང་གི་སྒྲ་སྨོས་སོ། །སྒོའི་ཐད་ཀར་སྒོ་གདོད་པར་མི་བྱའོ་ཞེས་བྱ་བ་ལས། འདིས་ནི་དེ་དག་ཉན་དུ་འགྱུར་བའི་སྒོ་དག་གདོད་ཅིང་ཕན་ཚུན་སྣང་ནས། བཅོམ་ལྡན་འདས་ཀྱིས་བཀའ་སྩལ་པ། སྒོ་དག་གཟུར་ཏེ་གདོད་པར་བྱའོ་ཞེས་གསུངས་པ་དེ་བསྡུས་པ་ཡིན་ནོ། །གལ་ཏེ་ཕྱི་རོལ་གྱི་ཆར་གྱིས་དེ་མ་ཐག་པ་དེ་སྨོས་པ་ཡིན་ནོ། །དེ་ལྟར་ཡང་ནང་དུ་ཉེས་པ་མི་
འགྲུབ་པ་ཡིན་ནོ། །དེ་ལྟ་བས་ན་དེ་འདི་ལས་ཐ་དད་པར་གྱུར་པ་གཉིས་ཀ་ལ་འགྲོ་བའི་ཚིག་ཏུ་གཏོགས་པར་བྱའོ། །སྒོ་ཁང་བྱའོ་ཞེས་བྱ་བ་ནི། སྤོང་ཁང་ལ་སྒོ་ཁང་བྱའོ། །ཕུག་ཀྱང་ངོ་ཞེས་བྱ་བ་ནི། སྤོང་ཁང་གི་ཉེན་འཁོར་དུ་ཞེས་བྱ་བས་དེ་དག་འབྲེལ་པའི་ཆོ་ག་རྣམ་པར་བསྟན་པའི་སྐབས་ནས་ཤེས་པར་བྱའོ། །འདུག་པའི་ཆེད་དུ་སའི་སྟེགས་བུ་དག་དང་ཁྲིའུ་ཡང་བྱའོ་ཞེས་བྱ་བ་ནི་བྱའོ་ཞེས་བྱ་བ་འདི་གཉིས་ཀ་ལ་སྦྱར་རོ། །དེའི་ཁོ་ར་ཁོར་ཡུག་ཏུ་ཁྲུ་བཞིས་འཁོར་བ་བཟང་ངོ་ཞེས་བྱ་བ་ནི། གྲུ་བཞི་པོའི་ངོས་རེ་རེ་ལ་ཁྲུ་གང་པའི་ཚད་བྱའོ་ཞེས་བྱ་བའི་དོན་ཏོ། །ཐགས་མ་ནི་རྣམ་པ་ལྔའོ་ཞེས་བྱ་བ་ནི། ཁྲིའུའི་སྟེང་དུའོ། །མུན་ཛའི་དང༌། ཤ་ནའི་དང༌། གྲེས་མའི་དང༌། རས་མའི་དང༌། སྦ་ཕྲ་མོའིའོ་ཞེས་བྱ་བ་ནི། རུང་བར་གྲགས་པའི་ཕྱིར། དེ་རྣམས་ཉིད་དུ་གྲགས་པར་ཤེས་པར་བྱའོ། །དེའི་ཐ་གུ་ལ་ སོགས་པ ་བཀག་པ་ནི་མ་ཡིན་པར་ཤེས་པར་བྱའོ། །ཐགས་མ་དག་ཐ་གུ་དམས་པས་སྒྲོགས་པ་ལ། དེར་སྟན་ནང་ཚངས་ཅན་དག་གདིང་ངོ་ཞེས་བྱ་བ་ལ། དེར་ཞེས་བྱ་བ་ནི་ཁྲིའུ་ལའོ། །དེའི་ཁོ་ར་ཁོར་ཡུག་ཏུ་མཐོ་གང་ལྷག་པ་ཉིད་བཟང་ངོ་ཞེས་བྱ་བ་ནི། ཁྲིའུ་དེའི་ཁོར་ཁོར་ཡུག་ཏུ་སྟན་ནང་ཚངས་ཅན་དེའི་ཐ་མ་མཐོ་རེ་རེ་ལྷག་ན་བཟང་བ་སྟེ། དེ་ལྟར་འདུག་པ་ལ་ སོགས་པ ་ལ་ཁྲིའུ་དེ་མི་གནོད་ཅིང་སྟན་ནང་ཚངས་ཅན་དེའི་ཐ་མའི་རིག་པར་འགྱུར་པ་དེ་ལྟ་བས་ན་རྫས་སྲིད་དུ་ཁྲུ་བཞི་པ་ཞིང་དུ་ཁྲུ་དོ་ཡོད་པ་ཉིས་ལྟབ་ཏུ་བྱས་ཏེ་བཙེམ་པར་བྱའོ་ཞེས་བྱ་བའི་དོན་ཏོ། །ཨརྐའི་དང༌། ཀ་ཤི་དང༌། ཨེ་ར་ཀའི་དང༌། སྲ་བའི་དང༌། ཤ་མ་ལ་དག་གི་བལ་གྱིས་དགང་ངོ༌། །བལ་དང༌། ཤ་ན་དང༌། རས་བལ་དང༌། རས་མ་དག་དང༌། ལོ་མའི་ཚོགས་དག་གིས་ཀྱང་ངོ་ཞེས་བྱ་བ་སྨོས་ཏེ། འདིར་རུང་བར་གྲགས་པ་བསྟན་པའི་ཕྱིར་དེ་དག་སྨོས་པར་མ་ཟད་ཀྱི། བཟང་པོའི་སྒྲ་འཇུག་པ་ཡིན་ནོ། །དོན་ཇི་ལྟ་བ་བཞིན་དུ་འདུག་པར་བྱ་བའི་ཕྱིར་མདོ་མདོར་བྱ་རོག་རྐང་དག་བྱའོ་ཞེས་བྱ་བ་ལ། དོན་ཇི་ལྟ་བ་བཞིན་དུ་ཞེས་བྱ་བ་ནི། ཐམས་ཅད་དུ་ཁོད་སྙོམས་པར་འགྱུར་བ་འདི་ནི་འདིར་དོན་ཏོ། །དེ་ཇི་ལྟ་བ་བཞིན་དུ་སྒྲུབ་པ་དེ་ལྟར་གནས་པའི་ཕྱིར་སྟན་ནང་ཚངས་ཅན་
གྱི་ཕྱོགས་ཐམས་ཅད་དུ་སྙོམས་པར་ཁྱབ་ཅིང༌། གཞན་དུ་མི་འཇུག་པར་བྱ་བའི་ཕྱིར་བྱ་རོག་གི་རྐང་པ་འདྲ་བ་དག་གིས་གཟུངས་གདབ་པར་བྱའོ་ཞེས་བྱ་བའི་དོན་ཏོ། །བསྒོམ་པ་ན་གཉིད་ཀྱི་གནོད་པ་བསལ་བར་བྱ་བའི་ཕྱིར། གཉིད་བྲོ་ན་གདོས་བུ་གདགས་པར་བྱའོ་ཞེས་བྱ་བ་སྨོས་ཏེ། ཤིང་བལ་ལ་ སོགས་པ ་ལས་བྱས་པའི་གདོས་བུ་ཆུང་དུའི་ཚད་དེ་ལུང་མི་གནས་སྐུད་པ་བཏགས་ཏེ། བསམ་གཏན་པ་རྣམས་གཉིད་བྲོ་ན་གདོས་བུ་དེ་རང་གི་རྣ་བ་ལ་བཏགས་ཏེ་སྤྱད་པར་བྱའོ། །འདིར་གཞུང་ནི། གཉིད་བྲོ་ན་གདོས་བུ་གདགས་པར་བྱའོ། །དེ་ལྷུང་ནས་བཅོམ་ལྡན་འདས་ཀྱིས་བཀའ་སྩལ་པ། སྐུད་པས་བཅིངས་ཏེ་རྣ་བ་ལ་བཏགས་ཤིང་བཅང་བར་བྱའོ་ཞེས་གསུངས་པ་ཡིན་ནོ། །དབྱུ་གུ་དལ་བུས་གཟུགས་པར་བྱའོ་ཞེས་བྱ་བ་ནི། དེའི་བསམ་གཏན་ཉིད་འགྲོགས་པར་མི་འགྱུར་བ་དེ་ལྟར་དལ་བུས་གཟུགས་པར་བྱའོ་ཞེས་སྨོས་སོ། །འདི་ནི་སྤོང་བའི་ཞལ་ཏ་བའི་ལས་ཡིན་ཏེ། དེས་དབྱུག་གུ་དལ་བུས་བཙུགས་པ་དེས་དེའི་གཉིད་སད་པར་འགྱུར་རོ། །གནོད་པར་མི་འགྱུར་བར་བྱ་བའི་ཕྱིར་བྲེའི་བཅད་འཕྲོ་ལྟ་བུར་རས་མ་དག་གིས་དཀྲིས་པས་སོ་ཞེས་བྱ་བ་ལས། བྲེའི་བཅད་འཕྲོ་ལྟ་བུ་ཞེས་བྱ་བ་ནི། བྲེའི་བཅད་འཕྲོ་ལྟར་འདི་ལ་བཅད་པ་ཡོད་པས་ན་ཞེས་བྱ་བའི་བསྡུ་བའོ། །རས་མ་དག་གིས་དཀྲིས་པ་གང་ཡིན་པ་དེ་ནི་སྡུག་བསྔལ་གྱིས་འབྱུང་བར་བྱ་བའི་ཕྱིར་བསྟན་པ་ཁོ་ནའོ། །རས་མ་ཞེས་བྱ་བ་གཞན་དག་གི་དཔེ་ཙམ་དུ་ཟད་དེ། རས་བལ་ལ་ སོགས་པ ་གཞན་གྱིས་ཀྱང་དཀྲི་བར་བྱ་བ་ནི་རིགས་པ་ཡིན་ནོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། དབྱུག་གུ་གཟུགས་པར་བྱའོ། །དགེ་སློང་དག་གིས་སྨྱིག་མ་བརྩལ་ཏེ་དེས་འཛུག་པ་ལས་རྨ་བྱུང་ནས། བཅོམ་ལྡན་འདས་ཀྱིས་བཀའ་སྩལ་བ། བྲེའི་བཅད་འཕྲོ་ལྟ་བུར་བྱའོ། །འོན་ཀྱང་སྣད་ནས་བཅོམ་ལྡན་འདས་ཀྱིས་བཀའ་སྩལ་པ། རས་མ་དག་གིས་དཀྲིས་ནས་དལ་བུས་ཁད་ཀྱིས་གཟུགས་པར་བྱའོ་ཞེས་གསུངས་པ་ཡིན་ནོ། །ཕོ་ལང་འཕང་བར་བྱའོ། །ཡང་ཕྱིར་འོང་བར་བྱ་བའི་ཕྱིར་ཐ་གུས་གདགས་པར་བྱའོ་ཞེས་བྱ་བ་ནི། ཕོ་ལང་དེ་ཡང་
ཕྱིར་དྲང་བར་བྱ་བའི་ཕྱིར་ཐ་གུ་ཕྲ་མོ་རིང་མོས་བཏགས་ཏེ་འཕང་བར་བྱའོ། །དེ་ལྟར་བྱས་ན་ཡང་དུ་འཕང་ཞིང་བླང་སླ་བར་འགྱུར་རོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་བ། ཕོ་ལོང་འཕང་བར་བྱའོ། །དགེ་སློང་དག་གིས་མུན་ཁུང་ན་མི་མཐོང་ནས། བཅོམ་ལྡན་འདས་ཀྱིས་བཀའ་སྩལ་པ། ཐ་གུས་བཏགས་ཏེ་འཕང་བར་བྱ་ཞིང༌། དེ་ནས་ཡང་ཕྱིར་དྲན་པར་བྱའོ་ཞེས་གསུངས་པ་ཡིན་ནོ། །མདུན་དུ་མར་མེ་གཞག་པར་བྱའོ་ཞེས་བྱ་བ་ནི་གཉིད་བསལ་བའི་དོན་དུ་ཆོ་ག་འདི་ཡིན་ཏེ། འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། མདུན་དུ་མར་མེ་གཞག་པར་བྱའོ་ཞེས་གསུངས་པ་ཡིན་ནོ། །འོན་ཀྱང་གཉིད་མ་སངས་ན་རྐང་པ་དབྱུང་ངོ༌། འོན་ཀྱང་མ་སངས་ན་ཡ་གཅིག་བརྐྱང་ངོ་ཞེས་བྱ་བ་ན། རྐང་པ་དབྱུང་ངོ་ཞེས་བྱ་བར་སྦྱར་རོ། །འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་བ། རྐང་པ་ཡ་གཅིག་བརྐྱང་བར་བྱའོ། །འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་ཡ་གཅིག་ཀྱང་བརྐྱང་བར་བྱའོ་ཞེས་གསུངས་པ་ཡིན་ནོ། །མི་འཐོམ་པར་བྱ་བའི་ཕྱིར་ཕྲེང་ཐག་དེ་དག་དེ་ལྟ་བུ་ལ་བཀོད་པའི་བུ་གུའམ། དེ་ལ་བཏགས་པའི་ཐག་པ་ལ་འཇུས་ཏེ་བཅག་པར་བྱའོ་ཞེས་བྱ་བ་ནི། ཕྲེང་ཐག་ཆད་པར་རབ་ཏུ་བརྐྱངས་པ་དེ་ལྟ་བུ་ལ་སྨྱུ་གུའི་སྦུབས་ལ་ སོགས་པ ་བསྐོན་པ་ལ་འཇུས་ཏེ་བཅག་པར་བྱའོ། །ཅིའི་དོན་དུ་འཇུས་ཤེ་ན། བཀའ་སྩལ་པ། མི་འཐོམ་པའི་དོན་དུ་སྟེ། འདིར་གཞུང་ནི་འོན་ཀྱང་ཡུར་ནས་བཅོམ་ལྡན་འདས་ཀྱིས་བཀའ་སྩལ་བ། ལངས་ཏེ་བཅག་པར་བྱའོ། །དགེ་སློང་དག་འཆག་པ་ན་འཐོམས་ནས། བཅོམ་ལྡན་འདས་ཀྱིས་བཀའ་སྩལ་པ། ཕྲེང་ཐག་ལ་འཇུ་བར་བྱའོ། །དེ་དག་ལག་པས་འཆད་བརྒྱུད་བྱེད་དམ། བཅོམ་ལྡན་འདས་ཀྱིས་བཀའ་སྩལ་པ། སྦུ་གུ་བསྐྱོན་ནས་སྐུད་པས་བཏགས་པ་ལ་འཇུས་ཏེ། བཅག་པར་བྱའོ་ཞེས་གསུངས་པ་ཡིན་ནོ། །འདིར་སྦུ་གུ་ལ་འཇུས་པ་ནི་སྦྱོར་བ་སྟེ། གཞུང་ལས་ཀྱང་འཐོགས་པ་སྲིད་པ་དེ་བས་ན་དེ་ལྟར་ཉེ་བར་འབྲེལ་པའོ། །མཆི་ལ་ལྷ་མ་ཅན་གྱིས་བཅག་པར་མི་བྱའོ་ཞེས་བྱ་བ་ནི་སྤོང་བ་ཉི་
ཚེར་མ་ཟད་ཀྱི་འོན་གང་ཞེ་ན། མཚོན་པའི་ཕྱིར་སྤོང་བ་པའི་ཞེས་སྨོས་པས་རིག་པར་བྱའོ། །རྐང་པ་གཉིས་ལ་རྡུལ་མི་འགོ་བར་བྱ་བའི་ཕྱིར་པར་ཐང་འདིང་བར་བྱའོ་ཞེས་བྱ་བ་ལ། འདིར་པར་ཐང་ཞེས་སྨོས་པ་ནི། འཇམ་པོ་དང་སྟན་གཞན་དག་གི་དཔེ་ཡིན་ནོ། །མི་འགོ་བར་བྱ་བའི་ཕྱིར་ཞེས་བྱ་བ་ནི། རྡུལ་གྱིས་མི་འགོ་བར་བྱ་བའི་ཕྱིར་རོ། །འདི་ནི་དཔེ་ཙམ་ཡིན་གྱི་ལུས་ཡིད་དུ་འོང་བ་ལ་དེ་བས་གཞན་གྱིས་ཀྱང་ལུས་ཀྱི་གོས་དང་སྟན་རྣམས་ཀྱིས་ཉམས་པ་བས་ལ་བའི་ཕྱིར། རྐང་པ་ཕྱི་བ་དང༌། བསྡུ་བ་དང༌། རྐང་པ་རྡུལ་ཅན་གྱིས་སྐྱིལ་མོ་ཀྲུང་འཆའ་བའི་རྒྱུ་མཚན་ཉིད་ཀྱི་ཕྱིར་རོ། །སྤོང་བ་པས་ཞག་གསུམ་ཞིང་རྐང་པ་གཉིས་བསྐུ་བར་བྱའོ་ཞེས་བྱ་བ་ནི། ཞག་གསུམ་གསུམ་ཞིང་རྐང་པ་གཉིས་བསྐུ་བར་བྱ་སྟེ། དེ་ལས་ལྷག་པར་ནི་མ་ཡིན་ཏེ་ཞེས་དེ་ལྟར་འདི་ནི་གཙོ་བོ་ཡིན་ནོ། །མ་ནུས་ན་དེར་ཡང་ཉལ་བར་བྱའོ་ཞེས་བྱ་བ་ནི། གཉིད་བྲོ་བས་བསད་པར་མ་ནུས་ན། རྣལ་འབྱོར་གྱི་གནས་དེར་ཡང་ཉལ་བ་ཉེས་པ་མེད་པ་སྟེ། རྣལ་འབྱོར་གྱི་གནས་ཉིད་ཀྱི་ཕྱིར་རོ། །དེ་ལ་འདི་ནི་རྣལ་འབྱོར་དང་བཅས་པ་ཉིད་ཀྱིས་དེར་ཞུགས་པ་སྲིད་པའི་ཕྱིར་གཞན་དུ་སོང་སྟེ། འདི་བྱེད་པ་རིགས་པ་ཞེས་བྱ་བ་དེའི་འདོད་པ་བསལ་བའི་དོན་དུའོ། །སྒོ་བཅད་པར་རོ་ཞེས་བྱ་བ་ལ་འདི་ནི་གཞན་དག་མ་དད་པར་འགྱུར་བ་དང༌། ཐོ་འཚམས་པར་འགྱུར་བའི་སྤང་བའི་ཕྱིར། སྒོ་གླེགས་ལ་ སོགས་པས་སྒོ་བཅད་པ ་དེར་ཉལ་བ་ལ་ཉེས་པ་མེད་དོ། །གློས་ཀྱང་ཕབ་སྟེའོ་ཞེས་བྱ་བ་ནི། ཉལ་དུ་རུང་ངོ་ཞེས་བྱ་བའི་དོན་དུའོ། །དེ་ཡང་སྟན་ལ་ཉལ་བ་འདིར་རུང་བ་མ་ཡིན་གྱི་གཞན་ནི་མ་ཡིན་ཞེས་བྱ་བ་འདོད་པ་བསལ་བའི་དོན་དུའོ། །དེ་ཡང་སྟན་ལ་ཉལ་བ་འདིར་རུང་བ་ཡིན་གྱི་གཞན་ནི་མ་ཡིན་ཞེས་བྱ་བ་འདོད་པའི་དོན་དུའོ། །སྤོང་བ་བའི་ཕྱིར་ཞལ་ཏ་བ་བསྐོ་བར་བྱའོ་ཞེས་བྱ་བ་ནི། །ཇི་ལྟར་འོས་པ་དེ་དགེ་འདུན་གྱིས་གསོལ་བ་དང་གཉིས་ཀྱིས་བསྐོ་བར་བྱའོ། །དེའི་བྱ་བ་ནི་ལངས་མ་ཐག་ཁོ་ནར་ཆག་ཆག་གདབ་པ་དང༌། ཕྱག་དར་བྱ་བ་དང༌། ལྕི་བསར་བའི་བྱུག་པས་བསྐུ་བར་བྱའོ་ཞེས་བྱ་བ་ལ། །སྤོང་བ་བའི་ཞལ་ཏ་བ་དེས་ལས་སུ་བྱ་བ་སྟེ། དེས་བྱ་བའི་ལས་འོག་ནས་འབྱུང་
བ་ཐམས་ཅད་ལ་སྤྱིར་སྦྱར་རོ། །ལངས་མ་ཐག་ཁོ་ནར་ཞེས་བྱ་བ་ནི། ནམ་ལངས་མ་ཐག་ཁོ་ནར་ལངས་ནས་སོ། །སྟན་བཤམ་པར་བྱའོ། །མི་གཙང་བའི་སྐྱབས་གཉིས་ཀྱིས་བྱི་དོར་བྱའོ་ཞེས་བྱ་བ་ནི་བཤང་བ་དང་གཅི་བའི་ས་གཉིས་བྱི་དོར་བྱའོ། །ཆག་ཆག་ལ་སོགས་པས་སོ་ཞེས་བྱ་བ་ལ་སོགས་པའི་སྒྲས་ནི་ཕྱག་དར་བྱ་བ་དང༌། ལྕི་བ་སར་པའི་བྱུག་པས་བསྐུ་བ་དག་བསྡུས་སོ། །བོང་རྡོག་དང༌། ས་དང་ཆུ་དག་གཞག་པར་བྱའོ་ཞེས་བྱ་བ་ལ་འདིར་དག་པར་བྱ་བའི་ཕྱིར་དུས་དང་མཐུན་པའི་ཆུ་ཞེས་བྱ་བ་ཕྲན་ཚེགས་དག་གི་རྗེས་སུ་འབྲངས་ནས་ཤེས་པར་བྱའོ། །བསྡུ་བའི་ཕྱིར་གཎྜཱི་བརྡུང་ངོ་ཞེས་བྱ་བ་ནི། སྤོང་བ་པ་རྣམས་ཞེས་བྱ་བ་ཤུགས་ཀྱིས་རྟོགས་པར་བྱའོ། །དེའི་གནས་ནི་ཁང་སྟེང་ངོ་ཞེས་བྱ་བ་ལ། དེའི་ཞེས་བྱ་བ་ནི་གཎྜཱི་བརྡུང་བ་དེའི་གནས་དེའོ། །གང་དང་གང་དུ་དེ་དང་དེ་བརྗོད་པ་དེར་འདི་གནས་པར་རྟོགས་པར་བྱ་སྟེ། དེ་བས་ན་འདིས་བྱས་པའོ། །དེའི་ཁང་སྟེང་དུ་སྒྲུབ་པ་ལ་མཆོག །དེ་བས་ན་གཞན་ཁང་སྟེང་གི་རྣམ་པ་མ་ཡིན་ཏེ། འདིར་དེའི་གནས་སུ་གཏོགས་པའི་གནས་དེ་དང་དེར་ཁང་ཐོག་ཏུ་འཛེགས་ནས་བཀླག་པར་བྱའོ་ཞེས་བྱུང་བ་ཡིན་ཏེ། དེ་བས་ན་མདོ་འདིའོ།། དེ་སྒྲུབ་པར་བྱེད་པས་ནི་མ་ཡིན་ཞེས་བྱ་བ་འདོན་པས་མེད་པར་ཤེས་པར་བྱ་བ་སྟེ། དགོངས་པ་མཚུངས་པ་ཉིད་ཀྱི་ཕྱིར་རོ། །དགེ་འདུན་བསྡུ་བའི་ཕྱིར་ནི་རྒྱུད་གསུམ་དང་དེ་སྙེད་ཀྱི་ཏོག་དག་གོ་ཞེས་བྱ་བ་ནི་ལན་གསུམ་བྱའོ་ཞེས་བྱ་བའི་དོན་ཏོ། །ལས་བྱ་བའི་དོན་དུ་གཎྜཱི་བརྡུང་བ་ལ་ནི་རྒྱུད་གཅིག་དང། ཏོག་གསུམ་བརྡུང་ངོ་ཞེས་བྱ་བའི་དོན་ཏོ། །ཁ་ཅིག་ལས་རྒྱུད་གསུམ་དང་ཏོག་གཉིས་སོ་ཞེས་བྱ་བ་ལུགས་གཅིག་ལས། ལས་བྱ་བའི་དོན་དུ་གཎྜཱི་བརྡུང་བ་ལ་ནི། རྒྱུད་གསུམ་དང་ཏོག་གཉིས་ཞེས་ཀྱང་འབྱུང་སྟེ། འདི་ནི་ཏོག་གི་སྒྲས་བརྗོད་པའོ། །ཁ་ཅིག་ཅེས་བྱ་བ་ནི་འདོད་པའོ། །ལས་བྱ་བའི་དོན་དུ་ཁ་ཅིག་གི་འདོད་པ་འདི་ཞེས་བྱ་བའི་དོན་དུའོ། །ཤི་བ་ལ་ཕྲག་པ་དབྱུང་བའི་དོན་དུ་ནི་བྱི་བོའོ་ཞེས་བྱ་བ་ནི། གཎྜཱི་བརྡུང་བ་ནི་བྱི་བོ་སྟེ། བྱི་བོ་ཞེས་བྱ་བ་ནི་རྒྱུད་ཉེ་ཚེ་སྟེ་ཏོག་དང་བྲལ་ལོ། །ཁ་ཅིག་ལས་ནི་རྒྱུད་གཅིག་དང་ཏོག་གཅིག་གོ་ཞེས་བྱ་བ་ནི་ལུགས་
ཁ་ཅིག་ལས་ཏེ་འདོད་པ་གཞན་ཉེ་བར་བཀོད་པའོ། །སྤོང་བ་བའི་དོན་དུ་ནི་ཁར་གསིལ་ལོ་ཞེས་བྱ་བ་ནི། དེས་གཎྜཱི་བྱ་བའི་དོན་ཏོ། །ཁ་ཅིག་ལས་གཎྜཱི་ཆུང་དུ་ཞེའོ་ཞེས་བྱ་བ་ནི། ཀློག་པར་བྱེད་པའི་རྟོགས་པས་མངོན་པར་འབྲེལ་པ་ཕོའི་རྟགས་འདི་བསྟན་ཏོ། །འདི་དག་གི་དོན་གཅིག་ཁོ་ན་ཞེས་བྱ་སྟེ། དེ་བས་ན་འདི་བསྟན་པ་ཁར་གསིལ་ཉིད་གཎྜཱི་ཆུང་དུ་ཞེས་བྱ་བ་བརྗོད་དོ། །གནོད་པ་བྱུང་བ་ལ་ནི་ཇི་ཙམ་གྱིས་ཆོག་པའོ་ཞེས་བྱ་བ་ནི། གནོད་པ་བྱུང་བའི་ཚེ་གཎྜཱི་བརྡུང་བ་ལ་ནི་ཇི་ཙམ་གྱིས་ཆོག་པ་དེ་ཙམ་བརྡུང་བར་བྱ་སྟེ། ནམ་ཞི་བར་གྱུར་གྱི་བར་དུ་བརྡུང་ངོ་ཞེས་བྱ་བའི་དོན་ཏོ། །ཟན་གྱི་ཕྱིར་འདུ་བའི་དོན་དུ་ནི་གཎྜཱི་དང༌། གཎྜཱི་ཆུང་དུ་གཉིས་ཀ་བརྡུང་ངོ་ཞེས་བྱ་བ་ནི། ཟན་གྱི་ཕྱིར་འདུ་བའི་གང་ཡིན་པ་དེའི་དོན་དུའོ། །ཅི་རྒྱུན་མ་ཆད་པར་བརྡུང་བར་བྱེའམ་ཞེ་ན། དེའི་ཕྱིར་རབ་ཏུ་གཅད་དེའོ་ཞེས་བྱ་བ་སྨོས་སོ། །ཅི་ཙམ་གྱིས་བར་དུ་གཅོད་ཅེ་ན། དེའི་ཕྱིར་བརྐྱང་བས་སོ་ཞེས་བྱ་བ་སྨོས་ཏེ། དུས་ཅི་ཙམ་གྱིས་འགྲུབ་པར་འགྱུར་བའི་དུས་དེ་ཙམ་གྱི་བར་དུ་གཎྜཱི་ཆུང་དུ་བརྐྱང་བས་བརྡུང་བར་བྱའོ། །དེ་བས་ན་ཤིན་ཏུ་ཆུང་བར་འདི་ལས་བསྟན་པར་མི་བྱའོ་ཞེས་བྱ་བར་ཤེས་པར་བྱའོ། །འདུས་པ་ཆེན་པོའི་ཚེ་གཎྜཱི་བརྡུངས་བས་གོ་བར་མི་འགྱུར་བ་བལྟ་ན་དུང་སྦྲེལ་ཏེ། བུད་པར་བྱའོ། །རྔ་བོ་ཆེ་བརྡུང་བར་བྱའོ་ཞེས་བྱ་བ་ནི་འདིར་གཞུང་ནི། གླེང་གཞི་དག་ལས་དེ་རྣམ་པའི་དོན་དུ་ཟན་གྱི་ཕྱིར་འདུ་བའི་དོན་དུ་ཞེས་བྱ་བ་ནི་དཔེ་ཙམ་དུ་རིག་པར་བྱ་སྟེ། གཞན་དུ་ཡང་འདི་སྦྱོར་བའི་ཕྱིར་རོ། །གཎྜཱི་བརྡུངས་པར་མི་འགྲོ་བར་མི་བྱའོ་ཞེས་བྱ་བ་ནི། ཅི་ཡང་རུང་བ་བླངས་པའོ། །བཅོམ་ལྡན་འདས་ཀྱིས་བཀའ་སྩལ་བ། རྣམ་པར་འབྱེད་པ་ལ་ སོགས་པ ་ལ་གཎྜཱི་ཕྱིར་མྱུར་བ་ཁོ་ནར་འགྲོ་བར་བྱའོ་ཞེས་བྱ་བའི་ཚིག་གནང་ངོ༌། །གཎྜཱི་བརྡུངས་པར་སོ་སོར་ཉེ་བར་གནས་པའི་ཕྱིར་སྦྲན་པ་ཡིན་པས་དེའི་ཕྱིར་དོན་ཅི་ཞིག་བྱུང་ཞེས་ངེས་པར་ཤེས་པར་བྱ་བའི་ཕྱིར་དེར་འགྲོ་བར་བྱའོ། །འདིར་འགྲོ་བ་ནི་བྱ་བ་སྟེ་དོན་སྒྲུབ་པ་ནི་མ་ཡིན་ནོ། །འདི་ལ་དགོས་པའི་དབང་ཉིད་ཀྱི་ཕྱིར་འོས་པ་ལ་ལྟོས་པ་ཉིད་ཀྱི་ཕྱིར་རོ། །མི་མྱུར་བར་མི་བྱའོ་ཞེས་བྱ་བ་ནི། གཎྜཱི་ཕྱིར་མྱུར་བ་ཁོ་ནར་འགྲོ་བར་བྱའོ་ཞེས་བྱ་བར་སྦྱར་ཏེ་འདི་ནི་མ་མོ་ལས་སོ། བྱ་བ་འགྲུབ་
པའི་དུས་ཀྱི་ལྷག་མ་ལུས་ཙམ་ན་རྒྱུན་ཆགས་གསུམ་པ་གདོན་ཅིང་ཅི་བདེར་བྱའོ་ཞེས་བྱ་བ་ནི། རྒྱུན་ཆགས་གསུམ་པ་གདོན་པ་ལ་དུས་ཇི་ཙམ་གྱིས་དགེ་སློང་སྤོང་བ་ པ་དག་གིས་མཆོད་རྟེན་ལ་ཕྱག་བྱ་བ་ལ་སོགས ་པའི་བྱ་བ་གྲུབ་པའི་དུས་ཀྱི་ལྷག་མ་དེ་ཙམ་ལུས་པ་ནི། རྒྱུན་ཆགས་གསུམ་པ་འདོན་པ་སྤོང་བ་བདག་ཅི་བདེར་བྱའོ་ཞེས་བྱ་བའི་དོན་ཏོ། །དེ་རན་པར་བྱའོ་ཞེས་བྱ་བ་ལ། དེ་ཞེས་བྱ་བ་ནི་རྒྱུན་ཆགས་གསུམ་པའོ། །ཡོན་བཤད་པར་བྱའོ་ཞེས་བྱ་བ་ནི། རྒྱུན་ཆགས་གསུམ་བཏོན་པའི་འོག་ཏུ་སྦྱིན་པའི་ཕན་ཡོན་བཤད་པར་བྱའོ། །དེ་ཡང་ཇི་ལྟར་བྱ་ཞེ་ན། དེའི་ཕྱིར་རན་པར་རོ་ཞེས་བྱ་བ་སྨོས་ཏེ། ཕྱི་དྲོ་མཚན་མོའི་མཇུག་ཏུ་རང་གི་གནས་སུ་འགྲོ་བར་མངོན་པར་ཕྱོགས་པ་རྣམས་ལ་དེ་རིགས་པར་གྱུར་པ་མཐོང་བ་ཡིན་ནོ། །སྤོང་བ་པའི་ཞལ་ཏ་པས་སྔར་འདུ་ཞིང་མཇུག་ཏུ་འགྱེད་པར་བྱའོ་ཞེས་བྱ་བ་ནི། སྤོང་བའི་ཞལ་ཏ་བྱེད་པས་གང་དེ་རྣམས་ཀྱིས་སོ། །གལ་ཏེ་རྐྱེན་དེ་ལྟ་བུ་བྱུང་ན་ལྡེ་མིག་སྦས་པ་བསྟན་པར་བྱའོ་ཞེས་བྱ་བ་ལ། གལ་ཏེ་དེ་ལྟ་བུ་ཞེས་བྱ་བ་ནི། དོན་གལ་པོ་ཆེའི་དབང་གིས་མ་གྲུབ་པས་ལྡེ་མིག་གང་དུ་སྦས་པ་དེ་བསྟན་པར་བྱའོ་ཞེས་བྱ་བ་དེ་བསྡུས་པ་ཡིན་ནོ། །གལ་ཏེ་སྔར་ལྡེ་མིག་འགའ་ཞིག་གི་ལག་ཏུ་གཞག་གམ། ཕྱོགས་འགའ་ཞིག་ཏུ་སྦས་ནས། སྔར་འགྲོ་མི་ཁོམ་པ་དེ་ལྟ་བུའི་རྐྱེན་དག་བྱུང་ན། སྦེད་པ་པོ་འགྲོ་བའི་ཕྱིར་གནས་སྐབས་བདེ་བླག་ཏུ་བྱེད་པར་མི་ནུས་ན། དེའི་ཕྱིར་གལ་ཏེ་དེ་ལས་སྤོང་བ་པ་གཞན་དག་མི་སྣང་ན་སྨྲ་བར་བྱ་བའི་དོན་ཏོ། །འདིར་གཞུང་ཐམས་ཅད་ཀྱི་སྔོན་དུ་འོང་བར་བྱའོ། །གལ་ཏེ་དེ་ལྟ་བུའི་རྐྱེན་དག་བྱུང་ན་ལྡེ་མིག་སྦ་བར་བྱ་བ་བརྗོད་པར་བྱ་སྟེ་བསྟན་པར་བྱའོ། །ཚེ་དང་ལྡན་པས་ཕྱོགས་འདི་ན་ལྡེ་མིག་སྦས་པ་བལྟས་ནས་དབྱུང་བར་བྱའོ། །གསོ་སྦྱོང་གི་གཞི་ལས་ཞི་གནས་ཀྱི་གསོ་སྦྱོང་གི་སྐབས་སོ། །གསོ་སྦྱོང་གི་གནས་ལ་བློ་མཐུན་པར་བྱའོ་ཞེས་བྱ་བ་སྨོས་ནས། གནས་ཇི་ལྟ་བུར་བློ་མཐུན་པར་བྱ་ཞེ་ན། དེའི་ཕྱིར་གནས་ཐམས་ཅད་གྲུབ་པའམ། བྱས་པའམ་ཟིན་པ་ལ་འོ་ཞེས་བྱ་བ་སྨོས་ཏེ། གནས་གང་ལ་ཐམས་ཅད་གྲུབ་པའམ། ཐམས་ཅད་བྱས་པའམ། ཐམས་ཅད་ཟིན་
བ་ཡོད་པ་དེ་ནི་གང་ལ་ཞེས་བྱ་བ་འདིས་བསྡུས་པའོ། དེ་ལ་གྲུབ་པ་ཞེས་བྱ་བ་ནི་འཆགས་པའི་བསྐལ་པ་ཚེ་རང་གྲུབ་པའམ། གཏིབ་ཆད་ པ་ལ་སོགས ་པས་རང་གྲུབ་པ་སྟེ། དཔེར་ན་རིའི་བྱ་སྐྱིབས་ལ་ སོགས་པ ་ལྟ་བུ་གཞན་གྱིས་བྱས་པ་ལ་མི་ལྟོས་པའི་ཕྱིར་རོ། །བྱས་པ་ཞེས་བྱ་བ་ནི་འབད་པ་ལ་བརྟེན་ནས། བསྒྲུབ་པ་གང་ཡིན་པའོ། །ཟིན་པ་ཞེས་བྱ་བ་ནི། བྱ་བ་བྱེད་པའི་གནས་ལ་ སོགས་པར་རུང་བ་སྟེ། གྲུབ་པ ་དང་བྱས་པ་དང་ཟིན་པ་ལའོ་ཞེས་བྱ་བ་འདི་ཡོངས་སུ་རྫོགས་པ་དེ་བས་ན་གྲུབ་པ་ལ་ སོགས་པ ་ནི་མིང་གི་རྣམ་གྲངས་ཉིད་དོ། །ཡོངས་སུ་མ་རྫོགས་པ་ལ་ཡང་འདི་དག་གི་སྒྲ་འཇུག་པར་འགྱུར་བ་ཡིན་ཏེ། དེའི་ཕྱིར་བྱེ་བྲག་འདི་ཡིན་ནོ། །ཕྱི་རོལ་ཉེ་འཁོར་འདོམ་གང་དང་ལྡན་པའོ་ཞེས་བྱ་བ་ནི། དགེ་འདུན་ལས་ཕྱི་རོལ་དུ་གྱུར་བའི་ཉེན་ཀོར་དུ་འདོམ་གང་ཙམ་དང་བཅས་པ་གང་ཡིན་པ་དེ་ནི་ཕྱི་རོལ་ཉེན་ཀོར་འདོམ་གང་དང་ལྡན་པ་ཞེས་བྱ་བའོ། །ཉེན་ཀོར་འདོམ་གང་དང་བཅས་པ་ཞེས་བྱ་བ་ནི། མཐའི་སྒྲ་ནི་འདིར་དྲང་སྲོང་གིས་གསུངས་པ་ལས་འདོན་པ་ཡིན་ཏེ། དེའི་དོན་ནི་བར་དང་བཅས་པར་གྱུར་པ་དང་ལྷན་ཅིག་ཏུ་དེ་ཙམ་པའི་ཕྱི་རོལ་དུ་གྱུར་པའི་ཉེ་འཁོར་ཞེས་གསུངས་པ་ཡིན་ནོ། །ཅི་མི་འདོད་བཞིན་དུ་ཡང་བློ་མཐུན་པར་བྱ་བའམ་ཞེ་ན། མ་ཡིན་ཏེ་དེའི་ཕྱིར་དགེ་འདུན་འདོད་ནའོ། །ལས་གཞན་གྱི་གནས་ཀྱང་དེ་ཡིན་ནོ་ཞེས་བྱ་བ་སྨོས་ཏེ། གསོ་སྦྱོང་གི་གནས་ཞེས་སྨོས་པས་འདིར་ལས་གཞན་དེར་མི་བྱ་བའམ་སྙམ་དུ་སེམས་པ་རྣམས་ཀྱི་དོགས་པ་བསལ་བའི་ཕྱིར་འདིའོ། །འདིར་གསོ་སྦྱོང་ཞེས་སྨོས་པ་ནི། དཔེ་ཙམ་དུ་ཟད་དེ་དེ་བས་ན་ལས་རྣམས་ཐ་དད་པར་གནས་པ་ཉིད་ཅེས་བྱ་བ་གསོ་སྦྱོང་གི་གཞི་ལས་དེ་བཅས་པའི་ཕྱིར་དེ་སྐད་ཅེས་བྱའོ། །མཚམས་གཅད་པར་བྱའོ། །དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུའོ་ཞེས་བྱ་བ་ལ། བྱེད་ཅེས་བྱ་བ་ནི་ཇི་སྲིད་དང་ལྷན་དུ་སྦྱར་བ་འདི་སྟེ། དེ་སྲིད་དཔག་ཚད་ཕྱེད་དང་གསུམ་ཞེས་བྱ་བའི་དོན་ཏོ། །ཕྱོགས་ཕྱོགས་སུ་ཕ་བོང་དང༌། རྩིག་པ་དང༌། ཀ་བ་དང༌། ཤིང་ལྗོན་པ་དང༌། ར་བ་དང༌། བྱ་སྐྱིབས་དང༌། ལམ་པོ་ཆེ་དང༌། ཁྲོན་པ་ལ་ སོགས་པ ་དེ་ཤེས་པའི་དགེ་སློང་རྣམས་ཀྱིས་བརྟགས་ནས་དགེ་འདུན་གྱི་མདུན་དུ་མཚན་མ་བརྟན་པོ་བརྗོད་
དེ་ལས་བྱའོ་ཞེས་བྱ་བ་ལ། དེ་ཤེས་པ་རྣམས་ཀྱིས་ཞེས་བྱ་བ་ནི་ཡུལ་དེ་ན་གནས་པའམ། གཉུག་མར་གནས་པ་རྣམས་ཀྱིའོ། །གནས་པ་ཞེས་བྱ་བ་ནི་གང་དག་གནས་པ་དེའམ། ཕྱི་རོལ་དུ་མངོན་པར་ཤེས་པ་མ་གྲུབ་པ་ལས་སྔར་གནས་པའོ། །སྔར་ཕ་བོང་ལ་ སོགས་པ ་མཚན་མ་བརྟན་པོ་ཞེས་བྱ་བ་ལ་ སོགས་པའི་སྒྲས་ནི་འཕངས་པ ་རྣམ་པར་བཅད་པའོ། །རྗེས་སུ་འཇུག་པར་བྱེད་ཙམ་ལ་བརྟན་པོ་ཞེས་བྱ་བ་ལ་ སོགས་པའི་སྒྲས་ནི་བརྗོད་པའོ། །འདིས་རྣམ་པར་བཅད་ནས་ཡུན་རིང་དུ་གནས་པ ་བརྗོད་པ་ལ་ཡིན་ཏེ། དོན་ལས་ཇི་ལྟར་ཡུན་རིང་དུ་ཡོངས་སུ་ཤེས་པ་བསྒྲུབ་པ་དེ་ལྟར་གོང་དུ་ཡང་མཚན་མ་གཞན་ངེས་པར་ཞུགས་པ་མངོན་པར་འདུ་བྱས་པས་བྱའོ་ཞེས་བྱ་བ་སྨོས་པ་དེའི་ཕྱིར། གང་ཞིག་གང་དུ་གཞན་སྒྲུབ་པར་འགྱུར་པ་དེ་བས་ན་རེ་ཞིག་འབྱུང་བར་གྱུར་ཅིག་སྙམ་དུ་བྱེད་པ་དེར་ན་པར་སྒྲུབ་པ་ལ་མཚན་མ་ཞེས་འབྱུང་བ་ཡིན་ཏེ། ཕ་བོང་ངམ་ཕུར་པ་གདབ་པ་ལ་ སོགས་པ ་བྱའོ་ཞེས་བྱ་བ་གསུངས་པ་དེ་འདིས་བསྡུས་པ་ཡིན་ནོ། །དེར་གནང་བ་བྱས་ན་ཆོས་གོས་དག་དང་བྲལ་བར་མི་འགྱུར་རོ་ཞེས་བྱ་བ་ལ། དེར་ཞེས་བྱ་བ་ནི་མཚམས་ཀྱི་ནང་དུའོ། །གལ་ཏེ་ཆོས་གོས་དག་དང་མི་འབྲལ་བའི་གནང་བ་བྱས་པར་གྱུར་ན་འདིར་ཆོས་གོས་དག་དང་འབྲལ་བར་མི་འགྱུར་བ་ཡིན་ནོ། །མཚམས་བཅད་པ་ཙམ་ཆོས་གོས་དང་མི་འབྲལ་བར་གྱུར་པ་ནི་མ་ཡིན་ནོ་ཞེས་བྱ་བའི་དོན་ཏོ། །དེ་བྱའོ་ཞེས་བྱ་བ་ནི། ཆོས་གོས་དང་བྲལ་བར་མི་འགྱུར་བའི་གནང་བ་དེ་བྱ་སྟེ། ཆོས་གོས་དག་དང་མི་འབྲལ་བའི་གནང་བ་དེ་བྱས་པར་འགྱུར་རོ། །དེ་ལ་བྱེད་པ་གནང་བ་མ་ཡིན་ནོ་སྙམ་དུ་འགའ་ཞིག་སེམས་སོ་ཞེས་སྨོས་སོ། །ཐམས་ཅད་ཀྱི་ཆེད་དུ་དཀྱིལ་འཁོར་བར་བློ་མཐུན་པར་བྱའོ་ཞེས་བྱ་བ་ནི། ལས་ཐམས་ཅད་ལ་བརྟེན་ནས་གསོ་སྦྱོང་གི་རྗེས་ལ་དཀྱིལ་འཁོར་བློ་མཐུན་པར་བྱའོ། །སྔ་མ་བག་ཡངས་སུ་མ་བྱས་པ་བཅད་པ་གཞན་མི་འཆགས་སོ་ཞེས་བྱ་བ་སྔར་གྱི་མཚམས་བག་ཡངས་སུ་མ་བྱས་པ་ལ་མཆོམས་གཞན་མི་འཆགས་སོ། །དེ་ལྟ་བས་ན་དཀྱིལ་འཁོར་བའི་མཚམས་སུ་བློ་མཐུན་པར་མ་བྱས་པར་མཚམས་བཅད་པའི་བློས་མཐུན་པར་བྱེད་འདོད་པ་ལ་
མཚམས་དགྲོལ་བར་བྱའོ། །འདི་ནི་རིགས་པ་མ་ཡིན་ནོ་སྙམ་དུ་ཤེས་པར་མི་བྱའོ། །དེའི་ཕྱིར་མཚམས་དག་དགྲོལ་བར་བྱའོ་ཞེས་བྱ་བ་སྨོས་ཏེ། མཚམས་པོ་ཆེའི་སྟེང་དུ་དཀྱིལ་འཁོར་བ་མི་འཆགས་པས་དེ་དགྲོལ་ནས་བྱའོ། །ཚིག་གཅིག་གིས་མཚམས་གཉིས་བཅད་པ་དང་དགྲོལ་དུ་རུང་ངོ་ཞེས་བྱ་བ་ནི། མཚམས་གཉིས་པོ་དག་ལ་ཚིག་གཅིག་གིས་བཅད་པའམ་དགྲོལ་བར་རིགས་པ་ཡིན་ཏེ། མཚམས་གཉིས་ཀར་དགེ་འདུན་བཀོད་ནས་ལས་བྱེད་པའི་དགེ་སློང་གིས་མཚམས་གཉིས་ཀར་ཤིང་ངམ་དབྱུག་པའམ་རེ་ལྡེས་མནན་ནས་གསོལ་བ་བྱ་སྟེ་ལས་བྱའོ་ཞེས་གསུངས་པ་དེ་བསྡུས་པ་ཡིན་ནོ། །མཚམས་མ་བཅད་པའི་གནས་སུ་ནི་ལས་ལ་རྩིག་པ་མཚམས་ཡིན་ནོ་ཞེས་བྱ་བ་ནི། མཚམས་མ་བཅད་པའི་གནག་གང་ཡིན་པ་དེར་ལས་བྱ་བའི་ཡུལ་ལ་གཙུག་ལག་ཁང་གི་རྩིག་པ་ཉིད་མཚམས་ཡིན་ནོ་ཞེས་བྱ་བའི་དོན་ཏོ། །འདིར་ཆོས་གོས་དང་འབྲལ་བའི་མཚམས་བསལ་བའི་ཕྱིར་ལ་ཞེས་སྨོས་པ་ནི། དེ་ལ་ཆོ་ག་ཡིན་ནོ། །དབྱར་གྱི་མཚམས་བཅད་པ་ལ་ཁས་བླངས་པའི་རྣམ་པ་གང་ཡིན་པ་དེ་ནི་འདིར་མཚམས་སོ། །ཁས་བླངས་པ་ཡང་ལས་ཏེ་གང་གི་ཕྱིར་འདིར་ལས་ཀྱི་གཞིར་སྤྱིར་བསྟན་པ་བཟུང་བ་ནི་མ་ཡིན་ཏེ། འོན་ཀྱང་ཐམས་ཅད་ངེས་པར་རྟོགས་པའི་རྗེས་སུ་བསྒྲུབ་པ་ལའོ། །དེ་ལྟར་ཡང་མཚམས་འདིར་རྙེད་པ་བགོ་བ་དང་ཤི་བའི་ཡོ་བྱད་བྱིན་གྱིས་བརླབས་པ་ཡང་དེ་ལྟ་བུའི་རྣམ་པ་ལས་འབྱུང་བའོ། །དེ་ལྟར་ཡང་ཚེ་དང་ལྡན་པ་ཉེ་དགའ་གཙུག་ལག་ཁང་ནས་ཐག་རིང་པོ་ན་འདུག་པས་ཁོ་བོ་མཚམས་སུ་གཏོགས་པས་རྙེད་པ་དབང་ངོ་ཞེས་བྱ་བ་སྨྲས་པ་ཡིན་ནོ། །ནང་དུ་འཚེད་པ་དང་སྨིག་པ་དག་ལ་སྒྲུབ་པ་གང་ཡིན་ཞེ་ན། གནས་སུ་འདི་དག་ལ་མི་མཐུན་པ་ཉིད་དོ། །དེ་ལྟ་བས་ན་ཇི་སྲིད་གནས་ཀྱི་བློ་ཡོད་པ་དེ་སྲིད་དུ་ཞེས་བྱའོ། །དེ་ཡང་ཕྱི་རོལ་འདོམ་གང་དང་བཅས་པའོ། །གཞི་མེད་པའི་གནས་སུ་ཇི་ལྟར་བྱ་ཞེ་ན། ཇི་སྲིད་དུ་དེར་ལྷག་པར་གནས་པའི་ངོ་བོས་སྒྲུབ་པར་བྱེད་པ་དེ་སྲིད་སྤང་བར་བྱའོ། །དགེ་སློང་གྲོང་དག་ཏུ་དགེ་སློང་རྣམས་ཀྱི་དོན་དུ་ཉེ་བར་མི་མཁོ་བའི་གནས་རྣམས་གང་ཡིན་པར་བྱེད་པ་དེ་རྣམས་ལ་ཇི་ལྟར་བྱ་ཞེ་ན།
གང་ཞིག་དེར་དགེ་སློང་རྣམས་ཀྱི་གནས་དོན་དུ་དེ་ཉེ་འཁོར་དང་བཅས་པ་སྤང་བར་བྱའོ། །དེ་བཞིན་དུ་གཞན་ལ་ཡང་ངོ༌། །ཝ་ནས་ཆུ་འཛག་པ་གང་དུ་བབ་པ་ཡང་ངོ་ཞེས་བྱ་བ་ནི། ཝ་ནས་ཆུ་འཛག་པ་ནི་རྣམས་ཀྱི་ནི་སྨྱུག་མ་བཞིན་དུ་གཙུག་ལག་ཁང་གི་ཁོངས་སུ་གཏོགས་པ་ཉིད་ཡིན་ནོ། །དེ་བས་ན་ཁྱམས་བཞིན་དུ་དེའི་འོག་ཆ་འདི་ཞུགས་པའོ། །ཡང་ངོ་ཞེས་བྱ་བའི་སྒྲས་ནི་གལ་གཉིས་སུ་བཏགས་པ་མ་ཡིན་གྱི། གང་དུ་ཝ་ནས་ཆུ་འཛག་པ་ཡོད་པ་དེ་ལ་ནི་འདི་ཡིན་ནོ། །གཞན་ལ་ནི་རྩིག་པ་ཞེས་བྱ་བ་བསྟན་པའི་དོན་དུའོ། །མཚམས་དེའམ་འདི་ཞེས་བྱ་བ་ཝ་ནས་ཆུ་འཛག་པའི་ཝ་ཡིན་ནོ། །གྲོང་ལ་ཉེན་ཀོར་གྱི་མཐའ་ཚུན་ཆད་དོ་ཞེས་བྱ་བ་ནི། གྲོང་ལ་སྔར་འབྲལ་བའི་སྐབས་སུ་གྲོང་གི་ཉེན་ཀོར་བསྟེན་པ་གང་ཡིན་པ་དེའི་མཐའ་ཚུན་ཆད་མཚམས་ཡིན་ཏེ། འདིར་གཞུང་ནི་ལུང་སིལ་བུ་དག་པས་གསུངས་པ་ཡིན་ནོ། །དགོན་པ་ལ་ནི་ཕྱོགས་ཕྱོགས་སུ་རྒྱང་གྲགས་ཀྱི་མཐའ་ཚུན་ཆད་དོ་ཞེས་བྱ་བ་ནི། དགོན་པ་ལ་དབུས་ནས་བརྩམས་ཏེ་ཞེས་བྱ་བ་བསྟན་པའི་ཕྱིར་ཕྱོགས་ཕྱོགས་སུ་ཞེས་སྨོས་སོ། །གསོ་སྦྱོང་གི་གཞི་ལས་གནས་ཀྱི་སྐབས་སོ།། །།འདིར་གསོ་སྦྱོང་དང་དགག་དབྱེའི་དོན་དུ་མཛད་དེ་འདུན་པ་འབུལ་བ་གསུངས་མོད་ཀྱི་ཚོགས་པར་གཏོགས་པ་གཞན་ཐམས་ཅད་ལ་ཡང་ཡོད་པས། ལས་ཐམས་ཅད་ལ་རྣམ་པར་གནས་པ་དེ་བས་ན་ཐམས་ཅད་ཀྱི་དབང་དུ་བྱ་སྟེ་བསྟན་པའི་ཕྱིར། འདུན་པ་འབུལ་བས་ལས་དེ་དང་མཐུན་པ་འགྲུབ་པོ་ཞེས་བྱ་བ་སྨོས་ཏེ། དེ་དང་ཞེས་བྱ་བ་ནི་འདུན་པ་འབུལ་བར་བྱེད་པ་གང་ཡིན་པའི་གང་ཟག་དེས་སོ། །མཚམས་བཅད་པའི་ལས་ནི་མི་འགྲུབ་བོ་ཞེས་བྱ་བ་ནི། འདུན་པ་འབུལ་བར་བྱེད་པ་དེའི་ཚོགས་པ་མཐུན་པ་མི་འགྲུབ་བོ། །འདིར་གཞུང་ནི་ཉེ་བ་འཁོར་ལས་ཐམས་ཅད་ལ་འདུན་པ་དང་བཅས་པ་ཡིན་ཏེ། མཚམས་བཅད་པ་ནི་མ་གཏོགས་སོ་ཞེས་གསུངས་པ་ཡིན་ནོ། །གླེང་གཞི་དག་ལས་དེ་ལ་ སོགས་པ ་འདུན་པ་འབུལ་བ་ཞེས་བྱ་བའི་མཐར་ཐུག་པའོ། །བསླབ་པ་བྱིན་པ་ལས་དེ་བླང་དུ་རུང་ངོ་ཞེས་བྱ་བ་ནི། འདིར་དེ་ཞེས་བྱ་བའི་སྒྲ་ནི་འདུན་པ་བཟང་ངོ༌། །བསླབ་པ་བྱིན་པ་ལས་འདུན་པ་བླང་བ་སུ་ལ་རུང་ཞེ་ན།
དེའི་ཕྱིར་དེ་ལ་དགེ་སློང་གི་འདུ་ཤེས་ཉེ་བར་གཞག་པ་ལའོ་ཞེས་བྱ་བ་སྨོས་ཏེ། བསླབ་པ་བྱིན་པ་དེ་ལ་དགེ་སློང་གི་འདུ་ཤེས་ཉེ་བར་གཞག་པ་དེ་ལ་དགེ་སློང་གི་འདུ་ཤེས་སོ། །དེ་ཉེ་བར་གནས་པ་གང་གིས་དེ་ལས་ཞེས་བྱ་བའི་དོན་ཏོ། །དབུལ་དུ་མི་རུང་ངོ་ཞེས་བྱ་བ་ནི་བསླབ་པ་བྱིན་པ་དེ་ལ་འདུན་པ་དབུལ་དུ་མི་རུང་སྟེ། དགེ་འདུན་དུ་གྱུར་པ་འདིར་ཡང་མ་ཡིན་ཞེས་བྱ་བ་བྱེ་བྲག་མེད་པར་གཏོགས་པའོ། །ཡོངས་སུ་དག་པ་དག་དགག་དབྱེ་དག་ལ་ཡང་འདིས་བྱས་པར་འགྱུར་ཞེས་བྱ་བར་རིག་པར་བྱའོ། །སྨྱོས་པའི་གནང་བ་ཐོབ་པས་ནི་མི་མཐུན་པ་ཉིད་དུ་མི་འགྱུར་རོ། །ཡོངས་སུ་དག་པ་ཕུལ་བ་དང་ཡང་གཅིག་པ་ཉིད་དོ་ཞེས་བྱ་བ་ནི། འགྲུབ་བོ་ཞེས་བྱ་བའི་རྗེས་བསྙེག་པའི་ཕྱིར་ཡང་ཞེས་བྱ་བའི་སྒྲ་སྨོས་ཏེ། གང་དང་ལྷན་ཅིག་པ་ཉིད་ཅེས་བྱ་བ་འདི་ལ་དགེ་འདུན་དང་ཞེས་བྱ་བ་ཤུགས་ཀྱིས་རྟོགས་པའོ། །དོན་གང་ལ་གཅིག་ཉིད་དུ་འགྱུར་ཞེ་ན། དེའི་ཕྱིར་གསོ་སྦྱོང་དང་དགག་དབྱེ་ལའོ་ཞེས་བྱ་བ་སྨོས་ཏེ། གཅིག་པ་ཉིད་དུ་འགྱུར་ཞེས་བྱ་བར་སྦྱར་རོ། །ཅི་ཞིག་བྱས་པས་ཤེ་ན། དེའི་ཕྱིར་དེ་ཕུལ་བས་སོ། །ཡོངས་སུ་དག་པ་དང་དགག་དབྱེ་ཕུལ་བས་ཞེས་བྱ་བའི་དོན་ཏོ། །དེ་བཞིན་དུ་དེ་གཉིས་ལའོ་ཞེས་བྱ་བ་ལ། དེ་བཞིན་དུ་ཞེས་བྱ་བ་ནི་ཡོངས་སུ་དག་པ་དང་དགག་དབྱེ་འབུལ་བ་དག་གིས་སོ། །དེ་གཉིས་ལ་ཞེས་བྱ་བ་ནི་གསོ་སྦྱོང་དང་དགག་དབྱེ་ལའོ། །རྟོགས་པ་པོ་ལ་ཆོ་ག་འདི་ལེགས་པ་ཉིད་དུ་བསྟན་གྱི་དགེ་འདུན་དུ་ལོངས་པས་ནི་མ་ཡིན་ནོ། །དེ་བརྗོད་པར་བྱ་སྟེ། ཆོ་གནོད་པར་བྱའོ་ཞེས་བྱ་བ་སྨོས་ཏེ། ཡོངས་སུ་དག་པ་དང་དགག་དབྱེ་ཕྲལ་བས་གསོ་སྦྱོང་དང་དགག་དབྱེ་གཉིས་བྱ་བའི་ཆོ་གའོ། །ཚོགས་ཐ་དད་པས་འདུན་ པ་ལ་སོགས ་པས་མཐུན་པར་བྱ་སྟེ། ལས་བྱེད་པ་ལ་མི་རུང་བ་ཉིད་དོ་ཞེས་བྱ་བ་ནི། བཀོད་པ་སྣ་ཚོགས་པ་བཅིངས་པར་གྱུར་པ་ཉིད་ཀྱིས་དེ་ལ་མི་རིགས་པའི་བློ་སྐྱེ་བ་སྟེ། དེ་བསལ་བའི་དོན་དུ་འདིའོ། །འདིར་ཁ་ན་མ་ཐོ་བ་མེད་པའི་འདུན་པ་ལ་ སོགས་པ ་འབུལ་བའི་སྐབས་མ་ཡིན་པར་ཤེས་པར་མི་བྱ་སྟེ། འདི་ནད་པ་ལ་ སོགས་པ ་དབང་པོ་ཉིད་རིགས་པར་གྱུར་པ་ཉིད་ཀྱི་ཕྱིར་རོ། །འདིར་གཞུང་ནི་ཞུ་བ་ལས། བཙུན་པ་དགེ་སློང་ཕྱོགས་
གཅིག་ན་མཆིས་པས་གནས་བཞི་པོ་དག་ཏུ་སོ་སོར་ཐར་པའི་མདོ་བཏོན་པ་ལ་གསོ་སྦྱོང་ཡང་བགྱིས་པར་འགྱུར་ཞིང༌། དགེ་སློང་དེ་དག་ལ་ཡང་འགལ་ཚབས་ཅན་དུ་མི་འགྱུར་བ་མཆིས་སམ། ཉེ་བ་འཁོར་ཡོད་དེ། འདི་ལྟར་སོ་སོར་ཐར་བའི་མེད་འདོན་པའི་དགེ་སློང་གི་གནས་བཞི་པོ་དག་ཅིག་ཅར་དུ་ཤིང་ངམ། དབྱུག་པའམ། རེ་ལྡེས་མནན་ཏེ་སོ་སོར་ཐར་བའི་མདོ་འདོན་ནའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །བརྗོད་པར་བྱ་བ་རྩོམ་པ་འདྲ་བ་རྣམས་ཅིག་ཅར་བརྗོད་པ་ལ་ཡང་མེད་དོ་ཞེས་བྱ་བ་ནི་མི་རུང་བ་མེད་དོ་ཞེས་བྱ་བར་སྦྱར་རོ། །ཅིག་ཅར་ཞེས་བྱ་བ་ནི་ཐབས་ཅིག་གིས་བསྒྲུབ་པར་བྱ་བ་ཉིད་དོ་ཞེས་བྱ་བའི་དོན་ཏོ། །འདུན་པ་དང་ཡོངས་སུ་དག་པ་གཉིས་ལྷན་ཅིག་ཏུ་འདུན་པ་དང་དགག་དབྱེ་དག་ལ་ཡང་བརྗོད་དོ། །བརྗོད་པ་ཡང་རིག་པར་བགྱིད་དོ་ཞེས་གསུངས་པ་གང་ཡིན་པ་དེ་འདིས་བསྡུས་པ་ཡིན་ནོ། །བརྗོད་པར་བྱ་བ་རྩོམ་པ་འདྲ་བ་རྣམས་ཞེས་སྤྱིར་སྨོས་པ་གང་ཡིན་པ་དེ་ལ་རིག་པ་ནི་འདུན་པ་དང་ཡོངས་སུ་དག་པ་དང༌། འདུན་པ་དང་དགག་དབྱེ་དག་ཀྱང་བརྗོད་པ་ཡང་རིག་པར་བགྱིད་དོ་ཞེས་གསུངས་པ་གང་ཡིན་པ་དེ་རྣམས་ཀྱིས་ནི་ཡུལ་གྱི་བྱེ་བྲག་ལ་བཅས་པ་ཞེས་བྱ་བ་དེ་ལྟ་བུར་གཞན་རྣམས་ལ་ཡང་འདིར་ཁོངས་སུ་བསྡུ་བའི་ཕྱིར་འདི་བསྟན་པ་ཡིན་ནོ། །གཅིག་གིས་དུ་མའི་དེ་དག་ལེན་པ་ལ་ཡང་མེད་དོ་ཞེས་བྱ་བ་ནི། མི་རུང་བ་ཞེས་བྱ་བར་སྦྱར་ཏེ། དགེ་སོང་གཅིག་གིས་དགེ་སློང་དུ་མའི་རྒྱུད་དུ་གཏོགས་པའི་འདུན་པ་དང༌། དགག་དབྱེ་ལ་ སོགས་པ ་ལེན་པ་ཡང་མི་རུང་བ་མེད་དོ། །འདི་ལ་བརྗོད་ནུས་པའི་ཚིག་གིས་གཟུང་ངོ་ཞེས་བྱ་བ་ལ། འདི་ལ་ཞེས་བྱ་བ་ནི་དགེ་སློང་དུ་མའི་རྒྱུད་དུ་གཏོགས་པའི་འདུན་པ་ལ་ སོགས་པ ་ལེན་པ་འདི་ལ་གྲངས་ཀྱི་བྱེ་བྲག་ཡོངས་སུ་ཆད་པ་མེད་དོ། །འོན་ཀྱང་བརྗོད་ནུས་པ་ལས་ཏེ་ཇི་སྙེད་བརྗོད་ནུས་པ་དེ་སྙེད་པ་རྣམས་ལ་ཞེས་བྱ་བའི་དོན་ཏོ། །མི་ནུས་ན་དེ་དག་འབུལ་བ་གང་ཡང་རུང་བས་འགྲུབ་བོ་ཞེས་བྱ་བ་ནི། འདུན་པ་ལ་ སོགས་པ ་དེ་རྣམས་འབུལ་བ་གང་ཡིན་པ་དེ་རྣམས་ལ་གང་ཡང་རུང་བས་མི་ནུས་པར་གྱུར་ན་འགྲུབ་པའོ། །ལུས་ཀྱིས་ཀྱང་ངོ༌། །ཇི་ལྟར་ཡང་མི་ནུས་ན་ཡང་ན་དགེ་འདུན་དེར་འགྲོ་བར་བྱའོ། །ཡང་ན་དེ་ཁྲིས་བླང་བར་བྱའོ་ཞེས་བྱ་བ་ལ་ཇི་ལྟར་ཡང་ཞེས་
བྱ་བ་ལ་ནི་ལུས་ཀྱིས་ཀྱང་མི་ནུས་པར་འགྱུར་ནའོ། །ཡང་ན་དེ་ཞེས་བྱ་བ་ནི་འདུན་པ་ལ་ སོགས་པ ་འབུལ་བའི་ནད་པ་ལའོ། །དེ་བླངས་པས་རྒྱུག་པར་མི་བྱའོ་ཞེས་བྱ་བ་ནི། འདུན་པ་ལ་ སོགས་པ ་རྣམས་སོ། །མགྱོགས་པར་མི་བྱའོ་ཞེས་བྱ་བ་ལ། ལ་ལ་དག་ནི་མགྱོགས་པ་དང་རྒྱུག་པ་དག་གིས་གནས་ལ་མགྱོགས་པ་དང༌། རྒྱུག་པར་མི་བྱའོ་ཞེས་ཟེར་རོ། །དོན་དེ་ཉིད་འདིར་མཐོང་བ་ཡིན་ནོ། །རྩེ་བའི་ངོ་བོས་ཅུང་ཟད་དལ་བའི་འགྲོ་བས་ཚིག་དང་བཅས་པས་རྒྱུག་པ་མཐོང་བའོ། །ཚིག་དང་བཅས་པའི་མགྱོགས་པའང་མཐོང་བ་ཡིན་ནོ། །རྒྱུག་ པ་ནི་དེ་ཉིད་སྟེང་གི་ཆ་ལ་བསྙེན་ནས་མཆོང་བ་ལ་སོགས ་པའི་ངོ་བོའོ། །མཆོང་བར་མི་བྱའོ། །ཕྱི་རོལ་ལ་མཆོང་བར་མི་བྱའོ་ཞེས་བྱ་བ་ནི་འོབས་ལའོ། །བང་རིམ་ལ་ནི་མི་བྱའོ་ཞེས་བྱ་བ་ནི་མཆོང་བ་སྟེ། ཕྱི་རོལ་གྱི་ཁྱམས་ཀྱི་བང་རིམ་ལའོ། །ནམ་མཁའ་ལ་འདུག་པར་མི་བྱའོ་ཞེས་བྱ་བ་ནི། ནམ་མཁའ་ལ་འཇུག་པའམ། འགྲོ་བར་མི་བྱའོ། །ཕྱི་རོལ་དུ་མི་བྱའོ་ཞེས་བྱ་བ་ནི་མཚམས་ནས་མཚམས་ཀྱི་ཕྱི་རོལ་དུ་འགྲོ་བར་མི་བྱའོ། །སྐས་ཀྱི་རིམ་པ་གཞན་བ་ཞག་ནས་གཞན་དུ་གོམ་པ་དོར་བར་མི་བྱའོ། །ཐེམ་སྐས་ཀྱི་ཐེམ་པར་མི་བྱའོ། །ཆུ་ལྐོག་མ་ནུབ་ཙམ་ལ་འབོག་པར་མི་བྱའོ། །གཉིད་ལོག་པ་དང་སྙོམས་པར་འཇུག་པར་མི་བྱའོ། །དེ་གཉིས་ནི་མ་བཀླས་པ་ཉིད་ཀྱིས་ཀྱང་སྨད་པར་བྱ་བ་ཉིད་ཡིན་ནོ་ཞེས་བྱ་བ་ལ། དེ་གཉིས་ཞེས་བྱ་བ་ནི་འདུན་པ་ལ་ སོགས་པ ་གཟུང་བ་གཉིད་ལོག་པ་དང༌། སྙོམས་པར་འཇུག་པ་དག་ལའོ། །མ་བཀླས་པ་ཉིད་ཅེས་བྱ་བ་ནི། ཐེ་ཚོམ་ཟ་བ་ཉིད་དང༌། མ་ངེས་པ་ཉིད་དང༌། མ་མོས་པ་ཉིད་དང་བསྟན་པ་ལ་མ་གུས་པ་ཉིད་དོ། །དེས་ན་གཉིད་ལོག་པ་དང༌། སྙོམས་པར་ཞུགས་པ་འདི་དག་ལ་སྨད་པར་བྱ་བ་ཉིད་དོ། །ལྟུང་བ་འབྱིན་པ་པོ་ཉིད་ཀྱིས་ངོ་ཚ་བ་མེད་པ་འབའ་ཞིག་མ་ཟད་ཀྱི་མཚམས་ཀྱི་ཕྱི་རོལ་དུ་འགྲོ་བ་ལ་སྐྱོན་དང་བཅས་པ་ཉིད་ཀྱི་རྗེས་སུ་བསྒྲུབ་པ་ལ་གཏོགས་པའི་ལོ་རྒྱུས་ལ་སོ་སོར་ནུབ་པ་ཉིད་མ་ཡིན་གྱི། འདི་དག་ལ་ནི་འདི་སོ་སོར་མི་གནང་བར་འགྱུར་བ་དེ་བས་ན་འདི་དག་ཁོ་ན་ལས་མ་བཀླས་པ་ཉིད་ཀྱིས་ཀྱང་སྨད་པར་བྱ་བ་ཉིད་ཡིན་ནོ། །དགེ་སློང་ལ་བརྗོད་པར་བྱའོ་ཞེས་བྱ་
བ་ནི། འདུན་ པ་ལ་སོགས ་པའི་ལེན་པར་བྱེད་པ་དེས་གང་གི་ཚེ་དགེ་འདུན་གྱི་གནས་བརྟན་གྱིས་བརྗོད་པར་བྱ་སྟེ། འདིར་གཞུང་ནི། དེས་དྲུང་ན་འདུག་པའི་དགེ་སློང་ལ་ཚེ་དང་ལྡན་པ་དགེ་སློང་མ་ལྷགས་པ་རྣམས་ལ་འདུན་པ་དང་ཡོངས་སུ་དག་པར་བརྗོད་དོ། །བརྗོད་པ་གང་རིག་པར་བགྱིད་དོ་ཞེས་གསུངས་པ་ཡིན་ནོ། །ཁ་ཅིག་ལས་དགེ་འདུན་ལའོ་ཞེས་བྱ་བ་ནི། ལུགས་ཁ་ཅིག་ལས་དགེ་འདུན་ལ་བརྗོད་པར་བྱའོ་ཞེས་ཀྱང་འབྱུང་ངོ༌། །བཙུན་པ་རྣམས་དགོངས་སུ་གསོལ་ཞེས་བྱ་བས་བརྩམ་མོ་ཞེས་བྱ་བ་ནི། དེ་ལྟར་འདུན་པ་ལ་ སོགས་པ ་བརྗོད་པར་བྱ་བ་ལ་ སོགས་པ ་ནི་རྩོམ་པ་རྩོམ་པའོ། །བཙུན་པ་རྣམས་དགོངས་སུ་གསོལ་ཞེས་བྱ་བ་དང་གསན་དུ་གསོལ་ཞེས་བྱ་བ་ནི། དགེ་འདུན་གྱི་ནང་དུ་མ་ཕྱིན་པར་དུས་བྱས་སམ། ཁྱིམ་ པ་ཉིད་ལ་སོགས ་པའི་ཁས་བླངས་ན་མ་བླངས་པ་ཉིད་ཡིན་ནོ་ཞེས་བྱ་བ་ནི། འདུན་པ་ལ་ སོགས་པ ་དབང་དུ་བྱས་པས་རྗེས་སུ་འཇུག་པའོ། །སོགས་པ་ཞེས་བྱ་བའི་སྒྲས་ནི་བསླབ་པ་དབུལ་བའི་ཚིག་དག་ཏུ་གཏོགས་པ་དགེ་ཚུལ་ཉིད་ཅེས་བྱ་བ་ལ་ སོགས་པ ་ནས། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་ཞེས་བྱ་བའི་མཐར་ཐུག་པའི་བར་དག་བསྡུས་པའོ། །ཕྱིན་ན་བླངས་པ་ཉིད་ཡིན་ནོ་ཞེས་བྱ་བར་གོ་བར་མ་བྱས་སུ་ཟིན་ཀྱང་འདི་ལ་ཐེ་ཚོམ་མེད་པར་བྱའོ་ཞེས་གོ་བར་བྱ་བའི་ཕྱིར་བརྗོད་པ་ཡིན་པས་དགེ་འདུན་གྱི་ནང་དུ་འོངས་པ་ཉིད། དགེ་འདུན་གྱི་ཁོངས་སུ་གཏོགས་པས་དེའི་དངོས་པོ་ལ་འདིར་གཙོ་བོ་སྟེ། དེ་བས་ན་འདིར་དེ་ཤེས་པའོ། །གཞན་གྱིས་ཚེས་བཅོ་ལྔ་ལ་དགེ་སློང་བཟུང་ན་དེ་ལ་དགེ་འདུན་གྱིས་འདི་བདག་ཅག་གི་ཚངས་པ་མཚུངས་པར་སྤྱོད་པ་ཡིན་གྱི་ཐོང་ཤིག་ཅེས་བརྗོད་པར་བྱའོ་ཞེས་བྱ་བ་ལ། གཞན་གྱིས་ཞེས་བྱ་བ་ནི། རྒྱལ་པོ་ལ་ སོགས་པའོ། །དེ་ལ་ཞེས་བྱ་བ་ནི་གཞན་ལ་བརྗོད་པར་བྱའོ། །གང་གིས་དགེ་སློང་བཟུང་བར་གྱུར་པ ་དེ་ལ་མངོན་སུམ་དུའམ་འཕྲིན་པ་བཏང་སྟེ། དེར་རང་གིས་སམ་ཐམས་ཅད་ཀྱིས་མ་བཏང་བ་དང་མ་བཏང་བར་འགྱུར་བ་མ་ཡིན་ཏེ། ཕོ་ཉའི་ཁ་ནས་སྨྲ་བ་གང་ཡིན་པ་དང༌། རང་གིས་ཁ་ནས་སྨྲ་བ་གང་ཡིན་པ་འདི་གཉིས་ཀའི་བསྡུ་བ་ལ་དགོངས་ནས། དེ་ལྟར་
ཉེ་བར་བཏགས་པའོ། མ་བཏང་ན་བདག་ཅག་འདི་དང་ལྷན་ཅིག་བྱ་བ་ཅུང་ཞིག་ཡོད་དོ་ཞེས་སྔ་མ་དང་བཅས་ཏེའོ་ཞེས་བྱ་བ་ལ། སྔ་མ་དང་བཅས་ཏེ་ཞེས་བྱ་བ་ནི་མདོ་སྔ་མ་དེས། ཐོང་ཤིག་ཅེས་སྨོས་པའི་ཚེག་སྔ་མ་དེ་དག་དང་བཅས་ཏེ། བདག་ཅག་དགེ་སློང་འདི་དང་ལྷན་ཅིག་བྱ་བ་ཅུང་ཟད་ཅིག་ཡོད་དོ་ཞེས་བྱ་བ་འདི་ལྟར་གཞན་ལ་བརྗོད་པར་བྱ་ཞེས་བྱ་བའི་དོན་ཏོ། །དེ་ལྟ་ན་ཡང་དཀྱིལ་འཁོར་པར་བྱའོ་ཞེས་བྱ་བ་ནི། ཚིག་གཉིས་པ་བརྗོད་ཀྱང་མ་བཏང་ན་དེའི་ཚེ་དགེ་འདུན་གྱིས་དཀྱིལ་འཁོར་དུ་གསོ་སྦྱོང་བྱའོ་ཞེས་བྱ་བའི་དོན་ཏོ། །དེ་བཏང་བའི་ཕྱིར་སྔར་མི་འབད་པར་མི་བྱའོ་ཞེས་བྱ་བ་ནི། གཞན་གྱིས་བཟུང་བའི་དགེ་སློང་དེ་བཏང་བའི་ཕྱིར་རོ། །འཕྲིགས་པས། མི་མཐུན་པ་ཉིད་དུ་འགྱུར་རོ་ཞེས་བྱ་བ་ནི། མཚམས་ཀྱི་ནང་ན་དགེ་སློང་དངོས་སུ་འཁོད་པར་ཤེས་པ་རྣམས་ཀྱི་ངེས་པ་རྣམས་ཁོ་ནས་དགེ་སློང་རྣམས་ཡོད་ན། གང་ཞིག་མ་འོངས་པ་ཞེས་པ་ལས་མི་མཐུན་པ་ཉིད་ཀྱིས་ཉེས་པར་འགྱུར་བ་འབའ་ཞིག་ཏུ་མ་ཟད་ཀྱི། འདི་ལྟར་མཐོང་ངམ་ཐོས་པས་མི་མཐུན་པ་ཉིད་ཀྱིས་ཉེས་པར་འགྱུར་བ་ཤས་པར་བྱ་བ་མ་ཡིན་ནོ། །ཐ་དད་པ་ཉིད་དུ་འདོད་པས་མངོན་པར་བརྟགས་ཏེ་ལས་བྱེད་ན་ཉེས་པ་སྦོམ་པའོ་ཞེས་བྱ་བ་ལ། ཐ་དད་པ་ཉིད་དུ་འདོད་པས་ཞེས་བྱ་བ་ནི། ངེས་པའམ་འཕྲིགས་པ་མ་ལྷགས་པ་རྣམས་ཐ་དད་པ་ཉིད་དུ་འདོད་པས་མ་འོངས་ཀྱང་སླའོ་སྙམ་དུ་སེམས་ཤིང་དེ་བས་ན་ཐག་རིང་པོ་ན་འཁོད་ཅིག་སྙམ་པའོ། །འདིར་ལས་ཞེས་སྨོས་པའི་འདུག་པར་གཏོགས་པ་དང་རྗེས་སུ་མཐུན་པའི་ལས་སུ་བྱ་བ་ལ། ཚོགས་པའི་ཡན་ལག་མ་ཡིན་པ་དེ་ཡོངས་སུ་བཅད་པའི་དོན་དུ་ཚིག་འདིའོ། །འདི་ནི་དགེ་འདུན་གྱི་དབྱེན་ལ་འདུ་བའི་སྐབས་སུ་དགེ་འདུན་ལྷག་མ་གང་ཡིན་པ་དེའི་སྐབས་སུ་ཚོགས་པའི་ཉེས་པ་སྡོམ་པོར་འགྱུར་རོ། །རྟོག་པ་ཉིད་ན་ཐེ་ཚོམ་ཟ་འམ་ངེས་པར་འབྱེད་པ་ལ་ནི་ཉེས་པའི་བྱེད་པ་མི་འབྱུང་བ་མ་ཡིན་ནོ་ཞེས་བྱ་བ་ལ། དེ་ལྟར་ཡང་འདིར་གཞུང་ནི། ཅི་གང་དག་མ་ལྷགས་པ་དེ་དག་མེད་པར་བདག་ཅག་གིས་གསོལ་བ་བྱས་ཏེ། གསོ་སྦྱོང་བྱ་བ་དང་སོ་སོར་ཐར་པའི་མདོ་འདོན་པ་གདོན་དུ་རུང་ངམ་འོན་ཏེ་མི་རུང༌། དེ་དག་མེད་པར་བདག་ཅག་གིས་དགག་དབྱེ་བྱར་རུང་
དམ་འོན་ཏེ་མི་རུང་སྙམ་དུ་རྟོག་པ་ཉིད་ན་ཐེ་ཚོམ་ཟའམ་ཉེས་པ་དེ་དག་མེད་པར་བདག་ཅག་གིས་གདོན་པ་དང༌། དགག་དབྱེའི་བར་དག་བྱར་རུང་ངོ་ཞེས་ངེས་པར་བྱེད་པ་གང་ཡིན་པ་དེ་ལ་ནི་ཉེས་པའི་བྱེད་པ་མི་འབྱུང་བ་མ་ཡིན་ཏེ། ཇི་སྲིད་དུ་འདོན་པ་དང༌། དགག་དབྱེ་བྱེད་པའི་བར་དག་ཏུ་མི་མཐུན་པའི་ཉེས་པ་ཁོ་ནར་འགྱུར་རོ་ཞེས་གསུངས་པ་ཁོ་ན་ཡིན་ནོ། །དེ་བཞིན་དུ་འདིར་འདི་ནི་ལས་ཐམས་ཅད་ཀྱི་དབང་དུ་བྱས་པ་ཁོ་ན་ཡིན་པས་སྤྱིར་མདོར་བྱས་སོ། །བསམ་པ་ཐག་པ་ནས་ཡོངས་སུ་བཙལ་ཞིང་གོ་བ་སློབ་མ་བྱས་ན་དག་པའི་བྱེད་པ་ཡིན་ནོ་ཞེས་བྱ་བ་ནི། གང་ཞིག་མ་འོངས་པ་ན་དགེ་སློང་དག་འབྱུང་བར་ཤེས་ནས་གལ་ཏེ་ལྷག་པའི་བསམ་པས་དེ་རྣམས་ལ་སློང་བར་བྱེད་ན། དེ་ནས་འདི་དག་གཅིག་པུས་མ་ཐོབ་པ་ལས་བྱེད་པས། དེ་རྣམས་ལ་ཁ་ན་མ་ཐོ་བ་དང་བཅས་པ་ཉིད་དང༌། མ་དག་པ་ཉིད་འབྱུང་བར་མི་འགྱུར་རོ། །རུང་བ་ཙམ་དུ་གྱུར་པ་བསམ་པ་ཐག་པ་ནས་མ་ཡིན་པ་ཡོངས་སུ་བཙལ་ཞིང་དག་པའི་བྱེད་པ་མ་ཡིན་ཏེ། དེར་གཏོགས་པ་རྣམས་ལ་མི་མཐུན་པའི་ཉེས་པར་འགྱུར་རོ། །བཙལ་བ་དང༌། བོད་པ་དང་མཐོན་པར་འདུག་སྟེ། ཕྱོགས་སུ་བལྟ་བ་དག་གིས་ནི་དེ་ཡིན་ཞེས་བྱ་བ་ནི། རྣམ་པ་དེ་གསུམ་གྱི་རིགས་ཀྱིས་ནི་ཡོངས་སུ་བཙལ་བ་ཉིད་ཡིན་ཏེ། དེ་འདིར་མངོན་པར་འདོད་པ་ཞེས་བྱ་བའི་དོན་ཏོ། །འདིར་བཙལ་བ་ཞེས་བྱ་བ་ནི་ཕྱོགས་དེ་དང་དེ་རྣམས་སུ་བྱུལ་བའོ། །བོད་པ་ཞེས་བྱ་བ་ནི་སྐད་ཀྱིས་བོད་པའོ། །མཐོན་པོར་འདུག་སྟེ་ཕྱོགས་སུ་བལྟ་བ་ཞེས་བྱ་བ་ནི་ས་ཕྱོགས་མཐོན་པོར་འགྲེང་སྟེ་མིག་རྒྱང་གིས་ཕྱོགས་སུ་བལྟ་བར་བྱའོ། །དེ་གསུམ་ལ་ཡང་གོ་རིམས་བཞིན་དུ་བྱ་སྟེ། དང་པོ་རྗེས་སུ་བཙལ་བར་བྱའོ། །བཙལ་བས་མ་རྙེད་ན་བོད་པར་བྱའོ། །དེས་ཀྱང་མ་རྙེད་ན་ཕྱོགས་ཆེས་མཐོན་པོར་འགྲེང་སྟེ། ཕྱོགས་བཞིར་བལྟ་བར་བྱའོ། །དེ་བཞིན་དུ་འདིར་འདི་འཇུག་པར་རིགས་པའི་ངོ་བོའོ། །འདིར་གཞུང་ནི་རྣམ་པ་གཉིས་དག་ལ་སྟེ། ཇི་སྐད་དུ་ཞུ་བ་ལས། བཅོམ་ལྡན་འདས་ཀྱིས་དགེ་སློང་གྲོང་མཐའ་བ་མ་ལགས་པ་དགོན་པ་ན་གནས་པ་དེ་རྣམས་ཐམས་ཅད་གསོ་སྦྱོང་གི་གནས་གཅིག་
ཏུ་འདུ་བར་བྱའོ་ཞེས་བཀའ་སྩལ་ནས། གལ་ཏེ་དེ་རྣམས་མི་གདའ་ན་བཅལ་བར་བགྱི་ཞིང་གལ་ཏེ་དེ་རྣམས་མ་རྙེད་ན་བོད་པར་བགྱིའོ། །གལ་ཏེ་དེ་རྣམས་ཀྱིས་མ་མཐོས་ན་གསོ་སྦྱོང་བགྱིའོ་ཞེས་བགྱི་བའམ། ཉེ་བར་འཁོར་བྱས་ཞེས་བྱའོ་ཞེས་གསུངས་པ་དག །འོག་མ་ཤོས་ཀྱིས་གཞུང་ནི་ཕྱོགས་བཞིར་བལྟས་ཏེ། གསོ་སྦྱོང་ཞེས་གསུངས་པ་ཡིན་ནོ་ཞེས་བྱ་བ་འདི་ནི་ས་ཕྱོགས་མཐོན་པོར་གནས་ཏེ་བརྟག་པར་བྱའོ་ཞེས་བྱ་བའི་རྗེས་སུ་འབྲངས་ནས་སོ། །ཞུ་བ་ལས་རྣམ་པ་འདི་གང་ཞིག་མ་གསུངས་པ་དེ་ནི་ཆུད་ཟོས་པས་མཐོང་བ་ཡིན་ནོ། །གསོ་སྦྱོང་གི་གཞི་ལས་མཐུན་པའི་གསོ་སྦྱོང་གི་ཚོགས་པའི་སྐབས་སོ། །གསོ་སྦྱོང་བྱའོ། །ཟླ་བ་ཕྱེད་ཕྱེད་ཀྱི་ཚེས་བཅོ་ལྔ་ལའོ། །སོ་སོར་ཐར་པའི་མདོ་གདོན་པས་སོ་ཞེས་བྱ་བ་ནི། གང་ཞིག་ཚེས་བཅུ་བཞི་དང་བཅོ་ལྔ་བ་ཉིད་ལ་འདི་མཚན་མོ་གཅིག་གིས་མ་ཆོག་པས་དེར་དེ་རིང་ཉིད་དུ་ཚེས་བཅོ་ལྔ་ཞེས་བྱ་བ་སྟེ། གསོ་སྦྱོང་བྱེད་པ་དེ་བས་ན་བཅུ་བཞི་པ་འདིས་བསྡུས་པ་ཡིན་ནོ། །གང་ཞིག་མདོ་ལས་གསོ་སྦྱོང་ནི་གཉིས་ཏེ། བཅུ་བཞི་པ་དང༌། བཅོ་ལྔ་པའོ་ཞེས་གསུངས་པ་ཡིན་ནོ། །དེ་ནི་འདིར་འགལ་བ་མེད་དོ། །དེ་ཉིད་ལ་འདི་བསྟན་པར་བྱས་པའོ། །མཚན་མོ་གཅིག་ཆད་པ་དང༌། གཞན་དུ་གསོ་སྦྱོང་ཞེས་བྱ་བ་འདིས་བསྟན་པའི་དོན་དུ་ཟླ་བ་པོ་དེའི་ཚེས་གྲངས་གང་ལ་མཐར་ཐུག་པ་ལ་དེར་དགེ་འདུན་གྱི་གསོ་སྦྱོང་བཅུ་བཞི་པ་ལགས་ཏེ། བདག་དགེ་སློང་མིང་འདི་ཞེས་བགྱི་བའི་གསོ་སྦྱོང་བཅུ་བཞི་བ་ལགས་པས་ཞེས་བརྗོད་པར་བྱའོ། །དེ་ཡང་མཚན་མོ་གཅིག་ཆད་པས་དེ་གསོ་སྦྱོང་ཞེས་བྱ་བ་བསྟན་པའི་དོན་དུའོ། །ཟླ་བ་ཕྱེད་ཕྱེད་ཅེས་བྱ་བའི་ལན་གཉིས་སུ་སྨྲ་བ་ནི་འདིར་ཟླ་བ་ཕྱེད་ཕྱེད་ཅེས་བྱ་བའི་དོན་དུའོ། །སོ་སོར་ཐར་པའི་མདོ་གདོན་པས་སོ་ཞེས་བྱ་བ་ནི། འདིར་གསོ་སྦྱོང་གིས་ཚུལ་ཁྲིམས་གསོ་བར་བྱེད་པ་ཡོད་བས། དེ་དག་བཙལ་བའི་ཕྱིར་སོ་སོར་ཐར་པའི་མདོག་དོན་པས་སོ། །དྲན་པ་ཙམ་གྱིས་བྱས་པ་དང༌། མ་བྱས་བ་ལ་སོ་སོར་བརྟག་པའོ། །སེམས་དྲང་པོར་བསྒྲུབ་པ་དང༌། བྱེ་བྲག་ཉེ་བར་བསྒྲུབ་པ་ལ་རྣམ་པར་ངེས་པ་ཀུན་ནས་ལྡང་བས་རང་གི་ངོ་བོ་དང་འབྲས་བུ་ལས་འདས་པར་བྱེད་ཅིང་
ཐ་དད་པར་བྱེད་པ་རྣམས་ཀྱིས་ཚུལ་ཁྲིམས་ལའོ། །དེ་ལྟར་རྣམ་པ་འདི་རྣམས་ཀྱིས་ཀྱང་ཚུལ་ཁྲིམས་གསོ་བར་བྱེད་པ་ཡོད་པས་བྱེ་བྲག་འདི་ཡོངས་སུ་བཟུང་བའོ། །སོ་སོར་ཐར་པའི་མདོ་གདོན་པས་སོ་ཞེས་བྱ་བ་ནི། འདུལ་བར་གཏོགས་པ་མ་ལུས་པ་སྟོན་པ་དང༌། མ་ལུས་པ་བསྟན་པའི་སྐབས་བཟློག་པའི་དོན་དུ་དགའ་བ་སྤྱོད་པ་འདི་ལ་ཞེས་བྱ་བ་རྒྱལ་བའི་བསྟན་པ་ལྷག་མ་རྣམས་པར་གཞག་པའོ། །ཡང་ན་སླར་ཡང༌། གཞན་དག་ཆོས་དང་རྗེས་སུ་མཐུན་པ་འོངས་པར་གྱུར་ནའོ། དེར་ཁྱེད་ཅག་གིས་བཅས་པ་དང་རྗེས་སུ་བཅས་པ་ལས་ཡང་དག་པར་དགའ་བར་གྱུར་པ་དང་རྗེས་སུ་བསྟན་པར་གྱུར་པ་རྣམས་ཀྱིས་བསླབ་པར་བྱའོ་ཞེས་གསུངས་པ་ཡིན་ནོ། །དགག་དབྱེ་བྱས་ན་འདི་མ་གྲུབ་པ་ཉིད་མ་ཡིན་ནོ་ཞེས་བྱ་བ་ནི། དེས་དག་པར་སྤྱད་ནས་དེ་བྱིན་པས་གསོ་སྦྱོང་གི་ཚུལ་ཁྲིམས་རྒྱས་པར་བྱེད་པའོ། །དགག་དབྱེ་བྱས་ནས་སླར་གསོ་སྦྱོང་མི་བྱའོ་ཞེས་བྱ་བ་དེ་ལ་འདི་བསྟན་པའོ། །དེ་གཉིས་ནི་ཚུལ་ཁྲིམས་དག་པར་བྱེད་པ་སྟེ། དེ་བས་ན་དགག་དབྱེ་བྱས་པས་གསོ་སྦྱོང་འགྲུབ་པ་ཉིད་དོ། །འདིར་གཞུང་ནི། ཕྲན་ཚེགས་དག་ལས། དགེ་སློང་དག་དགག་དབྱེ་བྱས་ནས་གསོ་སྦྱོང་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགག་དབྱེ་བྱས་ནས་གསོ་སྦྱོང་མི་བྱའོ་ཞེས་གསུངས་པ་ཡིན་ནོ། །གསོལ་བ་དང༌། རྣམ་པར་གཞག་པ་འཛིན་དུ་གཞུག་པ་སྔར་བྱ་ཞིང་དེ་གདོན་ཏོ་ཞེས་བྱ་བ་ནི་དང་པོར་གསོལ་བ་སྔོན་དུ་འགྲོ་བས་རྣམ་པར་གཞག་པས་འཛིན་དུ་གཞུག་པར་བྱས་ནས་དེའི་རྗེས་ལ་སོ་སོར་ཐར་པའི་མདོ་གདོན་པའོ། །རྣམ་པར་གཞག་པ་འཛིན་དུ་གཞུག་པ་ནི་སོ་སོར་ཐར་པའི་མདོ་ལས་ཚེ་དང་ལྡན་པ་དག་བདག་ཅག་གསོ་སྦྱོང་བྱ་སྟེ། སོ་སོར་ཐར་པའི་མདོ་གདོན་པ་གདོན་གྱིས་ཁྱེད་ཅག་སུ་ལ་ལྟུང་བ་ཡོད་པ་ཅེས་མཐོལ་ཅིག་ཅེས་བྱ་བ་ལ་ སོགས་པ ་སྨོས་སོ། །གླེང་གཞི་གདོན་པ་དང་གསོལ་བ་ནི་ཚིག་ཏུ་བརྗོད་པ་ཉིད་ཀྱིས་བསྒྲུབ་པར་བྱ་བ་ཉིད་ཡིན་ནོ་ཞེས་བྱ་བ་ལ། འདི་གཉིས་ནི་ཚིག་ཏུ་བརྗོད་པ་ཉིད་ཀྱིས་བསྒྲུབ་པར་བྱ་བ་ཉིད་ཡིན་གྱི། ཐོས་པ་བསྒྲགས་པས་བསྒྲུབ་པར་བྱ་བ་ཉིད་མ་ཡིན་ནོ། །ལྷག་མ་ནི་ཐོས་པ་བསྒྲུབ་པས་ཀྱང་ངོ་ཞེས་བྱ་བ་ནི། གླེང་གཞི་གདོན་པ་
དང། གསོལ་བའི་ལྷག་མ་དག་དི་ཐོས་པ་བསྒྲགས་པས་བསྒྲུབ་པར་བྱ་བ་རུང་བ་ཡིན་ནོ། །ཀྱང་ངོ་ཞེས་བྱ་བའི་སྒྲས་ནི་ཚིག་ཏུ་བརྗོད་པ་བསྒྲུབ་པར་བྱ་བ་ནི་མ་ཡིན་ནོ་ཞེས་བྱ་བར་སྦྱར་རོ། །བརྩམས་པའི་སྡེ་ཚན་ནི་རྫོགས་པར་བྱ་དགོས་སོ་ཞེས་བྱ་བ་ནི། ཕམ་པར་གྱུར་པའི་སྡེ་ཚན་མ་ཅུང་ཟད་བཏོན་ནས་ལྷག་མ་དེ་དག་དང་ལྡན་པར་རྟོགས་པ་ནི་ཐོས་པ་བསྒྲགས་པས་ཞེས་བྱ་བའི་དེ་ནི་མི་བྱའོ། །ད་བཞིན་དུ་དགེ་འདུན་ལྷག་མའི་སྡེ་ཚན་དང་མ་ངེས་པའི་སྡེ་ཚན་ལས་ཀྱང་མི་བྱའོ། །དེ་ལྟར་འཕྲོག་འཇོག་པ་ཉིད་སྐྱེ་བར་འགྱུར་ཏེ། འཕྲོག་འཇོག་པ་ནི་དམན་པར་བྱ་བ་ཉིད་དོ། །བཞི་པ་ལ་རེག་ན་རིལ་གྱིས་སོ་ཞེས་བྱ་བ་ནི། ལྟུང་བྱེད་ཀྱི་བདག་ཉིད་ཀྱི་སྡེ་ཚན་བཞི་པ་ལས་རེག་ན་ཐམས་ཅད་རྫོགས་པར་བྱའོ། །སོ་སོར་བཤགས་པར་བྱ་བ་ལ་ སོགས་པ ་ལ་ཡང་འདིར་ཐོས་པ་བསྒྲགས་པར་མི་བྱ་ཞེས་བྱ་བའི་དོན་ཏོ། །བྱས་པ་ཐོབ་པ་ལ་མཐར་ཐུག་པ་མ་ཡིན་པ་གཏོང་བ་ལེགས་པ་ཉིད་དུ་ཡིད་ལ་ངེས་པར་འབྲེལ་བ་མ་ཡིན་ཏེ། དེ་བས་ན་འདི་རྣམ་པར་གཞག་པའོ། །སོ་སོར་ཐར་པའི་མདོ་གདོན་པ་ལྔ་པོ་འདི་རྣམས་ལ་གླེང་གཞི་ཚིག་ཏུ་བརྗོད་པས་བཏོན་ནས་ལྷག་མ་བསྒྲགས་པས་བསྒྲུབ་པར་བྱར་རུང་ངོ༌། །དེ་བཞིན་དུ་ཕམ་པར་འགྱུར་བ་རྣམས་སམ། དགེ་འདུན་ལྷག་མ་རྣམས་སམ། མ་ངེས་པ་དག་ཏུ་འཛིན་ཏུ་བརྗོད་པས་བཏོན་ནས་ལྷག་མ་ཐོས་པ་བསྒྲགས་པས་བསྒྲུབ་ཏུ་ཡང་རུང་བ་ཡང་ལྔ་པའོ། །འདི་ལ་ཟླ་བ་ཕྱེད་འདས་པའི་སོ་སོར་བརྟག་པར་བྱའོ་ཞེས་བྱ་བ་ལ། འདི་ལ་ཞེས་བྱ་བ་ནི་གསོ་སྦྱོང་ལའོ། །ཟླ་བ་ཕྱེད་འདས་པའི་ཉེས་པ་དག་ལ་ཅི་བྱུང་བ་དེ་དག་སོ་སོར་བརྟག་པར་བྱའོ། །གང་གི་ཚེ་ཞེ་ན། འདུ་བར་འགྱུར་བ་དེར་རོ་ཞེས་བྱ་བ་སྨོས་ཏེ། དགེ་སློང་རྣམས་སོ་སོར་ཐར་པའི་མདོ་གདོན་པའི་ཕྱིར་འདུ་བ་པ་གང་ཡིན་པ་དེ་འདུ་བའི་མདུན་རོལ་དུ་འདུ་བ་ལ་སྦྱོར་བའི་ཚེ། ལྷག་མ་ནི་ཚོགས་པ་ཞེས་བྱ་བའི་དོན་ཏོ། །ཅི་སོ་སོར་བརྟགས་ནས་ལྟུང་བ་ཕྱིར་མ་བཅོས་པ་ཁོ་ནར་འདུག་པར་བྱ་བའམ་ཞེ་ན། དེའི་ཕྱིར་ཤེས་པ་ཕྱིར་བཅོས་ཏེ་ཐམས་ཅད་དུ་འདུག་པར་བྱའོ་ཞེས་བྱ་བ་སྨོས་ཏེ། ལྟུང་བ་ངེས་པར་ཤེས་པའམ། ཡིད་གཉིས་དང་བཅས་པ་ཤེས་ པ་ཕྱིར་བཅོས་ཏེ། དགག་དབྱེ་ལ་སོགས ་པའི་ལས་
ཐམས་ཅད་འདུག་པར་བྱའོ། །གསོ་སྦྱོང་ཉིད་ལ་ཡིད་གཉིས་ཀྱིས་ནི་མ་ཡིན་ཏེ། དེ་ལ་དགེ་སློང་མདོ་སྡེ་དང་འདུལ་བ་དང་མ་མོ་འཛིན་པ་རྣམས་ལ་དྲིས་ནས་ཡིད་གཉིས་དང་བྲལ་པར་བྱས་ཏེ། ཕྱིར་བཅོས་པ་ཞེས་བྱ་བ་ནི་ཤུགས་ཀྱིས་རྟོགས་པར་བྱའོ། །འདུག་པ་ན་དྲན་ནམ་ཡིད་གཉིས་ཟ་ན་དྲུང་ན་མོ་ལ་བྱིན་གྱིས་བརླབ་པར་བྱའོ་ཞེས་བྱ་བ་ནི། གལ་ཏེ་དེར་འདུག་པ་འདི་ལ་ལྟུང་བའི་ཡུལ་ཅན་དྲན་པ་བཅོས་སུ་ཡོད་པར་གྱུར་ན། གང་ཞིག་དྲུང་ན་འདུག་པའི་དགེ་སློང་དེ་ལ་བྱིན་གྱིས་བརླབ་པར་བྱ་སྟེ། མདུན་ནས་བྱའི་གློ་ནས་མི་བྱའོ། །དེ་ན་ངེས་པ་ལས་ཤེས་པའོ། །ཤིན་ཏུ་འདའ་བར་བྱེད་པས་དགོས་པ་མེད་པ་དེ་བས་ན་འདི་བརྟེན་པའོ། །ལས་བྱེད་པས་ནི་སེམས་ཀྱིས་སོ་ཞེས་བྱ་བ་ནི་དེ་ལྟར་འཇུག་པ་ཉིད་ན་ལྟུང་བ་དྲན་ནམ། ཡིད་གཉིས་ཟ་ན་བྱིན་གྱིས་བརླབ་པར་བྱའོ་ཞེས་བྱ་བར་སྦྱར་རོ། །ལས་བྱེད་པ་པོ་གང་ཞིག་དྲན་ནམ་དེ་ལ་ཡིད་གཉིས་ཟ་ན་ལྟུང་བྱེད་ཡུལ་དེས་དེ་རང་གི་སེམས་ཀྱིས་བྱིན་གྱིས་བརླབ་པར་བྱའོ་ཞེས་བྱ་བའི་དོན་ཏོ། །འདིར་དུས་རིང་དུ་འདའ་བར་བྱེད་པ་ནི་མ་གུས་པ་སྐྱེས་པ་ཡིན་ཏེ། དེ་བས་ན་ལན་ཅིག་ཁོ་ནས་བྱིན་གྱིས་བརླབ་པ་ཡིན་གྱི་ལན་གསུམ་དུ་ནི་མ་ཡིན་ནོ། །གལ་ཏེ་ཚེས་བཅོ་ལྔ་ལ་བདག་གཅིག་པུ་དེ་དང་མི་ལྡན་པར་ཤེས་ན་འགྲོགས་པ་ཤེས་ལ་དྲང་པོར་འབད་པར་བྱའོ་ཞེས་བྱ་བ་ནི། གལ་ཏེ་དགེ་སློང་གིས་གསོ་སྦྱོང་གི་ཉི་མ་བདག་གཅིག་བུ་ལྟུང་བ་དེ་དང་མི་ལྡན་ཞིང༌། དགེ་འདུན་ཐམས་ཅད་ལྟུང་བ་མཐུན་པ་དང་ལྡན་པར་ཤེས་ན། གང་ཞིག་ཚེས་བཅོ་ལྔ་ལ་དགེ་འདུན་ཐམས་ཅད་ལྟུང་བ་མེད་པར་བསམ་པར་བྱ་ཞེས་བྱ་བའི་དོན་ཏོ། །བཅོ་ལྔ་པ་ཁོ་ན་གསོ་སྦྱོང་བཅུ་བཞི་པ་ཞེས་བྱ་བར་གཟུང་བར་བྱ་བ་མ་ཡིན་པ་འདིར་སྒྲ་གཞན་གྱིས་འདིར་གསོ་སྦྱོང་དག་དང༌། དགག་དབྱེའི་བར་ཆད་བསལ་བར་བྱ་བའི་སྐབས་ཀྱིས་འདིར་སྨོས་ཀྱི། དུས་གཞན་ལ་ནི་མ་ཡིན་ནོ། །འདི་ལ་བྱ་བ་མ་ཡིན་པ་ཉིད་ན། ཇི་ལྟར་འབད་པར་བྱ་ཞེ་ན། དེའི་ཕྱིར་ཚེ་དང་ལྡན་པ་འདི་དང་འདི་ལྟར་བྱེད་པ་གང་ཡིན་པ་དེས་ཅིར་འགྱུར། ལྟུང་བ་དང་བཅས་པར་རོ། །འོ་ན་ཚེ་དང་ལྡན་པས་ཀྱང་འདི་དང་འདི་ལྟར་བྱས་སམ་བྱས་སོ། །འོ་ན་ཚེ་དང་ལྡན་པ་ཡང་ལྟུང་བ་དང་བཅས་པ་ཡིན་ནོ། །ཚེ་དང་ལྡན་པ་
ཁོ་བོ་གཅིག་པུར་མ་ཟད་ཀྱི། དགེ་འདུན་ཐམས་ཅད་དོན་དེ་དང་ལྡན་པ་ཡིན་ནོ། །ཀྱེ་ཚེ་དང་ལྡན་པ་ཇེ་ཁྱོད་རང་གི་ལྟུང་བ་ཆོས་བཞིན་དུ་ཕྱིར་གྱིས་ཤིག །དགེ་འདུན་ཐམས་ཅད་ཀྱིས་ཁྱེད་ལ་ཅི་འགྱུར་ཞེས་བྱ་བའི་རྩོམ་པས་མིག་ལམ་དུ་ལྷག་མ་འདོད་པ་རྣམས་འཆགས་སུ་གཞུག་གོ་ཞེས་བྱ་བ་སྨོས་ཏེ། རྩོམ་པ་ཞེས་བྱ་བའི་ཚིག་འདི་དང་གཞན་རྣམས་ཐམས་ཅད་ཀྱིས་ཞེས་བྱ་བའི་དོན་ཏོ། །འདི་ལ་མི་འདོད་པ་དེ་ལ་གླེང་བར་མི་བྱའོ་ཞེས་བྱ་བ་ལ། འདི་ལ་ཞེས་བྱ་བ་ནི་ལྟུང་བ་ལའོ། །དེ་ལ་ཞེས་བྱ་བ་ནི་མཉེས་གཤིན་པ་དང་བཅས་པ་དེ་ལའོ། །གསོ་སྦྱོང་དང་དགག་དབྱེའི་བར་ཆད་སྤང་བར་བྱ་བའི་ཕྱིར་བཀག་པ་ཡིན་ནོ། །འོ་ན་གལ་ཏེ། འདི་ལྟར་དྲན་དུ་བཅུག་པ་མི་འདོད་ན་འདི་གསོ་སྦྱོང་ངམ། དགག་དབྱེ་མ་དག་པར་འགྱུར་རོ། །དག་པ་རྣམས་ཀྱིས་ལས་རྣམས་ཉམས་སུ་མྱོང་བ་ལ་ཉེས་བྱས་གང་ཡིན་པ་དེ་ཇི་ལྟར་མི་འགྲུབ་ཅེས་བྱའོ། །དེའི་ཕྱིར་མི་འདོད་པ་ཞེས་བྱ་བ་དམིགས་ཀྱིས་བསལ་བར་གྱུར་པའི་ཚིག་ལས་མ་གྲུབ་པ་ཡིན་ནོ། །གལ་ཏེ་ཚེས་བཅོ་ལྔ་ལ་ཐམས་ཅད་ཀྱིས་ལྟུང་བ་ཤེས་སམ། ཡིད་གཉིས་སུ་གྱུར་ན་ལེན་པར་བྱེད་པ་བསྒྲུབ་པའི་ཕྱིར་དགེ་སློང་འགའ་ཞིག་ལ་ཕྱིར་བཅོས་པའི་དོན་དུ་གནས་གཞན་དུ་གཏང་བར་བྱའོ་ཞེས་བྱ་བ་ལ། རང་ཞེས་བྱ་བ་ནི་འདིར་བཞག་བཞིན་པའི་ཚིག་བླ་དགས་སོ། །ལེན་པ་བྱེད་པ་བསྒྲུབ་པའི་ཕྱིར་རོ་ཞེས་བྱ་བ་ནི། གང་དེ་རྣམས་ཀྱི་ལྟུང་བ་བསྟན་པ་དེ་ལེན་པར་བྱེད་པའི་དོན་དུའོ། །གང་གི་ཕྱིར་དོན་འདི་ལྟར་བསྒྲུབ་པར་འགྱུར་རོ། །མ་གྲུབ་ན་བྱིན་གྱིས་བརླབ་པའི་ཕྱིར། གསོལ་བ་བྱ་བ་འདོད་པར་བྱའོ་ཞེས་བྱ་བ་ལ། མ་གྲུབ་ན་ཞེས་བྱ་བ་ལ་ནི་ཆོ་ག་འདིའོ། །ཇི་སྐད་དུ་བསྟན་པའི་ཆོ་ག་དེ་དགེ་སློང་གི་དགེ་འདུན་གྱིས་གསོལ་བས་ལྟུང་བ་བྱིན་གྱིས་བརླབས་ལ་གསོ་སྦྱོང་ངམ་དགག་དབྱེའི་ལས་མི་ཤོལ་བར་བྱའོ། །གསོལ་བ་བྱ་བ་འདོད་པར་བྱའོ་ཞེས་བྱ་བ་ནི། སོ་སོར་བྱིན་གྱིས་བརླབ་པས་འདི་ལ་དག་པ་མི་འགྲུབ་པ་མ་ཡིན་ནོ། །དེ་འདིར་བརྗོད་པར་མི་བྱ་ཞེས་བྱ་བ་འདིར་རྣམ་པ་འདི་ལ་བརྟེན་པར་མི་བྱའོ་ཞེས་བྱ་བ་བསྟན་པའི་དོན་དུ་དེ་སྐད་བརྗོད་པའོ། །བཞི་པས་ཉུང་བ་ཉིད་ལ་ཡང་གཙུག་ལག་ཁང་གི་བྱ་བ་གནས་པ་
ཁོ་ན་ཡིན་ནོ་ཞེས་བྱ་བ་ནི། གཙུག་ལག་ཁང་གཅིག་ན། དགེ་སློང་གསུམ་མམ། གཉིས་སམ་གཅིག་ཁོ་ན་འདུག་ན་ཡང་དེས་ཕྱག་དར་ལ་ སོགས་པ ་གཙུག་ལག་ཁང་གི་བྱ་བ་གདོན་མི་ཟ་བར་བྱ་དགོས་སོ་ཞེས་བྱ་བའི་དོན་ཏོ། །འདུག་པ་པོ་རྣམས་ཀྱི་དོན་དུ་སྟན་རྣམས་གནང་བ་དེ་མེད་པས། དེའི་ཚེ་གཙུག་ལག་ཁང་གི་བྱ་བ་མ་ཡིན་སྙམ་པའི་དོགས་པ་བསལ་བའི་ཕྱིར། སྟན་ཐབས་ཉམས་པར་མི་བྱའོ་ཞེས་བྱ་བ་སྨོས་ཏེ་འོངས་སྲིད་པས་དེའི་དོན་དུ་མེད་པར་བརྟེན་པར་བྱ་བ་མ་ཡིན་ཞེས་བྱ་བའི་བློ་གྲོས་སོ། །ཆག་ཆག་དང༌། ཕྱག་དར་དང༌། ལྕི་བ་སར་པས་བྱུག་པ་བྱ་བ་དང༌། སེང་གེའི་ཁྲི་བཤམ་པ་དང༌། མར་མེ་གཟུགས་པ་དང་ཆོས་ཉམ་དུ་གཞུག་པ་དག་བྱས་ལ་ཕྱོགས་ཆེས་མཐོན་བོར་འདུག་སྟེ། ཕྱོགས་བཞིར་རྣམ་པར་བལྟ་བར་བྱའོ་ཞེས་བྱ་བ་ནི། འདི་ལྟར་ལྟ་བར་བྱེད་པ་རྣམས་ཀྱིས་བལྟ་བར་བྱ་སྟེ། གོ་རིམས་བསྟན་པའི་དོན་དུ་དེ་ལྟར་བསམས་པའོ། །དགེ་སློང་དག་འོང་བ་སྣང་ན། ཀྱེ་ཚེ་དང་ལྡན་པ་མྱུར་བ་མྱུར་བར་ཤོག་ཤིག་དེང་དགེ་འདུན་གྱིས་གསོ་སྦྱོང་ངམ། དགག་དབྱེ་བཅོ་ལྔ་པ་ཡིན་ནོ་ཞེས་བྱ་བ་ལ། དགག་དབྱེ་ལ་བཅོ་ལྔ་ཞེས་བྱ་བ་ཤུགས་ཀྱིས་རྟོགས་པར་བྱའོ། །འདི་ནི་མཚོན་པ་ཙམ་ཡིན་ཏེ། གསོ་སྦྱོང་བཅུ་བཞི་པ་དེ་བས་ན་འདི་ལ་མི་བྱ་བ་ཉིད་དུ་ཤེས་པར་མི་བྱའོ། །བཞིར་མ་ཚང་ན་དུས་ཀྱི་བར་དུ་བསྡད་དེ་བྱིན་གྱིས་བརླབ་པར་བྱའོ་ཞེས་བྱ་བ་ནི། དགེ་སློང་བཞིར་མ་ཚང་ན། སྐྱ་རེངས་མ་ཤར་ཚུན་ཆད་དུ་བསྡད་དེ། དུས་སུ་མ་འོངས་ན་གསོ་སྦྱོང་དང་དགག་དབྱེ་བྱིན་གྱིས་བརླབ་པར་བྱའོ་ཞེས་བྱ་བའི་དོན་ཏོ། །འདི་ནི་མ་མོ་ལས་སོ། །འབའ་ཞིག་ན་འདུག་སྟེའོ་ཞེས་བྱ་བ་ནི། གལ་ཏེ་གཅིག་པུ་འདུག་ན་སྟན་དེ་ལ་འདུག་སྟེ། དེས་གསོ་སྦྱོང་དང་དགག་དབྱེ་བྱིན་གྱིས་བརླབ་པར་བྱའོ། །ལྷག་མ་གཞན་དང་བཅས་པ་ཉིད་ཡིན་ན་མདུན་དུའོ་ཞེས་བྱ་བ་ནི། གཞན་དང་བཅས་པ་ནི་གཞན་དང་ལྷན་ཅིག་གོ །གལ་ཏེ་གཉིས་པ་ཡོད་པར་གྱུར་ན་དེའི་མདུན་དུ་ཙོག་ཙོག་པོར་འདུག་སྟེ། གསོ་སྦྱོང་དང་དགག་དབྱེ་བྱིན་གྱིས་བརླབ་པར་བྱའོ་ཞེས་བྱ་བ་ནི་ངེས་པ་ལ་གཏོགས་པའོ། །གསུམ་པ་ལ་ནི་རྣམ་པ་གཞན་དུ་བསྟན་པའི་ཕྱིར་
གསུམ་ནི་འཁོད་དེའོ་ཞེས་བྱ་བ་སྨོས་ཏེ། ཇི་ལྟར་དགེ་འདུན་གྲལ་རིམས་བཞིན་དུ་འཁོད་དེ་བྱིན་གྱིས་བརླབ་པར་བྱའོ་ཞེས་བྱ་བའི་དོན་ཏོ། །བཞིའི་དགག་དབྱེ་ཡང་དེ་བཞིན་ནོ་ཞེས་བྱ་བ་ནི། ཇི་ལྟར་དགེ་སློང་གསུམ་གྱིས་གསོ་སྦྱོང་བྱིན་གྱིས་བརླབ་པར་བྱ་བ་བཞིན་དུ་བཞིའི་ཡང་དེ་བཞིན་ནོ་ཞེས་བྱ་བའི་དོན་ཏོ། །དེའི་ཚེ་གནས་ན་སོ་སོར་ཐར་པའི་མདོ་གདོན་ནུས་པ་མེད་པར་ཤེས་ན་གསོ་སྦྱོང་ལ་བསྡད་པར་མི་བྱའོ་ཞེས་བྱ་བ་ལ། དེའི་ཚེ་ཞེས་བྱ་བ་ལ་ནི་གསོ་སྦྱོང་ལ་ལྟོས་པའི་གསོ་སྦྱོང་གི་དུས་ལ་གང་དུ་སྟོན་པ་པོ་མེད་པར་གྱུར་ན་ཞེས་བྱའོ། །གང་ན་དེ་ལས་འདའ་བར་དེར་ཉེ་བར་འགྲོ་བར་མི་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་གསོ་སྦྱོང་ལའོ། །མདོ་འདོན་ནུས་པ་མེད་པ་ལ་ནི་འདི་སྨོས་སོ། །ཚོགས་པ་མེད་པ་ལ་ཡང་དེ་ཉིད་ཀྱི་ཕྱིར་འདིའི་ལྟུང་བ་སྟེ། བར་ཆད་གཞན་གྱིས་བསྟན་པ་མེད་པ་ལ་དེ་བས་ན་འདི་ལྟར་བྱའོ། །གནས་པར་ཁས་བླངས་པ་ཕྱི་མའི་གོང་མ་བསྲུང་བར་མི་བྱའོ་ཞེས་བྱ་བ་ནི། ཁས་བླངས་པ་ཕྱི་མ་ཤོས་ཀྱིས་སྔ་མ་དེ་བསྲུང་བར་མི་བྱའོ་ཞེས་བྱ་བའི་དོན་ཏོ། །ཕྱི་མ་ཤོས་འགྲོ་བའི་ཕྱིར་སྔ་མ་དེ་སྒྲུབ་པ་ཞེས་བྱ་བར་དགོངས་པའོ། །དེ་བས་ན་སྔ་མ་གཞན་ལས་དབྱར་དྲལ་བ་ལ་ཕྱི་མ་ཁས་བླངས་བར་བྱའོ་ཞེས་བྱ་བ་འདིས་དེ་བྱས་པར་རིག་པར་བྱའོ། །དེ་ལ་ཡང་ཟླ་བ་གཉིས་ལས་ལྷག་པའོ་ཞེས་བྱ་བ་ནི་ཁས་བླངས་པ་ཕྱི་མ་ཤོས་དེ་ཟླ་བ་གཉིས་བསྲུང་གི་གཉིས་ལས་ལྷག་པ་གསུམ་པ་བསྲུང་བར་མི་བྱའོ་ཞེས་བྱ་བའི་དོན་ཏོ། །གནས་དང་ལས་དང་རྙེད་པ་དང་བསྙེན་བཀུར་བསྟབས་པས་གདོན་པར་བྱེད་པ་བསྙེན་པར་བྱའོ་ཞེས་བྱ་བ་ནི། འདི་འདོན་པ་པོའི་ཕྱིར་འབད་པར་བྱེད་པ་མེད་པའོ། །དེ་བས་ན་མ་གྲུབ་པ་ལ་འབད་པ་དེ་ལྟ་བུ་བྱས་ནས་ཀྱང་ཆོ་ག་བྱ་བ་ལ་རྗེས་སུ་བསྒྲུབ་པ་ཉིད་དུ་རིག་པར་བྱའོ། །འདིར་གནས་ཞེས་བྱ་བ་ནི་གནས་ཁང་དང༌། མལ་ཆ་དང༌། སྟན་དང་བགོ་བ་ལ་ སོགས་པ ་ཡིན་པར་རིག་པར་བྱའོ། །ལས་ཞེས་བྱ་བ་ནི་གང་གི་ལས་ཏེ་དེ་དག་ཏུ་མི་བསྐོ་བའོ། །རྙེད་པ་ཞེས་བྱ་བ་ནི་ཆོས་གོས་དང་བསོད་སྙོམས་དང་སྣུམ་བག་ལ་ སོགས་པའོ། །འདི་དག་གིས་བསྙེན་བཀུར་པ ་སྟབས་པ་ནི་འདོད་པ་འདི་དག་གིས་མ་བྲལ་བ་ཉིད་དུ་ངེས་པར་བྱེད་པའོ། །མདོ་སྡེ་འཛིན་པ་འོང་བ་ན་གདུགས་དང༌། རྒྱལ་མཚན་དང་བ་དན་ལ་ སོགས་པ ་དག་གིས་བསུ་བར་
བྱའོ། །འདུལ་བ་དང་མ་མོ་ཡང་ངོ་ཞེས་བྱ་བ་ན་འདུལ་བ་འཛིན་པ་དང་མ་མོ་འཛིན་པ་འོང་བ་ལ་གདུགས་དང་རྒྱལ་མཚན་དང་བ་དང་ལ་ སོགས་པ ་དག་གིས་བསུ་བར་བྱའོ། །ལམ་ཇི་སྲིད་དུ་ཞེ་ན། དེའི་ཕྱིར་དཔག་ཚད་ཕྱེད་དང་གསུམ་དུའོ། །མ་ནུས་རྒྱང་གྲགས་ལྔར་རོ་ཞེས་བྱ་བ་སྨོས་ཏེ། ལམ་དེ་ཙམ་དུ་བསུ་བར་མི་ནུས་ན་རྒྱང་གྲགས་ལྔར་བསུ་བར་བྱའོ་ཞེས་བྱ་བའི་དོན་ཏོ། །གསུམ་མམ་དཔག་ཚད་ཕྱེད་དམ་རྒྱང་གྲགས་སམ་རྒྱང་གྲགས་ཕྱེད་དམ་ཁྱམས་སུ་རུང་ངོ་ཞེས་བྱ་བ་ལ། གསུམ་ཞེས་བྱ་བ་ནི་རྒྱང་གྲགས་རྣམས་ཀྱང་ངོ༌། །མ་ནུས་ན་ཞེས་བྱ་བ་ནི་ཐམས་ཅད་ལ་སྦྱར་བར་བྱའོ། །དེ་ལྟར་བསུ་ནས་ཅི་ཞིག་བྱ་ཞེ་ན། དེའི་ཕྱིར་ངག་གི་བཤེས་པའི་ཚིག་གིས་བསུ་ནས་ལྷུང་བཟེད་དང་ཆོས་གོས་བླང་བར་བྱའོ། །ཁྲུས་བྱའོ། །དགེ་འདུན་ལ་ཡང་སྣུམ་བག་གིས་རྙེད་པའོ། །གནས་ལ་ སོགས་པ ་བསྟབས་པ་སྦྱིན་ནོ། །ཆོས་ཉན་པ་ཡང་ངོ་ཞེས་བྱ་བ་ནི། སྦྱིན་ནོ་ཞེས་བྱ་བར་སྦྱར་ཏེ། དེར་ཐམས་ཅད་ཀྱིས་སྤྲོ་བ་བསྐྱེད་པར་བྱ་ཞེས་བྱ་བ་ནི་མང་པོའི་ཚིག་གིས་བསྟན་པ་དེ་རྣམས་ཐམས་ཅད་ཀྱིས་སྨྲ་བར་མི་རིགས་པའི་ཕྱིར་རོ། །དགེ་སློང་ཕྲག་དོག་ཅན་ལ་འདི་དག་སྟོན་པར་འཛིན་པ་ཡིན་ནོ་ཞེས་གོ་བར་བྱའོ་ཞེས་བྱ་བ་ནི། འདི་སྟོན་པའོ་འདི་ནི་སྟོན་ཏེ་འདི་ལྟ་སྟེ། མདོ་སྡེ་དང་འདུལ་བ་འཛིན་པ་དང་མ་མོ་ཞེས་གསུངས་པ་དེ་འདིས་བསྡུས་པ་ཡིན་ནོ། །གསོ་སྦྱོང་དང་དགག་དབྱེ་མ་བྱས་པས་དེའི་ཉིན་མོ་རང་གི་དེ་ཡོད་པའི་གནས་ནས་འགྲོ་བར་མི་བྱ་སྟེ། གལ་ཏེ་དེ་ཉིད་ཀྱི་ཚེ་རྣམ་པ་དེ་ལྟ་བུར་ཕྱིན་པའམ། འཐབ་ཀྲོལ་ཅན་དག་དང་དབྲལ་བའམ། སྤྱོད་པ་བཟང་པོ་དག་དང་ཕྲད་པ་དེ་ལྟ་བུར་འགྲོ་བ་ཉིད་མ་ཡིན་ནའོ་ཞེས་བྱ་བ་ལ། དེའི་ཉིན་མོ་ཞེས་བྱ་བ་ནི་གསོ་སྦྱོང་དང་དགག་དབྱེའི་ཉིན་མོ་ལའོ། །རང་གི་ཞེས་བྱ་བ་ནི་དགེ་སློང་རྣམས་དང་ལྷན་ཅིག་མདོ་འདོན་པ་དང་སྤྱོད་པའོ། །ཡང་ན་རང་གི་ཞེས་བྱ་བ་ནི་དགེ་སློང་མའི་དགག་དབྱེ་དགེ་སློང་དང་དགེ་སློང་མ་རྣམས་ལྷན་ཅིག་ཏུ་མདོ་འདོན་པའི་ཚེ་དགེ་སློང་གི་ཚོགས་པ་གྲུབ་པ་དགེ་སློང་མ་རྣམས་དང་ལྷན་ཅིག་ཏུའོ། །དེ་ཞེས་བྱ་བ་ནི་གསོ་སྦྱོང་དང་དགག་དབྱེ་ལ་ལྟོས་ནས་བདག་ཉིད་ཀྱིས་གསོ་སྦྱོང་ངམ་དགག་དབྱེ་རབ་ཏུ་ཤེས་བཞིན་དུ་རང་དགག་དབྱེ་ཉིད་དུ་ཞེས་བྱ་བའི་དོན་ཏོ། །
དེ་ཉིད་ཀྱི་ཚེ་ཞེས་བྱ་བ་ནི་གསོ་སྦྱོང་དང་དགག་དབྱེའི་ཉི་མ་དེ་ཉིད་ལ་རྣམ་པ་དེ་ལྟ་བུའི་ཚིག་གིས་རབ་ཏུ་ཤེས་བཞིན་པ་དེ་བས་ན་གནས་འཛིན་པའོ། །འཐབ་ཀྲེལ་ཅན་ཞེས་བྱ་བ་ནི་འཐབ་ཀྲོལ་བྱེད་པ་པོ་རྣམས་ལས་བདག་འབྲལ་བར་འགྱུར་སྙམ་ནས་གལ་ཏེ་འདི་ཉིད་གཞན་དབང་ཉིད་དུ་ཐོབ་པར་བྱེད་པའོ། །སྤྱོད་པ་བཟང་པོ་དག་དང་ཕྲད་པ་དེ་ལྟ་བུར་འགྲོ་བ་ཉིད་མ་ཡིན་ནའོ་ཞེས་བྱ་བ་ནི། གལ་ཏེ་སྤྱོད་པ་བཟང་པོ་དག་ཕྲད་པ་དེ་ལྟ་བུ་འགྲོ་བ་ཉིད་ཡིན་ན་འགྲོ་བ་ལ་ཉེས་པ་མེད་དོ། །གནས་གང་ན་རང་གི་གསོ་སྦྱོང་དང་དགག་དབྱེའམ། གཞན་གང་ཡང་རུང་བ་མེད་པར་གྱུར་ན་ཡང་གནས་དེ་ནས་འགྲོ་བར་བྱ་བ་ཉིད་དོ། །དེ་ལ་སྟོན་པས་ཀྱང་དེ་ལྟ་བུའི་འཐབ་ཀྲོལ་ཅན་མ་ཡིན་པ་རང་འཇུག་པ་རྣམས་ལ་ཡང་གསོ་སྦྱོང་དང་རྣམ་པར་དག་པ་ཁས་ལེན་པ་དགག་དབྱེས་ཀྱང་ངོ༌། །གང་ན་འོངས་པ་མེད་ན་གཅིག་པུ་རབ་ཏུ་ཞི་བའི་སེམས་ཀྱིས་སྤྱོད་པ་བཟང་པོའི་ནང་ནག་གནས་པའི་བྱིན་གྱིས་བརླབས་པའི་སྔ་རོལ་དུ་དགེ་སློང་དག་དང་བཅས་པའི་གནས་ནས་གནས་མེད་ཀྱང་དགེ་སློང་དེ་འགྲོ་བར་བྱ་སྟེ། གང་ན་དགེ་སློང་ཚུལ་ཁྲིམས་ཡོངས་སུ་དག་པ་ལྟ་བ་མཐུན་པ་དག་པས་འཛིན་པ་དགེ་སློང་དང་བཅས་པའི་གནས་སུ་འགྲོ་བར་བྱའོ་ཞེས་མདོར་བྱས་སོ། །འདིར་ལྟ་བ་ཡང་ཚུལ་ཁྲིམས་ཉིད་ཀྱིས་སྨོས་པར་རིག་པར་བྱའོ། །གནས་གང་ན་དགེ་སློང་དང་བཅས་ཀྱང་དགེ་སློང་འཐབ་ཀྲོལ་བྱེད་པ་ཡོད་པ་དེར་འགྲོ་བར་མི་བྱའོ་ཞེས་བྱ་བ་ནི། གང་ཞིག་འཐབ་ཀྲོལ་བྱེད་པ་སྤང་པའི་ཕྱིར་གསོ་སྦྱོང་དང་དགག་དབྱེ་དག་བཤོལ་བར་གསུངས་པ་དེ་ནི་འཐབ་ཀྲོལ་ཅན་དག་ཅེས་བྱ་བའི་མདོར་བྱས་སོ། །གང་གི་ཕྱིར་དེར་འགྲོ་བ་བཀག་པ་དེའི་ཕྱིར་སྤྱོད་པ་བཟང་པོ་ཅན་གྱི་དགེ་སློང་དང་བཅས་པ་ནས་འཐབ་ཀྲོལ་ཅན་གྱི་དགེ་སློང་དང་བཅས་པར་འགྲོ་བར་མི་བྱའོ་ཞེས་བྱ་བ་སྨོས་སོ། །དགེ་སློང་མེད་པར་འགྲོ་བར་མི་བྱའོ་ཞེས་བྱ་བའི་ཉེས་པ་གཞན་སྟོན་པའི་ཚིག་བསྡུ་བའི་ཕྱིར། དགེ་སློང་དང་བཅས་པ་ནས་དགེ་སློང་མེད་པར་ལྷག་མ་རྣམས་དང་ལྷན་ཅིག་མ་ཡིན་པའམ་གནོད་པ་དང་ལུས་དང་སེམས་ཤིན་ཏུ་སྦངས་པའི་དབང་མ་གཏོགས་པར་འགྲོ་བར་མི་བྱའོ་ཞེས་བྱ་བ་སྨོས་ཏེ། ཅི་དགེ་སློང་དང་བཅས་པའི་གནས་ན་གནས་པའི་དགེ་སློང་རྣམས་དན་ཡང་ལྷན་ཅིག་ཏུ་མི་རིགས་སམ་ཞེ་ན། དེའི་ཕྱིར་འདིར་ལྷག་མ་རྣམས་དན་ལྷན་ཅིག་མ་ཡིན་པར་ཞེས་བྱ་བ་སྨོས་ཏེ། དགེ་
སློང་དང་བཅས་པའི་གནས་ས་མ་གཙུག་ལག་ཁང་ན་གནས་པའི་དགེ་སློང་རྣམས་ཀྱིས་སོ། །ཅི་འདི་ངེས་པ་ཁོ་ནར་ཡིན་ནམ་ཞེ་ན། དེའི་ཕྱིར་ལུས་དང་སེམས་ཤིན་ཏུ་སྦྱངས་པའི་དབང་མ་གཏོགས་པར་ཞེས་བྱ་བ་སྨོས་ཏེ། གལ་ཏེ་དེར་སོང་ནས་ལུས་དང་སེམས་ཤིན་ཏུ་སྦྱངས་པ་སྐྱེ་བར་འགྱུར་ཞང་དེའི་དབང་གིས་ནི་དགེ་སློང་དང་བཅས་པའི་གནས་ནས་དགེ་སློང་མེད་པའི་གནས་སུ་འགྲོ་བར་བྱའོ་ཞེས་བྱ་བའི་དོན་ཏོ། །དགེ་སློང་གསོ་སྦྱོང་རྗེས་སུ་གཟུང་བར་བྱ་བ་ཉིད་དུ་གྱུར་པས་ཀྱང་རུང་བ་ཉིད་དང་ཐུགས་བརྩེ་བ་ཉིད་ཅེས་བྱ་བ་འདི་རིགས་པ་ཡིན་ཏེ། དེའི་དོན་དུ་གསོ་སྦྱོང་དང་དགག་དབྱེ་དག་བྱིན་གྱིས་བརླབ་པ་ཙམ་དུ་རིགས་པ་ཁོ་ན་ཡིན་ནོ། །འགྲོ་བའི་ཕྱིར་གནས་པའི་གསོ་སྦྱོང་དང་དགག་དབྱེ་མ་བྱས་པར་དོར་བར་མི་བྱའོ་ཞེས་བྱ་བ་ནི། དེའི་ཉིན་མོ་ཞེས་བྱ་བར་སྦྱར་རོ། །རྐྱེན་དེ་ལྟ་བུ་ཉིད་ཡོད་ན་སྤྱོད་པ་བཟང་པོ་དང་ལྡན་པ་དང༌། གནོད་པ་དང་ལྡན་པའི་གནས་བསྟན་ནས་དེར་འགྲོར་གཞུག་བར་བྱའོ་ཞེས་བྱ་བ་ནི་སྤྱོད་པ་བཟང་པོ་དང་ལྡན་པ་དང༌། བསྟན་པ་དང་ལྡན་པའོ། །འདིར་གཞུང་ནི། གནས་ག་གི་མོར་འཇུག་པར་བྱ་སྟེ། དེ་ནི་དགེ་སློང་གི་དགེ་འདུན་གྱིས་གནས་བརྟན་དན་བཅས་པ་སོ་སོར་ཐར་པ་དང་བཅས་ཤིང་དགེ་སློང་ཚུལ་ཁྲིམས་དན་ལྡན་པ་ཡོན་ཏན་དན་ལྡན་པ་དེས་དགེ་བའི་ཆོས་ཅན་དག་འཁོད་ཀྱི། དེ་དག་གི་འགྱོད་པ་མ་སྐྱེས་པ་ནི་སྐྱེད་པར་མི་འགྱུར་ལ། སྐྱེས་པ་ནི་སྐད་ཅིག་མ་ཉིད་དུ་སླར་སེལ་བར་འགྱུར་རོ་ཞེས་གསུངས་པ་ཡིན་ནོ། །སོ་སོར་ཐར་པ་དང་བཅས་པ་ཞེས་བྱ་བ་འདིས་ནི་དགེ་འདུན་གྱི་གནས་བརྟན་གདོན་པ་དང་ལྡན་པ་ཉིད་དུ་བསྟན་ཏོ། །བསྒོ་བར་ད་ལས་འདའ་བར་མི་བྱའོ་ཞེས་བྱ་བ་ནི། བརྟེན་པས་བརྗོད་པ་གང་ཡིན་པ་དེ་ཉིད་བསྒྲུབ་པར་བྱའོ་ཞེས་བྱ་བའི་དོན་ཏོ། །ཕྱིས་འོངས་པ་རྣམས་ཀྱི་དོན་དུ་དེ་གཉིས་ཡང་བྱར་རུང་ངོ་ཞེས་བྱ་བ་ནི་གསོ་སྦྱོང་དང་དགག་དབྱེ་འདི་དག་ཡང་བྱེད་པའོ། །གལ་ཏེ་ལེགས་པར་ན་དེ་ལ་ཅི་དགར་འཇུག་པར་བྱའོ་ཞེས་བྱ་བ་ནི་གལ་ཏེ་གསོ་སྦྱོང་དང་དགག་དབྱེ་དེ་གཉིས་ལེགས་པར་བྱས་པ་ཡིན་ནོ། །དེའི་ཚེ་འདོད་པ་ནི་འདོད་པ་སྟེ་ཡང་འཇུག་པ་ལའོ། །འོན་ཏེ་འདིར་གཅིག་པ་ཉིད་མ་ཡིན་པའི་སྐྱོན་ནས་གཞན་ཡང་རུང་བ་ཡོད་བར་གྱུར་ན་འདོད་པ་ནི་མ་ཡིན་ཏེ། འོན་ཀྱང་གདོན་མི་ཟ་བར་ཡང་འཇུག་པར་བྱའོ། །འདུ་བ་མཐུན་པ་དག་
ལ་ཡང་ངོ་ཞེས་བྱ་བ་ནི། གཉུག་མར་གནས་པ་རྣམས་ནི་བྱས་པ་དང་ལྡན་པའི་གཉུག་མར་གནས་པ་རྣམས་དང་འདུ་བ་མཐུན་པ་ཡིན་ལ། གློ་བུར་དུ་ལྷགས་པ་རྣམས་ཀྱང་གཉུག་མར་གནས་པ་རྣམས་དང་མཐུན་པ་ཡིན་སྙམ་དུ་རྟོགས་པར་བྱའོ། །འོན་ཀྱང་འདུ་བ་མཐུན་པ་ཡིན་པས། གཉུག་མར་གནས་པ་བྱས་ཟིན་པ་རྣམས་གློ་བུར་དུ་ལྷགས་པ་དག་ལ་ཡང་ཞེས་བྱ་བའི་དོན་ཏོ། །གཞན་གྱི་ཚོགས་པ་གསོལ་བར་བྱའོ་ཞེས་བྱ་བ་ལ། གཞན་གྱིས་ཞེས་བྱ་བ་ནི་གང་དག་གི་འདོད་པ་འདི་སྨོས་པ་དེ་དག་ལས་གཞན་པ་གསོལ་བར་བྱའོ། །དེ་མ་ཐོབ་ན་མཚམས་གཞན་དུ་བྱའོ་ཞེས་བྱ་བ་ནི་ཚོགས་པ་དེ་མ་ཐོབ་ན་མི་མཐུན་པ་ཉིད་ཀྱི་ཉེས་པ་སྤང་བའི་ཕྱིར། མཚམས་གཞན་དུ་ལས་བྱེད་པ་ནི་དེ་དག་ཉི་ཚེ་ར་མ་ཟད་ཀྱི་ལས་ཐམས་ཅད་ལ་ཡང་དེ་བཞིན་ནོ། །བྱེད་པའི་ཚེ་འོངས་ན་ལྷག་མ་ཉམས་སུ་མྱོང་བས་འགྲུབ་པོ་ཞེས་བྱ་བ་ནི། དགག་དབྱེ་བྱེད་པར་འགྱུར་བའི་ཚེ་གང་དག་འོངས་པར་གྱུར་ན་དེ་དག་ལ་རང་གི་དགག་དབྱེ་བྱ་སྟེ་གོང་མ་ནི་མ་ཡིན་ནོ། །སྔ་མ་ཉིད་ཉམས་སུ་མྱོང་བར་མ་གྱུར་པ་ཉིད་ཀྱི་ཕྱིར་མ་གྲུབ་པ་སྟེ་འོན་ཀྱང་གྲུབ་པ་ཁོ་ནའོ། །དེ་བཞིན་དུ་གསོ་སྦྱོང་བྱེད་པར་གྱུར་པ་ཉིད་ཀྱི་ཚེ་གང་དག་འོངས་པར་གྱུར་པ་དེ་རྣམས་ལ་དེར་སོ་སོར་ཐར་པ་ལས་གང་ཞིག་ལྷག་མ་མ་བཏོན་པར་གྱུར་པ་དེའི་འཕྲོ་ཉམས་སུ་མྱོང་བས་ཀྱང་གསོ་སྦྱོང་འགྲུབ་བོ། །དེ་བས་ན་དེར་སླར་བྱེད་པ་དོན་མེད་པར་འགྱུར་བའི་ཕྱིར་མི་བྱ་བ་ཉིད་དོ། །དེར་འདི་ལ་མ་གྲུབ་པ་ཇི་ལྟར་ཐོས་པ་ཉན་དུ་བཅུག་པ་ལ་ཡང་ཡིན་ཞེ་ན། གང་གི་ཕྱིར་འདིར་དེ་ལྟ་བུ་ལྷག་མ་ཉམས་སུ་མྱོང་བ་ཐམས་ཅད་སོ་སོར་གནས་པའི་ཚིག་ཡོད་པ་ཡིན་ཏེ། ཚེ་དང་ལྡན་པ་དག་བདག་ལས་སོ་སོར་ཐར་པའི་མདོ་ལས་བསྟེན་པའི་གླེང་གཞི་ཡོད་དེ། ཕམ་པར་གྱུར་པ་བཞི་བསྟན་ པ་ཞེས་བྱ་བ་ལ་སོགས ་པའོ། །གནས་དེ་ནས་འགའ་ཡང་མ་སོང་བ་ཡིན་ན་ངེས་པ་ཡིན་ནོ་ཞེས་བྱ་བ་ནི། གསོ་སྦྱོང་དང་དགག་དབྱེ་ཟིན་པའི་གནས་དེ་ནས་གཅིག་ཀྱང་མ་སོང་བ་ཉིད་ཡིན་ན། ཚོགས་པ་མ་བྱིན་པའི་ཕྱིར་ངེས་པ་སྟེ་འདོད་པས་ནི་མ་ཡིན་ནོ། །མི་རིགས་པ་གནས་པ་ཚོགས་པས་རུང་བ་ཉིད་ལ་ཡན་ལག་གི་ངོ་བོ་འཇུག་པར་འགྱུར་བ་རྣམས་ཀྱིས་ཡན་ལག་གི་དངོས་པོས་འགྲོ་བར་མི་འགྱུར་རོ་ཞེས་བྱ་བ་ནི་འདིར་འཇུག་པའི་ངེས་པ་འདི་རྣམ་པར་གཞག་པའོ། །
འདིར་འདོད་པས་འཇུག་པ་མ་ཡིན་ཞེས་བྱ་བའི་དོན་ཏོ། །གློ་བུར་དུ་ལྷགས་པ་ཆེས་མང་བ་ཉིད་ཡིན་ན་ཡང་ངོ་ཞེས་བྱ་བ་ནི། གལ་ཏེ་ཕྱིས་འོངས་པ་མང་བར་གྱུར་ན། སོང་བ་ལ་ཡང་གསོ་སྦྱོང་གི་གནས་ནས་འགའ་ཡང་འདིར་ངེས་པས་འཇུག་པ་ལ་ཆེས་མང་བ་ཉིད་ལ་རབ་ཏུ་འབྱུང་བ་ཉིད་ཀྱི་ཕྱིར་རོ། །དུས་ཀྱི་ཕྱིར་ནི་ཆེས་མང་པོ་རྣམས་ཀྱི་རྗེས་སུ་འཇུག་པར་བྱ་བ་ཉིད་ཡིན་ནོ་ཞེས་བྱ་བ་ནི་གལ་ཏེ་གཉུག་མར་གནས་པ་རྣམས་ཀྱི་ཚེས་བཅོ་ལྔ་ཡིན་ལ། གློ་བུར་དུ་ལྷགས་པ་རྣམས་ཀྱི་ནི་ཚེས་བཅུ་བཞི་ཡིན་པའམ། བཅུ་དྲུག་ཡིན་པའམ། གློ་བུར་དུ་ལྷགས་པ་རྣམས་ཀྱི་ནི་ཚེས་བཅུ་བཞི་འམ་བཅུ་དྲུག་ཡིན་པ་ལྟ་བུ་དེ་ལ་ནི་དགེ་སློང་གང་མང་ཤོས་ཀྱི་ཕྱོགས་ཀྱི་རྗེས་སུ་འབྲང་བར་བྱའོ། །ཇི་སྟེ་ཕྱོགས་གཉིས་ཀ་གྲངས་མཉམ་པ་ཁོ་ན་ཡིན་ན་གཅིག་པ་ཡང་དགེ་སློང་དེ་སྙེད་པ་ཉིད་དེ་གཞན་ལ་ཡང་དེ་སྙེད་པ་ཉིད་དོ། །གཉུག་མར་གནས་པའི་ཕྱོགས་སུ་གློ་བུར་དུ་འོངས་པའི་ཕྱོགས་ཀྱི་རྗེས་སུ་འཇུག་པར་བྱ་བ་ཉིད་ཡིན་ནོ། །ཇི་སྐད་དུ་གསུངས་པ་མཉམ་པ་ཉིད་ཡིན་ན་གཉུག་མར་གནས་པ་རྣམས་ཀྱང་ངོ་ཞེས་བྱ་བའོ། །དེར་རྗེས་སུ་འཇུག་པར་བྱ་བ་ཉིད་དུ་རུང་བ་ཡིན་ཏེ། ཕྱིས་འོངས་པ་རྣམས་ཀྱི་དོན་དུ་ཞེས་བྱ་བ་ཡང་བྱེད་པ་རུང་བ་ཉིད་བརྗོད་པ་ཡིན་ཏེ། འཇུག་པ་ལ་ནི་འདིར་འདོད་པ་ཐོབ་པ་དེ་འདིར་དུས་ཀྱི་སྐབས་སུ་དམིགས་ཀྱིས་བསལ་བ་དེ་བསྟན་པའི་ཕྱིར་འདི་ལ་ཡང་ངོ་ཞེས་བྱ་བ་སྨོས་ཏེ། འདིར་ཡང་རྗེས་སུ་འཇུག་པར་བྱ་བ་ཉིད་ལ་ངེས་པ་སྟེ། འདིར་འཇུག་པ་ལ་ཞེས་བྱ་བའི་དོན་ཏོ། །གསོ་སྦྱོང་གི་ཆོ་གའི་སྐབས་སོ། །ཏིང་ངེ་འཛིན་ལས་བསླང་བར་མི་བྱའོ་ཞེས་བྱ་བར་འདིར་རྣམ་པར་འབྱེད་པ་དང་མདོ་ཕྱི་མའི་ཡང་གཞུང་ངོ༌། །གདམས་ངག་མེད་པར་བསྒོམ་པར་མི་བྱའོ་ཞེས་བྱ་བ་ནི་གདམས་ངག་སྟོན་པ་པོ་མེད་པར་བསྒོམ་པར་མི་བྱ་ཞེས་བྱ་བའི་དོན་ཏོ། །གདོས་བུ་དང་ཕོ་ལོང་གི་སྦྱོར་བ་རིགས་པ་ཉིད་ཡིན་ནོ་ཞེས་བྱ་བ་ནི། རྩ་བའི་གཞི་ལས་འདིའི་ཚིག་གང་ཡིན་བ་དེ་ནི་ངན་པར་འགྲོ་བར་གྱུར་པ་འདི་ཡོད་པ་དང༌། རྩེ་བར་གྱུར་པ་ལ་ཡང་མ་ཡིན་ཞེས་རྟོགས་པར་མི་བྱའོ་ཞེས་བྱ་བ་འདི་བསྟན་པའི་དོན་དུ་མདོ་འདིའོ། །འདིར་གཞུང་ནི། ཕྲན་ཚེགས་ཀྱི་མདོ་ཕྱི་མ་དག་ལས། དགེ་སློང་དག་དེ་ལྟ་བས་ན་ཇི་ལྟར་ཆུ་ཀླུང་ཡིད་འོང་ལྡན་གྱི་དོགས་ཀྱི་དགེ་སློང་དག་
གིས་བརྩོན་འགྲུས་བརྩམས་པ་དེ་ལྟར་གདོས་བུ་དང་ཕོ་ལོང་གི་སྦྱོར་བས་བརྩོན་འགྲུས་བརྩམ་པར་བྱའོ་ཞེས་བྱ་བ་ཕྱི་མ་ལས་ཀྱང་དགེ་སློང་གིས་བརྩོན་འགྲུས་གློད་པར་མི་བྱའོ། །བརྩོན་འགྲུས་གློད་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་དུ་འདི་ལས་འོག་ཏུ་གཞུང་མ་བཤད་པ་དེར་ཡང་གཞུང་འདི་ཕྲན་ཚེགས་དག་ལས་རིག་པར་བྱའོ། །བརྩོན་འགྲུས་གློད་པར་མི་བྱའོ། །འདི་ནི་མདོ་འདི་ལས་གསུངས་པ་བཞིན་ནོ་ཞེས་བྱ་བ་ནི་འདིར་དགེ་སློང་ཉིན་མོ་འདུག་པ་དང་འཆག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བར་བྱེད་ཅིང་མཚན་མོའི་ཐུན་དང་པོ་ལ་འདུག་པ་དང་འཆག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བར་བྱེད་ཅིང་ནམ་གྱི་གུང་ཐུན་ལག་གཙུག་ལག་ཁང་གི་ཕྱི་རོལ་དུ་རྐང་པ་བཀྲུས་ནས་གཙུག་ལག་ཁང་དུ་ཞུགས་ཏེ། གློ་གཡས་པ་ཕབ་སྟེ་རྐང་པ་རྐང་པའི་སྟེང་དུ་བཞག་ནས་སྣང་བའི་འདུ་ཤེས་དང་ལྡན་པས་དྲན་པ་དང་ཤེས་བཞིན་དང་ལྡན་པས་དབུགས་དབྱུང་བ་མ་ཡིན་པའི་འདུ་ཤེས་སུ་བྱེད་ཅིང༌། དེ་མཚན་མོའི་ཐུན་ཐ་མ་ལ་མྱུར་བ་མྱུར་བར་རབ་ཏུ་སད་ནས་འདུག་པ་དང༌། འཆག་པ་དག་གིས་སྒྲིབ་པར་འགྱུར་བའི་ཆོས་རྣམས་ལས་སེམས་ཡོངས་སུ་སྦྱོང་བར་བྱེད་ཅིང༌། དེ་ཙམ་གྱིས་དགེ་སློང་བརྩོན་འགྲུས་བརྩམས་པར་འགྱུར་རོ། །དེ་ཙམ་གྱིས་ཡང་དེ་བཞིན་གཤེགས་པས་དགེ་སློང་བརྩོན་འགྲུས་བརྩམས་པར་ཤེས་པ་ནས་གང་དུ་བཀའ་བསྒོ་བ་ཞེས་གང་ཞིག་མདོ་སྡེ་ལས་བརྩོན་འགྲུས་དང་ལྡན་པ་ཞེས་འདིར་རྟོགས་པར་བྱའོ་ཞེས་བྱ་བའི་དོན་ཏོ། །འདིར་ཉལ་བ་ལ་མ་མོ་ལས་ལྷག་པར་འདོན་པ་དེ་འདི་བསྡུ་བར་བྱ་སྟེ། ལུས་དང་སེམས་དང་གོས་མ་འཕྱར་བར་ཉལ་བར་བྱའོ་ཞེས་བྱ་བ་ནི་ལུས་དང་སེམས་དང་གོས་དག་རེ་རེ་ལ་མི་འཕྱར་བར་ཞེས་སོ་སོར་སྦྱར་བར་བྱའོ། །མི་ན་བས་ཉིན་མོ་ཉལ་བར་མི་བྱའོ་ཞེས་བྱ་བ་ནི། འདིར་ངལ་བ་ཡང་ན་བ་སྟེ། ལུས་ཉམ་ཆུང་བར་ཞེས་བྱ་བར་རྣམ་པར་གནས་པ་ཡིན་ནོ། །དང་དག་དེའི་བར་དུ་གཉིད་ཀྱིས་སྙོམ་པ་བརྣགས་མི་ཐུབ་པ་ཉིད་ཡིན་ན། གཉིད་ཀྱི་སྙོམ་པ་བསང་བའི་ཕྱིར་དེས་དེ་ཙམ་ཞིག་བསྟེན་པར་བྱ་ཞེས་བྱ་བ་ནི་རྩ་བའི་གཞི་ལ་ཤེས་པར་བྱའོ། །ཟས་ཀྱིས་སྙོམ་པ་བརྣགས་མི་བཟོད་པ་ཞིག་ཡིན་
ན་ཡང་དེ་བསང་བའི་ཕྱིར་དེ་ཙམ་ཞིག་བསྟེན་པར་བྱའོ། །འདི་ལ་ཡང་དེ་ལྟ་བུར་གྱུར་པའི་ཕྱིར་རོ། །མདོ་སྡེ་ལས་ཀྱང་མེར་འཇུག་གི་བུས་ནི་དཔྱིད་རྣམས་ཀྱི་ཟླ་བ་ཐ་མ་ལ་ཡུད་ཙམ་ཞིག་ཟད་ཀྱིས་སྙོམ་པ་བསང་བར་བྱེད་དོ་ཞེས་གསུངས་པ་ཡིན་ནོ། །རོ་རྒྱབ་ན་བས་པུས་འཁྱུད་བཅང་བར་བྱའོ། །དབང་པོ་རྣམས་ནང་དུ་བསྡུས་པ་དང༌། ཡིད་ཕྱི་རོལ་དུ་མ་སོང་བ་དང༌། གསལ་བ་དང་དྲང་པོས་མི་ཐོགས་པར་བཅག་པར་བྱའོ་ཞེས་བྱ་བ་ལ། ཕྱི་རོལ་དུ་མ་སོང་བའི་ཞེས་བྱ་བ་ནི་ཡུལ་རྣམས་ལ་མ་སོང་བ་སྟེ། ཁ་ཕྱིར་ཕྱོགས་པ་ཉིད་ཀྱིས་ཕྱིར་འགྲོ་བ་འདི་ལ་ཕྱི་རོལ་དུ་འགྲོ་བའི་བདག་ཉིད་ཅན་སའི་དབྱིངས་ལ་ སོགས་པ ་རྣམས་ཀྱིས་ཀྱང་འདིར་ཡུལ་ཡིན་པར་རིག་པར་བྱའོ། །གསལ་བ་ཞེས་བྱ་བ་ནི་སེམས་དང་བ་དང་རབ་ཏུ་ཟིན་པའི་ལུས་ཀྱིས་སོ། །དྲང་པོར་ཞེས་བྱ་བ་ནི་གོམ་པ་ཡ་ཡོ་མེད་པས་སོ། །མི་ནུས་ན་ཐ་གུ་བྲེལ་ཏེའོ་ཞེས་བྱ་བ་ནི། དྲང་པོར་འཆག་མི་ནུས་ན་ཐ་གུ་སྦྲེལ་ཏེ་བཅག་པར་བྱའོ། །ཁ་ཏོན་པའི་འཆགས་ནི་ཁྲུ་བཅུ་གཉིས་སོ། །སྤོང་བ་པ་ནི་བཅོ་བརྒྱད་དོ། །དེ་ཐ་གུས་གཞལ་ཏེ་བྱའོ་ཞེས་བྱ་བ་ལ། དེ་ཞེས་བྱ་བ་ནི་འཆག་པའོ། །དགེ་སློང་མའི་རྣམ་པར་འབྱེད་པ་ལས། འདིར་གཞུང་ནི་བསླབ་པའི་གཞི་ལས། དེ་དག་གིས་འཆག་པ་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། སྤོང་པའི་ས་ནི་ཁྲུ་བཅོ་བརྒྱད་དོ། །ཁ་ཏོན་བྱེད་པ་ནི་ཁྲུ་བཅུ་གཉིས་ཏེ། དེ་དག་ཐ་གུས་གཞལ་ཏེ་བཅག་པར་བྱའོ་ཞེས་གསུངས་པ་ཡིན་ནོ། །ཐ་གུས་གཞལ་ཏེ་བྱའོ་ཞེས་བྱ་བ་ནི་རྒྱས་པ་ལས། གཞན་འདིར་རང་དང་གཞན་དག་ལ་རིགས་དག་པ་གཞག་པ་རྣམ་པ་གང་ཞིག་ཆོས་བསྟན་པའོ། །གསོ་སྦྱོང་གི་ཉི་མ་ལ་བྱ་བ་ཉིད་འདི་ལ་ཡོད་དེ་དེ་བས་ན་འདིར་གཏོགས་པའི་ཆོ་ག་བརྗོད་པར་བྱ་སྟེ། དགེ་སློང་གིས་ཆོས་བཤད་པར་བྱའོ་ཞེས་བྱ་བ་ནི། འདིར་ཐོག་མར་བྱས་པའི་ངག་ཅུང་ཟད་ཅེས་བྱ་བའི་མཐར་ཐུག་པའོ། །འདི་ཐོག་མ་ཞེས་བྱ་བ་ནི་རྒན་པོའི་མཐར་ཐུག་ པ་ཞེས་བྱ་བ་ལ་སོགས ་པའོ། །དེས་ཚེས་བཅོ་ལྔ་ཞེས་བྱ་བའི་མཐར་ཟླ་བ་ཕྱེད་པའི་རྣམ་པ་ཞེས་བྱ་བ་ལ་ སོགས་པ ་དོར་བར་བྱའོ་ཞེས་བྱ་བའི་མཐར་ཡང་འདིར་གཞུང་ནི་རྣམ་པར་འབྱེད་པ་ལས། འདིར་ཉར་བྱེད་པ་ཞེས་བྱ་བ་ཕྲན་ཚེགས་རྣམས་ལས་སོ། །གལ་ཏེ་མ་བསྐུལ་བར་དེའི་སྒོ་ནས་ངེས་པར་འབྱུང་
བ་མ་ཡིན་ཞེས་བྱ་བ་འདི་རབ་ཏུ་བྱུང་བའི་གཞི་ལས་སོ། །འདིར་ལྷག་མ་གང་ཞིག་བྱེད་པ་མཚམས་སྦྱར་བ་མཐའི་རྣམ་པས་སོ། །དེ་ལ་མ་མོ་འདུག་སྟེའོ། །གལ་ཏེ་དུ་མ་ཉིད་ཡིན་ན་གཅིག་གིས་སོ་ཞེས་བྱ་བ་ནི་གལ་ཏེ་ཆོས་སྟོན་པ་དུ་མ་ཉིད་ཡོད་ན་འདི་པའི་དགེ་སློང་གི་འཁོར་དུ་གཏོགས་པ་རྣམས་ཞེས་བྱ་བ་ཤུགས་ཀྱིས་རྟོགས་པའོ། །ཆོས་འདི་པའི་རབ་ཏུ་བྱུང་བ་ཐམས་ཅད་ལ་མཚན་ཐ་དད་པ་ལ་ཡང་སྡོམ་པ་མཆོག་དང་མཆོག་མ་ཡིན་པ་ལ་ཆོས་འདི་པའི་དགེ་སྦྱོང་གི་འཁོར་དུ་གཏོགས་པ་ཞེས་བྱ་བ་ཉིད་དུ་རིག་པར་བྱའོ། །རབ་ཏུ་བྱུང་ཞིང་བསྙེན་པར་མ་རྫོགས་པ་ལ་ཡང་ཆོ་ག་འདི་རྣམ་པར་གཞག་པའོ། །གང་ཡང་རུང་བས་སོ་ཞེས་བྱ་བ་ནི་གསར་བུ་དང༌། མཚན་མི་མཐུན་པ་དང༌། རབ་ཏུ་བྱུང་ཞིང་བསྙེན་པར་མ་རྫོགས་པ་དག་གིས་ཀྱང་བྱར་རུང་སྟེ། རྒན་པོ་འབའ་ཞིག་གིས་ནི་བྱ་བར་མ་ཟད་དེ་བསྙེན་པར་རྫོགས་པ་ཞེས་བྱ་བའི་དོན་ཏོ། །དེ་དག་གི་ནང་ན་ཆོས་སྟོན་པ་དུ་མ་ཡོད་དུ་ཟིན་ཀྱང་གང་ལ་སྟོན་པར་བྱེད་པ་ཐམས་ཅད་ནི་མ་ཡིན་ཞེས་བྱ་བའི་དོན་ཏོ། །མ་གསོལ་བར་མི་བྱའོ་ཞེས་བྱ་བ་ནི་བསྟན་པར་མི་བྱའོ། །གལ་ཏེ་དེའི་ཚེ་ཚིག་གིས་བྱུང་བ་མ་ཡིན་ནའོ་ཞེས་བྱ་བ་ནི། གང་གི་ཚིག་གིས་དགེ་འདུན་སྤྱན་དྲངས་པ་ལ་ སོགས་པ ་མ་གསོལ་བར་ཡང་ཆོས་བསྟན་པར་བྱ་སྟེ། སྟོན་པ་ད་བཞིན་དུ་འདིར་འདི་འབྱུང་བ་ཡིན་ཏེ། འདི་ལྟར་མདུན་གྱིས་བལྟས་པར་གྱུར་པས་མདུན་གྱིས་བལྟས་པ་ཉིད་དེ་དགེ་སློང་དེ་རྣམས་དང་མཐུན་པ་ཉིད་དོ། །འདིར་འབྱུང་བ་ནི་དཔེ་ཙམ་ཡིན་ཏེ། ཐམས་ཅད་དུ་དེའི་སྒོ་ནས་གནས་པ་ལ་ཆོག་འདི་ཡིན་ནོ། །གནས་སྐབས་ཐམས་ཅད་ལ་ཡང་དགེ་འདུན་གྱི་གནས་བརྟན་གྱི་ཚིག་ལས་གྱུར་པ་ཉིད་ཡིན་པར་རིག་པར་བྱའོ། །གནས་པ་ལ་ནི་གནས་ཀྱིའོ། །ཉེ་གནས་རྣམས་ལ་ནི་ཀློག་པའི་སློབ་དཔོན་གྱིའོ། །དགེ་སློང་མ་རྣམས་ལ་དགེ་སློང་རྣམས་ཀྱིའོ། །བསྙེན་པར་མ་རྫོགས་ཤིང་རབ་ཏུ་བྱུང་བ་རྣམས་ལ་ནི་བསྙེན་པར་རྫོགས་པ་ལ་སྟེ་གནས་སུ་གྱུར་པ་ཡིན་པའི་ཕྱིར་རོ། །གསར་བུ་ལ་ཁ་ཟས་ཀྱི་མདུན་དུ་ཡོན་བཤད་པའི་དོན་དུ་ཁྲིའི་དྲུང་དུ་དེ་ནི་མ་གསོལ་བར་ཤེས་པར་བྱ་བ་མ་ཡིན་ནོ། །གྲྭས་མི་བྱའོ་ཞེས་བྱ་བ་ནི་གྲལ་བཅིངས་པའི་དབྱིབས་དང་ལང་ལོང་ཁྱད་པར་ཅན་མ་ཡིན་པར་གྱུར་པས་འཁོར་ལྷག་མའོ། །འདིར་དེའི་མཐར་ཐུག་པ་ཡིན་ཏེ། འདི་ནི་དབྱིབས་སུ་འབྱིན་
པ་མ་ཡིན་ནོ་ཞེས་བྱ་བ་འདི་ནི་གྲྭ་ཕྱེད་ཀྱིས་མི་ཕྱེའོ་ཞེས་བྱ་བ་དེ་ལས་ཤེས་པར་བྱའོ། །ཆོས་ཉན་པའི་གྲལ་གྱི་རྣམ་པ་ཁྱམས་སུ་ཟླ་ཁམ་གྱི་རྣམ་པ་ལྟ་བུ་འདི་རྗེས་སུ་གནང་བས། དེའི་ཕྱིར་ལང་ལོང་འདི་བཀག་པ་ཡིན་ཏེ། དགེ་སློང་དག་ལང་ལོང་དག་གིས་ཆོས་སྟོན་པར་བྱེད་པ་ན། ཅ་ཅོར་གྱུར་བའི་ཕྱིར་རོ་ཞེས་གླེང་གཞི་ལས་གསུངས་པ་ཡིན་ནོ། །འདི་ལས་ཀྱང་དེ་ནི་འདིར་མཐར་ཐུག་པ་ཞེས་བྱ་བར་གཏོགས་པའོ། །གྲྭ་ཕྱེད་ཀྱིས་མི་བྱའོ་ཞེས་བྱ་བ་ལ། འདིར་དེ་གཉིས་ཀྱི་གཞུང་ནི་མ་མོ་ལས། གང་སྨྲ་བར་མི་བྱ་བ་གྲྭ་ཕྱེད་ཀྱིས་སྨྲ་བར་མི་བྱ་སྟེ། གང་ཞིག་སྨྲ་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གཉིས་ཀྱིས་གཅིག་ཏུ་མི་བྱའོ་ཞེས་བྱ་བ་ནི། གྲྭ་ཡང་རུང་གྲྭ་ཕྱེད་ཀྱང་རུང་འདི་ནི་སྤོངས་པ་ཡིན་ནོ། །གལ་ཏེ་དུ་མ་ཉིད་དམ་གཅིག་ལ་ཞེས་བྱ་བ་འདི་ལ་འདིར་གཞུང་ནི། གཉིས་ཀྱིས་གྲྭ་གཅིག་ཏུ་སྨྲ་བར་མི་བྱའོ། །གང་སྨྲ་བར་བྱེད་པ་དེ་ལ་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །རྒན་རིམས་ཀྱིས་སོ་ཞེས་བྱ་བ་འདི་ལ་ཡང༌། སྔར་གལ་ཏེ་དུ་མ་ཉིད་ཡིན་ན་གཅིག་གིས་སོ་ཞེས་སྨོས་པས་དེའི་རྗེས་སུ་སྦྱར་གྱི་བསྟན་པར་མི་བྱའོ་ཞེས་བྱ་བ་ལ་ལོག་གོ །དུ་མ་ཉིད་ལ་གནས་པས་རྒྱན་རིམས་ཀྱིས་བསྟན་པར་བྱ་ཞེས་བྱ་པའི་དོན་ཏོ། །གལ་ཏེ་མང་བ་ཉིད་ཡིན་ན་སྟན་གཉིས་སམ་གསུམ་གཞག་སྟེའོ་ཞེས་བྱ་བ་ནི། གལ་ཏེ་རང་གི་འཁོར་མང་བ་ཉིད་དུ་གྱུར་ན་དེ་དག་གི་གོ་གཉིས་སམ་གསུམ་གོང་དུ་གཞག་ནས། དེས་རབས་དང་ཉེ་བར་གནས་པར་བྱའོ། །ཅི་གང་ཡང་རུང་བས་སམ་ཞེ་ན་མ་ཡིན་ཏེ། དེའི་ཕྱིར་གལ་ཏེ་སྟན་དེ་དག་མ་ཐོབ་པ་ཡིན་ནའོ་ཞེས་བྱ་བ་སྨོས་ཏེ། གང་གིས་གཉིས་སམ་གསུམ་གྱིས་སྟན་དེ་དག་མི་ཐོབ་པ་ཡིན་ན། དེས་དེ་དག་དོར་ནས་གཞན་ནི་མ་ཡིན་ཞེས་བྱ་བའི་དོན་ཏོ། །གང་གིས་གཉིས་མི་ཐོབ་པ་དེས་ཀྱང་གཉིས་གཞག་པར་བྱ། གང་གིས་གཅིག་མི་ཐོབ་པ་དེས་ཀྱང་གཅིག་གཞག་པར་བྱའོ་ཞེས་བྱ་བ་འདིའི་རྗེས་སུ་འབྲངས་ནས་ཤེས་པར་བྱའོ། །སེང་གེའི་ཁྲི་ལ་ཡང་ངོ་ཞེས་བྱ་བ་ནི། གནས་ཤིང་བསྟན་པར་བྱའོ། །མཆིལ་མའི་སྣོད་གཞག་པར་བྱའོ་ཞེས་བྱ་བ་ནི་མཆིལ་མ་དོར་བའི་ཕྱིར་ཞེས་བྱ་བ་བརྗོད་པས་གོ་བའོ། །འདིར་གཉིས་ཀ་ཡང་
བརྩམས་པ་སྟེ། །ཆོས་སྨྲ་བ་ཁྲི་སྟན་ལོགས་ཤིག་ཏུ་སྤགས་པ་ལ་བལྟས་ནས་འདི་སྨོས་པ་སྟེ། སེང་གེའི་ཁྲི་ཙམ་ལ་ནི་མ་ཡིན་ན་ཞེས་བྱ་བར་རིག་པར་བྱའོ། །སེང་གེའི་ཁྲི་ལ་དེ་སྨོས་ཀྱི་གཞན་ལ་ནི་ཤིན་ཏུ་དམན་པའི་སྐྱོན་འདི་ཞེས་བྱ་བ་བསྟེན་པའོ། །དེར་གཅལ་བླུགས་སོ་ཞེས་བྱ་བ་ལ། མཆིལ་མའི་སྣོད་ནི་སྣོད་དུ་རིག་པར་བྱ་སྟེ། དེར་གཅལ་ཅི་བླུགས་པར་བྱ་ཞེ་ན། དེའི་ཕྱིར་བྱེ་མའམ་ཐལ་བའོ་ཞེས་བྱ་བ་སྨོས་ཏེ། དེ་གཉིས་ནི་དཔེ་ཙམ་དུ་ཟད་དོ། །དོན་འདི་ལ་གཞན་ཡང་རུང་བའི་ཕྱིར་རོ། །དེ་དུས་དུས་སུ་སྦྱང་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་མཆིལ་མའི་སྣོད་དེའོ། །ཚེས་བརྒྱད་དང༌། བཅུ་བཞི་དང༌། བཅོ་ལྔའི་ནུབ་མོ་ཆོས་མཉན་པར་བྱའོ་ཞེས་བྱ་བ་ནི་ཚེས་བརྒྱད་དང་བཅུ་བཞི་ལ་ཞེས་བྱ་བ་དེ་ཙམ་འདིར་རེ་ཞིག་རྣམ་པར་འབྱེད་པ་ལས་མཐོང་བ་ཡིན་ཏེ། མ་མོ་ལས་ནི་ཚེས་བཅོ་ལྔའི་ཚིག་ཀྱང་འདིར་ཡོད་པ་ཡིན་ནོ། །འདིར་ཆོས་ཉན་དུ་གཞུག་པ་རིགས་པ་ཡིན་ཏེ། དེ་ལ་ཡང་དེ་དུས་ཚིགས་ཡིན་པ་ཉིད་ཀྱི་ཕྱིར་དང༌། ཤིན་ཏུ་གཙོ་བོ་ཉིད་ཀྱི་ཕྱིར་ཕྱི་མ་དུས་ཚིགས་ཀྱི་ཞག་དག་གིས་ཉམས་ཞེས་བྱ་བ་ངེས་པར་བྱས་ནས་འདི་སྐད་དུ། ནད་པས་དེ་མ་བྱས་པ་ལ་ནི་ཉེས་པ་མེད་དོ་ཞེས་བྱ་བ་སྨོས་ཏེ། ནད་པས་དེ་ཆོས་མཉན་པ་དེ་མཉན་པ་དང་མ་བཏོན་པ་ལ་ཉེས་པ་མེད་པའོ། །དེ་སྨྲ་བའི་ཕྱིར་གསོལ་བ་འདེབས་པ་མི་གདོན་པར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་ཆོས་མཉན་པའི་ཕྱིར་ཆོས་ལའོ། །མི་ནུས་པ་ལ་ སོགས་པ ་ཡིན་ན་གསོལ་བ་འདེབས་པ་ལ་ཤད་ཀྱིས་སྦྱང་བར་བྱའོ་ཞེས་བྱ་བ་ནི། ན་སྟེ་མི་ནུས་པའམ་བྱ་བ་གཞན་གྱིས་བྲེལ་བར་གྱུར་པ་ཡིན་ན་བྱ་བ་གཞན་ལ་རྩེ་གཅིག་པ་ལ་ སོགས་པ ་མ་ཡིན་ པ་ལ་ནི་སོགས ་པའི་སྒྲས་དྲངས་པའོ། །སྨྲ་བ་པོ་མེད་ན་རིམ་གྱིས་དྲན་པར་བྱ་ཞིང་ཐ་ན་ཚིགས་སུ་བཅད་པ་རེ་རེ་ཙམ་ཡང་སྨྲ་བར་བྱའོ། །དེར་མར་མེ་གཟུགས་སོ་ཞེས་བྱ་བ་ལ། དེར་ཞེས་བྱ་བ་ནི་ཆོས་ཉན་ས་དེར་རོ། །ཁྱམས་སུ་ཆོས་མཉན་པའི་གྲལ་ནི་ཟླ་ཁམ་གྱི་རྣམ་པ་ལྟ་བུའམ་རྫིང་བུའི་རྣམ་པ་ལྟ་བུར་བཤམ་པར་བྱའོ་ཞེས་བྱ་བ་ནི། འདིར་དེའི་དོན་ནི་ཐུན་མོང་དུ་དཔེ་ཙམ་དུ་ཟད་དེ་མི་གནོད་པ་གཞན་དག་ཀྱང་རུང་སྟེ། དེ་བས་ན་ངེས་པ་མེད་དོ། །བླ་གབ་མེད་
པར་ཆོས་ཉན་ན་བླ་རེ་གདགས་སོ། །རླུང་དང་ཆར་འབབ་ན་བརྟུལ་ལོ་ཞེས་བྱ་བ་ནི་བླ་རེའོ། །དེར་ཆོས་ཉན་པ་དག་དོར་བར་མི་བྱའོ་ཞེས་བྱ་བ་ལ། དེར་ཞེས་བྱ་བ་ནི་རླུང་དང་ཆར་འབབ་པ་དེར་རོ། །དེར་གནས་བརྟན་དང་པོར་འདུག་སྟེ་ཡུད་ཙམ་ཞིག་ཀྱང་མི་སྨྲ་བར་བསྡད་ནས་ཆོས་སྨྲ་བར་བྱ་བའམ་གཞན་ལ་དགེ་སློང་ཆོས་སྨྲས་ཤིག་ཅེས་གསོལ་བ་བྱའོ་ཞེས་བྱ་བ་ལ། གནས་བརྟན་ཞེས་བྱ་བ་ནི་དགེ་འདུན་གྱི་གནས་བརྟན་ནོ། །འདིར་མི་སྨྲ་བར་བསྡད་ནས་ཞེས་བྱ་བ་ནི་ཀུ་ཅོ་སྤང་བའི་དོན་དུའོ། །དང་པོ་འདུག་སྟེ་ཞེས་བྱ་བ་ནི་ཆོས་ཉན་དུ་གཞུག་པར་རྩོམ་པའི་དང་པོར་རོ། །དེར་ཞེས་བྱ་བ་ནི་ཆོས་ཉན་པ་ལའོ། །གསོལ་བ་བྱའོ་ཞེས་བྱ་བ་ནི་གནས་བརྟན་གྱིས་ཆོས་སྟོན་པ་པོ་ལ་ཆོས་བསྟན་པར་གསོལ་བ་གདབ་ཅིང་གཞན་ཆོས་སྨྲར་གཞུག་པར་བྱའོ། །སྨྲ་བ་ན་སེམས་གཏད་དེ་ཆོས་ཡིན་ན་སྤྲོ་བར་བྱའོ། །གལ་ཏེ་མ་ཡིན་ན་བཟློག་པར་བྱའོ་ཞེས་བྱ་བ་ལ། སེམས་གཏད་དེ་ཞེས་བྱ་བ་ནི་སེམས་གཏོད་དུ་གཞུག་པའོ། །གལ་ཏེ་ཆོས་ཡིན་ན་ཞེས་བྱ་བ་ནི་གལ་ཏེ་ཆོས་སྨྲས་པ་ཡིན་ནའོ། །དེར་ཁྱིམ་པ་ལྷགས་པར་རྣམས་ལ་ཆོས་དང་ལྡན་པའི་གཏམ་བྱའོ་ཞེས་བྱ་བ་ལ། དེར་ཞེས་བྱ་བ་ནི་ཆོས་ཉན་པ་དེ་ལའོ། །ཆོས་ཉན་པའི་མཐར་ཐུག་པ་ལ་འགྲོ་བར་གྱུར་ན་རྩོམ་པ་ལ་ཤུགས་ཀྱིས་བསྒྲུབ་པར་བྱའོ། །མུ་སྟེགས་ཅན་ཀླན་ཀ་ཚོལ་ཞིང་གནས་ན་ལེགས་པར་ཚེར་བཅད་ཅིང་ཁྲོ་བ་མི་བསྟན་པར་བཟོད་པར་བྱའོ་ཞེས་བྱ་བ་ནི། གནས་བརྟན་གྱིས་ཞེས་བྱ་བར་སྦྱར་རོ། །གང་དུ་འདིར་བཟོད་པར་བྱ་ཞེ་ན། དེའི་ཕྱིར་སྟོན་པས་འཁོར་ཁྲིད་དེ་འགྲོ་བར་མི་བྱའོ་ཞེས་བྱ་བ་ནི། ཚུར་ཤོག་བདག་གིས་བསྟན་པར་བྱའོ་ཞེས་བྱ་བའོ། །སྟོན་པས་ཞེས་བྱ་བ་ནི་གནས་བརྟན་གྱི་དབང་དུ་བྱས་པ་ལ་དེ་དག་བཟློག་པ་པོར་རིག་པར་བྱའོ། །དེ་དག་འགྲོ་ན་ཆོས་ཀྱི་སྒོར་གཟུང་བར་བྱའོ་ཞེས་བྱ་བ་ནི། དེ་ཚོལ་བས་གཞག་པར་བྱའོ་ཞེས་བྱ་བའི་དོན་ཏོ། །རྗེ་ས་དང་བཅས་པ་དང༌། གུས་པ་དང་བཅས་པ་དང་སེམས་དམའ་བས་འཇུག་པར་བྱའོ་ཞེས་བྱ་བ་ནི། འཁོར་ལ་ཞེས་བྱ་བ་དབང་དུ་བྱ་བར་གཏོགས་པ་སྟེ། རྗེས་དང་བཅས་པ་དང་གུས་པ་དང་བཅས་པ་དང་སེམས་དམའ་བས་སོ། །གུས་པར་བྱ་སྟེ་བསྟན་པར་བྱའོ་ཞེས་བྱ་བ་ནི་གཞན་ལ་
འཇིགས་པའི་གནས་ཉིད་དུ་ལྟ་བའོ། །སེམས་དམའ་བ་ཞེས་བྱ་བ་ནི་རྒྱགས་པ་དང་ང་རྒྱལ་ངེས་པར་བཅོམ་པ་ཉིད་ཀྱིས་སོ། །གུས་པར་བྱ་སྟེ་བརྟན་པར་བྱའོ་ཞེས་བྱ་བ་ནི། ཆོས་ལ་གུས་པ་དང་བཅས་པ་དང་བརྟེན་པ་དང་ཡིད་མི་གཡེང་བས་རིགས་པ་དང་གྲོལ་བའི་ཚིག་དག་གིས་སོ། །དོན་ཇི་ལྟ་བ་བཞིན་དུ་ཐོགས་པ་མེད་པར་བརྗོད་པ་དག་གིས་སོ། །མ་འདྲེས་པར་རོ་ཞེས་བྱ་བ་ནི་གཏམ་གཞན་དང་མ་འདྲེས་པར་རོ། །འབྲེལ་པར་རོ་ཞེས་བྱ་བ་ནི། ཚིག་སྔ་མའི་དོན་དང་ཚིག་ཕྱི་མའི་དོན་འབྲེལ་བ་དང་བཅས་ཤིང་སྐབས་སུ་བར་མ་ཆད་པར་ཕ་རོལ་གྱི་ངག་གིས་སྦྱོར་བས་སོ། །བྱམས་པ་དང་སྙིང་རྗེ་དང་ཟང་ཟིང་མེད་པའི་སེམས་ཀྱིས་སོ་ཞེས་བྱ་བ་ནི། བྱམས་པའི་སེམས་དང་སྙིང་རྗེའི་སེམས་དང་ཟང་ཟིང་མེད་པའི་སེམས་ཀྱིས་སོ། །བྱམས་པའི་སེམས་ཞེས་བྱ་བ་ནི། བྱམས་པའི་སེམས་དང་ཁོང་ཁྲོ་བ་དང་བྲལ་ཞིང་མཛའ་བཤེས་དང་ལྡན་པའི་སེམས་ཀྱིས་སོ། །སྙིང་རྗེའི་སེམས་ཀྱིས་ཞེས་བྱ་བ་ནི། ཕན་པ་ཉེ་བར་བསྒྲུབ་པར་འདོད་པས་དམ་པ་སྔོན་དུ་བཏང་བས་སོ། །ཟང་ཟིང་མེད་པའི་སེམས་ཀྱིས་ཞེས་བྱ་བ་ནི། སོ་སོར་བསྔགས་པ་བཞིན་དེའི་རྒྱུས་དེ་ལས་སམ་གཞན་ལ་རྙེད་པ་དང་བཀུར་སྟི་དང་རིམ་གྲོའམ་བྱ་བ་གཞན་ཞེས་བྱ་བའི་དོན་ཏོ། །རངས་པ་དང་མོས་པ་དང་དགའ་བར་བྱེད་པས་སོ་ཞེས་བྱ་བ་ནི་ཞུམ་པ་དང་ལྷག་པར་མི་མོས་པས་མི་རིགས་པར་བྱེད་པ་ཉིད་ཀྱི་གཉེན་པོས་སོ། །དོན་གྱི་དབང་གིས་མ་རྫོགས་ན་གཞག་པར་བྱའོ་ཞེས་བྱ་བ་ནི། མ་ནུས་པ་ལ་ སོགས་པ ་སྟེ་དེའི་དབང་གིས་སོ། །འདི་ལ་མི་རིགས་པ་མེད་པར་ཤེས་པར་བྱའོ། །དེ་བས་ན་འདི་དང་མདོ་ཕྱི་མ་དང་ཡང་དག་པར་བསྟན་པའོ། །དབྱངས་ཀྱིས་ཆོས་སྨྲ་བར་བྱའོ། །ལངས་ནས་རྣམ་པར་དབྱེ་བར་བྱའོ། །དོན་བསྡུས་ཏེ་བརྗོད་པ་ཡང་ངོ་ཞེས་བྱ་བ་ནི་བྱའོ་ཞེས་བྱ་བར་སྦྱར་བར་བྱའོ། །ཆོས་ལ་ཞེས་བྱ་བ་ནི་མདོ་སྡེ་ལ་ སོགས་པ ་ཤུགས་ཀྱིས་རྟོགས་པར་བྱའོ། །གལ་གཟུང་བ་དང་གཞུང་གཟུགས་པར་ཡང་ངོ་ཞེས་བྱ་བ་ལ་གང་ཞིག་ཅེ་ན། མདོ་སྡེ་ལ་ སོགས་པའི་ཆོས་ཀྱིའོ། །ཡི་གེ་དང་དོན་དེ་ནི་རིགས་པ ་མ་ཡིན་ཏེ། དེ་ནི་འདི་ལྟར་བརྗོད་པར་བྱ་སྟེ། དེ་ཡང་གཞི་འདིས་ཆོ་ག་རྟོགས་པར་བྱའོ་ཞེས་བྱ་བ་རྣམ་པར་འབྱེད་པ་ལས་སོ། །གལ་གཟུང་བ་དང་
གཞུང་གཟུགས་པ་དེ་ལྟར་ཡི་དམ་བྱེད་པའོ། །དགེ་འདུན་གྱི་གནས་བརྟན་གྱིས་སྨྱུག་མའི་ཐུར་མ་སྐུད་པ་ལ་བརྒྱུས་པ་སྤོབས་ཉི་མ་བགྲང་བར་བྱའོ་ཞེས་བྱ་བ་ལ། འདིར་གཞུང་ནི། གླེང་གཞི་དག་ལས་འདི་དང་པོར་བྱས་པའི་དྲང་བར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །དགེ་སྐོས་ཀྱིས་དེ་ལ་བརྟགས་ཏེ་དགེ་འདུན་ལ་བརྗོད་པར་བྱའོ་ཞེས་བྱ་བ་ནི་དགེ་འདུན་གྱི་གནས་བརྟན་གྱི་ལས་སོ། །བྱེ་བྲག་ཏུ་མ་བྱས་པས་ནི་ཞུ་བར་བྱ་བ་མ་ཡིན་ཏེ། འོན་ཀྱང་བྱེ་བྲག་ཏུ་བྱས་པའི་འོ་ཞེས་བྱ་བ་སྨོས་སོ། །གང་གིས་བྱེ་བྲག་ཏུ་བྱས་པ་ཡིན་ཞེ་ན། དེའི་ཕྱིར་ངོའི་དབྱེ་བས་སོ་ཞེས་བྱ་བ་སྨོས་ཏེ། ཟླ་བ་ཡར་གྱི་ངོ་དང་མར་གྱི་ངོ་འདི་དབྱེ་བ་དེས་སོ། །གཙུག་ལག་ཁང་གི་བདག་པོ་དང་ལྷའི་ཚིགས་སུ་བཅད་པ་འདོན་པར་དགེ་སློང་རྣམས་ལ་བསྐུལ་བའི་ཚིག་བྱའོ་ཞེས་བྱ་བ་གང་གི་ཚེ་ན་ཞེ་ན། དེའི་ཕྱིར་ཞེས་བྱ་བ་སྨོས་ཏེ། ཉི་མ་བརྗོད་པའི་ཞེས་བྱ་བ་སྐབས་ཀྱིས་རྟོགས་པར་བྱའོ། །སྡུག་བསྔལ་རིགས་པའི་ངོ་བོ་ཚིག་གིས་མངོན་པར་འདུ་བྱས་པ་ཞེས་བྱ་བ་གང་ཞིག་འདིར་རིགས་པའི་ངོ་བོའི་ཚིག་མངོན་པར་འདོད་པ་དེ་བསྟན་པར་བྱ་སྟེ། དེའི་ཕྱིར་དེང་ནི་ཡར་གྱི་ངོའི་ཚེས་གཅིག་ལགས་ཏེ། གཙུག་ལག་ཁང་གི་བདག་པོ་དང༌། གཙུག་ལག་ཁང་གི་ལྷ་རྣམས་ཀྱི་སླད་དུ་ཚིགས་སུ་བཅད་པ་རེ་རེ་བཀླག་ཏུ་གསོལ་ཞེས་བྱ་བ་སྨོས་ཏེ། བཀླག་ཏུ་གསོལ་ཞེས་བྱ་བའི་སྒྲས་ནི་འདི་སྐད་ཅེས་བྱ་བའི་དོན་ཅན་ནོ། །གཙུག་ལག་ཁང་གི་བདག་པོས་སྤྱན་འདྲེན་པའི་ཚིག་ཀྱང་བརྗོད་པར་བྱའོ། །ཇི་སྐད་དུ་ཞེ་ན། དེའི་ཕྱིར་ཡོན་བདག་མིང་འདི་ཞེས་བགྱིས་པས་སང་དགེ་འདུན་བཤོས་ལ་སྤྱན་འདྲེན་ན། བཙུན་པ་རྣམས་ཀྱིས་དེ་ལ་དགེ་ལེགས་ཀྱི་ཡིད་དག་གིས་སོ་སོ་ནས་ཐུགས་བརྩེ་བར་མཛད་དུ་གསོལ་ཞེས་བྱ་བས་སོ། །ཉིན་ཞག་གཅིག་གིས་མི་ཆོག་པར་བྱའོ་ཞེས་བྱ་བ་ལ། གང་གི་ཚེ་ན་ཡིན་ཞེ་ན། དེའི་ཕྱིར་དུས་ཚིགས་རྣམས་ཀྱི་ཟླ་བ་ཕྱེད་ལུས་པ་ཉིད་ལའོ་ཞེས་བྱ་བ་སྨོས་ཏེ། གསོ་སྦྱོང་གསུམ་པ་ལ་འདིས་ནི་ཚེས་བཅུ་བཞི་པ་ཉིད་བྱས་པར་རིག་པར་བྱའོ། །ཟླ་བ་ཤོལ་དོར་བ་ནི་རྒྱལ་པོའི་རྗེས་སུ་འབྲང་བས་སོ། །རྒྱུ་སྐར་ནི་སྐར་མཁན་གྱི་རྗེས་སུ་འབྲང་
བས་ཤེས་པར་བྱའོ། །འདི་ལ་དགོས་པ་ནི་ཐ་སྙད་ལ་མཁས་པར་བྱ་བའོ་ཞེས་བྱ་བ་ལ་ཚེས་གྲངས་བརྗོད་པར་བྱ་བ་ལ་ སོགས་པ ་འདི་ལ་དགོས་པ་ནི་འཇིག་རྟེན་པའི་ཐ་སྙད་ལ་མཁས་པར་བྱ་བ་དང༌། ཚེས་འདས་པ་སེམས་ལ་གཞག་པར་བྱ་བ་དང༌། གསོ་སྦྱོང་གི་ཉི་མ་ཡོངས་སུ་ཤེས་པར་བྱ་བ་ཡིན་ནོ། །མ་བརྟགས་ཤིང་གསོ་སྦྱོང་ལ་མ་བསྡད་པར་འདི་ནི་སྤོང་བ་ཞིག་གོ་སྙམ་ནས་མཚམས་གཅད་པར་མི་བྱའོ་ཞེས་བྱ་བ་ནི། བརྟག་ཅིང་མཚམས་བཅད་དམ་འོན་ཏེ་མ་བཅད་ཅེས་དེ་ལྟར་བརྟག་ཅིང་གསོ་སྦྱོང་གི་ཉི་མ་ལ་མ་བབ་ཀྱི་བར་དུ་བསྡད་དེ་བྱའོ་ཞེས་བྱ་བའི་དོན་ཏོ། །བཅད་པ་ཉིད་དུ་ཤེས་པ་ནི་མི་ཆགས་པའི་ཡན་ལག་མ་ཡིན་ནོ་ཞེས་བྱ་བ་ནི། བག་ཡངས་སུ་མ་བྱས་པར་གཅད་པ་གཞན་ནི་མི་འཆགས་པ་ཁོ་ནའོ་ཞེས་གང་བསྟན་པ་དེ་ལ་ཤེས་པ་དེ་ཡན་ལག་མ་ཡིན་ཏེ། འདི་ལྟར་མཚམས་བཅད་ཟིན་པ་ཡོད་ན་བག་ཡངས་སུ་གྲགས་པ་ཞེས་བྱ་བ་མི་ཤེས་པ་ཉིད་ལ་ཡང་དེ་རིག་པར་བྱའོ། །དེ་མེད་པ་ཉིད་ཀྱིས་ཀྱང་བག་ཡངས་སུ་འགྱུར་རོ་ཞེས་བྱ་བ་ནི། ལས་གང་ཞིག་བག་ཡངས་སུ་ཉིད་ཀྱིས་རྩ་བའི་གཞི་ལས་སྨོས་པ། དེ་ལ་ལྟོས་པ་ཀྱང་གི་སྒྲ་འདི་ཡིན་ནོ། །དེའི་སྒྲས་ནི་མཚམས་དགྲོལ་བ་ལ་ལྟོས་པའམ་འབའ་ཞིག་ཏུ་མ་ཟད་ཀྱི་དོན་གྱིས་ཉེ་བར་གནས་པ་རྣམས་ཀྱང་ཉེ་བར་བཟུང་བའོ། །གང་དག་གི་མཚམས་དེའི་ནང་ན་གཅིག་ཀྱང་མ་ལུས་པ་ཞེས་བྱ་བ་ནི་མཚམས་དེ་མེད་པའོ། །དེའི་དངོས་པོ་ནི་དེ་ཉིད་མེད་པའོ། །དེ་བས་ཀྱང་མཚམས་ཀྱི་བག་ཡངས་སུ་བྱ་བའོ། །ལས་རྣམ་པར་ལྔས་དེ་མེད་པ་ཉིད་ཀྱིས་ཀྱང་བག་ཡངས་སུ་སྒྲུབ་པ་བྱེད་པ་གཅིག་པུར་མ་ཟད་ཀྱི། དགེ་འདུན་ཐམས་ཅད་དོང་བ་ཐམས་ཅད་མཚན་པ་དང་ཞིང་མ་ཡིན་པ་ཉིད་ལྟུང་བ་ཐོབ་པ་དང་རྣམ་པར་འཁྲུགས་པར་གྱུར་པ་དང་ཤི་བས་སོ། །གནས་སུ་གཞག་སྟེ་སེམས་ཀྱིས་དཀྱིལ་འཁོར་པ་གང་གིས་བྱིན་གྱིས་བརླབ་པ་དེ་བས་ན། གནས་ཁང་དེར་དེ་མེད་པ་ཉིད་ཀྱིས་ཀྱང་འདི་ལ་དེ་མེད་པ་དེར་རང་ཉིད་ཀྱིས་ནི་མ་ཡིན་ནོ། །རུང་པའི་ཁང་པ་ཡང་ངོ་ཞེས་བྱ་བ་ནི་དེ་མེད་པ་ཉིད་ཀྱིས་ཀྱང་བག་ཡངས་སུ་འགྱུར་རོ་ཞེས་བྱ་བ་སྟེ། མདོ་སྔ་མ་ལས་ཉེ་བར་གཞག་པ་ལ་ཀྱང་གི་སྒྲས་ནི་འདིར་བསྡུས་པ་ལ་རིག་
པར་བྱའོ། །ལས་དང་དེ་མེད་པ་ཉིད་འདིས་ཀྱང་ཞེས་བྱ་བའོ། །མཚམས་སུ་མཚམས་ཀྱིས་བསྐོར་དུ་མི་རུང་ངོ་ཞེས་བྱ་བ་ནི། མ་གྲགས་པའི་ཚིག་འདི་ལས་བྱས་སུ་ཟིན་ཀྱང་མ་བྱས་པ་ཉིད་དུ་རིགས་པར་བྱའོ། །དཀྱིལ་འཁོར་བ་དང་དགེ་སློང་མའི་དབྱར་ཁོད་དག་དང་ཁྲོན་པ་དག་པ་ནི་རུང་ངོ་ཞེས་བྱ་བ་ལ། འདི་དག་ནི་ཡུལ་གྱི་བདུན་པའོ། །ཡུལ་འདི་ལ་མཚམས་གང་ཞིག་དེ་ལ་གང་ཞིག་བསྐོར་དུ་རུང་བ་ཞེས་བྱ་བའི་དོན་ཏོ། །ཤིང་ལྗོན་པ་གཅིག་ལ་མཚན་བཞི་མན་ཆད་ཀྱིས་མུ་ཤུགས་དུ་མ་རྣམ་པར་གནས་སོ་ཞེས་བྱ་བ་ལ། མཚམས་བཞི་མན་ཆད་ཀྱི་ཞེས་བྱ་བ་ནི་གསལ་བ་ཉིད་དུ་ཁས་བླངས་ནས་འདི་སྨོས་སོ། །རྣམ་པ་བཞི་ཤིང་ལྗོན་པའི་རྣམ་པར་དབྱེ་བ་ཤིན་ཏུ་ཡང་གསལ་བ་ཞེས་བྱ་བ་ནི་ཤིན་ཏུ་ཡང་མང་པོའི་མཚམས་རྣམས་ལ་རྣམ་པར་གནས་པ་ཉིད་ཡོད་པའོ། །འདི་ལ་ཐ་སྙད་དུ་རུང་བ་མཚན་མ་ཉིད་ཡིན་ནོ་ཞེས་བྱ་བ་ལ། འདི་ལ་ཞེས་བྱ་བ་ནི་མཚམས་ལའོ། །རྫུ་འཕྲུལ་དང་སྒྱུར་མ་བྱས་པ་དག་ཀྱང་དེ་ལྟར་གྱུར་པ་ཉིད་མ་ཡིན་ནོ་ཞེས་བྱ་བ་ནི། ཐ་སྙིད་མ་ཡིན་པ་ཉིད་དུ་བྱས་པ་ཞེས་བྱ་བའི་དོན་ཏོ། །ཟླ་བ་དང༌། ཉི་མ་དང༌། སྐར་མའི་འོད་དན་དབའ་ཀློང་གི་རླབས་དག་ཀྱང་མི་བརྟན་པ་ཉི་ཡིན་ནོ་ཞེས་བྱ་བ་ལ། བརྟན་པ་ཞེས་བྱ་བ་འདི་ཉིད་ཀྱིས་འདི་རྣམས་མ་ཡིན་པར་དགག་པ་ཉིད་ཅེས་བྱ་བའི་དོན་ཏོ། །མཚམས་དང་མ་འབྱར་བ་ལ་དེའི་མཚན་མ་ཉིད་མ་ཡིན་ནོ། །དེ་ལྟ་བས་ན་འདིར་འོད་བེར་རྣམས་མངོན་པ་བརྟེན་པ་ཟླ་བ་ལ་ སོགས་པ ་ལ་ཡང་མ་ཡིན་ཏེ། འདིར་དོགས་པའི་སྐབས་མེད་པའི་ཕྱིར་རོ། །འདིར་དེའི་ཁྱད་པར་གྱི་ངོ་བོས་ཟླ་བ་ལ་ སོགས་པ ་ཉེ་བར་བཟུང་བའོ། །དེ་བཞིན་དུ་དབའ་ཀློང་གི་རླབས་འགྲམ་དུ་འབྱུང་བ་ཞེས་བྱ་བ་རྟོགས་པར་བྱའོ། །མཚམས་སུ་ཆུ་ནི་མཚམས་གཞན་དང་འདྲའོ་ཞེས་བྱ་བ་ནི། འདི་ལ་མཚམས་ཀྱི་ནང་དུ་ཆུས་ཆོད་ན་མཚམས་ཐ་དད་པ་ཉིད་དེ་ཞེས་བྱ་བ་འདི་ལ་དེའི་མཚམས་ཀྱི་ནང་དུ་ལྟུང་བ་གཅིག་པུར་མ་ཟད་དེ། འོན་ཀྱང་མཚམས་ཉིད་ཐ་དད་པ་ཞེས་བྱ་བའི་དོན་ཏོ། །འདི་ནི་གནས་བྱིན་གྱིས་བརླབས་པ་སྟེ། གང་ཞིག་མཚམས་ལ་མངོན་པར་བརྟེན་པ་ཡིན་གྱི། ཆུ་ལ་ནི་འདི་རྣམས་ཀྱི་གནས་ཉིད་
དུ་བྱིན་གྱིས་བརླབ་པར་བྱ་བའི་གནས་ཉིད་ཡོད་པ་མ་ཡིན་ཏེ། ཇི་ལྟར་བསྟེན་པ་ལ་འང་ཡོད་པ་ཡིན་ཞེ་ན། དེའི་ཕྱི་གནས་པར་གྱུར་པ་མ་ཡིན་པ་ཉིད་ཀྱིས་སོ། །མཚམས་ལ་དེ་དང་ལྡན་པ་ཉིད་ལ་ཇི་སྲིད་དུ་ཆུས་མི་འབྱེར་བ་དེ་སྲིད་དུ་མཚམས་ཀྱི་ཡུལ་མ་ཡིན་ནོ། །ཆུ་མེད་པར་གྱུར་ན་མཚམས་དེ་ལས་སྐྱེས་པ་ཞེས་བྱ་བར་རིག་པར་བྱའོ། །བར་དུ་ཆོད་ན་གཅིག་པ་ཉིད་མ་ཡིན་ནོ་ཞེས་བྱ་བ་ནི། གང་དུ་ཕྱོགས་གཅིག་གིས་ཀྱང་འབྲེལ་པ་མེད་པར་དེར་མཚམས་གཅིག་པ་ཉིད་ལས་སྐྱེས་པར་མི་འགྱུར་ཞེས་བྱ་བའི་དོན་ཏོ། །མཚམས་གཅིག་ལ་གནས་པ་མ་ཡིན་པ་དེ་ལྟར་རྣམ་བར་བཅད་པའི་ཆར་གནས་པ་དུ་མའི་ཚོགས་རྣམ་པར་བཅད་ནས་ཅིག་ཅར་མཚམས་བཅད་པ་ལས་བླང་བ་དེ་ལྟ་བས་ན་འདི་ལྡེ་ལྟར་བྱེད་པའོ། །གལ་ཏེ་ཟམ་པ་བརྟན་པོ་ཡིན་ན་དེ་ཡུལ་ཉིད་ཡིན་ནོ་ཞེས་བྱ་བ་ལ། འདིར་གཞུང་ནི་བཙུན་པ་ཆབ་ཀྱི་མཚམས་ལས་འདར་རུང་ངམ། ཉེ་བ་འཁོར་མི་རུང་ངོ༌། །གལ་ཏེ་ཟམ་པ་བརྟན་པོ་ཡོད་ན་ནི་རུང་ངོ་ཞེས་གསུངས་སོ། །དེ་བཞིན་ན་ཡང་ཕྱིར་བ་ཡིན་ནི་རྗེས་སུ་འཇུག་གོ་ཞེས་བྱ་བ་ལ། དེ་ཞེས་བྱ་བ་ནི་ཟམ་པའོ། །ཇི་ལྟ་བུ་ཞིག་པ་དང་ཕྱིས་བྱ་ཞེ་ན། དེའི་ཕྱིར་སྦྱོར་བ་མ་བཏང་བ་ཉིད་དོ་ཞེས་བྱ་བ་སྨོས་ཏེ། ཡང་ཕྱིར་བྱ་བ་གང་ལ་སྤྱོར་བ་མ་བཏང་བ་ཞེས་བྱ་བའི་དོན་ཏོ། །དུས་ཇི་སྲིད་དུ་སྦྱོར་བ་མ་བཏང་བ་ཉིད་ཀྱང་ཕྱི་བྱ་ནས་རྗེས་སུ་འཇུག་ཅེ་ན། དེའི་ཕྱི་ཞག་བདུན་ཕན་ཆད་ནི་མི་འཇུག་གོ་ཞེས་བྱ་བས་མོས་ཏེ། །མི་འཇུག་གོ་ཞེས་བྱ་བར་སྦྱར་རོ། །ནམ་མཁའ་ནི་བར་དུ་ཆད་པ་གྱུར་པ་ཡིན་པས་དེ་ལ་ཡོད་པ་ཉིད་ཀྱི་ཐ་སྙད་ཀྱང་མེད་ན་འབྲེལ་པ་ལྟ་ག་ལ་ཡོད་ཅེས་བྱ་བ་ལ། དེ་ལ་ཞེས་བྱ་བ་ནི་ནམ་མཁའ་ལའོ། །ས་དང་དེ་དང་འབྲེལ་པའི་རང་གི་ཆ་ཡང་རུང་སྟེ། འདི་ལ་གཉིས་ཀའི་ཆ་ལ་ཡང་མཚམས་གཅིག་གིས་འབྲེལ་པ་མ་ཡིན་ནོ། །འདིར་གནས་ཁང་གི་ནང་ན་འདུག་པའི་གནམ་མཁའ་ཡང་མཚམས་ལ་འཇུག་པ་མ་ཡིན་ཏེ། མཚམས་གཅིག་པ་ཉིད་ཀྱང་མ་ཡིན་ཏེ་དེ་འདིར་དེ་ལྟར་བས་ན་དེ་བྱེད་པའོ། །འདིར་གཞུང་ནི་བཙུན་པ་ནམ་མཁའ་ལ་མཆིས་པ་དག་དང༌། དོགས་ལ་མཆིས་པ་དག་ལྷན་ཅིག་ལས་བགྱིར་རུང་ངམ། ཉེ་བ་འཁོར་མི་རུང་ངོ་ཞེས་
གསུངས་པ་གང་ཡིན་པ་དང༌། གང་ཡངས་དང་དེ་དང་འབྲེལ་བ་རྣམས་ཀྱིས་མི་རུང་བ་ཉིད་དེ་ལ་ནི་བསྡུས་པའོ། །དབུས་ནས་དཔག་ཚད་ཕྱེད་དང་གསུམ་གྱི་མཐའ་ལས་ལྷག་པར་མཚམས་བཅད་པ་མི་འཆགས་སོ་ཞེས་བྱ་བ་ནི། དཔག་ཚད་ཕྱེད་དང་གསུམ་གྱི་མཐའ་ཚུན་ཆད་དུ་ཞེས་བྱ་བ་གང་ཞིག་སྨོས་པ་གང་ཞིག་མ་གྲགས་པ་ཡང་དེ་ལས་འདའ་བར་བྱེད་པ་ལ་ལྟུང་བ་མེད་པ་ཙམ་ཞེས་བྱ་བ་དེ་ལ་འདི་བསྟན་པའོ། །བཙུན་པ་མཚམས་ཆེན་པོའི་ཚད་ཇི་ཙམ་ལགས། ཉེ་བ་འཁོར་དཔག་ཚད་ཕྱེད་དང་གསུམ་མོ། །བཙུན་པ་དཔག་ཚད་ཕྱེད་དང་གསུམ་ཕན་ཆད་མཚམས་སུ་རུང་ངམ། ཉེ་བ་འཁོར་མི་རུང་ངོ་ཞེས་གསུངས་པ་ཡིན་ནོ། །དེར་གང་ཞིག་ཚད་འདི་བརྗོད་པ་ནི་ཞུ་བ་ལས་གསུངས་པ་དེ་འདིས་བསྡུས་པ་ཡིན་ནོ། །འོག་དང་སྟེང་དུ་སྲ་བ་དང་འབྲེལ་པ་ལ་གཞི་དང་འདྲ་བ་ཉིད་དོ་ཞེས་བྱ་བ་ནི། དཔག་ཚད་ཕྱེད་དང་གསུམ་གྱི་མཐའ་ཡན་ཆད་དང་མན་ཆད་ས་དང་རྡོ་དང་རྩིག་པ་དང་ཤིང་ལྗོན་ པ་དང༌། ཤིང་ལ་སོགས ་པའི་སྲ་བ་དང་འབྲེལ་པའི་རྫས་གང་ཡིན་པ་ལ་ནི་དེའི་རང་བཞིན་ཅན་གྱི་འབྲེལ་པ་ལ་གཞི་དང་ལྡན་པ་བཞིན་དུ་མཚམས་ལ་ཡོད་པའོ། །མཚམས་ཆེན་པོའི་དབང་དུ་བྱས་ནས་ཚིག་དེའོ། །གཞན་དུ་ཇི་ལྟར་བྲིས་པ་བཞིན་དུ་ཞེས་རྟོགས་པར་བྱའོ། །དེ་ལྟར་ཡང་དཀྱིལ་འཁོར་ལ་ནི་ཚད་གཞན་དང་འབྲེལ་པ་གང་ཡིན་པ་དེ་ལ་དེར་ཞུགས་པ་མ་ཡིན་ནོ། །དེ་ཡོངས་སུ་སྤོངས་པས་ཡང་མཚམས་ལས་སྐྱེས་པར་རིག་པར་མི་བྱའོ། །ས་གཞི་མཚམས་མ་བཅད་པ་ཉིད་དུ་མི་འབྲལ་བའི་གནང་བ་མི་འཆགས་སོ་ཞེས་བྱ་བ་ནི། བཅོས་མའི་གནས་སུ་མི་འབྲལ་བའི་གནང་བའི་ཡུལ་ཡིན་པ་དེ་བས་དེ་དེ་ལ་འདི་བསྟན་པའོ། །ཞུ་བ་ལས་འདི་དང་པོར་བྱས་ཏེ་དེས་ནི་དེ་མི་ཞིག་གོ་ཞེས་བྱ་བའི་མཐར་ཐུག་པའོ། །བཅད་པ་ཞིག་ན་ཞིག་གོ་ཞེས་བྱ་བ་ལ། ཞིག་པ་ནི་མཚམས་བཅད་པ་ལས་གྲོལ་བའོ། །དེ་ཞིག་ན་མི་འབྲལ་བའི་གནང་བ་ཞིག་གོ །དེས་ནི་དེ་མི་ཞིག་ག་ཞེས་བྱ་བ་ནི། མི་འབྲལ་བའི་གནང་བ་ཞིག་པ་དེས་ནི་མཚམས་བཅད་པ་དེ་མི་ཞིག་པའོ། །མཆོད་རྟེན་དང༌། གཙུག་ལག་ཁང་དང༌། གཙང་ཁང་ཕྱུར་བུ་
དང་འཁོར་ས་དང༌། གསོ་སྦྱོང་གི་གནས་དག་ཏུ་ཕྱག་དར་བྱ་བ་ཉིད་དོ་ཞེས་བྱ་བ་ནི། འདིར་ཕྱག་དར་བྱ་བ་ནི་གནས་ཁང་ངམ་ཁྱམས་སམ་རྫིང་བུའི་ཚད་ཙམ་ཞིག་ཕྱགས་ན་ཕྱག་དར་བྱས་པ་ཉིད་དུ་ཤེས་པར་བྱ་ཞེས་བྱ་བའི་དོན་ཏོ། །འདི་ནི་མ་མོ་ལས་ཉེས་བྱས་ཏེ། ནད་པས་ཞེས་བྱ་བ་དང་པོར་བྱ་སྟེ། གནས་ཞེས་བྱ་བའི་མཐར་ཐུག་པ་དང༌། ཕུལ་བ་ཉིད་ཅེས་བྱ་བ་ལ་ སོགས་པའི་མདོ་འདི་ནི་ཞུས་པ ་ལས་སོ། །དགེ་འདུན་ལ་འདུན་པ་ལ་ སོགས་པ ་ཕུལ་བ་ནི་ཕུལ་བ་ཉིད་ཡིན་ནོ་ཞེས་བྱ་བ་ནི། གང་ཟག་ལ་འདུན་ པ་ལ་སོགས ་པའི་ཚིག་ལྷུག་པ་ལས་ཕུལ་བ་གསུངས་པ་ཡིན་ཏེ། དེ་བས་ན་དགེ་འདུན་ལ་ཕུལ་བ་ཉིད་ལ་མ་ཕུལ་བ་ཉིད་དུ་ལ་ལ་ཞིག་དོགས་པར་འགྱུར་པ་དེ་བས་ན། དེ་བཟློག་པའི་དོན་དུ་འདི་གསུངས་པ་ཡིན་ནོ། །དེ་ལས་གང་ཡང་རུང་བས་དེ་བརྗོད་པར་བྱ་བ་ཉིད་ཡིན་ནོ་ཞེས་བྱ་བ་ལ། དེ་ལས་ཞེས་བྱ་བ་ནི་དགེ་འདུན་ལས་སོ། །གང་དུ་འདི་ལ་ཕུལ་བ་དེ་ཡོད་པར་འགྱུར་རོ། །དེ་བརྗོད་པར་བྱ་བ་ཉིད་ཡིན་ནོ་ཞེས་བྱ་བ་ལ། དེ་ཞེས་བྱ་བ་ནི་དགེ་འདུན་ལ་འདུན་པ་ལ་ སོགས་པ ་ཕུལ་བ་དེའོ། །འོ་ན་བརྗོད་པ་འདི་དོན་མེད་པ་ཁོ་ན་ཡིན་ཏེ། འདིར་སྨྲ་བ་པོ་འབྱུང་བ་ནི་མི་རིགས་པ་ཁོ་ན་སྟེ། གང་གི་ཕྱིར་གོ་བ་བསྐྱེད་པའི་དོན་དུ་འདི་ནི་མངོན་སུམ་ཉིད་དུ་ཕུལ་བ་པོས་གོ་བ་བསྐྱེད་དོ་ཞེ་ན། དེ་ནི་བདེན་མོད་ཀྱི་འོན་ཀྱང་ཆོ་ག་ལ་འཇུག་པ་ལ་ཕུལ་བ་མ་བྱས་པ་ཉིད་དོ། །དེ་ལྟ་བས་ན་འདིར་དེ་ཐོབ་པའོ། །མཚམས་ཀྱི་ཕྱི་རོལ་ན་གནས་པས་དེ་འབུལ་བ་དང་འབུལ་དུ་གཞུག་པར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་འདུན་ པ་ལ་སོགས ་པའོ། །མི་ཆགས་པ་མི་བྱའོ་ཞེས་བྱ་བ་དེའི་འདི་སྤྲོས་པ་ཡིན་ནོ། །མཚམས་གཞན་ན་གནས་པ་ནི་གང་ལ་ཡང་ཡན་ལག་ཉིད་མ་ཡིན་ནོ་ཞེས་གསུངས་པ་དེས་འདིར་མི་འཆགས་པ་བྱས་པ་ཉིད་ཡིན་ནོ། །བརྒྱུད་པས་མི་བྱ་འོ་ཞེས་བྱ་བ་ནི་འབུལ་བ་དང་འབུལ་དུ་གཞུག་པར་བྱ་ཞེས་བྱ་བར་སྦྱར་རོ། །ལེན་པར་བྱེད་པས་གཞན་ལ་ཕུལ་བ་དེས་ཀྱང་གཞན་ཞིག་ལ་འབུལ་བ་ནི་བརྒྱུད་པ་ཡིན་ནོ། །ན་བ་དང་དབང་མེད་པ་དང་སྲོག་དང་ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་གཞན་པས་འབུལ་བ་ལ་ཉེས་བྱས་སོ་ཞེས་བྱ་བ་ནི་འདུན་པ་ལ་
སོགས་པ ་འདི་རྣམས་གཞན་ལ་འབུལ་བ་ལ་ནི་ཉེས་བྱས་སུ་འགྱུར་ཏེ། འབུལ་བ་མི་འཆགས་པ་ནི་མ་ཡིན་ནོ། །དེ་ཙམ་གྱི་དབང་གིས་དགེ་བའི་ཕྱོགས་ཀྱི་བར་ཆད་འབྱུང་བར་འགྱུར་བ་དེ་ཡང་འདིར་ཚངས་པར་སྤྱོད་པའི་བར་ཆད་ཡིན་པར་རིག་པར་བྱ་སྟེ་ཞེས་བྱ་བའི་སྒྲས་བསྡུས་པར་རྣམ་པར་གནས་པ་ཡིན་ནོ། །དེ་ལྟར་ཡང་བཅོམ་ལྡན་འདས་ཀྱི་ཉན་ཐོས་ཀྱི་དགེ་འདུན་ནི་དོན་ཉུང་བ་བྱ་བ་ཉུང་བ་ཡིན་པས་ཞེས་བྱ་བ་ནི་མ་འོངས་པ་ལ་རྒྱུ་བསྟན་པ་ཡིན་ནོ། །དེ་བས་ན་དེ་ཙམ་ཉིད་ཀྱིས་ཀྱང་འདིར་ཕུལ་བ་ཉིད་བསྟན་པར་རིག་པར་བྱའོ། །མ་བརྗོད་ན་ནི་མ་གུས་པ་ལས་སོ་ཞེས་བྱ་བ་ནི་འདུན་པ་ལ་ སོགས་པ ་བླངས་པ་མ་བརྗོད་ན་ནི་མ་གུས་པའི་ལྟུང་བྱེད་ཀྱི་རྗེས་སུ་མཐུན་པ་ལས་ཉེས་བྱས་སུ་འགྱུར་བའོ་ཞེས་བྱ་བའི་དོན་ཏོ། །དེས་འཇིགས་པས་མཚམས་ཀྱི་ཕྱི་རོལ་ནས་ཁྱེར་ཏེ་འོངས་པ་ལ་ནི་ཉེས་པ་མེད་དོ་ཞེས་བྱ་བ་ལ། དེས་ཞེས་བྱ་བ་ནི་སྲོག་དང་ཚངས་པར་སྤྱོད་པའི་བར་ཆད་ཀྱིས་འཇིགས་པས་དགྲ་དང་ཕྲད་ པ་ལ་སོགས ་པས་ཡིད་ལ་བྱེད་པ་འཇོམས་པ་གང་ཡིན་པ་དེ་ཡང་འདིར་ཚངས་པར་སྤྱོད་པའི་བར་ཆད་དུ་རྣམ་པར་གནས་པ་ཡིན་ནོ། །དགེ་སྐོས་ཀྱིས་གསོ་སྦྱོང་གི་ཚེ་ཚུལ་ཤིང་བྲིམ་པས་དགེ་སློང་རྣམས་བགྲང་བར་བྱའོ། །ལེགས་པར་ཐོན་པས་གདོན་ཏེ་ཚིག་ཕྱེད་ཀྱང་མ་འཁྲུལ་བ་ཉིད་ནའོ་ཞེས་བྱ་བ་ནི་གསོ་སྦྱོང་ལའོ། །སོ་སོར་ཐར་པ་བཏོན་པས་ནི་གསོ་སྦྱོང་ལས་བཏོན་པ་ཉིད་དོ། །དེ་བས་ན་སོ་སོར་ཐར་པ་ལས་ཞེས་བྱ་བ་འདིར་སྐྱེས་པ་ཉིད་དོ། །བྱེད་པ་པོ་གང་ལ་བསྟན་པ་འདི་ལས་ཡིན་ནམ་ཞེ་ན། དེའི་ཕྱིར་དགེ་འདུན་གྱི་གནས་བརྟན་གྱིས་སོ། །མི་ནུས་པ་ཉིད་ཡིན་ན་གཉིས་པའི་འོ་ཞེས་བྱ་བ་ནི་གནས་བརྟན་གྱིས་བཏོན་པའོ། །དེས་ཀྱང་གསུམ་པའི་འོ་ཞེས་བྱ་བ་ནི། གཉིས་པ་དེས་ཀྱང་མི་ནུས་པ་ཉིད་ཡིན་ན་གསུམ་པས་བསྟན་པར་བྱའོ། །དེས་ཀྱང་ན་རེས་ཀྱིས་སོ་ཞེས་བྱ་བ་ནི། གསུམ་པ་དེས་ཀྱང་མི་ནུས་པ་ཉིད་ཡིན་ན་རེས་ཀྱིས་གདོན་པར་བྱའོ། །འདིར་དགེ་འདུན་གྱིས་གནས་བརྟན་ལ་སྟོན་པའི་གནས་པ་ཐོབ་པ་ཉིད་ཇི་ལྟར་ཡང་འདིར་མཐའ་གཉིས་དང་བྲལ་བ་དེ་ལྟར་རྣམ་པར་གནས་པ་དེའི་འོག་ཏུ་ཞེས་བྱ་བ་ལ། གསུམ་པོ་དེ་ལས་འོག་ཏུ་ཚིག་གདོན་པར་མི་ནུས་ནའོ། །མི་ནུས་
ན་གཞན་ལ་བཅོལ་བར་བྱའོ་ཞེས་བྱ་བ་ནི། རེས་བབ་པའི་ཚེ་འདོན་མི་ནུས་ན་གདོན་པ་གཞན་ལ་བཅོལ་བར་བྱའོ། །མ་བཏུབ་ན་དགེ་འདུན་གྱིས་སོ་ཞེས་བྱ་བ་ནི། མ་བཏུབ་ན་དགེ་འདུན་གྱིས་བཅོལ་བར་བྱའོ། །རྟག་ཏུ་ཡང་ངོ་ཞེས་བྱ་བ་ནི་དགེ་འདུན་གྱིས་བཅོལ་བར་བྱའོ་ཞེས་བྱ་བར་སྦྱར་རོ། །རྡུགས་ན་ལྷག་མ་གཞན་གྱིས་སོ་ཞེས་བྱ་བར་སྦྱར་རོ། །གདོན་པ་ཞེས་བྱ་བར་སྦྱར་རོ། །དུམ་བུ་འཛིན་པ་ཉིད་ཡིན་ན་ཇི་སྙེད་ཀྱིས་འགྲུབ་པ་དག་གིས་སོ་ཞེས་བྱ་བ་ནི་ཇི་སྙེད་ཀྱིས་གདོན་པ་འགྲུབ་པར་འགྱུར་བ་སྟེ་དེ་སྙེད་ཀྱིས་ནི་རྗེས་སུ་བསྒྲུབས་པར་བྱའོ་ཞེས་བྱ་བར་དང་བཅས་པ་ཉིད་ཡིན་ན་གནས་མཛེས་པར་འདོད་པས་གྲོང་དང་མི་ཉེ་བར་གསོ་སྦྱོང་བྱར་མི་རུང་ངོ་ཞེས་བྱ་བ་ནི། སིལ་བུ་དག་ལས་འདི་དང་པོར་བྱས་ཏེ། ཁྱིམ་བདག་དང་རྒྱལ་པོ་དག་ལ་སོགས་པའི་མཐར་ཐུག་པའོ། །གཞན་ནི་ཞུ་བ་ལས་ཏེ། འདི་ནི་ལས་ཀྱི་སྦྱོར་བ་གཞན་ལ་ཡང་དཔེ་ཙམ་དུ་ཟད་དོ། །འགྲོན་པ་མི་སྡོད་ན་འགྲོ་བ་བཞིན་དུ་བྱའོ་ཞེས་བྱ་བ་ནི་མཆོང་བ་བཞིན་དུ་དེ་ཡིད་ལ་འདྲེས་པར་གྱུར་ན། གང་ཞིག་འགྲོ་བའི་བྱ་བ་རྣམས་ཀྱིས་ལས་བྱེད་པའོ། །དེ་ལྟ་བས་ན་མི་སྲིད་པ་ལས་གཞན་དུ་འགྱུར་བ་ཉིད་ལ་དེ་རྗེས་སུ་གནང་བའོ། །སྒྲ་མི་འདོད་ན་མདོར་བསྡུས་པས་སོ་ཞེས་བྱ་བ་ནི། གང་དག་འདིར་སྦྱར་བ་དེ་དག་སྒྲ་མི་འདོད་ན་མདོར་བསྡུས་པས་གསོ་སྦྱོང་བྱ་བའོ། །དེ་ཙམ་ཡང་ན་བྱིན་གྱིས་བརླབ་པོ་ཞེས་བྱ་བ་ནི་མདོར་བསྡུས་པས་བྱ་བ་ལ་སྒྲ་ཇི་ཙམ་འབྱུང་བར་འགྱུར་བའི་སྒྲ་དེ་ཙམ་ཡང་འགྲོན་པ་དག་གིས་མི་འདོད་ན་སོ་སོ་ནས་བྱིན་གྱིས་བརླབ་པར་བྱ་སྟེ། འཁོར་དང་བཅས་པ་ལ་སྒྲ་ལས་གྲོལ་བ་མེད་པས་སོ་སོ་ནས་ཞེས་བྱ་བར་བསྒྲུབ་པར་བྱའོ། །དད་པ་ཅན་དང་གཙོ་བོ་དག་དགའ་བར་འགྱུར་བལྟ་ན་ཆོ་ག་རྗེས་སུ་བསྒྲུབ་པ་ལ་ཁ་ན་མ་ཐོ་བ་མེད་དོ། །དྲུང་དུ་གསོ་སྦྱོང་བྱས་པ་ལ་ཡང་ངོ་ཞེས་བྱ་བ་ནི། གནས་མལ་གྱི་གཞི་ར་གཏོགས་པ་ལས་འདིར་གཉིས་པོ་དེ་དག་གྲངས་སོ། །ཕོངས་པའི་ཚེ་ཁྱིམ་པའི་དྲུང་དུ་བཤགས་པར་བྱའོ་ཞེས་བྱ་བ་ནི་ཆོམ་རྐུན་པ་དག་ལ་དེ་སྐད་གསུངས་པ་ཡིན་མོད་ཀྱི། ཁྱིམ་པ་གཞན་དག་ལ་ཡང་རུང་བ་ཉིད་ཡིན་པའི་ཕྱིར་འདི་རྣམ་པར་གཞག་གོ །དེ་ལྟ་བས་ན་ཀྱལ་ཀ་ཅན་ལ་ སོགས་པ ་དང་རྩེ་རྒོད་ལ་ སོགས་པ ་ལ་
རྒུད་པ་དེ་ཐོབ་པ་དང་དྲུང་དུའོ། །དེ་ལྟ་བས་ན་དེ་དང་ཉེ་བར་འབྲེལ་ལོ། །རབ་ཏུ་བྱུང་ཞིང་བསྙེན་པར་མ་རྫོགས་པའི་དྲུང་དུ་ཡང་དེ་དག་ནི་ཤིན་ཏུ་ཉེས་པ་མེད་པས་དེ་ལས་ཤེས་པར་བྱའོ། །དེ་ལ་ཆོ་ག་རྗེས་སུ་བསྒྲགས་པ་ལ་ཡང་ངོ་ཞེས་བྱ་བ་ལ། དེ་ལ་ཞེས་བྱ་བ་ནི་ཁྱིམ་པ་ལའོ། །ཆོ་ག་ཞེས་བྱ་བ་ནི་རབ་ཏུ་བྱུང་བའི་བསླབ་པ་རྣམས་ལ་ཡང་ངོ༌། །རྒྱལ་པོ་ལ་གོ་བར་བྱ་བ་ལ་ཡང་ངོ་ཞེས་བྱ་བ་ནི། ཆོ་ག་དག་རྗེས་སུ་ཐོབ་པར་བྱ་བ་ལ་ཁ་ན་མ་ཐོ་བ་མེད་དེ། འདིར་རྒྱལ་པོ་ནི་དཔེ་ཙམ་དུ་ཟད་དེ་གང་དུ་ཁྱིམ་གྱི་བདག་པོ་ལ་ཆོས་དང་ལྡན་པའི་དོན་འགྲུབ་པར་དེ་ལ་རིག་པར་བྱའོ། །སྡོམ་པ་མཆོག་དང་འབྲེལ་བར་བྱ་བ་དམན་པ་ལ་བླངས་ཤིང་གཟུང་བ་ཉེ་བར་མི་བྱའོ། །ཆོ་ག་ཐོས་པར་མི་བྱའོ་ཞེས་བྱ་བ་དེ་དང་ལྡན་པར་རིག་པར་བྱའོ། །གཞན་མ་རྫོགས་པ་ལ་མི་འཆགས་པ་མེད་དོ་ཞེས་བྱ་བ་ལ། གཞན་ཞེས་བྱ་བ་ནི་འདོན་པ་གཉིས་ པ་ལ་སོགས ་པའོ། །སྡེ་ཚན་ཐམས་ཅད་འདོན་པར་བརྩམས་པ་མ་རྫོགས་པའོ། །རེག་ནའོ་ཞེས་གང་ཞིག་གསུངས་པ་ནི་མ་རྫོགས་པ་དེ་ལ་མི་ཆགས་པ་མེད་དོ། །འོན་ཀྱང་ཉེས་བྱས་ཙམ་ཞེས་བྱ་བའི་དོན་ཏོ། །ཆོས་མ་ཡིན་པ་མི་བྱའོ་ཞེས་གང་ཞིག་གསུངས་པ་དེ་འདིར་གསོ་སྦྱོང་གི་ཆོས་ཞེས་བྱ་བར་བརྗོད་པར་བྱ་སྟེ། གདོན་པར་བྱ་བ་དང་དེའི་ཚད་དང་དུས་དང་འདོན་པར་བྱེད་པ་རྣམས་དེ་ཁོ་ན་བཞིན་ཉེ་བར་མ་བཟུང་བ་ནི་འདིར་ཆོས་མ་ཡིན་ནོ་ཞེས་བྱ་བ་ལ། དེ་ཁོ་ན་བཞིན་ཞེས་བྱ་བ་ནི་བསྟན་པར་བྱས་ནས་དང་པོ་ལ་ སོགས་པ ་ཉིད་དེ་ཁོ་ན་བཞིན་ཉེ་བར་མ་བཟུང་བ་ནི་སོ་སོར་ཐར་པ་ལས་གཞན་ཡང་བསྟན་པར་བྱས་ཏེ། བསྟན་པ་ཉིད་རྗེས་སུ་མ་བཟུང་བ་ནི་གླེང་གཞི་མི་འདོན་ཅིང་གཞན་མ་བརྗོད་པ་རྣམས་ནི་ཐོས་པ་བསྒྲགས་པས་སྒྲུབ་པར་མི་བྱེད་པ་རྣམས་བསྟན་པར་བྱ་སྟེ། འདི་ཙམ་ཉིད་རྗེས་སུ་མ་བཟུང་བའོ། །གསོལ་བ་མ་བྱས་པ་ལ་ནི་རྩེ་གཅིག་ཏུ་རིག་པར་བྱ་སྟེ། གྲོས་མ་བྱས་པ་དག་ལ་དེ་བྱེད་པ་ནི་གང་ཞིག་མི་ཤེས་པ་ཞེས་བྱ་བ་སྟེ། གསོ་སྦྱོང་གི་དུས་ལས་དུས་གཞན་དུ་བྱེད་པ་ནི་དུས་ཉེ་བར་མ་བཟུང་བའོ། །གང་ཟག་གང་དག་གི་དབང་དུ་གསོ་སྦྱོང་བྱེད་པའི་དབང་དུ་བསྙེན་པར་རྫོགས་པ་དང་བཅས་པ་དང་ལྟ་བ་དང་ཚུལ་ཁྲིམས་དག་གིས་རིགས་མཐུན་པ་དེ་རྣམས་ལས་གཞན་པས་བྱེད་པའོ། །ཡང་ན་འདོན་པར་མི་བྱེད་པ་དང་མི་འཛིན་པའོ། །གནས་
དེ་ནས་འགའ་ཡང་མ་སོང་བ་ཉིད་ཡིན་ན་ངེས་པ་ཡིན་ནོ་ཞེས་སྔར་གང་བསྟན་པ་དེ་ལ་དེའི་ངོ་བོ་བསྟན་པའི་ཕྱིར། །ཐོས་པའི་ཉེ་འཁོར་ལས་འདས་པ་ཉིད་ནི་སོང་བ་ཉིད་ཡིན་ནོ་ཞེས་བྱ་བ་ལས་སོ། །གསོ་སྦྱོང་གི་གཞི་དང་འབྲེལ་པ་རྣམ་པར་འབྱེད་ པ་ལ་སོགས ་པའི་སྐབས་སོ། །གསོ་སྦྱོང་གི་གཞི་རྫོགས་སོ།། །།དབྱར་གནས་པར་ཁས་བླང་བར་བྱའོ་ཞེས་བྱ་བ་སྨོས་ཏེ། དུས་ཇི་སྲིད་དུ་ཞེ་ན། དེའི་ཕྱིར་ཟླ་བ་གསུམ་དུའོ་ཞེས་བྱ་བ་སྨོས་སོ། །ཉི་མ་གང་ལ་དེ་རྣམས་དེ་སྲིད་དུ་ཁས་བླང་པར་བྱ་ཞེ་ན། དེའི་ཕྱིར་ཚེས་བཅུ་དྲུག་ལའོ་ཞེས་བྱ་བ་སྨོས་སོ། ཟླ་བ་གང་གི་ཞེ་ན་དེའི་ཕྱིར། དབྱར་ཟླ་འབྲིང་པོ་ཉའི་ཕྱེད་དེ་ཉིན་པར་གྱིའོ་ཞེས་བྱ་བ་སྨོས་ཏེ། དབྱར་ཟླ་འབྲིང་པོ་ཉའི་ཕྱེད་དེ་ཉིན་པར་ཞེས་བྱ་བ་ནི་དབྱར་འབྲིང་པོ་ཚེས་བཅུ་དྲུག་གི་ཚེས་སུ་གྱུར་པ་ལ་ཞེས་བྱ་བའི་དོན་ཏོ། །དབྱར་ཉེ་པར་སྒྲུབ་པར་དབྱར་ཟླ་འབྲིང་པོར་སྒྲུབ་པ་ཞེས་བྱ་བའི་ཚིག་གང་ཞིག་ཡང་དག་པར་བྱེད་པའོ། །དབྱར་ཞེས་བྱ་བ་ནི་དེར་ཉེ་བར་སྒྲུབ་པའོ་ཞེས་བྱ་བ་དེའི་དོན་ཏོ། །གང་ཟག་ཉེ་བར་འགྲོ་བ་མ་ཡིན་པ་རྒྱུ་མཚན་ཉིད་ཀྱིས་སོ་སོར་ཉེ་བར་གནས་པས་དབྱར་ཞེས་བྱ་བའོ། །དབྱར་ཟླ་ཐ་ཆུངས་ཉའིའོ་ཞེས་བྱ་བ་ནི་དེ་མ་ཐག་པ་ཞེས་བྱ་བར་སྦྱར་རོ། །དེའི་མཐར་དབྱར་ཟླ་ཐ་ཆུངས་ཉའི་ཕྱི་དེ་ཉིན་པར་ཞེས་བྱ་བ་ནི། ཉའི་དེ་མ་ཐག་པ་ནི་ཚེས་བཅུ་དྲུག་སྟེ། སྟོན་ཟླ་ར་བའི་ཚེས་ལ་ཞེས་བྱ་བའི་དོན་ཏོ། །ཞག་བཅུའམ་ཟླ་བ་ཕྱེད་ཀྱིས་འབྱུང་བར་འགྱུར་བ་ཉིད་ན་གཙུག་ལག་ཁང་བྱི་དོར་བྱའོ་ཞེས་བྱ་བ་ནི་གནས་པར་ཁས་བླངས་པ་ཞེས་བྱ་བའི་སྐབས་ཀྱིས་རྟོགས་པའོ། །ཁ་ཅིག་ལས་ནི་བདུན་ནམ་བརྒྱད་ནའོ་ཞེས་བྱ་བ་ནི་ལུགས་ཁ་ཅིག་ལས་ཞེས་བྱ་བར་དགོངས་སོ། །ཉི་མ་སྔ་མ་ལ་གནས་མལ་བསྡོག་གོ་ཞེས་བྱ་བ་ནི། ཁས་བླངས་པ་དེའི་ཉི་མ་སྔ་མ་སྟེ་ཚེས་བཅུ་དྲུག་པའི་སྔ་མ་ལ་ཚེས་བཅོ་ལྔ་ལ་ཞེས་བྱ་བའི་དོན་ཏོ། །ཁྲིའུ་དང་ཆོལ་ཟངས་ཡན་ཆད་དོ་ཞེས་བྱ་བ་ནི་ཐ་ན་ཁྲིའུ་དང་ཆོལ་ཟངས་ཀྱི་བར་ཡན་ཆད་ཀྱང་དེའི་ཉིན་མོ་བསྡོག་པར་བྱའོ་ཞེས་བྱ་བའི་དོན་ཏོ། །དེ་སྟོབས་པ་བསྐོ་བར་བྱའོ་ཞེས་བྱ་བ་ལ། དེའི་སྒྲས་ནི་གནས་མལ་སྟོབས་པ་ཡང་བསྡུས་པའོ། །མི་ནུས་ན་དུ་མའོ་ཞེས་བྱ་བ་ནི་གཅིག་གིས་གནས་མལ་སྟོབས་པར་མི་ནུས་པ་ན། གནས་མལ་སྟོབས་པ་དུ་མ་བསྐོ་
བར་བྱའོ་ཞེས་བྱ་བའི་དོན་ཏོ། །བསྐོས་པའི་འོག་ཏུ་དེས་ཅི་ཞིག་བྱ་ཞེ་ན། དེའི་ཕྱིར། དེས་དྲི་དག་གིས་བསླུས་པའི་ཚུལ་ཤིང་གཟེབ་ཀྱི་སྤྲོག་མར་རས་དཀར་པོ་བཏིང་བས་དཀྲིས་པ་དག་རྒན་རིམས་སུ་བཞག་ནས། ཚེ་དང་ལྡན་པ་དག་གནས་འདི་ན་ཁྲིམས་སུ་བཅས་པ་འདི་དང་འདི་ཡོད་དེ། ཁྱེད་ཅག་ལས་གང་ཁྲིམས་སུ་བྱ་བ་འདི་དང་འདིས་གནས་པར་སྤྲོ་བ་དེས་ནི་ཚུལ་ཤིང་ལོང་ཤིག་ཁྱེད་ཅག་ལས་སུས་ཀྱང་དབྱར་དགེ་འདུན་གྱི་ནང་དུ་འཁྲུག་ལོང་བསྐྱེད་པར་མི་བྱའོ། །ཁྱེད་ཅག་ལས་གང་གིས་འགའ་ཞིག་ལས་ཅུང་ཟད་ཤེས་པ་དེས་ང་སྨྲོས་ཤིག །ཁྱེད་ཅག་ལས་གང་དབྱར་གྱི་ནང་དུ་དགེ་འདུན་ལས་འཁྲུག་ལོང་སྐྱེད་པར་འགྱུར་བ་དེ་ལ་དགེ་འདུན་གྱིས་ཕྱིས་ཉེ་བར་བརྟག་པར་དགོངས་སོ་ཞེས་དགེ་སློང་རྣམས་ལ་གོ་བར་བྱའོ་ཞེས་སྨོས་ཏེ། དེས་ཞེས་བྱ་བ་ནི་གནས་མལ་སྟོབས་པས་སོ། །སྨྲོས་ཤིག་ཅེས་བྱ་བས་ནི་དགོད་པ་པོས་གོ་བར་བྱའོ་ཞེས་བྱ་བ་ནི་ཕིགས་པར་བྱའོ་ཞེས་བྱ་བའི་དོན་ཏོ། །གཞན་གྱིས་བླང་བ་དང་ཁས་བླང་བའི་ཕྱིར་དགེ་འདུན་ལ་གསོལ་བ་བྱའོ་ཞེས་བྱ་བ་ནི། །གནས་མལ་སྟོབས་པའི་དགེ་སློང་དེ་ལས་གཞན་པའི་དགེ་སློང་གིས་སོ། །དགེ་སློང་གཞན་གཅིག་གིས་ཚུལ་ཤིང་བླངས་པ་དང༌། དབྱར་གནས་ཁས་བླངས་པའི་ཕྱིར་གོ་བར་བྱ་ཞེས་བྱ་བའོ། །གསོལ་བ་གཅིག་དང་འབྲེལ་བ་ཉིད་ལ་དོན་གཉིས་བརྗོད་པའོ། །ཚུལ་ཤིང་བྲིམ་མོ། །དང་པོ་སྟོན་པའི་བླང་ངོ་ཞེས་བྱ་བ་ནི། ཚུལ་ཤིང་བྲིམ་པ་པོས་ཚུལ་ཤིང་བྲིམ་པར་བྱ་བའོ། །གཞན་དག་གིས་ནི་སྟན་ལས་ཕྱེད་འཕགས་པས་སོ་ཞེས་བྱ་བ་ནི། སྟོན་པའི་ཚུལ་ཤིང་ལེན་པ་ལས་གཞན་པས་སོ། །དགེ་ཚུལ་རྣམས་ཀྱི་ནི་སློབ་དཔོན་དང་མཁན་པོ་དག་གིས་སོ། །མཇུག་ཏུ་གཉུག་མར་གནས་པ་རྣམས་ཀྱི་དེ་ཡང་ངོ་ཞེས་བྱ་བ་ནི། འཕྲོག་མ་ལ་ སོགས་པ ་དག་གིས་ཚུལ་ཤིང་བྲིམ་པའོ། །དེ་ཡང་ཞེས་བྱ་བ་ནི་ཚུལ་ཤིང་ལ་གཏོགས་པའོ། །གང་གི་ཚེ་དེ་རྣམས་ལ་འདི་ཡིན་ཞེ་ན། དེའི་ཕྱིར་མཐར་དལ་བུས་གཞག་པར་བྱའོ་ཞེས་བྱ་བ་སྨོས་ཏེ། ཚུལ་ཤིང་རྣམས་གཞག་གོ་ཞེས་གསུངས་པ་ཡིན་ནོ། །དེ་ལ་གནས་ཁང་བསྟབས་པ་ཞེས་སྨོས་པས་འདིར་འདི་ཡང་སྨོས་པར་འགྱུར་བ་དེ་ལྟ་བས་ན་མདོ་འདི་བྱས་པ་ཡིན་ནོ། །བགྲངས་ནས་གནས་འདིར་དགེ་སློང་
འདི་སྙེད་ཀྱིས་ཚུལ་ཤིང་བླངས་སོ་ཞེས་གོ་བར་བྱའོ་ཞེས་བྱ་བ་ལ་ཞེས་བྱ་བའི་སྒྲས་ནི་འདི་ལྟར་དགེ་འདུན་ལ་གོ་བར་བྱའོ་ཞེས་བྱ་བའི་དོན་ཏོ། །གནས་ཀྱི་གཞི་བསྟབ་པར་བྱའོ། །དེ་དག་གི་སྒོ་ལྕགས་དང་ལྡེ་མིག་བླངས་པས་མདུན་དུ་འདུག་དུ་སྟེ། །གནས་བརྟན་གཙུག་ལག་ཁང་ཆེ་མི་ནི་རྙེད་པ་དང་བཅས་པ་གོས་ཀྱི་རིན་དང་བཅས་པ་ལགས་ཀྱིས་བཞེས་ཤིག་ཅེས་ཡོན་ཏན་ཇི་ལྟ་བ་བཞིན་དུ་མོས་པ་བསྐྱེད་ཅིང་ལེན་དུ་གཞུག་གོ་ཞེས་བྱ་བ་ལ། བླངས་པས་ཞེས་བྱ་བ་ནི་དེའི་ཚེ་གནས་ཀྱི་གཞི་གང་ལ་བསྟབ་པར་བྱ་བ་དེ་ལའོ། །སྒོ་ལྕགས་དང་ལྡེ་མིག་ཅེས་བྱ་བ་ནི། དེ་གཉིས་གང་གིས་བླངས་པ་ཞེས་བྱ་བའི་བསྡུ་བའོ། །ཡོན་ཏན་ཇི་ལྟ་བ་བཞིན་དུ་ཞེས་བྱ་བ་ནི། གནས་ཀྱི་གཞི་དེའི་ཡོན་ཏན་གང་ཡིན་པས་དེ་མོས་བསྐྱེད་པར་བྱ་ཞེས་བྱ་བའི་དོན་ཏོ། །བླང་བ་ལ་ སོགས་པ ་ནི་ལྷུང་བཟེད་དང་འདྲའོ་ཞེས་བྱ་བ་ལ། དགོས་པ་བླང་བ་དང་བླངས་པ་མ་ཡིན་པ་སྟེ། བར་ཆོད་པ་ཚིག་གཉིས་པ་ལ་མི་སྦྱིན་ཞིང་ཕྱི་མ་ལ་ནི་མ་ཡིན་ཞེས་བྱ་བ་འདི་ནི་གཞན་ལ་ཡང་འགྲེ་བའོ། །མཆོད་རྟེན་དང་དགེ་འདུན་གྱི་དོན་མ་ཡིན་པར་སེང་བར་ཤེས་པ་ལ་ནི་འཐེབ་ཉིད་ལས་བསྐོར་བར་བྱའོ་ཞེས་བྱ་བ་ནི། མཆོད་རྟེན་དང་དགེ་འདུན་གྱི་དོན་ལ་མ་སོང་བ་ལ་ཇི་ལྟར་རྒན་རིམས་ཉིད་ཀྱི་དགེ་འདུན་གྱི་གནས་བརྟན་ཡོད་པ་ལ་བཙུན་པ་ཉེ་དགས་རྒན་པ་གཞན་འོངས་པ་ལ་བདག་ཉིད་དང་ལྷན་ཅིག་དགེ་འདུན་གནས་བརྟན་དུ་གྱུར་ནས་གནས་བརྟན་གཉིས་པས་གནས་པར་བྱ་སྙོམ་པའི་བློས་གཙུག་ལག་ཁང་གཞན་དུ་སོང་བ་ན། དེར་དགེ་འདུན་གྱི་གནས་བརྟན་གྱི་རྙེད་པ་དང༌། རྙེད་པ་སྔ་མ་གནས་བརྟན་གཉིས་པའི་རྙེད་པ་དང༌། མཉམ་པར་ཤེས་ནས་དགོས་པ་མེད་པར་ཅིའི་ཕྱིར་དགེ་འདུན་གྱི་གནས་བརྟན་ཉིད་བདག་གིས་བྱའོ་སྙམ་པའི་བློ་སྔོན་དུ་བཏང་ནས། གཙུག་ལག་ཁང་དུ་ཕྱིན་པ་དང་སྔར་བསྟན་པའི་གནས་མལ་ལ་ཇི་ལྟར་འཕེལ་བ་ཉིད་ཀྱིས་མལ་སྟན་སློང་བར་བྱེད་པ་ཞེས་བྱ་བ། བཅོམ་ལྡན་འདས་ཀྱིས་གསུངས་བའི་ལུང་ལས་འབྱུང་བ་ཡིན་ནོ། །དགེ་འདུན་གྱིའམ་མཆོད་རྟེན་གྱི་བྱ་བ་ལ་སོང་བར་གྱུར་པ་གང་ཡིན་པ་དེ་ལ་ཇི་ལྟར་རྒན་རིམས་ཀྱིས་གནས་མལ་བསྟབ་པར་བྱའོ། །གཞན་ལ་ནི་ཇི་ལྟར་འཐེབ་ཉིད་ལས་བསྐོ་བར་བྱའོ་ཞེས་སྨོས་པ་སྟེ། དེ་བས་ན་མདོ་འདི་སྟེ་ཇི་ལྟར་བསྐོ་བ་ལས་
གཞན་པས་བསྐོ་བར་བྱའོ། །འདི་ཇི་ལྟར་འཐེབ་ཀྱི་དོན་འདིའོ། །གནས་མལ་གྱི་གཞི་ལས་འདི་དང་པོར་བྱ་སྟེ། སྔར་རྟོག་པའི་དགེ་སྐོས་ཀྱིས་ཞེས་བྱ་བ་དེ་བས་ན་འདིར་གྲགས་པ་ཡིན་ནོ། །གང་དུ་གཞུང་འཆད་པར་འགྱུར་བ་འདི་དང་གཞན་དེ་སྤངས་ནས་དུ་མ་ཉིད་མ་ཡིན་པ་གཙུག་ལག་ཁང་དུ་ཞེས་བྱ་བ་འདི་ཡང་དྲངས་པ་ཡིན་ནོ། །ཤིང་ལྗོན་པའི་དྲུང་དང་ནེའུ་གསིང་གི་གཞི་དག་ལ་ཡང་རྒན་རིམས་སུ་བསྐོ་བར་བྱའོ། །གནས་ཁང་གིས་མི་ཆོག་ན་གཉིས་ལ་ སོགས་པ ་དག་ན་ཐ་ན་དེའི་ས་གཞི་གདིང་བའི་ཚད་ཙམ་ཡང་ངོ་ཞེས་བྱ་བ་ལ། མི་ཆོག་ན་ཞེས་བྱ་བ་ནི། གལ་ཏེ་དགེ་སློང་ཐམས་ཅད་ལ་རེ་རེ་ལ་བསྐོར་མི་ཆོག་ན་འདི་རྣམས་ཐམས་ཅད་ཀྱིས་གནས་ཀྱི་གཞི་ཐོབ་པའི་མཐར་ཐུག་པ་མ་ཡིན་ པ་སྟེ། སོགས ་པའི་སྒྲས་གྲངས་པར་བསྟན་པའི་ཕྱིར་ཐ་ན་ཞེས་སྨོས་སོ། །དེའི་ས་ཞེས་བྱ་བ་ནི་གནས་ཁང་གིས་གཞིར་བཏིང་བའི་ཚད་ཙམ་ཡང་བསྐོ་བ་ཞེས་བྱ་བའི་དོན་ཏོ། །ལྷུང་བཟེད་དང་བྱ་བ་བུམ་དང་འདག་རྫས་དང༌། སོ་ཤིང་དང༌། སྨན་གྱི་གནས་ལ་ལྟོས་པར་བྱའོ་ཞེས་བྱ་བ་ལ་ལྟོས་པར་བྱའོ་ཞེས་བྱ་བ་ནི། གདིང་བའི་ཚད་ཙམ་དུ་བསྐོ་བར་བྱའོ། །དེ་དོར་ནས་ནི་མ་ཡིན་ཏེ་དེ་ལྟར་མ་ཡིན་ནོ། །ཇི་ལྟར་དེ་འབྱུང་བར་མི་འགྱུར་ཞེས་བྱ་བའི་དོན་ཏོ། །ཁ་ཅིག་ནི་འདིར་སྨན་གྱི་ཚིག་དུ་ཡང་བྱེད་དོ། །དེ་ནི་མི་རིགས་ཏེ་ནད་པས་བསྟེན་པར་བྱའི་གཞན་གྱིས་ནི་བཟའ་བར་བྱ་བ་མ་ཡིན་པ་ཉིད་ཀྱི་ཕྱིར་རོ། །སྒོ་ཁང་དང་ཐེམ་སྐས་ཀྱི་ལྐོག་དང༌། ཁྱམས་དང་དཔོང་ས་དང་བཀད་ས་དང་བསྲོ་ཁང་གི་ར་བ་དག་ནི་བསྐོ་བར་མི་བྱའོ་ཞེས་བྱ་བ་ལ། འདི་ནི་མི་ཆོག་པ་ལ་བསྐོ་བར་བྱ། ཤེས་པར་བྱ་བ་མ་ཡིན་ཞེས་བྱ་བའི་དོན་ཏོ། །འདིར་འདིར་གཞུང་ནི་རྣམ་པར་འབྱེད་པ་ལས། དགེ་སློང་དག་གནས་དྲུག་པོ་འདི་དག་ནི་བསྒོ་བར་མི་བྱ་བ་དག་སྟེ། སྒོ་ཁང་ཐམས་ཅད་དང༌། ཐེམ་སྐས་ཀྱི་ལྐོག་དང་ཁྱམས་དང་དཔོང་སའི་ར་བ་དང་བཀད་སའི་ར་བ་དང་བསྲོ་ཁང་གི་ར་བ་དག་སྟེ། སྐོ་བར་བྱེད་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །མཚན་མོ་གནས་མལ་མི་བསྐོའོ་ཞེས་བྱ་བ་ནི་བསྐོ་བར་མི་བྱའོ་ཞེས་བྱ་བར་སྦྱར་རོ། །ཁྲི་ལ་ སོགས་པ ་ལ་ཡང་ཆོ་ག་འདི་ཉིད་ཡིན་ཏེ། གནས་ཁང་ཉིད་ལ་
ནི་མ་ཡིན་ནོ་ཞེས་བྱ་བ་དེ་ཉིད་ཀྱི་ཕྱིར་གནས་མལ་ཞེས་སྨོས་སོ། །གནས་ཁང་གི་གཞིར་གྱུར་པའི་གནས་པའི་སྒྲ་འདི་གྲགས་པ་སྟེ། དེའི་ཕྱིར་ཤིང་ལྗོན་པའི་རྩ་བ་ལ་ སོགས་པ ་ལ་འདིས་ཆོ་ག་འདི་ལ་བྱས་པ་ཉིད་མ་ཡིན་ནོ། །ནད་པ་འདུག་པའི་གནས་ཁང་གཞན་ལ་མི་སྦྱིན་ནོ་ཞེས་བྱ་བ་ནི་གནས་ཁང་ཞེས་སྨོས་པས་ནི་ཁྲི་ལ་ སོགས་པ ་བཟློག་པའི་ཕྱིར་བསྟན་ཏོ། །དེ་ཉིད་ཐོབ་པ་མེད་ན་མི་སྦྱིན་པར་མི་བྱའོ་ཞེས་བྱ་བ་ལ། དེ་ཉིད་ཅེས་བྱ་བ་ནི་དེ་ལྷག་པར་གནས་པ་ཉིད་ལ་ཐོབ་པ་ལ་ཇི་ལྟར་རྒྱན་རིམས་སུ་མ་བྱས་པར་ནད་པ་ལ་གནས་ཁང་སྦྱིན་པར་མི་བྱའོ། །འདིར་གཞུང་ནི། དགེ་སློང་ནད་པའི་གནས་ཁང་གཞན་ལ་བསྐོ་བར་མི་བྱའོ། །བསྐོ་ན་འགལ་ཚབས་ཅན་དུ་འགྱུར་རོ། །འདིར་ནད་པ་ཞེས་བྱ་བ་ནི་སྦྱོར་མི་བཟོད་པ་ཡིན་པར་ཤེས་པར་བྱ་སྟེ། དེ་ལྟ་བས་ན་ནད་པ་སྦྱོར་མི་བཟོད་པ་ཞེས་བྱ་བ་དེ་ལས་རྟོགས་པར་བྱའོ། །དེ་དང་དེའི་གཡོག་ལས་བྱེད་དུ་མི་གཞུག་གོ་ཞེས་བྱ་བ་ལ། དེ་ཞེས་བྱ་བ་ནི་ནད་པ་དེའོ། །དེའི་ཞེས་བྱ་བ་དེ་ནི་ནད་པ་དེའི་འོ། །མཛེ་ཅན་གྱིས་དགེ་འདུན་གྱི་གནས་མལ་ལ་སྤྱད་པར་མི་བྱའོ་ཞེས་བྱ་བ་ནི་གོས་ཀྱི་གཞི་ལས་དེ་དང་པོར་བྱ་སྟེ། ནད་གཡོག་སྦྱིན་པས་འདི་ལ་སྙིང་བརྩེ་བར་བྱའོ་ཞེས་བྱ་བའི་མཐར་ཐུག་པའོ། །དེ་ལ་གནས་དབེན་པ་སྦྱིན་ནོ་ཞེས་བྱ་བ་ལ། དེ་ལ་ཞེས་བྱ་བ་ནི་མཛེ་ཅན་ལའོ། །འདིར་གནས་དབེན་པ་ཞེས་བྱ་བ་ནི་གཞན་དག་གིས་འདོད་པའོ། །དེ་ལས་ཐ་དད་པར་ཤེས་པར་བྱ་བ་མ་ཡིན་ནོ། །དབེན་པར་དེ་ཉིད་ཀྱིས་གང་ཞིག་སྦ་བ་ཉིད་དེ་འདིར་རིགས་པ་ཡིན་ནོ། །དགེ་འདུན་གྱིས་བསྟེན་པར་བྱ་བ་དང་བཅས་པ་ཐ་ན་ཁྱམས་དང༌། ཁྱམས་གྲུ་བཞི་དང༌། སྒོ་ཁང་དང༌། བང་རིམ་དང༌། འཆགས་དང༌། ཤིང་དྲུང་གི་གནས་དེར་ཡང་འདུག་པར་མི་བྱའོ་ཞེས་བྱ་བ་ལ། བསྟེན་པ་ཞེས་བྱ་བ་ནི་བསྟེན་པ་ཡོད་པར་གྱུར་པ་ལ་དུས་དུས་སུ་བསྟེན་པར་བྱའོ་ཞེས་བྱ་བའི་དོན་ཏོ། །གང་གིས་ཡིན་ཞེ་ན། དགེ་འདུན་གྱིས་ཞེས་བྱ་བར་སྦྱར་རོ། རབ་ཏུ་བྱུང་བ་ཞེས་བྱ་བར་ཤེས་པར་བྱའོ། །གནས་པས་ཀུན་ནས་ལོངས་སྤྱད་པ་ནི་བསྟན་པ་ཞེས་བརྗོད་པ་ཡིན་ནོ། །བཤང་བ་དང་གཅི་བའི་སྐྱབས་གཉིས་སུ་འཇུག་པར་མི་བྱའོ་ཞེས་བྱ་བ་ནི་དགེ་འདུན་དག་
གིས་ཞེས་བྱ་བ་འཇུག་གོ །དེ་ལ་གཡོག་བསྐོ་བས་སྙིང་བརྩེ་བར་བྱའོ་ཞེས་བྱ་བ་ནི་ནད་ཡུན་རིང་ཞིང་ཆེ་བ་ཡིན་པའི་ཕྱིར་ནད་གཡོག་དེ་མེད་ན་སྦྱིན་པར་བྱའོ་ཞེས་བྱ་བ། ཆོ་ག་འདི་ལ་འདིར་མ་སྦྱར་བ་གང་ཡིན་པའི་བརྡ་དེ་ལ་དེའི་དོགས་པ་བསལ་བའི་དོན་དུའོ། །དུས་ཐམས་ཅད་དུ་དགོན་པ་དག་ལ་ལྷུང་བཟེད་དང་ཆོས་གོས་གཞག་པའི་ཕྱིར་གནས་ཁང་བསྐོ་བར་བྱའོ་ཞེས་བྱ་བ་ལ། འདིར་གཞུང་ནི། དགེ་སློང་དགོན་པ་དག་དང་གཙུག་ལག་ཁང་དུ་ལྷགས་ཏེ། གནས་ཁང་དག་རྙེད་པ་ན་དགེ་སློང་དག་ལས་མ་ཐོབ་ནས། བཅོམ་ལྡན་འདས་ཀྱིས་བཀའ་སྩལ་ནས། གཙུག་ལག་ཁང་དུ་དགེ་སློང་དགོན་པ་པ་རྣམས་ཀྱི་ལྷུང་བཟེད་དང༌། ཆོས་གོས་གང་དུ་འཇོག་པའི་གནས་ཁང་བསྐོ་བར་བྱའོ་ཞེས་གསུངས་པ་ལྟ་བུ་ཡིན་ནོ། །དུས་ཐམས་ཅད་དུ་ཞེས་བྱ་བ་ནི་དབྱར་དག་ཉི་ཚོར་མ་ཟད་ཀྱི་གང་ཞིག་འདིར་སྨོས་པའི་གཞུང་ལས་དུས་ཀྱི་ཁྱད་པར་ལ་མ་བསྟེན་པ་དེ་བས་ན་མདོའི་ཚིག་འདི་སྨོས་ཏེ། དེའི་ཕྱིར་དབྱར་གནས་པར་ཁས་བླངས་པ་ན་ཁ་ཅིག་གློ་བུར་དུ་འོང་སྲིད་པས་གནས་དང་གནས་མལ་གཞག་པར་བྱའོ་ཞེས་བྱ་བ་སྨོས་ཏེ། དུས་ཐམས་ཅད་དུ་ཞེས་བྱ་བ་འདི་ལ་རྗེས་སུ་འཇུག་པ་མེད་པར་བསྟན་པའི་དོན་དུ་ནི་འདི་ཡིན་ཏེ། བྱེ་བྲག་ཡང་ཡོངས་སུ་མ་སྨོས་པའི་ཕྱིར། ཁས་བླངས་པ་གཉིས་ཀ་ལ་ཡང་སྔ་མ་དང་ཕྱི་མ་ཞེས་བྱ་བར་རིག་པར་བྱའོ། །གཞི་ཞེས་བྱ་བ་ནི་གནས་ཀྱི་གཞིའོ། །མང་པོ་དག་ལྷགས་ན་གནས་པ་གང་གིས་གཟོང་བསྐོ་བར་བྱའོ་ཞེས་བྱ་བ་ནི་དགེ་སློང་གློ་བུར་པ་མང་པོ་དག་ལྷགས་ན་སྔར་གནས་པར་ཁས་བླངས་པ་དག་གིས་གནས་མལ་གཟོད་བསྐོ་བར་བྱའོ། །གནས་པར་ཁས་བླངས་པ་ཕྱིན་ཆད་མི་བྱའོ་ཞེས་བྱ་བ་ནི་སླར་བསྐོ་བ་གཉིས་པ་ལ་ཁས་བླངས་པ་ཕྱི་མ་ཤོས་གང་ཡིན་པ་ཞེས་བྱ་བ་དེ་ལས་ཡིད་ཆེས་པའོ། །འདིར་གཞུང་ནི་རྣམ་པར་འབྱེད་པ་ལས། དགེ་སློང་དག་པས་དགེ་སློང་མ་འོངས་པ་རྣམས་ལ་བསྟེན་ནས་དབྱར་གནས་པར་ཁས་བླངས་པ་གཉིས་པ་བཅས་ཀྱི་གསུམ་པ་ནི་མ་ཡིན་ནོ་ཞེས་གསུངས་པ་ཡིན་ནོ། །མང་བ་ཉིད་ཡིན་ན་གཅིག་ལ་ཡང་གཉིས་ལ་ སོགས་པ ་ཁྱབ་པའི་བར་དག་གོ་ཞེས་བྱ་བ་ལ། གཉིས་ལ་ སོགས་པ ་ཞེས་
བྱ་བ་ནི་གནས་ཀྱི་གཞི་ལ་ སོགས་པ ་ནས་ཐ་མ་བསྟན་པར་བྱེད་དེ་མང་བ་ཉིད་ཡིན་ན་ཞེས་བྱ་བ་སྟེ། བསྐོ་བར་བྱའོ་ཞེས་སྦྱར་རོ། །ས་དེ་སྙེད་དུ་མང་བའི་གཞི་དག་ལ་རེ་རེ་ལ་བསྐོ་བར་བྱའོ། །ཇི་སྙེད་པ་བསྐོ་བ་རྣམས་ལ་ཐམས་ཅད་ཀྱི་བསྐོ་བ་འགྲུབ་པར་འགྱུར་ཞེས་བྱ་བའི་དོན་ཏོ། །ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་བྱ་བ་ནི། གནས་མལ་ཞེས་སྨོས་པ་ནི་དཔེ་ཙམ་དུ་ཟད་དེ་གཙུག་ལག་ཁང་ལ་ སོགས་པ ་ཡང་གནས་པ་ཡིན་ནོ། །འདིར་གཞུང་ནི། ཕྲན་ཚེགས་དག་ལས། དགེ་སློང་གིས་ཞག་གཅིག་གི་དོན་དུ་གནས་མལ་མནོད་པར་མི་བྱའོ་ཞེས་གསུངས་པ་ཡིན་ནོ། །རྙེད་པ་འདོད་པས་གཙུག་ལག་ཁང་མི་མནོད་དོ་ཞེས་བྱ་བ་ནི་གནས་མལ་ལ་ཡང་འཕངས་པ་ཉིད་དུ་རིག་པར་བྱའོ། །འདིར་གཞུང་ནི། །དེ་ནས་དུས་གཞན་ཞིག་ན་དགེ་སློང་རྣམས་ལ་རྒན་རིམས་བཞིན་དུ་གནས་མལ་སྟོབས་པར་བྱེད་ན། བྲམ་ཟེ་ཞིག་གཙུག་ལག་ཁང་དུ་འོངས་ནས་དེས་དེ་མཐོང་བ་དང༌། གང་གི་ཕྱིར་འདི་བཞིན་བགོ་བཤའ་བྱེད་པའི་ངང་ཚུལ་ཅན་ཤཱཀྱའི་སྲས་ཀྱི་དགེ་སློང་འདི་དག་ལ་སུ་ཞིག་མངོན་པར་དད་པར་མི་འགྱུར་སྙམ་དུ་དད་པ་སྐྱེས་པར་གྱུར་ནས། དེས་གཙུག་ལག་ཁང་བྱེད་དུ་བཅུག་སྟེ་དགེ་སློང་གི་དགེ་འདུན་ལ་ཕུལ་བ་དང༌། དགེ་སློང་རྣམས་ཀྱིས་སྨྲས་པ། ཧ་ཅང་གཤེར་ཆེས་སོ་ཞེས་མི་ལེན་པ་དང༌། དེས་ཕྲུས་འདེབས་སུ་བཅུག་སྟེ་ཕུལ་ལོ། །དགེ་སློང་རྣམས་ཀྱིས་སྨྲས་པ། ཧ་ཅང་དགོན་དུང་ཆེས་སོ་ཞེས་མི་ལེན་པ་དང༌། བྲམ་ཟེ་དེས་དེ་དག་རྙེད་པ་འདོད་པས་མི་ལེན་པར་རིག་ནས། བྲམ་ཟེ་དེས་ཤཱཀྱའི་སྲས་ཀྱི་དགེ་སློང་དག་གིས་རྙེད་པ་འདོད་པས་གཙུག་ལག་ཁང་ལེན་ཏོ་ཞེས་བྱ་བར་རྩོམ་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་རྣམས་ཀྱིས་རྙེད་པ་འདོད་པས་གཙུག་ལག་ཁང་བླང་བར་མི་བྱ་སྟེ། འོན་ཀྱང་སྦྱིན་བདག་རྣམས་ལ་རྗེས་སུ་སྙིང་བརྩེ་བས་གཙུག་ལག་ཁང་རྣམས་བླང་བར་བྱའོ་ཞེས་གསུངས་པ་དེ་འདིས་བསྡུས་པ་ཡིན་ནོ། །དེ་ལྟ་བས་ན་འདིར་བརྩེ་བའི་སེམས་ཀྱིས་ཞེས་བྱ་བ་འདི་ནི་མཚོན་པ་ཙམ་དུ་རྣམ་པར་གནས་པ་ཡིན་ཏེ་དེ་བས་ན་འདི་བསྡུ་བར་མ་བྱས་པའོ། །ཐམས་
ཅད་ཡོངས་སུ་སྤྱད་པར་བྱའོ་ཞེས་བྱ་བ་ནི་གཙུག་ལག་ཁང་དུ་མ་བླངས་པའོ། །འདི་ལ་ཇི་ལྟར་ཐམས་ཅད་ཀུན་ནས་སྤྱད་པར་བྱ་ཞེ་ན། དེའི་ཕྱིར་ལ་ལར་ཀློག་པ་དང༌། ཁ་ཏོན་དང༌། འདུག་པ་དང༌། བཅག་པ་ལས་གང་ཡང་རུང་བ་བྱ། ལ་ལར་ལྷུང་བཟེད་དང་ཆོས་གོས་གཞག་པར་བྱའོ། །ལ་ལར་མཚན་མོ་ཉལ་བ་དང༌། ལ་ལར་སྔ་དྲོ་དང༌། གུང་ཚིགས་དང༌། ཕྱི་དྲོ་འདུག་པས་དེ་ལ་སྦྱར་བར་བྱའོ་ཞེས་བྱ་བ་སྨོས་ཏེ། དེ་ལ་ཞེས་བྱ་བ་ནི་ཐམས་ཅད་ཡོངས་སུ་སྤྱད་པར་བྱ་བ་དེ་ལའོ། །དེ་ལ་གཞུང་ཁ་ཅིག་ལས་ནི། ལ་ལར་བཀླག་པར་བྱ། ཁ་དོན་བྱ། ལ་ལར་ལྷུང་བཟེད་དང་ཆོས་གོས་གཞག་པར་བྱ། ལ་ལར་འཆག་པར་བྱའོ་ཞེས་གསུངས་སོ། །གཞུང་ཁ་ཅིག་ལས་ནི། ལ་ལར་སྔ་དྲོ་འདུག་པར་བྱ། ལ་ལར་གུང་ཚིགས་ལ་འདུག་པར་བྱ། ལ་ལར་ཕྱི་དྲོ་འདུག་པར་བྱ། ལ་ལར་མཚན་མོ་འདུག་པར་བྱའོ་ཞེས་གསུངས་པས། དེའི་ཕྱིར་གཉིས་ཀ་བསྡུ་བའི་ཕྱིར་མདོ་འདི་བྱས་སོ། །གནས་པར་ཁས་བླངས་པས་གནས་ཀྱི་གཞི་རལ་བ་དང་འདྲུམས་པ་བཅོས་པར་བྱའོ་ཞེས་བྱ་བ་ལ། རལ་བ་ཞེས་བྱ་བ་ནི་ཕྱོགས་གཅིག་ཆད་པའོ། །འདྲུམས་པ་ཞེས་བྱ་བ་ནི་གས་པའོ། །དགེ་སློང་མ་དབྱར་གནས་པ་རྣམས་ཀྱིས་དབྱར་ཁང་བཅོས་པར་བྱའོ་ཞེས་བྱ་བ་ནི་ཐམས་ཅད་དུ་གཅིག་ཏུ་གྱུར་ནས་ཐམས་ཅད་སྤྱིས་བཅོས་པར་བྱ་བ་ཡིན་གྱི། གནས་ཁང་གང་ན་གང་གནས་པ་དེས་དེ་ཉི་ཚེས་བཅོས་པ་ནི་མ་ཡིན་ནོ་ཞེས་བྱ་བ་དེ་ལྟར་ཆོ་ག་འདིའོ། །དེ་བས་ན་མ་བྱས་བ་ཉིད་དེ་ལ་རལ་བ་དང་འདྲུམས་པ་ཞེས་བྱ་བ་འདིས་རུང་བ་འཇུག་པ་སྒྲུབ་པའི་དོན་དུའོ། །འཐབ་ཀྲོལ་ཅན་གྱིས་གནས་མི་ཐོབ་པར་བྱ་བའི་ཕྱིར་དགུན་མནོད་པ་དང་དཔྱིད་མནོད་པའི་གནས་མལ་ཡང་བསྟབ་པར་བྱའོ་ཞེས་བྱ་བ་ནི་གང་ཡང་རུང་བ་དེ་ལ་དགུན་དང་སོ་གའི་དུས་ཀྱི་ཆ་དག་ལ་ཟླ་བ་བཞི་དང་ལྡན་པ་ཉིད་ལ་མངོན་པར་བརྟེན་ནས་ཚིག་དེ་སྨོས་སོ། །རིལ་གྱིས་བསྐོ་བར་བྱའོ་ཞེས་བྱ་བ་ནི་གནས་མལ་རིལ་གྱིས་བསྐོ་བར་བྱའོ། །དེ་ཉིད་བསྟན་པར་བྱ་བའི་ཕྱིར། འདི་ལྟ་སྟེ། གཙུག་ལག་ཁང་དང་ཁང་ཁྱིམ་དག་གི་ཉེན་ཀོར་ཡང་ངོ༌། །ཁྱམས་ཀྱི་དེ་ཡང་ངོ་ཞེས་བྱ་བ་ནི་ཉེན་
ཀོར་དང་བཅས་པ་ལ་ཞེས་བྱ་བའི་དོན་ཏོ། །དེ་དག་དོང་བ་ཉིད་ཀྱི་འོག་ཏུ་དེ་དག་མི་གཏོང་བར་མི་བྱའོ་ཞེས་བྱ་བ་ལ། དེ་དག་ཅེས་བྱ་བ་ནི་ཁྱམས་ཀྱི་ཉན་ཀོར་དང་དེའི་ཉན་ཀོར་དུས་མ་ངེས་པ་ཉིད་ཀྱིས་དགུན་དང་དཔྱིད་མནོད་པའི་གནས་མལ་གཉིས་ཀྱང་བསྟབ་པར་བྱའོ། །རང་བཞིན་དུ་གནས་པའི་ཕྱིར་སྒྱུ་ཐབས་མི་བྱའོ་ཞེས་བྱ་བ་ནི་རང་བཞིན་དུ་གནས་པས་འཐབ་ཀྲོལ་མི་བྱེད་པའི་ཞེས་བྱ་བ་ནི་ཐམས་ཅད་ཉིད་ཀྱིས་ཏེ། འདི་ནི་བསྐོ་བའི་དུས་འབའ་ཞིག་ཏུ་མ་ཟད་ཀྱི་ཞེས་བྱ་བ་ནི་ཁྱད་པར་མེད་པར་རྟོགས་པའོ། །གང་ཞིག་མཐའ་འཁོབ་ཀྱི་རི་ལ་རང་བཞིན་དུ་གནས་པའི་དོན་དུ་ཆོ་ག་དེ་ལ་བྱས་པས་དེའི་དོན་དུ་དེ་མི་བྱའོ་ཞེས་བྱ་བ་སྨོས་པ་དེ་ནི་འདིའོ། །འབྱུང་བའི་དོན་དུ་ནི་མི་བསྐོའོ་ཞེས་བྱ་བ་ནི་ཕྱིས་འབྱུང་བར་འགྱུར་བའི་དོན་དུ་དགོས་པ་ཉེ་བར་མི་གནས་པས་དེ་ཉིད་བསྟན་པའི་ཕྱིར། འདི་ནི་དུས་ཚིགས་དང༌། ཉིན་མཚན་དང་དེའི་ཡན་ལག་ཆེ་གེ་མོ་ཞིག་འབྱུང་བའིའོ། །འདི་ནི་མཁན་པོ་དང་སློབ་དཔོན་ཆེ་གེ་མོ་ཞིག་འབྱུང་བའིའོ། །འདི་ནི་ལྷན་ཅིག་གནས་པ་དང་ཉེ་གནས་ཆེ་གེ་མོ་ཞིག་འབྱུང་བའིའོ། །འདི་ནི་གཏམ་འདྲེས་པ་དང་ཕེབས་པར་སྨྲ་བ་དང༌། འགྲོགས་བཤེས་དང་སྨོས་འདྲིན་པ་ལ་ སོགས་པ ་ཆེ་གེ་མོ་ཞིག་འབྱུང་བའིའོ་ཞེས་གཙུག་ལག་ཁང་དག་བསྐོ་བར་མི་བྱའོ་ཞེས་བྱ་བ་སྨོས་ཏེ། དེའི་ཡན་ལག་ཅེས་བྱ་བ་ནི་ཉིན་མཚན་གྱི་ཡན་ལག་སྔ་དྲོ་ལ་སོགས་པའོ། །མནོད་པར་མི་བྱའོ་ཞེས་བྱ་བ་ནི། གཞན་གྱིས་བསྐོས་ཀྱང་མནོད་པར་མི་བྱའོ། །འདིར་གཞུང་ནི་འབྱུང་བའི་དོན་དུ་གཙུག་ལག་ཁང་བསྐོ་བར་མི་བྱ། བསྐོར་གཞུག་པར་མི་བྱའོ་ཞེས་གསུངས་པ་ཡིན་ཏེ། དེ་ལ་མདོ་སྔ་མས་ནི་བསྐོ་བར་མི་བྱའོ་ཞེས་གསུངས་པ་བསྡུས་སོ། །མདོ་འདིས་ནི་བསྐོར་གཞུག་པར་མི་བྱའོ་ཞེས་གསུངས་པ་བསྡུས་སོ། །ཕྲན་ཚེགས་དག་ལས་ཀྱང་དགེ་འདུན་གྱི་འབྲེལ་པ་ཞེས་བྱ་བ་དང་པོར་བྱས་ཏེ་མནོད་པ་ཞེས་བྱ་བའི་མཐར་ཐུག་པའོ། །ཚང་གཞིག་པའི་ཕྱིར་དབྱུ་གུ་ཐོགས་པ་བསྐོ་བར་བྱའོ། །སྒོ་ང་མེད་པ་རྣམས་ནི་གདོན་པར་བྱའོ། །ཕྲ་མོ་རྣམས་ཀྱི་ནི་མི་འཕེལ་པར་བྱ་བའི་ཕྱིར་སྐུད་པས་དཀྲིའོ་ཞེས་བྱ་བ་ནི། ཁྭ་ཏ་དང་མཆིལ་
པ་དང་ཕུག་རོན་རྣམས་ལ་ནི་མ་ཡིན་ཏེ། འོན་ཏེ་འོན་ཀྱང་ཕྲ་མོ་ཆུང་བ་སྦྲང་བུ་ཏྲཻ་མ་བུ་ག་དང་ཏྲཻ་ལ་ཏ་ལ་ སོགས་པ ་དག་གི་ཚང་གང་ཡིན་པ་དེ་རྣམས་སྐུད་པས་དཀྲི་བར་བྱའོ། །འདིར་གཞུང་ནི་མི་འབྲེལ་བར་བྱ་བའི་ཕྱིར་སྐུད་པས་དཀྲིའོ་ཞེས་གསུངས་པ་ཡིན་ཏེ། དཀྲིས་པ་དེ་ལ་འདི་རྣམས་ཀྱང་བརྗོད་པ་ཡིན་ཏེ། ཉེ་བར་བསགས་པར་བྱ་ཞེས་བྱ་བ་དོན་འདི་ཤེས་པའོ། །གནས་མལ་ལ་ སོགས་པ ་སྦྱིན་ནོ་ཞེས་བྱ་བ་གོས་ལ་ སོགས་པ ་ཡང་བསྡུ་བའི་ཕྱིར་ སོགས་པ ་ཞེས་བྱ་བའི་སྒྲ་སྨོས་སོ། །ཡོད་པ་ཉིད་ན་དུ་མ་ཡང་ངོ་ཞེས་བྱ་བ་ནི་གལ་ཏེ་གཉིས་པ་ཁྲིའུའི་རིམ་པ་ཡོད་པར་གྱུར་ན་ཁྲིའུ་ལ་ སོགས་པ ་གསུམ་ལ་ སོགས་པ ་ཡང་རུང་སྟེ། དེ་ཡང་སྦྱིན་པར་བྱའོ་ཞེས་བྱ་བའི་དོན་ཏོ། །རིམ་པ་ཡོངས་སུ་མ་རྫོགས་ན་རྒན་རིམས་ནས་བརྩམས་ཏེ་ཇི་ཙམ་ཁྱེད་པ་ཡན་ཆད་ལ་དེ་སྙེད་པ་རྣམས་ལ་སྦྱིན་པར་བྱའོ་ཞེས་བྱ་བ་ནི་དོན་གྱིས་ཤེས་པར་བྱའོ། །ཁྲི་ཆེན་པོ་དག་ཀྱང་བསྐོ་བར་བྱ་བ་ཉིད་ཡིན་ནོ། །སྟན་དག་ཀྱང་ངོ་ཞེས་བྱ་བ་ནི་གླེང་གཞི་དག་ལས་དེའོ། །དགེ་འདུན་གྱི་གནས་མལ་གཡོགས་པ་དགེ་ཚུལ་མི་གཙང་བས་ཉམས་པར་བྱེད་པའི་ཆོས་ཅན་ལ་སུས་ཀྱང་མི་སྦྱིན་ནོ་ཞེས་བྱ་བ་ལ། སུས་ཀྱང་ཞེས་བྱ་བའི་སྒྲས་ནི་གནས་མལ་སྟོབས་པ་འབའ་ཞིག་ཏུ་མ་ཟད་ཀྱི་གཞན་དག་གིས་ཀྱང་སྦྱིན་པར་མི་བྱའོ་ཞེས་བྱ་བའི་དོན་ཏོ། །དགེ་སློང་མ་ལ་ཡང་མི་སྦྱིན་ནོ་ཞེས་བྱ་བ་ནི་གནས་མལ་གྱི་ཆོས་ཅན་ལ་དགེ་འདུན་གྱི་གནས་མལ་གཡོགས་པ་དག་མི་གཙང་བ་ལ་སུས་ཀྱང་མི་སྦྱིན་པའོ། །དགེ་སློང་མ་རྣམས་ལ་འབྲེལ་པའི་ཁྲི་སྦྱིན་པར་མི་བྱའོ་ཞེས་འདིར་སྨོས་ཏེ། གནས་མལ་ཡང་ཞེས་བྱ་བ་འདིར་ཡང་ཆོ་ག་འདི་རྣམ་པར་གཞག་པ་ཞེས་བྱ་བའོ། །འདིར་གནས་འབྱོར་ན་དེ་ལ་འདབ་ཏུ་གཙུག་ལག་ཁང་སྦྱིན་ནོ་ཞེས་བྱ་བ་ལ། དེ་ལ་ཞེས་བྱ་བ་ནི་དགེ་སློང་མའོ། །འདིར་ཞེས་བྱ་བ་ནི་གཙུག་ལག་ཁང་ལའོ། །གནས་མལ་ལྷག་པ་བཟང་པོ་མ་ཡིན་པ་ཡང་ངོ་ཞེས་བྱ་བ་ལ། ལྷག་ཅེས་བྱ་བ་ནི་དགེ་སློང་རྣམས་ལས་ལྷག་པར་གནས་པ་ལའོ། །ཁྱེད་ཅག་ལ་གང་གིས་ཀྱང་དགེ་འདུན་གྱི་གནས་མལ་ལ་གདིང་བ་མེད་པར་ལོངས་སྤྱད་པར་མི་བྱ། གདིང་བ་རུང་བ་
མ་ཡིན་པས་ལོངས་སྤྱད་པར་མི་བྱ། གདིང་བ་དྲི་མ་ཅན་གྱིས་ལོངས་སྤྱད་པར་མི་བྱའོ་ཞེས་བྱ་བ་ལ། དེ་ནི་ལྟུང་བ་ཡིན་ཏེ། བསླབ་པའི་གཞི་ཉིད་ལས་འདིར་ཡོད་པ་ཉིད་ཀྱི་ཕྱིར་རོ། །ཟླ་བ་ཕྱེད་ཅིང་སོ་སོར་བརྟག་པར་བྱའོ་ཞེས་བྱ་བ་ནི་གནས་མལ་ལའོ། །དམ་ཚིག་ལས་འདས་ཤིང་སྤྱད་ན་གནས་པ་ནི་གནས་ལ་གཞན་གྱི་ནི་དགེ་འདུན་ལ་བརྗོད་དེ་དབྲོག་པར་བྱའོ་ཞེས་བྱ་བ་ནི་བརྟེན་པ་ལས་གཞན་དགེ་འདུན་ལ་ཞུས་ཏེ་སྤྱད་པར་བྱའོ། །དགེ་འདུན་སོང་སྦྱིན་བདག་ཆེ་གེ་མོ་དང་ཞལ་ཏ་བ་ཆེ་གེ་མོ་དང༌། སྤྱོད་ཡུལ་གྱི་གནས་ཆེ་གེ་མོ་དང་ནད་གཡོག་ཆེ་གེ་མོས་གནས་པར་ཞལ་གྱིས་བཞེས་པར་འགྱུར་རོ་ཞེས་བརྗོད་པར་བྱའོ། །འགྱོད་པ་དང༌། གཞན་སྡུག་བསྔལ་བ་དང༌། ཡིད་མི་བདེ་བ་མི་སྐྱེད་པ་ཉིད་དང༌། སེལ་བ་ཉིད་དག་དང༌། བདེ་བ་དང་ཡིད་མི་བདེ་བ་བསྐྱེད་པ་ཉིད་རྗེས་སུ་བསྲུང་བ་ཉིད་དག་དང༌། ནད་གཡོག་ཉིད་ཚངས་པ་མཚུངས་པར་སྤྱོད་པ་དག་ལས་འབྱུང་བ་སོ་སོར་བརྟགས་པས་གནས་དང་སྤྱོད་ཡུལ་དང༌། བསོད་སྙོམས་དང་སྨན་པར་བྱེད་པ་ལ་རྣམ་པར་བལྟས་ཏེ་གནས་པར་ཁས་བླང་བར་བྱའོ་ཞེས་བྱ་བ་ནི་འགྱོད་པས་ཉེ་བར་གནས་པ་ལའོ། །འདིར་སྡུག་བསྔལ་ནི་ཤིན་ཏུ་ཆེ་བ་སྟེ། ཡིད་མི་བདེ་བ་དང་ཡིད་བདེ་བ་ནི་བདེ་བ་ཤིན་ཏུ་ཆེ་བ་སྟེ་ལུས་ཀྱི་ཡང་ངོ༌། །དེའི་ལུས་ཅན་གྱི་ཡུལ་བསྡུས་པ་དང༌། དེའི་རིགས་ཅན་བཟའ་བར་བྱ་བ་སྦྱིན་པ་ནི་དེ་དག་གིས་བསྐྱེད་པའི་སྡུག་བསྔལ་སེལ་བ་ནི་གསོ་བར་བྱེད་པའོ། །བདེ་བ་རྗེས་སུ་སྲུང་བ་ནི་དེའི་ཚོགས་པ་རྣམས་ལ་ཇི་ལྟར་མི་འབྲལ་བ་དེ་ནི་དེ་ལྟར་ཀུན་ཐུབ་པའོ། །སྦྱིན་པར་བྱེད་པ་ལ་ཞེས་བྱ་བ་ནི་སྤྱོད་ཡུལ་དེ་ལ་འབྱོར་པ་སོ་སོར་བརྟགས་པས་སོ། །གང་དུ་གནས་པར་ཁས་བླང་བར་བྱ་ཞེ་ན། དེའི་ཕྱིར་གཡོགས་པར་དགེ་སློང་གི་མདུན་དུའོ་ཞེས་བྱ་བ་སྨོས་སོ། །གཙུག་ལག་ཁང་དུ་མར་མི་བྱའོ་ཞེས་བྱ་བ་ལ། གཙུག་ལག་ཁང་དུ་མར་མཚམས་སུ་རྫས་གཅིག་གིས་མནན་ཏེ། དུ་མས་ཁས་ལེན་པ་གང་ཡིན་པ་དེར་ཡང་འདི་དག་བཀག་པ་ཡིན་ནོ། །འདིར་གཞུང་ནི་དགེ་སློང་གིས་གཙུག་ལག་ཁང་གཉིས་སུ་དབྱར་གནས་པར་ཁས་བླང་བར་མི་བྱའོ། །ཁས་ལེན་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གང་ལ་དགེ་སློང་མེད་པ་ཉིད་དང་སྒོ་
གླེགས་མེད་པ་ཉིད་དང་བཅས་པར་ཡང་མི་བྱའོ་ཞེས་བྱ་བ་ལ། གང་ལ་ཞེས་བྱ་བ་ནི་གཙུག་ལག་ཁང་ལའོ། །གཙུག་ལག་ཁང་གང་ན་འདི་གཉི་ག་མཉམ་པར་སྦྱོར་བ་དེ་ཡང་གནས་པར་ཁས་བླང་བར་མི་བྱའོ་ཞེས་བྱ་བའི་དོན་ཏོ། །སྦྱིན་བདག་དང་ཞལ་ཏ་བ་དང་སྤྱོད་ཡུལ་གྱི་གྲོང་དང་ནད་གཡོག་དག་ཡོད་པ་ཉིད་ཡིན་ན་བརྗོད་པར་བྱའོ་ཞེས་བྱ་བ་ནི་གལ་ཏེ་དེ་ན་དེ་དག་ཡོད་པ་ཉིད་ན་ཁས་ལེན་པའི་སྔགས་བརྗོད་པའི་ཚེ་ཡང་དེ་སྐད་བརྗོད་པར་བྱ་སྟེ། ཞུ་བ་ལས་ཀྱང་བརྗོད་པར་བྱ་ཞེས་བྱ་བའི་དོན་ཏོ། །བྱིན་གྱིས་མ་བརླབས་པར་མཚམས་ཀྱི་ཕྱི་རོལ་དུ་སྐྱ་རེངས་འཆར་བར་མི་བྱའོ་ཞེས་བྱ་བ་ནི་སྐྱ་རེངས་ལས་དུས་སྔར་མཚམས་ཀྱི་ཕྱི་རོལ་དུ་འདའ་བར་བྱེད་པ་ལ་ནི་ཉེས་པ་མེད་དོ། །དེ་ལྟ་ཡང་གལ་ཏེ་འགྲོ་ན་དེ་ཡང་གནས་པར་མི་བྱའོ་ཞེས་གསུངས་པའི་ཕྱིར་རོ། །ཆོས་དང་ལྡན་པའི་དོན་དུ་ཞག་བདུན་བྱིན་གྱིས་བརླབ་པར་བྱའོ་ཞེས་བྱ་བ་ནི་ཆོས་ལས་མི་འདའ་བའི་དོན་ལའོ། །དེ་འདིར་རྒྱས་པར་བཤད་པའི་ཕྱིར། འདི་ལྟ་སྟེ། དགེ་སློང་གི་ཀུན་དགའ་ར་བ་འབུལ་བ་དང༌། གཙུག་ལག་ཁང་ཞལ་བསྲོ་བ་དང༌། གནས་མལ་འབུལ་བ་དང༌། བསླབ་པ་བརྟན་པོ་བཅའ་བ་དང༌། མཆོད་རྟེན་ཞལ་བསྲོ་བ་དང༌། མཆོད་སྡོང་གཟུགས་པ་དང༌། རྒྱལ་མཚན་བསྒྲེང་བ་དང༌། མཆོད་པ་བྱ་བ་དང༌། ཚོན་དང༌། ཙན་དན་གུར་ཀུམ་བྱུག་པ་སྐུད་པ་དང༌། བཀླག་པ་དང༌། འགྱོད་པ་བསལ་བ་དང༌། ལྟ་བའི་རྣམ་པ་སྤང་བ་དང༌། ཕྱོགས་དང་མཐུན་པ་བསྒྲུབ་པ་དང༌། བཟོད་པ་གསོལ་བ་དང༌། ཡོངས་སུ་གནས་པ་ལ་ སོགས་པ ་བཞི་བྱ་བ་དང༌། དབྱུང་བ་དང་ནད་པ་དབུགས་དབྱུང་བ་དག་ལའོ་ཞེས་བྱ་བ་སྨོས་ཏེ། མཆོད་སྡོང་གཟུགས་པ་དང་རྒྱལ་མཚན་བསྒྲེང་བ་ཞེས་བྱ་བ་ལ། མཆོད་སྡོང་གི་སྒྲས་ནི་གཟུགས་བ་དང་འབྲེལ་བའོ། །བཀླག་པ་ཞེས་བྱ་བ་ནི་མདོ་སྡེའི་མཚན་བཀླག་པ་དང༌། སྟོན་པ་ན་རྙེད་པ་འགྲུབ་པ་ཡོད་པས་ལོངས་སྤྱད་པའི་དོན་དུ་ཞེས་བྱ་བ་འདིར་སྨོས་ཏེ། ཀློག་པ་དེ་ཙམ་གྱི་ཕྱིར་ཡང་རིགས་པ་ཡིན་ཏེ། བཟོད་པ་གསོལ་བ་ཞེས་བྱ་བ་ཡང་བསྡུ་བའི་ཕྱིར་བཀླག་པ་ཞེས་བྱ་བའི་སྒྲས་སྨོས་སོ། །ཕྱོགས་དང་མཐུན་པ་ཞེས་བྱ་བ་
ནི་སྨོན་ལམ་གྱི་ལམ་བྱ་བ་དང༌། གཞི་འགའ་ཞིག་སོ་སོར་གནས་པ་ལའོ། །ཡོངས་སུ་གནས་པ་ལ་ སོགས་པ ་བཞི་བྱ་བ་ནི་སྤོ་བ་དང༌། གཞི་ནས་ཡོངས་སུ་སྤོ་བ་དང༌། མགུ་བར་བྱ་བ་དང༌། གཞི་ནས་མགུ་བར་བྱ་བའོ། །གཞི་ནས་མགུ་བར་བྱ་བ་ལས་ཐ་མི་དད་དོ། །དགེ་སློང་གིས་ཞེས་བྱ་བ་ནི་ཆོས་ལས་མི་འདའ་བའི་དོན་ལ་ཞེས་བྱ་བ་དེ་དང་འབྲེལ་པའོ། །དགེ་སློང་མའི་ལྕི་བའི་ཆོས་ཀྱི་མགུ་བར་བྱ་བ་དབུལ་བ་ལ་ཡང་ངོ་ཞེས་བྱ་བ་ལ། སྔ་མ་རྣམས་བསྡུ་བའི་དོན་དུ་ཡང་ངོ་ཞེས་བྱ་བའི་སྒྲས་སྨོས་སོ། །དགེ་སློང་མའི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དང་བསྙེན་པར་རྫོགས་པར་བྱ་བ་ལ་ཡང་ངོ༌། །དགེ་ཚུལ་གྱི་དེ་ལའོ་ཞེས་བྱ་བ་ནི་བསྙེན་པར་རྫོགས་པར་བྱ་བ་ལ་ཞེས་བྱ་བ་ལ་ཞེས་བྱ་བའི་དོན་ཏོ། །དགེ་ཚུལ་མའི་བསླབ་པའི་སྡོམ་པ་སྦྱིན་པ་ལའོ། །ཁྱིམ་བདག་དང་ཁྱིམ་པ་མོའི་མགོ་དཀྲི་བ་དང༌། བང་བསང་བ་དང༌། སྐྲ་བསྐྱེད་པ་དང༌། སྐྲ་བྲེག་པ་དང༌། གདུབ་ཀོར་བསྐྱེད་པ་དག་ལའོ་ཞེས་བྱ་བ་ནི་ཆོས་ལས་མི་འདའ་བའི་དོན་ལ་ཞག་བདུན་མན་ཆད་བྱིན་གྱིས་བརླབ་པོ་ཞེས་བྱ་བའི་དགོངས་པ་འདིར་ཐམས་ཅད་དུ་རིག་པར་བྱའོ། །བསྙེན་པར་མ་རྫོགས་པ་རྣམས་ཀྱི་དགེ་འདུན་ལྷག་མའི་སྐབས་མ་གཏོགས་པ་སྔ་མ་དག་ལ་ཡང་ངོ་ཞེས་བྱ་བ་ནི་ཡོངས་སུ་གནས་པ་ལ་ སོགས་པ ་དབྱུང་བ་མ་གཏོགས་པ་གང་ཞིག་སྔོན་དུ་ཀུན་དགའ་ར་བ་འབུལ་བ་ཞེས་བྱ་བ་ལ་ སོགས་པ ་གསུངས་པ་དེ་ཐམས་ཅད་བསྙེན་པར་མ་རྫོགས་པ་རྣམས་ལ་ཡང་རྟོགས་པར་བྱའོ། །ཁྱིམ་པ་དང་ཁྱིམ་པ་མོའི་བཟོད་པ་གསོལ་བ་ནི་ཁ་བསྲང་པའོ་ཞེས་བྱ་བ་ནི་བཟོད་པར་གསོལ་བའི་གནས་ལ་ཁྱིམ་པ་ཕོ་མོའི་ལྷུང་བཟེད་ཁ་ཕུབ་པ་དག་ལ་ཁ་བསྲང་བར་གསོལ་བ་ཡིན་པར་བལྟའོ། །ཟས་དང་སྨན་དང་གཡོག་དག་མེད་ལ་དེ་དག་མེད་པར་འཚོ་མི་ནུས་ན་དེ་ལས་འདའ་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་དབྱར་གནས་པར་ཁས་བླངས་བ་དེའོ། །ཟས་ལ་ སོགས་པ ་རྣམས་མེད་ལ་དེ་དག་མེད་པར་འཚོ་མ་ནུས་པར་གྱུར་ན་དེ་ལས་འདའ་བར་བྱའོ་ཞེས་བྱ་བའི་དོན་ཏོ། །ཇི་ལྟར་ཟས་མེད་པར་འཚོ་བར་མི་ནུས་ཤེ་ན། གང་གི་ཕྱིར་འདིར་ཡང་བྱེ་བྲག་ཏུ་འདི་རྟེན་ནི་བྱེ་བྲག་ཏུ་འདི་ལ་བརྟེན་པ་ཡོད་པ་སྟེ། ཐམས་ཅད་དུ་མེད་པ་ཁོ་ན་མ་
ཡིན་ཏེ། དེ་ལ་མཆོག་མེད་པ་ལ་རྩ་བ་དང་འབྲས་བུ་ལ་ སོགས་པ ་གཞན་གྱིས་སུ་ཞིག་ལ་ནུས་པ་ཡོད་སྙམ་དུ་སེམས་པ་དེ་བས་འདི་བྱེ་བྲག་ཏུ་བྱས་སོ། །དགེ་སྦྱོང་གི་ཚུལ་དང་སྲོག་དང་ཚངས་པར་སྤྱོད་པའི་བར་ཆད་ཡོད་ན་ཡང་ངོ་ཞེས་བྱ་བ་ལ། དེ་ལས་འདའ་བར་བྱའོ་ཞེས་བྱ་བར་སྦྱར་རོ། །བུད་མེད་དང་སྐྱེས་པ་དང་མ་ནིང་གི་མཚན་མ་རྣམས་སམ། དེར་གཉེན་འདུན་རྣམས་ཀྱི་བར་ཆད་ཡོད་ན་ཞེས་བྱ་བ་དེ་བསྡུས་པ་ཡིན་ནོ། །དགེ་འདུན་དབྱེ་བའི་ཕྱིར་བརྟུལ་བ་རྗེས་སུ་མི་མཐུན་པའི་སེམས་བསྐྱེད་པ་དང་སྡིག་པ་ཅན་གྱི་ཚིག་བརྗོད་པ་དག་འབྱུང་ངོ་ཞེས་བྱ་བ་ནི་དབྱེ་བའི་ཕྱིར་རྗེས་སུ་མི་མཐུན་པར་གྱུར་བ་གཉིས་པོ་དེ་གང་ཡིན་པ་དེ་ལ་དེ་སྐད་ཅེས་སྨོས་པར་རིག་པར་བྱ་བ་སྟེ། གང་ཞིག་གཞན་འདུལ་བའི་ཕྱིར་སྐྲོད་པ་དེ་ནི་མ་ཡིན་ནོ། །དོན་ནི་འདི་ཡིན་ཏེ། དགེ་འདུན་དབྱེ་བའི་ཕྱིར་བརྟུལ་བ་དག་ཡོད་ལ་གང་ཞིག་རྗེས་སུ་མི་མཐུན་པ་ཚུལ་བཞིན་མ་ཡིན་པ་ཡིད་ལ་བྱེད་པ་དང༌། མཚུངས་པར་ལྡན་པའི་སེམས་སྟོན་པར་བྱེད་པ། ཨེ་མ་དགེ་འདུན་དབྱེ་བར་བྱའོ་སྙམ་པ་གང་ཡིན་པ་དང༌། གང་ཡང་དེ་དང་འབྲལ་བ་དེ་ལྟ་བུ་སྡིག་པ་ཅན་གྱི་ཚིག་བརྗོད་པ་དེ་དག་ལ་འབྱུང་བར་འགྱུར་ན་དབྱར་ཁས་བླངས་པ་ལས་འདའ་བར་བྱ་སྟེ། དེ་རལ་པའི་ལྟུང་བར་མི་འགྱུར་རོ་ཞེས་གསུངས་པ་ཡིན་ནོ། །དེ་ཞི་བར་བྱ་བའི་ཕྱིར་མཐུ་ཡོད་པ་ལྟ་ན་མི་འགྲོ་བར་མི་བྱའོ་ཞེས་བྱ་བ་ནི་དགེ་འདུན་དབྱེ་བའི་ཕྱིར་བརྟུལ་བ་དག་ཡོད་ལ་དེ་ཞི་བར་བྱ་བའི་ཕྱིར་གང་ལ་དེ་ནུས་པའི་མཐུ་ཡོད་པ་དེ་ནི་མཐུ་དང་བཅས་པའོ། །སོང་ན་མི་འདའ་བར་མི་བྱའོ་ཞེས་བྱ་བ་ནི་བྱིན་གྱིས་བརླབས་པའི་དུས་ལས་ཞེས་བྱ་བའི་ཚིག་གི་ལྷག་མའོ། །གལ་ཏེ་དེར་སོང་ནས་ཞག་བདུན་ལས་འདས་སུ་ཟིན་ཀྱང་བྱ་བ་ཉིད་ཀྱིས་དགེ་སློང་གི་དབྱར་རལ་བའི་ལྟུང་བར་མི་འགྱུར་རོ་ཞེས་གསུངས་པས། ངེས་པར་འདའ་བར་བྱའོ་ཞེས་པ་འདིར་དེ་ལ་གཞོལ་བར་བསྟན་པའི་ཕྱིར་མདོར་བྱས་པའོ། །དམ་བཅས་ན་དབྱར་གནས་པ་དང་གནས་སུ་མི་འབྲེལ་པར་མི་བྱའོ་ཞེས་བྱ་བ་ནི་གནས་འདིར་དབྱར་གནས་པར་བྱ་བའོ་ཞེས་དབྱར་གནས་པར་སོ་སོར་ཐོས་ན་དབྱར་གནས་པའི་དོན་དུ་དབྱར་གྱི་གནས་སུ་འབྲེལ་བར་བྱ་བའི་དོན་དུ་གདོན་མི་ཟ་བར་བྱས་ཏེ་མི་བྱེད་ན་ཉེས་བྱས་སོ་
ཞེས་བྱ་བའི་དོན་ཏོ། །གསོ་སྦྱོང་གཅིག་པ་ཉིད་ཀྱིས་གནས་གཉིས་སུ་དེ་འབྱུང་བ་མེད་དོ་ཞེས་བྱ་བ་ལ། དེ་ཞེས་བྱ་བ་ནི་སླར་བསྙེན་ནས་དབྱར་གནས་པ་དང་གནས་སུ་འབྲེལ་པར་མི་བྱེད་པའི་ཉེས་པའོ། །འདི་སྐད་བསྟན་ཏེ། གསོ་སྦྱོང་གཅིག་པའི་གནས་གཉིས་ལ་གཅིག་ཏུ་དབྱར་གནས་པར་དམ་བཅས་ནས། གཞན་དུ་དབྱར་གནས་པར་ཁས་ལེན་པར་བྱེད་དུ་ཟིན་ཀྱང་དེ་ལ་ཉེས་པ་མེད་དེ། གང་གི་ཕྱིར་གསོ་སྦྱོང་གཅིག་ཡིན་པས་ཐ་དད་པ་མ་ཡིན་པའི་ཕྱིར་རོ། །གནས་གཞན་དུ་སོང་བ་ལའོ། །དེར་མ་ཚང་བར་བྱས་པའི་གནས་ཁང་དུ་མ་བཟུང་བ་དང་འདྲ་བར་མ་འབྲེལ་བ་འདི་ལ་མི་གནས་པར་གྱུར་པ་ནི་མ་ཡིན་ནོ། །དེ་ལ་གནས་གཅིག་པར་གྱུར་པ་ཉིད་ཀྱི་ཕྱིར། གནས་དེ་དག་ལ་དེ་བས་ན་ཉེས་པ་མི་སྐྱེད་པའོ། །རྙེད་པར་གཅིག་པ་ཉིད་ལ་ནི་ཡོད་དོ་ཞེས་བྱ་བ་ནི་གསོ་སྦྱོང་ཐ་དད་པ་ཉིད་ལ་རྙེད་པ་ནི་གཅིག་པ་ཉིད་ཡིན་ན་གནས་དག་ལ་ཐ་དད་པར་ཉལ་བ་འདི་ལ་བསྐྱེད་པ་ཡོད་པ་ཉིད་དོ། །གནས་པའི་ལོངས་སྤྱོད་ཐ་དད་པས་གནས་ཀྱི་བྱེད་པ་ཐ་དད་པའི་ཕྱིར་རོ། །དོན་ལེན་པ་ལ་ནི་མ་ཡིན་ནོ། །རྙེད་པ་ཞེས་སྨོས་པས་ཡོན་བདག་གམ་རྙེད་པའི་ཚད་ལས་ཐ་དད་པའི་ཕྱིར་རོ། །འདིར་གཞུང་ནི་འདི་ལྟར། དགེ་སློང་གིས་གནས་འདིར་དབྱར་སྔ་མ་ཟླ་བ་གསུམ་གནས་པར་བྱའོ་ཞེས་དམ་བཅས་ནས་གནས་དེ་གཉིས་རྙེད་པ་ནི། གཅིག་ལ་གསོ་སྦྱོང་ནི་ཐ་དད་པར་གྱུར་ནས་དེ་འདི་སྙམ་དུ་འདིར་གནས་ན་ཡང་རྙེད་པ་གཅིག་ཏུ་ཟད་ལ། ཕ་གིར་གནས་ན་ཡང་རྙེད་པ་གཅིག་གུ་ཟད་དོ་སྙམ་ནས་དེ་དམ་བཅས་ནས་མི་འགྲོ་ཞིང་དགེ་སློང་དེ་ལ་དེར་དབྱར་སྔ་མ་ཟླ་བ་གསུམ་ཡང་མི་སྣང་ཕྱི་མ་ཡང་མི་སྣང་ལ་དམ་ནི་བཅས་ནས་ཉེས་བྱས་སོ་ཞེས་གསུངས་པ་ཡིན་ནོ། །གཞིར་གཏོགས་པའི་དབྱར་གྱི་གཞིའོ།། །།སྡེ་པ་སྔ་ཆར་གྱིས་ཀྱང་གནས་པར་ཁས་བླང་བར་བྱ་བ་ཉིད་ཡིན་ནོ་ཞེས་བྱ་བ་ནི་དགེ་སློང་དང་དགེ་སློང་མ་འབའ་ཞིག་གིས་གནས་པར་ཁས་བླང་བར་བྱ་བ་ཉིད་དུ་མ་ཟད་ཀྱི། འདི་ལྟར་དགེ་སློང་མ་དང་དགེ་ཚུལ་མ་དག་གིས་ཀྱང་གནས་པར་ཁས་བླང་བར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །དགེ་ཚུལ་འབའ་ཞིག་གིས་ནི་མ་ཡིན་ནོ་ཞེས་བྱ་བ་ནི་ཁས་བླང་བར་བྱ་བ་ཉིད་མ་ཡིན་ནོ་ཞེས་བྱ་བར་སྦྱར་རོ། །ལོ་མ་ཚང་
བ་དག་གིས་ཀྱང་ངོ་ཞེས་བྱ་བ་ནི་འབའ་ཞིག་གནས་པར་བྱ་བ་མ་ཡིན་ནོ། །དེ་དག་ལས་ཁས་བླང་བ་མི་འཆགས་པ་ཉིད་ནི་མ་ཡིན་ནོ་ཞེས་བྱ་བ་ལ། དེ་དག་ལ་ཞེས་བྱ་བ་ནི་དབྱར་གནས་པར་བྱ་བ་མ་ཡིན་པ་དང༌། སྔ་མ་དེ་རྣམས་འབའ་ཞིག་ཁས་ལེན་པ་ལའོ། །གནས་མལ་མི་མནོད་པར་བྱ་བ་ཉིད་མ་ཡིན་ནོ་ཞེས་བྱ་བ་ནི་དེ་ལྟར་གནས་པར་ཁས་བླངས་པ་རྣམས་ལའོ། །སྟོབས་པ་མེད་པས་ཀྱང་མ་ཡིན་ནོ་ཞེས་བྱ་བ་གནས་མལ་སྟོབས་པ་མེད་པས་ན་གནས་མལ་མི་མནོད་པ་མ་ཡིན་ཏེ། མནོད་པར་བྱ་བ་ཁོ་ན་ཡིན་པའོ། །མ་བསྐོས་པར་བསྟབ་པར་མི་བྱའོ་ཞེས་བྱ་བ་ནི་གནས་མལ་སྟོབས་པར་མ་བསྐོས་པའི་གང་ཟག་གིས་བསྙེན་པར་རྫོགས་པ་དང༌། བསྙེན་པར་མ་རྫོགས་ཤིང་རབ་ཏུ་བྱུང་བ་སུ་ཡང་བཟུང་བ་དང་འཇུག་པར་མི་བྱའོ་ཞེས་བྱ་བའི་དོན་ཏོ། །འགྱོད་ པ་ལ་སོགས ་པས་སྡེ་སྣོད་འཛིན་པ་དང༌། འཐབ་ཀྲོལ་བྱེད་པ་ཡོད་པ་དང་མེད་པ་དག་མ་བསྡུས་པ་མ་ཡིན་ནོ་ཞེས་བྱ་བ་ནི་མི་སྐྱེད་པ་ཉིད་དང་སེལ་བ་ཉིད་དག་ལ་འགྱོད་པ་ཞེས་བྱ་བ་ལ་ སོགས་པ ་ལ་མདོ་དེས་སྡེ་སྣོད་འཛིན་པ་ཡོད་པ་དང༌། འཐབ་ཀྲོལ་བྱེད་པ་མེད་པ་འདི་གཉིས་ཀྱང་མ་བསྡུས་པ་ཉིད་མ་ཡིན་པའོ། །ཇི་ལྟར་བསྡུས་ཤེ་ན། འདི་ལྟར་འགྱོད་པ་བསལ་བའི་སྒྲས་ནི་དེ་ལ་སྡེ་སྣོད་འཛིན་པ་ཙམ་བསྡུས་པ་ཡིན་ནོ། །འགྱོད་པ་དང་དེ་ལས་གཞན་པའི་སྡུག་བསྔལ་དང་ཡིད་མི་བདེ་བ་མི་སྐྱེད་པ་ཉིད་ཅེས་སྨོས་པས་ནི་འཐབ་ཀྲོལ་བྱེད་པ་མེད་པ་འདི་གཉིས་ཀྱང་མ་བསྡུས་པ་མ་ཡིན་ནོ། །གནས་པར་ཁས་མ་བླངས་པས་གནས་མི་གཏོང་ན་གནས་པ་ཉིད་ཡིན་ནོ་ཞེས་བྱ་བ་ནི་འདིར་གཞུང་ཁ་ཅིག་ལས་ནི། དགེ་སློང་དབྱར་གནས་པར་ཁས་མི་ལེན་པ་དག་ལ་དབྱར་རལ་བར་བརྗོད་པར་བགྱིའམ། གལ་ཏེ་དབྱར་གྱི་ནང་དུ་གནས་མི་གཏོང་ན་དབྱར་རལ་བར་བརྗོད་པར་བྱའོ་ཞེས་གསུངས་པ་དེ་བསྡུས་པ་ཡིན་ནོ། །འདིས་ནི་གནས་པར་ཁས་མ་བླངས་སུ་ཟིན་ཀྱང་དབྱར་གྱི་ནང་དུ་གནས་མི་གཏོང་ན་ཕྱི་རོལ་དུ་འགྲོ་བའི་ཕྱིར་བྱིན་གྱིས་བརླབ་པར་བྱ་དགོས་སོ་ཞེས་བསྟན་པར་རིག་པར་བྱའོ། །ནམ་མཁའ་ལ་གནས་པར་ཁས་བླངས་པ་མི་འཆགས་སོ་ཞེས་བྱ་བ་ནི་གནས་འདིར་དེ་ལྟ་བས་ན་རྟེན་འདི་ལ་འདིར་བླང་བའོ། །གྲུ་ལ་ནང་དུ་འབྱམ་པ་ཉིད་དུ་ཤེས་ན་མི་འཆགས་སོ། །ས་ལ་ཕྱིན་པ་དང༌། ས་ལ་གནས་པ་བརྟན་པོ་དང་
འབྲེལ་པ་ནི་མ་གཏོགས་སོ་ཞེས་བྱ་བ་ནི། གལ་ཏེ་གྲུ་ས་ལ་ཕྱིན་པར་གྱུར་ནས་ས་ལ་གནས་པ་བརྟན་པོ་དང་འབྲེལ་བར་གྱུར་ན་ཉེ་བར་འགྲོ་བ་པོས་ཤེས་པར་མ་གྱུར་ལ། དེ་དབྱར་གྱི་ནང་དུ་འབྱམ་པར་གྱུར་པ་ཉིད་དུ་མི་ཤེས་ན་དེ་ལྟར་ན་དབྱར་གནས་པར་ཁས་བླངས་པ་འཆགས་ཀྱི་གཞན་དུ་ནི་མི་འཆགས་སོ་ཞེས་བྱ་བའི་དོན་ཏོ། །དེ་ལྟར་ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་པ་དེ་མི་ཤེས་པ་མ་ལོན་པར་གྲགས། དེ་ལྟར་མ་ལོན་པའི་ཆོས་ཅན་ཉིད་དུ་མི་ཤེས་པ་ལ་ནི་ཁས་ལེན་པ་ལ་རིག་པར་བྱའོ། །འདིར་གཞུང་ནི་དགེ་སློང་དག་གྱུར་དབྱར་གནས་པར་ཁས་ལེན་པར་བགྱིད་ན། དབྱར་རལ་བར་བརྗོད་པར་བགྱིའམ། རལ་བར་བརྗོད་པར་མི་བགྱི། བཀའ་སྩལ་པ། གལ་ཏེ་བརྗོད་ཀྱི་ནང་དུ་འབྱམ་པར་འགྱུར་བ་ཉིད་དུ་ཤེས་ན་དབྱར་རལ་བར་བརྗོད་པར་བྱའོ། །འོན་ཏེ་མི་ཤེས་ན་ནི་དབྱར་རལ་བར་བརྗོད་པར་མི་བྱའོ་ཞེས་གསུངས་པ་དང༌། ཁ་ཅིག་ལས། བཙུན་པ་རེ་ཞིག་དགེ་སློང་གྲུར་དབྱར་གནས་པར་ཁས་ལེན་ན་དབྱར་གནས་པར་ཁས་བླངས་ཞེས་བགྱིའམ། གལ་ཏེ་ས་ལ་བརྟེན་ཅིང་གནས་པ་ཡིན་ན་དབྱར་གནས་པར་ཁས་བླངས་ཞེས་བྱའོ། །བཙུན་པ་ཕུར་པའམ་ཞུགས་ཤིང་དང་འབྲེལ་པ་ལགས་ན་དབྱར་གནས་པར་ཁས་བླངས་ཞེས་བགྱིའམ། ཉེ་བ་འཁོར་གནས་པར་ཁས་བླངས་ཞེས་བྱའོ་ཞེས་གསུངས་པ་ཡིན་ཏེ། དེ་གཉིས་ཀ་བསྡུས་ནས་དེ་སྨོས་པ་ཡིན་ནོ། །དེའི་ལྟ་བ་ལ་མངོན་པར་ཞེན་ནས་ཆོས་མ་ཡིན་པའི་ཕྱོགས་སུ་སོང་ནས་སྐྱ་རེངས་ཤར་ན་འཇིག་གོ་ཞེས་བྱ་བ་ལ། འཇིག་གོ་ཞེས་བྱ་བ་ཁས་བླངས་པ་དེའོ། །དེ་ལྟ་བ་ལ་ཞེས་བྱ་བ་ནི་ཆོས་མ་ཡིན་པའི་ཕྱོགས་དེའི་ལྟ་བ་ལའོ། །གང་གི་ཚེ་ན་འདི་ཉམས་པ་ཡིན་ཞེ་ན། དེའི་ཕྱིར་སྐྱ་རེངས་ཤར་ནའོ་ཞེས་བྱ་བ་སྨོས་ཏེ་ཆོས་མ་ཡིན་པའི་ཕྱོགས་ཀྱི་ལྟ་བ་ལ་མངོན་པར་བརྟེན་ནས་ཆོས་མ་ཡིན་པའི་ཕྱོགས་སུ་མངོན་པར་མཆིས་ན། སྐྱ་རེངས་ཤར་བའི་དུས་སུ་ཁས་ལེན་པ་འཇིག་པའོ། །འདིར་གཞུང་ནི། དགེ་སློང་བཞི་དག་ལས་བཙུན་པ་རེ་ཞིག་དབྱར་གྱི་ནང་དུ་དགེ་འདུན་བྱེ་བར་གྱུར་ལ། དེ་ན་གལ་ཏེ་དགེ་སློང་བསམས་བཞིན་དུ་ཆོས་ཀྱི་ཕྱོགས་ནས་ཆོས་མ་ཡིན་པའི་ཕྱོགས་སུ་མཆི་ན་དབྱར་རལ་ཞེས་བགྱིའམ། ཉེ་བ་འཁོར་གལ་ཏེ་དེའི་ལྟ་བ་འདོད་ཅིང་དེར་ཡང་སོང་ན་སྐྱ་
རེངས་ཤར་ན་དབྱར་རལ་བར་བརྗོད་པར་བྱའོ་ཞེས་གསུངས་པ་ཡིན་ནོ། །ཐེ་ཚོམ་ཟ་བ་ཉིད་ལ་ནི་མི་འཇིག་གོ་ཞེས་བྱ་བ་ནི་བདག་གནས་པར་ཁས་བླངས་སམ་འོན་ཏེ་མ་བླངས་སྙམ་དུ་ཐེ་ཚོམ་ཟ་བ་ཉིད་ལ་ནི་དབྱར་གནས་པར་ཁས་བླངས་པ་མི་འཇིག་པའོ། །མཐའི་ཞག་དྲུག་ལ་བྱིན་གྱིས་བརླབ་པ་མི་འཆགས་སོ་ཞེས་བྱ་བ་ནི་གནས་པར་ཁས་བླངས་ནས་ཟླ་བ་གསུམ་གྱི་མཐའི་ཞག་དྲུག་ལུས་པའི་ཚེ། ཕྱི་རོལ་དུ་འགྲོ་བའི་ཕྱིར་བྱིན་གྱིས་བརླབ་པ་མི་འཆགས་པ་སྟེ། དུས་ཧ་ཅང་ཡུན་ཐུང་ངུ་ལས་འདའ་བའི་ཕྱིར་རོ། །ཧ་ཅང་ཐུང་ངུ་ཉིད་ལ་མ་རྫོགས་པ་རིགས་པ་ཡིན་ཏེ། །གང་གི་ཕྱིར་སྐྱེས་པ་ངན་པ་ཉིད་དེ་ཞེས་བྱ་བ་ནི་ཞུ་བ་ལས་འབྱུང་བས་དགོངས་པ་མཐོང་བ་དེ་ལྟ་བས་ན་མདོ་འདི་ཡིན་ནོ། །བྱ་བ་མེད་པར་ཤེས་ནས་ཕྱིར་ལྡོག་པ་དང་གནས་པ་དག་ལ་ནི་འཇིག་གོ་ཞེས་བྱ་བ་ནི། འབྲས་བུ་མེད་པ་ཉིད་གང་གིས་ཤེས་པ་དེ་ནི་འབྲས་བུ་ཤེས་པ་ཉིད་ཤེས་པའོ། །བྱིན་གྱིས་བརླབས་ཏེ་འགྲོ་བཞིན་པ་ལ་བསྒྲུབ་པ་མི་དགོས་པའི་རྙེད་ཅིང་ཕྱིར་མི་ལྡོག་པར་འགྲོ་བ་ལ་དབྱར་གནས་པར་ཁས་བླངས་པ་དེ་འཇིག་གོ །བྱིན་གྱིས་བརླབས་ནས་འགྲོ་བ་ལ་དེ་སྨོས་ཏེ། འདིར་གཞུང་ནི་གལ་ཏེ་ཤུལ་གྱི་དབུས་ཁོ་ནར་དོན་དེ་བག་ཡངས་སུ་གྱུར་ན་དེ་མཆི་བར་བགྱིའམ། ཉེ་བ་འཁོར་མི་བྱ་སྟེ། གལ་ཏེ་འགྲོ་ན་དབྱར་རལ་བའི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདྲ་བ་ཉིད་ཀྱིས་འདྲ་བ་ཡང་ཤེས་པའོ། །འདི་ལ་མཐར་ཐུག་པའི་མཐའ་ནི་ཞག་བདུན་ཉིད་དོ་ཞེས་བྱ་བ་ལ། འདི་ལ་ཞེས་བྱ་བ་ནི་བྱིན་གྱིས་བརླབ་པ་ལའོ། །ཞག་གཅིག་ལ་ སོགས་པ ་རྣམས་ལ་ཡང་བྱིན་གྱིས་བརླབ་ཏུ་རུང་བ་ཉིད་དུ་དེ་བསྟན་པའོ། །གནང་བ་མ་ཐོབ་བའི་མཐའ་ནི་དེ་ཡིན་ནོ་ཞེས་བྱ་བ་ནི་མཐའ་ཞག་བདུན་ཡིན་ནོ། །གཞན་གྱི་ནི་ཞག་བཞི་བཅུའོ་ཞེས་བྱ་བ་ལ། གཞན་གྱི་ཟེས་བྱ་ནི་བྱིན་གྱིས་བརླབ་པ་གནང་བ་ཐོ་བ་དག་གི་མཐའ་ནི་ཞག་བཞི་བཅུའི་མཐར་ཐུག་པའོ། །གནང་བ་ཐོབ་བས་དགེ་སློང་གི་བདུན་དུ་སྔགས་ཀྱིས་བྱིན་གྱིས་བརླབས་ཏེ་འགྲོ་བར་བྱའོ། །གནང་བ་སྦྱིན་པ་ནི་བྱིན་གྱིས་བརླབ་པ་གནང་བ་སྦྱིན་པའོ། །བྱིན་གྱིས་བརླབས་པ་མ་ཡིན་པ་བསྒྲུབ་བ་མ་ཡིན་ཞེས་བྱ་བ་འདིས་བྱས་པ་རིག་
པར་བྱའོ། །ཁྱེད་ལ་ཁོ་བོ་ཅག་གིས་བྱིན་གྱིས་བརླབ་པ་འདི་རུང་བར་བྱིན་གྱིས་བརླབ་པ་ཞེས་བྱ་བ་འདིར་གནང་བ་སྦྱིན་པའི་དུས་ལ་མངོན་པར་བརྟེན་ནས་དེ་རྩེ་གཅིག་པ་ཉིད་དུ་རྣམ་པར་གནས་པ་ཡིན་ནོ། །དེ་ལྟ་བས་ན་དུས་མ་ཚང་བ་ལ་བྱིན་གྱིས་བརླབ་བ་འཆགས་པ་མ་ཡིན་ཞེས་བྱ་བར་རིག་པར་བྱའོ། །དེ་སྦྱིན་ནོ་ཞེས་བྱ་བ་ནི་བྱིན་གྱིས་བརླབ་པའི་གནང་བ་དེའོ། །དེ་ལས་ལྷག་པར་ཕྱི་རོལ་དུ་གནས་པར་མི་བྱ་བ་ཉིད་དོ་ཞེས་བྱ་བ་ལ། །དེ་ལས་ཞེས་བྱ་བ་ནི་ཞག་བཞི་བཅུ་པོ་དེ་ལས་སོ། །ལྷག་པར་ཅུང་ཟད་བྱིན་གྱིས་བརླབས་ཀྱང་རུང་བ་ཡང་འགྲོ་བ་ལ་ཅིག་ཅར་བྱིན་གྱིས་བརླབས་ཀྱང་རུང་སྟེ། དེ་ལས་ལྷག་པར་མཚམས་ཀྱི་ཕྱི་རོལ་དུ་འདུག་པར་མི་བྱའོ། །འདིར་གཞུང་ནི་ཉེ་བ་འཁོར་མཚམས་དེར་ཆེས་མང་དུ་འདའ་བར་བྱའོ་ཞེས་གསུངས་པ་དེ་མདོ་ཡིན་ནོ། །དེ་ནི་སྡེ་པ་ལྔ་པོ་དག་གི་ཡང་ཡིན་ནོ་ཞེས་བྱ་བ་ནི། བྱིན་གྱིས་བརླབས་པ་དེ་ཞེས་བྱ་བའི་དོན་ཏོ། །དེ་ནི་མཚམས་ཀྱི་ནང་དུ་འཆགས་སོ་ཞེས་བྱ་བ་ལ། དེ་ནི་ཞེས་བྱ་བ་ནི། གང་ཞིག་ཕྱི་རོལ་དུ་འགྲོ་བ་བྱིན་གྱིས་བརླབ་པ་དེ་ནི་སྡེ་པ་ལྔ་པོ་དག་ལ་བྱའོ་ཞེས་སྨོས་སོ། །དགེ་སློང་གི་མདུན་དུ་ཞེས་བྱ་བ་ནི་དགེ་སློང་གི་མདུན་དུ་བྱིན་གྱིས་བརླབས་ན་འཆགས་སོ་ཞེས་བྱ་བར་སྦྱར་བར་བྱའོ། །འདིར་དགེ་སློང་གི་མདུན་དུ་ཞེས་སྨོས་པ་ནི་གང་ཞིག་དགེ་སློང་མ་རྣམས་ཀྱི་གཞན་དུ་གསུངས་པ་དེ་བས་ན་འདིར་རྟགས་བརྗོད་པར་འདོད་པ་མ་ཡིན་པ་ཞེས་བྱ་བ་རྟོགས་པར་བྱའོ། །བྱ་བ་ཐམས་ཅད་ལ་དགེ་སློང་མ་ལ་ སོགས་པ ་རྣམས་ལ་བསྙེན་པར་རྫོགས་པའི་དྲུང་དུ་དེ་གཙོ་བོ་ཉིད་ཀྱི་ཕྱིར་བྱ་བ་ཉིད་དུ་རྣམ་པར་གནས་པ་ཡིན་ནོ། །དེ་ལྟ་བས་ན་འདིར་དེ་བྱེད་པ་གང་ཡིན་པ་དེ་ནི་མི་རིགས་པར་ཤེས་པར་མི་བྱའོ། །མུ་སྟེགས་ཅན་གྱི་ལྟ་བ་དང་དབྲལ་བའི་ཕྱིར་དང་ཉེ་དུ་བྱ་བ་དང༌། བདག་ཉིད་ཀྱི་ལུང་དང་རྟོགས་པ་ལ་ནེམ་ནུར་ཟ་བ་བསལ་བའི་ཕྱིར་འགྲོ་བ་ལ་དེ་བྱ་བ་མ་བསྡུས་པ་ཉིད་དུ་དོགས་པར་མི་བྱའོ་ཞེས་བྱ་བ་ལ། དེ་བྱ་བ་མ་བསྡུས་པ་ཉིད་དུ་དོགས་པར་མི་བྱའོ་ཞེས་བྱ་བ་ནི་སྔར་ཆོས་དང་ལྡན་པའི་དོན་དུ་ཞེས་སྨོས་པའི་མདོ་ངེས་སོ། །དེ་བྱ་བ་ཞེས་བྱ་བ་ནི་བྱིན་གྱིས་བརླབ་བ་དེ་བྱ་བ་ལའོ། །གནས་པར་ཁས་བླང་བ་ཉིད་ལ་གནས་པ་སྤང་བར་མི་བྱ་བ་ཉིད་དོ་ཞེས་བྱ་བ་ཁས་བླངས་པ་ཉིད་ལ་གནས་པའི་དགེ་སློང་སྤང་བར་མི་བྱ་བ་
ཉིད་དོ། །རྣམ་པར་གཞག་པ་འདི་སོ་སོར་བརྟེན་པར་གྱུར་པས་ན་དེ་ཤེས་པའོ། །འདིར་གཞུང་ནི་དགེ་སློང་གནས་པར་ཁས་བླངས་པ་སྤང་བར་བགྱི་བ་དེ་དང་ལྷན་ཅིག་གནས་པར་བགྱིའམ། བཀའ་སྩལ་པ། དེ་དང་ལྷན་ཅིག་གནས་པར་བྱའོ། །དགག་དབྱེ་བྱས་ནས་ནི་གནས་པར་མི་བྱའོ་ཞེས་གསུངས་པ་ཡིན་ནོ། །གནས་པ་དེ་ནི་དཔེ་ཡིན་ནོ་ཞེས་བྱ་བ་སྔར་མདོ་ལས། དམ་བཅས་ན་དབྱར་གནས་པ་དང་གནས་སུ་མི་འབྲེལ་བར་མི་བྱའོ་ཞེས་སྨོས་པ་དེ་ནི་དཔེ་ཙམ་དུ་ཟད་དེ། ཆོས་ལས་མི་འདའ་བའི་དོན་ལ་གནས་པའོ། །གཞན་དག་ལ་ཡང་དམ་བཅས་པ་སྒྲུབ་པར་མི་བྱེད་ན་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་དམ་བཅས་པ་སྒྲུབ་པར་མི་བགྱིད་པ་ལས་ཉེས་བྱས་སུ་གསུངས་ན། བཙུན་པ་དམ་བཅའ་བ་དུ་མཆིས། ཉེ་བ་འཁོར་ལྔ་སྟེ། ལྔ་གང་ཞེ་ན། དབྱར་དམ་བཅའ་བ་དང༌། ལྷུང་བཟེད་དམ་བཅའ་བ་དང༌། ཆོས་གོས་དམ་བཅའ་བ་དང༌། བསོད་སྙོམས་དམ་བཅའ་བ་དང༌། ནད་པའི་སྨན་དམ་བཅའ་བ་སྟེ། དེ་ལྟར་འདི་བསྡུ་བར་བྱས་པ་ཡིན་ནོ། །འདིར་དབྱར་གྱི་ཚིག་ནི་དཔེ་ཙམ་དུ་ཟད་དེ། རྣམ་པ་དེ་དག་དང་དམ་བཅས་པ་ལས་འདིར་གཞན་ཡང་ཁ་འོག་ཏུ་ལུས་འཁྲུས་པར་མི་བྱེད་ན། ཡང་ཉེས་བྱས་སུ་འགྱུར་རོ་ཞེས་སྦྱར་རོ། །གླེང་གཞི་ལ་སོགས་པར་གཏོགས་པའི་དབྱར་གྱི་གཞིའོ། །དབྱར་གྱི་གཞི་རྫོགས་སོ།། །།མི་སྨྲ་བའི་ཡིད་དམ་བཅའ་བར་མི་བྱའོ། །འདིས་དག་པ་དང་གྲོལ་བ་ཐོབ་བོ་སྙམ་ན་ཉེས་པ་སྦོམ་པོ་ཞེས་བྱ་བ་ལ། འདིས་ཞེས་བྱ་བ་ནི་མི་སྨྲ་བ་འདིས་སོ། །དགེ་འདུན་འབྱེད་པ་ལ་བརྟུལ་བའི་ཕྱོགས་ལ་འདི་རིག་པར་བྱའོ། །འདིར་གཞུང་ནི། མི་གཏི་མུག་ཅན་འདི་ནི་མུ་སྟེགས་ཀྱི་རྒྱལ་མཚན་ཏེ། འདི་ལྟ་སྟེ་མི་སྨྲའོ། །དེ་ལྟ་བས་ན་དགེ་སློང་གིས་མི་སྨྲ་བའི་ཡིད་དམ་བཅས་ན་ཉེས་པ་སྦོམ་པོའོ། །དགེ་སློང་མི་སྨྲ་བའི་ཡིད་དམ་བཅའ་བར་བྱེད་ན་ཉེས་པ་སྔོམ་པོར་འགྱུར་རོ་ཞེས་གསུངས་པ་ཡིན་ནོ། །དབྱར་གནས་པའི་དགེ་འདུན་ལ་མཐོང་བ་དང་ཐོས་པ་དང་དོགས་པ་དག་གིས་དགག་དབྱེ་བྱའོ་ཞེས་བྱ་བ་ནི་ཇི་ལྟར་ཡང་རུང་བས་དབྱར་
རལ་བ་ཡང་རུང་དབྱར་མ་རལ་བ་ཡང་རུང་སྟེ་དབྱར་གྱི་དུས་རྫོགས་པར་བྱའོ། །གང་གི་ཕྱིར་དབྱར་རལ་བ་ལ་དགག་དབྱེ་མི་བྱ་བ་མ་ཡིན་ནོ། །དུས་གང་གི་ཚེ་ན་དེའི་ཕྱིར་དབྱར་རྣམས་ཀྱི་ཐ་མའི་ཉི་མ་ལའོ། །སྤྱོད་ཡུལ་དུ་བརྗོད་པར་བྱའོ་ཞེས་བྱ་བ་སྨོས་སོ། །གང་གི་དུས་ནས་ཤེ་ན། དེའི་ཕྱིར་གང་ཚུན་ཆད་ནས་བྱི་དོར་བྱེད་པ་ནས་སོ་ཞེས་བྱ་བ་སྨོས་ཏེ། སྔར་དབྱར་གྱི་གཞིའི་སྐབས་སུ་ཞག་བཅུའམ་ཟླ་བ་ཕྱེད་ཀྱིས་འབྱུང་བར་འགྱུར་བ་ཉིད་ན་གཙུག་ལག་ཁང་བྱེ་དོར་བྱའོ། །ཁ་ཅིག་ལས་ནི་བདུན་ནམ་བརྒྱད་ན་ཞེའོ་ཞེས་སྨོས་པས་བྱི་དོར་བྱེད་པར་རྩོམ་པའི་དུས་གང་ཡིན་པ་དེའི་ཚེ་ཞེས་བྱ་བའི་དོན་ཏོ། །ཇི་སྐད་བརྗོད་པར་བྱ་ཞེ་ན། དེའི་ཕྱིར་དེང་ཕྱིན་ཆད་ཞག་འདི་ཙམ་ན་དགག་དབྱེ་མཛད་པར་འགྱུར་བ་ཁྱེད་ཅག་ལ་བརྗོད་པ་ཡིན་ནོ། །གཙུག་ལག་ཁང་བརྒྱན་པར་བྱའོ་ཞེས་བྱ་བ་སྨོས་ཏེ། གང་ཚུན་ཆད་ནས་བྱི་དོར་བྱ་བ་བསྟན་པ་སྟེ། དབང་དུ་བྱས་པས་ཤེས་པར་བྱའོ། །ཁང་པ་བརྩེགས་པ་དག་བརྩིག་གོ །གཙང་ཁང་བྱུར་བུ་དག་ཀྱང་རི་མོ་བྲིའོ། །མཆོད་རྟེན་དག་གསོ་བ་དང་བྱི་བྱད་བྱའོ། །སེང་གེའི་ཁྲི་བརྒྱན་བར་བྱའོ། །དོ་མོད་མཚན་ཐོག་ཐག་ཆོས་མཉན་པ་འབྱུང་བར་འགྱུར་གྱི། དེར་ཚེ་དང་ལྡན་པ་དག་གི་ཚོགས་པ་སྦྱིན་བར་བྱའོ་ཞེས་སྤྱོད་ཡུལ་དུ་བརྗོད་ནས་མདོ་སྡེ་དང༌། འདུལ་བ་དང་མ་མོ་འཛིན་པ་ལ་གསོལ་བ་བཏབ་པ་དག་གིས་ཚེས་བཅུ་བཞིའི་མཚན་ཐོག་ཐག་ཏུ་ཆོས་མཉམ་པ་སྦྱིན་པར་བྱའོ་ཞེས་བྱ་བ་ལ། ཚེས་བཅུ་བཞི་ཞེས་བྱ་བ་ནི་གཞན་ཞེས་བྱ་བ་འོག་མའི་ཆོ་ག་བརྗོད་པ་ལས་ཤེས་པར་བྱའོ། །གཞན་ལ་ནི་དེ་དག་གིས་ལས་ཀྱི་མདུན་རོལ་ཚུན་ཆད་དུ་ཆོས་དང་ལྡན་པའི་གཏམ་རྣམ་པར་གཏན་ལ་དབབ་པས་མཚན་མོ་འདའ་བར་བྱའོ་ཞེས་བྱ་བ་ལ། གཞན་ལ་ཞེས་བྱ་བ་ནི་ཚེས་བཅོ་ལྔ་ལའོ། །དེ་དག་གིས་ཞེས་བྱ་བ་ནི་མདོ་སྡེ་དང་འདུལ་བ་དང་མ་མོ་འཛིན་པ་དག་གིས་སོ། །མདུན་རོལ་དུ་ཞེས་བྱ་བ་ནི་དགག་དབྱེ་ལས་སོ། །ཚུན་ཆད་དུ་ཞེས་བྱ་བ་ནི་ཆོས་དང་ལྡན་པའི་གཏམ་རྣམ་པར་གཏན་ལ་དབབ་པས་ཇི་སྲིད་དགག་དབྱེའི་ལས་རྩོམ་པ་ལ་ཐུག་པ་དེ་ཚུན་ཆད་དུ་མཚན་མོ་འདའ་བར་བྱའོ། །དེ་ལ་ཡང་གང་གི་ཞེ་ན། དེའི་ཕྱིར་དགག་དབྱེའི་ལས་ནི་སྐྱ་རེངས་འཆར་བའི་མདུན་དུའོ་ཞེས་བྱ་བ་སྨོས་ཏེ། དེ་ལྟར་
དགག་དབྱེའི་ལས་བྱའོ། །ཇི་ལྟར་སྐྱ་རེངས་དང་པོ་མ་ཤར་བར་ལས་ཐམས་ཅད་ཟིན་པ་དེ་ལྟར་དགག་དབྱེའི་ལས་བྱའོ། །མཐར་ཐུག་པའི་ཆ་དང་ལྡན་པའི་སྐྱ་རེངས་ཀྱི་ལས་ལ་མི་བྱ་བ་ཉིད་ཅེས་བྱ་བའི་དོན་ཏོ། །དགེ་སློང་དགག་དབྱེའི་བྱེད་པ་བསྐོ་བར་བྱའོ། །མི་ནུས་ན་དུ་མའོ་ཞེས་བྱ་བ་ནི་དགེ་འདུན་མང་བ་ཉིད་ཀྱི་ཕྱིར་དགག་དབྱེའི་བྱེད་པ་གཅིག་གིས་མི་ནུས་ན་དགག་དབྱེ་བྱེད་པ་དུ་མ་ཡང་ཤེས་པར་བྱ་བའི་དོན་ཏོ། །དགག་དབྱེ་བྱ་བའི་ཕྱིར་གཞན་གྱི་དགེ་འདུན་ལ་གསོལ་བར་བྱའོ་ཞེས་བྱ་བ་ནི་གསོལ་བའི་ལས་བྱ་བའོ། །འདི་ལ་གྲལ་གྱི་ཆ་ལས་བྱར་རུང་ངོ་ཞེས་བྱ་བ་མི་གྲལ་གྱི་ཚར་གཅིག་ལ་དགག་དབྱེ་བྱེད་པ་དུ་མ་དག་གིས་ལས་བྱེད་པར་རིགས་སོ་ཞེས་བྱ་བའི་དོན་ཏོ། །རྩྭ་དཱུར་བ་བྲིམ་པ་དང་མདུན་དུ་འདུག་པ་ཡང་འདིའི་ཡུལ་ཡིན་ནོ། །དེས་རྩྭ་དཱུར་བ་བྲིམ་པར་བྱའོ་ཞེས་བྱ་བ་ནི་དགག་དབྱེ་བྱེད་པ་དེས་ཉེ་བར་མི་གནས་པ་རྣམས་ལ་བྲིམ་པ་ཡོད་པ་མ་ཡིན་ཏེ། དེར་བྲིམ་པའི་རྣམ་པར་གཞག་པ་རྗེས་སུ་སྐྱོང་བའི་དོན་དུ་ངེས་པར་འདིར་ཉེ་གནས་ཀྱི་ཕྱིར་རྩྭ་དཱུར་བ་འབད་པ་དང་ལྡན་བས་གནས་པར་བྱའོ་ཞེས་བྱ་བའི་དོན་གྱིས་ཐོབ་པར་བྱའོ། །དགག་དབྱེའི་ཕྱིར་གཞན་གྱིས་དགེ་འདུན་ལ་གསོལ་བར་བྱའི་དགག་དབྱེ་བྱེད་པ་པོས་ནི་མ་ཡིན་ནོ་ཞེས་བྱ་བར་དགོངས་པའོ། །དགག་དབྱེ་བྱས་ཟིན་གྱི་བར་དུ་དགེ་སློང་རེ་རེའི་མདུན་དུ་འདུག་པར་བྱའོ་ཞེས་བྱ་བ་ལ། དགག་དབྱེ་བྱས་ཟིན་གྱི་བར་དུ་ཞེས་བྱ་བ་ནི་དགག་དབྱེ་རྗེས་སུ་བསྒྲུབ་པ་ཐམས་ཅད་ལ་ཁྱབ་པ་འདི་ཡིན་ཏེ། དེ་ལ་ཇི་སྲིད་དུ་དགེ་སློང་དེས་དགག་དབྱེ་བྱས་པར་འགྱུར་རོ་ཞེས་བྱ་བའི་དོན་ཏོ། །མདུན་དུ་འདུག་པར་བྱའོ་ཞེས་བྱ་བ་ནི་ཇི་ལྟར་གཞན་དུ་གནས་པ་དེ་ལྟར་ཁོ་ནར་རོ། །གཞན་རྗེས་སུ་མི་མཐུན་པ་ཉིད་ཀྱིས་ཕྱིར་ཚོལ་བ་པོ་ལའོ། །དེ་ལ་དགག་དབྱེ་གོ་བར་བྱ་བ་ནི་ལན་གསུམ་མོ་ཞེས་བྱ་བ་ནི་དགག་དབྱེ་བྱེད་པ་མདུན་ན་གནས་པ་དེ་ལ་དགེ་སློང་རེ་རེས་ཀྱང་དགག་དབྱེ་བྱ་བའི་སྔགས་ལན་གསུམ་བརྗོད་པར་བྱའོ། །དགེ་འདུན་བཙུན་པ་རྣམས་དགོངས་སུ་གསོལ་ཞེས་བྱ་བ་འདིར་ཁ་ཅིག་འདིར་དགག་དབྱེའི་སྔགས་རྩོམ་པ་ན་བཏོན་ནས། ཚེ་དང་ལྡན་པ་དགོངས་སུ་གསོལ། གནས་གསུམ་གྱིས་དགེ་འདུན་ལ་དགག་དབྱེ་བགྱིད་དེ་ཞེས་བྱ་བ་དེ་ཡང༌། དགེ་འདུན་བཙུན་པ་རྣམས་
ལ་གནས་གསུམ་གྱིས་དགག་དབྱེ་བགྱིད་དོ་ཞེས་བྱ་བའོ། །དེར་མདུན་དུ་འདུག་པ་དགོས་པ་མེད་པ་དེ་ལྟ་བས་ན་དེ་ལ་མི་བརྟེན་པའོ། །རྒན་པའི་མཐར་འདུག་སྟེ། འདི་ལ་འདི་ལྟར་རིགས་པ་ཡིན་ཏེ། དགག་དབྱེ་བྱེད་པ་པོས་འདི་ལྟར་གོ་བར་བྱ་བར་རིགས་པ་ཡིན་ཏེ། དེ་ལྟ་བས་ན་དེ་ཉིད་ལ་དགོངས་སུ་གསོལ་ཞེས་བྱ་བར་རིགས་པ་ཡིན་ནོ། །དེ་ཉིད་ཀྱིས་ནད་པ་ངལ་བ་དང་གནས་མལ་ཕན་ཕུན་དུ་འགྱུར་བ་དང༌། དུས་ལས་ཡོལ་བ་དང༌། གནོད་པ་འབྱུང་ན་གཉིས་སོ་ཞེས་བྱ་བ་ལ་གཉིས་སོ་ཞེས་བྱ་བ་ནི། གོ་བར་བྱའོ། །ནད་པ་ཞེས་བྱ་བ་ནི་གཞང་འབྲུམ་གྱི་ནད་ལ་འདིར་ནད་པར་བརྗོད་དོ། །དུས་ལས་ཡོལ་བ་ཞེས་བྱ་བ་ནི། ལོ་གཅིག་གིས་དུས་ལས་ཡོལ་བར་གྲགས་པ་སྟེ། ཆོས་སྙན་པ་སྨྲ་བ་དང༌། ཆོས་དང་ལྡན་པའི་གཏམ་རྣམ་པར་གཏན་ལ་འབེབས་པ་དང༌། རྩོད་པ་ཉེ་བར་ཞི་བར་བྱེད་པས་ཀྱང་འགའ་ཞིག་མང་དུ་མཚན་མོ་འདའ་བར་བྱེད་པ་དང༌། གནོད་པ་འབྱུང་བ་ནི་ཉམ་ང་བ་འབྱུང་བ་སྟེ། རྒྱལ་པོ་དང་ཆོམ་རྐུན་དང་གྲོང་བའི་མི་དང་མི་མ་ཡིན་པའི་གདུག་ པ་དང་རླུང་དང་མེ་དང་ཆུ་ལ་སོགས ་པའི་གནོད་པས་སྲོག་དང་དགེ་སྦྱོང་གི་ཚུལ་དང༌། ཚངས་པར་སྤྱོད་པའི་བར་ཆད་ཀྱི་གནས་འདི་ལའོ། །དེར་རླུང་ལ་ སོགས་པ ་གསུམ་གྱིས་ཀྱང་འདུག་པ་ལས་འདའ་བར་འགྱུར་རོ། །དེ་འདིར་ཁོངས་སུ་བསྡུ་བར་མི་རིགས་སོ། །ཐམས་ཅད་ཉམས་པར་འགྱུར་བས་ཡང་དག་པར་གོ་བར་བྱ་བ་ཁོངས་སུ་བསྡུ་བར་རིགས་པའོ། །རླུང་ལ་ སོགས་པས་ཀྱང་དེ་བསྒྲུབ་པ ་ཡིན་གྱི་གཞན་དུ་ནི་མ་ཡིན་ནོ། །མཐར་འཛིན་པ་འཇུག་པ་ལ་དུས་ལས་འདའ་བར་བསྲུང་བར་བྱ་བ་མ་ཡིན་པའོ། །ཆོས་དང་ལྡན་པའི་དོན་ལ་གང་གིས་ཀྱང་བརྩམས་ཏེ་མཐར་འཛིན་བ་ནི་མི་རིགས་པ་མ་ཡིན་ནོ། །སངས་རྒྱས་ཀྱི་མཆོད་པ་ལ་ སོགས་པ ་གཞན་འདིར་ཐམས་ཅད་ལ་གོ་བར་བྱེད་པ་མ་སྐྱེས་པ་ལ་བར་ཆད་བྱེད་པ་ཡོད་པ་ཡིན་ཏེ། ཚངས་པར་སྤྱོད་པའི་གནས་རྗེས་སུ་དྲན་པ་དང་ཤེས་བཞིན་གྱི་ངོ་བོ་ལ་དེའི་ཕྱིར་འདིར་གནོད་པ་ལ་འགའ་ཞིག་མ་བཟུང་བ་ཉིད་ནི་མ་ཡིན་ནོ། །འདི་ལ་རྒྱུ་མཚན་གཞན་སྡིག་པ་དང་ཕྱེ་མ་ལེབ་ལ་ སོགས་པ ་ཡང་ཡོད་དེ། དེ་བས་ན་འདིར་གཞང་འབྲུམ་ལ་སོགས་པའི་ཚིག་
འདི་དཔེ་ཙམ་དུ་ཟད་དེ་ཞེས་བྱ་བར་ཤེས་ནས་འདི་ལྟར་མདོར་བྱས་སོ། །དེ་ཙམ་གྱིས་ན་ཡང་ལན་གཅིག་གོ་ཞེས་བྱ་བ་ནི་ལན་གཉིས་བཟླས་པ་དེ་ཙམ་གྱིས་ཀྱང་ནད་པ་ངལ་བ་ལ་ སོགས་པ ་འབྱུང་བར་འགྱུར་ལ་ལྟ་ན་དགག་དབྱེ་གོ་བར་བྱ་བའི་སྔགས་ལན་གཅིག་བཟླས་པར་བྱའོ། །དེས་གྲལ་རྫོགས་ན་གཞན་ལའོ་ཞེས་བྱ་བ་ལ། དེས་ཞེས་བྱ་བ་ནི་དགག་དབྱེ་བྱེད་པ་དེས་སོ། །གཞན་ལའོ་ཞེས་བྱ་བ་ནི། དགག་དབྱེ་བྱེད་པ་གཞན་གཅིག་ལ་དགག་དབྱེ་གོ་བར་བྱེད་པའོ། །གང་གི་ཚེ་ཞེ་ན། དེའི་ཕྱིར་གྲལ་རྫོགས་ན་ཞེས་བྱ་བ་སྨོས་སོ། །དེར་དེ་གཞན་ལའོ་ཞེས་བྱ་བ་ནི་དགག་དབྱེ་བྱེད་པ་གཞན་དེ་མེད་ན་དགག་དབྱེ་བྱེད་པ་དེས་སོ། །དགེ་སློང་གཞན་གཅིག་གིས་མདུན་དུ་དགག་དབྱེ་གོ་བར་བྱའོ། །དགེ་འདུན་ཐམས་ཅད་ཀྱི་དགག་དབྱེ་བྱས་པ་དེ་ཉིད་དགེ་འདུན་ལ་གོ་བར་བྱའོ་ཞེས་བྱ་བ་ལ། དེ་ཉིད་ཅེས་བྱ་བ་ནི་དགེ་འདུན་གྱི་དགག་དབྱེ་བྱས་པ་ཉིད་ལ་དགག་དབྱེ་བྱེད་པ་པོས་གོ་བར་བྱའོ། །ཐམས་ཅད་ཀྱིས་ལེགས་པར་དགག་དབྱེ་མཛད་དོ། །ཤིན་ཏུ་དགག་དབྱེ་མཛད་དོ་ཞེས་བསྒྲུབ་པར་བྱའོ་ཞེས་བྱ་བ་ལ་ཐམས་ཅད་ཀྱིས་ཞེས་བྱ་བ་ནི་དགེ་སློང་འདུས་པ་ཐམས་ཅད་ཀྱིས་སོ། །ཤིན་ཏུ་དགག་དབྱེ་མཛད་དོ་ཞེས་བྱ་བ་ནི་ཁོ་བོ་ཅག་གིས་འདི་ལ་ཐེ་ཚོམ་པར་ཞེས་བྱ་བ་དེ་ལྟར་བསྒྲུབ་པའོ། །རང་གི་རྫས་གང་ཡང་རུང་བ་ཐ་ན་ཁབ་ཙམ་གྱིས་ཀྱང་དགེ་འདུན་ལ་རྫས་ཀྱི་དགག་དབྱེ་བཙམ་པར་བྱ་སྟེ། དེ་བླངས་ནས་ཚིག་གིས་སོ་ཞེས་བྱ་བ་ལ། རང་གིས་ཞེས་བྱ་བ་ནི་དགག་དབྱེ་བྱེད་པོ་བདག་ཉིད་དོ། །ཇི་ལྟར་བྱ་ཞེ་ན་དེའི་ཕྱིར་དེ་བླངས་ནས་ཚིག་གིས་སོ་ཞེས་སྨོས་ཏེ། དེ་བླངས་ནས་ཐ་ན་ཞེས་བྱ་བ་ནི་རང་གིས་ཁབ་ལ་སོགས་པའོ། །གང་ལ་ཞེ་ན། དེའི་ཕྱིར་དགེ་འདུན་ལ་ཞེས་བྱ་བ་སྨོས་ཏེ། རྒན་པའི་མཐའ་ལོགས་སུ་འདུག་སྟེ་ཞེས་བྱ་བ་རྟོགས་པར་བྱའོ། །ཚིག་ཇི་ལྟ་བུ་ཞེ་ན། དེའི་ཕྱིར་བཙུན་པ། རྫས་ཇི་ལྟ་བུས་ཀྱང་དབྱར་གནས་པའི་དགེ་སློང་གི་དགེ་འདུན་ལ་དགག་དབྱེ་བགྱིར་རུང་ངོ་ཞེས་བྱ་བས་སོ། །དེའི་འོག་ཏུ་དགེ་ཚུལ་རྣམས་ལ་དགག་དབྱེ་བྱའོ་ཞེས་བྱ་བ་སྨོས་ཏེ། དེའི་ཞེས་བྱ་བ་ནི་རྫས་ཀྱི་དགག་དབྱེ་བྱས་པ་དེའི་འོག་ཏུ་
ཏུའོ། །དེའི་འོག་ཏུ་དགེ་སློང་མ་རྣམས་ལའོ་ཞེས་བྱ་བ་ལ། དེའི་ཞེས་བྱ་བ་ནི་དགེ་ཚུལ་རྣམས་ལ་དགག་དབྱེ་བྱས་པའི་འོག་ཏུ་དགེ་སློང་མ་རྣམས་ལ་དགག་དབྱེ་བྱའོ། །རང་གི་ཕྱོགས་མ་རྫོགས་པར་ཕྱོགས་གཞན་ལ་འཇུག་པར་མི་རིགས་པ་ཞེས་བྱ་བའི་རྒྱུ་དེ་མཐོང་བ་ཡིན་ནོ། །ཚིག་འདི་ནི་ཕྱོགས་གཞན་དུ་གཙོ་བོ་ཡིན་གྱི་བསྙེན་པར་རྫོགས་པའི་རྒྱུ་མཚན་དུ་ནི་མ་ཡིན་ནོ། །དེ་ལྟ་བས་ན་དགེ་སློང་མ་དང་དགེ་ཚུལ་མ་རྣམས་ལ་འདི་མ་བསྡུས་པ་མ་ཡིན་ནོ། །བྱིན་གྱིས་བརླབས་ཏེ་སོང་བས་དེར་སྔར་དགག་དབྱེ་བྱེད་པ་ན་བྱས་པ་ཉིད་ཡིན་ནོ་ཞེས་བྱ་བ་ནི། དགེ་སློང་གང་གཞན་དུ་སོང་བ་དེ་རྣམས་ཀྱི་དགག་དབྱེ་ནི་དེའི་འོག་ཏུ་དགག་དབྱེའོ། །བྱིན་གྱིས་བརླབ་པར་བྱས་ནས་འགྲོ་བར་གྱུར་པ་ལ་སྔ་མ་གནས་པར་ཁས་བླངས་པའི་དབང་གིས་སམ་ཚེས་གྲངས་ནོར་བའི་དབང་གིས་འམ་གང་ཟག་འཐབ་ཀྲལ་ཅན་འོང་བར་གྲགས་པའི་དབང་གིས་གནས་དེར་དགག་དབྱེའི་དུས་པས་སྔར་ཚོགས་ཏེ་དེ་དག་དང་ལྷན་ཅིག་དགག་དབྱེ་བྱས་པ་ཡིན་ནོ་ཞེས་བྱ་བའི་དོན་ཏོ། །གང་དུ་གནས་པར་ཁས་བླངས་པ་དེ་ཉིད་དུ་དགག་དབྱེ་ངེས་པར་འཆགས་ཀྱི་གཞན་དུ་ན་མི་འཆགས་སོ་སྙམ་དུ་དོགས་པ་བསལ་བའི་ཕྱིར་མདོར་བྱས་སོ། །འདིར་གཞུང་ནི། བཙུན་བ། རེ་ཞིག་དགག་དབྱེའི་གདུགས་ཀྱི་ལྷག་མ་བཅུ་མཆིས་ཤིང་དགེ་སློང་དེ་ཡང་བསྐོས་ཏེ། མཚམས་ཀྱི་སླད་དུ་མཆིས་ན་དེ་ནས་གདུགས་བདུན་ན་དགག་དབྱེ་བྱུང་ནས་དེ་དེར་དགག་དབྱེ་བགྱིད་ན་དགག་དབྱེ་བགྱིས་ཞེས་བགྱིའམ་ཉེ་བ་འཁོར་དགག་དབྱེ་བྱས་ཞེས་བྱའོ། །བཙུན་བ་རེ་ཞིག་དགག་དབྱེའི་གདུགས་ཀྱི་ལྷག་མ་བདུན་མཆིས་ཤིང་དགེ་སློང་དེ་ཡང་བྱིན་གྱིས་བརླབས་ཏེ། མཚམས་ཀྱི་ཕྱི་རོལ་དུ་མཆིས་ན་གང་དུ་མཆིས་པ་དེར་གདུགས་བཞི་ལ་དགག་དབྱེ་བགྱིས་ན་དགག་དབྱེ་བགྱིས་ཞེས་བགྱིའམ་ཉེ་བ་འཁོར་དགག་དབྱེ་བྱས་ཞེས་བྱའོ་ཞེས་གསུངས་པ་ཡིན་ནོ། །བུད་མེད་ལ་ནི་མ་ཡིན་ནོ་ཞེས་བྱ་བ་ནི་འདིར་དགག་དབྱེ་བྱེད་པ་པོ་ཉིད་ལ་ཉེ་བར་འབབ་པའོ། །བུད་མེད་ལ་ཞེས་བྱ་བ་འདིས་ཀྱང་བུད་མེད་ལ་དགག་དབྱེ་བྱེད་པ་མ་ཡིན་པ་ནི་དགག་དབྱེ་བྱས་པ་ཉིད་ཅེས་བྱ་བའི་དོན་ཏོ། །དགག་དབྱེ་བྱེད་པ་པོ་ཉིད་ཀྱི་ཚིག་ནི་འདི་ཡིན་ཏེ། དགེ་འདུན་ལ་ནི་མ་ཡིན་ནོ་ཞེས་བྱ་བའི་དང་པོའི་ཚིག་གི་
རྟོགས་པའོ། །སྐྱེས་པའི་ཕྱིར་ཆོ་ག་ནི་འདི་ཡིན་ནོ་ཞེས་བྱ་བ་ཤུགས་ཀྱིས་བུད་མེད་ཀྱི་མཚན་ལ་སྐྱེས་པའི་དགག་དབྱེ་བྱས་པ་ཉིད་གང་ཡིན་པ་དེ་ནི་འགྱུར་བའི་དབང་གིས་མཚན་སྒྲུབ་པ་ཡིན་ཏེ། དེ་ནི་དགག་དབྱེ་བྱས་པ་ཉིད་ཡིན་ནོ་ཞེས་བྱ་བའི་དོན་ཏོ། །འདིར་གཞུང་ནི། དགེ་སློང་དགག་དབྱེ་བྱེད་པ་མཚན་གྱུར་ན། དགག་དབྱེ་བྱས་པ་མ་ཡིན་བར་བརྗོད་པར་བྱའོ་ཞེས་གསུངས་པ་ཡིན་ནོ། །གནས་པར་མི་ནུས་པ་ཉིད་ཡིན་ན་སྤྱོད་ཡུལ་དུ་གྱུར་པའི་དགེ་སློང་ལ་ཚོགས་ཀྱི་དགག་དབྱེས་གོ་བར་བྱའོ་ཞེས་བྱ་བ་ནི་འདིར་སྐྱེ་གནས་འཁྲུགས་པ་ཞེས་སྨོས་པ་ཡིན་ཏེ། རྒྱལ་པོ་ལ་ སོགས་པ ་ཕ་རོལ་གྱི་གནོད་པ་རྣམས་ལ་འདི་ཡོད་པ་སྟེ། དེའི་རིགས་ཅན་གཞན་རྣམས་ལ་ཡང་ཡོད་པའོ། །དེར་གནས་པར་རིགས་པ་མ་ཡིན་ཏེ། དེ་ལྟ་བས་ན་འདི་ལ་མཚོན་པ་ཙམ་ཉིད་ཡིན་ཏེ། དེ་བས་ན་འདི་ལྟར་མདོར་བྱས་སོ། །སྤྱོད་ཡུལ་དུ་གྱུར་པ་ཞེས་བྱ་བ་ལ་ཕན་ཚུན་དུ་མཆོད་ནས་འགྲོ་བར་བྱའོ་ཞེས་བྱ་བ་ནི་འདིར་གཞན་དག་གི་འདོད་པའོ། །དེ་ལ་ཐམས་ཅད་ཀྱིས་ཕན་ཚུན་དུ་ཞེས་དོན་འདི་རིགས་པ་ཡིན་ཏེ། མི་ནུས་པ་ཉིད་ཀྱི་ཕྱིར། གང་གིས་གང་མཐོང་བ་དེས་དེ་བལྟ་བར་བྱའོ་ཞེས་བྱ་བ་འདིར་དོན་འདི་རྟོགས་པར་བྱའོ། །འདིར་ཡང་སྤྱོད་ཡུལ་ཐོབ་པ་ཉིད་ལ་དེ་བརྟན་པ་ཞེས་བྱ་བ་རྟོགས་པར་བྱ་ཏེ། ངེས་པ་ནི་མ་ཡིན་ནོ་ཞེས་བྱ་བ་དེ་ཉིད་འབྲེལ་པའོ། །དགེ་འདུན་ལ་རྫས་ཀྱི་དགག་དབྱེ་ཞེས་བྱ་བ་ནི་སྔགས་མཚོན་པའོ། །སྔགས་འདི་ལ་རྣམ་པ་གང་ཀླགས་པ་དེས་ལྟ་བར་བྱའོ་ཞེས་བྱ་བའི་དོན་ཏོ། །དེ་ལ་དོན་གྱི་སྔགས་དེས་ཞེས་བྱ་བ་ཐོབ་པ་ཡིན་ནོ། །འདིར་སྔགས་ནི་ཚེ་དང་ལྡན་བ་དེང་ནི་དགེ་འདུན་དགག་དབྱེ་མཛད་དེ། བདག་དེ་སྲིད་དུ་དེང་དགེ་འདུན་ལ་དགག་དབྱེ་བགྱིད་དོ་ཞེས་བྱ་བའོ། །སྐྱེ་བའི་གནས་འཁྲུགས་ པ་ལ་སོགས ་པའི་ཉེ་བར་འཚེད་པས་མི་ནུས་པ་ཉིད་ལ་གནས་པའི་ཕྱིར་སྤྱོད་ཡུལ་ཐོབ་པའི་དགེ་སློང་དགེ་འདུན་གྱི་དགག་དབྱེ་བལྟ་བར་བྱའོ་ཞེས་བྱ་བའི་དོན་ཏོ། །དབྱར་གྱི་ནང་དུ་བྱ་བས་འགྲོ་དགོས་ན་དགག་དབྱེ་བྱའོ་ཞེས་བྱ་བ་ནི་ཁས་བླངས་པ་བསལ་བར་གྱུར་པ་དེའི་ངོ་བོ་ཅུང་ཟད་སྐྱེས་པར་གྱུར་ན་གནས་པའི་ཕྱིར་མི་རིགས་པ་དབྱར་རལ་བ་རིགས་པའི་བྱ་བ་དེས་འགྲོ་བར་བྱེད་ཅིང་རང་དགར་འགྲོ་བ་མ་ཡིན་ཏེ། གལ་ཏེ་དབྱར་གྱི་ནང་དུ་དགག་དབྱེ་
བྱེད་པ་ལ་མི་རིགས་པ་མེད་དོ་ཞེས་བྱ་བའི་དོན་ཏོ། །འདིར་གཞུང་ནི་བཙུན་བ་འདི་ལྟར་དགེ་སློང་ཁྲིམས་ལུགས་སུ་བགྱི་བ་འདི་ལྟ་བུ་བགྱིས་ན་དབྱར་གནས་པར་ཁས་ལེན་པར་བགྱིད་དོ། །ཚེ་དང་ལྡན་པ་བདག་གལ་ཏེ་བདག་དབྱར་གྱི་ནང་དུ་ཉེ་དུའི་གན་དུ་འགྲོ་བའི་དགག་དབྱེ་སྦྱིན་བ་ལྟ་ན། བདག་དབྱར་གནས་པར་ཁས་ལེན་ཏོ་ཞེས་འཆི་ན། བཙུན་པ། དགག་དབྱེ་སྩལ་བར་བགྱི་འམ། ཉེ་བ་འཁོར་སྦྱིན་བར་བྱའོ་ཞེས་གསུངས་པ་ཡིན་ནོ། །དེ་ལ་རྒྱུ་མཚན་མེད་པར་དབྱར་རལ་བར་མི་རིགས་ཏེ། ཉེ་དུའི་དྲུང་དུ་འགྲོ་བ་རྒྱུ་མཚན་གཅིག་པུར་ནི་མ་ཟད་དེ་རིགས་པ་མེད་པར་ཡང་དབྱར་གྱི་ནང་དུ་དགག་དབྱེ་མ་བྱས་པ་ཉིད་ལ་དགེ་འདུན་གྱི་ཁྲིམས་སུ་བྱ་བ་མི་རིགས་པ་མ་ཡིན་ནོ། །དེ་ལྟ་བས་ན་ཇི་ལྟར་ཆོ་ག་འདི་ལ་སྐྱེད་པ་མ་ཡིན་པ་དེ་བཞིན་དུ་རྣམ་པར་གཞག་པ་རིགས་སོ། །རྣམ་པ་གསུམ་གྱིས་མདོར་བྱས་པ་གནས་ཏེ། དེའི་ཕྱིར་འདི་ལྟར་མདོར་བྱས་སོ། །གཞི་འམ་གང་ཟག་གམ་གཉིས་ཀ་བཞག་ནས་ཀྱང་ངོ་ཞེས་བྱ་བ་ནི་དགག་དབྱེ་བྱར་རུང་སྟེ་གཞིའི་སྒྲས་ནི་ལྟུང་བ་ཞེས་སྨོས་སོ། །ཕམ་པར་འགྱུར་བ་ལས་ལྟུང་བྱེད་ཀྱི་སྡེ་ཚན་གཞན་དུ་གཞག་པའོ། །དེ་ལྟར་ཡང་འདིར་གཞུང་ནི། གལ་ཏེ་དགེ་འདུན་ལྷག་མ་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །ཕམ་པར་འགྱུར་བར་ཤེས་ན་ནི་བསྙིལ་བར་གསུངས་པས་བསྙིལ་ཏེ་དགག་དབྱེ་བྱའོ། །དེ་ལས་གཞན་བདག་ཤེས་ན་ནི་བཤགས་ཏེ་དགག་དབྱེ་བྱའོ་ཞེས་གསུངས་པ་ཡིན་ནོ། །ཆེ་གེ་མོ་ལ་ལྟུང་བ་བཞག་ནས་དགག་དབྱེ་བྱའོ་ཞེས་བྱ་བ་ནི་གཞག་པ་ལ་རིམ་པས་སོ། །འདིར་གང་ཟག་གང་དུ་གཏོགས་པ་འདི་ལ་ཅུང་ཟད་འཇུག་པར་འགྱུར་བ་དེ་ནི་རིགས་པ་ཡིན་ཏེ། དེ་བསྐུལ་བ་པོ་འམ་གཞན་ཡང་རུང་སྟེ། གང་ཟག་ལྷག་མ་ཡོད་མོད་ཀྱི་གཞན་ཐམས་ཅད་ལ་ནི་འཇུག་པའི་དབང་དུ་བྱ་སྟེ། དགག་དབྱེའོ་ཞེས་བྱ་བ་འདིར་གཞག་པའི་རིམ་པ་འདི་ཡིན་ནོ། །གཉིས་ཀ་ཞེས་བྱ་བ་ནི་གཞི་དང་གང་ཟག་གཉིས་ཀའོ། །དེ་དག་མནོད་པར་བྱའོ་ཞེས་བྱ་བ་ནི་དེ་ལྟ་བུའི་རྣམ་པས་དགག་དབྱེ་བྱེད་པའོ། །གཞག་པར་བྱ་བ་མཐའ་མ་གཏོགས་པ་ཉིད་ཁས་བླངས་པར་བྱའོ་ཞེས་བྱ་བ་ནི་ཕམ་པར་འགྱུར་བ་འདིར་དང་པོར་ཞེས་གསུངས་པས་ཕམ་པར་འགྱུར་བ་དེ་ལས་གཞན་པ་གཞག་པར་བྱ་བ་ལ་ཁས་བླངས་ནས་མནོད་པར་
བྱའོ་ཞེས་བྱ་བའི་དོན་ཏོ། །ཇི་ལྟར་ཁས་བླང་བར་བྱ་ཞེ་ན། དེའི་ཕྱིར་ཚེ་དང་ལྡན་པ་ཁོ་བོ་ཅག་ནི་ཚེ་དང་ལྡན་པ་ཅི་ནས་ཀྱང་གཞི་འཇོག་པར་བྱེད་ཅིང་གང་ཟག་འཇོག་པར་མི་བྱེད་པ། དེའི་དོན་དང་དོན་དུ་འདུས་ཤིང་འདུག་པ་མ་ཡིན་གྱི། འདི་ལྟར་བཅོམ་ལྡན་འདས་ཀྱིས་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་གསུངས་ལ། ཆོས་རྣམ་པར་དག་པར་བྱ་བའི་ཕྱིར་ནི་དགག་དབྱེ་གསུངས་པས་གལ་ཏེ་འདོད་ན་དགག་དབྱེ་གྱིས་ཤིག་ཅེས་སོ་ཞེས་བྱ་བ་སྨོས་ཏེ། །འོ་ན་དེང་ཞེས་བྱ་བ་ནི་འདིར་གཞག་པ་ལ་དགོས་པ་མེད་དེ། །འོན་ཀྱང་ཁྱོད་རྣམ་པར་དག་པར་བྱ་བའི་དགོས་པ་ཡོད་པས། གལ་ཏེ་དེ་སྙམ་དུ་སེམས་ན་བདག་ལ་ཡང་དག་པ་ཉིད་འདོན་པར་མི་བྱ་བ་མེད་དེ། དེ་དགག་དབྱེ་གྱིས་ཤིག་ཅེས་བྱ་བའི་དོན་ཤེས་པར་བྱའོ། །དེ་ལ་བདག་ཅག་གཞག་པ་ལ་དགོས་པ་མེད་དེ། དེ་མེད་པར་གལ་ཏེ་དགག་དབྱེ་བྱེད་ན། དགག་དབྱེ་གྱིས་ཤིག་ཅེས་བྱའོ། །ཆོས་རྣམ་པར་དག་པར་བྱ་བའི་ཕྱིར་ཞེས་བྱ་བ་ནི་ཁ་ན་མ་ཐོ་བ་མེད་པ་ཙམ་ནི་གསོ་སྦྱོང་གི་རྣམ་པར་དག་པའོ། །འདི་ནི་ཅང་ཤེས་ཉིད་ཀྱང་ཡང་དག་པར་ཞུགས་པ་ཉིད་ལ་བསྐུལ་བ་དང༌། གདམས་ངག་དང་རྗེས་སུ་བསྟན་པ་རྣམས་དང༌། ས་དང་སེམས་ལས་བྱུང་བ་རྣམས་ལས་ཁྱད་པར་དུ་འཕགས་པ་ཉིད་ཅེས་བྱ་བ་དེ་ལྟར་བརྗོད་པའི་ཚིག་གོ །ཆོས་རྣམ་པར་དག་པའི་ཕྱིར་ཞེས་བྱ་བ་ནི། འདིར་འདོན་བ་གཞན་དེ་འདིར་དོན་ནི་དེ་ཉིད་དོ། །གང་ཟག་འཇོག་པར་བྱེད་ཅིང་གཞི་འཇོག་པར་མི་བྱེད་པ་དང༌། གཞི་ཡང་འཇོག་པར་བྱེད་ཅིང་གང་ཟག་ཀྱང་འཇོག་པར་བྱེད་པའི་འོ་ཞེས་བྱ་བ་ནི་འོན་ཀྱང་ཚེ་དང་ལྡན་པ་ཅི་ནས་ཀྱང་དེའི་དོན་དུ་འདུས་ཤིང་འདུག་པ་མ་ཡིན་གྱི། ཚེ་དང་ལྡན་པ་འགའ་ཞིག་ལ་གང་ཟག་འཇོག་པར་བྱེད་ཅིང་གཞི་མི་འཇོག་པ་དང༌། ཚུལ་ཁྲིམས་རྣམ་པར་དག་པར་བྱ་བའི་ཕྱིར་ཞེས་བྱ་བ་ནི་ཚིག་དང་པོའོ། །གཞན་ནི་འོན་ཀྱང་ཚེ་དང་ལྡན་པ་འགའ་ཞིག་གཞི་ཡང་འཇོག་པར་བྱེད་ཅིང་གང་ཟག་ཀྱང་འཇོག་པར་བྱེད་དེ། འོན་ཀྱང་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཁས་བླངས་པ་ཉིད་ནི་གཞག་པ་འམ། གཞག་པ་བསྙོན་པས་ནི་ཁས་བླངས་པ་ཉམས་པར་མི་འགྱུར་རོ་ཞེས་བྱ་བ་ནི། དགག་དབྱེ་བྱེད་པར་ཁས་
བླངས་པ་ལ་གལ་ཏེ་གཞག་པའམ་གཞག་པ་སྙོན་པར་བྱེད་པ་དེ་བདག་གིས་གཞག་པ་ཉིད་མ་བྱས་ཏེ། ཅུང་ཟད་ཀྱང་མ་བཞག་གོ་ཞེ་འམ། ཡང་ན་གཞག་སྟེ་བདག་གིས་འདི་མ་བཞག་གི་གཞན་གཞག་གོ་ཞེས་བསྙོན་ན། དེ་གཉིས་ཀ་ལྟར་ཡང་དགག་དབྱེ་ཁས་བླངས་པ་གང་ཡིན་བ་དེ་དག་ཉམས་པར་མི་འགྱུར་རོ་ཞེས་བྱ་བའི་དོན་ཏོ། །དེ་ལ་སྔ་མ་འམ་འདིའི་རྣམ་པ་དེ་ལྟ་བུ་ཅུང་ཟད་ཀྱང་མེད་དོ་ཞེས་ཟེར་ན་བརྫུན་ཉིད་དོ་ཞེས་བྱ་བ་ནི་གཞག་པ་སྔ་མ་ལ་དེ་ལྟར་བརྗོད་པ་ལ་གཞག་པ་འདི་ལ་ཡང་བརྫུན་ཉིད་དུ་ཤེས་པར་མི་བྱའོ། །དེ་ལྟ་བུའི་ཆས་སྨོས་པ་དེ་ནི་བརྫུན་དུ་སྨྲ་བ་ཉིད་ཅེས་བྱ་བ་འམ། བརྫུན་དུ་སྨྲ་བའི་རབ་ཏུ་དབྱེ་བ་ཐེ་ཚོམ་བཟློག་པར་བྱ་བའི་དོན་ཏེ། དེ་འདི་ཞེས་བྱ་བར་ཡུལ་བསྟན་པའོ། །སྔར་བསྟན་མ་ཐག་པའི་བསྙོན་པ་དེ་ལ་འཇུག་པ་ཞེས་བྱ་བའོ། །གལ་ཏེ་གནས་པར་ཁས་བླངས་པ་དག་གིས་དགེ་སློང་འཐབ་ཀྲོལ་བྱེད་པ་དག་འོང་བར་ཐོས་པར་གྱུར་ན་གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་ན་དགག་དབྱེ་བྱའོ་ཞེས་བྱ་བ་ནི་གལ་ཏེ་དེའི་ཚེ་ཁས་བླངས་པའི་ཚེ། གལ་ཏེ་གསོ་སྦྱོང་གཉིས་སམ་གསུམ་ཐལ་བར་གྱུར་པ་ཉིད་དུ་ཤེས་ན། དབྱར་གྱི་ནང་དུ་དགག་དབྱེ་བྱའོ་ཞེས་བྱ་བའི་དོན་ཏོ། །ཐམས་ཅད་ལ་ཡང་ཕྱེད་བྱས་པ་ནི་བྱས་པ་ཉིད་ཡིན་ནོ་ཞེས་འཇིག་རྟེན་པའི་གྲགས་པ་ཡིན་ལ། གང་ཞིག་ཕལ་ཆེར་བྱས་པ་ནི་བྱས་པ་ཉིད་ཡིན་ནོ་ཞེས་གྲགས་པའི་གྲགས་པ་ཡིན་པས་འདིར་ཡང་འདི་འམ་གཞན་དུ་ལྟུང་བ་ལའོ། །དེ་མེད་པ་ལ་སྔར་གྱི་ཉིད་ལ་བརྟེན་པར་རིག་པར་བྱ་བ་འདིས་གྲགས་པའི་དོན་དུ་རྣམ་པར་རྟོག་པའོ། །འདི་ལ་ཚེས་བཅོ་ལྔ་སྨོས་པ་ལ་གཉིས་པ་དང་གསུམ་པ་འདའ་བར་བྱེད་པ་ལ་ལྟོས་པ་ཉིད་དེ། དེའི་ཚེ་དགག་དབྱེ་བྱ་བ་ཉིད་ཀྱི་ཕྱིར་དེ་ལྟ་བས་ན་དེ་ཉིད་འདའ་བར་བྱེད་པ་ཉིད་དུ་ཤེས་པར་བྱའོ། །མ་གྲུབ་ན་དཀྱིལ་འཁོར་པ་ལྔ་འམ་དྲུག་ཏུ་བློ་མཐུན་བར་རོ་ཞེས་བྱ་བ་ནི་འདའ་བར་མ་གྱུར་ཏམ་བར་ཆད་ཀྱི་རྐྱེན་གཞན་གྱི་དབང་གིས་མ་གྲུབ་ན་འདིར་དགག་དབྱེ་དཀྱིལ་འཁོར་བ་ལྔ་འམ། དྲུག་ཏུ་བློ་མཐུན་པས་ཡང་དག་པར་ཤེས་པར་བྱའོ། །ངག་གིས་བཤེས་པའི་ཚིག་གིས་བསུ་ནས་ལྷུང་བཟེད་དང་ཆོས་གོས་བླང་བ་དང༌། གནས་ཁང་དང་ཁྱམས་དང་ཁང་པ་
བརྩེགས་པ་བསྐོ་བ་དང༌། ཁྲུས་དང་སྣུམ་བག་གི་རྙེད་པ་བསྟབས་པ་དང༌། ཆོས་མཉན་བ་སྦྱིན་པ་དང༌། དེ་ལྟ་བུ་མགུ་བར་བྱ་བ་དག་བྱའོ་ཞེས་བྱ་བ་ནི། སྐབས་དེར་འཐབ་ཀྲོལ་བྱེད་པ་དག་འོངས་ན། དེ་དག་ལ་ངག་གིས་བཤེས་པའི་ཚིག་གིས་བསུ་ནས་ལྷུང་བཟེད་དང༌། ཆོས་གོས་བླང་བར་བྱ། གནས་ཁང་སྐྱོང་བས་གནས་ཁང་དང་ཁྱམས་དང་ཁང་པ་བརྩེགས་པ་བསྐོ་བར་བྱ། ཁྲུས་དང་སྣུམ་བག་གི་རྙེད་པ་བསྟབས་པར་བྱ། །ཆོས་མཉན་བ་སྦྱིན་བར་བྱ་ཞིང་གལ་ཏེ་དེ་སྲིད་དུ་ནུས་ན་དེ་ལྟ་བུ་ལ་སོགས་པའི་བཅོམ་གསག་མགུ་བར་འགྱུར་བའི་སྦྱོར་བ་གཞན་དག་ཀྱང་དེ་ལྟ་བུའི་མཁས་པས་ཞེས་བྱ་བ་དེ་ལྟ་བུའི་འདོན་བ་ལ་ཀུན་ནས་བརྟེན་ནས་འདིར་མདོར་བྱས་སོ། །འདིར་ཁྲུས་འདི་ལ་འདོན་པ་གཞན་ལས་སྦྱར་བ་ལས་ཇུག་པ་ཉིད་ལ་ཀུན་ནས་བརྟེན་ནོ། །བདག་ཉིད་ཀྱི་དངོས་པོར་མ་གྲུབ་ན་དཀྱིལ་འཁོར་བ་དག་ཏུ་གསོ་སྦྱོང་བྱའོ། །འོ་ན་དེང་ཁྱེད་ཀྱིས་དགག་དབྱེ་མ་ཡིན་ནམ་ཞེས་ཟེར་བ་དག་ལ་ཚེ་དང་ལྡན་བ་དག་སྡོད་ཅིག །ཁྱེད་ཅག་གློ་བུར་དུ་ལྷགས་པ་ཡིན་གྱི། དོན་འདི་གཉུག་མར་གནས་པ་དག་གི་ཡིན་ནོ་ཞེས་ལན་གདབ་བར་བྱའོ། །དོང་བ་དག་ན་དགག་དབྱེ་བྱའོ་ཞེས་བྱ་བ་ནི་བྱའོ་ཞེས་བྱ་བའི་ཁྱད་པར་རོ། །གསོ་སྦྱོང་གི་ཉི་མ་ཁོ་ན་ལ་འདི་ཉིད་བྱའོ། །ཐ་དད་པ་ཡོད་ཀྱང་ལས་འདི་ལ་གསོ་སྦྱོང་རིགས་མཐུན་པ་ཉིད་ཀྱི་ཕྱིར་རོ། །དགག་དབྱེའི་གཞིའོ།། །།ནང་དང་བཅས་པས་བཟོད་པར་མ་བྱས་པར་དགག་དབྱེ་མི་བྱའོ་ཞེས་བྱ་བ་ལ། འདིས་ནི་བཟོད་པར་མ་བྱས་པ་ཞེས་བྱ་བ་སྟེ། བཟོད་པ་མ་བྱས་པའོ། །ནང་དང་བཅས་པ་ཞེས་བྱ་བ་ནི་ཐམས་ཅད་ཀྱིས་ནི་མ་ཡིན་ནོ། །ཞག་བཅུ་འམ་ཟླ་བ་ཕྱེད་ཀྱིས་དེ་འབྱུང་བར་འགྱུར་བ་ཉིད་ནི་དེའི་དུས་ཡིན་ནོ་ཞེས་བྱ་བ་ལ། དེ་ཞེས་བྱ་བ་ནི་དགག་དབྱེ་དེའོ། །དེའི་དུས་ཞེས་བྱ་བ་ནི་དེ་ལ་སྨོས་པའི་བཟོད་པར་བྱ་བ་དེའི་དུས་ཡིན་ནོ། །ཁ་ཅིག་ལས་ནི་བདུན་ནམ་བརྒྱད་ན་ཞེས་བྱ་བ་ནི། ཉི་མ་བདུན་ནམ་བརྒྱད་ཀྱིས་དེ་འབྱུང་བར་འགྱུར་བ་ཉིད་ཀྱི་དུས་ན་དགག་དབྱེ་དེ་ལ་བཟོད་པར་བྱ་བ་དེའི་དུས་ཡིན་ནོ་ཞེས་ཁ་ཅིག་ལས་འབྱུང་ངོ༌། །འདུས་པ་ལ་ནི་མ་ཡིན་ནོ་ཞེས་བྱ་བ་ནི། དེའི་ཚེ་འདུས་ཞེས་བྱ་བར་སྦྱར་ཏེ། འདིར་དགག་དབྱེའི་དོན་དུ་འདོན་པ་ཡིན་མོད་ཀྱི་
འདུས་པ་གཞན་ལ་ཡང་དེ་བཞིན་དུ་འདི་རིགས་པ་མ་ཡིན་ནོ། །དེའི་ཕྱིར་འདིར་བྱེ་བྲག་ཏུ་མ་བྱས་སོ། །དེས་བཟོད་པར་མ་བྱས་པར་མི་བྱའོ་ཞེས་བྱ་བ་ནི་ནང་དང་བཅས་པ་དེས་བཟོད་པར་མ་བྱས་པར་དགག་དབྱེ་མི་བྱའོ། །དེའི་ཚེ་འདུས་ པ་ཐམས་ཅད་ཀྱིས་ཕན་ཚུན་ཀུན་དགའ་བར་མ་བྱས་པར་མི་བྱའོ་ཞེས་བྱ་བ་ནི་ཕྱག་ལ་སོགས ་པས་ཕན་ཚུན་ཀུན་དགའ་བར་མ་བྱས་པར་གང་གིས་དེ་ཕན་ཚུན་ཀུན་དགའ་བར་མ་བྱས་པར་མི་བྱའོ། །གང་གི་རྣམས་ཀྱིས་ཤེ་ན། དེའི་ཕྱིར་དེའི་ཚེ་གནས་ཀྱི་གཞི་དེར་འདུས་པ་ཐམས་ཅད་ཀྱིས་ཞེས་བྱ་བ་སྨོས་ཏེ། ཅི་གང་ཞིག་ནང་དང་བཅས་པར་འགྱུར་བ་གང་ལ་ཡང་དེ་འབྱུང་བར་མི་འགྱུར་བ་དེ་ཉིད་ཡིན་ནམ་ཞེ་ན། དེའི་ཕྱིར་ཐམས་ཅད་ཀྱིས་ཞེས་བྱ་བ་སྨོས་སོ། །ཅི་ཞག་བཅུ་འམ། ཟླ་བ་ཕྱེད་ན་འབྱུང་བར་འགྱུར་བ་ཉིད་ན་ཕན་ཚུན་ཀུན་དགའ་བར་མ་བྱས་པར་མི་བྱ་བའམ་ཞེ་ན། དགག་དབྱེའི་དུས་སོ། །དེའི་ཚེ་གཤེ་བ་ལ་བཟོད་པར་མི་གསོལ་བར་མི་བྱའོ་ཞེས་བྱ་བ་སྨོས་ཏེ། དགག་དབྱེའི་དུས་འབའ་ཞིག་ཏུ་མ་ཟད་ཀྱི་དུས་གཞན་གྱི་ཚེ་ཡང་ངོ༌། །སིལ་བུ་དག་ལས་མི་འདོད་པ་ལས་ནི་མ་ཡིན་ནོ་ཞེས་བྱ་བ་ལ་ སོགས་པ ་དང༌། ཇི་སྲིད་དུ་བཟོད་པ་མ་ཡིན་ཞེས་བྱ་བ་ལ་ སོགས་པ ་ནི་ཕྲན་ཚེགས་ལྷག་མ་རྣམས་ལས་སོ། །དགེ་སློང་མས་དགེ་སློང་ལ་གནས་ཀྱི་ཕྱི་རོལ་དུ་བཟོད་པར་གསོལ་བར་མི་བྱའོ། །རྐང་པ་གཉིས་ལ་ཕྱག་བྱས་ཏེ་མི་བྱའོ་ཞེས་བྱ་བ་ནི་དགེ་སློང་མས་དགེ་སློང་ལ་བཟོད་པར་གསོལ་བར་མི་བྱའོ་ཞེས་བྱ་བར་སྦྱར་རོ། །བཟོད་ན་ཕྱག་བྱ་སྟེ་འགྲོ་བར་བྱའོ་ཞེས་བྱ་བ་ནི་དགེ་སློང་གིས་བཟོད་ན་དགེ་སློང་མས་དགེ་སློང་གི་རྐང་པ་གཉིས་ལ་ཕྱག་བྱ་སྟེ་འགྲོ་བར་བྱའོ། །བཟོད་པ་གསོལ་བར་བྱེད་པ་དེ་ལ་དགེ་སློང་གིས་མ་གུས་པར་བྱ་སྟེ་འགྲོ་བར་མི་བྱའོ། །འདའ་བར་མི་བྱའོ་ཞེས་བྱ་བ་ནི་དགེ་སློང་མ་བཟོད་པར་གསོལ་བར་བྱེད་པ་དེ་ལས། དགེ་སློང་གིས་འདའ་བར་མི་བྱ་སྟེ་བཟོད་པ་དང་དུ་བླང་བར་བྱའོ། །བཟོད་པར་བྱ་བ་ལ་སྔར་ཤེས་པ་ཤད་ཀྱིས་སྤྱང་དུ་གཞུག་པར་བྱའོ། །མི་འདོད་ན་ཐབས་བཙལ་བ་ལ་མི་འབད་པར་མི་བྱའོ་ཞེས་བྱ་བ་ལ། མི་འབད་པར་མི་བྱའོ་ཞེས་བྱ་བ་ནི། བཟོད་པ་གསོལ་བར་བྱ་བ་དེ་བཟོད་པར་མི་འདོད་ན། དེའི་ཕྱིར་མི་བསྒྱང་ངོ༌། །ཀུན་ནས་དཀྲིས་པ་
དང་མ་བྲལ་གྱི་བར་དུ་མི་བསྡད་པར་མི་བྱའོ། །བཟོད་པ་གསོལ་བར་བྱེད་པ་ལ་མི་བཟོད་པར་མི་བྱའོ་ཞེས་བྱ་བ་སྨོས་སོ། །དགག་དབྱེའི་གཞི་དང་འབྲེལ་བ་ཕྲན་ཚེགས་ལ་སོགས་པའི་སྐབས་སོ། །དགག་དབྱེའི་གཞི་རྫོགས་སོ།། །།སྲ་བརྐྱང་གདིང་བར་བྱའོ་ཞེས་བྱ་བ་ལ། སྲ་བརྐྱང་ཞེས་བྱ་བ་ནི་གཏན་པ་སྟེ། འདི་ལྟར་འདི་ནི་གོས་གདིང་བར་བྱེད་ཅིང་རྐྱོང་བར་བྱེད་པ་མི་འཁུམས་པར་བྱེད་པའི་ཆོས་ཅན་ཤིང་ལ་ སོགས་པ ་ལས་བྱས་པའི་སྤང་ལེབ་ལ་གཏན་པ་ཞེས་བྱའོ། །དེ་ལ་གང་ཞིག་འདིས་ཚོགས་དེ་ལ་དགེ་སློང་གཅིག་ཚོགས་ཏེ་མ་ལུས་པ་ལ་ཁྱེད་པར་བྱེད་ན་ཚོགས་མ་ལུས་པ་ཉིད་ཀྱིས་རྒྱས་པར་འགྱུར་བ་དེའི་ཚོགས་འབྲེལ་པ་ཐམས་ཅད་ལ་རྗེས་སུ་ཞུགས་པ་ཐམས་ཅད་ལ་ངོ་བོ་གཅིག་པའི་གདིང་བར་འགྱུར་བ་དགེ་འདུན་མཐའ་དག་ལ་ཁྱབ་པར་བྱེད་པས་དེའི་མིང་གཏན་པ་ཞེས་བྱ་བའོ། །དེ་ཉིད་ཀྱི་ཕྱིར་འདིར་འདི་བྱ་བ་ལ་གདིང་བ་ངེས་པར་དེ་ཞེས་བྱ་བར་བརྗོད་པ་ཡིན་ནོ། །ཅིའི་ཕྱིར་གོས་གསུམ་གདིང་བར་བྱ་བ་བཏིང་བ་ལ་འབྲས་བུ་ཅི་ཡོད་ཅེ་ན། དེའི་ཕྱིར་གསུམ་པོ་དག་ཇི་ལྟ་བ་བཞིན་དུ་སྲ་བརྐྱང་བཏིང་ན་ཡང་ཡང་ཟ་བ་དང་འདུས་ཤིང་ཟ་བ་དང༌། མ་སྨྲས་པར་གྲོང་དུ་འགྲོ་བ་དང་གོས་སློང་བ་ལ་ཡང་ཉེས་པ་མེད་ལ། དེ་ལྷག་མ་དག་དང་རྙེད་པ་ཐུན་མོང་དུ་འགྱུར་རོ་ཞེས་བྱ་བ་སྨོས་ཏེ། རེ་ཞིག་གསུམ་པོ་དག་ཅེས་བྱ་བ་ནི་འཆང་བ་དང་འབྲལ་བ་དང་འཇོག་པའི་བདག་ཉིད་ཅེས་སྨོས་པ་ཁོ་ན་སྟེ། ཇི་ལྟར་བཞི་པོ་གཞན་འདི་ཐུན་མོང་གི་མཐར་ཐུག་པ་ལྔ་པོ་སྐྱོན་དང་བྲལ་བ་ཞེས་བྱ་བའི་དོན་ཏོ། །སྨད་གཡོགས་དང་སྟོད་གཡོགས་སུ་བྱས་པའི་ཆོས་གོས་ཀྱིས་ལྗོངས་རྒྱུ་ཞིང་འགྲོ་བ་གང་ཡིན་པ་དང༌། རུང་བར་བྱས་པའི་གོས་ཇི་ཙམ་འདོད་པ་འཆང་བ་ཞེས་བྱ་བ་གང་ཡིན་བ་གཉིས་པོ་འདི་བསྡུས་པ་སྟེ། གསུམ་པོ་བསྟན་པ་ཉིད་ཀྱིས་བསྡུ་བ་བྱས་ཟིན་པའི་ཕྱིར་རོ། །གལ་ཏེ་དེ་ལ་སྣམ་སྦྱར་བསྐུར་བས་དགོས་པ་མེད་པས་དེས་ཅི་ཞིག་བྱ། ཇི་ལྟར་གང་གི་ཕྱིར་སྟོད་གཡོགས་སྨད་གཡོགས་སུ་བཅས་པ་མེད་ན་ངོ་ཚ་བའི་གནས་གཡོགས་པར་བྱ་བའི་ཕྱིར་དང༌། རབ་ཏུ་འབྱུང་བའི་རྟགས་ཡང་དག་པར་བསྲུང་བར་བྱ་བའི་ཕྱིར་ཡིན་གྱི། སྣམ་སྦྱར་བསྐུར་བ་ལ་དགོས་པ་མེད་པ་དེ་བཞིན་དུ་འདི་ལའོ། །གལ་ཏེ་བཏང་ན་འཆང་བ་
ལ་ཉེས་པ་མེད་དེ་རྣམ་པར་རྟོག་པས་ཅི་ཞིག་བྱ་ཞེས་བྱ་བའོ། །འོ་ན་བཅོམ་ལྡན་འདས་ཀྱིས། ཚིག་འདི་བརྗོད་པ་ཅི་ཞིག་བརྗོད་ཅེ་ན། སྟོད་གཡོགས་ཀྱི་ཁུར་ལས་ཐར་པར་བྱ་བའི་ཕན་ཡོན་བསྟན་པའི་ཕྱིར་རོ། །རུང་བ་མ་བྱས་པའི་གོས་འཆང་བ་དེ་ནི་རྣམ་པར་རྟོག་པའི་བྱ་བས་ཐར་པ་དང་བག་ཡངས་ཀྱི་བདེ་བའི་ཕན་ཡོན་ཡང་བསྟན་པའི་ཕྱིར་རོ། །གསུམ་པོ་དག་ཅེས་བྱ་བ་ལ་ལྟོས་པ་གང་ཡིན་ཞེ་ན། དེའི་ཕྱིར་གནས་པར་ཁས་མ་བླངས་པ་དང༌། དབྱར་རལ་བ་དང༌། དབྱར་ཕྱི་མར་གནས་པར་ཁས་བླངས་པ་དག་ལ་དེ་མི་འབྱུང་ངོ་ཞེས་བྱ་བ་སྨོས་ཏེ། ས་གཞན་གནས་པ་དག་ལ་ཡང་ངོ་ཞེས་བྱ་བ་ནི་དབྱར་གནས་གཞན་དུ་ཁས་བླངས་པ་ལ་ སོགས་པ ་སྟེ། དབྱར་གནས་པ་ཕྱི་མར་གནས་པར་ཁས་བླངས་པ་དེ་དང་རོ་གཅིག་པར་འདྲ་བའོ། །དབྱར་གནས་པར་ཁས་མ་བླངས་པ་དང༌། དབྱར་རལ་བ་དག་ལ་དབྱར་གྱི་གཏན་པ་མི་འབྱུང་ངོ༌། །དབྱར་གནས་གཞན་དུ་གནས་པར་ཁས་བླངས་པ་དག་ལ་ནི་གཏན་པ་གདིང་བ་དག་མི་འབྱུང་བ་སྟེ། གཏན་པ་གདིང་བ་ནི་དངོས་གཞིའི་ཆོ་ག་ལ་བརྟེན་པ་ཡིན་པའི་ཕྱིར་རོ། །དངོས་གཞིའི་ཆོ་ག་ཞེས་བྱ་བ་གཏན་པ་བཏིང་བ་ལ་བྱའོ། །དབྱར་ཕྱི་མར་ཁས་བླངས་པ་ནི་མ་ཡིན་ནོ། །དགེ་འདུན་གྱི་དུས་ལས་འདའ་བས་དེ་བརྟེན་པ་དང་ལྡན་པའི་ཚོགས་པ་སྦྱིན་བ་ལ་ཡང་དབྱར་གནས་པར་ཁས་ལེན་པ་མེད་པའོ། །འདི་ནི་སྐལ་བ་མི་མཉམ་པ་སྟེ། རང་བཞིན་གནས་པ་ཉིད་ཀྱི་ཕྱིར་རོ། །གང་ཞིག་སའི་ནང་དུ་གནས་པ་ཉིད་ནི་རང་བཞིན་དུ་གནས་པ་ཉིད་མ་ཡིན་པའོ། །དེ་བས་ན་འདི་ལྟར་ལྷན་ཅིག་ཏུ་རོ་གཅིག་པ་འདི་ལ་ནི་རུང་བ་མ་ཡིན་ནོ། །གལ་ཏེ་སྐྱེ་བར་མ་གྱུར་ན་རང་བཞིན་དུ་གནས་པ་ཉིད་ནད་པར་གྱུར་ན་སྲ་བརྐྱང་བཏིང་བ་དང༌། བཏིང་བ་ཆུད་ཟོས་པ་མི་སྐྱེད་པའོ། །དགེ་ཚུལ་དག་ལ་ནི་འདི་ལྟར་འདི་མི་སྐྱེད་པའོ་ཞེས་འབྱུང་ངོ༌། །དེ་དང་དེའི་ལས་ལ་འདི་མ་ཞུགས་པ་ལ་ཆོ་ག་གང་ཡིན་པ་དེ་ཉིད་ཀྱི་བྱས་པ་ཞེས་གསུངས་པ་དེའི་ཕྱིར་འདིར་བསྡུས་པ་མ་ཡིན་ནོ། །དེ་དག་ཉིད་ཐོབ་པ་ཡིན་ན་མི་འབྱུང་ངོ་ཞེས་བྱ་བ་ནི་སྲ་བརྐྱང་གདིང་བ་ཉིད་ལས་གཞན་ན་ངས་པ་དེ་དག་ཉིད་ཐོབ་པ་ལ་ནི་མི་འབྱུང་བ་སྟེ། སྲ་བརྐྱང་གདིང་བ་མི་འབྱུང་ཞིང་སྦྱར་བ་ནི་མ་ཡིན་ནོ། །ཐ་མ་མ་གཏོགས་པ་དག་དང་ས་
གཞན་ན་གནས་པ་དག་དང་དགེ་ཚུལ་ནི་རྙེད་པ་དབང་ངོ་ཞེས་བྱ་བ་ལ། ཐ་མ་མ་གཏོགས་པ་ནི་ཐ་མ་མ་གཏོགས་པ་སྟེ། གནས་གཞན་དུ་གནས་པ་དང་དབྱར་ཕྱི་མར་ཁས་བླངས་པ་དང་དབྱར་གནས་པར་ཁས་མ་བླངས་པ་ལ་ སོགས་པ ་རྣམས་སོ། །གལ་ཏེ་ཡང་གཏན་པ་གདིང་བ་ལ་འདི་རྣམས་མི་འགྱུར་བ་དེ་ལྟར་ཡང་དེ་རྒྱུ་མཚན་ཅན་གྱི་རྙེད་པ་ལ་དེ་རྣམས་ལ་སྐལ་བ་དང་ལྡན་བ་ཉིད་ཅེས་བྱ་བའི་དོན་ཏོ། །འདི་ལྟར་དེ་དག་གི་དབྱར་གནས་པ་དག་དང་དོན་གཅིག་པ་ཉིད་ཡིན་བས་བཟློག་པར་མི་བྱ་སྟེ་དེ་རྣམས་ཀྱི་དེ་སྐལ་བ་དང་ལྡན་བ་ཉིད་དོ། །ས་གཞན་ན་གནས་པ་དག་ཅེས་སྨོས་པས་སྤངས་པ་ཡང་རྙེད་པ་དབང་བ་ཉིད་དུ་ཐལ་བར་འགྱུར་བས་དེ་བསལ་བའི་ཕྱིར་སྤངས་པ་ནི་མི་དབང་ངོ་ཞེས་བྱ་བ་སྨོས་ཏེ། སྤངས་པ་ནི་དགེ་འདུན་ལས་ཐ་དད་དུ་གྱུར་པ་ཉིད་ཡིན་པས་དེའི་ཕྱིར་ན་གཏན་པ་བཏིང་བའི་རྙེད་པ་མི་དབང་བ་ཉིད་དུ་རིག་པར་བྱའོ། །དེ་ལས་གཞན་པ་ཆད་པས་བཅད་པ་དང་སྦོ་བ་ལ་ སོགས་པ ་བྱེད་པ་ནི་དགེ་འདུན་ལས་ཐ་དད་དུ་གྱུར་པ་ཉིད་མ་ཡིན་པས་དེའི་ཆོ་ག་འདི་མི་འཇུག་པའོ། །བྱེ་བ་དག་ནི་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་ནི་དེ་ཉིད་ཀྱིས་ཐོབ་པ་དང་འདྲའོ་ཞེས་བྱ་བ་ལ། དེ་ཞེས་བྱ་བའི་སྒྲས་ནི་སྤངས་པ་ལ་སྙེགས་ཏེ་སྤང་བའི་རྙེད་པ་དང་འདྲ་སྟེ། བྱེ་བ་དག་ན་འདོད་པ་གཞན་ལ་དམིགས་པས་ཆོས་མ་ཡིན་བའི་ཕྱོགས་དང་མཐུན་པ་དག་ཏུ་གནས་པ་རྣམས་ལྟུང་བའོ། །ཇི་ལྟར་སྤངས་པ་ལ་མེད་པར་འགྱུར་བ་དེ་བཞིན་དུ་འདི་རྣམས་ལ་ཞེས་བྱ་བའི་དོན་ཏོ། །གང་གི་དོན་དུ་སྲ་བརྐྱང་གདིང་བར་བྱ་ཞེས་བྱ་བ་དེ་བསྡུ་བ་བསྟན་ནས། ད་ནི་འདིར་དངོས་པོ་གང་གདིང་བར་བྱ་བ་ལ་དེ་ལ་གཏན་པ་ཉིད་ཅེས་པ་བརྗོད་པར་བྱ་སྟེ། དངོས་པོ་གཞིའི་དུས་སུ་དགག་དབྱེའི་མཐར་དབྱར་གྱི་རྒྱུ་ལས་བྱུང་བའི་གདིང་བའི་ཉི་མའི་མཐར་གྲུབ་པ་གོས་ཀྱི་རྙེད་པར་བགྲང་བའི་ཆོས་གོས་གསུམ་མོ་ཞེས་བྱ་བ་ལ་འདིར་དབྱར་དང་པོ་རྣམས་བཟུང་བ་ཞེས་བྱ་བ་དེ་ནི་དབྱར་ཕྱི་མ་ལ་བརྟེན་པ་ལ་མི་འབྱུང་ངོ་ཞེས་གསུངས་པའི་ཚིག་གིས་ཤེས་པར་བྱ་སྟེ། སྟོན་ཟླ་འབྲིང་པོའི་ཚེས་བཅུ་དྲུག་ནི་གཏན་པ་གདིང་བའི་ཉི་མ་ཉིད་ཡིན་པར་གསུངས་པའི་ཕྱིར་རོ། །དངོས་གཞིའི་དུས་དེའི་དགག་དབྱེའི་ཞག་མན་ཆད་གཞན་ནམ་རྒྱུ་ལས་གཞན་པའི་
རྙེད་པ་བྱེད་བཞིན་བའི་དགག་དབྱེའི་ཐ་མ་དེ་རྣམས་བསྡུས་པ་ནས་རྒྱུས་རྙེད་པ་ལ་མཐར་ཐུག་པ་དེ་དག་བསྡུས་པའི་རྒྱུ་ལས་བྱུང་བ་ཡིན་ནམ་ཞེ་ན། འདི་ལྟ་སྟེ་དབྱར་གནས་པའི་རྒྱུ་ལས་བྱུང་བའི་རྙེད་པ་གང་ཡིན་པའོ། །ཡང་ན་སོ་སོ་བ་སྟེ། འདི་ལྟར་རྒྱུ་ལས་བྱུང་བའི་རྙེད་པ་གང་ལ་ཡོད་པ་དེ་ནི་དངོས་གཞིའི་དུས་ཀྱི་དགག་དབྱེའི་མཐར་དབྱར་གྱི་རྒུ་ལས་བྱུང་བས་ཏེ། དུས་གཞན་དུ་འབྱུང་བ་ནི་མ་ཡིན་ཏེ། གདིང་བའི་ཞག་རྣམས་ཀྱི་མཐའ་ཅན་འདི་རྣམས་དང་འབྲེལ་བའོ། །དེའི་དུས་ལས་དུས་གང་ཡང་རུང་བའི་ས་ལས་བསྒྲུབ་པ་སྟེ། དུས་གཞན་གྱི་རྒྱུ་ལས་བྱུང་བའི་རྙེད་པ་ནི་མ་ཡིན་ནོ། །ལག་གི་བླ་དང་རྒྱན་འདོགས་པ་དང་བ་གླང་གི་དང་མ་ཧེ་དང་མལ་སྟན་དང་དེར་གཏོགས་པའི་དགག་དབྱེ་ལ་ སོགས་པའི་བྱེ་བྲག་གི་དོན་དུ་སྦྱིན་བ་མ་ཡིན་ཏེ། དེའི་གྲངས་དང་ལྡན་པ ་ཆོས་གོས་གསུམ་ཞེས་བྱ་བའི་དོན་ཏོ། །གཙུག་ལག་ཁང་ན་གོས་ཀྱི་རྙེད་པར་ངེས་པ་གང་ཡིན་པ་དེ་ཡང་འདིར་བསྡུས་པ་ཤེས་པར་བྱ་སྟེ། དེ་ལྟ་བས་ན་གོས་ཀྱི་དོན་དུ་རྙེད་པའི་རིན་དག་གིས་རྙེད་པ་བཟུང་ངོ༌། །དེ་ལྟ་བས་ན་ཆོས་གོས་གསུམ་དུ་ཤེས་པར་བྱ་བ་མ་ཡིན་ཏེ། གང་ཞིག་གོས་རྙེད་པ་ཞེས་བྱ་བ་བརྗོད་པར་བྱ་བ་ལ་རིན་ཐང་སྔོན་དུ་འགྲོ་བས་བསྒྲུབ་པ་ལ་སྐྱེད་པར་བྱེད་པ་ཉིད་དེ་དེ་བས་ན། གོས་གསུམ་ལ་སྲ་བརྐྱང་ཉིད་གདིང་བར་བྱའོ་ཞེས་བྱ་བ་འདིར་དངོས་སུ་སྒྲུབ་བྱེད་ཅུང་ཟད་ཀྱང་མ་མཐོང་ངོ༌། །རྟགས་ནི་ཡོད་དེ། དེ་གང་ལས་ཤེས་ཤེ་ན། ཚེ་དང་ལྡན་པ་དག་བདག་སང་གཏན་པ་གདིང་བར་འགྱུར་གྱི་ཁྱེད་ཅག་གིས་རང་རང་གི་ཆོས་གོས་རྣམས་དབྱུང་བར་བྱའོ་ཞེས་གསུངས་པའི་ལུང་ལས་ཤེས་ཏེ། གང་གི་ཕྱིར་གཅིག་པུ་ཞིག་གདིང་བར་བྱ་བ་ཉིད་ཡིན་ན་ནི་དེའི་ཚེ་རང་གི་ཞེས་བྱ་བ་གཅིག་གི་ཚིག་འཐོབ་པའོ། །གཅིག་ཅིག་བྱིན་གྱིས་བརླབས་པ་ལ་གསུམ་ཆར་གྱིས་དབྱུང་བ་ཡང་མི་རིགས་པའི་ཕྱིར་རོ། །དེ་ལྟར་ཡང་འདིར་གཞུང་ནི་བཙུན་བ། གང་ཟག་གི་སྣམ་སྦྱར་གྱི་གཏན་ལ་གདིང་དུ་རུང་ངམ། ཉེ་བ་འཁོར་མི་རུང་ངོ༌། །གལ་ཏེ་དགེ་འདུན་ལ་ཕུན་ན་ནི་རུང་ངོ༌། །བླ་གོས་དང་མཐང་གོས་ཀྱང་དེ་བཞིན་ནོ་ཞེས་གསུངས་པ་ཡིན་ཏེ། བླ་གོས་དང་མཐང་གོས་གཉིས་ཀྱང་ངོ༌། །གཅིག་གིས་གདིང་བ་ཡོད་པར་གྱུར་པ་ལ་འདི་རིགས་པར་གྱུར་པ་མཐོང་བ་ཡིན་ནོ། །གང་ཡང་
གདིང་བར་བྱ་ཞེས་བྱ་བ་གཅིག་གིས་ཚིག་དེ་ལ་ནི་དེ་ལྟར་གནོད་པ་མ་ཡིན་ཏེ། འདིར་དགེ་འདུན་རྒྱས་པ་བསྒྲུབ་བ་ཅན་གྱི་སྲ་བརྐྱང་གི་སྒྲས་ཆོས་གོས་བརྗོད་པའི་ཕྱིར་དང༌། གཅིག་པ་ཉིད་ཀྱི་ཕྱིར་རོ། །ཆོས་གོས་ཐམས་ཅད་གཅིག་པ་ཉིད་ཀྱི་ཕྱིར་རྒྱས་པར་སྒྲུབ་པ་ཉིད་ལ་གནས་པ་མེད་དོ། །དེ་ལྟ་བས་ན་བྱིན་གྱིས་བརླབ་པ་ཐམས་ཅད་ལ་འདི་ཐམས་ཅད་སྟོན་པའོ། །དེ་ལྟ་བས་ན་དགེ་སློང་མ་རྣམས་ཀྱིས་ཆོས་གོས་ལྔ་ཆར་གཏན་པ་ཉིད་དུ་གདིང་བར་བཏིང་བ་འདིས་བསྟན་པ་ཡིན་ནོ། །དགེ་འདུན་གྱིའོ་ཞེས་བྱ་བ་ནི་ཆོས་གོས་གསུམ་མོ། །ཆོས་གོས་གཞན་བྱིན་གྱིས་བརླབ་པར་བྱ་བ་དེ་ཉིད་ཡིན་ཏེ། ཁས་བླང་བར་མ་བྱས་པར་བྱིན་གྱིས་བརླབ་པ་མེད་དོ། །དེའི་ཕྱིར་དགེ་འདུན་གྱིལ་བྱིན་པ་དེ་ལ་བྱིན་གྱིས་བརླབ་པར་བྱ་བ་ཡིན་ནོ། །ཆོས་གོས་གང་གདིང་བར་འོས་པ་དེ་བསྟན་པའི་བཤད་གདབ་མ་བྱས་པ་དང༌། ཡ་ཡོར་མ་གྱུར་པ་དང་མ་མུགས་པ་དང་མ་ཟེགས་པའོ་ཞེས་བྱ་བ་སྨོས་ཏེ་བཀྲུ་བ་ལ་བཤད་གདབ་མ་བྱས་ཀྱི་བར་དེ་སྲིད་དུ་བཀྲུས་པ་མི་འགྲུབ་པས་དེ་སྲིད་དུ་འདིར་བཀྲུ་བ་ལ་བཤད་གདབ་ཏུ་འདོད་དོ། །དེ་ལས་གང་ཞིག་ལབ་བཞིན་དུ་བཤད་གདབ་བྱས་པ་དང་རྡུང་བ་དེ་ནི་བཤད་གདབ་བོ། །དེ་ལྟར་མ་བྱས་པ་གང་ཡིན་ པ་དེ་ནི་བཤད་གདབ་མ་བྱས་པའོ། །ཡ་ཡོར་ལ་སོགས ་ཞེས་བྱ་བ་ནི་སྒམ་བུ་ལ་ སོགས་པ ་གཞག་པ་ནི་ཡ་ཡོར་རོ། །གང་ཞིག་གྲྭ་དག་འཕྱང་བར་འདུག་པ་ནི་མི་མཉམ་པར་འདུག་པའོ་ཞེས་བྱ་བའི་དོན་ཏོ། །འཐག་པའི་ཚེ་བར་བར་དུ་རྒྱུ་སྤུན་མ་བཅུག་ཅིང་སེང་སེར་པོར་གྱུར་པའོ་ཞེས་ཀྱང་གཞན་དག་ཟེར་ཏེ། འདི་ལ་དོན་དེ་ཁས་ལེན་པའོ། །དེའི་འདོད་པ་འདིར་ཡ་ཡོ་ནི་སེང་སེང་པོར་གྱུར་པའོ། །དེ་ལས་བཟློག་པ་གང་ཡིན་པ་དེ་ནི་ཡ་ཡོར་མ་གྱུར་པའོ། །མ་མུགས་པ་ཞེས་བྱ་བ་ལ་མུགས་པ་ཞེས་བྱ་བ་ནི་སྲིལ་རྣམས་དང་བྱི་བ་ལ་ སོགས་པའི་མཆུས་མུགས་པ ་སྟེ། དེ་ལྟར་མ་གྱུར་པ་གང་ཡིན་པ་དེ་ནི་གཞན་ནོ། །མ་ཟེགས་པ་ཞེས་བྱ་བ་ལ། ཟེགས་པ་ཞེས་བྱ་བ་ནི་ཤས་སྲབ་པ་སྟེ། དེ་ལྟར་མ་གྱུར་པ་ནི་མ་ཟེགས་ པ་ཞེས་བྱ་བའི་དོན་ཏོ། །ཁ་བསྒྱུར་བའོ་ཞེས་བྱ་བ་ནི་འདིར་བཀྲུ་བཤལ་འབའ་ཞིག་ལ་སོགས ་པས་ཁ་བསྒྱུར་བར་བྱས་པའོ། །ཁ་བསྒྱུར་བ་དེས་ཀུན་ནས་སྦྱར་བ་ནི་ཁ་བསྒྱུར་བའོ། །ཆོས་གོས་མ་
བསྡམས་པ་རུང་བ་ཞེས་གསུངས་པ་དེ་ཉིད་འདིར་བསྡུས་པ་ཡིན་ནོ། །འདིར་གཞུང་ནི། བྲམ་ཟེའི་བུ་མོས་ཞུས་པ་ལས། ཆོས་གོས་མ་བསྡམས་པ་རུང་བ་གང་ཞེ་ན། མ་བསྡམས་པ་ནི་མ་བཅགས་པའོ། །དོན་དེ་ཉིད་རུང་བ་གང་ཡིན་བས་མ་བསྡམས་པ་རུང་བའོ་ཞེས་གསུངས་པ་ཡིན་ནོ། །སྨྲས་པ་ཆོས་གོས་རུང་བ་གང་ཡིན་ཞེ་ན། ཆོས་གོས་ཁ་བསྒྱུར་བ་གང་ཡིན་བ་དེ་ཡང་དེ་ཡིན་བས་ཁ་བསྒྱུར་བ་ཞེས་བྱ་བ་དེ་འདི་ཡིན་ཏེ། མི་གདིང་བར་མི་བྱའོ། །སྨྲས་པ་བདག་ཉིད་འདི་ཞེས་བྱ་བའི་དོན་ཏོ། །ཡོངས་སུ་མ་སྤྱད་པའོ་ཞེས་བྱ་བ་ནི། འདིར་གཞུང་འདི་བྲམ་ཟེའི་བུ་མོས་ཞུས་པ་ལས་ཆོས་གོས་དེངས་པ་འཆང་བ་ལས་དགེ་སློང་རྣམས་ཀྱིས་ཡོངས་སུ་ལོངས་སྤྱོད་པ་ཉིད་ཀྱི་དོན་དུ་གསུངས་སོ། །ཇི་སྐད་དུ་ཆོས་གོས་རྙིང་པ་འཆང་བས་སྲ་བརྐྱང་གདིང་བར་མི་བྱའོ། །ཅི་ཇི་ཙམ་གྱིས་ན་རྙིང་པ་བཅང་བར་བགྱི་ཞེ་ན། དགེ་སློང་གིས་སྤྱད་པའི་ཆོས་གོས་གསུམ་གང་ཡིན་པའོ་ཞེས་གསུངས་པ་ཡིན་ནོ། །དགེ་སློང་གིས་སྤྱད་པའི་མི་འོས་པ་ཉིད་ལ་བདེ་བླག་ཏུ་དེ་ལས་གཞན་པ་ཡོངས་སུ་ལོངས་སྤྱོད་པ་ཞེས་བྱ་བར་ཐལ་བར་འགྱུར་རོ། །དེ་ལྟ་བས་ན་ཡོངས་སུ་ལོངས་སྤྱོད་པ་ཐམས་ཅད་ལས་དེངས་པ་བསལ་བ་དང་འབྲེལ་ལོ། །སྲ་བའོ་ཞེས་བྱ་བ་འདིས་ནི་ཆོས་གོས་དེངས་པ་བསལ་བ་དེ་བསྡུས་པ་ཡིན་ནོ། །བྲམ་ཟེའི་བུ་མོས་ཞུས་པ་ལས། དེའི་དོན་ནི་ལོངས་སྤྱོད་མི་བཟོད་པ་ཞེས་གསུངས་སོ། །ཆོས་གོས་དེངས་པ་གང་ཞེ་ན། ཆོས་གོས་གང་དག་སློང་གི་ལུས་ལས་དེངས་པའོ་ཞེས་གསུངས་པ་ཡིན་ཏེ། དེངས་པ་ནི་ཟད་པ་ལས་ཏེ་ཞེས་བྱ་བ་འདིར་གཟུགས་པ་འདི་ཡིན་ཏེ། དེངས་པ་ནི་ཟད་པ་ཡིན་པས་དེ་ལྟར་མ་གྱུར་པ་ཞེས་བྱ་བའི་དོན་ཏོ། །མཐུད་མ་ཅན་དང་ལྷན་རིངས་ཅན་དང་ལྷན་པ་ཅན་དང་ཆག་ཅན་དང་ཟུངས་ཅན་མ་ཡིན་བའོ། །བྱ་བ་འདིར་མ་ཡིན་བའོ་ཞེས་བྱ་བའི་སྒྲ་འདི་ལྔ་ཆར་དང་སོ་སོར་སྦྱར་ཏེ། ཟུངས་ཅན་མ་ཡིན་ཏེའོ་ཞེས་བྱ་བའི་བར་དུའོ། །དེ་ལྟར་ཡང་ཐམས་ཅད་ལ་ཐུང་བ་ཉིད་དུ་བྱས་པ་ཉིད་དོ། །མཐུང་མ་ཅན་ཞེས་བྱ་བ་ལ། འདིར་གཞུང་ནི། ཚད་དུ་མཆོག་པ་དགེ་སློང་མང་པོ་དག་ལ་མཚམས་སྦྱར་བར་བྱེད་ཅིང་སྲ་བརྐྱང་འདིང་བར་བྱེད་ན་བཏིང་ཞེས་བརྗོད་པར་བགྱི་འམ། བཀའ་སྩལ་པ། མ་བཏིང་ཞེས་བརྗོད་པར་
བགྱིའོ་ཞེས་བྱ་བ་ལ་དེ་ལས་འདིར་གདིང་བར་བྱ་བ་བཀག་པའོ། །གདིང་བར་བྱ་བ་ནི་གང་ཞིག་དུམ་བུར་བྱ་སྟེ། བཙེམས་པར་མ་ཡིན་པ་དེའོ། །ལྷན་རིངས་ཅན་མ་ཡིན་བ་ཞེས་བྱ་བ་ནི་གང་དུ་ལྷན་པ་རིང་པོར་གླན་པ་སྟེ། དེ་ལྟ་བུས་མ་གླན་པ་ནི་ལྷན་རིངས་ཅན་མ་ཡིན་བའོ། །ལྷན་པ་ཅན་ཞེས་བྱ་བ་ནི་གང་ལ་ཆུ་བུར་གྱི་རྣམ་པ་ལྟར་རློབ་ལྷན་པ་གཞན་གླན་པ་ཅན་མ་ཡིན་པའོ། །དེ་ནི་ཁ་ཅིག་གིས་ལྷན་པ་ཞེས་བྱ་བར་བརྗོད་པ་ཡིན་ཏེ། འདི་ལ་དེ་ལས་དོན་ཐ་དད་པར་ཤེས་པར་བྱ་བ་མ་ཡིན་ནོ། །གཡའ་བར་བྱེད་པ་ཞེས་བྱ་བར་དབྱར་དང་བྱི་བའི་རྣམ་པ་གསད་པ་ནི་འདིར་གཡའ་བར་བྱེད་པ་ཞེས་བྱ་བའི་དོན་ཏོ། །ཆ་ག་ཅན་ཞེས་བྱ་བ་ནི་ཆོས་གོས་དག་གི་མཐའ་ཐོག་ཐག་ཏུ་ཆ་ག་ཙམ་བཏབ་པ་སྟེ། གང་དུ་དེ་རྣམས་མེད་པ་དེ་ནི་ཆ་ག་མེད་པའོ། །ཐ་མ་ཟེགས་པ་དག་ལ་ཟུངས་ཅན་བྱད་པ་དེ་གང་དུ་མེད་པ་དེ་ནི་ཟུངས་ཅན་མ་ཡིན་བའོ། །མཐའ་ཟེགས་པ་རྣམས་ལ་ཟུངས་ཅན་མ་བྱས་པ་ཉིད་ལ་ཡང་མི་མོས་པ་ཉིད་གཏན་པ་མ་ཡིན་པ་ཉིད་ཀྱི་ཕྱིར་རིག་པར་བྱའོ། །སྤངས་པ་དང་རྒྱུ་མ་བཏགས་པ་དང་བྲལ་ཕྲད་མ་ཡིན་བའོ་ཞེས་བྱ་བ་ནི། འདིར་ཡང་མ་ཡིན་བ་ཞེས་བྱ་བའི་སྒྲ་སོ་སོར་སྦྱོར་ཏེ། ཉེ་བར་གནས་པ་དང་མི་རུང་བ་བཀག་པ་དག་ལ་འདིར་སྤངས་པ་མ་ཡིན་བ་དང་བྲལ་ཕྲད་མ་ཡིན་པ་ཞེས་བྱ་བ་གྲངས་ཇི་ལྟ་བ་བཞིན་དུ་བསྡུ་བའོ། །འདིར་གཞུང་ནི། བྲམ་ཟེའི་བུ་མོས་ཞུས་པ་ལས། རྒྱུ་མ་བཏགས་པ་ཞེས་བྱ་བ་ནི་རུང་བ་མ་ཡིན་བའོ་ཞེས་གསུངས་པ་ཡིན་ཏེ། སྤངས་པ་ཉེ་བར་གཞག་པ་ཞེས་བྱ་བ་ནི་འདིར་ཞུ་བ་ལས་ཀྱང་གསུངས་སོ། །ཆོས་གོས་གཞག་པ་གང་ཡིན་ཞེ་ན། འདིར་ཞུ་བ་ལས་ཆོས་གོས་གང་ཞག་བཅུ་འདས་པ་འམ་ཞག་གཅིག་བྲལ་བའོ་ཞེས་གསུངས་ཏེ། འདི་དག་གི་འཇུག་པ་ཙམ་ནི་འདི་རྒྱུ་མཚན་དུ་བྱས་ཏེ། གང་ཞིག་སྔར་སྤངས་པར་གྱུར་པ་དང་དེ་ལྟར་ནི་མི་རུང་བ་དེ་ཡིན་ཏེ། ཞག་ལོན་པར་བརྗོད་པར་ངེས་པའི་ཕྱིར་རོ། །བྲལ་ཕྲད་ཅེས་བྱ་བ་འདིས་ཕྱག་དར་ཁྱོད་ཀྱང་བཀག་པའོ། །འདིར་བྲལ་ཕྲད་ཀྱི་སྒྲས་ནི་ཐམས་ཅད་ཕྱག་དར་ཁྲོད་ཀྱི་དོན་ཅན་ཏེ། སྔར་བོར་བའི་ཚེ་ན་བདག་པོ་དང་བྲལ་བ་ཡིན་ལ་ཕྱིས་བླངས་པའི་ཚེ་ན་བདག་པོ་གཞན་དང་ཕྲད་པ་དེ་ཙམ་ཞིག་ཉེ་བར་བླངས་པའོ། །གང་ཞིག་ཕྱིར་འདི་ལྟར་
བྲམ་ཟེའི་བུ་མོས་ཞུས་པ་ལས། ཆོས་གོས་བྲལ་ཕྲད་གང་ཞེ་ན། ཆོས་གོས་གང་ལམ་ཀ་ནས་བྱུང་སྟེ། ལམ་དུ་བོར་བ་ལས་རྙེད་པ་གང་ཡིན་བའོ་ཞེས་གསུངས་པ་དེའི་དོན་མཐོང་བ་ཡིན་ནོ། །དྲས་ཤིང་དྲུབས་པའོ་ཞེས་བྱ་བ་ནི་བྱིན་གྱིས་བརླབ་ཏུ་མི་རུང་བ་ནི་མ་ཡིན་ནོ། །དེའི་ཕྱིར་སྦྱར་མ་ཉིད་ཀྱང་གང་གི་ཚེ་བྱིན་གྱིས་བརླབ་པར་གསུངས་པ་གང་ཡིན་བ་དེ་ཡང་འདིས་བསྡུས་པ་ཡིན་ནོ། །ཟིན་པའོ། །ལྔ་པའོ། །ལྷག་མ་ཡང་ངོ་ཞེས་བྱ་བ་ནི་ཁྲུ་ལྔ་པོ་དག་ལ་འདི་ལ་དགེ་འདུན་གྱིས་ཁྱབ་པ་ཡིན་པའི་ཕྱིར། ལུས་འབའ་ཞིག་ལ་ནི་མ་ཡིན་ཏེ། དེའི་ཕྱིར་ལྷག་མ་ལ་ཉེས་པ་མེད་དོ། །གདིང་བ་ཞེས་བྱ་བའི་ཚད་ཇི་སྙེད་པ་དེ་ཙམ་གྱི་རྐྱེན་གྱི་ནང་དུ་འདུས་པ་ལས་ལྷག་མ་ནི་མ་ཡིན་ཞེས་བྱ་བའི་དོན་ཏོ། །ཡོ་བྱད་རྣམས་ལ་དེར་འབྱུང་བའི་ཕྱིར་བསྒྲུབ་པ་ནི་དགེ་འདུན་གྱི་གནས་སུ་རྙེད་པའི་ཕྱིར་འབྱུང་བའི་ཞིང་རེ་རེ་ལ་སྲ་བརྐྱང་གདིང་བ་བསྐྱེད་པའོ། །འདིར་ཐམས་ཅད་དུ་དམན་པ་ནི་དགེ་འདུན་གྱིས་རྣམ་པར་གཞག་པ་རིགས་པ་ཡིན་ནོ། །དེ་ལྟ་བས་ནི་འདིར་གཞིའི་ཚད་ཀྱི་འབྱོར་པ་ཇི་སྙེད་པ་དེའི་ཁུངས་སུ་བསྡུས་པ་དེ་ལས་ལྷག་པ་མ་ཡིན་པ་ཞེས་བྱ་བ་འགྲུབ་བའོ། །ཁ་ཅིག་ན་རེ། ཆོས་གོས་སུམ་ཕྲུགས་བཞི་བས་ལྷག་པར་བཏིང་བ་ལ་ཡང་དོན་དེར་འབྱུང་བ་ཉིད་ཀྱི་ཕྱིར་ཡོ་བྱད་རྣམས་ལྷག་པར་འབྱོར་བ་མི་བརླག་པ་རྣམས་ཀྱིས་བརྟེན་པར་བྱ་སྟེ། བྱེ་བྲག་མེད་པའི་ཕྱིར་རོ། །ཡང་བདེ་བར་གཤེགས་པའི་ཆོས་གོས་ཤིན་ཏུ་ཆེན་པོ་ལ་ཡང་འཕགས་པ་ཉིད་དུ་རིག་པར་བྱའོ། །སྔར་མ་བཏིང་བའོ་ཞེས་བྱ་བ་ནི་གང་ཞིག་ལོ་གཞན་ལ་གཏན་པ་ཉིད་དུ་སྔར་མ་བཏིང་བ་ནི་ཞེས་བྱ་བའི་དོན་ཏོ། །བཏིང་བའོ་ཞེས་བྱ་བ་ནི་སྤྲོག་མའི་ནང་དུ་བཏིང་བ་སྟེ་བསྡུས་ཏེ་གཞག་པ་ནི་མ་ཡིན་ཏོ། །དུ་མ་ཡང་ངོ་ཞེས་བྱ་བ་ནི་ཆོས་གོས་སུམ་ཕྲུགས་ཞེས་བྱ་བའི་དོན་ཏོ། །དགེ་འདུན་གྱི་ཚོགས་དུ་མ་ཡོང་པའི་ཕྱིར་ཆོས་གོས་སུམ་ཕྲུགས་དུ་མ་ཡང་འདིར་མཐུན་པ་ཡིན་ནོ། །དེ་ཇི་སྙེད་པའི་འདིང་བར་བྱེད་པའོ་ཞེས་བྱ་བ་ལ། དེའི་སྒྲས་ནི་ཆོས་གོས་སུམ་ཕྲུགས་ལ་བཟུང་ངོ༌། །ཆོས་གོས་སུམ་ཕྲུགས་དེ་ཇི་སྙེད་པ་དེ་སྙེད་ཀྱི་གདིང་བར་བྱེད་པའི་དགེ་སློང་བསྐོ་བར་བྱའོ་ཞེས་བྱ་བའི་དོན་ཏོ། །དེ་ནི་ཆོས་གོས་གཞན་བྱིན་གྱིས་བརླབ་པ་ཡིན་པས་དེའི་ཕྱིར་བྱིན་གྱིས་བརླབས་པ་དག་ཕྱུང་ནས་སོ་ཞེས་
བྱ་བ་ནི་ཚོགས་པ་ལ་མི་བརྟེན་པས་བརྗོད་པར་བྱའོ་ཞེས་བྱ་བ་ནི། རང་གི་རྫས་ནི་དོན་དུ་ངེས་པར་སྦྱར་བ་འདི་ཡིན་ཏེ། གང་གིས་ནི་མཐུན་པའོ། །བདག་པོས་མི་འདོར་བའི་རྫས་དོན་ལ་ངེས་པར་སྦྱོར་བ་མ་ཡིན་ཏེ། དེ་ལྟ་བས་ན་བདག་པོ་རྣམས་ཀྱིས་འདིར་འདོད་པས་བླང་བར་བྱའོ། །ཅི་ཚོགས་པ་རྗེས་སུ་བགྲང་བར་ཡིན་ནམ་ཞེ་ན། དེའི་ཕྱིར་ཞག་མ་ལོན་པར་ཚོགས་པས་མོས་པར་བྱའོ་ཞེས་བྱ་བ་སྨོས་ཏེ། ཚོགས་པ་ཁས་ལེན་པ་ལ་རྩོམ་པ་འདིའོ། །མངོན་སུམ་དུ་ཕྱོགས་པའི་དབང་གིས་ཚོགས་པ་འབྱོར་པའོ། །ཚོགས་པ་ལ་ཚོགས་པས་མངོན་དུ་ཕྱོགས་པ་ཉིད་ནི་ཤིན་ཏུ་སྟོབས་དང་ལྡན་བ་སྟེ། དེ་ལྟ་བས་ན་ཆོ་ག་འདི་གང་གི་ཚེ་ཞེ་ན། དེའི་ཕྱིར་ཞག་མ་ལོན་པར་ཞེས་བྱ་བ་སྨོས་ཏེ། ཞག་མ་ལོན་པ་ནི་ཉི་མ་གང་ལ་ཆོས་གོས་དེ་འབྱོར་བའི་ཉི་མ་དེ་ཉིད་ལ་བདག་པོ་རྣམས་ཀྱིས་ཚོགས་པ་དེ་ལ་འདོད་པར་བྱ་ཞེས་བྱ་བའི་དོན་ཏོ། །འདིར་གཞུང་ནི། ཇེ་དང་པོ་ཁོ་ནར་ཚོགས་པས་ཆོས་གོས་འདི་ནི་དབྱར་གནས་པའི་དགེ་འདུན་གྱི་ཆོས་གོས་ཀྱི་རྙེད་པ་གྲུབ་པ་ལགས་ཏེ། གལ་ཏེ་དགེ་འདུན་བཞེད་ན་ཆོས་གོས་འདིས་དགེ་འདུན་གྱི་སྲ་བརྐྱང་འདིང་པར་འགྱུར་རོ་ཞེས་མོས་པར་བྱའོ། །དེའི་འོག་ཏུ་ཉི་མ་གཞན་ལ་གནས་མལ་བཤམ་པར་བྱའོ་ཞེས་གསུངས་པ་ཡིན་ནོ། །ཉི་མ་གཞན་ལ་མོས་པར་བྱ་བའི་ཉི་མ་དེ་ཉིད་དམ། ཉི་མ་གཉིས་པ་ལ་བློ་མཐུན་བར་བྱ་བའི་དགེ་སློང་ཁོ་ནར་ངེས་པ་མེད་དེ། དེའི་ཕྱིར་དོན་འདི་ལ་གདིང་བའི་ཉི་མ་གང་ཉིད་ལ་བརྗོད་པ་དེ་ཉིད་ལ་མཐུན་བའི་བློ་ཞེས་བྱ་བ་འདི་ལྟར་རྩེ་གཅིག་པ་ཉིད་དུ་དེ་ལྟར་གནས་པ་ཡིན་གྱི། གཉིས་པ་ཉིད་ལ་ནི་མ་ཡིན་ཏེ་འདིར་དགོས་པ་མེད་པའི་ཕྱིར་རོ། །མཚམས་ཀྱི་ནང་དུ་བློ་མཐུན་བར་བྱའོ་ཞེས་བྱ་བ་ནི་བཞེད་ན་ཆོས་གོས་སྲ་བརྐྱང་ཉིད་བྱ་བའོ། །གདིང་བ་ཡང་ངོ་ཞེས་བྱ་བ་ནི་མཚམས་ཀྱི་ནང་དུ་བློ་མཐུན་པར་བྱའོ་ཞེས་བྱ་བར་སྦྱར་རོ། །དབྱར་གནས་པ་ལ་ནི་མཚམས་སྦྱར་བ་ནི་གང་ཞིག་གདིང་བ་ཡང་ངོ་ཞེས་བྱ་བའོ། །དབྱར་གནས་པའི་ཞིང་ལས་གཞན་པ་བློ་མཐུན་པ་འདི་མི་དགེ་བ་བསྐྱེད་པའོ། །གང་གི་ཕྱིར་གདིང་བ་བྱས་པ་ལ་འདི་ལ་མཚམས་སྦྱར་བ་ནི་མ་ཡིན་ནོ། །དེ་ཐམས་ཅད་ནི་གདིང་བ་ལ་བྱེད་པ་ཉིད་དེ། དེའི་ཕྱིར་བརྗོད་པ་ལ་ཡང་མཚམས་ཀྱི་ནང་དུ་བྱ་བ་ཉིད་ཅེས་བྱ་བར་རིག་པར་བྱའོ། །གང་ལ་
དེ་འབྱུང་བའོ་ཞེས་བྱ་བ་ནི་རྣམ་པ་གང་གིས་གདིང་བ་མི་འབྱུང་བ་སྡེ། སྔར་དབྱར་གནས་པར་ཁས་བླངས་པ་དེ་དག་ལས་གཞན་གདིང་བ་པོར་བློ་མཐུན་པར་མི་བྱ་ཞེས་བྱ་བའི་དོན་ཏོ། །དེ་ལ་གཏད་པར་བྱའོ་ཞེས་བྱ་བ་ནི་གཏན་པ་གདིང་བར་བློ་མཐུན་པར་བྱས་བ་དེ་ཉིད་ལའོ། །ཇི་ལྟར་གཏད་པར་བྱ་ཞེ་ན། དེའི་ཕྱིར་གསོལ་བར་བྱས་ཏེ་ཞེས་བྱ་བ་སྨོས་ཏེ། གསོལ་བ་འབའ་ཞིག་གི་ལས་བྱ་སྟེ། གཏད་པར་བྱའོ་ཞེས་བྱ་བའི་དོན་ཏོ། །གང་གི་ཆེ་ཆོས་གོས་མཐུན་པར་བྱས་པའི་ཉི་མ་དེ་ཉིད་ལ་ཡང་འདིང་བ་པོ་ལ་གཏད་པར་བྱའོ་ཞེས་བྱ་བ་དེ་ཤུགས་ཀྱིས་རྟོགས་པར་བྱའོ། །གང་གི་ཕྱིར་ཆོས་གོས་བློ་མཐུན་པར་བྱས་བ་ཉི་མ་གཞན་དུ་གཞག་པར་རིགས་པ་མ་ཡིན་བའི་ཕྱིར་རོ། །བཀྲུ་བ་དང་དྲུབས་པ་དང༌། བ་བསྒྱུར་བ་དག་ལ་དེས་སྔོན་དུ་འགྲོ་བར་བྱའོ་ཞེས་བྱ་བ་ལ། དེས་ཞེས་བྱ་བ་ནི་གཏན་པ་འདིང་བར་བྱེད་པའོ། །ཇི་ལྟར་སྔོན་དུ་འགྲོ་བར་བྱ་ཞེ་ན། དེའི་ཕྱིར་གཉིས་སམ་གསུམ་རྗེས་སུ་བསྒྲུབ་པས་སོ་ཞེས་བྱ་བ་སྨོས་ཏེ། བྱ་བ་གཉིས་སམ་གསུམ་གྱི་ལས་རྗེས་སུ་བསྒྲུབ་པས་སོ། །ཟིན་པ་ཞིག་གྲུབ་ན་རང་གིས་ཁབ་སྲུབས་གཉིས་སམ་གསུམ་དྲུབ་པར་བྱའོ་ཞེས་བྱ་བ་ནི། གལ་ཏེ་ཆོས་གོས་དེ་བྱས་ཟིན་པ་ཞིག་གྲུབ་ན་དེའི་ཚེ་སྲ་བརྐྱང་འདིང་བ་པོས་དེ་རང་གིས་བྱའོ་ཞེས་བྱ་བའི་དོན་ཏོ། །འདིར་གཞུང་ནི། དགེ་སློང་གཏན་པ་འདིང་བས་གཏན་པ་འདིང་བའི་ཆོས་གོས་བཀྲུ་བར་བྱ་བ་དང་དྲུབ་པར་བྱ་བ་དང༌། ཁ་བསྒྱུར་བར་བྱ་བ་ལ་སྔོན་དུ་འགྲོ་བར་བྱའོ། །གལ་ཏེ་ཟིན་པ་ཞིག་རྙད་ན་དེའི་འོག་ཏུ་ཐ་ན་ཁབ་སྲུབས་གཉིས་སམ་གསུམ་དྲུབ་པར་བྱའོ་ཞེས་བྱ་བ་གསུངས་པ་ཡིན་ནོ། །མནོས་པ་དང་རང་བྱེད་པ་དང༌། དེའི་མཇུག་དག་ཏུ་གོ་རིམས་བཞིན་དུ་འདིང་བར་འགྱུར་རོ། །གདིང་ངོ༌། །བཏིང་ངོ་སྙམ་དུ་སེམས་བསྐྱེད་པར་བྱའོ་ཞེས་བྱ་བ་ལ། མནོས་པ་ཞེས་བྱ་བ་ནི་དང་པོ་དགེ་འདུན་ལས་གཏན་པ་གདིང་བའི་ཆོས་གོས་མནོས་པའི་ཚེའོ། །གང་ཞིག་དེར་འདི་རང་གིས་སྒྲུབ་པར་བྱེད་པ་ན་སྔོན་དུ་འགྲོ་བར་འགྱུར་བ་ཟིན་པ་ཞིག་གྲུབ་ན་དེའི་རང་གི་བྱས་པ་དང་བྱེད་ པ་དང༌། དེའི་མཇུག་དག་ཏུ་གོ་རིམས་བཞིན་དུ་འདིང་བར་འགྱུར་རོ་ཞེས་བྱ་བ་ལ་སོགས ་པའི་སེམས་གསུམ་པོ་རྣམས་བསྐྱེད་པར་བྱའོ། །དང་པོ་ཉམས་ན་མི་འབྱུང་བ་མ་ཡིན་
ནོ་ཞེས་བྱ་བ་ནི་མནོས་པའི་ཚེ་ན་འདིང་བར་འགྱུར་རོ་སྙམས་དུ་འདི་ཉམས་པ་ལ་གཞན་འོག་མ་གཉིས་རྗེས་སུ་བསྒྲུབ་པས་གདིང་བར་བྱེད་པ་པོ་མི་འབྱུང་བ་མ་ཡིན་ཏེ་འབྱུང་ངོ༌། །ཚེ་དང་ལྡན་པ་དག་བདག་སང་གཏན་པ་འདིར་བར་འགྱུར་གྱིས་ཁྱེད་ཅག་གིས་རང་རང་གི་ཆོས་གོས་རྣམས་དབྱུང་བར་བྱའོ་ཞེས་ཚོགས་པ་ལ་བརྗོད་པར་བྱའོ་ཞེས་བྱ་བ་ནི་དེ་ཉིད་ཀྱི་ཚིག་གིས་ཤེས་པར་བྱ་སྟེ། སང་འདིང་བར་འགྱུར་བ་ཉིད་ལ་འདི་བརྗོད་པའོ། །འོ་ན་ཆོས་གོས་གཞན་བྱིན་གྱིས་བརླབ་པ་ཞེས་བྱ་བ་དེ་འདོན་པ་ལ་འཇུག་པ་གྲུབ་པ་དེ་བས་ན་བརྗོད་པ་འདི་དོན་མེད་དོ་ཞེ་ན་བརྗོད་པར་བྱ་སྟེ། ཁ་ཅིག་མི་མཁས་པ་དང་མཁས་པ་དག་དྲན་པ་བརྗེད་ངས་པ་འབྱུང་སྟེ་དེའི་དོན་དུ་འདི་བྱའོ། །འདུ་བའི་སྐབས་རྗེས་སུ་བསྒྲུབ་པར་བྱའོ་ཞེས་བྱ་བ་ནི་གདིང་བའི་དོན་དུ་དགེ་འདུན་གང་འདུ་བ་གང་ཡིན་པ་དེའི་སྐབས་འདི་ནི་གནས་མལ་བཤམ་པ་དང༌། གཎྜཱི་བརྡུང་བ་དང་དྲིས་པའི་ཚིག་གིས་ཡང་དག་པར་བསྒོ་བ་རྣམས་ལ་སྟེ་འདིང་བར་བྱེད་པ་པོས་བསྒྲུབ་ཅིང་འདིང་བར་བྱེད་པ་ཡང་དག་པར་བསྐོ་བ་དང༌། དེ་མ་ཐག་པའི་བློ་གདིང་བ་གདིང་བའི་དོན་དུ་གང་ཞིག་ཅེས་བྱ་བ་དེར་རྟོགས་པའོ། །དྲི་དང་མེ་ཏོག་གིས་མཆོད་ཅིང་བདུག་སྤོས་དྲི་ཞིམ་པོས་བདུག་པ་དུ་མ་གཟེབ་ཀྱི་སྤྲོག་མར་ལྷན་ཅིག་གཞག་པ་ཐོགས་ཏེ། རྒན་རིམས་སུ་འདུག་པས་གདིང་བ་བསྒྲུབ་པར་བྱའོ་ཞེས་བྱ་བ་ནི་ཁ་ཅིག་དུ་མ་ཞེས་བྱ་བ་ནི་ཆོས་གོས་གསུམ་མོ། །གཅིག་ཏུ་ཞེས་བྱ་བ་ནི་གཟེབ་ཀྱི་སྤྲོག་མར་གནས་པ་ཐོགས་ཏེའོ། །དུ་མ་ནི་ཆོས་གོས་ཕྲུགས་གསུམ་སྟེ་གཞན་དུ་ནི་མ་ཡིན་ནོ། །དུས་གང་གི་ཚེ་ཞེ་ན། དེའི་ཕྱིར་ཆོས་བཅུ་དྲུག་ལའོ་ཞེས་བྱ་བ་སྨོས་ཏེ། ཚེས་བཅུ་དྲུག་གི་ནང་བར་རོ། །ཟླ་བ་གང་གི་ཚེ་ན་ཞེ་ན། དེའི་ཕྱིར་སྟོན་ཟླ་འབྲིང་པོའི་འོ། །ལན་གསུམ་བཟླས་པས་སོ་ཞེས་བྱ་བ་སྨོས་ཏེ། ཅི་ཞག་ལན་གསུམ་དུ་བཟླས་པས་ཤེ་ན། དེའི་ཕྱིར་གདིང་ངོ་ཞེས་བྱ་བ་སྨོས་ཏེ། བཏིང་ངོ་ཞེས་བྱ་བའི་སྔགས་འདི་མཚོན་པ་ཙམ་མོ། །དགེ་སློང་རེ་རེའི་མདུན་དུ་འདུག་སྟེ་བཏིང་ངོ་ཞེས་གོ་བར་བྱ་བ་ནི་དགེ་སློང་དགེ་སློང་གི་མདུན་དུ་འདུག་སྟེ་བཏིང་ངོ་ཞེས་བྱ་བར་རིག་པར་བྱའོ་ཞེས་བྱ་བ་འདི་ཡང་སྔགས་ཀྱི་མཚོན་པ་ཙམ་ཡིན་ནོ། །ཅིའི་ཕྱིར་ཡང་དེ་གདིང་བ་ལྟར་ལྷན་ཅིག་ཉིད་ཀྱིས་དགེ་འདུན་ལ་
ཞུ་བར་མི་བྱ་ཞེ་ན། བྱེ་བྲག་ཏུ་ཆེར་འབྱུང་བ་ཉིད་གྲུབ་པ་ཡོད་མོད་ཅེས་བྱ་བ་མཐོང་བ་ཡིན་ནོ། །གཞན་གྱིས་ནི་ལེགས་པར་བཏིང་ངོ༌། །ཤིན་ཏུ་བཏིང་ངོ༌། །འདི་ལ་རྙེད་པ་དང་ཕན་ཡོན་གང་ཡོད་པའི་བདག་གི་ཡིན་ནོ་ཞེས་སོ་ཞེས་བྱ་བ་ནི་གང་གི་མདུན་དུ་གནས་པའི་གདིང་བ་པོས་བཏིང་ངོ་ཞེས་བྱ་བ་ཞུས་པ་དེ་ནི་འདིར་གཞན་ནོ། །འདི་ལ་རྗེས་སུ་ཡི་རང་བ་ནི་ཉམས་སུ་མྱོང་བ་དང་འདྲའོ་ཞེས་བྱ་བ་ནི་ཇི་ལྟར་སོ་སོར་ཉམས་སུ་མྱོང་བ་དེ་ནི་བཏིང་བའི་བྱེད་པ་འདི་བསྐྱེད་པ་ཉིད་དེ། དེ་བཞིན་དུ་སོ་སོར་ཉམས་སུ་མྱོང་བར་མ་བྱས་པ་ཉིད་འཐོབ་སྟེ། འདི་ལ་རྗེས་སུ་ཡི་རང་བ་ཞེས་བྱ་བའི་དོན་ཏོ། །འདིར་གཞུང་ནི་མ་མོ་ལས། དེ་ཐོས་ནས་ལེགས་པར་བཏིང་ངོ༌། །ཤིན་ཏུ་བཏིང་ངོ་ཞེས་རྗེས་སུ་ཡི་རང་བར་བྱེད་པ་དེ་དག་གིས་ཀྱང་གཏན་པ་བཏིང་བར་བརྗོད་པར་བྱས་སོ་ཞེས་གསུངས་པ་ཡིན་ནོ། །གང་གིས་དེའི་རྗེས་སུ་ཡི་རང་བར་བྱེད་པ་དེ་ནི་ལས་ཉམས་སུ་མྱོང་བ་དང་འདྲ་བར་འགྱུར་ཞེ་ན། དེའི་ཕྱིར་མངོན་སུམ་དུ་གྱུར་པས་སོ་ཞེས་བྱ་བ་སྨོས་ཏེ། དེ་བཏིང་བའི་ཕྱིར་ཚོགས་པ་བྱིན་པས་སོ་ཞེས་དོན་གྱིས་ཤེས་པའོ། །གདིང་བ་པོའི་ཕྱིར་བཏིང་བའི་ཆོས་གོས་དེ་ཇི་ལྟར་ཡོངས་སུ་བརྐྱང་བའི་ཆོ་ག་བཤད་པར་བྱ་སྟེ། དེའི་ཕྱིར་དུས་དུས་སུ་བསང་བར་བྱ་བསྲང་བར་བྱ་སྤྲུག་པར་བྱའོ། །ཁྱིམ་དུ་བ་ཅན་དང་རྡུལ་ཅན་དུ་གཞག་པར་མི་བྱའོ་ཞེས་བྱ་བའི་དོན་ཏོ། །རྒྱལ་པོའི་ཕོ་བྲང་དུ་གཞག་པར་མི་བྱའོ་ཞེས་བྱ་བ་ནི་གཞག་པར་མི་བྱའོ་ཞེས་བྱ་བར་སྦྱར་རོ། །དེ་དང་བྲལ་བར་མི་བྱའོ་ཞེས་བྱ་བ་ལ། དེ་དང་ཞེས་བྱ་བ་ནི་ཆོས་གོས་སྲ་བརྐྱང་ངོ༌། །ཁྱེར་ཏེ་གཞན་དུ་འགྲོ་བར་མི་བྱའོ། །མི་གཙང་བའི་སྐྱབས་སུ་འཇུག་པར་མི་བྱའོ། །བླ་གབ་མེད་པར་འདུག་པར་མི་བྱའོ་ཞེས་བྱ་བ་ནི་དེ་དག་གཉིས་ཀ་ལ་ཡང་ཁྱེར་ཏེ་ཞེས་བྱ་བར་སྦྱར་བའི་ཚིག་གོ །གང་དུ་དེ་ཁྱེར་ཏེ་འགྲོ་བ་དང་གནས་པ་བཀག་པ་དེར་དེ་ལས་བཞག་པ་ཡང་བཀག་པར་ཤེས་པར་བྱའོ། །འདིང་བར་བྱེད་པ་པོ་ལས་གཞན་གྱིས་གཞག་པ་དང༌། འཆང་བ་དང་ཁྱེར་བར་མི་བྱའོ་ཞེས་བྱ་བ་དེ་ཡང་འདིས་བྱས་པ་རིག་པར་བྱའོ། །གདིང་བ་དེ་ཇི་ལྟར་བརྐྱང་བ་བཤད་ཟིན་ཏོ། །ད་ནི་དབྱུང་བ་བཤད་པར་བྱ་སྟེ། དེའི་ཕྱིར་དབྱུང་བ་ནི་རྣམ་པ་གཉིས་ཏེ། རང་འཇུག་པ་དང་བྲལ་བ་དང་བཅོས་མའོ་ཞེས་བྱ་བ་སྨོས་ཏེ། གང་ཞིག་དབྱུང་བར་གྱུར་པ་ན་རང་འཇུག་པ་
སྟེ། གཏན་པ་དབྱུང་བ་འགྲུབ་པར་འགྱུར་བ་དེ་རང་ཉིད་ཀྱིས་བྱེད་རྒྱུ་མེད་པར་འཇུག་པར་ཉེ་བར་འགྲོ་བཞིན་པའོ། །འཇུག་པ་ཇི་ལྟར་འགྲུབ་པར་འགྱུར་ཞེ་ན། དེའི་ཕྱིར་རང་འཇུག་པ་དང་འབྲལ་བ་ནི་གཏན་པས་མཚམས་གཞན་དུ་ཕྱིན་པ་དང༌། བྱིན་གྱིས་རློབ་པར་བྱེད་པ་མེད་པར་མཚམས་ཀྱི་ནང་དུ་སྐྱ་རེངས་འཆར་བ་དང༌། དེའི་དཀྱིལ་འཁོར་ཀྱི་ཁོངས་སུ་གཏོགས་པ་འཆང་པའོ་ཞེས་བྱ་བ་སྨོས་ཏེ། གནས་སྐབས་གསུམ་པོ་འདི་དག་ལ་འབྱུང་སྟེ། གཏན་པ་མཚམས་ཀྱི་གནས་གཞན་དུ་ཕྱིན་པ་དང༌། མཚམས་གང་དུ་དེ་བཏིང་བའི་མཚམས་དེར་བྱིན་གྱིས་རློབ་པར་བྱེད་བའི་དགེ་སློང་ཐམས་ཅད་མ་ལུས་པ་མེད་པ་དེར་སྐྱ་རེངས་ཤར་བ་དང༌། བྱིན་གྱིས་རློབ་པར་བྱེད་པའི་དགེ་འདུན་ཀྱི་མཚམས་ཀྱི་དཀྱིལ་འཁོར་གྱི་ཁོངས་སུ་གཏོགས་པ་དེ་དག་གང་ལ་རྒྱུན་ཆད་བའི་གནས་སྐབས་ནའོ། །དབྱར་གྱི་གནས་ཀྱི་རྗེས་སུ་འཇུག་པར་གྱུར་པའི་གཏན་པ་གདིང་བ་གང་ཡིན་བའོ། །གང་གི་ཕྱིར་ཇི་ལྟར་དེའི་ཞིང་ལས་གཞན་པའི་གནས་སུ་མི་འབྱུང་བ་དེ་བཞིན་དུ་དབྱུང་བ་ཡང་ཞིང་གཞན་དུ་གནས་པ་ཉིད་ན་འཇིག་པར་འགྱུར་བའོ། །དེ་ལས་ཐམས་ཅད་ལ་བག་ཡངས་སུ་གནས་པ་གང་ཡིན་པ་དེ་ཉིད་དང༌། དེའི་ཕྱིར་བྱིན་གྱིས་རློབ་པར་བྱེད་པ་མེད་པར་འདི་ལ་རྒྱུན་གཅོད་པར་བྱེད་པ་དེ་ལ་འབྲལ་བའི་སྤང་བ་ཉིད་དེར་ཞིང་མ་ཡིན་བ་ཉིད་ཀྱི་ཕྱིར་ཇི་ལྟར་མི་འབྱུང་བ་དེ་བཞིན་དུ་འཇིག་པའོ། །དེ་རྣམས་ལ་འདིའི་རྒྱས་པ་ཉིད་གང་ཡིན་པ་དེ་ལ་ཡང་དེ་རྣམས་ལ་འདི་འཇིག་པ་སྟེ། གང་ཞིག་དཀྱིལ་འཁོར་གྱི་ཁོངས་སུ་གཏོགས་པ་དེས་རྣམ་པར་རྒྱུན་ཆད་པའོ། །དེའི་ཕྱིར་མ་ལྟ་བུའི་ཚིག་དྲུག་ནི་སྦྱོར་བས་འགྲོ་བ་དང༌། ངེས་པར་འབྱེད་པ་དང༌། མཐར་ཐུག་པར་གྱུར་པ་དང༌། ཞིག་པར་གྱུར་བ་དང༌། བསམ་པའི་རྒྱུན་ཆད་པ་དང༌། མཚམས་ལས་འདའ་བའོ་ཞེས་བྱ་བ་སྨོས་ཏེ། དེ་དག་ནི་དེའི་དཀྱིལ་འཁོར་གྱི་ཁོངས་སུ་གཏོགས་པ་ཆད་པ་ཞེས་བྱ་བ་དེའི་བྱེ་བྲག་ཏུ་བཤད་པར་གྱུར་པ་དག་ཡིན་ནོ། །ད་ནི་དེ་བཤད་པར་བྱ་སྟེ་དེའི་ཕྱིར་དེ་ལ་དེའོ་ཞེས་བྱ་བ་སྨོས་ཏེ། གང་ཟག་གང་དེ་རྣམ་པར་རྒྱུན་ཆད་པའི་རྒྱུ་མཚན་སྤྱོད་པ་བྱེད་པ་དེ་བས་ན་འདིར་དེ་ལ་དེའི་དཀྱིལ་འཁོར་གྱི་ཁོངས་སུ་གཏོགས་པ་རྣམ་པར་རྒྱུན་ཆད་པ་ལ་སོ་སོར་དབྱུང་བ་ཡང་དག་པར་གནས་པའོ། །དགེ་
འདུན་ཐམས་ཅད་ལ་ནི་དེ་རྣམ་པར་མི་གཞག་སྟེ་དེ་ལྟར་སྔ་མ་རྣམས་ལའོ། །དེའི་ཕྱིར་མཚམས་འདས་པ་ན་དེ་འགྲུབ་པའོ་ཞེས་བྱ་བ་སྨོས་ཏེ། དེ་ཞེས་བྱ་བ་ནི་རྣམ་པར་འཆད་པའོ། །ཅི་གང་ཡང་རུང་བས་མཚམས་ལས་འདས་ན་འམ་ཞེ་ན། མ་ཡིན་ཏེ། དེའི་ཕྱིར་ཕྱིར་མི་འོང་བའི་སེམས་ཀྱིས་སོ་ཞེས་བྱ་བ་སྨོས་ཏེ། ཡང་ཕྱིར་འོང་བར་བྱའོ་སྙམ་དུ་གནས་པའི་སེམས་ཀྱིས་ནི་མ་ཡིན་ནོ། །མཚམས་ཀྱི་ཕྱི་རོལ་དུ་དེ་སྐྱེས་ན་ཡང་ངོ་ཞེས་བྱ་བ་ནི་མཚམས་ཀྱི་ཕྱི་རོལ་དུ་སོན་པ་ཉིད་ན་ཕྱིར་མི་འོང་བར་ངེས་པའི་སེམས་དེ་སྐྱེས་ན་ཡང༌། དེའི་ཚེ་རྣམ་པར་འཆད་པར་འགྱུར་བ་འདི་འགྲུབ་པའོ། །ཆོས་གོས་བྱ་བའི་བསམ་པས་རྗེས་སུ་འབྲེལ་བ་མེད་ན་དེའི་ཚེ་ཉིད་ནའོ། །ཡོད་ན་བྱེད་པར་འགྱུར་པ་ཉིད་ཆད་ནའོ། །ཆོས་གོས་བྱའོ་སྙམ་པའི་བསམ་པ་ཡོད་ནའོ། །དཀྱིལ་འཁོར་དེ་དང་འབྲེལ་བར་གྱུར་པ་དང༌། ལྷག་མ་དང་བཅས་པར་གྱུར་པ་དང༌། རྣམ་པར་ཆད་པ་ལ་ཡོངས་སུ་མ་བཏང་བར་གྱུར་པའོ། །གལ་ཏེ་འདིས་འབྲེལ་པ་ལ་རྗེས་སུ་འགྲོ་བ་ཉིད་གཅིག་པར་གྱུར་པ་མེད་པར་གྱུར་པ་དེ་ཉིད་ཀྱི་ཚེ། མཚམས་ལས་འདའ་བར་བྱེད་པས་སླར་མི་འོང་བའི་སེམས་སྐྱེས་པའི་དུས་དག་ཉིད་དུ་རྣམ་པར་འཆད་པར་འགྱུར་བ་དེ་འགྲུབ་བོ། །འོན་ཏེ་མེད་པར་གྱུར་ན་གང་གི་ཚེ་ཆོས་གོས་བྱ་བའི་བསམ་པས་རྗེས་སུ་འབྲེལ་པ་ཆད་པར་གྱུར་པ་དེའི་ཚེ། རྣམ་པར་ཆད་པར་གྱུར་པ་དེ་རྗེས་སུ་འགྲུབ་པར་འགྱུར་རམ་ཞེ་ན། མ་ཡིན་ཏེ། དེའི་ཕྱིར་ཕྱིར་འོང་ན་ཡང་ངོ་ཞེས་བྱ་བ་སྨོས་ཏེ། གཏན་པ་བཏིང་བའི་མཚམས་སུ་ཕྱིར་འོང་ན་ཡང་ཆོས་གོས་བྱེད་པར་འགྱུར་བའི་བསམ་པ་ཉིད་རྒྱུན་ཆད་པར་གྱུར་ན་དེའི་ཚེ་རྣམ་པར་ཆད་པར་འགྱུར་རོ། །ཕྱིར་འོངས་ན་ཡང་རྣམ་པར་ཆད་པར་འདི་ཞེས་བྱ་བ་དེའི་ཕྱིར་དབྱུང་བས་འགྲུབ་པར་མི་བྱའོ་སྙམ་དུ་འགའ་ཞིག་འདོད་པར་འགྱུར་བ་དེའི་དོན་དུ་མདོ་འདི་ཡིན་ནོ། །ཕྱིར་འོངས་པ་ཉིད་ལ་ཡང་བྱེད་པར་འགྱུར་བ་ཉིད་ཆད་ནའོ་ཞེས་གང་སྨོས་པ་དེ་ལ་དབྱུང་བ་ཉིད་ཡོད་པར་འགྱུར་རོ། །བྱེད་པར་འགྱུར་བའི་མཐར་ཐུག་པ་དང༌། བརྩམས་པ་ཞིག་པ་དང༌། བསམ་པའི་རྒྱུན་ཆད་པ་གསུམ་ལ་དེ་གནས་སོ་ཞེས་བྱ་བ་ནི་ཆོས་གོས་བྱའོ་སྙམ་དུ་བསམས་པ་གང་ཡིན་བ་དེ་མཐར་ཐུག་པར་འགྱུར་བ་སྟེ། དེའི་རེ་བ་ཆད་པ་དང༌། བརྩམས་པ་ཞིག་བར་གྱུར་
བ་དང་བསམ་པའི་རྒྱུན་ཆང་པར་གྱུར་པ་ཞེས་བྱ་བ་གསུམ་པོ་དེ་ལ་བྱེད་བཞིན་བ་ཉིད་དུ་དེ་ལ་རྣམ་པར་ཆད་པ་གནས་པའོ། །ཡིད་གཉིས་ནི་ངེས་པས་འབྱིན་བར་བྱེད་པ་དང་འདྲའོ་ཞེས་བྱ་བ་ནི་གང་ཞིག་འདི་ཕྱིར་མི་འོངས་བའི་སེམས་ཀྱི་བདག་ཉིད་ཅན་གཏན་པ་དབྱུང་བ་སྒྲུབ་པར་བྱེད་པའི་ངེས་པར་སྨོས་པ་དེ་དང་འདྲ་བར་ཡིད་གཉིས་ནི་ཅི་ཞིག་འོང་བར་བྱ་བའམ། །འོན་ཏེ་ཕྱིར་འོང་བར་མི་བྱ་སྙམ་པ་དེ་ལྟ་བུའི་སེམས་གཅིག་ཏུ་མ་ངེས་པར་མཚམས་ལས་འདའ་ཞིང་འགྲོ་བ་དང༌། མཚམས་ཀྱི་ཕྱི་རོལ་དུ་སོན་པ་ན་དེ་ལྟ་བུའི་སེམས་བསྐྱེད་པས་ཀྱང་རྣམ་པར་ཆད་པ་འགྲུབ་པར་འགྱུར་རོ། །ཇི་ལྟར་འབྲེལ་བ་མེད་པ་ལ་རབ་ཏུ་དབྱེ་བར་གྱུར་པར་འདི་ལ་ཆོས་གོས་བྱའོ་སྙམ་པའི་ངེས་པ་གང་ཡིན་བ་འབྲེལ་བ་མེད་པར་དབྱུང་བ་འགྲུབ་པར་བྱེད་པ་མ་གསུངས་པ་དེ་བཞིན་དུ། འདི་ལྟ་བུའི་བློ་ཅི་ཆོས་གོས་བྱ་བའམ་འན་ཏེ་ཆོས་གོས་མི་བྱ་སྙམ་དུ་དེ་ལྟ་བུའི་སེམས་གཅིག་ཏུ་མ་ངེས་པས་མཚམས་ལས་འདའ་ཞིང་འགྲོ་བ་དང༌། མཚམས་ཀྱི་ཕྱི་རོལ་དུ་སོན་བ་ན་དེ་ལྟ་བུའི་སེམས་སྐྱེས་པས་ཀྱང་ཆོས་གོས་བྱ་བའི་བསམ་པས་འབྲེལ་བ་མེད་པར་འགྲུབ་པར་འགྱུར་རོ་ཞེས་བྱ་བའི་དོན་ཏོ། །འདིར་གཞུང་ནི། མཚམས་ཀྱི་ཕྱི་རོལ་དུ་འགྲོ་བ་ན་དེ་འདི་སྙམ་དུ་ཅིའི་ཕྱིར་ཕྱིར་འོང་བར་བྱ་ཞིང་ཆོས་གོས་བྱ་བ་འམ། འོན་ཏེ་མི་འོང་བར་མི་བྱ་སྙམ་དུ་སེམས་པས་མཚམས་ལས་འདས་པར་བྱེད་ན། དེའི་གཏན་པ་དབྱུང་བ་འབྱུང་བ་རང་འཇུག་པ་དང་བྲལ་བ་ནི། མཚམས་ལས་འདས་པའི་མཐའ་ལས་བྱུང་བ་ཡིན་ནོ་ཞེས་གསུངས་པ་ཡིན་ནོ། །གལ་ཏེ་ཡང་འོང་བའི་ཕྱིར་ཡིད་གཉིས་ཀྱིས་འདི་ལ་སླར་འོང་བའི་སེམས་དང་ལྡན་པ་ཉིད་ནི་ཡིད་གཉིས་སུ་བྱེད་པའི་ཕྱིར། འབྲེལ་བ་མེད་པར་ལྡན་བ་ཉིད་དེ་དེ་བཞིན་དུ་འདིར་མཚམས་ལས་འདའ་བར་བྱེད་པ་ལ་གཏན་པ་དབྱུང་བ་འགྲུབ་པ་སྦྱོར་བ་ལས་ཏེ། གཞན་དུ་ནི་མ་ཡིན་ཏེ་དེ་ནི་སོང་ཟིན་ཏེ། ད་ནི་དབྱུང་བ་དྲུག་པོ་དེ་རྣམས་འདིར་བཤད་པར་བྱ་སྟེ། བྱེད་པའི་བསམ་པ་མེད་པར་ཕྱིར་མི་འོང་བའི་སེམས་ཀྱིས་མཚམས་ལས་འདའ་བར་བྱེད་ན་འགྲོ་བའི་མཐའ་ཅན་གཏན་པ་དབྱུང་པར་བྱའོ། །ཡིད་གཉིས་ཀྱིས་བྱེད་པའི་ཕྱིར་ཕྱིར་མི་འོང་བའི་སེམས་དང་ཐེ་ཚོམ་གྱི་སེམས་སམ་མཚམས་ལས་འདའ་ཞིང་བྱེད་དུ་འཇུག་པའི་བསམ་པ་མེད་པར་
ཕྱིར་འོང་བ་ལ་ཐེ་ཚོམ་ཟ་བའི་སེམས་ཀྱི་མཚམས་ཀྱི་མཐར་འདས་པ་དང༌། མཚམས་ཀྱི་ཕྱི་རོལ་དུ་སོན་པ་ན་ཕྱིར་མི་འོང་བའི་སེམས་བསྐྱེད་པའམ། ཕྱིར་འོང་བ་ལ་ཐེ་ཚོམ་ཟ་བའི་སེམས་བསྐྱེད་པ་ལ་བསམ་བས་རྗེས་སུ་འབྲེལ་བ་མི་སྐྱེད་ཅིང་མཐར་ཐུག་པར་གྱུར་བའི་མཐའ་དང༌། ངེས་པར་ཁས་བླངས་པ་མཐར་ཐུག་པ་ཞེས་བྱ་བའི་དོན་ཏོ། །རྗེས་སུ་འབྲེལ་བ་ཡོད་ཅིང་ཕྱིར་མི་འོང་བའི་སེམས་སམ་ཐེ་ཚོམ་ཟ་བའི་སེམས་ཀྱིས་འདའ་བ་དང༌། མཚམས་ཀྱི་ཕྱིར་རོལ་དུ་འདི་དག་སྐྱེད་པ་ལ་གལ་ཏེ་བསམ་པའི་རྒྱུན་ཆད་པས་བྱེད་པར་གྱུར་པ་ཉིད་ལས་བསམ་པ་རྒྱུན་ཆད་པ་ལ་རྣམ་པར་ཆད་པར་འགྱུར་རོ། །འོ་ན་བརྩམས་པ་ཞིག་པའི་མ་གང་ཞེ་ན། བརྩམས་པ་ཞིག་པའི་མཐའ་ཅན་ནོ། །ཡང་ན་རྫོགས་ཤིང་ཟིན་པའི་མཐར་ཐུག་ཅེས་བྱ་བ་རང་འཇུག་པ་དང་བྲལ་བ་སྲ་བརྐྱང་དབྱུང་བ་རྣམ་པར་དབྱེ་བར་བྱས་སོ། །ད་ནི་བཅོས་མ་བརྗོད་པར་བྱ་སྟེ། གང་ཡང་རུང་བའི་རྣམ་པར་བསྒྲུབ་པར་བྱའོ་ཞེས་བྱ་བ་ངེས་པར་མ་བྱས་པ་ཉིད་ཀྱི་ཕྱིར་རྣམ་པར་ངེས་པ་བརྗོད་པར་བྱ་སྟེ། དེའི་ཕྱིར་ལས་ལས་གཞན་པའི་བྱ་བ་རྗེས་སུ་བསྒྲུབ་པར་མི་བྱའོ་ཞེས་བྱ་བ་སྨོས་ཏེ། ཅི་སླར་རྣམ་པ་གཞན་འདི་ཟློག་པ་སྒྲུབ་པར་བྱེད་པ་གང་གི་ཕྱིར་གཞན་བྱེད་པ་རྣམས་ལ་གཞན་སྨོས་ཏེ། ལས་ལ་རྣམ་པ་གཞན་གྱིས་འདི་བསྐྱེད་པ་མ་ཡིན་ཞེས་བྱ་བའོ། །འདི་ལྟར་སེམས་བསྐྱེད་པ་བརྟན་པོས་ཀྱང་འགྲུབ་པའི་ཕྱིར་རོ། །སླར་གང་ཞིག་དབྱུང་བའི་ལས་འདི་ལ་དུས་ནམ་ཡིན་ཞེ་ན། དེའི་ཕྱིར་དེའི་དུས་ནི་དཔྱིད་ཟླ་ར་བའི་ཉ་ལའོ་ཞེས་བྱ་བ་སྨོས་ཏེ། དགེ་སློང་མའི་རྣམ་པར་འབྱེད་པ་ལས། དུས་མ་ཡིན་བར་གཏན་བ་དབྱུང་བར་མི་བྱའོ་ཞེས་གསུངས་པ་ཡིན་ནོ། །གཏན་པ་དབྱུང་བའི་དུས་མ་ཡིན་པ་གང་ཞེ་ན་སྟོན་ཟླ་འབྲིང་པོའི་ཉ་ནས་དཔྱིད་ཟླ་ར་བའི་ཉའི་བར་དུ་གཏན་པ་དབྱུང་བར་ཆོས་གོས་གཏན་པ་གདིང་བའི་དུས་མ་ཡིན་པ་འདིའོ། །དེ་མན་ཆད་ནི་དུས་ཏེ། དུས་སུ་གཏན་པ་དབྱུང་བར་བྱ་བ་སྨོས་ན་སྲ་བརྐྱང་དབྱུང་བའི་དུས་གང་ཞེ་ན། དེའི་ཕྱིར་དཔྱིད་ཟླ་ར་བའི་ཉ་ལའོ་ཞེས་བྱ་བ་མངོན་བར་བརྟེན་པའོ། །དེའི་རྗེས་ལ་སྔ་མའི་ཚེས་བཅུ་བཞིའི་མཐའ་ཅན་དཔྱིད་ཟླ་ར་བའི་མཐའ་ཅན་ཉིད་ཀྱིས་སོ། །མོད་ལའོ་ཞེས་བྱ་བ་ནི་ལོ་གཉིས་པ་ལ་ སོགས་པ ་དང་འབྲེལ་བའི་དཔྱིད་ཟླ་ར་བའི་ཉ་ཐལ་བར་གྱུར་པ་
བསལ་བའི་ཕྱིར་ཚིག་འདི་སྨོས་ཏེ། དབྱར་དེ་ཉིད་ཀྱིས་བར་དུ་མཆོད་པའི་མོད་ལ་སྟེ། དབྱར་གཞན་ནི་ཡིན་ནོ་ཞེས་བྱ་བའི་དོན་ཏོ། །འདིར་སྔགས་ནི་མིང་དེ་ལས་དུས་ཐམས་ཅད་པ་དུས་ཀྱི་གཞུང་འདིར་དགེ་འདུན་གྱིས་གསན་པ་མཛོད་ཅིག །འདི་ལྟར་གནས་འདིར་དགེ་སློང་གི་དགེ་འདུན་གྱིས་གཏན་པ་བཏིང་བ་ལས་དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། གང་གི་ཕྱིར་དགེ་འདུན་གྱིས་གཏན་པ་འབྱིན་པར་མཛད་དོ། །འདི་ནི་གསོལ་བའོ། །དགེ་འདུན་བཙུན་པ་རྣམས་གསན་དུ་གསོལ། ཇི་སྲིད་གནས་འདི་དགེ་སློང་གི་དགེ་འདུན་གྱིས་གཏན་པ་བཏིང་བ་ལས་དེའི་རྗེས་སུ་འཇུག་པའི་དུས་ཚེས་བཅོ་ལྔ་ལགས་ཏེ། དེའི་བསླད་དུ་དགེ་སློང་གིས་གཏན་པ་འབྱིན་ནོ། །གཏན་པ་འབྱིན་པར་ཚེ་དང་ལྡན་པ་གང་དག་བཟོད་པ་དེ་དག་ནི་ཅང་མ་གསུང་ཤིག་གང་དག་མི་བཟོད་པ་དེ་དག་ནི་གསུངས་ཤིག་ཅེས་ལན་གསུམ་བཟླས་པས་དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གཏན་པ་ཕྱུང་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ཡིན་ནོ། །བཅོམ་བའི་དོན་ཉིད་དུ་ནི་སྔར་ཡང་ངོ་ཞེས་བྱ་བ་ན། དེ་དུས་ཡིན་ནོ་ཞེས་བྱ་བར་སྦྱར་ཏེ། ཉི་མ་དེ་ཉིད་ལ་ཞེས་བྱ་བའི་ཚིག་གིས་གསོ་སྤྱོང་གི་ཉི་མའི་བདག་ཉིད་ཅན་ནི་སྔར་གྱི་དུས་ཀྱི་དེ་ཡིན་ཏེ། སྔར་ནི་སྔོན་དུ་བྱ་བའོ། །དེར་ཉམས་སུ་མ་མྱོང་བ་དང་ལྡན་པ་ལ་ནི་མ་ཐོས་ཀྱི་བར་དུ་ཕན་ཡོན་རྗེས་སུ་འཇུག་གོ་ཞེས་བྱ་བ་ལ་མ་ཐོས་ཀྱི་བར་དུ་ཞེས་བྱ་བ་ནི་མཚམས་ཀྱི་ནང་ངམ་ཕྱི་རོལ་དུ་འདུག་པས་སོ། །དེ་ནི་འདིར་གཏན་པ་དབྱུང་བ་ཐོས་པའི་མཐའ་ལས་བྱུང་བ་སྔར་ཀྱི་དུས་སོ། །གཙུག་ལག་ལས། གང་གིས་དེ་ཉམས་སུ་མྱོང་བར་མ་གྱུར་པ་དེ་སྲིད་དུ་འདི་མ་ཐོས་ཀྱི་བར་དུ་འཇུག་གི་ཐོས་ན་ནི་ལྡོག་གོ །ཅི་གནས་སྐབས་ཐམས་ཅད་དུ་མ་ཐོས་ཀྱི་བར་དུ་ཕན་ཡོན་དེ་རྗེས་སུ་འཇུག་གམ་ཞེ་ན། དེའི་ཕྱིར་རྗེས་སུ་འབྲེལ་བ་མེད་ནའོ་ཞེས་བྱ་བ་སྨོས་སོ། །གཞན་དུ་ཇི་སྲིད་ཕན་ཡོན་རྗེས་སུ་འཇུག་ཅེ་ན། དེའི་ཕྱིར་ཡོད་ན་མ་ཆད་ཀྱི་བར་དུ་ཞེས་བྱ་བ་སྨོས་ཏེ། རྗེས་སུ་འབྲེལ་བ་ཡོད་པ་ཉིད་མ་ཆད་ཀྱི་བར་ཞེས་བྱ་བའི་དོན་ཏོ། །འདིར་གཞུང་ནི་ཞུ་བ་ལས་
གཏན་པ་དབྱུང་བ་ཐོས་པའི་མཐའ་ལས་བྱུང་བ་གང་ཞེ་ན། གང་ཞིག་མཚམས་ཀྱི་ཕྱི་རོལ་དུ་ཤན་མེད་པའི་རྒྱུད་ཀྱི་ཐོས་པ་དང༌། གོས་ལ་རེ་བ་ཆད་པ་དང༌། ཤན་ཡོད་པས་གོས་ཟིན་པར་གྱུར་བ་དང༌། གལ་ཏེ་གོས་ལ་རེ་བ་ཡོད་པ་དང༌། གོས་ཀྱང་རུང་སྟེ་བརྩམས་པ་ནི་ཤན་གྱི་རྒྱུན་ཡོངས་སུ་ཡང་དག་པས་བརྗོད་པར་བྱ་བ་སྟེ། དེ་བཞིན་དུ་དེ་འཇུག་གོ་ཞེས་གསུངས་པ་ཡིན་ནོ། །དངོས་པོ་བསྡུས་བ་ནི་བརྡ་བཤད་ཀྱིས་ཆོག་སྟེ་ཞེས་བྱ་བ་དེའི་རྙེད་པ་འབྱུང་བ་མཐོང་བ་ཡོད་ཀྱང་རྙེད་པ་བརྩམས་པ་ཉིད་ལ་ཡང་གོས་གནང་བཞིན་པ་ཉིད་ལ་འདི་ནི་མཐར་ཐུག་བའོ། །དེ་གཉིས་ནི་མཐར་ཐུག་པའི་མཐའ་ལས་བྱུང་བ་དང༌། རེ་བ་ཆད་པའི་མཐའ་ལས་བྱུང་བ་འདིས་རྣམ་པ་གཞན་གཉིས་ཡིན་ནོ། །ཞིག་པར་འགྱུར་བ་མཐའ་ལས་བྱུང་བའི་རྣམ་པ་གཞན་ཡང་འདིར་འབྱུང་བར་རིག་པར་བྱའོ། །མ་བྱུང་ན་ཐམས་ཅད་ཀྱིས་དེའི་དུས་ཀྱི་རྙེད་པ་བགོ་བར་མི་བྱའོ་ཞེས་བྱ་བ་གཏན་པའི་ཆོས་གོས་དེ་མ་བྱུང་ན་སྟེ། དངོས་པོ་ཞུགས་པ་ལ་ནི་མ་ཡིན་ནོ། །ཆོས་གོས་དེ་ནི་གཞན་དག་གི་ལ་གཏེར་གྱི་གནས་ལྟ་བུ་ཡིན་པས། གང་གི་ཚེ་འདིང་བར་བྱེད་པ་ཐམས་ཅད་ཀྱིས་དེ་ཕྱུང་བར་འགྱུར་བ་དེའི་ཚེ་ན་གཏན་པ་བཏིང་བའི་དུས་ལས་བྱུང་བའི་རྙེད་པར་བགོ་བར་བྱའི། །དེ་མ་ཕྱུང་བའི་སྔོན་རོལ་དུ་ནི་མ་ཡིན་ནོ་ཞེས་བྱ་བ་འདིར་སྟོན་ཏོ། །གཞིར་གཏོགས་པའི་སྲ་བརྐྱང་གི་གཞིའོ། །སྟོན་ཟླ་འབྲིང་པོའི་ཞེས་སྨོས་པས་སྟོན་ཟླ་འབྲིང་པོའི་ཆོས་བཅུ་དྲུག་ལ་གཏན་པ་བཏིང་བའི་དུས་ཡིན་ན་ཤོལ་གྱི་ཟླ་བ་ནི་རྒྱལ་པོའི་རྗེས་སུ་འབྲང་བར་བྱའོ་ཞེས་སྨོས་པས་དེའི་རྗེས་སུ་འབྲང་བ་ལ་མངོན་པར་བརྟེན་པར་ཐལ་བའི་བརྗོད་པར་བྱ་སྟེ། དེའི་ཕྱིར་དགག་དབྱེ་བ་ཇི་ལྟ་བ་བཞིན་དུ་གདིང་ངོ་ཞེས་བྱ་བ་སྨོས་ཏེ། འདིར་དགག་དབྱེའི་སྒྲས་ནི་དུས་ཉེ་བར་མཚོན་པར་བྱེད་པར་རིག་པར་བྱའོ། །ཇི་ལྟར་དགག་དབྱེའི་དུས་སུ་ཞེས་བྱ་བའོ། །དེ་ལྟ་བས་ན་རྩོད་པར་བྱེད་པའི་དབང་གིས་སྔོན་དུ་དགག་དབྱེ་བྱེད་པ་ལ་དེའི་འོག་ཏུ་གཏན་པ་བཏིང་བ་འདིས་བྱ་བ་ཉིད་དུ་སྟོན་པའོ། །དེ་ཡང་འདིར་དེའི་ཚེ་སྟོན་ཟླ་འབྲིང་པོའི་ཆས་བཅུ་དྲུག་ལ་ཞེས་བྱ་བའི་ཚིག་གིས་སོ། །གང་གི་ཕྱིར་གཞན་དུ་དུས་དེ་ལ་ངེས་པར་མི་འགྲུབ་པའོ། །གསོ་སྦྱོང་གི་མཐའ་མ་ཡིན་བ་ལ་མི་བྱའོ་ཞེས་བྱ་བ་ནི། གཏན་པ་གདིང་བ་ནི་ཞེས་བྱ་བར་སྦྱར་ཏེ།
གསོ་སྦྱོང་དང་ཉེ་བར་གྱུར་བའི་དུས་སུ་འདིར་ནི་ཐ་མའི་སྒྲའོ། །གསོ་སྦྱོང་གི་མདུན་རོལ་དུ་གཏན་པ་དབྱུང་བར་མི་བྱའོ་ཞེས་བྱ་བའི་དོན་ཏོ། །དབྱུང་བ་ཡང་ངོ་ཞེས་བྱ་བ་ནི་གསོ་སྦྱོང་ཐ་མ་ཡིན་བ་ལ་མི་བྱ་སྟེ། གཏན་པ་དབྱུང་བ་ཡང་གསོ་སྦྱོང་ཉིད་བྱས་ནས་རྗེས་སུ་བསྒྲུབ་པར་བྱའོ་ཞེས་བྱ་བ་ལ་འདིར་དེ་བྱེད་པའོ། །ཚེས་བཅུ་དྲུག་ལ་ཡང་འདིར་ཉེ་བ་ཉིད་དུ་ཤེས་ན་ནི་བཅུ་དྲུག་གི་དེའམ། ཚེས་བཅོ་ལྔ་གཏན་པ་དབྱུང་བར་ཐལ་བར་འགྱུར་བ་བསལ་བའི་ཕྱིར། འདི་ནི་ཉི་མ་དེ་ཉིད་ཀྱིའོ་ཞེས་བྱ་བ་སྨོས་ཏེ། གཏན་ཕ་དབྱུང་བ་འདི་ནི་གསོ་སྦྱོང་གི་ཉི་མ་ཚེས་བཅོ་ལྔ་ལ་དབྱུང་བ་ཡིན་གྱི། ཚེས་བཅུ་དྲུག་ལ་དབྱུང་བ་ནི་མ་ཡིན་ནོ་ཞེས་བྱ་བའི་དོན་ཏོ། བརྩམས་པ་འདི་ནི་དུས་མ་ཡིན་བར་དབྱུང་བར་ཆེད་དུ་བྱས་པ་ཡིན་པར་རིག་པར་བྱ་སྟེ། གཞན་ལ་ནི་ངེས་པ་ཡོད་པའི་ཕྱིར་རོ། །གསོ་སྦྱོང་མ་བྱས་པར་གཏན་པ་གདིང་བ་མི་འབྱུང་ངོ་ཞེས་བྱ་བ་ཤེས་བཞིན་དུ་གསོ་སྦྱོང་གི་མཐའ་མ་ཡིན་པ་ལ་ཞེས་བྱ་བ་འདི་ལས་གསོ་སྦྱོང་བྱ་སྟེ་གཏན་པ་གདིང་བར་བྱ་ཞིང་ཡང་དགེ་སློང་གཞན་བྱུང་ན་ཡང་གསོ་སྦྱོང་བྱེད་པ་ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་ཡང་གསོ་སྦྱོང་བྱས་ན་ཕྱུང་བ་ཉིད་ཡིན་ནོ་ཞེས་བྱ་བ་སྨོས་ཏེ། འདིས་ཀྱང་རྣམ་པ་གཞན་གྱིས་དབྱུང་བ་རང་འཇུག་པ་ཞེས་བྱ་བར་རིག་པར་བྱའོ། །བཏིང་ནས་བྱེ་བ་དག་ལ་ནི་དེ་ཐ་དད་པར་འགྲུབ་པོ་ཞེས་བྱ་བ་ནི། གཏན་པ་བཏིང་བ་ནས་བྱེ་བ་དག་ལ་ནི་དེ་དག་ཐ་དད་པར་དབྱུང་བ་འདི་ལ་འགྲུབ་པོ། །འདི་ལ་གདིང་བ་གཅིག་ཡིན་བའི་ཕྱིར་ཕྱོགས་གཅིག་གིས་ཕྱུང་ན་ཕྱོགས་ཅིག་ཤོས་ཀྱིས་ཀྱང་ཕྱུང་བ་ཉིད་མ་ཡིན་ནོ། །གང་གིས་གང་ཚེ་དེ་ལ་ཕྱུང་བའི་ལས་བྱས་པར་འགྱུར་བ་དེའི་ཚེ་འདི་ལ་འདི་ཞེས་བྱ་བའི་དོན་ཏོ། །ཆོས་སྨྲ་བ་དག་ཡོད་པས་དེ་གདིང་ངོ་ཞེས་བྱ་བ་ལ། དེ་ཞེས་བྱ་བའི་སྒྲས་ནི་ཆོས་སྨྲ་བ་པོ་བསྡུས་པ་སྟེ། གནས་གང་ན་དེ་ཡོད་པའོ། །ཆོས་སྨྲ་བ་དང་བཅས་པའི་གནས་ལ་ཆོས་སྨྲ་བ་པོ་རྣམས་ལ་རང་བྱུང་བ་གདིང་བ་ཞེས་བྱ་བ་འདིར་དོན་ཏོ། །ཆོས་སྨྲ་བ་པོ་དེས་ནི་དབང་བྱེད་པ་ཉིད་ཡིན་པའི་ཕྱིར་ཏེ། དེ་རྣམས་ཀྱི་གནས་ཀྱི་རྒྱུ་ལས་དེའི་དོན་གྱི་ཕྱིར་བསྟན་པའོ། །དེ་ལྟ་བས་ན་མ་ཆོག་པ་དང་ཤིན་ཏུ་མ་ཆོག་པ་རྣམས་ལ་མི་སྐྱེད་པ་ལམ་བྱས་པ་ཉིད་དུའོ། །དེ་ལྟར་ན་ཡང་བྱས་པ་ཉིད་ཀྱང་གཞན་རྣམས་ཀྱི་ཞེས་བྱ་བའི་
ཚིག་གིས་སོ། །འདིར་གཞུང་ཡང་དེ་བཞིན་དུ་སྟེ། དབྱར་གནས་པའི་དགེ་འདུན་བྱེ་ན་གང་གིས་གཏན་པ་གདིང་བར་བགྱི། གང་དག་ཆོས་སྨྲ་བ་དག་གིས་སོ་ཞེས་གསུངས་པ་དང༌། ལམ་ནས་དྲངས་པ་རྣམས་ལ་རང་བཞིན་དུ་གནས་པའི་གནས་ཀྱི་གཏན་པ་གདིང་བར་བྱེད་པ་དེ། སྤངས་པ་རྣམས་སྲ་བརྐྱང་མ་བཏིང་བ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །དགེ་སློང་བྲམ་ཟེའི་བུ་མོས་ཞུས་པ་ལས་ཀྱང༌། དགེ་འདུན་བྱེ་ན་སུས་གཏན་པ་བཏིང་བར་བགྱི་བཀའ་སྩལ་པ། ཆོས་སྨྲ་བ་དག་གིས་ཏེ། ཆོས་སྨྲ་བ་དེས་ནི་དབང་བྱེད་པ་ཉིད་ཡིན་བའི་ཕྱིར་ཏེ། ཐམས་ཅད་ལ་ཡང་གདིང་བ་འབྱུང་བར་ནི་འགྱུར་ཏེ་ཞེས་གསུངས་པ་ཡིན་ནོ། །འདི་ཉིད་ནི་དབང་དུ་བྱེད་པ་ལ་དགོངས་ནས་དེ་བྱ་བ་ཉིད་དུ་གསུངས་སོ། །མ་ཆོག་པའི་གནས་པ་ལ་ནི་མ་ཡིན་ནོ་ཞེས་བྱ་བ་བརྩམས་པ་དེ་ལས་བསྒྲུབ་པར་བྱའོ། །དེར་གཞན་དག་གིས་བྱས་ཀྱང་གནས་ཀྱི་རྙེད་པ་ནི་དེ་དག་ལས་འོས་པ་ཉིད་ཡིན་ནོ་ཞེས་བྱ་བ་ནི། དུས་འདིར་གནས་པ་ལ་འདི་སྦྱིན་བར་བྱའོ། །གནས་དེར་གནས་པའི་དགེ་འདུན་ལ་རྙེད་པ་འདིའོ། །དེ་ལྟར་གནས་ཡོངས་སུ་དག་པ་ལྟར་རྙེད་པ་དེ་ནི་གནས་ཀྱི་རྙེད་པའོ། །ཆོས་མ་ཡིན་བ་སྨྲ་བ་གཞན་དག་གིས་གཏན་པ་གདིང་བ་བྱས་ཀྱང་ཆོས་སྨྲ་བ་དེ་དག་ལ་གནས་ཀྱི་རྙེད་པ་འོས་པ་ཉིད་ཡིན་ཏེ། ཆོས་མ་ཡིན་པ་སྨྲ་བ་དག་ལ་ནི་མ་ཡིན་ཞེས་བྱ་བའི་དོན་ཏོ། །རང་བཞིན་དུ་གནས་པའི་གནས་སུ་དེ་སྤངས་པ་རྣམས་ལ་མི་འབྱུང་ངོ་ཞེས་བྱ་བ་ནི། རང་བཞིན་དུ་གནས་པའི་གནས་སུ་གཏན་པ་གདིང་བར་བྱེད་པ་དེ་བྱེད་བཞིན་པ་ལས་སྤངས་པ་རྣམས་ལ་མི་འབྱུང་ངོ་ཞེས་བྱ་བའི་དོན་ཏོ། བསམ་པ་གནས་པ་ནི་བཏིང་བ་ཡིན་ནོ་ཞེས་བྱ་བ་ལ། བསམ་པ་ནི་བསམ་བའོ། །ལྷན་ཅིག་ཏུ་བྱ་བ་ལ་འདུན་པ་ཕུལ་བའི་དབང་གིས་ལྷག་མ་རྣམས་ཀྱིས་བྱས་ན་བྱས་པ་ཉིད་ཡིན་ནོ་ཞེས་བྱ་བ་ནི་བསམ་པ་གནས་པ་ནི་བཏིང་བ་ཡིན་ལ་དེ་དང་བྲལ་བ་ནི་ཕྱུང་བ་ཡིན་བས་དེའི་ཕྱིར་འདུན་པ་ཕུལ་བའི་དབང་གིས་ན་འབུལ་ཞེས་བྱ་བ་སྨོས་པ་ལ། འདི་དག་མི་འབྱུང་བ་ཞེས་བྱ་བར་ཐལ་བའོ། །དེ་ལ་ལན་ནི་འདི་ཡིན་ཏེ། གཞན་དག་ལྷན་ཅིག་བྱ་བ་གང་ཡིན་བའི་བྱ་བར་འགྱུར་བ་ད་གཞན་དག་གིས་བྱས་པ་ལ་འདུན་པ་ཕུལ་བར་བྱེད་པས་ཀྱང་དེ་དག་བྱས་པ་ཉིད་དོ། །དེ་འདུན་པ་རྗེས་སུ་
ཕུལ་བས་ལམ་ལ་གནས་པར་འགྱུར་ཞེས་བྱ་བ་བྱས་སོ། །དེ་བས་ན་ཐལ་བ་འདི་ཡོད་པ་མ་ཡིན་ནོ་ཞེས་བྱ་བ་འདི་གླེང་གཞི་དག་ལས་དྲངས་པའོ། །ད་དང་བྲལ་བ་ནི་ཕྱུང་བ་ཡིན་ནོ་ཞེས་བྱ་བ་ལ། འདིའི་སྒྲས་ནི་བསམ་པ་གནས་པ་དེང་གཟུང་བའོ། །དེའི་ཕྱིར་འདུན་པ་མ་ཕུལ་བ་ལ་ནི་འདུག་ཏུ་ཟིན་ཀྱང་གཉིད་ལོག་གམ་སྙོམས་པར་ཞུགས་ན་མ་ཐོས་ཀྱི་བར་དུ་བཏིང་བ་དང་ཕྱུང་བ་མི་འབྱུང་ངོ་ཞེས་བྱ་བ་ལ། འདུག་ཏུ་ཟིན་ཀྱང་ཞེས་བྱ་བ་ནི། དགེ་འདུན་གྱི་ནང་དུའོ། །མ་ཐོས་ཀྱི་བར་དུའོ་ཞེས་བྱ་བ་ནི། ཇི་སྲིད་དུ་གཏན་པ་བཏིང་བའམ། ཕྱུང་བ་མ་ཐོས་ཀྱི་བར་དུའོ། །གང་གི་ཕྱིར་བསམ་པ་གནས་པ་ནི་བཏིང་བ་ཡིན་ལ། དེ་དང་བྲལ་བ་ནི་ཕྱུང་བ་ཡིན་བ་དེའི་ཕྱིར་འདུན་པ་མ་ཕུལ་བ་ལ་ནི་གཉིད་ལོག་གམ་སྙོམས་པར་ཞུགས་སུ་ཟིན་ཀྱང་ཐོས་པའི་མདུན་དུ་ནི་མ་ཡིན་ནོ། །འདུག་ཏུ་ཟིན་ཀྱང་དེ་གཉིས་ཡོད་པ་ཡིན་ཏེ། དེ་བས་ན་བཏིང་བ་དང་ཕྱུང་བ་འབྱུང་བ་ཁོ་ནར་འགྱུར་ཞེས་བྱ་བའི་དོན་ཏོ། །མཚམས་གཅིག་པ་ཉིད་ཡིན་ན་དེར་གནས་གཞན་དུ་གནས་པ་རྣམས་ཀྱང་བཏིང་བའི་ཕྱིར་གནས་པ་ཉིད་ཡིན་ནོ་ཞེས་བྱ་བ་ལ་དེར་ཞེས་བྱ་བ་གང་ཡང་རུང་བ་གཅིག་གི་ནང་ན་གནས་དུ་མ་ཡོད་ན་གནས་ལ་མངོན་བར་བརྟེན་པའོ། །དེ་ལས་གནས་གཞན་དུ་བཏིང་བ་ཞེས་བྱ་བ་ནི། བཏིང་བའི་ཕྱིར་རྣམ་པར་གཞག་པ་འདིའོ། །མཚམས་གཅིག་པའི་གནས་གཅིག་ཏུ་དེར་ཅིག་ཅར་དབྱར་གནས་པར་ཁས་བླངས་པ་དག་ལྷག་མ་རྣམས་གནས་པ་ཉིད་ཅེས་བྱ་བ་སྟེ་རྙེད་པ་ལ་ནི་མ་ཡིན་ནོ། །དབྱར་རྣམས་ལ་མཚམས་གཅིག་པ་ཉིད་ལ་གནས་དུ་མའི་འོག་ཏུ་དབྱར་གྱི་ནང་དུ་མཚམས་གཅིག་པ་ཉིད་དམ། མཚམས་ཐ་དད་པ་ཉིད་དུ་གནས་གང་ཡང་རུང་བར་བཏིང་བའི་གནས་དེ་ཐམས་ཅད་ལ་གཏན་པ་བཏིང་བ་ཉིད་ཅེས་བྱ་བ་གང་ཞིག་གསུངས་པ་ད་འདིས་བསྡུས་པ་ཡིན་ནོ། །དེ་ནི་བཏིང་བའི་ཚེ་དེ་ན་གནས་པ་དེ་ཉིད་ཡིན་ནོ་ཞེས་བྱ་བ་ནི། གང་ཡང་རུང་བའི་གནས་དུ་མ་ཉིད་ལས་དེའི་འདུན་པས་གནས་ལ་མངོན་བར་བརྟན་པའོ། །དེ་ཉིད་གནས་འདི་ཡིན་གྱིས་སྙམ་དུ་གནས་གཞན་འདི་ལ་དེ་དང་ལྡན་པ་ཉིད་དེ་གདིང་བའི་དུས་སུ་མཚམས་གཅིག་ན་གནས་པར་གྱུར་ན་གདིང་བའི་ཕྱིར་གནས་གཞན་དུ་ཡང་བཏིང་བར་རིག་པར་བྱའོ། །དེར་འདི་གདིང་བར་བྱ་སྟེ། ཇི་ལྟར་
གནས་གཅིག་པ་ཉིད་ལ་མཚམས་གཅད་པར་བྱ་སྟེ། མཚམས་འཕེལ་བ་ལའོ། །གདིང་བར་འགྱུར་བའི་གནས་ཉིད་ལ་གདིང་བར་བྱའོ་ཞེས་བྱ་བར་འགྱུར་རོ། །དེ་བས་ན་དེར་གནས་གཞན་ན་གནས་པ་སོ་སོར་ཉམས་སུ་མྱོང་བར་བྱེད་ཅིང་མི་འབྱུང་བ་མ་ཡིན་ཞེས་བྱ་བའི་དོན་ཏོ། །དབྱར་གནས་པ་ཉིད་མཚམས་གཅིག་ཏུ་བྱེད་པ་ལ་དུ་མའི་གནས་ལ་གནས་གཅིག་ཏུ་གཏན་པ་བཏིང་བ་ལ་གནས་ལྷག་མ་རྣམས་ལ་ཡང་གཏན་པ་ཉིད་དུ་གསུངས་པ་གང་ཡིན་བ་དེ་འདིས་བསྡུས་པ་ཡིན་ནོ། །བཏིང་ནས་མཚམས་ཐ་དད་པར་བྱས་ན་གང་ཡང་རུང་བ་དེའི་གནས་ཡིན་ནོ་ཞེས་བྱ་བ་ནི་མཚམས་གཅིག་ཏུ་བཏིང་ནས་མཚམས་ཐ་དད་པར་བྱས་ན་གནས་དུ་མ་དེ་ལས་གདིང་བའི་ལས་བྱས་པའི་གནས་གང་ཡིན་པ་དེ་གནས་གང་ཡང་རུང་བར་གཞག་ན་ཡང་རང་གི་གནས་ཁོན་གནས་པའི་ཡིན་ནོ་ཞེས་བྱ་བའི་དོན་ཏོ། །གང་དུ་བཏིང་བ་དེ་ཉིད་ནི་འདིའི་གནས་སོ་སྙམ་དུ་དོགས་པ་བསལ་བའི་ཕྱིར་གཏན་པ་གདིང་བར་བྱ་སྟེ། མཚམས་ཐ་དད་དུ་བྱེད་པ་ལ་ཐམས་ཅད་ལ་གཏན་པ་གདིང་བ་ཉིད་ཅེས་བྱ་བ་གང་ཞིག་གསུངས་པ་དེ་འདིས་བསྡུས་པ་ཡིན་ནོ། །ཐ་དད་པ་ཉིད་ཡིན་ན་གནས་སོ་སོར་དེ་དབྱུང་ངོ་ཞེས་བྱ་བ་ནི། མཚམས་ཐ་དད་པ་ཉིད་ཡིན་ན་གནས་འདི་རྣམས་ལ་གནས་སོ་སོ་སོ་སོར་གཏན་པ་དེ་དབྱུང་དགོས་ཀྱི་ཐམས་ཅད་ཀྱིས་གནས་གཅིག་ཏུ་འདི་ཕྱུང་བ་ཉིད་ལ་གནས་གཞན་དང་འབྲེལ་བ་རྣམས་ཀྱི་གཏན་པ་དེ་རང་གི་གནས་སུ་སྤོ་བར་བྱའོ། །ཡང་ན་རང་གི་གནས་ནས་འགའ་ཞིག་གཏན་པའི་དྲུང་དུ་གཞག་པར་བྱ་བ་སྟེ། གཞན་དུ་ན་དེ་སྐྱ་རེངས་འཆར་བའི་དུས་སུ་དབྱུང་བ་འགྲུབ་པོ་སྙམ་དུ་འདི་རྣམ་པར་གཞག་པར་རིག་པར་བྱའོ། །གང་ཞིག་སོ་སོར་མཚམས་འགུམས་པར་བགྱིད་ཅིང་སོ་སོར་བྱ་སྟེ། དབྱུང་བ་ལ་གནས་དེ་རྣམས་ཐམས་ཅད་གཏན་པ་ཕྱུང་བར་འགྱུར་རམ། ཉེ་བ་འཁོར་མི་འགྱུར་ཏེ། གང་དག་འབྱིན་པར་བྱེད་པ་དེ་དག་གིས་ནི་གཏན་པ་དབྱུང་བར་འགྱུར་ལ། གང་དག་འབྱིན་བར་མི་བྱེད་པ་དེ་དག་གིས་ནི་གཏན་པ་ཕྱུང་བར་མི་འགྱུར་རོ། །མཚམས་གཅིག་པ་ཉིད་དུ་ནི་ཕྱུང་ན་ཐམས་ཅད་ཀྱིས་གཏན་པ་ཕྱུང་བར་འགྱུར་རོ་ཞེས་གསུངས་པ་དེ་བས་ན་འདིར་མདོར་བྱས་པ་ཡིན་ནོ། །བྱེ་བ་ཉིད་ན་ཕྱོགས་སོ་སོའི་ཞེས་བྱ་བ་ནི་གནས་གཅིག་ཏུ་
གཏོགས་པ་ཉིད་ཡིན་ན་དགེ་འདུན་བྱེ་ཞིང་ཕྱོགས་གཉིས་སུ་གྱུར་ན་ཕྱོགས་གཅིག་གིས་ཕྱུང་བ་ཕྱོགས་ཅིག་ཤོས་ཀྱིས་ཕྱུང་པར་མི་འགྱུར་རོ་ཞེས་བྱ་བའི་དོན་ཏོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་གཏན་པ་བཏིང་བའི་གནས་སུ་དགེ་འདུན་བྱེ་ན། དེར་ཕྱོགས་གཅིག་གམ་ཅིག་ཤོས་ཀྱིས་གཏན་པ་འབྱིན་པར་བགྱིད་ན་དེ་དག་ཐམས་ཅད་ཀྱིས་གཏན་པ་ཕྱུང་བར་བརྗོད་པར་བགྱིའམ། ཉེ་བ་འཁོར་མི་བྱ་སྟེ་གང་དག་འབྱིན་པར་བྱེད་པ་དེ་དག་གིས་ནི་གཏན་པ་བྱུང་བར་འགྱུར་ལ། གང་དག་མི་བྱེད་པ་དེ་དག་གིས་ནི་གཏན་པ་ཕྱུང་བར་མི་འགྱུར་རོ་ཞེས་གསུངས་པ་ཡིན་ནོ། །མ་བཏིང་བས་ཕྱུང་བ་ནི་མ་ཕྱུང་བ་མ་ཡིན་ནོ་ཞེས་བྱ་བ་ནི་གནས་གཞན་དུ་དབྱར་གནས་པར་ཁས་བླངས་པ་གང་དག་ལ་གཏན་པ་བཏིང་བ་མེད་པ་དག་ནི་མ་བཏིང་བ་ཞེས་བྱ་བ་སྟེ། དེ་ནི་མ་ཕྱུང་བ་མ་ཡིན་ཏེ་ཕྱུང་བ་ཉིད་ཡིན་ནོ། །འདིར་གཞུང་ནི་བཙུན་པ། རེ་ཞིག་དབྱར་གནས་པའི་དགེ་སློང་གིས་གཏན་པ་བཏིང་ནས་མཚམས་ཀྱི་སླང་རོལ་དུ་མཆིས་ཤིང་ལྟོས་པ་མ་མཆིས་པར་གྱུར་ན་དགེ་སློང་གློ་བུར་བ་དག་ལྷགས་ཏེ་གཏན་པ་འབྱིན་བར་བགྱིད་ན་གཏན་པ་ཕྱུང་བར་བརྗོད་པར་བགྱིའམ། ཉེ་བ་འཁོར་ཕྱུང་བར་བརྗོད་པར་བགྱིའོ་ཞེས་གསུངས་པ་ཡིན་ནོ། །དེ་མི་འབྱུང་བ་ཉིད་ཀྱིས་ཁ་བསྐང་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི་གང་ལ་དགེ་འདུན་གྱིས་གཏན་པ་གདིང་བ་ལ་དེ་ལ་ཁ་བསྐང་དུ་མི་རུང་བ་ཉིད་མ་ཡིན་ནོ། །འདིར་གཞུང་ནི་ཆོས་གོས་ཀྱི་གཞི་ཞུ་བ་ལས། བཙུན་པ་རེ་ཞིག་དགེ་སློང་གིས་གཅིག་ཏུ་དབྱར་གནས་པར་ཁས་ལེན་ཅིང་དེས་དབྱར་ཟླ་བ་གསུམ་པོ་དག་འདས་ནས་དགག་དབྱེ་བགྱིས་ཏེ་དགེ་འདུན་ལ་གཏན་པ་གདིང་བའི་ཆོས་གོས་འབུལ་བར་བགྱིད་ཅིང་དེར་དགེ་སློང་གློ་བུར་བདག་ལྷགས་ཤིང་དེ་དག་གཏན་པ་འདིང་བའི་རྗེས་སུ་ཞུགས་ཏེ། དོད་ན་ཆོས་གོས་དེ་སུས་ཐོབ་པར་འགྱུར་ལགས། ཉེ་བ་འཁོར་དགེ་སློང་དེ་ཉིད་ཀྱིས་སོ་ཞེས་གསུངས་པ་ཡིན་ནོ། །མ་བཏིང་བ་ཉིད་ཀྱིས་དབྱུང་བར་མི་རུང་བ་ཉིད་མ་ཡིན་ནོ་ཞེས་བྱ་བ་ནི་གང་ལ་གཏན་པ་བཏིང་བར་མི་འགྱུར་བ་དེ་ལ་དེ་འདིང་བར་བྱེད་པའི་དགེ་འདུན་དེ་ལ་ཁ་བསྐང་དུ་རུང་བའོ། །དགེ་སློང་གློ་བུར་བདག་འོངས་ཏེ་གཏན་པ་འདིང་བར་བགྱིད་ན་ཞེས་བྱ་བ་འདིར་དོན་གྱིས་འབྱུང་བ་དེར་མདོར་བྱས་
པའོ། །གཏན་པ་བཏིང་བ་སྣམ་སྦྱར་མེད་པར་གྲོང་དུ་འཇུག་པ་ལ་ སོགས་པ ་དང་སུམ་མདོ་ཚུན་ཆད་དུ་འདུག་པ་ལ་ཡང་ཉེས་པ་མེད་དོ་ཞེས་བྱ་བ་ནི་ཇི་སྲིད་སུམ་མདོ་ཚུན་ཆད་དུ་འདུག་པ་དང་གྲོང་དུ་འཇུག་པ་ལ་ སོགས་པ ་ལ་ཡང་ཞེས་བྱ་བའི་དོན་ཏོ། །འོན་ཀྱང་འདི་ནི་དོན་ལས་ཐོབ་པས་གསལ་བར་བྱ་བའི་ཕྱིར་མདོར་བྱས་པའོ། །འདིར་གཞུང་ནི། བཙུན་བ་གཏན་པ་བཏིང་བའི་གནས་ན་རྐྱེན་དུ་དག་བག་ཡངས་སུ་འགྱུར་ལགས། ཉེ་བ་འཁོར་བཅུ་སྟེ། བཅུག་གང་ཞེ་ན། ཡང་ཡང་ཟ་བ་དང༌། འདུས་ཤིང་ཟ་བ་དང༌། མ་སྨྲས་པར་རྒྱུ་བ་དང༌། སྨད་གཡོགས་སྟོད་གཡོགས་དང་བཅས་པས་ཅི་བདེར་ལྗོངས་རྒྱུ་བ་དང༌། མཚན་མོ་འབྲལ་བ་མེད་པ་དང༌། ཞག་བཅུ་འདའ་བར་མེད་པ་དང༌། ཟླ་བ་འདའ་བར་མེད་པ་དང༌། །གོས་ཇི་ཙམ་གྱིས་ཆོག་པ་སློང་བ་དང་གོས་རུང་བར་བྱས་པ་དག་ཇི་ཙམ་འདོད་པ་དག་འཆང་བ་དང༌། སྟོན་ཟླ་འབྲིང་པོའི་ཚེས་བཅུ་དྲུག་ནས་དཔྱིད་ཟླར་བ་ཉའི་བར་དུ་དབྱར་གནས་པའི་དགེ་འདུན་གྱི་རྙེད་པ་མི་བགོ་བའོ་ཞེས་གསུངས་པ་དང༌། གཞན་ཡང་བཅོམ་ལྡན་འདས་ཀྱིས་ཇི་སྐད་དུ་དགེ་སློང་གིས་ཁྱིམ་གཞན་དུ་སྨད་གཡོགས་དང་སྟོད་གཡོགས་ཀྱིས་འདུག་པར་བྱའོ་ཞེས་གསུངས་ནས། བཙུན་བ་སུམ་མདོ་དང་བཞི་མདོ་དག་ཏུ་སྨད་གཡོགས་དང་སྟོད་གཡོགས་ཀྱིས་མཆིས་སུ་རུང་ངམ། ཉེ་བ་འཁོར་གཏན་པ་བཏིང་པར་རུང་ངོ་ཞེས་གསུངས་པ་དེ་གཉིས་ཀའི་འདིར་བསྡུས་ པ་ཡིན་ནོ། །གཏན་པའི་གཞི་ཞུ་བ་ལ་སོགས ་པའི་སྐབས་སོ། །སྲ་བརྐྱང་གི་གཞི་རྫོགས་སོ།། །།མཚོན་གྱིས་མ་དྲས་པའི་གོས་སྤྱད་པར་མི་བྱའོ་ཞེས་བྱ་བ་ནི། དེ་ལྟ་བས་ན་དགེ་སློང་དག་གིས་ཁྱིམ་བག་གི་གོས་མཚོན་གྱིས་མ་དྲས་པ་དག་ཁ་དོག་ངན་པར་བྱ་སྟེ། བཅང་བར་གནང་ངོ་ཞེས་གསུངས་པ་ཡིན་གྱི་ཁ་དོག་ངན་པར་བྱས་པ་དང་བྲལ་བ་ལྟུང་བྱེད་དུ་གསུངས་པ་ནི་མ་ཡིན་ཏེ། ལྷག་མ་ཡང་འདི་དང་ཉེ་བར་སྦྱར་བའོ། །དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་ཞེས་གསུངས་ན། རྣམ་པ་གང་གིས་དྲུབས་པ་གང་ཞེ་ན། དེའི་ཕྱིར་སྣམ་ཕྲན་སྦྲེལ་གཞི་ཉིད་དང་ལྷག་མ་མཉམ་པ་ཉིད་དང༌། དབུས་ནས་གཞན་དུ་གླེངས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་དང་མཐའ་བསྐོར་བ་ཉིད་དག་གིས་སོ་ཞེས་བྱ་
པ་སྨོས་ཏེ། གདིང་བ་སྒྲུབ་པར་བྱེད་པའི་དུམ་བུ་རྣམས་ལ་ཕྱེད་དང་གསུམ་གྱི་དཀྱིལ་འཁོར་ཉིད་ཅེས་བྱ་བ་ལ་སོགས་པའི་ཆོ་ག་གསུངས་སོ། །དེའི་ཕྱིར་དེ་སྲིད་དུ་སྒྲུབ་པར་བྱེད་པའི་དུམ་བུའི་དབང་དུ་བྱས་ནས་མདོ་འདི་བྱས་སོ། །གླེགས་བུ་འཕྲོ་བཟུང་པའི་དབུས་ནས་སྣམ་ཕྲན་རྣམས་ལ་ལྷག་མ་གང་ཡིན་བ་དེ་ནི་འདིར་ལྷག་མ་ཉིད་དུ་གསུངས་སོ། །ཕྱོགས་ཕྱོགས་སུ་ཞེས་ཟློས་བུར་བྱ་སྟེ། དབུས་ཀྱི་སྣམ་ཕྲན་གཞན་རྣམས་མངོན་པར་ཁྱབ་པར་བསྒྲུབ་པའི་དོན་དུ་སྣམ་ཕྲན་སྦྲེལ་གཞི་ཉིད་དོ། །ལྷག་མ་མཉམ་པ་ཉིད་དང་དབུས་ནས་གཞན་གླེགས་བུ་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་དེའི་དངོས་པོ་ནི་དེ་ཉིད་དོ། །གླེགས་བུའི་འཕྲོ་ཕྱོགས་ཕྱོགས་སུ་ལྟ་བ་ཉིད་ཅེས་བྱ་བ་ནི། རྒྱུད་གཞན་གྱི་ཁོངས་སུ་གཏོགས་པའི་གླེགས་བུའི་འཕྲོ་དེའི་དངོས་པོ་དང་མཐའ་སྐོར་ཉིད་དག་གིས་སྦྱིན་བ་རྗེས་སུ་སོང་བ་ཉིད་དེ་དེ་ལྟར་རྣམ་པ་བཞི་པོ་འདི་རྣམས་ཀྱི་ཞེས་བྱ་བ་ནི་འདིའི་དོན་ཏོ། །ཇི་ཙམ་དུ་གྱོན་པའི་གོས་གང་ལ་ཆོས་གོས་ཀྱི་དོན་དུ་རྣམ་པ་དེ་ལྟ་བུར་བྱིན་གྱིས་བརླབ་པར་བྱ་ཞེ་ན། དེའི་ཕྱིར་མཐང་གོས་དང་བླ་གོས་དང་སྣམ་སྦྱར་ལའོ་ཞེས་བྱ་བ་སྨོས་ཏེ་གསུམ་ཆར་ལ་ཡང་ཞེས་བྱ་བའི་དོན་ཏོ། །དགེ་སློང་མས་ནི་ཤིང་དཔུང་ཆད་དང་རྡུལ་གཞན་རྣམ་པ་གང་ཡང་རུང་བའོ་ཞེས་བྱ་བ་ནི་འདི་དག་དང་དེ་མ་ཐག་པའི་གསུམ་པོ་དགེ་སློང་མས་བྱིན་གྱིས་བརླབ་པར་བྱའོ། །རྣམ་པ་གང་ཡང་རུང་བ་ཞེས་སྨོས་པ་ནི་དྲས་ཤིང་དྲུབས་པ་ཞེས་བྱ་བ་ལས་བཟློག་པའི་དོན་དུའོ། །འདིའི་གཞུང་ནི་ཕྲན་ཚེགས་དག་ལས། བསྙེན་པར་རྫོགས་པའི་ཆོ་ག་ལས་ཆོས་གོས་ལྔ་པོ་རྣམས་བྱིན་གྱིས་བརླབ་པར་བྱའོ་ཞེས་བྱ་བ་ལ་ སོགས་པ ་དང༌། དགེ་སློང་མའི་སོ་སོར་ཐར་པ་དང༌། དེའི་རྣམ་པར་འབྱེད་པ་དག་ལས། དགེ་སློང་མ་ཆོས་གོས་ཟིན་པས་གཏན་པ་ཕྱུང་ནས། གལ་ཏེ་ཆོས་གོས་ལྔ་པོ་གང་ཡང་རུང་བ་དག་ལས་ཆོས་གོས་གཅིག་དང༌། ནུབ་གཅིག་མཚམས་ཀྱི་ཕྱི་རོལ་དུ་བྲལ་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །ཆོས་གོས་ལྔ་པོ་དག་ཅེས་བྱ་བ་ནི། སྣམ་སྦྱར་དང༌། བླ་གོས་དང༌། མཐང་གོས་དང༌། ཤིང་དཔུང་ཆད་དང༌། རྡུལ་གཟན་ཞེས་བྱ་བ་ལ་ སོགས་པ ་རྣམས་སོ། །བརྙན་པོ་ཡང་ཡོད་ཅིང་བདོག་ནའོ་ཞེས་བྱ་བ་ནི། གལ་ཏེ་
ཆོས་གོས་དྲས་ཤིང་དྲུབས་པ་བརྙན་པོ་ཡང་ཡོད་ཅིང་བདོག་ན་དེའི་ཚེ་ཡང་བྱིན་གྱིས་བརླབ་པར་བྱའོ། །གལ་ཏེ་མི་བདོག་ན་ནི་དྲས་ཤིང་དྲུབས་པ་མ་ཡིན་པ་ལ་ཡང་བྱིན་གྱིས་བརླབ་པར་བྱ་སྟེ། ཆོས་གོས་བྱིན་གྱིས་མ་བརླབས་པར་འདུག་པར་མི་བྱའོ་ཞེས་བྱ་བའི་དོན་ཏོ། །དེ་དག་བཞག་སྟེ་སྐྱ་རངས་འཆད་བ་འདའ་བར་མི་བྱའོ་ཞེས་བྱ་བ་ནི། ཆོས་གོས་བྱིན་གྱིས་བརླབས་པ་གསུམ་དང་འབྲལ་བར་མི་བྱ་སྟེ། བརྙན་པོ་ཡང་ཡོད་ཅིང་བདོག་ནའོ་ཞེས་བྱ་བ་འདི་དང་སྦྱར་བས་འབྲེལ་བར་རིག་པར་བྱའོ། །ཉིན་ཞག་འདའ་བར་བྱེད་ན་དེ་ལྟ་བུའི་རིགས་ཅན་རྣམས་ལ་འདའ་བར་བྱ་བ་ཉིད་དུ་རིགས་པ་དེ་བས་ན་སྐྱ་རེངས་འཆར་བ་ཞེས་བྱ་བ་སྨོས་ཏེ། གཞན་མེད་ན་ཁ་མ་བསྒྱུར་བ་ལ་ཡང་བྱིན་གྱིས་བརླབ་པ་འཆགས་སོ་ཞེས་བྱ་བ་ནི་ཁ་བསྒྱུར་བ་མེད་ན་ཆོས་གོས་གསུམ་པོ་འདི་ཁ་མ་བསྒྱུར་བ་ལ་ཡང་རྣམ་པར་རྟོག་པ་དོར་ནས་བྱིན་གྱིས་བརླབ་པའོ། །དེ་ལ་དོར་བས་དོགས་པ་ལ་གོ་སྐབས་ཉིད་དོ། །ཁ་བསྒྱུར་བ་ཉིད་ལ་ཡང་འདི་འཆགས་པར་འགྱུར་རོ་ཞེས་བྱ་བ་མེད་པས་རབ་ཏུ་མ་རྙེད་པ་ལ་ཁ་མ་བསྒྱུར་བའི་དོན་ལ་རུང་བས་ཅི་ཞིག་བསྒྱུར་བར་བྱ་སྟེ། འདིར་ཡང་དོགས་པ་མེད་བ་ཁོ་ནའོ། །གང་གི་ཕྱིར་ལོངས་སྤྱོད་པ་ལ་ཁ་བསྒྱུར་བ་ཉིད་དང༌། ཡན་ལག་གི་ངོ་བོར་རུང་བ་ལ་ལོངས་སྤྱོད་པའི་ངེས་པ་ལ་ཡན་ལག་ཉིད་དོ། །ཁ་བསྒྱུར་བ་ཉིད་ནི་རུང་བའོ། །དེ་ལྟར་ཡང་དཀར་པོའི་བྱ་བ་ཉིད་བསལ་བས་དོན་འདི་རུང་བའི་གཞི་བྱེད་པ་མ་ཡིན་ནོ། །དེ་ལྟ་བས་ན་ཁ་མ་བསྒྱུར་བ་ལ་ཡང་བྱིན་གྱིས་བརླབ་པ་འཆགས་པས་ན་དོན་འདི་བྱས་སོ། །མ་དྲས་པ་ལ་ཡང་ངོ་ཞེས་བྱ་བ་ནི་གཞན་ཟིན་པ་ལ་ཡང་བྱིན་གྱིས་བརླབ་པ་འཆགས་སོ། །དེ་དྲང་བའི་དོན་དུ་ཡང་གི་སྒྲའོ། །འདིར་གཞན་ཟིན་པ་ནི་དྲས་བ་གཞན་མ་ཟིན་པའོ། །དེ་ལ་གལ་ཏེ་འབྱོར་ན་ལྷན་ཐབས་གླན་ནོ་ཞེས་བྱ་བ་དེ་ལ་ཞེས་བྱ་བ་ནི་མ་དྲས་པ་ལའོ། །གཞན་མ་ཟིན་པ་བྱིན་གྱིས་བརླབ་པར་འདོད་པ་དང༌། བྱིན་གྱིས་བརླབ་པ་ལ་དེའི་ཚེ་གཞན་མ་ཟིན་པ་ལའོ། །གལ་ཏེ་འབྱོར་ན་ཞེས་བྱ་བ་ནི་ལྷན་ཐབས་གླན་པ་སྦྱིན་པར་བྱའོ། །ཁྱིམ་དུ་རུང་བའི་རྣམ་པ་ལ་ཡང་ངོ་ཞེས་བྱ་བ་ནི། གཞན་ཟིན་པ་མེད་ན་བྱིན་གྱིས་བརླབ་པ་འཆགས་པའོ་ཞེས་བྱ་བ་འདི་ལ་ཡང་གི་སྒྲས་ནི་དགུག་པའོ། །ཁྱིམ་དུ་རུང་བའི་རྣམ་པ་འདི་ལ་ཡོད་པས་ན་ཁྱིམ་དུ་རུང་བའི་རྣམ་
པའོ། །རུང་བས་ཀྱང་དགེ་སློང་གི་ཆོས་གོས་ཀྱི་རྣམ་པ་ཉིད་དུ་མ་རེད་པ་ཞེས་བྱ་བའི་དོན་ཏོ། །ཕྱིང་བ་དང་ལ་བ་དང་བེའུ་ཕྲུག་དང་ཀླམ་དང་སེངས་པ་རྣམས་ནི་མི་དྲ་བར་ལྷན་ཐབས་སུ་ཀླན་ཞིང་དྲུབ་པོ་ཞེས་བྱ་བ་ནི་ཆོས་གོས་ཉིད་དུ་བྱིན་གྱིས་བརླབ་པར་བྱའོ། །སྤུ་ཅན་ནི་ཆོས་གོས་ཉིད་དུ་བྱིན་གྱིས་བརླབ་པར་མི་བྱའོ་ཞེས་གསུངས་མོད་ཀྱི། སྤུ་ཅན་ནི་ལ་བ་དང་བེའུ་ཕྲུག་དག་ལ་འདི་དག་སྤུ་བྱི་བ་ཡང་སྲིད་པས་འདིར་དེ་གཉིས་གཟུང་བར་རིག་པར་བྱའོ། །འདིར་གཞུང་ནི་དགེ་སློང་དག་ལྔ་པོ་དག་ནི་མི་འདྲ་བ་དག་ཡིན་ཏེ། །ཕྱིང་པ་ཐམས་ཅད་དང༌། ལ་བ་ཐམས་ཅད་དང༌། བེའུ་ཕྲུག་ཐམས་ཅད་དང༌། ཀླམ་ཐམས་ཅད་དང༌། གོས་སེངས་པ་ཐམས་ཅད་དང༌། ལྷན་ཐབས་གླན་ཏེ་བཅང་བར་བྱའོ་ཞེས་གསུངས་པ་ཡིན་ནོ། །དེ་ལ་ཅུང་ཟད་ཀྱང་ནུས་པར་བྱ་བ་མ་ཡིན་མོད་ཀྱི་འདིར་བྱིན་གྱིས་བརླབ་པར་བྱ་བ་ཉིད་ཀྱིས་ཁས་བླངས་པ་རྟོགས་པའི་ཕྱིར་ཞེས་བྱ་བ་འདི་ལྟར་ཤེས་པ་ཡིན་ནོ། །གནས་མལ་མི་གཙང་བས་གོས་པར་གྱུར་ན་དེའི་མོད་ལ་སྦྱར་བར་བྱའོ། །དགེ་འདུན་གྱི་རྩྭའི་ཁྲི་དང་ཁྲིའུ་མ་གཏོགས་པ་སྟན་ཡན་ཆད་ལ་དེ་མ་ཡིན་བའི་གདིང་བ་མེད་པ་དང་གདིང་གཡོགས་ལ་ཡང་བར་ཆད་མ་བཅུག་པ་ཉེ་བར་སྤྱད་པར་མི་བྱའོ་ཞེས་བྱ་བ་ལ་ཁྲི་དང་ཁྲིའུ་མ་གཏོགས་པ་ཞེས་བྱ་བ་ནི་ཁྲི་དང་ཁྲིའུ་ལས་གཞན་པའོ། །རྩྭའི་ཁྲི་དང་ཁྲིའུ་ཞེས་བྱ་བ་ནི་འདིར་རྩྭ་མུན་ཛ་དང་གྲེས་མའི་ཁྲི་དང་ཁྲིའུ་ལ་ སོགས་པའི་ཐགས་མས་བརྒྱུས་པ ་ལ་སྨོས་སོ། །གང་ཞིག་འདི་ཕྲན་ཚེགས་རྣམས་ལས་གསུངས་ཏེ། ཚེ་དང་ལྡན་པ་གནས་མལ་བསྡུས་སམ། དེ་སྨྲས་པ། བདག་གིས་གདིང་བ་མ་བསྡུས་སོ། །དེ་རྩའི་ཁྲི་ལ་ཉལ་ཞིང་མ་བསྡུས་པ་དེ་བས་ན་དེ་དམིགས་ཀྱིས་བསལ་བ་ཡིན་ནོ། །གང་གི་ཕྱིར་འདིར་གང་ཟག་གི་རྩྭའི་ཁྲི་དང་འུ་འདི་མ་བསྡུས་སོ་སྙམ་དུ་ཡིད་ལ་བཟུང་བ་ཡིན་ནོ། །གྲོལ་བ་ལས་ཀྱང་འདི་ཐོབ་པ་འདི་དག་དྲི་མ་ཅན་དུ་བྱས་པ་དོན་མེད་དོ་ཞེས་འདིའི་རྗེས་སུ་འབྲངས་པས་ཀྱང༌། རྩྭའི་ཁྲི་དང་ཁྲིའུ་རྗེས་སུ་གནང་བའི་འཇིག་པའི་ཆོས་ཅན་དང་ལྡན་པར་གྱུར་པ་ལ་ཡང་དྲི་མ་ཅན་དུ་བྱས་པ་དོན་མེད་པ་མ་ཡིན་ཏེ། དེ་ལྟ་བས་ན་དེ་དང་ལྡན་བ་ལ་ཡང་འདིའི་རྗེས་སུ་འབྲངས་པས་རྟོགས་པར་བྱའོ། །དེ་ཞེས་བྱ་བ་ནི་དགེ་འདུན་གྱི་མ་ཡིན་བས་སོ། །དགེ་འདུན་
ལས་གཞན་གྱི་གདིང་བ་མ་ཡིན་པ་ཞེས་བྱ་བའི་དོན་ཏོ། །གདིང་བ་མེད་པ་དང་ཞེས་བྱ་བ་ནི་འདུག་པ་ལས་ཇི་སྲིད་དུ་ཉེ་བར་ལོངས་སྤྱོད་པར་མི་བྱའོ། །འདུག་པའི་སྟན་ཡན་ཆད་ལ་ཡང་གདིང་བ་མེད་པར་དགེ་འདུན་གྱི་ལ་འདུག་པར་མི་བྱའོ། །འདིར་ལོངས་སྤྱོད་པ་ནི་ཁོངས་སུ་མ་གཏོགས་པ་ནི་མ་ཡིན་ནོ་སྙམ་དུ་ཤེས་པར་བྱ་བའི་དོན་ཏོ། །ཡན་ལག་གིས་རེག་པ་ཙམ་ལ་ཡང་གདིང་བ་གཞུག་དགོས་པར་རིག་པར་བྱའོ། །འདིར་གཞུང་ནི་མ་མོ་ལས། དགེ་སློང་རྣམས་ལ་བཅོམ་ལྡན་འདས་ཀྱིས་འདུག་པར་གནང་སྟེ་གནས་མལ་སྤ་བའི་དོན་དུའོ། །གདིང་བ་མེད་པར་ཉེ་བར་སྤྱད་པར་མི་བྱའོ་ཞེས་གསུངས་པ་ཡིན་ནོ། །དགེ་སློང་བྲམ་ཟེའི་བུ་མོས་ཞུས་པ་ལས་ཀྱང༌། བཙུན་བ་སྟན་ཁྲ་བོ་ལ་འདུག་ཏུ་རུང་ངམ། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གདིང་བ་ཡོད་པར་གྱུར་པ་ན་རུང་སྟེ། གང་ཞིག་ཕལ་ཆེར་ཉམས་པར་འགྱུར་རོ་ཞེས་གསུངས་པ་ཡིན་ནོ། །ཕལ་ཆེར་མ་ཉམས་པ་ལ་ཞེས་བྱ་བ་འདིར་ཡང་ཚིག་ནི་འདི་ཉིད་ཡིན་ཏེ། འདིར་གཞུང་ནི། དགེ་སློང་བྲམ་ཟེའི་བུ་མོས་ཞུས་པ་ལས་རིག་པར་བྱའོ། །གདིང་གཡོགས་ལ་ཡང་ཞེས་བྱ་བ་ནི་སྟེང་དུ་གཡོགས་པ་ལ་གདིང་གཡོགས་སུ་འདོད་དོ། །གཞན་ཡང་བར་ཆད་མ་བཅུག་པ་ནི། དགེ་འདུན་གྱི་གདིང་གཡོགས་པའོ། །དེ་ལ་ཡང་བར་ཆད་མ་བཅུག་པར་ལོངས་སྤྱོད་པར་མི་བྱའོ། །ཐམས་ཅད་ཀྱི་ཁྲ་བོ་ཕལ་ཆེར་མ་ཉམས་པ་ལ་ཡང་ངོ་ཞེས་བྱ་བ་ནི་གང་ཟག་གི་གནས་མལ་ལ་ཡང་གདིང་བར་མ་བྱས་པ་ལ་མི་འདུག་པ་ལས་གདིང་གཡོགས་ལ་ཡང་བར་ཆད་མ་བཅུག་པར་ཉེ་བར་སྤྱད་པར་མི་བྱའོ་ཞེས་བྱ་བ་ནི་ཡང་གང་གི་སྒྲས་དྲངས་པའོ། །དེ་མ་ཡིན་པའི་ནི་འདིར་ཁྲ་བོ་ལས་ཕལ་ཆེར་མ་ཉམས་པ་ལས། གཞན་གྱིས་བྱ་བ་དོན་གྱིས་རྣམ་པར་གཞག་པའོ། །ངན་ངོན་ཅན་དང་དྲི་མ་ཅན་གྱིས་མི་བྱའོ་ཞེས་བྱ་བ་ནི་ཡང་གདིང་བ་ལ་ཡང་བར་ཆད་མ་བཅུག་པ་ལ་ཞེས་བྱ་བའི་རྗེས་སུ་འབྲངས་ནས་ཀྱང་སླར་གདིང་བའི་ཆོ་ག་ལ་འདིར་བར་ཆད་མ་བཅུག་པའི་ཆོ་ག་ཐོབ་པའོ། །བར་ཆད་མ་བཅུག་པའི་ཆོ་ག་ལས་ཀྱང་གདིང་བའི་ཆོ་གའོ། །དེ་ལྟ་བས་ན་ཐམས་ཅད་དུ་འདིས་གཉི་གའི་ཁོངས་སུ་བསྡུས་པར་བྱས་པའོ། །གདིང་བ་བཅང་བར་བྱའོ་ཞེས་བྱ་བ་ནི་བར་ཆད་མ་བཅུག་པ་བཟློག་པའི་དོན་དུ་འདི་སྨོས་སོ། །
དེ་ནི་སྟུག་ན་ཚིག་རྐྱང་རུང་ངོ་ཞེས་བྱ་བ་ནི་གདིང་བ་དེའོ། །སེངས་པ་ནི་ཉི་རིམ་མོ། །ཁྲ་ཁྲ་བོ་མི་རུང་ངོ་ཞེས་བྱ་བ་ནི་གདིང་བ་ཁྲ་བོ་བཀྲ་བ་ཁྲ་ཁྲ་བོར་འདུག་པ་དེ་བཀག་པའོ། །འདིར་མཚོན་གྱིས་དྲས་ཏེ་བཅང་བར་བྱའོ་ཞེས་གསུངས་སོ། །མཚོན་གྱིས་དྲས་པའི་གོས་ལོངས་སྤྱད་པར་བྱའོ་ཞེས་བྱ་བ་སྤྱིའི་ཆོ་ག་བསྒྲུབ་པ་ཉིད་ཀྱི་ཕྱིར་འདིར་མ་བསྡུས་པའོ། །དེ་ལ་གླེགས་བུའི་འཕྲོ་བྱའོ་ཞེས་བྱ་བ་ནི་གདིང་བ་དེ་ལའོ། །ཕྱོགས་གང་དུ་ཞེ་ན། དེའི་ཕྱིར་འོག་རོལ་གྱི་སུམ་ཆའི་དང་པོར་རོ་ཞེས་བྱ་བ་སྨོས་ཏེ། འོག་རོལ་ཞེས་བྱ་བ་ནི་རྐང་པའི་མཐའ་ལོགས་སུ་སུམ་ཆའི་གང་ཡིན་པ་དེའི་དང་པོ་དང་དབུས་དང་ཐ་མར་ནི་མ་ཡིན་ནོ་ཞེས་བྱ་བའི་དོན་ཏོ། །གླགས་བུ་གཅིག་པ་བྱིན་གྱིས་བརླབ་པར་མི་བྱའོ་ཞེས་བྱ་བ་ནི་གདིང་བ་སྟེ་མ་མོ་ལས་འདུག་པ་འདི་ནི་འདིར་གདིང་བའོ། །གཡན་པ་དགབ་པ་དེ་དང་ལྡན་པས་བཅང་པར་བྱའོ་ཞེས་བྱ་བ་ལ་དེ་དང་ལྡན་པས་ཞེས་བྱ་བ་ནི་གཡན་པའོ། །དེ་ཞག་ལྔའམ་དྲུག་ཅིང་སྦྱང་བར་བྱའོ། །སྲིན་བལ་གྱི་དང༌། བལ་གྱི་དང༌། ཤ་ནའི་དང༌། ཟར་མའི་རུང་ངོ་ཞེས་བྱ་བ་ནི་བྱེ་བྲག་མ་སྨོས་པའི་ཕྱིར་བསམ་པའི་བྱེ་བྲག་གོ་བར་བྱེད་ནུས་པ་མེད་པའི་ཕྱིར་ཆོས་གོས་གསུམ་པོ་ཉིད་ཀྱིས་ཀྱང་ཆོས་གོས་ལྷག་པ་ཉིད་ཀྱང་རིག་པར་བྱའོ། །སྲོག་ཆགས་ཀྱི་ཡན་ལག་རྣམས་བྱུང་བ་ཉིད་ཀྱི་ཕྱིར་ཀོ་ལྤགས་ལ་ སོགས་པ ་བཞིན་དུ་མི་རུང་བ་ཉིད་དུ་དོགས་པ་ལ། སྲིན་བལ་གྱི་དང་བལ་གྱི་དག་ཅེས་སྨོས་སོ། །ཤ་ནའི་དང་ཟར་མའི་རུང་བ་དག་ལ་ནི་རྩུབ་པར་གྱུར་པའི་ཕྱིར་གསོ་མ་དག་གོས་ལ་ སོགས་པ ་བཞིན་ནོ། །སྣམས་སུ་མ་བྱས་པ་དང་གསོ་མ་ནི་མི་རུང་ངོ་ཞེས་བྱ་བ་ནི། དཔག་བསམ་གྱི་ཤིང་ལས་བྱུང་བའི་གོས་ལ་ སོགས་པ ་དང༌། གསོ་མ་ལ་ སོགས་པའི་གོས་ནི་མི་རུང་ངོ་ཞེས་བྱ་བའི་དོན་ཏོ། །སྤང་པའི་ཞུ་བ་ལས་ཉེས་བྱས་བྱེད་པ ་ཉིད་ཀྱི་མི་རུང་བའི་ཁོངས་སུ་གང་ཞིག་མ་གཏོགས་པ་ལ་གོ་རིམས་བྱེད་པ་དེ་འདིར་བསྡུས་པའོ། །སྐྲ་ལས་བྱས་པ་དང་གཅེར་བུ་པ་དང་བྱ་འུག་པ་པ་ཡང་དག་པར་ལེན་པ་ཡང་ངོ་ཞེས་བྱ་བ་ཡང་མི་རུང་ངོ་ཞེས་བྱ་བར་སྦྱར་ཏེ། འདིར་སོ་སོར་ཡང་དག་པར་ལེན་པའི་སྒྲ་མངོན་པར་འབབ་པོ། །སྐྲའི་ལ་བ་ཡང་དག་པར་ལེན་པ་དང༌། །གཅེར་བུ་པ་ཡང་དག་པར་ལེན་པ་དང༌། བྱ་འུག་པ་པ་ཡང་དག་པར་ལེན་པ་དང་ནི་མི་རུང་ངོ༌། །འདིར་གཞུང་ནི།
དགེ་སློང་བྲམ་ཟེའི་བུ་མོས་ཞུས་པ་ལས། མུ་སྟེགས་ཅན་གྱི་རྒྱལ་མཚན་གསུམ་པོ་གཅེར་བུ་པ་ཉིད་དང༌། བྱ་འུག་པ་ཉིད་དང༌། སྐྲའི་ལ་བ་འཆང་བར་བྱེད་ན་ཉེས་པ་སྦོམ་པོར་འགྱུར་རོ། །མུ་སྟེགས་ཅན་གྱི་རྒྱལ་མཚན་གསུམ་པོ་དག་མ་གཏོགས་པ་དེ་ལས་གཞན་པའི་མུ་སྟེགས་ཀྱི་རྒྱལ་མཚན་འཆང་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཡང་དག་པར་བླང་བ་མངོན་དུ་གཏོང་བས་འཆང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་ལ་སྦོམ་པོའོ་ཞེས་བྱ་བ་ནི་སྐྲ་ལས་བྱ་པ་དང༌། གཅེར་བུ་དང༌། བྱ་འུག་པ་ཡང་དག་པར་ལེན་པ་དེ་ལ་ནི་དགེ་འདུན་གྱི་དབྱེན་གྱི་ཕྱོགས་སུ་གཏོགས་པའི་ཉེས་པ་སྦོམ་པོར་གྱུར་པར་རིག་པར་བྱའོ། །གཞན་བསྟེན་པ་ནི་དེའི་འོ་ཞེས་བྱ་བ་ནི་གསུམ་པོ་དག་ལས་གཞན་པའི་ཡང་དག་པར་བླང་བ་སྔོན་དུ་བཏང་བས་བསྟེན་པ་ནི་བསྟེན་དུ་རུང་བ་མ་ཡིན་ནོ་ཞེས་བྱ་བའི་དོན་ཏོ། །ཡང་དག་པར་བླང་པ་སྔོན་དུ་བཏང་བའི་བསྟེན་པ་ལ་ནི་ཉེས་བྱས་ཏེ་ད་བས་ན་དེའི་འདི་བྱེད་པའོ། །ཐམས་ཅད་དུ་མུ་སྟེགས་ཀྱི་རྒྱལ་མཚན་འཆང་བ་དེ་དག་དག་པ་དང་གྲོལ་བར་འཛིན་པས་འཆང་ན་ནི་ཉེས་པ་སྦོམ་པོར་འགྱུར་རོ། །འདིར་ཡང་དག་པར་བླང་བ་ལ་ཐ་དད་པ་ཉིད་ཡིན་ཏེ། སྦྱོར་བ་གྲུབ་པ་ཉིད་ནི་མ་ཡིན་ནོ། །དེ་ལ་ཡང་འདིར་སྦོམ་པོ་ཉིད་དུ་ལོགས་ཤིག་ཏུ་གསུངས་པས་གལ་ཏེ་འདིར་དག་པ་དང་གྲོལ་བ་ཉིད་ལས་འདིས་ཞེས་བྱ་བ་ལ་སྦོམ་པོའོ་ཞེས་དའི་རྗེས་སུ་འབྲང་བར་རྟོགས་པར་བྱའོ། །སྐྲ་འབལ་བ་དང༌། ལོ་མ་གྱོན་པ་དང༌། གཡང་གཞིའི་སྨད་གཡོགས་སྟོད་གཡོགས་དང་བཅས་པས་འཚོ་བ་དང༌། གསོ་རས་དང་ཡན་ལག་གི་སྦུབས་དང་གོས་ཐམས་ཅད་སྔོ་བ་དང༌། གདེངས་ཀ་ལྟ་བུ་དང་ཁ་ཚར་རིང་པོ་དང༌། རལ་ཀ་དང་གཙུག་གཏོར་དང་མགོ་དཀྲི་བ་དང༌། ར་ཕྱར་དང་རྔ་བལ་གྱི་སྣམ་བུ་དང༌། མུ་སྟེགས་ཅན་གྱི་རྒྱལ་མཚན་ཡང་ངོ་ཞེས་བྱ་བ་ཡང་མི་རུང་ངོ་ཞེས་སྦྱར་རོ། །གསོ་རས་ཞེས་བྱ་བ་ནི་འདབ་མ་ལས་མ་བྱས་པའི་གོས་ཞེས་བྱ་བ་ནི་རྒྱ་གར་བ་རྣམས་འདོད་དོ། །ཁ་ཆེ་བ་རྣམས་ནི། གསོ་མ་ལས་བྱས་པའི་གོས་སེང་སེང་པོའི་གོས་འདིའོ། །ཡན་ལག་གི་སྦུབས་ཞེས་བྱ་བ་ནི་ནུ་མ་ལ་ སོགས་པ ་གཡོགས་པའི་གོས་སོ། །གོས་ཐམས་ཅད་སྔོ་བ་ཞེས་བྱ་བའི་དོན་ཏོ། །འདིར་ཁ་ཅིག་ནི་ཐམས་ཅད་
སེར་བ་དང་ཐམས་ཅད་དམར་བ་དག་ལ་ཡང་བཀག་གོ་ཞེས་ཟེར་ཏེ། འདི་ནི་མི་རིགས་པ་སྟེ། དེ་གཡོགས་པ་ལ་མི་འདུན་པ་ཉིད་དུ་མ་མཐོང་བ་ཉིད་ཀྱི་ཕྱིར་རོ། །རལ་ག་ཞེས་བྱ་བ་ནི་ལྷམ་སྒྲོག་གུ་ཅན་གྱི་རྣམ་པའོ། །འདིས་ཤིང་དཔུང་ཆད་རྗེས་སུ་གནང་བ་འགལ་བ་མེད་དེ་ཤིང་དཔུང་ཆད་ནི་རྣམ་པ་གཞན་གྱི་ཕྱིར་རོ། །དཔེར་ན་ལྷམ་ཡུ་རིངས་ཀྱི་རྣམ་པ་ལས་ལྷམ་སྒྲོག་གུ་ཅན་གྱི་རྣམ་པ་ཅུང་ཟད་ཞན་པ་དང་འདྲའོ། །མགོ་དཀྲི་བ་ཞེས་བྱ་བ་ནི་གཙུག་ཏོར་མ་ཡིན་པ་དང་འདྲ་བ་ཡིན་ཏེ། དེ་ནི་རང་གི་སྒྲས་སྨོས་པ་ཉིད་ཀྱི་ཕྱིར་རོ། །ར་ཕྱར་ཞེས་བྱ་བ་ནི་ར་བལ་ལས་བྱས་པའི་ཕྱར་བའོ། །རྔ་བལ་གྱི་སྣམ་བུ་ཞེས་བྱ་བ་ནི་རྔ་མོའི་བལ་ལས་བྱས་པའི་སྣམ་བུའོ། །མུ་སྟེགས་ཀྱི་རྒྱལ་མཚན་ཡང་ཞེས་བྱ་བ་ལ། ཡང་གི་སྒྲས་ནི་མི་རུང་ངོ་ཞེས་བྱ་བར་སྦྱར་ཏེ། དེ་ལྟ་བས་ན་སྐབས་སུ་རྫོགས་པ་རབ་ཏུ་བསྟན་པའི་དོན་དུའོ། །ལྷག་མ་བརྩམས་པ་རྣམས་ལས་མུ་སྟེགས་ཀྱི་རྒྱལ་མཚན་འཛིན་པ་སྒྲུབ་པའི་དོན་དུ་ནི་དེའི་སྒྲའོ། །པུ་ས་ལའི་འདབ་མར་གང་དང་མ་ར་མེའི་སྙིང་པོ་ཙམ་དེས་ཀྱང་སྙོམས་པར་བྱ་བའི་ཕྱིར་བགོ་བཤའ་བྱའོ་ཞེས་བྱ་བ་ནི་བཟའ་བར་བྱ་བའི་ཟས་ནི་ཐ་ན་ཤིང་པུ་ས་ལའི་ལོ་མོ་ལ་གང་ཙམ་དེས་དབང་བ་ཐམས་ཅད་ལ་སྙོམས་པར་བྱ་བའི་ཕྱིར་བགོ་བཤའ་བྱའོ། །གོས་ནི་ཐ་ན་མར་མེའི་སྙིང་པོ་ཙམ་དེས་ཀྱང་བགོ་བཤའ་བྱའོ། །འདིར་གཞུང་ནི། ཕྲན་ཚོགས་དག་ལས་དེ་ནས་བརྩམས་ཏེ་ངེས་པ་མ་ཡིན་ཞེས་བྱ་བའི་བར་དུ་འདི་དྲངས་པའོ། །ལབ་དང་དེ་ལྟ་བུ་དག་ནི་བཙོངས་ཏེའོ་ཞེས་བྱ་བ་ནི་བགོ་བཤའ་བྱའོ་ཞེས་བྱ་བར་སྦྱར་རོ། །མེ་བཤིགས་པ་ཉིད་དོ་ཞེས་བྱ་བ་ནི་དེ་ལས་གཞན་པའི་གོས་བཞིན་དུ་མི་བཤིགས་པ་ཉིད་ཡིན་ནོ། །རྙེད་པ་བགོ་བ་ལ་ལྔ་བྱའོ། །རྙེད་པ་བགོ་བ་ལ་བྱ་བ་ལྔ་བྱ་བ་དེ་དག་གང་ཞེ་ན། དེའི་ཕྱིར་དེར་རྙེད་པ་འགོད་པར་འགྱུར་གྱི་དེར་ཁྱེད་ཅག་གིས་ཚོགས་པར་བྱའོ་ཞེས་དགེ་འདུན་ལ་བརྗོད་པར་བྱ་བ་དང༌། གཎྜཱི་བརྡུང་བ་དང༌། ཚུལ་ཤིང་བྲིམ་པ་དང༌། བགྲང་བ་དང། སོ་སོའི་སྐལ་བ་བྲིམ་པའོ། །ཐ་མ་ཡན་ཆད་བྱེད་པ་ཉིད་ན་འོངས་པ་དབང་བ་ཉིད་ཡིན་ནོ་ཞེས་བྱ་བ་ནི་རྙེད་པ་འགོད་པའི་དུས་སུ་བྱ་བ་ལྔ་པོ་དེ་དག་གི་གཞན་དེ་སྲིད་དུ་བྱ་བ་ཉིད་ལ་འོངས་པ་ལ་བརྟེན་པ་ཉིད་དོ། །རེ་ཞིག་འདིར་དབང་བྱེད་པ་ཉིད་ལ་ལྔ་པོ་འདིར་ངེས་པ་ལ་དབང་དུ་བྱ་བ་ཉིད་ཡིན་ནམ་འོ་ན་
ཏེ་ཅི་ཡང་མ་ཡིན་སྙམ་དུ་མི་ཤེས་པའི་བློ་ཅན་དག་ལ་གསུངས་པ་ནི། དེའི་ཕྱིར་མཇུག་ཏུ་ཕྱིན་པ་ཉིད་ནི་མི་དབང་ངོ་ཞེས་བྱ་བ་སྨོས་ཏེ། །ཡོངས་སུ་རྫོགས་པ་ལ་ལྔ་པོ་མི་དབང་ངོ་ཞེས་བྱ་བའི་དོན་ཏོ། །དེ་ནི་རྙེད་པ་ཆུང་དུ་ལ་ཡང་ངོ་ཞེས་བྱ་བ་ནི་ལྔ་རྣམས་ཞེས་བྱ་བ་ལ་ སོགས་པ ་སྨོས་ཏེ། དེའི་ནི་རྙེད་པ་ཆུང་ངུ་ལ་ཡང་བྱའི་རྙེད་པ་ཆེན་པོ་འབའ་ཞིག་ལ་བྱ་བར་མ་ཟད་དོ། །རྙེད་པའི་བྱ་བ་དེར་ཞུགས་ནས་སོང་བ་ཉིད་ཡིན་ཡང་མི་དབང་བ་མ་ཡིན་ནོ་ཞེས་བྱ་བ་ནི་དབྱར་གནས་ པ་ལ་སོགས ་པའི་ལས་གང་གིས་རྙེད་པ་འགྲིམ་པར་བྱེད་པའི་བྱ་བ་དེར་ཞུགས་པར་གྱུར་ན། གཙུག་ལག་ཁང་གི་མཚམས་ལས་འདས་ཏེ་སོང་བ་ཡང་རྙེད་པ་དེ་མི་འོས་པ་མ་ཡིན་ནོ། །དེའི་ཕྱིར་འགྲོ་བས་ནོད་པ་བཅོལ་བར་བྱའོ་ཞེས་བྱ་བ་ནི་གང་གི་ཕྱིར་རྙེད་པ་དེ་འོས་པ་དེ་བས་ན་འགྲོ་བས་རང་གི་སྐལ་བ་མནོད་པ་གཞན་ལ་བཅོལ་བར་བྱའོ། །ཁས་བླངས་པ་དང་ལྡན་པས་མ་མནོས་ན་བསབ་པར་བྱ་བ་ཉིད་དོ་ཞེས་བྱ་བ་ནི། མནོད་དོ་ཞེས་དེ་ལྟར་དམ་བཅའ་བར་བྱེད་ཅིང་གལ་ཏེ་རྙེད་པ་མ་མནོས་ན་དེའི་ཚེ་རང་གི་སྒོ་ནས་བསབ་པར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །རྙེད་པ་ཆུང་ངུ་ལ་ པ་ན་ལྔ་ལ་སོགས ་པའོ་ཞེས་བྱ་བ་ནི། རྙེད་པ་ཆུང་ངུ་ལ་ཡང་གལ་ཏེ་མངོན་པར་ཁས་བླངས་པ་དང་ལྡན་པ་མ་མནོས་ན་བགོ་སྐལ་མ་ཤ་ཀ་ལྔ་འམ་དེ་ལས་ལྷག་པ་ཡིན་ན་དེ་ལ་བསབ་པར་བྱ་བ་ཉིད་ཡིན་པའོ། །མ་བཅོལ་ན་མནོད་པར་མི་བྱའོ། །སློབ་དཔོན་ནམ་མཁན་པོའི་ནི་མནོད་པར་བྱའོ་ཞེས་བྱ་བ་ནི་མ་བཅོལ་ཡང་རྙེད་པ་མནོད་པར་བྱའོ། །ཡིད་གཅུགས་པའི་གནས་ཀྱི་དོན་དུ་ཡང་ངོ་ཞེས་བྱ་བ་ནི། ཡིད་གཅུགས་པའི་གནས་སུ་གྱུར་པ་གང་ཡིན་པ་དེའི་དོན་དུ་མ་བཅོལ་ཡང་མནོད་པར་བྱ་སྟེ། སློབ་དཔོན་དང་མཁན་པོར་གྱུར་པ་ཉིད་ལ་མནོད་པར་བྱའོ། རང་གི་ཕྱོགས་དང་མཐུན་པ་མ་ཡིན་བའི་དོན་དུ་མི་བྱའོ་ཞེས་བྱ་བ་ནི་བྱེ་བའི་ཕྱོགས་སུ་སོང་བའི་དོན་དུ་ཡང་མནོད་པར་མི་བྱའོ། །དེ་ནི་གནས་མལ་ལ་ཡང་ངོ་ཞེས་བྱ་བ་ནི། གནས་མལ་གནོད་པར་བྱ་བ་ཉིད་ལ་ཡང་དེ་མ་བཅོལ་བ་ཞེས་བྱ་བ་ལ་སོགས་པར་རྟོགས་པར་བྱའོ། །འདིར་གཞུང་ནི། གནས་མལ་གྱི་གཞུང་ཞུ་བ་ལས། ཡིད་གཅུགས་གནས་ཀྱི་དོན་དུ་ཞེས་བྱ་བ་ལ་ སོགས་པ ་ལ་གང་གིས་བཅོལ་བ་གང་དུ་ཡང་ཡིད་ཆེས་པའི་དོན་དུ་གྱུར་པ་སྟེ། དེའི་ཕྱིར་མངོན་དུ་
ཕྱོགས་པར་གྱུར་པའི་དོན་ལ་གནས་མལ་མནོད་པར་བྱའོ་ཞེས་གསུངས་པ་ཡིན་ཏེ། ཁས་བླངས་པས་ཁས་མ་བླངས་པ་ལ་ནི་མ་ཡིན་ནོ་ཞེས་བྱ་བ་དེར་དོན་དེ་ཙམ་དུ་གསུངས་སོ། །རྙེད་པ་ལ་ཡང་སྦྱོར་བ་འདི་རྙེད་པ་མ་ཡིན་པར་འབྲེལ་པ་ལ་ཡང་འདིར་ཡང་ཞེས་བྱ་བ་དེ་ལྟར་སྨོས་སོ། །ཟས་ལ་ཡང་ངོ་ཞེས་བྱ་བ་ཡང་མ་བཅོལ་ན་མནོད་པར་མི་བྱའོ་ཞེས་བྱ་བ་ལ་ སོགས་པ ་རིག་པར་བྱ་བ་སྟེ། འདིར་གཞུང་ནི། འདུལ་བྱེད་དག་ལས་ཐ་སྙད་འདི་ཡིན་ནོ། །འགོད་པ་དང་མ་བྱིན་བར་ལེན་པར་རྟོགས་པ་འདི་ཡང་གཞན་གྱི་ཚིག་གི་སྐབས་མེད་པའི་ཕྱིར་ཏེ། མ་བཅོལ་ན་མནོད་པར་མི་བྱའོ་ཞེས་བྱ་བ་དེ་ཙམ་ཞིག་དེར་དོན་གསུངས་སོ། །དེ་ཐམས་ཅད་ལ་མ་བཅོལ་བ་ཉིད་ལ་མ་ཡིན་ཞེས་བྱ་བ་ལ་ སོགས་པ ་འདིར་རྣམ་པར་གཞག་པ་དེའི་ཕྱིར་ཐམས་ཅད་དེ་འདིར་སྦྱར་བར་བྱའོ། །གཞན་གྱི་དོན་དུ་མནོད་པར་ཕ་རོལ་ལ་གོ་བར་བྱའོ་ཞེས་བྱ་བ་ནི་གཞན་ཡང་མནོད་པར་བྱ་སྟེ། ཟས་གཅིག་པུ་ནི་མ་ཡིན་ནོ། །འདིར་གཞུང་ནི་འདུལ་བྱེད་དག་ལས། ཐ་སྙད་འདི་འགྱོད་པ་གཅིག་པུ་ལས་སྐབས་མེད་པར་བྱ་བའི་ཕྱིར་ཟས་མནོད་པ་ལས་གླེང་གཞི་དེ་ལས་བྱེད་པའོ། །ཐ་སྙད་ལ་ནི་ཟས་མནོད་པ་མ་ཡིན་ཏེ། མནོད་པར་བྱེད་པས་གཞན་ལ་གོ་བར་བྱའོ་ཞེས་བྱ་བ་ཙམ་ཞིག་གསུངས་ཏེ་གཞན་དུ་མནོད་པར་བྱ་བ་ལ་ཆོ་ག་འདི་རྣམ་པར་གཞག་པར་བྱ་བ་སྟེ། དེ་ལྟར་ན་བྱེ་བྲག་ལ་མ་བརྟེན་པའོ། །མི་དབང་བས་ནང་དུ་ཞུགས་ཏེ་མི་བྱའོ་ཞེས་བྱ་བ་ནི། རྙེད་པ་ནི་དབང་བས་གང་དག་དབང་པ་དེ་དག་གི་ནང་དུ་ཞུགས་ཏེ་སྐལ་བ་མནོད་པར་མི་བྱའོ། །འདིར་གཞུང་ནི། དེ་ལྟ་བས་ན་དགེ་སློང་གི་གཞན་གྱི་རྙེད་པར་འཇུག་པར་མི་བྱའོ་ཞེས་གསུངས་པ་ཡིན་ནོ། །འདིར་དཔེ་གཞན་ཡང་ཚེ་དང་ལྡན་པ་ཉེ་དགའ་མགྲོན་དུ་མ་བོས་པས་ཟས་ཟོས་ནས་རས་ཡུག་ཆེན་མནོས་པ་བཞིན་ནོ། །དབང་བ་གཅིག་ཉིད་ཀྱིས་ཤིན་ཏུ་མང་པོ་ཐོབ་པ་ལ་མི་དབང་བའི་རྒྱུར་འགྱུར་བ་མེད་དོ་ཞེས་བྱ་བ་ནི། གང་ཟག་གང་དེ་དག་ལ་འདིར་ལུང་ནི་རྒན་ཞུགས་དེ་གཉིས་འདི་སྙམ་དུ་བདག་ཅག་གཉིས་ལས་རས་ཡུག་ཆེན་བརྒྱ་ཇི་ལྟར་འབྱུང་བར་འགྱུར་ཏེ། གཞན་ནས་འཇུག་ཏུ་གཞུག་པར་བྱའོ་སྙམ་དུ་སེམས་པ་དེ་བསལ་བའི་དོན་དུ་དེ་ཡིན་ཏེ། གང་ཞིག་དེད་དཔོན་གྱི་ས་དགེ་འདུན་གྱི་ཕྱིར་གཙུག་ལག་ཁང་དུ་རྙེད་པ་མང་པོ་བསྐུར་བ་ནས་གཙུག་
ལག་ཁང་དེ་ན་དགེ་སློང་གཅིག་པུ་ཞིག་གནས་པ་དེ་འགྱོད་པས་མི་ལེན་ནས། བཅོམ་ལྡན་འདས་ཀྱིས་དེ་ནི་དེ་ན་གང་གནས་པ་དེའི་ཕྱིར་ཡིན་ནོ་ཞེས་རྗེས་སུ་གནང་བའི་བར་དུ་གསུངས་པ་དེ་ནི་དཔེ་གཞན་ཡིན་ནོ། །བྱེ་བ་ནི་ཆོས་མ་ཡིན་པའི་ཕྱོགས་དང་མཐུན་པ་དག་ཏུ་སོང་བ་དགེ་འདུན་གྱི་རྙེད་པ་མི་དབང་ངོ་ཞེས་བྱ་བ་ནི། ཆོས་མ་ཡིན་པའི་ཕྱོགས་དང་མཐུན་པ་ཐ་དད་པ་རྣམས་ལ་ཆོས་ཀྱི་ཕྱོགས་དོར་ནས་སོང་བ་གང་ཡིན་བ་དེ་དགེ་འདུན་གྱི་རྙེད་པ་མི་དབང་བའོ་ཞེས་བྱ་བའི་དོན་ཏོ། །དེའི་དུས་ཀྱི་རྙེད་པ་ལ་ནི་ཆེས་རིང་དུ་གནས་ན་གནས་པ་ཉིད་ཡིན་ནོ་ཞེས་བྱ་བ་ལ། དེའི་དུས་ཀྱི་ཞེས་བྱ་བ་ནི་དབྱར་གནས་ པ་ལ་སོགས ་པའི་དོན་དུས་དེར་རོ། །དེ་ནི་འདིར་སྐབས་དང་མཐུན་པ་ཐ་དད་པ་ཉིད་ཀྱི་དོན་ཞེས་བྱ་བ་སྨོས་སོ། །འདིར་བརྗོད་པ་ཡང་བབས་པ་དང་ཤི་བར་གྱུར་པ་གཉིས་ལ་ཡང་མི་འོས་པ་ཉིད་ཀྱི་དོགས་པ་ཡོད་པར་འགྱུར་བ་དེ་བས་ན་དེའི་ཕྱིར་བརྗོད་པར་བྱ་སྟེ། བབས་པ་དང་ཤི་བར་གྱུར་པ་གཉིས་ཀྱང་ངོ་ཞེས་བྱ་བ་ནི་འདི་གཉིས་ཀྱང་ཆེས་རིང་དུ་གནས་པ་ཡིན་ན་དེའི་དུས་ཀྱི་རྙེད་པ་དབང་བ་ཉིད་ཡིན་ནོ་ཞེས་བྱ་བའི་དོན་ཏོ། །ཤི་བའི་ཕྱིར་འདི་སྨོས་པ་ལ་དགོས་པ་ཅི་ཡོད་ཅེ་ན། གལ་ཏེ་སུ་ཞིག་ལ་ཕུལ་ནས་ཤིན་བུ་ལོན་འདི་ལ་ཡོད་པ་འམ། ཉེ་བར་གནས་པས་ཡོ་བྱད་དྲུག་པོ་མ་ཐོབ་ན་དེ་ལ་སྦྱིན་བར་བྱའོ། །གལ་ཏེ་མ་ཡིན་ན་གང་རྣམས་ཀྱིས་དེ་ནི་ཤི་བའི་ཡོ་བྱད་ལ་དབང་བ་ཉིད་དེ་དེ་རྣམས་ལ་འདིར་རྙེད་པ་ཞེས་བྱ་བ་འདི་བསྟན་པའོ། །རྙེད་པ་ནི་ཇི་ལྟར་རྣམ་པར་ངེས་པར་བྱེད་པ་ལྟར་རྣམ་པར་གཞག་གོ་ཞེས་བྱ་བ་ནི། གཙུག་ལག་ཁང་འདི་ན་གནས་པའི་དགེ་སློང་རྣམས་ཀྱིས་གནས་མལ་དང་བསོད་སྙོམས་ལ་ སོགས་པ ་འདི་ལོངས་སྤྱོད་པར་བྱའོ་ཞེ་འམ། དེ་ན་གནས་པའི་རྟེན་བ་ལ་རྐང་བའི་མར་བསྐུ་བ་ལ་སྦྱར་བར་བྱའོ། །སྨན་གྱི་རིན་ལ་ སོགས་པ ་དང་ཞེས་བྱ་བ་འདིར་སྤྲོས་པ་མ་བྱས་ཏེ། སྤྲོས་པ་མ་བྱས་པ་ནི་གནས་ཁང་ལ་ སོགས་པ ་དགེ་སློང་གི་དབང་དུ་མཛད་ནས་རྙེད་པ་གནང་བ་ལ་དེ་ལྟ་བུར་གྱུར་པ་ཉིད་ཀྱིས་ལོངས་སྤྱད་པར་བྱའོ། །གནས་ཁང་དང་ཞིང་དང་ཁང་པ་བརྩེགས་པ་འདི་ལ་ངེས་པར་དེ་ནི་གནས་པས་འདི་ལོངས་སྤྱོད་པར་བྱའོ་ཞེས་སྤྲོས་པ་མ་བྱས་ཏེ། དེ་ན་དགེ་སློང་གི་དབང་དུ་མཛད་ནས་གནང་བའོ། །གཞན་དུ་གནས་པས་ལོངས་སྤྱད་པར་བྱའོ། །འདིར་དགུན་ནམ་དབྱར་གནས་པ་ལ་འདི་དབུལ་བར་
བྱའོ། །ངེས་པར་གནས་པ་ཉིད་ཀྱིས་དེར་དུས་དེར་མནོད་པར་བྱའོ་ཞེས་བྱ་བ་ལ་ སོགས་པ ་རྣམ་པར་དཔྱད་པར་བྱས་ནས་གང་ཟག་ལ་སྦྱིན་བར་བྱ་སྟེ་ངེ་ཉིད་ལ་དེའོ། །འཐོབ་པ་རྣམས་ཀྱིས་ཀྱང་ངོ་ཞེས་བྱ་བ་ཡང༌། །རྙེད་པ་ནི་ཇི་ལྟར་ངེས་པར་བྱེད་པ་ལྟར་རྙེད་པ་རྣམ་པར་གཞག་པའོ། །གང་དུ་དེ་རྣམས་འགྲོ་བ་དེར་གཏོགས་པའི་རྣམ་པར་ངེས་པ་ལ་ཞེས་བྱ་བ་དེ་ནི་དོན་གྱིས་རྟོགས་པར་བྱའོ། །གང་དུ་ཡང་དེ་རྣམས་འགྲོ་བ་སྟེ། ཕུལ་བའི་རྫས་ལ་ཁྱིམ་ཆེ་གེ་མོ་ནི་ཁྱེད་ཀྱིའོ། །ཁྱིམ་ཆེ་གེ་མོ་ནི་ངེད་ཀྱིའོ། །ལམ་པོ་ཆེ་འདི་ནི་ཁྱེད་ཀྱིའོ། །ལམ་པོ་ཆེ་འདི་ནི་ངེད་ཀྱིའོ། །བཞི་མདོའི་དབུས་ཀྱི་ཞེས་བྱ་བ་ལ་ སོགས་པ ་ལྟ་བུར་ཁྲིམས་སུ་བྱ་བ་བཅས་ནས་ཐ་དད་པ་དག་ལ་ཆོས་ཀྱི་འདོད་པ་ཁས་བླངས་པ་དང་མ་བླངས་པ་དག་གིས་ཕྱོགས་གཉིས་ལ་དབྱར་གནས་པར་ཁས་བླངས་པ་ལ་གཞི་མདོ་ལ་ སོགས་པ ་ལས་གནས་གཞན་ལས་གང་གིས་ཕྱོགས་གཞན་རྣམ་པར་ངེས་པའི་ཁྱིམ་གྱི་ཕྱོགས་གཞན་ཀྱི་རྙེད་པ་རྙེད་པའོ། །ཁྱིམ་དེ་ཉིད་དུ་རྣམ་པར་ངེས་པར་བྱས་པའི་ཕྱོགས་ཀྱི་རྙེད་པ་དེའོ། །དེའི་ཕྱོགས་གཉིས་ཀ་ཡང་གལ་ཏེ་ཁྱིམ་དེ་དང་ལྡན་པ་རྙེད་པ་དེ་དང་སྦྱོར་བ་ཡིན་ན་དེ་ལྟར་ཡང་ཕྱོགས་དེ་ཉིད་ཁྱིམ་དེར་རྣམ་པར་ངེས་པ་ལ་རྙེད་པ་དེ་ཡོད་པར་འགྱུར་རོ། །འདིར་ཐམས་ཅད་སྟོན་པ་ལ་སུ་ཞིག་ལ་དགོས་པ་འགྲུབ་པའི་ཕྱོགས་དེ་ལ་ཡང་རྙེད་པ་དེ་ལ་གཞན་གྱི་ཅི་ཞིག་སྙམ་པ་དེ་བཟློག་པའི་དོན་དུ་བརྗོད་པར་བྱ་སྟེ། དེའི་ཕྱིར་ཐམས་ཅད་ཀྱི་ཕུལ་ན་ཡང་ངོ་ཞེས་བྱ་བ་སྨོས་ཏེ། དེ་ལྟར་ཡང་ཇི་ལྟར་རྣམ་པར་ངེས་པའི་རྙེད་པ་རྣམ་པར་གཞག་པའི་དཔེར་འདིར་དབྱར་གྱི་དུས་སུ་བྱེད་པ་དག་གི་ཕྱོགས་དུས་གཞན་དག་ལ་ཡང་སྡེ་ཚན་གཞན་ལ་ཡང་འདི་རུང་བས། དེའི་ཕྱིར་འདིར་སྤྱིར་མདོར་བསྡུས་པའོ། །གལ་ཏེ་ཟས་ལ་ཡང་དེ་ལྟར་རྣམ་པར་ངེས་པར་བྱས་པར་གྱུར་ན་དེའི་ཚེ་ཁྱིམ་གཞན་རྣམ་པར་མ་ངེས་པ་ལ་གཞན་གྱིས་བཟའ་བར་མི་བྱ་སྟེ། རྣམ་པར་མ་ངེས་པའི་ཕྱོགས་ཀྱི་ཁྱིམ་གཞན་ལས་རྙེད་པར་འགྱུར་བ་ཅིག་ཤོས་ཀྱིས་ཕྱོགས་ཀྱི་རྗེས་སུ་གནང་བ་ཉིད་ཡིན་ན་ཉེས་པ་མེད་པར་རིག་པར་བྱའོ། །དགེ་འདུན་ཡོངས་སུ་མ་བཅད་ན་ལས་ཀྱི་མཚམས་ཀྱིས་ཡོངས་སུ་བཅད་དོ་ཞེས་བྱ་བ་ནི། དགེ་འདུན་ཡོངས་སུ་མ་བཅད་ན་དགེ་འདུན་ལ་རྙེད་པ་རྣམ་པར་ངེས་ པ་ལ་གང་ཞིག་གནས་དེ་ལ་གསོལ་བ་ལ་སོགས ་པའི་ལས་ཀྱི་མཚམས་དེས་དགེ་
འདུན་ཡོངས་སུ་བཅད་པ་དེའི་མཚམས་ཀྱི་ནང་དུ་གཏོགས་པའི་སྣ་ཚོགས་པའི་གནས་སམ་གནས་གཅིག་པ་ཐམས་ཅད་ལ། གློ་བུར་བ་དང་བཅས་པ་ལ་རྙེད་པ་དེ་ཞེས་བྱ་བའི་དོན་ཏོ། །འདི་ལ་གཅིག་ལ་ སོགས་པ ་ནི་དེ་ཉིད་དོ་ཞེས་བྱ་བ་ནི་འདིར་དགེ་འདུན་ལ་བརྟེན་ནས་ཕུལ་བའི་རྙེད་པ་ལ་གལ་ཏེ། མཚམས་གཅིག་གི་ནང་དུ་གཏོགས་པར་གྱུར་པ་གཉིས་སམ་གསུམ་ནི་དགེ་འདུན་ཉིད་དོ། །དེ་ལ་དེ་ཙམ་དེར་འོས་པ་མ་ཡིན་ནོ་ཞེས་བྱ་བའི་དོན་ཏོ། །སྐྱེས་པའམ་བུད་མེད་དམ་མ་ནིང་འགའ་ཞིག་ལ་བརྟེན་ནས་དབྱར་གནས་པར་ཁས་ལེན་ཅིང་གནས་མེད་པར་དེ་ན་བུད་མེད་ལ་སོགས་པས་དབུལ་བར་བྱེད་ན་དེ་གནས་ཆེ་གེ་མོར་དགེ་འདུན་ལ་ཕུལ་ལོ་ཟེར་ལ། གལ་ཏེ་དེ་ལྟར་གནས་དེར་མཚམས་གང་ཡིན་པའི་ཁོངས་སུ་ཆུད་པ་དེ་རྣམས་ཀྱི་རྙེད་པ་ནི་དེ་ཡིན་ནོ། །གལ་ཏེ་བདག་གིས་འདི་ཉིད་ཀྱི་དགེ་འདུན་ལ་ཕུལ་ལོ་ཞེས་ཟེར་ལ། །གལ་ཏེ་དེ་ན་གང་ཟག་གཞན་མེད་ན་ནི་རྙེད་པ་དེ་མཚམས་ཀྱིས་བསྟབས་པ་ཡིན་ནོ། །གལ་ཏེ་འདི་ཁྱོད་ཁོ་ན་ལ་ཕུལ་ལོ་ཞེས་ཟེར་ན་ནི་རྙེད་པ་དེ་རྟེན་གྱིས་བསྟབས་པ་ཡིན་ཏེ་རྟེན་གྱི་དབང་གིས་གྲུབ་ཅེས་བྱ་བའི་དོན་ཏོ། །ཆོས་ཀྱི་རྙེད་པ་ནི་དེ་སྨྲ་བ་རྣམས་དབང་བ་ཉིད་ཡིན་ནོ་ཞེས་བྱ་བ་ནི་འདིར་སྨྲ་བ་རྣམས་ལ་ཤུགས་ཀྱིས་དབང་བྱེད་པ་ཉིད་དོ། །དེའི་སྒྲས་ནི་ཆོས་དང་འབྲེལ་པའོ། །ཆོས་ཀྱི་རྙེད་པས་ནི་མ་ཡིན་ནོ་ཞེས་བྱ་བར་རིག་པར་བྱའོ། །འདུལ་བ་བྱེ་བྲག་ཏུ་བཤད་པ་དག་ལས་མྱ་ངན་ལས་འདས་པ་དག་ལ་ཕུལ་བ་ནི་མཆོད་རྟེན་གྱི་དང་འདྲ་བར་གཞག་གོ་ཞེས་གསུངས་པས། དེའི་ཕྱིར་འདིར་ཆོས་རིན་པོ་ཆེ་མ་ཡིན་གྱི་འོན་ཏེ་གཞན་ཡིན་ཏེ། སིལ་བུ་དག་ལས་ཀྱང་དེར་ཆོས་གཞན་བཟུང་བ་ཞེས་བྱ་བར་རྟོགས་པར་བྱའོ། །རིན་པོ་ཆེའི་གོ་རིམས་འདི་ནི་ཞེས་བྱ་བ་གལ་ཏེ་ཡོད་པར་འགྱུར་ན་ནི་མི་མཁས་པ་ལ་རིན་པོ་ཆེའི་གོ་རིམས་ལ་བརྡ་བྱས་པ་ལ་ཆོས་ཀྱི་མིང་ངོ༌། །གཙུག་ལག་ཁང་གི་ཚིགས་སུ་བཅད་ལ་གཅིག་འཛིན་པ་ནི་འདིར་དེ་ཉིད་ཀྱི་མཐའ་ཡིན་ནོ་ཞེས་བྱ་བ་ལ་དེ་ཉིད་ཀྱི་ཞེས་བྱ་བ་ནི་ཆོས་སྨྲ་བ་པོ་ཉིད་ལའོ། །འདི་ཞེས་བྱ་བ་ནི་ཆོས་ཀྱི་རྙེད་པ་དབང་བ་འདི་ལའོ། །མདོ་འདི་ནི་རྩོད་པའི་གཞིའི་གཞུང་ལས་འབྱུང་ངོ༌། །མཚན་མི་མཐུན་པའི་ཤི་བའི་ཡོ་བྱད་ལ་ཅིག་ཤོས་ཡོད་ན་མི་དབང་བ་ཉིད་དོ་ཞེས་བྱ་བ་ལ། མཚན་མི་མཐུན་པའི་ཞེས་བྱ་བ་ནི། འདིར་གཞུང་ནི། གླེང་གཞི་རྣམས་ལས། དགེ་སློང་དག་དགེ་ཚུལ་གྱི་རྒྱུད་དུ་གཏོགས་པ་དེའོ་ཞེས་
གསུངས་པ་ཡིན་ནོ། །ཅི་ཐམས་ཅད་དུ་རྣམ་པར་གཞག་པ་འདི་ཡིན་ནམ་ཞེ་ན་མ་ཡིན་ཏེ་དེའི་ཕྱིར་ཅིས་ཤོས་ཡོད་ན་ཞེས་བྱ་བ་སྨོས་ཏེ། ཅིག་ཤོས་ཞེས་བྱ་བ་གོང་ན་མཚན་མཐུན་བ་ཡོད་པ་དེ་མཚན་མ་མཐུན་བ་མི་དབང་ངོ་ཞེས་བྱ་བའི་དོན་ཏོ། །གནས་ནས་ཕྱུང་བའི་ཡང་དེ་བཞིན་ནོ་ཞེས་བྱ་བ་ནི་ཅིག་ཤོས་ཡོད་ན་ཤི་བའི་ཡོ་བྱད་ལ་ཡང་གནས་ནས་ཕྱུང་བའི་མི་དབང་ངོ་ཞེས་བྱ་བ་འདིར་ཉེ་བར་གཞག་པའོ། །འདིར་གནས་ནས་ཕྱུང་བའི་ནི་ཅིག་ཤོས་ཉིད་ལ་མཐར་ཐུག་པའོ། །འདིར་གནས་ནས་མ་ཕྱུང་བ་ལ་ནི་ཅིག་ཤོས་ཀྱི་སྒྲའི་རྣམ་པར་གཞག་པའོ། །མེད་ན་ཡང་ངོ་ཞེས་བྱ་བ་ནི་ཅིག་ཤོས་ལའོ། །རྒྱུ་ལས་སེམས་མ་ལོག་ནའོ་ཞེས་བྱ་བ་ནི་ལྟུང་བ་མ་མཐོང་བ་ལ་སོགས་པའི་རྒྱུ་གང་གིས་དེ་སྤང་བའི་ལས་བྱས་པའི་རྒྱུ་དེ་ལས་སེམས་མ་ལོག་ཅིང་བཟློག་པར་མ་བྱས་པ་དེ་ལའོ། །འདིར་གཞུང་ནི། གང་དབང་ལགས། དེ་དག་ལས་གང་གིས་དང་པོར་སྡིག་པ་ཅན་གྱི་ལྟ་བའི་རྣམ་པ་སྤོང་བར་བྱེད་པའོ་ཞེས་གསུངས་པ་ཡིན་ནོ། །གང་གིས་མ་བཏང་བ་ཉིད་ལ་གཞན་གྱིས་ཀྱང་ཞེས་བྱ་བའི་འདིར་ཚིག་ཡོད་པ་དེ་དེ་བས་ན་འདིར་མདོ་བྱས་སོ། །འདིར་ལྟ་བ་དང༌། འབྲེལ་བ་སྤང་བའི་རྒྱུ་ལས་མངོན་པར་ཞེན་པར་རིག་པར་བྱ་སྟེ། མཆོག་ཉིད་དུ་མཐོང་བའི་རབ་ཏུ་དབྱེ་བ་ཉིད་ཀྱི་ཕྱིར་འདི་ལ་ལྟ་བ་ཉིད་དུ་རིག་པར་བྱའོ། །དེའི་དེ་མནོད་པར་བྱ་བ་ཉིད་ལ་དེ་ནི་ཐ་དད་པ་ཉིད་མ་ཡིན་ནོ་ཞེས་བྱ་བ་ནི། སྤངས་པ་དེ་ཤི་བའི་ཡོ་བྱད་རྣམས་དེ་མནོད་པར་བྱ་བ་ཉིད་ལ་སྤངས་པ་དེ་མ་སྤངས་པ་དང་ཐ་དད་པ་ཉིད་མ་ཡིན་ནོ། །སྤངས་པ་ནི་དགེ་འདུན་ལས་ཐ་དད་པ་ཉིད་མ་ཡིན་པའི་ཕྱིར་འོས་པ་ཉིད་དོ། །དེའི་ཤི་བའི་ཡོ་བྱད་ལ་རང་བཞེན་གྱིས་གནས་པ་ཞེས་བྱ་བའི་དོན་ཏོ། །ཐ་དད་པའི་ལ་ནི་ཐ་དད་པ་ཉིད་དོ་ཞེས་བྱ་བ་ནི་འདོད་པ་གཞན་ལ་བརྟེན་པས་ཐ་དད་པ་ཕྱོགས་གཞན་དང་འབྲེལ་བ་ལ་ནི། ཐ་དད་པ་ཉིད་དེ་ཕྱོགས་གཞན་ལས་ཐ་དད་པར་གྱུར་བ་ཉིད་དོ། །དེའི་དེ་མནོད་པ་ཉིད་ལ་གཞན་གྱི་ཕྱོགས་སུ་གཏོགས་པའི་ཤི་བའི་ཡོ་བྱད་ལ་གཞན་གྱི་ཕྱོགས་སུ་གཏོགས་པ་ལ་འོས་པ་ཉིད་མ་ཡིན་ནོ། །ཆོས་དང་མཐུན་པའི་འདོད་པ་ལ་བརྟེན་པ་རྣམས་ལ་ཞེས་བྱ་བའི་དོན་ཏོ། །འདིར་གཞུང་ནི། ཁས་བླངས་པ་རྣམས་ཀྱི་གནས་སུ་ཁས་མ་བླངས་པའི་དགེ་ཚུལ་འོངས་ཏེ། དུས་བྱས་པར་གྱུར་ན་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཆོས་དང་
མཐུན་པའི་ཕྱོགས་ཁས་བླངས་པ་ནི་ཁས་བླངས་པ་ཡིན་ལ་ཆོས་མ་ཡིན་པ་དང་མཐུན་པའི་ཕྱོགས་ཁས་བླངས་པ་ནི་ཁས་མ་བླངས་པ་ཡིན་པར་རིག་པར་བྱའོ། །རབ་ཏུ་བྱུང་བ་དང༌། ཚངས་པ་མཚུངས་པར་སྤྱོད་པ་ལས་གཞན་པ་དག་དེ་མི་དབང་བ་ཉིད་ཡིན་ནོ་ཞེས་བྱ་བ་ནི་རབ་ཏུ་བྱུང་བ་ཚངས་པ་མཚུངས་པར་སྤྱོད་པ་དག་ལས་གཞན་ཉེ་དུ་ལ་ སོགས་པ ་དང༌། རྒྱལ་པོ་ལ་ཡང་རབ་ཏུ་བྱུང་བ་ཤི་བའི་ཡོ་བྱད་དེ་མི་དབང་བ་ཡིན་ཏེ། དེ་ནི་རབ་ཏུ་བྱུང་བ་དང་ཚངས་པ་མཚུངས་པར་སྤྱོད་པ་དག་ཁོ་ན་དབང་བ་ཡིན་ནོ་ཞེས་བྱ་བའི་དོན་ཏོ། །འདིར་དགེ་སློང་ཞེས་མ་སྨོས་པ་ནི་དགེ་ཚུལ་དང་དགེ་ཚུལ་མ་ཡང་དབང་བ་ཉིད་དུ་བསྟན་པའི་ཕྱིར་རོ། །ཚངས་པ་མཚུངས་པར་སྤྱོད་པ་ཞེས་སྨོས་པ་ནི་གཞན་མུ་སྟེགས་ཅན་བསལ་བའི་ཕྱིར་རོ། །གསོལ་བའམ་དང་པོ་དང་ཐ་མས་བྱིན་གྱིས་བརླབས་ཟིན་པ་ན་འོངས་པ་ནི་མི་དབང་ངོ་ཞེས་བྱ་བ་ནི་ཤི་བའི་ཡོ་བྱད་ལ་བྱིན་གྱིས་བརླབས་ཟིན་ཀྱང་རུང་སྟེ། གང་ཞིག་ཟིན་པ་ན་འོངས་པ་དེ་ལ་ཡང་དེ་དག་ནི་མི་དབང་བ་ཉིད་ཡིན་ནོ། །དེ་ལྟར་བྱུང་བ་བྱིན་གྱིས་བརླབ་པ་མ་ཟིན་པ་ནི་དབང་བ་ཉིད་ཡིན་ནོ། །ལྷོ་ཕྱོགས་སུ་མཚན་མོའི་འོག་ཏུ་འདི་ལ་བྱིན་གྱིས་བརླབ་པར་བྱ་བ་ཉིད་དུ་གསུངས་སོ། །དེ་ལ་གང་ཞིག་མདུན་རོལ་དུ་བྱིན་གྱིས་བརླབ་པ་གཉིས་པོ་འདི་བྱེད་པར་འགྱུར་བ་དེས་གཞན་རྣམས་ལ་སྐལ་བ་མི་དབང་བ་ཉིད་དུ་ཡང་མི་འགྱུར་བ་ལས་དེ་མ་གྲགས་པ་ཉིད་ཀྱི་ཕྱིར་ལས་ཀྱི་ཆོ་ག་ལས་འདས་པ་ཞེས་བྱ་བར་རིག་པར་བྱའོ། །དེ་ལས་འགའ་ཞིག་དགེ་འདུན་གྱི་རྒན་བ་དང་གསར་བུ་གཉིས་ལ་བྱིན་པ་ནི་དེ་ཞེས་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་ཤི་བའི་ཡོ་བྱད་དེ་ལས་སོ། །འགའ་ཞིག་ཅེས་བྱ་བ་ནི་དངོས་པོ་འགའ་ཞིག་གོ །དགེ་འདུན་གྱི་རྒན་བ་དང་དགེ་འདུན་གྱི་གསར་བུ་གཉིས་ལས་བྱིན་པ་ནི་དང་པོ་དང་ཐ་མ་ཡིན་པ་ཞེས་བྱའོ། །འདིར་གཞུང་ནི། ཡོ་བྱད་གཅིག་བཙོངས་ཏེ་ཅུང་ཞིག་དགེ་འདུན་གྱི་རྒན་བ་དང་དགེ་འདུན་གྱི་གསར་བུ་ལ་བྱིན་ནས་གསུངས་པ་ཡིན་ནོ། །དེ་ལ་དོན་གྱི་དབང་གིས་ནི་འདིར་ཅུང་ཞིག་ཉིད་དང༌། ཉོ་ཚོང་ཡང་ངེས་པ་ཅན་ནི་མ་ཡིན་ཏེ། དེ་བས་ན་འདིར་མདོར་བྱས་སོ། །གང་ན་བྱིན་གྱིས་བརླབ་པར་བྱ་བ་འདུག་པ་དེའི་མཚམས་སུ་གཏོགས་པ་རྣམས་བྱིན་གྱིས་རློབ་པར་བྱེད་པ་ཡིན་ནོ་ཞེས་བྱ་བ་ནི་གནས་གང་ན་བྱིན་གྱིས་བརླབ་པར་བྱ་བའི་དངོས་པོ་འདུག་པ་དེའི་མཚམས་སུ་གཏོགས་པའི་བྱིན་གྱིས་རློབ་པར་བྱེད་པ་པོ་རྣམས་ཞེས་བྱ་བའི་དོན་ཏོ། །འདི་ལ་ཤི་བའི་གནས་ཉིད་ཀྱི་རྒྱུ་མ་ཡིན་ནོ་
ཞེས་བྱ་བ་ལ། འདི་ལ་ཞེས་བྱ་བ་ནི་ཤི་བའི་ཡོ་བྱད་བྱིན་གྱིས་བརླབ་པར་བྱ་བ་འདི་ལ་ཤི་བའི་གནས་ཉིད་ནི་རྒྱུ་མ་ཡིན་པའོ། །འདིར་ཤི་བ་དེའི་དབང་གིས་མཚམས་དེ་ན་གནས་པ་རྣམས་ཀྱིས་ཤི་བའི་ཡོ་བྱད་འདུག་པ་བྱིན་གྱིས་བརླབ་ཏུ་མི་རུང་བ་ཉིད་ཡིན་ནོ་ཞེས་བྱ་བའི་དོན་ཏོ། །མཚམས་ཀྱི་བར་ན་འདུག་པ་ལ་ལུས་སམ་གཞན་གྱིས་རེག་པས་ཇི་ཙམ་ནོན་པ་དེར་གཏོགས་པ་རྣམས་སོ་ཞེས་བྱ་བ་ལ། མཚམས་ཀྱི་བར་ན་འདུག་པའི་ཤི་བའི་ཡོ་བྱད་དེ་ལ་ཤི་བ་དེའི་ལུས་ཀྱིས་རེག་གམ། གཞན་གྱིས་རེག་པའི་ཡོ་བྱད་བྱིན་གྱིས་བརླབ་པར་བྱ་བ་དེས་མཚམས་ཇི་ཙམ་ནོན་ཅིང་ཁྱབ་པའི་མཚམས་དེར་གཏོགས་པའི་དགེ་སློང་རྣམས་ཀྱིས་བྱིན་གྱིས་རློབ་པར་བྱེད་པ་ཡིན་ཏེ། འདི་ལ་ནི་བྱིན་གྱིས་བརླབ་པར་བྱ་བའི་རྫས་ཀྱི་དབང་གིས་རྣམ་པར་གཞག་གི་ཤི་བའི་རོའི་དབང་གིས་ནི་མ་ཡིན་གྱི་ཞེས་བྱ་བ་དེ་ལ་བརྗོད་པ་སྟེ། མདོ་འདི་ནི་གླེང་གཞི་རྣམས་ལས་སོ། །གང་ན་ནོར་དང་འདྲ་བ་དེ་འདུག་པའི་ཁོངས་སུ་ཡོ་བྱད་གཏོགས་པ་ཉིད་ཡིན་ནོ་ཞེས་བྱ་བ་ནི་ནོར་དང་འདྲ་བར་འགྱུར་བའི་དངོས་པོ་དེ་ལ་ཁྱིམ་པའམ་རབ་ཏུ་བྱུང་བའི་ནི་ནོར་དང་འདྲ་བའོ། །དེའི་ཁོངས་སུ་གཏོགས་པ་དེ་ནི་དེའི་ལུས་སུ་གྱུར་པ་སྟེ། འདི་འཛིན་པའི་བདག་ཉིད་ཅན་གྱི་ཕྱིར་ཞེས་བྱ་བའི་དོན་ཏོ། །དེ་ཁས་ལེན་པ་ཉིད་ལ་གང་དུ་འདི་ནོར་དང་འདྲ་བར་འགྱུར་བ་དེའི་ཁོངས་སུ་ཡོ་བྱད་གཏོགས་པ་ཉིད་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་ནོར་དང་འདྲ་བས་གཞན་ན་འདུག་པ་བྱིན་གྱིས་བརླབ་པར་བྱའོ་ཞེས་བྱ་བ་ནི་གཞན་ན་འདུག་པས་ཀྱང་ཤི་བའི་ཡོ་བྱད་ཀྱི་ནོར་དང་འདྲ་བའི་གང་ཟག་དྲུང་ན་འདུག་པས་བྱིན་གྱིས་བརླབ་པར་བྱའོ། །བསྐུར་བ་སྐུར་བར་བྱ་བས་མ་སྤངས་པ་ནི་དེ་ཉིད་ཡིན་ནོ་ཞེས་བྱ་བ་ནི་བསྐུར་བའི་དངོས་པོ་མ་སྤངས་པ་ནི་གང་གིས་སྐུར་བར་བྱེད་པས་བསྐུར་བར་བྱ་བ་ནི། དེ་ཉིད་ཡིན་ཏེ་བསྐུར་བར་བྱ་བ་དང་བཅས་པ་ཉིད་དོ། །སྤངས་པ་ནི་སྐུར་བར་བྱེད་པ་ཉིད་ཀྱིའོ་ཞེས་བྱ་བ་ནི་སྐུར་བར་བྱེད་པ་ནི་སྐུར་བར་བྱེད་པ་ཉིད་དེ་དངོས་པོ་ནི་དེ་ཉིད་ཡིན་ནོ་ཞེས་བྱ་བའི་དོན་ཏོ། །དེས་སྤངས་ན་ཡང་ངོ་ཞེས་བྱ་བ་ལ། དེས་ཞེས་བྱ་བ་ནི་སྐུར་བར་བྱེད་པ་དེས་སོ། །གང་ལ་སྟེ་གང་ལ་སྐུར་བར་བྱེད་པ་དེ་ནི་སྤང་བར་འགྱུར་རོ། །འདིར་སྐུར་བར་བྱེད་པ་སྤངས་པ་ནི་བཤད་པ་ལ་སྐུར་བར་བྱེད་པ་སྤངས་བར་མི་འགྱུར་རོ། །གལ་ཏེ་འདིས་སྔ་མ་བཟུང་
ན་འདིས་བདག་ལ་ཅི་ཞིག་བྱ་ཞེས་བདག་གིས་འདི་སྤངས་སོ་ཞེས་བྱ་བ་སྟེ། དེ་ལྟར་ཡང་སྐུར་བར་བྱེད་པ་ཉིད་ཀྱི་དེ་དང་འབྲེལ་པ་ཞེས་བྱ་བའི་དོན་ཏོ། །འདིར་གཞུང་ནི། དགེ་སློང་གིས་དགེ་སློང་ལ་ཆོས་གོས་དག་བསྐུར་ནས་གང་ལ་བསྐུར་བ་དེས་སྤངས་ནས། གང་གིས་བསྐུར་བ་དེས་ཀྱང་སྤང་ན་གང་ལ་བསྐུར་བ་དེ་ཡིར་བྱིན་གྱིས་རློབ་ན་ནི་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེ་ཡིར་བྱིན་གྱིས་རློབ་པར་བྱེད་ན་ནི་བྱིན་གྱིས་བརླབས་པ་ཡིན་ཏེ། ལེགས་པར་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་ཏེ། འདི་མི་རིགས་པར་ཤེས་པར་མི་བྱ་སྟེ། གང་གི་ཕྱིར་དེ་ལྟ་བུར་གྱུར་པའི་འཇུག་པ་ལ་མི་དགོས་པའི་མི་གཙང་བ་ལ་བདག་གིས་འདི་དོར་རོ་སྙམ་པ་དེ་ལྟ་བུའི་བློ་དང་འདྲའོ། །དེའི་དགོས་པ་ནི་བདག་པོ་སོ་སོ་སོ་སོར་བྱེད་ཅིང་དེ་ལ་ཡིད་བརྟེན་ནས་རྣམ་པར་གཞག་པ་ཤི་བའི་ཡོ་བྱད་དུ་བྱིན་གྱིས་རློབ་ པ་རྣམས་ཀྱིས་ཞེས་བྱ་བ་ལ་སོགས ་པའོ། །ཕྱི་རོལ་དུ་ཡང་མཚམས་ཀྱི་ནང་དུ་འདུ་ཤེས་པ་དག་གིས་འབའ་ཞིག་གིས་བྱིན་གྱིས་རློབ་པ་མི་འཆགས་སོ་ཞེས་བྱ་བ་ལ། ཕྱི་རོལ་དུ་ཡང་ཞེས་བྱ་བ་ནི་ནང་དུ་མ་བྱས་པ་ལ་ སོགས་པ ་བྱིན་གྱིས་བརླབ་པའོ། །མི་འཆགས་སོ་ཞེས་བྱ་བ་ལ་ཡང་གི་སྒྲ་འདི་ནི་མ་གྲགས་སོ། །ནང་དུ་འདུ་ཤེས་པ་དག་གིས་ཞེས་བྱ་བ་མཚམས་ཀྱི་ཞེས་བྱ་བར་སྦྱར་ཏེ། མཚམས་ཀྱི་ནང་དུ་འདུ་ཤེས་པ་དག་གིས་ཞེས་བྱ་བའི་དོན་ཏོ། །འབའ་ཞིག་གིས་བྱིན་གྱིས་བརླབས་པ་ཞེས་བྱ་བ་འབའ་ཞིག་དག་གིས་བྱིན་གྱིས་བརླབ་པོ། །མཚམས་ཀྱི་ནང་དུ་འདུ་ཤེས་པ་རྣམས་ལ་ཕྱི་རོལ་དུ་ཡང་བྱིན་གྱིས་རློབ་པར་བྱེད་པ་ནི་འབའ་ཞིག་གིས་ཞེས་བྱ་བ་མི་མཐུན་པ་དག་གེས་བྱིན་གྱིས་རློབ་པར་བྱེད་ན་མི་འཆགས་སོ། །མི་འཆགས་པར་མི་བྱའོ་ཞེས་སྤྱིར་བསྟན་པ་དེས་འདི་ལ་ཉེས་བྱས་སུ་ཤེས་པར་བྱའོ། །ཡིད་གཉིས་ཟ་བ་ལ་ཡང་ཡིད་གཉིས་ནི་མཚམས་ཀྱི་ནང་དུ་དེ་སྨོས་པ་ཞེས་བྱ་བར་རིག་པར་བྱའོ། །གང་ཞིག་ཕྱི་རོལ་དུ་མཚམས་ཀྱི་ནང་དུ་འདུ་ཤེས་པའམ་ཡིད་གཉིས་ཟ་བས་རྐུ་སེམས་ཀྱིས་བྱིན་གྱིས་རློབ་པར་བྱེད་ན་རྐུ་སེམས་དེ་ལ་ཉེས་པ་སྦོམ་པོར་བྱས་པར་འགྱུར་རོ། །དེའི་ཕྱིར་རྐུ་སེམས་ལ་ཉེས་པ་སྦོམ་པོར་རིག་པར་བྱའོ། །བཙུན་པ་གང་ཞིག་མཚམས་ཀྱི་ནང་དུ་རྐུ་སེམས་ཀྱིས་སྔར་ཕྲོགས་པ་ཉིད་ཀྱི་ཕྱིར་ཉེས་པ་སྦོམ་པོར་བྱས་ན་ནི་དངོས་པོ་
ལས་རྣམ་པར་གཞག་གོ །དབྱུང་བ་དང་རིམ་གྲོ་དང་ཆོས་མཉན་པ་དང་ཡོན་བཤད་པ་མ་བྱས་བར་བྱིན་གྱིས་བརླབ་པར་མ་བྱའོ། །ལྷུང་བཟེད་དང་ཆོས་གོས་ཁྱིམ་གཞན་ན་འདུག་པ་ཉིད་ནི་ཁྱིམ་བདག་གིས་གང་ལ་བྱིན་པ་དེ་དབང་བ་ཉིད་ཡིན་ནོ། །གལ་ཏེ་དབང་ཞིང་དེས་ཕོངས་པ་ཡིན་ནའོ་ཞེས་བྱ་བ་ལ། འདིར་གཞུང་ནི། གླེང་གཞི་རྣམས་ལས་དེ་མཐར་ཐུག་པའོ། །ཁྱིམ་བདག་གིས་གང་ལ་བྱིན་པ་ཞེས་བྱ་བ་ནི་བྱེ་བྲག་ཡོངས་སུ་མ་སྨོས་པས་གཅིག་དང་དུ་མ་ཞེས་བྱ་བར་ཤེས་པར་བྱའོ། །གལ་ཏེ་འདི་ཁྱིམ་པ་དང་མུ་སྟེགས་པའི་རབ་ཏུ་བྱུང་བ་དང༌། འདི་པའི་རབ་ཏུ་བྱུང་བའམ་མཚམས་ཐ་དད་པ་གཞན་ལ་བྱིན་བར་གྱུར་ན་ཅི་དེ་ལ་ཡང་དབང་བ་ཉིད་དམ་ཞེ་ན། དེའི་ཕྱིར་གལ་ཏེ་དབང་ཞིང་ཞེས་བྱ་བ་སྨོས་སོ། །གང་ལ་རྙེད་པ་དེ་ཡོད་ན་གལ་ཏེ་དབང་བ་དེ་ལ་བྱིན་པར་གྱུར་ན་ཅི་དེ་ལ་ཡང་རྙེད་པ་ཙམ་གྱི་དབང་གིས་དེ་དབང་བ་ཉིད་ཡིན་ནམ་ཞེ་ན། ཕོངས་པ་ཡིན་ནའོ་ཞེས་བྱ་བ་སྨོས་ཏེ། འདིར་གཞུང་ནི། མེད་དེ་འདིར་ཡང་ཆོ་ག་འདི་སྦྱར་བ་ཞེས་བྱ་བ་དེ་བས་ན་དེ་ལ་མངོན་པར་བརྟེན་པའོ། །གལ་ཏེ་ཁྱིམ་བདག་སྦྱིན་བའི་ཕྱིར་འཇུག་པར་མི་བྱེད་ན། དེའི་ཚེ་སུ་དབང་བ་ཉིད་ཡིན་ཞེ་ན། དེའི་ཕྱིར་སྦྱིན་པར་མི་བྱེད་ན་བླངས་པ་དང་ལྡན་པའོ་ཞེས་བྱ་བ་སྨོས་ཏེ། འདིར་ཡང་དབང་ཞིང་དེས་ཕོངས་པའོ་ཞེས་བྱ་བ་དབང་དུ་བྱ་བ་དང་སྦྱར་བར་རིག་པར་བྱའོ། །དུ་མ་ལ་ཡང་ཞེས་བྱ་བ་ནི་ཁྱད་པར་ཡོངས་སུ་མ་བཟུང་བར་རིག་པར་བྱའོ། །དེ་ཡང་འདི་ཅིག་ཅར་བླངས་པ་ལ་ཤེས་པར་བྱའོ། །གཞན་ཡང་བརྗོད་པར་བྱ་སྟེ། མཐར་གྱིས་ནི་དང་པོའི་ཞེས་བྱ་བ་ནི་བླངས་པ་དང་ལྡན་བའོ་ཞེས་བྱ་བར་སྦྱར་རོ། །གང་ཞིག་དང་པོར་བླངས་པ་དེ་ལ་ཞེས་བྱ་བའི་དོན་ཏོ། །གང་དུ་ཡོངས་སུ་འཛིན་པ་པོ་མེད་པ་ཉིད་དེ་ཙམ་ལ་བརྟེན་ནས། གང་ཟག་གང་ལ་ཡང་བྱེ་བྲག་ཏུ་མ་བྱས་པར་སུ་ཁྱེར་བ་ཁྱེར་ཅིག་སྙམ་དུ་བོར་བར་གྱུར་ན་དེ་ལ་སུ་དབང་བ་ཉིད་ཡིན་ཞེ་ན། དེའི་ཕྱིར་མེད་པ་ཉིད་ཡིན་ཞིང་མ་བསྔོས་པར་བོར་ན་སོང་བ་དང་ལྡན་པའོ། །དེ་ནི་མཐར་གྱིས་དང་འདྲའོ་ཞེས་བྱ་བ་སྨོས་ཏེ། ཇི་ལྟར་མཐར་གྱིས་སློང་བ་དང་བོར་གང་གིས་བླངས་པ་དབང་བ་དང་འདྲ་བར་ཞེས་བྱ་བའི་དོན་ཏོ། །བུ་ལོན་པ་བྱུང་ན་དེ་ལ་གཞལ་བར་བྱ་བའི་ཚད་ཀྱི་ཤི་བའི་ཡོ་བྱད་དེ་དབང་བ་ཉིད་ཡིན་ནོ་ཞེས་བྱ་བ་ལ་དེ་ལ་གཞལ་བར་བྱ་པའི་ཚད་ཀྱི་ཞེས་བྱ་བ་
ནི། གང་ཞིག་བུ་ལོན་པ་དེ་ཤི་བ་དེས་གཞལ་བར་བྱ་བའི་རྫས་ཀྱི་ཚད་ཀྱི་ཞེས་བྱ་བའི་དོན་ཏོ། །དེ་དབང་བ་ཉིད་ཡིན་ནོ་ཞེས་བྱ་བ་ནི་བུ་ལོན་བ་ཉིད་དབང་བ་ཉིད་ཡིན་ནོ། །མ་བགོས་པར་བྱུང་ན་དེ་ལ་ཚངས་པ་མཚུངས་པར་སྤྱོད་པ་རྣམས་ཀྱིས་དེ་གཞལ་བར་བྱ་བ་ཡིན་གྱི། བགོས་པའི་འོག་ཏུ་བྱུང་ན་ནི་དེ་ལ་མི་གཞལ་བར་བྱ་བ་ཉིད་དོ་སྙམ་དུ་དོགས་པ་བསལ་བའི་ཕྱིར་བགོས་ན་ཡང་ངོ་ཞེས་བྱ་བ་སྨོས་ཏེ། གཞལ་བར་བྱ་བ་ཉིད་དོ་ཞེས་བྱ་བར་སྦྱར་རོ། །དེ་དང་ལྷན་ཅིག་རྣམ་པར་གཞག་པ་དེ་ལ་སྦྱིན་བར་བྱ་བ་ཉིད་དམ་བླང་བར་བྱ་བ་ཉིད་གང་ཡིན་པ་སྟེ། དེ་ཉིད་ནི་མ་ཡིན་ནོ་ཞེས་བྱ་བ་ནི་ཤི་བ་དེ་དང་བུ་ལོན་དེད་པ་དང༌། བུ་ལོན་འཇལ་བར་ལྷན་ཅིག་གང་ཞིག་གནས་པ་དེ་ལ་འདིར་དགེ་སློང་རྣམས་ཀྱིས་གཞལ་བར་བྱ་བ་འམ། བསླང་བར་བྱ་བ་ཉིད་དེ་དེ་ཉིད་ལ་ནི་མ་ཡིན་ནོ། །གང་ཞིག་དེས་བུ་ལོན་པའི་དྲུང་ནས་བླངས་པ་དེ་བུ་ལོན་ཆགས་པ་ལ་སྦྱིན་པའོ། །ཀཱཪྵཱ་པ་ཎ་རྣམས་དབུལ་བར་བྱའོ་ཞེས་བྱ་བས་ཀཱཪྵཱ་པ་ཎ་རྣམས་བཟུང་བ་དེ་རྣམས་ཉིད་གཞལ་བར་བྱའོ། །རས་ཡུག་ཆེན་བླངས་ཏེ་རིན་སྦྱིན་བར་བྱའོ་ཞེས་བྱའོ་ཞེས་འཐམས་པ་ལ་ནི་རིན་སྦྱིན་པར་བྱའི་རས་ཡུག་ཆེན་དངོས་སྦྱིན་པར་མི་བྱ་བ་དང༌། ཐ་ག་པ་ལ་རས་ཡུག་ཆེན་གྱི་དོན་དུ་རྒྱུ་སྤུན་གཏད་པ་ལ་ས་ནི་རས་ཡུག་ཆེན་བླང་བར་བྱའི། རྒྱུ་སྤུན་བླང་བར་མི་བྱ་བ་ལྟ་བུའོ། །འདིར་གཞུང་ནི། དགེ་སློང་གིས་ཕྲ་བ་བསླངས་པ་དང༌། དེ་ན་རེ་འཕགས་པ་དག་བདག་གིས་དེ་ལ་སྦོམ་པོ་དབུལ་བར་བགྱི་བ་ལགས་སོ་ཞེས་ཟེར་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་དགེ་སློང་ཤི་བ་ཅི་འདྲ་བ་གཏད་བ་དེ་འདྲ་བ་བསླང་བར་བྱའོ་ཞེས་གསུངས་པ་དེ་ནི་ཐ་སྙད་ཀྱི་ཆོ་གས་ངེས་པར་དེ་བླང་བ་མ་ཡིན་ནོ། །དེའི་ཕྱིར་འདིར་འབད་པར་མི་བྱ་སྟེ། དེ་ནི་འབད་པའི་གནས་མ་ཡིན་ནོ་སྙམ་པ་དེ་ལ་འདི་བསྟན་པའོ། །གལ་ཏེ་ཐ་སྙད་ཙམ་སློབ་པ་དེའི་ཕྱིར་འདིར་མདོར་བྱས་སོ། །དེ་ཚངས་པ་མཚུངས་པར་སྤྱོད་པ་རྣམས་ལ་བུ་ལོན་ཆགས་པ་ཉིད་དུ་མི་འགྱུར་རོ་ཞེས་བྱ་བ་ནི་ཤི་བ་ལ་བུ་ལོན་ཆགས་པ་དེས། དེའི་དོན་ལས་མ་དག་པ་བྱས་པར་འདི་ལ་ཚངས་པ་མཚུངས་པར་སྤྱོད་པ་རྣམས་ཀྱིས་གཞལ་བར་བྱ་བ་ཉིད་ནི་མ་ཡིན་ནོ་ཞེས་བྱ་བའི་དོན་ཏོ། །ལག་གི་བླས་དཀོན་མཆོག་གི་བླངས་བ་ཉིད་ཡིན་ཞེ་ན་དེའི་ཕྱིར་ཇི་སྙེད་པ་དེ་སྙེད་པ་དེ་སྙེད་མཉམ་པར་བསབ་པོ་ཞེས་བྱ་བ་ན། སངས་རྒྱས་ལ་ སོགས་པ ་དཀོན་མཆོག་རྣམས་ཀྱི་དཀོར་ནི་དཀོན་མཆོག་གིའོ། །དེ་བླངས་པ་
ནི་འདིས་བཟུང་བ་སྟེ། དེ་བས་ན་དཀོན་མཆོག་གི་བླངས་པ་ཉིད་དེ། དེའི་དངོས་པོ་ནི་དེ་སྙེད་མཉམ་པར་བསབ་པར་བྱའོ། །དེའི་ཇི་སྙེད་པ་ལས་ཞེས་བྱ་བ་ནི་དཀོན་མཆོག་གི་ཇི་སྙེད་པ་ལས་དེ་དང་འབྲེལ་བ་བླངས་པ་ཉིད་ནི་མཉམ་པར་བསབ་སྟེ། དེ་སྙེད་པའི་དཀོན་མཆོག་ལ་ཆ་མཉམ་པར་བྱ་སྟེ་མཉམ་པར་བསབ་པར་བྱ་སྟེ། འོན་ཀྱང་གལ་ཏེ་ཐ་དད་པར་བྱེད་པ་དེ་དགེ་འདུན་གྱི་ནི་མཆོད་རྟེན་གྱིར་བྱེད། མཆོད་རྟེན་གྱི་ནི་དགེ་འདུན་གྱིར་བྱེད་དེ་དེ་བཞིན་དུ་ཆོས་ཀྱི་ཡང་འདྲེས་པར་བྱེད་ན་ལྷུང་བཟེད་དང་ཆོས་གོས་ལས་ཆ་གསུམ་དུ་བྱས་ཏེ་ཞེས་བྱ་བ་གསུངས་སོ་ཞེ་ན། འོན་ཀྱང་བདེན་མོད་ཀྱི་དེ་ལྟར་འདིས་དཀོན་མཆོག་གི་བླངས་པར་མི་འགྱུར་བ་ཡིན་ཏེ། གང་གི་ཕྱིར་རང་གི་འདོད་པ་བྱས་པས་གཞན་དང་འབྲེལ་བ་ལ་གཞན་དག་ལ་སྟེར་བ་ནི་མ་ཡིན་ནོ། །དེ་ནི་སྦྱིན་བདག་ཏུ་མི་འགྱུར་ཏེ། མཉམ་པར་བསབ་པ་ཉིད་འདི་ཤེས་པར་བྱེད་པ་ལ་དེ་ཉིད་འདིའི་དགོངས་པས་རྣམ་པར་གནས་པ་ཡིན་ཏེ། གང་གི་ཕྱིར་མ་བླངས་པ་ལ་སྦྱིན་པར་རིགས་པ་མ་ཡིན་ནོ། །ཡིན་ན་ཞེས་བྱ་བ་སྨོས་པ་གང་ཡིན་བ་དེ་ཡང་དྲང་སྲོང་གི་ཡེ་ཤེས་ཀྱིས་ཐ་སྙད་མ་ཡིན་ནོ། །རབ་ཏུ་གྲགས་པ་ཅན་གྱིས་ཀྱང་སྡུག་བསྔལ་ཏེ། དེ་ལྟ་བུར་གྱུར་པ་ལས་བསལ་བར་ཤེས་པའོ། །དེ་བས་ན་འདི་ལྟ་བུའི་དབང་བརྩན་ཁོ་ན་དེ་རྣམ་པར་གནས་པ་ཡིན་ཞེས་བྱ་བའོ། །གང་ཞིག་འདིར་ཇི་སྲིད་དུ་བླངས་པ་དེ་སྲིད་དུ་ཆ་གསུམ་བྱའོ། །ལྷག་མ་ནི་དགེ་འདུན་ཉིད་ལ་ཞེས་བྱ་བ་སྨོས་སོ། །དེ་ཡང་དེ་ཉིད་ཀྱི་ཕྱིར་གཟུང་བར་དཀའ་བས་ཞེས་བྱ་བ་མཐོང་ངོ༌། །དེ་ནི་གཟུང་བར་དཀའ་བ་འདིས་ལྷག་པར་ཕུལ་བ་ལ་སྐྱོན་ཡོན་ཡང་མེད་དེ། དེ་བས་ན་ཐམས་ཅད་བླངས་པ་ལ་བགོ་བཤའ་བྱེད་པ་ཞེས་བྱའོ། །ལག་གི་བླས་ཞེས་སྨོས་པ་ནི་འདིར་མཚོན་པ་ཙམ་དུ་རིག་པར་བྱའོ། །གཞན་དུ་ཡང་འདིས་དཀོན་མཆོག་གསུམ་གྱི་དཀོར་བླངས་ཤིང་ཁྱེར་བ་གཉིས་ཡིན་ནོ་སྙམ་དུ་ཤེས་ནས། དེའི་དཀོར་ལ་ཡང་འབུལ་བར་རིགས་པའི་ཕྱིར་རོ། །ནད་གཡོག་དང་བཅས་པ་ཉིད་ཡིན་ན་ཡོ་བྱད་དྲུག་པོ་དེ་བདག་དབང་བ་ཉིད་ཡིན་བས་བྱིན་གྱིས་བརླབ་པར་མི་བྱ་བ་ཉིད་ཡིན་ནོ་ཞེས་བྱ་བ་ལ། དེ་དབང་བ་ཉིད་ཡིན་བས་ཞེས་བྱ་བ་ནི་དེ་ནད་གཡོག་དེ་དབང་བ་ཉིད་ཡིན་པས་དགེ་སློང་རྣམས་ཀྱིས་བྱིན་གྱིས་མི་བརླབ་པར་བྱ་བ་ཉིད་ཡིན་ནོ། །དེའི་རབ་དང་འབྲིང་དང་ཐ་མ་དང་བཅས་པ་ལས་སོ་ཞེས་བྱ་བ་ནི་དེ་ལ་ཁ་ཅིག་ནི་དགེ་
སློང་གི་ཡོ་བྱད་དང་འཚོ་བའི་ཡོ་བྱད་རབ་ལས་སྦྱིན་བར་བྱའོ། །ཁ་ཅིག་ནི་འབྲིང༌། ཁ་གཅིག་ནི་ཐ་མ་དང་ལྡན་པའོ། །གསུམ་པོ་འདི་དང་བཅས་པ་དྲུག་པོ་སྦྱིན་བར་བྱ་བ་ཉིད་ཡིན་ནོ་ཞེས་བྱ་བའི་དོན་ཏོ། །དུ་མ་ཉིད་ཡིན་ན་ཐུན་མོང་ངོ་ཞེས་བྱ་བ་ནི་ནད་གཡོག་གཉིས་སམ་གསུམ་མམ་མང་པོ་ཉིད་ཡིན་ན། ཡོ་བྱད་དྲུག་པོ་དེ་དག་གི་ཐུན་མོང་ཉིད་ཡིན་ནོ། །དེའི་དོན་དུ་སོང་བ་ཉིད་ཡིན་ལ་ནད་པ་ཤི་ན་སྦྱིན་པར་བྱ་བ་ཉིད་ཅེས་བྱ་བ་ལ། དེའི་དོན་དུ་ཞེས་བྱ་བ་ནི་ནད་པ་དེའི་དོན་དུའོ། །བཅས་བ་ཉིད་ཡིན་ན་ཞེས་བྱ་བ་ནི། གལ་ཏེ་ནད་པའི་དོན་དུ་ནད་གཡོག་དང་བཅས་པར་འགྱུར་བ་དེ་ལྟ་བས་ན་ཡང་ཡོ་བྱད་དྲུག་པོ་འདི་སྦྱིན་པར་བྱ་བ་ཉིད་ཡིན་གྱི་གཞན་དུ་ནི་མ་ཡིན་ནོ་ཞེས་བྱ་བའི་དོན་ཏོ། །དགེ་སློང་བྲམ་ཟེའི་བུ་མོས་ཞུས་པ་ལས། དེ་དག་ལ་ སོགས་པ ་འདིར་བསྙེན་པར་མ་གནས་པར་ཁས་བླངས་པ་ལ་ཡོ་བྱད་དྲུག་པོ་དག་མི་སྦྱིན་པར་མི་གསུངས་པའོ། །རྫས་དེ་མི་དབང་བ་ལ་ནི་དེ་མི་སྦྱིན་ནོ་ཞེས་བྱ་བ་ལ། དེ་ཞེས་བྱ་བ་ནི་དྲུག་པོ་དེ་མི་སྦྱིན་པའོ། །ཁྱིམ་པ་ལ་ སོགས་པ ་རྣམས་ལ་ནད་གཡོག་གིས་བྱ་བ་ཉིད་ཀྱི་ཕྱིར་སྤྱི་ལ་བྱ་བར་བཀག་པའོ། །འདིར་གཞུང་ནི། བཙུན་བ་བྲོ་གཡོག་ཁྱིམ་པ་ལགས་ན། དེ་ལ་བྲོ་གཡོག་གི་ཆོས་གོས་བརྩལ་བར་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། ཅུང་ཟད་ཀྱང་སྦྱིན་པར་མི་བྱ་སྟེ། དེ་བཞིན་དུ་ནད་གཡོག་མ་དང༌། དགེ་སློབ་མ་དང༌། དགེ་ཚུལ་མ་ལ་ཡང་སྦྱིན་ནོ་ཞེས་རྒྱ་ཆེར་གསུངས་པ་ཡིན་ནོ་ཞེས་བྱ་བ་དེ་འདིས་བསྡུས་པ་ཡིན་ནོ། །གང་ལ་ཡང་མཚན་མི་མཐུན་པ་དག་འབའ་ཞིག་ཡོད་ན་མཚན་མཐུན་པ་དག་མེད་པ་དེར་མཚན་མི་མཐུན་བ་དག་ལ་ཡད་སྦྱིན་པར་བྱ་བ་ཉིད་ཡིན་བར་ཤེས་པར་བྱའོ། །དེ་ལ་མཚན་མི་མཐུན་བ་དག་ལ་འོས་པ་ཉིད་ཀྱི་ཕྱིར་རོ། །གཞན་དུ་གནས་པར་ཁས་བླངས་པ་ལ་མི་སྦྱིན་པར་མི་བྱའོ་ཞེས་བྱ་བ་ནི། ནད་གཡོག་གནས་གཞན་དུ་གནས་པར་ཁས་བླངས་པ་ལ་ཡོ་བྱད་དྲུག་པོ་དག་མི་སྦྱིན་པར་མི་བྱ་ཞིང་སྦྱིན་པར་བྱ་སྟེ། འདི་དང་འདི་ལས་གཞན་དུ་གནས་པར་ཁས་བླངས་པ་ནི་མི་སྦྱིན་བའི་རྒྱུ་མ་ཡིན་བའི་ཕྱིར་རོ་ཞེས་བྱ་བའི་དོན་ཏོ། །འདི་ལ་བསྙེན་པར་མ་རྫོགས་པ་ནི་ཐམས་ཅད་དབང་བ་ཉིད་དོ་ཞེས་བྱ་བ་ནི་སོ་སོར་སྐལ་བའི་ཆ་འོས་པ་ཉིད་ཡིན་བའོ། །འདི་ཡང་འདི་ལ་སུམ་ཆ་འབྲི་བ་ལྟ་བུ་མ་ཡིན་ནོ་ཞེས་བྱ་བའི་དོན་ཏོ། །ནད་པས་སྨྲས་པས་བྱིན་བ་ཕྲི་བ་ཡང་ཇི་སྐད་སྨྲས་པ་བཞིན་བྱ་བ་ཉིད་དོ་ཞེས་བྱ་བ་ནི། ནད་པས་སྦྱིན་བ་སྨྲས་པ་ལ་གང་
དེ་ལ་སྨྲས་པ་དེ་དེས་ཕྲི་བར་གྱུར་ཀྱང་ཇི་ལྟར་དེས་དེ་ལ་སྨྲས་པ་དེ་ལྟར་ཁོ་ན་བཞིན་བྱ་དགོས་པར་རིག་པར་བྱའོ། །འདིར་གཞུང་ནི། འདུལ་བྱེད་དག་ལས་སྔར་ནད་པས་སྦྱིན་བདེ་བདག་ཉིད་ཤི་བ་མ་ཡིན་ནོ་ཞེས་བྱ་བ་དང༌། དེ་ལྟ་བས་ན་འདི་ལ་མི་སྦྱིན་པ་མ་ཡིན་ནོ། །ནད་གཡོག་གིས་ཕྲི་ཡང་གང་ཞིག་དེས་སྨྲས་པ། གཞན་གྱི་ཕྱིར་ཡང་འདི་ལ་བྱེ་བྲག་མེད་པས་རྣམ་པར་གཞག་པའོ་ཞེས་གསུངས་པ་ཙམ་བསྡུས་པ་ཞེས་བྱ་བའོ། །ཤི་བ་ཉིད་ཀྱི་དུས་ན་རྫས་ཉིང་བསྒྲུབ་པ་ལ་ནི་ནོར་བདག་མི་དབང་ངོ་ཞེས་བྱ་བ་ནི་རང་ཤི་བ་ཉིད་ཀྱི་དུས་ན་གནས་ལ་རང་གི་དངོས་པོ་བསྒྲུབ་པ་ལ་གལ་ཏེ་བདག་ཤི་བར་གྱུར་ན་ཆ་གེ་མོ་ཞིག་ལ་བདག་གི་རྫས་འདི་སྦྱིན་པར་བྱའོ་སྙམ་དུ་འདིར་བུ་ལོན་པ་རབ་ཏུ་བྱུང་བ་མི་དབང་བ་མེད་དོ། །རབ་ཏུ་བྱུང་བ་རྣམས་ལ་འདིར་དེ་བྱིན་གྱིས་བརླབ་པར་བྱ་བ་ཉིད་དོ་ཞེས་བྱ་བའི་དོན་ཏོ། །ཁྱིམ་ན་གནས་པ་ནི་དབང་ངོ་ཞེས་བྱ་བ་ནི། བུ་ལོན་པ་ཁྱིམ་ན་དབང་བ་ལ་ཤི་བའི་དུས་ན་རང་ཉིད་བསྒྲུབ་པའི་ཕྱིར་དེ་དབང་བའོ། །འདིར་གཞུང་ནི། ཕྲན་ཚོགས་དག་ལས། ཁྱིམ་བདག་ནི་ལྟོས་པ་དང་བཅས་པས་དུས་བྱེད་ལ། རབ་ཏུ་བྱུང་བ་དག་ནི་ལྟོས་པ་མེད་པར་དུས་བྱེད་པའི་ཕྱིར་རོ་ཞེས་གསུངས་པ་ཡིན་ཏེ། དེ་ལྟ་བས་ན་ཁྱིམ་བདག་ནི་ལྟོས་པ་དང་བཅས་པའི་ཕྱིར་དབང་ལ། རབ་ཏུ་བྱུང་བ་ནི་ལྟོས་པ་མེད་པའི་ཕྱིར་མི་དབང་ངོ་ཞེས་གསུངས་པ་དེ་བསྒྲུབ་པོ། །ཁྱིམ་པས་བུ་དང་ཆུང་མ་ཕུལ་ནས་ཤི་ན་ཅི་བདེ་བར་བྱའོ་ཞེས་བྱ་བ་ནི་ཁྱིམ་པས་དགེ་འདུན་ལ་བུ་དང་ཆུང་མ་ཕུལ་ནས་ཁྱིམ་པ་ཉིད་ཤི་ན། དེའི་བུ་དང་ཆུང་མ་དག་ཅི་བདེར་བྱས་ཏེ། བདག་གིར་མི་བྱའོ་ཞེས་བྱ་བའི་དོན་ཏོ། །གླང་པོ་ཆེ་དང་རྟ་དང༌། བོང་བུ་དང་དྲེའུ་དང་གོ་ཆ་རྣམས་ནི་རྒྱལ་པོ་ལ་དབུལ་ལོ། །དབྱིག་དང་གསེར་དང་གཞན་བྱས་པ་དང་མ་བྱས་པ་རྣམས་ནི་གསུམ་ལའི་ཞེས་བྱ་བ་ནི་དབུལ་ལོ་ཞེས་བྱ་བར་སྦྱར་ཏེ། དབྱིག་དང་གསེར་དང་དེ་དག་ལས་གཞན་པ་ནི་ཟངས་ཀྱི་རང་བཞིན་ལ་ སོགས་པ ་བརྡུངས་སུ་བྱས་པ་དང་མ་བྱས་པ་རྣམས་ནི་དཀོན་མཆོག་གསུམ་ལ་དབུལ་ལོ་ཞེས་བྱ་བའི་དོན་ཏོ། །རིན་པོ་ཆེ་རྣམས་ཀྱང་ངོ་ཞེས་བྱ་བ་ནི་ནོར་བུ་དང་བཻ་ཌཱུཪྻ་དང་གཡས་སུ་འཁྱིལ་པ་ལ་ སོགས་པ ་རྣམས་ཀྱང་དཀོན་མཆོག་གསུམ་ལ་དབུལ་ལོ་ཞེས་བྱ་བའི་རྗེས་སྙེགས་པའི་ཕྱིར་ཡང་གི་སྒྲའོ། །མུ་ཏིག་རྣམས་ནི་གཞན་ཡོད་ན་དེའི་སྐལ་བས་སམ་ལྷག་པ་
ཡིན་ཡང་རུང་ངོ༌། །གལ་ཏེ་མེད་ན་དེ་བཞིན་དུ་སངས་རྒྱས་ལའོ་ཞེས་བྱ་བ་ནི་གལ་ཏེ་མུ་ཏིག་ལས་གཞན་པའི་རིན་པོ་ཆེ་ཡོད་ན་དཀོན་མཆོག་དག་ལས་སངས་རྒྱས་དེའི་སྐལ་བས་མུ་ཏིག་རྣམས་བརྗེས་ཏེ། སངས་རྒྱས་ལ་དབུལ་བར་བྱའོ། །གལ་ཏེ་དཀོན་མཆོག་གསུམ་མ་ཆར་གྱི་སྐུ་སྐལ་ལས་ལྷག་པ་ཉིད་ཡིན་ན། དེ་ལྟར་ཡང་དེ་དག་ཐམས་ཅད་སངས་རྒྱས་བཅོམ་ལྡན་འདས་ལ་དབུལ་བར་བྱའོ། །གལ་ཏེ་མུ་ཏིག་རྣམས་ལས་གཞན་པའི་རིན་པོ་ཆེ་མེད་ན་དེ་བཞིན་དུ་སྦྱིན་པ་མེད་ཀྱང་བླ་སྟེ། ཇི་སྲིད་དུ་སངས་རྒྱས་ཉག་གཅིག་ལ་དབུལ་བར་བགྱིའོ། །ཚོན་རྩི་ཆེན་པོ་རྣམས་ཀྱང་ངོ་ཞེས་བྱ་བ་ནི། གང་གུས་དང་མཚལ་དང་མཐིང་ཤུན་དང་ལ་ སོགས་པ ་ཡང་སངས་རྒྱས་ལ་དབུལ་ལོ་ཞེས་བྱ་བའི་རྗེས་སྙེགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དེ་དག་ནི་བཏགས་ཏེ་དྲི་གཙང་ཁང་གི་ཞལ་ཞལ་དུ་བྱའོ་ཞེས་བྱ་བ་ལ་དེ་དག་ཅེས་བྱ་བ་ལ་དེ་དག་ནི་མུ་ཏིག་རྣམས་སོ། །དེ་མ་ཡིན་པ་སངས་རྒྱས་ཀྱི་ནི་སྐུ་གཟུགས་དང༌། དྲི་གཙབ་བང་དང་མཆོད་རྟེན་གྱི་ཡོ་བྱད་དུ་བྱའོ་ཞེས་བྱ་བ་ལ། དེ་མ་ཡིན་པ་ཞེས་བྱ་བ་ནི་མུ་ཏིག་དེ་ལས་གཞན་པ་རྣམས་སོ། །ཆོས་ཀྱི་ནི་སངས་རྒྱས་ཀྱི་བཀའ་ཞེས་བྲི་བ་དང་སེང་གེའི་ཁྲི་དག་གིའོ་ཞེས་བྱ་བ་ནི་ཡོ་བྱད་དུ་ངོ་ཞེས་བྱ་བར་སྦྱར་ཏེ་དབུལ་བའོ། །ཐེག་པ་ནི་སྐུ་གཟུགས་ལའོ་ཞེས་བྱ་བ་ནི། རྒྱལ་མཚན་དེའི་སྲོག་ཤིང་དག་ནི་རྒྱལ་མཚན་གྱི་དོན་དུའོ་ཞེས་བྱ་བ་ནི། རྒྱལ་མཚན་གྱི་དོན་དུ་དབུལ་ལོ། །དེ་རུང་བའི་སྲོག་ཤིང་རྣམས་ཀྱང་ངོ་ཞེས་བྱ་བ་ནི། སྐུ་གཟུགས་ལ་དབུལ་ལོ་ཞེས་བྱ་བའི་རྗེས་སུ་སྙེགས་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །གཞན་དག་དང་མཚོན་ཆ་རྣམས་ནི་དགེ་འདུན་ལའོ་ཞེས་བྱ་བ་ནི་དབུལ་ལོ་ཞེས་སྦྱར་བར་བྱའོ། །གཞན་དག་དང་ཞེས་བྱ་བ་ནི། རྒྱལ་མཚན་གྱི་སྲོག་ཤིང་དུ་རུང་བ་ལས། འདི་ལྟ་སྟེ་ཐུང་ངུ་དག་ལའོ། །དེ་དག་ནི་ཁར་གསིལ་གྱི་ཡུ་བ་དང་ཁབ་དང་གྲི་གུར་བྱས་ཏེ་བྲིམ་མོ་ཞེས་བྱ་བ་ལ། དེ་བདག་ཅེས་བྱ་བ་ནི་སྲོག་ཤིང་ལ་ སོགས་པ ་རྣམས་སོ། །ཇི་ལྟར་རིགས་པ་དེ་རྣམས་ནི་ཡོ་བྱད་དུ་བྱ་བར་རིག་པར་བྱའོ། །སྲོག་ཤིང་གཞན་དེ་དག་ནི་ཁར་གསིལ་གྱིས་ཡུ་བར་བྱའོ། །མཚོན་ཆ་རྣམས་ནི་ཁབ་དང་གྲི་གུར་བྱས་ཏེ་དགེ་འདུན་ལ་བྲིམ་མོ། །དགེ་འདུན་གྱི་གཞན་རྣམས་ནི་གཞག་པ་དང་བགོ་བ་དང་བཟའ་བ་དག་ཏུ་ཅི་རིགས་པར་བྱའོ་ཞེས་བྱ་བ་ལ། གཞན་ནི་ཞེས་བྱ་བ་ནི་སྲོག་ཤིང་ལ་ སོགས་པ ་སྨོས་པའི་ཡོ་བྱད་
ཀྱིས་སོ། །ཞིང་དང་ཁང་ཁྱིམ་དང་ཚོང་ཁང་དང༌། གནས་མལ་དང་མགར་སྤྱད་དང༌། གསེར་མགར་གྱི་ལག་ཆ་དང༌། འདྲེག་མཁན་གྱི་ལག་ཆ་དང༌། རྫ་མཁན་གྱི་ལག་ཆ་དང༌། ཤིང་མཁན་གྱི་ལག་ཆ་དང༌། བསིལ་ཡབ་མཁན་གྱི་ལག་ཆ་དང༌། བྲན་དང་བྲན་མོ་དང༌། ལས་བྱེད་པ་དང་ཞོ་ཤས་འཚོ་བ་དང༌། བ་གླང་དང་མ་ཧེ་དང༌། ར་དང་ལུག་དང་སྨན་དང༌། སངས་རྒྱས་ཀྱི་བསྟན་བཅོས་ཀྱི་གླེགས་བམ་དང༌། མྱུར་དུ་མི་གྲུབ་པའི་དམ་རྒྱ་དག་ནི། དང་པོར་འོས་པ་ཉིད་ཡིན་ནོ་ཞེས་བྱ་བ་ལ་མྱུར་དུ་མི་གྲུབ་པའི་ཞེས་བྱ་བ་ནི། བྲི་བར་བྱ་བ་གང་ཡིན་པ་དང༌། གང་དུ་བྲི་བར་བྱ་བ་མྱུར་དུ་འགྲུབ་པར་མི་ནུས་པའོ། །དང་པོར་འོས་པ་ཉིད་ཡིན་ནོ་ཞེས་བྱ་བ་ནི་གཞག་པར་འོས་པ་ཡིན་ནོ། །རས་དང་རས་ཡུག་ཆེན་པོ་དང་བེའུ་རས་དང༌། མཆིལ་ལྷམ་དང༌། ལྷམ་སྒྲོག་གུ་ཅན་དང༌། འབྲུ་མར་དང་འབྲུ་མར་གྱི་སྣོད་དང༌། བྱ་མ་བུ་མ་དང་རིལ་བ་སྤྱི་བླུགས་དང༌། གླེགས་བམ་གཞན་དང་དམ་རྒྱ་གཞན་དང༌། ཚོན་རྩི་གཞན་དག་ནི་གཉིས་པར་འོས་པ་ཡིན་ནོ་ཞེས་བྱ་བ་ལ། བྱ་མ་བུམ་ཞེས་བྱ་བ་ནི་རྫ་མཁན་གྱི་སྣོད་དམིགས་ཀྱིས་བསལ་བའོ། གཞན་དང་ཞེས་བྱ་བ་ལ། གཞན་གྱི་སྒྲས་ནི་གླེགས་བམ་ལ་ སོགས་པ ་གསུམ་པོ་རྣམས་དང་འབྲེལ་པའོ། །སངས་རྒྱས་ཀྱི་བསྟན་བཅོས་ཀྱི་གླེགས་བམ་མྱུར་བར་འབྲི་བ་མ་ཡིན་ པ་ཚོན་ཆེན་པོ་རྣམས་ལས་གླེགས་བམ་ལ་སོགས ་པ། གཞན་རྣམས་ནི་ཕྱི་རོལ་པའི་བསྟན་བཅོས་ཀྱི་གླེགས་བམ་མོ། །མྱུར་བར་བསྒྲུབ་པར་བྱ་སྟེ། མྱུར་བར་འབྲི་བར་ཁར་གསིལ་གྱི་ཡུ་བ་དང༌། བཙག་དང་རྣམས་ལ་ སོགས་པ ་ཚོན་ཆེན་པོ་རྣམས་ལས་ངེས་པར་གྲོལ་པའི་ཁ་དོག་ཅེས་བྱ་བ་ནི་འདི་རྣམས་ཀྱིས་ཁ་དོག་གི་སྒྲ་འདི་བསྡུས་པར་བྱས་ཀྱི། ཚོན་རྩི་དང་ཁར་གསིལ་གྱི་ཡན་ལག་ཏུ་གྱུར་པ་ཁ་དོག་བྱེད་པ་ལ་བསྡུ་བའི་དོན་དུ་ནི་མ་ཡིན་ནོ། །གཉིས་པར་ཞེས་བྱ་བ་ནི་གོ་བར་འོས་པ་ཉིད་དུའོ། །འབྲས་དང་ཏིལ་དང་ནས་དང་མོན་སྲན་སྡེའུ་དང་མོན་སྲན་གྲེའུ་དང༌། འབྲུ་གཞན་དང་བཟའ་བ་དང་བཏུང་བ་དག་ནི་གསུམ་པར་འོས་པ་ཉིད་ཡིན་ནོ་ཞེས་བྱ་བ་ལ། གསུམ་པར་ཞེས་བྱ་བ་བཟའ་བར་འོས་པ་ཉིད་དོ། །གཞིར་གཏོགས་པའི་གོས་ཀྱི་གཞིའོ། །གླེགས་བུ་དང་གླེགས་བུ་ཕྱེད་པ་དག་མཉམ་པར་བྱའོ་ཞེས་བྱ་བ་ནི་ཡང་འདིར་གླེགས་བུ་རྣམས་ཀྱང་སོ་སོ་མཉམ་པ་ཉིད་དང༌། གླེགས་བུ་བྱེད་རྣམས་ཀྱང་ལོགས་ཤིག་ཏུ་
མཉམ་པ་ཉིད་ཅེས་བྱ་བ་རྟོགས་པར་བྱའོ། །གླེབས་བུ་ཡང་གླེགས་བུ་ཕྱེད་རྣམས་དང་ལྷན་ཅིག་ཚད་མ་ཉམ་པར་བྱ་ཞེས་བྱ་བའི་དོན་ཏོ། །མཉམ་པ་འདི་ནི་མཛེས་པ་ཉིད་དུ་བྱ་བའི་ཕྱིར་རོ། །གཞལ་བའི་ཕྱིར་དེའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བ་ནི། དེའི་ཚད་ཀྱི་ཞེས་བྱ་བ་ནི། གླེགས་བུ་དང་གླེགས་བུ་ཕྱེད་ཀྱི་ཚད་ལ་དོན་གྱི་དབང་གིས་འཆང་བ་འདིའོ། །དེ་ལྟར་ཡང་གཞལ་བར་བྱ་བའི་ཕྱིར་ཞེས་བྱ་བ་སྨོས་ཏེ། དེ་བས་ན་འདི་རྗེས་སུ་གནང་བ་སྟེ། ངེས་པ་ནི་མ་ཡིན་ནོ། །གཅིག་གིས་དགོས་པའི་དོན་འགྲུབ་པར་འགྱུར་ན་དེ་ཙམ་འཆང་བ་ལ་ཉེས་བྱས་ཉིད་ནི་མ་ཡིན་ནོ། །དེ་ལྟར་ཡང་གཞན་ལས་ཆག་ཤིང་ཁོ་ན་བཅང་བར་བྱའོ་ཞེས་གསུངས་ཏེ། བཅོམ་ལྡན་འདས་ཀྱི་བཀའ་སྩལ་པ། ཆག་ཤིང་བྱ་ཞིང་དེའི་ཚད་ཀྱི་གླེགས་བུ་བྱའོ། །གླེགས་བུའི་ཚད་ཀྱི་གླེགས་བུ་ཕྱེད་བཅང་བར་བྱའོ་ཞེས་གསུངས་པ་ཡིན་ནོ། །གང་ཞིག་འདིར་ཆག་ཤིང་གི་སྒྲ་ལས་དོན་ཐ་དད་པར་ཞེས་བྱ་བ་མ་ཡིན་ནོ། །གང་གི་ཕྱིར་འདིར་སྲོག་ཤིང་ནི་ཆག་ཤིང་དུ་གྱུར་པ་ཉིད་དུ་གསུངས་པ་རྣམས་པར་གནས་པ་ཡིན་ནོ། །གང་དུ་གདོང་གི་ཆག་ཤིང་ལས་འདི་ལ་ཤིན་ཏུ་ཆེ་བ་ཉིད་བསྟན་པའི་དོན་དུ་ཆུག་ཤིང་གི་སྒྲའོ། །ཚལ་བུ་དག་ཀྱང་ངོ་ཞེས་བྱ་བ་ནི་མཉམ་པ་ཉིད་དུ་བྱའོ། །དེའི་ཚད་ཀྱི་ཆག་ཤིང་བཅད་པར་བྱའོ་ཞེས་བྱ་བ་ནི། གཞག་པའི་ཕྱིར་ཚལ་བུའི་ཚད་ཀྱི་ཆག་ཤིང་བཅང་བར་བྱའོ་ཞེས་བྱ་བའི་དོན་ཏོ། །དེའི་ཚད་ནི་སོར་བཞིའོ་ཞེས་བྱ་བ་ལ་དེ་ལ་ཞེས་བྱ་བ་ནི་ཚལ་བུ་ལའོ། །བྱ་རོག་གི་མཐོ་གང་ངོ་ཞེས་བྱ་བ་ནི། མཐེ་བོའི་ལོགས་སུ་སོར་མོ་གང་ཡིན་པ་དེའི་དབུས་ཀྱི་ཚིགས་ཀྱི་ལོགས་སྟེངས་སུ་མཐེ་བོའི་ཚིགས་སུ་གཏད་དེ། གང་ཞིག་སོར་བཅུ་གཉིས་པར་གྱུར་པ་ཡིན་པ་དེ་ནི་བྱ་རོག་གི་མཐོ་གང་དང་འདྲ་བར་བརྗོད་པའོ། །འདིའི་ཚད་ནི་སོར་བཞི་ཁོ་ན་སྟེ། དེ་བས་ན་དེ་ཉིད་ལ་དེ་རྣམ་པ་གཞན་གྱིས་བསྟན་པའོ། །ཆུང་ཚད་ནི་སོར་གཉིས་སམ་ཕྱེད་དང་གསུམ་མ་མཐེ་བོ་སོར་གཅིག་གོ་ཞེས་བྱ་བ་ནི། སོར་གཉིས་ནི་ཐོབ་པའོ། །གང་གི་ཕྱིར་ཆུང་བ་ནི་སོར་བཞི་པ་དང༌། ཆུང་ཚད་ནི་སོར་ཕྱེད་དང་གསུམ་མོ། །དེའི་བར་ནི་འབྲིང་ཚད་དུ་སྟེ་དེའི་བར་ནི་འབྲིང་དུའོ་ཞེས་འབྱུང་ངོ༌། །གཞུང་ཁ་ཅིག་ལས་ནི་ཆེ་ཚད་ནི་སོར་བཞི་འམ། བྱ་རོག་གི་མཐོ་གང་ངོ༌། །ཆུང་ཚད་ནི་སོར་གཉིས་སམ་མཐེབ་སོར་གཅིག་གོ །དེའི་བར་ནི་འབྲིང་ཚད་དོ་ཞེས་གསུངས་
པ་ཡིན་ནོ། །སུ་ཞིག་སྦྱོར་བ་ལ་ཐམས་ཅད་སྦྱོར་བར་འགྱུར་བ་ཞེས་བྱ་བ་བསྡུས་ཏེ་ཉེ་བར་བཏགས་པ་འདི་བྱས་སོ། །ས་ལ་ཆོས་གོས་གདིང་བར་མི་བྱའོ། །དེའི་དོན་དུ་གཏན་པ་བྱའོ། །ཤིང་ལས་བྱས་པའམ་སྨྱིག་མ་ལས་བྱས་པ་གྲུ་བཞི་པ་རྟོད་པའི་ཕྱིར་ཐུག་གཞུག་པའི་བུ་ག་བཏོད་པ་ནི་དེ་ཞེས་བྱ་བ་ནི་ཐང་བཅད་ཅིང་བཅིང་བའི་ཕྱིར་ཐ་གུ་གང་ཡིན་པ་དེ་རྟོད་པའི་བུ་ག་བཏོད་པར་གྱུར་པ་དེ་ནི་གཏན་པ་ཞེས་བྱ་བ་ནི་དོན་ཏོ། །ཆོས་གོས་ཇི་ཙམ་པར་རོ་ཞེས་བྱ་བ་ནི་བཅོས་གོས་དང་འཚམས་པའི་ཚད་བྱའོ་ཞེས་བྱ་བའི་དོན་ཏོ། །ཆོས་གོས་ཚད་ཐ་དད་པ་དུ་མ་ཡོད་པས་གཏན་པ་ཡང་དོན་གྱིས་འཇུག་པའི་ཕྱིར་ཞེས་བྱ་བ་ནས་སོ། །ཡུ་བ་རྩི་ཅན་དང་ཁྲ་བོ་མི་བཅང་ངོ་ཞེས་དུ་མ་བྱ་དོགས་པར་རིག་པར་བྱའོ། །གྲི་གུས་དྲའོ། །དེ་བཅང་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་གྲི་གུ་དེའོ། །བྱ་རོག་གི་མཆུ་ལྟ་བུ་དང༌། བྱ་གག་གི་གཤོག་པ་ལྟ་བུར་རོ། །ལྕགས་ལས་བྱས་པ་ལས་གཞན་མ་ཡིན་ནོ་ཞེས་བྱ་བ་ནི། ལྕགས་ཀྱི་རང་བཞིན་ཁོ་ན་ལས་བྱ་ཞེས་བྱ་བའི་དོན་ཏོ། །དོན་གྱིས་འཇུག་པའི་ཕྱིར་ཞེས་བྱ་བ་བྱས་ནས་སོ། །ཡུ་བ་རྩི་ཅས་དང་ཁྲ་བོ་མི་བཅང་ངོ་ཞེས་བྱ་བ་ནི། ཡུ་བ་མི་བཅང་ངོ་ཞེས་བྱ་བའི་ཚིག་གི་ལྷག་མའོ། །སོར་དྲུག་གི་ཚངས་ལས་ལྷག་པ་མི་བཅང་མགོ་ཞེས་བྱ་བ་ལ། འདིར་གཞུང་ནི། གྲི་གུ་ནི་གསུམ་སྟེ། ཆེན་པོ་དང་འབྲིང་དང་ཆུང་ངུའོ། །ཆེན་པོ་ནི་སོར་དྲུག་གོ །ཆུང་ངུ་ནི་སོར་བཞིའོ། །དེའི་བར་ནི་འབྲིང་ངོ་ཞེས་གསུངས་པ་ཡིན་ནོ། །དེ་ལས་མང་བ་ཉིད་ནི་སྤང་བར་རིག་པ་ཡིན་ཏེ། དེ་ལས་ཆུང་བ་ཉིད་ཀྱིས་ནི་དོགས་པ་མི་འགྲུབ་པར་བརྗོད་པ་ཞེས་བྱ་བ་འདོར་དེའི་བསྡུས་པ་ཉིད་ཤེས་ནས་དེ་ལྟར་སྨོས་སོ། །ཁ་ཅིག་ལས་ནི་བརྒྱད་ལས་མི་བཅང་ངོ་ཞེས་བྱ་བ་ནི་འདོན་པའི་རྣམ་པར་རྟོག་པ་ལས་འདི་ཉེ་བར་བཏགས་པ་སྟེ། འདིར་གཞུང་ཁ་ཅིག་ལས་ནི། གྲི་གུ་སོར་བརྒྱད་ཀྱི་ཚད་ལས་ལྷག་པ་མི་བཅང་ངོ་ཞེས་འབྱུང་ངོ༌། །འདིར་གཞུང་ཆེན་པོ་ནི་སོར་བརྒྱད་དོ་ཞེས་གསུངས་པ་ཡིན་ནོ། །ཤིང་བུ་ཐུར་པ་ཉིད་ལ་དེ་ཡོད་པར་གྱུར་ནའོ། །དེ་ལྟ་བས་ན་མི་རིགས་པར་གྱུར་པ་འདི་ཞེས་བྱ་བ་མཐོང་བ་ཡིན་ནོ། །སོར་བཞི་བས་ཐུང་བ་ནི་དགོས་པ་མེད་དོ་ཞེས་བྱ་བ་ནི། མ་ལུས་པ་མ་ཡིན་པར་དགོས་པ་ལ་དགོངས་ནས་དགོས་པ་མེད་པ་ཉིད་བསྟན་པར་བྱ་སྟེ། དགོས་པ་ཙམ་ནི་མ་ཡིན་ནོ། །གང་གི་ཕྱིར་དེ་ལས་རྣམ་པ་ཐམས་ཅད་དུ་དགོས་པ་མི་འགྲུབ་པ་ནི་མ་ཡིན་
ནོ། ལྕི་བའི་བྱུག་པས་བསྐུས་པར་བཙེམ་མོ་ཞེས་བྱ་བ་ནི་དངོས་པོ་འམ་རྒྱུད་པས་བཙེམ་པར་བྱ་བའི་ཆོས་གོས་ལ་གནས་གང་ཡིན་པ་དེ་ལ་རྡུལ་ལྡང་བ་མེད་པར་བྱ་བའི་ཕྱིར་ལྕི་བའི་གྱུར་པས་བསྐུ་བར་བྱའོ། །ལྕི་བ་མེད་ན་ཆག་ཆག་གདབ་ཅིང་ཕྱགས་པར་རོ། །དེ་བཙེམ་པར་བྱའོ་ཞེས་བྱ་བ་ལ་དེ་ཞེས་བྱ་བ་ནི་ཆོས་གོས་སོ། །འདིར་གཞུང་ནི། དགེ་སློང་དག་བྱ་གག་གི་གཤོག་ཤིང་ངམ། སྨྱིག་མའི་ཚལ་བུ་གང་ཡིན་པས་ཆོས་གོས་དག་འཚེམ་པར་བྱའོ་ཞེས་གསུངས་པས་དེའི་ཕྱིར་མདོ་འདི་བྱས་པའོ། །ཁབ་ཀྱིས་ཀྱང་ངོ་ཞེས་བྱ་བ་ལ་ཀྱང་ངོ་ཞེས་བྱ་བའི་སྒྲས་ནི་བྱ་གག་གི་གཤོག་ཤིང་དང་སྨྱིག་མའི་ཚལ་བུ་འབའ་ཞིག་ཏུ་མ་ཟད་ཀྱི་ཁབ་ཀྱིས་ཀྱང་བཙེམ་དུ་རུང་བའོ། །བྱ་གག་གི་གཤོག་ཤིང་ལ་ སོགས་པ ་ལས་དེ་དང་མཐུན་པ་སྟེ་ཁབ་ཀྱིས་ནི་མ་ཡིན་ཏེ། ཁབ་ཀྱིས་འཚེམ་པའི་རྣམ་པ་སྟེ། འདིས་འཚེམ་པར་བྱེད་པའི་བཤད་པ་ཞེས་ཏེ་ཤེས་པར་མི་བྱའོ་ཞེས་བྱ་བའི་དོན་ཏོ། །དྲ་བའི་གཞུང་ནི་དགེ་སློང་དག་ལག་པ་དག་གིས་བྲལ་བར་བྱེད་པ་ན་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གྲི་གུས་དྲ་བར་བའོ་ཞེས་བྱ་བ་ཡིན་ནོ། །ཁབ་ཀྱི་གཞུང་ནི་དགེ་སློང་དག་བྱ་གག་གི་གཤོག་ཤིང་དང༌། སྨྱིག་མའི་ཚལ་བུས་ཆོས་གོས་དག་འཚེམ་པ་ན། བཅོམ་ལྡན་འདས་ཀྱིས་བཀའ་སྩལ་པ། ཁབ་བཅང་བར་བྱའོ་ཞེས་གསུངས་པ་ཡིན་ནོ། །དེ་ལ་དྲ་བ་ཉམས་པའི་སྐྱོན་ལ་བརྟེན་ནས་ངེས་པར་ཤེས་པའོ། །ཁབ་ཀྱིས་ཉེས་པ་ལ་མངོན་པར་མ་བརྟེན་པས་འཕགས་པ་བཀུ་ལ་གླེང་གཞིའི་རྒྱུ་ལས་མི་ལྡོག་པར་རྗེས་སུ་གནང་ངོ༌། །དེ་བཅང་བར་བྱའོ་ཞེས་བྱ་བ་ནི་ཁབ་དེའོ། །ར་གན་དང་ཟངས་དང་ཁར་བ་དང་ལྕགས་ལས་བྱས་པ་ལས་གཞན་པ་མི་བཅང་ངོ༌། །ཁ་ཅིག་ལས་ཟངས་ངང་ལྕགས་རྣོ་བ་དག་ལས་བྱས་པའི་ཞེས་སོ་ཞེས་བྱ་བ་ནི། འདིར་མ་མོའི་གཞུང་ཁ་ཅིག་ལས་ཁབ་རྣོ་བཟངས་དང་རྣོ་ལྕགས་ལས་བྱས་པ་བཅང་ངོ་ཞེས་འབྱུང་སྟེ། རྣོ་བ་ཞེས་བྱ་བ་ནི་དེ་གཉིས་ཀྱི་རིགས་ཀྱི་བདག་ཉིད་གཞན་ཞིག་ཡོད་དེ་ཞེས་གསུངས་པ་ཡིན་ནོ། །དེའི་ཁབ་རལ་སྤུ་གུ་འམ་ཆང་པ་ལྟ་བུ་བཅང་བར་བྱའོ། །དེ་ངོ་ཚ་མེད་པ་དང་དགེ་ཚུལ་དག་པ་རག་ལས་པར་མི་བྱའོ་ཞེས་བྱ་བ་ལ་དེ་ཞེས་བྱ་བ་ནི་ཁབ་རལ་དེ་དེའི་ནི་མ་མོ་དག་ལས་སོ། །མི་ཤེས་པ་དང་མི་དྲན་པ་དང༌། རང་བཞིན་དུ་གནས་པ་མ་ཡིན་པ་དག་ལ་ཡང་ཞེས་བྱ་
བ་ནི། རག་ལས་པར་མི་བྱའོ་ཞེས་བྱ་བ་ནི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ཁབ་དང་གྲི་གུ་དག་བཙགས་མི་ཟོས་པར་བྱ་བའི་ཕྱིར་སྨྲ་ཚིལ་གྱིས་བསྐུས་པའི་རས་མར་གཞུག་པར་བྱའོ་ཞེས་བྱ་བ་ལ། འདིར་གཞུང་ནི། དགེ་སློང་རྣམས་ཀྱི་ཁབ་བཙས་ཟོས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། རས་མལ་སྤྲ་ཚིལ་གྱིས་བསྐུ་བར་བྱ་ཞིང་དེར་ཁང་དཀྲིས་ཏེ་གཞག་པར་བྱའོ་ཞེས་གསུངས་པ་དང༌། གཞུང་གཞན་དག་ལས། ཁབ་དང་མཚོན་གཞག་པར་བྱའོ་ཞེས་གསུངས་པ་ཡིན་ཏེ། དེ་བས་ན་འདིར་མཚོན་གྱི་སྒྲ་སྨོས་སོ། །མི་འབྱིལ་བར་བྱ་བའི་ཕྱིར་ཆོས་གོས་ལ་སྒྲོག་རྟེན་བྱས་ཏེ་སྒྲོག་གཟུངས་གདགས་སོ་ཞེས་བྱ་བ་ནི། མི་འབྱིལ་བར་བྱ་བའི་ཕྱིར་ཞེས་བྱ་བ་ནི། ཆོས་གོས་གྱོན་པ་ལུས་ལས་མི་འབྱིལ་བར་བྱ་བའི་ཕྱིར་རོ། །སྒྲོག་གུ་ཡང་ཞེས་བྱ་བ་ནི་མི་འབྱིལ་བར་བྱ་བའི་ཕྱིར་ཆོས་གོས་ལ་སྒེག་རྟེན་བྱས་པ་ལ་དེ་གདགས་པའོ། །གཙོ་བླག་མཁན་ལ་གོས་ཁ་བསྒྱུར་བ་དང་ཁ་མ་བསྒྱུར་བ་འཁྲུག་གཞུག་པར་མི་བྱའོ་ཞེས་བྱ་བ་ལ། འདིར་གཞུང་ནི། དྲུག་སྡེ་དག་གཙོ་བླག་མཁན་དག་ལ་གོས་དག་འཁྲུག་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་གོས་དུར་སྨྲིག་དག་བཙོ་བླག་མཁན་དག་ལ་འཁྲུར་མི་འཇུག་པར་གཟོང་པ་འཇམ་པོར་རང་གིས་བཀྲུ་བར་བྱའོ་ཞེས་གསུངས་པ་དང༌། དྲུག་སྡེ་དག་གོས་དཀར་པོ་དག་བཙོ་བླག་མཁན་དག་ལ་འཁྲུག་འཇུག་པ་ན། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་གིས་ཐམས་ཅད་ནས་ཐམས་ཅད་དུ་བཙོ་བླག་མཁན་ལ་གོས་འཁྲུ་མི་འཇུག་གོ་ཞེས་གསུངས་པ་ཡིན་ནོ། །དེ་དང་འདྲ་པར་རང་གིས་མི་བྱའོ་ཞེས་བྱ་བ་ནི། བཙོ་བླག་མཁན་དེ་དང་འདྲ་བར་མི་བྱའོ། །དེའི་རོགས་སུ་མི་བྱའོ་ཞེས་བྱ་བ་ལ། དེའི་ཞེས་བྱ་བ་ནི་བཙོ་བླག་མཁན་དེའོ། །ཤིང་གི་ངོས་ལ་མི་བྱའོ་ཞེས་བྱ་བ་ནི། གོས་བཀྲུ་བར་མི་བྱའོ། །གཞོང་པ་འཇམ་པོར་བཀྲུ་བར་བྱའོ་ཞེ་བྱ་བ་ལ། འདིར་གཞུང་ནི། གཞོང་པ་འཇམ་པོར་རང་གིས་བཀྲུ་པར་བྱའོ་ཞེས་གསུངས་པ་ཡིན་ནོ། །ཆུ་བདེ་བས་སོ་ཞེས་བྱ་བ་ལ། དེ་ནི་དྲི་མ་འདག་བའི་ཐབས་བསྟན་པའོ། །དེ་བས་ན་ཐབས་གཞན་གྱི་གནས་སུ་དེ་ལ་ནི་བསིལ་བ་ཉིད་ནི་ཧ་ཅང་མི་གྲང་བ་ནི་མ་ཡིན་ནོ། །ལག་པ་གཉིས་ཀྱིས་མཐར་གྱིས་བསྒྱུར་ཞིང་ངོ་ཞེས་བྱ་བ་ནི་བསྒྱུར་ཞིང་བཀྲུ་
བར་བྱའོ། །མི་ནུས་ན་རྐང་པ་གཉིས་ཀྱིས་སོ། །དེ་ལྟར་ཁྱིམ་པས་བཀྲུར་རུང་ངོ་ཞེས་བྱ་བ་ལ། དེ་ལྟར་ཞེས་བྱ་བ་ནི་ཇི་ལྟར་རང་གིས་བཀྲུ་བའི་ཆོ་ག་དེ་བསྟན་པ་དེ་ལྟར་རོ། །དེ་གཞན་དུ་འགྱུར་བར་སྤྱོད་པ་བསྲུང་བར་བྱའོ་ཞེས་བྱ་བ་ནི། ཆོ་ག་ཇི་སྐད་བསྟན་པ་ལས་གཞན་དུ་ཁྱིམ་པ་དེའི་ལོག་པར་སྤྱོད་པ་བསྲུང་བར་བྱའོ། །འདིར་གཞུང་ནི། གཞན་གྱི་ལག་པ་གཉིས་ཀྱིས་ཀྱང་མི་ནུས་ལ། རྐང་པ་གཉིས་ཀྱིས་ཀྱང་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་ཞལ་ཏ་བྱས་ཏེ་གཞན་གྱིས་བཀྲུ་བར་བྱའོ་ཞེས་གསུངས་པ་ཡིན་ནོ། །མི་ནུས་ན་ཞེས་བྱ་བ་སྨོས་པ་ནི། གླེང་གཞི་ལས་བྱུང་བས་སོ། །དེ་བས་ན་འདིར་མ་བསྟན་ནོ། །ཕྱག་དར་ཁྲོད་ལེགས་པར་བཀྲུས་པ་དང༌། བཙེམས་པ་དང་ཁབ་སྒྱུར་བ་བཅང་བར་བྱའོ་ཞེས་བྱ་བ་ནི་ལེགས་པར་ཞེས་ཀུན་ལ་སྦྱར་བར་བྱས་ཏེ་ལེགས་པར་བཀུར་བ་དང་ལེགས་པར་བཙེམ་པ་དང་ལེགས་པར་ཁ་བསྒྱུར་བར་ཞེས་བྱའོ། །དང་བ་བསྐྱེད་པ་མ་ཡིན་པ་ཉིད་བསལ་བའི་དོན་དུ་འདི་ནི་འདུལ་བྱེད་དག་ལས་འདི་དང་མདོ་འོག་མའོ། །མི་གཙང་བས་གོས་པའི་ཆོས་གོས་མི་བཅང་ངོ་ཞེས་བྱ་བ་ནི། མི་བཅང་ངོ་ཞེས་བྱ་བར་སྦྱར་རོ། །ཚོན་བཟང་བ་ཉིད་དུ་བྱ་བའི་ཕྱིར་གྲིབ་མ་དང་ཉི་མ་འདྲེས་པར་གདུང་ཞིང་བསྐམ་པར་བྱའོ་ཞེས་བྱ་བ་ལ་གཞུང་ནི་རྣམ་པར་འབྱེད་པ་ཁ་ཅིག་དང་སྟན་གྱི་བསླབ་པའི་གཞི་ལས་ཐིབ་པ་ལའི་ཚོན་བླངས་ཏེ། ཆམ་ཆོམ་བརྡུང་བར་བྱ་ཞིང་བསྐམས་ཏེ་བསྐོལ་བར་བྱའོ་ཞེས་གསུངས་པ་ཡིན་ནོ། །གཞན་དུ་བྱས་ན་ཚོན་ཉམས་པར་འགྱུར་ཏེ། དེ་ལྟར་བྱས་ན་འདི་གདུང་བར་བྱའོ། །དེའི་ཕྱིར་འདིར་ཕིབ་པ་ལ་ཞེས་སྨོས་པ་ནི་ཚོན་གཞན་གྱི་དཔེ་ཡིན་ཏེ་དེ་བས་ན་བྱེ་བྲག་མེད་པར་སྨོས་སོ། །གོས་དག་མེད་པར་བསྐོལ་ལོ་ཞེས་བྱ་བ་ནི། ཚོན་ཡིན་ཏེ་ཆོས་གོས་དང་བཅས་པར་ནི་མ་ཡིན་ཞེས་བྱ་བའི་དོན་ཏོ། །བྱེ་བྲག་གསུམ་ཡན་ཆད་དུའོ་ཞེས་བྱ་བར་སྦྱར་རོ། །གང་གི་ཕྱིར། དེ་ལྟར་མང་བ་ཉིད་དུ་འདོད་པ་ཉིད་ཡིན་ན་ལན་གསུམ་དུ་བྱའོ། །ཕྱི་མ་ཆེས་ངན་པ་ཉིད་དེ་ཞེས་བྱ་བ་ནི་དང་པོ་བསྐོལ་པ་བས་ཕྱིས་བསྐོལ་བ་ཤོས་སོ། །དེའི་ཕྱིར་ཐ་དད་པར་གཞག་གོ་ཞེས་བྱ་བ་ནི་བསྐོལ་བ་རྣམས་གཞག་པའོ། །འདི་ནི་དང་པོའི་ཞེས་བྱ་བ་ལ་སོགས་པའི་ཡི་གེ་བྲི་བའོ། །སྔར་དང་པོ་དང་སྦྱར་རོ་ཞེས་བྱ་བ་ནི་ཚོན་ནོ། །གོས་ཀུན་ནས་བསུབས་པ་ལའོ་ཞེས་བྱ་བ་ནི། ཚོན་ལེགས་པར་འཛིན་པ་ཉིད་དུ་བྱ་བའི་ཕྱིར་ཚོན་གྱིས་བསྒོ་
བའོ། །ཚོན་གྱིས་ཀུན་ནས་བསུབས་པའི་གོས་དེ་ལ་ཚོན་དང་སྦྱར་བར་བྱའོ། །དེ་བས་ན་དེ་ལས་ཐུན་ཇི་ཙམ་རང་བར་བ་ཅུག་ཅིང་གཞོང་པར་བླུགས་སོ། །གཤེར་ཆེས་ན་འཇན་ལ་སྐམ་ཆེས་ན་འདྲིས་པར་འགྱུར་བས་དེའི་ཕྱིར་རང་པར་རོ་ཞེས་བྱ་བ་ནི་བླུགས་པའོ། །གཟར་ཐག་ཐང་བཅད་ཉིད་ལ་བསྐམས་ན་བཟང་ངོ་ཞེས་བྱ་བ་ནི་གཟར་ཐག་ཐང་བཅད་ཅིང་བརྒྱངས་པ་ལ་བསྐམས་ན་བཟང་བའོ། །ཇི་ལྟར་ཞེ་ན། དེའི་ཕྱིར་མཐའ་དབྱར་བས་སོ་ཞེས་བྱ་བ་སྨོས་སོ། །ཇི་ལྟར་མཐའ་དབྱར་བར་བྱ་ཞེ་ན། དེའི་ཕྱིར་དབང་བུ་དག་གིས་སོ། །གཟུང་དཀའ་བ་རྣམས་ནི་རྩྭ་བཏིང་བར་རོ་ཞེས་བྱ་བ་ནི་སྐམ་སར་རོ། །ཚོན་ཕྱོགས་གཅིག་ཏུ་མི་འཚིགས་པར་བྱ་བའི་ཕྱིར་ཡང་དང་ཡང་བསྒྱུར་པར་བྱའོ་ཞེས་བྱ་བ་ནི། ཚོན་ཕྱོགས་གཅིག་ཏུ་སོང་པར་མ་གྱུར་ཅིག་སྙམ་དུ་འདི་ཡང་ནས་ཡང་དུ་བསྒྱུར་བཟློག་བྱའོ། །ཚོན་སར་པ་ནི་སར་པ་དག་ལ་བླུགས་ན་བཟང་ངོ་ཞེས་བྱ་བ་ནི། ཚོན་སར་པ་ནི་ས་རབ་དག་ལ་བླུགས་ན་བཟང་ངོ༌། །རྙིང་པ་ནི་རྙིང་པ་དག་ལའོ། །སར་པ་རྣམས་ནི་ཉི་མ་ལ་བསྐམས་ནའོ། །རྙིང་པ་རྣམས་ནི་གྲིབ་མ་ལའོ། །མི་འདྲིས་པར་བྱ་བའི་ཕྱིར་ཉི་མ་གཞན་ལ་ཆུའི་ཐུན་བླུགས་སོ། །བང་རིམ་དང་འཆགས་ཚོན་གྱི་ལས་མི་བྱའོ། །གཙུག་ལག་ཁང་དུ་མི་བྱའོ། །དེའི་སྟེང་དུ་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་གཙུག་ལག་ཁང་གི་སྟེང་དུའོ། །ཚོང་ཡི་ལས་དེ་བྱེད་པ་དེ་ནི་དེའི་གནས་ཡིན་གྱིས་བང་རིམ་ལ་ སོགས་པ ་ནི་མ་ཡིན་ནོ། །འཐོར་འཐུང་བྱ་བའི་ཉེན་ཀོར་དུ་མི་བྱའོ་ཞེས་བྱ་བ་ནི་ཚོན་གྱི་ལས་མི་བྱའོ། །ཕྱོགས་དེར་ཞལ་ཞལ་བྱའོ། །གལ་ཏེ་རྡོ་ཐལ་གྱིས་བྱུགས་པ་ཡིན་ན་བཀྲུའོ། །གལ་ཏེ་བརྩམས་པ་ན་རླུང་དང་ཆར་འོང་ན་ཁྱམས་སུ་བྱའོ། །བྱས་ཟིན་ནས་ཕྱོགས་དེར་ལྕི་བའམ་སས་བྱུག་པར་བྱའོ་ཞེས་བྱ་བ་ནི་བྱས་ཟིན་ནས་ཞེས་བྱ་བ་ནི་ཚོན་གྱི་ལས་སོ། །བཅག་པ་དང་བརྡབས་པས་རུང་བར་མ་གྱུར་པ་སྤྱད་པ་བསྟེན་པར་མི་བྱའོ་ཞེས་བྱ་བ་ནི་གོས་བཅག་པ་དང༌། བརྡབས་པས་རུང་བར་མ་གྱུར་ཅིང་མ་གྲུབ་པ་དང་འདྲ་བ་མ་གྲུབ་པའི་གོས་བསྟེན་པར་མི་བྱའོ། །ཡང་འདིར་རུང་བ་གང་ཡིན་པ་གང་དུབ་སྟེན་པར་མི་བྱ་ཞེ་ན། དེའི་ཕྱིར་འདི་ལ་འཚོར་བ་ཉམས་པ་ནི་རུང་བ་ཡིན་ནོ། །ཆུས་བརླན་པ་ཉིད་ནའོ། །ཟིལ་པས་བརླན་ནས་ལག་པས་མཉེ་བས་ཉམས་པར་བྱ་བ་ལའོ། །ཤམ་ཐབས་བགོས་པའི་སྟེང་དུ་སྐ་རགས་
བཅིང་ངོ་ཞེས་བྱ་བ་ནི་ཤམ་ཐབས་བགོས་པའི་སྟེར་དུ་སྐ་རགས་བཅིང་བར་བྱའོ། །ཅི་ཞིག་བཅིང་བར་བྱ་ཞེ་ན། དེའི་ཕྱིར་ཤུར་བུ་འམ་ལྕག་པོད་དམ། རྒྱ་ཅང་ངམ་ཤུར་བུ་ཕྲེ་འུས་སོ་ཞེས་བྱ་བ་སྨོས་ཏེ། །སྐུད་པ་མང་པོ་ལས་བཏགས་བ་སྲབ་ལ་ཞེང་ཆེ་བ་དང༌། ལྷས་མ་གྲུ་བཞིར་འདུག་པ་དང༌། སྐུད་པ་མང་པོས་བཏགས་པ་ཉིད་ལ་བར་ཁོད་སྟོང་དུ་འདུག་པ་དང༌། སྐུད་པ་ཕྲ་མོ་ལས་བཏགས་པ་མདོ་མདོར་བུ་གུ་ལྔ་འམ་དྲུག་རིམ་དུ་བྱས་པ་བཏོད་པ་རྣམས་གོ་རིམས་ཇི་ལྟ་བཞིན་དུའོ། །སྐ་རགས་མ་བཅིངས་པར་གྲོང་དུ་འཇུག་པར་མི་བྱའོ་ཞེས་བྱ་བ་ནི། ཤམ་ཐབས་བགོས་པའི་སྟེང་དུ་སྐ་རགས་མ་བཅིངས་པར་གྲོང་དུ་འཇུག་པར་མི་བྱ་བ་སྟེ། འདི་ནི་ཤམ་ཐབས་བརླག་པར་འགྱུར་པ་སྤང་བའི་ཕྱིར་རོ། །ཁྲིས་གཅིག་གིས་ཀྱང་ངོ་ཞེས་བྱ་བ་ནི། གལ་ཏེ་སྐ་རགས་ཁྲིས་གཅིག་གིས་བཅིངས་ན་དེ་ལྟར་ན་ཡང་མི་རུང་བའོ། །ཚོམ་བུ་ཅན་དང་ཚར་ཚར་ཅན་དང་ཟླ་གམ་ཅན་དང་གསེར་སྐུད་ནི་རྒྱན་མ་ཡིན་པ་མ་ཡིན་ནོ་ཞེས་བྱ་བ་ནི། རྒྱན་ཐོགས་པ་བསྟེན་པར་མི་བྱའོ་ཞེས་སྨོས་པས་དེ་རྣམས་བཀག་བར་རིག་པར་བྱའོ། །ཁྲ་བོར་བྱས་པ་ཡང་དེ་དང་འདྲའོ་ཞེས་བྱ་བ་ནི། རྒྱན་བཞིན་དུའོ། །མདོ་འདི་ནི་གོས་ཀྱི་དུན་དུ་བྱས་པ་ཡིན་གྱི་རྩྭ་ལས་བྱས་པའམ། དེ་ལས་གཞན་པ་ཡང་རྒྱན་ཉིད་ཀྱི་ཁོངས་སུ་གཏོགས་པའི་ཕྱིར་རོ། །གཞི་མ་བཏིང་བའི་སར་ཆོས་གོས་བཞག་པར་མི་བྱའོ་ཞེས་བྱ་བ་ནི། འདིར་ཐམས་ཅད་བར་དུ་གཅོད་པ་དང༌། མ་ཉམས་པར་རས་སམ་ལོ་མ་ལ་ སོགས་པ ་གཞི་མ་བཏིང་བའི་ས་ལ་ཞེས་བྱ་བ་སྟེ། དེ་ནི་མ་རུང་བར་འགྱུར་བ་སྤང་བའི་ཕྱིར་རོ། །འདིར་གཞུང་ནི་རྣམ་པར་འབྱེད་པའི་སྟན་གྱི་གཞི་ལས་དགེ་སློང་རྣམས་ཚོགས་གོས་དག་གྱོན་ཏེ། ས་ལ་འཁོད་པ་ན་ཆོས་གོས་དག་མ་རུང་པར་གྱུར་པ་ན། བཅོམ་ལྡན་འདས་ཀྱིས་བཀའ་སྩལ་པ། དད་པས་སྦྱིན་པར་བྱས་པ་ཆུད་གསན་པར་མི་བྱ་བར་འདི་ལྟར་སྟན་ནང་ཚངས་ཅན་ལ་འདུག་པར་བྱའོ། །སྟན་ནག་ཚངས་ཅན་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། རྩྭའི་ཆུན་པོ་བཅིངས་དེ་རས་མས་དཀྲི་བར་བྱའོ་ཞེས་གསུངས་པ་ཡིན་ནོ། །འདིར་སྟན་ནང་ཚངས་ཅན་ནི་དཔེ་ཙམ་དུ་ཟད་དེ། སྟན་གཞན་ལ་ཡང་འདུག་པར་བྱའོ། །འདི་ནི་ཆོས་གོས་མ་རུང་བར་འགྱུར་བ་སྤང་བའི་ཕྱིར་རོ་ཞེས་བྱ་བ་དེ་ལྟར་སྨོས་སོ། །མི་གཙང་བའི་ཕྱོགས་སུ་མི་གཞག་གོ་ཞེས་བྱ་བ་ནི། ས་མ་ཡིན་པར་གྱུར་
པ་ལ་ཡང་ངོ༌། །བཏུལ་བ་ཡོད་ན་ཁུར་ལྕི་བས་མི་མནན་ནོ་ཞེས་བྱ་བ་ནི། ཆོས་གོས་མནན་པར་མི་བྱའོ། །གཞན་དུ་སྤྱོད་པས་ཡོངས་སུ་སྤྱད་པར་མི་བྱའོ་ཞེས་བྱ་བའི་གཞུང་ནི། འདིར་མ་མོ་ལས་སྟོད་དུ་བགོ་བ་སྨད་དུ་བགོ་བ་དང་སྨད་དུ་བགོ་བ་སྟོད་དུ་བགོ་བས་ཡོངས་སུ་ལོངས་སྤྱད་པར་མི་བྱའོ་ཞེས་བྱ་བ་ལ་ སོགས་པ ་གསུངས་སོ། །བཤང་བ་དང་གཅི་བ་དང་མི་གཙང་བའི་བྱི་དོར་བྱ་བ་དག་ཏུ་བླ་གོས་བགོ་བ་བསྟེན་པར་མི་བྱའོ་ཞེས་བྱ་བ་ནི་བཤད་བ་དང་གཅི་བ་བྱ་བ་དང༌། མི་གཙང་བའི་བྱི་དོར་བྱ་བ་དག་ཏུ་བླ་གོས་དག་བགོ་བར་མི་བྱའོ། །དེར་ཉལ་བར་མི་བྱའོ་ཞེས་བྱ་བ་ལ། དེར་ཞེས་བྱ་བ་ནི་བླ་གོས་དེའི་སྟེང་དུའོ། །བསོད་སྙོམས་ལ་རྒྱུ་བ་དང༌། མཆོད་སྟོན་དང་མཆོད་རྟེན་ལ་ཕྱག་བྱ་བ་དད་རྗེ་ས་བྱ་བ་དང༌། དགེ་འདུན་ཚོགས་པ་དང༌། གདམས་ངག་དང་ཆོས་མཉན་པ་ཉམས་སུ་མྱོང་བ་ལས་གཞན་པའི་བྱ་བ་ལ་སྣམ་སྦྱར་བགོ་བར་མི་བྱའོ་ཞེས་བྱ་བ་ནི་བགོ་བར་མི་བྱ་ཞེས་བྱ་བར་སྦྱར་རོ། །དེ་ལ་འདུག་པ་འམ་ཉལ་བར་མི་བྱའོ་ཞེས་བྱ་བ་ནི་དེ་བརྫིས་ནས་འདུག་པ་འམ་ཉལ་བར་མི་བྱའོ། །དེས་ན་གྲྭ་བ་རྫི་བ་ཡང་འདིར་བཀག་པ་ཡིན་ནོ། །མ་མོ་དག་ལས་དེ་དག་དང་མདོ་འོག་མ་གཉིས་སོ། །འགའ་ཡང་བསྐུར་བ་ལ་སྦྱར་བ་མི་བྱའོ་ཞེས་བྱ་བ་ནི་དེའི་ནང་དུ་ཅི་ཡང་བཅུག་ནས་བསྐུར་བར་མི་བྱའོ་ཞེས་བྱ་བའི་དོན་ཏོ། །ལུས་ལ་རེག་པར་བགོ་བར་མི་བྱའོ། །ཆན་ཁུངས་གཡས་པའི་དྲོད་ཀྱིས་དེ་མ་རུང་བར་འགྱུར་རོ་ཞེས་བྱ་བ་ནི། མཆན་ཁུང་གང་གི་དྲོད་ཀྱིས་འདི་ཉམས་པར་འགྱུར་རོ་ཞེ་ན། དེའི་ཕྱིར་གཡས་པའི་ཞེས་བྱ་བ་སྨོས་སོ། །དེ་ལྟར་མི་འགྱུར་བར་བྱ་བའི་ཕྱིར་ཕྱོགས་དེར་གོས་གླན་པར་བྱའོ་ཞེས་བྱ་བ་ལ། དེ་ལྟར་མི་འགྱུར་བར་བྱ་བའི་ཕྱིར་ཞེས་བྱ་བ་ནི། ཉམས་པར་འགྱུར་བ་མི་འགྲུབ་པའི་ཕྱིར་རོ། །ཕྱོགས་དེར་ཞེས་བྱ་བ་ནི་མཆན་ཁུང་གཡས་པའི་ཕྱོགས་དེར་རོ། །དེ་ལ་ཞེས་བྱ་བ་དེ་ནི་སྣམ་སྦྱར་དེ་ལའོ། །ཁྲུ་ཕྱེད་དང་དོ་དང་མཐོ་གང་ངོ་ཞེས་བྱ་བ་ནི། དེའི་ཚད་ནི་སྲིད་དུ་ཁྲུ་ཕྱེད་དང་དོ་ཞེང་དུ་མཐོ་གང་ངོ༌། །ངོས་གཉིས་ཀར་སྐུད་པའི་བྲུངས་ཀྱིས་སྦྱར་རོ་ཞེས་བྱ་བ་ནི་ངོས་གཉིས་ཀར་མཉམ་བར་གླན་པར་བྱའོ་ཞེས་བྱ་བ་ནི་དེའི་དོན་རྟོགས་པར་བྱའོ། །གཞན་དུ་ནི་གཉིས་ཀ་ལས། ངོས་གཉིས་ཀར་གླན་པར་བྱའོ་ཞེས་བྱ་བའོ། །སྐུད་པའི་ཟུངས་ཀྱིས་སྦྱར་བར་བྱའོ་ཞེས་བྱ་བ་ནི་སྟེན་པས་ནི་མ་ཡིན་ནོ། །དུས་དུས་སུ་དེ་བཀྲུ་
བ་དང་ཁ་བསྒྱུར་བར་བྱའོ། །དེའི་དེ་ནི་བཙག་གིས་སོ་ཞེས་བྱ་བ་ནི། གོས་དེའི་ཁ་བསྒྱུར་བ་དེ་ནི་བཙག་གིས་རིགས་པར་བྱའོ། །གདོང་ཕྱིས་བཅང་བར་བྱའོ་ཞེས་བྱ་བ་ལ། འདིར་གཞུང་ནི་གནས་བརྟན་གྱིས་དྲིས་པ་རུང་རམ། ཚེ་དང་ལྡན་པ་རྣམས་བདག་ནི་ནད་པས་ཏེ་མི་རུང་ངོ༌། །ཅི་ཁྱོད་སྔོན་གདོང་ཕྱིས་བཅང་བར་བྱས་ན་ད་ལྟར་ཅིའི་ཕྱིར་མི་འཆང༌། བཅོམ་ལྡན་འདས་ཀྱིས་མ་གནང་ངོ༌། །བར་སྐབས་དེར་གསུངས་པ་དེ་བས་ན་གདོང་ཕྱིས་བཅང་བར་བྱའོ་ཞེས་རྗེས་སུ་གནང་བའོ། །འདིར་གདོང་ཕྱིས་ནི་ལག་ཕྱིས་ལ་ སོགས་པ ་དག་གི་དཔེ་ཡིན་ཏེ། ཤིན་ཏུ་མོད་པ་ཉིད་དང་ཤིན་ཏུ་བཟོད་པ་ཞེས་བྱ་བའོ། །འདིར་གདོང་པ་ནི་གཙོ་བོ་ཉིད་དུ་བསྟན་པའོ། །ལུས་འཛག་པས་རྣག་གཟན་ནོ་ཞེས་བྱ་བ་ནི་བཅང་བར་བྱའོ་ཞེས་བྱ་བར་སྦྱར་བར་བྱའོ། །གང་གི་ལུས་ཁྲག་གམ་རྣག་འཛག་པ་དེ་ནི་ལུས་འཛག་པ་ཞེས་བྱ་སྟེ། དེས་རྣག་གཟན་བཅང་པར་བྱའོ། །དེ་ཆོས་གོས་ཀྱིས་ནང་དུ་བགོའོ་ཞེས་བྱ་བ་ལ་དེ་ཞེས་བྱ་བ་ནི་ལུས་སྤྲུག་པ་དེའོ། །དབྱར་བ་ནི་སྐ་བའི་ཆུ་འམ་སོ་ཕག་གི་ཕྱེ་མ་སྒྱུར་བའི་ཆུས་སྤངས་ཏེ་དལ་བུས་ཁད་ཀྱིས་འགོགས་པར་བྱའོ་ཞེས་བྱ་བ་ལ། སོ་ཕག་གི་ཕྱེ་མ་སྦྱར་ཞེས་བྱ་བ་ནི་ཆུས་སོ། །རྣག་དང་ཁྲག་ཀྱང་ངོ་ཞེས་བྱ་བ་ནི་སྐ་བའི་ཆུ་དང་སོ་ཕག་གི་ཕྱེ་མ་དང་སྦྱར་བའི་ཆུས་སྤངས་ཏེ་དལ་བུས་ཁད་ཀྱིས་འགོགས་བར་བྱའོ། །དུས་དུས་སུ་དེ་བཀྲུ་བ་དང་སྐམ་པ་དང་ཁ་བསྒྱུར་བར་བྱའོ་ཞེས་བྱ་བ་ལ་དེ་ཞེས་བྱ་བ་ནི་ལུས་ཀྱི་རྣག་གཟན་ནོ། །དེ་ནི་དེའི་བཙག་གིས་བཟད་དོ་ཞེས་བྱ་བ་ལ། དེ་ནི་ཞེས་བྱ་བ་ནི་རྣག་གཟན་དེ་ཁ་སྒྱུར་བར་བྱེད་བ་ནི་བཙག་གི་རྡུལ་བུ་གནས་འཛག་པར་སྤངས་པས་ཏེ། དེ་ལྟར་གྲང་མོ་དེ་མེད་པ་ཞེས་བྱ་བ་དེས་ཤེས་པའོ། །འདིའི་དེ་ལ་སའི་སྙིང་པོ་བཟང་ངོ་ཞེས་བྱ་བ་ནི། འཛག་པ་དེའི་སྐམ་བ་དང༌། ཤ་བཀྲར་མི་འགྱུར་བ་དེའི་སྨད་དུ་ནི་སའི་སྙིང་པོའི་ཕྱེ་མ་བཟང་ངོ༌། །ཆོས་གོས་གར་བབ་བབ་ཏུ་མི་གཞག་གོ་ཞེས་བྱ་བ་ནི། སྐབས་འགའ་ཙམ་གཞག་པའི་སྐབས་དགག་པ་ནི་སྔར་བྱས་ཟིན་པས། དེ་ནི་མཛོད་དུ་གྱུར་པའི་གནས་གང་ཡིན་བ་དེའི་དགག་པ་ཡིན་ནོ། །དེའི་དོན་དུ་གདང་བུ་བཅའོ་ཞེས་བྱ་བ་ནི་ཆོས་གོས་གཞག་པའི་དོན་དུའོ། །དེའི་དོན་དུ་སྦུབས་ཁུང་བྱའོ་ཞེས་བྱ་བ་ནི་བཅའ་བའོ། །དེའི་དོན་དུ་ཞེས་བྱ་བ་ནི་ཆོས་གོས་ཀྱི་གདང་བཅའ་བ་དེའི་དོན་དུའོ། །གང་གི་ཚེ་ཞེ་ན། དེའི་ཕྱིར་གཙུག་ལག་ཁང་རྩིག་པའི་ཚེ་ནའོ་ཞེས་
བྱ་བ་སྨོས་ཏེ། གལ་ཏེ་དུས་དེ་ལ་སྦུབས་ཁྱུད་དེ་གདོད་པར་བྱའི། །བརྩིགས་ཟིན་པའི་འོག་ཏུ་མི་བྱའོ། །རྩིག་པའི་སྟེང་ནས་དབུག་པར་བྱ་བའམ་ཞེ་ན། མ་ཡིན་ཏེ། དེའི་ཕྱིར་བྱས་ཟིན་ན་བུ་གུ་མི་བྱའོ་ཞེས་བྱ་བ་སྨོས་ཏེ། །གཙུག་ལག་ཁང་ལ་ཞེས་བྱ་བ་ལ། འདི་ལ་གཙུག་ལག་ཁང་བརྩིགས་ཟིན་ན་ཞེས་བྱ་བར་སྦྱར་རོ། །གཙུག་ལག་ཁང་ནི་དཔེ་ཙམ་ཡིན་ཏེ། ཁང་ཁྱིམ་ལ་ཡང་དེ་བཞིན་ནོ་ཞེས་བྱ་བ་ནི་གདང་བུའི་སྦུབས་ཁུང་བཅའ་བའོ། །དེ་ནི་ཤིང་བུ་འམ་ཐག་པས་འགྲུབ་པོ་ཞེས་བྱ་བ་ནི། གདང་བུ་དེ་བྱ་བ་ཉིད་ལ་འབྲས་བུ་མ་ཉམས་པར་གཞག་པ་ལ་དགོན་པ་རྣམས་སུ་དེ་གསུངས་ཏེ། ཡོད་པ་ཙམ་ཉིད་ལས་དེ་རྣམས་ལ་བསྟན་པ་རྣམ་པར་གནས་པ་ཡིན་ནོ། །དེ་རྣམས་ཀྱིས་སམ་གཞན་རྣམས་ཀྱིས་ཀྱང་བྱེད་པ་མ་ཡིན་ཏེ། དེ་ལ་མ་ཡིན་ནོ་ཞེས་བྱ་བ་དེ་གཙོ་བོ་སྙམ་པ་ལ་དེ་སྐད་ཅེས་སྨོས་སོ། །གཏུར་བུར་གོས་དག་བསྐུར་ན་བཟང་ངོ་ཞེས་བྱ་བ་ནི་ཆོས་དག་ཆུད་ཟ་བར་འགྱུར་བ་སྤོང་བ་དང་འབྲེལ་བའི་ཕྱིར་དེ་ཞུགས་པའོ། །དེ་བྱའོ་ཞེས་བྱ་བ་ནི་གཏུར་བུ་དེ་ལའོ། །ཁྲུ་གསུམ་དང་ཕྱེད་དང་གསུམ་གཉིས་བལྟབ་ཏུ་བྱས་ཏེ་བཙེམ་མོ་ཞེས་བྱ་བ་ནི་སྲིད་དུ་ནི་ཁྲུ་གསུམ་མོ། །ཞེང་དུ་ནི་ཁྲུ་ཕྱེད་དང་གསུམ་ལས་གང་གི་ཚད་དེ་ཉིད་བལྟབ་ཏུ་བྱས་པ་ནི་ཞེང་དུ་ཡིན་གྱི། སྲིད་དུ་མ་ཡིན་པ་ནི་དོན་གྱིས་གོ་བར་བྱའོ། །དབུས་སུ་ཁ་གདོད་དོ་ཞེས་བྱ་བ་ནི་གཏུར་བུ་དེའིའོ། །དེར་ཁ་རན་སྦུ་གུ་ཅན་དུ་བྱའོ་ཞེས་བྱ་བ་ལ། དེར་ཞེས་བྱ་བ་ནི་ཁར་རོ། །ཁར་ན་སྦུག་གུ་ཅན་ཅི་ལས་བྱ་ཞེ་ན། དེའི་ཕྱིར་ཐ་གུ་ལས་སོ་ཞེས་བྱ་བ་སྨོས་སོ། །ཁ་རྒྱུན་གཞན་ཡང་ངོ་ཞེས་བྱ་བ་ནི་ཐ་གུས་སོ། །སྤྱད་པར་བྱ་བ་དག་སྟེང་དུ་གཞུག་གོ་ཞེས་བྱ་བ་ནི་གོས་རྣམས་ལའོ། །སང་འགྲོ་བར་འགྱུར་བ་ཉིད་ན་བླ་མ་ལ་ཞུས་ཏེ་གནང་ན་འགྲོ་བར་བྱའོ། །རང་གི་གནས་སུ་ཆག་ཆག་ལ་ སོགས་པ ་བྱས་ཏེ་ཞེས་བྱ་བ་ནི་གནས་ཁང་ན་གནས་བ་དེ་ནི་འདིར་དེའི་རང་གི་ཞེས་བྱ་བ་སྨོས་སོ། །དེར་གང་གིས་ཆག་ཆག་ལ་ སོགས་པ ་བྱས་པ་དེའི་ནི་རང་གི་གནས་དེར་ཆག་ཆག་ལ་ སོགས་པ ་བྱས་པའོ། །སོགས་པ་ཞེས་སྨོས་པའི་སྒྲས་ནི་ཕྱག་དར་དང་ལྕི་བ་འཇམ་པོས་བྱུག་པ་དག་བསྡུའོ། །མ་མོ་ལས། འགྲོ་བར་འགྱུར་བ་ཞེས་བྱ་བའི་ཚིག་འདིའོ། །ལམ་དུ་ཆོས་དང་ལྡན་པའི་གཏམ་
གྱིས་སམ། འཕགས་པའི་མི་སྨྲ་བ་ཉིད་ཀྱིས་འགྲོ་བར་བྱའོ། །ངལ་བསོ་བའི་གནས་སུ་གཙུག་ལག་གི་ཚིགས་སུ་བཅད་པ་གདོན་ནོ། །ཆུ་བཅུས་པར་ཡང་ངོ་ཞེས་བྱ་བ་ནི་གནས་སུ་དྲང་སྲོང་གིས་གསུངས་པའི་ཚིགས་སུ་བཅད་པ་གདོན་པའོ། །སུའི་ཕྱིར་ཞེ་ན། དེའི་ཕྱིར་ཆུ་གང་གི་ཡིན་པ་དེའི་ཕྱིར་རོ། །ལྷ་རྣམས་ཀྱི་ཕྱིར་ཡང་ངོ་ཞེས་བྱ་བ་ནི། ཆུ་བཅུས་པའི་གནས་སུ་ཡང་དྲང་སྲོང་གིས་གསུངས་པའི་ཚིགས་སུ་བཅད་པ་གཞན་གདོན་ནོ་ཞེས་བྱ་བ་ནི་ཆུའི་ལྷ་རྣམས་ཀྱི་ཕྱིར་ཞེས་བྱ་བ་ནི་ཆུའི་ལྷ་རྣམས་ཀྱི་ཕྱིར་ཞེས་བྱ་བ་དོན་གྱིས་རྟོགས་པའོ། །གནས་པར་རྒྱུན་ཆགས་གསུམ་པའོ་ཞེས་བྱ་བ་ནི་ཞག་ཏུ་གནས་པའི་གནས་སུ་རྒྱུན་ཆགས་གསུམ་པ་གདོན་པར་བྱའོ། །དཔྱང་ཐག་བཅང་བར་བྱའོ། །དེའི་ཚད་ཀྱིའོ་ཞེས་བྱ་བ་ནི་ཁྲོན་པ་དེའི་འོ། །ཁྲུ་བརྒྱ་ཡན་ཆད་ནས་བརྒྱ་ལྔ་བཅུ་མན་ཆད་དོ། །ཁ་ཅིག་ལས་ནི་ཡུལ་གྱི་རྗེས་སུ་མཐུན་པའོ་ཞེས་སོ་ཞེས་བྱ་བ་ནི་ཁ་ཅིག་ནི་ཚིགས་སུ་བཅད་པ་རྣམས་ལ་འདོད་དོ། །དེ་མེད་པར་ཞེས་བྱ་བ་ནི་ཁྲོན་པའི་ཆུ་དེའོ། །ཁྲོན་པའི་ཆུ་མ་ཡིན་པ་དཀོན་པའི་ཡུལ་དུ་ཀུན་དུ་རྒྱུ་བར་མི་བྱའོ་ཞེས་བྱ་བ་ལ། ཁྲོན་པའི་ཆུ་མ་ཡིན་ པ་ལ་ནི་འབབ་ཆུ་ལ་སོགས ་པའི་ཆུ་ཕྱོགས་གང་ན་རྙེད་པར་དཀའ་བ་དེའི་ཁྲོན་པའི་ཆུ་མ་ཡིན་པ་དཀོན་པའི་ཡུལ་ལོ། །ལམ་དུ་འགྲོ་བས་ཆོས་གོས་སྤྲུགས་ཤིང་ཁྲུས་བྱས་པ་འམ། རྐང་ལག་བཀྲུས་ཏེ་ཆུ་ཐོགས་ནས་མཆིལ་ལྷམ་བྱིས་ཤིང་ཆོས་གོས་གསུམ་གྱོན་ཏེ་སྤྱོད་ལམ་ཞི་བས་གཙུག་ལག་ཁང་དུ་འཇུག་པར་བྱའོ་ཞེས་བྱ་བ་ནི་སིལ་བུ་དག་ལས་འདི་བསྟན་ཏོ། །རྒན་རིམས་བཞིན་ལ་ཕྱག་བྱས་ནས་ཐ་མལ་པའི་ཕྱོགས་སུ་བསྡད་པར་བྱའོ་ཞེས་བྱ་བ་ནི་ཐ་མལ་པའི་ཕྱོགས་ལྐོག་ཏུ་གྱུར་པ་མ་ཡིན་པ་དགེ་སློང་ཐམས་ཅད་འདུན་པ་གང་ཡིན་བ་དེར་བསྡད་པར་བྱའོ། །སྒྲ་བསྐྱུང་བ་དང་མཛེས་པ་དང་ཤིན་ཏུ་བསྡམས་པ་དང་སྤྱོད་ལམ་རན་པར་རོ་ཞེས་བྱ་བ་ནི། ཤིན་ཏུ་བསྡམས་པ་དང་སྤྱོད་ལམ་རན་པར་རོ། །འདིར་ནི་མ་མོ་དག་ལས། ཐ་མལ་པའི་ཕྱོགས་སུ་ཞེས་བྱ་བ་ལ་ སོགས་པ ་གསུངས་སོ།། མི་ཤེས་ན་ཞེས་བྱ་བ་ནི། འདིར་སིལ་བུ་དག་ལས། དེ་ལ་ སོགས་པ ་བྱའོ་ཞེས་གསུངས་པ་ཡིན་ནོ། །རྒྱུས་ཤེས་པ་དང་ལྡན་པས་བསུ་བར་བྱའོ་ཞེས་བྱ་བ་ནི་གང་གིས་དེའི་རྒྱུས་ཤེས་པ་ནི་དེ་ལ་འདི་ནི་ཆེ་གེ་མོ་ཞིག་ནས་འོངས་སོ། །ཆེ་གེ་མོ་ཞིག་གི་ལྷན་ཅིག་གནས་པ་དང་ཉེ་གནས་ཡིན་ནོ་ཞེས་དེས་བསུ་ཞིང་
རང་གནས་སུ་དལ་བསོར་གཞུག་པ་དང་ཆམ་དུ་དབབ་པར་བྱའོ། །རྒྱུས་ཀྱི་སྒྲས་ནི་དེ་ཤེས་པར་བརྗོད་པ་ཡིན་ཏེ། དེ་གང་ལ་ཡོད་པ་དེས་ཞེས་བྱ་བའི་དོན་ཏོ། །མི་ཤེས་ན་མུ་གཅིག་པ་ཡིན་ཡང་བསུ་བར་མི་བྱའོ་ཞེས་བྱ་བ་ནི་གཞན་དུ་མུ་གཅིག་པ་དང་བསུ་བར་མི་བྱ་བ་འབའ་ཞིག་ཏུ་མ་ཟད་དོ། །སྒོ་ཆོད་ཅིག་ཚོལ་ན་མ་སྦྱིན་ཅིག་ལེན་ན་བཟློག་ཅིག་ཅེས་བཅོལ་བ་ཁས་བླངས་ནས་ཡལ་བར་བོར་རམ། འདི་ཁོ་བོའི་གྲོགས་པོ་ཡིན་ནོ་ཞེས་བྱ་བ་ལ་ སོགས་པའི་ཚིག་གིས་ཡིད་གཅུགས་པའི་དངོས་པོ་ཉིད་དུ་བསྒྲུབས་པ ་ལ་བརླབ་པར་གྱུར་ན་གཞལ་བར་བྱ་བ་ཉིད་ཡིན་ནོ་ཞེས་བྱ་བ་ལ། ཇི་ལྟར་ཡིད་གཅུགས་པའི་དངོས་པོ་ཉིད་དུ་བསྒྲུབས་པ་ལས་ཡིན་ཞེ་ན། དེའི་ཕྱིར་འདི་ཁོ་བོའི་གྲོགས་པོ་ཡིན་ནོ་ཞེས་བྱ་བ་ལ་ སོགས་པའི་ཚིག་གིས་ཁས་བླངས་ནས་ཡལ་བར་བོར་ན་རྣམ་པ ་འདི་གཉིས་ནི་གཉུག་མར་གནས་པ་དང༌། གློ་བུར་དུ་འོངས་པ་གཉིས་ཀ་བྱེ་བྲག་མེད་པ་ཉིད་དུ་ཤེས་པར་བྱ་སྟེ། དེའི་ཕྱིར་ཡིད་ཆེས་པ་ལ་བརྟེན་པར་བྱའོ་ཞེས་བྱ་བ་སྨོས་སོ་ཇི་ལྟ་བུ་ཞེ་ན། དེའི་ཕྱིར་གཞན་གྱིས་མི་ཤེས་པའི་བྱེ་བྲག་བརྟག་པ་ནི་ཐབས་ཡིན་ནོ། །དབུལ་བར་བྱ་བ་ལྟུང་ནའོ་ཞེས་བྱ་བ་ནི་དབུལ་བར་བྱ་བའི་དངོས་པོ་ལེན་བར་བྱེད་པའི་ལག་ཏུ་མ་སོང་བར་འབབ་ཆུ་ལ་ སོགས་པའི་ནང་དུ་ལྷུང་ནས་འཛིན་མ་ནུས་ན་ཞེས་བྱ་བ་དོན་གྱིས་རིག་པར་བྱའོ། །ཅི་རྣམ་པ ་ཐམས་ཅད་དུ་འམ་ཞེ་ན། དེའི་ཕྱིར་གལ་ཏེ་མ་བླངས་པར་བཏང་ནའོ་ཞེས་བྱ་བ་སྨོས་ཏེ། གལ་ཏེ་གང་ལ་དབུལ་བ་དེས་མ་བླངས་པར་འབུལ་བར་བྱེད་པས་བཏང་ན་ནི་དེས་ན་བུལ་བར་བྱེད་པས་གཞལ་བར་བྱ་བ་ཉིད་མ་ཡིན་ནོ། །དེ་ལ་བག་མེད་པར་མི་འགྱུར་བར་བྱ་བའི་ཕྱིར་དྲི་བར་བྱའོ་ཞེས་བྱ་བ་ལ། དེ་ལ་ཞེས་བྱ་བ་ནི་མ་བླངས་པ་དེ་ལའོ། །ཁྱོད་ཀྱིས་ཟིན་ཏམ་འོན་ཏེ་མ་ཟིན་ཅེས་བྱ་བའི་ཚིག་གིས་ཐ་སྙད་དུ་བྱ་བའོ། །དེའི་ཕྱིར་ཟིན་ཏམ་མ་ཟིན་ཅེས་བརྗོད་ན་ཟིན་པ་ཉིད་དུ་རྣམ་པར་གཞག་པར་བྱའོ། །བརྙས་ པ་མི་གཙང་བས་མ་རུང་བར་འགྱུར་བ་བཀྲུ་བ་ལ་སོགས ་པས་སེམས་གཟུང་བར་མ་གྲུབ་ན་རིན་སྐྱིན་ནོ་ཞེས་བྱ་བ་ནི། གང་གི་ཕྱིར་དེ་སོན་པ་ལ་སྨོས་ཏེ། གཞན་དུ་ཡང་ཆོ་ག་འདི་སྦྱར་བ་ཞེས་བྱ་བ་བྱེ་བྲག་མ་སྨོས་པའོ། །ཞར་ལ་བྱུང་བའི་སྐབ་སོང་ཟིན་ཏོ།། །།རྒྱུས་ཤེས་པ་དང་ལྡན་པས་བསུ་བར་བྱའོ་ཞེས་གང་སྨོས་པ་དེ་ལ་ཇི་ལྟར་བསུ་བར་བྱ་ཞེ་ན་ལྷུང་བཟེད་དང་ཆོས་
གོས་བླང་བར་བྱའོ། །སྟན་གདིང་བར་བྱའོ། །རྐང་པ་བཀྲུ་བར་འགྲོན་དུ་གཉེར་བར་བྱའོ། །ཆུས་ཀྱང་ངོ་ཞེས་བྱ་བ་ནི་བཏུང་བའི་དོན་དུ་ཆུས་འགྲོན་དུ་བསྙེན་པར་བྱའོ་ཞེས་བྱ་བ་དོན་གྱིས་རྟོགས་པར་བྱའོ། །ཕྱག་བྱའོ། །སྤྱོད་པ་བདེའམ་མི་འདྲིའོ། །ཅི་ནུས་ཀྱིས་ཡང་དག་པར་དགའ་བར་འགྱུར་བར་བྱའོ། །གནས་མལ་རྐྱེན་དུ་འབབ་པ་སྦྱིན་ནོ་ཞེས་བྱ་བ་ནི་མ་མོ་དག་ལས་མཐུན་པས་ལྷུང་བཟེད་དང་ཆོས་གོས་ཞེས་བྱ་བ་ལ་སོགས་པའོ། །དགེ་འདུན་གྱི་གནས་བརྟན་གྱི་གན་དུ་འགྲོ་བར་བྱའོ་ཞེས་བྱ་བ་ནི་གློ་བུར་བའོ། །ཚིག་དེ་ནི་གློ་བུར་བ་ལམ་དུ་མི་འགྲོ་བ་དག་གི་ཕྱིར་གསུངས་པ་ཡིན་ནོ། །དེས་དེ་གནས་འཆའ་བ་ལ་སྦྱར་བར་བྱའོ་ཞེས་བྱ་བ་ལ། དེས་དེ་ཞེས་བྱ་བ་ནི་དགེ་འདུན་གྱི་གནས་བརྟན་དེས་སོ། །དེ་ལ་ཞས་བྱ་བ་ནི་གློ་བུར་དུ་འོངས་པ་དེ་ལའོ། །གལ་ཏེ་རྒན་ན་དེ་གནས་མལ་བསྟབས་པའི་ཕྱིར་དེའི་དགེ་སྐོས་ལའོ་ཞེས་བྱ་བ་ནི་དགེ་འདུན་གྱི་གནས་བརྟན་གྱིས་གནས་མལ་སྟོབས་པའི་དགེ་སྐོལ་ལ་བསྒོ་བར་བྱའོ། །བབ་ཅོལ་དུག་ནས་མལ་གསོལ་བར་མི་བྱའོ་ཞེས་བྱ་བ་ལ། འདི་ནི་མ་མོ་དག་ལས་ལེགས་པར་སོ་སོར་བརྟགས་ཏེ་མནོད་པར་བྱའོ་ཞེས་གསུངས་པ་ཡིན་ནོ། །གློ་བུར་དུ་འོངས་པའི་སྐབས་སོང་ཟིན་ཏོ།། །།ཆོས་གོས་ཀྱི་མཐའ་ཟེགས་ན་མཐའ་སྐར་གྱིས་གླན་ཞིང་ཕྱིར་བཅོས་སོ། །སྨྱུང་ཚམས་ལྟ་བུ་དག་གིས་དེའི་གཟུངས་གདབ་པོ་ཞེས་བྱ་བ་ནི་མཐའ་སྐོར་བསྡུས་པའོ། །རོའི་གོས་ནི་བླ་གབ་མེད་པར་ཞེས་བྱ་བ་སྨོས་ན་ཕྱོགས་གང་དུ་ཞེ་ན། དེའི་ཕྱིར། ཤིང་ལྗོན་ པ་ལ་སོགས ་པའི་སྟེང་དུའོ་ཞེས་བྱ་བ་སྨོས་སོ། །ཉི་མ་བདུན་ནམ་བརྒྱད་དམ་ཁ་ཅིག་ལས་ལྔ་འམ་དྲུག་བཞག་སྟེ་ཞེས་བྱ་བ་སྨོས་སོ། །དེ་ལྟར་རོའི་གོས་ལའོ། །གོས་འཁྲུར་བཅུ་གནས་སྤྱད་པར་བྱའོ། །བདག་དུར་ཁྲོད་པའོ་ཞེས་གོ་བར་བྱས་ནས་ཞེས་བྱ་བ་ལ་གོ་བར་བྱས་ནས་ཞེས་བྱ་བ་ནི་བརྗོད་ན་དོན་གང་ལ་ཡིན་ཞེ་ན། དེའི་ཕྱིར་བདག་དུར་ཁྲོད་པའོ་ཞེས་འབོད་ནའོ། །གཙུག་ལག་ཁང་དང་ཁྱིམ་བདག་ཏུ་འཇུག་པར་བྱའོ། །དུར་ཁྲོད་པས་བདག་གིར་བྱ་བ་མ་བཏང་བ་ལ་ཡང་སྤྱད་པ་བསྟེན་བར་བྱ་བ་ནི་གལ་ཏེ་དེ་སྐད་ཅེས་བརྗོད་པ་ན། བདག་གིར་བྱ་བ་མ་བཏང་བ་ལ་ཡང་དེ་ལྟར་ལོངས་སྤྱོད་པ་ཉིད་ཀྱིས་བསྟེན་པར་བྱ་བའི་དོན་ཏོ། །ཁྱིམ་གྱི་སྒྲས་ནི་བྲམ་ཟེ་དང་ཁྱིམ་བདག་གི་ཁྱིམ་པ་གཟུང་བར་རིག་པར་བྱའོ། །གང་གིས་ལོངས་སྤྱོད་པར་བྱ་ཞེ་ན།
དེའི་ཕྱིར་བདག་གིར་བྱ་བ་མ་བཏང་བར་ཡང་ཞེས་བྱ་བ་སྨོས་ཏེ། དེའི་ལྷུང་བཟེད་ལ་རེག་པ་ཡོངས་སུ་མ་བཏང་ཞིང་སྦྱིན་པ་གང་ཡིན་པ་དེ་ལ་ཞེས་བྱ་བའི་དོན་ཏོ། །དགེ་འདུན་གྱི་གནས་མལ་ལ་སྤྱད་པར་མི་བྱའོ་ཞེས་བྱ་བ་ནི་དུར་ཁྲོད་པས་སོ། །མཆོད་རྟེན་ལས་འདོམ་གང་ཙམ་གྱིས་འགྱེད་དོ་ཞེས་བྱ་བ་ལ་ཡང་དུར་ཁྲོད་པས་སོ། །སྦྲང་ཡབ་བཅང་བར་བྱའོ་ཞེས་བྱ་བ་ལ། དེ་ཇི་ལྟ་བུ་ཞིག་ཅེ་ན། དེའི་ཕྱིར་བལ་ལས་བྱས་པ་དང༌། ཤ་ན་ལས་བྱས་པའི་རས་མ་འམ་འདབ་མའི་དོག་པའོ། །གླང་པོ་ཆེ་དང་རྟ་དང་བ་ལང་གི་སྤུ་ལ་ སོགས་པ ་ལས་བྱས་པ་མི་རུང་ངོ་ཞེས་བྱ་བ། སྦྲང་བུ་དག་གསོད་པའི་བདག་ཉིད་གང་ཡིན་པ་དེ་ཡང་འདིར་བཀག་པ་ཡིན་ནོ། །བལ་ལ་ སོགས་པ ་ནི་དཔེ་ཙམ་དུ་ཟད་ཀྱི། དེ་བས་ན་གཞན་ཡང་རྟོགས་བར་བྱའོ། །འདིར་ཡང་སྦྲང་སྐྱབས་ནི་དོན་མཚུངས་པ་ཉིད་དེ་དེའི་ཕྱིར་དེ་དང་བཅས་པར་སྨོས་པར་གྱུར་ཅིག་ཅེས་བྱ་བ་འདིར་འདི་རྣམ་པར་གཞག་པའོ། །ཐམས་ཅད་དུ་གང་ཟག་གིས་འཁར་བ་རྩི་ཅན་ཉིད་དང་ཁྲོ་བོ་ཉིད་མི་རུང་ངོ་ཞེས་བྱ་བ་ལ། ཐམས་ཅད་དུ་ཞེས་བྱ་བ་ནི་སྦྲང་ཡབ་ཀྱི་ཡུ་བ་འབའ་ཞིག་ཏུ་མ་ཟད་ཀྱི། འོན་ཀྱང་གཞན་ཐམས་ཅད་ལ་ཡང་ཕྱོགས་གཅིག་ཏུ་གྱུར་པ་དང་ཡན་ལག་ཏུ་གྱུར་པ་ཡིན་པའི་ཕྱིར་རོ། །སྦྲང་སྐྱབས་ཀྱང་ངོ་ཞེས་བྱ་བ་ཡང་བཅང་བར་བྱའོ་ཞེས་ཇི་ལྟ་བུ་ཞིག་ཅེ་ན། དེའི་ཕྱིར། ཤིང་བུའི་སྟེང་དུ་རས་ཀྱིས་གཡོགས་བའོ་ཞེས་བྱ་བ་སྨོས་སོ། །ཇི་ལྟར་ཤིང་བུལ་གཡོགས་པར་བྱ་ཞེ་ན། དེའི་ཕྱིར་བཅིངས་པས་སོ་ཞེས་སྨོས་སོ། །རས་ཇི་ཙམ་ཞིག་ཅེས་ན། ཁྲུ་བཞི་དང་དོ་པའོ་ཞེས་སྨོས་ཏེ། སྲིད་དུ་ཁྲུ་བཞི་ལ་ཞེང་ཁྲུ་དོ་པའི་ཚད་གང་ལ་ཡོད་པའི་ཞེས་བྱ་བའི་དོན་ཏོ། །རས་ཁྲུ་བཅུ་གཉིས་པས་གཡོག་གོ་ཞེས་བྱ་བ་ལ། ཇི་ལྟར་གཡོགས་པར་བྱ་ཞེ་ན། དེའི་ཕྱིར་འབྱར་བ་དང་བཅས་པར་རོ་ཞེས་བྱ་བ་སྨོས་ཏེ། རས་ཀྱི་མཐའ་མ་རྣམས་འབྱར་བ་ཞེས་བྱ་བ་འདི་སྐབས་ཉིད་ཀྱི་ཕྱིར་ཤེས་པར་བྱའོ། །དེའི་མཐའ་ནི་མལ་ཆས་སྦྱར་རོ་ཞེས་བྱ་བ་ལ། དེའི་ཞེས་བྱ་བ་ནི་གཡོགས་མའི་རས་དེ་ལའོ། །སྒོ་བསེགས་ཁར་འདོད་དོ་ཞེས་བྱ་བ་ནི། སྦྱང་སྐྱབས་ཀྱི་སྒོ་སྣོལ་མར་འདོད་པའོ། །ཚ་བར་ནི་བསིལ་བ་སྦྱར་རོ། །བསིལ་ཡབ་བཅད་བར་བྱའོ་ཞེས་བྱ་བ་ལ། རླུང་བསྐྱབ་པར་བྱའོ་ཞེས་བྱ་བ་ནི་བསིལ་ཡབ་བོ། །འདིར་བཅོས་མ་ཉིད་ནི་གཙོ་བོ་སྟེ། གང་ཟག་ནི་མ་ཡིན་
ནོ། །དེ་བས་ན་མ་ཞེན་པར་བྱས་པ་ནི་འདིར་མ་བསྡུས་པ་ཉིད་དོ། །བསིལ་ཡབ་མཁན་གྱིས་བྱས་པ་དང༌། ཏ་ལའི་ཆང་བུའོ་ཞེས་བྱ་བ་ནི་སྐྱེད་པའི་ཆ་བྱད་ནི་ཏ་ལའི་ལོ་མའི་ཚོགས་ཡིན་པའི་ཕྱིར་རོ། །ཁྲ་ཁྲ་བོ་མི་རུང་ངོ་ཞེས་བྱ་བ་ལ། འདི་ན་དབྱིག་པར་གཏོགས་པའི་ལུས་སྤྱི་ལ་བསྙེགས་ཏེ། དེའི་ཕྱིར་ལྷག་མའི་དོན་དུ་འདིའོ། །དགེ་འདུན་གྱིས་ནི་གཞན་ཡང་ངོ་ཞེས་བྱ་བ་ལ། དགེ་འདུན་གྱིས་ནི་བསིལ་ཡབ་མཁན་གྱིས་བྱས་པ་དང་ཏ་ལའི་ཆང་བུ་ལས་གཞན་ཀོ་ལྤགས་ལས་བྱས་པ་དང་རྨ་བྱའི་གཤོག་པ་ལ་ སོགས་པ ་ལས་བྱས་པ་དང༌། ཁྲ་ཁྲ་བོ་མ་ཡིན་པ་ལས་གཞན་པ་ཁྲ་ཁྲ་བོར་འདུག་པ་དང༌། ཡུ་བ་རྩི་ཅན་དང་ཁྲ་བོ་ཡང་བཅད་བར་བྱའོ་ཞེས་ཏེ་དབྱུག་པ་དེ་ལྟ་བུ་ནི་གང་ཟག་ལ་བཀག་པར་རིག་པར་བྱའོ། །ནོར་བུ་དང་རྔ་མའི་བསིལ་ཡབ་རྙེད་ན་མཆོད་རྟེན་ལ་དབུལ་ལོ་ཞེས་བྱ་བ་ནི་དེའི་ཆེད་དུ་འདི་རྙེད་པར་གྱུར་པ་བླངས་པ་ཞེས་བྱ་བར་འདིར་རྣམ་པར་གཞག་པར་རིག་པར་བྱ་སྟེ། འདི་ནི་མ་མོ་དག་ལས་སོ། །མཆོད་རྟེན་ཀུན་ལ་ཡིན་ནམ་ཅི་སངས་རྒྱས་ཁོ་ནའི་ལ་ཡན་ནམ་ཞེ་ན། དེའི་ཕྱིར་ཉན་ཐོས་ཀྱི་ལ་ཡང་དོ་ཞེས་བྱ་བ་སྨོས་ཏེ། སངས་རྒྱས་ཀྱི་འབའ་ཞིག་ཏུ་མ་ཟད་དོ། །འདིར་གཞུང་ནི་དགེ་སློང་གིས་རྔ་མའི་བསིལ་ཡབ་ནོར་བུ་ཅན་བཅང་བར་མི་བྱའོ། །ཇི་སྟེ་རྙེད་ན་བླངས་ཏེ་སངས་རྒྱས་ཀྱི་མཆོད་རྟེན་ནམ་ཉན་ཐོས་ཀྱི་མཆོད་རྟེན་ལ་དབུལ་བར་བྱའོ་ཞེས་གསུངས་པ་ཡིན་ནོ། །སྟན་ནང་ཚངས་ཅན་དང་ལ་བ་དང་སྔས་ནད་ཚངས་ཅན་དང་གོར་བུ་དག་བཅད་བར་བྱའོ་ཞེས་བྱ་བ་ནི་མ་མོ་ལས། དགེ་སློང་རྣམས་ཀྱིས་གནས་མལ་དང༌། སྟན་གྱི་རྗེས་སུ་གནང་བ་ནི་འདི་ལྟ་སྟེ། ཁྲི་དང་ཁྲིའུ་དང་སྟན་ནད་ཚངས་ཅན་དང་ལ་བ་དང་སྔས་ནད་ཚངས་ཅན་དང༌། གོར་བུ་དང་བགོ་བའི་དགེ་འདུན་གྱི་ཡང་རུང་གང་ཟག་གི་ཡང་རུང་བའོ་ཞེས་གསུངས་པ་ཡིན་ནོ། །བུ་དང་ཆུང་མའི་རྙེད་པ་ནི་སྦྱིན་བར་བྱེད་པའི་དབང་གིས་བསྒྲུབ་པོ་ཞེས་བྱ་བ་ནི་སྦྱིན་བར་བྱེད་པས་ཇི་ལྟར་རྣམ་པར་ངེས་པ་བྱེད་པ་དེ་བཞིན་དུ་འདི་ལ་རྣམ་པར་ངེས་པར་བྱ་སྟེ། སིལ་བུ་དག་ལས་དེ་དང་པོར་བྱས་ནས་གཞན་ཞེས་བྱ་བའི་མཐར་ཐུག་པ་དང༌། སྣོད་སྤྱད་སྦེད་པ་ཞེས་བྱ་བ་དང་བོར་བྱས་ཏེ་འདུག་པར་བྱའོ་ཞེས་བྱ་བའི་མཐར་ཐུག་པ་དང༌། དཀོན་མཆོག་གི་དོན་དུ་ཞེས་བྱ་བ་དང་བོར་བྱ་སྟེ། འཁོར་ལོ་བཅད་བར་བྱའོ་ཞེས་བྱ་བའི་མཐར་ཐུག་པ་དང༌། བཅུ་སྟོན་ལ་ སོགས་པའི་རྙེད་པ ་ཞེས་བྱ་བ་དང་པོར་བྱ་སྟེ། འཆང་བ་བསྟན་པ་ཞེས་བྱ་བའི་
མཐར་ཐུག་པའོ། །འདིར་གཞུང་ནི་མ་མོ་དག་ལས། གླེང་གཞི་རྣམས་ལས་སྦྱར་བ་ཞེས་བྱ་བ་དང་པོར་བྱས་ནས་སྦྱིན་པ་ཞེས་བྱ་བའི་མཐར་ཐུག་པ་དང༌། ལྷུང་བཟེད་ཅེས་བྱ་བ་དང་པོར་བྱ་སྟེ། བྱིན་གྱིས་བརླབ་པར་མི་བྱའོ་ཞེས་བྱ་བའི་མཐར་ཐུག་པར་གསུངས་པ་ཡིན་ནོ། །གལ་ཏེ་སླུ་བར་བྱེད་ན་ཇི་ཙམ་དུ་འདོད་པ་དེ་ཙམ་དུ་བཙོང་བ་ཉིད་ཡིན་ནོ་ཞེས་བྱ་བ་ལ། གལ་ཏེ་སླུ་བར་བྱེད་ན་ཞེས་བྱ་བ་གལ་ཏེ་སྦྱིན་པར་བྱེད་པས་རང་གི་བུ་དང་ཆུང་མ་ཕུལ་བ་ཕྱིར་སླུ་བར་འདོད་ནའོ། །ཇི་ཙམ་དུ་འདོད་པ་ཞེས་བྱ་བ་ལ། དེ་ཞེས་བྱ་བ་ནི་སྦྱིན་བར་བྱེད་པ་ལའོ། །དེ་ཙམ་དུ་བཙོང་བར་འདོད་པ་ཉིད་ཡིན་ནོ་ཞེས་བྱ་བ་ཇི་ཙམ་དུ་བུ་དང་ཆུང་མ་སྦྱིན་བར་འདོད་པས་སླུ་བར་འདོད་ན། སྦྱིན་བར་བྱེད་པ་དེ་རིན་ཇི་ཙམ་དུ་འདོད་པ་དེ་ཙམ་དུ་བཙོང་བ་ཉིད་ཡིན་ནོ། །ཡང་དང་ཡང་འབུལ་དུ་རུང་བའོ་ཞེས་བྱ་བ་ནི་ཕུལ་ཟིན་བའི་དངོས་པོ་ལེན་པ་པོ་ཉིད་ལ་ཡང་དང་ཡང་འབུལ་དུ་རུང་བ་སྟེ། སྦྱིན་བར་བྱེད་པའི་དད་པ་སྤེལ་བའི་ཕྱིར་རོ། །ཤིང་ལྗོན་པ་ལ་ཕུལ་ན་གལ་ཏེ་རྒྱན་ཡིན་ན་གལ་ཏེ་དུས་སྟོན་གྱི་ཚེ་དེ་ཉིད་བརྒྱན་པའི་ཕྱིར་གཞག་གོ་ཞེས་བྱ་བ་ལ། དེ་ཉིད་ཅེས་བྱ་བ་ནི་ཤིང་ལྗོན་པ་དེ་ཉིད་དོ། །དུས་སྟོན་གྱི་ཚེ་དེ་ཉིད་བརྒྱན་པའི་ཕྱིར་གཞག་གོ་ཞེས་བྱ་བ་ནི་དེ་དང་རིགས་མཐུན་པ་གཞན་མེད་ན་རིགས་མི་མཐུན་པ་གཞན་བརྒྱན་བརྒྱན་བའི་ཕྱིར་གཞག་པ་ལ་ལྟུང་བ་མེད་དོ། །ཡོངས་སུ་བཙལ་ནས་མ་རྙེད་ན་ཞེས་བྱ་བ་ལ་ཡང་ལྷག་མ་ཟ་བ་ལ་སྨོས་པའི་ཕྱིར་རྟོགས་པར་བྱའོ། །རྩིག་པ་ལ་གལ་ཏེ་གནས་ཁང་གི་ནི་རི་མོ་བྱ་བའི་ཕྱིར་རོ་ཞེས་བྱ་བ་ལ། གལ་ཏེ་གནས་ཁང་ལ་ཕུལ་བར་གྱུར་ན། དེ་ནས་གནས་ཁང་གི་རྩིག་པ་ལ་རི་མོ་བྱ་བའི་ཕྱིར་གཞག་གོ་ཞེས་བྱ་བའི་དོན་ཏོ། །འདིར་མེ་ཁང་ལ་ སོགས་པར་གཏོགས་པའི་རྩིག་པའི་རྩིག་པ ་དང་ཀ་བ་དག་ལ་ཕུལ་བས་ལས་སར་པ་བྱ་ཞེས་བྱ་བའི་གཞུང་ཡང༌། འདིར་རྩིག་པ་གནས་ཁང་གི་ཡིན་ལ་རྫས་དེ་གནས་ཁང་གི་ཡིན་ན་རྫས་དེ་གནས་ཀྱི་རྩིག་པའི་རི་བྲི་བའི་ཕྱིར་སྤྱད་པར་བྱའོ་ཞེས་གསུངས་པ་མཐོང་བ་ཡིན་ཏེ། དེ་གནས་ཁང་གི་རྩིག་པ་འདིར་བྱེ་བྲག་ཏུ་བརྗོད་པར་རྣམ་པར་གནས་པ་ཡིན་ནོ། །གལ་ཏེ་དེ་མ་ཡིན་ནམ་ཀ་བ་ལ་ནི་ལས་སར་པའི་ཕྱིར་རོ་ཞེས་བྱ་བ་ནི་གལ་ཏེ་རྩིག་པ་དེ་གནས་ཁང་གི་མ་ཡིན་ནམ་ཀ་པ་ལ་ཕུལ་ན་མཁར་ལེན་གྱི་ཕྱིར་གཞག་པར་བྱའོ། །ས་ལ་ནའོ་ཞེས་བྱ་བ་འདི་ནི་འོག་མ་རྣམས་ལ་སྦྱར་བར་བྱའོ། །མེ་ཁང་གི་ནི་སྣང་བར་རོ་ཞེས་བྱ་བ་
ནི་མེ་བུད་པའི་མེ་ཁང་གིས་ལ་ཕུལ་བའི་རྫས་ནི་དགེ་འདུན་གྱི་སྣང་བ་གང་དང་གང་དུ་དགོས་པའི་རྒྱུར་སྤྱད་ཀྱི་མེ་ཁང་དེ་ཉི་ཚེར་ནི་མ་ཡིན་ནོ། །ཡང་ན་སྣུམ་བག་གི་རྙེད་བར་རོ་ཞེས་བྱ་བ་ནི་མེ་ཁང་གིས་ས་ལ་ཕུལ་བའི་རྫས་ཞེས་བྱ་བར་སྦྱར་རོ། །རུང་བའི་ཁང་པའི་ནི་ན་བའི་སྨན་དུ་གཞག་གོ་ཞེས་བྱ་བ་ནི་ཕུལ་པའི་རྫས་དེའོ། །བཀང་སའི་ནི་ཟས་སུ་བྱའོ། །སྐྱེམས་མལ་བྱི་ནི་བཏུང་བར་རོ་ཞེས་བྱ་བ་ནི། སྐྱེམས་མལ་གྱིས་ལ་ཕུལ་བའི་རྫས་ནི་བཏུང་བར་བསྒྱུར་བར་བྱའོ། །བསྲོ་ཁང་གི་གནས་ཀྱི་ནི་བསྲོ་ཁང་གི་ལམ་སྣུམ་བག་གི་རྙེད་པར་རོ། །འཁོར་གྱི་ཁྱམས་དང་དཔོང་སའི་ར་བའི་ནི་སྣུབ་བག་གི་རྙེད་པར་རོ། །ཡང་ན་སྐྱེས་པའི་རབ་ཀྱི་སྡེ་བྲི་བར་རོ་ཞེས་བྱ་བ་ནི། དཔོང་སའི་ར་བའི་རྣམ་པ་ཉིད་དང༌། འཁོར་གྱི་ཁྱམས་ལ་ཆོས་ཀྱི་གཉེར་ལ་དབང་བྱེད་པ་ཕལ་ཆེར་དེ་དག་གནས་པ་ཞེས་བྱ་བས་སྐྱེས་པའི་རབས་ཀྱི་སྡེ་བྲི་བར་རིགས་པ་ཡིན་ནོ་ཞེས་བྱ་བའི་དགོངས་པའོ། །བང་རིམ་དང་འཆགས་དང་སྒོ་ཁང་དང༌། ཁྱམས་དག་ལ་ཕུལ་བའི་སྣོད་སྒོའོ། །རྫིང་བུའི་ཡང་ངོ་ཞེས་བྱ་བ་ནི། སྣོད་སྒོ་ཁང་ཞེས་བྱ་བ་འདོན་པ་འདི་འདིར་འདོན་པར་འདོད་པ་ཉིད་ཀྱིས་ཉེ་བར་བཏགས་པའོ། །ཁ་ཅིག་ལས་དེ་ནི་ཕྱོགས་བཞིའི་དགེ་འདུན་གྱི་ཉིད་དུ་གཞག་གོ་ཞེས་བྱ་བ་ལ། དེ་ནི་ཞེས་བྱ་བ་ནི་རྫིང་བུ་ལའོ། །ཁ་ཅིག་ལས་ཞེས་བྱ་བ་ནི་འདོད་པའོ། །དཀོན་མཆོག་གི་དོན་དུ་བླང་དུ་རུང་ངོ༌། །བསྒྲག་ཏུ་ཡང་ངོ་ཞེས་བྱ་བ་ནི། དགེ་སློང་གི་བྱར་མི་རུང་བ་མ་ཡིན་ཞེས་བྱ་བའི་དོན་ཏོ། །གང་གི་ཚེ་བསྒྲགས་པར་བྱ་ཞེ་ན། དེའི་ཕྱིར་ལེན་པའི་འཚེའོ་ཞེས་སྨོས་ཏེ། རྙེད་པ་འབུལ་བ་ལེན་པའི་ཚེ་ནའོ་ཞེས་བྱ་བའི་དོན་གྱིས་སོ། །མཐོང་བར་བྱ་བའི་ཕྱིར་འཕང་ལོ་བྱའོ་ཞེས་བྱ་བ་ནི། གང་གི་ཕྱིར་དེར་སྒྲོགས་པར་བྱེད་བ་མཐོང་བ་ཡིན་ནོ། །འཕང་ལོ་གཉིས་སྨོས་པ་ནི་ཤིང་རྟའི་འཕང་ལོའི་རྣམ་པ་ལ་འདིར་འཁོར་ལོར་འདོད་པ་ཡིན་ནོ། །ཚ་བ་དག་རླུང་དང་ཆར་བའི་གནོད་པས་མི་རེག་པར་བྱ་བའི་ཕྱིར་ཁང་པ་བརྩེགས་པ་སྒོ་བཞི་དང་ལྡན་པའོ། །དུས་སྟོན་གྱི་རྗེས་ལ་འཕང་ལོ་བརྟུལ་ལོ་ཞེས་བྱ་བ་ནི་དུས་སྟོན་ལ་འཕང་ལོ་གང་ཡིན་པ་དེ་ལ་ཆོ་ག་འདི་ཞེས་བྱ་བའི་ལས་རྟོགས་པའོ། །སྣོད་སྤྱད་འབྲུབ་པས་རྙེད་པ་འགྲུབ་པར་བྱའོ། །གཉིས་ཀ་ལ་མ་བསྔོས་པ་སྟོན་པ་མཆོད་པའི་ཚེ་ཕུལ་བ་དགེ་འདུན་གྱི་ལ་དགེ་སློང་མ་རྣམས་ཀྱི་འཇུག་པ་མེད་དོ་ཞེས་བྱ་བ་ལ། གཉིས་ཀ་ལ་ཞེས་བྱ་བ་ནི། དགེ་སློང་གི་དགེ་འདུན་དང༌།
དགེ་སློང་མའི་དགེ་འདུན་ནོ། །སྟོན་པ་མཆོད་པའི་ཚེ་ཞེས་བྱ་བ་ནི། བྱང་ཆུབ་སེམས་དཔའི་གནས་སྐབས་ཀྱང་སྟོན་པ་ཡིན་པས་སོ། །དགེ་སློང་བྱེད་པ་པོ་རྣམ་ཀྱིས་མཆོད་པ་ལ་འདི་ཆོ་ག་ཞེས་བྱ་བའོ། །དགེ་སློང་མ་རྣམས་ཀྱིས་བྱས་པའི་ཚེ་ལ་བསྔོས་པའི་རྙེད་བ་བྱུང་བ་གང་ཡིན་པ་དེ་ཉིད་ཀྱིས་རྟོགས་པའོ། །གཉིས་ཀ་བྱས་པ་ན་གཉིས་ཀ་ལ་བསྔོས་པ་རྙེད་པ་འབྱུང་བ་གང་ཡིན་པ་དེ་ལ་ནི་རྗེས་སུ་མ་བརྗོད་པར་ཕུལ་བ་ལ་ཐུན་མོང་པ་ཉིད་ཀྱིས་ཕྱིར་སྟོན་པ་ལ་དོགས་པ་དེ་བཟློག་པའི་དོན་དུ་འདིར་བྱས་སོ། །འདི་ལ་གཅིག་གི་ནང་དུ་དེ་དག་གིས་འཕང་ལོ་ཐ་དད་པ་བཙུགས་ན་ཉེས་པ་སྦོམ་པོའོ་ཞེས་བྱ་བ་ལ། འདི་ལ་ཞེས་བྱ་བ་ནི་མཆོད་པ་ལའོ། །ཁ་ཅིག་གིས་ཞེས་བྱ་བ་ནི་གང་དུ་དགེ་སློང་རྣམས་ཀྱིས་འཕང་ལོ་བཙུགས་པ་དེ་ལ་གཞན་པ་དག་ལས་དགེ་འདུན་གྱི་དབྱེན་གྱི་སྐབས་སུ་འདི་གཏོགས་པར་རིག་པར་བྱའོ། །སྣོད་སྤྱད་འགྱེད་པས་བགོ་བར་བྱའོ། །དེ་བསྐོར་བར་བྱའོ་ཞེས་བྱ་བ་ནི། སྣོད་སྤྱད་འགྱེད་པ་པོ་དེས་སོ། །དེས་ཇི་ལྟར་བགོ་བར་བྱ་བ་ཞེ་ན། དེའི་ཕྱིར་བཙོང་བར་བྱ་བ་རྣམས་བཙོངས་ཏེའོ་ཞེས་བྱ་བ་སྨོས་ཏེ། སུ་ལ་བཙོངས་ཏེ་ཞེ་ན། དེའི་ཕྱིར་དགེ་འདུན་འདུས་པ་ལའོ་ཞེས་བྱ་བ་སྨོས་ཏེ། །ཇི་ལྟར་བཙོངས་ཏེ་ཞེ་ན། དེའི་ཕྱིར་བསྐྱེད་པས་སོ་ཞེས་བྱ་བ་སྨོས་སོ། །དེ་ཉིད་ཀྱིས་དེར་འདུ་བའི་སྐབས་སུ་རྗེས་སུ་བསྒྲུབ་པར་བྱའོ་ཞེས་བྱ་བ་ནི། སྣོད་སྤྱད་འགྱེད་པའི་གང་ཟག་དེ་ཉིད་ཀྱིས་གནས་མལ་བཤམ་པ་ལ་ སོགས་པ ་འདུ་བ་དང་འབྲེལ་བའི་ལས་ཞེས་བྱ་བའི་དོན་ཏོ། །དགེ་འདུན་གྱི་གནས་བརྟན་གྱིས་རིན་ཐང་གདབ་པོ་ཞེས་བྱ་བ་ནི། བཙོང་བར་བྱ་བའི་དངོས་པོ་རྣམས་ཀྱིའོ། །རིན་ཐང་ཇི་ཙམ་དུ་གདབ་པར་བྱ་ཞེ་ན། དེའི་ཕྱིར་རན་པར་རོ། །དེས་ནི་དེ་ལ་མི་དབབ་པ་ཉིད་དོ་ཞེས་བྱ་བ་ནི། རིན་ཐང་བཏབ་པ་དེས་ནི་དགེ་འདུན་གྱི་གནས་བརྟན་དེ་ལ་རྫས་དེ་ཉོ་བ་དང་དེའི་རིན་ཐང་གཞལ་བ་མི་དབབ་པ་ཉིད་དོ། །ཡང་མི་འབྱུང་བར་ངེས་པར་བྱས་ནས་བསྐྱེད་པ་ལ་དབབ་བོ་ཞེས་བྱ་བ་ནི་གལ་ཏེ་སླར་མི་བསྐྱེད་ཅེས་བྱ་བ་ངེས་པར་གྱུར་ན་དེ་ལ་ཡང་དབབ་པ་ཉིད་ཡིན་ནོ། །མི་ཉོ་བས་བསྐྱེད་པར་མི་བྱའོ། །བུད་མེད་ནི་མི་བྱའོ་ཞེས་བྱ་བ་ནི། རིན་ཐང་དེ་ལྟར་བསྐྱེད་པར་མི་བྱའོ། །རིན་མ་ཕུལ་གྱི་བར་དུ་སྤྱད་ པ་དང་བྱི་དོར་ཡང་མི་བྱའོ་ཞེས་བྱ་བ་ནི། བཀྲུ་བ་དང་ཁ་བསྒྱུར་བ་ལ་སོགས ་པའི་བྱི་དོར་ཡང་མི་བྱའོ་ཞེས་བྱ་བའི་དོན་ཏོ། །བགོ་
སྐལ་ པ་རྣམས་མང་བ་ཉིད་ཡིན་ན་བཅུ་ལ་སོགས ་པའི་ཚོམས་ཀྱིས་བགོ་བར་བྱའོ་ཞེས་བྱ་བ་ལ། འདིར་བགོ་སྐལ་པ་རྣམས་ཀྱི་སྒྲ་ནི་ཚོམས་བརྗོད་པའོ། །ཕོག་པ་མ་བགོས་པར་ཚོམས་ལས་འགའ་ཞིག་ཤི་ན་དེའི་སྐལ་བ་ཚོམས་དེ་པ་དབང་བ་ཉིད་ཡིན་ནོ་ཞེས་བྱ་བ་ནི་ཚོགས་ལ་ཕུལ་བ་དེའི་ཆ་མ་བསྒོས་པར་ཚོགས་དེར་འགའ་ཞིག་ཤི་ན། འགའ་ཞིག་ཤི་བ་དེའི་སྐལ་པ་གང་ཞིག་ཐོབ་པའི་སྐལ་པ་དེ་ལ་ཚོགས་གང་ཞིག་འབྱུང་བ་རྣམས་ལ་དེ་དབང་བ་ཉིད་ཡིན་ནོ། །བགོས་པའི་འོག་ཏུ་ཤི་ན་ནི་དེའི་སྐལ་བ་མཚམས་སུ་གཏོགས་པའི་རབ་ཏུ་བྱུང་བ་ཚངས་པ་མཚུངས་པར་སྤྱོད་པ་རྣམས་ཀྱིས་ཤི་བའི་ཡོ་བྱད་དུ་བྱིན་གྱིས་བརླབ་པར་བྱའོ། །མྱ་ངན་ལས་འདས་བའི་བསམ་པས་རབ་ཏུ་བྱུང་ཞིང་ཚུལ་ཁྲིམས་དང་ལྡན་པ་ལ་ནི་གོས་སྟོང་ཕྲག་བརྒྱ་པ་དང༌། ཁ་ཟས་རོ་བརྒྱ་པ་དང༌། ཁང་པ་བརྩེགས་པ་ལྔ་བརྒྱ་པ་ཡང་འོས་སོ། །དགེ་འདུན་གྱི་རྫས་ཀྱང་ངོ་ཞེས་བྱ་བར་ཡང་འོས་སོ་ཞེས་བྱ་བར་ཡང་སྦྱར་རོ། །དགེ་འདུན་གྱི་རྫས་རྣམ་པ་ཇི་ལྟ་བུ་ཞིག་ཡིན་ཞེ་ན། དེའི་ཕྱིར་མི་སློབ་པ་མན་ཆད་ཀྱིའོ་ཞེས་བྱ་བ་སྨོས་ཏེ། མི་སློབ་པའི་དགེ་འདུན་མན་ཆད་ཀྱི་རྫས་དེ། ཇི་སྲིད་དུ་དགྲ་བཅོམ་པའི་དགེ་འདུན་དབང་བའི་རྫས་ཀྱང་འོས་པ་ཡིན་ནོ་ཞེས་བྱ་བའི་དོན་ཏོ། །རྣམ་པ་གང་ལ་ཞེ་ན། ཚུལ་ཁྲིམས་དང་ལྡན་པ་ལ་ནི་ཞེས་བྱ་བ་སྨོས་སོ། །སོ་སོའི་སྐྱེ་བོ་ལ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲས་འཕགས་པ་འབའ་ཞིག་ལ་འོས་པར་ནི་མ་ཟད་དོ་ཞེས་བྱ་བ་བསྟན་ཏོ། །ཚུལ་ཁྲིམས་འཆལ་བ་ལ་ནི་མ་ཡིན་ནོ་ཞེས་བྱ་བ་ནི་དགེ་འདུན་གྱི་རྫས་འོས་པ་མ་ཡིན་པའོ་ཞེས་སྨོས་པའི་ཚིག་གི་ལྷག་མའོ། །ལེ་ལོ་ཅན་ལ་ནི་བླངས་པ་དང་ཉེ་བར་སྤྱད་པ་བུ་ལོན་དུ་འགྱུར་རོ་ཞེས་བྱ་བ་ནི། ཚུལ་ཁྲིམས་འཆལ་པ་ལ། རྣམ་པ་ཐམས་ཅད་དུ་མི་འོས་པའི་ཕྱིར་རོ། །དེ་ནི་ཚུལ་ཁྲིམས་དང་ལྡན་པ་ལ་རིག་པར་བྱའོ། །མཚམས་ཀྱི་ནང་ཉིད་ན་གང་ཟག་གི་གཙུག་ལག་ཁང་ངམ་དེའི་རྙེད་པས་འཚོ་བ་ལ་ནི་དགེ་འདུན་གྱི་རྙེད་པ་འོས་སོ་ཞེས་བྱ་བ་ནི་གང་ཟག་གི་གཙུག་ལག་ཁང་ཡོད་པ་དེ་རྙེད་པས་འཚོ་བའོ། །གཙུག་ལག་ཁང་དེའི་མཚམས་ཀྱི་ནང་རོལ་དུ་རྙེད་པ་དེ་འོས་པ་ཡིན་ཏེ། ཇི་ལྟར་འགའ་ཞིག་གཙུག་ལག་ཁང་འདི་ལ་སུ་གནས་པ་དེ་ལ་རྙེད་པ་འདི་ཙམ་ཞིག་ཁུད་པར་འབུལ་ལོ་ཞེས་དེའི་རྣམ་པ་ན་རྙེད་པ་དེའོ། །དེ་བས་ན་འདི་ལ་དགེ་འདུན་གྱིས་བགོ་བར་བྱ་བ་མ་ཡིན་ཏེ་
རྙེད་པ་བྱུང་ནའོ། །ངེས་པའི་གནས་ཁང་ན་ཡང་ངོ་ཞེས་བྱ་བ་ནི། རྙེད་པས་འཚོ་ཞིང་དགེ་འདུན་གྱི་རྙེད་པ་ལ་འོས་པའོ། །དེ་རེ་མོས་བསྐོའོ་ཞེས་བྱ་བ་ནི་རྙེད་པ་ངེས་པའི་གནས་ཁང་དེ་ཇི་ལྟར་བསྐྱེད་པ་ཉིད་ཀྱིས་ཞེས་བྱ་བ་དེ་འདིར་ཐམས་ཅད་དུ་ཇི་ལྟར་བསྐྱེད་པ་ཞེས་བྱ་བ་འདི་ལས་གྲུབ་པ་རིག་པར་བྱའོ། །ལྕགས་ལས་བྱས་པའི་སྣོད་སྤྱད་དག་ལས་ལྷུང་བཟེད་དང་ལྷུང་བཟེད་ཆུང་ངུ་དང་ཚ་སྣོད་དང་ཟོ་ཕོར་དང་ལྡེ་མིག་ཀྱོག་པོ་དང་གྲི་གུ་དང་ཁབ་དང་སེན་མོ་གཅོད་པ་དང༌། ནལ་ཟེ་དང་ཐལ་ཕྱགས་དང་སྟེ་རེ་དང་སླང་ང་དང་ཕོར་བུ་དག་ནི་བགོ་བར་བྱ་བ་ཉིད་དོ། །སའི་སྣོད་སྤྱད་དག་ལས་ནི་ལྷུང་བཟེད་དང་ལྷུང་བཟེད་ཆུང་ངུ་དང་སླང་ང་དང་བུམ་པ་དང་བྱ་མ་བུམ་དང༌། གཞོང་པ་དང་རིལ་བ་སྤྱི་བླུགས་དང་ཆུ་སྣོད་རྣམས་སོ་ཞེས་བྱ་བ་ནི་བགོ་བར་བྱ་བ་ཉིད་དོ་ཞེས་བྱ་བར་སྦྱར་རོ། །ཁྲི་ནི་རིན་པོ་ཆེ་ལས་བྱས་པ་ལ་ སོགས་པ ་མན་ཆད་ནས་ལྕགས་ལས་བྱས་པའི་བར་དག་གོ་ཞེས་བྱ་བ་ནི། ཁྲི་རིན་པོ་ཆེ་ལས་བྱས་པ་ནས་ལྕགས་ལས་བྱས་པའི་བར་ཡན་ཆད་བགོ་བར་བྱ་བ་ཉིད་ཡིན་ནོ། །ཇི་ལྟར་བགོ་བར་བྱ་ཞེ་ན། དེའི་ཕྱིར་ཞེས་བྱ་བ་སྨོས་ཏེ། རིན་དུ་བཙོངས་ཏེ་བགོ་བར་བྱ་བའི་དོན་ཏོ། །ཤིང་ལས་བྱས་པ་ནི་ཡིན་ནོ་ཞེས་བྱ་བ་ནི་ཁྲི་ནི་བགོ་བར་བྱ་བ་ཉིད་མ་ཡིན་ནོ། །ཚོན་རྩི་ནི་ལྔ་ལས་གཞན་པའོ་ཞེས་བྱ་བ་ནི་ཚོན་ཆེན་པོ་ལྔ་ལས་གཞན་པ་དག་བགོ་བར་བྱ་བ་ཉིད་དོ། །ཚོན་ཆེན་པོ་རྣམས་ཐམས་ཅད་ཀྱི་ལྔ་པོ་ཉིད་ནི་དཔེ་ཙམ་ཡིན་ཏེ། འདིར་བསྡུས་པ་ཉིད་དུ་རིག་པར་བྱའོ། །ཅི་གནས་སྐབས་ཐམས་ཅད་དམ་ཞེ་ན། དེའི་ཕྱིར་མ་བསྐོལ་བའོ་ཞེས་བྱ་བ་སྨོས་ཏེ་བཀོལ་བ་ནི་ཁ་བསྒྱུར་བར་བྱ་བ་ལ་སྦྱར་བར་བྱ་བ་ཉིད་དོ་ཞེས་བྱ་བའི་དོན་ཏོ། །ཁ་བསྒྱུར་བར་བྱ་བ་གང་ལ་སྦྱར་བར་བྱ་ཞེ་ན། དེའི་ཕྱིར། དགེ་འདུན་གྱི་ལའོ། །ཀུན་དགའ་ར་བ་དང་གཙུག་ལག་ཁང་དང་དེ་དག་གི་གཞི་དང་གནས་མལ་དག་ནི་བཙོང་བར་བྱ་བ་ཡང་མ་ཡིན་ནོ་ཞེས་བྱ་བ་སྨོས་ཏེ། ཡང་ཞེས་བྱ་བའི་སྒྲས་ནི་བགོ་བར་བྱ་བ་ཡང་མ་ཡིན་པར་བསྟན་ནོ། །དེ་དག་གི་གཞི་དང་ཞེས་བྱ་བ་ནི་ཀུན་དགའ་ར་བ་དང་གཙུག་ལག་ཁང་གིའོ། །གཞག་པར་བྱ་བ་ཉིད་མ་ཡིན་ནོ་ཞེས་བྱ་བ་ནི་དེ་དག་གཏར་གཞག་པ་ཉིད་ཀྱང་མ་ཡིན་ཞེས་བྱ་བའི་དོན་གྱིས་ཤེས་པར་བྱའོ། །བྱིན་གྱིས་བརླབ་པར་བྱ་བ་ཉིད་མ་ཡིན་ནོ་ཞེས་བྱ་བ་ནི་གང་ཟག་དང་འབྲེལ་པ་ཉིད་ཀྱིས་སྙམ་དུ་དོན་གྱིས་ཤེས་པར་
བྱའོ། །ཕ་མ་ལ་ཟས་དང་གོས་ཀྱིས་གཏང་བར་བྱའོ་ཞེས་བྱ་བ་སྨོས་ན། ཇི་ལྟར་གཏང་བར་བྱ་ཞེ་ན། དེའི་ཕྱིར། གལ་ཏེ་ལྷུང་བཟེད་དང་ཆོས་གསོ་ལས་ལྷག་པའི་རྙེད་པ་མེད་པ་ན་བསླངས་ཏེའོ། །མ་གྲུབ་ན་ཟན་གྱི་སྐལ་བ་ལས་ཕྱེད་སྦྱིན་ནོ་ཞེས་བྱ་བ་ལ། མ་གྲུབ་ན་ཞེས་བྱ་བ་ནི་བསླངས་པ་ལ་དེ་རུང་བའི་གང་ཟག་མ་བརྗོད་པའམ། བསླང་བར་མི་ནུས་བ་ལ་རྙེད་ པ་སྟེ། ཕྲན་ཚེགས་ཀྱི་གཞི་ལ་སོགས ་པར་གཏོགས་པའོ། །བྱེ་བྲག་ཤེས་པར་བྱ་བའི་ཕྱིར་ཆོས་གོས་དག་ལ་ཐིག་ལེ་བྱའོ་ཞེས་བྱ་བ་ནི་མི་ནོར་བར་བྱ་བའི་ཕྱིར་མཚན་མ་འདིའོ། །སྲི་ཥུ་སྲི་ཥུ་སྲི་ཥུ་ཆག་ཆག་འདེབས་པར་བྱེད་པའོ་ཞེས་འདིར་ཟུར་ཆག་པའི་ཁམས་སོ། །འདིར་གཞུང་ནི་དགེ་སློང་དག་ཁྱེད་ཀྱིས། དགེ་སློང་མཛེས་དགའ་བོའི་ཆོས་གོས་དག་ལ་ཐིག་ལེ་བྱོས་ཤིག་དང་འདི་ནི་མཛེས་དགའ་བའོ། །འདི་ནི་བཅོམ་ལྡན་འདས་སོ་ཞེས་ཤེས་པར་འགྱུར་རོ་ཞེས་བྱ་བ་གསུངས་པ་ཡིན་ནོ། །དེ་དག་ལ་མཚན་མ་གདབ་བོ་ཞེས་བྱ་བ་ལ། དེ་དག་ལ་ཞེས་བྱ་བ་ནི་ཆོས་གོས་དེ་དག་ལའོ། །སྣག་ཚའི་ཐིག་ལེ་ནི་དེས་ཞེས་བྱ་བའོ་ཞེས་བྱ་བ་ལ། དེས་ཞེས་བྱ་བ་ནི་མཚན་མ་གདབ་པ་དེའོ། །ལུང་དག་ཀྱང་ངོ་ཞེས་བྱ་བ་ནི་ཆོས་གོས་དག་ལ་གདགས་སོ་ཞེས་པར་སྦྱར་རོ། །ཁ་ཚར་དང་ཕུན་ཚར་གྱི་མཐའ་རང་ཆག་བྱའོ། །སྣམ་སྤྱར་མ་ཡིན་པ་དག་ལ་དྲས་ཏེ་བྱིན་གྱིས་བརླབ་པར་ངེས་པ་མེད་དོ་ཞེས་བྱ་བ་ནི། དྲས་ཤིང་དྲུབས་པ་ཆོས་གོས་ཉིད་དུ་བྱིན་གྱིས་བརླབ་པར་བྱའོ་ཞེས་བྱ་བ་ལས་སྣམ་སྦྱར་གྱི་ཆོ་ག་གང་ཞིག་མི་འདོད་པ་འདི་དང་འདྲ་བའི་དབྱེ་བས་སོ། །རྐྱེན་དེ་ལྟ་བུ་དག་ལ་དེ་དང་དེའི་རྒྱན་མེད་ན་གཞན་ལ་དངོས་གཞིའི་རྙེད་པ་མ་གྲུབ་པ་ལ། གདོད་ཁས་བླངས་པ་དབུལ་བ་ཞེས་བྱ་བ་ནི་ཕམ་དག་རུང་བའི་བསམ་པས་དྲས་ཤིང་དྲུབས་པ་མ་ཡིན་པ་ལ་ཡང་དེ་ཡོད་པར་འགྱུར་ཞེས་བྱ་བ་དེ་བས་ན་དེ་ལ་འདི་བྱེད་པའོ། །འདིར་གཞུང་ནི་བཙུན་པ་ཆོས་གོས་མ་དྲས་པ་བྱིན་གྱིས་བརླབ་ཏུ་རུང་ངམ། ཉེ་བ་འཁོར་མི་རུང་ངོ༌། །རྐྱེན་དེ་ལྟ་བུ་དག་ན་ནི་རུང་ངོ་ཞེས་གསུངས་པ་ཡིན་ནོ། །འདི་ལྟར་འདིར་ཆོས་གོས་གསུངས་པ་ནི་སྣམ་སྦྱར་ཁོ་ན་ཡིན་པར་རྣམ་པར་གནས་པའི་ཕྱིར་རོ། །དེར་ཇི་ལྟར་མངོན་ཞེ་ན། འདི་ལྟར་བློ་གོས་དང་མཐང་གོས་གཉིས་མ་དྲས་པ་གང་ཡིན་པ་དེས་ནི་ཆ་ལུགས་རྫོགས་པའི་ཕྱིར་རོ། །མ་མོས་ལས། སྣམ་སྦྱར་འདི་དྲ་བར་བྱའོ། །བླ་གོས་ནི་ངེས་
པ་མེད་པ་དང༌། མཐང་གོས་ཀྱང་ངེས་པ་མེད་དོ་ཞེས་གསུངས་པ་ཡིན་ནོ། །རྐྱེན་དེ་ལྟ་བུ་དག་མེད་པར་མ་དྲས་པ་དེས་གྲོང་དང་ཁྱིམ་གཞན་དག་ཏུ་འདུག་པ་དང་འཇུག་པར་མི་བྱའོ་ཞེས་བྱ་བ་ལ། དེས་ཞེས་བྱ་བ་ནི་སྣམ་སྦྱར་དེས་སོ། །འདིར་གཞུང་ནི། བཙུན་པ་ཆོས་གོས་མ་དྲས་པས་གྲོང་ཁྱེར་དུ་འཇུག་པར་རུང་ངམ་ཞེས་བྱ་བ་ལ་ སོགས་པའོ། །འདིར་སྣམ་སྦྱར་གྱི་དགོངས་པ ་ཡང་ལུང་དང་རིགས་པ་འདི་དང་སྔ་མ་གཉིས་ཀྱིས་ནི་འདིར་ཆོས་གོས་ཞེས་སྨོས་པ་ནི་སྣམ་སྦྱར་ཡིན་བར་དགོངས་པར་རིགས་སོ། །དེ་བས་ན་འདི་ལྟར་འདིར་མདོར་བྱས་པའོ། །མུ་སྟེགས་ཀྱི་འཇུག་གནས་སུ་ཡང་དེ་བཞིན་ནོ་ཞེས་བྱ་བ་ནི་རྐྱེན་དེ་ལྟ་བུ་མེད་པར་སྣམ་སྦྱར་མ་དྲས་པ་དེས་མུ་སྟེགས་ཅན་གྱི་འདུག་གནས་སུ་འཇུག་པ་དང་འདུག་པར་མི་བྱ་སྟེ། ཉེ་བར་ཞུགས་པའི་ཆོ་ག་འདི་འདུག་གནས་དེ་ན་མུ་སྟེགས་ཅན་དག་ཉེ་བར་མི་འཁོད་ཀྱང་མངོན་པར་འདོད་པ་ཡོད་བཞིན་དུ་དཔེར་བྱས་སོ། །འཁོད་ན་འདུག་པ་དང་འཇུག་པར་མི་བྱའོ་ཞེས་བྱ་བ་ནི་རྐྱེན་དེ་ལྟ་བུ་དག་ཡོད་ཀྱང་མུ་སྟེགས་ཅན་གྱི་འདུག་གནས་དེར་འདུག་པར་མི་བྱའོ་ཞེས་བྱ་བའི་དོན་ཏོ། །འདི་ལྟར་ཆོས་གོས་མ་དྲས་པ་ནི་ཀུན་དུ་རྒྱུ་ལ་ སོགས་པ ་མུ་སྟེགས་ཅན་རྣམས་ཀྱི་གོས་དང་འདྲ་བ་བསྟེན་པས་དེར་ཞུགས་པ་དང་འདུག་པར་འགྱུར་བ་གང་ཡིན་པ་དེའི་ཕྱོགས་ཀྱི་ནང་དུ་བསྟེན་པ་ཡིན་པར་དོགས་པར་འགྱུར་བས་ན་འདིར་དེ་དག་ག་པར་མཛད་དོ། །འདིར་གཞུང་ནི་བཙུན་བ་ཀུན་དུ་རྒྱུའི་འདུག་གནས་སུ་སྣམ་སྦར་མ་མཆིས་པར་མ་ཆིར་རུང་ངམ། ཉེ་བ་འཁོར་མི་རུང་ངོ༌། །གལ་ཏེ་ཀུན་དུ་རྒྱུ་དག་ཕྱི་རོལ་དུ་བྱུང་བར་གྱུར་ན་ནི་རུང་ངོ་ཞེས་བྱ་བ་ཡིན་ནོ། །སྤུ་ཅན་ཆོས་གོས་གསུམ་ཉིད་དུ་བྱིན་གྱིས་མི་བརླབ་བོ། །དེ་བགོ་བའི་ཆོས་གོས་སུན་མི་བསྟེན་ནོ་ཞེས་བྱ་བ་སྤུ་ཅན་དེ་བགོ་བར་མི་བྱའོ། །སེང་བདག་བདག་གིར་བྱའོ་ཞེས་བྱ་བ་ནི་རུང་བར་བྱ་སྟེ་བཅང་བ་ལ་འདིར་བདག་གིར་བྱའོ་ཞེས་བྱ་བའི་སྒྲས་གསུངས་སོ། །དེའི་རྣམ་པ་བཞིའོ་ཞེས་བྱ་བ་ནི་སེང་བ་དེའོ། །བཞི་གང་ཞེ་ན། དེའི་ཕྱིར་བལ་ལས་བྱས་པ་དང་ཟར་མ་ལས་བྱས་པ་དང་དུ་གུ་ལ་ལས་བྱས་པ་དང་རས་བལ་ལས་བྱས་པས་སོ་ཞེས་བྱ་བ་སྨོས་ཏེ། འདི་ལ་ལེགས་པར་མ་ཡིན་པའི་ངོ་བོ་ཉིད་དུ་ཚོགས་ལ་ སོགས་པ ་རྣམས་སུ་འགྱུར་རོ། །དེ་བས་ན་གཞན་མི་རུང་བ་ནི་མ་ཡིན་མོད་ཀྱི་འདིར་རྣམ་པ་བཞི་སྨོས་པ་
མཐོང་བ་ཡིན་ནོ། །སྤུ་དམའ་བ་ལ་ སོགས་པ ་རས་ཀྱི་རྣམ་ པ་ཡང་བ་གཞན་དག་ཀྱང་ངོ་ཞེས་བྱ་བ་ཡང༌། སྤུ་དམའ་བ་ལ་སོགས ་པའི་རྣམས་ལ་ཡང་ངོ༌། །གཞན་དག་ཀྱང་ངོ་ཞེས་བྱ་བ་ནི་དེ་ལྟ་བུའི་སྤུ་ཅན་ལ་ སོགས་པ ་ལ་འདི་ལྟར་བརྒལ་བར་བྱས་པ་རྣམས་ལ་ངོ་བོ་བསྟན་པར་བྱེད་དེ་སྤུ་དམའ་བ་ལ་ སོགས་པ ་ཞེས་བྱ་བའི་མཐར་ཐུག་པ་དེ་བཟུང་བ་ཡིན་ནོ། །ལ་བ་ཡང་ངོ་ཞེས་བྱ་བ་ཡང་བདག་གིར་བྱར་རུང་ངོ་ཞེས་བྱ་བའི་ལྷག་མའོ། །དེ་སྤུ་དམའ་བ་མ་ཡིན་པའི་ཕྱིར་བརྩམས་སོ། །གནོད་པ་མེད་ན་སྤུ་ཕྱིར་བསྟན་ཏེ་བགེ་བར་མི་བྱ་སྟེ། གཞན་དུ་ནའོ་ཞེས་བྱ་བ་ལ། གནོད་པ་མེད་ན་ཞེས་བྱ་བ་ནི་དྲི་མ་དང་ཤིག་ལ་ སོགས་པ ་རྣམས་ཀྱིས་སོ། །འདིར་གཞུང་ནི། །དྲི་མ་ཅན་དང་ཤིག་ཅན་ལ་ལྟུང་བ་མེད་དོ་ཞེས་གསུངས་པ་ཡིན་ཏེ། དེ་ཡང་དཔེ་ཙམ་དུ་རྣམ་པར་གནས་པ་ཡིན་ནོ་ཞེས་བྱ་བ་ནི་ཐམས་ཅད་བསྙེགས་པར་བྱས་པ་ཡིན་ནོ། །དེ་ཞེས་བྱ་བ་ནི་ལ་བདེའོ། །གཞན་དུ་ན་ཞེས་བྱ་བ་ནི་སྤུ་མེད་པ་གྱོན་པ་ལ་གནོད་པ་མེད་པའོ། །དེ་དེ་བཞིན་དུ་གྱོན་པས་འཆག་པར་མི་བྱའོ་ཞེས་བྱ་བ་ལ། དེ་བཞིན་དུ་ཞེས་བྱ་བ་ནི་ཕྱིར་བཟློག་ཏུའོ། །འདི་ནི་གནོད་པ་ཡོད་ན་ཞེས་བྱ་བ་དམིགས་ཀྱིས་བསལ་ལོ། །འདིར་གཞུང་ནི། བཅོམ་ལྡན་འདས་ཀྱིས་དགེ་སློང་གིས་ལ་བ་སྤུ་ཕྱིར་བསྟན་ཏེ་བགོ་བར་མི་བྱའོ་ཞེས་གསུངས་པ་དང༌། དགེ་སློང་དག་གིས་བ་གླང་རྫིའི་ཁྱིམ་ནས་ལ་བའི་གོས་དག་རྙེད་ནས་དེ་དགེ་སློང་དེ་དག་ཤིག་མང་བས་ཤིག་དག་གིས་ཟོས་པ་ན་མོས་པར་མ་གྱུར་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་ནས་བཀའ་སྩལ་པ། ལ་བ་སྤུ་ཕྱིར་བསྟན་ཏེ་གྱོན་ལ་འདུག་པར་བྱ་ཞིང་ཉལ་བར་ཡང་བྱའོ། །བཅག་པར་མི་བྱའོ་ཞེས་གསུངས་པ་ཡིན་ནོ། །པར་སིག་གི་ལ་བ་དང༌། བེའུ་ཕྲུག་དང༌། བར་ཐང་ཁྲ་བོ་གང་ཞག་གིས་བདག་གིར་མི་བྱའོ་ཞེས་བྱ་བ་ནི་རྙེད་པ་རྙེད་པ་ཡང་བྱེ་བྲག་མེད་པར་རྟོགས་པའོ། །འཆག་སར་པར་ཐང་གདིང་བ་མནོད་པར་བྱའོ་ཞེས་བྱ་བ་ལ། གལ་ཏེ་ཁྲ་བོ་ཡིན་ན་བདག་གིར་མི་བྱའོ། །གལ་ཏེ་མ་ཡིན་ན་ཅི་དགར་བྱའོ། །ཁྲ་བོ་བག་གིར་བྱེད་པ་བཀག་པ་ཡིན་པར་རྟོགས་པར་བྱའོ། །རྟག་ཏུ་མལ་གཅིག་ཏུ་བཅག་པར་མི་བྱའོ་ཞེས་བྱ་བ་ནི་པར་ཐང་གིའོ། །ནུས་པ་ཉིད་ཡིན་ན་བཙེམས་པ་དང་ལྷན་པ་རིང་པོར་གླན་པས་ཕྱིར་བཅོས་པར་
བྱའོ། །མི་ནུས་པ་ཉིད་ན་འཆགས་པ་དེ་ཉིད་དུ་ལྕི་བ་དང་ས་ས་བྱུག་པར་བྱའོ་ཞེས་བྱ་བ་ནི་གཞན་བཅང་བར་བྱའོ་ཞེས་བྱ་བ་ནི་སྤུ་ཅན་ནས་བརྩམས་ཏེ་འདི་རྣམས་ལས་གཞན་སྤུ་ཅན་ཇི་ལྟར་བཅང་བར་བྱ་བ་ཞེ་ན། དེའི་ཕྱིར་སྦྱིན་བདག་ལ་ཡིད་བརྟེན་པས་སོ་ཞེས་བྱ་བ་སྨོས་ཏེ། དེ་དབང་བའི་བསམ་པས་དེ་ལ་ཡིད་བརྟན་ཏེ་ལོངས་སྤྱོད་པ་ཉིད་ལ་མངོན་བར་བརྟེན་ནས་ཞེས་བྱ་བའི་དོན་ཏོ། །སྣམ་སྦྱར་དང་བླ་གོས་དང༌། མཐང་གོས་དང༌། ཤམ་ཐབས་དང༌། ཤམ་ཐབས་ཀྱི་གཟན་དང༌། རྡུལ་གཟན་དང༌། རྡུལ་གཟན་གྱི་གཟན་དང༌། གདོང་ཕྱིས་དང༌། རྣག་གཟན་དང༌། གཡན་བ་དགབ་བ་དང༌། སྐྲ་བཟེད་དང༌། གདིང་བ་དང༌། དབྱར་གྱི་གོས་རས་ཆེན་བཅང་བར་བྱའོ་ཞེས་བྱ་བ་ནི་ཡོ་བྱད་བཅུ་གསུམ་པོ་དེ་དག་བཅང་བར་བྱ་སྟེ། ཆོས་གོས་གནང་བ་དེ་ཉིད་དུ་བྱིན་གྱིས་བརླབས་ཏེ་བཅང་བར་བྱའོ་ཞེས་བྱ་བ་ལ། དེ་ཉིད་དུ་ཞེས་བྱ་བ་ནི་གང་ཞིག་ཆོས་གོས་དེ་ཉིད་དང༌། དབྱར་གྱི་གོས་རས་ཆེན་ལ་ སོགས་པ ་དེའི་དངོས་པོར་དེ་གནང་བའོ། །སྣམ་སྦྱར་ལ་སོགས་པའི་གོས་གནང་བ་དག་སྣམ་སྦྱར་ལ་ སོགས་པ ་དེ་ཉིད་ཀྱི་མིང་དུ་བྱིན་གྱིས་བརླབས་ཏེ་བཅང་བར་བྱའོ། །དེ་དག་གི་སྔགས་ནི། ཚེ་དང་ལྡན་པ་དགོངས་སུ་གསོལ་བདག་མིང་འདི་ཞེས་བྱ་བའི་ཆོས་གོས་བགྱིས་ལགས་པ་རུང་བར་སྤྱད་པར་འོས་པ་འདི་ཆོས་གོས་སྣམ་སྦྱར་དུ་བྱིན་གྱིས་བརླབ་པོ། །ལན་གསུམ་བཟླས། དེ་བཞིན་དུ་བླ་གོས་ནས་དབྱར་གྱི་གོས་རས་ཆེན་གྱི་མཐར་ཐུག་པ་རྣམས་ལ་ཡང་བརྗོད་པར་བྱའོ། །ཡོ་བྱད་ཀྱི་གོས་ཀྱང་ངོ༌། །དེ་ནི་དཀར་པོ་ཉིད་དང༌། ཁ་ཚར་དང༌། ཕུན་ཚར་དང་བཅས་པ་ལ་ཡང་ཉེས་པ་མེད་དོ་ཞེས་བྱ་བ་ལ། དེ་ནི་ཞེས་བྱ་བ་ནི་ཡོ་བྱད་ཀྱི་གོས་འཆང་བ་དེའོ། །དགེ་འདུན་གྱི་ཡང་ངོ་ཞེས་བྱ་བ་ནི་ཡོ་བྱད་ཀྱི་གོས་ཀྱང་དཀར་པོ་དང༌། ཁར་ཚར་དང་ཕུན་ཚར་དང་བཅས་པ་འཆང་བ་ལ་ཡང་ཉེས་པ་མེད་པའོ། །འདིར་གཞུང་ནི། དེ་ལྟ་བས་ན་དགེ་འདུན་གྱིས་གོས་དག་ནི་སར་པ་དང། ཁར་ཚར་དང་ཕུན་ཚར་རིང་པོ་དག་ཀྱང་བཅང་བར་གནང་ངོ་ཞེས་གསུངས་པ་ཡིན་ནོ། །གཞན་དུ་མ་ཡང་རུང་བར་བྱ་སྟེ་བཅང་བར་བྱའོ་ཞེས་བྱ་བ་ནི་འདིར་འཆང་བའི་ཉེས་པ་མེད་པར་རྗེས་སུ་གནང་བར་བྱས་སོ། །སྐྱོན་མང་པོ་མཐོང་བ་མི་རིགས་པའི་བློ་ལ་འབབ་སྟེ། དེ་བཟློག་པའི་དོན་དུ་
དེའོ། །སེམས་མི་བརྟན་པ་ལ་རུང་བར་མི་བྱའོ། བསྙེན་པར་མ་རྫོགས་པ་ལ་མི་བྱའོ་ཞེས་བྱ་བ་ལ་འདིར་གཞུང་ནི། དགེ་སློང་དག་དགེ་ཚུལ་ལ་གོས་དག་ཏུ་རུང་བར་བྱེད་ན། དེས་གོས་ཀྱི་ཕྲེང་བ་ཕུལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། བསྙེན་པར་མ་རྫོགས་པ་ལ་གོས་དག་རུང་བར་མི་བྱའོ་ཞེས་གསུངས་པ་ཡིན་ནོ། །མངོན་སུམ་དུ་མི་བྱའོ་ཞེས་བྱ་བ་ནི། གང་ལ་རུང་བར་བྱ་བ་དེའི་མངོན་སུམ་དུ་རུང་བར་མི་བྱའོ། །ཡུལ་གཞན་དུ་གནས་པར་གྱུར་པ་ཉིད་ཡིན་ན་ཡང་རུང་བ་མི་ཉམས་སོ། །ཤིན་ཉམས་སོ་ཞེས་བྱ་བ་ནི་གང་གི་མིང་གིས་རུང་བར་བྱ་བ་དེ་ཡུལ་གཞན་དུ་གནས་པར་གྱུར་ཀྱང་རུང་སྟེ། དེ་མི་ཉམས་སོ། །གང་ལ་རུང་བར་བྱས་པ་དེ་ཤིན་ཏུ་རུང་བར་ཉམས་པའོ། །ཅི་གང་གི་ཚེ་ཤི་བ་དེའི་ཚེ་ཁོ་ན་ན་དེ་ཉམས་སམ་ཞེ་ན། དེའི་ཕྱིར་ཤེས་ནའོ་ཞེས་བྱ་བ་སྨོས་ཏེ། དེ་ཤི་བར་ཤེས་ནའོ། །འདི་ལ་རུང་བར་བྱེད་པ་བདག་ཉིད་དོ་ཞེས་བྱ་བ་ནི་རུང་བར་བྱས་པའི་དངོས་པོ་འདི་ལ་གང་ཞིག་རུང་བར་བྱེད་པའོ། །སྤངས་པ་བདག་གིར་མི་བྱའོ་ཞེས་བྱ་བ་ནི་དགེ་འདུན་གྱིས་སམ་གང་ཟག་གིས་སོ། །དགེ་སློང་ལ་སྤང་བར་བྱའོ་ཞེས་བྱ་བ་ནི་དགེ་འདུན་ལ་ནི་མ་ཡིན་ནོ། །མི་གསལ་བ་ལ་ཡང་མི་བྱའོ། །མ་བྱིན་པར་ནི་བླང་ངོ་ཞེས་བྱ་བ་ནི་སྤངས་པའི་གོས་གང་ལ་དེས་ཕྱིར་མ་བྱིན་ན་སྤོང་བར་བྱེད་པས་ཕྱིར་བླང་བར་བྱའོ། །མཐུས་ཀྱང་དགུག་གོ་ཞེས་བྱ་བ་ནི་མ་བྱིན་ན་ཞེས་རྗེས་སྙེགས་པའི་ཕྱིར་ཀྱང་ཞེས་བྱ་བའི་སྒྲ་སྨོས་སོ། །གོས་དྲི་མ་དག་གིས་གོས་པ་བཀྲུས་ཏེ་བགོ་བར་བྱའོ། །ཕྱེ་མ་དག་གིས་ནི་སྒྲུགས་ཏེའོ་ཞེས་བྱ་བ་ནི་ཡོངས་སུ་དག་པའི་གོས་ལ་ལོང་སྤྱད་པའོ། །སྣུམ་གྱིས་ནི་རྩུབ་པར་བྱས་ཏེའོ་ཞེས་བྱ་བ་ནི་གོས་སྣུམ་གྱིས་གོས་ན་ཐལ་ཆུ་ལ་ སོགས་པས་རྩུབ་པར་བྱས་ཏེ་བགོ་བར་བྱའོ། །དེ་དག་གི་ནི་མི་སྡུག་པ ་བསལ་བ་ཡིན་གྱི། གསོག་འཇོག་ཏུ་གྱུར་པ་ནི་མ་ཡིན་ཏེ། མི་བདེན་པ་དེ་གང་ཞིག་འདིར་ཁ་ཅིག་ནི་འདོད་པ་དེ་གསོག་འཇོག་ནི་ཟས་དང་འབྲེལ་པ་ཡིན་པའི་ཕྱིར་རོ། །ཆར་འབབ་པའི་ཚེ་བླ་གབ་མེད་པར་དགེ་འདུན་གྱི་མི་བགོའོ་ཞེས་བྱ་བ་ནི་བགོ་བར་མི་བྱའོ་ཞེས་བྱ་བར་སྦྱར་རོ། །བཀྲུ་བཤལ་དང་ཚོན་དང་ལྷུང་བཟེད་ཀྱི་ལས་དང་ཤིང་གཤེག་པ་ལ་ སོགས་པ ་དེའི་ཚེ་མི་བགོའོ་ཞེས་བྱ་
བ་ནི་དགེ་འདུན་གྱི་གོས་མི་བགོ་བའོ། །ལྷན་ཅིག་ཉིད་ལ་ཞེས་བྱ་བ་མི་བགོན་ལྷན་ཅིག་དང་བྲལ་བའི་ཕྱིར་འདོམས་པ་ལ་བྱིན་པ་ནི་ཡང་དག་པ་ཉིད་ཀྱི་གྲངས་ཡིན་ནོ་ཞེས་བྱ་བ་ལ། ལྷན་ཅིག་ཉིད་ལ་ཞེས་བྱ་བ་ནི་ཁོ་བོ་ཅག་ལ་འདི་སྦྱིན་བར་བྱའོ། །འདོམས་པ་པོ་རྣམས་ཀྱིས་བྱ་བ་མ་བསྒོ་ན་གང་ཞིག་དེར་གཞན་གཅིག་གམ་དུ་མ་གྲོགས་བྱེད་པ་འདོམས་པར་བྱེད་པ་པོ་དེ་སྤངས་ནས་འདོམས་པར་བྱེད་པ་ལ་བྱིན་པ་ནི་ཡང་དག་པ་ཉིད་ཀྱི་གྲངས་དེའོ། །འདིར་གཞུང་ནི། བཙུན་པ་རེ་ཞིག་སྐྱེ་བོ་བཞིས་གོས་གཏམས་པར་གྱུར་པ་གཅིག་གིས་ལེན་ན་སྩལ་བར་བགྱིའམ། ཉེ་བ་འཁོར་སྦྱིན་བར་བྱའོ་ཞེས་གསུངས་སོ། །བྱེ་བྲག་འདི་མ་སྨོས་ཏེ། ཤུགས་ཀྱིས་འདི་ལ་ལྟ་བ་མཐོང་བ་དེ་བས་ན་འདི་སྨོས་སོ། །འདོམས་པར་བྱེད་པ་དང་བཅས་པ་ལ་མི་སྦྱིན་ནོ་ཞེས་བྱ་བ་ནི་འདོམས་པར་བྱེད་པ་མ་ཡིན་པའི་གང་ཟག་དང་ལྷན་ཅིག་ལེན་དུ་འོངས་ན་བསྐུར་བར་མི་བྱ་ཞེས་བྱ་བའི་དོན་ཏེ། དངོས་པོ་དེ་བདག་པོ་མ་ཡིན་བ་གཞན་ལ་ཡང་སྦྱིན་པར་འགྱུར་བ་དང༌། བསྐུར་བར་འགྱུར་བ་དང༌། བདག་པོ་ལ་ཞེས་བྱ་བ་ནི་དེའི་རྒྱུ་རིག་པར་བྱའོ། །སྨྱོན་པས་ཉེ་དུ་མ་ཡིན་བ་དང་དེའི་ཁྱིམ་ནས་བླངས་པ་ལ་བླང་བར་མི་བྱའོ་ཞེས་བྱ་བ་ནི་སྨྱོན་པས་རང་གི་ཉེ་དུ་མ་ཡིན་པའི་ཁྱིམ་ནས་བླངས་བ་དང༌། དེ་ལས་གཞན་བ་ཡང་རུང་སྟེ་དེས་གང་བླངས་བ་ཞེས་བྱ་བའི་དོན་ཏོ། །འདིར་གཞུང་ནི་གང་ན་པའམ་མའམ་ཕུ་ནུ་འམ་སྲིད་མོ་མངོན་པར་རང་གི་ཁྱིམ་ནས་སྦྱིན་པར་བྱེད་པ་དེ་ལས་བླང་བར་བྱའོ། །གང་ལས་བླང་བར་མི་བགྱི། གང་ན་ཕ་མ་ལ་ སོགས་པ ་མི་མངོན་བ་ནས་ནས་སོ་ཞེས་བྱ་བ་ལ་ སོགས་པ ་འདིར་གསུངས་པ་ཡིན་ནོ། །ཉེ་བ་དང་འབྲེལ་བ་དེ་ལ་ནི་སྦྱིན་པའམ་ཉེ་དུ་གང་གིས་བླངས་པའམ་ཞེས་བྱ་བ་ཡིད་ཆེས་པའི་གཙོ་བོ་ཕ་མ་ལ་ སོགས་པར་གཏམས་པ ་ཡིན་ནོ། །གསལ་ལ་མི་གསལ་གྱིས་འདིར་བྱ་བ་ཉིད་དུ་རྣམ་བར་གཞག་པས་དེ་ལྟ་བས་ན་དེ་ལྟར་ཉེ་བར་བཏགས་པའོ། །དགེ་སློང་བྲམ་ཟེའི་བུ་མོས་ཞུས་པ་ལས། མདོ་འདི་དང་ཕྱི་མ་གཉིས་རིག་པར་བྱའོ། །བུ་བསྐྲད་པ་ལས་བླང་བར་བྱའོ་ཞེས་བྱ་བ་ནི་ཕས་བུ་རེ་ཞིག་བསྐྲད་པའི་ལག་ནས་རྫས་བླང་བར་བྱ་བ་སྟེ། བུ་དེ་ཕའི་ཁྱིམ་གྱི་བདག་པོ་ལས་ཕྱིར་མི་ལྡོག་པའི་ཕྱིར་སྙམ་དུ་དགོངས་པའོ། །དུར་ཁྲོད་ནས་ཕྱིར་ཟློག་པ་ལ་ཡང་ངོ་
ཞེས་བྱ་བ་ནི་ཟློག་པ་བླང་བར་བྱའོ། །དུར་ཁྲོད་པས་ནི་གཙུག་ལག་ཁང་དུ་འཇུག་པར་བྱ་བ་ཉིད་དང་བཟའ་བར་བྱ་བ་ཉིད་མ་ཡིན་ཏེ། གཙུག་ལག་ཁང་དུ་གནས་པ་རྣམས་ཀྱིས་ཞེས་བྱ་བ་གཞན་ལ་བླང་བར་བྱ་བ་ཉིད་འདི་ལ་བསམ་པར་བྱེད་པ་རྣམས་ལ་འདི་སྨོས་སོ། །ཕྱིར་འགུགས་ན་སྦྱིན་པར་བྱའོ་ཞེས་བྱ་བ་ནི་དུར་ཁྲོད་ནས་ཕྱིར་བཟློག་པ་རྙེད་པ་ལའོ། །དམན་ལ་མངོན་པར་ཞེན་པ་འདི་ལྟ་བུ་མ་ཡིན་པ་གཞན་ལ་དེ་བས་ན་འདི་མ་གྲུབ་པ་ཉིད་སྨོས་པར་རིག་པར་བྱའོ། །ཡང་རྙེད་ན་བླང་ངོ་ཞེས་བྱ་བ་ནི་གོ་སྐབས་དབྱེ་བའམ་ཕུལ་བ་དེ་བླང་བར་བྱ་སྟེ། དེ་ནི་དེས་ཁྲོ་བ་མི་བརྟན་པར་བྱས་པར་འགྱུར་རོ་ཞེས་བྱ་བ་འདིར་རྒྱུའོ། །མཆོད་རྟེན་གྱི་དཀོར་དང་འབྱུང་ཁུང་དང་རྩ་བ་དང༌། འབྲས་བུ་དང་བུ་རམ་ཤིང་ལས་གཞན་བའི་ཟས་ཀྱི་དོན་དང༌། བསྐོ་བས་ཉེ་བར་འཚོ་བར་བྱ་བ་དང༌། ན་བའི་རུང་བ་ནི་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ་ཞེས་བྱ་བ་ལ། མཆོད་རྟེན་གྱི་དཀོར་ཞེས་བྱ་བྱ་ནི་དགེ་འདུན་གྱིས་ཐོབ་པར་བྱ་བ་ཉིད་ཀྱི་ཕྱིར། བཅོམ་ལྡན་འདས་ལ་ཤི་བའི་ཡོ་བྱད་འདི་ལ་ཞེས་བྱ་བ་ཐོབ་ པ་ལ་སོགས ་པའོ། །རྣམ་པ་ཐམས་ཅད་དུ་དཀོན་མཆོག་ཐ་དད་པ་ཡིན་བའི་ཕྱིར། བཅོམ་ལྡན་འདས་དང་དེ་དག་ཀྱང་བདག་གིར་བྱ་བའི་ཕྱིར་བགོ་བར་མི་བྱ་བ་ཉིད་ཡིན་ནོ། །འབྱུང་ཁུང་ཞེས་བྱ་བ་ནི་བྱེ་བྲག་མ་སྨོས་པ་པས་དངོས་གཞིའི་འཇུག་པ་འདི་ལྟ་སྟེ་ཞིང་དང་ལོ་ཐང་དང་ཀུན་དགའ་ར་བ་ལ་ སོགས་པ ་དང༌། ཚོང་འདུས་ལ་ སོགས་པའི་འཇུག་པ ་དང་དཀོར་གྱི་འཇུག་པ་དང༌། འདུ་བའི་སྒོ་མི་ཟད་པར་ངེས་པར་ཉིད་བྱས་གཞན་པ་དག་དང༌། བ་ལང་དང་མ་ཧེ་ལ་ སོགས་པ ་དང༌། ལྷ་འབངས་དང་རྩེ་རྒོད་ལ་ སོགས་པ ་དག་ལ་ཡང་བཟའ་བར་བྱེད་པ་རྣམས་ཡིན་ནོ། །རྩ་བ་དང་ཞེས་བྱ་བ་ནི་རྩ་བ་དང་འབྲས་བུ་དང་བུ་རམ་ཤིང་ལས་གཞན་པའི་ཟས་ནི་བགོ་བར་བྱ་བ་ཉིད་དོ། །དེ་དག་ལས་གཞན་བ་ཟས་ཀྱི་དོན་དུ་སྦྱོར་བ་དེ་དག་ལ་སོགས་པའི་དངོས་པོའི་ཁ་འདུ་བའི་སྒོ་དག་ཅེས་བྱ་བ་དེ་ཙམ་འདིར་བརྗོད་དེ། གཞན་དུ་ན་འདི་རྣམས་ལ་བགོ་བར་བྱ་བ་ཉིད་དུ་གསུངས་སོ། །དེ་བས་ན་དེ་གསལ་བའོ། །བསྐོ་བས་ཉེ་བར་འཚོ་བ་ཞེས་བྱ་བ་ནི་བསྐོ་བས་ཉེ་བར་འཚོ་བར་འགྱུར་བ་གང་ཡིན་བ་དང༌། གནས་ཁང་གནས་མལ་དང་བགོ་བ་ལ་ སོགས་པའོ། །ན་བའི་རུང་བ་ཞེས་བྱ་བ་ནི་སྣམ་དུ་གྱུར་པ ་དང༌། དགེ་
སློང་གི་ལྷག་མ་བཏང་བ་དང༌། གཞན་མ་གྲུབ་པ་འམ། དེའི་རིན་ཐང་ལའོ། །བདག་གིར་བྱ་བའི་ཕྱིར་ཞེས་བྱ་བ་ནི་བདག་གིར་བྱ་བའི་དོན་དུ་མཆོད་རྟེན་གྱི་དཀོར་ལ་ སོགས་པ ་ལྔ་པོ་དེ་རྣམས་ཀྱིས་བགོ་བ་བྱ་བ་གང་ཡིན་པ་དེ་ལ་བཀག་པ་འདི་ཡིན་གྱི་འདུས་བྱས་པའི་ཕྲིན་ལ་ སོགས་པའི་དོན་དུ་ནི་མ་ཡིན་ནོ། །རྙེད་པ ་ལས་ནི་དབྱར་གྱི་མཚམས་འཇུག་གོ་ཞེས་བྱ་བ་ནི་དགེ་འདུན་ཙམ་ལ་བརྟེན་ནས་རྙེད་པ་གང་ཡིན་པ་དེ་འབུལ་བར་བྱེད་དེ་དེ་ལ་དབྱར་གྱི་དུས་སུ་གྱུར་བའི་མཚམས་འཇུག་པ་སྟེ། འདིར་གཞུང་ནི་གཏན་པའི་གཞི་ཞུ་བ་ལས། དགེ་སློང་དག་དབྱར་གནས་པར་ཁས་བླངས་ནས་སྤྱོད་ཡུལ་གྱི་གྲོང་གི་ཉེན་ཀོར་དུ་མཚམས་བགྱིད་ཅིང་དེ་དག་གིས་དགག་དབྱེ་བགྱིས་ནས་ཕྱི་རོལ་དུ་མཚམས་བགྱིས་ཏེ། དེར་ཡང་མིས་དགེ་འདུན་གཞན་བཙུད་ན་དགེ་འདུན་ལ་ཆོས་གོས་འབུལ་ན་གང་གིས་འཐོབ་པར་འགྱུར། གང་དག་དེར་དབྱར་གནས་པ་དག་གིས་སོ། །ཅིའི་ཕྱིར་ཞེ་ན། རྙེད་པ་དེ་གནས་ཀྱིས་བསྟབས་པ་ཡིན་པའི་ཕྱིར་རོ་ཞེས་གསུངས་བ་ཡིན་ནོ། །འོན་ཏེ་དགེ་སློང་གཞན་དག་གནས་དེར་སྦྱིན་བདག་གིས་བཙུད་པ་ལ་རྙེད་པ་ཡང་ཅིའི་ཕྱིར་དེ་དག་མི་དབང་ཞེ་ན། ཁོ་བོས་དགེ་འདུན་ཙམ་གྱི་ཕྱིར་དབུལ་བར་བྱ་སྟེ། འདི་དག་རང་གིས་དབང་བ་ཉིད་དུ་རྣམ་པར་འཇོག་ཅིང་ལེན་གྲང་སྙམ་པའི་ཕྱིར་ཏེ། འདི་དག་དང་གཞན་དག་ཞུགས་པར་བྱེད་པ་ནི་རིགས་པའི་ཕྱིར་རོ། །གལ་ཏེ་ཡང་འདི་དག་དང་གཞན་དག་ལ་ཡང་རྙེད་པ་དེ་དབུལ་བར་བྱའོ་ཞེས་ཡོངས་སུ་ཆད་པར་བྱེད་ན་ནི། དེའི་ཚེ་གཞན་དག་ཀྱང་དབང་བར་ཐེ་ཚོམ་མེད་དོ། །དེའི་སྤྱོད་ཡུལ་གྱི་གྲོང་ཞེས་བྱ་བ་ཉམས་པར་བལྟ་བར་བྱའོ། །རླུང་དང་ཆར་པ་འབྱུང་བར་ཞེས་བྱ་བ་དེའི་དབྱར་གྱི་གནས་ངེས་པར་བསྒྲུབས་པའི་རྙེད་པའི་ཚོགས་ནི་འདིར་དབྱར་གནས་པ་རྣམས་ལ་རྣམ་པར་གཞག་པའི་ཕྱིར་རོ། །རྙེད་པ་དེ་གནས་ཀྱིས་བསྟབས་པ་ཡིན་པའི་ཕྱིར་རོ་ཞེས་གསུངས་པ་ལ་འདིར་གནས་ཞེས་བྱ་བ་ནི་འདིར་དབྱར་གྱི་གནས་ལ་བརྗོད་དོ། །འདི་ལ་གཙོ་བོ་བསྟན་པ་ལ་དངོས་གཞིར་གྱུར་པའི་ལུས་ལ་མངོན་པར་བརྟན་པ་ཉིད་ཀྱིས་གནས་ཉིད་ཅེས་བྱ་བ་སྟེ། དབྱར་རལ་བ་ལ་ནི་མི་དབང་བ་ཉིད་མ་ཡིན་ནོ་ཞེས་བྱ་བ་ལ་འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། གང་ལས་སྦྱིན་པར་བྱ་ཞེ་ན། དབྱར་
སྔ་མ་འམ་ཕྱི་མ་གང་ཡོད་པ་ལས་ཏེ། ཡུན་རིང་དུ་གནས་པ་ལས་སོ་ཞེས་གསུངས་པ་ཡིན་ནོ། །ཐམས་ཅད་ཉིད་དམ་ཤིན་ཏུ་མང་པོར་གནས་པ་ཉིད་ཀྱིས་དབྱར་གྱི་རྙེད་པ་དེའི་རྒྱུས་དབང་བ་ཉིད་མ་ཡིན་ནོ། །འདིར་གནས་པ་ཙམ་རྒྱུ་ཡིན་གྱི། དབྱར་མ་རལ་བར་གནས་པ་ནི་མ་ཡིན་ཞེས་བྱ་བའི་དོན་ཏོ། །གནས་ནས་བྱུང་བ་ཉིད་ནི་མི་དབང་ངོ་ཞེས་བྱ་བ་ནི་གནས་ནས་ཕྱུང་བ་ཉིད་དུ་གྱུར་པ་ན་ཐམས་ཅད་ཀྱིས་ཕལ་ཆེར་དབྱར་གནས་པའི་རྙད་པ་དེ་ནི་མི་དབང་བ་ཉིད་དོ། །རྫས་ཀྱིས་མནན་པར་གནས་པར་ཁས་བླངས་པ་ནི་སྐལ་བ་གཅིག་ཁོ་ནའོ་ཞེས་བྱ་བ་ནི་མཚམས་དུ་མ་ཁྲི་ལ་ སོགས་པའི་རྫས་གཅིག་གིས་མནན་པས་ཁས་བླངས་པ ་སྔོན་དུ་འགྲོ་བར་དུ་མ་མནན་པ་ལ་ཇི་སྲིད་དུ་མནན་པ་ཉིད་མ་ཡིན་པ་དེ་སྲིད་དུ་ཆ་དང་ལྡན་པ་ཡིན་ནོ། །འོན་ཀྱང་སྐལ་པ་གཅིག་ཁོ་ན་སྦྱིན་པའོ། །དེ་ལ་མནན་པ་རྣམས་སུ་བདག་ཉིད་བགྲང་བའི་ཆ་ཉིད་དོ་ཞེས་བྱ་བ་ནི་བདག་ཉིད་བགྲང་བའི་ཆ་མཚམས་གང་ལ་ཡོད་པ་རྣམས་ནི་རང་གི་གྲངས་ཀྱི་ཆའོ། །མཚམས་ཀྱི་ཇི་སྙེད་ཁས་བླངས་ཤིང་མནན་པ་རྣམས་དེ་ཙམ་མོ། །གྲངས་ཀྱི་ཆའི་དབྱེ་བ་གཅིག་གང་ཡིན་ན་དེ་ནི་དེ་ལས་སྐལ་བ་གཅིག་པ་ཉིད་ཅེས་བྱ་བར་བརྗོད་པ་ལ་ཆ་མནན་པའི་གནས་སྐབས་སུ་སྐལ་བ་སྦྱིན་པར་བྱའོ་ཞེས་བྱ་བའི་དོན་ཏོ། །འདིར་གཞུང་ནི་གཙུག་ལག་ཁང་ཅིག་སྙེད་པའི་ཐང་གང་ཡིན་པ་དེ་དེས་གནས་ཇི་སྙེད་མནན་པ་དེ་སྙེད་ནས་ཆ་བསྡུས་ཏེ། དེ་ལས་སྐལ་བ་གཅིག་སྦྱིན་བར་བྱའོ་ཞེས་གསུངས་པ་ཡིན་ནོ། །དེ་བཞིན་དུ་གནས་ལྷག་མ་རྣམས་ཀྱང་ཞེས་གསུངས་པ་དེ་བས་ན་འདི་མདོར་བྱས་སོ། །གཞན་བ་གཅིག་ཏུ་གནས་པ་ཁས་བླངས་པ་ལ་ནི་ཡུན་རིང་བ་ཉིད་ཀྱིས་རྣམ་པར་གཞག་གོ་ཞེས་བྱ་བ་ལ། གཞན་པ་གཅིག་ཏུ་གནས་པར་ཁས་བླངས་པ་ལ་ཞེས་བྱ་བ་ནི་མནན་པའི་རྫས་མེད་པར་ཁས་བླངས་པ་ཞེས་གཞན་ལ་ཐ་དད་པར་ཁས་བླངས་པ་ཞེས་བྱ་བའི་དོན་ཏོ། །དེ་དུས་ཡུན་རིང་དུ་གནས་པ་ཉིད་ཀྱིས་རྣམ་པར་གཞག་གོ །གང་དུ་ཡུན་རིང་བར་གནས་པ་དེ་ཉིད་ལ་རྙེད་པ་འདི་སྦྱིན་པར་བྱའི་གཞན་ལ་ནི་མ་ཡིན་ཞེས་བྱ་བའི་དོན་ཏོ། །འདིར་གཞུང་ནི་གནས་མལ་གྱི་གཞི་ལས། ཚེ་དང་ལྡན་པ་ཉེ་དགས་རྙེད་པ་འདོད་པས་གཙུག་ལག་ཁང་གཉིས་སུ་ཚུལ་ཤིང་དང་གནས་མལ་བླངས་ཏེ། གནས་མལ་ཁས་བླངས་པ་ན་དེས་
གནས་གཙུག་ལག་ཁང་གཅིག་ནས་ཆོས་གོས་ཀྱི་རིན་ཐོབ་ལ། ཅིག་ཤོས་ནས་མ་ཐོབ་ནས། དེ་ནས་རྙེད་པ་སྒྲུབ་པ་ན། བཅོམ་ལྡན་འདས་ཀྱིས་བཀའ་སྩལ་པ། གང་དུ་གང་གསོ་སྦྱོང་ལན་མང་དུ་བྱས་པ་དེ་ནས་རྙེད་པ་བླང་བར་བྱའོ་ཞེས་གསུངས་པ་ཡིན་ནོ། །དགེ་ཚུལ་དང་དགེ་ཚུལ་མ་ནི་རྙེད་པ་ལ་སུམ་ཆ་དབྲི་བ་ཉིད་དོ་ཞེས་བྱ་བ་ལ། སུམ་ཆ་དབྲི་བ་ཉིད་དོ་ཞེས་བྱ་བ་ནི་སུམ་ཆ་དེ་ཆ་ཉིད་མ་ཡིན་ཞེས་བྱ་བའི་དོན་ཏོ། །ཟས་ལ་ནི་མཉམ་པ་ཉིད་དོ་ཞེས་བྱ་བ་ལ། མཉམ་པ་ཉིད་ནི་འདིར་ཆ་ཐོབ་ཅེས་བྱ་བའི་དོན་ཏོ། །ཟང་ཟིང་གི་རྙེད་པ་ལ་ནི་མ་ཡིན་ནོ་ཞེས་བྱ་བར་གྲགས་སོ།། དེ་བས་ན་འདིར་མཉམ་པ་ཉིད་ཐོབ་པ་ལ་གསལ་བར་བྱ་བའི་ཕྱིར་མཉམ་པ་ཞེས་སྨོས་པར་རིག་པར་བྱའོ། །བསྙེན་པར་རྫོགས་པར་འདོད་པ་དང་དགེ་སློང་མ་དག་ཀྱང་ངོ་ཞེས་བྱ་བ་ལ་ནི་རྣམ་པ་ཉིད་དོ་ཞེས་བྱ་བར་སྦྱར་རོ། །བསྙེན་པར་རྫོགས་པར་འདོད་པ་ཞེས་བྱ་བ་སྨོས་པ་ནི་དགེ་ཚུལ་ཡང་བསྡུས་པའོ།། དེ་མེད་ན་དགེ་ཚུལ་མ་ལ་བསྙེན་པར་རྫོགས་པར་བྱར་མེད་པའི་ཕྱིར་རོ། །འདི་ནི་ཐམས་ཅད་ཀྱི་དོན་དུ་ཡིན་གྱི། ཡང་འདོད་པའི་དོན་དུ་ནི་མ་ཡིན་ཞེས་བྱ་བའོ། །འདིར་གཞུང་ནི་སིལ་བུ་དག་ལས། དགེ་སློང་དང་དགེ་སློང་མ་དག་གིས་སྐལ་བ་མཉམ་པར་སྦྱིན་ནོ། །དགེ་ཚུལ་དང་དགེ་ཚུལ་མ་དག་ལ་ནི་སུམ་གཉིས་སྦྱིན་ནོ། །བསྙེན་པར་རྫོགས་པར་འདོད་པ་དང༌། དགེ་སློང་མ་དག་ཀྱང་མཉམ་པར་སྦྱིན་པ་ཞེས་གསུངས་པ་ཡིན་ནོ། །དགེ་སློང་དང་དགེ་སློང་མ་རྣམས་ཀྱི་སྐལ་བ་བགོ་བ་ནི་གང་ཟག་ལས་ནི་ཡིན་གྱི་དགེ་འདུན་ལས་ནི་མ་ཡིན་ནོ་ཞེས་བྱ་བ་ནི་གང་ཟག་འདི་སྙེད་ནི་དགེ་སློང་གི་དགེ་འདུན་ལ་དབུལ་ལོ། །འདི་སྙེད་ཅིག་ནི་དགེ་སློང་མའི་དགེ་འདུན་ལ་དབུལ་ལོ་ཞེས་བྱ་བ་དེ་ལྟར་བྱེ་བྲག་ཏུ་མ་བྱས་པ་རྙེད་པ་ནི་དགེ་འདུན་གཉིས་ལ་བརྟེན་ནས་ཕུལ་བ་ཞེས་བྱ་བ་ཤུགས་ཀྱིས་རྟོགས་པར་བྱའོ། །འདིར་གཞུང་ན་མགོའི་ཤས་ཀྱིས་བགོ་བར་བྱའོ་ཞེས་གསུངས་པ་ཡིན་ནོ། ཟས་ཀྱི་མཇུག་ཐོགས་ཀྱི་རྙེད་པ་བྱེ་བྲག་ཏུ་མ་བཅད་པ་ལ་དེ་ལ་དགེ་སློང་མ་ཟོས་པ་ཉིད་དག་ཀྱང་མི་འཇུག་པ་མ་ཡིན་ནོ་ཞེས་བྱ་བ་ལ། ཟས་ཀྱི་མཇུག་ཐོགས་ཞེས་བྱ་བ་ནི་ཟས་སྔར་བཅུག་པ་དང་ལྷན་ཅིག་རུང་འདི་དགེ་སློང་ཁོ་ན་ལ་འབུལ་ལོ་ཞེས་སྦྱིན་བདག་གིས་བྱེ་བྲག་ཏུ་མ་བཅད་པའི་ཟས་
དེ་ལྟ་བུའི་རྙེད་པ་དེ་དག་ལ་ནི་དེར་ཟན་ཟོས་པའི་དགེ་སློང་མ་རྣམས་ཀྱང་མི་དབང་བ་མ་ཡིན་ཏེ་དེ་རྣམས་ལ་ཡང་རྙེད་པ་དབུལ་བར་བྱ་ཞེས་བྱ་བའི་དོན་ཏོ། །འདིར་ལུང་ནི་དགེ་སློང་དྲུག་ཅུ་རྣམས་བཟའ་བའི་ཕྱིར་ཞུགས་པ་དང༌། བཅོམ་ལྡན་འདས་ཀྱིས་ཀྱང་སྟོང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་དང་བཅས་པ་དང༌། དགེ་སློང་དྲུག་ཅུ་ཡང་རི་བྲགས་དེ་ཉིད་དུ་ལྷགས་ནས། དེ་དག་ཀྱང་ཟན་ཟོས་ནས་རྙེད་པ་ཐོབ་པ་ཉིད་ཅེས་གསུངས་སོ། །སྟན་དང་ཆུ་དང་བསོད་སྙོམས་དག་ལ་དགེ་སློང་དང་དགེ་སློང་མ་དག་པས་གཙོ་བོ་ཉིད་མ་ཡིན་བ་མ་ཡིན་ནོ། །དགེ་སློང་མ་རྣམས་ཀྱི་ཚོགས་པ་ནི་རྒན་པའི་མཐར་སྟན་དག་གཞག་གོ་ཞེས་བྱ་བ་ལ་འདི་ནི་བརྒྱ་ལམ་ན་དགེ་སློང་འགའ་ཞིག་འོང་སྲིད་པར་འགྱུར་བས་དེའི་ཕྱིར་དེ་མདོར་བྱས་སོ། །དགེ་སློང་དང་བཅས་པ་ཉིད་ནི་དེ་དག་གིས་མི་ནུས་ན་དགེ་སློང་མས་ཡོན་བཤད་པར་བྱའོ་ཞེས་བྱ་བ་ལ། དགེ་སློང་དང་བཅས་པ་ཉིད་ན་ཞེས་བྱ་བ་ནི་མཆོད་རྟེན་ལ་ཡོན་བཤད་པར་བྱའོ་ཞེས་སྨོས་པར་རིག་པར་བྱའོ། །དེ་དག་གིས་ཞེས་བྱ་བ་ནི་དགེ་སློང་རྣམས་ཀྱིས་སོ། །འདྲིམ་པར་བྱེད་པས་སྦྱིན་པའི་ཕྱིར་ཟས་ཉེ་བར་གཞག་པ་ནི་དགེ་འདུན་གྱི་གནས་བརྟན་གྱིས་དང་པོར་སྙོམས་པར་བྲིམས་ཤིག་ཅེས་བསོ་བར་བྱ་བ་ནི་དང་པོར་ཞེས་བྱ་བ་ནི་ཐོག་མར་རོ། །སྦྱིན་བའི་ཕྱིར་ཞེས་བྱ་བ་ནི་བརྩོན་འགྲུས་བརྩམས་པའོ། །བརྩོན་འགྲུས་དེ་ཉིད་ཀྱང་སྨོས་ན་སྐྱོན་དུ་མི་འགྱུར་བ་ཉིད་དོ། །དང་པོར་མ་སྨྲས་ན་དེའི་འོག་ཏུ་སྨྲ་བར་བྱ་བ་ཉིད་ཡིན་ཏེ་དེའི་ཚེ་ཡང་མ་སྨྲས་ན་ཉེས་བྱས་སུ་འགྱུར་རོ། །འཁོར་ལ་བལྟས་ཏེ་མང་ལ་ཟས་སུ་ཉུང་བ་ཉིད་ཡིན་ནོ། །དེའི་ཚེ་སྔ་མ་བརྗོད་ཅིང་ཇི་ལྟར་ཁྱེད་པར་བྱའོ་ཞེས་བྱ་བ་ལ། ཇི་ལྟར་ཁྱེད་པར་ཞེས་སོ་ཞེས་བྱ་བ་ནི་སྙོམས་པར་བྲིམས་ཤིག་ཅེས་བསྒོ་བར་བྱའོ་ཞེས་བྱ་བར་སྦྱར་རོ། །འཁོར་ལ་བལྟས་ཏེ་ཞེས་བྱ་བར་སྦྱར་རོ། །གཞན་དག་འོངས་པ་ལ་ནི་འདི་གསུངས་སོ། །གོ་རིམས་བཞིན་དུ་བོས་པ་ལ་དུས་གཞན་དུ་ཡང་འདི་མཐོང་བ་དང་ཐོས་པ་ལ་བཟའ་བའི་ཚད་ཀྱི་བློ་སྐྱེས་པ་ལ་ཟས་ཉུང་བ་ཉིད་དང་ལྷགས་པའི་དོགས་པ་བྱ་བ་ཉིད་རྣམས་པར་གནས་པ་ཡིན་ཞེས་བྱ་བ་བྱེ་བྲག་མེད་པར་སྨོས་སོ། །མང་ལ་ཞེས་བྱ་བ་ནི་འཁོར་གྱི་རྫས་རྣམས་མང་བ་ལའོ། །ཟས་ཉུང་བ་ཉིད་ཡིན་ན་ཞེས་བྱ་བ་ནི་གལ་ཏེ་མཐོང་བའི་ལམ་
ན་ཉེ་བར་སྡུད་པའོ། །འདིར་མཐོང་བ་ལས་ཡོངས་སུ་ཚང་བར་འགྲུབ་པའོ། །གལ་ཏེ་མ་ཡིན་ན་ཐོས་པ་དང་དོགས་པ་དང་བཅས་པ་ལ་སྤྱོད་པ་འམ། ཡིད་གཉིས་སམ་ཐོས་པ་ལ་ཐེ་ཚོམ་བརྗོད་པ་དང་བཅས་པ་ཉིད་དོ། །དགེ་སློང་དག་མང་ལ་ཟས་ཉུང་གི་ཇི་ལྟར་ཁྱེད་པར་བྲིམས་ཤིག་ཅེས་བསྒོ་བར་བྱའོ། །འོན་ཏེ་དགེ་སློང་དག་ཉུང་ལ་ཟས་དག་མང་བ་ཡིན་ནོ་ཞེས་བྱ་བ་བརྗོད་ཅིང་ཅི་འབྱོར་པ་བྲིམས་ཤིག་ཅེས་བསྒོ་བར་བྱའོ། །ཟས་ཉུང་བ་ཉིད་དུ་ངེས་པ་ལས་ཟས་ཉུང་བ་ཉིད་དམ་མང་བ་ཉིད་མ་ཡིན་ན་དེའི་ཚེ་སྔ་མ་བརྗོད་ཅིང་དེའི་འཁོར་གྱི་རྫས་མང་བ་ཉིད་དམ་ཉུང་བ་ཉིད་ནའོ། །དེའི་དོན་ནི་འདི་ཡིན་ཏེ། འཁོར་གྱི་རྫས་མང་བ་ཉིད་དང་ཟས་ཉུང་བ་ཉིད་ཡིན་ན་དེའི་ཚེ་སྔ་མ་བརྗོད་པ་ནི་བྲིམས་ཤིག་ཅེས་བྱ་བ་བསྒོ་བའོ། །ཟས་འགོད་པར་བྱེད་པ་པོ་ཉེ་བར་འགོད་པས་དང་པོར་དགེ་འདུན་གྱི་གནས་བརྟན་པར་གསོལ་བར་བྱའོ། །གཞན་ཉིད་ཡིན་ན་ཅི་འབྱོར་པ་ཞེས་སོ་ཞེས་བྱ་བ་ནི་འཁོར་གྱི་རྫས་རྣམས་ནི་ཉུང་ལ་ཟས་ནི་མང་བ་ཉིད་ཡིན་བར་གྱུར་ན་འཁོར་ལ་བལྟས་ཏེ། དེའི་ཚེ་སྔ་མ་བརྗོད་ཅིང་ཇི་ལྟར་ཁྱེད་པར་བྲིམས་ཤིག་ཅེས་བསྒོ་བར་བྱའོ་ཞེས་བྱ་བ་ཟས་ཉེ་བར་གཞག་པ་ན་དང་པོར་སྦྱིན་པའི་ཕྱིར་དགེ་འདུན་གྱི་གནས་བརྟན་གྱིས་བསྒོ་བར་བྱའོ། །རྒན་པའི་མཐར་སཾ་སྲ་བ་ཏ་ཞེས་མ་བརྗོད་པར་དང་པོར་བླང་བར་མི་བྱའོ་ཞེས་བྱ་བ་ནི་དང་པོར་ཞེས་བྱ་བའི་སྒྲས་ནི་དགེ་འདུན་གྱི་གནས་བརྟན་གྱི་ཞེས་བྱ་བར་སྦྱར་རོ། །ཟས་བསྡོགས་པ་ན་བསྐོས་པ་དག་ལས་གཞན་བ་དག་ལྷགས་ན་དེ་ལ་སྦྲན་བར་བྱའོ་ཞེས་བྱ་བ་ནི་གཞན་པའི་མ་བསྐོས་པ་དག་ལྷགས་ནས་སྦྱིན་བདག་དེ་ལ་སྦྲན་བར་བྱའོ། །དགེ་སློང་ཆོས་གོས་གསུམ་སྦྱིན་དུ་གཞུག་པར་མི་བྱའོ། །དགེ་འདུན་གྱི་སོས་པར་གྱུར་པ་ཉིད་ན་འདི་སྦྱིན་ནོ་སྙམ་པ་ལས་གཞན་བའི་ཡིད་ཀྱིས་བླང་བར་མི་བྱའོ་ཞེས་བྱ་བ་ལ་འདི་ཞེས་བྱ་བ་ནི་ཆོས་གོས་གསུམ་པོ་འདིའོ། །སོས་པར་གྱུར་པ་ཉིད་ན་ཞེས་བྱ་བ་ནི་གལ་ཏེ་ཤི་བར་དོགས་པ་དེའི་ཚེ་འདི་ཕྱིར་སྦྱིན་ནོ་སྙམ་པར་དོན་གྱིས་རྟོགས་པར་བྱའོ། །དགེ་འདུན་གྱི་ཞེས་བྱ་བ་ནི་འདིར་དེ་སྨོས་པ་ཞེས་བྱ་བ་ནི་བསྡུས་པའོ། །གང་ཟག་ལ་ཡང་དེ་རྟོགས་པར་བྱའོ། །ལངས་པ་དེ་ཉིད་ལ་འདི་ཕུལ་བར་གྱུར་བ་འདི་ལའོ་ཞེས་བྱ་བ་འདིའི་དགོངས་པས་བཟུང་བ་ལ་སྐྱོན་མེད་དེ་
གཞན་དུ་ན་ཉེས་བྱས་ཞེས་བྱ་བའི་དོན་ཏོ། །སྟོད་གཡོགས་དང་སྨད་གཡོགས་ཀྱི་རོ་དོར་རོ། །འབྲིང་གིས་སོ་ཞེས་བྱ་བ་ནི་ངན་པ་ཡང་མ་ཡིན་བཟང་པོ་ཡང་མ་ཡིན་པའོ། །ལྷག་མས་མི་བྱའོ་ཞེས་བྱ་བ་ནི་སྟོད་གཡོགས་དང་སྨད་གཡོགས་ལས་གཞན་པའི་རྫས་ལྷག་མས་རོ་དོར་བར་མི་བྱ་སྟེ། བཀག་པའི་ཕྱིར་འདིར་གསུངས་སོ། །ལྷག་མ་ཡང་དེ་ཉིད་དུ་བསྲེ་བར་མི་རིགས་པ་ཡིན་ནོ། །ཅི་རོའི་རྫས་བཟུང་བས་ཞེས་བྱ་བའི་བློ་བསལ་བའི་དོན་དུ་དེའོ། །སྐ་རགས་མ་བཅིངས་པས་གྲོང་དུ་འཇུག་པར་མི་བྱའོ། །ཁྲིས་གཅིག་གིས་ཀྱང་ངོ༌། །གོས་ཀྱི་གཞི་ཕྲན་ཚེགས་ལ་སོགས་བའི་ཞུ་བ་བཅས་པའི་སྐབས་སོ། །གོས་ཀྱི་གཞི་རྫོགས་སོ།། །།མཐའ་ཁོབ་ངེས་པར་ཤེས་པར་བྱ་བའི་ཕྱིར་ཡུལ་དབུས་བསྟན་པར་བྱ་སྟེ། དེའི་ཕྱིར་ཡུལ་དབུས་ཀྱི་མཚམས་སོ་ཞེས་བྱ་བ་སྨོས་ཏེ། ཤར་དུ་ནི་ལི་ཁར་ཤིང་འཕེལ་གྱི་མདུན་གྱི་ནགས་ཕུང་པོ་ཚང་ཚིང་ཅན་ཞེས་བྱ་བའོ། །འདིར་ནགས་ཀྱི་ཆ་གཞན་མཚམས་སུ་རྣམ་པར་གནས་པ་ཡིན་ཏེ། དེའི་ནུབ་ཀྱི་ཆ་ཚུན་ཆད་དབུས་ཀྱི་མཚམས་སོ། །ལྷོར་ནི་འདམ་བུ་ཅན་གྱི་ལྷོན་ཆུ་ཀླུང་དེ་ཞེས་བྱ་བའོ་ཞེས་བྱ་བ་ལ། དེ་ཞེས་བྱ་བ་ནི་ལྷོ་ཕྱོགས་ཀྱི་ཆ་ལའོ། །དེའི་ལྷོ་ན་ཆུ་ཀླུང་འདམ་བུ་ཅན་ཞེས་བྱ་བ་ཡོད་པའི་བྱང་གི་ཆ་ཚུན་ཆད་ནི། ཡུལ་དབུས་ཀྱི་ལྷོ་ཕྱོགས་ཀྱི་མཚམས་ཡིན་ནོ། །ནུབ་ཏུ་ནི་བྲམ་ཟེའི་གྲོང་ཀ་བ་དང༌། ཉེ་བའི་ཀ་བ་ཞེས་བྱ་བ་གཉིས་སོ་ཞེས་བྱ་བ་ནི་ནུབ་ཏུ་བྲམ་ཟེའི་གྲོང་ཀ་བ་དང་ཉེ་བའི་ཀ་བ་ཞེས་བྱ་བ་ཡོད་བའི་ཤར་གྱི་ཆ་ཚུན་ཆད་དུ་ཡུལ་དབུས་ཀྱི་མཚམས་སོ། །བྱང་དུ་ནི་ཨུ་ཤི་རའི་རི་ཞེས་བྱ་བའོ་ཞེས་བྱ་བ་ནི་མཚམས་ཡིན་ནོ་ཞེས་བྱ་བར་སྦྱར་རོ། །ཇི་ལྟར་ཨུ་ཤི་རའི་རིའི་ལྷོ་ཕྱོགས་ཀྱི་མཐར་ཐུག་པའོ། །མཐའ་ཁོབ་ཏུ་མཆི་ལ་ལྷམ་དག་བཅང་བར་བྱའོ། །གནས་མལ་བསྐྱབ་པའི་ཕྱིར་ཡང་ངོ༌། །མཐའ་ཁོབ་མ་ཡིན་པར་ཡང་མཆི་ལྷམ་དག་བཅང་བར་བྱའོ། །རྐང་པ་དང་བཅས་པའི་སྟན་ལ་འདུག་པ་ལ་གནས་མ་ལ་རྐྱང་པ་མི་འགྲུབ་པའོ། །གནས་གཞན་དུ་སོང་བས་ཀྱང་གནས་མལ་བསྐྱང་བར་དགོས་པ་མེད་དོ། །དེ་བས་ན་ལམ་དུ་འདི་དག་སྲེལ་བར་བྱ་བ་ཉིད་མ་ཡིན་ནོ། །གཞན་དུ་སོང་བས་ཀྱང་རྐང་པ་ལ་དགོས་པས་དེ་དག་བགོ་བར་ཤིན་ཏུ་རིགས་པ་ཡིན་ནོ། །འདི་དག་
ལམ་དུ་སོང་བས་ཀྱང་རྗེས་སུ་ཁུར་བ་ཡང་རིགས་སོ། །འདི་གཉིས་ལ་ཡང་མཚོན་པར་བྱེད་པའི་རྟགས་འདིར་ཡང་ཡོད་དེ། དེའི་ཕྱིར་འདིར་གཞུང་ནི་བསོད་སྙོམས་པ་ཞིག་མཉན་ཡོད་དུ་བསོད་སྙོམས་ལ་ཞུགས་པ་ན། དེར་མཆིལ་ལྷམ་མེད་པས་རྐང་པ་དག་ལ་སེར་ཁ་བྱུང་བ་ཁྱིམ་བདག་གིས་མཐོང་ནས་དེས་དེ་ལ་སྨྲས་པ། འཕགས་པ་ཁྱོད་ལ་མཆིལ་ལྷམ་དག་མེད་དམ། མེད་དོ། །ཚུར་ཤེག་དང་སྦྱིན་དུ་གཞུག་གོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཅི་ཡང་རུང་བའི་མཆི་ལྷམ་གནས་མལ་བསྐྱང་བའི་དོན་དུ་མཐའ་ཁོབ་དག་ཏུ་བཅང་བར་བྱ་བ་འམ་ཞི་ན། དེའི་ཕྱིར་ཚིག་རིམ་མོ་ཞེས་བྱ་བ་སྨོས་ཏེ། ཆིག་རིམ་གང་ལ་ཡོད་པ་དེ་ནི་ཚིག་རིམ་གཅིག་པའོ། །དེ་ཡང་འདིར་མཐིལ་ཆིག་པའི་རིམ་ཅན་ནམ་རིམ་པ་གཅིག་ལ་གནས་པ་ཞེས་བྱ་བའི་དོན་ཏོ། །སྡོགས་པ་གཞུག་པས་བཅོས་པར་བྱའོ་ཞེས་བྱ་བ་ནི་ཟད་པ་ཉིད་ལ་ནི་རིམ་པ་གཞན་སྡོགས་པ་གཞུག་པར་འོས་བ་ཡིན་ནོ་ཞེས་བྱ་བ་སུ་ཞིག་སྡོགས་པ་གང་ཞིག་གིས་བྱས་པ་དེ་སློབ་མའི་དོན་དུ་ངེས་པ་འདིར་རིག་པར་བྱའོ། །དེའི་དོན་དུ་གསལ་བར་བྱ་བའི་ཕྱིར་བརྗོད་པར་བྱ་སྟེ། རིམ་པ་གཞན་ནི་མི་རུང་ངོ་ཞེས་བྱ་བ་ནི་སྡོགས་པ་རིམ་པ་གཞན་གཞུག་པས་བཅོས་པར་མི་བྱའོ་ཞེས་བྱ་བར་སྦྱར་རོ། །འདིར་གཞུང་ནི། གལ་ཏེ་རྡོལ་ན་སྡོགས་པ་བཅུག་སྟེ་བཅང་བར་བྱའོ་ཞེས་གསུངས་པ་ཡིན་ནོ། །རྡོལ་ན་ཞེས་བྱ་བའི་དུག་བྱུང་ནའོ། །ཁྱིམ་པས་ཐ་ན་གོམ་པ་མདུན་དུ་བགོས་ན་རིམ་པ་མང་ཡང་རུང་ངོ་ཞེས་བྱ་བ་ལ། འདིར་གཞུང་ནི། ཉེ་བ་འཁོར་ཁྱིམ་པས་ཐ་ན་གོམ་པ་བདུན་བགོས་པར་གྱུར་ནའོ་ཞེས་གསུངས་པ་ཡིན་ནོ། །རུང་བ་ཙམ་གྱི་དོན་ཉིད་དུ་དེ་དང་སྦྱར་བའི་དབང་དུ་ལེན་པ་ནི། མི་རུང་བ་བླངས་པ་ཉིད་མ་ཡིན་ནོ་ཞེས་བྱ་བ་ལ། མི་རུང་བ་ཞེས་བྱ་བ་ནི་བླངས་པ་ཉིད་མ་ཡིན་ནོ་ཞེས་བྱ་བར་སྦྱོར་རོ། །གང་ཞིག་རིམ་པ་གཅིག་པ་བྱ་སྟེ་བཅང་བར་བྱའོ་ཞེས་བྱ་བ་ནི་རིམ་པ་དག་ལ་དགེ་སློང་གིས་བདག་ཏུ་བྱས་པ་དེའི་འདི་བསྡུས་པའོ། །རུང་བ་ཙམ་གྱིས་དོན་ཉིད་དོ་ཞེས་བྱ་བ་ནི་གང་ཞིག་དེར་རུང་བ་དང་ཇི་སྙེད་པར་གྱུར་པ་དེ་ཙམ་གྱིས་དོན་ཉིད་ཡོད་པ་དང༌། མེད་པ་དང་ལྷག་པར་གྱུར་པ་དང་མི་རུང་བའི་བསྩགས་པར་གྱུར་པ་དོགས་པ་ལ་དེའི་སྦྱོར་བའི་དབང་གིས་རུང་བ་དང་འབྲེལ་བ་འབྱོར་བ་
བླངས་པ་སྟེ། རུང་བ་མ་ཡིན་བའི་དངོས་པོ་ལ་བདག་གིར་བྱ་བ་མི་འབྱུང་བའི་ཕྱིར་རོ། །ཁྲ་བོ་བཀྲ་བ་དག་མི་བཅང་ངོ་ཞེས་བྱ་བ་ནི་འདི་མན་ཆད་ནས་འོག་གི་མདོ་ལས་སྒེག་རྫས་སུ་གྱུར་པ་གཞན་དག་ཀྱང་ངོ་ཞེས་འབྱུང་བ་ཡན་ཆད་མཆིལ་ལྷམ་དག་ཅེས་བྱ་བར་སྦྱར་རོ། །ལུག་རུ་ལྟ་བུ་དག་བཅང་བར་མི་བྱའོ། །ཨ་ཤྭད་ཐ་དང་ཀ་ར་བཱི་རའི་འདབ་མ་ལྟ་བུ་དག་མི་བཅང་ངོ༌། །གསེར་དང་དངུལ་གྱིས་སྤྲས་པ་དག་མི་བཅང་ངོ༌། །ཐྲིག་ཐྲིག་ཟེར་བ་དག་མི་བཅང་ངོ༌། །ཀྲོག་ཀྲོག་ཟེར་བ་དག་མི་བཅང་ངོ༌། །ཏུག་ཏུག་ཟེར་བ་དག་མི་བཅང་ངོ༌། །ཐྲིག་ཐྲིག་ཟེར་བ་དག་མི་བཅང་ངོ་ཞེས་བྱ་བ་ནི་ཐྲིག་ཐྲིག་ཟེར་བ་དག་མི་བཅང་ངོ༌། །ཀྲོག་ཀྲོག་ཟེར་བ་དག་མི་བཅང་ངོ་ཞེས་བྱ་བའི་ཚིག་གཉིས་སོ། །དེ་ལས་གཞན་བའི་ཏུག་ཏུག་ཟེར་བ་དག་མི་བཅང་ངོ༌། །ཐྲིག་ཐྲིག་ཟེར་བ་དག་མི་བཅང་ངོ་ཞེས་བྱ་བའི་ཚིག་གཉིས་བསྡུ་བར་བྱས་སོ། །དེ་ལ་སྒེག་རྫས་ཐམས་ཅད་བཀག་པའི་གཙོ་བོ་ཉིད་འདིར་རྣམ་པར་གནས་པ་ཡིན་ཏེ། དེ་བས་ན་གཉིས་ཀ་བསྡུས་པའོ། །སྒེག་རྫས་སུ་འགྱུར་བ་གཞན་དག་ཀྱང་ངོ་ཞེས་བྱ་བ་ནི་གང་ཞིག་འདི་སྒེག་རྫས་ཐམས་ཅད་དགག་པའི་གཙོ་བོ་ཉིད་དུ་འདིར་རྣམ་པར་གནས་པ་དེ་བས་ན་མདོ་འདི་ཡིན་ནོ། །བོལ་ཀོ་བ་ཅན་ནི་མི་རུང་བ་ཉིད་མ་ཡིན་ནོ་ཞེས་བྱ་བ་ལ། དེ་ནི་སྒེག་རྫས་སུ་གཏོགས་པ་མ་ཡིན་པར་ཤེས་པར་བྱའོ་ཞེས་བྱ་བའི་དོན་ཏོ། །སྣ་དང་རྟིང་པའི་སྦུབས་ཅན་བཅང་བར་བྱའོ་ཞེས་བྱ་བ་ནི་མཆིལ་ལྷམ་སྣའི་སྦུབས་ཅན་ཞེས་བྱ་བ་ནི་རྐང་བའི་སྣའི་སྦུབས་ཅན་ནོ། །རྟིང་པ་ནི་རྟིང་བའོ། །འདིར་གཞུང་ནི། དགེ་སློང་རྣམས་བྱ་རྒོད་ཕུང་པོའི་རི་ལ་འཛེགས་པ་ན་རྐང་པའི་སྣ་དག་དྲུད་ནས། བཅོམ་ལྡན་འདས་ཀྱིས་བཀའ་སྩལ་པ་ནས། སྣ་སྦུབས་ཅན་བཅང་བར་བྱའོ་ཞེས་གསུངས་པ་དང༌། འབབས་པ་ནི་རྟིང་བ་དག་དྲུད་ནས་རྟིང་བ་སྦུབས་ཅན་བཅང་བར་བྱའོ་ཞེས་གསུངས་པ་ཡིན་ནོ། །ཁ་ཆུ་ཆུས་བྱུང་ངོ་ཞེས་བྱ་བ་ནི་ཕལ་ཆེར་ཐམས་ཅད་རྐང་པ་འགེབས་པར་བྱེད་པ་མཆིལ་ལྷམ་འདི་བཅང་པར་རིག་པར་བྱའོ། །ལྷམ་ཡུ་ཆད་ཀྱང་ངོ་ཞེས་བྱ་བ་ཡང་བཅང་བར་བྱའོ་ཞེས་བྱ་བར་སྦྱར་རོ། །ལྷམ་ཡུ་ཆད་ཀྱང་ལས་ལྷམ་གྱི་རྣམ་པ་གཞན་འབྱུང་བ་ཡོད་པ་ཡིན་ཏེ། དེ་བས་ན་མཆིལ་ལྷམ་དང་ཁ་ཆུ་ཆུས་བྱུང་ངོ་ཞེས་བྱ་བར་རིག་པར་བྱའོ། །འདིར་གཞུང་ནི། གང་གི་ཚེ་ཀླུའི་
རྒྱལ་པོ་སོག་མ་མེད་ཀྱིས་སེར་བ་དང་བ་པའི་ཚེ། །ཐོག་གི་ཆར་རྣམས་འབབ་པ་དེའི་ཚེ་རྩ་སྣ་རྣམས་ཀྱང་དུག་དང་བཅས་པ་སྐྱེ་བར་འགྱུར་རོ། །དེར་དགེ་སློང་རྣམས་འཆག་པར་བྱ་བའི་དགེ་སློང་རྣམས་ལ་རྨ་བྱུང་བར་གྱུར་པ་དང་འགྲོ་མ་ཤེས་པར་གྱུར་ཏེ། བཅོམ་ལྡན་འདས་ཀྱིས་བཀའ་སྩལ་པ། ཁ་ཆུ་ཆུས་བྱུང་བཅང་བར་བྱའོ། །ལྷམ་ཡུ་ཆད་ཀྱང་བཅང་བར་བྱའོ་ཞེས་བྱ་བ་དང༌། མཆིལ་ལྷམ་ཉིད་འདི་བཅང་བར་བྱའོ་ཞེས་བྱ་བ་ནི་བྱང་ཕྱོགས་སུ་འདི་ལྟ་བུས་གྲགས་པའོ། །འདིར་ཁ་ཅིག་མཆིལ་ལྷམ་གྱི་ཚིག་བྱེད་བཞིན་བ་ཁ་ཆུ་ཆུས་བྱུང་བ་དང་མཆིལ་ལྷམ་བཅང་བར་བྱ་ཞེས་བྱ་བ་དེ་ཀླུའི་ཁ་ཆུའི་ཆུ་ལས་བྱུང་བ་རྒྱུ་མཚན་ལས་སྐྱེས་པ་ཉིད་ཀྱི་ཕྱིར་དང་དེ་ལས་སྐྱེས་པའི་ཕྱིར་དང་འཇིག་རྟེན་པས་བསྐྱེད་པའི་ཕྱིར་ཞེས་བྱ་བ་མཐོང་བ་ཡིན་ནོ། །རྣམ་པ་གཞན་བསྟན་པར་བྱས་པར་གྱུར་ཅིག་ཅེས་བྱ་བ་ལྷམ་ཡུ་ཆད་རྗེས་སུ་གནང་བའོ། །འདིར་དོན་ཐ་དད་པ་ཡང་ཡོད་དེ་རྣམ་པ་གཞན་ཉིད་ཀྱི་ཕྱིར་རོ། །སུ་ཞིག་ལ་ཅུང་ཟད་བདེ་བ་བྱེད་པ་ཞེས་བྱ་བ་འདི་ཡང་འདིར་རྗེས་སུ་གནང་བའི་དོན་ཏོ། །ཆུ་ལ་ཆབ་རོམ་འཆགས་པའི་ཡུལ་དུ་ནི་ཞྭ་དང་ལྷམ་སྒྲོག་གུ་ཅན་ཡང་ངོ་ཞེས་བྱ་བ་ནི་ཡུལ་གང་དུ་ཆུ་ལ་ཆབ་རོམ་འཆགས་པའི་ཆུ་ཡུལ་གང་ན་ཡོད་པ་དེ་ལ་ནི་འདི་དག་བཅང་བར་བྱ་ཞེས་བྱ་བའི་དོན་ཏོ། །དོན་འདི་ལ་མངོན་པར་བརྟེན་པ་ཡང་གཞན་ཡང་མེད་པའི་ཕྱིར་དང་འདིར་ལྷག་པའི་རིགས་པའི་ངོ་བོ་མེད་པའི་ཕྱིར་རིགས་པའི་ངོ་བོའི་དོན་ལ་དྲང་བ་བསྐྱབ་པའི་དོན་དུ་ཤེས་པར་བྱའོ། །དུས་གཞན་གྱི་ཚེ་ན་འབབ་པ་གཞན་སྦྱིན་པའི་ཕྱིར་དང་འབབ་པ་ལྷགས་པ་དང་བྲལ་ན་དབྱར་གྱི་གོས་རས་ཆེན་བཞིན་དུ་ཞེས་བྱ་བ་འདི་ལྟ་བུ་ཆུ་མེད་པའི་ཕྱིར་གཞག་པར་བྱའོ། །ནད་གསོ་བའི་དོན་དུ་ནི་འདི་དག་ནི་ཉེ་བར་དགོས་པའོ། །བཅས་པའི་ཁ་ན་མ་ཐོ་བ་ཐམས་ཅད་རྗེས་སུ་གནང་བས་བསྡུས་པར་རིག་པར་བྱའོ། །བླ་མའི་དྲུང་དུ་མཆིལ་ལྷམ་བགོ་བ་བསྟེན་པར་མི་བྱའོ་ཞེས་བྱ་བ་ནི་ཇི་སྐད་དུ་བཅོམ་ལྡན་འདས་ཀྱིས་འདི་ཉིད་ཀྱི་སྤྱན་སྔར་མཆིལ་ལྷམ་གྱོན་ཞིང་འཆག་པའི་དགེ་སློང་སྨད་པ་ན་དགེ་སློང་དག་ལ་ཡང་ཚུལ་དེ་ཉིད་སྨད་པ་ཡིན་བས་དེའི་ཕྱིར་མདོ་འདི་བྱས་སོ། །སེང་གེ་དང་སྟག་དང་གུང་དང༌། གླང་པོ་ཆེ་ཅང་ཤེས་དང་རྟ་ཅང་ཤེས་ཀྱི་ཡན་ལག་ཅུང་ཟད་ཀྱང་ལུས་ལ་གདགས་
པར་མི་བྱ་བ་ཉིད་དེ་ཞེས་བྱ་བ་ལ་ཅུང་ཟད་ཀྱང་ཞེས་བྱ་བ་ཡང་འདིར་གཞུང་ནི། ཕྲན་ཚེགས་དག་ལས་སེང་གེ་དང་དེ་ལས་གཞན་བའི་རི་དགས་གཏུམ་པོ་རྣམས་ལ་ཡང་འདིར་བསྙེགས་པའོ། །དེ་དག་གིས་གླང་པོ་ཆེ་ཕལ་པ་དང་རྟ་དམུ་རྒོད་དང༌། དེ་ལས་གཞན་བའི་གཅན་གཟན་དག་ལ་འཕངས་པ་ཡིན་ནོ་ཞེས་བྱ་བ་ལ། དེ་དག་གིས་ཞེས་བྱ་བ་ལ། འདིར་གཞུང་ནི། གླང་པོ་ཆེ་དང་སྟག་དང་གུང་དང་གླང་པོ་ཆེ་ཅང་ཤེས་དང༌། སེང་གེ་ལ་ སོགས་པ ་རྣམས་ཀྱིས་སོ་ཞེས་གསུངས་པ་ཡིན་ནོ། །མཆིལ་ལྷམ་དག་གདབ་པར་མི་བྱའོ། །རས་མ་གཤེར་བ་དག་གིས་དེ་དག་གི་རྡུལ་མེད་པར་བྱ་བའི་ཕྱིར་ཕྱི་བར་བྱའོ་ཞེས་བྱ་བ་ལ། དེ་དག་ཅེས་བྱ་བ་ནི་མཆིལ་ལྷམ་མོ། །དེ་བཅང་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་ཕྱི་བའི་རས་མའོ། །དེ་དག་བརྒྱུ་བར་བྱའོ་ཞེས་བྱ་བ་ནི་མཆིལ་ལྷམ་དེ་དག་གོ །མི་མཛེས་པའི་དངོས་པོ་དབེན་བའི་ཕྱོགས་སུ་བྱའོ་ཞེས་བྱ་བ་ནི། ལྷུང་བཟེད་གླན་པ་ལ་ སོགས་པ ་མི་མཛེས་པའི་དངོས་པོ་ཐམས་ཅད་དབེན་པའི་ཕྱོགས་སུ་ལས་བྱེད་པ་ཞེས་བྱ་བ་ཁྱད་པར་ཡོངས་སུམ་བཟུང་བར་བསྒྲུབ་པའོ། །དེའི་ཆེད་དུ་སྨྱུང་བུ་དང་ཀོ་བ་བཅང་བར་བྱ་སྟེ། དྲ་གྲི་ནི་མ་ཡིན་ནོ་ཞེས་བྱ་བ་ལ། དེའི་ཆེད་དུ་ཞེས་བྱ་བ་ནི་མཆིལ་ལྷམ་དེ་བརྒྱུ་བའི་དོན་དུའོ། །འདིར་གཞུང་ནི། སྨྱུང་བུ་དང་ཀོ་བ་བཅང་བར་བྱའི་དྲ་གྲི་ནི་མ་ཡིན་ནོ་ཞེས་གསུངས་པ་ཡིན་ནོ། །ཁྱིམ་གཞན་དང་ཆབ་ཁུངས་ལས་གཞན་བར་ཤིང་གི་མཆིལ་ལྷམ་བགོ་བར་མི་བྱ་བའོ། །སྨྱུག་མའི་གླེགས་བུ་མུན་ཛ་དང༌། སི་རི་དང་དར་བ་དག་གིས་ཡང་མི་བྱའོ། །ཐ་གུའི་ཡང་ངོ༌། །རླུང་དྲག་ཅན་མ་ཡིན་བས་སོ་ཞེས་བྱ་བ་ནི་གང་ཟག་རླུང་དྲག་ཅན་མ་ཡིན་བས་ཐ་གུའི་མཆིལ་ལྷམ་བགོ་བར་མི་བྱའོ། །རླུང་དྲག་ཅན་གྱི་ནད་པས་ནི་མི་འདྲུལ་བར་བྱ་བའི་ཕྱིར་ཆག་ཆག་གདབ་པ་ལ་འདིར་དེའི་རྗེས་སུ་མཐུན་བར་བྱའོ། །འདི་ནི་གཙོ་བོར་དོན་མཉམས་པར་ཡིན་གྱི་ནད་གསོ་བ་ནི་མ་ཡིན་ནོ། །དེ་ལྟ་བས་ན་བཅས་པའི་ཁ་ན་མ་ཐོ་བ་འདི་མ་གྲུབ་པ་ནི་མ་ཡིན་ཏེ། ནད་པ་ལ་རྗེས་སུ་གནང་བས་འདིར་སྨྱུག་མའི་གླེགས་བུ་ལ་ སོགས་པ ་ལ་ཕལ་ཆེར་དབུལ་བར་བྱེད་པ་ཉིད་དང་ཤིན་ཏུ་མི་མཐུན་པར་བྱེད་པ་ཉིད་དང་ཤིང་གི་ལྷམ་ནི་ཤིན་ཏུ་སྐྱོན་དང་ལྡན་བ་ཉིད་དོ། །དེ་བས་ན་འདིར་དེའི་ཐ་ཚིག་གོ །ཁྱིམ་གཞན་དུ་གཞན་མེད་ན་ཀོ་ལྤགས་ལ་འདུག་པར་བྱའོ་ཞེས་བྱ་བ་ལ།
གཞན་ཞེས་བྱ་བ་ནི་སྟན་གཞན་ན་མེད་ནའོ། །དེར་ཡང་རྐྱེན་དེ་ལྟ་བུ་དག་མེད་ན་ཉལ་བར་མི་བྱ་བ་ཉིད་དོ་ཞེས་བྱ་བ་ལ། དེར་ཡང་ཞེས་བྱ་བ་ནི་ཁྱིམ་གྱི་ནང་དུའོ། །དེ་ལྟ་བུ་དག་ནའོ་ཞེས་བྱ་བ་ནི་ཀོ་ལྤགས་སོ། །འདི་ནི་མ་མོ་ལས། མཆིལ་ལྷམ་དུ་གྱུར་པའི་ཀོ་ལྤགས་ལ་ཀོ་ལྤགས་ཉིད་མ་ཡིན་ཏེ། དེའི་ཕྱིར་ཕྲེང་ཐག་གི་ཆོ་ག་ལ་ཡུལ་མ་ཡིན་པར་ཤེས་པར་མི་བྱའོ། །མིག་ལ་ཕན་པར་བྱ་བའི་ཕྱིར་དོམ་ལྤགས་བཅང་བར་བྱའོ་ཞེས་བྱ་བ་ལ། འདིར་གཞུང་ནི། དོམ་གྱི་པགས་པ་བླང་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །རྐང་པའི་གནས་སུ་གདིང་བར་བྱ་བའོ་ཞེས་བྱ་བ་ནི་དོ་མ་ལྤགས་བླངས་པ་དེའོ། །སངས་རྒྱས་ཀྱི་ནི་དྲི་གཙང་ཁང་གི་སྒོར་རོ་ཞེས་བྱ་བ་ནི་སངས་རྒྱས་དབང་བའི་དོམ་ལྤགས་དགེ་སློང་ངམ་གཞན་གྱི་དྲི་གཙང་ཁང་གི་སྒོར་གདིང་བར་བཅས་པའོ། །མཆིལ་ལྷམ་དག་ཏུ་བགོ་བར་བྱའོ་ཞེས་བྱ་བ་ནི་མིག་ལ་ཕན་པར་བྱ་བའི་ཕྱིར་ཞེས་བྱ་བར་སྦྱར་རོ། །རླུང་ནད་ཅན་གྱི་ནི་འདུག་པ་དང་ཉལ་བར་ཡང་བྱའོ་ཞེས་བྱ་བ་ནི་དོམ་གྱི་པགས་པ་དེའི་སྟེང་དུའོ། །གཞང་འབྲུམ་ཅན་ཐམས་ཅད་ཀྱིས་ཀྱང་དེ་བཞིན་ནོ་ཞེས་བྱ་བ་ནི་རྐང་པའི་གནས་སུ་གདིང་བར་བྱའོ་ཞེས་བྱ་བ་ལ་ སོགས་པ ་འདིར་དེ་རྣམས་ལ་རླུང་ནད་ཅན་དང༌། ལྷན་ཅིག་ཏུ་འདུག་པ་དང་ཉལ་བར་ཡང་བྱ་བ་སྨོས་སོ། །འདིར་གཞུང་ནི་ཕྲན་ཚེགས་དག་ལས། མཆིལ་ལྷམ་གདིང་བར་བྱའོ། །དེ་བས་ན་དགེ་སློང་གཞང་འབྲུམ་ན་བས་དོམ་ལྤགས་ཀྱི་མཆིལ་ལྷམ་དག་བཅང་བར་རྗེས་སུ་གནང་ངོ་ཞེས་གསུངས་པ་ཡིན་ནོ་ཞེས་བྱ་བའི་རྗེས་སུ་འབྲངས་པས་རྐང་པའི་གནས་སུ་ཡང་བཅས་པའོ། །འདིར་ཡོ་བྱད་ཅེས་གསུངས་སོ། །དེ་ལ་དེ་ལྟར་སྦྱར་བར་བྱའོ་ཞེས་བྱ་བ་ནི་དོམ་གྱི་པགས་པ་དེ་ལའོ། །སྤུ་ལ་རེག་པས་ཕན་པར་བྱེད་པ་ཉིད་དུ་རེག་གོ་ཞེས་བྱ་བ་ནི་དོམ་ལྤགས་ཀྱི་སྤུ་ལས་སོ། །དགེ་སློང་དག་དོམ་ལྤགས་ཀྱི་སྤུ་དག་འོག་ཏུ་སྟོན་པར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྤུ་དག་གྱེན་དུ་བསྟན་པར་བྱའོ་ཞེས་གསུངས་པ་དེ་འདིས་བསྡུས་པ་ཡིན་ནོ། །མཆིལ་ལྷམ་དག་རིམ་པ་མང་པོ་ཉིད་ཀྱིས་ཀྱང་ངོ་ཞེས་བྱ་བ་ཡང་ཕན་པ་བྱེད་པ་ཉིད་དུ་རིག་གོ་ཞེས་བྱ་བར་སྦྱར་ཏེ། རིམ་པ་གཅིག་པ་ཡང་ཐམས་ཅད་ཀྱིས་ཐམས་ཅད་དུ་ཕན་པར་བྱེད་པ་
ཉིད་ཡིན་པས། དེ་བས་ན་རབ་ཀྱི་དགོངས་པ་ཅན་ཏེ་ཞེས་བྱ་བར་ཤེས་པར་བྱའོ། །དུ་མའི་སྟེང་དུ་གཅིག་གཞག་པས་ཀྱང་ངོ་ཞེས་བྱ་བ་ནི་ཀོ་ལྤགས་བཞིན་རིམ་པ་དུ་མའི་སྟེང་དུ་དོམ་ལྤགས་གཅིག་གཞག་པས་ཀྱང་ཕན་པར་བྱེད་པ་ཉིད་དུ་རིག་གོ་ཞེས་བྱ་བར་སྦྱར་ཏེ། སྔ་མའི་རྣམ་པ་མེད་པ་ལ་གང་བསྟེན་པ་ཉིད་དུ་རིག་པར་བྱའོ། །འདིར་གཞུང་ནི། རིམ་པ་མང་པོ་དག་རྙེད་པ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། སྟེང་དུ་རིམ་པ་གཅིག་བཅུག་པར་བྱའོ་ཞེས་གསུངས་པ་ཡིན་ནོ། །ཨཤྨ་པ་རནྟ་དག་ཏུ་ནི་ཀོ་ལྤགས་མི་བཅང་བར་མི་བྱའོ་ཞེས་བྱ་བ་ནི། ཡུལ་ཨཤྨ་པ་རནྟ་དག་ཏུ་ནི་ཀོ་ལྤགས་ནི་དགའ་མགུར་བཅང་དུ་གནང་བའོ། །འདིར་གཞུང་ནི། བེའུ་གསོད་པ་པའི་གླེང་གཞི་ལས། དེ་ལྟ་བས་ན་དགེ་སློང་གིས་ཀོ་ལྤགས་མི་བཅང་བར་མི་བྱའོ་ཞེས་གསུངས་ པ་ཡིན་ནོ། །སེང་གེ་ལ་སོགས ་པའི་མི་བཅང་ངོ་ཞེས་བྱ་བ་ཡང་ཀོ་ལྤགས་ཞེས་བྱ་བར་སྦྱར་ཏེ། སེང་གེ་དང་སྟག་དང༌། གླང་པོ་ཆེ་ཅང་ཤེས་དང༌། རྟ་ཅང་ཤེས་ལ་ སོགས་པ ་རྣམས་ཀྱིས་ཉེ་བར་བསྡུ་བའོ། །དེ་བས་ན་འདིར་ཡང་གླང་པོ་ཆེ་ལ་ སོགས་པ ་དག་ཀྱང་དེ་རྣམས་ཀྱིས་བསྙེགས་པ་ཉིད་དོ། །འདི་རྣམས་ལ་ཉེ་བར་གནས་པར་བྱ་བ་ཉིད་མ་ཡིན་པ་དེ་བས་ན་དེའི་བྱེད་པའོ། །གང་གིས་ཀོ་ལྤགས་མི་རུང་བ་ཉིད་ཡིན་བ་དེའི་རྒྱུས་པ་དང༌། རུས་པ་དང་སོ་དང་ཤ་ལ་ སོགས་པ ་ཡང་ངོ་ཞེས་བྱ་བ་ནི་སྲོག་ཆགས་གང་གིས་ཀོ་ལྤགས་མི་རུང་བ་དེའི་རྒྱུས་པ་ལ་ སོགས་པ ་ཡང་མི་རུང་བ་ཉིད་ཡིན་པའོ། །འགྲོ་བ་དམན་པའི་དེ་ལའོ། །རྐྱལ་བ་སྐ་བ་ཅན་བཅང་བར་བྱའོ་ཞེས་བྱ་བ་ནི། ཆུ་ལ་རྒལ་བ་དང་ཆུ་འཛིན་པའི་དོན་དུའོ། །ཡང་ན་རྐྱལ་སྐྱའོ་ཞེས་བྱ་བ་ནི། དཀར་པོ་རྐྱལ་སྐྱ་ཉིད་དུ་བརྗོད་པའོ། །དོན་གསལ་བ་དོན་གྱིས་ཐོབ་པ་མཛད་པར་བྱ་སྟེ། དེའི་ཕྱིར་ཁྲ་བོ་བཀྲ་བ་མི་བཅང་ངོ་ཞེས་བྱ་བ་ནི། རྐྱལ་པ་དང་རྐྱལ་སྐྱའོ། །རྐྱལ་མི་ཤེས་པས་སྟ་གོན་མ་བྱས་པར་ཆུའི་གཏིང་དུ་འཇུག་པར་མི་བྱའོ་ཞེས་བྱ་བ་ལ། མ་བྱས་པར་ཞེས་བྱ་བ་ནི་འདིར་གཞུང་ནི། གང་རྐྱལ་མི་ཤེས་པར་དེས་རང་གི་ལུས་སུ་ཡོངས་སུ་དོར་བར་མི་བྱའོ་ཞེས་འདོན་པ་གཅིག་ལས་གསུངས་པའི་དེའི་འདི་བསྡུས་པ་ཡིན་ནོ། །དབེན་པའི་ཕྱོགས་སུ་རྐྱལ་བསླབ་པར་བྱའོ་ཞེས་བྱ་བ་ནི་འགྲོ་བའི་
དོན་ཅན་ལ་རྒོད་བག་གི་རྣམ་པ་ཉིད་ཀྱིས་རྒལ་བ་ནི་མ་ཡིན་ཏེ། བསླབ་པར་བྱ་བ་ནི་རྒོད་བག་གི་རྣམ་པ་ཉིད་དེ་བསལ་ན་དེ་བཞིན་དུ་འདི་ལ་རྗེས་སུ་བསྒྲུབ་པའི་སྔ་རོལ་དུ་གནས་པར་མི་འགྱུར་རོ། །དབེན་པ་ཞེས་བྱ་བ་ནི་རབ་ཏུ་དབེན་པའི་ས་ཕྱོགས་སུ་དབེན་པའི་ཁྱམས་ཀྱི་དངོས་པོ་བྱེད་པ་དེ་བས་ན་དེའི་སྤྲོས་པ་འདིའོ། ཁ་ཅིག་ལས་མི་འདོད་པ་བཞིན་དུ་རྒལ་བར་འདོད་པ་དེ་ན་མི་བདེན་ཏེ། གང་གི་ཕྱིར་སྟོབས་ལ་ སོགས་པ ་མེད་པའི་ཕྱིར་དང༌། དམིགས་ཀྱིས་བསལ་བའི་བར་མེད་པའི་ཕྱིར་རོ། །དེ་མ་ཡིན་པའི་གཏིང་དུ་ཁྱུ་མཆོག་མ་གཏོགས་པའི་བ་ལང་ལ་བརྟེན་པར་མི་བྱའོ་ཞེས་བྱ་བ་ལ། དེ་མ་ཡིན་པའི་གཏིང་ཞེས་བྱ་བ་ནི་བ་ལང་གིས་རྒལ་མི་ནུས་པའི་གཏིང་དུའོ། །མདོར་གྱུར་པ་ལ་ཡང་བྱེ་བྲག་མ་བཟུང་བར་ཆོ་ག་འདིའོ། །དེ་ལ་མདོར་གྱུར་པ་འདི་ལ་བརྟེན་ནས་ནི་བསླབ་པའི་གཞི་འདི་ལས་འགལ་བའི་ཉེས་བྱས་གཅིག་དང༌། མོ་ལ་རེག་པའི་ཉེས་བྱས་གཞན་ཅིག་དང་གཉིས་སུ་འགྱུར་རོ། །ཆོ་ག་འདི་འདའ་བར་གྱུར་པ་ལ་ཞུས་པ་ལས། མོ་ལ་རེག་པར་མི་བྱའོ་ཞེས་གསུངས་པ་ལས་ཤེས་པ་ཡིན་ནོ། །གླང་པོ་ཆེ་དང་རྟ་དང་མ་ཧེ་དང་གཡག་དག་ལ་བརྟེན་པར་བྱའོ་ཞེས་བྱ་བ་ནི་ཁ་ཅིག་འདིར་གཡག་གི་གནས་སུ་རྔ་མོ་འདོན་པ་ཡིན་ནོ། །འདི་ནི་མི་རིགས་ཏེ་དེས་རྒལ་མི་ནུས་པ་ཉིད་ཀྱི་ཕྱིར་རོ། །ཀོ་ལྤགས་ཀྱི་གཞི་རྫོགས་སོ།། །།སྨན་བསྟེན་པར་བྱའོ། །དེ་ནི་རྣམ་པ་བཞིའོ། །དུས་སུ་རུང་བ་དང༌། ཐུན་ཚོད་དུ་རུང་བ་དང༌། ཞག་བདུན་བ་དང༌། འཚོ་བའི་བར་དུ་བཅང་བ་ཉིད་དོ། །དང་པོ་མ་ཡིན་པ་ཉིད་དག་ནི་ནད་པའི་ཕྱིར་རོ་ཞེས་བྱ་བ་ལ། འདིར་དང་པོ་ཞེས་བྱ་བ་ནི་དུས་སུ་རུང་བ་སྟེ། དེ་མ་ཡིན་པ་གཞན་ཐུན་ཚོད་དུ་རུང་བ་ལ་ སོགས་པ ་ནི་དང་པོ་མ་ཡིན་པ་ཉིད་དོ། །དེའི་དངོས་པོ་ནི་དང་པོ་མ་ཡིན་པ་ཉིད་དོ། །དུས་སུ་རུང་བའི་སྤངས་པའི་ཐུན་ཚོད་དུ་རུང་བ་ལ་ སོགས་པ ་གསུམ་ལ་ནད་པའི་ཡུལ་ལ་བརྟེན་པར་བྱ་བ་ཉིད་ཡིན་གྱི་མི་ན་བའི་ཡུལ་ལ་ནི་མ་ཡིན་ནོ་ཞེས་བྱ་བའི་དོན་ཏོ། འདིར་གཞུང་ནི། དགེ་སློང་བྲམ་ཟེའི་བུ་མོས་ཞུས་པ་ལས། བཙུན་པ་ཐུན་ཚོད་དུ་རུང་བ་དང༌། ཞག་བདུན་པ་དང༌། འཚོ་བའི་བར་དུ་བཅང་བར་བྱ་བའི་སྨན་བྱིན་གྱིས་བརླབས་པ་གང་དག་ལགས་པ་དེ་དག་བྲོ་མི་
འཚལ་བས་ཡོངས་སུ་སྤྱད་དུ་རུང་ངམ། ཉེ་བ་འཁོར་མི་རུང་ངོ༌། །བྱིན་ལེན་བགྱིས་པ་དང་བྱིན་གྱིས་བརླབས་པ་དེ་དག་བྲོ་འཚལ་བས་ཡོངས་སུ་སྤྱད་དུ་རུང་ངམ། ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །བཙོ་ཚ་དང་ཆུ་ཤིང་གི་འབྲས་བུ་དང༌། རྒྱ་ཤུག་དང་ཨ་ཤྭདྠ་དང༌། ཨུ་དུམ་བཱ་ར་དང་རྩུབ་འགྱུར་དང༌། རྒུན་ཆུ་དང༌། འབྲ་གོའི་བཏུང་བ་རྣམས་ནི་ཐམས་ཅད་དུའོ་ཞེས་བྱ་བ་ལ་ཐམས་ཅད་དུའོ་ཞེས་བྱ་བ་ནི་ན་བ་དང༌། མི་ན་བའི་ཕྱིར་བཙོ་ཚ་ལ་ སོགས་པའི་བཏུང་བ་བརྒྱད་པོ་འདི་རྣམས་ལ་ཐམས་ཅད་ཉིད་ཀྱི་ཕྱིར་དང་པོ་མ་ཡིན་པ ་ཉིད་དོ། །ནད་པ་མ་ཡིན་པའི་ཕྱིར་ཏེ། ནད་པ་ཁོ་ནའི་ཕྱིར་ནི་མ་ཡིན་ཞེས་བྱ་བའི་དོན་ཏོ། །བཙོས་པའི་ཚ་དང༌། འབྲུའི་ཚ་དང་ཞོ་ག་ཆུ་དང༌། དར་བའི་དངས་མ་དང༌། རྩབ་མོ་ཆུས་བཏབ་པ་ཚགས་ཀྱིས་བཙགས་པ་ཤིན་ཏུ་སླ་བ་བཞིན་སྣང་བ་འདམ་བུའི་ཉག་མའི་མདོག་ལྟ་བུ་དག་ཀྱང་དེ་དང་འདྲའོ་ཞེས་བྱ་བ་ལ་དེ་དང་འདྲའོ་ཞེས་བྱ་བ་སྟེ་བཙོ་ཚ་ལ་ སོགས་པའི་བཏུང་བའང་དེ་དང་འདྲའོ་ཞེས་སྦྱར་རོ། །འདི་རྣམས་ཀྱང་ཞོ་ག་ཆུའི་བྱེ་བྲག་དང་ལྡན་པ ་རྣམས་ལ་ཐམས་ཅད་ཀྱི་ཕྱིར་དང་པོ་མ་ཡིན་པ་དང་བཏུང་བའི་ཞེས་བྱ་བའི་དོན་ཏོ། །འདིར་གླེང་གཞི་རྣམས་ལས་མདོ་འདི་གཞུང་ངོ༌། །སྤངས་པ་གདོང་མཐོང་བ་ནི་ཞེས་བྱ་བའི་ཚིག་འདིའོ། །ཐུན་ཚོད་དུ་རུང་བ་གཞག་པའི་ཕྱིར། བཏུང་བ་ནི་བྱེད་པའི་ཡན་ལག་ཉིད་ལའོ། །དེ་ལ་སིལ་བུ་རྣམས་ལས་དངས་མ་ཞེས་བྱ་བ་སྟེ། འདིར་རྒྱས་པར་བཤད་པར་བྱ་སྟེ། གདོང་མཐོང་བ་ནི་ཞེས་བྱ་བའོ། །འདིར་གཞུང་ནི། ཆང་བཏུང་བའི་ལྟུང་བྱེད་ཀྱི་ཞུ་བ་ལས། བཙུན་པ་དུས་མ་ཡིན་པར་བཅོས་པའི་ཚ་བྱར་རུང་ངམ། གལ་ཏེ་དངས་མར་གྱུར་ན་བྱེ་བྲག་ཏུ་གསལ་བ་གང་ལ་བཞིན་སྣང་བའོ། །མྱོས་པ་དང་བྲལ་བ་ཞེས་བྱ་བ་ཐམས་ཅད་དུབ་ཏུང་བར་གཏོགས་པ་དངས་མ་དེ་ལའོ། །དེ་ལས་རྗེས་སུ་མཐུན་པར་རྣམ་པར་གནས་པ་ཡིན་ནོ། །ལྷག་མ་རྣམས་ལ་ཡང་ཚལ་ སོགས་པ ་འདི་སྨོས་སོ་ཞེས་གསུངས་པ་ཡིན་ནོ། །དེ་ལྟ་བུ་ཉིད་ཀྱི་མདུན་རོལ་དུ་བསྙེན་པར་རྫོགས་པར་མཚན་མཐུན་པས་རེག་ཏུ་མི་རུང་ངོ་ཞེས་བྱ་བ་ནི་དེ་ལྟ་བུའི་དངོས་པོ་ནི་དེ་ལྟ་བུ་ཉིད་དོ། །ཞོ་ག་ཆུ་ལ་ སོགས་པ ་མདུན་རོལ་དུ་བསྙེན་པར་རྫོགས་པ་གཞན་མཚན་མཐུན་
པས་དེ་ལ་རེག་ཏུ་མི་རུང་བ་ནི་རིགས་པ་ཡིན་ནོ། །ཇི་ལྟར་དུས་སུ་རུང་བའི་རྫས་ཀྱང་བཏུང་བ་ལ་མདུན་རོལ་དུ་ནི་དུས་མ་ཡིན་པ་ཉིད་ཀྱི་ཕྱིར་དང༌། བཏུང་བར་བྱ་བ་མ་ཡིན་པའི་ཕྱིར་ཞེས་བྱ་བའི་དོན་ཏོ། །ཨ་རུ་ར་ལ་ སོགས་པ ་ལྔ་ཡང་ངོ་ཞེས་བྱ་བ་ནི་ཨ་རུ་ར་དང་སྐྱུ་རུ་ར་དང༌། བ་རུ་ར་དང་ན་ལེ་ཤམ་དང་པི་པི་ལིང་ཞེས་གསུངས་པ་ཡིན་ནོ། །བུ་རམ་ཡང་ངོ་ཞེས་བྱ་བ་ནི་ཐམས་ཅད་དུ་རུང་བ་སྟེ་དང་པོ་ཉིད་མ་ཡིན་ནོ། །དེ་བྱིན་གྱིས་བརླབས་པ་བཟའ་བ་ལམ་དུ་ཞུགས་པ་དང༌། དགེ་སྐོས་དང་ལག་གི་བླ་རྣམས་ནི་ནད་པ་དང་འདྲ་བ་ཉིད་ཡིན་ནོ་ཞེས་བྱ་བ་ནི་བུ་རམ་དེ་ཞག་བདུན་ པ་ལ་སོགས ་པར་བྱིན་གྱིས་བརླབས་པ་བཟའ་བ་ལ་ཇི་ལྟར་ནད་པས་དུས་དད་དུས་མ་ཡིན་པར་ཐམས་ཅད་དུ་བཟར་རུང་བ་དེ་བཞིན་དུ་ལམ་དུ་ཞུགས་པ་ལ་ཡང་ཞེས་བྱ་བའི་དོན་ཏོ། །ཟན་ཆད་པས་ཀྱང་དེ་དང་དུས་སུ་རུང་བ་མ་ཡིན་པ་བཟར་རུང་ངོ་ཞེས་བྱ་བ་ལ། དེ་དང་ཞེས་བྱ་བ་ནི་དེ་ལ་བུ་རམ་བྱིན་གྱིས་བརླབས་པ་དེ་ཡང་ནད་པ་དེ་དང་འདྲ་བ་ཉིད་དུ་བཟར་རུང་ལ་ཐམས་ཅད་ཀྱིས་སམ། གཞན་གྱིས་ཀྱང་དུས་སུ་རུང་བ་དང་མར་དང་འབྲུ་མར་ལ་ སོགས་པ ་ཡང་དུས་མ་ཡིན་པར་བཟར་རུང་ཞིང་ནད་པ་ཉིད་ཀྱིས་སོ། །དེ་ནི་རྣམ་པ་བཞི་པོ་དག་བརྗོད་པར་བྱ་སྟེ། དེའི་ཕྱིར་ཐུན་ཚོད་དུ་རུང་བའི་ནི་བཏུང་བ་དག་གོ་ཞེས་བྱ་བ་སྨོས་ཏེ། འདིར་གཞུང་ནི། ཐུན་ཚོད་དུ་རུང་བ་ནི་ཁྱིམ་པའམ་དགེ་ཚུལ་གྱིས་སྦྱར་བ་ཚགས་ཀྱིས་བཙགས་པ་དག་ནི་ཐུན་ཚོད་དུ་རུང་བའོ་ཞེས་གསུངས་པ་ཡིན་ནོ། །ཁ་ཅིག་ནི་ཐུན་ཚོད་དུ་རུང་བའི་བཏུང་བ་བརྒྱད་པོ་ཞེས་ཀྱང་ཟེར་རོ། །འདིར་གཞུང་དུ་བྱེད་དེ་བཙོ་ཚེའི་བཏུང་བ་དང༌། ཆུ་ཤིང་གི་འབྲས་བུའི་བཏུང་བ་དང༌། རྒྱ་ཤུག་གི་བཏུང་བའམ། ཨ་ཤྭདྠའི་བཏུང་བའམ། ཨུ་དུམ་བཱ་རའི་བཏུང་བའམ། རྩུབ་འགྱུར་གྱི་བཏུང་བའམ། རྒུན་ཆུའི་བཏུང་བའམ། འབྲ་གོའི་བཏུང་བ་རྣམས་ནི་ཐམས་ཅད་དུ་བྱའི་ཞེས་ཟེར་བ་དེ་ནི་མི་རིགས་ཏེ། ནད་པ་མ་ཡིན་པ་ལ་ཡང་དེ་རྣམས་འོས་པའི་ཕྱིར་ཞེས་བྱ་བའོ། །འབྲས་བུ་བརྒྱད་པོ་འདི་རྣམས་ཁྱིམ་པ་དང་དགེ་ཚུལ་གྱིས་སྦྱར་བ། ཚགས་ཀྱིས་བཙགས་པ་འདི་དག་ནི་དུས་སམ་དུས་མ་ཡིན་པར་ཡང་ན་བའམ་ན་བ་མ་ཡིན་པས་ཀྱང་བཏུང་བར་བྱ་བ་དག་ཡིན་ཏེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །
དངས་མ་ཞེས་བྱ་བ་ནི་སྐ་བ་ཉིད་བསལ་བའོ། །ཤིན་ཏུ་སླ་བའོ་ཞེས་བྱ་བ་ནི་ཐུན་ཚོད་དུ་རུང་བའི་བཏུང་བ་དག་གོ །དེའི་རྫས་དེ་ཉིད་མ་ཡིན་པ་དེའི་ཕྱིར་གལ་ཏེ་དུས་སུ་རུང་བ་ཉིད་ཡིན་ན་བསྙེན་པར་མ་རྫོགས་པས་སྦྱར་ཞིང་ཚགས་ཀྱིས་ཀྱང་བཙགས་པར་བྱའོ་ཞེས་བྱ་བ་དང༌། དེའི་རྫས་དེ་ཉིད་མ་ཡིན་པའི་ཕྱིར་ཞེས་བྱ་བ་ནི་བཏུང་བ་ཉིད་མ་ཡིན་པའི་ཕྱིར་རོ། །དེའི་རྫས་ཞེས་བྱ་བ་ནི་བཏུང་བར་བྱ་བའི་རྫས་དེའོ། །གལ་ཏེ་དུས་སུ་རུང་བ་ཡིན་ན་ཞེས་བྱ་བ་ནི་རྫས་དེའོ། །བསྙེན་པར་མ་རྫོགས་པས་སྦྱར་ཞིང་ཞེས་བྱ་བ་ནི་དུས་མ་ཡིན་པར་རུང་བ་ཉིད་ཡིན་ནོ། བསྙེན་པར་རྫོགས་པས་སྦྱར་ཞིང་བཙགས་པ་ལ་ཡང་ཉེས་ པ་མེད་དོ། །དེ་དག་ལས་གཞན་བལ་པོ་སེའུ་དང་མདུ་ལུང་ག་ལ་སོགས ་པའི་རྫས་ཀྱི་ཞེས་བྱ་བ་ནི་བཙོ་ཚ་ལ་ སོགས་པའི་བཏུང་བ་དག་ལས་གཞན་པ ་ཐུན་ཚོད་དུ་རུང་བའི་བཏུང་བ་ལས། བལ་པོ་སེའུ་དང་མ་དུ་ལུང་ག་ལ་སོགས་པའི་རྫས་གང་ཞིག་རྩ་བ་དང་སྡོང་བུ་དང༌། འདབ་མ་དང་མེ་ཏོག་དང་འབྲས་བུ་ཟས་ཀྱི་དོན་དུ་ཁྱབ་པར་བྱེད་པ་གང་ཡིན་པ་དེ་དག་ཀྱང་བསྡུ་བའི་ཕྱིར་སྙེགས་པར་རིག་པར་བྱའོ། །འདིར་གཞུང་ནི། སིལ་བུ་དག་ལས། འདི་དང་པོ་བྱས་ཏེ་སིངས་པོ་ཞེས་བྱ་བའི་མཐར་ཐུག་བའོ་ཞེས་གསུངས་པ་ཡིན་ནོ། །དེ་དུས་སུ་རུང་བ་ཉིད་ཡིན་ན་ཐུན་ཚོད་ཀྱི་མཐའ་ཡིན་ནོ་ཞེས་བྱ་བ་ལ། དེ་ཞེས་བྱ་བ་ནི་བཏུང་བའི་རྫས་དེའོ། །གཞན་ཉིད་ཡིན་ན་དེའི་གང་ཡིན་པའོ་ཞེས་བྱ་བ་ནི་བཏུང་བའི་རྫས་དེ་དུས་སུ་རུང་བ་ལས་གཞན་བ་དུས་མ་ཡིན་པར་རུང་བ་ཉིད་ཡིན་ན་གང་ཞིག་རྫས་དེའི་མཐར་ཐུག་པ་བཏུང་བ་དེ་ལ་ཐུན་ཚོད་ཀྱི་མཐའ་གཞན་བཟའ་བར་བྱ་བ་ལ་དུས་གང་གི་ཚེ་བཟའ་བར་བྱ་བ་ཉིད་སྐྱེས་པར་འགྱུར་བ་དེའི་ཚེ་བཟའ་བའི་ཕྱིར་དུས་མ་ཡིན་པར་བཏུང་བའི་རྫས་ལ་དུས་ཐམས་ཅད་པ་ཉིད་ཡིན་པར་ཤེས་པར་བྱའོ། །བྱིན་གྱིས་བརླབས་པའི་ཕྱིར་ནི་ཐུན་ཚོད་དུ་རུང་བ་ཉིད་ཡིན་པར་ཤས་པར་བྱའོ། །ཁ་ཅིག་ན་རེ་མ་གྱུར་ན་དེ་ཡིན་གྱི་གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་རོ་ཞེས་བྱ་བ་ནི་གང་ཞིག་བཏུང་བའི་རྫས་ཀྱི་མཐའ་ཡིན་པ་དེ་ཉིད་བཏུང་བ་ལ་ཞེས་གང་སྨོས་པ་དེ་གཅིག་ཏུ་ངེས་པར་རྣམ་པར་གནས་པ་མ་ཡིན་པར་ཤེས་པར་བྱ་སྟེ། འདི་ལྟར་ངོ་བོ་ཉིད་མ་གྱུར་ན་དེ་ལྟུང་བའི་མཐའ་ཡིན་གྱི། གྱུར་ན་སྐད་ཅིག་གང་ཚུན་ཆད་ཀྱི་འོག་ཏུ་ངོ་བོ་ཉིད་
དུ་གྱུར་པའི་སྐད་ཅིག་དེ་ཉིད་བཏུང་བའི་མཐའ་ཡིན་པར་ཤེས་པར་བྱའོ་ཞེས་ཟེར་རོ། །དེ་ནི་མ་ཡིན་ཏེ་དུས་ལྷག་པ་ལ་བརྟེན་ན་མི་འཆགས་པར་འགྱུར་བའི་ཕྱིར་དང༌། དེ་འབྱུང་བར་འགྱུར་བ་ཕལ་པ་རྣམས་ཀྱི་བགྲོད་པ་མ་ཡིན་པའི་ཕྱིར་བྱིན་གྱིས་བརླབ་པར་བྱ་བ་ཉིད་མ་ཡིན་པར་འགྱུར་བའི་ཕྱིར་རོ་ཞེས་བྱ་བ་ནི་གྱུར་ན་གང་ཚུན་ཆད་དེ་ཡིན་པའོ་ཞེས་ཟེར་བ་ནི། དེ་ནི་མ་ཡིན་ཏེ། དུས་ལྷག་པ་ལ་བརྟེན་ན་མི་འཆགས་པར་འགྱུར་བའི་ཕྱིར་ཏེ། གང་ལས་བཏུང་བར་གྱུར་པར་འགྱུར་ན། དེའི་ཕྱིར་དུས་ལྷག་པ་ལ་བྱིན་གྱིས་བརླབ་པ་བརྟེན་པའི་བྱིན་གྱིས་བརླབ་པ་མི་འཆགས་པ་སྟེ། འདིར་དེ་ཙམ་གྱི་དུས་ལས་མ་གནང་བ་ཉིད་ཀྱི་ཕྱིར་ཞེས་བྱ་བ་འདི་ཐོབ་པའོ། །ཐོབ་པ་དེ་དང་མི་འཆགས་པ་མེད་པ་ལ་ཤེས་པར་བྱ་བ་མ་ཡིན་པ་ཉིད་ཀྱི་ཕྱིར་འབྱུང་བར་འགྱུར་བ་ལ་ཐ་མལ་པ་རྣམས་ལ་བྱིན་གྱིས་བརླབ་པ་མ་ཡིན་པ་ཉིད་ཐལ་བར་འགྱུར་རོ། །གང་གི་ཕྱིར་གང་ཞིག་འབྱུང་བར་འགྱུར་བ་དེ་ནི་ཐ་མལ་པ་དང༌། མ་ཐོབ་པ་རྣམས་ལ་མ་འོངས་པའི་ཤེས་པའི་ནུས་པས་བགྲོད་པར་བྱ་བ་མ་ཡིན་ནོ། །དེ་ལྟ་བས་ན་དེ་མི་ཤེས་པའི་ཕྱིར་ཡོངས་སུ་གཟུང་བར་བྱ་བའི་དུས་གང་ཡིན་པ་དེ་མི་ཤེས་པས། དེས་ན་བྱིན་གྱིས་བརླབ་པར་བྱ་བ་ཉིད་བཏུང་བ་ལ་ཐོབ་པར་འགྱུར་རོ། །ཐུན་ཚོད་ཉིད་ཀྱིས་ཀྱང་མདུན་རོལ་དུ་ཐུན་ཚོད་ཀྱི་ཐ་མ་ལས་འགའ་ཞིག་ལས་ཡོངས་སུ་གཟུང་བར་འགྱུར་རོ། །འདིར་རོ་དང་ཕྱེ་མ་སྦྱར་བའི་བཏུང་བ་དག་འདུས་པ་ཉིད་ཡིན་ནོ་ཞེས་བྱ་བ་ལ། འདིར་ཞེས་བྱ་བ་ནི་ཐུན་ཚོད་དུ་རུང་བ་རྣམས་ལའོ། །རོ་དང་ཕྱེ་མ་སྦྱར་བའི་བཏུང་བ་ལ་ཡང་ཐུན་ཚོད་དུ་རིག་པར་བྱའོ་ཞེས་བྱ་བའི་དོན་ཏོ། །སྨན་རྩབས་ཤིན་ཏུ་སླ་བ་ཡང་ངོ་ཞེས་བྱ་བ་ལ། ཐུན་ཚོད་དུ་རུང་བའི་བཏུང་བ་དག་ཏུ་འདུས་པ་ཉིད་ཡིན་ནོ་ཞེས་བྱ་བར་སྦྱར་རོ། །སྨན་རྩབས་ཞེས་བྱ་བ་དེ་ཇི་ལྟ་བུ་ཞིག་ཡིན་ཞེ་ན། དེའི་ཕྱིར་དེ་ནི་རྩ་བ་ལ་ སོགས་པའི་སྨན་བཀུས་པ ་སྐྱུར་པོ་ཞེས་བྱ་བ་སྨོས་ཏེ། ཐུན་ཚོད་དུ་རུང་བ་བསྟན་ནས། དེའི་ཕྱིར་ཞུན་མར་དང༌། འབྲུ་མར་དང༌། སྦྲང་རྩི་དང་བུ་རམ་གྱི་སྦུ་བ་དག་ནི་ཞག་བདུན་པའོ། །བུ་རམ་དང་ཧྭགས་དང༌། ལི་ཁ་ར་ལ་ སོགས་པ ་ཐམས་ཅད་ནི་བུ་རམ་གྱི་སྦུ་བ་ཉིད་ཀྱིས་འཕངས་སོ་ཞེས་བྱ་བ་ནི་ཁྱིམ་བདག་གླང་བུ་ལྟ་བུས་དགེ་སློང་ཟན་ཆད་པ་རྣམས་ཀྱིས་དུས་མ་ལགས་པར་ཅི་
ཞིག་འཚལ་དུ་རུང་ཞེས་ཞུས་ན། བུ་རམ་དང༌། ཞུན་མར་དང༌། ཧྭགས་དང༌། ལི་ཁ་ར་དག་དང༌། བཏུང་བ་དག་གོ་ཞེས་གསུངས་པ་གང་ཡིན་པ་དེ་ལས་འདི་ལྟར་ཤེས་པར་བྱ་བ་ཡིན་ནོ། །བདུད་རྩི་ནི་ཞུན་མར་དང་འདྲ་བ་ཉིད་དོ་ཞེས་བྱ་བ་ནི་བཟའ་བར་བྱ་བ་ཉིད་དང་ཞག་བདུན་པ་ཉིད་ཀྱི་ཕྱིར་ཏེ། ཞུན་མར་གྱི་རྣམ་པ་ཉིད་བསྟན་པའི་ཕྱིར་དེ་ལྟར་འདི་སྨོས་ཏེ། འདིར་གཞུང་ནི། ཞུ་བ་ལས་སོ། །ཞག་བསྐོལ་ཞིང་བཙགས་པ་དག་ནི་འབྲུ་མར་དང་མར་འདྲ་བ་ཉིད་དོ་ཞེས་བྱ་བ་ཡང༌། དེའི་ཚེ་དེ་རྣམས་ཡིན་པར་བྱིན་ལེན་བྱས་པ་རྣམས་ནི་འབྲུ་མར་གྱི་རྣམ་པ་ཉིད་ལས་སྐྱེས་པ་ཉིད་དོ། །འདིར་གཞུང་ནི། ཞག་རྣམ་པ་ལྔ་པོ་འདི་དག་ནི་དུས་མ་ཡིན་པར་བསྐོལ། དུས་མ་ཡིན་པར་བཙགས། དུས་མ་ཡིན་པར་བྱིན་ལེན་བྱས། དུས་མ་ཡིན་པར་བྱིན་གྱིས་བརླབས་ན་ཡང་ཡོངས་སུ་ལོངས་སྤྱོད་པར་མི་བྱའོ། །དུས་སུ་བསྐོལ་དུས་སུ་བཙགས། དུས་སུ་བྱིན་ལེན་བྱས་ཤིང་དུས་མ་ཡིན་པར་བྱིན་གྱིས་བརླབས་ན་ཡང་ལོངས་སྤྱད་པར་མི་བྱའོ། །དུས་སུ་བསྐོལ་དུས་སུ་བཙགས་དུས་སུ་བྱིན་ལེན་བྱས། དུས་སུ་བྱིན་གྱིས་བརླབས་ན་འབྲུ་མར་ཉིད་དུ་ལོངས་སྤྱད་པས་ཞག་བདུན་པས་ཡོངས་སུ་ལོངས་སྤྱད་པར་བྱའོ་ཞེས་གསུངས་པ་ཡིན་ནོ། །གང་ཞིག་འདིར་བསྐོལ་བ་དང་བཙགས་པ་ཉིད་ནི་ཁས་ལེན་པར་བྱེད་པ་དེ་བས་ན་འདིར་དོན་འདི་རྙེད་པའོ། །འདིར་དེ་དག་ལ་དུས་མ་ཡིན་པར་བྱས་པ་ཉིད་ལ་བཟའ་བར་བྱ་བ་མ་ཡིན་པ་ཉིད་དུ་ཤེས་པར་བྱ་བ་ཡིན་ནོ། །དུས་མ་ཡིན་པ་འམ་དུས་འདི་དག་བྱས་པ་ལ་དུས་མ་ཡིན་པར་བྱིན་གྱིས་བརླབས་བརླབས་པ་ཉིད་ལ་བཟའ་བར་བྱ་བ་མ་ཡིན་པ་ཉིད་ཅེས་བྱ་བ་འདིར་དོན་དེའོ། །བྱིན་ལེན་བྱེད་པ་ལ་ཡང་ཚུལ་འདི་ཉིད་དོ། །འདིར་གནས་སྐབས་དང་འབྲེལ་བའི་བྱེ་བྲག་ནི་འདི་ཡིན་ནོ། །བྱིན་ལེན་འདི་ལ་བསྐོལ་བ་དང༌། བཙགས་པ་ལྟར་དུས་མ་ཡིན་པར་བྱིན་གྱིས་བརླབས་པ་ལ་གནས་སྐབས་ཉིད་ཡོད་པ་མ་ཡིན་ནོ། །ཞག་རྣམ་པ་ལྔ་ཞེས་གསུངས་པ་དེ་དག་ལ་ནི་ངེས་པ་ནི་མ་ཡིན་ནོ། །འདི་རྣམས་ཉིད་ལ་འབྲུ་མར་དང་འདྲ་བ་ཉིད་ཡིན་ནམ་འོན་ཏེ་འདྲ་བ་ཉིད་མ་ཡིན་ཞེ་ན། དེ་བསྟན་པའི་ཕྱིར་དགོས་པ་བརྗོད་པར་བྱ་སྟེ། དེའི་ཕྱིར་ཉ་དང་རི་བོང་གི་དང་ཆུ་སྲིན་བྱིས་པ་གསོད་ཀྱི་དང༌། དོམ་གྱི་དང་ཕག་གིའོ། །དེ་དག་ནི་ནད་པ་ལ་ཕལ་ཆེར་
སྦྱོར་བར་བྱེད་དོ་ཞེས་བྱ་བ་སྨོས་ཏེ། ཕལ་ཆེར་ཞེས་བྱ་བ་ནི་ལན་ཤིན་ཏུ་མང་བའོ། །རྒྱུ་དེས་ཉེ་བར་ཞི་བར་བྱེད་པའི་ན་བ་རྣམས་ལ་ཕལ་ཆེར་འཇིག་རྟེན་ལ་གྲགས་པའི་ཕྱིར་རོ། །སོས་པ་ཉིད་ནི་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་ནི་དེ་རྣམས་ལ་ནི་ནད་སོས་པས་བཅང་བར་མི་བྱའོ་ཞེས་བྱ་བ་དེ་འདིས་བྱས་པར་རིག་པར་བྱའོ། །དེ་ཡང་དེ་ལྟ་བུར་གྱུར་པ་ཉིད་ཀྱིས་འདི་རྣམས་དང་མི་མཐུན་པ་ཉིད་ཀྱི་ཕྱིར་རིག་པར་བྱའོ། །རྒྱུ་མེད་པར་ན་བ་ཞེས་བྱ་བ་གང་ལ་ཞག་གིས་གནོད་པའི་ནད་དེ་ལ་སྙམ་དུ་ཤུགས་ཀྱིས་རྟོགས་པར་བྱའོ། །དགེ་སློང་གི་ཚིག་ཀྱང་འདིར་འདོན་པ་ཡིན་ཏེ། གླེང་གཞིའི་མཐའ་མའི་ཞག་ལ་དེར་མཚོན་པར་གྱུར་པ་སྨོས་པར་རྣམ་པར་གནས་པ་ཡིན་ཏེ། ཁྱིམ་པ་ནད་པ་ལ་ཡང་སྦྱིན་པར་རིག་པའི་ཕྱིར། དེ་བས་ན་འདིར་ཉེ་བར་མ་བསྡུས་སོ། །དེ་མེད་ན་སྨན་ཁང་དུའོ་ཞེས་བྱ་བ་ནི། སློང་བ་ནི་མེད་ན་དགེ་འདུན་གྱི་སྨན་ཁང་དུ་གཞག་པར་བྱའོ། །དགེ་འདུན་གྱི་སྨན་ཁང་དུ་གཞག་པར་བྱའོ། །སྨན་ཁུ་དང་མིག་སྨན་དག་ཀྱང་ངོ་ཞེས་བྱ་བ་ཡང༌། སོས་པ་ཉིད་ན་དེ་དག་ནད་པའི་ཕྱིར་སློང་ན་སྦྱིན་ནོ་ཞེས་བྱ་བ་དང༌། དེ་མེད་ན་སྨན་ཁང་དུ་གཞག་གོ་ཞེས་བྱ་བར་སྦྱར་རོ། །ད་ནི་བཞི་པ་བཤད་པར་བྱ་སྟེ། དེའི་ཕྱིར་འཚོ་བའི་བར་དུ་བཅང་བ་ནི་རྩ་བ་དང༌། སྡོང་བུ་དང་འདབ་མ་དང༌། མེ་ཏོག་དང་འབྲས་བུ་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པའོ་ཞེས་བྱ་བ་སྨོས་སོ། །ཁ་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་དེ་དག་འཚོ་བའི་བར་དུ་བཅང་བ་ཡིན་ནོ་ཞེས་བྱ་བའི་དོན་ཏོ། །དེ་ལ་རྩ་བ་དག་གང་ཞེ་ན་འདི་ལྟ་སྟེ་གླ་སྒར་དང་ཤུ་དག་དང༌། ཡུང་བ་དང༌། སྒེའུ་གཤེར་དང་བོང་དཀར་པོ་དག་གོ །སྡོང་བུ་དག་གང་ཞེ་ན། ཙན་དན་དང༌། སྦྱི་མོ་དང་ཤུག་པ་དང་སྲེ་ཏྲེས་དང༌། ཐང་ཤིང་དང་སྐྱེར་བ་དག་གོ །འདབ་མ་དག་གང་ཞེ་ན། བ་ཤ་ཀ་དང་ཀོ་ཤ་ཏ་ཀི་དང༌། པ་ཏོ་ལ་དང་ནི་མ་བ་དང༌། སཔྟ་པརྞའི་འདབ་མ་དག་གོ །མེ་ཏོག་དག་གང་ཞེ་ན། མེ་ཏོག་ནི་བ་ཤ་ཀ་དང༌། ནིམ་པ་དང༌། ཧ་ད་ཀི་དང༌། ཀླུ་ཤིང་དང་པདྨའི་ཟེ་བ་དག་གོ་ཞེས་བྱ་བ་སྨོས་ཏེ། ཟེ་བ་དེ་དག་ཀྱང་མཚོན་པ་ཙམ་དུ་ཟད་ཀྱི། མེ་ཏོག་ལས་ཕལ་ཆེར་སྨན་ཟས་ཀྱི་དོན་དུ་ཁྱབ་པར་བྱེད་པ་མ་ཡིན་པ་གཞན་དག་ཐ་དད་དུ་བྱས་ནས་བསྡུས་པའོ། །འབྲས་བུ་དག་གང་ཞེ་ན། ཨ་རུ་ར་དང༌། སྐྱུ་རུ་ར་དང༌། བ་རུ་ར་
དང། ན་ལེ་ཤམ་དང༌། པི་པི་ལིང་དག་གོ་ཞེས་བྱ་བ་སྨོས་ཏེ། རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་རྣམས་བཤད་ནས། གཞན་འཚོ་བའི་བར་དུ་བཅང་བར་བསྟན་པའི་ཕྱིར་བྱའོ་ཞེས་བྱ་བ་སྨོས་སོ། །དེ་ཉིད་བསྟན་པའི་ཕྱིར་སྤྱིལ་བའོ། །འདི་ལྟ་སྟེ་ཤིང་ཤིན་དང་ཕྲ་རྩི་དང་རྒྱ་སྐྱེགས་དང་སྤྲ་ཚིལ་དང་ཤིང་མ་ཞོའོ་ཞེས་བྱ་བ་སྨོས་ཏེ། འདི་ལྟ་སྟེ་ཞེས་བྱ་བའི་སྒྲས་ནི་འོག་མ་རྣམས་ལ་ཡང་དཔེར་བསྟན་པའི་ཕྱིར་རོ། །རྒྱ་སྐྱེགས་ནི་རྒྱ་སྐྱེགས་སོ། །སྤྲ་ཚིལ་ནི་སྤྲ་ཚིལ་ལོ། །ཤིང་མ་ཞོ་ཞེས་བྱ་བ་ནི། རྒྱ་སྐྱེགས་ལས་གཞན་པའི་ཤིང་དག་གི་ཤིང་མ་ཞོ་དག་སྟེ། ཤིང་དག་ལས་འབྱུང་བའོ། །འགྱུར་བྱེད་དོ་ཞེས་བྱ་བ་ནི་འདི་ལྟ་སྟེ། ཏིལ་གྱི་དང་རྒྱ་སྐྱེགས་ཀྱི་ཤིང་དང༌། ས་ཚུར་གྱི་དང༌། ནས་ཀྱི་དང༌། ནས་ཀྱི་དྲ་མའི་དང༌། བ་ཤ་ཀའི་དང་ཐལ་བའི་འགྱུར་བྱེད་དོ་ཞེས་བྱ་བ་སྨོས་སོ། །ལན་ཚྭའོ་ཞེས་བྱ་བ་ནི། འདི་ལྟ་སྟེ་རྒྱམ་ཚ་དང༌། ཁ་རུ་ཚ་དང༌། ཚ་དམར་དང༌། རྒྱ་མཚོའི་ཚ་དང༌། བ་ཚའོ་ཞེས་བྱ་བ་སྨོས་སོ། །སྨན་ཁུའོ་ཞེས་བྱ་བ་ནི། འདི་ལྟ་སྟེ། ཤིང་ཨ་མྲ་དང་ནི་མ་པ་དང་ཀོ་ཤམ་པ་དང་ཤི་རི་ཤ་དང་འཛམ་བུ་དག་གོ་ཞེས་བྱ་བ་སྨོས་སོ། །ཇི་ཙམ་གྱིས་ཆོག་པ་བསྟན་ནོ། །བཀྲུས་ནས་ཡང་ངོ་ཞེས་བྱ་བ་ནི། ཇི་ཙམ་གྱིས་ཆོག་པ་བསྟེན་ཏོ་ཞེས་བྱ་བར་སྦྱར་རོ། །མི་མཉེ་བ་ལན་ཅིག་བཀྲུའོ་ཞེས་བྱ་བ་ནི་དེ་ལ་རེག་པ་མེད་པས་ན་རེག་པ་མེད་པའོ། །སྨན་ཁུ་དེ་ལྟར་བསྟན་ནོ་ཞེས་བྱ་བ་ནི་རྣམ་པ་དེ་ལྟར་ཞེས་བྱ་བའི་དོན་ཏོ། །སྐམ་སྔོ་ལ་ སོགས་པ ་ལ་ཡང་དེ་བཞིན་ནོ། །སྨན་སྨོས་པས་དུག་སྨན་མ་བསྡུས་པ་ཉིད་མ་ཡིན་ནོ་ཞེས་བྱ་བ་ནི་དེ་ཡང་སྨན་ཞེས་བྱ་བས་དུག་སྨན་ཡང་བསྡུས་པར་རིག་པར་བྱའོ། །དེ་ནི་འཚོ་བའི་བར་དུ་བཅང་བ་ཉིད་དོ་ཞེས་བྱ་བ་ལ། དེ་ནི་ཞེས་བྱ་བ་ནི་དུག་སྨན་དེ་ལའོ། །འདིར་གཞུང་ནི། གང་ཞིག་བུ་རམ་ཤིང་དང་བུ་རམ་གཉིས་བསྲེགས་པའི་ཐལ་བ་ནི་འཚོ་བའི་བར་དུ་བཅང་བའོ་ཞེས་གསུངས་སོ། །སིལ་བུ་རྣམས་ལས་ཀྱང་འདི་གསུངས་སོ། །ནུ་ཞོས་འཚོ་བའི་བེའུ་རྣམས་ཀྱི་ལྕི་པ་དང༌། གཅིན་དག་ནི་དེ་ཞེས་བྱའོ་ཞེས་བྱ་བ་ལ། དེ་ཞེས་བྱ་བ་ནི་དུག་སྨན་དེ་ལའོ། །འདིར་གཞུང་ནི། གང་ཞིག་དེ་ཞེས་བྱ་བ་ནི་དུག་ལ་ཕན་ནོ་ཞེས་བྱ་བ་ནི། ལྕི་བ་དང་གཅིན་ལ་ སོགས་པ ་དུག་སྨན་ཞེས་བྱ་བ་ཇི་སྐད་
བསྟན་པ་དེ་དག་ནི་དུག་ཟོས་པ་ལ་ཕན་ནོ། །ཐལ་བའོ་ཞེས་བྱ་བ་ནི་ཤིང་ཀ་ཙ་ན་དང༌། ཀ་བི་ཀ་ལ་དང༌། ཨ་ཤྭདྠ་དང༌། ཨུ་དུམ་བཱ་ར་དང༌། ནྱ་གྲོ་དྷ་རྣམས་ཀྱི་ཞེས་བྱ་བ་སྨོས་ཏེ། དེའོ་ཞེས་བྱ་བ་ནི་དུག་ལ་སྨན་པའོ། །ས་ནི་སོར་བཞིའི་འོག་གི་བཟང་ངོ་ཞེས་བྱ་བ་ནི་རླུང་དང་ཉི་མ་ལ་ སོགས་པ ་རྣམས་ཀྱིས་སྟེང་གི་ལ་གནོད་པའི་ཕྱིར་རོ། །འདིར་གཞུང་ནི། དགེ་སློང་དག་དུག་སྨན་ཞེས་བྱ་བ་ནི་ལྕི་བ་དང་གཅིན་དང་ཐལ་བ་དང་ས་སྟེ། དེ་ལ་ལྕི་བ་ནི་བེའུ་འབྲེངས་ནས་རིང་པོ་མ་ལོན་པ་མའི་ནུ་ཞོས་འཚོ་བ་གང་དག་ཡིན་པ་རྣམས་ཏེ་གཅིན་ཡང་དེ་དག་ཉིད་ཀྱིའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །དེ་དགེ་བསྙེན་དད་པ་ཅན་ལས་བླང་ངོ་ཞེས་བྱ་བ་ལ་དེ་ནི་ཞེས་བྱ་བ་ནི་དུག་སྨན་དེའོ། །འདི་ནི་སིལ་བུ་དག་ལས་དེས་བྱིན་ལེན་ཡང་ངོ༌། །དེས་བྱིན་ལེན་བསྟབ་པར་བྱའོ་ཞེས་བྱ་བ་ནི་བྱིན་ལེན་ཡང་དགེ་བསྙེན་དད་པ་ཅན་དེས་བསྟབ་པར་བྱའོ། །ཤའི་བདག་ཉིད་ཀྱི་སྨན་དེ་ཡང་ངོ་ཞེས་བྱ་བ་ཡང༌། ཤའི་བདག་ཉིད་ཀྱི་སྨན་དེ་ལ་དེས་ཕྱིན་ལེན་བསྟབ་པར་བྱའོ། །ཐམས་ཅད་ཤན་པའི་གནས་ནས་བླང་ངོ་ཞེས་བྱ་བ་ནི་ཤ་རློན་པ་འབའ་ཞིག་ཏུ་མ་ཟད་ཀྱི་ཤའི་སྨན་ཐམས་ཅད་དགེ་བསྙེན་དད་པ་ཅན་གྱིས་ཤན་པའི་གནས་ནས་བླང་བའོ། །དེ་ནི་བྱ་བ་ཉིད་ཡིན་ནོ་ཞེས་བྱ་བ་ནི་ཤའི་སྨན་བླང་བ་དེ་ནི་ཤན་པའི་གནས་ནས་བླང་བ་ཉིད་དོ། །དེ་ལ་བྱ་བའི་ཆ་མ་ཡིན་པར་དོགས་པ་མི་བྱའོ་ཞེས་བྱ་བའི་དོན་ཏོ། །གལ་ཏེ་དུས་མ་ཡིན་པར་ནས་ལས་བྱས་པའི་སྨན་དགོས་པ་ཉིད་ཡིན་ན་དེའི་དོན་དུ་བ་ལང་རྒན་པོའི་ལྕི་བའི་ནས་ཀྱིས་ཆོག་པར་བྱའི་གཞན་བཟའ་བར་མི་བྱའོ་ཞེས་བྱ་བ་ལ། དེའི་དོན་དུ་ཞེས་བྱ་བ་ནི་ནས་ལས་བྱས་པའི་སྨན་དེའི་དོན་དུའོ། །གཞན་ཞེས་བྱ་བ་ནི་ནས་གཞན་དག་གོ །གལ་ཏེ་སྐྱོ་མ་ཚགས་ཀྱིས་བཙགས་ནས་ཏེ་གཞན་ནི་མ་ཡིན་ནོ་ཞེས་བྱ་བ་ནི་དུས་མ་ཡིན་པར་ཟ་བར་བྱ་བ་ཉིད་ལ་གང་ཞིག་སྨན་དུ་བྱས་པ་དེའི་དོན་དུ་བྱའི་ནས་ལས་བྱས་པ་གཞན་དུ་ནི་མ་ཡིན་ནོ། །དེ་རྣམས་ལ་ཡང་བ་ལང་རྒན་པོའི་ལྕི་བའི་ནས་ཀྱིས་ཆོག་པར་བྱའི་གཞན་བཟའ་བར་མི་བྱའོ། །གལ་ཏེ་ཤའི་སྨན་དགོས་པ་ཉིད་ཡིན་ན་མཚའི་རྟུག་པའི་ཤས་སོ་ཞེས་བྱ་བ་དུས་མ་ཡིན་པར་དགོས་པ་ཉིད་ལ་མཚའི་རྟུག་པའི་ནང་ནས་བྱུང་བའི་ཤས་དེའི་དོན་དུ་ཆོག་པར་བྱའི་
ཤ་གཞན་ལོངས་སྤྱད་པར་མི་བྱའོ། །གལ་ཏེ་ཁུ་བ་ཚགས་ཀྱིས་བཙགས་ནས་ཏེ། གཞན་ནི་མ་ཡིན་ནོ་ཞེས་བྱ་བ་ནི། དུས་མ་ཡིན་པར་ཤ་ལས་བྱས་པའི་སྨན་དགོས་པ་ཉིད་ཡིན་ནོ། །དེའི་དོན་དུ་མཚའི་རྟུག་པའི་ནང་ནས་བྱུང་བའི་ཤས་ཆོག་པར་བྱ་བ་དེ་ཡང་ཤ་དེས་བྱས་པའི་ཁུ་བ་གལ་ཏེ་ཚགས་ཀྱིས་བཙགས་ན་དེས་ཆོག་པར་བྱ་བ་ཡིན་གྱི། དེ་ལས་གཞན་བའི་ཚགས་ཀྱིས་མ་བཙགས་པ་དག་ནི་བཟའ་བར་མི་བྱའོ། །གཞན་དག་བཅས་པ་ལ་དེ་ལྷག་པར་སྤྱོད་པ་ཡོད་དོ། །དེའི་ཕྱིར་དེ་ལས་བཅས་པ་ལ་ཆོ་ག་སྔ་མས་འཇུག་པར་བྱའོ་ཞེས་བྱ་བ་ནི་གང་གི་ཕྱིར་གཞན་དང་བཅས་པ་དེ་ལ་ལྷག་པར་སྤྱད་པ་ལྷག་པར་མི་སྤྱོད་པར་འགྱུར་བ་དེ་བས་ན་གང་ཞིག་འདིར་དུས་དང་དུས་མ་ཡིན་པ་ལ་ སོགས་པ ་ཆོ་ག་སྔ་མ་དེ་དང་དེས་ཕྱི་མ་བཅས་པ་ཉིད་ལ་འཇུག་པར་བྱའོ་ཞེས་བྱ་བའི་དོན་ཏོ། །ཐུན་ཚོད་དུ་རུང་བ་དང་ཞག་བདུན་པ་དང༌། འཚོ་བའི་བར་དུ་བཅང་བ་དང་དུས་སུ་རུང་བ་དང་འདྲེས་བ་གང་དག་ནི་དུས་ཁོ་ནར་ལོངས་སྤྱད་པར་བྱའི། དུས་མ་ཡིན་པར་ལོངས་སྤྱད་པར་མི་བྱའོ། །ཞག་བདུན་པ་དང༌། འཚོ་བའི་བར་དུ་བཅང་བ་ཐུན་ཚོད་དུ་རུང་བ་དང༌། འདྲེས་པ་དག་གིས་ཐུན་ཚོད་དུ་ཁོ་ནར་ཡོངས་སུ་ལོངས་སྤྱད་པར་བྱའི། །ཐུན་ཚོད་ཀྱི་མཐའ་ལས་ཡོལ་བར་ཡོངས་སུ་ལོངས་སྤྱད་པར་མི་བྱའོ། །འཚོ་བའི་བར་དུ་བཅང་བ་དང་ཞག་བདུན་བ་དང༌། འདྲེས་པ་ནི་ཞག་བདུན་པ་ཁོ་ནར་ཡོངས་སུ་ལོངས་སྤྱད་པར་བྱའི། འཚོ་བའི་བར་བཅང་བར་ཡོངས་སུ་ལོངས་སྤྱད་པར་མི་བྱའོ་ཞེས་བྱ་བ་དེ་ལ་མདོ་འདི་བྱས་པའོ། །རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་ནོ། །དེའི་ཕྱིར་གཞན་དང་མ་འདྲེས་པ་ལ་ནི་རང་གི་ཆོ་གས་རུང་བར་བྱ་བ་མི་འགྲུབ་པ་མ་ཡིན་ནོ་ཞེས་བྱ་བ་ལ། རང་བཞིན་གཞན་དུ་མ་གྱུར་པ་ནི་གང་དང་མ་འདྲེས་པ་དེའི་བག་ཆགས་སུ་འགྱུར་བའི་ངོ་བོ་ཉིད་གཞན་ནོ། །སྔོན་གྱི་རང་བཞིན་མ་ཡིན་པ་ཞེས་བྱ་བ་ནི་གང་གི་སྔོན་དུ་རང་གི་རིགས་ཙམ་དུ་གྱུར་པ་ངོ་བོ་ཡོད་པར་གྱུར་པ་དེ་ལས་རྣམ་པ་གཞན་ཉིད་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་ནོ། །གང་གི་ཕྱིར་རང་བཞིན་གཞན་དུ་མ་གྱུར་པ་ནི་སྔོན་གྱི་རང་བཞིན་མ་ཡིན་པ་ཉིད་མ་ཡིན་པ་དེའི་ཕྱིར། གཞན་དང་མ་འདྲེས་པའི་ཞེས་བྱ་བ་ནི། གང་གིས་འདི་དང་འདྲེས་པ་ཡང་དག་པར་འབྱུང་བར་འགྱུར་བ་དེ་ལས་ཐ་
དད་པར་གྱུར་པ་ལ་རང་གི་ཆོ་གས་རུང་བས་བྱ་བ་མི་འགྲུབ་པ་མ་ཡིན་པ་དེ་འགྲུབ་པ་ཁོ་ན་ཡིན་ནོ། །དུས་སུ་རུང་བའི་ནང་ན་འདུག་པའི་འཚོ་བའི་བར་དུ་བཅང་བ་ལ་དུས་སུ་རུང་བ་ཉིད་དང༌། རང་བཞིན་གཞན་དུ་མ་གྱུར་པ་དང༌། གཞན་དང་མ་འདྲེས་པ་ལ་ནི་དུས་སུ་རུང་བ་དེ་ལས་འཚོ་བའི་བར་དུ་བཅང་བས་རུང་བ་བྱ་བ་མི་འགྲུབ་པ་མ་ཡིན་ཏེ། རང་རང་གི་ཆོ་ག་འདི་ལ་འཇུག་པར་བྱར་རུང་ཞེས་བྱ་བའི་དོན་ཏོ། །བུ་རམ་བསྒོང་བའི་ཕྱིར་འབྲས་ཕྱེའི་ནང་དུ་གཞག་པ་ནི་བཀྲུ་བས་རང་ཁོ་ནའི་གྲངས་ཉིད་དུ་འགྲུབ་པོ་ཞེས་བྱ་བ་ནི་ཞག་བདུན་པ་ཉིད་ཅེས་བྱ་བའི་དོན་ཏོ། །འགོར་གྱི་ཟུངས་ནི་བུ་རམ་ཉིད་དུ་ཤེས་པར་བྱའོ་ཞེས་བྱ་བ་ནི་བུ་རམ་བསྐོལ་བའི་དུས་སུ་འགོར་དང་ལིངས་ཉིད་དུ་བྱ་བའི་ཕྱིར་འབྲས་ཀྱི་བག་ཕྱེ་ལ་ སོགས་པ ་བླུགས་པ་དེ་ནི་བུ་རམ་ཉིད་ཡིན་པས། དེ་ལ་དུས་སུ་རུང་བ་ཉིད་ནི་མ་ཡིན་པར་ཤེས་པར་བྱའོ། །དེའི་ཕྱིར་དེ་ལ་འདི་བསྟན་པའོ། །བྱིན་གྱིས་བརླབས་པ་ལ་ནི་གསོག་འཇོག་མི་འབྱུང་ངོ་ཞེས་བྱ་བ་ལ་འདིར་གཞུང་ནི། བཙུན་པ་བྲོ་འཚལ་བས་བྱིན་ལེན་བགྱིས་པ་དང༌། བྱིན་གྱིས་བརླབས་པ་ཡོངས་སུ་ལོངས་སྤྱོད་དུ་རུང་ངམ། ཉེ་བ་འཁོར་རུང་ངོ་ཞེས་གང་ཞིག་གསུངས་པ་དེ་བས་ན་མདོ་འདི་བྱས་སོ། །བྲོ་འཚལ་བ་ཞེས་བྱ་བ་ནི་ན་བ་ལ་རུང་བ་ཉིད་དུ་བསྟན་པ་ཉིད་ཡིན་ནོ། །ནད་པའི་ཆེད་དུ་ཡོངས་སུ་ལོངས་སྤྱོད་པའི་ཕྱིར་རང་གི་དུས་ཀྱི་མཐའི་བར་དུ་བྱིན་གྱིས་བརླབ་པར་བྱའོ་ཞེས་བྱ་བ་ལ། དུས་སུ་རུང་བའི་ནི་དེའི་ཡུལ་མ་ཡིན་ཏེ། བྱིན་གྱིས་བརླབས་པ་དོན་མེད་པའི་ཕྱིར་རོ། །ཐུན་ཚོད་དུ་རུང་བ་དང༌། ཞག་བདུན་པ་དང་འཚོ་བའི་བར་དུ་བཅང་བ་དག་རང་རང་གི་དུས་ཀྱི་མཐའ་ཆུན་ཆད་དུ་བྱིན་གྱིས་བརླབ་པར་བྱའོ། །དུས་གང་གི་ཚེ་བྱིན་གྱིས་བརླབ་པར་བྱ་ཞེ་ན། དེའི་ཕྱིར་ཟས་སྔ་མའི་ཚེའོ་ཞེས་བྱ་བ་སྨོས་ཏེ། འདིར་ཆོ་གའི་གཞིར་གྱུར་པ་ཞེས་བྱ་བ་ཡིན་པས། དུས་སུ་བཟའ་བར་བྱ་བ་ལ་བརྟེན་པའོ། །བཟའ་བར་བྱ་བའི་དུས་འདི་ལ་གཞིར་གྱུར་པ་ཉིད་ཀྱི་ཕྱིར་ཞེས་བྱ་བས་དེ་ཤེས་པའོ། །ཐུན་ཚོད་ཀྱི་དོན་ལས་ཀྱང་འདིའི་ངེས་པ་རྣམ་པར་གནས་པ་བྱིན་གྱིས་བརླབ་པ་མེད་པར་ཕྱིས་ཟས་བྱིན་ལེན་བྱས་པ་ལ་ཐུན་གཅིག་གི་མཐར་ཇི་སྲིད་དུ་རུང་བ་ཉིད་ཅེས་བྱ་བ་དེ་ཉིད་དུ་འདི་ལ་དོན་དང་བཅས་པ་ཉིད་དོ། །ཇི་ལྟར་ཞེ་ན། དེའི་ཕྱིར་བྱིན་ལེན་བྱས་ཏེའོ། །བྱིན་
ལེན་མ་བྱས་པ་དང་གསོག་འཇོག་དང་འདྲེས་པ་བསྲུང་བར་བྱ་བ་ཡིན་ནོ། །དེའི་ཕྱིར་ལག་པ་གཉིས་ཀ་བསྙལ་ནས་སོ་ཞེས་བྱ་བ་ནི་གང་གི་ཕྱིར་ལག་པ་གཉིས་མ་བསྙལ་བ་ལ་བྱིན་ལེན་མ་བྱས་པ་དང༌། གསོག་འཇོག་དང་འདྲེས་པ་བསྲུང་བར་བྱ་བ་ཡིན་ནོ། །ལག་ཉར་བླངས་པ་དང་གསོག་འཇོག་བྱས་པ་དང༌། བྱིན་ལེན་མ་བྱས་པ་དང༌། ནང་དུ་ཞག་ལོན་པ་དང༌། ནང་དུ་བཙོས་པ་དང་དགེ་སློང་གིས་བཙོས་པ་དག་ལ་བྱིན་གྱིས་བརླབས་པ་མི་འཆགས་སོ་ཞེས་བྱ་བ་ལ་བཙོས་པའི་སྒྲས་ཀྱང་ནང་དུའི་སྒྲ་དང་འབྲེལ་པའོ། །འདིར་གཞུང་ནི་ཞུ་བ་ལས། ནང་དུ་བཙོས་པ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །རོ་དང་སླ་བ་ཉིད་ཡོངས་སུ་གྱུར་ན་ནི་གསོག་འཇོག་བྱས་པ་ཉིད་ཡིན་ནོ་ཞེས་བྱ་བ་ནི་རོ་མི་སྣང་བ་ཉིད་དུ་ཡོངས་སུ་གྱུར་པ་ནི་དེའི་ཚེ་གསོག་འཇོག་བྱས་པ་ཉིད་ཡིན་ནོ། །འདིར་ནི་འདི་གཉིས་ཀྱི་ནི་ངོ་བོ་ཉིད་གྱུར་པར་བསྟན་ཏེ། དེ་བས་ན་དེ་གཉིས་སྨོས་པ་ཡིན་ནོ། །དེ་ལྟ་བས་ན་གཅིག་ལ་ཡང་དེ་ལས་ཡོངས་སུ་གྱུར་ན་གསོག་འཇོག་ཉིད་དོ། །འདིར་གཞུང་ནི་སིལ་བུ་དག་ལས། བུ་རམ་གྱི་བཏུང་བའི་སྐབས་ནས། བཙུན་བ་བཏུང་བ་བཙགས་ནས་དགུང་བདུན་བར་བྱིན་གྱིས་བརླབ་ཏུ་རུང་ངམ། ཉེ་བ་འཁོར་མི་རུང་ངོ༌། །བཙུན་བ་ཡུན་ཇི་སྲིད་ཅིག་ཏུ་གཞག་པར་འཚལ་བར་བགྱི། ཉེ་བ་འཁོར་ཤིན་ཏུ་སླ་ཞིང་མི་སྐུར་ལ་རང་གི་ངོ་བོ་ཉིད་མི་སྤོང་བ་དེ་སྲིད་དུའོ་ཞེས་གསུངས་པ་ཡིན་ནོ། །འདིར་ཞུ་བ་བྱ་བ་མ་ཡིན་པ་ཉིད་གསུངས་ཏེ། འདི་ལ་གསོག་འཇོག་ལས་གཞན་པའི་བཏུང་བར་བྱ་བ་མ་ཡིན་པ་ཉིད་ལ་རྒྱུ་རྣམ་པར་མི་གནས་པ་དེ་བས་ན་གསོག་འཇོག་ཉིད་དུ་ཤེས་པའོ། །བྱིན་གྱིས་བརླབ་པ་འོག་མ་དང་ལྷན་ཅིག་ཡོངས་སུ་ལོངས་སྤྱད་པར་མི་བྱའོ་ཞེས་བྱ་བ་ནི་འདིར་བྱེ་བྲག་ཏུ་བཅད་པས་བྱིན་གྱིས་བརླབས་པ་དང༌། གསོག་འཇོག་གི་དུས་ལ་མ་བབ་པ་དང་ལྷན་ཅིག་ཅེས་བྱ་བར་ཤེས་པར་བྱའོ། །འདིར་གཞུང་ནི། མཽད་གལ་གྱི་བུ་ལ་ཐུན་ཚོད་དུ་རུང་བ་གང་ཡིན་པ་དང༌། ཞག་བདུན་པ་གང་ཡིན་པ་དང༌། འཚོ་བའི་བར་དུ་བཅང་བ་གང་ཡིན་པ་དེ་དུས་སུ་རུང་བ་དང་འདྲེས་ན་ཡོངས་སུ་ལོངས་སྤྱད་པར་མི་བྱའོ། །ཞག་བདུན་བ་གང་ཡིན་པ་དང༌། འཚོ་བའི་བར་དུ་བཅང་བ་གང་ཡིན་པ་དེ་ཐུན་ཚོད་དུ་རུང་བ་དང་འདྲེས་ན་ཡང་ཡོངས་སུ་ལོངས་སྤྱད་
པར་མི་བྱའོ། །འཚོ་བའི་བར་དུ་བཅང་བ་གང་ཡིན་པ་དེ་ཞག་བདུན་པ་དང་འདྲེས་ན་ཡང་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །སྨན་གྱི་གོ་རིམས་ནི་དཔེའོ་ཞེས་བྱ་བ་ནི་སྔར་དེ་ནི་རྣམ་པ་བཞིའོ་ཞེས་སྨོས་པས། སྨན་རྣམ་པ་བཞི་སྨོས་པའི་གོ་རིམས་དེ་ནི་དཔེ་ཙམ་དུ་ཟད་དེ། དེ་བས་ན་འདིས་མིག་སྨན་ལ་ སོགས་པ ་དག་ཀྱང་མ་འཕངས་པ་ཉིད་མ་ཡིན་ནོ། །དེ་བས་ན་ཅིར་འགྱུར་ཞེ་ན། དེའི་ཕྱིར་མིག་སྨན་བསྟེན་པར་བྱའོ། །སྨན་མ་ཡིན་པའི་དོན་དུ་མི་བྱའོ་ཞེས་བྱ་བའི་སྒེག་པའི་དོན་ནི་སྨན་མ་ཡིན་པའི་དོན་ཏེ་དེའི་དོན་དུ་མིག་སྨན་བསྟེན་པར་མི་བྱའོ། །འདི་ནི་དྲིས་བྱུག་པ་དང་ཁ་དོག་འཆང་བའི་ཕྱོགས་ཉིད་དུ་དོགས་པ་དེ་བས་ན་འདི་སྤངས་པའོ། །འདིར་གཞུང་ནི་མ་མོ་དག་ལས་མིག་ཐུར་བཅང་བར་བྱ་སྟེ། ཇི་སྙེད་དུ་རང་འཁྲུངས་དག་གོ་ཞེས་བྱ་བའོ། །དེའི་སྣོད་རིགས་པའོ་ཞེས་བྱ་བ་སྨོས་ཏེ། གང་གི་སྣོད་ཅི་ཡིན་ཞེ་ན། དེའི་ཕྱིར་མིག་སྨན་སྐྱེར་ཁཎྜའི་ནི་ཟ་མ་ཏོག་གོ་ཞེས་བྱ་བ་སྨོས་ཏེ། བཅང་བར་བྱ་བ་ཉིད་ཀྱང་དེ་ལ་ སོགས་པ ་དང་སྐྱེར་ཁཎྜ་ལ་ སོགས་པར་དོན་གྱིས་རིག་པར་བྱའོ། །མིག་སྨན་རི་ལུའི་ནི་སྒེའུ་འོ། །མིག་སྨན་དུ་བ་དང་སྦྲུས་པ ་དང༌། ཕྱེ་མ་རྣམས་ཀྱི་ནི་དོང་བུའི་ཐུར་མ་བཅང་བར་བྱའོ། །ཟངས་མ་དང་ལྕགས་དག་གི་བཟང་ངོ༌། །ཅི་མིག་ཐུར་ཐམས་ཅད་རུང་ངམ་ཞེ་ན། དེའི་ཕྱིར་རང་འཁྲུངས་དག་གོ་ཞེས་བྱ་བ་སྨོས་སོ། །ནད་པས་སྨན་གཞུག་པའི་ཕྱིར་མཆན་ཁུག་བཅང་བར་བྱའོ། །དེར་མ་ཤོང་བ་ཉིད་ཡིན་ན་བྲུབས་སམ་ཐུམ་པོ་བྱས་ཏེ་བཅེར་རོ་ཤེས་བྱ་བ་ལ། དེར་ཞེས་བྱ་བ་ནི་མཚན་ཁུག་དེར་བྲུབས་སམ་ཐུམ་པོ་བྱས་ཏེ་བཅེར་རོ། །བཅུག་པ་མི་འདྲུལ་བར་བྱ་བའི་ཕྱིར་དུས་སུ་སྐམ་མོ་ཞེས་བྱ་བ་ལ་གང་དུ་བསྐམ་པར་བྱ་ཞེ་ན། དེའི་ཕྱིར་ཉི་གྲིབ་ལའོ། །བསྐམས་ན་མཐུ་འབྲིའོ་ཞེས་བྱ་བ་ནི་སྐབས་འདིར་བསྒྲུབ་པ་འདི་བསྡུས་པ་ཡིན་ནོ། །གོས་ལ་ སོགས་པ ་བསྐམ་བ་ལ་ཡང་ཆོ་ག་འདི་ཡིན་གྱི་དེ་ཉིད་ལ་ནི་མ་ཡིན་ཞེས་བྱ་བ་བསྟན་པའི་དོན་དུའོ། །མ་རུང་བར་འགྱུར་བའི་རྒྱུ་བྱུང་ན་རང་གིས་བྲུབ་པར་བྱའོ་ཞེས་བྱ་བ་ནི། རླུང་དང་ཆར་བ་ལ་སོགས་པས་སྨན་མ་རུང་བར་གྱུར་པའི་རྒྱུ་བྱུང་ན་དེ་བསྐམས་པའི་གནས་ནས་རང་གིས་བསྡུ་ཞིང་བྲུབ་པར་བྱའོ། །ཅི་གནས་སྐབས་ཐམས་ཅད་
དུ་འམ་ཞེ་ན། དེའི་ཕྱིར་བསྙེན་པར་རྫོགས་པ་མེད་ནའོ། །སྨན་ཕོར་བཅང་བར་བྱའོ་ཞེས་བྱ་བ་ནི་ནད་པས་ཞེས་བྱ་བར་སྦྱར་རོ། །ཕྲན་ཚེགས་དག་ལས། འདིར་དང་པོར་བྱས་ཏེ་ཕྱིས་ལོངས་སྤྱད་པ་ཞེས་བྱ་བའི་མཐར་ཐུག་པའོ། །སྨན་གྱི་ནལ་ཟེ་ཡང་ངོ་ཞེས་བྱ་བ་ཡང༌། ནད་པས་བཅང་བར་བྱའོ་ཞེས་བྱ་བར་སྦྱར་རོ། །འགྲོར་མི་བཏུབ་པས་ཕུལ་བའི་བཏུང་ཕོར་རོ་ཞེས་བྱ་བ་ཡང་བཅང་བར་བྱའོ་ཞེས་བྱ་བར་སྦྱར་རོ། །འགྲོར་མི་བཏུབ་པས་ཞེས་བྱ་བ་ལ་འགྲོ་བ་ཞེས་བྱ་བ་ནི་མིད་པའི་ཚེ་ནང་དུ་འགྲོ་བའོ། །མི་བཏུབ་པ་ཞེས་བྱ་བ་ནི་མིད་པའི་ཚེ་ནང་དུ་འགྲོར་མི་བཏུབ་ཅིང་མགུལ་བར་ཐོགས་ཤིང་སྣང་བ་སྟེ། གང་གིས་དེར་འགྲོར་མི་བཏུབ་པ་དེ་ནི་འདིར་མགུལ་པའི་ནད་ཅེས་བྱ་བའི་དོན་ཏོ། །ཕུལ་བའི་བཏུང་ཕོར་ཞེས་བྱ་བ་ནི་གང་ཟས་ཟོས་ན་མགུལ་པར་ཐོགས་པ་དེ་འཕུལ་བར་བྱེད་པའི་ཕྱིར། ཕྱི་ནས་སྐོམ་འཐུང་བར་བྱེད་པའི་སྣོད་ཆུང་དུ་མ་ལ་བྱའོ། །འདིར་གཞུང་ནི། གནས་བརྟན་ཁྱོད་ཅི་བསྙུང༌། ཚེ་དང་ལྡན་བ་འགྲོར་མི་བཏུབ་བའོ། །ཁྱོད་ཀྱིས་སྔོན་ཅི་བགྱིས་ཕུལ་བའི་བཏུང་པོར་བཅངས་སོ། །དེ་ཅིའི་ཕྱིར་མི་བཅང༌། བཅོམ་ལྡན་འདས་ཀྱིས་མ་གནང་ངོ་ཞེས་ཟེར་བའི་སྐབས་དེ་ནས་ཇི་སྲིད་དུ་བཀའ་སྩལ་པ། དེ་ལྟ་བས་ན་ཕུལ་བའི་བཏུང་ཕོར་བཅང་བར་རྗེས་སུ་གནང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །འདིར་དེ་ལ་ལྟོས་པའི་གླེང་གཞིའི་དབང་གིས་རྗེས་སུ་གནང་བ་དེ་རིགས་པ་ཡིན་ཏེ། དེའི་ཕྱིར་འདིར་མདོར་བསྡུས་པ་བྱས་སོ། །ནད་པས་ལན་ཚྭ་བཅང་བར་བྱའོ་ཞེས་བྱ་བ་ནི་འགྲོར་མི་བཏུབ་པས་ཞེས་བྱ་བ་བསལ་བའི་ཕྱིར་འདིར་ནད་པ་ཞེས་བྱ་བ་སྨོས་སོ། །དེའི་སྣོད་ནི་རྭའི་སྦུབས་བཟང་ངོ་ཞེས་བྱ་བ་ནི་ལན་ཚྭ་དེའིའོ། །རྭ་ཇི་ལྟ་བུ་བཟང་ཞེ་ན། དེའི་ཕྱིར་ལྕི་བས་ཀུན་ནས་བསྐོར་པའོ། །དེ་མེད་པའི་ཉིས་པར་མི་འགྱུར་བར་བྱ་བའི་ཕྱིར་ཁ་གབ་གཞུག་གོ་ཞེས་བྱ་བ་ནི་ཁ་གབ་དང་བྲལ་བའི་ཉེས་པ་གང་ཡིན་པ་དེའོ། །ཅི་ལས་བྱས་པ་ཞེ་ན། དེའི་ཕྱིར་དེ་ཉིད་ལས་བྱས་པའོ་ཞེས་བྱ་བ་སྨོས་ཏེ། རྭ་ལྕི་བས་ཀུན་ནས་བསྐོར་བ་ལས་བྱས་པའི་ཁ་གབ་གཞུག་པའོ། །དྲིས་བསྒོས་པའི་སའོ་ཞེས་བྱ་བ་ནི་ནད་པས་བཅང་བར་བྱའོ་ཞེས་བྱ་བར་སྦྱར་རོ། །ཆུ་སྲོ་བའི་ཕྱིར་ལྕགས་ཀྱི་གར་བུའོ་ཞེས་བྱ་བ་ཡང་ནད་པས་བཅང་ངོ་ཞེས་བྱ་བར་སྦྱར་རོ། །ཐམས་ཅད་ཀྱིས་སྤྱད་པར་བྱའོ། །
ཞེས་བྱ་བ་ནི་ནད་པ་འབའ་ཞག་གིས་སྤྱད་པར་མ་ཟད་ཀྱི་ན་བ་དང་མི་ན་བ་ཐམས་ཅད་ཀྱིས་སྤྱད་དུ་རུང་བའོ། །འདིར་གཞུང་ཁ་ཅིག་ལས་ནི། བཅོམ་ལྡན་འདས་ཀྱིས་བསྲོ་ཁང་བྱའོ་ཞེས་གསུངས་པ་དང༌། གནས་པར་བྱ་བའི་དགེ་སློང་དག་ཆུ་དྲོན་བསྐོལ་བས་ངལ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་བ། ལྕགས་ཀྱི་གར་བུ་བསྲེག་པར་བྱ་ཞིང་ལྕགས་ཐག་གིས་གདགས་པར་བྱའོ་ཞེས་གསུངས་པ་དེ་མདོ་འདིར་བསྡུས་པ་ཡིན་ནོ། །དེ་ལྟ་བུར་གྱུར་པའི་དོགས་པ་དང༌། འོས་པ་དགེ་འདུན་གྱིས་འཆང་བ་ལ་མི་རིགས་པ་མེད་དོ། །དེ་ལྟ་བས་ན་དགེ་འདུན་གྱིས་ཀྱང་བཅང་དུ་རུང་པར་རིག་པར་བྱའོ། །བསྲེགས་པ་གདགས་པའི་ཕྱིར་དེ་ལ་ལྕགས་ཐག་གདགས་སོ་ཞེས་བྱ་བ་ལ་དེ་ལ་ཞེས་བྱ་བ་ནི་ལྕགས་ཀྱི་གར་བུ་དེ་ལའོ། །ཚ་བའི་དུས་ནས་གཤེར་བས་དེ་མནན་ནོ་ཞེས་བྱ་བ་ལ། དེ་མནན་ཏོ་ཞེས་བྱ་བ་ནི་ལྕགས་ཐག་དེ་མནན་པའོ། །བསྲེགས་པ་ནི་ཟས་དང་འཕགས་པའི་གནས་མེད་དོ་ཞེས་བྱ་བ་ནི། ལྕགས་ཀྱི་གར་བུ་བསྲེགས་པ་ན་དེ་ལ་ཟས་དང་འབགས་པའི་གནས་མེད་པའོ། །དེ་བས་ན་ལྕགས་ཀྱི་བར་དུ་དེ་རུང་བར་བྱ་བའི་ཕྱིར་འབད་པ་ནི་དོན་མེད་དོ། །དེའི་ཕྱིར་དེ་ལ་འདི་བརྗོད་དོ། །རུང་བ་སྔར་བསྲོ་བའོ། །ལོངས་སྤྱད་པ་ཕྱིས་སོ་ཞེས་བྱ་བ་ནི་འདི་གཉིས་ནི་གཙང་སྦྲའི་ཕྱིར་དེ་བསྒྲུབ་བོ། །མདོམས་ཀྱི་གསོ་བ་བསྟེན་པར་བྱའོ་ཞེས་བྱ་བ་ནི་ནད་པ་ཞེས་བྱ་བར་དོན་གྱིས་གྱུར་པ་དང་སྦྱར་རོ། །འདིར་གཞུང་ནི་སིལ་བུ་དག་ལས། མས་བཏང་བར་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །གཞན་གྱིས་འཚོ་བར་ནུས་པ་ཉིད་ན་དེ་ལ་སྦོམ་པོའོ་ཞེས་བྱ་བ་ནི་སྨན་གཞན་བྱ་བའི་ཐབས་ཀྱིས་ནད་དེ་ལས་འཚོ་བར་ནུས་པ་ཉིད་ཡིན་ན་མདོམས་ཀྱི་གསོ་བ་བསྟེན་པ་དེ་ལས་ཉེས་པ་སྦོམ་པོར་འགྱུར་རོ། །འདིར་གཞུང་ནི་མ་མོ་ལས། དེ་ལས་གཞན་པའི་སྨན་དག་གིས་འཚོ་ན་དགེ་སློང་གིས་མདོམས་ཀྱི་ལས་བྱེད་དུ་མི་གཞུག་གོ །གང་བྱེད་དུ་འཇུག་ན་ཉེས་པ་སྦོམ་པོར་འགྱུར་རོ། །མི་འཚོ་བ་ཉིད་ཡིན་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །འདི་ལ་ཟངས་མ་འམ་ཁར་བའི་སྦུ་གུ་བཟང་གི་ལྕགས་ཀྱི་ནི་མི་རུང་ངོ་ཞེས་བྱ་བ་ལ། འདི་ལ་ཞེས་བྱ་བ་ནི་མདོམས་ཀྱི་གསོ་བ་འདི་ལའོ། །མཚོན་གྱིས་གསོ་བ་ཡང་དེ་དང་འདྲའོ་ཞེས་བྱ་བ་ལ།
དེ་དང་འདྲའོ་ཞེས་བྱ་བ་ནི་མཚོན་གྱིས་གསོ་བ་བསྟེན་པར་བྱ་བ་ལའོ། །གཞན་གྱིས་འཚོ་བར་ནུས་པ་ཉིད་ན་དེ་སྦོམ་པོའོ་ཞེས་བྱ་བའི་དོན་ཏོ། །འདིར་གཞུང་ནི་མ་མོ་ལས། རྟུལ་བ་གཞན་ཡོད་ན་དགེ་སློང་གིས་མཚོན་གྱི་ལས་བྱེད་དུ་མི་གཞུག་གོ །གང་བྱེད་དུ་འཇུག་ན་ཉེས་པ་སྦོམ་པོའོ། །རྟུལ་བ་གཞན་མེད་ན་བྱེད་དུ་གཞུག་གོ་ཞེས་གསུངས་པ་ཡིན་ནོ། །གདོང་བུ་རྩའི་རྒྱུན་ལས་གཞན་པར་དེ་མི་བསྟེན་ནོ་ཞེས་བྱ་བ་ནི་གདོང་བུ་རྩའི་རྒྱུན་ལས་གཞན་པར་མཚོན་གྱིས་འཚོ་བ་དེ་མི་བསྟེན་པའོ། །འདིར་གཞུང་ནི། ཕྲན་ཚེགས་དག་ལས། དགེ་སློང་གི་གདོང་ནི་མེ་ལོང་ལྟ་བུ་ཡིན་པས། དེའི་ཕྱིར་སྨན་པ་གདོང་དུ་མཚོན་གྱི་ལས་བྱེད་དུ་མི་གཞུག་གོ་ཞེས་གསུངས་པ་ཡིན་ནོ། །གཞང་འབྲུམ་བཅད་པར་མི་བྱའོ་ཞེས་བྱ་བ་ནི་དེ་མི་བསྟེན་ནོ་ཞེས་བྱ་བར་སྦྱར་རོ། །དེའི་ཕྱིར་གཅིག་ཏུ་གྱུར་པ་ནི་གདོང་དུ་མཚོན་གྱི་ལས་བྱེད་པ་དང༌། གཞང་འབྲུམ་གཅོད་པ་ཡིན་ཏེ་འདི་གཉིས་ཡིན་པས་འདི་གཉིས་ལ་ཡང་སྦོམ་པོར་རིག་པར་བྱའོ། །མཚོན་ལས་གཞན་པས་ཀྱང་ངོ་ཞེས་བྱ་བ་ལ་གཞན་གྱིས་ཀྱང་ཞེས་བྱ་བ་ནི་སེན་མོ་ལ་སོགས་པས་ཀྱང་ཞེས་བྱ་བའི་དོན་ཏོ། །དེ་གསང་སྔགས་དང་སྨན་དག་གིས་གསོའོ་ཞེས་བྱ་བ་ལ། དེ་ཞེས་བྱ་བ་ནི་གཞང་འབྲུམ་རྣམས་སོ། །ཞེ་འགྲས་པ་གསོར་མི་གཞུག་གོ་ཞེས་བྱ་བ་ནི་གཞང་འབྲུམ་རྣམས་སོ། །གསོ་བའི་ཕྱིར་ནུབ་མོ་ཟ་བ་ནི་ཚུལ་དང་མི་མཐུན་པ་མ་ཡིན་ནོ་ཞེས་བྱ་བ་ནི། སིལ་བུ་དག་ལས་མདོ་འདི་དག་དང་འོག་མ་གཉིས་སོ། །འདི་ལ་བྱིན་ལེན་མ་བྱས་པ་གསོག་འཇོག་བྱས་པ་དག་མི་རུང་བ་ཉིད་དུ་དོགས་པར་མི་བྱའོ་ཞེས་བྱ་བ་ནི་གསོ་བ་འདི་ལའོ། །གསོ་བའི་ཕྱིར་རེང་བུའི་དུ་བས་བདུག་པར་བྱའོ་ཞེས་བྱ་བ་ནི་ཕྲན་ཚོགས་དག་ལས། འདི་དང་པོར་བྱས་ཏེ་འདི་བཟའ་བར་བྱ་བ་མ་ཡིན་པ་མ་ཡིན་ཞེས་བྱ་བའི་མཐར་ཐུག་པའོ། །དེ་ནི་སྨན་གཅེའུས་འགྲུབ་པའོ་ཞེས་བྱ་བ་ལ། དེ་ཞེས་བྱ་བ་ནི་དུ་བར་བདུག་པ་དེའོ། །ལྕགས་ལས་བྱས་པའོ་ཞེས་བྱ་བ་ནི་སྨན་གཅེའུའོ། །སོར་བཅུ་གཉིས་པ་བཟང་ངོ༌། །རྣོ་བ་དང་རྩུབ་པ་མི་བྱའོ་ཞེས་བྱ་བ་ནི་སྨན་གཅེའུ་འི་སྦུབས་སོ། །ཞུན་མར་རམ་བུ་རམ་གྱིས་བསྐུས་ཏེ་ཤུབས་སུ་གཞུག་གོ །དེ་ནི་ཟུང་ང་མ་ཆོས་གོས་ཀྱི་གདང་བུ་ལ་གདགས་སོ་ཞེས་བྱ་བ་ནི་ཤུབས་དེའོ། །དྲི་མ་མེད་པར་བྱ་བའི་ཕྱིར་མེར་གཞུག་
གོ་ཞེས་བྱ་བ་ནི་སྨན་གཅེའུའོ། །སྣར་བླུགས་པའི་ལས་བྱའོ། །དེ་ནི་སྣར་ལྡུགས་པ་སྤྱད་ཀྱིས་འགྲུབ་པོ་ཞེས་བྱ་བ་ལ། དེ་ནི་ཞེས་བྱ་བ་ནི་སྣར་ལྡུགས་པའི་ལས་བྱས་པ་དེའོ། །མཆུ་གཉིས་མི་རྣ་བ་བཟང་ངོ་ཞེས་བྱ་བ་ནི་སྣར་ལྡུགས་པའི་སྤྱད་ནི་ཁ་བྲག་མཆུ་གཉིས་པ་མི་རྣོ་བ་བཟང་ངོ། །དེ་བྱའོ་ཞེས་བྱ་བ་ནི་སྣར་ལྡུགས་པའི་སྤྱད་དེའོ། །དེ་ནི་བཟའ་བར་བྱ་བ་མ་ཡིན་པ་མ་ཡིན་ཏེ། བྱིན་ལེན་བྱས་ཏེ། སྣར་བླུགས་པའི་ལས་བྱའོ། །གལ་ཏེ་འཚོ་བའི་བར་དུ་བཅང་བ་སྨིན་པར་འགྱུར་ན། དེས་རང་ཉིད་ཀྱིས་བཟུང་སྟེ། སྦྱངས་ཏེ་སྦྱིན་པར་བྱ་ཞེས་སྨོས་ཏེ། དེ་ལ་དྲི་མ་མེད་པའི་རིགས་པའི་གནས་ལ་ སོགས་པ ་དང་ལྷན་ཅིག་ཏུ་དེ་ལྟ་བུས་བསྡུ་བ་འདིའོ། །སྨན་གྱི་གོ་རིམས་ནི་དཔེའོ་ཞེས་སྨོས་ཏེ་དེས་མཚོན་པ་གཞན་བསྟན་པའི་ཕྱིར། སྨན་གྱི་ཕྱིར་ཤ་རློན་པ་བསྟེན་པར་བྱའོ། །དེ་ཟ་མི་ནུས་ན་ཐབས་བྱའོ། །རས་ཀྱིས་མིག་གཉིས་དགབ་པོ། །མི་རྒལ་བར་བྱ་བའི་ཕྱིར་དྲི་ཞིམ་པོས་བསྒོའོ། །ཤ་མེད་པ་ཉིད་ན་མདུན་དུ་བཟའ་བ་དང་བཅའ་པ་ཡིད་དུ་འོང་བ་གཞག་སྟེ་དགྲོལ་ལོ་ཞེས་བྱ་བ་ལ། དགྲོལ་ལོ་ཞེས་བྱ་བ་ནི་མིག་ངས་ཀྱིས་གཡོགས་པ་དེའོ། །གཞན་གྱི་དོན་དེར་ན་སྦོམ་པོའོ་ཞེས་བྱ་བ་ལ། དེ་ཞེས་བྱ་བ་ནི་ཤ་རློན་པ་དེ་སྨན་གྱི་དོན་ལས་གཞན་པར་ཟ་བ་ལ་ཉེས་པ་སྦོམ་པར་འགྱུར་རོ། །མིའི་ཤ་ནི་ཐམས་ཅད་དུའོ་ཞེས་བྱ་བ་ནི་སྨན་གྱི་དོན་དུ་ཡང་མི་ཤ་ཟོས་ན་ཉེས་པ་སྦོམ་པོར་འགྱུར་རོ། །སྨན་གྱི་ཕྱིར་ཟ་བ་ཡང་བཅོམ་ལྡན་འདས་ཀྱིས་སྨད་པས་དེ་དགག་པ་དེའི་ཕྱིར་ཐམས་ཅད་དུའོ་ཞེས་མདོར་བསྡུ་བ་བྱས་སོ། །ཤ་བསྡོས་པར་ཤེས་ན་བཟའ་བར་མི་བྱའོ་ཞེས་བྱ་བ་ནི། ཟ་བ་པོ་ལ་བརྟེན་ནས་བསྔོས་པར་ཟ་བ་པོས་མཐོང་བ་དང་ཐོས་པ་དང་དོགས་པའི་སྒོ་ནས་ཤེས་ན་ཤེས་ཤ་ཟ་བར་མི་བྱ་སྟེ། རྣམ་པར་རྟོག་པ་ཡོངས་སུ་སྐྱེས་པས་བཟའ་བར་བྱ་བ་མ་ཡིན་བ་ཉིད་དུ་སྨོས་པ་གང་ཡིན་པ་དེ་འདིས་མ་བསྡུས་པ་ཡིན་ནོ། །གལ་ཏེ་རྣམ་པར་རྟོག་པ་དེ་ངེས་ན་ནི་ཤེས་པ་ཁོ་ན་ཡིན་ནོ། །གལ་ཏེ་ཡིད་གཉིས་སུ་གྱུར་ན་འདུ་ཤེས་པ་ལྟར་ཡིད་གཉིས་སོ་སྙམ་དུ་ངེས་པའི་ཕྱིར་དེས་འདི་བསྡུས་པའོ། །སྟག་གི་གོད་མའི་ཤ་མི་བཟའོ་ཞེས་བྱ་བ་ནི། ཤར་ཤེས་ན་ཟ་བར་མི་བྱའོ། །འདི་ནི་ཕྲན་ཚེགས་དག་ལས་དགེ་སློང་དག་སྟག་ནི་རུལ་སྦེད་པ་ཡིན་བས་
དེའི་ཕྱིར་དགེ་སློང་གིས་སྟག་གི་གོད་མའི་ཤ་བཟའ་བར་མི་བྱའོ་ཞེས་བྱ་བར་སྦྱར་རོ། །གླང་པོ་ཆེ་དང༌། རྟ་དང༌། ཀླུ་རྣམས་ཀྱི་མི་བཟའོ། །མིག་གཅིག་པ་དང༌། ཝ་དང༌། སྤྲེའུ་དང༌། ཤིང་རྟ་མོ་དང༌། བྱ་རོག་དང༌། བྱ་རྒོད་དང༌། ཆུ་སྐྱར་དང༌། ཁྱི་དང༌། བྱ་ཁྲ་དང༌། འུག་པ་དང༌། དེ་དག་ལས་གཞན་བའི་བྱ་མི་རོ་ཟ་བ་དག་དང༌། བྱ་གར་དང༌། ཕ་བང་དང༌། སྐྱིན་གོར་དང༌། དྲེའུ་སྲིན་དང༌། སྲིན་བུ་རྣམས་ཀྱི་ཡང་མི་བཟའོ་ཞེས་བྱ་བ་ནི། དེ་དག་གི་ཤ་ཡང་ཤེས་ན་བཟའ་བར་མི་བྱའོ་ཞེས་བྱ་བར་སྦྱར་རོ། །དེ་ལས་གཞན་བའི་ཞེས་བྱ་བ་ནི་གང་དུ་མི་རོ་ཟ་བའི་བྱ་སྔར་བསྟན་པ་དེ་དག་ལས་གཞན་པའི་ལའོ། །ཞུ་བའི་གཞུང་ཁ་ཅིག་ལས། སྲིན་བུ་རྣམས་ཀྱི་ཚིལ་འཚལ་བར་བགྱིའམ། འཚལ་བར་མི་བགྱི། བཀའ་སྩལ་པ་བཟའ་བར་མི་བྱའོ། །ནད་དང་བྲལ་བའི་ཕྱིར་ལུས་བསྐུ་བར་ནི་བྱའོ་ཞེས་གསུངས་པ་ཡིན་ནོ། །གཞན་དང་སྐྱ་ལ་ སོགས་པ ་རྣམས་ནི་དགེ་སློང་བྲམ་ཟེའི་བུ་མོས་ཞུས་པ་ལས་སོ། །ལྷག་མ་རྣམས་ནི་སའི་བུ་དག་ལས་སོ། །ཤའི་བྱིན་ལེན་སྟོབས་པ་ལ་བཅད་པ་ལས་བྱུང་བ་ཉིད་མ་ཡིན་ནམ་ཞེས་དྲི་བར་བྱའོ་ཞེས་བྱ་བ་ནི་མི་ལ་ སོགས་པའི་ཤ་བཅད་པ ་གང་ཡིན་པ་དེ་བྱུང་བ་ཉིད་མ་ཡིན་ནམ་ཞེས་བྱ་བ་དང༌། བཅས་པར་དྲི་བར་བྱའོ། །དེ་མི་ལ་ སོགས་པ ་མ་ཡིན་ནམ་ཞེས་བྱ་བ་ལ་སོགས་པས་སོ། །དུ་མ་ཉིད་ཡིན་ན་དང་པོས་སོ་ཞེས་བྱ་བ་དང༌། ཟ་བ་པོ་དུ་མ་ཉིད་ཡོད་ན་དང་པོས་དྲི་བར་བྱ་བ་སྟེ། དགེ་འདུན་གྱི་གནས་བརྟན་གྱི་ཆོས་ཉིད་ཀྱིས་གསུངས་པ་དེ་འདིར་རྣམ་པར་གནས་པ་ཡིན་ནོ། །དེ་བས་ན་དེ་ལྟར་ཉེ་བར་སྦྱར་བའོ། །ཉམས་ན་འོག་མས་སོ་ཞེས་བྱ་བ་ནི་ཤའི་སྐབས་དྲིའོ་ཞེས་བྱ་བར་སྦྱར་ཏེ། དང་པོས་དྲི་བ་ཉམས་ན་འོག་མས་དྲི་བར་བྱ་ཞེས་བྱ་བའི་དོན་ཏོ། །གླང་པོ་ཆེ་དང་མིའི་འོ་མ་དག་བཏུང་བར་མི་བྱའོ་ཞེས་བྱ་བ་ནི་གླང་པོ་ཆེ་ཞེས་བྱ་བ་གཞན་དུ་རིགས་ཙམ་པོའི་གཙོ་བོ་ལ་བརྟེན་ནས་མོའི་རྐྱེན་མ་བསྐྱེད་པ་སྟེ། དེ་ལྟ་བུའི་སྦྱོར་བ་ཡང་མཐོང་སྟེ་རིགས་ཀྱིའོ་ཞེས་བྱ་བ་ལྟ་བུའོ། །ཞུ་བའི་གཞུང་ཁ་ཅིག་ལས། བཙུན་པ་གླང་མོའི་འོ་མ་འམ་ཞོ་ལོངས་སྤྱད་དུ་རུང་ངམ། ཉེ་བ་འཁོར་མི་རུང་ངོ༌། །གང་ཞིག་ལོངས་སྤྱོད་པར་བྱེད་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གཞན་དུ་མིའི་བུད་མེད་ཀྱི་འོ་མ་བཏུང་དུ་རུང་ངམ་མི་རུང༌། བཀའ་
སྩལ་པ། མི་རུང་ངོ༌། འོན་ཀྱང་ལུས་ལ་བསྐུ་བར་བྱའོ་ཞེས་གསུངས་པ་དེ་གཉིས་ཀ་བསྡུས་ནས་སྨོས་པ་ཡིན་ནོ། །པགས་པ་དང་རྨར་བསྐུ་བ་དང་སྣར་བླུགས་པ་དང༌། མིག་སྐུད་ཅིང་བཟའ་བཏུང་མི་བྱེད་པ་ལ་ནི་སྐྱོན་ཆགས་པ་མེད་དོ་ཞེས་བྱ་བ་ནི་དེ་དག་གིས་པགས་པ་སྐུད་པ་དང༌། རྨ་སྐུད་པ་དང༌། སྣར་བླུགས་པ་དང་མིག་སྐུད་ཅིང་བཟའ་བཏུང་མི་བྱེད་པ་ལ་ནི་སྐྱོན་ཆགས་པ་མེད་དོ་ཞེས་བྱ་བའི་དོན་ཏོ། །འདིར་གཞུང་ནི། དགེ་སྲོང་བྲམ་ཟེའི་བུ་མོས་ཞུས་པ་ལས། བཙུན་བ་སྨན་རུང་བ་མ་ལགས་པ་དག་དང་བསྐོལ་བའི་འབྲུ་མར་འཚལ་དུ་རུང་ངམ་ཉེ་བ་འཁོར་མི་རུང་ངོ༌། །ལུས་སྐུད་པ་དེ་དང། རྨའི་བསྐུ་མཉེ་བྱ་བ་དང༌། སྣར་ལྡུགས་པའི་ལས་བྱ་བ་ནི་ལྟུང་བ་མེད་དོ། །བཙུན་བ་བུད་མེད་ཀྱི་འོ་མ་འཚལ་དུ་རུང་ངམ། ཉེ་བ་འཁོར་མི་རུང་ངོ༌། །མིག་ལ་སྐུད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །ལུས་སྐུད་པ་ལ་ལྟུང་བ་མེད་དོ། །སྔར་ཞུ་བ་ལས་གསུངས་སོ། །ནད་པས་ནི་ཞུན་མར་དང་འབྲུ་མར་ཆང་དང་འདྲེས་པ་བཏུང་བར་བྱ་བ་ཉིད་དོ། །ཆང་མ་ཡིན་པ་ཉིད་ནི་ཉེས་པ་མེད་པ་ཉིད་དོ་ཞེས་བྱ་བ་ལ། ནད་པ་ཞེས་བྱ་བ་ནི་འདིར་བཏུང་བ་པོའི་ཡུལ་ལ་ཞུ་བ་ལས། འདི་ནི་དང་པོ་སྟེ་བསྐོལ་ན་རུང་ངོ་ཞེས་བྱ་བའི་མཐར་ཐུག་པའོ། །ཆང་མ་ཡིན་པ་ཉིད་ན་ཞེས་བྱ་བ་ནི་ཆང་མ་ཡིན་པ་ཉིད་དུ་གྱུར་ན་ཉེས་པ་མེད་དོ། །བཏུང་དུ་མི་རུང་བ་ཉིད་མ་ཡིན་ནོ་ཞེས་བྱ་བའི་དོན་ཏོ། །དེའི་དྲི་དང་རོ་དག་ཀྱང་གང་དུ་བྲལ་བ་ཉིད་དེ་ནི་འདིར་ཆང་མ་ཡིན་པ་ཉིད་དུ་གསུངས་སོ། །དེའི་ཕྱིར་ཆང་གི་དྲི་དང་རོ་མྱང་བ་མྱོས་པར་མི་བྱེད་པ་དག་ཅེས་གསུངས་པ་ལས་ཤེས་པར་བྱའོ། །དེ་ནི་བསྐོལ་བ་ལས་འགྲུབ་པོ་ཞེས་བྱ་བ་ལ། དེ་ནི་ཞེས་བྱ་བ་ལ་ནི་ཆད་མ་ཡིན་པ་ཉིད་དེ་ནི་བསྐོལ་བ་ལས་ཆང་མ་ཡིན་པར་འགྱུར་རོ་ཞེས་བྱ་བའི་དོན་ཏོ། །འདིར་གཞུང་ནི། བཙུན་བ་མྱོས་པར་འགྱུར་བའི་བཏུང་བ་ཞུགས་ཀྱིས་བསྐོལ་ནས་འཚལ་དུ་རུང་ངམ་ཉེ་བ་འཁོར་རུང་ངོ་ཞེས་གསུངས་པ་ཡིན་ནོ། །གོས་ཀྱི་གཞི་ལས་སྨོས་པའི་ཚ་ཉིད་དུ་སྒྲུབ་པར་བྱད་པའི་ཆང་གི་ཆོ་ག་བརྗོད་པའི་ཕྱིར། དེ་ནི་ནས་རྔོས་པས་གདབ་ཅིང་སའི་སྟེང་དུ་བཅུག་པ་ཚ་ཉིད་དུ་འགྱུར་རོ། །རྒུན་གྱི་ཁུ་བ་ནི་བསྐོལ་ན་ཆང་ཉིད་དུ་མི་འགྱུར་རོ་ཞེས་བྱ་བ་སྨོས་ཏེ་འདིར་གཞུང་ནི། བསྐོལ་ཏེ་གཞག་པར་བྱ་ཞིང་དགེ་འདུན་གྱི་དུས་མ་ཡིན་པའི་བཏུང་བར་འགྱུར་རོ་ཞེས་གསུངས་
བའི་དགོངས་པ་ལ་འདི་སྨོས་པ་ཡིན་ནོ། །ཐ་དད་པ་མ་ཡིན་པ་ཉིད་ལ་ནི་ཡོད་པ་ཉིད་མ་ཡིན་ནོ་ཞེས་བྱ་བ་ནི་གང་ཞིག་ཐ་དད་པ་མ་ཡིན་པ་དེ་ནི་ཐ་མི་དད་པར་གྱུར་པའོ། །དཔེར་ན་ཏིལ་རྣམས་ལ་ཏིལ་མར་དང༌། བུ་རམ་ཤིང་ལ་ཁུ་བ་དང༌། དེ་ལ་ཡང་བུ་རམ་ཡོད་པ་ཉིད་མ་ཡིན་པ་ལྟ་བུའོ། །དེ་ལྟ་བས་ན་ཏིལ་ལ་བྱིན་ལེན་བྱས་པས་ཏིལ་མར་ལ་བྱིན་ལེན་བྱས་པར་མི་འགྱུར་ལ། བུ་རམ་ཤིང་ལ་བྱིན་ལེན་བྱས་པས་བུར་མ་བྱིན་ལེན་བྱས་པར་མི་འགྱུར་བར་ཤེས་པར་བྱའོ། །བག་ཆགས་སུ་གྱུར་པ་ཉིད་ནི་ཡོད་པ་ཉིད་དོ་ཞེས་བྱ་བ་ནི། འདིར་གཞུང་ནི། ཞག་རུང་བ་མ་ལགས་པ་དག་བསྐོལ་བའི་དབོན་ཚ་འཚལ་དུ་རུང་ངམ་མི་རུང་བཀའ་སྩལ་པ། ནད་པས་ནི་བཟང་རུང་ལ་མིན་པས་ནི་མི་རུང་ངོ༌། །ཤ་ལ་ཡང་དེ་བཞིན་ནོ་ཞེས་གང་ཞིག་ཞུས་པ་ལས་རྫས་རུང་བ་མ་ཡིན་པ་དང་འབགས་པ་བཟའ་བར་བྱ་བ་ཉིད་མ་ཡིན་ཞེས་གསུངས་པ་དེ་འདིར་བསྡུས་པ་ཡིན་ནོ། །ཆང་གི་སྲིད་པ་དང་བྲལ་བར་བྱ་བའི་ཕྱིར་རྩ་བ་དང། སྡོང་བུ་དང༌། འདབ་མ་དང༌། མེ་ཏོག་དང༌། འབྲས་བུའི་སྨན་སྐམ་པོའི་ཕྱེ་མ་ཆང་གི་དྲིས་བསྒོས་ པ་ཆུ་དང་སྦྱར་བ་བཏུང་ངོ་ཞེས་བྱ་བ་ནི་ཆང་གི་དྲིས་བསྒོས་པའི་རྩ་བ་ལ་སོགས ་པའི་སྨན་རྣམས་ལ་སྐམ་པོའི་ཕྱེ་མ་དང་སྦྱར་བའི་ཆུས་སོ། །འདིར་གཞུང་ནི། སིལ་བུ་དག་ལས། དེ་ལྟ་བས་ན་ཆང་དུ་རུང་བའི་རྩ་བ་དང་སྡོང་བུ་ལ་ སོགས་པའི་རྫས་སྐམ་པོ་གང་དག་ཡིན་པ ་དེ་དག་ཕྱེ་མར་བྱས་ཏེ། རས་མ་དཀར་པོས་ཕུལ་ཏེ་ཆང་གི་ཤུགས་དང་བྲལ་བའི་སྣོད་མ་གང་བར་བཅང་བར་བྱ་ཞིང་དེ་ནས་ཕྱུང་སྟེ། བྱི་དོར་བྱས་ནས་ཟས་དང་མ་འབགས་པའི་ཆུ་དང་ལྷན་ཅིག་སྦྱར་ཞིང་བཙགས་ཏེ་བཏུང་བར་རྗེས་སུ་གནང་ངོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཆང་དང་བཅས་པའི་སྣོད་དུ་སྦྱངས་ཏེ་གཞག་བར་བསྒོ་བར་བྱའོ། །རེག་པ་བསྲུང་ངོ་ཞེས་བྱ་བ་ནི་ཕྱེ་མའི་ཕུར་མ་དེ་ཆང་དང་རེག་པར་མི་འགྱུར་བར་བྱ་བའི་ཕྱིར་བསྲུང་བར་བྱའོ། །དེའི་ཕྱིར་མ་གང་བ་དང་ཤུགས་དང་བྲལ་བ་ཉིད་དུའོ་ཞེས་བྱ་བ་ནི་ཆང་གིས་མ་གང་བའི་སྣོད་དང་བཅས་པ་ལ་ཆང་གི་ཤུགས་དང་བྲལ་བ་ཉིད་ནི་དེའི་སྣོད་དུ་གཏོགས་པའི་ཆང་ལའོ། །གཞན་དུ་ན་གྱེན་དུ་བཏུང་བས་རེག་པར་འགྱུར་བའི་ཕྱིར་རོ། །དེ་བཞིན་དུ་རོ་མེད་པར་བྱེད་པ་དང༌། དུས་མ་ཡིན་བར་བཏུང་བ་ལ་ཟས་དང་ཡང་ངོ་ཞེས་བྱ་བ་ནི་ཇི་ལྟར་ཕྱེ་མ་ཆང་དང་རག་པ་བསྲུང་
བ་དེ་བཞིན་དུ་རོ་མེད་པར་གྱུར་པའི་རྫས་ཀྱིས་ཀྱང་དུས་མ་ཡིན་པར་བཏུང་བར་འདོད་པའི་ཟས་དང་རེག་པ་བསྲུང་བར་བྱའོ། །མཛེས་པ་ཡང་བཟང་ངོ་ཞེས་བྱ་བ་ནི་ཕྱེ་མ་སྐམ་པོ་ཆང་གི་དྲིས་བསྒོས་པ་དང་སྦྱར་བའི་ཆུ་བཟང་བའོ། །གང་གི་ཕྱིར་དེ་ལྟར་བསྲུང་བར་བྱ་བ་ཉིད་མཛེས་པ་ཡིན་ཏེ། དེའི་ཕྱིར་རས་མ་དཀར་པོས་བཙགས་པར་བྱའོ། །ནད་པས་ཆང་ནི་རྩྭ་མཆོག་གིས་ཀྱང་མི་བཏུང་ངོ་ཞེས་བྱ་བ་འདི་ནི་བཅས་པའི་ཁ་ན་མ་ཐོ་བ་དང་བཅས་པ་ཐམས་ཅད་གནང་བའི་ཡུལ་ལ་རྗེས་སུ་གནང་བ་དེ་ནི་དམིགས་ཀྱིས་བསལ་བ་ཡིན་ཏེ། ཇི་ལྟར་བཅོམ་ལྡན་འདས་ཀྱིས་ཤཱཀྱ་ན་བར་གྱུར་པ་དག་ལ་དེ་ཉིད་མ་གནང་བར་གསུངས་པ་ཡིན་ནོ། །དེ་ལྟར་དགེ་སློང་དག་ང་ལ་སྟོན་བ་ཞེས་ཟེར་བ་ཁྱེད་ཅག་གི་ཚང་རྩྭ་མཆོག་གིས་ཀྱང་མི་བླུད་མི་བཏུང་ངོ་ཞེས་གསུངས་པ་དེ་བས་མདོ་འདི་བྱས་སོ། །དགེ་བསྙེན་ཡན་ཆད་ཀྱིས་མི་བླུད་ཅིང་ཞེས་བྱ་བ་ནི་འདིར་ཡན་ཆད་ཀྱི་སྒྲ་བྲིས་པར་རིག་པར་བྱའོ།། དགེ་བསྙེན་གྱི་མཐའ་ཡན་ཆད་ཆོས་འདི་པ་བསླབ་པ་མ་བླངས་པ་ཐམས་ཅད་ཀྱིས་ཀྱང་ཆང་བླུད་པར་མི་བྱའོ། །དགེ་བསྙེན་གྱིས་མི་བྱ་བའི་ལས་དྲུག་སྟེ། སེམས་ཅན་འཚོང་བ་དང༌། ཆང་འཚོང་བ་དང༌། མཚོན་ཆ་འཚོང་བ་དང༌། དུག་འཚོང་བ་དང༌། རྒྱ་སྐྱེགས་ཀྱི་ལས་དང༌། ཏིལ་འཚོང་པའི་ལས་སོ་ཞེས་བྱ་བ་འདིས་བསྡུས་པ་ཡིན་ནོ། །རང་བཞིན་གྱི་ཁ་ན་མ་ཐོ་བ་དང་བཅས་པ་ལས་གཞན་པ་ཐམས་ཅད་ལ་གསོ་བའི་དོན་ཉིད་མ་གཏོགས་སོ་ཞེས་བྱ་བའི་ལྷག་མའོ་ཞེས་བྱ་བ་ནི་བཅས་པའི་ཁ་ན་མ་ཐོ་བ་དང་བཅས་པ་བཟའ་བ་ཐམས་ཅད་བཀག་པ་ལས་གཞན་དུ་ཡང་དགག་པའི་ཕྱིར་གང་ཡིན་པ་དེ་ཐམས་ཅད་ལ་གསོལ་བའི་དོན་ཉིད་དུ་ནི་མ་གཏོགས་སོ་ཞེས་བྱ་བའི་ལྷག་མ་འདི་ཤེས་པར་བྱའོ། །ཕྲན་ཚེགས་དག་ལས་འདི་དང་པོར་བྱས་ཏེ་གཙང་བར་བྱས་པ་དང་སྤོས་ཀྱིས་བསྒོ་བར་བྱའོ་ཞེས་བྱ་བའི་མཐར་ཐུག་པའོ། །སྒོག་སྐྱ་དང་ཀུན་དོང་ཀེའུ་བཟའ་བར་མི་བྱའོ། །ནད་པས་ནི་དབེན་བའི་ཕྱོགས་སུའོ་ཞེས་བྱ་བ་ནི་བཟའ་བར་བྱ་བའོ། །ཟོས་ནས་སྒོག་སྐྱ་ནི་ཞག་བདུན། ཀུན་དོང་ནི་ཞག་གསུམ། ཀེའུ་ནི་ཞག་གཅིག་མ་ལོན་པར་གཙུག་ལག་ཁང་དུ་འཇུག་པར་མི་བྱའོ་ཞེས་བྱ་བ་ནི། ཟོས་ནས་ཞེས་བྱ་བར་སྦྱར་རོ། །སྒོག་སྐྱ་ཟོས་ནས་ནི་ཞག་བདུན་ནོ། །དེ་བཞིན་དུ་ཀུན་དོང་ཟོས་
ནས་ནི་ཞག་གསུམ་མོ། །ཀེའུ་ཟོས་ནས་ནི་ཞག་གཅིག་གོ །གནས་མལ་ལ་མི་བྱའོ་ཞེས་བྱ་བ་ནི་ལོངས་སྤྱད་པར་མི་བྱའོ། །བཤང་བའི་སར་འཇུག་པར་མི་བྱའོ། །གཅི་བའི་སར་མི་བྱའོ། །དགེ་འདུན་གྱི་ནང་དུ་འགྲོ་བར་མི་བྱའོ། །མཆོད་རྟེན་གྱི་ཉེན་ཀོར་དུ་མི་བྱའོ། །དེའི་ཐག་ནི་འདོམ་གང་ངོ་ཞེས་བྱ་བ་ནི་མཆོད་རྟེན་གྱི་ཉེན་ཀོར་དེའི་འོ། །འདིར་གཞུང་ནི། མཆོད་རྟེན་གྱི་ཉེན་ཀོར་འདོམ་གང་སྤང་བར་བྱ་སྟེ། དགེ་སློང་དག་མཆོད་རྟེན་ནི་ལྷ་མངོན་བར་དད་པ་ཅན་དག་གིས་ཀུན་ནས་གང་བ་ཡིན་ལ། ལྷ་རྣམས་ནི་གཙང་སྦྲ་འདོད་པ་ཡིན་པས་དྲི་དེ་ནི་དེ་དག་དང་མི་མཐུན་པའི་ཕྱིར་མཆོད་རྟེན་ལ་ཕྱག་མི་བྱའོ་ཞེས་གསུངས་པ་ཡིན་ནོ། །འདི་ནི་མི་རིགས་པར་གྱུར་པ་སྟེ། གང་གི་ཕྱིར་དེ་ལྟ་བུར་གྱུར་པའི་གནས་སྐབས་རྣམས་ལ་མཆོད་རྟེན་ལ་ཕྱག་བྱ་བར་མི་རིགས་པ་ཁོ་ན་ཡིན་ནོ། །ཁྱིམ་བདག་དག་ལ་ཆོས་བསྟན་པར་མི་བྱའོ། །ཁྱིམ་དག་ཏུ་འགྲོ་བར་མི་བྱའོ། །སྐྱེ་བོས་གང་བའི་ས་ཕྱོགས་སུ་མི་བྱའོ། །མཇུག་ཏུ་ཁྲུས་བྱའོ། །གོས་དག་གི་དྲི་ནི་བཀྲུ་བ་དང༌། དུ་བ་དག་གིས་བསལ་ལོ། །རུང་བ་ཉིད་དུ་བྱིན་གྱིས་བརླབས་པར་བཙོས་པ་དང་གནས་པ་དག་ནི་ཕྱི་རོལ་དང་འདྲའོ་ཞེས་བྱ་བ་ནི་དཔེར་ན་དགེ་སློང་གིས་གནས་ཉེན་ཀོར་འདོམ་གང་དང་བཅས་པ་ནས་ཕྱི་རོལ་དུ་གྱུར་པའི་བཙོས་པ་དང་གནས་པ་དག་གིས་ཟས་ལ་རྟེན་ཉིད་དུ་འགྲོ་ཞིང་མི་རུང་བ་ཉིད་བྱེད་པ་པོ་མ་ཡིན་བའི་ཟས་དེ་ལ་དེ་བཞིན་དུ་རུང་བ་ཉིད་དུ་བྱིན་གྱིས་བརླབ་པའོ། །དེར་ཡང་ཉེས་པ་དེ་དག་མི་འབྱུང་བ་ཉིད་བྱིན་གྱིས་བརླབས་པ་ལས་གསུངས་སོ། །འདི་བྱེད་པར་རིགས་པ་མ་ཡིན་པ་འམ། འོན་ཏེ་ཡིན་སྙམ་པ་དེ་བསྟན་པའི་ཕྱིར། བྱིན་གྱིས་བརླབ་པར་བྱའོ། །ཤིང་དྲུང་དང་གླང་པོ་ཆེའི་ར་བ་དང༌། མུ་སྟེགས་ཅན་གྱི་འདུག་གནས་དང༌། རྒྱལ་པོའི་ཕོ་བྲང་ས་དང༌། དགེ་སློང་མའི་དབྱར་ཁང་དང༌། གཙུག་ལག་ཁང་གི་བང་རིམ་དང༌། སྒོ་ཁང་དང༌། ཁྱམས་དང༌། བསྲོ་ཁང་དང༌། དཔོང་སའི་ར་བ་དག་ཏུ་མི་བྱའོ་ཞེས་བྱ་བ་ནི་ཕྱིན་གྱིས་བརླབ་པར་བྱ་ཞེས་བྱ་བར་སྦྱར་རོ། །གཏུམ་ཕུག་ཅན་དང་བསྙོན་ཐབས་མཁན་དང༌། ཟིལ་གྱིས་གནོན་པར་བྱེད་པ་དང༌། ཁང་པ་དང༌། ཁྱམས་སུ་མི་བྱེད་པ་དང༌། དོན་ཉམས་པ་དང་གུས་པ་ཉམས་པ་ཞེས་བྱ་བ་དེ་རྣམས་ཡོངས་སུ་སྤང་བའི་ཕྱིར་དེ་རྣམས་འདིས་དགག་པ་སྟེ་བསྒྲུབ་པ་ལ་ སོགས་པ ་ལ་ཡང་ངོ༌། །ཁ་
ཅིག་ལས་བླ་གབ་མེད་པ་དང༌། མེ་ཁང་དང༌། མཆོད་རྟེན་གྱི་གཞི་དང༌། ཁྱིམ་བདག་གི་ས་གཞི་ཡང་ཞེས་བྱ་བ་ནི། གཞུང་ཁ་ཅིག་ལས་འདི་རྣམས་དང་སྔར་སྨོས་པ་དག་ཏུ་རུང་བའི་ཁང་པ་བྱིན་གྱིས་བརླབ་པར་མི་བྱའོ་ཞེས་བྱ་བ་ནི་གཞན་གྱི་འདོད་པའོ། །དེར་གཡོས་དང་བཙོ་བ་ཡང་མི་བྱའོ་ཞེས་བྱ་བ་ལ་དེར་ཞེས་བྱ་བ་ནི་ཤིང་དྲུང་ལ་ སོགས་པ ་དང་བླ་གབ་མེད་པ་དེར་རོ། །ཀུན་དུ་སྤྱོད་པ་འདི་ནི་ཁྱིམ་པ་དང་འདྲ་བ་སྟེ། གཡོས་དང་བཙོ་བ་བྱེད་པ་དེའི་ཕྱིར་ཤིན་ཏུ་དཔེན་པར་འདི་བྱ་བར་རིགས་པ་ཡིན་ནོ། །འདིར་མ་སྦས་པར་གནས་པས་མི་བྱ་བར་རབ་ཏུ་བྱུང་བའི་ཕམ་པར་གྱུར་བའི་དོན་འདིས་གཞན་རྣམས་ལ་ཡང་འགྱུར་རོ། །ཤིང་དྲུང་ལ་ སོགས་པ ་རྣམས་ལ་འདི་ཤིན་ཏུ་མ་སྦས་པ་ཉིད་དང༌། གུས་པ་ཉམས་པའི་མཐའ་མ་ཅན་གྱི་ཉེས་པ་རྣམས་ལ་འགའ་ཞིག་ཏུ་ཞེས་བྱ་བ་ལས་གཡོས་པ་དང་བཙོ་བ་དག་ལས་འདི་རྣམས་བཀག་པ་དང༌། ཚོས་པའི་བྱི་དོར་ཡང་མི་བྱའོ་ཞེས་བྱ་བ་ལ། ཚོས་པའི་བྱི་དོར་ནི་ཚོས་པའི་བྱི་དོར་རོ། །དེ་མི་བྱ་བ་སུམ་ཆ་བངས་པན་ཚོས་པ་ཡིན་ཏེ། ཚོས་ པ་དེ་དག་དགེ་སློང་རང་གིས་བྱི་དོར་བྱ་བ་ནི་ཤིང་དྲུང་ལ་སོགས ་པའི་གནས་དེ་རྣམས་སུ་མི་བྱའོ་ཞེས་བྱ་བའི་དོན་ཏོ། །དེ་ནི་ཀློག་པ་མ་ཡིན་ཏེ། ཤིན་ཏུ་སྡིག་པ་བསྲུང་བ་ལ་ སོགས་པ ་དེ་ལྟ་བས་ན་ཉེ་བར་བསྡུས་པའོ། །འདི་ལ་དུས་བཞི་ཡོད་དོ་ཞེས་བྱ་བ་ནི་འདིར་རུང་བའི་ཁང་པ་བྱིན་གྱིས་བརླབ་པ་འདི་ལ་དུས་བཞི་ཡོད་པའོ། །དེ་དག་ཀྱང་གང་ཞེ་ན། དང་པོ་སོ་ཕག་འགྲེམས་པའོ། །ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བ་ནི་དང་པོ་སོ་ཕག་བཀྲམ་པའི་འོག་ཏུ་རུང་བའི་ཁང་པ་བྱིན་གྱིས་བརླབ་པ་ནི་དུས་གཅིག་གོ །དང་པོ་སོ་ཕག་བཀྲམ་པའི་འོག་ཏུ་དེང་ཕྱིན་ཆད་ནས་ཇི་སྲིད་དུ་ལས་སར་པ་ཡོད་པ་ཉིད་འདི་ནི་གཞན་ནོ། །གཞན་གྱི་ཚེ་དགེ་སློང་གནས་པ་ཉིད་དང་མ་བྲལ་བའོ་ཞེས་བྱ་བ་ནི་དགེ་སློང་གནས་པ་ཉིད་དང་མ་བྲལ་བ་འདི་ལ་ཡོད་པས་ན་འདི་ནི་དགེ་སློང་གནས་པ་ཉིད་དང་མ་བྲལ་བའོ། །དེའི་དངོས་པོ་ནི་དེ་ཉིད་དོ། །དེ་ལས་སར་པ་ཉིད་ཀྱི་ཕྱིར་དུས་གཞན་གྱི་ཚེ་ན་གལ་ཏེ་དགེ་སློང་རྣམས་ཀྱིས་ལྷག་པར་གནས་པ་དང་མི་འབྲལ་བར་འགྱུར་ན། དེ་ནས་བྱིན་གྱིས་བརླབ་པར་བྱ་བ་ཉིད་ཅེས་བྱ་བ་འདི་ནི་དུས་གསུམ་པའོ། །དེ་དག་མེད་པ་ན་གནས་པའི་ཕྱིར་དགེ་སློང་དག་ཕྱིན་པ་ན་
ཞེས་བྱ་བ་ནི། དེ་ན་དགེ་སློང་སྔར་གནས་པ་གནས་ཁང་ན་མེད་པ་དེ་ནི་དེ་མ་ཡིན་པ་དེ་གང་ཡིན་པ་དེ་ལ་དགེ་སློང་གནས་པ་མེད་པར་གྱུར་པ་ལ་ལྷག་པར་གནས་པའི་ཕྱིར། དགེ་སློང་རྣམས་ཀྱིས་ཕྱིན་པ་གང་ཡིན་པ་དེ་ནི་བྱིན་གྱིས་བརླབ་པའི་དུས་བཞི་པའོ། །ཕྱིན་པའི་དུས་དེ་ཉིད་དུ་བྱིན་གྱིས་བརླབ་པར་བྱའོ། །བྱ་བ་གཞན་བརྩམས་པ་དང་ངལ་བསོ་བ་མ་བྱས་པ་ཚུན་ཆད་ནི་དེ་ཉིད་དོ་ཞེས་བྱ་བ་ནི་ཇི་སྲིད་དུ་དེ་རྣམས་ཕྱིན་པ་བྱ་བ་གཞན་བརྩམས་པ་མ་བྱས་པ་ཚུན་ཆད་ཞི་བར་མི་འགྱུར་རོ། །འདུག་པ་ལ་ སོགས་པ ་གནས་པར་གྱུར་པ་རེ་ཞིག་བརྟག་པར་མི་བྱ་སྟེ། དེ་ཉིད་ནི་ཕྱིན་པ་ཉིད་དོ། །ཕྱིན་བའི་གནས་སྐབས་སུ་རིག་པར་བྱ་ཞེས་བྱ་བའི་དོན་ཏོ། །ཐམས་ཅད་ལ་དགེ་འདུན་གྱི་ལས་ཀྱིས་སོ་ཞེས་བྱ་བ་ནི་དུས་བཞི་པོ་དེ་རྣམས་ལ་དགེ་འདུན་གྱི་ལས་ཀྱིས་བྱིན་གྱིས་བརླབ་པར་བྱའོ། །དང་པོ་གཉིས་ལ་ནི་གང་ཟག་གིས་ཀྱང་ངོ་ཞེས་བྱ་བ་ནི་དང་པོ་སོ་ཕག་འགྲེམས་པར་གྱུར་པ་དང༌། ཕྱིས་ལས་སར་པ་དང་བཅས་པར་གྱུར་པ་ཉིད་ནི་གང་ཟག་གིས་ཀྱང་བྱིན་གྱིས་བརླབ་པར་བྱའོ། །གང་ཟག་ཇི་ལྟ་བུས་ཤེ་ན། དེའི་ཕྱིར་ལག་གི་བླས་སོ། །དང་པོ་ཤོས་ལ་ནི་འབའ་ཞིག་གིས་ཀྱང་ངོ་ཞེས་བྱ་བ་སྨོས་ཏེ། དང་པོའི་དུས་ལ་དང་པོའི་སོ་ཕག་འགྲེམས་པ་ཉིད་ན་ལག་གི་བླ་འབའ་ཞིག་གིས་ཀྱང་བྱིན་གྱིས་བརླབ་ཏུ་རུང་བའོ། །དགེ་སློང་རབ་ཏུ་མང་པོ་རྣམས་ཀྱིས་སེམས་བསྡུ་བ་འབའ་ཞིག་ཏུ་མ་ཟད་ཀྱི་འདིའི་སྔགས་ནི། ཚེ་དང་ལྡན་བདག་སེམས་སྡུས་ཤིག་ཅེས་བྱ་བའི་དོན་ཏོ། །དང་པོར་འབའ་ཞིག་ལ་འདིས་ཇི་ལྟར་བྱིན་གྱིས་བརླབ་པར་བྱ་ཞེ་ན། དེའི་ཕྱིར་བརྗོད་པས་སོ་ཞེས་བྱ་བ་སྨོས་སོ། །ཇི་ལྟར་ཡང་དེ་དགེ་སློང་ལག་གི་བླས་རྡོ་བརྟེག་པ་ན། དེའི་ཕྱིར་དང་པོར་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་བའི་སྙམ་དུ་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་བྱ་སྟེ། གཞི་འདི་ནི་དགེ་འདུན་གྱི་རུང་བའི་ཁང་པ་འབྱུང་བར་འགྱུར་ཞེས་གསུངས་པ་ཡིན་ནོ། །གཉིས་པ་ལ་ནི་དགེ་སློང་རབ་ཏུ་མང་པོ་དག་གིས་སེམས་བསྡུས་བས་སོ་ཞེས་བྱ་བ་ནི་བྱིན་གྱིས་བརླབས་པའི་དུས་གཉིས་པ་སྟེ། ཕྱིས་ལས་སར་པ་དང་བཅས་པ་ཉིད་དོ་ཞེས་བྱ་བའི་དུས་དེར་ནི་དགེ་སློང་རབ་ཏུ་མང་པོ་དག་གིས་རུང་བའི་ཁང་པར་སེམས་བསྡུས་པར་བྱིན་གྱིས་བརླབ་པར་བྱ་བ་སྟེ། དེའི་ཚེ་ན་ཡང་གཙུག་ལག་
ཁང་བྱེད་པ་སྲིད་པའི་ཕྱིར་རོ། །གསུམ་པ་ལ་ནི་ལས་ཁོ་ནས་སོ་ཞེས་བྱ་བ་ནི་བྱིན་གྱིས་བརླབ་པའི་དུས་གསུམ་པ་སྟེ། གཞན་གྱི་ཚེ་དགེ་སློང་གནས་པ་ཉིད་དང་མ་བྲལ་བའོ་ཞེས་བྱ་བའི་དུས་ཀྱི་དེའི་ཚེ་ན་དགེ་འདུན་གྱིས་གསོལ་བ་དང༌། གཉིས་ཀྱི་ལས་ཀྱིས་བྱིན་གྱིས་བརླབ་པ་ཁོ་ནར་བྱས་པའོ། །དུས་གསུམ་པར་བྱིན་གྱིས་བརླབ་པའི་རུང་བའི་ཁང་པ་འདིའི་མིང་ནི་ལས་ཀྱི་མཐའ་ལས་བྱུང་བའི་ཞེས་བྱ་བའོ། །བཞི་པ་ལ་ནི་ཇི་སྙེད་ཕྱིན་པ་དེ་སྙེད་ཀྱིས་རུང་བའི་ཁང་པ་ཉིད་དུ་བསྒྲག་པའི་ཚིག་ཅིག་ཅར་བརྗོད་པས་སོ་ཞེས་བྱ་བ་ལ། ཇི་སྙེད་ཕྱིན་པ་ཞེས་བྱ་བ་ནི་བྱེ་བྲག་མ་ཐོབ་པ་རྣམས་ལ་མང་པོ་ཉིད་དུ་འཇུག་པར་འགྱུར་བས། མཉམ་པ་སྲིད་པ་ལ་བྱིན་གྱིས་བརླབ་པར་འགྱུར་ཞེས་བྱ་བའི་དོན་ཏོ། །བཞི་པ་ལ་ནི་ཞེས་བྱ་བ་ནི་དུས་ལའོ། །དེ་མ་ཡིན་པ་ལ་ལྷག་པར་གནས་པའི་ཕྱིར་དགེ་སློང་རྣམས་ཕྱིན་པ་ཞེས་བྱ་བ་དེ་ལའོ། །ཅིག་ཅར་ཞེས་བྱ་བ་ལ་དགེ་སློང་ཕྱིན་པ་ཐམས་ཅད་ཀྱིས་གཞི་འདི་ནི་དགེ་འདུན་གྱི་རུང་བའི་ཁང་པར་འགྱུར་རོ་ཞེས་ཚིག་མཐུན་པར་ཅིག་ཅར་བར་བརྗོད་པར་བྱའོ་ཞེས་བྱ་བའི་དོན་ཏོ། །འདིར་ཆོ་ག་དང་སྔགས་མ་བརྗོད་པ་དེ་བས་ན་འདི་ལྟར་སྨོས་སོ། །འདིའི་མིང་ནི་འཕྲལ་ལ་བྱུང་བའི་གནས་ཞེས་བྱའོ། །དུས་གཞན་གྱི་ཚེ་ན་དགེ་སློང་གནས་པ་ཉིད་དང་མ་བྲལ་ལོ་ཞེས་བྱ་བའི་དུས་གསུམ་པ་འདི་ལ་ལས་གཅིག་པ་ཉིད་ཀྱིས་ཞེས་བྱ་བ་དེ་གནས་པར་རིག་པར་བྱའོ། །གཅིག་གིས་གཙུག་ལག་ཁང་དུ་མའི་བྱ་བ་བྱེད་བ་ལ་མི་མཛེས་པ་མེད་པ་ཞེས་བྱ་བ་ལ་གཅིག་གིས་ཞེས་བྱ་བ་ནི་རུང་བའི་ཁང་པའོ། །འདིར་གཞུང་ནི། བ་ལང་གི་གནས་པ་ལྟ་བུ་གང་ཞེ་ན། གཙུག་ལག་ཁང་ཐ་དད་པ་ན་གནས་པའོ་ཞེས་བྱ་བའི་དོན་དེ་འདིས་ཤེས་པའོ། །དེ་ནི་ཐ་དད་པར་གྱུར་པའི་གནས་ཏེ་ཐ་དད་པ་དུ་མ་དག་ཏུ་རུང་བའི་ཁང་པ་གཅིག་ཏུ་གཙུག་ལག་ཁང་དུ་མའི་དེ་གནས་རྣམས་ཀྱིས་བྱ་བ་བྱེད་པ་གང་ཡིན་པ་དེ་ནི་མི་མཛེས་པ་མ་ཡིན་པར་ཤེས་པར་བྱའོ། །དེ་ནི་ཐ་དད་པར་གྱུར་པའི་རུང་བ་ཉིད་དུ་མ་བསྟན་ཏོ་ཞེས་བྱ་བ་ནི་དོན་གཞན་འདིས་དོགས་པ་ཡིན་ལ་འབྲེལ་བར་གནས་པའི་གཞི་ཐ་དད་པར་གྱུར་པ་གང་ཡིན་པ་དེས་སོ། །བྱིན་གྱིས་མ་བརླབས་པར་ཡང་རུང་བ་ཞེས་བྱ་བ་གཞུང་འདིས་སྨོས་པ་དེ་བས་ན་དེའི་འདི་བཀག་པའོ། །འདིར་ནི་དེ་མ་གསུངས་སོ་ཞེས་བྱ་བ་ཡང་ཅིའི་
ཕྱིར་ངེས་པ་འདིར་ཡིན་ཞེ་ན། དེའི་ཕྱིར་གལ་ཏེ་གནས་ཀྱི་གཞི་ཡིན་ན། དེའི་ཕྱིར་ཐ་དད་པར་གྱུར་པའོ། །འདི་བྱིན་གྱིས་བརླབ་པ་མེད་པ་རུང་བ་ཉིད་ལ་མི་སྦྱར་རོ། །གལ་ཏེ་མ་ཡིན་ན་འདིར་མི་རུང་བ་ཉིད་དུ་ཐལ་བ་མེད་པའོ། །གསོག་འཇོག་ཏུ་གྱུར་པ་ཟ་བ་དེ་བསལ་བའོ། །གནས་པ་མ་ཡིན་པའི་གཞི་ལ་མི་སྤྲོ་བ་འདི་མཐོང་བ་མ་ཡིན་ཞེས་བྱ་བའོ། །ཡང་ཁ་ཅིག་ནི་འདི་སྐད་ཅེས་ཟེར་ཏེ། བ་ལང་གི་གནས་ཞེས་བྱ་བ་འདི་ལྟར་བརྗོད་པ་ཡིན་ཏེ། ཇི་ལྟར་ཡང་མཚམས་གཅིག་ཏུ་གཙུག་ལག་ཁང་རབ་ཏུ་མང་པོ་ཐ་དད་པ་དག་ཏུ་བཀོད་པར་གྱུར་ཅིང༌། དེ་རུང་བའི་ཁང་པ་གཅིག་ལ་བློ་མཐུན་པར་བྱས་ནས་གཙུག་ལག་ཁང་དེ་དག་ཐམས་ཅད་ཀྱི་རུང་བའི་ཁང་པ་གཅིག་ཁོ་ན་ཡིན་ཏེ་བ་ལང་གི་གནས་ལྟ་བུ་ཞེས་གསུངས་པ་ནི་ཁང་པ་གཅིག་ཁོ་ན་ཡིན་ནོ། །པད་མའི་ཞེས་བྱ་བ་ཡན་ཆད་མུ་གེའི་ཚེའོ། །མུ་གེའི་ཚེ་དགེ་སློང་གིས་བཙོས་པ་དག་དང་ལག་ཉེར་བླངས་པ་དང༌། བྱིན་ལེན་མ་བྱས་པ་དག་བཟའ་བར་བྱའོ། །ནང་དུ་བཙོས་པ་དང་ཞག་ལོན་པའོ། །སྔ་དྲོ་བའི་ཟས་སོ་ཞེས་བྱ་བ་དེ་དག་ནི་ཟས་སྤངས་ནས་བཟའ་བ་དང་ཡང་ཡང་ཟ་བའི་གནང་བའོ། །བཏུང་བ་ནི་དུས་ཐམས་ཅད་དུའོ་ཞེས་བྱ་བ་ནི་ལོ་ལེགས་པའི་དུས་སུ་ཡང་བཟའ་བར་བྱ་བའོ། །འདིར་གཞུང་ནི་སིལ་བུ་ལས་དེ་ལྟ་བས་ན་ཚེ་དང་ལྡན་པ་གྲོ་བཞིན་སྐྱེས་རྣ་བ་བྱེ་བ་ཉི་ཤུ་བ་ལ་བརྟེན་ཏེ། དེ་དགེ་འདུན་ཐམས་ཅད་ཀྱིས་གང་ཞིག་བཏུང་བ་བཏུང་བར་རྗེས་སུ་གནང་ངོ་ཞེས་གསུངས་པ་དེ་ཡིས་བསྡུས་པ་འདི་ཡིན་ནོ། །དེ་ཡང་སྤངས་པ་ཟ་བ་དང་ཡང་ཡང་ཟ་བ་བག་ཡངས་སུ་གནང་བར་རྣམ་པར་གནས་པ་ཡིན་ནོ། །སྔར་བྱིན་ལེན་བྱས་པ་སྤངས་ཏེ་ལངས་པས་སོ་ཞེས་བྱ་བ་ནི་སྔར་བྱིན་ལེན་བྱས་པ་གང་ཡིན་པ་དེ་སྤངས་ཏེ་ལངས་པས་བཟའ་བར་བྱའོ། །དེ་བླང་བར་བྱ་བའི་ཕྱིར་ལྡང་བར་བྱའོ་ཞེས་བྱ་བ་ནི་སྔར་བྱིན་ལེན་བྱས་པ་དེ་བླང་བར་བྱ་བའི་ཕྱིར་རོ། །འདི་ནི་ཟས་བརྩམས་པས་བླང་བར་མི་བྱའོ་ཞེས་བྱ་བ་ནི་དེའི་བག་ཡངས་སུ་བྱ་བ་ཡིན་ནོ། །ལྷག་མའོ་ཞེས་བྱ་བ་ནི་དེས་བཟའ་བར་བྱ་བའི་ཕྱིར་སྟ་གོན་བྱས་པ་གང་ཡིན་པ་དེ་ལས་ལྷག་མ་ཡོད་པ་དེ་གང་ཡིན་པ་དེ་དགེ་སློང་སྤངས་ཏེ་ལངས་པས་བཟའ་བར་བྱའོ། །མངོན་བར་བསྒྲུབ་པོ་ཞེས་བྱ་བ་ནི་གཞག་པའི་གནས་པས་དྲངས་པ་སྤངས་ཏེ་ལངས་པས་བཟའ་བར་
བྱའོ། །ལྷག་མ་དེ་འབྱུང་བ་གང་གིས་མི་རིགས་པ་གང་ཞིག་གི་འདོད་པ་དེ་ལ་བརྗོད་པར་བྱ་སྟེ། དེས་བསྒྲུབ་པར་བྱའོ། །གཞན་ཡང་གནང་བ་དེའི་ཕྱིར་ནགས་ཀྱི་རུས་པའོ་ཞེས་བྱ་བ་སྨོས་ཏེ། སྤངས་ཏེ་ལངས་པ་ལས་བཟའ་བར་བྱའོ། །ནགས་ཀྱི་རུས་པ་ཞེས་བྱ་བ་ནི་དཔེར་ན་ཤའི་རུས་པ་ནི་རུས་པ་དག་ཡིན་པ་དེ་བཞིན་དུ་ནགས་ཀྱི་ཤིང་དག་ནི་རུས་པ་ཅན་དག་ཡིན་པས་དེའི་ཕྱིར་ཤིང་ཐོག་རུས་པ་ཅན་ནི་ནགས་ཀྱི་རུས་པ་ཡིན་ནོ། །ཤ་གན་དྷ་ལ་ སོགས་པ ་ལྟར་གཞན་གྱི་གཟུགས་སོ། །ཡང་ནགས་ཀྱི་རུས་པ་ཞེས་བྱ་བ་ཅི་ཞིག་ཡིན་ཞེ་ན། དེའི་ཕྱིར་འདི་ལྟ་སྟེ་རྒུན་དང་བལ་པོ་སེའུ་དང༌། འབྲ་གོ་དང་སྟར་ཀ་དང་པ་ཏ་མ་དང༌། ཨུ་རུ་མའི་ཀ་དང་ཀུ་རུ་མའི་ཀ་དང་ཁམ་བུ་དང་རྒྱ་ཤུག་དང་ས་ར་དག་ནི་དེ་ཞེས་བྱ་བའོ། །པདྨའོ་ཞེས་བྱ་བ་སྨོས་ཏེ། དེ་ཡང་ནགས་ཀྱི་དུས་ པ་ཡིན་ཏེ། སྤངས་ཏེ་ལགས་པས་བཟའ་བར་བྱའོ། །འདིར་ཐམས་ཅད་དུ་ལྷག་མའོ་ཞེས་བྱ་བ་ལ་སོགས ་པས་སྤངས་ཏེ་ལངས་པས་ཞེས་བྱ་བ་དང་སྦྱར་རོ། །པདྨ་ཞེས་བྱ་བ་དེ་ཅི་ཞིག་ཡིན་ཞེ་ན། དེའི་ཕྱིར་འདི་ལྟ་སྟེ་པདྨའི་རྩ་བ་དང༌། པདྨའི་རྩ་ལག་དང་བེ་ཊ་དང༌། ཨུཏྤ་ལའི་རྩ་བ་དང་པདྨའི་སྙིང་པོ་དག་ནི་དེ་ཞེས་བྱའོ་ཞེས་སྨོས་སོ། །གཞིར་གཏོགས་པའི་སྨན་གྱི་གཞིའོ།། །།དེ་ལ་རེ་ཞིག་འབྲེལ་པ་བསྟན་པར་བྱ་སྟེ། བཀྲེས་པ་དང་སྐོམ་པ་དག་ནི་ནད་དང་འདྲ་བ་མ་ཡིན་ཏེ། དེ་བས་ན་དེ་དག་གི་གཉེན་པོར་གྱུར་པ་འཚོ་བ་ཙམ་སྒྲུབ་པར་བྱེད་པ་བཟའ་བར་བྱ་བ་དང༌། བཏུང་བར་བྱ་བ་དུས་སུ་རུང་བའི་སྨན་གྱི་ཆོས་ཁོངས་སུ་གཏོགས་པ་ཉིད་གང་ཡིན་པ་དེ་དག་གི་འདུ་བའི་སྒོ་བསྟན་པའི་ཕྱིར། རྒྱལ་སྲིད་དང་དེའི་ཕྱེད་ནོད་པར་མི་བྱའོ་ཞེས་བྱ་བ་སྨོས་ཏེ་དེའི་ཞེས་བྱ་བ་ནི་རྒྱལ་སྲིད་དེའོ། །དགེ་འདུན་གྱི་ཆེད་དུ་གྲོང་མནོད་པའོ། །ཞིང་ཡང་ངོ་ཞེས་བྱ་བ་ནི་མནོད་པར་བྱའོ་ཞེས་བྱ་བར་སྦྱར་ཏེ། ཞིང་ནི་གྲོང་གི་ཕྱོགས་གཅིག་པ་ཡིན་པའི་ཕྱིར་གྲོང་མེད་པའི་ཕྱིར་དགོན་པ་དང༌། འབད་རྩོལ་མེད་པའི་གནས་དང་འབྲེལ་པ་ཞེས་བྱ་བ་ལྷག་མས་ཤེས་པར་བྱའོ། །དེ་ཡལ་བར་མི་དོར་རོ་ཞེས་བྱ་བ་ནི་ཞིང་དེའོ། །དེའི་འོག་ཤས་མནོད་དོ། །ཐོག་ཤས་བརྩལ་ལོ། །མནོད་པས་དེ་གཙུག་ལག་ཁང་དུ་དབུལ་བར་བྱ་བ་ཉིད་དོ་ཞེས་བྱ་བ་སྨོས་ཏེ། ནམ་གྱི་ཚེ་གང་ཞེ་ན། དེའི་ཕྱིར་བདག་
ཉིད་ཀྱི་བས་དང་པོར་རོ། །བསྲུང་བའི་ཕྱིར་དགེ་སློང་དག་བསྐོའོ་ཞེས་བྱ་བ་ནི་ཐོག་ཤས་མནོད་པ་ལ་ སོགས་པ ་ལའོ། །འདུ་བ་དང་འགོད་པ་དང་གཉིས་ཀ་ལས་གང་ཡང་རུང་བ་མི་མངོན་པས་རྩིས་གདབ་པར་མི་བྱའོ་ཞེས་བྱ་བ་ནི། འདུ་བ་དང་འགོད་པ་དང༌། འདུ་འགོད་གཉིས་ལས་གང་ཡང་རུང་བ་ཞེས་བྱ་བའོ། །འདི་རྣམས་ལས་གཞན་པའི་དག་འདུན་གྱི་གནས་གཅིག་ལས་གདགས་པར་མི་བྱ་སྟེ། དེར་རྩིས་གདབ་པར་མི་བྱ་ཞེས་བྱ་བའི་དོན་ཏོ། །གཞན་ལ་དྲན་བ་དང་ཤེས་བཞིན་སྔོན་དུ་བཏང་སྟེ་དེ་ལ་འཇུག་པར་བྱའོ་ཞེས་བྱ་བ་ལ། གཞན་ལ་ཞེས་བྱ་བ་ནི་གང་དུ་གཉིས་ཀ་གདགས་པ་བྱེད་པ་ལ་དེར་རྩིས་བྱེད་པ་ལ་དྲན་པ་དང༌། ཤེས་བཞིན་སྔོན་དུ་བཏང་སྟེ་འཇུག་པར་བྱའོ། །དགེ་འདུན་གྱི་ཆེད་དུ་གཡོག་འཁོར་ཉེ་བར་གཞག་གོ་ཞེས་བྱ་བ་ལ་འདིར་གཞུང་ནི་མ་བྱིན་པར་ལེན་པའི་ཕམ་པར་གྱུར་པ་ལས་འདིར་ལས་ཀྱི་མཐར། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཆེད་དུ་གཡོག་བླང་བར་བྱའོ་ཞེས་གསུངས་པ་ཡིན་ནོ། །གང་ནས་གཙུག་ལག་ཁང་དུ་སྒྲ་མི་འབྱུང་བ་དེར་ལྷ་འབངས་ཀྱི་ཁྱིམ་བྱེད་དུ་གཞུག་གོ །ཇི་སྙད་དགོས་པར་འཇུག་པར་བྱའོ། །ཟས་དང་གོས་སྦྱིན་པར་བྱ་བ་ཉིད་དོ་ཞེས་བྱ་བ་ནི། གཙོ་བོར་དགེ་འདུན་གྱི་གཡོག་དག་ལའོ། །གལ་ཏེ་གཞན་མེད་ན་དེའི་དོན་དུ་སྦྱིན་པ་ཤུགས་ཀྱིས་རྟོགས་པའོ། །གལ་ཏེ་ལས་བྱེད་པ་ནའོ་ཞེས་བྱ་བ་ནི་གལ་ཏེ་གཡོག་དག་ལས་བྱས་ན་དེ་དག་ལ་ཟས་དང་གོས་སྦྱིན་པར་བྱ་བ་ཉིད་དོ། །ན་བ་རྣམས་ལ་གཡོག་བྱའོ་ཞེས་བྱ་བ་ནི་གཡོག་དག་གལ་ཏེ་ནན་དེ་རྣམས་ལ་ཡལ་བར་མི་དོར་དེ་སྨན་ལ་སོགས་པས་བསྙེན་བཀུར་བྱའོ། །བ་གླང་དང་མ་ཧེ་དང་ར་དང་ལུག་དང༌། གླང་པོ་ཆེ་དང་རྟ་དང་རྔ་མོ་དང་བོང་བུ་དང༌། འབྲུ་ཙམ་པ་དང་སྣོད་ཀྱང་ངོ་ཞེས་བྱ་བ་ཡང་དགེ་འདུན་གྱི་ཆེད་དུ་བླང་བར་བྱའོ། །གླེང་གཞི་རྣམས་ལས་འབྲུ་ཙམ་བ་གནང་བ་རྗེས་སུ་གསུངས་པ་ཡིན་ནོ། །ཕྲན་ཚེགས་དག་ལས་ནི་སྣོད་རྣམས་ལའོ་ཞེས་གསུངས་པ་ཡིན་ནོ། །འདི་ཡང་འདིར་གཞུང་ནི་བཙུན་པ་དགེ་སློང་གིས་ལོངས་སྤྱོད་དང༌། ལོངས་སྤྱོད་མཆོག་བླང་དུ་རུང་ངམ་ཀ་ཏ་ཡ་ན་དགེ་འདུན་གྱི་ཆེད་དུ་བླང་དུ་རུང་ངོ༌། །དེ་ལ་ལོངས་སྤྱོད་ནི་གྲོང་དང་ཞིང་དག་གོ །ལོངས་སྤྱོད་མཆོག་ནི་བ་ལང་དང་ར་དང་ལུག་དང་མ་ཧེའོ། །ཡོ་
བྱད་མ་ཡིན་པ་དག་གང་ཞེ་ན་གླང་པོ་ཆེ་དང་རྟ་དང་རྔ་མོ་དང་བ་ལང་དང༌། བོང་བུ་དང་ར་དང་ལུག་དང་མ་ཧེ་བཅོམ་ལྡན་འདས་ཀྱིས་རྗེས་སུ་གནང་བ་མཆོད་རྟེན་གྱི་ཡང་རུང་བ་དག་གོ་ཞེས་བྱ་བ་ནི། མ་མོ་ལས་དེ་བསྡུས་ནས་གསུངས་པ་ཡིན་ནོ། །གང་ཞིག་ཕུལ་ནས་ཁྱིམ་པ་ཤི་ན་གླང་པོ་ཆེ་ལ་ སོགས་པ ་རྣམས་རྒྱལ་པོ་ལ་དབུལ་ལོ་ཞེས་གསུངས་སོ། །རྫས་འདི་ཉིད་རྙེད་པ་ལ་ཡང་ཁྱིམ་པས་རྒྱལ་པོ་དབང་བ་ཉིད་ཅེས་བྱ་བ་དེའི་དགོངས་པ་ནི་འདི་ཡིན་གྱི། དེ་བདག་ཏུ་བྱེད་པ་ལ་མི་རུང་བ་ཉིད་མ་ཡིན་ནོ་ཞེས་བྱ་བ་རྟེན་རྟོགས་པར་བྱའོ། །དེ་དག་མཆོད་རྟེན་གྱིར་ཡང་མི་རུང་བ་མ་ཡིན་ནོ་ཞེས་བྱ་བ་ནི། གྲོང་ལ་ སོགས་པ ་དགེ་འདུན་གྱི་ཆེད་དུ་བླང་དུ་རུང་བ་དེ་དག་མཆོད་རྟེན་གྱི་ཆེད་དུ་ཡང་རུང༌། དགེ་འདུན་གྱི་ཆེད་དུ་ཡང་རུང་བ་དེ་དག་གོ་ཞེས་བྱ་བ་མ་མོར་གཏོགས་པ་དེ་བས་ན་མདོ་འདིའོ། །དེའི་རྗེས་སུ་འབྲངས་ནས་འདིར་ལྷག་མ་བསྡུས་པའོ། །ཁ་གཟར་དང་ཚྭ་ཁུག་བཅང་བར་བྱའོ་ཞེས་བྱ་བ་ལ་དེ་གཉིས་ཞེས་བྱ་བ་ནི་ཁ་གཟར་དང་ཚྭ་ཁུག་དག་གོ །དེ་གཉིས་དང་ཕུལ་བའི་བཏུང་ཕོར་ལས་གཞན་བའི་ཁར་བའི་སྣོད་གང་ཟག་གིས་བཅང་བར་མི་བྱའོ། །ཀུན་དགའ་ར་བ་པ་ཉེ་བར་གཞག་པར་བྱའོ་ཞེས་བྱ་བ་ལ། འདིར་མ་མོ་ལས་དགེ་འདུན་གང་གིས་ཀྱང་ངོ༌། །བསྲུང་བའི་ཕྱིར་བྱིས་པ་མཚན་མཐུན་པ་འབུལ་བ་དག་བླང་བར་བྱའོ་ཞེས་བྱ་བ་ནི་དགེ་འདུན་ནམ་གང་ཟག་གིས་ཀྱང་བླང་བར་བྱའོ། །འདིར་གཞུང་ནི། བཅོམ་ལྡན་འདས་ལ་འཕྲོག་མ་སྐྱབས་སུ་སོང་ཞིང་བསླབ་པའི་གཞི་དག་ལ་བཞག་ནས། དེས་བུ་དེ་དག་གནོད་སྦྱིན་གདུག་པས་འཇིགས་པ་བསྲུང་བའི་ཕྱིར་དགེ་འདུན་ལ་ཕུལ་བ་ཐོས་ནས། དེ་དག་འདི་སྙམ་དུ་དེས་བསྲུང་བའི་ཕྱིར་དགེ་སློང་རྣམས་ལ་བུ་རེ་ཞིག་འབུལ་བར་བྱེད་ན་བདག་ཅག་གིས་ཀྱང་ཅིའི་ཕྱིར་མི་དབུལ་སྙམ་ནས། དེ་དག་གིས་བུ་དབུལ་བར་བརྩམས་པ་དང༌། དགེ་སློང་དག་མི་ལེན་ནས། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱའོ་ཞེས་གསུངས་པ་ཡིན་ནོ། །འདིར་ཚུལ་ནི་རྗེས་སུ་འགྲོ་བ་ནི་དགེ་འདུན་གྱིས་བླངས་ཏེ། ཀུན་དགའ་ར་བའི་གཡོག་ཏུ་རྣམ་པར་གནས་པ་ཡིན་ནོ། །དེ་ལྟ་བས་ན་བྱེ་བྲག་མེད་པར་བརྟེན་པ་ཡིན་ནོ། །དེ་དག་གི་ཆ་ལུགས་ནི་མགུལ་པར་ཆོས་གོས་བཏགས་པ་ཉིད་དོ། །
སྐྱེད་པར་ཡང་རུང་ངོ་ཞེས་བྱ་བ་ལ། དེ་དག་གི་ཆ་ལུགས་ནི་མགུལ་པར་ཆོས་གོས་ཀྱི་ཚལ་བུ་རེ་རེ་བཏགས་པ་ཡིན་ནོ། །ཕན་གདགས་པའི་སེམས་ཀྱིས་སོ་སོར་བསྐྱང་བར་བྱའོ། །དེའི་ཉེ་དུས་ཕུལ་བ་བླང་པར་བྱའོ། །མཇུག་ཏུ་རིན་ཉིད་དུ་ཡང་ངོ་ཞེས་བྱ་བ་ལ། དེའི་ཉེ་དུ་དག་གིས་མཇུག་ཏུ་བྱིས་པ་ཕྱིར་ལེན་པའི་ཚེ་དེའི་དུས་ཕུལ་བ་བླང་བར་བྱའོ་ཞེས་བྱ་བར་སྦྱར་རོ། །དེ་ལྟར་ཡང་དེ་རྣམས་ཀྱིས་ཕུལ་བར་གྱུར་པ་ལ་དད་པའི་དབང་དུ་བྱས་པ་ཉིད་ཡིན་པས་འདི་ལ་ལོག་པས་འཚོ་བ་ཉིད་ཡིན་པར་དོགས་པར་མི་བྱ་སྟེ། དེ་བས་ན་དེ་ལ་འདི་བསྟན་པའོ། །དེ་དག་གིས་བྱས་པ་ཤེས་པས་ཀྱང་ངོ་ཞེས་བྱ་བ་ནི། བྱིས་པ་དེ་དག་གིས་བྱས་པ་ཤེས་པས་ཕུལ་བ་ཡང་བླང་བར་བྱའོ། །དེའི་རིན་གདབ་པར་མི་བྱའོ་ཞེས་བྱ་བ་ནི། དགེ་སློང་གིས་བྱིས་པ་དེ་དག་ཡོངས་སུ་བསྐྱངས་པའི་རིན་དང་རྔན་པ་བླང་བར་མི་བྱའོ། །ཤིང་ཐོག་གི་རྙེད་པ་བདག་གིར་བྱའོ་ཞེས་བྱ་བ་ལ། འདིར་གཞུང་ནི་རྣམ་པར་འབྱེད་པ་ལས་ཏེ། འོག་མ་གསུམ་གྱིས་ཡང་ངོ༌། །འདིར་སིལ་བུ་དག་ལས། བཟའ་བར་བྱ་བ་ཉིད་ནི་མ་ཡིན་ནོ་ཞེས་གསུངས་སོ། །ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི་ལྦུ་བའི་བུམ་པ་ཡང་ངོ་ཞེས་བྱ་བ་ནི། ཞུན་མར་ལ་ སོགས་པས་གང་བའི་བུམ་པ ་ནི་བླང་བར་བྱའོ་ཞེས་བྱ་བར་སྦྱར་རོ། །འདིར་གཞུང་ནི། ཞུན་མར་དང་འབྲུ་མར་དང་སྦྲང་རྩི་དང་བུ་རམ་གྱི། ལྦུ་བའི་བུམ་པ་དགེ་འདུན་ལ་ཕུལ་ན་བུམ་པའི་ཚད་ཙམ་པོ་དེ་རྣམས་ཞེས་བྱ་བ་ནས། ཇི་སྲིད་བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་པས་དགེ་སློང་དག་གམ་ཁྱིམ་བདག་གིས་བྲིམ་པར་བྱའོ་ཞེས་གསུངས་པ་ཡིན་ནོ། །དགེ་འདུན་དུ་གཏོགས་པའི་ཚིག་ནི་འདི་ཡིན་ཏེ། འདིར་དགེ་འདུན་ནམ་གང་ཟག་གིས་ནི་མ་ཡིན་ནོ་ཞེས་བྱ་བ་རྣམ་པར་དཔྱད་ལ་མ་བྱས་ཏེ། འདི་ནི་གང་ཟག་ལ་མི་རིགས་པའི་ངོ་བོ་མ་མཐོང་ངོ༌། །དེ་བས་ན་སྐབས་ཀྱི་དབང་གིས་ཚིག་འདིར་བླངས་སོ་སྙམ་དུ་རྣམ་པར་ངེས་ནས་བྱེ་བྲག་ཏུ་མ་སྨོས་སོ། །དེ་དག་གི་སྣོད་ཀྱང་ངོ་ཞེས་བྱ་བ་ནི། ཞུན་མར་ལ་ སོགས་པ ་དེ་དག་གི་སྣོད་དེ་བུམ་པ་ནི་བུམ་པའོ། །དེ་དག་གཞག་པར་བྱའོ་ཞེས་བྱ་བ་ནི་ཞུན་མར་ལ་ སོགས་པའི་སྣོད་བུམ་པ ་དག་གོ །ཞུན་མར་ལ་ སོགས་པས་གང་བའི་བུམ་པ ་ཞེས་བྱ་བ་འདིར་ཤུགས་ཀྱིས་ཞུན་མར་གྱི་བུམ་ པ་ལ་
སོགས ་པའི་དོན་ཤེས་པའོ། །གང་དུ་གཞག་པར་བྱ་ཞེ་ན། དེའི་ཕྱིར་གཞི་ལའོ་ཞེས་བྱ་བ་སྨོས་སོ། །བཤང་བ་དང་གཅི་བ་དང་ཆང་གི་བུམ་པ་དག་ནི་མི་མཁོ་བ་ཉིད་དོ། །དགེ་འདུན་གྱི་ཕྱིར་ཡང་གཡོས་དང་འཚེད་པ་གང་ཡིན་པ་དག་གི་ཞལ་ཏ་བྱའོ་ཞེས་བྱ་བ་ནི། བྱེད་དུ་འཇུག་པ་ཞལ་ཏ་བྱེད་པ་སྟེ། རང་གིས་བྱ་བ་ནི་མ་ཡིན་ནོ། །འདིར་གཞུང་ནི་སྨན་གྱི་གཞི་ལས། འདིར་དང་པོར་བྱས་ནས་ལྷུང་བཟེད་ཀྱི་ཁ་གཡོགས་བཅང་བར་བྱའོ་ཞེས་བྱ་བའི་མཐར་ཐུག་པ་གསུངས་སོ། །ལྷུང་བཟེད་དུ་བསོད་སྙོམས་མ་བླུགས་པའི་མདུན་རོལ་དུ་མ་བཟུང་བ་ཉིད་ཀྱིས་བསོད་སྙོམས་ལ་འཇུག་པར་བསྟེན་པར་མི་བྱའོ་ཞེས་བྱ་བ་ལ། མ་བླུགས་པའི་མདུན་རོལ་དུ་ཞེས་བྱ་བ་ནི། མདུན་རོལ་དུ་ལྷུང་བཟེད་བློས་མ་བཟུང་བའི་ཕྱིར་རོ། །ལྷུང་བཟེད་ཀྱི་ཁ་གཡོགས་བཅང་བར་བྱའོ་ཞེས་བྱ་བ་ནི། །ལྷུང་བཟེད་ཀྱི་ནང་དུ་བསོད་སྙོམས་བླུགས་པ་གང་གིས་གཡོགས་པར་བྱེད་པ་དེ་ནི་ལྷུང་བཟེད་ཀྱི་ཁ་གཡོགས་ཞེས་བྱའོ། །འདི་དང་འཁར་བའི་སྣོད་བཅང་བ་ལ་ཐུན་མོང་མ་ཡིན་པ་ཉིད་དུ་དོགས་པར་མི་བྱའོ་ཞེས་བྱ་བ་ནི། ལྷུང་བཟེད་ཀྱི་ཁ་གཡོགས་བཅང་བར་བྱའོ་ཞེས་བྱ་བ་འདི་དང་འཁར་པའི་སྣོད་བཅང་བ་དག་ལས་དེ་ལ་ཕུལ་བའི་བཏུང་ཕོར་ལས་གཞན་པའི་འཁར་བའི་སྣོད་གང་ཟག་གིས་བཅང་བར་མི་བྱའོ་ཞེས་བྱ་བ་ཐུན་མོང་མ་ཡིན་པ་ཉིད་དུ་དོགས་པར་མི་བྱ་སྟེ། གཉིས་པོ་དེ་དགེ་སློང་མ་ལ་མ་ཡིན་སྙམ་དུ་རྟོག་པར་མི་བྱའོ་ཞེས་བྱའོ་ཞེས་བྱ་བའི་དོན་ཏོ། །ནད་པས་ཞྭ་བཅང་བ་ལ་ནི་མི་རུང་བ་ཉིད་དུ་ཡང་ངོ་ཞེས་བྱ་བ་ཡང་དོགས་པར་མི་བྱའོ་ཞེས་སྦྱར་བར་བྱའོ། །ཉེ་བ་འཁོར་རང་བཞིན་གྱི་ཁ་ན་མ་ཐོ་བ་དང་བཅས་པ་མ་གཏོགས་པ་ཞེས་བྱ་བ་གསུངས་པས། ནད་པ་ལ་ཞྭ་བཅང་བར་རྗེས་སུ་གནང་བ་གང་ཡིན་པ་དེ་དགེ་སློང་མ་ལ་མི་རུང་བ་ཉིད་དུ་དོགས་པར་མི་བྱའོ། །འདིར་གཞུང་ནི་སྐྱེ་དགུའི་བདག་མོ་ཆེན་མོ་གླད་པ་ན་ནས། བཅོམ་ལྡན་འདས་ཀྱིས་བཀའ་སྩལ་པ། ཞྭ་བཅང་བར་བྱའོ་ཞེས་གསུངས་པ་ཡིན་ནོ། །དོན་འདི་ལ་བུད་མེད་ཀྱིས་ཀྱང་ཞྭ་བཅང་དུ་རུང་ངོ་ཞེས་བྱ་བ་འདིས་བསྟན་པར་འགྱུར་རོ། །དེ་ལྟ་བས་ཆུ་ལ་ཆབ་རོམ་ཆགས་པའི་ཡུལ་དུ་ཡང་དེ་རྗེས་སུ་གནང་བར་ཤེས་པར་བྱ་སྟེ། དེའི་ཕྱིར་མདོ་འདི་ནི་དཔེ་ཙམ་དུ་རིག་པར་བྱའོ། །སིལ་བྱེད་ཀྱི་སྒྲ་
མ་ཕྱུང་བར་བསོད་སྙོམས་ལ་ཁྱིམ་དུ་འཇུག་པར་མི་བྱའོ། །དེ་བཅང་བར་བྱའོ་ཞེས་བྱ་བ་ནི་སིལ་བྱེད་དེའོ། །འབྱུང་བ་དང་འཇུག་པ་ལ་མཁས་པར་འབད་པར་བྱའོ་ཞེས་བྱ་བ་ནི་བསོད་སྙོམས་པས་སོ། །ཇི་ལྟར་ཞེ་ན་དེའི་ཕྱིར་མཚན་མར་བྱས་པས་སོ། །མཚན་མ་གདབ་ པ་ཅི་ཞིག་གིས་ཤེ་ན། དེའི་ཕྱིར་བསོད་སྙོམས་ཀྱི་བྲམ་ཟེ་ལ་སོགས ་པས་སོ་ཞེས་བྱ་བ་སྨོས་སོ། །ཆོས་བཙོངས་པས་འཚོ་བ་སྦྱར་བར་མི་བྱའོ་ཞེས་བྱ་བ་ལ། འདིར་གཞུང་ནི་མ་མོ་ལས་དེ་དག་ཆོས་ཀྱི་སྒོ་ནས་རྙེད་པ་ཡོངས་སུ་འཚོལ་ཞིང་ཆོས་འཚོང་བས་འཚོ་བ་སྦྱོར་བར་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། ཆོས་ཀྱི་སྒོ་ནས་རྙེད་པ་ཡོངས་སུ་བཙལ་བར་མི་བྱ་ཞིང་ཆོས་འཚོང་བས་འཚོ་བ་སྦྱར་བར་མི་བྱའོ་ཞེས་གསུངས་པ་ཡིན་ནོ། །འདིར་སིལ་བུ་དག་ལས་དེ་བྱེད་པ་ཞེས་བྱ་བ་དང་པོར་བྱས་ཏེ་བཟའ་བར་བྱའོ་ཞེས་བྱ་བའི་མཐར་ཐུག་པར་གསུངས་པ་ཡིན་ནོ། །གླེང་གཞི་རྣམས་ལས་དེ་སྤང་བ་འདུག་པ་ཞེས་བྱ་བ་དང་པོར་བྱས་ནས་དགེ་སློང་མའི་ཞེས་བྱ་བའི་མཐར་ཐུག་པར་གསུངས་པ་ཡིན་ནོ། །ཆུ་མེད་ན་ཞོ་ག་ཆུ་ལ་ སོགས་པའི་ཁུ་བས་རྐང་པ ་དག་བཀྲུའོ་ཞེས་བྱ་བ་ནི་འདི་ནི་འོག་ནས་ཟས་རྐང་པས་བརྫི་བར་མི་བྱའོ་ཞེས་འབྱུང་བའི་དམིགས་ཀྱིས་བསལ་བ་ཡིན་ནོ། །རྩྭ་བམ་ལ་འདུག་པར་བྱའོ་ཞེས་བྱ་བ་ནི་སྟན་གཞན་མེད་པའོ། །བླ་གབ་མེད་པའི་མཐའ་གཅིག་ཏུ་གཞག་གོ །སྦུངས་ཏེ་ཡང་ངོ་ཞེས་བྱ་བ་ནི་སོ་སོར་གཞག་པ་འབའ་ཞིག་ཏུ་མ་ཟད་ཀྱི། སྤུངས་ཏེ་གཞག་ཏུ་ཡང་རུང་བའོ། །མཇུག་ཏུ་འདོར་རོ་ཞེས་བྱ་བ་ནི། བྱ་བ་ཟིན་པའི་མཇུག་ཏུ་རྩྭ་བམ་དོར་བར་བྱའོ། །མང་བ་ཉིད་ཡིན་ན་བྱའོ་ཞེས་བྱ་བ་ནི་དགེ་སློང་མང་བ་ཉིད་ཡིན་ནའོ། །གྲལ་གྱི་ཚར་དུ་མ་ཉིད་ཀྱང་ངོ་ཞེས་བྱ་བ་ནི། ཚར་དུ་དགེ་སློང་མང་བ་ཉིད་ཡིན་ན། གྲལ་གྱི་ཚར་དུ་མ་ཉིད་ཀྱང་བྱར་རུང་བའོ་ཞེས་བྱ་བའི་དོན་ཏོ། །ཚད་ཇི་ཙམ་ཞེ་ན། དེའི་ཕྱིར་ལྔ་བརྒྱའི་ཚར་རོ་ཞེས་བྱ་བ་སྨོས་ཏེ། གྲལ་ཚར་གཅིག་ལ་དགེ་སློང་ལྔ་བཀོད་པ་མན་ཆད་ཀྱི་ཚར་རིང་པོ་བྱར་རུང་བའོ། །རྒན་པའི་མཐར་རེ་རེར་སྤྱི་བུངས་བྱའོ་ཞེས་བྱ་བ་ནི་བྱིན་གྱིས་བརླབ་པར་བྱ་བ་རྣམས་ལ་བསྐོའོ་ཞེས་འབྱུང་བ་དང་སྦྱར་རོ། །གང་དུ་བསྐོ་བ་ཡིན་ཞེ་ན། དེའི་ཕྱིར་འདྲིམ་པ་དག་རྐུ་བ་ཉིད་ན་སྤྱན་པ་དག་བསྐོའོ་ཞེས་སྨོས་སོ། །ཟས་
ཀྱི་ལས་བྱེད་པ་དག་གིས་དང་པོར་བཟའ་བར་བྱའོ། །འདུས་པ་ཆེན་པོའི་ཚེ་རྒན་རིམས་སུ་འཁོད་དུ་གཞུག་པའི་ཕྱིར་དང༌། འདྲིམ་དུ་གཞུག་པའི་ཕྱིར་དགེ་སློང་དག་བསྐོའོ། །འདི་ལ་དགེ་སློང་མས་ནི་གཉིས་སམ་གསུམ་གཞག་སྟེ་ཅི་དགར་འཁོད་པར་བྱའོ་ཞེས་བྱ་བ་ནི་འདུས་པ་ཆེན་པོ་འདི་ལ་དགེ་སློང་མས་ནི་རྒན་པ་གཉིས་སམ་གསུམ་སྤངས་ནས་སོ། །སྒྲ་བསྐྱུངས་ཏེ་ཟན་གྱི་ཆེད་དུ་འགྲོ་བར་བྱའོ་ཞེས་བྱ་བ་ནི། མ་མོ་ལས་འདི་དང་པོར་བྱས་ནས་གནས་པར་བྱའོ་ཞེས་བྱ་བ་ནི་མཐར་ཐུག་པ་དང༌། དྲན་པ་ཉེ་བར་བཞག་ནས་ཞེས་བྱ་བ་དང་པོར་བྱ་སྟེ། མེད་ན་བར་བསྡུ་བར་བྱའོ་ཞེས་བྱ་བའི་མཐར་ཐུག་པ་དང༌། མཐར་ལངས་པས་གཤེགས་པར་མི་བྱ་བ་དང་པོར་བྱས་ནས་ལྟོ་བ་དང་བློ་རྣམས་ཞེས་བྱ་བའི་མཐར་ཐུག་པའོ། །ཁྱིམ་པའི་དྲུང་དུ་འོངས་པ་བོད་པ་ལ་དད་པས་སྦྱིན་པར་བྱའོ་ཞེས་བྱ་བ་འདིས་ཀྱང་ངོ༌། །ཟས་རྐང་བར་བརྫི་པར་མི་བྱའོ་ཞེས་བྱ་བ་འདི་སྨན་གྱི་གཞི་ལས་སོ། །བཞོན་བས་འགྲོ་བར་མི་བྱའོ་ཞེས་བྱ་བ་དང་པོར་བྱས་ནས་བཀག་པ་ནི་མ་ཡིན་ནོ་ཞེས་བྱ་བའི་མཐར་ཐུག་པ་དང༌། ངེས་པར་མ་བྱས་པ་ཞེས་བྱ་བ་དེ་ཡང་འདུལ་བ་ལ་ཞེས་བྱ་བ་གང་ཞིག་བཅོམ་ལྡན་འདས་ཀྱིས་ལེགས་པར་འོངས་པ་ལྷུང་བཟེད་ལྷག་པ་གཞག་པ་ཞེས་བྱ་བ་རྣམ་པར་འབྱེད་པ་ལས་ཀློག་པ་དང༌། སིལ་བུ་རྣམས་ལས་ནི་དེ་ནས་གཅིག་ཏུ་འདོད་པར་བྱ་ཞེས་གསུངས་པ་ཡིན་ནོ། །ཤིན་ཏུ་བསྡམས་པ་དང་སྤྱོད་ལམ་མཛེས་པས་སོ། །མཛེས་པས་སོ་ཞེས་བྱ་བ་ཡང་ཟན་གྱི་ཆེད་དུ་འགྲོ་བར་བྱའོ། །དེ་བཞིན་དུ་འདུག་པར་བྱའོ་ཞེས་བྱ་བ་དང༌། སྒྲ་བསྐྱུངས་པ་དང༌། ཤིན་ཏུ་བསྡམས་པ་དང༌། སྤྱོད་ལམ་མཛེས་པས་ཟན་གྱི་ཆེད་དུ་འདུག་པར་བྱའོ། །ཟས་རྐང་པས་བརྫི་བར་མི་བྱའོ། །ལྷུང་བཟེད་ཀྱི་གཞི་ལ་རྐང་པས་རེག་པར་མི་བྱའོ། །དྲན་པ་ཉེ་བར་བཞག་སྟེ་བསོད་སྙོམས་བླང་བར་བྱའོ་ཞེས་བྱ་བ་ནི་རྩེ་གཅིག་པའོ། །བྱ་བ་གཞན་དང་འབྲེལ་བའི་བསམ་པ་ཡང་སེམས་གཏོད་པའི་རྩེ་གཅིག་པ་ལས་གཞག་པར་ཡོད་པར་འགྱུར་བ་དེ་བཟློག་པའི་ཕྱིར། སེམས་རྣམ་པར་མ་གཡེངས་པས་བསོད་སྙོམས་བླང་བར་བྱའོ་ཞེས་བྱ་བ་སྨོས་སོ། །མི་འཕྲོགས་པ་དང་འཚོ་བ་ཙམ་དང༌། དེ་མ་འདྲེས་པ་དང་མི་དཀྲུག་པ་དང༌། ཤིན་
ཏུ་དཔེན་པ་དང་དུས་ལས་མི་ཡོལ་བར་བསྒྲུབ་པར་བྱའོ། །གང་ལ་མགྲོན་དུ་བོས་པ་དེ་ལས་གཞན་རྙེད་པ་བདག་གིར་བྱེད་པ་མི་རིགས་པ་ཉིད་མེད་དོ་ཞེས་བྱ་བ་ལ། འདིར་གཞུང་ནི་འདྲེག་མཁན་རབ་ཏུ་བྱུང་བས་དགེ་འདུན་ཐུག་པ་ལ་སྤྱན་དྲངས་ནས་རོ་བསོད་པ་སྟ་གོན་བྱས་པ་དང༌། དགེ་སློང་དག་ཟས་གཞན་ལ་མགྲོན་དུ་བོས་པས་དེ་ནི་མི་ལེན་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཟས་གཞན་ལ་མགྲོན་དུ་བོས་པས་གཞན་རྙེད་པ་བདག་གིར་བྱེད་པ་ལ་མི་རིགས་པ་མེད་དོ་ཞེས་གསུངས་པ་ཡིན་ནོ། །རང་གིས་ཟས་ལས་གཞན་མནོས་པ་ལས་ཉེས་པ་མེད་དོ་ཞེས་བྱ་བ་ནི་རང་གིས་ཟན་ཟ་བའི་ཚེ་གལ་ཏེ་གཞན་གྱིས་སྦྱིན་བར་བྱེད་ན་དེ་མནོས་པ་ལ་ཉེས་པ་མེད་ཅེས་བྱ་བའི་དོན་ཏོ། །གཞན་གྱིས་མགྲོན་དུ་བོས་ནས་འདུག་པ་ལ་དེས་གནང་ན། གཞན་གྱིས་བྱིན་པ་ན་དེའི་ཁོངས་སུ་གཏོགས་པ་དང་འདྲའོ་ཞེས་བྱ་བ་ནི་གང་ཞིག་གཞན་གྱིས་མགྲོན་དུ་བོས་ན་ནི་འདུག་པ་ལ་སྦྱིན་བདག་དེས་གནང་ན་སྦྱིན་བདག་གཞན་གྱིས་སྦྱིན་བའོ། །འདི་ལྟ་སྟེ་སྡིག་བྱུང་བའི་གྱད་རྣམས་ཀྱིས་མགྲོན་དུ་བོས་པའི་དགེ་སློང་རྣམས་ལ་གྱད་ཀྱི་སྣ་ཆེན་པོ་ལ་གཏོགས་པ་སྣང་བྱེད་ཀྱིས་བཅའ་བ་དང་བཏུང་བ་དག་བྲིམས་པ་སྦྱིན་བདག་གིས་གནང་བ་དེ་ནི་སྦྱིན་བདག་གཞི་བོའི་ཁོངས་སུ་གཏོགས་པ་དང་འདྲའོ། །དེ་ལ་ནི་དམ་བཅའ་བ་ལས་འདས་པ་དང་ཡང་ཡང་ཟ་བའི་ཉེས་པར་མི་འགྱུར་རོ། །བསམས་པའི་དོན་གྱིས་སྒྲའི་སྦྱོར་བར་རྣམ་པར་གཞག་གི་གྲགས་པས་ནི་མ་ཡིན་ནོ་ཞེས་བྱ་བ་ནི་སངས་རྒྱས་ཚུར་ཤོག་ཅེས་བྱ་བ་ལ་ སོགས་པས་འབོད་ཅིང་ཅིའང་རུང་བ་སྦྱིན་བར་བྱེད་པ ་ན། སྨྲ་བ་པོའི་བསམས་པའི་དོན་གྱིས་དེ་རྣམ་པར་གཞག་གི་གྲགས་པ་ནི་མ་ཡིན་ཏེ། གལ་ཏེ་དེ་སྐད་དུ་འབོད་པ་དེ་སངས་རྒྱས་ཉིད་དུ་བསམས་པ་ཡིན་ན་ནི་དེ་ཉིད་ལ་དེ་ཕུལ་བར་འགྱུར་རོ། །ཇི་སྟེ་གྲགས་པ་ཉིད་དུ་བསམས་པ་ཡིན་ན་ནི་གྲགས་པ་ཉིད་ལ་ཕུལ་བ་ཡིན་ནོ། །བླངས་བ་སྤང་བར་མི་བྱའོ་ཞེས་བྱ་བ་ལ། བླངས་པ་ནི་བྱིན་ལེན་བྱས་པ་སྟེ་སླར་སྦྱིན་བར་མི་བྱའོ། །འདི་ལྟར་བསོད་སྙོམས་ལ་དེ་སྐད་གསུངས་པ་ཡིན་མོད་ཀྱི་གཞན་ལ་ཡང་དེ་རུང་བར་གནང་བས་དེ་རིགས་པར་བྱའོ། །ལྟ་བ་དང་ཚུལ་ཁྲིམས་ཕུན་སུམ་ཚོགས་པ་དག་ལས་བླངས་པ་གཞན་གོ་རིམས་
བཞིན་ལ་སྦྱིན་བ་དང༌། འཚོ་བར་བྱེད་བ་ལྷག་མ་ཁམ་གཅིག་ཡན་ཆད་ལེན་པ་དང་ཟ་བ་ནི་དད་པས་སྦྱིན་བར་བྱ་བ་ཆུད་གསོན་པ་ཡིན་ནོ་ཞེས་བྱ་བ་ལ། གོ་རིམས་བཞིན་ལ་ཞེས་བྱ་བ་ནི་ལྟ་བ་ཕུན་སུམ་ཚོགས་པ་ལས་བླངས་པ་ལྟ་བ་ཉམས་པ་ལ་སྦྱིན་བ་དང༌། ཚུལ་ཁྲིམས་ཕུན་སུམ་ཚོགས་པ་ལས་བླངས་པ་ཚུལ་ཁྲིམས་འཆལ་པ་ལ་སྦྱིན་པ་ལ་ནི་དཔེ་ཙམ་དུ་ཟད་དེ། མཆོག་ལས་བླངས་པ་མཆོག་མ་ཡིན་པ་ལ་ཡང་སྦྱིན་བ་ཞེས་བྱ་བ་དེ་ལ་འདི་བསྟན་པར་རེག་པར་བྱའོ། །མཆོག་དང་མཆོག་མ་ཡིན་པ་ནི་འདི་ལྟར་ཤེས་པར་བྱ་སྟེ། ཏིང་ངེ་འཛིན་ཐོབ་བ་ནི་མ་ཐོབ་པ་བས་མཆོག་གོ །འཕགས་པ་ནི་མ་འཕགས་པ་མ་ཡིན་པས་སོ། །ཆོས་ཀྱི་ཚོགས་རབ་ཏུ་འཕེལ་བའི་བྱང་ཆུབ་སེམས་དཔའི་སོ་སོའི་ཡང་ཉན་ཐོས་ལས་སོ། །དེ་ལྟར་འཛམ་བུའི་གྲིབ་མ་ལ་བཞུགས་བའི་བྱང་ཆུབ་སེམས་དཔའ་ཤཱ་ཀྱ་ཐུབ་པའི་དབང་དུ་མཛད་ནས་གསུངས་པ་ནི་དེ་ལ་ཕུལ་བས་བསོད་ནམས་ཆེས་མང་དུ་འཕེལ་བར་འགྱུར་གྱི་དགྲ་བཅོམ་བ་བྱེ་བ་རྣམས་ལ་ནི་མ་ཡིན་ནོ་ཞེས་གསུངས་པ་ཡིན་ནོ་ཞེས་གསུངས་སོ། །ཁམ་གཅིག་ཡན་ཆད་ཅེས་བྱ་བ་ནི་འདིར་ཡན་ཆད་ཀྱི་སྒྲ་དང་རབ་ཏུ་འབྲེལ་བར་རིག་པར་བྱ་སྟེ། ཁམ་གཅིག་ཡན་ཆད་ཅེས་བྱ་བའོ། །ཁམ་གཅིག་ཡན་ཆད་ཟབ་ནི་འཚོ་བར་བྱེད་པ་ཙམ་ལས་ལྷག་བར་ལན་པ་དང༌། ཟ་བ་ནི་དད་པས་སྦྱིན་བར་བྱེད་པ་ཆུད་གསོན་པ་ཡིན་ནོ་ཞེས་བྱ་བའི་དོན་ཏོ། །ཕ་མ་དང་ནད་པ་དང་རབ་ཏུ་བྱུང་བར་འདོད་པ་དང་སྦྲུམ་པ་དག་དང༌། གདུལ་བ་དང་འདོད་པས་བསོད་སྙོམས་ལ་རེག་པ་དང་ཁྱིམ་པ་འོངས་པ་ལ་ནི་དེ་ལས་བགོ་བཤའ་བྱའོ། །ཞེས་བྱ་བ་ནི་དེ་བསོད་སྙོམས་ཆུད་ཟོས་པར་བྱེད་པ་དེ་ལས་དད་པས་སྦྱིན་བར་བྱ་བ་ཆུན་གསོན་པའི་ཚིག་ཏུ་རིག་པར་མི་བྱའོ། །ཁམ་ཆངས་གཅིག་ཟ་བ་པོ་རྣམ་པར་མི་བཅད་པར་གཞག་པར་བྱའོ་ཞེས་བྱ་བ་ནི། འགའ་ཞིག་ཏུ་མིད་པ་ལ་ཡང་ཁམ་ཆངས་གཅིག་ཟབ་པོས་ཞེས་བྱ་བའི་དོན་ཏོ། །འདིར་གཞུང་ནི་ཅི་ནས་ཀྱང་ལྷག་མར་མ་གྱུར་པའི་ཁམ་ཆངས་གཅིག་གཞག་པར་བྱའོ་ཞེས་གསུངས་པ་ཡིན་ནོ། །བཟའ་བའི་ཕྱིར་ཉེ་བར་དུད་འགྲོ་ལ་ཡང་སྦྱིན་བར་བྱའོ་ཞེས་བྱ་བ་ནི། ཁམ་ཆངས་གཅིག་གཞག་པ་དེའོ། །འདིར་གཞུང་ནི་དགེ་སློང་གིས་ཟོས་ནས་དུད་འགྲོ་ལ་ཁམ་གཅིག་མི་གཞག་པར་
མི་བྱའོ་ཞེས་གསུངས་པ་ཡིན་ནོ། །བཟའ་བའི་ཕྱིར་ཉེ་བར་གཞག་པ་ལས་མ་རྫོགས་པར་སྦྱིན་པར་མི་བྱའོ་ཞེས་བྱ་བ་ལ། མ་རྫོགས་པར་ཞེས་བྱ་བ་ནི་ཟས་མ་རྫོགས་པ་ལའོ། །དད་པས་སྦྱིན་བར་བྱ་བ་དེ་ཉིད་ཀྱིས་མགྲོན་དུ་བོས་པ་ལ་ཡང་མི་བྱའོ། །ལྷུང་བཟེད་ཀྱི་གཞི་ནི་ལྷག་མ་ཟ་བ་རྣམས་ལ་ཅི་བདེར་བྱའོ། །གཉུག་མར་གནས་པ་རྣམས་ལ་གཏོར་མ་སྦྱིན་ནོ་ཞེས་བྱ་བ་ནི་གཙུག་ལག་ཁང་ན་གཉུག་མར་གནས་པ་མི་མ་ཡིན་པའི་གནས་པ་རྣམས་ལ་འབད་པས་དེ་སྦྱིན་བ་བསྒྲུབ་པར་བྱའོ་ཞེས་བྱ་བར་ཤེས་པར་བྱའོ། །དེ་དག་གི་ཆོ་གའི་རྗེས་སུ་འབྲངས་པས་སྔ་རོལ་ལ་ སོགས་པར་རོ་ཞེས་བྱ་བ་ནི་གང་ཞིག་གཉུག་མར་གནས་པ ་དེ་དག་གི་ཆོ་གའི་རྗེས་སུ་འབྲང་བས་སྔ་དྲོལ་ སོགས་པས་གཏོར་མ་སྦྱིན་བར་བྱ་བའི་དོན་ཏོ། །ཆོ་ག་ཐ་དད་པ ་ཉིད་ཡིན་ན་ཐ་དད་པར་རོ་ཞེས་བྱ་བ་ནི། གང་དུ་ཁ་ཅིག་ཆོ་ག་ཡང་གཞན་ཡིན་ལ། ཁ་ཅིག་གི་ཆོ་ག་ཡང་གཞན་ཡིན་ན་དེར་ཆོ་ག་དེ་རྣམས་ཐམས་ཅད་སོ་སོར་སྦྱིན་བར་བྱ་བ་ཞེས་བྱ་བའི་དོན་ཏོ། །ཨ་མྲ་རུས་པ་མ་ཆགས་པ་དག་གི་གནས་སྐབས་སུ་བཟའ་བར་མི་བྱའོ་ཞེས་བྱ་བ་ནི་ཟེ་འབྲུ་ཆགས་པ་ཉིད་ཀྱི་སྨན་པ་རྣམས་ལ་རྗེས་སུ་གནང་བ་གང་ཡིན་པ་དེ་ལ་ནི་འདི་ལས་ལྷག་པར་འགྱུར་བ་མ་ཡིན་ཏེ། དེའི་ཚེ་ཟེ་འབྲུ་ཆགས་པ་ཉིད་ལ་ངེས་པ་ཉིད་ཀྱི་ཕྱིར་རོ། །དང་པོ་ཉིད་དུ་ཟེ་འབྲུ་ལས་རུས་པ་མ་ཆགས་བ་སྒྲུབ་པའི་ཕྱིར་དེ་བས་ན་མ་སྦྱར་རོ། །རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་དང་བཅའ་བར་བྱ་བ་དང༌། འབྲས་ཆན་དང་ཟན་དྲོན་དང་འདེ་གུ་དང་ཤ་དང༌། སྣུམ་ཁུར་དང་འོ་མ་དང་ཞོ་དང་མར་དང་ཉ་ཤ་དང་ཤ་སྐམ་དག་ནི་མི་རུང་བ་ཉིད་མ་ཡིན་ནོ་ཞེས་བྱ་བ་ནི་ཚོད་མ་ཉིད་དུ་ཡང་ཤ་ལ་སོགས་པས་བཟའ་བའི་དོན་དུ་ཞེས་བྱ་བ་ནི་བསྟན་པའི་ཕྱིར་ཉ་ཤ་དང་ཤ་སྐམ་དག་བཟུང་བའོ། །སྔ་མ་ལ་ནི་ཤའི་འོ། །འདིར་འོ་མ་ལ་ སོགས་པ ་ནི་ཚོད་མ་དག་བསྟན་ཏོ། །འབྲས་ཆན་ལ་སོགས་པས་ནི་བཟའ་བདག་བསྟན་ཏོ། །རྩ་བ་ལ་སོགས་པས་ནི་བཅའ་བ་དག་བསྟན་ཏོ། །གསོ་མ་དང་ཡུངས་ཀར་དང་རྩ་བ་དང༌། སྡོང་བུ་དང་འདབ་མ་དང་མེ་ཏོག་དང་འབྲས་བུ་ལ་ སོགས་པའི་ཐུག་པ ་དག་བསྟེན་བར་བྱ་བ་དག་མ་ཡིན་པར་དོགས་པར་མི་བྱའོ་ཞེས་བྱ་བ་ནི། འདི་དག་སྨན་ཉིད་ཀྱི་སྐབས་ཡིན་མོད་ཀྱི། འཚོ་བ་ཙམ་གྱི་དོན་
དུ་གཞན་ལ་ཡང་སྦྱར་བ་དེ་བས་ན་བྱེ་བྲག་མེད་པར་སྨོས་སོ། །སིལ་བུ་དག་ལས་རྐྱལ་པར་བླུགས་པ་འདི་ཡང་ཞེས་གསུངས་པ་ཡིན་ནོ། །ཆུས་ཀྱང་སྦངས་ནས་འཚག་ཏུ་འགྱུར་བ་ཉིད་དོ་ཞེས་བྱ་བ་ནི། ལྷག་མར་གྱུར་པ་དེས་འོ་མ་ལ་ སོགས་པ ་ཚོད་མའི་རྣམ་པ་གང་ཡང་རུང་བས་སྦངས་ནས་རྣམ་པ་གང་རུང་བས་ན་སྦངས་ནས་ཡང་འཚག་ཏུ་འགྱུར་བ་ཉིད་བསྟན་ཏོ། །རྐྱལ་པར་བླུགས་ན་ནི་མི་རུང་བ་མ་ཡིན་ནོ། །སྣོད་དུ་ཟན་བཟར་རུང་ངོ༌། །ཡོལ་གོར་རོ། །རྡོ་ལས་བྱས་པ་ཡང་ངོ་ཞེས་བྱ་བ་ནི། ཟས་བཟར་རུང་བའོ། །ཟས་བྱས་པར་ཡང་ངོ༌། །ལྕགས་ཀྱི་ལྷུང་བཟེད་ལ་ སོགས་པ ་བཞིན་བཀྲུས་ཏེའོ། །བཀྲུ་བཤལ་ནི་གནས་པའི་ལས་ཡིན་ནོ་ཞེས་བྱ་བ་ནི་འོ་ན་ལྷུང་བཟེད་ལ་དེ་སྨོས་ཏེ། དེ་ཉིད་ལ་ནི་འདི་ལ་དཔེ་གཉིས་ཀྱིས་གྲུབ་པོ་ཞེ་ན། དེ་ལྟར་ནི་མ་ཡིན་ཏེ། གྲུབ་པ་ལ་ངོས་ཀྱི་ཚིག་ནི་སྐྱོན་ཡིན་ཏེ། འདི་ལ་ཤིན་ཏུ་གསལ་བ་ཉིད་ཀྱི་ཕྱིར་རོ། །ཟོས་ནས་ཀྱང་ངོ་ཞེས་བྱ་བ་ནི། ལྷག་མ་མ་ཡིན་པ་ལ་ལྷུང་བཟེད་བཀྲུ་བ་ལ་ སོགས་བ་རིགས་པ ་ཡིན་ཏེ། དེ་ཟློག་པའི་དོན་དུ་འདིའོ། །འདིར་གཞུང་ནི་མཁན་པོ་དང་སློབ་དཔོན་དག་གི་སྣོད་དག་གནས་པ་དག་གིས་བཀྲུས་ཏེ་དབུལ་བར་བྱའོ། །ཟོས་ནས་ཀྱང་གནས་པ་དག་གིས་སྣོད་དང་བྱ་མ་བུམ་བཀྲུས་ཏེ་བསྐུར་བར་བྱའོ་ཞེས་གསུངས་པ་ཡིན་ནོ། །གཞན་དང་ལྷན་ཅིག་སྣོད་གཅིག་ཏུ་བཟའ་བར་མི་བྱའོ། །ལམ་དུ་སྣོད་དག་མེད་ན་བཟའ་བར་བྱའོ་ཞེས་བྱ་བ་ནི་གང་དུ་ཕོངས་པའི་ཕྱིར་མེད་ན། རིམ་གཅིག་གི་ཕྱིར་ཟ་བ་དེ་ལ་ནི་མེད་པ་མ་ཡིན་ཏེ། ཡོད་པ་དང་མེད་པའི་རྣམ་པར་གཞག་པ་ནི་འབྲས་བུའི་དུས་ལ་ལྟོས་པ་ཉིད་ཀྱི་ཕྱིར་རོ། །དེ་ལྟ་བས་ན་འདིར་ཡང་དེ་བྱས་པས་ཤེས་པར་མི་བྱའོ། །འདིར་སུ་དང་ལྷན་ཅིག་ཏུ་བཟའ་བར་བྱ་ཞེ་ན། དེའི་ཕྱིར་དགེ་སློང་དང་ངོ༌། །གཞན་གྱི་ལག་བཏེག་ནས་རང་གིས་གཞུག་གོ་ཞེས་བྱ་བ་སྨོས་ཏེ་རང་གིས་ཞེས་བྱ་བ་ནི་ལག་པའོ། །དགེ་ཚུལ་དང་ནི་འོག་མ་བཞིན་ནོ།། མི་ལྡན་ན་ལྷན་ཅིག་ཏུ་འོ་ཞེས་བྱ་བ་ནི་གཞན་ཉིད་མི་ལྡན་ན་གང་ཞིག་འདིར་རུང་བར་བྱེད་བ་ལ་བྱ་བ་བཅངས་ཏེ་སྦྱིན་བར་གལ་ཏེ་རྐྱེན་གྱི་དབང་གིས་འདིར་བྱ་བར་མི་རིགས་ན། དེ་ནས་ལམ་དུ་སྣོད་གཞན་མེད་ན་དགེ་ཚུལ་དང་ལྷན་ཅིག་ཏུ་བཟའ་བར་བྱ་བའི་དོན་ཏོ། །རབ་ཏུ་བྱུང་བ་ཉིད་ཀྱིས་འདི་ལ་རིགས་མཐུན་
བར་ཡོད་པ་དེ་བས་ན་ཐམས་ཅད་ཀྱིས་ཐམས་ཅད་དུ་སྨད་པ་མ་ཡིན་ནོ། །འདིར་གཞུང་ནི་དགེ་ཚུལ་དག་ལ་སྣོད་དག་མེད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་བཅངས་ཏེ་ལག་ཏུ་སྦྱིན་བར་བྱའོ། །ལམ་དུ་འཇིགས་པ་དང་བཅས་ཤིང་འགྲོན་པ་དག་ཀྱང་ཐལ་ལམ་ཟས་བཅང་དུ་མི་རུང་ན་ལྷུང་བཟེད་བྱིན་གྱིས་བརླབས་པ་མི་གཏོང་བར་དེ་དག་དང་ལྷན་ཅིག་བཟའ་བར་བྱའོ་ཞེས་གསུངས་པ་ཡིན་ནོ། །གཡོག་རྣམས་ལ་བཅངས་ཏེ་སྦྱིན་ནོ། །ཉེ་དུ་བཅུགས་པས་གསོལ་ན་ཐམས་ཅད་དུ་དབེན་པའི་ཕྱོགས་སུའོ་ཞེས་བྱ་བ་ནི། བཅུགས་བས་ལྷན་ཅིག་བཟའ་བར་གསོལ་ན་དེའི་ལམ་འབའ་ཞིག་ཏུ་མ་ཟད་ཀྱི། གནས་ཐམས་ཅད་དུ་ཡང་དབེན་པའི་ཕྱོགས་སུ་ལྷན་ཅིག་བཟའ་བར་བྱའོ། །དེ་གཉིས་ལ་བྱིན་ལེན་བྱས་པ་འཇིག་པ་དང་བྱིན་ལེན་མ་བྱས་པ་དང་འདྲེས་པ་བསྲུང་བ་ཉིད་དོ་ཞེས་བྱ་བ་ལ། དེ་གཉིས་ཞེས་བྱ་བ་ནི་སྣོད་དག་ལའོ། །གང་ཞིག་འདིར་དགེ་ཚུལ་དང་ཉེ་དུ་དག་ཉིས་དང་དེ་དག་དང་ལྷན་ཅིག་བགོ་བར་བྱ་སྟེ། གང་ཡང་ཉེ་དུ་དང་ལྷན་ཅིག་བྱིན་གྱིས་བརླབས་ཏེའོ། །ལྷུང་བཟེད་བྱིན་གྱིས་བརླབས་ཏེ་ལག་པ་དག་བསྙལ་དུ་བཅུག་ནས་སོ་ཞེས་བྱ་བ་ལ། དེ་ནི་དོན་གྱིས་ཐོབ་པར་རིག་པར་བྱ་སྟེ། དེའི་ཕྱིར་འདི་དོན་གྱིས་བརྗོད་པའོ། །འདིར་ཉེ་དུ་རྣམས་ལ་ལག་པ་བསྙལ་དུ་བཅུག་པ་འདིར་གཞུང་ནི་ཕྱོགས་དབེན་པར་འདུག་སྟེ། ལག་པ་དག་བསྙལ་དུ་བཅུག་ནས་སྣོད་མི་བཏང་བར་བཟའ་བར་བྱའོ། །འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །མཆིལ་ལྷམ་དང་བཅས་བཞིན་དུ་བཟའ་བར་མི་བྱའོ་ཞེས་བྱ་བ་ནི་གསོ་བའི་དོན་ཉིད་མ་གཏོགས་པར་རང་བཞིན་གྱི་ཁ་ན་མ་ཐོ་བ་དང་བཅས་པ་མ་ཡིན་པ་ལྷག་མ་ཐམས་ཅད་ལ་ཞེས་བྱ་བ་འདིས། ནད་པ་མཆིལ་ལྷམ་དང་བཅས་པ་ལ་བཟའ་བ་ཡོངས་སུ་ཐོབ་པ་ལ་བྱེ་བྲག་ཏུ་སྨོས་པ་ནི། ནད་པས་ནི་མནན་ཏེའོ་ཞེས་བྱ་བ་ལ། མཆིལ་ལྷམ་ཕུད་པའི་སྟེང་དུ་མནན་པར་རིག་པར་བྱའོ། །འདིར་ནད་པ་ཞེས་བྱ་བ་ནི་ནད་པ་གང་ལ་རྐང་པ་ས་ལ་གཞག་ན་མི་འཕྲོད་པ་དེ་ནད་པ་ཡིན་ནོ་སྙམ་དུ་དོན་གྱིས་ཤེས་པར་བྱའོ། །སྒྲེན་མོ་དང་གོས་གཅིག་པས་མི་བྱའོ་ཞེས་བྱ་བ་ནི་མི་ན་བར་མི་བྱའོ་ཞེས་བྱ་བར་སྦྱར་རོ། །ནད་པ་ལ་ནི་ལྷུང་བ་མེད་དོ་ཞེས་བྱ་བ་ལ། འདིར་ནད་པའི་ཚད་ནི་མི་ནུས་
པ་ལ་བྱ་སྟེ། དེ་ལྟ་བས་ན་མི་ནུས་པ་ལ་རྣམ་པར་གཞག་གོ་ཞེས་བྱ་བར་ཤེས་པར་བྱའོ། །དེ་གཡོག་དག་གིས་སྐྱོར་བར་བྱའོ་ཞེས་བྱ་བ་ལ། དེ་ཞེས་བྱ་བ་ནི་ནང་པ་དེའོ། །འདིར་གཞུང་ནི། བཅོམ་ལྡན་འདས་ཀྱིས་བཀའ་སྩལ་པ། སྒྲེན་མོས་བཟའ་བར་མི་བྱའོ། །ནད་པས་སྦྱོར་བར་མི་བཟོད་ནས། བཅོམ་ལྡན་འདས་ཀྱིས་བཀའ་སྩལ་པ། ནད་པ་ལ་ལྟུང་བ་མེད་དོ། །དེ་གཡོགས་གོས་ཀྱིས་སྐྱོར་བར་བྱའོ་ཞེས་གསུངས་པ་ཡིན་ནོ། །ནུས་ན་རྔུལ་གཟན་ལ་བརྟེན་པར་བྱའོ་ཞེས་བྱ་བ་ནི་ནད་པས་ནུས་ན། ཆོས་གོས་སྟེང་མ་མེད་པར་བཟའ་བར་མི་བྱ་སྟེ། འདི་ལ་ཆོ་ག་འདི་སྙམ་དུ་ཤུགས་ཀྱིས་རྟོགས་པར་བྱའོ། །གསང་བའི་ཕྱོགས་ཀྱང་ངོ་ཞེས་བྱ་བ་ནི་ནད་པས་ནུས་ན་འཁོར་གསུམ་ཁེབས་པའི་མཐར་ཐུག་པའི་ཤམ་ཐབས་ལ་བརྟེན་པར་བྱ་སྟེ། གཉིས་ཀར་གཏོགས་པ་ཡིན་བར་རིག་པར་བྱ་སྟེ། འདིར་གཞུང་ནི་འཁོར་གསུམ་ཁེབས་པའི་ཚད་འདིས་ཕྱག་འཚལ་བ་ན་འོག་མའི་ཆ་སྤ་བར་བྱ་བ་འམ་ཉེ་བ་འཁོར་གང་ཞིག་གོས་དག་འཁོར་གསུམ་ཁེབས་པ་ཞེས་བྱ་བ་འདིའི་རྗེས་སུ་འབྲངས་ནས་ཤེས་པར་བྱའོ། །ཟས་ཀྱི་ཕྱིར་འདུག་པས་འདི་འམ་འདི་ནས་བྱིན་ཅེས་འདྲིམ་མཁན་ལ་བསྒོ་བར་མི་བྱའོ། །ནད་པས་འཕྲོད་པ་ལ་ལྟུང་བ་མེད་དོ་ཞེས་བྱ་བ་ནི་ནད་པས་ནད་པ་ལ་འཕྲོད་པ་ལ་ཁམས་སྙོམས་པར་འགྱུར་བའི་ཟས་འདི་བྱིན་ཅིག་ཅེས་མི་ནུས་པ་ལ། འདིར་རྣམ་པར་གནས་པའོ། །འདིར་གཞུང་ནི་ནད་པ་ལ་གལ་ཏེ་ཁམས་སྙོམས་པར་འགྱུར་ན་ལྟུང་བ་མེད་དོ་ཞེས་གསུངས་པ་དེ་འདིས་བསྡུས་པ་ཡིན་ནོ། །གཞུང་ཁ་ཅིག་ལས་དེའི་དཔེ་བསྟན་པའི་ཕྱིར། དཔེར་ན་དྲོད་ཆུང་བས་ཚོས་པ་དང༌། དྲོད་ཆེ་བས་རློན་པ་ལྟ་བུའོ་ཞེས་བྱ་བ་སྨོས་ཏེ། གོ་བར་བྱ་བ་ལ་ཞེས་བྱ་བ་དེ་གོ་བར་བྱེད་པ་ལ་ཞུ་བར་འགྱུར་བ་ལ་ཐ་དད་དུ་ཉེ་བར་གནས་པའོ། །བདག་ཉིད་ལ་ནད་པའི་འདུ་ཤེས་དང༌། ཟས་ལ་སྨན་གྱི་འདུ་ཤེས་ཉེ་བར་གཞག་སྟེ། བཟའ་བར་བྱའོ་ཞེས་བྱ་བ་ལ། བདག་ཉིད་ལ་ཞེས་བྱ་བ་ནི་རང་ལའོ། །འདི་ནི་མ་མོ་ལས། མར་དང་ཆུ་དང་པོར་བྱས་ཏེ། དེ་མ་ཡིན་ནོ་ཞེས་བྱ་བའི་མཐར་ཐུག་པས་སོ། །དྲན་བ་ཡང་ངོ་ཞེས་བྱ་བ་ཡང་ངོ༌། །ཟས་ལ་ཉེ་བར་གཞག་སྟེ་བཟའ་བར་བྱའོ། །ཇི་ལྟར་ཞེ་ན་དེའི་ཕྱིར་འབྱུང་བ་དང་འདྲ་བ་
དང་འགྱུར་བ་དང་ཕྱིར་རྒོལ་བ་ཉིད་དང་རྒྱུ་མཐུན་བ་དང་བརྟེན་པ་དང་རྣམ་པ་དང་བཙལ་བ་དང༌། གཞན་ལ་རག་ལས་པ་ཉིད་དང༌། སོ་སོར་འགྲོ་བ་དག་གི་མི་མཐུན་པ་ཉིད་དུ་གཞག་པའོ་ཞེས་བྱ་བ་སྨོས་ཏེ། འབྱུང་བ་ལ་ སོགས་པ ་རྣམ་པ་བཅུ་པོ་དེ་དག་གི་ཟས་ལས་མི་མཐུན་བའི་དྲན་པ་ཉེ་བར་གཞག་སྟེ། བཟའ་བར་བྱའོ་ཞེས་བྱ་བར་སྦྱར་རོ། །དེ་ལ་འབྱུང་བ་ཞེས་བྱ་བ་ནི་ཟས་ནི་མི་གཙང་བ་དང༌། ལུད་པ་ལ་ སོགས་པ ་དག་ལས་འབྱུང་བའོ། །འདྲ་བ་ཞེས་བྱ་བ་ནི་འདི་ལྟ་སྟེ། འབྲས་ཆན་ནི་སྲིན་བུ་དང་འདྲ་ལ། ཕྱེ་དག་ནི་རུས་ཕྱེ་དང་འདྲ་བ་ལ་སོགས་པའོ། །འགྱུར་བ་ཞེས་བྱ་བ་ནི་ཟས་ཟོས་ན་བད་ཀན་དང་སྣབས་དང་རང་དང་ཁྲག་ལ་སོགས་པར་འགྱུར་བའོ། །ཕྱིར་ཞེས་བྱ་བ་ནི་ཟས་ཀྱི་ཕྱིར་རྒོལ་བ་རྣམས་དང་རྗེས་སུ་འབྲེལ་བ་སྟེ། ཟས་ཀྱི་རྒྱུ་ལས། མ་ནི་བུ་དང་ལྷན་ཅིག་འཐབ་པར་བྱེད། བུ་ནི་མ་དང་ལྷན་ཅིག་འཐབ་པར་བྱེད་ པ་ལ་སོགས ་པའོ། །རྒྱུ་མཐུན་བ་ཞེས་བྱ་བ་ནི་ཟས་ནི་བཤང་དང་གཅི་ལ་ སོགས་པ ་ཤིན་ཏུ་སྨད་པ་དག་དང་རྒྱུ་མཐུན་བ་ཡིན་ནོ། །རྟེན་པའི་རྣམ་པ་ཞེས་བྱ་བ་ནི་རྟེན་ཅིང་འབྲེལ་བར་འབྱུང་བ་སྟེ། ཟས་འདི་ནི་རྟེན་ཅིང་འབྲེལ་པར་འབྱུང་བ་སྟེ། ཞིང་ལ་ སོགས་པ ་ལ་བརྟེན་ཏེ་འབྱུང་བ་དང༌། དེ་དག་ལ་བརྟེན་ནས་སྲེད་ པ་ལ་སོགས ་པའི་ནད་མང་པོ་དུ་མ་འབྱུང་བའི་ཕྱིར་རོ། །བཙལ་བ་ཞེས་བྱ་བ་ནི་དེ་ཚེགས་ཆེན་པོས་བསྒྲུབ་དགོས་པའོ། །གཞན་ལ་རག་ལས་པ་ཉིད་ཅེས་བྱ་བ་ནི་ཚེགས་ཆེན་པོས་འབྲུ་ལ་ སོགས་པ ་གྲུབ་ཀྱང་དེ་གཡོ་བ་ལ་ སོགས་པ ་མེད་ན་མི་ལྡན་པའི་ཕྱིར་གཞན་ལ་རག་ལས་པ་ཉིད་དུ་འགྱུར་བའོ། ནད་དང་བཅས་ པ་ཉིད་ཅེས་བྱ་བ་ནི་ཟས་ལོག་པར་ཞུ་བས་རིམས་ལ་སོགས ་པའི་ནད་མང་པོ་དུ་མ་དག་འབྱུང་བའི་ཕྱིར་རོ། །སོ་སོར་འགྲོ་བ་ཉིད་ཅེས་བྱ་བ་ནི། ཟས་འདི་རྣམ་བཞིར་འགྲོ་བ་སྟེ། དེའི་ཆ་གཅིག་ནི་ལུས་ཀྱི་མེས་སྲེག་པར་བྱེད་པ་དང༌། གཉིས་པ་ནི་བཤང་བ་དང་གཅི་བར་གྱུར་པ་དང༌། གསུམ་པ་ནི་སྲིན་བུ་དག་གིས་བཟའ་བར་འགྱུར་བ་དང༌། བཞི་པ་ནི་ལུས་བརྟས་པར་བྱེད་པའོ། །དྲན་པ་ཉེ་བར་གནས་པས་སོ་ཞེས་བྱ་བ་ནི་ཟས་ལ་སེམས་གཏད་བས་སོ་ཞེས་བྱ་བའི་ཐ་ཚིག་གོ །སེམས་རྣམ་པར་མ་གཡེངས་པས་སོ་ཞེས་བྱ་བ་ནི་སེམས་ཐམས་ཅད་ཀྱིས་ཟས་ལ་རྩེ་གཅིག་པས་
གཏད་པ་སྟེ། ཆ་ཤས་ཀྱིས་ནི་མ་ཡིན་པ་ཞེས་བྱ་བའི་དོན་ཏོ། །ཤེས་བཞིན་གྱིས་སྒྲ་བསྐྱུང་ཞིང་ངོ༌། །དེ་མི་སྦྱར་བར་རོ་ཞེས་བྱ་བ་ལ། དེ་ཞེས་བྱ་བ་ནི་སྒྲ་མི་བྱ་བ་དེའོ། །མི་འབྱུང་བར་ཐུག་པ་དག་གོ་ཞེས་བྱ་བ་ནི་སྒྲ་ཞེས་བྱ་བར་སྦྱར་རོ། །ཁྲུམ་ཁྲུམ་མི་བྱ་བར་རོ་ཞེས་བྱ་བ་ནི་སྒྲ་ཁྲུམ་ཁྲུམ་མི་བྱ་བར་རོ། །སྒྲ་འབྱུང་བ་དག་ཆུ་ལ་སོགས་པས་སྙེ་བར་བྱའོ་ཞེས་བྱ་བ་ནི་བཟའ་བར་བྱ་བ་རྣམས་ལའོ། །བཟའ་བ་དེའི་དོན་དུ་རོལ་མོ་བྱེད་དུ་མི་གཞུག་གོ་ཞེས་བྱ་བ་ནི། ཟས་ཟ་བ་དེའི་དོན་དུ་གླུ་གླིང་དང༌། སིལ་སྙན་ལ་སོགས་པའི་རོལ་མོ་བྱེད་དུ་གཞུག་ཅིང་བཟའ་བར་མི་བྱའོ། །འདིར་གཞུང་ནི་ཨ་མྲ་སྐྱོངས་ཀྱིས་རང་གི་མགྲོན་དུ་བོས་པའི་དགེ་འདུན་ཟ་བ་ན་རོལ་མོ་བྱ་བར་བརྩམས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་རོལ་མོ་བྱེད་དུ་གཞུག་བཞིན་དུ་བཟའ་བར་མི་བྱའོ། །ཟ་ན་འགལ་ཚབས་ཅན་དུ་འགྱུར་རོ། །ཁང་པའི་དུས་སྟོན་དང་མཆོད་རྟེན་ལ་རོལ་མོ་བྱས་པ་ལ་ཉེས་པ་མེད་དོ་ཞེས་གསུངས་པ་ཡིན་ནོ། །ཁ་ནས་རོལ་མོ་བྱེད་པ་ལ་ནི་ཡོངས་སུ་མ་རྫོགས་པ་ཉིད་ཀྱི་ཕྱིར་དེ་ལ་བྱས་པ་ལ་ནི་ཤིན་ཏུ་ན་སྨད་པའི་ཕྱིར་ཉེས་བྱས་ཕྲ་མོར་འགྱུར་རོ། །བཤད་པ་བྱེད་པ་ཉིད་ན་མི་བྱའོ་ཞེས་བྱ་བ་ནི་ཆོས་བཤད་པ་དང་ཡོན་བཤད་པ་ལས་འདིར་ཀློག་པ་ཡིན་ཏེ། ཆོས་བཤད་པ་ལ་ཡང་འདི་ནི་མི་རིགས་པ་ཞེས་གསུངས་པ་དེའི་ཕྱིར་འདིར་བྱེ་བྲག་མི་སྐྱེད་པའོ། །དེ་སོ་སོར་རིག་པར་བྱའོ་ཞེས་བྱ་བ་ནི་ཡོན་བཤད་པ་ལའོ། །འདིར་གཞུང་ནི་དགེ་སློང་རྣམས་ཀྱིས་ཡོན་བཤད་པར་བྱེད་པར་གྱུར་པ་དེ་ན་བཟའ་བར་མི་བྱའོ་ཞེས་གསུངས་པ་ཡིན་ནོ། །དུས་ཡོལ་བར་འགྱུར་ན་ཚིགས་སུ་བཅད་པ་གཉིས་སམ་གསུམ་དུ་བྱའོ་ཞེས་བྱ་བ་ལ་འདིར་གཞུང་ནི་བཤད་པ་བྱེད་དུ་བཅུག་སྟེ། བཟའ་བར་བྱའོ་ཞེས་གསུངས་པ་ཡིན་ནོ། །གལ་ཏེ་དྲོའི་དུས་ཡོལ་བར་དོགས་པ་ཡོད་ན། དེའི་ཚེ་ཚིགས་སུ་བཅད་པ་གཉིས་སམ་གསུམ་བཤད་པ་བྱེད་ཀྱི་བར་དུ་བཟའ་བར་མི་བྱའོ། །རྐྱང་པ་འཆད་ན་ཚིག་གཉིས་སམ་གསུམ་འཆད་ཀྱི་བར་དུ་བཟའ་བར་མི་བྱ་བ་ཡང་འདིའི་རྗེས་སུ་འབྲངས་པས་ཤེས་པར་བྱའོ། །གཞན་ལ་ནི་ལྟུང་བ་མེད་དོ། །ཟོས་ན་གཙུག་ལག་གི་ཚིགས་སུ་བཅད་པ་གདོན་ཏོ། །ཟོས་ནས་མགྲོན་དུ་འབོད་བ་ལ་
ཡོན་བཤད་པ་དང་ཆོས་བཤད་པ་དག་བྱའོ་ཞེས་བྱ་བ་ནི། མདོ་སྡེའི་གཞུང་ལས། ལག་པ་བསྙལ་ལ་ལྷུང་བཟེད་བཞག་ནས་ཞེས་གསུངས་པ་བཞིན་དུ་ཤེས་པར་བྱ་སྟེ། ཁའི་ནང་ཡང་བཀྲུས་ནས་ཞེས་བྱ་བ་དེ་ལྟ་བུས་འདིར་ཚིགས་སུ་བཅད་པ་གདོན་པ་ནི་མཛེས་པ་བསྐྱེད་པའོ། །ཐམས་ཅད་ཀྱིས་ཟོས་ཟིན་བ་ཉིད་དུ་ངེས་པར་ཤེས་ནས་སོ་ཞེས་བྱ་བ་ནི་ཡོན་བཤད་པ་དང་ཆོས་བཤད་པ་དག་བྱའོ། །ཇི་ལྟར་ངེས་པར་ཤེས་བར་བྱ་ཞེ་ན། དེའི་ཕྱིར་ཀུན་དུ་ལྟ་བས་སོ་ཞེས་བྱ་བ་སྨོས་སོ། །གང་གིས་དེ་དག་བྱ་ཞེ་ན། དེའི་ཕྱིར་དུ་མ་ཉིད་ཡིན་ན་དང་པོས་སོ་ཞེས་བྱ་བ་སྨོས་ཏེ། གལ་ཏེ་དགེ་སློང་དག་དུ་མ་ཉིད་ཡིན་ན་དེའི་ཚེ་དེ་དག་གི་གྲལ་གྱི་དང་པོ་པས་དེ་དག་བྱའོ། །མི་ནུས་ན་ནུས་པ་གཞན་ལ་བཅོལ་ལོ་ཞེས་བྱ་བ་ནི་གལ་ཏེ་དང་པོས་དེ་དག་མི་ནུས་ན་དུ་མ་ཉིད་ཡོད་པའི་སྟོབས་དང་ལྡན་བ་གཞན་ལ་བཅོལ་བར་བྱའོ། །གལ་ཏེ་མ་བྱས་བར་དགེ་སློང་རྣམས་ལ་འགྲོ་བའི་རྐྱེན་བྱུང་ན་འཁོར་ཐ་ན་བཞི་ཡན་ཆད་སྦྱིན་ནོ་ཞེས་བྱ་བ་ནི་གལ་ཏེ་ཡོན་བཤད་པ་དང་ཆོས་བཤད་བྱེད་པ་ནའོ། །གལ་ཏེ་འགྲོ་དགོས་པའི་རྐྱེན་བྱུང་ན་དེའི་ཚེ་འཆད་པར་བྱེད་པའི་ཐ་ན་དགེ་སློང་བཞི་ཡན་ཆད་གཞག་སྟེ་འགྲོ་བར་བྱའོ་ཞེས་བྱ་བའི་དོན་ཏོ། །དེ་ལ་རྐྱེན་བྱུང་ན་བྱིན་བ་ལ་ཞུས་ཏེ་བལྟས་ནས་སོ་ཞེས་བྱ་བ་ལ་དེ་ལ་ཞེས་བྱ་བ་ནི་འཁོར་ལའོ། །བལྟས་ནས་སོ་ཞེས་བྱ་བ་ནི་ཆོས་བཤད་པ་དང༌། ཆོས་བཤད་པར་བྱེད་པའི་བཤད་པ་པོ་གང་ལ་ད་འཁོར་དུ་སྦྱིན་བར་འགྱུར་བ་དེ་ལ་བལྟས་ནས་ཞེས་བྱ་བའི་དོན་གྱིས་ཤེས་པར་བྱའོ། །ཡོན་འཆད་པ་ན་དགའ་བོ་དང་ཉེ་དགའ་དག་གི་མིང་སྨོས་པར་བྱའོ་ཞེས་བྱ་བ་ནི། འདིར་རྣམ་པར་འབྱེད་པའི་གཞུང་ཁ་ཅིག་ལས་ཡོན་འཆད་པའི་ཚེ་ན་ཀླུའི་རྒྱལ་པོ་དགའ་བོ་དང་ཉེ་དགའ་བོ་གཉིས་ཀྱི་མིང་ཡང་སྨོས་པར་བྱའོ། །སྨོས་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །མིད་པ་གཉིས་པས་དུས་མ་ཡིན་པའི་སྒྲེགས་པ་དག་བྱུང་ན། དང་པོར་གཉིས་སམ་གསུམ་པོར་ཏེ་ཁ་བརྐུས་ནས་མིད་པར་བྱའོ་ཞེས་བྱ་བ་ནི། ཁ་ཆུ་ལ་ སོགས་པ ་གནོད་པ་ཉིད་སྒྲེགས་པ་དག་བོར་བའི་རྒྱུས་སྒྲེགས་པ་པོར་བའི་ལྷག་མ་བསལ་བའི་ཕྱིར་བཀྲུས་ནས་བོར་ད་གསུམ་པོ་འདི་དག་ལ་རྣམ་པར་གཞག་པ་དེ་བས་ན་འདི་ལ་མི་རུང་བ་ཉིད་དུ་རིག་པར་བྱའོ། །དེ་ནི་ཟས་མ་ཡིན་པ་མ་ཡིན་ནོ་ཞེས་བྱ་བ་ལ་དེ་ཞེས་བྱ་བ་ནི་སྒྲེགས་པ་བྱུང་བའོ། །དེའི་
ཕྱིར་གཞན་གྱིས་དུས་མ་ཡིན་པ་དང་སྡངས་པའི་ཚེ་སྒྲེགས་པ་བྱུང་ན་ཁ་བཀྲུ་བར་བྱའོ་ཞེས་བྱ་བ་ལ། གཞན་གྱིས་ཞེས་བྱ་བ་ནི་རྩེ་གཅིག་པ་སྒྲེགས་པའོ། །འདི་མན་ཆད་ནི་རྒྱུ་མཐུན་བ་དག་གང་ཡིན་བ་དེ་དག་བརྗོད་པར་བྱ་སྟེ། དེའི་བྱིར་མ་བཤམས་བའི་ཕྱོགས་སུ་མཆིལ་མ་དོར་བར་མི་བྱའོ། །བྱི་དོར་བྱས་པར་ཡང་མི་བྱའོ་ཞེས་བྱ་བ་ནི་དགེ་འདུན་གྱི་ཕྱོགས་མ་ཡིན་པ་ཡང་རུང་སྟེ་ཞེས་བྱ་བརྩོམ་བའི་ཤུགས་ཀྱིས་ཤེས་པར་བྱའོ། །མ་མོ་ལས། དེའི་སྐབས་ཞེས་བྱ་བའི་མཐར་ཐུག་པ་ཅན་ནོ། །སོས་ལྕེ་བཙིར་ཏེ་ཡང་མི་བྱའོ་ཞེས་བྱ་བ་ནི་སོས་ལྕེ་བཙིར་ཏེ་མཚལ་མ་བརླན་དེ་ལ་སྒྲ་ཙིད་ཅེས་ཀྱང་ཕྱོགས་དེར་དོར་བར་མི་བྱའོ། །དེ་དང་དེའི་སྒྲ་གནས་བརྟན་གྱི་བདུན་དུ་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་མཆིལ་མ་དོར་བའོ། །དེའི་སྒྲ་ཞེས་བྱ་བ་ནི་མཆིལ་མ་དོར་བ་དེའི་སྒྲའོ། །ཟ་བའི་དྲུང་དུ་ཡང་མི་བྱའོ་ཞེས་བྱ་བ་ནི་དེ་དང་དེ་སྒྲ་མི་བྱའོ། །ལྷག་མའི་དྲུང་དུ་ཡང་དང་ཡང་མི་བྱའོ་ཞེས་བྱ་བ་ནི་གནས་བརྟན་དང་ཟ་བའི་ལྷག་མ་དེའོ། །མི་ནུས་ན་གཞན་དུ་འགྲོ་བར་བྱའོ་ཞེས་བྱ་བ་ནི་གལ་ཏེ་མཆིལ་མ་དོར་བ་དེ་མི་ནུས་ན་ཕྱོགས་གཞན་དུ་འགྲོ་བར་བྱའོ། །གཞན་ལ་མི་བདེ་བ་མི་བྱའོ། །སྡུར་སྒྲ་ཅན་གྱིས་ཉལ་བར་མི་བྱའོ་ཞེས་བྱ་བ་ནི་ལྷག་མ་རྣམས་ཀྱི་མདུན་དུ་ཡང་ཉལ་བར་མི་བྱའོ། །དེས་སྡུར་སྒྲ་སྤང་བའི་ཕྱིར་ཇི་ལྟ་ཞེ་ན། དེའི་ཕྱིར་ད་བཅག་པ་འམ་གཞན་དུ་འགྲོ་བར་བྱའོ། །དེའི་སྣོད་གླང་པོ་ཆེའི་རྨིག་མཐིལ་ལྟ་བུ་འམ་བརྩེགས་མའོ་ཞེས་བྱ་བ་ལ། དེའི་ཞེས་བྱ་བ་ནི་མཆིལ་མ་དེའོ། །དེ་མེད་ན་ཕྱི་མ་ཤོས་སོ། །དེ་ཉེ་བར་གཞག་པར་བྱའོ་ཞེས་བྱ་བ་ནི་མཆིལ་མའི་སྣོད་དེའོ། །དེར་སོ་ཕག་གི་ཕྱེ་མའམ་ཐལ་བ་དག་གི་གཅལ་བླུགས་སོ་ཞེས་བྱ་བ་ནི་མཆིལ་མའི་སྣོད་དེར་རོ། །དེར་སྦྲང་བུ་འདུ་བའི་གཉེན་པོ་གང་ཞེ་ན། དེའི་ཕྱིར་སྦྲང་བུ་བསྐྲད་ པ་གཉེན་པོ་ཡིན་ནོ་ཞེས་བྱ་བ་སྨོས་ཏེ། ས་འམ་ལོ་མ་ལ་སོགས ་པས་དགབ་པས་སོ། །དྲིང་བར་མི་འགྱུར་བ་དང༌། སྲོག་ཆགས་འབྱུང་བར་མི་འགྱུར་བར་བྱ་བའི་ཕྱིར་དུས་དུས་སུ་བཀྲུ་བ་དང་བསྐམ་པར་བྱ་བའོ་ཞེས་བྱ་བ་ནི་དྲིང་བར་མི་འགྱུར་བའི་ཕྱིར་དང་སྲོག་ཆགས་འབྱུང་བར་མི་འགྱུར་བའི་ཕྱིར་རོ། དེའི་དུས་ཀྱི་ཆེད་དུ་གཞན་ཉེ་བར་གཞག་གོ་ཞེས་བྱ་བ་ནི་བཀྲུ་བ་དང་བསྐམ་པ་དེའི་དུས་ཀྱི་ཆེད་དུ་མའི་སྣོད་འཐེབ་ཉེ་བར་གཞག་པར་བྱའོ། །མི་བྲེལ་བར་བྱ་བའི་ཕྱིར་གཙུག་ལག་
ཁང་གི་གྲྭའི་ཀ་བ་བཞི་པོ་དག་གི་ངོས་སུ་ཡང་མཆིལ་མའི་སྣོད་དག་གཞག་པར་བྱའོ་ཞེས་བྱ་བ་ལ། བཞི་པོ་དག་གི་ཞེས་བྱ་བ་ནི་གྲྭའི་ཀ་བ་བཞི་པོ་དག་གི་ངོས་ལའོ། །རླུང་ལས་སྒྲ་དང་བཅས་པར་མི་བྱའོ་ཞེས་བྱ་བ་ལ། འདི་ནི་མ་མོ་ལས་གསུངས་པ་ཡིན་ནོ། །དཀོན་མཆོག་དང་བླ་མའི་མདུན་དུ་མི་གཏོང་ངོ༌། །གཞན་གྱི་དྲུང་དུ་ཡང་དང་ཡང་དུ་མི་གཏོང་ངོ༌། །ཤིང་ལྗོན་པའི་དྲུང་དུ་བཤང་བ་དང་གཅི་བ་དག་མི་བྱའོ་ཞེས་བྱ་བ་ནི་མི་བྱའོ་ཞེས་བྱ་བར་སྦྱར་རོ། །དགོན་པར་དེ་དག་གི་སྐབས་མེད་པ་ཉིད་ཡིན་ནམ་གཏོགས་སོ་ཞེས་བྱ་བ་ནི་ཚེར་མ་ཅན་གྱི་ཡང་ངོ་ཞེས་བྱ་བ་ནི། ཤིང་ཚེར་མ་ཅན་གྱི་དྲུང་ཡང་མ་གཏོགས་ཏེ། དེར་སྐྱེ་བོ་དག་མི་སྡུག་པའི་ཕྱིར་རོ། །བཤང་བའི་སྐྱབས་བྱའོ། །གལ་ཏེ་གཙུག་ལག་ཁང་དུ་ན་ནུབ་བམ་བྱང་གི་ཕྱོགས་སུའོ་ཞེས་བྱ་བ་ནི། སྒོ་ཤར་ཕྱོགས་ཉིད་དང་ངེས་པ་ལ་སྨོས་པར་རྣམ་པར་གནས་པ་ཡིན་ནོ། །འདིར་ནུབ་དང་བྱང་ཞེས་བྱ་བ་ནི་ཉི་མ་ཤར་ནུབ་ཀྱི་འགྲོས་ཀྱི་ཕྱོགས་ལ་ལྟོས་པ་ནི་མ་ཡིན་ནོ། །ཕྱོགས་སུའོ་ཞེས་བྱ་བ་ནི། དཔུང་པ་གཅིག་གམ་གཞན་གྱི་མཚམས་ལ་མ་ཡིན་ནོ་ཞེས་བྱ་བའི་དོན་ཏོ། །གསོང་ལྡོང་ངམ་ཕུག་རྡུགས་སོ་ཞེས་བྱ་བ་ནི་མི་གཙང་བའི་ལས་ཤོད་དམ་ཁང་སྟེང་ཉིད་དུ་བྱའོ། །འོག་ཏུ་ཤིང་ཚེར་མ་ཅན་དག་བསྐྱེད་པར་བྱའོ། །སྟེང་དུ་བུ་གུའི་ཉེན་ཀོར་དུ་རྐང་རྟེན་དག་གཞུག་གོ་ཞེས་བྱ་བ་ནི། བུ་གའི་ཉེན་ཀོར་དུ་རྐང་པ་གཉིས་རྟེན་པའི་རྐང་རྟེན་དག་གཞུག་པར་བྱའོ། །རིལ་བ་སྤྱི་བླུགས་གཞག་པར་བྱའོ། །སྒོ་བསྣོལ་མར་གདོད་དོ་ཞེས་བྱ་བ་ནི་གང་གི་རྣམ་པ་ཆབ་ཁུངས་སའི་ར་བའི་དེ་ལྟ་བུའི་སྒོ་བྱེད་པ་བསྣོལ་མ་གདོད་དོ། །སྒོ་གླགས་གཞུག་གོ །ཡང་མིག་དང་སྒོ་གཏན་དག་ཀྱང་ངོ༌། །ཞེས་བྱ་བ་ནི་གཞུག་པའོ། །འཇུག་པར་འདོད་པས་སྒྲ་བྱའོ། །དེར་ཞུགས་པས་ཀྱང་ཐོས་ནའོ་ཞེས་བྱ་བ་ནི། ཆབ་ཁུངས་དེར་སྔར་ཞུགས་པའི་སྒྲ་བྱས་པ་དེ་ཐོས་ན་མི་འབྱུང་བའོ། །གོས་ལེགས་པར་བརྫེས་པས་ཤེས་བཞིན་དུ་འདུག་པར་བྱའོ་ཞེས་བྱ་བ་ནི་མ་མོ་ལས། དེའི་དྲུང་ན་གནས་པར་མི་བྱའོ་ཞེས་བྱ་བའི་མཐར་ཐུག་པའོ། །དཀྱིལ་དུ་འདུག་པར་བྱའོ། །རྐང་རྟེན་གཉིས་ལ་མི་གོས་པར་ཁྱད་ཀྱིས་བྱའོ་ཞེས་བྱ་བ་ནི་བཤང་བས་ཞེས་བྱ་བར་དོན་གྱིས་ཁོང་དུ་ཆུད་པར་བྱའོ། །མི་འོང་ན་བསྡད་པར་མི་བྱའོ་ཞེས་བྱ་བ་ནི་བཤང་བའི་ཤུགས་པར་མི་འབྱུང་ན་མཐུས་བཙིར་བར་མི་བྱའོ། །འོང་ན་དགག་
པར་མི་བྱའོ་ཞེས་བྱ་བ་ནི་ཤུགས་འབྱུང་ན་དེ་ཕྱིར་དགག་པར་མི་བྱའོ། །དེ་དང་འབྲེལ་བའི་དོན་ལས་གཞན་པས་དེའི་དྲུང་དུ་འདུག་པར་མི་བྱའོ་ཞེས་བྱ་བ་ལ། དེ་དང་འབྲེལ་བའི་ཞེས་བྱ་བ་ནི་ཆབ་ཁུངས་དེ་དང་འབྲེལ་བ་ལས་སོ། །འདིར་གཞུང་ནི་དགེ་སློང་གིས་བཤང་བའི་སའི་ཉེན་ཀོར་དུ་འགྲེང་བར་མི་བྱ་འདུག་པར་མི་བྱ། བཅག་པར་མི་བྱ་ཁ་ཏོན་མི་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །རྐང་པ་བཀྲུ་བ་དང་འཐོར་འཐུང་བྱ་བ་དག་ཏུ་ཡང་དེ་བཞིན་ནོ་ཞེས་བྱ་བ་ནི། དེ་དང་འབྲེལ་བའི་དོན་ལས་གཞན་བས་དེ་དག་གི་དྲུང་དུ་འདུག་པར་མི་བྱའོ། །འདིར་རྐང་པ་བཀྲུ་བ་ཞེས་བྱ་བ་ནི་རྐང་ཁྲུས་ཀྱིས་དང་གཅི་བའི་སྐབས་གཉིས་ཀ་བསྟན་ཏོ། །འཐོར་འཐུང་ཞེས་བྱ་བ་ནི་ཁ་གདོང་བཀྲུ་བ་དང་ལག་པ་བསྙལ་བའི་ས་བསྟན་ཏོ། །དགེ་སྒོས་ཀྱིས་ཉི་མ་རེ་རེ་ཞིང་བྱི་དོར་བྱའོ་ཞེས་བྱ་བ་ནི། གང་ཞིག་འདིར་ས་དག་གི་ཕྱོགས་སྦྱང་བར་འོས་པ་དག་སྦྱང་བར་བྱའོ། །ས་དང་ལོ་མ་གཞག་པ་ཡང་ངོ་ཞེས་བྱ་བ་ནི། དགེ་སྐོས་ཀྱིས་བྱའོ་ཞེས་བྱ་བའི་རྗེས་སྙེགས་བའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ལོ་མ་ནི་ཕྱི་བར་བྱ་བའི་བོང་རྡོག་ལ་སོགས་པའི་དཔེ་ཡིན་ནོ། །ཕྱོགས་མ་ཡིན་བར་གཅི་བར་མི་བྱའོ་ཞེས་བྱ་བ་ནི་མ་མོ་ལས་ཁུང་སྐོར་གཞུག་གོ་ཞེས་བྱ་བའི་མཐར་ཐུག་པ་གསུངས་པ་ཡིན་ནོ། །དུ་མར་མི་བྱའོ་ཞེས་བྱ་བ་ནི་ཕྱོགས་དུ་མར་གཅི་བ་མི་བྱའོ། །རྒྱུན་གྱི་ཁུང་སྒོར་གཞུག་གོ །གཅི་བ་རྒྱུན་གྱི་ཞེས་བྱ་བ་ནི་རྒྱུན་ནོ། །གཅི་བའི་སྐྱབས་བྱའོ། །དེའི་གློར་རོ་ཞེས་བྱ་བ་ནི་འཆག་ཁང་དེ་ཞེས་བྱ་བའི་དོན་ཏོ། །ཕུག་རྡུགས་ལ་ཝ་གཞུག་པར་བྱའོ་ཞེས་བྱ་བ་ནི་གཅི་བའི་ཞེས་བྱ་བའི་ཕྱིར་རོ། །གཞན་ནི་འདྲའོ་ཞེས་བྱ་བ་ནི་འོག་ཏུ་ཤིང་ཚེར་མ་དག་བསྐྱེད་དོ་ཞེས་བྱ་བ་ལ་ སོགས་པ ་ཐམས་ཅད་བཤང་བའི་སྐྱབས་དང་འདྲ་བའོ། །ས་དང་ལོ་མ་གཞག་པ་ཡང་ངོ་ཞེས་བྱ་བ་ནི་འདིར་མི་དགོས་པའི་ཕྱིར་བཟློག་པར་བྱ་བའོ། །འཁྲུ་བའི་ནད་ཅན་ལ་ནི་ཁྲིའུའི་བུ་གུ་བྱའོ་ཞེས་བྱ་བར་སྨོས་ན། དེ་ཇི་ལྟ་བྱ་ཞེ་ན། དེའི་ཕྱིར་ཐག་མ་བཤུགས་བས་སོ། །མ་བཏུང་ན་བཅད་དོ་ཞེས་བྱ་བ་ནི། གལ་ཏེ་བཤུག་ཏུ་མི་བཏུབ་ན་བུ་གུ་སྒྲུབ་པར་མི་ནུས་ནས། དེའི་ཚེ་ཐག་མ་དེ་གཅད་པར་བྱའོ། །གལ་ཏེ་ན་ནི་ཐན་ཀོར་དུ་ལོ་མའི་ཆང་བུ་དག་གཞུག་གོ་ཞེས་བྱ་བ་ནི་གལ་ཏེ་བུ་གའི་ཐན་ཀོར་དུ་ཞུགས་ཤིང་བཤང་བ་བྱ་བའི་ཕྱིར་འདུག་པ་ན་རེག་པས་
བཤང་བའི་ལམ་གྱི་ཐན་ཀོར་ན་ནི་དེའི་ཚེ་ལོ་མའི་ཆང་བུ་དག་འདིར་གཞུག་པར་བྱའོ། །ས་སྨད་པར་བསྲུང་བར་བྱའོ། །དེའི་ཕྱིར་འོག་གཞིར་གྱོ་མོ་བྱའོ་ཞེས་བྱ་བ་ནི་དེའི་འོག་གཞིར་གྱོ་མོ་གཞུག་པར་བྱའོ་ཞེས་བྱ་བར་སྦྱར་རོ། །ཧ་ཅང་མི་མཐོ་བ་བཟང་ངོ་ཞེས་བྱ་བ་ནི་གྱོ་མོའོ། །དྲི་ང་བར་མི་འགྱུར་བར་བྱ་བའི་ཕྱིར་དུས་སུ་བཀྲུ་བ་དང་སྐམ་པ་དང་ཡུངས་མར་གྱིས་བསྐུ་བར་བྱའོ། །དེའི་དུས་ཀྱི་ཆེད་དུ་གཞན་བསྒྲུབ་པོ་ཞེས་བྱ་བ་ནི་བཀྲུ་བ་དང་བསྐམ་པ་དང་ཡུངས་མར་གྱིས་བསྐུ་བ་དེའི་དུས་ཀྱི་ཆེད་དུ་གྱོ་མོའི་འཐབ་གཞན་བསྒྲུབ་པར་བྱའོ། །མ་འབྱོར་ན་ཞི་ཉིད་དུ་ལོ་ཆུམ་གཞག་པར་བྱའོ་ཞེས་བྱ་བ་ནི། གྱོ་མོ་གཞན་མ་འབྱོར་ན་དེ་ཉིད་ཀྱི་སྟིང་དུ་ལོ་ཆུན་གཞག་པར་བྱའོ། །དེའི་སྟེང་དུ་བཤང་བ་བྱའོ། །དེ་ཉིད་དང་ལྷན་ཅིག་དོར་བར་བྱ་ཞིང་དུས་གཞན་གྱི་ཚེ་ན་ཡང་ལོ་ཆུན་གཞན་གཞག་པར་བྱའོ། །གྱོ་མོ་དེ་ཉིད་བཀྲུ་བ་ལ་སོགས་པའི་དོན་འགྲུབ་པར་འགྱུར་རོ། །བཤང་བ་བྱས་ནས་དེ་བྱེད་པའི་བཤང་བའི་ལམ་ཕྱི་བར་བྱའོ་ཞེས་བྱ་བ་ལ། དེ་བྱེད་པའི་ཞེས་བྱ་བ་ནི་བཤང་བ་དེ་བྱེད་པའི་ལམ་མོ། །ཅི་ཞིག་གིས་དེ་ཕྱི་བར་བྱ་ཞེ་ན། དེའི་ཕྱིར་རྣོན་པོ་དང་རྩྭའི་ཆང་བུ་མ་ཡིན་པས་སོ་ཞེས་བྱ་བ་སྨོས་སོ། །འོ་ན་ཅི་བཟང་ཞེ་ན། དེའི་ཕྱིར་འདི་ལ་རས་མ་དང་ལོ་ཆུན་དང་ལོ་མའི་ཆང་བུ་དང༌། ཤིང་དང་བོང་རྡོག་དག་བཟང་བ་ཉིད་དོ་ཞེས་བྱ་བ་སྨོས་ཏེ། འདི་ལ་ཞེས་བྱ་བ་ནི་བཀྲུ་བར་བྱ་བ་ལའོ། །ས་གཉིས་ཀྱིས་བཀྲུ་བར་བྱའོ་ཞེས་བྱ་བ་ནི་བཤང་བའི་ལམ་ཞེས་བྱ་བར་སྦྱར་རོ། །སྔར་གཞག་པའི་ས་མ་འདྲེས་པ་དག་གིས་ཕྱིས་བཀྲུ་བར་བྱའོ་ཞེས་བྱ་བ་ལ། སྔར་ཞེས་བྱ་བ་ནི་བཤང་བ་བྱས་པ་ལས་དང་པོ་ཉིད་དུ་འཁྲུ་བ་ཞེས་བྱའོ། །འཐོར་འཐུང་གི་རྐང་རྟེན་དག་ཟེར་མ་དག་གིས་མི་ཉམས་པ་ཉིད་དུ་ཁད་ཀྱིས་དལ་བུ་དལ་བུས་སོ་ཞེས་བྱ་བ་དེ་ནི་མ་མོ་ལས་སོ། །བདུན་པ་དག་གིས་གཡོན་བའོ་ཞེས་བྱ་བ་ནི། ལག་པ་གཡོན་བ་བཀྲུ་བའོ། །བདུན་གྱིས་ནི་གཉིས་ཀའོ་ཞེས་བྱ་བ་ནི་ལག་པ་གཉིས་ཀ་བཀྲུ་བར་བྱའོ། །ལག་དར་གཉིས་ཀྱང་བཀྲུ་བར་བྱའོ་ཞེས་བྱ་བ་ནི་ལག་པ་གཉིས་བཀྲུ་པ་དེའི་རྗེས་ལའོ། །ཡང་ལག་པ་གཉིས་སོ། །གཞན་གྱིས་རིལ་བ་སྤྱི་བླུགས་སོ་ཞེས་བྱ་བ་ལ། །གཞན་གྱིས་ཞེས་བྱ་བ་ནི་སས་སོ། རྐང་བ་གཉིས་བཀྲུ་བའོ། །ལྟོ་འཛག་པས་ནི་མདུན་དག་ཏུ་ཕྱི་བ་ཙམ་བྱས་ཏེ་འདུག་པ་ལ་ཉེས་པ་མེད་དོ་
ཞེས་བྱ་བ་ལ། ཐ་མའི་མདུན་དུ་ཞེས་བྱ་བ་འཛད་བའི་ཐ་མ་ལས་མདུན་རོལ་དུ་བྱའོ། །དེ་ལས་གཞན་བས་ནི་ཆུ་ཡོད་ན་འཐོར་འཐུང་མ་བྱས་པར་ཡང་འདུག་པར་མི་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་ལྟོས་འཛག་པ་ལས་སོ། །འཐོར་འཐུང་མ་བྱས་པས་ཞེས་བྱ་བ་ནི་ཁྲུང་མ་བྱས་པས་ཏེ་དེ་ནི་མ་མོ་ལས་སོ། །སྨན་གྱི་གཞི་ཕྲན་ཚེགས་ལ་སོགས་པའི་སྐབས་སོ། །སྨན་གྱི་གཞི་རྫོགས་སོ།། །།ཆོ་ག་ལས་འདས་ན་ལས་མི་འཆགས་སོ་ཞེས་བྱ་བ་ནི་ཆོ་ག་གང་དག་ལས་གང་ཞིག་བྱེད་པ་ཆོ་ག་ལས་འདས་ན་གཞན་དུ་ན་དེ་མི་བྱེད་པ་ལ་ཕྱི་རོལ་གྱི་དེ་འབད་པ་ཙམ་དེའི་ཆོས་འདུལ་བར་གཏོགས་པའི་ལས་བྱས་པར་མི་འགྱུར་ཞེས་བྱ་བའི་དོན་ཏོ། །འདིར་ཆོ་ག་ནི་དགེ་འདུན་ཚང་བ་དང་ལས་བརྗོད་པ་དང་ལས་བྱེད་པ་ཉིད་དོ་ཞེས་བྱ་བ་ནི་ཆོ་གའི་རྣམ་ པ་བསྟན་ཏོ། །དགེ་འདུན་ལྷག་མའི་ལྟུང་བ་དབྱུང་བ་ལ་ནི་དགེ་སློང་ཉི་ཤུ་ལ་སོགས ་པའོ། །ཡུལ་དབུས་སུ་བསྙེན་པར་རྫོགས་ པ་ལ་ནི་བཅུ་ལ་སོགས ་པའོ། །མཐའ་འཁོབ་ཏུ་ནི་གཞན་མེད་ན་འདུལ་བ་འཛིན་ པ་དང་ལྔ་ལ་སོགས ་པའོ། །དགེ་སློང་མ་དགེ་འདུན་ལྷག་མ་ལས་དབྱུང་བ་ལ་ནི་མཚམས་ཀྱི་དགེ་འདུན་གཉིས་ཀ་ཚོགས་པའོ། །དགེ་སློང་མའི་སྡོམ་པ་སྦྱིན་པ་དང༌། ཚངས་པར་སྤྱོད་པ་ལ་སྡོམ་པ་སྦྱིན་བ་དང༌། འཁོར་ཉེ་བར་གནས་པའི་སྡོམ་པ་སྦྱིན་བ་དང༌། འཁོར་ཉེ་བར་འཇོག་པ་དང༌། འཁོར་མང་པོ་ཉེ་བར་འཇོག་པའི་གནང་བ་སྦྱིན་བ་ལ་ནི་ཡུལ་དབུས་སུ་དགེ་དགེ་སློང་མ་བཅུ་གཉིས་ལ་ སོགས་པའོ། །བསྙེན་བར་རྫོགས་པ ་ལ་ནི་དགེ་སློང་བཅུ་དང་དགེ་སློང་མ་བཅུ་གཉིས་ལ་སོགས་པའོ། །ལས་གཞན་ཐམས་ཅད་ལ་ནི་བཞི་ལ་ སོགས་པའོ་ཞེས་གསུངས་པའི་གྲངས་དེ་བཞིན་ཚང་བའོ། །ལས་བརྗོད་པ ་ཞེས་བྱ་བ་ནི་གསོལ་བ་འབའ་ཞིག་གི་ལས་དང་གསོལ་བ་དང༌། གཉིས་ཀྱི་ལས་དང༌། གསོལ་བ་དང་བཞིའི་ལས་བརྗོད་པ་དག་ལས་གང་ལ་གང་བྱ་བར་གསུངས་པ་དེ་ལས་མ་ཆད་པ་སྟེ། ལྷག་མ་ལ་ནི་ཉེས་པ་མེད་དོ། །ལས་བྱེད་པ་ཞེས་བྱ་བ་ནི་བསྙེན་པར་རྫོགས་པའི་ལས་བྱས་ པ་ལ་སོགས ་པའོ། །ལས་ནི་གསོལ་བ་དང་བརྗོད་པ་དང་སོ་སོར་ཐར་པ་འདོན་པ་དང༌། དག་གང་བྱེའོ་ཞེས་བྱ་བ་ནི་ལས་བརྗོད་པའོ། །སོ་སོར་ཐར་པ་འདོན་པ་ཞེས་བྱ་བ་ནི་གསོ་སྦྱོང་ངོ༌། །དགག་དབྱེ་ཞེས་བྱ་བ་ནི་ལས་བརྗོད་པ་ཞེས་བྱ་བའི་དོན་ཏོ། །ཐོས་པར་བྱ་
བ་མ་ཡིན་པས་ཐོས་པ་ནི་མི་འཆགས་པར་མི་འགྱུར་རོ་ཞེས་བྱ་བ་ནི། གང་ཞིག་དེ་མ་ཡིན་ པ་ལ་སོགས ་པའི་དབང་དུ་བྱ་སྟེ། སྨོས་པ་དེ་ནི་དག་གིས་དེ་ཐོས་པར་བྱ་བ་མ་ཡིན་པས་དེ་འདའ་བར་བྱེད་པ་ལ་ལྟུང་བ་ཙམ་དུ་འགྱུར་གྱི་མི་འཆགས་པར་མི་འགྱུར་རོ། །དེ་ལྟར་ཡང་ཀུན་དགའ་བོ་ཁྱོད་ཀྱིས་རྒྱལ་པོ་གསོ་སྦྱོང་གི་ཕྱིར། སོ་སོར་ཐར་པ་འདོན་པ་ཉན་དུ་མ་བཅུག་པ་ཉེས་བྱས་སོ་ཞེས་གསུངས་པ་ཡིན་ནོ། །མི་འཆགས་པ་མི་བྱའོ་ཞེས་བྱ་བ་ནི་ལས་གང་འདི་ལ་འཆགས་པ་མེད་པ་དེ་ནི་མི་འཆགས་པ་སྟེ་ལས་དེ་མི་བྱའོ། །གང་ཞིག་ཆོས་མ་ཡིན་པའི་ལས་རྣམས་ལ་དེས་ནི་དགེ་འདུན་ལ་ཡང་འགལ་ཚབས་ཅན་དུ་འགྱུར་རོ་ཞེས་བྱ་བ་འདོད་པ་བས་ན་མདོ་འདིའོ། །ད་ནི་ཆོ་ག་ལས་འདས་ན་ལས་མི་འཆགས་སོ་ཞེས་སྨྲས་པ་གང་ཡིན་པ་འདི་བརྗོད་པར་བྱ་སྟེ། ཆོས་མ་ཡིན་པས་མི་བྱའོ་ཞེས་བྱ་བ་ལ། ཆོས་མ་ཡིན་པ་ཞེས་བྱ་བ་ནི་གླེང་བར་མ་བྱས་དྲན་བར་མ་བྱས་པར་མཐུས་མངོན་སུམ་དུ་མ་གྱུར་བ་ནི་ཆོས་མ་ཡིན་པར་རིག་པར་བྱའོ། །མ་ཞི་བའི་གཞི་ལ་བརྟེན་ནས་སྐུལ་བ་བོས་དམ་བཅས་པ་ལ་མངོན་སུམ་དུ་རྟོག་པར་བྱེད་དེ། སྨོན་ལམ་གྱི་ལས་བྱེད་པ་ལ་ སོགས་པ ་ལས་ཀྱི་གཞི་ལས་གཞན་པ་ལ་གསུངས་པའི་ཆོ་ག་དེ་བསྡུས་བའི་མདོ་འདིའོ། །མི་མཐུན་བ་དག་མི་བྱའོ་ཞེས་བྱ་བ་ནི་ལས་རྣམས་མི་བྱའོ། །ཚོགས་ཀྱི་མི་བྱའོ་ཞེས་བྱ་བ་ནི་ལས་རྣམས་མི་བྱའོ། །བཞི་ལ་སོགས་པའི་ལས་དག་བྱེད་ན་དགེ་འདུན་གྱི་དབྱེན་ཉིད་དུ་འགྱུར་བའི་ཕྱིར་རོ། །དེ་ལྟ་བས་ན་འདི་སུན་ཕྱུང་བའོ། །དགེ་འདུན་དུ་མ་གྱུར་པ་དག་གིས་མི་བྱའོ་ཞེས་བྱ་བ་ནི་ལས་མི་བྱའོ་ཞེས་བྱ་བར་སྦྱོར་རོ། །ལས་གང་ལ་དུ་དག་དགེ་འདུན་ཉིད་ཡིན་ཞེ་ན། དེའི་ཕྱིར་དབྱུང་བ་ལ་ནི་ཉི་ཤུ་ལ་ སོགས་པ ་ཉིད་དགེ་འདུན་ཡིན་ནོ། །བསྙེན་པར་རྫོགས་ པ་ལ་ནི་བཅུ་ལ་སོགས ་པའོ། །མཐའ་འཁོབ་དག་ཏུ་མེད་ན་ནི་འདུལ་བ་འཛིན་བ་དང་ལྔ་ལ་སོགས་པའོ་ཞེས་བྱ་བ་ནི་དགེ་འདུན་བཅུ་ལ་ སོགས་པ ་མ་རྙེད་པ་ལ་ཆོ་ག་འདིའོ་ཞེས་བྱ་བ་ནི་བསྒྲུབ་པ་ནི་དངོས་གཞིའི་ཆོ་ག་ལ་བརྟེན་པ་ཉིད་རིགས་པ་དང་མཐུན་པའོ། །དགེ་སློང་མ་རྣམས་ལ་ཡང་ཆོ་ག་འདི་ཡིན་ཏེ། དེ་རྣམས་ལ་ནི་ཡུལ་མཐའ་འཁོབ་ཏུ་འདུལ་བ་འཛིན་པར་གཏོགས་པའི་དྲུག་ལ་སོགས་པའི་ཚོགས་ལ་བཅུ་གཉིས་ཀྱི་ཚོགས་མ་རྙེད་ན་ཤེས་པར་བྱ་བ་ཉིད་དོ། །ལྷག་མ་ལ་ནི་བཞི་ལ་སོགས་
པའོ་ཞེས་བྱ་བ་ནི་དབྱུང་བ་དང་བསྙེན་པར་རྫོགས་པར་བྱ་བའི་ལས་མ་གཏོགས་པ་དེ་དག་གི་ལྷག་མའི་ལས་ལ་ནི་དགེ་སློང་བཞི་ལ་ སོགས་པ ་དགེ་འདུན་ཉིད་དོ། །དགེ་སློང་མ་རྣམས་ཀྱི་ལས་ནི་ཐ་དད་པ་ཉིད་དོ་ཞེས་བྱ་བ་ནི་དེ་ལྟར་ཡང་དགེ་སློང་རྣམས་ཀྱི་ལས་དག་ཀྱང་ཐ་དད་ལ་དགེ་སློང་མ་རྣམས་ཀྱི་ལས་ཀྱང་ཐ་དད་དོ་ཞེས་བྱ་བ་དེའི་བསྡུ་བ་འདིའོ། །དགག་དབྱེ་ནི་དགེ་སློང་གི་དགེ་འདུན་ལ་ཡང་ངོ་ཞེས་བྱ་བ་ནི་དགེ་སློང་མའི་དགེ་འདུན་འབའ་ཞིག་ཏུ་མ་ཟད་ཀྱི། གཉིས་ཀའི་དགེ་འདུན་ཚོགས་པ་དགེ་སློང་དགག་དབྱེ་བྱེད་པ་པོ་མདུན་དུ་གནས་པ་ལ་དགག་དབྱེ་བྱེད་པས་དེ་རྣམས་ཀྱི་དགག་དབྱེ་ཞེས་བྱ་བ་རྣམ་པར་གཞག་པའོ། །གསོ་སྦྱོང་ནི་དེ་དང་མཐུན་པར་འགྲུབ་པ་རྣམས་ཀྱིས་སོ་ཞེས་བྱ་བ་ལ། དེ་དང་ཞེས་བྱ་བ་ནི་དགེ་སློང་གི་དགེ་འདུན་དེ་དང་སྟེ། དགེ་སློང་མ་རྣམས་ཀྱི་གསོ་སྦྱོང་ཐ་དད་པ་ཡིན་མོད་ཀྱི་གལ་ཏེ་དགེ་སློང་གི་དགེ་འདུན་དང་མཐུན་བར་གྱུར་པ་རྣམས་ཀྱི་འགྲུབ་ཀྱི་མ་གྱུར་པ་རྣམས་ཀྱི་ནི་མི་འགྲུབ་བོ་ཞེས་བྱ་བའི་དོན་ཏོ། །དགེ་སློང་མ་རྣམས་ཀྱིས་ནི་གསོ་སྦྱོང་ཐ་དད་པ་བྱའོ། །དགེ་སློང་མ་རྣམས་ཀྱིས་ཀྱང་ཐ་དད་པ་དགེ་སློང་མ་འདུན་བ་དང་གསོ་སྦྱོང་འབུལ་བ་དག་གིས་དབྱུང་བར་བྱ་ཞེས་བྱ་བ་དེ་ཙམ་ཞིག་འདིར་གསུངས་སོ། །འདུན་པ་དང་གསོ་སྦྱོང་འབུལ་བ་དག་གིས་དབྱུང་བར་བྱ་ཞེས་བྱ་བ་ཚིག་དེ་ལས་ཤེས་པར་གྱུར་པའི་དོན་ལ་མདོ་དེ་བྱས་པ་སྟེ། གང་གི་ཕྱིར་ཚོགས་པ་མི་མཐུན་པ་ལས་གཞན་འདུན་པ་འབུལ་བ་ལས་དགོས་པ་མེད་དེ་གསོ་སྦྱོང་གི་ལས་འདིར་གསོ་སྦྱོང་གིས་གསུངས་པ། གསོ་སྦྱོང་འབུལ་བ་ལ་ཡང་ཚོགས་པ་དེ་ཉིད་མི་མཐུན་པའི་བདག་ཉིད་ཅན་གྱི་དགོས་པ་ཞེས་བྱ་བར་ཤེས་བར་བྱའོ། །ཇི་ལྟར་དེ་དག་གིས་དགེ་སློང་གི་དགེ་འདུན་དང་གསོ་སྦྱོང་མཐུན་བར་བྱ་ཞེ་ན། དེའི་ཕྱིར་འདུན་པ་དང་གསོ་སྦྱོང་འབུལ་བས་དེ་བསྒྲུབ་པར་བྱའོ་ཞེས་བྱ་བ་སྨོས་ཏེ། འབུལ་བ་ཞེས་བྱ་བ་ནི་སྟོབས་པས་སོ། །འདུན་བ་དང་གསོ་སྦྱོང་དགེ་སློང་མའི་དགེ་འདུན་གྱི་འདུན་བ་དང༌། གསོ་སྦྱོང་དགེ་སློང་གི་དགེ་འདུན་ལ་དབུལ་བར་བྱ་བ་ནི་ཀུན་ནས་ཐོབ་པར་བྱ་སྟེ། དེ་ལྟར་ན་དེའི་ཚོགས་ལ་མཐུན་བ་འགྲུབ་པར་འགྱུར་རོ། །འདི་ལ་གཉིས་ཀྱིས་བྱའོ་ཞེས་བྱ་བ་ལ། འདི་ལ་ཞེས་བྱ་བ་ནི་འདུན་བ་དང་གསོ་སྦྱོང་འབུལ་བ་འདི་ལའོ། །གཉིས་ཀྱིས་ཞེས་བྱ་བ་ནི། དགེ་སློང་མ་གཉིས་ཀྱིས་
བསྟབས་པར་བྱའོ་ཞེས་བྱ་བའི་དོན་ཏོ། །དེ་གཉིས་ནུས་པ་ཉིད་ཀྱིས་སོ་ཞེས་བྱ་བ་ནི་འདུན་པ་དང་གསོ་སྦྱོང་འབུལ་བར་བྱེད་པ་དག་ལའོ། །མེད་ན་གཅིག་གོ་ཞེས་བྱ་བ་ནི་དགེ་སློང་མ་གཉིས་ཀས་ནུས་པ་ཉིད་མེད་ན་ནི་གཅིག་གིས་ནུས་པ་ཉིད་ལ་ནི་འབུལ་བར་བརྟེན་པར་བྱ་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །དགེ་སློང་གིས་དགེ་འདུན་གྱི་ལེན་པའི་དགེ་སློང་བསྐོ་བར་བྱའོ་ཞེས་བྱ་བ་ནི་གང་གི་ཕྱིར་འདུན་པ་དང་གསོ་སྦྱོང་དག་ལེན་པར་བྱེད་པ་དེ་བསྒོ་བར་བྱའོ། །དེས་སྒོ་ཁང་དུ་བསྡད་པར་བྱའོ་ཞེས་བྱ་བ་ལ། དེ་ཞེས་བྱ་བ་ནི་ལེན་པར་བསྐོས་པའི་དགེ་སློང་དེས་སོ། །འབྲོས་པ་ཤད་ཀྱིས་སྦྱང་ངོ་ཞེས་བྱ་བ་ནི་ལེན་པར་བསྐོས་པའི་དགེ་སློང་དེ་འཇིགས་པ་དང་བཅས་པའི་ཕྱིར་འབྲོས་པར་བྱེད་ན་དེ་ལ་དགེ་སློང་མ་དེ་གཉིས་ཀྱིས་ཤད་ཀྱིས་སྦྱང་བར་བྱའོ། །དེས་ཀྱང་དེ་བཞིན་ནོ་ཞེས་བྱ་བ་ནི་དགེ་སློང་མ་དེ་གཉིས་འབྲོས་ནས་དགེ་སློང་དེས་ཀྱང་དེ་བཞིན་དུ་ཤད་ཀྱིས་སྦྱང་བར་བྱའོ། །འབྲོས་པར་མི་བྱའོ་ཞེས་བྱ་བ་ནི་དགེ་སློང་དེ་དང་འདུན་བ་དང་གསོ་སྦྱོང་འབུལ་བའི་དགེ་སློང་མ་དེ་གཉིས་ཀྱིས་འབྲོས་པར་མི་བྱའོ། །མི་ཤེས་ན་མིང་རུས་དྲིའི་ཞེས་བྱ་བ་ནི་ལེན་པར་བྱེད་པའི་དགེ་སློང་དེ་མི་ཤེས་ན་འབུལ་བར་བྱེད་པའི་དགེ་སློང་མ་དེ་གཉིས་ཀྱིས་དེའི་མིང་རུས་དྲི་བར་བྱའོ། །མགུ་བ་དང་དབྱུང་བ་ནི་གཉིས་ཀ་ཚོགས་པ་ལའོ་ཞེས་བྱ་བ་ནི་དགེ་སློང་མ་གཉིས་ཀྱིས་མགུ་བར་བྱ་བ་དང་དབྱུང་བ་ནི་དགེ་སློང་མའི་དགེ་འདུན་འབའ་ཞིག་ལ་བྱ་བར་མ་ཟད་ཀྱི། གཉིས་ཀའི་དགེ་འདུན་ཚོགས་པ་དུས་གཅིག་ཏུ་གནས་གཅིག་ན་འཁོད་པ་དག་ལ་བྱའོ། །བསྙེན་པར་རྫོགས་པར་བྱས་པ་ཡང་ངོ་ཞེས་བྱ་བ་ནི་དེ་ཡང་གཉིས་ཀའི་དགེ་འདུན་ཚོགས་པ་ལ་བྱའོ། །འདི་ལ་དེ་དག་གི་ཚོགས་ནི་བཅུ་གཉིས་སོ་ཞེས་བྱ་བ་ནི་དགེ་སློང་མ་བསྙེན་པར་རྫོགས་པར་བྱ་བ་འདི་ལ་དགེ་སློང་མ་དེ་དག་གི་ཚོགས་བཅུ་གཉིས་ཡན་ཆད་དོ། །སྔོན་རོལ་གྱི་སྡོམ་པ་གཉིས་དང༌། འཁོར་དང་འཁོར་མང་པོ་ཉེ་བར་གཞག་པའི་གནང་བ་སྦྱིན་བ་དང་བཅས་པའི་དགེ་འདུན་གྱི་མཐའོ་ཞེས་བྱ་བ་ནི་དེ་ནི་དགེ་སློང་མ་བསྙེན་པར་རྫོགས་པའི་སྔོན་རོལ་གྱི་སྡོམ་པ་གཉིས་པོ་བསླབ་པའི་སྡོམ་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའོ། །ཡང་འཁོར་ཉེ་བར་འཇོག་པའི་གནང་བ་དང་ལྷན་ཅིག་ཏུ་འཁོར་མང་པོ་ཉེ་བར་འཇོག་པའི་གནང་བ་དང་ལྷན་ཅིག་ཏུ་དེས་འདིར་
བསྙེན་པར་རྫོགས་པ་དང་བཅས་པའི་དགེ་སློང་མའི་གྲངས་ཀྱི་མཐའ་ཡིན་ནོ། །འདི་ཡང་སྡོམ་པ་བཞི་པོ་སྦྱིན་པ་ལ་དེ་རྣམས་ལ་ཚོགས་བཅུ་གཉིས་ཡན་ཆད་ཁོ་ནས་སོ་ཞེས་བྱ་བའི་དོན་ཏོ། །ལྷག་མ་དག་གི་ཚོགས་ནི་བཞིའོ་ཞེས་བྱ་བ་ནི་དགེ་སློང་མའི་ལས་ལྔ་པོ་ཇི་སྐད་བསྟན་པ་དེ་དག་གི་ལྷག་མ་དགེ་སློང་མའི་དགེ་འདུན་གྱི་ལས་གཞན་ཐམས་ཅད་ལ་ནི་དགེ་སློང་མ་བཞིའི་ཚོགས་ཡན་ཆད་ཀྱིས་ལས་བྱར་རུང་ངོ༌། །དེ་ལྟར་ཡང་འདིར་གཞུང་ནི། དགེ་སློང་མ་རྣམས་ཀྱི་ཚོགས་བཞིས་ལས་དག་བྱའོ་ཞེས་བྱ་བ་ལ་ སོགས་པ ་ཡིན་ནོ། །ལས་བྱེད་པ་པོས་མ་ནུས་ན་དེས་དགེ་སློང་གིས་བྱས་པའི་ཚིག་ངེས་པར་བརྟགས་ན་རུང་ངོ་ཞེས་བྱ་བ་ནི་དགེ་སློང་མ་ལས་བྱེད་པ་ལས་བྱེད་མི་ནུས་ན་དེས་དགེ་སློང་གིས་ལས་བྱེད་པའི་ཚིག་ངེས་པར་བརྟགས་ཤིང་ཐོས་ན་དེས་ལས་བྱས་པ་ཉིད་དུ་རུང་བར་འགྱུར་རོ་ཞེས་བྱ་བའི་དོན་ཏོ། །ཇི་ཙམ་ཡན་ཆད་ཅེ་ན། དེའི་ཕྱིར་འདི་ལྟར་ཅང་མི་གསུང་བས་ཞེས་བྱ་བའི་གོང་ཡན་ཆད་དོ་ཞེས་བྱ་བ་སྨོས་ཏེ། དགེ་སློང་འཕགས་མ་རྣམས་ཀྱིས་བཟོད་ཅིང་གནང་ནས་ཞེས་བྱ་བ་དེ་ནས་ཇི་སྲིད་དུ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་བར་དུ་དགེ་སློང་མ་ལས་བྱེད་པ་ཉིད་ཀྱིས་ངེས་པ་ཁོ་ནར་བརྗོད་པར་བྱ་དགོས་སོ། །འདིར་གཞུང་ནི། མགུ་བ་དང་དབྱུང་བར་གཏོགས་པའི་དགེ་སློང་མའི་སོ་སོར་ཐར་པ་དང༌། དེའི་རྣམ་པར་འབྱེད་བ་ལས་འཁོར་ཉེ་བར་འཇོག་པ་དང༌། འཁོར་མང་པོ་ཉེ་བར་འཇོག་པའི་གནང་བ་སྦྱིན་པ་དང༌། དགེ་སློང་མའི་རྣམ་པར་འབྱེད་པ་ལས། སོ་སོའི་དགེ་འདུན་གྱི་ཚད་གཞན་དུ་དེ་ཐ་མའོ་ཞེས་གསུངས་པ་དང༌། འདིར་ཕྲན་ཚེགས་ལས་ཚིག་ངེས་པར་བཏགས་ན་ཞེས་བྱ་བ་ལ་ སོགས་པ ་གསུངས་སོ། །དགེ་སློང་མའི་རྣམ་པར་འབྱེད་པ་ལས། བསླབ་པའི་སྡོམ་པ་སྦྱིན་པ་དང་སོ་སོའི་དགེ་འདུན་གྱི་གྲངས་ཀྱང་གསུངས་སོ། །དགག་དབྱེར་གཏོགས་པའི་དགག་དབྱེའི་གཞི་ནི་དགེ་སློང་མའི་སོ་སོར་ཐར་པ་དང༌། དེའི་རྣམ་པར་འབྱེད་པ་དག་ལས་ཀྱང་ངོ༌། །གསོ་སྦྱོང་དུ་གཏོགས་པའི་དགེ་སློང་མའི་སོ་སོར་ཐར་པ་དང༌། དེའི་རྣམ་པར་འབྱེད་པ་དག་ལས་ཀྱང་ངོ༌། །མི་སྡུག་པར་འགྲེང་བ་ནི་ཁ་སྐོང་བ་ཉིད་མ་ཡིན་ནོ་ཞེས་བྱ་བ་ལ། མི་སྡུག་བར་འགྲེད་བ་གང་ཡིན་པ་དེ་ནི་དགེ་འདུན་ཁ་སྐོང་བར་བྱེད་པ་པོ་མ་ཡིན་པ་ཞེས་བྱ་བའི་དོན་ཏོ། །
གང་ལ་ལས་བྱ་བ་ཡང་མ་ཡིན་ནོ་ཞེས་བྱ་བ་ནི། དེ་ཉིད་ཀྱང་ཁང་སྐོང་བ་ཉིད་མ་ཡིན་ནོ། །དེའི་ཕྱིར་འདུན་པ་དང་ཡོངས་སུ་དག་པའི་ཆོ་ག་ལས་མ་ཡིན་པ་ཉིད་དོ་ཞེས་བྱ་བ་ནི། གང་ཞིག་འདུན་པ་དང་ཡོངས་སུ་དག་པར་གཏོགས་པ་འབུལ་བར་བྱེད་པ་དང༌། བརྗོད་པའི་ཆོ་ག་ཚོགས་པ་མི་མཐུན་པའི་དོན་དུ་རྗེས་སུ་གནང་བ་དེའི་དབང་གིས་ཁ་སྐོང་བ་ཉིད་དུ་མ་ཡིན་ནོ། །དེ་འབུལ་བ་པོ་ལས་སྐྱེས་པར་མི་འགྱུར་བ་དེ་ལྟ་བས་ན། གསུམ་གྱིས་འདུན་བ་དང་ཡོངས་སུ་དག་པ་དག་བླངས་ནས་གསོ་སྦྱོང་དང་དགག་དབྱེ་དག་མི་བྱ་སྟེ། ལས་ཀྱི་འདུན་པ་གཞན་མ་བླངས་པར་ཞེས་བྱ་བའི་དོན་ཏོ། །དེ་གཉིས་དབུལ་བར་བྱ་བ་དག་མ་ཡིན་ནོ་ཞེས་བྱ་བ་ནི་ཁ་སྐོང་བ་ལ་འདུན་བ་ཡོངས་སུ་དག་པ་དེ་གཉིས་འོས་པ་ཉིད་མ་ཡིན་ཏེ། དགེ་འདུན་གྱི་ཁ་སྐོང་བར་བྱེད་པ་པོས་འདུན་བ་དང་ཡོངས་སུ་དག་པ་གཉིས་དབུལ་བར་བྱ་བ་ཉིད་མ་ཡིན་ནོ་ཞེས་བྱ་བའི་དོན་ཏོ། །དགག་དབྱེ་བྱེད་པ་ཉིད་དུ་མི་བསྐོའོ་ཞེས་བྱ་བ་ནི་ཁ་སྐོང་བར་བྱེད་པ་ཞེས་བྱ་བར་སྦྱར་རོ། །བསྙེན་པར་མ་རྫོགས་པ་དང་ཉམས་པ་དང་མཚམས་མེད་པ་བྱས་པ་དང༌། སྡིག་པའི་ལྟ་བ་ཅན་དང་ས་གཞན་ན་གནས་པ་དང༌། ཐ་དད་པར་གནས་པ་རྣམས་མ་ཡིན་ནོ་ཞེས་བྱ་བ་ནི་དེ་དག་ཀྱང་ཁ་སྐོང་བ་ཉིད་མ་ཡིན་ནོ་ཞེས་བྱ་བའི་དབང་དུ་བྱས་པའོ། །དེ་ལ་ཉམས་པ་ཞེས་བྱ་བ་ནི་ཕམ་པའོ། །འདི་ལ་བསྙེན་པར་མ་རྫོགས་པ་ཞེས་བྱ་བ་སྨོས་སོ། །ཉམས་པ་ཞེས་བྱ་བ་སྨོས་པ་ཡང་མཚམས་མེད་པ་བྱས་པའི་ཚིག་གོ །གང་གི་ཕྱིར་མ་ཉམས་པར་འགྱུར་ལ་མཚམས་མེད་པ་བྱས་པ་པོར་ཡང་འགྱུར་བ་དེ་ནི་འདི་ལྟ་སྟེ། དེ་བཞིན་གཤེགས་པའི་དྲུང་དུ་ངན་སེམས་ཀྱིས་ཁྲག་འབྱིན་བ་དང༌། དགེ་འདུན་གྱི་དབྱེན་ནོ། །ལྟ་བའི་རྣམ་པ་དྲུག་ཅུ་རྩ་གཉིས་པོ་དག་ལས་གང་ཡང་རུང་བ་ལྟ་བ་མ་ཡིན་པར་གཏོགས་པ་དེ་ནི་སྡིག་པའི་ལྟ་བ་ཅན་ནོ། །འདིས་ནི་ཐམས་ཅད་ལྟ་བ་མཐུན་བ་ཚུལ་ཁྲིམས་ཡོངས་སུ་དག་པ་འདུས་པ་འཁོད་པ་དག་གིས་གསོ་སྦྱོང་དང༌། དགག་དབྱེ་དང་གསོལ་བ་དང༌། གཉིས་དང་གསོལ་བ་དང་བཞིའི་ལས་བྱའོ་ཞེས་གསུངས་པ་དེ་བསྡུས་པ་ཡིན་ནོ། །ས་གཞན་ན་གནས་པ་ཞེས་བྱ་བ་ནི་སྤོ་བ་ལ་ སོགས་པ ་ཆད་པ་ནི་ལས་བྱེད་པའོ། །འདིས་ནི་བཞིའི་ཚོགས་ཀྱིས་ལས་བྱས་ཏེ། སྤོ་བ་བྱེད་པ་དང་ལས་བཞིས་བྱེད་པ་ཆོས་མ་ཡིན་པས་ལས་བྱེད་པ་ཡིན་ནོ། །
གཞི་ནས་སྤོ་བ་བྱེད་པ་དང༌། མགུ་བ་སྤྱོད་པ་དང་གཞི་ནས་མགུ་བ་སྤྱོད་པ་སྤངས་པ་དང་བཞིས་བྱེད་ན་ཆོས་མ་ཡིན་བ་བྱེད་པ་ཡིན་ན་ཞེས་བསྡུས་བ་ཡིན་ནོ། །འདིར་ཆོས་མ་ཡིན་པའི་ལས་བྱེད་པ་དཔེ་ཙམ་ཡིན་ཏེ། སྤོ་བ་བྱེད་པ་རྣམས་ལ་སྤངས་པའི་ཚིག་ཏུ་རྣམ་པར་གནས་པ་ཡིན་ནོ། །སྤོ་བ་བྱེད་པ་ལ་ སོགས་པ ་སྨོས་པ་ནི་བསླབ་པ་བྱིན་པ་ཡང་བཟུང་བར་གྲུབ་སྟེ། བསླབ་པ་བྱིན་པ་ནི་ཆོས་དམན་པ་ཡིན་པའི་ཕྱིར་རོ། །ཐ་དད་པར་གནས་པ་ཞེས་སྨོས་པ་ནི་འདིར་ཆོས་དང་མཐུན་པའི་ཕྱོགས་ཁས་བླངས་པ་ཡིན་པར་ཤེས་པར་བྱ་སྟེ། ཆོས་མ་ཡིན་པའི་ཕྱོགས་དང་མཐུན་པར་ཁས་བླངས་པའི་ཐ་དད་པར་གནས་པ་ནི་ཁོངས་སུ་བསྡུ་བ་བསྒྲུབ་པའི་དོན་དུ་ཆོས་མ་ཡིན་བའི་ཕྱོགས་དང་མཐུན་བར་ཁས་བླངས་པའི་ཐ་དད་པར་གནས་པ་ནི་སྡིག་པའི་ལྟ་བ་ཅན་ཞེས་སྨོས་པ་ཉིད་ཀྱིས་བསྡུས་པའི་ཕྱིར་རོ། །འཁྲུལ་པ་དང་བཅས་པ་ཡང་ངོ་ཞེས་བྱ་བ་ཡང༌། ཁ་སྐོང་བ་ཉིད་མ་ཡིན་ནོ་ཞེས་བྱ་བ་ནི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲས་སྨོས་ཏེ། ཐམས་ཅད་ཚུལ་ཁྲིམས་ཡོངས་སུ་དག་པ་ཞེས་གསུངས་བས་དེའི་ཕྱིར་མདོ་འདི་བྱས་སོ། །འདི་ཚུལ་ཁྲིམས་ཡོངས་སུ་དག་པ་ནི་ལྟུང་བ་ཐམས་ཅད་ཡོངས་སུ་དག་པས་ཡོངས་སུ་དག་པ་ཡིན་གྱི་ཕམ་པར་འགྱུར་བ་ཉིད་ཙམ་གྱིས་ནི་མ་ཡིན་ནོ། །རང་བཞིན་དུ་གནས་པ་མ་ཡིན་པ་དེ་ཉིད་ཀྱིས་ཁ་སྐོང་བར་འོས་པ་ཉིད་མ་ཡིན་ནོ། །འདིར་གཞུང་ནི་སིལ་བུ་དག་ལས། བཙུན་བ། ཇི་ཙམ་གྱིས་རང་བཞིན་དུ་གནས་པ་མ་ལགས་པར་འགྱུར། ཉེ་བ་འཁོར་ཇི་ཙམ་གྱིས་ལྷག་པར་སྤྱད་པ་མ་ཡིན་པ་ལྷག་པར་སྤྱོད་ཅིང་དགེ་སློང་གི་བསླབ་པ་ལ་མི་བསླབ་པ་སྟེ། ཉེ་བ་འཁོར་དེ་ཙམ་གྱིས་རང་བཞིན་དུ་གནས་པ་མ་ཡིན་པར་འགྱུར་རོ་ཞེས་གསུངས་པ་ཡིན་ནོ། །འདིས་ནི་གང་ཡང་རུང་བས་འཁྲུལ་པར་གྱུར་ཅིང་དགེ་སློང་གི་རང་བཞིན་ལས་ཉམས་པར་འགྱུར་བ་ཉིད་ཅེས་བྱ་བའོ། །དེ་ཉིད་ཀྱིས་རང་བཞིན་དུ་གནས་པ་ཡིན་པ་དེ་བསྟན་ཏོ། །རང་བཞིན་དུ་གནས་པ་མ་ཡིན་པ་དེ་ཉིད་ཀྱིས་ནི་ཕྱིར་ཟློག་པར་འོས་པ་ཉིད་མ་ཡིན་པར་གསུངས་ཏེ། དེ་ལྟར་ཡང་འདིར་གཞུང་ནི། བཙུན་བ། གང་ཟག་དུ་དག་གིས་སླར་བཟློག་པ་མི་ཆགས། ཉེ་བ་འཁོར་བཅུ་གཉིས་ཏེ། བྱིས་པ་དང་རྨོངས་པ་མི་གསལ་བ་དང༌། མི་མཁས་པ་དང་ངོ་ཚ་མེད་པ་དང༌།
ནད་དང་བཅས་པ་དང༌། མཚམས་ཀྱི་ཕྱི་རོལ་ན་གནས་པ་དང༌། གནས་ནས་ཕྱུང་བ་དང་ཚིག་ཡང་དག་པར་མ་བསྡམས་པ་དང༌། སྤྱོད་ལམ་ལས་ཉམས་པ་དང༌། རང་བཞིན་དུ་གནས་པ་མ་ཡིན་པ་དང༌། བསླབ་པ་བྱིན་པས་སོ་ཞེས་གསུངས་པ་ཡིན་ནོ། །འདིར་དགེ་སློང་ཉམས་པ་ལ་རང་བཞིན་དུ་གནས་པ་མ་ཡིན་པ་དེའི་དོན་ཏོ། །སུ་ཞིག་འཁྲུལ་པ་མ་ཡིན་པ་ལ་ནི་དགེ་སློང་གི་རང་བཞིན་དུ་གྱུར་པ་ཉིད་མ་ཡིན་ནོ། །གང་གིས་འཁྲུལ་པ་དང་བཅས་པ་ཡིན་ཞེ་ན། དེའི་ཕྱིར་བསྡམས་པར་བྱས་པས་ཀྱང་ཡིན་གྱི་བཤགས་པར་བྱ་བ་འབའ་ཞིག་གིས་ཡིན་པར་མ་ཟད་དོ་ཞེས་བྱ་བ་སྨོས་ཏེ། འདིར་གཞུང་ནི་དགག་དབྱེའི་གཞི་ལས། གལ་ཏེ་དེས་བསྡམ་པར་བྱ་བ་རྣམས་ཞེ་ན་བསྡམ་པར་བྱ་སྟེ། དགག་དབྱེ་བྱའོ་ཞེས་གསུངས་པ་ཡིན་ཏེ། དེང་དང་པོར་བྱ་སྟེ། དེ་ཉིད་ཀྱི་མཐར་གཞུང་ནི་རང་བཞིན་བྱེད་པ་དང༌། རྣམ་པ་དུ་མས་ཞེས་གསུངས་པ་ཡིན་ནོ། །རང་བཞིན་དུ་གནས་ཏེ་སེམས་པ་ལ་འདུག་པར་བྱའོ་ཞེས་བྱ་བ་འདི་ལ་གཞན་ཕམ་བ་བྱེད་པ་རྣམས་བསྟན་པའི་ཕྱིར་འཁྲུལ་པ་དང་བཅས་པ་ཞེས་བྱའོ། །འདིར་འཁྲུལ་པ་ཡོ་བྱད་འདི་བྱེད་བཞིན་ལ་འཁྲུལ་པ་མ་ཡིན་པ་ལྟར་བལྟ་བར་བྱ་བ་ཉིད་ཅེས་བྱ་བ་དེ་ལ་བརྗོད་པར་བྱ་སྟེ། བྱིན་གྱིས་བརླབས་པས་དག་པ་ཉིད་དུ་འགྱུར་རོ་ཞེས་བྱ་བ་སྨོས་ཏེ། དགེ་འདུན་ལྷག་མ་དང་སྤང་པའི་ལྟུང་བྱེད་ནི་བྱིན་གྱིས་བརླབས་ཏེ་འདུག་པར་བྱའོ། །ལྷག་མ་བསྡམ་པར་བྱ་བ་ལེན་པར་བྱེད་ན་བྱིན་གྱིས་བརླབས་པ་བསྐོ་བ་འདི་ལ་ཁ་སྐོར་བ་མ་ཡིན་པ་ཉིད་ཅེས་བྱ་བ་དེ་མཐུན་པ་ཉིད་དོ། །ནུས་པ་ཉིད་ཡིན་ན་མི་འགྱུར་རོ་ཞེས་བྱ་བ་ནི་འཆགས་ནུས་པ་ཉིད་ཡིན་ན། བྱིན་གྱིས་བརླབས་པས་དག་པ་ཉིད་དུ་མི་འགྱུར་བའོ། །གང་གི་ཕྱིར་འདི་སྐད་བསྟན་ཏེ། གལ་ཏེ་ཕམ་པར་འགྱུར་བ་དག་ཤེས་ན་བསྙིལ་ཏེ་དགག་དབྱེ་བྱའོ། །གལ་ཏེ་དགེ་འདུན་ལྷག་མ་དག་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །གལ་ཏེ་སྤོང་བ་ཤེས་ན་བྱིན་གྱིས་བརླབས་ཏེ་དགག་དབྱེ་བྱའོ། །གལ་ཏེ་ལྟུང་བྱེད་དེ་དག་ཤེས་ན་བཤགས་ཏེ་དགག་དབྱེ་བྱའོ། །གལ་ཏེ་སོ་སོར་བཤགས་པར་བྱ་བ་དག་ཤེས་ན་སོ་སོར་བཤགས་ཏེ་དགག་དབྱེ་བྱའོ། །གལ་ཏེ་བཤགས་པར་བྱ་བའི་ཉེས་བྱས་དག་ཤེས་ན་བཤགས་ཏེ་དགག་དབྱེ་བྱའོ། །གལ་ཏེ་བསྡམས་པར་བྱ་བའི་ཉེས་
བྱས་དག་ཤེས་ན་བསྡམས་ཏེ་དགག་དབྱེ་བྱའོ་ཞེས་གསུངས་པ་ཡིན་ནོ། །གང་ཞིག་སྐབས་འདིར་ལྷུང་བཟེད་ལ་ སོགས་པ ་རྣམས་ཀྱི་ཚིག་འདིས་བྱས་པར་འགྱུར་བར་ནུས་པ་ཉིད་ཡིན་ན་བྱིན་གྱིས་བརླབས་པས་དག་པ་འགྲུབ་བ་ཉིད་དུ་མི་འགྱུར་རོ་ཞེས་བསྟན་པ་ཡིན་ནོ། །ཡང་ནུས་པ་ཉིད་གང་ཞེ་ན། དེའི་ཕྱིར། དེའི་ཚེ་ལེན་པ་ཡོད་ན་ལྟུང་བྱེད་འབའ་ཞིག་ཏུ་གྱུར་པ་དང༌། སོ་སོར་བཤགས་པར་བྱ་བ་དང་ཕྱིར་བཅོས་པར་བྱ་བའི་ཉེས་བྱས་ནི་ནུས་པ་ཉིད་ཡིན་ཏེ་བཤགས་པ་ཙམ་ཡིན་བའི་ཕྱིར་རོ་ཞེས་བྱ་བ་སྨོས་ཏེ། དེའི་ཚེ་ལེན་པ་ཡོད་ན་ཞེས་བྱ་བ་ནི་ཉི་མ་དེ་ཉིད་ལ་ལས་བྱེད་པ་དེའི་ཚེ་ཕྱིར་བཅོས་པར་ནུས་པ་ཉིད་དོ། །གང་དག་བཤགས་པ་ལ་ལེན་པ་གང་གི་ཕྱིར་དེ་རྣམས་ལ་དེའི་མདུན་དུ་བཤགས་པ་ཙམ་གྱིས་ཕྱིར་བཅོས་པ་དག་ཡིན་བའི་ཕྱིར་རོ། །ལྟུང་བ་ཆུང་བ་ལ་ནི་འདུ་ཤེས་ཇི་ལྟ་བ་བཞིན་དུ་བསྒྲུབ་པར་བྱའོ་ཞེས་བྱ་བ་ནི་ལྷག་མ་དང་བཅས་པར་འདུ་ཤེས་པ་རྣམས་ཀྱིས་ནི་བྱིན་གྱིས་བརླབ་ཏུ་གཞུག་པའམ། ཕྱིར་བཅོས་པ་བྱེད་དུ་བཅུག་ནས་དེ་དང་ལྷན་ཅིག་ལས་བྱའོ། །ལྷག་མ་མེད་པར་འདུ་ཤེས་པ་རྣམས་ཀྱིས་ནི་དེ་མེད་པར་ལས་བྱའོ། །གཅིག་ལ་དེ་ལྟར་བསྙིལ་བ་དང༌། མི་བསྙིལ་བ་དང་ཕྱིར་བཅོས་པ་རྣམ་པ་དུ་མ་ནི་རིགས་པ་ཁོ་ནའོ་ཞེས་བྱ་བ་ནི། ལྷག་མ་མེད་པར་འདུ་ཤེས་པ་རྣམས་ཀྱིས་ནི་དེ་བསྙིལ་བར་བྱའོ། །ལྷག་མ་དང་བཅས་པར་འདུ་ཤེས་པ་རྣམས་ཀྱིས་ནི་བསྡུ་བར་བྱའོ། །བཤགས་པར་བྱ་བ་འདུ་ཤེས་པ་རྣམས་ཀྱིས་ནི། བཤགས་པའི་བདག་ཉིད་ཀྱི་ཕྱིར་བཅོས་པར་བྱེད་དུ་གཞུག་གོ །བསྡམ་པར་བྱ་བར་འདུ་ཤེས་པ་རྣམས་ཀྱིས་ནི་བསྡམས་པའི་བདག་ཉིད་ཀྱིས་ཞེས་བྱ་བ་ལ་ སོགས་པ ་གཅིག་ལ་མི་རིགས་པར་འགྱུར་བ་ཞེས་བྱ་བའི་དོན་ཏོ། །དེ་དག་ནི་བྱེད་པ་པོ་ཉིད་མ་ཡིན་ནོ་ཞེས་བྱ་བ་ནི་བསྙེན་པར་མ་རྫོགས་པ་ལ་ སོགས་པ ་རྣམས་ལས་ཀྱི་བྱེད་པ་པོ་མ་ཡིན་ནོ། །འདིར་གཞུང་ནི་གླེང་གཞི་དག་ལས། བཙུན་བ། བསླབ་པ་བརྩལ་བས་ལས་དག་བགྱིས་ན་བགྱིས་ཞེས་བརྗོད་པར་བགྱི་འམ་འོན་ཏེ་མ་བགྱིས་ཞེས་བརྗོད་པར་བགྱི། ཉེ་བ་འཁོར་མ་བྱས་ཞེས་བརྗོད་པར་བྱ་སྟེ། ཡང་བྱ་བ་དག་ཡིན་ནོ། །བཙུན་བ་ཟ་མ་དང་མ་ནིང་དང་དགེ་སློང་མ་སུན་ཕྱུང་བ་དང༌། མ་བཀུམ་པ་དང་
ཕ་བཀུམ་པ་དང་དགྲ་བཅོམ་པ་བཀུམ་པ་དང༌། དགེ་འདུན་གྱི་དབྱེན་བགྱིས་པ་དང༌། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། མུ་སྟེགས་ཅན་དང་མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང་ཐ་དད་པར་གནས་པ་དང་ངས་པར་མི་བགྱི་བས་ལས་དག་བགྱིས་ན་བགྱིས་ཞེས་བགྱིའམ། འོན་ཏེ་མ་བགྱིས་ཞེས་བརྗོད་པར་བགྱིས། ཉེ་བ་འཁོར་མ་བྱས་ཞེས་བརྗོད་པར་བྱ་བ་སྟེ། ཡང་བྱ་བ་མ་ཡིན་ནོ་ཞེས་གསུངས་པ་ཡིན་ནོ། །གང་ཚོགས་ཀྱི་ཁ་སྐོང་བར་མི་འོས་པ་དེ་དང༌། དེས་ལས་བྱ་བས་ཐག་དིང་དུ་སྤང་བ་ཁོ་ན་ཡིན་ཏེ། ལས་བྱེད་པ་ནི་ཚོགས་ཀྱིས་ཁ་སྐོང་བ་གཞན་དག་པས་ཆེས་གཅེས་པ་ཡིན་པའི་ཕྱིར་དང་དགེ་འདུན་གྱི་གཙོ་བོར་གྱུར་པ་ཡིན་པའི་ཕྱིར་རོ། །དགེ་འདུན་གྱི་སྒོར་གྱུར་པ་ཉིད་ཀྱིས་ལས་ཀྱི་ཡན་ལག་གཞན་ལས་ལས་ཀྱི་ཡན་ལག་འདི་ལ་གླེང་གཞི་ལས་གསུངས་པའི་བསླབ་པ་བརྩལ་བ་ལ་ སོགས་པ ་རྣམས་ལ་གཞན་རྣམས་ནི་ལྷག་མའོ། །འདིར་དེ་རྣམས་ལ་ལས་བྱེད་པ་པོ་ཉིད་བཀག་པ་ལ་ཡོངས་སུ་བསྡུ་བའོ། །ལྷག་མ་དང་བཅས་པའི་ཕྱིར་བཅོས་པ་ལ་ཞུགས་པ་ནི་འདོན་པར་བྱེད་པ་ཉིད་ཡིན་ནོ་ཞེས་བྱ་བ་ནི་སྔར་དེ་དག་ནི་བྱེད་པ་པོ་ཉིད་མ་ཡིན་ནོ་ཞེས་སྨོས་པ་དེའི་དམིགས་ཀྱིས་བསལ་བ་ཡིན་ཏེ། དགེ་འདུན་ལྷག་མའི་ལྟུང་བ་ཕྱིར་འཆོས་པ་ལ་ཞུགས་པ་སྦོ་བ་ལ་ སོགས་པ ་དང༌། དབྱུང་བ་ལ་སོགས་པས་གསོ་བར་ཞུགས་པའི་གང་ཟག་གིས་ནི་སོ་སོར་ཐར་པའི་མདོ་འདོན་དུ་རུང་བ་ཉིད་ཡིན་པའོ། །བསྐོ་བ་པོ་གཞན་ཡོད་ན་ཉེས་བྱས་ཙམ་གྱི་མི་འཆགས་པ་ནི་མ་ཡིན་ནོ། །དེ་ལས་གཞན་དེ་དག་གིས་ནི་ཐོས་པ་དང་བཅས་པར་མི་བྱའོ་ཞེས་བྱ་བ་ལ། དེ་ལས་གཞན་ཞེས་བྱ་བ་ནི་ལྷག་མ་དང་བཅས་པ་ཕྱིར་འཆོས་པ་ལ་ཞུགས་པས་སོ། །གཞན་བ་དེ་དག་གིས་ནི་ཞེས་བྱ་བ་ནི་བསྙེན་པར་མ་རྫོགས་པ་ལ་ སོགས་པ ་རྣམས་ཀྱིས་སོ། །ཐོས་པ་དང་བཅས་པར་མི་བྱའོ་ཞེས་བྱ་བ་ནི་ལས་སོ། །དེ་དག་ལས་ཁ་ཅིག་དམིགས་ཀྱིས་བསལ་བ་བསྟན་པའི་ཕྱིར། མ་སྤངས་པ་དང་མ་ལོག་པ་མ་གཏོགས་སོ་ཞེས་བྱ་བ་སྨོས་ཏེ། མ་སྤངས་ཞེས་སྨོས་པས་ནི་སྤངས་པ་ཐ་དད་པ་དང་གནས་ནས་ཕྱུང་བ་གཉིས་དམིགས་ཀྱིས་བསལ་བའོ། །ཉམས་པ་དང་མཚམས་
མེད་པ་བྱེད་པ་གཉིས་བྲལ་བའི་བསྙེན་པར་རྫོགས་པ་རྣམས་སྦོངས་པའི་ཕྱིར་ལོག་པ་ནི་འདིར་ལོག་པར་མངོན་བར་འདོད་པའོ། །ཉམས་པ་དང་མཚམས་མེད་པ་བྱེད་པ་གཉིས་ནི་ལོག་པ་ཡིན་ཏེ། གང་ལས་ཤེ་ན། བདེ་འགྲོར་འགྲོ་བ་དང་རང་བཞིན་དུ་གནས་པའི་རྗེས་སུ་མཐུན་བ་ཉིད་ལས་སོ། །བསྙེན་པར་རྫོགས་པ་དང་བྲལ་བ་ནི། ཡང་བསྙེན་པར་རྫོགས་པ་ལས་ལོག་པ་ཡིན་ནོ། །མ་སྤངས་པ་དང་མ་ལོག་པ་མ་གཏོགས་པ་དེ་ལས་གཞན་བ་འདི་རྣམས་ཀྱིས་ཐོས་པ་དང་བཅས་པར་ལས་མི་བྱའོ་ཞེས་བྱ་བ་འདིས་ནི་བསླབ་པ་དང༌། དེའི་ངོ་བོ་ཉིད་ཚོལ་བ་བྱིན་པ་དང༌། བསྡིགས་པ་དང་སྨད་པ་དང་བསྐྲད་པ་དང་སྤངས་པ་རྣམས་བསྟན་པར་རིག་པར་བྱ་སྟེ། དེ་རྣམས་ཀྱིས་ཐོས་པ་དང་བཅས་བར་ལས་བྱེད་པ་ལ་ཉེས་པ་མེད་དོ། །གནས་ནས་ཕྱུང་བ་ནི་རང་གིས་ལས་ཡང་ངོ་ཞེས་བྱ་བ་ཡང་མ་གཏོགས་སོ་ཞེས་བྱ་བ་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། གནས་ནས་བྱུང་བ་དེའི་རང་གིས་བཟོད་པ་གསོལ་བ་དེ་ནི་དེས་ཐོས་པ་དང་བཅས་པར་བྱ་བ་ལས་གཞན་ནི་མ་ཡིན་ནོ་ཞེས་བྱ་བའི་དོན་ཏོ། །འོ་ན་ཐ་དད་པར་གནས་པ་རྣམས་ཀྱིས་ཞེས་བྱ་བ་བྱེ་བྲག་མེད་པར་འདི་རྣམས་པ་སྤང་བར་སྨོས་སོ་ཞེ་ན། བདེན་མོད་ཀྱི་འོན་ཀྱང་ཡོངས་སུ་མ་བཟུང་བའི་ཐ་དད་པའི་གནས་ལ་དགོངས་ནས་ངེས་ཞེས་བྱ་བར་ཤེས་པར་བྱ་སྟེ། ཡོངས་སུ་བཟུང་བ་ལ་ཡོངས་སུ་སྤངས་པར་མི་རིགས་པའི་ཕྱིར་རོ། །གནས་ནས་ཕྱུང་བ་དག་ལ་ཐོས་པའི་ཉེན་ཀོར་སྤངས་ཏེ་མཐོང་བའི་ཉེན་ཀོར་དུ་བཞག་ནས། གཞན་འདོན་པས་མ་ཡིན་པའི་འདིར་ལུང་དུ་རིག་པར་བྱའོ། །ནང་དུ་དྲི་བའི་ཕྱིར་གསོལ་བ་ལ་ སོགས་པ ་བསྙེན་པར་རྫོགས་པར་བྱ་བ་ལ་ཡང་ངོ་ཞེས་བྱ་བ་ཡང་མ་གཏོགས་སོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ནང་དུ་ཞེས་བྱ་བ་ནི་དགེ་འདུན་གྱི་ནང་དུ་བར་ཆད་ཀྱི་ཆོས་གང་དག་དྲི་བ་སྟེ་དེའི་ཕྱིར་རོ། །གསོལ་བ་ཞེས་བྱ་བ་ནི་དེ་དང་པོའི་ལས་ལ་བསྙེན་པར་རྫོགས་བཞིན་སྤངས་ནས་ཞེས་བྱ་བའི་དོན་ཏོ། །བསྙེན་པར་མ་རྫོགས་པས་ཐོས་པ་དང་བཅས་པའི་ལས་དེ་བྱའོ། །དེ་ལས་གཞན་ཐོས་པའི་ཉན་ཀོར་དོར་བར་བྱས་ནས་མཐོང་བའི་ཉེན་ཀོར་དུ་བཞག་སྟེ་ཞེས་བྱ་བའི་ཚིག་
ནི་འདིར་ལུང་ལས་སོ། །ཅི་ཐོས་པར་བྱ་བ་མ་ཡིན་པ་ལས་མངོན་སུམ་དུ་བྱས་པ་དང༌། རྗེས་སུ་བསྒྲག་པར་བྱ་བ་དང༌། དབྱེ་བའི་ལས་ལ་བསྙིལ་ལམ་འོན་ཏེ་རྣམ་པ་གང་གིས་གཟུང་བར་བྱ་ཞེ་ན། དེའི་ཕྱིར་དེ་དག་བྱ་བ་ལ་ལྟ་བའི་ཉོན་ཀོར་དུ་གཞག་པས་ནི་མངོན་སུམ་དུ་བསྒྲུབ་པོ། །གོ་བར་བྱ་བས་ནི་རྗེས་སུ་བསྒྲག་པའོ་ཞེས་བྱ་བ་སྨོས་ཏེ། དེ་དག་བྱ་བ་ལས་ཞེས་བྱ་བ་ནི་མངོན་སུམ་དུ་བྱ་བ་དང་རྗེས་སུ་བསྒྲག་པར་བྱ་བ་ལའོ། །མངོན་སུམ་དུ་བྱ་བ་ནི་གང་ཞིག་ཐོས་པར་བྱ་བ་ཡིན་པའི་ལས་བྱེད་པ་དེར་ལྟ་བའི་ཉེན་ཀོར་དུ་གཞག་པས་མངོན་སུམ་དུ་བསྒྲུབ་པར་བྱའོ། །རྗེས་སུ་བསྒྲག་ པ་ནི་ཐོས་པར་བྱ་བ་མ་ཡིན་པའི་ལས་བྱ་བ་ལ་སོགས ་པའི་བྱ་བས་རྗེས་སུ་བསྒྲག་བར་བསྒྲུབ་པར་བྱ་སྟེ། ཁྱོད་ལ་གསོལ་བ་དང་བཞིའི་ལས་བྱ་བ་ལས་གསོལ་བ་ནི་བྱས་ཟིན་ཏོ་ཞེས་བྱ་བ་ལ་ སོགས་པ ་གོ་བར་བྱ་བས་སོ། །སྨྱོས་པའི་གནང་བ་དང་ཕྱག་མི་བྱ་བ་དང་མི་སྨྲ་བ་དང༌། ལོངས་མི་སྤྱོད་པ་དང་གཙུག་ལག་ཁང་གི་སྡོམ་པ་དག་ནི་མངོན་སུམ་དུ་མ་གྱུར་བར་རོ་ཞེས་བྱ་བ་ནི། གཙུག་ལག་ཁང་ལ་ སོགས་པ ་རེ་རེ་ལ་སྡོམ་པའི་སྒྲ་སྦྱར་བར་བྱ་སྟེ། གཙུག་ལག་ཁང་གི་སྡོམ་པ་དང་སྨྱོས་པའི་སྡོམ་པ་དང་ཕྱག་མི་བྱ་བའི་སྡོམ་པ་དང༌། ལོངས་མི་སྤྱོད་པའི་སྡོམ་ཞེས་བྱ་བའོ། །འདིར་གཞུང་ནི་མ་མོ་ལས། མངོན་སུམ་དུ་མ་གྱུར་པར་བྱ་བའི་ལས་བཅུ་གང་ཞེ་ན། ལྷུང་བཟེད་ཁ་སྦུབ་པ་དང༌། ལྷུང་བཟེད་ཁ་སྦུབ་བག་ཡོངས་སུ་བྱ་བ་དང༌། བསླབ་པའི་སྡོམ་པ་དང་བསླབ་པའི་སྡོམ་པ་ཡངས་སུ་བྱ་བ་དང༌། གཙུག་ལག་ཁང་གི་སྡོམ་པ་དང༌། དགེ་ཚུལ་གྱི་སྡོམ་པ་དང༌། སྨྱོས་པའི་སྡོམ་པ་དང༌། ཕྱག་མི་བྱ་བའི་སྡོམ་པ་དང༌། མི་སྨྲ་བའི་སྡོམ་པ་དང༌། ལོངས་མི་སྤྱོད་པའི་སྡོམ་པའོ་ཞེས་གསུངས་པ་ཡིན་ནོ། །ཅི་སྟེ་ཅིའི་ཕྱིར་ལྷུང་བཟེད་ཁ་སྦུབ་པ་ལ་ སོགས་པ ་ནས་དགེ་ཚུལ་གྱི་སྡོམ་པའི་བར་གྱི་སྡོམ་པ་ལྔ་པོ་རྣམས་འདིར་ཅིའི་ཕྱིར་འདིར་མ་བསྡུས་ཤེ་ན། དེ་རྣམས་ནི་བསྙེན་པར་མ་རྫོགས་པའི་ཡུལ་ཡིན་པས་དེ་དག་ལ་མངོན་སུམ་དུ་གྱུར་པའི་དོགས་པ་མེ་དཔའི་ཕྱིར་རོ། །དེ་ལྟ་བས་ན་མདོ་འདིར་མ་སྨོས་སོ། །འདི་ན་རང་ལ་ངེས་པ་བྱེད་པ་སྟེ། གཞན་དག་བསྐྲད་པས་ནི་མ་ཡིན་ནོ། །དེ་བས་ན་དེ་རྣམས་ལ་མངོན་སུམ་དུ་མ་གྱུར་པ་ཉིད་ལ་བྱ་བ་ཉིད་དོ། །འདི་ནི་སྨྲ་
བར་མི་བྱ་བ་དང༌། དེ་ནི་ལོངས་སྤྱོད་པར་བྱ་བ་མ་ཡིན་པ་དང༌། དེའི་གཙུག་ལག་ཁང་དུ་འགྲོ་བ་མ་ཡིན་པ་ཞེས་བྱ་བའི་དོན་དེ་རྣམས་ལ་གོ་རིམས་ཇི་ལྟ་བ་བཞིན་དུ་མི་སྨྲ་བ་དང༌། ལོངས་སྤྱད་པར་མི་བྱ་བ་དང༌། གཙུག་ལག་ཁང་གི་སྡོམ་པ་རྣམས་རིག་པར་བྱའོ། །སྨྱོས་པའི་སྡོམ་པ་ནི་སྨྱོས་པ་དང་རྩེ་གཅིག་པ་དང༌། སྨྱོས་པ་དང་རྩེ་གཅིག་པ་མ་ཡིན་པའི་གྲུབ་པའི་དོན་དུ་སྦྱིན་པ་ཡིན་ནོ། །ཕྱག་མི་བྱ་བའི་སྡོམ་པ་ནི་དགེ་སློང་བསྙིལ་བ་ལ། དགེ་སློང་མ་རྣམས་ཀྱིས་བྱ་བའོ། །སྡོམ་པ་འདི་རྣམས་ནི་བསྙེན་པར་རྫོགས་པ་མངོན་སུམ་དུ་མ་གྱུར་པ་མ་ཡིན་པ་རྣམས་ལ་བྱེད་པ་ཡིན་གྱི། ལས་གཞན་ཐམས་ཅད་ནི་མངོན་སུམ་དུ་གྱུར་པ་རྣམས་ལའོ། །གསོལ་བ་མ་བྱས་པར་དེའི་དོན་དུ་བརྗོད་པར་མི་བྱའོ་ཞེས་བྱ་བ་ནི་གང་གི་དོན་དུ་ལས་བརྗོད་པ་དེ་མ་ཤེས་པ་ལ་ལས་བརྗོད་པར་མི་བྱའོ། །སྔར་མི་མཐུན་བ་དག་མི་བྱའོ་ཞེས་སྨོས་པ་དེའི་མི་མཐུན་བའི་ངོ་བོ་ཉིད་བསྟན་པའི་ཕྱིར། དེའི་མཚམས་ཀྱི་ཁོངས་སུ་གཏོགས་པའི་ཁ་སྐོང་བར་འོས་པ་ལུས་སམ་དེ་ལ་འདུན་པས་རྗེས་སུ་མ་ཞུགས་པ་ཉིད་དང༌། ཕྱིར་ཟློག་པར་བྱེད་པ་ཡང་གང་ལ་ལས་དེ་བྱེད་པ་དེ་ལས་གཞན་པས་གལ་ཏེ་མི་མཐུན་པ་དང་ཆོས་དང་ལྡན་ན་སྤྱོད་ལམ་མ་ཉམས་པ་དང༌། རང་བཞིན་དུ་གནས་པ་དང༌། ངག་ཡང་དག་པར་བསྡམས་པས་མངོན་པར་མི་ཤེས་པ་དང༌། ནད་དང་བཅས་པ་མ་གཏོགས་པས་ནི་མི་མཐུན་པ་ཉིད་དོ་ཞེས་བྱ་བ་སྨོས་ཏེ། མི་མཐུན་པ་ཉིད་ནི་རྣམ་པ་གཉིས་ཏེ། འདུས་པར་རྗེས་སུ་ཞུགས་པ་ཉིད་དང༌། ཕྱིར་ཟློག་པར་བྱེད་པའོ། །གང་དུ་བྱེ་བྲག་གང་དང་ལྷན་ཅིག་བའི་འདུག་པ་ལ་རྗེས་སུ་མ་ཞུགས་པ་ཉིད་ཅེས་བྱ་བ་དེ་དང་པོར་བསྟན་པའི་ཕྱིར། དེའི་མཚམས་ཀྱི་ཁོངས་སུ་གཏོགས་པ་ཞེས་བྱ་བ་སྨོས་ཏེ། མཚམས་གང་དུ་ལས་དེ་བྱེད་པ་དེའི་ཁོངས་སུ་གཏོགས་པའི་དགེ་སློང་ངོ་ཞེས་བྱ་བའི་དོན་ཏོ། །ཁ་སྐོང་བར་འོས་པ་ཞེས་བྱ་བ་ནི་བསྙེན་པར་མ་རྫོགས་པ་དང༌། ཉམས་པ་ལ་ སོགས་པ ་གཞན་ལ་ཞེས་བྱ་བའི་དོན་ཏོ། །འདིར་ལུང་ནི་ཇི་སྲིད་དུ་དགེ་སློང་དག་མཚམས་ཐོབ་པ་དང་བྱ་བ་ཐོབ་པ་ཞེས་བྱ་བའོ། །དེ་བས་ན་བྱ་བ་ཐོབ་པའི་ཚིག་གོ །གང་གི་ཕྱིར་དེ་ནི་བྱ་བ་ཐོབ་པ་ཉིད་ཡིན་ཏེ། གང་ཞིག་བསྐང་བའི་ཕྱིར་
འོས་པ་ཉིད་དོ། །རྣམ་པ་གང་གིས་འདུས་པར་རྗེས་སུ་མ་ཞུགས་པ་ཉིད་ཅེ་ན། དེའི་ཕྱིར་ལུས་སམ་དེ་ལ་འདུན་པ་ཞེས་བྱ་བ་སྨོས་ཏེ། ཕྱིར་ཟློག་པར་བྱེད་པའི་མཐའ་མ་ཅན་མི་མཐུན་པ་ཉིད་ཅེས་བྱ་བ་འདི་དང་འདི་འབྲེལ་བའོ། །གང་དུ་དེ་རྗེས་སུ་མ་ཞུགས་པ་ཉིད་སྨོས་པ་དེའི་མཚམས་ཀྱི་ཁོངས་སུ་གཏོགས་པ་ཁ་སྐོང་བའི་ཕྱིར་འོས་པ་དེ་ཉིད་ལ་ཆོས་དེ་བཞིན་ནོ་སྙམ་དུ་ཤེས་པར་བྱ་བའི་ཕྱིར་ཡང་གི་སྒྲའོ། །ཕྱི་རོལ་གྱི་མཚམས་སུ་གནས་པ་ལ་ནི་ཕྱིར་ཟློག་པར་བྱེད་པ་སྐྱེ་བ་མ་ཡིན་ཏེ། ཕྱིར་ཟློག་པར་བྱེད་པ་ཞེས་བྱ་བ་ནི་ཕྱིར་ཟློག་པར་བྱེད་པས་ཡང་ཞེས་བྱ་བ་སྟོན་ཏེ། དེ་ལ་མི་མཐུན་པ་ཉིད་ཡིན་ནོ་ཞེས་བྱ་བར་སྦྱར་རོ། །གང་གི་ཕྱིར་ཟློག་པར་བྱེད་ཅེ་ན། དེའི་ཕྱིར་གང་ལ་ལས་དེ་བྱེད་པ་དེ་ལས་གཞན་ནི་ཞེས་བྱ་བ་སྨོས་ཏེ། དེའི་ཕྱིར་བཟློག་པ་འཆགས་ཀྱི་གང་ལ་ལས་དེ་བྱེད་པ་ཉིད་ཀྱིས་ཕྱིར་བཟློག་པ་ནི་མི་འཆགས་སོ། །ཅི་ལས་ཐམས་ཅད་ལ་གང་ལ་བྱེད་པ་བརྩལ་བར་བྱ་བའམ་ཞེ་ན། དེའི་ཕྱིར་གལ་ཏེ་མི་མཐུན་བ་དང་ཆོས་དང་ལྡན་ན་ཞེས་བྱ་བ་སྨོས་ཏེ། གལ་ཏེ་ལས་དེ་ལྟ་བུ་ཡིན་ན་ལས་དེ་ལྟ་བུ་དེ་ལ་བརྩལ་བའོ། །གཞན་མི་མཐུན་པའི་དེ་འཆགས་པ་ཡིན་ཞེས་བྱ་བའི་དོན་ཏོ། །ཆད་པ་ལས་གསོལ་བའི་གྲངས་སུ་གཞུག་པ་དག་ནི་གང་ལ་བྱེད་པ་དེས་ཕྱིར་བཟློག་པ་ནི་མི་འཆགས་སོ། །སྦྱིན་བ་དང་དབྱུང་བ་དང་བཟོད་པ་དང་བསྐོ་བ་དག་ལ་ནི་དེ་བས་ན་དེ་བྱེད་པའོ། །འདིར་གཞུང་ནི་གླེང་གཞི་དག་ལས། བཙུན་བ་བཅོམ་ལྡན་འདས་ཀྱིས་གང་ལ་ལས་བྱེད་པ་དེས་ཕྱིར་བཟློག་པ་མི་འཆགས་སོ་ཞེས་གསུངས་པ་དེ་ལ། བཙུན་བ་གང་ལ་ཚོགས་མ་ལགས་པས་ལས་བགྱིས་པ་དེས་སླར་ཟློག་པ་ནི་མི་འཆགས་སམ། ཉེ་བ་འཁོར་འཆགས་སོ། །བཙུན་བ། རེ་ཞིག་གང་ཟག་བཅུ་གཉིས་པོ་དེ་དག་བསྐོ་བ་ན། དེ་དག་འདི་སྐད་ཅེས་བདག་ཅག་མ་བསྐོ་ཅིག་ཅེས་མཆི་ན། དེ་དག་གིས་སླར་བཟློག་པ་ཡང་མི་འཆགས་སམ། ཉེ་བ་འཁོར་འཆགས་ཏེ། མི་འཆགས་སོ་ཞེས་བྱ་བ་དེ་ནི་ངས་ཆད་པའི་ལས་ལ་དགོངས་ཏེ་གསུངས་པ་ཡིན་ནོ། །གང་ཟག་གི་རྣམ་པ་ཇི་ལྟ་བུས་ཕྱིར་བཟློག་པ་འཆགས་ཤེ་ན། དེ་བསྟན་པའི་ཕྱིར་སྤྱོད་ལམ་ལས་མ་ཉམས་པ་དང༌། རང་བཞིན་དུ་གནས་པ་དང༌། ངག་ཡང་དག་པར་བསྡམས་པ་
མངོན་བར་མི་ཤེས་པ་དང་ནང་དང་བཅས་པ་མ་གཏོགས་སོ་ཞེས་སྨོས་ཏེ། དེ་ལྟ་བུའི་རྣམ་པ་ཐམས་ཅད་ལས་འཆགས་པར་འོས་པ་ཉིད་དུ་ཐལ་བ་བསྟན་པའི་ཕྱིར། མངོན་བར་མི་ཤེས་པ་དང་ནང་དང་བཅས་པ་མ་གཏོགས་པ་ཞེས་བྱ་བ་སྨོས་ཏེ། འདིས་མངོན་བར་མི་ཤེས་པ་ཞེས་བྱ་བ་འདིས་ནི་བྱིས་པ་དང་རྨོངས་པ་དང་མི་མཁས་པ་དང༌། རིགས་ངན་པའོ་ཞེས་གསུངས་པ་གང་ཡིན་པ་དེའི་འདི་བསྡུས་པ་ཡིན་ནོ། །དེ་ནི་འདིར་མི་ཤེས་པ་སྟེ། འདི་ལ་ཕྱིར་བཟློག་པ་དེ་ལ་གཏོགས་པའི་རིགས་པས་སྨྲ་བ་ཉིད་འབྱུང་བར་འགྱུར་ཞེས་བྱ་བ་གཟུང་བར་བྱ་བ་མ་ཡིན་པའི་ཚིག་སྤངས་པ་འདི་ཉིད་ལ་གང་ཞིག་དེ་རྣམས་འཆགས་པའོ། །ནང་དང་བཅས་པ་ཞེས་བྱ་བ་ནི་ཞེ་འགྲས་པའི་དངོས་པོར་རིགས་པ་རྗེས་སུ་གཟུང་བར་བྱ་བ་མ་ཡིན་པས། དེ་རྗེས་སུ་བཟུང་བ་འདི་ལ་ཡང་རིགས་པ་དོགས་པར་བྱ་བ་མ་ཡིན་ཏེ། ཡིད་ཆེས་པ་ལ་བརྟེན་པ་མ་ཡིན་པ་ཉིད་དེ་བས་ན་འདི་ལ་ཚིག་ཏུ་མ་བསྡུས་པ་ཉིད་དོ། །གཞུང་ལས་བཙུན་པ་དུ་དག་གིས་སླར་ཟློག་པ་འཆགས། ཉེ་བ་འཁོར་བཞི་སྟེ། རང་བཞིན་དུ་གནས་པ་དང༌། དེའི་མཚམས་ན་གནས་པ་དང༌། སྤྱོད་ལམ་ལས་མ་ཉམས་པ་དང༌། ངག་ཡང་དག་པར་བསྡམས་པས་སོ་ཞེས་གསུངས་པ་ལ། འདིར་ངག་ཡང་དག་པར་བསྡམས་པ་ཉིད་ཀྱིས་གནོང་བར་མི་ཤེས་པ་དང༌། ནང་དང་བཅས་པ་གཉིས་གསལ་བར་རིག་པར་བྱའོ། །ནང་དང་བཅས་པ་ལ་དུ་མ་ཡིན་པ་ཉིད་ཀྱི་ཕྱིར་བརྗོད་པ་མི་རིགས་པ་ཡིན་ནོ། །མངོན་པར་མི་ཤེས་པ་ལ་ནི་མི་རུང་བ་ཉིད་ཀྱི་ཕྱིར་རོ། །དེ་ལྟ་བས་ན་ཚིག་འདི་དག་ལ་བསྡམས་པའི་དབང་གིས་སོ། །དེ་ཞེས་བྱ་བ་ནི་མ་བསྡམས་པ་ཉིད་དེ་དག་ལ་འདི་སྨོས་སོ། །འོ་ན་མདོ་ལས་ཅིའི་ཕྱིར་འདི་དག་བཏང་བར་བྱས་པ་ཡིན་ཞེ་ན། དེའི་ཕྱིར་ཤིན་ཏུ་གསལ་བར་བསྟན་པ་ཞེས་གསུངས་པ་ཡིན་ནོ། །མ་ཉམས་པ་ཞེས་བྱ་བ་ལ། འདིར་ཉམས་པ་ནི་གང་ཡིན། གང་ཞིག་མེད་པས་མ་ཉམས་པ་ཉིད་དོ། །ཅི་རང་བཞིན་དུ་མི་གནས་པ་ཉིད་དམ། མ་བསྡམས་པ་ནི་གང་ཡིན། གང་ཞིག་ཟློག་པ་དང་ལྡན་པས་བསྡམས་པ་ཉིད་ནི་རང་བཞིན་དུ་གནས་པ་ཉིད་དོ་སྙམ་བ་ལ། སིལ་བུ་དག་ལས། བཙུན་པ་ཇི་ཙམ་གྱིས་ན་ངག་ཡང་དག་པར་མ་བསྡམས་པ་ལགས་ཉེ་བ་
འཁོར་གང་ཚུན་ཆད་བརྫུན་དུ་སྨྲ་བའམ། ཕྲ་མ་ཅན་ནམ། ངག་རྩུབ་པོ་ཅན་ནམ། ཚིག་འཁྱལ་པ་ཅན་ཡིན་ནའོ་ཞེས་བྱ་བ་ལ་ སོགས་པ ་དག་བསྡུ་བའི་ཕྱིར། བརྫུན་དུ་སྨྲ་བའི་རྗེས་སུ་མཐུན་པ་ཉིད་ནི་ངག་ཡང་དག་པར་མ་བསྡམས་པའོ་ཞེས་བྱ་བ་སྨོས་ཏེ། བརྫུན་དུ་སྨྲ་བའི་རྗེས་སུ་མཐུན་པ་ཉིད་ཅེས་བྱ་བ་ནི། བརྫུན་དུ་སྨྲ་བ་ལས་སེམས་ཕྱིར་མ་བསྡམས་པ་ཉིད་དེ། དེ་ནི་ངག་ཡང་དག་པར་མ་བསྡམས་པ་ཡིན་གྱི། དྲན་པ་ཉམས་པ་གང་ཡང་རུང་བས་བརྫུན་དུ་གྱུར་པ་ནི་མ་ཡིན་ནོ། །ཅི་དེ་འབའ་ཞིག་གིས་ངག་ཡང་དག་པར་མ་བསྡམས་པ་ཡིན་ནམ་ཞེ་ན། དེའི་ཕྱིར་ཕྲ་མ་དང༌། ངག་རྩུབ་མོ་དང་ཚིག་འཁྱལ་པའི་ཡང་ངོ་ཞེས་བྱ་བ་སྨོས་ཏེ། རྗེས་སུ་མཐུན་བ་ཉིད་ནི་ངག་ཡང་དག་པར་མ་བསྡམས་པའོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དེ་དག་རེ་རེའི་རྗེས་སུ་མཐུན་པ་ཉིད་ཀྱང་འདིར་ངག་ཡང་དག་པར་མ་བསྡམས་པ་ཡིན་པར་བལྟ་བར་བྱའོ། །རང་བཞིན་དུ་གནས་པ་མ་ཡིན་པ་ཉིད་ཀྱང་དེ་དག་གིའོ་ཞེས་བྱ་བ་ནི་བརྫུན་དུ་སྨྲ་བ་ལ་ སོགས་པ ་དེ་དག་གི་རྗེས་སུ་མཐུན་པ་ཉིད་ཡིན་ཏེ་དེ་བས་ན་ངག་ཡང་དག་པར་མ་བསྡམས་པ་དེ་ནི་རང་བཞིན་དུ་གནས་པ་མ་ཡིན་བ་ཞེས་ཀྱང་བྱའོ། །གཞན་ཡང་བྱ་བ་མ་ཡིན་པའོ་ཞེས་བྱ་བ་ནི་ལྟུང་བར་འགྱུར་བ་དག་ལྷག་པར་སྤྱོད་པའི་རྗེས་སུ་མཐུན་བ་ཉིད་ཀྱང་རང་བཞིན་དུ་གནས་པ་མ་ཡིན་པ་ཞེས་བྱའོ། །བྱ་བ་མི་བྱེད་པ་ཞེས་བྱ་བ་ནི་གང་ཞིག་བྱ་བ་གང་ཡིན་པ་དེ་མི་བྱེད་པ་ལ་ལྟུང་བ་བསྐྱེད་པ་ནི་མི་མཐུན་པ་ཉིད་དེ། བསླབ་པ་ཐམས་ཅད་ལ་བརྩོན་བ་བཏང་ཞིང་སྤྲོ་བ་བོར་བ་ཉིད་ཅེས་བྱ་བའི་དོན་ཏོ། །དེ་བརྩམས་པ་འགྲོ་བའི་སེམས་ཀྱིས་བཏང་བ་ནི་སྤྱོད་ལམ་ལས་ཉམས་པ་ཡིན་ནོ་ཞེས་བྱ་བ་ནི་འདུག་པ་ཞེས་བྱ་བའི་སྤྱོད་ལམ་དེ་བརྩམས་ཤིང་སྔར་འདུག་པར་གྱུར་པ་གཞན་དུ་འགྲོ་བའི་སེམས་ཀྱིས་བཏང་བ་ནི་སྤྱོད་ལམ་ལས་ཉམས་པ་ཡིན་ནོ་ཞེས་བྱ་བའི་དོན་ཏོ། །གང་ལ་འཇུག་པ་ཞེ་ན། དེའི་སྤྱོད་ལམ་འདི་ལ་ཞེས་བྱ་བའི་དོན་ཏོ། །དགེ་འདུན་གྱི་ནད་ནས་སྟན་ལས་ལངས་པ་ནི་སྤྱོད་ལམ་ལས་ཉམས་པ་ཡིན་གྱི། དེ་ནས་གཞན་དུ་མ་ཡིན་ནོ། །འདིར་གཞུང་ནི་ཉེ་བ་འཁོར་གང་ཚུན་ཆད་དགེ་འདུན་གྱི་ནང་ནས་ལངས་པར་གྱུར་པའོ་ཞེས་བྱ་བ་འདི་གསུངས་པ་ཡིན་ཏེ། སྟན་ལས་ལངས་པ་ཉིད་དང་དགེ་འདུན་གྱི་ནང་
ནས་ལངས་པ་ཉིད་མ་སོང་བ་ཉིད་ཅེས་བྱ་བ་འདི་ལ་འདིར་དོན་རྣམ་པར་གཞག་པ་དང་འདྲ་བ་དེ་ནི་འདིའི་དོན་ཏོ། །གནས་སུ་སོང་བ་དོན་གཞན་གཙོ་བོ་ལ་ཞུགས་པ་ཞེས་བྱ་བ་ནི་ཆགས་པའོ། །ལྟ་བ་དགེ་འདུན་ལ་བརྗོད་པར་བྱའོ་ཞེས་བྱ་བ་ནི་དགེ་འདུན་གྱི་བྱ་བ་དོགས་པ་ལ་ལྟ་བའི་བློ་ནི་ལྟ་བ་ཞེས་བྱ་བའི་སྒྲ་བརྗོད་པ་ཡིན་ནོ། །གཞན་ལ་ནི་མི་བྱའོ་ཞེས་བྱ་བ་ནི་དགེ་འདུན་ལས་གཞན་པའི་ཚོགས་དགེ་འདུན་མ་ཡིན་པ་ལ་ལྟ་བ་བརྗོད་པར་མི་བྱ་ན། གང་ཟག་ལ་ལྟ་སྨོས་ཀྱང་ཅི་དགོས། བསྙེན་པར་མ་རྫོགས་པ་ལ་མི་བྱའོ་ཞེས་བྱ་བ་ནི་དགེ་ཚུལ་གྱི་དགེ་འདུན་ལ་ཡང་མ་ཡིན་ཞེས་བྱ་བའི་དོན་ཏོ། །ཁ་སྐོང་བར་འོས་པ་མ་ཡིན་པ་ལ་ཡང་ངོ་ཞེས་བྱ་བ་ནི། བསྙེན་པར་རྫོགས་པ་ཡིན་ཡང་དགེ་འདུན་གྱི་ཁ་སྐོང་བའི་འོས་མ་ཡིན་པ་རྣམས་ལ་ཡང་ལྟ་བ་བརྗོད་པར་མི་བྱའོ། །ལྷག་མ་མ་ལུས་པ་ཉིད་མི་བྱའོ་ཞེས་བྱ་བ་ནི་བསྡུས་པའི་གང་ཟག་ཏུ་གཏོགས་པའི་གཞི་ལ་མ་བསྡུས་པའི་གང་ཟག་ལས། དེའི་རྒྱུས་གནོད་པ་འབྱུང་བ་སྤང་བའི་ཕྱིར། ལྟ་བ་བརྗོད་པ་ཉིད་མི་བྱའོ། །འདིར་གཞུང་ནི་མ་མོ་ལས། ཆོས་དང་ལྡན་བ་མ་ཡིན་པའི་ལྟ་བ་བརྗོད་པ་ལྔ་གང་ཞེ་ན། གནས་པར་མི་བྱ་བ་ལ་ལྟ་བ་བརྗོད་པ་དང༌། ཐ་དད་པར་གནས་པ་ལ་ལྟ་བ་བརྗོད་པ་དང༌། བསྙེན་པར་མ་རྫོགས་པ་ལ་ལྟ་བ་བརྗོད་པ་དང༌། ཚོགས་ལ་ལྟ་བ་བརྗོད་པ་དང༌། ལྷག་མ་མ་ལུས་པའི་དངོས་པོའི་ལྟ་བ་བརྗོད་པ་སྟེ། ལྔ་པོ་དེ་དག་ནི་ཆོས་དང་ལྡན་པ་མ་ཡིན་པའི་ལྟ་བ་བརྗོད་པ་དང༌། དེ་ལས་བཟློག་པ་ལྔ་ནི་ཆོས་དང་ལྡན་བའི་ལྟ་བ་བརྗོད་པ་ཡིན་ནོ་ཞེས་གསུངས་པ་ཡིན་ནོ། །འདིར་ཚོགས་ཞེས་སྨོས་པ་ནི་དགེ་འདུན་དུ་མར་གྱུར་པ་རྣམས་བཟུང་ངོ༌། །གང་རྣམས་ཀྱི་མདུན་དུ་ཆོས་དང་ལྡན་པ་འབྱུང་བ་སྨོས་པ་དེ་རྣམས་ནི་དགེ་འདུན་དུ་གྱུར་པ་རྣམས་ལ་ཞེས་བྱ་བར་ཤེས་པར་བྱའོ། །ལྷག་མ་མ་ལུས་པའི་དངོས་པོའི་ལྟ་བ་བརྗོད་པ་བཀག་པ་ནི་དེའི་ཕྱིར། གང་ཟག་དེ་ལས་དེའི་རྒྱུས་གནོད་པ་འབྱུང་བ་སྤང་བའི་ཕྱིར། འདིར་གཞུང་ནི་ཞུ་བ་ལས། སྔོན་ལྟུང་བ་བྱུང་བ་ལས་ལྟ་བ་བརྗོད་ན་ཉེས་བྱས་སོ། །རྐུ་ཐབས་སུ་གནས་པ་དང༌། དང་པོ་འཁྲུག་པ་དང་བསླབ་པ་བྱིན་པ་དང༌། དགེ་ཚུལ་ལ་ལྟ་བ་བརྗོད་ན་ཉེས་བྱས་སུ་འགྱུར་རོ། །དེ་བཞིན་དུ་གནས་ནས་ཕྱུང་བ་ལ་ལྟ་བ་བརྗོད་ན་
ཡང་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །དེ་འདིར་བསྡུས་ནས་སྨོས་པ་གང་རྗེས་སུ་གནང་བ་ལ་དབང་བ་དེ་ལ་ནི་འབྱུང་བ་འདི་རིགས་བ་ཡིན་ནོ་ཞེས་བྱ་བ་འདི། གནས་པར་མི་བྱ་བ་ལ་ སོགས་པ ་རྣམས་ཀྱི་མདུན་དུ་འབྱུང་བ་དགག་པ་འདི་ཡིན་ཏེ། དེ་བས་ན་ཐམས་ཅད་དུ་ཡང་ཁ་སྐོང་བར་འོས་པ་མ་ཡིན་པ་བཀག་པར་ཤེས་པར་བྱའོ། །བསྐོས་པ་རྗེས་ནས་ཆེས་ལེགས་པ་དང་ཆེས་མང་དུ་བྱེད་པ་བསྐོ་བར་བྱའོ་ཞེས་བྱ་བ་ནི། སྔར་བསྐོས་པའི་གང་ཟག་རྗེས་ནས་བྱ་བ་དེ་ལ་འདི་འབྱུང་བ་འདི་གང་ཞིག་ཆེས་ལེགས་པར་བྱེད་པ་དང༌། ཆེས་མང་དུ་བྱེད་པའི་གང་ཟག་གཞན་ཡང་ཡིན་བ་དེ་བསྐོ་བར་བྱའོ། །འདིར་གཞུང་ནི་མ་མོས་ལས་དེ་དང་པོར་བྱས་ཏེ། དེ་སྤང་བར་མི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །དུས་ངེས་པར་བྱ་སྟེ་མི་བྱའོ་ཞེས་བྱ་བ་ནི་བསྐོ་བར་རོ། །གང་ལ་དུས་ངེས་པར་བྱ་སྟེ་བསྐོ་བར་མི་བྱ་ཞེ་ན། དེའི་ཕྱིར་ཡང་དང་ཡང་དུའམ་གཞན་ལའོ་ཞེས་བྱ་བ་སྨོས་ཏེ། དེའི་གཞན་དུ་ཡང་དགོས་པ་འབྱུང་ངོ་ཅོག་ཏུ་ཁྱོད་འབའ་ཞིག་བསྐོའོ་ཞེས་དེ་ལྟར་དུས་ངེས་པར་བྱ་སྟེ། མི་བསྐོའོ། །གཞན་ལའོ་ཞེས་བྱ་བ་ནི་དགོས་པ་གཞན་དག་ལ་ཁྱོད་ཁོ་ན་བསྐོའོ་ཞེས་དེ་ལྟར་དུས་ངེས་པར་བྱ་སྟེ། ཡང་མི་བསྐོའོ། །གཞན་ལ་ཡང་ཇི་ཙམ་གྱིས་ཆོག་པ་ན་སྤང་བ་སྦྱིན་ནོ་ཞེས་བྱ་བ་ལས་མཐུན་པ་གཅིག་ལ་ཇི་སྲིད་དུ་དགོས་པ་སྤོང་བར་བྱེད་པ་དེ་ལས་བསྐྲད་པར་མི་བྱའོ་ཞེས་བྱ་བའོ། །བསྐོས་པ་མེད་ན་མདུང་དོར་བར་བགོའོ་ཞེས་བྱ་བ་ནི་གང་ཟག་རེ་རེ་ལ་བྱེ་བྲག་གཞན་དང་གཞན་ནི་མདུང་དོར་བའི་གང་ཟག་བསྐོ་བ་པས་མཚན་མའི་བྱེ་བྲག་མི་ཤེས་པས་སོ། །འདིར་མཚན་མའི་ཞེས་ཀྱང་གཅིག་ཏུ་བྱ་སྟེ། དེས་མིག་བཀབ་སྟེ། མདུང་རེ་རྫས་དེའི་སྟེང་དུ་གཞག་པར་བྱའོ། །བསྐོ་བ་པོ་མེད་ན་གང་ཟག་རེ་རེ་ལ་ཆ་རེ་རེའི་ཕྱིར་ཐ་དད་པར་བྱེ་བྲག་གཞན་དང་གཞན་བྱ་སྟེ། བྱེ་བྲག་ཏུ་མཚན་མའི་དབྱེ་བ་ཤེས་པ་རྣམས་ཀྱིས་ཤེས་པ་ལ་འདིར་གཅིག་ཏུ་བྱ་སྟེ། བཀབ་སྟེ་བཞག་ནས་ལག་ཏུ་བྱིན་ནས་གཟུང་བར་བྱ་བ་དེ་བཞིན་དུ་གང་ལ་གང་ཞིག་མཚན་མ་གཞག་པ་དེ་ནི་དེའི་སྐལ་བ་ཡིན་ནོ། །གང་ཞིག་འཇིག་རྟེན་ན་རྒྱན་འགྱེད་པའི་ཆོ་གར་གྲགས་པ་དེ་འདིར་རྣམ་པ་གཞན་གྱིས་སྨོས་པ་སྟེ། མི་མཐུན་པ་ལ་རྣམ་པར་གཞག་པ་འདིའོ། །ཡོད་པར་གྱུར་པ་གང་ཞིག་
དེས་སྐལ་བ་སྦྱིན་བ་དེའི་ཞེས་བྱ་བར་རྣམ་པར་གཞག་པར་བྱའོ། །བསྐོས་པ་མེད་ན་སྣོད་སྤྱད་འགྱེད་པའི་རྣམ་པར་གཞག་པ་འདི་ལྟ་སྟེ། ཆ་གང་ཞིག་དེས་གང་ལ་སྟེར་བ་དེ་དེའི་ཞེས་བྱ་བར་རྣམ་པར་གཞག་གོ །བགོའོ་ཞེས་བྱ་བ་ནི་གོས་ཀྱི་གཞི་ལས་གསུངས་སོ། །གོས་དེ་དག་ཇི་ལྟར་བགོ་བར་བྱ་ཞེ་ན། ཉེ་བ་འཁོར་མདུང་དོར་བས་སོ་ཞེས་བྱ་བ་སྨོས་སོ། །འདྲ་བ་ཉིད་དོ་ཞེས་བྱ་བ་ནི་རྣམ་པ་ཐམས་ཅད་དུ་ཤེས་པར་བྱ་སྟེ། འདི་གོས་ཀྱི་གཞི་ཞུ་བ་ལས་གསུངས་པ་ཡིན་ནོ། །གང་ཁ་སྐོང་བར་མི་འོས་པ་དེ་མདུང་དོར་བར་ཡང་ཞེས་བྱ་བ་ལ། དེ་ཡང་ངོ་ཞེས་བྱ་བ་ནི་དེ་ཡང་ལས་བྱེད་པའི་ཆོ་ག་ཁོ་ན་རྗེས་སུ་འཇུག་པ་ཞེས་བྱ་བ་འདིར་རྣམ་པར་གཞག་སྟེ། གླེང་གཞི་དག་ལས་སོ། །དགེ་འདུན་གྱི་དབྱེན་ལ་ཡང་འོས་པ་མ་ཡིན་པས་ཚུལ་ཤིང་བྲིམ་པ་མི་འཆགས་སོ་ཞེས་བྱ་བ་ནི་སངས་རྒྱས་ཀྱི་གདུལ་བྱ་དང་ལྡན་པའི་ལས་ཀྱི་ལྡང་བར་རྣམ་པར་གཞག་གོ ། སངས་རྒྱས་ཀྱི་གདུལ་བྱ་ལས་ཉམས་པར་ཤེས་པར་མི་བྱའོ། །དེ་བས་ན་འདི་སངས་རྒྱས་ཀྱི་གདུལ་བྱ་དང་ལྡན་པའི་ལས་ཀྱི་ཆོག་ལ་ཡན་ལག་ཉིད་མ་ཡིན་ནོ་ཞེས་བྱ་བ་བསྟན་པའི་དོན་དུ་འདི་རྩོམ་པའོ། །སངས་རྒྱས་དང་དགེ་འདུན་དུ་གཏོགས་པ་ལ་ཚུལ་འདིའོ། །གཞན་དུ་སངས་རྒྱས་དང་ཆོས་ཀྱི་རྣམ་པར་གཞག་པ་མི་གནས་སོ་ཞེས་བྱ་བ་ལས་ཆོ་ག་འདི་ནི་སིལ་བུ་དག་ལས་གསུངས་པ་ཡིན་ནོ། །ལས་ཀྱི་གཞིར་གཏོགས་པའོ།། །།བརྗོད་པ་ལྷག་པ་དག་གིས་ནི་མ་བྱས་པ་ཉིད་མ་ཡིན་ནོ་ཞེས་བྱ་བ་ནི་གང་ལ་ལས་བརྗོད་པ་དག་ལྷག་པར་བྱེད་པ་དེ་ལ་ཆོ་ག་ལས་འདས་ནས་ལས་མི་འཆགས་སོ་ཞེས་བྱ་བའི་ཉེས་པར་འགྱུར་བའི་དོགས་པར་མི་བྱའོ། །རང་གི་དོན་ནི་བྲལ་བ་དང་སྟོང་པ་དང་ལྡན་བར་སྨོས་ པ་ཞེས་བྱ་བ་ལ་སོགས ་པའི་ཚིག་རྣམ་འདིར་ལས་བརྗོད་པའི་ཚིག་གིས་བསྡུས་པར་རིག་པར་བྱའོ། །མ་མོ་ལས། འདིར་དང་པོར་བྱས་ཏེ། རྗེས་སུ་བསྒྲགས་པ་ཞེས་བྱ་བའི་བར་དུ་གསུངས་པའོ། །ཉམས་ན་མ་བྱས་པ་ཉིད་དོ་ཞེས་བྱ་བ་ནི་གང་ལ་ལས་བརྗོད་པ་ཇི་སྙེད་གསུངས་པ་དེ་ལས་ཉམས་ན་ནི་ལས་དེ་མ་བྱས་པ་ཉིད་དོ། །བྱེད་པ་ཉིད་ནི་སོང་ན་ཚིག་མ་རྫོགས་པ་རྣམ་པར་འཁྲུགས་པ་ཉིད་དོ་ཞེས་བྱ་བ་ནི་ལས་བྱེད་པ་དག་སོང་ན་གང་དེའི་ཚེ་གསོལ་བའི་
བདག་ཉིད་ཀྱི་ཚིག་མ་རྫོགས་པ་གང་ཡིན་པ་དེ་རྣམ་པར་འཁྲུགས་པ་ཉིད་ཡིན་ཏེ། གང་ཞིག་ཡོངས་སུ་རྫོགས་པར་བྱེད་པ་དེ་ལ་ནི་མ་ཡིན་པ་བྱས་པ་ཉིད་མ་ཡིན་གྱི། རྫོགས་པར་བྱས་པ་གང་ཡིན་པ་དེ་ནི་བྱས་པ་ཁོ་ན་ཡིན་ནོ་ཞེས་བྱ་བའི་དོན་ཏོ། །ལས་དེ་ལ་དགེ་འདུན་གྱི་ཚད་དག་ཏུ་མ་ལངས་པ་རྣམས་མ་ལུས་བ་ཉིད་ན་རྫོགས་པའོ་ཞེས་བྱ་བ་ནི་རྩོམ་པར་བྱས་པར་གྱུར་པ་ཉིད་ལ་ནི་བྱེད་པར་འགྱུར་བའོ། །ལས་དེ་དགེ་འདུན་གྱི་མཐའ་བཅུའི་ཚོགས་ལ་ སོགས་པ ་དེའི་ཚད་དག་ཏུ་དེ་ནས་མ་ལངས་པ་རྣམས་མ་ལུས་པ་ཉིད་ཡིན་ན་ནི། ཚིག་རྫོགས་པ་དག་ཀྱང་རྣམ་པར་འཁྲུགས་པ་ཉིད་ཡིན་ནོ། །འདིར་ལངས་པ་ནི་སྟན་ལས་འཕགས་པར་རིག་པར་བྱའོ། །ལུས་པ་ཉིད་ན་མི་འགྱུར་རོ་ཞེས་བྱ་བ་ནི་ལུས་པ་ཉིད་ན་དེའི་ལས་དང་དགེ་འདུན་གྱི་ཚད་མ་ལངས་པ་དག་དེའི་ཚེ། ལས་ཀྱི་ཚིག་སྔར་བརྗོད་པ་རྣམ་པར་འཁྲུགས་པར་མི་འགྱུར་བ་དག་གོ །གལ་ཏེ་དེ་ཡང་བྱེད་པར་འདོད་ན་ཚིག་གིས་རྣམ་པར་དཀྲུག་ཅིང་གསོལ་བས་དགེ་འདུན་ལ་བཙུན་པ་དག་ཡང་གསོལ་བར་བགྱིའོ། །ཞིའམ། རྗེས་སུ་བསྒྲག་གོ་ཞེས་བྱ་བས་སོ་ཞེས་བྱ་བ་ལ། དེ་ཡང་བྱེད་པར་འདོད་ན་ཞེས་བྱ་བ་ནི་ཚིག་རྣམ་པར་མ་འཁྲུགས་པ་དེ་ལའོ། །ཇི་ལྟར་ཚིག་གིས་རྣམ་པར་དཀྲུག་པར་བྱ་ཞེ་ན། གསོལ་བས་སོ། །འདིས་སུ་ལ་གསོལ་བར་བྱེད་ན། དགེ་འདུན་ལ་གསོལ་བས་སོ། །རྣམ་པ་གང་གིས་ཤེ་ན། དེའི་ཕྱིར་བཙུན་པ་དག་ཡང་གསོལ་བར་བགྱིའོ་ཞེས་བྱ་བ་ལ་ སོགས་པ ་རྣམ་པར་དཀྲུག་ཅིང་ལས་དེ་སླར་བྱ་སྟེ། རྣམ་པར་མ་དཀྲུགས་པས་ནི་མ་ཡིན་ཏེ། དེ་བས་ན་དེ་བྱེད་པའོ། །འདི་ནི་བསྟན་པ་ཡིན་ཏེ་དེ་ལུས་པའི་ཚིག་གཉིས་རྫོགས་ཟིན་པའི་དབང་དུ་བྱས་ཏེའོ། །གསོལ་བ་ཙམ་རྫོགས་ཟིན་པ་དེ་ལས་གསོལ་བར་བགྱིའོ་ཞེས་བྱ་བའི་བར་བརྗོད་པར་བྱ་བ་ཉིད་དུ་རིག་པར་བྱའོ། །གསོལ་བ་མ་བྱས་པའི་ཚིག་དག་ལ་དེ་སྤངས་ཏེ། དེས་ན་གང་ཟག་ལ་ལྷུང་བཟེད་ལ་ སོགས་པ ་བྱིན་གྱིས་བརླབ་པའི་ཚིག་དེ་ཡང་རང་བཞིན་དང་བྲལ་བ་ཉིད་ལ་ཉམས་པར་འགྱུར་རོ། །དེ་ལྟ་བས་ན་འདིར་དགེ་འདུན་ལ་ཞེས་བྱ་བ་སྨོས་པ་དེ་ནི་དཔེ་ཙམ་དུ་ཟད་དེ། བཟློག་པའི་ཕྱིར་བསྒོ་བ་དང༌། བསྙིལ་བ་དང༌། དེའི་ངོ་བོ་ཉིད་ཚོལ་དུ་གཞུག་པ་དང༌། བསླབ་པ་དང་མཐུན་པ་དང༌། དེའི་
གསོ་སྦྱོང་དང༌། མུ་སྟེགས་ཅན་གྱི་གནས་པ་དང༌། དེ་ལས་གཞན་པའི་སྤོ་བ་དང༌། མགུ་བ་དང༌། ཡང་གཞི་ནས་བསླང་བ་དང་དྲན་པས་འདུལ་བ་དང༌། མ་མྱོས་པར་འདུལ་བ་སྦྱིན་བ་དང༌། བསྙེན་པར་རྫོགས་པར་བྱ་བ་དང༌། མཚམས་དགྲོལ་བ་དང༌། ནན་ཏུར་གྱི་ལས་དང༌། དབྱུང་བ་དག་ལ་ནི་བརྗོད་པ་གསུམ་མོ་ཞེས་བྱ་བ་ལ། དེ་ལས་བཟློག་པའི་ཕྱིར་བསྒོ་བས་ཞེས་བྱ་བ་ནི་དགེ་འདུན་འབྱེད་པའི་ཕྱིར་བརྟུལ་བ་ལ་ སོགས་པ ་དེ་རྗེས་སུ་འཇུག་པ་རྣམས་ཀྱི་འདུན་ པ་ལ་སོགས ་པས་འགྲོ་བ་ཉིད་ལས་ཀྱིས་བརྗོད་པར་གྱུར་པ་ལ་བདག་ཉིད་བརྗོད་པར་བྱ་བ་མ་ཡིན་པ་བྱེད་ཅིང་དགེ་སློང་དང་དགེ་ཚུལ་སྡིག་བ་ཅན་གྱི་ལྟ་བའི་རྣམ་པ་མི་གཏོང་བ་གནས་ནས་ཕྱུང་བ་རྗེས་སུ་འཇུག་པའི་དགེ་སློང་མ་དཀོན་མཆོག་དག་གཏོང་བ་ལ་ སོགས་པ ་གཞི་ལ་ཞུགས་པ་དག་བཟློག་པའི་ཕྱིར་བསྒོ་བ་སྟེ། དགེ་ཚུལ་སྡིག་པ་ཅན་གྱི་ལྟ་བའི་རྣམ་པ་མི་གཏོང་བ་དེའི་ངོ་བོ་ཉིད་ཚོལ་དུ་གཞུག་པ་སྦྱིན་པ་དང་གང་གི་བསླབ་པ་སྦྱིན་པ་པོར་གྱུར་པ་དང༌། མཐུན་པ་སྦྱིན་བ་དང༌། མཐུན་པའི་གསོ་སྦྱོང་སྦྱིན་བ་དང༌། མུ་སྟེགས་ཅན་གྱི་གནས་པ་སྦྱིན་པ་ཞེས་བྱ་བས་ནི། མུ་སྟེགས་ཅན་རབ་ཏུ་དབྱུང་བར་འདོད་པ་ལ། ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱི་གནས་པ་སྦྱིན་པའི་ལས་གཅིག་བསྟན་ཏོ། །དེ་ལས་གཞན་པའི་སྤོ་བ་སྦྱིན་བ་ཞེས་བྱ་བ་ནི་མུ་སྟེགས་ཅན་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱི་གནས་པ་སྦྱིན་བ་ལས་གཞན་བ། དགེ་འདུན་ལྷག་མའི་བཅབས་པ་ལ་སྤོ་བ་སྦྱིན་པའི་ལས་ཡིན་པའོ། །མགུ་བ་སྦྱིན་བ་ཞེས་བྱ་བ་ས་ནི། དགེ་འདུན་ལྷག་མའི་ལྟུང་བའི་ཕྱིར་མགུ་བ་སྦྱིན་བ་དང༌། ལྕི་བའི་ཆོས་ཀྱི་ལྟུང་བའི་མཚན་མ་མགུ་བ་ལའོ། །ཡང་ཞི་ནས་བསླང་སྟེ་སྦྱིན་པ་ཞེས་བྱ་བ་ནི། སྤོ་བ་དང་མགུ་བར་བྱ་བ་བྱེད་པའི་སྐབས་སུ་ལྷག་མའི་ལྟུང་བ་བྱུང་ན་གཞི་ནས་སྤོ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ། སྤོ་བ་དང༌། ཡང་ཞི་ནས་བསླང་སྟེ་མགུ་བར་བྱ་བ་དག་གིས་འདིར་གཞི་ནས་བསླངས་པའི་སྒྲ་རིག་པར་བྱའོ། །ཡང་གཞི་ནས་བསླངས་པར་གྱུར་པ་ཞེས་བྱ་བ་ལ་ སོགས་པ ་ཞེས་བྱ་བས་ཡང་གཞི་ནས་བསླངས་པ་ལ་ སོགས་པ ་བཞི་པོ་རྣམས་ཀྱང་ཡང་གཞི་ནས་བསླངས་ཏེ་
མགུ་བར་བྱ་བ་སྦྱིན་ པ་ལ་སོགས ་པའི་སྒྲས་བརྗོད་དོ་ཞེས་བྱ་བ་ལ་དགོངས་པའོ། །དྲན་པས་འདུལ་བ་སྦྱིན་བ་ཞེས་བྱ་བས་ནི་དྲན་པས་དང་མ་མྱོས་པས་འདུལ་བ་སྦྱིན་པ་གཉིས་བསྟན་ཏོ། །བསྙེན་པར་རྫོགས་པར་བྱ་བ་དང་མཚམས་དགྲོལ་བ་ཞེས་བྱ་བས་མཚམས་དགྲོལ་བའི་ལས་གཅིག་བསྟན་ཏོ། །ནན་ཏུར་གྱི་ལས་ཞེས་བྱ་བ་ནི་འདི་ལྟ་སྟེ། བསྡིགས་པ་དང༌། སྨད་པ་དང༌། བསྐྲད་པ་དང༌། ཕྱིར་འགྱེད་པ་དང་མ་མཐོང་བས་གནས་ནས་དབྱུང་བ་དང༌། ཕྱིར་མི་འཆོས་པས་གནས་ནས་དབྱུང་བ་དང༌། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་དང༌། དབྱུང་བ་དག་ལ་ནི་བརྗོད་པ་གསུམ་མོ་ཞེས་བྱ་བ་ནི་ལས་ལན་གསུམ་དུ་བརྗོད་པའོ། །དེ་ལྟར་འདུལ་བའི་གཞུང་ལས་བགྲང་བ་དང༌། བཤུང་བ་བྱེད་པ་དང༌། ཁྱིམ་གྱི་བསླབ་པའི་སྡོམ་པ་སྦྱིན་པ་དང༌། ཕྱག་མི་བྱ་བའི་བསླབ་པའི་སྡོམ་པ་སྦྱིན་པ་དང༌། རྩོད་པ་སྤོང་བར་བྱེད་པ་བསྐོ་བ་དང༌། བཟོད་པ་གསོལ་བ་ཞེས་བྱ་བའི་ལས་དྲུག་པོ་འདི་རྣམས་ལ་ལན་གསུམ་རྗོད་པར་བྱེད་པ་ཞེས་བྱ་བ་འདི་སྟོན་པར་བྱེད་པ་མཐོང་བར་བྱེད་པ་དེ་དག་ནི་འདིར་གསོལ་པ་དང་བཞིའི་ལས་སུ་མ་བྱས་སོ། །དེ་ལྟར་གང་ལས་ཤེས་ཤེ་ན། གཏམ་གྱི་གཞི་ལས། ལས་ཀྱི་གྲངས་བརྗོད་པ་ལས་འབྱུང་སྟེ། བཙུན་པ་ལས་རྣམ་པ་དུ་མ་ཆིས། ཉེ་བ་འཁོར་བ་རྒྱ་རྩ་གཅིག་གོ །བཙུན་པ་ལས་དུ་རྣམས་ཀྱིས་ལས་རྣམ་བསྡུས། ཉེ་བ་འཁོར་གསུམ་གྱིས་ཏེ་གསུམ་གང་ཞེ་ན། གསོལ་བའི་ལས་དང༌། གསོལ་བ་དང་གཉིས་ཀྱི་ལས་དང༌། གསོལ་བ་དང་བཞིའི་ལས་ཀྱིས་སོ། །དེའི་དབྱེ་བ་རྣམས་ནི་གཏམ་གྱི་གཞི་དེ་ཉིད་ལས་ལྟ་བ་རྣམས་གསུམ་དུ་གསུངས་སོ། །བཙུན་པ་ལས་བརྒྱ་རྩ་གཅིག་པོ་གང་ལགས་པ་དེ་རྣམས་ལ་གསོལ་བའི་ལས་རྣམས་ནི་དུ། གསོལ་བ་དང་གཉིས་ཀྱི་ལས་དག་ནི་དུ། གསོལ་བ་དང་བཞིའི་ལས་རྣམས་ནི་དུ་མ་ཆིས། བཀའ་སྩལ་པ། ཉེ་བ་འཁོར་གསོལ་བའི་ལས་རྣམས་ནི་ཉི་ཤུ་རྩ་བཞིའོ། །གསོལ་བ་དང་གཉིས་ཀྱི་ལས་ནི་བཞི་བཅུ་རྩ་བདུན་ནོ། །གསོལ་བ་དང་བཞིའི་ལས་ནི་སུམ་ཅུའོ་ཞེས་གསུངས་པ་ཡིན་ནོ། །ལས་ཀྱི་གཞི་ཉིད་ལས་དབྱེ་བའི་ཚད་དེ་ལྟ་བུ་རྣམ་ལ་ལས་རྣམ་པར་གཞག་པའི་སྐབས་སུ་
ངོ་བོ་ཉིད་བརྗོད་པ་ཡིན་ནོ། །དེའི་ཕྱིར། གསང་དང་ནང་དུ་དྲི་ཕྱིར་དང༌། །གསོ་སྦྱོང་དེ་ལ་ལྟུང་བཅས་དང༌། །དེ་ལ་དགེ་འདུན་ཡིད་གཉིས་དང༌། །རྩོད་དང་ངེས་ཉིད་མ་ཡིན་དང༌། །དེ་ཡི་དོན་དུ་ལྔ་པོ་དག །ཐམས་ཅད་དགག་དབྱེར་གཏོགས་པ་ཡིན། །དབྱེར་གནས་ཁས་བླངས་ཉིད་དང་ནི། །ཤི་བའི་རྫས་དང་ནོར་འདྲ་དང༌། །ཆོས་གོས་སྲ་བརྐྱང་གཏད་པ་དང༌། །གནས་ངན་ལེན་ནི་བརྗོད་པ་དང༌། །ཆོས་གོས་སྦྱིན་པར་བྱ་བ་དང༌། །གྲངས་སུ་གཞུག་པའི་གཞི་དག་དང༌། །ཁྱིམ་གྱི་སྡོམ་དང་དེ་གཞིག་དང༌། །ལྷུང་བཟེད་ཁ་སྦུབ་བྱ་བ་དང༌། །དེ་ཉིད་བཟློག་པར་བྱ་བ་དང༌། །གསོལ་བ་འབའ་ཞིག་ལས་ཡིན་ནོ། །གནས་དང་མཚམས་ཀྱི་གཉིས་པོ་དང༌། །མི་འབྲལ་མྱོས་དང་དགག་དབྱེ་དང༌། །གནས་མལ་སྟོབས་པར་བྱེད་པ་དང༌། །རུང་བའི་ས་གཞི་བསྐོ་བ་དང༌། སྲ་བརྐྱང་དང་ནི་དེ་གདིང་དང༌། །སྤོང་དང་ལག་གི་བླ་དང་ནི། །གནས་ཁང་བསྐོ་ལ་ སོགས་པ ་དག །གཟུ་དང་གསོལ་དང་སྦེད་པ་དང༌། ཚུལ་ཤིང་འདྲི་མ་པར་བྱེད་པ་དང༌། ཁང་པ་ཁང་ཆེན་བསྟན་པ་དང༌། །གླེང་དང་འབྲལ་བར་མི་འགྱུར་དང༌། །སྟན་དང་ལྷུང་བཟེད་འདྲིམ་པ་དང༌། །མ་དང་གོ་བར་བྱ་བ་དང༌། །སྟོན་པ་དང་ནི་ནགས་ཉུལ་དང༌། །ཕྱག་མི་བྱ་དང་མང་ཕྱིར་དང༌། །ཁར་བ་དྲ་བའི་ཕྱིར་དང་ནི། །རྙེད་པ་གཅིག་ཏུ་བྱ་ཕྱིར་དང༌། །བསླབ་པ་སྦྱིན་དང་ཉེར་གནས་དང༌། །བུ་དང་ཉེ་དུའི་ཕྱིར་འགྲོ་བ། །གསོལ་དང་གཉིས་ཀྱི་ལས་ཡིན་ནོ། །བསྙེན་པར་རྫོགས་པར་བྱ་བ་དང༌། མུ་སྟེགས་གནས་དང་མཚམས་དགྲོལ་དང༌། །མཐུན་སྦྱིན་གསོ་སྦྱོང་བདུན་པོ་དང༌། བརྒྱད་དང་དྲན་དང་མ་མྱོས་དང༌། །དེ་ཉིད་ཚལ་དུ་གཞུག་པ་དང༌། །བགོ་བར་བྱ་བ་བརྒྱད་དང་ནི། །ཉམས་པ་སྦྱིན་པར་བྱ་བ་ནི། །གསོལ་དང་བཞི་ཡི་ལས་ཡིན་ནོ། །ད་ནི་བསྡུ་བའི་ཚིགས་སུ་བཅད་པ་དེ་དག་བཤད་པར་བྱ་སྟེ། དེ་ལ། གསང་དང་ནང་དུ་དྲི་ཕྱིར་དང༌། །ཞེས་བྱ་བ་ལ་དེ་ལ་གསང་སྟེ་དྲི་བའི་ཕྱིར་ཞེས་བྱ་བ་ནི་གསང་སྟེ་སྟོན་པས་བར་ཆད་ཀྱི་ཆོས་རྣམས་གསང་སྟེ་དྲི་བའི་ཕྱིར། གསོལ་བ་འབའ་ཞིག་གི་ལས་བྱའོ། །ནང་དུ་དྲི་བའི་ཕྱིར་ཞེས་བྱ་བ་ནི་ལས་བྱེད་པས་བར་ཆད་ཀྱི་ཆོས་རྣམས་དགེ་འདུན་གྱི་ནང་དུ་དྲི་བའི་ཕྱིར་གསོལ་བ་འབའ་ཞིག་གི་ལས་
སོ། །གསོ་སྦྱོང་ཞེས་བྱ་བ་ནི་སོ་སོར་ཐར་པའི་མདོ་འདོན་པའི་ཕྱིར་གསོལ་བ་འབའ་ཞིག་གི་ལས་བྱ་བའོ། །དེ་ལ་ཞེས་བྱ་བ་ནི་གསོ་སྦྱོང་དེ་ལའོ། །དེ་ལ་ཅི་ཞེ་ན། དེའི་ཕྱིར་ལྟུང་བཅས་དང་ཞེས་བྱ་བ་སྨོས་ཏེ། ལྟུང་བ་ནི་ལྟུང་བ་ཞེས་བྱ་བ་བརྗོད་དོ། །དགེ་འདུན་ཐམས་ཅད་ལྟུང་བ་དང་བཅས་པར་གྱུར་ན་གསོལ་བ་འབའ་ཞིག་གི་ལས་གྱིས་བྱིན་གྱིས་བརླབས་ཏེ་གསོ་སྦྱོང་བྱའོ་ཞེས་བྱ་བ་སྨོས་ཏེ། དེ་ནི་འདི་ཡིན་ནོ། །ཡིད་གཉིས་དང་ཞེས་བྱ་བ་ནི་དགེ་འདུན་ལའོ། །དེ་ལ་ཞེས་བྱ་བ་ནི་ལྟུང་བ་དེ་ལའོ། །རྩོད་དང་ངེས་ཉིད་མ་ཡིན་ཞེས་བྱ་བ་ནི་དེར་གཏོགས་པའི་རྩོད་པ་དང་མ་ངེས་པ་ཉིད་ལའོ། །དེ་ཡི་དོན་དུ་ལྔ་པོ་དག །ཅེས་བྱ་བ་ནི་གསོ་སྦྱོང་ཞེས་བྱ་བ་ལ་ སོགས་པ ་གསུངས་པ་ལ་གསོ་སྦྱོང་གསུངས་པས་དགག་དབྱེ་ལ་སྦྱར་རོ། །ཤི་བའི་རྫས་དང་ཞེས་བྱ་བ་ནི་ཤི་བ་དང་འབྲེལ་པའི་རྫས་བགོ་བ་ལའོ། །ཆོས་གོས་སྲ་བརྐྱང་གཏད་པ་དང༌། །གནས་ངན་ལེན་ནི་བརྗོད་པ་དང༌། །ཆོས་གོས་སྦྱིན་པར་བྱ་བ་དང༌། །ཞེས་བྱ་བ་ནི་གལ་ཏེ་གཏན་པ་ཕུལ་ན་དེ་བས་ན་ཉེ་བར་སྦྱར་བའོ། །གྲངས་སུ་གཞུག་པ་བཞི་དག་དང༌། །ཞེས་བྱ་བ་ནི་ངོར་འཕྱ་བའི་གྲངས་སུ་གཞུག་ པ་ལ་སོགས ་པའོ། །ཁྱིམ་གྱི་སྡོམ་དང་དེ་གཞིག་ཅེས་བྱ་བ་ནི་གང་ཞིག་ཅེས་བྱ་བ་འདའ་བྱེད་ཅིང་ལོངས་སྤྱོད་འགྲིབས་པ་ལས་དེ་གཞིག་པའོ། །ལྷུང་བཟེད་ཁ་སྦུབ་བྱ་བ་དང༌། །དེ་ཉིད་བཟློག་པར་བྱ་བ་དག །གསོལ་བ་འབའ་ཞིག་ལས་ཡིན་ནོ། །ཞེས་བྱ་བ་ནི་ལས་ཉི་ཤུ་རྩ་བཞི་པོ་གསུངས་པ་རྣམས་ལའོ། །གནས་དང་ཞེས་བྱ་བ་ནི། གསོ་སྦྱོང་གི་གནས་ལ་གསོལ་བ་དང༌། གཉིས་ཀྱི་ལས་ཀྱིས་བསྐོ་བའོ། །མཚམས་གཉིས་པོ་དང་ཞེས་བྱ་བ་ནི། མཚམས་ཆེན་པོ་དང༌། དཀྱིལ་འཁོར་བའི་མཚམས་བསྐོ་བའོ། །མ་འབྲེལ་ཞེས་བྱ་བ་ནི་མཚམས་ཆེན་པོ་བཅད་བའི་ནང་དུ་གསོལ་བ་དང༌། གཉིས་ཀྱི་ལས་ཀྱིས་ཆོས་གོས་དང་འབྲལ་བར་མི་འགྱུར་བའི་བསྐོ་བའོ། །སྨྱོས་དང་ཞེས་བྱ་བ་ནི་མི་འབྲལ་བར་བསྐོ་བ་དང༌། མྱོས་པའི་བསྐོ་བ་དང༌། དགག་དབྱེ་བསྐོ་བ་དང༌། གནས་མལ་སྟོབས་པར་བྱེད་པ་བསྐོ་བའོ། །རུང་བའི་ས་གཞི་ཞེས་བྱ་བ་ནི་རུང་བའི་ཁང་པ་གསོལ་བ་དང༌། གཉིས་ཀྱི་ལས་ཀྱིས་བསྐོ་བའོ། །གཏན་པ་དད་ནི་ཞེས་བྱ་བ་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །དེ་གདིང་དང་ཞེས་བྱ་བ་ནི་གསོལ་བ་དང་གཉིས་ཀྱི་ལས་ཀྱིས་བསྐོ་བའོ། །སྤོང་དང་ཞེས་བྱ་བ་ནི་སྤོང་བའི་ཞལ་ཏ་
བསྐོ་བའི་ལས་གཅིག་བསྟན་ཏོ། །ལག་གི་བླ་དང་ཞེས་བྱ་བ་ནི། དེའི་ལག་གི་བླ་བསྐོ་བའི་ལས་གཅིག་བསྟན་ཏོ། །གནས་ཁང་བསྐོ་བ་ལ་ སོགས་པ ་དང་ཞེས་བྱ་བ་ལ་ སོགས་པའི་སྒྲས་ནི་འདུན་པ ་དང་བཟློག་པའི་བར་དུ་བསྐོ་བའོ། །གཟུ་དང་གསལ་དང་སྦེད་པ་དང༌། །ཚུལ་ཤིང་འདྲིམ་པར་བྱེད་བ་དང༌། །ཞེས་བྱ་བ་ནི་དེ་བསྐོ་བའོ། །སྦེད་པ་དང་ཞེས་བྱ་བ་ནི་གཞི་འདྲིམ་པར་བྱེད་པ་བསྐོ་བ་ལའོ། །ཁང་པ་ཁང་ཆེན་བསྟན་པ་དང༌། །ཞེས་བྱ་བ་ནི་དགེ་འདུན་ལྷག་མ་ལས་གསུངས་པའི་སྟོན་པ་གཉིས་བསྐོ་བའོ། །གླེང་དང་ཞེས་བྱ་བ་ནི་བསྐོ་བའོ། །འབྲལ་བར་མི་འགྱུར་དང་ཞེས་བྱ་བ་ནི་སྣམ་སྦྱར་དང་མི་འབྲལ་བའི་གནང་བ་སྦྱིན་པའོ། །གདིང་དང་ཞེས་བྱ་བ་ནི་གདིང་བའི་ཐོག་མར་ལོ་དྲུག་ཏུ་གནང་བ་སྦྱིན་བའོ། །ལྷུང་བཟེད་འདྲིམ་དང་ཞེས་བྱ་བ་ནི། ལྷུང་བཟེད་ལྷག་མ་འདྲིམ་པར་བསྐོ་བ་ལའོ། །མ་དད་གོ་བར་བྱ་བ་དང༌། །ཞེས་བྱ་བ་ནི། ཁྱིམ་རྣམས་སུ་གནས་ངན་ལེན་གོ་བར་བྱ་བའི་ཕྱིར་གང་ཟག་བསྐོ་བ་དང༌། སྔོན་བཞིན་དུ་གང་ཞིག་བརྗོད་པ་སྨྲ་བ་ལ་དགེ་སློང་རྣམས་ཀྱིས་སོ། །ནགས་ཉུལ་བ་ལ་ སོགས་པ ་གཉིས་བསྡུས་པ་ལ་དགེ་སློང་མའི་གདམས་ངག་སྟོན་པ་བསྐོ་བར་བསྟན་པའི་དོན་དུའོ། །ཕྱག་མི་བྱ་དང་ཞེས་བྱ་བ་ནི་ཕྱག་མི་བྱ་བའི་ཕྱིར་བསྐོ་བ་སྟེ། དགེ་སློང་མའི་དགེ་འདུན་གྱིས་རྩ་བ་དང་འབྲས་བུ་མེད་པའི་སྦུན་པའི་རྣམ་པ་ཅན་རྣམས་ལའོ། །མང་ཕྱིར་དང་ཞེས་བྱ་བ་ནི་འཁོར་དང་འཁོར་མང་པོ་ཉེ་བར་འཇོག་པའི་གནང་བ་སྦྱིན་པའོ། །འཁར་བ་དྲ་བའི་ཕྱིར་དང་ནི། །ཞེས་བྱ་བ་ནི་བསླབ་པའི་དོན་དུ་འཁར་བ་དང་དྲ་བའི་སྡོམ་པ་གཉིས་སོ། །རྙེད་པ་གཅིག་ཏུ་བྱ་ཕྱིར་དང༌། །ཞེས་བྱ་བ་ནི་གཙུག་ལག་ཁང་མཚམས་ཐ་དད་པ་གཉིས་རྙེད་པ་གཅིག་ཏུ་བྱ་བའི་ཕྱིར་གསོལ་བ་དང་གཉིས་ཀྱི་ལས་བྱ་བའོ། །བསླབ་པ་བྱིན་དང་ཞེས་བྱ་བ་ནི། དགེ་སློང་མའི་བསླབ་པ་སྦྱིན་པའོ། །ཉེར་གནས་དང་ཞེས་བྱ་བ་ནི། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་བའོ། །བུ་དང་ཞེས་བྱ་བ་ནི་ཉལ་བའི་གནང་བ་སྦྱིན་པ་བསྐོ་བ་སྟེ། གང་ཞིག་གནས་པའི་དོན་དུ་གསུངས་པའོ། །ཉེ་དུའི་ཞེས་བྱ་བ་ནི་ཉེ་དུ་རྣམས་དང་ལྷན་ཅིག་འབྲེལ་བའི་ཉེ་བར་སྤྱོད་པའི་གནང་བའི་སྡོམ་པ་སྦྱིན་བའོ། །དགེ་སློང་མས་མུ་གེའི་སྡུག་བསྔལ་བྱུང་བའི་ཚེ་ཇི་སྐད་བསྟན་པའོ། །ཕྱིར་འགྲོ་བ་ཞེས་བྱ་བ་ནི། ཞག་བདུན་ལས་འོག་ཏུ་ཞག་བཞི་བཅུ་མཚམས་ཀྱི་ཕྱི་རོལ་དུ་འགྲོ་བའི་གནང་བ་སྦྱིན་པ་བསྐོ་བའོ། །འདི་ནི་གསོ་སྦྱོང་ལ་བསྐོ་བ་ལ་ སོགས་
པ ་ལས་བཞི་བཅུ་རྩ་བདུན་པོ་རྣམས་ལའོ། །གསོལ་དང་གཉིས་ཀྱི་ལས་ཡིན་ནོ། །ཞེས་བྱ་བ་ནི་གསོལ་བ་དང་གཉིས་ཀྱི་ལས་ཡིན་ནོ་ཞེས་བྱ་བའི་དོན་ཏོ། །བསྙེན་པར་རྫོགས་པར་བྱ་བ་དང༌། མུ་སྟེགས་གནས་དང་མཚམས་དགྲོལ་དང༌། །ཞེས་བྱ་བ་ལ་མཚམས་དགྲོལ་བ་ནི་མཚམས་བཅད་པ་གསོལ་བ་དང༌། བཞིའི་ལས་ཀྱིས་དགྲོལ་བའོ། །མཐུན་སྦྱིན་ཞེས་བྱ་བ་ནི། མཐུན་པ་སྦྱིན་པ་དང་གསོ་སྦྱོང་སྦྱིན་པའོ། །འདུན་པ་པོ་དང་ཞེས་བྱ་བ་ནི། དེའི་རིགས་ཅན་གྱི་ནན་ཏུར་གྱི་ལས་བདུན་པོ་རྣམས་ཀྱི་ནན་ཏུར་བྱ་བའི་ལས་གཅིག །བཟོད་པར་གསོལ་བའི་ལས་གཅིག་དང་ལས་གཉིས་སོ། །བརྒྱད་དང་ཞེས་བྱ་བ་ནི་སྤོ་བ་དང་མགུ་བར་བྱ་བ་དང༌། གཞི་ནས་སྤོ་བ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་སྤོ་བ་སྦྱིན་བ་དང༌། ཡང་གཞི་ནས་མགུ་བ་སྦྱིན་བ་དང༌། སྲ་བརྐྱང་དབྱུང་བ་དང་ལྷག་མ་ལས་དབྱུང་བ་དག་ལ་གསོལ་བ་དང༌། བཞིའི་ལས་བྱ་བ་དང༌། བརྒྱད་སོ་སོར་བགྲང་ངོ༌། །དྲན་དང་མི་མྱོས་དང༌། དེ་ཉིད་ཚོལ་དུ་གཞུག་པ་དང༌། །ཞེས་བྱ་བ་ནི་དྲན་པས་འདུལ་བར་འོས་པ་དང༌། མ་མྱོས་པས་འདུལ་བར་འོས་པ་དང༌། དེའི་ངོ་བོ་ཉིད་ཚོལ་དུ་གཞུག་པ་གསུམ་བསྡུས་པའོ། །བསྐོ་བར་བྱ་བ་རྣམས་དང་ནི། །ཞེས་བྱ་བ་ནི་བཟློག་པའི་ཕྱིར་བསྒོ་བར་བྱ་བ་བཅུ་གཅིག་པོ་དག་གསུངས་ཏེ་དེ་ལ་དྲུག་ནི་དགེ་སློང་གི་རྣམ་པར་འབྱེད་པ་ལས་སྨོས་ཏེ། དགེ་འདུན་གྱི་དབྱེན་བྱེད་པ་ལ་ སོགས་པ ་རྣམས་སོ། །གཉིས་ནི་དགེ་སློང་མའི་རྣམ་པར་འབྱེད་པ་ལས་ཐུན་མོང་མ་ཡིན་པར་གསུངས་ཏེ། ཕམ་པར་འགྱུར་བའི་སྐབས་ནས་གནས་ནས་དབྱུང་བའི་རྗེས་སུ་ཕྱོགས་པ་གཅིག་གོ །དགེ་འདུན་ལྷག་མའི་སྐབས་ནས་བཞི་བསྟན་ཏེ། སྡེ་ཚན་གཅིག་གོ །ཉམས་པ་སྦྱིན་པར་བྱ་བའི་བསླབ་པ་སྦྱིན་པའོ། །གསོལ་དང་བཞི་ཡི་ལས་ཡིན་ནོ། །ཞེས་བྱ་བ་ནི་ལས་སུམ་ཅུ་པོ་ཇི་སྐད་བསྟན་པ་དེ་རྣམས་ནི་གསོལ་བ་དང་བཞིའི་ལས་ཡིན་ནོ་ཞེས་བྱ་བའི་དོན་ནོ། །ལྷག་བོར་མ་གཏོགས་པ་རང་གི་དོན་གྱི་སྔགས་བརྗོད་པ་ཡང་ངོ་ཞེས་བྱ་བ་ལ་རང་གི་དོན་ནི་བདག་གི་དོན་ཏེ། སྔགས་བརྗོད་པ་ནི་སྔགས་གཞན་བརྗོད་པ་གང་ཡིན་པ་དེ་ཡང་ལན་གསུམ་བརྗོད་པར་བྱ་བ་ཁོ་ནའོ། །འདི་ལྟ་སྟེ་འཁར་པ་དང་དྲ་བ་ལ་ སོགས་པ ་གསོལ་བ་གང་དག་ཡིན་པ་དང༌། ཆོས་གོས་ལ་ སོགས་པ ་རྫས་གཞན་དང༌། གསོ་སྦྱོང་དང་དགག་དབྱེ་དག་དང་གནས་པར་ཁས་བླངས་པ་
དང། མཚམས་ཀྱི་ཕྱི་རོལ་དུ་མི་འབྲལ་བར་བྱ་བའི་ཕྱིར་ཞག་གཅིག་ལ་ སོགས་པ ་བྱིན་གྱིས་བརླབ་པ་དང༌། སྐྱབས་སུ་འགྲོ་བ་དང༌། རབ་ཏུ་བྱུང་བ་དང༌། སྡོམ་པ་མནོད་པ་གང་དག་ཡིན་པ་དང༌། ལྟུང་བ་བཤགས་པ་དང༌། འདུན་པ་དང༌། ཡོངས་སུ་དག་པ་དབུལ་པ་དང༌། དགག་དབྱེ་དག་པ་དབུལ་བ་ལའོ།། གཞན་གྱི་དོན་དུ་གང་ཟག་ལ་ཡང་ངོ་ཞེས་བྱ་བ་ནི་གཞན་གྱི་དོན་དུ་སྔགས་གང་ཟག་ལ་བརྗོད་པ་གང་ཡིན་པ་དེ་ཡང་ལན་གསུམ་ཁོ་ན་བརྗོད་པར་བྱ་བའོ། །འདི་ལྟ་སྟེ་འདུན་པ་དང་ཡོངས་སུ་དག་པ་དང༌། དགག་དབྱེ་བརྗོད་པ་དག་དགེ་སློང་ལ་བརྗོད་པའི་ཕྱོགས་ལ་ནི་ལན་གསུམ་བརྗོད་པར་བྱའོ། །དགེ་འདུན་ལ་བརྗོད་པར་བྱའོ་ཞེས་བྱ་བའི་ཕྱོགས་ལ་ནི་ལན་ཅིག་བརྗོད་པར་བྱ་སྟེ། གང་ཟག་ལ་ཞེས་སྨོས་པའི་ཕྱིར་རོ། །ལྷག་བོར་ཡང་མདུན་དུ་ཙོག་པུར་འདུག་སྟེའོ་ཞེས་བྱ་བ་ནི་གང་ཟག་འདི་གང་ཟག་ལ་ཡང་ངོ་ཞེས་བྱ་བ་སྨོས་པས་སོ། །གང་ཡང་རང་གི་དོན་ལ་ཞེས་བྱ་བ་དགེ་འདུན་ཙམ་ཉིད་དང༌། འདི་ལས་གཞན་རྣམ་པ་གཉིས་ལ་ཡང་དེ་བྱེད་པའོ། །ལྷག་པོར་བྱ་བའི་སྔགས་བརྗོད་པ་གང་ཡིན་པ་དེ་ཡང་གང་ཟག་གི་མདུན་དུ་ཙོག་པུར་འདུག་སྟེ་བརྗོད་པར་བྱ་བ་གཞན་གྱིས་ནི་མ་ཡིན་ནོ། །ཞུ་བ་ཡང་ངོ་ཞེས་བྱ་བ་ནི་འདིར་རབ་ཏུ་དབྱུང་ངམ་ཞེས་དགེ་སློང་གི་དགེ་འདུན་ལ་ཞུ་བར་བྱེད་པ་ན། རབ་ཏུ་དབྱུང་བར་འདོད་པའི་དགེ་བསྙེན་དེས་ཀྱང་རྒན་པའི་མཐའ་ལོགས་སུ་ཙོག་བུར་འདུག་པར་བྱ་བ་སྟེ། གང་ཞིག་དགེ་འདུན་ལ་ཞེས་བྱ་བ་འདི་ལས་རྒན་པའི་མཐའ་ལོགས་སུ་ཞེས་བྱ་བ་རྟོགས་པའོ། །བསྙེན་པར་རྫོགས་པར་བྱེད་ན་གསང་སྟེ་སྟོན་པ་མ་གཏོགས་པ་ཕ་གུ་ལ་རྟིང་པ་གཉིས་ཀྱིས་སོ་ཞེས་བྱ་བ་ནི་གསང་སྟེ་སྟོན་པ་མ་གཏོགས་པ་བསྙེན་པར་རྫོགས་པའི་ལས་བྱེད་པ་ན་མཁན་པོར་གསོལ་བ་དང༌། ལས་ཀྱི་སློབ་དཔོན་གྱིས་བར་ཆད་དྲི་བ་མཉན་པ་དང༌། དེའི་ལན་འདེབས་ པ་དང༌། བསྙེན་པར་རྫོགས་པར་བྱ་བ་ལ་སོགས ་པའི་སྐབས་ཐམས་ཅད་དུ། བསྙེན་པར་རྫོགས་པར་བྱ་བའི་གང་ཟག་དེ་ཕ་གུའི་སྟེང་དུ་རྟིང་པ་ཉིད་ཀྱིས་འདུག་ཏུ་གཞུག་གོ །ཆོས་གོས་དང་ལྷུང་བཟེད་བྱིན་གྱིས་བརླབ་པ་ནི། སྔར་བྱས་ཟིན་པས་དེ་ལ་ནི་ཆོ་ག་འདི་ཐལ་བར་མི་འགྱུར་ཏེ། རྫས་བྱིན་གྱིས་བརླབ་ པ་ལ་སོགས ་པས་གནོད་པའོ། །འདིར་ཕ་གུ་ཞེས་བྱ་བ་ནི་དྲང་སྲོང་གི་རྗེས་སུ་འབྲངས་ནས་སྨོས་པའོ། །དེ་ལྟར་འདི་ནི་དྲང་སྲོང་གི་ལུང་ལས་འབྱུང་བ་སྟེ། བོང་བའི་རིགས་ཀྱིས་དབང་དུ་བྱས་ནས་
དེའོ། །དུམ་བུ་ཡང་འདིས་རྗེས་བསྙེགས་པའོ། །བུད་མེད་ནི་སྟན་ནང་ཚངས་ཅན་ལ་ སོགས་པའོ་ཞེས་བྱ་བ་ནི་བུད་མེད་བསྙེན་པར་རྫོགས་པར་བྱེད་པ ་ན་གསང་སྟེ་བསྟན་པ་མ་གཏོགས་པས་གནས་སྐབས་ཇི་སྐད་བསྟན་པ་དེ་དག་ཏུ་སྟན་ནང་ཚངས་ཅན་ལ་ སོགས་པ ་བུད་མེད་ཅི་བདེར་འདུག་ཏུ་གཞུག་པ་ཡིན་གྱི་ཙོག་པུར་འདུག་ཏུ་ཡང་མི་བཞུག་གོ །སོགས་པ་ཞེས་སྨོས་པའི་སྒྲས་ནི་རྫས་འཇམ་པ་དང་སྤངས་པ་གཞན་དག་བསྡུའོ། །གཞན་གཙོ་བོ་མ་ཡིན་པ་ཉིད་ལ་ནི་དགེ་འདུན་ལ་རྒན་པའི་མཐར་རོ་ཞེས་བྱ་བ་ནི་རང་གི་དོན་གྱི་སྔགས་དགེ་འདུན་ལ་བརྗོད་པ་ན། དགེ་འདུན་ལས་གཞན་གཙོ་བོ་མ་ཡིན་པ་ཉིད་ལ་ནི། དེ་ལ་དེ་བསྡུ་བའི་གཏོགས་པའི་གང་ཟག་ལ་ཅུང་ཟད་ཀྱང་རག་ལས་པ་མ་ཡིན་པ་དེ་ནི་རང་གི་དོན་གྱིས་སྔགས་བརྗོད་པའོ། །རྒན་པའི་མཐའ་ལོགས་སུ་ཙོག་པུར་འདུག་སྟེ་བརྗོད་པར་བྱའོ། །འདི་ལྟ་སྟེ། འཇུག་པའི་སྔགས་རྣམས་ལྟ་བུའོ། །གཞན་གྱི་གནས་ལ་ སོགས་པའི་ཚུལ་བརྗོད་པ ་ལའོ། །སྔགས་མ་བརྗོད་པའི་གང་ཟག་དག་གིས་གསོལ་བ་གཞན་ལ་མཉན་ཏེ་བརྗོད་པར་བྱ་བ་དེ་ནི་གང་ཟག་ལ་རག་ལས་པ་མ་ཡིན་པས་དེ་ནི་དེ་རྣམས་ཀྱི་མདུན་དུ་གཙོ་པུར་འདུག་སྟེ་བརྗོད་པར་བྱའོ། །འདུན་པ་དང་ཡོངས་སུ་དག་པ་དང༌། དགག་དབྱེ་བརྗོད་པ་གང་ཟག་གི་ཕྱོགས་ལས་ཡན་ལག་གི་ངོ་བོར་འགྲོ་བ་ཉིད་ཀྱིས་དེ་ལ་རག་ལས་པ་ཡིན་པས་དེས་དེ་ཉིད་ཀྱི་མདུན་དུ་གཙོག་པུར་འདུག་སྟེ་བརྗོད་པར་བྱ་སྟེ། འདི་ནི་བསྙེན་པར་རྫོགས་པའི་སྐབས་སུ་གསུངས་མོད་ཀྱི་ཐམས་ཅད་ལ་ཡང་འདུན་པ་དང་ཡོངས་སུ་དག་པ་དང་འདྲ་བས་སྤྱིར་མདོར་བྱས་སོ། །གཞན་གྱི་དོན་དུ་ནི་འགྲེངས་ཏེ་འདུད་པ་དང་བཅས་པར་རོ་ཞེས་བྱ་བ་ནི་དགེ་འདུན་ལ་ཡང་གཞན་གྱི་དོན་དུ་བརྗོད་པ་གང་ཡིན་པ་དེ་ནི་རྒན་པའི་མཐར་འགྲེངས་ཏེ་འདུད་པ་དང་བཅས་པས་བརྗོད་པར་བྱ་སྟེ། འདི་ལྟ་སྟེ་ཞུ་བ་དག་དང་འདུན་པ་དང་ཡོངས་སུ་དག་པ་དང༌། དགག་དབྱེ་བརྗོད་པ་དགེ་འདུན་གྱི་ཕྱོགས་ལ་བྱ་བ་དང༌། དབྱར་གནས་པའི་དགེ་འདུན་གྱི་དགག་དབྱེ་མཛད་ལགས་སོ་ཞེས་བྱ་བ་དང༌། ཁྲིམས་སུ་བྱ་བ་བཟང་པོ་བརྗོད་པ་དང། རྩོད་པ་མི་སྐྱེད་པ་ཉིད་དང༌། ཚུལ་ཤིང་གི་གྲངས་དང་གནས་མལ་ལས་ལོག་པར་ལོངས་མི་སྤྱོད་པར་བྱེད་པ་ཉིད་ནི་འབྲས་བུ་གོ་བར་བྱེད་པ་དག་གོ །ཁ་ཅིག་ལས་གསང་སྟེ་སྟོན་པ་ཉིད་ནི་ལམ་གྱི་དབུས་ནས་ཞེས་སོ་ཞེས་བྱ་བ་ནི་ལམ་གྱི་དབུས་ནས་གསང་སྟེ་སྟོན་པ་དགེ་འདུན་བཙུན་པ་རྣམས་གསན་དུ་གསོལ་ཞེས་
བྱ་བའི་ཚིག་གིས་སོ། །ལམ་གྱི་དབུས་ན་གནས་པ་དེས་འདུད་པ་དང་བཅས་པས་ཞེས་བྱ་བ་ནི་འདོད་པ་གཅིག་གོ །གཞུང་ཁ་ཅིག་ལས་རྒན་པའི་མཐར་འགྲེངས་ཏེ་ཞེས་བྱ་བ་ནི་གཞན་དག་གོ །རྫས་བྱིན་གྱིས་བརླབ་པ་ཡང་ངོ་ཞེས་བྱ་བ་ལ། འགྲེངས་ཏེ་ཞེས་བྱ་བ་ནི་དེ་ཙམ་ལ་འདིར་འདོད་པས་འགྲེངས་ཏེ་བྱའོ་ཞེས་བྱ་བར་སྦྱར་རོ། །མདུན་དུ་ཞེས་བྱ་བ་ནི་དེ་ཉིད་འདིར་ཤུགས་ཀྱིས་ཐོབ་པ་ཉིད་དུ་རིག་པར་བྱའོ། །འདིར་གཞུང་ནི་སྨན་བྱིན་གྱིས་བརླབ་པ་ལས། དགེ་སློང་གི་མདུན་དུ་འགྲེངས་ཏེ་འདི་སྐད་བརྗོད་པར་བྱའོ་ཞེས་གསུངས་པ་ཡིན་ཏེ། དེའི་རྗེས་སུ་འབྲང་བས་ཐམས་ཅད་ཀྱི་དབང་དུ་བྱས་པའི་ཕྱིར་མདོ་འདི་བྱས་སོ། །ཕལ་ཆེ་བ་ལ་རབ་ཏུ་གྲགས་པ་ལ་བརྟེན་པའོ། །དབྱུང་བར་བྱ་བ་ལ་ཡང་དེའི་རྗེས་སུ་འབྲངས་ནས་ཆོ་གའི་སྐྱོན་ཤེས་པར་བྱའོ། །འགལ་བའི་ཟླ་ནི་བྱིན་གྱིས་བརླབས་པའམ། དབྱུང་བར་བྱ་བ་དག་གཞན་དུ་གནས་པས་མི་རིགས་སོ། །དེ་ལྟ་བས་ན་གང་གི་མདུན་དུ་བྱིན་གྱིས་བརླབ་པ་འམ་དབྱུང་བར་བྱ་བ་དེ་ལ་ཡང་སྤྱོད་ལམ་དེ་ཁོ་ན་དང་འདྲའོ། །འགྲེངས་ཏེ་འདུག་པ་རྣམས་ཀྱིས་དུས་སུའོ། །ལྷུང་བཟེད་དང་ཆོས་གོས་བྱིན་གྱིས་བརླབ་པའི་ཕྱིར་རིགས་པ་ནི་མ་ཡིན་ནོ། །མ་དད་པ་ཉིད་ཀྱིས་དེ་ཡིད་ལ་ཆགས་པར་འགྱུར་རོ། །དེ་ལྟ་བས་ན་དེ་ལ་བརྟེན་ནས་གནས་པ་ལས་བསྙེན་པར་རྫོགས་པ་ནི་མཁན་པོས་བྱས་སོ། །དེ་བས་ན་ལྟུང་བ་དང་བཅས་པར་རིག་པར་བྱའོ། །འདིར་རྫས་ཀྱི་སྒྲས་ནི་གསོ་སྦྱོང་གི་ཉི་མ་དང༌། དགག་དབྱེ་དང་ལྟུང་བ་བྱིན་གྱིས་བརླབ་པ་དང༌། ཕྱིར་བཅོས་པའི་དོན་དུ་འགྲེངས་ཏེ་འདུད་པ་དང་བཅས་པ་ཉིད་ཀྱིས་སོ། །གསོ་སྦྱོང་དང་དགག་དབྱེ་དག་བྱིན་གྱིས་བརླབ་པའི་ཕྱིར་ཙོག་པུར་འདུག་སྟེ་བྱ་བར་གསུངས་པས་དེ་གཉིས་ཀ་ཡང་འདུག་སྟེ་བྱའོ། །དེས་ན་གཅིག་དང་བཅས་པ་ལ་ནི་དེ་ལ་ངེས་པ་དང་ལྡན་པའི་ཆོ་གས་ཤེས་པར་བྱའོ། །གཅིག་པུར་ལྟུང་བ་བྱིན་གྱིས་བརླབ་པ་ནི་ལས་བྱེད་པ་པོས་ད་ལྟར་བྱ་བ་ཉིད་ལ་མི་འཐད་པས་འདིར་སྤྱོད་ལམ་རྣམ་པར་མ་འཁྲུགས་པས་ཇི་ལྟར་གནས་པས་དགེ་འདུན་ལས་ཕྱི་རོལ་དུ་དགག་དབྱེ་བྱིན་གྱིས་བརླབ་པ་ཉིད་ཀྱང་འདུག་སྟེ་ཞེས་བྱ་བར་རིག་པར་བྱའོ། །ཆོས་གོས་དབྱུང་བ་དང་བྱིན་གྱིས་བརླབ་པ་དག་ལ་ཡང་འདུག་པ་གཅིག་པུས་བྱ་བ་རིག་པར་འགྱུར་བ་མཐོང་བ་ཡིན་ནོ། །གསོ་སྦྱོང་གི་ལས་ལ་ཡང་དེ་ལྟ་བུའི་ངོ་བོའི་རྐྱེན་རྣམས་ལ་འགྲོ་བ་རྣམས་ཀྱིས་བྱེད་པར་གསུངས་པ་དེ་བས་ན། དེ་ལྟ་བུའི་ངོ་བོའི་རྐྱེན་རྣམས་ལ་གསོ་སྦྱོང་བྱིན་གྱིས་བརླབ་པ་ལ་ སོགས་པ ་ཐམས་
ཅད་དུ་འགལ་ཟླ་དང་འགྲོ་བ་མ་ཡིན་པ་ལ་ཡང་བྱེད་པ་ཉིད་རིག་པར་བྱའོ། །གསོ་སྦྱོང་ལ་ནི་གཅིག་པུ་བྱིན་གྱིས་བརླབ་པ་འགྲོ་བ་ཉིད་ལ་དེར་སྨོས་པ་ཉིད་དོ། །ཁ་ཅིག་ནི་དེའི་ངོ་བོའི་རྐྱེན་རྣམས་སུ་འགྱུར་ཏེ། གང་དུ་མི་འདུག་པ་རྣམས་ཀྱིས་གནས་པར་རིགས་པ་ཡིན་ཏེ་འདུག་པ་རྣམས་ཀྱིས་ནི་མ་ཡིན་ནོ། །འདུག་པའམ་མི་གནས་པ་རྣམས་ཀྱིས་དེར་ཡང་ནུས་པ་དེ་ལྟ་བུར་གྱུར་པ་ཉིད་ལ་བྱ་བ་བྱེད་པ་འགྲོ་བ་བཞིན་དུ་དོར་བར་མི་རིགས་པ་དེ་བས་ན། དེ་ལྟ་བུའི་ངོ་བོའི་རྐྱེན་རྣམས་ལ་གང་ལ་འགྲོ་བ་ཉིད་ལ་བྱ་བ་ཉིད་འདུག་པ་ལ་ཡང་དེའི་རྫས་བྱིན་གྱིས་བརླབ་པ་དང༌། བཏང་བ་དག་ནི་འདུག་པ་ལ་ཡང་རིག་པར་བྱའོ། །རྣམ་པར་བརྟག་པ་ནི་དེ་ཉིད་དོ་ཞེས་བྱ་བ་ནི་གོས་རྣམ་པར་བརྟག་པ་ནི་བྱིན་གྱིས་བརླབ་པ་ཉིད་ཡིན་པར་རིག་པར་བྱའོ། །དེས་ན་རྣམ་པར་བརྟག་པ་དེ་ལ་ཡང་ཆོ་ག་བཞིན་དུ་ཤེས་པར་བྱའི་མ་བྱས་པ་ཉིད་ནི་ཤེས་པར་མི་བྱའོ། །འདིར་གཞུང་ནི་སིལ་བུ་དག་ལས། འདི་ལྟར་རྣམ་པར་བརྟག་པར་བྱ་སྟེ། དགེ་སློང་གི་མདུན་དུ་འགྲེངས་ཏེ། བཙུན་པ་དགོངས་སུ་གསོལ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །དེ་ལ་བཟུང་སྟེ་ཞེས་བྱ་བ་ནི་ལག་པས་རྫས་དེ་བཟུང་སྟེ་བྱིན་གྱིས་རློབ་པར་བྱེད་པ་གཉིས་ཀས་དེ་ལྟར་བྱའོ། །འདི་ནི་གོས་ཀྱི་དོན་ལྷུང་བཟེད་དང་སྨན་བྱིན་གྱིས་བརླབ་པའི་ཕྱིར། ལྷུང་བཟེད་དང་སྨན་ལག་པ་གཡོན་པར་གཞག་པ་སྟེ། ལག་པ་གཡས་པས་བཀབ་ནས་སོ་ཞེས་བྱ་བ་སྨོས་ཏེ། བྱིན་གྱིས་རློབ་དུ་འཇུག་པ་དང་བྱིན་གྱིས་རློབ་པ་གཉིས་ཀར་སྨན་དང༌། ལྷུང་བཟེད་བྱིན་གྱིས་བརླབ་པ་ལ་གྲགས་པའོ། །བྱིན་གྱིས་རློབ་པར་བྱེད་པ་བཞིན་དུ་དེའི་ཕྱི་རོལ་དུ་ལག་པ་དག་གིས་སོ། །དེ་ཉིད་ལ་གང་གིས་བྱིན་གྱིས་རློབ་པའི་བདག་ཉིད་ཅན་མངོན་པར་བརྟེན་པ་བྱིན་གྱིས་རློབ་པར་བྱེད་པ་དེས་ལུས་ཀྱིས་མངོན་པར་བརྟེན་པ་རིགས་པ་ནི་འདིར་ཡན་ལག་ཉིད་དོ། །ཅིག་ཤོས་ཀྱིས་གང་ཞིག་གི་མི་རིགས་པ་དེ་འདིར་ཡན་ལག་ཉིད་ལ་ཞེས་བྱ་བ་སྣོད་དུ་མི་རུང་བ་ཉིད་ཀྱི་ཕྱིར་དང་དགོས་པ་གནང་དུ་མི་རུང་བ་ཉིད་ཀྱི་ཕྱིར་དེ་ལ་མ་བརྟེན་པའོ། །དབྱུང་བར་བྱ་བ་ལ་ཡང་རྫས་ཀྱི་ཆོ་ག་འདིའི་རྗེས་སུ་འབྲང་བར་ཤེས་པར་བྱའོ། །ལྷུང་བཟེད་ཀྱི་དབྱུང་བ་ནི་ལག་པས་སྟེང་ནས་གཡོགས་པ་བཏང་སྟེ། ལག་པ་ཡ་རེས་ཁ་ནས་བཟུང་སྟེ་བྱ་བ་ནི་རིགས་པ་ཡིན་ནོ། །གཟུང་བར་བྱ་བ་མ་ཡིན་པ་ཉིད་ལ་ནི་མདུན་དུ་བཞག་སྟེའོ་ཞེས་བྱ་བ་ནི་གཟུང་བར་བྱ་བའི་རྫས་ཉིད་མ་ཡིན་ པ་ནི་འདི་ལྟ་སྟེ། གསེར་དངུལ་ལ་སོགས ་པའི་སྒྲམ་བུ་མདུན་དུ་བཞག་སྟེ་བྱིན་གྱིས་བརླབ་
པར་བྱའོ། །ལས་ནི་འདུག་པ་ཉིད་ཀྱིས་སོ་ཞེས་བྱ་བ་ནི་གསོལ་བ་ལ་ སོགས་པའི་ལས་ཐམས་ཅད་འདུག་པ ་ཉིད་ཀྱིས་བྱའི་སྤྱོད་ལམ་གཞན་གྱིས་ནི་མི་བྱའོ། །དགག་དབྱེ་བྱེད་པ་པོ་ལ་མངོན་སུམ་དུ་ཆོ་ག་བརྗོད་པ་ཡིན་ནོ། །བརྗོད་པ་པོ་ལ་ཡང་དགག་དབྱེ་བྱེད་པ་ལ་སྔར་གསུངས་པ་ཉིད་ཀྱི་ཚིག་རིག་པར་བྱའོ། །ལྷག་མའི་དོན་དུ་མདོ་འདི་ཤེས་པར་བྱའོ། །གསོལ་བ་དང་ལས་བརྗོད་པའི་བསྟན་པ་རྣམས་ནི་མི་བྱེད་པའི་ཁ་སྐོང་བར་བྱེད་པ་རྣམས་ཀྱི་དགག་དབྱེ་ཕྱེ་བ་ལས་ཁ་སྐོང་དུ་བྱེད་པ་གཞན་རྣམས་ཞེས་བྱ་བའོ། །དགེ་འདུན་ནམ་གཅིག་ཁོ་ན་ལ་མ་བརྟེན་པ་ནི་གང་ཟག་དགེ་སློང་ལ་བརྗོད་པར་བྱའོ་ཞེས་བྱ་བ་ལ་གང་དུ་འདིར་དགེ་འདུན་ནམ་གང་ཟག་གསོལ་བར་བྱ་བ་ལ་མི་བརྟེན་བར་ནི་འདི་ལྟ་སྟེ། གནས་ལ་ སོགས་པའི་མིང་བརྗོད་པ ་སྟེ། གྲོང་དུ་ཞུགས་པའི་དོན་དུའོ། །ལྟ་བ་དག་དང༌། དེ་ལས་གཞན་དུ་གཅིག་པུ་བྱ་བ་ཉིད་ལ་འདི་ལྟ་སྟེ། རྫས་བྱིན་གྱིས་བརླབ་པ་དང༌། ཉིན་ཞག་བྱིན་གྱིས་བརླབ་པ་ལ་གང་ཟག་གི་དེར་གསོལ་བར་བྱ་བ་ཉིད་ཤེས་པར་བྱའོ། །དགེ་སློང་གཞན་ལ་བརྗོད་པར་བྱ་བ་ཉིད་དོ་ཞེས་བྱ་བ་ནི་དགེ་སློང་ལ་ སོགས་པ ་ཉིད་ཡིན་གྱི་གཞན་ལ་ནི་མ་ཡིན་ནོ་ཞེས་བྱ་བ་སྨོས་སོ། །ཆོས་གོས་དབྱུང་བ་དང་བྱིན་གྱིས་བརླབ་པ་ནི་ཉེ་བར་མི་གནས་ན་ཡིད་ཀྱིས་རྣམ་པར་བརྟགས་པས་འཆགས་སོ་ཞེས་བྱ་བ་ལ་ཉེ་བར་མི་གནས་ན་ཞེས་བྱ་བ་ནི་དབང་དུ་བྱ་བ་ཉིད་ཀྱི་ཕྱིར་དགེ་སློང་ལའོ། །འདིར་ཆོས་གོས་ཉེ་བར་མི་གནས་ན་རྣམ་པར་བརྟག་པ་དང་བྱིན་གྱིས་བརླབ་པ་དག་བྱའོ། །ཕྱིར་བཏང་བ་ནི་ཉེ་བར་གནས་པ་དགོས་པ་ཡིན་གྱི། དེ་བས་ན་ཆོས་གོས་ཉེ་བར་མི་གནས་པ་ལ་བཏང་བ་མ་གྲུབ་པ་ཤེས་པར་མི་བྱའོ། །དགེ་སློང་ཉེ་བར་གནས་པ་ཡོད་པར་གྱུར་པ་ལག་ཏུ་བྱ་སྟེ་བཏང་བ་ཉིད་དོ། །འདིར་གཞུང་ནི་དགེ་སློང་དག་ལྔ་པོ་འདི་དག་ནི་སེམས་བསྐྱོད་པས་འགྲུབ་པ་ཡིན་ཏེ། གསོ་སྦྱོང་དང་དགག་དབྱེ་དང་ཆོས་གོས་བྱིན་གྱིས་བརླབ་པ་དང༌། ཆོས་གོས་རྣམ་པར་བརྟག་པ་དང༌། གང་ཟག་གི་མགྲོན་དུ་བོས་པའོ་ཞེས་གསུངས་པ་ཡིན་ནོ། །དེ་ལ་གསོ་སྦྱོང་དང་དགག་དབྱེ་གཉིས་ལ་མདོ་འདི་བྱས་པ་མདུན་རོལ་དུ་ཞེས་བྱ་བ་འདིར་བསྡུ་བ་མ་བྱས་པའོ། །འདིར་མགྲོན་དུ་བོས་པ་བླངས་པས་ཆོ་ག་བརྗོད་པར་རིག་པར་བྱའོ། །དེ་ལྟར་འདི་ལ་ཁས་ལེན་པར་མི་བྱ་ཞེས་བྱ་བ་འགའ་ཞིག་ཏུ་ཡང་འགྲུབ་པ་ཡོད་པ་མ་ཡིན་ནོ། །དེ་ཡང་ཡོད་པ་མ་ཡིན་ཏེ། འདི་ལ་འདི་ལྟར་འཕེལ་བ་ཞེས་བྱ་བ་སྨོས་པས་རྣམ་པ་དེ་ལྟར་འདི་
མི་བྱ་ཞེས་བྱ་བ་དེ་བས་ན་དེ་མདོར་མ་བྲིས་སོ། །མི་སྨྲ་བའི་ངོ་བོ་དང་དུ་ལེན་པས་དེ་བྱ་བའི་དེའི་ངོ་བོ་མཉམ་པར་སྦྱར་བ་ཡོད་པ་ལ་ཚིག་གིས་ཞེས་བྱ་བ་འདིར་ཆོ་ག་ཤེས་པར་བྱ་སྟེ། མདོའི་རྗེས་སུ་འབྲངས་ནས་ཀྱང་ངོ༌། །གང་ཟག་གིས་མགྲོན་དུ་བོས་པ་སེམས་བསྐྱེད་པས་འགྲུབ་པ་ནི་ཅང་མི་གསུང་པས་ཞེས་མདོའི་སྡེ་ལས་གསུངས་པ་ཡིན་ནོ། །དེའི་ངོ་བོ་མཉམ་པར་སྦྱར་བ་ཡོད་པ་ལ་ཚིག་གིས་སོ། །གལ་ཏེ་དེ་རྒྱལ་པོ་ཆེན་པོ་ཁྱོད་ཀྱི་བཙུན་མོ་ཕྲེད་ལྡན་མ་རྗེས་སུ་ཤེས་ན་དེ་ལྟར་དུ་བདག་ནི་དང་དུ་མི་ལེན་པ་ཞེས་བྱའོ། །འདིར་རིགས་པས་ཀྱང་བརྗོད་པའི་རྣམ་པ་ཉིད་འདིར་ཚིག་མྱུར་བ་ཉིད་དུ་བསྟན་པའོ། །འདིར་ཅང་མི་གསུངས་བས་གནང་ངོ་ཞེས་གསོལ་བ་མ་གྲུབ་པ་མ་ཡིན་ཏེ། དེ་ལྟ་བས་ན་འདིར་ཅང་མི་གསུང་བའི་ངོ་བོ་ནི་ལེགས་པ་ཡིན་ནོ། །སྔ་མ་མ་ཕྱུང་ན་ཕྱི་མ་མི་འཆགས་སོ་ཞེས་བྱ་བ་ནི་དངོས་པོ་ལ་སྔར་བྱིན་གྱིས་བརླབས་པ་མ་ཕྱུང་བར་གཞན་བྱིན་གྱིས་རློབ་པར་བྱེད་པ་གང་ཡིན་པ་དེ་མི་འཆགས་སོ། །གཅིག་པུས་བྱིན་གྱིས་རློབ་ན་དེ་ལ་དང་པོར་བསམ་པ་བསྒྲུབ་ཅིང་ཚིག་ཏུ་བརྗོད་པར་བྱའོ་ཞེས་བྱ་བ་ནི་གང་ཞིག་གཅིག་པུས་བྱིན་གྱིས་རློབ་པར་བྱེད་ན་ཡང་དེ་ལ་ཡང་ཚིག་ཏུ་བརྗོད་པས་བྱིན་གྱིས་བརླབ་པར་བྱའོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། དེ་ལྟར་སེམས་བསྐྱེད་པར་བྱ་ཞིང་ཚིག་ཏུ་བརྗོད་པར་བྱའོ་ཞེས་གསུངས་པ་ཡིན་ནོ། །དགེ་སློང་དང་འདུ་བ་ཉིད་ན་བླ་གོས་ཕྲག་པ་གཅིག་ཏུ་བྱས་པ་ཉིད་དོ་ཞེས་བྱ་བ་ནི་འཆགས་པ་ལ་ སོགས་པ ་དག་ལ་དགེ་སློང་དང་ལྷན་ཅིག་འདུ་བ་ཉིད་ན་བླ་གོས་ཕྲག་པ་གཅིག་ཏུ་བྱས་པ་ཉིད་ཀྱིས་ཀུན་ནས་གཡོགས་པ་དང་བྲལ་བ་ཉིད་རིགས་པར་བལྟ་བར་བྱའོ། །རང་གི་དོན་དུ་སྔགས་ལན་གསུམ་རྗོད་པར་བྱེད་པ་ཉིད་ན་དེའི་འོས་ཉིད་ལ་ཕྱག་བྱས་ཏེའོ་ཞེས་བྱ་བ་ནི། རང་གི་དོན་དུ་དགེ་འདུན་ནམ་གང་ཟག་གང་ལ་བརྗོད་པའི་བདག་ཉིད་དམ། གཞན་གང་ཡང་རུང་བའི་སྔགས་ལན་གསུམ་བརྗོད་པ་ཉིད་ཀྱིས་མདུན་རོལ་དུ་གལ་ཏེ་བཟླས་ཏེ་ཕྱག་བྱ་བ་ཉིད་ཡིན་ན་ཕྱག་བྱ་སྟེ་བརྗོད་པར་བྱ་བའི་དུས་ནི་རིགས་པའོ། །གསང་སྟེ་སྟོན་པ་ཡང་ངོ་ཞེས་བྱ་བ་ཡང་ཕྱག་བྱས་ཏེ་བྱ་བར་རིགས་པའོ། །སྣམ་སྦྱར་དང་བཅས་པ་ཉིད་ལ་བསྙེན་པར་རྫོགས་པའི་ཕྱིར་འདུས་པ་ལ་ཡང་ངོ་ཞེས་བྱ་བ་ནི་བསྙེན་པར་རྫོགས་པར་བྱ་བའི་ཕྱིར་འཁོད་པ་ལ་སྣམ་སྦྱར་དང་བཅས་པ་ཉིད་དུ་གྱུར་པ་ནི་བསྙེན་པར་རྫོགས་པར་བྱ་བ་དེས་ཕྱག་བྱ་བ་ཉིད་དུ་རིགས་པའོ། །ཆོས་གོས་བྱིན་གྱིས་
བརླབ་པ་ལ་སྣམ་སྦྱར་དང་བཅས་པ་ཉིད་དེ་དེའི་གནས་སྐབས་ཅན་ལ་བསྟན་པར་རིག་པར་བྱའོ། །དང་པོར་གསུམ་མོ་ཞེས་བྱ་བ་ནི་བསྙེན་པར་རྫོགས་པར་བྱ་བའི་ཕྱིར་འདུས་པའི་དང་པོར་དགེ་སློང་དང་ཕྲད་དོ་ཅོག་ཐམས་ཅད་ལས་བསྙེན་པར་རྫོགས་པར་བྱ་བ་དེས་ཕྱག་བྱ་བར་རིགས་པ་ཡིན་ནོ། །དེ་ཡང་ལན་ཅིག་མ་ཡིན་ཏེ་འོན་ཀྱང་ལན་གསུམ་ཕྱག་བྱ་བར་རིགས་པ་ཡིན་ཏེ། དེའི་དོན་ཉིད་དུ་འདུས་པའི་དགེ་འདུན་ནམ་གང་ཟག་དེ་དག་ལ་ཡང་ཐལ་མོ་སྦྱོར་བར་བྱེད་པའི་གང་ཟག་དེས་ཐལ་མོ་སྦྱོར་བ་ཉིད་དུ་རིགས་པ་ཡིན་ནོ། །གཅིག་པུར་འདུས་པ་དང་གཉིས་པ་ནི་སྐལ་བ་མཉམ་པར་སོན་པ་ནི་རབ་ཏུ་བརྟེན་པར་གྱུར་པ་དང་པོ་ཤིན་ཏུ་གྱུར་པའི་སྔོན་རོལ་དུའོ། །འདི་བསྟན་པ་ངེས་པར་འབྱེད་པར་རིགས་པ་ཞེས་བྱ་བ་འདིར་དང་པོར་ཕྱག་བཙལ་བར་བྱེད་པ་ལ་དང་པོར་འཇུག་པར་རིགས་པ་དེའི་ཕྱིར་འདིར་དང་པོར་ལན་གསུམ་ཕྱག་བྱ་བར་གསུངས་སོ། །དེའི་དོན་ཉིད་དུ་དང་ཉི་མ་བརྗོད་པ་ལ་ཐལ་མོ་སྦྱར་བ་ཉིད་དོ་ཞེས་བྱ་བ་ནི་ཐལ་མོ་སྦྱོར་བར་བྱེད་པའི་གང་ཟག་དེའི་དོན་འདི་ལྟ་སྟེ། རབ་ཏུ་དབྱུང་བའི་ཕྱིར་ཞུ་བ་དང༌། ཡང་དག་པར་བླང་བ་དང༌། མཁན་པོ་ཉིད་ལ་ སོགས་པར་གསོལ་བ་དང༌། སྦྱིན་པ ་དག་དང་བར་ཆད་དྲི་བ་དང༌། བསྙེན་པར་རྫོགས་པའི་ཕྱིར་འདུ་བ་དག་བསྒྲུབ་པའི་ཕྱིར་དགེ་འདུན་ནམ་གང་ཟག་འདུས་པར་གྱུར་པ་དེ་ནི་དེའི་དོན་ཉིད་དུ་ཞེས་བྱ་སྟེ། ཉིན་ཞག་བྱིན་གྱིས་བརླབ་པ་དང༌། གསོ་སྦྱོང་དང་དགག་དབྱེའི་དུས་བྱིན་གྱིས་བརླབ་པ་དང༌། འདུན་པ་དང་ཡོངས་སུ་དག་པ་དང་དགག་དབྱེ་སྦྱིན་པ་དང༌། གཅིག་ཏུ་འདུན་བ་ཡོངས་སུ་དག་པ་དང༌། དགག་དབྱེ་སྦྱིན་པ་དང༌། དབྱུང་བ་དག་དང་ཡོངས་སུ་གནས་པའི་དུས་འདས་པ་བརྗོད་པ་དང༌། ཡོངས་སུ་གནས་པ་ལ་ སོགས་པ ་ལས་དབྱུང་བ་ལ་ སོགས་པ ་དེ་ལ་ཡང་དེའི་ཟླ་བའི་ངོ་བོ་འདིའི་ཉི་མའི་འདིའོ་ཞེས་བརྗོད་པ་དག་སྟེ། དེ་ལ་ཡང་ཐལ་མོ་སྦྱར་བ་ཉིད་དུ་རིགས་པ་ཡིན་ནོ། །གལ་ཏེ་གང་ཟག་གིས་རང་གི་དོན་དུ་བརྗོད་ན་གསོལ་བ་བཏབ་པས་མཇུག་ཏུ་ཐབས་ཡིན་ནོ་ཞེས་སོ་ཞེས་བྱ་བ་ནི་གལ་ཏེ་གང་ཟག་གིས་རང་གི་དོན་ཙམ་སྒྲུབ་པའི་ཕྱིར་བརྗོད་ན་གསོལ་བ་གང་བཏབ་པའི་གང་ཟག་གིས་དེ་སྔགས་བརྗོད་དུ་བཅུག་པའི་མཇུག་ཏུ་ཐབས་ཡིན་ནོ་ཞེས་བརྗོད་པར་བྱའོ། །ཐབས་ལས་བྱུང་བའི་ཐབས་ཡིན་ཏེ། ཁྱོད་ཀྱིས་འདུལ་བ་ལ་ སོགས་པ ་ཉིད་ཀྱི་ཕྱིར་རང་གི་དོན་ལ་ཨེ་ཀཎ་ནོ། །དེ་ལྟར་བྱས་ན་
དོན་དེ་སྒྲུབ་པའི་ཐབས་ཡིན་ནོ་ཞེས་བྱ་བའི་དོན་ཏོ། །དེའི་རྗེས་ལ་ཅིག་ཤོས་ཀྱིས་ལེགས་སོ་ཞེས་བྱ་བ་ནི་གསོལ་བ་བཏབ་པའི་གང་ཟག་དེས་ཐབས་ཡིན་ནོ་ཞེས་བརྗོད་པ་དེའི་རྗེས་སུ་གསོལ་བ་འདེབས་པའི་གང་ཟག་ཅིག་ཤོས་ཀྱིས་ལེགས་སོ་ཞེས་བྱ་བ་སྟེ། ཐབས་ཡིན་ནོ་ཞེས་གང་སྨྲས་པ་དེ་ལེགས་ཏེ། དེ་ནི་ཐབས་ཡིན་ནོ་ཞེས་བྱ་བའི་དོན་ཏེ། འདུན་པ་དང་ཞེ་སྡང་དང་གཏི་མུག་དང་འཇིགས་པས་འགྲོ་བ་དང་བྲལ་བ་བྱས་པ་དང་མ་བྱས་པ་དྲན་པར་ནུས་པར་སྤྲོ་བར་བྱ་སྟེ་བསྐོའོ་ཞེས་བྱ་བ་ནི། དེ་ལྟ་བུའི་བྱ་བ་དེ་རྣམས་ལ་དེས་ཞེས་བྱ་བ་སྟེ། སྤྲོ་བས་བྱས་པ་ཡིན་གྱི། སྤྲོ་བ་མ་བྱས་པར་ནི་མ་ཡིན་ནོ། །བྱས་པ་ཉིད་ནི་གནས་པར་བརྗོད་པར་བྱའོ་ཞེས་བྱ་བ་ནི་ལས་ལ་རབ་ཏུ་གནས་པ་ཉིད་ཅེས་བྱ་བ་ལས་བྱེད་པ་པོ་མ་ཡིན་པས་བྱས་པ་ཉིད་འདི་ལ་རིག་པར་བྱའོ། །དཔེར་ན་དགེ་འདུན་གྱིས་བཟོད་ཅིང་གནང་ནས་དགེ་འདུན་མིང་འདི་ཞེས་བགྱི་བ་དགེ་སློང་རུང་བ་ལ་འཆགས་པའི་གཞི་བསྟན་པ་སྦྱིན་པ་སྟེ། གང་གི་ཚེ་འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་གསུངས་པ་ལ་ སོགས་པ ་ལྟ་བུའོ། །གསོལ་བ་ནི་གོ་བར་བྱ་བ་ཙམ་ཡིན་པའི་ཕྱིར་རོ། །འདི་ལ་བྱེད་པ་ཡོད་པ་མ་ཡིན་ཏེ། དེ་ལྟ་བས་ན་གསོལ་བ་དང་བཞིའི་ལས་ལ་དེ་ཐལ་བ་མ་ཡིན་ནོ། །མཚམས་གཅོད་བ་ཉིད་ནི་གཅད་པ་དང་འདྲ་བ་ཉིད་དུ་ཤེས་པར་བྱའོ་ཞེས་བྱ་བ་ལ་འདིར་མཚམས་གཅོད་པ་ཉིད་ཅེས་བྱ་བ་ནི་མཚམས་མ་མནན་པར་དགེ་འདུན་གནས་པ་ལ་མཚམས་བཅད་པ་ཉིད་འགྲུབ་པ་མ་ཡིན་ཏེ། དེ་བཞིན་དུ་བཅད་པར་གྱུར་པ་ཉིད་ཀྱང་མི་འགྲུབ་སྟེ། འདི་ལྟར་མཚམས་གཅད་པར་འདོད་པ་ངོས་དེ་དང་ཉེ་བའི་ཕྱོགས་དེ་ན་གནས་པའི་དགེ་འདུན་གྱི་ཆའི་ཕྱོགས་དེར་ཡང་བཅད་པར་མི་འགྱུར་རོ། །སྡུད་པར་བྱེད་པས་གཎྜཱི་བརྡུང་བ་དང༌། འདྲི་བ་ལ་བརྗོད་པ་རྗེས་སུ་བསྒྲུབ་པ་དག་གིས་བསྡུ་བར་བྱ་བ་དག་ལ་གོ་བར་བྱའོ་ཞེས་བྱ་བ་ནི། དགེ་འདུན་སྡུད་པར་བྱེད་པའི་གང་ཟག་གིས་གཎྜཱི་བརྡུང་བ་དང༌། ཅིའི་ཕྱིར་བརྡུང་ཞེས་དྲི་བ་དག་ལ་ཚིག་གང་ཞིག་རིགས་པ་ལས་མ་འདས་པ་དེ་དང་འདྲ་བའི་ཚིག་དྲི་བ་ལ་བརྗོད་པའོ། །དེས་དེ་དག་གི་དོན་དུ་བཤམ་མོ་ཞེས་བྱ་བ་ནི། སྡུད་པར་བྱེད་
པ་དེས་སྡུད་པར་བྱ་བ་དེ་དག་གི་དོན་དུ་སྟན་བཤམ་པར་བྱའོ། །བསྐོས་པའི་བྱ་བ་དེའི་དོན་ཉིད་ལ་ནི་དེ་ཉིད་དོ་ཞེས་བྱ་བ་ནི། བསྐོས་པ་དེའི་བྱ་བ་ལག་གི་བླ་ལ་ སོགས་པ ་དོན་གང་གི་ཕྱིར་དེ་བགོ་བར་བྱ་བ་དེའི་དོན་ཉིད་ལ་བསྡུ་བར་བྱ་བ་དེ་བསྐོ་བར་བྱ་བ་དེ་ཉིད་ནི་འདུག་པར་བྱེད་པ་པོ་ཉིད་དོ། །དེས་འདིར་གཎྜཱི་བརྡུང་བ་ལ་ སོགས་པ ་བྱའོ། །ཐམས་ཅད་ལ་རྒན་རིམས་སུའོ་ཞེས་བྱ་བ་ནི་ཤིང་དྲུང་དང་ནེའུ་གསིང་གི་ཕྱོགས་དང་དགོན་པའི་ས་གཞི་དང༌། འདུག་པའི་གནས་ཐམས་ཅད་ལ་རྒན་རིམས་སུ་བསྐོ་བ་རིགས་པ་ཉིད་ཡིན་ནོ། །བླང་བར་བྱ་བ་ཉིད་ལ་ནི་འདོད་པ་མཆོག་ཡིན་ནོ་ཞེས་བྱ་བ་ནི་བསྡུ་བར་བྱ་བ་དང་འདུལ་བ་དང་ཕྱག་བྱ་བ་དང༌། མདུན་དུ་འགྲོ་བ་དག་གམ། དེ་ལྟ་བུ་གཞན་ལ་ཡང་རྣམ་པ་རྟོག་པ་མེད་དོ། །དེར་ཇི་ལྟར་རྒན་རིམས་ཁོ་ནས་རྣམ་པར་མི་གཞག་གོ །བླང་བར་བྱ་བ་གནས་མལ་ལ་ སོགས་པ ་དག་ལ་ནི་འདོད་པས་མཆོག་ཉིད་དུ་རྣམ་པར་གཞག་གི་དངོས་པོ་ལས་རྣམ་པར་མི་གཞག་སྟེ། ལེན་པ་པོ་རྒན་པ་དེ་འདོད་པ་ཡིན་ན་ངན་པ་གང་ཡིན་པ་དེ་ཡང་དེ་ལ་སྦྱིན་པར་བྱ་བའི་ཕྱིར་མཆོག་ཡིན་གྱིས་གང་ཐོབ་པ་བཟང་པོ་དེ་ནི་མཆོག་ཉིད་མ་ཡིན་ནོ། །འདིར་གཞུང་ནི་དངོས་པོ་ཆེན་པོ་གང་དག་ཡིན་པ་ལ་བྱི་དོར་བྱེད་པས་རྒན་པོ་དག་རལ་བར་གྱུར་པས་མི་འདོད་ནས། དེ་དག་ལ་མི་འདོད་བཞིན་དུ་སྦྱིན་པར་མི་བྱ་བར་གསར་བུ་དག་གིས་དེ་དག་བླང་པར་བྱའོ་ཞེས་གསུངས་པ་ཡིན་ནོ། །ལས་སྤྱིར་བསྟན་པའོ།། །།བསྒོ་བ་ལས་བྱུང་བ་ཕྱིར་མ་བཅོས་པས་ལས་ཉམས་སུ་མྱོང་བར་མི་བྱའོ་ཞེས་བྱ་བ་ནི་བསྒོ་བ་ལས་གྱུར་པ་འདིས་མ་བྱས་པ་དགེ་འདུན་གྱི་ལྷག་མ་བཞི་ལས་ལྟུང་བ་འབའ་ཞིག་དང༌། ལྟ་བའི་རྣམ་པར་མི་གཏོང་བའི་ལྟུང་བྱེད་ཀྱི་བདག་ཉིད་བསྒོ་བ་ལས་བྱུང་བ་ཕྱིར་མ་བཅོས་པ་དེས་ལས་ཉམས་སུ་མྱོང་བར་མི་བྱ་སྟེ། དེ་ཉམས་སུ་མྱོང་བ་དེ་ལ་ནི་ཉེས་བྱས་སོ། །གང་དག་གིས་དེ་ཁ་ན་མ་ཐོ་བ་དེ་ཕྱིར་མ་བཅོས་པར་ཤེས་བཞིན་དུ་དེ་དང་ལྷན་ཅིག་ལས་ཉམས་སུ་མྱོང་བར་བྱེད་པ་དེ་དག་ལ་ཡང་ཉེས་བྱས་སུ་འགྱུར་བར་རིག་པར་བྱའོ། །དགེ་འདུན་ལས་ཐ་དད་པའི་དངོས་པོར་གྱུར་པ་ཞེས་བྱ་བ་དེ་ལྟ་བུར་གྱུར་པའི་ཁ་ན་མ་ཐོ་བ་འདི་རྣམས་དང༌། ལུས་ཀྱི་ལས་ངན་
པ་བྱེད་པ་གཞན་དུ་གྱུར་པ་ལ་གཞན་དུ་གཏོགས་པ་ཞེས་བྱ་བ་ཉེས་བྱས་འདི་ཤེས་པས་སོ། །གསོ་སྦྱོང་དང་དགག་དབྱེ་དག་ནི་མ་གཏོགས་སོ་ཞེས་བྱ་བ་ནི་དེ་ན་གཉིས་ཉམས་སུ་མྱོང་བ་ལ་ཉེས་བྱས་སུ་མི་འགྱུར་རོ་ཞེས་བྱ་བའི་དོན་ཏོ། །དགེ་འདུན་དུ་བྱེད་པ་ལ་ནི་ཡན་ལག་གི་དངོས་པོར་མི་སྦྱོར་བའོ། །རང་གི་དོན་དུ་འགྲོ་བ་དག་གང་ཞིག་བྱེད་པ་འདི་དགེ་འདུན་གྱིས་དོར་བར་བྱ་བ་མ་ཡིན་ནོ། །དགེ་སློང་གི་དོན་ལ་གཞི་སྤངས་པ་ལ་ཉམས་ཞེས་བྱ་བ་ཉིད་དུ་ཤེས་པར་བྱའོ། །འདིར་གཞུང་ནི་རྣམ་པར་འབྱེད་པ་ལས། དགེ་སློང་གིས་ཇི་སྲིད་དུ་གཞི་དེས་མ་བཤགས་ཤིང་སོ་སོར་མ་བཤགས་པར་གསོལ་བ་དང༌། གསོལ་བ་དང་གཉིས་དང་གསོལ་བ་དང་བཞིའི་ལས་ཉམས་སུ་མྱོང་བར་བྱེད་ན་ཐམས་ཅད་དུ་ཉེས་བྱས་སོ་ཞེས་གསུངས་པ་ཡིན་ནོ། །འདིར་འདྲ་བའི་རྗེས་སུ་འབྲངས་ནས་སྨོས་པ་ཡིན་གྱི། ཆོས་མ་ཡིན་གྱི་ལས་ཉིད་སྨོས་པ་ཞེས་བྱ་བ་སྔ་མ་ལ་འདི་གོ་བར་བྱེད་པ་ཉིད་ནི་མ་ཡིན་ཏེ། གསོ་སྦྱོང་དང་དགག་དབྱེ་དག་ལ་ནི་མ་ཡིན་ནོ། །མཚམས་གཞན་ན་གནས་པ་ནི་གང་གི་ཡན་ལག་ཉིད་ཀྱང་མ་ཡིན་ནོ་ཞེས་བྱ་བ་ནི་དགེ་འདུན་ནམ་གང་ཟག་མཚམས་གཞན་ན་གནས་པ་ནི་ལས་གང་གི་ཡན་ལག་ཉིད་ཀྱང་མ་ཡིན་ཏེ། བྱིན་ལེན་ལ་ སོགས་པ ་བྱས་ཀྱང་མ་བྱས་པ་ཉིད་དུ་ཤེས་པར་བྱའོ། །མཚམས་གཞན་ན་གནས་ པ་ཉིད་ན་བཟོད་པར་གསོལ་བ་ལ་སོགས ་པའི་གསོལ་བ་ཡང་འདི་ལྟ་སྟེ། འདུན་པ་དང་ཡོངས་སུ་དག་པ་དང་དགག་དབྱེ་བྱ་བ་དང༌། བརྗོད་པ་འདི་རྣམས་ལ་ཡང་དགག་དབྱེ་བྱེད་པ་པོ་འཇོག་པ་དང་དགག་དབྱེ་ལའོ། །དེར་སོང་ན་ཚོགས་པའི་ཡན་ལག་ཉམས་སོ་ཞེས་བྱ་བ་ནི་མཚམས་གཞན་དུ་སོང་ན་གང་ཞིག་ཚོགས་པའི་ཡན་ལག་འདི་ལྟ་སྟེ། འདུན་པ་དང་ཡོངས་སུ་དག་པ་དང་དགག་དབྱེ་བླངས་པ་དེ་མཐར་ནི་ཉམས་པ་སྟེ་དེ་ལའོ། །དེ་བས་ན་ཉམས་པའི་ཉེས་པ་སྤང་བའི་ཕྱིར། འདུན་པ་ལ་ སོགས་པ ་ལེན་ པ་དེས་ནམ་མཁའ་ལ་འདུག་པར་མི་བྱའོ་ཞེས་བྱ་བ་ལ་སོགས ་པའི་བསླབ་པའི་གཞི་བཅའ་བར་མཛད་དེ། །འདིར་གཞུང་ནི་གླེང་གཞི་དག་ལས། བཙུན་པ་དགེ་སློང་གི་འདུན་པ་བླངས་ཏེ། སྟེང་གི་
ནམ་མཁའ་ལ་མཆིས་ན་འདུན་པ་འཚལ་ཏེ་མཆིས་ཞེས་བརྗོད་པར་བགྱིའམ། འཚལ་ཏེ་མ་མཆིས་ཞེས་བརྗོད་པར་བགྱི། ཉེ་བ་འཁོར་ཁྱེར་ཏེ་མ་འོངས་ཞེས་བརྗོད་པར་བྱ་སྟེ། ཡང་བླང་བར་བྱའོ། །བཙུན་པ་དགེ་སློང་ཡོངས་སུ་དག་པ་ལེན་པས་ཡོངས་སུ་དག་པ་བླངས་ཏེ། སྟེང་གི་ནམ་མཁའ་ལ་འཚལ་ཏེ་མཆིས་ཞེས་བརྗོད་པར་བགྱིའམ། འཚལ་ཏེ་མ་མཆིས་ཞེས་བགྱི། ཉེ་བ་འཁོར་མ་འོངས་ཞེས་བརྗོད་པར་བྱ་སྟེ་ཡང་བླང་པར་བྱའོ་ཞེས་གསུངས་པ་དང༌། ཞུ་བ་ལས་ཀྱང་ཡོངས་སུ་དག་པ་བླངས་ནས་མཚམས་ཀྱི་སླད་རོལ་ནས་མཆིས་ནས་ཡོངས་སུ་དག་པ་རྒྱུན། ཆད་པར་བརྗོད་པར་བགྱིའམ། རྒྱུན་མི་འཆད་པར་བརྗོད་པར་བགྱི་བཀའ་སྩལ་པ། རྒྱུན་ཆད་པར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ནི་དེས་འཇིགས་པས་མཚམས་ཀྱི་ཕྱི་རོལ་ནས་ཁྱེར་ཏེ་འོངས་པ་ལ་ནི་ཉེས་པ་མེད་དོ་ཞེས་གང་སྨོས་པ་དེའི་དམིགས་ཀྱིས་བསལ་བ་ཡིན་པར་རིག་པར་བྱའོ།། གཅིག་ཏུ་རྐང་པ་ཡ་གཅིག་ལ་གཅིག་ཏུ་ཡ་གཅིག་ན་གཉིས་ཀར་གནས་པ་ཉིད་དོ་ཞེས་བྱ་བ་ནི་མཚམས་གཅིག་ཏུ་གང་གི་རྐང་པ་ཡ་གཅིག་པ་ཞག་ལ་མཚམས་གཅིག་ཏུ་རྐང་པ་ཡ་གཅིག་བཞག་ན་དེའི་མཚམས་དེ་གཉི་གར་གནས་པ་ཡིན་པའོ། །ཐམས་ཅད་ནོན་པ་ལ་གནས་ན་ནོན་པ་ཉིད་དོ་ཞེས་བྱ་བ་ནི་མཚམས་སུ་མ་ནོན་པའི་རྫས་ལ་གནས་པ་གང་ཡིན་པ་དེས་ནི་མཚམས་ཇི་ཙམ་ནོན་པ་ཉིད་ཡིན་པའི་རྫས་དེས་ནོན་པའི་མཚམས་དེ་ཐམས་ཅད་དུ་གནས་པ་ཉིད་ཡིན་ནོ། །དུ་མར་གནས་པ་ཁས་བླངས་པ་ལ་ནི་འཆགས་པ་ཁོ་ནའོ་ཞེས་བྱ་བ་ནི་མཚམས་གཉིས་ལ་གནས་པའི་རྐང་པ་དག་གིས་ནོན་པའི་རྫས་ལ་གནས་པ་གང་ཡིན་པ་ཇི་སྙེད་པའི་གནས་གཅིག་ཏུ་དབྱར་གནས་པར་ཁས་ལེན་པ་དེ་ལ་ནི་མི་འཆགས་པ་མ་ཡིན་ཏེ། འཆགས་པ་ཁོ་ན་ཡིན་ནོ། །གནས་མལ་དུ་མ་མནོད་པར་རིགས་པ་ཉིད་དོ་ཞེས་བྱ་བ་ནི་སྔར་བསྟན་པའི་ཚུལ་ཀྱིས་མཚམས་དུ་མར་གནས་བསྟེན་པར་གྱུར་པ་ལ་དེ་དང་ཉེ་བ་དེ་དག་གི་ཁོངས་སུ་གཏོགས་པ་གནས་མལ་མནོད་པར་བྱེད་པ་དེ་ནི་ཆོས་དང་མི་མཐུན་པ་མ་ཡིན་ནོ་ཞེས་བྱ་བའི་དོན་ཏོ། །ཅི་དེས་ཐམས་ཅད་དུ་དུས་མཉམ་པར་གནས་པར་བྱའམ། འོན་ཏེ་མཚམས་དུ་མར་ཅི་དགར་གནས་པར་བྱ་ཞེ་ན། དེའི་ཕྱིར་ཇི་ལྟར་འདོད་པས་དུས་འགའ་ཞིག་གི་ཚེ་སྐབས་
འགའ་ཞིག་གམ་གཅིག་ལ་དུས་ཐམས་ཅད་དུ་མངོན་པར་བརྟེན་པར་བྱ་བ་མ་ཡིན་ནོ། །དེའི་ཕྱིར་དེས་ཅི་དགར་གནས་པར་བྱ་བ་ཉིད་དོ་ཞེས་བྱ་བ་སྨོས་ཏེ། དེས་གཙུག་ལག་ཁང་དུ་དུས་ཇི་སྲིད་གནས་པར་འདོད་པ་དེ་སྲིད་དུ་དེར་གནས་པར་བྱ་བ་ཉིད་ཡིན་ནོ། །ཆོ་ག་འདི་རྣམས་ལ་ནམ་མཁའ་ཅིའི་ཕྱིར་མ་སྨོས་ན། མཚམས་གཞན་སྨོས་པ་ཉིད་ཀྱི་ཕྱིར་ནམ་མཁའ་ལ་འདུག་པར་མི་བྱའོ་ཞེས་བྱ་བ་ལ་ཅིའི་ཕྱིར་སྨོས། ནང་གི་ནམ་མཁའ་ཕྱི་རོལ་དུའོ་ཞེས་བྱ་བ་གཏོགས་པའི་ཕྱིར་རོ། །རྒྱལ་བ་ནི་མི་མཐུན་པ་ཉིད་བྱེད་པ་མ་ཡིན་ནོ་ཞེས་བྱ་བ་ནི་དེ་བཞིན་གཤེགས་པ་ནང་གི་མཚམས་ལ་གནས་ཤིང་རྗེས་སུ་མ་ཞུགས་པར་འདུག་པ་ལ་ལས་བྱེད་པ་དེ་ནི་དཀོན་མཆོག་གཞན་ཡིན་པས་ལས་མི་མཐུན་པར་བྱེད་པ་མ་ཡིན་ནོ་ཞེས་བྱ་བའི་དོན་ཏོ། །ཁ་སྐོང་བར་བྱེད་པ་ཉིད་མ་ཡིན་ནོ་ཞེས་བྱ་བ་ནི་རྒྱལ་བ་ནི་དགེ་འདུན་གྱི་ཁ་སྐོང་བར་བྱེད་པ་མ་ཡིན་ཏེ། །ལས་དག་མི་བྱ་བ་ཉིད་མ་ཡིན་ནོ། །དེས་བྱ་བ་ལས་མ་ཡིན་པས་མི་འཆགས་སོ་ཞེས་བྱ་བ་ནི་ལས་ངེས་བསྙེན་པར་རྫོགས་ པ་ལ་སོགས ་པར་བྱ་བར་རྣམ་པར་གཞག་པ་གང་ཡིན་པ་དེ་ལས་མ་ཡིན་པས་བྱས་ན་མི་འཆགས་སོ། །འདིར་གཞུང་ནི་བསྙེན་པར་རྫོགས་པར་བགྱི་བ་གསོལ་བ་དང༌། བཞིའི་ལས་མི་བགྱིད་ན་བསྙེན་པར་རྫོགས་ཞེས་བགྱིའམ། བསྙེན་པར་མ་རྫོགས་ཞེས་བརྗོད་པར་བགྱི། བཀའ་སྩལ་པ། བསྙེན་པར་རྫོགས་ཞེས་བརྗོད་པར་བགྱིའོ་ཞེས་གསུངས་པ་ཡིན་ནོ། །དེ་བསྙེན་པར་རྫོགས་པར་བྱ་བའི་སྐབས་སུ་གསུངས་པ་ཡིན་མོད་ཀྱི་ཐམས་ཅད་ལ་འདྲ་བས་འདིར་སྤྱིར་མདོར་བྱས་སོ། །ཕལ་ཆེར་བྱས་པ་ཉིད་ཡིན་ཡང་ལས་ཡོངས་སུ་མ་རྫོགས་པའི་ཕྱིར་དེ་མ་བྱས་པ་ཉིད་ཡིན་པར་དོགས་པ་བསལ་བའི་ཕྱིར། ཚིག་ཕལ་ཆེར་བྱས་པ་ཉིད་ནི་བྱས་པ་ཉིད་དོ་ཞེས་བྱ་བ་སྨོས་ཏེ། གང་ཞིག་གསོལ་བའི་བདག་ཉིད་དམ་བརྗོད་པའི་བདག་ཉིད་ཀྱི་ཚིག་ཕལ་ཆེར་བྱས་པ་ཉིད་ཅེས་བྱ་བ་སུམ་གཉིས་བརྗོད་ཟིན་ན་སུམ་ཆ་བརྗོད་པའི་ཚེ་ན་རིལ་གྱིས་ཟིན་པ་ཉིད་ཡིན་ནོ་ཞེས་བྱ་བའི་དོན་ཏོ། །གསོལ་བ་དང་བརྗོད་པ་དག་ལ་དོན་འདི་སྐབས་གསུམ་ཡོད་དེ། དང་པོ་ནི་རང་གི་ངོ་བོ་ཙམ་བརྗོད་པ་སྟེ། དཔེར་ན་དགེ་འདུན་བཙུན་པ་རྣམས་གསན་དུ་གསོལ་ཞེས་བྱ་བ་ལ་ སོགས་པ ་ལྟ་བུའོ། །གཉིས་པ་ནི་བྱ་བ་བརྗོད་པ་སྟེ། དཔེར་ན་མིང་འདི་ཞེས་བགྱི་བ་འདི་ཞེས་བྱ་བ་ལ་ སོགས་པ ་ལྟ་བུའོ། །གསུམ་པ་ནི་བྱེད་པ་བརྗོད་པར་བྱ་
སྟེ། དཔེར་ན་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང་ཞེས་བྱ་བ་ལ་ སོགས་པ ་ལྟ་བུའོ། །གང་རྣམས་ཀྱིས་ཞེས་བྱ་བ་དང་པོར་བརྗོད་པ་ཞེས་བྱ་བ་འདིར་གསུམ་པའི་ཆ་ལ་ཐ་མ་འཇུག་པ་ཉིད་དོ་ཞེས་བྱ་བ་དེའི་རྗེས་སུ་འབྲངས་པས་རྟོགས་པར་བྱའོ། །ཅི་ཚིག་ཐམས་ཅད་ལ་ཕལ་ཆེར་བྱས་པ་ཉིད་ན་བྱས་པ་ཉིད་ཡིན་ནམ་ཞེ་ན་དེའི་ཕྱིར་འོག་མ་མེད་པ་ལའོ་ཞེས་བྱ་བ་སྨོས་ཏེ། ཚིག་གང་ལ་འོག་མ་མེད་པ་དེ་ནི་འོག་མ་མེད་པ་སྟེ། གང་ཞིག་ཐ་མའི་ཚིག་དེ་ལས་ཕལ་ཆེར་བྱས་པ་ཉིད་ན་བྱས་པ་ཉིད་དོ། །གསོལ་བའི་ལས་ནི་ཕལ་ཆེར་བྱས་པ་ཉིད་ན་བྱས་པ་ཉིད་དོ། གསོལ་བ་དང་གཉིས་ཀྱི་ལས་ལ་ནི་ལས་བརྗོད་པ་ཉིད་འོག་མ་མེད་པ་ཡིན་ནོ། །གསོལ་བ་དང་བཞིའི་ལས་ལ་ནི་ལས་བརྗོད་པ་གསུམ་པ་འོག་མ་མེད་པ་ཡིན་ནོ་ཞེས་བྱ་བའི་དོན་ཏོ། །འདིར་གཞུང་ནི་གླེང་གཞི་དག་ལས། མཚམས་བཅད་པ་ལ་བཙུན་པ་རེ་ཞིག་མཚམས་འགུམས་པ་ན་དགེ་སློང་ལས་བགྱིད་པ་སྲོག་ཆད་ཅིང་དུས་བགྱིས་པར་གྱུར་ན་མཚམས་བཀུམ་པར་བརྗོད་པར་བགྱིའམ། མ་བཀུམ་པར་བརྗོད་པར་བགྱི། ཉེ་བ་འཁོར་གལ་ཏེ་མཚན་མ་དག་བརྗོད་པར་གྱུར་ན་ནི་ལས་ཕལ་ཆེར་བས་པས་གཅད་པར་བརྗོད་པར་བྱའོ། །བཟློག་པས་ནི་མ་བཅད་པར་བརྗོད་པར་བྱའོ། །དགེ་སློང་མའི་མཚམས་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །དེ་ཉིད་ཐམས་ཅད་དུ་རུང་བས་འདིར་སྤྱིར་མདོར་བྱས་སོ། །གང་ཞིག་སླར་བྱས་པ་ཉིད་ལ་ཡང་ཚིག་ཕྱི་མའི་ཚིག་ལ་ཞེས་བྱ་བ་དེ་བས་འདིར་ཚིག་འོག་མ་མ་ཡིན་པ་ལ་ཞེས་བྱེ་བྲག་ཏུ་བསྟན་པའོ། །མཚན་མ་དག་མ་བརྗོད་པ་ཉིད་ན་མ་བཅད་པ་ཡིན་ནོ་ཞེས་བྱ་བ་ནི། ཕལ་ཆེར་བྱས་པ་ཉིད་ན་བྱས་པ་ཉིད་ཡིན་དུ་ཟིན་ཀྱང་ཕྱོགས་བཞིའི་མཚན་དག་མ་བརྗོད་ན་མཚམས་གཅད་པའི་ལས་བྱས་པ་དག་མ་ཡིན་ཏེ། མཚམས་ངེས་པ་ལ་དེ་རྣམ་པར་གཞག་པར་འགྱུར་རོ། །དེ་ལ་རྣམ་པར་གཞག་པ་དེ་ནི་ལས་ཞེས་བྱ་སྟེ་དེ་བས་ན་དེ་ཤེས་པའོ། །ཡོངས་སུ་གནས་པས་ནི་ཉེ་བར་གནས་པ་ལས་གཞན་པའོ་ཞེས་བྱ་བ་ནི་ཡོངས་སུ་གནས་པས་ནི་ཚང་པར་སྤྱོད་པ་སྟེ། ཉེ་བར་གནས་པའི་སྡོམ་པ་མ་གཏོགས་
པར་དེ་ལས་གཞན་པའི་ལས་བྱས་པ་ཉིད་ན་བྱས་པ་ཉིད་ཡིན་པའོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུགས་པ་ལས། ཡོངས་སུ་གནས་པས་དགེ་སློང་གནས་ནས་འབྱིན་པ་གནས་ནས་ཕྱུང་བར་བརྗོད་པར་བགྱིའམ། ཉེ་བར་གནས་པའི་སྡོམ་པ་མ་གཏོགས་པར་ལས་ཐམས་ཅད་བྱས་པར་བརྗོད་པར་བྱའོ་ཞེས་གསུངས་པ་ཡིན་ནོ། །གང་ཞིག་འདིས་ལས་རྣམས་མི་བྱ་བ་ཉིད་དུ་གསུངས་པ་དེར་མི་འཆགས་པ་ཉིད་ལ་དེ་ནི་དཔེ་ཙམ་དུ་ཟད་དེ། བསྡུ་བར་བྱས་ནས་མ་ཡིན་པ་ཞེས་བྱ་བ་དེའི་ཕྱིར་དེ་ཤེས་པའོ། །དེ་ལྟ་བས་ན་དཔེ་ཙམ་དུ་དགེ་འདུན་ལྷག་མ་སྤྱོད་པ་ལ་གནས་པ་གཞན་དག་ལ་ཡང་ཆོ་ག་འདི་ཞེས་བྱ་བ་ཤེས་པར་བྱའོ། །སྨྱོན་པས་བཏོན་པ་ཡང་ངོ་ཞེས་བྱ་བ་ནི་སྨྱོན་པས་སོ་སོར་ཐར་པའི་མདོ་གདོན་པར་བྱས་པ་ལ་ཡང་བྱས་པ་ཉིད་ཡིན་ནོ། །འདིར་གཞུང་ནི་སྨྱོན་པས་སོ་སོར་ཐར་པའི་མདོ་བཏོན་ན། སོ་སོར་ཐར་པའི་མདོ་གདོན། པར་བརྗོད་པར་བགྱིའམ། བཀའ་སྩལ་བ་བཏོན་པར་བརྗོད་པར་བགྱིའོ། །གསོ་སྦྱོང་བགྱིད་པར་བརྗོད་པར་བགྱི་འམ། བཀའ་སྩལ་པ་བྱས་པར་བགྱིའོ་ཞེས་གསུངས་པ་ཡིན་ནོ། །འདིར་སྨྱོན་པ་ནི་དཔེ་ཙམ་དུ་ཟད་དེ་ངེས་ན་རང་བཞིན་དུ་ཉམས་པ་ཐམས་ཅད་འཕངས་པ་ཡིན་ཏེ་དོན་དྲན་པའི་ཕྱིར་རོ། །དབྱེན་རྗེས་སུ་སྒྲུབ་པ་ནི་གསོལ་བ་དང་འདྲའོ་ཞེས་བྱ་བ་ནི་རྒྱུ་གང་དག་གིས་གསོལ་བའི་ལས་བྱས་པའི་མི་འཆགས་པ་དེ་བཞིན་དུ་རྒྱུ་དེ་དག་ཉིད་ཀྱིས་དགེ་འདུན་གྱི་དབྱེན་གྱི་སྦྱོར་བ་རྗེས་སུ་སྒྲུབ་པ་ལ་ནི་ཡང་དེ་རྣམས་ཀྱིས་ཤེས་པའི་དོན་ཏོ། །གང་ཞིག་འདིར་ཚུལ་ཤིང་དག་ལེན་པ་དང༌། འདྲིམ་པར་བྱེད་པའི་ངོ་བོ་དེའི་དོན་དུ་མདོ་འདི་བྱས་ཏེ། གཞན་ལ་གསོལ་བ་ཉིད་ཀྱི་ཕྱིར་རོ། །འདིར་གཞུང་ནི་ཞུ་ན་ལས་གནས་ནས་ཕྱུང་བ་དང་དགུས་དགེ་འདུན་མ་ཕྱེད་པར་བརྗོད་པར་བྱའོ། །རྐུ་ཐབས་སུ་གནས་པ་དང་དགུས་དགེ་འདུན་འབྱེད་ན་དགེ་འདུན་མ་ཕྱེད་པར་བརྗོད་པར་བྱའོ། །མཚན་གཉིས་པས་ཚུལ་ཤིང་ལེན་ཏམ། རྗེས་སུ་སྒྲོགས་ན་དགེ་འདུན་བྱེ་བར་བརྗོད་པར་བགྱིའམ། དགེ་འདུན་མ་བྱེ་བར་བརྗོད་པར་བགྱི། བཀའ་སྩལ་པ། དགེ་འདུན་མ་བྱེ་བར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་
མཚན་མི་མཐུན་པ་ཉིད་ནི་ཡན་ལག་མ་ཡིན་ནོ། །རྗེས་སུ་ཞེས་བྱ་བ་ནི་དབྱེན་རྗེས་སུ་སྒྲུབ་པ་འདི་ལ་ཕོ་རྣམས་ལ་ནི་མོ་ཉིད་ཡན་ལག་མ་ཡིན་ལ། མོ་རྣམས་ལ་ཡང་ཕོ་ཉིད་ཡན་ལག་མ་ཡིན་ནོ། །འདིར་གཞུང་ནི་གཏམ་གྱི་གཞི་ལས། ཉེ་བ་འཁོར་དགེ་སློང་ཁོ་ནས་དགེ་སློང་གི་དགེ་འདུན་འབྱེད་པར་འགྱུར་གྱི། དགེ་སློང་མས་ཀྱང་མི་འགྱུར། དགེ་སློང་མས་ཀྱང་མི་འགྱུར། དགེ་ཚུལ་གྱིས་ཀྱང་མི་འགྱུར། དགེ་ཚུལ་མས་ཀྱང་མི་འགྱུར་མོད་ཀྱི་འོན་ཀྱང་དགེ་འདུན་འབྱེད་པའི་ཕྱིར་བརྟུལ་བར་ནི་འགྱུར་རོ། །དགེ་སློང་མ་ཁོ་ནས་དགེ་སློང་མའི་དགེ་འདུན་འབྱེད་པར་འགྱུར་གྱི། དགེ་སློང་གིས་ཀྱང་མི་འགྱུར། དགེ་སློང་མས་ཀྱང་མི་འགྱུར། དགེ་ཚུལ་མས་ཀྱང་མི་འགྱུར་མོད་ཀྱི། འོན་ཀྱང་དགེ་འདུན་འབྱེད་པའི་ཕྱིར་བརྟུལ་བར་ནི་འགྱུར་རོ་ཞེས་གསུངས་པ་ཡིན་ནོ། །བཞད་གད་ཀྱི་དངོས་པོས་ནི་གང་གིར་ཡང་མི་འགྱུར་རོ་ཞེས་བྱ་བ་ནི། བཞད་གད་ཀྱི་དངོས་པོས་ཞེས་བྱ་བ་ནི་ཀུ་རེའི་བསམ་པས་ཁས་ལེན་པར་བྱེད་ཅིང་ལས་ཐམས་ཅད་ནི་གང་གིས་ཡང་ཡན་ལག་དུ་མི་འགྱུར་ཏེ། བསམ་པའི་དབང་གིས་གནས་པ་ལྡང་བ་ཡིན་གྱི། ལས་གནས་པ་ལ་ལྟོས་པའི་བསམ་བས་ནི་འདིར་མ་ཡིན་ནོ།། འདིར་གཞུང་ནི་དབྱེན་གྱི་སྐབས་སུ་དགེ་སློང་བྲམ་ཟེའི་བུ་མོས་ཞུས་པ་ལས། གང་གི་ཕྱིར་དབྱེན་གྱི་བྱ་བ་ལ་བཞད་གད་ཀྱི་བསམ་པས་རྗེས་སུ་སྒྲོགས་ཤིང་ཚུལ་ཤིང་ལེན་དུ་གསོལ་ན་དགེ་འདུན་བྱེ་བར་བགྱིའམ། ཉེ་བ་འཁོར་མི་བྱའོ་ལས་བགྱིད་པ་ལ་ལྟུང་བ་ཅིར་འགྱུར། དབྱིན་གྱི་སྐབས་ཀྱི་ཉེས་པ་སྦོམ་པོར་འགྱུར་རོ། །གལ་ཏེ་དགེ་འདུན་གྱིས་ཤེས་ན་དགེ་འདུན་ཐམས་ཅད་ལ་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །འདིར་ཐམས་ཅད་དུ་བྱེ་བྲག་མེད་པར་ཤེས་པས་འདིར་རྗེས་སུ་ཐོབ་པའི་སྒྲས་ནི་ལས་བརྗོད་པ་ལའོ། །མི་འཆགས་པའི་སྦོས་དབྱེན་བྱེད་པ་དང་གནས་ནས་འབྱིན་པ་དག་ནི་སྦོམ་པོའི་ཞེས་བྱ་བ་ནི་དབྱེན་གྱི་ལས་དང་གནས་ནས་དབྱུང་བའི་ལས་མི་འཆགས་པར་ཤེས་བཞིན་དུ་མི་འཆགས་ཀྱང་བླའི། འོན་ཀྱང་བྱའོ་སྙམ་པའི་བློས་དབྱེན་དང་གནས་ནས་དབྱུང་བའི་ལས་བྱེད་དམ། དེའི་ཡན་ལག་
གི་དངོས་པོ་བསྒྲུབས་ན་ཐམས་ཅད་དུ་དབྱེན་གྱི་ཕྱོགས་ཀྱི་སྦོམ་པོར་འགྱུར་བའོ། །དགེ་འདུན་དུ་མ་གྱུར་པ་ཉིད་ནི་ཉེས་བྱས་སོ་ཞེས་བྱ་བ་ནི་གྲོགས་མེད་པ་ཉིད་དུ་བྱེད་པའམ། གཅིག་དང་ལྷན་ཅིག་གམ་གཉིས་དང་ལྷན་ཅིག་ཏུ་དབྱེན་དང་གནས་ནས་འབྱིན་པ་དག་བྱེད་ན་ཉེས་བྱས་སུ་འགྱུར་རོ། །འདི་ནི་རྩེད་མོའི་རྣམ་པ་ཡིན་གྱི་རྗེས་སུ་བསྒྲུབ་པའི་རྣམ་པ་ནི་མ་ཡིན་པར་ཤེས་པར་བྱའོ། །འདིར་གཞུང་ནི་གཅིག་གིས་གཅིག་གནས་ནས་འབྱིན་པ་ཉེས་བྱས་སོ། །གཅིག་གིས་གཉིས་སམ་གཅིག་གིས་མང་པོ་འམ་གཉིས་ཀྱིས་བཞིའམ། གཉིས་ཀྱིས་གཅིག་གམ། མང་པོས་མང་པོ་འམ་མང་པོས་བཞིའམ། མང་པོས་གཅིག་གམ། མང་པོས་གཉིས་གནས་ནས་འབྱིན་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཐ་དད་པར་གནས་པ་དག་ལས་གཞན་པ་ཁ་སྐོང་བར་འོས་པ་མ་ཡིན་པ་དག་གིས་ཚོགས་ཀྱིས་གསོལ་བ་དང་བརྗོད་པ་དག་ནི་མ་ཡིན་ནོ་ཞེས་བྱ་བ་ནི། བྱས་པ་ཉིད་ལ་བྱས་པ་ཉིད་དོར་ནས་གནས་ཐ་དད་པ་ཞེས་བྱ་བའི་དོན་ཏོ། །འདི་ལྟར་ཁ་སྐོང་བར་འོས་པ་མ་ཡིན་པ་ཐམས་ཅད་ཀྱང་རྣམ་གྲངས་ཀྱིས་ཐ་དད་པར་གནས་པ་ཡིན་ནོ། །དེ་ལྟར་ན་གནས་པ་ཐ་དད་པར་གནས་པ་ཉིད་དང་གང་དག་རང་བཞིན་དུ་མི་གནས་པ་ཉིད་ནི་གཞན་མ་ཡིན་ནོ། །དེ་རྣམས་ལ་དེ་ལེན་པར་རྟོགས་པར་བྱའོ། །ཡང་དེ་རྣམས་ནི་ཆོས་མ་ཡིན་པའི་ཕྱོགས་ཁས་བླངས་པ་འདི་ཐོབ་པ་རྣམས་ལ་དེ་རྣམས་ཡང་ཁས་བླངས་པས་ཐ་དད་པ་ཉིད་ཡིན་པས་ཐ་དད་པ་ཉིད་དུ་རིག་པར་བྱའོ། །བསྙེན་པར་རྫོགས་པ་དང་བཅས་པ་མ་ཉམས་པ་རྣམས་ཀྱིས་བསླབ་པ་ལ་གུས་པར་བྱ་དགོས་ལ་གསོ་སྦྱོང་དང་དགག་དབྱེ་དག་བྱ་བ་གང་ཡིན་པ་དེ་ནི་བསླབ་པའི་ཡན་ལག་དང༌། བསླབ་པ་རྗེས་སུ་སྐྱོང་བར་འགྱུར་བ་དག་ཡིན་པ་དེའི་ཕྱིར་ཁ་སྐོང་པར་འོས་པ་མ་ཡིན་པས་གསོ་སྦྱོང་དང་དགག་དབྱེ་དག་བྱས་པ་ཁོ་ན་ཡིན་ནོ། །རང་གི་འོས་པའི་དགེ་འདུན་ཉམས་སུ་མྱོང་བ་མ་གྲུབ་པ་ཉིད་ནི་མ་ཡིན་ནོ་ཞེས་བྱ་བ་ནི་ལས་དེ་ལ་རང་གི་འོས་པའི་དགེ་འདུན་བཞིའི་ཚོགས་ལ་ སོགས་པའི་དགེ་འདུན་གང་ཡིན་པ ་དེ་ལས་ཉམས་སུ་མྱོང་བ་མ་གྲུབ་པ་ཉིད་ན་ལས་དེ་བྱས་
པ་ཉིད་མ་ཡིན་ཏེ་ལས་མ་གྲུབ་པ་ཉིད་ཅེས་བྱ་བའི་དོན་ཏོ། །གསོལ་བ་ཐོས་ན་དེ་གྲུབ་པ་ཉིད་ཡིན་ནོ་ཞེས་བྱ་བ་ནི། དགེ་འདུན་དང་ཉན་དུ་གཞུག་ པ་བསྙེན་པར་རྫོགས་པར་བྱ་བ་ལ་སོགས ་པས་གསོལ་བ་ཙམ་ཐོས་ན་ཡང་ཉམས་སུ་མྱོང་བ་དེ་འགྲུབ་པ་ཉིད་ཡིན་ཏེ། དེ་ཙམ་ཐོས་པས་ལས་དེ་བྱས་པ་ཉིད་ཡིན་ནོ། །སྐལ་པ་དང་ལྡན་པའི་རང་བཞིན་ཅན་ལ་མ་དག་པ་འདྲ་བས་རབ་ཏུ་འབྱིན་དུ་གཞུག་པ་ནི་ཆོ་ག་མ་ཡིན་པ་མ་ཡིན་ནོ་ཞེས་བྱ་བ་ནི་གང་ཞིག །སྐལ་བ་དང་ལྡན་བའི་རང་བཞིན་ཅན་གྱི་གང་ཟག་གང་ཡིན་པ་ཁྱིམ་ནས་འབྱུང་བའི་སྐབས་མི་རྙེད་ན། དེ་ལ་མངགས་པ་དང་འདྲ་བས་རབ་ཏུ་འབྱིན་དུ་གཞུག་པ་གང་ཡིན་པ་དེ་ནི་ཆོ་ག་མ་ཡིན་པ་མ་ཡིན་ཏེ། ཆོ་ག་ཡིན་པ་ཁོ་ནར་བལྟ་བར་བྱ་བ་ཞེས་བྱ་བའི་དོན་ཏོ། །འདིར་གཞུང་ནི་དེ་བས་ན་དེ་ལྟ་བུའི་མངགས་པས་བསྙེན་པར་རྫོགས་པར་བྱའོ། །བསྙེན་པར་རྫོགས་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པའི་སྐབས་ཀྱི་ཆོས་བྱིན་གྱིས་སྐབས་རྗེས་སུ་གནང་བ་དང་ཆུ་ལ་ཡང་གསུངས་སོ། །མངགས་པ་དེས་དེའི་སྐབས་རྗེས་སུ་བསྒྲུབ་པར་བྱའོ་ཞེས་བྱ་བ་ནི་དེས་དེར་སོང་ནས་དེ་ལ་འདི་ལྟར་མངགས་པའི་ལས་ཀྱིས་བསླབ་པ་སྦྱིན་པ་དེ་ནི་སློབ་དཔོན་དང་འདྲ་བས་མངགས་པའི་ལས་ཞེས་བྱ་བ་བརྗོད་པར་བྱའོ། །བུད་མེད་ལ་ནི་བུད་མེད་དང་སྐྱེས་པས་ཀྱང་ངོ་ཞེས་བྱ་བ་ནི་རབ་ཏུ་དབྱུང་བར་བྱ་བ་བུད་མེད་ལ་ནི་མངགས་པ་བུད་མེད་ཀྱིས་ཀྱང་བྱར་རུང་སྐྱེས་པས་ཀྱང་བྱར་རུང་ངོ༌། །སྐྱེས་པ་ལ་ནི་སྐྱེས་པ་ཁོ་ནས་སོ་ཞེས་བྱ་བས་ནི་བུད་མེད་ཀྱིས་མི་བྱ་སྟེ་མཐུ་དང་ལྡན་པའི་ཡུལ་ལ་དམན་པ་དབང་མེད་པའི་སྐྱེས་པ་བདག་པོར་གྱུར་པ་སྟེ། དེ་ཡང་འདི་ལ་ཡོད་པས་སྐྱེས་པའི་བྱ་བ་དག་ལ་བུད་མེད་ཀྱི་ཡིད་ཀྱིས་བྱ་བ་མི་རིགས་པ་ཉིད་ཀྱི་ཕྱིར་རོ། །དེ་ལ་མངགས་པས་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་གསོལ་བ་དང་ཁས་བླངས་པ་དག་དེའི་མིང་ཁོ་ནས་བྱའོ་ཞེས་བྱ་བ་སྨོས་ཏེ། མིང་འདི་ཞེས་བྱ་བ་དེ་རབ་ཏུ་དབྱུང་བར་གསོལ་ལོ་ཞེས། དེའི་མིང་ཉིད་ཀྱིས་རབ་ཏུ་འབྱུང་བ་ཡང་དག་པར་ལེན་ཏོ་ཞེས་དེ་ལྟར་དེའི་མིང་གིས་བྱའོ། །དེའི་མིང་ནས་
མ་སྨོས་པར་རབ་ཏུ་དབྱུང་བ་ཞུ་བ་ཡང་མངགས་པས་མི་བྱ་བའི་ཕྱིར་བརྗོད་བ་ཡང་རབ་ཏུ་བྱུང་བ་ཞེས་སྨོས་པས་འཕངས་པ་ཉིད་ཡིན་ནོ། །བསྙེན་པར་རྫོགས་པ་མན་ཆད་གོང་མ་ཡང་ངོ་ཞེས་བྱ་བ་ནི་འདིར་མན་ཆད་ཀྱི་སྒྲས་དབྲི་བའོ། །རབ་ཏུ་བྱུང་བའི་གོང་མ་བསྙེན་པར་རྫོགས་པ་མན་ཆད་ཀྱང་སྐལ་པ་དང་ལྡན་བའི་རང་བཞིན་ཅན་ལ་མངགས་པ་དང་འདྲ་བས་གང་བྱ་བ་དེ་མི་རིགས་པ་མ་ཡིན་ཏེ། རིགས་པ་ཁོ་ན་ཡིན་ནོ། །འདིར་གོང་མ་ཞེས་བྱ་བ་ཡིན་ཏེ། སྔར་རབ་ཏུ་བྱུང་བ་དེ་སྨོས་པས་དགེ་ཚུལ་གྱི་སྡོམ་པ་སྦྱིན་པ་བསྟན་པ་དང༌། གོང་མ་དགེ་ཚུལ་མའི་སྡོམ་པ་སྦྱིན་པ་དང༌། བར་སློབ་མའི་སྡོམ་པ་སྦྱིན་པ་དང༌། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པ་དང༌། བསྙེན་པར་རྫོགས་པར་བྱ་བ་དག་གོ །མི་ནོད་ན་སྦྱིན་པ་ཉིད་མ་ཡིན་ནོ་ཞེས་བྱ་བ་ནི་བདག་ལ་བསླབ་པ་མ་སྦྱིན་ཅིག །བདག་ལ་བསྙེན་པར་རྫོགས་པར་མ་བྱས་ཤིག་ཅེས་མི་ནོད་ན་སྦྱིན་པར་བྱེད་དུ་ཟིན་ཀྱང་བྱིན་པ་ཉིད་དུ་མི་འགྱུར་བའོ། །དེ་ལ་གསོལ་བ་ཉམས་སོ་ཞེས་བྱ་བ་ནི་མི་ནོད་པ་དེ་ལ་སྔར་གསོལ་བ་གང་ཡིན་པ་དེ་ཡང་འདིར་ཁས་མི་ལེན་པ་དེ་ལ་ཉམས་པ་ཡིན་ཏེ། དེའི་ཕྱིར་བླང་བར་འདོད་པ་དེ་ཡང་གསོལ་བ་བྱ་བ་ཉིད་ཡིན་ནོ། །སྔར་བཞམས་ཏེ་བསྒོ་བ་ཉིད་ཆོ་ག་ཉིད་ཡིན་ནོ་ཞེས་བྱ་བ་དེ་དག་ལ་བཞམས་ཏེ་བསྒོ་བར་བྱའོ་ཞེས་གང་གསུངས་པ་དེ་ཉིད་ཆོ་གར་ཤེས་པར་བྱ་སྟེ། དེས་ན་དེ་མ་བསྒྲུབས་ན་ཆོ་ག་ལས་འདས་ན་ལས་མི་འཆགས་སོ་ཞེས་བྱ་བ་བསྟན་པས། བསྒོ་བར་བྱ་བ་ལ་ཡང་སྔར་བཞམས་ཏེ་མ་བསྒོ་ན་ལས་མི་འཆགས་སོ། །གནས་ནས་དབྱུང་བ་ལ་ཡང་བཞམས་ཏེ་བསྒོ་བ་ཉིད་ཆོ་ག་ཡིན་ཏེ། དེས་ན་གནས་ནས་དབྱུང་བ་ལ་བཞམས་ཏེ་བསྒོ་བ་མ་བྱས་ན་ལས་མི་འཆགས་སོ། །དགོངས་སུ་གསོལ་ཞེས་བྱ་བ་ལ་ སོགས་པ ་ལ་ནི་ཕ་རོལ་གྱི་སེམས་གཏད་པ་ཉིད་གཙོ་བོ་ཡིན་ནོ་ཞེས་བྱ་བ་ནི། དགོངས་སུ་གསོལ་ཞེས་བྱ་བ་ལ་ སོགས་པ ་བརྗོད་པ་དག་ལ་ཕ་རོལ་གྱི་སེམས་གཏད་པ་ཉིད་གཙོ་བོ་ཡིན་ཏེ། གང་གི་ཕྱིར་དེ་ལྟར་གྱུར་པ་ཡིན་པ་དེའི་ཕྱིར་དགོངས་སུ་གསོལ་ཞེས་བྱ་བ་ལ་ སོགས་པ ་བརྗོད་པ་ལ་
སེམས་སྡུས་ཤིག་ཅེས་བྱ་བའི་སྔགས་རྣམས་མ་བརྗོད་ཀྱང་ལས་མི་འཆགས་པར་དོགས་པར་མི་བྱའོ། །སོགས་པ་ཞེས་སྨོས་པའི་སྒྲས་ནི་དགེ་འདུན་བཙུན་པ་རྣམས་གསན་དུ་གསོལ། དགེ་འདུན་བཙུན་པ་རྣམས་དགོངས་སུ་གསོལ། བཙུན་པ་དགོངས་སུ་གསོལ། ཚེ་དང་ལྡན་པ་གསན་དུ་གསོལ། ཚེ་དང་ལྡན་པ་དག་སེམས་སྡུས་ཤིག་ཅེས་བྱ་བའི་སྔགས་དག་སྨོས་པ་བསྡུ་བར་རིག་པར་བྱའོ། །དོན་གྱི་སྐབས་དག་གི་གོ་རིམས་འཁྲུགས་པས་ནི་མི་འཆགས་པ་མ་ཡིན་ནོ་ཞེས་བྱ་བ་ནི་མིང་འདི་ཞེས་བགྱི་བས་མིང་འདི་ཞེས་བགྱི་བ་དགེ་འདུན་ལས་བསྟེན་པར་རྫོགས་པར་གསོལ་ཏེ་ཞེས་བྱ་བ་ལ། དགེ་འདུན་ལས་མིང་འདི་ཞེས་བགྱི་བས་བསྙེན་པར་རྫོགས་པར་གསོལ་ཏེ་ཞེས་བྱ་བ་ལྟ་བུའི་ཚིག་གི་གོ་རིམས་འཁྲུགས་པས་ནི་ལས་མི་འཆགས་པར་མི་འགྱུར་བའོ།། དེ་ཡང་ཚིག་གི་ཕྲད་སྔ་ཕྱི་འཁྲུགས་པས་གོ་བར་བྱེད་པ་མ་ཡིན་ན་ནི་མི་འཆགས་སོ། །གོ་བར་བྱེད་པ་ཡིན་ན་ནི་འཆགས་སོ། །དེ་ནི་མི་བྱ་བ་ཉིད་དོ་ཞེས་བྱ་བ་ནི་དགོངས་སུ་གསོལ་ཞེས་བྱ་བ་ལ་ སོགས་པའི་ཚིག་མེད་པ ་དང༌། དོན་གྱི་སྐབས་དག་གི་གོ་རིམས་འཁྲུགས་པ་དེ་ནི་མི་བྱ་བ་ཉིད་དེ། དེ་ནི་ཟུང་ཆག་པ་ཡིན་པས་དེ་ལྟར་བྱེད་ན་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །མཚན་གཞན་ལ་བརྟེན་པས་ནི་མ་ཡིན་ནོ་ཞེས་བྱ་བ་ནི་དགེ་སློང་ཞེས་བརྗོད་པར་བྱ་བ་ལ་དགེ་སློང་མ་ཉིད་དུ་བརྗོད་པ་དང༌། དགེ་སློང་མ་ཞེས་བྱ་བ་བརྗོད་པར་བྱ་བ་ལ། དགེ་སློང་ཉིད་དུ་བརྗོད་ པ་ལ་སོགས ་པས་ནི་མི་འཆགས་པ་མ་ཡིན་པའི་རྫས་སུ་བརྗོད་པ་ནི་དགོངས་པ་ཡིན་ཏེ་མཚན་མས་ནི་མ་ཡིན་ཞེས་བྱ་བ་དེ་ཤེས་པའོ། །དགེ་སློང་དང་དགེ་སློང་མ་དག་གི་ལས་གཞན་བྱེད་པ་ནི་མ་ཡིན་ནོ་ཞེས་བྱ་བ་ནི་དགེ་སློང་ཉིད་ལ་དགེ་སློང་མ་ཉིད་ཀྱི་ལས་གཞན་བྱེད་པ་ནི་མི་འཆགས་པ་མ་ཡིན་ལ། དགེ་སློང་མ་ཉིད་ལ་དགེ་སློང་གི་ལས་བྱེད་པ་ཡང་མི་འཆགས་པ་མ་ཡིན་པའོ། །དགེ་སློང་བསྙེན་པར་རྫོགས་པར་བྱ་བའི་ལས་གང་ཞིག་ལ་དགེ་སློང་མ་རྣམས་ཀྱི་བསྙེན་པར་རྫོགས་པའི་ལས་གང་ཞིག་མཐར་ཐུག་བྱེད་པ་ལ་གཅིག་པུ་
ཡོད་པ་མ་ཡིན་ནོ། །དགེ་སློང་གི་དགེ་འདུན་གྱིས་བསྙེན་པར་རྫོགས་པར་བྱེད་པ་ལ་གཙོ་བོ་ཉིད་དེ་རྗེས་སུ་འཇུག་པ་ཙམ་པོར་གྱུར་པས་དགེ་སློང་མའི་དགེ་འདུན་ཉེ་བར་གནས་པའོ། །དེ་ལྟར་ཡང་དགེ་སློང་རྣམས་ལས་དགེ་སློང་མས་བསྙེན་པར་རྫོགས་པ་དགེ་སློང་མའི་དངོས་པོ་བརྩལ་བར་བྱའོ་ཞེས་གསུངས་པ་དེ་བས་ན་དེས་ཤེས་པའོ། །འདིར་གཞུང་ནི་སིལ་བུ་དང་རབ་ཏུ་བྱུང་བའི་གཞི་ཞུ་བ་དག་ལས། བཙུན་པ་རེ་ཞིག་དགེ་ཚུལ་དགེ་ཚུལ་མའི་ལས་ཀྱིས་བསྙེན་པར་རྫོགས་པར་བགྱི་ན་ནི་བསྙེན་པར་རྫོགས་པར་བགྱི་འམ། ཉེ་བ་འཁོར་བསྙེན་པར་རྫོགས་པར་བརྗོད་པར་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ་ཞེས་བྱ་བ་ལ་ སོགས་པ ་གསུངས་ པ་ཡིན་ནོ། །ལས་ཀྱི་གཞི་ཞུ་བ་ལ་སོགས ་པའི་སྐབས་སོ། །ལས་ཀྱི་གཞི་རྫོགས་སོ།། །།གཞི་མ་ཞི་བར་ཤེས་ནས་གླེང་བ་པོས་སོ་སོར་ཤེས་པར་བྱས་ཤིང་མངོན་སུམ་དུ་འཇོག་པ་ལ་ནན་ཏུར་གྱི་ལས་བྱའོ་ཞེས་བྱ་བ་སྨོས་ཏེ་ནན་ཏུར་གྱི་ལས་ཀྱི་རྒྱུ་འཐབ་ཀྲོལ་བྱེད་ པ་ཉིད་ལ་སོགས ་པའི་གཞི་དེ་མ་ཞི་ཞིང་དེས་ཡིད་ཆེས་ཤིང་མངོན་བར་ཡིད་ཆེས་པར་གྱུར་ན་གླེང་བ་པོས་ཀྱང་དམ་བཅས་པ་ལ་གཞི་དེ་ཉེ་བར་མ་ཞི་བ་ལ་གང་དུ་གླེང་བ་པོ་མ་བྱུང་བ་ལས་དགེ་སློང་ཐམས་ཅད་ལ་ཤེས་པ་ཉིད་དེར་དགེ་འདུན་ཐམས་ཅད་ཀྱིས་ཤེས་པར་བྱ་བ་ལ་མདོ་འདིའོ། །དེ་ལྟར་གནས་པ་ལ་གླེང་བ་པོ་རང་གི་ངང་གིས་མ་བྱུང་བ་དེ་ལ་ཅི་དགེ་འདུན་གྱིས་བཏང་སྙོམས་སུ་བྱའམ། འོ་ན་གླེང་པ་པོ་བསླང་སྟེ་འཇུག་པར་བྱ་སྙམ་པའི་ཐེ་ཚོམ་དང་མ་ངེས་པའི་ཆགས་པ་མི་ལྟུང་བ་སྟེ་བཟློག་པའི་ཕྱིར། གླེང་བ་པོ་རང་མ་བྱུང་ན་དགེ་འདུན་གྱིས་བསླང་བར་བྱའོ་ཞེས་བྱ་བ་སྨོས་ཏེ། འདིར་ཡང་ལུང་ནི་བསྐྲད་པར་བྱ་བའི་ལས་ལ་ལམ་ཕྱེད་དུ་སོང་ལ་འགྲོ་མགྱོགས་དང་ན་བསོ་གཉིས་ཀྱི་གླེང་བ་པོ་དགེ་སློང་བསྐོ་བར་བྱའོ་ཞེས་གསུངས་པ་ཡིན་ནོ། །དགེ་འདུན་ཐམས་ཅད་གཤེ་བ་གང་ཡིན་པ་མི་རིགས་ཤིང་མཛེས་པས་དེའི་ཕྱིར་གླེང་བར་བྱ་བ་རྣམ་པ་དེ་ལྟ་བུ་མངོན་སུམ་དུ་གྱུར་པ་ལ་ནན་ཏུར་གྱི་ལས་བསྡིགས་པ་ལ་ སོགས་པ ་བདུན་པོ་དག་བྱའོ། །ནན་ཏུར་ཞེས་བྱ་བ་ནི་འོག་ཏུ་གཞུག་ཅིང་
བཤུད་པ་ཉིད་དུ་རྣམ་པར་གཞག་པ་ཞེས་བྱ་བའི་དོན་ཏོ། །འདུ་བ་མི་སྟེར་ན་གྲགས་པ་ཙམ་གྱིས་སོ་ཞེས་བྱ་བ་ནི། གླེང་བ་པོས་སོ་སོར་ཤེས་པར་བྱས་ཤིང་མངོན་སུམ་དུ་འཇོག་ན་ཞེས་སྨོས་ན་དེ་ཉིད་དམིགས་ཀྱིས་བསལ་བ་ཡིན་ནོ། །གང་གི་ཕྱིར་འདུ་བ་མི་སྟེར་བ་ལ་ སོགས་པ ་ལ་དེའི་ཚེ་སོ་སོར་ཤེས་པར་བྱ་བ་ལ་ སོགས་པ ་བྱར་མི་ནུས་པས། དེའི་ཕྱིར་འཐབ་ཀྲོལ་བྱེད་པ་ཉིད་ལ་ སོགས་པ ་རྒྱུ་གྲགས་པ་ཙམ་གྱི་འདུ་བ་མི་སྟེར་ན་བསྡིགས་ པ་ལ་སོགས ་པའི་ལས་བྱའོ། །མ་མཐོང་བ་ལ་ནི་ཁས་ལེན་པ་ཡན་ལག་མ་ཡིན་ཏོ། །ཡོད་པ་ཉིད་རྣམ་པར་བཤིག་པའི་ཕྱིར་རོ་ཞེས་བྱ་བ་ནི་གང་གི་ཚེ་ལྟུང་བ་མ་མཐོང་བས་གནས་ནས་དབྱུང་བའི་ལས་བྱེད་པ་མ་མཐོང་བ་དེ་ལ་ནི་གྲགས་པ་དང་མངོན་སུམ་གྱི་དངོས་པོ་གཉིས་ཡན་ལག་ཡིན་གྱི། ཁས་ལེན་པ་ལ་ནི་ཡན་ལག་མ་ཡིན་ནོ། །དེ་ཅིའི་ཕྱིར་ཞེ་ན། ཡོད་པ་ཉིད་རྣམ་པར་བཤིག་པའི་ཕྱིར་རོ། །འདི་ལྟར་བྱས་པ་ཡང་དག་པའི་ལྟུང་བ་མ་མཐོང་ཞིང་ལྟུང་བ་ཡང་དག་པར་མ་མཐོང་བ་དེ་ལ་གལ་ཏེ་དེ་བདེན་ཡང་དག་སྟེ། ཡང་དག་པའི་ལྟུང་བ་བདག་གིས་མ་མཐོང་ཞིང་ཁས་ལེན་ན་དེས་ལྟུང་བ་མཐོང་བར་འགྱུར་རོ། །དེ་བས་ན་གང་ཞིག་ནན་ཏུར་གྱི་ལས་བྱེད་པའི་རྒྱུ་ལྟུང་བ་མཐོང་བ་དེས་ཡོད་པ་ཉིད་རྣམ་པར་བཤིག་པའི་ཕྱིར་ནན་ཏུར་གྱི་ལས་མི་བྱ་བ་ཉིད་ཡིན་པས། དེའི་ཕྱིར་དེ་ལ་ཁས་ལེན་པ་ནི་ཡན་ལག་མ་ཡིན་ནོ། །སྐབས་མི་འབྱེད་ན་ཡང་མི་རིགས་པའི་ཕྱིར་རོ་ཞེས་བྱ་བ་ནི་སྐབས་མི་འབྱེད་ན་ཡང་གྲགས་པ་དང་མངོན་སུམ་གྱི་དངོས་པོ་གཉིས་ཡན་ལག་ཡིན་གྱི་ཁས་ལེན་པ་ནི་ཡན་ལག་མ་ཡིན་ནོ། །དེ་ཅིའི་ཕྱིར་ཞེ་ན་མི་རིགས་པའི་ཕྱིར་རོ། །གང་གི་ཕྱིར་འདི་རྒྱུ་གཉིས་ཀྱིས་མི་རིགས་ཏེ། སྐབས་མི་འབྱེད་པའི་གང་ཟག་ལ་གླེང་བ་ཉིད་ཀྱང་མི་བྱ་ན་ཁས་ལེན་པ་ལྟ་ག་ལ་ཡོད་དེ། དེའི་ཕྱིར་རྒྱུ་གཅིག་གིས་ཀྱང་མི་རིགས་ལ། གང་སྐབས་མི་འབྱེད་པར་བྱེད་པ་དེ་ལ་ཇི་ལྟར་བྱས་ཀྱང་སྐབས་རྙེད་ཅིང་གླེང་བ་ལ་ཁས་བླང་ངོ་སྙམ་དུ་སེམས་པར་མི་འགྱུར་བས་དེའི་ཕྱིར་རྒྱུ་གཉིས་པ་དེས་ཀྱང་མི་རིགས་སོ། །གླེང་བ་པོས་རང་མ་ལངས་ན་བསྐོ་བས་བསླང་བར་བྱའོ་ཞེས་བྱ་བ་ནི་གལ་ཏེ་གླེང་བ་པོ་རང་ལངས་
ནས་སྤྲོ་བར་བྱ་སྟེ། དགེ་འདུན་མཐུན་པར་བསླང་བར་བྱའོ། །རྒྱུ་གང་གིས་ནན་ཏུར་གྱི་ལས་བྱ་བ་དེ་སྤྱིར་བསྟན་པས་ནན་ཏུར་བྱས་པ་ཇི་ལྟར་གྱུར་པ་ལ་བཟོད་པར་བྱ་བ་དེ་བསྟན་པའི་ཕྱིར། གཤེ་བ་དང་ཁྲོ་བ་དང་སྤྱོ་བ་ཉིད་དང༌། དགེ་འདུན་གྱི་རྙེད་པ་མེད་པ་དང༌། གནས་མེད་པར་བྱ་བར་སེམས་པ་ཉིད་དང༌། བླའི་གྲྭ་དང་འོག་ཟུར་དང༌། ཉེ་དུའི་གང་ཟག་རྟེན་ཉིད་དང༌། དགེ་འདུན་རྟེན་མ་ཡིན་པ་ཉིད་དུ་མི་འཛིན་པ་དང༌། ཁྱིམ་པ་དང་མུ་སྟེགས་ཀྱི་རྒྱལ་མཚན་འཆང་བ་དང༌། མུ་སྟེགས་ཅན་ལ་བརྟེན་པ་དང༌། ཆོ་ག་མ་ཡིན་པར་སྤྱོད་པ་དང་དགེ་སློང་གི་བསླབ་པ་དག་ལ་སློབ་པར་མི་བྱེད་པ་དང། སྐྲ་འགྲེང་བར་གྱུར་པ་དང༌། སྐྲ་འཕྱར་བར་གྱུར་པ་དང༌། དགེ་འདུན་ལ་སྤུ་སྙོལ་བར་བྱེད་པ་དང༌། འབྱུང་བར་བསྐྱོད་པ་དང་མཚུངས་པར་ཉེ་བར་སྟོན་པ་དང༌། རྒྱུན་ལས་ཕྱིར་བཟློག་པར་བཟོད་པར་གསོལ་བའོ་ཞེས་བྱ་བ་སྨོས་ཏེ། མི་འཛིན་པ་ཞེས་བྱ་བ་ནི་ཚིག་གོང་མ་བཞི་དང་སོ་སོར་སྦྱར་ཏེ། ཁྱིམ་པ་དང་རབ་ཏུ་བྱུང་བ་དག་ལ་གཤེ་བ་དང་ཁྲོ་བ་དང༌། སྤྱོ་བ་ཉིད་དུ་མི་འཛིན་པའོ། །འདིར་གཤེ་བ་ལ་ སོགས་པ ་ལ་འཇུག་པར་གྱུར་པ་ཉིད་གཟུང་བར་རིག་པར་མི་བྱ་བར་མི་བྱའོ། །ཞི་བ་མ་ཡིན་པར་འཇུག་པ་ལ་ཡང་འདིར་བཟོད་པ་གསོལ་བ་མི་རིགས་པའི་ཕྱིར་རོ། །བཟོད་པ་གསོལ་བ་དང་འཇུག་པར་འགྱུར་བ་ལ་ཡང་སྔོན་གྱི་གནས་སྐབས་སུ་གྱུར་པའི་གཤེ་བ་ལ་ སོགས་པ ་ཡང་འདིར་བསྡུས་པར་རིག་པར་བྱའོ། །རྙེད་པ་དང་གནས་པ་དག་གིས་དགེ་འདུན་ལ་སེམས་པར་བྱེད་པ་ཉིད་མི་འཛིན་པའོ། །གལ་ཏེ་དགེ་འདུན་ལ་མ་རྙེད་པའི་ཕྱིར་སེམས་པར་མི་བྱེད་པ་དང་མི་གནས་པའི་ཕྱིར་སེམས་པར་མི་བྱེད་པ་ཞེས་བྱ་བའོ། །འདིར་དགེ་འདུན་ཞེས་སྨོས་པ་ནི་དཔེ་ཙམ་དུ་ཟད་དེ་དགེ་སློང་བསྡུས་པའམ། རེ་རེ་ལ་དེ་ལྟར་རྙེད་པ་མ་ཡིན་པ་དང་གནས་མེད་པ་དག་གིས་དེ་ལྟར་སེམས་པ་ཉིད་མི་འཛིན་པ་སྟེ། བཟོད་པར་གསོལ་བ་རིགས་པ་ཉིད་དོ། །ནན་ཏུར་གྱི་ལས་ཀྱི་རྒྱུ་བྱ་བ་ཡོད་པའི་ཕྱིར། བླའི་གྲྭ་དང་འོག་ཟུར་དང༌། ཉེ་དུའི་གང་ཟག་རྟེན་ཉིད་དུ་མི་འཛིན་པའོ། །བླའི་གྲྭ་དང་འོག་ཟུར་དང༌། ཉེ་དུའི་གང་ཟག་ཁྱིམ་པ་དང་རབ་ཏུ་བྱུང་བའི་གང་ཟག་རྟེན་ཉིད་དུ་མི་འཛིན་པ་སྟེ། དེ་དག་རྟེན་ཉིད་དུ་མི་འཛིན་ཅིང་བཟོད་པ་གསོལ་བ་ལ་དགེ་
འདུན་གྱིས་བཟོད་པའི་ལས་བྱའོ། །གལ་ཏེ་དེ་ལྟར་དགེ་འདུན་རྟེན་པར་བྱེད་ན་ཁྱིམ་པ་དང་མུ་སྟེགས་ཅན་གྱི་རྒྱལ་མཚན་འཛིན་པར་མི་བྱེད་ཅིང་མུ་སྟེགས་ཅན་ལ་བརྟེན་པ་དང༌། ཆོ་ག་མ་ཡིན་པར་སྤྱོད་པར་མི་བྱེད་པ་ཞེས་བྱ་བ་ནི་འདིར་གང་དག་དང་འབྲེལ་པས་འདིར་ཆོ་ག་མ་ཡིན་པ་དག་སྤྱོད་པ་དག་པ་མི་བྱེད་པ་བསྡུས་པར་རིག་པར་བྱའོ། །ཁྱིམ་པའི་རྒྱལ་མཚན་འཆང་བ་དང༌། མུ་སྟེགས་ཅན་གྱི་རྒྱལ་མཚན་འཆང་བ་དང༌། མུ་སྟེ་གས་ཅན་ལ་བརྟེན་པ་དང༌། ཆོ་ག་མ་ཡིན་པར་སྤྱོད་པར་མི་བྱེད་པ་ཞེས་བྱ་བ་དེ་རྣམས་མི་བྱེད་ཅིང་ཞེས་བྱ་བའོ། །འདི་པའི་ཆ་བྱད་གྲུབ་པས་བཟོད་པ་གསོལ་བར་བྱ་བ་ཉིད་དོ། །ཇི་ལྟར་བསྙེན་པར་རྫོགས་པ་ལ་དེ་ཡང་ཁྱིམ་པ་དང༌། མུ་སྟེགས་ཅན་གྱི་རྒྱལ་མཚན་འཆང་བས་མི་རིགས་པ་སྟེ། ལྟ་བ་ཕུན་སུམ་ཚོགས་པ་དང་ཚུལ་ཁྲིམས་ཕུན་སུམ་ཚོགས་པར་གྱུར་པས་བསྙེན་པར་རྫོགས་པར་ལྟ་བར་བཟོད་པ་གསོལ་བའོ། །དེ་ཡང་མུ་སྟེགས་ཅན་ལ་བརྟེན་པ་དང༌། ཆོ་ག་མ་ཡིན་པ་ལ་སྤྱོད་པ་ལ་རིམ་པ་ཇི་ལྟ་བ་བཞིན་དུ་ཕུན་སུམ་ཚོགས་པ་གཉིས་མ་ཚང་བས་མི་རིགས་པའོ། །དགེ་སློང་གི་བསླབ་པ་དག་ལ་མི་སློབ་པར་མི་བྱེད་པ་ཞེས་བྱ་བ་ནི་སྤོང་བས་བསྡུས་པའི་བསླབ་པ་དག་ལ་སློབ་པར་བྱེད་པ་ཁོ་ནར་བྱེད་པའོ། །སྐྲ་འགྲེང་བར་གྱུར་པ་ཞེས་བྱ་བ་ནི་སྐྲ་དག་གྱེན་དུ་རྣམ་པར་འགྲེང་བར་གྱུར་པ་ཉིད་དོ། །སྐྲ་འཕྱར་བར་གྱུར་པ་ཞེས་བྱ་བ་སྐྲ་དག་ཐད་ཀར་རྣམ་པར་འཕྱར་བར་གྱུར་པ་ཉིད་དོ། །དེ་གཉིས་ཀྱིས་ནི་སྨད་བབ་པ་ཉིད་དུ་བསྟན་པ་ཡིན་ཏེ། འདི་ལྟར་ན་སྨད་བབ་པ་ནི་སྐྲ་འགྲེང་བར་གྱུར་བ་དང༌། སྐྲ་འཕྱར་བར་གྱུར་བ་ཡིན་ནོ་ཞེས་གྲགས་པའི་ཕྱིར་ཏེ། དེ་ལྟར་གྱུར་ཅིང་བཟོད་པ་ཡང་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །སྤུ་སྙོལ་བར་བྱེད་པ་ཞེས་བྱ་བ་ནི། སྤུ་འཁུམས་པར་བྱེད་པ་སྟེ། དེས་ནི་རྒྱགས་པ་མེད་པར་བསྟན་ཏེ། འདི་ལྟར་རྒྱགས་པ་དང་བཅས་པའི་སྤུ་དག་སྟེ། དང་པོར་ཤིན་ཏུ་སྤུངས་པར་སྟོན་པས་དེས་ན་འདི་ནི་རྒྱགས་པ་མེད་པ་ཉིད་དུ་བྱེད་པ་བསྟན་ཏེ། དེ་ལྟར་བྱེད་ཅིང་བཟོད་པ་གསོལ་བ་ལ་དགེ་འདུན་གྱིས་བཟོད་པའི་ལས་བྱའོ། །འབྱུང་བ་སྤྱོད་པ་དང་ཞེས་བྱ་བ་ལ་འབྱུང་བ་ནི་འབྱུང་བ་སྟེ། རིགས་པ་མ་ཡིན་པ་དག་པ་མ་ཡིན་པ་སྨད་པ་ཞེས་བྱ་བའི་གནས་ཀྱི་
བྱེ་བྲག་དེ་ནས་རྣམ་པར་དག་པའི་ལམ་དུ་ཞུགས་ཤིང་འབྱུང་བ་ནི་འབྱུང་བ་ཞེས་བྱའོ། །མཚུངས་པ་ཞེས་བྱ་བ་ནི་ཡང་དག་པ་ཉིད་དུ་གྱུར་པར་འཇུག་སྟེ། དགེ་འདུན་དང་འདྲ་དགེ་འདུན་དང་མཚུངས་པར་འཇུག་པའོ། །དེར་ཉེ་བར་སྟོན་པ་ནི་གང་གིས་འདི་བདག་ཅག་དང་མཚུངས་པར་འགྱུར་ཏེ་ཞེས་བྱ་བས་ཤེས་པར་གྱུར་པས་འདུད་པ་དང༌། རྫེས་དང་བཅས་པས་མཉན་ཞིང་རྗེས་སུ་མཐུན་པའི་བྱ་བ་དང༌། མཛའ་བར་གྱུར་བའི་སྤྱོད་པ་དང་ལྡན་ཞིང་གུས་པ་དང་རྗེས་གཉིས་ཀྱི་བདག་ཉིད་དུ་གྱུར་པ་ནི་ནང་དུ་གནས་ཤིང་ཞེས་བྱ་བས་ཤེས་པ་ཡིན་ནོ། །རྒྱུ་ལས་ཕྱིར་བཟློག་པ་ཞེས་བྱ་བ་ནི་འཐབ་ཀྲོལ་བྱེད་ པ་ཉིད་ལ་སོགས ་པའི་རྒྱུ་གང་གིས་དེ་ལ་ནན་ཏུར་གྱི་ལས་བྱས་པར་གྱུར་པའི་རྒྱུ་དེ་ལས་ཕྱིར་བཟློག་པས་ཏེ། དེ་ནས་བསམ་པ་ཞུགས་པ་འགའ་ཞིག་ལ་ཡང་ལམ་རྣམ་པ་དག་པ་ལ་དེ་དང་འབྲེལ་པ་ཉིད་དུ་འགྱུར་རོ། །ལོག་པའི་ལམ་ལ་གོམས་པས་འདི་ལས་ངེས་པར་འབྱུང་བས་བསྟན་པའི་དོན་དུ་འདི་སྨོས་སོ། །དེ་ལྟ་བུར་གྱུར་པ་ལ་ཡང་གསོལ་བ་མེད་པར་བཟོད་པའི་ལས་མི་བྱའོ། །བཟོད་པ་དེ་གསོལ་ན་བཟོད་པའི་ལས་བྱའོ། །ལས་སྦྱིན་པ་དང་དབྱུང་བ་དང་བསྙེན་པར་རྫོགས་པར་བྱ་བ་དང༌། གཞིག་པ་དང་བསྲང་བ་ཡང་ངོ་ཞེས་བྱ་བ་ནི་ལས་ཀྱི་སྦྱིན་པ་འམ་ལས་གྱི་བདག་ཉིད་སྦྱིན་བ་འདི་ལྟ་སྟེ། ཁང་པ་དང་གཙུག་ལག་ཁང་བསྟན་ པ་ལ་སོགས ་པའི་ལས་སྦྱིན་བའོ། །དེ་ཡང་དབྱུང་བ་དང་བསྙེན་པར་རྫོགས་པ་དང་ཁྱིམ་གྱི་བསླབ་པ་གཞིག་པ་དང༌། ལྷུང་བཟེད་ཁ་སྤུབ་པ་རྣམས་ཀྱི་གསོལ་བ་ཉིད་ཀྱིས་སོ། །འོ་ན་བསྙེན་པར་རྫོགས་པ་སྨོས་བ་ཁོ་ན་ཡིན་ན། བསྙེན་པར་རྫོགས་པར་གསོལ་བར་བྱའོ་ཞེས་བྱ་བས་མ་ཡིན་ནམ་ཞེ་ན། བརྗོད་པར་བྱ་སྟེ་གཙོ་བོ་མ་ཡིན་པའི་དངོས་པོས་འདིར་གསོལ་བ་འདི་མངོན་པར་བསྟེན་པའོ། །འདིར་ལས་བྱེད་པ་པོའི་བྱ་བ་སྒྲུབ་པར་གྱུར་པ་ལ་ཆོ་ག་འདི་ཐོབ་པའོ། །ཤུགས་ཀྱིས་ཐོབ་པ་ལ་དངོས་སུ་སྨོས་པ་ལ་ཉེས་པ་ཡོད་ པ་མ་ཡིན་ནོ། །གཞི་མ་ཞི་བར་ཤེས་ནས་ཞེས་བྱ་བ་ལ་སོགས ་པས་ནན་ཏུར་གྱི་ལས་ཀྱི་རྒྱུ་ཐུན་མོང་བ་བསྟན་ནས། ད་ནི་རྒྱུ་གང་ལ་ནན་ཏུར་གྱི་ལས་གང་དག་བྱ་བ་དེ་དག་གི་བྱེ་བྲག་བསྟན་པར་བྱ་སྟེ། འཐབ་
ཀྲོལ་བྱེད་པ་ལ་ལས་ཀྱིས་བསྡིགས་པར་བྱའོ་ཞེས་བྱ་བ་ནི་འཐབ་ཀྲོལ་བྱེད་པ་ལ་ལས་ཀྱིས་བསྡིགས་པར་བྱ་བའི་དོན་ཏོ། །དགེ་འདུན་ལྷག་མའི་ལྟུང་བ་ཕྱིར་མི་འཆོས་པར་རྒྱུན་དུ་བྱེད་པ་ལ་ནི་སྨད་པའོ་ཞེས་བྱ་བ་ནི་ལས་ཀྱིས་ཞེས་བྱ་བ་འདི་དང་འོག་མ་ཐམས་ཅད་ལ་ཡང་སྦྱར་བར་ཤེས་པར་བྱའོ། །དགེ་འདུན་ལྷག་མའི་བདག་ཉིད་ཀྱི་ལྟུང་བ་ཡང་དང་ཡང་དུ་འབྱུང་བ་གང་ལ་ཡོད་པ་ནི་ཡང་དང་ཡང་དགེ་འདུན་ལྷག་མའི་ལྟུང་བ་ཅན་ཏེ་དེ་ལའོ། །ཕྱིར་མི་འཆོས་པ་བསྟན་པ་སྨད་པར་བྱ་བའི་ལས་བྱའོ། །ཚར་བཅད་ནས་ནན་ཏུར་གྱི་ལས་རིགས་པ་ཡིན་ཏེ། དག་པ་ལ་འཇུག་པར་གྱུར་པ་ལ་ནི་མ་ཡིན་ནོ་སྙམ་དུ་བྱས་ནས་སོ། །ཁྱིམ་སུན་འབྱིན་པ་ལ་ནི་བསྐྲད་པའོ་ཞེས་བྱ་བ་ནི་གང་གི་ཁྱིམ་སུན་འབྱིན་བ་མ་བཏང་བ་དེ་གནས་དེ་ནས་བསྐྲད་པའི་ལས་བྱའོ། །དེའི་ཕྱིར་འདུ་བ་མི་སྦྱིན་བ་དང་སྐབས་མི་འབྱེད་པ་དག་ལ་ཡང་ངོ་ཞེས་བྱ་བ་ལ་དེའི་ཕྱིར་ཞེས་བྱ་བ་ནི་གནས་ནས་བསྒྲད་པའི་ཕྱིར་རོ། །གླེང་བའི་ཕྱིར་ཡོངས་སུ་རྫོགས་པས་དེའི་དོན་ཉིད་དུ་རིག་པར་བྱའོ། །འདུ་བ་མི་སྦྱིན་པ་དང༌། སྐབས་མི་འབྱེད་པ་དག་ལ་གནས་ནས་སྐྲོད་པར་བྱེད་པ་ཞེས་བྱ་བའི་དོན་ཏོ། །དེ་མ་མཐོང་ངོ་ཞེས་ཟེར་ན་ཡང་ངོ་ཞེས་བྱ་བ་ནི་ཁྱིམ་སུན་འབྱིན་བ་སྟེ། མ་མཐོང་བ་ནི་དེ་མ་མཐོང་བའོ་ཞེས་ཟེར་ན་ཁྱིམ་སུན་འབྱིན་བ་དེ་ལ་བསྐྲད་པའི་ལས་བྱ་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །ཁྱིམ་པ་ལ་བརྙས་ཐབས་བྱེད་པ་ལ་ནི་ཕྱིར་འགྱེད་པའོ་ཞེས་བྱ་བ་ནི་ཁྱིམ་པ་ལ་གང་གིས་ཐོ་འཚམ་བ་ནི་བརྙས་ཐབས་བྱེད་པ་སྟེ། དེ་ནི་ཁྱིམ་པ་ལ་བརྙས་ཐབས་བྱེད་བ་ཡིན་པས་དེ་ལ་ཕྱིར་འགྱེད་པའོ། །བརྙས་ཐབས་སུ་བྱ་བ་མི་བདེན་པའི་ཕྱིར་རོ། །དེ་ལྟར་ཡང་དེའི་མིང་གིས་བཟློག་པར་བྱ་བ་བདག་ཅག་གིས་ཁྱེད་ཀྱི་དྲུང་ནས་བསམ་བ་བཟློག་པར་བྱས་པས་སོ། །ཇི་སྲིད་དུ་ཁྱེད་ཀྱི་ལས་ཀྱི་མཐའ་འདི་མ་བཏང་གི་བར་དུ་ཁྱེད་ཀྱི་ཡུལ་ལས་ངེད་ཀྱི་མཛའ་གཅུགས་ཀྱི་དངོས་པོ་དང༌། དགའ་བའི་དངོས་པོ་ཕྱིར་བསྡུ་ཞིང་དེད་ཕྱིར་འབྱེད་པར་བྱའོ་ཞེས་བྱ་བ་དེའི་དོན་ཏོ། །འདི་ལ་བཟོད་པ་གསོལ་བའི་ལས་ཀྱི་གནས་སུ་དེ་ལ་བཟོད་པ་གསོལ་དུ་གཞུག་གོ་ཞེས་བྱ་བ་ནི། ཕྱིར་འགྱེད་པའི་ལས་འདི་ལ་བཟོད་པ་གསོལ་བའི་ལས་ཀྱི་གནས་སུ་ཁྱིམ་པ་དེ་ལ་
བཟོད་པ་གསོལ་དུ་གཞུག་པ་ཡིན་བར་བལྟ་བར་བྱའི་འདིར་ལས་ནི་མི་བྱའོ། །འོན་ཀྱང་གསོལ་བ་བྱ་སྟེ། ཁྱིམ་པ་ལ་གསོལ་དུ་གཞུག་པར་བྱ་སྟེ། ཁྱིམ་པས་བཟོད་པ་ཉིད་བཟོད་པ་བྱས་པ་ཡིན་པར་ཤེས་པར་བྱའོ། །ལྟུང་བ་གྲགས་པ་ཕྱིར་མ་བཅོས་པ་བསྡམས་པས་ཕྱིར་བཅོས་སུ་མི་རུང་བ་དང༌། མ་མཐོང་ངོ་ཞེས་ཟེར་ཞིང་ཕྱིར་འཆོས་པ་རྗེས་སུ་བསྒྲུབ་པར་མི་འདོད་པ་དང་སྡིག་པ་ཅན་གྱི་ལྟ་བ་མི་གཏོང་བ་ལ་ནི་གནས་ནས་དབྱུང་བར་བྱའོ་ཞེས་བྱ་བ་ལ་ནི་གནས་ནས་དབྱུང་བ་རྣམས་ཀྱིས་དེ་ལ་ལྟུང་བ་གྲགས་པ་ཕྱིར་མ་བཅོས་པ་བསྡམས་པས་ཕྱིར་བཅོས་སུ་མི་རུང་བ་ཞེས་བྱ་བའི་དོན་ཏོ། །དེ་ལ་མ་མཐོང་ངོ་ཞེས་ཟེར་ཞིང་ཞེས་བྱ་བ་ནི་མ་མཐོང་བས་གནས་ནས་དབྱུང་བ་བསྟན་ཏེ། དེའི་ཕྱིར་བཅོས་པ་རྗེས་སུ་བསྒྲུབ་པར་མི་འདོད་ཅིང་ཇི་ལྟར་ཆོས་བཞིན་ཕྱིར་བཅོས་པར་གྱིས་ཤིག་ཅེས་བྱ་བ་དེ་ལྟར་བརྗོད་པར་གྱུར་པ་ཇི་ལྟར་ལྟུང་བ་ཕྱིར་འཆོས་པའི་ཕྱིར་འཆོས་པ་རྗེས་སུ་བསྒྲུབ་པ་མི་འདོད་པ་ཞེས་བྱ་བས་ནི་མ་མཐོང་བ་གནས་ནས་དབྱུང་བའོ། །ལྟུང་བ་སླར་མི་འཆོས་པའི་ཕྱིར་གནས་ནས་དབྱུང་བའི་ཕྲིན་ལས་མཛད་དོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ལྟ་བར་གཏོགས་པའི་ལྟུང་བྱེད་ལ་བརྗོད་པའི་རྣམ་པས་སྡིག་པ་ཅན་ཆོས་འདུ་ལ་བ་ལས་དབྱུང་བར་གྱུར་པའི་ལྟ་བའི་རྣམ་པ་མི་གཏོང་བས་གནས་ནས་དབྱུང་བ་བསྟན་ཏོ། །སྡིག་པ་ཅན་གྱི་ལྟ་བ་གཏོགས་པ་ལ་གནས་ནས་དབྱུང་བའི་ལས་འདི་བྱའོ། །འདི་ཉིད་དུ་ལྟུང་བ་འདི་ཕྱིར་འཆོས་པར་གྱིས་ཤིག །དགེ་འདུན་འདི་ཉིད་ཀྱིས་ཁྱོད་ལ་བག་ཡངས་སུ་བྱེད་པར་འགྱུར་རོ་ཞེས་བརྗོད་ང་ར་བྱའོ་ཞེས་བྱ་བ་ནི། ལྟུང་བ་བཅབ་པར་མི་བྱའོ་ཞེས་བྱ་བ་ནི་རང་གི་ལྟུང་བའི་དབང་དུ་བྱས་པ་ཡིན་གྱི་གཞན་གྱི་འཆབ་པའི་ཉེས་པ་བསྟན་ཟིན་པའི་ཕྱིར་རོ། །དགེ་འདུན་ལྷག་མ་འབའ་ཞིག་ཏུ་མ་ཟད་དེ། དེ་ལྟར་ཡང་གཞུང་ནི་བཙུན་བ་རེ་ཞིག་ལྟུང་བ་དང་བཅས་པ་དགེ་སློད་མ་མཆིས་པའི་གནས་ན་གནས་པས་གང་ལ་མི་བརྗོད་ན་བཅབས་པར་བརྗོད་པར་བགྱི་འམ། ཉེ་བ་འཁོར་མི་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །འདིར་ཞུ་བ་ལས་ཀྱང་ལྟུང་བ་བཅབས་པ་ཙམ་ལས་ལྡང་བ་ལ་དྲི་བ་རྣམས་བྱེད་པ་དང༌། དེའི་ལན་ལྡོན་པ་ཡིན་ནོ། །ཐ་ན་མིང་གོ་བར་བྱ་བ་ཉིད་དོ་ཞེས་བྱ་བ་ནི་གལ་ཏེ་རྒྱ་
ཆེར་གོ་བར་བྱེད་མ་ནུས་ན་ལྟུང་བ་སྡེ་ལྔ་པོ་དག་ལས་གང་བྱུང་བའི་མིང་ཙམ་ཡང་གོ་བར་བྱ་བ་ཉིད་ཡིན་ནོ། །འདིར་གཞུང་ནི་བདག་ལ་ཕམ་པར་འགྱུར་བ་བྱུང་ངོ་ཞེས་བྱ་བ་ལ་ སོགས་པ ་ལྷག་མ་དང་ལྟུང་བྱེད་བྱུང་ངོ་ཞེ་འམ། སོ་སོར་བཤགས་པར་བྱ་བའི་རིགས་བརྗོད་པ་མ་བྱས་པ་གང་ཡིན་པ་དང༌། དགེ་སློང་སྟན་དེ་ཉིད་ལ་འདུག་པ་དེས་ཚེ་དང་ལྡན་པ་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེ་འམ། ལྟུང་བ་བྱུང་ངོ་ཞེས་བྱ་བའི་མིང་གིས་གསུངས་པ་ཡིན་ནོ། །རྒྱ་ཆེར་གོ་བར་བྱ་བ་ཤིན་ཏུ་རིགས་མོད་ཀྱི་ཐ་ན་ལྟུང་བའི་མིང་ཡང་བརྗོད་པར་བྱ་བ་ཉིད་དོ། །དེའི་གཞུང་ཡང་བཙུན་བ་བདག་གིས་བསླབ་པ་མ་ཕུལ་བར་མི་ཚངས་པར་སྤྱོད་པ་འཁྲིག་པ་ཆོས་བརྟེན་ཏོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །དེ་ལྟ་བས་ན་ཐ་མའི་མཐར་ཐུག་པའི་དབང་དུ་བྱ་སྟེ། མིང་ཙམ་གྱིས་རིག་པར་བྱ་བ་ཉིད་དུ་གསུངས་པ་ཉིད་དུ་རྣམ་པར་གནས་པ་དེ་མདོ་འདིར་བསྡུས་པ་ཡིན་ནོ། །ཉེས་བྱས་ནི་གང་ཡང་རུང་བས་སོ་ཞེས་བྱ་བ་ནི་ཉེས་བྱས་རིག་པར་བྱ་བ་ཉིད་ལ་ནི་བདག་ལ་ནི་ལྟུང་བ་བྱུང་ངོ་ཞེས་བྱ་བ་འམ། བདག་གིས་ཁ་ན་མ་ཐོ་བ་བྱས་སོ་ཞེས་བྱ་བ་རྣམ་པ་གང་ཡང་རུང་བས་རིག་པར་བྱ་བ་ཉིད་ཡིན་ནོ། །ལྟུང་བྱེད་གཞན་ལ་འདི་ལྟར་མིང་བརྗོད་པ་ཉིད་འབྱུང་བ་ཡིན་ཏེ། བདག་ཉིད་ཀྱི་སྨད་གཡོགས་ལ་ཐུན་མོང་བ་ཉིད་ཀྱི་ངོ་བོ་འདི་ལ་ཉེས་བྱས་མ་ཡིན་ནོ། །དེ་དག་ལས་གང་ལ་རིག་པར་བྱ་བ་ཡིན་ཞེ་ན། དེའི་ཕྱིར་རང་བཞིན་དུ་གནས་པ་ལའོ་ཞེས་སྨོས་སོ། །གང་གི་དྲུང་དུ་བཅབས་པ་མ་འཆགས་པར་བྱ་ཞེ་ན། དེའི་ཕྱིར་རང་བཞིན་དུ་གནས་བ་མཚམས་ཀྱི་ནང་ན་འདུག་པ་ལའོ་ཞེས་བྱ་བ་སྨོས་སོ། །འདིར་གཞུང་ནི་ཞུ་བའི་གང་ཟག་གི་གཞི་ལས། རང་བཞིན་དུ་གནས་པ་མཚམས་ཀྱི་ནང་ན་འདུག་པ་ལའོ་ཞེས་གསུངས་པ་དེ་འདིར་ལུང་ཡིན་ནོ། །ཅི་ལྟ་བ་ལས་རང་གི་ཕྱོགས་མ་ཡིན་པ་འང་རང་བཞིན་དུ་གནས་པ་ཡིན་ནམ་ཞེ་ན། དེའི་ཕྱིར་ལྟ་བ་ཐ་མི་དད་པ་ལའོ་ཞེས་བྱ་བ་སྨོས་ཏེ། རབ་ཏུ་བྱུང་ཞིང་བསྙེན་པར་མ་རྫོགས་པ་དང་མ་བསྙིལ་བ་ཡང་དག་པར་སྡོམ་པ་དང༌། ཁྱིམ་པ་ཡང་དག་པར་སྡོམ་པ་ཡང་རང་བཞིན་དུ་གནས་པ་ཉིད་ཡིན་ནམ་ཞེ་ན། དེའི་ཕྱིར་བསྙེན་བར་རྫོགས་པ་དང་བཅས་པ་ལའོ་ཞེས་བྱ་བ་སྨོས་ཏེ། དགེ་སློང་
གིས་ཀྱང་དགེ་སློང་མ་ལ་རིག་པར་བྱ་བ་ཉིད་ཡིན་ལ། དགེ་སློང་མས་ཀྱང་དགེ་སློང་ལ་རིག་པར་བྱ་བ་ཉིད་ཡིན་ནམ་ཞེ་ན། དེའི་ཕྱིར་མཚན་མཐུན་པ་ལའོ་ཞེས་བྱ་བ་སྨོས་ཏེ། དེ་ལ་རིག་པར་བྱ་བ་ཉིད་ཡིན་ནོ། །རིགས་མཐུན་པས་རིག་པར་བྱ་བ་ཉིད་དང་བཤགས་པ་ལ་ སོགས་པ ་བྱ་བ་ཉིད་དམ་ཞེ་ན། དེའི་ཕྱིར་དེ་ཉིད་ལ་འདི་དང་འོག་མ་དང་བཅས་ཏེ་འོ་ཞེས་བྱ་བ་སྨོས་ཏེ། ལྟུང་བར་རིག་པར་བྱ་བ་འདི་ཉིད་ལྟུང་བ་བཤགས་པར་བྱ་བ་ནས་འོག་ནས་བྱུང་བ་དང་བཅས་ཏེ་བྱའོ། །དེ་ཉིད་ལ་ཞེས་བྱ་བ་ནི་རང་བཞིན་དུ་གནས་ པ་ཞེས་བྱ་བ་ལ་སོགས ་པས་བྱེ་བྲག་དང་བཅས་པས་གང་ཟག་ལ་རིག་པར་བྱའོ། །རབ་ཏུ་བྱུང་བ་བསྙེན་པར་མ་རྫོགས་པ་དག་ནི་བསྙེན་པར་རྫོགས་པའི་དགེ་འདུན་གྱིས་ཡོངས་སུ་བཟུང་བ་ཙམ་ཡིན་པའི་ཕྱིར་རོ་ཞེས་བྱ་བ་ནི་དེ་རྣམས་ནི་ཐམས་ཅད་དུ་རག་ལས་ཁོ་ན་ཡིན་པར་རྣམ་པར་གནས་སོ། །དེ་ལྟར་ཡང་རབ་ཏུ་བྱུང་ཞིང་བསྙེན་པར་མ་རྫོགས་པ་དག་གིས་དགེ་འདུན་ལ་དགག་དབྱེ་བྱའོ་ཞེས་གསུངས་པ་ལས་ཤེས་སོ། །ཆོས་འདི་པ་ལ་དེ་བྱས་ན་བྱས་པ་ཉིད་དོ་ཞེས་བྱ་བ་ལ། ཆོས་འདི་བ་ཞེས་བྱ་བ་ནི་བསྙེན་པར་རྫོགས་པ་མཚན་མི་མཐུན་པ་དང༌། རབ་ཏུ་བྱུང་ཞིང་བསྙེན་བར་མ་རྫོགས་པ་དང༌། ཁྱིམ་པ་དེ་བཞིན་གཤེགས་པའི་ཆོས་ཀྱི་ལྟ་བ་ཅན་ཐམས་ཅད་བསྡུས་ཏེ། ཆོས་འདི་པ་དེ་དག་ལ་ལྟུང་བ་རིག་པར་བྱ་བ་དེ་བྱས་ནས་ཡང་བྱས་པ་ཉིད་དེ། དེ་རིག་པར་བྱས་ན་བཅབས་པར་མི་འགྱུར་རོ། །དེ་ལ་འདིར་བྱ་བ་ནི་དགེ་འདུན་གྱི་ཡུལ་ལ་མ་གུས་པ་སྤང་བའི་ཕྱིར་ཏེ། མི་རིགས་པ་སྤངས་པར་གསུངས་སོ། །འོ་ན་མདོ་འདི་ཅིའི་ཕྱིར་བྱས་ཤེ་ན། མ་བརྗོད་པ་བརྗོད་པར་བྱ་བའི་ཕྱིར་ཏེ། དེ་བས་ན་མཚན་མི་མཐུན་པ་བསྙེན་པར་རྫོགས་བདག་ལ་རིག་པར་བྱེད་ན་ཡང་བཅབས་པར་མི་འགྱུར་ལ། །རིག་པར་བྱེད་པ་ཡང་ཉེས་བྱས་སུ་འགྱུར་རོ། །འདིར་གཞུང་ནི་ཉེ་བ་འཁོར་གྱིས་ཞུས་པའི་གང་ཟག་གི་གཞི་ལས། དགེ་སློང་ལ་བརྗོད་ན་བརྗོད་ཅེས་བྱ་བའམ། ཉེ་བ་འཁོར་བརྗོད་ཅེས་བྱའོ། །དེ་བཞིན་དུ་དགེ་སློང་མ་དང་བསླབ་པ་བྱིན་པ་དང༌། དགེ་སློབ་མ་དང་དགེ་ཚུལ་དང་དགེ་བསྙེན་དང་དགེ་བསྙེན་མ་ལ་བརྗོད་ན་བརྗོད་ཅེས་བགྱི་འམ། ཉེ་བ་འཁོར་བརྗོད་ཅེས་གསུངས་པ་ཡིན་ནོ། །འདོན་པ་གཞན་མ་ལས་ཀྱང་དེ་བཞིན་དུ་ཁས་
བླངས་པས་ཁས་མ་བླངས་པ་ལ་རྗོད་པར་བྱེད་ཅིང་ཁས་མ་བླངས་པ་ལ་རྗོད་པར་བྱེད་ན་བརྗོད་ཅེས་བགྱི་འམ། ཉེ་བ་འཁོར་བརྗོད་ཅེས་བྱ་སྟེ། ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །མཚམས་གཞན་ན་གནས་པ་ལ་ཡང་ངོ་ཞེས་བྱ་བ་ཡང་རིག་པར་བྱས་ན་བྱས་པ་ཉིད་ཡིན་པ་སྟེ་འདི་ནི་མཚམས་གཞན་ན་གནས་པ་གང་གི་ཡན་ལག་ཀྱང་མ་ཡིན་ནོ་ཞེས་བྱ་བ་དེའི་དམིགས་ཀྱིས་བསལ་བ་ཡིན་ནོ། །འདིར་གཞུང་ནི་དེ་བཞིན་དུ་དོགས་ལ་མཆིས་པ་ལ་ནམ་མཁའ་ལ་མཆིས་པས་སམ། ནམ་མཁའ་ལ་མཆིས་པ་ལ་དོག་ས་ལ་མཆིས་པས་བརྗོད་ན་བརྗོད་ཅེས་བགྱི་འམ། ཉེ་བ་འཁོར་བརྗོད་ཅེས་བྱ་སྟེ། བརྗོད་པ་ལ་ཉེས་བྱས་སུ་འབྱུང་རོ་ཞེས་གསུངས་པ་ཡིན་ནོ། །བསྒོ་བ་ལས་བྱུང་བ་རྣམས་ནི་དགེ་འདུན་ཐམས་ཅད་ལའོ་ཞེས་བྱ་བ་ནི་དགེ་འདུན་ལྷག་མ་ཐུན་མོང་བ་བཞི་པོ་དགེ་འདུན་བྱེད་པ་དང་དེའི་རྗེས་སུ་ཕྱོགས་པ་ལ་ སོགས་པ ་དང༌། དཀོན་མཆོག་གཏོང་བ་དང་འཐབ་ཀྲོལ་བྱེད་པ་ལ་ སོགས་པ ་བཞི་པོ་ནི་དགེ་སློང་མ་རྣམས་ཀྱིའོ། །ལྟུང་བྱེད་ཐུན་མོང་བ་ལྟ་བའི་རྣམ་པ་མི་གཏོང་བ་དག་གི་བསྒོ་བ་ལས་བྱུང་བའི་ལྟུང་བ་རྣམས་ནི་ཕྱིར་བཅོས་ཤིང་བཤགས་པ་དང༌། དེ་དག་རིག་པར་བྱ་བ་ཉིད་དང་དགེ་འདུན་ཐམས་ཅད་ལ་བྱ་བ་ཡིན་ནོ། །འདིར་ལུང་ནི་དགེ་སློང་སྟན་དེ་ཉིད་ལ་འདུག་ནས་དེས་ཚེ་དང་ལྡན་པ་དག་བདག་ལ་དགེ་འདུན་ལྷག་མའི་ལྟུང་བ་བྱུང་ངོ་ཞེས་བརྗོད་པར་བྱ་སྟེ། གལ་ཏེ་བརྗོད་པར་བྱེད་ན་དེ་ལྟར་ན་ལེགས་གལ་ཏེ་མི་བརྗོད་ན་དེ་ལ་ཉི་མ་དེ་ཉིད་ནས་བརྩམས་ཏེ་འཆབ་པ་འབྱུང་ངོ༌། །དགེ་སློང་དེས་ཚེ་དང་ལྡན་བ་དག་བདག་ལ་ལྟུང་བ་བྱུང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །སོ་སོར་བཤགས་པར་བྱ་བ་ནི་གནས་དེར་ཚོགས་པ་ལའོ་ཞེས་བྱ་བ་ནི་ཐམས་ཅ་ལ་ཞེས་བྱ་བར་སྦྱར་ཏེ། གནས་དེར་རིག་པར་བྱ་བའི་དུས་སུ་གང་དག་གི་ཉེ་བར་གནས་པ་ཉིད་དེར་གཏོགས་པ་ཐམས་ཅད་ལ་གདོན་མི་ཟ་བར་ཉེ་བར་བསྡུ་བར་བྱ་བ་ཉིད་ཡིན་གྱི་དགེ་འདུན་དུ་གཏོགས་པ་ལ་ནི་མ་ཡིན་ཞེས་བྱ་བའི་དོན་ཏོ། །དེ་ལྟར་ཡང་གཞུང་ནི་གནས་ཀྱི་ནང་དུ་སོང་བས་དགེ་སློང་གང་དག་མཐོང་བ་དེ་དག་གི་དྲུང་དུ་ཅི་ནས་ཀྱང་གནས་ཁང་ལ་ སོགས་པ ་ན་
འཁོད་པ་དག་ལ་ཡང་གྲག་བར་འགྱུར་བ་དེ་ལྟར་ཐོས་པ་དང་བཅས་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་ལྟར་བྱས་ན་གལ་ཏེ་ཁ་ཅིག་ལ་གཉིད་ལོག་ པ་དང་བྲེལ་བ་ལ་སོགས ་པའི་དབང་གིས་གྲག་པར་མ་གྱུར་ན་ཡང་ཉེས་པ་མེད་དོ་ཞེས་བྱ་བ་འདི་ལ་ཆོ་ག་རྣམ་པར་གནས་པ་ཡིན་ནོ། །འདིར་གནས་ཀྱི་གཞི་སྨོས་པའི་ནི་འདུ་བའི་གནས་ཀྱི་དཔེ་ཡིན་ཏེ། ཕྱོགས་གང་དུ་དགེ་སློང་དག་འདུ་བ་དེར་ཅི་ནས་ཀྱང་དགེ་ཚུལ་ལ་ སོགས་པ ་ཐོས་པར་བྱ་བ་མ་ཡིན་པ་དག་གིས་ཐོབ་པར་མི་འགྱུར་བ་དེ་ལྟར་བྱའོ། །འདི་ནི་གནས་བརྟན་ལ་ སོགས་པའི་དུས་ཅུང་ཞིག་གནས་པ ་ལ་འང་དེ་ཤེས་པར་བྱའོ། །དེར་འདི་ཇི་ལྟར་རིག་པར་བྱ་བ་ཉིད་ཡིན་ཞེ་ན། དེའི་ཕྱིར་ཚེ་དང་ལྡན་པ་དག་བ་བདག་ལ་སྨད་པའི་གནས་སུ་གྱུར་པ་མི་རིགས་པ་སོ་སོར་བཤགས་པར་བྱ་བ་བྱུང་གི་ཆོས་དེ་སོ་སོར་འཆགས་སོ་ཞེས་བྱ་བ་སྨོས་ཏེ། སྤྱད་པ་དེ་ངེས་པར་དམན་པ་ཉིད་དང་ཟས་འདུ་བ་ཉིད་ཡིན་པའི་ཕྱིར་སྨད་པ་ཡིན་ཏེ། འདི་ལྟར་ཟང་ཟིང་མེད་པའི་ཆོས་སྒྲུབ་པའི་ཕྱིར་ཞུགས་པ་རྣམས་ལ་སྨད་པའི་གནས་དེ་ཉིད་ལ་རྒྱུག་པ་ནི་སྒྲུབ་པ་པོ་ལ་མི་རིགས་པ་ཡིན་ནོ། །འདི་ནི་སྨྲེ་སྔགས་འདོན་པའི་རྣམ་པར་བརྗོད་པར་སོ་སོར་བཤགས་པའི་བྱ་བ་ཉིད་དུ་གསུངས་པ་ཡིན་གྱི། བཤགས་པ་ནི་མ་ཡིན་ནོ། །བཤགས་པ་ཇི་ལྟར་ལྟུང་བྱེད་ཀྱི་ལྟུང་བ་བྱུང་བས་གཅིག་གི་མདུན་དུ་བཤགས་པར་བྱ་བར་གསུངས་པ་དང་འདྲ་བ་ཡིན་ནོ། །དེ་ནི་སྔགས་དང་འདྲ་བ་མ་ཡིན་ནོ་ཞེས་བྱ་བ་ནི་རིག་པར་བྱ་བ་དེ་ནི་རང་གི་དོན་དུ་སྔགས་ལན་གསུམ་བརྗོད་པ་དང་འདྲ་བ་མ་ཡིན་ཏེ། ལན་ཅིག་བརྗོད་པས་ཆོག་གོ །གང་གི་ཕྱིར་སྔགས་ནི་གཞན་གང་ལ་ལན་གསུམ་པར་བྱ་བ་དེའི་མདུན་དུ་ཙོག་བུར་འདུག་སྟེ། ཐལ་མོ་སྦྱར་བར་བྱ་བ་ཡིན་ཏེ་ངེས་པ་དེ་ལ་འདི་བཀག་པའོ། །ཡིད་ཀྱིས་དེ་ལས་ནི་བསྡམ་པར་བྱས་ན་ལྡང་ངོ་ཞེས་བྱ་བ་ནི་ཅང་མི་སྨྲ་བའི་དངོས་པོས་མ་དག་པ་བསྟན་པ་ལ་དམིགས་པ་ནོར་གྱི་ཕྱིར་གཞན་ཤི་བར་འདོད་པ་ཞེས་བྱ་བ་ལ་ སོགས་པ ་དེ་ལས་ནི་ཡིད་ཀྱི་ཉེས་བྱས་བསྡམ་པར་བྱ་བ་དོན་གྱི་ཕྱིར་ཡང་མི་བྱའོ་སྙམ་དུ་བསྡམས་པ་ལས་ཕྱིར་བཟློག་པའི་བསམ་པ་བྱས་པ་ལྟུང་བ་ལས་བསྡམ་པར་འགྱུར་བའོ། །འདིར་ཉེ་འཁོར་གྱིས་ཞུས་པའི་གཞུང་ཁ་ཅིག་ལས། ཕྱེད་ཆད་སྡོམ་
མ་མ། སྡོམ་མོ་ཞེས་གསུངས་པ་ཡིན་ནོ། །ལས་གཞན་ལས་ནི་དེ་དང་བཅས་པའི་བཤགས་པའོ་ཞེས་བྱ་བ་ནི་གང་ཞིག་ཡིད་ཀྱིས་ལྟུང་བ་དེ་ལས་གཞན་ལས་ནི་བསྡམ་པར་བྱ་བ་དེ་དང་བཅས་པའི་བཤགས་པ་བྱས་ན་ལྡང་བ་སྟེ། དག་པ་དང་མ་དག་པ་དག་ནི་བསམ་བའི་གཞི་ལས་བྱུང་བ་ཡིན་པས། བསྡམ་པར་བྱ་བ་མེད་ན་འདིར་བཤགས་པས་ཅིར་ཡང་མི་འགྱུར་རོ། །འདིར་གཞུང་ནི་ཕྱིན་ཆད་སྡོམ་མམ། སྡོམ་མོ་ཞེས་བྱ་བས་སྡོམ་པ་ལྟུང་བ་ལས་ལྡང་བའི་དོན་དུ་ཚིག་ཏུ་བརྗོད་པ་བསྔགས་པ་ཡིན་ནོ། །དེ་ལྟར་ཡང་བསམ་པས་ལྟུང་བ་ལས་ལྡང་བར་སྨྲའི་ཆད་པའི་ལས་ཀྱིས་ནི་མ་ཡིན་ནོ་ཞེས་གསུངས་པ་ཡིན་ནོ། །ལུས་མི་མཐུན་པའི་གཉེན་པོ་ནི་འདི་ཡིན་ཏེ། གང་ཞིག་ཀུན་དུ་སྤྱོད་པའི་ཚུལ་ལ་ཕྱིར་བཅོས་པ་དང་སྡུག་བསྔལ་ཡིན་ནོ། །ལུས་པ་རྣམ་པར་འགྱུར་བ་ལ་གཞན་དབང་ཉིད་མེད་པར་སྡོམ་མོ་ཞེས་བྱ་བས་གང་ཞིག་བཤགས་པ་ཁས་ལེན་པའོ། །གང་ལ་བཤགས་པར་བྱ་ཞེ་ན། དེའི་ཕྱིར་དེ་གཅིག་པུ་ལྟ་བ་ཐ་མི་དད་པ་ལའོ་ཞེས་བྱ་བ་སྨོས་ཏེ། དེ་ཞེས་བྱ་བའི་སྒྲས་ནི་རང་བཞིན་དུ་གནས་པ་ཞེས་བྱ་བ་ལ་ སོགས་པ ་སྔར་བསྟན་པའི་བྱེ་བྲག་དང་ལྟ་བ་ཐ་མི་དད་པ་བསྟན་ཏོ། །གཅིག་པུ་ཞེས་སྨོས་པའི་སྒྲས་ནི་མང་པོ་དག་བསལ་ཏེ། འདི་ལྟར་གང་ཟག་གཅིག་ལ་བཤགས་པ་འགྲུབ་པར་བསྟན་ཏེ། གང་ཞིག་རང་བཞིན་དུ་གནས་པ་བསྙེན་པར་རྫོགས་པ་དང་བཅས་པ་མཚན་མཐུན་པ་ལྟ་བ་ཐ་མི་དད་པ་ཞེས་གསུངས་པ་དེ་ལྟ་བུ་གཅིག་ལ་བཤགས་པར་བྱའོ།། ཅི་འདིར་ཐམས་ཅད་ལ་འམ་ཞེ་ན། དེའི་ཕྱིར་ཁ་ན་མ་ཐོ་བ་མི་མཐུན་པ་ལའོ་ཞེས་བྱ་བ་སྨོས་ཏེ། ལྟུང་བ་མི་འདྲ་ལ་ཞེས་བྱ་བའི་དོན་ཏོ། །ཇི་ལྟར་ཁ་ན་མ་ཐོ་བ་མི་མཐུན་པ་ཉིད་ཡིན་ཞེ་ན། དེའི་ཕྱིར་སྡེ་ཚན་ལས་སོ་ཞེས་བྱ་བ་སྨོས་ཏེ། འདིར་གཞུང་ནི་གླེང་གཞི་དག་ལས་བཙུན་བ་ལྟུང་བ་རིགས་མཐུན་པ་ཞེས་ཀྱང་བགྱི། བཙུན་པ་ལྟུང་བ་རིགས་མི་མཐུན་པ་ཞེས་ཀྱང་བགྱི་ན། བཙུན་བ་ལྟུང་བ་རིགས་མཐུན་པ་ནི་གང་ལགས། ལྟུང་བ་རིགས་མི་མཐུན་པ་ནི་གང་ལགས། ཉེ་བ་འཁོར་ཕམ་པར་གྱུར་པ་གང་ཡིན་བ་ཕམ་པར་གྱུར་པ་དང་རིགས་མཐུན་བ་
ཡིན་ལ། དེ་ལས་གཞན་པ་དག་རིགས་མི་མཐུན་པ་ཡིན་ནོ། །དགེ་འདུན་ལྷག་མ་ནི་དགེ་འདུན་ལྷག་མ་དང་ངོ༌། །ལྟུང་བྱེད་ནི་ལྟུང་བྱེད་དང་ངོ༌། །སོ་སོར་བཤགས་པར་བྱ་བ་ནི་སོ་སོར་བཤགས་པར་བྱ་བ་དང་ངོ༌། །ཉེས་བྱས་ནི་ཉེས་བྱས་དང་ངོ་ཞེས་གསུངས་པ་ཡིན་ནོ། །འདིར་ཉེས་བྱས་རང་དབང་ཅན་དག་བསྡུས་པར་རིག་པར་བྱ་སྟེ། ལྟུང་བ་གཞན་བ་དང་འབྲེལ་བའི་ཉེས་པ་གང་ཡིན་བ་དེ་ནི་ལྟུང་བ་དེ་བཤགས་པ་ཉིད་ཀྱིས་དེ་ཡང་བཤགས་པ་བྱས་པར་འགྱུར་རོ། །ཅི་དེ་ལས་འདའ་བར་བྱ་བ་མ་ཡིན་ནམ་ཞེ་ན། དེའི་ཕྱིར་མེད་ན་ལྟུང་བ་ལས་སོ་ཞེས་བྱ་བ་སྨོས་ཏེ། རང་གི་མདུན་དུ་བཤགས་པར་བྱ་བ་སྡེ་ཚན་ལས་ཁ་ན་མ་ཐོ་བ་མི་མཐུན་པ་མེད་པ་ལྟུང་བ་ལ་ཁ་ན་མ་ཐོ་བ་མི་མཐུན་པའི་མདུན་དུ་བཤགས་པར་བྱའོ་ཞེས་བྱ་བའི་དོན་ཏོ། །འདིར་གཞུང་ནི་སིལ་བུ་དག་ལས་བཙུན་བ་ལྟུང་བ་མཐུན་པའི་མདུན་དུ་ལྟུང་བ་བཤགས་སུ་རུང་ངམ། ཉེ་བ་འཁོར་མི་རུང་ངོ༌། །རྐྱེན་དེ་ལྟ་བུ་དག་ཡོད་ན་རིགས་མི་མཐུན་པར་བྱ་སྟེ་རུང་ངོ་ཞེས་གསུངས་པ་ཡིན་ནོ། །སྤངས་པ་ལས་ནི་སྤངས་པ་དང་བྲལ་བ་སྔོན་དུ་བཏང་བ་ལས་སོ་ཞེས་བྱ་བ་ནི་ལྟུང་བྱེད་ལས་རྫས་དེ་སྤངས་པ་དང་སྤངས་བ་དག་ཞག་གཅིག་བྲལ་བར་བྱ་བ་དེ་གཉིས་སྔོན་དུ་བཏང་སྟེ། བཤགས་ན་ལྡང་བར་འགྱུར་རོ། །བཏང་བ་ལས་སོ་ཞེས་བྱ་བ་ནི་ནང་མ་བྱས་པ་ལས་སོ། །ཞག་དེ་ལ་ཆོས་གོས་གཞན་བྱིན་གྱིས་མི་རློབ་པར་བྱིན་གྱིས་བརླབ་ཏུ་རུང་བའི་ཆོས་གོས་མེད་པར་གནས་པར་བྱའོ། །དེ་གཉིས་སྔོན་དུ་སོང་བའི་བཤགས་པ་བྱས་ན་སྤང་བའི་ལྟུང་བྱེད་ལས་ལྡང་བར་འགྱུར་རོ། །ཆོས་གོས་གཞན་བྱིན་གྱིས་བརླབ་ན་ནི་བྱིན་གྱིས་བརླབ་ཏུ་རུང་བ་དང་བྲལ་བར་མི་འགྱུར་རོ། །ལྷག་མ་དང་བཅས་པར་གཏོགས་པའི་སྦོམ་པོ་ལྕི་བ་ལས་དགེ་འདུན་ལྔ་ལ་སོགས་པའི་ཐམས་ཅད་ལའོ་ཞེས་བྱ་བ་ནི་དགེ་འདུན་ལྷག་མ་དང་འབྲེལ་བའི་སྦོམ་པོ་ལྕི་བ་ལས་ནི་མཚམས་དེར་གཏོགས་པའི་དགེ་འདུན་ལྔ་ལ་ སོགས་པ ་ཐམས་ཅད་ལས་བཤགས་པས་ལྡང་བར་འགྱུར་རོ། །ལྷག་མ་མེད་པར་གཏོགས་པའི་སྦོམ་པོ་ལྕི་བ་ལས་ནི་མ་བཅད་པ་ལྷག་པ་ལའོ་
ཞེས་བྱ་བ་ལ་ནི་ཕམ་པ་དེར་གཏོགས་པ་དེ་དང་འབྲེལ་བའི་སྦོམ་པོ་ལྕི་བ་ལས་ནི་མ་བཅད་པའི་དེའི་གནས་ཀྱི་གཞི་དེ་ཉེ་བར་སོན་བ་ལས་མཚམས་གཞན་དུ་ཁྱེར་བས་ཐམས་ཅད་དུ་དེའི་མཚམས་ཀྱི་ནང་དུ་གཏོགས་པའི་དགེ་འདུན་ལྔ་ལས་མང་བ་དྲུག་ལ་བཤགས་པས་ལྡང་བར་འགྱུར་རོ། །ཡང་བ་དེ་ལས་བཞི་ལ་ སོགས་པ ་ལའོ་ཞེས་བྱ་བ་ནི་ལྷག་མ་མེད་པར་གཏོགས་པའི་སྦོམ་པོ་ཡང་བ་དེ་ལས་ནི་མཚམས་དེར་གཏོགས་པའི་དགེ་འདུན་མ་བཅད་པ་བཞི་ལ་ སོགས་པ ་ཐམས་ཅད་ལ་བཤགས་པས་ལྡང་བར་འགྱུར་རོ། །དགེ་འདུན་ལྷག་མར་གཏོགས་པའི་སྦོམ་པོ་ལྕི་བ་དང་ཡང་བ་ཇི་ལྟར་ཤེས་པར་བྱ་ཞེ་ན། དེའི་དམིགས་ཀྱིས་བསལ་བ་མེད་པའི་ཕྱིར་དེ་དང་བཅས་པར་བཤགས་པ་ལས་གཅིག་ལ་ཆོ་ག་གཞན་འཇུག་པའོ། །ལྕི་བ་དང་ཡང་བ་ཉིད་ཀྱང་ཁ་ན་མ་ཐོ་པ་མང་བ་དང་ཉུང་བ་ཉིད་ཀྱིས་ཤེས་པར་བྱའོ། །དཔེར་ན་འཛག་སྣོད་དུ་ལས་སུ་མི་རུང་བའི་ཡན་ལག་གི་རྣམ་པ་ཉེད་པ་ལ་ སོགས་པ ་ཡང་བ་ཡིན་ནོ། །བསྟེན་པར་བྱ་བ་མཐུ་མེད་པར་ཡན་ལག་རྩོལ་བ་དང༌། རིན་ཐང་མ་ཚངས་བའི་རྫས་མང་པོར་རྐུ་བ་ཡང་ལྕི་བའོ། །འདིར་གཞུང་ནི་འདུལ་བྱེད་དག་ལས་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་བ་ཉེས་པ་སྦོམ་པོ་ཇི་ལྟར་བཤགས་པར་བགྱི། ཉེ་བ་འཁོར་ཉེས་པ་སྦོམ་པོ་ནི་བཞི་པོ་འདི་དག་ཡིན་ནོ། །ཕམ་པར་འགྱུར་བས་ཀུན་ནས་བསླང་བ་ལྕི་བ་དང༌། ཕམ་པར་འགྱུར་བས་ཀུན་ནས་བསླང་བ་ཡང་བ་དང༌། དགེ་འདུན་ལྷག་མས་ཀུན་ནས་བསླང་བའི་ལྕི་བ་དང༌། དགེ་འདུན་ལྷག་མས་ཀུན་ནས་བསླང་བ་ཡང་བའོ། །ཉེ་བ་འཁོར་དེ་ལ་ཀུན་ནས་བསླང་བ་ཕམ་པར་འགྱུར་བས་ཀུན་ནས་བསླང་བའི་ཉེས་པ་སྦོམ་པོ་ལྕི་བ་གང་ཡིན་བ་དེ་ནི་མཚམས་ཀྱི་ནང་དུ་དགེ་འདུན་དྲུག་ལ་ སོགས་པ ་ཐམས་ཅད་ཀྱི་མདུན་དུ་བཤགས་པར་བྱའོ། །ཕམ་པར་འགྱུར་བ་ཀུན་ནས་བསླང་བའི་ཉེས་པ་ཡང་བ་གང་ཡིན་པ་དེ་ནི་མཚམས་ཀྱི་ཕྱི་རོལ་དུ་དགེ་སློང་བཞིའི་མདུན་དུ་བཤགས་པར་བྱའོ། །དེ་ལ་དགེ་འདུན་ལྷག་མས་ཀུན་ནས་བསླང་བའི་ཉེས་
པ་སྦོམ་པོ་ལྕི་བ་གང་ཡིན་པ་དེ་ནི་མཚམས་ཀྱི་ཕྱི་རོལ་དུ་དགེ་སློང་ལྔའི་མདུན་དུ་བཤགས་པར་བྱའོ། །དགེ་འདུན་ལྷག་མས་ཀུན་ནས་བསླང་བའི་ཉེས་པ་སྦོམ་པོ་ཡང་བ་གང་ཡིན་པ་དེ་ནི་མཚམས་ཀྱི་ནང་དུ་དགེ་སློང་གཅིག་གི་མདུན་དུ་བཤགས་པར་བྱའོ་ཞེས་གསུངས་པ་ཡིན་ནོ། །མཐར་དེ་ལ་བརྩལ་བའི་རྐྱེན་མ་འབྱོར་བ་ཉིད་ན་ལས་བྱས་པ་དང་འདྲའོ་ཞེས་བྱ་བ་ལ། དེ་ལ་ཞེས་བྱ་བ་ནི་ཕྱིར་བཅོས་པ་ལའོ། །བརྩལ་བའི་རྐྱེན་མ་འབྱོར་བ་ཉིད་ནི་ཞེས་བྱ་བ་ལ་མཐར་ཞེས་བྱ་བ་ནི་འཆི་བ་སྲིང་པའི་གནས་སྐབས་ཀྱི་འཆི་བའི་སྐད་ཅིག་མར་རོ། །དེ་ལ་ཞེས་བྱ་བ་ནི་བཤགས་པ་ལ་ སོགས་པ ་ཕྱིར་བཅོས་པའི་ཕྱིར་བརྩལ་བ་ནི་ཕྱིར་བཅོས་པའི་ལས་བྱས་པ་དང་འདྲའོ། །འདིར་གཞུང་ནི་དགེ་སློང་དག་དེ་ནི་ལྟུང་བ་དེ་ལས་ལངས་པ་ཡིན་ཏེ། ད་ནི་བསམ་པས་ལྟུང་བ་ལས་ལྡང་བར་སྨྲའི། ཆད་པའི་ལས་ཀྱིས་ནི་མ་ཡིན་ནོ་ཞེས་བྱ་བ་ནི་དགེ་འདུན་ལྷག་མའི་ལྟུང་བ་ཕྱིར་བཅོས་པར་བྱའོ་སྙམ་པ་ཡུལ་གཞན་དུ་སོང་བའི་སྐབས་སུ་སྲོག་དང་བྲལ་བར་གྱུར་པ་ནས་ཆད་པའི་ལས་ཀྱིས་ནི་མ་ཡིན་ནོ་ཞེས་བྱ་བའི་བར་དུ་གསུངས་པ་ཡིན་ནོ། །ང་ནི་བསམ་པས་ལྟུང་བ་ལས་ལྡང་བར་སྨྲའི་ཞེས་སྨོས་པ་ནི་ཕྱིར་བཅོས་པ་ཐམས་ཅད་ཀྱི་ལྟུང་བྱེད་ཀྱི་དབང་དུ་བྱ་བའི་དོན་དུའོ། །དགེ་འདུན་ལྷག་མའི་ཕྱིར་བཅོས་པ་ནི་ཐམས་ཅད་དུ་ལྕི་བ་སྟེ། དེ་བས་ན་དེ་ལས་འདི་ལྟར་ལྔ་པ་ཡོད་པ་ལ་སྡང་བ་ཞེས་བྱ་བ་ནི་སྦྱར་བར་བྱའོ། །དེ་བས་ན་ཐམས་ཅད་ལ་དབང་དུ་བྱ་བའི་ཕྱིར་མདོ་འདིའོ། །དུས་གཞན་དུ་ཡང་དེ་ལྟར་བླངས་པ་ཉིད་ལ་བཤགས་ པ་ལ་སོགས ་པའི་དོན་མེད་པར་ཐལ་བས་དེ་བས་ན་ནང་དུ་དེ་རྣམ་པར་གནས་པ་ཡིན་ནོ་ཞེས་བྱ་བ་གསུངས་སོ། །མི་ཟད་པའི་ཡིད་ལས་བྱུང་བ་རྗེས་སུ་སྦྱར་བའི་བསམ་པ་གཅིག་པུ་ལས་བཤགས་པར་བྱེད་པ་རྣམས་ལས་ལྡང་བར་རིགས་པ་ཡིན་ནོ། །དོན་མེད་པ་ལ་ཡང་དེ་ལྟར་དེ། གཞན་དུ་ན་བཤགས་པ་ལ་ སོགས་པ ་ཐལ་བས་ན་དེ་བས་ན་བརྩོན་པ་དང་བཅས་པ་ཉིད་ན་དེ་རྣམ་པར་གནས་པ་ཡིན་ཏེ། དེ་བས་ན་དེ་ཡང་འདི་བརྟེན་པའོ། །བརྩོན་འགྲུས་
དམན་པ་ལ་ཡང་བརྩོན་འགྲུས་དང་བཅས་པ་ཉིད་བསྟན་པའོ། །ཡོད་པ་གང་ལ་ཡང་རྐྱེན་གཞན་མ་ཚང་བས་ཕྱིར་བཅོས་པ་མ་གྲུབ་པ་དེ་ལ་འདིར་ཡན་ལག་འདི་ཉིད་རིགས་པ་མ་ཡིན་ནོ། །དེ་བས་ན་རྐྱེན་མ་གྲུབ་པའི་ཕྱིར་སྨོས་པའོ། །སྨྱོས་པས་བྱས་པ་དེའི་ཕྱིར་སངས་པ་ནི་ཉེས་བྱེད་དང་འདྲ་བ་ཉིད་དོ་ཞེས་བྱ་བ་ནི་རང་བཞིན་ལས་ཉམས་པས་བྱས་པ་ཐམས་ཅད་ཉིད་ལ་ལྷག་པར་སྤྱད་པ་སངས་པ་རང་བཞིན་ཐོབ་པ་ཡོད་པ་ལ་བྱེད་པ་པོ་དེས་འདུ་ཤེས་པ་ནི་ཉེས་བྱེད་དང་འདྲ་བ་ཉིད་དོ། །གཅིག་གི་མདུན་དུ་ཕྱིས་བཤགས་པ་ཉིད་དང་འདྲའོ། །མི་བདེན་པ་བསལ་བའི་དོན་དུ་བཤགས་པ་དེ་རྣམ་པར་གནས་པ་ཡིན་གྱི་ཕྱིར་བཅོས་པ་ཉིད་ཀྱི་ཕྱིར་ལྟུང་བ་མི་ལྡང་བ་ཉིད་ལ་ནི་མ་ཡིན་ནོ། །མིང་དང་རིགས་དང་ལྡན་པར་བརྗོད་ན་ལྟུང་བ་ལས་སོ་ཞེས་བྱ་བ་ནི་ལྡང་ངོ་ཞེས་བྱ་བར་དབང་དུ་བྱེད་པ་ལས་ཤེས་པར་བྱའོ། །མིང་དང་ལྡན་བ་ཞེས་བྱ་བ་ནི་ཉེས་བ་སྦོམ་པོ་དང༌། དགེ་འདུན་ལྷག་མ་དང༌། སྤང་བའི་ལྟུང་བྱེད་དང༌། ལྟུང་བྱེད་འབའ་ཞིག་པ་དང༌། སོ་སོར་བཤགས་པར་བྱ་བ་དང༌། ཉེས་བྱས་ཞེས་བྱ་བ་རྣམས་སོ། །རིགས་དང་ལྡན་པ་ཞེས་བྱ་བ་ནི་མི་ཚངས་པར་སྤྱོད་པས་ཀུན་ནས་བསླང་བ་ལ་ སོགས་པ ་དང༌། བསམས་བཞིན་དུ་ཁུ་བ་འབྱིན་པས་ཀུན་ནས་བསླང་བ་ལ་ སོགས་པ ་དང༌། རེག་པས་ཀུན་ནས་བསླང་བ་ལ་ སོགས་པ ་དང༌། འཁྲིག་པ་སྨྲ་བས་ཀུན་ནས་བསླང་བ་ལ་ སོགས་པ ་དང༌། བསྙེན་བཀུར་བསྔགས་པས་ཀུན་ནས་བསླང་བ་ལ་ སོགས་པ ་དང༌། ཚིག་རྩུབ་པ་སྨྲ་བས་ཀུན་ནས་བསླང་བའི་བར་དང༌། ཞག་བཅུ་ལས་འདའ་པས་ཀུན་ནས་བསླང་བ་དང༌། བརྫུན་དུ་སྨྲ་བས་ཀུན་ནས་བསླང་བ་ལ་ སོགས་པ ་དང༌། དགེ་སློང་མའི་བསོད་སྙོམས་བྱིན་བྱེད་པས་ཀུན་ནས་བསླང་བ་དང༌། ཤམ་ཐབས་ཟླུམ་པོར་མ་བགོས་པས་ཀུན་ནས་བསླང་བ་ལ་ སོགས་པ ་དག་སྟེ། དེ་ལྟར་མིང་དང་རིགས་དང་ལྡན་པར་བརྗོད་པས་ལྟུང་བ་བཤགས་པར་བྱའོ་ཞེས་བྱ་བའི་དོན་ཏོ། །འདིར་བདག་ལས་བརྗོད་པ་ནི་སྔགས་ལས་ཤེས་པར་བྱ་སྟེ། བདག་དགེ་སློང་མིང་འདི་ཞེས་བྱ་བགྱི་བ་ལ་ལྟུང་བྱེད་ཀྱི་སྡེ་ཚན་ལས།
བརྫུན་དུ་སྨྲ་བས་ཀུན་ནས་བསླང་ཞེས་བྱ་བ་ལ་ སོགས་པས་དེ་ལྟར་དེ་བརྗོད་པར་རྣམ་པར་གནས་པ ་ཡིན་ནོ། །དགེ་འདུན་ལྷག་མ་ལས་ནི་དུས་འདི་ཇི་སྲིད་ཅིག་བཅབས་པ་ཉིད་དམ་བཅབས་པ་ཉིད་དང་ངོ་ཞེས་བྱ་བ་ནི་དགེ་འདུན་ལྷག་མ་ལས་ནི་གཞན་འདི་དང་ལྡན་པར་བརྗོད་པར་བྱ་སྟེ། འཆབ་པ་འཛིན་པར་བྱེད་ན་ནི་དུས་ཇི་སྲིད་འཆབ་པར་བྱེད་པའི་དུས་དེ་ཙམ་པ་ཉིད་ཀྱིས་སོ། །ཞག་གཅིག་བཅབས་པ་འམ་ཞག་གཉིས་བཅབས་པ་ལ་ སོགས་པ ་དེ་དང་བརྗོད་པར་བྱའོ། །བཅས་པ་མ་ཡིན་པ་ལ་བཅས་པ་མ་ཡིན་པ་ཉིད་ཀྱིས་འཆབ་བ་མ་ཡིན་ པ་ལ་སོགས ་པའོ། །དེ་ལས་བསླབ་བྱེད་པ་ནི་དབྱུང་བའོ་ཞེས་བྱ་བ་ལ། དེ་ལས་ཞེས་བྱ་བ་ནི་དགེ་འདུན་ལྷག་མ་དེ་ལས་སོ། །གང་ཞིག་དེ་ལས་སློང་བར་བྱེད་པ་དེ་ཉིད་ཀྱི་ཕྱིར་མིང་འདི་དབྱུང་བ་ཞེས་བྱ་བ་སྟེ་ལྟུང་བ་ལས་དབྱུང་བ་ཞེས་བྱ་བའི་དོན་ཏོ། །ལྟུང་བར་བྱ་བའི་རྣམ་པ་ཉིད་ཀྱི་ཕྱིར་སྡེ་ཚན་དེ་ལ་འདིར་དེ་བརྗོད་པའོ། །དབྱུང་བ་གང་ཞེ་ན། དེའི་ཕྱིར་དགེ་འདུན་ལས་ཞག་དྲུག་མགུ་བར་བྱ་བ་མ་ནོས་ཏེ་སྤྱད་པ་ལའོ་ཞེས་བྱ་བ་སྨོས་ཏེ། དགེ་འདུན་ལས་ཟག་དྲུག་མགུ་བར་བྱ་བ་མ་ནོས་ཏེ་སྤྱད་ཅིང་དབྱུང་བ་གང་ཡིན་པ་དེ་ནི་ལྟུང་བ་དེ་ལས་སློང་བར་བྱེད་པ་གང་ཡིན་པ་དེ་ནི་དབྱུང་བ་ཡིན་གྱི་གཞན་ནི་མ་ཡིན་ནོ། །དགེ་སློང་མས་ནི་ཟླ་བ་ཕྱེད་དོ་ཞེས་བྱ་བ་ནི་འདི་ལས་ཞག་དྲུག་ཏུ་མགུ་བ་སྤྱོད་པར་བྱ་བ་མ་ཡིན་ཏེ། འོན་ཀྱང་ཟླ་བ་ཕྱེད་ནི་གཉིས་ཀའི་དགེ་འདུན་ལས་ཞེས་བྱའོ། །དེ་ནི་ལས་ཀྱི་གཞི་ལས་དགེ་སློང་མས་ལྕི་བའི་ཆོས་ལས་འདས་ན་ཡང་གཉིས་ཀའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་མནོས་ཏེ་སྤྱད་པར་བྱ་བ་ཉིད་ཡིན་ནོ། །ལྕི་བའི་ཆོས་ལས་འདས་ན་ཡང་དེ་སྤྱད་པར་བྱ་བ་ཉིད་ཡིན་ནོ་ཞེས་བྱ་བས་ནི་དགེ་སློང་མས་ལྕི་བའི་ཆོས་ལས་འདས་ན་ཡང་གཉིས་ཀའི་དགེ་འདུན་ལས་ཟླ་བ་ཕྱེད་མགུ་བར་བྱ་བ་དེ་མནོས་ཏེ། སྤྱད་པར་བྱ་བ་ཉིད་ཡིན་གྱི་དགེ་འདུན་ལྷག་མ་འབའ་ཞིག་ལ་ནི་མ་ཡིན་ནོ། །བཅབས་པའི་ཉེས་པ་མེད་ན་དེ་འཆགས་སོ་ཞེས་བྱ་བ་ནི་གལ་ཏེ་བཅབས་པའི་ཉེས་པ་མེད་ན་དེའི་ཚེ་མགུ་བར་བྱ་བ་དེ་འཆགས་སོ། །སྤོ་བས་དེ་མེད་པར་འགྱུར་རོ་ཞེས་བྱ་བ་ནི་སྤོ་བ་དེས་བཅབས་པའི་
ཉེས་པ་དེ་འབྱང་ཞིང་མེད་པར་འགྱུར་ཏེ། སྤོ་བ་དེས་བཅབས་པའི་ཉེས་པ་བསལ་བ་བྱས་པ་ལ་མགུ་བར་བྱས་པ་འཆགས་སོ། །ལྟུང་བ་གཞན་བསྐྱེད་པ་བསྒྲུབ་པ་རྗེས་སུ་སྒྲུབ་པར་བྱེད་པ་ལ་ཡང་ཉེས་པ་ཕྱིར་བཅོས་པར་བྱ་ཞིང་འཆགས་པ་ཞེས་བྱ་བའི་རྗེས་སུ་འབྲངས་ནས་ཤེས་པར་བྱའོ། །སྤོ་བས་ཇི་ལྟ་བུ་ཞེ་ན། དེའི་ཕྱིར་དགེ་འདུན་ལས་དུས་དེ་སྲིད་མནོས་ཏེའོ་ཞེས་བྱ་བ་སྨོས་ཏེ། ལྟུང་བ་འབྱིན་པར་བྱེད་པ་དེས་དུས་ཇི་སྲིད་དུ་བཅབས་པའི་དུས་དེ་སྲིད་སྤོ་བ་དག་འདུན་ལས་མནོས་ཏེའོ་ཞེས་བྱ་བའི་དོན་ནོ། །དེ་གཉིས་བྱེད་པ་ཉིད་ན་དགེ་འདུན་ལྷག་མ་དེ་བྱུང་ན་མནོས་ཏེ་བྱས་པ་དེ་གཉིས་ཞིག་པས་དེའི་ཕྱིར་གཞི་ནས་བརྩམས་པ་ཉིད་སྦྱིན་ནོ་ཞེས་བྱ་བ་ནི་དགེ་འདུན་ལྷག་མ་དེ་ཕྱིར་བཅོས་པའི་ཕྱིར་སྤོ་བ་དང་མགུ་བར་བྱ་བ་དེ་གཉིས་བྱེད་པ་ཉིད་ན་དགེ་འདུན་ལྷག་མའི་ལྟུང་བ་བྱུང་བ་གང་ཞིག་སྔ་མ་དང་འདྲ་བ་རིགས་མཐུན་པ་ཡང་བྱུང་ན་སྦོ་པ་ལ་གནས་པ་དང༌། མནོས་པ་མགུ་བར་བྱ་བ་སྤྱད་པ་མནོས་ཏེ། བྱས་པ་དེ་ཉིད་ཉམས་པ་ཡིན་ནོ། །དགེ་འདུན་ལྷག་མའི་ལྟུང་བ་སྔ་མ་དང་མི་འདྲ་བ་བྱུང་བ་ལ་ནི་མི་ཉམས་སོ། །གང་གི་ཕྱིར་དགེ་འདུན་ལྷག་མའི་ལྟུང་བ་སྔ་མ་དང་འདྲ་བ་སྤོ་བ་དང་མགུ་བར་བྱ་བ་མནོས་ཤིང་བྱས་པ་དེ་གཉིས་ཉམས་པ་དེའི་ཕྱིར་གཞི་ནས་བརྩམས་པ་ཉིད་སྦྱིན་པར་བྱ་སྟེ། དགེ་སློང་དེ་ལ་ཡང་གཞི་ནས་བརྩམས་ཏེ་སྤོ་བ་དང་མགུ་བར་བྱ་བ་ཉིད་སྦྱིན་པར་བྱ་བ་ཞེས་བྱ་བའི་དོན་ནོ། །བརྩམས་པ་ནི་མཐར་ཐུག་པར་བྱ་བ་དང་འདྲའོ་ཞེས་བྱ་བ་ནི་གང་ལ་སྤོ་བ་བརྩམས་ནས་གཞི་ནས་སྤོ་བ་དང་ཡང་གཞི་ནས་བསླང་སྟེ་སྤོ་བ་དང༌། མགུ་བར་བྱ་བ་དང་གཞི་ནས་བསླང་སྟེ་མགུ་བར་བྱ་བ་བརྩམས་པ་གང་ལ་དགེ་འདུན་ལྷག་མའི་ལྟུང་བ་རིགས་མཐུན་པ་བྱུང་ནས་མཐར་ཐུག་པ་དང་འདྲ་བ་དེ་བལྟ་བར་བྱའོ། །ཡང་དག་པར་བླངས་པར་གྱུར་པ་དེ་ལ་སླར་བསླང་བར་བྱ་བ་ཀུན་དུ་སྤྱད་པ་སྤྱོད་དུ་འཇུག་པ་སྔ་མ་ལྟར་ནི་མ་ཡིན་ནོ་ཞེས་བྱ་བའི་དོན་ནོ། །ཤེས་པ་དེ་ཡང་དེ་ཁོ་ན་ལྟར་བློ་གནས་པས་དེ་ཉིད་འདིར་སྐབས་སུ་བབ་པ་དེ་ལྟར་མ་གྲུབ་པ་ཞེས་བྱ་བ་སླར་བྱེད་པ་སྟེ། གཞན་གྱིས་ནི་མ་ཡིན་ནོ་ཞེས་བྱ་བའི་དོན་ཏོ། །དེའི་ཕྱིར་དེ་མ་
ཆགས་ན་དེའི་ཚེ་དང་པོ་ཡང་ཐ་དད་པར་བསླང་བར་བྱ་བ་ཉིད་དོ་ཞེས་བྱ་བ་ནི་གང་གི་ཕྱིར་བརྩམས་པ་ནི་མཐར་ཐུག་པ་དང་འདྲ་བ་དེའི་ཕྱིར་སྤོ་བ་ལ་ སོགས་པ ་སྔ་མ་ལྟར་ནི་མ་ཡིན་ནོ། །དེ་བས་ན་མ་གྲུབ་པས་བསླང་བ་དེ་ནི་དེའི་ཚེ་སྦྱིན་པ་ལ་མ་ཆགས་པའོ། །དེ་མ་ཆགས་པའི་གནས་སྐབས་སུ་གཞི་ནས་བསླང་བ་ཉིད་སྦྱིན་པར་བྱ་བ་མ་ཡིན་པས་ཐ་དད་པར་བསླང་བར་བྱའོ། །ཇི་ལྟར་ལྟུང་བར་མེད་པར་གྱུར་པ་ལ་ཡང་སྤོ་བ་མགུ་བ་སྦྱིན་དགོས་པ་དེ་བཞིན་དུ་བར་མ་གྱུར་པ་ལ་ཡང་ཐ་དད་པར་སྦྱིན་པའོ། །བར་མ་དེ་ཕྱིར་བཅོས་པར་བྱའོ་ཞེས་བྱ་བ་ལ་དེ་ཞེས་བྱ་བ་ནི་ཕྱིར་བཅོས་པའི་བདག་ཉིད་ཅན་གྱི་དོན་སྨོས་པས་སོ། །གང་ཞིག་ལྟུང་བ་བར་མའི་བདག་ཉིད་འདི་ཁ་ན་མ་ཐོ་བ་ཕྱིར་བཅོས་ པ་དེའི་དོན་དུ་སྤོ་བ་ལ་སོགས ་པའོ། །དེ་བས་ན་འདིར་སྤོ་བ་ལ་ སོགས་པས་ཕྱིར་བཅོས་པ ་ཉིད་བྱའོ་ཞེས་བྱ་བའི་དོན་ཏོ། །དེའི་ཕྱིར་དེའི་དོན་དུ་ཡང་བརྟེན་པར་བྱ་བ་ཉིད་ཡིན་ནོ་ཞེས་བྱ་བ་ནི་གང་གི་ཕྱིར་ལྟུང་བ་བར་མའི་བདག་ཉིད་ཁ་ན་མ་ཐོ་བ་དེའི་ཕྱིར་བཅོས་པར་བྱ་བ་ཁོ་ན་སྟེ། དེའི་ཕྱིར་གཞི་ནས་བརྩམས་པས་གང་གི་ཚེ་མ་ཆགས་པ་ལེན་པར་བྱེད་པ་དེའི་ཚེ་དེ་ཕྱིར་བཅོས་པ་དེའི་དོན་དུ་སྔར་བྱས་པ་ཡང་བསླང་བར་བྱ་བའི་དོན་ཏོ། །དེར་གཏོགས་པའི་སེམས་ཅན་ཐམས་ཅད་བསྐྱེད་དེ་རྒྱུད་དང་འདྲ་བའི་དུ་མ་ཅིག་ཅར་གཟུང་བའོ། །ཇི་ལྟར་བརྩོན་པ་སྔོན་དུ་འགྲོ་བ་ཅན་ལྟུང་བ་དུ་མ་རྣམས་ཀྱི་ཕྱིར་དེར་གཏོགས་པའི་སེམས་ཅན་ཐམས་ཅད་བསྐྱེད་ནས་རྒྱུད་ལ་བྱ་བ་དུ་མ་ཅིག་ཅར་ལེན་པར་བྱེད་པ་དེ་ལྟར་ཞེས་བྱ་བའི་དོན་ཏོ། །དེ་བཅབས་པའི་དུས་ལྷག་མ་ཡང་དེར་གཞུག་པ་ཉིད་དོ་ཞེས་བྱ་བ་ནི་གང་ཞིག་འདིར་ལྟུང་བ་བར་མའི་དུས་ལྷག་པར་འགྱུར་བ་གཞི་ནས་བསླངས་ཏེ་ལེན་པ་ལ་ཁོངས་སུ་བསྡུ་བ་ཉིད་ལ་སྤོ་བ་འམ་གཞི་ནས་སྤོ་བ་དུས་དེ་ཙམ་ཡང་དག་པར་བསླང་བར་བྱ་ཞེས་བྱ་བའོ། །ཡང་ཇི་ལྟར་ལྟུང་བར་མ་བཅབས་པའི་དུས་ལྷག་པར་འབྱུང་བ་ཇི་སྲིད་པས་དེའི་ཕྱིར་བརྗོད་པར་བྱ་སྟེ། སྤྱོད་པ་ལ་ཞུགས་པ་མཐོང་ཐུག་ན་ལྟུང་བ་བར་མ་བརྗོད་པ་དང་གཞན་དུ་ཡང་མ་བརྗོད་པས་སོ། །རྣམ་པ་གཞན་གྱིས་ཀྱང་འདི་ལྟ་སྟེ། སྤོ་བའམ་གཞི་ནས་སྤོ་བ་བྱེད་པས་ལྟུང་བ་རིགས་མཐུན་
པ་བྱུང་ནས་འཐབ་ཀྲོལ་བྱེད་པ་འོང་བ་ཕྱིར་སྤོ་བ་འམ་གཞི་ནས་སྤོ་བ་ལ་ སོགས་པ ་བཏང་སྟེ་ཡང་ཕྱིར་ལེན་པ་ངེས་བཏང་བའི་གནས་སྐབས་སུ་བཅབས་པའི་དུས་རིང་དུ་སྒྲུབ་པར་བྱེད་བའོ། །མནོས་ཏེའོ་ཞེས་སྨོས་ཏེ་དགེ་འདུན་གྱི་སྤོ་བ་དང་མགུ་བར་བྱ་བ་དེ་གཉིས་ཇི་ལྟར་སྦྱིན་པར་བྱ་བ་ནི་བསྟན་པས་དེའི་ཕྱིར། དབྱུང་བ་ཡང་ངོ་ཞེས་བྱ་བ་ཡང་ལས་ཀྱིས་སྦྱིན་ནོ་ཞེས་བྱ་བའི་རྗེས་སུ་བསྙེག་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །དེར་བསྡིགས་པ་ཡང་ངོ་ཞེས་བྱ་བ་ནི་ཁྱོད་ཀྱིས་ལེགས་པར་མ་བྱས་སོ་ཞེས་བྱ་བ་ལ་ སོགས་པའི་སྔགས་ལས་ལྡང་བར་བྱེད་པའོ། །དེར་ཞེས་བྱ་བ་ནི་དབྱུང་བ་དེར་རོ། །བསྡིགས་པ ་དེ་ནམ་གྱི་ཚེ་ན་བྱ་ཞེ་ན་དེའི་ཕྱིར་གསོལ་བ་དང་ལས་བརྗོད་པ་དང་པོའི་བར་དུའོ་ཞེས་བྱ་བ་སྨོས་ཏེ། གསོལ་བ་བྱས་ནས་དེའི་རྗེས་ལ་ཞེས་བྱ་བའི་དོན་ཏོ། །གནས་སྐབས་ཇི་ལྟར་འདུག་པ་ལ་བྱ་ཞེ་ན། དེའི་ཕྱིར་རྩྭ་བཀྲམ་པ་ལྟ་བུར་འགྱེལ་བ་ལའོ། །གཟེངས་བསྟོད་པ་ཡང་ངོ་ཞེས་བྱ་བ་ལ་སྨོས་ཏེ། འདི་ཡང་ཁྱོད་ཀྱིས་ལེགས་པར་བྱས་སོ་ཞེས་བྱ་བ་ལ་ སོགས་པའི་སྔགས་ལས་ལྡང་བར་བྱེད་པ ་ལའོ། །འགྱེལ་བ་ལའོ་ཞེས་བྱ་བ་ནི་འདིར་སྦྱར་བར་བྱ་བ་མ་ཡིན་ནོ། །ནམ་གྱི་ཚོ་ན་བྱ་ཞེ་ན། དེའི་ཕྱིར་བརྗོད་མ་ཐག་ཏུའོ་ཞེས་བྱ་བ་སྨོས་ཏེ། དགེ་འདུན་གྱིས་ཕྱུང་ལགས་ཏེ། འདིར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་ཚིག་བརྗོད་པ་བྱས་མ་ཐག་ཏུའོ་ཞེས་བྱ་བའི་དོན་ཏོ། །ཕྱིར་བཅོས་པའི་གཞིའོ།། །།ཚུལ་ཁྲིམས་འཆལ་པ་བསྐྲད་པར་བྱའོ་ཞེས་བྱ་བ་ནི། འདིར་ཚུལ་ཁྲིམས་འཆལ་བ་ཞེས་བྱ་བ་ནི་ཕམ་པར་གྱུར་པར་ཤེས་པར་བྱའོ། །འདི་ལ་དགེ་འདུན་དབང་བ་ཞེས་བྱ་བ་ནི་ཚུལ་ཁྲིམས་འཆལ་བ་བསྐྲད་པ་ནི་དགེ་འདུན་ལ་རག་ལས་པ་ཡིན་པའི་ཕྱིར་གཙུག་ལག་ཁང་གི་བྱ་བ་ལ་དགེ་འདུན་དབང་བ་ཉིད་ཡིན་པས་གང་ཟག་ལ་ཡང་ནུས་པར་ཡོད་པར་གྱུར་ཀྱང་འདིར་བྱ་བ་ཉིད་དོ། །དེ་ལྟར་ཡང་འཕགས་པ་མོད་གལ་གྱི་བུ་གཅིག་པུས་གང་ཟག་ལ་སྡུག་བསྔལ་དེ་བྱས་པས་ན། འདིར་གང་ཟག་མི་དབང་བ་ཡིན་པས། དེ་བས་ན་དགེ་འདུན་ཉིད་ཀྱིས་བྱ་བར་གསུངས་སོ། །འདིར་
གཞུང་ནི། བཅོམ་ལྡན་འདས་ཀྱིས་དགེ་སློང་ཚུལ་ཁྲིམས་འཆལ་བ་བསྐྲད་པར་བྱའོ་ཞེས་བཀའ་སྩལ་ན། གང་གིས་བསྐྲད་པར་བགྱི། དགེ་འདུན་གྱིས་སོ་ཞེས་གསུངས་པ་ཡིན་ནོ། །དེས་དེ་ཡལ་བར་མི་དོར་རོ་ཞེས་བྱ་བ་ལ། དེས་ཞེས་བྱ་བ་ནི་དགེ་འདུན་གྱིས་སོ། །དེ་ཞེས་བྱ་བ་ནི་ཚུལ་ཁྲིམས་འཆལ་པ་བསྐྲད་པ་དེའོ། །ཡལ་བར་མི་དོར་ཞེས་བྱ་བ་ནི་དེས་དེ་ལ་འབད་པར་བྱ་ཞེས་བྱ་བའི་དོན་ནོ། །བསྙིལ་བ་ལ་བཟོད་པར་བྱ་བ་ཉིད་དོ་ཞེས་བྱ་བ་ནི་དགེ་ཚུལ་བསྙིལ་བའི་ལས་བྱས་པ་ལ་ཇི་ལྟར་ནན་ཏུར་བྱས་པ་གཞན་དག་ལ་བཟོད་པར་བྱ་བ་དེ་བཞིན་དུ་དེ་ལ་ཡང་བཟོད་པར་བྱ་བ་ཉིད་ཡིན་ནོ། །བསྙིལ་བ་ཉིད་ཀྱི་ཕྱིར་འདི་ལ་བཟོད་པར་མི་འོས་སོ་སྙམ་པའི་དོགས་པ་བཟློག་པའི་ཕྱིར་མདོ་འདི་ཡིན་ནོ། །འདིར་གཞུང་ནི་དགེ་ཚུལ་བསྙིལ་བ་སྡུག་པའི་ལྟུང་བྱེད་ཀྱི་ཞུ་བ་ཁ་ཅིག་ལས། དགེ་འདུན་གྱིས་དགེ་ཚུལ་བསྙིལ་བའི་ལས་ཀྱིས་བསྙིལ་བར་གྱུར་ཅིང་དེ་ཡང་འབྱུང་བ་སྐྱོད་ན་བཟོད་པར་བགྱི་འམ་བཟོད་པར་མི་བགྱི། བཟོད་པར་བྱའོ་ཞེས་གསུངས་པ་ཡིན་ནོ། །ནན་ཏུར་བྱེད་པ་དག་གིས་མ་བསྐོས་ན་ནན་ཏུར་བྱས་པ་ལ་བཟོད་པ་མི་འཆགས་སོ་ཞེས་བྱ་བ་ནི་མ་བསྐོས་པར་གྱུར་པ་ལ་ནན་ཏུར་བྱེད་པའི་དགེ་སློང་རྣམས་ཀྱིས་ནན་ཏུར་བྱས་ན་བཟོད་པ་མི་འཆགས་ཏེ། གལ་ཏེ་དགེ་སློང་གཞན་དག་ནན་ཏུར་བྱས་པ་དེ་ལ་བཟོད་པར་བྱེད་འདོད་ན་ཅི་ནས་ཀྱང་ནན་ཏུར་བྱེད་པ་དེ་དག་གིས་དེར་བསྐོས་པ་ཉིད་དུ་འགྱུར་བ་དེ་ལྟར་བྱ་ཞིང་ཇི་ལྟར་ནན་ཏུར་བྱེད་པ་རྣམས་ལ་དེར་བསྐོས་པ་ཉིད་དུ་གྱུར་ཏེ། དེ་ལྟ་བས་ན་དེ་བསྟན་པའོ། །བསྐྲད་པས་སུན་ཕྱུང་བའི་གནས་སུ་གནས་པར་མི་བྱ་བ་ཉིད་དོ་ཞེས་བྱ་བ་ནི་ཁྱིམ་སུན་འབྱིན་པ་བསྐྲད་པ་ཉིད་ཀྱིས་གནས་ཁང་ཕྱུང་བར་གྱུར་པའི་སྤྱོད་ཡུལ་གྱི་གནས་དེར་གནས་པ་ཉིད་དོ། །དེས་དེ་དག་གི་མ་དད་པ་ཡོངས་སུ་སྤང་བའི་ཕྱིར་གཞན་དུ་འགྲོ་བར་བྱའོ། །འདིར་གཞུང་ནི་རྣམ་པར་འབྱེད་པ་དག་ལས། ཚེ་དང་ལྡན་པ་དག་ཁྱོད་གནས་འདི་ནས་སོང་ཤིག་དང་ཞེས་བྱ་བ་དང༌། དགེ་སློང་བྲམ་ཟེའི་བུ་མོས་ཞུས་པ་ལས་ཀྱང་བསྐྲད་པ་ཞེས་བྱ་བའི་དོན་ཅི་ལགས།
ཉེ་བ་འཁོར་ལས་དེའི་མིང་ཡིན་ཏེ། འོན་ཀྱང་བསྐྲད་པར་བྱ་བ་ནི་དགེ་སློང་སུན་འབྱིན་པ་གང་ཡིན་པ་དེ་ལ་བྱ་སྟེ། དེ་འདིར་གནས་པར་མི་བྱའོ་ཞེས་གསུངས་པ་ཡིན་ནོ། །གནས་ནས་ཕྱུང་བ་ཐམས་ཅད་ལ་གནས་པར་བྱ་བ་མ་ཡིན་པ་ཉིད་དང་ལོངས་སྤྱད་པར་བྱ་བ་མ་ཡིན་པ་ཉིད་དོ་ཞེས་བྱ་བ་ནི་ལྷན་ཅིག་གནས་པར་བྱ་བ་མ་ཡིན་པ་ཉིད་དང༌། ལྷན་ཅིག་ལོངས་སྤྱོད་པ་མ་ཡིན་པ་ཉིད་ཅེས་བྱ་བ་དེ་གཉིས་ནི་གནས་ནས་ཕྱུང་བ་ཐམས་ཅད་ལ་རིག་པར་བྱ་བའི་ལྟ་བའི་རྣམ་པ་མི་གཏོང་བ་ཉིད་ཀྱིས་གནས་ནས་ཕྱུང་བ་འབའ་ཞིག་ལ་དེ་གཉིས་རིག་པར་བྱ་བར་མ་ཟད་དོ། །དེ་ཡང་བསྐྲད་པར་བྱ་བ་ཉིད་ཅེས་བྱ་བ་ཉིད་དེ་འདིར་བརྗོད་པས་འདི་ལ་འདི་གནས་པར་རིག་པར་བྱ་བ་མ་ཡིན་ནོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་གནས་ནས་ཕྱུང་བ་གྲོགས་དང་བཅས་པར་བརྗོད་པར་བགྱི་འམ། གྲོགས་མ་མཆིས་པར་བརྗོད་པར་བགྱི། གནས་ནས་ཕྱུང་བ་ཐམས་ཅད་གཅིག་པུ་གྲོགས་གཉིས་མེད་པར་བརྗོད་པར་བྱའོ། །གནས་ནས་ཕྱུང་བ་ལ་ལོངས་སྤྱོད་དང་བཅས་པར་བརྗོད་པར་བགྱི་འམ། ལོངས་སྤྱོད་མ་མཆིས་པར་བགྱི། གནས་ནས་ཕྱུང་བ་ཐམས་ཅད་ལ་ལོངས་སྤྱོད་མེད་པར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་འདུ་ཤེས་ཀྱིས་རྣམ་པར་གཞག་གོ་ཞེས་བྱ་བ་ནི་གནས་ནས་ཕྱུང་བ་སྤང་བ་འདི་ལ་འདུ་ཤེས་ཀྱིས་རྣམ་པར་གཞག་པ་སྟེ། གང་གིས་འདི་གནས་ནས་བྱུང་བ་ཡིན་ནོ་ཞེས་བྱ་བར་ཤེས་ལ། དེ་མི་སྦོང་བ་དེ་ལ་ཉེས་འདིར་འགྱུར་གྱི་མི་ཤེས་པ་ནི་མ་ཡིན་ནོ་། །འདིར་གཞུང་ནི་གང་གིས་གནས་ནས་ཕུང་བར་ཤེས་པ་དེས་ལྷན་ཅིག་གནས་པ་དང༌། ལྷན་ཅིག་ལོངས་སྤྱད་པར་མི་བྱའི་གང་གིས་གནས་ནས་ཕུང་བར་མི་ཤེས་པ་དེས་ལྷན་ཅིག་གནས་པ་དང༌། ལྷན་ཅིག་ལོངས་སྤྱོད་པ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཡོངས་སུ་སྤང་བར་བྱ་བ་ཐམས་ཅད་ཡོངས་སུ་སྤངས་པ་དག་ལ་ཡང་འདིའི་རྗེས་སུ་འབྲང་བའི་རྣམ་པ་ཉིད་དུ་རིག་པར་བྱའོ། །བྱེ་བ་ཉིད་ནི་དེ་གཉིས་ཆོས་མ་ཡིན་པའི་ཕྱོགས་དང༌། ཅིག་ཤོས་སུ་ཡིན་གྱི་ཅིག་ཤོས་དང་ནི་མ་ཡིན་ནོ་
ཞེས་བྱ་བ་ནི། ལས་བྱེ་བ་དང་འཁོར་ལོ་བྱེ་བ་དག་ལས་གང་ཡང་རུང་བ་བྱེ་བ་དེ་ཉིད་ནས་གནས་པ་བྱ་བ་མ་ཡིན་པ་ཉིད་དང༌། ལོངས་སྤྱད་པར་བྱ་བ་མ་ཡིན་པ་ཉིད་དེ་དེ་གཉིས་ཆོས་མ་ཡིན་པའི་ཕྱོགས་དང༌། ཅིག་ཤོས་ཀྱི་ཕྱོགས་སུ་ལྷན་ཅིག་མི་བྱ་བ་ཡིན་གྱི་ཆོས་ཀྱི་ཕྱོགས་ཅིག་ཤོས་དང་ཆོས་མ་ཡིན་པའི་ཕྱོགས་སུ་ལྷན་ཅིག་བྱར་མི་རུང་བ་ནི་མ་ཡིན་ཏེ། ཆོས་ཀྱི་ཕྱོགས་ལ་ནི་ཉེས་པ་མེད་པའི་ཕྱིར་རོ། །འདིར་གཞུང་ནི་ཁས་བླངས་པ་དག་ནི་ཁས་མ་བླངས་པ་དག་དང་ལྷན་ཅིག་ལོང་སྤྱོད་པར་བྱེད་ན་ཉེས་བྱས་སོ། །ཁས་མ་བླངས་པ་དག་ཁས་བླངས་པ་དག་དང་ལྷན་ཅིག་ལོངས་སྤྱོད་པར་བྱེད་པ་དག་ལ་ནི་ཉེས་པ་མེད་དོ་ཞེས་གསུངས་པ་ཡིན་ནོ། །འཁོར་ལོ་བྱེ་བ་དག་ལས་ཐ་དད་པ་དག་ལ་ཡང་ཆོ་ག་འདི་རྣམ་པར་གཞག་པ་དེ་བས་ན་བྱེ་བྲག་མེད་པར་མདོར་བྱས་པ་སྟེ། ཐམས་ཅད་ཀྱི་དབང་དུ་བྱས་ནས་བསྟན་པའོ། །ནན་ཏུར་བྱས་པ་གཞན་དག་ལ་དེ་གཉིས་མི་བྱའོ་ཞེས་བྱ་བ་ནི་གནས་ནས་ཕུང་བ་ལས་གཞན་པའི་ནན་ཏུར་བྱས་པ་བསྡིགས་པ་དང༌། སྨད་པ་དང༌། བསྐྲད་པ་དང༌། ཕྱིར་འགྱེད་པ་བྱས་པའི་ཡུལ་དག་ལ་ལྷན་ཅིག་གནས་པར་མི་བྱ་བ་ཉིད་དང་ལྷན་ཅིག་ལོངས་སྤྱོད་པར་མི་བྱ་བ་ཉིད་དེ་གཉིས་མི་བྱའོ། །འདིར་གཞུང་ནི་བསྡིགས་པའི་ལས་བགྱིས་པ་ལ་སྨད་པའི་ལས་བགྱིས་ན་བགྱིས་པར་བརྗོད་པར་བགྱི་འམ། བཅོམ་ལྡན་འདས་ཀྱིས་བཀའ་སྩལ་པ། བྱས་པར་བརྗོད་པར་བྱ་སྟེ། བསྡིགས་པའི་ལས་ནི་བག་ཡངས་སུ་གྱུར་ཏོ་ཞེས་བྱ་བ་ལ་ སོགས་པས་གནས་ནས་ཕྱུང་བ་ལས། གཞན་པའི་ནན་ཏུར་བྱས་པ ་དག་ལ་ནན་ཏུར་གཞན་འཆགས་པར་གསུངས་ནས། གནས་ནས་ཕྱུང་བ་ལ་བསྡིགས་པའི་ལས་བགྱིས་ན་བགྱིས་པར་བརྗོད་པར་བགྱི་འམ། ཉེ་བ་འཁོར་མི་བྱ་སྟེ། ཅིའི་ཕྱིར་ཞེ་ན། དེ་ནི་ལོངས་མི་སྤྱོད་པར་བྱ་བའི་ཕྱིར་སོང་བ་ཡིན་པའི་ཕྱིར་རོ། །དེ་བཞིན་དུ་གནས་ནས་ཕྱུང་བ་ལ་སྨད་པ་དང༌། བསྐྲད་པ་དང༌། ཕྱིར་འགྱེད་པའི་ལས་བགྱིས་ན་བགྱིས་པར་བརྗོད་པར་བགྱི་འམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། དེ་ནི་ལོངས་མི་སྤྱད་པར་བྱ་བའི་ཕྱིར་སོང་བ་ཡིན་པའི་ཕྱིར་རོ་ཞེས་གསུངས་པ་ཡིན་ཏེ་དེའི་ཕྱིར་མདོ་འདི་བྱས་
སོ། །དེས་འགྲོགས་བཤེས་ལ་བརྟེན་ཏེ་གནས་པར་བྱ་བ་ཉིད་དོ་ཞེས་བྱ་བ་ནི་ནན་ཏུར་བྱས་པ་དེས་འགྲོགས་བཤེས་ལ་བརྟེན་ཏེ་གནས་པར་བྱ་བ་ཉིད་ཡིན་པ་སྟེ། གང་གི་ཕྱིར་ཆད་པ་དང་བཅས་པ་ཉིད་ལ་ཡང་དེ་ལྟར་འགྱུར་རོ། །འདིར་གཞུང་ནི་མི་གནས་པར་འདུག་པར་མི་བྱའོ་ཞེས་གསུངས་པ་དེའི་དོན་ཅི་ལགས། གང་ཟག་གན་གལ་འགྲོགས་བཤེས་སམ། གུས་པ་དད་ངོ་ཚ་ཤེས་པ་དང༌། ཡིད་དུ་འཐད་པའི་སེམས་ཉེ་བར་གནས་པ་ཡོད་པ་དེ་ལ་གནས་དེར་འདུག་པར་བྱའོ་ཞེས་གསུངས་པའི་གཞུང་གནང་བ་ཡིན་ནོ། །དེའི་ཕྱིར་མདོ་འདི་རྣམ་པར་གནས་པ་ཡིན་ནོ། །ནན་ཏུར་བྱས་པས་སམ་ཉམས་པ་བསྐྲད་པར་བྱ་བས་འགྱུར་བ་བརྟེན་ན་ཡོ་བྱད་ཀྱང་ཕུང་སྟེ་དེར་རོ་ཞེས་བྱ་བ་ནི་སློང་གང་ལ་ནན་ཏུར་བྱས་པ་དེས་སམ། ཚུལ་ཁྲིམས་འཆལ་བ་ཉམས་པ་ལ་བསྐྲད་པར་བྱ་བ་དེས་དོ་ཟུམ་དང་ཁྲོ་བ་ལ་ སོགས་པར་འགྱུར་བ་བསྟན་པ ་དེའི་ཚེ་དེའི་ཡོ་བྱད་ཀྱང་ཕྱུང་སྟེ་དོར་བར་བྱའོ། །གླེང་གཞི་དག་ལས། གཙུག་ལག་ཁང་ནས་ཞེས་བྱ་བ་ལ་ སོགས་པ ་ནས་དེ་ཉིད་གནས་པ་ཞེས་བྱ་བའི་བར་དུ་གསུངས་པ་ཡིན་ནོ། །མཐུས་བསྐྲད་པར་བྱའོ་ཞེས་བྱ་བ་ནི་སྔར་བསྟན་པའི་གང་ཟག་ནན་ཏུར་བྱ་བ་དང༌། ཚུལ་ཁྲིམས་འཆལ་པ་དེ་གཉིས་སོ། །འཇུས་པ་གཅད་པར་བྱའོ་ཞེས་བྱ་བ་ནི་གྲལ་ནས་བསྐྲད་པར་བྱ་བ་དག་ཀ་བ་ལ་ སོགས་པ ་གང་ལ་འཇུས་པ་དེ་ཡང་གཅད་པར་བྱའོ། །དེ་རྡིབ་པའི་ཆོས་ཅན་མ་ཡིན་ན་དབྱུང་ངོ་ཞེས་བྱ་བ་ནི་གང་ལ་འཇུས་པ་གཅད་པར་བྱ་བ་དེ་རྡིབ་པར་འགྱུར་བ་ཉིད་མ་ཡིན་པ་དེ་དབྱུང་བར་བྱའོ། །འདིར་གཞུང་ནི་དེ་ལ་ཀ་བ་གཅད་པར་བྱ་སྒོ་སྐྱེས་དབྱུང་བར་བྱ་ཞེས་གསུངས་པ་ཡིན་ཏེ། དེའི་ཕྱིར་མདོ་གཉིས་བྱས་སོ། །དགེ་འདུན་གྱི་དེ་ཕྱིར་བཅོས་སོ་ཞེས་བྱ་བ་ནི་བཅད་པ་དང་དབྱུང་བ་ཡང་ངོ༌། །ཇི་ལྟར་ཞེ་ན་དེའི་ཕྱིར་བཅོལ་ཏེའོ་ཞེས་བྱ་བ་སྨོས་ཏེ་སྦྱིན་བདག་ལའོ། །མ་གྲུབ་ན་གཙུག་ལག་ཁང་གི་རྫས་ཀྱིས་སོ་ཞེས་བྱ་བ་ནི་བཅོལ་ཏེ་མ་གྲུབ་ན་གཙུག་ལག་ཁང་གི་རྫས་ཀྱིས་ཕྱིར་བཅོས་པར་བྱའོ། །འཐབ་ཀྲོལ་བྱེད་པ་བསྐྲད་པ་ན་གཟུང་བར་མི་བྱའོ་ཞེས་བྱ་བ་ནི་དགེ་སློང་འཐབ་
ཀྲོལ་བྱེད་པ་གཙུག་ལག་ཁང་ནས་བསྐྲད་པ་ནི་དགེ་སློང་གཞན་གྱིས་ཕྱིར་གཟུང་བར་མི་བྱ་སྟེ། དེ་ནི་ཕྲན་ཚོགས་དག་ལས་འབྱུང་བའོ། །འཐབ་ཀྲོལ་ལ་འབད་པ་ས་མ་ལོག་ན་ཉེ་བར་ཞི་བར་བྱ་བའི་ཕྱིར་གནས་ནས་དབྱུང་བར་བྱའོ་ཞེས་བྱ་བ་ནི་ཐ་མལ་པ་ཉེ་བར་ཞི་བར་བྱ་བའི་དོན་ལ་འབད་པས་མ་ལོག་ཅིང་མ་བཏང་ན་འཐབ་ཀྲོལ་ཉེ་བར་ཞི་བར་བྱ་བའི་ཕྱིར་དེ་གནས་ནས་དབྱུང་བའི་ལས་བྱའོ། །ཡང་དང་ཡང་དུ་དོན་གཞན་དང་གཞན་གྱི་ཕྱིར་འཐབ་ཀྲོལ་སྐྱེད་པར་བྱེད་པ་ཉིད་ལ་ནི་བསྡིགས་པའི་ལས་བྱའོ། །མི་གཏོང་བ་ལ་ནི་གནས་ནས་དབྱུང་བའི་ལས་བྱ་སྟེ། དེ་གཉིས་ཀྱི་ཡུལ་གྱི་བྱེ་བྲག་ནི་དེ་ཡིན་ནོ། །འདིར་གཞུང་ནི་གླེང་གཞི་དག་ལས། བཅོམ་ལྡན་འདས་ཀྱིས་བཀའ་བསྩལ་པ། འཐབ་ཀྲོལ་བྱེད་པ་དག་བཟློག་པར་བྱའོ། །དེ་དག་བཟློག་པ་མི་འཁོད་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་བཟློག་པ་ན་མི་འཁོད་ན་གནས་ནས་དབྱུང་བའི་ལས་བྱའོ་ཞེས་གསུངས་པ་ཡིན་ནོ། །རྣམ་པར་གཏན་ལ་འབེབས་པ་ལས་གྱུར་པ་ལས་ཉེ་བར་ཞི་བས་སོ་ཞེས་བྱ་བ་ནི་རྣམ་པར་གཏན་ལ་འབེབས་པའི་དོན་ལ་འཐབ་མོ་གང་ལ་རྩོད་པའི་གཞི་ཉེ་བར་ཞི་བ་བརྗོད་པར་གྱུར་པ་ལ། ཉེ་བར་མ་ཞི་བས་འཐབ་ཀྲོལ་གྱི་རྒྱུ་ཉེ་བར་བསྒྲུབ་པ་ལས་བཟློག་པའི་ཕྱིར། དེ་གཉིས་ཀ་ཞི་བར་བྱའི་དོན་དུ་གནས་ནས་དབྱུང་བ་ཞེས་བྱ་བའི་དོན་ཏོ། །གནས་པ་ལ་གནས་ཀྱིས་འབད་པར་བྱའོ་ཞེས་བྱ་བ་ནི་སློབ་མ་ཉེ་གནས་ཀྱི་རྣམ་པར་གཏན་ལ་འབེབས་པ་ལས་གྱུར་པའི་འཐབ་མོ་ཉེ་བར་ཞི་བར་བྱ་བའི་ཕྱིར་ཡལ་བར་མི་འདོད་པར་འབད་པར་བྱ་བ་སྟེ། འདི་ལྟར་དེས་གཞན་ལ་བཅོལ་བས་འབད་པར་བྱ་བའམ། རང་གིས་ཉེ་བར་ཞི་བར་བརྗོད་པར་གྱུར་པ་ལས་ཀྱང་རུང་ངོ་ཞེས་བྱ་བ་བྱེ་བྲག་མེད་པར་ཤེས་པར་བྱའོ། །འཐབ་ཀྲོལ་གྱི་རྒྱུ་ཉེ་བར་བསྒྲུབ་པ་ལ་གནས་ནས་དབྱུང་བར་བྱ་བ་ཉིད་དོ་ཞེས་བྱ་བ་ནི་འཐབ་ཀྲོལ་གྱི་རྒྱུ་ཉེ་བར་སྒྲུབ་པར་བྱེད་པ་གང་ཡིན་པ་དེ་ལ་གནས་ནས་དབྱུང་བའི་ལས་བྱ་བ་ཉིད་ཡིན་གྱི་འཐབ་ཀྲོལ་བྱེད་པ་འབའ་ཞིག་ལ་བྱ་བར་མ་ཟད་དེ། །གང་ཞིག་བདེ་ཞིང་གནས་པ་འཐབ་ཀྲོལ་གྱི་རྒྱུ་རྗོད་པར་བྱེད་གང་ཞིག་དགེ་སློང་མ་
རྣམས་ཀྱིས་གནས་ནས་དབྱུང་བའི་ལས་བྱས་པ་སྟེ། དེ་ལྟ་བས་ན་མདོ་འདི་བྱས་སོ། །དགེ་སློང་མའི་རྣམ་པར་འབྱེད་པ་ལས། དེ་དང་འོག་མ་གཉིས་ཀྱི་ཡང་གཞུང་ནི་དེ་ཉིད་དོ། །དགེ་སློང་མ་རྣམས་དང་འདྲེ་ཞིང་གནས་པ་ལ་ཡང་གནས་ནས་དབྱུང་བར་བྱའོ་ཞེས་བྱ་བ་ནི་དགེ་སློང་གང་དག་དགེ་སློང་མ་རྣམས་དང་ལྷན་ཅིག་འདྲེ་ཞིང་གནས་པ་ལ་འབད་པས་བཟློག་ཀྱང་མི་གཏོང་ན་དེ་ལ་ཡང་གནས་ནས་དབྱུང་བར་བྱའི་གཞན་ལ་བྱ་བ་འབའ་ཞིག་ཏུ་མ་ཟད་དོ་ཞེས་བྱ་བའི་དོན་ཏོ། །འདིས་གནས་ནས་དབྱུང་བ་ལ་དགེ་སློང་མས་ཕྱག་བྱ་བའི་འོས་མ་ཡིན་པའི་སྔོམ་པ་བྱའོ་ཞེས་བྱ་བ་ལ། འདིས་ཞེས་བྱ་བ་འདི་དགེ་སློང་མ་དང་འདྲེ་ཞིང་གནས་པའི་བདག་ཉིད་ཀྱིས་རྒྱུ་འདིས་གནས་ནས་ཕུང་བའི་དགེ་སློང་ལ་དགེ་སློང་མ་རྣམ་སྐྱིས་ཕྱག་བྱ་བའི་འོས་མ་ཡིན་པའི་སྡོམ་པ་བྱའོ། །དགེ་སློང་མ་རྣམས་པ་ནི་ལོག་པར་རྟོག་པ་འདི་ཡོད་པ་དེ་བས་ན་འཐབ་ཀྲོལ་དང་བསྐྲད་ པ་ལ་སོགས ་པའི་ལོག་པར་རྟོག་པ་ལ་དགེ་སློང་གནས་ནས་ཕྱུང་བ་ཉིད་ལ་བྱ་བ་ཉིད་དེ་ནི་དགེ་ཙམ་དུ་ཤེས་པར་བྱའོ། །དགེ་སློང་གི་དགེ་འདུན་གྱིས་དགེ་སློང་མ་སྤངས་པ་ལ་དགེ་སློང་མའི་དགེ་འདུན་གྱི་ལན་གདབ་པར་མི་རིགས་སོ། །དེ་བས་ན་དགེ་སློང་མས་དགེ་སློང་ལ་སྐུར་བར་བྱ་བ་མ་ཡིན་པ་དང༌། དགེ་སློང་མས་དགེ་སློང་ལ་འཐབ་ཀྲོལ་བྱེད་པ་མ་ཡིན་ནོ་ཞེས་བྱ་བ་ལྕི་བའི་ཆོས་རྗེ་སུས་འབྲངས་པས་ཐོབ་པའོ། །དེ་བས་ན་གནས་ནས་དབྱུང་བ་ཉིད་ལ་སྔོམ་པ་འདི་བྱ་བ་ཉིད་ཤེས་པ་འདིའོ། །ནན་ཏུར་གྱི་རྒྱུ་གཞན་ལ་དེའི་དོན་དུ་བསམ་པ་གཞན་བྱེད་པ་ནི་འཆགས་སོ་ཞེས་བྱ་བ་ནི་ནན་ཏུར་གྱི་རྒྱུ་གཞན་ཡོད་པ་ལ་དེའི་དོན་དུ་བསམ་པ་ཞེས་བྱ་བ་ནི་གང་གི་རྒྱུ་དེ་ཉེ་བར་གནས་པ་དེའི་བདག་ཉིད་རང་གི་ངོ་བོར་གྱུར་པའི་དོན་གང་ཡིན་པ་དེ་ནི་ནན་ཏུར་གཞན་གྱི་མིང་གིས་བསམ་པ་གང་ཡིན་པ་དེ་ནི་དེའི་དོན་དུ་བསམས་པ་སྟེ། ནན་ཏུར་གྱི་རྒྱུ་ཉེ་བར་གནས་པ་དེའི་དོན་ཏོ། །གལ་ཏེ་བསྡིགས་པའི་ནན་ཏུར་གྱི་རྒྱུ་ཉེ་བར་གྱུར་པ་དེའི་དོན་དུ་བསམས་པས་བསྐྲད་ པ་ལ་སོགས ་པའི་མིང་གི་ནན་ཏུར་གྱི་ལས་བྱེད་ན་དེ་ལྟར་ན་ཡང་བསྡིགས་པའི་ནན་ཏུར་
གྱི་ལས་ཉིད་འཆགས་པར་འགྱུར་རོ། །གཞན་དུ་ན་མི་འཆགས་སོ་ཞེས་བྱ་བ་ནི་དེའི་མིང་གི་དོན་འདོད་པ་ཉིད་དུ་མི་སེམས་ན་ཞེས་བྱ་བའི་དོན་ཏོ། །འཐབ་ཀྲོལ་བྱེད་པ་ཉིད་ལ་སྐྲོད་པར་བྱེ་དཔའི་ལས་བྱེད་པ་ལ་གལ་ཏེ་འཐབ་གྲོལ་བྱེད་པ་ཉིད་སྐྱོད་པར་བྱེད་པའི་ཡིད་ཅན་གྱི་དོན་ལ་དགོངས་ནས་སྐྲོད་པར་བྱེད་ན་བསྐྲད་པར་བྱ་བ་དེ་འབྱུང་ངོ༌། །གལ་ཏེ་ཁྱིམ་དུན་འབྱིན་པ་ཉིད་ཀྱི་དོན་ལ་དོགས་ནས་འཐབ་ཀྲོལ་བྱེད་པའི་རྒྱུ་ཡོད་པ་ལ་སྐྲོད་པའི་ལས་བྱེད་ན། དེས་ན་ལས་དེ་འབྱུང་བར་མི་འགྱུར་རོ། །དེ་བས་ན་དེ་ལ་འདི་སྐད་བརྗོད་དོ། །གཞན་ལས་ཉམས་སོ་ཞེས་བྱ་བ་ནི་ནན་ཏུར་གཞན་བྱས་པ་ལ་སྔ་མ་ཉམས་པ་ཡིན་ཏེ། གཞན་མི་འཆགས་པ་ནི་མ་ཡིན་ནོ། །སྤྱིར་ནན་ཏུར་བྱེད་པ་རྣམས་པ་ལ་དེ་བསྐྲད་པའི་རྣམ་པ་ཉིད་ཀྱིས་ཤེས་པར་བྱའོ། །ནན་ཏུར་གཞན་བྱས་ནན་ན་ཏུར་སྔར་བྱས་པ་ཉམས་སོ། །དིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས། བཙུན་པ་རེ་ཞིག་བསྡིགས་པའི་ལས་བྱིས་པ་ལ་སྨད་པའི་ལས་བརྗོད་པར་བགྱི་འམ། བཅོམ་ལྡན་འདས་ཀྱིས་བཀའ་སྩལ་བ། བྱས་པར་བརྗོད་པར་བྱ་སྟེ། བསྡིགས་པའི་ལས་ནི་བག་ཡངས་སུ་གྱུར་ཏོ། །བཙུན་པ་གནས་ནས་ཕྱུང་བ་ལ་བསྡིགས་པའི་ལས་བགྱིས་པར་བརྗོད་པར་བགྱིའམ། ཉེ་བ་འཁོར་མི་བྱ་སྟེ། དེ་ཅིའི་ཕྱིར་ཞེ་ན། དེ་ནི་ལོངས་མི་སྤྱད་པའི་ཕྱིར་སོང་བའི་ཕྱིར་རོ་ཞེས་གསུངས་པ་ཡིན་ནོ། །གནས་ནས་ཕྱུང་བ་ལ་ནི་མི་འཆགས་སོ་ཞེས་བྱ་བ་ནི་གནས་ནས་ཕྱུང་བ་བདག་ཉིད་ཀྱིས་ནན་ཏུར་བྱས་བ་ལ་ནི་ཕྱི་མ་མི་འཆགས་ཏེ་སྔ་མ་ཉམས་པར་ཡང་མི་འགྱུར་ཏེ། དེ་ལོངས་མི་སྤྱད་པའི་ཕྱིར་སོང་བ་ཉིད་ཡིན་པའི་ཕྱིར་རོ་ཞེས་བྱ་བ་འདིར་རྒྱུ་སྨོས་ཏེ། ལོངས་མི་སྤྱད་པར་སོང་བ་མ་ཡིན་ཏེ་འདིར་དགེ་འདུན་ལ་ཞེས་བྱ་བའི་དོན་དེ་རིག་པར་བྱའོ། །ཤེས་བ་དང༌། བསོད་ནམས་ཆེན་པོ་དང༌། མདོ་སྡེ་དང་འདུལ་བ་དང༌། མ་མོ་འཛིན་པ་དང༌། ཐོས་པ་མང་བ་དང༌། ཕྱོགས་མང་བ་དང༌། འཁོར་མང་བདག་ལ་ནི་སྦོམ་པོའོ་ཞེས་བྱ་བ་ཤེས་པ་དང༌། བསོད་ནམས་ཆེན་པོ་དང༌། མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་
དང། ཐོས་པ་མང་བ་དང༌། ཕྱོགས་མང་བ་དང༌། འཁོར་མང་བ་ཆོས་ཀྱི་གནས་ནས་འབྱིན་ན་དབྱིན་གྱི་སྐབས་སུ་གཏོགས་པའི་ཉེས་པ་སྦོམ་པོར་འགྱུར་རོ། །དབྱེ་བར་འདོད་པས་དེས་རྒྱས་པར་གྱུར་བ་དང༌། གཞན་ཆོས་དང་ལྡན་པ་ཡང་མངོན་པར་འདོད་པས་གང་ཟག་ལྔ་པོ་ལ་ནན་ཏུར་བྱེད་པ་ནི་ཉེས་བྱས་སོ། །ཕྱི་རོལ་པའི་རྟོག་གེ་དང༌། སྒྲ་དང་སྤྱོད་ པ་ལ་སོགས ་པའི་ཐོས་པ་མང་བ་དང་ལྡན་པའི་མདོ་སྡེ་ལ་ སོགས་པའི་དོན་ལ་ཐོས་པ ་མང་བས་ཞེས་སྨོས་པས་སོ། །ཁྱིམ་པ་ནི་དཔེའོ། །དགེ་སློང་ལ་ སོགས་པ ་ལྔ་པོ་དག་ལ་བརྙས་ཐབས་བྱེད་པ་དག་ལ་ཡང་ཕྱིར་འགྱེད་པ་བྱའོ་ཞེས་བྱ་བ་ནི་ཁྱིམ་པ་ལ་བརྙས་ཐབས་བྱེད་པ་ལ་ཕྱིར་འགྱེད་པའི་ལས་བགྱིའམ། ཉེ་བ་འཁོར་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཕྱིར་འགྱེད་པའི་ལས་བྱའོ་ཞེས་གང་གསུངས་པ་དེ་ནི་དཔེ་ཙམ་དུ་ཟད་དེ་དང་ཁྱིམ་པ་རིག་པར་བྱའོ། །དགེ་སློང་དང་དགེ་སློང་མ་དང༌། དགེ་སློབ་མ་དང༌། དགེ་ཚུལ་དང་དགེ་ཚུལ་མ་དག་ལ་བརྙས་ཐབས་བྱེད་པ་ལ་ཡང་ཕྱིར་འགྱེད་པའི་ལས་བྱ་བ་ཁོ་ན་ཡིན་ནོ། །འདིར་གཞུང་ནི་གླེང་གཞི་དག་ལས། བཙུན་པ་བཅོམ་ལྡན་འདས་ཀྱིས་དགེ་སློང་ཁྱིམ་པ་ལ་བརྙས་ཐབས་བགྱིད་པ་ལ་ཕྱིར་འགྱེད་པའི་ལས་བྱའོ་ཞེས་གསུངས་ན། བཙུན་པ་དགེ་སློང་ལ་བརྙས་ཐབས་བགྱིད་པར་གྱུར་ན་དེ་ཡང་ཕྱིར་འགྱེད་པའི་ལས་བགྱི་འམ། ཉེ་བ་འཁོར་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཁྲོ་བ་ནི་བརྙས་ཐབས་མ་ཡིན་པ་མ་ཡིན་ནོ་ཞེས་བྱ་བ་ནི། འདིར་གཞུང་ཁ་ཅིག་ལས། ཁྲོ་བ་ནི་བརྙས་ཐབས་བྱེད་པ་ཡིན་པས་དེ་ལ་ཡང་ཕྱིར་འགྱེད་པའི་ལས་བྱ་བ་ཡིན་ནོ། །ཁྲོ་བ་ལ་ཡང་འདི་རྣམས་ཀྱི་ཕྱིར་འགྱེད་པར་བྱ་བ་ཉིད་དོ། །ནན་ཏུར་གྱི་ལས་དག་ལ་ཐུན་མོང་བ་མ་ཡིན་པར་དོགས་པར་མི་བྱའོ་ཞེས་བྱ་བ་ལ། འདི་ནི་དགེ་སློང་མ་རྣམས་ཀྱི་ཆོ་ག་མ་ཡིན་ཞེས་བྱ་བའི་དོན་ཏོ། །རབ་ཏུ་བྱུང་ཞིང་བསྙེན་པར་མ་རྫོགས་པ་ལ་ཡང་དེ་དག་བྱ་བ་ཉིད་ཡིན་ནོ་ཞེས་བྱ་བ་ལ། དེ་དག་བྱ་བ་ཉིད་ནི་ནན་ཏུར་གྱི་ལས་དག་དང༌། བསྙིལ་བའི་ཆོ་ག་འདི་ལ་དམིགས་ཀྱིས་བསལ་བར་རིག་པར་བྱའོ། །ཁྱིམ་པ་ལ་མི་བྱའོ་ཞེས་བྱ་བ་
ནི། ཁྱིམ་པ་ལ་ནན་ཏུར་གྱི་ལས་དག་མི་བྱ་བ་སྟེ། དེ་ལ་དགེ་སློང་མི་དབང་བའི་ཕྱིར་རོ། །དགེ་སློང་ལ་ཕམ་པར་འགྱུར་བ་ཡང་དག་པ་མ་ཡིན་བས་སྐུར་པ་དང་གཤེ་བ་དང་སྤྱོ་བ་ལ་ལྷུང་བཟེད་ཁ་སྤུབ་པར་བྱའོ་ཞེས་བྱ་བ་ནི། གསོལ་བ་འབའ་ཞིག་གི་ལས་ཀྱིས་ལྷུང་བཟེད་ཁ་སྤུབ་པར་བྱའོ་ཞེས་བྱ་བར་སྦྱར་རོ། །སུ་ལ་ཁས་སྦུབ་པར་བྱ་ཞེ་ན། དེའི་ཕྱིར་ཡང་དག་པ་མ་ཡིན་པས་སྐུར་པའི་ཁྱིམ་པ་ལའོ་ཞེས་བྱ་བར་སྦྱར་རོ། །སྐུར་པ་འདེབས་པ་པོ་གང་གི་ཕྱིར་ཡིན་ཞེ་ན། དེའི་ཕྱིར་དགེ་སློང་ལ་ཞེས་བྱ་བ་སྨོས་ཏེ། ཆོས་འདི་པའི་རབ་ཏུ་བྱུང་བ་ནི་དཔེ་ཙམ་ཡིན་ནོ། །གང་གིས་སྐུར་པ་བཏབ་པ་ལ་ཞེ་ན། དེའི་ཕྱིར་ཡང་དག་པ་མ་ཡིན་པའི་ཕམ་པར་འགྱུར་བས་སོ་ཞེས་བྱ་བ་སྨོས་ཏེ། འདིར་ཕམ་པའི་སྒྲ་ནི་དཔེ་ཡིན་ཏེ། ཚུལ་ཁྲིམས་ལྷུར་བྱ་བ་ཡིན་ནོ། །ལྟུང་བ་ལྷུར་བྱ་བ་ནི་མ་ཡིན་ནོ། །དེ་ན་རབ་ཏུ་བྱུང་ཞིང་བསྙེན་པར་མ་རྫོགས་པ་ལ་སྐུར་བ་འདེབས་པ་ལ་བྱ་བ་རིགས་པར་གྱུར་པ་ཉིད་དུ་ཤེས་པར་བྱའོ། །ཅི་དེ་ཉིད་ལ་བརྟེན་ནས་སམ་ཞེ་ན། དེའི་ཕྱིར་གཤེ་བ་དང༌། སྤྱོ་བ་ལ་ཞེས་བྱ་བ་སྨོས་ཏེ། ཅི་འབྱུང་བ་དང་མི་འབྱུང་བ་ཁྱད་པར་མ་བྱས་པ་ཉིད་ཀྱི་ཕྱིར་གཉིས་ཀ་ལྟར་ཤེས་པའོ། །འདིར་གཞུང་ནི་ཞུ་བ་ལས་ཆོས་གཉིས་དང་ལྡན་པའི་ཁྱིམ་བདག་ལ་ལྷུང་བཟེད་ཁས་སྦུབ་པར་བྱ་སྟེ། གཉིས་གང་ཞེ་ན། དགེ་སློང་དག་ལ་གཤེ་བ་དང་སྤྱོ་བར་བྱེད་པ་དང༌། དགེ་སློང་དག་པ་ལ་གཞི་མེད་པ་ལ་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པ་ལའོ་ཞེས་གསུངས་པ་ཡིན་ནོ། །ཅི་ཁས་ཕུབ་ཏུ་གཞག་པས་ཁ་དབུབ་པར་བྱ་བའམ། ཇི་སྲིད་དུ་གན་རྐྱལ་དུ་མ་བྱས་པ་དེ་སྲིད་དུ་འདི་ལ་སུས་ཀྱང་ལྷུང་བཟེད་མེད་པར་མི་བྱའོ། །འོན་ཏེ་གཞན་གྱིས་ཤེ་ན། དེའི་རྣམ་པར་གཞག་པས་སོ་ཞེས་བྱ་བ་སྨོས་ཏེ། འདིར་ལྷུང་བཟེད་བཟེད་པར་མི་བྱའོ་ཞེས་བྱ་བ་ཁྲིམས་སུ་བྱ་བ་རྣམ་པར་གཞག་པར་བྱ་བས་ཡིན་གྱི། ལྷུང་བཟེད་ཀྱི་དབྱིབས་སུ་གྲུབ་པས་ནི་མ་ཡིན་ནོ་ཞེས་བྱ་བའི་དོན་ཏོ། །རྣམ་པ་གང་གིས་དེ་རྣམ་པར་གཞག་པར་བྱ་ཞེ་ན། དེའི་ཕྱིར་གསོལ་བས་སོ་ཞེས་བྱ་བ་སྨོས་ཏེ། གསོལ་བ་འབའ་ཞིག་གི་ལས་གྱིའོ། །གང་གི་ཕྱིར་ཁས་སྤུབ་པ་དེའི་དོན་བརྗོད་པར་བྱ་
སྟེ། ལྷུང་བཟེད་ཁས་སྦུབ་བའི་ཁྱིམ་དུ་འགྲོ་བར་མི་བྱའོ། །སྟན་ལ་འདུག་པར་མི་བྱའོ། །སྦྱིན་པར་བྱ་བའི་ཆོས་བཤམས་པ་ལས་ཡོངས་སུ་ལོངས་སྤྱོད་པར་མི་བྱའོ་ཞེས་བྱ་བ་ལ་འདིས་ནི་གཙུག་ལག་ཁང་ཡང་སྤང་བར་ཡང་རིག་པར་བྱའོ། །དེ་ལྟར་ཡང་འདིར་གཞུང་ཁ་ཅིག་ལས་སྦྱིན་པར་བྱ་བའི་ཆོས་སྔར་བཤམས་པ་དག་ཡོངས་སུ་ལོངས་སྤྱད་པར་མི་བྱའོ་ཞེས་གསུངས་པ་ཡིན་ནོ། །བསོད་སྙོམས་བླང་བར་མི་བྱའོ། །ཆོས་བསྟན་པར་མི་བྱའོ། །གང་དུ་ལས་བྱ་བ་དེར་གཏོགས་པ་དག་ལ་ཁས་སྦུབ་པ་ཉིད་ཡིན་ནོ་ཞེས་བྱ་བ་ཡིན་ནོ། །གནས་ཀྱི་གཞི་གང་དུ་ལས་བྱ་བ་དེར་གཏོགས་པའི་ཁྱིམ་བདག་རྣམས་ལ་ལྷུང་བཟེད་ཁས་སྦུབ་པ་ཉིད་ཡིན་ནོ། །འདིར་གཞུང་ནི་དགེ་སློང་གི་ཁྱིམ་བདག་བཞིའི་གནས་བཞི་པོ་དག་ཏུ་ལྷུང་བཟེད་བཞི་ཁས་སྦུབ་པར་འགྱུར་བ་མ་ཆིས་སམ། བཀའ་སྩལ་པ། ཡོད་དེ་ཁྲི་འམ་ཁྲིའུ་འམ་ཤིང་ངམ་རེ་ལྡེས་གནས་བཞི་པོ་དག་གི་མཚམས་དག་མནན་ཏེ་ཁ་སྦུབ་པར་བྱེད་ནའོ་ཞེས་གསུངས་པ་ཡིན་ནོ། །ཐ་ན་གནས་ནས་ཕྱུང་བ་ཕན་ཆད་རང་གི་ཕྱོགས་དང་མཐུན་པའི་མ་ཡིན་པའི་ཁྱིམ་དུ་དེ་མི་འཆགས་སོ་ཞེས་བྱ་བ་ནི་ཐ་ན་གནས་ནས་ཕྱུང་བ་ཕན་ཆད་ཀྱི་སྒྲ་དབྲི་བའོ། །ཐ་ན་གནས་ནས་ཕྱུང་བ་ཕན་ཆད་ཀྱི་སྒྲས་ཕྱོགས་དང་མཐུན་པ་མ་ཡིན་པ་ཚུན་ཆད་ཀྱི་དགེ་སློང་གི་ཡོན་ཏན་བདག་གི་ཁྱིམ་དུ་ལྷུང་བཟེད་ཁས་སྦུབ་པ་དེ་མི་འཆགས་སོ། །འདིར་གཞུང་ནི་དགེ་སློང་ཁས་མ་བླངས་པ་དག་ལ་ཁས་བླངས་པ་དག་གིས་ཁྱིམ་དག་ཏུ་ལྷུང་བཟེད་ཁས་མ་སྦུབ་པར་བརྗོད་པར་བྱའོ། །དེ་བཞིན་དུ་གནས་ནས་ཕྱུང་བ་དག་གིས་རང་བཞིན་དུ་གནས་པ་དག་གི་ཁྱིམ་བདག་རྣམས་ཀྱི་ཁྱིམ་བདག་ཏུ་ལྷུང་བཟེད་ཁས་སྦུབ་པར་བྱེད་ན་ཁས་མ་སྦུབ་པར་བརྗོད་པར་བྱའོ། །དེ་བཞིན་དུ་གནས་པར་མི་བྱ་བ་དག་གིས་ངས་པར་བྱ་བ་དག་གི་ཁྱིམ་བདག་རྣམས་ཀྱི་ཁྱིམ་དག་ཏུ་ལྷུང་བཟེད་ཁས་སྦུབ་པར་བྱེད་ནས་ཁས་མ་སྦུབ་པར་བརྗོད་པར་བྱའོ་ཞེས་གསུངས་པ་ཡིན་ནོ། །དེ་འགའ་ཞིག་གིས་གོ་བར་བྱའོ་ཞེས་བྱ་བ་ནི་ལྷུང་བཟེད་ཁས་སྦུབ་པ་དེ་དགེ་སློང་འགའ་ཞིག་གིས་ཁྱིམ་བདག་དེ་ལ་དགེ་འདུན་གྱིས་ཁྱོད་ལ་ལྷུང་བཟེད་ཁས་
སྦུབ་པོ་ཞེས་གོ་བར་བྱའོ། །བཟོད་པར་གསོལ་བ་དང་ལྡན་ན་གསོལ་བས་བཟློག་པར་བྱའོ་ཞེས་བྱ་བ་ནི་ཁྱིམ་བདག་དེ་བཟོད་པར་གསོལ་བར་བྱེད་ན། དགེ་སློང་དེ་ལ་གསོལ་བ་འབའ་ཞིག་གི་ལས་ཀྱིས་ལྷུང་བཟེད་ཕྱིར་བཟློག་པར་བྱའོ། །བཅབ་པའི་སེམས་མ་སྐྱེས་ན་མཐའ་ལས་ལྡང་བར་འགྱུར་རོ་ཞེས་བྱ་བ་ནི་གང་ལ་བཅབ་པའི་སེམས་གཅིག་ཀྱང་མ་སྐྱེས་ན་དེ་ཕམ་པར་འགྱུར་བའི་ལྟུང་བ་ལས་ལྡང་བར་འགྱུར་བའོ། །ཐབས་གང་གིས་ལྡང་བར་འགྱུར་ཞེ་ན། དེའི་ཕྱིར་བསླབ་པ་སྤྱོད་པས་སོ་ཞེས་བྱ་བ་སྨོས་སོ། །བསླབ་པ་སྤྱོད་པ་དེ་དག་གང་གིས་བསྒྲུབ་པར་བྱ་ཞེ་ན། དེའི་ཕྱིར། དེ་ཐོབ་པས་སོ་ཞེས་བྱ་བ་སྨོས་ཏེ། བསླབ་པ་ལ་སྤྱོད་པ་ཐོབ་པས་བསྒྲུབ་པར་བྱའི་མ་ཐོབ་པས་མ་ཡིན་ནོ། །སུ་ལས་ཐོབ་པ་ཞེ་ན། དེའི་ཕྱིར། དགེ་འདུན་ལས་སོ་ཞེས་བྱ་བ་སྨོས་སོ། །དགེ་འདུན་གྱིས་དེ་ལ་ཇི་ལྟར་སྦྱིན་པར་བྱ་ཞེ་ན། དེའི་ཕྱིར། ལས་ཀྱིས་སྦྱིན་ནོ་ཞེས་བྱ་བ་སྨོས་སོ། །དུས་ཇི་སྲིད་དུ་ཞེ་ན། དེའི་ཕྱིར། ཇི་སྲིད་འཚེ་བའི་བར་དུའོ་ཞེས་བྱ་བ་སྨོས་ཏེ་འདིར་གཞུང་ནི་ཇི་ལྟར་དེ་སྙོམས་པར་ཞུགས་པ་ལ་དེ་ལྟར་དགྲ་བཅོམ་པ་ཉིད་བག་ཡངས་སུ་སྦྱོར་བའོ། །གང་གི་ཚེ་འཁྲུལ་པའི་རྒྱུ་ཟད་ནས་བསྙེན་པར་རྫོགས་པ་ལ་དེའི་ཚེ་ན་ནི་བསླབ་པ་སྦྱིན་པ་ཞེས་མི་བྱ་སྟེ། བསྙེན་པར་རྫོགས་པ་སྔོན་དུ་འགྲོ་བའི་ངོ་བོ་ཞེས་བྱ་བའོ། །འདིར་གཞུང་ནི་ཕྲན་ཚེགས་དག་ལས་འདི་དང་པོར་བྱ་བ་སྟེ་མཐར་སོང་བ་ཞེས་བྱ་བའི་བར་དུ་གསུངས་པ་ཡིན་ནོ། །ངོ་ཚ་དང་ལྡན་པ་དང༌། མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་དང༌། ཤེས་པས་ནི་གཅིག་གི་མདུན་དུ་བཤགས་པས། དགེ་འདུན་ལྷག་མ་ལས་བདག་གོ་ཞེས་བྱ་བ་ལ་འདིས་སྤོ་བར་བྱ་བ་དང་མགུ་བར་བྱ་བ་དག་ལ་རྩོམ་པ་མི་དགོས་པ་ཉིད་ཅེས་བྱ་བ་ཤེས་པར་བྱའོ། བསམ་པས་ལྟུང་བ་ལས་ལྡང་གི་ཚད་པའི་ལས་ཀྱིས་ནི་མ་ཡིན་ནོ་ཞེས་བྱ་བ་ནི་བསམ་པའི་ཁྱད་པར་སྐྱེད་པའི་ཕྱིར་ཆད་པའི་ལས་བྱ་བ་ཡིན་ནོ། །དེ་བས་ན་འདིར་ཆད་པའི་ལས་མེད་པར་བསམ་པའི་ཁྱད་པར་གནས་པ་ཡོད་ན་འདི་དོན་མེད་པར་བྱེད་པ་ཉིད་དོ། །འདིར་གཞུང་ནི་སིལ་བུ་
དག་ལས། དེ་ལྟ་བས་ན་གང་དག་རྣམ་པ་དེ་ལྟ་བུར་རང་བཞིན་གྱིས་ངོ་ཚ་ཤེས་པ་དང་ལྡན་པ་དེ་དག་གིས་ནི་གཅིག་གི་མདུན་དུ་བཤགས་པར་རྗེས་སུ་གནང་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ལྟུང་བ་མིང་དང་རིགས་དང་ལྡན་པར་བརྗོད་པར་བྱའོ་ཞེས་གང་ཞིག་གསུངས་པ་དེ་ལ། འདིར་མིང་ནི་རྣམ་པ་ཇི་ལྟ་བུ་ཞིག་ཡིན། རིགས་ནི་རྣམ་པ་ཇི་ལྟ་བུ་ཞིག་ཡིན་པར་ཤེས་པར་བྱ་ཞེ་ན་དེའི་ཕྱིར། འདིར་མིང་ནི་ལྟུང་བྱེད་ཀྱི་སྡེ་ཚན་ལས་མིང་ངོ༌། །བྱུང་བ་ནི་རིགས་སོ་ཞེས་བྱ་བ་སྨོས་ཏེ། འདིར་ལྟུང་བ་ལས་ལྡང་བ་ལ་སྡེ་ཚན་ལ་བརྟེན་ནས་མིང་དུ་གྲགས་བ་གང་ཡིན་པ་དེ་ནི་མིང་དུ་ཤེས་པར་བྱའོ། །དེ་བས་ན་ཕམ་པར་འགྱུར་བ་དང་དགེ་སློང་ལྷག་མར་ཞེས་བྱ་བ་ལ་ སོགས་པས་སོ། །བསམས་བཞིན་དུ་ཁུ་བ་འབྱིན་པ ་ལ་ སོགས་པ ་བྱུང་བ་གང་ཡིན་པ་དེ་ནི་རིགས་ཡིན་པར་ཤེས་པར་བྱའོ། །འདིར་གཞུང་ནི་བཙུན་པ་ལྟུང་བ་རྣམས་ཀྱི་མིང་ཞེས་བགྱི། རིགས་ཞེས་ཀྱང་བགྱི་ན། བཙུན་པ་མིང་གང་ལགས། རིགས་ནི་གང་ལགས། ཉེ་བ་འཁོར་ཕམ་པར་འགྱུར་བ་ཞེས་བྱ་བ་ནི་མིང་ངོ༌། །བྱུང་བ་ནི་རིགས་སོ། །དགེ་འདུན་ལྷག་མ་ཞེས་བྱ་བ་ནི་མིང་ངོ༌། །ལྟུང་བྱེད་དང་སོ་སོར་བཤགས་པར་བྱ་བ་དང༌། ཉེས་བྱས་ཞེས་བྱ་བ་ནི་མིང་ངོ༌། །བྱུང་བ་ནི་རིགས་སོ་ཞེས་གསུངས་པ་ཡིན་ནོ། །འདི་ནི་གླེང་གཞི་དག་ལས་ཀོའུ་ཤཱམྦཱི་དང༌། དམར་སེར་ཅན་གྱི་གཞི་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་གཞན་དུ་བྱས་ཏེ། ཕྱིར་བཅོས་པར་བྱ་བའི་གང་ཟག་གི་བྱེ་བྲག་ཐམས་ཅད་བསྟན་པའི་ཕྱིར། འཐབ་ཀྲོལ་བྱེད་ པ་ལ་སོགས ་པའི་གང་ཟག་གང་ཇི་སྙེད་ཕྱིར་བཅོས་པར་བྱ་བ་དེ་དག་ཐམས་ཅད་དེ་གཉིས་ཀྱིས་ཕྱིར་བཅོས་པར་བྱ་བ་གསུངས་པས་དེའི་ཕྱིར་དོན་དང་མཐུན་པར་མིང་བསྟན་པར་བྱ་བའི་ཕྱིར་དེ་གཉིས་ལ་ཕྱིར་བཅོས་པའི་གཞི་ཞེས་བྱ་བའི་མིང་དུ་གཞན་དུ་བྱ་སྟེ་དེས་ན་མིང་བརྗོད་པ་ཁོ་ནས་བརྔ་ཕྲད་སླ་བར་འགྱུར་རོ་ཞེས་བྱ་བར་ཤེས་པར་བྱའོ། །ཕྱིར་བཅོས་པའི་གཞི་ཞ་བ་ལ་སོགས་པའི་སྐབས་སོ། །ཕྱིར་བཅོས་པའི་གཞི་རྫོགས་སོ།། །།འདི་ལ་དགེ་འདུན་ལྷག་
མར་མི་ཤེས་པ་ཉིད་དང༌། བཅབ་པའི་སེམས་མ་བཞག་པས་བརྗེད་པ་དང༌། བྱས་སམ་མ་བྱས་ཅི་ཞིག་ཇི་ལྟ་བུ་ཞིག་ཅེས་དྲན་པར་མི་ནུས་པ་ཉིད་དང༌། བསྙེན་པར་མ་རྫོགས་པ་ཉིད་དང༌། གནས་ནས་ཕྱུང་བ་ཉིད་ལ་འཆབ་པ་མི་འབྱུང་ངོ་ཞེས་བྱ་བ་ནི་འཆབ་པའི་ཉེས་པ་མི་འབྱུང་ངོ་ཞེས་བྱ་བར་སྦྱར་རོ། །གང་གི་ཕྱིར་ཤེས་ཏེ་སྦས་ན་ནི་འཆབ་པར་འགྱུར་རོ། །བཅབ་པའི་སེམས་མ་བཞག་པས་བརྗོད་པ་ཞེས་བྱ་བ་ནི་སྔར་ཤེས་པའི་དོན་དེ་ཉིད་དགོས་པ་མེད་པར་བརྗོད་པ་སྟེ་མི་ཤེས་པའོ། །གང་གིས་བསམ་པའི་སེམས་མ་བཞག་པས་ནི་མངོན་པར་བརྟེན་པའོ། །བསམ་པས་ཞུགས་པས་གཞག་པར་བྱ་བ་དེ་ལ་དེ་སྐྱེ་བར་འགྱུར་རོ། །འཆབ་པ་དེ་ལ་མི་སྐྱེད་པ་མ་ཡིན་ནོ། །དེ་བས་ན་མ་བཞག་ པ་ལ་སོགས ་པའི་བྱེ་བྲག་བྱས་པའོ། །མི་སྣང་བ་མ་བརྗེད་པ་ཡོད་པར་གྱུར་ན་དེ་ལྟར་བཅབ་པའི་སེམས་མ་བཞག་པས་བརྗེད་པ་དེ་ལ་ཡང་འཆབ་པ་མི་འབྱུང་ངོ༌། །མི་ནུས་པ་ཉིད་ཅེས་བྱ་བ་ནི་དྲན་པའི་ཕྱིར་བར་དུ་ཆོད་པའི་ཆོས་ཅན་སྐྱོན་དང་བཅས་པ་བརྗེད་ངས་པ་དེ་བརྗོད་པའོ། །ཇི་ལྟ་བུའི་སྐྱོན་དང་བཅས་པ་བརྗེད་ངས་པ་མི་སྐྱེད་པ་དེ་བཞིན་དུ་འཆབ་པ་ལའོ། །བྱས་སམ་མ་བྱས་ཞེས་འཇུག་པར་རྟོགས་པ་ནི་སྐྱོན་དང་བཅས་པར་བརྗོད་པའོ། །ཇི་སྲིད་ཅིག་ཅེས་བྱ་བ་ནི་དབྱར་གནས་པ་ཉིད་ཀྱིས་ཡིད་ལ་ཉེ་བར་གནས་པ་ལའོ། །ཇི་ལྟ་བུ་ཞིག་ཅེས་བྱ་བ་ནི་སྤྱིར་ཡིད་ཀྱི་ངོ་བོ་ཀུན་ནས་སློང་བས་བསམས་བཞིན་དུ་གྱུར་པ་ལ་དེ་བཟློག་པར་བྱ་བའི་དོན་དུའོ། །བསྙེན་པར་རྫོགས་པ་ཉིད་ལྟུང་བ་དང་ལྡན་པ་ལ་འཆབ་པ་མི་འབྱུང་བ་ཉིད་དོ། །ཐ་སྙད་དུ་བྱ་བའི་འདུ་ཤེས་ལས་ཉམས་པ་ཉིད་ལ་ནི་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་ཞེས་བྱ་བ་ནི་སྨྱོན་པ་དང་སེམས་འཁྲུགས་ པ་ལ་སོགས ་པའི་ཐ་སྙད་དུ་རུང་བའི་འདུ་ཤེས་ཉམས་པ་ཉིད་ལ་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་བའོ། །མན་ཆད་ཅེས་སྨོས་པས་ནི་ལྟུང་བ་ཐམས་ཅད་ནི་མི་འབྱུང་བར་བསྟན་ཏོ། །ཡང་ཞེས་བྱ་བའི་སྒྲས་ནི་འཆབ་པ་ཡང་མི་འབྱུང་ངོ་ཞེས་བྱ་བའི་རྗེས་བསྟན་ཏོ། །འདིར་ཕམ་པར་འགྱུར་བ་མན་ཆད་ཀྱི་ཞེས་
བྱ་བ་ལ། འདིར་མན་ཆད་ཀྱི་སྒྲས་ནི་མངོན་པར་ཁྱབ་པའི་དོན་དུའོ། །ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་ཞེས་བྱ་བ་ནི་ལྟུང་བ་ཐམས་ཅད་མི་འབྱུང་བར་བསྟན་ཏོ་ཞེས་བྱ་བའི་དོན་ཏོ། །མ་བཅས་པ་ཉིད་ལ་ཡང་ངོ་ཞེས་བྱ་བ་ནི་དེ་ཕམ་པར་འགྱུར་བ་མན་ཆད་ཀྱི་ལྟུང་བ་ཡང་མི་འབྱུང་ངོ་ཞེས་བྱ་བའི་རྗེས་སུ་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདིར་གཞུང་ནི་ལས་དང་པོ་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །མི་ཤེས་པ་ཉིད་ལ་ནི་མ་ཡིན་ནོ་ཞེས་བྱ་བ་ནི་འདི་ལྟུང་བ་ཡིན་ནོ་ཞེས་བྱ་བ་མི་ཤེས་པ་ཉིད་ལ་ནི་ལྟུང་བ་མི་འབྱུང་བ་མ་ཡིན་ཏེ་འབྱུང་བ་ཁོ་ན་ཡིན་པའོ། །འདིར་གཞུང་ནི་ཚེ་དང་ལྡན་པ་དེ་མི་ཤེས་པས་ནི་མི་གྲོལ་ཏེ། དེ་ལྟུང་བ་གང་བྱུང་བ་དེ་ཆོས་བཞིན་དུ་བྱེད་དུ་གཞུག་གི་སྟེང་དུ་ཞེས་གསུངས་པ་དེ་འདིས་བསྡུས་པ་ཡིན་ནོ། །མངོན་པར་ཡིད་མི་ཆེས་པ་ཉིད་ལ་ཡང་ངོ་ཞེས་བྱ་བ་ཡང་མི་འབྱུང་བ་མ་ཡིན་ནོ་ཞེས་བྱ་བར་སྦྱར་རོ། །འདོན་པ་དང་བརྗོད་པ་དག་ཐོས་པ་དང་འདི་ལྟུང་བ་ཡིན་ནོ་ཞེས་བྱ་བ་མངོན་པར་ཡིད་མི་ཆེས་པ་ཉིད་ལ་ཡང་ལྟུང་བ་འབྱུང་བ་ཁོ་ནར་འགྱུར་རོ། །མངོན་པར་མི་ཤེས་པ་ཉིད་དུ་འདུ་ཤེས་པ་ལ་ཡང་ངོ་ཞེས་བྱ་བ་ཡང་མི་འབྱུང་བ་མ་ཡིན་ནོ་ཞེས་བྱ་བར་སྦྱར་ཏེ། འདོན་པར་བྱེད་པ་དང་རྗོད་པར་བྱེད་པ་ལ་འདི་བྱིས་པ་ཡིན་པས་ཅུང་ཟད་ཀྱང་སྨྲ་བ་མ་ཡིན་ནོ་ཞེས་དེའི་ཚིག་དག་ལ་མི་གུས་ཤིང་མངོན་པར་མི་ཤེས་པ་ཉིད་དུ་འདུ་ཤེས་པས་ལྟུང་བ་ལ་ཡང་མངོན་པར་ཡིད་མི་ཆེད་པ་ཉིད་ལ་ཡང་ལྟུང་བ་ཁོ་ནར་འགྱུར་ཏེ། དེ་དག་ནི་ལྟུང་བ་མི་འབྱུང་བའི་རྒྱུ་མ་ཡིན་ནོ་ཞེས་བྱ་བའི་དོན་ཏོ། །འདིར་གཞུང་ནི་ཀུན་ཤེས་པར་འདོད་པའི་དགེ་སློང་གིས་ཀྱང་བསླབ་པ་འདི་ལ་བསླབ་པར་བྱའོ་ཞེས་གསུངས་པ་ཡིན་ནོ། །ས་གཞན་ན་གནས་པ་ཉིད་ལ་ནི་སྔ་མ་ཡང་ངོ་ཞེས་བྱ་བ་ནི་སྔོ་བ་དང་མགུ་བ་དང་བ་སྡིགས་པ་དང་སྨད་པ་དང་བསྐྲད་པ་དང་ཕྱིར་འགྱེད་པ་དང༌། བསླབ་པ་བྱིན་པས་ས་གཞན་ན་གནས་པ་ཉིད་ལ་ནི་སྔ་མ་ཞེས་བྱ་བ་ལྟུང་བ་འབྱུང་བ་ཁོ་ནར་མ་ཟད་སྔ་མ་འཆབ་པ་ཞེས་བྱ་བ་ཡང་མི་འབྱུང་བ་མ་ཡིན་ཏེ་འབྱུང་བ་ཁོ་ན་ཡིན་པའོ། །དེ་ལ་འཆབ་པ་དང་ལྟུང་བ་
གཉིས་ཀ་འབྱུང་ངོ་ཞེས་བྱ་བའི་དོན་ཏོ། །འཆབ་པ་ལ་དགེ་འདུན་ལྷག་མ་ཉིད་ལ་ཡིད་གཉིས་ཟ་བ་ནི་ཤེས་པ་པོ་དང་འདྲའོ་ཞེས་བྱ་བ་ནི་ཡིད་གཉིས་ནི་འདུ་ཤེས་དང་འདྲའོ་ཞེས་བྱ་བར་སྦྱར་ཏེ། འཆབ་པའི་ཡུལ་ལ་དགེ་འདུན་ལྷག་མ་ལ་ཡིད་གཉིས་ཟ་བཞིན་དུ་བཅབས་ན་དགེ་འདུན་ལྟག་མ་ཤེས་བཞིན་དུ་བཅབས་པ་དང་འདྲ་སྟེ་བཅབས་པའི་ཉེས་པར་འགྱུར་རོ་ཞེས་བྱ་བའི་དོན་ཏོ། །ས་གང་ལ་འཆབ་པ་མི་འབྱུང་བ་དེ་ལ་སྤྱད་པ་ཡང་ངོ་ཞེས་བྱ་བ་ནི་བསྙེན་པར་མ་རྫོགས་པ་དང་གནས་ནས་ཕྱུང་བ་དང་ཐ་སྙད་དུ་རུང་བའི་འདུ་ཤེས་ཉམས་པ་ཞེས་སྨོས་པ་དེ་དག་ནི་འདིར་ས་ཞེས་བྱ་བའི་སྒྲར་བརྗོད་དོ། །དེ་དག་ཇི་ལྟར་འཆབ་པ་འབྱུང་བའི་ཞིང་མ་ཡིན་པ་དེ་བཞིན་དུ་ཡོངས་སུ་གནས་པ་ལ་ སོགས་པ ་སྤྱད་པའི་ཞིང་མ་ཡིན་པའོ། །དེ་བཞིན་དུ་མ་བཅབས་པ་ལ་ཡང་ཇི་ལྟར་འདིར་འཆབ་པ་མི་འབྱུང་བ་དེ་ལྟར་གནས་ནས་སྤོ་བ་ལ་ སོགས་པ ་སྤྱོད་པ་ལ་ཡང་དེ་ལྟ་བས་ན་འདི་བསྟན་པའོ། །མ་གུས་པས་སྤྱོད་པ་གཏོང་ན་ཉས་བྱས་སོ་ཞེས་བྱ་བ་ནི་ཡོངས་སུ་གནས་པ་དང་མགུ་བ་སྤྱོད་པ་མ་གུས་པས་གཏོང་ན་ཉེས་བྱས་སུ་འགྱུར་རོ། །འཐབ་ཀྲོལ་བྱེད་པ་འོང་བས་འཇིགས་པས་གཏོང་བ་ལ་ནི་ཉེས་པ་མེད་དོ། །དེ་ལ་དེའི་སྡེ་པ་ལྷག་པར་སྤྱོད་པ་ཡང་ངོ་ཞེས་བྱ་བ་དེ་ལ་ཞས་བྱ་བ་ནི་སྤོ་མགུ་བྱེད་པ་དེ་ལའོ། །དེའི་སྡེ་བ་ཞེས་བྱ་བ་གང་གི་སྡེ་ཚན་སྤྱོད་པ་དེ་ནི་དེའི་སྡེ་པའོ། །ཡོངས་སུ་གནས་པ་དང་མགུ་བ་སྤྱོད་པའི་གནས་སྐབས་དེ་ལ་དེའི་སྡེ་པ་ཞེས་བྱ་བ་དགེ་འདུན་ལྷག་མའི་སྡེ་ཚན་དུ་གཏོགས་པའི་དངོས་གཞི་འམ་ཉེས་པ་སྦོམ་པོ་འམ་ཉེས་བྱས་ལྷག་པར་སྤྱོད་ན་ཡང་ཉེས་བྱས་སུ་འགྱུར་རོ་ཞེས་བྱ་བའི་དོན་ཏོ། །ཡོད་ལ་ཕྱིར་མི་འཆོས་ན་ཡང་ངོ་ཞེས་བྱ་བ་ནི་ལེན་པར་བྱེད་པ་ཡོད་ པ་ལ་སོགས ་པས་ཕྱིར་བཅོས་པའི་ཐབས་ཡོད་པ་ལ་སྤོ་བ་དང་ལྟུང་བ་ཕྱིར་མི་འཆོས་ན་སྐྱ་རེངས་རེར་ཞིང་ཉེས་བྱས་རེ་རེར་འགྱུར་བའོ། །མི་སྤྱོད་པའི་ས་ནས་ཕྱིར་འོངས་པ་ནི་དེའི་གནས་སྐབས་ཉིད་ཡིན་ནོ་ཞེས་བྱ་བ་ནི་གནས་སྐབས་གང་ལ་སྤོ་བ་ལ་ སོགས་པའི་སྤྱོད་པའི་ས་བསྙེན་པར་མ་རྫོགས་པ ་ལ་ སོགས་པ ་ཐོབ་པ་དེའི་ཕྱིར་འཆོས་པ་ལ་སྤོ་བ་དང་མགུ་བ་མི་སྤྱོད་
པའི་སར་སོང་ནས་སྤྱོད་པའི་ས་སྒྲུབ་པ་ལ་ལྟུང་བ་དང་བཅས་པའི་གནས་སྐབས་ཉིད་ཡིན་ནོ་ཞེས་བྱ་བའི་དོན་ཏོ། །སྦྱངས་པའི་གཞི་ལ་ལྷག་མ་རྗེས་སུ་བསྒྲུབ་པོ་ཞེས་བྱ་བ་ནི་བདག་ལ་ལྟུང་བའི་མིང་ནི་འདི་བྱུང་རིགས་ནི་འདི་བྱུང་དུས་ཇི་སྲིད་ཅིག་ཏུ་བཅབས་པ་འམ་མ་བཅབས་པ་དེའི་ཕྱིར་བདག་གིས་སྤྱད་པ་འདི་བླངས་ཏེ་འདི་ཇི་སྲིད་ཅིག་ནི་སྤྱད་ཟིན་ཏོ། །ལྷག་མ་ནི་ཇི་སྲིད་ལུས་སོ་ཞེས་སྤྱད་པ་གང་ལ་ཀུན་དུ་སྤྱད་པ་དེ་བརྟེན་པར་བྱ་བའི་དགེ་འདུན་ལ་དེ་གོ་བས་སྦྱངས་པའི་གཞི་ལ་ལྷག་མ་མ་སྤྱད་པ་ཅི་ཡོད་པ་བསྒྲུབ་པར་བྱ་སྟེ། དེ་ལ་ལྷག་མ་གང་ཡོད་པ་དེ་སྤྱད་པར་བྱའོ་ཞེས་བྱ་བའི་དོན་ཏོ། །འདིར་གཞུང་ནི་ཡོངས་སུ་གནས་པར་བྱེད་པའི་གང་ཟག་གིས་གཞི་ཇི་ཙམ་སྦྱངས་ན་རྣམ་པར་འཁྱམས་ཏེ། ཡང་ཕྱིར་འོངས་ནས་བསྙེན་པར་རྫོགས་ན་འདུལ་བ་དང་འགལ་བའི་བཅས་པའི་ཁ་ན་མ་ཐོ་བའི་ཉེས་བྱས་བཤགས་ཏེ། ཡོངས་སུ་གནས་པ་ལ་ཡོངས་སུ་གནས་པར་གྱུར་ན། ཡོངས་སུ་གནས་པ་ལ་ཡོངས་སུ་གནས་པར་འགྱུར་རོ་ཞེས་གསུངས་པ་ཡིན་ནོ། །བཅབས་པའི་དུས་ངེས་པར་མི་ཤེས་ན་ཉུང་བ་ཉིད་དུ་མི་འགྱུར་བ་ལ་བརྟེན་པར་བྱའོ་ཞེས་བྱ་བ་ནི་ལྟུང་བ་གང་ལ་བཅབས་པའི་དུས་ངེས་པ་ཉིད་དུ་མི་ཤེས་ཏེ། བདག་གིས་ལྟུང་བ་དེ་དུས་འདི་སྲིད་དུ་བཅབས་པ་ཞེས་བྱ་བར་བཅབས་པའི་དུས་ངེས་པར་མི་ཤེས་པ་དེ་ལ་ཅི་ནས་ཀྱང་ཉུང་བ་ཉིད་དུ་མི་འགྱུར་བའི་དུས་དེ་སྲིད་ཅིག་ལ་བརྟེན་པར་བྱ་སྟེ། གང་དུ་ཉུང་བའི་དུས་མི་འགྱུར་བའི་དུས་དེ་སྲིད་དུའོ། །སྤྱད་པར་བྱ་བ་ཉིད་ལ་དག་པའི་མཐའ་ཅན་ཉིད་ཀྱི་བྱེ་བྲག་གིའོ་ཞེས་བྱ་བ་ནི་ཡུལ་དེ་ལ་ཉུང་བ་ཉིད་དུ་མི་འགྱུར་བའི་དུས་དེ་ལྟ་བུ་ལ་བརྟེན་པར་བྱའོ་ཞེས་བྱ་བར་སྦྱར་རོ། །འདིར་དུས་དེར་དོན་གཉིས་ལ་བརྟེན་ཏེ་བཅབས་པ་དང་སྤྱད་པར་བྱ་བ་ཉིད་ལའོ། །སྤྱད་པར་བྱ་བ་ཉིད་ཅེས་བྱ་བ་ནི་དུས་འདི་སྲིད་དུ་ཡོངས་སུ་གནས་པར་བྱ་བ་ཞེས་བྱའོ། །དེ་ལ་བཅབས་པ་ལ་ནི་ཡོངས་སུ་གནས་པ་དང་མགུ་བར་བྱ་བ་གཉིས་ཀའི་དུས་ལ་བརྟེན་པའོ། །སྤྱད་པར་བྱ་བ་ཉིད་ལ་ནི་ཡོངས་སུ་གནས་པའི་དུས་འབའ་ཞིག་ལ་བརྟེན་པའི་མགུ་བར་བྱ་བའི་དུས་ལ་ནི་མི་བརྟེན་ཏེ་འདི་ལྟར་
དུས་ངེས་པ་ཉིད་ཡིན་པའི་ཕྱིར་རོ། །ཇི་ལྟར་ཉུང་བ་ཉིད་ཀྱི་མི་འགྱུར་བ་དག་པའི་མཐའ་ཅན་གྱི་བྱེ་བྲག་གི་དུས་བརྟེན་པར་བྱའམ་ཞེ་ན། དེའི་ཕྱིར་དག་པའི་མཐའ་ཅན་ཟླ་བ་བཞི་ལའོ་ཞེས་བྱ་བ་སྨོས་ཏེ། ཟླ་བ་བཞི་ལ་ སོགས་པ ་ཇི་ལྟར་ཉུང་བ་ཉིད་དུ་མི་འགྱུར་བའི་ཚིག་གི་དུས་ལ་བརྟེན་ནས་ལྷག་མ་དང་བཅས་པ་ལ་དེ་བརྟེན་པ་སྟེ། དེ་ཙམ་དུ་སྤྱོད་པར་བྱ་བའི་དུས་དེ་ཁོ་ནར་ངེས་པར་འཆབ་པའི་དུས་སྤྱོད་པར་འགྱུར་རོ་སྙམ་དུ་དོན་གྲུབ་པ་ལ་མངོན་པར་བརྟེན་ནས་ཡིད་ཀྱིས་བརྟེན་པར་བྱ་བ་ཙམ་ལ་ནི་མ་ཡིན་ནོ་ཞེས་བྱ་བར་གོ་བར་བྱ་བའི་དོན་དུ་དག་པའི་མཐའ་ཅན་ཞེས་བྱ་བ་འོག་ནས་བརྗོད་པར་བྱའོ། །འདིར་དག་པའི་མཐའ་ཅན་གྱི་དོན་ནི་ཚིག་གི་དོན་འདིས་སྤོ་བ་འདི་ལ་ཡོད་པས་ན་དག་པའི་མཐའ་ཅན་ནོ། །དེ་ཡོད་པས་དག་པའི་མཐའ་སྟེ། ཇི་ལྟར་ཁྱོད་ལ་འདི་སྦྱིན་བ་དང་བླང་བ་ཞེས་བྱ་བའི་དོན་ཏོ། །འོ་ན་བཅབས་པའི་དུས་ངེས་པར་མི་ཤེས་པས་ཉུང་བ་ཉིད་དུ་མི་རུང་བའི་དུས་ལ་བརྟེན་པར་གང་གསུངས་པ་དེ་ལ་ནི་ཉུང་བ་ཉིད་དུ་མི་འགྱུར་བའི་དུས་ཡོངས་སུ་ཆད་པ་ཞིག་ལ་བརྟེན་པར་བྱ་བ་འམ་ཞེ་ན་མ་ཡིན་ཏེ། དེའི་ཕྱིར་བཅབས་པ་ནི་དཔག་ཏུ་མེད་པ་ལའོ་ཞེས་བྱ་བ་སྨོས་ཏེ་བརྟེན་པར་བྱའོ་ཞེས་བྱ་བར་སྦྱར་རོ། །ཇི་ལྟར་ཞེ་ན། དེའི་ཕྱིར་བསམས་བཞིན་དུ་ཁུ་བ་ཕྱུང་བ་ལས་བྱུང་བ་དཔག་ཏུ་མེད་པར་ཞེས་སོ་ཞེས་བྱ་བ་སྨོས་ཏེ། དུས་བཅབས་པ་གོ་བར་བྱའི་དོན་དུ་འདིར་ཡང་དག་པར་འབྱུང་བ་བརྗོད་པའི་འོག་ཏུ་དུས་དཔག་ཏུ་མེད་པར་བཅབས་པ་ཞེས་བྱ་བར་སྦྱར་ཏེ། ཟླ་བ་བཞི་བཅབས་པས་ནི་མ་ཡིན་ཞེས་བྱ་བའི་དོན་ནོ། །འདི་སྐད་བརྗོད་པ་ན་བདེན་པ་བརྗོད་པར་མི་འགྱུར་ཏེ། འདི་ལ་ཇི་སྙེད་ལ་སེམས་པ་དེ་སྙེད་དུ་གཏོགས་པ་ཉིད་རྗེས་སུ་བསྒྲུབ་པོ་ཞེས་བྱ་བ་འདི་ལ་ཞེས་བྱ་བ་ནི་ཡོངས་སུ་གནས་པ་དང་མགུ་བར་བྱ་བ་དག་ལའོ། །འདི་ལ་ལྟུང་བ་ཇི་སྙེད་པ་ཕྱིར་བཅོས་པར་སེམས་པ་དེ་སྙེད་དུ་གཏོགས་བ་ཉིད་ཅེས་སུ་བསྒྲུབ་པར་བྱ་སྟེ། ལྟུང་བ་མང་པོ་དག་ལ་ཡང་ཡོངས་སུ་གནས་པ་དང་མགུ་བར་བྱ་བ་གཅིག་རྗེས་སུ་བསྒྲུབ་པར་བྱ་བ་ཉིད་ཀྱིས་ཆོག་གོ་ཞེས་བསྟན་པའོ། །ཚད་ནི་རྣམ་པ་གཉིས་ཏེ་ལྟུང་བའི་ཚད་དང་མཚན་མོའི་ཚད་དོ། །དེ་ལ་མཚན་མོའི་མཚན་ངེས་པར་མི་
ཤེས་པའི་ཆོ་ག་ནི་བསྟན་ཟིན་ཏོ།། །།ལྟུང་བའི་ཚད་ངེས་པར་མི་ཤས་པའི་ཆོ་ག་བསྟན་པར་བྱ་སྟེ། ངེས་པར་མི་ཤེས་ན་དེ་དཔག་ཏུ་མེད་པ་ལ་བརྟེན་པར་བྱའོ་ཞེས་བྱ་བ་ལ། དེ་ཞེས་བྱ་བ་ནི་དཔེ་ཙམ་ཡོད་པ་ལའོ། །ལྟུང་བའི་ཚད་ངེས་པར་མི་ཤེས་ན་ལྟུང་བ་དེ་དཔག་ཏུ་མེད་པ་བྱུང་ངོ་ཞེས་བྱ་བ་དེ་ལ་བརྟེན་པར་བྱ་སྟེ། ཕྱིར་བཅོས་པར་བྱ་བ་འདྲ་བའི་ཕྱིར་དེ་ལྟར་ཤེས་པར་བྱའོ། །མང་པོ་ཉིད་ལ་ནི་ཚད་ཤིན་ཏུ་མང་པོ་དང་ལྡན་པ་ཞེས་སོ་ཞེས་བྱ་བ་ནི་ལྟུང་བ་དག་མང་པོ་ཡིན་ན་ཆེ་གེ་མོ་ལས་བྱུང་བའི་དགེ་འདུན་ལྷག་མའི་ཚད་ལྟུང་བ་ཤིན་ཏུ་མང་པོ་དང་ལྡན་པ་བྱུང་བ་ལ་བརྟེན་པར་བྱའོ་ཞེས་བྱ་བའི་དོན་ཏོ། །དུས་རྣམས་ནི་ལྷག་པས་སོ་ཞེས་བྱ་བ་ནི་ལྟུང་བ་དང་བཅས་པའི་དུས་ཐ་དད་པ་རྣམས་དང་ལྷན་ཅིག་ཏུ་ཡོངས་སུ་གནས་པ་དང༌། མགུ་བར་བྱ་བ་སྦྱིན་པ་དེའི་ཚེ་ན་ལྟུང་བ་གཞན་དག་གི་དུས་ཡུན་རིང་ཞིང་ལྷག་པ་དེ་ལ་བརྟེན་པར་བྱའོ། །མིང་དག་ལ་ནི་ སོགས་པ ་དང་ལྡན་པ་ཉིད་དུའོ་ཞེས་བྱ་བ་ནི་བསམས་བཞིན་དུ་ཁུ་བ་ཕྱུང་བ་ལས་བྱུང་བ་ལ་ སོགས་པ ་ནི་འདིར་མིང་དུ་གསུངས་བར་རིག་པར་བྱ་བ་སྟེ་གལ་ཏེ་སྡེ་ཚན་གྱི་མིང་དེ་དག་ལ་ནི་ སོགས་པ ་དང་ལྡན་པ་ཉིད་དུ་བརྟེན་པར་བྱའོ། །གང་རྣམས་ཀྱིས་དེ་དང་པོ་ཞེས་བྱ་བ་དོན་དེས་ལྟུང་བ་གཞན་དག་གི་མིང་བརྗོད་པ་ལ་བརྟེན་པར་བྱའོ་ཞེས་བྱ་བའི་དོན་ཏོ། །ཅི་བྱེ་བྲག་མེད་པར་དང་པོ་གང་ཡིན་པ་ཉིད་ལ་བརྟེན་པར་བྱ་བ་འམ་ཞེ་ན། དེའི་ཕྱིར་ལྕི་བ་ཉིད་དང་བསམ་པ་དྲག་པོས་བྱས་པ་ཉིད་དག་གིས་དང་པོ་ཉིད་དུའོ་ཞེས་བྱ་བ་སྨོས་ཏེ། འདིར་ལྕི་བ་ཉིད་ཅེས་བྱ་བ་ནི་གཞི་ལས་ལྟུང་བ་གང་ལས་དངོས་པོ་ལས་ལྟུང་བ་དུ་མ་ཡོད་པར་འགྱུར་བ་ལ་ལྟུང་བ་ལྕི་བ་ཉིད་དང༌། བསམ་པ་དྲག་པོས་བྱས་པ་ཉིད་ནི་དེ་ལ་དང་པོ་ཉིད་ཀྱང་ལྟུང་བའི་ཕྱིར་བཅོས་པ་ཉིད་དང་ཕྱིར་བརྟེན་པར་བྱ་བ་ཉིད་དོ། །འདིར་གཞུང་ནི་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་བ་དགེ་སློང་ལ་དགེ་འདུན་ལྷག་མའི་ལྟུང་བ་བྱུང་ཞིང་བསམས་བཞིན་དུ་ཁུ་བ་ཕྱུང་བ་ལས་བྱུང་བ་ནི་དགུང་གཅིག་བཅབས་ལ་འཛིན་པ་ལས་འབྱུང་བ་དགུང་གཉིས་བཅབས་པ་ནས་བཀའ་བློ་མི་བདེ་བ་བྱུང་བ་དགུང་
བཅུ་གསུམ་བཅབས་པའི་བར་དུ་བྱུང་ན། བཙུན་བ་དེ་དག་དུས་གཅིག་དང་སྐད་ཅིག་ལ་ལས་བགྱིད་པ་གཅིག་གི་ཡོངས་སུ་གནས་པ་དང༌། གཞི་ནས་ཡོངས་སུ་གནས་པ་དང་མགུ་བར་བགྱི་བ་དང༌། གཞི་ནས་མགུ་བར་བགྱི་བ་སྩལ་ཅིང་དབྱུང་བར་བགྱི་བ་དང༌། ལས་དེ་དག་བརྗོད་པར་བགྱི་བར་བརྗོད་པ་དང་དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་བར་རུང་ངམ། ཉེ་བ་འཁོར་རུང་སྟེ། བསམས་བཞིན་དུ་ཁུ་བ་ཕྱུང་བ་ཞིག་ཕྱུང་བ་ཞག་གཅིག་བཅབས་པའི་ལྟུང་བ་གང་ཡིན་པ་ནས་བཀའ་བློ་མི་བདེ་བ་ལས་བྱུང་བ་ཞག་བཅུ་གསུམ་བཅབས་པའི་བར་གྱི་ལྟུང་བ་གང་ཡིན་པ་དེ་དག་ལ་དམ་པ་དང་རབ་ཏུ་དམ་པ་དང་ལྕི་བ་དང་ཞག་གཅིག་ཏུ་བཅབས་པ་གང་ཡིན་པ་དེའི་ཕྱིར་ཡོངས་སུ་གནས་པ་དང༌། གཞི་ནས་ཡོངས་སུ་གནས་པ་དང༌། མགུ་བར་བྱ་བ་དང༌། མགུ་བར་བྱ་བ་སྦྱིན་ཞིང་དབྱུང་བར་བྱ་སྟེ། ལས་དེ་དག་ཀྱང་བྱས་པར་བརྗོད་པར་བྱ་ལ་དེས་དགེ་འདུན་ལ་ཡང་འགལ་ཚབས་ཅན་དུ་མི་འགྱུར་རོ་ཞེས་གསུངས་པ་ཡིན་ནོ། །གང་ཞིག་འདིར་མངོན་པར་ཞེན་པར་བྱས་པ་ནི་དམ་པ་ཡིན་ལ་མངོན་པར་ཞེན་པ་ཤས་ཆེན་པོར་བྱས་པ་ནི་རབ་ཏུ་དམ་པ་ཉིད་ཡིན་པར་རིག་པར་བྱའོ། །སྤྱོད་པ་ལ་སྔོན་བྱུང་བ་གཞན་གྱི་གསོ་བར་འདོད་པ་སྐྱེས་ན་ཐ་དད་པར་སྦྱིན་ཞིང་ཅིག་ཅར་སྤྱད་དོ་ཞེས་བྱ་བ་ནི་ཡོངས་སུ་དག་པ་དང་མགུ་བར་བྱ་བ་སྤྱོད་པའི་གང་ཟག་ལ་སྔོན་ལྟུང་བ་བྱུང་བ་གཞན་གྱི་གསོ་བར་འདོད་པ་བསྐྱེད་ན་ལྟུང་བ་དེའི་ཡོངས་སུ་གནས་པ་དང་མགུ་བར་བྱ་བ་སྦྱིན་པ་ཐ་དད་པར་སྦྱིན་པར་བྱ་ཞིང་སྤྱད་པ་ནི་ཅིག་ཅར་སྤྱད་དུ་རུང་བ་སྟེ། འདི་ལ་ལྟུང་བ་གཞན་ཡིན་པས་སྤྱད་པ་ཡང་སྤྱད་པའི་ཆོ་ག་ཡིན་ནོ་སྙམ་དུ་བསམ་པར་མི་བྱའོ། །དེ་བཅབས་པ་ཉིད་ཡིན་ན་མགུ་བར་བྱ་བ་ལ་མི་སྲིད་དོ་ཞེས་བྱ་བ་ནི་མགུ་བ་སྤྱོད་པ་དང་ཡོངས་སུ་གནས་པ་དེ་ཅིག་ཅར་སྤྱོད་པར་ཐལ་བ་བཟློག་པའི་ཕྱིར་མདོ་འདི་བྱས་སོ། །ལྟུང་བ་བཅབས་པ་བཅབས་པ་ཉིད་དང་ལྷན་ཅིག་སྤྱོད་པ་འདི་ལ་མགུ་བར་བྱ་བ་སྤྱད་པ་ནི་མི་སྲིད་དེ་ཡོངས་སུ་གནས་པ་དང༌། ལྷན་ཅིག་ཏུ་ཞེས་བྱ་བའི་དོན་གྱིས་གོ་བའོ། །མགུ་བར་བྱ་བ་ནི་སེམས་མགུ་བར་
བྱ་བའི་ཕྱིར་ཡིན་ལ། ཡོངས་སུ་གནས་པ་ནི་བཅབས་པའི་ཁ་ན་མ་ཐོ་བ་གཞོམ་པའི་ཕྱིར་ཡིན་ནོ། །དེ་བས་ན་འདི་གཉིས་ཅིག་ཅར་སྤྱད་པ་ནི་མི་སྲིད་དོ། །དགེ་སློང་དག་ཁྱོད་ཀྱིས་གང་ཟག་དེ་ལ་ལྟུང་བ་གཉིས་པའི་རྒྱུ་ལ་སྔ་མ་ལ་ནི་ཇི་ལྟར་བཅབས་པའི་ཡོངས་སུ་གནས་པ་བྱིན་ཅིག །ཕྱི་མ་ལ་ནི་ཞག་དྲུག་མགུ་བ་བྱིན་ཅིག་ཅེས་བྱ་བ་ལ་ སོགས་པ ་གསུངས་པ་ཡིན་པ་དེ་ནི་མགུ་བ་སྤྱོད་པའི་གནས་སྐབས་སུ་ཡོངས་སུ་གནས་པ་ལ་སྤྱད་པ་ཡང་དེ་ལྟར་བསྟན་པར་མི་བྱ་སྟེ་ད་ནི་ཕྱིར་བཅོལ་བ་ཙམ་བསྟན་པ་ཡིན་པས་ན་དེས་ནི་སྔར་བཅབས་པའི་ཕྱིར་ཡོངས་སུ་གནས་པ་བྱེད་དུ་བཅུག་ལ་དེའི་འོག་ཏུ་དབྱུང་བའི་ཕྱིར་མགུ་བར་བྱེད་དུ་བཅུག་ཅིག་ཅེས་གསུངས་པ་ཡིན་གྱི་མགུ་བ་དང་ཡོངས་སུ་གནས་པ་གཉིས་ཅིག་ཅར་སྤྱོད་དུ་གཞུག་པ་ནི་མ་ཡིན་ནོ། །དུས་དང་དུས་མ་ཡིན་པར་བསྡུས་པའི་དབྱུང་བ་གཞིའོ་ཞེས་བྱ་བ་ནི་གཞི་འདི་ལ་མིང་དུ་བྱས་པའོ། །འདི་ནི་ལྟུང་བ་བཅབས་པ་སྤྱད་པ་རྣམས་ཀྱི་ལྡང་བའི་དུས་སོ། །འདི་ནི་དུས་མ་ཡིན་ནོ་ཞེས་བྱ་བར་སྦྱར་རོ། །འདི་ནི་མི་ཤེས་པའི་དུས་ལ་བརྟེན་པར་བྱའོ། །བསྡུས་པ་འབྱུང་བ་ཞེས་བྱ་བ་ནི་ལྟུང་བ་རྣམས་ཀྱི་ཆོག་མདོར་བསྡུས་པ་འདི་ཅིག་ཅར་མངོན་དུ་འབྱུང་ངོ་ཞེས་བྱ་བའི་ཚིག་གིས་དེ་རིག་པར་བྱའོ། །དུས་དང་དུས་མ་ཡིན་པར་བསྡུས་པ་འབྱུང་བའི་གཞིའོ། །།ཉིན་མཚན་གྱི་མཐའི་ཆ་མ་ཡིན་པ་ལ་འཆབ་པ་མི་འབྱུང་ངོ་ཞེས་བྱ་བ་ནི་སྐྱ་རེངས་ཤར་ན་ནི་འཆབ་པ་འབྱུང་བ་ཁོ་ནར་འགྱུར་རོ། །བརྗོད་པའི་ཡན་ལག་མེད་ན་དེའི་སེམས་མ་ཡིན་པ་ཉིད་འཆབ་པ་མ་ཡིན་ནོ་ཞེས་བྱ་བ་ནི་བརྗོད་པའི་རང་བཞིན་དུ་གྱུར་བ་དང་རང་བཞིན་དུ་གནས་པ་དང༌། ལྟ་བ་ཐ་མི་དད་པ་དང་བསྙེན་པར་རྫོགས་པ་དང་བཅས་པ་དང༌། མཚན་ཐ་མི་དད་པ་དང༌། མཚམས་ཀྱི་ནང་ན་གནས་ པ་ཞེས་བྱ་བ་ལ་སོགས ་པའི་གང་ཟག་གང་ཡིན་པ་དེ་མེད་ན། ཉིན་མཚན་གྱི་ཐ་མའི་ཆ་དེ་ལ་ཡང་དེའི་སེམས་མ་ཡིན་པ་ཉིད་ཅེས་བྱ་བ་བརྗོད་པ་དེའི་སེམས་མ་ཡིན་པ་ཉིད་ཅེས་བྱ་བ་ཡོད་ཀྱང་ད་འཆབ་བ་མ་ཡིན་ནོ། །བརྗོད་པའི་ཡན་ལག་ཡོད་པ་གལ་ཏེ་མི་བརྗོད་དོ་སྙམ་དུ་མི་བརྗོད་པའི་བསམ་
པ་སྐྱེ་ན་དེའི་ཚེ་འཆབ་པ་ཁོ་ནར་འགྱུར་རོ། །བགྲོད་དུ་མེད་དམ་སོང་བའི་དབང་ནི་མེད་པ་དང་འདྲ་བ་ཉིད་དོ་ཞེས་བྱ་བ་ནི་བརྗོད་པའི་ཡན་ལག་ཡོད་དུ་ཟིན་ཀྱང་གལ་ཏེ་རྐྱེན་འགའ་ཞིག་གིས་བདག་ཉིད་དེར་བརྗོད་དུ་འགྲོ་བའི་སྐབས་མེད་དམ་གནས་དེ་ནས་སོང་བར་གྱུར་ན། དེའི་དབང་གིས་ཡན་ལག་དེ་མེད་པ་ནི་དེའི་བརྗོད་པའི་ཡན་ལག་མེད་པ་དང་འདྲ་བ་ཉིད་ཡིན་ནོ། །བརྗོད་པའི་ཡན་ལག་ཉེ་བར་གནས་སུ་ཟིན་ཀྱང་རྐྱེན་འགའ་ཞིག་གིས་བདག་ཉིད་དེར་བརྗོད་དུ་འགྲོ་བའི་སྐབས་མེད་དམ་བདག་ཉིད་གནས་དེ་ནས་གཞན་དུ་སོང་བར་གྱུར་པའི་དབང་དག་གིས་བརྗོད་པའི་ཡན་ལག་མེད་པ་ན་མི་བརྗོད་པའི་སེམས་གང་ཡིན་པ་དེ་ནི་འཆབ་པ་མ་ཡིན་ནོ། །བགྲོད་དུ་མེད་པ་དང་སོང་བ་དེ་གཉིས་ཀྱིས་བརྗོད་པ་མ་གྲུབ་པ་འགའ་ཞིག་མེད་པ་དང་འདྲ་བ་ཉིད་ཡིན་པར་མ་ཟད་ཀྱི་འོན་ཀྱང་འདི་ལྟར་དེའི་རྐྱེན་གྱི་དབང་གིས་བྱས་པ་ཡང་ངོ་ཞེས་བྱ་བ་ཡང་འཆབ་པར་གྱུར་དུ་དོགས་པའི་དབང་གིས་ཏེ་དེ་ལྟར་ན་ཡང་བཅབས་པར་མི་འགྱུར་བ་ཁོ་ན་ཡིན་ནོ། །སོང་སྟེ་མ་བརྗོད་ན་བདག་ལ་བཅབས་པའི་ཉེས་པར་འགྱུར་རོ་སྙམ་དུ་དོགས་པའི་བསམ་པ་གལ་ཏེ་བརྗོད་པའི་ཡན་ལག་དྲུང་དུ་མི་འགྲོ་འམ། གནས་དེ་ནས་གཞན་དུ་སོང་བར་གྱུར་ན། དེ་ལྟར་ན་ཡང་བརྗོད་པའི་ཡན་ལག་མེད་པ་དང་འདྲ་བ་ཉིད་དུ་རིག་པར་བྱ་སྟེ་དེའི་ཚེ་ཡང་འཆབ་པར་མི་བྱའོ། །འདིར་གཞུང་ནི་བཙུན་པ་རེ་ཞིག་དགེ་སློང་ལྟུང་བ་དང་བཅས་པ་དགེ་སློང་མི་གནས་ན་མཆིས་ཤིང་གང་ལ་ཡང་བརྗོད་པར་མི་བགྱིད་ན་བཅབས་པར་བརྗོད་པར་བགྱི་འམ། ཉེ་བ་འཁོར་མི་བྱའོ། །བཙུན་པ་རེ་ཞིག་དགེ་སློང་ལྟུང་བ་དང་བཅས་པ་དགེ་སློང་རྣམས་དང་ལྷན་ཅིག་གདུགས་ཡོལ་བར་བགྱིས་ནས་མཚན་མོ་སློང་མི་གནས་ན་མཆིས་ཤིང་གང་ལ་ཡང་བརྗོད་པར་མི་བགྱི་ན་བཅབས་པར་བརྗོད་པར་མི་འགྱི་འམ་ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །དོན་མེད་པས་ནི་ཉེས་བྱས་སོ་ཞེས་བྱ་བ་ནི་དོན་ཅུང་ཟད་ལ་ཡང་མི་ལྟོས་པར་མི་འགྲོ་འམ། གཞན་དུ་སོང་བས་ནི་ཉེས་སུ་འགྱུར་རོ། །མཐའི་མདུན་རོལ་དུ་ཡང་ངོ་ཞེས་བྱ་བ་ནི་ཉིན་མཚན་གྱི་
མཐའི་མདུན་རོལ་དུ་བཅབས་པ་ཡང་ཉེས་བྱས་སུ་འགྱུར་རོ། །འཆབ་པའི་སེམས་མ་བཏང་བ་ཉིད་ནི་དེའི་སེམས་ཉིད་ཡིན་ནོ་ཞེས་བྱ་བ་ནི་འཆབ་པ་ཀུན་དུ་སྤྱོད་པ་དག་ཉིན་མཚན་གྱི་མཐར་འཆབ་པའི་སེམས་ཡིན་ཞིང་འཆབ་པར་འགྱུར་བ་འབའ་ཞིག་ཏུ་མ་ཟད་ཀྱི་ཇི་ལྟར་འཆབ་པའི་སེམས་མ་བཏང་ཞིང་ཡོངས་སུ་མ་སྤངས་པ་འདིས་ཀྱང་འཆབ་པ་དེའི་སེམས་ཉིད་ཡིན་པར་རིག་པར་བྱའོ་ཞེས་བྱ་བའི་དོན་ཏོ། །འདིར་གཞུང་ནི་གང་གི་མདུན་དུ་འཆབ་པ་འབྱུང་བར་འགྱུར་བར་རང་བཞིན་དུ་གནས་པ་དང༌། མཚམས་ཀྱི་ནང་ན་གནས་པ་ལ་གལ་ཏེ་མི་བརྗོད་ན་དེ་ཕྱིན་ཆད་འཆབ་པ་འབྱུང་བར་འགྱུར་རོ་ཞེས་གསུངས་པ་ཡིན་ནོ། །འདིར་བརྗོད་པ་རྗེས་སུ་སྒྲུབ་པར་མི་བྱེད་པ་ཙམ་ཁས་བླང་བར་བྱའི་འཆབ་པ་ལ་ཕྱོགས་པ་ཉིད་ནི་ཁས་བླང་བར་མི་བྱ་སྟེ། དེའི་ཕྱིར་དོན་འདི་ཐོས་པས་མདོ་འདི་བྱས་སོ། །དགེ་སློང་ཕམ་པར་གྱུར་པས་ལྟུང་བ་ཕྱིར་མ་བཅོས་པ་ལ་ཉེས་པ་མེད་དོ་ཞེས་བྱ་བ་ནི་ཇི་སྐད་དུ་འདི་ནི་ཡོད་ལ་ཕྱིར་མི་འཆོས་ན་ཡང་ཉེས་བྱས་སོ་ཞེས་སྔར་སྨོས་པ་དེའི་དམིགས་ཀྱིས་བསལ་བ་ཡིན་ཏེ་འབྱུང་བའི་ཡན་ལག་ཉིད་ཀྱི་ཕྱིར་འདིར་དེའི་སྡོམ་པ་ནི་དགོས་པ་མེད་པ་ཉིད་དུ་གྱུར་པའི་ཕྱིར་དེ་ལ་ཉེས་པ་མེད་པ་ཉིད་དུ་རིག་པར་བྱའོ། །ཡང་དེའི་ཕྱིར་གང་ཟག་གི་གཞི་ལ་དུས་དང་དུས་མ་ཡིན་པར་བསྡུས་པ་འབྱུང་བའི་གཞི་ཞེས་མིང་དུ་བྱས་ཤེ་ན། འདི་ནི་ལྟུང་བ་དང་བཅབས་པ་སྤྱད་པ་རྣམས་ཀྱི་ལྡང་བའི་དུས་སོ་འདི་ནི་དུས་མ་ཡིན་ནོ་ཞེས་བྱ་བར་སྦྱར་རོ། །བསྡུས་པ་འབྱུང་བ་ཞེས་བྱ་བ་ནི་ལྟུང་བ་རྣམས་ཀྱི་ཆོ་ག་མདོར་བསྡུས་པ་འདི་ཅིག་ཅར་དོན་གཅིག་ཏུ་འབྱུང་བའོ་ཞེས་བརྗོད་པའི་ཕྱིར་དེ་རིག་པར་བྱའོ། །དུས་དང་དུས་མ་ཡིན་པར་བསྡུས་པ་འབྱུང་བའི་གཞི་ཞུ་བའི་སྐབས་སོ། །དུས་དང་དུས་མ་ཡིན་པར་བསྡུས་པ་འབྱུང་བའི་གཞི་རྫོགས་སོ།། །། ཡོངས་སུ་གནས་པ་དང་མགུ་བར་བྱ་བ་སྤྱོད་པ་དག་གིས་དགེ་སློང་རང་བཞིན་དུ་གནས་པ་ལས་མངོན་པར་སྨྲ་བ་དང་ཕྱག་དང་མངོན་དུ་ལྡང་བ་དང་ཐལ་མོ་སྦྱར་བ་དང་གུས་པའི་ལས་དག་བདག་གིར་མི་བྱའོ་ཞེས་བྱ་བ་ནི་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དག་གིས་ཞེས་སྨོས་
པས་ནི་གཞི་ནས་ཡོངས་སུ་གནས་པ་དང༌། ཡང་གཞི་ནས་བསླང་སྟེ་ཡོངས་སུ་གནས་པ་དང༌། གཞི་ནས་མགུ་བར་བྱ་བ་དང༌། ཡང་གཞི་ནས་བསླང་སྟེ་མགུ་བར་བྱ་བ་སྤྱོད་པ་དག་ཀྱང་བསྡུས་པ་ཡིན་ཏེ། གང་གི་ཕྱིར་རྩོམ་པའི་བྱེ་བྲག་ལ་བརྟེན་པས་འདི་གཉིས་མངོན་པར་སྨྲ་བ་དག་གོ །དེ་བས་ན་དེ་སྤྱོད་པ་རྣམས་ལ་འདིར་མ་བསྡུས་པ་ཉིད་ནི་མ་ཡིན་ནོ། །མངོན་པར་སྨྲ་བ་ཞེས་བྱ་བ་ནི་ཕྱག་འཚལ་ལོ་ཞེས་ཟེར་བ་སྟེ། མངོན་པར་ཞེས་བྱ་བ་སྟེ་བརྗོད་པའི་ཚིག་ཡིན་ལ། སྨྲས་པ་ཞེས་བྱ་བ་ནི་ཕྱག་འཚལ་བའི་ཚིག་ཡིན་པར་སྦྱར་རོ། །ཕྱག་ཅེས་བྱ་བ་ནི་ལུས་འདུད་པ་བསྡུས་པའོ། །གུས་པའི་ལས་ཞེས་བྱ་བ་ནི་ལག་རྐྱོང་བ་དང༌། བསུ་བ་ལ་ སོགས་པ ་མཆོད་པའི་ལས་གཞན་དག་བསྡུའོ། །དེ་གཉིས་ཀྱིས་མི་བྱ་བ་གང་ཡིན་པ་དེའི་སྐབས་གཞན་དག་གིས་ཀྱང་དེ་དག་ལའོ་ཞེས་བྱ་བ་ལ་དེ་གཉིས་ཀྱིས་ཞེས་བྱ་བ་ནི་ཡོངས་སུ་གནས་པ་དང་མགུ་བར་བྱ་བར་སྤྱོད་པ་དེ་གཉིས་ཀྱིས་སོ། །མི་བྱ་བ་གང་ཡིན་པ་དེའི་སྐབས་ཞེས་བྱ་བ་ནི་རང་བཞིན་དུ་གནས་པ་ལས་ཅིག་ཤོས་རྣམས་ཀྱིས་སོ། །དེ་དག་ལའོ་ཞེས་བྱ་བ་ནི་ཡོངས་སུ་གནས་པ་མགུ་བར་བྱ་བ་སྤྱོད་པ་དེ་དག་ལ་མངོན་པར་སྨྲ་བ་ལ་ སོགས་པ ་སྐབས་དེ་དག་མི་བྱ་བ་ཞེས་བྱ་བའི་དོན་ཏོ། །རང་བཞིན་དུ་གནས་པ་རྣམས་ཀྱིས་དེ་དག་ལ་མངོན་པར་སྨྲ་བ་དང་ཕྱག་འཚལ་བ་ལ་ སོགས་པ ་མི་བྱའོ། །དེ་དང་ལྷན་ཅིག་ཏུ་གོམ་པ་བསྲི་བ་ཉིད་ལས་གཞན་པས་བཅག་པར་མི་བྱའོ། །སྟན་ཆེས་དམའ་བ་ཉིད་ལས་གཞན་ལ་འདུག་པར་ཡང་ངོ་ཞེས་བྱ་བ་ནི་ལྷན་ཅིག་པར་ཡང་མི་བྱ་ན་སྟན་གཅིག་ལ་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཕྱི་བཞིན་འབྲེང་བའི་དགེ་སྦྱོང་གི་བདག་ཉིད་ལས་གཞན་པས་ཁྱིམ་དག་ཏུ་འགྲོ་བ་ཡང་ངོ༌། །གཡོགས་མ་གཅིག་ཏུ་མལ་བཤམ་པར་མི་བྱའོ། །རབ་ཏུ་བྱུང་བ་དང་བསྙེན་པར་རྫོགས་པ་དང༌། གནས་སྦྱིན་བ་དང༌། དགེ་ཚུལ་ཉེ་བར་གཞག་པ་དག་མི་བྱའོ་ཞེས་བྱ་བ་ནི་རབ་ཏུ་བྱུང་བ་དང་བསྙེན་པར་རྫོགས་པ་དག་གིས་ཡན་ལག་གི་ངོ་བོས་འགྲོ་བར་མི་བྱའོ། །མཁན་པོས་དེ་དག་ལ་བསྙེན་པར་རྫོགས་པར་མི་བྱའོ། །འདི་དག་
ལས་བསྙེན་ནས་གནས་པར་མི་བྱའོ། །གསོལ་བ་དང་བརྗོད་པ་དག་ཁས་མི་བླང་ངོ་ཞེས་བྱ་བ་ལ་ སོགས་པ ་ལ་དེ་བསྟན་པ་ཡིན་ནོ། །གོམ་པ་བསྲི་བ་ཉིད་ལས་གཞན་དུ་འདི་དང་ལྷན་ཅིག་བཅག་པར་མི་བྱ་བ་དང༌། ཡོངས་སུ་གནས་པ་དང་མགུ་བར་སྤྱོད་པ་དེ་གཉིས་ཀྱིས་དགེ་སློང་རང་བཞིན་དུ་གནས་པ་དེ་དང་ལྷན་ཅིག་ཏུ་གོམ་པ་གཅིག་གི་ཕྱིར་འབྱངས་ཤིང་བསྲི་བ་ཉིད་མ་གཏོགས་པར་གོམ་པ་མཉམ་པར་འདོར་བ་དང༌། གོམ་པ་མདུན་དུ་ཐལ་བར་འདོར་བ་དག་གིས་བཅག་པར་མི་བྱའོ། །སྟན་ཆེས་དམའ་བ་ཉིད་ལས་གཞན་དུ་མི་འདུག་པ་དང། ཕྱི་བཞིན་འབྲང་བའི་དགེ་སྦྱོང་གི་བདག་ཉིད་ཀྱིས་ཁྱིམ་དག་ཏུ་འགྲོ་བ་སྟེ་གཞན་དུ་ན་ཞེས་བྱ་བར་སྦྱར་རོ། །དེ་གཉིས་འདུག་པ་ནི་དགེ་སློང་རང་བཞིན་དུ་གནས་པ་དང་ལྷན་ཅིག་ཏུ་སྟན་ཆེས་དམའ་བ་ལ་འདུག་པར་བྱའི་མཉམ་པ་འམ་ཤིན་ཏུ་མཐོ་བ་ལ་འདུག་པར་མི་བྱའོ། །གཉིས་གྲོང་དུ་འགྲོ་བས་རང་བཞིན་དུ་གནས་པའི་དགེ་སློང་གིས་ཕྱི་བཞིན་དུ་འབྲང་བའི་དགེ་སྦྱོང་གི་ཆོས་ཀྱིས་འགྲོ་བར་བྱའི་མདུན་དུ་འགྲོ་བའི་དགེ་སྦྱོང་གིས་ཆོས་ཀྱིས་ནི་མི་བྱའོ། །གཡོགས་མ་གཅིག་ཏུ་མལ་བཤམ་པར་མི་བྱའོ། །དེ་གཡོགས་མ་གཅིག་ཏུ་མལ་མི་བཤམ་པ་དང་ཡོངས་སུ་གནས་པ་དག་མགུ་བར་བྱ་བ་སྤྱོད་པ་དེ་གཉིས་ཀྱིས་དགེ་སློང་རང་བཞིན་དུ་གནས་པ་དང་ལྷན་ཅིག་ཏུ་ཞེས་བྱ་བར་སྦྱར་རོ། །རབ་ཏུ་བྱུང་བ་དང་བསྙེན་པར་རྫོགས་པ་དང་གནས་སྦྱིན་པ་དང༌། དགེ་ཚུལ་ཉེ་བར་གཞག་པ་དག་མི་བྱའོ་ཞེས་བྱ་བ་ནི་དེ་གཉིས་ཀྱིས་རབ་ཏུ་དབྱུང་བར་མི་བྱ་བསྙེན་པར་རྫོགས་པར་མི་བྱ་གནས་སྦྱིན་པར་མི་བྱ་དགེ་ཚུལ་ཉེ་བར་གཞག་པར་མི་བྱ་བའོ། །གསོལ་བ་དང་བརྗོད་པ་དག་ཁས་མི་བླང་ངོ་ཞེས་བྱ་བ་ནི་གཉིས་གསོལ་བ་དང་བརྗོད་པའི་ལས་དག་བྱེད་དུ་བཅུག་པ་ཁས་བླང་བར་མི་བྱའོ། །ལས་བྱེད་པ་དང་དགེ་སློང་མའི་སྟོན་པ་དང༌། དགེ་འདུན་གྱི་ཡིད་བརྟན་པར་བསྐོ་བ་ཡང་ངོ་ཞེས་བྱ་བ་ཡང་ཁས་མི་བླང་ངོ་ཞེས་བྱ་བར་སྦྱར་ཏེ། དགེ་འདུན་གྱི་ཡིད་བརྟན་ པ་ཞེས་བྱ་བ་ནི་གནས་ཁང་བསྐོ་བ་ལ་སོགས ་པའོ། །ལས་བྱེད་པར་བསྐོ་བ་དང༌། དགེ་སློང་མའི་སྟོན་བར་བསྐོ་བ་དང༌། དགེ་འདུན་གྱི་ཡིད་བརྟན་པར་བསྐོ་བ་ཁས་
བླང་བར་མི་བྱའོ་ཞེས་བྱ་བའི་བསྐོ་བ་དེ་དག་ལ་བརྩལ་བར་མི་བྱའོ། །སྔར་བསྐོས་པས་ཀྱང་མི་བྱའོ་ཞེས་བྱ་བ་ནི་དེ་གཉིས་ལས་བྱེད་པ་པོ་ལ་ སོགས་པ ་དག་ཏུ་སྔར་བསྐོ་ན་ཡང་བྱ་བ་བྱེད་དུ་མི་གཞུག་གོ །དགེ་སློང་མ་རྣམས་ལ་ཡང་བསྟན་པར་མི་བྱའོ་ཞེས་བྱ་བ་ཡང་སྔར་བསྐོས་ན་ཡང་ཞེས་བྱ་བའི་རྗེས་བསྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །འདོན་པ་དང་གཞན་ཡོད་ན་གསོ་སྦྱོང་ལས་སོ་སོར་ཐར་པ་གདོན་པར་མི་བྱའོ། །དགེ་སློང་ལས་ཉམས་པས་གླེང་བར་མི་བྱའོ་ཞེས་བྱ་བ་ནི་ཡོངས་སུ་གནས་པ་དང་མགུ་བར་སྤྱོད་པ་དག་གིས་དགེ་སློང་ལ་གླེང་བར་མི་བྱའོ། །དེ་གཉིས་ཀྱིས་དགེ་སློང་ལ་ཚུལ་ཁྲིམས་ཉམས་པ་དང་ལྟ་བ་ཉམས་པ་དང་ཆོ་ག་ཉམས་པ་དང་འཚོ་བ་ཉམས་པས་གླེང་བར་མི་བྱའོ། །ཅི་ཐམས་ཅད་ལ་གླེང་བར་མི་བྱ་འམ་ཞེ་ན། དེའི་ཕྱིར། དགེ་འདུན་ལས་མ་བཀར་བའོ་ཞེས་བྱ་བ་སྨོས་ཏེ་དགེ་འདུན་ལས་བཀར་བ་དེ་ལ་གླེང་བ་ལ་ སོགས་པ ་དག་ལ་ནི་བཀག་པ་མེད་དོ། །དེ་དང་བརྟེན་པར་བྱའོ་ཞེས་བྱ་བ་ནས་འདི་ཐམས་ཅད་དུ་སྦྱར་བར་བྱའོ་ཞེས་བྱ་བའི་བར་དུ་རིག་པར་བྱའོ། །མ་མོ་ལས་དེ་མི་བྱེད་པ་དང་བརྗོད་པར་བྱ་བ་ཉིད་དང་ཞེས་བྱ་བ་དེ་ཡང་སྦྱོར་བ་ཞེས་བྱ་བ་ནས་ཡིད་ལ་བྱེད་པ་ཞེས་བྱའི་བར་དུ་གསུངས་པ་ཡིན་ནོ། །བརྗོད་པ་དང་བཅས་པ་ཉིད་དང་ཕུར་པ་དང་བཅས་པ་ཉིད་དག་མི་བྱའོ་ཞེས་བྱ་བ་ནི་དེ་གཉིས་ཀྱིས་དགེ་སློང་རང་བཞིན་དུ་གནས་པ་དགེ་འདུན་ལས་མ་བཀར་བ་ལས་བརྗོད་པ་དང་བཅས་པ་ཉིད་དང་ཕུར་བ་དང་བཅས་པ་ཉིད་དག་མི་བྱའོ། །གདམས་ངག་དང་གསོ་སྦྱོང་དང༌། དགག་དབྱེ་དང་གསོལ་བ་དང་བརྗོད་པ་དག་གཞག་པར་མི་བྱའོ་ཞེས་བྱ་བ་ནི་དེ་གཉིས་ཀྱིས་དགེ་སློང་རང་བཞིན་དུ་གནས་པ་དགེ་འདུན་ལས་མ་བཀར་བའི་གདམས་ངག་གཞག་པར་མི་བྱ་གསོ་སྦྱོང་གཞག་པར་མི་བྱ་གསོལ་བ་གཞག་པར་མི་བྱ་ལས་བརྗོད་པ་གཞག་པར་མི་བྱའོ། །དེ་དང་བརྟེན་པར་མི་བྱའོ་ཞེས་བྱ་བ་ལ་དེ་དང་ཞེས་བྱ་བ་ནི་དགེ་འདུན་གྱིས་མ་བཀར་བའི་དགེ་སློང་ལས་སོ། །ཆད་པ་དེའི་རྒྱུ་བྱས་པ་སྤོང་ངོ་ཞེས་བྱ་བ་ནི་ཆད་པ་གང་ལས་འདི་ཡོད་པ་ཉིད་དེ། རྒྱུ་གང་ལས་བྱས་པའི་དེ་སྤང་བར་བྱ་སྟེ་མི་སྤོང་བ་ཁ་ན་
མ་ཐོ་བ་གཞན་དུ་འགྱུར་རོ། །ཉེས་པ་གཞན་ཡང་ངོ་ཞེས་བྱ་བ་ནི་ཆད་པའི་ལས་ཀྱི་རྒྱུར་གྱུར་པ་ལས་གཞན་པའི་ཉེས་པ་ཡང་སྤང་བ་ཞེས་བྱ་བ་འཇུག་གོ །འདིར་གཞུང་ནི་དགེ་འདུན་གྱིས་དབྱུང་བའི་ལས་བྱས་པ་དེས་ལྟུང་བ་འབྱུང་བར་མི་འགྱུར་ཞིང༌། དེ་དང་འདྲ་བ་གཞན་ཡང་མི་བྱའོ་ཞེས་གསུངས་པ་ཡིན་ནོ། །ཚངས་པ་མཚུངས་པར་སྤྱོད་པ་རྣམས་ལ་ཉེས་པ་དང་མཐུན་པ་ཉིད་ཀྱིས་མི་བྱའོ་ཞེས་བྱ་བ་ནི་གནས་ཐ་དད་པའི་ཚུལ་ལ་དེ་སྨོས་ཏེ་བྱེ་བྲག་མེད་པས་འདི་བསྡུ་བར་བྱས་སོ། །བརྟུལ་ཞུགས་སྙིང་པོ་མེད་པར་འགྱུར་རོ་སྙམ་དུ་ཡིད་ལ་བྱའོ། །ནང་བར་སྔར་ལངས་ཏེ་སྒོ་དབྱེ་བ་དང་མར་མེའི་ཀོང་བུ་བསལ་བར་བྱའོ། །གཙུག་ལག་ཁང་ཅུ་ཆག་ཆག་དང་ཕྱག་དར་དང་ལྕི་བ་འཇམ་པོའི་བྱུག་པས་བསྐུ་བ་དག་ཀྱང་བྱའོ། །གཤང་བ་དང་གཅི་བའི་སྐྱབས་དག་སྦྱང་ངོ༌། །ས་ཕྱག་བ་དང་དུས་དང་མཐུན་པའི་ཆུ་དག་གཞག་པར་བྱའོ། །ཝའི་ཁ་དག་བསལ་ལོ། །སྟན་བཤམ་མོ། །དུས་ཤེས་པར་བྱ་སྟེ་བདུག་སྤོས་དང་པོག་ཕོར་དག་ཉེ་བར་གཞག་གོ །གལ་ཏེ་ནུས་པ་ཉིད་ཡིན་ན་སྟོན་པའི་ཡོན་ཏན་ཡང་དག་པར་བསྒྲག་གོ །གལ་ཏེ་མི་ནུས་ན་སྨྲ་བ་པོ་ལ་བཅོལ་ལོ། །སྤྱི་བུངས་བཤམ་པ་གཎྜཱི་བརྡུང་ངོ༌། །གལ་ཏེ་དགེ་སློང་རྣམས་ཚན་བསིལ་ཡབ་བྱའོ། །དེ་དག་གིས་འདུག་པ་ལ་ སོགས་པ ་ནི་བསྙེན་པར་རྫོགས་པ་ཐམས་ཅད་ཀྱི་མཐའ་ཉིད་དུའོ་ཞེས་བྱ་བ་ནི་དེ་གཉིས་ཀྱིས་འདུག་པ་ལ་ སོགས་པ ་ནི་དེ་གྲལ་རིམས་བསྟན་པའི་ཕྱིར་རོ། །ཟས་ཀྱི་བྱ་བ་བྱས་ནས་གདན་ཆ་དབེན་པར་བརྟུལ་ལོ་ཞེས་བྱ་བ་ལ། འདིར་གདན་ཆ་ཞེས་སྨོས་པས་ནི། འཇམ་པོ་དང་གོར་བུ་དང་པར་ཐང་ལ་ སོགས་པ ་དབེན་པར་བསྡུ་བའི་དོན་དུའོ། །ལྷུང་བཟེད་ཀྱི་གཞི་དོར་རོ། །དུས་ཤེས་བྱ་སྟེ་མཆོད་རྟེན་དག་གི་ཕྱག་དར་བྱའོ། །ལྕི་བ་འཇམ་པོའི་བྱུག་པས་བསྐུའོ། འདུ་བའི་དུས་སུ་བཤམ་བ་ལ་ སོགས་པ ་ནས་ཡོན་ཏན་གྱི་སྐབས་ཀྱི་བར་དག་གོ་ཞེས་བྱ་བ་ནི་སྟན་བཤམ་མོ། །དུས་ཤེས་པར་བྱ་སྟེ་བདུག་སྤོས་དང་པོག་ཕོར་གཞག་གོ །གལ་ཏེ་ནུས་པ་ཉིད་ཡིན་ན་སྟོན་པའི་ཡོན་ཏན་ཡང་དག་པར་བསྒྲག་གོ །གལ་ཏེ་མི་ནུས་པ་པོ་ལ་བཅོལ་ལོ་ཞེས་
ཇི་སྐད་སྟོན་པ་ཞེས་བྱ་བའི་དོན་ཏོ། །གལ་ཏེ་ནུས་པ་ཉིད་ན་ཉི་མ་བརྗོད་པ་ཡང་ངོ༌། །གལ་ཏེ་མི་ནུས་ན་དགེ་སློང་གཞན་ལ་བཅོལ་ལོ། །དགོངས་ཀར་དུས་དང་མཐུན་པའི་ཆུས་དགེ་སློང་རྣམས་ཀྱི་རྐང་པ་བཀྲུའོ་ཞེས་བྱ་བ་ནི་མཚན་མོའི་དུས་སུ་གང་ཞིག་མལ་ལ་བརྟག་པའི་དོན་དུ་དེའོ། །རྐང་པ་དག་བསྐུའོ་ཞེས་བྱ་བ་ནི་དགོངས་ཀར་བསྐུའོ་ཞེས་བྱ་བ་དང་སྦྱར་རོ། །མ་འདོད་ན་སྣུམ་དབུལ་ལོ་ཞེས་བྱ་བ་ནི་དགེ་སློང་དག་རྐང་པ་དག་བསྐུ་བར་མི་འདོད་ན་སྣུམ་དབུལ་བར་བྱའོ། །དེའི་གཙུག་ལག་ཁང་ཐ་མར་འོས་པ་ཉིད་ཡིན་ནོ་ཞེས་བྱ་བ་ལ། །དེའི་ཞེས་བྱ་བ་ནི་ཡོངས་སུ་གནས་པ་དེའི་འོ། །མགུ་བར་བྱ་བ་སྤྱོད་པ་འདིའི་ཐ་མར་འོས་པ་ཉིད་ཡིན་ནོ། །བསྙེན་པར་རྫོགས་པ་ཐམས་ཅད་ཀྱིས་ཞེས་བྱ་བ་ནི་བསྙེན་པར་རྫོགས་པ་རྣམས་ལ་ཞེས་བྱ་བའི་བར་དུ་ཤེས་པར་བྱའོ། འདུག་པ་ལ་ཐ་མར་འོས་པའི་ཆོ་ག་འདི་ཡིན་ཏེ། དེ་བས་ན་དེ་རྩོམ་པའོ། །རང་བཞིན་དུ་གནས་པ་རྣམས་ལས་མཐར་འོས་པའི་ཆོག་གཉིས་པོ་འདི་ཡིན་ཏེ། འདིས་ནི་ཕན་ཚུན་དུ་ཡོངས་སུ་གནས་པ་ལ་ སོགས་པ ་རྣམས་ལ་ཇི་ལྟར་གང་གི་ཚེ་རིགས་ཀྱི་ཆོ་ག་ལ་གནོད་པར་ཤེས་པར་བྱ་བ་མ་ཡིན་ནོ། །བསླབ་པ་བྱིན་པ་ལ་ཡོངས་སུ་གནས་པ་དང༌། མགུ་བར་སྤྱོད་པ་དག་གིས་གཞན་ཉིད་ཅེས་བྱ་བ་ཤིན་ཏུ་དམན་པ་དང་རྩུབ་པ་བྱུང་བ་མ་ཡིན་པར་ཤེས་པར་བྱ་ཞིང་འདི་རྣམས་ཐམས་ཅད་གནས་ནས་ཕྱུང་བ་སྤང་བ་ཉིད་ཀྱི་ཕྱིར་ཤེས་པར་བྱའོ། །ཐམས་ཅད་དུ་རྙེད་པ་དབང་བ་ཉིད་ཡིན་ནོ། །དགེ་བའི་ཕྱོགས་ལ་མི་གཡེལ་བར་བྱའོ་ཞེས་བྱ་བ་ལ། འདི་ནི་དགེ་བའི་ཕྱོགས་ཀྱི་དུས་མ་ཡིན་པར་ཤེས་པར་མི་བྱ་སྟེ། འདི་ལྟར་དེའི་དུས་ན་རྟོགས་པའི་སྐལ་བ་ཅན་མ་ཡིན་དུ་ཟིན་ཀྱང་དེ་ལྟར་མོད་ཀྱིས་ཚོགས་རྗེས་སུ་བསྒྲུབ་པའི་ཕྱིར་མི་རིགས་ཏེ། དེའི་སྐལ་བ་ཅན་མ་ཡིན་པ་དེ་ལྟ་བས་ན་འདིར་དགོངས་པ་དེ་རིག་པར་བྱའོ། །སླར་སྐལ་བ་དང་ལྡན་པ་ཉིད་དེའི་ཚེ་བསམ་པས་ལྡང་བ་ལས་ལྡང་བར་སྨྲའི་ཆད་པའི་ལས་ཀྱིས་ནི་མ་ཡིན་ནོ་ཞེས་གསུངས་པའི་ཕྱིར་རོ། །བསླབ་པ་བྱིན་པ་ཡང་རྟོགས་པས་གྲགས་པས་དེས་ན་དགྲ་བཅོམ་ཉིད་ཐོབ་པ་ན་ཡོངས་སུ་གནས་པ་དང་མགུ་བ་སྤྱོད་པ་འདི་གཉིས་ཀྱང་བསླབ་པ་སྦྱིན་པ་དང་འདྲ་བ་རང་བཞིན་
ཐོབ་ཅིང་ཆད་པའི་ལས་ལྷག་མ་སྤྱད་པར་བྱ་བ་མི་དགོས་པ་ཉིད་ཡིན་ཏེ། དབྱུང་བ་ལ་ སོགས་པ ་བྱ་མི་དགོས་པ་ཉིད་དུ་རིག་པར་བྱའོ། །འདི་ལ་དེའི་ངོ་བོ་ཉིད་ཚོལ་བ་བྱིན་པ་དང་བསླབ་པ་བྱིན་པ་དག་ཀྱང་དེ་དང་འདྲའོ་ཞེས་བྱ་བ་ནི་འདིར་མངོན་པར་སྨྲ་བ་ལ་ སོགས་པས་འདི་ལ་སྐབས་སུ་བབ་པའི་འཇུག་པ ་འདི་ལ་དེའི་ངོ་བོ་ཉིད་ཚོལ་བ་བྱིན་པ་དང༌། བསླབ་པ་བྱིན་པ་དག་ཀྱང་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དེ་དང་འདྲ་སྟེ། དེ་གཉིས་ཀྱིས་སྤྱོད་པ་ཡང་འདི་དག་ཡིན་ཞེས་བྱ་བའི་དོན་ཏོ། །གདོན་པར་མི་བྱའོ་ཞེས་བྱ་བ་ནི་དེའི་ངོ་བོ་ཉིད་ཚོལ་བ་བྱིན་པ་དང༌། བསླབ་པ་བྱིན་པ་དེ་གཉིས་ཀྱི་འདོན་པ་གཞན་མེད་ན་ཡང་གསོ་སྦྱོང་ལས་སོ་སོར་ཐར་པ་གདོན་པར་མི་བྱའོ། །སྔ་མ་ནི་བཟོད་པ་གསོལ་བས་རང་བཞིན་དུ་གནས་པ་ཐོབ་པོ་ཞེས་བྱ་བ་ནི་དེའི་ངོ་བོ་ཉིད་ཚོལ་བ་བྱིན་པ་ལ་བཟོད་པར་གསོལ་བ་བྱས་པ་ན་རང་བཞིན་དུ་གནས་པ་ཉིད་ཐོབ་པའོ། །འོག་མ་ནི་དགྲ་བཅོམ་པ་ཉིད་ཀྱིས་སོ་ཞེས་བྱ་བ་ནི་བསླབ་པ་བྱིན་པ་པོ་ནི་དགྲ་བཅོམ་པ་ཉིད་ཀྱིས་རང་བཞིན་དུ་གནས་པ་ཉིད་ཐོབ་པ་སྟེ་རང་བཞིན་དུ་མི་གནས་པ་ནི་མ་ཡིན་ནོ། །སྒོ་དབྱེ་བ་ཡན་ཆད་དང་གཙུག་ལག་ཁང་ལ་ སོགས་པ ་ལ་ཡོངས་སུ་གནས་པ་དང་ལྡན་བ་དང་སྤྱོད་པ་དང་ལྡན་བ་གཉིས་ཀྱང་ངོ་ཞེས་བྱ་བ་ནི་དེ་དང་འདྲའོ་ཞེས་བྱ་བར་སྦྱར་རོ། །ནང་པར་ལངས་ཏེ་སྒོ་དབྱེ་བ་ཡན་ལག་ཀྱི་མདོ་ཐམས་ཅད་དང༌། དེའི་གཙུག་ལག་ཁང་ཐ་མར་འོས་པ་ཉིད་ཡིན་ནོ་ཞེས་བྱ་བ་དང༌། ཐམས་ཅད་དུ་རྙེད་པ་དབང་བ་ཉིད་ཡིན་ནོ་ཞེས་བྱ་བ་དང༌། དགེ་བའི་ཕྱོགས་ལ་མི་གཡེལ་བར་བྱའོ་ཞེས་བྱ་བའི་མདོ་གསུམ་པོ་དེ་དག་གི་སྤྱོད་པ་དེ་ནི་ཡོངས་སུ་གནས་པ་དང་ལྡན་པ་ཞེས་བྱ་བ་ཡོངས་སུ་གནས་པ་བྱས་ཟིན་ལ་མགུ་བར་བྱ་བ་མ་བླངས་པ་དང་སྤྱད་པ་དང་ལྡན་པ་ཞེས་བྱ་བ་མགུ་བར་བྱ་བ་སྤྱད་ཟིན་ནས་དབྱུང་བ་མ་བྱས་པ་ད་གཉིས་ཀྱང་ཡོངས་སུ་གནས་པ་དད་མགུ་བར་བྱ་བ་སྤྱོད་པ་དེ་དང་འདྲ་བར་རིག་པར་བྱ་སྟེ། དེ་གཉིས་ནི་རང་བཞིན་དུ་གནས་པ་ཉིད་མ་ཡིན་པའི་ཕྱིར་དང་ཆད་པའི་ལས་བྱས་པ་དེ་ཡིན་པའི་ཕྱིར་དེ་ལྟར་རྣམ་པར་གཞག་གོ །བསྡིགས་པ་དང་སྨད་པ་དང་བསྐྲད་པ་དང་ཕྱིར་འགྱེད་པ་
དང་གནས་ནས་ཕྱུང་བ་དག་ཀྱང་དེ་བཞིན་ནོ་ཞེས་བྱ་བ་ནི་དེ་དག་ཀྱང་སྒོ་དབྱེ་བ་ཡན་ཆད་དང༌། གཙུག་ལག་ཁང་ལ་ སོགས་པ ་ཡོངས་སུ་གནས་པ་དང༌། མགུ་བར་བྱ་བ་སྤྱོད་པ་དང་འདྲ་བར་རིག་པར་བྱའོ། །དེ་དག་ལ་ཧ་ཅང་ཐལ་བར་གྱུར་པ་ལ་འགལ་ཚབས་དང་བཅས་པར་འགྱུར་བ་དམིགས་ཀྱིས་བསལ་བའི་ཕྱིར་གདོན་པ་ནི་མི་བྱ་བ་ཉིད་དོ། །གཞན་དག་གིས་གནས་ནས་ཕྱུང་བ་སྤང་བར་བྱ་བ་ཁོ་ནའོ་ཞེས་བྱ་བ་སྨོས་ཏེ། རང་བཞིན་དུ་གནས་པ་དག་གིས་དེ་ལ་བསྡིགས་པར་བྱ་བ་ཁོ་ན་ཡིན་ཏེ། དེ་དང་ལྷན་ཅིག་བཅག་པ་དང་འདུག་པ་དང་འགྲོ་བ་ཇི་སྐད་བསྟན་པ་དག་ཀྱང་མི་བྱ་ཞིང་འདོན་པ་གཞན་མེད་ན་དེས་སོ་སོར་ཐར་པའི་མདོ་འདོན་པ་ཡང་ཉམས་སུ་མྱོང་བར་མི་བྱའོ། །གཞན་ཡང་དེ་ལ་ལུས་སམ་ངག་གི་འདྲེ་བར་འགྱུར་བ་ཅུང་ཟད་མི་བྱའོ། །དེའི་དུས་ཉིད་ཀྱི་རྒྱུ་ལས་བྱུང་བའི་རྙེད་པ་ཡང་མི་དབང་བ་ཉིད་ཡིན་ནོ་ཞེས་བྱ་བ་ནི་དེ་གནས་ནས་ཕྱུང་བའི་དུས་ཉིད་ཀྱི་ཚེ་ན་དགེ་འདུན་ལ་རྙེད་པ་བྱུང་བ་གང་ཡིན་པ་དེ་ནི་ཡང་གནས་ནས་ཕྱུང་བ་དེ་ལ་མི་འོས་པ་ཉིད་ཡིན་ཏེ། གནས་ནས་མ་ཕྱུང་བའི་མདུན་རོལ་དུ་ཇི་སྲིད་གནས་ཀྱི་རྒྱུ་ལས་བྱུང་བའི་རྙེད་པ་ལ་གལ་ཏེ་དེའི་ཚེ་དགེ་འདུན་གྱིས་ཐོབ་པ་ཉིད་དུ་འབྱུང་བར་འགྱུར་བའི་དབྱར་གནས་ པ་ལ་སོགས ་པའི་རྒྱུ་ལས་བྱུང་བའི་རྙེད་པ་གང་ཡིན་པ་དེ་དེ་དང་ལྡན་པ་ཉིད་ནི་དེ་ཡང་དབང་བ་ཉིད་ཡིན་ཏེ། ཁྱིམ་པ་ཉིད་དུ་གྱུར་པ་ཡང་དེ་ལྟར་དབང་བ་ཉིད་ཀྱི་ཕྱིར་རོ། །ཅི་ཆ་གཅིག་མི་དབང་བ་ཉིད་དེ་གཏན་དུ་འམ་ཞེ་ན་དེའི་ཕྱིར་བྱེ་བ་བཞིན་ནོ་ཞེས་བྱ་བ་སྨོས་ཏེ། ཇི་ལྟར་བྱེ་བ་དག་ལས་དེ་སྨོས་པ་དེ་བཞིན་དུ་ཞེས་བྱ་བའི་དོན་ཏོ། །མ་ཚོར་བ་ལྟར་ཅིག་ཤོས་རྣམས་ལ་དེ་ཉིད་ཅེས་བྱ་བ་ལ་ སོགས་པ ་ལ་དེ་བསྟན་པའོ། །བྱེ་བ་དག་ན་ཆོས་མ་ཡིན་པའི་ཕྱོགས་དང་མཐུན་བ་ཡང་དེ་དང་འདྲའོ་ཞེས་བྱ་བ་ནི་དགེ་སློང་བྱེ་བ་རྣམས་ལ་ཆོས་མ་ཡིན་པའི་ཕྱོགས་དང་མཐུན་པ་ཡང་གནས་ནས་ཕྱུང་བ་དེ་དང་འདྲ་སྟེ། གནས་ནས་ཕྱུང་བ་ལ་གང་དུ་སྤྱོད་པ་ཅི་བསྟན་པ་དེ་དག་ཐམས་ཅད་ཆོས་མ་ཡིན་པའི་ཕྱོགས་དང་མཐུན་པ་ལ་ཡང་བལྟ་བར་བྱའོ་ཞེས་བྱ་བའི་དོན་ཏོ། །རང་བཞིན་དུ་གནས་པ་མ་ཡིན་པ་དག་ལ་ཡོངས་སུ་གནས་པ་དང་མགུ་བར་
བྱ་བ་དང་བསླབ་པ་སྤྱོད་པ་དག་མི་འཆགས་སོ་ཞེས་བྱ་བ་ནི་རང་བཞིན་དུ་གནས་པ་མ་ཡིན་པ་དེ་རྣམས་ལ་མི་སྤྱད་པ་ཉིད་དོ། །གང་གི་ཕྱིར་དེ་རྣམས་ལ་མི་འཆགས་པའི་ཕྱིར་རོ། །དགེ་འདུན་མ་ཡིན་པ་ལ་ཡང་ངོ་ཞེས་བྱ་བ་ནི་ཡོངས་སུ་གནས་པ་ལ་ སོགས་པ ་མི་འཆགས་པ་སྟེ། སུ་དག་དགེ་འདུན་དུ་མ་གྱུར་པའི་གང་ཟག་གཅིག་གམ་གཉིས་སམ་གསུམ་དག་ལ་ཡང་མི་འཆགས་སོ། །གནས་དེ་ན་འཁོད་པ་དག་ལས་ཡོངས་སུ་བཅད་པ་དག་ལ་ཡང་ངོ་ཞེས་བྱ་བ་ལ་ཡང་མི་འཆགས་སོ་ཞེས་བྱ་བར་སྦྱར་ཏེ། གནས་གང་དུ་ཡོངས་སུ་གནས་པ་ལ་ སོགས་པ ་དེ་དག་ལ་སྤྱད་པར་བྱ་བའི་གནས་དེ་ན་འཁོད་པའི་དགེ་སློང་དག་ལས་ལོགས་ཤིག་ཏུ་ཡོངས་སུ་བཅད་ཅིང་བཀར་བ་དག་ལས་ཡོངས་སུ་གནས་པ་ལ་ སོགས་པ ་སྤྱོད་པ་མི་འཆགས་སོ། །མང་པོ་ཉིད་དུ་ཡོངས་སུ་སྤང་བར་མི་བྱའོ་ཞེས་བྱ་བ་ནི་གནས་དེ་ན་དགེ་སློང་མང་པོ་དག་འཁོད་པར་འདིར་སྤྱད་པར་དཀའོ་སྙམ་པའི་བློ་མང་བ་ཉིད་ཀྱིས་སྤྱོད་པ་སྤང་བར་མི་བྱའོ་ཞེས་བྱ་བའི་དོན་ཏོ། །གནས་བརྟན་དང་སོ་སོར་ཐར་པ་དང་བཅས་པ་ཉིད་དུ་འབད་པར་བྱའོ་ཞེས་བྱ་བ་ནི་གནས་གང་ན་གནས་བརྟན་དང་བཅས་སོ་སོར་ཐར་པ་དང་བཅས་པའི་དགེ་འདུན་ཡོད་པའི་གནས་དེ་ཇི་ལྟར་སྤྱོད་པར་འགྱུར་བ་ཞིག་གུ་སྙམ་དུ་དེའི་དོན་དུ་འབང་པར་བྱའོ། །མ་གྲུབ་ན་གཞན་དུ་ཡང་སྤྱད་པར་བྱའོ་ཞེས་བྱ་བའི་དོན་ཏོ། །གང་ན་གཞན་གསུམ་ལ་ སོགས་པ ་དེ་དག་གི་མིང་རྣམ་པ་ཐམས་ཅད་ཀྱི་སྤྱོད་པ་དེར་སྤྱོད་པར་མི་བྱའོ་ཞེས་བྱ་བ་ནི་རྣམ་པ་ཐམས་ཅད་ཀྱི་དེ་སྤྱོད་པ་དེར་ཞེས་བྱ་བ་གང་རྣམས་ལ་ཡོད་པ་དེ་རྣམས་ནི་རྣམ་པ་ཐམས་ཅད་སྤྱོད་པ་དེར་བྱ་བའོ། །བསླབ་པ་ལ་སྤྱོད་པ་ཞེས་བྱ་བ་སྨོས་པས་སོ། །ཡོངས་སུ་གནས་པ་དང་མགུ་བར་བྱ་བ་དང་བཅས་པ་རྣམས་ཉེ་བར་བསྡུ་བའི་ཕྱིར་རྣམ་པ་ཐམས་ཅད་ཀྱི་ཞེས་བྱ་བ་སྨོས་སོ། །གང་ན་བདག་ཉིད་ལས་གསུམ་པོ་ལ་ སོགས་པ ་དེ་དག་གི་མིང་རྣམ་པ་ཐམས་ཅད་སྤྱོད་པ་དེར་དེ་སྤྱད་པར་མི་བྱའོ་ཞེས་བྱ་བ་ནི་གང་དུ་གཞན་ཡོངས་སུ་གནས་པ་སྤྱོད་པ་གསུམ་ཡོད་པ་དེར་ཡོངས་སུ་གནས་པར་སྤྱོད་པ་མི་བྱའོ། །གང་ན་གཞན་གསུམ་པོ་ལ་
སོགས་པ ་གཞི་ནས་ཡོངས་སུ་གནས་པ་སྤྱོད་པ་དེར་གཞི་ནས་ཡོངས་སུ་གནས་པ་སྤྱད་པར་མི་བྱའོ། །གང་ན་གཞན་ཡང་གཞི་ནས་བསླང་སྟེ། ཡོངས་སུ་གནས་པ་དང་མགུ་བར་བྱ་བ་སྤྱོད་པ་དང༌། གཞི་ནས་མགུ་བར་བྱ་བ་སྤྱོད་པ་དང༌། ཡང་གཞི་ནས་བསླང་སྟེ་མགུ་བར་བྱ་བ་སྤྱོད་པ་དང༌། བསླབ་པ་སྤྱོད་པ་དེར་བསླབ་པ་གང་ཞིག་ལ་ཞེས་བྱ་བ་དེ་ལ་འདི་བསྟན་པའོ། །འདིར་གཞུང་ནི། གཙུག་ལག་ཁང་གཅིག་ཏུ་ཡོངས་སུ་གནས་པར་བྱེད་པ་བཞིས་ཡོངས་སུ་གནས་པར་བྱེད་པར་མི་བྱའོ། །མགུ་བར་བྱ་བ་སྤྱོད་པ་བཞིས་མགུ་བར་བྱ་བ་སྤྱད་པར་མི་བྱའོ། །གཞི་ནས་མགུ་བར་བྱ་བ་སྤྱོད་པ་བཞིས་གཞི་ནས་མགུ་བར་བྱ་བ་སྤྱད་པར་མི་བྱའོ། །གཙུག་ལག་ཁང་དུ་བསླབ་པ་བྱིན་པ་བཞིས་བསླབ་པ་ལ་བསླབ་པར་མི་བྱའོ་ཞེས་གསུངས་པ་ཡིན་ནོ། །དང་པོ་གཉིས་ཀྱིས་གཞན་དུ་སྐྱ་རེངས་འཆར་བར་མི་བྱའོ་ཞེས་བྱ་བ་ནི་ཡོངས་སུ་གནས་པ་སྤྱོད་པ་དང་མགུ་བ་སྤྱོད་པ་དང་བསླབ་པ་སྤྱོད་པ་ཞེས་བྱ་བ་གསུམ་སྨོས་པའི་དང་པོ་གཉིས་ཏེ། ཡོངས་སུ་གནས་པ་སྤྱོད་པ་དང་མགུ་བར་བྱ་བ་སྤྱོད་པ་གཉིས་ཀྱིས་གནས་གང་དུ་སྤྱད་པར་བྱ་བ་ཡང་དག་པར་བླངས་པའི་གནས་དེ་ལས་གཞན་པའི་མཚམས་སུ་སྐྱ་རེངས་འཆར་བར་མི་བྱའོ། །བསླབ་པ་བྱིན་པ་ལ་ནི་ཆོ་ག་ཇི་སྲིད་འཚོའི་བར་དུ་དེ་ལ་འཇུག་པ་དང་བར་དུ་གཅོད་པར་གྱུར་པ་འདི་མེད་དོ། །དེ་ནི་ཚེ་གཅིག་གིས་ཡིན་པས་ཚེ་གཅིག་ཏུ་ངེས་པ་མེད་པའི་ཕྱིར་སྔ་རོལ་དུ་ཇི་སྲིད་འཚོ་བ་ཞེས་བྱ་བ་མི་སྦྱོར་བའོ། །འདུས་པའི་དགེ་འདུན་ལ་འདས་པ་དང་འབྱུང་བར་འགྱུར་བ་བརྗོད་པར་བྱ་བ་ཉིད་དོ་ཞེས་བྱ་བ་ནི་འདུས་པའི་གཎྜཱི་བརྡུངས་པ་དེར་ཇི་སྙེད་འདུས་པ་དེ་སྙེད་འདུས་པ་དག་ལ་གང་ཞིག་འདུས་པ་དེ་གནས་པ་དེ་ལ་དགེ་འདུན་གྱིས་གང་ཡང་མ་འོངས་པ་འབྱུང་བར་འགྱུར་བ་དང་བྱུང་ཟིན་པ་དེ་དག་སྤྱོད་པར་གྱུར་པ་དང། དེ་དག་སྤྱད་ཟིན་པ་ཞེས་བྱ་བ་བརྗོད་པར་བྱ་བ་ཉིད་དོ། །འདིར་ལས་བཞིན་དུ་ཐམས་ཅད་མི་འཚོགས་ན་བརྗོད་པ་མི་འཆགས་པ་མ་ཡིན་ཏེ་དེ་ལྟ་བས་ན་ཇི་སྙེད་པ་འདུས་པ་དེ་སྙེད་པ་རྣམས་ལ་ཉེས་པ་དང་བྲལ་བར་རིག་པར་བྱའོ། །དགེ་འདུན་ལས་ཞེས་སྨོས་པ་དེ་ནི་གང་ཟག་
གི་འདུས་པ་བསལ་བའི་དོན་དུའོ། །དུས་ཇི་ཙམ་ཞིག་བརྗོད་པར་བྱ་ཞེ་ན། དེའི་ཕྱིར་གལ་ཏེ་ཡུན་རིང་དུ་སྤྱད་པར་བྱ་བ་ཉིད་མ་ཡིན་ན་ཉིན་རེ་ཞིང་ངོ་ཞེས་བྱ་བ་སྨོས་ཏེ་གལ་ཏེ་ཡོངས་སུ་གནས་པ་ཡུན་རིང་དུ་སྤྱད་པར་བྱ་བ་མ་ཡིན་ན་ཉིན་རེ་ལན་རེ་བརྗོད་པར་བྱ་བ་ཡིན་ནོ། །འདི་ལ་ནི་གསུམ་མམ་བཞི་ཞིང་ངོ་ཞེས་བྱ་བ་ནི་ཡུན་རིང་དུ་སྤྱད་པར་བྱ་བ་ཉིད་འདི་ལ་ཉི་མ་གསུམ་མམ་བཞི་ཞིང་ལན་རེ་བརྗོད་པར་བྱ་བ་ཉིད་ཡིན་ནོ། །དེ་གཉིས་ལ་དོན་དེས་བརྙས་ཐབས་མི་བྱའོ་ཞེས་བྱ་བ་ནི་ཡོངས་སུ་གནས་པ་དང་མགུ་བར་བྱ་བ་སྤྱོད་པ་དེ་གཉིས་ལ་དགེ་འདུན་ལྷག་མ་དང་ཁ་ན་མ་ཐོ་བ་ཀུན་དུ་སྤྱོད་པའི་དོན་དེས་བརྙས་ཐབས་མི་བྱའོ། །འཐབ་ཀྲོལ་བྱེད་པ་འོང་བར་ཐོས་ཤིང་གལ་ཏེ་དེས་འཇིགས་ན་དགེ་འདུན་ཚོགས་པ་འམ་གང་ཟག་ལ་ཕྱིར་བཏང་བར་བྱ་བ་ཉིད་ཡིན་ནོ་ཞེས་བྱ་བ་ནི་ཐམས་ཅད་དུ་འཐབ་ཀྲོལ་བྱེད་ཅིང་རྒོལ་བའི་ངང་ཚུལ་ཅན་ལ་དེ་ལ་ཆེད་དུ་འགྲོ་བ་ཉིད་དུ་གནས་པ་དེ་འདིར་འཐབ་ཀྲོལ་བྱེད་པར་འགྱུར་སྙམ་དུ་འབྱུང་བར་འགྱུར་ལ་འཐབ་ཀྲོལ་བྱེད་པ་གཅིག་གམ་དུ་མ་འོང་བར་ཐོས་ཤིང༌། གལ་ཏེ་དེ་དག་གིས་གླེང་བ་དང་དྲན་པར་བྱེད་པས་འཇིགས་ན་སྤྱོད་པ་དེས་འཁྲུག་པར་གྱུར་པའི་འཐབ་ཀྲོལ་བྱེད་པ་པོ་གཅིག་གམ་དུ་མ་འོང་བར་མ་ཐོས་པར་འབྱུང་ན། དགེ་འདུན་གྱི་དྲུང་ངམ་གང་ཟག་གམ་དེ་དང་མི་མཛའ་བ་ཉིད་དུ་གནས་པས་བདག་ཉིད་རང་བཞིན་དུ་གནས་པ་ལ་གཞག་པར་བྱའོ། །འདིར་གཞུང་ཁ་ཅིག་ལས་རྒན་པའི་མཐར་གནས་ཏེ་ཡོངས་སུ་གནས་པ་དང་མི་མཛའ་བ་ཉིད་དུ་གནས་པར་བྱའོ། །དགེ་འདུན་ལ་ཕྱིར་བཏང་བའི་སྔགས་ནི་དགེ་འདུན་བཙུན་པ་རྣམས་གསན་དུ་གསོལ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །གཞན་དུ་ཡང་གཉིས་པོ་འདི་དག་གང་ཟག་ལ་ཕྱིར་བཏང་བའི་སྔགས་ཀྱི་གཞུང་ནི་ཞུ་བ་ལས་བཙུན་པ་བཅོམ་ལྡན་འདས་ཀྱིས་གལ་ཏེ་ཡོངས་སུ་གནས་པར་བྱེད་པའི་དགྲ་བོ་འོངས་ན། དེ་ཡོངས་སུ་གནས་པའི་སྤྱོད་པ་བག་ཡངས་སུ་བྱའོ་ཞེས་བཀའ་སྩལ་ན་དེས་ཇི་ལྟར་བག་ཡངས་སུ་བགྱི། ཉེ་བ་འཁོར་དགེ་སློང་དེས་ཆོས་གོས་ཕྲག་པ་གཅིག་ཏུ་སྟེ། འཆིལ་ལྷམ་དག་ཕུང་ནས་དགེ་སློང་གི་
མདུན་དུ་ཙོག་པུར་འདུག་སྟེ་འདི་སྐད་ཅེས་བརྗོད་པར་བྱའོ། །བདག་དགེ་སློང་ཡོངས་སུ་གནས་པར་བགྱིད་པའི་དགྲ་བོ་དགེ་སློང་མཆིས་ཏེ། བདག་མིང་འདི་ཞེས་བགྱི་བ་ཡོངས་སུ་གནས་པའི་སྤྱོད་པ་བག་ཡངས་སུ་བགྱིད་ཅིང་སླར་ཡང་ལེན་པར་བགྱིད་དོ། །ཡང་བླངས་ཏེ་སྤྱོད་པར་བགྱིད་ན་ཚེ་དང་ལྡན་བ་དག་གིས་བདག་ངོ་ཚ་མ་མཆིས་པར་གཟུང་དུ་གསོལ། །དེ་བཞིན་དུ་ལན་གཉིས། ལན་གསུམ་དུ་བཟླས། ཐབས་ཡིན་ནོ་ལེགས་སོ་ཞེས་གསུངས་པ་ཡིན་ནོ། །དགྲ་བོ་སོང་ན་ཕྱིར་ཡང་དེ་བཞིན་དུ་བླང་བར་བྱ་སྟེ། དེ་ནི་ཡོངས་སུ་གནས་པ་དང་མགུ་བར་བྱ་བར་སྤྱོད་པ་ཡིན་ནོ་ཞེས་གསུངས་ཏེ། དེ་ལ་གཉིས་ཀའི་སྦྱོར་བ་ཞེས་བྱ་བ་འདི་གཉིས་ཀ་བསྡུས་པའོ། །འཇིགས་དང་བྲལ་ན་དེ་ཉིད་དུ་ཕྱིར་བླང་བར་བྱའོ་ཞེས་བྱ་བ་ནི་དགེ་འདུན་གྱི་དྲུང་ངམ་གང་ཟག་ལའོ། །ས་གཞན་ན་གནས་པའི་གཞིའོ།། །།ཡོངས་སུ་གནས་པ་དང་མགུ་བར་བྱ་བ་སྤྱོད་པར་རང་བཞིན་དུ་གནས་པ་དང་ལྷན་ཅིག་ཏུ་གཡོགས་མ་གཅིག་པར་ཉལ་ན་ཉིན་མཚན་དེ་བཅད་དོ་ཞེས་བྱ་བ་ནི་ཇི་སྲིད་ཉལ་བའི་ཉིན་མཚན་དེ་ཡོངས་སུ་གནས་པར་བྱ་བ་དང་མགུ་བར་སྤྱད་པའི་ཞག་ཏུ་བགྲང་བར་མི་བྱ་ཞིང་བཅད་པར་བྱ་བའོ། །འདིར་གཞུང་ནི་ཡོངས་སུ་གནས་པར་བྱེད་པས་རང་བཞིན་དུ་གནས་པ་དང་ལྷན་ཅིག་གཡོགས་མ་གཅིག་པར་ཉལ་བ་དེའི་ཉིན་མཚན་ཡོངས་སུ་གནས་པ་དང༌། མགུ་བར་བྱ་བ་སྤྱོད་པ་མི་བགྲང་བར་མཚན་མོ་དེ་བཅད་དེ་བགྲང་བར་བྱའོ། །མགུ་བར་བྱ་བ་སྤྱོད་པ་ཡང་དེ་བཞིན་ནོ་ཞེས་གསུངས་པ་ཡིན་ནོ། །མཚམས་ཀྱི་ཕྱི་རོལ་དུ་སྤྱད་པ་ཡང་ངོ་ཞེས་བྱ་བ་ཡང་ཉལ་ན་ཉིན་མཚན་དེ་བཅད་དོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མ་བརྗོད་ན་ཡང་ངོ་ཞེས་བྱ་བ་ཡོངས་སུ་གནས་པ་དང་མགུ་བར་བྱ་བ་སྤྱོད་པ་ཞག་འདས་པ་དང་འབྱུང་བར་འགྱུར་བ་མ་བརྗོད་ན་ཡང་ཉིན་མཚན་དེ་བཅད་པར་བྱའོ། །ཐོས་པར་བྱ་བ་དག་མཚམས་དེ་ན་ཉེ་བར་མི་འཁོད་ན་མི་འབྱུང་ངོ་ཞེས་བྱ་བ་ནི་མཚམས་གང་དུ་དེ་སྤྱད་པར་བྱ་བའི་མཚམས་དེ་གང་ན་མང་དུ་ཐོས་པར་བྱ་བ་རྣམས་ལ་ཉེ་བར་མི་གནས་ན་མ་བརྗོད་པ་དེ་མི་འབྱུང་བའོ། །ཉི་མ་དེ་ཉིད་ལ་ཕྱིར་འོང་ན་
མཚམས་གཞན་དུ་འགྲོ་བ་ལ་ཉེས་པ་མེད་དོ། །ཡོངས་སུ་གནས་པར་བྱེད་པས་ཡོངས་སུ་གནས་པར་བྱེད་པ་དང་ལྷན་ཅིག་གཡོགས་མ་གཅིག་པར་ཉལ་བར་མི་བྱའོ་ཞེས་བྱ་བ་ནི་ཉིན་མཚན་སྤྱད་པར་ནི་མི་འགྱུར་མོད་ཀྱི་འོན་ཀྱང་ཉིན་མཚན་གྱི་མཐའ་ཉེས་བྱས་རྫོགས་པར་འགྱུར་ལ། དེའི་མདུན་རོལ་དུ་ནི་སྦྱོར་བ་ལས་བྱུང་བའི་ཉེས་བྱས་སུ་འགྱུར་བར་ཤེས་པར་བྱའོ། །རང་བཞིན་དུ་གནས་པ་དང་ལྷན་ཅིག་ཉལ་བ་ཡང་ཁ་ན་མ་ཐོ་བ་དེ་གཉིས་སུ་འགྱུར་བའི་སྟེང་དུ་དེའི་ཉིན་མཚན་བཅད་པར་ཡང་འགྱུར་རོ། །དེ་དང་མུ་སྟེགས་ཅན་ཡོངས་སུ་གནས་པ་ལ་གནས་པ་དང༌། དེར་ལྷན་ཅིག་པ་ལ་ནི་ཉེས་པ་མེད་དོ་ཞེས་བྱ་བ་ནི་དེར་ལྷན་ཅིག་པ་ལ་ཞེས་བྱ་བ་ནི་མུ་སྟེགས་ཅན་གྱི་གནས་དེར་རོ། །དེར་ཞེས་བྱ་བ་ནི་ཉལ་ས་དེར་རོ། །ཅིའི་ཕྱིར་ཡང་ཡོངས་སུ་གནས་པའི་གཞི་ལས་གཞན་ན་གནས་པའི་སྤྱོད་པའི་གཞི་ཞེས་མིང་གཞན་དུ་བྱས་ཤེ་ན། ས་གཞན་ན་གནས་པ་དང་མགུ་བར་བྱ་བ་སྤྱོད་པ་དང༌། བསླབ་པ་བྱིན་པ་ལ་ སོགས་པ ་གཞན་ན་གནས་པ་གང་ཇི་སྙེད་པ་དེ་དག་ཐམས་ཅད་གཞི་འདིས་སྤྱོད་པར་བསྟན་གྱི། ཡོངས་སུ་གནས་པ་འབའ་ཞིག་ཏུ་ནི་མ་ཟད་པས་དེའི་དོན་དེ་བསྟན་པའི་ཕྱིར་དེ་ཤེས་པར་བྱའོ། །ས་གཞན་ན་གནས་པ་སྤྱོད་པའི་གཞི་ཞུ་བའི་སྐབས་སོ། །ས་གཞན་ན་གནས་པ་སྤྱོད་པའི་གཞི་རྫོགས་སོ།། །།མ་གྲགས་པ་ནི་གཞི་ཉིད་མ་ཡིན་ནོ་ཞེས་བྱ་བ་ནི་འདོད་པ་རྣམས་ནི་ཞེ་སྡང་གིས་འཇུག་པ་ཡིན་ཏེ། དྲང་པོ་མ་ཡིན་པ་ལ་བརྟེན་ནས་འདི་རྣམས་ལ་མིའི་ཆོས་བླ་མར་གྱུར་པ་ཅིའི་ཕྱིར་ཞེ་ན། དེ་ལ་ཐ་དད་དུ་བྱ་བ་མ་ཡིན་པ་ལྟུང་བའི་ཐ་སྙད་ཁ་ཅིག་སྡིག་པ་འདོད་པ་རྣམས་ཀྱིས་དེ་ལྟ་བུའི་ངོ་བོ་ཉིད་འཇུག་པ་རྣམས་ཀྱིས་དགེ་སློང་རྣམས་ཉམས་པར་བྱས་པ་དེ་བས་ན་འདི་རྣམ་པར་གཞག་གོ །མ་གྲགས་པ་དེས་ཅིའི་ཕྱིར་གླེང་བར་མི་བྱ་ཞེ་ན། ཁ་ཅིག་མིའི་ཆོས་བླ་མ་དང་ལྡན་པས་སྔགས་ཀྱང་སྨན་གྱིས་བྱས་པ་འམ། སྐྱེ་བ་ལས་བྱུང་བ་གང་ཡིན་པ་འདི་ལྟ་སྟེ་དཔེར་ན་འཁོར་ལོས་སྒྱུར་བ་ལ་ སོགས་པ ་རྣམས་ཀྱིའོ། །ཏིང་ངེ་འཛིན་ལས་གྲུབ་པ་འམ་མཉམ་
པར་མ་བཞག་པའི་ས་ལ་གནས་པ་ནི་འདི་ལྟ་སྟེ། བྱེ་བྲག་ཅན་གྱི་ཡོན་ཏན་རྣམས་ཀྱི་རིགས་ལས་བྱུང་བ་ནི་འདོད་པ་ན་སྤྱོད་པ་རྣམས་སོ། །འདིར་གཞུང་ནི། དགེ་སློང་དག་ལྷའི་མིག་ནི་ཐ་སྙད་དུ་བྱ་བ་མ་ཡིན་ཏེ། དེ་བས་ན་དགེ་སློང་གིས་ལྷའི་མིག་གིས་མཐོང་བས་གླེང་བར་མི་བྱའོ་ཞེས་བྱ་བ་ནས་དེ་བཞིན་དུ་ལྷའི་རྣ་བས་གླེང་བར་མི་བྱའོ་ཞེས་བྱ་བ་ལ་ སོགས་པའི་བར་དུ་གསུངས་པ ་ཡིན་ནོ་ཞེ་ན་བདེན་མོད་ཀྱི། གཞན་དུ་ཡང་གྲགས་པ་ལས་མི་འདའ་བས་བྱས་ནས་འདི་ལ་འདོད་པ་ཉིད་རྣམ་པར་གནས་པ་ཡིན་ཏེ་སྐྱོན་མཚུངས་པ་ཉིད་ཀྱི་ཕྱིར་རོ། །ཐ་སྙད་དུ་བྱས་པ་མ་ཡིན་ཞེས་སྨོས་པས་ལོག་པར་རྟོག་པ་དེ་བས་ན་འདི་ལྟར་སྦྱར་བའོ། །དགག་དབྱེ་བརྗོད་པ་རྫོགས་ན་དགག་དབྱེ་གཞག་པ་མི་འཆགས་སོ་ཞེས་བྱ་བ་ནི། གང་ཟག་གང་གིས་དགག་དབྱེ་བརྗོད་པ་རྫོགས་ན་མི་འཆགས་པའོ། །དགག་དབྱེ་བརྗོད་པ་རྫོགས་པར་དགག་དབྱེ་འཇོག་པར་བྱེད་ན་ནི་འཆགས་སོ། །དགག་དབྱེའི་སྔགས་ལན་ཅིག་བརྗོད་པ་ལ་ནི་དེའི་མཐར་ཕྱིན་པ་ཉིད་བརྗོད་པ་ཡིན་ཏེ། ལན་གཉིས་བརྗོད་པ་ལ་ནི་གཉིས་པའི་མཐར་ཕྱིན་པ་ཉིད་རྫོགས་པ་ཡིན་ནོ། །ལན་གསུམ་དུ་བརྗོད་པ་གསུམ་པའི་མཐར་ཕྱིན་པ་ཉིད་རྫོགས་པ་ཡིན་ནོ། །དགག་དབྱེའི་གཞི་ལས་དེ་ལ་ སོགས་པས་དྲན་པ ་ཉེ་བར་གཞག་སྟེ་ཞེས་བྱ་བ་ནས་ཤེས་བཞིན་ཞེས་བྱ་བའི་བར་དུ་གསུངས་པ་ཡིན་ནོ། །བྱེད་པ་པོ་ནད་པ་དང་ལྡན་པ་ཉིད་ལ་ཡང་དེ་བཞིན་ནོ་ཞེས་བྱ་བ་ནི་གལ་ཏེ་དགག་དབྱེ་འཇོག་པ་པོ་ནད་པར་གྱུར་ན་དེས་དགག་དབྱེ་འཇོག་ཏུ་འཇུག་པ་ཡང་སྔ་མ་བཞིན་དུ་མི་འཆགས་པ་ཉིད་ཡིན་ནོ་ཞེས་བྱ་བའི་དོན་ཏོ། །ཅི་དེས་མངོན་སུམ་དུ་འཇོག་པ་མི་འཆགས་པར་ཟད་དམ་ཞེ་ན། དེའི་ཕྱིར་མངགས་པས་ཀྱང་ངོ་ཞེས་བྱ་བ་ལས་ཀྱང་ངོ་ཞེས་བྱ་བའི་སྒྲས་ནི་རང་གིས་འཇོག་ཏུ་འཇུག་ན་ཡང་མི་འཆགས་སོ་ཞེས་བྱ་བའི་དོན་ཏོ། །ནད་པ་ཉིད་ལ་ཡང་ངོ་ཞེས་བྱ་བ་ནི་གལ་ཏེ་གཞན་གྱིས་ནད་པའི་དགག་དབྱེ་འཇོག་པར་བྱེད་ན། དེས་ཀྱང་ནད་པའི་དགག་དབྱེ་གཞག་པ་མི་འཆགས་པའོ། །འདིར་དགག་དབྱེ་ཞེས་སྨོས་པས་ནི་གསོ་
སྦྱོང་དང་གདམས་ངག་གཞག་པ་ལ་ཡང་ཆོ་ག་འདི་རིག་པར་བྱའོ། །དེ་མནོད་པར་མི་བྱའོ་ཞེས་བྱ་བ་ནི་གང་ཞིག་དགག་དབྱེ་གཞག་པ་མི་འཆགས་པ་བསྟན་པ་གང་ཡིན་པ་དེ་མནོད་པར་མི་བྱའོ། །ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱེད་སྡོད་ཅིག་ཅེ་འམ། ཚེ་དང་ལྡན་པ་ཕོ་ཉ་དེ་ལ་ནི་བརྒལ་ཞིང་བརྟག་པ་མ་ཡིན་ནོ་ཞེས་ལན་གདབ་པར་བྱའོ་ཞེས་བྱ་བ་ནི་གལ་ཏེ་ནད་པ་རང་གི་དགག་དབྱེ་འཇོག་ཏུ་འཇུད་ན་དེའི་ཚེ་ཚེ་དང་ལྡན་པ་ནད་པ་ནི་སྦྱོར་མི་བཟོད་པ་ཡིན་གྱི་ཁྱོད་རང་སྡོད་ཅིག་ཅེས་ལན་གདབ་པར་བྱའོ། །འོན་ཏེ་ནད་པས་མངགས་པ་དེ་ལ་ཚེ་དང་ལྡན་པ་ཕོ་ཉ་ནད་པ་དེ་ལ་བརྒལ་ཞིང་བརྟག་པར་བྱ་བ་མ་ཡིན་ནོ་ཞེས་ལན་གདབ་པར་བྱའོ། །བྱས་པ་དང་བྱེད་པའི་རང་གི་ངོ་བོ་མ་རྟོགས་པ་ཉིད་ན་ཡང་གླེང་བ་མི་འཆགས་སོ་ཞེས་བྱ་བ་ལ་བྱས་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི་འཕགས་པ་ཆེ་གེ་མོས་ཉེས་པ་བྱས་པ་ཞེས་ཐོས་ཀྱིས་ཉེས་པ་འདི་དང་འདི་ལྟ་བུ་བྱས་ཞེས་བྱ་བ་མ་ཐོས་སོ་ཞེས་ཟེར་བའོ། །བྱེད་པའི་རང་གི་ངོ་བོ་མ་རྟོགས་པ་ཉིད་ཅེས་བྱ་བ་ནི་འཕགས་པས་ཉེས་པ་འདི་དང་འདི་ལྟ་བུ་བྱས་ཞེས་ནི་ཐོས་ཀྱི་ཆེ་གེ་མོ་ཞིག་གིས་ནི་མ་ཐོས་སོ་ཞེས་ཟེར་བ་སྟེ། དེ་ལྟར་བྱས་པ་དང་བྱེད་པའི་རང་གི་ངོ་བོ་མ་རྟོགས་པ་ཉིད་ཡིན་ན་ཡང་གླེང་བ་མི་འཆགས་སོ། །ལྷག་མས་ཀྱང་དུས་མ་ཡིན་པར་འཇུག་པར་མི་བྱའོ་ཞེས་བྱ་བ་ལ་གནས་གང་དུ་གླེང་བར་བྱ་བའི་གང་ཟག་དེའི་བསྲུང་བར་བྱ་བ་རྣམས་ཀྱི་མདུན་དུ་དེས་བདག་ལ་བརྙས་ཐབས་བྱས་པར་འགྱུར་བའི་གནས་དེ་ལས་ལྷག་མས་ཀྱང་ཞེས་བྱ་བས་ནི་བྱེད་པ་པོ་ནད་ པ་ལ་སོགས ་པས་གླེང་བ་དེ་ལས་གཞན་བས་ཀྱང་དུས་མ་ཡིན་པར་འཇུག་པར་མི་བྱའི་དུས་སུ་འཇུག་པར་བྱའོ། །དྲན་པ་དང་ཤེས་བཞིན་ཉེ་བར་མ་གཞག་པར་མི་བྱའོ། །མཐའ་མ་ཡིན་པར་མི་བྱའོ་ཞེས་བྱ་བ་ནི་གནས་གང་དུ་གླེང་བར་བྱ་བའི་གང་ཟག་དེའི་བསྲུང་བར་བྱ་བ་རྣམས་ཀྱི་མདུན་དུ་དེས་དག་ལ་བརྙས་ཐབས་བྱས་པར་འགྱུར་བའི་གནས་དེ་ལས་གཞན་བའི་གླེང་བར་བྱ་བ་དེས་འཇུག་པར་བྱ་བའི་དོན་ཏོ། །ལྕགས་ཀྱི་གསལ་ཞིང་ཅན་ཉིད་ནི་དམ་པ་རྣམས་ཀྱིས་སྨད་པར་བྱ་བ་ཉིད་ཡིན་པའི་ཕྱིར་རོ། །
སྐབས་འབྱེད་དུ་མ་བཅུག་པར་མི་བྱའོ་ཞེས་བྱ་བ་ནི་གང་དུ་གང་ཟག་གང་ལ་སྐབས་འབྱེད་དུ་མ་བཅུག་པར་གླེང་བ་ལ་འཇུག་པར་མི་བྱ་སྟེ་དེ་ནི་རབ་ཏུ་འཁྲུག་པ་སྤང་བ་ཉིད་ཀྱི་ཕྱིར་རོ། །དགག་དབྱེ་ནི་དེ་ཉིད་ཡིན་ནོ་ཞེས་བྱ་བ་ནི། གང་གི་དགག་དབྱེའི་ཚེ་དགེ་འདུན་ལས་དགག་དབྱེ་བྱས་པ་དེ་ནི་སྐབས་ཕྱེད་པ་ཉིད་ཡིན་པས་དེའི་ཕྱིར་དགག་དབྱེ་བྱེད་པ་ནི་གླེང་བ་ལ་འཇུག་པ་ནི་ཉེས་པ་མེད་དོ་ཞེས་བྱ་བའི་དོན་ཏོ། །མི་དྲན་པ་ན་དྲན་པར་བྱའོ་ཞེས་བྱ་བ་ནི་གླེངས་པ་ན་མི་དྲན་ན་དྲན་དུ་གཞུག་གོ །དྲན་པར་བྱ་བ་ནི་གླེང་བའི་འཁོར་ཡིན་པས་དེའི་ཕྱིར་ཇི་ལྟར་གླེང་བ་ལ་དུས་མ་ཡིན་པར་འཇུག་པ་མི་བྱ་བ་དང༌། དྲན་པ་དང་ཤེས་བཞིན་ཉེ་བར་མ་བཞག་པར་མི་བྱ་བ་དང༌། སྐབས་འབྱེད་དུ་མ་བཅུག་པར་མི་བྱའོ་ཞེས་ཇི་སྐད་སྨོས་པ་དེ་དག་དྲན་པར་བྱ་བའི་སྐབས་འདིར་ཡང་གྲུབ་པ་ཡིན་ནོ། །དེ་མི་བྱེད་ན་དེ་ལ་བརྗོད་པ་དང་བཅས་པ་ཉིད་བྱའོ་ཞེས་བྱ་བ་ནི་སྐབས་འབྱེད་པ་དེ་མི་བྱེད་ན་གླེང་བར་བྱ་བ་དེ་ལ་བརྗོད་པ་དང་བཅས་པ་ཉིད་བྱའོ། །མ་མོ་དག་ལས་ཆོ་ག་དང་བཅས་པར་བརྗོད་པར་བྱ་བ་ཉིད་བརྗོད་པའོ། །ཇི་ལྟར་བརྗོད་པ་དང་བཅས་པ་ཉིད་བྱ་ཞེ་ན། དེའི་ཕྱིར་ཚེ་དང་ལྡན་པ་ཁྱེད་ལ་བརྗོད་པ་དང་བཅས་པ་ཉིད་ཀྱིས་ཁྱེད་ཀྱིས་གནས་འདི་ནས་མ་ཞུས་པར་འགྲོ་བར་མི་བྱའོ། །ཁོ་བོ་ལ་ཚེ་དང་ལྡན་པ་ལ་བརྗོད་པའི་ཕྱིར་བསྡོགས་པ་ཡོད་དོ་ཞེས་བྱ་བ་སྨོས་ཏེ། བརྗོད་པར་བྱ་བ་ཉིད་དུ་ངེས་པ་ནི་བསྡོགས་པ་ཞེས་བྱའོ། །དེས་དུལ་བར་མི་འགྱུར་བ་མི་གདམས་པ་ཉིད་དུའོ་ཞེས་བྱ་བ་ནི་དེ་ལ་བརྗོད་པ་དང་བཅས་པ་ཉིད་བྱའོ་ཞེས་བྱ་བར་སྦྱར་རོ། །དེ་ལ་གཏམ་འདྲེ་བ་ལ་ སོགས་པ ་ཡང་བཟློག་པར་བྱའོ་ཞེས་བྱ་བ་ནི་མི་གདམས་པ་ཉིད་དུ་བྱས་པ་དེ་ལ་གདམས་ཤིང་རྗེས་སུ་བསྟན་པར་བྱ་བ་ཉིད་ཀྱིས་ཕན་གདགས་པ་བཟློག་པར་བྱ་བ་འབའ་ཞིག་ཏུ་མ་ཟད་ཀྱི་འོན་ཀྱང་གཏམ་འདྲེ་བ་དང་ཕེབས་པར་སྨྲ་བ་དང༌། སོ་སོར་ཀུན་དགའ་བར་བྱ་བའི་ཐ་སྙད་ཀྱིས་ཚིག་སྦྱིན་པར་ཡང་མི་བྱའོ། །དེ་ལྟར་ན་ཡང་གསོ་སྦྱོང་གཞག་གོ་ཞེས་བྱ་བ་ནི་དེ་ལྟར་ཡང་དུལ་བར་མི་འགྱུར་ཞིང་སྐབས་མི་འབྱེད་ན་དེའི་ཚེ་གསོ་སྦྱོང་གཞག་པར་བྱའོ། །དེས་ཀྱང་ནི་དགག་དབྱེའོ་ཞེས་བྱ་བ་ནི་དེ་ལྟར་གཞག་པ་དེས་ཀྱང་དུལ་བར་མི་
འགྱུར་ཞིང་སྐབས་མི་འབྱེད་ན་དེའི་ཚེ་དེའི་དགག་དབྱེ་གཞག་པར་བྱའོ། །གསོ་སྦྱོང་དང་དགག་དབྱེ་གཞག་པར་ཞེས་བྱ་བ་ནི་གང་ཟག་འདི་འདུག་པ་དང་ལྷན་ཅིག་དགེ་སློང་རྣམས་ཀྱིས་གསོ་སྦྱོང་དང་དགག་དབྱེ་མི་བྱའོ་ཞེས་བྱ་བ་ཡིན་པར་རིག་པར་བྱའོ།། འཇོག་པར་བྱེད་པ་དག་གིས་གཞན་པ་དང་ལྷན་ཅིག་ཏུ་བྱ་བ་ཡང་འདིར་བཟོད་པ་ཡིན་ནོ་ཞེས་བྱ་བ་ནི་གང་དག་གིས་གཞན་པ་གང་ཡིན་བ་དག་དང་ལྷན་ཅིག་གསོ་སྦྱོང་ལ་ སོགས་པ ་བྱ་བ་གང་ཡིན་པ་དེ་ཡང་སྐབས་འདིར་དེ་ལ་བཟོད་པ་བྱ་བ་ཡིན་གྱི་ཚིག་འབའ་ཞིག་གིས་བཟོད་པ་བྱ་ཞིང་བག་ཡངས་སུ་བྱ་བར་མ་ཟད་དོ་ཞེས་བྱ་བའི་དོན་ཏོ། །འདིར་གཞུང་ནི་དྲུག་སྡེ་དག་གིས་འགྲན་དོར་གྱི་བསམ་པས་དགེ་སློང་གིས་གསོ་སྦྱོང་གཞག་པ་དང༌། དགེ་སློང་རབ་ཏུ་གནས་པ་ཐམས་ཅད་ཀྱིས་ཀྱང་ཁྱེད་ཀྱི་གསོ་སྦྱོང་དྲུག་སྡེ་དག་གིས་གཞག་གོ་ཞེས་གསོ་སྦྱོང་ལས་ཟློག་པར་བྱེད་ན་ཡང་དྲུག་སྡེ་དག་གིས་གསོ་སྦྱོང་བྱའོ་ཞེས་སྨྲས་པ་ནས་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དགེ་སློང་དག་གིས་གསོ་སྦྱོང་གཞག་པ་དེ་ཉིད་ཀྱིས་གསོ་སྦྱོང་བྱས་ནས་བཟོད་པར་བྱས་པར་བརྗོད་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྐབས་ཕྱེ་བ་ཉིད་ན་གལ་ཏེ་མཉན་བ་ཉིད་མ་ཡིན་ན་ཕུར་པ་དང་བཅས་པ་ཉིད་བྱའོ་ཞེས་བྱ་བ་ནི་སྐབས་ཕྱེ་བ་ཉིད་ན་གལ་ཏེ་དེ་མཉན་པ་ཉིད་དུ་མི་འགྱུར་ན་དེའི་ཚེ་དེ་ལ་ཕུར་པ་དང་བཅས་པ་ཉིད་ཅེས་བྱ་བ་སྟེ། ཕུར་པ་དང་བཅས་པའི་སྐབས་འདི་ནི་མ་མོ་ལས་འབྱུང་ངོ༌། །ཇི་ལྟར་ཕུར་པ་དང་བཅས་པ་ཞེས་བྱ་ཞེ་ན། དེའི་ཕྱིར་གནས་འདིའམ་གཞན་དུའམ་གཞི་འདི་འམ་གང་ཡང་རུང་བ་ལ་འདོད་པར་སྨྲ་བར་བྱའོ་ཞེས་བྱ་བ་དང༌། ལྟུང་བ་བཀལ་ཞིང་ཉེས་པ་བསྟན་ཏེ་བཏང་བས་སོ་ཞེས་བྱ་བ་སྨོས་ཏེ་གང་ཡང་རུང་བ་ལ་འདོད་པར་བྱ་ཞེས་བྱ་བ་ནི་གནས་སམ་གཞི་ལ་འོ། །ཉེས་པ་བསྟན་ཏེ་ཞེས་བྱ་བ་ནི་ལྟུང་བ་བཀལ་ཞིང་ཞེས་བྱ་བའི་རྣམ་གྲངས་གཞན་བསྟན་པའོ། །རྟ་དམུ་རྒོད་ཕུར་པ་དང་བཅས་པ་དང་འདྲ་བར་དེ་དང་དྲི་མ་དང་བཅས་པར་བཏང་བ་ཡིན་པས་དེའི་ཕྱིར་ཕུར་པ་དང་བཅས་པ་ཞེས་བྱའོ། །ཚུལ་ཁྲིམས་དང་ལྟ་བ་དང་
ཆོ་ག་དང་འཚོ་བ་ཉམས་པས་གླེང་བ་ལ་ སོགས་པ ་དེ་དག་ཐམས་ཅད་བྱེད་ན་གཞི་དང་བཅས་པ་འཆགས་སོ་ཞེས་བྱ་བ་ནི་མཐོང་བ་དང་ཐོས་པ་དང་དོགས་པ་དག་གིས་གཞི་དང་བཅས་པར་ཚུལ་ཁྲིམས་དང་ལྟ་བ་དང་ཆོ་ག་དང་འཚོ་བ་ཉམས་པས་གླེང་པ་དང་དྲན་པར་བྱ་བ་དང་སྐབས་འབྱེད་དུ་གཞུག་པ་དང་བརྗོད་པ་དང་བཅས་པ་དང༌། མི་གདམས་པ་ཉིད་དང༌། གསོ་སྦྱོང་གཞག་པ་དང༌། དགག་དབྱེ་གཞག་པ་ཕུར་པ་དང་བཅས་པས་བྱ་བ་དག་བྱེད་ན་འཆགས་པའོ། །དེ་དག་བྱ་བ་ཡང་གཞི་ཡོད་ན་འཆགས་ཀྱི་གཞི་མེད་པར་ཚུལ་ཁྲིམས་ལ་ སོགས་པ ་ཉམས་པས་གླེང་བ་ལ་ སོགས་པ ་བྱེད་པ་ནི་མི་འཆགས་སོ། །གཞི་ལེགས་པ་མ་ཡིན་པས་མི་བྱའོ་ཞེས་བྱ་བ་ནི་གླེང་བ་ལ་ སོགས་པ ་དེ་དག་ལེགས་པར་མ་མཐོང་བ་དང༌། ལེགས་པར་མ་ཐོས་པ་དང༌། ལེགས་པར་མི་དོགས་པར་མི་བྱ་བ་དང༌། མི་གསལ་བར་ཐོས་པ་ནི་ལེགས་པར་མ་ཐོས་པའོ། །སྙིང་ཐ་དད་ཅིང་དད་པ་ཞེན་པའི་ཡོངས་སུ་རྟོག་པ་ནི་ལེགས་པར་མི་དོགས་པའོ། །འདིར་གཞི་དྲི་ངན་པ་ཡོད་དེ། དེ་བས་ན་འདིར་མི་འཆགས་པ་མ་ཡིན་པར་རིག་པར་བྱའོ། །འདི་ནི་ཕྲན་ཚེགས་དག་ལས་འབྱུང་ངོ༌། །འདི་ལ་དངོས་པོ་ལ་བདེན་པ་ཉིད་ནི་རྒྱུ་མ་ཡིན་ནོ་ཞེས་བྱ་བ་ནི་གཞི་འདི་ལ་དངོས་པོ་ལ་བདེན་པ་ཉིད་ནི་རྒྱུ་མ་ཡིན་གྱི་འདུ་ཤེས་ཀྱི་དབང་གིས་འདི་རྣམ་པར་གཞག་པ་སྟེ། དངོས་པོ་བདེན་ པ་ཉིད་ཡིན་ན་ཡང་གལ་ཏེ་མཐོང་བ་ལ་སོགས ་པའི་འདུ་ཤེས་མེད་པར་གླེང་བར་བྱེད་ན་གཞི་མེད་པ་ཁོ་ནས་གླེང་བ་ལ་ སོགས་པ ་ཁོ་ནར་འགྱུར་ལ། དངོས་པོ་མི་བདེན་ པ་ཉིད་ཡིན་ཡང་གལ་ཏེ་མཐོང་བ་ལ་སོགས ་པའི་འདུ་ཤེས་ཀྱིས་གླེང་བར་བྱེད་ན་གཞི་དང་བཅས་པ་ཁོ་ནས་གླེང་ པ་ལ་སོགས ་པར་འགྱུར་རོ་ཞེས་བསྟན་པ་ཡིན་ནོ། །ཐོས་པ་ནི་རྣམ་པ་གསུམ་སྟེ། བྱ་བའི་མཚན་མ་དང༌། གཞན་ཕེབས་པར་སྨྲ་བ་དང༌། རང་གི་རྗེས་སུ་ཐོས་པའོ་ཞེས་བྱ་བ་ལ། བྱ་བའི་མཚན་མ་ཞེས་བྱ་བ་སྨྲ་བ་གང་དག་གིས་འཇུག་པར་བྱེད་པའི་སྒྲ་དེ་དག་དེར་བྱ་བ་དེ་ལྷན་ཅིག་བྱུང་བའི་རང་བཞིན་གང་ཡིན་པ་དེ་ནི་བྱ་བའི་མཚན་མའོ། །གཞན་དག་གིས་
བྱས་པར་གྱུར་པ་ལ་དེའི་དོན་དུ་གཞན་ཕེབས་པར་སྨྲ་བ་ལ་གཞན་གྱིས་སྨྲས་པ་ཉིད་དོ། །རང་གི་བདག་ཉིད་ཤེས་པ་པོ་ཉིད་ལ་གང་ཞིག་གཞན་གྱིས་ཐོས་སུ་བཅུག་པ་དེ་ནི་ཆེ་གེ་མོ་ཞིག་གིས་འདི་ལྟ་བུས་བྱས་སོ་ཞེས་གཞན་དག་ལོགས་ཤིག་ན་གཏམ་ཟེར་བ་རང་གིས་ལོགས་ཤིག་ནས་རྗེས་སུ་ཐོས་པ་གང་ཡིན་པའོ། །འདིར་གཞུང་ནི་འདི་ལ་དགེ་སློང་དག་གིས་རྣམ་པ་གང་དག་དང༌། རྟགས་གང་དག་དང་མཚན་མ་གང་དག་གིས་ཕམ་པར་འགྱུར་བའི་མཐའི་ལྟུང་བ་འབྱིན་པའི་རྣམ་པ་དེ་དག་དང་རྟགས་དེ་དག་དང་མཚན་མ་དེ་དག་གིས་ཕམ་པར་འགྱུར་བ་མཐའི་ལྟུང་བ་འབྱིན་པ་དེ་ཐོས་པ་དང༌། གཏམ་དེ་ཡང་དེ་ལས་བྱུང་ཞིང་དེའི་རང་བཞིན་གྱིས་ཉེ་བར་གནས་པ་ཡིན་པ་དང༌། དེ་བཞིན་དུ་དེས་དགེ་སློང་དེ་ཕམ་པར་འགྱུར་བའི་མཐའ་ལྟུང་བར་འབྱུང་ངོ་ཞེས་ཡིད་ཆེས་པའི་ཚིག་ལས་ཐོས་པར་གྱུར་ན་གཞི་དེས་གནས་པ་དེའམ་གཞན་དུ་དེའི་གསོ་སྦྱོང་འཇོག་པར་བྱེད་ན་ཆོས་བཞིན་དུ་གསོ་སྦྱོང་འཇོག་པ་ཡིན་ནོ་ཞེས་གསུངས་པ་ཡིན་ཏེ། དེར་ཇི་སྐད་གསུངས་པ་དེ་དག་གོ་རིམས་བཞིན་དུ་འདིར་བསྡུས་པ་ཡིན་ནོ་ཡིད་མ་ཆེས་པ་ནི་གཞི་ཉིད་མ་ཡིན་ནོ་ཞེས་བྱ་བ་ནི་ཐོས་ཀྱང་ཡིད་མ་ཆེས་པ་གང་ཡིན་པ་དེ་ནི་གཞི་མ་ཡིན་པར་རིག་པར་བྱའོ། །འདིར་གཞུང་ནི་དེས་ཡིད་ཆེས་པའི་ཚིག་ལས་ཐོས་པ་མ་ཡིན་ནོ་ཞེས་གསུངས་པ་ཡིན་ནོ། །ཡོངས་སུ་སྦྱོང་བའི་གཞིའོ།། །།ཤེས་པ་དུ་མ་ཉིད་ཡིན་ན་གླེང་བ་ལ་ སོགས་པ ་ལ་འདོད་པས་སོ་ཞེས་བྱ་བ་ནི་ཤེས་པའི་དགེ་སློང་དུ་མ་ཉིད་ཡིན་ན་དེ་ལ་གླེང་བ་དང་དྲན་པར་བྱ་བ་དང་སྐབས་འབྱེད་དུ་གཞུག་པ་ལ་ སོགས་པ ་དེ་དག་རྒན་རིམ་གྱིས་འཇུག་པར་བྱ་བ་མ་ངེས་ཀྱིས་གླེང་བར་བྱ་བ་འདོད་པས་ཅི་དགར་འཇུག་པར་བྱའོ་ཞེས་བྱ་བའི་དོན་ཏོ། །འདིར་གཞུང་ནི་བརྫུན་དུ་སྨྲ་བའི་ལྟུང་བྱེད་ཀྱི་ཞུ་བ་ལས། །བཙུན་པ་དགེ་སློང་གི་དགེ་འདུན་གྱི་དབུས་སུ་བསླབ་པ་ལས་འདའ་བར་བགྱིད་ན་སུས་གླེང་བར་བགྱི། གང་འདོད་པས་སོ་ཞེས་བྱ་བ་གསུངས་པ་ཡིན་ནོ། །དགག་དབྱེ་མ་ཡིན་པར་དེ་གཞག་པར་མི་བྱའོ་ཞེས་བྱ་བ་ནི་དགག་བྱའོ་ལས་ཀྱི་དུས་མ་ཡིན་པ་གཞན་དུ་དགག་དབྱེ་དེ་གཞག་
པར་མི་བྱའོ། །གསོ་སྦྱོང་མ་ཡིན་པར་དེ་མི་བྱའོ་ཞེས་བྱ་བ་ནི་གསོ་སྦྱོང་གི་ལས་ཀྱི་དུས་མ་ཡིན་པར་གཞན་དུ་གསོ་སྦྱོང་དེ་གཞག་པར་མི་བྱའོ། །འཇོག་པར་བྱེད་པ་བུད་མེད་ཉིད་ཀྱིས་གཞན་སྐྱེས་པའི་གཞག་པ་ཉིད་བྱེད་དམ་བྱས་པ་ཉིད་ན་གཞག་པ་ཉིད་མ་ཡིན་ནོ་ཞེས་བྱ་བ་ནི་དེ་དག་འཇོག་པར་བྱེད་པ་ཉིད་དམ་གཞག་པར་བྱས་པ་ཉིད་ཀྱི་འོག་ཏུ་གལ་ཏེ་མཚན་དེ་བུད་མེད་དུ་གྱུར་པ་ཉིད་ཀྱིས་འཇོག་པར་བྱེད་པ་བུད་མེད་ཡིན་ལ། ཅིག་ཤོས་སྐྱེས་པ་ཡིན་པར་གྱུར་ན་དེ་ལ་འཇོག་པར་བྱེད་པ་གང་ཡིན་བ་དེ་ནི་གཞག་པ་ཉིད་མ་ཡིན་ཏེ། དེ་ལྟ་ན་མི་འབྱུང་བ་ཁོ་ན་ཡིན་ནོ་ཞེས་བྱ་བའི་དོན་ཏོ། །སྐྱེས་པས་བུད་མེད་ཀྱི་འཇོག་པ་ནི་འབྱུང་བ་ཁོ་ན་ཡིན་ནོ། །མི་འབྱུང་བས་རྗེས་སུ་འཇུག་པ་མེད་དོ། །དེ་ལྟ་བས་ན་བུད་མེད་ཀྱིས་འཇོག་ཏུ་བཅུག་ན་སྐྱེས་པ་ཉིད་དུ་གྱུར་ཀྱང་གཞན་པ་ཉིད་དགག་དབྱེའི་གཞི་ཞུ་བ་ལས། བཙུན་པར་ཞིག་དགེ་སློང་གིས་དགེ་སློང་གི་དགག་དབྱེ་འཇོག་པར་བགྱིད་ཅིང་གང་གིས་བགྱི་བ་དེ་མཚན་གྱུར་ཏེ་དགེ་སློང་མར་གྱུར་ན་གཞག་པར་བགྱིའམ། ཉེ་བ་འཁོར་གཞག་པར་བརྗོད་པར་བྱའོ། །འཇོག་པར་བགྱི་བ་གང་ལགས་པ་དེ་མཚན་གྱུར་ཏེ། དགེ་སློང་མར་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །བཙུན་པ་རེ་ཞིག་དགེ་སློང་མས་དགེ་སློང་མའི་དགག་དབྱེ་འཇོག་པར་བགྱིད་ཅིང་གང་གིས་འཇོག་པར་བགྱིད་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །འཇོག་པར་བགྱིད་པ་གང་ལགས་པ་དེ་མཚན་གྱུར་ཏེ་དགེ་སློང་དུ་གྱུར་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་བྱའོ། །དེ་བཞིན་དུ་དགེ་སློང་དང་དགེ་སློང་མས་དགག་དབྱེ་བྱེད་པ་ལ་ཡང་བརྗོད་པར་བྱའོ་ཞེས་གསུངས་པ་ཡིན་ནོ། །རང་བཞིན་དུ་ཉམས་པས་ཀྱང་མ་ཡིན་ནོ་ཞེས་བྱ་བ་སྨྱོན་ པ་ལ་སོགས ་པས་གཞག་པ་ཉིད་ཀྱང་གཞག་པ་ཉིད་མ་ཡིན་ནོ། །ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པས་ཀྱང་མ་ཡིན་ནོ་ཞེས་བྱ་བ་ནི་ཉམས་པའམ་རྣམ་པ་ཐམས་ཅད་དུ་གང་
ལ་ཚུལ་ཁྲིམས་མེད་པ་དེ་ནི་ཚུལ་ཁྲིམས་མེད་པའོ། །ཆོས་དང་ཆོས་མ་ཡིན་པའི་ཕྱོགས་སུ་གྱུར་པ་ཕན་ཚུན་བློ་གཅིག་པ་ཉིད་མ་ཡིན་པ་དེ་གཉིས་ཀྱིས་གཞག་པ་ཉིད་ཀྱང་གཞག་པ་ཉིད་མ་ཡིན་ནོ། །གཅིག་པ་ཉིད་མ་ཡིན་པའི་གཞུང་ནི་དགག་དབྱེའི་ཞུ་བ་ལས། བཙུན་པ་རེ་ཞིག་ཁས་བླངས་པ་དག་གིས་ཁས་མ་བླངས་པ་དག་གི་དགག་དབྱེ་འཇོག་པར་བགྱིད་ན་གཞག་པར་བརྗོད་པར་བགྱིའམ། ཉེ་བ་འཁོར་གཞག་པར་བརྗོད་པར་མི་བྱའོ། །བཙུན་བ་རེ་ཞིག་ཁས་མ་བླངས་པ་དག་གིས་ཁས་བླངས་པ་དག་གི་དགག་དབྱེ་འཇོག་པར་བགྱིད་ན་གཞག་པར་བརྗོད་པར་བགྱི་འམ། ཉེ་བ་འཁོར་གཞག་པར་བརྗོད་པར་མི་བྱའོ་ཞེས་གསུངས་པ་ཡིན་ནོ། །དེ་གཉིས་ཀྱིས་ཡང་མ་ཡིན་ནོ་ཞེས་བྱ་བ་ནི་རང་བཞིན་ཉམས་པ་སྨྱོན་པ་ལ་ སོགས་པ ་ཞེས་བྱ་བ་དེ་དང་ཚུལ་ཁྲིམས་མེད་པ་དང་གཅིག་པ་ཉིད་མ་ཡིན་པས་གཞག་པ་ཉིད་ཀྱང་གཞག་པ་ཉིད་མ་ཡིན་ནོ། །ཡང་ཅིའི་ཕྱིར་གསོ་སྦྱོང་གཞག་པའི་གཞི་འདིའི་མིང་ཡོངས་སུ་སྦྱང་བའི་གཞི་ཞེས་གཞན་དུ་བྱས་ཤེ་ན། གཞི་འདིས་གདངས་ངག་གཞག་ པ་དང་ཕུར་ལ་སོགས ་པས་ལས་ཀྱིས་སྤྱད་བར་བྱ་བ་ཐམས་ཅད་པ་སྡུས་པ་ཡིན་གྱི། གསོ་སྦྱོང་གཞག་པ་འབའ་ཞིག་ཏུ་མ་ཟད་པས་ཞེས་བྱ་བ་འདི་སྒྲུབ་པས་དེ་ཤེས་པར་བྱའོ། །རྣམ་པ་ཐམས་ཅད་དུ་མིང་དུ་མིང་དུ་གཞན་དུ་བྱས་པ་ནི་བཞི་པོ་ལ་ཡང་ཡོངས་སུ་སྦྱང་བའི་གཞི་ཞེས་བྱ་བ་དེ་བར་གཏོགས་པའི་དོན་དུའོ། །ཡོངས་སུ་སྦྱང་བའི་གཞི་ཞུ་བའི་སྐབས་སོ། །ཡོངས་སུ་སྦྱང་བའི་གཞི་རྫོགས་སོ།། །།དགེ་འདུན་ཐ་དད་པ་ཉིད་དུ་ནུས་པ་ལ་མི་འདོད་པར་གླེང་བ་དང༌། གླེང་བར་བྱེད་པ་ན་ལོག་པར་མི་བྱའོ། །འདའ་བར་བྱ་བ་གང་ན་མི་མཐུན་པ་ཡོད་པ་དེ་དང་ལྷན་ཅིག་ཏུ་འཁོད་པར་མི་བྱའོ་ཞེས་བྱ་བ་ནི་གནས་གང་དུ་འདའ་བར་བྱེད་པ་ནི་འདའ་བར་བྱེད་པའོ། །འཐབ་ཀྲོལ་གྱི་སྐབས་བཅད་པའི་ཕྱིར་འདི་བཅའ་བ་མཛད་དོ། །གཞན་དུ་ན་གོ་གཉིས་སམ་གསུམ་གྱི་བར་དུ་བཅད་དེའོ་ཞེས་བྱ་བ་ཡང་གནས་གང་ན་གང་ཟག་མི་མཐུན་པ་ཡོད་པ་དེ་དང་
ལྷན་ཅིག་ཏུ་འདའ་བར་བྱེད་པ་ལས་གཞན་ལ་གོ་གཉིས་སམ་གསུམ་གྱི་བར་དུ་བཅད་དེ་སྟན་ལ་འཁོད་པར་བྱའོ། །འདི་ནི་ལུས་ཀྱིས་ཕ་རོལ་གནོན་པ་དང་དེ་དང་དེ་རེག་པ་སྤང་བའི་ཕྱིར་རོ། །འདའ་བར་བྱ་བ་ལ་ཡང་ལངས་ནས་དེ་ལ་ཕ་རོལ་གནོན་པའི་ཕྱིར་སྦྱོར་བ་ཞེས་བྱ་བ་དེར་དེ་མི་གནང་བའོ། །དེས་ཅིག་ཤོས་དང་ཡང་དེ་བཞིན་ནོ་ཞེས་བྱ་བ་ཡང་འདིར་གང་ཞིག་གང་ལ་ཞེས་བྱ་བའི་ཡུལ་ཉིད་ཀྱིས་སྨོས་པ་དེས་ཀྱང་དེ་དང་ལྷན་ཅིག་ཏུ་འཁོད་པར་མི་བྱ་བ་དང་དེ་ནི་དེ་ལྟ་ཉིད་དུ་བསྡུས་པ་སྟེ། གཉིས་སམ་གསུམ་གྱིས་བཅད་དེ་འཁོད་པར་བྱའོ། །འདི་ནི་ལུས་ཀྱི་ལས་དེ་མི་མཐུན་པ་དེས་ཀྱང་འགྲོགས་བཤེས་ཉིད་མ་ཡིན་པ་དེ་ལྟ་ན་ཡང་ལྟུང་བ་སྤང་བའི་ཕྱིར། དེ་གཉིས་ཀྱི་གཙུག་ལག་ཁང་བར་དུ་ཆོད་པ་སྦྱིན་པར་བྱ་བ་ཉིད་དང་མནོད་པ་བྱ་བ་ཉིད་དོ་ཞེས་བྱ་བ་ནི་མི་མཐུན་པ་དང༌། ཅིག་ཤོས་དེ་གཉིས་ཀྱི་གཙུག་ལག་ཁང་ཞེས་བྱ་བ་གནས་པའི་གཞི་གཡོགས་པའམ། མ་གཡོགས་པ་བསྒྲུབ་པར་བྱ་བའི་དོན་དུ་གནས་ཁང་གིས་བར་དུ་ཆོད་པ་གནས་ཁང་བསྐོ་བས་ཀྱང་སྦྱིན་བར་བྱ་བ་ཉིད་ཡིན་ལ་རང་གིས་ཀྱང་མནོད་པར་བྱ་བ་ཉིད་ཡིན་ནོ། །འདིར་སྦྱིན་པ་པོ་དང་མནོད་པ་ཕོས་ཀྱང་གཞན་དུ་བྱེད་ན་ཉེས་བྱས་སུ་འགྱུར་ཏེ། དེ་ལྟ་བས་ན་ལྟུང་བ་དང་ལྡན་པར་རིག་པར་བྱའོ། །དགེ་འདུན་ཐམས་ཅད་ཀྱིས་གྲོས་བྱས་སམ་ལས་སུ་སྩལ་ཏེ་དེར་གནས་ཁང་སྦྱིན་པར་བྱེད་ན་ཡང་ཐམས་ཅད་ཉེས་བྱས་སུ་རིག་པར་བྱའོ། །འདིར་གནས་ཀྱི་གཞི་གཡོགས་པ་ནི་གཙུག་ལག་ཁང་ངོ༌། །ཆོས་དང་འདུལ་བ་ལ་གལ་ཏེ་དེ་དང་ལྡན་པར་ཤེས་ནས་ཆོས་མ་ཡིན་པ་ལ་མངོན་པར་ཞེན་པ་ལ་དགེ་འདུན་མཐུན་པ་མེད་དོ་ཞེས་བྱ་བ་ལ་ཆོས་དང་ཞེས་བྱ་བ་ནི་དངོས་པོར་གཏོགས་པ་དང་སྤྱོད་པར་གཏོགས་པའི་ཆོ་གའོ། །འདུལ་བ་ཞེས་བྱ་བ་ནི་བྱ་བ་དང་བྱ་བ་མ་ཡིན་པ་དག་ལ་བྱས་པ་དང་མ་བྱས་པ་ཉིད་དོ། །དེ་དང་ལྡན་པར་ཞེས་བྱ་བ་ནི་དེ་ལྟར་ཆོས་དང་འདུལ་བའི་རྣམ་པ་ལ་མི་མཐུན་པ་ཉིད་དང་ལྡན་པའོ། །གལ་ཏེ་ཤེས་ནས་ཆོས་མ་ཡིན་པ་ལ་ཞེས་བྱ་བ་ནི། ཆོས་མ་ཡིན་པ་ལ་མངོན་པར་བྱེད་པ་དེ་ལ་དགེ་འདུན་
མཐུན་པ་མེད་དོ། །གང་གི་ཕྱིར་ཆོས་དང་འདུལ་བའི་ཕྱིར་དགེ་འདུན་མི་མཐུན་པ་ཡིན་གྱི། དོན་གཞན་གྱི་ཕྱིར་ནི་མ་ཡིན་པས་དེའི་ཕྱིར་མི་མཐུན་པ་ལ་ནི་དགེ་འདུན་མི་མཐུན་པ་བྱེད་པར་མི་རིགས་སོ། །དེའི་ཕྱིར་དེ་ལས་གཞན་པ་དག་དང་ཚོགས་ཏེ་ལས་བྱས་ན་ཡང་མི་འཆགས་ལ་ཕན་ཚུན་མི་མཐུན་པ་ཉིད་དུ་ཡང་མི་འགྱུར་རོ་ཞེས་བྱ་བ་ནི་གང་གི་ཕྱིར་དགེ་འདུན་མཐུན་པ་མེད་པ་དེའི་ཕྱིར་ཆོས་མ་ཡིན་པ་ལ་མངོན་པར་ཞེན་པ་དེ་དག་དང་དེ་ལས་གཞན་པ་ཆོས་ཀྱི་ཕྱོགས་དང་མཐུན་པ་གཞན་དག་ལ་ཡང་བསྡུས་ཏེ་བྱས་པ་ལ་ལས་བྱས་ན་ཡང་མི་འཆགས་པ་དང་ཕན་ཚུན་མི་མཐུན་པའི་དངོས་པོར་མི་འགྱུར་རོ། །དེ་དག་དེའི་མི་མཐུན་པའི་ཕྱོགས་དང་འཐབ་པར་གྱུར་པ་ཉིད་ན་ཆོས་འདི་པ་དག་གིས་ཕྱག་མི་བྱ་བ་ཉིད་ཡིན་ནོ་ཞེས་བྱ་བ་ལ་དེ་དག་ཅེས་བྱ་བ་ནི་ཆོས་མ་ཡིན་པ་ལ་མངོན་པར་ཞེན་པ་དེ་རྣམས་ལ་དེའི་མི་མཐུན་པའི་ཕྱོགས་ཆོས་དང་མཐུན་པའི་ཕྱོགས་སུ་གཏོགས་པ་དང་ལྷན་ཅིག་འཐབ་པར་འགྱུར་བ་ཉིད་ན་དེ་དག་ལ་ཆོས་འདི་པ་དགེ་སློང་དང་དགེ་སློང་མ་དང་དགེ་ཚུལ་དང་དགེ་ཚུལ་མ་དང་དགེ་སློབ་མ་དང་དགེ་བསྙེན་དང་དགེ་བསྙེན་མ་རྣམས་ཀྱིས་ཕྱག་མི་བྱ་བ་ཉིད་ཡིན་ནོ། །མངོན་དུ་ལྡང་བ་དང་སྟན་ལ་བོད་པ་དང༌། གཏམ་འདྲེ་བ་དང༌། ཕེབས་པར་སྨྲ་བ་དང༌། ཀུན་དགའ་བར་འགྱུར་བ་དང་རྣམ་པར་ལྟ་བ་དང་ཅུང་ཟད་ལྟ་བ་དག་ཀྱང་མི་བྱའོ། །ལག་པའི་ཐ་སྙད་ཀྱིས་གནས་མལ་ངན་པ་རྗེས་སུ་སྦྱིན་ནོ། །ཁ་ཅིག་ལས་ནི་ཚིག་གིས་ཐོས་པ་དང་བཅས་པར་གཞན་ལའོ་ཞེས་བྱ་བ་ནི་གཞུང་ཁ་ཅིག་ལས་ནི་ཆོས་མ་ཡིན་པ་ལ་མངོན་པར་ཞེན་པ་དེ་དག་འོངས་ན་ཚིག་གིས་ཅི་ནས་ཀྱང་དེ་དག་གིས་ཐོས་པ་དང་བཅས་པར་གང་ཟག་གཞན་ལ་བརྟེན་ཏེ་དེ་དག་འདི་ཙམ་ཐོབ་པོ་ཞེས་བྱ་བའི་ཚིག་གིས་གནས་མལ་ངན་པ་རྗེས་སུ་སྦྱིན་པར་བྱའོ་ཞེས་འབྱུང་ངོ༌། །གཙུག་ལག་ཁང་མཇུག་ཏུའོ་ཞེས་བྱ་བ་ནི་སྦྱིན་ནོ་ཞེས་བྱ་བར་སྦྱར་རོ། །ཁོ་བོ་ཅག་རྒན་ནོ་ཞེས་ཟེར་ན་ཁྱེད་ཅག་ཀྱང་བདག་ཅག་ཤཱཀྱའི་སྲས་ཀྱི་དགེ་སློང་དག་ཡིན་ནོ་སྙམ་དུ་བདག་ཉིད་ཁས་འཆེ་འམ། ཁྱེད་ཅག་གང་
དག་གི་སྤྱོད་ཚུལ་འདི་ལྟ་བུ་དང་གཏམ་འདི་ལྟ་བུ་འདི་ཡང་མི་ཐོབ་པ་ཡིན་ན། ཁྱེད་ཀྱི་སྟོན་པ་ཐུགས་རྗེ་དང་ལྡན་པ་དེས་ན་འདི་རྗེས་སུ་གང་ངོ་ཞེས་གཞན་ལ་ལན་གདབ་པར་བྱའོ་ཞེས་བྱ་བ་ནི། དེ་དག་ལ་དངོས་སུ་ལན་མི་གདབ་པར་གང་ཟག་གཞན་ལ་བརྟེན་ཏེ་ལན་འདི་སྐད་གདབ་པར་བྱའོ་ཞེས་བྱ་བའི་དོན་ཏོ། །སྤྱོད་ཚུལ་འདི་ལྟ་བུ་ཞེས་བྱ་བ་ནི་གང་ཞིག་དེ་རྣམས་ཀྱིས་སྤྱད་པའི་སྤྱོད་པ་ལ་ སོགས་པ ་དེ་དག་བརྗོད་པར་བྱའོ། །གཏམ་འདི་ལྟ་བུ་ལ་ཞེས་བྱ་བ་ནི་གང་ཞིག་སྤྱོད་ཚུལ་དེ་ལ་ཉེས་དམིགས་གང་བྱུང་བ་སྟེ། སྟོན་པ་གཅུད་དུ་གཤེགས་པ་ལ་ སོགས་པ ་གང་ཡིན་པ་དེ་དག་བརྗོད་པར་བྱའོ། །དགེ་སློང་མ་ལ་སྟན་ལས་ལྡང་བ་དིར་བར་མི་བྱའོ་ཞེས་བྱ་བ་ནི་འཐབ་ཀྲོལ་བྱེད་པ་རྣམས་ལའོ། །དགེ་བསྙེན་གྱིས་བསོད་སྙོམས་དབུལ་བར་བྱའོ། །བཟོད་པར་བྱས་པ་དེ་དག་ལ་མཐུན་པ་ཐོབ་པ་མེད་པར་མཐུན་པ་མི་འབྱུང་ངོ་ཞེས་བྱ་བ་ལ་དེ་དག་ལ་ཞེས་བྱ་བ་ནི་ཆོས་མ་ཡིན་པ་ལ་མངོན་པར་ཞེན་པ་དེ་དག་ལའོ། །བཟོད་པར་བྱས་པ་རྣམས་ལ་ཡང་བཟོད་པ་བྱས་སུ་ཟིན་ཀྱང་མཐུན་པ་སྦྱིན་པ་ཐོབ་པ་མེད་པར་མཐུན་པ་འབྱུང་བར་མི་འགྱུར་རོ། །གསོ་སྦྱོང་མེད་པར་རང་བཞིན་དུ་གནས་པ་ཉིད་མི་ཐོབ་བོ་ཞེས་བྱ་བ་ནི་མཐུན་པ་ཐོབ་ཏུ་ཟིན་ཀྱང་ཇི་སྲིད་དུ་དགེ་འདུན་ལས་མཐུན་པའི་གསོ་སྦྱོང་མ་གསོལ་ཞིང་མཐུན་པའི་གསོ་སྦྱོང་མ་ཐོབ་ཀྱི་བར་དུ་རང་བཞིན་དུ་གནས་པ་ཉིད་མི་འཐོབ་སྟེ། ཆོས་དང་ཟང་ཟིང་གི་ལོངས་སྤྱོད་གཉིས་ཀྱི་འོས་ཉིད་མ་ཡིན་ནོ་ཞེས་བྱ་བའི་དོན་ཏོ། །མཐུན་པའི་གསོ་སྦྱོང་ཞེས་བྱ་བའི་དོན་དང་མཐུན་པ་ཡིན་ཏེ། གསོ་སྦྱོང་ཞེས་བྱ་བའི་དོན་ནི་གང་ཞིག་འདི་ལ་འཐབ་ཀྲོལ་ལ་མངོན་པར་སྤྱོད་པ་ཉིད་ཀྱི་ཕྱིར་དེས་པར་སྤྱོད་པ་ལ་མངོན་པར་གནས་པ་སྤང་བར་བྱ་བ་ཉིད་དོ། །ཐ་དད་པའི་དངོས་པོ་ལ་ཡང་ཐ་དད་པའི་བློ་ལ་མངོན་པར་ཞེན་པར་གནས་པས་རང་བཞིན་དུ་མི་གནས་པ་ཉིད་དོ། །དེ་ལྟ་བས་ན་མཐུན་པ་རྙེད་པ་དང་མཐུན་པའི་གསོ་སྦྱོང་དག་མེད་པར་ཡང་མི་བྱ་བ་ཉིད་ལ། རང་བཞིན་དུ་གནས་པ་དག་དང་དེ་མི་འགྲུབ་པས་དེའི་ཕྱིར་དེ་བརྟེན་པའོ། །དེ་བྱིན་ནས་བྱའོ་ཞེས་བྱ་བ་ལ་དེ་ཞེས་བྱ་
བྱ་ནི་གསོ་སྦྱོང་སྟེ། དེ་བཞིན་མི་བྱ་བར་འོན་ཀྱང་བྱིན་ནས་བཟོད་པར་བྱའོ། །དེ་ནི་ལས་ཀྱིས་སོ་ཞེས་བྱ་བ་ནི་གང་ཞིག་གསོ་སྦྱོང་བྱིན་པ་དེ་ནི་ལས་ཀྱིས་ཏེ། དེ་ཐམས་ཅད་ཉིད་ཀྱིས་ནི་མ་ཡིན་ཞེས་བྱ་བའི་དོན་ཏོ། །སྔ་མ་ཡང་ངོ་ཞེས་བྱ་བ་ནི་མཐུན་བ་སྦྱིན་པ་ཞེས་བྱ་བ་བསྟན་པ་དེ་ཡང་ལས་ཀྱིས་ཏེ་དེ་བཞིན་དུ་མཐུན་པ་སྦྱིན་པ་དང་མཐུན་པའི་གསོ་སྦྱོང་སྦྱིན་པ་དེ་དག་ལ་ལས་ཀྱིས་སྦྱིན་པ་དང༌། གསོལ་བའི་ལས་ཀྱིས་སྦྱིན་པ་དང་རྣམ་པར་གཞག་པ་ལས་གསོལ་བའི་ལས་སྔོན་དུ་འགྲོ་བ་ཉིད་དུ་ཤེས་པར་བྱའོ། །མཐུན་པ་དང་བཀྲ་ཤིས་དང་གནོད་པ་བྱུང་བའི་དོན་དུ་གསོ་སྦྱོང་བྱར་རུང་ངོ་ཞེས་བྱ་བ་ནི་གཞན་འདི་རྣམས་ཚུལ་ཁྲིམས་རྣམས་པར་དག་པ་སྦྱིན་པའི་རྒྱུད་ཀྱིས་གསོ་སྦྱོང་ཞེས་བྱ་བ་འདི་ལས་སུ་རུང་ངོ་ཞེས་བྱ་བ་སྨོས་པས་སོ། །བྱ་བ་རྣམས་ཀྱི་མཐུན་པ་སྒྲུབ་པའི་ཕྱིར་མཐུན་པའི་གསོ་སྦྱོང་བྱར་རུང་བ་ཡིན་ཏེ། བཀྲ་ཤིས་ཀྱི་དོན་དང་ཆོས་དང་འདུལ་བའི་སྐབས་སྨ་དགེ་འདུན་བདེ་བའི་སྐབས་སུ་ཅུང་ཟད་བཀྲ་མི་ཤིས་པ་ཉེ་བར་ཞི་བ་མཐོང་ནས་གསོལ་བ་བསྒྲུབ་པའི་དོན་དུ་འདི་བྱེད་པའོ། །གནོད་པ་ཡང་དག་པར་བསྡུམ་པར་བྱ་བ་འམ་དོགས་པར་གྱུར་པ་ལ་དེ་དག་ཉེ་བར་ཞི་བར་བྱ་བའི་དོན་དུ་གྲོང་ཁྱེར་ཡངས་པ་ཅན་དུ་གང་དག་སྡུད་པར་བྱེད་པ་ན། གསོ་སྦྱོང་བྱས་པ་གང་ཡིན་པ་དེ་ནི་མི་རུང་བའི་གཞི་བཅུ་བྱུང་བ་དེ་དག་ཉེ་བར་ཞི་བར་བྱ་བའི་ཕྱིར་ཏེ། ཆོས་དང་འདུལ་བ་ཀུན་ནས་འཁྲུག་པ་མཐོང་བས་ཞེས་བྱ་བར་རིག་པར་བྱའོ། །བཀྲ་མི་ཤེས་པ་ཉེ་བར་ཞི་བར་བྱ་བའི་དོན་དུ་འདི་བྱེད་པ་རིགས་པ་ཡིན་ཏེ། ཉེ་བར་འཚེ་བ་མ་ཞི་བ་ལ་ནི་མ་ཡིན་ནོ། །དེ་ལྟར་ཡང་གྲོང་ཁྱེར་ཡངས་པ་ཅན་དུ་བྱས་པའོ། །འདི་ལ་དུས་ནི་དེ་ཁོ་ནའི་རྒྱུ་ཉིད་དུའོ་ཞེས་བྱ་བ་ནི་གསོ་སྦྱོང་བྱེད་པ་འདི་ལ་དེ་དག་ཚེས་བཅུ་བཞི་པ་འམ་བཅོ་ལྔའི་དུས་མ་ཡིན་མོད་ཀྱི། འོན་ཀྱང་མཐུན་པ་ལ་ སོགས་པ ་དེ་དག་གི་དུས་ཡིན་པའི་དུས་དེ་ཁོ་ནའི་རྒྱུ་ཉིད་དུ་བྱ་བ་ཡིན་ནོ། །འདིར་གཞུང་ནི་ཉེ་བ་འཁོར་གསོ་སྦྱོང་ལྔ་པོ་འདི་དག་ཡིན་ཏེ་བཅུ་བཞི་པ་དང༌། བཅོ་ལྔ་པ་དང༌། བཀྲ་ཤིས་ཀྱི་གསོ་སྦྱོང་དང༌། གནོད་པ་བྱུང་བའི་གསོ་
སྦྱོང་དང༌། མཐུན་པའི་གསོ་སྦྱོང་ངོ༌། །དགེ་སློང་གིས་གསོ་སྦྱོང་མ་ཡིན་པར་གསོ་སྦྱོང་མི་བྱའོ། །བྱེད་ན་འགལ་ཚབས་ཅན་དུ་འགྱུར་རོ། །བཀྲ་ཤིས་ཀྱི་གསོ་སྦྱོང་བྱ་བ་དང་གནོད་པ་བྱུང་བའི་གསོ་སྦྱོང་དང་མཐུན་པའི་གསོ་སྦྱོང་ནི་མ་གཏོགས་སོ་ཞེས་གསུངས་པ་ཡིན་ནོ། །ལས་བྱེད་པའི་གཞིའོ།། །།ཆོས་མ་ཡིན་པ་སྨྲ་བ་དག་གིས་དབྱེ་བའི་སེམས་ཀྱིས་མཚམས་ཀྱི་ནང་དུ་ལས་ཐ་དད་པ་བྱས་ན་བྱེ་བ་ཡིན་ནོ་ཞེས་བྱ་བ་ནི་ནང་དུ་བཅས་པ་འདི་རྣམས་བདག་ཅག་ལ་ནི་ཅི་དགོས། འདི་རྣམས་ཁོ་བོ་ཅག་ལས་ཐ་དད་པར་གྱུར་ཅིག་སྙམ་དུ་དབྱེ་བའི་སེམས་ཀྱིས་ཆོས་སྨྲ་བ་རྣམས་ཀྱི་མཚམས་ཀྱི་ནང་དུ་ཆོས་མ་ཡིན་པ་སྨྲ་བ་དག་ལས་ཐ་དད་པའི་ལས་བྱས་པ་ལས་དེ་བྱེ་བ་ནི་ལས་བྱེ་བ་ཞེས་བྱ་བའི་དོན་ནོ། །འདིར་གཞུང་ནི་སིལ་བུ་དག་གིས་ཀཽ་ཤཱམྦའི་པའི་དགེ་འདུན་ཕྱེ་བར་འགྱུར། ཆོས་མ་ཡིན་པ་དག་གིས་མཚམས་ཀྱི་ནང་དུ་གསོ་སྦྱོང་མ་འདྲེས་པར་བྱས་པས་སོ་ཞེས་གསུངས་པ་ཡིན་ནོ། །ཡང་ན་ཆོས་སྨྲ་བ་རྣམས་ཀྱིས་ཆོས་མ་ཡིན་པ་སྨྲ་བའི་ཕྱོགས་དག་ལ་ཐ་དད་པར་བྱས་པ་ནི་མཚམས་ཀྱི་ནང་དུ་ལས་བྱེད་པ་མ་ཡིན་ནོ། །ཆོས་ལས་མི་གཡོ་བ་དེ་རྣམས་ཀྱིས་དེ་བྱས་པས་གནས་ནས་དབྱུང་བ་རྣམ་པ་དེས་ཆོས་མ་ཡིན་པ་སྨྲ་བ་རྣམས་ལ་ཞེས་བྱ་བའོ། །འདི་ལ་སོ་སོ་རང་གི་ལས་ནི་འཆགས་སོ་ཞེས་བྱ་བ་ནི་ལས་བྱེད་པའི་བདག་ཉིད་ཀྱི་དགེ་འདུན་བྱེ་བ་འདི་ལ་ཕྱོགས་སོ་སོའི་ལས་ཐ་དད་པར་བྱས་པ་ནི་ཐ་དད་པར་འཆགས་པའོ། །རང་གི་ཕྱོགས་དང་མཐུན་པ་མ་ཡིན་པ་ལ་ནི་མི་འཆགས་སོ་ཞེས་བྱ་བ་ནི་རང་གི་ཕྱོགས་དང་མཐུན་པ་མ་ཡིན་པའི་གང་ཟག་ལ་ནི་ལས་མི་འཆགས་སོ། །འདིར་གཞུང་ནི་དགེ་སློང་བྱེ་བར་རྣམ་པར་གནས་ནས་ཕན་ཚུན་གྱི་ཕྱོགས་ནས་འབྱིན་བར་བགྱིད་ན། གནས་ནས་ཕྱུང་བར་བརྗོད་པར་བགྱི་འམ། བཀའ་སྩལ་པ། གནས་ནས་མ་ཕྱུང་བ་བརྗོད་པར་བགྱིའོ་ཞེས་གསུངས་པ་ཡིན་ནོ། །དགེ་འདུན་གྱི་ནི་ཆོས་སྨྲ་བར་བྱས་པ་ཉིད་ན་བྱས་པ་ཉིད་ཡིན་ནོ་ཞེས་བྱ་བ་ནི་དགེ་འདུན་གྱི་མཚམས་བཅད་ པ་ལ་སོགས ་པའི་ལས་གང་ཡིན་པ་དེ་ནི་ཆོས་སྨྲ་བ་དག་
གིས་བྱས་པ་ཉིད་ན་བྱས་པ་ཉིད་ཡིན་གྱི་ཆོས་མ་ཡིན་པ་སྨྲ་བ་དག་གིས་བྱས་པ་ཉིད་ན་ནི་བྱས་པ་ཉིད་མ་ཡིན་ནོ། །འདིར་གཞུང་ནི་དགེ་འདུན་བྱེ་ན་གཅིག་གམ་ཅིག་ཤོས་ཀྱིས་མཚམས་དགྲོལ་བར་བགྱིད་ན་མཚམས་དགྲོལ་བར་བྱེད་པར་བརྗོད་པར་བགྱི་འམ། གལ་ཏེ་ཆོས་སྨྲ་བས་དགྲོལ་བར་བྱེད་ན་དགྲོལ་བར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ལ་གལ་ཏེ་གཟུ་བོ་དག་ཡོད་ན་དགེ་སློང་མ་རྣམས་ལ་བསྟན་པར་བྱ་བ་ཉིད་ཡིན་ནོ་ཞེས་བྱ་བ་ནི་དགེ་འདུན་དབྱེ་བ་འདི་ལ་གལ་ཏེ་གཟུ་བོ་དག་ཡོད་ན་དེ་དག་གིས་དགེ་སློང་མ་རྣམས་ལ་བསྟན་པར་བྱ་བ་དག་ཡིན་ནོ། །གལ་ཏེ་དེ་དག་མེད་ན་ཆོས་སྨྲ་བ་དག་ཉིད་ཀྱིས་སོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་ཀཽ་ཤཱམྦཱི་བའི་དགེ་སློང་ཕྱོགས་གཉིས་སུ་འདུས་ཤིང་མཆིས་པར་གྱུར་ན། དེ་གཉིས་གང་གིས་དགེ་སློང་མ་རྣམས་ལ་བསྟན་པར་བགྱི། ཉེ་བ་འཁོར་གཟུ་བོ་དག་གིས་མཚམས་ཀྱི་ཕྱི་རོལ་དུ་སོང་སྟེ་བསྟན་པར་བྱའོ་ཞེས་གསུངས་པ་དང་བྲམ་ཟེའི་བུ་མོས་ཞུས་པ་ལས་ཀྱང་གལ་ཏེ་གཟུ་བོ་དག་མེད་ན་ཆོས་སྨྲ་བ་དག་ཁོ་ནས་སོ་ཞེས་གསུངས་པ་ཡིན་ནོ། །དེ་དག་གིས་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པ་ཉིད་དོ་ཞེས་བྱ་བ་ནི་གཟུ་བོ་དེ་དག་གི་ལས་ནི་ཆོས་ཀྱི་ཕྱོགས་དང་མཐུན་པ་དག་གིས་མི་མཐུན་པར་འགྱུར་བ་སྟེ། དེ་དག་ནི་དགེ་འདུན་གྱི་ཁོངས་སུ་གཏོགས་པའི་ཕྱིར་དང་དགེ་འདུན་ལས་ཐ་མི་དད་པའི་ཕྱིར་རོ། །ཆོས་མ་ཡིན་པའི་ཕྱོགས་དང་མཐུན་པ་དག་གིས་ནི་མ་ཡིན་ནོ། །གཟུ་བོ་འམ་དགེ་སློང་དག་གིས་ལས་ལ་ཆོས་སྨྲ་བ་དག་དང་མི་མཐུན་པ་སྤང་བར་བྱ་ཞིང་དེ་དག་ལྷན་ཅིག་ཏུ་གནས་ན་ཡང་འཆགས་སོ། །ཆོས་མ་ཡིན་པ་སྨྲ་བ་དག་ཀྱང་ནི་མ་ཡིན་ནོ། །དེ་ལྟ་བས་ན་དེ་ལ་འདི་བསྟན་པའོ། །རྗེས་སུ་ཞུགས་ན་དེ་ཉིད་ཉམས་སོ་ཞེས་བྱ་བ་ནི་གཟུ་བོ་རྣམས་གང་ཡང་རུང་བའི་ཕྱོགས་ཀྱི་རྗེས་སུ་ཞུགས་ན་གཟུ་བོ་ཉིད་ཉམས་སོ། །གང་གི་ཕྱིར་དབུས་ན་གནས་པ་ཉིད་ནི་ཞལ་ཅེ་བ་ཉིད་ཡིན་ནོ། །ཕྱོགས་དེ་གཉིས་ལས་ཕྱོགས་གང་ཡང་རུང་བ་
ཅིག་ཤོས་སུ་ཡང་མ་ལྟུང་ལ་ཅིག་ཤོས་སུ་ཡང་མ་ལྟུང་བ་ཉིད་ཀྱིས་སྐབས་ལ་གནས་པ་ནི་གཟུ་བོ་ཞེས་བྱ་བར་བསྟན་པའོ། །དེ་ལྟར་ཡང་འདིར་གཞུང་ནི་ཞུ་བ་ལས། ཡངས་པ་ཅན་གྱི་དགེ་སློང་གི་གཞི་བཅུ་བྱུང་བ་ན། དགེ་སློང་གནས་བརྟན་གང་དག་ཕྱོགས་ཅིག་ཤོས་སུ་ཡང་མ་གཏོགས་ལ་ཕྱོགས་གཉིས་པར་ཡང་མ་གཏོགས་པ་དེ་དག་ཅི་ལགས་པར་བརྗོད་པར་བགྱི། སྐམ་ལ་གནས་པ་གཟུ་བོ་ཡིན་པར་བརྗོད་པར་བྱའོ་ཞེས་གསུངས་པ་ཡིན་ནོ། །འདིར་ཕྱོགས་འགའ་ཞིག་སྒྲུབ་པ་ལ་གཟུ་བོ་དང༌། དབུས་ན་གནས་པ་དང་ཞལ་ཅེ་བ་མིན་བར་རིག་པར་བྱའོ། །དེ་ནི་མི་བྱའོ་ཞེས་བྱ་བ་ནི་གཟུ་བོ་ཉིད་ཉམས་པ་ཉིད་མི་བྱའོ། །འདིར་གཞུང་ནི་དགེ་འདུན་བྱེ་བར་རྣམ་པར་གནས་པ་ན་གཟུ་བོ་རྣམས་ཀྱིས་ཇི་ལྟར་བསྒྲུབ་པར་བགྱི། ཕྱོགས་ཅིག་ཤོས་སུ་ཡང་རང་འགྲོ་བར་མི་བྱའོ།། མངག་པ་གཏང་བར་མི་བྱ་ཞིང༌། ཕྱོགས་གཉིས་པར་ཡང་རང་འགྲོ་བར་མི་བྱ་ལ་མངག་པ་གཏང་བར་མི་བྱ་བར་ལུས་ཀྱིས་ཀྱང་བསྡམ་པར་བྱ། ངག་གིས་ཀྱང་བསྡམ་པར་བྱ་ཞིང་མཚམས་ཀྱི་ཕྱི་རོལ་དུ་སོང་སྟེ་གསོ་སྦྱོང་བྱའོ་ཞེས་གསུངས་པ་ཡིན་ནོ། །དགེ་སློང་མའི་དགེ་འདུན་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་གདམས་པར་བྱ་བ་ཉིད་ཡིན་ནོ་ཞེས་བྱ་བ་ལ། འདིར་གཞུང་ནི་དགེ་སློང་མའི་དགེ་འདུན་ཕྱོགས་དང་ཕྱོགས་ལ་རྣམ་པར་གནས་པ་ལ་དགུང་ཟླ་ཕྱེད་ཕྱེད་ཅིང་གདམས་ངག་དང་རྗེས་སུ་བསྟན་པ་སྩལ་བར་བགྱི་འམ་བཀའ་སྩལ་པ། དགེ་སློང་མའི་དགེ་འདུན་བྱེ་བར་མི་འགྱུར་བའི་ཕྱིར་སྦྱིན་པར་བྱའོ་ཞེས་གསུངས་པ་ཡིན་ནོ། །བྱེ་བ་ལ་ནི་དེ་ལྟ་མ་ཡིན་ནོ་ཞེས་བྱ་བ་ནི་དགེ་སློང་མའི་དགེ་འདུན་ལས་དང་འཁོར་ལོ་བྱེ་བས་ཕྱོགས་དང་གཞན་གྱི་ཕྱོགས་སུ་རྣམ་པར་གནས་པ་ལ་ནི་སྔ་མ་ལྟར་གདམས་པར་མི་བྱ་བ་ཉིད་ཡིན་ནོ། །འཁོར་གྱི་བྱེ་བས་གནས་ཐ་དད་པ་རྣམས་ཡང་ངོ༌། །མཚམས་གཞན་དུ་གཏོགས་པ་ཉིད་ཀྱིས་ཐ་དད་པ་ཉིད་རྙེད་པ་ཉིད་ཀྱིས་བྱེ་བྲག་ཏུ་བསྐུལ་བར་བྱ་བ་མ་ཡིན་པ་ཉིད་དོ། །གསོལ་བ་ན་མཐུན་པར་
བྱེ་བ་ཉིད་ལ་ངེས་པར་སྦྱར་བར་བྱ་བ་ཉིད་ཡིན་ནོ་ཞེས་བྱ་བ་ལ་དགེ་སློང་མ་བྱེ་བ་ཕྱོགས་གཞན་དང་གཞན་གྱི་ཕྱོགས་སུ་རྣམ་པར་གནས་པ་དག་གདམས་ངག་གསོལ་བ་ནི་སྲིད་མོ་དག་རྗེས་སུ་མཐུན་པར་གྱིས་ཤིག་ཅེས་མཐུན་པ་ཉིད་ལ་ངེས་པར་སྦྱར་བར་བྱའོ། །དབྱར་གྱི་རྙེད་པ་ནི་ཆོས་སྨྲ་བ་དབང་བ་ཉིད་དོ་ཞེས་བྱ་བ་ནི་དགེ་འདུན་བྱེད་བ་ན་དབྱར་གནས་པའི་རྒྱུ་ལས་བྱུང་བའི་རྙེད་པ་ནི་ཆོས་སྨྲ་བ་དག་དབང་བ་ཡིན་གྱི་ཆོས་མ་ཡིན་པ་སྨྲ་བ་དག་མི་དབང་ངོ༌། །གཉིས་ཀ་འདུས་པ་ལ་བྱེ་བྲག་ཏུ་མ་བྱས་པར་བགོ་བཤའ་བྱ་བ་དགེ་འདུན་ལ་ཕུལ་བ་ཡང་ངོ་ཞེས་བྱ་བ་ནི་ཆོས་དང་ཆོས་མ་ཡིན་པ་སྨྲ་བའི་ཕྱོགས་གཉིས་ཀ་འདུས་པ་ལ་བྱེ་བྲག་ཏུ་མ་བྱས་པར་དགེ་འདུན་ཙམ་ལ་ཕུལ་བའི་བགོ་བཤའ་བྱ་བར་འོས་པ་གང་ཞིག་བདག་གིས་མ་ཡིན་ཞིང༌། ཆོས་གོས་ལ་ སོགས་པའི་དངོས་པོ་ཕུལ་བ་དེ་གཉིས་ཀ་མ་ཡིན་པ ་དང༌། ཆོས་མ་ཡིན་པར་སྨྲ་བ་དག་ཀྱང་མི་དབང་ངོ་ཞེས་བགོ་བཤའ་བྱས་ནས་དེ་ལ་ཆོས་སྨྲ་བ་རྣམས་དབང་བ་ཉིད་དོ། །ཆོས་མ་ཡིན་པ་སྨྲ་བ་དག་ནི་མི་དབང་ངོ༌། །ཅི་ཐམས་ཅད་ལ་དེ་ལྟར་རྣམ་པར་གཞག་ཅེ་ན། དེའི་ཕྱིར་དེ་ལ་གལ་ཏེ་དགེ་འདུན་ཀྱི་ཚད་ཉིད་ཡིན་ན་དེ་དག་གོ་ཞེས་བྱ་བ་སྨོས་ཏེ། གལ་ཏེ་ཆོས་སྨྲ་བ་དག་བཞི་ཡན་ཆད་ཡིན་ན་དེའི་ཚེ་རྙེད་པ་དེ་དག་དབང་བ་རྣམ་པར་གཞག་གོ་ཞེས་བྱ་བའི་དོན་ཏོ། །དེ་དག་ཉུང་བ་ཉིད་ཡིན་ན་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར་གལ་ཏེ་ཉུང་བ་ཉིད་ཡིན་ལ་ཅིག་ཤོས་ཀྱིས་ནི་དེ་ཉིད་ཡིན་ན་གང་གིས་ཕང་བར་ཕུལ་བའི་འོ་ཞེས་བྱ་བ་སྨོས་ཏེ། གལ་ཏེ་དེ་ན་ཆོས་སྨྲ་བ་དག་ནི་དགེ་འདུན་གྱི་ཚད་ལ་ཉུང་བ་ཉིད་ཡིན་ལ་ཆོས་མ་ཡིན་པ་སྨྲ་བ་ཅིག་ཤོས་ན་དགེ་འདུན་གྱི་ཚད་དེ་ཡིན་ན་ནི་ཕྱོགས་དེ་གཉིས་ཀྱི་གང་ཟག་གི་ཕང་བར་རྙེད་པ་དེ་ཕུལ་བའི་ཕྱོགས་དེ་རྙེད་པ་དེ་དབང་ངོ༌། །ཕང་པ་ཞེས་སྨོས་པ་ནི་ལག་པ་དང་རྐང་པའི་དྲུང་དག་ཀྱང་དཔེ་ཡིན་ནོ། །གང་དུ་བཞག་པའི་གང་ཟག་དེ་ལ་གཞག་པ་ཉིད་ཅེས་བྱ་བ་ཡིན་ཏེ། དེ་ལ་རྣམ་པར་གཞག་པ་ཉིད་དོ། །གང་ཞིག་འདིར་ཆོས་སྨྲ་བ་རྣམས་ཉུང་ལ་ཅིག་
ཤོས་ཚད་པ་ཉིད་ལ་དགེ་སློང་གཉིས་ཀ་ལ་གཅིག་ལ་གཅིག་གི་ཕྱོགས་དང་གཞན་ལ་གཞན་གྱི་ཕྱོགས་པའི་ཕང་ལ་སོགས་པའི་ཕུལ་བ་དེ་ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་གལ་ཏེ་གཉིས་ཀའི་ན་གཉིས་ཀའི་འོ་ཞེས་བྱ་བ་སྨོས་ཏེ། གལ་ཏེ་ཕྱོགས་གཉིས་ཀའི་དགེ་སློང་དག་གི་ཕྱོགས་གཅིག་དང་འབྲེལ་པ་ཅན་གཅིག་དང༌། ཕྱོགས་གཞན་དང་འབྲེལ་ པ་ཅན་གཞན་གྱི་ཕང་བ་ལ་སོགས ་པར་ཕུལ་ན་ཕྱོགས་གཉིས་ཀ་དབང་བ་ཉིད་དོ་ཞེས་བྱ་བའི་དོན་ཏོ། །དེ་ལ་ཕྱོགས་གཉིས་ཀས་དབང་བ་ཉིད་ལ་ནི་ཅི་ཕྱོགས་བརྒྱ་ལ་གང་ཟག་གི་ལ་བགོ་བར་བྱ་བ་འམ་ཞེ་ན་དེའི་ཕྱིར། དེ་ལ་གང་ཟག་ལས་ཆ་ཉིད་ཡིན་གྱི་དགེ་འདུན་ལས་མ་ཡིན་ནོ་ཞེས་བྱ་བ་སྨོས་ཏེ། གང་ཟག་ཇི་སྙེད་ཡོད་པ་དེ་སྙེད་ཀྱི་ཆ་ཉིད་དུ་བྱའོ་ཞེས་བྱ་བའི་དོན་ཏོ། །ལས་བྱེ་བའི་གཞི་ཞུ་བ་དང་བྲམ་ཟེའི་བུ་མོའི་སྐབས་སོ། །ལས་བྱེ་བའི་གཞི་རྫོགས་སོ།། །།འཁོར་ལོ་བྱེ་བའི་བདག་ཉིད་དགེ་འདུན་གྱི་དབྱེན་ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར། དགེ་འདུན་གྱི་དབྱེན་ནི་ཆོས་ལས་ཐ་དད་པར་དངོས་པོར་གསོལ་བས་སམ། དོན་དེས་ཚུལ་ཤིང་ལེན་དུ་འཇུག་པས་སོ་ཞེས་བྱ་བ་སྨོས་ཏེ། འདིར་ཆོས་ཞེས་བྱ་བ་ནི་ཐར་པའི་ལམ་ཡང་དག་པར་གྱུར་པ་སྟེ། དགེ་འདུན་གྱི་དབྱེན་ནི་ཆོས་ལས་ཐ་དད་པའི་དངོས་པོར་ཞེས་པ་འམ་གསོལ་བའི་བདག་ཉིད་ཀྱི་ལས་ཀྱིས་སོ། །དོན་དེས་ཚུལ་ཤིང་ལེན་དུ་འཇུག་པས་དབྱེན་བྱེད་པའོ། །དེ་ལས་ཐ་དད་པའི་དངོས་པོས་གང་དག་ལ་དེ་འདོད་པའི་ཚུལ་ཤིང་ལོང་ཤིག་ཅེས་བྱ་བའི་དོན་འདིས་ལེན་དུ་འཇུག་པའོ། །དབྱེ་བར་བྱ་བ་དག་དགེ་འདུན་གྱི་ཚད་ཉིད་མ་ཡིན་པ་དང་མཚམས་ཀྱི་ནང་ན་གཞན་དགེ་འདུན་ཚད་དག་ཀྱང་མེད་པ་ཉིད་ཡིན་ནོ། །དེ་མི་འཆགས་སོ་ཞེས་བྱ་བ་ནི་འདིར་དགེ་འདུན་གྱི་ཚད་ནི་བཞི་ལ་ སོགས་པ ་ཡན་ཆད་དོ། །དབྱེ་བར་བྱ་བའི་དགེ་འདུན་གྱི་ཚད་དག་ཀྱང་མེད་པ་ཉིད་ཡིན་ན་དགེ་འདུན་གྱི་དབྱེན་དེ་མི་འཆགས་སོ། །དབྱེ་བར་བྱེད་པ་པོ་ལས་དབྱེ་བར་བྱ་བ་ཉིད་ནི་མ་ཡིན་ནོ། །དེ་ལྟ་བས་ན་ལྷན་ཅིག་ཏུ་འདི་རྣམས་ལ་དགེ་འདུན་གྱི་ཚད་ཉིད་རྟེན་པར་
ཤེས་པར་བྱའོ། །ཕྱོགས་གཞན་དུ་གྱུར་པའི་དགེ་འདུན་གྱི་ཚད་གཞན་རྣམས་ལ་མཚམས་ཀྱི་ནང་དུ་དགེ་འདུན་རྣམས་མེད་པ་ཉིད་ལ་དགེ་འདུན་གྱི་དབྱེན་མི་འཆགས་པའོ། །ཅི་འབྱེད་པ་ཐམས་ཅད་ལ་མཚམས་མེད་པར་འགྱུར་རམ་ཞེ་ན། དེའི་ཕྱིར་ཆས་དང་ཆོས་མ་ཡིན་པ་གཉིས་ཀ་དེ་བཞིན་ཉིད་དུ་ཤེས་ན་མཚམས་མེད་པའོ་ཞེས་བྱ་བ་སྨོས་ཏེ། ཆོས་ཀྱང་ཆོས་ཉིད་དུ་ཤེས་ལ་ཆོས་མ་ཡིན་པ་ཡང་ཆོས་མ་ཡིན་པ་ཉིད་དུ་འདུ་ཤེས་བཞིན་དུ་དགེ་འདུན་འབྱེད་པར་བྱེད་ན་དེ་ལ་མཚམས་མེད་པའི་ཁ་ན་མ་ཐོ་བར་འགྱུར་གྱི་ཆོས་ལ་ཆོས་མ་ཡིན་པར་འདུ་ཤེས་པ་དང༌། ཆོས་མ་ཡིན་པ་ལ་ཆོས་སུ་འདུ་ཤེས་པ་ལ་ནི་མ་ཡིན་ཏེ། དེ་ལ་བསམ་པས་ལོག་པར་སྒྲུབ་པ་མེད་པའི་ཕྱིར་རོ། །དབྱེ་བ་ལ་ཆོས་སུ་འདུ་ཤེས་པས་ཀྱང་ངོ་ཞེས་བྱ་བ་ཡང་མཚམས་མེད་པ་ཉིད་དུ་འགྱུར་རོ་ཞེས་བྱ་བར་སྦྱར་ཏེ། ཕུང་པོའི་ལྷག་མ་མེད་པ་ཆུང་ཟ་བ་དེ་ལས་བཟློག་ཅིང་དབྱེན་བྱེད་པས་འགྲོ་བ་རྣམས་ཐར་པ་ལས་བཟློག་པ་གང་ཡིན་པ་དེ་ནི་འདོད་པའི་ཁམས་ཀྱི་དབང་ཕྱུག་ལ་ཕན་པ་ཆེན་པོ་ཡིན་ཞེས་བྱ་བ་ལ་ སོགས་པའི་རྣམ་པར་འབྱེད་པ ་ལ་ཆོས་སུ་འདུ་ཤེས་པས། དགེ་འདུན་གྱི་དབྱེན་བྱེད་ན་དེས་ནི་ཆོས་དང་ཆོས་མ་ཡིན་པ་དག་དེ་བཞིན་དུ་ཤེས་པ་ཡིན་པས་མཚམས་མེད་པར་འགྱུར་རོ་ཞེས་བྱ་བའི་དོན་ཏོ། །ཡིད་གཉིས་ནི་འདུ་ཤེས་པ་དང་འདྲ་བར་དེའི་ཕྱིར་འདི་ལ་ཡིད་གཉིས་ཟ་བ་ན་ཡང་དེ་མཚམས་མེད་པར་འགྱུར་བར་རིག་པར་བྱའོ། །འཁོར་ལོ་བྱེ་བའི་གཞིའོ།། །།རྩོད་པ་ནི་རྣམ་པ་བཞི་སྟེ། འགྱེད་པའི་རྩོད་པ་དང༌། མི་གདམས་པའི་ཕྱིར་རྩོད་པ་དང༌། ལྟུང་བའི་ཕྱིར་རྩོད་པ་དང༌། བྱ་བའི་ཕྱིར་རྩོད་པ་སྟེ། རྩོད་པ་བཞི་པོ་གང་དག་ཡིན་པ་དེ་དག་གི་རང་གི་ངོ་བོ་ངེས་པར་གཟུང་བའི་ཕྱིར་འཁྲུག་ལོང་གི་རྒྱུ་བཞིའོ་ཞེས་བྱ་བ་སྨོས་ཏེ། ཚིག་གི་ཕྱིར་སེམས་གཞོལ་བ་གང་ཡིན་པ་དེ་ནི་འདིར་འཁྲུག་ལོང་ཞེས་བྱའི་ཁྲོ་བ་ནི་མ་ཡིན་ནོ། །འདིར་ཚིག་ཅེས་བྱ་བ་ནི་དགྲ་བོས་མི་མཐུན་པར་སྨྲ་བ་ཡིན་པར་དགོངས་ཀྱི་ཚིག་ཙམ་ནི་མ་ཡིན་ཏེ། དེའི་ཕྱིར་དེ་ལ་
འཁྲུག་ལོང་ཉིད་དུ་ཉེ་བར་གདགས་སོ། །གཙུག་ལག་ལས་དེ་ལ་བརྟེན་ཏེ་འཐབ་པ་དང་མཚང་འདྲུ་བ་དང་རྩོད་པ་དང་འགྱེད་པ་གང་ཡིན་པ་དེ་འགྱེད་པའི་ཕྱིར་རྩོད་པ་ཞེས་གསུངས་ཏེ། འཁྲུག་ལོང་ནི་འདིའི་འཁོར་དུ་གྱུར་པ་ཡིན་པའི་ཕྱིར་རོ། །ཡང་དག་པར་འཁྲུག་ལོང་ཉིད་རྩོད་པ་ཡིན་ཏེ། འདི་ལྟར་རྩོད་པའི་གཞི་ཡིན་པས་གཞིར་གྱུར་པའི་དངོས་པོར་ནི་འགྱེད་པའི་ཕྱིར་རྩོད་པ་ཡིན་པར་རིགས་པ་ཡིན་ནོ། །དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་དང༌། སྤོང་བ་དང་ལྟུང་བ་དང་བཅས་པ་ཉིད་དང་ལས་ལ་མཐུན་པ་མི་སྦྱིན་པའོ་ཞེས་བྱ་བ་ནི་ཆོས་ཡིན་ནོ་ཞེ་འམ་ཆོས་མ་ཡིན་ནོ་ཞེས་བྱ་བ་ལ་ སོགས་པ ་དེ་ལྟར་དངོས་པོ་རྣམས་ཀྱི་དེ་བཞིན་ཉིད་ཀྱི་ངོ་བོ་ལས་ལོག་པར་བསྒྲུབ་པ་དེ་ནི་འཁྲུལ་ལོང་གི་རྒྱུ་དང་པོ་ཡིན་ནོ། །འདི་ལྟར་དངོས་པོའི་རྣམ་པ་ལ་སྤྱོད་པ་ལས་ཀྱང་འགྱེད་པ་འབྱུང་བའི་ཕྱིར་ཏེ། ཅིའི་ཕྱིར་ཁྱོད་ཀྱིས་བླངས་ཤེ་འམ་བྱིན་ཞེ་འམ་ལས་སུ་བསྐོས་པ་ནི་མ་བྱས་ཞེས་འགྱེད་པ་ཡིན་པ་དེ་ཡང་དངོས་པོའི་དེ་བཞིན་ཉིད་ཡིན་ནམ་མ་ཡིན་ཏེ་འདི་ནི་བྱ་བའོ་ཞེ་འམ་བྱ་བ་མ་ཡིན་ནོ་ཞེས་ཞུགས་པའི་ཕྱིར་རོ་ཞེ་ན། འདི་ལྟ་སྟེ། དེ་ལྟ་བུའི་རིགས་ཅན་འདིར་མ་བསྡུས་པས་ཤེས་པར་མི་བྱའོ། །སྤོང་བ་ཞེས་བྱ་བ་ནི་གདམས་ངག་ལ་ སོགས་པ ་འཇོག་པར་འགྱུར་བས་གཞན་སྤོང་བ་སྟེ་དེ་ནི་འཁྲུག་ལོང་གི་རྒྱུ་གཉིས་པ་ཡིན་ནོ། །རྒྱུ་དེ་ལས་མི་གདམས་པའི་ཕྱིར་རྩོད་པ་འདི་བརྗོད་པའོ། །ལྟུང་བ་དང་བཅས་པ་ཉིད་ཅེས་བྱ་བ་ནི་འཁྲུག་ལོང་གི་རྒྱུ་གསུམ་པ་ཡིན་ཏེ་དེ་ལས་ལྟུང་བའི་ཕྱིར་རྩོད་པ་འབྱུང་ངོ༌། །ལས་ལ་མཐུན་པ་མི་སྦྱིན་པ་ཞེས་བྱ་བ་ནི་གསོལ་བ་ལ་ སོགས་པའི་ལས་ལ་མཐུན་པ ་མི་སྦྱིན་པ་སྟེ་དེ་ནི་འཁྲུག་ལོང་གི་རྒྱུ་བཞི་པ་ཡིན་ཏེ། དེ་བས་ན་བྱ་བའི་ཕྱིར་རྩོད་པ་ཞེས་བྱ་བའི་ཚིག་འདི་འབྱུང་ངོ༌། །རྒྱུ་དང་པོ་ལས་བྱུང་བ་ནི་རྒྱུ་དག་ཅིག་ཏུ་བྱ་བས་ཉེ་བར་ཞི་བའོ་ཞེས་བྱ་བ་ནི། དང་པོ་ཞེས་བྱ་བ་དངོས་པོའི་དེ་བཞིན་ཉིད་ལ་ལོག་པར་སྒྲུབ་པ་ཞེས་བྱ་བ་དེའི་རྒྱུ་འཁྲུག་ལོང་གང་ལ་དེ་ནི་རྒྱུད་གཅིག་ཏུ་བྱས་པས་ཉེ་བར་ཞི་བར་འགྱུར་ཏེ་མངོན་སུམ་གྱིས་འདུལ་བར་འགྱུར་ཞེས་བྱ་བ་ཡང་དེ་ཡིན་ནོ། །
གང་ཞིག་སླར་ངོ་བོ་ཉིད་ཚོལ་དུ་གཞུག་པས་གཞན་བལྟ་བར་བྱའོ། །རྒྱུད་ཅེས་བྱ་བ་ནི་ངེས་པར་རྟོགས་པས་ཏེ་དངོས་པོ་གང་ལ་ངེས་པར་རྟོགས་པ་གཅིག་ཡོད་པའི་དངོས་པོ་དེ་ནི་རྒྱུད་གཅིག་བྱ་བ་སྟེ་ངེས་པ་སྐྱེས་པས་མཐའ་གཅིག་ཏུ་བྱ་བ་དེས་ཞེས་བྱ་བའི་དོན་ཏོ། །རྒྱུ་གཉིས་པ་ལས་བྱུང་བ་ནི་འདི་དང་དག་པ་སྦྱིན་པས་སོ་ཞེས་བྱ་བ་ནི་སྤོང་བའི་རྒྱུ་འཁྲུག་ལོང་ལ་གཅིག་ཏུ་ཞེས་བྱ་བ་སྨོས་པ་འདི་དང་དག་པ་སྦྱིན་པས་ཉེ་བར་ཞི་བར་འགྱུར་ཏེ། དྲན་པས་འདུལ་བ་དང༌། མ་མྱོས་པས་འདུལ་བ་ཞེས་བྱ་བ་ཡང་དེ་བཞིན་ནོ། །རྒྱུ་གསུམ་པ་ལས་བྱུང་བ་ནི་ཕྱིར་བཅོས་པ་དང་ངེས་པར་འཛིན་པ་ལ་སྦྱར་བ་ཉིད་སྦྱིན་བས་སོ་ཞེས་བྱ་བ་ནི་ལྟུང་བ་དང་བཅས་པ་ཉིད་ཅེས་བྱ་བ་ལས་བྱུང་བའི་རྒྱུ་འཁྲུག་ལོང་ཕྱིར་བཅོས་པ་ཞེས་བྱ་བ་བཤགས་པས་ཉེ་བར་ཞི་བར་བྱ་བ་དང༌། ངེས་པར་འཛིན་པ་ལ་སྦྱར་བ་ཉིད་སྦྱིན་བས་ངེས་པར་འབྱུང་བར་གཏོགས་པའི་ངེས་པས་སྦྱར་བ་ཉིད་དོ། །དེ་སྦྱིན་པས་དེའི་ངོ་བོ་ཉིད་ཚོལ་དུ་གཞུག་པས་ཞེས་བྱ་བའི་དོན་ཏོ། །ཐ་མའི་ནི་སྦྱིན་དུ་གཞུག་པས་སོ་ཞེས་བྱ་བས་ནི་མཐུན་པར་མི་སྦྱིན་པ་ཞེས་བྱ་བའི་རྒྱུ་ལ་བྱུང་བའི་འཁྲུག་ལོང་སྦྱིན་དུ་གཞུག་པ་ཕྱིར་བཅོས་པའོ། །མཐུན་པ་སྦྱིན་བས་མཐུན་པ་ཉིད་དུ་གྱུར་ན་བྱ་བའི་ཕྱིར་རྩོད་པ་ཉེ་བར་ཞི་བ་ཉིད་ཡིན་ནོ་ཞེས་བྱ་བའི་དོན་ཏོ། །འོ་ན་རྒྱུད་གཅིག་ཏུ་བྱ་བས་ཉེ་བར་ཞི་བར་བྱའོ་ཞེས་གང་བསྟན་པ་དེ་ཇི་ལྟར་རྒྱུད་གཅིག་ཏུ་བྱ་ཞེ་ན། དེའི་ཕྱིར་འགྱེད་པ་གཉིས་རང་གིས་མི་ནུས་ན་ཚོགས་པར་དབྱུང་བ་དག་གིས་ལེགས་པར་བསྒྲུབ་པོ་ཞེས་བྱ་བ་སྨོས་ཏེ། གལ་ཏེ་འགྱེད་པར་བྱེད་པ་དེ་གཉིས་རང་གིས་རྩོད་པ་དེ་ཉེ་བར་ཞི་བར་བྱེད་མི་ནུས་ན་ཚོགས་པར་དབྱུང་བ་དག་གིས་དོན་དེ་ལེགས་པར་བསྒྲུབ་ཅིང་མཐའ་གཅིག་ཏུ་བྱའོ་ཞེས་བྱ་བའི་དོན་ཏོ། །འདིར་ཉེ་བར་ཞི་བ་ནི་དགོས་པ་ཡིན་ཏེ། དེ་བས་ན་རང་ལ་བསྒྲུབ་པ་ལ་དེ་བྱ་བ་ཉིད་དུ་ནི་རིགས་པ་མ་ཡིན་ནོ་ཞེས་བྱ་བ་དེ་བསྟན་ཏེ། འོ་ན་འགྱེད་པ་མང་པོ་དག་བྱུང་ན་ཅིའི་ཕྱིར་འགྱེད་པ་གཉིས་ཞེས་གཉིས་ཀྱི་ཚིག་ཏུ་བྱས་ཤེ་ན། བདེན་མོད་ཀྱི་དེ་ནི་ཕྱོགས་གཉིས་སུ་རྣམ་པར་གནས་པས་དེ་ལ་གཉིས་ཉིད་དུ་བྱུང་བ་
ཉིད་དོ། །ཚོགས་པར་དབྱུང་བ་ཇི་ལྟ་བུ་དག་གིས་སོ་ཞེ་ན། དེའི་ཕྱིར་དགེ་སློང་དག་གིས་སོ་ཞེས་བྱ་བ་སྨོས་སོ། །དགེ་སློང་ཇི་ལྟ་བུ་དག་གིས་ཤེ་ན། དེའི་ཕྱིར་འགྲང་བ་དག་གིས་སོ་ཞེས་བྱ་བ་སྨོས་སོ། །སུ་འགྲང་བདག་གིས་ཤེ་ན། དེའི་ཕྱིར། དེ་གཉིས་སོ་ཞེས་བྱ་བ་སྨོས་ཏེ་འགྱེད་པ་དེ་གཉིས་སོ། །ཇི་སྙེད་དག་གིས་ཤེ་ན། དེའི་ཕྱིར་གཅིག་ཡན་ཆད་ཀྱིས་སོ་ཞེས་བྱ་བ་སྨོས་ཏེ། འདི་ཡན་ཆད་ཀྱི་སྒྲ་བྲི་བར་རིག་པར་བྱ་སྟེ་གཅིག་ཡན་ཆད་དུ་རུང་བར་ཞེས་བྱ་བའི་དོན་ཏོ། །ཡང་དགེ་སློང་གཅིག་གམ་དུ་མ་ཇི་ལྟ་བུ་ལ་དེ་གཉིས་ཀྱིས་འགྲང་བར་བྱ་ཞེ་ན། དེའི་ཕྱིར་གཟུ་བོ་དག་ལ་བགྲང་བར་བྱའོ་ཞེས་བྱ་བ་སྨོས་ཏེ། ཕྱོགས་གཉིས་ཀའི་དབུས་ན་གནས་པ་གཅིག་གམ་དུ་མ་ཕྱོགས་ཀྱི་ཁོངས་སུ་མི་བསྡུ་ཞིང་གཟུ་བོ་ཡིན་པར་རིག་པར་བྱའོ། །དེ་ལྟར་ཡང་འདིར་གཞུང་ནི་སོ་སོར་ཐར་པའི་སྐབས་ཀྱི་རྩོད་པ་ཞི་བར་བྱ་བའི་ཞུ་བའི་གཞུང་ཁ་ཅིག་ལས། དགེ་སློང་གཟུ་བོ་གང་ཞེ་ན་ཕྱོགས་ཅིག་ཤོས་སུ་ཡང་མ་སོང་ལ་གཉིས་པར་མ་སོང་བ་གང་ཡིན་པའོ་ཞེས་གསུངས་པ་ཡིན་ནོ། །དེ་དག་དགེ་འདུན་གྱི་གཏན་དུ་བསྒོའོ་ཞེས་བྱ་བ་ནི། གཟུ་བོ་དེ་དག་དགེ་འདུན་གནས་དེར་གཏན་ཏུ་དགེ་འདུན་ཐམས་ཅད་ཀྱིས་བསྐོ་བ་ནི་རྩོད་པ་བྱུང་བ་རྣམས་རྣམ་པར་ཞི་བར་བྱ་བའི་ཕྱིར་ཡིན་གྱི། རྩོད་པ་གཅིག་གི་ཕྱིར་འཕྲལ་ལ་བསྐོ་བའི་ཕྱིར་ནི་མ་ཡིན་ཞེས་བྱ་བའི་དོན་ཏོ། །འདིར་འཐབ་མོ་མི་སྐྱེད་པར་བསྐོ་བར་བྱ་བ་ཉིད་དོ་ཞེས་བྱ་བ་ནི་གཟུ་བོ་བསྐོ་བ་འདིར་གང་ཞིག་འདི་ལྟ་བུ་བསྐོ་བར་བྱ་བ་ཉིད་ཡིན་ནོ། །ངོ་ཚ་ཤེས་ཤིང་བསླབ་པ་འདོད་པའོ་ཞེས་བྱ་བ་ནི་འདིར་ངོ་ཚ་ཤེས་པ་ཞེས་བྱ་བ་བསླབ་པའི་གཞི་ཡང་དག་པར་བླངས་པ་ཐམས་ཅད་ལ་བག་རྐྱོང་བ་ཞུམ་པར་བྱེད་པ་ཡིན་གྱི་ཕན་པར་འགྱུར་བ་ཙམ་ཉི་ཚེར་མ་ཟད་དོ། །མ་མོ་ལས་འདི་སྐད་གསུངས་ཏེ། དེ་དགེ་སློང་ཆོས་ཉི་ཤུ་རྩ་གཉིས་དང་ལྡན་པ་བཙལ་བར་བྱ་སྟེ། ཉི་ཤུ་རྩ་གཉིས་གང་ཞེ་ན་ཅི་ཚེ་དང་ལྡན་པ་དེ་ལ་ཚུལ་ཁྲིམས་དང་ལྡན་ཞིང་དང་པོ་ནས་ཕུན་སུམ་ཚོགས་པ་དང་ངོ་ཚ་ཤེས་ཤིང་འགྱོད་པ་དང་ལྡན་ལ་སྡོམ་པ་དང་བསླབ་པ་འདོད་པ་དང༌།
འདུལ་བ་ལ་ཤིན་ཏུ་རྣམ་པར་ངེས་ཤིང་ཐོས་པ་འཛིན་ལ་ཐོས་པ་བསགས་པ་དང༌། ལུང་ཐོན་པ་དང༌། རྩོད་པ་ལ་མཁས་པ་དང༌། རྩོད་པ་ཀུན་ནས་སློང་བ་ལ་མཁས་པ་དང༌། རྩོད་པའི་བྱེ་བྲག་ལ་མཁས་པ་དང༌། རྩོད་པ་འགོག་པ་ལ་མཁས་པ་དང༌། རྩོད་པ་འགགས་ནས་ཕྱིས་མི་འབྱུང་བ་ལ་མཁས་པ་དང༌། བསྟན་བཅོས་ལ་མཁས་པ་དང༌། གཞི་ལྷག་པར་སྤྱོད་པ་ལ་མཁས་ཤིང་ཉེས་རྩོམ་མེད་པར་སྨྲ་བ་དང༌། ཉེས་རྩོམ་བྱེད་དུ་མི་འདུག་པ་དང༌། ལུས་དང་ངག་གིས་མི་འཇུག་པ་དང༌། སྨྲ་བར་བྱེད་ཅིང་སྨྲ་བ་བརྡ་ཕྲད་པར་བྱེད་པ་དང༌། གོ་བར་བྱེད་ཅིང་གོ་བ་བརྡ་ཕྲད་པར་བྱེད་པ་དང༌། རྣམ་པར་རིག་པར་བྱེད་ཅིང་རྣམ་པར་རིག་པར་བྱ་བ་བརྡ་ཕྲད་པར་བྱེད་པ་དང༌། ངེས་པར་རྟོགས་པར་བྱེད་ཅིང་ངེས་པར་བརྟགས་པ་བརྡ་ཕྲད་པར་བྱེད་པ་དང༌། འདུན་པས་འགྲོ་བ་མ་ཡིན་པ་དང༌། ཞེ་སྡང་གིས་འགྲོ་བ་མ་ཡིན་པ་དང༌། གཏི་མུག་གིས་འགྲོ་བ་མ་ཡིན་པ་དང༌། འཇིགས་པས་འགྲོ་བ་མ་ཡིན་པ་སྟེ། གཟུ་བོའི་ཆོས་ཉིད་ཉི་ཤུ་རྩ་གཉིས་པོ་དེ་དག་དང་ལྡན་པའི་ཆོས་ཀྱི་ལོངས་སྤྱོད་དམ། ཟང་ཟིང་གི་ལོངས་སྤྱོད་ཀྱི་ཕྱོགས་གཉིས་ཀ་ལ་མི་བརྟེན་པ་ཡིན་ནོ་ཞེས་གསུངས་པ་དེ་དག་འདིར་བསྡུས་པར་ཤེས་པར་བྱའོ། །འདུལ་བ་ལ་ཤིན་ཏུ་རྣམ་པར་ངེས་པའོ་ཞེས་བྱ་བ་ནི་ལྟུང་བ་དང་ལྟུང་བ་མ་ཡིན་པ་ལ་མཁས་པ་ཞེས་བ་བའི་དོན་ཏོ། །རྩོད་པའི་འབྱུང་བ་སྤྱོད་པ་ལ་མཁས་པའོ་ཞེས་བྱ་བ་ནི་རྩོད་པ་ལ་མཁས་པ་དང༌། རྩོད་པ་ཀུན་ནས་སློང་བ་ལ་མཁས་པ་དང༌། རྩོད་པའི་བྱེ་བྲག་ལ་མཁས་པ་དང༌། རྩོད་པ་འགོག་པ་ལ་མཁས་པ་དང༌། རྩོད་པ་འགགས་ནས་ཕྱིར་མི་འབྱུང་བ་ལ་མཁས་པ་ནི་འབྱུང་བ་སྤྱོད་པ་ལ་མཁས་པའོ། །སྤྱོད་པ་ལ་མཁས་པ་ཞེས་བྱ་བ་ནི་འདི་རྗེས་སུ་སྒྲུབ་པ་དང་འདི་བྱེད་པར་འགྱུར་བ་ལ་མཁས་པ་ཞེས་བྱ་བའོ། །ཐོབ་པའི་གཞི་ལ་ སོགས་པ ་གསུམ་པོ་རང་གི་རྣམ་པར་ངེས་པ་ལ་ཇི་སྲིད་དུ་རྣམ་པར་ཞེན་པའི་ཞེས་བྱ་བ་འདི་ལ་རྗེས་སུ་ཞུགས་པར་རིག་པར་བྱའོ། །རྣམ་པར་ཞེན་པའོ་ཞེས་བྱ་བ་ནི་དོན་རྣམ་པར་ངེས་པས་མི་འགྱུར་ཏེ་དེས་ནི་བསྟན་བཅོས་ལ་མཁས་པ་བསྡུས་སོ། །བརྟན་
ཞིང་ཉེས་རྩོམ་མེད་པར་འཇུག་པའོ་ཞེས་བྱ་བ་ལ། བརྟན་པ་ནི་བརྟེན་པའོ། །ལུས་དང་ངག་གིས་མི་འཇུག་པ་བསྡུས་སོ། །ཉེས་རྩོམ་མེད་པར་འཇུག་པའོ་ཞེས་བྱ་བ་ནི་ཉེས་རྩོམ་མེད་པར་སྨྲ་བ་དང་ཉེས་རྩོམ་བྱེད་དུ་མི་འཇུག་པ་བསྡུས་སོ་སྙམ་པའོ་ཞེས་བྱ་བ་ནི། འདུན་པ་དང་ཞེ་སྡང་དང་འཇིགས་པས་མི་འགྲོ་བ་བསྟན་ཏོ། །བརྡ་ཕྲད་པའོ་ཞེས་བྱ་བ་ནི་གཞན་གྱིས་བསྒོ་བ་བརྡ་ཕྲད་པར་བྱེད་པ་གང་ཡིན་པ་དེ་ནི་བརྡ་ཕྲད་པར་བྱ་བ་སྟེ་དེས་ནི་སྨྲ་བ་བརྡ་ཕྲད་པར་བྱེད་པ་དང་ཞེས་བྱ་བ་ནས་ངེས་པར་རྟོགས་པར་བྱེད་པ་ཞེས་བྱ་བའི་ཚིག་འོག་མ་བཞི་བསྡུས་སོ། །བརྡ་སྤྲོད་པར་བྱེད་པའོ་ཞེས་བྱ་བ་ནི་གང་ཞིག་ཕ་རོལ་པོ་ལ་བརྡ་ཕྲད་པར་བྱེད་ནུས་པ་དེ་ནི་མཁས་པའོ། །བརྡ་སྤྲོད་པར་བྱེད་ནུས་པ་ཞེས་བྱ་བ་ལ་ སོགས་པ ་སྔ་མའི་ཚིག་བཞི་པོ་རྣམས་བསྡུ་པའོ། །མཁས་པ་ཞེས་བྱ་བ་ནི་རྨོངས་པ་མེད་ཅིང་མཁས་པ་སྟེ་དེས་ནི་གཏི་མུག་གིས་འགྲོ་བ་མ་ཡིན་པ་ཞེས་བྱ་བ་ཡན་ཆད་ཐམས་ཅད་བསྡུས་པར་རིག་པར་བྱའོ། །དེ་དག་གིས་ཉེ་བར་མ་ཞི་ན་དགེ་འདུན་ལ་དབུལ་ལོ་ཞེས་བྱ་བ་ནི་གཟུ་བོ་དེ་དག་གིས་རྩོད་པ་དེ་ཉེ་བར་མ་ཞི་ན་དགེ་འདུན་ལ་དབུལ་བར་བྱའོ། །དེས་མ་ནུས་ན་གསལ་བ་དག་བསྐོའོ་ཞེས་བྱ་བ་ནི་དགེ་འདུན་དེས་རྩོད་པ་ཉེ་བར་ཞི་བར་བྱེད་མ་ནུས་ན་དགེ་སློང་གསལ་བ་དག་བསྐོ་བར་བྱའོ། །འདིའི་བསྐྲད་པའི་རྣམ་པ་ཡིན་ཏེ། ཇི་ལྟར་བསྐྲད་པ་སྐྱེ་བོ་ཆེན་པོས་སྒྲུབ་པར་མི་ནུས་ན་དེ་བཞིན་དུ་འདིར་དོན་སྒྲུབ་པའོ། །ཇི་ཙམ་དུ་གསལ་བ་དག་བསྐོ་བར་བྱ་ཞེ་ན། དེའི་ཕྱིར་དགེ་འདུན་གྱི་ཚད་ལས་མི་ཉུང་བ་དག་གོ་ཞེས་བྱ་བ་སྨོས་ཏེ། མཚམས་ཀྱི་ཕྱི་རོལ་དུ་སོང་ནས་དགེ་འདུན་ཚང་བ་ཇི་སྙེད་པ་དག་བསྐོའོ་ཞེས་བྱ་བའི་དོན་ཏོ། །སྡེ་ཚན་དེས་མི་ནུས་ན་རང་གིས་གསལ་བ་དག་བསྐོ་བ་ཉིད་དོ་ཞེས་བྱ་བ་ནི་གཟུ་བོའི་སྡེ་ཚན་ནམ་གསལ་བའི་སྡེ་ཚན་ནམ། གསལ་པའི་ཡང་གསལ་བའི་སྡེ་ཚན་གང་ཡང་རུང་བས་རྩོད་པ་དེ་ཉེ་བར་ཞི་བར་མ་ནུས་ན། སྡེ་ཚན་དེ་རང་གིས་གསལ་བ་དག་བསྐོ་བར་རིགས་པ་ཉིད་ཡིན་ཏེ་ཆོས་དང་ལྡན་པ་དེ་ནི་མཉམ་པ་སྟེ། སྡེ་ཚན་དེ་རྣམས་ཀྱིས་ཀྱང་རང་གིས་གསལ་བ་དག་བྱེད་པ་ཞེས་བྱ་བའི་དོན་ཏོ། །དགེ་འདུན་
གྱི་ཚད་ལས་མི་ཉུང་བ་དག་གོ་ཞེས་སྔར་སྨོས་པའི་བདག་པོའི་དབང་གིས་ཤེས་པར་བྱའོ། །འདིར་གཞུང་ནི་ཁ་ཅིག་ལས་གཟུ་བོ་རྣམས་ཀྱིས་གསལ་བ་དག་བསྐོ་བར་གསུངས་ཏེ། གལ་ཏེ་དགེ་སློང་གཟུ་བོ་དག་གིས་རྩོད་པ་དེ་ཉེ་བར་ཞི་བར་བྱེད་མ་ནུས་ན་དགེ་སློང་གཟུ་བོ་རྣམས་ཀྱིས་དགེ་སློང་གསལ་བ་དག་བསྐོ་བར་བྱའོ་ཞེས་གསུངས་པ་དང༌། ཁ་ཅིག་ལས་དགེ་འདུན་ལས་གསལ་བ་དག་བསྐོ་བར་གསུངས་ཏེ་གལ་ཏེ་དགེ་འདུན་གྱིས་རྩོད་པ་དེ་ཉེ་བར་ཞི་བར་བྱེད་མ་ནུས་ན་དགེ་འདུན་གྱིས་དགེ་སློང་གསལ་བ་དག་བསྐོ་བར་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ཏེ། འདིར་དེ་གཉིས་ཀ་ཡང་སྦྱར་བའི་དོན་གྲུབ་པ་ཞེས་བྱ་བ་དེ་གཉིས་ཀ་ཡང་ཁོངས་སུ་བསྡུ་བར་བྱའོ། །ཁ་ཅིག་ལས་འདིར་གསལ་བ་དང་གསལ་བའི་གསལ་བ་རྣམས་བྱེད་པ་འབྱུང་བ་ཡིན་ནོ། །གཞན་དག་ནི་གསལ་བ་དང་གསལ་བའི་གསལ་བ་འདིར་དེ་གཉིས་ཀའི་དཔེ་ཙམ་འདིར་ཞེས་བྱ་བ་དེས་འདི་རིག་པར་བྱའོ། །མི་ནུས་ཤིང་གཞན་མི་བྱེད་ན་གང་ལས་བླངས་པ་དེ་ལ་དབུལ་ལོ་ཞེས་བྱ་བ་ནི་གང་དུ་རང་ལས་གཞན་གྱི་ཚོགས་མི་བྱེད་ཅིང་དེས་ཉེ་བར་ཞི་བར་མི་ནུས་ན་དེའི་ཚེ་དང་པོ་རྩོད་པ་དེ་གང་ལས་བླངས་པ་དེ་ཉིད་ལ་ཕྱིར་དབུལ་བར་བྱ་བ་སྟེ་གསལ་བའི་ཡང་གསལ་བ་དག་གིས་ནི་གསལ་བ་དག་ལའོ། །གསལ་བ་དག་གིས་ནི་གཟུ་བོ་དག་གམ་དགེ་འདུན་དག་ལའོ། །གཟུ་བོ་དག་གིས་ནི་རྒོལ་བ་དང་ཕྱིར་རྒོལ་བ་དག་ལའོ། །གནས་བརྟན་དག་གིས་རྩོད་པ་སྦེད་པ་ལའོ། །དེས་ནི་དགེ་འདུན་ལའོ། །ཕྱིར་འོངས་ན་དགེ་འདུན་གཞི་བོས་རྩོད་པ་སྦེད་པ་བསྐོའོ་ཞེས་བྱ་བ་ནི་གསལ་བ་དག་ལས་རྩོད་པ་དེ་ཕྱིར་འོངས་ན་དགེ་འདུན་གཞི་བོས་རྩོད་པ་སྦེད་པ་བསྐོ་བར་བྱ་སྟེ། དེ་ཡང་དགེ་འདུན་གྱིས་སྤྲོ་བར་བྱས་ནས་གསོལ་བ་དང་གཉིས་ཀྱི་ལས་ཀྱིས་བསྐོ་བར་བྱའོ། །དེས་ན་གནས་བརྟན་དང་བཅས་ཤིང་སོ་སོར་ཐར་པ་དང་བཅས་པའི་དགེ་འདུན་གཞན་ལ་དབུལ་ལོ་ཞེས་བྱ་བ་ནི་རྩོད་པ་སྦེད་པ་དེ་གནས་བརྟན་དང་བཅས་པ་སོ་སོར་ཐར་པ་དང་བཅས་པའི་དགེ་འདུན་ལ་དབུལ་བར་བྱའོ།།
སྔར་བྱུང་བ་བརྗོད་དེ་དུས་ཟླ་བ་གསུམ་དུ་དབུལ་ལོ་ཞེས་བྱ་བ་ནི་འདིར་ཁ་ཅིག་ནི་ཟླ་བ་དྲུག་གི་བར་དུ་བརྟན་ནས་ཞེས་བྱ་བ་ནི་འདིར་གཞུང་དུ་སྨོས་པ་ཡིན་ཏ་མདོ་སྡེ་འཛིན་པ་ལ་ སོགས་པ ་རྣམས་ལ་ལོ་གཅིག་གི་བར་དུ་བརྟེན་ནས་ཞེས་གསུངས་པ་ཡིན་ནོ། །ཤིན་ཏུ་ཡུན་རིང་པོར་འདིར་མང་པོ་རྣམས་ལ་འདི་ཀུན་ནས་ཉོན་མོངས་པར་རིགས་པ་མ་ཡིན་ནོ། །དེ་བས་ན་དེ་ལ་མ་བརྟེན་ནོ། །དེ་ནི་དེའི་འོ་ཞེས་བྱ་བ་ནི་དེ་ནི་རྩོད་པ་སྦེད་པར་བསྐོས་པ་དེའི་ཡིན་པ་སྟེ། དབུལ་བའི་བདག་ཉིད་ཀྱི་ལས་དེ་ནི་དབུལ་བ་ཐམས་ཅད་བསྡུས་པའི་ཕྱིར་མདོ་འདི་བྱས་སོ། །ཕྱིར་ཕུལ་བ་ན་དེས་མདོ་སྡེ་དང་འདུལ་བ་དང་མ་མོ་འཛིན་པ་དག་ལའོ་ཞེས་བྱ་བ་ནི་གནས་བརྟན་དང་བཅས་སོ་སོར་ཐར་པ་དང་བཅས་པའི་དགེ་འདུན་གྱི་རྩོད་པ་དེ་ཉེ་བར་ཞི་བར་བྱེད་མ་ནུས་ཏེ། དེ་ཉིད་ལ་ཕུལ་བ་ན་མདོ་སྡེ་ལ་ སོགས་པ ་འཛིན་པ་དག་ལ་དབུལ་བར་བྱའོ། །ཟླ་བ་དྲུག་ཏུའོ་ཞེས་བྱ་བ་ནི་སྔར་བྱུང་བ་བརྗོད་དེ་དུས་ཟླ་བ་དྲུག་ཏུ་དབུལ་ལོ་ཞེས་བྱ་བར་སྦྱར་རོ། །དེ་དག་གིས་གནས་བརྟན་མཐུ་དང་ལྡན་པ་ལའོ་ཞེས་བྱ་བ་ནི་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་དག་གིས་རྩོད་པ་དེ་ཉིད་ཕྱིར་ཕུལ་བ་གང་ཞིག་གནས་བརྟན་གྲགས་པ་བས་ཀྱང་ཆེས་གྲགས་པ་གཙོ་བོ་བས་ཀྱང་ཆེས་གཙོ་བོ་དེ་ལ་དབུལ་བར་བྱའོ། །ཐུག་པ་མེད་པར་རོ་ཞེས་བྱ་བ་ནི་དུས་ཐུག་པ་མེད་པར་དབུལ་ལོ་ཞེས་བྱ་བར་སྦྱར་ཏེ། འགྲོ་ས་གནས་མེད་པའི་ཕྱིར་ཕུལ་བ་གང་ཞིག་གནས་བརྟན་གྲགས་པ་བས་ཀྱང་ཆེས་གྲགས་པ་གཙོ་བོ་བས་ཀྱང་ཆེས་གཙོ་བོ་ལ་དབུལ་བར་བྱའོ། །ཐུག་པ་མེད་པར་རོ་ཞེས་བྱ་བ་ནི་དུས་ཐུག་པ་མེད་པར་དབུལ་ལོ་ཞེས་བྱ་བར་སྦྱར་ཏེ། འགྲོ་ས་གནས་མེད་པའི་ཕྱིར་འདིར་དུས་དཔག་ཏུ་མེད་པ་ལ་བརྟེན་པར་མཛད་དོ། །གནས་བརྟན་དེས་གདུལ་བར་བྱ་བ་དེ་གཉིས་ལ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་དེས་དེ་གཉིས་ལས་བདག་གིར་བྱ་བ་ཐ་ན་འདག་རྫས་དང་སོ་ཤིང་ཡན་ཆད་ཅུང་ཟད་ཀྱང་སྤང་བར་བྱའོ་ཞེས་བྱ་བ་སྨོས་ཏེ། འདིར་ཡན་ལག་གི་སྒྲ་བྲི་བར་བྱ་བ་སྟེ་ཐ་ན་འདག་རྫས་དང་སོ་ཤིང་ཡང་ཆད་ཅེས་བྱ་བའི་དོན་ཏོ། །ལྷན་
ཅིག་འགྲོ་བ་དང་འདུག་པ་དང་ལྷན་ཅིག་འཆག་སར་འཆག་པ་དང་གཏམ་འདྲེ་བ་དང་ཕེབས་པར་སྨྲ་བ་ཡང་ངོ་ཞེས་བྱ་བ་ཡང༌། དེས་དེ་གཉིས་ལས་ལྷན་ཅིག་ཏུ་སྤང་བར་བྱའོ་ཞེས་བྱ་བར་སྦྱར་རོ། །རྗེས་སུ་འབྲེང་ན་དེ་དག་ལ་འདི་སྐད་ཅེས་ཚེ་དང་ལྡན་པ་དག་ཁྱེད་ཅག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་བྱུང་ནས་འཐབ་པར་གྱུར་མཚང་འདྲུ་བར་གྱུར། རྩོད་པར་གྱུར་འགྱེད་པར་གྱུར་ཅིང་གནས་པ་ནི་མ་རྙེད་དེ་རྙེད་པ་མ་ཡིན་ནོ། །ཉེས་པ་རྙེད་ཀྱི་ལེགས་པ་རྙེད་པ་མ་ཡིན་གྱི། ཚེ་དང་ལྡན་པ་དག་མ་འཐབ་ཅིག་མཚང་མ་འདྲུ་ཤིག ། མ་འགྱེད་ཅིག་འགྱེད་པ་གཉིས་ཀ་རྒྱལ་བ་མེད་དོ། །རྒྱུག་པ་གཉིས་ཀ་རྒྱལ་བ་མེད་དོ། །གཅིག་རྒྱལ་གཅིག་འཕམ་དུ་འགྱུར་རོ་ཞེས་བརྗོད་པར་བྱའོ་ཞེས་བྱ་བ་ནི་གལ་ཏེ་རྒོལ་བ་དང་ཕྱིར་རྒོལ་བའི་དགེ་སློང་དེ་དག་གནས་བརྟན་དེའི་རྗེས་སུ་འབྲང་བ་ན་དེས་དེ་དག་ལ་དེ་སྐད་ཅེས་བརྗོད་པར་བྱའོ། །ཆེས་མང་བའི་བློས་ལེགས་པར་གཞག་པ་ནི་ལེགས་པ་སྒྲུབ་པའི་རྣམ་པ་གཞན་ཡིན་ནོ་ཞེས་བྱ་བ་ནི་ཚོགས་པར་བྱུང་བ་དག་གིས་རྒྱུད་གཅིག་ཏུ་བྱའོ་ཞེས་བྱ་བ་ལ་ སོགས་པ ་ཇི་སྐད་བསྟན་པའི་རྣམ་པ་དེ་དག་ལས་འདི་ལྟ་སྟེ། ཆེས་མང་བའི་བློས་ལེགས་པར་གཞག་པ་ཞེས་བྱ་བ་འདི་ནི་ལེགས་པར་སྒྲུབ་པའི་རྣམ་པ་གཞན་ཡིན་པར་ཤེས་པར་བྱའོ། །འདི་ནི་ཆོས་ཀྱི་རྣམ་པར་གཏན་ལ་དབབ་པ་ལ་སྲིད་ཀྱི་ཚུལ་ཁྲིམས་རྣམ་པར་གཏན་ལ་དབབ་པ་མི་སྲིད་དོ་ཞེས་བྱ་བ་ལ། འདི་ནི་ཞེས་བྱ་བ་ནི་ཆེས་མང་བའི་བློས་ལེགས་པར་གཞག་པ་འདི་ནི་ཞེས་བྱ་བར་སྦྱར་རོ། །ཆོས་རྣམ་པར་གཏན་ལ་དབབ་པའི་ཞེས་བྱ་བ་ནི་ཅི་འདི་ཆོས་མ་ཡིན་ནམ་འོན་ཏེ་ཡིན་འདུལ་བ་ཡིན་ནམ་འོན་ཏེ་འདུལ་བ་མ་ཡིན་ཞེས་བྱ་བ་ལ་ སོགས་པས་ཆོས་རྣམ་པར་གཏན་ལ་དབབ་པ ་ལ་ཡིན་གྱི་ཚུལ་ཁྲིམས་རྣམ་པར་གཏན་ལ་དབབ་པ་ལ་ནི་མ་ཡིན་ནོ། །ཅིའི་ཕྱིར་ཞེ་ན། དེའི་ཕྱིར་དེའི་སྐབས་ཀྱིས་ཤེས་པ་ནི་འགྱེད་པ་གཉིས་དང་འབྲེལ་བ་ཡིན་པའི་ཕྱིར་རོ་ཞེས་བྱ་བ་སྨོས་ཏེ། ཚུལ་ཁྲིམས་རྣམ་པར་གཏན་ལ་དབབ་པ་ཞེས་བྱ་བ་ནི་འདིས་གཞི་བྱས་སམ་འོན་ཏེ་མ་བྱས་ཞེས་བྱ་བ་ལ་ སོགས་པས་གཏན་ལ་ཕེབས་
པ ་ཡིན་པས་དེ་ནི་འགྱེད་པ་གཉིས་ལས་གཞན་པ་དག་གིས་ཤེས་པའི་ཡུལ་མ་ཡིན་པས་དེའི་ཕྱིར་རྟོག་པ་པོ་ཉིད་ཀྱིས་བསྟེན་པར་བྱ་བ་མེད་པར་ཤིན་ཏུ་མང་བ་འདི་དང་གནས་པ་ཞེས་བྱ་བ་བསྟེན་པའི་རྣམ་པ་གཞན་ནི་མེད་དོ། །ཅི་འདི་ལ་དེ་བཞིན་དུ་བརྟེན་པར་བྱ་བ་འམ་ཞེ་ན། དེའི་ཕྱིར་རྒོལ་བ་དག་གིས་གཅེས་པར་གཟུང་བ་ཉིད་དང༌། རབ་ཏུ་དམ་པ་ཉིད་དང་མི་ཟད་པ་ཉིད་ཡིན་ཞིང་དེ་དག་བྱེ་བར་དོགས་པ་ཉིད་ཀྱིས་དེ་ལ་བརྟེན་པར་བྱའོ་ཞེས་བྱ་བ་སྨོས་ཏེ། གལ་ཏེ་རྒོལ་བ་དང་ཕྱིར་རྒོལ་བ་དག་མངོན་པར་ཞེན་པ་རྣོན་པོས་རྩོད་པ་གཅེས་པར་གཟུང་བ་ཉིད་དང། མངོན་པར་ཞེན་པ་མི་ཕྱེད་པས་གལ་ཏེ་རྩོད་པ་དེ་ཡལ་བར་བོར་ན་དེ་དག་རྣོན་པོས་ཕྱེ་བ་དོགས་པ་ཉིད་ཤེས་ཀྱང་བསམ་པ་ཁྱད་པར་ཅན་དང༌། མངོན་པར་ཞེན་པས་མི་ཟད་པ་ཉིད་དུ་འགྱུར་ཞིང་མདོ་སྡེ་དང་འདུལ་བ་དང་མ་མོ་འཛིན་པ་ཉིད་རྣམ་པར་གནོན་པ་ཉིད་ཀྱིས་སོ། །གལ་ཏེ་རྩོད་པ་དེ་ཡ་ལ་བར་བོར་ན་དེ་དག་བྱེ་བར་དོགས་པ་ཉིད་ཀྱང་ཡོད་ན་དེའི་ཚེ་དགེ་འདུན་བྱེ་བར་གྱུར་ན་མི་རུང་ངོ་སྙམ་པའི་བསམ་པས་ཆེས་མང་བའི་བློས་ལེགས་པར་གཞག་པའི་ཞེས་བྱ་བ་ལེགས་པར་སྒྲུབ་པའི་རྣམ་པ་གཞན་ལ་བརྟེན་པར་བྱ་ཞིང་གཞན་དུ་མི་བྱའོ། །བསྡམ་པར་བྱ་བ་མ་ཡིན་པའི་དོན་ལའོ་ཞེས་བྱ་བ་ནི་འདི་ལ་ལྟུང་བ་ཡིན་ནམ་མ་ཡིན་རྣམ་པར་གཏན་ལ་དབབ་པའི་དོན་ཏོ། །གལ་ཏེ་ལྟུང་བ་ལས་བསྡམ་པར་བྱ་བའི་བདག་ཉིད་མ་ཡིན་གྱི་བཤགས་པར་བྱ་བའི་བདག་ཉིད་ཡིན་ན་དེས་ཀྱང་དོན་དེ་ལ་ཆེས་མང་བའི་བློས་ལེགས་པར་གཞག་པ་ཞེས་བྱ་བའི་ལེགས་པར་སྒྲུབ་པའི་རྣམ་པ་གཞན་ལ་བརྟེན་པར་བྱའི་བསྡམ་པར་བྱ་བའི་དོན་ཡིན་ན་དེ་ལ་ནི་རྣམ་པ་འདི་ལ་བརྟེན་པར་མི་བྱ་སྟེ་ཕྲན་ཚེགས་ཙམ་དུ་ཟད་པའི་ཕྱིར་རོ། །ཅི་དང་པོ་ཉིད་ནས་འདི་ལ་བརྟེན་པར་བྱ་འམ་ཞེ་ན། དེའི་ཕྱིར་གནས་བརྟེན་གྱི་མཐར་ཐུག་པ་དག་ཡོངས་སུ་ཉོན་མོངས་པར་གྱུར་པ་དག་ལའོ་ཞེས་བྱ་བ་སྨོས་ཏེ། དགེ་འདུན་གཞི་པོ་དང་གསལ་བ་ལ་ སོགས་པའི་རིམ་གྱིས་གནས་བརྟན་གྱི་མཐར་ཐུག་པའི་བར་དག་གིས་ཉོན་མོངས་པ ་བརྩལ་ཀྱང་ཉེ་བར་མ་ཞི་བར་གྱུར་པ་ནི་ཡིད་
ཡིན་ན་འདི་ལ་བརྟེན་པར་བྱའོ། །གང་གིས་འདི་ལ་བརྟེན་པར་བྱ་ཞེ་ན། དེའི་ཕྱིར་དགེ་འདུན་གཞི་བོས་སོ་ཞེས་བྱ་བ་སྨོས་སོ། །དོན་འདི་ལ་ཆེས་མང་པོ་དག་ལ་བགྲང་བར་ཇི་ལྟར་བྱ་ཞེ་ན། དེའི་ཕྱིར་འདི་ལ་ཚུལ་ཤིང་བྲིམ་པས་བློ་གཟུང་བར་བྱ་བ་ཉིད་དོ། །ཚུལ་ཤིང་འདྲིམ་པ་བསྐོ་བར་བྱའོ། །དེས་ཚུལ་ཤིང་རྣམ་པ་གཉིས་དག་ཉེ་བར་གཞག་གོ །ཆོས་ཀྱི་ཚུལ་ཤིང་དག་ནི་ཡ་ཡོ་མེད་པ་དང་ཁྱར་ཁྱོར་མེད་པ་དང་ཆས་ཆུས་མེད་པ་དང༌། ཁ་དོག་བཟང་བ་དང་དྲི་ཞིམ་པ་དང་རེག་པ་འཇམ་པ་དག་ཡིན་ལ། །ཅིག་ཤོས་ཀྱི་ནི་དེ་ལས་བཟློག་པའོ། །དགེ་འདུན་ལ་འདུ་བར་གསོལ་ལོ། །ཚུལ་ཤིང་འདྲིམ་པར་འགྱུར་གྱི་ཐམས་ཅད་ཀྱིས་འདུ་བར་བྱའོ། །གལ་ཏེ་འདི་ལྟར་འདུན་པ་སྦྱིན་བས་ཚོགས་པ་དང་ཆོས་མ་ཡིན་པའི་ཚུལ་ཤིང་ལྷག་པར་འགྱུར་བ་སེམས་ན་བྲིམ་པར་མི་བྱའོ། །འདྲིམ་པའི་ཚེ་ན་ལག་པ་གཡས་པས་ཆོས་ཀྱི་ཚུལ་ཤིང་དག་བཟུང་ཞིང་གཡོན་པས་ཅིག་ཤོས་དག་གོ །དེ་དག་གཡོགས་ཏེ་སྔ་མ་དག་སྣང་བར་བྱས་ནས་བརྗོད་པར་བྱའོ། །གནས་བརྟན་འདི་དག་ནི་ཆོས་ཀྱི་ཚུལ་ཤིང་ཡ་ཡོ་མེད་པ་ཁྱར་ཁྱོར་མེད་པ་ཆས་ཆུས་མེད་པ་ཁ་དོག་བཟང་བ་དྲི་ཞིམ་པ་རེག་ན་འཇམ་པ་དག་ཡིན་གྱི་ལོང་ཤིག་ཅེས་སོ། །ཅིག་ཤོས་ཚོལ་ན་ཚིག་གཉིས་ཀྱི་བར་དུ་མི་དབུལ་ལོ་ཞེས་བྱ་བ་སྨོས་ཏེ། ཅིག་ཤོས་ཅེས་བྱ་བ་ནི་ཆོས་མ་ཡིན་པའི་ཚུལ་ཤིང་ངོ༌། །གཡོགས་སམ་ཕྱེ་བ་གང་གིས་ཆོས་ཀྱི་མང་བར་འགྱུར་བ་དེ་ལྟར་བྲིམ་པར་བྱའོ་ཞེས་བྱ་བ་ནི་གལ་ཏེ་གཡོགས་ཏེ་བྲིམ་ན་ཆོས་ཀྱི་ཚུལ་ཤིང་མང་བ་ལྟ་ན་ཡང་གཡོགས་ཏེ་བྲིམ་པར་བྱའོ། །ཇི་སྟེ་ཕྱེ་སྟེ་བྲིམ་ན་ཆོས་ཀྱི་ཚུལ་ཤིང་མང་བར་འགྱུར་བ་ལྟ་ན་ཡང་ཕྱེ་སྟེ་བྲིམ་པར་བྱའོ། །ཚེ་དང་ལྡན་པ་ཁྱོད་ཀྱི་མཁན་པོ་དང་སློབ་དཔོན་དང་མཁན་པོ་གཅིག་པ་དང་སློབ་དཔོན་ཅིག་པ་དང་གཏམ་འདྲེས་པ་དང་ཕེབས་པར་སྨྲ་བ་དང་སྨོས་འདྲིན་དང་འགྲོགས་པ་ཤེས་ཀྱི་ཆོས་ཀྱི་ཚུལ་ཤིང་བླངས་ཀྱིས་ཁྱོད་ཀྱིས་ཀྱང་ཆོས་ཀྱི་ཚུལ་ཤིང་ལོང་ཤིག །ཁྱོད་དེ་དག་ལྷན་ཅིག་རྩོད་པར་གྱུར་ན་མ་ལེགས་
སོ་ཞེས་རྣ་དྲུང་དུ་བཤུབ་བོ་ཞེས་བྱ་བ་ནི་བརྡ་སྤྲད་པའི་ཕྱིར་རྣ་དྲུང་དུ་བཤུབ་ཅིང་དེ་སྐད་ཡང་དང་ཡང་དུ་བརྗོད་པར་བྱའོ་ཞེས་བྱ་བའི་དོན་ཏོ། །ཆོས་མ་ཡིན་པའི་ཚུལ་ཤིང་བླང་བར་མི་བྱའོ་ཞེས་བྱ་བ་ནི་ལེན་ན་འདུལ་བ་དང་འགལ་བའི་ཉེས་བྱས་ཀྱི་ལྟུང་བ་བཤགས་པར་བྱའོ་ཞེས་བྱ་བ་དེའི་འདི་བསྡུས་པའོ། །མདོ་སྡེ་དང་འདུལ་བ་དང་མ་མོ་འཛིན་པ་དག་ལ་མ་དྲིས་པར་མི་བྱའོ་ཞེས་བྱ་བ་ནི་ཚུལ་ཤིང་བླང་བར་བྱ་ཞེས་བྱ་བར་སྦྱར་ཏེ། འདི་ནི་ཐམས་ཅད་ཀྱི་དབང་དུ་བྱེད་པའོ། །མདོ་སྡེ་འཛིན་པ་ལ་ སོགས་པ ་ལ་དྲི་བ་ནི་ཆོས་ཡོངས་སུ་ཤེས་པར་བྱ་བའི་ཕྱིར་རོ། །དེ་ལ་རང་གི་མ་ཡིན་པ་ཤིན་ཏུ་རྣམ་པར་གཏན་ལ་དབབ་པ་ཉིད་ལ་སྡེ་སྣོད་འཛིན་པ་རྣམས་ལ་དྲི་བ་འདི་བྱས་པ་ཉིད་དོ། །ཆོས་ཀྱི་དོན་ཤེས་པར་གྱུར་ནས། དེའི་ཚེ་ཚིག་དང་དོན་བླང་བར་བྱ་བ་ཉིད་མ་ཡིན་ཞེས་བྱ་བར་ཤེས་པར་བྱའོ། །དབྱེན་དུ་འགྱུར་བའི་བཟོད་པས་མི་བྱའོ་ཞེས་བྱ་བ་ནི་ཨེ་མའོ་བྱེ་བར་གྱུར་ན་ཅི་མ་རུང་སྙམ་པའི་མངོན་པར་འདོད་པས་ཀྱང་ཞེས་བྱ་བའི་དོན་ཏོ། །ཆོས་མ་ཡིན་པས་མི་བྱའོ་ཞེས་བྱ་བ་ནི་བྱུང་བར་གྱུར་ན་ཅི་མ་རུང་སྙ་པ་ཚུལ་ཤིང་བླང་བར་མི་བྱ་སྟེ། ཆོས་མ་ཡིན་པ་འབྱུང་བར་འདོད་པས་ཀྱང་བླང་བར་མི་བྱའོ། །དེ་གཉིས་འབྱུང་བར་འགྱུར་བ་ཉིད་དོགས་པར་ཤེས་ན་མི་བྱའོ་ཞེས་བྱ་བ་འདི་ལྟར་ཨེ་མའོ་བྱེ་བར་གྱུར་ན་ཅི་མ་རུང་སྙམ་པའི་དང༌། ཨེ་མའོ་ཆོས་མ་ཡིན་པ་བྱུང་བར་གྱུར་ན་ཅི་མ་རུང་སྙམ་པ་མེད་དུ་ཟིན་ཀྱང་དེ་གཉིས་འབྱུང་བར་འགྱུར་བ་ཉིད་དུ་ཤེས་པ་སྟེ། དོན་ཇི་ལྟ་བུ་དང་འདི་ན་དགེ་སློང་གང་དག་དབྱེན་ལ་མངོན་པར་ཞེན་པར་བྱེད་པ་དེ་ལྟ་བུ་དག་ཡོད་པས་སྟོན་པ་ཉིད་ཀྱང་འགའ་ཞིག་འབྱུང་བར་འགྱུར་རོ་སྙམ་དུ་ཤེས་ན། དེ་ལྟར་ཡང་ཚུལ་ཤིང་དག་བླང་བར་མི་བྱའོ། །མཉམ་པ་ཉིད་ན་ཉན་ཐོས་ཆེན་པོའི་ཕྱིར་ཆོས་ཀྱི་ཚུལ་ཤིང་གཅིག་བླང་ངོ་ཞེས་བྱ་བ་ནི་ཆོས་དང་ཆོས་མ་ཡིན་པའི་ཚུལ་ཤིང་གྲངས་མཉམ་པ་ཉིད་ཡིན་ན་ཉན་ཐོས་ཆེན་པོ་ལ་གཅིག་བསྡོས་ཏེ་ཆོས་ཀྱི་ཚུལ་ཤིང་བླང་བར་བྱ་སྟེ། དེ་ལྟར་ན་རྩོད་པ་དེ་ཆོས་ཀྱིས་ཉེ་བར་ཞི་བར་འགྱུར་བ་ཡིན་ནོ། །ཆོས་མ་
ཡིན་པའི་ཚུལ་ཤིང་ལྷག་ན་ནི་རྩོད་པ་དེ་ཆོས་མ་ཡིན་པས་ཉེ་བར་ཞི་བར་འགྱུར་རོ། །ཆོས་མ་ཡིན་པས་ཉེ་བར་ཞི་བ་ལ་སྐྱོ་སྔོགས་མི་བྱའོ་ཞེས་བྱ་བ་ནི་ཆོས་ཀྱིས་ཉེ་བར་ཞི་བ་ལ་སྐྱོ་སྔོགས་བྱེད་དུ་འགྱུར་བ་ལ་འདི་ནི་ཉེས་བྱས་སུ་གསུངས་སོ། །འགྱེད་པའི་ཕྱིར་རྩོད་པ་དེ་ཆོས་ཀྱིས་ཉེ་བར་ཞི་བའི་ཆོ་ག་བཤད་ཟིན་ཏོ། །མི་གདམས་པའི་ཕྱིར་རྩོད་པ་ནི་རྒྱུད་གཅིག་ཏུ་བྱ་བ་དང༌། དག་པ་སྦྱིན་པ་ཞེས་བྱ་བ་གཉིས་ཀྱིས་ཉེ་བར་ཞི་བར་བསྟན་པ་དེ་ལ་རྒྱུད་གཅིག་ཏུ་བྱ་བ་ནི་བསྟན་ཟིན་པས་དག་པ་སྦྱིན་པར་བརྗོད་པར་བྱ་སྟེ། དེའི་ཕྱིར་གླེང་བའི་ཁ་ན་མ་ཐོ་བ་མེད་པ་ལ་ནི་དག་བ་སྦྱིན་ནོ་ཞེས་བྱ་བ་སྨོས་ཏེ། གལ་ཏེ་དགེ་སློང་དེ་ལ་ལྟུང་བ་གང་གིས་གླེང་བར་བྱ་བའི་ལྟུང་བ་དེ་ནི་ཁ་ན་མ་ཐོ་བ་མེད་པར་གྱུར་ན་དེའི་ཕྱིར། དེ་ལ་དྲན་པས་འདུལ་བ་དང༌། མ་སྨྱོས་པས་འདུལ་བའི་བདག་ཉིད་ཀྱིས་དག་པ་སྦྱིན་པར་བྱའོ།། གླེང་བ་ནི་རྣམ་པ་བཞི་སྟེ། གཞི་མེད་པ་དང་གཞན་རྗེས་སུ་སྒྲུབ་པའི་དབང་གིས་དང་ཕྱིར་བཅོས་པ་ལ་མ་ལྟོས་པའི་ཕྱིར་དང་སྨྱོས་པས་བྱས་པས་སོ་ཞེས་བྱ་བ་ནི་གླེང་བའི་ཁ་ན་མ་ཐོ་བ་མེད་པ་ནི་རྣམ་པ་བཞི་སྟེ། གཞི་མེད་པ་ནི་ལྟུང་བ་མ་བྱུང་བ་ཉིད་ལ་གླེང་བ་གང་ཡིན་པའོ། །གཞན་རྗེས་སུ་བསྒྲུབ་པ་པའི་དབང་གིས་ནི་དེ་གཞན་རྗེས་སུ་བསྒྲུབས་ལ་གཞན་གྱིས་གླེང་བར་བྱེད་པ་སྟེ། ལྟུང་བྱེད་ལ་དགེ་འདུན་ལྷག་མ་ལ་ སོགས་པས་གླེང་བས་སོ། །ཕྱིར་བཅོས་པ ་ལ་མི་ལྟོས་པའི་ཕྱིར་ནི་འདི་ལ་ལྟུང་བ་བྱུང་བར་གྱུར་ཏོ་ཞེས་བྱ་བ་དེ་དེས་ཆོས་བཞིན་དུ་ཕྱིར་བཅོས་པ་ཉིད་ན་ཕྱིར་བཅོས་པ་ཉིད་ལ་མ་ལྟོས་བར་གླེང་བའོ། །སྨྱོས་པས་བྱ་བ་ནི་སྨྱོས་པའི་གནས་སྐབས་སུ་དེས་རུང་བ་མ་ཡིན་པ་ཀུན་དུ་སྤྱད་པ་དེས་གླེང་བར་བྱེད་པའོ། །དང་པོ་གསུམ་ལ་ནི་དྲན་པས་འདུལ་བ་སྦྱིན་ནོ་ཞེས་བྱ་བ་ནི་གཞི་མེད་པ་དང་གཞན་རྗེས་སུ་བསྒྲུབ་པའི་དབང་གིས་དང༌། ཕྱིར་བཅོས་པ་ལ་མི་ལྟོས་པའི་ཕྱིར་རོ་ཞེས་བྱ་བ་གསུམ་གྱིས་གླེང་བར་བྱ་བ་དེ་དག་ལ་ནི་དགེ་འདུན་གྱི་དྲན་པས་འདུལ་བ་སྦྱིན་པར་བྱ་སྟེ། དེ་བྱིན་པ་ན་དགེ་སློང་དེ་ལ་དགེ་སློང་དག་གིས་དྲན་པ་དང་ལྡན་པར་འཛིན་གྱི་ལྟུང་བ་དང་བཅས་པར་མི་འཛིན་ཏེ།
དེ་ལྟར་ན་དེའི་རྩོད་པ་ཉེ་བར་ཞི་བ་བརྗོད་པར་བྱའོ། །ཐ་མ་ལ་ནི་མ་སྨྱོས་པས་འདུལ་བ་སྦྱིན་པའོ་ཞེས་བྱ་བ་ནི་སྨྱོས་པས་བྱས་པ་གླེང་བ་ལ་ནི་དགེ་འདུན་གྱི་མ་སྨྱོས་པས་འདུལ་བ་སྦྱིན་པར་བྱ་བ་སྟེ། དེ་སྦྱིན་ན་དགེ་འདུན་དེ་ལ་དགེ་སློང་གིས་རང་བཞིན་དུ་གནས་པ་ཉིད་དུ་འཛིན་གྱི་ལྟུང་བ་དང་བཅས་པར་མི་འཛིན་ཏེ། མི་གདམས་པ་ལ་རྩོད་པ་ཉེ་བར་ཞི་བར་བྱ་བའི་ཕྱིར་ཆོག་བཤད་ཟིན་ཏོ། །ལྟུང་བའི་ཕྱིར་རྩོད་པ་ནི་ཕྱིར་བཅོས་པས་ཉེ་བར་ཞི་བར་བྱའོ་ཞེས་བསྟན་པ་དེའི་རབ་ཏུ་དབྱེ་བ་བསྟན་པའི་ཕྱིར་ལྟུང་བ་དང་བཅས་པ་ཉིད་ཀྱི་ཕྱིར་འཁྲུག་ལོང་རྣམ་པ་གསུམ་སྟེ། ཕྱིར་འཕྲོས་པ་མེད་པ་དང་ཕྱིར་འཕྲོས་པ་དང་བཅས་པས་རྣམ་པ་གཉིས་སོ། །ཉི་ཚེ་བ་དང༌། དགེ་འདུན་མཐའ་དག་དང་འབྲེལ་པའོ་ཞེས་བྱ་བ་སྟེ། གལ་ཏེ་ལྟུང་བ་དང་བཅས་པ་ཉིད་ཀྱི་རྒྱུས་འཁྲུག་ལོང་གི་ཕྱིར་དགེ་འདུན་མཐའ་དག་ཕྱོགས་དང་གཞན་གྱི་ཕྱོགས་སུ་གནས་པར་གྱུར་ན་འདི་ནི་དགེ་འདུན་མཐའ་དག་གི་ཁོངས་སུ་གཏོགས་པ་ཁ་ཅིག་ལ་ཡང་འཁྲུག་ལོང་འབྱུང་བའོ། །དང་པོ་ལས་ནི་ཁས་བླངས་པའི་བྱ་བ་ཕྱིར་བཅོས་སོ་ཞེས་བྱ་བ་ནི་ཕྱིར་འཕྲོས་པ་མེད་པར་འཁྲུག་ལོང་དུ་གྱུར་པའི་འོག་ཏུ་ལྟུང་བའི་ཕྱིར་རྩོད་པ་ནི་ཁས་བླངས་པའི་བྱ་བས་ཕྱིར་བཅོས་པར་བྱ་སྟེ། ཁས་བླངས་པ་ཙམ་གྱི་དབང་གིས་བྱེད་པ་ནི་བྱ་བ་སྟེ་དེའི་ཕྱིར་བཅོས་པའི་མིང་ངོ༌། །གཉིས་པ་ལས་ནི་མངོན་སུམ་གྱིས་འདུལ་བས་སོ་ཞེས་བྱ་བ་ནི་ཕྱིར་འཕྲོས་པ་དང་བཅས་པ་ཉི་ཚེ་བའི་འཁྲུག་ལོང་དུ་གྱུར་པ་གང་གི་འོག་ཏུ་ནི་མངོན་སུམ་གྱིས་འདུལ་བས་ཕྱིར་བཅོས་ཏེ། འདི་ལ་རྒོལ་བ་དང་ལན་གྱི་ཚིག་དག་མངོན་སུམ་དུ་བྱུང་གི་གླེང་བ་པོས་དང་དམ་བཅས་པ་ཙམ་གྱིས་འདི་ལ་རྣམ་པར་ངེས་པར་སྦྱིན་པ་མ་ཡིན་པར་རིག་པར་བྱའོ། །ཕྱིར་འཆོས་པར་བྱེད་པ་གང་ཡིན་པ་དེ་ནི་མངོན་སུམ་གྱིས་འདུལ་བར་བརྗོད་དོ། །དེ་ལྟར་ཡང་གང་ཟག་ལ་གང་ཟག་གིས་གླེང་བར་བྱེད་ན་ཆོས་འདུལ་བས་མངོན་སུམ་དུ་སྲུང་བ་ཐོབ་པ་ཞེས་བྱ་བ་ལ་ སོགས་པས་སོ། །གསུམ་པ ་ལ་ནི་རྩྭ་བཀྲམ་བ་ལྟ་བུས་སོ་ཞེས་བྱ་བ་ནི་དགེ་འདུན་དུ་གཏོགས་པ་ཐམས་ཅད་ཕྱོགས་སུ་རྣམ་པར་གནས་པའི་དགེ་འདུན་དུ་གྱུར་པའི་དགེ་སློང་
ཐམས་ཅད་ཕྱིར་འཕྲོས་པ་དང་བཅས་པས་འཁྲུག་ལོང་གི་འོག་ཏུ་སྟེ། ཕྱིར་བཅོས་པ་ནི་རྩྭ་བཀྲམ་བའོ། །རྩ་བཀྲམ་ན་རྩྭ་ཐམས་ཅད་ཕན་སུན་ནས་རྩེ་སྤྲོད་དུ་ཉལ་བ་དང་འདྲ་བས་འདིའི་མིང་དེ་ཡིན་ནོ། །འདི་ལ་མང་པོ་དག་གི་དོན་དུ་དགེ་འདུན་མ་ཡིན་པ་ལ་བཤགས་པར་བྱ་བ་དག་ནི་གཅིག་གིས་ཕྱིར་བཅོས་པར་བྱའོ་ཞེས་བྱ་བ་ནི་ཉེས་པ་སྦོམ་པོ་དང༌། དགེ་འདུན་ལྷག་མར་གཏོགས་པའི་ཉེས་པ་སྦོམ་པོར་དོར་ནས་དགེ་འདུན་ལ་བཤགས་པར་བྱ་བ་ཉིད་དོ། །དེའི་ཕྱིར་ལྟུང་བ་གཞན་རྣམས་ལ་འདི་གང་ཟག་མང་པོ་དག་གི་དོན་གང་ཟག་གི་རྩྭ་བཀྲམ་པ་ལྟ་བུས་ཕྱིར་བཅོས་པར་བྱར་རུང་བ་ཞེས་བྱ་བའི་དོན་ཏོ། །དུ་མ་དག་ཅིག་ཅར་དུ་ཡང་ཞེས་བྱ་བ་ནི་འདིར་མང་པོ་དག་གི་དོན་དུ་ལྟུང་བ་དུ་མ་དག་ཅིག་ཅར་དུ་ཕྱིར་འཆོས་སུ་ཡང་རུང་བའོ། །གང་ཡིན་པ་ཞེས་སྨོས་པ་དང་ཤེས་པ་སྣང་བར་བྱས་པས་སོ་ཞེས་བྱ་བ་ནི་གཞི་འདི་ལས་ཁྱེད་ཅག་ལ་ལྟུང་བ་བྱུང་བ་གང་ཡིན་པ་དང༌། ཁོ་བོ་ཅག་ལ་ལྟུང་བ་བྱུང་བ་གང་ཡིན་པ་དེ་དག་ལྟུང་བའི་མིང་དང་རིགས་སྨོས་པས་གཞན་ལ་ལྟུང་བའི་མིང་དང་རིགས་སྨོས་པས་གཞན་ལ་ལྟུང་བའི་རིགས་ཤེས་པ་སྣང་བར་གོ་བར་བྱས་པས་ཕྱིར་བཅོས་པར་བྱའོ་ཞེས་བྱ་བའི་དོན་ཏོ། །ཕྱོགས་གཞན་གྱིས་ཀྱང་མཐུན་པ་དེ་དག་ལའོ་ཞེས་བྱ་བ་ནི་གཞན་གྱིས་ཀྱང་བློ་གཅིག་ཏུ་གྱུར་པ་དེ་དག་ལ་དེ་ཕྱིར་བཅོས་པར་བྱའི་གཞན་གང་ལ་ཡང་མ་ཡིན་ནོ། །ཁས་མི་ལེན་པ་དང་དོན་མེད་པ་ལ་ནི་བཤགས་པའི་མི་འཆགས་སོ་ཞེས་བྱ་བ་ནི་ཁ་ན་མ་ཐོ་བ་ཁས་མི་ལེན་པ་དང་དོན་མེད་པར་ཁས་བླངས་པས་འཆགས་པ་གང་ཡིན་པ་དེ་ལ་ནི་བཤགས་པ་མི་འཆགས་ཏེ། གང་ཞིག་ལྟུང་བ་བྱུང་བ་དག་ལ་ལྟུང་བ་མ་བྱུང་ངོ་ཞེས་ཁས་མི་ལེན་པ་དང༌། ལྟུང་བ་མ་བྱུང་བ་དག་ལ་ལྟུང་བ་བྱུང་ངོ་ཞེས་ཁས་ལེན་པར་བྱེད་པ་ནི་ཆོས་མ་ཡིན་པའོ་ཞེས་གསུངས་པ་དེ་འདིས་བསྡུས་པ་ཡིན་ནོ། །ལྷན་ཅིག་གི་དངོས་པོས་གླེང་བ་ཉིད་དུ་རུང་ངོ་ཞེས་བྱ་བ་ནི་གང་ཟག་གིས་གང་ཟག་ལ་གླེང་བར་བྱེད་པ་དང༌། གང་ཟག་གིས་གང་ཟག་གཉིས་ལ་དང༌། གང་ཟག་གིས་གང་ཟག་མང་པོ་དང༌། གང་ཟག་གིས་དགེ་འདུན་ལ་དང༌། གང་ཟག་གཉིས་ཀྱིས་གང་ཟག་ལ་དང༌། ཇི་སྲིད་
དགེ་འདུན་གྱིས་གང་ཟག་མང་པོ་ལ་དང༌། དགེ་འདུན་གྱིས་དགེ་འདུན་ལ་གླེང་བར་བྱེད་ན་ཞེས་བྱ་བའི་བར་དུ་གླེང་བར་བྱེད་པའི་སྐབས་ལྷན་ཅིག་གི་དངོས་པོར་བསྟན་པ་དེ་དག་བསྡུའོ། །གླེང་བ་པོ་ཉིད་ཀྱང་དེ་བཞིན་ནོ། །འདི་ལ་གྲངས་ཀྱི་བྱེ་བྲག་ནི་ངེས་པ་མེད་དོ་ཞེས་བྱ་བ་ནི་གླེང་བར་བྱ་བ་དང་གླེང་བ་པོ་གཉིས་ལ་གླེང་བར་བྱ་བ་ཇི་སྙེད་པ་དེ་སྙེད་པ་ཁོ་ནའི་གླེང་བ་པོ་དག་གིས་བྱ་བར་མ་ངེས་པའོ། །གླེང་བ་པོ་ལུས་དང་ངག་དག་གིས་བསྡམས་པ་ཉིད་དང༌། སྡེ་སྣོད་དག་ཤེས་པ་ཉིད་དང༌། དགེ་འདུན་གྱི་ནང་དུ་བསམས་བཞིན་དུ་ཆོས་དང་འདུལ་བ་ལོག་པ་དང༌། དེ་བཟློག་པ་དག་མི་སྟོན་པ་ཉིད་ཅེས་བྱ་བ་གསུམ་དང་ལྡན་པ་ལ་གུས་པར་བྱའོ་ཞེས་བྱ་བ་ལ། དེ་ལས་བཟློག་པར་ཞེས་བྱ་བ་ནི་ཆོས་དང་འདུལ་བ་མ་ཡིན་པ་ལས་ཏེ། ཆོས་ཀྱང་ཤེས་བྱ་རྣམ་པར་གཞག་པ་ལས་རིག་པར་བྱའོ། །འདུལ་བ་ནི་ཚུལ་ཁྲིམས་རྣམ་པར་དག་པའི་ཆོ་གའོ། །གླེང་བ་པོ་གང་ཞིག་ལུས་དང་ངག་དག་གིས་བསྡམས་པ་ཉིད་དང༌། སྡེ་སྣོད་དག་ལ་མཁས་པ་ཉིད་དང༌། དགེ་འདུན་གྱི་ནང་དུ་བསམས་བཞིན་དུ་ཆོས་དང་ཆོས་མ་ཡིན་པར་མི་སྟོན། ཆོས་མ་ཡིན་པ་ཆོས་སུ་མི་སྟོན་པ་དང༌། འདུལ་བ་འདུལ་བ་མ་ཡིན་པར་མི་སྟོན་པ་དང༌། འདུལ་བ་མ་ཡིན་པ་འདུལ་བར་མི་སྟོན་པའི་གླེང་བ་པོ་འདི་ལྟ་བུ་ལ་གུས་པར་བྱའོ། །ཚུལ་ཁྲིམས་འཆལ་བ་དང་ལོག་པར་སྟོན་པ་ལ་མི་བྱའོ་ཞེས་བྱ་བ་ནི་གླེང་བ་པོ་ཚུལ་ཁྲིམས་འཆལ་བ་དང༌། ཆོས་དང་འདུལ་བ་ཆོས་མ་ཡིན་པ་དང༌། འདུལ་བ་མ་ཡིན་པར་ལོག་པར་སྟོན་པ་ལ་ནི་མཐུན་པར་མི་བྱ་སྟེ། མི་བགྲང་ཞིང་སྨད་པ་དང་ཚིག་གིས་ཅུང་ཟད་ཀྱང་བསྒྲུབ་པར་མི་བྱའོ། །དགོས་པ་དང་ལྡན་པ་ཉིད་ཀྱིས་གླེང་བ་ལ་རྣམ་པ་གཞན་གྱིས་དེར་འདི་ལ་གླེང་བ་ལ་འཇུག་པ་ཞེས་བྱ་བ་ངེས་པར་ཤེས་པ་ལ་མཐུན་པར་བྱ་བའོ། །ངེས་པར་ཤེས་པ་མེད་པ་ལ་འདི་ལ་གུས་པར་མི་བྱ་བ་ཉིད་དོ། །ཁ་ཅིག་ནི་ལོག་པར་སྟོན་པ་ལ་སྣང་བ་དང༌། རབ་ཏུ་སྣང་བ་དེ་དཔྱད་པར་བྱ་ཞེས་ཟེར་བ་སྟེ། འཇོམས་པ་དང་རབ་ཏུ་འཇོམས་པ་མ་ཡིན་པར་ཞེས་བྱ་བར་སྨྲ་སྟེ་དེ་ནི་མི་རིགས་སོ། །འདི་ལྟ་བུའི་དོན་རྣམས་ལ་ཚུལ་
ཁྲིམས་ཉམས་པ་དང༌། ལྟ་བ་ཉམས་པ་ལས་གུས་པར་བྱ་བ་མ་ཡིན་པ་ཉིད་ཀྱི་ཕྱིར་རོ། །རྣམ་པ་དེ་ལྟ་བུ་མ་ཡིན་པ་སྟེ་སྣོད་དག་འཛིན་ཅིང་མི་ཤེས་པ་ལ་ནི་བློན་གདབ་པར་བྱའོ་ཞེས་བྱ་བ་ནི་གླེང་བ་པོ་ལོག་པར་སྟོན་པའི་རྣམ་པ་དེ་ལྟ་བུ་མ་ཡིན་པ་ལུས་དང་ངག་དག་གིས་བསྡམས་པ་དེ་ལ་སྡེ་སྣོད་འཛིན་པ་པོ་སྟེ་མི་ཤེས་པ་ལ་བློན་གདབ་པར་བྱའོ། །མི་ཤེས་པ་ཉིད་ཀྱིས་གླེང་བར་བྱེད་པ་ལ་ཞེས་བྱ་བ་གང་དུ་ངེས་པར་ཤེས་པར་བྱ་བ་ལ་དེར་ལན་གདབ་པ་ངེས་པར་བྱའི་ཤེས་པ་ལ་གུས་པར་མི་བྱ་བ་ཉིད་དོ། །གང་ཞིག་གླེང་བ་པོ་ཡོན་ཏན་གསུམ་དང་ལྡན་པ་ལ་གུས་པར་བྱའོ་ཞེས་ཇི་སྐད་བསྟན་པ་དེ་ལ་བརྟག་པ་ཙམ་ཡང་མི་བྱའམ་ཞེ་ན། དེའི་ཕྱིར། དེ་ལ་བསམ་པ་རྟོགས་པར་བྱ་བའི་ཕྱིར་བརྒལ་ཞིང་བརྟག་པར་བྱའོ་ཞེས་བྱ་བ་སྨོས་ཏེ། སེམས་ཀྱི་སྤྱོད་པ་ནི་གཡོ་བ་ཡིན་པས་སྔར་སྡིག་པ་ལ་མ་ཞུགས་སུ་ཟིན་ཀྱང་ཕྱིས་འཇུག་སྲིད་པས་དེའི་ཕྱིར་སེམས་ཀྱི་སྤྱོད་པ་བསྒོམ་པའི་ཕྱིར་བརྒལ་ཞིང་བརྟག་པར་བྱའོ། །བསམ་པ་རྟོགས་པར་བྱ་བ་ནི་འདིར་བསམ་པ་རྟོགས་པར་བྱ་བ་སྟེ། །འདིའི་བསམ་པ་ཇི་ལྟ་བུས་ཞེས་བྱ་བ་དེའི་དོན་དུའོ། །ཇི་ལྟར་བརྒལ་ཞིང་བརྟག་པར་བྱ་ཞེ་ན། དེའི་ཕྱིར་གནས་སུ་མི་གཞག་པས་སོ་ཞེས་བྱ་བ་སྨོས་ཏེ། འདི་ནི་ལོག་པའི་བསམ་པ་རྗེས་སུ་བརྩལ་བ་ཡིན་གྱི། ཡང་དག་པའི་བསམ་ པ་རྗེས་སུ་བརྩལ་བར་བྱ་བ་ནི་མ་ཡིན་ནོ། །དུས་ལས་སོགས ་པའི་གནས་སུ་གླེང་པའི་ཚིག་གིས་འཇོག་པར་མི་ཕྱེད་ན་ལོག་པར་གླེང་བ་ལ་ཞུགས་པར་ངེས་པ་ཡིན་པས་དེའི་ཕྱིར། གནས་སུ་མི་འཇོག་ན་བསམ་པ་ལོག་པར་ཤེས་པར་བྱའོ། །གལ་ཏེ་གང་ཟག་དེ་ལ་བརྒལ་ཞིང་བརྟགས་ པ་ན་དུས་ལ་སོགས ་པའི་གླེང་བའི་ཚིག་འཇིག་པར་མི་བྱེད་ན་ཞེས་བྱ་བའོ། །གང་དུ་མི་འཇོག་ན་བསམ་པ་ལོག་པར་མཚོན་པར་བྱ་བའི་གནས་དེ་དག་གང་ཞེ་ན་དེའི་ཕྱིར། གནས་སུ་ནི་དུས་དང་ཡུལ་དང་སྤྱོད་ལམ་དང་རྗེས་སུ་སྒྲུབ་པ་དག་གོ་ཞེས་བྱ་བ་སྨོས་ཏེ། དུས་ཞེས་སྨོས་པས་ནི་མཚན་མོ་བྱས་པས་གླེང་བ་དང་ཉིན་མོ་བྱས་པས་གླེང་བ་ལ་ སོགས་པ ་བསྡུས་སོ། །ཡུལ་ཞེས་སྨོས་པས་ནི་ལྐོག་ཏུ་བྱས་པ་དང་གསལ་
བར་བྱས་པ་དང་ལམ་དུ་བྱས་པ་དང་ལམ་གོལ་བར་བྱས་པ་དང་གྲོང་དུ་བྱས་པ་དང་དགོན་པར་བྱས་པ་ལ་ སོགས་པ ་བསྡུས་སོ། །སྤྱོད་ལམ་ཞེས་སྨོས་པ་ནི་འགྲོ་བ་དང་འགྲེལ་བ་དང་འདུག་པ་དང་ཉལ་བས་བྱས་པས་གླེང་བ་བསྡུས་སོ། །རྗེས་སུ་བསྒྲུབ་པ་ཞེས་སྨོས་པས་ནི་ཕམ་པར་འགྱུར་བ་དང་དགེ་འདུན་ལྷག་མ་དང་ལྟུང་བྱེད་དང་སོ་སོར་བཤགས་པར་བྱ་བ་དང་ཉེས་བྱས་སུ་བསྒྲུབ་པས་གླེང་བ་བསྡུས་སོ། །གནས་གཞན་དུ་འཕོ་བ་དང༌། རྙོག་པ་ཅན་དུ་གྱུར་ན་གླེང་བ་མི་འཆགས་སོ་ཞེས་བྱ་བ་ནི་གལ་ཏེ་གླེང་བ་པོ་དེ་ལ་གལ་ཏེ་དེ་ལྟར་བརྒལ་ཞིང་བརྟགས་པ་ན་གནས་ནས་གཞན་དུ་འཕོ་བ་དང་འཁྲུག་པའི་རྙོག་པ་ཅན་དུ་གྱུར་ན་དེའི་ཚེ། དེ་ལ་གླེང་བ་མི་འཆགས་པ་ཉིད་ཡིན་ཏེ། གླེང་བའི་བྱ་བ་མ་བྱས་པ་ཉིད་དང༌། མ་བྱུང་བ་ཉིད་དང་མི་སྐྱེད་པ་ཉིད་ཡིན་ནོ། །དེ་ཡོད་པ་ན་གླེང་བ་ཉིད་དང་གླེང་བ་པོ་མེད་པ་ཉིད་ཡིན་ཏེ། དེ་ཉིད་ཀྱིས་འདིར་དགོས་པ་འགྲུབ་པར་འགྱུར་ཏེ། དེ་ཡོད་ན་རྩོད་པ་ཉེ་བར་ཞི་བ་ཉིད་འགྲུབ་པར་འགྱུར་བ་ཡིན་ནོ། །དེ་བས་ན་དེ་ལ་གླེང་བ་ལ་མི་འཆགས་སོ་ཞེས་སྨོས་སོ། །གླེང་བས་ཁས་བླངས་ན་མཐར་ཐུག་པ་ཡིན་ནོ་ཞེས་བྱ་བ་ནི། གང་ཟག་གང་ལ་གླེངས་པ་དེས་ལྟུང་བ་དེ་ཁས་བླངས་ན་དེ་ནི་འདིར་རྩོད་པའི་མཐར་ཐུག་པ་ཡིན་ཏེ། ཁས་བླངས་ན་རྩོད་པ་དེ་ཉེ་བར་ཞི་བར་འགྱུར་རོ། །སྨྲ་བ་པོ་བདེན་པ་མཐོང་བ་ཉིད་དང༌། ཡོན་ཏན་ལས་ཆེས་མཆོག་ཏུ་གྱུར་པ་ཁྱིམ་པ་ཡང་རུང་བ་གཞན་ཚད་མར་བྱའོ་ཞེས་བྱ་བ་ནི་འདིར་ཐམས་ཅད་ཉིད་དེ་དོན་ཚོལ་བ་དང་དོན་བརྗོད་པའི་དབང་པོ་གླེང་བར་བྱ་བ་དང༌། གླེང་བར་བྱེད་པ་སྨྲ་བ་པོ་ཉིད་ཀྱིས་གཟུང་བར་རིག་པར་བྱའི་ཆེ་བ་ཞིར་གྱུར་པ་ཉིད་ཀྱིས་ནི་མ་ཡིན་ནོ། །རབ་ཏུ་བྱུང་བ་འབའ་ཞིག་ཏུ་མ་ཟད་ཀྱི་སྨྲ་བ་པོ་བདེན་པ་མཐོང་བ་ཉིད་དམ་ཁྱིམ་པ་ཡང་རུང་བ་གཞན་དག་ཚད་མར་བྱས་ཏེ། འདི་ནི་མི་གཡོ་བའི་ཆོས་དང་ལྡན་པ་ཉིད་ལ་དཔེ་ཙམ་དུ་རིག་པར་བྱ་སྟེ། ཡོན་ཏན་གཞན་གྱིས་ཀྱང་གང་ཞིག་བདེན་པ་ལས་མི་གཡོ་བ་དེ་ཡང་འདིར་བསྡུས་པ་ཉིད་དོ། །མི་གཡོ་བའི་ཆོས་བྱེད་པ་ལས་གཞན་གང་ཡིན་པ་དེ་ལ་ཡོན་ཏན་ལས་ཆོས་མཆོག་ཏུ་གྱུར་པ་ཉིད་ཚད་མར་བྱ་སྟེ། དེ་དག་ཆེ་བཞིར་དྲིའོ་ཞེས་བྱ་བའི་དོན་
ཏོ། །འདིར་གཞུང་ནི་སིལ་བུ་དག་ལས་བཙུན་བ་རེ་ཞིག་དགེ་སློང་གཉིས་ལ་ཐ་དད་པར་སྨྲ་བ་དང་འགལ་བར་སྨྲ་བ་དང་མི་མཐུན་པར་སྨྲ་བ་དག་བྱུང་བ་ན། གང་གི་ཚིག་གཟུང་བར་བགྱི། གང་ཚུལ་ཁྲིམས་དང་ལྡན་པའི་འོ། །གཉིས་ཀ་ཚུལ་ཁྲིམས་དང་ལྡན་ན་གང་མང་དུ་ཐོས་པའོ་འོ། །གཉིས་ཀ་མང་དུ་ཐོས་པ་ལགས་ན་གང་ཡང་དག་པར་བསྡམས་པའི་འོ། །གཉིས་ཀ་ཡང་དག་པར་བསྡམས་པ་ལགས་ན་གང་ཆེས་ཡང་དག་པར་བསྡམས་པའི་འོ། །གཉིས་ཀ་ཆེས་ཡང་དག་པར་བསྡམས་པ་ལགས་ན་དེ་ནི་གནས་མ་ཡིན་སྐབས་མ་ཡིན་ཏེ། གལ་ཏེ་གཉིས་ཀ་ཆེས་ཡང་དག་པར་བསྡམས་པ་ལ་ཐ་དད་པར་སྨྲ་བ་དང་འགལ་བར་སྨྲ་བ་དང་མི་མཐུན་པར་སྨྲ་བ་དག་འབྱུང་བ་དེ་ནི་གནས་མེད་དོ་ཞེས་གསུངས་པ་ཡིན་ནོ། །གཞན་དང་བཅས་པ་ཉིད་ན་ཚིག་བསྟུན་པར་བྱའོ་ཞེས་བྱ་བ་ནི་ཆེ་བཞི་དེ་ལ་གལ་ཏེ་གཞན་ཕ་རོལ་པོ་ཉེ་བར་གནས་པར་གྱུར་ན་གཞན་དེ་ལ་དྲི་བར་བྱ་བ་ཡིན་ཞིང་དེ་དང་ལྷན་ཅིག་དེའི་ཚིག་གོ་བར་བྱའོ། །མི་གཡོ་བ་རྙེད་པ་འདི་དག་གིས་འཁྲུལ་བ་མེད་པ་ཤེས་པར་བྱ་བའི་ཕྱིར་དེ་བསྐོའོ། །མ་རྙེད་པ་མི་གཡོ་བའི་ཆོས་དང་ལྡན་པ་ལ་མ་ཤེས་པ་ཤེས་པའི་དོན་དུ་བསྐོ་བ་འདིའོ། །འདིར་གཞུང་ནི་བཙུན་པ་དགེ་བསྙེན་མ་དད་པ་ཅན་དགེ་སློང་རྣམས་ཀྱི་དྲུང་དུ་མཆིས་ཏེ། འདི་སྐད་ཅེས་བཙུན་པ་དག་བདག་གིས་དགེ་སློང་ཞིག་རྒྱལ་རིགས་མོ་དང་ལྷན་ཅིག་མི་ཚངས་པར་སྤྱོད་པས་ཉམས་པར་བགྱིད་པ་མཐོང་ངོ་ཞེས་མཆི་ན། བགྱིད་དུ་སྩལ་ཅིང་དེ་ལ་དེའི་ངོ་བོ་ཉིད་ཚོལ་བ་དང་མཐུན་པ་བསྩལ་བར་བགྱི་འམ་ཉེ་བ་འཁོར་མི་བྱ་སྟེ། དྲི་བར་བྱ་ཞིང་གལ་ཏེ་དེ་ན་སྲིང་མོ་གཞན་གང་ཞིག་ཀྱང་ཡོད་དོ་ཞེས་ཟེར་ན་གཉིས་ཀ་དྲི་བར་བྱའོ། །གལ་ཏེ་མཐུན་ན་དགེ་བསྙེན་མ་དད་པ་ཅན་གྱི་ཚིག་གིས་བྱེད་དུ་གཞུག་ཅིང་དེ་ལ་དེའི་ངོ་བོ་ཉིད་ཚོལ་བ་དང་མཐུན་པ་ཡང་སྦྱིན་པར་བྱའོ། །གལ་ཏེ་འདིས་རྒྱལ་རིགས་མོ་དང་མི་ཚངས་པར་སྤྱོད་པ་མ་བྱས་ཀྱི། འདིས་བྲམ་ཟེ་མོ་དང་ལྷན་ཅིག་མི་ཚངས་པར་སྤྱོད་པ་བྱས་སོ་ཞེས་ཟེར་ན་དགེ་སློང་གིས་དམ་བཅས་པས་བྱེད་དུ་གཞུག་གོ་ཞེས་གསུངས་པ་ཡིན་ནོ། །
ཐེ་ཚོམ་ཉིད་དུ་གྱུར་ན་ཤེས་པ་ཉིད་མ་ཡིན་ནོ་ཞེས་བྱ་བ་འདི་དོན་གང་ལ་ཐེ་ཚོམ་ཉིད་དུ་གྱུར་པ་དེས་དོན་དེ་ཤེས་པ་ཉིད་མ་ཡིན་ཏེ། འདི་ལྟར་དེས་པའི་ཤེས་པ་མ་བསྐྱེད་པའི་ཕྱིར་རོ། །གང་ལ་བརྗོད་པ་གཞན་ལ་གླེང་བར་བྱས་པ་ལ་དུས་མ་ཡིན་པར་ལི་ཁ་རའི་ཆུ་འཐུང་བ་ལ་ སོགས་པ ་མཐོང་ནས་དབང་པོ་དང་གླེང་བ་པོ་དག་གིས་ཅིག་ཤོས་བྱས་པར་ཐེ་ཚོམ་ཟ་བ་ཉིད་དུ་ཐོབ་པར་གྱུར་པ་ལ་དེས་བརྗོད་པར་གྱུར་པ་ལ་དེས་ཤེས་པ་དང་བྲལ་བ་ཉིད་སྐྱེ་བར་འགྱུར་རོ། །དེས་རྩོད་པ་དེ་ལ་རྣམ་པར་གཞག་པ་མེད་པར་དེ་བས་ན་འདི་ལ་དོན་གྱིས་བྱས་པའོ། །འདིར་ཐེ་ཚོམ་ཟ་བར་གྱུར་པ་ཉིད་འདི་ནི་དཔེ་ཡིན་ཏེ་གཡོ་བའི་དབང་གིས་བརྗོད་པ་ལའོ། །ངག་གི་རྣམ་པར་འགྱུར་བ་ནི་རྙོག་ པ་ལ་སོགས ་པའོ། །ལུས་ཀྱི་རྣམ་པར་འགྱུར་བ་ངལ་བ་ནི་རྨྱ་བ་ཉིད་ལས་སོ། །དུ་མའི་རྣམ་པར་འགྱུར་བ་ངལ་བ་ནི་གླགས་རྙེད་ཅིང་གནས་པ་ལ་རྩོད་པའོ་ཞེས་བྱ་བ་སུ་ཞིག་གིས་གླེང་བ་ལ་རང་ཉིད་ཀྱིས་གཡོ་བར་གྱུར་བ་ཁས་ལེན་པ་བསྒྲུབ་པ་དེ་ལ་ཡང་དེ་ཤེས་པ་ཉིད་མ་ཡིན་པར་རིག་པར་བྱའོ། །འདིར་གཞུང་ནི་དགེ་བསྙེན་མ་དད་པ་ཅན་གྱིས་དགེ་སློང་དུས་མ་ཡིན་པར་ལི་ཁ་རའི་ཆུ་འཐུང་བ་མཐོང་ནས། དེས་དགེ་སློང་རྣམས་ལ་འདི་སྐད་ཅེས་བདག་གིས་དགེ་སློང་དུས་མ་ལགས་པར་སྐྱོ་མ་འཐུང་བ་མཐོང་ངོ་ཞེས་མཆི་ན། ཆོས་བཞིན་དུ་བགྱིད་དུ་སྩལ་ཅིང་དེའི་ངོ་བོ་ཉིད་ཚོལ་བ་དང་མཐུན་པར་བསྩལ་པར་བགྱི་འམ་ཉེ་བ་འཁོར་མི་བྱ་སྟེ། ཇེ་དགེ་སློང་ལ་དྲི་བར་བྱ་ཞིང་གལ་ཏེ་འདི་སྐད་ཅེས་བདག་གིས་ལི་ཁ་རའི་ཆུ་འཐུངས་སོ་ཞེས་ཟེར་ན་དགེ་སློང་གིས་དམ་བཅས་པས་བྱེད་དུ་གཞུག་གོ་ཞེས་གསུངས་པ་ཡིན་ནོ། །དེ་ལ་ངེས་པར་གྱུར་པ་ནི་ཁས་བླངས་པ་དང་འདྲའོ་ཞེས་བྱ་བ་ནི་དེ་ལྟར་རང་གིས་ཁས་བླངས་པ་དང་འདྲ་སྟེ། དེ་ལས་ཆོ་ག་ངེས་པར་བལྟ་བར་བྱའོ། །དེའི་ངོ་བོ་ཉིད་ཚོལ་བ་ནི་གང་ལ་སྒྲུབ་པ་དེ་ལ་སྦྱིན་པར་བྱ་བ་ཉིད་མ་ཡིན་ནོ། །དེའི་རྒྱུ་མཚན་བརྗོད་པས་བསྟན་པར་བྱ་སྟེ། དེའི་ཕྱིར། ལྟུང་བའི་ཕྱིར་རྩོད་པ་འདི་ལ་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པར་བྱ་བ་ཉིད་དོ་ཞེས་བྱ་བ་སྨོས་ཏེ། དགེ་འདུན་ལ་ཁས་བླངས་ནས་ཡང་ཁྱད་དུ་གསོད་པར་
བྱེད་ན་དེ་ནི་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པའི་རྒྱུ་ཡིན་ཏེ། དེ་ལ་ཁས་བླངས་པས་ནི་ཡོད་པ་བསྟན་པ་ཡིན་ལ་ཁྱད་དུ་གསོད་པ་ནི་མེད་པ་སྟོན་པ་ཡིན་པའི་ཕྱིར་ངེས་པ་དང་བྲལ་བ་ནི་ཁྱད་དུ་གསོད་པ་ཡིན་ནོ་ཞེས་བྱ་བ་ལ། ཁྱད་དུ་གསོད་པ་ཞེས་བྱ་བ་ནི་གུས་པ་མ་ཡིན་པའི་ཚིག་གིས་ཁྱད་པར་རྣམ་པ་གཞན་གྱིས་ཉེ་བར་བསྡུ་བ་བརྗོད་པ་ནི་ཉེ་བར་བསྡུ་བ་བརྗོད་པའོ། །འདི་ནི་མ་མཐོང་བ་ལ་བརྗོད་པ་ཡིན་ཏེ། དེ་ལ་ཡང་གནས་ནས་དབྱུང་བའི་ལས་བྱེད་པ་སྟེ་འོན་ཀྱང་ངེས་པའོ། །འདི་ལ་རྩོད་པ་སྒྲུབ་པ་ནི་ཁྱད་དུ་གསོད་པའོ། །དེ་ལྟ་ན་འདི་ཁས་བླངས་ནས་ཡང་ཁྱད་དུ་གསོད་པར་བྱེད་ན་རྒྱུ་ཡོད་པའི་ཕྱིར་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་པར་འགྱུར་རོ། །དགེ་འདུན་ལ་ཁས་བླངས་ནས་ཁྱད་དུ་གསོད་ན་ངེས་པར་འཛིན་དུ་གཞུག་པའི་ཕྱིར་ངེས་པར་སྦྱོར་བ་སྦྱིན་ནོ་ཞེས་བྱ་བ་ནི་གང་ཞིག་དགེ་འདུན་ལ་ལྟུང་བ་ཁས་བླངས་ནས་ཡང་ཁྱད་དུ་གསོད་པར་བྱེད་ན་དེ་ངེས་པར་ལྟུང་བ་དེ་འཛིན་དུ་གཞུག་པའི་ཕྱིར་ངེས་པར་སྦྱོར་བ་སྦྱིན་པར་བྱ་སྟེ་འཛིན་དུ་གཞུག་གོ་ཞེས་བྱ་བའི་དོན་ཏོ། །མངོན་སུམ་དུ་དགེ་འདུན་མཐུན་པ་ལ་དེ་རང་གིས་ཁས་བླངས་པའི་དེ་གང་གིས་རང་བཞིན་ཉམས་པ་ལ་ཞུགས་པ་སྐྱེས་པ་ཞེས་བྱ་བ་དེའི་ངོ་བོ་ཚོལ་བ་ཉིད་ལས་རྒྱུ་རིག་པར་བྱའོ། །ཅིའི་ཕྱིར། འདིའི་མིང་དེའི་ངོ་བོ་ཉིད་ཚོལ་བ་དང་མཐུན་པ་ཞེས་བྱ་ཞེ་ན། དེའི་ཕྱིར། དེ་ནི་དེའི་ངོ་བོ་ཉིད་ཚོལ་བ་ལ་ཕན་པ་ཡིན་པའི་ཕྱིར་དེའི་ངོ་བོ་ཉིད་ཚོལ་བ་དང་མཐུན་པ་ཉིད་དོ་ཞེས་བྱ་བ་སྨོས་ཏེ། ཚོལ་བར་བྱེད་པས་ན་ཚོལ་བའོ། །ལྟུང་བ་དེས་དེའི་ངོ་བོ་ཉིད་ཚོལ་བ་ནི་དེའི་ངོ་བོ་ཉིད་ཚོལ་བའོ། །དེ་ལ་ཕན་པ་ཉིད་ནི་རྗེས་སུ་མཐུན་པ་ཉིད་ཀྱི་ཕྱིར་དེའི་ངོ་བོ་ཉིད་ཚོལ་བ་ཉིད་དོ། །དེ་ནི་བསླབ་པ་བྱིན་པ་དང་ཡོངས་སུ་གནས་པ་དང་མགུ་བ་སྦྱིན་ པ་ལ་སོགས ་པས་ས་གཞན་ན་གནས་པ་ཁས་བླངས་པའི་ཚུལ་ཡང་ཡིན་པར་བལྟ་བར་བྱ་སྟེ། གང་གི་ཕྱིར་འདི་བླངས་པས་དེའི་ངོ་བོ་ཉིད་ཚོལ་བར་བྱེད་པ། ལྟུང་བ་དེའི་ངོ་བོ་ཉིད་ཡོངས་སུ་ཤེས་ན་དགེ་འདུན་གྱིས་དེ་ལ་བཟོད་པར་བྱས་ཤིང་དེའི་འོག་ཏུ་རང་བཞིན་དུ་གནས་པ་ཉིད་དུ་འགྱུར་བ་ཡིན་ནོ། །ཁ་ཅིག་གིས་འདི་ནན་ཏུར་གྱི་ཚུལ་དུ་བསྟན་ཏོ་ཞེས་བྱ་བ་
ནི་ཇི་ལྟར་བསྡིགས་ པ་ལ་སོགས ་པའི་ནན་ཏུར་གྱི་ལས་མི་འདོད་བཞིན་དུ་དགེ་འདུན་གྱིས་བྱེད་པ་དེ་བཞིན་དུ་འདི་ཡང་དགེ་འདུན་གྱིས་སྦྱིན་པ་ཡིན་པས། ཁ་ཅིག་གིས་ནན་ཏུར་གྱི་ལས་ཀྱི་ངོ་བོ་འདི་སྟོན་ཅིང་འདོད་ པ་ལ་སོགས ་པའི་ངོ་བོས་ནི་མ་ཡིན་ནོ་ཞེས་ཟེར་ཏེ། དགེ་འདུན་ཐམས་ཅད་འདུག་ཅིང་མཐུན་པར་གྲུབ་པའི་འོག་ཏུ་དགེ་སློང་གཅིག་གིས་གསོལ་བ་བྱས་ཏེ་ལས་བྱ་བ། དགེ་འདུན་བཙུན་པ་རྣམས་དགོངས་སུ་གསོལ། དགེ་སློང་ཤི་རི་ཀ་འདི་དགེ་འདུན་གྱི་དབུས་སུ་ཞེས་བྱ་བ་ལ་ སོགས་པ ་གསུངས་པ་ཡིན་གྱི། དགེ་སློང་ཤི་རི་ཀ་ཉིད་ཀྱིས་རྒན་པའི་མཐར་འདུག་སྟེ། དགེ་འདུན་བཙུན་པ་རྣམས་གསན་དུ་གསོལ། བདག་དགེ་སློང་ཤི་རི་ཀ་དགེ་འདུན་གྱི་དབུས་སུ་ཞེས་བྱ་བ་ནས། ཐུགས་བརྩེ་བའི་སླད་དུ་བདག་ལ་དེའི་ངོ་བོ་ཉིད་ཚོལ་བ་དང་མཐུན་པ་སྩལ་དུ་གསོལ་ཞེས་དེ་ལྟར་ལན་གཉིས་ལན་གསུམ་དུ་ཡང་གསོལ་བ་བྱའོ་ཞེས་བྱ་བའི་འོག་ཏུ་དེ་དག་བྱས་ནས་སོ། །སྔགས་འདི་ལས་སྔར་ཁྱད་དུ་གསོད་ན་ཞེས་བྱ་བ་ནས། གལ་ཏེ་དེའི་འོག་ཏུ་དགེ་འདུན་ལ་གནང་བ་ཐོབ་པ་ཞེས་བྱ་བ་དགེ་སློང་ཤི་རི་ཀ་འདི་དགེ་འདུན་ལས་དེའི་ངོ་བོ་ཉིད་ཚོལ་བ་དང་མཐུན་པ་སྩལ་དུ་གསོལ་ཞེས་བྱ་བ་གསུངས་པའི་ཕྱིར་རོ་ཞེས་ཟེར་རོ། །དེ་ནི་མི་བཟང་སྟེ་མདོ་སྡེ་དང་འགལ་བའི་ཕྱིར་རོ་ཞེས་བྱ་བ་ནི་མདོ་སྡེ་ལས་ཀུན་དགའ་བོ་འདི་ནི་དགེ་སློང་གི་དགེ་འདུན་གྱི་དབུས་སུ་ལྟུང་བ་ཁྱད་དུ་གསོད་པར་བྱེད་ཅིང༌། ཅི་ཁྱད་དུ་བསད་ནས་ཁས་ལེན་པར་བྱེད་པ་དེ་ནི་དགེ་སློང་རྣམས་ཀྱིས་འདི་སྐད་ཅེས་བརྗོད་པར་བྱ་སྟེ། ཚེ་དང་ལྡན་པ་ཁྱོད་དགེ་འདུན་གྱི་དབུས་སུ་ལྟུང་བ་ཁྱད་དུ་གསོད་པར་བྱེད་ཅིང༌། ཁྱད་དུ་བསད་ནས་ཁས་ལེན་པར་བྱེད་ལ། ཁས་བླངས་ནས་ཡང་ཁྱད་དུ་གསོད་པར་བྱེད་པ་གང་ཡིན་པ་དེ་ནི་ཁྱོད་ཀྱིས་མ་རྙེད་དེ་རྙེད་པ་མ་ཡིན་ནོ། །ཉེས་པ་རྙེད་ཀྱིས་ལེགས་པ་རྙེད་པ་མ་ཡིན་གྱི་ཚེ་དང་ལྡན་པ་ཁྱོད་དགེ་འདུན་གྱི་གན་དུ་སོང་ལ་དེའི་ངོ་བོ་ཉིད་ཚོལ་བ་དང་མཐུན་པ་ལེགས་པར་ཚོལ་ཅིག །དེས་དགེ་འདུན་གྱི་གན་དུ་སོང་སྟེ། དེའི་ངོ་བོ་ཉིད་ཚོ་བ་དང་མཐུན་པ་གསོལ་བར་བྱའོ། །དགེ་འདུན་གྱིས་ཀྱང་ཆོས་དང་འདུལ་བས་དེ་ལ་དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་
པར་བྱའོ་ཞེས་གསུངས་པའི་མདོ་སྡེ་འདི་དང་འགལ་བས་ཁ་ཅིག་འདི་ནན་ཏུར་གྱི་ཚུལ་དུ་སྟོན་པ་དེ་ནི་མི་བཟང་སྟེ། འདི་ལྟར་གང་གསོལ་བ་བྱེད་པ་དེ་ནི་བདག་ཉིད་དག་པར་བྱེད་པའི་ཕྱིར་ཡིན་གྱི་ནན་ཏུར་གྱི་ལས་ནི་མ་ཡིན་ནོ། །ཉེ་བར་ཞི་བ་ཉིད་ཀྱི་སྡེ་ཚན་ལས་ལོགས་ཤིག་ཏུ་མཛད་པ་ནི་མི་བཞེད་དོ་ཞེས་བྱ་བ་ནི་གང་འདི་ནན་ཏུར་གྱི་ལས་ཀྱི་སྡེ་ཚན་ལས་ལོགས་ཤིག་ཏུ་མཛད་ཅིང་དེ་དག་གི་ནང་དུ་མ་གསུངས་སོ་ཞེ་ན་དེ་ནི་དེ་ལྟར་མི་རུང་སྟེ། འདི་ལྟར་དེ་ནན་ཏུར་གྱི་ལས་ཉིད་ཡིན་ན་ནན་ཏུར་གྱི་ལས་ཀྱི་སྡེ་ཚན་གྱི་ནང་དུ་གསུང་བར་འགྱུར་བར་རིགས་པ་ལས་དེ་མ་གསུངས་པའི་ཕྱིར་རོ། །ཉེ་བར་མ་ཞི་བ་ཉིད་ཡིན་པའི་ཕྱིར་ནི་ལོགས་ཤིག་ཏུ་བཞག་སྟེ། ནན་ཏུར་གྱི་ལས་ཀྱི་ནང་དུ་མ་བཞག་པས་དེའི་ཕྱིར་འདི་ནི་ནན་ཏུར་གྱི་ཚུལ་དུ་བསྟན་པ་མ་ཡིན་ནོ། །དེ་ལ་ཡང་འདིར་མེད་པ་རུང་བ་ཡིན་ཏེ། ཉེ་བར་ཞི་བ་ཉིད་ཀྱིས་ནན་ཏུར་གྱི་ལས་ལས་དེའི་ནང་ནས་ཐ་དད་པར་བྱེད་པ་མི་རིགས་པའི་ཕྱིར་རོ། །འདི་ལྟར་མི་བཞེད་པ་དེ་གང་ལས་ཤེས་ཤེ་ན། དེའི་ཕྱིར། བསྡིགས་པ་ལ་ སོགས་པ ་ནི་དེ་ཉིད་ཡིན་པས་རྣམ་པར་མ་བཞག་པའི་ཕྱིར་ཞེས་བྱ་བ་སྨོས་ཏེ། བསྡིགས་ པ་ལ་སོགས ་པའི་ནི་འཐབ་མོ་ལ་ སོགས་པ ་ཉེ་བར་གྱུར་པ་ཉིད་ཀྱི་ཕྱིར་ཉེ་བར་ཞིག་བ་ཉིད་ཡོད་མོད་ཀྱི་དེ་དག་ནི་དེ་ཉིད་ཀྱིས་ནན་ཏུར་གྱི་ལས་ཀྱི་སྡེ་ཚན་དག་ལས་ལོགས་ཤིག་ཏུ་རྣམ་པར་མ་བཞག་པའི་ཕྱིར་ཏེ། དེས་ན་ཉེ་བར་ཞི་བ་ཉིད་ཀྱིས་ནན་ཏུར་གྱི་ལས་ཀྱི་སྡེ་ཚན་ལས་ལོགས་ཤིག་ཏུ་མཛད་པར་མི་བཞེད་དོ། །དེ་ཤེས་བཞིན་དུ་ཁྱད་དུ་གསོད་དོ་སྙམ་ན། ཡོད་བཞིན་དུ་མ་མཐོང་བ་ཉིད་ཀྱིས་ཤེས་པ་སྐྱེས་བ་ཉིད་ཀྱི་ཕྱིར་རོ་ཞེས་བྱ་བ་ནི་དེ་ཤེས་བཞིན་དུ་ཁྱད་དུ་གསོད་དོ་སྙམ་ན་ཞེས་བྱ་བ་ཡོད་པར་གྱུར་པ་ལ་ནན་ཏུར་གྱི་ལས་ཉིད་ཀྱིས་འདི་བྱས་པ་ཉིད་དོ། །དེ་ཡོད་བཞིན་དུ་མ་མཐོང་ངོ་ཞེས་ཟེར་བ་དེ་ལྟ་བུའི་བློ་དགེ་སློང་རྣམས་ལ་སྐྱེ་བར་འགྱུར་བའི་ཕྱིར་རོ། །དེ་ལ་ལྟུང་བ་མ་མཐོང་བ་ལ་ནན་ཏུར་གྱི་ལས་བཅའ་བ་མཛད་ཟིན་པས་དེ་བས་ན་མ་མཐོང་བས་གནས་ནས་དབྱུང་བ་ཞེས་བྱ་བ་འདིའི་གནང་བའི་སྐབས་མེད་པ་ཉིད་དུ་འགྱུར་རོ། །དེ་ལྟར་བས་ན་ཁ་ཅིག་དེའི་ངོ་བོ་ཉིད་ཚོལ་བ་དང་མཐུན་པ་དེ་
ནན་ཏུར་གྱི་ལས་ཀྱི་ཚུལ་དུ་སྟོན་པ་དེ་མི་བཟང་ངོ༌། །ཉེ་བར་ཞི་བར་བྱ་བའི་ཕྱིར་འབད་པ་མི་སྐྱེད་པར་མི་བྱའོ་ཞེས་བྱ་བ་ནི་དགེ་འདུན་དུ་གྱུར་པའི་དགེ་སློང་དག་གིས་དགེ་སློང་དག་བྱ་བའི་ཕྱིར་རྩོད་པ་དགེ་འདུན་མཐུན་པས་ཉེ་བར་ཞི་བར་བྱའོ་ཞེས་གང་གསུངས་པ་དེ་མདོ་འདིར་བསྡུས་པ་ཡིན་ནོ། །མཐུན་པ་སྦྱིན་པར་མི་བྱེད་ན་དེའི་ཚེ་སྦྱིན་པ་ལས་འབད་པར་བྱ་བ་སྟེ། ཐམས་ཅད་དུ་རུང་བའི་ཕྱིར་སྤྱིར་མདོར་བྱས་པར་གནས་པ་ཡིན་ནོ། །རྩོད་པ་ཉེ་བར་ཞི་བར་བྱ་བའི་ཕྱིར་འབད་པ་འདི་ཞེས་བྱ་བ་དེ་ལྟར་འདི་གསུངས་སོ། །རྩོད་པ་ཐམས་ཅད་ལ་འདི་རུང་བ་ཉིད་ཅེས་བྱ་བ་ཐམས་ཅད་ཀྱི་དབང་དུ་བྱས་ནས་ཉེ་བར་ཞི་བར་སྦྱར་བའོ། །རྩོད་པའི་གཞིའོ།། །།ཞི་བ་ཐམས་ཅད་ནི་བྱ་བའི་ཕྱིར་རྩོད་པར་འཇུག་གོ་ཞེས་བྱ་བ་ནི་རྩོད་པ་ཞི་བར་བྱ་བ་བདུན་པོ་ཐམས་ཅད་ནི་བྱ་བའི་ཕྱིར་རྩོད་པར་འཇུག་གོ །གསོལ་བ་ལ་ སོགས་པའི་ལས་ལ་མཐུན་པ ་མི་སྦྱིན་པ་ནི་བྱ་བའི་ཕྱིར་རྩོད་པ་ཡིན་པས་སྤོང་བ་ཉིད་ལ་བརྟེན་ཏེ་མཐུན་པ་མི་སྦྱིན་པ་དང་བཅས་པ་ཉིད་ཀྱང་ངོ༌། །རྣམ་པར་ངེས་པར་བྱ་བ་སྤོང་བ་དང་ལྟུང་བ་དང་བཅས་པ་འདི་གཉིས་དང་ལྟ་བ་ངན་བ་ཉིད་ཀྱིས་ཀྱང་རྣམ་པར་ངེས་པར་བྱ་བ་ནི་རྒྱུའི་སྒོ་ནས་ཏེ། རྒྱུ་གང་གིས་རྩོད་པ་ཞི་བར་བྱ་བ་བདུན་པོ་དག་འཇུག་པར་འགྱུར་བའི་རྒྱུ་དེ་ནི་བྱ་བའི་ཕྱིར་རྩོད་པ་ལ་ཡོད་དེ་འདི་ལྟར་སྤོང་བ་ལ་ སོགས་པ ་ནི་མཐུན་པ་མི་སྦྱིན་པའི་རྒྱུ་ཡིན་པ་དེའི་ཕྱིར་རྩོད་པའི་མཐུན་པ་མི་སྦྱིན་པ་ཞེས་བྱ་བ་གང་ཡིན་པ་དེའི་སྒོ་ནས་འདིར་ཞི་བར་བྱ་བ་ཐམས་ཅད་དུ་འཇུག་གོ །གསོལ་བ་ལ་ སོགས་པའི་ལས་ལ་མཐུན་པ ་མི་སྦྱིན་པ་ནི་བྱ་བའི་ཕྱིར་རྩོད་པ་ཡིན་པས་དེ་ལ་ཇི་ལྟར་སྤོང་བ་ཉིད་ལ་བརྟེན་ཏེ་མཐུན་པ་མི་སྦྱིན་པ་དེ་བཞིན་དུ་མི་གདམས་པའི་ཕྱིར་རྩོད་པ་ཞི་བར་བྱ་བའི་དྲན་པ་དང་མ་སྨྱོས་པས་འདུལ་བ་གཉིས་ཀྱང་འདིར་འཇུག་གོ །ཇི་ལྟར་ལྟུང་བ་དང་བཅས་པ་ཉིད་ཀྱིས་དེ་བཞིན་དུ་ལྟུང་བའི་ཕྱིར་རྩོད་པ་ཞི་བར་བྱེད་པ་ཁས་བླངས་པའི་བྱ་བ་དང༌། མངོན་སུམ་གྱིས་འདུལ་བ་དག་དང༌། རྩྭ་བཀྲམ་པ་ལྟ་བུ་དག་ཀྱང་འཇུག་གོ །ཁས་ལེན་ཅིང་ཁྱད་དུ་གསོད་པ་ལ་དེའི་ངོ་བོ་ཉིད་ཚོལ་བ་དང་མཐུན་པ་ཡང་ངོ༌། །ཇི་ལྟར་རྣམ་པར་ངེས་པར་བྱ་བ་སྤོང་བ་དང་ལྟུང་བ་དང་བཅས་པ་འདི་གཉིས་ཀྱི་མཐུན་པ་
མི་སྦྱིན་པ་དེ་བཞིན་དུ་འགྱེད་པའི་ཕྱིར་རྩོད་པ་ཉེ་བར་ཞི་བར་བྱེད་པའི་གང་མང་བ་བསྩལ་བ་དན་མངོན་སུམ་གྱིས་འགལ་བ་ཡང་འདིར་འཇུག་གོ །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་རྩོད་པ་བཞི་པོ་གང་དག་གསུངས་པ་དང་རྩོད་པ་ཞི་བ་བདུན་པོ་གང་དག་གསུངས་པ་དེ་དག་ལ་བཙུན་པ་དགེ་སློང་གིས་རྩོད་པ་བཞི་པོ་དག་རྩོད་པ་ཞི་བར་བགྱིད་པ་བདུན་པོ་གང་ཡང་རུང་བས་ཉེ་བར་ཞི་བར་བགྱིད་པ་དང་ཉེ་བར་ཞི་བར་བྱར་རུང་ངམ། ཉེ་བ་འཁོར་ཞི་བར་བྱ་བའི་ཕྱིར་རྩོད་པ་མ་གཏོགས་པ་མི་རུང་ངོ་ཞེས་གསུངས་པ་ཡིན་ནོ། །ཁ་སྐོང་བར་འོས་པ་མ་ཡིན་པ་ནི་དགེ་འདུན་གྱི་ཐ་སྙད་ལ་ཚོགས་པར་དབྱུང་བ་ཉིད་མ་ཡིན་ནོ་ཞེས་བྱ་བ་ནི་བསྙེན་པར་མ་རྫོགས་པ་དང༌། ཉམས་པ་ལ་ སོགས་པ ་གང་དགེ་འདུན་གྱི་ཁ་སྐོང་བར་འོས་པ་མ་ཡིན་པ་དེ་ནི་གཟུ་བོ་ལ་ སོགས་པ ་དགེ་འདུན་གྱི་ཐ་སྙད་ལ་ཡང་ཚོགས་པར་དབྱུང་བ་ཉིད་མ་ཡིན་པའོ་ཞེས་བྱ་བའི་དོན་ཏོ། །གཞན་གྱི་དག་ལ་ནི་བསྙེན་པར་རྫོགས་པ་དང་བཅས་པ་རྣམས་ཀྱི་དབང་དུ་བྱའོ་ཞེས་བྱ་བ་ནི་བསྙེན་པར་མ་རྫོགས་པ་དགེ་འདུན་ལ་ སོགས་པ ་གཞན་གྱི་རྩོད་པ་དག་ལ་ནི་བསྙེན་པར་རྫོགས་པ་དང་བཅས་པ་རྣམས་ཀྱི་དབང་དུ་བྱ་སྟེ་དེ་དག་གི་དེ་ཉེ་བར་ཞི་བར་བྱའོ། །བུད་མེད་རྣམས་ཀྱི་ནི་སྐྱེས་པས་རིགས་པ་ཉིད་དོ་ཞེས་བྱ་བ་ནི་བུད་མེད་རྣམས་ཀྱི་རྩོད་པ་གང་ཡིན་པ་དེ་ནི་དེ་ཉིད་དུ་ཉེ་བར་ཞི་བར་བྱ་བའི་རིགས་པ་ཉིད་ཡིན་ནོ། །འདིར་གཞུང་ནི་དགེ་སློང་རྣམས་ཀྱི་རྩོད་པ་གང་ཡིན་པ་དེ་དག་དགེ་སློང་མ་རྣམས་ཀྱིས་སྤང་དུ་རུང་ངམ་ཉེ་བ་འཁོར་མི་རུང་སྟེ། དགེ་སློང་རྣམས་ཀྱི་རྩོད་པ་ནི་དགེ་སློང་རྣམས་ཀྱིས་ཉེ་བར་ཞི་བར་བྱའོ། །དེ་བཞིན་དུ་དགེ་སློང་མ་རྣམས་ཀྱི་རྩོད་པ་ཡང་དགེ་སློང་རྣམས་ཀྱིས་ཉེ་བར་ཞི་བར་བྱའོ། །དེ་བཞིན་དུ་དགེ་སློབ་མ་རྣམས་དང༌། དགེ་ཚུལ་དང་དགེ་ཚུལ་མ་རྣམས་ཀྱི་རྩོད་པ་ཡང་དགེ་སློང་རྣམས་ཀྱིས་ཉེ་བར་ཞི་བར་བྱའོ་ཞེས་གསུངས་པ་ཡིན་ནོ། །སྲོག་གམ་བསྙེན་པར་རྫོགས་པ་ལས་ཉམས་ན་ཉེ་བར་ཞི་བ་ཉིད་ཡིན་ནོ་ཞེས་བྱ་བ་ནི་སྲོག་ལས་ཉམས་སམ་བསྙེ་པར་རྫོགས་པ་ལས་ཉམས་ན་རྩོད་པ་ཉེ་བར་ཞི་བ་ཉིད་ཡིན་པའོ། །སྤང་བ་ཉིད་ནས་གཞན་གྱི་ཕྱོགས་ཉིད་ཀྱི་བར་དུ་གྱུར་ན་ཡང་ངོ་ཞེས་བྱ་བ་ནི་
འདིར་བར་དུའི་སྒྲ་བྲི་བར་བྱའོ། །སྤང་བར་བྱ་བ་ཉིད་ནས་ཕྱོགས་ན་ཕྱོགས་མ་ཡིན་པ་ཐ་དད་པར་གནས་པའི་བར་དུ་གྱུར་ན་དེ་དག་ཐམས་ཅད་ལ་ཡང་ལྟུང་བ་དང་རྩོད་པ་ཉེ་བར་ཞི་བ་ཉིད་ཡིན་པའོ། །དགེ་འདུན་དུ་གྱུར་པ་དང་འབྲེལ་པ་དག་ལ་འཁྲུག་ལོང་གི་རྩོད་པ་དག་གིས་རྣམ་པར་གཞག་པའི་ལྟུང་བ་ཉིད་ནི་དགེ་འདུན་དུ་གྱུར་པ་གསལ་བ་ཉིད་དོ། །གཞན་དུ་སོང་ངན་ནད་ཀྱི་རྣམ་པས་ཡུན་རིང་པོར་བཏབ་ན་ཡང་ངོ་ཞེས་བྱ་བ་ཡང་རྩོད་པ་ཉེ་བར་ཞི་བ་ཉིད་ཡིན་པའོ། །གང་ཞིག་སྲོག་ལས་འདས་པ་ནས་ན་ནད་ཀྱི་རྣམ་པས་ཡུན་རིང་པོར་བཏབ་པའི་བར་དུ་གྱུར་ན་རྩོད་པ་ཉེ་བར་ཞི་བ་ཉིད་ཡིན་ནོ། །དེའི་ཕྱིར། དོན་སྦྱིན་པར་བྱེད་པའམ་མངོན་པར་བརྩོན་པའོ་ཞེས་བྱ་བ་སྨོས་ཏེ་དོན་སྦྱིན་པར་བྱེད་པ་ནི་གླེང་བའོ། །འདིར་ཉམས་ པ་ལ་སོགས ་པའི་གཞུང་ནི་བཙུན་པ་རྩོད་པ་བཞི་པོ་དག་ལས་རྩོད་པ་གང་ཡང་རུང་བ་བྱུང་བ་རྩོད་པ་ཞི་བར་བགྱིད་པའི་ཆོས་བདུན་པོ་དག་ལས་གང་ཡང་རུང་བར་ཉེ་བར་ཞི་བར་མི་འགྱིད་ཅིང༌། ཉེ་བར་ཞི་བར་ཡང་བརྗོད་པར་བགྱི་བ་མཆིས་སམ། ཡོད་དེ་སྦྱིན་པར་བྱེད་པའི་དགེ་སློང་དུས་བྱེད་དམ་བྱིན་པའི་དགེ་སློང་དུས་བྱེད་དམ་དགེ་སློང་སྦྱིན་པར་བྱེད་པའི་དགེ་སློང་བྱིན་པ་ཉིད་དུ་དམ་འཆའ་འམ། །དགེ་ཚུལ་ཉིད་དམ་དགེ་སློང་མ་སུན་ཕྱུང་བ་ཉིད་དམ། རྐུ་ཐབས་སུ་གནས་པ་ཉིད་དམ་མ་ནིང་ཉིད་དམ། མུ་སྟེགས་ཅན་ཞུགས་པ་ཉིད་དམ་མ་བསད་པ་ཉིད་དམ། ཕ་བསད་པ་ཉིད་དམ། དགྲ་བཅོམ་པ་བསད་པ་ཉི་དམ། དགེ་འདུན་གྱི་དབྱེན་བྱས་པ་ཉིད་དམ། དེ་བཞིན་གཤེགས་པ་ལ་ནང་སེམས་ཀྱིས་ཁྲག་ཕྱུང་བ་ཉིད་དམ། གནས་པར་མི་བྱ་བ་ཉིད་དམ། ཐ་དད་དུ་གནས་པ་ཉིད་དུ་དམ་འཆར་བར་བྱེད་དམ། དེ་བཞིན་དུ་བྱིན་པའི་དགེ་སློང་དེ་དག་ཏུ་དམ་འཆའ་བར་བྱེད་དམ། སྦྱིན་པར་བྱེད་པའི་དགེ་སློང་ནད་ཀྱི་རྣམ་པས་ཡུན་རིང་དུ་ཐེབས་སམ་གཞན་དུ་སོང་ངམ། དེ་བཞིན་དུ་བྱིན་པའི་དགེ་སློང་དེ་ལྟར་གྱུར་ན་རྩོད་པ་དེ་ཉེ་བར་ཞི་བར་བརྗོད་པར་བྱའོ་ཞེས་གསུངས་པ་ཡིན་ནོ། །རྩོད་པའི་གཞི་ཞུ་བའི་སྐབས་སོ། །རྩོད་པའི་གཞི་རྫོགས་སོ།། །།སོ་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ་
ཞེས་བྱ་བ་ནི་སོ་སོར་ཐར་པའི་སྡོམ་པས་མཆོག་ཏུ་གྱུར་པ་དགེ་སློང་གང་ཡིན་པ་དེ་ལ་རབ་ཏུ་བྱུང་པས་ཕྱག་བྱའོ། །དགེ་ཚུལ་གྱིས་དགེ་སློང་ལ་ཕྱག་བྱའོ། །དགེ་ཚུལ་མས་དགེ་སློབ་མ་ལ་ཕྱག་བྱའོ། །དགེ་སློབ་མས་དགེ་སློང་མ་ལ་ཕྱག་བྱའོ་ཞེས་བྱ་བ་དེ་ལ་དེ་བྱེད་པའོ། །མཉམ་ན་རྒན་པ་ལའོ་ཞེས་བྱ་བ་ནི་སོ་སོར་ཐར་པའི་སྡོམ་པས་མཉམ་པ་ཉིད་ན་སོ་སོར་ཐར་པའི་སྡོམ་པ་དེས་རྒན་པ་དེ་ལ་གཞོན་པས་ཕྱག་བྱའི་ན་ཚོད་ཀྱིས་ནི་མ་ཡིན་ནོ། །བསྙེན་པར་རྫོགས་པའི་སྡོམ་པ་སྔར་བླངས་པ་ལ་ཕྱིས་བླངས་པས་ཕྱག་བྱའོ་ཞེས་བྱ་བའི་དོན་ཏོ། །དང་བོར་བསྙེན་པར་རྫོགས་ཟིན་པ་ལ་བསྙེན་པར་རྫོགས་པས་ཕྱག་བྱའོ། །དགེ་སློང་གིས་དགེ་སློང་ལ་ཕྱག་བྱའོ། །དགེ་སློང་མས་དགེ་སློང་མ་ལ་ཕྱག་བྱའོ། །དང་པོར་དགེ་སློང་མའི་སྡོམ་པ་དང་ལྡན་ཟིན་པ་ལ་དགེ་སློང་མས་ཕྱག་བྱའོ། །དང་པོར་རབ་ཏུ་བྱུང་བའི་སྡོམ་པ་དང་ལྡན་ཟིན་པ་ལ་དགེ་སློང་མས་ཕྱག་བྱའོ། །དང་པོར་རབ་ཏུ་བྱུང་བའི་སྡོམ་པ་དང་ལྡན་པར་གྱུར་ཟིན་པའི་དགེ་སློང་ལ་དགེ་སློང་ལ་དགེ་ཚུལ་གྱིས་ཕྱག་བྱའོ། །དགེ་ཚུལ་མས་ཀྱང་དགེ་ཚུལ་མ་ལ་ཕྱག་བྱའོ་ཞེས་གསུངས་པ་དེ་བས་ན་དེ་ལ་དེ་བྱེད་པའོ། །མདོ་སྔ་མས་ནི་ས་སོར་ཐར་པའི་སྡོམ་པས་མཆོག་ལ་རབ་ཏུ་བྱུང་བས་ཕྱག་བྱའོ་ཞེས་བསྟན་པ་ལ་དགེ་ཚུལ་ཕས་དགེ་སློང་མ་དང་དགེ་སློང་མ་ལ་ཕྱག་བྱ་བར་ཐལ་བར་འགྱུར་བ་དང༌། མདོ་འདིས་ནི་མཉམ་ན་རྒན་པ་ལའོ་ཞེས་བྱ་སྟན་པས་དགེ་སློང་དང་དགེ་སློང་མ་ཡང་སོ་སོར་ཐར་པའི་སྡོམ་པས་མཉམ་པ་ཡིན་པས། དགེ་སློང་མ་ལ་དགེ་སློང་གིས་ཕྱག་བྱ་བར་ཐལ་བར་འགྱུར་བ་དང༌། དགེ་ཚུལ་དང་དགེ་ཚུལ་མ་ཡང་སོ་སོར་ཐར་བའི་སྡོམ་པས་མཉམ་པ་ཡིན་པས་དགེ་ཚུལ་མ་རྒན་པ་ལ་དགེ་ཚུལ་གྱིས་ཕྱག་བྱ་བར་ཐལ་བར་འགྱུར་བས་དེ་བསལ་བའི་ཕྱིར་མདོ་དེ་གཉིས་ཀྱི་བྱེ་བྲག་བསྟན་པར་བྱ་སྟེ། དེའི་ཕྱིར། མཚན་ཐ་མི་དད་པ་ལའོ་ཞེས་བྱ་བ་སྨོས་ཏེ། མཚན་མཐུན་པ་དག་ལ་ཆོ་ག་འདི་ཡིན་གྱི་མཚན་མི་མཐུན་པ་དག་གི་ནི་མ་ཡིན་ནོ། །ཇི་ལྟར་སྐྱེས་པས་བུད་མེད་ལ་ཕྱག་མི་བྱ་བ་དེ་བཞིན་དུ་བུད་མེད་ཀྱིས་ཀྱང་སྐྱེས་པ་ལ་ཕྱག་མི་བྱ་བར་ཐར་བར་འགྱུར་བ་དེ་དམིགས་ཀྱིས་བསལ་བའི་ཕྱིར།
སྐྱེས་པ་མི་དམན་པ་ལ་བུད་མེད་ཀྱིས་སོ་ཞེས་བྱ་བ་སྨོས་ཏེ། གང་ཞིག་སོ་སོར་ཐར་པའི་སྡོམ་པས་བུད་མེད་པས་མི་དམན་ན་གསར་བུ་ལ་ཡང་བུད་མེད་ཀྱིས་ཕྱག་བྱ་ན་དུས་མཉམ་པ་འམ་རྒན་པ་ལ་ལྟ་སྨོས་ཀྱང་ཅི་དགོས་ཞེས་བྱ་བའི་དོན་ཏོ། །ཆོ་ག་དེ་དག་ཐམས་ཅད་ཀྱི་དམིགས་ཀྱིས་བསལ་བའི་ཕྱིར། ས་གཞན་ན་གནས་པ་དང་ཉམས་པ་དང་དགེ་སློང་མ་སུན་ཕྱུང་བ་དང༌། ཆོས་མ་ཡིན་པའི་ཕྱོགས་དང་མཐུན་པ་དང༌། ཐ་དད་པར་གནས་པ་དང༌། ཐ་དད་པར་གནས་པ་དང༌། ཉལ་བ་དང་སྙོམས་པར་ཞུགས་པ་དང་བྲེལ་བ་དང་སེམས་གཞན་དུ་སོང་བ་དང་རྒྱབ་ཀྱིས་ཕྱོགས་པ་དང་ཁྱིམ་གཞན་ན་འདུག་པ་དང་ཟས་ཀྱི་གྲལ་ན་འདུག་པ་མ་གཏོགས་སོ་ཞེས་བྱ་བ་སྨོས་ཏེ། ས་གཞན་ན་གནས་པ་ཞེས་བྱ་བ་ནི་ཡོངས་སུ་གནས་པ་ལ་ སོགས་པ ་བསླབ་པ་བྱིན་པ་དང༌། དེའི་ངོ་བོ་ཉིད་ཚོལ་བ་དང་མཐུན་པ་སྦྱིན་ པ་ལ་སོགས ་པའོ། །ཉམས་པ་ཞེས་བྱ་བ་ནི་གནས་པར་མི་བྱ་བའོ། །དགེ་སློང་མ་སུན་ཕྱུང་བ་དང་མཚམས་མེད་པ་བྱས་པ་ཞེས་བྱ་བ་ནི། མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང༌། ཟ་མ་དང༌། མ་ནིང་དང་ཞེས་བྱ་བ་ལ་ སོགས་པ ་སྡོམ་པའི་ཞིང་མ་ཡིན་པར་གྱུར་བ་དག་བསྡུས་སོ། །ཆོས་མ་ཡིན་པའི་ཕྱོགས་དང་མཐུན་པ་ཞེས་བྱ་བ་སྨོས་པས་ནི་ཐ་དད་པས་གནས་པའི་བྱེ་བྲག་གོ །ཆོས་མ་ཡིན་པའི་ཕྱོགས་དང་མཐུན་པའི་ཐ་དད་པ་གནས་པ་གང་ཡིན་པ་ཞེས་བྱ་བ་དེས་ནི་ཆོས་ཀྱི་ཕྱོགས་དང་མཐུན་པ་གནས་པའི་ཐ་དད་པ་ལ་ཕྱག་བྱ་བ་ཉིད་ཡིན་ནོ། །ཆོས་མ་ཡིན་པའི་ཕྱོགས་དང་མཐུན་པ་ཞེས་སྨོས་པས་ནི་རང་གི་ཕྱོགས་ཀྱིས་ཀྱང་ཕྱག་མི་བྱ་བར་ཐལ་བར་འགྱུར་བ་ཞེས་བྱ་བས་འདིར་ཐ་དད་པར་གནས་པར་བསྡུས་སོ། །ཉལ་བ་ཞེས་བྱ་བ་ནི་གློས་ཕབ་སྟེ་ཉལ་བའོ། །སྙོམས་པར་ཞུགས་པ་ཞེས་བྱ་བ་ནི་ཏིང་ངེ་འཛིན་ལའོ། །བྲེལ་བ་ཞེས་བྱ་བ་ནི་བྱ་བ་རྗེས་སུ་བསྒྲུབ་པ་ལ་སེམས་གཞོལ་བའོ། །སེམས་གཞན་དུ་སོང་ཞེས་བྱ་བ་ནི་ཕྱག་འཚལ་བ་ལ་སེམས་གཏོད་པ་མི་སྦྱིན་པའོ། །རྒྱབ་ཀྱིས་ཕྱོགས་པ་ཞེས་བྱ་བ་ནི་མདུན་ཕར་པ་ལྟས་པའོ། །ཁྱིམ་གཞན་ན་
འདུག་པ་ཞེས་བྱ་བའི་སྒྲ་ལས་ཁྱིམ་གྱི་ནང་ན་འདུག་པ་ཞེས་བྱ་བ་དང་སྦྱར་ཏེ་ཁྱིམ་པའི་ཁྱིམ་ན་འདུག་པ་ཞེས་བྱ་བའི་དོན་ཏོ། །ཁྱིམ་པས་རབ་ཏུ་བྱུང་བ་ལའོ་ཞེས་བྱ་བ་ནི་མ་གཏོགས་པའི་ཇི་སྐད་བསྟན་པ་དེ་དག་ལས་གཞན་པ་ཐམས་ཅད་ལ་ཕྱག་བྱའོ། །ཁྱིམ་གཞན་ན་འདུག་པ་ལ་ཡང་མ་གཏོགས་པར་མི་རིགས་ཏེ། ཁྱིམ་གཞན་ནི་ཁྱིམ་པ་རྣམས་ཀྱི་སྤྱོད་ཡུལ་ཡིན་པའི་ཕྱིར་རོ། །དེ་ལྟར་ཡང་འདིར་གཞུང་ནི་ཁྱིམ་བདག་གི་ཆུང་མ་བདེ་ཆེན་མ་དད་པ་སྐྱེས་པ་གནས་ནས་ཕྱིར་བྱུང་སྟེ། བཅོམ་ལྡན་འདས་ཀྱི་ཞབས་ལ་ཕྱག་བྱས་སོ་ཞེས་གྲགས་པ་ཡིན་ནོ། །ཆུས་བཏབ་པས་སྲོག་ཕྱིར་བཟློག་པའི་ཕྱིར་ཚེ་དང་ལྡན་པ་ལམ་ཕྲན་གྱི་ཞབས་ལ་ཕྱག་བྱས་ནས་བཟོད་པ་གསོལ་བ་ཞེས་ཐོས་པ་ཡིན་ནོ། །མ་གཏོགས་པ་གཞན་ཐམས་ཅད་ལ་ནི་ཁྱིམ་པས་ཀྱང་ཕྱག་མི་བྱ་བར་རིགས་ཏེ། འདི་ལྟར་ཡོངས་སུ་གནས་པ་ལ་ སོགས་པ ་དག་ལ་ཡང་དེ་དང་མི་འབྱུང་བ་ཉིད་ལ་ སོགས་པ ་སྨོས་ཏེ། ཁྱིམ་པ་དག་གིས་ཀྱང་ཕྱག་བྱ་བར་མི་རིགས་ཏེ། ནན་ཏུར་བྱས་པ་དག་ཀྱང་སྤངས་པ་ཡིན་པའི་ཕྱིར་རོ། །དེ་ལ་ཁྱིམ་པའི་སྙོམས་པར་ཞུགས་པ་སྤང་བ་ནི་འདི་ཡིན་ཏེ། གང་ཞིག་ལྷ་ལ་མཆོད་པའི་རྣམ་པ་ནི་མ་ཡིན་པ་ནི་འདི་ལྟ་སྟེ། མེའི་ཁང་ པ་ལ་སོགས ་པར་སྙོམས་པར་ཞུགས་པ་ཁ་ཅིག་རྣམས་ལ་ནི་ཁ་ཅིག་ཏུ་ལྷ་རྣམས་ཀྱིས་ཕྱག་འཚལ་བ་ཁོ་ན་ཡིན་ནོ། །འདིར་དེ་དག་གི་གཞུང་ནི་སངས་རྒྱས་བཅོམ་ལྡན་འདས་ལ་ཚེ་དང་ལྡན་པ་ཉེ་བ་འཁོར་གྱིས་ཞུས་པ། བཙུན་པ་ཕྱག་མི་བྱ་བ་དུ་མཆིས་ཉེ་བ་འཁོར་སུམ་ཅུ་རྩ་གཉིས་ཏེ། བསྡིགས་པའི་ལས་བྱས་པ་དང༌། སྨད་པའི་ལས་བྱས་པ་དང༌། བསྐྲད་པའི་ལས་བྱས་པ་དང༌། ཕྱིར་འགྱེད་པའི་ལས་བྱས་པ་དང༌། མ་མཐོང་བས་གནས་ནས་ཕྱུང་བ་དང༌། ཕྱིར་མ་འཆོས་པས་གནས་ནས་ཕྱུང་བ་དང། སྡིག་པ་ཅན་གྱི་ལྟ་བའི་རྣམ་པ་མི་གཏོང་བས་གནས་ནས་ཕྱུང་བ་དང༌། ཡོངས་སུ་གནས་པར་བྱེད་པ་དང༌། མ་གུ་བ་སྤྱོད་པ་དང་གཞི་ནས་མ་གུ་བ་སྤྱོད་པ་དང༌། བསླབ་པ་བྱིན་པ་དང༌། ཟ་མ་དང་མ་ནིང་དང་དགེ་སློང་མ་སུན་ཕྱུང་བ་དང༌། རྐུ་ཐབས་སུ་གནས་པ་དང་གནས་
པར་མི་བྱ་བ་དང༌། མ་བསད་པ་དང༌། ཕ་བསད་པ་དང༌། དགྲ་བཅོམ་པ་བསད་པ་དང༌། དགེ་འདུན་གྱི་དབྱེན་བྱས་པ་དང་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། གཅེར་བུ་དང་ཆོས་གོས་གཅིག་པ་དང་ཉལ་བ་དང༌། སྙོམས་པར་ཞུགས་པ་དང༌། སྙོམས་པར་ཞུགས་པ་དང༌། རྒྱབ་ཀྱིས་ཕྱོགས་པ་དང༌། སོ་ཤིང་ཟ་བ་དང༌། བཤང་བ་བྱེད་པ་དང༌། གཅི་བ་བྱེད་པ་དང༌། ཁྱིམ་གཞན་ན་འདུག་པའོ། །བཙུན་པ་ཕྱག་བགྱི་བ་དུ་མཆིས། ཉ་བ་འཁོར་ལྔ་སྟེ། ཁྱིམ་པས་རབ་ཏུ་བྱུང་བ་ལ་དང༌། བསྙེན་པར་མ་རྫོགས་པས་བསྙེན་པར་རྫོགས་པ་ལ་དང༌། གཞོན་པས་རྒན་པ་ལ་དང༌། དགེ་སློང་མ་བསྙེན་པར་རྫོགས་ནས་ལོ་བརྒྱ་ལོན་པས་དེ་རིང་བསྙེན་པར་རྫོགས་པའི་དགེ་སློང་ལ་དང༌། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་ལྷ་དང་བཅས་པའི་འཇིག་རྟེན་གྱིས་ཕྱག་བྱའོ་ཞེས་གསུངས་པ་ཡིན་ནོ། །འདིར་ཁ་ཅིག་ཏུ་བྲེལ་བ་དང་སེམས་གཞན་དུ་སོང་བ་དང་ཟས་ཀྱི་གྲལ་ན་འདུག་པ་དག་ནི་གཞུང་གཞན་ནས་བསྡུས་སོ། །ཐམས་ཅད་ཀྱིས་སངས་རྒྱས་ལའོ་ཞེས་བྱ་བ་ནི་ཁྱིམ་པ་ཡང་རུང་རབ་ཏུ་བྱུང་བ་ཡང་རུང་བུད་མེད་ཀྱང་རུང་སྐྱེས་པ་ཡང་རུང་རྒན་པ་ཡང་རུང་གཞོན་པ་ཡང་རུང་བ་ཐམས་ཅད་ཀྱིས་སངས་རྒྱས་བཅོམ་ལྡན་འདས་ལ་ཕྱག་བྱའོ། །གཙུག་ལག་ཁང་བྱའོ་ཞེས་བྱ་བ་ནི་དགེ་སློང་གིས་གཙུག་ལག་ཁང་བྱ་བ་ལ་མི་རུང་བ་མེད་པའོ། །དེ་ལྟར་ཡང་འདིར་གཞུང་ནི་འདི་ལྟ་སྟེ། དགེ་སློང་ཀུན་དགའ་ར་བ་དེ་ཉིད་དུ་ཕྱོགས་བཞིའི་དགེ་སློང་གི་དགེ་འདུན་གྱི་ཕྱིར་གཙུག་ལག་ཁང་ཁ་སྲོ་བེར་བྱེད་དོ་ཞེས་གསུངས་པ་ཡིན་ནོ། །ངོས་གཅིག་གི་དབུས་སུ་དྲི་གཙང་ཁང་བྱ་བ་ཉིད་དོ་ཞེས་བྱ་བ་ལ། འདིར་ངོས་ཞེས་བྱ་བ་ནི་ཕྱོགས་ཏེ། ཤར་ལ་སོགས་པའི་ཕྱོགས་གཅིག་གི་དབུས་སུ་དྲི་གཙང་ཁང་བྱ་བ་ཉིད་ཡིན་པའོ། །དེའི་མདུན་དུ་སྒོ་ཁང་ངོ་ཞེས་བྱ་བ་ནི་དྲི་གཙང་ཁར་དེའི་མདུན་གྱི་བྱང་གཏད་ཀྱི་ངོས་སུ་སྒོ་ཁང་བརྩིག་པར་བྱའོ། །གཙུག་ལག་ཁང་གི་དབྱིབས་ནི་གྲུ་བཞི་བཟང་བ་ཉིད་དེ་རྣམ་པ་གཞན་ཡང་བཀག་པ་ནི་མེད་པར་ཤེས་པར་བྱའོ། །ཁྱམས་གསུམ་པ་ཡང་ངོ་ཞེས་བྱ་བ་ནི་གྲུ་བཞི་པ་བཟང་ངོ་ཞེས་བྱ་བ་རྗེས་སུ་སྦྱར་ཏེ། གྲུ་བཞི་ལ་ངོས་
གསུམ་ལས་ཁྱམས་བཏགས་པ་བཟང་ངོ༌། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། ཁྱིམ་བདག་རྗེས་སུ་གནང་གིས་བྱེད་དུ་ཆུག་ཅིག །དེ་ཇི་ལྟ་བུར་བྱེད་དུ་གཞུག་པ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་གནས་ཁང་གསུམ་པ་བྱེད་དུ་འཇུག་ན། དབུས་སུ་དྲི་གཙང་ཁང་བྱེད་དུ་གཞུག་ཅིང་གཉིས་སུ་གནས་ཁང་གཉིས་སོ། །ཁྱམས་གསུམ་ལ་ནི་དི་བཞིན་དུ་གནས་ཁང་དགུ་དག་གོ །ཁྱམས་བཞི་ལ་ནི་དབུས་སུ་སྒོ་ཁང་གི་བྱང་གཏད་དུ་དྲི་གཙང་ཁང་ངོ༌། །སྒོ་ཁང་གི་ངོས་གཉིས་སུ་གནས་ཁང་གཉིས་སོ་ཞེས་གསུངས་པ་ཡིན་ནོ། །མནོད་པར་བྱའོ་ཞེས་བྱ་བ་ནི་གཙུག་ལག་ཁང་ཞེས་བྱ་བར་སྦྱར་ཏེ། འདིས་ནི་དོན་གྱིས་དེའི་ས་གཞི་ཉེན་ཀོར་དང་བཅས་པ་མནོད་པར་རིགས་པར་བྱའོ། །གཙུག་ལག་ཁང་དུ་གནས་པར་བྱའོ་ཞེས་བྱ་བ་ནི་བྱའོ་ཞེས་བྱ་བ་དང་མནོད་པར་བྱའོ་ཞེས་བྱ་བ་དེ་གཉིས་ཀྱིས་གནས་པར་བྱ་བ་མ་བསྡུས་ཏེ། དེ་གཉིས་ཀྱིས་གཞན་གྱི་དོན་དུ་བྱ་བ་དང༌། མནོད་པར་བྱ་བ་ཡང་སྲིད་པས་རྩོམ་པ་འདིའོ། །གཞན་དག་དགེ་འདུན་གྱི་གཞིར་དགེ་འདུན་གྱི་ཕྱིར་རམ་གང་ཟག་དགེ་སློང་གི་ཕྱིར་གནས་ཀྱི་གཞི་བྱེད་པ་རྗེས་སུ་གནང་བར་བྱའོ། །གལ་ཏེ་སྦྱིན་བདག་ཡོད་ན་དེས་རྗེས་སུ་གནང་བ་ནའོ་ཞེས་བྱ་བ་ནི་གལ་ཏེ་དགེ་འདུན་གྱི་གཞི་དེ་ལ་སྦྱིན་བདག་ཡོད་ན་དེས་རྗེས་སུ་གནང་ན་དགེ་འདུན་གྱི་ཕྱིར་རམ་གང་ཟག་གི་ཕྱིར། གནས་ཀྱི་གཞི་བྱེད་པ་རྗེས་སུ་གནད་བར་བྱའོ། །གྲོང་ཁྱེར་གྱི་ཕྱི་རོལ་ལ་ལམ་ནང་དུ་བསྟི་བའི་གནས་དག་རུང་ངོ་ཞེས་བྱ་བ་ནི་གང་དུ་དགེ་སློང་དག་བསོང་སྙོམས་པའི་དོན་དུ་འཇུག་པ་རྣམས་ཀྱི་ཚ་བ་དང༌། ངལ་བ་རྣམས་ལ་ སོགས་པ ་བསལ་བའི་ཕྱིར་བསྟི་བའི་གནས་མི་འོང་བའི་གནས་ཞེས་བྱ་བ་དེ་བྱེད་དུ་གཞུག་པར་རུང་ངོ༌། །འདིར་གཞུང་ནི་གལ་ཏེ་བཅོམ་ལྡན་འདས་ཀྱིས་རྗེས་སུ་གནང་ན་བདག་གྲོང་ཁྱེར་གྱི་སླང་རོལ་དུ་བསྟི་བའི་གནས་བགྱིད་དུ་སྩལ་ཏེ་ཞེས་བྱ་བ་ནས། ཁྱིམ་བདག་རྗེས་སུ་གནང་གིས་རྩིགས་ཤིག་ཅེས་བྱ་བའི་བར་དུ་གསུངས་པ་ཡིན་ནོ། །འདིར་གྲོང་ཁྱེར་གྱི་ཕྱི་རོལ་དུ་ཞེས་གསུངས་པ་ནི། བྱུང་བའི་དབང་གིས་སྨོས་པ་ཡིན་གྱི། གྲོང་ཁྱེར་གྱི་ནང་དུ་ཡང་
འགལ་བ་མེད་པས་འདིར་གཉིས་ཀ་མདོར་བསྡུས་སོ། །རང་གི་ཁྲོན་པ་བར་དུ་བཅད་པའི་ཕྱིར་རྩིག་གུ་བྱས་པས་ཀུན་དུ་ཆགས་པའི་ཤེས་པ་བསལ་བར་བྱའོ་ཞེས་བྱ་བ་ནི་བར་དུ་བཅད་པའི་ཕྱིར་རྩིག་གུ་བྱ་བ་གང་ཡིན་པ་དེ་བྱེད་པས་བུད་མེད་ཀྱི་ཚོགས་ལ་བལྟ་བར་བྱ་བ་གསལ་བར་བྱ་སྟེ། ཁྲོན་པ་གཞན་ལ་ཆོ་ག་འདི་བྱེད་པ་མ་ཡིན་ཏེ་དེ་བས་ན་རང་གི་ཁྲོན་པའི་ཚིག་གོ །དེར་བུད་མེད་ཆུ་ཆུར་འོངས་པ་མཐོང་བ་ན་ཀུན་དུ་ཆགས་པའི་རྐྱེན་ཡིན་ཏེ། རྩིག་པས་བར་དུ་ཆོད་པ་མེད་པ་ཉིད་ལ་ནི་མཐོང་བ་མེད་པ་ཉིད་ཀྱི་ཕྱིར་ཆགས་པ་སྐྱེ་བའི་རྐྱེན་དུ་མི་འགྱུར་ཏེ། དེ་ལྟ་བས་ན་དེའི་དེ་ཉིད་མེད་པ་ཉིད་དོ། །སྙིམ་པ་བཀང་ཞིང་བླུད་པས་བུད་མེད་རྗེས་སུ་གཟུང་བར་བྱ་ཞིང་ཆུ་རྒྱུན་མ་ཆད་པས་བླུགས་པར་མི་བྱའོ་ཞེས་བྱ་བ་ནི་བུད་མེད་ཀྱིས་ཆུ་སྙིམ་པ་གང་འཐུངས་ཟིན་ནས་སྙིམ་པ་གཉིས་པ་དགང་ཞིང་བླུད་པར་བྱའི། སྙིམ་པ་ནས་འཐུང་བཞིན་དུ་ཆུའི་རྒྱུན་ཕྱི་མ་ཡང་རྒྱུན་མི་འཆད་པར་བླུགས་པར་མི་བྱའོ་ཞེས་བྱ་བའི་དོན་ཏོ། །བུད་མེད་གང་ཞིག་དགེ་སློང་གི་མདུན་དུ་སེམས་རབ་ཏུ་གཏང་པ་དེ་ལ་རང་གིས་སྦྱིན་པར་མི་བྱའོ་ཞེས་བྱ་བ། འདིར་ཁ་ཅིག་བྱེད་པ་དེ་ནི་གཞན་གྱི་སེམས་ཤེས་པར་དཀའ་བ་ཉིད་ཀྱི་ཕྱིར་ཏེ། ཤིན་ཏུ་བྲེལ་བའི་ངོ་བོ་མ་ཡིན་ནོ། །བར་བར་དུ་ཡང་ཆུའི་རྒྱུན་གཅད་པར་བྱའོ་ཞེས་བྱ་བ་ལ། གཞན་དེ་རྣམས་ཆུ་སྟེར་བ་ལ་རྣམ་པར་རྟོག་པ་བྱེད་པ་དེ་ལ་ཡང་ཐོ་འཚམ་བ་ཉིད་དུ་འགྱུར་བའི་ཕྱིར་མི་རིགས་པ་ཉིད་དོ། །དེའི་དུས་ཉིད་ཀྱི་དབྱར་གྱི་ནང་དུ་འོངས་པ་ནི་རྙེད་པ་དབང་ངོ་ཞེས་བྱ་བ་ནི་འདིར་རྙེད་པ་ལ་དེའི་སྒྲ་ལ་ལྟོས་པ་ཉིད་དེ་དུས་གང་ལ་ཡོད་པ་ཞེས་བྱ་བ་དེ་བསྡུས་པའོ། །འདིར་དབྱར་གྱི་རྙེད་པས་དབྱར་གྱི་ནང་དུ་འོངས་ཤིང་ཞེས་བྱ་བ་འདི་ལས་ཤེས་པའོ། །དབྱར་གྱི་དུས་ལ་ཤིན་ཏུ་མང་བ་ཉིད་ནི་དེའི་རྙེད་པའི་དུས་སོ། །གལ་ཏེ་དབྱར་གྱི་ནང་དུ་འོངས་པ་ལ་ཤིན་ཏུ་མང་བར་དབྱར་གནས་ལ་དེར་གནས་པ་གྲུབ་པར་འགྱུར་ན་དེ་འོས་པ་ཡིན་ནོ། །དབྱར་རལ་བ་ལ་ཡང་དབྱར་གྱི་རྙེད་པའི་སྐལ་བ་དབང་བའོ་ཞེས་བྱ་བའི་དོན་ཏོ། །འདིར་རྙེད་པ་དབང་བའི་རྒྱུ་ནི་གནས་པ་ཡིན་ཏེ། གནས་པར་ཁས་བླངས་པ་ནི་མ་ཡིན་ཏེ། ཇི་ལྟར་ཡང་དེ་ལྟར་ཁས་བླངས་ཀྱང་ཞེས་བྱ་བ་དེ་ལྟར་
རྣམ་པར་གཞག་པ་འདིའོ། །ཟ་ཞིང་རྙེད་པ་མ་ཡིན་པ་ལ་ནི་ལས་མི་རིགས་སོ་ཞེས་བྱ་བ་ནི་ཟས་ཙམ་གྱིས་འཚོ་ཞིང་རྙེད་པ་མ་ཡིན་པ་ལ་ནི་དེ་ལ་སུས་ཀྱང་བསྐོ་བར་མི་བྱའོ་ཞེས་བྱ་བའི་དོན་ཏོ། །འདིར་གཞུང་ནི་ཁ་ཅིག་ལས་དབྱར་གྱི་ནང་དུ་འོངས་པ་དག་གི་དབང་དུ་བྱས་ཏེ་གསུངས་པ་ཡིན་ནོ། །འདིར་གཞུང་ནི་དགེ་སློང་དག་གི་རྙེད་པ་མ་ཐོབ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ལས་སུ་བསྐོས་པ་བྱེད་ན་ནི་རྙེད་པ་ཡང་སྦྱིན་པར་བྱའོ། །ཇི་སྟེ་མི་བྱང་ན་ནི་ཟན་ལ་བལྟས་པ་ཙམ་གྱིས་གནས་པར་བྱ་སྟེ་ལས་དང་རྙེད་པ་ཡང་ངོ་ཞེས་གསུངས་པ་འདི་ལ་རིགས་པས་བྱེ་བྲག་ཉེ་བར་བསྡུས་ནས་མདོ་འདི་གཉིས་ཀྱིས་འདི་བསྡུས་སོ། །གཞུང་གཞན་ལས་ཀྱང་དགེ་སློང་དག་ཟས་ཀྱི་རྙེད་པ་དེ་ཡང་མི་ནོད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་ལ་ཟས་ཀྱི་རྙེད་པ་དེ་དག་སྦྱིན་པར་བྱའོ་ཞེས་གསུངས་པ་དེ་དག་འདིར་བསྡུས་པ་ཡིན་ནོ། །ལས་སུ་ནི་གཞོན་རིམས་ནས་མཐར་གྱིས་བསྐོའོ་ཞེས་བྱ་བ་ནི་གཞོན་རིམས་ནས་མཐར་གྱིས་བྱའོ། །རྙེད་པ་མི་འཐོབ་པ་ལ་ཟས་སྦྱིན་པར་བྱ་བ་ཉིད་དོ་ཞེས་བྱ་བ་ནི་གང་ལ་དབྱར་རམ་དུས་གཞན་ལ་དབྱར་གྱི་དུས་བཞིན་དུ་ངེས་པ་ཉིད་ཀྱི་ཕྱིར། །བྱ་བས་རྙེད་པ་མི་འཐོབ་པ་དེ་ལ་ཟས་ནི་སྦྱིན་པར་བྱ་བ་ཉིད་ཡིན་པའོ། །གཞན་གྱི་རྙེད་པ་ལ་འདུ་བར་མི་བྱའོ་ཞེས་བྱ་བ་ནི་གང་ཞིག་དེའི་ཚེ་མ་སྦྱིན་པར་ལེན་པ་སྐྱེད་པ་ནི་འདི་ལྟ་སྟེ། གནས་གཞན་མངོན་སུམ་དུ་རྙེད་པའི་ཕྱིར་ནང་དུ་གཏོགས་པའི་ཁྲོད་དུ་ཞུགས་ནས་ཟོས་ན་ཉེས་པར་འགྱུར་ལ། ཉེས་པ་མེད་པ་དེའི་དོན་ཁོ་ནར་དེར་སོང་བ་མ་ཡིན་པ་གཙུག་ལག་ཁང་གཞན་དུ་སོང་ནས་ཟོས་པ་ལའོ། །གལ་ཏེ་ཟས་ཀྱི་དོན་ཁོ་ནར་དེར་སོང་བ་མ་ཡིན་པ་དེ་ལ་ནི་ཉེས་པ་མེད་པའོ། །མུ་གེའི་ཚེ་རང་གིས་མ་ཁྱེར་བ་ལ་ཡང་ངོ་ཞེས་བྱ་བ་མུ་གེའི་དུས་ཀྱི་ཚེ་རང་གིས་གཙུག་ལག་ཁང་ནས་བརྒྱགས་མ་ཁྱེར་བར་གཙུག་ལག་ཁང་གཞན་དུ་ཟན་ཟོས་ན་ཉེས་པ་མེད་པའོ། །དགེ་སློང་གི་ཚང་ཉིད་ལས་ལྷག་མ་ཉིད་བླངས་པ་ཡང་ངོ་ཞེས་བྱ་བ་ནི་གཙུག་ལག་ཁང་ན་གནས་ནས་དགེ་སློང་ཇི་སྙེད་པ་འཁོད་པའི་ཟས་ཀྱི་ཚོད་ལས་ལྷག་པའི་
ཐོབ་པ་ཡོད་པ་ཉིད་ཡིན་ན་གཙུག་ལག་ཁང་ན་གནས་ནས་ཟས་བླངས་ན་ཉེས་པ་མེད་པའོ། །གཙུག་ལག་ཁང་ཡལ་བར་མི་དོར་རོ་ཞེས་བྱ་བ་ནི་འདི་ནི་སིལ་བུ་དག་ལས་སོ། །རང་གིས་ཞེས་བྱ་བ་དེ་ཡང་ངོ༌། །སྦྱིན་པའི་བདག་པོ་ཞེས་བྱ་བ་དེ་ནི་འདིར་ཡང་ངོ༌། །ཕྱིར་བཅོས་པའི་ཕྱིར་སྦྱིན་བདག་སྤྲོ་བར་བྱའོ་ཞེས་བྱ་བ་ནི་བྱེ་བྲག་ཏུ་མ་སྨོས་པས་གནས་པའི་གཞི་ཉི་ཚེར་མ་ཟད་ཀྱི་དགེ་འདུན་གྱི་གཙུག་ལག་ཁང་ཐམས་ཅད་ཀྱང་དགེ་འདུན་གྱི་ཡིན་གྱི་གཞན་གྱི་ནི་མ་ཡིན་ནོ་ཞེས་བྱ་བ་འདིའི་འོག་ནས་སྟོན་པ་ལས་ཤེས་པར་བྱའོ། །མ་གྲུབ་ན་དགེ་འདུན་གྱི་ལས་ཇི་ཙམ་གྱིས་ནུས་པ་ངེས་པར་སྦྱར་རོ་ཞེས་བྱ་བ་ནི་སྦྱིན་བདག་མ་གྲུབ་ན་ཕྱིར་བཅོས་པའི་ཕྱིར་དགེ་འདུན་གྱི་རྫས་ལས་ཇི་ཙམ་གྱིས་ཆོག་པར་ཕྱིར་བཅོས་པར་བྱའོ། །རང་གིས་ཀྱང་ཕྱིར་བཅོས་པར་བྱའོ་ཞེས་བྱ་བ་ནི་ལག་གི་ལས་ཀྱི་ཚུལ་གྱིས་ཅི་ནུས་པས་ཀྱང་ངོ༌། །རྙེད་པ་མནོད་པས་གཙུག་ལག་ཁང་གི་བྱི་དོར་བྱའོ་ཞེས་བྱ་བ་ནི་དེ་ནས་གང་རྙེད་པ་ནོད་པ་དེས་ལས་དེ་བྱའོ། །དད་པའི་རྙེད་པ་ནི་གཙུག་ལག་ཁང་ཉིད་ཀྱིས་མ་ཡིན་ནོ་ཞེས་བྱ་བ་ནི་དད་པའི་རྒྱུ་ལས་བྱུང་བའི་རྙེད་པ་གང་ཡིན་པ་སྦྱིན་བདག་དད་པས་དུས་ངེས་པ་མེད་པར་གང་ཟག་འགའ་ཞིག་ལ་འབུལ་བར་བྱེད་པ་དེ་ནི་གཙུག་ལག་ཁང་ཉིད་ལ་རྙེད་པ་མ་ཡིན་ནོ། །གཙུག་ལག་ཁང་ནས་སྒོ་བཅད་དེ་འགྲོ་བར་བྱའོ། །སྲུང་མ་ཡང་གཞག་སྟེའོ་ཞེས་བྱ་བ་ནི་གཙུག་ལག་ཁང་གི་ཞེས་བྱ་བའི་ལྷག་མའོ། །དེ་ལ་ཟན་མེད་ན་སྦྱིན་ནོ་ཞེས་བྱ་བ་ནི་གཙུག་ལག་ཁང་གི་སྲུང་མ་དེ་ལ་ཟན་མེད་ན་སྦྱིན་པར་བྱའོ། །དེས་ཆོམ་རྐུན་པའི་རང་དབང་ཉིད་མེད་པར་མི་ཤེས་པར་སྒོ་དབྱེ་བར་མི་བྱའོ་ཞེས་བྱ་བ་ནི་གཙུག་ལག་ཁང་གི་སྲུང་མ་དེས་གཞན་དག་གཙུག་ལག་ཁང་གི་སྒོ་ཕྱེ་ཤིག་ཅེས་ཟེར་ན། ཆོམ་རྐུན་པའི་རང་དབང་ཉིད་མེད་པ་ངེས་པར་མི་ཤེས་པར་སྒོ་དབྱེ་བར་མི་བྱའོ། །འདིར་ངེས་པར་ཤེས་པར་བྱ་བའི་ཐབས་གང་ཞེ་ན། དེའི་ཕྱིར་ཁང་སྟེང་དུ་འཛེགས་ལ་བལྟ་སྟེ། ཁྱོད་རིམས་ཀྱིས་མ་བཏབ་བམ་ཞེས་བརྗོད་པ་ནི་འདིར་ཐབས་ཡིན་ནོ་ཞེས་བྱ་བ་སྨོས་ཏེ། ཁྱོད་རིམས་ཀྱིས་མ་བཏབ་བམ་ཞེས་བརྡ་སྐད་བརྗོད་པ་ནི་སྨྲར་གཞུག་པའོ། །གནས་དང་མིང་དང་ཕ་མ་ལ་ སོགས་པ ་སོ་སོར་
ཤེས་པར་བྱེད་དུ་གཞུག་པ་ཡང་ངོ་ཞེས་བྱ་བ་ཡང་བརྗོད་པ་ནི་ཐབས་ཡིན་ནོ། །འདི་རྗོད་པར་བྱེད་དུ་གཞུག་པའོ། །ཡིད་མ་ཆེས་ཤིང་འཇིགས་པ་དང་བཅས་པ་ཉིད་ལ་སྒོ་དབྱེ་བར་མི་བྱའོ། །དགོན་པ་བས་ཁྱི་བཅང་བར་བྱའོ། །དེས་ནང་བར་སྔར་ལངས་མ་ཐག་ཁོ་ནར་གཙུག་ལག་ཁང་དང་མཆོད་རྟེན་གྱི་འཁོར་ས་བལྟ་བར་བྱའོ་ཞེས་བྱ་བ་ལ། དེས་ཞེས་བྱ་བ་ནི་ཁྱི་འཆང་བ་པོས་སོ། །ལངས་མ་ཐག་ཅེས་བྱ་བ་ལ་ལངས་མ་ཐག་ཁོ་ནར་ཞེས་བྱ་བའི་སྒྲས་ནི་བྱ་བ་གཞན་དག་མ་བྱས་པའི་མདུན་རོལ་དུ་བལྟ་བར་བྱའོ་ཞེས་བསྟན་པས་ནི་ཉི་མ་ཤར་བར་ལངས་པ་འདིས་བཀག་པ་ཡིན་ནོ། །གལ་ཏེ་དེས་བཤང་བ་བྱས་ན་དོར་བར་བྱ་ཞིང་གཅི་བ་བྱས་ན་ཕྱི་བར་བྱ། གལ་ཏེ་སྡེར་མོ་དག་གིས་བྲད་ན་མཉམ་པར་བྱའོ། །དེ་དག་གི་གནས་དག་ཏུ་དཀྱིལ་འཁོར་བྱའོ་ཞེས་བྱ་བ་ནི་བཤང་བ་ལ་ སོགས་པ ་དེ་དག་གི་གནས་དག་ཏུ་བྱའོ། །ཞེས་བྱ་བར་སྦྱར་རོ། །དེ་ཇི་ལྟར་གསོ་བར་བྱ་ཞེ་ན། དེའི་ཕྱིར་དེ་ལ་ལྷུང་བཟེད་ཀྱི་ལྷག་རོལ་སྦྱིན་ནོ་ཞེས་བྱ་བ་སྨོས་ཏེ་ཁྱི་དེ་ལའོ། །གང་དུ་དེ་སྦྱིན་པར་བྱ་ཞེ་ན། དེའི་ཕྱིར་མཆོད་རྟེན་དང་གཙུག་ལག་ཁང་གི་ཉེན་ཀོར་གྱི་ཕྱི་རོལ་དུའོ། །སྤྱོད་ལམ་ཅི་འདོད་པས་ལུང་དཔོག་གོ་ཞེས་བྱ་བ་ལ། ལུང་དབོག་པ་ནི་སྤྱོད་ལམ་བཞི་པོ་དག་ལས་ཅི་འདོད་བས་དབོག་ན་ཡང་དེ་ལ་ཉེས་པ་མེད་པའོ་ཞེས་བྱ་བའི་དོན་ཏོ། །གསར་བུས་མནོད་པའི་ཕྱིར་ཁམས་སྙོམས་པ་ཉིད་དྲི་སྟེ། ཕྱག་བྱ་བ་སྔར་བཏང་བའི་སྤྱོད་ལམ་བསྟེན་པར་བྱའོ་ཞེས་བྱ་བ་ནི་གསར་བུས་བླ་མ་ལ་ཀླག་པའི་ལུང་མནོད་པའི་ཕྱིར། སྔར་ཕྱག་བྱ་སྟེ་བསྙུན་གསོལ་ནས་བྱ་བའི་སྤྱོད་ལམ་བསྟེན་པར་བྱའོ། །རྒན་པས་ནི་ཕྱག་མི་བྱ་བར་བསྙུན་གསོལ་ནས་སོ། །ཐལ་མོ་བསྣོལ་ཏེ་བཅང་ངོ་ཞེས་བྱ་བ་ནི་ལག་པ་གཉིས་ཀྱིས་ཐལ་མོ་བསྣོལ་ཏེ་བཅང་བའི་སྤྱོད་ལམ་བསྟེན་པར་བྱའོ། །ལུས་དང་སེམས་བཏུད་དོ་ཞེས་བྱ་བ་ནི་ལུས་བཏུད་པ་དང་སེམས་བཏུད་པར་བྱ་བ་སྟེ། ང་རྒྱལ་གྱིས་སེམས་ཁེངས་པའི་ཡན་ལག་ཀྱང་སེམས་དམའ་བ་ཉིད་ཡིན་ལ་གུས་པ་དང་བཅས་པ་ཉིད་ཀྱང་སེམས་དམའ་བ་ཉིད་ཡིན་པར་རིག་པར་བྱའོ། །དྲང་པོར་རོ་ཞེས་བྱ་བ་ནི་གྱ་གྱུ་མེད་པ་
དང་སྒྱུ་དང་གཡོ་མེད་པར་བྱའོ། །ལུང་འབོགས་པར་བྱེད་པ་གནས་ཇི་ལྟ་བུ་དེ་ལྟ་བུར་གྱུར་པའི་སྤྱོད་ལམ་བསྟེན་པར་བྱ་ཞེ་ན། དེའི་ཕྱིར་འཆག་པ་ན་གོམ་པ་སྲི་བས་བཅག་པའི་འོ་ཞེས་བྱ་བ་སྨོས་ཏེ། ལུང་འབོགས་པར་བྱེད་པ་འཆག་པ་ན་ལུང་ནོད་པར་བྱེད་པས་གོམ་པ་སྲི་བར་བཅག་པའི་སྤྱོད་ལམ་བསྟེན་པར་བྱའོ། །འགྲེང་བ་དང་འགྲེང་བའི་འོ་ཞེས་བྱ་བ་ནི་ལུང་འབོགས་པར་བྱེད་པ་འགྲེང་བ་ན་ལུང་ནོད་པར་བྱེད་པས་ཀྱང་འགྲེང་བའི་སྤྱོད་ལམ་བསྟེན་པར་བྱའོ། །འདུག་པ་དང་ཉལ་བ་ན་འདུག་པའི་འོ་ཞེས་བྱ་བ་ནི་བསྟེན་པར་བྱའོ། །གང་དུ་འདུག་པའི་སྤྱོད་ལམ་བསྟེན་པར་བྱ་ཞེ་ན། དེའི་ཕྱིར་སྟན་ཆེས་དམའ་བ་ལའོ་ཞེས་བྱ་བ་སྨོས་ཏེ། འདིར་ཆེས་རྒན་པ་ནི། རྗེས་སུ་གནང་བ་ལ་མི་ལྟོས་པ་ཉིད་ཀྱིས་རང་འདུག་པར་བྱའོ། །གསར་བུས་རྗེས་སུ་གནང་བ་ལ་ལྟོས་ཏེ་འདུག་པར་བྱ་བ་བསྟན་པའི་ཕྱིར་གསར་བུས་ནི་བསྒོ་ནའོ་ཞེས་བྱ་བ་སྨོས་ཏེ་ལུང་འབོགས་པར་བྱེད་པས་བསྒོ་ཞིང་རྗེས་སུ་གནང་ན་འདུག་པར་བྱའོ། །མ་བསྒོ་བའི་ཆོག་བསྟན་པའི་ཕྱིར། མ་བསྒོ་ན་ཙོག་པུས་སོ་ཞེས་བྱ་བ་སྨོས་ཏེ། འདུག་པ་བསྟེན་པར་བྱའོ་ཞེས་བྱ་བར་སྦྱར་རོ། །མནོད་པར་བྱ་བ་མང་བ་ཉིད་ཡིན་ན་ཞུ་བར་བྱའོ་ཞེས་བྱ་བ་ནི་ལུང་མནོད་པར་བྱ་བའི་གཞུང་མང་བ་ཉིད་ཡིན་ན་འདུག་པའི་ཕྱིར་ལུང་འབོགས་པར་བྱེད་པ་ལ་ཞུ་བར་བྱའོ། །འདིར་གཞུང་ནི་གལ་ཏེ་གསར་བུས་ཡིན་ལ། མང་དུ་ནོད་ན་སློབ་དཔོན་ལ་ཞུས་ཏེ་སྟན་ཆེས་དམའ་བ་ལ་འདུག་ནས་ལུང་མནོད་པར་བྱའོ། །ཇི་སྟེ་ཉུང་དུ་ནོད་ན་ནི་ཙོག་བུས་འདུག་སྟེའོ་ཞེས་གསུངས་པ་ཡིན་ནོ། །ཐོས་པའི་ཉེན་ཀོར་མ་གཏོགས་པ་སྣང་བའི་ཉེན་ཀོར་དུ་འདུག་སྟེ་ཁ་ཏོན་བྱའོ་ཞེས་བྱ་བ་ནི་མཐོང་བའི་ཉེན་ཀོར་དུ་གནས་ནས་སོ། །གདམས་ངག་ནི་མཐའ་གཅིག་ཏུ་སོང་སྟེ་བསྒྲུབ་པར་བྱའོ་ཞེས་བྱ་བ་ནི་སྒོམ་པའི་གདམས་དག་གོ །ལུང་འབོགས་པ་དང་མནོད་བའི་ཤིན་ཏུ་ལེགས་པར་བསླབས་པ་དང༌། ཤིན་ཏུ་ཡོངས་སུ་བྱང་བ་དང་ཐེ་ཚོམ་མེད་པར་བྱས་ཏེའོ། །གནས་ཁང་དང་ཟས་ལ་བསྐོ་བ་དང་ཐུག་པ་དང་བག་ཆོས་དང་ཤིང་ཐོག་འདྲིམ་པ་བསྐོ་བར་བྱའོ་ཞེས་བྱ་བ་ནི་གནས་ཁང་བསྐོ་བར་བྱའོ་ཞེས་བྱ་བར་སྦྱར་བར་བྱའོ། །
ཐུག་པ་དང་བག་ཆོས་དང་ཤིང་ཐོག་འདྲིམ་པ་ཡང་བསྐོ་བར་བྱའོ་ཞེས་བྱ་བ་ནི་སྒྲ་དང་སྦྱར་རོ། །བར་བུར་འདྲིམ་པ་ཡང་ངོ་ཞེས་བྱ་བ་ནི་བསྐོ་བར་བྱའོ་ཞེས་བྱ་བར་སྦྱར་རོ། །གཞུང་ཁ་ཅིག་ལས་ནི་བར་བུར་འདྲིམ་པ་ཞེས་བྱ་བ་འདིའི་མིང་ཕྲན་ཚེགས་འདྲིམ་པ་ཞེས་འབྱུང་ངོ༌། །བར་བུར་ཞེས་བྱ་བ་དེ་ཅི་ཡིན་ཞེ་ན་དེའི་ཕྱིར། ལྷག་རོལ་ཕྱི་དེ་ཉིན་པར་བྲིམ་པར་བྱ་བ་ནི་དེ་ཞེས་བྱ་བ་སྨོས་ཏེ། འདིར་གཞུང་ནི་བག་ཆོས་ལ་ སོགས་པ ་བྲིམ་པའི་ལྷག་རོལ་ལུས་པས་སུ་ཡང་བྲིམ་པར་མི་བྱེད་པ་ན། བཅོམ་ལྡན་འདས་ཀྱིས་བཀའ་སྩལ་པ། བར་བུར་བྲིམ་པ་བསྐོ་བར་བྱ་ཞིང་དེས་དེ་དག་ཕྱི་དེ་ཉིན་པར་བྲིམ་པར་བྱའོ་ཞེས་གསུངས་པ་ཡིན་ནོ། །སྣོད་སྤྱད་འདྲུབ་པའོ་ཞེས་བྱ་བ་ནི་བསྐོ་བར་བྱའོ། །དབྱར་གྱི་རས་ཆེན་ནོ་ཞེས་བྱ་བ་ནི་སྦེད་པ་པོ་བསྐོ་བར་བྱའོ། །སྣམ་སྦྱར་ཞེས་བྱ་བ་ནི་འདི་ལ་དགེ་འདུན་གྱི་བསམ་པར་བྱ་བ་མ་ཡིན་པ་ཉིད་ཤེས་པའོ། །ཆོས་གོས་བསྟན་པའོ་ཞེས་བྱ་བ་ནི་སྦེད་པ་པོ་བསྐོ་བར་བྱའོ། །གང་ཞིག་འདི་གདིང་བ་པོ་བསྟན་པ་སྟེ། འདིར་སྦེད་པའོ་ཞེས་བྱ་བར་རྗོད་པ་པོ་རྣམ་པར་གནས་པ་ཡིན་ནོ། །གོས་དག་གོ་ཞེས་བྱ་བ་ནི་སྦེད་པ་པོ་བསྐོ་བར་བྱའོ། །འགྱེད་པ་ཡང་ངོ་ཞེས་བྱ་བ་ནི་གོས་སྦེད་པ་དང་འགྱེད་པ་པོ་དེ་གཉིས་བསྐོ་བར་བྱའོ། །དགེ་སྐོས་དང་མངག་གཞུག་གོ་ཞེས་བྱ་བ་ནི་སྐོས་ཅི་རིགས་པར་སྦྱར་བའི་ཕྱིར་བསྡུས་པའོ། །དགེ་སྐོས་ཀྱི་བྱ་བ་དང་བག་ཡངས་སུ་གྱུར་པ་དང་དེས་བྱ་བ་གང་ཡིན་པ་དེས་དེ་འགྲུབ་པའི་ཕྱིར་རོ། །འདིར་གཞུང་ནི་དགེ་སློང་རྣམས་ཀྱི་ཟན་གྱི་གྲལ་དང་ཆོས་ཉན་སར་སུ་ཡང་སྟན་ཤོམ་པར་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སྐོས་བསྐོ་བར་བྱ་ཞིང་དགེ་སྐོས་ཀྱིས་ཀུན་དུ་སྤྱོད་པ་ཐམས་ཅད་བྱའོ། །དགེ་སྐོས་ལ་བྱ་བ་ཅུང་ཞིག་བྱུང་བ་དེས་སུ་ཡང་མི་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། མངག་གཞུག་བསྐོ་བར་བྱའོ་ཞེས་གསུངས་པ་ཡིན་ནོ། །སྡེར་སྤྱད་འདྲིམ་མོ་ཞེས་བྱ་བ་ནི་བསྐོ་བར་བྱའོ། །དེ་དག་འདྲིམ་པ་དང་ཟན་གྱུ་ནས་སྦ་བ་ནི་དེའི་ལས་ཡིན་ནོ་ཞེས་བྱ་བ་ནི་དགེ་སློང་དེས་ཟན་གྱི་དོན་དུ་སྡེར་སྤྱད་འདྲིམ་པར་བྱའོ། །འདིར་
གཞུང་ནི་སྡེར་སྤྱད་འདྲིམ་པ་དེས་དགེ་སློང་རྣམས་ཀྱི་ཟན་གྱི་གྲལ་དུ་སྡེར་དག་བྲིམ་པར་བྱ་ཞིང་ཟན་ཟོས་ཟིན་ནས་བྲུབ་པར་བྱའོ་ཞེས་གསུངས་པ་ཡིན་ནོ། །ཆུའི་ཞལ་ཏ་པའོ་ཞེས་བྱ་བ་ནི་ཆུ་སྦྱིན་པ་ལ་དེའི་བྱ་བ་ལ་བསྐོ་བར་བྱའོ་ཞེས་བྱ་བའི་དོན་གྱིས་ཤེས་པའོ། །མཛེས་ཆོས་སོ་ཞེས་བྱ་བ་ནི་མཛེས་པར་བྱ་བའི་དོན་དུ་འཆོས་པ་ནི་མཛེས་ཆོས་ཀྱི་དོན་དུ་བསྐོ་བར་བྱའོ། །དེ་བལྟས་ཏེ་རབ་ཏུ་བྱུང་བ་རྣམས་མི་མཛེས་པ་བསྟེན་ན་སེ་གོལ་གྱི་སྒྲ་སྔོན་དུ་བཏང་སྟེ་མཛེས་པ་ལ་ངེས་པར་སྦྱར་བར་བྱའོ་ཞེས་བྱ་བ་ནི་མཛེས་ཆོས་དེས་སོ། །མཛེས་པ་ལ་ངེས་པར་སྦྱར་བའི་ངོ་བོ་ཉིད་བསྟན་པའི་ཕྱིར་འདིར་ལྟ་སྟེ། ཟས་ལ་སྒྲ་བསྐྱུང་བ་ཉིད་དང་ཤིན་ཏུ་བསྡམས་པ་ཉིད་དང་ཤིན་ཏུ་ནོགས་ཐུག་པ་ཉིད་ཀྱིས་སོ། །མཆོད་རྟེན་ལ་ཕྱག་བྱ་བ་ལ་སྒྲ་བསྐྱུང་བ་ཉིད་དང་རྒན་རིམས་ཉིད་ཀྱིས་སོ་ཞེས་བྱ་བ་སྨོས་སོ། །བང་རིམ་གྱི་ཞལ་ཏ་པའོ་ཞེས་བྱ་བ་ནི་བསྐོ་བར་བྱའོ། །དེས་དང་པོར་ཟན་ཟོས་ཏེ་དབྱི་གུ་བླངས་ནས་ཟན་ཟ་བ་དག་ལ་ཁྭ་ཏ་དང་བྱེའུ་དང་ཕུག་རོན་ལ་ སོགས་པ ་དག་བཟློག་པར་བྱའོ་ཞེས་བྱ་བ་ནི་བང་རིམ་གྱི་ཞལ་ཏ་བ་དེས་སོ། །ཁྭ་ཏ་ལ་ སོགས་པ ་དེ་དག་ནི་བང་རིམ་ལ་ སོགས་པ ་དག་ཏུ་གནས་འཆའ་བས་དེའི་ཕྱིར་དེས་ཤས་ཆེར་དེ་དག་ཟློག་པར་བྱེད་པས་བང་རིམ་གྱི་ཞལ་ཏ་བ་ཞེས་བྱའོ། །གནས་མལ་དབོག་པ་དང་གནས་མལ་བྱི་བོ་དབོག་པའོ་ཞེས་བྱ་བ་ནི་དེ་གཉིས་དཔོག་པ་སྤྲོ་བར་བྱ་སྟེ་གཅིག་གི་དངོས་པོའོ། །གནས་མལ་ཞེས་བྱ་བ་ནི་ཁྲི་དང་ཁྲིའུ་ལ་ སོགས་པ ་ལ་རྟག་པར་གནས་པ་ལའོ། །གནས་མལ་བྱི་བོ་ཞེས་བྱ་བ་ནི་ཁྲི་དང་ཁྲིའུ་དང། སྟན་ནང་ཚངས་ཅན་དང་མལ་ཆ་དང་སྟན་དང་གནས་མལ་ལ་ སོགས་པ ་མེད་པ་འདི་ལྟ་སྟེ། ཤིང་ལྗོན་པའི་དྲུང་དང་ནེའུ་གསིང་ལ་ སོགས་པ ་གཏན་གྱི་གནས་མལ་མ་ཡིན་པའོ། །ཟས་རུང་བ་དང་བཅས་པ་ཉིད་ཡིན་ན་མི་དག་འོང་བ་ལ་སྒེའུ་ཆུང་སྲུང་བའོ་ཞེས་བྱ་བ་ནི་འཇིག་རྟེན་པ་ཞུགས་ནས་ཟས་རུང་བ་དང་བཅས་པ་ཉིད་ཅེས་བྱ་བ་ཤ་དང་བཅས་པ་ཉིད་ཡིན་ན། དེར་མི་གཞན་དག་འོང་བ་དགག་པའི་ཕྱིར། སྒེའུ་ཆུང་སྲུང་བ་སྤྲོ་བར་བྱ་སྟེ་བསྐོ་བར་བྱའོ། །འདིར་སྒེའུ་ཆུང་ཞེས་བྱ་བ་ནི་དགག་པ་སྒོ་བ་ཡིན་པར་རིག་པར་བྱའོ། །འདིར་གཞུང་ནི་དགེ་སློང་དག་
གྲལ་ན་ཟན་ཟ་བ་ན་མི་དག་འོངས་ནས་བཅོམ་ལྡན་འདས་ཀྱིས་བཀའ་སྩལ་པ། སྒེའུ་ཆུང་སྲུང་བ་བསྐོ་བར་བྱའོ། །ཤ་དག་འདྲིམ་པ་ན་བྲམ་ཟེ་དང་ཁྱིམ་བདག་དག་འཕྱ་ནས། བཅོམ་ལྡན་འདས་ཀྱིས་བཀའ་སྩལ་པ། གང་གི་ཚེ་རུང་བ་ཡོད་པ་དེའི་ཚེ་སྒེའུ་ཆུང་སྲུང་བ་བསྐོ་བར་བྱའོ་ཞེས་བྱ་བ་གསུངས་པ་ཡིན་ནོ། །གནས་མལ་གྱི་གཞིའོ།། །།ཕྱག་བྱ་བའི་གནས་མུན་ཁྲོད་དུ་ཕྱག་དང་བཅས་པའི་ཚིག་བརྗོད་པར་བྱའོ་ཞེས་བྱ་བ་ནི་ཕྱག་འཚལ་བའི་གནས་མུན་ཁྲོད་དུ་དགེ་སློང་གིས་ཕྱག་མི་བྱ་བར་ཕྱག་འཚལ་ལོ་ཞེས་བྱ་བའི་སྒྲ་དང་བཅས་པའི་ཚིག་བརྗོད་པར་བྱ་བ་ཡིན་གྱི་ཞེས་བྱ་བ་འདིར་སྨོས་ན། འདི་ནི་ཕྱག་འཚལ་བའི་ཚེ་མདུད་པ་མེད་པར་འདི་མི་རིགས་སོ་ཞེ་ན། བདེན་མོད་ཀྱི་དེའི་ཕྱིར་འདུད་པ་དང་བཅས་པར་ཞེས་བྱ་བ་སྨོས་སོ། །ཉེན་ཀོར་དུ་གྱུར་པ་གཞན་གྱིས་ཕྱག་བྱ་བར་བརྩམས་པ་ལ་ཕྱག་མི་བྱ་བར་མི་བྱའོ་ཞེས་བྱ་བ་ནི་གཞན་གྱིས་ཕྱག་བྱ་བར་བརྩམས་པ་ལ་ཉེན་ཀོར་དུ་གྱུར་པ་གཞན་གྱིས་ཕྱག་བྱ་བར་འོས་པ་ལ་གཞན་གྱིས་ཕྱག་མི་བྱ་བ་མ་ཡིན་ནོ། །སིལ་བུ་དག་ལས་འདི་དང་པོར་བྱས་ནས་ཕྱག་འཚལ་བ་ཉིད་དོ་ཞེས་བྱ་བའི་མཐར་ཐུག་པའོ། །འདིར་ཞུ་བ་དག་ལས། མཐའ་དང་བཅས་པ་ལ་དོར་ནས་མི་བྱ་ཞེས་བྱ་བའི་བར་དུ་གསུངས་སོ། །ཚངས་པའི་ཕྱག་གིས་ནི་དེ་བྱས་པ་ཉིད་ཡིན་ནོ་ཞེས་བྱ་བ་ནི་ཚངས་པའི་ཕྱག་ཅེས་བྱ་བ་ཐམས་ཅད་ལ་ཁྱབ་པ་ཐམས་ཅད་གནས་གཅིག་ཏུ་ཚོགས་པ་ལ་སྤྱིར་ཕྱག་བྱ་བ་བསྟན་ཕྱག་བྱ་བ་བསྟན་པ་སྟེ་དེ་བྱས་ན་དེ་བྱས་པ་ཉིད་ཡིན་པའོ། །ནང་དང་བཅས་པ་ལ་ཕྱག་མི་བྱའོ་ཞེས་བྱ་བ་ལ། འདིར་ནང་དང་བཅས་པ་ཞེས་བྱ་བ་ནི་གནོད་པ་བྱ་བའི་བསམ་པས་ཉེ་བར་གནས་པར་བྱ་བ་ཡིན་པར་རིག་པར་བྱའི། རྩོད་དོ་ཅོག་ཐམས་ཅད་ནི་མ་ཡིན་ནོ། །དེ་བས་ན་གནོད་པར་བྱ་བའི་བསམ་པས་ཉེ་བར་གནས་པ་ལ་ཕྱག་བྱད་མི་རུང་གི་རྩོད་པ་གཞན་ལ་ནི་རུང་ངོ༌། །འདིར་གཞུང་ནི་གཉིས་ལ་ཕྱག་བྱ་སྟེ། གློ་བུར་དུ་འོངས་པ་དག་དང་གཉུག་མར་གནས་པ་དག་གིས་ཕན་ཚུན་རྒན་རིམས་བཞིན་དུ་ཕྱག་བྱའོ། །ནང་དང་བཅས་པ་དང་ཡོངས་སུ་གནས་པ་བྱེད་པ་ནི་མ་གཏོགས་སོ་ཞེས་གསུངས་པ་ཡིན་ནོ། །ཕྱག་འཚལ་བ་ལ་ཨ་རོག་གྱ་ཞེས་
བྱ་བར་མི་བྱའོ། །འདས་པ་ལ་ཕྱག་བྱ་བ་ཡིན་པ་ལ་ཕྱག་མི་བྱ་བ་ཉིད་མ་ཡིན་ནོ་ཞེས་བྱ་བ་ནི་སྔོན་འདས་པའི་དུས་ན་དེ་ཕྱག་བྱ་བ་ཉིད་དུ་འགྱུར་བ་ཡིན་ན། ད་ལྟར་ཕྱག་བྱ་བ་ཉིད་མ་ཡིན་དུ་ཟིན་ཀྱང་སྔོན་གྱི་གནས་སྐབས་དེ་ཉིད་མངོན་སུམ་བྱས་ཏེ་ཕྱག་བྱར་རུང་བས་དེའི་ཕྱིར་དེ་ལ་ཕྱག་བྱ་བ་ཉིད་ཡིན་ནོ།། འདི་ནི་དགེ་སློང་རྒན་པོ་ཁྲོས་པའི་དབང་གིས་སྡོམ་པ་རྒྱུན་ཆད་དེ་སྤྲུལ་དུ་གྱུར་པ་ལ། དགེ་སློང་ཅིག་ཤོས་ཀྱིས་སྔོན་གྱི་རྒྱུད་དེ་མངོན་སུམ་དུ་བྱ་སྟེ་འདུད་པར་བྱའོ་ཞེས་གསུངས་པའི་གླེང་གཞི་ཡིན་ཏེ། ཐམས་ཅད་ལ་བྱེ་བྲག་མེད་པས་བྱར་རུང་བས་འདིར་སྤྱིར་མདོར་བྱས་སོ། །སྦགས་པ་ལ་ཕྱག་མི་བྱའོ། །སྦགས་པས་ཕྱག་མི་བྱའོ། །དེས་བདག་གིར་མི་བྱའོ་ཞེས་བྱ་བ་ནི་སྦགས་པ་ལ་ཕྱག་མི་བྱ་བ་དང༌། སྦགས་པས་གཞན་ལ་ཕྱག་མི་བྱ་བ་དང༌། སྦགས་པས་ཕྱག་དེ་བདག་གིར་མི་བྱའོ། །སྦགས་པ་ལས་མི་བྱའོ་ཞེས་བྱ་བ་ནི་སྦགས་པ་གཞན་ལས་ཕྱག་དེ་བདག་གིར་མི་བྱ་བའོ། །འདིར་གཞུང་ནི་བཅོམ་ལྡན་འདས་ཀྱིས་ནད་པ་བལྟ་བར་བྱའོ་ཞེས་གསུངས་པ་དང༌། ནད་པ་བལྟ་བར་བྱ་བའི་དགེ་སློང་རྒན་པོ་དག་དང་གསར་བུ་དག་ཀྱང་དོང་ནས། དེ་ན་གསར་བུ་གང་དག་ཡིན་པ་དེ་དག་ནི་ནད་པ་དེ་ལ་ཕྱག་འཚལ་བར་བྱེད། རྒན་པོ་གང་དག་ཡིན་པ་དེ་དག་ལ་ནི་ནད་པ་དེས་ཕྱག་དག་འཚལ་བར་བྱེད་པ་ན་དེ་སྐྱོ་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྦགས་པ་ལ་ཕྱག་མི་བྱའོ། །སྦགས་པས་ཕྱག་མི་བྱའོ། །སྦགས་པས་ཕྱག་བདག་གིར་མི་བྱའོ། །སྦགས་པ་ལས་ཕྱག་བདག་གིར་མི་བྱའོ། །སྦགས་པ་ལ་ཕྱག་འཚལ་ལམ། སྦགས་པས་ཕྱག་འཚལ་ལམ། སྦགས་པས་ཕྱག་བདག་གིར་བྱེད་དམ། སྦགས་པ་ལས་ཕྱག་བདག་གིར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །སྦགས་པ་ནི་རྣམ་པ་གཉིས་ཏེ། ཐ་ན་སོ་ཤིང་ཡན་ཆད་ཟ་བས་སམ། ཐ་ན་དེའི་ས་བྱི་དོར་བྱེད་པ་ཡན་ཆད་མི་གཙང་བས་སོ་ཞེས་བྱ་བ་ནི་ཟ་བས་སྦགས་པ་ནི་ཐ་ན་སོ་ཤིང་ཡན་ཆད་ཟ་བས་སྦགས་པ་ཡིན་ནོ། །མི་གཙང་བས་སྦགས་པ་ནི་ཐ་ན་མི་གཙང་བའི་ས་བྱི་དོར་བྱེད་པ་ཡན་ཆད་གྱིས་སྦགས་པ་ཡིན་ནོ། །འདི་ལ་གཅེར་བུ་ཉིད་དང་གོས་གཅིག་པ་ཉིད་ནི་སྦགས་པ་དང་
འདྲའོ་ཞེས་བྱ་བ་ནི་འདི་ལ་ཞེས་བྱ་བ་ནི་ཕྱག་བྱ་བ་ལ་སྟེ། དེས་གཅེར་བུ་ལ་ཕྱག་མི་བྱའོ། །གཅེར་བུས་ཕྱག་མི་བྱའོ། །གཅེར་བུས་ཕྱག་བདག་གིར་མི་བྱའོ། །གཅེར་བུ་ལས་ཕྱག་བདག་གིར་མི་བྱའོ། །དེ་བཞིན་དུ་གོས་གཅིག་པ་ལ་ཕྱག་མི་བྱའོ། །གཅིག་པས་ཕྱག་མི་བྱའོ། །གོས་གཅིག་པས་ཕྱག་བདག་གིར་མི་བྱའོ། །གོས་གཅིག་པ་ལས་ཕྱག་བདག་གིར་མི་བྱའོ། །ཕྱག་ནི་རྣམ་པ་གཉིས་ཏེ། ཡན་ལག་ལྔས་ཕྱག་འཚལ་བ་དང༌། སྒྱིད་པ་ལ་འཁྱུད་པས་ཕྱག་འཚལ་བའོ། །སྦྲིད་བ་བྱུང་བ་ལ་སོས་ཞེས་བརྗོད་པར་མི་བྱ་སྟེ། རྒན་ཞུགས་དང་ཁྱིམ་པ་ལ་ནི་མ་གཏོགས་སོ། །གསར་བུ་དེ་ལ་ཨ་རོག་གྱ་ཞེས་བརྗོད་པར་བྱའོ། །རྒན་པོ་ལ་ནི་ཕྱག་བྱའོ་ཞེས་བྱ་བ་ནི་དེ་ལ་ཞེས་བྱ་ནི་སྦྲིད་པ་བྱུང་བ་དེ་ལ་ནི་གསར་བུས་ཕྱག་བྱའོ། །སྦྲིད་པ་བྱུང་ན་ཡང་ངོ་ཞེས་བྱ་བ་ནི་གསར་བུ་རང་ལ་སྦྲིད་པ་བྱུང་ན་ཡང་རྒན་པོ་ལ་ཕྱག་བྱའོ། །འདིར་གཞུང་ནི་གསར་བུས་སྦྲིད་པ་བྱུང་ན་ཕྱག་བྱའོ་ཞེས་གསུངས་པ་ཡིན་ནོ། །དེ་བཞིན་གཤེགས་པ་ལ་ཚེ་དང་ལྡན་པ་དང་མིང་དང་རུས་བརྗོད་པས་ཀུན་དུ་སྤྱད་པར་མི་བྱའོ། །ཉེ་བའི་ཚིག་དང་བྲལ་བར་དེའི་མཚན་ནས་གདུང་སྨོས་པར་མི་བྱའོ་ཞེས་བྱ་བ་ནི་འོན་ཀྱང་ཉེ་བའི་ཚིག་དང་བཅས་པར་མཚན་ནས་གདུང་སྨོས་པར་བྱའོ། །འདིར་གཞུང་ནི་འདི་ལྟར་ཉེ་བའི་ཚིག་དང་བཅས་ཏེ་སྟོན་པའི་མཚན་སྨོས་པར་བྱ་སྟེ། བཅོམ་ལྡན་འདས་ཤཱཀྱ་ཐུབ་པ་ཞེས་བརྗོད་པར་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །རྒན་པའི་མི་བྱའོ་ཞེས་བྱ་བ་ནི་ཉེ་བའི་ཚིག་དང་བྲལ་བར་མིང་དང་རུས་སྨོས་པར་མི་བྱའོ། །འདི་ལ་གནས་བརྟན་དང་ཚེ་དང་ལྡན་པ་ནི་ཉེ་བའི་ཚིག་ཉིད་ཀྱི་ཚུལ་དང་མཐུན་པ་ཡིན་ནོ་ཞེས་བྱ་བ་ལ། འདི་ལ་ཞེས་བྱ་བ་ནི་རྒན་པ་ལའོ། །སྔ་མ་ལ་ནི་མ་ཡིན་ནོ་ཞེས་བྱ་བ་ནི་དེ་བཞིན་གཤེགས་པ་ལ་སྟེ། སྟོན་པ་ལ་ནི་གནས་བརྟན་དང་ཚེ་དང་ལྡན་པ་ཞེས་བྱ་བ་ནི་ཉེ་བའི་ཚིག་ཉིད་ཀྱི་ཚུལ་དང་མཐུན་པ་མ་ཡིན་ནོ་ཞེས་བྱ་བའི་དོན་ཏོ། །ལག་གི་བླས་འགྲོ་བ་དང་འོང་བ་དང་ལྡན་པའི་གཞིར་གཙུག་ལག་ཁང་རབ་ཏུ་གནས་པར་བྱའོ་ཞེས་བྱ་བ་ནི་གང་འགྲོར་ཡང་ནུས་ལ་འོང་ཡང་ནུས་
པའི་གཞིར་རོ། །འདིར་གཞུང་ནི་མ་མོ་ལས། ཕྱོགས་གང་དུ་དང་པོ་གཙུག་ལག་ཁང་རབ་ཏུ་གནས་པར་བྱེད་པ་དེ་དགེ་སློང་ལག་གི་བླས་དང་པོ་ཁོ་ནར་གཙུག་ལག་ཁང་གི་གཞི་བརྟག་པར་བྱ་སྟེ། འོང་བ་དང་ལྡན་པ་དང་འགྲོ་བ་དང་ལྡན་པ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཤིང་ལྗོན་པ་དང་རྫིང་བུ་དང་འཆག་ས་དག་དང་ངོ་ཞེས་བྱ་བ་ཡང་ལྡན་པ་ཞེས་བྱ་བར་སྦྱར་ཏེ། ཤིང་ལྗོན་པ་དང་ལྡན་པ་དང་རྫིང་བུ་དང་ལྡན་པ་དང་འཆག་ས་དང་ལྡན་པའི་གཞིར་གཙུག་ལག་ཁང་རབ་ཏུ་གནས་པར་བྱའོ། །ཉེན་ཀོར་དང་ངོ་ཞེས་བྱ་བ་ནི་ཉེན་ཀོར་དང་ལྡན་པའི་གཙུག་ལག་ཁང་རབ་ཏུ་གནས་པར་བྱའོ། །རྒྱུན་ལུགས་དང་ཀླག་ཅོར་དང་སྒྲ་དང་ཏུག་རིང་ཆུང་བར་རོ་ཞེས་བྱ་བ་ནི་རྒྱུན་ལུགས་ཉུང་བ་དང་ཀླག་ཅོར་ཆུང་བ་དང་སྒྲ་ཆུང་བ་དང་ཏུག་རིང་ཆུང་བར་གཙུག་ལག་ཁང་རབ་ཏུ་གནས་པར་བྱའོ། །བྲམ་ཟེའི་ཀློག་ པ་དང་འདུན་སའི་ཐ་སྙད་དང་གླང་པོ་ཆེ་དང་རྟ་ལ་སོགས ་པའི་སྒྲ་ནི་སྒྲའོ། །རྫ་རྔ་ལ་ སོགས་པའི་སྒྲ་ནི་ཏུག་རིང་སྟེ་དེ་དག་ཆུང་བར་བྱའོ། །སྦྱིན་པ ་པོས་རྗེས་སུ་གནང་ན་གཙུག་ལག་ཁང་བྱ་བའི་དངོས་པོ་ལས་དེ་བྱ་བའི་སྤྱད་བྱའོ་ཞེས་བྱ་བ་ནི་སྦྱིན་བདག་གིས་རྗེས་སུ་གནང་ན་གཙུག་ལག་ཁང་བྱ་བའི་རྫས་གང་ཡིན་པ་དེ་ལ་ལག་གི་བླས་བྱ་བའི་སྤྱད་བྱ་བ་ལ་མི་རིགས་པ་མེད་པའོ། །འདིར་གཞུང་ནི་གལ་ཏེ་ཁྱིམ་བདག་གིས་རྗེས་སུ་སྟེར་ན་དེ་ཉིད་ལས་སྤྱད་ཉེ་བར་གཞག་པར་བྱའོ་ཞེས་གསུངས་པ་ཡིན་ནོ། །དེ་གཞག་པའི་ཁང་པ་སྦྱིན་ནོ་ཞེས་བྱ་བ་ནི་ལག་གི་བླས་བྱ་བའི་སྤྱད་དེ་གཞག་པའི་ཁང་པ་སྦྱིན་པར་བྱ་བ་དེ་དམིགས་ཀྱིས་བསལ་པའོ། །དེ་ཞེས་བྱ་བ་ནི་སྤྱད་དེའོ། །དེར་དགོས་པའི་འབྲུ་མར་ལ་ སོགས་པ ་ཚོད་རན་པར་ཉོའོ་ཞེས་བྱ་བ་ནི་འདིར་དེར་གྱི་སྒྲས་ནི་ལག་གི་བླས་ལས་བྱ་བ་དེ་བསྡུས་པའོ། །ལག་གི་བླས་སྤྱི་བུངས་ཇི་འདྲ་བ་དེ་འདྲ་བར་བཟའོ་ཞེས་བྱ་བ་ནི་གང་དུ་དེ་འོས་པ་ཉིད་དེ་ལ་བསྡུས་པ་དེ་རྣམ་པར་གནས་པ་ཡིན་ནོ། །གང་དུ་དེའི་འོས་པ་ཉིད་ནི་གང་ཞིག་གཙུག་ལག་ཁང་ན་གནས་པ་དེ་ལས་སར་པ་བྱེད་དུ་འཇུག་པ་དེའི་གཙུག་ལག་ཁང་ལའོ། །གནས་དེའི་གཙུག་ལག་ཁང་མེད་པ་ཉིད་ཡིན་ན་ཉེ་འཁོར་གྱི་གཙུག་ལག་ཁང་གིའོ་ཞེས་བྱ་བ་ནི་ཇི་
ཙམ་པ་དེ་ཙམ་ཞེས་བྱ་བར་སྦྱར་རོ། །སྣུམ་བག་གི་རྙེད་པ་མནོད་དོ་ཞེས་བྱ་བ་ནི་འདིར་བྱ་ན་ཡང་དགེ་སློང་གི་ཐང་བཞིན་དུ་མནོད་པའོ་ཞེས་བྱ་བར་རྣམ་པར་གནས་པ་ཡིན་ནོ། །འདིར་དེ་འདྲ་བར་ཞེས་བྱ་བར་སྦྱར་བར་བྱའོ། །གཙུག་ལག་ཁང་དག་གི་བརྩེགས་མ་ཉིད་ཀྱི་མཐའ་ནི་ལྔའོ། །དགེ་སློང་མ་རྣམས་ཀྱི་ནི་གསུམ་མོ་ཞེས་བྱ་བ་ནི་མཐའོ། །འདིར་གཞུང་ནི་སིལ་བུ་དག་ལས་དགེ་སློང་རྣམས་ཀྱི་གཙུག་ལག་ཁང་ནི་ལྔ་བརྩེགས་སུ་བྱའོ། །དྲི་གཙང་ཁང་ནི་བདུན་བརྩེགས་སུ་བྱའོ། །སྒོ་ཁང་གི་སྟེང་གི་བསིལ་ཁང་ཡང་བདུན་བརྩེགས་སོ། །དགེ་སློང་མ་རྣམས་ཀྱི་གཙུག་ལག་ཁང་ནི་སུམ་བརྩེགས་སུ་བྱའོ། །དྲི་གཙང་ཁང་ནི་ལྔ་བརྩེགས་སུ་སོ། །སྒོ་ཁང་ནི་སྟེང་གི་བསིལ་ཁང་ཡང་ལྔ་བརྩེགས་སོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །དྲི་གཙང་ཁང་དང་སྒོ་ཁང་སྟེང་གི་བསིལ་ཁང་དག་ནི་བརྩེགས་མ་གཉིས་ཀྱིས་ལྷག་པར་བྱའོ། །དེ་དག་ལྕི་བས་འཇིག་པ་ཉིད་ཡིན་ན་བརྩེགས་མ་བཤིག་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ལ། དེ་དག་ཅེས་བྱ་བ་ནི་དགེ་སློང་དང་དགེ་སློང་མའི་གཙུག་ལག་ཁང་དེ་དག་ལྕི་བས་འཇིག་པ་ཉིད་ཡིན་ན། བརྩེགས་པ་བཤིགས་པ་ལ་ཁ་ན་མ་ཐོ་བ་མེད་པ་ཉིད་ཡིན་ཏེ། བརྩེགས་མ་ཇི་སྙེད་བཤིག་པ་གཅིག་གམ་དུ་མ་དེ་སྙེད་བཤིག་པར་བྱའོ། །བདུན་སྟོབས་ཉིད་ཀྱིས་སེལ་བ་ཞེས་བྱ་བ་དང་ཁ་ན་མ་ཐོ་བ་མེད་པ་ཉིད་ཅེས་བྱ་བ་ཤུགས་ཀྱིས་རྟོགས་པ་སྟེ་གཙུག་ལག་ཁང་གིས་ཞེས་བྱ་བར་སྦྱར་རོ། །བརྩམས་པ་སྐྱེད་པ་འམ་བསྐྱུད་བར་བྱ་བའི་ཕྱིར་བཤིག་པ་ཡང་ངོ་ཞེས་བྱ་བ་ཡང༌། ཁ་ན་མ་ཐོ་བ་མེད་དོ་ཞེས་བྱ་བར་སྦྱར་ཏེ། འདིར་གཞུང་ནི་གལ་ཏེ་བྱེད་དུ་འཇུག་མི་ནུས་ན་བཤིག་སྟེ་ཆུང་དུར་བྱེད་དུ་གཞུག་སྟེ་འདི་ལ་འགྱོད་པ་མི་བྱའོ་ཞེས་གསུངས་པ་ཡིན་ནོ། །མཆོད་རྟེན་དང་སྐུ་གཟུགས་དག་ནི་སྐྱེད་པ་ཉིད་ཀྱི་ཕྱིར་རོ་ཞེས་བྱ་བ་ནི་བརྩམས་པ་བཤིག་པ་ལ་ཁ་ན་མ་ཐོ་བ་མེད་བ་སྟེ། དེ་གཉིས་བརྩམས་པ་བསྐྱུང་བའི་ཕྱིར་བཤིག་པ་ནི་ཁ་ན་མ་ཐོ་བར་འགྱུར་རོ། །རྙིངས་པ་ཉིད་ཀྱི་ཕྱིར་ནི་ཟིན་ཀྱང་མཉམ་པའི་ཕྱིར་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲས་ནི་ཀྱང་ངོ་ཞེས་བྱ་བའི་རྗེས་སྙེགས་པའི་ཕྱིར་སྨོས་སོ། །བརྩམས་པ་མ་ཟིན་པ་དེ་དག་སྐྱེད་པ་འབའ་
ཞིག་གི་ཕྱིར་བཤིག་པ་ལ་ཁ་ན་མ་ཐོ་བ་མེད་པར་མ་ཟད་ཀྱི་སྔ་མ་དང་མཉམ་པར་བྱ་བའི་ཕྱིར་བཤིག་པ་ལ་ཡང་ཁ་ན་མ་ཐོ་བ་མེད་པའོ། །རྙིངས་པ་ལ་གང་ལ་ཕྱིར་བཅོས་པས་བསྐྱེད་པར་བྱ་མི་ནུས་པ་དེ་ལ་བསྙམས་པ་ལ་ཁ་ན་མ་ཐོ་བ་མེད་པ་འདི་གསུངས་པར་རིག་པར་བྱའོ། །ཕྱོགས་གཅིག་ཕྱིར་བཅོས་པའི་ཕྱིར་ཡང་ངོ་ཞེས་བྱ་བ་ནི་མཆོད་རྟེན་དང་སྐུ་གཟུགས་ཀྱི་ཕྱོགས་གཅིག་རྙིངས་པ་ཕྱིར་འཆོས་པར་བྱ་བའི་ཕྱིར་བཤིག་པ་ལ་ཡང་ཁ་ན་མ་ཐོ་བ་མེད་པའོ། །འདིར་གཞུང་ནི་མཆོད་རྟེན་དང་སྐུ་གཟུགས་དག་རྙིངས་པ་ན། བཅོམ་ལྡན་འདས་ཀྱིས་བཀའ་སྩལ་པ་ཕྱིར་བཅོས་པར་བྱའོ་ཞེས་གསུངས་པ་ཡིན་ནོ། །མདོ་སྔ་མའི་གཞུང་ནི་སྐྱང་ནུལ་གྱི་སྐུ་གཟུགས་དག་རྙིངས་པར་གྱུར་པ་ན། དགེ་སློང་དག་འགྱོད་པས་ཕྱིར་འཆོས་པར་མི་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ལྷག་མ་འམ་མཉམ་པར་བྱའི་ཆུང་བ་ནི་མི་བྱའོ་ཞེས་གསུངས་པ་ཡིན་ནོ། །འདིར་མཆོད་རྟེན་དང་སྐུ་གཟུགས་དག་འདྲ་བ་ཉིད་དེ་གང་ཞིག་འདི་དག་གི་དེ་དག་ལས་དེ་ལྟ་བུའི་རིགས་ཅན་གྱི་ཚིག་དེ་ལས་གཞན་དུ་བརྗོད་པ་ཉིད་ནི་མ་ཡིན་ནོ། །དེ་ལྟ་བས་ན་འདི་གཉིས་ཀ་ལུང་གཉིས་ལས་ཤེས་པའོ། །གདུགས་ལ་ སོགས་བཅོས་པ ་ཡང་ངོ་ཞེས་བྱ་བ་ནི་རྙིངས་པ་ཕྱིར་གཅོས་པའི་ཕྱིར་མཆོད་རྟེན་དང་སྐུ་གཟུགས་དག་ལས་དབོག་པ་ལ་ཁ་ན་མ་ཐོ་བ་མེད་པའོ། །སོགས་པ་ཞེས་བྱ་བའི་སྒྲས་ནི་ཆར་ཁབ་ལ་ སོགས་པ ་དག་ཀྱང་བསྡུའོ། །གཞན་གདགས་པའི་ཕྱིར་ཡང་ངོ་ཞེས་བྱ་བ་ནི་རྙིངས་པ་ཕྱིར་བཅོས་པར་བྱ་བའི་ཕྱིར་འབོགས་པ་ལ་ཁ་ན་མ་ཐོ་བ་མེད་པ་འབའ་ཞིག་ཏུ་མ་ཟད་ཀྱི་སར་པ་གཞན་གདགས་པའི་ཕྱིར་འབོགས་པ་ལ་ཡང་ཁ་ན་མ་ཐོ་བ་མེད་པའོ། །དེའི་དོན་དུ་ཉེ་བར་མ་བཞག་པར་འགོག་པར་མི་བྱའོ་ཞེས་བྱ་བ་ནི་གཞན་གདགས་པ་དེའི་དོན་དུ་གདུགས་ལ་ སོགས་པ ་ཉེ་བར་མ་བཞག་པར་སྔ་མ་དབོག་པར་མི་བྱའོ། །འདིར་གཞུང་ནི་གཞན་དག་གིས་གདུགས་དག་ཕོག་པར་གྱུར་ནས་དེ་དག་རབ་ཏུ་དུས་བྱེད་པར་གྱུར་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཇི་སྲིད་དུ་གཞན་དག་ཉེ་བར་མ་བཞག་པ་དེ་སྲིད་དུ་དབོག་པར་མི་བྱའོ་ཞེས་
གསུངས་ པ་ཡིན་ནོ། །སྐྱེས་པའི་རབས་ལ་སོགས ་པའི་རི་མོ་དང༌། སངས་རྒྱས་ཀྱི་བཀའི་ཡི་གེ་དག་ཀྱང་ཞེས་བྱ་བ་ནི་དེ་དག་ཀྱང་རྙིངས་པ་བཅོས་པའི་ཕྱིར་ཕྱིས་པ་ལ་ཁ་ན་མ་ཐོ་བ་མེད་པའོ། །ཅི་ཞིག་གི་ཕྱིར་ཕྱིས་པ་ལ་བྱ་ཞེ་ན། དེའི་ཕྱིར་བྱིད་པའི་བྱེ་བྲག་ཁོ་ན་བྱ་བའི་ཕྱིར་རོ་ཞེས་བྱ་བ་སྨོས་ཏེ། བྱིད་པའི་བྱེ་བྲག་གང་ཡིན་པ་དེ་ཁོ་ན་བྲི་བའི་ཕྱིར་ཡིན་གྱི་གཞན་དུ་ནི་མ་ཡིན་ནོ། །རྩོམ་པར་བྱེད་པས་མ་བྱས་ན་གཞན་གྱིས་ལྷག་མ་བྱའོ་ཞེས་བྱ་བ་ནི་གང་གིས་མཆོད་རྟེན་དང་གཙུག་ལག་ཁང་དག་རྩོམ་པར་བྱེད་པ་དེ་བརྩམས་ནས་མ་ཟིན་པར་མ་བྱས་ན་གཞན་གྱིས་དེའི་ལྷག་མ་བྱ་བ་ལ་མི་རིགས་པ་མེད་པའོ། །གལ་ཏེ་དགེ་འདུན་གྱི་ཕྱིར་ཕྱེད་བརྩིགས་ན་འཁར་ལེན་སྦྱིན་པར་བྱའོ་ཞེས་བྱ་བ་ནི་འདི་ལ་ཚུལ་དང་མི་མཐུན་པ་མེད་པར་ཤེས་པར་བྱའོ། །དེ་བས་ན་དེའི་བརྗོད་པ་འདིའོ། །འདིར་ཕྱེད་ཅེས་བྱ་བའི་སྒྲ་ནི་ཆ་ཤས་ལ་སྙེགས་ཀྱི་ཆ་མཉམ་པའི་ཕྱེད་ཁོ་ན་ནི་མ་ཡིན་ཏེ། ཅུང་ཟད་ཙམ་བརྩིགས་ནས་ཞེས་བྱ་བའི་དོན་ཏོ། །འདིར་རྣམ་པར་འབྱེད་པ་ལས། བཅོམ་ལྡན་འདས་ཀྱིས་བཀའ་སྩལ་པ། གཞི་མ་ཟིན་པ་ལ་ཞེས་བྱ་བ་ནས་འདི་ལྟར་ལྷན་ཅིག་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །དེས་བསྟང་བའི་དུས་ནི་གལ་ཏེ་དགུན་ཡིན་ན་ཟས་ཀྱི་འོག་རོལ་དུའོ། །གལ་ཏེ་སོ་ག་ཡིན་ན་ཟས་ཀྱི་མདུན་རོལ་དུའོ་ཞེས་བྱ་བ་ལ། དུས་ནི་མཁར་ལེན་གྱིས་བསྟང་བ་དེའི་དུས་སོ། །འདིར་གཞུང་ནི་དགེ་སློང་དག་སོ་ག་ནི་ཟས་ཀྱི་འོག་རོལ་དུ་ལས་བྱེད་ལ། དགུན་ནི་ཟས་ཀྱི་མདུན་རོལ་དུ་ལས་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགུན་ནི་ཟས་ཀྱི་འོག་རོལ་དུ་ལས་བྱ་ལ། སོ་གས་ནི་ཟས་ཀྱིས་མདུན་རོལ་དུ་ལས་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །ཟས་ཀྱི་བྱ་བའི་དུས་ལུས་པར་རོ་ཞེས་བྱ་བ་ནི་ཇི་སྲིད་དུ་ཟས་ཀྱི་བྱ་བ་ལྷུང་བཟེད་བཀྲུ་བ་ལ་ སོགས་པ ་དག་གི་དུས་ལས་ཡོལ་བར་གྱུར་པ་དེ་སྲིད་དུ་ལས་མི་བྱའོ། །དེའི་ལས་བྱི་དོར་མ་བྱས་པར་འཚོ་བ་ལ་འཇུག་པར་མི་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་བསྟང་བའི་བྱ་བ་ལས་སོ། །འཚོ་བ་ལས་ཞེས་བྱ་བ་ནི་བསོད་སྙོམས་ཀྱི་ཕྱིར་འགྲོ་བ་ལ་ སོགས་
པའོ། །དེའི་མཐའ་ནི་རྐང་ལག་བཀྲུས་པ ་ཉིད་དོ་ཞེས་བྱ་བ་ལ། དེའི་མཐའ་ཞེས་བྱ་བ་ནི་བྱི་དོར་བྱས་པ་དེའི་མཐའོ། །འདིར་མཐའི་སྒྲ་ནི་འདི་ཐམས་ཅད་ལས་ཆུང་བ་ཉིད་ལ་སྨོས་སོ། །ལག་གི་བླས་ཁྱེའུ་སུས་སྦྱོར་དུ་གཞུག་གོ་ཞེས་བྱ་བ་ནི་གལ་ཏེ་དགེ་སློང་དག་ཟས་ཀྱི་མདུན་རོལ་དུ་བྱེད་ན་དེའི་ཚེ་ལག་གི་བླས་ཁྱེའུ་སས་སྦྱོར་དུ་གཞུག་གོ །ཟས་ཀྱི་འོག་རོལ་དུ་ནི་སྐོམ་དང་རྐང་ལག་བསྐུ་མཉེ་བྱའོ་ཞེས་བྱ་བ་ནི་གལ་ཏེ་དགེ་སློང་དག་ཟས་ཀྱི་འོག་རོལ་དུ་ལས་བྱེད་ན་དེའི་ཚེ་ལག་གི་བླས་སྐོམ་ལ་ སོགས་པ ་སྦྱོར་དུ་གཞུག་པའོ། །གནས་ཁང་དག་གི་སྒོ་གདོད་དོ། །སྒོ་གླེགས་གཞུག་གོ །ལག་གཟུངས་དང་ཡང་མིག་དང་ཀོ་བའི་དུམ་བུ་དག་གོ་ཞེས་བྱ་བ་ནི་གཞུག་གོ་ཞེས་བྱ་བའི་རྗེས་སུ་སྦྱར་རོ། །སྐར་ཁུང་དག་གདོད་དོ་ཞེས་བྱ་བ་ནི་གནས་ཁང་ལའོ། །ཕྱོགས་གང་དུ་གདོད་པར་བྱ་ཞེ་ན་དེའི་ཕྱིར་དཀྱིལ་དུའོ་ཞེས་བྱ་བ་སྨོས་ཏེ་རྩིག་ངོས་ཀྱིའོ། །དབྱིབས་ཅི་འདྲ་བ་ཞེ་ན། ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུའོ་ཞེས་བྱ་བ་སྨོས་ཏེ། རྒྱ་མཚོ་ལྟར་བྱིན་གྱིས་ཡངས་པའོ། །དྲ་བ་གཞུག་གོ་ཞེས་བྱ་བ་ནི་སྟེགས་བུའི་རྣམ་པ་འདིར་རིག་པར་བྱ་སྟེ་སྐར་ཁུང་ལ་སྟེ། དྲ་བ་ཞེས་བྱ་བ་གང་ཞིག་བསྟན་པ་དེ་ནི་འདིར་སྟེགས་བུ་དེའོ། །སྒོ་གླེགས་སོ་ཞེས་བྱ་བ་ནི་སྐར་ཁུང་ལ་གཞུག་པར་བྱའོ། །འཁོར་གཏན་དང་གནམ་གཟེར་དང་འཕྲེད་གཏན་དག་གོ་ཞེས་བྱ་བ་ནི་སྒོ་གླེགས་དེ་ལ་གཞུག་པར་བྱ། དབྱུག་གུ་སྐམ་ཁ་བཅང་ངོ༌། །གསོར་གྱིས་བཙུགས་པས་རྒྱུའོ་ཞེས་བྱ་བ་ནི་ཐག་མ་རྒྱུ་བ་ཐམས་ཅད་ནི་གསོར་གྱིས་བཙུགས་པའི་ཐབས་ཀྱིས་བྱ་བའོ། །གནས་ཁང་གི་མདུན་དུ་ཁྱམས་བྱའོ་ཞེས་བྱ་བ་སྨོས་ན། ཕྱོགས་གང་དུ་བྱ་ཞེ་ན་དེའི་ཕྱིར་གནས་ཁང་གི་མདུན་དུའོ་ཞེས་བྱ་བ་སྨོས་སོ། །རིམ་པ་གང་གིས་འདི་བྱ་ཞེ་ན་དེའི་ཕྱིར། སོ་ཕག་གི་གཅལ་བདུན་ནམ་བརྒྱད་གཞུག་གོ་ཞེས་བྱ་བ་སྨོས་ཏེ། གནས་ཁང་གི་རྩིག་པའི་འོག་གཞིའི་གཅལ་དུ་སོ་ཕག་རིམ་པ་བདུན་ནམ་བརྒྱད་གཞུག་པར་བྱ་བའོ། །དེའི་སྟེང་དུ་ཀ་ཏན་གྱི་སྤང་ལེབ་བོ་ཞེས་བྱ་བ་སྨོས་པས་ཀ་ཏན་གྱི་སྤང་ལེབ་གཞུག་པར་བྱའོ་ཞེས་བྱ་བ་ནི་སོ་ཕག་གི་གཅལ་དེའི་སྟེ་འདུ་ཀ་ཏན་གྱི་སྤང་ལེབ་
གཞུག་པར་བྱའོ། །དེའི་སྟེང་དུ་ཀ་བའི་ཚར་དག་གོ་ཞེས་བྱ་བ་ནི་ཀ་ཏན་གྱི་སྤང་ལེབ་དེའི་སྟེང་དུ་ཀ་བའི་ཚར་དག་གཟུགས་པའོ། །དེ་དག་གི་སྟེང་དུ་ཀ་ཞུའི་འདབ་མ་དག་གོ་ཞེས་བྱ་བ་ལ། དེ་དག་གི་ཞེས་བྱ་བ་ནི་ཀ་བའི་ཚར་དེ་དག་གི་སྟེང་དུ་ཀ་ཞུའི་འདབ་མ་དག་གཞུག་པའོ། །དེ་དག་གི་སྟེང་དུ་གདུང་མ་དག་གོ །དེ་དག་གི་སྟེང་དུ་ཕྱམ་དག་གོ །དེ་དག་གེ་སྟེང་དུ་སྤང་ལེབ་དག་གོ །དེ་དག་གི་སྟེང་དུ་སོ་ཕག་དགྲམ་མོ། །དེ་དག་གི་སྟེང་དུ་སོ་ཕག་གི་ཕྱེ་མའི་འཇིམ་པའོ་ཞེས་བྱ་བ་ནི་དེ་དག་གི་སྟེང་དུ་སོ་ཕག་གི་ཕྱེ་མའི་འཇིམ་པ་གླན་པར་བྱ་བའོ། །མི་ལྟུང་བར་བྱ་བའི་ཕྱིར་ལན་ཀན་བྱའོ། །མི་འགུལ་བར་བྱ་བའི་ཕྱིར་ཤར་བ་གཞུག་གོ །དེ་ལྕགས་ཀྱི་གཟེར་བུ་དག་གིས་སྦྱར་རོ་ཞེས་བྱ་བ་ལ། དེ་ཞེས་བྱ་བ་དེ་ཤར་བ་དེའོ། །འཛེག་པའི་ཕྱིར་ཐེམ་སྐས་བྱའོ། །འོག་ཏུ་རྡོ་ལས་བྱས་པ་བར་དུ་ས་ལས་བྱས་པ། སྟེང་དུ་ཤིང་ལས་བྱས་པའོ། །ཡ་གད་ལས་འཛེག་པར་བྱའོ། །ཤིང་དང་སྨྱིག་མ་དང་ཐག་པ་ལས་བྱས་པ་ཡང་ངོ་ཞེས་བྱ་བ་ནི་ཤིང་ལས་བྱས་པ་དང་སྨྱིག་མ་ལས་བྱས་པ་དང་ཐག་པ་ལས་བྱས་པ་རྣམས་སོ། །རྫིང་བུ་དང་སྒོ་ཁང་དུ་རྫབ་མི་འབྱུང་བར་བྱ་བའི་ཕྱིར་སོ་ཕག་གི་གཅལ་གཞུག་གོ །དེའི་སྟེང་སོ་ཕག་གི་ཕྱེ་མའི་འཇིམ་པའོ་ཞེས་བྱ་བ་ནི་སོ་ཕག་གི་གཅལ་དེའི་སྟེང་དུའོ། །དེའི་སྟེང་དུ་རྡོ་ཐལ་གྱིས་སོ་ཞེས་བྱ་བ་ནི་སོ་ཕག་གི་སྟེང་མའི་འཇིམ་པ་དེའི་སྟེང་དུ་རྡོ་ཐལ་གྱི་སྐྱང་ནུལ་གྱིས་བསྐུ་བར་བྱ་བའོ། །མེད་ན་རྐང་པ་བསྐྱབ་པའི་ཕྱིར་ཤིང་གི་སྤང་ལེབ་སོ་ཞེས་བྱ་བ་ནི་གཅལ་ཇི་ལྟར་བསྟན་པའི་རྫས་དེ་དག་མེད་ན་རྐང་པ་བསྐྱབ་པའི་ཕྱིར་སྤང་ལེབ་གཞུག་པར་བྱའོ། །ཡང་ན་བར་བར་དུ་སོ་ཕག་གོ་ཞེས་བྱ་བ་ནི་རྐང་པ་བསྐྱབ་པའི་ཕྱིར་གཞུག་བའོ། །མཆོད་རྟེན་ལ་ཡང་དེ་བཞིན་ནོ་ཞེས་བྱ་བ་ནི་རྫབ་མི་འབྱུང་བར་བྱ་བའི་ཕྱིར་སོ་ཕག་གི་གཅལ་གཞུག་གོ་ཞེས་བྱ་བ་ནས་སོ་ཕག་དག་གོ་ཞེས་བྱ་བའི་བར་དེ་དག་དེ་བཞིན་དུ་གཞུག་པའོ། །འདི་ལ་དེ་འདོམ་གང་ཙམ་བྱས་པ་ཉིད་ན་བྱས་པ་ཉིད་དོ་ཞེས་བྱ་བ་ལ་དེ་ཞེས་བྱ་བ་ནི་གཅལ་དེའོ། །འདི་ལ་ཞེས་བྱ་བ་ནི་མཆོད་རྟེན་ལའོ། །སེང་གེའི་ཁྲི་གྲུ་བཞི་བྱའོ། །རྐང་པ་དག་ལ་སེང་གེའི་གདོང་
ཉིད་དོ། །སྤོ་བའི་ཕྱིར་གཟུང་བའི་དོན་དུ་བཞི་པོ་དེ་དག་ལ་ལྕགས་ཀྱི་ཡང་མིག་དག་གདགས་སོ་ཞེས་བྱ་བ་ལ་དེ་དག་ལ་ཞེས་བྱ་བ་ནི་རྐང་པ་བཞི་པོ་དག་ལའོ། །ཐག་གུ་དག་གིས་གདགས་སོ། །དེར་སྟན་ནང་ཚངས་ཅན་གཞག་གོ །སྟེང་དུ་བླ་རེ་འོ་ཞེས་བྱ་བ་ནི་གདགས་པའོ། །དཔྱང་བ་དག་གོ་ཞེས་བྱ་བ་ནི་ཡང་གདགས་པའོ། །བརྟན་པ་ལ་ནི་སོ་ཕག་ལས་བྱས་པའི་ཐེམ་སྐས་བྱའོ་ཞེས་བྱ་བ་ནི་མི་བསྐྱོད་པའི་ཆོས་ཅན་བརྟན་པ་ལའོ། །སྤོ་བ་ལས་ནི་ཤིང་ལས་བྱས་པའོ། །མ་འབྱོར་ན་ཡ་གད་དོ་ཞེས་བྱ་བ་ནི་ཐེམ་སྐས་མ་འབྱོར་ན་འདི་བྱ་བའོ། །རྐང་རྟེན་ཡང་ངོ་ཞེས་བྱ་བ་ནི་གང་དུ་རྐང་པ་གཉིས་མི་འཕྱང་བ་ནི་འདིར་དགོས་པ་ཞེས་བསྟན་པར་འགྱུར་རོ། །དེ་བས་ན་གང་དུ་རྐང་པ་འཕྱང་བ་དེ་རྟོགས་པར་བྱའོ། །མཆོད་པའོ་ཞེས་བྱ་བ་ནི་རྐང་རྟེན་ལའོ་ཞེས་བྱ་བ་དེ་མ་ཐག་པར་ཤེས་པར་བྱའོ། །སྟེང་དུ་ལོ་མའི་ཆུན་པོ་འམ་རྩྭའི་ཆུན་པོ་གཞུག་གོ །འདི་ནི་རྐང་པ་གཉིས་མི་འཕྱང་བར་བྱ་བའི་ཕྱིར་རོ་ཞེས་བྱ་བ་ལ། འདི་ནི་ཞེས་བྱ་བ་ནི་རྐང་པའི་རྟེན་ལའོ། །འདི་ནི་རྡོས་འགྲུབ་པོ་ཞེས་བྱ་བ་ལ། འདི་ནི་ཞེས་བྱ་བ་ནི་རྐང་པ་གཉིས་མི་འཕྱང་བ་འདིའོ། །ཟན་ཟ་བ་དག་ལ་ཁྲ་དང་བྱེའུ་དག་ཕུག་རོན་དག་གིས་མི་འཚེ་བར་བྱ་བའི་ཕྱིར་བྱ་རྒྱ་བྱའོ་ཞེས་བྱ་བ་ནི་གང་དུ་ཁྭ་ཏ་ལ་ སོགས་པ ་འབྱུང་བ་དེར་ཞེས་བྱ་བ་ནི་དོན་གྱིས་ཤེས་པའོ། །འདིར་གཞུང་ནི་དགེ་སློང་དག་ཁྱམས་སུ་ཟན་ཟ་བ་ན། དེ་དག་ཁྭ་དང་བྱེའུ་དང་ཕུག་རོན་དག་གིས་འཚེ་ནས། བཅོམ་ལྡན་འདས་ཀྱིས་བཀའ་སྩལ་པ། བྱ་རྒྱ་བྱའོ་ཞེས་གསུངས་པ་ཡིན་ནོ། །རྣམ་པ་བཞིའོ་ཞེས་བྱ་བ་ནི་བྱ་རྒྱ་དེའོ། །མུཉྫ་ལས་བྱས་པ་དང༌། བལ་བ་རྫ་ལས་བྱས་པ་དང༌། ཤ་ན་ལས་བྱས་པ་དང༌། རས་བལ་ལས་བྱས་པའོ་ཞེས་བྱ་བ་ནི་གླེང་གཞི་དག་ལས་དེ་གསུངས་པ་དང༌། འདིར་གཞུང་ནི་ཕྲན་ཚེགས་དག་ལས་ཀྱང་དྲ་བ་ནི་རྣམ་པ་ལྔ་སྟེ། ལྔ་གང་ཞེ་ན། ཤ་ན་ལས་བྱས་པ་དང༌། མུཉྫ་ལས་བྱས་པ་དང༌། བལ་བ་རྫ་ལས་བྱས་པ་དང༌། ཀ་ཤ་ལས་བྱས་པ་དང༌། ཀུ་ཤ་ལས་བྱས་པའོ་ཞེས་གསུངས་པ་ཡིན་ཏེ། དེ་དག་ནི་འགལ་བར་ཤེས་པར་མི་བྱ་སྟེ། དེ་ནི་གཉིས་ཀ་ལ་ཡང་དཔེ་ཉིད་དུ་
རྣམ་པར་གཞག་པའི་ཕྱིར་རོ། །བལ་བ་ཛ་སྨོས་པས་ནི་སྔར་གྱི་ཀ་ཤ་ལས་བྱས་པ་དང༌། ཀུ་ཤ་ལས་བྱས་པ་དག་ཀྱང་འཕངས་པར་ཤེས་པར་བྱའོ། །ཤ་ན་ལས་བྱས་པ་ཞེས་སྨོས་པས་ནི་ཕྱི་མ་རས་བལ་ལས་བྱས་པ་ཡང་འཕངས་སོ། །གྲུ་བཞི་དག་ཏུ་གཟུངས་གཟེར་གདབ་པོ། །དེ་དག་ལ་ཡང་གདགས་སོ་ཞེས་བྱ་བ་ནི་གཟུངས་གཟེར་དེ་དག་ལ་བྱ་རྒྱ་གདགས་སོ། །ཤིང་གི་ནི་འཆག་པ་དང་འདྲུལ་བས་དེའི་ཕྱིར་ལྕགས་ལས་བྱས་པ་དག་གོ་ཞེས་བྱ་བ་ནི་གཟུངས་གཟེར་གདགས་པའོ། །དེའི་ཕྱོགས་གཅིག་ཏུ་མཐོངས་གདོད་དོ་ཞེས་བྱ་བ་ལ་དེའི་འོ་ཞེས་བྱ་བ་དེ་ནི་བྱ་རྒྱ་དེའི་འོ། །དེ་ཅིའི་ཕྱིར་ཞེ་ན། ཟས་ཟོས་ཟིན་ནས་འཇུག་པའི་ཕྱིར་རོ་ཞེས་སྨོས་ཏེ། ཁྭ་ཏ་ལ་ སོགས་པ ་རྣམས་ཞེས་བྱ་བ་ཤུགས་ཀྱིས་ཤེས་པའོ། །དེ་དྲོ་ཀར་དགབ་བོ་ཞེས་བྱ་བ་ལ། དེ་ཞེས་བྱ་བ་ནི་མཐོངས་དེའོ། །དབྱར་དག་ཁྱམས་སུ་ཆུ་མི་འབྱུང་བར་བྱ་བའི་ཕྱིར་སྤང་ལེབ་དག་གོ་ཞེས་བྱ་བ་ནི་གཞུག་གོ་ཞེས་བྱ་བར་སྦྱར་རོ། །ཕྱོགས་གན་དུ་ཞེ་ན་དེའི་ཕྱིར་ཀ་བའི་བར་དག་ཏུའོ་ཞེས་བྱ་བ་སྨོས་སོ། །ཅི་ཐམས་ཅད་དུའམ་ཞེ་ན་དེའི་ཕྱིར་སྣང་བར་བྱ་བའི་ཕྱོགས་མ་གཏོགས་པར་རོ་ཞེས་བྱ་བ་སྨོས་སོ། །མེད་ན་སེག་དག་གམ་རེ་སྡེ་དག་གོ་ཞེས་བྱ་བ་ནི་སྤང་ལེན་དག་མེད་ན་སེག་དག་གམ་རེ་ལྡེ་དག་གཞུག་པར་བྱའོ། །དབྱར་གྱི་ཟླ་བ་བཞི་པོ་དག་གི་མཐར་དེ་དབྱུང་ངོ་ཞེས་བྱ་བ་ནི་སྤང་ལེབ་ལ་ སོགས་པའོ། །འཁོར་གྱི་ཁྱམས་བྱའོ་ཞེས་བྱ་བ་ལ། ཁྱམས་ནི་ཀུན་ནས་ཟླུམ་པ ་སྟེ་འཁོར་གང་ལ་ཡོད་པ་དེ་ནི་ཁྱམས་ཟླུམ་པའོ། །གནས་བསིལ་བར་བྱ་བའི་ཕྱིར་ཕྱི་རོལ་རྩིག་པས་བསྐོར་བར་བྱའོ། །ཀ་བའི་ཚར་དག་གཟུགས་སོ་ཞེས་བྱ་བ་ནི་རྩིག་པའི་ཕྱི་རོལ་དུ་གྱུར་པ་ལ་རིག་པར་བྱའོ། །ཀ་བའི་ཚར་དག་གཟུགས་སོ་ཞེས་བྱ་བར་སྦྱར་རོ། །སྐར་ཁུང་གདོད་དོ་ཞེས་བྱ་བ་ནི་དེར་སྐར་ཁུང་མང་པོ་དག་གདོད་པར་བྱའོ་ཞེས་བྱ་བ་སྟེ་མང་པོའི་མཐའ་ཅན་ནོ། །མ་མཐའ་དག་སྟན་གྱི་ཡ་མཐའ་དང་ཐད་ཀར་བབ་པར་བྱའོ་ཞེས་བྱ་བ་ནི། སྟན་ཚད་མ་དག་གི་མཐའ་དན་མཉམ་པའི་མ་མཐའ་དང་ཡ་མཐའ་གང་ལ་ཡོད་པ་ཐད་ཀར་བབ་པར་འགྱུར་བ་དེ་ལྟ་བུར་འཁོར་གྱི་ཁང་
པ་དེར་སྐར་ཁུང་དག་གདོད་པར་བྱའོ། །དྲ་བ་དང་སྒོ་གླེགས་དག་གཞུག་གོ །ཟས་དང་མེ་དང་དཔོང་ས་དང་འཆག་པའི་ཁང་པ་དག་བྱའོ་ཞེས་བྱ་བ་ནི་ཟས་ལ་ སོགས་པ ་རྣམས་ལ་ཁང་པའི་སྒྲ་སོ་སོར་སྦྱར་བར་བྱ་བའོ། །མ་མོ་ལས། འདི་དང་བོར་བྱ་སྟེ། རྩིག་ངོས་ཀྱི་ཕྱོགས་ཀྱི་གསལ་བ་ཞེས་བྱ་བའི་བར་དུ་གསུངས་པ་ཡིན་ནོ། །གཡོགས་པའི་རྩིག་ངོས་ཀྱིས་ཕྱོགས་སུ་ཀུན་ནས་བསྐོར་བའི་ལྷག་མ་དང་བཅས་པ་ཞེས་བྱ་བ་དེའི་དོན་དུ་མཐོང་བ་ཡིན་ནོ། །དེ་བས་ན་དེ་བྱེད་པ་ནི་གནས་པའི་ཕྱིར་ནི་མ་ཡིན་ཏེ། རྩིག་ངོས་ཀྱི་ཕྱོགས་འཁོར་བར་གློ་འབུར་དག་བྱའོ་ཞེས་བྱ་བ་ནི་རྩིག་ངོས་ཀྱི་བདག་ཉིད་ངོས་གཅིག་ཏུ་ཀུན་ནས་བསྐོར་བ་གྲུབ་པ་ལ་ཉེ་བར་བརྟེན་ཏེ་ཁང་པ་བྱའོ་ཞེས་བྱ་བར་རིག་པར་བྱའོ། །ས་ཁྱིམ་རུང་ངོ༌། །དགྲ་ཁང་ཡང་ངོ་ཞེས་བྱ་བ་ནི་དགེ་སློང་དག་གི་གནས་སུ་རུང་བ་སྟེ། འདིར་དགྲ་ཁང་ཞེས་བྱ་བ་ནི་གཙུག་ལག་ཁང་གི་གྲྭ་དག་གི་ཡང་ཐོག་ལ་ སོགས་པ ་སྟེ། ཕ་རོལ་གྱི་མཚོན་རྡུགས་པར་བྱེད་པའི་ཕྱིར་རོ། །འདི་ལ་ལན་ཀན་གྱི་སྐབས་ནི་ཁྱམས་དང་འདྲའོ་ཞེས་བྱ་བ་ལ། འདི་ལ་ཞེས་བྱ་བ་ནི་དགྲ་ཁང་ལའོ། །མི་ལྟུང་བར་བྱ་བའི་ཕྱིར་ལན་ཀན་བྱ་བ་དང་མི་འགུལ་བར་བྱ་བའི་ཕྱིར་ཤར་བ་གཞུག་པ་དང། དེ་ལྕགས་ཀྱི་གཟེར་བུ་དག་གིས་སྦྱར་བ་ཞེས་བྱ་བ་གཞན་རྣམས་ལ་ཡང་སྦྱར་བའོ། །རབ་ཏུ་བྱུང་བའི་ཀུན་དཀའ་ར་བ་རྩིག་པས་བསྐོར་བ་ཉིད་ཀྱང་ངོ་ཞེས་བྱ་བ་ཡང་རུང་ངོ་ཞེས་བྱ་བའི་རྗེས་སྙེག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །རྩིག་པ་ལ་ཆུ་ཁུང་གདོད་པ་ཉིད་ཀྱང་ངོ་ཞེས་བྱ་བ་ནི་རབ་ཏུ་བྱུང་བའི་ཀུན་དགའ་རབ་གང་ཡིན་པ་དེ་ལ་ཆུ་ཁུང་གདོད་པ་ཉིད་ཀྱང་ངོ་ཞེས་བྱ་བ་ནི་རུང་བའོ། །རྩང་དང་འོབས་དག་ཀྱང་ངོ་ཞེས་བྱ་བ་ཡང་རབ་ཏུ་བྱུང་བའི་ཀུན་དགའ་རབ་དེ་དག་གིས་བསྐོར་བ་ཉིད་ཀྱང་རུང་བའོ། །གང་ཟག་གི་གཙུག་ལག་ཁང་ཡོ་བྱད་དང་བཅས་པ་ཡང་ངོ་ཞེས་བྱ་བ་ཡང་རུང་བའོ་ཞེས་བྱ་བར་སྦྱར་ཏེ། ལན་ཀན་དང་དྲ་བ་དང་ཟས་ཀྱི་ཁང་པ་ལ་ སོགས་པ ་ཡོ་བྱད་ཡིན་པར་རིག་པར་བྱའོ། །སྔོན་པོ་ལ་ སོགས་པ ་ཟད་པར་གྱི་མཚན་མ་མངོན་དུ་བྱ་བའི་ཕྱིར་གནས་ཁང་གི་རྩིག་པ་དག་སྔོན་པོ་ལ་ སོགས་པ ་རྣམ་པ་བཞིར་བྱའོ་ཞེས་བྱ་བ་ནི་ཟད་པར་
སྔོན་པོ་དང་ཟད་པར་སེར་པོ་དང་ཟད་པར་དམར་པོ་དང་ཟད་པར་དཀར་བའི་སྐྱེ་མཆེད་ཀྱི་མཚན་མ་དག་མངོན་དུ་བྱ་བའི་ཕྱིར། གནས་ཁང་གི་རྩིག་པ་དེ་དག་སྔོན་པོ་ལ་ སོགས་པ ་ཁ་དོག་རྣམ་པ་བཞིར་བྱ་བའོ། །འདིར་གཞུང་ནི་དགེ་སློང་ཞིག་ཟད་པར་སྔོན་པོའི་སྐྱེ་མཆེད་ཀྱི་སྙོམས་པར་འཇུག་པ་སྒོམ་པར་བྱེད་པའི་དགེ་སློང་དེ་ལ་རེ་ཞིག་མངོན་དུ་མི་འགྱུར་བ་ནས། བཅོམ་ལྡན་འདས་ཀྱིས་བཀའ་སྩལ་པ། གནས་ཁང་གི་རྩིག་པ་སྔོན་པོ་དང་སེར་པོ་དང་དམར་པོ་དང་དཀར་པོ་དང་དཀར་པོ་རྣམས་པ་བཞི་བྱ་སྟེ། དེ་དག་མཐོང་ནས་མངོན་དུ་བྱ་སྟེ། ཟད་པར་སྔོན་པོའི་སྐྱེ་མཆེད་ཀྱི་སྙོམས་པར་འཇུག་པ་བསྒོམ་པར་བྱའོ་ཞེས་གསུངས་སོ། །རབ་ཏུ་བྱུང་བའི་ཀུན་དགའ་ར་བ་ལ་རི་མོ་བྲི་བ་ཉིད་དུ་རུང་ངོ་ཞེས་བྱ་བ་སྨོས་ན། གང་དུ་ཅི་ཞིག་བྲི་བར་བྱ་ཞེ་ན། དེའི་ཕྱིར་སྒོར་གནོད་སྦྱིན་ལག་ན་རྡོ་རྗེ་འཛིན་པ་ལ་ སོགས་པ ་རྣམས་བྲིའོ། །སྒོ་ཁང་དུ་འཁོར་བའི་འཁོར་ལོའོ་ཞེས་བྱ་བ་ཡང་རི་མོ་བྲི་བར་བྱའོ་ཞེས་བྱ་བར་སྦྱར་རོ། །ཅི་འདྲ་བ་ཞེ་ན། དེའི་ཕྱིར་ཆ་ལྔ་པར་སྦྱར་ཞེས་བྱ་བ་སྨོས་ཏེ། འདིར་ཆ་ལྔ་པ་ཞེས་བྱ་བའི་སྒྲས་ནི་འགྲོ་བ་ལྔ་པོ་དག་བསྟན་ཏེ། ལྷ་དང་མིའི་ཆ་དག་ཕྱོགས་གང་དུ་བྲི་བར་བྱ་ཞེ་ན། དེའི་ཕྱིར་དེའི་སྟེང་དུ་ལྷ་དང་མི་རྣམས་སོ་ཞེས་བྱ་བ་སྨོས་ཏེ། དེ་ནས་འོག་གི་ཕྱོགས་དག་ཏུ་སེམས་ཅན་དམྱལ་བ་དང་དུད་འགྲོ་དང་ཡི་དགས་ཀྱི་འགྲོ་བ་རྣམས་བྲི་བར་ཞར་ལ་ཤེས་པར་བྱའོ། །འདིར་གཞུང་ནི་རྣམ་པར་འབྱེད་པ་ལས། འདི་དང་པོར་བྱ་སྟེ་གཞག་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །གླིང་བཞི་པོ་དག་གོ་ཞེས་བྱ་བ་ཡང་བྲི་བར་བྱའོ། །རྫུས་ཏེ་སྐྱེ་བའི་སེམས་ཅན་ཟོ་ཆུན་རྒྱུད་མོ་བཞིན་དུ་འཆི་འཕོ་བ་དང་སྐྱེ་བ་དག་ཀྱང་ངོ་ཞེས་བྱ་བ་ཡང་རི་མོར་བྲི་བར་བྱའོ། །དབུས་སུ་འདོད་ཆགས་དང་ཞེ་སྡང་དང་གཏི་མུག་དག་ཕུག་རོན་དང་སྦྲུལ་དང་ཕག་གི་རྣམ་པར་རོ་ཞེས་བྱ་བ་ནི་དེ་དག་གྲངས་ཇི་ལྟ་བ་བཞིན་དུ་རི་མོར་བྲི་བར་བྱའོ། །སྔ་མ་དེ་གཉིས་གཏི་མུ་གེས་ཟ་བར་རོ་ཞེས་བྱ་བ་ལ། སྔ་མ་དེ་གཉིས་ཞེས་བྱ་བ་ནི་འདོད་ཆགས་ཞེ་སྡང་གི་རྣམ་པ་ཕུག་རོན་དང་སྦྲུལ་གཉིས་ཏེ། གཏི་མུག་ཏི་རྣམ་པ་ཕག་གིས་ཟ་བ་འདྲ་བ་བྲི་བར་བྱའོ། །ཁོ་ར་ཁོར་ཡུག་ཏུ་
རྟེན་ཅིང་འབྲེལ་པར་འབྱུང་བའི་ཡན་ལག་བཅུ་གཉིས་དང་ཐམས་ཅད་མི་རྟག་པར་གཟུང་བར་རོ། །སྟེང་དུ་སངས་རྒྱས་མྱ་ངན་ལས་འདས་པའི་དཀྱིལ་འཁོར་དཀར་པོ་ཉེ་བར་སྟོན་པའོ། །འོག་ཏུ་བརྩམ་པར་བྱ་ཞིང་ཞེས་བྱ་བའི་ཚིགས་སུ་བཅད་པ་གཉིས་སོ་ཞེས་བྱ་བ་ནི་འདིར་བྲི་བར་བྱ་ཞེས་ཐམས་ཅད་དུ་དགོངས་པའོ། །དེ་སྟོན་པར་བྱེད་པ་གཞག་པར་བྱའོ་ཞེས་བྱ་བ་ནི་སྐྱེ་བོ་ལྷགས་པ་རྣམས་ལ་འཁོར་བའི་འཁོར་ལོ་དེ་སྟོན་པར་ནུས་པའི་དགེ་སློང་གཙུག་ལག་ཁང་དེར་གཞག་པར་བྱའོ། །དེའི་ཁོར་ཁོར་ཡུག་ཏུ་ཆོ་འཕྲུལ་ཆེན་པོ་དང་བདུད་འཇོམས་པ་དག་གོ་ཞེས་བྱ་བ་ནི་དེ་ལྟར་སྟོན་བྱེད་ནུས་པ་ཞེས་བྱ་བར་སྦྱར་རོ། །ཁྱམས་སུ་སྐྱེས་པའི་རབས་དག་གོ །དྲི་གཙང་ཁང་གི་སྒོར་གནོད་སྦྱིན་ཕྲེང་ཐགས་དག་གོ །དཔོང་སའི་ཁང་པར་གནས་བརྟན་གྱི་གྲལ་དག་གོ །མཛོད་ཀྱི་སྒོར་ནི་གནོད་སྦྱིན་ལག་ན་དབྱུ་གུ་ཐོགས་པ་དག་གོ །ཟས་ཀྱི་ཁང་པར་ལག་ན་བཅའ་བ་ཐོགས་པ་དག་གོ །བསྲོ་ཁང་གི་ཁང་བར་ལག་ན་མྱུ་གུ་དང་བུམ་པ་ཐོགས་པ་དག་གོ །མེའི་ཁང་པར་གྲུལ་བུམ་མེ་སྦར་བར་བྱེད་པ་དག་དང༌། གྲུལ་བུམ་གྱི་བུ་མོ་བྱི་དོར་ལ་ སོགས་པ ་བྱེད་པ་དང༌། མེ་སྦར་བར་བྱེད་པ་དང༌། སྦྱིན་བདག་མར་མེ་ཐོགས་པ་དང་ལྷའི་ཕོ་ཉ་དག་གོ །ཆུའི་ཁང་པར་ཀླུ་ལག་ན་བུམ་པ་ཐོགས་པ་རྒྱན་སྣ་ཚོགས་ཀྱིས་བརྒྱན་པ་དག་དང་ཀླུའི་བུ་མོ་ཆུ་འདྲིམ་པར་བྱེད་པ་དག་གོ །ནད་པའི་རུང་པའི་ཁང་པར་དེ་བཞིན་གཤེགས་པ་ནད་པའི་རིམ་གྲོ་མཛད་པའོ། །བཤང་བ་དང་གཅི་བའི་སྐྱབས་སུ་དུར་ཁྲོད་དག་གམ་མགོ་བོའི་ཐོད་པ་དག་གོ །གཙུག་ལག་ཁང་བླ་ཁབ་མེད་པ་མ་ཡིན་པར་མེ་དུ་བ་ཅན་དང་བཅས་པ་བུང་པར་ཡང་མི་བྱ། བཅང་བར་ཡང་མི་བྱའོ། །སྤྱིལ་བུར་ནི་ཐམས་ཅད་མི་བྱའོ་ཞེས་བྱ་བ་ནི་མེ་དུ་བ་ཅན་དང་དུ་བ་མེད་པ་ཐམས་ཅད་བུད་པར་མི་བྱ་བཅང་བར་ཡང་མེ་བྱའོ་ཞེས་བྱ་བར་སྦྱར་རོ། །དེའི་དོན་དུ་ཞུགས་ལིང་བཅང་བར་བྱའོ་ཞེས་བྱ་བ་ལ། དེའི་དོན་ཞེས་བྱ་བ་ནི་མེ་འབུད་པ་དང་བཅང་བ་དེའི་དོན་དུ་ཞུགས་ལིང་བཅང་བར་བྱའོ། །འདིར་གཞུང་ནི་སིལ་བུ་དག་ལས། དགེ་སློང་དག་དགུན་སྨད་ཀྱི་དུས་སུ་ལྷགས་
པས་ཉེན་ནས་སྤྱིལ་བུར་མེ་བུད་པར་བྱེད་པ་ན་སྤྱིལ་བུ་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། སྤྱིལ་བུར་མེ་བུད་པར་མི་བྱ་བ་ལ་ སོགས་པ ་གསུངས་པ་ཡིན་ནོ། །མཉམ་པར་བཅེར་བའི་ཕྱིར་ལྕགས་ཀྱི་ཕྲ་སྐམ་མོ་ཞེས་བྱ་བ་ནི་བཅང་བར་བྱའོ་ཞེས་བྱ་བར་སྦྱར་ཏེ། མེའི་ཕྱོགས་ཕན་ཚུན་ནས་བསྐུལ་བ་ནི་མཉམ་པར་བཅེར་བ་ཞེས་བྱའོ། །ལྕགས་ཀྱི་ཕྲ་སྐམ་ཞེས་བྱ་བ་ནི་ལྕགས་ཀྱི་ཐལ་ཕྱགས་སོ། །ཤིང་གི་ཡོག་པས་ཀྱང་ལས་དེ་འགྲུབ་པོ་ཞེས་བྱ་བ་ནི་ཕྲ་སྐམ་གྱི་ལས་དེ་འགྲུབ་པོ། །ཁང་སྐྱོང་གིས་གཙུག་ལག་ཁང་དེ་ཉི་མ་རེ་རེ་ཞིང་ཕྱག་དར་བྱའོ། །མི་ནུས་ན་མཁོ་བའི་ཕྱོགས་སོ་ཞེས་བྱ་བ་ནི་གཙུག་ལག་ཁང་མཐའ་དག་ཕྱག་དར་བྱེད་མི་ནུས་ན་གཙུག་ལག་ཁང་གི་ཕྱོགས་གང་མཁོ་བ་དེ་ཕྱག་དར་བྱའོ། །ལྷག་མ་ནི་ཚེ་བརྒྱད་དམ་བཅུ་བཞི་ལ་གཎྜཱི་བརྡུངས་ཏེ་དགེ་འདུན་ཐམས་ཅད་ཀྱིས་ཆོས་དག་ལྡན་པའི་གཏམ་གྱིས་སམ། འཕགས་པའི་མི་སྨྲ་བ་ཉིད་ཀྱིས་སོ་ཞེས་བྱ་བ་ནི་མཁོ་བའི་ཕྱོགས་ཀྱི་ལྷག་མ་ཕྱག་དར་མ་བྱ་པ་གང་ཡིན་པ་དེ་དག་དུས་དེར་དགེ་འདུན་ཐམས་ཅད་ཀྱིས་རིམ་པ་འདིས་ཕྱག་དར་བྱའོ། །ཆོས་ཀྱི་མདུན་སར་ཆག་ཆག་དང་ལྕི་བ་འཇམ་པོའི་བྱུག་གོ་ཞེས་བྱ་བ་ནི་གསོ་སྦྱོང་དང་དགག་དབྱེ་ལ་ སོགས་པ ་ཆོས་ཀྱི་འདུན་སའི་གནས་དེར་རོ། །མཇུག་ཏུ་ཁྲུས་བྱའོ་ཞེས་བྱ་བ་ནི་ཕྱག་དར་ལ་ སོགས་པ ་ཟིན་པའི་མཇུག་ཏུའོ། །ཡང་ན་རྐང་ལག་བཀྲུའོ། །ཆུས་བརླན་པས་ལུས་ཀྱང་བྱུག་གོ་ཞེས་བྱ་བ་ནི་རྫས་ཀྱི་ངོ་བོ་བསྟན་བས་ལག་པ་ལ་ སོགས་པ ་རྣམས་གང་ཡང་རུང་བ་དེས་ཞེས་བྱ་བ་ཤེས་པར་བྱའོ། །སྣུམ་བག་གི་ཉེད་པ་བྱའོ་ཞེས་བྱ་བ་ནི་ཚེ་བརྒྱད་དང་བཅུ་བཞི་དང་བཅོ་ལྔ་ལའོ། །དཀོན་མཆོག་གི་དོན་དུ་ཕྱག་དར་བྱས་པ་དང་ཞལ་ཞལ་བྱས་པ་དག །དྲི་གཙང་ཁང་དང་སྐུ་གཟུགས་དང་མཆོད་རྟེན་དང་སྲོག་ཤིང་གི་གྲིབ་མ་ལ་གཙུག་ལག་གི་ཚིགས་སུ་བཅད་པ་གདོན་ཅིང་འགོམ་མོ་ཞེས་བྱ་བ་ལ། འདིར་ཞལ་ཞེས་བྱ་བ་ནི་བྱུག་པ་ལ་རིག་པར་བྱའོ། །ཉི་མ་དེ་ཉིད་ལ་གནས་མལ་ལ་སོ་སོར་བརྟགས་ལ་དེས་བཅོས་པར་བྱའོ་ཞེས་བྱ་བ་ནི་ཚེས་བརྒྱད་དང་བཅུ་བཞིའི་ཉི་མ་དེ་དག་ལའོ། །སུས་དེ་ལ་སོ་སོར་བརྟག་པར་བྱ་ཞེ་ན། དེའི་ཕྱིར་རྡོལ་བ་ལ་ སོགས་པ ་
དང་ལྡན་པ་དག་གིས་སོ་ཞེས་བྱ་བ་སྨོས་ཏེ་མལ་ཆ་ལ་ སོགས་པའོ། །སུས་བཅོས་པར་བྱ་ཞེ་ན། དེའི་ཕྱིར་གནས་པ ་དག་གིས་སོ་ཞེས་བྱ་བ་སྨོས་ཏེ། དེ་དག་ཉིད་ཀྱིས་འདིར་མཁན་པོ་དང་སློབ་དཔོན་དག་གིས་མལ་སྟན་ལ་ སོགས་པ ་བཅོས་པར་བྱའོ། །གནས་མལ་གྱི་གཞིར་ཆག་ཆག་དང་ཕྱག་དར་དང༌། ལྕི་བ་འཇམ་པོའི་བྱུག་པས་བསྐུ་བར་བྱའོ་ཞེས་བྱ་བ་ནི་མ་མོ་ལས་འདི་དང་པོར་བྱས་ནས་བཀྲུའོ་ཞེས་བྱ་བའི་བར་དུ་གསུངས་པ་ཡིན་ནོ། །མལ་ཆ་དྲི་མས་གོས་པ་སྤྲུག་པར་བྱའོ། །གལ་ཏེ་ཧ་ཅང་ན་སྤྲུག་པར་བྱའོ་ཞེས་བྱ་བ་ནི་གལ་ཏེ་ཧ་ཅང་དྲི་མ་ཅན་དུ་གྱུར་ན་འགྱུར་བྱེད་ཀྱི་ཆུ་ལ་སོགས་པས་བཀྲུ་བར་བྱའོ། །ཆག་ཆག་གདབ་པའི་འོག་ཏུ་ཕྱག་གོ །དེའི་འོག་ཏུ་བཤམ་མོ་ཞེས་བྱ་བ་ནི་ཕྱག་དར་བྱས་པའི་འོག་ཏུ་མལ་དང་སྟན་བཤམ་པར་བྱའོ། །གཞི་རྡུལ་དང་བཅས་པ་མ་སྤྲུགས་པ་ལ་མི་བྱའོ་ཞེས་བྱ་བ་མལ་དང་སྟན་གྱི་གཞི་ཁྲི་ལ་ སོགས་པ ་རྡུལ་དང་བཅས་པ་ཉིད་ཡིན་ན་དེ་མ་སྤྲུགས་པའི་སྟེང་དུ་མལ་དང་སྟན་བཤམ་པར་མི་བྱའོ། །བཤམ་པར་བྱ་བ་དག་ལ་གོས་ཅིག་སྤྲུག་པར་སྤྱད་དོ་ཞེས་བྱ་བ་ནི་མལ་སྟན་བཤམ་པར་བྱ་བ་དེ་དག་གིའོ། །གོས་ཇི་ལྟ་བུ་ཞིག་ཅེ་ན་དེའི་ཕྱིར། ངན་པའོ་ཞེས་བྱ་བ་སྨོས་ཏེ་ཐམས་ཅད་ཀྱི་ཐ་མའོ། །དེ་བཅོས་སོ་ཞེས་བྱ་བ་ལ། དེ་ཞེས་བྱ་བ་ནི་ཕྱིར་བཅོས་པ་དེའོ། །སྤྲུག་པའི་དོན་དུ་སྤྱད་པའི་དོན་གོས་ངན་པ་དེའོ། །མི་ནུས་པ་ཉིད་ན་རས་མར་བྱས་ཏེ་ཤིང་བུའི་རྩེ་མོ་ལ་བཏགས་ནས་སྤྲུག་གོ་ཞེ་བྱ་བ་ནི་དེས་ཁྲི་ལ་ སོགས་པ ་དག་སྤྲུག་གོ་ཞེས་བྱ་བར་སྦྱར་རོ། །དེ་ལྟར་ཡང་མི་རུང་བ་ཉིད་མ་ཡིན་ན། སྦྱིན་པ་པོའི་བསོད་ནམས་མངོན་པར་སྤེལ་བ་དང་ཡུན་རིང་བ་ཉིད་དུ་བྱ་བའི་ཕྱིར་ལྕི་བ་དང་ས་བསྲེས་ཏེ་ཀ་བ་དང་རྩིག་པའི་སེར་ཀར་གླན་པར་བྱའོ་ཞེས་བྱ་བ་ལ། དེ་ལྟར་ཡང་ཞེས་བྱ་བ་ནི་དེ་ལྟར་བྱས་ཀྱང་མི་རུང་པ་ཉིད་ཡིན་ནའོ་ཞེས་བྱ་བར་སྦྱར་རོ། །སྒོ་ཁང་དང་ཁྱམས་སུ་མལ་བཅའ་བ་དང་བཅས་ན་ཡང་གཟུང་བར་མི་བྱའོ་ཞེས་བྱ་བ་ནི་དེ་དག་ཏུ་མལ་བཅའ་བར་ཡང་མི་བྱ་གཞན་གྱིས་བཅས་ན་ཡང་རང་གིས་གཟུང་བར་མི་བྱའོ་ཞེས་བྱ་བའི་དོན་ཏོ། །འདིར་བརྟགས་པ་ནི་སྐྱོན་ཡིན་ཏེ་གཟུང་བས་ཀྱང་ངོ༌། །གཞན་གྱིས་བཅས་ན་ཡང་གནས་ཁང་ཡོངས་སུ་གྱུར་པ་ལ་ སོགས་པ ་རང་ལས་པ་ཉིད་ཐོབ་པ་ལ་ཉེས་པ་སྤང་
བར་བྱའོ། །སྦྱིན་པ་པོས་མྱ་ངན་བསང་བའི་ཕྱིར་ཕུལ་བ་དེས་མཐོང་བར་གཞག་པར་མི་བྱའོ་ཞེས་བྱ་བ་ནི་རྒྱལ་པོ་གསལ་རྒྱལ་གྱིས་རང་གི་མ་ཤི་བའི་མྱ་ངན་བསང་བའི་ཕྱིར། མའི་མལ་ཁྲི་དགེ་འདུན་ལ་ཕུལ་བ་དགེ་སློང་གིས་སྒོ་ཁང་དང་ཁྱམས་སུ་བཤམས་པ་རྒྱལ་པོས་མཐོང་ནས། ཡང་མྱ་ངན་ལྔས་པ་བྱུང་བའི་མཐའ་ལས་བཅས་པ་ཡིན་ཏེ། དེ་ལྟ་བུའི་རྫས་སྤྱིན་བདག་གིས་མཐོང་བར་མི་བྱའོ། །སྒྲ་མི་སྙན་པའི་གཉེན་པོའི་ཕྱིར་ཚེ་བརྒྱད་དང་བཅུ་བཞི་དག་ལ་ཁྱམས་སུ་བཤམ་པར་བྱའོ་ཞེས་བྱའོ་ཞེས་བྱ་བ་ནི་དེ་རྣམས་ཀྱིས་མལ་ཁྲི་དེ་བཀྲུས་སོ་ཞེས་བྱ་བ་ལ་སོགས་པའི་སྒྲ་མི་སྙན་པའོ། །དེ་བསལ་བའི་གཉེན་པོའི་ཕྱིར་བཤམ་ཞིང་གཞན་གྱིས་མཐོང་བར་བྱའོ། །ཁྲི་དང་ཁྲིའུ་བཅང་བར་བྱའོ་ཞེས་བྱ་བ་ནི་བྱེ་བྲག་མ་སྨོས་པའི་ཕྱིར་གང་ཟག་གིས་ཀྱང་ངོ་ཞེས་བྱ་བར་རྟོགས་པར་བྱའོ། །མ་མོ་ལས་འདི་ནི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །སྤྱིལ་བ་མི་ཉམས་པར་བྱ་བའི་ཕྱིར་ཁྲི་རྐང་གི་མཐིལ་མཉམ་པར་སྤྱད་པར་བྱའོ། །ཡང་དེའི་འོག་ཏུ་ཕུབ་མའི་ཕུང་པོ་གཞག་པའམ་དེ་རས་མས་དཀྲི་བར་བྱའོ་ཞེས་བྱ་བ་ལས། དེའི་ཞེས་བྱ་བ་ནི་ཁྲིའུའི་རྐང་པ་དེའི་འོག་ཏུའོ། །དགེ་འདུན་མ་ཡིན་པས་རྐང་པ་དཀྲིས་པའི་ཁྲིའུ་བསྟེན་པ་བདག་གིར་མི་བྱའོ་ཞེས་བྱ་བ་ནི་སིལ་བུ་དག་ལས་སྒྲོན་མའི་ཤིང་ཤེས་པར་བྱ་བའི་བར་དུ་ཡང་ངོ༌། །སྟན་བཟང་པོ་དང་རྒྱབ་རྟེན་དང་བཅས་བའི་སྟན་ཡང་མི་བྱའོ་ཞེས་བྱ་བ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱ་བའོ། །མར་མེའི་སྡོང་བུ་ཡང་མི་བྱའོ་ཞེས་བྱ་བ་ནི་ཤིང་ལྗོན་པའི་རྣམ་པ་འདྲ་བའི་མར་མེའི་སྡོང་བུ་ཡང་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱ་བའོ། །འདིར་གཞུང་ནི། དགེ་འདུན་ལ་ནི་ཡལ་ག་གཅིག་པའི་མར་མེའི་སྡོང་པོ་རྙེད་ན་ཡང་རྗེས་སུ་གནང་ངོ༌། །གང་ཟག་ལ་ནི་རྗེས་སུ་མ་གནང་ངོ༌། །ཡལ་ག་གཉིས་པ་དང་མང་པོ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཁ་ཅིག་ལས་ནི་ཡལ་ག་དུ་མ་པ་ཞེས་སོ་ཞེས་བྱ་བ་ནི་ལུགས་ཁ་ཅིག་ལས་ནི་ཡལ་ག་དུམ་དང་ལྡན་བའི་མར་མེའི་སྡོང་པོ་དགེ་འདུན་མ་ཡིན་པས་བདག་གིར་བྱ་བ་བསྟེན་པར་མི་བྱའོ། །ཡལ་ག་གཅིག་དང་ལྡན་པ་བདག་གིར་བྱས་པ་ལ་ནི་ཉེས་པ་མེད་དོ་ཞེས་འབྱུང་ངོ༌། །སྟན་ནང་
ཚངས་ཅན་གྲུ་བཞི་དང་སྔས་ནང་ཚངས་ཅན་བཅང་པར་བྱའོ་ཞེས་བྱ་བ་ནི་བྱེ་བྲག་མ་གཏོགས་པའི་ཕྱིར་ཐམས་ཅད་ཀྱིས་བཅང་བར་རྟོགས་པར་བྱའོ། །སྟན་ནང་ཚངས་ཅན་ཞེས་བྱ་བ་ནི་ཤིང་བལ་ཅན་ནོ། །འདིར་གཞུང་ནི་མ་མོ་ལས་སྟན་ནང་ཚངས་ཅན་གྲུ་བཞི་དང་སྔས་ནང་ཚངས་ཅན་བཅང་བར་བྱའོ་ཞེས་གསུངས་པ་ཡིན་ནོ། །སྔས་ནང་ཚངས་ཅན་གྱི་ངོ་བོ་བསྟན་པའི་ཕྱིར་ཁྲུ་བཞི་པ་དང་དོ་པ་ཉིས་བལྟབ་ཏུ་བྱ་སྟེ། བཙེམ་མོ་ཞེས་བྱ་བ་སྨོས་ཏེ། སྲིད་དུ་ནི་ཁྲུ་བཞི་པ་ཉིས་བལྟབ་དང་ཞེང་དུ་ནི་ཁྲུ་དོ་པ་ཉིས་བལྟབ་ཏུ་བྱས་ཏེ་བཙེམ་མོ། །ཤིང་བལ་གྱིས་བརྫང་ངོ༌། །སོ་སོར་བརྟག་པ་མ་བྱས་པར་ཉལ་བར་མི་བྱའོ་ཞེས་བྱ་བ་ནི་མལ་དང་སྟན་འདི་ལ་སོ་སོར་བརྟག་པ་མ་བྱས་ན་སོ་སོར་བརྟག་པ་མ་བྱ་པ་ཞེས་བྱ་བ་འདིས་བསྡུས་བའོ། །འདིར་གཞུང་ནི་དགེ་སློང་ཉལ་བར་བྱེད་ན་སོ་སོར་བརྟགས་ཏེ་ཉལ་བར་བྱའོ་ཞེས་གསུངས་བ་ཡིན་ནོ། །དྲན་པ་ཉེ་བར་མ་བཞག་པར་མི་བྱའོ་ཞེས་བྱ་བ་ནི་དགེ་བ་བརྩམས་པ་དང་འབྲེལ་བ་དང་དགེ་བའི་ཕྱོགས་གཞན་དང་འབྲེལ་བ་དང༌། དུས་ཇི་ལྟ་བ་བཞིན་དུ་ལྡང་བ་དང་འབྲེལ་བ་དན་ལུས་དན་གོས་མི་འཕྱར་བ་དག་འབྲེལ་བའི་དྲ་པ་ཡིན་པར་རིག་པར་བྱའོ། །གཞན་དང་ལྷན་ཅིག་ཁྲིའམ་སྟན་ནམ་གཞན་ལ་ཅིག་ཅར་མི་བྱའོ་ཞེས་བྱ་བ་ནི་ཉལ་བར་མི་བྱ་བ་སྟེ། གཞན་ལ་ཞེས་སྨོས་ པ་ནི་སྟེགས་བུ་ལ་སོགས ་པའི་ཁྲི་དག་བསྡུའོ། །ངོ་ཚ་ཤེས་པ་མེད་ན་སྟན་སོ་སོར་བཏིང་སྟེ་གཏུར་བུའམ་ལྷུང་བཟེད་ཀྱི་སྣོད་ལ་ སོགས་པས་རབ་ཏུ་བཅད་ནས་དྲན་པ ་ཉེ་བར་གཞག་སྟེ་ཉལ་བར་བྱའོ་ཞེས་བྱ་བ་ནི་རེག་པའམ་ཀུན་ནས་ཉོན་མོངས་པའི་གཉེན་པོར་གྱུར་པ་ཞེས་བྱ་བ་ཤུགས་ཀྱིས་ཤེས་པའོ། །གསུམ་ལས་ལྷག་པ་དང་པོ་དང་ལྷན་ཅིག་ཁྲི་ལ་འཛེགས་པ་བསྟེན་པར་མི་བྱའོ་ཞེས་བྱ་བ་ནི་གང་ཟག་གསུམ་ལས་ལྷག་པ་མང་པོ་དང་ལྷན་ཅིག་ཏུ་ཁྲི་གཅིག་གེ་སྟེང་དུ་འཛེགས་པ་དང་འདུག་པ་དང་ཉལ་བར་མི་བྱའོ། །གང་ཞིག་ཁྲི་གཅིག་གི་སྟེང་དུ་གང་ཟག་གཉིས་སམ་གསུམ་ནི་འཛེགས་པ་དག་འདུག་པ་དང་ཉལ་བར་བྱའི་བཞི་ཡན་ཆད་ནི་མི་བྱ་ཞེས་བྱ་བའི་དོན་ཏོ། །ཁྲི་རིང་པོ་ལ་ནི་གཉིས་ལས་མི་བྱའོ་ཞེས་བྱ་བ་ནི། ལྷག་པར་མང་པོ་དང་ལྷན་ཅིག་འཛེག་པ་བསྟེན་པར་མི་བྱ་བའོ། །ཁྲིའུ་ལ་གཅིག་མ་ཡིན་པས་
མི་བྱའོ་ཞེས་བྱ་བ་ནི་གཅིག་ཁོ་ན་དེ་ལ་འདུག་པར་བྱའོ་ཞེས་བྱ་བའི་དོན་ཏོ། །དེ་ནི་ཁྲི་ཐུང་ངུའི་དཔེ་ཡིན་པར་རིག་པར་བྱའོ། །ཤིང་གི་ཁྲིའུ་ལ་ཡང་དེ་ལྟ་བུ་ཡིན་ཏེ། དེ་ལྟར་ཁྲིའུ་མེད་པས་དེ་ལ་ཡང་ཁྱབ་པ་ཉིད་ཀྱིས་ཡང་བ་ཉིད་དུ་རྣམ་པར་གཞག་པས་འདིར་དུ་མས་འཛེག་པར་མི་འོས་པ་ཉིད་དོ། །ཤིང་གི་སྤང་ལེབ་ལ་ནི་སྟོབས་ཅི་ཡོད་པ་དང་གོ་ཅི་ཡོད་པ་ལས་ཤེས་པར་བྱའོ། །ལོ་གསུམ་ལས་ལྷག་པས་བར་དུ་ཆོད་པ་དང་ལྷན་ཅིག་སྟན་ལ་འདུག་པར་མི་བྱའོ་ཞེས་བྱ་བ་ནི་ལོ་གསུམ་ལས་ལྷག་པའི་དུས་བསྙེན་པར་རྫོགས་པའི་བར་དུ་གྱུར་པས་བསྙེན་པར་རྫོགས་པའི་དུས་གཞན་གྱིས་བར་དུ་ཆོད་པ་ཉིད་དེ་དང་ལྷན་ཅིག་སྟན་ཐམས་ཅད་ལ་འཛེག་པ་ཉིད་བསྟེན་པར་བྱ་བ་མ་ཡིན་ནོ། །ཁྱིམ་གཞན་དུ་མེད་ན་མཁན་པོ་དང་ཡང་དྲན་པ་ཉེ་བར་གཞག་སྟེ་སྟན་གཅིག་ལ་འདུག་པར་བྱའོ་ཞེས་བྱ་བ་ནི་ཁྱིམ་པའི་ཁྱིམ་མ་མ་གཞན་འགའ་ཞིག་ཏུ་ནི་མ་ཡིན་ནོ། །ཁྱིམ་པ་དང་གང་དུ་ཡང་མི་བྱའོ་ཞེས་བྱ་བ་ནི་ཁྱིམ་པ་དང་ཁྱིམ་གཞན་ཡང་རུང་གཙུག་ལག་ཁང་ཡང་རུང་བ་སྟེ། གང་ཡང་རུང་བར་སྟན་གཅིག་ལ་འདུག་པར་མི་བྱའོ། །བསྙེན་པར་མ་རྫོགས་པ་དང་ཡང་མི་བྱའོ་ཞེས་བྱ་བ་ནི་བསྙེན་པར་མ་རྫོགས་པ་དང་གང་དུ་ཡང་སྟན་གཅིག་ལ་འདུག་པར་མི་བྱའོ། །ཟ་མ་དང་མ་ནིང་དང་མ་བསད་པ་ལ་ སོགས་པ ་དང་མུ་སྟེགས་ཅན་ཞུགས་པ་དང༌། རྐུ་ཐབས་སུ་གནས་པ་དང༌། ཐ་དད་པར་གནས་པ་དང༌། གནས་པར་མི་བྱ་བ་དག་དང་མི་བྱའོ་ཞེས་བྱ་བ་ནི་མ་མོ་ལས་འདི་ལ་ སོགས་པ ་གསུངས་ཏེ། དེ་དག་གང་དང་གང་དུ་ཡང་རུང་སྟན་གཅིག་ལ་འདུག་པ་བསྟེན་པར་མི་བྱའོ། །བསླབ་པ་བྱིན་པ་དང་མི་བྱའོ་ཞེས་བྱ་བ་ནི་གང་དུ་ཡང་སྟན་གཅིག་ལ་འདུག་པ་བསྟེན་པར་མི་བྱའོ། །ཨར་མོ་ནིག་ནི་བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པར་སྟན་ཉིད་ཡིན་ནོ་ཞེས་བྱ་བ་ནི་ཨར་མོ་ནིག་ནི་བསྙེན་པར་རྫོགས་པ་དང་བཅས་པའི་དགེ་འདུན་འདུས་པ་ལས་གཞན་པའི་གནས་སུ་སྟན་ཉིད་ཡིན་པའོ། །གང་གི་ཕྱིར་དེ་ལྟ་ཡིན་པ་དེའི་ཕྱིར་དགེ་འདུན་འདུས་པ་ལས་གཞན་པར་ཡང་ཨར་མོ་ནིག་ནི་དེ་ལ་ལོ་གསུམ་ལས་ལྷག་པའི་བར་དུ་ཆོད་པ་དང་ལྷན་ཅིག་འདུག་པ་བསྟེན་པར་མི་བྱའོ། །འདིར་བསྙེན་
པར་རྫོགས་པ་དང་བཅས་པ་ཞེས་སྨོས་པ་ནི་བསྙེན་པར་མ་རྫོགས་པ་དག་དང་ལྷན་ཅིག་དགེ་འདུན་ཚོགས་ན་ཡང་འདུག་པར་མི་བྱའོ་ཞེས་བསྟན་པའི་ཕྱིར་སྨོས་སོ། །སྟེགས་བུ་ནི་མ་ཡིན་ནོ་ཞེས་བྱ་བ་ནི་སྟེགས་བུ་ནི་སར་གྱུར་པ་ཉིད་ཡིན་པས་སྟན་མ་ཡིན་ནོ། །དོགས་པའི་གནོད་པར་གྱུར་ན་ལྟུང་བ་མེད་དོ་ཞེས་བྱ་བ་ནི་འདིར་འདུས་པའི་སྐབས་ཀྱི་བསླབ་པའི་གཞི་དེ་དག་ཐམས་ཅད་ལ་འདི་དམིགས་ཀྱིས་བསལ་བ་ཡིན་ནོ། །འདིར་གཞུང་ནི་བཙུན་པ་དགེ་སློང་ཁྱིམ་པ་དང་ལྷན་ཅིག་སྟན་ནང་ཚངས་ཅང་ཅིག་ལ་མཆིས་སུ་རུང་ངམ། ཉེ་བ་འཁོར་མི་རུང་སྟེ། རྐྱེན་དེ་ལྟ་བུ་དག་ཡོད་ན་རུང་ངོ་ཞེས་གསུངས་པ་ཡིན་ནོ། །གནས་མལ་སྤེད་པ་ན་གལ་ཏེ་གཉིས་ཡོད་ན་གཅིག་གིས་ཁྲིའམ་ཁྲིའུ་བསྐུར་ཞིང་ཅིག་ཤོས་ཀྱིས་སྟན་ནང་ཚངས་ཅན་ལ་སོགས་པའོ་ཞེས་བྱ་བ་ནི་གལ་ཏེ་གང་ཟག་གཉིས་ཡོད་ན་དེ་ལྟར་བསྐུར་བར་བྱའོ། །འདིར་བྱེ་བྲག་ཏུ་མ་སྨོས་པས་དགེ་འདུན་གྱི་འབའ་ཞིག་ཏུ་མ་ཟད་ཀྱི་གང་ཟག་གི་ཡང་རུང་ངོ༌། །དགེ་འདུན་གྱི་དེ་སྙིང་མི་བརྩེ་བར་མདུན་ནས་དྲང་བ་དང༌། གཡས་གཡོན་ནས་དྲང་བར་མི་བྱའོ་ཞེས་བྱ་བ་ལ་དེ་ཞེས་བྱ་བ་ནི་གནས་མལ་དེའོ། །ཅི་ནས་ཀྱང་དེ་དུ་བ་དང་རྡུལ་དང་དྲི་མ་དག་གིས་གོས་པར་འགྱུར་བ་དེ་ལྟར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་དགེ་འདུན་གྱི་དེའོ། །དེ་མི་གཙང་བའི་སྐྱབས་དང་ཉེ་བར་བསྟེན་པར་མི་བྱའོ། །ཉམས་པ་དོར་བར་མི་བྱའོ། །བསྲད་པ་དང་སྐམ་པ་དང་སྤྲུག་པ་དང་བུ་གུ་གླན་པར་བྱའོ། །རལ་པ་ན་ལྷན་རིངས་སོ། །དབུས་ཟེགས་ན་མཐའ་གཉིས་དབུས་སུ་བྱའོ། །དེར་འོས་པ་ཁ་བསྒྱུར་རོ། །ཕྱིར་བཅོས་མ་ནུས་ན་དཀོན་མཆོག་ལ་ཕུལ་བའི་མར་མེ་གང་ཟག་སྦྱིན་བདག་ཡིན་པ་གང་ཡང་རུང་བ་དག་གི་སྙིང་པོ་ཉིད་དུ་སྤྱད་དོ་ཞེས་བྱ་བ་ནི་དཀོན་མཆོག་ལ་ཕུལ་བའི་མར་མེ་གང་ཟག་སྦྱིན་བདག་མིན་པ་ཡང་རུང་བ་དག་གིས་སྤྱད་པར་བྱ་སྟེ། དགེ་འདུན་སྦྱིན་བདག་ཡིན་པའི་ཡང་རྣམ་པར་སྦྱར་བར་བྱའོ། །དེར་མི་མཁོ་བ་ཉིད་ཡིན་ན་འཇིམ་པ་དང་བསྲེས་ཏེ་དཀོན་མཆོག་དག་གི་རྩིག་པ་དང༌། ཀ་བ་དང་སྒོ་གླེགས་ཀྱི་སེར་ཀ་དག་བྱུག་པའི་ཕྱིར་དེ་ལ་ནན་ཏན་བྱའོ་ཞེས་བྱ་བ་ལ། དེར་མི་མཁོ་བ་ཉིད་ཡིན་ན་ཞེས་བྱ་བ་ནི་མར་མེའི་སྙིང་པོ་དེར་རོ། །དཀོན་མཆོག་དག་གི་ཞེས་བྱ་བ་ནི་དཀོན་མཆོག་དང་འབྲེལ་པ་རྣམས་ལའོ། །
དེ་ལ་ནན་ཏན་བྱའོ་ཞེས་བྱ་བ་ནི་བསྲད་པ་ལ་ སོགས་པ ་དེ་རྣམས་ལ་ནན་ཏན་བྱ་བའོ། །གནས་མལ་ཇི་ལྟ་བུར་གྱུར་པ་སུས་བསྲད་ པ་ལ་སོགས ་པའི་ནན་ཏན་བྱ་ཞེ་ན། དེའི་ཕྱིར་བསྐོས་པ་ནི་མནོས་པས་སོ་ཞེས་བྱ་བ་སྨོས་ཏེ། བསྐོས་པ་གང་ཡིན་པ་དེས་སུ་ཞིག་ལ་སྦྱིན་པ་སྟེ། བསྐོས་པ་མནོས་པས་བསྲད་པ་ལ་ སོགས་པ ་རྗེས་སུ་བསྒྲུབ་པར་བྱའོ། །ལྷག་མ་ནི་དགེ་འདུན་གཎྜཱི་བརྡུངས་པས་བསྡུས་ཏེའོ་ཞེས་བྱ་བ་ལ། ལྷག་མ་བསྐོས་པ་ནི་དགེ་འདུན་གྱིས་བསྲད་པ་ལ་ སོགས་པ ་དེ་དག་བསྡུས་ཏེ་བསྒྲུབ་པར་བྱ་ཇི་ལྟར་བསྡུས་ཏེ་བསྒྲུབ་པར་བྱའོ་ཞེ་ན། དེའི་ཕྱིར་གཎྜཱི་བརྡུངས་པས་བསྡུས་ཏེའོ་ཞེས་བྱ་བ་སྨོས་ཏེའོ། །དགེ་འདུན་གྱི་རྐུ་འཕྲོག་བྱེད་པ་མཐོང་ལ་ནུས་ན་མི་བཟློག་པར་མི་བྱའོ་ཞེས་བྱ་བ་ལ། རྐུ་འཕྲོག་ནི་དཔེ་ཙམ་དུ་ཟད་དེ། ཆུད་ཟ་བར་གྱུར་བ་དག་ལ་ཡང་ཆོ་ག་དེ་བཞིན་དུ་བསྒྲུབ་པར་བྱའོ། །བསྐྲད་པ་ན་དགེ་འདུན་གྱི་ཡལ་བར་མི་དེར་རོ། །གནས་སུམ་སོན་གྱི་བར་དུ་ཁྱེར་བར་བྱེད་པས་ལོངས་སྤྱོད་པར་བྱ་བ་ཉིད་ཡིན་ནོ་ཞེས་བྱ་བ་ནི་བསྐྲད་པ་ནི་དགེ་འདུན་གྱི་དངོས་པོ་ཡལ་བར་དོར་ཏེ་བླངས་པ་གང་ཡིན་པ་དེ་ནི་དགེ་སློང་གི་གནས་སུ་མ་སོན་གྱི་བར་དུ་གང་གིས་ཁྱེར་བར་བྱེད་པའི་གང་ཟག་དེ་ཉིད་ཀྱིས་ལོངས་སྤྱད་པར་བྱ་བ་ཉིད་ཡིན་པའོ། །དེར་རང་གི་གནས་སུ་བསྐུར་བར་མི་འགྲུབ་ན་གནས་གཞན་དུ་ལོངས་སྤྱད་པས་ཡོངས་སུ་སྤྱད་པར་བྱའོ་ཞེས་བྱ་བ་ནི་གནས་གཞན་དུ་ལོངས་སྤྱད་པར་བྱའོ་ཞེས་བྱ་བའི་དོན་ཏོ། །གནས་གཞན་གྱི་ཟས་དང་ཡོ་བྱད་ཀྱི་རྙེད་པ་ནས་གཞན་དུ་ཡོངས་སུ་སྤྱད་པར་མི་བྱའོ་ཞེས་བྱ་བ་ནི་གནས་གཞན་གྱི་ཟས་ཀྱི་རྙེད་པར་བཟའ་བ་དང་བཅས་པ་ལ་ སོགས་པ ་དང༌། ཡོ་བྱད་ཀྱི་རྙེད་པ་མར་མེ་དང་འབྲུ་མར་དང་རྐང་པ་བསྐུ་བ་དང༌། མཆིལ་ལྷམ་དང་གོས་དང་གདུགས་དང་ཤིང་དང་རྩ་བ་དང་སྡོང་བུ་དང་འདབ་མ་དང་མེ་ཏོག་དང༌། འབྲས་བུ་དན་སྨན་ལ་ སོགས་པ ་དག་གནས་དེར་གནས་པར་མི་བརྟེན་པས་གནས་གཞན་དུ་དྲང་ཞིང་ཡོངས་སུ་སྤྱད་པར་མི་བྱའོ། །དེ་དེ་ལ་སྦྱིན་པར་མི་བྱའོ་ཞེས་བྱ་བ་ནི་གནས་གཞན་གྱི་ཟས་དང་ཡོ་བྱད་ཀྱི་རྙེད་པ་དེ་གནས་གཞན་དུ་ཟ་བར་བྱེད་པ་དེ་ལ་སྦྱིན་པར་མི་བྱའོ། །ནོད་པ་འབུལ་དུ་གཞུག་པར་བྱའོ་ཞེས་བྱ་བ་ནི་གནས་གཞན་དུ་ཟ་བར་བྱེད་པ་མནོས་པ་སྨོས་པ་གང་ཡིན་པ་དེ་འབུལ་དུ་གཞུག་
པར་བྱའོ། །མི་ཁུགས་ན་དབྲོག་པར་བྱའོ་ཞེས་བ་ནི་གལ་ཏེ་ནོད་པ་སྟེ་མ་རྙེད་དམ། མཐུ་དང་ལྡན་པ་ལ་བརྟེན་པའི་ཕྱིར་ནོད་པ་དེ་ལ་དབྲོག་པར་མི་ནུས་ན། གང་གིས་དེ་ལ་སྦྱིན་པ་དེ་ལ་འབུལ་དུ་གཞུག་པར་བྱའོ། །འདིར་སིལ་བུ་དག་ལས། དགེ་སློང་གཞན་དུ་གནས་པས་གཞན་དུ་ཁྱེར་ཏེ་ཅུང་ཟད་ཅི་ཙམ་ཟོས་པ་ཐམས་ཅད་རིན་ཐང་ཚང་བར་བྱ་སྟེ་འབུལ་དུ་གཞུག་པར་བྱའོ་ཞེས་གསུངས་པ་དེ་འདིར་བསྡུས་པ་ཡིན་ནོ། །ཆ་དབང་བ་དག་གིས་དགེ་འདུན་གྱི་རྩྭ་དང་ཤིང་མི་མཁོ་བ་དང༌། རང་གི་དང་འདྲ་བར་སྤྱད་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་གང་དག་དེས་འཐོབ་ཅིང་དེའི་ཆ་དབང་བ་དག་གིས་དགེ་འདུན་གྱི་རྩྭ་དང་ཤིང་དགེ་འདུན་གྱི་ས་ཁོ་ནར་སྐྱེ་ཞིང་ཡོངས་སུ་མ་བཟུང་བ་དག་ཡིན་ལ་ཡོངས་སུ་བཟུང་བ་དང་འདིར་མི་མཁོ་བ་ཉིད་མ་ཡིན་ནོ། །མ་བསྐོས་པ་འཁོར་ཞིང་སྤྱད་པ་ལ་ཇི་ལྟར་འོངས་པས་ཡིན་གྱི་རྒན་རིམས་ཀྱིས་མ་ཡིན་ནོ་ཞེས་བྱ་བ་ནི་མ་བསྐོས་པ་རེས་ཀྱིས་འཁོར་ཞིང་སྤྱད་པ་ཟས་ལ་ སོགས་པ ་ལ་མར་མེ་བཞིན་དུ་ཅིག་ཅར་སྤྱད་པ་མ་ཡིན་པ་ལ་ནི་ཇི་ལྟར་འོས་པས་སྤྱད་པར་བྱའི་རྒན་རིམས་ཀྱིས་སྤྱད་པར་བྱ་བ་ནི་མ་ཡིན་གྱི། གང་ཞིག་མ་བསྐོས་ན་དང་པོ་སུ་འོངས་པ་དེ་ལ་གཡར་པོར་སྦྱིན་པར་བྱའོ་ཞེས་བྱ་བའི་དོན་ཏོ། །ཅིག་ཅར་བརྙས་ན་ནི་དེའོ་ཞེས་བྱ་བ་ནི་གལ་ཏེ་ཅིག་ཅར་བརྙས་པར་གྱུར་ན་ནི་ཅིག་ཅར་བརྙས་པ་དེ་རྒན་རིམས་ཀྱིས་སྤྱད་པར་བྱ་བའོ། །མ་ཟིན་ན་དེ་ལས་དབྲལ་བར་མི་བྱའོ་ཞེས་བྱ་བ་ལ་དེ་ལས་ཞེས་བྱ་བ་ནི་མ་བསྐོས་པ་དེ་ལ་སྦྱར་ཞིང་སྤྱད་པ་ལས་སོ། །དེ་བཀྲུ་བར་ཆུས་རྐང་པ་འབགས་པ་ཉིད་ན་དེ་ཡིན་ནོ་ཞེས་བྱ་བ་ལ། དེ་ཞེས་བྱ་བ་ནི་མ་ཟིན་པ་ཉིད་དོ། །དེ་བཀྲུ་བར་ཞེས་བྱ་བ་ནི་རྐང་པ་དེ་བཀྲུ་བ་ལའོ། །ཆབ་ཁུངས་དེར་ཞུགས་པ་ཉིད་ནའོ་ཞེས་བྱ་བ་ལ། དེར་ཞེས་བྱ་བ་ནི་ཆབ་ཁུང་ལའོ། །ཞུགས་པ་ཉིད་ན་ཞེས་བྱ་བ་ནི་མ་ཟིན་ནའོ། །སྒོམ་པའི་ཕྱིར་འདུག་པ་བསློང་བར་མི་བྱའོ་ཞེས་བྱ་བ་ལ་འདུག་པ་ཞེས་བྱ་བ་ནི་སྒོམ་པའོ། །དེ་ལ་རྒན་རིམས་སུ་མི་བྱའོ་ཞེས་བྱ་བ་ནི་འདུག་པ་དེ་ལ་རྒན་རིམས་སུ་མི་བྱའོ། །འོན་ཀྱང་འདི་ལྟར་འོངས་པས་བྱ་བ་སྟེ། འདུག་པ་ལ་ཉེ་བར་མཁོ་བའི་སྟན་ལ་ སོགས་པ ་རྣམས་ལ་ཇི་ལྟར་འོངས་པ་ཉིད་ཀྱིས་ལོངས་སྤྱད་པ་སྟེ། ཇི་ལྟར་རྒན་རིམས་སུ་ལོངས་སྤྱད་པར་བྱ་བ་མ་ཡིན་ཏེ་དེ་བས་ན་དེའི་འདི་བྱ་
བའོ། །འདིར་གཞུང་ནི་དགེ་སློང་དག་སྤོང་བའི་ཁང་པ་ན་འཁོད་ཅིང་དགེ་བའི་ཕྱོགས་དག་བྱེད་པ་ན། དྲུག་སྡེ་དག་འོངས་ཏེ་ངེད་ཅག་རྒན་ནོ་ཞེས་བྱ་བས་སློང་བར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། འདི་ལ་རྒན་རིམས་སུ་མི་བྱའོ་ཞེས་གསུངས་པ་ཡིན་ནོ། །དགེ་སློང་ལས་དང་ཟས་ཀྱིས་འབགས་པ་མི་བྱའོ་ཞེས་བྱ་བ་ནི་ལས་དང་ཟས་བརྩམས་པས་འབགས་པ་བསླང་བར་མི་བྱའོ། །བྱུག་རིས་མ་ཡིན་པར་འདུག་པར་མི་བྱའོ་ཞེས་བྱ་བ་ནི་རང་གི་གོ་མ་ཡིན་པ་ནི་བྱུག་རིས་མ་ཡིན་པ་སྟེ་དེར་འདུག་པར་མི་བྱའོ། །བྱ་བ་བྱས་ནས་འཁོར་ཞིང་སྤྱད་པ་འདོད་པ་ཡོད་ན་བཅང་བར་མི་བྱའོ་ཞེས་བྱ་བ་ལ། འཁོར་ཞིང་སྤྱད་པ་ཞེས་བྱ་བ་ནི་ཇི་ལྟར་འོས་པའི་སྤྱོད་པ་ལ་སྤྱད་པར་བྱ་བའོ། །བར་དུ་དོན་གྱི་ཆེད་ཉིད་དུ་ཁྲིའུ་ལས་ལངས་པ་ནི་བྱ་བ་བྱས་པ་ཉིད་མ་ཡིན་ནོ་ཞེས་བྱ་བ་ནི་བར་མ་བྱ་བ་ཉིད་ཀྱི་དབང་གིས་ཐ་མ་བྱས་པ་ཉིད་ལ་དུ་དུང་ལས་སྔ་མ་བརྩམས་པ་གང་ཡིན་པ་དང༌། ཁྲིའུ་ལས་བབས་པ་གང་ཡིན་པ་དེ་ལ་འདི་བྱ་བ་བྱས་པ་ཉིད་དུ་ཤེས་པར་བྱ་བ་མ་ཡིན་ནོ། །དེའི་དུས་ན་དེ་ལ་ཆོས་གོས་སམ་པུས་འཁྱུད་གཞག་པར་བྱའོ་ཞེས་བྱ་བ་ནི་ཁྲིའུའོ། །དེའི་དུས་ན་ཞེས་བྱ་བ་ནི་བར་མ་བྱས་པ་ཉིད་ཀྱི་དབང་གིས་དུས་ལ་བཏང་བའི་དུས་ལའོ། །འདོད་པ་ཡོད་ལ་གནས་ཡོད་ན་དགེ་འདུན་གྱི་སྤགས་པ་ཉིད་བརྟེན་པར་མི་བྱའོ་ཞེས་བྱ་བ་ནི་གལ་ཏེ་དོན་དུ་གཉེར་བ་གཞན་དག་ཡོད་ན་འགྲོ་བ་ཡང་ཡོ་ན་དེས་དགེ་འདུན་གྱི་ཡོ་བྱད་སྦགས་པ་ཉིད་སྟེན་པར་མི་བྱའོ། །དོན་ཡོད་ན་རྣམས་པ་དེ་ལྟ་བུ་ལས་བྲལ་བར་བྱས་པ་ལ་ཁ་ན་མ་ཐོབ་མེད་དོ་ཞེས་བ་ནི་དོན་ཡོད་པ་ཉིད་དང་འདོད་པའི་གང་ཟག་གཞན་ཡོད་པ་ལ་གང་ལ་སྦགས་པ་ཡོད་པ་ཉིད་བསྟེན་པའོ། །དེ་ལྟ་བུར་གྱུར་པ་ལས་ཡོ་བྱད་དེ་ལས་བྲལ་བར་བྱ་སྟེ་ཁྱེར་བ་ལ་ཁ་ན་མ་ཐོ་བ་མེད་པའོ། །ཅི་དགོས་པ་མེད་ཀྱང་ཁ་ན་མ་ཐོ་བ་མེད་པ་ཡིན་ནམ་ཞེ་ན། དེའི་ཕྱིར། དོན་ཡོད་ན་ཞེས་བྱ་བ་སྨོས་ཏེ། དགོས་པ་ཡོད་པ་ལ་ཡིན་གྱི་མེད་ན་ནི་མ་ཡིན་ནོ། །དགེ་འདུན་གྱི་མཆིག་དང་མཆིག་གུ་བཅང་བར་བྱའོ། །འདྲེག་མཁན་གྱི་ལག་ཆ་ཡང་ངོ་ཞེས་བྱ་བ་ཡང་བཅང་བར་བྱའོ་ཞེས་བྱ་བའི་རྫས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དགེ་སློང་གི་དགེ་འདུན་གྱི་ཕྱིར་བཅད་པའོ། །སྣོད་དུ་བཅུག་སྟེ་རྩིག་པ་ལ་
གཞག་གོ་ཞེས་བྱ་བ་ནི་འདྲེག་མཁན་གྱི་ལག་ཆའོ། །འདིར་གཞུང་ནི་ཕྲན་ཚེགས་དག་ལས། དགེ་སློང་གིས་དགེ་འདུན་གྱི་ཕྱིར་འདྲེག་མཁན་གྱི་ལག་ཆ་བཅང་བར་བྱ་ཞིང་སྣོད་དུ་བཅུག་སྟེ་རྩིག་པ་ལ་གཞག་པར་བྱའོ་ཞེས་གསུངས་པ་ཡིན་ནོ། །སྟེའུ་དང་སྟ་རེ་དང་གཟོང་ལ་ སོགས་པ ་དང་དེ་དག་གི་སྣོད་དང་བཅས་པ་ཡང་ངོ་ཞེས་བྱ་བ་ཡང་དགེ་འདུན་གྱིས་བཅང་བར་བྱའོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་ཏེ། དེ་དག་གི་སྣོད་དང་བཅས་པ་ཞེས་བྱ་བ་ནི་སྟེའུ་དང་སྟ་རེ་དང་གཟོང་ལ་ སོགས་པ ་དེ་དག་གི་སྣོད་དོ། །འདིར་གཞུང་ནི་ཤིང་དག་གཤགས་པར་མི་ནུས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་གྱི་ཕྱིར་སྟེའུ་དང་སྟ་རེ་དང་གཟོང་བཅང་བར་བྱའོ། །དགེ་སློང་ཞིག་གི་ཧྲི་ཆག་ནས་དགེ་སློང་དེས་སྨྲས་པ་ན་ཁོ་བོ་ལ་གཟོད་ཡོད་དེ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། དབེན་པའི་ཕྱོགས་སུ་བྱའོ། །དགེ་འདུན་གི་སྟེའུ་དང་སྣོད་ཀྱང་བཅང་བར་བྱའོ། །གང་ཟག་གིས་འཆང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ངེས་གཡར་པོ་ཉིད་དུ་ས་ལས་བྱས་པ་ཡང་ཆད་སྦྱིན་ནོ་ཞེས་བྱ་བ་ནི་དགེ་འདུན་དེས་དགེ་སློང་དེ་ལ་ལག་ཆའི་སྣོད་ཐ་ནས་ལས་བྱས་པ་ཡང་ཆད་ཀྱང་གཡར་པོ་ཉིད་དུ་སྦྱིན་པར་བྱའོ་ཞེས་བྱ་བའི་དོན་ཏོ། །དགེ་སློང་མས་མཆིང་བུའི་སྣོད་བཅང་བར་མི་བྱའོ། །ཐམས་ཅད་ཀྱིས་འབྲུ་མར་གྱི་སྣོད་བཅང་བར་བྱའོ་ཞེས་བྱ་བ་ནི་དགེ་སློང་དང་དགེ་སློང་མ་ཐམས་ཅད་གྱིས་སོ། །ཕུལ་གང་མན་ཆད་ནས་ཕུལ་ཕྱེད་ཡན་ཆད་ཤོང་བའོ་ཞེས་བྱ་བ་ནི། འདིར་ཡན་ཆད་ཀྱི་སྒྲ་བྲི་བར་བྱ་སྟེ་ཕུལ་ཕྱེད་ཡན་ཆད་ཅེས་བྱ་བའི་དོན་ཏོ། །ལྕགས་ཀྱི་དོག་ལེ་ཡང་ངོ་ཞེས་བྱ་བ་ནི་ཐམས་ཅད་ཀྱིས་བཅང་བར་བྱའོ། །དེའི་ལྕགས་སྒྱེད་ཀྱང་ངོ་ཞེས་བྱ་བ་ནི་ལྕགས་ཀྱི་དོག་ལེའི་ལྕགས་སྒྱེད་རྐང་པ་གསུམ་པའམ། རྐང་པ་བཞི་པ་ཡང་བཅད་བར་བྱའོ་ཞེས་གསུངས་པ་ཡིན་ནོ། །ས་ལས་བྱས་པའི་ཐབ་ཀྱང་ངོ་ཞེས་བྱ་བ་ནི་རྒྱ་ཐབ་དང་སྐྱེད་པོ་ཡང་བཅང་བར་བྱའོ། །གནང་བ་ཐོབ་པས་འཁར་བའོ་ཞེས་བྱ་བ་ནི་གནང་པ་ཐོབ་པ་ཐམས་ཅད་ཀྱིས་བཅང་བར་བྱའོ། །དྲ་བ་ཁ་དོག་གཅིག་པ་ཡང་ངོ་ཞེས་བྱ་བ་ནི་འདིར་དྲ་བ་ཞེས་བྱ་བ་ནི་བྱ་རྒྱའི་རྣམ་པ་ལྟ་བུ་ཡིན་པར་ཤེས་པར་བྱ་སྟེ། འདི་
ཉིད་དུ་དེ་གྲགས་པའི་ཕྱིར་རོ། །འདིར་གཞུང་ནི་བཅོམ་ལྡན་འདས་ཀྱིས་དྲ་བ་ཉེ་བར་གཞག་པར་བྱའོ་ཞེས་བཀའ་སྩལ་པ་དང༌། དྲུག་སྡེ་དག་གིས་ཚོན་སྣ་ལྔའི་དྲ་བ་དག་ཉེ་བར་བཞག་ནས། བཅོམ་ལྡན་འདས་ཀྱིས་བཀའ་སྩལ་པ། ཚོན་སྣ་ལྔའི་དྲ་བ་དག་ཉེ་བར་གཞག་པར་མི་བྱའོ་ཞེས་གསུངས་པ་ཡིན་ནོ། །དེའི་ཕྱིར་དྲ་བ་ཁ་དོག་གཅིག་པ་ཡང་ངོ་ཞེས་བྱ་བ་སྨོས་སོ། །གནང་བ་འདི་དག་ལ་སྦྱིན་པར་རིགས་སམ་ཞེ་ན། དེའི་ཕྱིར་དེ་སྦྱིན་པར་བྱའོ་ཞེས་བྱ་བ་སྨོས་སོ། །ཅི་ཐམས་ཅད་ལ་འམ་ཞེ་ན་དེའི་ཕྱིར་རྒས་པ་དང་ནད་པ་དག་ལའོ་ཞེས་བྱ་བ་ལ་སྨོས་སོ། །དེ་གཉིས་ཚིག་གཅིག་གིས་སྦྱིན་པ་ཡང་སྲིད་དོ་ཞེས་བྱ་བ་ནི་གཅིག་གིས་ཞེས་བྱ་བ་ནི་སྔགས་ཀྱི་ཚིག་གཅིག་གིས་སོ། །སྡིག་སྦྲུལ་ལ་ སོགས་པའི་གཉེན་པོའི་ཕྱིར་འཁར་བ་སྒྲ་དང་བཅས་པ ་བཅང་ངོ་ཞེས་བྱ་བ་ལ། སྔར་རྒྱན་པོ་དང་ནད་པ་དག་ལ་གནང་བ་སྦྱིན་པའི་འཁར་བ་ནི་ལུས་རྟེན་པའི་ཕྱིར། བེ་ཅོན་སྦོམ་པོ་རྗེས་སུ་གནང་བ་ཡིན་ནོ། །དེ་དང་མི་འདྲ་བའི་ཕྱིར་དེ་བས་ན་འདིར་རྗེས་སུ་མཐུན་པར་ངེས་པ་སྟེ་དེ་ལས་གཞན་པའི་སྐབས་ཀྱི་བྱེ་བྲག་མེད་དོ། །དེ་བས་ན་དེ་འཆང་བའི་ཆོ་ག་འདི་དགོས་པ་གཞན་གྱིས་བརྗོད་པར་ཤེས་པར་བྱའོ། །མ་མོ་དག་ལས་དེ་དང་པོར་བྱ་སྟེ། དེ་བྱིན་པས་ཞེས་བྱ་བའི་བར་དུ་གསུངས་པ་ཡིན་ནོ། །ཡུ་བའི་རྩ་བས་ནས་གས་ན་སྦུ་གུ་བསྐོན་ནོ་ཞེས་བྱ་བ་ལ་འཁར་བའི་ཡུ་བ་དང༌། འཁར་གསིལ་གྱི་ཡུ་བ་དང༌། གོས་ཀྱི་སྲོག་ཤིང་གི་ཡུ་བ་ངག་ཅེས་སྨོས་པས་གཟུང་བའོ། །དེ་དག་གི་རྩ་བ་མ་ཐོག་གས་ན་ལྕགས་ཀྱི་སྤུ་གུ་ངོས་གཅིག་ནས་ཞབས་བཅུག་པ་བསྐོན་པར་བྱའོ། །ཡ་ཐོག་དཀྲི་བས་སོ་ཞེས་བྱ་བ་ནི་ཡུ་བ་དེ་དག་གི་ཡ་ཐོག་གས་ན་དཀྲི་བ་བསྐོན་པར་བྱ་སྟེ། ལྕགས་ཀྱི་གླེགས་བུས་ཀུན་ནས་འཁོར་བར་དཀྲི་བར་བྱའོ། །འདིར་གཞུང་ནི་རྒྱལ་པོའི་ཁབ་ཀྱི་གྲོང་ཁྱེར་གྱི་བསིལ་བའི་ཆལ་གྱི་དུར་ཁྲོང་ན་སྡིག་སྦྲུལ་དག་མང་བས་དེ་ན་དགེ་སློང་དུར་ཁྲོད་དུ་འགྲོ་བ་དག་སྡིག་སྦྲུལ་དག་གིས་ཟིན་པ་ནས། བཅོམ་ལྡན་འདས་ཀྱིས་བཀའ་སྩལ་པ། སྡིག་སྤྲུལ་བཟློག་པའི་ཕྱིར་འཁར་བ་སྒྲ་དང་བཅས་པ་རྗེས་སུ་གནང་ངོ་ཞེས་བྱ་བའི་བར་དུ་གསུངས་པ་ཡིན་ནོ། །སྨྱིག་མ་མཁན་གྱིས་བྱས་པའམ་ལོ་མ་ལས་བྱས་པའི་གདུགས་བཅང་
བར་བྱའོ་ཞེས་བྱ་བ་ལ། སྨྱིག་མས་འཚོ་བ་ནི་སྨྱིག་མ་མཁན་ཏེ། དེ་ནི་སྐྱེ་བོ་ཐམས་ཅད་ཀྱི་དོན་དུ་གདུགས་ཁྲ་བོ་བཀྲ་བ་དག་བྱེད་པས་དེ་འདིར་ཉེས་པ་མེད་པར་བསྟན་པའི་ཕྱིར་སྨྱིག་མ་མཁན་གྱི་སྒྲས་སྨོས་པར་བྱའོ། །དེ་ལས་གཞན་པ་ཁྲ་བོ་བཀྲ་བ་དག་བརྟག་པར་བྱ་བ་མ་ཡིན་ནོ། །ཡུ་བ་ནི་ལུས་ཀྱི་ཚད་དོ་ཞེས་བྱ་བ་ནི་ལུས་ཀྱི་ཚད་ཀྱི་ཡུ་བ་འདིར་ཞེས་བསྡུ་བའོ། །དེས་གྲོང་དབུས་སུ་འགྲོ་བར་མི་བྱའོ་ཞེས་བྱ་བ་ལ་དེས་ཞེས་བྱ་བ་ནི་གདུགས་དེས་སོ། །གལ་ཏེ་ལམ་གྱི་དབང་གིས་ན་གློར་བསྙལ་ཏེའོ། །ཆར་འབབ་པ་ཉིད་ན་བསོད་སྙོམས་ལ་རྒྱུ་བར་བྱའོ་ཞེས་བྱ་བ་ནི་གདུགས་ཀྱིས་གྲོང་དབུས་སུའོ། །ཡུ་བ་ལ་གཞར་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི་འདིར་དྲི་མ་བཀྲུ་བར་བྱ་བའི་ཕྱིར་ཡུ་བ་ལ་བྱི་དོར་བྱ་བར་རིག་པར་བྱ་སྟེ། །འདིར་དེ་ལྟར་བརྗོད་པར་བྱའོ། །ཆད་ན་ཁྱིམ་དག་ཏུ་གཞག་གོ་ཞེས་བྱ་བ་ནི་ཆར་པ་ཆད་ན་དེའི་དྲུང་དུ་འདུག་པའི་ཁྱིམ་གང་ཡིན་པ་དེར་འདུགས་ཏེ་བཏགས་ཏེ་གཞག་གོ །འབྱུང་ཁར་བླང་ངོ་ཞེས་བྱ་བ་ནི་གདུགས་གང་དུ་གཞག་པའི་གྲོང་དེ་ནས་ཕྱིར་འབྱུང་ཁར་དེ་བླང་ངོ༌། །གཙུག་ལག་ཁང་ན་གནས་པའི་སྐབས་བཤད་ཟིན་ཏོ།། །།ད་ནི་གནས་གཞན་ན་གནས་པའི་སྐབས་བརྗོད་པར་བྱ་སྟེ། །རོལ་མོ་མཁན་གྱི་གནས་དང༌། སྨད་འཚོང་མའི་གནས་དང༌། ཆང་འཚོང་མའི་གནས་དང༌། རྒྱལ་པོའི་ཕོ་བྲང་དང༌། གདོལ་པའི་ཁྱིམ་གྱི་གནས་དག་བསྟེན་པར་མི་བྱའོ་ཞེས་བྱ་བ་ལ། རོལ་མོ་ཞེས་བྱ་བ་ནི་གྲུ་མཁན་ལ་ སོགས་པ ་རྩེ་འཇོའི་གནས་སོ། །གདོལ་བའི་ཁྱིམ་གྱི་གནས་དག་ཞེས་བྱ་བ་ནི་གདོལ་པའི་གནས་དག་གོ །དེ་ལྟར་སྤྱོད་ཡུལ་མ་ཡིན་པའི་གནས་ལྔ་པོ་དེ་དག་ཏུ་འཇུག་པར་མི་བྱའོ། །མི་གཙང་བའི་སྐྱབས་དང་ཉེ་བར་འདུག་པར་མི་བྱའོ་ཞེས་བྱ་བ་ནི་འཇུག་པའི་ཕྱིར་སོང་ན་ཡང་དེའི་ཉེན་ཀོར་དུ་བསྡད་པར་མི་བྱའོ། །འདིར་གཞུང་ནི་གླེང་གཞི་དག་ལས་དེ་ལྟ་བས་ན། དགེ་སློང་གིས་ཆབ་ཁུང་སར་སོང་ན་འདུ་འཛིས་གནས་པར་མི་བྱའོ། །དེའི་ཉེ་འཁོར་དུ་ལུང་དབོག་པར་མི་བྱ་བཀླག་པར་མི་བྱ་བ་ཁ་ཏོན་མི་བྱའོ་ཞེས་བྱ་བ་ལ་ སོགས་པ ་གསུངས་པ་ཡིན་ནོ། །གོས་རིན་པོ་ཆེར་གྱུར་བས་དགོན་པར་གནས་པར་མི་བྱའོ་ཞེས་བྱ་བའི་ལ་བ་རིན་པོ་ཆེ་ལ་ སོགས་པ ་རིན་ཆེ་བས་སོ། །ལྡུམ་བུ་
ནི་མེ་རུ་ཀའི་ཕྱེ་མས་ལ་བ་ལ་སྲོག་ཆགས་དག་མི་འབྱུང་ངོ༌། །ཤིང་ཀུན་གྱིས་ཀྱང་ངོ་ཞེས་བྱ་བ་ལ་ཤིང་ཀུན་ཕྱེ་མས་ཀྱང་ལ་བ་ལ་སྲོག་ཆགས་དག་གི་འབྱུང་བའོ། །ཤིང་ནིམ་པ་དང་བ་ཤ་ཀའི་ལོ་མ་དག་གིས་ཀྱང་ངོ་ཞེས་བྱ་བ་ནི་ཤིང་ནིམ་པ་དང་བ་ཤ་ཀའི་ལོ་མ་དག་གིས་ཀྱང་ངོ་ཞེས་བྱ་བའི་དོན་ནོ། །རིམ་པ་དེར་སོང་ན་དེ་ལ་ཤིང་ཏུ་ཕན་པ་ཉིད་དོ་ཞེས་བྱ་བ་ལ། རིམ་པ་དེར་སོང་ན་ཞེས་བྱ་བ་ནི་རིམ་པ་དེ་ལ་ཤིན་ཏུ་ཕན་པ་ཉིད་དུ་འགྱུར་ཏེ། དེ་ཙམ་གྱི་མཐུས་རིམ་པ་གཞན་ལ་ཡང་ཤིང་ཏུ་ཕན་པའི་དྲི་འབྱུང་ངོ༌། །དེ་རྣམས་ལ་ཡང་ཕན་པ་དེ་ཉིད་འབྱུང་བའོ། །སྐམ་པ་ཡང་དེའི་དོན་ཉིད་ཡིན་ནོ་ཞེས་བྱ་བ་ནི་གོས་སྐམ་པ་ཡང་སྲོག་ཆགས་མི་སྐྱེ་བ་དེའི་དོན་ཉིད་ཡིན་པའོ། །འདིར་གཞུང་ནི་དུས་སུ་བསྐམ་པར་བྱའོ་ཞེས་གསུངས་པ་ཡིན་ནོ། །དགོན་པ་བས་ཕྱོགས་དང་ལམ་དང༌། ཚེས་གྲངས་དང་ཉི་མ་དང་རྒྱུ་སྐར་དག་ལ་མཁས་པར་བྱའོ་ཞེས་བྱ་བ་ནི་དགོན་པ་པས་དེ་དག་ཤེས་པར་བྱ་བའོ། །རྟག་ཏུ་མེད་དང་ཆུ་ཡོད་པར་རོ། །ཕྱེ་དང་རས་མ་དག་དང་སྦྲང་རྩི་དང་ཞུན་མར་དག་ཅི་འབྱོར་བ་ཉེ་བར་གཞག་པར་བྱའོ་ཞེས་བྱ་བ་ལ། ཕྱེ་དང་ཞེས་བྱ་བ་ཐམས་ཅད་དུ་ཅི་འབྱོར་བ་ཞེས་བྱ་བ་ལ་ལྷག་མ་ཉིད་ལ་ཡང་རིག་པར་བྱའོ། །འདིར་གཞུང་ནི་ཕྱེ་དང་སྦྲང་རྩི་དང་ཞུན་མར་ཅི་འབྱོར་པ་ཉེ་བར་གཞག་པར་བྱའོ་ཞེས་གསུངས་པ་ཡིན་ནོ། །གལ་ཏེ་ཟས་ལས་ལྷག་རོལ་བྱུང་ན་ཡང་ངོ་ཞེས་བྱ་བ་ནི་གལ་ཏེ་ཟས་ལས་ལྷག་རོལ་ལུས་པར་གྱུར་ན་ཡང་ཉེ་བར་གཞག་པར་བྱའོ་ཞེས་བྱ་བའི་དོན་ཏོ། །དགེ་སློང་མས་དགོན་པར་གནས་པར་མི་བྱའོ། །གྲོང་ཁྱེར་གྱི་ནང་དུ་དབྱར་ཁང་བྱའོ། །དེས་དེའི་ཕྱིར་སྒོར་འདུག་པར་མི་བྱའོ་ཞེས་བྱ་བ་ལ། དེའི་ཞེས་བྱ་བ་ནི་དབྱར་ཁང་དེའི་འོ། །དེས་ཞེས་བྱ་བ་ནི་དགེ་སློང་མ་དེས་སོ། །སྣང་གཡེལ་ཅན་དུ་མི་བྱའོ་ཞེས་བྱ་བ་ནི་འདུག་པར་ཏེ། འདིར་སྣང་གཡེལ་ཞེས་བྱ་བ་སྐར་ཁུང་འབའ་ཞིག་ཏུ་མ་ཟད་ཀྱི་གང་དུ་ཕྱི་རོལ་སྣང་བ་ཐམས་ཅད་ཡང་ཡིན་པར་རོ། །ལམ་བཞི་མདོར་མི་བྱའོ། །གོས་མེད་པ་ཅན་གྱིས་མི་བྱའོ་ཞེས་བྱ་བ་ནི་འདུག་པར་མི་བྱའོ་ཞེས་བྱ་བར་སྦྱར་རོ། །དབྱར་ཁང་ཞེས་སྨོས་པ་ནི་ལམ་གྱི་བཞི་མདོ་ལས་ལོག་པ་སྟེ། ཐམས་ཅད་དུ་ཆོ་ག་འདི་ཉིད་ཡིན་ནོ། །དེ་ལ་རྡུལ་གཞན་ནི་གོས་
ཉིད་ཡིན་ནོ་ཞེས་བྱ་བ་ལ། དེ་ལ་ཞེས་བྱ་བ་ནི་དེ་ཐོག་མར་གསུངས་པའི་ཆོ་ག་ལའོ། །དཔུང་པ་གཉིས་མ་གཡོགས་པར་ཁྱིམ་པའི་དྲུང་དུ་མི་བྱའོ་ཞེས་བྱ་བའི་རྡུལ་གཞན་གྱི་གོས་ཉི་གོན་དུ་ཟིན་ཀྱང་དཔུང་པ་གཉིས་མ་གཡོགས་པར་ཁྱིམ་པའི་དྲུང་དུ་འདུག་པར་མི་བྱའོ་ཞེས་བྱ་བའི་དོན་ཏོ། །དེའི་སྐྱིལ་མོ་ཀྲུང་གི་གནས་སུ་སྐྱིལ་མོ་ཀྲུང་ཕྱེད་དོ་ཞེས་བྱ་བ་ལ། སྐྱིལ་མོ་ཀྲུང་གི་གནས་སུ་སྐྱིལ་མོ་ཀྲུང་ཕྱེད་ཀྱིས་འདིར་ཏིང་ངེ་འཛིན་ལ་འདུག་པར་བྱའོ་ཞེས་བའི་དོན་ཏོ། །ཟག་བྱེད་ཀྱི་སྒོར་སྲོག་ཆགས་མི་འཇུག་པར་བྱ་བའི་ཕྱིར་གོས་ལ་ སོགས་པས་གཡོག་གོ །དགེ་སློང་དག་གིས་དགེ་སློང་མ་གཙུག་ལག་ཁང་དུ་འཇུག་པ ་བཟློག་པར་མི་བྱའོ། །དེ་དག་གཏམ་མི་འདྲེ་བ་དན་མི་གདམས་པ་དང་གསོ་སྦྱོང་དང་དགག་དབྱེ་གཞག་པ་དག་གིས་ཡོངས་སུ་གདུལ་བར་བྱའོ། །དེས་དགེ་སློང་རྗེས་སུ་གནང་བ་བྱེད་དུ་མ་བཅུག་པར་གཙུག་ལག་ཁང་འདུ་འཇུག་པར་མི་བྱའོ་ཞེས་བྱ་བ་སྨོས་ན། དགེ་སློང་གིས་དེ་ལ་ཇི་ལྟར་རྗེས་སུ་གནང་བར་བྱ་ཞེ་ན། དེའི་ཕྱིར་ཁྱོད་ནད་དང་བཅས་པ་མ་ཡིན་ན་རྗེས་སུ་གནང་ངོ་ཞེས་སོ་ཞེས་བྱ་བ་སྨོས་སོ། །དེ་བཞིན་དུ་རྗེས་སུ་གནང་བར་བྱ་བ་འམ་ཞེ་ན། དེའི་ཕྱིར་དྲི་བ་ཞེ་འགྲས་པ་མེད་པ་ཉིད་ངེས་པར་ཤེས་པར་བྱས་ཏེའོ་ཞེས་བྱ་བ་སྨོས་ཏེ། དྲི་བ་གང་གིས་དེ་ལ་ཞེ་འགྲས་པ་མེད་ཅིང་དྲི་བ་དེ་ཤུགས་ཀྱིས་ཤེས་པར་བྱའོ། །གནས་ཀྱི་ཡང་དག་པར་སྦྱོར་བའི་སྐབས་བཤད་ཟིན་ཏོ།། །།ད་ནི་སྤ་བའི་རྣམ་པར་གཞག་པ་དང་ཡོངས་བསྐྱབ་པའི་སྐབས་བརྗོད་པར་བྱ་སྟེ། འཕྲེད་གཏན་དང་གནམ་གཟེར་དང༌། འཁོར་གཏན་དང་སྒོ་ལྕགས་དང་ལྡེ་མིག་ཀྱོག་པོ་དག་གཙུག་ལག་ཁང་བསྡམས་པའི་ཕྱིར་ཡང་དག་པར་སྦྱར་རོ་ཞེས་བྱ་བ་ལ། འདིར་གཞུང་ནི་སིལ་བུ་དག་ལས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ལྔ་པོ་འདེ་དག་ནི་སྔོམ་པར་བྱེད་པ་དག་ཡིན་ཏེ་ལྔ་གང་ཞེ་ན། འཕྲེད་གཏན་དང་གནམ་གཟེར་དང་འཁོར་གཏན་དང་སྒོ་ལྕགས་དང་ལྡེ་མིག་ཀྱོག་པོ་སྟེ། དེ་དག་གཙུག་ལག་ཁང་ན་བདོག་ན་དེ་དག་ཐམས་ཅད་དགེ་སྐོས་ཀྱིས་བཅང་བར་བྱའོ་ཞེས་གསུངས་པ་དང༌། རྣམ་པར་འབྱེད་པ་ལས་ཀྱང་དགེ་འདུན་གྱི་གནས་བརྟན་དགེ་སློང་གིས་དགེ་སྐོས་ལ་ཚེ་དང་ལྡན་པ་ཁྱོད་
གྱིས་སྒོ་བཅད་དམ། གཙུག་ལག་ཁང་སོ་སོར་བརྟགས་སམ་ཞེས་བྲི་བར་བྱའོ་ཞེས་གསུངས་པ་དང་མ་མོ་ལས་ཀྱང༌། བཅོམ་ལྡན་འདས་ཀྱིས་དགེ་སློང་རྣམས་ལ་གནས་མལ་བསྲུང་བའི་ཕྱིར་ལྡེ་མིག་འཁྱོག་པོ་རྗེས་སུ་གནང་ངོ་ཞེས་གསུངས་པ་ཡིན་ནོ། །དགེ་སྐོས་ཀྱིས་དགོངས་ཀར་གཙུག་ལག་ཁང་སོ་སོར་བསྡམས་ནས་སོ་སོར་བརྟག་པར་བྱའོ་ཞེས་བྱ་བ་ནི་གཙུག་ལག་ཁང་བསྡམས་ནས་དགོངས་ཀར་སོ་སོར་བརྟག་པར་བྱ་སྟེ། གཙུག་ལག་ཁང་ཞེས་བྱ་བ་དང་སྦྱར་བར་བྱའོ། །སྒོ་བསྡམས་ནས་དེའི་ཞེས་བྱ་བ་རིག་པར་བྱའོ། །འཇིགས་པ་དང་བཅས་པ་ཉིད་ཡིན་ན་ཐུན་པ་ཉིད་ཀྱིས་མེལ་ཚེ་བྱའོ། །དེར་གྱུར་བས་ཉལ་བ་དང་སྙོམས་པར་ཞུགས་པ་དག་སྤང་ངོ་ཞེས་བྱ་བ་ལ། དེར་གྱུར་པ་ཞེས་བྱ་བ་ནི་མེལ་ཚེའི་ཐུན་པར་གྱུར་པས་གནས་པའོ། །དང་པོར་སྤང་བར་བྱ་བའི་སྒྲ་མི་བྱེད་པ་དེས་པར་རྟོགས་པར་བྱའོ། །གཞན་དུ་མ་ཡིད་རྟོན་པ་ལ་འཁུས་པར་འགྱུར་རོ། །དེ་དག་ལ་འཁུ་བ་ཡོད་པ་ཞེས་བྱ་བ་འདིར་དེས་པར་རྣམ་པར་གཞག་གོ །དེར་དགེ་འདུན་གྱི་གནས་བརྟན་གྱིས་དགེ་སྐོས་ལ་དམ་གཞག་བྱས་པ་ཉིད་དྲི་བར་བྱའོ་ཞེས་བྱ་བ་ལ། དེར་ཞེས་བྱ་བ་ནི་གཙུག་ལག་ཁང་བསྡམས་པ་ལ་ སོགས་པ ་དེར་རོ། །དམ་གཞག་བྱས་པ་ཉིད་ཅེས་བྱ་བ་ནི་བྱ་བ་དང་བྱེད་པ་ལ་ངེས་པར་སྦྱར་བ་དག་གོ །གལ་ཏེ་ཡང་དག་པར་སྦྱོར་བ་དག་གིས་མ་བསྡམས་པ་ཉིད་ན་གཙུག་ལག་ཁང་བརླག་ན་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ནོ་ཞེས་བྱ་བ་ལ། ཡང་དག་པར་སྦྱར་བ་ཞེས་བྱ་བ་ནི་འཕྲེད་གཏན་ལ་ སོགས་པ ་རྣམས་ཀྱིས་སོ། །འཇལ་དུ་གཞུག་བར་བྱ་བ་ནི་བརླག་པའི་དངོས་པོ་དེའོ། །དེ་དག་ཇི་ཙམ་ཉམས་པར་བྱས་བ་དེ་ཙམ་གྱི་ཆ་དག་གོ་ཞེས་བྱ་བ་ནི་བསྡམས་པའི་ཕྱིར་ཡང་དག་པར་སྦྱོར་བ་སུ་དག་ལས་གཅིག་གམ་དུ་མ་འམ་མང་པོས་བསྡམས་པ་མ་བསྒྲུབ་ཤིང་ཉམས་པར་བྱས་ན་ཡང་དག་པར་སྦྱོར་བ་དེ་དག་གི་ཆ་དག་དགེ་སྐོས་འཇལ་དུ་གཞུག་པར་བྱ་བ་ཉིད་ཡིན་ཏེ། གལ་ཏེ་གཅིག་གིས་མ་བསྡམས་ན་གཅིག་གི་ཆ་འཇལ་དུ་གཞུག་གོ །ཇི་དེ་གཉིས་ཀྱིས་མ་བསྡམས་ན་གཉིས་ཀྱི་ཆ་འཇལ་དུ་གཞུག་པའོ། །ཇི་སྲིད་དུ་ལྔ་ཆར་གྱིས་མ་བསྡམས་ན་སྐྱིན་པ་རིལ་གྱིས་འཇལ་དུ་གཞུག་གོ །ལྡེ་
མིག་འཁྱོག་པོ་དང་སྒོ་ལྕགས་བཅད་བར་བྱའོ་ཞེས་བྱ་བ་ནི་ཐམས་ཅད་ཀྱིས་སོ། །སྡོམ་པ་ཇི་སྙེད་ཡོད་པ་དག་གིས་སྒོམ་བསྡམས་བར་འགྲོ་བར་མི་བྱའོ་ཞེས་བྱ་བ་ནི་འཕྲེད་གཏན་ལ་ སོགས་པར་སྡོམ་པར་བྱེད་པ ་ཇི་སྙེད་ཡོད་པ་དེ་དག་ཐམས་ཅད་ཀྱིས་སྒོ་མ་བསྡམས་པར་གཞན་དུ་འགྲོ་བར་མི་བྱའོ་ཞེས་བྱ་བ་སྨོས་སོ། །གལ་ཏེ་གནས་སྟོང་པར་ཞུགས་པར་གྱུར་ན་དེར་ཆགས་ཆག་ལ་ སོགས་པ ་བྱའོ་ཞེས་བྱ་བ་ནི་འདི་ནི་ཡོངས་སུ་བསྐྱང་བའི་རྣམ་པ་སྟེ་དེས་ན་འདིར་ནི་དེ་ཞུགས་པའོ། །སྣོད་སྤྱད་ཙམ་པ་འཁོས་སུ་དབབ་པར་བྱའོ་ཞེས་བྱ་བ་ནི་གནས་ཇི་ལྟ་བ་བཞིན་དུ་བསྡུ་སྐྱོག་བྱ་ཞིང་འཁོས་སུ་དབབ་པར་བྱ་བའོ། །གལ་ཏེ་དེ་བཟོད་ན་བྱི་དོར་བྱའོ་ཞེས་བྱ་བ་ནི་གལ་ཏེ་བཀྲུ་བཤལ་ལ་ སོགས་པ ་བྱི་དོར་བྱ་བ་དེ་བཟོད་ཅིང་འོས་པ་ཡིན་ན་བྱིན་དོར་བྱ་སྟེ་འཁོས་སུ་དབབ་པར་བྱའོ། །གལ་ཏེ་རུང་པར་བྱེད་པ་ཡོད་ན་སྔོ་སྲབ་པར་བྱེད་དུ་གཞུག་གོ །གལ་ཏེ་དེར་ཁྱིམ་པ་དག་ལྷགས་ན་དེ་དག་ལ་ཆོས་དང་ལྡན་པའི་གཏམ་དང་ནུས་པའི་ཆོས་གཞན་ཡང་བྱའོ་ཞེས་བྱ་བ་ལ། གཞན་ཡང་ཞེས་བྱ་བ་ནི་ཟས་སྐོམ་དང་དབྱར་གཟིགས་ལ་ སོགས་པའོ། །གནས་ཀྱི་གཞིའི་ནང་གི་སྐབས་བཤད་ཟིན་ཏོ།། །།ད་ནི་ཕྱིའི་སྐབས་བརྗོད་བར་བྱ་སྟེ། ཤིང་ལྗོན་པ ་བསྐྱེད་བ་མི་རུང་བ་ཉིད་མ་ཡིན་ནོ་ཞེས་བྱ་བ་ལ། འདིར་ཤིང་ལྗོན་བ་ཞེས་བྱ་པ་ནི་ནགས་མ་དང་གེལ་བ་དང་འཁྲི་ཤིང་དང་ཏཱ་ལ་ལ་ སོགས་པ ་དག་བསྟན་པར་རིག་པར་བྱའོ། །དེ་སྐྱེད་ནས་མི་བསྐྱང་བར་མི་བྱའོ་ཞེས་བྱ་བ་སྨོས་ན། ཤིང་ལྗོན་པ་བསྐྱེད་ནས་དུས་ཇི་སྲིད་དུ་བསྐྱང་བར་བྱ་ཞེ་ན་དེའི་ཕྱིར། དེའི་ཤིང་ལྗོན་པ་ནི་མེ་ཏོག་ཆགས་ཀྱི་བར་དུའོ་ཞེས་བྱ་བ་སྨོས་ཏེ། མེ་ཏོག་གི་ཤིང་ལྗོན་པ་ནི་མེ་ཏོག་ཆགས་ཀྱི་བར་དུ་བསྐྱང་བར་བྱའོ། །གཞན་ནི་འབྲས་བུའི་བར་དུའོ་ཞེས་བྱ་བ་ནི་འབྲས་བུའི་ཤིང་ལྗོན་པ་ནི་འབྲས་བུ་ཆགས་ཀྱི་བར་དུ་བསྐྱང་བར་བྱའོ། །གང་ལ་མེ་ཏོག་དང་འབྲས་བུ་གཉིས་ཀ་ཡང་གྲུབ་པའི་ཤིང་ལྗོན་པ་དེ་ལ་ནི་གང་གི་དོན་དང་ལྡན་པ་ཉིད་དུ་ཆེས་གྲགས་པ་དེས་རྣམ་པར་གཞག་གོ །ཡུན་རིང་པ་ཉིད་ན་ལོ་ལྡར་རོ་ཞེས་བྱ་བ་ནི་མེ་ཏོག་དང་འབྲས་བུ་ཆགས་བ་དེ་གཉིས་ནི་ཡུན་རིང་བ་ཉིད་ལོ་ལྡར་བསྐྱང་བར་བྱའོ། །འདི་ལ་དགེ་སློང་བསྐོས་པ་ནི་རང་ཉིད་དང་འདྲའོ་ཞེས་བྱ་བ་ནི་ཤིང་ལྗོན་པ་བསྐྱེད་པ་བསྐྱབ་བ་
འདི་ལ་དགེ་སློང་གཞན་ལ་བཅོལ་ཞིང་བསྐོས་བ་ནི་རང་ཉིད་དང་འདྲ་སྟེ། དགེ་སློང་བསྐོས་པས་བསྐྱང་བར་བྱས་ན་རང་ཉིད་ཀྱིས་བསྐྱང་བ་བྱས་པ་དང་འདྲ་བ་ཡིན་ནོ་ཞེས་བྱ་བའི་དོན་ཏོ། །འདིར་གཞུང་ནི་དགེ་སློང་ཀུན་དགའ་ར་བ་བསྐྱེད་པས་ལོ་ལྡ་གར་ཡང་འགྲོ་བར་མི་བྱའོ། །གལ་ཏེ་འགྲོན་ན་དགེ་སློང་ལ་རྗེས་སུ་གཏད་དེ་འགྲོ་བར་བྱའོ་ཞེས་གསུངས་པ་ཡིན་ནོ། །ཅི་དེ་དང་རྩེ་གཅིག་པ་ཉིད་ཀྱིས་བཅུ་པའི་བདག་ཉིད་ཀྱིས་བསྐྱང་བར་ཇི་ལྟར་བྱ་ཞེ་ན། དེའི་ཕྱིར། །ལག་པ་དག་དང་རྐང་བ་དག་བཀྲུ་བ་དང་སོ་ཞིང་དོར་བ་དང་ལྷུང་བཟེད་བཀྲུ་བ་དང་ཁྲུས་བྱས་པ་ནི་བཅུ་པ་ཡིན་ནོ། །གྲང་བ་སྐྱོབ་པའི་ཕྱིར་ཁང་བུའི་སྦུབས་བྱའོ། །དབུགས་དབྱུང་བའི་ཕྱིར་དེ་ལ་སྐར་ཁུང་གདོད་དོ་ཞེས་བྱ་བ་སྨོས་ཏེ། དེ་ལ་ཞེས་བྱ་བ་ནི་ཁང་བུའི་སྦུབས་དེ་ལའོ། །གཡོགས་མས་དགབ་པོ་ཞེས་བྱ་བ་ནི་གྲང་བ་བསྐྱབ་པའི་ཕྱིར་ཁོ་ནར་ཁང་བུའི་སྦུབས་དེ་གཡོགས་པར་བྱ་བའོ། །སོ་ག་མི་ཚ་བར་བྱ་བའི་ཕྱིར་བསལ་འོ་ཞེས་བྱ་བ་ནི་སོ་ག་ཤིང་ལྗོན་པ་དེ་མི་ཚ་བར་བྱ་བའི་ཕྱིར་གཡོགས་མ་དེ་བསལ་བར་བྱ་བའོ། །དབྱར་དག་ནི་མི་འདྲུལ་བར་བྱ་བའི་ཕྱིར་སྔ་མ་ཡང་དེ་ཞེས་བྱ་བ་ལ་སྔ་མ་ཞེས་བྱ་བ་ནི་ཁང་བུའི་སྦུབས་དེ་ཡང་བསལ་བར་བྱའོ། །ཆུའི་ཡུར་བ་གདོད་དོ་ཞེས་བྱ་བ་ནི་ཁང་བུའི་སྦུབས་དེ་ལའོ། །རྩ་བའི་འོངས་ཡལ་བར་མི་དོར་རོ་ཞེས་བྱ་བ་ལ། རྩ་བའི་འོངས་ཞེས་བྱ་བ་ནི་ཤིང་ལྗོན་པའི་འོངས་སོ། །འདིར་གཞུང་ནི་རྩ་བའི་ཐོག་ཡལ་བར་མི་བྱ་ཞིང་བྱི་དོར་བྱའོ་ཞེས་གསུངས་པ་ཡིན་ནོ། །འདིར་གཞུང་ནི་གླེང་གཞི་དག་ལས་འདིར་དང་པོར་བྱས་ཏེ། དེ་རྣམས་འགྲོ་བ་ཞེས་བྱ་བའི་བར་དུ་གསུངས་པ་ཡིན་ནོ། །འཁོར་རྣམ་པར་དབྱེ་བའི་བྱེ་བྲག་གི་བྱི་དོར་བྱའོ་ཞེས་བྱ་བ་སྨོས་ན། ཅི་དེ་ལ་འཇུག་པས་སམ་ཞེ་ན་དེའི་ཕྱིར། ཁ་ཅིག་ཏུ་སོ་ཤིང་བཟའ་བ་དང༌། ཁ་ཅིག་ཏུ་ཁ་བཀྲུ་བ་དང༌། ཁ་ཅིག་ཏུ་རྐང་པ་དག་བཀྲུ་བ་དེ་ལྟ་བུས་དེ་ལ་འཇུག་པ་ཉིད་མ་ཡིན་པས་སོ་ཞེས་བྱ་བ་སྨོས་ཏེ། བཀྲུ་བར་བྱ་བ་ནི་བྱི་དོར་གྱི་ལས་ལྷག་མ་རྣམས་ལ་ཡང་ཅི་རིགས་པར་རིག་པར་བྱའོ་ཡང་འདིར་ཅི་ཞིག་བྱི་དོར་བྱ་ཞེ་ན། ཁང་བུའི་སྦུབས་བྱ་བ་ལ་ སོགས་པར་རང་གིས་བསྐྱེད་པ ་ལ་བྱ་བར་བསྟན་པ་གང་ཡིན་པ་དེ་ལ་བྱའོ་ཞེས་བྱ་བ་དེ་དག་ལ་སྨོས་སོ། །མེ་ཏོག་དང་འབྲས་བུ་བསྲུང་བའི་ཕྱིར་
དགེ་སློང་བསྐོ་བར་བྱའོ་ཞེས་བྱ་བ་ནི་མེ་ཏོག་དང་འབྲས་བུ་ལ་ སོགས་པ ་བསྲུང་བའི་ཕྱིར་རོ། །ཟས་ཀྱི་ཆེད་དུ་གཞན་དག་གོ །དེ་དག་གིས་ཆེས་དང་པོར་ཟན་ཟོས་ཏེ་འགྲོ་བར་བྱའོ་ཞེས་བྱ་བ་ནི་ཟན་གྱི་དུས་ཀྱི་ཆེད་དུ་བསྐོས་པ་དག་གིས་སོ། །གནས་ཀྱི་ཚུལ་བཤད་ཟིན་ཏོ།། །།ད་ནི་བྱ་བའི་སྐབས་བརྗོད་པར་བྱ་སྟེ། ཀློག་ཏུ་འཛུད་པ་བསྙེན་བཀུར་ཆེས་མད་བ་བྱེད་པ་དང༌། མི་ནུས་པ་ལ་ལོགས་ཤིག་ཏུ་བྱས་བས་ཀྱང་རྗེས་སུ་བརྩེ་བར་བྱའོ་ཞེས་བྱ་བ་ནི་ཀློག་ཏུ་འཛུད་པ་ཞེས་བྱ་བ་ཀློག་པའི་སློབ་དཔོན་གྱི་བསྙེན་བཀུར་ཆེས་མང་དུ་བྱེད་པ་ཞེས་བྱ་བ་རང་གི་དྲུང་ན་འདུག་པའི་སློབ་མ་དང་ཉེ་གནས་ལ་སློབ་དཔོན་དག་གིས་སོ། །དེའི་འདུལ་བ་བཟུང་སྟེ་དེའི་ལུང་དབོག་པ་དང་ཁ་དོན་བྱ་བ་དང་དམིགས་ཀྱིས་དྲི་བ་སྦྱིན་བ་དག་གིས་དགེ་སློང་མ་ལ་རྗེས་སུ་བརྩེ་བར་བྱའོ་ཞེས་བྱ་བ་ལ། དེའི་འདུལ་བ་ཞེས་བྱ་བ་ནི་དགེ་སློང་མའི་འདུལ་བ་དེའོ། །དེའི་ལུང་དབོག་པ་ཞེས་བྱ་བ་ནི་དགེ་སློང་མའི་འདུལ་བ་དེ་ལའོ། །ཡི་གེ་བྲི་བར་བྱའོ་ཞེས་བྱ་བ་ནི་འདི་ལ་ཚུལ་དང་མི་མཐུན་པ་མེད་པར་ཤེས་པར་བྱ་ཞེས་བྱ་བའི་དོན་ཏོ། །འདིར་གཞུང་ནི་རྣམ་པར་འབྱེད་པ་ལས། བཅོམ་ལྡན་འདས་ཀྱིས་རང་ཉད་ཀྱི་ཡབ་ལ་སྤྲིང་ཡིག་བསྐུར་བ་དང༌། སྐྱེད་གུའི་བདག་མོ་ཆེན་མོས་ཨུཏྤ་ལའི་མདོག་གི་ཕྱིར་དང་རང་ཉིད་ཀྱི་ཡི་གེ་སྤྲིང་ངོ་ཞེས་གསུངས་པ་དེའི་ཕྱིར་མདོ་འདི་བྱས་སོ། །དྲན་པ་དང་འཛིན་པར་མི་ནུས་པས་འདུལ་བའོ། །དེ་མི་བྲི་བར་བྱ་བ་ཉིད་ཡིན་ནོ་ཞེས་བྱ་བ་ནི་འདུལ་བ་དེ་དྲན་པར་བྱ་བའི་དོན་ལས་གཞན་དུ་ཡི་གེ་མི་བྲི་བ་ཉིད་ཡིན་པའོ། །གླེང་གཞི་རྣམས་ལས་འདི་དང་པོར་བྱ་སྟེ་མཚན་མ་མེད་པ་ཞེས་བྱ་བའི་བར་དུ་གསུངས་པ་ཡིན་ནོ། །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་མ་འོངས་པའི་དུས་ན་བརྗེད་ངས་པ་རྒྱུད་ཉམ་ཆུང་བ་དག་འབྱུང་བར་འགྱུར་ཏེ། དེ་དག་གིས་གླེང་གཞི་ཡང་ཐོན་པར་མི་འགྱུར་རོ་ཞེས་གསུངས་པ་ལ། བཅོམ་ལྡན་འདས་ཀྱིས་ལྔ་པོ་དག་ནི་ཡི་གེར་མི་བྲི་སྟེ། ལྔ་གང་ཞེ་ན། སོ་སོར་ཐར་པ་ཐམས་ཅད་དང༌། སོ་སོར་ཐར་པ་དང་ལྡན་པ་ཐམས་ཅད་དང་འདུལ་བ་ཐམས་ཅད་དང༌། འདུལ་བ་དང་ལྡན་པ་ཐམས་ཅད་དང༌། གང་ཟག་སོ་སོའོ་ཞེས་བཀའ་སྩལ་ན་དེ་དག་གིས་ཇི་ལྟར་བསྒྲུབ་པར་བགྱི། ཉེ་བར་འཁོར་དེ་དག་གིས་གླེགས་བུ་ལ་
ཡི་གེར་བྲིས་ཏེ་བཅད་བར་བྱའོ་ཞེས་གསུངས་པ་ཡིན་ནོ། །འདིར་གཟུང་ནི་ཕྲན་ཚེགས་དག་ལས། བྲི་བ་དོར་ནས་དེ་དག་ལྡན་པ་ཉིད་དོ་ཞེས་གསུངས་སོ། །འདི་ལ་སོ་སོར་ཐར་པ་ནི་དེ་དང་འདྲའོ་ཞེས་གསུངས་པ་ཡིན་ནོ། །ཡི་གེར་བྲི་བ་དང་ཡི་གེར་མི་བྲི་བ་ཉིད་འདི་ལ་སོ་སོ་ཐར་པ་ནི་འདུལ་བ་དང་འདྲ་སྟེ། དྲན་པ་དང་འཛིན་པར་མི་ནུས་པས་ནི་སོ་སོར་ཐར་པ་ཡི་གེར་བྲི་བར་བྱའོ། །དེ་དང་ལྡན་པ་ཡང་ངོ་ཞེས་བྱ་བ་ནི་འདུལ་བ་དེ་དང་ལྡན་པ་དང་སོ་སོར་ཐར་པ་དེ་དང་ལྡན་པ་ཡང་ཡི་གེར་བྲི་བ་དང༌། ཡི་གེར་མི་བྲི་བ་ཉིད་འདི་ལ་འདུལ་བ་དང་འདྲ་བར་ཤེས་པར་བྱའོ། །འདིར་གཞི་དག་ནི་འདུལ་བ་ཉིད་ཀྱིས་བསྟན་ཏོ། །མདོ་ཙམ་ནི་སོ་སོར་ཐར་པ་ཉིད་ཀྱིས་བསྟན་ཏོ། །སོ་སོར་ཐར་པ་རྣམ་པར་འབྱེད་པ་དང༌། དེར་གཏོགས་པའི་ཕྲན་ཚེགས་དང༌། གླེང་གཞི་དང་སིལ་བུ་དང་ཞུ་བ་ལ་ སོགས་པའོ་སོ་སོར་ཐར་པ ་དང་ལྡན་པ་ཉིད་ཀྱིས་བསྟན་ཏོ། །གཞིར་གཏོགས་པའི་ཕྲན་ཚེགས་དང༌། གླེང་གཞི་དང་སིལ་བུ་དང་ཞུ་བ་ལ་ སོགས་པ ་ནི་འདུལ་བ་དང་ལྡན་པ་ཉིད་ཀྱིས་བསྟན་ཏོ། །གང་ཟག་གི་ཡང་ངོ་ཞེས་བྱ་བ་ཡང་མི་བྲི་བར་བྱ་བ་ཉིད་ཡིན་ནོ་ཞེས་བྱ་བའི་རྗེས་སྙེགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །མཚན་མ་བྱ་བ་ལ་ནི་ཉེས་པ་མེད་དོ་ཞེས་བྱ་བ་ནི་གང་ཞིག་ཡོངས་སུ་ཤེས་པར་བྱ་བའི་ཕྱིར་ལྷུང་བཟེད་ལ་ སོགས་པ ་ལ་མཚན་མ་མེད་པ་གང་ཡིན་པ་དེ་ནི་ཡིན་པར་རིག་པར་བྱའོ། །འདིར་གཞུང་ནི་མཚན་མ་མེད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །དགེ་འདུན་གྱི་གནས་མལ་ལ་མིང་ཡི་གེར་བྲིའོ་ཞེས་བྱ་བ་སྨོས་ན་ཇི་ལྟར་ཞེ་ན། དེའི་ཕྱིར། འདི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བ་ནི་སྦྱིན་པར་བྱ་བའི་ཆོས་སོ་ཞེས་བྱ་བ་སྨོས་སོ། །དེ་ནི་འདིར་སིལ་བུའི་གཞུང་ལས། བཅོམ་ལྡན་འདས་ཀྱིས་བཀའ་སྩལ་པ། མལ་ཆ་དེ་ལས་འདི་ནི་རྒྱལ་པོ་གཟུགས་ཅན་སྙིང་པོའི་སྦྱིན་པར་བྱ་བའི་ཆོས་སོ་ཞེས་ཡི་གེར་བྲི་བར་བྱའོ་ཞེས་གསུངས་པ་ཡིན་ནོ། །གོས་དག་ལ་ཡང་ངོ་ཞེས་བྱ་བ་ནི་འདིར་གཞུང་ནི་གནས་མལ་གྱི་ལྟུང་བྱེད་ཞུ་བ་ལས། དགེ་འདུན་གྱི་གོས་དག་ལ་ཡང་འདི་ནི་ཆེ་གེ་མོའི་གཙུག་ལག་ཁང་མིང་འདི་ཞེས་བྱ་བའི་སྦྱིན་པར་བྱ་བའི་ཆོས་ཞེས་ཡི་གེར་བྲི་བར་བྱ་བ་ཡིན་ནོ་ཞེས་
གསུངས་པ་ཡིན་ནོ། །རྣམ་པ་དེ་ལྟར་གཞན་ལ་ཡང་ངོ་ཞེས་བྱ་བ་ལ། འདིར་གཟུང་ནི་སིལ་བུ་དག་ལས། གནས་མལ་གྱི་རྣམ་པ་དེ་ལྟ་བུར་སྣོད་སྤྱད་དང་གཙུག་ལག་ཁང་དུ་ཞེས་བྱ་བ་ནི་གླེང་གཞི་ལས་ཏེ། གནས་མལ་གྱི་རྣམ་ པ་དེ་ལྟར་སྣོད་སྤྱད་ལ་སོགས ་པའི་དོན་གཞན་ལ་ཡང་བྱའོ། །ཀློག་ཏུ་གཞུག་པའི་སྐབས་ཞར་ལ་བྱུང་བ་དང་བཅས་པ་བཤད་ཟིན་ཏོ།། །།ད་ནི་ཀློག་པར་བྱེད་པའི་སྐབས་བརྗོད་པར་བྱ་སྟེ། སངས་རྒྱས་ཀྱི་བཀའ་སྡེ་བ་སྤྱོར་དང་ཚིག་དང་རིམ་པ་ལ་གཞོལ་བ་ཉིད་ཀྱིས་སྦྱར་ཏེ་ཀློག་པར་མི་བྱའོ་ཞེས་བྱ་བ་ལ། སྡེབ་སྦྱོར་ཞེས་བྱ་བ་ནི་སྡེབ་སྦྱོར་ཏེ། ཀླག་པའི་རྣམ་པ་དང་རིང་པོར་དྲང་བ་ལ་ སོགས་པ ་རྣམས་ལ་དེ་ལྟ་བུར་གྱུར་ཅིག་སྙམ་པ་ཉིད་ཀྱིས་སོ། །དེ་ལ་གཞོལ་བ་ཉིད་ཅེས་བྱ་བ་ནི་དེ་དག་ཁོ་ན་ལྟ་བུར་བྱས་པར་གྱུར་ཅིག་སྙམ་པ་ལ་ཉེས་པ་འདི་ཡིན་ཏེ་གཞན་གྱི་དབང་གིས་འདི་འགྲུབ་པ་མ་ཡིན་ཞེས་བྱ་བའི་དོན་ཏོ། །གཞན་ལ་ལེགས་པར་གོ་བར་བྱེད་ནུས་ཤིང་སངས་རྒྱས་ཀྱི་བཀའ་ལ་བརྩོན་བ་ཉིད་མིག་གཏོང་ན་ཕྱི་རོལ་བའི་བསྟན་བཅོས་དག་གཟུང་བར་བྱའོ་ཞེས་བྱ་བ་ནི་གཞན་ལ་གོ་བར་བྱེད་ནུས་ཤིང་སངས་རྒྱས་ཀྱི་བཀའ་ལ་བརྩོན་པ་ཉིད་མི་གཏོང་ན་ཚིག་དང་དོན་མི་གཏོང་ཞིང་བྱེ་བྲག་ཡོངས་སུ་མ་སྨོས་པས་ཤེས་པའོ། །འདིར་གཞུང་ནི་དེའི་ཕྱིར་རྗེས་སུ་ཤེས་ཏེ། དགེ་སློང་རྣམས་ཀྱིས་འཇིག་རྟེན་རྒྱང་འཕེན་པའི་བསྟན་བཅོས་གཟུང་བར་བྱ་ཞེས་ཏེ། འདི་ནི་དཔེ་ཙམ་དུ་རྣམ་པར་གནས་པ་ཡིན་ནོ་ཞེས་བྱ་བ་དེ་ལྟར་རྣམ་པར་གནས་པ་ཡིན་ནོ། །ཅི་ཐམས་ཅད་ཀྱི་བྱེ་བྲག་མེད་པར་རམ་ཞེ་ན། དེའི་ཕྱིར། གཞན་ལ་ལེགས་པར་གོ་བར་བྱེད་ནུས་ཤིང་ཞེས་སྨོས་ཏེ། གཞན་མ་གུ་བར་བྱེད་ནུས་པ་གང་ཡིན་པ་དེས་སོ། །ཅི་དེ་ལ་གཞོལ་པ་ཁོ་ནས་དེ་གཟུང་བར་བྱ་འམ་ཞེ་ན། དེའི་ཕྱིར། སངས་རྒྱས་ཀྱི་བཀའ་ལ་བརྩོན་པ་ཉིད་མིག་གཏོང་ན་ཞེས་བྱ་བ་སྨོས་ཏེ། རྣམ་པ་ཐམས་ཅད་དུ་སངས་རྒྱས་ཀྱི་བཀའ་ལ་བརྩོན་པ་གཏང་བར་མི་བྱའོ། །དེའི་དུས་ནི་ཉི་མའི་སུམ་ཆ་བདེ་བ་མ་ཡིན་པའོ་ཞེས་བྱ་བ་ལ། དེའི་དུས་ཞེས་བྱ་བ་ནི་ཕྱི་རོལ་པའི་བསྟན་བཅོས་བཟུང་བདེའི་དུས་སོ། །དེ་ཡང་བདེ་བ་མ་ཡིན་པ་ཞེས་བྱ་བའི་དུས་གང་གི་ཚེ་ལུས་
དང་སེམས་ལས་སུ་རུང་བ་མ་ཡིན་པའོ། །ལུས་ལ་གཟི་བརྗིད་དང་བཅས་པ་ཉིད་དེ་ལ་འདིར་བདེ་བར་འདོད་དེ་དེ་སངས་རྒྱས་ཀྱི་བཀའ་ལ་སྦྱར་བ་ནི་མཛེས་པ་ཞེས་བྱ་བར་བལྟ་བར་བྱའོ། །མཚན་མོ་ཡང་ངོ་ཞེས་བྱ་བ་ཡང༌། དེའི་དུས་སུམ་ཆ་བདེ་བ་མ་ཡིན་པའོ་ཞེས་བྱ་བར་སྦྱར་རོ། །གསང་སྔགས་ཕན་འདོགས་པར་བྱེད་པ་དག་གཟུང་བར་བྱའོ་ཞེས་བྱས་ནི་དུག་གི་གནོད་པ་ལ་ སོགས་པ ་སེལ་བར་བྱེད་བ་དག་གོ །སྦྱར་བར་བྱའོ་ཞེས་བྱ་བ་ནི་གསང་སྔགས་གཟུང་བ་དག་ཐམས་ཅད་དུ་རྗེས་སུ་གནང་བའི་གསང་སྔགས་རྗེས་སུ་སྦྱར་བར་བྱའོ། །གནོད་པ་བྱེད་པ་ནི་མི་བྱའོ་ཞེས་བྱ་བ་ནི། གསང་སྔགས་གནོད་པར་བྱེད་པ་ནི་གཟུང་བར་ཡང་མི་བྱའོ། །སྦྱར་བར་ཡང་མི་བྱའོ། །དེ་དག་གི་ཕྱག་གི་གནས་སུ་དཀོན་མཆོག་གསུམ་བརྗོད་པར་བྱའོ་ཞེས་བྱ་བ་ནི་གསང་སྔགས་དེ་དག་ལ་ཕྱག་འཚལ་བ་བྱུང་བ་དེ་གང་ཡིན་པ་དེའི་གནས་སུ་དཀོན་མཆོག་གསུམ་ལ་ཕྱག་འཚལ་ལོ་ཞེས་བརྗོད་པར་བྱའོ། །ལྷ་གཞན་ལ་ཕྱག་མི་བྱའོ་ཞེས་བྱ་བ་ནི་ཁྱབ་འཇུག་ལ་ སོགས་པ ་ལའོ། །འདིར་གཞུང་ནི་གསང་སྔགས་ནི་རྣམ་པ་གཉིས་ཏེ། ཕན་འདོགས་པ་དང༌། གནོད་པ་བྱེད་པའོ། །དེ་ལ་གནོད་པ་བྱེད་པ་གང་ཡིན་པ་དེ་དག་ནི་དགེ་སློང་རྣམས་ཀྱིས་བཀླག་པར་མི་བྱ་སྦྱར་བར་མི་བྱ། ཕན་འདོགས་པ་གང་ཡིན་པ་དེ་དག་ནི་དགེ་སློང་རྣམས་ཀྱིས་བཀླག་པར་བྱའོ། །སྤྱར་བར་བྱའོ་ཞེས་གསུངས་པ་དང༌། གསང་སྔགས་དེ་དག་ལ་ལྷ་གཞན་ལ་ཕྱག་འཚལ་བ་དག་སྔོན་དུ་བཏང་བ་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་འདི་ལ་ཕྱི་རོལ་པའི་ལྷ་ལ་ཕྱག་མི་བྱའོ་ཞེས་གསུངས་པ་ཡིན་ནོ། །མཆོད་པ་མི་བྱའོ་ཞེས་བྱ་བ་ནི་གླེང་གཞི་དག་ལས་འདི་དང་པོར་བྱ་སྟེ། རྗེས་སུ་གཟུང་བར་བྱ་ཞེས་བྱ་བའི་བར་དུ་གསུངས་པ་ཡིན་ནོ། །བཀུར་སྟི་མི་བྱའོ་ཞེས་བྱ་བ་ནི་འདི་ལས་ཕྱི་རོལ་པའི་ལྷ་ལའོ། །གནས་སུ་ཕྱིན་ན་མངོན་དོན་སུམ་དུ་འགྲེང་སྟེ་སེ་གོལ་གྱི་སྒྲས་གོ་བར་བྱས་ནས་གཙུག་ལག་གི་ཚིགས་སུ་བཅད་པ་གདོན་པས་དེ་ལ་ཕན་གདགས་པར་བྱའོ་ཞེས་བྱ་བ་ནི་འདི་ལས་ཕྱི་རོལ་པའི་ལྷའི་གནས་སུ་ཕྱིན་ནད་དེའི་མངོན་སུམ་དུ་འགྲེང་སྟེ། སེ་གོལ་གྱི་སྒྲས་གོ་བར་
བྱས་ནས་སོ། །བཟོ་རྗེས་སུ་སྒྲུབ་པ་དང༌། བསླབ་པ་དང༌། དེའི་སྣོད་ཉེ་བར་གཞག་པར་མི་བྱ་སྟེ། མཚོན་གྱི་ཤུབས་དང་ཁབ་རལ་དང་རམ་ཕྱིས་ནི་མ་གཏོགས་སོ་ཞེས་བྱ་བ་ནི་འདིར་གཞུང་ནི་སྨན་གྱི་གཞི་ལས་དགེ་སློང་གིས་རང་གིས་བཟོ་མི་བྱ་བ་དང་གཞན་ལ་བཟོ་བསླབ་པར་མི་བྱ་བ་དང༌། བཟོ་སྤྱད་ཀྱི་སྣོད་ཉེ་བར་གཞག་པར་མི་བྱའོ། །གྲི་ཤུབས་ལ་ སོགས་པ ་དང་ཁབ་རལ་དང་རམ་ཕྱིས་ནི་མ་གཏོགས་སོ་ཞེས་གསུངས་པ་དང༌། འདིར་གཞུང་ནི་དགེ་སློང་གིས་དེ་ལྟ་བུའི་སྣོད་ཉེ་བར་གཞག་པར་མི་བྱའོ། །སྔོན་སྨན་པ་ཡིན་ན་མཚོན་གྱི་སྣོད་དང་སྔོན་ཡི་གེ་པ་ཡིན་ན་རམ་ཕྱིས་དང༌། སྔོན་བཟོ་མཁན་ལས་རབ་ཏུ་བྱུང་བ་ཡིན་ན་ཁབ་རལ་ནི་མ་གཏོགས་སོ་ཞེས་གསུངས་པ་ཡིན་ནོ། །མུ་གཅིག་པ་ལ་བསོད་ནམས་ཀྱི་བསམ་པས་དགེ་པའི་གསོ་བ་ཉེ་བར་བསྒྲུབ་བར་བྱ་སྟེ། གླ་རྔན་གྱིས་ནི་མ་ཡིན་ནོ་ཞེས་བྱ་བ་ནི་ཚངས་པ་མཚུངས་པར་སྤྱོད་པ་མུ་གཅིག་པ་དག་ལའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ་ཞེས་བྱ་བ་ནི་སྨན་གཞན་ལ་བཀྲུ་སྨན་བཏང་ནས་དེ་ཉིད་དུ་བསྡད་པར་བྱའོ་ཞེས་བྱ་བའི་དོན་ནོ། །རྐྱེན་དེ་ལྟ་བུ་དག་བྱུང་ན་ཧ་ཅང་འཁྲུ་བ་ལ་སོགས་པའི་གཉེན་པོའི་ཆོག་བསྟན་ཏེ་འོ་ཞེས་བྱ་བ་ནི་འདིར་གཞུང་ནི་གླེང་གཞི་དག་ལས་དེ་ལྟ་བས་ན་དགེ་སློང་གིས་གླ་རྔན་གྱིས་བཀྲུ་སྨན་བཏང་བར་མི་བྱའོ། །བཀྲུ་སྨན་བཏང་ནས་གཞན་དུ་འགྲོ་བར་མི་བྱའོ། །རྐྱེན་དེ་ལྟ་བུ་དག་བྱུང་ན་བསྒོ་སྟེ་འགྲོ་བར་བྱའོ་ཞེས་གསུངས་པ་ཡིན་ནོ། །ཚངས་པ་མཚུངས་པར་སྤྱོད་པ་ལ་དབེན་བའི་ཕྱོགས་སུ་འདྲེག་མཁན་གྱི་བྱ་བ་བྱའོ་ཞེས་བྱ་བ་ནི་དགེ་སློང་གིས་དགེ་སློང་ལ་དང༌། དགེ་སློང་མས་དགེ་སློང་མ་ལའོ། །ཁྲིའུ་ཡན་ལག་ཆག་པ་བཅོས་པ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བ་ཡང་དབེན་བའི་ཕྱོགས་སུ་བྱ་བའོ། །འདིར་ཁྲི་ཞེས་སྨོས་པ་ནི་ཁྲིའུ་ལ་ སོགས་པ ་གཞན་དག་གི་དཔེ་ཡིན་ཏེ། ཁྲིའུ་ལ་ སོགས་པ ་གཞན་རྣམས་ལ་ཡང་འདི་རིགས་པའི་ཕྱིར་རོ། །ཕྲེང་བའི་རིམ་པ་དག་བརྒྱུད་ཡང་དོ་ཞེས་བྱ་བ་ཡང་དབེན་བའི་ཕྱོགས་སུ་བྱ་བའོ། །དཀོན་མཆོག་མཆོང་པར་གྱུར་པ་སེམས་ཅན་གྱི་གཟུངས་མ་ཡིན་པའི་རི་མོ་འདྲི་བ་ཡང་ངོ་ཞེས་བྱ་བ་ཡང་དབེན་པའི་ཕྱོགས་སུ་བྱའོ། །སེམས་ཅན་གྱི་གཟུགས་མ་ཡིན་
པ་ཞེས་སྨོས་པ་ནི་འདབ་མ་དང་མྱུ་གུ་ལ་ སོགས་པ ་དག་བསྡུས་སོ། །དེའི་ཕྱིར་འདྲི་བ་ནི་དེ་ཉིད་ཡིན་ནོ་ཞེས་བྱ་བ་ལ། དེའི་ཕྱིར་འདྲི་བ་ཞེས་བྱ་བ་ནི་བྲི་བའི་ཕྱིར་རི་མོར་བྲི་བ་ཉིད་དོ། །དེའི་ཕྱིར་འདྲི་བ་ནི་འདྲི་བར་རྩོམ་པ་ལ་ནི་ཉེས་པར་འགྱུར་ལ། སེམས་ཅན་གྱི་གཟུགས་མ་ཡིན་པ་ལ་ནི་ཉེས་པར་མི་འགྱུར་བའོ། །རྗེས་སུ་བསྒྲུབ་པའི་སྐབས་བཤད་ཟིན་ཏོ། །ཤི་བའི་སྐབས་དང་གཞག་པའི་སྐབས་ལས་གཞན་པའི་རྗེས་སུ་བསྒྲུབ་པའི་སྐབས་རྫོགས་སོ།། །།ད་ནི་ཤི་བའི་སྐབས་དང་གཞག་པའི་སྐབས་སུ་འཇུག་པ་གཞན་ཡིན་པས་དེ་ལྟར་གྱུར་པའི་སློབ་པ་ལ་ཤི་བ་ལ་གང་བྱ་བ་དེ་བརྗོད་པར་བྱ་སྟེ། ཚངས་པ་མཚུངས་པར་སྤྱོད་པ་ཤི་བའི་ལུས་ལ་མཆོད་པ་བྱའོ། །དེ་བསྲེག་པར་བྱའོ་ཞེས་བྱ་བ་ལ་འདིར་གཞུང་ནི་ལུས་ལ་མཆོད་པར་བྱ་སྟེ་བསྲེག་པར་བྱའོ་ཞེས་གསུངས་པ་ཡིན་ནོ། །ཅི་གདོན་མི་ཟ་བར་སྲེག་པ་ཁོ་ན་ཡིན་ནམ་ཞེ་ན། དེའི་ཕྱིར། གལ་ཏེ་སྲོག་ཆགས་དང་བཅས་པའི་རྨ་མེད་པ་ཉིད་ཡིན་ནའོ། །སོ་སོར་བརྟག་པས་ངེས་པར་བྱའོ་ཞེས་བྱ་བ་ནི་དེ་ལ་སྲོག་ཆགས་ཡོད་དམ་མེད་པའོ། །འདིར་བསྲེག་པ་ཉིད་ནི་རྣམ་པ་གཅིག་ཉིད་ཡིན་ནམ་ཞེ་ན། དེའི་ཕྱིར། བརྐོ་བའམ་ཆུ་ཀླུང་ལ་བསྐུར་རོ་ཞེས་བྱ་བ་སྨོས་ཏེ། ས་བརྐོས་པར་གཞུག་པའམ་ཆུ་ཀླུང་ལ་བསྐུར་བར་བྱའོ། །མི་རུང་ན་ཚང་ཚིང་གི་དབུས་སུ་གཞུག་གོ་ཞེས་བྱ་བ་ནི་བརྒྱ་ལ་སྲོག་ཆགས་དང་བཅས་ཤིང་བསྲེགས་ན་སྲོག་ཆགས་མང་པོ་དག་འཆི་བ་ལྟ་ནའོ། །སྤྱོད་ལམ་གང་གིས་གཞག་པར་བྱ་ཞེ་ན། དེའི་ཕྱིར་གློ་གཡས་པས་བསྙལ་ཏེ་མགོ་བྱང་ཕྱོགས་སུ་བསྟན་ཏོ་ཞེས་བྱ་བ་སྨོས་སོ། །སྔས་སུ་རྩྭའི་ཆུན་པོ་གཞུག་གོ །རྩྭ་དག་གམ་ལོ་མ་དག་གིས་གཡོགས་སོ། །ཆོས་མཉན་པ་དང་ཡོན་བཤད་པ་དག་བྱའོ། །རེག་པ་དག་གིས་གོས་དང་བཅས་ཏེ་ཁྲུས་བྱའོ། །གཞན་དག་གིས་ནི་རྐང་ལ་ལག་བཀྲུའོ་ཞེས་བྱ་བ་ནི་རོལ་མ་རེག་པ་དག་གིས་སོ། །མཆོད་རྟེན་ལ་ཕྱག་བྱས་ཏེ་འཇུག་པར་བྱའོ། །མཆོད་རྟེན་ནི་རྣམ་པ་གཉིས་ཏེ། གཙང་ཁང་ཅན་ཉིད་དང༌། ཀ་བ་ལྟ་བུ་ཉིད་དོ་ཞེས་བྱ་བ་ལ། འདི་ནི་མ་མོ་དག་ལས་སོ། །དེ་རབ་ཏུ་བྱུང་བ་རྣམས་ལ་འོས་པ་ཉིད་དོ་ཞེས་བྱ་བ་ནི་མཆོད་རྟེན་དེའོ། །ཅི་ཐམས་ཅད་ལའམ་ཞེ་ན་དེའི་ཕྱིར། གལ་ཏེ་དགེ་བ་ཡིན་ནའོ་ཞེས་བྱ་བ་སྨོས་ཏེ། རབ་ཏུ་བྱུང་བ་ཞེས་བྱ་
བར་སྦྱར་རོ། །སོ་སོའི་སྐྱེ་བོ་དགེ་བ་ཡིན་ན་མཆོད་རྟེན་དབུ་མེད་པ་བྱའོ་ཞེས་གསུངས་པ་ཡིན་ནོ། །གང་ཞིག་འཕགས་པ་ལས་གཞན་པ་དགེ་བ་ཉིད་སྒྲུབ་པ་རྣམས་ལ་དེའི་ཕྱིར་མདོ་འདི་ཡིན་ནོ། །སངས་རྒྱས་རྣམས་ཀྱི་ནི་རྣམ་པ་ཐམས་ཅད་དོ་ཞེས་བྱ་བ་སྨོས་ན། རྣམ་པ་དེ་དག་གང་ཡིན་སྙམ་ན་དེ་ལ་བརྗོད་པར་བྱ་སྟེ་དེའི་ཕྱིར། རྣམ་པ་ནི་བར་རིམ་བཞི་དང་འདབ་མ་དང་པུ་ཤུ་དང་སྲོག་ཤིང་དང༌། གདུགས་བཅུ་གསུམ་དང་ཆར་ཁབ་དག་གོ་ཞེས་བྱ་བ་ནི་མཆོད་རྟེན་གྱི་རྣམ་པ་ཐམས་ཅད་རྫོགས་པའོ། །རང་སངས་རྒྱས་རྣམས་ཀྱི་ནི་ཆར་ཁབ་མེད་པའོ་ཞེས་བྱ་བ་ནི་རྣམ་པ་དེ་དག་ལས་ཆར་ཁབ་འབའ་ཞིག་མེད་པ་དང་ཞེས་བྱ་བའི་དོན་ཏོ། །དེ་ཡང་བསེ་རུ་ལྟ་བུའི་ཕྱིར་གསུངས་པ་ཡིན་གྱི་ཚོགས་ན་སྤྱོད་པ་ནི་དགྲ་བཅོམ་པའི་ཆོ་གའི་རྣམ་པ་ལྟ་བུས་རིག་པར་བྱའོ། །འདིར་གཞུང་ནི་རང་སངས་རྒྱས་ཀྱི་ཆར་ཁབ་མེད་པའོ་ཞེས་གསུངས་པ་ཡིན་ནོ། །ཉན་ཐོས་རྣམས་ཀྱི་ནི་འབྲས་བུའི་ཚད་དག་གིས་དེའི་གདུགས་གཅིག་ལྷག་པའོ་ཞེས་བྱ་བ་ལ། འདིར་གཞུང་ནི་དགྲ་བཅོམ་པའི་ནི་གདུགས་ལྔའོ། །ཕྱིར་མི་འོང་བའི་ནི་གདུགས་བཞིའོ། །ལན་ཅིག་ཕྱིར་འོང་བའི་ནི་གདུགས་གསུམ་མོ། །རྒྱུན་དུ་ཞུགས་པའི་ནི་གདུགས་གཉིས་སོ་ཞེས་གསུངས་པ་ཡིན་ནོ། །དེའི་ཞེས་བྱ་བ་ནི་གདུགས་དེའི་འོ། །མཆོད་རྟེན་ཡོངས་སུ་རྫོགས་པར་གྱུར་པའི་གདུགས་ནི་ལྷག་མ་རྣམས་ལས་བྱེ་བྲག་ཏུ་གྱུར་པ་ཉིད་དོ་ཞེས་བྱ་བའི་དགོངས་པ་ཡང་མཐོང་བ་ཡིན་ནོ། །འདིར་འབྲས་བུ་རྣམས་ནི་རྒྱུན་དུ་ཞུགས་པ་ལ་ སོགས་པ ་རྣམས་སོ། །གང་གི་འབྲས་བུ་རྣམས་ཇི་སྙེད་ཐོབ་བདེ་སྙེད་ལས་གདུགས་རེ་རེས་ལྷག་པར་བྱའོ་ཞེས་བྱ་བའི་དོན་ཏོ། །གལ་ཏེ་ཡང་ཕལ་ཆེར་འདོད་ཆགས་དང་བྲལ་བ་དང་འདོད་པའི་འདོད་ཆགས་དང་བྲལ་བ་དག་ལ་འབྲས་བུ་གཞན་གཅིག་དང་གཉིས་ཐོབ་པ་མེད་ན། དེ་ལྟར་ཡང་དེའི་འབྲས་བུ་ཐོབ་པར་བྱ་བའི་སྤང་བྱ་རྣམས་ལ་ཟག་པ་དང་བྲལ་བ་ཐོབ་བ་རྙེད་པས་ཐོབ་པ་ལྟར་བལྟ་བར་བྱ་བ་ཉིད་དོ། །ཉན་ཐོས་ཀྱི་མཆོད་རྟེན་ཕྱོགས་གང་དུ་བྱ་ཞེ་ན། དེའི་ཕྱིར། དེ་བཞིན་གཤེགས་པའི་ཕྱོགས་ཀྱི་ཡུལ་ཉིད་དུ་གང་དུ་དེ་དག་གནས་པར་གྱུར་པའི་ཕྱོགས། དེར་དེའི་འཁོར་དུ་བྱའོ་ཞེས་བྱ་བ་སྨོས་ཏེ། དེ་བཞིན་གཤེགས་པའི་མཆོང་རྟེན་གྱི་ཕྱོགས་བཞི་པོ་དག་གང་ཡིན་པ་དེ་དག་གི་ཡུལ་
ཡིན་ན། དེར་གལ་ཏེ་འབྲས་བུ་ཐོབ་པའི་ཉན་ཐོས་དེ་རྣམས་གལ་ཏེ་འཇུག་པ་ཉིད་དེ་བཞིན་གཤེགས་པའི་ངོས་སུ་ཡུལ་ཉིད་དུ་གྱུར་ན་ཕྱོགས་དེར་མཆོད་རྟེན་བྱ་སྟེ། གང་དུ་དེ་རྣམས་ལ་འཁོར་བྱིན་པ་ལ་གནས་པར་གྱུར་པས་སོ། །འདི་ལ་རྒན་རིམས་སུ་མི་བྱ་བར་མི་བྱའོ་ཞེས་བྱ་བ་ལ། འདི་ལ་ཞེས་བྱ་བ་ནི་མཆོད་རྟེན་གྱི་ཕྱོགས་ལའོ། །སོ་སོའི་སྐྱེ་བོ་རྣམས་ཀྱི་ནི་བྱི་བོའོ། །དེ་དག་ལ་ནི་དགེ་འདུན་གྱི་ཀུན་དགའ་ར་བའི་ཕྱི་རོལ་དུ་བྱའོ། །འཕགས་པ་ལ་ནི་མཆོད་རྟེན་གྱི་དུས་སྟོན་རིགས་སོ་ཞེས་བྱ་བ་ནི་འཕགས་པའི་གང་ཟག་ལ་མཆོད་རྟེན་གྱི་དུས་སྟོན་རིགས་སོ། །ཉན་ཐོས་ཀྱི་མཆོད་རྟེན་ལ་ཕུལ་བ་ནི་ཚངས་པ་མཚུངས་པར་སྤྱོད་པ་དབང་པ་ཉིད་ཡིན་ནོ་ཞེས་བྱ་བ་ནི་དེ་ལ་རས་དང་སྣམ་བུ་དང་རྫས་གང་ཡང་རྣམ་པ་གཞན་གང་དག་ཕུལ་བ་དེ་དག་ནི་དགེ་སློང་རྣམས་ཀྱིས་བགོ་བར་བྱའོ། །འདིར་གཞུང་ནི་ཚངས་པ་མཚུངས་པར་སྤྱོད་པའི་རྫས་ལ་ནི་དགེ་སྤོང་ཚངས་པ་མཚུངས་པར་སྤྱོད་པ་དག་དབང་ངོ་ཞེས་གསུངས་པ་ཡིན་ནོ། །མུ་ཏིག་དག་ནི་བསྟན་པ་བཞིན་བྱའོ་ཞེས་བྱ་བ་ནི་དྲི་གཙང་ཁང་གི་ཞལ་ཞལ་དུ་བྱའོ་ཞེས་བསྟན་པ་བཞིན་དུ་བྱའོ་ཞེས་བྱ་བའི་དོན་ཏོ། །བུད་དུང་དག་ནི་སངས་རྒྱས་ལ་དབུལ་ལོ་ཞེས་བྱ་བ་ལ། འདིར་གཞུང་ནི་བུད་དུང་གང་དག་ཡིན་པ་དེ་དག་ནི་འཛམ་བུའི་གྲིབ་མ་ལས་བྱུང་བའི་སྐུ་གཟུགས་ལ་དབུལ་བར་བྱའོ་ཞེས་གསུངས་པ་ཡིན་ནོ། །དེ་ལས་ཞིག་རལ་བྱུང་བ་བཅོས་པའི་ཕྱིར་གཞག་པར་བྱའོ་ཞེས་བྱ་བ་ལ། དེ་ལས་ཞེས་བྱ་བ་ནི་མཆོད་རྟེན་གང་ལ་ཕུལ་བའི་རྫས་དེ་ལས་སོ། །མཆོད་པར་རུང་བ་ཉིད་ཀྱང་ངོ་ཞེས་བྱ་བ་ནི་དེ་ལ་གཞག་པར་བྱའོ། །འདིར་གཞུང་ནི། དེ་ལ་དབྱིག་དང༌། གསེར་གང་ཡིན་པ་དེ་དག་མཆོད་རྟེན་དེ་ཉིད་ཞིག་རལ་དུ་གྱུར་པ་བཅོས་པའི་ཕྱིར་གཞག་པར་བྱའོ། །མཆོད་པར་རུང་བའི་རྫས་དེ་དག་ནི་དུས་སྟོན་གྱི་ཚེ་མཆོད་པར་བྱ་བའི་ཕྱིར་གཞག་པར་བྱའོ་ཞེས་གསུངས་པ་ཡིན་ནོ། །སངས་རྒྱས་ལ་ལྕགས་ལས་བྱས་པའི་མཆོད་རྟེན་བྱ་བ་ནི་ཆོས་དང་མཐུན་པའོ་ཞེས་བྱ་བ་ནི་རུང་ངོ་ཞེས་བྱ་བའི་དོན་ཏོ། །དབུ་སྐྲ་དང་སེན་མོའི་མཆོད་རྟེན་གསེར་དང་དངུལ་དང་བཻ་ཌཱུཪྻ་དང་ཤེལ་ལས་བྱས་པ་ཡང་ངོ་ཞེས་བྱ་བ་ཡང་ཆོས་དང་མཐུན་པའོ། །འདིར་གཞུང་ནི་རྣམ་པར་འབྱེད་པ་དང༌། སིལ་བུ་དག་དང༌། གླེང་གཞི་དག་ལས། རབ་ཏུ་བྱུང་བའི་གནས་སུ་དགྲ་བཅོམ་པ་གཞག་པར་བྱའོ་ཞེས་
བྱ་བ་ནས་སྐུ་གཟུགས་བགྱིད་དུ་སྩལ་ལོ་ཞེས་བྱ་བའི་བར་དང༌། དེ་ལ་ཞེས་བྱ་བ་ནས་མཐུན་པའི་འཁོར་བགྱིད་དུ་སྩལ་ཏོ་ཞེས་བྱ་བའི་བར་དང༌། གྲོང་ཁྱེར་དུ་ཞུགས་ཏེ་ཞེས་བྱ་བ་ནས་ཡོངས་སུ་བསྐོར་ཏེ་ཞེས་བྱ་བའི་བར་དུའོ། །རབ་ཏུ་བྱུང་བའི་གནས་སུ་དགྲ་བཅོམ་པ་གཞག་པར་བྱའོ་ཞེས་བྱ་བ་འདིའི་ནི་སིལ་བུ་དག་ལས་སོ། །ལྷག་མ་ནི་གླེང་གཞི་དག་ལས་སོ། །དེ་ལ་མཐུན་པའི་འཁོར་བྱའོ་ཞེས་བྱ་བ་ལ། དེ་ལ་ཞེས་བྱ་བ་ནི་སངས་རྒྱས་ཀྱི་མཆོད་རྟེན་དེ་ལའོ། །དགའ་ལྡན་གྱི་གནས་ན་བཞུགས་པ་ལ་ སོགས་པ ་ནས་ཡོངས་སུ་མྱ་ངན་ལས་འདས་པའི་མཐའི་བར་གྱི་སྤྱོད་པ་ནི་དེ་ཞེས་བྱའོ་ཞེས་བྱ་བ་ནི་མཐུན་པའི་འཁོར་ཞེས་བྱའོ། །དཀར་རྩིས་དཀར་པོར་བྱའོ་ཞེས་བྱ་བ་ནི་ས་དཀར་པོ་ལ་ སོགས་པས་སོ། །མར་མེ་འཛིན་པ ་བྱའོ། །ལན་ཀན་གྱིས་བསྐོར་རོ། །རྟ་བབས་བསྒྲེང་བར་བྱའོ། །རྒྱལ་མཚན་གཟུགས་སོ། །དེ་ནི་རྣམ་པ་བཞིའོ་ཞེས་བྱ་བ་ལ། དེ་ནི་ཞེས་བྱ་བ་ནི་རྒྱལ་མཚན་ནོ། །སེང་གེའི་རྒྱལ་མཚན་དང། ཆུ་སྲིན་གྱི་རྒྱལ་མཚན་དང༌། ཀླུའི་རྒྱལ་མཚན་དང༌། ཁྱུ་མཆོག་གི་རྒྱལ་མཚན་ནོ། །གཙང་ཁང་གི་མུ་ཁྱུད་བྱའོ། །དེར་རྟ་བབས་བ་སྒྲེང་བར་བྱའོ་ཞེས་བྱ་བ་ནི་དེར་ཞེས་བྱ་བ་ནི་གཙང་ཁང་གི་མུ་ཁྱུད་དེར་རོ། །སྒོ་ཡབ་བྱའོ་ཞེས་བྱ་བ་ནི་སྒོ་ཡབ་བྱ་བའོ། །གཙང་ཁང་གི་མུ་ཁྱུད་དེའི་མདུན་རོལ་དུ་སྒོ་ཡབ་ཀྱི་ཁྱམས་བྱ་བ་སྟེ་སྒོའི་དྲུང་དུ་ཁང་པ་བྱའོ། །དེ་ལ་ལན་ཀན་གྱིས་བསྐོར་རོ་ཞེས་བྱ་བ་ལ། དེ་ལ་ཞེས་བྱ་བ་ནི་སྒོ་ཡབ་དེ་ལའོ། །ཀ་བ་རྣམས་བཙག་གིས་བསྐུའོ། །རྩིག་པ་དག་རྒྱ་སྐྱེགས་ཀྱིས་བྲིའོ། །དྲིས་དབང་བསྐུར་བ་དབུལ་ལོ་ཞེས་བྱ་བ་ནི་ཆོས་དང་མཐུན་ནོ་ཞེས་བྱ་བར་སྦྱར་རོ། །འབྲུ་མར་དང་བ་བླ་དང་ཙནྡན་དང་གུར་གུམ་གྱིས་ཆག་ཆག་དག་ཀྱང་ངོ་ཞེས་བྱ་བ་ཡང་འབུལ་བ་ཆོས་དང་མཐུན་ཞེས་བྱ་བར་སྦྱར་རོ། །གཟེར་བུ་མི་གདབ་བོ་ཞེས་བྱ་བ་ནི་མཆོད་རྟེན་ལ་གོས་ལ་ སོགས་པ ་སྤྱད་པའི་ཕྱིར་གཟེར་བུ་གདབ་པར་མི་བྱ་བའོ། །བརྩིག་པའི་ཚེ་ཕྲེང་བ་ལ་ སོགས་པ ་གདགས་པའི་ཕྱིར་ཟུངས་ཐག་གཞུག་གོ་ཞེས་བྱ་བ་ནི་མཆོད་རྟེན་ལའོ། །མི་དབུག་གོ་ཞེས་བྱ་བ་ནི་མཆོད་རྟེན་ལ་ཟུངས་གཞུག་པར་བྱ་བའི་ཕྱིར་རོ། །སྟེང་དུ་མར་མེ་མི་གཟུགས་སོ། །མཆོད་པ་བྱ་བའི་ཕྱིར་ཁྱིམ་པ་དག་འཛེག་ཏུ་གཞུག་གོ་ཞེས་བྱ་བ་ནི་མཆོད་རྟེན་ལའོ། །མེད་ན་དགེ་ཚུལ་དག་དྲིའི་ཆུས་རྐང་པ་བཀྲུས་
ཏེའོ་ཞེས་བྱ་བ་ནི་ཁྱིམ་པ་མེད་ནའོ། །གལ་ཏེ་དེ་མ་བྱས་ན་དྲི་དག་གིས་དྲིལ་ཕྱིས་བྱས་ཏེའམ་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་དུ་བྱས་ནས་དོན་གྱི་བརྣབ་སེམས་ཀྱི་དྲན་པ་དག་གིས་སོ་ཞེས་བྱ་བ་ལ། གལ་ཏེ་དེ་མ་བྱས་ན་ཞེས་བྱ་བ་ནི་དྲིའི་ཆུ་དང་གཞན་གྱིས་སོ། །གལ་ཏེ་དྲིའི་ཆུས་རྐང་པ་བཀྲུ་བ་དག་མ་བྱས་ན་དེའི་ཕྱིར་དྲི་དག་གིས་རྐང་པ་དྲིལ་ཕྱིས་བྱ་སྟེ་ཞེས་བྱ་བའི་དོན་ཏོ། །དོན་གྱི་ཞེས་བྱ་བ་ནི་མཆོད་པར་བརྗོད་པར་བྱའོ་ཞེས་བྱ་བ་དེ་ལའོ། །དྲན་བ་དག་གིས་སོ་ཞེས་བྱ་བ་ནི་དྲན་པ་ཉེ་བར་གཞག་པ་རྣམས་ཀྱིས་སོ། །དེ་དག་ཀྱང་མེད་ན་དགེ་སློང་དག་གིས་དེ་བཞིན་དུའོ་ཞེས་བྱ་བ་ནི་དགེ་ཚུལ་དེ་དག་ཀྱང་མེད་ན་དགེ་སློང་དག་གིས་དྲིའི་ཆུས་རྐང་པ་བཀྲུ་བ་ལ་ སོགས་པའི་རྣམ་པ ་ཇི་སྐད་བསྟན་པ་བཞིན་བྱ་སྟེ་འཛེག་པར་བྱའོ། །དེའི་ཆེད་དུ་ཐག་པས་གདགས་སོ་ཞེས་བྱ་བ་ལ། དེའི་ཆེད་དུ་ཞེས་བྱ་བ་ནི་འཛེག་པ་དེའི་ཆེད་དུའོ། །རིན་པོ་ཆེ་ལས་བྱས་པའི་ཕྲེང་བ་དབུལ་ལོ་ཞེས་བྱ་བ་ནི་མཆོད་རྟེན་ལའོ། །འཇིག་པར་བྱེད་པ་ཟློག་པའི་ཕྱིར་དབུ་གཡོགས་གཡོགས་སོ་ཞེས་བྱ་བ་ནི་མཆོད་རྟེན་ལའོ། །མུན་ནག་མི་གནས་པར་བྱ་བའི་ཕྱིར་དེ་ལ་སྒོ་གདོད་དོ་ཞེས་བྱ་བ་ལ། དེ་ལ་ཞེས་བྱ་བ་ནི་དབུ་གཡོགས་ཏེ་དེ་ལའོ། །སངས་རྒྱས་ཀྱི་སྐུ་གཟུགས་བྱའོ་ཞེས་བྱ་བ་ནི་ཆོས་དང་མཐུན་པ་ཉིད་ཡིན་པའོ་ཞེས་བྱ་བར་སྦྱར་རོ། །དེ་ལ་དུས་སྟོན་བྱའོ་ཞེས་བྱ་བ་ནི་སངས་རྒྱས་ཀྱི་སྐུ་གཟུགས་དེ་ལའོ། །བལྟམས་པ་དང་གཙུག་པུད་དང་དབུ་སྐྲ་དང་བྱང་ཆུབ་པའི་དུས་སྟོན་དག་ཀྱང་ངོ་ཞེས་བྱ་བ་ཡང་བྱའོ་ཞེས་བྱ་བའི་རྗེས་སྙེགས་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །དུས་སྟོན་ཞེས་བྱ་བའི་སྒྲས་ནི་བལྟམས་པ་ལ་ སོགས་པ ་དང་སོ་སོར་སྦྱར་རོ། །དེ་གྲོང་ཁྱེར་དུ་གཤེགས་པར་བྱའོ་ཞེས་བྱ་བ་ནི་སངས་རྒྱས་ཀྱི་སྐུ་གཟུགས་དེའོ། །འདི་ལ་དགེ་སློང་གིས་བསྐུར་དུ་རུང་ངོ་ཞེས་བྱ་བ་ལ། འདི་ལ་ཞེས་བྱ་བ་ནི་གྲོང་ཁྱེར་དུ་ཞུགས་པ་འདི་ལས་ཏེ། སངས་རྒྱས་ཀྱི་སྐུ་གཟུགས་བསྐུར་བ་དེ་ལའོ། །དེ་ནི་གསར་བུ་དག་ལ་འབབ་པོ་ཞེས་བྱ་བ་ལ། དེ་ནི་ཞེས་བྱ་བ་ནི་བསྐུར་བ་དེའོ། །སྡེ་པ་ལྔ་པོ་དག་གིས་ཞབས་འབྲིང་བྱའོ་ཞེས་བྱ་བ་ནི་དགེ་སློང་ལ་ སོགས་པ ་དག་གིས་སོ། །མཆོད་ཡོན་དུ་བྱ་བ་ནི་རྒན་པ་དག་གིས་གཟུང་ངོ༌། །དེ་ལ་རོལ་མོ་བྱེད་པ་དག་གིས་རོལ་མོ་བྱ་བ་དང༌། བཀུར་སྟི་ཆེན་པོ་གཞན་ཡང་བཟང་ངོ་ཞེས་བྱ་བ་ལ། དེ་ལ་ཞེས་བྱ་བ་ནི་སངས་རྒྱས་ཀྱི་སྐུ་གཟུགས་གྲོང་ཁྱེར་དུ་གཤེགས་པར་
བྱ་བ་དེ་ལའོ། །རོལ་མོ་བྱེད་དུ་གཞུག་པའི་ཕྱིར་ཀྱེ་མི་དག་སྟོན་པ་ལ་མཆོད་པར་གྱིས་ཤིག་ཅེས་བྱ་བ་ལ་ཁ་ན་མ་ཐོ་བ་མེད་དོ་ཞེས་སྨོས་ནས། ཇི་ལྟར་བསྒྲགས་པར་བྱ་ཞེ་ན། དེའི་ཕྱིར་ལམ་པོ་ཆེ་དང་ལམ་སྲང་དང་བཞི་མདོ་དང་སུམ་མདོ་དག་ཏུ་སང་ངམ་གནང་འབྱུང་བར་འགྱུར་བ་ཉིད་ནི་ཡི་གེར་བྲིས་པས་བསྒྲགས་པར་བྱའོ་ཞེས་བྱ་བ་སྨོས་སོ། །ཇི་ལྟར་ཡི་གེར་བྲི་བར་བྱ་ཞེ་ན་དེའི་ཕྱིར་དེ་ལྟར་སངས་རྒྱས་གཤེགས་པར་འགྱུར་རོ་ཞེས་གྲོ་ག་ལ་ སོགས་པ ་ལ་བྲིས་ པ་གླང་པོ་ཆེའི་བཤུལ་སྟེང་དུ་གདུགས་དང༌། རྒྱལ་མཚན་དང༌། བ་དན་ལ་སོགས ་པས་ཡོངས་སུ་བསྐོར་བའོ་ཞེས་བྱ་བ་སྨོས་ཏེ། དེ་ལྟར་སངས་རྒྱས་གཤེགས་པར་འགྱུར་རོ་ཞེས་སྨོས་པ་ལ་སྙེགས་པའོ། །བྱང་ཆུབ་སེམས་དཔའི་སྐུ་གཟུགས་བྱ་བ་ཆོས་དང་ལྡན་ནོ། །དེ་རྒྱལ་མཚན་དག་གིས་བསྐོར་རོ། །ལན་ཀན་གྱིས་བསྐོར་རོ། །ལྕགས་ཀྱི་ཀ་བ་དག་གིས་སོ། །དེ་དག་ལ་བ་དན་གདགས་སོ་ཞེས་བྱ་བ་ནི་ལྕགས་ཀྱི་ཀ་བ་དེ་དག་ལ་བ་དན་དག་གདགས་པ་ནི་ཆོས་དང་མཐུན་པའོ། །རྗེས་སུ་འགྲོ་བ་བྱའོ། །རྐང་རྒྱན་དང་རྣ་རྒྱན་མ་གཏོགས་པའི་རྒྱན་གདགས་སོ། །སངས་རྒྱས་ཀྱི་སྐུ་གཟུགས་བརྙན་དང་བདག་པོ་གཞན་ལ་དེ་གཉིས་མ་གཏོགས་པའི་ཆོས་དང་མཐུན་པ་ཞེས་བྱ་བ་འདི་ལས་རྟོགས་པར་བྱའོ། །སྤོས་ཀྱི་ལུས་སྦྱིན་པར་བྱའོ། །ཁྱོགས་ཀྱིས་བསྐུར་རོ། །ཤིང་རྟས་ཀྱང་ངོ་ཞེས་བྱ་བ་ཡང་བསྐུར་རོ་ཞེས་བྱ་བར་སྦྱར་ཏེ་ཆོས་དང་མཐུན་པའོ། །དེ་ལ་གདུགས་དང་རྒྱལ་མཚན་དང་བ་དན་དག་བསྒྲེང་ངོ་ཞེས་བྱ་བ་ལ། དེ་ལ་ཞེས་བྱ་བ་ནི་ཤིང་རྟ་དེ་ལའོ། །དབུ་ལ་མེ་ཏོག་རྣ་རྒྱན་གདགས་སོ་ཞེས་བྱ་བ་ནི་བྱང་ཆུབ་སེམས་དཔའི་སྐུ་གཟུགས་ཀྱི་ཞེས་བྱ་བར་སྦྱར་རོ། །མཆོད་ཡོན་དང་ཞབས་ལ་གསོལ་བ་དག་ཀྱང་ངོ་ཞེས་བྱ་བ་ནི་དེ་ལ་དབུལ་བ་ཆོས་དང་མཐུན་པའོ། །དང་རྫས་ནི་གནས་པ་དང༌། གཞོན་ནུ་དང་རྒན་པོ་དག་གིས་བླང་ངོ༌། །གནས་བརྟན་རྣམས་ཀྱིས་བསྲུང་ངོ་ཞེས་བྱ་བ་ནི་དང་རྫས་སོ། །ལམ་པོ་ཆེར་ཕྲེང་བའི་བྲམ་ཏོག་བྱའོ་ཞེས་བྱ་བ་ནི་མཆོད་ཡོན་དང་ཞབས་ལ་གསོལ་བ་མེ་ཏོག་དང་གོས་ལ་ སོགས་པ ་གཏོར་བ་དག་ས་ལ་མི་འབབ་པར་བྱ་བའི་ཕྱིར་དེ་དག་ལམ་སྲོལ་དུ་ཞེས་བྱ་བའི་དོན་ཏོ། །ཕྲེང་བའི་ཟ་མ་ཏོག་གི་ནང་དུ་དྲིའི་ཟ་མ་ཏོག་གཞུག་གོ་ཞེས་བྱ་བ་ནི་ཕྲེང་བའི་ཟ་མ་ཏོག་གི་ནང་དུ་དྲིའི་ཟ་མ་ཏོག་གཞག་པར་བྱ་ཞེས་བྱ་བའི་དོན་ཏོ། །ཕྲེང་བ་གདགས་སོ་ཞེས་བྱ་བ་ནི་ཕྲེང་
བ་གདགས་པ་ཆོས་དང་མཐུན་ནོ་ཞེས་བྱ་བའི་དོན་ཏོ། །མཆོད་པ་རྫོགས་ཤིང་རོལ་མོ་བརྟུལ་བ་དག་ན་སྐྱེ་བོའི་ཚོགས་ཕྱི་རོལ་དོང་བའི་ཚེ་རྒྱན་བརྟུལ་ལོ་ཞེས་བྱ་བ་སྨོས་ན་གང་གི་ཚེ་ཡིན་ཞེ་ན་དེའི་ཕྱིར་མཚན་མོའོ་ཞེས་བྱ་བ་སྨོས་ཏེ། ཉིན་མོ་ནི་ཕྱིར་དོང་དུ་ཟིན་ཀྱང་ཡང་ཕྱིར་འོངས་པ་དང༌། དང་པོ་ནས་ཕྱིར་མི་འོང་བ་ཡང་སྲིད་པས་འདི་དག་གི་འགྲོ་བ་ཡོད་པས་འདི་མི་བྱ་བ་ཉིད་དོ། །བྱང་ཆུབ་སེམས་དཔའི་འབའ་ཞིག་ལ་དེ་ལ་དེ་ལྟར་བྱ་བར་མ་ཟད་ཀྱི། མཆོད་པ་ཐམས་ཅད་ལ་ཆོ་ག་དེ་ལྟར་བྱ་བ་རིག་པར་བྱའོ། །ཤི་བའི་སྐབས་སུ་མཆོད་རྟེན་བྱ་བ་ལ་ སོགས་པ ་དང་འདྲ་བ་དང་བཅས་པ་བཤད་ཟིན་ཏོ། །ད་ནི་མཆོད་རྟེན་དང༌། ལྷ་དང་མཐའ་མེད་བའི་རབ་ཏུ་བྱུང་བའི་གནས་སྐབས་སུ་བབ་པ་བརྗོད་པར་བྱ་སྟེ། རབ་ཏུ་བྱུང་བའི་གནས་སུ་དུས་སྟོན་བྱ་བ་ཆོས་དང་མཐུན་ནོ་ཞེས་བྱ་བ་ནི་ཁང་པའི་དུས་སྟོན་ནི་འོས་པའོ། །འདུལ་བ་རྒྱ་ཆེར་བསྟན་པ་བཤད་ཟིན་ཏོ།། །།ད་ནི་འདུལ་བ་མདོར་བསྡུས་ནས་བརྗོད་པར་བྱ་སྟེ། མི་རུང་བ་དང་མཐུན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ་ཞེས་བྱ་བ་ནི་གང་རུང་བ་མ་ཡིན་པ་བསྟེན་ཅིང་རུང་བ་དང་འགལ་བ་དེ་ནི་རུང་བ་མ་ཡིན་ཏེ། དེ་ནི་འདིར་རུང་བ་མ་ཡིན་པར་མདོར་བསྡུའོ་ཞེས་བྱ་བའི་དོན་ཏོ། །ཕྱི་མ་དང་མཐུན་པ་ལ་སྔ་མ་དང་འགལ་བ་ནི་རུང་བར་རོ་ཞེས་བྱ་བ་ལ། ཕྱི་མ་ཞེས་བྱ་བ་ནི་རུང་བ་སྟེ། དེ་དང་མཐུན་ལ་སྔ་མ་ཞེས་བྱ་བ་ནི་མི་རུང་བ་སྟེ། དེ་དག་དང་འགལ་བ་ནི་རུང་བ་སྟེ། དེ་ནི་འདིར་རུང་བར་མདོར་བསྡུའོ། །གནས་མལ་གྱི་གཞིའི་ཕྲན་ཚོགས་ལ་ སོགས་པའི་སྐབས་སོ། །གནས་མལ་གྱི་གཞི་རྫོགས་སོ། །འདུལ་བ་མདོའི་འགྲེལ་བ་རང་གི་རྣམ་པར་བཤད་པ ་ཞེས་བྱ་བ་གནས་བརྟན་ཡོན་ཏན་འོད་ཀྱི་མཛད་པ་རྫོགས་སོ།། །།རིག་བྱེད་ཉི་མ་རྣམས་ནི་མ་ལུས་གདོན་བྱས་ནས། བསྟན་བཅོས་བཞི་པོ་རྣམས་ལ་མཉམ་པོའི་མཐུ་མངའ་བ། །དག་སློང་ཡོན་ཏན་འོང་ཅེས་བྱ་བ་བྱུང་གྱུར་ཏེ། །གང་ཞིག་ཤཱཀྱའི་སྲས་ཀྱིས་རབ་ཏུ་བསྐུལ་བར་གྱུར། །བསོད་སྙོམས་ཕྱིར་ནི་གང་གི་བར་སྣང་ལ་འཁོར་ཞིང༌། །ལྷ་རྣམས་ལུས་ཕྱེད་དག་གིས་བྱུང་བར་གྱུར་བ་ནི། །བརྩོན་ལྡན་ཞལ་ཟས་བདུད་རྩི་རྣམས་ནི་འཛིན་མཛད་དེ། །འོད་ཟེར་དང་ལྡན་རྒྱན་རྣམས་ཀྱིས་སྨྲས་གནས་པར་གྱུར། །ནུ་མ་གཉིས་ཀྱི་ལྕིད་ཀྱིས་དུད་བྱས་ལྷ་ཡི་བུད་མེད་རྣམས་ནི་ཉམས་དགའ་བ། །ལག་པ་པདྨའི་ཟེ་འབྲུ་རྣམས་ལ་དབུལ་བ་ཆགས་པའི་ལག་དར་བཅས། །རོ་དང་བཅས་པའི་ཤིང་རྣམས་ལ་ནི་བྱུང་བའི་བཅའ་བ་དང་
བཅས་པ། །རྟག་ཏུ་གཡུལ་དོར་རྣམ་པར་རྒྱལ་བའི་ཕྱོགས་ནི་ཁ་ན་མ་ཐོ་ཉིད། །ཡེ་ཤེས་ལས་ནི་རབ་ཏུ་འཇུག་བའི་སྟེང་དུ་གང་གི་འགྲེལ་པ་བརྩམས་པ་སྟེ། །བྱེ་བྲག་བཤད་པ་རྣམས་ལས་ཤིན་ཏུ་རྒྱ་ཆེན་ཚུལ་ནི་རྣམ་པར་གསལ་བྱེད་པ། །ཐམས་ཅད་དུ་ནི་སྣང་བར་བྱེད་པའི་འོད་ཟེར་ཚོགས་ཀྱིས་མུན་པའི་རབ་རིབ་ལྟར། །རིན་ཆེན་འབྱུང་གནས་མཆོག་གི་གྲུབ་མཐའ་ང་རྒྱལ་ཆེན་པོ་རྣམས་ནི་འཇིག་པར་བྱེད། །ཐེག་པ་རྒྱས་པས་ཟབ་པའི་སངས་རྒྱས་གསུང་གི་ཆུ་ཡི་ཕུང་པོ་ལས། །རང་བྱུང་ཚུལ་ནི་རྣམ་པར་འཇོམས་པའི་ཤེས་རབ་ཀྱིས་བསྲུབས་ཡང་དག་པར། །ཤིན་ཏུ་དྲི་མེད་ཚུལ་གྱིས་རིན་ཆེན་རྣམས་ཀྱི་འོད་གསལ་འགྲེལ་པའི་དཔལ། །འགྲོ་བ་རྣམས་ཀྱི་དགེ་བའི་རྒྱུར་གྱུར་དེས་ནི་མྱུར་དུ་བཏུ་བར་བྱས། །མུན་པ་འཇོམས་ཤིན་ཚུལ་ཁྲིམས་ཡངས་པའི་འོད་ཟེར་ཅན་ནི་དཔལ་ལྡན་སྔོན་མེད་རི་བོང་ཅན། །རྩོད་པའི་དུས་སུ་སྐྱེས་པ་དྲི་མ་དང་བྲལ་གང་ཞིག་གྲངས་པ་རྫོགས་པ་ལེགས་པའི་བློ། །རྟག་ཏུ་མུ་སྟེགས་ཅན་གྱི་མཐུག་པའི་མུན་པ་ལས་རྒྱལ་ཤེས་རབ་རི་བོང་ཅན་གྱི་མཐར། །གྲགས་པའི་ཤེས་རབ་འཛིན་མཁས་དམན་པའི་ཚོགས་འཇོམས་ཤཱཀྱའི་འོད་ནི་གསལ་ལྡན་པ། །ཡང་དག་བསྟན་བཅོས་ཚུལ་གྱི་རབ་ཏུ་རྒྱས་པའི་པདྨ་གསལ་བར་བྱེད་ཅིང་ཐམས་ཅད་དུ། །སྐྱེས་བུ་ཤིན་ཏུ་རྣམ་དག་གྲགས་པའི་རྗེས་འགྲོ་གང་ཞིག་ཉི་མའི་གཤེགས་གཉེན་ལ་བརྟེན་པའོ།། །།ཚིགས་བཅད་སྟོང་ཕྲག་བཅུ་བཞི་ནི། །འདི་ཡི་ཚད་དུ་ཤེས་བྱ་སྟེ། །དཔལ་ལྡན་རྒྱལ་ཆེན་ཐམས་ཅད་ཀྱིས། །རྒྱལ་སྲིད་བྱེད་དུས་འདི་བྱས་སོ། །འདུལ་བ་མདོའི་འགྲེལ་པ་བཅོམ་བརླག་མ་ཞེས་བྱ་བ་ཡུལ་བཅོམ་བརླག་གི་འཕགས་པ་གཞི་ཐམས་ཅད་ཡོད་པར་སྨྲ་བའི་རྩོད་པ་བ་ཆེན་པོ་རྣམས་ཀྱི་ཁྱུ་མཆོག་བསྟན་བཅོས་དུ་མ་མཛད་པ་གཞུང་འབུམ་ཕྲག་བཅོ་བརྒྱད་ལ་ཁ་ཏོན་མཛད་པའི་སློབ་དཔོན་ཡོན་ཏན་འོད་ཀྱིས་མཛད་པ་རྫོགས་སོ།། །།འདི་ནི་དཔལ་ས་ཉིའི་གཙུག་ལག་ཁང་ཆེན་པོར་རྗེ་བཙུན་དམ་པ་རྒྱལ་པོ་ཆེན་པོའི་ཡང་ཆེན་པོ་དབང་ཕྱུག་དམ་པ་དཔལ་ཚུལ་ཁྲིམས་ཉི་མའི་ལྷ་རབ་ཏུ་རྒྱས་པར་གྱུར་པ་རྣམ་པར་རྒྱལ་བའི་རྒྱལ་སྲིད་ཀྱི་ལོ་ལ་བྲིས་པ་ཡིན་ནོ། །གང་འདི་འདུལ་བའི་སྡེ་སྣོད་སྟོང་ཕྲག་ཉི་ཤུ་རྩ་ལྔ་ལས་ལྷག་པའི་འབུམ་ཕྲག་གཅིག་གི་དོན་གསལ་བར་བྱེད་པ་རང་གི་
རྣམ་པར་བཤད་པ་ཞེས་བྱ་བ་ལོ་ཙཱ་བ་ཤཱཀྱའི་དགེ་སློང་ཚུལ་ཁྲིམས་འབྱུང་གནས་ཀྱིས་བསྒྱུར་བའི་བསོད་ནམས་གང་དེས་མཁན་པོ་དང་སློབ་དཔོན་དང་ཕ་དང་མ་སྔོན་དུ་འགྲོ་བར་བྱས་པའི་མ་ལུས་པའི་སེམས་ཅན་གྱི་ཕུང་པོས་བླ་ན་མེད་པའི་ཡེ་ཤེས་ཀྱི་འབྲས་བུ་ཐོབ་པར་གྱུར་ཅིག །། འབུམ་གྱི་ཚད་ལྡན་འདུལ་བའི་རྒྱ་མཚོ་ཆེན་པོ་དག །སྟོན་པས་གསུངས་པ་ལས་ནི་མན་ངག་ཚུལ་གྱིས་འདིར། །གཟིངས་ནི་ཡང་དག་ཐོབ་ནས་བླ་མའི་དྲིན་གྱིས་ནི། །གང་ཞིག་རིན་ཆེན་མདོ་རྣམས་ཡང་དག་མཛད་པར་གྱུར། །ས་གསུམ་བརྙེས་ནས་དཔལ་ལྡན་རྒྱལ་བ་རྣམས་ཀྱི་སྲས། །ཡོན་ཏན་འོད་ཅེས་བྱ་བ་ཡོན་ཏན་རྣམས་ཀྱིས་གཙོས། །མདོ་ཡི་བཤད་པ་བདུད་རྩིའི་རོ་ཡིས་ཡང་དག་པར། །རང་གིས་མཛད་འདི་འགྲོ་བ་ལ་ནི་ཕན་འདོད་ཅིང༌། །དགེ་སློང་ཕ་མ་ལ་སོགས་འདུལ་བའི་སྣོད་གྱུར་པའི། །འཇིག་རྟེན་ཚིམ་པར་མཛད་ཅིང་གྲགས་པས་ཀུན་ལ་ཁྱབ། །རྒྱལ་བའི་ཡུམ་ལ་ལེགས་པའི་བློ་མངའ་འཕགས་པ་ཐོགས་མེད་བཞིན་དུ་དྲི་མེད་དོན་ཤེས་ཁྱོད། །ཕྱོགས་ཀྱི་གླང་པོའི་བསྡུས་དོན་འདི་ལ་ཡང་ནི་མི་མཉམ་དེ་དང་འདྲ་བར་ཁྱོད་ཀྱིས་གཟུང༌། །སློབ་དཔོན་ཆོས་མཆོག་བཞིན་དུ་ཚང་མ་ལ་མཁས་ཁྱོད་ཀྱིས་ཕྱི་རོལ་དོན་གྲུབ་ལ་སྟེར་བ། །སློབ་དཔོན་དབྱིག་གཉེན་ལྟ་བུར་སེམས་ཅན་རྣམས་ལ་ཁྱོད་ནི་དོན་གཉེར་ལ་དགའ་མཛོད་ནི་སྟེར། །དཔལ་ལྡན་བློ་གྲོས་འབྱུང་གནས་ཞེས་བྱ་བཅོམ་ལྡན་འདས་ཀྱི་བསྟན་པའི་བསླབ་འཛིན་ནི། །གསོལ་དང་བཞི་ཡི་ལས་ཀྱི་ཆོ་གས་དགེ་སློང་རྣམ་དག་བསྙེན་རྫོགས་མཆོག་ནི་ཐོབ་གྱུར་ནས། །གཞན་རྣམས་ལ་ཡང་རུང་དབང་ཐོབ་ནས་རང་གིས་རབ་ཏུ་དབྱུང་ཕྱིར་མཁན་པོ་མཛད་པ་སྟེ། །རང་གི་རྣམ་བཤད་སྒྱུར་བར་བྱེད་པའི་སྦྱིན་བདག་དེ་ནི་ཡུན་རིང་པོར་ནི་གནས་གྱུར་ཅིག །བསྒྱུར་བའི་ཡོན་བདག་ཉིད་མཛད་པས། །ཁྱེད་ཀྱིས་དགེ་བ་གང་ཐོབ་པ། །དེས་ནི་ཚོགས་གཉིས་མྱུར་རྫོགས་ནས། །ཁྱོད་ཉིད་སངས་རྒྱས་ཉིད་གྱུར་ཅིག །།རྒྱ་གར་གྱི་མཁན་པོ་པཎྜི་ཏ་ཨ་ལངྐར་དེ་བ་དང༌། ཞུ་ཆེན་གྱི་ལོ་ཙཱ་བ་ཤཱ་ཀྱའི་དགེ་སློང་ཚུལ་ཁྲིམས་འབྱུང་གནས་སྦས་པ་གཉིས་ཀྱིས་དཔལ་སྒྱེའུ་རིའི་རྩ་ཆོས་སྐོར་དབེན་ཚའི་གཙུག་ལག་ཁང་དུ་བསྒྱུར། འདི་ལ་ཤློ་ཀ་སྟོང་ཕྲག་བཅུ་བཞི་ཡོད་དོ།། །།