འདུལ་བའི་མདོའི་རྒྱ་ཆེར་འགྲེལ་པ།
རྒྱ་གར་སྐད་དུ། བི་ན་ཡ་སཱུ་ཏྲ་ཊཱི་ཀ །བོད་སྐད་དུ། འདུལ་བའི་མདོའི་རྒྱ་ཆེར་འགྲེལ་པ། བམ་པོ་དང་པོ། དཀོན་མཆོག་གསུམ་ལ་ཕྱག་འཚལ་ལོ། །འདུལ་བ་རྒྱ་མཚོའི་གཏིང་དང་ཕ་རོལ་བརྙེས་གྱུར་ཅིང༌། །དྲི་མ་མེད་རྒྱུ་མཐའ་དག་རྫོགས་པའི་དགོངས་ལྡན་པ། །འཇིག་རྟེན་འདྲེན་པ་མ་ལུས་མཆོག་ལ་ཕྱག་འཚལ་ཏེ། །འདུལ་བའི་མདོ་ཡི་དེ་ཉིད་རྣམ་པར་དབྱེ་བར་བྱ། །ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་བྱ་བ་མདོ་དང་པོ་འདིས་ནི། འདུལ་བའི་མདོའི་འགྲེལ་པ་དང༌། བརྗོད་པར་བྱ་བ་དང༌། དགོས་པ་དང༌། དགོས་པའི་ཡང་དགོས་པ་རྣམས་བརྗོད་དེ། འདི་ལྟར་རྟོག་པ་སྔོན་དུ་གཏོང་བ་དག་ནི་འབྲེལ་པ་མེད་པ་དང༌། བརྗོད་པར་བྱ་བ་མེད་པ་དང༌། དགོས་པ་མེད་པའི་ཚིག་ཀྱང་ཁས་མི་ལེན་ན། བསྟན་བཅོས་ལ་སོགས་པ་གཞན་ལྟ་སྨོས་ཀྱང་ཅི་དགོས་ཏེ། དེ་བས་ན་འདུལ་བའི་མདོ་འདི་ལ་བརྗོད་པར་བྱ་བ་མེད་པར་དོགས་པ་བསལ་བའི་ཕྱིར་བརྗོད་
པར་བྱ་བ་བསྙད་དོ། །འབྲས་བུ་མེད་པར་དོགས་པ་བཟློག་པའི་ཕྱིར་དགོས་པ་བརྗོད་དོ། །ཐབས་མེད་པར་དོགས་པ་སྤང་བའི་ཕྱིར་འབྲེལ་པ་བཤད་དོ། །འདོད་པའི་དོན་གྲུབ་པར་བྱ་བའི་ཕྱིར་དགོས་པའི་ཡང་དགོས་པ་བསྟན་ཏོ། །དེ་ལྟར་ན་འདིས་བཞི་པོ་བསྟན་ཏེ། ཁ་ཅིག་ནི་མངོན་སུམ་དུའོ། །ཁ་ཅིག་ནི་བརྒྱུང་པས་སོ། །དེ་ལ་འདིར་བརྗོད་པར་བྱ་བ་ནི། ཆོས་འདི་པ་དག་གི་ཚུལ་ཁྲིམས་ཏེ། ཚུལ་ཁྲིམས་ནི་ཚུལ་ཁྲིམས་སོ། །དེ་ལྟ་བས་ན་ཚུལ་ཁྲིམས་ཞེས་བྱ་བའི་སྒྲ་སྨོས་པ། བརྗོད་པར་བྱ་བ་བསྙད་པ་ཡིན་ནོ། །འདིར་དགོས་པ་ནི་བཅོམ་ལྡན་འདས་ཀྱིས་གསུངས་པའི་ཚུལ་ཁྲིམས་བསྟན་པ་སྟེ། དེ་ཡང་མདོ་འདིས་རྗོད་པར་བྱེད་དོ། །དེ་ལྟ་བས་ན་མདོ་འདི་ནི་ཐབས་ཡིན་ལ། ཚུལ་ཁྲིམས་བསྟན་པ་ནི་ཐབས་ལས་བྱུང་བ་ཡིན་ནོ། །ཐབས་དང་ཐབས་ལས་བྱུང་བའི་མཚན་ཉིད་ནི་འབྲེལ་བ་ཡིན་ནོ། །འབྲེལ་པ་ནི་ཤུགས་ཀྱིས་སྨོས་ཏེ། འདི་ལྟར་ཚུལ་ཁྲིམས་རྟོགས་པར་བྱ་བའི་ཕྱིར་མདོ་རྩོམ་པ་ན་དོན་གྱིས་མདོ་ནི་ཐབས་ཉིད་ཡིན་པར་སྨོས་པའི་ཕྱིར་རོ། །ཐབས་མེད་པར་འཇུག་པ་མི་སྲིད་པས་དེའི་ཕྱིར་འབྲེལ་པ་ནི་དོན་
གྱིས་བསྟན་པ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། འདིར་ཚུལ་ཁྲིམས་ནི་བརྗོད་པར་བྱ་བ་ཡིན་ལ། ཚུལ་ཁྲིམས་བསྟན་པ་ནི་དགོས་པ་ཡིན་ཏེ། འདུལ་བའི་མདོ་འདིས་ཚུལ་ཁྲིམས་སྟོན་པར་བྱེད་པས་ན། འདུལ་བའི་མདོ་ནི་དགོས་པ་དེའི་ཐབས་ཡིན་ནོ། །དེ་ལྟར་ན་འདུལ་བའི་མདོ་དང་དགོས་པ་གཉིས་ནི་ཐབས་དང་ཐབས་ལས་བྱུང་བའི་མཚན་ཉིད་ཀྱིས་འབྲེལ་པ་ཡིན་ཏེ། རྒྱུ་དང་འབྲས་བུའི་མཚན་ཉིད་ཅེས་བྱ་བའི་ཐ་ཚིག་གོ །དེ་ལྟ་བས་ན་ཚུལ་ཁྲིམས་ཡོངས་སུ་ཤེས་པར་བྱ་བའི་དོན་དུ་མདོ་འདི་བརྩམས་སོ་ཞེས་བྱ་བར་གནས་སོ།། བརྒྱལ་ལ་ལ་ཞིག་ཚུལ་ཁྲིམས་ཡོངས་སུ་ཤེས་པ་དེས་ཅི་བྱ་སྟེ། དེ་ནི་བྱ་རོག་གི་སོ་བརྟག་པ་དང་འདྲ་བར་གང་ཡང་དགོས་པ་མེད་དོ་ཞེས་རྒོལ་ན། དེའི་ཕྱིར་དགོས་པའི་ཡང་དགོས་པ་བརྗོད་པར་བྱ་སྟེ། དེ་ཡང་ངེས་པར་འབྱུང་བ་ཞེས་སྨོས་པས་བསྟན་ཏོ། །ངེས་པར་འབྱུང་བ་ནི་མྱ་ངན་ལས་འདས་པ་སྟེ། བཅོམ་ལྡན་འདས་ཀྱི་བསྟན་པ་ལ་ཚུལ་ཁྲིམས་འདི་ནི་ངེས་པར་འབྱུང་བའི་ཕྱིར་བསྟན་པ་ཡིན་པས། དེའི་ཕྱིར་ཚུལ་ཁྲིམས་ཡོངས་སུ་དག་པས་མྱ་ངན་ལས་འདས་པ་ཡང་དག་པར་འཐོབ་པར་འགྱུར་རོ། །འོ་ན་ཡེ་ཤེས་ཀྱིས་ཉོན་མོངས་པ་རྣམས་འཇོམས་པ་ཡིན་ན། ཇི་ལྟར་ཚུལ་ཁྲིམས་ཀྱིས་དེ་ཡང་དག་པར་འཐོབ་པར་འགྱུར་ཞེན། བདེན་མོད་ཀྱི་འོན་ཀྱང་ཚུལ་ཁྲིམས་ལ་བརྟེན་ནས་ཡེ་ཤེས་ཀྱིས་ཉོན་མོངས་པ་རྣམས་སྤོང་བར་འགྱུར་ཏེ། དེའི་ཕྱིར་མདོ་སྡེ་ལས་ཀྱང་ཚུལ་ཁྲིམས་ལ་གནས་ཚུལ་ཁྲིམས་ལ་བརྟེན་ནས་འཕགས་པའི་བདེན་པ་བཞི་པོ་དག་ཡང་དག་པ་ཇི་ལྟ་བ་བཞིན་དུ་མཐོང་བར་འགྱུར་རོ་ཞེས་གསུངས་སོ། །འདིར་དགོས་པ་ནི་ཚུལ་ཁྲིམས་བསྟན་པའོ་ཞེས་སྨྲས་ན། འོན་རྣམ་པར་འབྱེད་པ་ལ་སོགས་པའི་གཞུང་གིས་ཚུལ་ཁྲིམས་དེ་བསྟན་ཟིན་པས། དེའི་ཕྱིར་མདོ་འདི་བརྩམ་པར་མི་བྱ་བ་ཁོ་ནའོ་ཞེན། དེ་ནི་དེ་ལྟ་མ་ཡིན་ཏེ། འདི་ལྟར་གཞུང་གཞན་གྱིས་དེ་བསྟན་མོད་ཀྱི། འོན་ཀྱང་གཞུང་རྒྱས་པ་ཉན་པས་འཇིགས་པ་རྣམས་ཀྱི་དོན་དང༌། རྣམ་པར་འབྱེད་པ་ལ་སོགས་པ་དེ་དག་ཉིད་ཡང་དག་པར་བསྟན་པར་བྱ་བ་གཞན་དག་གིས་ཕྱིར་ལོག་པར་རྣམ་པར་
འཆད་པ་བསལ་བའི་དོན་དུ་སློབ་དཔོན་གྱིས་བརྩམས་སོ། །དེ་ལྟ་བས་ན་བརྗོད་པར་བྱ་བ་དང༌། དགོས་པའི་ཡང་དགོས་པ་ནི་ཚུལ་ཁྲིམས་དང་ངེས་པར་འབྱུང་བའི་སྒྲ་གཉིས་ཀྱིས་གོ་རིམས་བཞིན་དུ་མངོན་སུམ་དུ་བསྟན་ལ། འབྲེལ་པ་དང་དགོས་པ་ནི་ཤུགས་ཀྱིས་བསྟན་ཏེ། ཚུལ་ཁྲིམས་བསྟན་པའི་དོན་དུ་མདོ་བརྩམ་པའི་ཕྱིར་རོ། །དབང་དུ་བྱ་སྟེ་ཞེས་བྱ་བའི་སྒྲ་ནི་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱ་བ་ཉིད་ཀྱི་བར་སྟོན་ཏེ། དེ་ནི་རེ་ཞིག་སྤྱིའི་དོན་ཡིན་ནོ། །ཡན་ལག་གི་དོན་ཡང་བརྗོད་པར་བྱ་སྟེ། ངེས་པར་འབྱུང་བའི་ཚུལ་ཁྲིམས་ཞེས་བྱ་བ་ནི། ངེས་པར་འབྱུང་བའི་ཕྱིར་ཚུལ་ཁྲིམས་ནི་ངེས་པར་འབྱུང་བའི་ཚུལ་ཁྲིམས་སོ། །འབྱུང་བ་ཞེས་བྱ་བའི་སྒྲ་འདི་ནི་དོན་མང་པོ་ཞིག་ལ་ཡང་མཐོང་སྟེ། འདི་ལྟ་སྟེ། རྐང་གིས་འགྲོ་བ་ལ་གྲོང་དུ་བྱུང་བ་དང༌། གྲོང་ཁྱེར་དུ་འབྱུང་བ་ཞེས་བྱ་བ་ལྟ་བུའོ། །བཞོན་པའི་དོན་ལ་ཡང་མཐོང་སྟེ། འདི་ལྟ་སྟེ་དཔེར་ན། གླང་པོ་ཆེས་འབྱུང་བ་དང༌། རྟས་འབྱུང་བ་ཞེས་བྱ་བ་ལྟ་བུའོ། །ལམ་ལ་ཡང་འབྱུང་བ་ཞེས་བྱ་སྟེ། དེ་ནས་འབྱུང་བའི་ཕྱིར་རོ། །ཐོབ་པར་བྱ་བ་ལ་ཡང་འབྱུང་བ་ཞེས་བྱ་སྟེ། འབྱུང་བ་ནི་ཐེབ་པར་བྱ་བའོ་ཞེས་ཟེར་བའི་ཕྱིར་རོ། །དེ་དག་ལས་འདིར་ནི་འབྱུང་བའི་སྒྲ་ཐོབ་པར་བྱ་བ་ཁོ་ནར་བཟུང་སྟེ། ངེས་པར་ཞེས་བྱ་བའི་སྒྲ་སྨོས་པའི་ཕྱིར་རོ། །ངེས་པར་འབྱུང་བ་ནི་ངེས་པར་འབྱུང་བ་སྟེ། ཕྱིར་མི་ལྡོག་པ་ཐོབ་པར་བྱ་བ་ཕུང་པོའི་ལྷག་མ་མེད་པའི་མྱ་ངན་ལས་འདས་པ་ཐོབ་པ་ཞེས་བྱ་བའི་ཐ་ཚིག་གོ །ཅིའི་ཕྱིར་ཟག་པ་མེད་པའི་ལམ་མི་གཟུང་ཞེ་ན། གཙོ་བོ་མ་ཡིན་པའི་ཕྱིར་རོ། །ལམ་ནི་གཙོ་བོ་མ་ཡིན་ཏེ། ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དོན་དུ་ཡིན་པའི་ཕྱིར་རོ། །གཙོ་བོ་དང་གཙོ་བོ་མ་ཡིན་པ་གཉིས་ནི། གཙོ་བོ་ལ་འབྲས་བུར་ཡིད་ཆེས་སོ་ཞེས་ཟེར་བའི་ཕྱིར་རོ། །མྱ་ངན་ལས་འདས་པ་ནི་དོན་དམ་པར་གཙོ་བོ་ཡིན་ཏེ། དགེ་བ་དང་རྟག་པའི་ཕྱིར་རོ། །དེ་ལྟ་བས་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པ་ཡང་དག་པར་ཐོབ་པའི་གནས་སྐབས་གང་ཡིན་པ་དེ་ནི། ངེས་པར་འབྱུང་བའི་སྒྲར་བརྗོད་དེ། འདི་ལྟར་དེ་གཅིག་པུ་
ཕྱིར་མི་ལྡོག་པ་ཁོ་ན་ཡིན་གྱི། མུ་སྟེགས་བྱེད་ཀྱིས་ཀུན་ནས་བརྟགས་པ་གཞན་ནི་མ་ཡིན་པའི་ཕྱིར་རོ། །ཚུལ་ཁྲིམས་ཞེས་བྱ་བ་ནི། སྤོང་བ་བདུན་ཞེས་བྱ་བའི་ཚུལ་ཁྲིམས་འཁོར་དང་བཅས་པ་སྟེ། གང་ནས་འདུལ་བའི་མདོ་འདི་བཏུས་པའི་འདུལ་བ་མཐའ་དག་བཤད་པའོ། །འདིར་འདུལ་བ་ཞེས་བྱ་བ་ཡང་རྣམ་པར་འབྱེད་པ་ལ་སོགས་པ་དག་ཡིན་པར་བལྟ་སྟེ། དེས་བྱ་བ་དང་བྱ་བ་མ་ཡིན་པ་ཉེ་བར་སྟོན་པས་སློབ་མ་རྣམས་འདུལ་ཞིང་རྗེས་སུ་སྟོན་པར་བྱེད་པས་འདུལ་བའོ། །དབང་དུ་བྱ་སྟེ་ཞེས་བྱ་བའི་སྒྲ་ནི་དབང་དུ་བྱ་བའི་དོན་ཏོ། །འདི་ལྟར་ཨ་ཐ་ཞེས་བྱ་བའི་སྒྲ་ནི་བཀྲ་ཤིས་པ་ལ་སོགས་པ་དག་ལ་ཡང་འབྱུང་མོད་ཀྱི། དབང་དུ་བྱ་བ་སྟེ་ཞེས་བྱ་བའི་སྒྲས་བྱེ་བྲག་ཏུ་ངེས་པར་གཞག་སྟེ། འདི་ནི་དབང་དུ་བྱ་བའི་དོན་ཡིན་གྱི་གཞན་གྱི་དོན་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་ཨ་ཐ་ཞེས་བྱ་བའི་སྒྲ་ནི་བཀྲ་ཤིས་པའི་དོན་དུ་ཡང་མཐོང་སྟེ། འདི་ལྟ་སྟེ་དཔེར་ན། བཀྲ་ཤིས་པ་འདི་ལས་ཡུན་རིང་དུ་འཚོ་བ་དང་མཐུན་པའི་བརྗོད་ལེའུ་རྣམ་པར་བཤད་པར་བྱའོ་ཞེས་བྱ་བ་ལྟ་བུའོ། །ཁ་ཅིག་ཏུ་ཚིག་གི་ཕྲད་ཀྱི་དོན་དུ་ཡང་སྦྱོར་ཏེ། དེ་ནས་བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དུས་ཀྱི་ཚེ་དེ་ཉིད་ན་ཞེས་བྱ་བ་ལྟ་བུའོ། །ཁ་ཅིག་ཏུ་དེ་མ་ཐག་པའི་དོན་ཏེ། འདི་ལྟ་སྟེ་དཔེར་ན། དེས་དེ་མ་ཐག་ཏུ་སོམ་ཉི་ཐམས་ཅད་རྣམ་པར་བཅད་ནས་ཞེས་བྱ་བ་ལ་སོགས་པ་ལྟ་བུའོ། །ཁ་ཅིག་ཏུ་ནི་དབང་དུ་བྱ་བའི་དོན་ཏེ། འདི་ལྟ་སྟེ་དཔེར་ན་སྒྲའི་རྗེས་སུ་བསྟན་པའི་དབང་དུ་བྱའོ་ཞེས་བྱ་བ་ལྟ་བུའོ། །འདིར་ཡང་ཨ་ཐ་ཞེས་བྱ་བའི་སྒྲ་སློབ་དཔོན་གྱིས་དབང་དུ་བྱ་བའི་དོན་ཁོ་ནར་སྦྱར་ཏེ། རང་གི་བཤད་པ་ལས་དེ་ལྟར་རྣམ་པར་བཤད་པའི་ཕྱིར་རོ། །དབང་དུ་བྱ་སྟེ་ཞེས་བྱ་བ་ནི་དབང་དུ་བྱ་བ་སྟེ། མདོ་རེ་རེ་ལ་ཡང་ངེས་པར་འབྱུང་བའི་ཚུལ་ཁྲིམས་ཞེས་བྱ་སྟེ། ཉེ་བར་གནས་ཞེས་བྱ་བའི་ཐ་ཚིག་གོ །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་འདུན་ཐམས་ཅད་འདུས་པ་ན་ཞེས་བྱ་བ་ལ་སོགས་པའི་མདོ་དེ་བརྗོད་ནས། དེ་མ་ཐག་ཏུ་ངེས་པར་འབྱུང་བའི་ཚུལ་ཁྲིམས་ཞེས་བྱ་བ་འདི་དང་སྦྱར་བར་བྱས་ཏེ། ཚུལ་
ཁྲིམས་འདི་ནི་ཕུང་པོའི་ལྷག་མ་མེད་པའི་མྱ་ངན་ལས་འདས་པ་འཐོབ་པར་འགྱུར་བ་ཡིན་པའི་ཕྱིར་རོ། །དེ་བཞིན་དུ་རབ་ཏུ་འབྱུང་བ་དང༌། རྫོགས་པར་བསྙེན་པ་དེའི་ཕྱིར་དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་བྱ་བ་དེ་བརྗོད་ནས་ངེས་པར་འབྱུང་བའི་ཚུལ་ཁྲིམས་ཞེས་བྱ་བ་འདི་ཡང་བརྗོད་པར་བྱ་བ་དང༌། མི་རུང་བ་དང༌། མཐུན་རྐྱེན་ལ་རུང་བ་དང་འགལ་བ་ནི་རུང་བ་མ་ཡིན་པར་བསྡུའོ། །ཕྱི་མ་དང་མཐུན་ལ་སྔ་མ་དང་འགལ་བ་ནི་རུང་བར་རོ་ཞེས་བྱ་བའི་བར་དེ་དག་བརྗོད་ནས། ངེས་པར་འབྱུང་བའི་ཚུལ་ཁྲིམས་ཞེས་བྱ་བ་འདི་དང་སྦྱར་བར་བྱའོ། །འདི་སྐད་བསྟན་ཏེ། མདོའི་ཚིག་ཡོངས་སུ་རྫོགས་ཀྱི་བར་དུ་ངེས་པར་འབྱུང་བའི་ཚུལ་ཁྲིམས་ཞེས་བྱ་བ་འདིའི་དབང་དུ་བྱས་པར་རིག་པར་བྱའོ། །དེ་ལྟར་ན་མདོ་འདིའི་སྤྱིའི་དོན་འདི་འབྱུང་སྟེ། ངེས་པར་འབྱུང་བའི་ཚུལ་ཁྲིམས་ཞེས་བྱ་བའི་སྒྲ་ནི་མདོ་རེ་རེ་ལ་ཡང་ཉེ་བར་གནས་ཏེ། འདུལ་བའི་མདོ་མཐའ་དག་གི་དགོས་པ་དང་བརྗོད་པར་བྱ་བ་དང༌། འབྲེལ་པ་དང༌། དགོས་པའི་ཡང་དགོས་པ་བསྟན་པའི་ཕྱིར་རོ། །དབང་དུ་བྱས་ཏེ་ཞེས་བྱ་བའི་སྒྲ་ནི་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱ་བ་སྟེ། བྱ་བ་ཞེས་བྱ་བར་སྟོན་ཏོ། །དེ་ལྟར་རེ་ཞིག་མདོ་དང་པོས་ཚུལ་ཁྲིམས་ཀྱི་ཕུང་པོ་མཐའ་དག་ཕུང་པོའི་ལྷག་མ་མེད་པའི་མྱ་ངན་ལས་འདས་པ་འཐོབ་པའི་དོན་ཉིད་ཡིན་པར་བཅོམ་ལྡན་འདས་ཀྱིས་གསུངས་པ་བསྟན་ནས། ད་ནི་དང་པོར་རབ་ཏུ་འབྱུང་བའི་གཞི་བརྗོད་པར་བྱ་སྟེ། བསླབ་པའི་གཞི་རྣམ་པར་གཞག་པ་མཐའ་དག་ནི་རབ་ཏུ་བྱུང་བ་རྣམས་ཁོ་ནའི་ཡིན་པར་གསུངས་ཀྱི་ཁྱིམ་པ་རྣམས་ཀྱི་མ་ཡིན་པའི་ཕྱིར་རོ། །སྤོང་བ་བདུན་ཞེས་བྱ་བ་སོ་སོར་ཐར་པའི་སྡོམ་པ་ཡང་དེ་དག་ཁོ་ནའི་ཡིན་ནོ། །འདུལ་བ་གཞི་ལས་ཀྱང་དང་པོར་རབ་ཏུ་འབྱུང་བའི་གཞི་བསྟན་པས་འདིར་ཡང་དེ་ཁོ་ན་བཞིན་དུ་སྟོན་ཏོ། །དེ་ཡང་སྔོན་གྱི་ཆོ་ག་དང་ད་ལྟར་གྱི་ཆོ་གའི་དབྱེ་བ་རྣམ་པ་གཉིས་ཏེ། རེ་ཞིག་སྔོན་གྱི་ཆོ་ག་ཇེ་བཤད་པར་བྱ་སྟེ། དང་པོར་བསྟན་པའི་ཕྱིར་དང༌། བརྗོད་པར་བྱ་བ་ཉུང་བའི་ཕྱིར་རོ། །ད་ལྟར་གྱི་ཆོ་ག་བས་སྔར་བསྟན་པ་དང༌།
མཁན་པོ་དང་སློབ་དཔོན་གྱིས་གནང་བ་བས་སྔར་བཤད་པས་ན། དེའི་ཕྱིར་སྔོན་གྱི་ཆོག་ཞེས་བྱ་སྟེ། དེ་གཉིས་མེད་པར་ཡང་སྔོན་རབ་ཏུ་འབྱུང་བ་དང༌། རྫོགས་པར་བསྙེན་པའི་ཆོ་ག་འབྱུང་བས་དེའི་ཕྱིར་སྔོན་གྱི་དུས་ན་རབ་ཏུ་འབྱུང་བ་དང་རྫོགས་པར་བསྙེན་པ་ཅིག་ཅར་མགོ་མཉམ་དུ་རྫོགས་པར་འགྱུར་ཏེ། མདོ་མཛད་པས་ཀྱང་དོན་དེ་ཉིད་ཡང་དག་པར་བཟུང་ནས། དགེ་འདུན་ཐམས་ཅད་འདུས་པ་ན་ཆ་ལུགས་འདི་བཞིན་བྱས། རྒན་རིམས་ལ་ཕྱག་འཚལ་ཏེ། ཐལ་མོ་སྦྱར་ཙོག་ཙོག་པོར་འདུག་ཅིང་གསོལ་བ་བཏབ་པར་གྱུར་པ་གསུམ་དང༌། གསོལ་བ་དང་བཞིའི་ལས་ཀྱིས་ཅིག་ཅར་རབ་ཏུ་འབྱུང་བ་དང༌། རྫོགས་པར་བསྙེན་པ་ཉེ་བར་བསྒྲུབས་པར་གྱུར་པ་ལྟ་བུ་ནི་སྔོན་གྱི་ཆོ་གའོ་ཞེས་བྱ་བ་སྨྲས་སོ། །དགེ་འདུན་ཐམས་ཅད་ཅེས་བྱ་བའི་ཚིག་ནི་དཀྱིལ་འཁོར་བ་ཕྱོགས་གཅིག་གི་དགེ་འདུན་འདུས་པ་དགག་པའི་དོན་ཏོ། །འདི་སྐད་བསྟན་ཏེ། མཚམས་དེ་ན་དགེ་སློང་ཇི་སྙེད་གནས་པ་དེ་དག་ཐམས་ཅད་ལས་ཀྱི་གནས་དེར་ལྷགས་པ་ཡིན་པས། དེའི་ཕྱིར་དགེ་འདུན་ཐམས་ཅད་ཅེས་བྱའོ། །འདུས་པ་ན་ཞེས་བྱ་བ་ནི་ཚོགས་པ་ནའོ། །ཆ་ལུགས་འདི་བཞིན་བྱས་ཞེས་བྱ་བ་ནི་རབ་ཏུ་བྱུང་བ་དང་རྫོགས་པར་བསྙེན་པར་འདོད་པ་དེས་ཆ་ལུགས་འདི་བཞིན་བྱས་པ་དེ། ཆ་ལུགས་འདི་བཞིན་བྱས་པ་དེ་ནི་རབ་ཏུ་དབྱུང་བ་དང་རྫོགས་པར་བསྙེན་པར་འདོད་པ་ཡིན་ནོ། །ཆ་ལུགས་ཞེས་བྱ་བ་ནི། རབ་ཏུ་འབྱུང་བའི་རྟགས་སོ། །འདི་བཞིན་བྱས་ཞེས་བྱ་བ་ནི། རྫོགས་པར་བྱས་པ་སྟེ། རབ་ཏུ་འབྱུང་བ་དང་རྫོགས་པར་བསྙེན་པར་འདོད་པས་ཞེས་བྱ་བའི་ཐ་ཚིག་གོ །གང་གི་ཚེ་སྐྲ་དང་ཁ་སྤུ་དག་བྲེག་ས་ཤིང་ཆོས་གོས་གསུམ་བགོས་པར་གྱུར་པ་དེའི་ཚེ་ན་ཆ་ལུགས་འདི་བཞིན་བྱས་ཞེས་བྱའོ། །ཆ་ལུགས་འདི་བཞིན་བྱས་པའི་གང་ཟག་དེ་དགེ་འདུན་དུ་གྱུར་པའི་དགེ་སློང་དག་གིས་རབ་ཏུ་འབྱུང་བ་དང་རྫོགས་པར་བསྙེན་པ་ཉེ་བར་བསྒྲུབས་པར་གྱུར་པ་ཞེས་བྱ་བ་བྱེད་པའི་ཚིག་དེ་དང་འདིར་སྦྱར་རོ། །རྒན་རིམས་ལ་ཞེས་བྱ་བ་ནི་དགེ་འདུན་ལ་རབས་གཉིས་ཏེ། གཞོན་རིམས་དང་རྒན་རིམས་ཡོད་པས། དགེ་སློང་རྒན་པ་རྣམས་ཀྱི་རབས་ནི་རྒན་རིམས་ཏེ་དེར་ཕྱག་འཚལ་
ཏེ་ཞེས་བྱ་བའི་ཐ་ཚིག་གོ །ཕྱག་འཚལ་ཏེ་ཞེས་བྱ་བ་ནི། ཡན་ལག་ལྔས་ཕྱག་འཚལ་ཏེ་ཞེས་བྱ་བའི་ཐ་ཚིག་གོ །སུ་ལ་ཞེ་ན་རྒན་རིམས་ལ་ཞེས་བྱ་བར་སྦྱར་རོ། །ཐལ་མོ་སྦྱར་ཞེས་བྱ་བ་ནི། དེ་ལ་ཐལ་མོ་སྦྱར་བའི་ཚུལ་དང་ལྡན་པ་སྟེ། ཐལ་མོ་སྦྱར་བ་དེ་ཉེ་བར་བསྒྲུབས་པར་གྱུར་ཞེས་བྱ་བ་དེ་དང་འདིར་སྦྱར་རོ། །ཙོག་ཙོག་པོར་འདུག་ཅིང་ཞེས་བྱ་བ་ལ། ཙོག་པུར་འདུག་པ་ནི་ཙོག་ཙོག་པོར་འདུག་པ་སྟེ། དེ་སྟན་ལ་མི་འདུག་གོ །ཐམས་ཅད་དུ་ཡང་རྒན་རིམས་ལ་ཞེས་བྱ་བར་སྦྱར་རོ། །གསོལ་བ་བཏབ་པར་གྱུར་པ་ཞེས་བྱ་བ་ལ། གསོལ་བ་ཉིད་གསོལ་བ་བཏབ་པའོ། །གསོལ་བ་བཏབ་པ་གང་ལ་ཡོད་པ་དེ་གསོལ་བ་བཏབ་པར་གྱུར་པ་སྟེ། གསོལ་བ་བཏབ་པར་གྱུར་པའི་གང་ཟག་དེ་ཉེ་བར་བསྒྲུབས་པར་གྱུར་ཞེས་བྱ་བར་སྦྱར་རོ། །ཅི་ཞིག་གསོལ་བ་བཏབ་པར་གྱུར་ཞེ་ན། སྨྲས་པ། རབ་ཏུ་འབྱུང་བ་དང་རྫོགས་པར་བསྙེན་པར་རོ། །ཇི་ལྟར་ཞེ་ན། གསུམ་དང་ཞེས་བྱ་སྟེ། གལ་ཏེ་རབ་ཏུ་འབྱུང་བ་དང་རྫོགས་པར་བསྙེན་པར་བྱ་བའི་ཕྱིར་ལན་གསུམ་གསོལ་བར་བྱེད་ན་དེའི་ཚེ་ན་དེ་གསོལ་བ་བཏབ་པར་གྱུར་པ་ཡིན་ནོ། །འདིར་གསོལ་བ་ནི། དགེ་འདུན་བཙུན་པ་རྣམས་གསན་དུ་གསོལ། བདག་མིང་འདི་ཞེས་བགྱི་བ་དགེ་འདུན་ལས་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་གསོལ་ན། ཐུགས་བརྩེ་བ་ཅན་དགེ་འདུན་བཙུན་པ་རྣམས་ཀྱིས་ཐུགས་བརྩེ་བའི་སླད་དུ་བདག་རབ་ཏུ་འབྱུང་དུ་གསོལ། རྫོགས་པར་བསྙེན་པར་མཛད་དུ་གསོལ། ཞེས་བྱ་བ་ཡིན་ཏེ། སྔགས་འདིས་ལན་གསུམ་གསོལ་བ་བཏབ་པར་གྱུར་པ་ཞེས་བྱ་བའི་ཐ་ཚིག་གོ །གསོལ་བ་དང་བཞིའི་ལས་ཀྱིས་ཞེས་བྱ་བ་ནི། ལས་གང་ལ་གསོལ་བ་དང་བཞི་ཡོད་པ་དེ་གསོལ་བ་དང་བཞིའི་ལས་སོ། །འདི་སྐད་བསྟན་ཏེ། ལས་གང་ལ་ལས་བརྗོད་པ་གསུམ་དང་གསོལ་བ་དང་བཞིའི་ལས་བྱེད་པ་དེ་ནི་གསོལ་བ་དང་བཞིའི་ལས་ཡིན་ནོ། །བརྗོད་པ་ཞེས་བྱ་བ་ནི་ཚིག་ཏུ་བརྗོད་པའི་དོན་ཏེ། ཟློས་ཞེས་བྱ་བའི་ཐ་ཚིག་གོ །ཅིག་ཅར་རབ་ཏུ་འབྱུང་བ་དང་རྫོགས་པར་བསྙེན་པ་ཞེས་བྱ་བ་ལ། ཅིག་ཅར་ཞེས་བྱ་བའི་སྒྲ་ནི་འདིར་དུས་
གཅིག་ཏུ་ཞེས་བྱ་བའི་ཐ་ཚིག་ཡིན་ནོ། །འདི་སྐད་བསྟན་ཏེ། དུས་མཉམ་དུ་ཅིག་ཅར་དུས་གཅིག་ཁོ་ནར་དེ་གཉིས་ཀ་ཉེ་བར་བསྒྲུབས་པར་གྱུར་པ་སྟེ། དགེ་འདུན་དུ་གྱུར་པའི་དགེ་སློང་དག་གིས་རྫོགས་པར་བྱས་པར་གྱུར་པ་ཡིན་གྱི་རིམ་གྱིས་ནི་མ་ཡིན་ནོ། །ཅིག་ཅར་ཞེས་བྱ་བའི་སྒྲ་འདིར་དུས་གཅིག་ལ་བྱའོ་ཞེས་བྱ་བ་དེ་ཅི་ལས་རིག་པར་བྱ་ཞེན། སྔགས་ཀྱི་ཚིག་ལས་ཏེ་འདི་ལྟར་སྔགས་ལས། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་དགེ་འདུན་ལས་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་གསོལ་ཏེ། དེའི་སླད་དུ་དགེ་འདུན་གྱི་མིང་འདི་ཞེས་བགྱི་བ་རབ་ཏུ་འབྱུང་བ་དང་རྫོགས་པར་བསྙེན་པར་མཛད་ན་ཚེ་དང་ལྡན་པ་གང་དག་མིང་འདི་ཞེས་བགྱི་བ་རབ་ཏུ་འབྱུང་བ་དང་རྫོགས་པར་བསྙེན་པར་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་དག་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་མིང་འདི་ཞེས་བགྱི་བ་རབ་ཏུ་ཕྱུང་རྫོགས་པར་བསྙེན་པར་མཛད་པ་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་འདོན་པའི་ཕྱིར་རོ། །སྔགས་འདི་ལ་རབ་ཏུ་ཕྱུང་རྫོགས་པར་བསྙེན་པར་མཛད་ལགས་ཏེ་ཞེས། དེ་གཉིས་སྨོས་པ་གང་ཡིན་པ་དེ་འདིར་ཁུངས་ཡིན་པར་རིག་པར་བྱའོ། །ལྟ་བུ་ནི་སྔོན་གྱི་ཆོ་གའོ་ཞེས་བྱ་བ་ལ། ལྟ་བུ་ནི་ཞེས་བྱ་བའི་སྒྲ་ནི་རྣམ་པའི་ཚིག་ཡིན་ཏེ་སྔོན་གྱི་ཆོ་གའི་རྣམ་པ་ནི་དེ་ལྟ་བུར་རིག་པར་བྱའི། རྣམ་པ་གཞན་མ་ཡིན་ནོ་ཞེས་བྱ་བའི་ཐ་ཚིག་གོ །སྔོན་གྱི་ཆོ་ག་ཞེས་བྱ་བ་ནི། ད་ལྟར་གྱི་ཆོ་ག་བས་སྡར་ཆོ་ག་རིགས་ལ་རྣམ་པ་གཞན་དེ་ལྟ་བུ་འབྱུང་ངོ་ཞེས་བྱ་བའི་ཐ་ཚིག་གོ །འདིར་ལ་ལ་དག་འདི་སྐད་ཅེས་གལ་ཏེ་སྔོན་གྱི་ཆོགས་རབ་ཏུ་འབྱུང་བ་དང་རྫོགས་པར་བསྙེན་པར་འགྱུར་བའི་རྒྱུའི་དངོས་པོ་འགྲུབ་པར་འགྱུར་ན་ནི་ད་ལྟར་གྱི་ཆོ་གས་ཅི་བྱ། གལ་ཏེ་ད་ལྟར་གྱི་ཆོ་ག་ཁོ་ནས་རྒྱུའི་དངོས་པོ་འགྲུབ་པར་འགྱུར་ན་ཡང་སྔོན་གྱི་ཆོ་གས་ཅི་བྱ་སྟེ། གཅིག་ཁོ་ནས་བྱས་པའི་ཕྱིར་རོ་ཞེ་
ན། དེ་ལ་ཉེས་པ་མེད་དེ་གཉི་ག་ཡང་རྒྱུའི་དངོས་པོ་འགྲུབ་པར་འགྱུར་བ་ཡིན་མོད་ཀྱི། འོན་ཀྱང་འདུལ་བའི་སེམས་ཅན་གྱི་བྱེ་བྲག་ལས་ཆོ་ག་གཉིས་རྣམ་པར་གཞག་སྟེ། འདི་ལྟར་དང་པོ་མངོན་པར་རྫོགས་པར་བྱང་ཆུབ་པའི་དུས་ཀྱི་ཚེ་ན་ནི་སེམས་ཅན་རྒྱུད་རྣམ་པར་དག་པ་ཤ་སྟག་འབྱུང་བས་འདུལ་བའི་རིམ་པ་ལ་མི་ལྟོས་ཤིང༌། མཁན་པོ་དང་སློབ་དཔོན་ལ་སོགས་པ་ལ་མ་ལྟོས་པར་ཡང་ཚོགས་ཆུང་དུ་ཁོ་ནས་བཅོམ་ལྡན་འདས་ཀྱི་བཀའ་རྫོགས་པར་བྱེད་པ་དང༌། དེ་དག་བསོད་ནམས་བྱས་པ་ཡིན་པས་ནད་མེད་པ་དང༌། ཇི་སྟེ་དེ་དག་ལ་ནད་ཅིག་བྱུང་དུ་ཟིན་ན་ཡང་དེ་དག་གི་ནད་གཡོག་ལ་སོགས་པ་རྙེད་པར་འགྱུར་རོ། །ད་ལྟར་ན་དེ་ལྟ་བུའི་རྒྱུད་རྣམ་པར་དག་པ་དག་མེད་པས་དེས་ན་ད་ལྟར་གྱི་ཆོ་ག་རྣམ་པར་གཞག་གོ །དེ་ལྟར་ན་འདིར་སྤྱིའི་དོན་འདི་འབྱུང་སྟེ། སངས་རྒྱས་བཅོམ་ལྡན་འདས་དང་པོ་མངོན་པར་རྫོགས་པར་བྱང་ཆུབ་པའི་དུས་ན་དགེ་འདུན་དུ་གྱུར་པའི་དགེ་སློང་རྣམས་ཀྱིས་སྔར་བསྟན་པའི་ཆོ་གས་རབ་ཏུ་འབྱུང་བ་དང་རྫོགས་པར་བསྙེན་པར་འདོད་པ་ལ་སྔར་བསྟན་པའི་བྱེ་བྲག་གིས་བྱེ་བྲག་ཏུ་བྱས་ཤིང་ཅིག་ཅར་རབ་ཏུ་འབྱུང་བ་དང་རྫོགས་པར་བསྙེན་པར་བྱེད་དེ། སྔགས་ཀྱི་ཚིག་གཅིག་གིས་ཞེས་བྱ་བའི་ཐ་ཚིག་གོ །སྔོན་གྱི་ཆོ་ག་དགོས་པ་དང་བཅས་པ་རྣམ་པར་བཤད་ཟིན་ཏོ། །དེ་ལྟར་སྔོན་གྱི་ཆོ་ག་དགོས་པ་དང་བཅས་པར་བསྟན་ནས། ད་ནི་ད་ལྟར་གྱི་ཆོ་ག་བཤད་པར་བྱ་སྟེ། རབ་ཏུ་འབྱུང་བ་དང་རྫོགས་པར་བསྙེན་པ་དེའི་ཕྱིར་དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་བྱ་བ་ནི། གནས་པ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དག་ཡོད་ཀྱི། མི་གནས་པ་ལ་མེད་དོ་ཞེས་བྱ་བར་སྦྱར་རོ། །ཅི་ཞིག་གི་ཕྱིར་གནས་པ་ལ་ཞེ་ན། རབ་ཏུ་འབྱུང་པ་དང་རྫོགས་པར་བསྙེན་པ་དེའི་ཕྱིར་ཞེས་བྱ་བ་སྨྲས་ཏེ། དེའི་ཕྱིར་ཞེས་བྱ་བར་སྦྱར་རོ། །གང་གི་ཕྱིར་རབ་ཏུ་འབྱུང་བར་འདོད་པའམ་རྫོགས་པར་བསྙེན་པར་འདོད་པ་དེ་རབ་ཏུ་འབྱུང་བའམ་རྫོགས་པར་བསྙེན་པ་འཐོབ་པར་བྱའོ་
ཞེས་དེའི་ཕྱིར་དགེ་སློང་འགའ་ཞིག་ལ་གནས་པ་ཡིན་ཏེ། དེའི་ཕྱིར་རོ་ཞེས་བྱ་བའི་ཐ་ཚིག་གོ །སུ་ལ་གནས་པ་ལ་ཞེ་ན། དགེ་སློང་འགའ་ཞིག་ལ་ཞེས་བྱ་བ་སྨྲས་ཏེ། མིང་མ་བསྟན་པ་ལའོ། །དེས་འདི་སྐད་སྟོན་ཏེ། གང་ཁོ་ན་ལ་གནས་ཏེ་རབ་ཏུ་འབྱུང་བ་དེ་ཁོ་ན་ལ་གནས་ཏེ། རྫོགས་པར་བསྙེན་པར་ངེས་པ་མ་ཡིན་གྱི། འདི་ལྟར་འདོད་པས་འཇུག་པར་རིག་པར་བྱ་སྟེ། དེའི་ཕྱིར་འགའ་ཞིག་ལ་ཞེས་བྱ་བའི་ཚིག་སྨོས་སོ། །རྣམ་པ་གང་གིས་གནས་པ་ལ་ཞེ་ན་དེའི་ཕྱིར་མཁན་པོ་ཉིད་དུ་ཞེས་བྱ་བ་སྨྲས་ཏེ། མཁན་པོའི་དངོས་པོ་ནི་མཁན་པོ་ཉིད་དེ། མཁན་པོ་ཉིད་དེ་ཉིད་དུ་ཞེས་བྱ་བའི་ཐ་ཚིག་གོ །གནས་པ་ལའོ་ཞེས་བྱ་བ་ནི་རབ་ཏུ་འབྱུང་བར་འདོད་པ་འམ། རྫོགས་པར་བསྙེན་པར་འདོད་པ་ནི་གནས་པ་ཞེས་བྱ་སྟེ། དེའི་རབ་ཏུ་འབྱུང་བ་དང་རྫོགས་པར་བསྙེན་པ་དག་ནི་གཞན་ལ་རག་ལས་པའི་ཕྱིར་དང༌། དེའི་རབ་ཏུ་འབྱུང་བ་དང་རྫོགས་པར་བསྙེན་པ་མཁན་པོ་དང་འབྲེལ་པའི་ཕྱིར་རོ། །འདི་སྐད་བསྟན་ཏེ། ད་ལྟར་གྱི་ཆོ་ག་ལ་རབ་ཏུ་འབྱུང་བ་དང་རྫོགས་པར་བསྙེན་པར་འདོད་པས། རབ་ཏུ་འབྱུང་བ་དང་རྫོགས་པར་བསྙེན་པ་དེའི་ཕྱིར་དགེ་སློང་འགའ་ཞིག་ལ་མཁན་པོ་ཉིད་དུ་གནས་ན་དེ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དག་ཡོད་ཀྱི། ཇི་ལྟར་སྔོན་གྱི་ཆོ་ག་ལ་དགེ་སློང་འགའ་ལ་ཡང་མི་གནས་པ་ལ་ཡང་ཡོད་པ་ལྟ་བུ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །རབ་ཏུ་འབྱུང་བ་སྨོས་པས་དགེ་ཚུལ་གྱི་སྡོམ་པ་ཡང་གནས་པ་ལ་ཡོང་པར་བསྟན་པ་ཡིན་ཏེ། དགེ་ཚུལ་གྱི་སྡོམ་པ་ཡང་རབ་ཏུ་འབྱུང་བ་ལ་གནས་པའི་ཕྱིར་རོ། །དེ་ལྟ་མོད་ཀྱི་རབ་ཏུ་འབྱུང་བ་ནི་མཁན་པོ་ཁོ་ན་ལས་འགྱུར་ལ། དགེ་ཚུལ་གྱི་སྡོམ་པ་ནི་གཞན་ལས་ཐོབ་པ་ཁོ་ན་ཡིན་ནོ། །མཁན་པོར་འགྱུར་བས་རབ་ཏུ་འབྱུང་བར་འདོད་པ་ཆོ་ག་གང་གིས་ཡོངས་སུ་གཟུང་བར་བྱ་བའི་ཆོ་ག་དེ་བསྟན་པའི་ཕྱིར། དང་པོའི་མཁན་པོ་ཉིད་ཀྱིས་བར་ཆད་དྲིས་ནས་ཡོངས་སུ་དག་པ་ལ་སྐབས་དབྱེའོ་ཞེས་བྱ་བ་སྨྲས་ཏེ། གནས་ཀྱིས་རབ་ཏུ་འབྱུང་བར་འདོད་པ་དེ་ལ་བར་ཆད་ཡོད་དམ་
མེད་ཅེས་དྲིས་ནས། གལ་ཏེ་དེ་ལ་བར་ཆད་ཀྱི་ཆོས་དེ་དག་མེད་ན་དེའི་ཚེ་ཡོངས་སུ་དག་པ་ཡིན་པས་རབ་ཏུ་འབྱུང་བར་འདོད་པས་ཡོངས་སུ་དག་པ་དེ་ལ་ཁོ་བོས་ཁྱོད་རབ་ཏུ་འབྱུང་ངོ་ཞེས་སྐབས་དབྱེའོ་ཞེས་བྱ་བར་སྦྱར་རོ། །སུས་སྐབས་དབྱེ་ཞེ་ན། དང་པོའི་མཁན་པོ་ཉིད་ཀྱིས་ཞེས་བྱ་བ་སྨྲས་ཏེ། དགེ་ཚུལ་གྱི་མཁན་པོ་ཉིད་ཀྱིས་ཞེས་བྱ་བའི་ཐ་ཚིག་གོ །དགེ་ཚུལ་གྱི་མཁན་པོ་ཉིད་ནི་གཞན་གྱི་མཁན་པོ་ཉིད་པས་དང་པོ་ཡིན་པའི་ཕྱིར་རོ། །འདིར་བར་ཆད་ཅེས་བྱ་བ་ནི། མ་བསད་པ་ལ་སོགས་པ་ཡིན་པར་འདོད་དེ། རབ་ཏུ་འབྱུང་བ་ལ་བར་དུ་གཅོད་པར་བྱེད་པའི་ཕྱིར་རོ། །དྲིས་ནས་ཡོངས་སུ་དག་པ་ལ་སྐབས་དབྱེའོ་ཞེས་བྱ་བས་ནི། འདི་སྐད་བསྟན་ཏེ། གལ་ཏེ་རབ་ཏུ་འབྱུང་བར་འདོད་པ་ཞིག་འོང་ཞིང་རབ་ཏུ་འབྱུང་བར་གསོལ་ན། དེའི་ཚེ་དགེ་སློང་དེས་དེ་ལ་བར་ཆད་རྣམས་དྲི་བར་བྱ་སྟེ། གལ་ཏེ་བར་ཆད་དེ་དག་མེད་ན་དེའི་འོག་ཏུ་ཡོངས་སུ་དག་པ་དེ་ལ་དང་པོའི་མཁན་པོ་ཉིད་ཀྱི་སྐབས་དབྱེའོ། །དེ་སྐད་དུ་གཞུང་ལས་ཀྱང་འགའ་ཞིག་གི་གན་དུ་རབ་ཏུ་འབྱུང་བར་འདོད་འོངས་ན་དེས་དེ་ལ་བར་ཆད་ཀྱི་ཆོས་རྣམས་དྲིས་ནས་གཟུང་བར་བྱའོ་ཞེས་གསུངས་སོ། །སྡོམ་པ་རྣམས་སྦྱིན་པའི་གོ་རིམས་བསྟན་པའི་ཕྱིར། དགེ་བསྙེན་ཉིད་དང༌། དགེ་ཚུལ་ཉིད་དང༌། དགེ་སློང་ཉིད་དག་གིས་སྔ་མར་རྫོགས་པར་མ་བསྙེན་པ་ལ་ཕྱི་མ་མི་བྱའོ་ཞེས་བྱ་བ་སྨྲས་ཏེ། དགེ་བསྙེན་ཉིད་དང༌། དགེ་ཚུལ་ཉིད་དང༌། དགེ་སློང་ཉིད་དེ་དག་གི་ཚིག་སྔ་མ་སྔ་མ་གང་དང་གང་ཡིན་པ་དེར་རྫོགས་པར་མ་བསྙེན་པ་ཞེས་བྱ་བ་ཡང་དག་པར་ཐོབ་པའི་གང་ཟག་ལ་ཚིག་ཕྱི་མ་ཕྱི་མ་མི་བྱའོ་ཞེས་སྟོན་ཏོ། །འདི་སྐད་བསྟན་ཏེ། ཇི་སྲིད་དུ་དགེ་བསྙེན་གྱི་སྡོམ་པ་སྦྱིན་པར་མི་བྱེད་པ་དེ་སྲིད་དུ་དགེ་ཚུལ་གྱི་སྡོམ་པ་སྦྱིན་པར་མི་བྱ་ལ། དེ་བཞིན་དུ་ཇི་སྲིད་དུ་དག་ཚུལ་གྱི་སྡོམ་པ་སྦྱིན་པར་མི་བྱེད་པ་དེ་སྲིད་དུ་རྫོགས་པར་བསྙེན་པར་མི་བྱའོ་ཞེས་བསྟན་ཏོ། །དེ་ནི་རྣམ་པར་གཞག་པ་བསྟན་པ་ཡིན་གྱི་འབྱུང་བའི་རྒྱུ་བསྟན་པ་ནི་མ་ཡིན་ཏེ། འདི་ལྟར་དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་
གྱི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་ལ། དེ་བཞིན་དུ་དགེ་ཚུལ་གྱི་སྡོམ་པ་མེད་པར་ཡང་དགེ་སློང་གི་སྡོམ་པ་ཡང་དག་པར་ལེན་ན་རུང་བ་ཉིད་ཡིན་པའི་ཕྱིར་རོ། །དེ་ལྟ་ན་གོ་རིམས་འདིས་ནི་སྡོམ་པ་ཐམས་ཅད་ཀྱི་ཡང་དག་པར་བླང་བར་བསྟན་པ་ཡིན་ཏེ། འདི་ལྟར་བཙུན་པ་ཁྱིམ་པ་རབ་ཏུ་བྱུང་བ་ཞིག་རྫོགས་པར་བསྙེན་པར་བགྱིད་ན། རྫོགས་པར་བསྙེན་ཞེས་བགྱི་འམ། རྫོགས་པར་མ་བསྙེན་ཞེས་བགྱི། ཉེ་བ་འཁོར་རྫོགས་པར་བསྙེན་ཞེས་བྱའོ་ཞེས་གསུངས་པའི་ཕྱིར་རོ། །དེ་ལ་འདིར་གལ་ཏེ་དགེ་བསྙེན་དང་དགེ་ཚུལ་གྱི་སྡོམ་པ་མ་སྐྱེས་པ་ལ་དགེ་སློང་གི་སྡོམ་པ་མི་འབྱུང་བར་འགྱུར་ན། གཙུག་ལག་དེ་དོན་མེད་པར་འགྱུར་རོ། །དགེ་བསྙེན་གྱི་སྡོམ་པ་མེད་པར་ཡང་དགེ་ཚུལ་གྱི་སྡོམ་པ་སྐྱེ་བའི་ཁུངས་ཀྱང་དེ་ཉིད་ཡིན་ཏེ། དེ་ལྟ་བས་ན་མདོ་འདི་ནི་རྣམ་པར་གཞག་པ་བསྟན་པ་ཙམ་ཡིན་ནོ། །སྔར་དཀོན་མཆོག་གསུམ་ལ་སྐྱབས་སུ་འགྲོ་བར་བྱ་ཞིང་ཕྱིས་སྡོམ་པ་ཡང་དག་པར་བླང་བར་བྱའོ་ཞེས་བསྟན་པའི་ཕྱིར། སྐྱབས་སུ་འགྲོ་བར་ཁས་བླང་བའི་ཚིག་རྩོམ་པ་དང༌། དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླང་བའི་ཚིག་བྱའོ་ཞེས་བྱ་བ་སྨྲས་ཏེ། སྐྱབས་ཞེས་བྱ་བ་ནི་འདིར་ཐར་པ་དང༌། ལམ་ཐོབ་པར་བྱ་བའི་རྟེན་དུ་གྱུར་པ་ནི་དཀོན་མཆོག་གསུམ་ཞེས་བྱ་བའི་དངོས་པོའོ། །སྐྱབས་སུ་འགྲོ་བ་ཞེས་བྱ་བ་ནི། སྐྱབས་དེ་ལ་སྐྱབས་སུ་འགྲོ་བ་སྟེ། སྐྱབས་སུ་འཇུག་པའོ། །སྐྱབས་སུ་འགྲོ་བ་དེ་ཁས་བླང་བ་ཞེས་བྱ་བ་ནི། ཁས་ལེན་པའོ། །ཚིག་ཅེས་བྱ་བ་ནི། སྐྱབས་སུ་འགྲོ་བར་ཁས་བླང་བ་དེ་སྒྲུབ་པར་བྱེད་པ་སྟེ། རྐང་གཉིས་རྣམས་ཀྱི་མཆོག །སངས་རྒྱས་ལ་སྐྱབས་སུ་མཆིའོ། །ཞེས་བྱ་བ་ལ་སོགས་པའོ། །རྩོམ་པ་ཞེས་བྱ་བ་ནི། སྐྱབས་སུ་འགྲོ་བར་ཁས་བླང་བའི་ཚིག་དེ་ཉིད་དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླང་བའི་ཚིག་གང་ཡིན་པའི་རྩོམ་པ་ཡིན་ཏེ། དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླང་བའི་ཚིག་གི་རྩོམ་པ་སྐྱབས་སུ་འགྲོ་བར་ཁས་བླང་བའི་ཚིག་དེ་བྱའོ། །དགེ་བསྙེན་ཉིད་དང་དགེ་ཚུལ་ཉིད་ཅེས་བྱ་བ་ནི། དགེ་བསྙེན་གྱི་དངོས་པོ་དང་དགེ་ཚུལ་གྱི་དངོས་པོ་སྟེ། དེ་གཉིས་ཁས་བླང་བ་དེའི་ཚིག་དེ་ཡང་བྱའོ། །འདི་སྐད་བསྟན་
ཏེ། གང་ལ་ལ་ཞིག་དགེ་བསྙེན་དང་དགེ་ཚུལ་དང་སྡོམ་པ་ལེན་པར་འདོད་པ་དེས་དང་པོར་ཇེ་དཀོན་མཆོག་གསུམ་ལ་སྐྱབས་སུ་འགྲོ་བར་ཁས་བླང་བར་བྱའོ། །དེའི་འོག་ཏུ་དགེ་བསྙེན་ཉིད་དང༌། དགེ་ཚུལ་ཉིད་དུ་ཁས་བླང་བའི་ཚིག་བྱའོ། །དེ་ལྟར་གཞུང་འདི་སྣང་སྟེ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་བསྙེན་དུ་བཙུན་པས་གཟུང་དུ་གསོལ་ཞེས་བྱ་བའི་ཚིག་འདི་ལན་གསུམ་དུ་བརྗོད་པར་བྱ་བ་དང༌། དགེ་ཚུལ་ཉིད་དུ་ཁས་བླང་བའི་དུས་ན་ཡང་དེ་བཞིན་དུ། བཙུན་པ་དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་བཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཆོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་ཇི་སྲིད་འཚོའི་བར་དུ་དགེ་ཚུལ་དུ་བཙུན་བས་གཟུང་དུ་གསོལ་ཞེས་བརྗོད་ནས། རྣམ་གྲངས་ཐ་མ་ལ་ང་དག་ཇི་སྲིད་འཚོའི་བར་དུ་དགེ་ཚུལ་དུ་སློབ་དཔོན་གྱིས་གཟུང་དུ་གསོལ་ཞེས་བརྗོད་པར་བྱའོ། །དེ་ལ་ཁ་ཅིག་ན་རེ་སྐྱབས་སུ་འགྲོ་བ་ཉི་ཚེ་ལན་གསུམ་བརྗོད་ནས། དེའི་འོག་ཏུ་བདག་ཇི་སྲིད་འཚོའི་བར་དུ་དགེ་བསྙེན་དུ་སློབ་དཔོན་གྱིས་གཟུང་དུ་གསོལ་ཞེས་བྱ་བ་དང༌། བདག་ཇི་སྲིད་འཚོའི་བར་དུ་དགེ་ཚུལ་དུ་སློབ་དཔོན་གྱིས་གཟུང་དུ་གསོལ་ཞེས་བྱ་བ་བརྗོད་པར་བྱའོ་ཞེས་ཀྱང་ཟེར་ཏེ། དེ་ནི་འཁྲུལ་པ་ཡིན་པར་རིག་པར་བྱའོ། །མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་བས་སྐྱབས་སུ་འགྲོ་བས་མྱ་ངན་ལས་འདས་པ་བསམ་པ་བརྟན་པོ་སྒྲུབ་པར་བྱེད་དེ། ཇི་ལྟར་ཞེ་ན། རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ལམ་ཉེ་བར་སྟོན་པར་མཛད་པ་ལ་ཡང་དག་པར་རྟེན་པར་བྱེད། འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ་ཞེས་བྱ་བ་འདིས་ནི་ཆོས་ཀྱི་མཆོག་མྱ་ངན་ལས་འདས་པ་ལ་ཡང་དག་པར་རྟེན་
པར་བྱེད། ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ་ཞེས་བྱ་བ་འདིས་ནི་མྱ་ངན་ལས་འདས་པའི་གྲོང་ཁྱེར་དུ་འགྲོ་བའི་ཟླ་གྲོགས་ལ་ཡང་དག་པར་རྟེན་པར་བྱེད་པའི་ཕྱིར་ཏེ། མྱ་ངན་ལས་འདས་པའི་བསམ་པ་བརྟན་པོ་མེད་པར་ནི་སུ་ཡང་སྐྱབས་སུ་འགྲོ་བ་འགྲུབ་པར་མི་བྱེད་དོ། །རྫོགས་པར་བསྙེན་པའི་དུས་ན་ནི་རྫོགས་པར་བསྙེན་ཞེས་བྱ་བའི་སྒྲ་ཁོ་ན་ལས་མྱ་ངན་ལས་འདས་པའི་བསམ་པ་བརྟན་པོ་རྟོགས་པར་བྱ་སྟེ། འདི་ལྟར་རྫོགས་པར་བསྙེན་པ་ཞེས་བྱ་བ་ལ་རྫོགས་པ་ཞེས་བྱ་བ་ནི་གནོད་པ་ཐམས་ཅད་དང་བྲལ་བའི་དངོས་པོ་ལ་བྱ་སྟེ། མྱ་ངན་ལས་འདས་པ་ཡང་དེ་ལྟ་བུའི་རང་བཞིན་ཡིན་ནོ། །བསྙེན་པ་ཞེས་བྱ་བའི་སྒྲ་ནི་ཉེ་བའི་ཚིག་ཡིན་ཏེ་དེའི་ཕྱིར་བསམ་པ་ཐམས་ཅད་ཀྱིས་མྱ་ངན་ལས་འདས་པ་དང་ཉེ་བར་གྱུར་པ་ནི་རྫོགས་པར་བསྙེན་པ་ཡིན་ནོ། །དེ་བས་ན་མྱ་ངན་ལས་འདས་པའི་བསམ་པ་ཁོ་ནས་སྡོམ་པ་སྐྱེའི་གཞན་གྱིས་མ་ཡིན་ནོ། །ཡང་དག་པར་ལེན་པས་བྱ་བ་འདི་དག་ཐམས་ཅད་བྱ་སྟེ། དེ་ཡང་གཞན་གྱིས་བརྗོད་པ་ན་ལེན་པས་བཟླས་པར་བྱའོ། དེ་ནི་བསླབ་པ་ཡིན་པར་རིག་པར་བྱའོ། །བྱིན་པ་བླང་བ་ནི་མ་ཡིན་ཏེ། སྡོམ་པ་ནི་རང་གི་སེམས་ལ་རག་ལས་པའི་ཕྱིར་རོ། །གཞན་ཡང་སྦྱིན་པར་བྱེད་པ་ལས་ལེན་པས་སྡོམ་པ་གང་དང་གང་གནོད་པའི་སྡོམ་པ་དེ་དང་དེ་རྒྱུན་ཆད་པའི་སྐྱོན་དུ་ཡང་འགྱུར་ཏེ། དགེ་བསྙེན་དང་དགེ་ཚུལ་དང་དགེ་སློང་གི་སྡོམ་པ་དག་ནི་རེ་རེར་ཟད་པའི་ཕྱིར་རོ། །གལ་ཏེ་དེ་ལ་བྱིན་པར་གྱུར་ན་རང་གི་རྒྱུད་ལས་རྒྱུན་ཆད་པར་འགྱུར་བ་ཞིག་ན། དེ་ལྟར་ཡང་མ་ཡིན་ཏེ། དེ་ལྟ་བས་ན་བྱིན་པ་བླང་བ་ནི་མ་ཡིན་ནོ། །དེ་ལྟར་དགེ་བསྙེན་ཉིད་དང་དགེ་ཚུལ་ཉིད་དུ་ཁས་ལེན་དུ་བཅུག་ནས་དེའི་འོག་ཏུ་ཅི་བྱ་ཞེ་ན། དེའི་འོག་ཏུ་བསླབ་པ་བརྗོད་པ་ཁས་བླང་བའི་ཚུལ་གྱིས་བྱའོ་ཞེས་བྱ་བ་སྨྲས་ཏེ། དེའི་འོག་ཏུ་ཞེས་བྱ་བ་ནི། དགེ་བསྙེན་ཉིད་དང་དགེ་ཚུལ་ཉིད་དུ་ཁས་བླང་བའི་ཚིག་བརྗོད་མ་ཐག་པ་དེའི་འོག་ཏུའོ། །བསླབ་པ་བརྗོད་པ་ཞེས་བྱ་བ་ནི། བསླབ་པའི་བརྗོད་པ་ནི་བསླབ་པ་བརྗོད་པ་སྟེ། དགེ་བསྙེན་རྣམས་ཀྱི་ནི་ལྔའོ། །དགེ་ཚུལ་རྣམས་ཀྱི་ནི་བཅུའོ། །འདི་སྐད་བསྟན་ཏེ། །འདི་སྐད་བསྟན་ཏེ། བདག་ཇི་སྲིད་འཚོའི་བར་དུ་དགེ་བསྙེན་དུ་སློབ་དཔོན་གྱིས་གཟུང་དུ་གསོལ། བདག་ཇི་སྲིད་འཚོའི་བར་དུ་དགེ་ཚུལ་དུ་སློབ་དཔོན་གྱིས་གཟུང་དུ་གསོལ།
ཞེས་བྱ་བའི་ཚིག་དེའི་འོག་ཏུ་དེ་གཉིས་ལ་བསླབ་པའི་གཞི་གང་དག་ཡིན་པ་དེ་དག་བརྗོད་པར་བསྟན་པར་བྱའོ། །ཇི་ལྟར་དེ་ཇི་བྱ་བའི་ཚུལ་གྱིས་འདི་དང་འདི་སྤོང་ངོ་ཞེས་སམ། འོན་ཏེ་དགག་པའི་ཚུལ་གྱིས་འདི་དང་འདི་མི་བྱའོ་ཞེས་ཤེ་ན་དེའི་ཕྱིར། ཁས་བླང་བའི་ཚུལ་གྱིས་བྱའོ་ཞེས་བྱ་བ་སྨྲས་ཏེ། བྱ་བའི་ཚུལ་གྱིས་སོ། །ཇི་ལྟར་འཕགས་པ་དགྲ་བཅོམ་པ་དེ་དག་གིས་ཇི་སྲིད་འཚོའི་བར་དུ་ཞེས་བྱ་བ་ལ་སོགས་པའི་རྩོམ་པས། དགེ་བསྙེན་ལ་ནི་སྲོག་གཅོད་པ་སྤངས་ཏེ་སྲོག་གཅོད་པ་ལས་སླར་ལྡོག་པར་བགྱིའོ་ཞེས་བྱ་བ་ནས་དེ་བཞིན་དུ་འབྲུའི་ཆང་དང་བཅོས་པའི་ཆང་མྱོས་པར་འགྱུར་བ་བག་མེད་པའི་གནས་ལས་སླར་ལྡོག་པར་བགྱིའོ་ཞེས་བྱ་བའི་བར་གྱིས་ལྔ་པོ་དག་བརྗོད་པར་བྱའོ། །དེ་བཞིན་དུ་དགེ་ཚུལ་ལ་ནི་སྲོག་གཅོད་པ་ལ་སོགས་པ་ནས། གསེར་དངུལ་ལེན་པ་ལས་སླར་ལྡོག་པར་བགྱིའོ་ཞེས་བྱ་བའི་བར་གྱིས་བཅུ་པོ་དག་གོ །གང་གིས་དགེ་བསྙེན་ཉིད་དུ་ཉེ་བར་བསྒྲུབ་པར་བྱ་ཞིང་དགེ་བསྙེན་ཉིད་ཀྱི་འོག་ཏུ་ཡང་གང་གིས་དགེ་ཚུལ་ཉིད་དུ་ཉེ་བར་བསྒྲུབ་པར་བྱ་ཞེ་ན་དེའི་ཕྱིར། རང་གི་དགེ་བསྙེན་ཉིད་དུ་ཉེ་བར་བསྒྲུབས་ནས་དགེ་འདུན་ལ་ཞུ་བའི་དགེ་སློང་ལ་གཏད་པར་བྱའོ་ཞེས་བྱ་བ་སྨྲས་ཏེ། རང་གིས་ཞེས་བྱ་བ་ནི། མཁན་པོས་ཏེ་རབ་ཏུ་འབྱུང་བ་ནི་མཁན་པོ་ཁོ་ནའི་དབང་དུ་བྱ་བའི་ཕྱིར་རོ། །དེ་ཉིད་ཀྱིས་ཀྱང་དང་པོ་ཁོ་ནར་ཁོ་བོས་ཁྱོད་རབ་ཏུ་དབྱུང་ངོ་ཞེས་སྐབས་ཕྱེ་བས། དེའི་ཕྱིར་མཁན་པོ་རང་གི་སྲབ་ཏུ་འབྱུང་བར་འདོད་པ་དེ། དགེ་བསྙེན་ཉིད་དུ་ཉེ་བར་བསྒྲུབས་པ་དགེ་བསྙེན་གྱི་སྡོམ་པ་བྱིན་ནས་དེའི་འོག་ཏུ་དགེ་སློང་ལ་གཏད་པར་བྱའོ། །ཇི་ལྟ་བུ་ཞིག་ལ་ཞེ་ན། ཞུ་བ་ལ་སྟེ། གོ་བར་བྱེད་པ་ལའོ། །སུ་ལ་ཞུ་བ་ལ་ཞེ་ན། དགེ་འདུན་ལ་སྟེ་དགེ་སློང་གི་དགེ་འདུན་ལ་ཞུ་བ་ལའོ། །འདི་སྐད་བསྟན་ཏེ། ཇེ་དང་པོ་ཁོ་ནར་མཁན་པོས་རབ་ཏུ་འབྱུང་བར་འདོད་པ་ལ་དགེ་བསྙེན་གྱི་སྡོམ་པ་སྦྱིན་པར་བྱའོ། །དེའི་འོག་ཏུ་གང་གིས་དེ་ཞུ་བར་བྱེད་པའི་དགེ་སློང་ལ་གཏད་པར་བྱ་སྟེ། འདི་དགེ་འདུན་ལ་ཞུས་ཤིག་ཅེས་བྱ་བའི་ཚིག་གིས་བཀྲི་ཞེས་བྱ་བའི་ཐ་ཚིག་གོ །དེ་ལྟར་གཞུང་ལས་ཀྱང་དེའི་འོག་ཏུ་གང་གིས་དེ་ཞུ་བར་བྱེད་པའི་དགེ་སློང་ལ་གཏད་པར་བྱའོ་ཞེས་འབྱུང་ངོ༌། །འདིར་ཞུ་བས་ཅི་ཞིག་བྱ་ཞེ་ན། ཞུ་བས་ཀྱང་
ཅི་ཡོངས་སུ་དག་གམ་ཞེས་དྲིས་ལ་དག་ན་ཞུ་བར་བྱའོ་ཞེས་བྱ་བ་སྨྲས་ཏེ། ཅི་ཡོངས་སུ་དག་གམ་ཞེས་བྱ་བ་ནི་ཅི་བར་ཆད་ཀྱི་ཆོས་རྣམས་ཡོངས་སུ་དག་གམ་ཞེས་བྱ་བའོ། །དེ་སྐད་དུ་གཏོད་པར་བྱེད་པ་རབ་ཏུ་འབྱུང་བར་འདོད་པ་དེའི་མཁན་པོ་ལ་དྲིས་ལ་དག་ན་རབ་ཏུ་འབྱུང་བར་འདོད་པ་དེ་དགེ་འདུན་ལ། དགེ་འདུན་བཙུན་པ་རྣམས་གསན་དུ་གསོལ། མིང་འདི་ཞེས་བགྱི་བ་འདི་མཁན་པོ་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། ཁྱིམ་པ་གོས་དཀར་པོ་ཅན་ཞེས་བྱ་བ་ལ་སོགས་པའི་སྔགས་ཀྱི་ཚིག་གིས་ཞུ་བར་བྱའོ། །འདི་སྐད་བསྟན་ཏེ། དགེ་སློང་ཞུ་བ་དེས་རབ་ཏུ་འབྱུང་བར་འདོད་པའི་མཁན་པོ་ལ། ཅི་རབ་ཏུ་འབྱུང་བར་འདོད་པ་འདི་བར་ཆད་ཀྱི་ཆོས་རྣམས་ཡོངས་སུ་དག་གམ་ཞེས་དྲི་བར་བྱ་ཞིང༌། གལ་ཏེ་མཁན་པོ་འདི་སྐད་དུ་ཡོངས་སུ་དག་གོ་ཞེས་ཟེ་ན། དེ་ཡོངས་སུ་དག་པ་ཁོ་ན་ཡིན་པས་དགེ་སློང་ཞུ་བས་དེའི་ཚེ་རབ་ཏུ་འབྱུང་བར་འདོད་པ་ཡོངས་སུ་དག་པ་དགེ་འདུན་ལ་ཞུ་བར་བྱའོ་ཞེས་བསྟན་ཏེ། །དགེ་འདུན་ཇི་ལྟར་གནས་པ་ལ་ཞུ་བར་བྱ་ཞེ་ན། ཐམས་ཅད་འདུས་པ་ལ་ཡང་རུང༌། གནས་ཁང་སོ་སོ་ན་འཁོད་པ་ལ་ཡང་རུང་ངོ་ཞེས་བྱ་བ་སྨྲས་ཏེ། ཐམས་ཅད་འདུས་པ་ལ་ཞེས་བྱ་བ་ནི། དགེ་འདུན་ཐམས་ཅད་འདུས་པ་ལ་སྟེ། ཐམས་ཅད་འདུས་པ་དེས་གནས་པའི་དགེ་འདུན་ལའོ། །གནས་ཁང་སོ་སོ་ཞེས་བྱ་བ་ནི་གནས་ཁང་སོ་སོན་གནས་པས་འཁོད་པ་ལའོ། །གཉིས་ཀར་ཡང་རུང་ཞེས་བྱ་བའི་སྒྲ་ནི། རྣམ་པ་གཉིས་ཀར་ཡང་བསྟན་པའི་ཐ་ཚིག་སྟེ། རྣམ་པ་འདིས་ཞུར་ཡང་རུང་ལ། རྣམ་པ་འདིས་ཞུ་བར་ཡང་རུང་བའོ། །འདི་སྐད་བསྟན་ཏེ། གང་གི་ཚེ་དགེ་འདུན་ཐམས་ཅད་ཕྱོགས་གཅིག་ཏུ་འདུས་པར་གྱུར་པ་དེའི་ཚེ་ཞུར་ཡང་རུང༌། ཡང་ན་གང་གི་ཚེ་དགེ་འདུན་དུ་གྱུར་པའི་དགེ་སློང་དག་རང་རང་གི་གནས་ཁང་ན་གནས་པའི་ཆོ། གནས་ཁང་སོ་སོར་སོང་སྟེ། དེ་དག་གི་མདུན་དུ་ཞུར་ཡང་རུང་ངོ་ཞེས་བསྟན་ཏོ། །གཙུག་ལག་ཁང་ཁྱིམ་སོ་སོ་ན་འཁོད་པ་ལ་ཞེས་འབྱུང་བའི་ཚིག་གང་ཡིན་པ་དེ་ནི་གནས་ཁང་སོ་སོ་ན་འཁོད་པ་ལ་ཞེས་བྱ་བའི་ཚིག་འདི་ཉིད་ཡིན་ནོ། །གང་དག་གི་མདུན་དུ་ཞུ་བར་བྱ་བ་དེ་དག་གི་ཆོ་ག་གང་ཡིན་པ་དེ་བསྟན་པའི་ཕྱིར་རོ། །ཐམས་ཅད་ཀྱིས་གལ་ཏེ་ཡོངས་སུ་དག་ནའོ་ཞེས་བརྗོད་པར་བྱའོ་ཞེས་
བྱ་བ་སྨྲ་བ་སྟེ། ཐམས་ཅད་ཀྱིས་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་མ་ལུས་པ་ཐམས་ཅད་ཀྱིས་སོ། །གལ་ཏེ་ཡོངས་སུ་དག་ནའོ་ཞེས་བྱ་བ་ནི། གལ་ཏེ་རབ་ཏུ་འབྱུང་བར་འདོད་པ་དེ་བར་ཆད་ཀྱི་ཆོས་རྣམས་ཡོངས་སུ་དག་པར་གྱུར་ན་དེའི་ཚེ་རབ་ཏུ་འབྱུང་བར་བྱའོ་ཞེས་བྱ་བའོ། །བརྗོད་པར་བྱའོ་ཞེས་བྱ་བ་ནི། སྨྲ་བར་བྱའོ་ཞེས་བྱ་བའི་ཐ་ཚིག་གོ །ཞུས་པའི་འོག་ཏུ་རབ་ཏུ་འབྱུང་བར་འདོད་པས་མཁན་པོར་གསོལ་བར་བྱའོ་ཞེས་བྱ་བས་ནི། འདི་སྐད་བསྟན་ཏེ། ཞུས་མ་ཐག་ཁོ་ནར་རབ་ཏུ་འབྱུང་བར་འདོད་པས་མཁན་པོར་གསོལ་བའི་སྔགས་སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ་སློབ་དཔོན་ལ་མཁན་པོར་གསོལ་གྱིས་སློབ་དཔོན་བདག་གི་མཁན་པོ་མཛད་དུ་གསོལ། སློབ་དཔོན་མཁན་པོས་རབ་ཏུ་འབྱུང་བར་བགྱིའོ་ཞེས་བྱ་བ་ལ་སོགས་པས། མཁན་པོར་གསོལ་བ་བྱ་སྟེ། བཅོལ་བར་བྱའོ། །མཁན་པོས་ཀྱང་རབ་ཏུ་འབྱུང་བར་འདོད་པའི་གཙུག་ཕུད་མ་གཏོགས་པ་སྐྲ་དང་ཁ་སྤུ་བྲེག་པར་བྱའོ་ཞེས་བྱ་བ་ནི། མཁན་པོས་རབ་ཏུ་འབྱུང་བར་འདོད་པའི་གཙུག་པུད་མ་གཏོགས་པ་གཙུག་ཕུད་གཞག་སྟེ། སྐྲ་དང་ཁ་སྤུ་དག་བྲེག་པར་བྱ་བཀྱེར་བར་བྱ་བའོ། །འདི་སྐད་བསྟན་ཏེ། མཁན་པོས་རབ་ཏུ་འབྱུང་བར་འདོད་པའི་གཙུག་པུད་ནི་དྲི་པའི་ཕྱིར་གཞག་པར་བྱ། སྤྲ་དང་ཁ་སྤུ་དག་ནི་བྲེག་པར་བྱའོ། །གལ་ཏེ་མཁན་པོས་བསྐོས་པའི་འདྲེག་མཁན་གྱི་སྐྲ་དང་ཁ་སྤུ་དག་འདྲེག་པར་བྱེད་ན་དེ་ལྟ་ན་ཡང་ཉེས་པ་མེད་དོ། །གཙུག་ཐུད་མ་གཏོགས་པ་ཞེས་བྱ་བ་ནི། སྐྲ་དང་ཁ་སྤུ་བྲེག་པ་གང་ལ་གཙུག་པུད་མེད་པ་དེ་ནི། གཙུག་པུད་མ་གཏོགས་པ་སྐྲ་དང་ཁ་སྤུ་བྲེག་པ་སྟེ། གཙུག་པུད་གཞག་སྟེ། སྐྲ་དང་ཁ་སྤུ་བྲེག་པར་བྱའོ་ཞེས་བྱ་བའི་ཐ་ཚིག་གོ །གཙུག་པུད་བཞག་པའི་དགོས་པ་ནི་རབ་ཏུ་འབྱུང་བར་འདོད་པ་འདི་རབ་ཏུ་འབྱུང་བར་ངེས་པ་ཡིན་ནམ་མ་ཡིན་ཞེས་དྲི་བས་ཡོངས་སུ་ཤེས་པར་བྱ་བའི་ཕྱིར་རོ། །དེའི་གཙུག་པུད་གང་གི་ཚེ་བྲེག་པར་བྱ་ཞེ་ན། གཙུག་པུད་བྲེག་གོ་ཞེས་དྲིས་ནས་སྟེར་ན་དེའོ་ཞེས་བྱ་བ་སྨྲས་ཏེ། རབ་ཏུ་འབྱུང་བར་འདོད་པ་དེ་ལ་ཅི་གཙུག་པུད་བྲེག་གམ་ཞེས་དེ་སྐད་དྲི་བར་བྱ་ཞིང༌། གལ་ཏེ་དྲིས་པས་དེ་རབ་ཏུ་འབྱུང་བར་འདོད་པས་བྲེག་ཏུ་སྟེར་ན་དེའི་ཚེ། སྟེར་བ་ཡིན་པས་གཙུག་པུད་དེ་
བྲེག་པར་བྱའོ། །རབ་ཏུ་འབྱུང་བར་འདོད་པ་དེ་ལྟར་སྐྲ་དང་ཁ་སྦུ་བྲེག་པས་ཁྲུས་བྱའོ་ཞེས་བྱ་བ་ནི། དུས་དང་མཐུན་པའི་ཆུས་བཀྲུ་བར་བྱའོ་ཞེས་བྱ་བའི་ཐ་ཚིག་གོ །ཁྲུས་བྱས་པའི་འོག་ཏུ་མཁན་པོས་གོས་དུར་སྨྲིག་དག་སྦྱིན་པར་བྱའོ་ཞེས་བྱ་བ་ནི། ཁྲུས་བྱས་པའི་འོག་ཏུ་མཁན་པོས་རབ་ཏུ་འབྱུང་བར་འདོད་པ་དེ་ལ་རབ་ཏུ་འབྱུང་བའི་ཚུལ་དང་མཐུན་པའི་ཚོན་གྱིས་ཁ་བསྒྱུར་བའི་གོས་དག་སྦྱིན་པར་བྱའོ། །རབ་ཏུ་འབྱུང་བར་འདོད་པ་དེས་ཀྱང་རྐང་པ་གཉིས་ལ་གཏུགས་ཏེ་བླང་བར་བྱའོ་ཞེས་བྱ་བ་ནི། ཕྱག་འཚལ་ཏེ་གོས་དེ་དག་བླང་བར་བྱའོ། །དེའི་འོག་ཏུ་མཁན་པོས་བསྐོན་པར་བྱའོ་ཞེས་བྱ་བ་ནི། མཁན་པོ་རང་གིས་རབ་ཏུ་འབྱུང་བར་འདོད་པ་དེ་ལ་གོས་དེ་དག་བསྐོན་པར་བྱ་དགབ་པར་བྱའོ་ཞེས་བྱ་བའི་ཐ་ཚིག་གོ །སྐོན་པ་ན་མཁན་པོས་རབ་ཏུ་འབྱུང་བར་འདོད་པ་དེའི་མཚན་མཚོར་བར་བརྟག་གོ་ཞེས་བྱ་བ་ནི། ཟམ་དང༌། མ་ནིང་དང་མཚན་མེད་དང་མཚན་གཉིས་པའི་སྐྱོན་ཡོངས་སུ་སྤངས་པའི་ཕྱིར་རོ། །མཚོར་བར་ཞེས་བྱ་བ་ནི། ཅི་ནས་ཀྱང་རབ་ཏུ་འབྱུང་བར་འདོད་པ་དེས་བདག་གི་མཚན་མཁན་པོས་མཐོང་ངོ་སྙམ་དུ་མི་ཤེས་པ་དེ་ལྟར་བརྟག་པར་བྱའི། སྒྲེན་མོར་ཕྱུང་སྟེ་ནི་མི་ཡིན་ནོ། །རབ་ཏུ་བྱུང་བའི་དུས་ཁོ་ནར་མཚན་བརྟག་པར་ངེས་པ་ནི་མ་ཡིན་ཏེ། འདི་ལྟར་གང་ཚུན་ཆད་ཁོ་བོས་ཁྱོད་རབ་ཏུ་དབྱུང་ངོ་ཞེས་མཁན་པོ་ཉིད་དུ་ཁས་བླངས་པ་དེ་ཚུན་ཆད་ནས་བསྐོན་པ་ན་ཞེས་སྨྲས་པའི་བར་དག་གཟུང་ངོ༌། །མཁན་པོ་རང་ཁོ་ནས་ངེས་པར་བྱ་བ་ཡང་མ་ཡིན་ཏེ། གལ་ཏེ་དགེ་སློང་ཡིད་ཆེས་པས་ལས་དེ་བྱས་པ་དེ་ལས་མཁན་པོས་ཐོས་པར་གྱུར་ན་ཡང་ལས་དེ་མཁན་པོ་ཉིད་ཀྱིས་བྱས་པ་ཡིན་པར་ཁོང་དུ་ཆུད་པར་བྱའོ། །སྐྱབས་སུ་འགྲོ་བ་རྩོམ་པས་རབ་ཏུ་འབྱུང་བ་ཉེ་བར་བསྒྲུབ་པར་བྱའོ་ཞེས་བྱ་བ་ནི། དེ་ལྟར་རབ་ཏུ་འབྱུང་བར་འདོད་པ་ཟ་མ་ལ་སོགས་པའི་སྐྱོན་དང་བྲལ་བར་ཤེས་ནས། དེའི་འོག་ཏུ་རབ་ཏུ་འབྱུང་བ་ཉེ་བར་བསྒྲུབ་པར་བྱ་ཐོབ་པར་བྱའོ། །ཇི་ལྟར་ཉེ་བར་བསྒྲུབ་པར་བྱ་ཞེ་ན། སྐྱབས་སུ་འགྲོ་བ་རྩོམ་པས་ཏེ། རབ་ཏུ་འབྱུང་བ་ཉེ་བར་བསྒྲུབ་པ་དེའི་དང་པོ་རྩོམ་པ་དེ་ནི་སྐྱབས་སུ་འགྲོ་བ་རྩོམ་པའོ། །འདི་སྐད་བསྟན་ཏེ། དང་པོར་སྐྱབས་སུ་འགྲོ་བ་སྦྱིན་པར་བྱ་ཞིང་ཕྱིས་རབ་ཏུ་འབྱུང་བ་ཡང་དག་པར་ལེན་དུ་གཞུག་སྟེ། མཁན་པོས་འདི་ལྟར་སྦྱིན་པར་བྱ་སྟེ། མཁན་པོ་
དགོངས་སུ་གསོལ། བདག་མིང་འདི་ཞེས་བགྱི་བ་དུས་འདི་ནས་གཟུང་སྟེ། ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཤཱཀྱ་སེང་གེ་ཤཱཀྱའི་རྒྱལ་པོ་ཤཱཀྱའི་གཙོ་བོ་དེ་རབ་ཏུ་བྱུང་བའི་རྗེས་སུ་རབ་ཏུ་འབྱུང་སྟེ། ཁྱིམ་པའི་རྟགས་སྤོང་ངོ༌། །རབ་ཏུ་བྱུང་བའི་རྟགས་ཡང་དག་པར་ལེན་ཏོ་ཞེས་བྱ་བའི་སྔགས་ཀྱིས་སྦྱིན་པར་བྱའོ། །འདིར་རབ་ཏུ་འབྱུང་བའི་རྟགས་ཞེས་བྱ་བ་ནི་སྐྲ་བྲེགས་པ་ལ་སོགས་པ་དགེ་སློང་གི་ཆ་ལུགས་ལ་བྱའོ། །རྣམ་པ་གཞན་ཉེ་བར་བསྟན་པའི་ཕྱིར། གསོལ་བའི་འོག་ཏུ་འང་རུང་ངོ་ཞེས་བྱ་བ་སྨྲས་ཏེ། རབ་ཏུ་འབྱུང་བ་ཉེ་བར་བསྒྲུབ་པ་ཞེས་བྱ་བར་སྦྱར་རོ། །རུང་ངོ་ཞེས་བྱ་བའི་སྒྲ་ནི་ལུགས་ཐ་དད་པར་རྟོག་པའི་དོན་ཏོ། །འདུལ་བ་འཛིན་པ་ཁ་ཅིག་འདི་ལ་ཐ་དད་པར་རྟོག་པ་སྟེ། མཁན་པོར་གསོལ་བའི་མོད་ཁོ་ན་ལ་སྐྲ་དང་ཁ་སྤུ་མ་བྲེགས་པར་རབ་ཏུ་དབྱུང་བར་བྱ་སྟེ། འདི་ལྟར་དཔེར་ན་དགེ་ཚུལ་ཉིད་རབ་ཏུ་བྱུང་བ་ཁོ་ན་ལ་བྱེད་པ་དེ་བཞིན་དུ་སྐྲ་དང་ཁ་སྤུ་བྲེག་པ་དང༌། ངུར་སྨྲིག་སྦྱིན་པ་དང་བསྐོན་པ་ཡང་རབ་ཏུ་འབྱུང་བ་ཁོ་ནའི་ཚུལ་ཡིན་པས། དེའི་ཕྱིར་མཁན་པོར་གསོལ་བའི་མདོ་ཁོ་ན་ལ་རབ་ཏུ་དབྱུང་བར་བྱ་ཞིང་ཕྱིས་སྐྲ་དང་ཁ་སྤུ་བྲག་པ་ལ་སོགས་པ་བྱའོ་ཞེས་ཟེར་རོ། །དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་དགེ་སློང་ལ་གཏད་པར་བྱའོ་ཞེས་བྱ་བ་ནི། མཁན་པོས་རབ་ཏུ་ཕྱུང་བའི་གང་ཟག་དེའོ། །དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པ་ཞེས་བྱ་བ་ནི། གང་གིས་དེ་ལ་དགེ་ཚུལ་གྱི་སྡོམ་པ་སྦྱིན་པར་བྱེད་པ་སྟེ། དགེ་ཚུལ་ཉིད་དུ་ཉེ་བར་བསྒྲུབ་པའི་ངང་ཚུལ་གང་ལ་ཡོད་པ་དེ་ནི་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའོ། །དགེ་སློང་ལ་ཞེས་བྱ་བ་ནི། གསོལ་བ་དང་བཞིའི་ལས་ཀྱིས་རྫོགས་པར་བསྙེན་པའི་དགེ་སློང་དོ་ལའོ། །གཏད་པར་བྱའོ་ཞེས་བྱ་བ་ནི། སྦྱིན་པར་བྱའོ་ཞེས་བྱ་བའི་ཐ་ཚིག་གོ །དེའི་ངང་ཚུལ་ཅན་གྱི་རྐྱེན་གྱི་གཞིས་དེ་སྟོན་ཏེ། གལ་ཏེ་དགེ་སློང་དེ་དགེ་ཚུལ་གྱི་སྡོམ་པ་སྦྱིན་པར་ནུས་པ་ཡིན་ནའོ། །ཅི་ཡོངས་
སུ་དག་གམ་ཞེས་དྲིས་ནས་དག་ན་ཉེ་བར་བསྒྲུབ་པར་བྱའོ་ཞེས་བྱ་བ་ནི། དགེ་ཚུལ་ཉེ་བར་སྒྲུབ་པར་བྱེད་པས་འདི་བྱ་བའོ། །ཅི་ཡོངས་སུ་དག་གམ་ཞེས་བྱ་བ་ནི། ཅི་འདི་ལ་བར་ཆད་ཀྱི་ཆོས་རྣམས་མེད་དམ་ཞེས་བྱ་བའི་ཐ་ཚིག་གོ །དྲིས་ནས་ཞེས་བྱ་བ་ནི། གཏོད་པར་བྱེད་པའི་དགེ་སློང་དེ་ལ་དྲིས་ནས་སོ།། གལ་ཏེ་དེ་འདི་སྐད་ཅེས་འདི་ནི་དག་གོ་ཞེས་ཟེར་ན་དེའི་ཚེ་གང་ཟག་དེ་དག་པ་ཡིན་པས་དགེ་ཚུལ་ཉིད་དུ་ཉེ་བར་བསྒྲུབ་པར་བྱའི། མ་དག་ན་ནི་མི་བྱའོ། །དེ་ནི་སློབ་དཔོན་ཡིན་ནོ་ཞེས་བྱ་བ་ནི། དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པའི་དགེ་སློང་དེ་ནི་དགེ་ཚུལ་དེའི་སློབ་དཔོན་ཡིན་ཏེ། དཔེར་ན་རབ་ཏུ་འབྱུང་བ་ཉེ་བར་སྒྲུབ་པར་བྱེད་པའི་དགེ་སློང་མཁན་པོ་ཡིན་པ་དང་འདྲའོ། །གསང་སྟེ་སྟོན་པ་དང་ལས་བྱེད་པ་དང་གནས་སྦྱིན་པ་དང་ཀློག་པ་ཡང་ངོ་ཞེས་བྱ་བ་ལ། གསང་སྟེ་སྟོན་པར་བྱེད་པས་ན་གསང་སྟེ་སྟོན་པའོ། །རྫོགས་པར་བསྙེན་པའི་ཚེ་ན་གསོལ་བ་དང་བཞིའི་ལས་བྱེད་པས་ན་ལས་བྱེད་པའོ། །གནས་སྦྱིན་པར་བྱེད་པས་ན་གནས་སྦྱིན་པའོ། །ཀློག་ཏུ་འཇུག་པས་ན་ཀློག་པ་སྟེ་གསང་སྟེ་སྟོན་པ་དང་ལས་བྱེད་པ་དང་གནས་སྦྱིན་པ་དང་ཀློག་པ་ཡང་དེ་དག་ཉིད་དོ། །ཡང་ངོ་ཞེས་བྱ་བའི་སྒྲ་ནི། གོང་དུ་མདོ་ལས་སྨོས་བའི་སློབ་དཔོན་ཞེས་བྱ་བའི་སྒྲ་དང་སྦྱར་བར་བྱ་བའི་དོན་ཏེ། དེ་འབའ་ཞིག་སློབ་དཔོན་མ་ཡིན་གྱི། འདི་དག་ཀྱང་སློབ་དཔོན་ཡིན་ནོ་ཞེས་བྱ་བའི་ཐ་ཚིག་གོ །སློབ་དཔོན་ལྔ་སྨྲས་ན་ད་གནས་སྐབས་གང་ལ་སློབ་དཔོན་ཉིད་དག་ཏུ་འགྱུར་བར་བརྗོད་པར་བྱ་ཞེ་ན་དེའི་ཕྱིར་རོ། །དོན་གྲུབ་ན་གྱུར་པ་ཉིད་དོ་ཞེས་བྱ་བ་སྨྲས་ཏེ། དོན་གྲུབ་ན་ཞེས་བྱ་བ་ནི། དོན་གང་གིས་སློབ་དཔོན་ཉིད་དུ་འགྱུར་བའི་དོན་དེ་ཡོངས་སུ་མཐར་ཐུག་པར་གྱུར་ན་སྟེ། དོན་དགོས་པ་དེ་གྲུབ་པ་ཡོངས་སུ་རྫོགས་ནའོ། །གྱུར་པ་ཉིད་དོ་ཞེས་བྱ་བ་ནི། སློབ་དཔོན་ཉིད་དུ་གྱུར་པ་ཉིད་དོ། །ཇི་ལྟར་གང་ལ་ལ་ཞིག་དགེ་ཚུལ་གྱི་སྡོམ་པ་སྦྱིན་པར་བྱེད་པ་དེ་དགེ་ཚུལ་གྱི་སྡོམ་པ་སྐྱེས་པ་དེ་ཉིད་དང༌། ཅིག་ཅར་དུ་དགེ་ཚུལ་གྱི་སློབ་དཔོན་དུ་ཡང་གྱུར་པར་རིག་པར་བྱ་བ་དེ་བཞིན་དུ། གསང་སྟེ་སྟོན་པའི་དགོས་པ་ཡོངས་སུ་རྫོགས་ན། གསང་སྟེ་སྟོན་པའི་སློབ་དཔོན་ཉིད་དུ་གྱུར་པ་ཡིན་ནོ། །དེ་བཞིན་དུ་ལས་བྱེད་པ་དགེ་སློང་གི་སྡོམ་པ་སྦྱིན་པར་བྱེད་པ་དེ་སྐད་ཅིག་གང་ལ་དགེ་སློང་གི་སྡོམ་པ་སྐྱེ་བ་དེ་ཉིད་དང༌།
ཅིག་ཅར་དུ་ལས་བྱེད་པའི་སློབ་དཔོན་ཉིད་དུ་གྱུར་པར་རིག་པར་བྱའོ། །གནས་སྦྱིན་པའི་སློབ་དཔོན་ཉིད་ནི་སྐྱ་རེངས་ཤར་བའི་དུས་ན་སློབ་དཔོན་ཉིད་དུ་འགྱུར་བ་ཡིན་ནོ། །ཀློག་པའི་སློབ་དཔོན་ནི་མཚན་ཉིད་ཐ་དད་པར་བརྗོད་པར་བྱ་སྟེ། ཚིགས་སུ་བཅད་པ་གཅིག་ལན་གསུམ་བཀླགས་པ་ལ་སོགས་པས་སོ། །ཅི་མཁན་པོ་ཉིད་ཀྱང་དོན་གྲུབ་ན་གྱུར་པ་ཡིན་ནམ་ཞེ་ན་མ་ཡིན་ཏེ། ཇི་ལྟར་ཞེ་ན། མཁན་པོར་གསོལ་བ་ཁས་བླངས་པ་ན་དེར་གྱུར་ཏོ་ཞེས་བྱ་བ་སྨྲས་ཏེ། གང་གི་ཚེ་མཁན་པོར་གསོལ་བ་དེའི་ཚེ་ན་ཁས་བླངས་པ་དམ་བཅས་པ་གསུམ་པ་ལའོ། །གང་ཞིག་ཁས་བླངས་པ་ན་ཞེ་ན། དེའི་ཕྱིར་མཁན་པོར་ཞེས་བྱ་བ་སྨྲས་སོ། །དེར་གྱུར་ཏོ་ཞེས་བྱ་བ་ནི། མཁན་པོ་ཉིད་དེར་གྱུར་པ་སྟེ་ཡིན་པར་གྱུར་ཏོ་ཞེས་བྱ་བའི་ཐ་ཚིག་གོ །ཇི་སྲིད་དུ་དགེ་ཚུལ་དུ་མི་བྱེད་པ་འམ་ཇི་སྲིད་དུ་རྫོགས་པར་བསྙེན་པར་མི་བྱེད་ཀྱི་བར་དུ་མི་འགྱུར་བ་མ་ཡིན་གྱི། མཁན་པོར་ཁས་བླངས་པའི་དུས་ཁོ་ནའོ། །དགེ་ཚུལ་ཉིད་དུ་ཉེ་བར་བསྒྲུབ་པ་ལ་སོགས་པའི་དོན་གྲུབ་ན་སློབ་དཔོན་ཉིད་ལ་སོགས་པར་གྱུར་པ་ཉིད་དོ་ཞེས་སྨྲས་ན། གང་གི་དོན་དུ་གྲུབ་པ་ཡིན་ཞེ་ན། དེའི་ཕྱིར་བརྗོད་པ། ཐ་མ་གང་ཡིན་པའི་ཆ་གསུམ་པ་ལ་གྲུབ་པ་ཉིད་དོ་ཞེས་བྱ་བ་སྨྲས་ཏེ། བརྗོད་པ་ཞེས་བྱ་བ་ནི། དགེ་ཚུལ་ཉིད་དུ་ཉེ་བར་སྒྲུབ་པ་ལ་སོགས་པའི་དོན་རྗོད་པར་བྱེད་པས་བརྗོད་པ་སྟེ། ཚིག་གང་ལ་དོན་དེ་ཡང་དང་ཡང་དུ་རྗོད་པར་བྱེད་ཟློས་པར་བྱེད་པ་དེ་ནི་འདིར་བརྗོད་པ་ཞེས་བྱའོ། །བརྗོད་པ་དེ་ལ་དགེ་ཚུལ་ཉིད་དུ་ཉེ་བར་སྒྲུབ་པ་ལ་སོགས་པའི་དོན་གྲུབ་པ་ཉིད་དེ། དེའི་དབང་གིས་ན་སློབ་དཔོན་ཉིད་ལ་སོགས་པ་དག་གྲུབ་པ་ཡིན་ནོ། །བརྗོད་པ་གསུམ་ཡོད་པ་ལས་བརྗོད་པ་གང་གི་བརྗོད་པའི་ཆ་གང་ལ་ཞེ་ན། དེའི་ཕྱིར་ཐ་མ་གང་ཡིན་པའི་ཆ་གསུམ་པ་ལ་ཞེས་བྱ་བ་སྨྲས་ཏེ། ཐ་མ་ཕྱི་མའི་བརྗོད་པ་གང་ཡིན་པ་བརྗོད་པ་ཐ་མ་གང་ཡིན་པ་དེའི་ཆ་གསུམ་པ་གང་ཡིན་པའི་ཆ་གསུམ་པ་དེ་ལ་དགེ་ཚུལ་ཉིད་དུ་ཉེ་བར་སྒྲུབ་པ་ལ་སོགས་པའི་དོན་གྲུབ་པ་ཉིད་དུ་རིག་པར་བྱའོ། །འདི་སྐད་བསྟན་ཏེ། བརྗོད་པ་ཁོ་ན་ལ་དོན་དེ་ཡོངས་སུ་རྫོགས་པར་གྱུར་ན་འོན་ཀྱང་བརྗོད་པ་གང་ལ་དང༌། བརྗོད་པའི་ཆ་གང་ལ་མི་ཤེས་པས་དེའི་ཕྱིར་བརྗོད་པ་ཐ་མ་གང་ཡིན་པའི་ཆ་གསུམ་པ་གང་
ཡིན་པ་དེ་ལ་ཞེས་དེ་སྐད་བྱའོ། །སྔར་བསྟན་པའི་དོན་དཔེས་བསྟན་པའི་ཕྱིར། དཔེར་ན་གཞན་བརྗོད་པའི་དུས་ན་དགེ་ཚུལ་ཉིད་བཞིན་ནོ་ཞེས་བྱ་བ་སྨྲས་ཏེ། གཞན་ཞེས་བྱ་བའི་སྒྲ་ནི། འདིར་དགེ་སློང་གང་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པ་དེ་ལ་བྱའོ། །བརྗོད་པའི་དུས་ན་ཞེས་བྱ་བ་ནི། ཉེ་བར་སྒྲུབ་པར་བྱེད་པ་གཞན་དེ་བརྗོད་པའི་དུས་གང་ཡིན་པ་ན་སྟེ། དགེ་ཚུལ་གྱི་སྡོམ་པ་སྦྱིན་པའི་དུས་ནའོ། །དུས་དེ་ན་དགེ་ཚུལ་ཉིད་དུ་གྲུབ་ཅིང༌། དགེ་ཚུལ་དུ་བྱེད་པའི་ཐ་ཚིག་སྟེ། དགེ་ཚུལ་གྱི་སྡོམ་པ་ཞེས་བྱ་བ་དེ་གྲུབ་པ་ཉིད་དུ་རིག་པར་བྱ་བ་བཞིན་ནོ། །དུས་དེ་ཡང་གང་ཡིན་པར་ཤེས་པར་བྱ་ཞེ་ན། བདག་ཇི་སྲིད་འཚོའི་བར་དུ་དགེ་ཚུལ་དུ་ཞེས་བྱ་བའི་འོག་ཏུ་སློབ་དཔོན་གྱིས་ཞེས་བྱ་བའི་སྒྲ་བརྗོད་པའི་གོང་དུ་ཞེས་བྱ་བའི་ཐ་ཚིག་གོ །དེ་ལྟ་བས་ན་དེའི་འོག་ཏུ་སློབ་དཔོན་གྱིས་གཟུང་དུ་གསོལ་ཞེས་བརྗོད་པར་བྱའི། བཙུན་པས་གཟུང་དུ་གསོལ་ཞེས་བརྗོད་པར་མི་བྱའོ། །ཅི་མཁན་པོ་ཉིད་དུ་གྲུབ་པའི་དོན་ཀྱང་དེ་ཁོ་ན་བཞིན་དུ་ཁོང་དུ་ཆུད་པར་བྱ་འམ་ཞེ་ན། འདིར་ཐ་མ་ལ་མཁན་པོའི་དོན་ཏོ་ཞེས་བྱ་བ་སྨྲས་ཏེ། གྲུབ་པ་ཉིད་དོ་ཞེས་བྱ་བར་སྦྱར་རོ། །འདིར་ཞེས་བྱ་བ་ནི། གཞན་བརྗོད་པའི་དུས་ནའོ། །ཐ་མ་ལ་ཞེས་བྱ་བ་ནི། རྣམ་གྲངས་ཐ་མ་གང་ཡིན་པ་ལ་སྟེ། དེས་ན་ཁས་བླངས་པའི་བདག་ཉིད་ཀྱི་མཁན་པོའི་དོན་དུ་གྲུབ་པ་ཉིད་དེ། དེའི་ཚེ་འདི་སྐད་ཅེས་མཁན་པོ་མཁན་པོས་རབ་ཏུ་འབྱུང་བ་དང༌། རྫོགས་པར་བསྙེན་པར་བགྱིའོ་ཞེས་བརྗོད་པར་བྱའི། བཙུན་པ་མཁན་པོས་ཤེ་འམ། སློབ་དཔོན་མཁན་པོས་ཞེས་མི་བྱའོ། །ཐམས་ཅད་དུ་ཡང་གསུམ་པའི་དོན་གྱི་མཚམས་ཁོ་ནས་ཁོང་དུ་ཆུད་པར་བྱའི་ཡི་གེའི་ཚད་ལས་ནི་མ་ཡིན་ནོ། །འདི་ལྟར་དགེ་ཚུལ་གྱི་སྡོམ་པ་མ་སྦྱིན་པའི་དུས་ན་དོན་གྱི་མཚམས་གཉིས་ཏེ། སྐྱབས་སུ་འགྲོ་བ་དང༌། དགེ་ཚུལ་ཉིད་དུ་ཁས་བླང་པ་ཡིན་མོད་ཀྱི། འོན་ཀྱང་ཆ་གསུམ་དུ་བྱ་བར་ནུས་ཏེ། སྐྱབས་སུ་འགྲོ་བ་ནི་ཆ་གཅིག་གོ །བདག་ཇི་སྲིད་འཚོའི་བར་དུ་དགེ་ཚུལ་དུ་ཞེས་བྱ་བ་ནི་ཆ་གཉིས་པའོ། །སློབ་དཔོན་གྱིས་གསོལ་ཞེས་བྱ་བ་ནི་ཆ་གསུམ་པའོ། །བརྗོད་པ་ཐ་མ་ཡོངས་སུ་མ་རྫོགས་མོད་ཀྱི། འོན་ཀྱང་ཆ་གསུམ་པའི་དོན་ལས་མ་ལུས་པར་གྲུབ་པ་ཉིད་དེ། བྱ་བ་ཕལ་ཆེར་
བྱས་པའི་ཕྱིར་རོ། །ལས་ཐམས་ཅད་ལ་ཡང་ཆོ་ག་འདི་བཞིན་བལྟ་བར་བྱའོ། །གནས་སྦྱིན་པ་དང་ཀློག་པ་གཉིས་ཀྱི་དོན་གྲུབ་པ་ཉིད་ནི་གཞན་དུ་བསྟན་པའི་ཕྱིར། གནས་སྦྱིན་པ་ནི་ཞག་གཅིག་གནས་ཉིད་ཀྱི་ཕྱིར་ཉེ་བར་གནས་པ་མཐར་ཐུག་ནའོ་ཞེས་བྱ་བ་ལ་སོགས་པ་སྨྲས་ཏེ། གནས་སྦྱིན་པ་དང་ཀློག་པའི་སློབ་དཔོན་ཉིད་གཉིས་ཀྱི་རྒྱུའི་དོན་གྲུབ་པ་ཉིད་ནི་བརྗོད་པ་གསུམ་པའི་ཆ་གསུམ་པ་ལ་མ་ཡིན་མོད་ཀྱི་འོན་ཀྱང་གནས་སྦྱིན་པ་ནི་གང་གི་ཚེ་མཐར་ཐུག་པ་མཐར་ཕྱིན་ཅིང་ཡོངས་སུ་རྫོགས་པར་གྱུར་པ་དེའི་ཆོ་ནའོ། །ཞག་གཅིག་ཅེས་བྱ་བ་ནི། ཉིན་མཚན་གཅིག་གོ །གནས་ཉིད་ཀྱི་ཕྱིར་ཉེ་བར་གནས་པ་ཞེས་བྱ་བ་ནི། གནས་སྦྱིན་པའི་སློབ་དཔོན་ལ་གནས་ཉིད་ཀྱིས་གནས་སུ་འཛིན་པ་ཉིད་ཀྱི་ཕྱིར་ཉེ་བར་གནས་པའོ། །མཐར་ཐུག་ནའོ་ཞེས་བྱ་བ་ནི། གནས་སྦྱིན་པ་དེ་མཐར་ཐུག་པའོ། །འདི་སྐད་བསྟན་ཏེ། གང་གི་ཚེ་གནས་སྦྱིན་པའི་སློབ་དཔོན་དང་མཚམས་གཅིག་ཏུ་གནས་སུ་འཛིན་པས་ཉིན་ཞག་གཅིག་ལྷན་ཅིག་གནས་པར་བྱེད་ན་དེའི་ཚེ་གནས་སྦྱིན་པའི་མཐར་ཐུག་པ་ཉིད་ཡིན་ཏེ། དེ་ལྟར་གཞང་ལས་ཀྱང་གནས་སྦྱིན་པའི་སློབ་དཔོན་གང་ཞེ་ན། གང་གི་དྲུང་དུ་ཞག་གཅིག་ཙམ་གནས་པས་བསྟེན་པ་ཡང་ཡིན་ནོ་ཞེས་གསུངས་སོ། །ཀློག་པ་ནི་ཚིགས་སུ་བཅད་པ་གཅིག་ལན་གསུམ་བཟླས་ནའོ་ཞེས་བྱ་བ་ནི། ཀློག་པའི་བསམ་པས་གང་ལས་ཚིགས་སུ་བཅད་པ་གཅིག་ལན་གསུམ་བཟླས་ན་དེའི་ཀློག་པའི་མཐར་ཐུག་པ་ཡིན་ནོ། །འདི་སྐད་བསྟན་ཏེ། གང་ལས་ཚིགས་སུ་བཅད་པ་གཅིག་ལན་གསུམ་བཀླགས་ན་དེ་ནི་ཀློག་པའི་སློབ་དཔོན་ཡིན་པར་བལྟ་བར་བྱ་སྟེ། ཀློག་པའི་མཐར་ཐུག་པ་ཡང་དེ་ཡིན་པར་རིག་པར་བྱའོ། །གཙུག་ལག་ལས་ཀློག་པའི་སློབ་དཔོན་གང་ཞེ་ན། གང་ལས་ཚིག་བཞི་པའི་ཚིགས་སུ་བཅད་པ་ཙམ་བཟུང་བའོ་ཞེས་བྱ་བའི་ཚིག་དེ་ལྟ་བུ་སྣང་བ་ལ། བཟུང་བ་ཞེས་བྱ་བའི་སྒྲ་ནི་འདི་ལྟར་རྣམ་པར་བཤད་པར་བྱ་སྟེ། ཀློག་པའི་སློབ་དཔོན་གྱིས་སྨྲས་པ་ཟློས་པར་བྱེད་པས་རྗེས་སུ་ཟློས་པ་ནི་བཟུང་བ་མ་ཡིན་ནོ། །སློབ་དཔོན་གྱིས་ཇི་སྐད་མདོར་བྲིས་པའི་ཚིག་འདི་ནི་བཅོམ་བརླག་པའི་གཞུང་ལས་འབྱུང་ངོ༌། །ཚིགས་སུ་བཅད་པ་གཅིག་ལན་གསུམ་བཟླས་ན་ཀློག་པའི་མཐར་ཐུག་པ་ཡིན་པར་སྨྲས་ན། དེ་
ལྟ་ན་གྱི་ན་ལན་གསུམ་བཟླས་པ་ཡང་སློབ་དཔོན་ཉིད་དུ་ཐལ་བར་འགྱུར་རོ་ཞེ་ན། ཀློག་པའི་བསམ་པ་མེད་པས་བརྗོད་པ་ནི་ཀློག་པ་ཉིད་མ་ཡིན་ནོ་ཞེས་བྱ་བ་སྟེ། གལ་ཏེ་ཀློག་པའི་བསམ་པ་མེད་པས་ལན་སྟོང་རྗོད་པར་བྱེད་དུ་ཟིན་ཀྱང་དེ་ཀློག་པ་མ་ཡིན་པ་ཁོ་ན་སྟེ། དཔེར་ན་ཁ་ཏོན་ཙམ་ཟློས་པ་བཞིན་ནོ། །དེའི་ཕྱིར་ཀློག་པའི་བསམ་པ་མེད་པས་བརྗོད་པ་སློབ་དཔོན་ཉིད་དུ་མི་འགྱུར་རོ། །ཁ་ཏོན་ལ་སོགས་པ་ནི་གོམས་པར་བྱ་བའི་བསམ་པ་ཡིན་པའི་ཕྱིར་དང༌། ཀློག་པ་ནི་མ་བཟུང་བ་འཛིན་པའི་ཚུལ་ཡིན་པའི་ཕྱིར་རོ། །དེ་ལྟ་བས་ན་ཁ་ཏོན་ལ་སོགས་པ་ནི་ཀློག་པ་ཉིད་ཀྱང་མེད་ན་སློབ་དཔོན་ཉིད་དུ་འགྱུར་བ་ལྟ་ཡོད་རེ་སྐན། སློབ་དཔོན་དང་མཁན་པོ་དག་ཏུ་འགྱུར་བ་སྨྲས་ནས། གང་གི་ཚེ་གྱུར་པ་ན་དེ་གཉིས་ཀྱི་མིང་ནས་ཇི་ལྟར་བརྗོད་པར་བྱ་ཞེ་ན། དེ་གཉིས་ལ་གཞན་དུ་ཉེ་བར་མི་བརྗོད་དོ་ཞེས་བྱ་བ་སྨྲས་ཏེ། སློབ་དཔོན་དང་མཁན་པོ་དེ་གཉིས་ལ་སློབ་དཔོན་དང་མཁན་པོའི་སྒྲ་མ་གཏོགས་པ་རྣམས་གཞན་དུ་ཉེ་བར་མི་བརྗོད་དོ། །ཉེ་བར་བརྗོད་པའི་ཚིག་ནི་ཉེ་བར་བརྗོད་པ་སྟེ། ཉེ་བར་ཞེས་བྱ་བའི་སྒྲ་ནི་ཁད་ཉེ་བའི་ཚིག་ཡིན་པའི་ཕྱིར་རོ། །དེ་བས་ན་སློབ་དཔོན་དང་མཁན་པོ་གཉིས་ཀྱི་མིང་ཚེ་དང་ལྡན་པ་དང་བཙུན་པ་དང་གནས་བརྟན་ཞེས་བྱ་བའི་སྒྲ་གཞན་དུ་བརྗོད་པར་མི་བྱ་སྟེ། འདི་ལྟར་སློབ་དཔོན་ལ་ཡང་སློབ་དཔོན་ཁོ་ན་ཞེས་བརྗོད་པར་བྱ། མཁན་པོ་ལ་ཡང་མཁན་པོ་ཁོ་ནར་རོ། །དེ་གཉིས་ལ་ཉེ་བའི་ཚིག་དང་བྲལ་བར་ཡང་རྣམ་པ་ཐམས་ཅད་དུ་གཟུང་བར་མི་བྱའོ། །རྒན་པ་ལ་ཡང་ཉེ་བའི་ཚིག་དང་བྲལ་བར་མིང་མི་གཟུང་སྟེ། གཞི་དེ་ཉིད་ཀྱི་ཕྱིར་རོ། །གཞན་ལ་མི་བྱའོ་ཞེས་བྱ་བ་ནི། སློབ་དཔོན་མཁན་པོ་གཉིས་ལས་གཞན་པའི་གང་ཟག་སློབ་དཔོན་དང་མཁན་པོ་མ་ཡིན་པ་ལ་སློབ་དཔོན་དང་མཁན་པོའི་སྒྲ་དག་ཏུ་ཉེ་བར་བརྗོད་པར་མི་བྱའོ། །མཁན་པོ་ལ་མཁན་པོའི་སྒྲར་ཉེ་བར་བརྗོད་པར་བྱའོ་ཞེས་བསྟན་ན། དེ་ལྟར་ན་སློབ་དཔོན་བཞིན་དུ་མཁན་པོ་ལ་ཡང་མཁན་པོའི་སྒྲ་འབའ་ཞིག་གིས་ཉེ་བར་བརྗོད་པ་འཐོབ་པོ་ཞེ་ན་དེའི་ཕྱིར། དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བ་དང་བཅས་པར་མ་སྨྲས་པར་མཁན་པོའི་མིང་མི་གཟུང་ངོ་ཞེས་བྱ་བ་སྨྲས་ཏེ། མཁན་པོའི་མིང་བཟུང་བ་ན། དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བའི་ཚིག་དེ་དང་བཅས་པར་མ་སྨྲས་པར་མཁན་པོ་ཞེས་བྱ་
བའི་སྒྲ་ཉེ་བར་བརྗོད་པ་ཉི་ཚེས་མཁན་པོའི་མིང་མི་གཟུང་ངོ༌། །འདི་སྐད་བསྟན་ཏེ། དོན་གྱི་སླད་དུ་ཞེས་བྱ་བ་དགོས་པའི་དབང་དུ་མཁན་པོའི་མཚན་ནས་ཞེས་བྱ་བ་མཁན་པོའི་མིང་ནས་སྨོས་ཏེ་ཞེས་བྱ་བ་བརྗོད་དེ། ཚིག་དེ་དང་བཅས་པ་ཞེས་བྱ་བ་ཚིག་དེའི་མཇུག་ཐོགས་སུ་མཁན་པོའི་སྒྲ་ཉེ་བར་བརྗོད་པས་མཁན་པོའི་མིང་ཉེ་བར་བརྗོད་དེ་གཟུང་བར་བྱའི། དོན་གྱི་སླད་དུ་མཚན་ནས་སྨོས་ཏེ་ཞེས་བྱ་བའི་ཚིག་མ་སྨྲས་པར་མཁན་པོ་ཞེས་བྱ་བའི་སྒྲ་ཙམ་ཉེ་བར་བརྗོད་པས་མཁན་པོའི་མིང་མི་གཟུང་ངོ༌། །བཅས་པར་ཞེས་བྱ་བ་སྨོས་པ་ནི། བར་དུ་ཆད་པ་སྤང་བའི་དོན་ཏེ། ཚིག་སྔ་མ་དང་འབྲེལ་བར་མཁན་པོའི་མིང་གཟུང་བར་བྱ་བའི་བར་དུ་ཆད་ནས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དགེ་ཚུལ་ཉིད་དུ་ཉེ་བར་བསྒྲུབ་པའི་ཆོ་གའོ་ཞེས་བྱ་བ་ནི། དགེ་ཚུལ་ཉིད་ཐོབ་པར་བྱ་བའི་ཆོ་གའི་ཞེས་བྱ་བའི་ཐ་ཚིག་གོ །དགེ་ཚུལ་ཉིད་དུ་ཆོ་ག་རྣམ་པར་བཤད་ནས། ད་ནི་རྫོགས་པར་བསྙེན་པའི་ཆོ་ག་བརྗོད་པར་བྱ་སྟེ། དགེ་འདུན་ལས་རྫོགས་པར་བསྙེན་པར་བྱའོ་ཞེས་བྱ་བ་ནི། དགེ་འདུན་ཁོ་ན་ལས་རྫོགས་པར་བསྙེན་པར་འགྱུར་གྱི། ཇི་ལྟར་རབ་ཏུ་འབྱུང་བ་དང་དགེ་ཚུལ་ཉིད་གང་ཟག་ཁོ་ན་ལས་འགྱུར་བ་ལྟར་གང་ཟག་ལས་ནི་མ་ཡིན་ནོ། །ཐབས་གང་གིས་དགེ་འདུན་ལས་རྫོགས་པར་བསྙེན་པར་འགྱུར་ཞེ་ན། མཁན་པོ་ཉིད་དུ་ཕྱོགས་པར་གྱུར་པས་ལས་བྱེད་པ་དང་གསང་སྟེ་སྟོན་པའི་དགེ་སློང་ལ་གསོལ་བ་གདབ་པར་བྱའོ་ཞེས་བྱ་བ་སྨྲས་ཏེ། མཁན་པོ་ཉིད་དུ་ཕྱོགས་པར་གྱུར་པ་ཞེས་བྱ་བ་ནི། རྫོགས་པར་བསྙེན་པའི་མཁན་པོ་ཉིད་དུ་ཉེ་བར་གནས་པ་སྟ་གོན་དུ་གྱུར་པའི་དགེ་སློང་སྟེ། དེ་ཉིད་ཀྱིས་ལས་བྱེད་པ་ལ་གསོལ་བ་གདབ་པ་བཅོལ་བར་བྱ་ཞིང༌། གསང་སྟེ་སྟོན་པའི་དགེ་སློང་ལ་ཡང་གསོལ་བ་གདབ་པར་བྱའོ་ཞེས་བྱ་བར་སྦྱར་རོ། །དགེ་སློང་ཞེས་སྨོས་པ་ནི། གསང་སྟེ་སྟོན་པའི་ཁྱད་པར་དུ་བྱ་བའི་ཕྱིར་ཏེ། ལས་བྱེད་པ་ནི་ལས་ཡོངས་སུ་བརྗོད་པས་དགེ་སློང་ཉིད་ཡིན་པར་གྲུབ་པའི་ཕྱིར་རོ། །གསོལ་བ་གདབ་པའི་འོག་ཏུ་ཅི་ཞིག་བྱ་ཞེ་ན། མཁན་པོར་གསོལ་བ་བྱའོ་ཞེས་བྱ་བ་སྨྲས་ཏེ། རྫོགས་པར་བསྙེན་པར་འདོད་པས་དགེ་འདུན་གྱི་དབུས་དེ་ཉིད་དུ་མཁན་པོར་གསོལ་བ་བྱའོ། །མཁན་པོར་གསོལ་བའི་འོག་ཏུ་མཁན་པོས་ཅི་ཞིག་བྱ་ཞེ་ན། དེ་རང་
གིས་དེ་ལ་ཆོས་གོས་གསུམ་བྱིན་གྱིས་བརླབ་པར་བྱའོ་ཞེས་བྱ་བ་སྨྲས་ཏེ། དེ་ཞེས་བྱ་བ་ནི། མཁན་པོ་ལ་སྙེགས་ཏ། འདས་མ་ཐག་ཏུ་བསྟན་པའི་ཕྱིར་རོ། །འོན་ན་རང་གིས་ཞེས་བྱ་བ་སྨོས་མི་དགོས་ཏེ། དེས་དེ་ལ་ཆོས་གོས་གསུམ་བྱིན་གྱིས་བརླབ་པར་བྱའོ་ཞེས་བྱ་བ་འདི་ཉིད་ཀྱང་དོན་རྟོགས་པའི་ཕྱིར་རང་གིས་ཞེས་བྱ་བ་སྨོས་ཅི་དགོས་ཤེ་ན། དེ་ནི་དེ་ལྟ་མ་ཡིན་ཏེ། རང་གིས་ཞེས་སྨོས་པ་ནི་བཅོལ་བའི་ཆོ་ག་སྤང་བའི་ཕྱིར་ཏེ། འདི་ལྟར་དཔེར་ན་སྐྲ་བྲེག་པ་དང་མཚན་བརྟག་པ་ལ་སོགས་པ་དག་གཞན་གྱིས་བྱེད་ན་ཡང་ཉེས་པ་མེད་པ་ལྟ་བུ་ཆོ་ག་མ་ངེས་པ་ནི་བཅོལ་བའི་ཆོ་ག་ཞེས་བྱའོ། །འདིར་ནི་ཆོས་གོས་བྱིན་གྱིས་བརླབ་པ་མཁན་པོ་ཉིད་ཀྱིས་རང་གིས་བྱ་བ་ཡིན་གྱི་གཞན་བྱེད་དུ་མི་གཞུག་པ་དེའི་དོན་དུ་རང་གིས་ཞེས་བྱ་བའི་སྒྲ་ཉེ་བར་བརྗོད་པ་བྱས་སོ། །དེ་ལ་ཞེས་བྱ་བ་ནི། རྫོགས་པར་བསྙེན་པར་བྱ་བ་ལའོ། །དེ་ལྟར་ན་འདིར་མདོའི་དོན་འདི་འབྱུང་སྟེ། མཁན་པོ་དེ་རང་གིས་རྫོགས་པར་བསྙེན་པར་བྱ་བ་དེ་ལ་ཆོས་གོས་གསུམ་དྲས་ཤིང་དྲུབས་ཟིན་པ་དེ་ཡོད་ཅིང་བདོག་པའམ། མེད་ཅིང་མི་བདོག་ན་གཞན་ལ་རྒྱུ་ཡང་བྱིན་གྱིས་བརླབ་པར་བྱའོ། །བྱིན་གྱིས་བརླབས་པའི་འོག་ཏུ་བསྐོན་པར་བྱ་སྟེ། ཆོས་གོས་བྱིན་གྱིས་བརླབ་པ་ནི་ཆ་ལུགས་ཀྱི་དོན་དུ་ཡིན་པའི་ཕྱིར་རོ། །ལྷུང་བཟེད་ཀྱང་མི་ཆུང་ངམ་མི་ཆེ་འམ་མི་སྐྱ་འམ་ཞེས་དགེ་འདུན་ལ་བསྟན་ནས་སོ་ཞེས་བྱ་བ་ལ། ལྷུང་བཟེད་ཀྱང་དགེ་འདུན་ལ་བསྟན་ནས་ཞེས་བྱ་བའི་ཀྱང་ཞེས་བྱ་བ་ནི། དེ་རང་ཁོ་ནས་དེ་ཡང་བྱིན་གྱིས་བརླབ་པར་བྱའོ་ཞེས་བྱ་བའོ། །དགེ་འདུན་ལ་ལྷུང་བཟེད་བསྟན་པ་ཅིའི་ཕྱིར་བྱ་ཞེ་ན། དེའི་ཕྱིར་མི་ཆུང་ངམ་ཞེས་བྱ་བ་ལ་སོགས་པ་སྟེ། བྱིན་གྱིས་བརླབ་ཏུ་རུང་བའི་ལྷུང་བཟེད་གསུམ་ལས་མི་ཆུང་གནམ་ཞེས་བྱ་བ་མི་དམན་ནམ་ཞེས་བྱ་བའི་ཐ་ཚིག་གོ །མི་ཆེ་འམ་ཞེས་བྱ་བ་ནི། ཚད་གསུམ་པོ་དག་ལས་བོང་ཚོད་མ་ལྷག་གམ་ཞེས་བྱ་བའོ། །མི་སྐྱ་འམ་ཞེས་བྱ་བ་ནི། ལྷུང་བཟེད་དཀར་པོར་མ་གྱུར་ཏམ་ཞེས་བྱའོ། །ལྷུང་བཟེད་ནག་པོ་ཞེས་གསུངས་པ་གང་ཡིན་པ་དེ་ནི་སྐྱ་བ་ལ་སོགས་པར་ཐལ་བ་ཡོངས་སུ་སྤང་བའི་ཕྱིར་ཉེ་བར་བསྟན་པ་ཡིན་ཏེ། ཆུང་བ་ཉིད་ལ་སོགས་པའི་སྐྱོན་དང་ལྡན་པ་ལ་ནི་བྱིན་གྱིས་བརླབ་པ་མི་འཆགས་པའི་ཕྱིར་རོ། །ལྷུང་བཟེད་བསྟན་པའི་འོག་ཏུ་དགེ་སློང་དེ་དག་གིས་ཇི་སྐད་བརྗོད་པར་བྱ་ཞེ་ན། ཐམས་ཅད་ཀྱིས་དེ་ལྟ་བུ་ཉིད་མ་ཡིན་ཏེ།
ལྷུང་བཟེད་བཟང་ངོ་ཞེས་བརྗོད་པར་བྱ་བ་སྨྲས་ཏེ། ཐམས་ཅད་ཀྱིས་ཞེས་བྱ་བ་སྨོས་པ་ནི། དགེ་སློང་འདུས་པ་རྣམས་མ་ལུས་པ་བསྟན་པའི་ཕྱིར་རོ། །དེ་ལྟ་བུ་ཉིད་ཅེས་བྱ་བ་ནི། དེ་ལྟ་བུའི་དངོས་པོ་སྟེ་ཆུང་བ་ཉིད་ལ་སོགས་པའི་སྐྱོན་དང་ལྡན་པ་ཉིད་ཅེས་བྱ་བའི་ཐ་ཚིག་གོ །དེ་ལྟ་བུ་ཉིད་མ་ཡིན་ཏེ་ཞེས་བྱ་བ་ནི། དེ་ལྟ་བུའི་དངོས་པོ་མ་ཡིན་པ་སྟེ། ཆུང་བ་ཉིད་ལ་སོགས་པའི་སྐྱོན་དང་བྲལ་བ་ཉིད་དོ། །དེ་ལྟར་ན་འདིར་མདོའི་དོན་འདི་འབྱུང་སྟེ། གལ་ཏེ་ལྷུང་བཟེད་དེ་ཆུང་བ་ཉིད་ལ་སོགས་པའི་སྐྱོན་དང་བྲལ་བ་ཡིན་ཞིང༌། ཚད་དང་ལྡན་པ་དང་ལེགས་པར་ཁ་བསྒྱུར་བ་ལ་སོགས་པའི་ཡོན་ཏན་དང་ལྡན་པ་ཡིན་ན། དེའི་ཚེ་དགེ་སློང་ཐམས་ཅད་ཀྱིས་ལྷུང་བཟེད་ བཟང་ངོ་ཞེས་བྱ་བ་ལྷུང་བཟེད་མཛེས་སོ་ཞེས་བརྗོད་པར་བྱའོ། །ལྷུང་བཟེད་བསྟན་པའི་འོག་ཏུ 
་ཅི་ཞིག་བྱ་ཞེ་ན། བཀར་ནས་ལས་བྱེད་པས་གསང་སྟེ་སྟོན་པ་གང་ཡིན་ཞེས་བྱ་བས་སྨྲར་བཅུག་སྟེ། སྤྲོ་བ་བྱས་ནས་དགེ་འདུན་ལ་གསོལ་བ་བྱའོ་ཞེས་བྱ་བ་སྨྲས་ཏེ། བཀར་ནས་ཞེས་བྱ་བ་ནི། རྫོགས་པར་བསྙེན་པར་བྱ་བ་དེ་དཀྱིལ་འཁོར་བའི་གནས་ནས་ཕྱིར་ཕྱུང་ནས་ཏེ། ཐག་ཇི་སྲིད་དུ་དགར་བར་བྱ་ཞེན། གསང་སྟེ་སྟོན་པའི་ཕྱིར་ལས་གང་བྱེད་པ་དེ་མི་ཐོས་པ་དེ་སྲིད་དུའོ། །དེའི་འོག་ཏུ་ལས་བྱེད་པས་སུ་ཡིན་ཞེས་བྱ་བ་ལ་སོགས་པའི་ལས་བྱའོ། །དེ་ཡང་ལས་ཀྱི་ཆོ་ག་ལས་ཁོང་དུ་ཆུད་པར་བྱ་སྟེ། དེ་ལས་ཀྱང་དེ་ཐོས་པའི་ཉེན་ཀོར་ནས་བཀར་ཏེ་མཐོང་བའི་ཉེན་ཀོར་དུ་ཐལ་མོ་སྦྱོར་དུ་བཅུག་ནས། ཚོགས་ལ་མངོན་པར་ཕྱོགས་པར་གཞག་པར་བྱའོ་ཞེས་འབྱུང་ངོ༌། །དེའི་འོག་ཏུ་ལས་བྱེད་པས་སྨྲ་བར་བྱའོ། །གང་ཡིན་ཞེས་བྱ་བ་དེ་ནི། སྔགས་ཀྱི་ཚིག་གི་ཡི་གེ་དང་པོ་བླངས་པ་ཡིན་ཏེ། མཁན་པོ་མིང་འདི་ཞེས་བྱ་བས་ནི་མིང་འདི་ཞེས་བྱ་བའི་གསང་སྟེ་སྟོན་པར་གསོལ་བ་གདབ་པ་གང་ཡིན་ཞེས་བྱ་བའི་སྔགས་དེས་གསང་སྟེ་སྟོན་པ་བཙལ་བར་བྱའོ། །དེའི་འོག་ཏུ་གསང་སྟེ་སྟོན་པས་བདག་མིང་འདི་ཞེས་བྱ་བའི་ཞེས་བརྗོད་པར་བྱའོ། །དེ་ལྟར་ལས་བྱེད་པས་གསང་སྟེ་སྟོན་པ་དེ་སྨྲར་བཅུག་པའི་ཚིག་གི་ལན་འདེབས་སུ་བཅུག་སྟེ་དེའི་འོག་ཏུ་ལས་བྱེད་པས་གསང་སྟེ་སྟོན་པ་དེ་ཉིད་སྤྲོ་བར་བྱ་བའི་ཕྱིར། སྤྲོ་བར་བྱས་ནས་ཞེས་བྱ་བ་སྨྲས་ཏེ། གསང་སྟེ་སྟོན་པ་དེ་ཉིད་དོ། །མིང་འདི་ཞེས་བྱ་བ་ཁྱོད་མཁན་པོ་མིང་འདི་ཞེས་བྱ་བས་མིང་འདི་ཞེས་བྱ་
བ་ལ་གསང་སྟེ་སྟོན་པར་སྤྲོ་འམ་ཞེས་བྱ་བའི་སྔགས་ཀྱིས་སོ། །ཆོ་ག་བཤད་པ་འདི་ནི་ཐམས་ཅད་དུ་ཡང་དུས་དང་པོར་བྱ་བ་ཡིན་ནོ། །དེ་དང་དེ་ལྟར་བྱས་ནས་དེའི་འོག་ཏུ་ལས་བྱེད་པས་གསང་སྟེ་སྟོན་པ་དེ་དགེ་འདུན་ལ་གསོལ་བ་བྱའོ་ཞེས་བྱ་བ་གོ་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་ན་འདིར་མདོའི་དོན་འདི་འབྱུང་སྟེ། རྫོགས་པར་བསྙེན་པར་འདོད་པ་ཐ་དད་པར་གནས་པ་ལས་བཀར་ནས། མིང་འདི་ཞེས་བྱ་བས་མིང་འདི་ཞེས་བྱ་བའི་གསང་སྟེ་སྟོན་པར་གསོ་ལྦ་བཏབ་པ་གང་ཡིན་ཞེས་དུས་སྔར་བྱ་བ་བྱས་ནས། དེའི་འོག་ཏུ་དགེ་འདུན་ལ་གསང་སྟེ་སྟོན་པ་ཚོལ་བ་བྱའོ་ཞེས་བྱ་བའི་ཐ་ཚིག་གོ ། དགེ་འདུན་ལ་གསོལ་བའི་འོག་ཏུ་གསང་སྟེ་སྟོན་པས་རྫོགས་པར་བསྙེན་པར་འདོད་པ་ལྐོག་ཏུ་རྗེས་སུ་སྟོན་པར་བྱ་སྟེ། དེའི་ཕྱིར་ཁྱོད་ཉོན་ཅིག་ཅེས་བྱ་བས་ལྐོག་ཏུ་རྗེས་སུ་བསྟན་པར་བྱའོ་ཞེས་བྱ་བ་སྨྲས་ཏེ། དེ་ནི་གསང་སྟེ་སྟོན་པས་བྱ་བ་ཡིན་གྱི་གཞན་གྱིས་ནི་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་ལྐོག་ཏུ་རྗེས་སུ་བསྟན་པ་ནི་དེའི་ལས་ཡིན་པའི་ཕྱིར་རོ། །ཁྱོད་ཉོན་ཅིག་ཅེས་བྱ་བས་ཞེས་བྱ་བའི་ཚིག་དང་པོས་ནི་སྔགས་མཐའ་དག་ལེན་པར་བྱེད་དེ། ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས་འདི་ནི་བྱུང་བའི་དུས་ཏེ་ཞེས་བྱ་བ་ལ་སོགས་པའོ། །རྗེས་སུ་བསྟན་པའི་འོག་ཏུ་གསང་སྟེ་སྟོན་པས་རྫོགས་པར་བསྙེན་པར་འདོད་པ་ལ་བརྗོད་པར་བྱ་བ་མ་བོས་ཀྱི་བར་དུ་མ་འོང་བར་སྡོད་ཅིག་ཅེས་སྨྲས་ནས་རྗེས་སུ་བསྟན་ན་ཞེས་བྱ་བས་དགེ་འདུན་ལ་ཡོངས་སུ་དག་པས་ཏེ་ཅི་མཆི་ཞིག་གམ་ཞེས་བྱ་བས་འོང་བར་ཞུ་བར་བྱའོ་ཞེས་བྱ་བ་ནི། མ་བོས་ཀྱི་བར་དུ་ཞེས་བྱ་བ་མ་སྦྲན་གྱི་བར་དུ་ཁྱོད་རེ་ཞིག་དགེ་འདུན་གྱི་ནང་དུ་མ་འོང་བར་སྡོད་ཅིང་ཅེས་རྫོགས་པར་བསྙེན་པར་འདོད་པ་དེ་ལ་སྨྲས་ནས་ཞེས་བྱ་བ་བསྒོ་ནས་གསང་སྟེ་སྟོན་པས་རྒན་རིམས་ལ་འདི་སྐད་དུ་རྗེས་སུ་བསྟན་ན་ཞེས་བྱ་བ་བརྗོད་པར་བྱ་སྟེ། དེ་ཡང་སྔགས་ཀྱི་ཚིག་བླངས་པ་ཡིན་ཏེ། དེའི་ཕྱིར་ཞེས་བྱ་བས་ཞེས་བྱ་བའི་སྒྲ་ཉེ་བར་བརྗོད་པར་བྱ་སྟེ། སྔགས་ཀྱི་ཚིག་དེ་ཉིད་ཀྱི་ཕོགས་གཅིག་སྨོས་པའི་ཐ་ཚིག་གོ །དགེ་འདུན་ལ་རྫོགས་པར་བསྙེན་པར་འདོད་པའི་ཡོངས་སུ་དག་པ་གོ་བར་བྱས་ཏེ་ཞེས་བྱ་བ་གང་གིས་ཞེ་ན། དགེ་འདུན་བཙུན་པ་རྣམས་གསན་དུ་གསོལ། བདག་གིས་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་
བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན་དེ་བར་ཆད་ཀྱི་ཆོས་རྣམས་ཡོངས་སུ་དག་གོ་ཞེས་ཁོ་ན་ཉིད་མཆི་ན་ཞེས་བྱ་བ་ལ་སོགས་པའི་སྔགས་ཀྱིས་སོ། །དེ་ལྟར་ན་འདིར་མདོའི་དོན་འདི་འབྱུང་སྟེ། གསང་སྟེ་སྟོན་པས་རྫོགས་པར་བསྙེན་པར་འདོད་པ་ལ་རྗེས་སུ་བསྟན་པའི་འོག་ཏུ་མ་བོས་མ་སྦྲན་གྱི་བར་དུ་ཐ་དད་པར་གནས་པའི་ནང་དུ་མ་འོང་བར་ཕྱོགས་འདི་ཉིད་དུ་རེ་ཞིག་སྡོད་ཅིག་ཅེས་བརྗོད་པར་བྱའོ། །དེ་ནས་དགེ་འདུན་ལ་རྫོགས་པར་བསྙེན་པར་འདོད་པའི་ཡོངས་སུ་དག་པ་གོ་བར་བྱ་སྟེ། བདག་གིས་མཁན་པོ་མིང་འདི་ཞེས་བགྱི་བས་མིང་འདི་ཞེས་བགྱི་བ་ལ་བར་ཆད་ཀྱི་ཆོས་རྣམས་གསང་སྟེ་རྗེས་སུ་བསྟན་ན་ཞེས་བྱ་བ་ལ་སོགས་པའི་སྔགས་ཀྱིས་སོ། །ཡོངས་སུ་དག་པ་གོ་བར་བྱས་ནས་ཀྱང་ཅི་མཆི་ཞིག་གམ་ཞེས་བྱ་བས་འོང་བ་ཞུ་བར་བྱའོ་ཞེས་བྱ་བ་ནི། ཅི་མཆི་ཞིག་གམ་ཞེས་བྱ་བའི་ཞུ་བ་འདིས། རྫོགས་པར་བསྙེན་པར་བྱ་བ་དེའི་འོང་བ་དགེ་འདུན་ལ་ཞུ་བར་བྱའོ། །གསང་སྟེ་སྟོན་པའི་ལས་རྫོགས་སོ།། །།བམ་པོ་གཉིས་པ། འོང་བ་ཞུས་པའི་འོག་ཏུ་དགེ་འདུན་ཐམས་ཅད་ཀྱིས་གལ་ཏེ་ཡོངས་སུ་དག་ནའོ་ཞེས་བརྗོད་པར་བྱའོ་ཞེས་བྱ་བ་ལ། ཐམས་ཅད་ཀྱིས་ཞེས་བྱ་བ་ནི། ལན་མེད་པ་མ་ཡིན་པར་བསྟན་པའི་ཕྱིར་རོ། །གལ་ཏེ་ཡོངས་སུ་དག་ནའོ་ཞེས་བྱ་བ་ནི། གལ་ཏེ་རྫོགས་པར་བསྙེན་པར་བྱ་བ་དེ་བར་ཆད་ཀྱི་ཆོས་རྣམས་ཡོངས་སུ་དག་ནའོ་ཞེས་བྱ་བའི་སྒྲ་ནི་བརྗོད་མ་ཐག་པ་དེ་ཉིད་ལ་སྙེགས་པའི་དོན་ཏེ། དེ་ཁོ་ན་སྐད་བརྗོད་པར་བྱའི་ལྷག་པ་མ་ཡིན་ནོ་ཞེས་བྱ་བའི་ཐ་ཚིག་གོ །བརྗོད་པར་བྱའོ་ཞེས་བྱ་བ་ནི། སྨྲ་བར་བྱ་ཞེས་བྱ་བའི་དོན་ཏོ། །གང་གི་ཚེ་དགེ་འདུན་གྱིས་གནང་སྟེ། རྫོགས་པར་བསྙེན་པར་འདོད་པ་དགེ་འདུན་གྱི་ནང་དུ་ཞུགས་པ་དེ་ཉིད་ལས་བྱེད་པ་ཅི་ཞིག་བྱ་ཞེ་ན། ལས་བྱེད་པས་རྫོགས་པར་བསྙེན་པར་གསོལ་དུ་གཞུག་གོ་ཞེས་བྱ་བ་སྨྲས་ཏེ། ལས་བྱེད་པས་རྫོགས་པར་འདོད་པ་རྫོགས་པར་བསྙེན་པར་བྱ་བའི་ཕྱིར། གསོལ་དུ་གཞུག་གོ་ཞེས་བྱ་བ་གསོལ་བ་བྱེད་དུ་གཞུག་གོ་ཞེས་བྱ་བའི་ཐ་ཚིག་གོ །གསོལ་བའི་འོག་ཏུ་དགེ་འདུན་ལ་གོ་བར་བྱ་སྟེ། དེའི་ཕྱིར་དགེ་འདུན་ལ་གསོལ་ནས་བར་ཆད་དྲི་བར་བྱའོ་ཞེས་བྱ་བ་སྨྲས་ཏེ། དགེ་འདུན་
ལ་གསོལ་ནས་ཞེས་བྱ་བ། བར་ཆད་དྲི་བའི་ཕྱིར་དགེ་འདུན་ལ་གསོལ་བ་བྱས་གོ་བར་བྱས་ནས་སོ། །ཇི་ལྟར་བར་ཆད་དྲི་བར་བྱ་ཞེ་ན། ཚེ་དང་ལྡན་པ་ཁྱོད་ཉོན་ཅིག །འདི་ནི་ཁྱོད་ཀྱི་བདེན་པའི་དུས་འདི་ནི་བྱུང་བའི་དུས་དེ་ཞེས་བྱ་བ་ལ་སོགས་པའི་སྔགས་ཀྱིས་སོ། །བར་ཆད་དྲིས་པའི་འོག་ཏུ་རྫོགས་པར་བསྙེན་པ་ཉེ་བར་བསྒྲུབ་པར་བྱའོ་ཞེས་བྱ་བ་ནི། ལས་བྱེད་པས་རྫོགས་པར་བསྙེན་པར་འདོད་པ་དེ་གསོལ་བ་དང་བཞིའི་ལས་ཀྱིས་རྫོགས་པར་བསྙེན་པ་ཉེ་བར་བསྒྲུབ་པར་བྱའོ་ཞེས་བྱ་བ་ཡང་དག་པར་ཐོབ་པར་བྱའོ། །རབ་ཏུ་གནས་པར་བྱའོ་ཞེས་བྱ་བའི་ཐ་ཚིག་གོ །རྫོགས་པར་བསྙེན་པ་ཉེ་བར་བསྒྲུབ་པའི་འོག་ཏུ་དེ་མ་ཐག་ཏུ་གྲིབ་ཚོད་རིག་པར་བྱའོ་ཞེས་བྱ་བ་ནི། གང་གི་ཚེ་རྫོགས་པར་བསྙེན་པར་གྱུར་པ་དེ་མ་ཐག་ཏུ་དགེ་སློང་གང་ཡང་རུང་བས་གྲིབ་མ་གཞལ་པར་བྱ་ཞིང༌། གྲིབ་མ་དེའི་ཚོད་རྫོགས་པར་བསྙེན་པའི་གང་ཟག་ད་ལྟར་གྲིབ་མ་འདི་ཙམ་དུ་གྱུར་ཏོ་ཞེས་རིག་པར་བྱའོ་ཞེས་བྱ་བ་གོ་བར་བྱའོ། །གཞལ་བ་དེ་ཡང་ཅི་ཞིག་གིས་བྱ་ཞེ་ན། དེ་ནི་ཐུར་མ་སོར་བཞི་པས་བཟང་ངོ་ཞེས་བྱ་བ་སྨྲས་ཏེ། གྲིབ་མ་གཞལ་བ་དེ་ནི་ཐུར་མ་སོར་བཞིའི་ཚད་ཙམ་གྱིས་གཞལ་ན་བཟང་ངོ་ཞེས་བྱ་བ་སླའོ་ཞེས་བྱ་བར་རིག་པར་བྱའོ། །རྐང་པ་ལ་སོགས་པས་ནི་བུལ་བར་འགྱུར་གྱི་ཐུར་མས་ནི་མྱུར་ཏེ། དེའི་ཕྱིར་དེ་ཉིད་ཀྱིས་གཞལ་ན་བཟང་གི་གཞན་གྱིས་ནི་མི་བཟང་ངོ༌། །མིང་མ་གྲགས་པ་གཞན་གྱི་ཐ་སྙད་བསྟན་པའི་ཕྱིར། དེ་ནི་སྐྱེས་བུ་ཉིད་ཅེས་ཐ་སྙད་དུ་བྱའོ་ཞེས་བྱ་བ་སྨྲས་ཏེ། བཟང་ངོ་ཞེས་བྱ་བར་འགྱུར་རོ། །ཐུར་མ་དེའི་ཐ་སྙད་ནི་སྐྱེས་བུ་ཉིད་ཅེས་བརྗོད་པར་བྱ་སྟེ། དེ་ལ་ཐུར་མས་གཞལ་བའི་གྲིབ་མ་དེ་ཇི་ཙམ་དུ་གྱུར་པ་དེ་ཙམ་ལ་གྲིབ་མ་སྐྱེས་བུའི་ཚད་ཅེས་བརྗོད་པར་བྱའོ། །གྲིབ་མ་འབའ་ཞིག་རིག་པར་བྱ་བ་མ་ཡིན་གྱི་གཞན་ཡང་ཉིན་མཚན་གྱི་ཆ་སྔ་དྲོ་ལ་སོགས་པ་དང་ཞེས་བྱ་བ་ལ། ཉིན་མཚན་ཞེས་བྱ་བ་ནི། ཉིན་པར་དང་མཚན་མོའོ། །དེའི་ཆ་ནི་སྔ་དྲོ་དང་གུང་དང་ཕྱི་འབྲེད་དང༌། ཐུན་དང་པོ་ཞེས་བྱ་བ་ལ་སོགས་པ་སྟེ་དེ་ཡང་རིག་པར་བྱའོ། །སོགས་པ་ཞེས་བྱ་བའི་སྒྲས་ནི། གུང་ལ་སོགས་པ་དེ་དག་ཉིད་དུ་བཟུང་ངོ༌། །དུས་ཚོད་ཀྱང་ངོ་ཞེས་བྱ་བ་ལ། དུས་ཚོད་ཅེས་བྱ་བ་ནི། དུས་ཀྱི་བྱེ་བྲག་ཡིན་པར་རིག་པར་བྱའོ། །ཀྱང་ངོ་ཞེས་བྱ་བ་ནི་
རིག་པར་བྱའོ་ཞེས་བྱ་བར་སྦྱར་རོ། །འོ་ན་དུས་ཚོད་དེ་དག་དུ་ཡོད་ཅེ་ན། དེ་དག་ནི་ལྔའོ་ཞེས་བྱ་བ་སྨྲས་ཏེ། འདི་ལྟར་མདོ་གོང་མ་ལ་དུས་ཚོད་ཅེས་བྱ་བའི་སྒྲ་ཐ་མ་གཅིག་གི་ཚིག་ཏུ་སྦྱར་མོད་ཀྱི། འདིར་རྣམ་པར་དབྱེ་བ་ཡོངས་སུ་སྦྱར་ཏེ། ཐ་མ་མང་པོའི་ཚིག་ཏུ་སྦྱར་བར་བྱའོ། །དུས་ཚོད་དེ་དག་ནི་ལྔའོ་ཞེས་བྱ་བར་རིག་པར་བྱའོ་ཞེས་བྱ་བའི་ཐ་ཚིག་གོ །དེ་དག་ཀྱང་གང་ཞེ་ན། དགུན་གྱི་དུས་དང༌། དཔྱིད་ཀྱི་དུས་དང༌། དབྱར་གྱི་དུས་དང༌། དབྱར་ཐུང་ངུའི་དུས་དང༌། དབྱར་རིང་པོའི་དུས་སོ་ཞེས་བྱ་བ་སྨྲས་ཏེ། དགུན་གྱི་དངོས་པོ་ནི་དགུན་གྱི་དུས་སོ། །དཔྱིད་ཀྱི་དངོས་པོ་ནི་དཔྱིད་ཀྱི་དུས་སོ། །དབྱར་གྱི་དངོས་པོ་ནི་དབྱར་གྱི་དུས་སོ། །དུས་ཐུང་ངུར་གནས་པའི་ཕྱིར་ཤི་བ་དང་འདྲ་བས་ཐུང་དུ་ཡང་དེ་ཡིན་ལ་དབྱར་ཀྱང་དེ་ཡིན་པ་དེ་ནི་དབྱར་ཐུང་དུའི་དུས་སོ། །དུས་རིང་པོའི་ཕྱིར་རིང་པོ་ཡང་དེ་ཡིན་ལ་དབྱར་ཀྱང་དེ་ཡིན་པ་ནི་དབྱར་རེང་པོའི་དུས་སོ། །དེ་དག་གི་ཚད་བརྗོད་པར་བྱ་བའི་ཕྱིར། དང་པོ་གཉིས་ནི་ཟླ་བ་བཞི་བཞིའོ་ཞེས་བྱ་བ་སྨྲས་ཏེ། མདོ་བསྟན་པའི་དང་པོར་བསྟན་པའི་ཕྱིར་དང་པོ་གཉིས་ཏེ། དགུན་གྱི་དུས་དང་དཔྱིད་ཀྱི་དུས་ཞེས་བྱ་བའི་ཐ་ཚིག་གོ །ཟླ་བ་བཞི་བཞིའི་དངོས་པོ་ནི། ཟླ་བ་བཞི་བཞིའོ། །འོག་མའི་ཟླ་བ་གཅིག་གོ་ཞེས་བྱ་བ་ནི་དེ་གཉིས་འོག་ཏུ་བསྟན་པའི་ཕྱིར། འོག་མ་ཞེས་བྱ་བའི་སྒྲ་ནི། དབྱར་གྱི་དུས་ལ་བྱ་སྟེ། དེ་ནི་ཟླ་བ་གཅིག་ཏུ་རིག་པར་བྱའོ། །དེའི་འོག་མ་ནི་ཉིན་ཞག་གཅིག་གོ་ཞེས་བྱ་བ་ནི། མདོ་སྔ་མ་ལས་འོག་མ་ཞེས་བྱ་བའི་སྒྲའི་རྗེས་སུ་འཇུག་སྟེ། དབྱར་གྱི་དུས་དེའི་འོག་མ་ནི་དབྱར་ཐུང་ངུའི་དུས་ཡིན་པར་རིག་པར་བྱའོ། །དེ་ནི་ཉིན་ཞག་གཅིག་སྟེ། དབྱར་ཟླ་ཐ་ཆུངས་ཚེས་བཅུ་དྲུག་ཅེས་བྱ་བའི་ཐ་ཚིག་གོ །ཐ་མ་ནི་དེས་ཟླ་བ་གསུམ་དུ་མཆོག་པའོ་ཞེས་བྱ་བ་ནི་དུས་ཐ་མ་དབྱར་རིང་པོའི་དུས་ཞེས་བྱ་བ་ནི་དབྱར་ཐུང་ངུའི་དུས་ཞེས་བྱ་བའི་ཉིན་ཞག་གཅིག་པུ་ཉིད་དེས་ཟླ་བ་གསུམ་དུ་མ་ཆོག་པའོ། །ཐ་མའི་དངོས་པོ་ཡིན་པའི་ཕྱིར་ཐ་མའོ། །དུས་ཚོད་བརྗོད་པའི་འོག་ཏུ་གནས་རྣམས་བརྗོད་པར་བྱའོ་ཞེས་བྱ་བ་ནི། རྫོགས་པར་བསྙེན་པའི་འོག་ཏུ་ལས་བྱེད་པས་རྫོགས་པར་བསྙེན་པ་དེ་ལ་གནས་རྣམས་བརྗོད་པར་བྱའོ། །དེ་དག་ཀྱང་གང་ཞེ་ན། སྨྲས་པ། ཕྱག་དར་ཁྲོད་ལ་སོགས་པའོ། །དེ་དག་ཀྱང་བཞི་སྟེ། ཕྱག་དར་ཁྲོད་དང༌།
བསོད་སྙོམས་དང༌། ཤིང་དྲུང་དང༌། བཀུས་ཏེ་བོར་བ་ཞེས་བྱ་བ་གནས་བཞི་པོ་དག་གོ །ཕྱག་དར་བཞིན་དུ་བོར་བའི་ཕྱིར་ཕྱག་དར་འདྲ་བའི་གོས་ནི་ཕྱག་དར་ཁྲོད་དོ། །ཡང་ན་ཕྱག་དར་དག་གི་ནང་ན་འདུག་པའི་གོས་ཕྱག་དར་དུ་བསགས་པ་ཞེས་བྱ་བའི་ཐ་ཚིག་གོ །ལྷུང་བཟེད་ལ་སོགས་པའི་ནང་དུ་ཟས་བཅུག་ཅིང་བླུགས་པ་ནི་བསོད་སྙོམས་སོ། །ཤིང་ལྗོན་པའི་དྲུང་ནི་ཤིང་དྲུང་ངོ༌། །ཚགས་ཀྱིས་བཙགས་པ་ནི་བཀུས་ཏེ་བོར་བའོ། །ཡང་ན་དེ་བཀུས་པ་ཡང་ཡིན་ལ་བོར་བ་ཡང་ཡིན་པ་ནི་བཀུས་ཏེ་བོར་བའོ། །བཞི་པོ་དེ་དག་ནི་ཚངས་པར་སྤྱོད་པའི་གནས་ཡིན་པར་ཁོང་དུ་ཆུད་པར་བྱའོ། །ལྟུང་བར་འགྱུར་བའི་ཆོས་རྣམས་དང་ཞེས་བྱ་བ་ནི། ལས་བྱེད་པས་བརྗོད་པར་བྱའོ་ཞེས་བྱ་བར་སྦྱར་རོ། །དགེ་སློང་གི་དངོས་པོའི་ལྟུང་བ་དང་རྗེས་སུ་མཐུན་པའི་ཕྱིར་ལྟུང་བར་འགྱུར་ཏེ། དེ་དག་ཀྱང་མི་ཚངས་པར་སྤྱོད་པ་ལ་སོགས་པ་བཞི་འོག་ནས་འབྱུང་བ་དག་གོ །དགེ་སྦྱོང་བྱེད་པའི་ཆོས་རྣམས་ཀྱང་ངོ་ཞེས་བྱ་བ་ཡང་བརྗོད་པར་བྱའོ་ཞེས་བྱ་བར་སྦྱར་ཏེ། གཤེ་ཡང་སླར་མི་གཤེ་བར་བྱ་བ་དང༌། ཁྲོས་ཀྱང་སླར་མི་ཁྲོ་བར་བྱ་བ་དང༌། བརྡེགས་ཀྱང་སླར་མི་བརྡེག་པར་བྱ་བ་དང༌། མཚང་བྲུས་ཀྱང་སླར་མཚང་མི་འབྲུ་བར་བྱ་བ་དག་གོ །དེ་ལྟར་དེ་དག་ནི་གཞན་ལ་གནོད་པ་མེད་པའི་ཕྱིར་དགེ་སྦྱོང་དུ་བྱེད་པས་ན་དགེ་སྦྱོང་བྱེད་པ་དག་སྟེ། འདི་ལྟར། རབ་ཏུ་བྱུང་བ་གཞན་ལ་གནོད་པ་དང༌། །གཞན་ལ་འཚེ་བ་དགེ་སྦྱོང་མ་ཡིན་ནོ། །ཞེས་གསུངས་པའི་ཕྱིར་རོ། །དེའི་འོག་ཏུ་ཅི་ཞིག་བྱ་ཞེ་ན། མཆོག་ཏུ་འདོད་པར་བྱ་བ་ཡང་དག་པ་ཉིད་ཀྱིས་རྫོགས་པ་ཉིད་བརྗོད་ནས་ཚུལ་ཁྲིམས་ཀྱིས་མཉམ་པར་གྱུར་པ་ཉིད་བསྒྲུབ་པ་ལ་ངེས་པར་སྦྱར་བར་བྱའོ་ཞེས་བྱ་བ་སྨྲས་ཏེ། མཆོག་ཏུ་འདོད་པར་བྱ་བ་ཞེས་བྱ་བ་ནི་རབ་ཏུ་འདོད་པར་བྱ་བ་འདོད་པར་གྱུར་པའི་དངོས་པོ་སྟེ། ཁྱོད་སྔོན་བདག་ལེགས་པར་གསུངས་པའི་ཆོས་འདུལ་བ་ལ་རབ་ཏུ་འབྱུང་བ་དང་རྫོགས་པར་བསྙེན་པ་དགེ་སློང་གི་དངོས་པོ་ཐོབ་ཀྱང་ཇི་མ་རུང་སྙམ་དུ་སྨོན་པ་གང་ཡིན་པ་དེ་ཞེས་བྱ་བ་ནི་མཆོག་ཏུ་འདོད་པར་བྱ་བའི་དངོས་པོའོ། །ཡང་དག་པ་ཉིད་ཀྱིས་ཞེས་བྱ་བ་ལ། ཡང་དག་པའི་དངོས་པོ་ནི་ཡང་དག་པ་ཉིད། ཡང་དག་པ་ཉིད་ངེས་ཏེ། ད་ཁྱོད་མཁན་པོར་འོས་པ་དང༌། སློབ་དཔོན་འོས་པ་ཉིད་དང༌། དགེ་འདུན་མཐུན་པ་དང༌། གསོལ་བ་དང་བཞིའི་ལས་མི་གཡོ་བ་གཞག་པར་མི་
འོས་པས་ཞེས་བྱ་བས་སོ། །རྫོགས་པ་ཉིད་ཅེས་བྱ་བ་ནི། མཆོག་ཏུ་འདོད་པར་བྱ་བའི་དངོས་པོ་དེ་རྫོགས་པ་ཉིད་གང་ཡིན་པ་ཡོངས་སུ་རྫོགས་པ་དང་ཡོངས་སུ་རྒྱས་པ་སྟེ། རབ་ཏུ་བྱུང་ཞིང་རྫོགས་པར་བསྙེན་ཏོ་ཞེས་བྱ་བའོ། །བརྗོད་ནས་ཞེས་བྱ་བ་ནི། བརྡ་སྤྲད་ནས་སམ་གོ་བར་བྱས་ནས་སོ། །ནས་ཞེས་བྱ་བ་དང་སྦྱར་བ་ནི་བྱ་བ་གཞན་ལ་ལྟོས་པའི་ཕྱིར་རོ། །ཡང་དག་པ་ཉིད་ཀྱིས་རྫོགས་པ་ཉིད་དེ་བརྗོད་ནས་ཅི་ཞིག་བྱ་ཞེ་ན། ཚུལ་ཁྲིམས་ཀྱིས་མཉམ་པར་གྱུར་པ་ཉིད་ཅེས་བྱ་བ་ལ་སོགས་པ་སྟེ། ཚུལ་ཁྲིམས་ཀྱི་རྒྱུ་མཚན་གྱིས་མཉམ་པའི་རང་བཞིན་ཉིད་གང་ཡིན་པ་དེ་ནི་ཚུལ་ཁྲིམས་ཀྱིས་མཉམ་པར་གྱུར་པ་ཉིད་དོ། །དེ་བསྒྲུབ་པ་ནི་ནན་ཏན་དུ་བྱ་བ་སྟེ། དེ་དེ་ལ་ངེས་པར་སྦྱར་བར་བྱའོ་ཞེས་བྱ་བ་སྟེ། རྫོགས་པར་བསྙེན་ནས་ལོ་བརྒྱ་ལོན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་དེ་རིང་རྫོགས་པར་བསྙེན་པས་ཀྱང་བསླབ་པོ། །དེ་རིང་རྫོགས་པར་བསྙེན་པའི་དགེ་སློང་གིས་བསླབ་པ་གང་ལ་བསླབ་པར་བྱ་བ་དེ་ལ་རྫོགས་པར་བསྙེན་ནས་ལོ་བརྒྱ་ལོན་པས་ཀྱང་བསླབ་པོ་ཞེས་བྱ་བ་ལ་སོགས་པའི་ཚིག་དག་གིས་སོ། །དེ་ལྟར་ན་འདིར་ཚིག་གི་དོན་འདི་བྱུང་སྟེ། འདོད་པར་གྱུར་པའི་དོན་རྫོགས་པར་བསྙེན་པ་ཉིད་ཡང་དག་པའི་ཚོགས་ཡོངས་སུ་རྫོགས་པ་ཉིད་བརྗོད་ནས། དེའི་འོག་ཏུ་ཚུལ་ཁྲིམས་ཀྱིས་མཉམ་པའི་རང་བཞིན་ཉིད་བསྒྲུབ་པ་ལ་ངེས་པར་སྦྱར་བར་བྱའོ། །ཚུལ་དང་འབྲེལ་པའི་གཟུགས་བརྙན་དང་ཞེས་བྱ་བ་ནི། ངེས་པར་སྦྱར་བར་བྱའོ་ཞེས་བྱ་བར་སྦྱར་རོ། །ཚུལ་དང་ཞེས་བྱ་བ་ནི། འཇིག་རྟེན་གྱི་ཐ་སྙད་དང་ངོ༌། །འབྲེལ་པ་ཞེས་བྱ་བ་ནི། ཡོད་པ་སྟེ་ཚུལ་དང་འབྲེལ་པ་ཕ་མ་ལྟ་བུར་འབྲེལ་པ་ཞེས་བྱ་བའི་ཐ་ཚིག་གོ །དེའི་གཟུགས་བརྙན་ཞེས་བྱ་བ་ནི། འདྲ་བར་བྱེད་པ་གཟུགས་བརྙན་ལྟ་བུར་འདྲ་བར་བསྒྲུབ་པ་སྟེ། དེང་ཕྱིན་ཆད་ཁྱོད་ཀྱིས་མཁན་པོ་ལ་ཕའི་འདུ་ཤེས་ཉེ་བར་གཞག་པར་བྱའོ། །མཁན་པོས་ཀྱང་ཁྱོད་ལ་བུའི་འདུ་ཤེས་ཉེ་བར་གཞག་པར་བྱའོ་ཞེས་བྱ་བ་ལ་སོགས་པའོ། །དེ་ནི་ན་བ་ལ་སོགས་པའི་གནས་སྐབས་དག་ན་རེ་བ་དང་བཅས་པ་ཉིད་དུ་བྱ་བ་ཡིན་ནོ། །དུལ་བར་གནས་པ་ཉིད་དང་ཞེས་བྱ་བ་ཡང་ངེས་པར་སྦྱར་བར་བྱའོ་ཞེས་བྱ་བར་སྦྱར་རོ། །དུལ་བ་ནི་ཉེ་བར་ཞི་བ་སྟེ་མི་རྒོད་པའོ། །དེ་ལ་དུལ་བར་གནས་
པ་ནི་གནས་པའོ། །དེའི་དངོས་པོ་ནི་དུལ་བའི་གནས་ཉིད་དོ། །དེ་ལ་ངེས་པར་སྦྱར་བར་བྱ་བ་སྟེ། དེང་ཕྱིན་ཆད་ཁྱོད་ཀྱིས་ཚངས་པ་མཚུངས་པར་སྤྱོད་པ་རྣམས་དང༌། གནས་བརྟན་རྣམས་དང༌། བར་མ་རྣམས་དང༌། གསར་བུ་རྣམས་ལ་གུས་པ་དང་བཅས་པ་དང༌། ཞེས་དང་བཅས་པ་དང༌། འཇིགས་པ་དང་བཅས་པའི་དབང་དུ་འགྱུར་བར་གནས་པར་བྱའོ་ཞེས་བྱ་བས་སོ། །དགོས་པ་རྗེས་སུ་བསྒྲུབ་པ་ལ་ཡང་ངོ་ཞེས་བྱ་བ་ལ་ཡང་ངེས་པར་སྦྱར་བར་བྱའོ་ཞེས་བྱ་བར་སྦྱར་ཏེ། དགོས་པའི་བཀླགས་པ་དང༌། ཁ་ཏོན་དང་ཚུལ་བཞིན་ཡིད་ལ་བྱ་བ་ལ་སོགས་པའོ། །དེ་རྗེས་སུ་བསྒྲུབ་པ་ལ་ངེས་པར་སྦྱར་བར་བྱ་བ་སྟེ། དེང་ཕྱིན་ཆད་ཁྱོད་ཀྱིས་ལུང་མནོད་པར་བྱ། བཀླག་པར་བྱ་ཁ་ཏོན་བྱའོ་ཞེས་བྱ་བ་ལ་སོགས་པའི་གཞུང་གིས་སོ། །དེའི་འོག་ཏུ་མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་བསྒྲུབ་པར་གྱུར་པ་ཉིད་ཀྱང་བརྗོད་པར་བྱའོ་ཞེས་བྱ་བ་ནི། བསྒྲུབ་པར་གྱུར་པ་ཉིད་ཀྱང་བརྗོད་པར་བྱའོ་ཞེས་བྱ་བ་བར་སྦྱར་རོ། །གང་གིས་བསྒྲུབ་པར་གྱུར་པ་ཉིད་ཅེ་ན། མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པའི་འོ། །མ་བརྗོད་པ་ཞེས་བྱ་བ་ནི་གོ་བར་མ་བྱས་པ་མ་སྨྲས་པའོ། །ཡང་དག་པར་བླངས་པ་ཞེས་བྱ་བ་ནི། བླངས་ཏེ་དགེ་འདུན་ལྷག་མ་ལ་སོགས་པ་བསླབ་པའི་གཞི་རྣམས་སོ། །དེ་ནི་མ་བརྗོད་པ་ཡང་ཡིན་ལ་ཡང་དག་པར་བླངས་པ་ཡང་ཡིན་པས་མ་བརྗོད་པ་ཡང་དག་པར་བླངས་པའོ། །དེའི་ཡོངས་སུ་ཤེས་པ་ནི་མ་བརྗོད་པ་ཡང་དག་པར་བླངས་པ་ཡོངས་སུ་ཤེས་པ་དེའི་འོ། །དེའི་བསྒྲུབ་པར་འགྱུར་བ་ཉིད་བསྒྲུབ་པར་བྱ་བ་ཉིད་འབྱུང་བར་འགྱུར་བ་སྟེ། དེ་དག་བརྗོད་པར་བྱ་གོ་བར་བྱ་བའི་ཐ་ཚིག་སྟེ། འདི་དག་ནི་ཁོ་བོས་ཁྱོད་ལ་བསླབ་པའི་གཞི་ཆེ་ལོང་ཆེ་ལོང་ཙམ་ཞིག་བརྗོད་པར་ཟད་དེ། གཞན་དག་ནི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོག་གདོན་པའི་ཚེ་ཐོས་པར་འགྱུར་རོ། །གཞན་དག་ཀྱང་སློབ་དཔོན་དང༌། མཁན་པོ་དང༌། མཁན་པོ་གཅིག་པ་དང༌། སློབ་དཔོན་གཅིག་པ་དང༌། གཏམ་འདྲེས་པ་དང༌། ཕེབས་པར་སྨྲ་བ་དང༌། སྨོས་འདྲིན་དང༌། འགྲོགས་བཤེས་རྣམས་ཀྱང་རྒྱ་ཆེར་སྟོན་པར་འགྱུར་རོ་ཞེས་བྱ་བས་སོ། །འདི་སྐད་བསྟན་ཏེ། ད་ལྟར་ཁོ་བོས་ལྟུང་བར་འགྱུར་བ་ཙམ་ཞིག་བརྗོད་པར་ཟད་དེ། བསླབ་པའི་གཞི་ལྷག་མ་མ་བརྗོད་པ་ཡང་དག་པར་བླངས་པ་དེ་དག་
ནི། མཁན་པོ་ལ་སོགས་པ་ལས་བསྒྲུབ་པར་འགྱུར་རོ་ཞེས་བསྟན་ཏོ། །གུས་པ་ལ་ཡང་ངེས་པར་སྦྱར་བར་བྱའོ་ཞེས་བྱ་བ་ནི། རྫོགས་པར་བསྙེན་པ་དེ་གུས་པར་བྱེད་པ་དེ་ཉིད་ལ་ངེས་པར་སྦྱར་བར་བྱ་སྟེ། ཤེས་རབ་མཆོག་གི་བསྟན་པ་ལ། །ཁྱོད་ནི་རྫོགས་པར་བསྙེན་པར་འགྱུར། །དལ་དང་འབྱོར་པ་རྙེད་དཀའ་བས། །འདི་དག་ཇི་ལྟ་བཞིན་དུ་བསྒྲུབས། །མཛེས་པར་རབ་ཏུ་དབྱུང་བ་དང༌། །ཡོངས་སུ་དག་པ་རྫོགས་བསྙེན་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །ཞེས་བྱ་བའི་ཚིགས་སུ་བཅད་པ་གཉིས་ཀྱིས་སོ། །བསྒྲུབ་པར་བྱ་བ་ཐབས་བརྗོད་པ་དང་བཅས་པ་ལ་ཡང་ངོ་ཞེས་བྱ་བ་ཡང༌། ངེས་པར་སྦྱར་བར་བྱའོ་ཞེས་བྱ་བར་སྦྱར་རོ། །བསྒྲུབ་པར་བྱ་བ་ལ་ངེས་པར་སྦྱར་བར་བྱའོ། །ཇི་ལྟར་ན་ཐབས་བརྗོད་པ་དང་བཅས་པ་ལའོ། །དེ་ནི་བྱ་བའི་ཁྱད་པར་ཏེ། ངེས་པར་སྦྱར་བར་བྱ་བ་ལ་ཁྱད་པར་དུ་བྱ་བའོ། །དོན་གང་གི་ཕྱིར་རབ་ཏུ་བྱུང་བ་དང་རྫོགས་པར་བསྙེན་པའི་དོན་དགེ་སྦྱོང་གི་ཚུལ་ཞེས་བྱ་བ་ཐབས་བརྗོད་པ་དང་བཅས་པ་ལ་ངེས་པར་སྦྱར་བར་བྱའོ། །ཐབས་ཀྱི་བརྗོད་པ་ནི་ཐབས་བརྗོད་པ་སྟེ། ཐབས་བརྗོད་པ་དང་བཅས་པར་འཇུག་པ་ནི་ཐབས་བརྗོད་པ་དང་བཅས་པའོ། །དོན་དེ་བསྒྲུབ་པར་བྱ་བ་ལ་ཐབས་གང་ཞེ་ན། བག་ཡོད་པ་སྟེ། དེའི་ཕྱིར་འདུལ་བ་ལས་ཀྱང་ཚེ་དང་ལྡན་པ་ཁྱོད་རྫོགས་པར་བསྙེན་ཟིན་གྱི་བག་ཡོད་པར་སྒྲུབས་ཤིག་ཅེས་གསུངས་སོ། །དང་པོར་ཕྱག་ལན་གསུམ་བྱས་ནས་ཞེས་བྱ་བ་ལ་སོགས་པ་ནི་འདིར་མ་སྨོས་ཏེ། ལས་ཀྱི་གཞིར་འོག་ནས་འབྱུང་བའི་ཕྱིར་རོ། །རྫོགས་པར་བསྙེན་པའི་ཆོ་གའོ།། །། གནས་པས་གནས་ལམ་ཞུས་པར་བྱ་བ་མི་བྱའོ་ཞེས་བྱ་བ་ལ། གནས་པས་ཞེས་བྱ་བ་ནི། སློབ་མ་དང་ཉེ་གནས་ཀྱིས་སོ། །གནས་ལ་ཞེས་བྱ་བ་ནི། སློབ་དཔོན་དང་མཁན་པོ་ལའོ། །མ་ཞུས་པར་ཞེས་བྱ་བ་ནི། མ་དྲིས་པའོ། །བྱ་བ་ཞེས་བྱ་བ་ནི། ལྷུང་བཟེད་དང་ཆོས་གོས་ཁ་བསྒྱུར་བ་ལ་སོགས་པ་སྟེ། དེ་མི་བྱའོ། །འདི་སྐད་བསྟན་ཏེ། གནས་པ་དག་གིས་གནས་ལ་མ་ཞུས་པར་བྱ་བ་གང་ཡང་མི་བྱའོ། །དེ་ནི་ཉེ་བར་སྦྱར་བ་ཡིན་གྱི། དམིགས་ཀྱིས་བསལ་བ་བརྩམ་པར་བྱ་སྟེ། བཤང་བ་དང་གཅི་བ་དང་སོ་ཤིང་དོར་བ་དང་ཉེན་འཁོར་དང་བཅས་པའི་གཙུག་ལག་ཁང་དུ་མཆོད་རྟེན་ལ་ཕྱག་བྱ་བ་ནི་མ་
གཏོགས་སོ་ཞེས་བྱ་བ་ནི། བཅོམ་ལྡན་འདས་ཀྱིས་བྱ་བ་ཐམས་ཅད་སློབ་དཔོན་དང་མཁན་པོ་ལམ་ཞུས་པར་མི་བྱ་སྟེ། ཆུ་དང་སོ་ཤིང་དང་བཤང་བ་དང་གཅི་བ་དང༌། མཚམས་ཀྱི་ནང་དུ་མཆོད་རྟེན་ལ་ཕྱག་བྱ་བ་མ་གཏོགས་སོ་ཞེས་གསུངས་སོ། །ཉེན་འཁོར་དང་བཅས་པའི་གཙུག་ལག་ཁང་ཞེས་བྱ་བ་ནི། ཉེན་འཁོར་དང་བཅས་པར་གནས་པ་སྟེ། གཙུག་ལག་ཁང་དེ་ན་མཆོད་རྟེན་གང་ཡོད་པ་དེ་ལ་ཕྱག་བྱ་བ་ནི་མ་ཞུས་པར་ཡང་བྱའོ། །གཙུག་ལག་ཁང་ན་འདྲུ་བ་དང་འཚེད་པ་དང་ཟ་བ་ལ་སོགས་པའི་བྱ་བས་ཁྱབ་པའི་བགྲོད་ས་གང་ཡོད་པ་དེ་ནི་གཙུག་ལག་ཁང་དེའི་ཉེན་འཁོར་ཡིན་པར་རིག་བར་བྱ་སྟེ། དེ་ན་མཆོད་རྟེན་གང་ཡོད་པ་དེ་ལ་ཕྱག་བྱ་བ་ནི་མ་གཏོགས་སོ་ཞེས་བྱ་བའི་ཐ་ཚིག་གོ །གཙུག་ལག་ཁང་ནས་འདོམ་བཞི་བཅུ་རྩ་དགུའི་མཐའ་ཚུན་ཆད་དུ་འགོར་བ་ཡང་ངོ་ཞེས་བྱ་བ་ཡང་མ་གཏོགས་སོ་ཞེས་བྱ་བར་སྦྱར་ཏེ། གཙུག་ལག་ཁང་ནས་འགོར་བ་ཞེས་སྨྲས་པ་ལ། གཙུག་ལག་ཁང་ནི་རྣམ་པ་གཉིས་སུ་རིག་པར་བྱ་སྟེ། རབས་བསྐོར་བ་དང་ར་བས་མ་བསྐོར་བའོ། །དེ་ལ་གལ་ཏེ་གཙུག་ལག་ཁང་རབས་བསྐོར་བ་ནས་འགྲོ་ན་ནི་དེའི་ཚེ་ར་བའི་ཕྱི་རོལ་ནས་བརྩམས་ཏེ། འདོམ་བཞི་བཅུ་རྩ་དགུའི་མཐའ་ཚུན་ཆད་དུ་འགྲོ་བར་བྱའོ། །ར་བས་མ་བསྐོར་བ་ནས་འགྲོ་ན་ནི་གཙུག་ལག་ཁང་གི་རྩིག་དྲུང་ནས་བགྲང་བར་བྱའོ། །འདོམ་བཞི་བཅུ་རྩ་དགུ་ཞེས་བྱ་བ་ནི་ལྔ་བཅུར་འདོམ་གང་གིས་མཆོག་པ་སྟེ། གཙུག་ལག་ཁང་གི་མཐའ་ནས་འདོམ་བཞི་བཅུ་རྩ་དགུའི་མཐའ་ཚུན་ཆད་དུ་ཕྱི་རོལ་དུ་འགྲོ་བ་ནི་མ་ཞུས་པར་ཡང་རུང་ངོ༌། །ཚུན་ཆད་དུ་ཞེས་བྱ་བ་ནི་དེ་ཚུན་ཆད་ཅེས་བྱ་བར་སྦྱར་རོ། །དེ་ཡང་བཅག་བར་བྱ་བའི་ཕྱིར་བསྟན་པ་ཡིན་གྱི། མཆོད་རྟེན་ལ་ཕྱག་བྱ་བའི་ཕྱིར་ནི་མ་ཞུས་པར་འགྲོ་བར་མི་བྱའོ། །གལ་ཏེ་བཅག་པའི་བསམ་པ་ཁོ་ནས་འགོར་བ་ནི། ལམ་ཁར་མཆོད་རྟེན་ལ་ཕྱག་འཚལ་བར་བྱེད་ན་ནི་དེའི་ཚེ་ཉེས་པར་མི་འགྱུར་རོ་ཞེས་བྱ་བའི་ཐ་ཚིག་གོ །བྱ་བ་ཡང་རྣམ་པ་གཉིས་ཏེ། གང་སྦྱོར་བ་ཆེན་པོས་རྩོམ་པ་ནི་འདི་ལྟ་སྟེ། ཆོས་གོས་དང་ལྷུང་བཟེད་ཀྱི་ལས་ལ་སོགས་པ་སྟེ། དེ་ནིམ་ཞུས་པར་མི་བྱའོ། །གང་སྦྱོར་བ་ཆུང་དུས་དེའི་མོད་ཁོ་ན་ལ་བྱ་བ་ནི་འདི་ལྟ་སྟེ་གཏམ་འདྲེ་བ་དང༌། ཕེབས་པར་སྨྲ་བ་དང༌། ཕན་ཚུན་ཀུན་དགའ་བར་བྱ་བ་དང༌། ལན་གདབ་པ་དང་འོངས་པ་ལེགས་སོ་ཞེས་
བརྗོད་པ་ལ་སོགས་པ་དང༌། ལག་པ་ཆུར་སྨྱུགས་པས་རྐང་ལག་དག་ལ་བྱུག་པ་དང༌། གོས་ལ་རྡུལ་ཆགས་པ་སྤྲུགས་པ་དང༌། དེ་ལྟ་བུ་ལ་སོགས་པ་སྟེ། དེ་ནི་མ་ཞུས་པར་ཡང་བྱ་སྟེ། དེ་དག་ཞུས་ན་བཞད་གད་ཀྱི་གཞིར་འགྱུར་བའི་ཕྱིར་རོ། །དགེ་སློང་ཚུལ་ཁྲིམས་འཆལ་བའི་ཡུལ་ལ་ནི་དེ་དག་ཐམས་ཅད་ཀྱང་ཞུ་བར་བྱ་བ་ཡིན་ཏེ། སློབ་དཔོན་དང་མཁན་པོ་དང༌། དགེ་སློང་ནད་པ་ལ་ནི་མ་གཏོགས་སོ། །ད་ནི་གནས་པའི་ཚུལ་ཁྲིམས་བརྗོད་པར་བྱ་སྟེ། ལྷུང་བཟེད་དང་ཆོས་གོས་ཀྱི་ལས་དང་ནད་གཡོག་དང་འགྱོད་པ་བསལ་བ་དང༌། སྡིག་པ་ཅན་གྱི་ལྟ་བའི་རྣམ་པ་སྤངས་པ་ལ། ཨེ་མ་འོ་བདག་གིས་བྱའོ་ཞེ་འམ་བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ་ཞེས་བྱ་བ་ལ། ལྷུང་བཟེད་ཀྱི་ལས་ནི་བསྲེག་པ་དང༌། གླན་པ་ལ་སོགས་པའོ། །ཆོས་གོས་ཀྱི་ལས་ནི་དྲུབ་པ་དང༌། ཁ་བསྒྱུར་བ་ལ་སོགས་པའོ། །དེ་ལ་ཨེ་མའོ་བདག་གིས་ཞེས་བྱ་བས་ནི། འདོད་པའི་ཚུལ་གྱིས་སྒྲུབ་པར་བྱེད་པ་སྟོན་ཏོ། །བྱའོ་ཞེས་བྱ་བ་ནི་བདག་ཉིད་ཀྱིས་སོ། །བྱེད་དུ་གཞུག་གོ་ཞེས་བྱ་བ་ནི་གཞན་ནོ། །དེ་ལྟར་བརྩོན་པ་ཤས་ཆེན་པོ་བསྒྲུབ་པར་བྱ་བ་ནི། འབད་པ་ཆེན་པོ་རབ་ཏུ་བསྒྲུབ་པར་བྱ་བ་ནི། ནན་ཏན་བྱའོ་ཞེས་བྱ་བའི་ཐ་ཚིག་གོ །ནད་གཡོག་ལ་སོགས་པ་ཐམས་ཅད་ལ་ཡང་དེ་ཉིད་སྦྱར་བར་བྱའོ། །ནད་གཡོག་ཅེས་བྱ་བ་ནི། འཕྲོད་པ་དང་སྨན་སྦྱིན་པ་ལ་སོགས་པའོ། །འགྱོད་པ་བསལ་བ་ཞེས་བྱ་བ་ལ། འགྱོད་པ་ཞེས་བྱ་བ་ནི་ཡིད་ལ་གཅགས་པ་སྟེ། ཉེས་བྱས་ལ་སོགས་པའི་ལྟུང་བ་ལྷག་པར་སྤྱད་པའི་ཕྱིར་ཡིད་ལ་གཅགས་པ་སྐྱེས་པ་གང་ཡིན་པ་དེ་བསལ་བ་བཤགས་པ་ལ་སོགས་པའོ། །དེ་ལ་ཡང་ཨེ་མའོ་བདག་གིས་བྱའོ་ཞེ་འམ་བྱེད་དུ་གཞུག་གོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ་ཞེས་བྱ་བར་སྦྱར་རོ། །སྡིག་པ་ཅན་གྱི་ལྟ་བའི་རྣམ་པ་སྤང་བ་ལ་ཞེས་བྱ་བ་ནི། བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་ནི་བར་དུ་གཅོད་པར་མི་འགྱུར་རོ་ཞེས་བྱ་བ་དང༌། དེ་ལྟ་བུ་ལ་སོགས་པ་ལྟ་བའི་རྣམ་པ་ཡོངས་སུ་སྤང་བལ། ཨེ་མའོ་བདག་གིས་བྱའོ་ཞེ་འམ། བྱེད་དུ་གཞུག་གོ་ཞེས་བརྩོན་པ་ཤས་ཆེན་པོར་བསྒྲུབ་པར་བྱ་སྟེ། གནས་པས་གནས་པ་ལ་དེ་དག་ཐམས་ཅད་བྱའོ། །ཅི་དེ་འབའ་ཞིག་གམ་ཞེ་ན་མ་ཡིན་ཏེ།
དེའི་ཕྱིར་ནན་ཏུར་བྱེད་པར་འདོད་པའི་དགེ་འདུན་ལ་ཨེ་མའོ་དགེ་འདུན་གྱིས་འདི་ལ་ནན་ཏུར་གྱི་ལས་འདི་ལྟ་བུ་མི་བྱའོ་ཞེས་ཀྱང་ངོ་ཞེས་བྱ་བ་སྨྲས་ཏེ། མདོ་སྔ་མ་ལས་བརྩོན་པ་ཤས་ཆེན་པོ་བསྒྲུབ་པར་བྱའོ་ཞེས་སྨོས་པ་དང༌། འོག་ནས་དབྱུང་བར་བྱའོ་ཞེས་བྱ་བའི་བར་དེ་དག་འདིར་ཐམས་ཅད་དུ་སྦྱར་བར་རིག་པར་བྱའོ། །ནན་ཏུར་བྱེད་པར་འདོད་པའི་དགེ་འདུན་ལ་ཞེས་བྱ་བ་ནི། གང་གི་ཚེ་དགེ་འདུན་གནས་ལ་ནན་ཏུར་གྱི་ལས་གནས་ནས་དབྱུང་བ་ལ་སོགས་པའི་ལས་བྱེད་པར་འདོད་པ་དེའི་ཚེ་གནས་པས། ཨེ་མའོ་དགེ་འདུན་གྱིས་གནས་འདི་ལ་ནན་ཏུར་གྱི་ལས་འདི་ལྟ་བུ་མི་བྱའོ་ཞེས་བརྩོན་པ་ཤས་ཆེན་པོར་བསྒྲུབ་པར་བྱའོ། །དང་པོར་རེ་ཞིག་མི་བྱ་བའི་ཕྱིར་གནས་པས་འབད་པར་བྱ་ན། གལ་ཏེ་བྱས་པར་གྱུར་ན་དེའི་ཚེ་ཇི་ལྟ་བྱ་ཞེ་ན་དེའི་ཕྱིར་བྱས་ན་བཟོད་པར་བྱའོ་ཞེས་བྱ་བ་སྨྲས་ཏེ། ནན་ཏུར་གྱི་ལས་བྱས་པར་གྱུར་ན། དེའི་ཚེ་གནས་པས་ཨེ་མའོ་གནས་འདི་ལ་དགེ་འདུན་གྱིས་གང་བྱས་པ་དེ་བཟོད་པར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱས་ཏེ། གཏང་བར་བྱའོ་ཞེས་བྱ་བའི་ཐ་ཚིག་གོ །སྤོ་བ་དང་གཞི་ནས་སྤོ་བ་དང་མགུ་བར་བྱ་བ་དང་གཞི་ནས་མགུ་བར་བྱ་བ་དང་དབྱུང་བར་འདོད་པ་གནས་ལ་ཨེ་མའི་དགེ་འདུན་གྱིས་སྤོ་བ་ལ་སོགས་པ་གཞི་སྦྱིན་པར་བྱ་ཞིང་དབྱུང་བར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་ཡང་བྱའོ། །དེ་ལ་སྤོ་བ་ཞེས་བྱ་བ་ནི། དགེ་འདུན་ལྷག་མའི་ལྟུང་བ་བྱུང་བ་ལ་བཅགས་པའི་རྒྱུས་ཆད་པའི་ལས་ཀྱི་བྱེ་བྲག་ཏུ་གཞུག་པའོ། །གཞི་ནས་སྤོ་བ་ཞེས་བྱ་བ་ནི། སྤོ་བ་བྱེད་བཞིན་པ་ལས་ཡང་བར་དུ་དགེ་འདུན་ལྷག་མ་བྱེད་པ་ལ་སྤོ་བ་ཡང་གཞི་ནས་བྱེད་དུ་གཞུག་པའོ། །མགུ་བར་བྱ་བ་ཞེས་བྱ་བ་ནི། སྤོ་བ་སྤྱད་ཟིན་པ་ལས་དབྱུང་བའི་རྒྱུར་ཞག་དྲུག་ཆད་པའི་ལས་ཀྱི་བྱེ་བྲག་བྱེད་དུ་གཞུག་པའོ། །གཞི་ནས་མགུ་བར་བྱ་བ་ཞེས་བྱ་བ་ནི། མགུ་བ་སྤྱོད་པའི་བར་སྐབས་སུ་ཡང་དགེ་འདུན་ལྷག་མ་བྱེད་པ་ལ། དེའི་གཞི་ནས་ཡང་མགུ་བ་བྱེད་དུ་གཞུག་པའོ། །གནས་གང་ལ་སྤོ་བ་ལ་སོགས་པའི་དོན་དགོས་པ་ཡོད་པ་དེ་ནི། སྤོ་བ་ལ་སོགས་པ་འདོད་པའི་གནས་ཡིན་པས་གནས་དེ་སྤོ་བ་ལ་སོགས་པ་འདོད་ན་གནས་པས་ཨེ་མའོ་དགེ་འདུན་གྱིས་གནས་འདི་ལ་སྤོ་བ་ལ་སོགས་པ་བཞི་སྦྱིན་པར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་
བྱའོ། །དབྱུང་བར་འདོད་པ་ལ་ཡང་དེ་བཞིན་དུ་སྦྱར་ཏེ། དབྱུང་བ་ཞེས་བྱ་བ་ནི་ལྟུང་བ་ལས་བསླང་བའོ། །གནས་གང་ལ་དོན་དགོས་པ་དེ་ཉིད་ཡོད་པ་དེ་ནི་དབྱུང་བར་འདོད་པ་ཡིན་པས་གནས་དེ་དབྱུང་བར་འདོད་ན་གནས་པས་ཨེ་མའོ་དགེ་འདུན་གྱིས་གནས་འདི་འབྱུང་བར་བྱའོ་ཞེས་བརྩོན་པ་ཤས་ཆེན་པོ་བསྒྲུབ་པར་བྱའོ། །གནས་པའི་ཚུལ་ཁྲིམས་བསྟན་ནས། ད་ནི་གནས་ཀྱི་ཚུལ་ཁྲིམས་བརྗོད་པར་བྱ་སྟེ། དེས་ཀྱང་དེ་ལ་དེ་བྱས་ཏེ་ཞུ་བ་ནི་མ་གཏོགས་སོ་ཞེས་བྱ་བ་ནི། དེས་ཀྱང་ཞེས་བྱ་བ་ནི། གནས་དེ་མཁན་པོ་ལ་སོགས་པས་ཀྱང་ངོ༌། །དེ་ལ་ཞེས་བྱ་བ་ནི། གནས་པ་ལ་སྟེ་སློབ་མ་དང་ཉེ་གནས་དག་ལའོ། །དེ་ཞེས་བྱ་བ་ནི། ལྷུང་བཟེད་དང་ཆོས་གོས་ལ་སོགས་པའི་ལས་དེ་སྟེ། མཁན་པོ་ལ་སོགས་པས་ཀྱང་གོང་དུ་བསྟན་མ་ཐག་པ་དེ་སློབ་མ་ལ་སོགས་པའི་དོན་དུ་བསྒྲུབ་པར་བྱའོ། །ཅི་ཐམས་ཅད་དམ་ཞེ་ན། ཞུ་བ་ནི་མ་གཏོགས་སོ་ཞེས་བྱ་བ་སྨྲས་ཏེ། ཞུ་བ་ནི་དྲི་བའོ། །གནས་ཀྱིས་བྱ་བའི་ཕྱིར་ཞུ་བ་ནི་མི་དགོས་སོ་ཞེས་བྱ་བའི་ཐ་ཚིག་གོ །གནས་པས་གནས་ལ་མ་ཞུས་པར་བྱ་བ་མི་བྱའོ་ཞེས་བྱ་བ་བསྟན་པ་དེའི་ཞར་ལ་འདི་ཡང་བརྗོད་པར་བྱ་སྟེ། བསྙེན་པར་རྫོགས་ནས་ཇི་སྲིད་ལོན་པས་མཁན་པོ་ཉིད་ལ་སོགས་པ་བྱ་ཞེ་ན། དེའི་ཕྱིར་རྫོགས་པར་བསྙེན་ནས་ལོ་བཅུ་མ་ལོན་པར་མཁན་པོ་ཉིད་དང་གནས་ཉིད་དང་མི་གནས་པར་འདུག་པར་མི་བྱའོ་ཞེས་བྱ་བ་སྨྲས་ཏེ། གང་ལོ་བཅུ་མ་ལོན་པ་དེ་ནི་ལོ་བཅུ་མ་ལོན་པའོ། །གང་གིས་ཤེ་ན། རྫོགས་པར་བསྙེན་པས་ཞེས་བྱ་བ་སྨྲས་ཏེ། དགེ་སློང་གི་དངོས་པོས་སོ། །དེས་འདི་གསུམ་མི་བྱ་སྟེ། མཁན་པོ་ཉིད་དང་གནས་ཉིད་དང་མི་གནས་པར་འདུག་པ་ཉིད་མི་བྱའོ། །འདི་སྐད་བསྟན་ཏེ། དགེ་སློང་གིས་ཇི་སྲིད་དུ་ལོ་བཅུ་མ་ལོན་པ་དེ་སྲིད་དུ་དགེ་སློང་དེས་སློབ་མ་གཟུང་བར་མི་བྱ། གནས་སྤྱིན་པར་མི་བྱ་རང་ཡང་མི་གནས་པར་འདུག་པར་མི་བྱའོ་ཞེས་བྱ་བའི་ཐ་ཚིག་གོ །ཅི་ལོ་བཅུ་ལོན་པ་ཐམས་ཅད་ཀྱིས་དེ་གསུམ་བྱ་བ་ཡིན་ནམ་ཞེ་ན། དེའི་ཕྱིར། འོག་ནས་འབྱུང་བ་དག་ལས་ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ་ཞེས་བྱ་བ་སྨྲས་ཏེ། རྫོགས་པར་བསྙེན་ནས་ལོ་བཅུ་ལོན་དུ་ཟིན་ཀྱང་གལ་ཏེ་འོག་ནས་འབྱུང་བ་ཡན་ལག་ལྔ་དང་ལྡན་པའི་ལྷན་ཅིག་སྦྱར་བ་གང་དག་ཡིན་པའི་ལྷན་ཅིག་སྦྱར་བ་དེ་དག་
ལས་ལྷན་ཅིག་སྦྱར་བ་གང་ཡང་རུང་བའི་ལྷན་ཅིག་སྦྱར་བ་གཅིག་དང་ཡང་ལྡན་པ་དང་འབྱོར་པ་དང་མཐུན་པ་མ་ཡིན་ན། ལོ་བཅུ་ལོན་པ་དེས་ཀྱང་རབ་ཏུ་འབྱུང་བར་མི་བྱ་རྫོགས་པར་བསྙེན་པར་མི་བྱ་གནས་སྦྱིན་པར་མི་བྱ་ཞིང༌། དེ་རང་ཡང་མི་གནས་པར་འདུག་པར་མི་བྱའོ། །གང་ལྷན་ཅིག་སྦྱར་བ་གཅིག་དང་ལྡན་ཞིང་ལོ་བཅུ་ལོན་པ་ཡང་ཡིན་ན། དེས་ནི་མཁན་པོ་ཉིད་གནས་ཉིད་དང༌། མི་གནས་པར་འདུག་པར་ཡང་བྱའོ་ཞེས་བྱ་བའི་ཐ་ཚིག་གོ །དེ་ལ་ལོ་བཅུ་ལོན་པ་ཉིད་འདི་ནི་ལྔ་པ་དང་པོའི་ཡན་ལག་ལྔ་པ་ཡིན་པར་རིག་པར་བྱ་སྟེ། འདུལ་བ་ལ་གནས་པའི་དོན་ཉིད་ཀྱང་བསྟན་པ་ཡིན་ནོ། །དེ་ལྔ་པ་ལྷག་མ་རྣམས་ཀྱི་ནི་ཡུལ་ཡིན་པར་སྟོན་ཏེ། གང་ལ་ལོ་བཅུ་ལོན་པ་ཉིད་དང་འདུལ་བ་ལ་གནས་པའི་དོན་ཉིད་གཉིས་པོ་དེ་དག་ཡོད་པ་དེ་ས་ནི་མཁན་པོ་ཉིད་ལ་སོགས་པ་གསུམ་པོ་དག་བྱ་སྟེ། འདི་ལྟར་དེ་ནི་མཁན་པོ་ཉིད་ལ་སོགས་པ་དག་གི་གཙོ་བོའི་རྒྱུ་ཡིན་པའི་ཕྱིར་རོ། །སློབ་པ་ཉིད་ལ་སོགས་པའི་ཡན་ལག་ལྷག་མ་ནི་བྱེ་བྲག་ཏུ་གྱུར་པ་ཉིད་ཡིན་ཏེ། དེ་མེད་ཀྱང་མཁན་པོ་ཉིད་ལ་སོགས་པའི་རྒྱུར་རུང་བས། དེའི་ཕྱིར་ལོ་བཅུ་ལོན་པ་ཉིད་དང༌། འདུལ་བལ་གནས་པའི་དོན་ཉིད་ནི་བཟླ་བར་བྱ་བ་མ་ཡིན་པའི་ཡན་ལག་ཡིན་ནོ། །དོན་འདི་བསྟན་པའི་ཕྱིར་དང་པོ་ལོ་བཅུ་ལོན་པ་ཉིད་སྨོས་སོ། །ལྷན་ཅིག་སྦྱར་བ་གང་དང་ཡང་མི་ལྡན་པས་ནི་མ་ཡིན་ནོ་ཞེས་སྨྲས་པས། དེའི་ཕྱིར་ལྷན་ཅིག་སྦྱར་བ་དེ་དག་བརྗོད་པར་བྱ་དགོས་པས། དེའི་ཕྱིར་ནད་གཡོག་དང༌། འགྱོད་པ་བསལ་བ་དང༌། སྡིག་པ་ཅན་གྱི་ལྟ་བའི་རྣམ་པ་སྤོང་བ་དང༌། གནས་མངོན་པར་མི་དགའ་བ་དོར་བ་དག་ལ་བྱེད་དམ་བྱེད་དུ་འཇུག་ནུས་པའོ་ཞེས་བྱ་བ་སྨྲས་ཏེ། སློབ་མ་དང་ཉེ་གནས་ན་བ་ལ་ནད་གཡོག་བྱེད་དམ་ནད་གཡོག་བྱེད་དུ་གཞུག་པ་དེ་ལ་མཐུ་ཡོད་པ་དང༌། དེ་བཞིན་དུ་དེ་དག་ལ་འགྱོད་པ་སྐྱེས་པ་སེལ་ཏམ་སེལ་དུ་འཇུག་ནུས་པ་དང༌། དེ་བཞིན་དུ་སྡིག་པ་ཅན་གྱི་ལྟ་བའི་རྣམ་པ་སྐྱེས་པ་སྤང་བ་ལ། རང་གིས་བྱེད་ནུས་སམ་གཞན་བྱེད་དུ་འཇུག་པར་ནུས་པ་དང༌། དེ་བཞིན་དུ་སློབ་མ་དང་ཉེ་གནས། གནས་གང་ལ་མངོན་པར་མི་དགའ་བའི་གནས་མངོན་པར་མི་དགའ་བ་དེ་དོར་ཞིང་མངོན་པར་དགའ་བའི་གནས་སུ་རྣམ་པར་གཞག་པ་བདག་ཉིད་ཀྱིས་བྱེད་ནུས་སམ། གཞན་བྱེད་དུ་
འཇུག་པ་དང་ལོ་བཅུ་ལོན་པའོ། །ནད་གཡོག་ཅེས་བྱ་བ་འདིས་ནི་སྙིང་རྗེ་དང་ལྡན་པ་ཉིད་དང༌། སྡུག་བསྔལ་ལ་ཇི་མི་སྙམ་པ་ཉིད་བསྟན་ཏེ། གང་ལ་དེ་གཉིས་ཡོད་པ་དེས་ནི་ནད་གཡོག་བྱེད་ནུས་སོ། །འགྱོད་པ་བསལ་བ་ཞེས་བྱ་བ་ནི། བྱ་བ་འདིས་ཇི་བདག་ལྷུང་བ་དང་བཅས་པར་གྱུར་ཏམ། འོན་ཏེ་མ་ཡིན་ཞེས་འགྱོད་པར་གྱུར་པ་དེ་བསལ་བ་སྟེ། དེ་བྱེད་དམ་བྱེད་དུ་འཇུག་ནུས་པ་ཡིན་ནོ། །ཡན་ལག་འདིས་ནི་འདུལ་བ་ལ་གནས་པའི་དོན་ཉིད་བསྟན་ཏེ། འདི་ལྟར་གང་ལ་ལ་ཞིག་གིས་ལྟུང་བ་དང་ལྟུང་བ་མ་ཡིན་པ་མངོན་པར་ཤེས་ཤིང༌། དེ་ལ་བསླང་བ་ཡང་མངོན་བར་ཤེས་པ་དེས་ནི་དེ་དག་གི་འགྱོད་པ་སེལ་བར་ནུས་པ་ཁོ་ན་ཡིན་པའི་ཕྱིར་རོ། །སྡིག་པ་ཅན་གྱི་ལྟ་བའི་རྣམ་པ་ཞེས་བྱ་བ་ལ་སོགས་པས་ནི། ཆོས་མངོན་པ་ལ་མཁས་པ་ཉིད་བསྟན་ཏོ། །གནས་མངོན་པར་མི་དགའ་བ་ཞེས་བྱ་བ་ལ་སོགས་པས་ནི་བསམ་པ་ཤེས་པ་ཉིད་བསྟན་ཏོ། །འདི་ལྟར་འདིར་བྱེད་དུ་གཞུག་པ་ཞེས་བྱ་བ་སྨོས་མོད་ཀྱི། འོན་ཀྱང་གང་ལ་ཡན་ལག་བཞི་པོ་དག་རང་གིས་བྱེད་པའི་མཐུ་མེད་ན་གཞན་བྱེད་དུ་གཞུག་པའི་མཐུ་ཡོད་དུ་ཟིན་ཀྱང༌། དེས་གསུམ་པོ་དེ་དག་མི་བྱ་སྟེ། དེ་ལྟ་མ་ཡིན་དུ་ཟིན་ན་འདུལ་བ་ལ་གནས་པའི་དོན་ཉིད་ཅེས་བྱ་བའི་ཡན་ལག་བཟླ་བར་བྱ་བ་མ་ཡིན་པ་དེ་ཡང་བཟླས་པར་འགྱུར་རོ། །གལ་ཏེ་དེ་ལྟ་ན་བྱེད་དུ་གཞུག་པ་ཞེས་བྱ་བ་སྨོས་པ་ཅིའི་ཕྱིར་ཞེ་ན། འདུལ་བ་ལ་ལྟོས་པའི་ཕྱིར་ཏེ། ལ་ལ་གདུལ་བ་ནི་ལ་ལས་ནུས་ཀྱི་ཐམས་ཅད་ཀྱིས་ཐམས་ཅད་ནུས་པ་ནི་མ་ཡིན་པས། དེའི་ཕྱིར་འདིས་ནི་ལྔ་པ་གཅིག་བསྟན་པ་ཡིན་ནོ། །འདི་མན་ཆད་ནི་འོག་ནས་འབྱུང་བའི་ལྷན་ཅིག་སྦྱར་བ་མཚང་བ་རྣམས་ཚང་བར་བྱ་བའི་ཕྱིར། མདོ་བསྟན་བའི་དབང་དུ་བྱས་ཏེ། སློབ་པ་ཉིད་ཡན་ཆད་ལྔ་པ་མ་ཡིན་པ་ལ་ཚུལ་ཁྲིམས་དང་ལྡན་པ་ཉིད་དང་མང་དུ་ཐོས་པ་ཉིད་སྦྱར་རོ་ཞེས་སྨྲས་ཏེ། འོག་ནས་སློབ་པ་ཉིད་ཅེས་འབྱུང་བ་ཡན་ཆད་ལྔ་པ་ཚང་བར་མ་བསྟན་པ་གང་ཡིན་པ་དེ་ནི་ཚུལ་ཁྲིམས་དང་ལྡན་པ་ཉིད་དང་མང་དུ་ཐོས་པ་ཉིད་ཅེས་བྱ་བ་གཉིས་ཀྱིས་བསྣན་ཏེ། ལྔ་པ་ཚང་བར་རིག་པར་བྱའོ། །འདིར་དད་པ་དང་ཚུལ་ཁྲིམས་ལ་སོགས་པ་ལྔ་པ་གཉིས་ནི་ཚང་བ་ཡིན་གྱི། ལྷག་མ་ནི་མ་ཚང་བ་ཡིན་ནོ། །ལྔ་པ་མ་ཡིན་པ་ལ་ཞེས་བྱ་བ་ནི། ལྔ་རྣམས་
ཀྱི་ཚོགས་ནི་ལྔ་པའོ། །ལྔ་པ་མེད་པ་ནི་ལྔ་པ་མ་ཡིན་པ་སྟེ། ལྔ་པ་མ་ཡིན་པ་དེ་ལའོ། །འདི་སྐད་བསྟན་ཏེ། ལྷན་ཅིག་སྦྱར་བ་གང་ལ་ཡན་ལག་ལྔ་པོ་དག་ཚང་བར་མེད་པ་དེ་ནི་ལྔ་པ་མ་ཡིན་པའོ། །ཚུལ་ཁྲིམས་དང་ལྡན་པ་ཉིད་དང་མང་དུ་ཐོས་པ་ཉིད་སྦྱར་རོ་ཞེས་བྱ་བ་ལ། གང་ལ་ཚུལ་ཁྲིམས་ཡོད་བ་དེ་ནི་ཚུལ་ཁྲིམས་དང་ལྡན་པའོ། །དེའི་དངོས་པོ་ནི་ཚུལ་ཁྲིམས་དང་ལྡན་པ་ཉིད་དེ། འདི་ལ་ཚུལ་ཁྲིམས་འཆལ་བའི་སྐབས་མེད་པའི་ཕྱིར་དེས་ན་འདི་ནི་དགེ་བའོ་ཞེས་བྱ་བར་ཤེས་པ་དེ་ནི་ཚུལ་ཁྲིམས་དང་ལྡན་པ་ཉིད་ཡིན་པར་རིག་པར་བྱའོ། །དེ་བཞིན་དུ་མང་དུ་ཐོས་པའི་དངོས་པོ་ནི་མང་དུ་ཐོས་པ་ཉིད་དེ། བསྟན་བཅོས་མང་པོ་ཤེས་པ་ཉིད་དོ། །ཚུལ་ཁྲིམས་དང་ལྡན་པ་ཉིད་དང་མང་དུ་ཐོས་པ་ཉིད་དེ་གཉིས་དང༌། ལྷན་ཅིག་འཇུག་པ་ནི་ཚུལ་ཁྲིམས་དང་ལྡན་པ་ཉིད་དང་མང་དུ་ཐོས་པ་ཉིད་དང་སྦྱར་བའི་ལྔ་པ་ཡིན་ནོ། །ལྔ་པ་གང་ལ་སྡེ་སྣོད་མངོན་པར་ཤེས་པ་ཉིད་ཡོད་པ་དེར་ནི་མང་དུ་ཐོས་པ་ཉིད་གཞན་གྱི་བསྟན་བཅོས་ཀྱི་ཡུལ་ཅན་ཡིན་ནོ། །གང་དུ་སྡེ་སྣོད་མངོན་པར་ཤེས་པ་མ་བསྡུས་བ་དེར་ནི་མང་དུ་ཐོས་པ་ཉིད་རང་གི་གྲུབ་པའི་མཐའི་ཡུལ་ཅན་ཡིན་པར་རིག་པར་བྱའོ། །སྡེ་སྣོད་མངོན་པར་ཤེས་པ་ཉིད་དོ་ཞེས་བྱ་བ་ནི་མདོ་སྡེ་དང་འདུལ་བ་དང་ཆོས་མངོན་པ་མངོན་པར་ཤེས་པ་ཉིད་དེ། འདི་གསུམ་ལ་ཚུལ་ཁྲིམས་དང་ལྡན་པ་ཉིད་དང༌། མང་དུ་ཐོས་པ་ཉིད་ཀྱིས་བསྣན་ན་ལྔ་པ་ཡིན་ནོ། །འདུལ་བ་ལས་མདོ་སྡེ་ལ་སོགས་པ་འཛིན་པ་དང༌། མཁས་པ་དང༌། རིག་པ་དང༌། གསལ་བ་ཞེས་བྱ་བ་བཞི་པོ་འདི་དག་སྨོས་པ་གང་ཡིན་པ་དེ་ནི་སྡེ་སྣོད་མངོན་པར་ཤེས་བ་ཉིད་ཅེས་སྨོས་པ་འདི་ཉིད་ཀྱིས་བསྡུས་པར་རིག་པར་བྱའོ། །ཚིག་དེ་དག་གི་རྣམ་པར་དབྱེ་བ་ནི་འདི་ཡིན་ཏེ། མདོ་སྡེ་ལ་སོགས་པ་བཟུང་བ་མི་བརྗེད་པ་ནི་འཛིན་པའོ། །སྡེ་སྣོད་གསུམ་ཕན་ཚུན་འབྲེལ་པས་འདྲེས་པར་གནས་པ་ལ་སོ་སོར་གནས་པར་ནུས་པ་ནི་མཁས་པའོ། །མངོན་སུམ་དང་རྗེས་སུ་དཔག་པའི་ཚད་མ་གཉིས་དང་ལུང་གིས་མདོ་སྡེ་ལ་སོགས་པ་སྦྱོར་བ་ནི་རིགས་པའོ། །ལུང་དང་རིགས་པ་གཉིས་ཀྱིས་མདོ་སྡེ་ལ་སོགས་པ་སྦྱར་ཏེ། གཞན་ལ་གོ་བར་བྱེད་ནུས་པ་གང་ཡིན་པ་དེ་ནི་གསལ་བའོ། །དེ་ལྟ་བས་ན་སྡེ་སྣོད་མངོན་པར་ཤེས་པ་ཉིད་ཅེས་བྱ་བའི་མདོ་འདིས་ནི་ལྔ་པ་བཞི་བསྟན་
ལ། སྔ་མས་ནི་ལྔ་པ་གཅིག་སྟེ། ལྔ་པ་ལྔའོ། །དེ་དག་འཛིན་དུ་འཇུག་ནུས་པ་ཉིད་དོ་ཞེས་བྱ་བ་ནི། སྡེ་སྣོད་དེ་དག་དོན་གྱི་བདག་ཉིད་ཀྱིས་གཞན་འཛིན་དུ་གཞུག་ཅིང་གོ་བར་བྱེད་ནུས་པ་ཉིད་ནི་ལྔ་པ་དྲུག་པ་ཡིན་ནོ། །དེ་ནི་སྡེ་སྣོད་མངོན་པར་ཤེས་པ་ཉིད་དེ་ཁོ་ནའི་བྱེ་བྲག་གཞན་ཡིན་ཏེ། དེ་ལྟ་མ་ཡིན་དུ་ཟིན་ན་གལ་ཏེ་དེ་རང་གིས་མངོན་པར་མི་ཤེས་པར་ཇི་ལྟར་དོན་གྱི་བདག་ཉིད་ཀྱིས་གཞན་འཛིན་དུ་འཇུག་པར་ནུས་པ་དང༌། འདུལ་བ་ལ་གནས་པའི་དོན་ཉིད་ཀྱང་ཤིན་ཏུ་བཟླས་པར་འགྱུར་རོ། །དེ་ལྟ་བས་ན་སྡེ་སྣོད་མངོན་པར་ཤེས་པའི་གང་ཟག་ཉིད་ཀྱི་གཞན་ལ་གོ་བར་བྱེད་ནུས་པ་གང་ཡིན་པ་དེ་ནི་དེའི་བརྗོད་པ་ཡིན་པར་རིག་པར་བྱའོ། །ལྔ་པ་དྲུག་པའོ། །ལྷག་པའི་ཚུལ་ཁྲིམས་དང་སེམས་དང་ཤེས་རབ་ལ་སློབ་པ་ཉིད་དོ་ཞེས་བྱ་བ་ལ། ཚུལ་ཁྲིམས་དང་སེམས་དང་ཤེས་རབ་ནི་ཚུལ་ཁྲིམས་དང་སེམས་དང་ཤེས་རབ་པོ། །ལྷག་བ་ཞེས་བྱ་བའི་སྒྲ་ནི། ཚུལ་ཁྲིམས་དང་སེམས་དང་ཤེས་རབ་ཀྱི་ཕྱིར་རོ། །སློབ་པ་ཞེས་བྱ་བ་ནི། སློབ་པར་བྱེད་པའོ། །སློབ་པར་བྱེད་བའི་དངོས་པོ་ནི་སློབ་པ་ཉིད་དེ་ལ་སློབ་པ་ཉིད་དོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལྷག་པའི་ཚུལ་ཁྲིམས་ཀྱི་བསླབ་པ་དང༌། ལྷག་པའི་སེམས་དང༌། ལྷག་པའི་ཤེས་རབ་ཀྱི་བསླབ་པ་ལ་སློབ་པ་ཉིད་ཅེས་བྱ་བའི་ཐ་ཚིག་གོ །ལྷག་པའི་ཚུལ་ཁྲིམས་ཞེས་སྨོས་པས་ནི། འདུལ་བར་མ་གཏོགས་པའི་བསླབ་པའི་གཞི་ཐམས་ཅད་བཟུང་བ་ཡིན་ནོ། །ལྷག་པའི་སེམས་ཞེས་སྨོས་པས་ནི། བསམ་གཏན་བཞི་པོ་དག་བཟུང་སྟེ། དེ་དག་ནི་སེམས་འདུལ་བར་བྱེད་པ་ཡིན་པའི་ཕྱིར་རོ། །ལྷག་པའི་ཤེས་རབ་སྨོས་པས་ནི་ཟག་པ་མེད་པའི་ལམ་བཟུང་ངོ༌། །ལྔ་པ་བདུན་པའོ། །སློབ་ཏུ་འཇུག་ཀྱང་ནུས་པ་ཉིད་དོ་ཞེས་བྱ་བ་ལ། ཀྱང་ཞེས་བྱ་བའི་སྒྲ་ནི། ལྷག་པའི་ཚུལ་ཁྲིམས་ལ་སོགས་པ་ཉེ་བར་བསྡུ་བའི་དོན་ཡིན་གྱི། ཐ་དད་པར་རྟོགས་པའི་དོན་ནི་མ་ཡིན་ཏེ། དེ་ལྟར་མ་ཡིན་དུ་ཟིན་ན་ལྔ་པ་རང་དབང་ཅན་ཁོ་ནར་འགྱུར་རོ། །དེ་ལྟར་ཡང་མི་འགྱུར་ཏེ་མི་སྲིད་པའི་ཕྱིར་རོ། །དེ་ལྟ་བས་ན་འདི་ནི་སྔ་མ་དེ་ཉིད་ཀྱི་བྱེ་བྲག་ཡིན་པར་རིག་པར་བྱ་སྟེ། འདི་ལྟར་རང་ཉིད་ལྷག་པའི་ཚུལ་ཁྲིམས་ལ་སོགས་པ་ལ་མ་བསླབས་པར་གཞན་སློབ་དུ་འཛུད་ནུས་པ་ནི་འགའ་ཡང་མེད་པའི་ཕྱིར་ཏེ། བདག་ཉིད་མ་དུལ་
བར་གཞན་དུལ་བར་བྱེད་པ་ནི། གནས་མེད་སྐབས་མེད་དོ་ཞེས་གསུངས་པའི་ཕྱིར་རོ། །ནུས་པའི་དངོས་པོ་ནི་ནུས་པ་ཉིད་དེ་གཞན་ལྷག་པའི་ཚུལ་ཁྲིམས་ལ་སོགས་པ་ལ་སློབ་ཏུ་འཇུག་ནུས་པ་ཉིད་དོ། །ལྔ་པ་བརྒྱད་པའོ། །ལྷག་པའི་སྤྱོད་པ་དང་འདུལ་བ་དང་སོ་སོར་ཐར་པ་ལ་ཡང་དེ་བཞིན་ནོ་ཞེས་བྱ་བ་ལ། ལྷག་པའི་སྤྱོད་པ་ཞེས་བྱ་བ་ནི། འདུལ་བ་ལས་འགྲོ་བ་དང་འོང་བ་ལ་སོགས་པ་ཡིན་པར་གསུངས་ཏེ། རྟག་ཏུ་ལྷག་པར་སྤྱད་པ་ཡིན་པའི་ཕྱིར་རོ། །འདུལ་བ་ཞེས་བྱ་བ་ནི། སོ་སོར་ཐར་པའི་བསླབ་པ་རྣམ་པར་བཤད་པར་གྱུར་པ། རྣམ་པར་འབྱེད་པ་དང་ཕྲན་ཚེགས་དང་གཞི་ལ་སོགས་པའོ། །སོ་སོར་ཐར་པའི་ཞེས་བྱ་བ་ནི། སོ་སོར་ཐར་པར་གཏོགས་པའི་བསླབ་པའི་གཞི་རྣམས་སོ། །དེ་བཞིན་ནོ་ཞེས་བྱ་བ་འདིས་ནི། སྔར་བསྟན་པའི་ལུགས་སྟོན་ཏེ། ཇི་ལྟར་ལྷག་པའི་ཚུལ་ཁྲིམས་དང༌། སེམས་དང་ཤེས་རབ་ལ་སློབ་པ་ཉིད་དང༌། སློབ་ཏུ་འཇུག་ཀྱང་ནུས་པ་ཉིད་ལ་ལྔ་པ་གཉིས་ཡོད་པ་དེ་བཞིན་དུ། འདིར་ཡང་ལྷག་པའི་སྤྱོད་པ་དང༌། འདུལ་བ་དང་སོ་སོར་ཐར་པ་ལ་སློབ་པ་ཉིད་དང༌། སློབ་ཏུ་འཇུག་ཀྱང་ནུས་པ་ཉིད་ལ་ལྔ་པ་གཉིས་ཡོད་པར་རིག་པར་བྱའོ། །དེའི་ཕྱིར་སྡར་བསྟན་པ་དང་བཅས་པ་ལ་ལྔ་པ་བཅུར་རིག་པར་བྱའོ། །ལྔ་པ་བཅུ་པའོ། །དད་པ་དང་ཚུལ་ཁྲིམས་དང་ཐོས་པ་དང་གཏོང་བ་དང༌། ཤེས་རབ་ཕུན་སུམ་ཚོགས་པ་ཉིད་དོ་ཞེས་བྱ་བ་ལ། དད་པ་ཞེས་བྱ་བ་ནི། དཀོན་མཆོག་གསུམ་ལ་སོགས་པ་དག་ལ་སེམས་དང་བའི་མཚན་ཉིད་དོ། །ཚུལ་ཁྲིམས་ཞེས་བྱ་བ་འདི། རང་བཞིན་དང་བཅས་པའི་ཁ་ན་མ་ཐོ་བ་དང་བཅས་པ་སྤོང་བའི་མཚན་ཉིད་དོ། །ཐོས་པ་ཞེས་བྱ་བ་སྨོས་པས་ནི། འདིར་འདུལ་བ་བཟུང་བ་ཡིན་ཏེ། འདུལ་བ་ལ་གནས་པའི་དོན་ཉིད་ཤིན་ཏུ་བཟླ་བར་བྱ་བ་མ་ཡིན་པའི་ཕྱིར་རོ། །གཏོང་བ་ཞེས་བྱ་བ་ནི། མ་ཆགས་པའི་ངོ་བོ་ཉིད་དོ། །ཤེས་རབ་ཅེས་བྱ་བ་ནི། ཆོས་རབ་ཏུ་རྣམ་པར་འབྱེད་པའོ། །ཕུན་སུམ་ཚོགས་པ་ཞེས་བྱ་བ་ནི། དད་པ་ལ་སོགས་པ་ཕུན་ཚོགས་པའོ། །ཉིད་ཅེས་བྱ་བ་ནི། ཕུན་སུམ་ཚོགས་པ་དེའི་དངོས་པོ་ནི། ཕུན་སུམ་ཚོགས་པ་ཉིད་དེ་ལྡན་པ་ཉིད་ཅེས་བྱ་བའི་ཐ་ཚིག་གོ །ལྔ་པ་བཅུ་གཅིག་པའོ།།
ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་དེ་ཤེས་པ་དང་མཐོང་བ་རྣམས་ཀྱིས་ཀྱང་ངོ་ཞེས་བྱ་བ་ནི། ཕུན་སུམ་ཚོགས་པ་ཉིད་ཅེས་བྱ་བར་སྦྱར་ཏེ། འདི་ཡང་ཚུལ་ཁྲིམས་ཕུན་སུམ་ཚོགས་བ་ཞེས་སྨོས་པས་ནི་འདུལ་བ་མངོན་པར་ཤེས་པ་ཉིད་སྟོན་ཏོ། །རྣམ་པར་གྲོལ་བ་ཞེས་བྱ་བ་ནི། འདིར་མི་སློབ་པའི་རྣམ་པར་གྲོལ་བ་ལ་བྱའོ། །དེ་ཤེས་པ་དང་མཐོང་བ་ཞེས་བྱ་བ་ལ། དེ་ཞེས་བྱ་བའི་སྒྲ་ནི། གོང་དུ་བསྟན་མ་ཐག་པའི་ཕྱིར་རྣམ་པར་གྲོལ་བ་ལ་སྙེགས་ཏེ། དེའི་ཕྱིར་འདི་ནི་རྣམ་པར་གྲོལ་བ་ཤེས་པ་དང་མཐོང་བ་ཞེས་བྱ་བའི་ཐ་ཚིག་གོ ། རྣམ་པར་གྲོལ་བ་ཞེས་པ་ནི་ཟད་པ་དང་མི་སྐྱེ་བ་ཤེས་པ་ཞེས་བྱ་བའོ། །དེ་ལ་མཐོང་བ་ནི་མི་སློབ་པའི་ལྟ་བ་སྟེ། དེའི་ཕྱིར་རྣམ་པར་གྲོལ་བ་ཤེས་པ་དང་མཐོང་བ་ཡིན་ནོ། །ལྔ་པ་བཅུ་གཉིས་པའོ། །བརྩོན་འགྲུས་བརྩམས་པ་ཉིད་དང་ཤེས་རབ་དང་ལྡན་པ་ཉིད་དང་ཡང་སྦྱར་རོ་ཞེས་བྱ་བ་ལ། ཡང་ཞེས་བྱ་བའི་སྒྲ་ནི། འདིར་སློབ་པ་ཉིད་ཡན་ཆད་ལྔ་པ་མ་ཡིན་པ་ལ། ཚུལ་ཁྲིམས་དང་ལྡན་པ་ཉིད་དང༌། མང་དུ་ཐོས་པ་ཉིད་སྦྱར་རོ་ཞེས་བྱ་བའི་རྗེས་སུ་འཇུག་པ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། འདི་མན་ཆད་སློབ་པ་ཉིད་ཅེས་བྱ་བའི་དོན་ཡན་ཆད་ལ། ལྔ་པ་ཅིག་ཅར་བསྟན་པ་མ་ཡིན་པ་དེ་ལ། བརྩོན་འགྲུས་བརྩམས་པ་ཉིད་དང་ཤེས་རབ་དང་ལྡན་པ་ཉིད་ཅེས་བྱ་བ་གཉིས་དང༌། ཚུལ་ཁྲིམས་དང་ལྡན་པ་ཉིད་དང༌། མང་དུ་ཐོས་པ་ཉིད་ཅེས་བྱ་བ་གཉིས་སྦྱར་ཏེ་བསྟན་པར་རིག་པར་བྱ་སྟེ། མདོ་གསུམ་པོ་དག་ལ་དེ་ལྟར་སྦྱར་བར་བྱ་བའོ། །དྲན་པ་དང་ལྡན་པ་ཉིད་དང་ནང་དུ་ཡང་དག་གཞག་པ་ཉིད་དང་མཉམ་པར་གཞག་པ་ཉིད་དོ་ཞེས་བྱ་བ་གསུམ་པོ་དེ་དག་ནི་རེ་རེ་ཡང་སྔར་བསྟན་པ་བཞི་དང་སྦྱར་བར་བྱ་སྟེ། དེས་ན་ལྔ་པ་གསུམ་དུ་འགྱུར་ཏེ། འདིར་བསྡུས་པའི་དོན་ནི་དེ་ཡིན་ནོ། །དེ་ལྟར་ན་ཚུལ་ཁྲིམས་དང་ལྡན་པ་ཉིད་དང༌། མང་དུ་ཐོས་པ་ཉིད་དང༌། བརྩོན་འགྲུས་བརྩམས་པ་ཉིད་དང་ཤེས་རབ་དང་ལྡན་པ་ཉིད་དང༌། དྲན་པ་དང་ལྡན་པ་ཉིད་དང༌། ལྔ་པ་ལྔ་པ་གཅིག་སྟེ། ལྔ་པ་བཅུ་གསུམ་པའོ། །ཡང་བཞི་པོ་དེ་དག་ཉིད་བརྗོད་ནས། ནང་དུ་ཡང་དག་གཞན་པ་ཉིད་དང་ལྔ་པ་ལྔ་པ་གཅིག་སྟེ། ནང་དུ་ཡང་དག་གཞག་པ་ཉིད་ཅེས་བྱ་བ་ནི། རབ་
ཏུ་དབེན་པར་གྱུར་པ་ཉིད་ཅེས་བྱ་བའི་ཐ་ཚིག་གོ །ལྔ་པ་བཅུ་བཞི་པའོ། །ཡང་སྐབས་དེའི་བཞི་པོ་དེ་དག་ཉིད་བརྗོད་ནས། མཉམ་པར་གཞག་པ་ཉིད་དང་ལྔ་པ་ལྔ་པ་གཅིག་སྟེ། མཉམ་པར་གཞག་པ་ཉིད་ཅེས་བྱ་བ་ནི་མི་རྒོད་པ་ཞེས་བྱ་བའི་ཐ་ཚིག་གོ །ཐམས་ཅད་དུ་ཡང་མང་དུ་ཐོས་པ་ཉིད་ཅེས་སྨོས་པས་ནི་འདུལ་བ་ལ་གནས་པའི་དོན་ཉིད་སྟོན་ཏོ། །ལྔ་པ་བཅོ་ལྔ་པའོ། །སློབ་པ་ཉིད་དོ་ཞེས་བྱ་བ་ལ། ཟག་པ་མེད་པའི་ལམ་གྱིས་ཉོན་མོངས་པ་སྤང་བའི་ཕྱིར་སློབ་པའི་ངང་ཚུལ་ཅན་ཡིན་པའི་ཕྱིར། སློབ་པ་ཞེས་བྱའོ། །ཉིད་ཅེས་བྱ་བ་ནི་སློབ་པའི་དངོས་པོ་ནི་སློབ་པ་ཉིད་དེ། སློབ་པ་ཞེས་བྱ་བའི་སྒྲ་ནི་རྒྱུར་འཇུག་པ་ཡིན་པས་སློབ་པ་ཉིད་ཅེས་བྱའོ། །ཡན་ལག་གི་དོན་ཉིད་བརྗོད་པར་བྱ་སྟེ། སློབ་པའི་ཚུལ་ཁྲིམས་ཀྱི་ཕུང་པོ་དང༌། ཏིང་ངེ་འཛིན་དང༌། ཤེས་རབ་དང༌། རྣམ་པར་གྲོལ་བ་དང༌། རྣམ་པར་གྲོལ་བའི་ཤེས་པ་དང༌། མཐོང་བའི་ཕུང་པོ་དང་ལྡན་པ་ཡིན་ནོ། །སློབ་པའི་རྣམ་པར་གྲོལ་བ་ཤེས་པ་དང༌། མཐོང་བ་ཞེས་བྱ་བ་ནི་བསླབ་པར་བྱ་བ་མོས་པར་བྱ་བའི་རྣམ་པར་གྲོལ་བར་འགྱུར་ན། ཤེས་པ་དང་མཐོང་བ་འབྱུང་བ་སྟེ། སློབ་པའི་ཆོས་ཤེས་པ་ལ་སོགས་པ་ནི་ཤེས་པའོ། །ཆོས་ཤེས་པའི་བཟོད་པ་ལ་སོགས་པ་ཤེས་རབ་ནི་མཐོང་བ་སྟེ། དེའི་ཕྱིར་རྣམ་པར་གྲོལ་པ་ཤེས་པ་དང་མཐོང་བ་ཞེས་བྱའོ། །ལྔ་པ་བཅུ་དྲུག་པའོ། །མི་སློབ་པ་ཉིད་དོ་ཞེས་བྱ་བ་ལ། ཉོན་མོངས་པའི་སྤང་བའི་ཕྱིར་མི་སློབ་པས་མི་སློབ་པ་སྟེ། དགྲ་བཅོམ་པའོ། །ཉིད་ཅེས་བྱ་བ་ནི། མི་སློབ་པའི་དངོས་པོ་ནི་མི་སློབ་བ་ཉིད་དོ། །འདིས་ཀྱང་དགྲ་བཅོམ་པའི་རྒྱུད་ལ་ཡོད་པའི་ཚུལ་ཁྲིམས་ལ་སོགས་པ་ཡན་ལག་ལྔ་པོ་དེ་དག་ཉིད་བསྡུས་པ་ཡིན་ནོ། །འོ་ན་ལྔ་པ་གཉིས་པོ་འདི་དག་གིས་འདུལ་བ་ལ་གནས་པའི་དོན་ཉིད་མ་བསྟན་ན། ཤིན་ཏུ་བཟླ་བར་བྱ་བ་མ་ཡིན་པའི་ཡན་ལག་ཇི་ལྟར་བཟླ་བར་རུང༌། འདི་ལྟར་འདུལ་བ་ཡོངས་སུ་ཤེས་པ་མེད་པར་ཡང་སློབ་པ་དང་མི་སློབ་པ་ཉིད་ནི་སྲིད་པ་ཁོ་ན་ཡིན་ལ། ཟག་པ་མེད་པའི་ཚུལ་ཁྲིམས་ཀྱི་ཡུལ་ལ་འདི་བྱ་བའོ། །འདི་ནི་བྱ་བ་མ་ཡིན་ནོ་ཞེས་ཡོངས་སུ་ཤེས་པ་གང་ཡིན་པ་དེ་ནི། མངོན་པར་རྟོགས་པ་ལས་བྱུང་བ་ཁོ་ན་ཏེ། འཕགས་པའི་ལམ་གྱིས་ཡིན་གྱི། ལྟུང་བ་རྣམ་པར་གཞག་པ་ལ་ནི་སོ་སོར་ཐར་པ་ལ་སོགས་པ་ཡོངས་སུ་ཤེས་པ་
དགོས་པའི་ཕྱིར་རོ། །དེ་ལ་ཉེས་པ་མེད་དེ་ལོ་བཅུ་ལོན་པ་ཉིད་ཅེས་སྨོས་པའི་ཕྱིར་ཏེ། འདི་ལྟར་དེ་གཉིས་ནི་འཕགས་པ་ཡིན་པས་ལོ་བཅུ་པོ་དེ་དག་ལ་འདུལ་བ་གདོན་མི་ཟ་བར་འབད་པར་བྱ་བ་ཡིན་པའི་ཕྱིར་རོ། །བཅོམ་ལྡན་འདས་ཀྱིས་ལོ་བཅུ་ལོན་པ་ཉིད་ཅེས་གསུངས་པ་ནི། རང་དབང་ཡོད་པར་བསྟན་པ་ཡིན་པས། གལ་ཏེ་དེ་གཉིས་ལ་འདུལ་བ་ལ་གནས་པའི་དོན་ཉིད་མེད་པར་གྱུར་ན། དེ་གཉིས་ཇི་ལྟར་རང་དབང་ཅན་དུ་འགྱུར། ལྔ་པ་བཅུ་བདུན་པའོ། །འབྱུང་བ་དང་བཅས་པ་དང༌། རྗེས་སུ་བཅས་པ་དང༌། བཀག་པ་དང་གནང་བ་མངོན་པར་ཤེས་པ་ཉིད་དོ་ཞེ་བྱ་བ་ལ། འབྱུང་བ་ཞེས་བྱ་བ་ནི། བསླབ་པའི་གཞི་རྣམས་གང་ལས་འབྱུང་བར་གྱུར་པའི་འབྱུང་བ་དེའི་གླེང་གཞི་དང༌། རྒྱུ་མཚན་དང་བྱེད་རྒྱུ་གང་ཡིན་པ་སྟེ། དེ་ནི་འབྱུང་བ་ཞེས་བྱ་བའི་སྒྲ་བརྗོད་དོ། །བཅས་པ་ཞེས་བྱ་བ་ནི། བསླབ་པའི་གཞི་རྣམས་རྣམ་པར་གཞག་པའོ། །ཉེས་པ་སྦོམ་པོ་ནི་དགེ་སློང་འདི་སྙེད་ཅིག་གི་མདུན་དུ་བཤགས་པར་བྱའོ་ཞེས་བྱ་བ་ལ་སོགས་པ་ཡང་བཅས་པ་ཞེས་སྨོས་པས་གཟུང་བར་རིག་པར་བྱའོ། །རྗེས་སུ་བཅས་པ་ཞེས་བྱ་བ་ནི། སྔར་གནང་བའི་གཞི་ལ་བཀག་པ་དང༌། སྔར་བཀག་པ་ལ་གནང་བ་གང་ཡིན་པ་ནི་རྗེས་སུ་བཅས་པ་སྟེ། དཔེར་ན་མཆིལ་ལྷམ་གཉིས་གནང་བ་མཛད་པ་ལ་ཡང་དེ་གཉིས་ཀྱི་བྱེ་བྲག་དགག་པ་མཛད་དེ། སྒྲ་ཀྲོག་ཀྲོག་མི་ཟེར་བ་དང༌། སྒྲ་ཏུག་ཏུག་མི་ཟེར་བར་བྱའོ་ཞེས་བྱ་བ་ལ་སོགས་པ་ལྟ་བུ་ནི། གནད་བ་ལ་ཡང་བཀག་པའོ། །བཀག་པ་ལ་ཡང་གནང་བ་ནི་དཔེར་ན་དུས་མ་ཡིན་པའི་ཟས་སྔར་བཀག་པ་ནང་པ་ལ་གནང་བ་ལྟ་བུ་སྟེ། དེ་ནི་བཀག་པ་ལ་ཡང་གནང་བའོ། །བཀག་པ་ཞེས་བྱ་བ་ནི། སྲོག་ལ་བབ་ཀྱང་གཞི་འདི་རྣམ་པ་ཐམས་ཅད་དུ་མི་བྱའོ་ཞེས་བྱ་བ་སྟེ། དཔེར་ན་ང་ལ་སྟོན་པར་སྨྲ་བ་རྣམས་ཀྱིས་ཐ་ན་རྩྭའི་མཆོག་མས་ཀྱང་ཆང་མི་བླུད་མི་བཏུང་ངོ་ཞེས་གསུངས་པ་དང༌། སྲོག་གཅོད་པ་ལ་སོགས་པ་རང་བཞིན་གྱིས་ཁ་ན་མ་ཐོ་བ་དང་བཅས་པ་མི་བྱའོ་ཞེས་གསུངས་པ་ལྟ་བུའོ། །གནང་བ་ཞེས་བྱ་བ་ནི། ཅི་དགར་སྤྱད་པའི་ཡུལ་ལ་བྱ་བ་གནག་ཡང་རུང་བ་ཞིག་མི་བྱེད་དམ་བྱེད་ན་ལྟུང་བ་ཞེས་བྱ་བའི་ཉེས་པ་མེད་པ་སྟེ། དཔེར་ན་ཕས་ཀྱི་རྒོལ་བ་ཚར་གཅོད་པའི་ཕྱིར་ཕྱི་རོལ་གྱི་བསྟན་བཅོས་བཀླག་པ་ངས་རྗེས་སུ་གནང་ངོ་ཞེས་གསུངས་པ་ལྟ་
བུའོ། །ལྔ་པ་འདི་དང་འོག་ནས་ལྟུང་བ་ཞེས་བྱ་བ་ལ་སོགས་པའི་ལྔ་པས་ནི། འདུལ་བ་འབའ་ཞིག་མངོན་པར་ཤེས་པ་ཉིད་བསྟན་ཏོ། །ལྔ་པ་བཅོ་བརྒྱད་པའོ། །བར་དུ་གཅོད་པ་དང་བར་དུ་གཅོད་པ་མ་ཡིན་པ་མངོན་པར་ཤེས་པ་ཉིད་དང༌། སྨྲ་བ་པོ་ཉིད་དང་རྗེས་སུ་སྟོན་པ་ཉིད་ཅེས་བྱ་བ་ནི། བར་དུ་གཅོད་པ་ཉིད་དང་བར་དུ་གཅོད་པ་མ་ཡིན་པ་ནི་བར་དུ་གཅོད་པ་དང༌། བར་དུ་གཅོད་པ་མ་ཡིན་པ་སྟེ། དེ་གཉི་ག་མངོན་པར་ཤེས་པ་གཉིས་དང༌། སྨྲ་བ་པོ་ཉིད་དང༌། རྗེས་སུ་སྟོན་པ་ཉིད་ནི་སྨྲ་བ་པོ་ཉིད་དང་རྗེས་སུ་སྟོན་པ་ཉིད་ཡིན་ནོ་ཞེས་བྱ་བར་ཚིག་སྦྱར་བར་བྱའོ། །དེ་ལ་བར་དུ་གཅོད་པ་ཞེས་བྱ་བ་ནི། འདུལ་བ་ལས་སྲོག་གཅོད་པ་ལ་སོགས་པ་བྱ་བ་མ་ཡིན་པ་གང་ཡིན་པ་སྟེ། དེ་ནི་བར་དུ་གཅོད་པར་ནུས་པའི་ཕྱིར་བར་དུ་གཅོད་པའོ། །བར་དུ་གཅོད་པ་མ་ཡིན་པ་ཞེས་བྱ་བ་ནི། བྱ་བ་གང་ཡིན་པ་སྟེ་དེ་ནི་བར་དུ་གཅོད་པ་མ་ཡིན་ནོ། །བར་དུ་གཅོད་པ་དང་བར་དུ་གཅོད་པ་མ་ཡིན་པ་མངོན་པར་ཤེས་པ་ཉིད་ཅེས་བྱ་བ་ཡན་ལག་གཉིས་པོ་འདིས་ནི་འདུལ་བ་ལ་གནས་པའི་དོན་ཉིད་བསྟན་ཏོ། །སྨྲ་བ་པོ་ཉིད་ཅེས་བྱ་བ་ལ། སྨྲ་བར་བྱེད་པ་ནི་སྨྲ་བ་པོའོ། །སྨྲ་བ་པོའི་དངོས་པོ་ནི་སྨྲ་བ་པོ་ཉིད་དེ། ཡན་ལག་གཉིས་པོ་དེ་དག་ཉིད་གཞན་དག་ལ་སྟོན་པ་འམ། གོ་བར་བྱ་བ་ལ་མཁས་པར་གྱུར་ཅིང་ནུས་པ་གང་ཡིན་པ་དེ་ནི་སྨྲ་བ་པོ་ཉིད་ཅེས་བྱ་བའོ། །རྗེས་སུ་སྟོན་པ་ཉིད་ཅེས་བྱ་བ་ནི། སློབ་མ་ལ་སོགས་པ་དག་བྱ་བ་མ་ཡིན་པ་དག་ལས་ལེགས་པར་འཇོག་པ་དང༌། རྗེས་སུ་མཐུན་པ་དང༌། རྣམ་པར་བཟློག་པ་དང༌། རྗེས་སུ་མཐུན་པར་སྨྲ་བ་ཉིད་དང༌། བྱ་བ་དག་ལ་རྗེ་སུ་བསྒྲུབ་པ་ལ་འཇུག་པ་དང་རྗེས་སུ་མཐུན་པར་སྨྲ་བ་ཉིད་དེ། འདིས་སློབ་མ་རྣམས་རྗེས་སུ་སྟོན་པར་བྱེད་པའི་ཕྱིར་རོ། །དེ་ཉི་ཀྱི་ཕྱིར་འདུལ་བ་ལས་ཀྱང་སྨྲ་བ་པོ་དང༌། རྗེས་སུ་སྟོན་པ་ཞེས་གསུངས་སོ། །དེ་ལ་བར་དུ་གཅོད་པ་དང་བར་དུ་གཅོད་པ་མ་ཡིན་པ་མངོན་པར་ཤེས་པ་ཉི་ནི་ཡན་ལག་གཉིས་ཡིན། གསུམ་པ་ནི་བར་དུ་གཅོད་པ་དང་བར་དུ་གཅོད་པ་མ་ཡིན་པ་སྨྲ་བ་པོ་ཉིད་ཡིན། བཞི་པ་ནི་རྗེས་སུ་སྟོན་པ་ཉིད་ཡིན་ན། དེ་ལ་བར་ཇི་ལྟར་སྦྱར་བར་བྱ་ཞེ་ན། དེའི་ཕྱིར་གནས་དང་རེ་ཞིག་གནས་འཆར་གཞུག་ནུས་པ་ཉིད་དང་སྦྱར་རོ་ཞེས་བྱ་བ་སྨྲས་ཏེ། བར་དུ་གཅོད་པ་མངོན་པར་ཤེས་པ་
ཉིད་ལ་སོགས་པ་ཡན་ལག་སྔ་མ་གཞི་གནས་འཆར་གཞུག་ནུས་པ་ཉིད་དང་སྦྱར་བ་ལ་ལྔ་པ་གཅིག་སྟེ། ལྔ་པ་བཅུ་དགུ་པའོ། །དེ་བཞིན་དུ་ཡན་ལག་བཞི་པོ་དེ་དག་ཉིད་རེ་ཞིག་གནས་འཆར་གཞུག་ནུས་པ་ཉིད་དང་སྦྱར་བ་ལ་ལྔ་པ་གཅིག་སྟེ། ལྔ་པ་ཉིད་ཤུ་པ་ཡིན་པར་སྦྱར་རོ། །དེ་ལ་གནས་དང་རེ་ཞིག་གི་གནས་ཞེས་བྱ་བ་ལ། དང་ཞེས་བྱ་བའི་སྒྲ་ནི། གནས་དང་རེ་ཞིག་གནས་ཉིད་རང་དབང་ཡོད་པར་བསྟན་པའི་ཕྱིར་རོ། །འདི་སྐད་བསྟན་ཏེ། གནས་དང་རེ་ཞིག་གནས་ཞེས་བྱ་བའི་ཡན་ལག་གཉིས་པོ་ལྔ་པ་གཅིག་ཏུ་རྣམ་པར་བཞག་པར་མི་བྱའི། མདོ་སྔ་མར་བསྟན་མ་ཐག་པའི་ཡན་ལག་བཞི་དང་སོ་སོར་སྦྱར་ཏེ། ལྔ་པ་གཉིས་སུ་བྱའོ་ཞེས་བྱ་བའི་ཐ་ཚིག་གོ །འཆར་གཞུག་ཅེས་བྱ་བ་ནི། སྦྱིན་དུ་གཞུག་པའོ། །འཆར་ནུས་པ་ཉིད་ཅེས་བྱ་བ་ནི། འཆར་གཞུག་ནུས་པ་ཉིད་དེ་འཆར་གཞུག་ནུས་པ་ཉིད་ནི་ཕོད་པ་ཉིད་དོ། །ཅི་ཞིག་འཆར་གཞུག་ནུས་པ་ཉིད་ཅེ་ན་གནས་དང་རེ་ཞིག་གི་གནས་སོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་མཁན་པོ་གཞན་དུ་འགྲོ་ན་གནས་འཆར་གཞུག་ནུས་པ་དང༌། རེ་ཞིག་པའི་བསམ་པས་གཞན་དུ་འགྲོ་འམ། དེ་ཉིད་ན་སྤོ་བ་ལ་སོགས་པ་དགོས་པའི་དབང་གིས་འདུག་པ་ན་གནས་པ་རེ་ཞིག་གི་གནས་འཆར་གཞུག་ནུས་པ་སྟེ། ཡན་ལག་འདི་གཉིས་ཡན་ལག་སྔ་མ་བཞི་དང་སྦྱར་ན་ལྔ་པ་གཉིས་སུ་འགྱུར་རོ། །ལྔ་པ་ཉིད་ཤུ་པའོ། །ལྟུང་བ་དང་ལྟུང་བ་མ་ཡིན་པ་དང་ཡང་བ་དང་ལྕི་བ་ཉིད་མངོན་པར་ཤེས་པ་ཉིད་དང་སོ་སོར་ཐར་པ་དང་རྒྱས་པ་ཐོན་པ་ཉིད་དོ་ཞེས་བྱ་བ་ལ་ལྟུང་བ་དང་ལྟུང་བ་མ་ཡིན་པ་ནི། ལྟུང་བ་དང་ལྟུང་བ་མ་ཡིན་པའོ། །ཡང་བ་དང་ལྕི་བ་དེ་གཉིས་ཀྱི་དངོས་པོ་ནི་ཡང་བ་དང་ལྕི་བ་ཉིད་དོ། །ལྟུང་བ་ལ་སོགས་པ་མངོན་པར་ཤེས་པ་ཉིད་ནི་ལྟུང་བ་ལ་སོགས་པའི་མངོན་པར་ཤེས་པ་ཉིད་དོ། །སོ་སོར་ཐར་པ་དང་རྒྱས་པར་ཐོན་པ་ཉིད་ནི་སོ་སོར་ཐར་པ་དང་རྒྱས་པ་ཐོན་པ་ཉིད་དོ་ཞེས་བྱ་བ་ཐམས་ཅད་ལ་ཡང་གཅིག་གི་ཚིག་ཏུ་བྱའོ། །དེ་ལ་ལྟུང་བ་མ་ཡིན་པ་མངོན་པར་ཤེས་པ་ཉིད་ནི་སློབ་མ་ལ་སོགས་པ་བྱ་བ་དང་བྱ་བ་མ་ཡིན་པ་ལ་སྦྱར་བ་ལ་དགོས་སོ། །ཡང་བ་དང་ལྕི་བ་ཉིད་མངོན་པར་ཤེས་པ་ཉིད་ནི་ཉེས་པ་སྦོམ་པོ་བཤགས་པ་ལ་དགོས་ཏེ། འདི་ལྟར་ཉེས་པ་སྦོམ་པོ་ཁ་ཅིག་ནི་མཚམས་ཀྱི་
ནང་དུ་དགེ་འདུན་ཐམས་ཅད་ཚོགས་པ་ལ་བཤགས་པར་བྱ་བ་ཡིན། ཁ་ཅིག་ནི་མཚམས་ཀྱི་ཕྱི་རོལ་དུ། ཁ་ཅིག་ནི་བདུན་ལ། ཁ་ཅིག་ནི་ལྔ་ལ། ཁ་ཅིག་ནི་བཞི་ལ་བཤགས་པར་བྱ་བ་ཡིན་པའི་ཕྱིར་རོ། །སོ་སོར་ཐར་པ་དང་རྒྱས་པ་ཐོན་པ་ཉིད་ཀྱིས་ནི་འདུལ་བ་ལ་གནས་པའི་དོན་ཉིད་བསྟན་ཏོ།། རྒྱས་པ་ཞེས་སྨོས་པས་ནི་འདུལ་བ་མཐའ་དག་བསྡུས་པར་རིག་པར་བྱ་སྟེ། འདུལ་བ་མཐའ་དག་ནི་སོ་སོར་ཐར་པ་རྒྱས་པར་གྱུར་པ་ཡིན་པའི་ཕྱིར་རོ། །འདིར་སོ་སོར་ཐར་པ་དང་རྒྱས་པ་ཐོན་པ་ཉིད་ནི་ཚིག་ལས་རིག་པར་བྱའོ། །དོན་ལས་ནི་ལྟུང་བ་དང་ལྟུང་བ་མ་ཡིན་པ་ལ་སོགས་པ་ཉིད་ཀྱིས་གྲུབ་པའི་ཕྱིར་རོ། །འདི་ལྟར་འདུལ་བ་ལས་ཀྱང་ལྟུང་བ་ཤེས་པ་དང༌། ལྟུང་བ་མ་ཡིན་པ་ཤེས་པ་དང༌། ཡང་བ་ཤེས་པ་དང༌། ལྕི་བ་ཤེས་པ་དང༌། སོ་སོར་ཐར་པའི་མདོ་འདོན་པ་དང་རྒྱས་པ་བཀླགས་པ་དང་ཐོན་པ་སྟེ། བཀླགས་པ་ཞེས་སྨོས་པས་ནི། འདིར་སློབ་དཔོན་དང་མཁན་པོ་ལ་སོགས་པ་ལས་བཀླག་པའི་བསམ་པས་བཟུང་བ་ཉིད་སྟོན་ཏོ། །ཐོན་པ་ཞེས་སྨོས་པས་ནི། ཁ་ཏོན་དུ་རྣམ་པར་གཞག་པ་ཉིད་སྟོན་ཏོ། །ལྔ་པ་ཉི་ཤུ་རྩ་གཅིག་པའོ། །གཙུག་ལག་ཁང་གང་ན་དགེ་སློང་ལོ་བཅུ་ལོན་པའམ། དེ་བས་ལྷག་པ་ལྔ་པ་གང་དང་ཡང་མི་ལྡན་པ་ཤ་སྟག་འཁོད་ལ་གཙུག་ལག་ཁང་དེ་ན་རྒན་པ་ལྔ་པ་དང༌། ལྡན་པ་མེད་ན་དེས་ཇི་ལྟར་བསྒྲུབ་པར་བྱ་ཞེ་ན། རྒན་པ་མེད་ན་གཞོན་པ་ལ་གནས་བཅའ་བར་བྱའོ་ཞེས་བྱ་བ་སྨྲས་ཏེ། གལ་ཏེ་རྒན་པ་ལྔ་པ་གང་ཡང་རུང་བ་ཅིག་དང་ཡང་མི་ལྡན་པར་གྱུར་ན། དེའི་ཆོ་ག་ནི་དེ་ཡིན་ནོ། །འདིར་ལུང་ཡང་འདི་ཡིན་ཏེ། བཙུན་པ་དགེ་སློང་རྫོགས་པར་བསྙེན་ནས་ལོ་དྲུག་ཅུ་ལགས་ལ་དེས་སོ་སོར་ཐར་པའི་མདོ་གདོན་པ་དང༌། རྒྱས་པ་བཀླགས་པ་ཐོན་པ་མ་ལགས་ན་དེས་ཀྱང་གཞན་ལ་གནས་པས་མཆིས་པར་བགྱི་འམ། ཉེ་བ་འཁོར་དེས་ཀྱང་གཞན་ལ་གནས་པས་འདུག་པར་བྱའོ་ཞེས་གསུངས་པ་ཡིན་ནོ། །འདིར་ལོ་དྲུག་ཅུ་ལོན་པ་ཉིད་ཀྱང་མཚོན་པ་ཙམ་དུ་ཟད་ཀྱི། ལོ་བརྒྱད་ཅུ་ལོན་པས་ཀྱང་གཞན་ལ་གནས་པས་འདུག་པར་བྱའོ། །དགེ་སློང་རྔ་པ་ལྔ་པ་དང་ལྡན་པ་མེད་ན་དགེ་སློང་གཞོན་པ་ལྔ་བ་དང་ལྡན་པ་ལ་གནས་པར་བྱའོ། །ཅི་ཉེ་གནས་ཀྱི་ཚུལ་ཁྲིམས་ཐམས་ཅད་བྱ་འམ་ཞེ་ན། འདུད་པ་འབའ་ཞིག་མ་གཏོགས་སོ་ཞེས་བྱ་བ་སྨྲས་ཏེ། རྒན་བས་གནས་
གཞོན་པ་ལ་བཏུད་དེ་ཕྱག་འཚལ་བ་འབའ་ཞིག་མ་གཏོགས་པ་གནས་པའི་ཚུལ་ཁྲིམས་དེ་ལས་གཞན་པ་དག་ལ་རྗེས་སུ་གནས་པར་བྱའོ་ཞེས་བྱ་བའི་ཐ་ཚིག་གོ །དགེ་སློང་གནས་ན་གནས་པའི་ཇི་ལྟར་རྗེས་སུ་གནས་པ་བསྟན་ན། ལམ་དུ་ཞུགས་པས་ཀྱང་ཅི་དེ་དག་ཉིད་ལ་རྗེས་སུ་གནས་པར་བྱ་འམ་ཞེ་ན། མ་ཡིན་ཏེ་དེའི་ཕྱིར། ལོ་ལྔ་ལོན་ཞིང་ལྷན་ཅིག་སྦྱར་བ་ཐ་མ་དང་ལྡན་ན་གནས་མ་བཅས་པར་ལྗོངས་རྒྱུར་འགྲོ་བར་བྱའོ་ཞེས་བྱ་བ་སྨྲས་ཏེ། གལ་ཏེ་ལོ་ལྔ་ཡང་ལོན་ལ་ལྷན་ཅིག་སྦྱར་བ་ཐ་མ་དང་ཡང་ལྡན་ན་གནས་མ་བཅས་པར་ཡང་འགྲོ་ཞིང་རྒྱུ་བར་བྱའོ། །ལྷན་ཅིག་སྦྱར་བ་ཐ་མ་ཞེས་བྱ་བ་ནི། ལྟུང་བ་དང་ལྟུང་བ་མ་ཡིན་པ་དང༌། ཡང་བ་དང་ལྕི་བ་ཉིད་མངོན་པར་ཤེས་པ་ཉིད་དང༌། སོ་སོར་ཐར་པ་དང་རྒྱས་པ་ཐོན་པ་ཉིད་དེ། ལྷན་ཅིག་སྦྱར་བ་ཐམས་ཅད་ཀྱི་མཇུག་ཏུ་བསྟན་པའི་ཕྱིར་ཐ་མའོ། །ཇི་འདིར་ལོ་ལྔ་ལོན་པ་ཉིད་གཙོ་བོ་ཡིན་ནམ་འོན་ཏེ་ལྷན་ཅིག་སྦྱར་བ་ཐ་མ་དང་ལྡན་པ་ཉིད་གཙོ་བོ་ཡིན་ཞེ་ན། འདིར་གཉི་ག་ཡང་གཙོ་བོ་ཡིན་ཏེ། གལ་ཏེ་ལྷན་ཅིག་སྦྱར་བ་ཐ་མ་དང་ལྡན་ན་ཡང་ལོ་ལྔ་མ་ལོན་ན་དེས་ཀྱང་འགྲོ་བར་མི་བྱ་ལ། ཅི་སྟེ་ལོ་ལྔ་ལོན་ཡང་ལྷན་ཅིག་སྦྱར་བ་ཐ་མ་དང་མི་ལྡན་པ་དེ་ལྟ་ན་ཡང་འགྲོ་བར་མི་བྱ་སྟེ། དེའི་ཕྱིར་གཞན་དུ་ན་གསུམ་རིག་པ་ཡིན་ཡང་མི་བྱའོ་ཞེས་བྱ་བ་སྨྲས་ཏེ། གལ་ཏེ་ལོ་ལྔ་མ་ཡིན་ནམ་ལོ་ལྔ་ལོན་ཡང་ལྷན་ཅིག་སྦྱར་བ་ཐ་མ་དང་མི་ལྡན་ན། རིག་པ་གསུམ་པོ་སྔོན་གྱི་གནས་དང༌། འཆི་འཕོ་དང་སྐྱེ་བ་དང་ཟག་པ་ཟད་པ་ཞེས་བྱ་བ་དག་དང་ལྡན་དུ་ཟིན་ཀྱང༌། དེ་ལྟ་ན་དེས་གནས་མ་བཅས་པར་ལྗོངས་རྒྱུ་ཞིང་འགྲོ་བར་མི་བྱའོ། །འདི་ལྟར་བཙུན་པ་གསུམ་རིག་པ་དྲི་མ་གསུམ་སྤངས་ལ་དེ་ལོ་ལྔ་མ་ལགས་ཤིང་ཆོས་ལྔ་དང་མི་ལྡན་ན་དེས་ཀྱང་མི་གནས་པར་ལྗོངས་རྒྱུ་ཞིང་མཆི་བར་མི་བགྱི་འམ། ཉེ་བ་འཁོར་མི་བྱའོ་ཞེས་གསུངས་པའི་ཕྱིར་རོ། །དེ་ལྟ་བས་ན་འདིར་གསུམ་རིག་པ་ཡང་མ་གནང་བ་བཞིན་དུ་གཞན་ལ་ཡང་དེ་ཁོ་ན་བཞིན་ནོ། །གནས་ཀྱི་སྐབས་སོ། །བར་ཆད་དྲིས་ནས་ཡོངས་སུ་དག་པ་ལ་སྐབས་དབྱེའོ་ཞེས་གང་སྨྲས་པ་དེའི་ཕྱིར་འདི་མན་ཆད་རྣམས་ནི་རྣམ་པ་གཉིས་ཏེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་མུ་སྟེགས་ཅན་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་ངོ་ཞེས་བྱས་ནི། མུ་སྟེགས་ཅན་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ། །བར་ཆད་
ཀྱི་ཆོས་རྣམས་ནི་རྣམ་པ་གཉིས་ཏེ། ཁ་ཅིག་ནི་སྡོམ་པ་སྐྱེ་བ་ལ་བར་ཆད་བྱེད་པ་སྟེ། འདི་ལྟ་སྟེ་མ་གསོད་པ་ལ་སོགས་པའོ། །ཁ་ཅིག་ནི་མཛེས་པ་ཉིད་ལ་བར་དུ་གཅོད་པ་སྟེ། འདི་ལྟ་སྟེ་ལག་རྡུམ་ལ་སོགས་པའོ། །གཞན་ཡང་བར་ཆད་ཀྱི་ཆོས་རྣམས་ནི་རྣམ་པ་གཉིས་ཏེ། ཁ་ཅིག་ནི་ལྟ་བའི་རྣམ་པ་སྟེ། འདི་ལྟ་སྟེ་མུ་སྟེགས་ཅན་མ་ཡིན་ནམ་ཞེས་བསྟན་པ་ལ་སོགས་པའོ། །ཁ་ཅིག་ནི་བྱ་བས་ཏེ། འདི་ལྟ་སྟེ། རྒྱལ་པོས་བཀྲབས་པ་མ་ཡིན་ནམ་ཞེས་བྱ་བ་ལ་སོགས་པའོ། །དེ་དག་ཐམས་ཅད་གོ་རིམས་བཞིན་དུ་བསྟན་ཏེ། མུ་སྟེགས་ཅན་མ་ཡིན་ནམ་ཞེས་བྱ་བ་ནི། རབ་ཏུ་འབྱུང་བའི་ཕྱིར་ཉེ་བར་འོངས་པའི་གང་ཟག་ལ་མཁན་པོས་ཁྱོད་མུ་སྟེགས་ཅན་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱའོ་ཞེས་བྱ་བར་སྦྱར་རོ། །འོ་ན་གསང་སྟེ་སྟོན་པ་ཁོ་ནས་འདྲི་ཞིང་ལས་བྱེད་པས་ཀྱང་ཡིན་ན། ཇི་ལྟར་རྫོགས་པར་བསྙེན་པར་བྱེད་པ་དག་གིས་ཀྱང་ཞེས་མང་པོའི་ཚིག་ཏུ་བྱ། དྲི་བར་བྱ་ཞིང་ཞེས་གཅིག་གིས་ཚིག་སྨོས་པ་ལས་ཇི་ལྟར་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱའོ་ཞེས་མཇུག་མང་པོའི་ཚིག་ཏུ་རུང་ཞེ་ན། ཉེས་པ་མེད་དེ་ལྐོག་ཏུ་གསང་སྟེ་སྟོན་པས་དྲི་བར་བྱེད་པ་དེ་ནི་རྫོགས་པར་བསྙེན་པར་བྱེད་པ་དག་གིས་བྱས་པ་ཁོ་ན་ཡིན་པར་རིག་པར་བྱ་སྟེ། ཇི་ལྟར་རྫོགས་པར་བསྙེན་པར་བྱེད་པ་དག་ཁོ་ནས་གསང་སྟེ་སྟོན་པ་འདྲི་བའི་དོན་དུ་བསྐོས་པ་ཡིན་པས་དེས་བྱ་པ་ནི་དེ་དག་ལ་ཉེ་བར་གདགས་པའི་ཕྱིར་རོ། །དྲི་བར་བྱ་ཞིང་ཞེས་བྱ་བ་འདི་ཡང་དོན་གྱི་དབང་གིས་རྣམ་པར་དབྱེ་བ་བསྒྱུར་ཏེ། ངག་གིས་ཀྱང་དྲི་བར་བྱའོ་ཞེས་བྱ་བར་རུང་ངོ༌། །གལ་ཏེ་དྲིས་པན་དེ་དག་མུ་སྟེགས་ཅན་ནོ་ཞེས་ཟེར་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་ཤཱཀྱ་དང་མེ་པ་རལ་པ་ཅན་མ་གཏོགས་པ་སེམས་མགུ་བར་མ་གྱུར་པའི་མུ་སྟེགས་ཅན་རབ་ཏུ་དབྱུང་བ་དང་རྫོགས་བར་བསྙེན་པར་མི་བྱའོ་ཞེས་བྱ་བ་སྨྲས་ཏེ། གང་ལ་སེམས་མགུ་བར་མ་གྱུར། ཡིད་ཆེས་པར་མ་གྱུར། དད་པར་མ་གྱུར་པ་ཡོད་པ་ནི་སེམས་མ་གྱུར་པའི་མུ་སྟེགས་ཅན་ཏེ། སེམས་མགུ་བར་མ་གྱུར་པའི་མུ་སྟེགས་ཅན་ནི་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ། །ཅི་མུ་སྟེགས་ཅན་ཐམས་ཅད་དམ་ཞེ་ན། དེའི་ཕྱིར་ཤཱཀྱ་དང་མེ་པ་རལ་པ་ཅན་མ་གཏོགས་པ་ཞེས་བྱ་བ་སྨྲས་ཏེ། ཤཱཀྱ་དང་མེ་བ་
རལ་བ་ཅན་ནི་མ་གཏོགས་སོ། །མེ་པ་ཞེས་བྱ་བ་ནི་མེ་ལ་དད་པས་མ་པ་སྟེ། དེ་མེད་པའི་རིགས་དང་དད་པ་ཡོངས་སུ་སྤྱོད་པར་ཞུགས་པ་དང༌། མངོན་པར་བརྩོན་པར་གྱུར་པས་ན་དེ་སྐད་ཅེས་བྱའོ། །འོ་ན་མཁན་པོ་གཅིག་ཁོ་ནར་ཟད་པས་གཅིག་གི་ཚིག་ཏུ་བྱ་བའི་རིགས་ན། རབ་ཏུ་དབྱུང་བ་དང་ཞེས་བྱ་བ་མང་པོའི་ཚིག་ཏུ་བྱས་པ་ཇི་ལྟར་ཞེ་ན། ཉེས་པ་མེད་དེ་རབ་ཏུ་བྱུང་བ་ལ་ནི་ཞུ་བར་བྱེད་པ་ལ་སོགས་པ་མང་པོ་དག་ཀྱང་གཏོགས་པས་མང་པོའི་ཕྱིར་མང་པོའི་ཚིག་ཏུ་བྱས་སོ། །ཤཱཀྱ་དང་མེ་པ་རལ་པ་ཅན་གཉིས་ཀྱི་རབ་ཏུ་འབྱུང་བར་རྗེས་སུ་བསྒྲུབ་པ་གང་ཡིན་པ་དེ་ནི་དེ་གཉིས་ཀྱི་བདེན་པ་ཁོ་ན་ཡིན་གྱི་སྒྱུས་མ་ཡིན་པས་དེའི་ཕྱིར་བཅོམ་ལྡན་འདས་ཀྱིས་ཀྱང་དགེ་སློང་དག་ང་ནི་ཉེ་དུ་རྣམས་ལ་ཉེ་ངུའི་ཡོངས་སུ་སྤང་བ་སྦྱིན་པར་བྱེད་དོ་ཞེས་གསུངས་སོ། །འདི་ལྟར་མིང་དང་མིང་ཅན་སྦྱར་ན་དོན་སླ་བར་འགྱུར་བས། འདི་ཡང་བསྟན་བཅོས་ལ་མིང་དང་མིང་ཅན་དུ་སྦྱར་བ་སྡེབ་པར་འདོད་ནས། བཀོལ་བ་དེ་ནི་མུ་སྟེགས་ཅན་དང་ཤཱཀྱ་ལ་སོགས་པའི་མཇུག་གི་མུ་སྟེགས་ཅན་བཀོལ་བ་ལའི་ཞེས་བྱ་བ་སྨྲས་ཏེ། བཀོལ་བཞེས་བྱ་བ་ནི་མིང་ངོ༌། །དེ་ནི་ཞེས་བྱ་བ་ནི་མིང་ཅན་ཏེ། མདོ་སྔར་བསྟན་མ་ཐག་པ་གཉིས་ལ་མུ་སྟེགས་ཅན་ཞེས་བྱ་བ་རྣམ་པ་གཉིས་བཀོལ་བའི་ལྷག་མའོ། །མདོ་སྔ་མ་ལ་མ་ཡིན་ནམ་ཞེས་བྱ་བའི་གོང་ན་མུ་སྟེགས་ཅན་ཞེས་བྱ་བའི་སྒྲ་འདུག་པ་བཀོལ་བའི་ལྷག་མ་དང༌། མདོ་གཉིས་པ་ལ་ཤཱཀྱ་དང་མེ་པ་རལ་པ་ཅན་མ་གཏོགས་པ་སེམས་མགུ་བར་མ་གྱུར་པའི་མུ་སྟེགས་ཅན་ཞེས་བྱ་བའི་སྒྲ་དེ་དག་བཀོལ་བའི་ལྷག་མ་ནི་བཀོལ་བ་ཞེས་བྱ་བའི་མིང་ཅན་ཡིན་པར་རིག་པར་བྱའོ། །དེ་ལྟར་ན་འདིར་ཚིག་གི་དོན་འདི་བྱུང་སྟེ། གོང་དུ་བཀོལ་བ་ཞེས་བྱ་བའི་སྒྲ་ཡོད་པ་དེར་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ཆེ་གེ་མོ་ཞིག་མ་ཡིན་ནམ་ཞེས་དྲི་བར་བྱ་ཞིང༌། རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། གལ་ཏེ་དྲིས་པ་ན་དེ་དག་ཆེ་གེ་མོ་དེ་ཡིན་ནོ་ཞེས་ཟེར་ན། རབ་ཏུ་འབྱུང་པ་དང་རྫོགས་པར་བསྙེན་པར་མེ་བྱའོ་ཞེས་བྱ་བ་དེ་བརྗོད་པར་བྱ་བའི་སྐབས་ཡིན་པར་ཤེས་པར་བྱའོ། །ད་ནི་ཡན་ལག་གི་དོན་བརྗོད་པར་བྱ་སྟེ། མུ་སྟེགས་ཅན་དང་ཞེས་བྱ་བ་ནི། མདོ་སྔ་མ་ལ་མ་ཡིན་ནམ་ཞེས་བྱ་བའི་གོང་ན་མུ་སྟེགས་ཅན་ཞེས་བྱ་བའི་སྒྲ་འདུག་པ་དང་སྦྱར་རོ། །ཤཱཀྱ་ལ་སོགས་པའི་མཇུག་གི་མུ་སྟེགས་ཅན་ཞེས་
བྱ་བ་ནི། མདོ་གཉིས་པ་ལ་ཤཱཀྱ་དང་མེ་པ་རལ་པ་ཅན་མ་གཏོགས་པ་སེམས་མགུ་བར་མ་གྱུར་པའི་མུ་སྟེགས་ཅན་ཞེས་བྱ་བའི་སྒྲ་འདུག་པ་དང་སྦྱར་རོ། །ཤཱཀྱ་ལ་སོགས་པའི་ཞེས་བྱ་བ་ནི་ཚིག་གང་ལ་སོགས་པ་ཞེས་བྱ་བ་ཡོད་པ་དེ་ནི་ཤཱཀྱ་ལ་སོགས་པའིའོ། །མཇུག་གི་མུ་སྟེགས་ཅན་ཞེས་བྱ་བ་ནི། མུ་སྟེགས་ཅན་ཞེས་བྱ་བའི་སྒྲ་འདི་ཚིག་གང་གི་མཇུག་ན་ཡོད་པའི་ཚིག་དེའི་མཇུག་ན་མུ་སྟེགས་ཅན་ཡོད་པའོ། །དེ་ལྟར་ན་ཚིག་དེ་ནི་ཤཱཀྱ་ལ་སོགས་པ་ཡང་ཡིན་ལ། མཇུག་ན་མུ་སྟེགས་ཅན་ཡོད་པ་ཡང་ཡིན་པས། ཤཱཀྱ་ལ་སོགས་པའི་མཇུག་གི་མུ་སྟེགས་ཅན་ཡོད་པ་ཡིན་ནོ། །ཡང་མདོ་སྔ་མ་ལས་མུ་སྟེགས་ཅན་ཞེས་སྨོས་པའི་སྒྲ་དང་ཅིག་ཆར་གཅིག་གི་ཚིག་ཏུ་ཡང་བསྡུ་བར་བྱ་སྟེ། མུ་སྟེགས་ཅན་དང་ཞེས་བྱ་བ་ཡང་ཚིག་དེ་ཡིན་ལ་ཤཱཀྱ་ལ་སོགས་པའི་མཇུག་གི་མུ་སྟེགས་ཅན་ཞེས་བྱ་བ་ཡང་དེ་ཡིན་པས་ན། མུ་སྟེགས་ཅན་དང་ཤཱཀྱ་ལ་སོགས་པའི་མཇུག་གི་མུ་སྟེགས་ཅན་ཏེ། དེ་བཀོལ་བའི་ལྷག་མ་ནི་མིང་ཅན་ཡིན་པར་རིག་པར་བྱའོ། །འདི་ལྟར་མིང་ནི་གཞན་གྱི་དོན་གྱི་ཕྱོགས་དག་ལ་མིང་ཅན་གོ་བར་བྱེད་པ་ཡིན་པས་དེའི་ཕྱིར་རབ་ཏུ་འབྱུང་བའི་གཞི་འདིར་ཡང་བཀོལ་བ་བྲན་ཞེས་བྱ་བ་ལ་སོགས་པས་བཀོལ་བའི་ཕྱོགས་ཤེས་པར་བྱའོ། །ཕྲན་ཚེགས་ལ་ནི་བཀོལ་བ་རྒྱལ་པོས་བཀྲབས་པ་ཞེས་བྱ་བ་ལ་སོགས་པས་བཀོལ་བའི་ཕྱོགས་ཤེས་པར་བྱའོ།། །།བམ་པོ་གསུམ་པ། །སེམས་མགུ་བར་མ་གྱུར་པའི་མུ་སྟེགས་ཅན་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་སྨྲས་ན། དེ་ཅི་ཙམ་གྱིས་ན་སེམས་མགུ་བར་གྱུར་པར་རིག་པར་བྱ་ཞེ་ན། དེའི་ཕྱིར་དཀོན་མཆོག་རྣམས་ཀྱི་བསྔགས་པ་དང༌། མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་ཡང་དག་པར་བརྗོད་པ་ན་མི་གཡོ་བ་ཉིད་ནི་སེམས་མགུ་བར་གྱུར་པ་ཉིད་དོ་ཞེས་བྱ་བ་སྨྲས་ཏེ། དཀོན་མཆོག་རྣམས་ཀྱི་ཞེས་བྱ་བ་ནི། གསུམ་པོ་སངས་རྒྱས་དང་ཆོས་དང་དགེ་འདུན་རྣམས་ཀྱིའོ། །བསྔགས་པ་ཡང་དག་པར་བརྗོད་པ་ན་ཞེས་བྱ་བ་ནི་ཡོན་ཏན་ཡང་དག་པ་ཇི་ལྟ་བ་བཞིན་དུ་བརྗོད་པ་ནའོ། །མུ་སྟེགས་ཅན་རྣམས་ཀྱི་བསྔགས་པ་མ་ཡིན་པ་ཡང་དག་པར་བརྗོད་པ་ན་ཞེས་བྱ་བ་ནི། སྐྱོན་ཡང་དག་བ་ཇི་ལྟ་བ་བཞིན་དུ་བརྗོད་པ་ནའོ། །མི་གཡོ་བ་ཉིད་ཅེས་བྱ་བ་ནི་གཡོ་བར་མི་འགྱུར་བས་མི་གཡོ་བ་སྟེ། མི་གཡོ་བའི་
དངོས་པོ་ནི་མུ་སྟེགས་ཅན་རྣམས་ཀྱི་མི་གཡོ་བ་ཉིད་དོ། །སེམས་མགུ་བར་གྱུར་པ་ཉིད་ཅེས་བྱ་བ་ཡང༌། མུ་སྟེགས་ཅན་དེ་དག་ཉིད་ཀྱིའོ། །མུ་སྟེགས་ཅན་སེམས་མགུ་བར་གྱུར་པ་ཉིད་ལ་ཇི་ལྟར་ནན་ཏན་བྱ་ཞེ་ན། དེའི་ཕྱིར་དེའི་དོན་དུ་དེ་དང་མི་ལྡན་པ་དེ་དགེ་བསྙེན་ཉིད་དུ་བྱས་པའི་མཐའ་ཅན་དེ་ལ་དགེ་འདུན་གྱི་ལས་ཀྱིས་གནས་པ་བྱིན་ལ་ཟླ་བ་བཞིར་གནས་པར་བྱའོ་ཞེས་བྱ་བ་སྨྲས་ཏེ། དེའི་དོན་དུ་ཞེས་བྱ་བ་ནི། བསྟན་མ་ཐག་པ་སེམས་མགུ་བར་གྱུར་པ་ཉིད་ཀྱི་དོན་དུའོ། །དེ་དང་མི་ལྡན་པ་ཞེས་བྱ་བ་ལ། དེ་ཞེས་བྱ་བའི་སྒྲས་ནི་སེམས་མགུ་བར་མ་གྱུར་པ་ཉིད་གཟུང་ངོ༌། །གང་ལ་དེ་ཡོད་པ་དེ་ནི་དེ་དང་ལྡན་པའོ། །དེ་དང་ལྡན་པ་མ་ཡིན་པ་ནི་དེ་དང་མི་ལྡན་པ་སྟེ་སེམས་མགུ་བར་མ་གྱུར་པ་ཉིད་ལྡན་པ་དེ་དང་མི་ལྡན་པའོ། །དེ་ཞེས་བྱ་བ་ནི། མུ་སྟེགས་ཅན་ཡིན་ནོ། །དགེ་བསྙེན་ཉིད་དུ་བྱས་པའི་མཐའ་ཅན་ཞེས་བྱ་བ་ལ། དགེ་བསྙེན་གྱི་དངོས་པོ་ནི་དགེ་བསྙེན་ཉིད་དོ། །དེ་ནི་ཆོ་ག་དེའི་མཐའ་ཡིན་པས་དགེ་བསྙེན་ཉིད་དུ་བྱས་པའི་མཐའ་སྟེ། དེ་ལ་དགེ་བསྙེན་དུ་བྱས་པའི་མཐའི་ཆོ་ག་ཡོད་པས་ན། དགེ་བསྙེན་ཉིད་དུ་བྱས་པའི་མཐའ་ཅན་ནོ། །དེ་ལ་ཞེས་བྱ་བ་ནི། དགེ་བསྙེན་ཉིད་དུ་བྱས་པའི་མཐའ་ཅན་གྱི་མུ་སྟེགས་ཅན་ལའོ། །དགེ་འདུན་གྱིས་ལས་ཀྱི་གནས་པ་བྱིན་ལ་ཟླ་བ་བཞིར་གནས་པར་བྱའོ་ཞེས་བྱ་བ་ནི། དགེ་འདུན་གྱིས་གནས་པ་བྱིན་ལ་ཟླ་བ་བཞིར་གནས་པར་བྱའོ། །ཇི་ལྟར་གནས་པ་བྱིན་ལ་ཞེ་ན། ལས་ཀྱིས་ཏེ་གསོལ་བ་དང་བཞིའི་ལས་ཀྱིས་སོ། །གསོལ་བ་དང་བཞིའི་ལས་ནི། དགེ་འདུན་བཙུན་པ་རྣམས་གསན་དུ་གསོལ། མུ་སྟེགས་ཅན་མིང་འདི་ཞེས་བགྱི་བ་ལས་རབ་ཏུ་འབྱུང་བར་འཚལ་ཏེ། མུ་སྟེགས་ཅན་མིང་འདི་ཞེས་བགྱི་བ་འདི། ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱིས་གནས་པར་དགེ་འདུན་ལ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན། དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་མུ་སྟེགས་ཅན་མིང་འདི་ཞེས་བགྱི་བ་ལ་ཟླ་བ་བཞིའི་བར་དུ་མཁན་པོས་སྦྱར་བའི་གོས་ཀྱིས་གནས་པ་སྩལ་ཏོ་ཞེས་བྱ་བ་ལ་སོགས་པས་སོ། །ཟླ་བ་བཞི་པོ་དག་ལ་ཟན་དང་གོས་གང་ནས་སྦྱིན་པར་བྱ་ཞེ་ན། དེའི་ཕྱིར་དེའི་ཟན་དགེ་འདུན་ལས་སོ་ཞེས་བྱ་བ་སྨྲས་ཏེ། མུ་སྟེགས་ཅན་གནས་པ་བྱིན་པ་དེའི་ཟན་ནི་དགེ་འདུན་གྱི་ལས་སྦྱིན་པར་བྱའོ། །
གོས་གང་ནས་ཤེ་ན། དེའི་ཕྱིར་གོས་ནི་མཁན་པོ་ལས་སོ་ཞེས་བྱ་བ་སྨྲས་ཏེ། གོས་ནི་མཁན་པོས་སྦྱིན་པར་བྱའོ། །ཟན་དང་གོས་འབྱོར་ནས་དེས་ཅི་ཞིག་བྱ་ཞེ་ན། དེའི་ཕྱིར་ལས་སུ་བསྐོ་བར་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། མུ་སྟེགས་ཅན་རབ་ཏུ་འབྱུང་བར་འདོད་པ་དེའོ། །དགེ་ཚུལ་དག་པས་ཀྱང་གཞོན་པའི་ཕྱིར་གཞོན་པ་ཐམས་ཅད་ཀྱི་ལས་སུ་བསྐོ་བ་གང་ཡིན་པ་དེ་དེས་བྱའོ། །གང་གི་ཕྱིར་བར་ཆད་རྣམ་པ་གཉིས་པོ་རེ་ཞིག་པ་དང་གཏན་དུ་བ་ཞེས་གསུངས་པ་ལ། རེ་ཞིག་པ་བསྟན་པའི་ཕྱིར། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ལོ་བཅོ་ལྔ་ལོན་ནམ་ཞེས་དྲི་བར་བྱའོ་ཞེས་བྱ་བ་སྨྲས་ཏེ། རབ་ཏུ་འབྱུང་བར་འདོད་པ་རབ་ཏུ་འབྱུང་བའི་ཕྱིར་འོངས་པ་ལ་མཁན་པོས་ཅི་ཁྱོད་ལོ་བཅོ་ལྔ་ལོན་ནམ་ཞེས་དྲི་བར་བྱའོ། །གལ་ཏེ་ལོ་བཅོ་ལྔ་མ་ལོན་ན་དེའི་ཕྱིར་ཇི་ལྟར་བྱ་ཞེ་ན། དེའི་ཕྱིར་མ་ལོན་པ་བྱ་རོག་སྐྲོད་མི་ནུས་པ་དང་ནུས་པ་ལོ་བདུན་མ་ལོན་པ་རབ་ཏུ་འབྱུང་བར་མི་བྱའོ་ཞེས་བྱ་བ་སྨྲས་ཏེ། རབ་ཏུ་འབྱུང་བར་འདོད་པ་ལོ་བཅོ་ལྔ་མ་ལོན་པ་བྱ་རོག་སྐྲོད་མི་ནུས་པ་རབ་ཏུ་འབྱུང་བར་མི་བྱའོ། །བྱ་རོག་སྐྲོད་ནུས་ཀྱང་ལོ་བདུན་མ་ལོན་ན་རབ་ཏུ་དབྱུང་བར་མི་བྱའོ། །གལ་ཏེ་ལོ་བཅོ་ལྔ་འམ་ལོ་བདུན་ལོན་ལ་བྱ་རོག་སྐྲོད་ཀྱང་ནུས་ན་དེ་ནི་རབ་ཏུ་དབྱུང་བར་བྱའོ། །འོ་ན་རབ་ཏུ་དབྱུང་བ་ནི་མཁན་པོའི་ལས་ཡིན་ན། དེ་དག་གིས་རབ་ཏུ་དབྱུང་བར་བྱའོ་ཞེས་མང་པོའི་ཚིག་ཏུ་ཇི་ལྟར་རུང་ཞེ་ན། རབ་ཏུ་དབྱུང་བ་ལ་ནི་མང་པོ་རྣམས་ཀྱིས་བྱ་བ་ཡོད་པས་ཐམས་ཅད་བསྡུ་བའི་ཕྱིར་མང་པོའི་ཚིག་ཏུ་རུང་སྟེ། ཞུ་བར་བྱེད་པས་ཀྱང་འདི་ཡོངས་སུ་མ་དག་གོ་ཞེས་བྱ་བར་ཤེས་ན་ཞུ་བར་མི་བྱ་ལ། དགེ་འདུན་གྱིས་ཀྱང་གནང་བར་མི་བྱ། དགེ་ཚུལ་ཉིད་དུ་ཉེ་བར་བསྒྲུབ་པས་ཀྱང་དགེ་ཚུལ་ཉིད་དུ་ཉེ་བར་བསྒྲུབ་པར་མི་བྱ་བའི་ཕྱིར་རོ། །ཅི་དཔེར་ན་གནས་གཅིག་གིས་གནས་པ་རྫོགས་པར་བསྙེན་པ་མང་པོ་དག་འཇོག་པར་བྱེད་པ་དེ་བཞིན་དུ། དེས་དགེ་ཚུལ་མང་པོ་དག་ཀྱང་གཞག་པར་བྱའམ། ཞེ་ན། དེའི་ཕྱིར་དགེ་ཚུལ་གཅིག་ལས་ལྷག་པ་ཉེ་བར་གཞག་བར་མི་བྱའོ་ཞེས་བྱ་བ་སྨྲས་ཏེ། དགེ་ཚུལ་གཅིག་ལས་ལྷག་པ་དགེ་ཚུལ་གཉིས་པ་ལ་སོགས་པ་ཉེ་བར་གཞག་པར་མི་བྱའོ། །ཇི་ལྟར་དགེ་ཚུལ་གཉིས་པ་ལ་སོགས་པ་ཉེ་བར་གཞག་པ་བཀག་པ་ལྟར། ཅི་རབ་ཏུ་དབྱུང་བ་ཡང་གཉིས་པ་ལ་སོགས་པ་མི་བྱའམ་ཞེ་ན། དེའི་ཕྱིར་གལ་ཏེ་སོ་སོར་རབ་ཏུ་
འབྱུང་མི་འདོད་ན་རབ་ཏུ་ཕྱུང་ལ་རྒན་པ་རྫོགས་པར་བསྙེན་པར་བྱའོ་ཞེས་བྱ་བ་སྨྲས་ཏེ། རབ་ཏུ་འབྱུང་བར་འདོད་པ་གཉིས་ཤིག་བདག་ཅན་གཉིས་ཅིག་ཅར་ལྷན་ཅིག་རབ་ཏུ་འབྱུང་བར་བྱའོ་ཞེས་དེ་ལྟར་ངེས་པར་བྱས་ཏེ། རབ་ཏུ་འབྱུང་བའི་ཕྱིར་འོངས་པ་དེ་གཉིས་གལ་ཏེ་སོ་སོར་ཐ་དད་པར་རབ་ཏུ་འབྱུང་བར་མི་འདོད་ན། དེའི་ཚེ་གཉིས་ཀ་རབ་ཏུ་འབྱུང་བར་བྱ་ཞིང་གཉིས་ཀ་རབ་ཏུ་འབྱུང་ན་དགེ་ཚུལ་ནས་རྒན་པ་ཤོས་རྫོགས་པར་བསྙེན་པར་བྱའོ། །གལ་ཏེ་རྒན་དུ་ཟིན་ཀྱང་ལོ་ཉི་ཤུ་མ་ལོན་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་གལ་ཏེ་ལོ་མ་ལོན་ན་གཞན་ལ་རེ་ཞིག་གནས་པའི་དོན་དུ་གཏད་པར་བྱའོ་ཞེས་བྱ་བ་སྨྲས་ཏེ། དགེ་ཚུལ་གང་ཡང་རུང་བ་དེ་རྒན་དུ་ཟིན་ཀྱང༌། གལ་ཏེ་ལོ་ཉི་ཤུ་མ་ལོན་པར་གྱུར་ན། དེའི་ཚེ་དེ་གཉིས་ལས་གཅིག་དགེ་སློང་གཞན་ལ་རེ་ཞིག་གི་གནས་ཀྱི་དོན་དུ་གཏད་པར་བྱའོ། །ཅི་སྟེ་གང་ལ་རེ་ཞིག་གི་གནས་ཀྱི་དོན་དུ་གཏད་པ་དེའི་ཡིན་པ་ཁོ་ནར་འགྱུར་རམ་ཞེ་ན། དེའི་ཕྱིར་དེ་ལ་དེ་དབྲོག་པར་མི་བྱའོ་ཞེས་བྱ་བ་སྨྲས་ཏེ། དགེ་སློང་དེ་ལ་དགེ་ཚུལ་དེ་མཁན་པོ་ལ་ས་དབྲོག་པར་མི་བྱའོ། །རྫོགས་པར་བསྙེན་པར་བྱ་བའི་དུས་ན་གང་གིས་རྫོགས་པར་བསྙེན་པར་བྱ་ཞེ་ན། དེའི་ཕྱིར་གང་གིས་གཏད་པ་ཉིད་ཀྱིས་དེ་རྫོགས་པར་བསྙེན་པར་བྱའོ་ཞེས་བྱ་བ་སྨྲས་ཏེ། གལ་ཏེ་མི་སྟེར་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་མི་སྟེར་བ་རེ་ཞིག་གི་གནས་ལས་མཐུས་བཀུག་སྟེ་འོ་ཞེས་བྱ་བ་སྨྲས་ཏེ། མི་སྟེར་བ་ལས་མཐུས་བཀུག་སྟེ་རྫོགས་པར་བསྙེན་པར་བྱའོ་ཞེས་བྱ་བར་སྦྱར་རོ། །བཀོལ་བ་བྲན་ནོ་ཞེས་བྱ་བས་ནི། བཀོལ་བ་ཞེས་བྱ་བའི་མིང་མིང་ཅན་ལ་ཉེ་བར་འཇོག་པར་བྱེད་དེ། མ་ཡིན་ནམ་ཞེས་བྱ་བ་ལ་སོགས་པ་བྲན་ཞེས་བྱ་བར་སྦྱར་བ་ཅན་ལའོ། །བྲན་ཞེས་བྱ་བའི་སྒྲ་མིང་ཅན་དང་ལྷན་ཅིག་ཇི་ལྟར་སྦྱར་བར་བྱ་ཞེ་ན། འདིར་བྲན་མ་ཡིན་ནམ་ཞེས་བྱ་བའི་སྒྲ་ནི་དང་པོའི་མཐའ་ཅན་ཡིན་ལ། མི་བྱའོ་ཞེས་བྱ་བ་ནི་འདིར་གཉིས་པའི་མཐའ་ཡིན་ནོ། །དེ་ལྟར་ན་འདི་ཚིག་གི་དོན་འདི་འབྱུང་སྟེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་བྲན་མ་ཡིན་ནམ་ཞེས་དྲི་བར་བྱ་ཞིང༌། རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། བྲན་རབ་ཏུ་འབྱུང་བ་དང་རྫོགས་པར་བསྙེན་པར་མི་བྱའོ། །འདི་ལྟར་བྲན་ཞེས་བྱ་བའི་སྒྲ་གཅིག་
ཏུ་ཟད་མོད་ཀྱི། འོན་ཀྱང་དོན་གྱི་དབང་གིས་རྣམ་པར་དབྱེ་བ་བསྒྱུར་ཏེ། གནས་གཉི་གར་སྦྱར་བར་བྱའོ། །ཡིན་ནམ་གཏང་ལ། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་ཞེས་བྱའོ་ཞེས་བྱ་བ་ལ། ཡིན་ནམ་གཏོང་ལ་ཞེས་བྱ་བ་ནི། ཡིན་ནམ་ཞེས་བྱ་བ་བཀོལ་པའོ། །མདོ་འདི་ལ་བཀོལ་བའི་མིང་གིས་ཡིན་ནམ་ཞེས་བའི་སྒྲ་བཀོལ་བའི་མིང་ཅན་ཉེ་བར་འཇོག་པར་བྱེད་དེ། ཡིན་ན་མ་ཞེས་བྱ་བའི་གནས་སུ་ཁྱོད་ལ་ཞེས་བྱ་བར་ཉེ་བར་སྦྱར་བར་བྱའོ། །དེ་ལྟར་ན་འདིར་མདོའི་དོན་འདི་འབྱུང་སྟེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ་ཞེས་དྲི་བར་བྱ་ཞིང༌། རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། བུ་ལོན་ཅན་རབ་ཏུ་དབྱུང་བར་མི་བྱ་རྫོགས་པར་བསྙེན་པར་མི་བྱའོ། །བུ་ལོན་ཞེས་བྱ་བ་ནི་གཞལ་བར་བྱ་བ་ཡིན་པས་དེའི་ཕྱིར་འདིར་བཀོལ་བ་བུ་ལོན་ཅན་དང་སྦྱར་བར་ཤེས་པར་བྱའོ། །བུ་ལོན་ཅན་ཐམས་ཅད་རབ་ཏུ་དབྱུང་བར་མི་བྱ་བ་ཡང་མ་ཡིན་ཏེ། གང་འདི་སྐད་དུ་རབ་ཏུ་བྱུང་ངམ། རྫོགས་པར་བསྙེན་ནས་ཕྱིས་བུ་ལོན་འཇལ་ནུས་སོ་ཞེས་དམ་འཆའ་བར་བྱེད་པ་དེ་ནི་རབ་ཏུ་དབྱུང་བར་བྱའོ། །བྱེ་བྲག་འདི་ནི་སྔགས་ལས་སྣང་སྟེ། སྔགས་འདི་སྐད་དུ་འབྱུང་སྟེ། ཁྱོད་ལ་ལ་ལའི་བུ་ལོན་མང་ཡང་རུང་ཉུང་ཡང་རུང་ཅུང་ཟད་ཆགས་པ་མེད་དམ། རབ་ཏུ་བྱུང་ནས་འཇལ་ནུས་སམ་ཞེས་འབྱུང་བས། འཇལ་ནུས་སམ་ཞེས་བྱ་བའི་ཚིག་གིས་དེ་དེ་ལྟར་གྱུར་ན་རབ་ཏུ་དབྱུང་བར་བྱའོ། །རབ་ཏུ་དབྱུང་བར་འདོད་པ་ཕ་མ་གསོན་ཞིང་དེ་གཉིས་ཀྱིས་མི་གནང་བ་ཡུལ་ཐག་མི་རིང་བ་ནི། ཞག་བདུན་བསྲེལ་བར་བྱའོ་ཞེས་བྱ་བ་ལ། རབ་ཏུ་འབྱུང་བར་འདོད་པ་ཕ་མ་གསོན་ཞིང་ཞེས་བྱ་བ་ནི། རབ་ཏུ་དབྱུང་བར་འདོད་པ་གང་གི་ཕ་མ་གཉིས་གསོན་པ་དེ་ནི་རབ་ཏུ་འབྱུང་བར་འདོད་པ་ཕ་མ་གསོན་པ་ཡིན་ནོ། །དེ་གཉིས་ཀྱིས་མ་གནང་བ་ཞེས་བྱ་བ་ནི། ཕ་མ་དེ་གཉིས་ཀྱིས་གལ་ཏེ་རབ་ཏུ་འབྱུང་བའི་ཕྱིར་གནང་བར་མ་གྱུར་པའོ། །ཡུལ་ཐག་མི་རིང་བ་ཞེས་བྱ་བ་ནི། གང་ལ་ཡུལ་ཐག་རིང་པོ་མེད་པ་དེ་ནི་ཡུལ་ཐག་མི་རིང་བ་ཡིན་ནོ། །རབ་ཏུ་འབྱུང་བར་འདོད་པ་དེ་ལྟ་བུ་དེ་ནི་ཞག་བདུན་བསྲེལ་བར་བྱ་སྟེ། འོངས་མ་ཐག་ཏུ་རབ་ཏུ་དབྱུང་བར་མི་བྱའོ་ཞེས་བྱ་བའི་ཐ་ཚིག་གོ །དེ་གཉིས་
ཀྱིས་ཞེས་བྱ་བ་གཉིས་ཀྱི་ཚིག་ཏུ་བྱས་པའི་ཕྱིར་ཕ་མ་གསོན་ཞིང་ཞེས་བྱ་བ་འདིར་ཡང་ཕ་མ་གཉི་ག་གཟུང་བར་བྱའོ། །གལ་ཏེ་གཅིག་གསོན་ན་ཡང་དེའི་ཚེ་དེ་ཁོ་ན་བཞིན་དུ་བསྒྲུབ་པར་བྱའོ། །ཡུལ་ཐག་མི་རིང་བ་ཅན་གྱི་དབང་དུ་བྱས་ཏེ་སྨྲས་ནས། ད་ནི་ཡུལ་ཐག་རིང་པོ་ཅན་གྱི་དབང་དུ་བྱས་ཏེ། དེ་ཡུལ་ཐག་རིང་ན་ཡང་དགེ་འདུན་ལ་མ་ཞུས་པར་རབ་ཏུ་དབྱུང་བར་མི་བྱའོ་ཞེས་བྱ་བ་ལ། དེ་ཞེས་བྱ་བ་ནི་རབ་ཏུ་དབྱུང་བར་འདོད་པ་ཕ་མ་གསོན་ཞིང་དེ་གཉིས་ཀྱིས་མ་གནང་བའོ། །ཡུལ་ཐག་རིང་ན་ཡང་དགེ་འདུན་ལ་མ་ཞུས་པར་རབ་ཏུ་དབྱུང་བར་མི་བྱའོ་ཞེས་བྱ་བ་ལ། ཡང་ཞེས་བྱ་བའི་སྒྲ་ནི། ཞག་བདུན་བསྲེལ་དུ་ཟིན་ཀྱང་དགེ་འདུན་ལ་མ་ཞུས་པ་རབ་ཏུ་དབྱུང་བར་མི་བྱའོ་ཞེས་བྱ་བར་སྦྱར་རོ། །བཟློག་པ་ནི་རབ་ཏུ་དབྱུང་བར་བྱའོ། །དེ་ལྟར་ཕ་མ་གསོན་པ་ལ་དྲི་བའི་གཞུང་ནི་བཙུན་པ་གང་གི་ཕ་མ་གཉིས་དུས་ལས་འདས་པར་གྱུར་ཏམ། དུད་འགྲོའི་སྐྱེ་གནས་སུ་གཏོགས་པར་གྱུར་པ་དེའི་སྐྲ་བྲེག་པ་དགེ་འདུན་ཐམས་ཅད་ལ་ཞུ་བར་བགྱི་འམ། ཉེ་བ་འཁོར་མི་བྱའོ་ཞེས་གསུངས་པའོ། །འོ་ན་ཡུལ་ཐག་ཉེ་བ་ཡང་མ་ཞུས་པར་རབ་ཏུ་དབྱུང་བར་མི་བྱ་ན། ཡུལ་ཐག་རིང་བ་སྨོས་པ་ཅིའི་ཕྱིར་བྱ་ཞེ་ན། དོགས་པ་བསལ་བའི་ཕྱིར་ཏེ། འདི་ལྟར་ཁྱིམ་པ་མོ་ཞིག་གིས་བུ་རབ་ཏུ་ཕྱུང་བ་མཐོང་ནས། ཁྱོད་ཤཱཀྱའི་བུའི་རྐུན་མ་རྣམས་ཀྱི་ནང་དུ་ཅིའི་ཕྱིར་རབ་ཏུ་བྱུང་ཚུར་ཤོག་འདོང་ཞེས་སྨྲས་ཏེ། དེས་དེ་བཟུང་ནས་ཁྱིམ་དུ་ཁྲིད་ཅིང་དགེ་སློང་རྣམས་ལ་རྐུན་མ་ཞེས་བྱ་བའི་ཚིག་གིས་སྐུར་པ་བཏབ་པས། ལ་ལ་ཡུལ་ཐག་ཉེ་བ་ལ་ནི་ཉེས་དམིགས་དེ་ལྟ་བུ་ཡོད་ཀྱི། ཡུལ་ཐག་རིང་བ་ལ་ནི་ཉེས་པ་མེད་དོ་སྙམ་དུ་དེ་ལྟར་དོགས་པར་གྱུར་པས་ཡུལ་ཐག་རིང་བ་སྨོས་སོ། །དེ་ཉིད་ཀྱི་ཕྱིར་ཁ་ཅིག་ཡང་ཞེས་བྱ་བའི་སྒྲ་གཞན་དུ་རྣམ་པར་འཆད་དེ། ཡང་ཞེས་བྱ་བའི་སྒྲས་ནི་ཡུལ་ཐག་རིང་བ་ཡང་ཞུ་བར་བྱ། ཡུལ་ཐག་ཉེ་བ་ཡང་ཞུ་བར་བྱའོ་ཞེས་བྱ་བར་རྣམ་པར་འཆད་དོ། །རབ་ཏུ་འབྱུང་བར་འདོད་པ་ཞག་བདུན་བསྲེལ་བར་བྱའོ་ཞེས་སྨྲས་ན། ཟན་སུས་སྦྱིན་པར་བྱ་བ་མ་བསྟན་པས་དེའི་ཕྱིར་རབ་ཏུ་འབྱུང་བར་འདོད་པའི་ཟན་ནི་དགེ་འདུན་གྱིས་བྱིན་ན་རུང་ངོ་ཞེས་བྱ་བ་སྨྲས་ཏེ། རུང་ངོ་ཞེས་སྨོས་པས་ནི། དགེ་འདུན་གྱི་གནང་སྤབས་སྟོན་ཏེ། གལ་ཏེ་གཅིག་ལ་མ་ཞུས་ན་ཡང་
དེའི་ཚེ་སྦྱིན་པར་མི་བྱའོ་ཞེས་བྱ་བའི་ཐ་ཚིག་གོ །བཀོལ་བ་ཕ་མས་གནང་ངམ་མཇུག་ནས་ཡུལ་ཐག་རིང་བ་ནི་མ་གཏོགས་སོ་ཞེས་བྱ་བ་ནི། མེད་དམ་ཞེས་བྱ་བའི་སྒྲ་དེའི་གནས་སུ་ཕ་མས་གནང་ངམ་ཞེས་བྱ་བའི་སྒྲ་བརྗོད་པར་བྱའོ། །བཀོལ་བ་ཞེས་བྱ་བའི་སྒྲ་འདིས་བསྒྲུབ་པར་བྱ་བའི་མིང་ཅན་གྱི་མཇུག་ཐ་མར་ཡུལ་ཐག་རིང་བ་ནི་མ་གཏོགས་སོ་ཞེས་བྱ་བའི་སྒྲ་འདི་ལྷག་པར་བརྗོད་པར་བྱའོ། །དེ་ལྟར་ན་ཚིག་གི་དོན་འདི་འབྱུང་སྟེ། རབ་ཏུ་འབྱུང་བའི་ཕྱིར་ཉེ་བར་འོངས་པས་ལ་ཕ་མས་གནང་ངམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། ཕ་མས་མ་གནང་བ་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ། །ཡུལ་ཐག་རིང་བ་ནི་མ་གཏོགས་སོ། །ཉེ་བར་འོངས་པ་ལ་ནད་པ་མ་ཡིན་ནམ་ཞེས་དྲི་བར་བྱའོ་ཞེས་བྱ་བ་ནི། རབ་ཏུ་འབྱུང་བར་འདོད་པ་རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་དགེ་ཚུལ་གྱི་མཁན་པོས་ནད་པ་མ་ཡིན་ནམ་ཞེས་དྲི་བར་བྱའོ། །དེ་ཡང་རབ་ཏུ་འབྱུང་བའི་སྐབས་ནས་གནང་ངོ༌། །ཁྱོད་ལ་ནད་གང་ཡང་རུང་བ་མེད་དམ་ཞེས་བྱ་བར་ཡང་རུང་ངོ་ཞེས་བྱ་བ་ལ། རུང་ངོ་ཞེས་བྱ་བའི་སྒྲ་ནི། ཚིག་ཐ་དད་པར་རྟོགས་པའི་དོན་ཏེ་གཉིས་པོ་དག་ལས་གང་ཡང་རུང་བ་བརྗོད་པར་བྱའོ། །རྫོགས་པར་བསྙེན་པར་བྱེད་པ་དག་གིས་བྱེ་བྲག་ཏུའོ་ཞེས་བྱ་བ་ནི། འདི་ལྟར་རབ་ཏུ་འབྱུང་བའི་དུས་ན་ནད་པ་མ་ཡིན་ནམ་ཞེས་བྱ་བ་ལ་སོགས་པ་སྤྱིར་དྲི་བར་བྱེད་མོད་ཀྱི། འོན་ཀྱང་བསྙེན་པར་རྫོགས་པའི་དུས་སུ་མི་རྣམས་ཀྱི་ལུས་ལ་ལུས་ཀྱི་ནད་རྣམ་པ་འདི་ལྟ་བུ་འདི་དག་འབྱུང་བ་འདི་ལྟ་སྟེ། མཛེ་དང༌། འབྲས་དང་ཞེས་བྱ་བ་ལ་སོགས་པས་བྱེ་བྲག་ཏུ་དྲི་བར་བྱའོ་ཞེས་བྱ་བ་གཅིག་གི་ཚིག་གི་མཐའི་སྒྲ་འདི་མང་པོའི་ཚིག་ཏུ་བསྒྱུར་ཏེ། དེ་དག་གིས་དྲི་བར་བྱའོ་ཞེས་བྱ་བར་སྦྱར་བར་བྱ་སྟེ། རྫོགས་པར་བསྙེན་པར་བྱེད་པ་དག་གིས་ཞེས་བྱ་བ་མང་པོའི་ཚིག་གི་མཐའ་ཡིན་པའི་ཕྱིར་རོ། །ནད་པ་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བྱ་བ་ནི། ཞུ་བར་བྱེད་པ་དང༌། རྫོགས་བར་བསྙེན་པར་བྱེད་པ་ལ་སོགས་པ་མང་པོའི་ཕྱིར་རབ་ཏུ་འབྱུང་བ་དང་རྫོགས་པར་བསྙེན་པར་མི་བྱའོ་ཞེས་མང་པོའི་ཚིག་ནི་འདིར་ཐམས་ཅད་ཀྱི་བྱེ་བྲག་བསྟན་པའི་ཕྱིར་རོ། །གང་གི་ཕྱིར་བཀོལ་བ་ནད་པ་ཞེས་བྱ་བ་འདི་ལྟར་བསྟན་སླ་བར་མ་བྱས་པར་འདི་ལྟར་མདོ་བཞིར་བྱས་པ་ནི། གལ་ཏེ་བཀོལ་བ་ནང་
པ་ཞེས་བྱ་བ་དེ་ལྟར་བྱས་ན་དེའི་ཚེ་རྫོགས་པར་བསྙེན་པར་བྱེད་པ་དག་གིས་བྱེ་བྲག་ཏུའོ་ཞེས་བྱ་བ་དེ་འདུས་པར་མི་འགྱུར་ལ། ཁྱོད་ལ་ནད་གང་ཡང་རུང་བ་མེད་དམ་ཞེས་བྱ་བའི་ཚིག་ཐ་དད་པར་རྟོག་པ་ཡང་མ་བྱས་པར་འགྱུར་པའི་ཕྱིར་རོ། །བཀོལ་བ་ཆད་པ་ཡན་ཆད་དོ་ཞེས་བྱ་བ་ནི། དབང་དུ་བྱ་བ་འདིས་རྒྱུ་ལས་བཟློག་པའི་ཆད་པ་ཁས་མི་ལེན་པ་དག་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བྱ་བ་ཡན་ཆད་ཀྱི་མདོ་བསྟན་པ་ཐམས་ཅད་བཀོལ་བ་ཞེས་བྱ་བའི་སྒྲ་འདིའི་དབང་དུ་བྱའོ། །དེས་ན་སྤྲུལ་པ་ལ་སོགས་པ་དག་བཀོལ་བ་དང་སྦྱར་བར་རིག་པར་བྱའོ། །འདི་ལ་སྐྱེ་བའི་ཆོས་ཉིད་མེད་པར་ཡང་འདྲའོ་ཞེས་བྱ་བ་ལ། འདི་ལ་ཞེས་བྱ་བ་ནི། འོག་ནས་འབྱུང་བ་སྤྲུལ་པ་ལ་སོགས་པ་ལའོ། །སྐྱེ་བའི་ཆོས་ཉིད་མེད་པར་ཞེས་བྱ་བ་ནི། སྡོམ་པ་སྐྱེ་བའི་ཆོས་ཉིད་མེད་པར་རོ། །ཡང་ཞེས་བྱ་བའི་སྒྲ་ནི། ཀུན་བསྡུ་བའི་དབང་དུ་བྱ་བའི་དོན་ཏོ། །འདྲའོ་ཞེས་བྱ་བའི་སྒྲ་ནི། སྤྱི་ལ་སྙེགས་པའི་དོན་ཏོ། །དེ་ལྟར་ན་མདོ་འདིས་ཀྱང་ཆད་པ་ཡན་ཆད་ཀུན་བསྡུ་བ་དང༌། སྤྱི་ལ་སྙེགས་པའི་དབང་དུ་བྱེད་དོ། །དེ་ལྟར་ན་སྐྱེ་བའི་ཆོས་ཉིད་མེད་པ་ཇི་ལྟར་བྱ་ཞེ་ན། དེའི་ཕྱིར་དེ་ལྟ་བུ་རྟགས་ཅན་ནི་བསྙིལ་བར་བྱའོ་ཞེས་བྱ་བ་སྨྲས་ཏེ། དེ་ལྟ་བུ་ཞེས་བྱ་བ་ནི། སྐྱེ་བའི་ཆོས་ཉིད་མེད་པའོ། །རྟགས་ཅན་ཞེས་བྱ་བ་ནི། རབ་ཏུ་བྱུང་བ་དང་དགེ་ཚུལ་དང་རྫོགས་པར་བསྙེན་པ་ཡང་དག་པའི་འོ། །འདི་ཡང་དབང་དུ་བྱ་བའི་མདོ་བསྟན་མ་ཐག་པའི་ལྷག་མར་གྱུར་པ་ཡིན་པའི་ཕྱིར། ཆད་པ་ཡན་ཆད་ཐམས་ཅད་ཀྱིས་དབང་དུ་བྱའོ། །ད་ནི་བཀོལ་བ་དང་སྦྱར་བ་དང་སྐྱེ་བའི་ཆོས་ཉིད་མེད་བ་དང་སྦྱར་བ་རྣམ་པར་བཤད་པར་བྱ་སྟེ། སྤྲུལ་པའོ་ཞེས་བྱ་བ་འདིར་ཡང་བཀོལ་བ་ལ་སོགས་པའི་དབང་དུ་བྱ་བ་ཐམས་ཅད་སྦྱར་བར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་སྤྲུལ་པ་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། སྤྲུལ་པ་རབ་ཏུ་འབྱུང་བ་དང་རྫོགས་པར་བསྙེན་པར་མི་བྱའོ། །འདི་ལ་སྐྱེ་བའི་ཆོས་ཉིད་མེད་པར་ཡང་འདྲའོ། །དེ་ལྟ་བུ་རྟགས་ཅན་ནི་བསྙིལ་བར་བྱའོ། །དེ་བཞིན་དུ་མ་ནིང་ལ་སོགས་པ་གཞན་དག་ལ་ཡང་སྦྱར་བར་བྱའོ། །མ་ནིང་ངོ་ཞེས་བྱ་བ་ནི། རབ་ཏུ་འབྱུང་བའི་ཕྱིར་ཉེ་བར་
འོངས་པ་ལ་མ་ནིང་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། མ་ནིང་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བྱ་བ་ལ་སོགས་པ་ཐམས་ཅད་བརྗོད་པར་བྱའོ། །མ་ནིང་གི་དབྱེ་བ་བསྟན་པའི་ཕྱིར། དེ་ནི་རྣམ་པ་ལྔའོ་ཞེས་བྱ་བ་སྨྲས་ཏེ། མ་ནིང་ནི་རྣམ་པ་ལྔ་ཉིད་དོ་ཞེས་བྱ་བའི་ཐ་ཚིག་གོ །རྣམ་པ་ལྔ་བསྟན་པའི་ཕྱིར། སྐྱེས་ནས་དང༌། ཟླ་བ་ཕྱེད་པ་དང༌། འཁྱུད་ནས་ལྡང་བ་དང༌། ཕྲག་དོག་ཅན་དང༌། ཉམས་པ་དང༌། ཞེས་བྱ་བ་སྨྲས་ཏེ། དེ་ལ་སྐྱེས་ནས་ཞེས་བྱ་བ་ནི། སྐྱེས་པའི་ཚེ་ཉིད་ནས་ཕོའི་དབང་པོ་ཡོད་པའི་ཕྱིར་བུད་མེད་ཉིད་ཀྱང་མ་ཡིན་ལ་མོའི་དབང་པོ་ཡོད་པའི་ཕྱིར་ཕོ་ཉིད་ཀྱང་མ་ཡིན་པ་གང་འཇིག་རྟེན་ན་མཚན་གཉིས་པ་ཞེས་བྱ་བ་གང་ཡིན་པ་སྟེ། དེ་ནི་སྐྱེས་ནས་མ་ནིང་དུ་གྱུར་པར་རིག་པར་བྱའོ། །ཟླ་བ་ཕྱེད་པ་ཞེས་བྱ་བ་ནི། ཞག་བཅོ་ལྔ་ནི་བུད་མེད་ཀྱི་འདོད་ཆགས་ཀྱིས་གནོད་པར་འགྱུར་ལ། ཞག་བཅོ་ལྔ་ནི་སྐྱེས་པའི་འདོད་ཆགས་ཀྱིས་གནོད་པར་འགྱུར་བ་གང་ཡིན་པ་སྟེ། དེ་ནི་མ་ནིང་ཟླ་བ་ཕྱེད་པའོ། །འཁྱུད་ནས་ལྡང་བ་ཞེས་བྱ་བ་ནི། དེ་འཁྱུད་པ་ཡང་ཡིན་ལ་ལྡང་བ་ཡང་ཡིན་པས་འཁྱུད་ནས་ལྡང་བའི་མ་ནིང་སྟེ། གང་སྐྱེས་པ་གཞན་གྱིས་བརྩལ་བས་ན་དབང་པོ་ལས་སུ་ཡང་རུང་བ་ལྡང་བར་འགྱུར་བ། དབང་པོ་ལས་སུ་རུང་བ་ལྡང་བ་ཞེས་བྱ་བའི་ཐ་ཚིག་སྟེ། དེ་ནི་འཁྱུད་ནས་ལྡང་བའི་མ་ནིང་ངོ༌། །གཞན་དག་ནི་བུད་མེད་ལ་སོགས་པས་བརྩལ་བ་ན་ཞེས་ཀྱང་ཟེར་རོ། །ཕྲག་དོག་ཅན་ཞེས་བྱ་བ་ནི། གང་ལ་གཞན་གྱིས་བརྩལ་བའི་བུད་མེད་ལ་སོགས་པ་མཐོང་བ་དེའི་ཚེ་ཁོ་ན་ཕྲག་དོག་གིས་དབང་པོ་ལས་སུ་རུང་བར་འགྱུར་ལ་གཞན་གྱི་ཚེ་ན་མ་ཡིན་པ་སྟེ། དེ་ནི་མ་ནི་ང་ཕྲག་དོག་ཅན་ནོ། །ཉམས་པ་ཞེས་བྱ་བ་ནི། གང་གི་ཕོའི་དབང་པོ་བཅད་པ་ལ་སོགས་པས་ཉམས་པར་གྱུར་པ་སྟེ། དེ་ནི་ཉམས་པའི་མ་ནིང་ངོ༌། །ཅི་མ་ནིང་ཐམས་ཅད་བསྙིལ་བར་བྱ་བ་ཡིན་ནམ་ཞེ་ན། དེའི་ཕྱིར་འདི་ལས་ཐ་མ་ནི་ཉེས་པ་བསྟེན་ནས་བསྙིལ་བའོ་ཞེས་བྱ་བ་སྨྲས་ཏེ། ཐ་མར་བསྟན་པའི་ཕྱིར་ཐ་མ་སྟེ། ཉམས་པའི་མ་ནིང་ངོ༌། །དེ་ནི་གལ་ཏེ་མ་ནིང་གི་ཉེས་པ་སྐྱེས་པ་གཞན་གྱིས་བརྩལ་པའི་འདོད་པ་ལ་སོགས་པ་བསྟེན་ན་དེའི་ཚེ་དགེ་སློང་གི་དངོས་པོའི་སྣོད་མ་ཡིན་པར་གྱུར་པས་དེ་ནི་བསྙིལ་བའོ་ཞེས་བྱ་བར་རིག་པར་བྱའོ། །ཇི་སྲིད་དུ་
མ་ནིང་གི་ཉེས་པ་བསྟེན་པར་མི་བྱེད་པ་དེ་སྲིད་དུ་བསྙིལ་བ་མ་ཡིན་ནོ་ཞེས་བྱ་བའི་ཐ་ཚིག་གོ །རྐུ་ཐབས་སུ་གནས་པའོ་ཞེས་བྱ་བ་ནི། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་རྐུ་ཐབས་སུ་གནས་པ་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པའོ། །རྐུ་ཐབས་སུ་གནས་པའི་མཚན་ཉིད་བརྗོད་ནས། རྫོགས་པར་བསྙེན་པའི་ཆོ་ག་མ་བྱས་པ་ཉིད་དམ་མ་ཆགས་པ་ཉིད་དུ་ཤེས་ལ། ལན་གཉིས་སུ་དགེ་འདུན་དང་ལྷན་ཅིག་ལས་ཉམས་སུ་མྱོང་བར་གྱུར་པ་ཉིད་ནི་དེ་ཉིད་ཡིན་ནོ་ཞེས་བྱ་བ་སྨྲས་ཏེ། དེའི་རྫོགས་པར་བསྙེན་པའི་ཆོ་ག་གསོལ་བ་ལ་སོགས་པ་གང་ཡིན་པའི་ཆོ་ག་དེ་མ་བྱས་པ་ཉིད་དུ་ཤེས་པ། བདག་རྫོགས་པར་བསྙེན་པར་འགྱུར་བའི་ཆོ་ག་གང་ཡིན་པ་དེ་ཡོངས་སུ་རྫོགས་པར་མ་བྱས་སོ་ཞེས་བྱ་བ་དེ་ལྟར་ཤེས་པ་འམ། ཡང་ན་དེའི་རྫོགས་པར་བསྙེན་པ་མ་ཆགས་པ་ཉིད་དུ་ཤེས་པ་འདི་ལྟར་ཆོ་ག་ཡོངས་སུ་རྫོགས་པར་བྱས་མོད་ཀྱི། འོན་ཀྱང་མཁན་པོ་ཚུལ་ཁྲིམས་འཆལ་བ་ལ་སོགས་པའི་ཉེས་པས་བདག་གིས་རྫོགས་པར་བསྙེན་པར་མ་ཆགས་པ་ཉིད་དུ་དེ་ལྟར་ཤེས་ལ། དེས་དེ་ལྟར་ཤེས་བཞིན་དུ་ལན་གཉིས་སུ་དགེ་འདུན་དང་ལྷན་ཅིག་གསོ་སྦྱོང་ལ་སོགས་པའི་ལས་ཉམས་སུ་མྱོང་བར་གྱུར་ཅིང༌། དེ་ལྟར་ཤེས་པའི་དགེ་སློང་དེ་དགེ་འདུན་དང་ལྷན་ཅིག་གསོ་སྦྱོང་ལ་སོགས་པའི་ལས་ཉམས་སུ་མྱོང་བར་གྱུར་པ་ཉིད་ན། རྐུ་ཐབས་སུ་གནས་པ་ཉིད་དེ་ཉིད་ཡིན་ནོ། །ཉམས་སུ་མྱོང་བར་གྱུར་པའི་དངོས་པོ་ནི་ཉམས་སུ་མྱོང་བར་གྱུར་པ་ཉིད་དོ། །འོ་ན་འདུལ་བ་ལས། ཉེ་བ་འཁོར་གང་ཚུན་ཆད་ལན་གཉིས་སམ་གསུམ་གསོ་སྦྱོང་གི་ལས་དག་ཉམས་སུ་མྱོང་བར་གྱུར་པ་དེ་ཙམ་གྱིས་ན་རྐུ་ཐབས་སུ་གནས་པ་ཡིན་ནོ་ཞེས་གསུངས་ན། གསུམ་ཞེས་བྱ་བ་དེ་ཅིའི་ཕྱིར་མདོར་མ་བྲིས་ཤེ་ན། འདི་ལྟར་ལན་གཉིས་སུ་ལས་ཉམས་སུ་མྱོང་བར་གྱུར་པ་ཉིད་ཀྱི་ཚེ་ཁོ་ན་རྐུ་ཐབས་སུ་གནས་བ་ཡིན་པས་གསུམ་ཞེས་སྨོས་པ་ནི་རྒྱུན་བསྟན་པའི་ཕྱིར་རོ། །ལུང་ཡང་ཡོད་དེ། གཏམ་གྱི་གཞི་ལས་གཞི་གང་གིས་རྐུ་ཐབས་སུ་གནས་པ་རབ་ཏུ་དབྱུང་བར་མི་བགྱི། རྫོགས་པར་བསྙེན་པར་མི་བགྱི་བའི་གཞི་དེ་ཉིད་ཀྱིས་རབ་ཏུ་དབྱུང་བར་བགྱི་བ་དང༌། རྫོགས་པར་བསྙེན་པར་བགྱི་བ་མཆིས་སམ། བཀའ་སྩལ་པ་ཡོད་དོ་ཞེས་གསུངས་པ་ཡིན་ནོ། །གང་གིས་ལན་གཉིས་
སམ་གསུམ་གསོ་སྦྱོང་གི་ལས་དག་ཉམས་སུ་མྱོང་བར་འགྱུར་བ་དེ་ནི་རབ་ཏུ་དབྱུང་བར་མི་བྱ་རྫོགས་པར་བསྙེན་པར་མི་བྱའོ། གང་གིས་ལན་ཅིག་གསོ་སྦྱོང་ཉམས་སུ་མྱོང་བར་གྱུར་བ་དེ་ནི་རབ་ཏུ་དབྱུང་བར་བྱ། རྫོགས་པར་བསྙེན་པར་བྱའོ། །གལ་ཏེ་ལན་གསུམ་ལས་ཉམས་སུ་མྱོང་བར་གྱུར་པའི་ཚེ་ཁོ་ན་རྐུ་ཐབས་སུ་གནས་པ་ཡིན་པར་གྱུར་ན་དེའི་ཚེ་གཏམ་གྱི་གཞི་ལས་ལན་ཅིག་ཅེས་སྨོས་པར་མི་མཛད་ཅིང་ལན་གཉིས་ཞེས་སྨོས་པ་མཛད་པར་འགྱུར་རོ། །ཅིའི་ཕྱིར་འདིར་ལས་ཞེས་སྤྱིར་སྨོས་ལ་གསོ་སྦྱོང་ནི་མ་སྨོས་ཤེ་ན། གཙུག་ལག་ལས་གསོ་སྦྱོང་ཞེས་སྨོས་བ་ནི་མཚོན་བའི་ཕྱིར་ཡིན་ཏེ། དགེ་འདུན་དང་འབྲེལ་པའི་ལས་ཐམས་ཅད་ཀྱང་མཚོན་པར་བྱེད་དོ། །དེ་ལྟར་ནི་མ་ཚང་བ་རྫོགས་པར་བསྙེན་པར་བྱེད་པའི་ལྟུང་བྱེད་ཞུས་པ་ལས་ཀྱང༌། གང་གསོལ་བ་དང་བཞིའི་ལས་ཀྱིས་རྫོགས་པར་མ་བསྙེན་བར་དགེ་འདུན་གྱི་ལས་གསོ་སྦྱོང་ངམ་དགག་དབྱེ་འམ། གང་ཟག་བཅུ་གཉིས་བསྐོ་བ་དག་ཉམས་སུ་མྱོང་བར་གྱུར་པ་དེ་ཡང་དེ་ཙམ་གྱིས་ན་རྐུ་ཐབས་སུ་གནས་པ་ཡིན་ནོ་ཞེས་གསུངས་སོ། །ལས་ཞེས་སྨོས་པས་ནི་མཚོན་བ་ཁོ་ནའི་ཕྱིར་ཡིན་ཏེ། རྫོགས་པར་མ་བསྙེན་པས་བྱ་བ་མ་ཡིན་པ་དགེ་འདུན་ལ་རག་ལས་པ་དཔེར་ན་རབ་ཏུ་དབྱུང་བ་ཞུ་བ་ལ་སོགས་པ་གང་ཡིན་པ་དེ་ཉམས་སུ་མྱོང་བར་གྱུར་ན་ཡང་རྐུ་ཐབས་སུ་གནས་པ་ཉིད་ཡིན་ནོ། །ལ་ལ་ནི་འདི་སྐད་ཅེས་ལས་ཉམས་སུ་མྱོང་བས་རྐུ་ཐབས་སུ་གནས་པ་ཉིད་ཡིན་གྱི། འཕྲལ་གྱི་བྱ་བ་ཉམས་སུ་མྱོང་བས་ནི་མ་ཡིན་ནོ་ཞེས་ཟེར་རོ། །མུ་སྟེགས་ཅན་ཞུགས་པའོ་ཞེས་བྱ་བ་ནི། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་མུ་སྟེགས་ཅན་ཞུགས་པ་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པ་དག་བརྗོད་པར་བྱའོ། །མུ་སྟེགས་ཅན་ཞུགས་པའི་རང་གི་ངོ་བོ་ཡོངས་སུ་ཤེས་པར་བྱ་བའི་ཕྱིར། རབ་ཏུ་དབྱུང་བ་འདི་ཡང་དག་པར་བླངས་པ་ལྟ་བ་དེ་དང་ལྡན་པ་ཆོས་གོས་འདི་བོར་ཏེ། རྒྱལ་མཚན་དེས་དེ་སྐྱ་རེངས་ཤར་ན་དེ་ཉིད་ཡིན་ནོ་ཞེས་བྱ་བ་སྨྲས་ཏེ། རབ་ཏུ་བྱུང་བ་འདི་ཡང་དག་པར་བླངས་པ་ཞེས་བྱ་བ་ནི། དེས་རབ་ཏུ་བྱུང་བ་འདི་ཡང་དག་པར་བླངས་པ་སྟེ་དེའོ། །ལྟ་བ་དེ་དང་ལྡན་པ་ཞེས་བྱ་བ་ནི། མུ་སྟེགས་ཅན་དེ་དག་གི་ལྟ་བ་དེ་ལ་ཡོད་པས་ལྟ་བ་དེ་དང་ལྡན་པ་སྟེ་དེའོ། །ཆོས་གོས་འདི་བོར་ཏེ་ཞེས་བྱ་བ་ནི། དེ་བཞིན་གཤེགས་པའི་དགེ་སློང་གི་ཆ་
ལུགས་འདི་བོར་ཏེ་འོ། །རྒྱལ་མཚན་དེས་ཞེས་བྱ་བ་ནི། མུ་སྟེགས་ཅན་གྱི་རྒྱལ་མཚན་གྱིས་སོ། །དེར་ཞེས་བྱ་བ་ནི། མུ་སྟེགས་ཅན་གྱི་འདུག་གནས་སུའོ། །སྐྱ་རེངས་ཤར་ན་ཞེས་བྱ་བ་ནི། སྐྱ་རེངས་དང་པོ་ཤར་ནའོ། །དེ་ཉིད་ཡིན་ནོ་ཞེས་བྱ་བ་ནི། མུ་སྟེགས་ཅན་ཞུགས་པ་ཉིད་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གང་ལ་ལ་ཞིག་དེ་བཞིན་གཤེགས་པས་གསུངས་པའི་རབ་ཏུ་འབྱུང་བ་ཡང་དག་པར་བླངས་ནས། མུ་སྟེགས་ཅན་གྱི་ལྟ་བ་དན་ལྡན་ཞིང་ཆོས་གོས་འདི་བོར་ཏེ། མུ་སྟེགས་ཅན་གྱི་རྟགས་བླངས་ནས། མུ་སྟེགས་ཅན་གྱི་རྟགས་དེས་མུ་སྟེགས་ཅན་གྱི་འདུག་གནས་དེར་སྐྱ་རེངས་དང་པོ་འཆར་བར་བྱེད་ན། སྐྱ་རེངས་དང་པོ་འཆར་བའི་སྐད་ཅིག་དེ་ཉིད་ལ་མུ་སྟེགས་ཅན་ཞུགས་པ་ཡིན་པར་རིག་པར་བྱའོ། །མུ་སྟེགས་ཅན་ཞུགས་པ་རྣམ་པ་གཞན་ཡང་སྲིད་པར་བསྟན་པའི་ཕྱིར། དེ་མ་བྱས་པ་ཡང་རྐུ་ཐབས་དང་འདྲའོ་ཞེས་བྱ་བ་སྨྲས་ཏེ། དེ་མ་བྱས་པ་ཞེས་བྱ་བ་ནི། མུ་སྟེགས་ཅན་གྱི་ལྟ་བ་དང་ལྡན་པ་གང་གིས་མདོ་བསྟན་མ་ཐག་པའི་དངོས་པོ་དེ་མ་བྱས་པ་སྟེ། དེ་མ་བྱས་པའི་གང་ཟག་དེའོ། །མདོ་སྔ་མར་བསྟན་པ་དེ་བཞིན་གཤེགས་པའི་དགེ་སློང་གི་ཆ་ལུགས་པོར་ཏེ། མུ་སྟེགས་ཅན་གྱི་རྟགས་འདོད་པ་བགོས་ནས་མུ་སྟེགས་ཅན་གྱི་འདུག་གནས་སུ་སྐྱ་རེངས་ཤར་བ་དེ་མ་བྱས་པའོ། །ཡང་ཞེས་བྱ་བ་ནི། དེ་མ་བྱས་སུ་ཟིན་ཀྱང་མུ་སྟེགས་ཅན་ཞུགས་པ་ཉིད་ཡིན་པར་འགྱུར་བའོ། །ཇི་ལྟར་ཞེ་ན། རྐུ་ཐབས་དང་འདྲ་སྟེ། བསྟན་མ་ཐག་པར་ཇི་ལྟར་ལན་གཉིས་སུ་དགེ་འདུན་དང་ལྷན་ཅིག་ལས་ཉམས་སུ་མྱོང་བར་འགྱུར་བ་ཉིད་ན། རྐུ་ཐབས་སུ་གནས་པ་ཉིད་ཡིན་པ་དེ་བཞིན་དུ། མུ་སྟེགས་ཅན་གྱི་ལྟ་བ་དང་ལྡན་པ་དེས་མ་བྱས་སུ་ཟིན་ཀྱང༌། ལན་གཉིས་སུ་དགེ་འདུན་དང་ལྷན་ཅིག་ལས་ཉམས་སུ་མྱོང་བར་གྱུར་པ་ཉིད་ན། མུ་སྟེགས་ཅན་ཞུགས་པ་ཉིད་ཡིན་ནོ། །མ་བསད་པ་དང་ཞེས་བྱ་བ་ནི། མ་ལ་བསད་པའམ་མའི་བསད་པ་ནི་མ་བསད་པ་སྟེ། རབ་ཏུ་དབྱུང་བའི་ཕྱིར་ཉེ་བར་འོངས་པ་ལ་མ་བསད་པ་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པ་དག་བརྗོད་པར་བྱའོ། །ཕ་བསད་པ་དང༌། དག་བཅོམ་པ་བསད་པ་དང༌། དགེ་འདུན་གྱི་དབྱེན་བྱས་པ་དང་ཞེས་བྱ་དག་ཀྱང་དེ་ཁོ་ན་བཞིན་ནོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དག་
ཞེས་བྱ་བ་ལ། བསད་པའི་བསམ་པའི་ངན་སེམས་ཀྱིས་ཁྲག་ཕྱུང་བ་ནི། ངན་སེམས་ཀྱིས་ཁྲག་ཕྱུང་བ་སྟེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པ་དག་བརྗོད་པར་བྱའོ། །དགེ་སློང་མ་སུན་ཕྱུང་བ་དང་ཞེས་བྱ་བ་ཡང༌། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་དགེ་སློང་མ་སུན་ཕྱུང་བ་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པ་དག་བརྗོད་པར་བྱ་སྟེ། འདིའི་མཚན་ཉིད་ནི་འོག་ནས་སྟོན་ཏོ། །ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་ཞིག་བྱུང་བ་མ་ཡིན་ནམ་ཞེས་སོ་ཞེས་བྱ་བ་ཡང༌། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ཁྱོད་ཕམ་པར་གྱུར་པ་བཞི་ལས་ལྟུང་བ་གང་ཡང་རུང་བ་བྱུང་བ་ཞིག་མ་ཡིན་ནམ་ཞེས་དྲི་བར་བྱ་ཞིང་ཞེས་བྱ་བ་ལ་སོགས་པ་དག་བརྗོད་པར་བྱའོ། །གང་ཡང་རུང་བ་ཞིག་ཅེས་སྨོས་པས་ནི། གཅིག་གིས་ཀྱང་སྐྱེ་བའི་ཆོས་ཉིད་མེད་པ་ཡིན་ནོ་ཞེས་བྱ་བར་སྟོན་ཏོ། །ད་ནི་སྐྱེ་བའི་ཆོས་ཅན་གྱིས་རབ་ཏུ་དབྱུང་བར་མི་འོང་པ་དག་གི་མཚན་ཉིད་བསྟན་པར་བྱ་བའི་ཕྱིར། རྒྱུ་ལས་བཟློག་པའི་ཆད་པ་ཁས་མི་ལེན་པ་དག་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བྱ་བ་སྨྲས་ཏེ། ཆད་པ་ཁས་མི་ལེན་པ་ཁས་ལེན་པར་མི་བྱེད་མི་བསྒྲུབ་པ་དག་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བྱ་བར་སྦྱར་རོ། །ཅི་ཞིག་ཁས་མི་ལེན་ཞེ་ན། རྒྱུ་ལས་བཟློག་པ་ཞེས་བྱ་བ་སྟེ། རྒྱུ་གང་གིས་འཐབ་ཀྲོལ་བྱེད་པ་ཉིད་ལ་སོགས་པས་བསྡིགས་པ་ལ་སོགས་པའི་ཆད་པའི་ལས་བྱས་པར་གྱུར་པའི་རྒྱུ་དེ་ལས་བཟློག་པ་འཐབ་ཀྲོལ་མི་བྱེད་པ་ཉིད་ལ་སོགས་པ་ཁས་མི་ལེན་པ་དག་རབ་ཏུ་དབྱུང་བར་མི་བྱ་རྫོགས་པར་བསྙེན་པར་མི་བྱའོ་ཞེས་མདོའི་དོན་བསྟན་པ་ཡིན་ནོ། །གལ་ཏེ་དགེ་སློང་ཆད་པས་བཅད་པ་ཞིག་བསླབ་པ་ཕུལ་ནས་ཡང་རྫོགས་པར་བསྙེན་པ་གསོལ་ན། ཅི་རྫོགས་པར་བསྙེན་ནས་ཡང་བཟོད་པ་གསོལ་བར་བྱ་དགོས་སམ་ཞེ་ན། རྫོགས་པར་བསྙེན་ན་བཟོད་པ་གསོལ་ཟིན་པ་ཡིན་ནོ་ཞེས་བྱ་བ་སྨྲས་ཏེ། བཟོད་པ་མ་གསོལ་བ་ཞིག་རྫོགས་པར་བསྙེན་ན་ཡང་བཟོད་པ་གསོལ་མི་དགོས་ཏེ། རྫོགས་པར་བསྙེན་པ་ཉིད་བཟོད་པ་གསོལ་པ་ཡིན་པའི་ཕྱིར་རོ། །བཟོད་པ་ཞེས་བྱ་བ་ནི། བཟོད་པ་བྱ་བའོ། །བཙུན་པ་དགེ་སློང་དག་བསྡིགས་པའི་ལས་བགྱིས་ནས་རེ་ཞིག་རྫོགས་
པར་བསྙེན་པར་བགྱིད་ན། རྫོགས་པར་བསྙེན་ཞེས་བགྱི་འམ་རྫོགས་པར་མ་བསྙེན་ཞེས་བགྱི། ཉེ་བ་འཁོར་རྫོགས་པར་བསྙེན་ཞེས་བྱ་སྟེ། རྫོགས་པར་བསྙེན་པར་བྱེད་བ་དག་ལ་ནི་འགལ་ཚབས་ཅན་དུ་འགྱུར་ལ། བཟོད་པ་ནི་གསོལ་ཟིན་པ་ཞེས་བྱའོ་ཞེས་གླེང་གཞི་དག་ལས་གསུངས་སོ། །གལ་ཏེ་རྫོགས་པར་བསྙེན་པ་ན་རྒྱུ་ལས་བཟློག་པ་ཁས་མི་ལེན་ན་དེའི་ཚེ་ཇི་ལྟར་བྱ་ཞེ་ན། གལ་ཏེ་རྫོགས་པར་བསྙེན་ནས་ཁས་མི་ལེན་པ་ནི་ཚོགས་པ་ཡོད་ན་ཡང་ཆད་པས་བཅད་དོ་ཞེས་བྱ་བ་སྨྲས་ཏེ། གལ་ཏེ་རྫོགས་པར་བསྙེན་ནས་ཕྱིས་འཐབ་ཀྲོལ་མི་བྱེད་པ་ཉིད་ལ་སོགས་པ་ཁས་མི་ལེན་པ་དེ་ནི། གལ་ཏེ་ཚོགས་པ་ཡོད་ན་ཡང་ཆད་པའི་ལས་བྱེད་དུ་གཞུག་གོ་ཞེས་བྱ་བའི་ཐ་ཚིག་གོ །ཆད་པའི་ལས་བྱེད་དུ་བཅུག་ན་གལ་ཏེ་འདི་སྐད་ཅེས་ལྟུང་བ་མ་མཐོང་ངོ་ཞེས་ཟེར་ན་དེ་ལ་ཇི་ལྟར་འགྱུར་ཞེ་ན། དེའི་ཕྱིར་གལ་ཏེ་མ་མཐོང་ངོ་ཞེས་བརྫུན་ཟེར་ན་ལྟུང་བྱེད་དོ་ཞེས་བྱ་བ་སྨྲས་ཏེ། གལ་ཏེ་བརྫུན་དུ་འདི་སྐད་ཅེས་ལྟུང་བ་མ་མཐོང་ངོ་ཞེས་ཟེར་ན། དེའི་ཚེ་དེ་ལ་ལྟུང་བྱེད་ཀྱི་ལྟུང་བར་འགྱུར་རོ། །སྐྱེ་བའི་ཆོས་ལྷག་མ་བཀག་པ་རྣམས་ཀྱང་བསྟན་པའི་ཕྱིར། ལག་རྡུམ་དག་དང་རྐང་རྡུམ་དང༌། །ལག་སོར་ཟླུམ་པོར་འཇས་པ་དང༌། །མཆུ་མེད་ལུས་ལ་རྨ་མཚན་ཅན། །རྒན་ཆེས་པ་དང་གཞོན་ཆེས་དང༌། །ཐེང་པོ་སྨད་འཆལ་ཞར་བ་དང༌། །ལག་སོར་རྡུམ་རྒུར་མིའུ་ཐུང་དང༌། ཝ་བ་ལྐུགས་པ་འོན་པ་དང༌། །རྟེན་འཕྱེ་དང་ནི་རྐང་འབམ་དང༌། །བུད་མེད་ཀྱིས་དུབ་ཁུར་གྱིས་དབུ། །མི་གང་ལམ་གྱིས་དུབ་རྣམས་དང༌། །ཡ་ཟ་མ་ལུག་གཏའ་གམ་དང༌། །དེ་ལྟ་བུ་ཡི་མི་རྣམས་ནི། །དྲང་སྲོང་ཆེན་པོས་དགག་པར་མཛད། །མཛེས་པ་རབ་ཏུ་དབྱུང་བ་དང༌། །ཡོངས་སུ་དག་པ་རྫོགས་བསྙེན་པར། །རྫོགས་སངས་རྒྱས་ཀྱིས་རབ་མཁྱེན་ཏེ། །བདེན་པའི་མཚན་གྱིས་བཀའ་སྩལ་ཏོ། །ཞེས་བྱ་བ་སྨྲས་ཏེ། གང་དག་གི་ལག་པའི་མཁྲིག་མ་མན་ཆད་ཆད་པ་དེ་དག་ནི། ལག་རྡུམ་དག་གོ །གང་དག་གི་རྐང་པ་ལོང་བུ་མན་ཆད་ཆད་པ་དེ་དག་ནི། རྐང་རྡུམ་དག་གོ །གང་དག་གི་ལག་པའི་སོར་མོ་སྤྲུལ་གྱི་གདེངས་ཀ་འདྲ་བ་དག་ནི། ལག་སོར་ཟླུམ་པོར་འཇས་པ་དག་གོ །གང་དག་གི་མཆུ་གཉིས་མེད་པ་དག་ནི་མཆུ་མེད་དག་གོ །གང་དག་གི་ལུས་ལ་རྨ་མཚན་དག་ཡོད་པ་དེ་དག་ནི་ལུས་རྨ་མཚན་
ཅད་དག་སྟེ། སྣག་ཚ་ལ་སོགས་པས་ལག་པ་ལ་སོགས་པ་བྲིས་པ་ནི། ལུས་རྨ་མཚན་ཅན་ཡིན་ཏེ། ཁབ་ལ་སོགས་པས་གཙགས་ཤིང་ཁྱི་རྗེས་ལ་སོགས་པའི་མངོན་མཚན་དག་གིས་མཚན་བཏབ་པའི་ཕྱིར་རོ། །ལྕག་ལ་སོགས་པས་གཞུས་པའི་མྲ་མཚན་ཡང་ཡིན་ནོ། །རྒས་པས་སྦྱོར་མི་བཟོད་པ་དག་ནི་རྒན་ཆེས་པ་དག་གོ །ལོ་བཅོ་ལྔ་མ་ལོན་པ་བྱ་རོག་སྐྲོད་མི་ནུས་པ་དག་དང་བྱ་རོག་སྐྲོད་ནུས་པ་ལ་ལོ་བདུན་མ་ལོན་པ་དག་ནི་གཞོན་ཆེས་པ་དག་གོ །གང་རྐང་པ་འཐེང་ཞིང་ལེག་ལེག་པོར་འགྲོ་བ་ནི་ཐང་པོའོ། །བརླའི་ཕྱོགས་རླུང་བྱ་རྒོད་འགྲོས་ཀྱིས་ཀུན་དུ་ཉམས་པར་གྱུར་པ་ནི་སྨད་འཆལ་ལོ། །མིག་ཡ་གཅིག་བ་ནི་ཞར་བའོ། །གང་གི་མཁྲིག་མའི་ཕྱོགས་ན་མཚན་མ་ཙམ་གྱི་ལག་པ་ཡོད་ཅིང་ཅུང་ཟད་ཀྱང་བྱེད་མི་ནུས་པ་ནི་ལག་སོར་རྡུམ་པོའོ། །བྲང་དང་སྒལ་ཚིགས་ཞོམ་པན་སྒྱུར་པོའོ། །ཧ་ཅང་ལུས་ཐུང་བར་གྲགས་པ་ནི་མིའུ་ཐུང་ངོ༌། །གང་གི་ལྐོག་མ་ལ་ཝ་བ་ཡོད་པ་དེ་ནི་ཝ་བ་ཅན་ནོ། །སྨྲ་མི་ནུས་པ་ནི་ལྐུགས་པའོ། །དོན་དང་བཅས་པའི་སྒྲ་ཐོས་པར་མི་འགྱུར་བ་ནི་འོན་པའོ། །གང་ལག་པ་གཉིས་ལག་རྟེན་ལ་བརྟེན་ན་གཟུགས་བཞིས་འཕྱེ་བ་ནི་རྟེན་འབྱེའོ། །མིང་གཉིས་པ་ནི་གྲུམ་པོ་ཞེས་ཀྱང་བྱའོ། །གང་གི་རྐང་པ་ལ་ནད་ཀྱི་རིགས་རྐང་འབམ་ཡོད་པ་དེ་ནི་རྐང་འབམ་མོ། །བུད་མེད་དག་ཤས་ཆེར་བསྟེན་པས་མཐུ་དང་གཟི་བརྗིད་ཟད་ཅིང་ལུས་མི་བདེ་བ་བུད་མེད་ཀྱིས་དུབ་བ་དག་གོ །དེ་བཞིན་དུ་མི་བཟོད་པའི་ཁུར་ཐོགས་པའི་ཕྱི་ཁུར་གྱིས་དུབ་པ་དག་གོ །ལམ་དུ་འགྲོ་བ་དྲགས་པའི་ཕྱིར་ལམ་གྱིས་དུབ་པ་རྣམས་སོ། །ཡ་ཟ་མ་ལུག་ཅེས་བྱ་བ་ནི། གང་དག་ལ་ཇི་ལྟར་ཟོས་པ་མ་ཞུ་བར་ཐུར་དུ་འབྱུང་བའོ། །གཞན་དག་ནི་འདི་སྐད་ཅེས་ཟེར་ཏེ། གང་གི་རྐང་པ་ལྕགས་སྒྲོག་གིས་ཉམས་པ་ལྕགས་སྒྲོག་ལས་བཀྲོལ་ཡང་བཅིངས་པ་བཞིན་དུ་འགྲོ་བ་ནི་སྒྲོག་བཀྲོལ་ཞེས་བྱའོ་ཞེས་ཟེར་རོ། །དེ་ལ་དང་པོ་ནི་ཁ་ཟས་ལ་སོགས་པ་ཐུར་དུ་འཛག་པ་དེ་ནི་ཡ་ཟ་མ་ལུག་གོ །ཕྱོགས་ཕྱི་མ་ལ་ནི་ལྕགས་སྒྲོག་གིས་བཅིངས་པ་ལས་བཀྲོལ་པས་སྒྲོག་བཀྲོལ་ཞེས་བྱའོ། །ཡང་ན་བཀྲོལ་ཡང་ལྕགས་སྒྲོག་ཏུ་བཅུག་པ་བཞིན་དུ་རྐང་པ་ཁྲིས་ཁྲིས་པོར་འགྲོ་བའི་ཕྱིར་སྒྲོབ་གྲོལ་ཞེས་བྱའོ། །གཏའ་གམ་པ་ཞེས་བྱ་བ་ནི། གང་དག་ལང་ཚོ་ལ་མ་བབ་པ་ཁོ་ནར་ནད་ལ་སོགས་པས་དེ་ལྟར་ཉམས་པར་གྱུར་ཅིང༌། ཏེ་པོར་
རྒས་པས་ཉམས་པ་བཞིན་དུ་བྱ་བ་ཅུང་ཟད་ཀྱང་བྱེད་མི་ནུས་པ་སྟེ། བྱུང་བ་ཉིད་ནས་དེ་དག་གི་ལང་ཚོ་ཉམས་པར་གྱུར་ཅེས་བྱ་བའི་ཐ་ཚིག་གོ །དེ་ལྟ་བུའི་ཞེས་བྱ་བ་ནི། རྣམ་པ་དེ་ལྟ་བུའོ། །མི་རྣམས་ནི་ཞེས་བྱ་བ་ནི། ལག་རྡུམ་ལ་སོགས་པའི་མི་རྣམས་སོ། །དྲང་སྲོང་ཆེན་པོས་ཞེས་བྱ་བ་ནི། དེ་ནི་དྲང་སྲོང་ཡང་ཡིན་ལ་ཆེན་པོ་ཡང་ཡིན་པས་དྲང་སྲོང་ཆེན་པོས་ཏེ་དེས་སོ། །དགག་པ་མཛད་ཅེས་བྱ་བ་ནི། རབ་ཏུ་དབྱུང་བ་དང་རྫོགས་པར་བསྙེན་པའི་ཕྱིར་བཀག་པའོ། །མཛེས་པ་རབ་ཏུ་དབྱུང་བ་དང་ཞེས་བྱ་བ་འདིས་ནི། རིགས་དང་ལུས་ལ་སྐྱོན་ཆགས་པ་ཉིད་སེལ་བར་བྱེད་དོ། །ཡོངས་སུ་དག་པ་རྫོགས་པར་བསྙེན་པ་ཞེས་བྱ་བ་འདིས་ནི། མ་བསད་པ་ལ་སོགས་པ་བར་ཆད་ཉིད་དག་སེལ་པར་བྱེད་དོ། །རྫོགས་སངས་རྒྱས་ཀྱིས་ཞེས་བྱ་བ་ནི། ཡང་དག་པར་རྫོགས་པའི་སངས་རྒྱས་ཡིན་པའི་ཕྱིར་ཏེ་དེས་སོ། །རབ་མཁྱེན་ཏེ་ཞེས་བྱ་བ་ནི། དངོས་པོ་ཐམས་ཅད་མངོན་པར་མཁྱེན་པའི་ཕྱིར་རོ། །བདེན་པའི་མཚན་གྱིས་ཞེས་བྱ་བ་ནི། གང་གི་མིང་བདེན་པ་དེ་ནི་བདེན་པའི་མཚན་ཏེ། རྫོགས་སངས་རྒྱས་ཀྱིས་ཞེས་བྱ་བ་དེས་སོ། །བཀའ་སྩལ་ཏེ་ཞེས་བྱ་བ་ནི་གསུངས་པའོ། །བསྡུ་བར་བྱ་བའི་སྐབས་ཏེ། རབ་ཏུ་འབྱུང་བའི་གཞི་རྫོགས་སོ།། །།ད་ནི་རབ་ཏུ་འབྱུང་བའི་གཞིའི་སྐབས་ཕྲན་ཚེགས་ལ་སོགས་པ་ལས་གསུངས་པ་བསྡུ་བར་བྱ་སྟེ། བཀོལ་བ་རྒྱལ་པོས་བཀྲབས་པའོ། །ཞེས་བྱ་བ་ནི། རྒྱལ་པོས་བཀྲབས་པ་བཀོལ་བ་དང་སྦྱར་བ་ཡིན་ནོ། །རྒྱལ་པོས་བཀྲབས་པ་ལ་སྤྱིར་རབ་ཏུ་དབྱུང་བ་བཀག་པར་གྱུར་པ་ལ་ད་ནི་བྱེ་བྲག་ཏུ་བྱ་བའི་ཕྱིར། རྒྱལ་པོས་མ་གནང་བ་ཡུལ་ཐ་ག་མི་རིང་བའོ་ཞེས་བྱ་བ་སྨྲས་ཏེ། དེ་ལྟར་ན་འདིར་ཚིག་གི་དོན་འདི་འབྱུང་སྟེ། རབ་ཏུ་བྱུང་བའི་ཕྱིར་ཉེ་བར་འོངས་པ་ལ་རྒྱལ་པོས་བཀྲབས་པ་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། རྒྱལ་པོས་བཀྲབས་པ་རྒྱལ་པོས་མ་གནང་བ་ཡུལ་ཐག་མི་རིང་བ་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ། །ཡུལ་གང་ན་རྒྱལ་པོ་གང་གི་ཚིག་མངོན་སུམ་མམ། བརྒྱུད་པས་འདའ་བར་བྱ་བ་མ་ཡིན་པ་དེ་ནི་འདིར་ཡུལ་ཐག་མི་རིང་བའོ། །བཀོལ་བ་ཆོམ་རྐུན་པར་གྲགས་པའོ་ཞེས་བྱ་བ་ལ། བཀོལ་བ་ཞེས་བྱ་བ་ནི་དབང་དུ་བྱེད་པ་ཉིད་ཡིན་པའི་ཕྱིར་མདོ་སྔ་མ་ལས་
བཀོལ་བ་ཞེས་སྨོས་པའི་རྗེས་སུ་འཇུག་པར་འགྱུར་བ་ཡིན་མོད་ཀྱི། ཡང་བཀོལ་བ་ཞེས་སྨོས་པ་ནི་རྒྱལ་པོས་མ་གནང་བ་ཡུལ་ཐག་མི་རིང་བ་བྱ་བ་དེ་ལས་བཀར་བའི་དོན་ཏེ། རབ་ཏུ་འབྱུང་བའི་ཕྱིར་ཉེ་བར་འོངས་པ་ལ་ཆོམ་རྐུན་པར་གྲགས་པ་མ་ཡིན་ནམ་ཞེས་དྲི་བར་བྱ་ཞིང་རྫོགས་པར་བསྙེན་པར་བྱེད་པ་དག་གིས་ཀྱང་དྲི་བར་བྱ་སྟེ། ཆོམ་རྐུན་པར་གྲགས་པ་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱའོ་ཞེས་བརྗོད་པར་བྱའོ། །ཆོམ་རྐུན་པར་རབ་ཏུ་ཤེས་པ་ནི་གྲགས་པ་སྟེ། གང་རབ་ཏུ་ཤེས་པར་གྱུར་པ་ཉིད་དེ་ཁོ་ན་དེར་གྲགས་པ་ཉིད་ཡིན་གྱི་གཞན་དུ་ན་མ་ཡིན་ནོ། །ལྷམ་མཁན་དང་གདོལ་པ་དང་གཡུང་པོ་དང་དེ་ལྟ་བུ་རབ་ཏུ་དབྱུང་བར་མི་བྱའོ་ཞེས་བྱ་བ་ལ། ལྷམ་མཁན་ཞེས་བྱ་བ་ནི་ཀོ་ལྤགས་མཁན་ནོ། །གདོལ་པ་ཞེས་བྱ་བ་ནི་རིགས་དན་ནོ། །གཡུང་པོ་ཞེས་བྱ་བ་ནི་ཀླ་ཀློའོ། །དེ་ལྟ་བུ་ཞེས་བྱ་བ་ནི་ཟན་བཟའ་བར་མི་བྱ་བ་སྟེ། དེ་དག་ནི་རབ་ཏུ་དབྱུང་བའི་ཕྱིར་ཡང་བཀག་པ་ཉིད་ཡིན་པས་དགེ་ཚུལ་ཉིད་ལ་སོགས་པ་དག་གི་ཕྱིར་ཆེས་ཤིན་ཏུ་བཀག་པ་ཡིན་པར་རིག་པར་བྱའོ། །སྔར་བསྟན་པའི་ལུས་ལ་སྐྱོན་ཆགས་པ་ལས་གཞན་པའི་ལུས་ལ་སྐྱོན་ཆགས་པ་དག་ཀྱང་བསྟན་པར་འདོད་ནས། ལག་རྡུམ་ལ་སོགས་པ་ནི་མཚོན་པ་ཡིན་ནོ་ཞེས་བྱ་བ་སྨྲས་ཏེ། རབ་ཏུ་འབྱུང་བའི་གཞིར། ལག་རྡུམ་དག་དང་རྐང་རྡུམ་དང༌། །ཞེས་བྱ་བ་ལ་སོགས་པ་སྨོས་པ་དེ་ནི་མཚོན་པ་ཡིན་གྱི། སྐྲ་སེར་ལ་སོགས་པ་དག་ཀྱང་རིག་པར་བྱ་སྟེ། ཡོངས་སུ་བགྲང་བ་ནི་མ་ཡིན་ནོ། །མཚོན་པས་འཕངས་པ་བསྟན་པའི་ཕྱིར། །སྐྲ་སེར་དང་ནི་སྐྲ་སེར་སྐྱ། །དེ་བཞིན་སྐྲ་ནི་ལྗང་གུ་ཁ། །མི་རྣམས་སྐྲ་ནི་དཀར་བ་དང༌། །གླང་ཆེན་སྤུ་འདྲ་སྐྲ་མེད་དང༌། །མགོ་འབར་འབུར་ཅན་གླང་པོ་ཆེ། །ཧ་ཅང་སྦོམ་དང་ལུས་གླེབས་འདྲ། །བོང་བུ་ཕག་གི་མགོ་ལྟ་བུ། །མགོ་གཉིས་པ་དང་མགོའུ་ཆུང་དང༌། །གླང་ཆེན་རྣ་འདྲ་རྟ་རྣ་འདྲ། །བ་ལང་རྣ་འདྲ་སྤྲེའུ་རྣ་འདྲ། །བོང་བུའི་རྣ་འདྲ་ཕག་རྣ་འདྲ། །རྣ་གཅིག་པ་དང་རྣ་མེད་དང༌། །མིག་དམར་ཧ་ཅང་མིག་ཆེ་དང༌། །མིག་ཆུང་མིག་ནི་ཧ་ཅང་སེར། །ཤེལ་མིག་མིག་ཆུ་བུར་ལྟ་བུ། །མིག་གཅིག་པ་དང་མིག་མེད་དང༌། །གླང་ཆེན་སྣ་འདྲ་རྟ་སྣ་འདྲ། །བ་ལང་སྣ་འདྲ་སྤྲེའུ་སྣ་འདྲ། །བོང་བུའི་སྣ་འདྲ་ཕག་སྣ་
འདྲ། །སྣ་སྦུབས་གཅིག་དང་སྣ་མེད་དང༌། །གླང་ཆེན་ཀོས་འདྲ་རྟ་ཀོས་འདྲ། །བ་ལང་ཀོས་འདྲ་སྤྲེའུ་ཀོས་འདྲ། །བོང་བུའི་ཀོས་འདྲ་ཕག་ཀོས་འདྲ། །ཀོས་སྨྱུང་དང་ནི་ཀོས་མེད་དང༌། །གླང་ཆེན་སོ་འདྲ་རྟ་སོ་འདྲ། །བ་ལང་སོ་འདྲ་སྤྲེའུ་སོ་འདྲ། །བོང་བུའི་སོ་འདྲ་ཕག་སོ་འདྲ། །སོ་གཅིག་པ་དང་སོ་མེད་དང༌། །མགུལ་རིང་ཆེས་དང་མཇིང་ནུབ་དང༌། །ཕྲག་མིག་དང་ནི་ཆེས་སྒུར་དང༌། །ཕེ་མཚན་ཆད་དང་རླིག་རླུགས་དང༌། །རླིག་གཅིག་པ་དང་རླིག་མེད་དང༌། །ཧ་ཅང་རིང་དང་ཧ་ཅང་ཐུང༌། །སྐེམ་པོ་མ་འོས་ངལ་སྐྱེན་དང༌། །ཤ་མདོག་ཁ་དོག་རྣམ་བཞི་དང༌། །དེ་བཞིན་གྱོལ་པོ་ལུས་ཉམས་པའོ། །ཞེས་བྱ་བ་སྨྲས་སོ། །གང་དག་གི་སྐྲ་ངོ་བོ་ཉིད་ཀྱིས་ཡུང་གིས་ཁ་བསྒྱུར་བ་ལྟ་བུ་དེ་དག་ནི་སྐྲ་སེར་དག་ཡིན་ནོ། །གང་དག་གི་སྐྲ་སེང་གེའི་ལྟ་བུ་དེ་དག་ནི། སྐྲ་སེར་སྐྱ་དག་ཡིན་ནོ། །གང་དག་གི་སྐྲ་ངོ་བོ་ཉིད་ཀྱིས་རམས་ཀྱིས་ཁ་བསྒྱུར་བ་ལྟ་བུ་དེ་དག་ནི་སྐྲ་ལྗང་གུ་ཁ་དག་ཡིན་ནོ། །གང་དག་གི་སྐྲ་སྐྱེས་པ་ཁོ་ན་ནས་དཀར་བ་དེ་དག་ནི། །སྐྲ་དཀར་བ་དག་ཡིན་ཏེ། མགོ་སྐྱར་གྱུར་པ་ནི་མ་གཏོགས་སོ། །གང་དག་གི་སྐྲ་གླང་པོ་ཆེའི་ལྟ་བུ་དེ་དག་ནི་གླང་ཆེན་སྐྲ་འདྲ་སྟེ། སྐྲ་གླང་པོ་ཆེའི་སྤུ་འདྲ་བ་དག་ཡིན་ནོ། །གང་དག་གི་མགོ་བོ་ཟངས་མའི་བུམ་པ་ལྟར་འཇམ་ཞིང་སྐྲ་མེད་པ་དེ་དག་ནི་སྐྲ་མེད་པ་དག་ཡིན་ནོ། །གང་དག་གི་མགོ་བོ་ལ་སུལ་གསུམ་མམ་བཞི་ཡོད་ལ་དེ་དག་གི་འབར་འབུར་དུ་མངོན་པ་དེ་དག་ནི་མགོ་འབར་འབུར་ཅན་དག་ཡིན་ནོ། །གང་དག་གི་མགོ་ལུས་ལ་ལྟོས་ནས་ཚད་ཧ་ཅང་ཆེ་བར་མངོན་པ་དེ་ནི་གླང་པོ་ཆེ་ཡིན་ནོ། །གང་དག་གི་ལུས་ཧ་ཅང་ཡང་སྦོམ་པས་ལས་སུ་མི་རུང་བ་དེ་དག་ནི་ཧ་ཅང་སྦོམ་པ་དག་ཡིན་ནོ། །གང་དག་གི་ལུས་འབྲས་ཀྱི་སྲུགས་གླེབས་པ་འདྲ་བར་ལེབ་ལེབ་པོར་འདུག་པ་དེ་དག་ནི་ལུས་གླེབས་འདྲ་བ་དག་ཡིན་ཏེ། དཔེར་ན་འབྲས་ཐུག་པོ་ཆེའི་སྲུགས་གཏུན་བུ་དག་གིས་གླེབས་པ་ལེབ་ལེབ་པོར་གྱུར་ཅིང་རྔམས་སྲབ་མོར་གྱུར་བ་དེ་དག་ནི་གླེབས་པ་ཞེས་བྱ་སྟེ། དེ་དག་གི་ལུས་སམ་མགོ་ཡང་དེ་དང་འདྲ་བའི་ཐ་ཚིག་གོ །གང་དག་གི་མགོ་བོང་བུ་དང་ཕག་གི་མགོ་འདྲ་བ་དེ་དག་ནི་བོང་བུ་ཕག་གི་མགོ་ལྟ་བུ་སྟེ། མགོ་བོང་བུའི་ལྟ་བུ་དང་མགོ་ཕག་གི་ལྟ་བུ་དག་ཡིན་ནོ། །གང་དག་ལ་མགོ་གཉིས་ཡོད་པ་དེ་དག་ནི་མགོ་གཉིས་པ་དག་ཡིན་ནོ། །གང་
དག་ལ་ཕྲལ་བ་ཡན་ཆད་མཚོག་མ་མེད་པ་དེ་དག་ནི་མགོའུ་ཆུང་དག་ཡིན་པར་ཤེས་པར་བྱའོ། །ཁ་ཅིག་ནི་མགྲིན་པ་ཡན་ཆད་མེད་དེ་བྲང་ལ་ཁ་སྣ་ལ་སོགས་པ་ཡོད་པའི་ཕྱིར་རོ་ཞེས་ཀྱང་ཟེར་རོ། །གང་དག་གི་རྣ་བ་གླང་པོ་ཆེའི་འདྲ་བ་དེ་དག་ནི་གླང་ཆེན་རྣ་འདྲ་སྟེ། རྣ་བ་གླང་པོ་ཆེའི་ལྟ་བུ་དག་ཡིན་ནོ། །གང་དག་གི་རྣ་བ་རྟའི་འདྲ་བ་དེ་དག་ནི་རྟ་རྣ་འདྲ་སྟེ་རྣ་བ་རྟའི་ལྟ་བུ་དག་ཡིན་ནོ། །གང་དག་གི་རྣ་བ་བ་ལང་དང་སྤྲེའུ་འདྲ་བ་དེ་དག་ནི་བ་ལང་རྣ་འདྲ་སྤྲེའུ་རྣ་འདྲ་སྟེ། རྣ་བ་བ་ལང་གི་ལྟ་བུ་དང་རྣ་བ་སྤྲེའུའི་ལྟ་བུ་དག་ཡིན་ནོ། །གང་དག་གི་རྣ་བ་བོང་བུ་དང་ཕག་གི་འདྲ་བ་དེ་དག་ནི་བོང་བུའི་རྣ་འདྲ་ཕག་རྣ་འདྲ་སྟེ། རྣ་བ་བོང་བུའི་ལྟ་བུ་དང་རྣ་བ་ཕག་གི་ལྟ་བུ་དག་ཡིན་ནོ། །གང་དག་ལ་རྣ་བ་ཡ་གཅིག་ཡོད་པ་དེ་དག་ནི་རྣ་བ་གཅིག་པ་དག་ཡིན་ནོ། །གང་དག་ལ་རྣ་བ་མེད་པ་དེ་དག་ནི་རྣ་མེད་དག་ཡིན་ནོ། །གང་དག་གི་མིག་ཙན་དན་དམར་པོ་ལྟར་དམར་བ་དེ་དག་ནི་མིག་དམར་པ་དག་ཡིན་ནོ། །གང་དག་གི་མིག་ཚད་ལས་ཧ་ཅང་འདས་ཏེ་རྐྱེན་དུ་མི་འབབ་པ་དེ་དག་ནི་ཧ་ཅང་མིག་ཆེ་བ་དག་ཡིན་ནོ། །གང་དག་གི་མིག་ཧ་ཅང་ཆུང་ཞིང་ཟླུམ་པ་དེ་དག་ནི་མིག་ཆུང་དག་ཡིན་ནོ། །ཁ་ཅིག་ནི་གང་གི་མིག་ལྤགས་ཤིང་ཏུ་དམར་ལ་རྫི་མ་མེད་པར་གྱུར་པ་དེ་དག་ནི་མིག་མི་སྡུག་པས་མིག་ཆུང་ཞེས་བྱའོ་ཞེས་ཟེར་རོ། །གང་དག་གི་མིག་ལ་ཁ་དོག་དམར་པོ་དང་སེར་པོ་འདྲེན་མར་ཡོད་པ་དེ་དག་ནི་མིག་ཧ་ཅང་སེར་བ་དག་ཡིན་ནོ། །གང་དག་གི་མིག་མཆིང་བུ་ལྟར་འཚེར་བ་དེ་དག་ནི་ཤེལ་མིག་དག་ཡིན་ནོ། །གང་དག་གི་མིག་ཆུའི་ཆུང་བུར་ལྟར་ཕྱི་རོལ་དུ་རློ་བ་དེ་དག་ནི་མིག་ཆུ་བུར་ལྟ་བུ་དག་ཡིན་ནོ། །གང་དག་གི་མིག་སྐྱེས་པ་ཉིད་ནས་ཡ་གཅིག་ལས་མེད་པ་དེ་དག་ནི་མིག་གཅིག་པ་དག་ཡིན་ཏེ། དེའི་ཕྱིར་དེ་ཞར་བ་ལ་སོགས་པ་ལས་ལོགས་ཤིག་ཏུ་རྣམ་པར་གཞག་གོ །གང་དག་ལ་མིག་མེད་པ་དེ་དག་ནི་མིག་མེད་པ་དག་ཡིན་ནོ། །གང་དག་གི་སྣ་གླང་པོ་ཆེ་ལ་སོགས་པའི་འདྲ་བ་དེ་དག་ནི་གླང་ཆེན་སྣ་འདྲ་ཞེས་བྱ་བ་ལ་སོགས་པ་སྟེ། སྣ་གླང་པོ་ཆེའི་ལྟ་བུ་དང༌། སྣ་རྟའི་ལྟ་བུ་དང༌། སྣ་བ་ལང་གི་ལྟ་བུ་དང༌། སྣ་སྤྲེའུའི་ལྟ་བུ་དང༌། སྣ་བོང་བུའི་ལྟ་བུ་དང༌། སྣ་ཕག་གི་ལྟ་བུ་དག་ཡིན་ནོ། །གང་དག་ལ་སྣའི་བུ་ག་གཅིག་ཡོད་པ་དེ་དག་ནི་སྣ་སྦུབས་གཅིག་པ་དག་ཡིན་ནོ། །གང་དག་ལ་སྣ་མེད་པ་དེ་དག་ནི་སྣ་མེད་
དག་ཡིན་ནོ། །གང་དག་གི་ཀོ་སྐོ་གླང་པོ་ཆེའི་འདྲ་བ་དེ་དག་ནི་གླང་ཆེན་ཀོས་འདྲ་སྟེ། ཀོ་སྐོ་གླང་པོ་ཆེའི་ལྟ་བུ་དག་ཡིན་ནོ། །དེ་བཞིན་དུ་གང་དག་གི་ཀོ་སྐོ་རྟ་ལ་སོགས་པའི་འདྲ་བ་དེ་དག་ནི་རྟ་ཀོས་འདྲ་ཞེས་བྱ་བ་ལ་སོགས་པས་རིག་པར་བྱ་སྟེ། ཀོ་སྐོ་རྟའི་ལྟ་བུ་དང༌། ཀོ་སྐོ་བ་ལང་གི་ལྟ་བུ་དང༌། ཀོ་སྐོ་སྤྲེའུའི་ལྟ་བུ་དང༌། ཀོ་སྐོ་བོང་བུའི་ལྟ་བུ་དང༌། ཀོ་སྐོ་ཕག་གི་ལྟ་བུ་དག་ཡིན་ནོ། །གང་དག་ལ་ཀོ་སྐོ་གཡས་པའམ། གཡོན་པ་གཅིག་ཁོ་ན་ཡོད་པ་དེ་དག་ནི་ཀོས་སྨྱུང་དག་ཡིན་ནོ། །གང་དག་ལ་ཀོ་སྐོ་མེད་པ་དེ་དག་ནི་ཀོ་སྐོ་མེད་པ་དག་ཡིན་ནོ། གང་དག་གི་སོ་གླང་པོ་ཆེའི་འདྲ་བ་དེ་དག་ནི་གླང་ཆེན་སོ་འདྲ་སྟེ། སོ་གླང་པོ་ཆེའི་ལྟ་བུ་དག་ཡིན་ནོ། །དེ་བཞིན་དུ་གང་དག་གི་སོ་རྟ་ལ་སོགས་པའི་འདྲ་བ་དེ་དག་ནི་རྟ་སོ་འདྲ་ཞེས་བྱ་བ་ལ་སོགས་པས་རིག་པར་བྱ་སྟེ། སོ་རྟའི་ལྟ་བུ་དང༌། སོ་བ་གླང་གི་ལྟ་བུ་དང༌། སོ་སྤྲེའུའི་ལྟ་བུ་དང༌། སོ་བོང་བུའི་ལྟ་བུ་དང༌། སོ་ཕག་གི་ལྟ་བུ་དག་ཡིན་ནོ། །གང་དག་ལ་སོ་གཅིག་ཡོད་པ་དེ་དག་ནི་སོ་གཅིག་པ་དག་ཡིན་ནོ། །གང་དག་ལ་སོ་མེད་པ་དེ་དག་ནི་སོ་མེད་དག་ཡིན་ནོ། །གང་དག་གི་མགུལ་པ་ཧ་ཅང་རིང་ཆེས་པ་དེ་དག་ནི་མགུལ་རིང་ཆེས་པ་དག་ཡིན་ནོ། །གང་དག་ལ་མགུལ་མེད་ཅིང་མགོ་ཐལ་གོང་ལ་འབྱར་བ་དེ་དག་ནི་མཇིང་ནུབ་དག་གོ །གང་དག་གི་མགོ་མདུན་དུ་གུག་པའི་ཕྱིར་མིག་ཕྲག་པ་དང་མཉམ་པ་དེ་དག་ནི་ཕྲག་མིག་དག་ཡིན་ནོ། །ཡང་ན་གང་དག་ལ་ཕྲག་པའི་ཕྱོགས་ཁོ་ན་ན་མིག་ཡོད་པ་དེ་དག་ནི་ཕྲག་མིག་དག་ཡིན་ནོ། །མི་སྡུག་རབ་ཏུ་སྒུར་བ་དག་ནི་ཆེས་སྒུར་བ་དག་ཡིན་ནོ། །གང་དག་གི་ཕོ་མཚན་ཆད་པ་དེ་དག་ནི་ཕོ་མཚན་ཆད་པ་དག་ཡིན་ཏེ། སྐྱེས་པའི་གཅིབ་འབྱུང་བ་ནི་ཕོ་མཚན་ཞེས་བྱའོ། །གང་དག་གི་རླིག་པ་རླུང་གིས་རླུགས་པར་གྱུར་པ་དེ་དག་ནི་རླིག་རླུགས་དག་ཡིན་ནོ། །གང་དག་ལ་རླིག་པའི་འབྲས་བུ་ཡ་གཅིག་ཡོད་པ་དེ་དག་ནི་རླིག་གཅིག་དག་ཡིན་ནོ། །གང་དག་ལ་རླིག་པ་མེད་པ་དེ་དག་ནི་རླིག་མེད་དག་ཡིན་ནོ། །ཚད་ལས་ཧ་ཅང་འདས་པ་དག་ནི་ཧ་ཅང་རིང་བ་དག་ཡིན་ནོ། །ཧ་ཅང་འབོལ་བུ་ཐུང་དག་ནི་ཧ་ཅང་ཐུང་བ་དག་ཡིན་ནོ། །ལུས་སྐེམ་པ་དག་ནི་སྐེམ་པོ་དག་ཡིན་ནོ། །གང་དག་བརྩལ་བ་ཆུང་ངུས་ཀྱང་དབུགས་བརྫངས་པ་ལ་སོགས་པའི་
སྐྱོན་འབྱུང་བར་འགྱུར་བ་དེ་དག་ནི་མ་འོངས་པར་ངལ་སྐྱེན་པ་ཞེས་བྱའོ། །ངལ་བ་ནི་ཆད་པའི་རྣམ་གྲངས་ཡིན་པའི་ཕྱིར་ལས་ཆུང་ཟད་ཀྱང་མི་བཟོད་ཅེས་བྱ་བའི་ཐ་ཚིག་གོ །ཤ་མདོག་ཁ་དོག་རྣམ་བཞི་དང༌། །ཞེས་བྱ་བ་ནི། ཤ་མདོག་སྔོ་ཆེས་པ་དང༌། ཤ་མདོག་སེར་ཆེས་པ་དང༌། ཤ་མདོག་དཀར་ཆེས་པ་དང་དམར་བ་དག་སྟེ། སྨད་པར་བྱ་བའི་ཤ་མདོག་དེ་དག་དགག་པ་ཡིན་གྱི། ལྷ་རྣམས་ཀྱི་གཟུགས་མཛེས་པ་ལྟ་བུ་དག་ནི་མ་གཏོགས་སོ། །གྱོལ་པོ་ཞེས་བྱ་བ་ནི་རྐང་ཡོན་དག་གོ །ཡང་ན་རྐང་པ་ས་ལ་འཆལ་ཞིང་འགྲོ་བ་དག་གོ །གང་དག་གི་རྐང་པ་གཉིས་ཧ་ཅང་གདངས་ཏེ་འགྲོ་བ་དེ་དག་ནི་ལུས་ཉམས་པ་དག་ཡིན་ནོ། །ཡང་ན་གང་གི་རྐང་པ་གཉིས་གཅིག་གི་སྟེང་དུ་གཅིག་འདོར་ཞིང་འགྲོ་བ་དེ་དག་ནི་ལུས་ཉམས་པ་དག་ཡིན་ནོ། །རྣམ་པ་དེ་ལྟ་བུ་དག་གི་དགག་པ་དེ་ཡང་རབ་ཏུ་གཟུང་བར་བྱའོ་ཞེས་བྱ་བ་ནི། ལག་རྡུམ་ལ་སོགས་པའི་དགག་པ་འབའ་ཞིག་རབ་ཏུ་གཟུང་བར་བྱ་བ་མ་ཡིན་གྱི། འདི་ལྟར་སྐྲ་སེར་བ་ལ་སོགས་པ་རྣམ་པ་དེ་ལྟ་བུ་དག་གི་དགག་པ་དེ་ཡང་རབ་ཏུ་བསྒྲིམས་ཏེ་གཟུང་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་རེ་ཞིག་རྣམ་པ་དེ་ལྟ་བུ་དག་རབ་ཏུ་དབྱུང་བར་མི་བྱ་རྫོགས་པར་བསྙེན་པར་མི་བྱའོ་ཞེས་བསྟན་ནས། ད་ནི་རབ་ཏུ་བྱུང་ཞིང་རྫོགས་པར་བསྙེན་ན་ཡང་བསྡུ་བར་མི་བྱའོ་ཞེས་བསྟན་པའི་ཕྱིར། རིགས་དང་ལུས་ལ་སྐྱོན་ཆགས་པ་རབ་ཏུ་དབྱུང་བ་ནི་ཉེ་བར་གཞག་པར་མི་བྱའོ་ཞེས་བྱ་བ་སྨྲས་ཏེ། རིགས་ལ་སྐྱོན་ཆགས་པ་ནི་ལྷམ་མཁན་ལ་སོགས་པ་ཟན་བཟའ་བར་མི་བྱ་བ་དག་གོ །ལུས་ལ་སྐྱོན་ཆགས་པ་ནི་རྣམ་པ་གཉིས་ཏེ། དབྱིབས་ལས་དང༌། ཁ་དོག་ལས་སོ། །དེ་ལ་དབྱིབས་ལས་སྐྱོན་ཆགས་པ་ནི་ལག་རྡུམ་ལ་སོགས་པའོ། །ཁ་དོག་ལས་སྐྱོན་ཆགས་པ་ནི་ལུས་རྨ་མཚན་ཅན་ལ་སོགས་པའོ། །དེ་དག་ནི་འདིར་གནས་སྦྱིན་པ་འབའ་ཞིག་བཀག་པ་མ་ཡིན་གྱི། འདི་ལྟར་གནས་ཁང་ལ་སོགས་པ་དག་ཏུ་སྐབས་དབྱེ་བ་དང་རྗེས་སུ་འབྲང་བའི་འཁོར་ཉིད་དང་ཕྱི་བཞིན་འབྲང་བའི་དགེ་སྦྱོང་དུ་བསྒྲུབས་པ་ལ་སོགས་པ་ཡང་བཀག་པ་ཡིན་ནོ། །དེ་ལྟར་ན་གཞུང་ལས་ཀྱང་གསུངས་ཏེ། དགེ་སློང་གིས་སུན་འབྱིན་པའི་འཁོར་ཉེ་བར་གཞག་པར་མི་བྱ་སྟེ། ཉེ་བར་འཇོག་པར་གྱུར་ན་འགལ་
ཚབས་ཅན་དུ་འགྱུར་རོ་ཞེས་གསུངས་ནས། ཇི་ཙམ་གྱིས་ན་འཁོར་སུན་འབྱིན་པའི་འཁོར་ཡིན་པར་བརྗོད་པར་བྱ་ཞེ་ན། རིགས་ལས་དང་ཁ་དོག་དང་དབྱིབས་ལས་ཏེ། ཇི་ལྟར་རིགས་ལས་ཤེ་ན། ལྷམ་མཁན་དང་གདོལ་བ་དང་གཡུང་པོའི་རིགས་ལས་སོ། །ཇི་ལྟར་ཁ་དོག་དང་དབྱིབས་ལས་ཤེ་ན། སྐྲ་སེར་ལ་སོགས་པ་ཞེས་འདིར་སྨྲས་པ་དག་ལས་སོ། །ཇི་མང་པོ་དག་ཚིག་གཅིག་གིས་ཅིག་ཅར་རྫོགས་པར་བསྙེན་པར་བྱར་རུང་ངམ་ཞེ་ན། དེའི་ཕྱིར་དུ་མ་མཁན་པོ་གཅིག་ལ་གསུམ་མན་ཆད་ཚིག་གཅིག་གིས་རྫོགས་པར་བསྙེན་པར་བྱར་རུང་ངོ་ཞེས་བྱ་བ་སྨྲས་ཏེ། དུ་མ་ཞེས་བྱ་བ་ནི། རྫོགས་པར་བསྙེན་པར་བྱ་བའོ། །ཁྱད་པར་ཇི་ལྟ་བུ་ཅན་ཞི་ཆེ་ན། མཁན་པོ་གཅིག་པ་ཞེས་བྱ་བ་སྟེ། རྫོགས་པར་བསྙེན་པར་བྱ་བ་དུ་མ་མཁན་པོ་གཅིག་པ་ནི་དུ་མ་མཁན་པོ་གཅིག་པ་སྟེ་དེའོ། །དུ་མ་ཞེས་བྱ་བ་དེ་ལ་ཇི་ཙམ་གྱིས་དུ་མར་བརྗོད་པར་བྱ་ཞེ་ན། གསུམ་མན་ཆད་ཅེས་བྱ་བ་སྨྲས་ཏེ། གསུམ་མན་ཆད་ཅིག་ཅར་རྫོགས་པར་བསྙེན་པར་བྱར་རུང་གི་དེ་ལས་ལྷག་པ་ནི་མི་རུང་ངོ་ཞེས་བྱ་བའི་ཐ་ཚིག་གོ །ལུང་ལས་ཀྱང༌། ཚོགས་ཀྱིས་ཚོགས་ཀྱི་ལས་དག་མི་བྱའོ། །ཞེས་གསུངས་ལ། ཉེ་བ་འཁོར་གྱིས་ཞུས་པ་ལས་ཀྱང༌། བཙུན་པ་དུས་གཅིག་སྐད་ཅིག་གཅིག་ལ་ལས་བྱེད་པ་གཅིག་གིས་གསོལ་བ་གཅིག་གི་ལས་གཉིས་བགྱི་བ་དང་བགྱིས་པར་བརྗོད་པ་དང༌། དགེ་འདུན་ཡང་དེས་འགལ་ཚབས་ཅན་དུ་མི་འགྱུར་བ་མཆིས་སམ། ཉེ་བ་འཁོར་ཡོད་དེ་གལ་ཏེ་ལས་བྱེད་པའི་དགེ་སློང་གིས་མཁན་བོ་རྣམས་དང་རྫོགས་པར་བསྙེན་པར་འདོད་པ་རྣམས་ཀྱི་མིང་ཡོངས་སུ་བརྗོད་ནུས་ཤིང་གསོལ་བ་ཉམས་བར་མི་འགྱུར་ལ་ལས་ཀྱང་བྱེད་ནའོ་ཞེས་བྱ་བ་ལ་སོགས་པ་གསུངས་སོ། །མཁན་པོ་གཅིག་པ་ཉིད་ནི་གླེང་གཞི་ལས་སྟོན་ཏེ། དགེ་ཚུལ་སྦྱིན་བྱེད་དང་སྐྱོང་བ་དེ་གཉིས་ཕན་ཚུན་སེམས་རྗེས་སུ་སྲུང་བས་སོ་སོར་རྫོགས་པར་མ་བསྙེན་པར་སྐད་ཅིག་གཅིག་ཁོ་ན་ལ་མཁན་པོ་གཅིག་གིས་ཅིག་ཅར་རྫོགས་པར་བསྙེན་པར་གྱུར་པའོ། །ཚིག་གཅིག་གིས་ཞེས་བྱ་བ་ནི། གསོལ་བ་དང་བཞིའི་ལས་གཅིག་གིས་སོ། །དུས་མཉམ་པ་རྣམས་ནི་གཅིག་ལ་གཅིག་ཕྱག་མི་བྱའོ་ཞེས་བྱ་བ་ལ། གང་དག་
དུས་མཉམ་པ་དེ་དག་ནི་དུས་མཉམ་པ་རྣམས་ཏེ། དེ་དག་ནི་གཅིག་ལ་གཅིག་བཏུད་དེ་ཕྱག་བྱ་བ་མི་དགོས་པར་རིག་པར་བྱའོ། །འདི་སྐད་བསྟན་ཏེ། དུས་གཅིག་ཏུ་རྫོགས་པར་བསྙེན་པའི་དགེ་སློང་རྣམས་ཀྱིས་གཅིག་ལ་གཅིག་བཏུད་དེ་ཕྱག་མི་བྱའོ་ཞེས་བྱ་བའི་ཐ་ཚིག་གོ །དུས་མཉམ་པ་རྣམས་ཀྱི་རྙེད་པ་དང༌། ལས་སུ་བསྐོ་བ་དག་ལ་གང་དང་པོ་ཡིན་ཞེ་ན། དེའི་ཕྱིར་སྔར་འོངས་པ་དང་པོ་ཡིན་ནོ་ཞེས་བྱ་བ་སྨྲས་ཏེ། རབ་ཏུ་བྱུང་བ་དུས་མཉམ་པ་རྣམས་ཀྱི་རྙེད་པ་དང་ལས་སྦྱིན་པར་བསྐོ་བའི་གནས་སུ་སྔར་འོངས་པ་ཞེས་བྱ་བ་ཐོག་མར་ཕྱིན་པའི་གང་ཟག་དང་པོ་ཐུ་བོ་ཉིད་དུ་འགྱུར་ཏེ། །དེ་ལྟ་བས་ན་གང་རྙེད་པའི་གནས་སུ་དང་པོར་འོངས་པ་དེས་ནི། རྙེད་པ་དང་པོར་བླང་བར་བྱ་བ་ལ་ལས་སུ་བསྐོ་བ་ནི་ཕྱིས་བྱ་སྟེ། དེ་ནི་དང་པོར་འོངས་པའི་ཕྱིར་ཐུ་བོ་ཉིད་ཡིན་ནོ། །དེ་ལྟར་ནི་བཅོམ་ལྡན་འདས་ཀྱིས་ཀྱང་ཇི་ལྟར་འོངས་པས་རྙེད་པ་བླང་བར་བྱའོ་ཞེས་གསུངས་ཏེ། གང་དང་གང་འོངས་པ་ནི་ཇི་ལྟར་འོངས་པའོ། །ཇི་ལྟར་འོངས་པར་གྱུར་པ་དེར་འོངས་པ་ནི་ཇི་ལྟར་འོངས་པ་སྟེ། ཇི་ལྟ་འོངས་པ་དེས་རྙེད་པ་བླང་བར་བྱའོ། །དེས་ཕྱིས་ལས་སུ་བསྐོ་བ་བྱ་བ་དེ་ཡང་ཤུགས་ཀྱིས་འཐོབ་པ་ཡིན་ཏེ། དེའི་ཚེ་ཐུ་བོ་ཡིན་པའི་ཕྱིར་རོ། །ཕྱིས་འོངས་པས་ནི་ལས་སུ་བསྐོ་བ་དང་པོར་བྱ་སྟེ་དེའི་ཚེ་གསར་པ་ཡིན་པའི་ཕྱིར་རོ། །དེ་ལ་ཕྱིས་འོངས་པས་ལས་སུ་བསྐོ་བ་སྔར་བྱའོ་ཞེས་འབྱུང་བའི་ཕྱིར་རོ། །དགོན་པ་བས་སྐྲ་སོར་གཉིས་ལས་ལྷག་པར་མི་གཞག་གོ་ཞེས་བྱ་བ་ནི། དགེ་སློང་དགོན་པ་བས་སྐྲ་སོར་གཉིས་ཀྱི་ཚད་ལས་ལྷག་པར་མི་གཞག་གོ་ཞེས་བྱ་བའི་ཚིག་གོ །སྐྲ་སྨོས་པས་ཁ་སྤུ་ཡང་སྨོས་པར་གྱུར་པའི་ཕྱིར་ལོགས་ཤིག་ཏུ་མ་བརྗོད་དོ། །གྲོང་མཐའ་བས་ནི་དེའི་འོག་མ་ཉིད་ལས་མི་གཞག་གོ་ཞེས་བྱ་བ་ལ་འོག་མའི་དངོས་པོ་ནི་འོག་མ་ཉིད་དེ་སོར་གཉིས་དེའི་འོག་མ་ཉིད་དེ། སོར་ཕྱེད་དང་གཉིས་ཉིད་དོ། །དེ་ལྟ་བས་ན་སོར་ཕྱེད་དང་གཉིས་ཀྱི་ཚད་ལས་ལྷག་པར་ཇི་ཙམ་དུ་སོར་གཉིས་ཀྱི་ཚད་དུ་གྱུར་པ་དེ་ཙམ་དུ་མི་གཞག་གོ །འདི་སྐད་བསྟན་ཏེ། དགེ་སློང་གྲོང་མཐའ་པས་སྐྲ་ཇི་ཙམ་དུ་སོར་གཉིས་ཀྱི་ཚད་དུ་མ་ཕྱིན་པ་དེ་ཙམ་ཁོ་ནར་བྲེག་པར་བྱའོ། །འདིར་དེ་ལྟར་ནི་གཞུང་ལས་ཀྱང་དགེ་སློང་དགོན་པ་བས་སྐྲ་སོར་གཉིས་སུ་གཞག་
པར་བྱ་ལ། གྲོང་མཐའ་བས་ནི་དེའི་འོག་མའོ་ཞེས་གསུངས་སོ། །རབ་ཏུ་འབྱུང་བའི་དུས་ན་སྐྲ་བྲེག་པ་སྨྲས་པ་དེའི་སྒོ་ནས་འདིར་སྐྲ་བྲེག་པའི་ཆོ་ག་ཐམས་ཅད་བསྟན་ཏེ། སྐྲ་བ་ལང་གི་སྤུ་འདྲ་བར་མི་བྲེག་གོ་ཞེས་བྱ་བ་ལ། བ་ལང་གི་སྤུ་ཞེས་བྱ་བ་ནི་བ་ལང་གི་སྤུ་དག་གོ །བ་ལང་གི་སྤུ་དག་དང་འདྲ་བ་ནི་བ་ལང་གི་སྤུ་འདྲ་བར་དེ་དེ་ལྟར་རོ། །ཇི་ལྟར་ཆན་པས་སྐྲ་བ་ལང་གི་སྤུ་དག་དང་འདྲ་བར་འདྲེག་པ་དེ་ལྟར་བྲེག་པར་མི་བྱའོ། །དེ་ནི་ཐམས་ཅད་དུ་ཡང་བཀག་པ་ཡིན་ན་དེའི་དམིགས་ཀྱིས་བསལ་བ་བསྟན་པའི་ཕྱིར། རྨའི་ཐན་ཀོར་ནི་མ་གཏོགས་སོ་ཞེས་བྱ་བ་སྨྲས་ཏེ། རྨའི་ཐན་ཀོར་ནི་ཆན་པས་བྲེག་པར་བྱའོ་ཞེས་བྱ་བའི་ཐ་ཚིག་གོ །སྐྲ་འཇོག་པ་ལས་གཙུག་པུད་འཇོག་པ་ནི་ཕྱོགས་གཅིག་ཏུ་གྱུར་པ་ཡིན་པའི་ཕྱིར་དེ་འཇོག་པ་ལ་ཉེས་པ་མེད་དོ་སྙམ་དུ་དོགས་པ་ལ། གཙུག་པུད་བྱེད་དུ་མི་གཞུག་གོ་ཞེས་བྱ་བ་སྨྲས་ཏེ། གཙུག་པུད་མི་བྱའོ་ཞེས་བྱ་བའི་ཐ་ཚིག་གོ། །།བམ་པོ་བཞི་པ། སྐྲ་བྲེག་པ་ལས་ན་སྤུ་བྲེག་པ་ཡང་ཉེས་པ་མེད་དོ་སྙམ་དུ་དོགས་པ་བསལ་བའི་ཕྱིར་རོ། །མདོམས་ཀྱི་སྤུ་འདྲེག་ཏུ་མི་གཞུག་གོ་ཞེས་བྱ་བ་སྨྲས་ཏེ། མདོ་སྔ་མ་ལས་བྱེད་དུ་མི་གཞུག་གོ་ཞེས་བྱ་བའི་རྗེས་སུ་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མདོམས་གསང་བའི་གནས་ཏེ་སྤུ་འདྲེག་ཏུ་མི་གཞུག་གོ །རེ་ཞིག་མདོམས་ཀྱི་སྤུ་བྲེག་པ་སྤྱིར་བཀག་ནས། ད་ནི་དམིགས་ཀྱིས་བསལ་བར་བྱ་སྟེ། རྨའི་ཆེད་དུ་གཞན་གྱིས་མི་འཚོ་ན་མཁས་པ་གནས་བརྟན་གནས་བརྟན་དག་ལ་དྲི་སྟེ་འདྲེག་ཏུ་གཞུག་གོ་ཞེས་བྱ་བ་ནི། རྨའི་ཕྱིར་ནི་སྤུ་འདྲེག་ཏུ་གཞུག་པའོ། །གཞན་གྱིས་མི་འཚོ་ན་ཞེས་བྱ་བ་ནི། གལ་ཏེ་བསྐ་བ་ལ་སོགས་པའི་ཐབས་གཞན་གྱིས་རྨ་མི་འཚོ་ནའོ། །དེ་ལྟར་ན་བཅོམ་ལྡན་འདས་ཀྱིས་ཀྱང་བསྐ་བ་ལྡས་བཀྲུ་བར་བྱ་ཞིང་ཕྱིས་གལ་ཏེ་མ་སོས་ན་མདོ་སྡེ་དང་འདུལ་བ་དང་མ་མོ་འཛིན་པ་དག་ལ་དྲིས་ཏེ། མདོམས་ཀྱི་སྤུ་འདྲེག་ཏུ་གཞུག་གོ་ཞེས་གསུངས་ཏེ། དེ་ནི་འདིར་གཞུང་ཡིན་ནོ། །དེའི་ཕྱིར་མཁས་པ་ཞེས་གསུངས་པ་ནི་ཚིག་གཞན་བསྟན་པའི་ཕྱིར་རོ། །བྱིན་པའི་སྤུ་བྲེག་པ་ཡང་དེའི་ཕྱིར་མ་ཡིན་པར་བྱེད་དུ་མི་གཞུག་གོ །ཞེས་
བྱ་བ་ཡང་འདྲེག་ཏུ་མི་གཞུག་གོ་ཞེས་བྱ་བའི་རྗེས་སུ་སྦྱར་ཏེ། བྱིན་པའི་སྤུ་བྲེག་པ་ཡང་འདྲེག་ཏུ་མ་གཞུག་གོ་ཞེས་བྱ་བའི་ཐ་ཚིག་གོ །ཇི་རྣམ་པ་ཐམས་ཅད་དུ་འདྲེག་ཏུ་མི་གཞུག་གམ་ཞེ་ན། དེའི་ཕྱིར་མ་ཡིན་པར་ཞེས་བྱ་བ་སྨྲས་ཏེ། རྨའི་ཕྱིར་མ་ཡིན་པར་འདྲེན་ཏུ་མི་གཞུག་གི་རྨའི་ཕྱིར་ནི་འདྲེག་ཏུ་གཞུག་པ་ཁོ་ན་ཡིན་ནོ། །བྱིན་པའི་སྤུ་བྲེག་པ་བཀག་པས་ལུས་གཞན་གྱི་སྤུ་ནི་བྲེག་ཏུ་རུང་ངོ་སྙམ་དུ་དོགས་པ་ལ་ལུས་གཞན་དུ་ཡང་མི་བྱའོ་ཞེས་བྱ་བ་སྨྲས་ཏེ། མདོམས་དང་བྱིན་པ་གཉིས་ལས་གཞན་པའི་ལུས་ནི་མགྲིན་པ་མན་ཆད་ཀྱི་ལུས་འོག་མ་ལ་བྱ་སྟེ། དེ་ལ་ཡང་རྨའི་ཕྱིར་མ་ཡིན་པར་སྤུ་བྲེག་པར་མི་བྱའོ། །འདིར་མ་མོའི་གཞུང་ལས་སྐྲ་དང་ཁ་སྤུ་མ་གཏོགས་པ་དེ་ལས་གཞན་པའི་ཡན་ལག་དང་ཉིང་ལག་དག་གི་སྤུ་བྲེག་པར་མི་བྱའོ། །གང་འདྲེག་ན་ཉེས་བྱས་ཀྱི་ལྟུང་བར་འགྱུར་རོ་ཞེས་གསུངས་སོ། །སྣའི་སྤུ་བྲེག་པ་ལ་ནི་རྣམ་གྲངས་ཀྱི་ཚིག་ཡོད་དེ། འདི་ལྟར་བཅོམ་ལྡན་འདས་ཀྱིས་དགེ་སློང་གིས་དགེ་སློང་དག་གི་སྣའི་སྤུ་ཕྱེད་བཏོགས་པ་དག་ལ་རྒན་རིམས་ཀྱིས་སྨང་ཚེར་བླང་བར་མི་བྱའོ། །དགེ་སློང་གིས་དགེ་སློང་དག་གི་སྣའི་སྤུ་ཕྱེད་བཏོགས་པ་དག་ལ་རྒན་རིམས་ཀྱིས་སྨང་ཚེར་ལེན་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་སོ། །གལ་ཏེ་སྣའི་སྤུ་དག་རྣམ་པ་ཐམས་ཅད་དུ་བཏོགས་པར་མི་བྱ་བ་ཡིན་ན། ཅིའི་ཕྱིར་ཕྱེད་བཏོགས་པའི་སྨད་ཚེར་ལེན་པ་ཉེས་བྱས་སུ་བསྟན་ཏེ། རིགས་པ་འདིས་ནི་སྔོན་གཞུང་དངོས་སུ་ཡང་ཡོད་པར་གྱུར་པ་ལས་དེ་ནུབ་པར་གྱུར་པར་ཤེས་སོ། །ད་ནི་སེན་མོ་བྲེག་པའི་ཆོ་ག་བསྟན་ཏེ། སེན་མོ་སྤུ་གྲིའི་སོ་ལྟ་བུའམ། སྟེའུའི་ཁ་ལྟ་བུར་བྲེག་པར་བྱའོ་ཞེས་བྱ་བ་ནི། སེར་མོ་སྤུ་གྲིའི་སོ་ལྟ་བུར་མཐའ་དམའ་ཞིང་དབུས་མཐོ་བར་བྲེག་པར་བྱ་བའམ། སྟེའུའི་ཁ་འདྲ་བར་དབུས་དང་མཐའ་མཉམ་པར་བྲེག་པར་བྱའོ། །དེ་དག་སྦྱིལ་བར་མི་བྱའོ་ཞེས་བྱ་བ་ནི། སེན་མོ་དེ་དག་རྒྱགས་པ་བསྐྱེད་པའི་སྦྱིལ་བར་མི་བྱའོ། །སེན་མོ་སྦྱང་བ་ཡང་རྣམ་པ་ཐམས་ཅད་དུ་བཀག་པར་གྱུར་ཏོ་སྙམ་པ་ལ། དྲི་མ་བསལ་བའི་ཕྱིར་བྲུད་པར་བྱའོ་ཞེས་བྱ་བ་སྨྲས་ཏེ། དྲི་མ་བསལ་བར་བྱ་བའི་ཕྱིར་བྲུད་ཅིང་བཞར་བར་བྱ་སྟེ། བྲུད་པ་ཇི་ཙམ་གྱིས་དྲི་མ་སླེ་བར་གྱུར་པ་དེ་ཙམ་བྱའོ། །ཆོས་གོས་གྱོན་བཞིན་དུ་སྐྲ་དང་ཁ་སྤུ་བྲེག་
པར་མི་བྱའོ་ཞེས་བྱ་བ་ལ། འདིར་གོས་ཐམས་ཅད་ཆོས་གོས་ཀྱི་སྒྲར་བརྗོད་པ་ཡིན་མོད་ཀྱི། འདིར་བླ་གོས་གཟུང་བར་བྱའི། མཐང་གོས་ནི་མ་ཡིན་ནོ། །གལ་ཏེ་མཐང་གོས་ཀྱང་བཀག་ན་ནི། གཅེར་བུ་ཁོ་ནལ་བྲེག་པར་འགྱུར་བས་དེའི་ཕྱིར་འདི་ནི་བླ་གོས་ཐམས་ཅད་བཀག་པ་ཡིན་ནོ། །སྐྲ་བྲེག་པ་གང་གིས་བྱ་ཞེ་ན། སྐྲ་བཟེད་བཅང་བར་བྱའོ་ཞེས་བྱ་བ་སྨྲས་ཏེ། སྐྲ་བཟེད་པའི་གོས་བཅང་བར་བྱ་སྟེ། དེས་སྐྲ་དག་བཟེད་པར་བྱ་བའི་ཕྱིར་རོ། །དེ་ཡང་བགོ་བའི་དོན་ཡིན་གྱི་གདིང་བའི་དོན་ནི་མ་ཡིན་ཏེ། མེད་ན་རྡུལ་གཟན་གྱིས་སོ་ཞེས་བརྗོད་པའི་ཕྱིར་རོ། །མེད་ན་རྡུལ་གཟན་གྱིས་སོ་ཞེས་བྱ་བ་ནི། སྐྲ་བཟེད་ཀྱི་གོས་མེད་ན་རྡུལ་གཟན་གྱོན་པས་སྐྲ་དང་ཁ་སྤུ་བྲེག་པར་བྱའོ། །བཏིང་བར་ཡང་མི་བྱའོ་ཞེས་བྱ་བ་ནི། སྐྲ་དང་ཁ་སྤུ་བྲེག་པར་མི་བྱ་བའོ། །འདིར་གཞུང་ནི་གླེང་གཞི་དག་ལས་དགེ་སློང་གིས་བཏིང་བར་འདུག་ནས་སྐྲ་བྲེག་པར་མི་བྱ་སྟེ། གནས་ཁང་དང་ཁྱམས་དང་སྒོ་ཁང་དུ་སྐྲ་འདྲེག་ཏུ་འཇུག་ན་ཡང་ཉེས་བྱས་དེ་ཉིད་དུ་འགྱུར་རོ་ཞེས་བྱ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། གང་དུ་དགེ་འདུན་ཕྱག་དར་ཕྱགས་པ་དེར་སྐྲ་འདྲེག་ཏུ་གཞུག་པར་མི་བྱ་སྟེ། འདྲེག་ཏུ་གཞུག་ན་འགལ་ཚབས་ཅན་དུ་འགྱུར་རོ་ཞེས་བྱ་བ་དང༌། དེ་བཞིན་དུ་དགེ་སློང་གང་དག་རྒས་འཁོགས་ཉམ་ཆུང་བ་དག་དང་ནད་པ་སྦྱོར་མི་བཟོད་པ་དེ་དག་གིས་ནི་ཁྱམས་སམ་གཞན་དུ་སྐྲ་འདྲེག་ཏུ་གཞུག་པར་བྱ་ཞིང༌། བདེ་བར་གནས་པ་དག་གིས་ཀྱང་ཉི་མ་ཚ་བའམ། ཆར་འབབ་པ་གང་དུ་ཕྱི་རོལ་དུ་འགྲོར་མེད་ན་ཁྱམས་སམ་གཞན་དེར་སྐྲ་བྲེག་པར་བྱའོ་ཞེས་གསུངས་པ་ཡིན་ནོ། །གང་དུ་དགེ་འདུན་ཕྱག་དར་ཕྱགས་པར་ཡང་མི་བྱའོ་ཞེས་བྱ་བ་ནི། ཕྱོགས་གང་དུ་དགེ་འདུན་ཕྱག་དར་ཕྱགས་པའི་ཕྱོགས་དེར་སྐྲ་འདྲེག་ཏུ་གཞུག་པར་མི་བྱ་སྟེ། གཙུག་ལག་ཁང་གི་ཕྱོགས་གང་དུ་དགེ་འདུན་ཕྱག་དར་ཉལ་ཉིལ་ལ་སོགས་པ་ཕྱགས་པ་དེར་ཞེས་བྱ་བའི་ཐ་ཚིག་གོ །རྒན་པོ་དང་ནད་པ་དང་རླུང་དང་ཉི་མ་དང་ཆར་པ་དག་ལ་ཁྱམས་ལ་སོགས་པར་འདྲེག་ཏུ་གཞུག་པར་བྱའོ་ཞེས་བྱ་བ་ལ། ཁྱམས་ལ་སོགས་པར་ཞེས་བྱ་བའི་སོགས་པའི་སྒྲས་ནི་གནས་ཁང་དང་སྒོ་ཁང་ལ་སོགས་པ་དག་བསྡུའོ། །འདི་སྐད་བསྟན་ཏེ། རྒན་པོ་
སྦྱོར་མི་བཟོད་པ་དང༌། ནད་པ་མི་ནུས་པས་ནི་ཁྱམས་ལ་སོགས་པར་སྐྲ་འདྲེག་ཏུ་གཞུག་པར་བྱའོ། །རླུང་དང་ཉི་མ་དང་ཆར་བ་དག་ལ་ནི་ཐམས་ཅད་ཀྱིས་སོ། །ཕྱོགས་དེ་བྱི་དོར་བྱའོ་ཞེས་བྱ་བ་ནི་སྐྲ་བྲེགས་པའི་ཕྱོགས་དེར་བྱི་དོར་བྱ་བ་སྟེ། སྦྱང་བར་བྱའོ་ཞེས་བྱ་བའི་ཐ་ཚིག་གོ །སྦྱང་བ་ཞེས་བྱ་བ་ནི་སྐྲ་མེད་པ་ཉིད་དང་ཆུས་བཏབ་པ་ལས་བྱུང་བའི་ས་འབུས་པ་ལ་སོགས་པ་བསལ་བ་ཡིན་ནོ། །སྐྲ་བྲེགས་པ་རྣམས་གང་དུ་དོར་བར་བྱ་ཞེ་ན། དེའི་ཕྱིར་སྐྲ་ནི་ཕྱག་དར་ཁྲོད་དུ་དོར་རོ་ཞེས་བྱ་བ་སྨྲས་ཏེ། སྐྲ་དག་ནི་ཕྱག་དར་གྱིས་གང་བའི་ཕྱོགས་སུ་དོར་རོ། །སེན་མོ་གཅད་པ་ཡང་དེ་བཞིན་ནོ་ཞེས་བྱ་བ་ནི། སྐྲ་བྲེག་པའི་ཆོ་ག་བསྟན་པ་གང་ཡིན་པའི་ཆོ་ག་དེ་ཉིད་ཀྱིས་སེན་མོ་བཅད་པར་ཡང་རིག་པར་བྱའོ། །དེ་འདོད་ཆགས་དང་བྲལ་བ་མ་ཡིན་ན་དགེ་སློང་མས་ཞལ་ཏ་མ་བྱས་པར་སྐྱེས་པས་སྐྲ་མི་བྲེག་གོ་ཞེས་བྱ་བ་ལ། དེ་ཞེས་བྱ་བ་ནི་དགེ་སློང་མའོ། །དགེ་སློང་མས་ཞལ་ཏ་མ་བྱས་པར་ཞེས་བྱ་བ་ནི་དགེ་སློང་མ་གཞན་གྱིས་མ་བསྲུངས་པར་སྐྱེས་པས་སྐྲ་མི་བྲེག་གོ་ཞེས་བྱ་བར་སྦྱར་རོ། །ཅི་ཐམས་ཅད་དམ་ཞེ་ན། མ་ཡིན་ཏེ་དེའི་ཕྱིར་འདོད་ཆགས་དང་བྲལ་བ་མ་ཡིན་ན་ཞེས་བྱ་བ་སྨྲས་སོ། །འདོད་ཆགས་དང་བྲལ་བ་ནི་བྲེག་སྟེ། འདིར་གཞུང་ནི་གལ་ཏེ་འདོད་ཆགས་དང་བྲལ་བ་ཞིག་ཡིན་ན་ལྟུང་བ་མེད་དོ་ཞེས་གསུངས་པ་ཡིན་ནོ། །ཀུན་དུ་ཆགས་པར་གྱུར་ན་ཞལ་ཏ་བྱེད་པ་མོས་རྗེས་སུ་བསྟན་པར་བྱའོ་ཞེས་བྱ་བ་ནི། གལ་ཏེ་སྐྱེས་པའི་ཡུལ་དེའི་འདོད་ཆགས་སྐྱེ་ན་དགེ་སློང་མ་ཀུན་དུ་ཆགས་པར་གྱུར་པ་དེ་ལ་དགེ་སློང་མ་ཞལ་ཏ་བྱེད་པ་མོས་རྗེས་སུ་བསྟན་པར་བྱ་སྟེ་ཡང་དག་པར་རྗེས་སུ་བསྟན་པར་བྱའོ། །ཇི་ལྟར་ཞེ་ན་དྲན་པ་ཉེ་བར་ཞོག་ཅིག །ཇི་རྣག་གི་ལུས་འདི་ལ་སྙིང་པོ་ཡོད་དམ་ཞེས་སོ་ཞེས་བྱ་བས་ནི། དྲན་པ་ཉེ་བར་ཞོག་ཅིག་ཅེས་བྱ་བ་ནི། དྲན་པ་མངོན་དུ་གྱིས་ཤིག་ཅེས་པའོ། །ཇི་རྣག་གི་ལུས་འདི་ལ་ཞེས་བྱ་བ་ནི། འཇིག་བའི་བདག་ཉིད་ཀྱི་ལུས་ལའོ། །སྙིང་པོ་ཡོད་དམ་ཞེས་བྱ་བ་ནི་ཀུན་དུ་འདོད་ཆགས་པའི་དངོས་པོ་ཡོད་དམ་ཞེས་བྱ་བའི་ཐ་ཚིག་གོ །འདྲེག་མཁན་ལ་ནི་མ་དང་སྲིང་མོ་དང་བུ་མོའི་འདུ་ཤེས་ཉེ་བར་ཞོག་ཅིག་ཅེས་སོ་ཞེས་བྱ་བ་ནི་གལ་ཏེ་འདྲེག་མཁན་དགེ་སློང་མའི་ཡུལ་ལ་འདོད་ཆགས་སྐྱེ་བར་གྱུར་ན་དེའི་ཚེ་འདྲེག་མཁན་ཀུན་དུ་ཆགས་པར་གྱུར་པ་དེ་ལ་ནི་ཞལ་ཏ་བྱེད་པ་
མོས་རྗེས་སུ་བསྟན་པར་བྱ་སྟེ། ཇི་ལྟར་ཞེ་ན། མ་ལ་སོགས་བའི་འདུ་ཤེས་ཉེ་བར་ཞོག་ཤིག་ཅེས་བྱ་བས་སོ། །དགེ་སློང་མ་རྣམས་ཀྱིས་སྐྲ་བྲེག་པའི་བྱེ་བྲག་སྨྲས་ན། ད་ནི་སྤྱིའི་ཆོ་ག་བསྟན་པའི་ཕྱིར་དེ་བྱས་ནས་ཁྲུས་བྱའོ་ཞེས་བྱ་བ་སྨྲས་ཏེ། དེ་ཞེས་བྱ་བ་ནི། སྐྲ་དང་ཁ་སྤུ་བྲེགས་པའོ། །བྱས་ནས་ཞེས་བྱ་བ་ནི་ཟིན་ནས་ཏེ། ཁྲུས་བྱའོ་ཞེས་བྱ་བར་སྦྱར་རོ། །ཡང་ན་ཡན་ལག་ལྔའི་ཁྲུས་ཀྱང་བྱའོ་ཞེས་བྱ་བ་ཡང་ངོ་ཞེས་བྱ་བར་སྦྱར་རོ། །ཡང་ན་ཞེས་བྱ་བའི་སྒྲ་ནི་ཆོ་ག་གཞན་བསྟན་པའི་དོན་ཏེ། འདིར་གཞུང་ནི་དགེ་སློང་གིས་སྐྲ་བཟེད་བཅང་བར་བྱ་ཞིང་ཁྲུས་ཀྱང་བྱ་སྟེ། ཐ་ན་རྐང་ལག་དག་ཀྱང་བཀྲུ་བར་བྱའོ་ཞེས་གསུངས་པ་ཡིན་ནོ། །སྒྲེན་མོར་ཁྲུས་མི་བྱའོ་ཞེས་བྱ་བ་ནི། གཅེར་བུ་ཁོ་ནར་ཁྲུས་མི་བྱ་བ་སྟེ། འདི་ལྟར་འཁོར་གསུམ་གཡོགས་པ་ཉིད་ན་སྒྲེན་མོ་མ་ཡིན་པ་ཉིད་ཡོད་མོད་ཀྱི། འོན་ཀྱང་འདིར་ནི་མདོམས་ཀྱི་སྤུ་དང་ཡན་ལག་གི་རྣམ་པ་དག་གཡོགས་པ་ཉིད་ན་གཡོགས་པ་ཉིད་ཡིན་པར་རིག་པར་བྱའོ། །དགེ་སློང་མས་སྐྱེས་པའི་ཆུ་ངོགས་སུ་མི་བྱའོ་ཞེས་བྱ་བ་ནི། དགེ་སློང་མས་སྐྱེས་པ་ཁྲུས་བྱེད་པའི་ཆུ་ངོགས་སུ་ཁྲུས་མི་བྱ་བའོ། །བུད་མེད་ཀྱི་ཆུ་ངོགས་སུ་ཡང་ཕྱེ་མས་མི་བྱའོ་ཞེས་བྱ་བ་ནི་ཁྲུས་ཞེས་བྱ་བར་སྦྱར་རོ། །དགེ་སློང་མས་སྐྱེས་པའི་ཆུ་ངོགས་སུ་ཁྲུས་བྱ་བ་ནི་ཐམས་ཅད་ཀྱིས་ཐམས་ཅད་དུ་དགག་པ་མཛད་དོ། །བུད་མེད་ཀྱི་ཆུ་ངོགས་སུ་ནི་ཕྱེ་མ་ལ་སོགས་པས་ཁྲུས་བྱ་བ་དགག་པ་མཛད་ཀྱི་ཁྲུས་ཉི་ཙེ་ནི་མ་བཀག་གོ །འདིར་གཞུང་ནི་དགེ་སློང་མས་བུད་མེད་ཀྱི་ཆུ་ངོགས་སུ་ཕྱེ་མས་ཁྲུས་མི་བྱའོ་ཞེས་གསུངས་པ་ཡིན་ནོ། །མོན་སྲན་སྡེའུ་ལ་སོགས་པའི་ཕྱེ་མ་དྲིས་བསྒོས་པ་རུང་ངོ་ཞེས་བྱ་བ་ནི་དགེ་སློང་དང་དགེ་སློང་མ་གཉི་ག་ལ་མོན་སྲན་སྡེའུ་ལ་སོགས་པའི་ཕྱེ་མ་རུང་ངོ༌། །བྱེ་བྲག་ཅི་ལྟ་བུ་ཅན་ཞིག་ཅེ་ན། དྲིས་བསྒོས་པ་སྟེ། གླ་རྩི་ལ་སོགས་བས་བསྒོས་པ་ཞེས་བྱ་བའི་ཐ་ཚིག་གོ །དེ་ནི་བླང་བར་བྱའོ་ཞེས་བྱ་བ་ནི། དྲིས་བསྒོས་པའི་ཕྱེ་མ་དེ་བདག་གིར་བྱར་རུང་བའོ། །ནད་པས་ནི་སྨན་གྱིས་བསྒོས་པ་ཡང་ངོ་ཞེས་བྱ་བ་ནི་ནད་པས་ནི་ཕྱེ་མ་སྨན་གྱིས་བསྒོས་པ་ཡང་བླང་དུ་རུང་བའོ། །དགེ་སློང་མས་བུད་མེད་ལ་ཕྱེ་མས་མི་གཏོར་རོ་ཞེས་བྱ་བ་ནི། དགེ་སློང་མས་ཁྲུས་ཀྱི་ཚེའམ་དུས་གཞན་གྱི་ཚེ་ཡང་བུད་མེད་ལ་
ཕྱེ་མས་མི་གཏོར་བའོ། །སྒྲེན་མོར་ཁྲུས་མི་བྱའོ་ཞེས་སྨྲས་པས་དེའི་ཕྱིར་སྒྲེན་མོ་ཉིད་བསལ་བའི་ཞར་ལ། ཤམ་ཐབས་ཀྱི་ཐ་མ་ཉིད་ཀྱི་མདུན་དང་རྒྱབ་ཀྱི་མཐའ་མ་མདུད་པར་སྐས་ལ་མི་འཛེག་གོ་ཞེས་བྱ་བ་སྨོས་ཏེ། དགེ་སློང་གང་གིས་ཤམ་ཐབས་ཀྱི་གོས་ཀྱི་ཐ་མ་ཉིད་ཀྱི་མདུན་དང་རྒྱབ་ཀྱི་མཐའ་མ་མཐའི་ཆ་མ་མདུད་པ་དེ་ནི་ཤམ་ཐབས་ཀྱི་མཐའ་གཉི་ག་མདུན་དང་རྒྱབ་ཀྱི་མཐའ་མ་མདུད་པའི་དགེ་སློང་ཡིན་ཏེ། དེས་སྐས་ལ་མི་འཛེག་གོ །མ་མཐའི་དངོས་པོ་ནི་ཐ་མ་ཉིད་དོ། །མ་མདུད་པར་ཞེས་བྱ་བ་ནི་མ་བཅིངས་པར་རོ། །སྐས་ཞེས་སྨོས་པ་ནི་དཔེ་སྟེ། ཤིང་ལ་སོགས་པ་ལ་འཛེག་པ་ལ་ཡང་དེ་ཁོ་ན་བཞིན་དུ་བསྒྲུབ་པར་བྱའོ། །ཚིག་འདི་ནི་མདོམས་མཐོང་བ་ཡོངས་སུ་སྤང་བའི་ཕྱིར་རོ། །གཞན་གྱི་དུས་སུ་དེ་ལྟར་མི་བྱའོ་ཞེས་བྱ་བ་ལ། གཞན་གྱི་དུས་སུ་ཞེས་བྱ་བ་ནི། སྐས་ལ་སོགས་པ་ལ་འཛེག་པ་ལས་གཞན་པའི་དུས་སུའོ། །དེ་ལྟར་ཞེས་བྱ་བ་ནི། ཤམ་ཐབས་ཀྱི་ཐ་མ་ཉིད་ཀྱི་མདུན་དང་རྒྱབ་ཀྱི་མཐའ་མདུད་པའོ། །མི་བྱའོ་ཞེས་བྱ་བ་ནི། བྱ་མི་དགོས་སོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། སྐས་ལས་བབས་མ་ཐག་ཏུ་མདུད་པ་བཀྲོལ་བར་བྱའོ། །ཁའི་ནང་ཡང་མདོམས་ཀྱི་ཕྱོགས་དང་མཐུན་པའི་ཕྱིར་དེར་གཏོགས་པའི་ཆོ་ག་བསྟན་པའི་ཕྱིར། ཁ་མ་བཀབ་པར་གདངས་པར་མི་བྱའོ་ཞེས་བྱ་བ་སྨྲས་ཏེ། ཁ་མ་བཀབ་པར་ཞེས་བྱ་བ་ནི་མ་གཡོགས་པར་རོ། །གླལ་བ་ལ་སོགས་པའི་རྒྱུས་གོས་ལ་སོགས་པས་ཁམ་བཀབ་པར་གདངས་པ་ནི་འབྱེད་པ་སྟེ། དེ་མི་བྱའོ། །འདིར་ནི་གཞུང་དགེ་སློང་གླལ་བས་ཁ་ལག་པས་དགབ་པར་བྱའོ་ཞེས་གསུངས་པ་ཡིན་ནོ། །སྒྲེན་མོར་ཁྲུས་མི་བྱའོ་ཞེས་བྱ་བས་འདིར་སྒྲེན་མོའི་ཁྲུས་བཀག་པའི་ཕྱིར་རོ། །ཁྲུས་རས་བཅང་བར་བྱའོ་ཞེས་བྱ་བ་འདི་བརྗོད་དེ་བྱེད་པའི་ཚིག་དང་པོར་བསྟན་པའི་ཕྱིར་རང་དགར་སྤྱད་པ་ཡིན་པར་རིག་པར་བྱའོ། །ཉི་རིམ་ལ་ནི་སྲོག་ཆགས་དག་ཀུན་དུ་འཆགས་སོ་ཞེས་བྱ་བ་ལ་ཆགས་སོ་ཞེས་བརྗོད་པར་བྱ་ལ། ཀུན་དུ་ཞེས་སྨོས་པ་ནི་འགྲེལ་བ་བྱེད་པ་ན་རེ། གཞུང་མཛེས་པ་བསྒྲུབ་པའི་ཕྱིར་ཞེས་ཟེར་རོ། །ཁོ་བོ་ནི་ཡི་གེ་ལྷག་པ་ཡོད་པའི་ཕྱིར། དོན་ཀྱང་ལྷག་པ་ཡོད་པར་ཤེས་པར་བྱ་ཞེས་སྨྲས་ཏེ། དེས་ན་བྱེད་རྒྱུ་བསྟན་པ་མེད་ཀྱང་བྱེད་རྒྱུ་
བསྟན་པར་ཁོང་དུ་ཆུད་པར་བྱའོ། །དེ་ལྟར་ན་འདིར་ཚིག་གི་དོན་འདི་ལྟར་ཤེས་པར་བྱ་སྟེ། གང་གི་ཕྱིར་གོས་ཉི་རིམ་ལ་སྲོག་ཆགས་དག་ཆགས་པར་འགྱུར་བ་དེའི་ཕྱིར། སྲོག་ཆགས་དང་བཅས་པའི་ཆུ་ལ་ཁྲུས་ཉི་རིམ་ལ་སོགས་པས་ཁྲུས་མི་བྱའོ་ཞེས་བྱ་བའི་ཐ་ཚིག་གོ །ཆོས་གོས་གསུམ་པས་ཀྱང་ངོ་ཞེས་བྱ་བ་ཡང་ཁྲུས་རས་བཅང་བར་བྱའོ་ཞེས་བྱ་བར་སྦྱར་རོ། །ཀྱང་ངོ་ཞེས་བྱ་བའི་སྒྲས་ནི། གཞན་གྱིས་ཀྱང་ངོ་ཞེས་བྱ་བར་སྦྱར་རོ། །འདིར་གཞུང་ནི། བཅོམ་ལྡན་འདས་ཀྱིས་བཀའ་སྩལ་བ། དགེ་སློང་ཆོས་གོས་གསུམ་པས་ཀྱང་ཁྲུས་རས་བཅང་བར་བྱའོ་ཞེས་གསུངས་པ་ཡིན་ནོ། །གལ་ཏེ་ཁྲུས་རས་མི་འབྱོར་ན་དེའི་ཚེ་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་མེད་ན་མདུན་དང་རྒྱབ་ནས་ལོ་མ་དག་གིས་གླན་ལ་དབེན་པའི་ཕྱོགས་སུ་ཁྲུས་བྱའོ་ཞེས་བྱ་བ་སྨྲས་ཏེ། ཁྲུས་རས་མེད་ན་མདུན་དང་རྒྱབ་ནས་ལོ་མ་དག་གིས་གླན་ལ་ཁྲུས་བྱའོ། །དབེན་པའི་ཕྱོགས་སུ་ཞེས་བྱ་བ་ནི། སྐྱེ་བོ་མེད་པའི་ཕྱོགས་སུའོ། །གང་ལ་ལ་ཞིག་ལ་ཁྲུས་རས་མེད་ན་དགེ་སློང་དེས་ཆོ་ག་དེས་ཁྲུས་བྱའོ། །འདིར་གཞུང་ནི་གཞན་དག་ལ་ཁྲུས་རས་ཀྱི་རྙེད་པ་མེད་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གི་མདུན་དང་རྒྱབ་ནས་ལོ་མ་དག་གིས་གླན་ལ་ཁྲུས་བྱའོ་ཞེས་གསུངས་པ་ཡིན་ནོ། །སྲོག་ཆགས་དང་བཅས་པའི་ཆུ་ལ་ཁྲུས་རས་ཉི་རིམ་གྱིས་ཁྲུས་མི་བྱ་ཞིང་ཆིག་རྐྱང་གིས་ཁྲུས་བྱ་ན་དེ་ལ་ཡང་སྲོག་ཆགས་མེད་པ་ཉིད་དུ་བསྒྲུབ་པའི་ཕྱིར། སྲོག་ཆགས་ཆགས་ན་བཤལ་བས་མེད་པར་འགྱུར་རོ་ཞེས་བྱ་བ་སྨྲས་ཏེ། ཁྲུས་རས་ཆིག་རྐྱང་ལ་སྲོག་ཆགས་ཆགས་ན་ཆུས་བཤལ་བས་མེད་པར་འགྱུར་ཞིང་བྲལ་བར་འགྱུར་རོ། །ལྷན་པ་ཅན་ཡང་ཉི་རིམ་ཉིད་ཡིན་ནོ། །གཙུག་ལག་ཁང་དུ་ཁྲུས་ཀྱི་ཕྱོགས་བརྗོད་པར་འདོད་ན་ས་དེ་གཙུག་ལག་ཁང་དུ་ནི་སྟོར་ཁུང་དུའོ་ཞེས་བྱ་བ་སྨྲས་ཏེ། དེ་ཞེས་བྱ་བ་ནི་ཁྲུས་སོ། །གལ་ཏེ་གཙུག་ལག་ཁང་དུ་བྱེད་ན་སྟོར་ཁུང་གི་ཕྱོགས་ཁོ་ནར་བྱའི་གཞན་དུ་ནི་མ་ཡིན་ནོ། །ཁྲུས་ཀྱི་ཞར་ལ་གཙུག་ཆུ་ཡང་དབོ་བར་བྱའོ་ཞེས་བྱ་བ་འདི་བརྗོད་དེ། ལྷུང་བཟེད་བཀྲུས་པ་དང༌། ཆོས་གོས་བཀྲུས་པ་ལ་སོགས་པའི་ཆུ་དག་དབོ་བར་བྱའོ། །ཡང་ཞེས་བྱ་བ་ནི་སྟོར་ཁུང་ཉིད་དུ་དབོ་བར་རིག་པར་བྱའོ། །ཁྲུས་ལ་སོགས་པའི་དོན་
ཉིད་དུ་གནས་གཞན་བྱ་བའི་ཕྱིར་ཁྲུས་ཁང་བྱའོ་ཞེས་བྱ་བ་སྨྲས་ཏེ། ཁྲུས་ཀྱི་ཆེད་དུ་ཁང་པ་བྱའོ། །དེར་སོ་ཕག་གི་གཅལ་དགྲམ་མོ་ཞེས་བྱ་བ་ནི་ཁྲུས་ཁང་དེར་སོ་ཕག་སོ་བཏང་བ་ལས་བྱས་པའི་གཅལ་དགྲ་མ་པར་བྱའོ། །སྟོར་ཁུང་གདོད་དོ་ཞེས་བྱ་བ་ནི། གང་ནས་ཆུའི་ཕྱི་རོལ་དུ་འཛག་པ་དེའི་སྲང་གདོད་པར་བྱ་སྟེ། ཆུ་ཕྱི་རོལ་དུ་འགྲོ་བར་བྱ་བའི་ཕྱིར། བུ་གུ་གདོད་པར་བྱ་བའོ། །ལྗན་ལྗིན་བསལ་བར་བྱའོ་ཞེས་བྱ་བ་ལ། ལྗན་ལྗིན་ཞེས་བྱ་བ་ནི་རྫ་བ་སྟེ། དེ་བསལ་བར་བྱ་བ་ནི་བཞར་བར་བྱ་བའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། སྟོར་ཁུང་གདོད་པར་བྱའོ། །ལྗན་ལྗིན་ཡོད་ནས། བཅོམ་ལྡན་འདས་ཀྱིས་བཀའ་སྩལ་པ། དུས་དུས་སུ་བསལ་བར་བྱའོ་ཞེས་གསུངས་པ་ཡིན་ནོ། །དེ་ལྟར་བཅོམ་ལྡན་འདས་ཀྱིས་སྟོར་ཁུང་ཁོ་ནར་ཁྲུས་བྱའོ་ཞེས་གསུངས་པས་དེ་བསྡུ་བའི་ཕྱིར། སྟོར་ཁུང་དུ་ཁྲུས་བྱེད་ན་མི་འབྱུང་ངོ་ཞེས་བྱ་བ་སྨྲས་ཏེ། ཁྲུས་ནི་བཀྲུ་བའོ། །སྟོར་ཁུང་དེར་ཁྲུས་བྱེད་ན་རྫབ་མི་འབྱུང་ངོ༌། །སོ་ཕག་གི་དུམ་བུས་བྲུད་པ་ཡང་ཁྲུས་ཀྱི་ཡན་ལག་ཡིན་པས་དེའི་ཕྱིར་ཁྲུས་ཀྱི་ཞར་ལ། སོ་ཕག་གི་དུམ་བུས་བྲུད་པས་རྐང་པ་གཉིས་ལས་གཞན་པའི་ལུས་ལ་བྲུད་པར་མི་བྱའོ་ཞེས་བྱ་བ་འདི་བརྗོད་དེ། སོ་ཕག་གི་དུམ་བུས་ཞེས་བྱ་བ་ནི། སོ་ཕག་སོ་བཏང་བ་ལ་སོགས་པའི་དུམ་བུས་སོ། །སོ་ཕག་གི་དུམ་བུ་དེས་བྲུས་པས་ཞེས་བྱ་བ་ནི་སྦྱང་བ་སྟེ། དེས་ལུས་ལ་བྲུད་པར་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་སོ་ཕག་གི་དུམ་བུས་ལུས་ལ་བྲུད་པར་མི་བྱའོ་ཞེས་གསུངས་པ་ཡིན་ཏེ། རྐང་པ་གཉིས་ལས་གཞན་པ་དེ་གཉིས་མ་གཏོགས་པའི་ལུས་ལ་བྲུད་པར་མི་བྱའོ་ཞེས་བྱ་བའི་ཐ་ཚིག་གོ །དེ་ནི་རྣོན་པོ་དང་བཞར་སྤྱད་གཉིས་ཀྱི་དཔེ་ཡིན་ནོ་ཞེས་བྱ་བ་ལ། དེ་ནི་ཞེས་བྱ་བ་ནི་སོ་ཕག་གི་དུམ་བུའོ། །དཔེ་ཡིན་ནོ་ཞེས་བྱ་བ་ནི་ཉེ་བར་མཚོན་པ་ཡིན་པར་རིག་བར་བྱའོ། །གང་གིས་ཤེ་ན་རྣོན་པོ་དང་བཞར་སྤྱད་གཉིས་ཀྱིས་ཏེ། རྣོན་པོ་ཞེས་བྱ་བ་ནི་གྲི་ལ་སོགས་པའོ། །བཞར་སྤྱད་ཅེས་བྱ་བ་ནི་རྒྱ་མཚོའི་དབུ་བ་ལ་སོགས་པ་སྟེ། དེ་ནི་གཉིས་ཀྱི་དཔེ་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་སོ་ཕག་གི་དུམ་བུས་ལུས་ལ་བྲུད་པར་མི་བྱའོ་ཞེས་བཀའ་སྩལ་པ་དང༌། དགེ་སློང་དག་ཉ་ཕྱིས་འདྲུད་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཉ་
ཕྱིས་མི་རྩུབ་པས་བྱའོ་ཞེས་གསུངས་པ་ཡིན་ནོ། །གལ་ཏེ་ཉ་ཕྱིས་མི་རྩུབ་པས་ལུས་ལ་འདྲུད་པར་བྱེད་ན་དེ་ཇི་ལྟར་སྦྱར་བར་བྱ་ཞེ་ན། དེའི་ཕྱིར་ཉ་ཕྱིས་ནི་མེས་སྦྱང་ངོ་ཞེས་བྱ་བ་སྨྲས་ཏེ། ཉ་ཕྱིས་སྦྱང་བ་ནི་མེས་དྲོས་ཙམ་གྱི་བྱ་བ་ཡིན་པར་རིག་པར་བྱའོ། །དགེ་སློང་རྣམས་ཀྱིས་ནི་རྣམ་པ་འགས་བྲུད་པར་བྱའོ། །དགེ་སློང་མ་རྣམས་ཀྱིས་ནི་རྣམ་པ་གང་གིས་ཀྱང་མི་བྱའོ་ཞེས་བསྟན་པའི་ཕྱིར་དགེ་སློང་མས་ནི་གང་དུ་ཡང་ཁུ་ཚུར་དག་དང་གོས་དྲིལ་བ་དག་ཡན་ཅང་གང་གིས་ཀྱང་བྲུད་པར་མི་བྱའོ་ཞེས་བྱ་བ་སྨྲས་ཏེ། དགེ་སློང་མས་ནི་བྲུད་པར་མི་བྱ་སྟེ། གང་དུ་ཡང་ཞེས་བྱ་བ་ནི་ལུས་ཀྱི་ཕྱོགས་སོ། །གང་གིས་ཀྱང་ཞེས་བྱ་བ་ནི་དངོས་པོས་ཏེ། ཁུ་ཚུར་དག་ཡན་ཆད་དང་གོས་དྲིལ་བ་དག་ཡན་ཆད་ཀྱིས་ཀྱང་བྲུད་པར་མི་བྱ་ན། ཉ་ཕྱིས་ལ་སོགས་པ་གཞན་དག་གིས་ལྟ་སྨོས་ཀྱང་ཅི་དགོས། ཁྲུས་ཀྱི་ཞར་ལ་གོས་གྱོན་པ་ཉམས་པ་ཡོངས་སུ་སྤང་བའི་ཕྱིར། གཤེར་འགྱུར་གྱི་ཆུ་དང་མ་བྲལ་བས་ཆོས་གོས་དག་བགོ་བར་མི་བྱའོ་ཞེས་བྱ་བ་སྨྲས་ཏེ། ཁྲུས་བྱས་པའི་རྗེས་ལ་ཆུའི་ཐིགས་པའི་ལྷག་མ་མང་པོ་ལུས་ལ་ཆགས་པར་འགྱུར་ཞིང༌། ཆུའི་ཐིགས་པ་དེ་དག་གིས་ཆོས་གོས་དག་གཤེར་བར་འགྱུར་བ་དེ་དག་ནི་གཤེར་འགྱུར་གྱི་ཆུ་ཞེས་བྱ་བའི་སྒྲས་བརྗོད་དོ། །དགེ་སློང་གང་གཤེར་འགྱུར་གྱི་ཆུ་དང་མ་བྲལ་བ་དེ་ནི་གཤེར་འགྱུར་གྱི་ཆུ་དང་མ་བྲལ་བ་སྟེ། དེས་ཇི་སྲིད་དུ་ཆུའི་ཐིགས་པ་དེ་དག་མ་སྐམས་ཀྱི་བར་དུ་ཆོས་གོས་དག་བགོ་བར་མི་བྱའོ། །གང་དུས་དེ་སྲིད་དུ་སྡོད་པར་མི་འདོད་པ་དེའི་ཕྱིར་ལུས་ཕྱིས་བཅང་བར་བྱའོ་ཞེས་བྱ་བ་བརྗོད་དེ། ལུས་ཕྱི་བའོ། །ལུས་ཕྱིས་མེད་ན་ཇི་ལྟར་བྱ་ཞེ་ན། དེའི་ཕྱིར་མེད་ན་ཡུད་ཙམ་ཞིག་ཙོག་པུར་འདུག་ལ་ཁྲུས་རས་ཀྱིས་ཕྱི་བར་བྱའོ་ཞེས་བྱ་བ་སྨྲས་ཏེ། མེད་ན་ཞེས་བྱ་བ་ནི་ལུས་ཕྱི་བའོ། །ཡུད་ཙམ་ཞིག་ཅེས་བྱ་བ་ནི། ཇི་ལྟར་ཁྲུས་རས་ཀྱིས་ལུས་ཕྱིས་ཏེ། ཆོས་གོས་ངག་གྱོན་ན་ཉམས་པར་མི་འགྱུར་བ་དེ་ལྟར་འགྱུར་བའི་དུས་ཇི་སྲིད་པའི་དུས་དེ་ནི་ཡུད་ཙམ་ཞིག་ཅེས་བྱའོ། །ཙོག་པུར་འདུག་ལ་ཞེས་བྱ་བ་ནི། ལུས་ལ་ཆུའི་ཐིགས་པ་མྱུར་དུ་འབྲུལ་བའི་ཕྱིར་རོ། །ཁྲུས་རས་ཀྱིས་ཕྱི་བར་བྱའོ་ཞེས་བྱ་བ་ནི། ཕྱིས་ཁྲུས་རས་ཀྱིས་ལུས་ཕྱི་བར་བྱ་བའོ་ཞེས་བྱ་བའི་ཐ་ཚིག་གོ །ཁྲུས་
ཀྱི་ཞར་ལ་བསྲོ་གང་བསྟེན་པར་བྱའོ་ཞེས་བྱ་བ་འདི་བརྗོད་དེ། བསྲོ་གང་ཉམས་སུ་མྱོང་བར་བྱའོ། །འདི་མན་ཆད་ནི་བསྲོ་གང་གི་ཆོ་ག་བརྗོད་དེ། བསྲོ་གང་གི་ཁང་པ་བྱ་བ་ནི་གྲམས་ཆེ་བར་བཟང་ངོ་ཞེས་བྱ་བ་ལ། བསྲོ་གང་གི་ཁང་པ་ཞེས་བྱ་བ་ནི། བསྲོ་གང་གི་ཆེད་ཀྱི་ཁང་པའོ། །དེ་བྱ་བ་ནི་བརྩིག་པའོ། །གྲམས་ཆེ་བར་ཞེས་བྱ་བ་ནི། གྲམ་གསེག་ཆེ་བ་སྟེ། གྲམ་གསེག་ཤས་ཆེ་བའི་ཕྱོགས་སུའོ། །བཟང་ངོ་ཞེས་བྱ་བ་ནི། གྲམ་གསེག་ནི་བརླན་མེད་པའི་ཕྱིར་རོ། །བསྲོ་གང་གི་ཁང་པ་དེར་གང་བྱ་བ་དེ་ཉེ་བར་བསྟན་པའི་ཕྱིར། དཀྱིལ་དུ་སྐར་ཁུང་ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུ་གདོད་དོ་ཞེས་བྱ་བ་སྨྲས་ཏེ། སྐར་ཁུང་གདོད་པར་བྱའོ། །ཕྱོགས་གང་དུ་ཞེ་ན། བསྲོ་གང་གི་ཁང་པར་གཏོགས་པའི་རྩིག་པའི་དཀྱིལ་དུའོ། །དམའ་བར་ཡང་མི་གདོད་དེ། དུ་བ་སངས་དཀའ་བའི་ཕྱིར་རོ། །མཐོ་བར་ཡང་མི་གདོད་དེ། མུན་པར་འགྱུར་བའི་ཕྱིར་རོ། །དེ་ཁྱད་པར་ཇི་ལྟ་བུ་ཞིག་ཅེ་ན། ཕྱི་རུབ་ལ་ནང་ཡངས་པ་རྒྱ་མཚོའི་རྣམ་པ་ལྟ་བུ་ཞེས་བྱ་བ་སྨྲས་ཏེ། དེའི་ཕྱི་རོལ་གྱི་ཁ་ཞུམ་ལ་ནང་ལོགས་ཡངས་པར་བྱའོ། །རྒྱ་མཚོའི་རྣམ་པ་ལྟ་བུ་ནི་གང་གི་དབྱིབས་རྒྱ་མཚོའི་རྣམ་པ་འདྲ་བ་ནི་དེ་ཉིད་ཡིན་ཏེ། དེས་ནི་སྐར་ཁུང་དེ་བྱིན་གྱིས་ཡངས་པར་སྟོན་ཏོ། །དེར་སྐར་ཁུང་དྲ་བ་ཅན་དང་སྒོ་གླེགས་དང༌། འཁོར་གཏན་དང༌། གནམ་གཟེར་དང༌། ཕྲེད་གཏན་དང་བཅས་པར་གཞུག་གོ་ཞེས་བྱ་བ་ནི། སྐར་ཁུང་དེར་སྐར་ཁུང་དྲ་བ་ཅན་དང་སྒོ་གླེགས་དང༌། འཁོར་གཏན་དང༌། གནམ་གཟེར་དང༌། ཕྲེད་གཏན་དེ་དག་གཞུག་སྟེ་རྣམ་པར་གཞག་པར་བྱའོ། །སྐར་ཁུང་དྲ་བ་ཅན་ཞེས་བྱ་བ་ནི། སྐར་ཁུང་ལན་ཀན་ཅན་ནོ། །སྒོ་གླེགས་ཞེས་བྱ་བ་ནི། སྤང་ལེབ་ཅེས་བྱ་བའི་ཤིང་སྟེ། དེས་སྐར་ཁུང་བཅད་པར་བྱེད་པའོ། །འཁོར་གཏན་ཞེས་བྱ་བ་ནི། དེ་སྒོ་གླེགས་བཅད་པའི་ཐབས་སུ་གྱུར་པ་ཡིན་ཏེ། སྒོ་གླེགས་ཀྱི་དཀྱིལ་གྱི་ཕྱོགས་སུ་ཤིང་གི་གཏན་བུ་ཁྲུ་གང་གི་ཚད་ཙམ་བཏགས་ཤིང༌། སྒོ་སྐྱེས་ལ་དེའི་གཟུངས་གདོད་དོ། །གཏན་བུ་དེ་འཁོར་ལོ་བཞིན་དུ་བསྐོར་ནས་གཟུངས་དེར་གཞུག་པར་བྱ་སྟེ། དེས་ན་འཁོར་གཏན་ཞེས་བྱའོ། །གནམ་གཟེར་ཞེས་བྱ་བ་ནི། སྒོའི་ཡ་ཕུབས་ལས་བཏགས་པའི་གཟེར་བུ་ལ་སོགས་པའོ། །ཕྲེད་གཏན་ཞེས་བྱ་བ་ནི། རྩིག་པའི་སྦུབས་ཀྱི་ཁོང་དུ་
གཞུག་པའི་ཤིང་རིང་པོ་ལ་བྱའོ། །དབྱུག་གུ་སྐམ་ཁ་ཡང་ཉེ་བར་གཞག་གོ་ཞེས་བྱ་བ་ལ། དབྱུག་གུ་རའི་རྐང་པ་འདྲ་བ་ནི་དབྱུག་གུ་སྐམ་ཁ་སྟེ། དེ་ཡང་དེར་ཉེ་བར་གཞག་གོ །ཡང་ཞེས་བྱ་བ་ནི། དེར་ཞེས་བྱ་བ་འདྲེན་པར་བྱེད་དོ། །འདི་ལྟར་དབྱུག་གུ་སྐམ་ཁ་དེར་སྐར་ཁུང་དུ་ཕྲེད་གཏན་འཛུད་པ་དང་འབྱིན་པར་བྱེད་དོ། །སྒོར་སྒོ་གླེགས་དང་སྒོ་གཏན་དང་ཡང་མིག་དང་ལག་གཟུངས་ལེགས་པར་བྱའོ་ཞེས་བྱ་བ་ནི། བསྲོ་གང་གི་ཁང་པའི་སྒོར་སྒོ་གླེགས་ལ་སོགས་པ་ལེགས་པར་བྱ་བའོ། །སྒོ་གཏན་ཞེས་བྱ་བ་ནི། སྒོ་གླེགས་གཅད་པའི་ཐབས་སུ་གྱུར་པའོ། །ཡང་མིག་ཅེས་བྱ་བ་ནི། སྒོ་གླེགས་ཀྱི་ཕྱི་རོལ་གྱི་ངོས་ཀྱི་ཡང་མིག་གོ །ལག་གཟུངས་ཞེས་བྱ་བ་ནི། སྒོ་གླེགས་ནང་དུ་འདྲེན་པ་ལྕགས་ལས་བྱས་པའོ། །ཆུ་དྲོན་གཞག་པའི་ཕྱིར་ནང་གི་ཕྱོགས་སུ་བཞག་སྟེགས་བྱའོ་ཞེས་བྱ་བ་ནི། ཆུ་དྲོན་མོ་གཞག་པའི་ཕྱིར་བསྲོ་གང་གི་ཁང་པའི་ནང་གི་ཕྱོགས་སུ་བཞག་སྟེགས་ཀྱི་སྟེགས་བུ་དེ་བྱའོ། །མེ་འབུད་པའི་གནས་ཀྱི་སར་སོ་ཕག་གིས་གཅད་བྱའོ་ཞེས་པ་ལ། མེ་བུང་པ་ཞེས་བྱ་བ་ནི། མེ་སྦར་བའོ། །དེའི་གནས་གང་ཡིན་པ་དེའི་ས་དེར་སོ་ཕག་དག་གི་གཅལ་གཞུག་པར་བྱའོ། །མི་འཆི་བར་བྱ་བའི་ཕྱིར་སྦ་བར་བྱའོ་ཞེས་བྱ་བ་ནི། མེ་མི་འཆི་བར་བྱ་བའི་ཕྱིར་ཞེས་བྱ་བ་མི་ཉམས་པར་བྱ་བའི་ཕྱིར་རོ། །སྦ་བར་བྱའོ་ཞེས་བྱ་བ་ཟླུམ་པོར་བྱ་བ་སྟེ། བཅེར་བར་བྱའོ་ཞེས་བྱ་བའི་ཐ་ཚིག་གོ །དེའི་ཆེད་དུ་ལྕགས་ཀྱི་ཐལ་ཕྱགས་བཅང་བར་བྱའོ་ཞེས་བྱ་བ་ནི། མེས་སྦ་བ་དེའི་ཆེད་དུ་ལྕགས་ཀྱི་ཐལ་ཕྱགས་བཅང་བར་བྱའོ། །ལྕགས་ལས་བྱས་བ་ནི་ལྕགས་ཀྱི་སྟེ། ལྕགས་ཀྱི་ནལ་ཟེ་བཅང་བར་བྱའོ་ཞེས་བྱ་བའི་ཐ་ཚིག་གོ །མེ་འབར་བ་ན་མི་རྨྱ་བར་བྱ་བའི་ཕྱིར་འཇུག་པ་བསྡད་པར་བྱའོ་ཞེས་བྱ་བ་ནི། བསྲོ་གང་གི་ཁང་པར་མེ་སྦར་ཏེ་འབར་ན་མི་རྨྱ་བར་བྱ་བ་མི་འཁྲུགས་པར་བྱ་བའི་ཕྱིར་ནང་དུ་འཇུག་པ་རེ་ཞིག་བསྡད་པར་བྱའོ། །བོག་པ་མི་འབྱུང་བར་བྱ་བའི་ཕྱིར། ཕྱེ་དང་ཡུངས་མར་དུ་བསྲེས་པ་དག་མེར་བླུགས་སོ་ཞེས་བྱ་བ་ལ། བོག་པ་ཞེས་བྱ་བ་ནི་མེས་བརྒྱལ་བ་སྟེ། དེ་མི་འབྱུང་བར་བྱ་བའི་ཕྱིར་ཕྱེ་དང་ཡུངས་མར་ཡུངས་ཀར་གྱི་མར་དུ་བསྲེས་པ་སྦྱར་བ་དག་མེར་བླུགས་པར་བྱའོ། །དྲི་མི་ཞིམ་པ་ཉིད་བསལ་བའི་
ཕྱིར་བདུག་སྤོས་བླུགས་སོ་ཞེས་བྱ་བ་ལ། དྲི་མི་ཞིམ་པའི་དངོས་པོ་ནི་དྲི་མི་ཞིམ་པ་ཉིད་དེ། ཕྱེ་དང་ཡུངས་མར་བསྲེས་པ་དག་བླུགས་པ་ལས་གྱུར་པའི་དྲི་མི་ཞིམ་པ་ཉིད་དེ། བསལ་བ་ཞེས་བྱ་བ་དེ་དང་དབྲལ་བའི་ཕྱིར་བདུག་སྤོས་བླུགས་པར་བྱའོ། །མཆི་མ་འཛག་ནས་ཀྱི་བག་ཟན་གྱིས་གཅོད་དོ་ཞེས་བྱ་བ་ལ། མཆི་མ་འཛག་ན་ཞེས་བྱ་བ་ནི། མིག་ཆུ་འཛག་ནའོ། །ནས་ཀྱི་བག་ཕྱེ་ཞེས་བྱ་བ་ནི། ནས་བཏགས་པའི་མིང་ངོ༌། །དེའི་ཟན་གྱིས་མིག་ཆུ་གཅད་པར་བྱ་སྟེ། མི་འཛག་པར་བྱ་བའི་ཐབས་ཞེས་བྱ་བའི་ཐ་ཚིག་གོ །སྐྱུ་རུ་རའི་ཕྱེ་མ་སྤུས་པའི་ཆད་བུས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བས་ནི་དེ་བཅད་དོ་ཞེས་བྱ་བར་སྦྱར་རོ། །དེར་རྩྭ་བམ་གྱི་སྟན་གདིང་ངོ་ཞེས་བྱ་བ་ནི། བསྲོ་གང་དེར་རྩ་བམ་རྩྭ་ཆུན་གཤིབས་པའི་སྟན་གདིང་བར་བྱ་སྟེ། སླ་བའི་ཕྱིར་རོ། །ས་གཞིར་སྐྱེ་བ་ཉིད་ཀྱིས་སམ་སྤངས་བས་གཤེར་བའི་རྩྭ་གཤེར་བ་དག་དགྲམ་མོ་ཞེས་བྱ་བ་ནི། བསྲོ་གང་གི་ཁང་པའི་ས་གཞི་གང་ཡིན་པར་རྩྭ་དག་དགྲམ་པར་བྱ་སྟེ། ཁྱད་པར་ཇི་ལྟ་བུ་ཅན་ཞིག་ཅེ་ན། གཤེར་བ་དག་གོ །དེ་དག་ཅིས་གཤེར་ཞེ་ན། སྐྱེ་བ་ཉིད་ཀྱིས་སམ་ཞེས་བྱ་བ་སྐྱེ་བས་གྲུབ་པ་ནི། སྐྱེ་བས་གཤེར་བ་སྟེ་དེས་སོ། །སྤངས་པས་ཞེས་བྱ་བ་ནི་ཆུས་བཏབ་པས་གཤེར་བ་སྟེ། དེ་ཡང་རུང་ངོ༌། །གཡན་པ་ཕྲུག་པའི་ཆེད་དུ་ལྕགས་ཀྱི་ཕྲུག་སྤྱད་བྱའོ་ཞེས་བྱ་བ་ནི། གཡན་པ་ཕྲུག་པའི་རྒྱུར་ལྕགས་ལས་བྱས་པའི་གཟར་ཆུང་བྱ་བའོ། །རྫས་ཀྱི་བླས་ལུང་མིག་ནས་ཐ་གུས་བཏགས་ཏེ་དབེན་པར་གཞག་གོ་ཞེས་བྱ་བ་ནི། རྫས་ཀྱི་བླས་ཕྲུས་སྤྱད་དེའི་ལུང་མིག་གི་ནང་ནས་ཐ་གུས་བཏགས་པའི་རྒྱུས་ཕྱོགས་དབེན་པར་གཞག་སྟེ། སྤྱང་དུ་གཞུག་གོ་ཞེས་བྱ་བའི་ཐ་ཚིག་གོ །དེ་ལ་དྲི་མ་མེད་པ་ཉིད་དུ་བསྒྲུབ་པའི་ཕྱིར་མེས་རུང་བར་བྱའོ་ཞེས་བྱ་བ་ནི། གཡན་པ་ཕྲུག་པའི་ཆེད་དུ་སྦྱར་བའི་ཕྲུག་སྤྱད་དེ་ལ་དྲི་མ་མེད་པ་ཉིད་དུ་བསྒྲུབ་པ་དག་པར་བྱ་བའི་ཕྱིར་མེས་རུང་བར་བྱ་བ་མེས་བརྟག་པར་བྱའོ་ཞེས་བྱ་བའི་ཐ་ཚིག་གོ །དེར་ཁྲུས་མི་བྱའོ་ཞེས་བྱ་བ་ནི། བསྲོ་གང་དེར་དགེ་སློང་དག་གིས་ཁྲུས་མི་བྱ་བའོ། །དེའི་ཆེད་དུ་ཁྲུས་ཁང་བྱའོ་ཞེས་བྱ་བ་ནི། ཁྲུས་བྱ་བ་དེའི་ཆེད་དུ་ཁྲུས་ཁང་བྱའོ་ཞེས་བྱ་བའི་ཐ་ཚིག་གོ །ཁྲུས་ཆུ་ལྡུགས་པའི་ཆོས་གོས་དག་མི་ཉམས་པར་བྱ་བའི་ཕྱིར་སོ་ཕག་གིས་བསྒྲོན་པའི་ཁྲུས་དོང་བྱའོ་
ཞེས་བྱ་བ་ལ། ཁྲུས་ཀྱི་ཆུ་ལྡུགས་པར་བྱེད་པའི་གོས་དག་ནི་ཁྲུས་ཆུ་ལྡུགས་པའི་ཆོས་གོས་དག་གོ །དེ་དག་མི་ཉམས་མི་གཤེར་བར་བྱ་བའི་ཕྱིར་སོ་ཕག་གིས་བསྒྲོན་པའི་ཁྲུས་དོང་བྱའོ། །འདི་སྐད་བསྟན་ཏེ། དགེ་སློང་ཁྲུས་དོང་དུ་ཞུགས་པས་ནི་ཁྲུས་བྱ་ལ། དགེ་སློང་ཁ་ན་སྡོད་པས་ནི་ཆུ་བླུགས་པར་བྱ་སྟེ། དེ་ལྟར་ན་ཆོས་གོས་དག་ཉམས་པར་མི་འགྱུར་རོ། །དེ་ལ་སྟོར་ཁུང་གདོད་དོ་ཞེས་བྱ་བ་ལ། དེ་ལ་ཞེས་བྱ་བ་ནི་ཁྲུས་དོང་ལ་སྟེ། ཁྲུས་དོང་དེ་ལ་སྟོར་ཁུང་གདོད་པར་བྱའོ། །ཆུ་ཧ་ཅང་ཚན་ཕྱི་མ་རྣམས་ལ་སྦྲན་པར་བྱའོ་ཞེས་བྱ་བ་ནི་ཁྲུས་ཆུ་ཧ་ཅང་ཚ་སྟེ། བརྣགས་མི་བཟོད་ན་རབ་ཏུ་བྱུང་བ་ཕྱི་མ་རྣམས་ལ་སྤྲན་པར་བྱ་བ་སྟེ། གལ་ཏེ་ཆུ་ཧ་ཅང་ཚ་ཆེས་ཏེ་ཁྲུས་བྱར་མི་བཟོད་ན། དགེ་སློང་ཕྱི་མ་རྣམས་ལ་ཆུ་ཏེ་པོར་ཚའོ་ཞེས་སྦྲན་པར་བྱ་བའོ། །དེར་གྲང་མོས་བསྲེའོ་ཞེས་བྱ་བ་ནི། ཆུ་ཚ་བ་དེར་ཆུ་གྲང་མོས་བསྲེ་བ་འདྲེས་པར་བྱ་བ་སྟེ། ཆུ་ཚ་བའི་ནང་དུ་ཆུ་གྲང་མོས་བསླད་པར་བྱ་བའོ། །ཆག་ཆག་གི་ཆུ་ལ་སོགས་པར་ཡང་ངོ་ཞེས་བྱ་བ་ལ། ཆག་ཆག་གི་ཆུ་གང་ལ་བཀྲུ་བཤལ་དང༌། ཞལ་ཞལ་ལ་སོགས་པའི་སོགས་པ་ཡོད་པ་དེ་ནི་ཆག་ཆག་གི་ཆུ་ལ་སོགས་པ་སྟེ། ཆག་ཆག་གི་ཆུ་ལ་སོགས་པ་དེར་ཞེས་བྱ་བ་ཆག་ཆག་གི་ཆུ་ལ་སོགས་པའི་ཕྱིར། ཡང་ཆུ་ཚ་བ་དེར་ཆུ་གྲང་མོས་བསྲེ་བར་བྱའོ་ཞེས་བྱ་བའི་ཐ་ཚིག་གོ །ཁྲུས་གང་དེར་ཡང་ཐལ་བ་དང་བ་ལང་གི་ལྕི་བ་དང་སོ་ཤིང་གིས་བཀང་བའི་གྱོ་མོ་དག་གཞག་པར་བྱའོ་ཞེས་བྱ་བ་ལ། ཐལ་བ་དང་བ་ལང་གི་ལྕི་བ་དང་སོ་ཤིང་ནི་ཐལ་བ་དང་བ་ལང་གི་ལྕི་བ་དང་སོ་ཤིང་དག་གོ །དེ་དག་གིས་སོ་སོར་བཀང་བའི་གྱོ་མོ་དག་གཞག་པར་བྱ་སྟེ། ཁྲུས་ཁང་དེར་ཐལ་བ་ལ་སོགས་པས་བཀང་བའི་གྱོ་མོ་དག་གཞག་པར་བྱའོ་ཞེས་བྱ་བའི་ཐ་ཚིག་གོ །གལ་ཏེ་ཉམས་དམས་པར་གྱུར་ན་ཁེའུ་སུས་བྱའོ་ཞེས་བྱ་བ་ནི། གལ་ཏེ་བསྲོ་གང་དུ་ཞུགས་པས་ལུས་ཀྱི་ཉམས་དམས་པ་ཉིད་དུ་གྱུར་ན་དེའི་ཚེ་ཁེའུ་སུས་བཟའ་བར་བྱའོ། །བསྲོ་གང་དུ་འཇུག་པའི་དུས་ན་དགེ་སློང་རྣམས་ཆ་ལུགས་དང་བྲལ་བའི་ཕྱིར། ཀུན་དུ་རྒྱུ་ལ་སོགས་པ་གཞན་དག་ཤན་བསྲེ་བས་བསྲོ་གང་དུ་འཇུག་པའི་སྐབས་སྲིད་པའི་ཕྱིར། དེར་ངོ་མི་ཤེས་པ་ཞིག་ཤན་བསྲེ་བས་ཉེ་བར་གནས་པར་གྱུར་ན། དེར་གཏོགས་པས་ངེས་
པར་ཤེས་པར་བྱ་བའི་ཕྱིར། དྲི་བར་བྱ་ཞིང་དེའི་ཆེད་དུ་མི་འཇུག་པར་བྱ་བའི་ཕྱིར། དགེ་སློང་སྒོ་བ་བསྐོའི་ཞེས་བྱ་བ་སྨྲས་ཏེ། དེར་ཞེས་བྱ་བ་ནི་བསྲོ་ཁང་དུའོ། །ངོ་མི་ཤེས་པ་ཞིག་ཅེས་བྱ་བ་ནི་མ་ངེས་པ་ཞིག་གོ །ཤན་བསྲེ་བས་ཞེས་བྱ་བ་ནི། ཁོ་བོ་ཁྱེད་ཅག་ལས་གང་ཡང་རུང་བ་ཞིག་ཡིན་ནོ་ཞེས་གསེབ་ཏུ་འཇུག་པས་སོ། །ཉེ་བར་གནས་པར་གྱུར་ན་ཞེས་བྱ་བ་ནི། ཀུན་དུ་རྒྱུ་ལ་སོགས་པ་སྟ་གོན་དུ་གནས་པར་གྱུར་ནའོ། །དེར་གཏོགས་པས་ཞེས་བྱ་བ་ནི། བསྲོ་གང་ན་རྣམ་པར་གནས་པའི་དགེ་སློང་གིས་ཏེ། དེས་དྲི་བར་བྱའོ། །ཅི་ཞིག་གི་ཕྱིར་ཞེ་ན། ཇི་འདི་ཆོས་འདིའི་བའི་དགེ་སློང་ཞིག་གམ། འོན་ཏེ་ཀུན་དུ་རྒྱུ་ལ་སོགས་པ་ཞིག་ཡིན་ཞེས་དེ་ལྟར་ཤེས་པར་བྱ་བ་ངེས་པར་བྱ་བའི་ཕྱིར་དྲི་བར་བྱའོ། །འདི་སྐད་བསྟན་ཏེ། གལ་ཏེ་བསྲོ་གང་དུ་མུ་སྟེགས་ཅན་འགའ་ཞིག་ཁོ་བོ་ཁྱེད་ཅག་ལས་གང་ཡང་རུང་བ་ཞིག་ཡིན་ནོ་ཞེས་ཤན་བསྲེ་ཞིང་འཇུག་ན། དེའི་ཚེ་དགེ་སློང་བསྲོ་གང་དུ་ཞུགས་པས་ཁྱོད་སུ་ཞིག་ཅེས་བྱ་བ་ལ་སོགས་པས་ངེས་པར་བྱ་བའི་ཕྱིར་དྲི་བར་བྱའོ། །ཞུགས་པའི་ཐབས་ཀྱི་ཆོ་ག་བསྟན་ནས། མ་ཞུགས་པའི་ཐབས་ཀྱི་ཆོ་ག་བརྗོད་པར་བྱ་བའི་ཕྱིར། དེའི་ཆེད་དུ་ཞེས་བྱ་བ་ལ་སོགས་པ་སྨྲས་ཏེ། སྒོ་བ་བསྐོའོ་ཞེས་བྱ་བར་སྦྱར་རོ། །དེའི་ཆེད་དུ་ཞེས་བྱ་བ་ནི། ངོ་མི་ཤེས་པ་ཤན་བསྲེ་བས་ཉེ་བར་གནས་པར་གྱུར་པ་དེ་ངེས་པར་ཤེས་པར་བྱ་བའི་ཕྱིར་དྲི་བར་བྱ་བ་དང༌། མི་འཇུག་པར་བྱ་བའི་ཕྱིར་རོ། །འདི་སྐད་བསྟན་ཏེ། བསྲོ་གང་དུ་སྒོ་བ་གཞག་པར་བྱ་ཞིང༌། གལ་ཏེ་མུ་སྟེགས་ཅན་འགའ་ཞིག་འོང་ཞིང་འཇུག་པར་འདོད་ན་དེའི་ཚེ་སྒོ་བས་ངེས་པར་ཤེས་པར་བྱ་བའི་ཕྱིར་དང༌། འདི་ནི་བདག་ཅག་ལས་གང་ཡང་རུང་བ་མ་ཡིན་པས་མི་གཞུག་པའི་ཕྱིར་དེ་ལ་ཁྱོད་སུ་ཞིག་ཅེས་དྲི་བར་བྱའོ། །སྒོ་བ་ཇི་ལྟ་བུ་ཞིག་ཅེ་ན། དགེ་སློང་ཞེས་བྱ་བ་སྨྲས་ཏེ། བསྐོའོ་ཞེས་བྱ་བར་སྦྱར་རོ། །དགེ་སློང་སྨོས་པ་ནི་རབ་ཏུ་བྱུང་བའི་མཚོན་པ་ཡིན་པར་རིག་པར་བྱའོ། །སྒོ་བའི་དགོས་པ་གཞན་བསྟན་བའི་ཕྱིར། དེར་མ་དད་པ་འཇུག་ཏུ་མི་གཞུག་གོ་ཞེས་བྱ་བ་སྨྲས་ཏེ། བསྲོ་གང་དེར་ཁྱིམ་པ་མ་དད་པ་ནི་ཤན་བསྲེ་བས་ཉེ་བར་གནས་པར་གྱུར་པ་མ་ཡིན་དུ་ཟིན་ཀྱང་འཇུག་ཏུ་མི་གཞུག་གོ །འོ་ན་སུས་བྱི་དོར་གྱི་ལས་བྱ་ཞེ་ན། དེའི་ཕྱིར་བྱི་དོར་གྱི་ལས་ནི་ལྷན་ཅིག་གནས་པ་དང་ཉེ་གནས་དག་གིས་བྱའོ་
ཞེས་བྱ་བ་སྨྲས་ཏེ། བསྲོ་གང་དེར་བསྐུ་མཉེ་ལ་སོགས་པ་བྱི་དོར་གྱི་ལས་གང་ཅི་ཡང་རུང་བ་དེ་དག་ཐམས་ཅད་ལྷན་ཅིག་གནས་པ་དང་ཉེ་གནས་པ་དག་གིས་བྱའོ། །ལུགས་གཞན་ལས་ནི་གཞོན་རབས་དག་གིས་ཤེས་སོ་ཞེས་བྱ་བ་ནི། སློབ་དཔོན་གྱི་ལུགས་གཞན་ལས་ནི་བསྲོ་གང་དེར་བྱི་དོར་གྱི་ལས་གཞོན་རབས་དག་གིས་བྱའོ་ཞེས་འབྱུང་སྟེ། ཚིག་གཞན་མཐོང་བའི་ཕྱིར་རོ། །བྱི་དོར་གྱི་ལས་ཀྱི་ངོ་བོ་ཉིད་བསྟན་པའི་ཕྱིར་སྤར་བ་དང་ཟངས་དང་འབྲུ་མར་དང་སོ་ཤིང་དང་བ་ལང་གི་ལྕི་བ་དང་ས་དང་ཕྱེ་མ་དང་ཆུ་ལ་སོགས་པ་ཉེ་བར་གཞག་པ་དང༌། ཤིང་བརྟགས་པ་དང༌། དྲིལ་ཕྱི་དང་སྣུམ་གྱིས་བསྐུ་བ་དང༌། བཀྲུ་བ་དང༌། ཕྱགས་པ་དང༌། ཕྱག་དར་དོར་བ་ལ་སོགས་པའོ་ཞེས་བྱ་བ་སྨྲས་ཏེ། སྦར་བ་དང༌། ཟངས་དང༌། འབྲུ་མར་དང༌། སོ་ཤིང་དང་བ་ལང་གི་ལྕི་བ་དང༌། ས་དང་ཕྱེ་མ་དང་ཆུ་དང༌། དེ་དག་ལ་སོགས་པ་གཞན་དག་གང་ཡིན་པ་དེ་དག་ནི་དེ་དག་ལ་སོགས་པ་སྟེ། དེ་དག་ཉེ་བར་གཞག་པ་དེ་དང་ཤིང་བརྟགས་པ་དང་དྲིལ་ཕྱི་དང༌། སྣུམ་གྱིས་བསྐུ་བ་དང༌། བཀྲུ་བ་དང༌། ཕྱགས་པ་དང༌། ཕྱག་དར་དོར་བ་དང༌། དེ་དག་ལ་སོགས་པ་གཞན་གང་དག་ཡིན་པ་དེ་དག་ནི་དེ་དག་ལ་སོགས་པ་སྟེ། དེ་ལྟ་བུའི་ཁྱད་པར་ཅན་གྱི་བྱི་དོར་གྱི་ལས་བྱ་བའོ། །སྦར་བ་ཞེས་བྱ་བ་ནི། ཤིང་ལ་སོགས་པ་ལས་མེ་སྦར་བའོ། །དེ་དག་གི་ནི་གཅིག་གིས་གཅིག་ལའོ་ཞེས་བྱ་བ་ནི། ལྷན་ཅིག་གནས་པ་ལ་སོགས་པ་དེ་དག་གིས་བསྐུ་མཉེ་ལ་སོགས་པའི་བྱི་དོར་གྱི་ལས་ནི་གཅིག་གིས་གཅིག་ལ་བྱའོ། །མདོ་སྔ་མའི་སོགས་པའི་སྒྲ་གཉིས་ཀྱིས་གང་བསྡུས་པ་དེ་བསྟན་པའི་ཕྱིར། ཁྲིའུ་དང་ཉ་ཕྱིས་དག་ཀྱང་གཙང་སྦྲ་ཉིད་བྱས་ནས་གནས་ཇི་ལྟ་བར་གཞག་གོ་ཞེས་བྱ་བ་སྨྲས་ཏེ། ཁྲིའུ་དང་ཉ་ཕྱིས་དེ་གཉིས་ཀྱང་གཙང་སྦྲ་ཉིད་དག་པ་ཉིད་དུ་བྱས་ནས་གནས་ཇི་ལྟ་བར་ཞེས་བྱ་བ་གང་གིས་གནས་གང་ཡིན་པ་དེའི་དེར་གཞག་པ་དགོད་པ་རིག་པར་བྱའོ། །དེ་ཡང་མཚོན་པ་ཡིན་ཏེ། འདི་ལྟར་མ་མོ་ལས་བསྲོ་གང་དེ་ན་ཁྲིའུ་འམ། ཁྲུས་རས་སམ། གཞན་ཡང་བསྲོ་གང་གི་སྣོད་སྤྱད་གང་ཡོད་པ་དེ་ཡང་གཙང་སྦྲ་ལེགས་པར་བྱས་ཏེ། གནས་ཇི་ལྟ་བར་ཉེ་བར་དགོད་པར་བྱའོ་ཞེས་གསུངས་པ་ཡང་བསྡུ་བར་བྱའོ། །མཚུངས་པའི་ཕྱིར་གཞན་ལ་ཡང་འདྲ་བར་བསྟན་པའི་ཕྱིར། སྣོད་སྤྱད་ཐམས་ཅད་ལ་ཆོ་ག་དེ་བཞིན་ནོ་ཞེས་
བྱ་བ་སྨྲས་ཏེ། སྣོད་སྤྱད་བུམ་བ་དང་རས་ལ་སོགས་པ་ཐམས་ཅད་ལ་གཏང་སྦྲ་ལེགས་པར་བྱ་སྟེ། གནས་ཇི་ལྟ་བར་ཉེ་བར་དགོད་པར་བྱའོ་ཞེས་བྱ་བའི་ཆོ་ག་དེ་བཞིན་དུ་རིག་པར་བྱའོ། །བསྲོ་གང་གི་ཆོ་ག་འདིའི་ཞར་ལ་སྦྱར་བར་བྱ་བ་གཞན་ཡང་བསྟན་པའི་ཕྱིར། ཡོ་བྱད་ཐམས་ཅད་ལེགས་པར་སྦ་བ་དང་བྱི་དོར་བྱའོ་ཞེས་བྱ་བ་སྨྲས་ཏེ། ཡོ་བྱད་སྤྱད་ཐམས་ཅད་དབེན་པར་བཞག་པ་ལ་སོགས་པས་ལེགས་པར་སྦ་བར་བྱའོ། །བསྐམ་པ་དང་བརྐུ་བ་ལ་སོགས་པ་བྱི་དོར་བྱའོ། །ཞར་ལ་བྱུང་བ་སྨྲས་ནས། ད་ནི་བསྲོ་གང་དུ་འཇུག་པ་ལ་སོགས་པའི་ཆོ་ག་ཉིད་བརྗོད་པར་བྱ་སྟེ། དེར་སྒྲ་བསྐྱུངས་ཏེ་འཇུག་པར་བྱའོ་ཞེས་བྱ་བ་ནི་བསྲོ་གང་དེར་སྒྲ་བསྐྱུངས་ཏེ་འཇུག་པར་བྱ་བའོ། །མཛེས་པར་རོ་ཞེས་བྱ་བ་ནི། འོ་བཟེ་བར་འཇུག་པར་བྱ་བ་སྟེ། དེ་མཐོང་ན་དང་བ་སྐྱེ་བར་རོ། །མཛེས་པ་ཉིད་བསྟན་པའི་ཕྱིར། ལེགས་པར་བསྡམས་པ་དང༌། སྤྱོད་ལམ་མཛེས་པ་དང༌། ཤེས་བཞིན་དུའོ་ཞེས་བྱ་བ་སྨྲས་ཏེ། ལེགས་པར་བསྡམས་པ་ཞེས་བྱ་བ་ནི། ལུས་དང་ངག་མ་གཡེངས་པར་རོ། །སྤྱོད་ལམ་མཛེས་པ་ཞེས་བྱ་བ་ནི། སྤྱོད་པའོ་བཟེ་བར་རོ། །ཤེས་བཞིན་དུའོ་ཞེས་བྱ་བ་ནི། སེམས་ཉེ་བར་ཞི་བར་རོ། །མདུན་དུ་འདུག་སྟེ། མེ་མི་འདེའོ་ཞེས་བྱ་བ་གཞན་མེ་འདེ་བའི་མདུན་དུ་འདུག་སྟེ་མེ་མི་འདེ་བའོ། །འདི་སྐད་བསྟན་ཏེ། གཞན་མེ་འདེ་བ་རང་གི་ལུས་ཀྱིས་བསྒྲིབས་ཏེ། མེ་འདེའོ། །འདུ་འཛིའི་གཏམ་སྤང་ངོ་ཞེས་བྱ་བ་ནི། དེར་ཞེས་བྱ་བར་སྦྱར་ཏེ། དེར་སྒྲ་བསྐྱུངས་ཏེ་འཇུག་པར་བྱའོ་ཞེས་བྱ་བ་དེར་རོ། །འདུ་འཛིའི་གཏམ་ཞེས་བྱ་བ་ནི། རྒྱལ་པོ་དང་རྐུན་པོ་ལ་སོགས་པའི་གཏམ་སྟེ། བསྲོ་གང་དེར་སྤང་ངོ་ཞེས་བྱ་བའི་ཐ་ཚིག་གོ །འོ་ན་ཇི་ལྟར་གནས་པར་བྱ་ཞེ་ན། དེའི་ཕྱིར་འཕགས་པའི་མི་སྨྲ་བ་ཉིད་ལ་དམིགས་པས་སོ་ཞེས་བྱ་བ་སྨྲས་ཏེ། འཕགས་པ་རྣམས་ཀྱི་མི་སྨྲ་བ་ཉིད་ལ་དམིགས་པར་བྱའོ། །འདི་སྐད་བསྟན་ཏེ། འཕགས་པ་རྣམས་མི་སྨྲ་བ་ཉིད་གང་གིས་བཞུགས་པའི་མི་སྨྲ་བ་ཉིད་དེ་ཁོ་ནས། བསྲོ་གང་དུ་གནས་པར་བྱའོ་ཞེས་བྱ་བའི་ཐ་ཚིག་གོ །དེ་ཡང་ཚུལ་བཞིན་ཡིད་ལ་བྱེད་པ་མངོན་དུ་བྱ་བའི་དངོས་པོ་ཡིན་པར་རིག་པར་བྱའོ། །མཇུག་ཏུ་རྒྱུད་ཆགས་གསུམ་པ་གདོན་ཏོ་ཞེས་བྱ་བ་ནི། བྱ་བ་ཐམས་ཅད་ཡོངས་སུ་རྫོགས་པའི་དུས་ཀྱི་མཇུག་ཏུ་རྒྱུད་ཆགས་གསུམ་པ་གདོན་
པར་བྱ་བའོ། །གོས་གཅིག་པས་བྱི་དོར་གྱི་ལས་མི་བྱའོ་ཞེས་བྱ་བ་ལ། གང་གི་ལུས་ལ་གོས་གཅིག་གྱོན་པ་དེ་ནི་གོས་གཅིག་པ་སྟེ། དེས་བྱི་དོར་གྱི་ལས་མི་བྱའོ། །བྱི་དོར་གྱི་ལས་ཐམས་ཅད་ལ་ཡིན་གྱི། ལུས་སུ་གཏོགས་པ་འབའ་ཞིག་ལ་ནི་མ་ཡིན་པ་དང༌། གནས་ཐམས་ཅད་དུ་ཡིན་གྱི་བསྲོ་གང་འབའ་ཞིག་ཏུ་ནི་མ་ཡིན་ནོ། །ལུས་ཀྱི་དེ་མ་དད་པ་བྱེད་དུ་མི་གཞུག་གོ་ཞེས་བྱ་བ་ནི། ལུས་ཀྱི་བྱི་དོར་གྱི་ལས་དེ་མ་དད་པར་བྱེད་དུ་མི་གཞུག་པའོ། །ཁུར་ཁྱེར་དུ་གཞུག་པ་ལ་སོགས་པ་ནི་མི་དགག་སྟེ། དེ་ཡང་ཡུལ་ཐམས་ཅད་དུ་ཡིན་གྱི། བསྲོ་གང་འབའ་ཞིག་ཏུ་ནི་མ་ཡིན་ནོ། །དེར་མ་དད་པ་འཇུག་པ་བཀག་པས་འདིར་མ་དད་པའི་སྒྲ་ཡང་དང་ཡང་དུ་གྲག་པ་དེའི་མཚན་ཉིད་གང་ཡིན་ཞེ་ན། དེའི་ཕྱིར། འདི་དང་གོང་མ་ལ་ཡང་བརྟན་པ་ནི་དད་པ་ཅན་དུ་འདོད་དོ་ཞེས་བྱ་བ་སྨྲས་ཏེ། བྱི་དོར་གྱི་ལས་ཀྱི་ཆོ་ག་འདི་དང་གོང་མ་ལ་ཡང་མི་བརྟན་པ་ནི་རེ་ཞིག་པ་ཡིན་ལ། བརྟན་པ་ནི་དུས་ཡུན་རིང་བ་མི་གཡོ་བ་སྟེ། དད་པ་ཅན་ཡིན་ནོ། །འདོད་དོ་ཞེས་བྱ་བ་ནི། དེ་ལྟར་བསམས་པ་སྟེ། འདིར་མ་དད་པ་དེར་མི་གཞུག་གོ །འདི་སྐད་བསྟན་ཏེ། གང་གི་དད་པ་མི་གཡོ་བ་ཅུང་ཟད་ཙམ་གྱིས་ཀྱང༌། མི་འཁྲུལ་པ་དེ་འདིར་དང་པ་ཅན་དུ་གཟུང་བར་བྱའོ། །ཁ་ཅིག་སྡིག་པ་བྱེད་པ་ངོ་ཚ་མེད་པ་ཐར་པའི་ལམ་ཡོངས་སུ་གཏང་བ་ཚུལ་ཁྲིམས་འཆལ་ཀྱང་མཁས་པར་མངོན་པའི་ང་རྒྱལ་དང་ལྡན་ཞིང་རྒན་པའི་མངོན་པའི་ང་རྒྱལ་དང་ལྡན་པ་དེ་དག་ཚུལ་ཁྲིམས་དང་ལྡན་པ་དག་ལས་བསྙེན་བཀུར་བདག་གིར་བྱེད་པ་དེ་དག་དགག་པའི་ཕྱིར། སེང་གེ་ལྟ་བུས་ཝ་ལྟ་བུ་ལ་བསྙེན་བཀུར་མི་བྱའོ་ཞེས་བྱ་བ་སྨྲས་ཏེ། སེང་གེ་ལྟ་བུ་ཞེས་བྱ་བ་ནི། ཚུལ་ཁྲིམས་དང་ལྡན་པ་སྟེ། རི་དྭགས་ཕྲ་མོ་ལྟ་བུའི་ཉོན་མོངས་པ་དག་གིས་མི་ཐུབ་པའི་ཕྱིར་རོ། །ཝ་ལྟ་བུ་ཞེས་བྱ་བ་ནི། ཚུལ་ཁྲིམས་འཆལ་པ་སྟེ་ཁྱི་ལྟ་བུའི་ཉོན་མོངས་པ་དག་གིས་ཕམ་པར་བྱས་པའི་ཕྱིར་ཏེ། དེ་ལ་སྔ་མས་བསྙེན་བཀུར་མི་བྱའོ། །དེ་ནི་ཐམས་ཅད་དུ་གཏོགས་པ་ཡིན་ནོ། །ཐམས་ཅད་ལ་བཀག་པར་ཐལ་བ་ལ། ལ་ལ་ལ་བྱ་བ་བརྩམ་པའི་ཕྱིར་སློབ་དཔོན་དང་མཁན་པོ་ནི་མཆོག་ཏུ་ཚུལ་ཁྲིམས་འཆལ་པ་ལ་ཡང་བསྙེན་བཀུར་བྱའོ་ཞེས་བྱ་བ་སྨྲས་ཏེ། མཆོག་ཏུ་ཚུལ་ཁྲིམས་འཆལ་པ་ཞེས་བྱ་བ་ནི། ཕམ་པར་གྱུར་
པ་ཐམས་ཅད་ཀྱི་ལྟུང་བ་བྱུང་བའམ། ལྟུང་བ་སྡེ་ལྔ་ཆར་གྱི་ལྟུང་བ་བྱུང་བའོ། །སློབ་དཔོན་དང་མཁན་པོ་ནི་གལ་ཏེ་མཆོག་ཏུ་ཚུལ་ཁྲིམས་འཆལ་བར་གྱུར་ཀྱང་སློབ་མ་དང་ཉེ་གནས་ཚུལ་ཁྲིམས་དང་ལྡན་པས། བསྙེན་བཀུར་བྱ་སྟེ། གཡོག་བྱའོ་ཞེས་བྱ་བའི་ཐ་ཚིག་གོ །དེ་གཉིས་ནི་བསྟན་པ་ལ་འཇུག་པའི་སྒོར་གྱུར་པ་ཡིན་པའི་ཕྱིར་དང༌། སྡོམ་པ་སྐྱེ་བ་དང༌། ལེགས་པར་བསྲུང་བ་དང༌། ཆོས་ཁོང་དུ་ཆུད་པའི་རྒྱུ་ཡིན་པའི་ཡང་ཕྱིར་རོ། །ཕ་མ་དང་ནད་པ་དག་ནི་ཁྱིམ་པ་ཡིན་ན་ཡང་ངོ་ཞེས་བྱ་བ་ནི། ཕ་མ་དང་ནད་པ་དེ་དག་ནི་ཁྱིམ་པ་ཡིན་ན་ཡང་བསྙེན་བཀུར་བྱ་བ་སྟེ། གཡོག་བྱའོ་ཞེས་བྱ་བའི་ཐ་ཚིག་གོ །ཡང་ངོ་ཞེས་བྱ་བའི་སྒྲ་ལས་ནི་རབ་ཏུ་བྱུང་བ་ཡིན་ན་ལྟ་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ །ཕ་མ་ནི་ཕན་འདོགས་པའི་ཞིང་ཡིན་པའི་ཕྱིར་དང༌། ནད་པ་ནི་སྙིང་རྗེའི་ཞིང་ཡིན་པའི་ཕྱིར་ཏེ། དཀོན་མཆོག་གསུམ་པས་ཀྱང་བསྙེན་བཀུར་བྱའོ་ཞེས་གསུངས་པའི་ཕྱིར་རོ། །ཁྲུས་ཀྱི་ཞར་ལ་ལེགས་པར་སྦྱར་བའི་ཁྲུས་ཀྱིས་བཀྲུའོ་ཞེས་བྱ་བ་འདི་བརྗོད་དེ། ལེགས་པར་སྦྱར་བའི་ཁྲུས་ཀྱིས་ནི་ནད་དང་ནད་པ་མ་ཡིན་པ་ཡང་བཀྲུའོ་ཞེས་གསུངས་ཏེ། མདོ་འདི་ནི་ཐམས་ཅད་དུ་གཏོགས་པ་ཡིན་པའི་ཕྱིར་རོ། །དེའི་རང་གི་ངོ་བོ་བསྟན་པའི་ཕྱིར་རླུང་འདྲེན་པའི་རྩ་བ་དང་སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུ་བསྐོལ་བས་ཁྲུས་བྱ་བ་ནི་དེའི་མིང་ཡིན་ནོ་ཞེས་བྱ་བ་སྨྲས་ཏེ། རྩ་བ་དང༌། སྡོང་བུ་དང༌། ལོ་མ་དང༌། མེ་ཏོག་དང༌། འབྲས་བུ་རླུང་འདྲེན་པ་དག་སྟེ། རྩ་བ་ལ་སོགས་པ་རླུང་འདྲེན་པ་དེ་དག་བསྐོལ་བ་དེས་ཁྲུས་བྱ་བ་ནི། དེའི་མིང་ཡིན་ཏེ། ལེགས་པར་སྦྱར་བའི་ཁྲུས་ཞེས་བྱའོ། །ཅི་དེ་འབའ་ཞིག་ཁོ་ནས་བཀྲུ་འམ་ཞེ་ན་དེའི་ཕྱིར། བསྐུ་མཉེ་བྱས་ཏེ་མི་རྩུབ་པ་ཉིད་ཀྱི་ཕྱིར་རོ་ཞེས་བྱ་བ་སྨྲས་ཏེ། འབྲུ་མར་ལ་སོགས་པས་བསྐུ་མཉེ་བྱས་ནས་ཕྱིས་བཀྲུ་བར་བྱ་སྟེ། ཅིའི་ཕྱིར་ཞེ་ན། མི་རྩུབ་པ་ཉིད་ཀྱི་ཕྱིར་རོ། །མི་རྩུབ་པ་ཉིད་དང་ཇི་ལྟར་དབྲལ་དར་བྱ་ཞེ་ན། དེའི་ཕྱིར་དེ་དང་དབྲལ་བའི་ཕྱིར་ཁྲུས་ཆལ་གྱིས་སོ་ཞེས་བྱ་བ་སྨྲས་ཏེ། མི་རྩུབ་པ་ཉིད་ཀྱི་ཕྱིར་བསྐུ་མཉེ་བྱས་པ་དེ་དང་དབྲལ་བའི་ཕྱིར་སྲན་ཆུང་གི་ཕྱེ་ལ་སོགས་པ་ཁྲུས་ཆལ་གྱིས་ལུས་བསྐུས་ཏེ་ཁྲུས་བྱའོ་ཞེས་བྱ་བའི་ཐ་ཚིག་གོ །གལ་ཏེ་ཁྲུས་ཆལ་གྱིས་ལུས་བསྐུས་ནའོ་ན་དེ་ཉིད་རྩུབ་པ་ཉིད་དུ་མི་འགྱུར་རམ་ཞེ་ན། དེའི་ཕྱིར་
སྔ་མའི་ཆེད་དུ་ཆུའི་བུམ་པ་ཕྱིར་མར་སྣུམ་ཐིགས་པ་གཉིས་སམ་གསུམ་བླུགས་སོ་ཞེས་བྱ་བ་སྨྲས་ཏེ། སྔ་མ་མི་རྩུབ་པ་ཉིད་ཀྱི་ཕྱིར་དུ་ཕྱིས་ལྡུགས་པའི་ཆུའི་བུམ་པ་ཕྱི་མར་སྣུམ་ཐིགས་པ་གཉིས་སམ་གསུམ་དག་བླུགས་སོ་ཞེས་བསྟན་ཏོ། །མ་བརྟགས་པ་ཉིད་མ་ཡིན་པར་བསྟན་པའི་ཕྱིར། ལྕགས་ཀྱི་གཞོང་རིངས་སུ་ཁྲུས་བྱའོ་ཞེས་བྱ་བ་སྨྲས་ཏེ། ལྕགས་ཀྱི་གཞོང་རིངས་ཞེས་བྱ་བ་ནི་གྲུ་ཆུང་དུའི་རྣམ་པ་འདྲ་བ་ཡིན་ཏེ། དེར་ཁྲུས་བྱའོ། །ཁྲུས་བཞིན་དུ་ཐམས་ཅད་ཀྱིས་བཅང་བར་ཐལ་བར་མི་འགྱུར་བར་བྱ་བའི་ཕྱིར། དེ་ནི་ནད་པས་བཅང་བར་བྱ་བ་ཞེས་བྱ་བ་འདི་བརྗོད་དེ། ལྕགས་ཀྱི་གཞོང་རིངས་དེ་ནི་ནད་པ་འབའ་ཞིག་གིས་བཅང་བར་བྱའི་གཞན་གྱིས་ནི་མ་ཡིན་ནོ། །དེའི་སྟེང་དུ་ཁ་གབ་གཞུག་གོ་ཞེས་བྱ་བ་ནི། ལྕགས་ཀྱི་གཞོང་རིངས་དེའི་སྟེང་དུ་ཁ་གབ་གཞུག་སྟེ། ཆུ་དྲོན་མོ་ཡུན་རིང་དུ་གནས་པར་བྱ་བའི་ཕྱིར་རོ། །དེ་གཉའ་བར་སྔས་ནང་ཚངས་ཅན་གཞུག་གོ་ཞེས་བྱ་བ་ནི། ལྕགས་ཀྱི་གཞོང་རིངས་དེར་གཉའ་བའི་ཕྱོགས་སུ་སྔས་ནང་ཚངས་ཅན་གཞུག་གོ་ཞེས་བྱ་བའི་ཐ་ཚིག་སྟེ། དེས་ཡུན་རིང་དུ་གནས་པས་གཉའ་བ་ན་བར་མི་འགྱུར་རོ། །ཁྲུས་བྱས་ནས་ཕྱིས་རྐང་པ་གཉིས་བཀྲུ་བར་བྱ་སྟེ། དེའི་ཕྱིར་གར་བབ་བབ་ཏུ་རྐང་པ་མི་བཀྲུའོ་ཞེས་བྱ་བ་སྨྲས་ཏེ། ཁྱམས་ལ་སོགས་པ་གར་བབ་བབ་ཏུ་རྐང་པ་གཉིས་མི་བཀྲུའོ་ཞེས་བྱ་བའི་ཐ་ཚིག་སྟེ། དེ་ནི་གཙུག་ལག་ཁང་གི་དབང་དུ་བྱས་པ་ཡིན་ནོ། །འོ་ན་གང་དུ་ཞེ་ན། དེའི་ཕྱིར་དེའི་གནས་ནི་ཝ་ཁར་རོ་ཞེས་བྱ་བ་སྨྲས་ཏེ། རྐང་པ་བཀྲུ་བདེའི་གནས་ནི་ཝ་ཁ་ཡིན་པར་རིག་པར་བྱའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། རྐང་པ་ཝ་ཁར་བཀྲུའོ་ཞེས་གསུངས་པ་ཡིན་ནོ། །རྐང་ཁྲུས་ཀྱི་གཞི་བྱའོ་ཞེས་བྱ་བ་ལ། བྱའོ་ཞེས་བྱ་བའི་བྱེད་པའི་ཚིག་དང་པོར་སྦྱར་བ་ནི་འདོད་པས་སྤྱོད་པ་ཡིན་པར་བསྟན་པའི་ཕྱིར་རོ། །རྐང་ཁྲུས་ཀྱི་གཞི་ཞེས་བྱ་བ་ནི། རྐང་པ་བཀྲུ་བའི་གནས་ཞེས་བྱའོ། །དེ་ནི་ཐམས་ཅད་ཀྱི་ཐུན་མོང་ཡིན་ཏེ། དགེ་འདུན་གྱི་ཕྱོགས་སུ་བྱ་བའི་ཆོ་ག་ཡིན་པའི་ཕྱིར་རོ། །ཕྱོགས་གང་དུ་ཞེ་ན། དེའི་ཕྱིར་གཙུག་ལག་ཁང་གི་སྟེང་གི་ཤར་ལྷོ་མཚམས་སུའོ་ཞེས་བྱ་བ་སྨོས་ཏེ། གཙུག་ལག་ཁང་གི་སྟེང་ཞེས་བྱ་བ་ནི་ཁང་ཐོག་གོ །གཙུག་ལག་ཁང་གི་སྒོ་ལ་
བརྟེན་ནས་ཤར་དང་ལྷོའི་ཕྱོགས་ཀྱི་བར་གྲྭའི་མཚམས་སུ་བྱེད་དུ་གཞུག་གོ་ཞེས་བྱ་བའི་ཚིག་གོ །རྣམ་པ་ཇི་ལྟ་བུ་ཞེ་ན། དེའི་ཕྱིར་རུས་སྦལ་གྱི་རྣམ་པ་འདྲ་བ་རྩུབ་པར་རོ་ཞེས་བྱ་བ་སྨྲས་ཏེ། གང་གི་རྣམ་པར་རུ་སྦལ་གྱི་རྒྱབ་འདྲ་བ་དེ་ནི་རུ་སྦལ་གྱི་རྣམ་པ་འདྲ་བ་སྟེ་དེ་ལྟར་རོ། །རྩུབ་པར་རོ་ཞེས་བྱ་བ་ནི་རུད་རུད་པོར་ཏེ། དེ་ལྟར་བྱེད་དུ་གཞུག་གོ་ཞེས་བྱ་བར་སྦྱར་རོ། །བདེ་བ་ལ་རེག་པར་གནས་པར་བྱ་བའི་ཕྱིར། ཆོལ་ཟངས་ས་ལས་བྱས་པ་གཞག་པར་བྱའོ་ཞེས་བྱ་བ་སྨྲས་ཏེ། ཆོལ་ཟངས་ཞེས་བྱ་བ་ནི་རྐང་ལག་བཀྲུ་བའི་སྣོད་དོ། །ཅི་ལས་བྱས་པ་ཞེ་ན། དེའི་ཕྱིར་ས་ལས་བྱས་པ་ཞེས་བྱ་བ་སྨྲས་ཏེ། གཞག་པར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་གསེར་དང་དངུལ་དང་བཻ་ཌཱུཪྻ་དང༌། ཤེལ་ལས་བྱས་པའི་ཆོལ་ཟངས་དག་བཞག་པར་མི་བྱའི་ས་ལས་བྱས་པ་གཞག་པར་བྱའོ་ཞེས་གསུངས་པ་ཡིན་ནོ། །རྒྱ་ཆེར་འགྲེལ་པ་བྱེད་པ་ལ་ལ་འདི་སྐད་ཅེས་ས་ལས་བྱས་པ་ཞེས་གཉིས་པ་སྨོས་པ་ལས་ན། ཟངས་ལས་བྱས་པ་ལ་སོགས་པ་ཡང་བཀག་པར་ཤེས་སོ་ཞེས་ཟེར་ཏེ། དེ་ལྟ་ཡིན་ན་ཤིང་ལ་སོགས་པ་ཡང་བཀག་པར་ཐལ་བར་འགྱུར་རོ། །ས་ལས་བྱས་པ་ཞེས་གཉིས་པ་སྨོས་པ་ལས་ནི་དེ་ལྟར་མི་འགྱུར་ཏེ། ས་ལས་བྱས་པ་ཁོ་ནའོ་ཞེས་དམིགས་ཀྱིས་བསལ་བ་དང་བཅས་པར་བྱས་པའི་རིགས་སོ། །གསེར་ལ་སོགས་པ་ནི་བཀག་པར་གྲུབ་པ་ཡིན་ནོ། །དེ་ལྟ་བས་ན་གཙོ་བོ་གསེར་ལ་སོགས་པ་བཀག་པའི་ཚིག་གིས་ནི་ཟངས་ལས་བྱས་པ་ལ་སོགས་པ་ནི་བྱ་བར་ཤེས་པ་ཡིན་ནོ། །དབྱིབས་ཇི་ལྟར་ཞེ་ན། དེའི་ཕྱིར། ཞབས་གླང་པོ་ཆེའི་རྨིག་མཐིལ་འདྲ་བ་སྙིང་པོ་ཅན་ནོ་ཞེས་བྱ་བ་སྨྲས་ཏེ། ཆོལ་ཟངས་གང་གི་ཞབས་གླང་པོ་ཆེའི་རྨིག་མཐིལ་འདྲ་བ་དེ་ནི། ཞབས་གླང་པོ་ཆེའི་རྨིག་མཐིལ་འདྲ་བའོ། །དེ་ལྟར་བྱེད་དུ་གཞུག་གོ་ཞེས་བྱ་བར་སྦྱར་ཏེ། མི་ལྡེག་པར་གནས་པར་བྱ་བའི་ཕྱིར་རོ། །ཞབས་ཞེས་བྱ་བ་ནི་འོག་གི་མཐིལ་ལོ། །སྙིང་པོ་ཅན་ཞེས་བྱ་བ་ནི། ཆོལ་ཟངས་གང་ལ་སྙིང་པོ་ཡོད་པ་དེ་ནི་སྙིང་པོ་ཅན་ཏེ། དབྱིབས་དེ་ལྟ་བུ་དང་ལྡན་པ་དེ་བྱེད་དུ་གཞུག་གོ་ཞེས་བྱ་བར་སྦྱར་རོ། །སྙིང་པོ་ཅན་ཞེས་སྨྲས་ན། དེ་ཕྱོགས་གང་ན་ཡོད་པའི་སྙིང་པོ་དང་ལྡན་པ་མི་ཤེས་པས་དེའི་ཕྱིར། དབུས་ན་ཡོད་པ་ཀ་དམ་པའི་མེ་ཏོག་འདྲ་ལ་རྩུབ་པ་
དང་ངོ་ཞེས་བྱ་བ་སྨྲས་ཏེ། དེ་དབུས་ཀྱི་ཕྱོགས་ན་ཡོད་པའི་སྙིང་པོ་དང་ལྡན་པར་བྱེད་དུ་གཞུག་གོ་ཞེས་བྱ་བའི་ཐ་ཚིག་གོ །རྣམ་པ་ཅི་འདྲ་ཞེ་ན། དེའི་ཕྱིར། ཀ་དམ་པའི་མེ་ཏོག་འདྲ་ལ་ཞེས་བྱ་བ་ལ་སོགས་པ་སྨྲས་ཏེ། ཤིང་གདམ་པའི་མེ་ཏོག་ལྟར་དབྱིབས་ལྕོག་ལྕོག་པོར་འདུག་ལ། རྩུབ་པ་རུད་རུད་པ་དང་ལྡན་པའི་ཆོལ་ཟངས་བཅངས་བར་བྱའོ་ཞེས་བྱ་བར་སྦྱར་རོ། །ཇི་ལྟར་གཞག་པར་བྱ་ཞེ་ན། དེའི་ཕྱིར་བཀྲུས་ནས་ཁ་བུབ་ཏུ་གཞག་གོ་ཞེས་བྱ་བ་སྨྲས་ཏེ། ཆོལ་ཟངས་ཁས་བུབ་ཏུ་གཞག་གོ །ཇི་ལྟར་བྱས་ནས་ཤེ་ན། བཀྲུས་ནས་ཏེ་ཆུ་གཞན་གྱིས་བཀྲུའི་རྐང་པ་བཀྲུས་པའི་ཆུས་ནི་མ་ཡིན་ནོ། །འདིར་གཞུང་ནི་རྐང་པ་གཉིས་བཀྲུས་ནས་རྐང་པ་བཀྲུས་པའི་ཆུ་གཙུག་ལག་ཁང་གི་ཕྱི་རོལ་ལམ་ཝ་ཁར་འབོར་བཅུག་སྟེ། ཡང་འཁྲུར་བཅུག་ནས་སོ་ཞེས་གསུངས་པ་ཡིན་ནོ། །གང་དུ་གཞག་པར་བྱ་ཞེ་ན། དེའི་ཕྱིར་དགེ་འདུན་གྱི་ནི་ཁང་ཐོག་དུའོ་ཞེས་བྱ་བ་སྨྲས་ཏེ། དགེ་འདུན་གྱི་ཆོལ་ཟངས་ནི་ཁང་ཐོག་ཁང་བའི་སྟེང་དུ་གཞག་གོ །གང་ཟག་གི་ནི་གནས་ཁང་དུ་སྒོ་གླེགས་ཀྱི་ཕག་ཏུའོ་ཞེས་བྱ་བ་སྨྲས་ཏེ། གནས་ཁང་དེར་སྒོ་གླེགས་ཀྱི་ཕག་ཏུའོ་ཞེས་བྱ་བ་ནི། གང་ཟག་གི་ཆོལ་ཟངས་ནི་སྒོ་གླེགས་དང་རྩིག་པའི་བར་དེར་གཞག་པར་བྱའོ། །གཙུག་ལག་ཁང་གི་ཕྱོགས་གང་དུ་ལྷུང་བཟེད་ཀྱི་བྱི་དོར་ལ་སོགས་པ་བྱས་པ་དེར་ཆུས་བྱུག་གོ་ཞེས་བྱ་བ་ནི། གཙུག་ལག་ཁང་གི་ཕྱོགས་གང་དུ་ལྷུང་བཟད་ཀྱི་བྱི་དོར་ལ་སོགས་པ་བྱེད་པའི་ཕྱོགས་དེ་ཆུས་བྱུག་གོ །སོགས་པ་ཞེས་བྱ་བའི་སྒྲས་ནི། ཚོན་གྱི་ལས་ལ་སོགས་པ་བསྡུས་ཏེ། དེའི་ཕྱོགས་ཆུས་བྱུག་གོ །ཡང་ན་བསྐུའོ་ཞེས་བྱ་བ་ལ་བསྐུ་བ་རྣམ་པ་ཇི་ལྟ་བུར་བྱ་ཞེ་ན། དེའི་ཕྱིར། མདུད་རྩེའི་རྣམ་པ་ལྟ་བུ་འམ་རྫ་རྔའི་རྣམ་པ་ལྟ་བུར་རོ་ཞེས་བྱ་བ་སྨྲས་ཏེ། དབྱིབས་དེ་འདྲ་བར་བསྐུ་བའོ། །བསྐུ་བ་བསྟན་ན་ཇི་ཞིག་གིས་བསྐུ་ཞེ་ན། དེའི་ཕྱིར་པ་ལང་གི་ལྕི་བའམ་འཇིམ་པས་སོ་ཞེས་བྱ་བ་སྨྲས་སོ། །ཐམས་ཅད་དུ་ཡང་རྣམ་པ་དེ་ལྟར་ངེས་པར་འགྱུར་རམ་ཞེ་ན། དེའི་ཕྱིར་དཀོན་མཆོག་གི་དོན་ཉིད་དུ་བསྐུ་བ་ལ་ནི་རྣམ་པ་ངེས་པ་མེད་དོ་ཞེས་བྱ་བ་སྨྲས་ཏེ། དཀོན་མཆོག་གི་དོན་ཉིད་དུ་བསྐུ་བ་གང་ཡིན་པའི་བསྐུ་བ་དེ་ལ་ནི་དབྱིབས་ངེས་པ་མེད་དོ། །དཀོན་མཆོག་དག་གི་ཆེད་དུ་བསྐུ་བ་གང་ཡིན་པ་དེ་ནི་དཀོན་
མཆོག་གི་དོན་ཏོ། །དེའི་དངོས་པོ་ནི་དཀོན་མཆོག་གི་དོན་ཉིད་དེ། དཀོན་མཆོག་གི་དོན་ཉིད་དུ་བསྐུ་བ་དེ་ལ་ནི་དབྱིབས་ངེས་པ་མེད་དོ། །རབ་ཏུ་བྱུང་བའི་གཞིའི་ཞར་ལ། ལྷུང་བཟེད་མེད་པ་རབ་ཏུ་དབྱུང་བ་དང་རྫོགས་པར་བསྙེན་པ་མི་བྱའོ་ཞེས་བྱ་བ་སྨྲས་ཏེ། ལྷུང་བཟེད་མེད་པར་དགེ་ཚུལ་གྱི་མཁན་པོ་དང་སློབ་དཔོན་དང། ཞུ་བའི་དགེ་སློང་དག་གིས་རབ་ཏུ་དབྱུང་བར་མི་བྱ་སྟེ། དེ་ལྟ་བས་ན་མཁན་པོ་ལ་སོགས་པ་དེ་དག་བསྡུ་བའི་ཕྱིར་མང་པོའི་ཚིག་ཏུ་བྱའོ། །རྫོགས་པར་བསྙེན་པར་མི་བྱའོ་ཞེས་བྱ་བ་ནི། དགེ་འདུན་དུ་འགྱུར་བའི་དགེ་སློང་དག་གིས་སོ། །ཆུང་དུ་དང་ཆེན་པོ་དང་སྐྱབས་ཀྱང་མི་བྱའོ་ཞེས་བྱ་བ་ནི། ལྷུང་བཟེད་ཆུང་དུ་དང་ཆེན་པོ་དང་སྐྱབས་རབ་ཏུ་དབྱུང་བ་དང་རྫོགས་པར་བསྙེན་པར་མི་བྱ་བའོ། །ཆུང་དུ་དང་ཆེན་པོས་མི་བྱའོ་ཞེས་བྱ་བ་ལ་སོགས་པ་སྨྲས་པས། དེའི་ཕྱིར་ལྷུང་བཟེད་བྱིན་གྱིས་བརླབ་ཏུ་རུང་བ་གསུམ་གྱི་ཚད་ངེས་པར་ཤེས་པར་བྱ་བའི་ཕྱིར། ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་གིས་ལྷག་བར་འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་གང་བཙོས་པ་སྲན་ཚོད་དང་བཅས་ཚོད་མ་དང་བཅས་པ་ལྷག་པ་ནས་དོའི་བར་དེ་ཤོང་བ་དེ་ནི་རིགས་པ་ཡིན་ནོ་ཞེས་བྱ་བ་སྨྲས་ཏེ། ལྷུང་བཟེད་ཀྱི་སྨད་ཀྱི་ཆ་ལྷག་མར་འབྲས་ཐུག་པོ་ཆེ་བྲེའུ་ཆུང་གང་བཙོས་པ་ཤོང་ཞིང་ཆུད་པའི་ལྷུང་བཟེད་གང་ཡིན་པ་དེ་ནི་རིགས་པ་ཡིན་ནོ་ཞེས་བྱ་བར་སྦྱར་རོ། །གང་གི་ལྷག་མར་ཞེ་ན། ཁའི་ཆའི་མཐའ་ཁོ་ན་ནས་ཞེས་བྱ་བ་སྨྲས་ཏེ། དེ་ནི་ཁ་ཡང་ཡིན་ལ། ཆ་ཡང་ཡིན་པས་ཁའི་ཆའོ། །ཁའི་ཆའི་མཐའ་ནི་མཆུ་སྟེ། མུ་ཞེས་བྱ་བ་ཡིན་ནོ། །ཁའི་ཆའི་མཐའ་དེ་ཁོ་ན་ནི་ཁའི་ཆའི་མཐའ་ཁོ་ནའོ། །ཁའི་ཆའི་མཐའ་ཁོ་ན་དེ་ནས་ཚད་ཇི་ཙམ་གྱིས་ཞེ་ན། དེའི་ཕྱིར་མཐེ་བོའི་ལྟོ་གང་གི་ཞེས་བྱ་བ་སྨྲས་ཏེ། མཐེ་བོའི་ལྟོ་ནི་མཐེ་བོའི་ལྟོ་སྟེ། མཐེ་བོའི་ཚིགས་ཀྱི་ཕྱོགས་གཅིག་ནས་བརྩམས་ཏེ། ཚིགས་ཀྱི་ཕྱོགས་གཅིག་གི་བར་ནི་མཐེ་བོའི་ལྟོ་ཞེས་བྱའོ། །གང་གི་ཁའི་ཆའི་མཐའ་ཁོ་ན་ནས་མཐེ་བོའི་ལྟོའི་ཚད་དེ་ཉིད་ཡོད་པ་དེ་ནི་མཐེ་བོའི་ལྟོ་གང་ངོ༌། །ཁའི་ཆའི་མཐའ་ཁོ་ན་ནས་མཐེ་བོའི་ལྟོ་གང་བཞག་པ་དེའི་ལྷག་མ་སྨད་ཀྱི་ཆ་གང་ཡིན་པའི་སྨད་ཀྱི་ལྷག་མ་དེར་ཤོང་བའི་ལྷུང་བཟེད་གང་ཡིན་པའོ། །ཅི་ཞིག་ཤོང་ཞེ་ན། དེའི་ཕྱིར་འབྲས་ཐུག་པོ་ཆེ་མ་གདྷཱའི་བྲེའུ་ཆུང་གང་བཙོས་པ་ཞེས་བྱ་བ་སྨྲས་ཏེ། འབྲས་ཐུག་པོ་ཆེ་མ་གདྷྲཱའི་བྲེའུ་ཆུང་གང་བཙོས་པ་ནི་འབྲས་ཐུག་
པོ་ཆེ་མག་དྷཱའི་བྲེའུ་ཆུང་གང་བཙོས་པ་སྟེ། དེ་ཤོང་བའོ། །ཅི་དེ་འབའ་ཞིག་གམ་ཞེ་ན། མ་ཡིན་ཏེ། དེའི་ཕྱིར། སྲན་ཚོད་དང་བཅས་ཚོད་མ་དང་བཅས་པ་ཞེས་བྱ་བ་སྨྲས་ཏེ། འདི་ལྟར་ཚོད་མདག་མང་བ་ཡིན་མོད་ཀྱི། འོན་ཀྱང་ཚོད་མ་ཇི་ཙམ་གྱིས་འབྲས་ཆན་སྦགས་ནུས་པ་དེའི་ཚད་ཁོ་ནའི་ཚོད་མ་འདིར་གཟུང་གི །ལྷག་པ་ནི་མ་ཡིན་ཏེ། དེ་ནི་ལྷུང་བཟེད་ཆུང་དུའི་ཚད་ཡིན་ནོ། །འབྲིད་དང་ཆེན་པོའི་ཚད་ཇི་ཙམ་ཞེ་ན། དེའི་ཕྱིར་ལྷག་པ་ནས་དོའི་བར་དེ་ཤོང་ཞེས་བྱ་བ་སྨྲས་ཏེ། འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་གང་བཙོས་པ་ལས་ལྷག་པ་ནས་བྲེའུ་ཆུང་དོར་མ་ཆོག་པའི་བར་སྲན་ཚོད་དང་བཅས་ཚོད་མ་དང་བཅས་པ་ཤོང་ཞིང་དེ་ཆུད་པ་ནི་ལྷུང་བཟེད་འབྲིང་པོའི་ཚད་ཡིན་ནོ། །འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་དོ་བཙོས་པ་སྲན་ཚོད་དང་བཅས་ཚོད་མ་དང་བཅས་པ་བཟའ་བ་དང་རྗེས་སུ་མཐུན་པ་དེ་ཤོང་ཞིང་ཆུད་པའི་ལྷུང་བཟེད་གང་ཡིན་པ་དེ་ནི་ལྷུང་བཟེད་ཆེན་པོའི་ཚད་ཡིན་ནོ། །ལྷུང་བཟེད་གསུམ་པོ་དེ་ནི་རིགས་པ་ཡིན་ཏེ། རིགས་པ་ལས་མ་འདས་པ་ནི་རིགས་པ་སྟེ་བྱིན་གྱིས་བརླབ་ཏུ་རུང་བ་ཞེས་བྱ་བའི་ཐ་ཚིག་གོ །འདིར་མ་ག་དྷཱའི་བྲེའུ་ཆུང་ཞེས་བྱ་བའི་སྒྲས་ནི། འབྲས་ཐུག་པོ་ཆེ་སྐམ་པོ་ཡུལ་དབུས་ཀྱི་སྲང་བཅུ་དྲུག་བརྗོད་པར་རིག་པར་བྱའོ། །དགེ་སློང་རྣམས་ཀྱི་ལྷུང་བཟེད་ཀྱི་ཚད་བསྟན་ནས་དགེ་སློང་མ་རྣམས་ཀྱི་བརྗོད་པའི་ཕྱིར། དགེ་སློང་མས་དགེ་སློང་གི་ཆུང་དུ་ལས་ལྷག་པ་མི་བཅང་ངོ་ཞེས་བྱ་བ་སྨྲས་ཏེ། དགེ་སློང་མས་དགེ་སློང་རྣམས་ཀྱི་ལྷུང་བཟེད་ཆུང་དུ་གང་ཡིན་པ་དེ་ལས་ལྷག་པའི་ལྷུང་བཟེད་མི་བཅང་ངོ༌། །འདི་སྐད་བསྟན་ཏེ། དགེ་སློང་རྣམས་ཀྱི་ལྷུང་བཟེད་ཆུང་དུ་གང་ཡིན་པ་དེ་ནི་དགེ་སློང་མ་རྣམས་ཀྱི་ཆེན་པོ་ཡིན་ཏེ། དེ་ལས་ལྷག་པ་བཅང་བར་མི་བྱའོ། །དེ་དག་གི་ལྷུང་བཟེད་ཆུང་དུ་ནི་འབྲས་ཐུག་པོ་ཆེ་བཙོས་པ་སྲན་ཚོད་དང་བཅས་ཚོད་མ་དང་བཅས་པ་འགྲངས་བ་ཙམ་ཤོང་བ་ཡིན་ནོ། །འབྲིང་ནི་དེ་གཉིས་ཀྱི་བར་གྱི་མཚམས་ཡིན་པར་དོན་གྱིས་ཁོང་དུ་ཆུད་པར་བྱའོ།། །།བམ་པོ་ལྔ་པ། ལྷུང་བཟེད་ཀྱི་གཞི་བརྗོད་པར་འདོད་ནས། དེས་དེའི་གཞིར་ཞ་ཉེའི་དབྱར་འདབ་གཞག་པར་བྱའོ་ཞེས་བྱ་བ་སྨྲས་ཏེ། དེས་ཞེས་བྱ་བ་ནི་དགེ་སློང་མས་སོ། །དེའི་ཞེས་བྱ་བ་ནི་ལྷུང་བཟེད་ཀྱིའོ། །གཞིར་ཞེས་བྱ་བ་ནི་སའི་ཕྱོགས་གང་
དུ་ལྷུང་བཟེད་བཞག་པའི་འོག་གཞི་གང་ཡིན་པ་དེ་ནི་གཞིའོ། །དེར་ཞ་ཉེའི་དབྱར་འདབ་གཞག་པར་བྱ་སྟེ། དེར་ཞ་ཉེའི་དབྱར་འདབ་གཞག་གོ་ཞེས་བྱ་བའི་ཐ་ཚིག་གོ །དེའི་རྣམ་པ་ཅི་འདྲ་ཞེ་ན། དེའི་ཕྱིར། བྱང་ཆུབ་དང་པ་ཊའི་ལོ་མའམ་ལག་མཐིལ་གྱི་ལྟ་བུར་རོ་ཞེས་བྱ་བ་སྨྲས་ཏེ། བྱང་ཆུབ་ཀྱི་ཤིང་དང་ཤིང་པ་ཊའི་ལོ་མ་གང་ཡིན་པ་དེའི་དབྱིབས་ལྟ་བུར་རོ་ཞེས་བྱ་བའི་ཐ་ཚིག་གོ །ཡང་ན་ལག་མཐིལ་གྱི་དབྱིབས་ཅི་འདྲ་བ་དེ་ལྟ་བུ་དེར་གཞུག་གོ་ཞེས་བྱ་བར་སྦྱར་རོ། །ཚད་ཤེས་པར་བྱ་བའི་ཕྱིར། ཚད་ལས་ཀྱང་ངོ་ཞེས་བྱ་བ་སྨྲས་ཏེ། ཀྱང་ངོ་ཞེས་བྱ་བ་ནི། མདོ་སྔ་མ་དྲང་བའི་དོན་ཏོ། །དེ་ལྟར་ན་འདི་ཚིག་གི་དོན་འདི་འབྱུང་སྟེ། བྱང་ཆུབ་ཀྱི་ཤིང་དང༌། ཤིང་པ་ཊའི་ལོ་མ་ཚད་གང་ཡིན་པ་དང༌། ལག་མཐིལ་གྱི་ཚད་གང་ཡིན་པ་དེའི་ཚད་ཙམ་དུ་ཞ་ཉེའི་དབྱར་འདབ་ཀྱི་ཚད་ཀྱང་རིག་པར་བྱའོ། །བརྙན་པོས་ཀྱང་དེ་ཉིད་དང་བཅས་པ་ཡིན་ནོ་ཞེས་བྱ་བ་ནི། ལྷུང་བཟེད་བརྙན་པོས་ཀྱང་དེ་ཉིད་དང་བཅས་པ་ཡིན་ཏེ། ལྷུང་བཟེད་ཉིད་དང་བཅས་པ་ཡིན་ནོ་ཞེས་བྱ་བའི་ཐ་ཚིག་གོ །དབྱར་དག་ཀྱང་བརྙན་པོས་ལྷུང་བཟེད་དང་བཅས་པ་ཉིད་ཡིན་ན། མཚུངས་པས་འདྲ་བར་བསྟན་པའི་ཕྱིར། །ལྔ་པོ་དག་དེ་བཞིན་ནོ་ཞེས་བྱ་བ་སྨྲས་ཏེ། ལྔ་པོ་ཡང་ཞེས་བྱ་བ་ནི། ཆོས་གོས་གསུམ་དང་སྟན་དང་ཆུ་ཚགས་སོ། །ཇི་ལྟར་ལྷུང་བཟེད་བརྙན་པོས་དེ་ཉིད་དང་བཅས་པ་ཡིན་པ་བཞིན་དུ་ལྔ་པོ་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་དེ་ལྟ་བས་ན་ཡོ་བྱད་དྲུག་པོ་བརྙས་པ་དག་གིས་ཀྱང་རབ་ཏུ་དབྱུང་བར་བྱའོ་ཞེས་གསུངས་པ་ཡིན་ནོ། །དབྱར་དག་ལྷུང་བཟེད་མེད་དུ་མི་རུང་ངོ་ཞེས་བྱ་བ་ལ། གང་ལ་ལྷུང་བཟེད་མེད་པ་དེ་ནི་ལྷུང་བཟེད་མེད་པ་སྟེ། དབྱར་དག་ལྷུང་བཟེད་མེད་དུ་མི་རུང་ངོ་ཞེས་བྱ་བའི་ཐ་ཚིག་གོ །ལྗོངས་རྒྱུ་ཞིང་འགྲོ་བར་མི་བྱའོ་ཞེས་བྱ་བ་ནི། ལྷུང་བཟེད་མེད་པར་ལྗོངས་རྒྱུ་ཞིང་འགྲོ་བར་མི་བྱའོ། །འཇིགས་པ་དང་བཅས་པ་ཉིད་དུ་ལྷུང་བཟེད་ཆུང་དུས་འགྲོ་བར་བྱའོ་ཞེས་བྱ་བ་ལ་འཇིགས་པ་དང་བཅས་པར་འགྲོ་བ་ནི་འཇིགས་པ་དང་བཅས་པའི་ལམ་མོ། །དེའི་དངོས་པོ་ནི་འཇིགས་པ་དང་བཅས་པ་ཉིད་དོ། །འཇིགས་པ་དང་བཅས་པ་ཉིད་དུ་གྱུར་ན། ལྷུང་བཟེད་ཆུང་དུ་ཐོགས་ཏེ་འགྲོ་བར་བྱའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། དགེ་སློང་
གིས་ལྷུང་བཟེད་མེད་པར་ལྗོངས་རྒྱུ་ཞིང་འགྲོ་བར་མི་བྱའོ། །མ་བྱིན་པར་ལེན་པ་དག་གིས་བཅོམ་ནས། བཅོམ་ལྡན་འདས་ཀྱིས་བཀའ་སྩལ་པ། ལྷུང་བཟེད་ཆུང་དུ་བསྐུར་བར་བྱ་ཞིང༌། ལྷུང་བཟེད་གཞག་པར་བྱ་བའོ། །དབྱར་དག་ལྷུང་བཟེད་ཉེ་བར་བཞག་པར་བྱའོ་ཞེས་གསུངས་པ་ཡིན་ནོ། །མེད་ན་རབ་ཏུ་དབྱུང་བར་བྱའོ་ཞེས་བྱ་བ་ནི། ལྷུང་བཟེད་མེད་ནའོ། །འདི་སྐད་བསྟན་ཏེ། ལྷུང་བཟེད་མེད་ན་རབ་ཏུ་དབྱུང་བར་བྱའོ། །རྫོགས་པར་བསྙེན་པར་མི་བྱའོ། །འགྲེང་བཞིན་དུ་ལྷུང་བཟེད་དབྱུང་བ་དང་གཞུག་པ་དང་བསྐམ་པར་མི་བྱའོ་ཞེས་བྱ་བ་ནི། འགྲེང་བཞིན་དུ་ལྷུང་བཟེད་ཀྱི་སྣོད་ནས་ལྷུང་བཟེད་དབྱུང་བར་མི་བྱ་དེར་གཞུག་པར་ཡང་མི་བྱ་ཞིང༌། འགྲེང་བཞིན་དུ་ལྷུང་བཟེད་བསྐམ་པར་ཡང་མི་བྱ་བ་སྟེ། དེ་ནི་ལྷུང་བཟེད་ལྷུང་བ་སྤང་བའི་ཕྱིར་རོ། །རན་པར་སྤྱད་པར་བྱའོ་ཞེས་བྱ་བ་ལ། རན་པར་ཞེས་བྱ་བ་ནི། འོས་པར་ཏེ་དེས་ལྷུང་བཟེད་སྤྱད་པར་བྱའོ། །རན་པར་སྤྱད་པ་བསྟན་པའི་ཕྱིར། གཞན་གྱིས་སྤང་བ་དེར་མི་བླུགས་སོ་ཞེས་བྱ་བ་སྨྲས་ཏེ། སྣོད་ལ་སོགས་པ་གཞན་གྱིས་སྤང་བར་དོར་བའི་ཆུས་ལྷུང་བཟེད་དེར་མི་བླུགས་སོ། །དེས་ཕྱག་དར་མི་དོར་རོ་ཞེས་བྱ་བ་ནི། ལྷུང་བཟེད་དེས་ཕྱག་དར་མི་དོར་རོ། །ངན་པ་ཡང་མི་དོར་རོ་ཞེས་བྱ་བ་ནི། ལྷུང་བཟེད་ཀྱིས་མི་དོར་རོ་ཞེས་བྱ་བར་སྦྱར་རོ། །ཤིང་ཏོག་ལ་སོགས་པ་ཟོས་པའི་ལྷག་མ་ཤུན་པ་ལ་སོགས་པ་ནི་ངན་བ་ཞེས་བྱའོ། །ལག་པ་དང་ཁའི་ཆུ་མི་བླུགས་སོ་ཞེས་བྱ་བ་ནི། ལག་པ་བསྙལ་བའི་ཆུ་དང་ཁ་བཀྲུ་བའི་ཆུ་ལྷུང་བཟེད་དུ་མི་བླུགས་པ་སྟེ། དེ་དག་ཐམས་ཅད་ནི་མ་གུས་པར་སྤྱོད་པ་སྤང་བའི་ཕྱིར་རོ། །དགེ་ཚུལ་བག་མེད་པའི་ཆོས་ཅན་བྱི་དོར་བྱེད་དུ་མི་གཞུག་གོ་ཞེས་བྱ་བ་ལ། གང་ལ་བག་མེད་པའི་ཆོས་ཡོད་པ་དེ་ནི་བག་མེད་པའི་ཆོས་ཅན་ཏེ། དགེ་ཚུལ་དེ་ལྷུང་བཟེད་བྱི་དོར་བྱེད་དུ་མི་གཞུག་གོ །དེ་ནི་འཆག་པ་ལ་སོགས་པ་སྤང་བའི་ཕྱིར་རོ། །བྱེ་མ་ཅན་དང་ལྕི་བས་མི་བྱའོ་ཞེས་བྱ་བ་ལ། བྱེ་མ་དང་ལྷན་ཅིག་འདྲེས་པ་ནི་བྱེ་མ་ཅན་ནོ། །ལྕི་བ་ནི་བ་ལང་གི་ལྕི་བ་སྟེ། དེས་ལྷུང་བཟེད་བྱི་དོར་མི་བྱའོ། །དེ་ནི་འཆས་བ་ལ་སོགས་པའི་སྐྱོན་སྤང་བའི་ཕྱིར་རོ། །ཧ་ཅང་གཤེར་བཞིན་དུ་ཕྱིར་མི་གཞུག་གོ་ཞེས་བྱ་བ་ནི། ཆུའི་ལྷག་མ་ཡོད་བཞིན་དུ་ལྷུང་བཟེད་སྣོད་ལ་སོགས་པར་
ཕྱིར་མི་གཞུག་མི་སྦ་སྟེ། དེ་ནི་བཙའ་འཆགས་པར་འགྱུར་བའི་སྐྱོན་སྤང་བའི་ཕྱིར་རོ། །ཧ་ཅང་བསྐམ་པར་མི་བྱའོ་ཞེས་བྱ་བ་ནི། ལྷུང་བཟེད་ཧ་ཅང་རུང་བར་འགྱུར་བ་དེ་ལྟར་མི་བྱ་བ་སྟེ། དེ་ནི་རྩུབ་པ་ཉིད་ཀྱི་སྐྱོན་སྤང་བའི་ཕྱིར་རོ། །རྡོའི་སྟེང་དུ་མི་གཞག་གོ་ཞེས་བྱ་བ་ནི། རེ་ཞིག་ཀྱང་མི་གཞག་གོ་ཞེས་བྱ་བའི་ཐ་ཚིག་གོ །མི་གཙང་བའི་ཕྱོགས་སུ་མི་གཞག་གོ་ཞེས་བྱ་བ་ནི། ལྷུང་བཟེད་ནི་ཤིན་ཏུ་རུང་བ་ཡིན་པའི་ཕྱིར་རོ། །གར་བབ་བབ་ཏུ་མ་ཡིན་ནོ་ཞེས་བྱ་བ་ནི། ཕྱོགས་ཞེས་བྱ་བ་དང་མི་གཞག་གོ་ཞེས་བྱ་བར་སྦྱོར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ཁྱམས་ལ་སོགས་པ་མ་བཤམས་པའི་ཕྱོགས་གང་ཡིན་པ་དེར་ལྷུང་བཟེད་རེ་ཞིག་ཀྱང་མི་གཞག་གོ །དེར་མི་གཞག་གོ་ཞེས་བྱ་བ་ནི། གར་བབ་བབ་དེར་ལྷུང་བཟེད་མི་གཞག་གོ །འདི་ནི་གཏན་དུ་གཞག་པའི་ཕྱིར་དགག་པ་ཡིན་གྱི། རེ་ཞིག་ཁོ་ན་ནི་མ་ཡིན་ནོ། །ལྷུང་བཟེད་དུས་ཐམས་ཅད་དུ་གཞག་པའི་གནས་བསྟན་པའི་ཕྱིར། དེའི་ཆེད་དུ་ངོས་ཁུང་བྱའོ་ཞེས་བྱ་བ་སྨྲས་ཏེ། དེའི་ཆེད་དུ་ཞེས་བྱ་བ་ནི། ལྷུང་བཟེད་གཞག་པའི་ཆེད་དུ་སྟེ། ངོས་ཁུང་བྱའོ། །ཁུང་བུ་བ་ལང་གི་མིག་གི་དབྱིབས་འདྲ་བ་ནི། ངོས་ཁུང་ཞེས་བྱའོ། །ངོས་ཁུང་ཇི་ལྟར་བྱ་ཞེ་ན། དེའི་ཕྱིར། གཙུག་ལག་ཁང་དང་ཁང་ཁྱིམ་དག་རྩིག་པའི་ཚེ་བྱའི་རྩིག་པ་བརྐོ་བས་ནི་མ་ཡིན་ནོ་ཞེས་བྱ་བ་སྨྲས་ཏེ། གཙུག་ལག་ཁང་དང་ཁང་ཁྱིམ་དག་བྱེད་པའི་ཚེ་ན་ངོས་ཁུང་བྱའོ། །བརྐོ་བས་ནི་མ་ཡིན་ནོ་ཞེས་བྱ་བ་ནི། གཙུག་ལག་ཁང་བྱས་ཟིན་པའི་རྩིག་པ་བརྐོ་བའི་ཐབས་ཀྱིས་ནི་མ་ཡིན་ཏེ་དེ་ནི་གྲོང་འདབ་པ་རྣམས་ཀྱི་ཆོ་ག་བསྟན་པ་ཡིན་ནོ། །ད་ནི་དགོན་པ་པ་རྣམས་ཀྱི་ཆེད་དུ་བསྟན་པའི་ཕྱིར། དགོན་པ་པ་རྣམས་ཀྱིས་སྐོན་བུ་ཁ་སྦྱར་བྱའོ་ཞེས་བྱ་བ་སྨྲས་ཏེ། དགེ་སློང་དགོན་པ་པ་རྣམས་ཀྱིས་ལྷུང་བཟེད་གཞག་པའི་སྐོན་བུ་ཁ་སྦྱར་བྱའོ། །དེ་ཅི་ལས་བྱ་ཞེ་ན། དེའི་ཕྱིར་ལྕུག་མའམ་སྲད་བུ་ལས་བས་པའོ་ཞེས་བྱ་བ་སྨྲས་ཏེ། ལྕུག་མ་ལས་བསྒྱུར་བའམ། སྲད་བུ་ལས་བསྒྱུར་བ་སྟེ། སྲད་བུ་ལས་བྱས་པའོ་ཞེས་བྱ་བའི་ཐ་ཚིག་གོ །བསྒྱུར་བ་ནི་བྱས་པ་ཡིན་པར་སྟོན་པའི་ཕྱིར་རོ། །ལྕི་བ་དང་སས་བྱུགས་པའོ་ཞེས་བྱ་བ་ནི། བྱུགས་པའི་སྐོན་བུ་ཁ་སྦྱར་བྱའོ། །ཅི་ཞིག་གིས་བྱུགས་ཤེ་ན། ལྕི་བ་དང་སས་ཞེས་བྱ་བ་སྟེ། བ་ལང་གི་ལྕི་བ་དང་སར་བསྲེས་
པ་སྟེ་དེས་བྱུགས་པའོ། །ཁ་གབ་རྣམ་པ་དེ་ལྟ་བུ་དང་བཅས་པའོ་ཞེས་བྱ་བ་ལ། ཁ་གབ་དེ་རྣམ་པ་དེ་ལྟ་བུ་ཡིན་པ་ནི། ཁ་གབ་རྣམ་པ་དེ་ལྟ་བུ་སྟེ། རྣམ་པ་དེ་ལྟ་བུ་ཞེས་བྱ་བ་ནི། ལྕུག་མ་ལས་བྱས་པའམ། སྲད་བུ་ལམ་བྱས་པ་ལྕི་བ་དང་སར་བསྲེས་པས་བྱུགས་པའོ། །ཁ་གབ་རྣམ་པ་དེ་ལྟ་བུ་དང་ལྡན་པ་ནི། ཁ་གབ་རྣམ་པ་དེ་ལྟ་བུ་དང་བཅས་པ་སྟེ། སྐོན་བུ་ཁ་གབ་རྣམ་པ་དེ་ལྟ་བུ་དང་བཅས་པ་དེ་བྱའོ། །དེ་ནི་གཟར་ཐག་གིས་ཤིང་ལས་དཔྱངས་ན་བཟང་ངོ་ཞེས་བྱ་བ་ནི། སྐོན་བུ་ཁ་སྦྱར་དེ་ནི་ཤིང་ལྗོན་པའི་ཤིང་ལས་དཔྱངས་ན་བཟང་སྟེ་རིགས་སོ། །ཅི་ཞིག་གིས་ཤེ་ན། གཟར་ཐག་གིས་ཏེ། ཐག་པས་ཞེས་བྱ་བའི་ཐ་ཚིག་གོ །དེའི་ཕྱིར་སྐོན་བུ་ཁ་སྦྱར་ལ་མཁའ་འཕྲེང་ཞེས་ཀྱང་བྱའོ། །ས་ལ་མི་གཞག་གོ་ཞེས་བྱ་བ་ནི། སྐོན་བུ་ཁ་སྦྱར་ས་ལ་གཞག་པར་མི་བྱའོ། །ཚིག་དེ་ནི་སྲིལ་ཟ་བ་ལ་སོགས་པའི་སྐྱོན་སྤང་བའི་ཕྱིར་རོ། །དེ་གཞན་དུ་མི་བསྐུར་རོ་ཞེས་བྱ་བ་ནི། སྐོན་བུ་ཁ་སྦྱར་དེ་ཡུལ་གཞན་དུ་མི་བསྐུར་རོ། །དེ་ནི་ཁུར་ཁྱེར་བ་ལ་སོགས་པའི་སྐྱོན་སྤང་བའི་ཕྱིར་རོ། །འོ་ན་གར་བཅུག་སྟེ་བསྐུར་བར་བྱ་ཞེ་ན་དེའི་ཕྱིར། སྣོད་དུ་བཅུག་སྟེ་བསྐུར་བར་བྱའོ་ཞེས་བྱ་བ་སྨྲས་ཏེ། ལྷུང་བཟེད་སྣོད་དུ་བཅུག་སྟེ་ཡུལ་གཞན་དུ་བསྐུར་བར་བྱའོ། །ལག་པས་མི་བསྐུར་རོ་ཞེས་བྱ་བ་ནི། ལྷུང་བཟེད་བསྐུར་བའོ། །འོ་ན་ཅིས་བསྐུར་ཞེ་ན། དེའི་ཕྱིར་དེ་བསྐུར་བ་ནི་ལུང་ཐག་བཏགས་ཏེ་མཆན་ཁུང་གིས་སོ་ཞེས་བྱ་བ་སྨྲས་ཏེ། ལྷུང་བཟེད་དེ་བསྐུར་བའོ། །ལུང་བཏགས་ཏེ་ཞེས་བྱ་བ་ནི། ལྷུང་བཟེད་སྣོད་ཀྱི་ལུང་བཏགས་ཏེ་ཞེས་བྱ་བའི་ཐ་ཚིག་གོ །ལུས་ཀྱི་ཡན་ལག་གང་གིས་བསྐུར་ཞེ་ན། དེའི་ཕྱིར་མཆན་ཁུང་གིས་སོ་ཞེས་བྱ་བ་སྨྲས་ཏེ། མཆན་འོག་ཏུ་བཅངས་ཏེ་བསྐུར་རོ། །ལྷུང་བཟེད་ཀྱི་སྣོད་ཀྱི་ཞར་ལ་ལྷུང་བཟེད་དང་སྨན་དང་བར་བུར་དག་སྣོད་ཐ་དད་པར་གཞུག་གོ་ཞེས་བྱ་བ་འདི་བརྗོད་དེ། ལྷུང་བཟེད་དང་སྨན་དང༌། ངར་བུར་དག་ནི་དེ་དག་ཉིད་དོ། །དེ་ལྟར་ན་ལྷུང་བཟེད་ལ་སོགས་པ་དེ་དག་སྣོད་གསུམ་པོ་དག་ཏུ་སོ་སོར་གཞུག་པར་བྱའི། ཐམས་ཅད་གཅིག་ཏུ་ནི་མི་གཞུག་གོ །སྐུད་མ་དང་ཁབ་རལ་དང་ལྡན་པ་ལ་སོགས་པ་དག་ནི། བར་བུར་གྱི་སྒྲས་བརྗོད་དོ། །དེ་དག་བཅང་བར་བྱའོ་ཞེས་བྱ་བ་ནི་ལྷུང་བཟེད་ལ་སོགས་པའི་སྣོད་དག་གོ །དེ་དག་ལ་
དཔྱང་བའི་ལུང་ཐག་མཉམ་པར་གདགས་པར་མི་བྱའོ་ཞེས་བྱ་བ་ལ། ལུང་ཐག་གང་དག་གི་དཔྱང་བ་མཐོ་དམན་མཉམ་པར་གྱུར་པ་དེ་དག་ནི་དཔྱང་པའི་ལུང་ཐག་མཉམ་པའོ། །དེ་བས་ན་སྣོད་གསུམ་པོ་དེ་དག་ལ་དཔྱང་བའི་ལུང་ཐག་མཉམ་པ་དེ་དག་གདགས་པ་གཞག་པར་མི་བྱ་མི་སྦྱར་རོ། །འདི་སྐད་བསྟན་ཏེ། སྣོད་དེ་དག་ལ་དཔྱང་བའི་ལུང་ཐག་སྲིད་མཉམ་པར་མི་བྱའོ་ཞེས་བྱ་བའི་ཐ་ཚིག་གོ །དེ་ལྟར་ཡང་གླེང་གཞི་ནི་འཕགས་པ་འདི་ཅི། རྫ་རྔའམ་ཞེས་བྱ་བ་ཡིན་ནོ། །སྡུག་བསྔལ་མི་འདོད་པས་ནི་ཞེང་ཆུང་དུ་དག་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བ་ལས་ནི་སྣོད་དེ་དག་ལ་ལུང་ཐག་བཏགས་པ་ཞེང་ཆུང་དུ་དག་ཀྱང་མི་བྱའོ་ཞེས་བྱ་བར་སྦྱར་རོ། །ཅིའི་ཕྱིར་ཞེ་ན། དེའི་ཕྱིར་སྡུག་བསྔལ་མི་འདོད་པས་ནི་ཞེས་བྱ་བ་སྨྲས་ཏེ། གང་སྡུག་བསྔལ་འདོད་པར་མི་བྱེད་པའི་གང་ཟག་དེ་ནི་སྡུག་བསྔལ་མི་འདོད་པ་སྟེ། དེས་དེ་དག་ཀྱང་མི་བྱའོ། །ཞུམ་པར་མི་འགྱུར་བར་བྱ་བའི་ཕྱིར་དབུས་སུ་ཕྱིང་བུས་སྦྱར་བར་བྱའོ་ཞེས་བྱ་བ་ནི། ལུང་ཐག་དེ་དག་ཞུམ་པར་མི་འགྱུར་བར་བྱ་བའི་ཕྱིར་ཕྱིང་བུས་སྦྱར་བར་བྱའོ་ཞེས་བསྟན་པ་ཡིན་ནོ། །ཕྱོགས་གང་དུ་ཕྱིང་བུས་སྦྱར་བར་བྱ་ཞེ་ན། དེའི་ཕྱིར། དབུས་སུ་ཞེས་བྱ་བ་སྨྲས་ཏེ། གང་གི་དབུས་སུ་ཞེ་ན། ལུང་ཐག་གི་ཞེས་བྱ་བ་བར་སྐབས་ལས་ཤེས་པར་འགྱུར་ཏེ། ཕྱིང་བུ་སྟུག་པོས་སྦྱར་པར་བྱའོ། །དེ་གནས་པར་བྱ་བའི་ཕྱིར་མདོ་མདོར་བྱ་རོག་རྐང་བྱའོ་ཞེས་བྱ་བ་ནི། ཕྱིང་བུ་དེ་གནས་པ་མི་འགྱུར་བར་བྱ་བའི་ཕྱིར་མདོ་མདོར་སྐབས་སྐབས་སུ་བྱ་རོག་རྐང་གི་གཟུངས་གདབ་པར་བྱ་སྟེ། བྱ་རོག་རྐང་གི་དབྱིབས་འདྲ་བར་དྲུབ་བོ་ཞེས་བྱ་བའི་ཐ་ཚིག་གོ །ལྷུང་བཟེད་ཡོངས་སུ་བསྐྱང་བའི་བྱེ་བྲག་བསྟན་ནས། ད་ནི་གུས་པ་བསྐྱེད་པའི་ཕྱིར་སྤྱིར་བརྗོད་པར་བྱ་སྟེ། ལྷུང་བཟེད་མིག་བཞིན་དུ་བསྐྱང་བར་བྱའོ་ཞེས་བྱ་བ་ནི་ཇི་ལྟར་མིག་གནོད་པ་ཐམས་ཅད་ལས་བསྐྱབ་པར་བྱ་བ་ལྟར་དགེ་སློང་གིས་ལྷུང་བཟེད་ཀྱང་དེ་བཞིན་དུ་བསྐྱབ་བར་བྱའོ། །ཤིན་ཏུ་གུས་པ་བསྐྱེད་པའི་ཕྱིར་མིག་དཔེ་ཉིད་དུ་གཞག་གོ ། སྣམ་སྦྱར་པགས་པ་འདྲ་བར་རོ་ཞེས་བྱ་བ་ནི། ཇི་ལྟར་པགས་པ་རླུང་དང་ཉི་མ་དང་ཆར་པ་ལ་སོགས་པ་དག་ལས་བསྐྱབ་པར་བྱ་བ་ལྟར། དགེ་སློང་གིས་སྣམ་སྦྱར་ཡང་དེ་བཞིན་དུ་བསྐྱབ་པར་བྱ་བའོ། །ཆོས་གོས་ལྷག་མ་ཡང་ངོ་ཞེས་བྱ་བ་ནི། པགས་པ་དང་འདྲ་བར་བསྐྱབ་པར་བྱའོ་ཞེས་བྱ་བར་སྦྱར་
རོ། །དྲན་པར་སྤྱད་པའི་ཞར་ལ་ཆོས་གོས་ལ་སོགས་པ་དེ་དག་ཡོངས་སུ་བསྐྱབ་པར་བསྟན་ཏོ། །གལ་ཏེ་ལྷུང་བཟེད་ལ་སོགས་པ་དག་ལོངས་སྤྱོད་ན་དེངས་པར་གྱུར་ན། དེའི་ཚེ་དེ་ཇི་ལྟར་བྱ་ཞེ་ན། དེའི་ཕྱིར་བཅོས་ལེགས་བྱ་བ་ཡལ་བར་མི་དོར་རོ་ཞེས་བྱ་བ་སྨྲས་ཏེ། ལྷུང་བཟེད་ཀྱི་བཅོས་ལེགས་ནི་གླན་པ་དང་བསྲེག་པ་དང༌། སྣུམ་གྱིས་བསྐུ་བ་དང༌། བྱི་དོར་བྱ་བ་ལ་སོགས་པའོ། །ཆོས་གོས་ཀྱི་བཅོས་ལེགས་ནི། བཀྲུ་བ་དང༌། དྲུབ་པ་དང༌། ཁ་བསྒྱུར་བ་ལ་སོགས་པའོ། །དེ་དག་བྱ་བ་ཡལ་བར་མི་དོར་ཏེ། དེར་ལྷུང་བླང་བར་བྱའོ་ཞེས་བྱ་བའི་ཐ་ཚིག་གོ ། བཅོས་ལེགས་བྱ་བ་སྨྲས་ན། དེ་ཇི་ཞིག་དང་ཇི་ལྟར་དང་གང་དུ་བྱ་བ་དེ་མི་ཤེས་པས། དེའི་ཕྱིར་འདི་མན་ཆད་དེ་དག་བརྗོད་པར་བྱ་སྟེ། ལྷུང་བཟེད་གླན་པ་ལ་ནན་ཏན་དུ་བྱའོ་ཞེས་བྱ་བ་ནི། དགེ་སློང་གིས་ལྷུང་བཟེད་གླན་པ་ལ་ནན་ཏན་བྱ་སྟེ། ལས་སུ་བྱའོ་ཞེས་བྱ་བའི་ཐ་ཚིག་གོ །ལག་བཟོའི་ཐ་སྙད་བསལ་བའི་ཕྱིར། དབེན་པའི་ཕྱོགས་སུའོ་ཞེས་བྱ་བ་སྨྲས་ཏེ། དེ་ལ་མགར་སྤྱད་དག་དགོས་པ་གང་ཟག་གིས་བསྲེལ་བ་ཚུལ་དང་མཐུན་པ་མ་ཡིན་པར་བསྟན་པའི་ཕྱིར། དགེ་འདུན་གྱིས་མགར་སྤྱད་དག་བསྲེལ་བར་བྱའོ་ཞེས་བྱ་བ་སྨྲས་ཏེ། དགེ་འདུན་གྱི་མགར་སྤྱད་དག་བསྲེལ་བར་བྱའི་གང་ཟག་གིས་ནི་མ་ཡིན་ནོ། །ལྷུང་བཟེད་གླན་པ་ལ་ནན་ཏན་བྱའོ་ཞེས་སྨྲས་ན། གང་ལ་ཇིས་གླན་པ་དེ་བརྗོད་པར་བྱ་སྟེ། རེ་ཞིག་དགག་པ་བསྟན་པའི་ཕྱིར། བུ་གུའི་ལྷན་པ་བུ་རམ་དང་རྒྱ་སྐྱེགས་ཀྱི་ཚིགས་མ་དང༌། སྤྲ་ཚིལ་དང་རོ་ཉེ་དང་ཚོན་མོ་སྟེང་དེ་དག་མི་བཟང་ངོ་ཞེས་བྱ་བ་སྨྲས་ཏེ། མི་བཟང་བ་ནི་ཆ་མ་ཡིན་ནོ། །འདི་སྐད་བསྟན་ཏེ། བུ་གུའི་ལྷན་པར་བུ་རམ་དང་རྒྱ་སྐྱེགས་ཀྱི་ཚིགས་མ་དང༌། སྦྲ་ཚིལ་དང་རོ་ཉེ་དང་ཚོན་མོ་སྟེང་དག་མི་རུང་སྟེ། མི་སྲ་བའི་ཕྱིར་རོ། །འོ་ན་གང་བཟང་ཞེ་ན། དེའི་ཕྱིར་ལྷན་རིངས་དང་ཐམ་ཕྲན་དང་ལྷན་པ་ཆུ་སྲིན་གྱི་སོ་ལྟ་བུ་དག་བཟང་ངོ་ཞེས་བྱ་བ་སྨྲས་ཏེ། བཟང་བ་ནི་ཆ་མ་ཡིན་པའོ། །འདི་སྐད་བསྟན་ཏེ། བུ་གུའི་ལྷན་པར་བུ་རམ་དང༌། རྒྱ་སྐྱེགས་ཀྱི་ཚིགས་མ་དང༌། སྤྲ་ཚིལ་དང་རོ་ཉེ་དང་ཚོ་ན་མོའོ། །བུ་གུའི་ལྷན་པར་ལྷན་རིངས་ལ་སོགས་པ་དག་རུང་སྟེ། སྲ་བའི་ཕྱིར་རོ། །ལྷུང་བཟེད་ཀྱི་ལྷན་པ་ལྕགས་ལས་བྱས་པའི་རིང་པོ་ནི་ལྷན་རིངས་ཞེས་བྱའོ། །བུ་གུ་དགག་པའི་ལྕགས་གཟེར་མགོ་
ལེབ་ནི་ཐམ་ཕྲན་ཞེས་བྱའོ། །ལྕགས་ཀྱི་ལྷན་པ་དེ་ཉིད་གྲུ་བཞིའམ་ཟླུམ་པོའམ་ཟུར་གསུམ་དུ་བྱས་པ་ནི་ལྷན་པ་ཡིན་ནོ། །དེ་ཉིད་ཀྱི་མཐའ་ཐམས་ཅད་སོག་ལེའི་སོ་ལྟ་བུ་དང་ལྡན་པ་ནི་ཆུ་སྲིན་གྱི་སོ་ལྟ་བུ་ཡིན་ནོ། །ཕྱེ་མས་ཀྱང་ངོ་ཞེས་བྱ་བ་ནི། ལྕགས་ཀྱིའམ་རྡོའི་ལྟ་བུའོ་ཞེས་བྱ་བ་དང་སྦྱར་ཏེ། ལྕགས་ཀྱིའམ་རྡོའི་ཕྱེ་མས་གླན་ན་བཟང་ངོ༌། །འོག་མ་དང་སྦྱར་བའི་དོན་དུ་རྣམ་པར་དབྱེ་བ་ཡིན་ནོ། །འབྲུ་མར་དང་བདར་བ་སྤྲ་ཚིལ་འདྲ་བ་ལ་ཐུག་པར་གྱུར་པས་སོ་ཞེས་བྱ་བ་ནི། ཕྱེ་མས་གླན་པ་འབའ་ཞིག་ལ་ཡིན་གྱི་ལྷན་རིངས་ལ་སོགས་པ་ལ་ནི་མ་ཡིན་ནོ། །འབྲུ་མར་དང་ཕྱེ་མ་ལྷན་ཅིག་བདར་བ་ནི་འབྲུ་མར་བདར་བའོ། །ཇི་སྲིད་དུ་བདར་བ་ཞེ་ན། དེའི་ཕྱིར་སྤྲ་ཚིལ་འདྲ་བ་ལ་ཐུག་པར་གྱུར་པས་སོ་ཞེས་བྱ་བ་སྨྲས་ཏེ། ཕྱེ་མ་དེ་སྤྲ་ཚིལ་འདྲ་བ་ལ་ཐུག་པར་གྱུར་པའི་བར་དུ་བདར་བས་སོ། །རྫས་ཅི་ཞིག་གིས་བདར་བར་བྱ་ཞེ་ན། དེའི་ཕྱིར་ལྕགས་སམ་ཀུ་རུ་བིན་དས་སོ་ཞེས་བྱ་བ་སྨྲས་ཏེ། ཀུ་རུ་བིན་ད་ཞེས་བྱ་བ་ནི་རྡོའི་བྱེ་བྲག་གོ །འདི་སྐད་བསྟན་ཏེ། འབྲུ་མར་དང་ཕྱེ་མར་བསྲེས་ནས་ལྕགས་སམ་རྔོ་ཀུ་རུ་བིན་དས་ཇི་སྲིད་དུ་སྤྲ་ཚིལ་འདྲ་བར་གྱུར་པ་དེ་སྲིད་དུ་བདར་བར་བྱའོ་ཞེས་བྱ་བའི་ཐ་ཚིག་གོ །དྲོ་བ་ལ་གླན་ནོ་ཞེས་བྱ་བ་ནི། ལྷུང་བཟེད་དྲོ་བ་ལ་ཕྱེ་མ་བདར་བས་གླན་པའོ། །གྲོ་པས་གཡོགས་ཏེ་འཇིམ་པས་བསྐུས་ལ་ཅི་རན་ཙམ་དུ་བསྲོའོ་ཞེས་བྱ་བ་ནི། ལྷུང་བཟེད་དྲོན་པོ་ལ་ཕྱེ་མ་བདར་བ་དེས་གླན་པའི་སྟེན་གདུ་གྲོ་བས་གཡོགས་ཏེ་བཀབ་ནས་དེའི་སྟེང་དུ་འཇིམ་པས་བསྐུས་ལ་ཅི་རན་ཙམ་དུ་བསྲོ་བར་བྱའོ། །འདི་སྐད་བསྟན་ཏེ། གང་གི་ཚེ་ལྷུང་བཟེད་ལ་ཕྱེ་མ་བཏགས་པ་དེས་གླན་པ་དེའི་ཚེ་གྲོ་བས་གཡོགས་པར་བྱ་ཞིང༌། གྲོ་བའི་སྟེང་དུ་འཇིམ་པས་བསྐུ་བར་བྱས་ལ། དེའི་འོག་ཏུ་ལྷུང་བཟེད་ཅི་རན་ཙམ་དུ་བསྲོ་བར་བྱའོ་ཞེས་བྱ་བའི་ཐ་ཚིག་གོ །འབྲུ་མར་གྱིས་བདར་རོ་ཞེས་བྱ་བ་ནི། ལྷུང་བཟེད་ལ་ལྷན་པ་གླན་པ་འབྲུ་མར་གྱིས་སྦྱངས་ལ་རྡོ་འཇམ་པོ་ལ་སོགས་པས་བདར་བར་བྱའོ་ཞེས་བསྟན་པ་ཡིན་ནོ། །ལྕགས་ཀྱི་ལྷན་པ་བསྟན་ནས། ས་ལས་བྱས་པའི་ལྷན་པ་ཇི་ལྟར་བྱ་ཞེ་ན། དེའི་ཕྱིར་ས་ལས་བྱས་པའི་ནི་བུ་རམ་དང་འཇིམ་པས་སོ་ཞེས་བྱ་བ་སྨྲས་ཏེ། ས་ལས་བྱས་པའི་ལྷུང་བཟེད་ལ་ནི་བུ་རམ་དང་འཇིམ་པ་བསྲེས་པས་གླན་པར་ཤེས་པར་བྱའོ། །
གླན་པ་དེ་ཡང་སྔ་མ་བཞིན་དུ་བྱ་སྟེ། འབྲུ་མར་དང་བདར་བ་སྤྲ་ཚིལ་འདྲ་བ་ལ་ཐུག་པར་གྱུར་པས་དྲོ་བ་ལ་གླན་ནས་གྲོ་བས་གཡོགས་ཏེ། འཇིམ་པས་བསྐུས་ལ་ཅི་རན་ཙམ་དུ་བསྲོ་ནས་འབྲུ་མར་གྱིས་བདར་རོ་ཞེས་སྔར་བསྟན་པ་དེ་དག་ཐམས་ཅད་འདིར་ཡང་སྦྱར་བར་བྱའོ། །གླན་པ་བསྟན་ནས། བསྲེག་པ་བརྗོད་པར་བྱ་བའི་ཕྱིར། སྤྱོད་པ་ཉིད་ཡིན་ན་ཟླ་བ་དྲུག་གི་འོག་ཏུ་བསྲེག་པ་ཉིད་ཡིན་ནོ་ཞེས་བྱ་བ་སྨྲས་ཏེ། ལྷུང་བཟེད་སྤྱོད་པ་ཉིད་ཡིན་ན། ཟླ་བ་དྲུག་གི་འོག་ཏུ་བསྲེག་པ་ཉིད་ཡིན་ཏེ། བསྲེག་པར་འོས་པ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་ཉིན་གཅིག་བཞིན་དུ་ལྷུང་བཟེད་ངེས་ཟས་ཀྱི་བྱ་བ་བྱེད་ན་དེའི་ཚེ་ལྷུང་བཟེད་དེ་ཟླ་བ་དྲུག་གི་མཐར་བསྲེག་པར་འོས་པར་འགྱུར་བས་དེའི་དུས་སུ་བསྲེག་པར་བྱའོ་ཞེས་བྱ་བའི་ཐ་ཚིག་གོ །ས་ལས་བྱས་པའི་ལྷུང་བཟེད་ཀྱི་བསྲེག་པའི་དུས་བསྟན་པའི་ཕྱིར། གལ་ཏེ་ས་ལས་བྱས་པ་ཡིན་ན་ཟླ་བ་ཕྱེད་ནའོ་ཞེས་བྱ་བ་སྨྲས་ཏེ། གལ་ཏེ་ས་ལས་བྱས་པའི་ལྷུང་བཟེད་ནར་མར་སྤྱོད་པ་ཉིད་ཡིན་ན། དེ་ནི་ཟླ་བ་ཕྱེད་ཀྱི་མཐར་བསྲེག་པར་འོས་པ་ཉིད་དུ་འགྱུར་བས་དེའི་དུས་སུ་བསྲེག་པར་བྱའོ། །གལ་ཏེ་ལྷུང་བཟེད་ཀྱང་བསྲེག་པར་འོས་པར་གྱུར་ལ་དབྱར་ཀྱང་ཉེ་བར་གནས་པར་གྱུར་ན་དེའི་ཚེ་ཇི་ལྟར་ལོངས་སྤྱད་པར་བྱ་ཞེ་ན། དེའི་ཕྱིར་གལ་ཏེ་དབྱར་བྱུང་ན་དེ་བྱ་བའི་བར་དུ་བསྐུ་བ་དང་རྩུབ་ཁྲུས་ཉིད་ཀྱིས་ལེགས་པར་བཅོས་པ་ཉིད་བྱའོ་ཞེས་བྱ་བ་སྨྲས་ཏེ། གལ་ཏེ་དབྱར་གྱི་དུས་བྱུང་བར་གྱུར་ན། དེའི་ཚེ་ལྷུང་བཟེད་དེ་སྤྱོད་པའི་ཐབས་ནི་འདི་ཡིན་ཏེ། བསོད་སྙོམས་ཀྱིས་བླང་བ་དང་བཟའ་བ་འཛིན་པ་གང་ཡིན་པ་དེ་ནི་ལྷུང་བཟེད་ཀྱི་བྱ་བ་ཡིན་ནོ། །དེ་ཡང་ཉིན་གཅིག་བཞིན་འབྱུང་བས་དུ་མ་ཡོད་དེ་དུ་མ་དེའི་བར་ནི་བསོད་སྙོམས་འཛིན་པས་སྟོང་པའི་དུས་ཏེ། དེ་ཡང་ཟན་ཟོས་པའི་འོག་ཏུ་ཕན་ཆད་ཕྱི་དེ་ཉིན་པར་བསོད་སྙོམས་ལ་འགྲོ་བའི་མདུན་ཚུན་ཆད་ཀྱི་བར་རོ། །དེར་བསོད་སྙོམས་བཟའ་བ་ལ་སོགས་པ་བྱས་ནས་འབྲུ་མར་ལ་སོགས་པས་བསྐུ་བ་བྱ་སྟེ། གཞག་པར་བྱའོ། །ཡང་ཕྱི་དེ་ཉིན་པར་བསོད་སྙོམས་ལ་འགྲོ་བའི་ཚེ་ལྕི་སྐམ་ལ་སོགས་པས་རྩུབ་ཁྲུས་བྱའོ། །དེའི་འོག་ཏུ་ཡང་ཟས་ཀྱི་བྱ་བ་བྱས་ནས་ཕྱི་དེ་ཉིན་པར་བསོད་སྙོམས་ལ་འགྲོ་བའི་དུས་ཀྱི་བྱ་བའི་བར་དུ་འབྲུ་མར་ལ་སོགས་
པས་བསྐུས་ཏེ་གཞག་པར་བྱའོ། །བསྐུ་བ་དང་རྩུབ་ཁྲུས་ཉིད་ནི་བསྐུ་བ་དང༌། རྩུབ་ཁྲུས་ཉིད་དེ། བསྐུ་བ་དང་རྩུབ་ཁྲུས་དེ་ཉིད་ཀྱིས་ལྷུང་བཟེད་དེའི་བྱ་བའི་བར་དུ་ལེགས་པར་བཅོས་པ་ཉིད་བྱའོ་ཞེས་བྱ་བར་སྦྱར་རོ། །དེ་བསྲེག་པར་བྱའོ་ཞེས་བྱ་བ་ནི། ལྷུང་བཟེད་དེའོ། །ལྷུང་བཟེད་བསྲེག་པར་བྱ་བའི་བསྲེག་པའི་ཐབས་བསྟན་པའི་ཕྱིར། དེའི་ཆེད་དུ་རྫ་བོ་བསྲེལ་བར་བྱའོ་ཞེས་བྱ་བ་སྨྲས་ཏེ། ལྷུང་བཟེད་བསྲེག་པ་དེའི་ཆེད་དུ་རྫ་བོ་བྱའོ། །དེ་ཇི་ལྟ་བུ་ཞིག་ཅེ་ན། དེའི་ཕྱིར་དེ་ཉིད་དུ་གྲུབ་པའམ་དབྱིབ་མོ་ཡང་རུང་ངོ་ཞེས་བྱ་བ་སྨྲས་ཏེ། དེ་ཉིད་དུ་གྲུབ་པ་ཞེས་བྱ་བ་ལ། རྫ་བོ་དེའི་དངོས་པོ་ནི་དེ་ཉིད་དོ། །དེ་ཉིད་ཁོ་ནར་གྱུར་པ་ནི་དེ་ཉིད་དུ་གྲུབ་པ་སྟེ། གང་རྫ་བོའི་གཟུགས་ཉིད་དུ་གྲུབ་པའོ། །ཅི་དེ་ཁོ་ནས་བྱ་བ་ཡིན་ནམ་ཞེ་ན། མ་ཡིན་ཏེ་དེའི་ཕྱིར་དབྱིབ་མོ་ཡང་རུང་ངོ་ཞེས་བྱ་བ་སྨྲས་ཏེ། བསྲེལ་བར་བྱའོ་ཞེས་བྱ་བར་སྦྱར་རོ། །དབྱིབ་མོའི་བདག་ཉིད་ཀྱི་རྫ་བོ་བྱ་བའི་ཐབས་སུ་རུང་བ་བསྟན་པའི་ཕྱིར། ཐལ་བས་བཀང་སྟེ་རྫ་གཟོང་གིས་བརྐོས་ན་བཟང་ངོ་ཞེས་བྱ་བ་སྨྲས་ཏེ། དབྱིབ་མོ་ཐལ་པས་འགེངས་སུ་བཅུག་སྟེ། བཀང་ནས་དེའི་འོག་
ཏུ་རྫ་གཟོང་ལྕགས་ཕུར་ཞེས་བྱ་བ་བས་དབྱིབ་མོ་ལ་གཅགས་ན་བཟང ་སྟེ། རུང་བར་འགྱུར་རོ་ཞེས་བྱ་བའི་ཐ་ཚིག་གོ །རྫ་གཟོང་དེ་ག་ལས་བཙལ་ཞེ་ན། དེའི་ཕྱིར་དེ་བཅང་བར་བྱའོ་ཞེས་བྱ་བ་སྨྲས་ཏེ། རྫ་གཟོང་དེའོ། །རྫ་བོས་ཇི་ལྟར་བྱ་ཞེ་ན། དེའི་ཕྱིར་དེས་དུ་བ་མི་འཆོར་བར་དགབ་པོ་ཞེས་བྱ་བ་སྨྲས་ཏེ། རྫ་བོ་དེས་ལྷུང་བཟེད་དགབ་པར་བྱའོ། །ཇི་ལྟར་དགབ་ཅེ་ན། དེའི་ཕྱིར་དུ་བ་མི་འཆོར་བར་ཞེས་བྱ་བ་སྨྲས་ཏེ། དེ་ལ་དུ་བ་ཕྱིར་འབྱུང་ཞིང་འགྲོ་བ་ནི་དུ་བ་འཆོར་བའོ། །དུ་བ་ཕྱིར་མི་འབྱུང་ཞིང་མི་འགྲོ་བ་ནི་དུ་བ་མི་འཆོར་བ་སྟེ། དགབ་པ་གང་ལ་དུ་བ་མི་འཆོར་བ་ཡོད་པའི་དགབ་པ་དེ་ནི་དུ་བ་མི་འཆོར་བའོ། །འདི་སྐད་བསྟན་ཏེ། ཅི་ལྟར་བྱས་ན་དུ་བ་མི་འཆོར་བ་དེ་ལྟ་བུ་དགབ་པར་བྱའོ་ཞེས་བྱ་བའི་ཐ་ཚིག་གོ །རྫ་བོས་དགབ་པོ་ཞེས་བསྟན་ན། ཅི་རྫ་བོ་ཉིད་ཀྱི་ཕྱི་རོལ་བྱུགས་པས་སམ་འོན་ཏེ་མ་བྱུགས་པས་ཤེ་ན། དེའི་ཕྱིར། ཕུབ་མ་དང་འཇིམ་པར་སྦྱར་བས་ཕྱི་རོལ་བྱུགས་པས་སོ་ཞེས་བྱ་བ་སྨྲས་ཏེ། དགབ་པ་གང་གི་ཕྱི་རོལ་ཕུབ་མ་དང་འཇིམ་པ་བསྲེས་པས་བྱུགས་པ་དེ་ནི་ཕུབ་མ་དང་འཇིམ་པར་སྦྱར་བས་ཕྱི་རོལ་བྱུགས་པ་སྟེ། དེས་དགབ་
པར་བྱའོ། །ནང་ཅི་ཞིག་གིས་བསྐུ་བར་བྱ་ཞེ་ན། དེའི་ཕྱིར་འབྲུ་མར་གྱི་ཚིགས་མའམ་ལྕི་བས་ནང་བྱུགས་པས་སོ་ཞེས་བྱ་བ་སྨྲས་ཏེ། དེའི་ནང་འབྲུ་མར་གྱི་ཚིགས་མའམ་བ་ལང་གི་ལྕི་བས་བྱུགས་པ་ནི་ནང་བྱུགས་པ་སྟེ། རྫ་བོ་ནང་བྱུགས་པ་དེས་དགབ་པར་བྱའོ། །ཅི་ནང་དང་ཕྱི་རོལ་གྱི་སྐྱང་ཉུལ་མ་བསྐམས་པས་སམ་ཞེ་ན། མ་ཡིན་ཏེ་དེའི་ཕྱིར། བསྐམས་པར་གྱུར་པས་སོ་ཞེས་བྱ་བ་སྨྲས་ཏེ། བསྐམས་ཟིན་པས་སོ་ཞེས་བྱ་བའི་ཐ་ཚིག་གོ །ས་གཞི་ཇི་འདྲ་བར་གཞི་ཅི་བཏིང་བའི་སྟེང་དུ་ལྷུང་བཟེད་ཇི་ལྟར་གཞག་པ་ལ་རྫ་བོས་དགབ་པར་བྱ་ཞེ་ན། དེའི་ཕྱིར་ས་གཞི་བྱི་དོར་བྱས་པར་ཕུབ་མ་བཏིང་ཞིང་དུ་བ་འཚེར་པར་བྱེད་པ་འབྲུ་མར་གྱི་ཚིགས་མ་ལ་སོགས་པའི་རྫས་བཀྲམ་པའི་སྟེང་དུ་ཁ་བུབ་ཏུ་གཞག་པ་ལའོ་ཞེས་བྱ་བ་སྨྲས་ཏེ། ས་གཞི་བྱི་དོར་བྱས་པར་ཞེས་བྱ་བ་ལ། བྱི་དོར་བྱས་པ་ཞེས་བྱ་བ་ནི། ས་གཞི་གང་དུ་བརྐོ་བ་དང་ཞལ་ཞལ་དང་བརྟགས་པ་ལ་སོགས་པ་བྱས་པ་དེ་ནི་ས་གཞི་བྱི་དོར་བྱས་པ་སྟེ་དེར་རོ། །ཕུབ་མ་བཏིང་ཞིང་ཞེས་བྱ་བ་ལ། གང་དུ་ཕུབ་མ་བཏིང་བ་དེ་ནི་ཕུབ་མ་བཏིང་བ་སྟེ་དེར་རོ། །དུ་བ་འཚེར་བ་ཞེས་བྱ་བ་ནི། དེ་དུ་བ་ཡང་ཡིན་ལ་འཚེར་བ་ཡང་ཡིན་པས་དུ་བ་འཚེར་བའོ། །དེ་བྱེད་པ་ཞེས་བྱ་བ་ནི། དུ་བ་འཚེར་བར་བྱེད་པའོ། །དེ་དག་ཀྱང་གང་ཞེ་ན། དེའི་ཕྱིར་འབྲུ་མར་གྱི་ཚིགས་མ་ལ་སོགས་པའི་རྫས་ཞེས་བྱ་བ་སྨྲས་ཏེ། འབྲུ་མར་གྱི་ཚིགས་མ་ལ་སོགས་པ་ཉིད་རྫས་སོ། །དེ་དག་ནི་དུ་བ་འཚེར་པར་བྱེད་པ་ཡང་ཡིན་ལ་འབྲུ་མར་གྱི་ཚིགས་མ་ལ་སོགས་པའི་རྫས་ཀྱང་ཡིན་ནོ། །གང་དུ་དེ་དག་བཀྲམ་པ་དེ་ནི་དུ་བ་འཚེར་བར་བྱེད་པ་འབྲུ་མར་གྱི་ཚིགས་མ་ལ་སོགས་པའི་རྫས་བཀྲམ་པ་ཡིན་ནོ། །རྣམ་པ་དེ་ལྟ་བུའི་ས་གཞིའི་སྟེང་དུ་ལྷུང་བཟེད་གཞག་པ་བཀོད་པ་ལ་རྫ་བོ་ངེས་དགབ་པར་བྱའོ། །རྣམ་པ་ཇི་ལྟར་གཞག་པའི་ལྷུང་བཟེད་ལ་ཞེ་ན། དེའི་ཕྱིར་ཁ་བུབ་ཏུ་ཞེས་བྱ་བ་སྨྲས་ཏེ། ཁ་ཐུར་དུ་བསྟན་ཅེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཇེ་དང་པོ་ཁོ་ནར་བསྐོ་བ་ལ་སོགས་པས་ས་གཞི་བྱི་དོར་བྱའོ། །དེའི་འོག་ཏུ་ཕུབ་མ་དག་གདིང་བར་བྱའོ། །དེའི་འོག་ཏུ་དུབ་འཚེར་བར་བྱེད་པའི་རྫས་དག་དགྲམ་པར་བྱ་སྟེ། རྣམ་པ་དེ་ལྟ་བུའི་ས་གཞིར་ལྷུང་བཟེད་ཁ་བུབ་ཏུ་གཞག་པར་བྱ་ཞིང༌། སྔར་བསྟན་པའི་རྫ་བོས་དགབ་པར་བྱའོ་ཞེས་བྱ་བའི་ཐ་
ཚིག་གོ །དེའི་འོག་ཏུ་ཅི་ཞིག་བྱ་ཞེ་ན། དེའི་ཕྱིར། ལྕི་བ་དག་དང་སོག་མས་བཅེར་ཏེ་མེ་སྦར་ཏེ་ཞེས་བྱ་བ་སྨྲས་ཏེ། བ་ལང་གི་ལྕི་བདག་དང་སོག་མས་རྫ་བོ་གཡོགས་བར་བྱ་ཞིང་གཡོགས་ནས་དེའི་མོད་ལ་ལྕི་བ་ལ་སོགས་པའི་མེ་སྦར་བར་བྱ་སྟེ། མེ་བཏང་ངོ་ཞེས་བྱ་བའི་ཐ་ཚིག་གོ །ཏེ་པོར་གྲངས་ནས་དབྱུང་ངོ་ཞེས་བྱ་བ་ནི། ལྷུང་བཟེད་དབྱུང་བ་སྟེ། ལྷུང་བཟེད་ཏེ་པོར་གྲངས་པར་ཤེས་ནས་བསྲེག་པའི་གནས་ནས་དབྱུང་བར་བྱའོ་ཞེས་བྱ་བའི་ཐ་ཚིག་གོ །ལྷུང་བཟེད་བསྲེག་པ་རྒྱུན་ཆགས་སུ་ལན་དུ་ཙམ་བྱ་ཞེ་ན། དེའི་ཕྱིར་ཁ་དོག་རྫོགས་པ་ཕུན་སུམ་ཚོགས་པར་འགྱུར་གྱི་བར་དུ་བཟླས་པར་བྱའོ་ཞེས་བྱ་བ་སྨྲས་ཏེ། དེ་ཁ་དོག་ཀྱང་ཡིན་ལ་རྫོགས་པ་ཡང་ཡིན་པས་ཁ་དོག་རྫོགས་པ་སྟེ། ཁ་དོག་ཡོངས་སུ་རྫོགས་པའོ། །དེའི་ཕུན་སུམ་ཚོགས་པ་ནི་གྲུབ་པ་སྟེ། ཁ་དོག་རྫོགས་པ་ཕུན་སུམ་ཚོགས་པར་གྱུར་པའོ། །ཁ་དོག་རྫོགས་པ་ཕུན་སུམ་ཚོགས་པར་གྱུར་གྱི་བར་དུ་བཟླས་པར་བྱ་སྟེ། ཡང་དང་ཡང་དུ་བསྲེག་པར་བྱ་བའོ། །འདི་སྐད་བསྟན་ཏེ། ཇི་སྲིད་དུ་ལྷུང་བཟེད་ཀྱི་ཁ་དོག་ཡོངས་སུ་རྫོགས་པར་གྱུར་གྱི་བར་དུ་དེ་སྲིད་དུ་ཡང་དང་ཡང་དུ་བཟླས་ཤིང་བསྲེག་པར་བྱའོ། །ཇི་ལྟར་ཡང་དང་ཡང་དུ་བཟླས་པར་བྱ་ཞེ་ན། དེའི་ཕྱིར། བྱི་དོར་བྱས་ཤིང་བྱི་དོར་བྱས་ཤིང་གཞུག་པར་བྱའོ་ཞེས་བྱ་བ་སྨྲས་ཏེ། བསྲེག་པ་བསྲེག་པ་ན་བྱི་དོར་བྱས་ཤིང་བྱི་དོར་བྱས་ཤིང་བསྲེག་པའི་གནས་སུ་གཞུག་པར་བྱའོ་ཞེས་བྱ་བའི་ཐ་ཚིག་གོ །སྲོག་ཆགས་རྣམས་ལ་སྙིང་བརྩེ་བས་ཉེན་ཀོར་ཕྱག་དར་དང་ཆག་ཆག་བྱའོ་ཞེས་བྱ་བ་ནི། སྲོག་ཆགས་རྣམས་ལ་རྗེས་སུ་སྙིང་བརྩེ་བས་བསྲེག་པའི་གནས་ཀྱི་ཉེན་ཀོར་ཕྱག་དར་ཕྱག་པར་བྱ་བ་དང༌། ཉེན་ཀོར་ཉིད་དུ་ཆུས་ཆག་ཆག་གདབ་པར་བྱ་བའོ། །ལྷུང་བཟེད་མེད་པར་རབ་ཏུ་དབྱུང་བ་དང༌། རྫོགས་པར་བསྙེན་པར་མི་བྱའོ་ཞེས་བྱ་བ་དེའི་ཞར་ལ་འོངས་པ་ལྷུང་བཟེད་ཀྱི་ཆོ་ག་འཁོར་དང་བཅས་པ་བསྟན་ནས། རབ་ཏུ་འབྱུང་བའི་གཞི་དང་འབྲེལ་བ་ཕྲན་ཚོགས་ལ་སོགས་པ་ལས་འབྱུང་བ་གཞན་བརྗོད་པར་བྱ་སྟེ། ལོ་ཚིགས་མི་ཤེས་ན་མཚན་གྱི་ཉེན་ཀོར་དུ་སྤུ་སྐྱེས་པ་རྫོགས་པར་བསྙེན་པར་ཁས་བླང་བར་བྱའོ་ཞེས་བྱ་བ་ནི། སྤུ་སྐྱེས་པ་ནི་ལོ་ཚིགས་ཡོངས་སུ་ཤེས་པའི་རྒྱུ་མཚན་ཡིན་པས་རྫོགས་པར་བསྙེན་པར་ཁས་བླང་བར་བྱའོ། །
ཕྱོགས་གང་དུ་ཞེ་ན། དེའི་ཕྱིར་མཚན་གྱི་ཉེན་ཀོར་དུ་ཞེས་བྱ་བ་སྨྲས་ཏེ། མཚན་གྱི་ཐེན་ཀོར་དུའོ། །སུའི་ཞེ་ན་རྫོགས་པར་བསྙེན་པར་འདོད་པའི་སྟེ། ལོ་ཚིགས་གང་ཡིན་པ་དེ་མི་ཤེས་ནའོ། །འདི་སྐད་བསྟན་ཏེ། གལ་ཏེ་རྫོགས་པར་བསྙེན་པར་འདོད་པ་ལོ་ཉི་ཤུ་ལོན་པ་ཉིད་དུ་མི་ཤེས་ན་དེའི་ཚེ། མཚན་གྱི་ཐེན་ཀོར་དུ་སྤུ་སྐྱེས་པ་རྫོགས་པར་བསྙེན་པར་བྱ་བའི་རྒྱུ་མཚན་ཡིན་པས་རྫོགས་པར་བསྙེན་པར་བྱ་སྟེ། གལ་ཏེ་མཚན་གྱི་ཉེན་ཀོར་དུ་སྤུ་དག་སྐྱེས་པར་གྱུར་ན། རྫོགས་པར་བསྙེན་པར་འདོད་པ་དེ་རྫོགས་པར་བསྙེན་པར་བྱའོ་ཞེས་བྱ་བའི་ཐ་ཚིག་གོ །མཚན་གྱི་ཉེན་ཀོར་དུ་སྤུ་སྐྱེས་པ་དེ་ཇི་ལྟར་ཤེས་པར་བྱ་ཞེ་ན། དེའི་ཕྱིར། དེ་ནི་སྒྱུ་ཐབས་ཀྱིས་བརྟག་པར་བྱའོ་ཞེས་བྱ་བ་སྨྲས་ཏེ། མཚན་གྱི་ཉེན་ཀོར་དུ་སྤུ་སྐྱེས་པ་དེ་ནི་སྒྱུ་ཐབས་ཀྱིས་བརྟག་པར་བྱ་སྟེ། སྤུ་སྐྱེས་པ་སྒྱུ་ཐབས་ཀྱིས་བརྟག་པར་བྱའོ་ཞེས་བྱ་བའི་ཐ་ཚིག་གོ །སྒྱུ་ཐབས་ཇི་ལྟ་བུས་ཤེ་ན། དེའི་ཕྱིར་ཟུང་ང་དང་གོས་ཀྱི་གདང་མཐོན་པོ་ལ་འདུག་པའི་དངོས་པོ་དབབ་པ་ལ་སོགས་པས་སོ་ཞེས་བྱ་བ་སྨྲས་ཏེ། ཟུང་ང་དང་གོས་ཀྱི་གདང་མཐོན་པོ་ལ་འདུག་པའི་ཆོས་གོས་ལ་སོགས་པའི་དངོས་པོ་གང་ཡིན་པའི་དངོས་པོ་དེ་དབབ་པ་དང༌། དགབ་པ་ལ་སོགས་པའི་སྒྱུ་ཐབས་ཀྱིས་མཚན་གྱི་སྦུ་བརྟག་པར་བྱ་བའོ། །རྫོགས་པར་བསྙེན་པར་འདོད་པ་ཤིང་ལ་འཛེག་ཏུ་མི་གཞུག་གོ་ཞེས་བྱ་བ་ནི། རྫོགས་པར་བསྙེན་པར་འདོད་པའི་གང་ཟག་ཤིང་ལ་འཛེག་ཏུ་མི་གཞུག་པའོ། །མཚམས་ཀྱི་ཕྱི་རོལ་དུ་མི་གཏོང་ངོ་ཞེས་བྱ་བ་ནི། རྫོགས་པར་བསྙེན་པར་འདོད་པའི་གང་ཟག་མཚམས་ཀྱི་ཕྱི་རོལ་དུ་མི་གཏོང་བའོ། །མདོ་དེ་གཉིས་ནི་བར་ཆད་ཡོངས་སུ་སྤངས་པའི་ཕྱིར་རོ། །རྫོགས་པར་བསྙེན་པར་བྱ་བའི་གནས་སུ་ཁྲིད་པ་ལྟར་སྣང་བའི་ཉེན་ཀོར་ནི་འདིར་མཚམས་ཀྱི་ནང་ངོ༌། །དེ་ལས་གཞན་པ་ནི་མཚམས་ཀྱི་ཕྱི་རོལ་ལོ། །དེ་ལྟར་སྣང་བའི་ཉེན་ཀོར་དུ་བཀར་ཏེ། ཚོགས་ལ་མངོན་དུ་ཕྱོགས་པར་ཐལ་མོ་སྦྱར་ཏེ་གཞག་པར་བྱའོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་གིས་ལྟར་སྣང་བའི་ཉན་ཀོར་དུ་གཞག་གོ་ཞེས་བྱ་བར་སྦྱར་རོ། །སུ་ཞེ་ན་དེའི་ཕྱིར་དེ་ཞེས་བྱ་བ་སྨྲས་ཏེ། རྫོགས་པར་བསྙེན་པར་འདོད་པའོ། །གང་གི་ཚེ་ཞེ་ན། བཀར་བ་ཞེས་བྱ་བ་གསང་སྟེ་སྟོན་པ་བསྐོ་བའི་ལས་མི་ཐོས་པར་བྱ་བའི་ཕྱིར་
བཀར་བ་ན། དེ་དགེ་འདུན་གྱི་ནང་ནས་ལོགས་ཤིག་ཏུ་གཞག་པར་བྱའོ། །ཇི་ལྟར་གཞག་པར་བྱ་ཞེ་ན། དེའི་ཕྱིར་ཚོགས་ལ་མངོན་དུ་ཕྱོགས་པར་ཐལ་མོ་སྦྱར་ཏེ་གཞག་པར་བྱའོ་ཞེས་བྱ་བ་སྨྲས་ཏེ། རྫོགས་པར་བསྙེན་པར་འདོད་པ་གང་དགེ་འདུན་གྱི་ཚོགས་ལ་མངོན་དུ་ཕྱོགས་པ་དེ་ནི་ཚོགས་ལ་མངོན་དུ་ཕྱོགས་པ་དང༌། གང་གིས་ཐལ་མོ་སྦྱར་བ་དེ་ནི་ཐལ་མོ་སྦྱར་བ་སྟེ། རྫོགས་པར་བསྙེན་པར་འདོད་པ་དེ་དེ་ལྟར་གཞག་པར་བྱ་སྟེ། དགེ་འདུན་གྱི་ནང་ནས་མ་བཀར་བར་དེ་མི་བྱའོ་ཞེས་བྱ་བའི་ཐ་ཚིག་གོ །ཁྱིམ་པ་ལ་གནས་བརྗོད་པར་མི་བྱའོ་ཞེས་བྱ་བ་ནི། ཁྱིམ་པ་དེ་ལ་གནས་རྣམས་བརྗོད་པར་མི་བྱ་བ་སྟེ། དེ་ནི་རབ་ཏུ་འབྱུང་བའི་བར་ཆད་ཡོངས་སུ་སྤང་བའི་ཕྱིར་རོ། །འདིར་གཞུང་ནི་ཇི་སྲིད་དུ་རབ་ཏུ་བྱུང་བར་མ་གྱུར་གྱི་བར་དུ་ཁྱིམ་པ་ལ་གནས་རྣམས་བརྗོད་པར་མི་བྱའོ་ཞེས་གསུངས་པ་ཡིན་ནོ། །རྫོགས་པར་བསྙེན་མ་ཐག་པ་ལ་མི་བརྗོད་པར་མི་བྱའོ་ཞེས་བྱ་བ་ནི། རྫོགས་བར་བསྙེན་པའི་མོད་ལ་གནས་རྣམས་མི་བརྗོད་པར་མི་བྱའོ་ཞེས་བྱ་བའི་ཐ་ཚིག་སྟེ། ཐམས་ཅད་དུ་ཡང་རྫོགས་པར་བསྙེན་པའི་མོད་ལ་སེམས་མཐུན་པར་འགྱུར་བས་དེ་རྗེས་སུ་གནང་ངོ༌། །འདིར་གཞུང་ནི་བྲམ་ཟེའི་ཁྱེའུ་ཞིག་རབ་ཏུ་བྱུང་རྫོགས་པར་བསྙེན་པ་ལ་མཁན་པོས་འཕྱི་བ་ཞིག་ན་བསོད་སྙོམས་ལ་སོང་ཤིག་ཅེས་བསྒོ་བ་དང༌། དེས་བསྒོ་བ་ན་བདག་སློང་མོ་ལ་རྒྱུ་བས་སྐྱོ་སྟེ་རབ་ཏུ་བྱུང་ན་ཡང་བསོད་སྙོམས་བྱའམ་ཞེས་བསླབ་པ་ཕུལ་ནས་མཉམ་པར་གྱུར་པ་ནས། བཅོམ་ལྡན་འདས་ཀྱིས་བཀའ་སྩལ་པ། རྫོགས་པར་བསྙེན་མ་ཐག་ཏུ་གནས་གཞི་བརྗོད་པར་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །གང་ན་གནས་མེད་པ་དེར་གསོ་སྦྱོང་ལ་བསྡད་པ་དང་གནས་པར་ཁས་བླང་བར་མི་བྱའོ་ཞེས་བྱ་བ་ན། གཙུག་ལག་ཁང་གང་ན་གནས་མེད་པའི་གཙུག་ལག་ཁང་དེར། གསོ་སྦྱོང་མ་འོངས་པ་བསྡད་པར་མི་བྱ་ཞིང༌། དབྱར་གནས་པར་ཁས་བླངས་པ་མ་འོངས་པར་གནས་པར་ཁས་བླང་བར་མི་བྱའོ། །གལ་ཏེ་གནས་པར་ཁས་བླངས་ནས་ཕྱིས་གནས་མེད་པར་གྱུར་ན། དེའི་ཚེ་ཇི་ལྟར་བྱ་ཞེ་ན། དེའི་ཕྱིར་གནས་པར་ཁས་བླངས་པ་སྔ་མ་རྗེས་སུ་བསྲུང་བར་མི་བྱའོ་ཞེས་བྱ་བ་སྨྲས་ཏེ། གནས་མེད་ན་གནས་པར་ཁས་བླངས་པ་སྔ་མ་རྗེས་སུ་བསྲུང་བར་མི་བྱའོ།།
འདི་སྐད་བསྟན་ཏེ། དགེ་སློང་དབྱར་གནས་པར་ཁས་བླངས་པ་སྔ་མས་གནས་པར་ཁས་བླངས་པ་གལ་ཏེ་དབྱར་ཟླ་འབྲིང་པོ་མར་གྱི་ངོ་དང༌། དབྱར་ཟླ་ཐ་ཆུངས་ཡར་གྱི་ངོ་ལ་གནས་མེད་པར་གྱུར་ན། དེའི་ཚེ་གནས་པར་ཁས་བླངས་པ་སྔ་མ་དྲལ་ཏེ་གཞན་དུ་འགྲོ་བར་བྱ་ཞིང༌། གང་ན་གནས་ཡོད་པའི་དབྱར་གནས་པར་ཁས་བླངས་པ་ཕྱི་མ་ཤོས་དེར་གནས་པར་ཁས་བླང་བར་བྱའོ། །གལ་ཏེ་གནས་པར་ཁས་བླངས་པ་ཕྱི་མ་ཤོས་ན་ཡང་གནས་མེད་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་ཕྱི་མ་ལ་ཡང་ཟླ་གཉིས་ལས་ལྷག་པའོ་ཞེས་བྱ་བ་སྨྲས་ཏེ། ཡང་ཞེས་བྱ་བའི་སྒྲ་ལས་གནས་མེད་ན་རྗེས་སུ་མི་བསྲུང་ངོ་ཞེས་བྱ་བ་ན་འགྱུར་རོ། །དེ་ལྟར་ནི་འདིར་ཚིག་གི་དོན་འདི་འབྱུང་སྟེ། དབྱར་གནས་པར་ཁས་བླངས་པ་ཕྱི་མ་ཤོས་ན་ཡང་གནས་མེད་ན། ཟླ་བ་གཉིས་ལས་ལྷག་པར་ཁས་བླངས་པ་གཞན་རྗེས་སུ་བསྲུང་བར་མི་བྱ་སྟེ། ཟླ་བ་གཉིས་ནི་གནས་མེད་པ་དེས་ཀྱང་གནས་པར་བྱ་ཞིང་སྟོན་ཟླ་འབྲིང་པོའི་ཚེས་བཅུ་དྲུག་ལ་བབས་ན། གཞན་དུ་འགྲོ་བར་བྱའོ་ཞེས་བྱ་བའི་ཐ་ཚིག་གོ །གལ་ཏེ་གཙུག་ལག་ཁང་གཞན་ནས་དེར་གནས་འོང་བར་འགྱུར་བ་ཞིག་བཙལ་བར་བྱ་ན། ཇི་ལྟར་བཙལ་བར་བྱ་ཞེ་ན། དེའི་ཕྱིར་གནས་དང་ལས་དང་བསྙེན་བཀུར་གྱི་སྟ་གོན་གྱིས་དེ་བཙལ་བར་བྱའོ་ཞེས་བྱ་བ་སྨྲས་ཏེ། དེ་ལ་གནས་ཀྱི་སྟ་གོན་ཞེས་བྱ་བ་ནི་གནས་ཁང་གི་སྟ་གོན་ནོ། །དེས་རྙེད་པའི་སྟ་གོན་ཡང་བསྟན་པ་ཡིན་ཏེ། གནས་ཁང་གང་དུ་ཡོན་བདག་གིས་རྙེད་པ་ལྷག་པར་སྦྱོར་བའོ། །དེ་ཞེས་བྱ་བ་ནི་གནས་སོ། །བཙལ་བར་བྱའོ་ཞེས་བྱ་བ་ནི་དགེ་འདུན་དུ་གྱུར་པའི་དགེ་སློང་གནས་བཅའ་བར་འོས་པ་དག་གིས་སོ། །དགེ་སློང་གནས་མ་བཅས་པ་དག་གིས་ཟླ་བ་གཉིས་སུ་ལ་ཞུ་བར་བྱ་ཞེ་ན། དེའི་ཕྱིར། མེད་ན་གཞོན་ནུའི་ནང་ནས་ཆེས་རྒན་པ་ལ་ཞུ་བར་བྱའོ་ཞེས་བྱ་བ་སྨྲས་ཏེ། གནས་གཞན་མེད་ན་གཞོན་ནུ་རྣམས་ཀྱི་ནང་ན་ཆེས་རྒན་བ་ལ་ཞུ་བར་བྱའོ། །འདིར་གཞུང་ནི་དེ་ལྟ་མོད་ཀྱི་དེ་དག་ལས་ཆེས་རྒན་པ་གང་ཡིན་པ་དེ་ལ་ཞུ་བར་བྱ་ཞིང་དེའི་འོག་ཏུ་དགག་དབྱེ་གཞན་དུ་འགྲོ་བར་བྱའོ་ཞེས་གསུངས་པ་ཡིན་ཏེ། དངོས་སུ་ན་ཆེས་རྒན་པས་ནི་མ་ཞུས་པར་ཡང་བྱ་བ་བྱའོ་ཞེས་རྗེས་སུ་གནང་བ་ཡིན་ནོ། །ཡོད་ན་ཡང་རེ་ཞིག་གི་
གནས་ཉིད་ཀྱིས་སོ་ཞེས་བྱ་བ་ནི། གཞོན་རབས་ཀྱི་ནང་ན་ཆེས་རྒན་པ་ལ་རེ་ཞིག་གི་གནས་ཉིད་ཀྱིས་ཞུ་བར་བྱའོ། །འདིར་གཞུང་ནི་འདི་ནི་ཁྱོད་དང་མཁན་པོ་གཅིག་པ་ཡིན་གྱིས་ཁྱོད་ཀྱིས་འདི་ལ་ཞུ་བར་བྱའོ་ཞེས་གསུངས་པ་ཡིན་ནོ། །བྱ་བ་ཞུ་བའི་ཞར་ལ་མ་ཞུས་པར་དེ་ལྟ་བུ་ལ་བདག་གིས་སམ་དེས་ཀྱང་བསྙེན་བཀུར་གྱི་ལས་མི་བྱའོ་ཞེས་བྱ་བ་འདི་བརྗོད་དེ། གནས་མ་ལ་ཞུས་པར་ཚུལ་ཁྲིམས་རལ་བ་འཆལ་པའི་ཚུལ་ཁྲིམས་ཅན་དེ་ལྟ་བུ་ལ་བདག་གིས་ཀྱང་རྐང་པ་མཉེ་བ་ལ་སོགས་པའི་བསྙེན་བཀུར་གྱི་ལས་མི་བྱ་ལ། དེ་ལྟ་བུ་དེས་ཀྱང་མི་བྱ་སྟེ། དེ་ལྟ་བུ་དེས་བདག་ལ་བསྙེན་བཀུར་གྱི་ལས་མི་བྱ་ཞིང་བསྙེན་བཀུར་བྱེད་དུ་མི་གཞུག་གོ་ཞེས་བྱ་བའི་ཐ་ཚིག་གོ །མི་གནས་པར་འདུག་པར་མི་བྱའོ་ཞེས་སྤྱིར་བཏང་བ་དེའི་དམིགས་ཀྱིས་བསལ་བ་བསྟན་པའི་ཕྱིར། གནས་པར་འོས་པ་ཡོངས་སུ་ཚོལ་བ་ལ་ཞུགས་པ་ནི་མེད་ན་མི་གནས་པར་འདུག་པ་ལ་ཉེས་པ་མེད་དོ་ཞེས་བྱ་བ་སྨྲས་ཏེ། ཉེས་པར་མི་འགྱུར་བ་ནི་ཉེས་པ་མེད་པའོ། །གང་གི་ཚེ་ན་གནས་མེད་ནའོ། །སུ་ལ་ཞེ་ན། དེའི་ཕྱིར་གནས་པར་འོས་པ་ལའོ། །ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར། ཡོངས་སུ་ཚོལ་བ་ལ་ཞུགས་པ་ཞེས་བྱ་བ་སྨྲས་ཏེ། གང་ཡོངས་སུ་ཚོལ་བ་ལ་ཞུགས་པ་དེ་ནི་ཡོངས་སུ་ཚོལ་བ་ལ་ཞུགས་པ་སྟེ། གནས་པར་འོས་པ་ཡོངས་སུ་ཚོལ་བ་ལ་ཞུགས་པ་དེ་ནི་གནས་མེད་ན་མི་གནས་པར་འདུག་པ་ལ་ཉེས་པ་མེད་པར་རིག་པར་བྱའོ། །དེ་དུས་ཇི་སྲིད་དུ་མི་གནས་པར་འདུག་པ་ལ་ཉེས་པ་མེད་ཅེ་ན་དེའི་ཕྱིར་ཞག་ལྔའི་མཐར་ཐུག་པའི་བར་དུའོ་ཞེས་བྱ་བ་སྨྲས་ཏེ། ཞག་ལྔའི་མཐར་ཐུག་པ་ནི་ཞག་ལྔའི་མཐར་ཐུག་པའོ། །ཞག་ལྔའི་མཐར་ཐུག་པའི་བར་དུ་མི་གནས་པར་འདུག་པ་ལ་ཉེས་པ་མེད་དོ། །རྙེད་པ་ཡོང་ན་འོས་པ་ཉིད་དོ་ཞེས་བྱ་བ་ནི། རྙེད་པ་ཉེ་བར་གནས་པ་ཡོད་ན། གནས་པར་འོས་པ་ཡོངས་སུ་ཚོལ་བ་ལ་ཞུགས་པ་དེ་རྙེད་པ་སྦྱིན་པར་འོས་པ་ཉིད་ཡིན་ནོ། །དེ་ལྟར་འདིར་གཞུང་ནི་གླེང་གཞི་དག་ལས་མི་གནས་པ་ལ་ཡུན་ཇི་སྲིད་དུ་རྙེད་པ་བསལ་བར་བགྱི། ཉེ་བ་འཁོར་ཞག་ལྔ་ཚུན་ཆད་དོ་ཞེས་གསུངས་པ་ཡིན་ནོ། །དེ་ཡང་སྦྱོར་བ་མི་གཏོང་བ་ལའོ། །གཉུག་མར་གནས་པའི་གནས་ཀྱི་ཆོ་ག་བསྟན་ནས། གློར་བུར་དུ་འོངས་པའི་གནས་ཀྱི་ཆོ་ག་སྨྲ་བར་འདོད་
ནས། གློ་བུར་དུ་འོངས་པས་ནི་ངལ་བསོས་ནས་ཉི་མ་གཉིས་པའམ་གསུམ་པ་ལ་གནས་བཅའ་བར་བྱའོ་ཞེས་བྱ་བ་སྨྲས་ཏེ། དལ་བསོས་ནས་ཞེས་བྱ་བ་ནི། ཉི་མ་དང་པོ་ལ་བསྟིས་ནས་སོ། །གློ་བུར་དུ་འོངས་པ་དེས་ཉི་མ་དང་པོ་ལ་ངལ་བསོས་ནས་དེའི་འོག་ཏུ་ཉི་མ་གཉིས་པའམ་གསུམ་པ་ལ་གནས་ལ་གནས་བཅའ་བར་བྱའོ། །ཉི་མ་གཅིག་ནི་ཆེད་དུ་མི་བྱའོ་ཞེས་བྱ་བ་ནི། གློ་བུར་དུ་འོངས་པས་ཉི་མ་གཅིག་ནི་འདུག་པར་བྱའི་ཆེད་དུ་གནས་བཅའ་བར་མི་བྱའོ་ཞེས་བྱ་བར་སྦྱར་རོ། །གནས་པ་ཉེ་བར་མི་གནས་ན་གཞན་ལ་ཞུ་བར་བྱའོ་ཞེས་བྱ་བ་ནི། གནས་པས་དགེ་སློང་གཞན་ལ་ཞུ་བར་བྱའོ། །གང་གི་ཚེ་ཞེ་ན། ཉེ་བར་མི་གནས་ན་སྟེ། སྤྱོད་ཡུལ་དུ་མ་གྱུར་པ་ཉིད་ནའོ། །སུ་ཞིག་ཅེ་ན། གནས་པའོ། །འོ་ན་གནས་ཞེས་བརྗོད་པར་བྱ་བ་ཡིན་ན། ཇི་ལྟར་གནས་པ་ཞེས་བརྗོད་པར་བྱ་ཞེ་ན། ཉེས་པ་མེད་དེ་གནས་པར་བྱ་བའི་ལས་ལ་གནས་པ་ཞེས་བྱ་བའི་ཚིག་ཏུ་བྱའི། གནས་པར་བྱེད་པའི་བྱེད་པ་པོ་ལ་མི་བྱ་བའི་ཕྱིར་ཏེ། གང་གནས་པར་འོས་པ་དེ་ལ་གནས་པར་བྱེད་ཅིང་གནས་པར་བྱེད་ལེན་པར་བྱེད་པས། དེས་ན་གནས་པ་ཞེས་བྱ་བ་ནི་གནས་ཉིད་ཡིན་པར་གཟུང་ངོ༌། །དེ་ལྟར་ན་འདིར་དོན་འདི་འབྱུང་སྟེ། གནས་མེད་ན་དགེ་སློང་གཞན་ལ་ཞུ་བར་བྱའོ་ཞེས་བྱ་བའི་ཐ་ཚིག་གོ །གནས་ལ་མ་ཞུས་པར་བྱ་བ་མི་བྱའོ་ཞེས་བྱ་བ་ལ་སོགས་པ་དེའི་ཉེ་བར་སྦྱར་བའི་དམིགས་ཀྱིས་བསལ་བསྟན་པའི་ཕྱིར། ལས་སུ་བསྐོས་པར་སོང་བ་ན་དེ་གཞན་བྱུང་ན་མ་ཞུས་ཀྱང་ཉེས་པ་མེད་དོ་ཞེས་བྱ་བ་ལ། ལས་སུ་བསྐོས་པར་སོང་བ་ན་ཞེས་བྱ་བ་ནི། དེའི་ཕྱིར་སོང་བ་ན་ཞེས་བྱ་བར་སྦྱར་ཏེ། གནས་པ་ལས་སུ་བསྐོས་པའི་ཕྱིར་སོང་བ་ནའོ། །དེ་གཞན་བྱུང་ན་ཞེས་བྱ་བ་ནི། ལས་སུ་བྱ་བ་གཞན་བྱུང་ན་སྟེ། གཞན་དེ་བསྒྲུབ་པའི་ཕྱིར་མ་ཞུས་ཀྱང་ཉེས་པ་མེད་པར་རིག་པར་བྱའོ། །རྣམ་པར་འབྱེད་པའི་གནས་མལ་གྱི་གཞི་ལས་གལ་ཏེ་དེར་སོང་བ་རྣམས་ལ་ལས་སུ་བྱ་བ་གཞན་བྱུང་ན་དེ་དག་གིས་ཡང་འོངས་ཏེ་ཞུ་བར་མི་བྱ་བར་ལས་སུ་བྱ་བ་དེ་ཉིད་བྱ་སྟེ། དེ་དག་ནི་ཞུ་བ་སྔ་མ་ཉིད་དེའི་ཞུ་བ་ཡང་ཡིན་ནོ་ཞེས་གསུངས་སོ། །གནས་བཅའ་བར་བྱའོ་ཞེས་སྨྲས་ན། ཅི་གང་ཡང་རུང་བ་ལའམ་ཞེ་ན། དེའི་
ཕྱིར་གང་ཡང་རུང་བ་ལ་མི་བྱའོ་ཞེས་བྱ་བ་སྨྲས་ཏེ། གནས་བཅའ་བའོ། །འོ་ན་གང་ལ་ཞེ་ན། དེའི་ཕྱིར་དྲི་བ་ལ་སོགས་པས་ཚུལ་ཁྲིམས་དང་ཤེས་པ་དང་འཁོར་ལ་ཕན་འདོགས་པ་ཉིད་ངེས་པར་ཤེས་པར་བྱས་ནས་དེ་གཟུང་བར་བྱའོ་ཞེས་བྱ་བ་སྨྲས་ཏེ། དྲི་བ་ལ་སོགས་པས་ཞེས་བྱ་བ་ལ་སོགས་པའི་སྒྲས་ནི་ལུས་ཀྱི་ལས་ལ་སོགས་པའི་ཀུན་ཏུ་སྤྱོད་པ་དག་ཀྱང་བསྡུའོ། །དེ་དག་གིས་གནས་སྦྱིན་པའི་གང་ཟག་གི་ཚུལ་ཁྲིམས་དང་ཤེས་པ་དང་འཁོར་ལ་ཕ་ན་འདོགས་པ་ཉིད་དེ་དག་ཐམས་ཅད་ངེས་པར་ཤེས་པར་བྱས་ནས་གནས་དེ་གཟུང་བར་བྱའོ། །ཇི་ལྟར་ཞེ་ན། དེའི་ཕྱིར་སྡོམ་པ་བཞིན་ནོ་ཞེས་བྱ་བ་སྨྲས་ཏེ། དཔེར་ན་དགེ་བསྙེན་གྱི་སྡོམ་པ་ལ་སོགས་པ་སྔགས་སྔོན་དུ་བཏང་བའི་ཆོ་གས་ལན་གསུམ་བཟླས་ཏེ། ལེན་པ་དེ་བཞིན་དུ་འདི་ཡང་དེ་བཞིན་ནོ། །འདི་ལྟར་སྡོམ་པ་བཞིན་ནོ་ཞེས་སྨྲས་ན། སྡོམ་པ་ནི་ཐལ་མོ་སྦྱར་བས་བླང་བར་བྱ་བ་ཡིན་གྱི། འདིར་ཆོ་ག་གཞན་གྱིས་ཡིན་པར་བསྟན་པའི་ཕྱིར། ལག་པ་གཉིས་ཀྱིས་རྐང་མཐིལ་གཉིས་ལ་བཅངས་ནས་སོ་ཞེས་བྱ་བ་སྨྲས་ཏེ། གནས་པས་ལག་པ་གཉིས་ཀྱིས་གནས་ཀྱི་རྐང་མཐིལ་གཉིས་ལ་བཅངས་ཏེ་གཟུང་ནས་གནས་སུ་གཟུང་བར་བྱའོ། །གནས་ཀྱིས་ཀྱང་ཐམས་ཅད་ལ་གནས་སྦྱིན་པར་མི་བྱ་སྟེ། འདི་ལྟར་ཡོངས་སུ་བརྟགས་ནས་སྦྱིན་ནོ་ཞེས་བྱ་བ་ནི། གནས་པ་ཡོངས་སུ་བརྟགས་ནས་གནས་སྦྱིན་པར་བྱ་བའོ། །འདི་ལྟར་ཡོངས་སུ་བརྟག་པར་བྱ་སྟེ། ཅི་འདི་མྱ་ངན་ལས་འདས་པའི་བསམ་པ་ཅན་དང༌། བསླབ་པ་དག་ལ་གུས་པ་ཡིན་ནམ་ཞེས་ཡོངས་སུ་བརྟགས་ནས་སོ། །གནས་དང་གནས་པ་གཉིས་ཇི་ལྟར་ཕན་ཚུན་གནས་པར་བྱ་ཞེ་ན། དེའི་ཕྱིར་བུ་དང་ཕའི་འདུ་ཤེས་དག་བསྐྱེད་པར་བྱའོ་ཞེས་བྱ་བ་སྨྲས་ཏེ། བུ་དང་ཕ་གཉིས་ནི་བུ་དང་ཕའོ། །དེ་གཉིས་ཀྱི་འདུ་ཤེས་དག་ནི་བུ་དང་ཕའི་འདུ་ཤེས་དག་སྟེ། དེ་དག་བསྐྱེད་པར་བྱའོ། །འདི་སྐད་བསྟན་ཏེ། གནས་ཀྱིས་ནི་གནས་པ་ལ་བུའི་འདུ་ཤེས་བསྐྱེད་པར་བྱ་ལ། གནས་པས་ནི་གནས་ལ་ཕའི་འདུ་ཤེས་བསྐྱེད་པར་བྱའོ་ཞེས་བྱ་བའི་ཐ་ཚིག་གོ །ཅི་ལྷན་ཅིག་གནས་པས་མཁན་པོ་ལ་གནས་བཅའ་དགོས་སམ་ཞེ་ན། དེའི་ཕྱིར། མཁན་པོ་དེ་ཉིད་གནས་པ་དེ་ཉིད་ཡིན་ནོ་ཞེས་བྱ་བ་སྨྲས་ཏེ།
དེའི་དངོས་པོ་ནི་དེ་ཉིད་དེ་དེ་ཞེས་བྱ་བའི་སྒྲ་ནི་མཁན་པོ་ལ་སྙེགས་སོ། །འདི་སྐད་བསྟན་ཏེ། མཁན་པོ་ལ་གནས་ན་མཁན་པོ་དེ་ཉིད་གནས་པ་ཉིད་ཡིན་ནོ། །མཁན་པོ་ཡིན་པའི་ཕྱིར་གནས་ཉིད་ཡིན་པར་བརྗོད་པར་བྱ་བ་ཇི་ལྟར་གནས་པ་ཉིད་དུ་བརྗོད་ཅེ་ན། ཉེས་པ་མེད་དེ་འདིར་གནས་པ་ཉིད་ཅེས་བྱ་བ་ནི་གནས་པར་བྱ་བའི་ལས་ལ་གནས་པ་ཞེས་བྱ་བའི་རྐྱེན་གྱིས་བསྟན་པ་ཡིན་གྱི། གནས་པར་བྱེད་པའི་བྱེད་པ་པོ་ནི་མ་ཡིན་ནོ། །དེ་ལ་གནས་པར་བྱ་བས་གནས་པ་སྟེ། དེས་ན་གནས་པ་ཞེས་བྱ་བའི་སྒྲས་གནས་པ་བསྟན་པ་ཡིན་ནོ། །དེའི་དངོས་པོ་ནི་གནས་པ་ཉིད་དེ། དངོས་པོའི་རྐྱེན་གྱིས་མཁན་པོ་ཡིན་པར་བྱེད་པ་བསྟན་ཏོ། །གང་གི་ཕྱིར་མཁན་པོ་དེ་ཉིད་གནས་ཉིད་ཡིན་པ་དེའི་ཕྱིར་དེ་ལ་དེ་མི་བཅའོ། །དེའི་ཕྱིར་མཁན་པོའི་ཡུལ་དེ་ལ་གནས་དེ་མི་བཅའོ། །འདི་སྐད་བསྟན་ཏེ། གང་གི་ཕྱིར་ལྷན་ཅིག་གནས་པའི་མཁན་པོ་ཉིད་གནས་ཉིད་ཁོན་ཡིན་པས། དེའི་ཕྱིར་སློབ་མས་དེ་ལ་གནས་བཅའ་མི་དགོས་སོ། །གནས་བཅས་པ་གང་གིས་འཇིག་པར་འགྱུར་ཞེ་ན། དེའི་ཕྱིར་གཉི་ག་ལས་མི་ལྟོས་པ་ཉིད་བྱུང་བ་ནི་གནས་བཅས་པ་འཇིག་པའི་རྒྱུ་ཡིན་ནོ་ཞེས་བྱ་བ་སྨྲས་ཏེ། གཉི་ག་ལས་ཞེས་བྱ་བ་ནི། གནས་དང་གནས་པ་གཉི་ག་ལས་ཏེ། མི་ལྟོས་པ་ཉིད་ཅིག་ཅར་རམ་སྔ་ཕྱིར་བྱུང་ན་དེ་ནི་གནས་བཅས་པ་བླངས་པའི་འཇིག་པའི་རྒྱུ་ཡིན་ནོ། །འདི་སྐད་བསྟན་ཏེ། གལ་ཏེ་གནས་དང་གནས་པ་གཉིས་དུས་གཅིག་ཏུ་མི་ལྟོས་པ་ཉིད་དུ་གྱུར་ཏམ། འོན་ཏེ་སྔ་ཕྱིར་ངང་པོར་གནས་མི་ལྟོས་པ་ཉིད་དུ་གྱུར་ལ་ཕྱིས་གནས་པ་མི་ལྟོས་པ་ཉིད་དུ་གྱུར་ན། དེའི་ཚེ་ན་གནས་ཞིག་པར་རིག་པར་བྱའི། གཅིག་མི་ལྟོས་པ་ཉིད་དུ་གྱུར་པས་ནི་གནས་འཇིག་པར་མི་འགྱུར་རོ། །གནས་དུམ་ཚོགས་པར་གྱུར་ན། གང་ལ་གནས་པར་བྱ་ཞེ་ན། དེའི་ཕྱིར་མཁན་པོ་མ་ཡིན་པ་དག་ཆོགས་ན་འདོད་པས་འཇུག་པར་བྱའོ་ཞེས་བྱ་བ་སྨྲས་ཏེ། གནས་མཁན་པོ་དེ་ནི་མཁན་པོའོ། །གནས་མཁན་པོ་དེ་ལས་གཞན་པའི་གནས་ནི། མཁན་པོ་མ་ཡིན་པའོ། །མཁན་པོ་མ་ཡིན་པའི་གནས་དེ་དག་འདུས་ཤིང་ཚོགས་ན་སྟེ། ཚོགས་པར་གྱུར་པ་ནི་ཚོགས་པ་སྟེ། གནས་
དག་ཚོགས་ནའོ། །དེའི་དུས་ན་གནས་པ་འདོད་པས་གནས་སུ་འཇུག་པར་བྱའོ། །འདི་སྐད་བསྟན་ཏེ། གནས་མང་པོ་དག་ཚོགས་པར་གྱུར་པ་ན་གནས་ཀྱི་གང་འདོད་པ་དེས་གནས་པར་བྱའོ་ཞེས་བྱ་བའི་ཐ་ཚིག་གོ །དེ་དང་ན་དེ་ཉིད་ཀྱིས་སོ་ཞེས་བྱ་བ་ལ། དེ་དང་ན་ཞེས་བྱ་བ་ནི། མཁན་པོར་གཏོགས་པའི་གནས་དེ་དང་ཚོགས་ནའོ། །དེ་ཉིད་ཀྱིས་སོ་ཞེས་བྱ་བ་ནི། མཁན་པོ་དེ་ཉིད་ཀྱིས་ཏེ། མཁན་པོ་ཡིན་པའི་གནས་དེ་ཉིད་ཀྱིས་སློབ་མ་གནས་པར་བྱ་བའོ། །འདི་སྐད་བསྟན་ཏེ། གལ་ཏེ་མཁན་པོ་དང་སློབ་དཔོན་མང་པོ་ཞིག་གཙུག་ལག་ཁང་དུ་ལྷན་ཅིག་ལྷགས་པར་གྱུར་ལ། གནས་པ་ཡང་དེ་ཉིད་དུ་འདུས་པར་གྱུར་ན། གནས་པས་མཁན་པོ་ཉིད་དུ་གཏོགས་པའི་གནས་དེ་ཉིད་ཀྱིས་གནས་པར་བྱའི། གཞན་གྱིས་མི་བྱའོ། །དེ་ནི་གནས་པས་གནས་ལ་ཇི་ལྟར་བྱ་བ་དེ་སྟོན་ཏེ། མཁན་པོ་མཐོང་མ་ཐག་ཏུ་སྟན་ལས་ལྡང་བར་བྱའོ་ཞེས་བྱ་བ་ནི། མཁན་པོ་ལངས་པ་མཐོང་ན་མཐོང་མ་ཐག་ཁོ་ནར་སྟན་ལས་ལྡང་བར་བྱ་སྟེ། ལྡང་བར་བྱའོ་ཞེས་བྱ་བའི་ཐ་ཚིག་གོ །མཁན་པོ་མཐོང་མ་ཐག་ཏུ་ཞེས་བྱ་བ་སྨོས་པ་འདི་ནི་དཔེ་ཙམ་སྟེ། གནས་གཞན་དག་མཐོང་ན་ཡང་ད་བཞིན་དུ་སྟན་ལས་ལྡང་བར་བྱའོ། །གཙུག་ལག་ཁང་དེ་ན་འདུག་ན་གནས་པས་ཉིན་པར་ལན་གསུམ་འགྲོ་བར་བྱའོ་ཞེས་བྱ་བ་ནི། གཙུག་ལག་ཁང་གང་ན་གནས་འདུག་པའི་གཙུག་ལག་ཁང་དེ་ན་གལ་ཏེ་གནས་པ་ཡང་འདུག་པར་གྱུར་ན། དེའི་ཚེ་གནས་པས་གནས་དེའི་དྲུང་དུ་ཉིན་མོ་ལན་གསུམ་འགྲོ་བར་བྱ་བའོ། །གལ་ཏེ་དགོན་པ་ན་འདུག་ལ་རྒྱང་གྲགས་ཙམ་ན་ཉིན་རེ་ལན་རེའོ་ཞེས་བྱ་བ་ནི། གལ་ཏེ་གནས་དགོན་པ་ན་འདུག་ལ་དགོན་པ་དེ་ཡང་རྒྱང་གྲགས་གཅིག་ན་ཡོང་ན། གནས་པས་ཉིན་རེ་ལན་རེ་འོངས་ནས་གནས་དེའི་དྲུང་དུ་འགྲོ་བར་བྱའོ། །རྒྱང་གྲགས་ལྔ་ཡོད་ན་ཞག་ལྔའམ་དྲུག་ཅིང་དོ་ཞེས་བྱ་བ་ནི། གལ་ཏེ་དགོན་པ་སྟེ་རྒྱང་གྲགས་ལྔ་ཡོད་པ་ཞིག་ཡིན་ན། དེའི་ཚེ་གནས་པས་གནས་ཀྱི་དྲུང་དུ་ཞག་ལྔའམ་དྲུག་ཅིང་འོངས་ནས་འགྲོ་བར་བྱའོ། །དཔག་ཚད་ཕྱེད་དང་གསུམ་དག་ནི་གསོ་སྦྱང་གི་ཚེའོ་ཞེས་བྱ་བ་ནི། གལ་ཏེ་དགོན་པ་དེ་དཔག་ཚད་ཕྱེད་དང་གསུམ་དག་ཡོད་ལ་དེ་ན་གནས་
འདུག་ན་དེའི་ཚེ་གནས་པས་གསོ་སྦྱོང་གི་ཉིན་མོ་ཟླ་བ་ཕྱེད་ཕྱེད་ཅིང་འོངས་ནས་འགྲོ་བར་བྱའོ། །ད་ནི་གནས་ཀྱིས་གནས་པ་ལ་ཇི་ལྟར་གནས་པར་བྱ་བ་སྟོན་ཏེ། གནས་པ་ཆད་པས་གཅད་པར་འོས་པ་ཆད་པས་མི་གཅད་པར་མི་བྱའོ་ཞེས་བྱ་བ་ནི། གནས་པ་ཆད་པས་གཅད་པར་འོས་པ་ཆད་པའི་ལས་བྱེད་དུ་གཞུག་པར་འོས་པ་གནས་ཀྱིས་ཆད་པས་མི་གཅད་པར་མི་བྱ་བའོ། །ཆད་པ་དུ་ཡོད་ཅེ་ན། དེའི་ཕྱིར་ཆད་པ་ནི་ལྔའོ་ཞེས་བྱ་བ་སྨྲས་ཏེ། དེ་དག་གང་ཞེ་ན། དེའི་ཕྱིར། གཏམ་འདྲེ་བར་མི་བྱ་བ་དང༌། གདམས་ངག་མི་སྦྱིན་པ་དང༌། བསྙེན་བཀུར་དང་ཆོས་དང་ཟང་ཟིང་དག་གིས་ལོངས་སྤྱོད་དུ་མི་གཞུག་པ་དང༌། དགེ་བའི་ཕྱོགས་བརྩམས་པ་རྒྱུན་བཅད་པ་དང༌། གནས་དགག་པར་བྱ་བའོ་ཞེས་བྱ་བ་སྨྲས་ཏེ། གཏམ་མི་བྱ་བ་ནི་གཏམ་འདྲེ་བར་མི་བྱ་བ་སྟེ། དེ་དང་ལྷན་ཅིག་ཚིག་སྨྲ་བ་རྨི་བྱ་བའོ། །གདམས་ངག་མི་སྦྱིན་པ་ནི། མི་སྡུག་པ་ལ་སོགས་པ་བསྒོམ་པའི་གདམས་ངག་སྦྱིན་པར་མི་བྱ་བའོ། །བསྙེན་བཀུར་དང་ཆོས་དང་ཟང་ཟིང་དག་གིས་ལོངས་སྤྱོད་དུ་མི་གཞུག་པ་ནི་དེ་དག་གིས་ལོངས་སྤྱོད་པ་མི་སྦྱིན་པ་སྟེ། བགོ་བཤའ་མ་བྱས་པའི་བགོ་བཤའ་མི་བྱའོ་ཞེས་བྱ་བའི་ཐ་ཚིག་གོ །དགེ་བའི་ཕྱོགས་བརྩམས་པ་རྒྱུན་བཅད་པ་ནི། དེ་བར་དུ་བཅད་པར་བྱ་བའོ། །གནས་དགག་པར་བྱ་བ་ནི་རྣམ་པར་མནན་པར་བྱ་བའོ། །ཆད་པ་རྣམས་གང་ལ་འོས་ཤེ་ན། དེའི་ཕྱིར་མ་པ་དང༌། ལེ་ལོ་ཅན་དང་བཀའ་བློ་མི་བདེ་བ་དང༌། མ་གུས་པ་དང་སྡིག་པའི་གྲོགས་བྱེད་པ་ལ་དེ་དག་འོས་པ་ཉིད་དོ་ཞེས་བྱ་བ་སྨྲས་ཏེ། མ་དད་པ་ཞེས་བྱ་བ་ནི། གང་ལ་དད་པ་མེད་པ་དེ་ནི་མ་དད་པ་སྟེ། དེ་ལ་ཆད་པ་དེ་དག་འོས་པ་ཉིད་དོ། །ཆད་པས་གཅད་པར་འོས་པ་ནི་དེ་དག་འོས་པ་སྟེ། དེ་དག་འོས་པའི་དངོས་པོ་ནི་དེ་དག་འོས་པ་ཉིད་དོ། །མ་དད་པ་འབའ་ཞིག་ལ་མ་ཡིན་གྱི་གཞན་ཡང་ལེ་ལོ་ཅན་ལ་སོགས་པ་དག་ལ་ཡང་འོས་པ་ཡིན་ཏེ། སྨད་པ་ལ་གནས་པར་བྱེད་པ་ནི། ལེ་ལོ་ཅན་ཏེ། དེ་ཡང་ཆད་པས་གཅད་པར་འོས་པ་ཉིད་ཡིན་ནོ། །ཚིག་མི་བཟོད་པ་ནི་བཀའ་བློ་མི་བདེ་བ་སྟེ་དེ་ཡང་ངོ༌། །གུས་པར་མི་བྱེད་པ་ནི། མ་གུས་པ་སྟེ་དེ་ཡང་ངོ༌། །གང་སྡིག་པའི་གྲོགས་ཡིན་པ་དེ་ནི་སྡིག་པའི་གྲོགས་བྱེད་པ་སྟེ། དེ་
ཡང་ཆད་པས་གཅད་པར་འོས་པ་ཉིད་ཡིན་ནོ། །གལ་ཏེ་གཞན་ཞིག་གིས་དེ་ལེན་པར་བྱེད་ན། གཞན་དེ་ལ་ཅི་འགྱུར་ཞེ་ན། དེའི་ཕྱིར་ཆད་པས་བཅད་པ་གཞན་གྱིས་ལེན་པར་བྱེད་པ་ལ་ཉེས་པ་སྦོམ་པར་འགྱུར་རོ་ཞེས་བྱ་བ་སྨྲས་ཏེ། ཆད་པས་བཅད་པ་གནས་ལས་གཞན་པའི་ལེན་པ་པོས་ལེན་པར་བྱེད་ན། དེ་ལ་དགེ་འདུན་གྱི་དབྱེན་གྱིས་དགེ་འདུན་ལྷག་མར་འགྱུར་བའི་ཉེས་པ་སྦོམ་པོར་འགྱུར་བར་རིག་པར་བྱའོ། །དེ་ལྟར་བྱས་ཀྱང་གལ་ཏེ་དེ་བཟོད་པ་གསོལ་བའི་ཕྱིར། གུས་པར་མི་བྱེད་ན། དེའི་ཚེ་ཇི་ལྟར་བྱ་ཞེ་ན། དེའི་ཕྱིར། གུས་པར་མི་བྱེད་ན་དྲང་པོར་བྱ་བའི་ཕྱིར་དགེ་སློང་ཤེས་ཉེན་ཅན་བསྐོ་བར་བྱའོ་ཞེས་བྱ་བ་སྨྲས་ཏེ། གནས་པ་གུས་པར་མི་བྱེད་ན་དེ་དྲང་པོར་རྣལ་དུ་དབབ་པར་བྱ་བའི་ཕྱིར་དག་སློང་གཞན་བསྐོ་བར་བྱའོ། །ཁྱད་པར་ཇི་ལྟ་བུ་ཅན་ཞིག་ཅེ་ན། དེའི་ཕྱིར་ཤེས་ཉེན་ཅན་ཞེས་བྱ་བ་སྨྲས་སོ། །འདི་སྐད་བསྟན་ཏེ། གནས་ཀྱིས་གནས་པ་དེ་དྲང་པོར་རྣལ་དུ་དབབ་པའི་ཕྱིར་དགེ་སློང་ཤེས་ཉེན་ཅན་བསྐ་ཞིང་དེས་གནས་པ་མ་གུས་པ་དེ་བཟོད་པ་གསོལ་དུ་གཞུག་པའི་ཕྱིར་དྲང་པོར་རྣལ་དུ་དབབ་པར་བྱའོ། །རྒྱུ་བཏང་བ་བཟོད་པ་གསོལ་བར་བྱེད་པ་ལ་བཟོད་པར་བྱའོ་ཞེས་བྱ་བ་ལ། གང་གིས་མ་དད་པ་ཉིད་ལ་སོགས་པའི་རྒྱུ་བཏང་བ་དེ་ནི་རྒྱུ་བཏང་བསྟེ། དེ་ལ་གནས་ཀྱིས་བཟོད་པར་བྱ་སྟེ་དགའ་བར་བྱའོ། །འོ་ན་ཅི་རྒྱུ་བཏང་བ་ཙམ་ཁོ་ནར་ཟད་ལ་བཟོད་པ་གསོལ་བར་མི་བྱེད་པ་ལ་ཡང་བཟོད་པར་བྱ་འམ་ཞེ་ན་མ་ཡིན་ཏེ། དེའི་ཕྱིར་བཟོད་པ་གསོལ་བར་བྱེད་པ་ལ་ཞེས་བྱ་བ་སྨྲས་སོ། །འདི་སྐད་བསྟན་ཏེ། གལ་ཏེ་གནས་པས་རྒྱུ་ཡང་བཏང་ལ་གནས་ལ་བཟོད་པ་གསོལ་བར་ཡང་བྱེད་ན་དེའི་ཚེ་གནས་ཀྱིས་བཟོད་པར་བྱའོ། དེ་བཞིན་པ་ལ་ནི་མ་ཡིན་ནོ། །མི་འོས་པ་ཆད་པས་གཅད་པར་མི་བྱའོ་ཞེས་བྱ་བ་ལ། མི་འོས་པ་ནི་དད་པ་ལ་སོགས་པའི་ཡོན་ཏན་དང་ལྡན་པ་ཆད་པས་གཅད་པར་མི་འོས་པ་སྟེ། དེ་ཆད་པས་གཅད་པར་མི་བྱའོ། །དད་པ་ལ་སོགས་པའི་ཡོན་ཏན་དང་ལྡན་པ་ཆད་པས་གཅད་པར་མི་བྱའོ་ཞེས་བྱ་བའི་ཐ་ཚིག་གོ །།བམ་པོ་དྲུག་པ། འོས་པ་ལ་མི་བཟོད་པར་མི་བྱའོ་ཞེས་བྱ་བ་ནི། རྒྱུ་བཏང་བ་བཟོད་པར་བྱ་བར་འོས་པ་ལ་མི་བཟོད་པར་མི་བྱ་བ་སྟེ། བཟོད་པར་བྱ་བ་ཁོ་ནའོ། །མདོ་དེ་གཉིས་
ནི་ཚུལ་མ་ཡིན་པ་སྤང་བའི་ཕྱིར་རོ། །མི་འོས་པ་ལ་བཟོད་པར་མི་བྱའོ་ཞེས་བྱ་བ་ནི། རྒྱུ་མ་བཏང་བ་བཟོད་པར་བྱ་བར་མི་འོས་པ་ལ་བཟོད་པར་མི་བྱ་བ་སྟེ། དེ་ནི་ཧ་ཅང་མང་དུ་ཡོད་པ་སྤང་བའི་ཕྱིར་རོ། །གལ་ཏེ་དྲང་པོར་བྱར་མ་ནུས་ན་དེའི་ཚེ་གནས་ཀྱིས་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་མི་བྱེད་པ་ཉིད་ཡིན་ན་གནས་ཁང་ནས་བསྐྲད་པར་བྱའོ་ཞེས་བྱ་བ་སྨྲས་ཏེ། བྱེད་པའི་དངོས་པོ་ནི་བྱེད་པ་ཉིད་དོ། །མི་བྱེད་པ་ཉིད་ནི་དྲང་པོའི་དངོས་པོ་མི་བྱེད་པ་ཉིད་ཡིན་ཏེ། གལ་ཏེ་རྣམ་པ་ཐམས་ཅད་དུ་དྲང་པོར་བྱར་མི་ནུས་ན། དེའི་ཚེ་དེ་གནས་ཁང་ནས་བསྐྲད་པར་བྱ་སྟེ། དེ་གནས་ཁང་ནས་དབྱུང་བར་བྱའོ་ཞེས་བྱ་བའི་ཐ་ཚིག་གོ །ཅི་ཡོ་བྱད་མེད་པར་བསྐྲད་པར་བྱའམ་ཞེ་ན་མ་ཡིན་ཏེ་དེའི་ཕྱིར། དགེ་ཚུལ་ལ་ནི་ཆུ་ཚགས་དང་རིལ་པ་སྤྱི་བླུགས་དང་མཐང་གོས་དང་བཅས་པའི་བློ་གོས་ཀྱང་བྱིན་ཏེའོ་ཞེས་བྱ་བ་སྨྲས་ཏེ། ཆུ་ཚགས་དང་རིལ་པ་སྤྱི་བླུགས་ནི། ཆུ་ཚགས་དང་རིལ་བ་སྤྱི་བླུགས་ཏེ་དེ་གཉིས་བྱིན་ཏེའོ། །མཐང་གོས་དང་བླ་གོས་ཕྲུགས་སུ་བཅས་པ་ནི། མཐང་གོས་དང་བཅས་པའི་བླ་གོས་སོ། །ཀྱང་ཞེས་བྱ་བ་ནི། དེ་ཡང་བྱིན་ཏེ་ཞེས་བྱ་བར་སྦྱར་ཏེ། གནས་ཀྱིས་དགེ་ཚུལ་ལ་ནི་དེ་དག་བྱིན་ཏེ། བསྐྲད་པར་བྱའོ། །གལ་ཏེ་རྫོགས་པར་བསྙེན་པར་འདོད་པ་ཞིག་ཡིན་ན་ཡོ་བྱད་ལྔའོ་ཞེས་བྱ་བ་ནི། གལ་ཏེ་རྫོགས་པར་བསྙེན་པར་འདོད་པ་ཞིག་ཡིན་ན་དེའི་ཚེ་ཡོ་བྱད་ལྔ་བྱིན་ཏེ་བསྐྲད་པར་བྱ་སྟེ། ཆོས་གོས་གསུམ་དང་སྟན་དང་ལྷུང་བཟེད་དོ། །ཆུ་ཚགས་ཀྱང་སྦྱིན་པར་བྱ་བ་ཡིན་ཏེ། འདིར་མ་སྨོས་པ་ནི་མདོ་སྔ་མར་སྨོས་པས་དེ་ནི་མ་སྨོས་ཀྱང་གྲུབ་པ་ཡིན་ནོ། །དེས་ན་ཡོ་བྱད་དྲུག་པོ་དག་སྦྱིན་པར་བྱའོ་ཞེས་བྱ་བར་གྲུབ་པ་ཡིན་ནོ། །རྫོགས་པར་བསྙེན་པ་ལ་ཡང་ངོ་ཞེས་བྱ་བ་ཡང་ཡོ་བྱད་དྲུག་པོ་དག་བྱིན་ཏེ། གནས་ཁང་ནས་བསྐྲད་པར་བྱའོ་ཞེས་བྱ་བར་སྦྱར་རོ། །དེ་ལྟར་བསྐྲད་པ་ན་གལ་ཏེ་དང་པོར་གྱུར་ན་ཅི་དེ་རྣམ་པ་ཐམས་ཅད་དུ་བླང་བར་མི་བྱའམ་ཞེ་ན། དེའི་ཕྱིར་སེང་གེ་ལྟར་གྱ་ཚོམ་མི་བྱའོ་ཞེས་བྱ་བ་སྨྲས་ཏེ། ཇི་ལྟར་སེང་གེ་ཟས་གང་སྤངས་པ་དེ་ནམ་ཡང་ཕྱིར་མི་ལེན་པ་དེ་ལྟར་གྱ་ཚོམ་མི་བྱ་སྟེ། གལ་ཏེ་དྲང་པོར་གྱུར་ན་ཡན་ཕྱིར་བླང་བར་བྱའོ་ཞེས་བྱ་བའི་ཐ་ཚིག་གོ །གནོད་པར་འགྱུར་
བའི་ཁྲིམས་སུ་བྱ་བ་མི་བཅའོ་ཞེས་བྱ་བ་ལ། གང་གནོད་པར་འགྱུར་བའི་ངང་ཚུལ་ཅན་གྱི་ཁྲིམས་སུ་བྱ་བ་དེ་ནི། གནོད་པར་བྱ་བའི་ཁྲིམས་སུ་བྱ་བ་སྟེ་དེ་མི་བཅའོ། །དགེ་འདུན་དུ་གྱུར་པའི་དགེ་སློང་དག་གིས་ཁྲིམས་སུ་བྱ་བ་གང་གིས་དགེ་སློང་དག་ལ་གནོད་པར་འགྱུར་ལ། མ་བྱས་ན་ཡང་ཉེས་པ་འགའ་ཡང་མེད་པ་དེ་ལྟ་བུའི་ཁྲིམས་སུ་བྱ་བ་མི་བྱའོ་ཞེས་བྱ་བའི་ཐ་ཚིག་གོ །ཁའི་གནས་པ་ཉིད་ནི་མ་བཀྲུས་པ་ཉིད་ཡིན་ནོ་ཞེས་བྱ་བ་སྨྲས་ཏེ། ཁའི་མཚན་མོ་ཉལ་ཉལ་བས་གནས་པ་ཉིད་གང་ཡིན་པ་དེ་ཉིད་མ་བཀྲུས་པ་ཉིད་ཡིན་ཏེ། ཟང་ཟིང་དང་བཅས་པ་ཉིད་ཡིན་པར་རིག་པར་བྱའོ། །དེ་བས་ན་ཇི་སྲིད་དུ་སོ་ཤིང་ལ་སོགས་པས་ཁ་མ་སྦྱངས་ཀྱི་བར་དུ་རེ་ཞིག་ཕྱག་དང་བཟའ་བ་ལ་སོགས་པ་མི་བྱའོ། །འདིར་གཞུང་ནི། དགེ་སློང་གིས་སོ་ཤིང་མ་བོར་བར་བསོད་སྙོམས་བཟའ་བར་མི་བྱའོ། །ཟོས་ན་འགལ་ཚབས་ཅན་དུ་འགྱུར་རོ་ཞེས་བྱ་བ་གསུངས་པ་དང༌། ཕྱག་གི་གཞུང་ནི། ལྡང་བྱེད་འདི་ལ་ལྷན་ཅིག་གནས་པ་དང༌། ཉེ་གནས་ཀྱིས་ནང་པར་སྔར་ལངས་ཏེ་ཤམ་ཐབས་ཟླུམ་པོར་བགོས་ནས་སོ་ཤིང་བོར་ཏེ་མཚམས་ཀྱི་ནང་གི་མཆོད་རྟེན་ལ་ཕྱག་འཚལ་ནས་ཞེས་བྱ་བ་ལ་སོགས་པ་གསུངས་པ་ཡིན་ཏེ། དེའི་ཕྱིར་མདོ་འདི་སྨོས་སོ། །སོ་ཤིང་དབེན་པར་དོང་རོ་ཞེས་བྱ་བ་ནི་ཁ་སྦྱང་བའི་ཕྱིར་རོ། །ཇི་ལྟར་དོར་བར་བྱ་ཞེ་ན། དེའི་ཕྱིར་དབེན་པར་ཞེས་བྱ་བ་སྨྲས་ཏེ། ལྐོག་ཏུ་འོ་ཞེས་བྱ་བའི་ཐ་ཚིག་གོ །དབེན་པའི་སྐབས་ཀྱིས་བཤད་གཅི་བྱ་བ་ཡང་ངོ་ཞེས་བྱ་བ་སྨྲས་ཏེ། བཤད་བ་དང་གཅི་བ་ནི་བཤང་གཅི་སྟེ། དེ་གཉིས་ཀྱི་བྱ་བ་ཡང་ངོ༌། །དེ་ཡང་ཅི་ལྟར་བྱ་ཞེ་ན། དབེན་པར་བྱ་སྟེ། བྱ་བའི་བྱེ་བྲག་ཡིན་པའི་ཕྱིར་མ་ནིང་གི་རྟགས་སུ་བྱས་སོ། །དེ་གཉིས་ཀྱི་གནས་བསྟན་པའི་ཕྱིར་ལོངས་སྤྱད་དུ་རུང་བའི་ཤིང་ངམ་རྩིག་པའི་དྲུང་དུ་མི་དོར་རོ་ཞེས་བྱ་བ་སྨྲས་ཏེ། ལོངས་སྤྱད་པར་འོས་པ་ནི་ལོངས་སྤྱད་དུ་རུང་བ་སྟེ། དེའི་ཤིང་ངམ་རྩིག་པའི་དྲུང་དུ་ཉེ་བར་སོ་ཤིང་དོར་བ་དང་བཤད་གཅི་དོར་བར་མི་བྱའོ། །འདིར་གང་དུ་སྐྱེ་བོ་ཕལ་པོ་ཆེ་རྟག་ཏུ་གནས་པ་དེ་ནི་ལོངས་སྤྱོད་དུ་རུང་བ་ཞེས་བྱའོ། །སོ་ཤིང་གི་ཚད་ཤེས་པར་བྱ་བའི་ཕྱིར། དེའི་ཚད་ནི་སོར་བཅུ་གཉིས་མན་ཆད་སོར་བརྒྱད་ཡན་ཆད་དོ་ཞེས་བྱ་བ་སྨྲས་ཏེ། སོ་ཤིང་
དེའི་སྲིད་ཀྱི་ཚད་ནི་སོར་བཅུ་གཉིས་མན་ཆད་ཅེས་བྱ་བ་ལ། བཅུ་གཉིས་པོ་དག་གི་ཚོགས་ནི་བཅུ་གཉིས་སོ། །གང་གི་ཞེ་ན་སོར་དག་གི་སྟེ། དེ་བས་ན་སོར་དག་གི་བཅུ་གཉིས་ཀྱི་ཚོགས་མན་ཆད་དོ། །སོར་བརྒྱད་ཡན་ཆད་ཅེས་བྱ་བ་འདིར་ཡང་བརྒྱད་པོ་དག་གི་ཚོགས་ནི་བརྒྱད་དོ། །ཡན་ཆད་ཅེས་བྱ་བ་ནི། མཚམས་དེ་ཡན་ཆད་ཡིན་པར་ཤེས་པར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སོ་ཤིང་གི་སྲིད་ནི་སོར་བཅུ་གཉིས་མན་ཆད་སོར་བརྒྱད་ཡན་ཆད་དོ། །ཉེ་བར་སྦྱར་བ་དེའི་འགའ་ཞིག་དམིགས་ཀྱིས་བསལ་བ་བསྟན་པའི་ཕྱིར། བད་ཀན་མང་བའི་ནི་མེད་ན་སོར་བཞི་ལས་ལྷག་པ་ཡན་ཆད་དོ་ཞེས་བྱ་བ་ནི། གང་ཟག་བད་ཀན་མང་པའི་སོ་ཤིང་ནི་ཚད་སྔར་བསྟན་པ་ལྟ་བུ་ཉིད་མེད་ན་སོར་བཞི་པོ་དག་གི་ཚོགས་ནི་སོར་བཞི་སྟེ། དེ་ལས་ལྷག་པའི་ཚད་ཡན་ཆད་རུང་ངོ༌། །སོར་བཞི་ལས་ལྷག་པ་ཡན་ཆད་ཅེས་བྱ་བ་ནི། སོར་ཕྱེད་དང་ལྔ་ཡན་ཆད་ཡིན་པར་རིག་པར་བྱ་སྟེ། གང་ཟག་བད་ཀན་མང་བའི་སོ་ཤིང་གི་སྲིད་ཀྱི་ཚད་ནི་སོར་བཞི་ཡན་ཆད་རུང་བར་རིག་པར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་བད་ཀན་མང་པོ་ཞིག་ཡིན་ལ་དེ་ས་སོ་ཤིང་གི་ཚད་སྔར་བསྟན་པའི་མཐར་ཐུག་པ་ཉིད་མ་རྙེད་ན་སོར་ཕྱེད་དང་ལྔ་ཡན་ཆད་གང་རྙེད་པ་ཡང་དོར་བར་བྱའི་གཞན་གྱིས་ནི་མ་ཡིན་ནོ་ཞེས་བསྟན་ཏོ། །འདིར་གཞུང་ནི་བར་ནི་དབུས་ཏེ། འདི་ལྟར་བད་ཀན་མང་པོ་གང་ཡིན་པ་དེ་དག་གིས་སོ་ཤིང་སོར་བཞི་པ་མ་གཏོགས་པ་ཡང་དོར་བར་བྱའོ་ཞེས་གསུངས་པ་ཡིན་ནོ། །གནས་ཁང་དུ་སོ་ཤིང་དོར་བ་ལ་མི་རིགས་པར་དོགས་པ་བསལ་བའི་ཕྱིར། གནས་ཁང་དུ་ཆོལ་ཟངས་ཀྱི་ནང་དུ་སོ་ཤིང་དོར་བར་མི་རིགས་པ་མེད་དོ་ཞེས་བྱ་བ་སྨྲས་ཏེ། གནས་ཁང་དུ་ཆོལ་ཟངས་ཀྱི་ནང་དུ་སོ་ཤིང་དོར་བ་ནི་ཚུལ་དང་མི་མཐུན་པ་མེད་དོ། །སོ་ཤིང་དབེན་པར་དོར་རོ་ཞེས་སྨས་པ་ལ་ཝ་ཁ་ཡང་དབེན་པ་ཉིད་ཡིན་པར་བསྟན་པའི་ཕྱིར་རོ། །དེ་ལ་ཝ་ཁ་ཡང་མི་དཔེན་པར་མི་འགྱུར་རོ་ཞེས་བྱ་བ་སྨྲས་ཏེ། སོ་ཤིང་དོར་བ་དེ་ལ་ཝ་ཁར་བྱེད་ན་ཡང་མི་དབེན་པར་མི་འགྱུར་ཏེ། དབེན་པ་ཉིད་ཡིན་ནོ། །འདི་སྐད་བསྟན་ཏེ། ཝ་ཁར་སོ་ཤིང་དོར་བར་བྱེད་པ་ན། དབེན་པ་གང་ཡིན་པ་དེ་ཉིད་ཀྱང་དབེན་པ་ཉིད་ཡིན་པར་རིག་པར་བྱའོ་ཞེས་བྱ་བའི་
བ་ཚིག་གོ །ཝ་ཁའི་ཉེན་ཁོར་ཡང་དེ་ཉིད་ཀྱི་ཁོངས་སུ་གཏོགས་པ་ཡིན་པར་བསྟན་པའི་ཕྱིར། དེའི་ཁྲུ་གང་ཁོར་ཡུག་ཏུ་རྣམ་པ་དེ་ལྟ་བུར་བྱར་རུང་བ་ཉིད་དོ་ཞེས་བྱ་བ་སྨྲས་ཏེ། དེར་ཞེས་བྱ་བ་ནི་ཝ་ཁར་རོ། །ཝ་ཁ་དེར་ཁྲུ་གང་ཁོར་ཡུག་ཏུ་སོ་ཤིང་དོར་བ་དང་རྐང་པ་བཀྲུ་བ་ལ་སོགས་པ་རྣམ་པ་དེ་ལྟ་བུ་བྱར་རུང་སྟེ། དེ་ཉིད་ཀྱི་ཁོངས་སུ་གཏོགས་པ་ས་དེ་ན་ལོངས་སྤྱད་དུ་རུང་གི་ཁྲུ་གང་གི་ཁོར་ཡུག་ལས་ལྷག་པར་ནི་སོ་ཤིང་དོར་བ་ལ་སོགས་པ་མི་བྱའོ། །སོ་ཤིང་དོར་བ་དང་འབྲེལ་པས་དེའི་རྗེས་ལ་ལྕེ་བཞར་བར་བྱའོ་ཞེས་བྱ་བ་སྨྲས་ཏེ། དེའི་ཞེས་བྱ་བ་ནི་སོ་ཤིང་དོར་བའི་འོ། །རྗེས་ལ་ཞེས་བྱ་བ་ནི། དེ་མ་ཐག་ཏུ་སྟེ། ལྕེ་བཞར་བར་བྱའོ། །ཅི་ཞིག་གིས་བཞར་བར་བྱ་ཞེ་ན། དེའི་ཕྱིར་ལྕེ་བཞར་ཉེ་བར་གཞག་པར་བྱའོ་ཞེས་བྱ་བ་སྨྲས་ཏེ། ལྕེ་བཞར་བཅང་བར་བྱའོ་ཞེས་བྱ་བའི་ཐ་ཚིག་གོ །ཅི་ལས་བྱས་པ་ཞེ་ན། དེའི་ཕྱིར་ཁབ་ཀྱི་རྫས་དག་ལས་སོ་ཞེས་བྱ་བ་སྨྲས་ཏེ། རྫས་གང་དག་ལས་ཁབ་བྱེད་པར་གན་དང་ཟངས་དང་ཁར་བ་དང་ལྕགས་དག་ལས་བྱའོ་ཞེས་བྱ་བའི་ཐ་ཚིག་གོ །ལྕེ་བཞར་མེད་པ་དག་གི་ཕྱིར་དོར་འདི་ལ་སོ་ཤིང་གི་ཚལ་པ་རུང་ངོ་ཞེས་བྱ་བ་སྨྲས་ཏེ། དོན་འདི་ལ་ཞེས་བྱ་བ་ནི། ལྕེ་བཞར་བའི་དོན་ལའོ། །སོ་ཤིང་གི་ཚལ་པ་ཡང་རུང་ངོ་ཞེས་བྱ་བའི་ཐ་ཚིག་གོ །རུང་པ་ཉིད་དུ་བྱ་བའི་ཕྱིར། དེ་མི་རྣོ་བར་བྱ་བའི་ཕྱིར་གཅིག་གིས་གཅིག་བྲུད་པར་བྱའོ་ཞེས་བྱ་བ་སྨྲས་ཏེ། དེ་ཞེས་བྱ་བ་ནི་སོ་ཤིང་གི་ཚལ་པའོ། །མི་རྣོ་བར་བྱ་བའི་ཕྱིར་ཞེས་བྱ་བ་ནི། ཧ་ཅང་ཟུར་རྣོན་པོ་བཅག་པའི་ཕྱིར་ཏེ། དེའི་ཕྱིར་གཅིག་གིས་གཅིག་བྲུད་པར་བྱའོ། །སོ་ལ་སོགས་པའི་སྡུག་བསྔལ་ཉིད་སྤང་བའི་ཕྱིར། མི་རྣོ་བས་སོ་དང་ལྕེ་དང་རྣ་བ་བྲུད་བཞར་བྱའོ་ཞེས་བྱ་བ་སྨྲས་ཏེ། དངོས་པོ་རྣོན་པོས་སོ་ལ་སོགས་པ་མི་བྲུད་མི་བཞར་རོ། །མི་རྣོ་བས་ཀྱང་དལ་གྱིས་མ་ཡིན་པས་མི་བྱའོ་ཞེས་བྱ་བ་ནི། སོ་ལ་སོགས་པ་དལ་བུས་ཁད་ཀྱིས་བྲུད་པ་དང་བཞར་བར་བྱའོ་ཞེས་བྱ་བའི་ཐ་ཚིག་གོ །ཇི་ལྟར་དལ་བུས་ཤེ་ན་དེའི་ཕྱིར། དེ་དག་གིས་ཤ་ལ་མི་གནོད་པར་རོ་ཞེས་བྱ་བ་སྨྲས་ཏེ། སོའི་རྙིལ་ལ་སོགས་པ་མི་སྣང་པར་རོ། །སོ་ཤིང་དོར་བའི་ཞར་ལ་སོ་དང་ལྕེ་གཉིས་ཀྱི་བྲུད་བཞར་གྱི་ཕྱོགས་ཁའི་དྲི་མས་གོས་པ་མ་བཀྲུས་སམ་སས་མ་བསྐུས་པར་མི་དོར་རོ་ཞེས་བྱ་བ་འདི་སྨྲས་ཏེ། སོ་དང་ལྕེ་གཉིས་ཀྱི་བྲུད་བཞར་ནི་སོ་ཤིང་སྟེ། དེའི་ཕྱོགས་དབུས་ཀྱིས་
ལྕེ་བཞར་བ་དང་རྩེ་མོ་སོས་བཅས་པའི་ཕྱོགས་དེ་ཁའི་དྲི་མས་གོས་ཤིང་སྤགས་པའི་སོ་ཤིང་དེ་མ་བཀྲུས་པར་མི་དོར་རོ་ཞེས་བྱ་བར་སྦྱར་རོ། །སས་མ་བསྐུས་པར་ཞེས་བྱ་བ་ནི། ཆུ་མེད་ན་སས་བསྐུ་བར་བྱ་བ་སྟེ། སོ་ཤིང་ཞེས་བྱ་བའི་བྲུད་བཞར་གྱི་སོ་ཤིང་དེའི་ཕྱོགས་གང་གིས་སོ་དང་ལྕེ་བྲུད་ཅིང་བཞར་བའི་ཕྱོགས་དེ་སས་མ་བསྐུས་བར་མི་དོར་བའོ། །སྒྲ་མ་བྱས་བར་མི་དོར་རོ་ཞེས་བྱ་བ་ནི། སེ་གོལ་ལ་སོགས་པའི་སྒྲ་མ་བྱས་པར་སོ་ཤིང་དང་ཚལ་པ་དོར་བར་མི་བྱའོ། །དེ་ནི་དཔེ་ཡིན་ནོ་ཞེས་བྱ་བ་ལ། དེ་ནི་ཞེས་བྱ་བ་ནི། སོ་དང་ལྕེ་གཉིས་ཀྱི་བྲུད་བཞར་སྒྲ་མ་བྱས་པར་མི་དོར་བ་དེའོ། །གང་གི་དཔེ་ཞེ་ན། སྒྲ་མ་བྱས་པར་མི་དོ་རང་གཞན་གྱིའོ། །འདི་སྐད་བསྟན་ཏེ། དོར་བར་བྱ་བའི་བདག་ཉིད་ཀྱིས་དངོས་པོ་གཞན་གང་ཡིན་པ་ཡང་སྒྲ་མ་བྱས་པར་མི་དོར་རོ་ཞེས་བྱ་བའི་ཐ་ཚིག་གོ །དཔེས་གང་མཚོན་པ་དེ་སྟོན་ཏོ། །བཤད་བ་དང་གཅི་བ་དང༌། མཆིལ་མ་དང༌། སྣབས་དང༌། སྐྱུགས་པ་དང༌། རླུགས་པ་དང༌། གཞན་དག་ཀྱང་ངོ་ཞེས་བྱ་བ་སྨྲས་ཏེ། སྐྱུགས་པ་དང་རླུགས་པ་ཞེས་བྱ་བ་སྨོས་པ་ནི། མཆིལ་མ་དང་བཤད་བ་གཉིས་ལས་གཞན་ཡིན་ཏེ། མཆིལ་མ་མ་ཡིན་ལ་སྐྱུགས་པ་ཡིན་པ་ནི། འདི་ལྟ་སྟེ་དཔེར་ན་སྣའི་བཤལ་སྨན་ལྟ་བུའོ། །རླུགས་པ་ཡིན་ལ་བཤད་བ་མ་ཡིན་པ་ནི་འདི་ལྟ་སྟེ་དཔེར་ན། འཁྲུ་བ་ཅན་གྱིས་ཇི་ལྟར་ཟོས་པ་དེ་བཞིན་དུ་ཟུར་དུ་རླུགས་པ་ལྟ་བུའོ། །གཞན་དག་ཀྱང་ངོ་ཞེས་བྱ་བའི་ཚིག་ནི་བཤད་བ་ལ་སོགས་པ་ལས་གཞན་པ་དོར་བར་བྱ་བ་ཐམས་ཅད་བསྡུ་བའི་དོན་ཏོ། །སོ་ཤིང་དོར་བ་དང་འདྲ་བའི་དངོས་པོ་གཞན་ཡང་ཡོད་པར་བསྟན་པའི་ཕྱིར། དེ་ལས་བྱི་དོར་འབྱུང་བ་བཞིན་དུ་འདག་རྫས་དང་ལྕི་བས་ཀྱང་ངོ་ཞེས་བྱ་བ་སྨྲས་ཏེ། སོ་ཤིང་དོར་བ་དེ་ལས་སོ་ལ་སོགས་པའི་བྱི་དོར་འབྱུང་བ་བཞིན་དུ་འདག་རྫས་དང་ལྕི་བས་ཀྱང་བྱི་དོར་འབྱུང་བར་འགྱུར་རོ་ཞེས་བྱ་བར་སྦྱར་རོ། །འདིར་གཞུང་ནི་སོ་ཤིང་མ་རྙེད་ན། འདག་རྫས་དང་བ་ལང་གི་ལྕི་བ་ལས་ཀྱང་ཁ་སྦྱང་བར་བྱའོ་ཞེས་གསུངས་པ་ཡིན་ནོ། །ལུས་ཀྱི་ཀྱང་བསྒྲུབས་མ་ཐག་ཏུ་མཆོད་རྟེན་ལ་ཕྱག་བྱའོ་ཞེས་བྱ་བ་ནི། ལུས་ཀྱི་བྱ་བ་བསྒྲུབ་པ་སོ་ཤིང་བོར་བའི་འོག་ཏུ་མཆོད་རྟེན་ལ་ཕྱག་བྱ་བའོ། །གནས་པས་སྒྲུབ་པའི་དབང་དུ་བྱ་སྟེ་ཞེས་བྱ་བ་ལ། ཨ་ཐ་ཞེས་བྱ་བའི་སྒྲ་ནི་དབང་དུ་བྱ་བའི་དོན་ཡིན་གྱི་དེ་མ་ཐག་
གི་དོན་ནི་མ་ཡིན་ཏེ། མདོ་འོག་མ་ཁོན་ལས་དེ་མ་ཐག་ཏུ་ཞེས་བྱ་བའི་ཚིག་འབྱུང་བའི་ཕྱིར་རོ། །འདི་མན་ཆད་ནི་གནས་པས་སྒྲུབ་པའི་དབང་དུ་བྱས་ཏེ། གནས་པས་བྱ་བ་སྟོན་ཏོ་ཞེས་བྱ་བའི་ཐ་ཚིག་གོ །ད་ནི་གནས་པས་སྒྲུབ་པ་སྟོན་ཏེ། དེ་ནས་དེ་མ་ཐག་ཏུ་སྔར་སོང་སྟེ་ཕྱག་བྱའོ་ཞེས་བྱ་བ་ལ། དེ་ནས་ཞེས་བྱ་བ་ནི། ལུས་ཀྱི་བྱ་བ་བསྒྲུབས་ནས་མཆོད་རྟེན་ལ་ཕྱག་བྱས་ནས་སོ། །དེ་མ་ཐག་ཏུ་གནས་པས་གནས་ཀྱི་དྲུང་དུ་སྔར་སོང་སྟེ་ཕྱག་བྱའོ་ཞེས་བྱ་བའི་ཐ་ཚིག་གོ །བསྙུན་གསོལ་ལོ་ཞེས་བྱ་བ་ནི། གནས་པས་གནས་ལའོ། །འདག་རྫས་དང་སོ་ཤིང་དབུལ་ལོ་ཞེས་བྱ་བ་ནི། གནས་དེ་ལ་གནས་པ་དེས་འདག་རྫས་དང་སོ་ཤིང་དག་དབུལ་ཞིང་བསྟབས་པར་བྱའོ། །ཆུ་ལ་སོགས་པ་ནི་མ་བསྟན་ཡང་གྲུབ་པའི་ཕྱིར་མ་སྨོས་སོ། །ཚང་མང་བལྟ་སྟེ་བརྗོད་པར་བྱའོ་ཞེས་བྱ་བ་ནི། གནས་པས་གཡོས་ཀྱི་ཁང་པ་བལྟས་བརྟགས་ཏེ་གནས་ལ་བརྗོད་པར་བྱའོ། །འདི་སྐད་བསྟན་ཏེ། ཚང་མང་དེར་བཟའ་བ་དང་བཏུང་བ་གང་དག་སྟ་གོན་བྱ་བར་འདོད་ན་གནས་པས་གནས་ལ་བརྗོད་པར་བྱའོ་ཞེས་བྱ་བའི་ཐ་ཚིག་གོ །དགའ་བ་སྟོབས་པ་ཉིད་དུ་ཡིད་ལ་བྱའོ་ཞེས་བྱ་བ་ནི། ཚང་མང་བལྟས་ཏེ་བརྗོད་པ་ན་དངོས་པོ་གང་ལ་གནས་དགའ་ཞིང་འདོད་པ་སྟོན་པར་བྱེད་པ་དེ་ནི། དགའ་བ་སྟེ། དགའ་བ་དེ་བསྟབས་པ་ཉིད་དུ་ཡིད་ལ་བྱ་བ་ནི། བདག་གིས་དེ་ཟས་ཀྱི་དུས་སུ་བསྟབས་པར་བྱའོ་ཞེས་ཡིད་ལ་བྱ་བའོ། །འདི་སྐད་བསྟན་ཏེ། གནས་བཟའ་བ་དང་བཏུང་བའི་དངོས་པོ་འབའ་ཞིག་ལ་དགའ་བ་སྟོན་པར་བྱེད་ན་དེའི་ཚེ་གནས་པས་འདི་ལྟར་སེམས་བསྐྱེད་པར་བྱ་སྟེ། བཟའ་བ་དང་བཏུང་བ་ལ་སོགས་པ་དེ་དག་འདི་ལ་བསྟབས་པར་བྱའོ་སྙམ་དུ་ཡིད་ལ་བྱའོ་ཞེས་བྱ་བའི་ཐ་ཚིག་གོ །ལྷུང་བཟེད་བཀྲུ་བར་བྱའོ་ཞེས་བྱ་བ་ནི། གནས་ཀྱི་ལྷུང་བཟེད་གནས་པས་བཀྲུ་བར་བྱའོ། །གལ་ཏེ་བསོད་སྙོམས་པ་ཞིག་ན་གསིལ་བྱེད་ཀྱང་ངོ་ཞེས་བྱ་བ་ནི་།གལ་ཏེ་གནས་བསོད་སྙོམས་པ་ཞིག་ཡིན་ན་དེའི་ཚེ་གསིལ་བྱེད་ཀྱང་བྱི་དོར་བྱ་སྟེ། སྒྲ་སི་ལི་ལི་བྱེད་པས་གསིལ་བྱེད་དེ། ཁར་གསིལ་གྱི་མིང་ཅིག་ཤོས་ཡིན་ནོ། །གལ་ཏེ་དགོས་པ་ཡོད་ན་ཆུ་ཚགས་ཀྱང་ངོ་ཞེས་བྱ་བ་ནི། གལ་ཏེ་དེར་ཆུ་ཚངས་དགོས་པ་ཡོད་ན་དེའི་ཚེ་དེ་ཡང་བྱི་དོར་བྱ་བའོ། །དེའི་དགོས་པ་ནི་འདི་ཡིན་པར་ཤེས་པར་བྱ་སྟེ། གལ་ཏེ་གནས་སྐྱེད་མོས་ཚལ་ལ་སོགས་པར་ཟན་ཟ་བར་བྱེད་
ན་དེར་ཆུ་བཙག་པར་བྱ་བའོ། །གལ་ཏེ་དེ་ཡང་ཡིན་ན་ཞུ་བར་བྱའོ་ཞེས་བྱ་བ་ནི། གལ་ཏེ་གནས་པ་དེ་ཡང་བསོད་སྙོམས་པ་ཡིན་ན་དེའི་གནས་པས་གནས་ལ་ཞུ་བར་བྱ་སྟེ། ཅི་ལགས་ཐབས་ཅིག་ཏུ་བསོད་སྙོམས་ལ་འཇུག་པར་བགྱི་འམ་འོན་ཏེ་སོ་སོར་ཞེས་དེ་སྐད་ཞུ་བར་བྱའོ། །གལ་ཏེ་བཟོད་ཅིང་འདོད་ན་དེ་ཉིད་དང་ལྷན་ཅིག་ཏུ་འཇུག་པར་བྱའོ་ཞེས་བྱ་བ་ནི། གལ་ཏེ་བསོད་སྙོམས་ལ་འཇུག་པ་ལ་གནས་གནས་པ་དང་ལྷན་ཅིག་འཇུག་པར་བཟོད་ཅིང་འགྲོགས་པར་འདོད་ན་དེའི་ཚེ་གནས་དེ་ཉིད་དང་ལྷན་ཅིག་འཇུག་པར་བྱ་བའོ། །ལྷན་ཅིག་འཇུག་པ་ན་གནས་པས་གང་བསྒྲུབ་པར་བྱ་བ་དེ་སྟོན་ཏེ། ཉམ་ང་བ་ལ་སོགས་པར་མདུན་དུ་འགྲོ་བར་བྱའོ་ཞེས་བྱ་བ་ནི། གླང་པོ་ཆེ་ལ་སོགས་པ་དང་ཕྲད་པའམ། གཡང་ས་དང་འདམ་རྫབ་ལ་སོགས་པ་དང་ཉེ་བར་གྱུར་པ་ན་གནས་པ་མདུན་དུ་འགྲོ་བར་བྱ་བའོ། །བསོད་པ་དེ་ལ་བདར་བར་བྱའོ་ཞེས་བྱ་བ་ནི། གལ་ཏེ་གནས་པས་བསོད་སྙོམས་བསོད་པ་བཟང་པོ་ཞིག་རྙེད་ན། འདི་ལ་ཕུལ་ཅིག་ཅེས་གནས་དེ་ལ་བདར་བར་བྱའོ། །གལ་ཏེ་མ་འགྲོགས་ན་འོངས་ནས་བསྟན་པར་བྱའོ་ཞེས་བྱ་བ་ནི། གལ་ཏེ་གནས་དང་གནས་པ་གཉིས་མ་འགྲོགས་པར་བསོད་སྙོམས་ལ་ཞུགས་ན་དེའི་ཚེ་གནས་པས་བསོད་སྙོམས་ལས་ཕྱིར་འོངས་ནས་གནས་བསོད་སྙོམས་བསྟན་པར་བྱའོ། །ཆེས་མཆོག་ཏུ་གྱུར་པ་དབུལ་བར་བྱ་བའོ་ཞེས་བྱ་བ་ནི། གནས་པས་བཟའ་བ་དང་བཅའ་བ་ཆེས་མཆོག་ ཏུ་གྱུར་པ་བཟང ་པོ་གནས་ལ་འདི་བཞེས་ཤིག་ཅེས་དབུལ་ཞིང་བསྟབས་པར་བྱ་བའོ། །དེས་ཐམས་ཅད་ལ་ཚོད་རིག་པར་བྱའོ་ཞེས་བྱ་བ་ནི་།གནས་དེས་བསོད་པ་བསྟབས་པ་འབའ་ཞིག་ལ་མ་ཡིན་གྱི། ཐམས་ཅད་ལ་ཚོད་རིག་པར་བྱ་ཞིང༌། ཚོད་རིག་པར་བྱ་སྟེ། གང་གིས་གནས་པ་ལ་གནོད་པར་མི་འགྱུར་བ་དེ་ལྟར་བྱ་བའོ། །ཆུ་སྣོད་དགང་བར་བྱའོ་ཞེས་བྱ་བ་ལ། ཆུ་སྣོད་རིལ་བ་སྤྱི་བླུགས་ལ་སོགས་པ་སྟེ། དེ་དག་དགང་བ་ན་ཆུ་སྣོད་དགད་བར་བྱ་བའོ། །དུས་བརྗོད་པར་བྱའོ་ཞེས་བྱ་བ་ནི། གདུགས་ཚོང་བབ་བོ་ཞེས་ཟས་ཀྱི་དུས་བརྗོད་པར་བྱ་བའོ། །ཟན་ཟོས་ནས་ལྷུང་བཟེད་ལ་སོགས་པ་བཀྲུ་བར་བྱའོ་ཞེས་བྱ་བ་ནི། གནས་ཀྱིས་ཟན་ཟོས་ནས་གནས་པས་ལྷུང་བཟེད་ལ་སོགས་པ་བཀྲུ་བར་བྱ་བའོ། །སོགས་པའི་སྒྲས་ནི། ལྷུང་བཟོད་ཆུང་དུ་ལ་སོགས་པ་དག་
བསྡུའོ། །དེ་དག་གཞག་པར་བྱའོ་ཞེས་བྱ་བ་ནི། ལྷུང་བཟེད་ལ་སོགས་པ་བཀྲུས་པ་དེ་དག་རང་རང་གི་གནས་སུ་གཞག་པར་བྱ་བའོ། །མཆོད་རྟེན་ལ་ཕྱག་འཚལ་བ་ན་འདག་རྫས་དང་ཆུ་ལ་སོགས་པ་དབུལ་ལོ་ཞེས་བྱ་བ་ནི། གནས་མཆོད་རྟེན་གྱི་བྱི་དོར་བྱེད་པ་ན། གནས་པས་བདག་རྫས་དང་ཆུ་ལར་སོགས་པ་དབུལ་བར་བྱ་སྟེ། འདག་རྫས་དང་ཆུ་དང་ཕྱག་མ་ལ་སོགས་པ་དག་དབུལ་བར་བྱའོ་ཞེས་བྱ་བའི་ཐ་ཚིག་གོ །རྐང་པ་བཀྲུ་བར་གཏོགས་པ་ལ་ནན་ཏན་བྱའོ་ཞེས་བྱ་བ་ནི། གནས་ཀྱི་རྐང་པ་བཀྲུ་བ་དེར་གཏོགས་པ་བསྐུ་མཉེ་དང་དྲིལ་ཕྱིས་ལ་སོགས་པ་བྱ་བ་གང་ཡིན་པ་དེ་ལ་གནས་པས་ནན་ཏན་བྱ་བའོ། །མལ་དང་སྟན་བཤམ་པར་བྱའོ་ཞེས་བྱ་བ་ནི་།གནས་པས་གནས་ཀྱི་མལ་དང་སྟན་བཤམ་པར་བྱ་བའོ། །ཤམ་ཐབས་ཀྱི་གཟན་དབུལ་བར་བྱའོ་ཞེས་བྱ་བ་ནི། ཤམ་ཐབས་ཀྱི་གཟན་ནུབ་མོའི་གོས་དབུལ་ཞིང་བསྐོན་པར་བྱ་བའོ། །ཤམ་ཐབས་བླང་བར་བྱའོ་ཞེས་བྱ་བ་ནི། གནས་ཀྱི་ཤམ་ཐབས་ཤམ་ཐབས་ཀྱི་གཟན་གྱིས་བརྗེས་ནས་གས་པས་བླང་ཞིང་གཞག་པར་བྱ་བའོ། །རྐང་པའི་ཆུ་དང་རྟེན་དང་ཆོལ་ཟངས་དབུལ་བར་བྱའོ་ཞེས་བྱ་བ་ལ། རྐང་པའི་ཞེས་བྱ་བའི་སྒྲ་ནི། ཆུ་དང་རྟེན་གཉི་ག་དང་སོ་སོར་སྦྱར་བར་བྱ་སྟེ། རྐང་པའི་ཆུ་ལ་སོགས་པ་དབུལ་བར་བྱ་བ་ནི། རྐང་པ་བཀྲུ་བའི་ཆུ་དང་རྐང་རྟེན་དང་ཆོལ་ཟངས་དབུལ་བར་བྱའོ་ཞེས་བྱ་བའི་ཐ་ཚིག་གོ །མཆིལ་ལྷམ་གཉིས་ཕྱིའོ་ཞེས་བྱ་བ་ནི། གནས་ཀྱི་མཆིལ་ལྷམ་གཉིས་ཕྱི་བར་བྱ་བ་སྟེ། གནས་པས་ཕྱིར་གཞུག་གོ་ཞེས་བྱ་བའི་ཐ་ཚིག་གོ །སྒྲུབ་པར་བྱེད་པ་ཉིད་དུ་མ་བསྐོས་པ་ཕྱག་མ་ཐོགས་པ་མཐོང་ན་ལས་ཆུང་བར་བྱའོ་ཞེས་བྱ་བ་ལ། སྒྲུབ་པར་ཕྱེད་པ་ཉིད་དུ་མ་བསྐོས་པར་ཞེས་བྱ་བ་ལ། སྨོས་པ་ནི་བསྐོས་ན་རང་ཁོ་ནའི་ལས་ཡིན་པའི་ཕྱིར་མ་བསྐོས་པར་ཞེས་བྱ་བ་སྨོས་ཏེ། ཕྱག་དར་ལ་སོགས་པ་སྒྲུབ་པར་བྱེད་པ་ཉིད་དུ་མ་བསྐོས་པའི་གནས་སོ། །གང་གིས་ཕྱག་མ་ཐོགས་པར་གྱུར་པ་དེ་ནི་ཕྱག་མ་ཐོགས་པ་སྟེ། མ་བསྐོས་པར་ཕྱག་མ་ཐོགས་པའི་གནས་དེ་མཐོང་ན་ལས་ཆུང་བར་བྱ་སྟེ། བདག་གིས་བླང་བ་ལ་སོགས་པས་གནས་དེ་ལས་ཆུང་དུར་བྱའོ་ཞེས་བྱ་བའི་ཐ་ཚིག་གོ །གོས་འཚེམ་པ་ཉིད་དུ་མ་བསྐོས་པར་ཁ་པ་ཐོགས་པ་ཡང་ངོ་ཞེས་བྱ་བ་ལ། གོས་འཚེམ་པ་ཉིད་དུ་མ་བསྐོས་པར་ཞེས་བྱ་བ་ཡང་གལ་ཏེ་བསྐོས་ན་
རང་ཁོ་ནའི་ལས་ཡིན་པའི་ཕྱིར། མ་བསྐོས་པར་ཞེས་བྱ་བ་སྨོས་སོ། །གང་གིས་ཁབ་ཐོགས་པར་གྱུར་པ་དེ་ནི་ཁབ་ཐོགས་པ་སྟེ་གནས་སོ། །ཡང་ངོ་ཞེས་བྱ་བ་ནི། མཐོང་ན་ལས་ཆུང་ངུར་བྱའོ་ཞེས་བྱ་བར་སྦྱར་རོ། །འདི་སྐད་བསྟན་ཏེ། གལ་ཏེ་གནས་དེ་གོས་འཚེམ་པ་ཉིད་དུ་མ་བསྐོས་ན་དེའི་ཚེ་གནས་པས་གནས་ཁབ་ཐོགས་པ་མཐོང་ན། ལས་ཆུང་ངུར་བྱའོ་ཞེས་བྱ་བའི་ཐ་ཚིག་གོ །རུང་བར་བྱ་བ་དང་སྔོ་ཆུང་ངུར་བརྔ་བ་དང༌། མེ་ཏོག་དང་འབྲས་བུ་བཏོག་པ་དང༌། སོ་ཤིང་ཉེ་བར་བསྒྲུབ་པ་ལ་སོགས་པ་ཡང་དགེ་ཚུལ་བསྐོའོ་ཞེས་བྱ་བ་ལ། རུང་བར་བྱ་བ་ནི་ཤིང་ཏོག་ལ་སོགས་པའོ། །སྔོ་ཆུང་ངུར་བརྔ་བ་ནི་མཆོད་རྟེན་ལ་སོགས་པ་དག་ལའོ། །མེ་ཏོག་བཏོག་པ་དང༌། འབྲས་བུ་བཏོག་པ་དང༌། སོ་ཤིང་ཉེ་བར་བསྒྲུབ་པ་འབུལ་བ་དང༌། དེ་དག་ལ་སོགས་པ་གང་ཡིན་པ་དེ་ནི་དེ་དག་ལ་སོགས་པའོ། །རུང་བར་བྱ་བ་ལ་སོགས་པ་དེ་དག་གནས་ཀྱི་ཆེད་དུ་དགེ་ཚུལ་བསྐོ་ཞིང་བྱེད་དུ་གཞུག་པ་གནས་པས་ལྷག་པར་བྱ་བར་རིག་པར་བྱའོ། །དེའི་ཕྱིར་ཡང་ཞེས་བྱ་བའི་སྒྲས་གནས་པས་བྱ་བ་སྔར་བསྟན་པ་ཐམས་ཅད་དང་གནས་འབའ་ཞིག་ལ་བྱ་བར་ཡང་མ་ཟད་ཀྱི་དགེ་འདུན་ལ་ཡང་དེ་དག་ཐམས་ཅད་དགེ་ཚུལ་བསྐོ་ཞིང་བྱེད་དུ་གཞུག་པར་སྟོན་ཏོ། །སྒོ་གླེགས་ལ་བརྡབ་པས་ནང་ན་གནས་པ་ལ་གོ་བར་བྱའོ་ཞེས་བྱ་བ་ནི། ཕྱི་རོལ་ན་གནས་པའི་དགེ་སློང་ནང་དུ་འོང་བར་འདོད་པས་སྒོ་གླེགས་སྒོ་མོ་ལ་ལག་པ་ལ་སོགས་པས་བརྡབ་པས་དགེ་སློང་གནས་ཁང་གི་ནང་ན་འདུག་པ་ནང་ན་གནས་པ་ལ་གོ་བར་བྱ་བའོ། །ཆོ་ག་འདི་ནི་གནས་པ་འབའ་ཞིག་གི་ཡུལ་ལ་མ་ཡིན་གྱི་ཐམས་ཅད་ཀྱི་དབང་དུ་བྱ་བ་ཡིན་པར་རིག་པར་བྱའོ། །དེ་ནི་དལ་བུས་དང་ཡུན་མི་རིང་བར་བྱའོ་ཞེས་བྱ་བ་ལ། སྒོ་གླེགས་ལ་བརྡབ་པ་དེ་ནི་དལ་བུས་བྱ་སྟེ། དེ་ནི་སྒྲ་ཡིད་དུ་མི་འོང་བ་སྤང་བའི་ཕྱིར་རོ། །ཡུན་མི་རིང་བར་བྱ་བ་ནི། ཡུན་རིང་པོར་སྒོ་གླེགས་ལ་བརྡབ་པར་མི་བྱའོ་ཞེས་བྱ་བའི་ཐ་ཚིག་གོ །དེ་དྲག་ཏུ་མི་དབུལ་ལོ་ཞེས་བྱ་བ་ལ། དེ་ཞེས་བྱ་བ་ནི། སྒོ་གླེགས་སོ། །དྲག་ཏུ་མི་དབུལ་ལོ་ཞེས་བྱ་བ་ནི་དྲག་ཏུ་ཕུལ་ཏེ་མི་དབྱེའོ་ཞེས་བྱ་བའི་ཐ་ཚིག་གོ །དལ་བུས་ཤེས་བཞིན་དུ་འཇུག་པ་དང་འབྱུང་བ་དང༌། སྒོ་སྐྱེས་ལ་མི་དྲུད་པར་བྱའོ་ཞེས་བྱ་བ་ལ། དལ་བུས་ཞེས་བྱ་བ་ནི། ཧ་
ཅང་མི་མགྱོགས་པར་རོ། །ཤེས་བཞིན་དུ་ཞེས་བྱ་བ་ནི། སེམས་རྣམ་པར་མ་གཡེངས་པ་སྟེ། འདི་ལྟར་དྲན་པ་མངོན་དུ་གྱུར་པར་རོ། །འཇུག་པ་ཞེས་བྱ་བ་ནི་གནས་ཁང་ལ་སོགས་པར་རོ། །འབྱུང་བ་ཞེས་བྱ་བ་ནི། ཕྱི་རོལ་དུ་དེ་ཁོ་ན་བཞིན་ནོ། །སྒོ་སྐྱེས་ལ་མི་དྲུད་པར་བྱ་བ་ནི། ཅི་ནས་ཀྱང་དེ་གཉིས་ལ་མི་འཇར་བ་དེ་ལྟར་བྱ་བའོ། །དེ་ནི་ཆོས་གོས་མ་རུང་བར་འགྱུར་བ་དགག་པ་ལྷུར་བྱ་བའི་ཕྱིར་རོ། །དེ་ལ་བཀུར་སྟི་བྱའོ་ཞེས་བྱ་བ་ནི། གནས་དེ་ལ་བཀུར་སྟི་བྱ་བའོ། །སྒོ་གླེགས་ལ་བརྡབ་པ་ལ་སོགས་པའི་མདོས་གནས་པའི་དབང་དུ་བྱ་བ་རྒྱུན་ཆད་པས་དེའི་ཕྱིར་དེ་ལ་ཞེས་བྱ་བ་སྨོས་ཏེ། གནས་དེ་ལ་ཞེས་བསྙགས་པའི་ཕྱིར་རོ། །བཞར་བར་བྱའོ་ཞེས་བྱ་བ་ནི། གནས་པས་གནས་དེ་ལ་བཞར་བར་བྱ་སྟེ། ཐག་མི་རིང་བར་འདུག་པར་བྱའོ་ཞེས་བྱ་བའི་ཐ་ཚིག་གོ །དེ་དང་ཞེ་འགྲས་པ་ལ་མི་བཞར་རོ་ཞེས་བྱ་བ་ནི། གནས་དང་ལྷན་ཅིག་ཞེ་འགྲས་པའི་གང་ཟག་ལ་གནས་པས་མི་བཞར་བའོ། །དེ་ལ་ཁྲེལ་ཡོད་པར་བྱའོ་ཞེས་བྱ་བ་ལ། དེ་ལ་ཞེས་བྱ་བ་ནི་གནས་ལའོ། །འདི་སྐད་བསྟན་ཏེ། གནས་པས་གནས་ལ་ངོ་ཚ་ཤེས་པ་དང་བཅས་པས་གནས་པར་བྱའོ་ཞེས་བྱ་བའི་ཐ་ཚིག་གོ །དེའི་བྱ་བ་ལ་གྲིམས་པར་བྱ་བ་དང་ཞེས་བྱ་བ་ནི། གནས་དེའི་ལས་སུ་བྱ་བ་ལ་གནས་པས་གྲིམས་པར་བྱ་སྟེ། ལེ་ལོ་མི་བྱའོ་ཞེས་བྱ་བའི་ཐ་ཚིག་གོ །གུས་པར་བྱ་སྟེ་བྱ་བ་དང་ཞེས་བྱ་བ་ནི། གནས་ཀྱི་བྱ་བ་ཆོས་གོས་ལ་སོགས་པའི་ལས་ལ་གནས་པས་གུས་པར་བྱ་སྟེ་བྱ་བའོ། །མཛེས་པས་འཇུག་པར་བྱ་བའོ་ཞེས་བྱ་བ་ནི། གནས་ཀྱི་བྱ་བ་ལ་གནས་པས་འགྲོ་བ་དང་ལྡོག་པ་ལ་སོགས་པ་མཛེས་པའོ། །བཟེབས་འཇུག་པ་བྱ་བ་བརྩམ་པར་བྱ་བའོ། །ངོ་ཚ་དང་ལྡན་པ་དང་གུས་པ་དང་བཅས་པ་དང་ཞེས་བྱ་བ་ལ་གནས་པ་གང་ལ་ངོ་ཚ་ཤེས་པ་ཡོད་པ་དེ་ནི་ངོ་ཚ་དང་ལྡན་པ་སྟེ། གནས་ཀྱི་བྱ་བ་ལ་ངོ་ཚ་ཤེས་པ་དང་བཅས་པར་བྱ་བའོ། །གུས་པ་དང་བཅས་པ་ཞེས་བྱ་བ་ནི། དེའི་བྱ་བ་ལ་གུས་པ་དང་བཅས་པར་བྱ་བའོ། །འདི་ལྟར་ངོ་ཚ་དང་ལྡན་པའི་བྱེ་བྲག་ནི་གུས་པ་དང་བཅས་པ་ཡིན་མོད་ཀྱི་ཡུལ་ལ་འཇུག་པ་ཐ་དད་པས་སོ་སོར་བསྟན་ཏེ། ངོ་ཚ་དང་ལྡན་པ་ནི་བག་རྐྱོང་བ་ཞུམ་པར་བྱེད་པ་ཡིན་ལ། གུས་པ་དང་བཅས་པ་ནི་དེའི་དབང་གིས་དམ་པ་མ་ཡིན་པའི་ལས་ལ་མི་འཇུག་པའོ། །རྗེས་དང་བཅས་
པ་ཞེས་བྱ་བ་ནི། གང་གི་དབང་གིས་ན་བདག་ལ་དབང་བའི་བླ་མ་མཐོང་ན་དེ་དང་བཅས་པར་འཇུག་པ་སྟེ། དེ་ནི་རྗེས་དང་བཅས་པ་ཡིན་ནོ། །སེམས་དམའ་བ་དང་ཞེས་བྱ་བ་ནི། དེའི་བྱ་བ་ལ་ང་རྒྱལ་དང་རྒྱགས་པ་གཞོམ་པར་བྱ་བའོ། །ཤེས་བཞིན་གྱིས་རང་གི་དོན་མི་ཉམས་པར་བྱའོ་ཞེས་བྱ་བ་ནི། ཤེས་བཞིན་གྱིས་རང་གི་དོན་བསམ་གཏན་དང་ཀླག་པ་ལ་སོགས་པ་མི་ཉམས་མི་འཆོར་བར་བྱ་བའོ། །འདི་སྐད་བསྟན་ཏེ། གནས་པས་ཅི་ནས་ཀྱང་རང་གི་དོན་མི་ཉམས་པ་དེ་ལྟར་བྱ་བ་ཐམས་ཅད་ལ་ཤེས་བཞིན་གྱིས་འཇུག་པར་བྱའོ་ཞེས་བྱ་བའི་ཐ་ཚིག་གོ །དགེ་བ་གང་ཡིན་ཞེས་ཚོལ་བ་ཅན་དུ་བྱའོ་ཞེས་བྱ་བ་ལ། གང་ལ་དགེ་བ་གང་ཡིན་ཞེས་ཚོལ་བར་བྱེད་པའི་ངང་ཚུལ་ཡོད་པ་དེ་ནི་དགེ་བ་གང་ཡིན་ཞེས་ཚོལ་བ་ཅན་ཏེ། གནས་པས་གནས་དང་འབྲེལ་བའི་བྱ་བ་དང༌། གཞན་ཡང་གནས་བཅའ་བ་དང་ཞུ་བ་དང་འཁོར་སྦྱིན་པ་ལ་སོགས་པའི་ལས་ལ་ཅི་འདི་ལས་དགེ་བར་འགྱུར་རམ་འོན་ཏེ་འདི་ལས་མི་འགྱུར་ཞེས་དེ་ལྟར་དགེ་བ་ཚོལ་བ་ཅན་དུ་བྱའི། འཇིག་རྟེན་གྱི་སྤྱོད་པ་ལ་གདུ་བར་བྱ་པ་ནི་མ་ཡིན་ནོ། །ཉེས་བྱེད་ལ་འཇུག་ན་བཟློག་པར་བྱའོ་ཞེས་བྱ་བ་ལ། ཉེས་བྱེད་ཅེས་བྱ་བ་ནི། བསླབ་པ་གཡེལ་བ་ལ་སོགས་པའོ། །དེ་ལ་འཇུག་ན་ཞེས་བྱ་བ་ནི་གནས་དེ་བྱེད་ནའོ། །བཟློག་པར་བྱའོ་ཞེས་བྱ་བ་ནི། གནས་པས་སོ། །དགེ་བ་མི་འཕེལ་ན་དེ་བྱེད་པ་གཞན་ལ་གཏད་པར་གསོལ་བར་བྱའོ་ཞེས་བྱ་བ་ནི། གལ་ཏེ་གནས་དེ་ལ་གནས་པའི་དགེ་བ་བསམ་གཏན་དང་ཀླག་པ་ལ་སོགས་པ་འཕྲལ་གྱི་བྱ་བ་ལ་སོགས་པས་མི་འཕེལ་ཞིང་འཕེལ་བར་མི་འགྱུར་ན། དགེ་བ་འཕེལ་བར་བྱེད་པ་དེ་བྱེད་པའི་གནས་གཞན་ལ་གནས་པ་བདག་ཉིད་གཏད་པར་གནས་ལ་གསོལ་བ་བྱ་སྟེ། བདག་གནས་དེ་ལྟར་དེ་ལ་གཏད་པར་གསོལ་ཞེས་གསོལ་བ་བྱ་བའོ། །གསོལ་ནས་གནས་ཀྱིས་ཇི་ལྟར་བྱ་ཞེ་ན་དེ་ལྟར་དེའི་ཕྱིར། དེས་ཀྱང་དེ་དྲི་བ་ལ་སོགས་པས་གནས་ཀྱི་འོས་ངེས་པར་ཤེས་པར་བྱས་ནས་གཏད་པར་བྱའོ་ཞེས་བྱ་བ་སྤྲས་ཏེ། གནས་དེས་ཀྱང་གནས་པ་དེ་གནས་ཀྱི་འོས་དགེ་སློང་ལ་གཏད་པར་བྱའོ། །ཅི་མ་བརྟགས་པར་རམ་ཞེ་ན། དེའི་ཕྱིར། ངེས་པར་ཤེས་པར་བྱས་ནས་ཞེས་བྱ་བ་སྨྲས་ཏེ། དྲི་བ་ལ་སོགས་པས་གནས་ཀྱི་འོས་དེའི་ཚུལ་ཁྲིམས་དང་སྤྱོད་
པ་ལ་སོགས་པ་ངེས་པར་ཤེས་པར་བྱས་ནས་གནས་ཀྱི་འོས་སུ་རུང་ན་དེ་ལ་གཏད་པར་བྱའི་ཐམས་ཅད་ལ་ནི་གཏད་པར་མི་བྱའོ། །འདི་ནི་གནས་ཀྱིས་གནས་པ་ལ་བྱ་བ་གཞན་ཡིན་ཏེ། སྡིག་པའི་གྲོགས་པོ་ལས་བཟློག་པར་བྱའོ་ཞེས་བྱ་བ་ལ། སྡིག་པའི་གྲོགས་པོ་ལས་ཞེས་བྱ་བ་ནི། ཚུལ་ཁྲིམས་འཆལ་པ་ལ་སོགས་པ་ལས་སོ། །བཟློག་པར་བྱའོ་ཞེས་བྱ་བ་ནི། གནས་པ་བཟློག་པར་བྱ་བ་སྟེ། དགག་པར་བྱའོ་ཞེས་བྱ་བའི་ཐ་ཚིག་གོ །དགེ་བ་ལ་སྦྱར་བར་བྱའོ་ཞེས་བྱ་བ་ནི། གནས་ཀྱིས་གནས་པ་དེ་བསམ་གཏན་དང་ཀླག་པ་ལ་སོགས་པའི་དགེ་བ་ལ་སྦྱར་བར་བྱ་བའོ། །དེ་ཉེ་བར་བསྒྲུབ་པར་བྱའོ་ཞེས་བྱ་བ་ནི་གནས་ཀྱིས་གནས་པ་དེ་ལ་ཆོས་དང་ཟང་ཟིང་དག་གིས་དགེ་བ་དེ་ཉེ་བར་བསྒྲུབ་པར་བྱ་བའོ། །ལྟུང་བ་ལས་བསླང་བ་དང༌། རྗེས་སུ་མཐུན་པའི་འཚོ་བའི་ཡོ་བྱད་བསྒྲུབ་པ་ལ་བརྩོན་པར་བྱའོ་ཞེས་བྱ་བ་ནི། གནས་ཀྱིས་གནས་པ་དགེ་འདུན་ལྷག་མ་ལ་སོགས་པའི་ལྟུང་བ་ལས་བསླང་བའི་རྒྱུ་ལ་བརྩོན་པར་བྱ་བ་དང༌། རྗེས་སུ་མཐུན་པའི་རྐྱེན་དུ་འབབ་པ་ཁ་ན་མ་ཐོ་བ་མེད་པའི་འཚོ་བའི་ཡོ་བྱད་འཚོ་བའི་འཚོག་ཆས་ལྷུང་བཟེད་དང་ཆོས་གོས་ལ་སོགས་པ་དག་བསྒྲུབ་པ་འབྱོར་བར་བྱ་བ་ལ་བརྩོན་པར་བྱ་བ་དང༌། གནས་པས་ཀྱང་གནས་ལ་དེ་གཉིས་བསྒྲུབ་པ་ལ་བརྩོན་པར་བྱ་བའོ་ཞེས་བྱ་བའི་ཐ་ཚིག་གོ །གནས་དང་གནས་པའི་བྱ་བའི་ཞར་ལ་ནད་གཡོག་བརྟག་པའི་ཕྱིར། ལྷན་ཅིག་ངས་པ་དང་ཉེ་གནས་དང༌། མཁན་པོ་དང་སློབ་དཔོན་དང༌། མཁན་པོ་གཅིག་པ་དང༌། སློབ་དཔོན་གཅིག་པ་དང༌། གཏམ་འདྲེས་པ་དང༌། ཕེབས་པར་སྨྲ་བ་དང་སྨོས་འདྲིན་དང་འགྲོགས་བཤེས་ཀྱིས་ནད་གཡོག་བྱའོ་ཞེས་བྱ་བ་སྨྲས་ཏེ། མདོའི་དོན་ནི་ལྷན་ཅིག་གནས་པ་ལ་སོགས་པས་ནད་གཡོག་དག་བྱའོ་ཞེས་བྱ་བའི་ཐ་ཚིག་གོ །གཏམ་འདྲེས་པ་ཞེས་བྱ་བ་ནི། གཅུགས་པའི་གཏམ་ལ་སོགས་པ་དག་གིས་དགའ་བར་སྤྱོད་པས་དགའ་བ་ཉིད་ཉེ་བར་སྒྲུབ་པར་བྱེད་པའོ། །ཕེབས་པར་སྨྲ་བ་ཞེས་བྱ་བ་ནི། གང་དུ་ལྷན་ཅིག་ཏུ་བག་འབེབ་པར་གྱུར་ཅིང་ཀུན་དུ་སྨྲ་བར་བྱེད་པའོ། །སྨོས་འདྲིན་ཞེས་བྱ་བ་ནི། གང་དང་ལྷན་ཅིག་ཏུ་གནས་གཅིག་ན་འདུག་པ་དང༌། ལམ་གཅིག་ཏུ་འགྲོ་བ་ལ་སོགས་པས་འདྲིས་པར་བྱེད། ངོ་ཤེས་པར་བྱེད་པའོ། །འགྲོགས་བཤེས་ཞེས་བྱ་བ་ནི།
གང་གིས་གང་མཐོང་ངམ་ཐོས་མ་ཐག་ཁོ་ནར་རྗེས་སུ་མཐུན་པ་མེད་ཀྱང་དགའ་བ་ཡོད་པའོ། །ད་ནི་ལྷན་ཅིག་གནས་པ་ལ་སོགས་པ་དག་གི་ནད་གཡོག་བྱ་བའི་རིམ་པ་བསྟན་པའི་ཕྱིར། བྱེད་པ་དང་པོ་མེད་ན་འོག་མས་སོ་ཞེས་བྱ་བ་སྨྲས་ཏེ། ནད་གཡོག་བྱེད་པ་གང་ཡིན་པ་ནི། ནད་གཡོག་བྱེད་པའོ། །མདོ་གོང་མར་ལྷན་ཅིག་གནས་པ་དང་ཉེ་གནས་ལ་སོགས་པ་གང་དག་བསྟན་པ་དེ་དག་གི་དང་པོ་ནི། ལྷན་ཅིག་གནས་པ་གང་ཡིན་པ་སྟེ། ནད་གཡོག་བྱེད་པ་དང་པོ་ལྷན་ཅིག་གནས་པ་དེ་མེད་ན་ལྷན་ཅིག་གནས་པ་དེའི་འོག་མ་ཉེ་གནས་ལ་སོགས་པས་ནད་པ་དེའི་ནད་གཡོག་དང་བསྙེན་བཀུར་བྱ་བའོ། །འདི་སྐད་བསྟན་ཏེ། གལ་ཏེ་ནད་པ་དེ་ལ་ལྷན་ཅིག་གནས་པ་མེད་ན་དེའི་ཚེ་ཉེ་གནས་ཀྱིས་ནད་གཡོག་བྱའོ། །བྱེད་པ་དེ་ཡང་མེད་ན་མཁན་པོས་སོ། །བྱེད་པ་དེ་ཡང་མེད་ན་སློབ་དཔོན་གྱིས་སོ། །བྱེད་པ་དེ་ཡང་མེད་ན་མཁན་པོ་གཅིག་པས་སོ། །བྱེད་པ་དེ་ཡང་མེད་ན་སློབ་དཔོན་གཅིག་པས་སོ། །བྱེད་པ་དེ་ཡང་མེད་ན་གཏམ་འདྲེས་པས་ཏེ། དེ་ལ་སོགས་པ་རིམ་བཞིན་དུ་སྦྱར་བར་བྱའོ། །སློབ་དཔོན་ཐམས་ཅད་ལས་ཀློག་པའི་སློབ་དཔོན་རིང་བའི་ཕྱིར་རོ། །དེ་འདིར་མ་བཟུང་ངོ་སྙམ་དུ་དོགས་པའི་ཕྱིར་འདིར་ཀློག་པའི་སློབ་དཔོན་ཡང་བཟུང་བ་ཉིད་ཡིན་ནོ་ཞེས་བྱ་བ་སྨྲས་ཏེ། ནད་གཡོག་བྱ་བའི་སྐབས་འདིར་སློབ་དཔོན་སྨོས་པས་ཀློག་པའི་སློབ་དཔོན་ཡང་བཟུང་བ་ཉིད་ཡིན་པར་རིག་པར་བྱའོ། །དེས་ན་ནད་གཡོག་བྱེད་པ་མཁན་པོ་མེད་ན་གནས་སྦྱིན་པའི་སློབ་དཔོན་གྱིས་ནད་གཡོག་བྱའོ། །དེ་མེད་ན་ལས་བྱེད་པས་སོ། །དེ་མེད་ན་གསང་སྟེ་སྟོན་པས་སོ། །དེ་མེད་ན་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པས་སོ། །དེ་མེད་ན་ཐ་མར་ཀློག་པའི་སློབ་དཔོན་གྱིས་བྱའོ། །འོ་ན་གང་གི་ཚེ་ལྷན་ཅིག་གནས་པ་ལ་སོགས་པ་དག་ཅིག་ཅར་ན་བར་གྱུར་པ་དེའི་ཚེ་ནད་གཡོག་གིས་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། ཅིག་ཅར་མི་ནུས་ན་གནས་པ་གང་དང་འཇུག་པའི་འོ་ཞེས་བྱ་བ་སྨྲས་ཏེ། ལྷན་ཅིག་གི་དངོས་པོ་ནི་ཅིག་ཅར་ཏེ་ནད་པ་རྣམས་ཅིག་ཅར་ནད་ཀྱིས་བཏབ་ནའོ། །ནད་གཡོག་གིས་ཀྱང་ནད་གཡོག་བྱེད་པར་མི་ནུས་ན་ནད་གཡོག་གིས་གནས་པའི་ནད་གཡོག་བྱའོ། །འདིར་ཡང་གནས་པ་ཞེས་བྱ་བའི་སྒྲས་ནི་གནས་ཀྱི་ཚིག་ཡིན་པར་རིག་པར་བྱ་སྟེ། གནས་པར་བྱ་བའི་
ལས་ལ་གནས་པ་ཞེས་བྱ་བའི་ཚིག་ཏུ་བྱས་པའི་ཕྱིར་རོ། །གལ་ཏེ་གནས་མང་པོ་དག་ཅིག་ཅར་ན་བར་གྱུར་ན། གནས་གང་གིས་ནད་གཡོག་བྱ་ཞེ་ན། དེའི་ཕྱིར། གང་དང་འཇུག་པའི་འོ་ཞེས་བྱ་བ་སྨྲས་ཏེ། གང་ལ་ཞུ་ཞིང་བྱ་བ་བྱེད་པའི་གནས་དེའི་ནད་གཡོག་བྱའོ། །འདི་སྐད་བསྟན་ཏེ། ནད་གཡོག་བྱ་དགོས་པ་མང་པོ་ཅིག་ཅར་ན་བར་གྱུར་ལ་ནད་གཡོག་དེས་ཀྱང་ནད་གཡོག་བྱ་དགོས་པ་ཐམས་ཅད་ཀྱི་ནད་གཡོག་བྱེད་མི་ནུས་ན་དེའི་ཚེ་གནས་ཀྱི་ནད་གཡོག་བྱའོ། །གལ་ཏེ་གནས་ཀྱང་མང་ཞིག་ཡོད་ན་དེའི་ཚེ་གང་ལ་ཞུ་ཞིང་བྱ་བ་བྱེད་པ་དེ་ཁོ་ནའི་ནད་གཡོག་བྱའོ། །གལ་ཏེ་དེའི་སྐབས་སུ་ནད་གཡོག་བྱ་དགོས་པ་གཞན་ཞིག་བཅལ་ཐག་པར་གྱུར་ལ་གནས་དེའི་སྲོག་གི་བར་ཆད་དུ་འགྱུར་པའི་འཇིགས་པ་མེད་ན་དེའི་ཚེ། བཅལ་ཐག་པར་གྱུར་པ་དེའི་ནད་གཡོག་བྱའོ། །མདོ་ཞེས་བྱ་བ་ནི་དོན་མདོར་སྨོས་པས་མདོ་ཡིན་པའི་ཕྱིར་དེས་ན་འདི་ཡང་སྨོས་པ་ཉིད་ཡིན་པར་རིག་པར་བྱ་སྟེ། གལ་ཏེ་ལས་བྱེད་པ་དང་གསང་སྟེ་སྟོན་པ་དང་དགེ་ཚུལ་ཉིད་དུ་ཉེ་བར་སྒྲུབ་པར་བྱེད་པ་དང་ཀློག་པ་དང་ལྷན་ཅིག་གནས་པ་དང༌། ཉེ་གནས་དང༌། མཁན་པོ་གཅིག་པ་དང༌། སློབ་དཔོན་གཅིག་པ་དང༌། གཏམ་འདྲེས་པ་དང༌། ཕེབས་པར་སྨྲ་བ་དང༌། སྨོས་འདྲིན་དང༌། འགྲོགས་བཤེས་དག་ཅིག་ཅར་ན་བར་གྱུར་ལ། ཐམས་ཅད་ཀྱི་ནད་གཡོག་བྱེད་མི་ནུས་ན་ཡང་དེའི་ཚེ་རིམ་པ་བསྟན་པ་སྔར་སྨྲས་པ་བཞིན་དུ་ནད་གཡོག་བྱ་སྟེ། ཟེ་དང་པོར་སློབ་དཔོན་གྱི་ནད་གཡོག་བྱའོ། །དེ་མེད་ན་ལྷན་ཅིག་གནས་པའིའོ། །དེ་མེད་ན་ཉེ་གནས་ཀྱིའོ། །དེ་མེད་ན་མཁན་པོ་གཅིག་པ་ལ་སོགས་པ་རིམ་བཞིན་དུ་འགྲོགས་བཤེས་ཀྱི་མཐར་ཐུག་པའི་བར་དག་གི་ནད་གཡོག་བྱ་བར་རིག་པར་བྱའོ། །གཞན་ལ་ཡང་ནད་གཡོག་གི་ཆོག་འདྲ་བར་བསྟན་པའི་ཕྱིར། འདིར་དེའི་རྟགས་བརྩམས་པ་ཡང་རབ་ཏུ་བྱུང་བ་དང་འདྲའོ་ཞེས་བྱ་བ་སྨྲས་ཏེ། འདིར་ཞེས་བྱ་བ་ནི། ནད་གཡོག་བྱ་བ་ལའོ། །གང་གིས་རབ་ཏུ་བྱུང་བའི་རྟགས་བརྩམས་པ་དེ་ནི་དེའི་རྟགས་བརྩམས་པ་སྟེ། གལ་ཏེ་རབ་ཏུ་འབྱུང་བའི་ཕྱིར། སྐྲ་བྲེག་པ་ལ་སོགས་པའི་རྟགས་ཙམ་གྱིས་བདག་ཉིད་བཅོས་པར་གྱུར་པ་དེ་ནི། རབ་ཏུ་བྱུང་བ་དང་འདྲ་བར་བ་ལྟ་བར་བྱ་སྟེ། ཇི་ལྟར་རབ་ཏུ་བྱུང་བའི་ནད་གཡོག་བསྟན་པ་བཞིན་དུ་དེའི་རྟགས་བརྩམས་པའི་ནད་གཡོག་ཀྱང་
དེ་ཁོ་ན་བཞིན་དུ་བྱའོ། །ཚངས་པ་མཚུངས་པར་སྤྱོད་པ་ན་ན་ཡལ་བར་མི་དོར་རོ་ཞེས་བྱ་བ་ནི། ཚངས་པ་མཚུངས་པར་སྤྱོད་པ་གང་ལ་ལ་ཞིག་ན་བར་གྱུར་ན་དེ་དགེ་འདུན་དུ་དགེ་སློང་དག་གིས་ཡལ་བར་མི་དོར་བ་སྟེ། ཚངས་པ་མཚུངས་པར་སྤྱོད་པ་ཞེས་སྨོས་པ་ནི་ངེས་པ་ཁོ་ནར་བྱ་བ་བསྟན་པའི་ཕྱིར་རོ། །ཇི་ལྟར་ཡལ་བར་མི་དོར་བ་དེ་བསྟན་པའི་ཕྱིར། དེ་ལ་ནད་གཡོག་མེད་ན་མཐར་ཐུག་པ་མན་ཆད་ལས་བསྐོ་བར་བྱའོ་ཞེས་བྱ་བ་ནི། ནད་པ་དེ་ལ་ནད་གཡོག་མེད་ན་དེ་དགེ་འདུན་དུ་གྱུར་པའི་དགེ་སློང་དག་གིས་ནད་གཡོག་བསྐོའོ། །གང་མན་ཆད་ལས་བསྐོ་བར་བྱ་ཞེ་ན། དེའི་ཕྱིར་མཐར་ཐུག་པ་མན་ཆད་ལས་ཞེས་བྱ་བ་སྨྲས་ཏེ། མཐར་ཐུག་པ་མན་ཆད་ལས་ཞེས་བྱ་བ་ནི། གལ་ཏེ་ནད་གཡོག་གཅིག་གིས་ནད་པའི་བྱ་བ་ཐམས་ཅད་སྒྲུབ་པར་མི་ནུས་ན་དེའི་ཚེ་གཉིས་པ་བསྐོའོ། །གལ་ཏེ་དེ་གཉིས་ཀྱིས་ཀྱང་བྱར་མི་ནུས་ན། དེའི་ཚེ་གསུམ་པ་ལ་སོགས་པ་ནས་དགེ་འདུན་གྱི་མཐར་ཐུག་པ་མན་ཆད་ལས་བསྐོ་བར་བྱའོ། །འདིར་གཞུང་ནི། ཐམས་ཅད་མེད་ན་དགེ་འདུན་གྱིས་ནང་པའི་གནས་སྐབས་ཡོངས་སུ་ཤེས་པར་བྱ་སྟེ། ནད་གཡོག་གཅིག་གམ་གཉིས་སམ་རབ་ཏུ་མང་པོ་བསྐོ་བར་བྱ་ཞིང༌། ཆེར་ན་དགེ་འདུན་ཐམས་ཅད་ཀྱིས་ནད་གཡོག་བྱའོ་ཞེས་གསུངས་པ་ཡིན་ནོ། །སྨན་བརྟག་པར་བྱ་བའི་ཕྱིར། དགེ་འདུན་ལས་བྱུང་བའི་སྨན་ནི་ནང་པ་འབའ་ཞིག་གིས་སྤྱད་དུ་རུང་ངོ་ཞེས་བྱ་བ་སྨྲས་ཏེ། སྨན་ནི་སྤྱད་དུ་རུང་ངོ༌། །གང་ལས་བྱུང་བ་ཞེ་ན། དགེ་འདུན་ལས་བྱུང་བའོ། །སུས་ཤེ་ན་ནད་པ་འབའ་ཞིག་གིས་ཏེ། ནད་གཡོག་ལ་སོགས་པས་སྤྱོད་དུ་མི་རུང་ངོ། །འདིར་གཞུང་ནི་ཁྱིམ་བདག་སྒྲེ་བོའི་རྫས་ལས་སྨན་གང་ཡིན་པ་དེ་དགེ་འདུན་གྱི་སྨན་ཁང་དུ་གཞག་པར་བྱ་ཞིང༌། དགེ་སློང་ནད་པ་དག་གིས་ལོངས་སྤྱད་པར་བྱའོ་ཞེས་གསུངས་པ་ཡིན་ཏེ། དེ་སྐད་གསུངས་པ་དེ་མདོ་འདིས་བསྡུས་པ་ཡིན་ནོ། །མེད་པ་ཉིད་ཡིན་ན་དེ་ནད་གཡོག་གིས་ཚོལ་དུ་གཞུག་གོ་ཞེས་བྱ་བ་ནི། དགེ་འདུན་གྱི་སྨན་དང་ནད་པ་རང་གི་སྨན་མེད་པ་ཉིད་ཡིན་ན་དེའི་ཚེ་སྨན་དེ་ནད་གཡོག་གིས་ཡོན་བདག་གཞན་ཚོལ་དུ་གཞུག་གོ་ཞེས་བྱ་བའི་ཐ་ཚིག་གོ །མ་འབྱོར་ན་དགེ་འདུན་གྱིས་སྦྱིན་པར་བྱའོ་ཞེས་བྱ་བ་ནི། གལ་ཏེ་ནད་གཡོག་གིས་ཡོན་བདག་གཞན་འཚོལ་དུ་བཅུག་ཀྱང་སྨན་དེ་མ་འབྱོར་ན་དེའི་ཚེ་
དགེ་འདུན་གྱི་དཀོར་ལས་ཟོང་སྦྱིན་པར་བྱའོ། །འདིར་སྨན་སྨོས་པ་ནི་མཚོན་པ་སྟེ། དངོས་པོ་གང་གིས་ནད་པའི་ནད་ཞི་བར་འགྱུར་བས་བྲེལ་བར་གྱུར་པའི་དངོས་པོ་རང་ལ་ཡང་མི་བདོག་ཚོལ་དུ་བཅུག་ན་ཡང་མ་རྙེད་ལ། དགེ་འདུན་གྱི་ལ་ནི་ཡོད་ན་དགེ་འདུན་དུ་གྱུར་པའི་དགེ་སློང་དག་གིས་དེ་ཐམས་ཅད་སྦྱིན་པར་བྱའོ། །མེད་ན་སངས་རྒྱས་ཀྱི་ལས་སྐུ་ལ་གསོལ་བ་མན་ཆད་ཀྱང་ངོ་ཞེས་བྱ་བ་ནི། དགེ་འདུན་གྱི་མེད་ན་སངས་རྒྱས་ཀྱི་ལས་སྦྱིན་པར་བྱའོ། །སྐུ་ལ་གསོལ་བ་མན་ཆད་ཀྱང་ངོ་ཞེས་བྱ་བ་ནི། སྐུ་གཟུགས་དང་མཆོད་རྟེན་ལ་རྒྱན་ལ་སོགས་པ་བཏགས་པ་གང་ཡིན་པ་དེ་དག་གི་བར་ཡང་སྦྱིན་པར་བྱ་ན། སངས་རྒྱས་ཀྱི་འམ་དགེ་འདུན་གྱི་དཀོར་གཞན་ལྟ་ལས་སྨོས་ཀྱང་ཅི་དགོས་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་ནད་པའི་ནད་ལ་ཕན་པ་རང་གི་རྫས་ལ་མེད་ན་དེའི་ཚེ་དགེ་འདུན་གྱི་ལས་ཐམས་ཅད་སྦྱིན་པར་བྱའོ། །དེ་ཡང་མེད་ན་སངས་རྒྱས་ཀྱི་ལས་ཐམས་ཅད་སྦྱིན་པར་བྱ་སྟེ། འདི་ལ་འགྱོད་པར་མི་བྱའོ་ཞེས་བསྟན་ཏོ། །དེའི་ཕྱིར་དགེ་འདུན་གྱི་ལས་བཏུང་བ་དང་གདུགས་གདགས་པ་ལ་སོགས་པའི་མཆོད་པ་བྱའོ་ཞེས་བྱ་བ་ནི། ནད་པ་དེའི་ཕྱིར་གལ་ཏེ་རང་དང་དེའི་འཁོར་གྱིས་ཀྱང་བྱེད་མི་ནུས་ན་དགེ་འདུན་དུ་གྱུར་པའི་དགེ་སློང་དག་གིས་དགེ་འདུན་གྱི་དཀོར་ལས་དཀོན་མཆོག་གསུམ་ལ་བཏུང་བ་དང་གདུགས་གདགས་པ་ལ་སོགས་པའི་མཆོད་པ་བྱ་བའོ། །དེའི་ཕྱིར་མ་འབྱོར་ན་ཞེས་སྨོས་པ་དང་སྦྱར་ཏེ། རང་གི་རྫས་མེད་ན་དགེ་འདུན་གྱི་དཀོར་ལས་མཆོད་སྙོན་ལ་སོགས་པ་བྱ་བའོ། །མེད་ན་སངས་རྒྱས་ཀྱི་ལས་སོ་ཞེས་བྱ་བ་ནི། དགེ་འདུན་གྱི་དཀོར་མེད་ན་སངས་རྒྱས་ཀྱི་དཀོར་ལས་ཐམས་ཅད་བྱ་བའོ། །དེ་གཉིས་ཀྱིས་བླངས་པ་དེས་མ་ཤི་ལ་འབྱོར་པ་ཡོད་ན་བསབ་པ་ཉིད་དུ་བྱའོ་ཞེས་བྱ་བ་ནི། དགེ་འདུན་དང་སངས་རྒྱས་དེ་གཉིས་ཀྱི་དཀོར་བླངས་པ་བསབ་པ་ཉིད་དུ་བྱའོ། །སུས་ཤེ་ན་དེའི་ཕྱིར་དེས་ཞེས་བྱ་བ་སྨྲས་ཏེ། སྔོན་ན་བར་གྱུར་པ་དེས་སོ། །གང་གི་ཚེ་ཞེ་ན། དེའི་ཕྱིར་མ་ཤི་ལ་ཞེས་བྱ་བ་སྨྲས་ཏེ། གལ་ཏེ་མ་ཤི་ན་དེའི་ཚེ་ནའོ། །ཅི་ཞིག་གིས་བསབ་ཅེ་ན། དེའི་ཕྱིར་འབྱོར་པ་ཡོད་ན་ཞེས་བྱ་བ་སྨྲས་ཏེ། འབྱོར་པ་མེད་ན་མ་བསབས་ཀྱང་ཉེས་པ་མེད་དེ། བསམ་པ་དག་པའི་ཕྱིར་དང་ཞིང་ཆེན་པོའི་གནས་སྐབས་སུ་སྤྱད་པའི་ཕྱིར་རོ། །ནད་གཡོག་
གི་ཚུལ་ཁྲིམས་བསྟན་པའི་ཕྱིར། ནད་གཡོག་གིས་དེ་ལ་བསྙེན་བཀུར་མི་བྱ་བར་མི་བྱའོ་ཞེས་བྱ་བ་སྨྲས་ཏེ། ནད་གཡོག་གིས་ནད་པ་དེ་ལ་བསྙེན་བཀུར་མི་བྱ་བར་མི་བྱའི་བསྙེན་བཀུར་བྱ་བ་སྟེ། ནད་གཡོག་ལེགས་པར་བྱའོ་ཞེས་བྱ་བའི་ཐ་ཚིག་གོ །དེའི་ཚིག་དོན་དང་ལྡན་པ་དང་ཆོས་དང་ལྡན་པ་བཅག་པར་མི་བྱའོ་ཞེས་བྱ་བ་ནི། ནད་པ་དེའི་ཚིག་གི་དོན་དང་ལྡན་པ་ཞེས་བྱ་བ་འཆོ་བ་ལ་ཕན་པ་དང་འབྲེལ་པ་དང༌། ཆོས་དང་ལྡན་པ་ཞེས་བྱ་བ་ལ་བསོད་ནམས་ལ་ཕན་པ་དང་འབྲེལ་པ་བཅག་པར་མི་བྱ་སྟེ། ནད་གཡོག་གིས་འདའ་བར་མི་བྱའོ། །ལྷག་པར་ཆགས་པའི་དངོས་པོ་འགུགས་ན་དགག་པར་མི་བྱའོ་ཞེས་བྱ་བ་ལ། ལྷག་པར་ཆགས་པའི་དངོས་པོ་ཞེས་བྱ་བ་ནི། ཞེན་པའི་དངོས་པོ་ལྷུང་བཟེད་ལ་སོགས་པ་དག་གོ །འགུགས་ནས་ཞེས་བྱ་བ་ནི། ནད་གཡོག་ལ་ཁོ་བོའི་དངོས་པོ་དེ་ཁྱེར་ཏེ་ཤོག་ཤིག་ཅེས་ལེན་དུ་འཆོལ་ནའོ། །དགག་པར་མི་བྱའོ་ཞེས་བྱ་བ་ནི། བླངས་ཏེ་བསྟན་པར་བྱ་བའོ། །འདི་སྐད་བསྟན་ཏེ། གལ་ཏེ་ནད་པས་ནད་གཡོག་ལ་ལྷུང་བཟེད་ལ་སོགས་པའི་དངོས་པོ་དེ་འོན་ཅིག་ཅེས་འགུགས་ཤིང་ལེན་དུ་འཆོལ་ན། དེའི་ཚེ་ནད་གཡོག་གིས་མི་དགག་པར་སྦྱིན་པར་བྱའོ་ཞེས་བྱ་བའི་ཐ་ཚིག་གོ །མི་གདམ་པར་མི་བྱའོ་ཞེས་བྱ་བ་ནི། ནད་གཡོག་གིས་ནད་པ་དེ་ལ་གདམས་ངག་མི་སྦྱིན་པར་མི་བྱ་བའོ། །དེ་ནད་པས་བཟླ་བར་ཤིན་ཏུ་མི་བྱའོ་ཞེས་བྱ་བ་ནི། ནད་གཡོག་གིས་གདམས་ངག་བྱིན་པ་དེ་ནད་པས་བཟླ་བར་ཤིན་ཏུ་མི་བྱ་བ་སྟེ། འདའ་བར་མི་བྱའོ་ཞེས་བྱ་བའི་ཐ་ཚིག་གོ །དེས་དེ་འཆིར་དོགས་ན་དགེ་འདུན་གྱི་མལ་སྟན་ལས་བསླངས་ཏེ། གང་ཟག་གི་ལ་གཞག་པར་བྱའོ་ཞེས་བྱ་བ་ནི། ནད་གཡོག་དེས་ནད་པ་དེ་འཆིར་དོགས་ན་དགེ་འདུན་གྱི་མལ་སྟན་ལས་བསླངས་ཏེ། གང་ཟག་གི་མལ་སྟན་ལ་གཞག་པར་བྱ་བའོ། །ཇི་ལྟར་ཞེ་ན་དེའི་ཕྱིར། བསྐུ་མཉེ་དང་ཁྲུས་སྔར་བྱ་བ་ཉིད་ཀྱི་སྒྱུ་ཐབས་ཀྱིས་སོ་ཞེས་བྱ་བ་ལ། གཞག་པ་གང་ལ་བསྐུ་མཉེ་དང་ཁྲུས་སྔར་བྱ་བ་ཡོད་པ་དེ་ནི། བསྐུ་མཉེ་དང་ཁྲུས་སྔར་བྱ་བའོ། །དེའི་དངོས་པོ་ནི་བསྐུ་མཉེ་དང་ཁྲུས་སྔར་བྱ་བ་ཉིད་དེ། བསྐུ་མཉེ་དང་ཁྲུས་སྔར་བྱ་བ་དང་ལྡན་པའི་གཞག་པ་ཉིད་ཀྱི་སྒྱུ་ཐབས་དེས་གཞག་པར་བྱ་བའོ། །བསྐུ་མཉེ་དང་ཁྲུས་སྨོས་པ་ནི་མཚོན་པ་སྟེ། སྒྱུ་ཐབས་གཞན་དག་
གིས་ཀྱང་གཞག་པར་བྱའོ། །འདིར་འཆིར་དོགས་པའི་གནས་སྐབས་ཇི་ལྟར་ཡོངས་སུ་བརྟག་པར་བྱ་ཞེ་ན། དེའི་ཕྱིར་དེའི་གནས་སྐབས་ཀྱི་ཡོངས་སུ་བརྟགས་པ་ལ་འབད་པ་དང་ལྡན་པར་བྱའོ་ཞེས་བྱ་བ་སྨྲས་ཏེ། འཆི་བ་དེའི་གནས་སྐབས་ཀྱི་ཡོངས་སུ་བརྟག་པ་ལ་འབད་པ་དང་ལྡན་པར་བྱ་སྟེ། གང་གི་ལུས་ཀྱི་གནས་སྐབས་ལ་འཆི་ལྟས་ལ་སོགས་པ་འཆི་བར་དོགས་པ་ཡོད་པ་ཡོངས་སུ་བརྟག་པ་ལ་འབད་པ་དང་ལྡན་པར་བྱའོ། །འདིར་འབད་པ་ནི་ཡང་དང་ཡང་དུ་ནད་པ་ལ་བརྟག་པར་བྱ་བའོ། །དེས་སྨེ་བར་བྱས་པ་ཤི་བའི་གོས་དེ་དག་བཀྲུ་བ་ན་དེས་བྱ་བ་ཉིད་ཡིན་ནོ་ཞེས་བྱ་བ་ནི། ནད་པ་དེས་སྨེ་བར་བྱས་ནས་ཤི་བའི་གོས་དེ་དག་བཀྲུ་བ་ནི་ནད་གཡོག་དེས་བྱ་བ་ཉིད་ཡིན་ནོ་ཞེས་བྱ་བར་སྦྱར་རོ། །གང་དག་གི་བཀྲུ་ཞེ་ན། དེའི་ཕྱིར། དེས་སྨེ་བར་བྱས་པ་ཞེས་བྱ་བ་སྨྲས་ཏེ། ནད་པ་དེས་གོས་གང་དག་སྨེ་བར་བྱས་པ་དེ་དག་ནི་དེས་སྨེ་བར་བྱས་པ་སྟེ། དེ་དག་གིའོ། །ཤི་བའི་གོས་དེ་དག་ཅེས་བྱ་བ་ནི། ནད་གཡོག་དེས་ནད་པ་གང་གི་གཡོག་བྱས་པའི་ནད་པ་ཤི་བ་དེའི་གོས་དེ་དག་ནི་ཤི་བའི་གོས་དེ་དག་ཆེས་བྱའོ། །དེ་དག་གི་བཀུ་བ་ནི་ནད་གཡོག་དེས་བྱ་བ་ཉིད་ཡིན་ནོ་ཞེས་བྱ་བ་ལ། ནད་གཡོག་དེས་བྱ་བ་ནི་དེས་བྱ་བའོ། །དེའི་དངོས་པོ་ནི་དེས་བྱ་བ་ཉིད་དེ་བཀྲུ་བ་ཞེས་བྱ་བར་སྦྱར་རོ། །གནས་དང་གནས་པའི་དབང་དུ་བྱ་བའི་ཕྱིར་དགེ་འདུན་གྱི་གནས་བརྟན་ཡང་དགེ་འདུན་ཐམས་ཅད་ཀྱི་གནས་ལྟ་བུ་ཡིན་པས། དེའི་ཕྱིར་འདིར་དེ་བཀར་ཏེ་བརྗོད་པར་བྱའོ། །དགེ་འདུན་འདུས་པ་ན་དེའི་གནས་བརྟན་མདུན་དུ་འགྲོ་བར་བྱའོ་ཞེས་བྱ་བའོ། །དགེ་འདུན་འདུས་པ་ཚོགས་པ་ནི་དེའི་གནས་བརྟན་ཞེས་བྱ་བ་དགེ་འདུན་གྱི་གནས་བརྟན་མདུན་དུ་འགྲོ་བར་བྱ་བའོ། །འདི་སྐད་བསྟན་ཏེ། དགེ་འདུན་ཐམས་ཅད་འཚོགས་པ་ན་དགེ་འདུན་གྱི་གནས་བརྟན་སྣ་ལ་འགྲོ་བར་བྱའོ་ཞེས་བྱ་བའི་ཐ་ཚིག་གོ །འགྲོ་བའི་ཚེ་ཐོགས་ན་བསྡད་པར་བྱའོ་ཞེས་བྱ་བ་ནི། དགེ་འདུན་གཞིག་ཏུ་འགྲོ་བའི་ཚེ་དགེ་སློང་དག་ཐོགས་ན་དགེ་འདུན་གྱི་གནས་བརྟན་གྱིས་བསྡད་པར་བྱ་སྟེ། ཐོགས་པར་བྱའོ་ཞེས་བྱ་བའི་ཐ་ཚིག་གོ །དེ་དག་གིས་དེ་ཡང་ངོ་ཞེས་བྱ་བ་ནི། དགེ་སློང་དེ་དག་གིས་དགེ་འདུན་གྱི་གནས་བརྟན་དེ་ཐོགས་ན་བསྡད་པར་བྱ་བའོ། །ཡང་ངོ་ཞེས་བྱ་བའི་སྒྲ་ནི།
གནས་བརྟན་འབའ་ཞིག་ལ་མ་ཡིན་གྱི། དགེ་སློང་དག་ལ་ཡང་བསྡད་པར་བྱ་བའོ། །མ་བྱུང་བ་ལ་མི་རིང་བར་སོང་སྟེའོ་ཞེས་བྱ་བ་ནི། གལ་ཏེ་གནས་བརྟན་གནས་ཁང་ལ་སོགས་པ་ནས་མ་བྱུང་ན་གནས་བརྟན་མ་བྱུང་བ་དེ་ལ་དགེ་སློང་དག་གིས་མི་རིང་བར་སོང་སྟེ་བསྡད་པར་བྱ་བའོ། །གྲོང་གི་ཉེན་ཀོར་དུ་ཡང་ངོ་ཞེས་བྱ་བ་ལ། ཉེན་ཀོར་ཞེས་བྱ་བའི་སྒྲ་ནི། ཉེ་བའི་ཚིག་ཡིན་ཏེ། གནས་བརྟན་གྲོང་གི་ཉེན་ཀོར་དུ་ཐོགས་པ་ལ་ཡང་དགེ་སློང་དག་གིས་བསྡད་པར་བྱ་བའོ། །གལ་ཏེ་འཇུག་པ་ན་ཕྱི་བཞིན་འོང་ན་ཡང་ངོ་ཞེས་བྱ་བ་ནི། གལ་ཏེ་དགེ་སློང་དག་གྲོང་དུ་འཇུག་པར་འདོད་པ་ན་གནས་བརྟན་ཕྱི་བཞིན་འོང་བ་སྣང་ན་དེ་དག་གིས་གནས་བརྟན་དེ་འོང་བ་མཐོང་ནས་བསྡད་པར་བྱ་བའོ། །གལ་ཏེ་སྦྲོན་པ་འོངས་ན་ཡང་དེ་ལ་གནས་བརྟན་འོངས་ཀྱི་བར་དུ་སྡོད་ཅིག་ཅེས་བསྒོ་བར་བྱའོ་ཞེས་བྱ་བ་ནི། དགེ་སློང་རྣམས་དེ་ལྟར་སྡོད་པ་ན་གལ་ཏེ་གྲོང་ནས་སྦྲོན་པ་སྤྱན་འདྲེན་འོངས་ན་ཡང་དེའི་ཚེ་སྦྲོན་པ་དེ་ལ་དགེ་སློང་རྣམས་ཀྱིས་འདི་སྐད་ཅེས་གནས་བརྟན་འོངས་ཀྱི་བར་དུ་རེ་ཞིག་སྡོད་ཅིག་ཅེས་བསྒོ་བར་བྱ་སྨྲ་བར་བྱའོ། །ཟས་ཀྱི་ཕྱིར་སོན་པ་ཉིད་ན་ལག་ཆུ་དྲངས་པའི་ཆོ་གལ་ཏེ་དུས་ཡོད་ན་ཡང་ངོ་ཞེས་བྱ་བ་ནི། དགེ་སློང་རྣམས་ཟས་བཟའ་བའམ་བཏུང་བའི་ཕྱིར་གྲོང་དུ་ཞུགས་ཏེ། སོན་པ་ཉིད་ན་གང་གི་ཚེ་ལག་པ་བསྙལ་བའི་ཕྱིར་ལག་ཆུ་དྲངས་པ་དེའི་ཚེ་ལག་ཆུ་དྲངས་པ་དེ་ན་གལ་ཏེ་དགེ་སློང་རྣམས་ཀྱིས་གནས་བརྟན་བསྡད་པའི་དུས་ཡོད་དེ་དེ་གདུགས་ཚོད་ཀྱིས་ཐུབ་པ་ལྟ་ན་ཡང་ངོ་ཞེས་བྱ་བའི་སྒྲ་ལས་དེའི་ཚེ་ཞལ་ཏ་པ་ལ་འདི་སྐད་ཅེས་གནས་བརྟན་འོངས་ཀྱི་བར་དུ་ཆུང་སྡོད་ཅིག་ཅེས་བསྒོ་བར་བྱའི་ཞེས་བྱ་བ་འདི་འབྱུང་བར་སྦྱར་རོ། །མེད་ན་གྲལ་དེར་དེའི་སྟན་གཞག་པར་བྱའོ་ཞེས་བྱ་བ་ནི། གདུགས་ཚོད་ལ་བབ་སྟེ། བསྡད་པའི་དུས་མེད་ན་བཀད་སའི་གྲལ་གྱི་གོང་དེར་གནས་བརྟན་དེའི་སྟན་གཞག་པར་བྱའོ། །བསྡད་པའི་སྐབས་སྨྲས་ནས། ད་ནི་གནས་བརྟན་དེའི་ཚུལ་ཁྲིམས་ཉིད་བརྗོད་པར་བྱ་སྟེ། འདུག་པ་དང་ཕྱི་རོལ་དུ་ཡང་སོ་སོར་བརྟག་པར་བྱའོ་ཞེས་བྱ་བ་ནི། གནས་བརྟན་གྱིས་དགེ་སློང་རྣམས་ཁྱིམ་གྱི་ནང་དུ་འདུག་པ་དང་སྡོད་ས་ཕན་ཆད་ཕྱི་རོལ་ཐམས་ཅད་དུ་ཡང་འདི་དག་ལ་ཁ་ཅིག་གིས་ལེགས་པར་མ་བགོས་པ་དང་ལེགས་པར་མ་སྦྱངས་པར་མ་གྱུར་ཏམ་ཞེས་སོ་སོར་བརྟག་པར་བྱ་བའོ། །སོ་སོར་བརྟགས་
ན་ཇི་ལྟར་བྱ་ཞེ་ན། དེའི་ཕྱིར་ལེགས་པར་མ་བགོས་པ་ཉིད་དམ་ལེགས་པར་མ་སྦྱངས་པ་ཉིད་ཡིན་ན་མཛེས་པར་བྱ་བའི་ཕྱིར་དེ་གཉིས་ལ་བརྔ་བྱའོ་ཞེས་བྱ་བ་སྨྲས་ཏེ། ལེགས་པར་མ་བགོས་པ་ཉིད་ཅེས་བྱ་བ་ནི་སྟོད་ཀྱི་ཆོས་གོས་སོ། །ལེགས་པར་མ་སྦྱངས་པ་ཉིད་ཅེས་བྱ་བ་ནི། སྨད་ཀྱི་ཤམ་ཐབས་སོ། །མཛེས་པར་བྱ་བའི་ཕྱིར་ཞེས་བྱ་བ་ནི་སྡུ་གུར་བྱ་བའི་ཕྱིར་རོ། །དེ་གཉིས་ལ་ཞེས་བྱ་བ་ནི། ལེགས་པར་མ་བགོས་པ་ཉིད་དང༌། ལེགས་པར་མ་སྦྱངས་པ་ཉིད་དེ་གཉིས་ལའོ། །བརྡ་བྱའོ་ཞེས་བྱ་བ་ནི། ལེགས་པར་མ་བགོས་པ་ཉིད་དང་ལེགས་པར་མ་སྦྱངས་པ་ཉིད་ཀྱི་དགེ་སློང་དེ་གཉིས་ལ་ལག་བརྡ་ལ་སོགས་པ་བྱ་བའོ། །གལ་ཏེ་བརྡ་བྱས་ཀྱང་མགོ་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་མ་གོན་དྲུང་ན་མོ་བྱེད་དུ་གཞུག་གོ་ཞེས་བྱ་བ་སྨྲས་ཏེ། མགོ་ན་ཞེས་བྱ་བ་ནི། མ་ཚོར་ན་སྟེ། གལ་ཏེ་ལེགས་པར་མ་སྦྱངས་པའི་དགེ་སློང་དེ་ལ་དགེ་འདུན་གྱི་གནས་བརྟན་གྱིས་བརྡ་བྱས་པ་ན། མགོ་ན་དེའི་ཚེ་ལེགས་པར་མ་བགོས་པ་ལ་སོགས་པའི་དགེ་སློང་དེའི་དྲུང་ན་མོའི་དགེ་སློང་གང་ཡིན་པ་དེ་བརྡ་བྱེད་དུ་གཞུག་གོ་ཞེས་བྱ་བ་ནི། མ་གྱུར་ན་རང་གིས་སོ་ཞེས་བྱ་བ་ནི། གལ་ཏེ་དྲུང་ན་མོའི་དགེ་སློང་གིས་བརྡ་བསྟན་པས་ཀྱང་མཛེས་པར་མ་གྱུར་ན་དགེ་འདུན་གྱི་གནས་བརྟན་རང་གིས་མཛེས་པར་བྱའོ། །གསར་བུ་དེ་དག་ལ་ཀུན་དུ་སྨྲ་བར་མི་བྱའོ་ཞེས་བྱ་བ་ནི། གསར་བུ་གང་དག་ཡིན་པ་དེ་དག་ལ་དགེ་འདུན་གྱི་གནས་བརྟན་དེས་ཀུན་དུ་སྨྲ་བར་མི་བྱ་སྟེ། དེ་དག་དང་ལྷན་ཅིག་ཏུ་འདུ་འཛིའི་གཏམ་མི་བྱའོ་ཞེས་བྱ་བའི་ཐ་ཚིག་གོ །གཙུག་ལག་ཁང་དང་དགོན་པ་དེར་དེ་དག་གི་ཚུལ་ཁྲིམས་ཀྱི་ཚུལ་ཁྲིམས་དེ་འཛིན་དུ་གཞུག་པར་བྱ་ཞིང་ངེས་པར་སྦྱར་བར་ཡང་ངོ་ཞེས་བྱ་བ་ནི། གཙུག་ལག་ཁང་དང་དགོན་པའི་གནས་དེར་གསར་བུ་དེ་དག་གི་ཚུལ་ཁྲིམས་འཇུག་པ་གནས་པའི་ཚུལ་ཁྲིམས་གཙུག་ལག་ཁང་དང་དགོན་པའི་ཚུལ་ཁྲིམས་ཀུན་སྤྱོད་པ་ལ་སོགས་པ་དེ་འཛིན་དུ་གཞུག་པར་བྱ་བ་གསར་བུ་རྣམས་ལ་གོ་བར་བྱ་ཞིང་ངེས་པར་སྦྱར་བ་ཡང་ངོ་ཞེས་བྱ་བ་ལས་ཚུལ་ཁྲིམས་དེ་ཞེས་བྱ་བར་སྦྱར་རོ། །འདི་སྐད་བསྟན་ཏེ། ཚུལ་ཁྲིམས་དེ་འཛིན་དུ་གཞུག་པ་འབའ་ཞིག་ཏུ་མ་ཟད་ཀྱི་དགེ་འདུན་གྱི་གནས་བརྟན་གྱིས་གསར་བུ་རྣམས་ཚུལ་ཁྲིམས་དེ་ལ་ནན་ཏན་བྱ་བ་ལ་ངེས་པར་སྦྱར་བར་ཡང་བྱ་བའོ། །གློ་བུར་དུ་འོངས་པས་ན་སོ་སོར་བརྟགས་
ནས་གནས་མལ་གྱི་ཕྱིར་གཉུག་མར་གནས་པ་རྣམས་ལ་བརྗོད་པར་བྱའོ་ཞེས་བྱ་བ་ནི། གང་དག་གློ་བུར་དུ་ལྷགས་པ་དེ་དག་གི་ནང་ནས་དགེ་འདུན་གྱི་གནས་བརྟན་གང་ཡིན་པའི་གནས་བརྟན་གློ་བུར་དུ་འོངས་པ་དེས་རང་དང་ལྷན་ཅིག་ཏུ་གློ་བུར་དུ་ལྷགས་པ་རྣམས་ལ་སོ་སོར་བརྟགས་པ་བགྲངས་ནས་གནས་མལ་ཐོབ་པར་བྱ་བའི་ཕྱིར་དགེ་སློང་གཉུག་མར་གནས་པ་རྣམས་ལ་བརྗོད་པར་བྱ་བའོ། །འགྲོ་བར་ཆས་པས་ནི་ཕྱོགས་དང་འདྲོན་པ་དང་གནས་དང་གནས་མལ་དང༌། གྲོགས་ན་ན་མི་དོར་བ་ཉིད་བརྟགས་ནས་འཕགས་པར་བྱའོ་ཞེས་བྱ་བ་ནི། དགེ་སློང་འགྲོ་བར་ཆས་པ་རྣམས་ཀྱི་ནང་ན་འགྲོ་བར་ཆས་པའི་གནས་བརྟན་གང་ཡིན་པ་གནས་བརྟན་འགྲོ་བར་ཆས་པ་དེས་ནི་ཕྱོགས་ལ་སོགས་པ་བརྟགས་ནས་འཕགས་པར་བྱའོ་ཞེས་བྱ་བར་སྦྱར་རོ། །འགྲོ་བར་ཆས་པའི་གནས་བརྟན་དེས་ཕྱོགས་གང་དུ་འདྲོན་པ་གང་དང་ལམ་གང་ནས་འགྲོ་བར་བྱ་བ་དང༌། གནས་དགོན་པ་ལ་སོགས་པ་འདོད་པ་གང་ཡིན་པ་དང༌། དེར་སོན་པ་རྣམས་ཀྱི་གནས་མལ་གང་ཡིན་པ་དེ་དག་ཐམས་ཅད་ཁོང་དུ་ཆུད་པར་བྱས་བརྟགས་ནས་གྲོགས་ཀྱང་བརྟགས་ཏེ། ན་བར་གྱུར་ན་གང་གིས་ཀྱང་འགའ་ཡང་མི་འདོར་བ་ཉིད་བརྟགས་ནས་དེ་ལྟར་ཡིད་ལ་བྱས་ཏེ་ཇི་ལྟར་བསམས་པའི་གནས་དེར་སོན་པར་བྱ་བའི་ཕྱིར། འཕགས་པར་བྱའི་གཞན་དུ་ན་མི་འཕགས་སོ་ཞེས་བྱ་བ་སྟེ། འདིར་མདོའི་དོན་ནི་དེ་ཡིན་ནོ། །རིང་པོར་མ་སོན་པར་ཐམས་ཅད་ཀྱི་ཐ་མར་ལ་ལའི་ཆུང་ཟད་མ་ལུས་སམ་ཞེས་འཕྲལ་དུ་དྲན་པར་བྱའོ་ཞེས་བྱ་བ་ནི། འགྲོ་བར་ཆས་པའི་དགེ་འདུན་གྱི་གནས་བརྟན་དེས་འགྲོ་བར་ཆས་པའི་དགེ་སློང་དེ་དག་ལ་འཕྲལ་དུ་དྲན་པར་བྱའོ་ཞེས་བྱ་བར་སྦྱར་རོ། །ཇི་ལྟར་ཞེ་ན། རིང་པོར་མ་སོན་པར་ཞེས་བྱ་བ་ལ་སོགས་པ་སྨྲས་ཏེ། གནས་དེ་ནས་ཐག་རིང་པོར་མ་སོང་བར་ཞེས་བྱ་བའི་ཐ་ཚིག་གོ །ཐམས་ཅད་ཀྱི་ཐ་མར་ཞེས་བྱ་བ་ནི། གཞི་ནས་ཆ་བ་ལ་སོགས་པའི་བྱ་བ་ཐམས་ཅད་ཟིན་ཏེ། གནས་ནས་སྤགས་པའི་འོག་ཏུའོ། །ལ་ལའི་ཞེས་བྱ་བ་ནི། དགེ་སློང་ལ་ལའིའོ། །ཅུང་ཟད་ཅེས་བྱ་བ་ནི་དངོས་པོའོ། །མ་ལུས་སམ་ཞེས་བྱ་བ་ནི། མ་བརྗེད་དམ་ཞེས་བྱ་བའོ། །འཕྲལ་དུ་དྲན་པར་བྱའོ་ཞེས་བྱ་བ་ནི་མོད་ལ་རྨ་བས་སོ། །གསར་བུ་རྣམས་མི་རྒོད་
པ་ཉིད་དང་མ་ཁེངས་པ་ཉིད་ལ་དགོད་པར་བྱའོ་ཞེས་བྱ་བ་ལ་རྒོད་པ་ནི་ཉེ་བར་མ་ཞི་བའོ། །ཁེངས་པ་ནི་གྱང་གྱིང་ཆེ་བ་སྟེ། འགྲོ་བར་ཆས་པའི་གནས་བརྟན་གྱིས་གསར་བུ་རྣམས་དེ་ལས་བཟློག་པར་བྱ་ཞིང༌། ཉེ་བར་ཞི་བ་དང༌། རྒྱགས་པ་དང༌། ང་རྒྱལ་ངེས་པར་བཅོམ་པ་ཉིད་ལ་དགོད་པར་བྱའོ། །ཁྱིམ་ཕྱིར་ཉེ་བ་ན་ཐམས་ཅད་ཀྱིས་ཐམས་ཅད་ཀྱང་ངོ་ཞེས་བྱ་བ་ལ། ཁྱིམ་ཕྱིར་ཉེ་བ་ན་ཞེས་བྱ་བ་ནི། གྲོང་དུ་སོན་པ་ནའོ། །ཐམས་ཅད་ཀྱིས་ཞེས་བྱ་བ་ནི། འགྲོ་བར་ཆས་པའི་གནས་བརྟན་འབའ་ཞིག་མ་ཡིན་གྱི་གནས་བརྟན་གཞན་ཐམས་ཅད་ཀྱིས་ཀྱང་ངོ༌། །ཐམས་ཅད་ཅེས་བྱ་བ་ནི། གསར་བུ་རྣམས་འབའ་ཞིག་མ་ཡིན་གྱི། རྒན་པ་གཞན་ཐམས་ཅད་ཀྱང་ངོ༌། །ཀྱང་ངོ་ཞེས་བྱ་བ་ལས་ནི། མི་རྒོད་པ་ཉིད་དང་མ་ཁེངས་པ་ཉིད་ལ་དགོད་པར་བྱའོ་ཞེས་བྱ་བར་སྦྱར་རོ། །ཀུན་ཤེས་པར་བྱའོ་ཞེས་བྱ་བ་ནི། འགྲོ་བར་ཆས་པའི་དགེ་འདུན་གྱི་གནས་བརྟན་གྱིས་རང་གི་འཁོར་མིང་ལ་སོགས་པའི་མཚན་མས་ཀུན་ཤེས་པར་བྱ་བ་སྟེ། འདི་ནི་བདག་གི་འཁོར་དུ་གཏོགས་པའི་གང་ཟག་གོ །དེ་ཡང་བདག་གིས་བསྲུང་བར་བྱ་བའོ་ཞེས་བྱ་བའི་དོན་དུའོ། །སྤྱོད་པ་དང་སྤྱོད་ལམ་བསྟན་པ་དང་ལུང་མནོད་པ་ལ་སོགས་པ་དང༌། ཟས་ཀྱི་རྙེད་པ་དང༌། ནད་པ་ལ་བགོ་བཤའ་བྱ་བ་ལ་སོགས་པའི་བྱ་བ་བསྒྲུབས་པས་ཕན་གདགས་པར་བྱའོ་ཞེས་བྱ་བ་ལ། སྤྱོད་པ་ཞེས་བྱ་བ་ནི། བསོད་སྙོམས་ལ་སོགས་པའི་སྤྱོད་ཡུལ་ལོ། །སྤྱོད་ལམ་ཞེས་བྱ་བ་ནི། འཆག་པ་ལ་སོགས་པའི་སྤྱོད་ལམ་མོ། །བསྟན་པ་ཞེས་བྱ་བ་ནི། དེ་གཉིས་བསྟན་པ་སྟེ། འདི་ནི་སྤྱོད་ཡུལ་ལོ། །འདི་ནི་སྤྱོད་ཡུལ་མ་ཡིན་ནོ། །འདི་ལྟར་འགྲོ་བར་བྱའོ། །འདི་ལྟར་འགྲོ་བར་མི་བྱའོ་ཞེས་བྱ་བ་ལ་སོགས་པ་བསྟན་པའོ། །ལུང་མནོད་པ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི་ཁ་ཏོན་ལ་སོགས་པ་དག་བསྡུའོ། །ཟས་ཀྱི་རྙེད་པ་ཞེས་བྱ་བ་ནི། བཟའ་བ་དང་བཏུང་བ་ལ་སོགས་པའོ། །ནད་པ་ལ་བགོ་བཤའ་བྱ་བ་ལ་སོགས་པ་ཞེས་བྱ་བ་ལ། ནད་པ་ལ་བོག་བཤའ་བྱ་བ་ནི་སྨན་དང་ནད་གཡོག་ལ་སོགས་པའོ། །སོགས་པ་ཞེས་བྱ་བའི་སྒྲས་ནི། ཆོས་གོས་ལ་སོགས་པ་ཟང་ཟིང་གི་བགོ་བཤའ་དག་བསྡུའོ་ཞེས་བྱ་བ་ནི། སྤྱོད་པ་དང་
སྤྱོད་ལམ་བསྟན་པ་དང༌། ལུང་མནོད་པ་ལ་སོགས་པ་དང༌། ཟས་ཀྱི་རྙེད་པ་དང༌། ནད་པ་ལ་བགོ་བཤའ་བྱ་བ་ལ་སོགས་པ་དེ་དག་ཉིད་བྱ་བའོ། །དེ་དག་བསྒྲུབས་པས་ཞེས་བྱ་བ་ནི་ནན་ཏན་བྱ་བས་སོ། །ཕན་གདགས་པར་བྱའོ་ཞེས་བྱ་བ་ནི། དགེ་འདུན་གྱི་གནས་བརྟན་གྱིས་དེ་དག་གི་གསར་བུ་རྣམས་ལ་ཕན་གདགས་པར་བྱའོ། །དབྱར་གནས་པར་ཁས་བླངས་པས་གཙུག་ལག་ཁང་གི་བྱི་དོར་མི་བྱེད་པ་ལ་གྲོས་བཏབ་སྟེ། བྱི་དོར་བྱེད་དུ་གཞུག་ཅིང་བྱི་དོར་བྱེད་པ་ལ་ནི་སྤྲོ་བར་བྱའོ་ཞེས་བྱ་བ་ནི། དབྱར་གནས་པར་ཁས་བླངས་པའི་གནས་བརྟན་གྱིས་གཙུག་ལག་ཁང་གི་བྱི་དོར་བྱེད་དུ་གཞུག་གོ་ཞེས་བྱ་བར་སྦྱར་རོ། །གཙུག་ལག་ཁང་གི་བྱི་དོར་མི་བྱེད་པ་ལ་གྲོས་བཏབ་སྟེ། བྱི་དོར་བྱེད་དུ་གཞུག་ཅེས་བྱ་བ་འདི་སྐད་བསྟན་ཏེ། གལ་ཏེ་དགེ་སློང་རང་དགར་དབྱར་གནས་པར་ཁས་བླངས་པ་དག་གཙུག་ལག་ཁང་གི་བྱི་དོར་མི་བྱེད་ན་དེའི་ཚེ་དགེ་འདུན་གྱི་གནས་བརྟན་གྱིས་ཅི་ནས་ཀྱང་གཙུག་ལག་ཁང་གི་བྱི་དོར་བྱེད་པར་འགྱུར་བ་དེ་ལྟར་གྲོས་བཏབ་སྤྲོ་བར་བྱས་ཏེ། བྱི་དོར་བྱེད་དུ་གཞུག་པའོ། །གང་གི་ཚེ་རང་གི་ངང་ཁོ་ནས་བྱི་དོར་བྱེད་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་བྱི་དོར་བྱེད་པ་ལ་ནི་སྤྲོ་བར་བྱའོ་ཞེས་བྱ་བ་སྨྲས་ཏེ། བྱ་བ་དེ་ནི་ཚུལ་དང་མཐུན་པ་ཡིན་ནོ་ཞེས་གཟེངས་བསྟོད་པས་སྤྲོ་བར་བྱ་བའོ། །ཐམས་ཅད་ཀྱིས་འཁོར་དུ་གཏོགས་པ་གཏམ་འདོད་པ་དག་ལ་རྗེས་སུ་མཐུན་པའི་ཆོས་ཉེ་བར་བསྒྲུབ་པས་ཕན་གདགས་པར་བྱའོ་ཞེས་བྱ་བ་ནི། གནས་བརྟན་ཐམས་ཅད་ཀྱིས་དགེ་སློང་འཁོར་དུ་གཏོགས་པ་ལ་ཆོས་ཀྱིས་ཕན་གདགས་པར་བྱའོ་ཞེས་བྱ་བར་སྦྱར་རོ། །ཐམས་ཅད་ཀྱིས་ཞེས་བྱ་བ་ནི། གནས་བརྟན་ཐམས་ཅད་ཀྱིས་ཏེ། དབྱར་གནས་པའི་གནས་བརྟན་འབའ་ཞིག་གིས་བྱ་བར་མ་ཟད་པའོ། །གང་གི་ཚེ་ཞེ་ན། འཁོར་དུ་གཏོགས་པ་གཏམ་འདོད་པ་དག་གི་ཚེ་སྟེ། གལ་ཏེ་དགེ་སློང་དེ་དག་མདོ་སྡེ་དང་འདུལ་བ་ལ་སོགས་པའི་ཆོས་ཀྱི་གཏམ་འདོད་ཅིང་གསོལ་བའི་ཚེའོ། །དེའི་ཚེ་དེ་དག་ལ་དགེ་འདུན་གྱི་གནས་བརྟན་ཐམས་ཅད་ཀྱིས་གང་ལ་གང་འོས་པའི་རྗེས་སུ་མཐུན་པའི་ཆོས་ཉེ་བར་བསྒྲུབ་པ་དེས་ཕན་གདགས་པར་བྱ་བའོ།། །།བམ་པོ་བདུན་པ། མི་སྨྲ་བ་ཉིད་ལ་དགའ་བ་དག་བཏང་སྙོམས་སུ་
གཞག་གོ་ཞེས་བྱ་བ་ལ་མི་སྨྲ་བའི་དངོས་པོ་ནི། མི་སྨྲ་བ་ཉིད་དོ། །གང་དག་དེ་ལ་དགའ་བའི་དགེ་སློང་དག་ཅི་དགར་བཏང་སྙོམས་སུ་གཞག་གོ །འདིར་མི་སྨྲ་བ་ཉིད་ཅེས་བྱ་བ་ཡང་འཕགས་པའི་མི་སྨྲ་བ་ཉིད་ཚུལ་བཞིན་ཡིད་ལ་བྱེད་པ་ཞེས་བྱ་བ་ཉིད་ཡིན་པར་འདོད་ཀྱི། གྱི་ན་ཁ་རོག་སྟེ་འདུག་པ་ལ་ནི་མི་བྱའོ། །ཁྱིམ་པ་དེ་ཉེ་བར་འོངས་པའི་མཚལ་མ་སྦྱོར་དུ་གཞུག་གོ་ཞེས་བྱ་བ་ནི། གལ་ཏེ་གཙུག་ལག་ཁང་དུ་ཁྱིམ་པ་འོངས་ན་ཁྱིམ་པ་ཉེ་བར་འོངས་པའི་ཟན་སྦྱོར་དུ་གཞུག་གོ །དགེ་འདུན་གྱི་གནས་བརྟན་གྱིས་དགེ་སློང་དག་ལ་གོ་བར་བྱ་སྟེ། ཟན་སྦྱོར་དུ་བཅུག་པ་ན་གལ་ཏེ་དགེ་སློང་དག་སྟ་གོན་མི་བྱེད་དམ་ཁྱིམ་པ་དེ་དག་ཟན་མི་འདོད་ན་དེའི་ཚེ་མི་བྱེད་དམ་མི་འདོད་ན་དེ་དག་ལ་ཆོས་དང་ལྡན་པའི་གཏམ་བྱས་ནས་བདག་ཅག་ལ་འདི་ཡོད་དོ་ཞེས་བརྗོད་པར་བྱའོ་ཞེས་བྱ་བ་ནི། དགེ་སློང་དག་ཟན་གྱི་སྟ་གོན་མི་བྱེད་དམ་ཁྱིམ་པ་དག་ཟན་བཟའ་བར་མི་འདོད་ན་ཁྱིམ་པ་དེ་དག་ལ་དགེ་འདུན་གྱི་གནས་བརྟན་གྱིས་ཆོས་དང་ལྡན་པ་སྦྱིན་པ་ལ་སོགས་པའི་གཏམ་བྱའོ། །དེ་དག་བྱས་ནས་དགེ་འདུན་གྱི་གནས་བརྟན་གྱིས་དེ་དག་ཡང་དག་པར་དགའ་བར་བྱ་བའི་ཕྱིར། བདག་ཅག་དགེ་སློང་རྣམས་ལ་ཆོས་ཀྱི་སྦྱིན་པ་འདི་ཡོད་དོ་ཞེས་དེ་དག་ལ་བརྗོད་པར་བྱ་བའོ། །དེ་དག་དང་ལྡན་པ་ཐམས་ཅད་ཀྱིས་འཁོར་ལ་སོ་སོར་བརྟག་པར་བྱའོ་ཞེས་བྱ་བ་ནི་འཁོར་དེ་དང་ལྡན་པའི་དགེ་སློང་ཐམས་ཅད་ཀྱིས་ཀྱང་རང་རང་གི་འཁོར་ལ་སོ་སོར་བརྟག་པར་བྱའི་དགེ་འདུན་གྱི་གནས་བརྟན་འབའ་ཞིག་གིས་བྱ་བར་མ་ཟད་དོ་ཞེས་བྱ་བའི་ཐ་ཚིག་གོ །དོན་མེད་པར་སྤྱོད་པ་ཚར་གཅོད་དོ་ཞེས་བྱ་བ་ལ། གང་མི་དགོས་པ་བྱེད་པ་དེ་ནི་དོན་མེད་པར་སྤྱོད་པ་སྟེ། ཅི་ནས་ཀྱང་དོན་མེད་པས་དུས་ཡོལ་བར་བྱེད་པར་མི་འགྱུར་བ་དེ་ལྟར་ཚར་གཅད་པར་བྱ་བའོ། །དེ་ལ་འགྲོ་བ་ལ་སོགས་པ་དེ་ཇི་ལྟར་བ་བཞིན་བྱའོ་ཞེས་བྱ་བ་ལ། དེ་ལ་ཞེས་བྱ་བ་ནི། འཁོར་ལའོ། །འགྲོ་བ་ལ་སོགས་པ་ཞེས་བྱ་བ་ལ། སོགས་པ་ཞེས་བྱ་བའི་སྒྲས་ནི། འདི་ལྟར་འགྲོ་བར་བྱ། འདི་ལྟར་འདུག་པར་བྱ། འདི་ལྟར་ཉལ་བར་བྱ་བ་ལ་སོགས་པའི་རྣམ་པ་དེ་ལྟ་བུ་དག་གི་དོན་དུ་འཁོར་ཇི་ལྟ་བ་བཞིན་བྱ་བ་བསྡུའོ། །དེ་ཞེས་བྱ་བའི་སྒྲ་ནི་འཁོར་ལ་སྙེགས་སོ། །ཇི་ལྟ་བ་བཞིན་ཞེས་བྱ་བ་
ནི། འཁོར་དང་མཐུན་པར་བྱའོ། །འདི་སྐད་བསྟན་ཏེ། འཁོར་དང་ལྡན་པའི་དགེ་སློང་གིས་འགྲོ་བ་ལ་སོགས་པ་རང་གི་འཁོར་དང་མཐུན་པར་བྱ་སྟེ། འཁོར་དང་ལྡན་པ་དེས་རང་གི་འཁོར་རྣམས་ཀྱི་འགྲོ་བ་ལ་སོགས་པ་འཁོར་ཇི་ལྟ་བ་བཞིན་བསྒྲུབ་པར་བྱའོ་ཞེས་བྱ་བའི་ཐ་ཚིག་གོ །གཏམ་སྣ་ཚོགས་དང་འགལ་བ་མེད་པར་བྱའོ་ཞེས་བྱ་བ་ལ། གཏམ་སྣ་ཚོགས་ཞེས་བྱ་བ་ནི། རྣམ་པར་འཕྲོས་པའི་གཏམ་མོ། །གཏམ་འགལ་བ་ཞེས་བྱ་བ་ནི། ཆོས་འདུལ་བ་དང་འགལ་བའོ། །འཁོར་དང་ལྡན་པ་གང་ལ་གཏམ་སྣ་ཚོགས་དང་གཏམ་འགལ་བ་མེད་པ་དེ་ནི་གཏམ་སྣ་ཚོགས་དང་འགལ་བ་མེད་པ་སྟེ། འཁོར་དང་ལྡན་པ་དེས་འཁོར་དེ་ལ་ཁྱད་པར་དེ་ལྟ་བུ་དང་ལྡན་པར་བྱའོ་ཞེས་བྱ་བའི་ཐ་ཚིག་གོ །གནས་དང་གནས་པའི་སྐབས་ཡིན་པའི་ཕྱིར་དེའི་ཞར་ལ། ཕྱི་བཞིན་འབྲང་བའི་དགེ་སྦྱོང་མདུན་དུ་འགྲོ་བར་མི་བྱའོ་ཞེས་བྱ་བ་འདི་སྨྲས་ཏེ། ཕྱི་བཞིན་འབྲང་བའི་དགེ་སྦྱོང་གནས་ཀྱི་མདུན་དུ་འགྲོ་བར་མི་བྱའོ། །འདུག་པར་མི་བྱའོ་ཞེས་བྱ་བ་ནི། གོང་དུ་འདུག་པ་དང་འགྲེང་བར་མི་བྱ་བའོ། །སྨྲས་ན་སྨྲ་བར་བྱ་ཞིང་བསྒྲུབ་པར་བྱའོ་ཞེས་བྱ་བ་ལ། སྨྲས་ན་སྨྲ་བར་བྱ་ཞེས་བྱ་བ་ནི། དགེ་སློང་བལ་མས་སྨྲས་ཤིང་བརྗོད་ན། ཕྱི་བཞིན་འབྲང་བའི་དགེ་སྦྱོང་གིས་སྨྲ་བར་བྱ་བ་སྟེ། བལ་མས་མ་སྨྲས་ཀྱི་བར་དུ་འོག་མས་ཅུང་ཟད་ཀྱང་སྨྲ་བར་མི་བྱ་བའོ། །བསྒྲུབ་པར་བྱའོ་ཞེས་བྱ་བ་ནི། ཡང་ན་དགེ་སྦྱོང་བླ་མས་གང་སྨྲས་པ་དེ་ཕྱི་བཞིན་འབྲང་བའི་དགེ་སྦྱོང་གིས་ཅང་མི་སྨྲ་བ་ཁོ་ནར་བསྒྲུབ་པར་བྱ་བའོ། །གཏམ་གྱི་བར་ཆད་མི་བྱའོ་ཞེས་བྱ་བ་ལ། གཏམ་གྱི་བར་ཆད་ཅེས་བྱ་བ་ནི། གཏམ་ཟེར་བའི་བར་དུ་གཅོད་པའོ། །དགེ་སྦྱོང་བླ་མས་གཏམ་ཟེར་བ་ན་ཕྱི་བཞིན་འབྲང་བའི་དགེ་སྦྱོང་གིས་གཏམ་གྱི་བར་ཆད་མི་བྱའོ། །ཆོས་མ་ཡིན་པ་སྨྲ་བ་ན་བཟློག་པར་བྱའོ་ཞེས་བྱ་བ་ནི། དགེ་སྦྱོང་བླ་མ་ཆོས་མ་ཡིན་པ་མི་རིགས་པ་སྨྲ་བ་ན་ཕྱི་བཞིན་འབྲང་བའི་དགེ་སློང་གིས་བཟློག་པར་བྱ་དགག་པར་བྱའོ། །ཆོས་ཀྱིས་རྗེས་སུ་ཡི་རང་བར་བྱའོ་ཞེས་བྱ་བ་ནི། དགེ་སློང་བླ་མ་ལ་སོགས་པ་ཆོས་སྨྲ་བ་ན་ཕྱི་བཞིན་འབྲང་བའི་དགེ་སྦྱོང་ལ་སོགས་པས་རྗེས་སུ་ཡི་རང་བར་བྱ་སྟེ། ལེགས་སོ་ཞེས་བྱ་བ་སྦྱིན་ནོ་ཞེས་བྱ་བའི་ཐ་ཚིག་གོ །ཆོས་དང་ལྡན་པའི་རྙེད་པ་བྱུང་ན་
བླང་བར་བྱའོ་ཞེས་བྱ་བ་ནི། དགེ་སྦྱོང་བླ་མའི་ཆོས་དང་ལྡན་པའི་རྙེད་པ་ཞིག་བྱུང་ན་ཕྱི་བཞིན་འབྲང་བའི་དགེ་སྦྱོང་གིས་བླང་བར་བྱ་སྟེ། དགེ་སྦྱོང་བླ་མ་རང་གིས་བླང་བ་ནི་ཚུལ་མ་ཡིན་པའི་ཕྱིར་རོ། །དེ་ནི་ཕྱི་བཞིན་འབྲང་བའི་དགེ་སྦྱོང་གི་ཚུལ་ཁྲིམས་ཡིན་ནོ། །འདི་མན་ཆད་ནི་རབ་ཏུ་བྱུང་བའི་གཞིའི་ཞར་ལ་ཕྲན་ཚེགས་ལ་སོགས་པའི་སྐབས་ནས་འབྱུང་བ་ཤེས་པར་བྱ་སྟེ། དེ་ལ་ཇེ་རེ་ཞིག་ཁྱིམ་དུ་འགྲོ་བའི་ཚུལ་ཁྲིམས་བརྗོད་པར་བྱ་སྟེ། ཁྱིམ་དུ་མི་རྒོད་པ་དང་མ་ཁེངས་པ་དང་མི་གནས་པར་བྱའོ་ཞེས་བྱ་བ་ནི། དགེ་སྦྱོང་ཁྱིམ་དུ་འགྲོ་བས་ཁྱིམ་དུ་མི་རྒོད་པར་བྱ་བ་དང༌། མ་ཁེངས་པ་ནི་གྱང་གྱིང་མེད་པར་བྱ་བ་དང༌། མི་གནས་པ་ཞེས་བྱ་བ་ནི། དགེ་སྦྱོང་ཁྱིམ་དུ་འགྲོ་བས་ཁྱིམ་དུ་མི་གནས་པར་བྱས་ཏེ། ཁྱིམ་ནས་ཕྱིར་འགྲོ་འདོད་པར་བྱ་ཞིང་དེར་ཡུན་རིང་དུ་གནས་པའི་སེམས་མེད་པར་བྱ་བའོ། །མིག་སྨད་པ་དང་ཁྱིམ་པ་རྣམས་ལ་ཆོས་དང་ལྡན་པའི་གཏམ་བྱའོ་ཞེས་བྱ་བ་ལ། གང་གིས་མིག་སྨད་པ་དེ་ནི་མིག་སྨད་པ་སྟེ། ཡུལ་རྣམས་ལས་མིག་ཕྱིར་བླན་པ་ཞེས་བྱ་བའི་ཐ་ཚིག་གོ །གཡེང་བག་ཏུ་ལྟ་བ་ཉིད་ནི་ཚུལ་མ་ཡིན་པའི་ཕྱིར་རོ། །ཆོས་དང་ལྡན་པའི་གཏམ་བྱའོ་ཞེས་བྱ་བ་ནི། ཁྱིམ་དུ་སོན་པ་ན་ཁྱིམ་པ་རྣམས་ལ་ཆོས་དང་ལྡན་པའི་གཏམ་བྱའོ་ཞེས་བྱ་བའི་ཐ་ཚིག་གོ ། ཅི་དང་ཅི་ལྟ་བུ་བྱ་ཞེ་ན། དེའི་ཕྱིར་སྦྱིན་པ་དང་དུལ་བ་དང་ཡང་དག་པར་སྡོམ་པ་དང༌། ཚངས་པར་སྤྱོད་པ་ལ་གནས་པ་དང༌། གསོ་སྦྱོང་དང་སྐྱབས་སུ་འགྲོ་བ་དང༌། བསླབ་པའི་གཞི་བཟུང་བདག་ལ་དེ་དག་ངེས་པར་སྦྱར་བར་བྱའོ་ཞེས་བྱ་བ་སྨྲས་ཏེ། དགེ་སློང་ཁྱིམ་དུ་འགྲོ་བས་ཁྱིམ་པ་དེ་དག་སྦྱིན་པ་ལ་སོགས་པ་དག་ལ་ངེས་པར་སྦྱར་བར་བྱའོ་ཞེས་བྱ་བར་སྦྱར་རོ། །དེ་ལ་སྦྱིན་པ་ཞེས་བྱ་བ་ནི་གང་གིས་སྦྱིན་པར་བྱེད་པ་དང་སྦྱིན་པར་བྱ་པའོ། །དུལ་བ་ཞེས་བྱ་བ་ནི། དབང་པོ་རྣམས་ལ་དབང་བྱེད་པའོ། །ཡང་དག་པར་སྡོམ་པ་ཞེས་བྱ་བ་ནི། ལུས་དང་ངག་གི་ཡང་དག་པར་སྡོམ་པའོ། །ཚངས་པར་སྤྱོད་པ་ལ་གནས་པ་ཞེས་བྱ་བ་ནི། རབ་ཏུ་བྱུང་བའི་ཚུལ་ཁྲིམས་དང་ཁྱིམ་པ་ཉིད་ལ་ཡང་ཇི་སྲིད་འཚོའི་བར་དུ་གྲོང་པའི་ཆོས་ལས་ཕྱིར་ལྡོག་པའོ། །ལྟུང་བའི་སྒོར་གྱུར་པའི་འཇུག་པ་ཐམས་ཅད་ལ་དྲན་པས་བསྒྲུབ་པར་བྱའོ་ཞེས་བྱ་བ་ནི། འཇུག་པ་ཐམས་ཅད་ལ་དྲན་བས་
བསྒྲུབ་པར་བྱའོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཅན་ཞིག་ཅེ་ན། ལྟུང་བའི་སྒོར་གྱུར་པ་ལ་སྟེ། བྱ་བ་བརྩམ་པ་གང་ལས་ལྟུང་བ་འབྱུང་བར་འགྱུར་བ་ཡོད་པ་ལྟུང་བ་འབྱུང་བའི་སྒོར་གྱུར་པ་དེ་ལའོ། །ཁྱིམ་དུ་འཇུག་པ་དང་བསོད་སྙོམས་བླང་བ་ལ་སོགས་པ་དང་འགྲོ་བ་དང་འཇུག་པ་དང༌། ལྷུང་བཟེད་བཟེད་པ་ལ་སོགས་པའི་འཇུག་པ་ཐམས་ཅད་ལ་དྲན་པས་བསྒྲུབ་པར་བྱ་སྟེ། དགེ་སློང་དྲན་པ་མངོན་དུ་གྱུར་པས་བྱ་བ་དེ་དག་ལ་འཇུག་པར་བྱའོ་ཞེས་བྱ་བའི་དོན་ཏོ། །འདི་སྐད་བསྟན་ཏེ། གལ་ཏེ་དགེ་སློང་བྱ་བ་རྩོམ་པར་འདོད་པས་བྱ་བ་བརྩམ་པ་གང་ལས་ལྟུང་བ་འབྱུང་བ་ཡོད་པའི་ལྟུང་བའི་ཡུལ་དེ་ལ་དགེ་སློང་དེས་ཅི་ནས་ཀྱང་ལྟུང་བ་འགའ་ཡང་མི་འབྱུང་བ་དེ་ལྟར་དང་པོ་ཉིད་ནས་དྲན་པ་ཉེ་བར་གཞག་པར་བྱ་བ་ཡིན་གྱི། དོན་གྱི་རང་གི་ངོ་བོ་ཉིད་ངེས་པར་བཟུང་བའི་ཕྱིར་དྲན་པས་བསྒྲུབ་པར་བྱ་བ་ནི་མ་ཡིན་ནོ། །རྗེས་སུ་འགྲོ་བ་བསླབས་པས་མི་བྱ་བར་མི་བྱའོ་ཞེས་བྱ་བ་ནི། བསྒྲུབ་པར་ཞེས་བྱ་བར་སྦྱར་རོ། །རྗེས་སུ་འགྲོ་བས་ནི་རྗེས་སུ་འགྲོ་བ་སྟེ། རྗེས་སུ་འབྲང་བའོ། །གང་ལ་རྗེས་སུ་འབྲང་བ་དེས་གལ་ཏེ་བསླབས་པར་གྱུར་ན་དེ་ནི་དེས་བསླབས་པ་ཡིན་པས་རྗེས་སུ་འགྲོ་བ་དེས་དེའི་རྗེས་སུ་བསྟན་པ་ལས་མི་འདའ་བར་བསྒྲུབ་པར་བྱ་བ་དེ་མི་བྱ་བའོ། །འདི་སྐད་བསྟན་ཏེ། གང་ཟག་གང་གང་ཟག་གང་གི་རྗེས་སུ་འབྲང་ཞིང་གལ་ཏེ་དེས་དེ་སློབ་ཏུ་འཇུག་པར་བྱེད་ན། རྗེས་སུ་འབྲང་བ་དེས་དེའི་བསླབ་པ་ཁས་བླང་བར་བྱའོ་ཞེས་བྱ་བའི་ཐ་ཚིག་གོ །འོངས་པ་ལ་འོངས་པ་ལེགས་སོ་ཞེས་སྔར་སྙན་པར་བརྗོད་པར་བྱའོ་ཞེས་བྱ་བ་ནི། གལ་ཏེ་ཁྱིམ་པའམ་རབ་ཏུ་བྱུང་བ་འགའ་ཞིག་གཙུག་ལག་ཁང་དུ་འོངས་ན་འོངས་པ་དེ་ལ་དགེ་སློང་གིས་འོངས་པ་ལེགས་སོ་ཞེས་བརྗོད་པར་བྱ་ཞིང༌། འོངས་པ་གང་ཡིན་པ་དེས་བརྗོད་པ་བས་སྔར་བསྙེན་པར་བརྗོད་པར་བྱ་བའོ། །བཞིན་གྱི་མདངས་གསལ་བར་བྱའོ་ཞེས་བྱ་བ་ནི། བཞིན་རབ་ཏུ་དང་བར་བྱ་ཞིང་ངོམ་ཟུམ་མི་བྱ་བའོ། །འཛུམ་པར་སྔར་བྱའོ་ཞེས་བྱ་བ་ནི། འོངས་པ་དེ་ལ་དགེ་སློང་དེས་འཛུམ་པ་ཡིད་ཙམ་དགོད་པར་སྔར་བྱ་བའོ། །ཁྲོ་གཉེར་མེད་པར་བྱའོ་ཞེས་བྱ་བ་ནི། གང་ལ་འོངས་པ་ན་ཁྲོ་གཉེར་མེད་པ་དེ་ནི་ཁྲོ་གཉེར་མེད་པ་སྟེ་དེ་ལྟར་བྱ་བ་
བའོ། །གལ་ཏེ་ཁྱིམ་པ་ཞིག་ན་དེ་ལ་ཆོས་དང་ལྡན་པའི་གཏམ་བྱའོ་ཞེས་བྱ་བ་ནི། གལ་ཏེ་ཁྱིམ་པ་ཞིག་གཙུག་ལག་ཁང་དུ་འོངས་ན་ཁྱིམ་པ་དེ་ལ་དགེ་སློང་གིས་ཆོས་དང་ལྡན་པའི་གཏམ་བྱ་བའོ། །གྲོང་མཐའ་བས་ནི་དེར་མི་འོང་ན་ཀུན་དགའ་བར་འགྱུར་བར་ཅི་ནུས་པས་བཟླུག་པར་བྱའོ་ཞེས་བྱ་བ་ནི། དགེ་སློང་གྲོང་མཐའ་པ་གཙུག་ལག་ཁང་ན་གནས་པས་ནི་གཙུག་ལག་ཁང་དེར་ཁྱིམ་པ་མི་འོང་ན་དེའི་ཚེ་ཀུན་དགའ་བར་འགྱུར་བ་ཟས་དང་སྐོམ་ལ་སོགས་པ་ཅི་ནུས་པས་ནུས་པ་དང་མི་འགལ་བར་ནུས་པའི་མཐུ་དང་མཐུན་པར་བཟླུག་པར་བྱ་བ་སྲུལ་བར་བྱའོ་ཞེས་བྱ་བའི་ཐ་ཚིག་གོ །ཆུ་དང་སྟན་བསྟབས་པར་བྱའོ་ཞེས་བྱ་བ་ནི། དགོན་པ་པས་ཀྱང་འོངས་པ་ལ་ཆུ་དང་སྟན་ཙམ་ཡང་བསྟབས་པར་བྱའོ་ཞེས་བྱ་བའོ། །ཕྱག་དར་དང་མལ་དང་སྟན་བཤམས་པ་དང༌། ཆུ་གཞག་པ་དང་བྲིམ་པ་དང་ཟན་དྲང་བ་ནི་གསར་བུས་བྱའོ་ཞེས་བྱ་བ་ནི། ཕྱག་དར་ལ་སོགས་པ་གསར་བུས་བྱའོ་ཞེས་བྱ་བར་སྦྱར་རོ། །གནས་ཁང་ལ་སོགས་པའི་ཕྱག་དར་ཡང་གསར་བུས་བྱའོ། །དགེ་འདུན་གྱི་བྲང་དུ་མལ་སྟན་བཤམས་པ་ཡང་གསར་བུ་དེ་ཉིད་ཀྱིས་བྱའོ། །ཆུ་གཞག་པ་ཡང་དེ་ཉིད་ཀྱིས་བྱའོ། །ཤིང་ཐོག་ལ་སོགས་པ་བྲིམ་པ་དང༌། ལྷུང་བཟེད་ལ་སོགས་པར་ཟན་དྲང་བ་ཡང་གསར་བུས་བྱ་སྟེ། དགེ་སློང་རྣམས་གང་དང་གང་དུ་སོན་པ་དེ་དང་དེར་དེ་ལྟར་བྱ་བ་ཡིན་ནོ། །གཡོག་འཁོར་གྱི་བྱ་བ་མི་མཐུན་པ་གལ་ཏེ་རང་དང་གཞན་ལ་གནོད་པར་མི་འགྱུར་བ་ནི་ཅི་བདེར་གཞག་གོ་ཞེས་བྱ་བ་ནི། དེ་བཏང་སྙོམས་སུ་གཞག་པར་བྱའོ་ཞེས་བྱ་བར་སྦྱར་རོ། །གཡོག་འཁོར་གྱི་བྱ་བ་མི་མཐུན་པ་ཞེས་བྱ་བ་ནི། གཡོག་འཁོར་གྱི་རྣམ་པར་གཞག་པ་ཚུལ་དང་མཐུན་པ་མ་ཡིན་པ་རྐྱེན་དུ་མི་འབབ་པ་སྟེ། ལྷ་དྲག་པོའི་རྟེན་གཟུགས་པ་ལ་སོགས་པའོ། །གལ་ཏེ་རང་དང་གཞན་ལ་གནོད་པར་མི་འགྱུར་བ་ཞེས་བྱ་བ་ནི། བྱ་བ་དེས་དགེ་སློང་བདག་ཉིད་ལ་ཡང་གནོད་པའི་རྒྱུར་མི་འགྱུར་ལ། ཡུལ་མི་གཞན་དག་ལ་ཡང་གནོད་པའི་རྒྱུར་མི་འགྱུར་བའོ། །ཅི་བདེར་གཞག་གོ་ཞེས་བྱ་བ་ནི་བཏང་སྙོམས་སུ་གཞག་པར་བྱ་བའོ། །གལ་ཏེ་དེ་ལྟར་ན་ནུས་ཀྱང་དེ་དག་རྒྱུན་བཅད་ལ་ཆོས་དང་ལྡན་པར་བསྐྱེད་ནས་དེས་གྲོས་གདབ་པར་བྱའོ་ཞེས་བྱ་བ་ནི། གལ་ཏེ་ཇི་སྟེ་བྱ་བ་དེ་ཁས་བླངས་པ་ལྟ་ན་བདག་
དང་གཞན་ལ་གནོད་པ་དེ་ལྟར་འགྱུར་ཞིང༌། བདག་དང་གཞན་ལ་གནོད་པ་ལྟ་ན་ནུས་སུ་ཟིན་ཀྱང་གཡོག་འཁོར་གྱི་བྱ་བ་མི་མཐུན་པ་དེ་དག་གིས་བྱ་བ་རྒྱུན་བཅད་ལ། གཡོག་འཁོར་གྱི་བྱ་བ་ཆོས་དང་ལྡན་པ་གཙུག་ལག་ཁང་དུ་ཕྲེང་བ་དགོད་པ་དང་ལོ་ལྔའི་དུས་སྟོན་ལ་སོགས་པ་གཞན་དག་བྱ་བའི་སེམས་བསྐྱེད་ནས་བྱ་བ་དེ་ཉིད་དེས་གཡོག་འཁོར་ལ་གྲོས་གདབ་པར་བྱ་བའོ། །ཡང་ན་བསྐྱེད་ནས་ཞེས་བྱ་བ་ནི། རྣམ་པར་བཞག་ནས་སོ། །དེས་ཞེས་བྱ་བ་ནི། ཆོས་དང་ལྡན་པའི་བྱ་བ་དེས་སོ། །གྲོས་གདབ་པར་བྱའོ་ཞེས་བྱ་བ་ནི། ཁྱེད་ཀྱིས་ད་ཕྱིན་ཆད་ཆོས་དང་ལྡན་པའི་བྱ་བ་དེ་བྱའོ་ཞེས་ཁོང་དུ་ཆུད་པར་བྱ་བའོ། །དེའི་གཞི་ལས་གཡོག་འཁོར་མི་དགའ་ཞིང་འཕོ་བ་ལྟ་ན་ཕྱིར་བསྡུ་བར་བྱའོ་ཞེས་བྱ་བ་ནི། གལ་ཏེ་ཆོས་དང་ལྡན་པའི་བྱ་བ་ལ་རྣམ་པར་གཞག་པ་དེའི་གཞི་ལས་གཡོག་འཁོར་གྱི་སེམས་མི་དགའ་ཞིང་ཡིད་མི་བདེ་བར་གྱུར་ཏམ། གཙུག་ལག་ཁང་གི་གནས་དེ་ནས་གྲོང་གཞན་དུ་འཕོ་ཞིང་སྐྱ་བ་ལྟ་ན། གཡོག་འཁོར་དེ་ཅི་ནས་ཀྱང་མི་དགའ་བ་དང་འཕོ་བ་དེ་གཉིས་སུ་ཡང་མི་འགྱུར་ལ་བྱ་བ་མི་མཐུན་པ་དེ་ཡང་རྒྱུན་གཅོད་པར་འགྱུར་བ་དེ་ལྟར་སྦྱིན་པ་དང་སྙན་པར་སྨྲ་བ་ལ་སོགས་པས་ཕྱིར་བསྡུ་བར་བྱ་བའོ། །མི་ནུས་པ་ཉིད་ཡིན་ན་གཞན་དུ་འགྲོ་བར་བྱའོ་ཞེས་བྱ་བ་ནི། གཡོག་འཁོར་གྱི་བྱ་བ་མི་མཐུན་པ་དེ་རྒྱུན་གཅོད་པར་མི་ནུས་པ་ཉིད་ཡིན་ན་བདག་ཉིད་གནས་གཞན་དུ་འགྲོ་བར་བྱ་བའོ། །དེའི་རྐྱེན་གྱིས་རྩོད་ཅིང་སྨྲ་བར་མི་བྱའོ་ཞེས་བྱ་བ་ནི། དགེ་སློང་དེས་གཙུག་ལག་ཁང་གཞན་དུ་འགྲོ་བར་བྱའི་བྱ་བ་མི་མཐུན་པ་རྒྱུན་གཅད་པ་དང༌། ཆོས་དང་ལྡན་པའི་བྱ་བ་ལ་རྣམ་པར་གཞག་པ་དེའི་རྐྱེན་གྱིས་གཡོག་འཁོར་མི་དགའ་ཞིང་འཕོ་བ་ཕྱིར་བསྡུས་ཀྱང་མི་བཏུབ་ན་ཡང་རྒྱུ་དེས་གཡོག་འཁོར་དང་ལྷན་ཅིག་རྩོད་ཅིང་འཐབ་པའི་ཚིག་སྨྲ་བར་མི་བྱ་བའོ། །གལ་ཏེ་དགེ་འདུན་གྱི་ཀུན་དགའ་ར་བར་རྐུན་པོ་ལ་སོགས་པས་གནོད་པར་བྱེད་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་དགེ་འདུན་གྱི་ཀུན་དགའ་ར་བར་གནོད་པ་བྱེད་ན་ཅི་ནས་ཀྱང་དེ་ཉིད་འཛིན་དུ་གཞུག་པའི་ཕྱིར་འཛིན་པ་བཏང་བ་དེ་ལྟར་བྱའོ་ཞེས་བྱ་བ་ནི། དགེ་འདུན་གྱི་ཀུན་དགའ་ར་བ་གཙུག་ལག་ཁང་དུ་རྐུན་པོ་ལ་སོགས་པས་གནོད་པ་བྱེད་པས་ཉེས་པ་བྱེད་ན།
གཡོག་འཁོར་གྱིས་ཅི་ནས་ཀྱང་དེ་ཉིད་འཛིན་དུ་གཞུག་པ་མངོན་སུམ་དུ་ཟིན་པས་ཅི་ནས་ཀྱང་ཅུང་ཟད་ཀྱང་སྨྲ་མི་ནུས་པར་འགྱུར་བར་བྱ་བའི་ཕྱིར་འཛིན་པ་བཏང་བདེ་ལྟར་ཐབས་བྱའོ་ཞེས་བྱ་བའི་ཐ་ཚིག་གོ །ཇི་སྟེ་དེ་ཉིད་འཛིན་དུ་གཞུག་པའི་ཕྱིར་འཛིན་པ་མི་འགྲོ་ན་ཡང་ཇེ་སྒོ་ཉིད་དུ་ཡུས་རྩོད་པ་བཏང་ལ། ཡུས་སུ་འགྱུར་བར་བསྒྲུབ་པ་བཏང་བའི་ཕྱིར། མི་འགྲོ་ན་བ་ཅོལ་དུ་སུ་ལ་ཡང་མི་བརྗོད་པར་གཞོན་ནུ་དང་མཛའ་བཤེས་དང་ཞང་བློན་དང་བཀྲབས་པ་དང༌། ཞབས་འབྲིང་གཉུག་མ་དག་ལ་སྐད་སྦྱར་ཏེ། གྲ་དག་པར་ཐུལ་འོག་ཏུ་གཞུག་པར་བྱའོ་ཞེས་བྱ་བ་སྨྲས་ཏེ། གལ་ཏེ་གཡོག་འཁོར་སུ་ཡང་ཐབས་གང་གིས་ཀྱང་འཛིན་དུ་མི་འགྲོ་ན་དེའི་ཚེ་གནོད་པ་བྱེད་པར་འཛིན་པའི་གཡོག་འཁོར་མི་འགྲོ་ཡང་གྲ་དག་པར་ཐུལ་འོག་ཏུ་གཞུག་པར་བྱའོ་ཞེས་བྱ་བར་སྦྱར་རོ། །ཇི་ལྟར་ཞེ་ན། བ་བཅོལ་དུ་སུ་ལ་ཡང་མི་བརྗོད་པར་ཞེས་བྱ་བ་ལ་སོགས་པ་སྨྲས་ཏེ། བབ་ཅོལ་དུ་ཞེས་བྱ་བ་ནི། སོ་སོར་མ་བརྟགས་པར་རོ། །སུ་ལ་ཡང་ཞེས་བྱ་བ་ནི། གཡོག་འཁོར་ལ་སོགས་པ་སུ་ཡང་ངོ༌། །མི་བརྗོད་པར་ཞེས་བྱ་བ་ནི། མི་སྨྲ་བར་རོ། །འདི་སྐད་བསྟན་ཏེ། ཅི་ནས་ཀྱང་གཡོག་འཁོར་གཞན་གྱིས་མི་ཐོས་པར་བདག་འབའ་ཞིག་གིས་བྱའོ་ཞེས་དེ་ལྟར་གསང་ཆེན་བྱ་ཞིང༌། བབ་ཅོལ་དུ་གཡོག་འཁོར་སུ་ལ་ཡང་བརྗོད་པར་མི་བྱའོ་ཞེས་བསྟན་པ་ཡིན་ནོ། །གཞོན་ནུ་ཞེས་བྱ་བ་ནི། རྒྱལ་ཚབ་ཏུ་དབང་བསྐུར་བའོ། །མཛའ་བ་ཤེས་ཞེས་བྱ་བ་ནི། རྒྱལ་པོའིའོ། །ཞང་བློན་ཞེས་བྱ་བ་ནི་བློན་པོའོ། །བཀྲབས་པ་ཞེས་བྱ་བ་ནི། རྒྱལ་པོའི་གདུང་ལ་གཏོགས་པ་སྡིག་པའི་ཆོས་བསལ་བ་མཆོད་པའོ། །ཞབས་འབྲིང་གཉུག་མ་ཞེས་བྱ་བ་ནི། ཉིན་མཚན་གྱི་ཐུན་ཐམས་ཅད་དུ་རྒྱལ་པོའི་ཞབས་འབྲིང་བྱེད་པའོ། །ཡང་ན་རྒྱལ་པོའི་ཞབས་ཀྱིས་འཚོ་བའི་གནང་ཆེན་ནོ། །དེ་དག་ལ་སྐད་སྦྱར་ཏེ་ཞེས་བྱ་བ་ནི། གཞོན་ནུ་ལ་སོགས་པ་དེ་དག་ལ་གཞི་དེ་གོ་བར་བྱས་ཏེའོ། །གྲ་དག་བར་ཞེས་བྱ་བ་ནི། གྲ་གང་དུ་སྐྱེ་བོ་ཡོངས་ལ་མི་རིགས་པའི་ཆད་པས་མི་གཅོད་པའི་གྲ་དེ་ནི་གྲ་དག་པ་སྟེ་དེར་རོ། །ཐུལ་འོག་ཏུ་གཞུག་པར་བྱའོ་ཞེས་བྱ་བ་ནི། ཕམ་པར་བྱའོ་ཞེས་བྱ་བའི་ཐ་ཚིག་གོ །རབ་ཏུ་བྱུང་བའི་གཞིའི་སྐབས་ལས་དགེ་སློང་གི་སྐབས་སྨྲས་ཟིན་ཏོ།། །།
ད་ནི་དགེ་སློང་མའི་སྐབས་བརྗོད་པར་བྱ་སྟེ། དེ་ལ་སྐྱེས་པའི་རབ་ཏུ་འབྱུང་བ་དང་རྫོགས་པར་བསྙེན་པའི་ཆོ་ག་བསྟན་པ་གང་ཡིན་པ་དེ་ཉིད་བུད་མེད་ཀྱི་ཡིན་པར་ཡང་ཁས་བླང་ངོ༌། །བྱ་བྲག་ཏུ་ནི་འདི་བརྗོད་པར་བྱ་སྟེ། དགེ་སློང་གི་གནས་སུ་དགེ་སློང་མའོ་ཞེས་བྱ་བ་ནི། དགེ་སློང་རབ་ཏུ་འབྱུང་བ་དང་རྫོགས་པར་བསྙེན་པར་བྱེད་པའི་སྐབས་གང་དུ་དགེ་སློང་ཞེས་སྨོས་པ་དེར་དགེ་སློང་མ་ཞེས་བརྗོད་པར་བྱ་སྟེ། དཔེར་ན་དགེ་སློང་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་བྱ་བ་དེར། དགེ་སློང་མ་འགའ་ཞིག་ལ་མཁན་པོ་ཉིད་དུ་གནས་པ་ལའོ་ཞེས་བྱ་བ་ལྟ་བུ་དང༌། དེ་བཞིན་དུ་རང་གི་དགེ་བསྙེན་ཉིད་དུ་ཉེ་བར་བསྒྲུབས་ནས་དགེ་འདུན་ལ་ཞུ་བའི་དགེ་སློང་ལ་གཏད་པར་བྱའོ་ཞེས་བྱ་བ་དེ་ཡང༌། དགེ་སློང་མ་དགེ་འདུན་ལ་ཞུ་བའི་དགེ་སློང་མ་ལ་གཏད་པར་བྱའོ་ཞེས་བྱ་བ་ལྟ་བུར་ཤེས་པར་བྱ་སྟེ། གཞན་དག་ལ་ཡང་དེ་བཞིན་དུ་སྦྱར་བར་བྱའོ། །ཅི་དགེ་སློང་གི་གནས་ཐམས་ཅད་དུ་དགེ་སློང་མ་ཞེས་བརྗོད་པར་བྱ་བའམ། འོན་ཏེ་ཁ་ཅིག་ཏུ་ཞེ་ན། དེའི་ཕྱིར་རབ་ཏུ་འབྱུང་བ་ཐམས་ཅད་ཀྱིའོ་ཞེས་བྱ་བ་སྨྲས་ཏེ། རབ་ཏུ་འབྱུང་བའི་ཡུལ་ལ་རེ་ཞིག་མཁན་པོ་ལ་སོགས་པ་དགེ་སློང་ཐམས་ཅད་ཀྱི་གནས་སུ་དགེ་སློང་མ་ཞེས་བརྗོད་པར་རིག་པར་བྱ་བའོ། །རྫོགས་པར་བསྙེན་པ་ལ་ཡང་ཇི་ལྟར་ཤེས་པར་བྱ་ཞེ་ན། དེའི་ཕྱིར་རྫོགས་པར་བསྙེན་པ་ལ་ནི་དེ་གསོལ་བ་ལ་སོགས་པའི་ལས་བྱེད་པ་ལས་གཞན་པའི་འོ་ཞེས་བྱ་བ་སྨྲས་ཏེ། རྫོགས་པར་བསྙེན་པ་ནི་དགེ་སློང་ཞེས་བྱ་བའི་གནས་ཐམས་ཅད་དུ་དགེ་སློང་མ་ཞེས་བརྗོད་པར་བྱ་སྟེ། འདི་ལྟར་དེ་གསོལ་བ་ལ་སོགས་པའི་ལས་བྱེད་པ་ཞེས་བྱ་བ་རྫོགས་པར་བསྙེན་པ་གསོལ་བ་ལ་སོགས་པའི་ལས་བྱེད་པའི་དགེ་སློང་སྨོས་པ་གང་ཡིན་པའི་དགེ་སློང་ལས་བྱེད་པ་དེ་མ་གཏོགས་པ་དེ་ལས་གཞན་པའི་གནས་སུ་དཔེར་ན། གསང་སྟེ་སྟོན་པ་དང༌། མཁན་པོ་ལ་སོགས་པ་དགེ་སློང་ཞེས་སྨོས་པ་དེར་དགེ་སློང་མ་ཞེས་བརྗོད་པར་བྱའོ། །རྫོགས་པར་བསྙེན་པ་གསོལ་བའི་སྔ་རོལ་ཕན་ཆད་དུ་དགེ་སློང་མའི་དགེ་འདུན་གྱི་དབུས་སུ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པ་ལ་སོགས་པ་ནི། དགེ་སློང་མ་ལས་བྱེད་པ་འབའ་ཞིག་གིས་བྱའོ། །ཅི་དགེ་སློང་མ་རྫོགས་པར་བསྙེན་པར་བྱ་བ་ལས་
བྱེད་པ་མ་གཏོགས་པ་དགེ་སློང་གི་གནས་སུ་དགེ་སློང་མ་བརྗོད་པར་བྱ་བའི་བྱེ་བྲག་དེ་ཁོ་ནར་ཟད་དམ་གཞན་ཡང་ཡོད་ཅེ་ན། ཡོད་དེ་དེའི་ཕྱིར་འདིར་དགེ་འདུན་གྱིས་བསྣུན་པར་བྱའོ་ཞེས་བྱ་བ་སྨྲས་ཏེ། རྫོགས་པར་བསྙེན་པ་གསོལ་བ་ལ་སོགས་པའི་སྐབས་འདིར་དགེ་སློང་གི་དགེ་འདུན་གྱིས་བསྣན་པར་བྱའོ་ཞེས་བྱ་བར་རིག་པར་བྱའོ། །འདི་སྐད་བསྟན་ཏེ། གཉི་གའི་དགེ་འདུན་འདུས་པ་ལ་ལས་བྱེད་པའི་དགེ་སློང་གིས་གསོལ་བ་ལ་སོགས་པའི་ལས་བྱའོ་ཞེས་བྱ་བའི་ཐ་ཚིག་གོ །བྱེ་བྲག་གཞན་ཡང་བསྟན་པའི་ཕྱིར། བར་ཆད་དྲི་བ་དགེ་སློང་མས་བསྒྲིབས་པ་ལ་བྱའོ་ཞེས་བྱ་བ་སྨྲས་ཏེ། བར་ཆད་དྲི་བའི་ཚེ་ལན་གདབ་པའི་ཚིག་གང་ཡིན་པ་དེ་དག་དགེ་སློང་མ་གཞན་ཅིག་མདུན་དུ་བཞག་པས་ལན་གདབ་ཅིང་དེའི་ཚིག་གི་རྗེས་སུ་དེ་ཉིད་ཟློས་སུ་གཞུག་གོ །དགེ་སློང་མ་རྫོགས་པར་བསྙེན་པར་བྱ་བ་ལ། དགེ་འདུན་གྱི་དབུས་སུ་བར་ཆད་དྲི་བ་ལན་གཉིས་བྱ་དགོས་ཏེ། གཅིག་ནི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའི་དུས་ན་དགེ་སློང་མའི་དགེ་འདུན་འབའ་ཞིག་གི་དབུས་སུ་ལས་བྱེད་པའི་དགེ་སློང་མས་དྲི་བའོ། །གཉིས་པ་ནི་རྫོགས་པར་བསྙེན་པར་བྱ་བའི་དུས་ན། གཉི་གའི་དགེ་འདུན་གྱི་དབུས་སུ་ལས་བྱེད་པའི་དགེ་སློང་གིས་དྲི་སྟེ། དེ་གཉི་གར་ཡང་ཆོ་ག་དེ་བཞིན་བྱའོ། །སྔར་གསང་སྟེ་སྟོན་པའི་དགེ་སློང་མས་ལྐོག་ཏུ་དྲི་བའི་དུས་ན་ནི་དེ་ལྟར་བྱ་མི་དགོས་སོ། །བུད་མེད་ལ་ནི་དགེ་སློང་མ་ཞེས་བྱ་བའི་ཚིག་གཞན་ཡོད་དོ་ཞེས་བྱ་བ་ནི། བུད་མེད་ལ་ནི་དགེ་ཚུལ་མ་ཉིད་དང་དགེ་སློང་མ་ཉིད་ལས་དགེ་སློབ་མ་ཞེས་བྱ་བའི་ཚིག་གཞན་གསུམ་པ་འདི་ཡོད་པར་རིག་པར་བྱའོ། །གནས་པ་ཁོ་ན་ལའོ་ཞེས་བྱ་བ་ནི། དགེ་སློབ་མ་ཉིད་ཀྱི་ཚིག་དེ་ཡང་དགེ་སློང་མ་འགའ་ཞིག་ལ་མཁན་པོ་ཉིད་དུ་གནས་པ་ཁོ་ན་ལ་ཡོད་པའོ། །འདི་སྐད་བསྟན་ཏེ། ཇི་ལྟར་དགེ་ཚུལ་མ་ཉིད་དང་དགེ་སློང་མ་ཉིད་ཀྱི་ཚིག་མཁན་མོ་དང་བཅས་པ་ལ་ཡོད་པར་འགྱུར་བ་བཞིན་དུ་འདི་ཡང་དེ་བཞིན་ཏེ། དེའི་ཕྱིར་དགེ་སློང་མ་འབའ་ཞིག་ལ་མཁན་མོ་ཉིད་དུ་གནས་པ་ལ་དག་སློབ་མ་ཉིད་ཡོད་པར་འགྱུར་བར་རིག་པར་བྱའོ། །དགེ་སློབ་མ་ཉིད་ཀྱི་ཚིག་གཞན་དེ་གནས་སྐབས་གང་དུ་སྦྱིན་པར་བྱ་ཞིང་དེ་དུས་ཇི་སྲིད་སྤྱད་པར་བྱ་དགོས་ཤེ་ན། དེའི་ཕྱིར་དགེ་ཚུལ་མ་ཉིད་
དང་དགེ་སློབ་མ་ཉིད་ཀྱི་བར་སྐབས་སུ་སྤྱོད་པའི་དུས་འདི་ལོ་གཉིས་སོ་ཞེས་བྱ་བ་སྨྲས་ཏེ། དགེ་སློབ་མ་ཉིད་ཀྱི་ཚིག་གཞན་དེ་ནི་དགེ་ཚུལ་མ་ཉིད་དང་དགེ་སློང་མ་ཉིད་ཀྱི་བར་སྐབས་སུ་སྦྱིན་ནོ། །དེ་སྤྱད་པའི་དུས་ནི་ལོ་གཉིས་སོ། །ལོ་གཉིས་ལས་ལྷག་ན་ཡང༌། དེ་ཕྱིན་ཆད་བརྟུལ་ཞུགས་དེ་ཉམས་པར་ཡང་མི་འགྱུར་ལ། དེ་ཕྱིན་ཆད་མི་བསྲུང་བར་བྱ་བ་ཡང་མ་ཡིན་ནོ། །འོན་ཀྱང་དུས་ངེས་པར་མཛད་པས། དུས་དེ་སྲིད་དུ་ངེས་པ་ཁོ་ནར་བསྲུང་བར་བྱ་བ་ཉིད་ཡིན་ཏེ། དེ་སྲིད་དུ་དེ་ཡོངས་སུ་རྫོགས་པར་མ་གྱུར་གྱི་བར་དུ་རྫོགས་པར་བསྙེན་པར་མི་བྱའོ་ཞེས་བྱ་བའི་ཐ་ཚིག་གོ ། དེ་གཉིས་ཀྱི་བར་སྐབས་སུ་དགེ་སློང་མ་ཉིད་ཀྱིས་ཚིག་གཞན་དེ་སྦྱིན་པར་བྱའོ་ཞེས་སྨྲས་ན། དེ་གཉིས་ཀྱི་བར་སྐབས་ལ་ཡང་དུས་སུ་གྱུར་པ་རིང་ཞིག་ཡོད་པས་དུས་གང་གི་ཚེ་ན། དགེ་སློབ་མ་ཉིད་ཀྱི་སྡོམ་པ་སྐྱེ་ཞེ་ན། དེའི་ཕྱིར་རྫོགས་པར་བསྙེན་པའི་དུས་ཀྱི་དང་པོར་དེས་མ་ལོན་པའི་དང་པོ་ལ་སྐྱེའོ་ཞེས་བྱ་བ་སྨྲས་ཏེ། རྫོགས་པར་བསྙེན་པའི་དུས་ནི། རྫོགས་པར་བསྙེན་པའི་དུས་ཏེ་དེའི་དང་པོ་རྩོམ་པ་ནི། རྫོགས་པར་བསྙེན་པའི་དུས་ཀྱི་དང་པོའོ། །དེ་ཡང་འདི་ལྟ་སྟེ། གཞོན་ནུ་མའི་ནི་ལོ་ཉི་ཤུ་ལོན་ཕ་ཉིད་དོ། །ཁྱིམ་སོ་བཟུང་བའི་ལོ་བཅུ་གཉིས་ལོན་པ་ཉིད་དོ། །དེ་མ་ལོན་པ་ཞེས་བྱ་བ་ནི། དགེ་སློབ་མ་ལོ་གཉིས་སྤྱད་པའི་དུས་དེས་རྫོགས་པར་བསྙེན་པའི་དུས་ཀྱི་དང་པོར་མ་ལོན་པ་སྟེ། འདི་ལྟ་སྟེ། གཞོན་ནུ་མའི་ལོ་བཅོ་བརྒྱད་ལོན་པ་ཉིད་དོ། །ཁྱིམ་སོ་བཟུང་བ་ནི་ལོ་བཅུ་ལོན་པ་ཉིད་དོ། །ལོ་གཉིས་ཀྱི་དུས་དེས་རྫོགས་པར་བསྙེན་པའི་དུས་ཀྱི་དང་པོར་མ་ལོན་པ་ནི། རྫོགས་པར་བསྙེན་པའི་དུས་ཀྱི་དང་པོར་དེས་མ་ལོན་པའོ། །རྫོགས་པར་བསྙེན་པའི་དུས་ཀྱི་དང་པོར་དེས་མ་ལོན་པའི་དུས་དེའི་ཡང་དང་པོ་ནི། རྫོགས་པར་བསྙེན་པའི་དུས་ཀྱི་དང་པོར་དེས་མ་ལོན་པའི་དང་པོ་སྟེ། དེས་ནི་དགེ་སློབ་མ་ཉིད་དང་པོ་སྐྱེ་བའི་དུས་ཡིན་པར་རིག་པར་བྱའོ། །དེ་ལ་དང་པོར་ཞེས་བྱ་བའི་སྒྲ་སྔ་མས་ནི། གཞོན་ནུ་མའི་ལོ་ཉི་ཤུ་ལོན་པ་ལ་སོགས་པ་བཟུང་ངོ༌། །ཁྱིམ་སོ་བཟུང་བའི་ནི་ལོ་བཅུ་གཉིས་ལོན་པ་ལ་སོགས་པ་བཟུང་ངོ༌། །དང་པོ་ལ་ཞེས་བྱ་བའི་སྒྲ་གཉིས་པས་ནི། གཞོན་ནུ་མའི་ནི་ལོ་བཅོ་བརྒྱད་ལོན་པ་ལ་སོགས་པ་ཉིད་བཟུང་ངོ༌། །ཁྱིམ་སོ་བཟུང་བའི་ནི་ལོ་བཅུ་
ལོན་པ་ལ་སོགས་པ་ཉིད་བཟུང་ངོ༌། །མདོར་བསྡུས་ན་འདི་སྐད་བསྟན་ཏེ། རྫོགས་པར་བསྙེན་པའི་དུས་ཀྱི་མདུན་དུ་ལོ་གཉིས་དགེ་སློང་མ་ཉིད་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི། དགེ་སློང་མའི་རྣམ་པར་འབྱེད་པ་ལས་ཁྱིམ་སོ་བཟུང་བ་གང་ཡིན་པ་ནི་ལོ་བཅུ་ལོན་ནའོ། །གཞོན་ནུ་མར་གྱུར་པ་ནི་ལོ་བཅོ་བརྒྱད་ལོན་པ་སྟེ། དེ་གཉིས་ལ་ལོ་གཉིས་སུ་དགེ་སློབ་མའི་སྡོམ་པ་སྦྱིན་པར་བྱའོ་ཞེས་གསུངས་པ་ཡིན་ནོ། །རྫོགས་པར་བསྙེན་པའི་དུས་ལོ་ཉི་ཤུ་ལོན་པ་ལ་སོགས་པ་ཡིན་པར་ཁས་བླངས་པ་ལ་བུད་མེད་རྫོགས་པར་བསྙེན་པར་བྱ་བའི་བྱེ་བྲག་བསྟན་པའི་ཕྱིར། ཁྱིམ་སོ་བཟུང་བ་རྫོགས་པར་བསྙེན་པར་བྱ་བའི་ལོ་རྣམས་ཀྱི་དང་པོ་ནི་བཅུ་གཉིས་ཉིད་དོ་ཞེས་བྱ་བ་སྨྲས་ཏེ། བུད་མེད་ཁྱིམ་སོ་བཟུང་བ་བགག་མར་བཏང་བ་ཡིན་ན། དེའི་རྫོགས་པར་བསྙེན་པར་བྱ་བའི་དུས་དེའི་ལོ་རྣམས་ཀྱི་དང་པོ་ནི་ལོ་བཅུ་གཉིས་ལོན་པ་ཉིད་དོ། །འདི་སྐད་བསྟན་ཏེ། བུད་མེད་ཁྱིམ་སོ་བཟུང་བ་ནི་ལོ་བཅུ་གཉིས་ལོན་པ་ཡན་ལག་རྫོགས་པར་བསྙེན་པར་བྱའོ། །ལོ་བཅུ་གཉིས་མ་ལོན་པ་མན་ཆང་ནི་ཁྱིམ་སོ་བཟུང་དུ་ཟིན་ཀྱང་རྫོགས་པར་མི་བྱའོ། །དེ་ཇི་ལྟར་སྐྱེས་ཤེ་ན། དེའི་ཕྱིར། སྦྱིན་པ་ལས་སྐྱེའོ་ཞེས་བྱ་བ་སྨྲས་ཏེ། དགེ་སློབ་མ་ཉིད་དོ། །སུས་སྦྱིན་པ་ལས་ཤེ་ན། དེའི་ཕྱིར་དགེ་སློང་མའི་དགེ་འདུན་གྱིས་སོ་ཞེས་བྱ་བ་སྨྲས་སོ། །ཇི་ལྟར་སྦྱིན་པར་བྱ་ཞེ་ན། དེའི་ཕྱིར་སྦྱིན་པ་ནི་བསླབ་པའི་སྡོམ་པ་ཞེས་བྱ་བ་སྨྲས་ཏེ། བསླབ་པའི་སྡོམ་པ་ཞེས་བྱ་བའི་ཐ་ཚིག་དང་ལྡན་པ་འདིས་སྦྱིན་པར་བྱའོ། །དགེ་སློབ་མ་ཉིད་ཅེས་བྱ་བ་འདིས་ནི་མ་ཡིན་ནོ། །དེ་ལྟར་ན་འདུལ་བ་ལས་ཀྱང་འདི་སྐད་འབྱུང་སྟེ། དགེ་ཚུལ་མ་མིང་འདི་ཞེས་བགྱི་བས་དགེ་སློང་མའི་དགེ་འདུན་ལས་ལོ་གཉིས་སུ་ཆོས་དྲུག་དང་རྗེས་སུ་མཐུན་པའི་ཆོས་དྲུག་ལ་བསླབ་པའི་སྡོམ་པ་གསོལ་ན་ཞེས་བྱ་བ་ལ་སོགས་པའི་སྔགས་ལས་འབྱུང་བ་ཡིན་ནོ། །དགེ་སློང་མའི་བསླབ་པ་རྣམས་ཡང་དག་པར་བླང་བའི་ཕྱིར་སྔོམ་པ་ནི་བསླབ་པའི་སྔོམ་པ་ཞེས་བྱའོ། །དེའི་འོག་ཏུ་བསླབ་པ་བརྗོད་པར་བྱའོ་ཞེས་བྱ་བ་ནི། བསླབ་པའི་སྡོམ་པ་བྱིན་པ་དེའི་འོག་ཏུ་ལས་བྱེད་པ་མོས་བསླབ་པ་བརྗོད་པར་བྱ་བའོ། །དགེ་སློབ་མའི་བསླབ་པ་ནི་ཆོས་དྲུག་དང་རྗེས་སུ་མཐུན་པའི་ཆོས་དྲུག་སྟེ། དེ་ལ་ཆོས་དྲུག་ནི།
གཅིག་པུ་ལམ་དུ་འགྲོ་མི་བྱ། །ཆུ་བོའི་ཕ་རོལ་རྒྱལ་མི་བྱ། །སྐྱེས་པ་ལ་ནི་རེག་མི་བྱ། །སྐྱེས་པ་དང་ནི་འདུག་མི་བྱ། །སྨྱན་དུ་འགྱུར་པ་མི་བྱ་ཞིང༌། །ཁ་ན་མ་ཐོ་བཅབ་མི་བྱ། །ཞེས་བྱ་བདག་གོ །རྗེས་སུ་མཐུན་པའི་ཆོས་དྲུག་ནི། །གསེར་ལ་གཟུང་བར་མི་བྱ་ཞིང༌། མདོམས་ཀྱི་སྤུ་ནི་བྲེག་མི་བྱ། །ས་ནི་བརྐོ་བར་མི་བྱ་སྟེ། །རྩ་སྔོན་དག་ཀྱང་གཅད་མི་བྱ། །བྱིན་ལེན་མ་བྱས་བཟའ་མི་བྱ། །སོགས་འཇོག་བྱས་པ་བཟའ་མི་བྱ། །ཞེས་བྱ་བ་དག་གོ །ཅི་དགེ་སློབ་མ་ཉིད་སྤྱད་པའི་འོག་ཁོ་ནར་དེ་བསྙེན་བར་རྫོགས་པར་བྱའམ་ཞེ་ན་དེའི་ཕྱིར། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་ཐོབ་པར་བསྙེན་པར་རྫོགས་པར་མི་འགྱུར་རོ་ཞེས་བྱ་བ་སྨྲས་ཏེ། ཚངས་པ་ཞེས་བྱ་བའི་སྒྲ་ནི་མྱ་ངན་ལས་འདས་པ་ལ་བྱའོ། །དེའི་དོན་དུ་སྤྱོད་པ་ནི་ཚངས་པར་སྤྱོད་པ་སྟེ་བསྙེན་པར་རྫོགས་པའོ། །དེ་ལ་ཉེ་བར་གནས་པ་ནི་ཉེ་བར་སྐྱེད་པར་བྱེད་པ་ལ་ཉེ་བར་གནས་པར་བྱ་བའི་ཕྱིར། སྡོམ་པ་ནི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྟེ། ལུས་ལ་བསྙེན་པར་རྫོགས་པ་སྐྱེ་བའི་སྐལ་བ་ཅན་དུ་འགྱུར་བར་ངེས་པ་ནི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པའོ། །གང་གིས་དེ་མ་ཐོབ་པ་དེ་ནི་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་མ་ཐོབ་པ་སྟེ། བསྙེན་པར་རྫོགས་པར་འདོད་པ་གང་གིས་དེ་ནི་མ་ཐོབ་པ་དེ་ལ་ནི་བསྙེན་པར་རྫོགས་པར་མི་འགྱུར་རོ། །གང་གི་ཚེ་དེ་སྦྱིན་པར་བྱ་ཞེ་ན་དེའི་ཕྱིར། །གསང་སྟེ་སྟོན་པའི་འོག་ཏུ་དགེ་འདུན་གྱིས་དེ་སྦྱིན་པར་བྱའོ་ཞེས་བྱ་བ་སྨྲས་ཏེ། བསྙེན་པར་རྫོགས་པའི་ཆེད་དུ་གསང་སྟེ་སྟོན་པའི་འོག་ཏུ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་དེ་སྦྱིན་པར་བྱའོ། །སུས་ཤེ་ན། དེའི་ཕྱིར་དགེ་འདུན་གྱིས་ཞེས་བྱ་བ་སྨྲས་ཏེ། སྐབས་ཡིན་པའི་ཕྱིར། དགེ་སློང་མའི་དགེ་འདུན་གྱིས་སྦྱིན་པར་ཤེས་པར་བྱའོ། །ཅི་ཞིག་བྱས་ནས་སྦྱིན་པར་བྱ་ཞེ་ན། དེའི་ཕྱིར་བར་ཆད་དྲིས་ནས་སོ། །དགེ་སློང་མ་ལས་བྱེད་པས་དགེ་འདུན་མའི་དབུས་སུ་དེ་ལ་བར་ཆད་ཀྱི་ཆོས་རྣམས་དྲིས་ནས་ཚངས་པར་སྤྱོང་བ་ལ་ཉེ་བར་གནས་པའི་སྡོམ་པ་སྤྱིན་པར་བྱའོ། །དེ་ལྟར་ན་བུད་མེད་རྣམས་ལ་བར་ཆད་དྲི་བ་ལན་གསུམ་དུ་འགྱུར་ཏེ། དང་པོར་
གཅིག་ནི་དགེ་སློང་མ་གསང་སྟེ་སྟོན་པས་བཀར་ཏེ་དྲི་བའོ། །དེའི་འོག་ཏུ་གཉིས་པ་ནི་དགེ་སློང་མ་ལས་བྱེད་པས་དགེ་སློང་མའི་དགེ་འདུན་འབའ་ཞིག་གི་དབུས་སུ་ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་སྦྱིན་པའི་སྔ་རོལ་ཁོ་ནར་དྲི་བའི་ཐ་མར་གསུམ་པ་ནི་དགེ་སློང་ལས་བྱེད་པས་གཉི་གའི་དགེ་འདུན་གྱི་དབུས་སུ་བསྙེན་པར་རྫོགས་པར་གསོལ་བའི་འོག་ཏུ་དྲི་བའོ། །གསོལ་བ་བྱས་ནས་སོ་ཞེས་བྱ་བ་ནི། ཚངས་པར་སྤྱོད་པ་ལ་ཉེ་བར་གནས་པའི་སྡོམ་པ་ཡང་གསོལ་ནས་སྦྱིན་པར་བྱའོ། མ་གསོལ་བར་ནི་མི་སྦྱིན་པའོ། །བསྙེན་པར་རྫོགས་པ་ལ་ཆོས་གོས་དག་ནི་ལྔ་ཉིད་དོ་ཞེས་བྱ་བ་ནི། དགེ་སློང་མ་བསྙེན་པར་རྫོགས་པའི་ཆོས་སོགས་དག་རྣམ་པར་གཞག་པ་ནི་ཆོས་གོས་ལྔ་ཉིད་དེ། ཆོས་གོས་གསུམ་ནི་ཐུན་མོང་ཡིན་ནོ། །ཤིང་ང་དབུང་བཅད་དང་རྡུལ་གཟན་ལྷག་པར་རིག་པར་བྱའོ། །གནས་རྣམས་ལ་ཤིང་དྲུང་ཉིད་མ་གཏོགས་སོ་ཞེས་བྱ་བ་ནི། གནས་རྣམས་བརྗོད་པ་ལ་ཤིང་དྲུང་མ་གཏོགས་པ་ཉིད་དེ། གནས་རྣམས་ལ་ཤིང་དྲུང་ཉིད་མ་གཏོགས་པ་གནས་གཞན་གསུམ་དེ་ལ་བརྗོད་པར་བྱའོ། །ལྟུང་བར་འགྱུར་བ་རྣམས་ལ་བརྒྱད་ཉིད་དོ་ཞེས་བྱ་བ་ནི་ལྟུང་བར་འགྱུར་བ་རྣམས་བརྗོད་པ་ལ། དགེ་སློང་མའི་ལྟུང་བར་འགྱུར་བ་རྣམས་ནི་བརྒྱད་ཉིད་དུ་ཤེས་པར་བྱ་བ་སྟེ། རེག་པ་དང་ནི་ལུས་བཀན་དང༌། །འཆབ་པ་དང་ནི་བཟློག་པའོ། །ཞེས་བྱ་བ་བཞི་པོ་དེ་དག་ལྷག་པ་ཡིན་ནོ། །ལྕི་བའི་ཆོས་རྣམས་བརྗོད་པར་བྱའོ་ཞེས་བྱ་བ་ནི། ལྕི་བའི་ཆོས་བརྒྱད་པོ་དག་བརྗོད་པར་བྱ་བ་སྟེ། དེ་དག་ནི་དགེ་སློང་མས་དགེ་སློང་རྣམས་ལས་བསྙེན་པར་རྫོགས་པ་གསོལ་བར་བྱ་བ་དང༌། ཟླ་བ་ཕྱེད་ཕྱེད་ཅིང་གདམས་ངག་སྩལ་བར་བྱ་བ་དང༌། དགེ་སློང་མེད་པའི་གནས་གང་དུ་ཡང་དེས་དབྱར་གནས་པར་ཁས་མི་བླང་བ་དང༌། དགེ་སློང་ལ་ཚུལ་ཁྲིམས་ཉམས་པ་ལ་སོགས་པ་གླེང་བར་མི་བྱ་བ་དང༌། དགེ་སློང་མས་དགེ་སློང་ལ་ཇི་ལྟར་ཡང་སྤྱོ་བར་མི་བྱ་བ་དང༌། དགེ་སློང་གསར་བུ་ལ་ཡང་དགེ་སློང་མས་ཕྱག་བྱ་བ་དང༌། གཉི་གའི་དགེ་འདུན་ལས་མགུ་བར་བྱ་བ་དང༌། གཉི་གའི་དགེ་འདུན་ལ་དག་དབྱེ་བ་བྱ་སྟེ། དེ་དག་ནི་ལྕི་བའི་ཆོས་བརྒྱད་དོ། །དུས་གན་གདུ་ལྕི་བའི་ཆོས་རྣམས་བརྗོད་པར་
བྱ་ཞེ་ན་དེའི་ཕྱིར། ལྟུང་བར་འགྱུར་བ་དང༌། དགེ་སྦྱོང་བྱེ་དཔའི་བར་སྐབས་སུའོ་ཞེས་བྱ་བ་སྨྲས་ཏེ། ལྟུང་བར་འགྱུར་བ་རྣམས་དང་པོར་བརྗོད་པར་བྱའོ། །དེའི་འོག་ཏུ་ལྕི་བའི་ཆོས་རྣམས་སོ། །དེའི་འོག་ཏུ་དགེ་སྦྱོང་བྱེད་པའི་ཆོས་རྣམས་བརྗོད་པར་བྱ་བའོ། །བཀོལ་བ་དྲུག་པོ་དག་གོ་ཞེས་བྱ་བ་ནི། སྔོན་རབ་ཏུ་བྱུང་བ་ཞེས་བྱ་བ་ཉིད་གཏོགས་པ་དེ་ཡན་ཆད་ཀྱི་མདོ་དྲུག་པོ་དག་བཀོལ་བ་ཞེས་བྱ་བ་དབང་དུ་བྱ་བའི་མིང་འདིའི་དབང་དུ་བྱ་སྟེ། །མིང་དང་མིང་ཅན་བསྡེབ་པར་བྱའོ། །དེ་ལྟར་ན་མདོ་དྲུག་པོ་དེ་དག་ཀུན་ལ་ཚིག་གི་དོན་འདི་ཉེ་བར་གནས་པར་རིག་པར་བྱ་སྟེ། རབ་ཏུ་འབྱུང་བ་དང་བསྙེན་པར་རྫོགས་པའི་ཕྱིར་ཉེ་བར་འོངས་པ་ལ་དྲུག་པོ་དེ་དག་མ་ཡིན་ན་མ་ཞེས་དྲི་བར་བྱ་ཞིང་བསྙེན་པར་རྫོགས་པར་བྱེད་པ་དག་གིས་ཀྱང་དྲི་བར་བྱ་སྟེ། དྲུག་པོ་དེ་དག་རབ་ཏུ་འབྱུང་བ་དང་བསྙེན་པར་རྫོགས་པར་མི་བྱའོ་ཞེས་བྱ་བར་སྦྱར་རོ། །དེ་ལ་སྐྱེ་བའི་ཆོས་ཉིད་མེད་པར་ཡང་འདྲའོ་ཞེས་བྱ་བ་འདི་ཡང་འདིར་མདོ་དྲུག་པོ་དག་གི་དབང་དུ་བྱ་བའོ། །རྣམ་པ་དེ་ལྟ་བུའི་རྟགས་ཅན་ནི་བསྙིལ་བར་བྱའོ་ཞེས་བྱ་བ་དེ་ཡང་འདིར་མ་སྨོས་སུ་ཟིན་ཀྱང༌། ཐམས་ཅད་ཀྱི་དབང་དུ་བྱ་བ་ཡིན་ཏེ། སྐྱེས་པ་འབའ་ཞིག་གི་དབང་དུ་བྱ་བ་མ་ཡིན་པས་མ་སྨོས་ཀྱང་དེ་བཞིན་ཡོད་པར་ཤེས་པར་བྱ་སྟེ། རྣམ་པར་དེ་ལྟ་བུ་ཞེས་སྨོས་པའི་ཕྱིར་རོ། །དབང་དུ་བྱ་བའི་ཡུལ་དུ་གྱུར་པ་མདོ་དྲུག་པོ་དང་བསྟན་པའི་ཕྱིར་མཚན་གཉིས་པའོ་ཞེས་བྱ་བ་སྨྲས་ཏེ། གང་ལ་མཚན་གཉིས་ཡོད་པའོ། །གླེ་འདམས་པའོ་ཞེས་བྱ་བ་ནི། མོ་མཚན་དང་བཤང་པའི་སྒོ་གཉིས་ལྷན་ཅིག་གཅིག་ཏུ་གྱུར་པ་གནག་ལ་ཡོད་པ་དེ་ནི་གླེ་འདམས་པའོ། །རྟག་ཏུ་ཟླ་མཚན་ཟག་པའོ་ཞེས་བྱ་བ་ནི། གང་གི་མོའི་དབང་པོ་ནས་རྟག་ཏུ་ཁྲག་འཛག་པ་དེ་ནི་དེ་ཡིན་པར་རིག་པར་བྱའོ། །ཟླ་མཚན་མི་ཟག་པའོ་ཞེས་བྱ་བ་ནི། གང་གི་མངའ་ན་གནས་པ་ཉལ་པའི་གནས་ཟླ་མཚན་གྱི་ཁྲག་མེད་པ་དེ་ནི་ཟླ་མཚན་མེད་པ་ཡིན་ནོ། །མཚན་མ་ཙམ་ཡོད་པའོ་ཞེས་བྱ་བ་ལ་ཅི་ཞིག་གི་མཚན་མ་ཙམ་ཡོད་པ་ཞེ་ན་དེའི་ཕྱིར། མཚན་མ་ཙམ་དུ་གྱུར་པའི་མཚན་ཡོད་པ་དེ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། གང་ལ་མཚན་མ་ཙམ་དུ་གྱུར་པའི་མོ་མཚན་ཡོད་པ་དེ་ནི་
མཚན་མ་ཙམ་ཡོད་པ་དེ་ཞེས་བྱ་སྟེ། མིང་དེ་སྐད་གདགས་སོ། །སྔོན་རབ་ཏུ་བྱུང་བའོ་ཞེས་བྱ་བ་ནི། གང་སྔོན་རབ་ཏུ་བྱུང་བ་ལས་ཕྱིས་བསླབ་པ་ཕུལ་བར་གྱུར་པ་དེ་ནི་སྔོན་རབ་ཏུ་བྱུང་བའོ། །དེ་ལྟར་ན་འདི་ཚིག་གི་དོན་འདི་འབྱུང་སྟེ། རབ་ཏུ་འབྱུང་བ་དང་བསྙེན་པར་རྫོགས་པའི་ཕྱིར་ཉེ་བར་འོངས་པ་ལ་མཚན་གཉིས་པ་ཞེས་བྱ་བ་ནས་སྔོན་རབ་ཏུ་བྱུང་བ་ཞེས་བྱ་བའི་བར་གྱི་མདོ་དྲུག་པོ་དེ་མ་ཡིན་ནམ་ཞེས་དྲི་བར་བྱ་ཞིང་བསྙེན་པར་རྫོགས་པར་བྱེད་པ་དག་གིས་ཀྱང་དྲི་བར་བྱ་སྟེ། མཚན་གཉིས་པ་ཞེས་བྱ་བ་ནས་སྔོན་རབ་ཏུ་བྱུང་བ་ཞེས་བྱ་བའི་བར་གྱི་དྲུག་པོ་དེ་རབ་ཏུ་དབྱུང་བ་དང༌། བསྙེན་པར་རྫོགས་པར་མི་བྱའོ། །དེ་ལ་ནི་སྐྱེས་པའི་ཆོས་ཉིད་མེ་དཔར་ཡང་འདྲའོ། །རྣམ་པ་དེ་ལྟ་བུའི་རྟག་ཅན་ནི་བསྙིལ་བར་བྱའོ་ཞེས་བྱ་བར་སྦྱར་རོ། །རབ་ཏུ་འབྱུང་བའི་གཞི་ཕྲན་ཚེ་གསལ་སོགས་པའི་སྐབས་སོ།། །།ཞུ་བའི་སྐབས་བརྗོད་པར་བྱ་བའི་ཕྱིར། མི་མ་ཡིན་པའི་འགྲོ་བ་པ་དང་བྱང་གི་སྒྲ་མི་སྙན་པ་གཉིས་ནི་སྔོམ་པའི་ཞིང་ཉིད་མ་ཡིན་ནོ་ཞེས་བྱ་བ་ནི། མིའི་འགྲོ་བ་ལས་གཞན་པ། ལྷ་ལ་སོགས་པའི་འགྲོ་བར་སྐྱེས་པ་དེ་དག་ནི་མི་མ་ཡིན་པའི་འགྲོ་བ་བའོ། །མིའི་འགྲོ་བ་ཉིད་ཡིན་དུ་ཟིན་ཀྱང༌། བྱང་གི་སྒྲ་མི་སྙན་པ་དང༌། དེ་གཉིས་ནི་སྡོམ་པའི་ཞིང་ཉིད་མ་ཡིན་ཏེ། དེ་གཉིས་ལ་སྡོམ་པ་མི་སྐྱེའོ་ཞེས་བྱ་བའི་ཐ་ཚིག་གོ །མཚན་ལན་གསུམ་གྱུར་པ་ཡང་མ་ཡིན་ནོ་ཞེས་བྱ་བ་ནི། གང་གི་མཚན་ལན་གསུམ་གྱུར་ན་མཚན་གྱུར་པ་ལན་གྲངས་གསུམ་པ་དེ་ལ་ཡང་སྡོམ་པའི་ཞིང་ཉིད་མེད་དེ། སྡོམ་པ་མི་སྐྱེ་བའོ་ཞེས་བྱ་བའི་ཐ་ཚིག་གོ །མཚན་ལན་གསུམ་གྱུར་པ་ནི་མ་ནིང་གི་རིགས་ཡིན་པའི་ཕྱིར་རོ། །དང་པོ་གཉིས་པ་ནི་མི་ཉམས་སོ་ཞེས་བྱ་བ་ནི་སྡོམ་པ་སྟེ། མཚན་གྱུར་པ་དང་པོ་དང་གཉིས་པ་ལ་ནི་སྡོམ་པ་ཉམས་པ་མེད་དོ། །ལེན་པ་ཉིད་ན་ཡང་སྐྱེའོ་ཞེས་བྱ་བ་ནི། སྡོམ་པ་ལེན་པ་ཉིད་ན་སྡོམ་པ་ཡང་དག་པར་ལེན་པ་ཉིད་དེ་དེའི་ཚེ་མཚན་གྱུར་ན་ཡང་སྡོམ་པ་སྐྱེ་བ་ཉིད་ཡིན་ནོ། །འདིར་གཞུང་ནི་བསྙེན་པར་རྫོགས་པར་འཚལ་བའི་མཚན་གྱུར་ན་བསྙེན་པར་རྫོགས་པ་ཞེས་བགྱི་འམ། བསྙེན་པར་མ་རྫོགས་པ་ཞེས་བགྱི། བཀའ་སྩལ་པ། བསྙེན་པར་རྫོགས་པ་ཞེས་བྱ་སྟེ། དགེ་སློང་མས་ནི་དགེ་
སློང་རྣམས་ལས་བསྙེན་པར་རྫོགས་པ་དགེ་སློང་མའི་དངོས་པོ་བཙལ་བར་བྱ་བ་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །འདིར་ཕོའི་མཚན་གྱུར་པ་ནི་དཔེ་ཙམ་དུ་ཟད་དོ། །དེ་དང་ལྡན་པ་ལྟར་མཁན་པོ་མེད་པ་ཉིད་ལ་ཡང་ངོ་ཞེས་བྱ་བ་ལ། དགེ་ཚུལ་ལ་སོགས་པའི་སྡོམ་པ་གང་ལ་མཁན་པོ་དེ་ཡོད་པ་དེ་ནི་དེ་དང་ལྡན་པ་སྟེ། མཁན་པོ་དེ་དང་ལྡན་པ་དེའི་སྡོམ་པ་སྐྱེ་བ་ཁོ་ན་ལྟར་མཁན་པོ་མེད་པ་ཉིད་ལ་ཡང་སྡོམ་པ་སྐྱེ་བ་ཡིན་ཏེ། ཡང་དག་པར་ལེན་པར་བྱེད་པ་གང་ལ་མཁན་པོ་མེད་པ་དེ་ནི་མཁན་པོ་མེད་པའོ། །དེའི་དངོས་པོ་ནི་དེ་ཉིད་དེ་དེ་ལ་ཡང་སྡོམ་པ་སྐྱེའོ། །འདི་སྐད་བསྟན་ཏེ། མཁན་པོ་མེད་ན་ཡང་སྔོམ་པ་སྐྱེ་བ་ཉིད་དོ་ཞེས་བྱ་བའི་ཐ་ཚིག་གོ །དེ་བསྙེན་པར་མ་རྫོགས་པ་ཉིད་ན་ཡང་ངོ་ཞེས་བྱ་བ་ནི། མཁན་པོ་དེ་བསྙེན་པར་མ་རྫོགས་པ་ཉིད་ཡིན་ན་ཡང་མཁན་པོ་དང་ལྡན་པའི་སྡོམ་པ་སྐྱེ་བ་ཉིད་དུ་འགྱུར་རོ། །དེ་དགེ་སློང་ཉིད་མ་ཡིན་པར་ཤེས་ན་ནི་མི་སྐྱེའོ་ཞེས་བྱ་བ་ནི། ཡང་དག་པར་ལེན་པར་བྱེད་པས་མཁན་པོ་དེ་བསྙེན་པར་མ་རྫོགས་པ་ཉིད་དམ་ཉམས་པ་ཉིད་ཡིན་པས། དགེ་སློང་ཉིད་མ་ཡིན་པར་ཤེས་ན་ནི་མཁན་པོ་དང་ལྡན་པའི་སྡོམ་པ་མི་སྐྱེ་བ་ཁོ་ནའོ། །འདིར་གཞུང་ནི་བསྙེན་པར་རྫོགས་པར་འཚལ་བ་མཁན་པོ་རྐུ་ཐབས་སུ་གནས་པས་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱིའམ་བསྙེན་པར་མ་རྫོགས་ཞེས་བགྱི། བཀའ་སྩལ་པ། གལ་ཏེ་བདག་གི་མཁན་པོ་རྐུ་ཐབས་སུ་གནས་པ་ཡིན་ནོ་ཞེས་ཤེས་ན་ནི་བསྙེན་པར་མ་རྫོགས་ཞེས་བྱའོ། །གལ་ཏེ་མི་ཤེས་ན་ནི་བསྙེན་པར་རྫོགས་ཞེས་བྱའོ། །སྔོན་ལྟུང་བ་བྱུང་བས་ཀྱང་དེ་བཞིན་ནོ་ཞེས་གསུངས་པ་ལ་སོགས་པ་ཡིན་ནོ། །དེ་ཕྱིར་སྤོང་བ་ལ་ཡང་མི་སྐྱེའོ་ཞེས་བྱ་བ་ནི། བསྙེན་པར་རྫོགས་པར་འདོད་པ་དེ་དེའི་ཚེ་མཁན་པོ་དེ་ཕྱིར་དབུལ་ཞིང་ཕྱིར་སྤོང་བར་བྱེད་ན་དེ་ལ་སྔོམ་པ་མི་སྐྱེའོ། །འདིར་གཞུང་ནི་བསྙེན་པར་རྫོགས་པར་བགྱིད་བ་ན་མཁན་པོ་སླར་སྤོང་བར་བགྱིད་ན་བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། བསྙེན་པར་མ་རྫོགས་ཞེས་བྱའོ་ཞེས་གསུངས་པ་ཡིན་ནོ། །དེ་གཉིས་ཀྱི་མིང་མ་བརྗོད་ན་ཡང་མི་སྐྱེའོ་ཞེས་བྱ་བ་ལ། དེ་གཉིས་ཀྱི་ཞེས་བྱ་བ་ནི། བསྙེན་པར་
རྫོགས་པར་འདོད་པ་དང་མཁན་པོ་གཉིས་ཀྱིའོ། །མིང་མ་བརྗོད་ན་ཞེས་བྱ་བ་ནི་ཡང་དག་པར་ལེན་པར་བྱེད་པས་བདག་མིང་འདི་ཞེས་བགྱི་བ་དོན་གྱི་སླད་དུ་མཚན་ནས་སྨོས་ཏེ། མཁན་པོ་མཚན་འདི་ཞེས་བགྱི་བས་ཞེས་རང་དང་མཁན་པོའི་མིང་མ་བརྗོད་པའམ་ལས་བྱེད་པས་མིང་འདི་ཞེས་བགྱི་བ་ནི། མཁན་པོ་མིང་འདི་ཞེས་བགྱི་བས་ཞེས་དེས་དེ་གཉིས་ཀྱི་མིང་མ་བརྗོད་ནའོ། །དེ་གཉིས་ཀྱི་མིང་དེ་གཉིས་མ་བརྗོད་ན་ཡང་ཡང་དག་བར་ལེན་པར་བྱེད་པ་དེ་ལ་སྡོམ་པ་མི་སྐྱེའོ། །དགེ་འདུན་གྱི་ན་ཡང་དེའི་སྐྱེ་གནས་ཀྱི་མི་སྐྱེའོ་ཞེས་བྱ་བ་ནི། ཡང་དག་པར་ལེན་པར་བྱེད་པའམ་ལས་བྱེད་པ་གཉིས་ལས་གང་ཡང་རུང་བས་དགེ་འདུན་ཞེས་བྱ་བའི་དགེ་འདུན་གྱི་མཚན་མི་བརྗོད་ན་ཡང་དེའི་སྐྱེ་གནས་ཀྱི་ཞེས་བྱ་བ་དགེ་འདུན་གྱི་སྐྱེ་གནས་ལས་སྐྱེ་བ་དགེ་སློང་མ་ཉིད་ལ་སོགས་པའི་སྡོམ་པ་མི་སྐྱེའོ། འདིར་གཞུང་ནི་ཡང་དག་པར་ལེན་བར་བྱེད་པའི་ཕྱིར་ནི་གང་ཟག་གསུམ་ནི་བསྙེན་པར་མ་རྫོགས་པ་ཡིན་ཏེ། བདག་ཉིད་མིང་མི་བརྗོད་པ་དང༌། མཁན་པོའི་མིང་མི་བརྗོད་པ་དང༌། བསྙེན་པར་རྫོགས་པ་མི་ཤེས་པའོ་ཞེས་གསུངས་པའོ། །ལས་བྱེད་པའི་ཕྱིར་ནི་གཞུང་འདི་ཡིན་ཏེ། མཁན་པོ་དང་བསྙེན་པར་རྫོགས་པར་འཚལ་བ་དང༌། དགེ་འདུན་དང་གསུམ་གྱི་མིང་བརྗོད་པར་མི་བགྱིད་ན། བསྙེན་པར་རྫོགས་ཞེས་བགྱིའམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། བསྙེན་པར་མ་རྫོགས་པ་ཞེས་བྱའོ་ཞེས་གསུངས་པ་ཡིན་ནོ། །ཁྱིམ་པ་དང་མུ་སྟེགས་ཅན་གྱི་རྒྱལ་མཚན་ཅན་ལ་ཡང་མི་སྐྱེའོ་ཞེས་བྱ་བ་ལ། རྒྱལ་མཚན་ཞེས་བྱ་བའི་ཁྱིམ་པ་དང་མུ་སྟེགས་ཅན་གཉི་ག་སོ་སོར་སྦྱར་ཏེ། ཁྱིམ་པའི་རྒྱལ་མཚན་ཅན་དང༌། མུ་སྟེགས་ཅན་གྱི་རྒྱལ་མཚན་ཅན་ཞེས་བྱ་བ་ནི། གང་ལ་ཁྱིམ་པའི་རྒྱལ་མཚན་གྱི་རྒྱལ་མཚན་ཡོད་བ་དང༌། གང་ལ་མུ་སྟེགས་ཅན་གྱི་རྒྱལ་མཚན་གྱི་རྒྱལ་མཚན་ཡོད་པ་སྟེ། རྒྱལ་མཚན་གྱི་སྒྲ་རེ་རེ་ནི་དབྲི་བར་བྱའོ། །རྒྱལ་མཚན་ཞེས་བྱ་བ་ནི་ཆ་ལུགས་ལ་བྱ་སྟེ། ཁྱིམ་པ་དང་མུ་སྟེགས་ཅན་གྱི་ཆ་ལུགས་གཉིས་ཐོགས་པ་དག་ལ་ཡང་སྡོམ་པ་མི་སྐྱེའོ། །སྒྲེན་མོ་དང་འཁྲུགས་པ་དང་མཚན་དུག་མ་དག་ལ་མི་སྐྱེའོ་ཞེས་བྱ་བ་ལ། སྒྲེན་མོ་ཞེས་བྱ་བ་ཡང་དག་པར་བླང་བ་སྔོན་
དུ་བཏང་བའི་སྒྲེན་མོ་ཉིད་ནི་མུ་སྟེགས་ཅན་གྱི་རྒྱལ་མཚན་ཉིད་ཀྱིས་བསྡུས་པས་ན། འདིར་ནི་སྒྲེན་མོ་ཞེས་བྱ་བས་དོན་གཞན་བཟུང་སྟེ། སྒྲེན་མོ་ཤིན་ཏུ་ངོ་ཚ་དང་བྲལ་བའི་ཕྱིར་དེ་ལ་སྡོམ་པ་མི་སྐྱེའོ། །འཁུགས་པར་ཞེས་བྱ་བས་ནི། དེ་ལ་བརྟན་པ་ཉིད་མེད་པས་དེ་ལ་ཡང་མི་སྐྱེའོ། །མཚན་དུག་མ་ཞེས་བྱ་བ་ནི། བུད་མེད་གང་དང་ཉལ་པོའི་སྦྱོར་བ་བྱས་ན་སྐྱེས་པ་འཆི་བར་འགྱུར་བ་ནི་ཡིན་པར་རིག་པར་བྱའོ། །འདིར་མཚན་དུག་མའི་གཞུང་ནི་བཙུན་པ་རེ་ཞིག་མཚན་དུག་མ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། བསྙེན་པར་མ་རྫོགས་ཞེས་བྱ་སྟེ། བསྙེན་པར་རྫོགས་པར་བྱེད་པ་དག་ཀྱང་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །རྒྱུ་ལས་བཟློག་པ་ཁས་མི་ལེན་པ་གནས་ནས་ཕྱུང་བ་ལ་ཡང་མི་སྐྱེའོ་ཞེས་བྱ་བ་ནི། ལྟུང་བ་མ་མཐོང་བ་ལ་སོགས་པའི་རྒྱུ་གང་གིས་གནས་ནས་དབྱུང་བའི་ལས་བྱས་པ་རྒྱུ་དེ་ལས་བཟློག་པ་ལྟུང་བ་མཐོང་བ་ལ་སོགས་པ་དེ་ཁས་མི་ལེན་པ་ལ་ཡང་སྡོམ་པ་མི་སྐྱེའོ། །འདིར་གནས་ནས་བྱུང་བ་སྨོས་པ་ནི་དཔེ་ཙམ་དུ་ཟད་ཀྱི། ཆད་པའི་ལས་བྱེད་དུ་བཅུག་པ་རྒྱུ་ལས་བཟློག་པ་ཁས་མི་ལེན་པ་ཐམས་ཅད་ལ་ཡང་དེ་བཞིན་དུ་རིག་པར་བྱའོ། །ཚིག་སྔ་མ་མེད་པ་ཉིད་ལ་ནི་ཉེ་ས་བྱས་ཙམ་དུ་ཟད་དོ་ཞེས་བྱ་བ་ནི། གང་ལ་དགེ་བསྙེན་ཉིད་ལ་སོགས་པའི་ཚིག་སྔ་མ་མེད་པ་དེ་ནི་ཚིག་སྔ་མ་མེད་པ་སྟེ། དེའི་དངོས་པོ་ནི་དེ་ཉིད་དོ། །དེ་མེད་པ་དེ་ལ་ནི་དགེ་ཚུལ་ཉིད་ལ་སོགས་པའི་ཚིག་གཞན་དག་ཁས་ལེན་དུ་བཅུག་ན་ཡང་ལས་བྱེད་པ་དག་ལ་ཉེས་བྱས་ཙམ་དུ་ཟད་ཀྱི་དེ་ལ་ནི་སྡོམ་པ་སྐྱེའོ། །འདི་སྐད་བསྟན་ཏེ། དགེ་བསྙེན་ཉིད་མེད་པར་དགེ་ཚུལ་ཉིད་ཁས་ལེན་པ་དང༌། དགེ་ཚུལ་མེད་པར་དགེ་སློང་ཉིད་ཁས་ལེན་པར་བྱེད་ན། ཉེས་བྱས་ཙམ་དུ་འགྱུར་གྱི་སྡོམ་པ་མི་སྐྱེ་བར་མི་འགྱུར་རོ། །འདིར་གཞུང་ནི་བཙུན་པ་ཁྱིམ་པ་རབ་ཏུ་མ་བྱུང་བ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱིའམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། ཉེ་བ་འཁོར་བསྙེན་པར་རྫོགས་ཞེས་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་
ཉེས་བྱས་ཀྱི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །མཁན་པོར་མ་གསོལ་བ་ལ་ཡང་ངོ་ཞེས་བྱ་བ་ནི། མཁན་པོར་གསོལ་བ་མ་བྱས་པར་བསྙེན་པར་རྫོགས་པར་བྱེད་ན་ཡང་སྡོམ་པ་སྐྱེ་བར་འགྱུར་བ་ཁོ་ན་ཡིན་པའོ། །བར་ཆད་མ་དྲིས་པར་ཡང་ངོ་ཞེས་བྱ་བ་ནི། བར་ཆད་མ་དྲིས་པར་བསྙེན་པར་རྫོགས་པར་བྱེད་ན་ཡང་སྡོམ་པ་སྐྱེ་བར་འགྱུར་བ་ཁོ་ན་ཡིན་པའོ། །དེ་མེད་པར་ཁས་ལེན་པ་ལ་སྦྱིན་ན་ཡང་ངོ་ཞེས་བྱ་བ་ནི། བར་ཆད་ཀྱི་ཆོས་དེ་མེད་བཞིན་དུ་ཡང་དག་པར་ལེན་པར་བྱེད་པས་བདག་ལ་བར་ཆད་ཀྱི་ཆོས་ཡོད་དོ་ཞེས་ཁས་ལེན་པར་བྱེད་ན་དེ་ལྟར་ན་ཡང་དེ་ལ་སྡོམ་པ་སྦྱིན་ན་ཡང་སྡོམ་པ་སྐྱེ་བར་འགྱུར་བ་ཁོ་ན་ཡིན་པ་སྟེ། ཉེས་བྱས་ཙམ་ནི་གནས་པ་ཁོ་ན་ཡིན་ནོ། །འདིར་གཞུང་ནི་གླེང་གཞི་དག་ལས་བཙུན་པ་རེ་ཞིག་བར་ཆད་ཀྱི་ཆོས་རྣམས་དང་མི་ལྡན་པར་བདག་བར་ཆད་ཀྱི་ཆོས་རྣམས་དང་མི་ལྡན་ནོ་ཞེས་མཆི་བ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱིའམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། ཉེ་བ་འཁོར་བསྙེན་པར་རྫོགས་པ་ཞེས་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །འདིར་བར་ཆད་ནི་སྡོམ་པའི་བགེགས་ཡིན་པར་རིག་པར་བྱའོ། །སྐྱེས་པ་འདྲ་བའི་བུད་མེད་ཉིད་དང༌། བུད་མེད་འདྲ་བའི་སྐྱེས་པ་ཉིད་མཚན་གྱི་རྣམ་པ་གཞན་མ་ཡིན་པ་ལ་ཡང་ངོ་ཞེས་བྱ་བ་ནི། གལ་ཏེ་བུད་མེད་སྐྱེས་པའི་རྣམ་པ་འདྲ་བ་ཉིད་དང༌། སྐྱེས་པ་བུད་མེད་ཀྱི་རྣམ་པ་འདྲ་བ་ཉིད་དེ་ལྟ་བུ་མཚན་རྣམ་པ་གཞན་མ་ཡིན་པར་རིག་པར་བྱ་སྟེ། དེས་ན་སྡོམ་པ་ནི་སྐྱེ་བ་ཁོ་ན་ཡིན་པའོ། །མཚན་རྣམ་པ་གཞན་མ་ཡིན་པའི་ཕྱིར་མི་དགག་པ་ཡིན་པར་ཐལ་བར་འགྱུར་བ་བསལ་བའི་ཕྱིར། དེ་ནི་ལག་རྡུམ་ལ་སོགས་པས་འཕངས་པ་ཉིད་ཡིན་ནོ་ཞེས་བྱ་བ་འདི་སྨྲས་ཏེ། སྐྱེས་པ་འདྲ་བའི་བུད་མེད་ཉིད་དང༌། བུད་མེད་འདྲ་བའི་སྐྱེས་པ་ཉིད་དེ་ནི་སྔར་བསྟན་པའི་ལག་རྡུམ་ལ་སོགས་པས་འཕངས་པ་ཉིད་ཡིན་ཏེ། འདི་ལྟར། དེ་ལྟ་བུ་ཡི་མི་རྣམས་ནི། །དྲང་སྲོང་ཆེན་པོས་དགག་པར་མཛད། །ཅེས་བྱ་བ་ལ་དེ་ལྟ་བུ་ཞེས་སྨོས་པས་དེར་འདི་ཡང་གཟུང་བར་ཤེས་པར་བྱའོ། །འདི་སྐད་བསྟན་ཏེ། ཇི་ལྟར་ལག་རྡུམ་ལ་སོགས་པ་དག་རབ་ཏུ་འབྱུང་བར་མི་བྱ་བ་དེ་
བཞིན་དུ། སྐྱེས་པ་འདྲ་བའི་བུད་མེད་ཉིད་དང༌། བུད་མེད་འདྲ་བའི་སྐྱེས་པ་ཉིད་ཀྱང་རབ་ཏུ་འབྱུང་བར་མི་བྱ་སྟེ། རབ་ཏུ་འབྱིན་ན་འགལ་ཚབས་ཅན་དུ་འགྱུར་རོ། །འཕངས་པ་གཞན་ཡང་བསྟན་པའི་ཕྱིར། སྡིག་སྡིག་ལྟ་བུའི་མཚན་ཉིད་ཅན་དང༌། གླིང་གཞན་ནས་སྐྱེས་པ་ཚུལ་བྱད་མི་འདྲ་བ་ཉིད་ཀྱང་ངོ་ཞེས་བྱ་བ་སྨྲས་ཏེ། སྡིག་སྡིག་ལྟ་བུའི་མཚན་ཉིད་ཅན་དང༌། གླིང་གཞན་ནས་སྐྱེས་པ་ཚུལ་བྱད་མི་འདྲ་བ་དེ་གཉིས་ཀྱང་ལག་རྡུམ་ལ་སོགས་པས་འཕངས་པ་ཉིད་ཡིན་པར་ཤེས་པར་བྱའོ། །སྡིག་སྡིག་ལྟ་བུའི་མཚན་ཉིད་ཅན་གྱི་གཞུང་ནི་བཙུན་པ་སྡིག་ལྟ་བུའི་མཚན་ཉིད་ཅན་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་པ། ཉེ་བ་འཁོར་བསྙེན་པར་རྫོགས་ཞེས་བྱ་སྟེ། དགེ་སློང་བསྙེན་པར་རྫོགས་པར་བྱེད་པ་དག་ལ་ནི་ཉེས་བྱས་ཀྱི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །གླིང་གཞན་ནས་སྐྱེས་པའི་གཞུང་ཡང་བཙུན་པ་འཛམ་བུའི་གླིང་པའི་དགེ་སློང་དག་གིས་ཤར་གྱི་ལུས་འཕགས་པོ་ཞིག་བསྙེན་པར་རྫོགས་པར་བགྱིད་ན། བསྙེན་པར་རྫོགས་ཞེས་བགྱི་འམ། བསྙེན་པར་མ་རྫོགས་ཞེས་བགྱི། བཀའ་སྩལ་བ། ཉེ་བ་འཁོར་བསྙེན་པར་རྫོགས་ཞེས་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ་ཞེས་བྱ་བ་དང༌། དེ་བཞིན་དུ་རྒྱས་པར་འཁོར་ལོ་བཞིན་དུ་སྦྱར་བ་གསུངས་པ་ཡིན་ནོ། །འོ་ན་གླིང་གཞན་ནས་སྐྱེས་པ་ཞེས་སྨོས་པ་ཉིད་ཀྱིས་ཚུལ་བྱད་མི་འདྲ་བ་ཉིད་ཀྱང་གྲུབ་པ་ཡིན་ན། ཅིའི་ཕྱིར་ཚུལ་བྱད་མི་འདྲ་བ་སྨོས་ཤེ་ན། དེའི་ཕྱིར་བྱེ་བྲག་ཏུ་བྱ་བའི་ཕྱིར་ཏེ། ཚུལ་བྱད་མི་འདྲ་བ་ཞེས་སྨོས་པས་གཙོ་ཆེན་པོ་ཤེས་པར་བྱ་བའི་ཕྱིར་རོ། །དེས་ན་གླིང་གཅིག་ནས་སྐྱེས་པ་རྣམས་ལ་ཡང་གདོང་ཁྱིའི་ལྟ་བུ་དང༌། རྣ་གྱོན་ལ་སོགས་པ་དག་བཀག་པ་ཡིན་པར་རིག་པར་བྱ་ལ། གླིང་གཞན་ནས་སྐྱེས་པ་རྣམས་ལ་ཡང་ཚུལ་བྱད་འདྲ་བ་དག་ནི་བསྒྲུབ་པར་བྱ་བར་བསྟན་ཏེ། ཇི་ལྟར་གླིང་གཞན་པ་དག་ཡིན་ཡང་གླིང་ཕྲན་དག་ནས་སྐྱེས་པ་རྣམས་མ་བཀག་བ་བཞིན་ནོ། །འདིར་ཚུལ་བྱད་མི་འདྲ་བ་ཞེས་བྱ་བ་ནི། ཁ་སྣ་ལ་སོགས་པའི་རྣམ་པ་ཐ་དད་པ་ཡིན་པར་ཤེས་པར་བྱའོ། །གཞན་ཡང་འཕངས་པ་མ་བསྟན་པ་དག་གི་བསྡུབ་བསྟན་
པའི་ཕྱིར། སེན་མོ་གཅིག་པ་དང༌། ལག་པ་འཇས་ཏེ་ལྟེབས་པ་དང༌། གཞོགས་ཕྱེད་འཇས་པ་དང༌། མགོ་སྨྱུང་དང༌། སྐྲ་སྒྲ་སྒྲེ་ཅན་དང༌། སྒུར་པོ་དང༌། དགྱེ་པོ་དང༌། དགྱེ་དགུར་གྱུར་པ་དང༌། སོར་མོ་དྲུག་པ་དང༌། འབྱར་བ་དང༌། མིད་པ་དང༌། མིག་རྫི་མ་ནང་དུ་འཇུག་པ་དང༌། ནེའུ་ལེའི་ལྟ་བུ་དང༌། འུག་པའི་ལྟ་བུ་དང༌། ཕྱིན་ཅི་ལོག་པ་དང༌། བར་འཛིངས་པ་དང༌། གློ་བ་དང༌། སླེ་བོ་དང༌། ཟླུམ་པོ་དང༌། མིག་པོ་ཆེ་དང༌། མཛེར་ཅན་དང༌། ཤུ་ཅན་དང༌། འབྲུམ་ཅན་དང༌། རྣ་བ་སེར་བ་དང༌། དཀར་བ་དང༌། དམར་བ་དང༌། སྦུབས་ཅན་དང༌། ཁྱི་རྔོ་གཡའ་བ་དང༌། འཕུངས་པ་དང༌། ཆེ་བ་དང༌། རླིག་པའི་ནང་དུ་མཚན་ནུབ་པ་དང༌། གླེན་པ་དང༌། ལྕེ་མེད་པ་དང༌། རྐ་ལག་གཅིག་པ་དང༌། མེད་པ་དང༌། སྐྲ་སྔོན་དང༌། མགོ་གླང་པོ་ཆེའི་ལྟ་བུ་དང༌། རྟའི་ལྟ་བུ་དང༌། ཁྱིའི་ལྟ་བུ་དང༌། བ་གླང་གི་ལྟ་བུ་དང༌། ལུག་གི་ལྟ་བུ་དང༌། རི་དགས་ཀྱི་ལྟ་བུ་དང༌། ཉའི་ལྟ་བུ་དང༌། སྦྲུལ་གྱི་ལྟ་བུ་དང༌། རིང་བ་དང༌། མང་བ་དང༌། མགུལ་ཏ་ལ་ལྟ་བུ་དང༌། སྐྲངས་པ་དང༌། སྤྱོད་ལམ་གྱིས་དུབ་པ་དེ་དག་ལས་མི་ན་བ་རྣམས་སོ། །གཞན་དག་ནི་ན་བས་སོ་ཞེས་བྱ་བ་སྨྲས་ཏེ། སེན་མོ་གཅིག་པ་ལ་སོགས་པ་མདོ་དག་ལས་བཤད་པ་དེ་དག་ལས་གང་དག་མིན་པ་སེན་མོ་གཅིག་པ་དང༌། མགོ་སྨྱུང་བ་དང༌། སྐྲ་སྒྲ་སྒྲེ་ཅན་ལ་སོགས་པ་དེ་དག་ནི། ལག་རྡུམ་ལ་སོགས་པ་དེ་དག་གིས་འཕངས་པ་ཉིད་དེ། དེ་དང་རིགས་མཐུན་པའི་ཕྱིར་རོ། །གང་དག་ན་བ་ལག་པ་འཇས་ཏེ་ལྟེབས་པ་དང༌། གཞོགས་ཕྱེད་འཇས་པ་དང༌། སྒུར་པོ་དང༌། དགྱེ་བོ་དང༌། དགྱེ་དགུར་གྱུར་པ་ལ་སོགས་པ་དེ་དག་ནི་ནད་པ་ཉིད་ཡིན་པའི་ཕྱིར། ནད་པ་མ་ཡིན་ནམ་ཞེས་བྱ་བ་དེས་འཕངས་པ་ཉིད་ཡིན་ཏེ། དེ་ལྟར་ན་འདིར་སྤྱིའི་དོན་ནི་དེ་ཡིན་ནོ། །ཡན་ལག་གི་དོན་འདི་བཤད་པར་བྱ་སྟེ། སེན་མོ་གཅིག་པ་ཞེས་བྱ་བ་ནི། གང་ལ་སེན་མོ་གཅིག་ཁོ་ན་ཡོད་པ་སྟེ། དེ་ནི་སེན་མོ་གཅིག་པའོ། །ལག་པ་འཇས་ཏེ་ལྟེབས་བ་ཞེས་བྱ་བ་ནི། གང་ལུས་ཀྱི་ཡན་ལག་སྤྲིང་ཡིག་རྒྱས་བཏབ་པ་འདྲ་བ་དེ་ནི་ལག་པ་འཇས་ཏེ་ལྟེབས་པ་སྟེ། འདི་ལྟར་དེའི་ལག་པ་དང་དཔུང་མགོ་གཉིས་ཕྲག་པའི་ཕྱོགས་སྤྲིང་ཡིག་བལྟ་བ་སྟེ་རྒྱས་བཏབ་པའི་དབྱིབས་འདྲ་བར་འབྱར་ཅིང་འདུག་པས་དེའི་ཕྱིར། ལག་པ་
འཇས་ཏེ་ལྟེབས་པ་ཞེས་བྱའོ། །གཞོགས་བྱེད་འཇས་པ་ཞེས་བྱ་བ་ནི། གང་གི་གཞོགས་ཕྱེད་བསྐམས་པའོ། །མགོ་སྨྱུང་ཞེས་བྱ་བ་ནི། གང་གི་མགོ་པོ་མཚན་གྱི་དབྱིབས་འདྲ་བའོ། །སྐྲ་སྒྲ་སྒྲེ་ཅན་ཞེས་བྱ་བ་ནི། གང་གི་སྐྲ་སྨྱོན་ཐབས་མཁན་གྱི་ལྟར་སྒྲ་སྒྲེར་འདུག་པའོ། །སྒུར་པོ་དང༌། དགྱེ་བོ་དང༌། དགྱེ་དགུར་གྱུར་པ་ཞེས་བྱ་བ་ནི། དགྱེ་དགུའི་སྒྲ་སུམ་ཆར་ལ་སོ་སོར་ཁྱད་པར་ཡོད་དེ། རྒྱབ་སྒུར་བ་དང༌། མདུན་དགྱེ་བ་དང༌། རྒྱབ་དང་མདུན་གཉི་གར་དགྱེ་དགུར་དུ་གྱུར་པ་སྟེ། རིམ་བཞིན་ནོ། །དེ་དག་ནི་གོང་དུ། ལག་སོར་རྡུམ་སྒུར་མིའུ་ཐུང་དང༌། །ཞེས་སྨྲས་པའི་སྒུར་པོ་ཞེས་བྱ་བ་དེའི་རབ་ཏུ་དབྱེ་བ་བསྟན་པའི་ཕྱིར་རོ། །སོར་མོ་དྲུག་པ་དང༌། འབྱར་བ་དང༌། མེད་པ་ཞེས་པ་ནི། སོར་མོ་ཞེས་བྱ་བའི་སྒྲ་སོ་སོར་སྦྱར་ཏེ། སོར་མོ་དྲུག་པ་དང༌། སོར་མོ་འབྱར་བ་དང༌། སོར་མོ་མེད་པའོ། །མིག་གི་རྫི་མ་ནང་དུ་འཇུག་པ་དང༌། ནེའུ་ལེའུ་ལྟ་བུ་དང༌། འུག་པའི་ལྟ་བུ་དང༌། ཕྱིན་ཅི་ལོག་དང༌། བར་འཛིངས་པ་དང༌། གློ་བ་དང༌། སླེ་བོ་དང༌། ཟླུམ་པོ་ཞེས་བྱ་བ་ཡང་མིག་ཅེས་བྱ་བའི་སྒྲ་སོ་སོར་སྦྱར་ཏེ། མིག་གི་རྫི་མ་ནང་དུ་འཇུག་པ་དང༌། མིག་ནེའུ་ལེའུ་ལྟ་བུ་དང༌། མིག་འུག་པའི་ལྟ་བུ་དང༌། མིག་ཕྱིན་ཅི་ལོག་པ་དང༌། མིག་བར་འཛིངས་པ་དང༌། མིག་གློ་བ་དང༌། མིག་སླེ་བོ་དང༌། མིག་ཟླུམ་པོའི་ཚིག་དེ་དག་གི་རབ་ཏུ་དབྱེ་བ་བྱ་སྟེ། མིག་རྫི་མ་ནང་དུ་འཇུག་པ་ཞེས་བྱ་བ་ནི། གང་གི་མིག་གི་ནང་གི་པགས་པའི་རིམ་པ་ལ་རྫི་མ་ཡོད་པའོ། །མིག་ནེའུ་ལེའི་ལྟ་བུ་ཞེས་བྱ་བ་ནི། གང་གི་མིག་ནེའུ་ལེའི་མིག་ལྟ་བུའོ། །མིག་འུག་པའི་ལྟ་བུ་ཞེས་བྱ་བ་ནི། གང་གི་མིག་འུག་པའི་མིག་ལྟ་བུའོ། །ཡང་ན་མིག་སེར་སྐྱ་ལ་ཟླུམ་པའི་ཕྱིར་སྲིན་པོའི་མིག་འདྲ་བའོ། །མིག་ཕྱིན་ཅི་ལོག་ཅེས་བྱ་བ་ནི། གང་གི་མིག་གི་གྲྭ་ལོགས་ཀྱི་ཟུར་གང་ཡིན་པ་དེ་ནི་སྣ་ལོགས་ན་འདུག་ལ། སྣ་ལོགས་ཀྱི་ཟུར་གང་ཡིན་པ་དེ་ནི་གྲྭ་ལོགས་ན་འདུག་པའོ། །མིག་པར་འཛིངས་པ་ཞེས་བྱ་བ་ནི། གང་གི་སྣ་གོང་གཏན་མེད་ལ། མིག་གཡས་གཡོན་འབྲེལ་བའོ། །མིག་གློ་བ་ཞེས་བྱ་བ་ནི། གང་གི་མིག་དྲ་བ་བཞིན་དུ་ཧ་ཅང་འཕྱང་བའོ། །མིག་སླེ་བོ་ཞེས་བྱ་བ་ནི། གང་གི་མིག་གི་རྫི་མའི་སྤུ་མེད་པའི་ཕྱིར། རྫི་མ་སྐྱེ་བའི་མཐའ་
དཔེར་ན་ཁྲག་འཛག་པའི་ཤ་ལྟར་དམར་བའོ། མིག་ཟླུམ་པོ་ཞེས་བྱ་བ་ནི། གང་གི་མིག་གི་འབྲས་བུ་ཨུག་ཤུད་ཀྱི་རི་མོ་ལྟར་ཟླུམ་པ་སྟེ། མིག་གི་སྙིང་པོའི་ལྟག་ན་སྙིང་པོ་གཉིས་པ་ཡོད་པ་ཞེས་བྱ་བའི་ཐ་ཚིག་གོ །མིག་པོ་ཆེ་དང་མཛེར་ཅན་དང༌། ཤུ་ཅན་དང༌། འབྲུམ་ཅན་ཞེས་བྱ་བ་ཡང་མིག་ཅེས་བྱ་བའི་སྒྲ་སོ་སོར་སྦྱར་ཏེ། མིག་པོ་ཆེ་དང༌། མིག་མཛེར་ཅན་དང༌། མིག་ཤུ་ཅན་དང༌། མིག་འབྲུམ་ཅན་ནོ། །དེ་ལ་མིག་པོ་ཆེ་ཞེས་བྱ་བ་ནི། གང་གི་མིག་ཧ་ཅང་ཆེ་བའོ། །མིག་མཛེར་ཅན་ཞེས་བྱ་བ་ནི། གང་གི་མིག་གི་དབུས་སུ་མིག་གི་དགྲར་གྱུར་པ་མཛེར་བུ་ཡོད་པའོ། །མིག་ཤུ་ཅན་ཞེས་བྱ་བ་ནི། གང་གི་མིག་ལ་ཤུ་བ་ཡོད་པའོ། །མིག་འབྲུམ་ཅན་ཞེས་བྱ་བ་ནི། གང་གི་མིག་ལ་འབྲུམ་བུ་ཡོད་པའོ། །རྣ་བ་སེར་བ་དང༌། དཀར་བ་དང༌། དམར་བ་དང༌། རྣ་བ་སྦུབས་ཅན་ནོ་ཞེས་བྱ་བ་ཡང༌། རྣ་བ་ཞེས་བྱ་བའི་སྒྲ་སོ་སོར་སྦྱར་ཏེ། རྣ་བ་སེར་བ་དང༌། རྣ་བ་དཀར་བ་དང༌། རྣ་བ་དམར་བ་དང༌། རྣ་བ་སྦུབས་ཅན་ནོ། །དེ་ལ་གོང་མ་གསུམ་ནི་རྣ་བའི་མདོག་ཧ་ཅང་སེར་ཆེས་པ་དང༌། ཧ་ཅང་དཀར་ཆེས་པ་དང༌། ཧ་ཅང་དམར་ཆེས་པའོ། །རྣ་བ་སྦུབས་ཅན་ཞེས་བྱ་བ་ནི། གང་གི་རྣ་བ་འཁྲིས་ཏེ་སྦུབས་ཅན་བཞིན་དུ་འདུག་པའོ། །ཁྱི་རྔོ་གཡའ་བ་དང། འཕུངས་པ་དང༌། ཆེ་བ་ཞེས་བྱ་བ་ཡང་ཁྱི་རྔོ་ཞེས་བྱ་བའི་སྒྲ་སོ་སོར་སྦྱར་ཏེ། ཁྱི་རྡོ་གཡའ་བ་དང༌། ཁྱི་རྡོ་འཕུངས་པ་དང༌། ཁྱི་རྡོ་ཆེ་བའོ། །དེ་ལ་ཁྱི་རྔོ་གཡའ་བ་ཞེས་བྱ་བ་ནི། གང་ལ་ཁྱི་རྔོ་དང་བཅས་པའི་གཡའ་བ་ཡོད་པའོ། །ཁྱི་རྡོ་འཕུངས་པ་ཞེ་བྱ་བ་ནི། གང་ལ་ཁྱི་རྡོ་འཕུངས་པ་དང་བཅས་པ་ཡོད་པའོ། །ཁྱི་རྡོ་ཆེ་བ་ཞེས་བྱ་བ་ནི་གང་ལ་ཁྱི་རྡོ་ཆེན་པོ་ཡོད་པའོ། །རླིག་པའི་ནང་དུ་མཚན་ནུབ་པ་ཞེས་བྱ་བ་ནི། གང་གི་རླིག་པ་གཉིས་ཀྱིས་ཕོ་མཚན་ཡོག་པའོ། །གླེན་པ་ཞེས་བྱ་བའི་སྒྲས་ནི་བསྙེན་པར་རྫོགས་པར་མི་ཤས་པ་ཡིན་པ་དེའི་ཕྱིར་འདི་སྨོས་སོ། །ལྕེ་མེད་པ་ཞེས་བྱ་བ་ནི། གང་ལ་ལྕེ་གཏན་མེད་པའོ། །སྔར་ལྐུགས་པ་ཞེས་སྨོས་པ་ནི་ལྕེ་ཡོད་དུ་ཟིན་ཀྱང་སྨྲ་མི་ནུས་པ་སྟེ། དེའི་ཕྱིར་ཚིག་དེ་གཉིས་ནི་ཡུལ་ཐ་དད་པ་ཡིན་ནོ། །རྐ་ལག་གཅིག་པ་དང་མེད་པ་ཞེས་བྱ་བ་ལ་འདིར་གཅིག་པ་ཞེས་བྱ་བ་ནི་རྐང་པ་གཅིག་པ་དང་ལག་པ་གཅིག་པའོ། །
མེད་པ་ཞེས་བྱ་བ་ནི། དགག་པའི་དོན་ཏེ། རྐང་པ་མེད་པ་དང་ལག་པ་མེད་པའོ། །དེ་ཡང་གང་ལ་དང་པོ་སྐྱེས་པ་ཉིད་ནས་རང་བཞིན་གྱིས་རྐང་པ་གཉིས་མེད་པ་དང༌། ལག་པ་གཉིས་མེད་པ་དེ་འདིར་གཟུང་གི །གཞན་དུ་ན་ལག་རྡུམ་དང་རྐང་རྡུམ་ཞེས་སྨོས་ཟིན་པའི་ཕྱིར་རོ། །སྐྲ་སྔོན་ཞེས་བྱ་བ་ནི། ཡུང་གི་ཁ་དོག་ལས་གཞན་པའི་སྔོན་པོའི་ཁ་དོག་ལ་བྱ་སྟེ། དེའི་ཕྱིར་སྔ་མ་དག་ལས་གཞན་པ་འདིར་སྐྲ་སྔོན་ཞེས་སྨོས་སོ། །མགོ་གླང་པོ་ཆེའི་ལྟ་བུ་དང༌། རྟའི་ལྟ་བུ་དང༌། ཁྱིའི་ལྟ་བུ་དང༌། བ་གླང་གེ་ལྟ་བུ་དང༌། ལུག་གི་ལྟ་བུ་དང༌། རི་དགས་ཀྱི་ལྟ་བུ་དང༌། ཉའི་ལྟ་བུ་དང༌། སྦྲུལ་གྱི་ལྟ་བུ་དང༌། རིང་བ་དང༌། མང་བ་ཞེས་བྱ་བ་ཡང་མགོའི་སྒྲ་སོ་སོར་སྦྱར་ཏེ། མགོ་གླང་པོ་ཆེའི་ལྟ་བུ་དང༌། མགོ་རྟའི་ལྟ་བུ་དང༌། མགོ་ཁྱིའི་ལྟ་བུ་དང༌། མགོ་བ་གླང་གི་ལྟ་བུ་དང༌། མགོ་ལུག་གི་ལྟ་བུ་དང༌། མགོ་རི་དགས་ཀྱི་ལྟ་བུ་དང༌། མགོ་ཉའི་ལྟ་བུ་དང༌། མགོ་སྤྲུལ་གྱི་ལྟ་བུ་དང༌། མགོ་རིང་བ་དང་མགོ་མང་བའོ། །མགུལ་ཏ་ལ་ལྟ་བུ་ཞེས་བྱ་བ་ནི། གང་གི་མགུལ་པ་ལ་ཤིང་ཏ་ལའི་གཉེར་མའི་རྣམ་པ་ལྟ་བུ་དག་གི་རི་མོ་དང་ལྡན་པའོ། །སྐྲངས་པས་དུབ་པ་ཞེས་བྱ་བ་ནི། གང་སྐྲངས་པའི་སྡུག་བསྔལ་བས་གནོད་པར་གྱུར་པའོ། །སྤྱོད་ལམ་གྱིས་དུབ་པ་ཞེས་བྱ་བ་ནི། སྤྱོད་ལམ་འགྲེང་བ་དང་འཆག་པའི་བརྟུལ་བས་གནོད་པར་གྱུར་པའོ། །དེ་དག་ལས་ཞེས་བྱ་བ་ནི། སེན་མོ་གཅིག་པ་ལ་སོགས་པ་མདོ་ལས་བཤད་པ་དེ་དག་ལས་སོ། །མི་ན་བ་རྣམས་ཞེས་བྱ་བ་ནི། གང་དག་མི་ན་བ་སེན་མོ་གཅིག་པ་དང༌། མགོ་སྨྱུང་དང༌། སྐྲ་སྒྲ་སྒྲེ་ཅན་ལ་སོགས་པ་དེ་དག་སྟེ། དེ་དག་ནི་ལག་རྡུམ་ལ་སོགས་པ་དག་གིས་འཕངས་སོ། །གཞན་དག་ནི་ཞེས་བྱ་བ་ནི། གང་དག་ན་བ་ལག་པ་འཇས་ཏེ་ལྟེབས་པ་དང༌། གཞོགས་ཕྱེད་འཇགས་པ་དང༌། སྒུར་པོ་དང༌། དགྱེ་བོ་དང༌། དགྱེ་དགུར་གྱུར་པ་ལ་སོགས་པ་དེ་དག་གོ །ན་བས་སོ་ཞེས་བྱ་བ་ནི། ནད་པ་མ་ཡིན་ནམ་ཞེས་བྱ་བ་སྟེ། གཞན་དེ་དག་ནི་ནད་པ་ཉིད་ཡིན་པའི་ཕྱིར། ནད་པ་མ་ཡིན་ནམ་ཞེས་བྱ་བ་དེས་འཕངས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །རྐུན་པོས་ནི་ཕུང་ཀྲོལ་བའོ་ཞེས་བྱ་བ་ནི། འཕངས་པ་ཉིད་དོ་ཞེས་བྱ་བར་སྦྱར་རོ། །དེ་གཉིས་ནི་སྡིག་པ་ལ་འཇུག་པར་
ནི་འདྲའོ། །དེ་གཉིས་ལ་བྱེ་བྲག་ཀྱང་ཡོད་དེ། འདི་ལྟར་རྐུན་པོ་ནི་མ་བྱིན་པར་ལེན་པར་བྱེད་པའོ། །ཕུང་ཁྲོལ་བ་ནི་སྙིང་རྗེ་མེད་པའོ། །དེ་ལྟར་སྤྱི་དང་བྱེ་བྲག་ཡོད་པས་ན་རྐུན་པོས་ཕུང་ཁྲོལ་བ་འཕངས་པ་ཉིད་ཡིན་ནོ། །རྒྱལ་པོ་ཕ་མའི་བསམ་པ་ཅན་ཉིད་ཀྱིས་གནང་བ་ནི་ཕ་མ་དང་འདྲའོ་ཞེས་བྱ་བ་ནི། རྒྱལ་པོ་ཕ་མ་དང་འདྲ་བའི་བསམ་བ་ཅན་ཉིད་ཀྱིས་རབ་ཏུ་འབྱུང་བར་གནང་བ་ནི་ཕ་མས་གནང་བ་དང་འདྲ་བས་རབ་ཏུ་དབྱུང་དུ་རུང་བའོ། །འདི་སྐད་བསྟན་ཏེ། རབ་ཏུ་འབྱུང་བར་འདོད་པ་དེ་ལ་གལ་ཏེ་རྒྱལ་པོ་ཕ་མ་དང་འདྲ་བའི་བསམ་པ་ཉིད་ཡོད་ན་དེ་རྒྱལ་པོས་རབ་ཏུ་འབྱུང་བར་གནང་བ་ཕ་མས་གནང་བ་དང་འདྲ་བར་རིག་པར་བྱའོ། །དེའི་ཕྱིར་རྒྱལ་པོས་གནང་བ་རབ་ཏུ་འབྱིན་ན་ཉེས་པ་མེད་དོ། །ཡོངས་སུ་འཛིན་པར་བྱེད་པ་གཉིས་ཀྱང་གནང་བ་དང་བསྲེལ་བ་དང་ཞུ་བ་དག་ལ་ཕ་མ་ཉིད་དང་འདྲའོ་ཞེས་བྱ་བ་ལ། ཡོངས་སུ་འཛིན་པར་བྱེད་པ་གཉིས་ཞེས་བྱ་བ་ནི། ཇི་ལྟར་ཕ་མ་གཉིས་ཀྱིས་བུ་དེ་ཡོངས་སུ་འཛིན་པ་བཞིན་དུ་གང་དག་གིས་བུ་དེ་ཡོངས་སུ་འཛིན་པར་བྱེད་པ་གཉིས་སོ། །དེ་གཉིས་ཀྱིས་བུ་དེ་གསོས་པས་ན། དེ་གཉིས་ཀྱང་བུ་དེའི་ཕ་མ་ཉིད་དང་འདྲའོ། །གནས་སྐབས་གང་དག་ལ་ཞེ་ན། རབ་ཏུ་འབྱུང་བའི་ཕྱིར་གནང་བ་དང་རབ་ཏུ་འབྱུང་བར་འདོད་པ་ཡུལ་ཐག་མི་རིང་བ་ནི་ཞག་བདུན་བསྲེལ་བར་བྱའོ་ཞེས་བྱ་བ་ནི། བསྲེལ་བ་དང་དེ་ཡུལ་ཐག་རིང་ན་ཡང་དགེ་འདུན་ལ་མ་ཞུས་པར་རབ་ཏུ་དབྱུང་བར་མི་བྱའོ་ཞེས་བྱ་བའི་ཞུ་བ་ལ་སྟེ། གནས་གསུམ་པོ་དེ་དག་ལ་དེ་གཉིས་བསྐྱེད་པའི་ཕ་མ་མ་ཡན་དུ་ཟིན་ཀྱང་ཕ་མ་ཉིད་དང་འདྲའོ། །འདིར་གཞུང་ནི་བཙུན་པ་བུ་བརྙན་མ་ཞིག་རེ་ཞིག་བསྙེན་པར་རྫོགས་པར་བགྱིད་ན་སུ་ལ་བཟོད་པ་གསོལ་བར་བགྱི། བཀའ་སྩལ་པ། བུ་ཉིད་དང་འདྲ་བར་གང་གིས་ཁས་བླངས་པ་དེ་ལའོ། །བུ་མོ་བརྙན་མ་ཡང་བུ་མོ་ཉིད་དང་འདྲ་བར་གང་གིས་ཁས་བླངས་པ་དེ་ལའོ་ཞེས་གསུངས་པ་ཡིན་ནོ། །མི་མ་ཡིན་པའི་འགྲོ་བ་གཉིས་ནི་མ་ཡིན་ནོ་ཞེས་བྱ་བ་ནི། ཕ་དང་མ་མི་མ་ཡིན་པའི་འགྲོ་བར་ཀ་གཏོགས་པ་གཉིས་ནི་གནང་བ་དང་བསྲེལ་བ་དང་ཞུ་བ་དག་ལ་ཕ་མ་ཉིད་དང་འདྲ་བ་མ་ཡིན་བའོ། །འདིར་གཞུང་ནི་བཙུན་པ་གང་གི་ཕ་མ་གཉིས་དུས་ལ་བབ་བམ་དུད་འགྲོའི་སྐྱེ་
གནས་སུ་གཏོགས་པ་ལགས་ན། དེའི་སྐྲ་བྲེག་པ་དགེ་འདུན་ཐམས་ཅད་ལ་ཞུ་བར་བགྱིའམ། ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །དེ་གཉིས་ལས་མཚམས་མེད་པར་མི་འགྱུར་རོ་ཞེས་བྱ་བ་ནི། ཕ་མ་དུད་འགྲོའི་སྐྱེ་གནས་སུ་གཏོགས་པ་དེ་གཉིས་བསད་པ་ལས་མཚམས་མེད་པ་འབྱུང་བར་མི་འགྱུར་བའོ། །དེ་ནི་སྐྱེད་པར་བྱེད་པ་གཉིས་ལས་ཏེ། མཚན་གྱུར་པ་གཉིས་ཀྱང་ངོ་ཞེས་བྱ་བ་ལ། དེ་ནི་ཞེས་བྱ་བ་ནི་མཚམས་མེད་པ་འབྱུང་བའོ། །སྐྱེད་པར་བྱེད་པ་གཉིས་ལས་ཏེ་ཞེས་བྱ་བ་ནི། ཕ་མ་མིའི་འགྲོ་བར་གཏོགས་པ་གཉིས་བསད་པ་ལས་མཚམས་མེད་པ་འབྱུང་བར་འགྱུར་བའོ། །མཚན་གྱུར་པ་གཉིས་ལས་ཀྱང་ངོ་ཞེས་བྱ་བ་ནི། ཕ་མ་མིའི་འགྲོ་བར་གཏོགས་པ་དེ་གཉིས་མཚན་གྱུར་ཏེ། གལ་ཏེ་མ་སྐྱེས་པ་ཉིད་དུ་གྱུར་ཏམ། ཕ་བུད་མེད་ཉིད་དུ་གྱུར་ན་ཡང་དེ་གཉིས་བསད་པ་ལས་མཚམས་མེད་པ་འབྱུང་བར་འགྱུར་བ་ཁོ་ན་ཡིན་པའོ། །མ་བསད་པ་ལ་སོགས་དེ་བྱས་པ་ཉིད་གཙོ་བོའོ་ཞེས་བྱ་བ་ནི། མ་བསད་པ་ལ་སོགས་པ་དག་རབ་ཏུ་འབྱུང་བའི་ཕྱིར་བཀག་པ་གང་ཡིན་པ་དེ་བྱས་པ་ཉིད་དེ་མཚམས་མེད་པ་དེ་བྱས་པ་ཉིད་དོ། །མཚམས་མེད་པ་དེ་ལས་མ་བསད་པ་ལ་སོགས་པ་གཙོ་བོ་ཡིན་ཏེ། གཙོ་ཆེར་བྱའི། མ་བསད་པ་ཉི་ཚེ་ན་གཙོ་བོ་མ་ཡིན་ན། །དེའི་ཕྱིར་མཚམས་མེད་པ་བྱེད་པ་རབ་ཏུ་དབྱུང་བར་མི་བྱ་བ་ཡིན་གྱི། མ་བསད་པ་ཉི་ཚེ་ནི་རབ་ཏུ་དབྱུང་བར་ཡང་བྱ་སྟེ། ཇི་ལྟར་ཕ་མ་དུད་འགྲོའི་སྐྱེ་གནས་སུ་གཏོགས་པ་གསོད་པར་བྱེད་ན་ཡང༌། འོན་ཀྱང་དེ་རབ་ཏུ་དབྱུང་དུ་རུང་བ་ལྟ་བུའོ།། །།བམ་པོ་བརྒྱད་པ། སྐྱེས་པས་དགེ་སློང་མ་ལ་ཅི་ཞིག་བྱས་ན་དགེ་སློང་མ་སུན་ཕྱུང་བར་འགྱུར་ཞིང༌། བུད་མེད་ཀྱིས་ཀྱང་དགེ་སློང་ལ་ཅི་ཞིག་བྱས་ན་དགེ་སློང་སུན་ཕྱུང་བར་འགྱུར། དེ་ཅིའི་ཕྱིར་དེ་གཉིས་བསྟན་ཅེ་ན། དེའི་ཕྱིར། ཕམ་པར་འགྱུར་བ་མ་བྱུང་བ་ཉིད་ལ་མི་ཚངས་པར་སྤྱད་པས་ཉམས་སུ་མྱོང་བ་དག་སུན་ཕྱུང་བ་ཉིད་ད་ཡིན་ནོ་ཞེས་བྱ་བ་སྨྲས་ཏེ། མི་ཆངས་པར་སྤྱད་པས་དགེ་སློང་དང་དགེ་སློང་མ་སུན་ཕྱུང་བ་བྱས་ན། དགེ་སློང་སུན་ཕྱུང་བ་ཉིད་དང༌། དགེ་སློང་མ་སུན་ཕྱུང་བ་ཉིད་ཡིན་པར་འགྱུར་བར་རིག་པར་བྱའོ། །དོན་འདི་ཉིད་ནི་ལུང་གིས་གོ་བར་བྱེད་
དེ། འདིར་གཞུང་ནི་བཙུན་པ་ཅི་ཙམ་གྱིས་ན་དགེ་སློང་མ་སུན་ཕྱུང་བ་ཞེས་བགྱི། ཉེ་བ་འཁོར་གང་གིས་མི་ཚངས་པར་སྤྱད་པས་དགེ་སློང་མ་སུན་ཕྱུང་བར་གྱུར་ནའོ་ཞེས་གསུངས་པ་ཡིན་ནོ། །འདི་ལྟར་དགེ་སློང་མ་ཞེས་སྨོས་པ་ནི་མཚོན་པ་སྟེ། དགེ་སློང་སུན་ཕྱུང་བའི་མཚན་ཉིད་ཀྱང་དེ་ཁོ་ན་བཞིན་དུ་ཤེས་པར་བྱའོ། །འོ་ན་མི་ཚངས་པར་སྤྱད་པས་ཞེས་སྨོས་ན་ཅི་ལུང་དུ་མ་བསྟན་པ་ལ་སོགས་པའི་སེམས་གང་ཡང་རུང་བས་ཉམས་སུ་མ་མྱོང་བ་དག་ལ་ཡང་སུན་ཕྱུང་བ་ཉིད་འབྱུང་བར་འགྱུར་རམ་ཞེ་ན། མ་ཡིན་ཏེ་འོ་ན་ཇི་ལྟ་བུ་དག་ལ་ཞེ་ན་དེའི་ཕྱིར། ཉམས་སུ་མྱོང་བ་དག་ཅེས་བྱ་བ་སྨྲས་ཏེ། མི་ཚངས་པར་སྤྱད་པ་དེ་ཉམས་སུ་མྱོང་བ་སུན་ཕྱུང་བ་ཉིད་ཡིན་གྱི། གཞན་དུ་མ་ཡིན་ནོ། །འོ་ན་སུན་ཕྱུང་བ་ནི་གཅིག་ཡིན་པའི་ཕྱིར་གཅིག་གི་ཚིག་ཏུ་འགྱུར་བ་ཡིན་ན། ཇི་ལྟར་གཉིས་ཀྱི་ཚིག་ཏུ་བྱས་ཤེ་ན་ཉེས་པ་མེད་དེ། སུན་ཕྱུང་བ་གཉིས་སྲིད་པའི་ཕྱིར་ཏེ། འདི་ལྟར་བགྲོད་པ་ཡང་སུན་ཕྱུང་བར་འགྱུར་ལ། འགྲོ་བ་ཡང་སུན་ཕྱུང་བར་འགྱུར་བ་སྲིད་པའི་ཕྱིར་རོ། །འདི་ལྟར་སུན་དབྱུང་བ་དང་སུན་འབྱིན་པ་གཉི་གས་དུས་གཅིག་ཏུ་ཉམས་སུ་མྱོང་བ་ཡན་ལག་ཉིད་དུ་མི་འདོད་ཀྱི། སུན་འབྱིན་པ་ཁོ་ནས་ཉམས་སུ་མྱོང་བ་ཡན་ལག་ཉིད་ཡིན་ནོ། །དེས་ན་འདིར་ཟླས་ཉམས་སུ་མྱོང་བ་ཁས་མི་བླང་སྟེ། འདི་ལྟར་གཞན་གྱི་ཉེས་པས་གཞན་ལ་མི་གོས་པའི་ཕྱིར་རོ། །དེ་ལྟ་མ་ཡིན་དུ་ཟིན་ན་གང་གི་ཚེ་ལ་ལས་འདོད་ཆགས་དང་བྲལ་བ་མོ་ཞིག་སུན་འབྱིན་པར་བྱེད་ན་དེ་ཡང་སུན་ཕྱུང་བ་ཉིད་དུ་མི་འགྱུར་ཏེ། ཟླས་ཉམས་སུ་མྱོང་བ་མེད་པའི་ཕྱིར་རོ། །དེའི་ཕྱིར་སུན་ཕྱུང་བ་གཉིས་ཀྱི་ཚིག་ཏུ་བྱས་པ་བསྟན་པའི་ཕྱིར། གང་གི་ཚེ་དགེ་སློང་གིས་དགེ་སློང་མ་ལ་རྩོལ་ཞིང༌། ཇི་ལྟར་དགེ་སློང་གིས་ཉམས་སུ་མྱོང་བ་ལྟར་གལ་ཏེ་དགེ་སློང་མས་ཀྱང་ཉམས་སུ་མྱོང་བར་གྱུར་ན། དེའི་ཚེ་གཉི་ག་ཡང་སུན་ཕྱུང་བ་ཉིད་ཡིན་ཏེ། དགེ་སློང་ནི་དགེ་སློང་མ་སུན་ཕྱུང་བ་ཡིན་ལ། དགེ་སློང་མས་ཡང་དགེ་སློང་སུན་ཕྱུང་པ་ཡིན་ནོ། །དེ་བཞིན་དུ་དགེ་སློང་མས་དགེ་སློང་ལ་རྩོལ་ཞིང་གཉི་གས་ཉམས་སུ་མྱོང་བར་གྱུར་ན་ཡང་གཉི་ག་སུན་ཕྱུང་བ་ཉིད་ཡིན་ནོ། །གང་ཡང་རུང་བས་ཉམས་སུ་མྱོང་བར་གྱུར་ན་ནི་གང་ཡང་རུང་བ་དེ་ཉིད་སུན་ཕྱུང་བ་ཡིན་ནོ། །དེ་བཞིན་དུ་དགེ་སློང་གིས་དགེ་
སློང་ལ་རྩོལ་ཞིང་གཉི་གས་ཉམས་སུ་མྱོང་བར་གྱུར་ན། གཉི་ག་དགེ་སློང་སུན་ཕྱུང་བ་ཉིད་ཡིན་ནོ། །གལ་ཏེ་གཅིག་གིས་ཉམས་སུ་མྱོང་བར་གྱུར་ན་ནི། དེ་ཉིད་དགེ་སློང་སུན་ཕྱུང་བ་ཉིད་ཡིན་ནོ། །ཅི་ཕམ་པར་འགྱུར་བ་འབྱུང་བའི་ཡུལ་ལ་མི་ཚངས་པར་སྤྱད་པས་ཀྱང་སུན་ཕྱུང་བ་ཉིད་དུ་འགྱུར་རམ་ཞེ་ན་མ་ཡིན་ཏེ། དེའི་ཕྱིར་ཕམ་པར་འགྱུར་བ་མ་བྱུང་བ་ཉིད་ལ་ཞེས་བྱ་བ་སྨྲས་ཏེ། སུན་དབྱུང་བར་བྱ་བའོ། །འདིར་གཞུང་ནི་བཙུན་པ་རེ་ཞིག་གང་ཟག་བརྒྱད་ཀྱིས་དགེ་སློང་མ་གཅིག་ལ་དངོས་པོ་བརྒྱད་པོ་རེ་རེས་སུན་འབྱིན་པར་བགྱིད་ན། དགེ་སློང་མ་དེ་སུན་ཕྱུང་བ་ཞེས་བགྱིའམ། ཉེ་བ་འཁོར་སུན་ཕྱུང་བ་ཞེས་བྱའོ། །གང་ཟག་དེ་དག་ལས་དུ་ཞིག་དགེ་སློང་མ་སུན་ཕྱུང་བ་ཞེས་བགྱི། བཀའ་སྩལ་པ། ཉེ་བ་འཁོར་འགའ་ཡང་མ་ཡིན་ནོ་ཞེས་གསུངས་པ་ཡིན་ནོ། །དེ་ནི་རེག་པ་དང་ལུས་བཀན་པ་གཉིས་ཀྱིས་དང་པོ་ཁོ་ནར་ཕམ་པར་འགྱུར་བས། དེས་ན་འདིར་སུན་ཕྱུང་བ་ཉིད་དུ་རྣམ་པར་མ་བཞག་པར་སྣང་ངོ༌། །འོ་ན་དགེ་སློང་མ་སུན་ཕྱུང་བ་ཇི་ལྟར་རྣམ་པར་གཞག་པར་བྱ་ཞེ་ན། ནོམ་པ་དང་ཉུག་པ་ཉམས་སུ་མ་མྱོང་པའི་དགེ་སློང་མ་ལ་མི་ཚངས་པར་སྤྱད་ནའོ། །ཡང་ན་སྐྱེས་པའི་ལུས་ལ་མ་རེག་པའི་དགེ་སློང་མ་ལ་མི་ཚངས་པར་སྤྱད་ན། གང་ཟག་དེ་དགེ་སློང་མ་སུན་ཕྱུང་བ་ཡིན་ནོ། །སྔོན་རབ་ཏུ་བྱུང་བ་ལ་སྐྱེས་པའི་ཆོས་ཉིད་མེད་པར་བསྟན་པ་གནས་སྐབས་ཀྱི་བྱེ་བྲག་ལ་དམིགས་ཀྱིས་བསལ་བ་བསྟན་པའི་ཕྱིར། བུད་མེད་བསླབ་པ་ཕུལ་ནས་སྐྱེས་པ་ཉིད་དུ་གྱུར་པ་ན་རབ་ཏུ་དབྱུང་བ་དང་བསྙེན་པར་རྫོགས་པར་རུང་བ་ཉིད་དོ་ཞེས་བྱ་བ་སྨྲས་ཏེ། བུད་མེད་བསླབ་པ་ཕུལ་ནས་ཉམས་པར་གྱུར་པ་མཚན་གྱུར་ནས་སྐྱེས་པ་ཉིད་དུ་གྱུར་པ་ནི་རབ་ཏུ་དབྱུང་བ་དང་བསྙེན་པར་རྫོགས་པར་བྱར་རུང་བ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་མ་བསླབ་པ་འབུལ་བར་བྱེད་ཅིང་དེའི་འོག་ཏུ་མཚན་གྱུར་ནས། ཕོའི་དབང་པོ་བྱུང་ཞིང་མོའི་དབང་པོ་འགགས་པར་གྱུར་ན་དེའི་ཚེ་དེ་རབ་ཏུ་དབྱུང་བར་བྱ་བསྙེན་པར་རྫོགས་པར་བྱའོ། །ཕམ་པར་འགྱུར་པའི་ཚིག་ལ་སྤྱིར་སྐྱེ་བའི་ཆོས་ཉིད་མེད་པར་བསྟན་པ་གནས་སྐབས་གཞན་ལ་བྱེ་བྲག་གི་གནས་སྐབས་བསྟན་པའི་ཕྱིར། ཕམ་པར་འགྱུར་བ་ཐུན་མོང་མ་ཡིན་པ་ལྷག་པར་སྤྱད་པ་ཅན་
ཡང་ངོ་ཞེས་བྱ་བ་སྨྲས་ཏེ། དགེ་སློང་མ་རེག་པ་དང་ལུས་བཀན་པ་དང༌། ཁ་ན་མ་ཐོབ་འཆབ་པ་དང༌། ཟློག་པར་བྱེད་པའི་ཕམ་པར་འགྱུར་བ་དགེ་སློང་དང་ཐུན་མོང་མ་ཡིན་པ་ལྷག་པར་སྤྱད་པ་དེའི་འོག་ཏུ་བསླབ་པ་ཕུལ་བའི་བུད་མེད་ཉམས་པ་ལྷག་པར་སྤྱད་པ་ཅན་དེ་སྐྱེས་པ་ཉིད་དུ་གྱུར་ན། ཡང་རབ་ཏུ་དབྱུང་བ་དང་བསྙེན་པར་རྫོགས་པར་བྱར་རུང་ངོ༌། །བུད་མེད་བསྙེན་པར་རྫོགས་པར་བྱ་བ་ལ་གཉུག་མར་གནས་པ་རྣམས་ཡན་ལག་ཉིད་དོ་ཞེས་བྱ་བ་ནི། འདིར་བུད་མེད་བསྙེན་པར་རྫོགས་པར་བྱ་བ་ལ་དགེ་འདུན་གྱིས་བསྣན་ནོ་ཞེས་གང་སྨྲས་པ་དེ་ལ་དགེ་སློང་གཉུག་མར་གནས་པ་རྣམས་ཡན་ལག་ཉིད་ཡིན་གྱི། གློ་བུར་དུ་ལྷགས་པ་རྣམས་དང་འགྲོ་བར་ཆས་པ་རྣམས་ཡན་ལག་ཉིད་མ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་གསོ་སྦྱོང་གི་གཞི་ལས་བཙུན་པ་བཅོམ་ལྡན་འདས་ཀྱིས། དགེ་སློང་རྣམས་ཀྱིས་དགེ་སློང་རྣམས་ལས་དགེ་སློང་མའི་དངོས་པོ་བཙལ་བར་བྱའོ། ཞེས་གསུངས་པ་ལ། དགེ་སློང་དེ་དག་གང་དག་ལགས། ཉེ་བ་འཁོར་གཉུག་མར་གནས་པ་དང་རིང་དུ་གནས་པ་དག་གོ་ཞེས་གསུངས་པ་ཡིན་ནོ། །སྐྱེ་བའི་ཚེ་ཉིད་ན་ཕུལ་ལམ། ཉམས་ན་མི་སྐྱེའོ་ཞེས་བྱ་བ་ལ། སྐྱེ་བཞིན་པས་སྐྱེ་བའི་ཚེ་སྟི་འབྱུང་བའི་ཚེའོ། །སྐྱེ་བའི་ཚེ་དེའི་དངོས་པོ་ནི་སྐྱེ་བའི་ཚེ་ཉིད་དེ། སྐྱེ་བའི་ཚེ་ཉིད་དང་འབྱུང་བའི་ཚེ་ཉིད་དོ། །སྡོམ་པ་ལེན་པའི་ཚེ་ན་སྡོམ་པ་དེ་སྐྱེ་བའི་ཚེ་ཉིད་གང་ཡིན་པའི་སྐྱེ་བའི་ཚེ་ཉིད་དེའི་ཕུལ་བ་ཡོངས་སུ་བཏང་ཞིང་ཕྱིར་ཕུལ་ལམ་མཚན་གཉིས་སྐྱེས་པ་ལ་སོགས་པའི་སྐྱོན་གྱིས་ཉམས་ན། དེའི་སྡོམ་པ་དེ་མི་སྐྱེ་སྟེ། སྐྱེ་བར་མི་འགྱུར་རོ་ཞེས་བྱ་པའི་ཐ་ཚིག་གོ །འདིར་གཞུང་ནི་སིལ་བུ་དག་ལས་ཉེ་བ་འཁོར་རེ་ཞིག །བསྙེན་པར་རྫོགས་ནས་ཁྱིམ་པ་ཉིད་ཡིན་ནོ་སྙམ་དུ་སོ་སོར་ཤེས་ན་ཡང་བསྙེན་པར་རྫོགས་པ་མ་ཡིན་ཞེས་བྱ་བ་ནི། བསྙེན་པར་རྫོགས་པར་བྱེད་པའི་ཚེ་ན་ལྟ་སྨོས་ཀྱང་ཅི་དགོས་འདིར་སྐྱེ་བ་ལ་མངོན་དུ་གྱུར་པ་ནི་སྐྱེ་བའི་ཚེ་ཉིད་མ་ཡིན་པར་རིག་པར་བྱ་སྟེ། དེ་ལས་སྐྱེ་བའི་ཚེ་ཉིད་གང་གིས་ཀྱང་བགེགས་བྱ་བར་མི་ནུས་པས། འདི་ལྟར་སྐད་ཅིག་མ་དུ་མས་ཆོད་པ་ལ་སྐྱེ་བའི་ཚེ་ཉིད་ཅེས་བྱའོ་ཞེས་གསུངས་པ་ཡིན་ནོ། །རབ་ཏུ་འབྱུང་བའི་གཞི་ཞུ་བ་ཕལ་ཆེ་བའི་སྐབས་སོ།། །།བསླབ་པ་འབུལ་བའི་ཆོ་གའི་མཚན་ཉིད་སྨྲས་པ།
རང་བཞིན་ཉམས་པས་བྱས་པ་ཉིད་ནི་ཕུལ་བ་ཉིད་མ་ཡིན་ནོ་ཞེས་བྱ་བ་ལ། རང་བཞིན་ཉམས་པས་ཞེས་བྱ་བ་ནི་གང་གི་ཐ་མལ་པའི་བློའི་རང་བཞིན་ཉམས་པ་སྟེ། སྨྱོས་པ་ལ་སོགས་པས་སོ། །བྱས་པ་ཉིད་ཅེས་བྱ་བ་ན་བསླབ་པ་དབུལ་བ་བྱས་པ་སྟེ། དེའི་དངོས་པོ་ནི་བྱས་པ་ཉིད་དོ། །རང་བཞིན་ཉམས་པས་འབུལ་བ་བྱས་པ་ཉིད་ནི་རང་བཞིན་ཉམས་པས་བྱས་པ་ཉིད་དེ་དེ་ནི་ཕུལ་བ་ཉིད་མ་ཡིན་ནོ། །འདི་སྐད་བསྟན་ཏེ། གལ་ཏེ་རང་བཞིན་ཉམས་པ་སྨྱོས་པ་ལ་སོགས་པས་བསླབ་པ་ཕུལ་ན་ཕུལ་དུ་ཟིན་ཀྱང་བསླབ་པ་ཕུལ་བར་མི་འགྱུར་རོ། །དེ་ལ་མ་ཡིན་ནོ་ཞེས་བྱ་བ་ནི། ཉན་པ་པོ་རང་བཞིན་ཉམས་པ་དེ་ལ་བསླབ་པ་འབུལ་བར་བྱེད་ན་ཡང་བསླབ་པ་འབུལ་བའི་བསླབ་པ་དེ་ཕུལ་བ་མ་ཡིན་པའོ། །ལྐུགས་པ་ལ་མ་ཡིན་ནོ་ཞེས་བྱ་བ་ནི། ཉན་པ་པོ་ལྐུགས་པ་དེ་ལ་ཕུལ་ན་ཡང་དེ་འབུལ་བ་མ་ཡིན་པའོ། །གང་རྣམ་པ་ཐམས་ཅད་དུ་སྨྲ་མི་ནུས་པ་དེ་ནི་འདིར་ལྐུགས་པར་འདོད་དོ། །མི་མ་ཡིན་པའི་འགྲོ་བ་ལ་མ་ཡིན་ནོ་ཞེས་བྱ་བ་ནི། ལྷ་དང་ཀླུ་དང་གནོད་སྦྱིན་དང་ཤ་ཟ་ལ་སོགས་པ་ལ་ཕུལ་བ་གང་ཡིན་པ་དེ་ཡང་ཕུལ་བ་མ་ཡིན་པ་ཉིད་དོ། །མ་གོ་བ་ཉིད་ལ་མ་ཡིན་ནོ་ཞེས་བྱ་བ་ནི། ཉན་པ་པོ་གང་གི་མདུན་དུ་འབུལ་པར་བྱེད་པ་དེས་དེའི་ཚིག་དང་བརྡ་མ་གོ་བ་ཉིད་དེ་ཁོར་དུ་མ་ཆུད་པ་ཉིད་ལ་ཕུལ་ན་ཡང་ཕུལ་བ་མ་ཡིན་པའོ། །གླེན་པ་དང༌། འོན་པ་དང༌། སྙོམས་པར་ཞུགས་པ་དང༌། མཐའ་འཁོབ་པ་ལ་དབུས་ཀྱིས་ཕུལ་བ་ཞེས་བྱ་བ་དེ་དག་ཀྱང་བསྡུས་ཏེ། དེ་དག་ལ་ཡང་མ་གོ་བ་ཉིད་ཀྱི་རྒྱུད་སྣང་ངོ༌།། དབེན་པར་མ་ཡིན་ནོ་ཞེས་བྱ་བ་ནི་དབེན་པར་དབེན་པའི་འདུ་ཤེས་ཀྱིས་སམ། དབེན་པ་མ་ཡིན་པའི་འདུ་ཤེས་ཀྱིས་དབུལ་བ་ཉིད་བྱས་ན་ཡང་དེ་ཕུལ་བ་ཉིད་མ་ཡིན་པ་སྟེ། འདི་ལྟར་དབེན་པ་དེར་གང་དབེན་པའི་འདུ་ཤེས་ཀྱིས་སམ་མི་དབེན་པའི་འདུ་ཤེས་ཀྱིས་འབུལ་བར་ཞུགས་པའི་མི་དབེན་པ་ཡང་ལྐུགས་པའི་ཡུལ་ལ་ཞུགས་པ་བཞིན་དུ་གྱུར་ཏེ། སྐྱེ་བོ་ཐམས་ཅད་ལ་གྲགས་པའི་འདུ་ཤེས་མེད་པའི་ཕྱིར་རོ། །དབེན་པར་འདུ་ཤེས་པས་མ་ཡིན་ནོ་ཞེས་བྱ་བ་ནི། མི་དབེན་པར་དབེན་པའི་འདུ་ཤེས་ཀྱིས་སམ། རྣམ་པ་ཐམས་ཅད་དུ་དབེན་པའི་
འདུ་ཤེས་ཀྱིས་དབུལ་བ་བྱས་ན་ཡང་ཕུལ་བ་ཉིད་མ་ཡན་པའོ། །རང་བཞིན་ཉམས་པ་ལ་སོགས་པ་ཐམས་ཅད་ལ་ཡང་འདི་ལྟར་བདག་ལ་ཐ་སྙད་ལ་གནས་པའི་བློ་མེད་པའི་ཕྱིར་ཏེ། དེས་ན་དེ་དག་ལ་ཕུལ་བ་ཡང་ཕུལ་བར་མི་འགྱུར་རོ། །ཇི་ལྟར་ཕུལ་བར་མ་འགྱུར་བ་བསྟན་ནས། ད་ནི་བསླབ་པ་འབུལ་བར་བྱེད་པའི་ཚིག་དག་བརྗོད་པར་བྱ་སྟེ། བསླབ་པའམ། སངས་རྒྱས་མ། ཆོས་སྨ། དགེ་འདུན་ནམ། མདོ་སྡེ་འམ། འདུལ་བའམ། མ་མོའམ། སློབ་དཔོན་ནམ། མཁན་པོ་འབུལ་ལོ། །བདག་ཁྱིམ་པའམ། དགེ་ཚུལ་ལམ། ཟ་མ་འམ། མ་ནིང་ངམ། དགེ་སློང་མ་སུན་ཕྱུང་བའམ། རྐུ་ཐབས་སུ་གནས་པའམ། ཐ་དད་དུ་གནས་པའམ། གནས་པར་མི་བྱ་བའམ། མུ་སྟེགས་ཅན་ནམ། མུ་སྟེགས་ཅན་ཞུགས་པའམ། མ་བསད་པའམ། ཕ་བསད་པའམ། དགྲ་བཅོམ་པ་བསད་པའམ། དགེ་འདུན་གྱི་དབྱེན་བྱས་པའམ། དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བར་གཟུང་དུ་གསོལ། བདག་ཚངས་པ་མཚུངས་པར་སྤྱོད་པ་ཁྱེད་ཅག་དང་ལྷན་ཅིག་གནས་པའམ། ལོངས་སྤྱོད་པས་ཆོག་གོ་ཞེས་བྱ་བ་ལྟ་བུ་ནི་འབུལ་བའི་ཚིག་དག་ཡིན་ནོ་ཞེས་བྱ་བ་ལ། ལྟ་བུ་ནི་ཞེས་བྱ་བའི་སྒྲ་ནི་རྣམ་པ་ཉིད་བསྟན་པའི་ཕྱིར་ཏེ། འབུལ་བའི་ཚིག་དག་ནི་རྣམ་པ་དེ་ལྟ་བུ་དག་དང༌། ཆོ་ག་དེ་ལྟ་བུ་དག་དང༌། རང་བཞིན་དེ་ལྟ་བུ་དག་ཡིན་ནོ་ཞེས་བྱའོ། །དེ་ལྟར་ན་བསླབ་པ་འཕུལ་བ་ནི་ཚིག་ཏུ་སྨྲས་པ་དེ་ཁོ་ན་ལས་བསླབ་པ་ཕུལ་བར་འགྱུར་བར་མ་ཟད་ཀྱི། ཚིག་ཏུ་མ་སྨྲས་པར་གཏོང་བའི་མཚན་ཉིད་མ་བྱས་ཀྱང་ཕུལ་བར་འགྱུར་ཏེ། དེས་ན་ལུས་ཀྱི་རྣམ་པར་རིག་བྱེད་ལས་ཀྱང་ཕུལ་བར་འགྱུར་ལ། ངག་གི་རྣམ་པར་རིག་བྱེད་ལས་ཀྱང་ཕུལ་བར་འགྱུར་རོ། །འབུལ་ལོ་ཞེས་བྱ་བའི་སྒྲ་ནི་བསླབ་པའམ་ཞེས་བྱ་བ་མན་ཆད་མཁན་པོ་ཞེས་པའི་བར་གྱི་སྒྲ་རྣམས་དང་སོ་སོར་སྤྱར་རོ། །དེ་བཞིན་དུ་བདག་ཅེས་བྱ་བའི་སྒྲ་ཡང་ཁྱིམ་པའམ་ཞེས་བྱ་བ་མན་ཆད་དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བར་ཞེས་བྱ་བའི་བར་གྱི་སྒྲ་རྣམས་དང་སོ་སོར་སྦྱར་རོ། །ལྷག་མ་གཞན་གྱིས་བྱེད་པའི་ཚིག་ནི་དངོས་སུ་བསྟན་པ་ཡིན་ནོ། །དབུལ་བའི་ཆོ་གའོ།། །།དབུལ་བའི་ཆོ་ག་བཤད་ནས། ད་ནི་རྣམ་
པར་འབྱེད་པར་གཏོགས་པའི་ལྟུང་བ་རྣམས་ཀྱི་མཚན་ཉིད་བཤད་པར་བྱ་སྟེ། གང་བྱས་ན་མི་ཚངས་པར་སྤྱོད་པའི་ཕམ་པར་འགྱུར་ན་ཞེ་ན་དེའི་ཕྱིར། བཅུག་རེག་ཉམས་སུ་མྱོང་བར་བྱས་ནའོ་ཞེས་བྱ་བ་སྨྲས་ཏེ། བཅུག་ཅེས་བྱ་བའི་སྒྲ་བའི་འདི་བྱེ་བྲག་ཏུ་བསྒྲུབ་པ་ནི་རྣམ་པ་གཉིས་སུ་བྱ་སྟེ། དེས་འཛུད་པར་བྱེད་པས་བཅུག་པ་སྟེ། བྱེད་པ་པོ་བསྒྲུབ་པ་དང༌། དེར་གཞུག་པར་བྱ་བས་བཅུག་པ་སྟེ། གནས་བསྒྲུབ་པ་ནི་བཅུག་པའི་སྒྲ་ཡིན་ནོ། །དེ་ལ་གནས་བསྒྲུབ་པའི་ཕྱོགས་ལ་བརྟེན་ནས་ནི་བཅུག་ཅེས་བྱ་བའི་སྒྲས་ཁ་དང་བཤང་བའི་ལམ་དང་མོའི་དབང་པོ་བརྗོད་དེ། ཁ་དང་བཤང་བའི་ལམ་དང་མོའི་དབང་པོ་དེར་ཡན་ལག་གི་རྣམ་པར་གཞག་པར་བྱ་བ་ཡིན་པས། ཁ་དང་བཤང་བའི་ལམ་དང་མོའི་དབང་པོར་ནི་བཅུག་པ་ཞེས་བྱའོ། །ཁ་དང་བཤང་བའི་ལམ་དང་མོའི་དབང་པོར་བཅུག་པ་དེའི་རེག་པ་ནི་ཡན་ལག་གི་རྣམ་པ་དེར་བཅུག་པས་བྱེད་པ་གང་ཡིན་པའོ། །རེག་པ་དེའི་ཉམས་སུ་མྱོང་བར་བྱས་པ་ནི་ཉམས་སུ་མྱོང་བར་འགྱུར་བ་གང་ཡིན་པའོ། །དེ་ཉམས་སུ་མྱོང་བར་གྱུར་ན་དེའི་ཚེ་སྟེན་པར་བྱེད་པའི་དགེ་སློང་དེ་ཕམ་པར་འགྱུར་ཏེ། དེ་ལྟར་རེ་ཞིག་གནས་བསྒྲུབ་པའི་སྒོ་ནས་སྟེན་པར་བྱེད་པའི་དགེ་སློང་གི་ཕམ་པར་འགྱུར་བ་རྣམ་པར་གཞག་པ་བྱས་པ་ཡིན་ནོ། །བཅུག་པའི་སྒྲས་བྱེད་པ་པོའི་བསྒྲུབ་པའི་ཕྱོགས་ལ་བརྟེན་ནས་ནི་བསྙེན་པར་བྱ་བ་དགེ་སློང་དང་དགེ་སློང་མ་རྣམས་ཀྱི་ཁ་དང་བཤང་བའི་ལམ་དང་མོའི་དབང་པོར་ཕོའི་དབང་པོ་འཛུད་པར་བྱེད་པས་བཅུག་པ་ལ་ཕམ་པར་འགྱུར་བར་རྣམ་པར་འཇོག་པར་བྱེད་དོ། །ཕོའི་དབང་པོ་བཅུག་པ་དེའི་རེག་པ་ནི་པ་སྟེན་པར་བྱ་བ་ཁ་དང་བཤང་བའི་ལམ་དང་མོའི་དབང་པོ་དང་ལྡན་པའི་ཕྱོགས་དེར་རེག་པའོ། །རེག་པ་དེའི་ཉམས་སུ་མྱོང་བར་བྱས་པ་ནི་ཉམས་སུ་མྱོང་བར་འགྱུར་བ་གང་ཡིན་པའོ། །དེ་ཉམས་སུ་མྱོང་བར་གྱུར་ན་དེའི་ཚེ་བསྟེན་པར་བྱ་བའི་དགེ་སློང་དང་དགེ་སློང་མ་དེ་ཕམ་པར་འགྱུར་ཏེ། དེ་ནི་བྱེད་པ་པོ་བསྒྲུབ་པའི་སྒོ་ནས་བསྟེན་པར་བྱ་བའི་དགེ་སློང་དང་དགེ་སློང་མའི་ཕམ་པར་འགྱུར་བ་རྣམ་པར་གཞག་པ་བྱས་པ་ཡིན་ནོ། །དེ་ལྟར་མདོའི་བྱེ་བྲག་ཏུ་བསྒྲུབ་པ་རྣམ་པ་གཉིས་པོ་དེ་དག་ནི་ལན་གཉིས་སུ་བཟླས་པས་
འཐོབ་པོ། །གཞན་རྒྱལ་བར་བྱེད་དུ་བཅུག་པ་ནི་གཞན་རྒྱལ་བའོ། །དེ་ལ་ཡོད་པའི་ཉེས་པ་ནི་ཕམ་པའོ། །དེ་བྱེད་པར་འགྱུར་བའི་ཕྱིར་ཕམ་པར་འགྱུར་བ་སྟེ་ལྟུང་བའོ། །མདོ་སྔ་མར་བཅུག་པ་ཞེས་བྱ་བའི་སྒྲ་སྨོས་པ་ལ། བཅུག་པ་ཡང་གཉིས་ལ་ལྟོས་ཏེ་བྱེད་པ་པོར་གྱུར་པ་འཇུད་པར་བྱེད་པ་དང༌། གནས་སུ་གྱུར་པ་གཞུག་པར་བྱ་བའི་ཡུལ་ལོ། །དེ་ལ་རེ་ཞིག་བྱེད་པ་པོར་གྱུར་པ་འཛུད་པར་བྱེད་པ་བསྟན་པའི་ཕྱིར། ཟག་བྱེད་དོ་ཞེས་བྱ་བ་སྨྲས་ཏེ། ཕོའི་བཅུག་ན་ནི་ལྟུང་བ་ཡིན་ནོ། །གང་དུ་ཞེ་ན། གནས་སུ་གྱུར་པ་གཞུག་པར་བྱ་བའི་ཡུལ་བསྟན་པའི་ཕྱིར། དེར་རོ་ཞེས་བྱ་བ་སྨྲས་ཏེ། མོའི་ཟག་བྱེད་དུ་ཕོའི་ཟག་བྱད་བཅུག་པའི་རེག་པ་ཉམས་སུ་མྱོང་བར་བྱས་ན་ཡུལ་གྱི་ལྟུང་བར་གཞག་གོ །མོའི་ཟག་བྱེད་ཇི་ལྟར་དེའི་ཕོའི་ཟག་བྱེད་བཅུག་པའི་རེག་པ་ཉམས་སུ་མྱོང་བར་བྱས་ན་ལྟུང་བར་འགྱུར་ཞེ་ན་དེའི་ཕྱིར། མ་ཉམས་པར་རོ་ཞེས་བྱ་བ་སྨྲས་ཏེ། གཞུང་ལས་མིའི་བུད་མེད་གསོན་པ་མ་ཉམས་པ་ལའོ་ཞེས་གསུངས་པ་ཡིན་ནོ། །འདི་ལྟར་བྱེ་བྲག་མ་བསྟན་མོད་ཀྱི་འོན་ཀྱང་འདིར་མོའི་དབང་པོ་ཁོ་ནའི་མ་ཉམས་པ་ཉིད་དངོས་པོ་དེའི་བྱེ་བྲག་ཁོ་ན་གཟུང་ངོ༌། །ཡུལ་གཞན་བསྟན་པའི་ཕྱིར། ཁའམ་བཤང་བའི་ལམ་དུའོ་ཞེས་བྱ་བ་སྨྲས་ཏེ། བྱེ་བྲག་མ་བསྟན་པའི་ཕྱིར། འདིར་ཐམས་ཅད་དུ་ཡང་རང་གི་དང་གཞན་གྱི་དང༌། མིའི་དང་དུད་འགྲོའི་སྐྱེ་གནས་ལ་སོགས་པའི་རྒྱུད་དུ་གཏོགས་པའི་དང༌། མོའི་དང་ཕོའི་དང་མ་ནིང་གི་ཞེས་སྤྱིར་གང་ཡང་རུང་བ་གཟུང་ངོ༌། །དེ་དག་ཐམས་ཅད་ཀྱི་བྱེ་བྲག་གི་དོན་ཡང་མ་ཉམས་པ་ཞེས་བྱ་བར་སྦྱར་རོ། །གལ་ཏེ་མ་ཉམས་པ་དག་ནི་ཕམ་པར་འགྱུར་ན། ཉམས་པ་དག་ལ་ཅིར་འགྱུར་ཞེ་ན། དེའི་ཕྱིར་ཉམས་པ་དག་ལ་ནི་སྦོམ་པོར་རོ་ཞེས་བྱ་བ་སྨྲས་ཏེ། ཁ་དང་བཤང་བའི་ལམ་དང་མོའི་དབང་པོ་ཉམས་པ་དག་ཏུ་བཅུག་པ་ལ་ནི་ཁ་ན་མ་ཐོ་བ་སྦོམ་པོར་འགྱུར་ཏེ། དེ་ཉམས་སུ་མྱོང་བ་ཡོངས་སུ་རྫོགས་པར་མི་མྱོང་བའི་ཕྱིར་རོ། །ཕོའི་དབང་པོ་ཡང་གལ་ཏེ་ཉམས་པར་གྱུར་ན་དེ་ལ་ཡང་སྦོམ་པོ་ཉིད་དོ། །མི་རུང་བ་ཉིད་ལ་ནི་ན་སྨད་དོ་ཞེས་བྱ་བ་ནི། བགྲོད་པར་བྱ་བ་ཕོ་དང་མོ་དང་མ་ནིང་མི་རུང་བ་ཉིད་ལ་ཞེས་བྱ་བ་ལ་འཁྲིག་པ་སྤྱད་དུ་མི་རུང་བ། སྤྱད་མི་བཟོད་པ་ཉིད་ལ་བགྲོད་པར་བྱེད་པ་ཕོའི་དབང་པོས་
རྩོལ་བར་བྱེད་པ་ནི་ལྟུང་བ་ན་སྨད་ཅིང་དབྲི་བ་ཉིད་དུ་བྱའོ་ཞེས་བྱ་བའི་ཐ་ཚིག་གོ །དེ་ལྟར་ན་འདིར་ཚིག་གི་དོན་ནི་འབྱུང་སྟེ། བགྲོད་པར་བྱ་བ་རུང་བ་ཉིད་གང་ལ་བགྲོད་པར་བྱེད་པས་བཅུག་རེག་ཉམས་སུ་མྱོང་བར་བྱེད་པ་ནི་ཕམ་པར་འགྱུར་རོ། །བགྲོད་པར་བྱ་བ་མི་རུང་བ་ཉིད་གང་ལ་བགྲོད་པར་བྱེད་པས་སྩལ་ན་ནི་སྦོམ་པོའོ། །གང་ལ་ཕམ་པར་འགྱུར་བའི་བགྲོད་པར་བྱ་བ་རུང་བ་ཉིད་དེ་ལ་བགྲོད་པར་བྱེད་པས་རེག་ཅིང་ལུས་ལ་རེག་པ་ལ་སོགས་པ་བྱེད་ན་ནི་སྤོམ་པོའོ། །གང་ལ་ཕམ་པར་འགྱུར་བའི་བགྲོད་པར་བྱ་བ་མི་རུང་བ་ཉིད་དེ་ལ་བགྲོད་པར་བྱེད་པས་རེག་ཅིང་ལུས་ལ་རེག་པ་ལ་སོགས་པ་བྱས་ན་ནི་ཉེས་བྱས་སོ། །གང་ལ་སྦོམ་པོར་འགྱུར་བའི་བགྲོད་པར་བྱ་བ་རུང་བ་ཉིད་དེ་ལ་བགྲོད་པར་བྱེད་པས་རེག་ཅིང་ལུས་ལ་རེག་པ་ལ་སོགས་པ་བྱས་ན་ནི་སྦོམ་པོའོ། །གང་ལ་སྦོམ་པོར་འགྱུར་བའི་བགྲོད་པར་བྱ་བ་མི་རུང་བ་ཉིད་དེ་ལ་བགྲོད་པར་བྱེད་པས་རེག་ཅིང་ལུས་ལ་རེག་པ་ལ་སོགས་པ་བྱས་ན་ནི་ཉེས་བྱས་སོ། །བགྲོད་པར་བྱ་བ་རུང་བ་ཉིད་ལ་ཁྲི་ལས་ལྡང་བ་ལ་སོགས་པ་སྦྱོར་བའི་སྦྱོར་པ་བྱས་ན་ནི་ཉེས་བྱས་སོ། །བགྲོད་པར་བྱ་བ་མི་རུང་བ་ཉིད་ལ་ཁྲི་ལས་ལྡང་བ་ལ་སོགས་པ་སྦྱོར་བའི་སྦྱོར་བ་བྱས་ན་ནི་ཉེས་བྱས་ཕྲ་མོར་འགྱུར་ཏེ། དེ་ལྟར་ན་འདིར་ན་སྨད་པའི་དོན་འདི་དེ་ཡིན་ནོ། །མི་མ་ཡིན་པའི་འགྲོ་བ་ཉིད་དང༌། སྐྱེས་པ་ཉིད་དང༌། མ་ནིང་ཉིད་དང༌། རོ་ཉིད་དང༌། སྟེན་པར་བྱེད་པ་དང༌། བསྟེན་པར་བྱ་བ་དང༌། སྟེན་པར་བྱ་བ་གཡོགས་མ་ཅན་ཉིད་དག་ལ་ནི་ན་སྨད་པ་མེད་དོ་ཞེས་བྱ་བ་ནི། དེ་དག་ལ་ན་སྨད་པ་མེད་དེ། ཐམས་ཅད་ཕམ་པར་འགྱུར་རོ་ཞེས་བྱ་བར་སྦྱར་རོ། །དེ་ལ་བགྲོད་པར་བྱ་བ་མི་མ་ཡིན་པའི་འགྲོ་བ་ཉིད་ཕོ་དང་མོ་ལ་སོགས་པ་དག་ལ་བཅུག་རེག་ཉམས་སུ་མྱོང་བར་བྱས་ན་ལྟུང་བ་ན་སྨད་པ་མེད་དོ། །དེ་བཞིན་དུ་བགྲོད་པར་བྱ་བ་སྐྱེས་པ་ཉིད་སྐྱེས་པའི་དངོས་པོ་ཕོ་ཉིད་དང་བགྲོད་པར་བྱ་བ་མ་ནིང་ཉིད་དང༌། བགྲོད་པར་བྱ་བ་རོ་ཉིད་དང༌། སྟེན་པར་བྱེད་པ་ཕོའི་དབང་པོ་དང༌། བསྟེན་པར་བྱ་བ་ཁ་དང་བཤད་པའི་ལམ་དང༌། མོའི་དབང་པོ་རྣམས་གཡོགས་མ་ཅན་ཉིད་དུ་བྱས་པ་རེག་པ་ཉམས་སུ་མྱོང་བ་ལ་མི་གནོད་པར་བར་ཆད་སྲ་བ་མོས་གཡོགས་པ་ཉིད་
དག་ལ་བཅུག་རེག་ཉམས་སུ་མྱོང་བར་བྱས་པ་ལ་ནི། ལྟུང་བ་ན་སྨད་པ་མེད་དེ། ན་སྨད་པར་མི་བྱ་བ་ནི་ན་སྨད་པ་མེད་པ་ཡིན་ནོ། །བསྟེན་པར་བྱ་བ་དག་ལ་ཡང་མ་ཚོར་བ་དང༌། རང་བཞིན་ཉམས་པའི་གནས་སྐབས་དང་མི་འདོད་བཞིན་བཅུག་པ་ཉིད་ནའོ་ཞེས་བྱ་བ་ཡང་ན་སྨད་པ་མེད་དོ་ཞེས་བྱ་བར་སྦྱར་རོ། །མ་ཚོར་བ་ཞེས་བྱ་བ་ནི། བགྲོད་པར་བྱ་བ་བུད་མེད་ལ་སོགས་པ་དེ་གཉིད་ལོག་པ་དང༌། མྱོས་པ་ལ་སོགས་པའི་གནས་སྐབས་སུ་གྱུར་པ་དེའི་ཚེ་ཟག་བྱེད་ལ་སོགས་པར་བགྲོད་པར་བྱེད་པའི་ཟག་བྱེད་བཅུག་པ་ཉིད་ན། འདིར་ལྟར་བགྲོད་པར་བྱ་བས་མ་ཚོར་མོད་ཀྱི། འོན་ཀྱང་ན་སྨད་པ་མེད་པ་ཁོ་ནའོ། །བགྲོད་པར་བྱེད་པ་སྨོས་པ་ལ་སོགས་པས། རང་བཞིན་ཉམས་པའི་གནས་སྐབས་སུ་གྱུར་པ་ལ་ཟག་བྱེད་དུ་ཟག་བྱེད་བཅུག་པ་ཡང་དེ་བཞིན་ནོ། །མི་འདོད་བཞིན་དུ་བཅུག་པ་ཉིད་ཅེས་བྱ་བ་ནི། བགྲོ་པར་བྱ་བ་མི་དགའ་བ་བཞིན་དུ་ནན་གྱིས་བཅུག་ན་ཡང་ན་སྨད་པ་མེད་པའོ། །རང་གི་བསྟེན་པར་བྱ་བར་རོ་ཞེས་བྱ་བ་ནི། དགེ་སློང་རང་གི་བསྟན་པར་བྱ་བ། ཁ་དང་བཤང་བའི་ལམ་དུ་ཟག་བྱེད་བཅུག་ན་ཡང་ན་སྨད་པ་མེད་པའོ། །སྔར་ཕྱི་རོལ་དུ་དྲུད་པ་ཉིད་ལའོ་ཞེས་བྱ་བ་ལ། སྔར་ཕྱི་རོལ་དུ་དྲུད་ཅིང་ནང་དུ་ལྡུགས་པ་ནི། སྔར་ཕྱི་རོལ་དུ་དྲུད་ཅིང་ནང་དུ་ལྡུགས་པ་སྟེ། དེའི་དངོས་པོ་ནི་དེ་ཉིད་དོ། །དེར་ཟག་བྱེད་བཅུག་ན་ཡང་དེ་ལ་ན་སྨད་པ་མེད་པའོ། །ནང་དུ་སྨྱུགས་ཤིང་ཕྱི་རོལ་དུ་དབོ་བར་བྱའི། ནང་དུ་མི་དབོའོ་སྙམ་ནས་ནང་དུ་མི་དབོ་བར་ཕྱི་རོལ་ཉིད་དུའོ་ཞེས་བྱ་བ། ནང་དུ་མི་དབོ་བའི་བསམ་པས་ཟག་བྱེད་ལ་སོགས་པར་ཟག་བྱེད་ཀྱི་བཅུག་རེག་ཉམས་སུ་མྱོང་བར་བྱས་ན་ཡང་དེ་ལ་ན་སྨད་པ་མེད་དོ། །མི་ཚངས་པར་སྤྱོད་པའི་ཞར་ལ་དེའི་རྒྱུ་དག་ཡོངས་སུ་སྤང་བའི་ཕྱིར། མ་བསྲུངས་པར་ཉིན་མོ་གློས་ཕབ་སྟེ་གཉིད་ལོག་པར་མི་བྱའོ་ཞེས་བྱ་བ་སྨྲས་ཏེ། དགེ་སློང་མ་བསྲུངས་པར་ཉིན་མོ་གློས་ཕབ་སྟེ་གཉིད་ལོག་པར་མི་བྱའོ། །སྦྱོར་བ་གང་གིས་དགེ་སློང་བསྲུངས་པ་ཞེས་བྱ་བའི་བསྲུངས་པ་དེ་ཅི་ལྟ་བུ་ཞིག་ཅེ་ན་དེའི་ཕྱིར། བསྲུངས་པ་ནི་གསུམ་སྟེ། སྒོ་བཅད་ཅིང་ཀུན་ནས་བསྐོར་བ་ན་གནས་པ་ཉིད་དང༌། དགེ་སློང་གིས་ཀུན་ནས་བསྲུངས་པ་ཉིད་དང༌། ཤམ་ཐབས་ཀྱི་མཐའ་བཅིངས་པ་ཉིད་དོ་ཞེས་བྱ་བ་སྨྲས་ཏེ།
གནས་གང་ན་སྒོ་བཅད་པ་དེ་ནི་སྒོ་བཅད་པ་སྟེ། སྒོ་བཅད་པའི་གནས་ཀུན་ནས་བསྐོར་བ་ཕྱོགས་ཀུན་ནས་བསྐོར་བའི་གནས་དེ་ན་གནས་པ་ནི་སྒོ་བཅད་ཅིང་ཀུན་ནས་བསྐོར་བ་ན་གནས་པ་སྟེ། དེའི་དངོས་པོ་ནི་དེ་ཉིད་དོ། །ཀུན་ནས་བསྲུངས་པ་ཉིད་སུས་ཤེ་ན། དགེ་སློང་གིས་ཏེ། དགེ་སློང་གིས་ཀུན་ནས་བསྲུངས་པ་ཉིད་དང༌། བསྲུངས་པ་གསུམ་པ་ནི། ཤམ་ཐབས་ཀྱི་མཐའ་མདུད་པ་བོར་ཏེ་བཅིངས་པ་ཉིད་དོ། །མི་ཚངས་པར་སྤྱོད་པའི་ཕམ་པར་འགྱུར་བ་རྣམ་པར་འབྱེད་པའོ་ཞེས་བྱ་བ་ནི། རྣམ་པར་འབྱེད་པར་གཏོགས་པ་མི་ཚངས་པར་སྤྱོད་པའི་ཕམ་པར་འགྱུར་བའི་སྐབས་རྫོགས་སོ།། །།ཕྲན་ཚོགས་ལ་སོགས་པ་ནི་རྣམ་པར་འབྱེད་པའི་རབ་ཏུ་འབྱེད་པར་འགྱུར་བ་ཡིན་པའི་ཕྱིར། ད་ནི་ཕྲན་ཚེགས་ཀྱི་སྐབས་བརྗོད་པར་བྱ་སྟེ། གང་དུ་བུད་མེད་ཀྱིས་བརྗོད་པ་དེར་འགྲོ་བར་མི་བྱའོ་ཞེས་བྱ་བ་ནི་ཁྱིམ་ལ་སོགས་པ་གང་དུ་བུད་མེད་ཀྱིས་ཚུལ་མ་ཡིན་པའི་བསམ་པས་བརྗོད་པ་དེར་དགེ་སློང་འགྲོ་བར་མི་བྱའོ། །གང་དུ་མི་མ་ཡིན་པས་གཏོད་པའི་ཕྱིར་བརྩལ་བ་དེར་གནས་པར་མི་བྱའོ་ཞེས་བྱ་བ་ནི། དགོན་པ་ལ་སོགས་པ་གང་དུ་མི་མ་ཡིན་པས་འཁྲིག་པ་བསྟེན་པ་ལ་སོགས་པ་གནོད་པའི་ཕྱིར་བརྩལ་བའི་གནས་དེར་གནས་པར་མི་བྱ་འདུག་པར་མི་བྱའོ། །འདོད་ཆགས་ཤས་ཆེ་བས་འཛག་སྣོད་བཅང་བར་བྱའོ་ཞེས་བྱ་བ་ནི། དགེ་སློང་གང་འདོད་ཆགས་ཤས་ཆེ་བ་དེ་ནི་འདོད་ཆགས་ཤས་ཆེ་བ་སྟེ། དེས་ཁུ་བ་འཛག་པའི་འཛག་སྣོད་རྒྱལ་བུ་བཅང་བར་བྱའོ། །འདིར་གཞུང་ནི་འདི་ལྟར་འདོད་ཆགས་ཤས་ཆེ་བ་ལ་ཡང་དང་ཡང་དུ་ཁུ་བ་འཛག་པར་འགྱུར་བས་དེའི་ཕྱིར་ཆོས་གོས་ཉམས་པར་མི་འགྱུར་བར་བྱ་བའི་ཕྱིར་ཉོན་མོངས་བ་ཅན་མ་ཡིན་པའི་སེམས་ཀྱིས་འཛག་སྣོད་བཅང་བར་བྱའོ་ཞེས་གསུངས་པ་ཡིན་ནོ། །འཛག་སྣོད་ལ་སྦོམ་པོར་འགྱུར་རོ་ཞེས་གསུངས་པ་ནི་ཉོན་མོངས་པ་ཅན་གྱི་སེམས་ལའོ། །འཛག་སྣོད་རྫས་ཅི་ཞིག་ལས་བྱ་ཞེ་ན། དེའི་ཕྱིར་ར་འམ་རི་དགས་སམ་བྱི་བའི་པགས་པ་ལས་སོ་ཞེས་བྱ་བ་སྨྲས་ཏེ། འཛག་སྣོད་ནི་རའམ་རི་དགས་སམ་བྱི་བའི་པགས་པ་ལས་བྱའོ། །དེས་ན་བྱིལ་དང་ལུག་ལྤགས་ལ་སོགས་པ་ལས་འཛག་སྣོད་བྱས་ན་ཡང་ཉེས་པ་མེད་དོ། །འཛག་སྣོད་དེ་
ཡང་བྱི་དོར་བྱ་དགོས་པས་དེའི་ཕྱིར། དྲི་མིང་བར་བྱ་བའི་ཕྱིར་བསྐབས་བཀྲུ་བ་དང་བསྐམ་བར་བྱའོ་ཞེས་བྱ་བ་སྨྲས་ཏེ། འཛག་སྣོད་དྲི་མིང་བར་བྱ་བའི་ཕྱིར་བསྐབས་གདབ་ཅིང་བྱི་དོར་བྱ་བ་དང༌། འཛག་སྣོད་དྲི་ང་བ་མེད་པར་བྱ་བ་ཉིད་ཀྱི་ཕྱིར་དུས་དུས་སུ་བཀྲུ་བ་དང་བསྐམ་པར་བྱ་བའོ། །འཛག་སྣོད་བཀྲུ་བ་ལ་སོགས་པའི་དུས་ན་ཅི་ཞིག་བཅང་བར་བྱ་ཞེན་དེའི་ཕྱིར། དེའི་དུས་ཀྱི་ཆེད་དུ་གཞན་བྱའོ་ཞེས་བྱ་བ་སྨྲས་ཏེ། བཀྲུ་བ་དང་བསྐམ་པའི་དུས་ཀྱི་ཆེད་དུ་འཛག་སྣོད་གཉིས་པ་གཞན་བཅང་བར་བྱའོ་ཞེས་བྱ་བའི་ཐ་ཚིག་གོ །ཧ་ཅང་མང་བས་ལྔར་བར་གྱུར་ན་ཕྲུ་བླུགས་སོ་ཞེས་བྱ་བ་ནི། ཁུ་བ་ཧ་ཅང་མང་བས་འཛག་སྣོད་ལྔར་བར་གྱུར་ཅིང་གཤེར་བར་གྱུར་ན་ཕྲུ་བླུགས་པར་བྱ་སྟེ། དེར་རློད་གཞུག་པར་བྱའོ། །ཕྲུ་བླུགས་སོ་ཞེས་སྨྲས་པ། ཕྲུ་ཅི་འདྲ་བར་བླུགས་པར་བྱ་ཞེ་ན་དེའི་ཕྱིར། བྱེ་མའམ་སའི་འོ་ཞེས་བྱ་བ་སྨྲས་སོ། །ཅི་དུས་ཐམས་ཅད་དུ་འཛག་སྣོད་ཐོགས་པར་བྱའམ་ཞེན་དེའི་ཕྱིར། ཟན་ཟ་བ་དང༌། མཆོད་རྟེན་ལ་ཕྱག་འཚལ་བའི་ཚེ་ཕོག་ལ་བཀྲུས་ཏེའོ་ཞེས་བྱ་བ་སྨྲས་ཏེ། ཟན་ཟ་བ་དང༌། མཆོད་རྟེན་ལ་ཕྱག་འཚལ་བའི་ཚེ་འཛག་སྣོད་དེ་དབང་པོ་ལས་ཕོག་ལ་དེའི་འོག་ཏུ་དབང་པོ་བཀྲུས་ཏེ་དུས་དེ་གཉིས་སུ་དེ་མེད་པར་བྱའོ། །མི་ཚངས་པར་སྤྱོད་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་སོ་ཞེས་བྱ་བ་ནི། མི་ཚངས་པར་སྤྱོད་པའི་ཕམ་པར་འགྱུར་བ་ཕྲན་ཚོགས་ཀྱི་སྐབས་ནས་འབྱུང་བ་རྫོགས་སོ།། །།ཕམ་པར་འགྱུར་བ་བྱེད་པ་རྨའི་སྒོ་གསུམ་སྨྲས་ན། གང་གི་ཕྱོགས་སུ་ཕོའི་དབང་པོ་བཅུག་པ་ཉིད་ན་ཕམ་པར་འགྱུར་བ་དེ་དག་གི་ཕམ་པར་བྱེད་པའི་དང་པོར་གྱུར་པའི་ཕྱོགས་མ་བསྟན་པས་དེའི་ཕྱིར་དེ་དག་གི་དང་པོར་གྱུར་པའི་ཕྱོགས་བསྟན་པའི་ཕྱིར། ཁའི་དང་པོ་ནི་སོ་ཕན་ཆད་དོ་ཞེས་བྱ་བ་ལ་སོགས་པ་སྨྲས་ཏེ། ཁའི་དང་པོ་ནི་སོའི་ནང་ལོགས་ཀྱི་ངོས་ཀྱི་སོ་དྲུང་སྟེ། སོ་དྲུང་དེ་ཕན་ཆད་ནི་ཁའི་དང་པོའོ། །དེས་འདི་སྐད་བསྟན་ཏེ། གལ་ཏེ་ཕོའི་དབང་པོ་སོའི་ནང་ལོགས་ཀྱི་ངོས་ཀྱི་སོ་དྲུང་ཕན་ཆད་དུ་ཅུང་ཟད་ཅིག་བཅུག་ན་ཡང་དེའི་ཚེ་ཕམ་པར་འགྱུར་བར་རྣམ་པར་གཞག་གོ །བཤང་བའི་ལམ་གྱི་ནི་བུ་གུའི་སྦུབས་ཀྱི་མཐའ་ཡན་ཆད་དོ་ཞེས་བྱ་བ་ལ། བུ་གུར་གྱུར་པའི་སྦུབས་ཡིན་པས་བུ་གུའི་སྦུབས་ཏེ། འཇིག་རྟེན་ན་
བཤང་བའི་སྦུབས་ཞེས་བྱ་བ་གང་ཡིན་པའོ། །བུ་གུའི་སྦུབས་དེའི་མཐའ་ཡན་ཆད་ནི་བཤང་བའི་ལམ་གྱི་དང་པོའོ། །བུ་གུའི་སྦུབས་ཀྱི་མཐའ་དེ་ཡན་ཆད་གང་ནས་བརྩམས་ཏེ་ཟབས་སུ་ཅི་བཟོད་པའི་ནང་མན་ཆད་དུ་ཕོའི་དབང་པོ་ཅུང་ཟད་ཅིག་བཅུག་ན་ཡང་ཕམ་པར་འགྱུར་རོ། །བྲག་བྱེད་ཀྱི་ནི་ལྤགས་རིམ་ཡན་ཆང་དོ་ཞེས་བྱ་བ་ན། ཟག་བྱེད་ཀྱི་དང་པོ་ནི་མདོམས་ཀྱི་ཕྱོགས་ན་རྨའི་ཁ་ཤུན་དུ་གྱུར་པ་པགས་པར་གཏོགས་པའི་ལྤགས་ཤུན་གཉི་གའི་རིམ་པའི་ལྤགས་རིམ་ཡན་ཆད་ཤའི་རྣམ་པ་དང་པོའི་མཚམས་ལ་ཐུག་པ་དེ་ནི་བྲག་བྱེད་ཀྱི་དང་པོའོ། །འདི་སྐད་བསྟན་ཏེ། གལ་ཏེ་ཕོའི་དབང་པོ་ལྤགས་རིམ་དེ་ཡན་ཆད་དུ་དེ་ཙམ་ཞིག་བཅུག་ནས་ཤར་བགྲངས་པའི་ཕྱོགས་དང་རག་པར་གྱུར་ན་དེ་ཕམ་པར་འགྱུར་རོ། །རྨའི་སྒོ་རྣམས་ཀྱི་དང་པོ་བསྟན་ནས། ཟག་བྱེད་རྨའི་སྒོ་དེ་དག་ཏུ་ཅི་ཙམ་ཞིག་བཅུག་པ་ཉིད་ན་ཕམ་པར་འགྱུར་ཞེ་ན་དེའི་ཕྱིར། དེའི་ནོར་བུ་བཅུག་པ་ཉིད་དེའི་མཐའོ་ཞེས་བྱ་བ་སྨྲས་ཏེ། དེའི་ཞེས་བྱ་བ་ནི་ཟག་བྱེད་ཀྱིའོ། །དེའི་ནོར་བུ་ཞེས་བྱ་བ་མཐེ་བོའི་རྣམ་པར་འདྲ་བ་གང་ཡིན་པ་དེ་རྨའི་སྒོ་གསུམ་པོ་དག་ཏུ་བཅུག་པ་ཉིད་གང་ཡིན་པས་རྨའི་སྒོ་དག་གི་དང་པོར་གྱུར་པའི་ཕྱོགས་དང་ཕྲད་པ་གང་ཡིན་པ་དེ་ནི་དེའི་མཐའ་སྟེ་བཅུག་པ་ཉིད་ཀྱི་མཐའོ། །ནོར་བུ་རིལ་གྱིས་མ་འདས་མོད་ཀྱི་འོན་ཀྱང་ཡན་ལག་གི་རྩེ་མོའི་ཐོག་མའི་ཕྱོགས་ཐམས་ཅད་ཀྱིས་རྨའི་སྒོ་རྣམས་ཀྱི་དང་པོར་གྱུར་པའི་ཕྱོགས་སུ་རེག་པ་གང་ཡིན་པ་དེ་ནི་བཅུག་པ་ཉིད་ཀྱི་མཐར་ཐུག་པ་ཡིན་པར་རིག་པར་བྱའོ། །གང་གིས་བཅུག་པའི་རེག་པ་ཉམས་སུ་མྱོང་བར་བྱས་པ་ཞེས་བྱ་བ་དེས་བཅུག་པ་བསྟན་པར་འགྱུར་རོ། །འདིར་གཞུང་ནི་སོ་དག་ལས་ནོར་བུ་འདའ་བར་བྱེད་པ་དང༌། བུ་གའི་སྦུབས་ལས་ནོར་བུ་འདའ་བར་བྱེད་པ་དང༌། པགས་པ་ལས་ནོར་བུ་འདའ་པར་བྱེད་པ་ཞེས་གསུངས་པ་ཡིན་ནོ། །རྣམ་པར་འབྱེད་པའི་མདོ་ལས་རྨའི་སྒོ་རྣམས་ཀྱི་ཉམས་པ་ཉིད་སྨྲས་པ་དེའི་མཚན་ཉིད་རྣམ་པར་དབྱེ་བ་བརྗོད་པར་བྱ་སྟེ། ཕྱོགས་ཀྱི་དང་པོ་ཅུང་ཟད་ཟིན་པ་ཉིད་དང༌། ཟིན་པ་ཉིད་དང༌། སྐྲངས་པ་ཉིད་དང༌། རུལ་བ་ཉིད་དང༌། མྱགས་པ་ཉིད་དང༌། སྲོག་ཆགས་ཀྱིས་ཟོས་པ་ཉིད་ལྟ་བུ་ནི་ཉམས་པ་ཉིད་དོ།།
ཞེས་བྱ་བ་ལ་ཕྱོགས་ཀྱི་དང་པོ་ཞེས་སྨོས་པས་ནི། རྨའི་སྒོའི་ཕྱོགས་ཀྱི་དང་པོར་གྱུར་པ་གང་ཚུན་ཆད་ཀྱིས་ཕམ་པར་འགྱུར་པའི་ཕྱོགས་ཀྱི་དང་པོ་གཟུང་གི །ལུས་སུ་གཏོགས་པ་གཞན་གྱིས་ནི་མ་ཡིན་ནོ། །ཅུང་ཟད་ཟིན་པ་ཉིད་ཅེས་པ་ནི་རྨའི་སྒོ་རྣམས་ཀྱི་དང་པོར་གྱུར་པའི་ཕྱོགས་བསྙན་པ་གང་ཡིན་པའི་ཕྱོགས་དེ་སྡིག་པ་ལ་སོགས་པ་དག་གིས་ཅུང་ཟད་ཟིན་པ་ཉིད་དོ། །ཟིན་པ་ཉིད་ཅེས་བྱ་བ་ནི། ཤས་ཆེར་ཟིན་པ་ཉིད་དོ། །སྐྲངས་པ་ཉིད་ཅེས་བྱ་བ་ནི། རླུང་ལ་སོགས་པས་སྐྲངས་རློར་གྱུར་པ་ཉིད་དོ། །རུལ་བ་ཉིད་ཅེས་བྱ་བ་ནི། མུགས་པར་གྱུར་པ་ཉིད་དོ། །མྱགས་པ་ཉིད་ཅེས་བྱ་བ་ནི། ཤ་ཟག་པར་གྱུར་པ་ཉིད་དོ། །སྲོག་ཆགས་དག་གིས་ཟོས་པ་ཉིད་ཅེས་བྱ་བ་ནི། ནང་ཉིད་ནས་དེའི་དྲི་མ་ལས་སྐྱེས་པའི་སྲོག་ཆགས་དག་གིས་ཟོས་པ་ཉིད་དོ། །འདིར་གཞུང་ནི་གང་གི་རྨའི་སྒོ་དག་ཅུང་ཟད་ཟིན་པ་ཉིད་དམ། ཟིན་པ་ཉིད་དམ། རུལ་བ་ཉིད་དམ། མྱགས་པ་ཉིད་དམ་ཞེས་གསུངས་པ་དང༌། གཞུང་གཞན་ལས་ཅུང་ཟད་ཟིན་ཏམ། ཟིན་ཏམ། སྐྲངས་པ་ཉིད་དམ། རུལ་པ་ཉིད་དམ། སྲོག་ཆགས་དག་གིས་ཟིན་པ་ཉིད་དམ་ཞེས་གསུངས་པ་སྟེ། འདིར་སྐྲངས་པ་དང༌། སྲོག་ཆགས་དག་གིས་ཟིན་པ་ནི་དེ་ལས་བསྡུ་བ་བྱས་པ་ཡིན་ནོ། །ལུས་ཉམས་པ་ཉིད་ཡིན་ཡང་རྨའི་སྒོ་ཉམས་པར་མི་འགྱུར་བ་བསྟན་པའི་ཕྱིར། བགྲོད་པར་བྱ་བ་ཕྱེད་བཅས་པ་ཉིད་ལ་ཡང་ན་སྨད་པ་མེད་དོ་ཞེས་བྱ་བ་སྨྲས་ཏེ། བགྲོད་པར་བྱ་བ་ཕོ་དང་མོ་དང་མ་ནིང་གི་ལུས་མཐའ་དག་གི་ལྟེ་བའི་ཕྱོགས་ལ་སོགས་པར་ཕྱེད་དུ་བཅད་པ་ཉིད་ལ་ཡང་ལྟུང་བ་ན་སྨད་པ་མེད་དོ། །ཕམ་པ་ཁོ་ནར་འགྱུར་རོ། །རྨའི་སྒོ་ཙམ་བཅད་པ་ནི་ཕྱེད་དུ་བཅད་པ་ཉིད་མ་ཡིན་ནོ། །འདི་ལྟར་རྨའི་སྒོ་ཕྱེད་དུ་བཅད་པ་ནི་ཉམས་པ་ཡིན་ཏེ། དེ་ལ་ནི་སྦོམ་པོ་ཁོ་ནར་འགྱུར་གྱི། ཕམ་པར་མི་འགྱུར་རོ། །འདིར་གཞུང་ནི། བཙུན་པ་རེ་ཞིག་དགེ་སློང་གིས་བུད་མེད་ལུས་ཕྱེད་དུ་བསྐུམ་ལ། རྨའི་སྒོ་གསུམ་པོ་དག་ལས་རྨའི་སྒོ་གང་ཡང་རུང་བ་ཞིག་མ་ཉམས་པ་དེར་མི་ཚངས་པར་སྤྱོད་པ་བགྱིས་ན་ལྟུང་བ་ཅིར་འགྱུར། ཉེ་བ་འཁོར་མཐར་འགྱུར་རོ་ཞེས་གསུངས་པ་དེ་འདིར་བསྡུས་པ་ཡིན་ནོ། །གཞུང་དེ་ལས་རྨའི་སྒོ་ཉམས་པ་ཉིད་མ་བཀབ་པས་ན་ལུས་ཉིད་ཕྱེད་དུ་བཅད་པ་ཉིད་ཡིན་གྱི་རྨའི་སྒོ་ཙམ་གྱིས་ནི་མ་ཡིན་
ནོ། །བསྟེན་པར་བྱ་བའི་དབུས་བྱེ་བའི་མཚམས་སྦྱོར་བར་མི་མངོན་པ་ལ་ཡང་ངོ་ཞེས་བྱ་བ་ནི། བསྟེན་པར་བྱ་བ་ནི། ཕོ་དང་མོ་དང་མ་ནིང་གི་ཁ་དང་བཤང་བའི་ལམ་དང་མོའི་དབང་པོར་གྱུར་པའི་དབུས་ཕྱེད་ཙམ་དུ་གས་པ་ལ་སོགས་པས་བྱེ་བའི་མཚམས་ཡང་ཕྱིར་འབྱོར་ཅིང་འབྲེལ་པར་གྱུར་པས་མི་མངོན་བ་ལ་ཡང་ཕམ་པར་འགྱུར་པ་ལས་ན་སྨད་པ་མེད་པའོ། །མངོན་པ་ལ་ནི་ཚིགས་འོག་མར་རོ་ཞེས་བྱ་བ་ནི། རྨའི་སྒོའི་མཚམས་འབྱོར་བར་རབ་ཏུ་ཤེས་པ་ལ་ནི་ཚིགས་འོག་མར་འགྱུར་ཏེ། ལྟུང་བ་འོག་མ་ཉིད་ལ་གནས་པར་འགྱུར་བའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མཚམས་འབྱོར་པར་མི་མངོན་པ་གང་ལ་བཅུག་རེག་ཉམས་སུ་མྱོང་བར་བྱས་པ་དེ་ནི་ཕམ་པར་འགྱུར་རོ། །མཚམས་འབྱོར་པར་མངོན་པ་གང་ལ་བཅུག་རེག་ཉམས་སུ་མྱོང་བར་བྱས་པ་དེ་ལ་ནི་སྦོམ་པོའོ། །མཚམས་འབྱོར་པར་མི་མངོན་པ་གང་ལ་ཕམ་པར་འགྱུར་བ་དེའི་སྦྱོར་བ་དེ་ལ་ནི་སྦོམ་པོའོ། །མཚམས་འབྱོར་བར་མངོན་པ་གང་ལ་སྦོམ་པོར་འགྱུར་བ་དེའི་སྦྱོར་བ་དེ་ལ་ནི་ཉེས་བྱས་སོ། །མཚམས་འབྱོར་བར་མི་མངོན་པ་གང་ལ་ཕམ་པར་འགྱུར་བ་དེའི་སྦྱོར་བ་ལ་སྦོམ་པོར་འགྱུར་བ་དེའི་སྦྱོར་བ་ལ་ནི་ཉེས་བྱས་སོ། །མཚམས་འབྱོར་པར་མངོན་པ་གང་ལ་སྦོམ་པོར་འགྱུར་བ་དེའི་སྦྱོར་བ་ལ་ཉེས་བྱས་སུ་འགྱུར་བ་དེའི་སྦྱོར་བ་ལ་ནི། ཉེས་བྱས་ཕྲ་མོར་འགྱུར་རོ། །སྦོམ་པོའི་དབང་དུ་བྱས་པ་ནི་ཕག་ལ་སོགས་པ་བཙོས་པ་སྤུ་མེད་པ་དག་ལའོ་ཞེས་བྱ་བ་ནི། དབང་དུ་བྱ་བ་བསྟན་པའི་ཕྱིར། དང་པོར་སྦོམ་པོའི་དབང་དུ་བྱས་པ་ནི་ཞེས་བྱ་བའི་ཚིག་སྨོས་ཏེ། འདི་མན་ཆད་འོག་ནས་མཐའ་ཉིད་བརྗོད་པའི་གཡོགས་པ་དེ་ནི་བསྒྲིབས་པ་སྟེ་ཞེས་འབྱུང་བའི་མདོ་མན་ཆད་ནི་སྦོམ་པོ་ཞེས་བྱ་བའི་དབང་དུ་བྱའོ། །ཕག་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་སྤྲེའུ་དང་བ་ལང་དང༌། མ་ཧེ་ལ་སོགས་པ་དག་བསྡུའོ། །བཙོས་པ་ཞེས་བྱ་བ་ནི་མེ་ལ་སོགས་པའོ། །སྦུ་མེད་པ་ཞེས་བྱ་བ་ནི། ཕག་ལ་སོགས་པ་གང་ལ་སྦུ་དག་མེད་པར་གྱུར་པ་དེ་ནི་སྤུ་མེད་པའོ། །ཕག་ལ་སོགས་པ་བཙོས་པ་སྦུ་མེད་པ་དེ་དག་ལ་བཅུག་རེག་ཉམས་སུ་མྱོང་བར་བྱས་པ་ནི་སྦོམ་པོར་འགྱུར་བ་ཉིད་དོ། །འདི་སྐད་བསྟན་ཏེ། གལ་ཏེ་དགེ་སློང་
གིས་ཕག་ལ་སོགས་པ་སྦུ་མེད་པ་དེ་དག་གི་རྨའི་སྒོ་དག་ཏུ་སྤྲོད་པ་ལས་འཁྲིག་པ་སྤྱོད་པར་བྱེད་ན་དེ་ནི་སྦོམ་པོར་རིག་པར་བྱ་སྟེ། རྨའི་སྒོ་རྣམས་ཉམས་པ་ཉིད་ཡིན་པའི་ཕྱིར་རོ། །སྦྱོར་བར་གྱུར་པ་གཞན་དུ་སྤྱོད་པ་ལ་ནི་སྦོམ་པོར་མི་འགྱུར་ཏེ། སྦོམ་པོའི་དངོས་གཞི་བསྐྱེད་པའི་སྦྱོར་བ་ལ་ནི་ཉེས་བྱས་སོ། །སྦྱོར་བའི་ཡང་སྦྱོར་བ་ལ་ནི་ཉེས་བྱས་ཕྲ་མོར་འགྱུར་རོ། །འདིར་བཙོས་པ་ཞེས་བྱ་བ་ནི་ཉམས་པ་ཉིད་ཀྱི་རྒྱུ་ཡིན་པས། དེས་ན་དུད་འགྲོ་དང་མི་ལ་སོགས་པ་སྤུ་དང་བཅས་པའམ། སྤུ་མེད་དག་ལ་ནི་སྦོམ་པོ་ཁོ་ནའི་དབང་དུ་བྱས་ཏེ། རྨའི་དབང་པོ་བཙོས་པ་ཐམས་ཅད་ནི་ཉམས་པ་ཉིད་ཡིན་པའི་ཕྱིར་རོ། །དེའི་ཕྱིར་སྤུ་མེད་པ་ཞེས་སྨོས་པ་ནི་པགས་པ་མི་དང་འདྲ་བའི་ཕྱིར་ཕམ་པའི་ཁ་ན་མ་ཐོ་བ་ཉིད་དུ་འགྱུར་རོ་སྙམ་དུ་དོགས་པ་བསལ་བའི་ཕྱིར་རོ། །ཤི་བ་ཉིད་ལ་རྨའི་སྒོ་གསུམ་ཆར་ལ་ཡང་སྤྱིར་དངོས་གཞིའི་ཁ་ན་མ་ཐོ་བར་བསྟན་པ་ལ་ཁའི་ཡུལ་ལ་བྱེ་བྲག་སྨྲ་བར་འདོད་ནས། མགོ་བཅད་པའི་ཁར་རོ་ཞེས་བྱ་བ་སྨྲས་ཏེ། མགོ་བཅད་པའི་ཁང་བྱེད་ན་སྦོམ་པོའི་དབང་དུ་བྱས་པ་ཉིད་ཡིན་གྱི། དངོས་གཞིའི་དབང་དུ་བྱས་པ་ཉིད་ནི་མ་ཡིན་ནོ། །མགོ་བཅད་དུ་ཟིན་ཀྱང་མོའི་དབང་པོ་དང་བཤང་བའི་ལམ་མ་ཉམས་པ་གཉིས་སུ་བྱེད་པ་ནི་དངོས་གཞིའི་དབང་དུ་བྱས་པ་ཉིད་ཡིན་ནོ། །ཁ་དང་བཤང་པའི་ལམ་དང་མོའི་དབང་པོ་རྣམས་ཀྱི་གནས་སྐབས་ཀྱི་བྱེ་བྲག་བསྟན་ནས། ཕོའི་དབང་པོ་སྦོམ་པོའི་དབང་དུ་བྱས་པ་བསྟན་པའི་ཕྱིར། བསྟེན་པར་བྱ་བ་དང༌། སྟེན་པར་བྱེད་པ་ལུས་ལས་ཐ་དད་པར་བྱས་པ་གཉིས་ཀྱིའོ་ཞེས་བྱ་བ་སྨྲས་ཏེ། བསྟེན་པར་བྱ་བ་དང༌། སྟེན་པར་བྱེད་པ་ཞས་བྱ་བ་ནི། ཁ་དང་བཤང་བའི་ལམ་དང་མོའི་དབང་པོ་དང་ཕོའི་དབང་པོ་ཞེས་བྱ་བ་ཅི་རིགས་པར་བསྟེན་པར་བྱ་བ་དང༌། སྟན་པར་བྱེད་པ་ཡིན་པའོ། །ལུས་ལས་ཐ་དད་པར་བྱས་པ་གཉིས་ཀྱིའོ་ཞེས་བྱ་བ་ནི། གཞན་གྱིས་བསྟེན་པར་བྱ་བ་ལུས་ལས་ཐ་དད་པར་བྱས་པ་དག་ཏུ་རང་གིས་སྟེན་པར་བྱེད་པ་ལུས་ལས་ཐ་དད་པར་མ་བྱས་པ་དང༌། རང་དང་གཞན་གྱིས་སྟེན་པར་བྱེད་པ་ལུས་ཐ་དད་པར་བྱས་པ་དག་རང་གིས་བསྟན་པར་བྱ་བ་ལུས་ལས་ཐ་དད་པར་མ་བྱས་པ་དག་ཏུ་དང༌། གཞན་གྱིས་སྟེན་པར་བྱེད་པ་ལུས་ལས་ཐ་དད་པར་བྱས་པ་རང་གིས་བསྟེན་པར་བྱ་བ་
ལུས་ལས་ཐ་དད་པར་མ་བྱས་པ་དག་ཏུ་ཅིག་ཅར་རམ་རིམ་གྱིས་ཕན་ཚུན་སྦྱོར་བར་བྱེད་པ་ནི་སྦོམ་པོའི་དབང་དུ་བྱས་པ་ཉིད་ཡིན་པའོ། །འདི་སྐད་བསྟན་ཏེ། དགེ་སློང་གིས་གཞན་གྱིས་བསྟེན་པར་བྱ་བ་ཁ་དང་བཤང་བའི་ལམ་དང་མོའི་དབང་པོའི་གཞི་གཅད་པ་ལ་སོགས་པས་ལུས་ལས་ཐ་དད་པར་བྱས་པ་དག་ཏུ་རང་གིས་སྟེན་པར་བྱེད་པ་ཕོའི་དབང་པོ་སྦྱོར་བར་བྱེད་ན་ཡང་སྦོམ་པོའི་དབང་དུ་བྱས་པ་ཉིད་དོ། །རང་དང་གཞན་གྱིས་སྟེན་པར་བྱེད་པ་ཕོའི་དབང་པོ་བཅད་པ་ལ་སོགས་པས་ལུས་ལས་ཐ་དད་པར་བྱེད་པ་དག་རང་གིས་བསྟེན་པར་བྱ་བ་ཁ་དང་བཤང་བའི་ལམ་དུ་སྦྱོར་བར་བྱེད་ན་ཡང་སྦོམ་པོའི་དབང་དུ་བྱས་པ་ཉིད་དོ། །དགེ་སློང་མས་གཞན་གྱིས་སྟེན་པར་བྱེད་པ་ཕོའི་དབང་པོ་བཅད་པ་ལ་སོགས་པས་ལུས་ལས་ཐ་དད་པར་བྱས་པ་རང་གིས་བསྟེན་པར་བྱ་བ་ཁ་དང་བཤང་བའི་ལམ་དང་མོའི་དབང་པོ་དག་ཏུ་སྦྱོར་བར་བྱེད་ན་ཡང་སྦོམ་པོའི་དབང་དུ་བྱས་པ་ཉིད་དོ་ཞེས་བྱ་བའི་ཐ་ཚིག་གོ །བསྟེན་པར་བྱ་བ་དང༌། སྟེན་པར་བྱེད་པ་གཉིག་གཞན་གྱི་ལུས་ལས་ཐ་དད་པའམ་ཐ་དད་པ་མ་ཡིན་པ་ནི་མདོ་འོག་མའི་ཡུལ་ལས་སྟོན་ཏོ། །གཞན་པ་གཉིས་ཀྱང་གཞན་གྱི་གཉིས་དང་གཞན་དུ་སྦྱོར་བར་བྱེད་ནའོ་ཞེས་བྱ་བ་ལ། གཞན་པ་གཉིས་ཀྱང་ཞེས་བྱ་བའི་ཀྱང་གི་སྒྲས་ནི་སྔར་བསྟེན་པར་བྱ་བ་དང་སྟེན་པར་བྱེད་པ་ལུས་ལས་ཐ་དད་པར་བྱས་པ་གཉིས་ཀྱིའོ་ཞེས་བྱ་བ་སྨོས་པ་དེ་གཉིས་ལས་གཞན་པ་ལུས་ལས་ཐ་དད་པར་མ་བྱས་པ་གཉིས་དང༌། ལུས་ལས་ཐ་དད་པར་བྱས་པ་གཉིས་ཀྱང་སྔ་མ་བཞིན་དུ་སྦྱར་བར་སྟོན་ཏོ། །གཞན་གྱི་གཉིས་དང་ཞེས་བྱ་བ་ནི། གཞན་ཕོ་དང་མོ་དང་མ་ནིང་གིས་བསྟེན་པར་བྱ་བ་དང༌། སྟེན་པར་བྱེད་པ་ཅི་རིགས་པར་གཉིས་དང་ངོ༌། །གཞན་དུ་སྦྱོར་བར་བྱེད་ནའོ་ཞེས་བྱ་བ་ནི། བསྟེན་པར་བྱ་བ་དང༌། སྟེན་པར་བྱེད་པའི་སྦྱོར་བར་བྱེད་ན་སྦོམ་པོའི་དབང་དུ་བྱས་པ་ཉིད་ཡིན་པའོ། །གཙུག་ལག་ལས་ཅི་རིགས་པར་སྦྱར་བའི་དོན་སྟོན་ཏེ། ལ་ལ་ལས་ནི་བུད་མེད་ཀྱིས་བཅད་དེ་འཇུག་ན་ལྟུང་བ་ཅིར་འགྱུར་ཉེས་པ་སྦོམ་པོར་འགྱུར་རོ་ཞེས་གསུངས་སོ། །གཞན་ལས་ནི་གཞན་གྱི་ཡན་ལག་གི་རྣམ་པ་གཞན་གྱི་ཟག་བྱེད་དུ་འཇུག་ཏུ་རྩོལ་ན་ལྟུང་བ་ཅིར་
འགྱུར་ཉེས་པ་སྦོམ་པོར་རོ་ཞེས་གསུངས་སོ། །གཞན་གྱི་ནི་དགེ་སློང་ལ་ལས་ཟག་བྱེད་དུ་ཟག་བྱེད་རྩོལ་ལ་མཐའི་ལྟུང་བར་མི་འགྱུར་བར་མཆིས་སམ། བཀའ་སྩལ་པ། ཡོད་དེ་བཅད་དེ་འཛུད་པར་བྱེད་པའམ། བུད་མེད་ཀྱིས་བཅད་པར་འཛུད་པའོ། །ལྟུང་བ་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་སོ། །གཞན་ལས་ནི་དགེ་སློང་ལ་ལས་བྲག་བྱེད་དུ་ཟག་བྱེད་རྩོལ་ལ་མཐའི་ལྟུང་བར་མི་འགྱུར་བ་མཆིས་སམ། བཀའ་སྩལ་པ་ཡོད་དེ། ལ་ཅད་དེ་འཛུད་པར་བྱེད་པའམ། བུད་མེད་ཀྱིས་བཅད་པར་འཛུད་པར་བྱེད་པའམ། གཉི་ག་བཅད་དེ་འཛུད་པར་བྱེད་པའོ།། ལྟུང་བ་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་སོ། །མདོ་གཉིས་ལས་བཤད་པ་དེ་ཐམས་ཅད་སྦྱར་ནས་དེའི་རྗེས་སུ་འབྲང་བས་ཁ་དང་བཤང་བའི་ལམ་གཉིས་སུ་འཛུད་པ་དག་ཀྱང་སྦོམ་པོའི་དབང་དུ་བྱས་པ་ཁོ་ནར་སྔ་མ་བཞིན་དུ་སྦྱར་རོ། །གཞན་པའི་བུ་ག་ལུས་ལས་བཅད་པ་ལ་ཡང་ངོ་ཞེས་བྱ་བ་ནི། རྨའི་སྒོ་གསུམ་ལས་གཞན་པའི་བུ་ག་མཚོན་གྱིས་དྲལ་བ་ལ་སོགས་པ་བཅོས་མ་དང་མིད་པ་ལ་སོགས་པ་ལུས་བྱུང་བན་ཡིད་ནས་བྱུང་བ་དང་པོ་ནས་དོད་པ་ལུས་ལས་བཅས་པ་དང་མ་བཅད་པ་ལ་ཡང་སྦོམ་པོའི་དབང་དུ་བྱས་པ་ཡིན་པའོ། །གཞུང་ནི་ལ་ལས་ལུས་དྲལ་ཏེ་ཡན་ལག་གི་རྣམ་པ་རྩོལ་ན་ལྟུང་བ་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་པ་དང༌། གཞན་ལས་མགོ་བཅད་དེ་མཐའ་གཉིས་པར་རྩོལ་ན་ལྟུང་བ་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་པ་དེ་དག་བསྡུས་པ་ཡིན་ནོ། །བསྟེན་པར་བྱ་བ་མ་ནིང་མོ་སྦུབས་མེད་པ་ལ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲ་ནི་བུ་ག་ལུས་ལས་བཅད་པ་ལ་ཡང་ངོ་ཞེས་སྔར་སྨོས་པའི་རྗེས་བསྙགས་པའི་ཕྱིར་རོ། །སྦུབས་ཞེས་བྱ་བ་ནི་ཕོའི་དབང་པོ་གཞུག་པར་བྱ་བའི་སྐབས་ཏེ། བསྟེན་པར་བྱ་བ་མ་ནིང་མོ་གང་ལ་མོའི་དབང་པོ་གཞུག་པར་བྱ་བའི་སྐབས་ཀྱི་ཚད་ཀྱི་སྦུབས་དེ་མེད་པ་དེ་ནི་སྦུབས་མེད་པ་སྟེ། ཕོའི་དབང་པོ་ཤོང་བའི་སྦུབས་མེད་པ་ཡིན་ནོ། །བསྟེན་པར་བྱ་བ་མ་ནིང་མོ་སྦུབས་མེད་པ་དེའི་བསྟེན་པར་བྱ་བའི་བདག་ཉིད་ཀྱི་བུ་ག་དེ་ལུས་ལས་བཅད་པ་དང་མ་བཅད་པ་ལ་ཡང་སྦོམ་པོའི་དབང་དུ་བྱས་པ་ཉིད་དོ། །འདིར་སྦུབས་མེད་པ་ཞེས་བྱ་བའི་སྒྲ་ལས་ནི་སྦྱར་བ་ཙམ་ལས་ལྟུང་བར་འགྱུར་བར་ཤེས་པར་
བྱའོ། །གཞུང་ལ་ལས་འདི་སྐད་ཅེས་གང་ལ་སྦུ་བས་མ་མཆིས་པ་མ་ནིང་མོ་ལས་རྩོལ་ན་ལྟུང་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་པ་དེ་འདིར་བསྡུས་པ་ཡིན་ནོ། །མཆུ་གཉིས་ལའོ་ཞེས་བྱ་བ་ནི། མཆུ་གཉིས་ལ་སྦྱར་བ་ཙམ་ལ་ཡང་སྦོམ་པོའི་དབང་དུ་བྱས་པ་ཉིད་དེ། སོའི་མཐའ་ཚུན་ཆད་འབའ་ཞིག་ཏུ་མ་ཟད་པའོ། །ཕྱིར་རོལ་ཀྱི་མཚམས་ལ་ཐུག་པར་རོ་ཞེས་བྱ་བ་ལ། ཁའི་དང་པོ་ནི་སོ་ཕན་ཆད་དོ་ཞེས་བསྟན་པ་ཚུན་ཆད་ཁའི་སྒོའི་མཚམས་ཕན་ཆད་ཀྱི་བར་གང་ཡིན་པ་དེ་ནི་ཕྱི་རོལ་གྱི་མཚམས་ཞེས་བྱ་སྟེ། དེར་ཐུག་པར་གྱུར་ན་སྦོམ་པོའི་དབང་དུ་བྱས་པ་ཉིད་དོ། །འདི་སྐད་བསྟན་ཏེ། མཆུ་གཉིས་ཕན་ཆད་སོ་ཚུན་ཆད་དུ་འཛུད་ན་ཉེས་པ་སྦོམ་པོའི་ལྟུང་བར་འགྱུར་རོ། །འདིར་གཞུང་ནི་སོའི་ཕྱི་རོལ་དུ་ཉམས་པར་བྱེད་ན་ཉེས་པ་སྦོམ་པོའི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །སྣོད་དུའོ་ཞེས་བྱ་བ་ནི། སྣོད་དུ་འཛུད་ན་སྦོམ་པོའི་དབང་དུ་བྱས་པ་ཉིད་དེ། སྣོད་ནི་གང་ལས་བྱས་པ་དང༌། དེ་ལས་བྱས་པ་བྱེ་བྲག་མེད་དོ། །བལྟབ་པ་དང་མི་རེག་པར་འཛུད་པ་གཉིས་སོ་ཞེས་བྱ་བ་ལ་ཕོའི་དབང་པོ་རྐེད་བལྟབ་ཏུ་བྱས་ཏེ་རྨའི་སྒོ་དག་ཏུ་འཛུད་པ་གང་ཡིན་པ་དེ་ཡང་སྦོམ་པོར་དབང་དུ་བྱས་པ་ཉིད་ཡིན་ལ་ཡན་ལག་གི་རྣམ་པ་རྨའི་སྒོ་དག་གིས་མི་རེག་པར་དེར་འཇུག་པ་དེ་ཡང་སྦོམ་པོའི་དབང་དུ་བྱས་པ་ཉིད་ཡིན་ཏེ། དགེ་སློང་ལ་ལྟུང་བར་འགྱུར་བ་བཞིན་དུ་དགེ་སློང་མ་ལ་ཡང་འགྱུར་རོ། །གལ་ཏེ་མི་རེག་པར་འཛུད་པ་སྦོམ་པོའི་དབང་དུ་བྱས་པ་ཉིད་ཡིན་ན། འོན་ཇི་ལྟར་རོ་ཉིད་དང༌། སྟེན་པར་བྱེད་པ་དང༌། བསྟན་པ་བྱ་བ་གཡོགས་མ་ཅན་ཉིད་དག་ལ་ནི་ན་སྨད་པ་མེད་དོ་ཞེས་བྱ་བ་དེར་གཡོགས་མས་པར་དུ་ཆོད་པ་ལན་སྨད་པ་མེད་དོ་ཞེས་སྨྲས་ཤེ་ན། དེའི་ཕྱིར་མཐའ་ཉིད་བརྗོད་པའི་གཡོགས་པ་དེ་ནི་བསྒྲིབས་པ་སྟེ། དེས་གཡོགས་པ་ལ་ཐམས་ཅད་ཀྱི་ཐམས་ཅད་དུ་རེག་པར་མི་འགྱུར་བ་མ་ཡིན་ནོ་ཞེས་བྱ་བ་སྨྲས་ཏེ། མཐའི་དངོས་པོ་ནི་མཐའ་ཉིད་དེ་ཕམ་པར་འགྱུར་བའོ། །དེ་བརྗོད་པ་ནི་མཐའ་ཉིད་བརྗོད་པའོ། །དེའི་གཡོགས་པ་དེ་ནི་བསྒྲིབས་པར་འདོད་དེ། བསྒྲིབས་པ་དེས་གཡོགས་པའི་བསྒྲིབས་པ་དེ་ལ་ནི་ཐམས་ཅད་ཀྱི་ཐམས་ཅད་དུ་རེག་པར་
མི་འགྱུར་བ་མ་ཡིན་ནོ། །འདི་སྐས་བསྟན་ཏེ། གལ་ཏེ་བསྟེན་པར་བྱ་བ་དང༌། སྟེན་པར་བྱེད་པ་ཞེས་བྱ་བ་དབང་པོ་གཉིས་ལ་སྒྲིབས་པ་རྣམ་པ་དེ་ལྟ་བུས་གཡོགས་པར་གྱུར་པ་གོང་ལ་བཅུག་རེག་ཉམས་སུ་མྱོང་པར་འགྱུར་བ་དེ་ནི་ཕམ་པར་འགྱུར་བ་ཡིན་ནོ། །དེ་ལྟ་ན་འོ་ན་གང་ལ་རེག་པར་མི་འགྱུར་བ་དེ་ལ་ཅི་ཞིག་ཏུ་རྣམ་པར་གཞག་ཅེ་ན་དེའི་ཕྱིར། གཞན་གྱིས་གཡོགས་པ་ཉིད་ནི་མི་རེག་པར་འཛུད་པས་རྣམ་པར་བཤད་པ་ཡིན་ནོ་ཞེས་བྱ་བ་སྨྲས་ཏེ། མདོ་སྔ་མར་བསྟན་པ་ལས་གཞན་པའི་བསྒྲིབས་པ་པགས་པའམ་སྟུག་པོ་འཇམ་པོའི་བསྒྲིབས་པས་གཡོགས་པ་བསྒྲིབས་པ་ཉིད་དག་ལ་ཐམས་ཅད་ཀྱི་ཐམས་ཅད་ལ་རེག་པར་མི་འགྱུར་བ་དེ་ནི་མི་རེག་པར་འཛུད་པས་རྣམ་པར་བཤད་པ་ཡིན་ཏེ། དེ་ལ་སྤོམ་པོར་འགྱུར་རོ་ཞེས་བྱ་བའི་ཐ་ཚིག་གོ །ཕམ་པར་འགྱུར་བ་དང་པོ་ཞུ་བའི་སྐབས་སོ་ཞེས་བྱ་བ་མི་ཚངས་པར་སྤྱོད་པའི་ཕམ་པར་འགྱུར་བ་ཞུ་བའི་སྐབས་རྫོགས་སོ།། །། ད་ནི་མི་ཚངས་པར་སྤྱོད་པའི་སྐབས་འདུལ་བྱེད་ལས་འབྱུང་བ་དག་བརྗོད་པར་བྱ་སྟེ། དགེ་སློང་གི་དངོས་པོར་མི་ཤེས་ན་རང་བཞིན་གྱིས་ཉམས་པ་ཡིན་ནོ་ཞེས་བྱ་བ་ནི། བདག་དགེ་སློང་ངོ་སྙམ་དུ་དགེ་སློང་གི་དངོས་པོར་དགེ་སློང་ཉིད་དུ་བདག་ཉིད་ཀྱིས་མི་ཤེས་མི་རིག་པ་གནག་ཡིན་པ་དེ་ནི་རང་བཞིན་གྱིས་ཉམས་པ་ཡིན་པར་ཤེས་པར་བྱའོ། །དེ་ལྟ་བུར་གྱུར་པའི་ཚེ་ཉེས་པ་གང་བྱས་ཀྱང་རུང་སྟེ། འདིར་འདུལ་བ་ལས་རང་བཞིན་ཉམས་པ་ཞེས་བྱ་བའི་སྒྲ་དང་སྨྱོན་པ་ལ་སོགས་པའི་སྒྲའི་ཐ་སྙད་སྣང་བ་དེ་དག་གི་མཚན་ཉིད་འདི་ཡིན་ནོ། །དེ་ལྟར་འདིར་གཞུང་ནི་གལ་ཏེ་དགེ་སྤོང་གི་དངོས་པོར་ཤེས་ན་ནི་གཞི་ཇི་ལྟ་བ་བཞིན་དུ་ལྟང་བར་འགྱུར་རོ། །གལ་ཏེ་དགེ་སློང་གི་དངོས་པོར་མི་ཤེས་པ་སྨོས་པ་ལ་ནི་ལྟུང་བར་མི་འགྱུར་ཏེ། སེམས་འཁྲུག་པ་དང་ཚོར་བས་ཉེན་པ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཉམས་པ་དག་ལ་སྦོམ་པོར་བསྟན་པ་དེ་རྣམ་པར་དབྱེ་བའི་ཕྱིར། ཉམས་པ་ཉིད་ནི་གཉིས་ཏེ་ནང་དང་ཕྱི་རོལ་ལོ་ཞེས་བྱ་བ་སྨྲས་ཏེ། ཉམས་པ་ཉིད་གཉིས་ལས་འདིར་ནང་གི་རིམ་པར་གཏོགས་པ་ཉམས་པ་ཉིད་གཙོ་བོ་ཡིན་པས་དེའི་ཕྱིར་ནང་གི་རིམ་པ་ནས་བརྩམས་ཏེ། ཕྱི་རོལ་ཉམས་པའི་བར་དེ་ནི་འདིར་ཕྱི་རོལ་ཉམས་པ་ཉིད་ཡིན་
གྱི། ཕྱི་རོལ་ཉམས་པ་འབའ་ཞིག་ནི་ཉམས་པ་ཉིད་མ་ཡིན་ནོ། །བསྟེན་པའི་ཕྱིར་གཞན་ལ་ཁས་བླངས་པ་ན་བསླབ་པ་འཁྲུགས་པ་ཉིད་དོ་ཞེས་བྱ་བ་ནི། དགེ་སློང་མ་གང་གིས་བདག་ལ་གཞན་གྱིས་བསྟན་པའི་ཕྱིར་བརྗོད་པ་ན་དེ་ལྟར་རུང་ངོ་ཞེས་གཞན་ལ་ཁས་བླངས་པ་ན་དགེ་སློབ་མ་དེའི་བསླབ་པའི་གཞི་རྣམས་འཁྲུགས་པ་ཉིད་མེད་པར་གྱུར་ཏོ་ཞེས་བྱ་བའི་ཐ་ཚིག་གོ །འདིར་དགེ་སློབ་མའི་བསླབ་པ་འཁྲུགས་པ་ཉིད་ཡིན་གྱི། དགེ་ཚུལ་མའི་བསླབ་པ་སྐྱེས་པ་ལ་རེག་པ་སྤོང་པ་ཞེས་བྱ་བ་ནི་འཁྲུགས་པ་མ་ཡིན་ཏེ། དགོན་པ་སྡིག་ཅན་གྱིས་ལྷན་ཅིག་སྦྱར་བའི་གནས་སྐབས་ན་ཉམས་སུ་མྱོང་བར་མ་གྱུར་པའི་ཕྱིར་རོ། །གལ་ཏེ་ཡང་དེའི་ཚེ་ཉམས་སུ་མྱོང་བར་གྱུར་ན་ནི་དེའི་ཚེ་ཕམ་པར་འགྱུར་བ་དང་འདྲ་བའི་ཉེས་བྱས་སུ་འགྱུར་ཏེ། དེས་ན་དེའི་ལུས་ལ་སྐྱེ་བའི་ཆོས་ཉིད་མེད་པར་འགྱུར་རོ། །དེ་ལྟ་བས་ན་ཁས་བླངས་པའི་དུས་ཁོ་ན་དེའི་བསླབ་པ་འཁྲུགས་པ་ཉིད་ཡིན་གྱི། བརྩལ་བའི་དུས་ན་ནི་མ་ཡིན་ཏེ། མངོན་པར་མི་དགའ་བའི་ཕྱིར་རོ། །འདིར་གཞུང་ནི་དགོན་པ་པ་སྡིག་པ་ཅན་གྱིས་དགེ་སློབ་མ་ལ་ཁྱོད་བསྙེན་པར་མ་རྫོགས་གྱི། མི་ཚངས་པར་སྤྱོད་ཀྱང་ལྟུང་བར་མི་འགྱུར་རོ་ཞེས་ཅོ་དྲིས་ཏེ། དེས་དེ་བསྟེན་པ་དང་སྟེན་པ་དེ་ལས་འགྱོད་པ་སྐྱེས་སོ། །དེས་དེ་མི་འདོད་བཞིན་དུ་བརྩལ་བ་དང༌། དེ་བདག་དགེ་སློབ་མར་མ་རུང་བར་གྱུར་ཏམ་སྙམ་དུ་འགྱོད་པ་སྐྱེས་སོ། །བཅོམ་ལྡན་འདས་ཀྱིས་བཀའ་སྩལ་པ། །བསླབ་པ་འཁྲུགས་ཏེ་ཡང་དབོག་པར་བྱའོ། །ཉེས་བྱས་ཀྱི་ལྟུང་པར་འགྱུར་རོ། །ཉེས་བྱས་དེ་ཡང་ཁས་བླངས་པའི་དུས་ཁོ་ནར་བྱུང་ངོ་ཞེས་གསུངས་པ་ཡིན་ནོ། །དེ་ལ་དེ་ཡང་སྦྱིན་པར་བྱ་བ་ཉིད་དོ་ཞེས་བྱ་བ་ནི། འཁྲུགས་པ་ཉིད་དེ་ལ་དགེ་སློབ་མའི་བསླབ་པ་དེ་ཡང་སྦྱིན་པར་བྱ་བ་ཉིད་དོ། །བསྟེན་པར་ཁས་བླངས་པའི་ཞར་ལ་དེ་ནི་དགེ་སློང་གི་སྦོམ་པོའོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི་བསྟེན་པའི་ཕྱིར་གཞན་ལ་ཁས་བླངས་པའོ། །དེ་ནི་དགེ་སློང་གི་ཁ་ན་མ་ཐོ་བ་སྦོམ་པོའོ། །འདི་མན་ཆད་འོག་ནས་མདོ་ལས་བསྟེན་པའི་ཕྱིར་གཞན་ལ་བསྒོ་ན་ཞེས་བྱ་བ་ཡན་ཆད་ནི་སྦོམ་པོའི་དབང་དུ་བྱའོ། །འདིར་ཡང་གཞུང་ནི་དགོན་པ་པ་སྡིག་ཅན་
གྱིས་ལོར་མ་ལོན་པ་ལ་ཁྱོད་བསྙེན་པར་རྫོགས་ནས་རིང་པོར་མ་ལོན་གྱི། མི་ཚངས་པར་སྤྱོད་ཀྱང་དེས་ལྟུང་བར་མི་འགྱུར་རོ་ཞེས་ཅོ་དྲིས་ཏེ། དེས་དེ་བསྟེན་པ་དང༌། བསྟེན་པ་དེ་ལ་འགྱོད་པ་སྐྱེས་སོ། །དེས་དེ་མི་འདོད་བཞིན་དུ་བརྩལ་བ་དང༌། དེ་བདག་ཕམ་པར་མ་གྱུར་ཏམ་སྙམ་དུ་འགྱོད་པ་སྐྱེས་སོ། །བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བར་མི་འགྱུར་ཏེ་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདི་ཡང་ཁས་བླངས་པ་ཁོ་ན་ལས་ལྟུང་བར་འགྱུར་གྱི། བརྩལ་བའི་དུས་ན་ནི་ཉམས་སུ་མྱོང་བ་མེད་པས་ལྟུང་བར་མི་འགྱུར་རོ། །མ་ཆུད་ན་ཡང་ངོ་ཞེས་བྱ་བ་ནི། སྦོམ་པོའི་ཞེས་བྱ་བར་སྦྱར་རོ། །ཆུད་པར་མ་གྱུར་པ་ནི་མ་ཆུད་པའོ། །བསྟེན་པར་བྱ་བར་སྟེན་པར་བྱེད་པ་མ་ཤོང་བ་སྟེ། དེར་མ་ཆུད་ཅེས་བྱ་བའི་ཐ་ཚིག་གོ །ཆུད་པར་བྱ་བའི་ཕྱིར་རྨ་མེད་ན་ཡང་ངོ་ཞེས་བྱ་བ་ནི། ཟག་བྱེད་ཟག་བྱེད་དུ་ཆུད་པར་བྱའོ་སྙམ་ནས་དེའི་ཆེད་དུ་རྨའི་སྒོ་སྦལ་བར་བྱེད་ན་ཡང་སྦོམ་པོའོ། །སྐྲག་པ་དང་ངོ་ཚ་བས་ཀྱང་ཀུན་དུ་འདོད་ཆགས་མ་སྐྱེས་ནའོ་ཞེས་བྱ་བ་ནི། བསྟེན་པར་བྱ་བར་སྟེན་པར་བྱེད་པ་འཛུད་པ་ན་སྐྲག་པ་དང་ངོ་ཚ་བར་གྱུར་ན་ཡང་སྦོམ་པོ་སྟེ། དེ་ཅིའི་ཕྱིར་ཞེ་ན། འདི་ལྟར་སྐྲག་པ་དང་ངོ་ཚ་བ་ལ་ཀུན་དུ་འདོད་ཆགས་མི་སྐྱེ་བས། དེས་ན་ཉམས་སུ་མྱོང་བ་མེད་པར་བཅུག་པ་ལ་སྦོམ་པོར་འགྱུར་རོ། །ཡན་ལག་གི་རྣམ་པ་རྡོལ་བའི་ཕྱིར་རོ་མ་མྱོང་ནའོ་ཞེས་བྱ་བ་ནི། ཡན་ལག་གི་རྣམ་པ་གླང་ཤུ་ལ་སོགས་པས་རྡོལ་པའི་ཕྱིར་བསྟེན་པར་བྱ་བར་སྟེན་པར་བྱེད་པ་བཅུག་པ་ན་འཁྲིག་པ་ལས་བྱུང་བའི་འདོད་ཆགས་ཀྱི་རོ་ཉམས་སུ་མ་མྱོང་ན་ཡང་སྦོམ་པོའོ། །ལས་སུ་མི་རུང་བ་བཅུག་ནའོ་ཞེས་བྱ་བ་ནི། ཡན་ལག་གི་རྣམ་པ་ལས་སུ་མི་རུང་བ་བསྟེན་པར་བྱ་བར་བཅུག་ན་ཡང་སྦོམ་པོའོ། །འདིར་ཡང་འཁྲིག་པ་ལས་བྱུང་བའི་འདོད་ཆགས་ཀྱི་རོ་ཉམས་སུ་མ་མྱོང་ན་སྟེ། ཉམས་སུ་མྱོང་བ་ནི་ལས་སུ་རུང་བ་ལ་རག་ལས་པའི་ཕྱིར་རོ། །ལག་པས་ལག་པར་དང༌། རྐང་པས་རྐང་པར་དང༌། ཚིགས་ཀྱིས་ཚིགས་སུ་ཀྱང༌། མདོམས་ཀྱིས་མདོམས་སུ་ལྟ་བུར་མི་རུང་ནའོ་ཞེས་བྱ་བ་ནི། འདིར་ལག་པ་ལ་སོགས་པས་ལག་པ་བཟུང་དུ་མི་ཆོག་པ་ནི་མི་རུང་བ་ཞེས་བྱ་བའོ། །དེ་དག་མི་རུང་བ་ཉིད་ཀྱིས་ན་བསྟེན་པར་བྱ་
བ་ཡང་མི་རུང་བ་ཉིད་དུ་མངོན་ཏེ། ལག་པས་བགྲོད་པར་བྱ་བའི་ལག་པ་བཟུང་དུ་མི་རུང་བ་ཉིད་དང༌། མདོམས་ཀྱིས་མདོམས་སུ་འཇུག་པར་མི་རུང་བ་ཉིད་ཡིན་ན་ཟག་བྱེད་དུ་ཟག་བྱེད་འཛུད་པར་བྱེད་ཀྱང་སྦོམ་པོ་ཁོ་ནའོ། །བཟུང་དུ་མི་རུང་བ་ཉིད་ནི་རེག་པ་ལ་སོགས་པ་འཁྲིག་པའི་མཐར་ཐུག་པ་ཐམས་ཅད་ལ་ཡང་རོ་ཡོངས་སུ་རྫོགས་པར་མི་མྱོང་བ་ཡིན་ནོ། །ཇི་ལྟར་ལས་སུ་མི་རུང་བ་བཅུག་ན་རོ་ཉམས་སུ་མི་མྱོང་བའི་ཕྱིར་ཞེས་བྱ་བ་སྨྲས་པ། དེ་ཁོ་ན་བཞིན་དུ་འདིར་ཡང་རིག་པར་བྱའོ། །སྤྲད་པའི་གཡོ་བ་ཉིད་ཙམ་ལའོ་ཞེས་བྱ་བ་ནི། མཐུས་བརྩལ་བ་ན་སྟེན་པར་བྱེད་པ་བསྟེན་པར་བྱ་བ་དང༌། ལྷན་ཅིག་སྤྲད་ཅིང་བཅུག་པ་ལས་བགྲོད་པར་བྱ་བའི་འཁྲིག་པའི་རོ་ཉམས་སུ་མྱོང་བར་གལ་ཏེ་གཡོ་བ་ཙམ་ཉིད་ཅེས་བྱ་བ་ཅུང་ཟད་འགྱུར་བ་ཙམ་གྱིས་སེམས་གཡོ་བ་ཙམ་ཉིད་ལ་ཡང་སྦོམ་པོའོ། །ཤིང་དང་བ་སོ་དང་རྡོ་བ་དང༌། གོས་ལས་བུ་མོའི་གཟུགས་བྱས་པ་ལ་བརྩལ་བ་ན་གལ་ཏེ་དབང་པོ་ཙམ་དོད་པ་ནའོ་ཞེས་བྱ་བ་ནི། ཤིང་ལ་སོགས་པ་ལས་བུ་མོའི་གཟུགས་བྱས་པ་ལ་བརྩལ་བ་ན། གལ་ཏེ་ནང་ན་གནས་པའི་འདྲེ་ལ་སོགས་པས་མོའི་དབང་པོ་ཙམ་དོད་ཅིང་སྐབས་ཡོད་པར་བྱེད་ལ། དེར་ཟག་བྱེད་བཅུག་ན་ཡང་སྦོམ་པོ་སྟེ། ཤིང་ལ་སོགས་པ་སྨོས་པ་ནི་མཚོན་པ་སྟེ། གྱོ་མོ་ལས་བྱས་པ་ལ་སོགས་པ་ཐམས་ཅད་ལ་ཡང་སྦོམ་པོ་ཁོ་ནར་འགྱུར་རོ། །ཡན་ལག་ཐམས་ཅད་དུ་རེག་པ་བསྟེན་ན་དངོས་གཞིའོ་ཞེས་བྱ་བ་ནི། ཤིང་ལ་སོགས་པ་ལས་བུ་མོའི་གཟུགས་སུ་བྱས་པ་ན་གལ་ཏེ་ནང་ན་གནས་པའི་འདྲེ་ལ་སོགས་པས་ཡན་ལག་ཐམས་ཅད་དུ་རྩོལ་བར་བྱེད་པ་དེ་ལ་རེག་པ་བསྟེན་ན་དངོས་གཞིའི་ཁ་ན་མ་ཐོ་བ་ཁོ་ནར་འགྱུར་ཏེ། བགྲོད་པར་རྫོགས་པ་ཡིན་པའི་ཕྱིར་རོ། །བསྟེན་པའི་དོན་དུ་རྩོལ་བས་ཡན་ལག་གི་རྣམ་པར་རྐང་པ་འཛུད་ནའོ་ཞེས་བྱ་བ་ནི། སྤྱོད་པ་ལས་བྱུང་བ་བསྟེན་པའི་དོན་དུ་བུད་མེད་ལ་རྩོལ་བའི་གང་ཟག་གིས་མོའི་དབང་པོ་ཞེས་བྱ་བའི་ཡན་ལག་གི་རྣམ་པར་རྐང་པ་འཇུད་ན་སྦོམ་པོའོ། །ཁ་དང་བཤང་བའི་ལམ་དག་ཏུ་ཡང་ཐམས་ཅད་དུ་དེ་བཞིན་ནོ། །བསྟེན་པར་བྱ་བའི་ཡན་ལག་གི་རྣམ་པར་དེ་ཙམ་ལ་གཞོལ་བས་ཕྱི་རོལ་དུ་རེག་ནའོ་ཞེས་བྱ་བ་ནི།
བསྟེན་པར་བྱ་བ་མོའི་དབང་པོ་ལ་སོགས་པ་ལ་ཡན་ལག་གི་རྣམ་པ་ཕོའི་དབང་པོས་དེ་ཙམ་ལ་གཞོལ་བ་ཕྱི་རོལ་ལ་རེག་པའི་བསམ་པས་ཕྱི་རོལ་དུ་རེག་ན་སྦོམ་པོའོ། །འདིར་གཞུང་ནི། བུད་མེད་སྒྲེན་མོ་ཡོལ་བའི་ནང་ན་སྣ་ཆུ་ལྡུགས་པ་དེའི་ཡན་ལག་གི་རྣམ་པ་དགེ་སློང་གིས་ཡོལ་བའི་རྒྱབ་ནས་མཐོང་ངོ༌། །དེས་མཐོང་ནས་ཀུན་དུ་འདོད་ཆགས་པས་དེའི་ཡན་ལག་གི་རྣམ་པ་དང་ཡན་ལག་གི་རྣམ་པ་སྤྲད་དོ། །དེས་འགྱོད་པ་སྐྱེས་པ་ནས་བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །བསྟེན་པར་བྱ་བའི་ཕྱིར་གཞན་ལ་བསྒོ་ནའོ་ཞེས་བྱ་བ་ནི་འཁྲིག་པ་བསྟེན་པའི་ཕྱིར་ཚུར་ཤོག །བདག་ཅག་གཉིས་མི་ཚངས་པར་སྤྱོད་དོ་ཞེ་འམ། སོང་ལ་མི་ཚངས་པར་སྤྱོད་ཅིག་ཅེས་གཞན་ལ་བསྒོ་ན་སྦོམ་པོའོ། །རང་བཞིན་གྱིས་ལས་སུ་རུང་བ་ཉིད་ཡིན་ན་ན་སྨད་པར་བྱ་བ་མེད་དོ་ཞེས་བྱ་བ་ནི། གང་ལ་རང་བཞིན་གྱིས་ངོ་བོ་ཉིད་ཁོ་ནས་དུས་ཐམས་ཅད་དུ་དབང་པོ་ལས་སུ་རུང་བ་ཉིད་ཡིན་ན་དེའི་སྟེན་པར་བྱེད་པ་བསྟེན་པར་བྱ་བར་བཅུག་ན་ན་སྨད་པར་བྱ་བ་མེད་དེ་དངོས་གཞི་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །མདུན་མ་དང་ཕྱི་མ་གཉིས་གང་དུ་བརྩམས་པ་དེ་ལས་གཞན་དུ་གཏུགས་པ་ལ་མེད་དོ་ཞེས་བྱ་བ་ནི། མདུན་མ་མོའི་དབང་པོ་དང་ཕྱི་མ་བཤང་བའི་ལམ་ཞེས་བྱ་བའི་བསྟེན་པར་བྱ་བ་དེ་གཉིས་ལས་ཁུ་བ་དབྱུང་བའི་ཆེད་དུ་མདུན་མ་འམ་ཕྱི་མ་གང་དུ་བརྩམས་པ་དེ་ལས་དེ་གཉིས་བསྣོར་བ་གཞན་དུ་ཁུ་བ་ལྡུགས་པ་ལ་ན་སྨད་པར་བྱ་བ་མེད་པར་ཤེས་པར་བྱའོ། །འདིར་གཞུང་ནི་བཙུན་པ་མདུན་ན་མོར་སྨྱུགས་པའི་ལས་བྱས་ཤིང་ཕྱི་ན་མོར་བླུགས་པ་དེ་ལ་ནི་ཁོ་མོ་མི་ཚངས་པར་སྤྱད་པ་ཡིན་པར་མི་འཛིན་ཏོ་ཞེས་བྱ་བ་ལ་དེས་མདུན་ན་མོར་སྨྱུགས་པའི་ལས་བྱས་ཤིང་ཕྱི་ན་མོར་བླུགས་སོ་ཞེས་གསུངས་པ་ཡིན་ནོ། །ལམ་ལྷག་མ་རྣམས་སུ་བརྩལ་བར་བྱའོ་སྙམ་པ་ལ་ཡང་མེད་དོ་ཞེས་བྱ་བ་ནི། ཟག་བྱེད་དང་ཁ་དང་བཤང་བའི་ལམ་རྣམས་ལས་གཅིག་ཏུ་དང་པོར་མི་ཚངས་པར་སྤྱད་པ་བརྩམས་ལ། ལམ་ལྷག་མ་རྣམས་སུ་བརྩལ་བར་བྱའོ་སྙམ་པའི་བསམ་པས་བསྟེན་པར་བྱ་བར་སྟེན་པར་བྱེད་པ་འཛུད་པ་ལ་ཡང་ན་སྨད་པར་བྱ་བའི་རྒྱུ་མེད་དོ། །བདག་ནི་ཉམས་པའོ་
སྙམ་པའི་བསམ་པ་ཅན་ལ་ཡང་མེད་དོ་ཞེས་བྱ་བ་ནི། དགེ་སློང་ཉམས་པ་མེད་པ་འཁྲུལ་པ་འབའ་ཞིག་གིས་བདག་ནི་ཉམས་པའོ། །དགེ་སློང་གི་ཚུལ་ཞིག་པའོ་སྙམ་པའི་བསམ་པ་ཅན་གྱིས་བཅུག་པ་ལ་ཡང་ན་སྨད་པར་བྱ་བ་མེད་དོ། །ནད་པ་དང་བྲལ་བར་བྱ་བའི་དོན་ཉིད་ལ་ཡང་མེད་དོ་ཞེས་བྱ་བ་ལ། ནད་པ་དང་བྲལ་བ་ནི་ནད་དང་བྲལ་བ་སྟེ། དེའི་དོན་ནི་དགོས་པའོ། །གང་དུ་བཅུག་ན་ནད་དེ་མེད་པར་འགྱུར་བ་ནི་དེའི་དོན་ཏེ་དེའི་དངོས་པོ་ནི་དེ་ཉིད་དོ། །ནད་དང་བྲལ་བར་བྱ་བའི་དོན་དེ་ཉིད་ཀྱིས་བཅུག་པ་ལ་ཡང་ན་སྨད་པར་བྱ་བ་མེད་དོ། །ལམ་ལ་གཞན་ཉིད་དུ་འདུ་ཤེས་པ་དང་ཡིད་གཉིས་ཟ་བ་ལ་ཡང་མེད་དོ་ཞེས་བྱ་བ་ནི། མོའི་དབང་པོ་ལ་སོགས་པ་ལམ་ལ་ལམ་མ་ཡིན་པར་ངེས་པ་ཁོ་ནར་གཞན་ཉིད་དུ་འདུ་ཤེས་པ་དང༌། གང་ལམ་ལ་ཡིད་གཉིས་ཟ་བ་ཅི་འདི་ཟག་བྱེད་ལ་སོགས་པའི་ལམ་ཡིན་ན། འོན་ཏེ་བརླ་དང་པུས་མོ་དང་ཕྲག་པ་དག་གི་པར་ཞིག་ཡིན་སྙམ་དུ་ཡིད་གཉིས་ཟ་བར་བཅུག་ན་དེ་གཉི་ག་ལ་ཡང་ན་སྨད་པར་བྱ་བ་མེད་དོ། །ལམ་མ་ཡིན་པ་ལ་ནི་དེ་གཉིས་སྦོམ་པོའི་དབང་དུ་བྱས་པ་ཉིད་དོ་ཞེས་བྱ་བ་ནི། ལམ་མ་ཡིན་པའི་ཡུལ་ལ་གཞན་ཉིད་དུ་འདུ་ཤེས་པ་དང༌། ཡིད་གཉིས་ཟ་བ་དེ་གཉིས་ནི་སྦོམ་པོའི་དབང་དུ་བྱས་པ་ཉིད་དེ། ལམ་མ་ཡིན་པ་ལ་ལམ་དུ་འདུ་ཤེས་པ་ཉིད་དང༌། ལམ་མ་ཡིན་པ་ལ་ཡིད་གཉིས་ཟ་བས་བཅུག་པ་ལ་ནི་སྦོམ་པོའོ། །འདིར་གཞུང་ནི་ལམ་ལ་ལམ་དུ་འདུ་ཤེས་པ་ནི་ཕམ་པར་འགྱུར་བའི་ལྟུང་བའོ། །ལམ་ལ་ཡིད་གཉིས་ཟ་བ་ལ་ཡང་ཕམ་པར་འགྱུར་བའི་ལྟུང་བའོ། །ལམ་མ་ཡིན་པ་ལ་ལམ་དུ་འདུ་ཤེས་པ་ནི་ཉེས་པ་སྦོམ་པོར་རོ། །ལམ་མ་ཡིན་པ་ལ་ཡིད་གཉིས་ཟ་བ་དང༌། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །རྡོས་པ་བུད་མེད་ཀྱི་སྟེང་དུ་སྒྱེལ་བ་ལ་ནི་ལྟུང་བ་མེད་དོ་ཞེས་བྱ་བ་ནི། བ་ལང་ལ་སོགས་པས་རྡོས་པའི་དགེ་སློང་བུད་མེད་ཀྱི་སྟེང་དུ་སྒྱེལ་བ་རྒྱུ་དེས་རེག་ཅིང་གལ་ཏེ་རེག་པ་ཉམས་སུ་མྱོང་བར་བྱ་བ་མི་བྱེད་ན་དེ་ལ་ནི་ལྟུང་བ་མེད་དོ། །ཉམ་ཐག་པས་མགུལ་ནས་མི་འདོད་བཞིན་དུ་འཁྱུད་པ་ལ་ཡང་ངོ་ཞེས་བྱ་བ་ནི། འཇིགས་པ་དང་སྐྲག་པས་ཉམ་ཐག་པའི་བུད་མེད་ཀྱིས་དགེ་
སློང་གི་མགུལ་ལ་སོགས་པ་ནས་མི་འདོད་བཞིན་དུ་འཁྱུད་པ་ཉམས་སུ་མྱོང་བར་བྱ་བ་མེད་ན་དེ་ལ་ཡང་ལྟུང་བ་མེད་དོ། །མཆུར་མཆུས་རེག་པ་ལ་ཡང་ངོ་ཞེས་བྱ་བ་ནི། བུད་མེད་ཀྱིས་དགེ་སློང་གི་མཆུར་མི་འདོད་བཞིན་དུ་མཆུས་རེག་པ་ལ་ཉམས་སུ་མྱོང་བར་བྱ་བ་མེད་ན་དེ་ལ་ཡང་ལྟུང་བ་མེད་དོ། །ཁྱིའི་མདུན་དུ་གཅི་བར་མི་བྱའོ་ཞེས་བྱ་བ་ནི། ཁྱིའི་མདུན་དུ་ཟག་བྱེད་ཕྱུང་སྟེ་གཅིན་གཅི་བར་མི་བྱ་སྟེ། ཡན་ལག་གི་རྣམ་པ་ཟིན་པ་སྤངས་པའི་ཕྱིར་རོ། །དེ་ནི་འདིར་སྟེན་པར་བྱེད་པའི་སྐབས་ལས་སྨྲས་པ་ཡིན་ནོ། །གང་དུ་སྲོག་གི་བར་ཆད་དུ་འགྱུར་བའི་དགོན་པ་དེར་གནས་པར་མི་བྱའོ་ཞེས་བྱ་བ་ལ། སྲོག་དག་གི་བར་དུ་གཅོད་པ་ནི་སྲོག་གི་བར་ཆད་དེ་སྲོག་གི་དབང་པོ་འཇིག་པའོ། །དགོན་པ་གང་དུ་སྲོག་གི་བར་ཆད་འབྱུང་བ་འོང་བར་འགྱུར་བ་ཡོད་པའི་དགོན་པ་དེར་གནས་པར་མི་བྱའོ། །དེ་ནི་མི་འམ་ཅི་མོའི་བྱུང་བའི་མཐའ་ལས་གཞག་པ་ཡིན་ནོ། །འདིར་གཞུང་ནི་ཡང་དགེ་སློང་གིས་གང་ན་ཉེས་དམིགས་དེ་ལྟ་བུ་ཡོད་པའི་དགོན་པ་དེ་ལྟ་བུར་ལྷག་པར་གནས་པར་མི་བྱའོ་ཞེས་གསུངས་པ་ཡིན་ནོ། །གང་ན་ཡན་ལག་གི་རྣམ་པ་འཛིན་པའི་འཇིགས་པ་ཡོད་པའི་ཆུ་ཀླུང་དེར་སྒྲེན་མོར་རྒལ་བར་མི་བྱའོ་ཞེས་བྱ་བ་ནི། ཆུ་ཀླུང་གང་ན་ཡན་ལག་གི་རྣམ་པ་འཛིན་པའི་འཇིགས་པ་ཡོད་པའི་ཆུ་ཀླུང་དེར་དགེ་སློང་གིས་སྒྲེན་མོར་རྒལ་བར་མི་བྱའི། དེར་ཤེས་བཞིན་དུ་གྲུ་རྒལ་བར་བྱའོ་ཞེས་བྱ་བ་ནི། ཆུ་ཀླུང་དེར་དགེ་སློང་གིས་ཤེས་བཞིན་དུ་གྲུ་རྒལ་བར་བྱ་སྟེ། དེ་ནི་བུད་མེད་ལ་རེག་པ་སྤངས་པའི་ཕྱིར་ཤེས་བཞིན་དུ་བྱ་བ་ཡིན་པར་རིག་པར་བྱའོ། །བ་ལང་གི་ནང་དུ་ཡང་འགྲོ་བར་བྱའོ་ཞེས་བྱ་བ་ནི། དགེ་སློང་གིས་བ་ལང་གི་ནང་དུ་ཡང་ཤེས་བཞིན་དུ་འགྲོ་བར་བྱའོ། །ཁྲོན་པ་ཡང་བརྟག་པར་བྱའོ་ཞེས་བྱ་བ་ནི། དགེ་སློང་གིས་ཁྲོན་པ་ཡང་ཤེས་བཞིན་དུ་བརྟག་པར་བྱ་སྟེ། ངེས་པར་བརྟག་པར་བྱ་བའོ། །བསོད་སྙོམས་ལ་ཡང་གྲོང་དུ་རྒྱུ་བར་བྱ་བའོ་ཞེས་བྱ་བ་ནི། དགེ་སློང་གིས་བསོད་སྙོམས་ལ་ཡང་ཤེས་བཞིན་དུ་གྲོང་དུ་རྒྱུ་བར་བྱའོ། །གསུམ་པོ་དག་ལ་ཡང་ཞེས་བྱ་བའི་སྒྲ་སྨོས་པ་ནི་ཤེས་བཞིན་ཞེས་བྱ་བའི་རྗེས་སུ་སྙེགས་པའི་ཕྱིར་ཏེ། ཤེས་བཞིན་ཐམས་ཅད་དུ་ཡང་བུད་མེད་ལ་རེག་པ་སྤང་བའི་ཕྱིར་རོ། །
ལེགས་པར་སོ་སོར་བརྟག་པར་བྱས་ནས་རབ་ཏུ་དབྱུང་བར་བྱའོ་ཞེས་བྱ་བ་ནི། རབ་ཏུ་འབྱུང་བར་འདོད་པ་ལེགས་པར་སོ་སོར་བརྟག་པར་བྱས་ནས་རབ་ཏུ་དབྱུང་བར་བྱ་བ་སྟེ། འདི་ལྟར་རབ་ཏུ་དབྱུང་བའི་གཞིར་དོན་ལས་བསྟན་ཟིན་མོད་ཀྱི་འོན་ཀྱང་འདིར་བརྗོད་དོ། །གལ་ཏེ་བུད་མེད་སྐྱེས་པ་གཞོན་ནུ་འདྲ་བར་རབ་ཏུ་ཕྱུང་སྟེ། དགེ་སློང་དག་གི་ནང་དུ་གཞག་ན་དེའི་ཚེ་གནོད་པ་ཆེན་པོར་འགྱུར་བ་དང༌། གུས་པ་སྐྱེད་པའི་ཕྱིར་རོ། །འདི་ལྟར་བསླབ་པ་ཐམས་ཅད་ལ་སྦྱོར་བ་མི་ལྷོད་པར་བྱ་བ་ཡིན་པས་ལྷག་པར་ཡང་རབ་ཏུ་དབྱུང་བ་ལ་བྱ་དགོས་སོ། །དེས་ན་བསླབ་པ་ཐམས་ཅད་ལ་སྦྱོར་བ་ལྷོད་ན་ཉེས་བྱས་སུ་འགྱུར་རོ། །གཅིག་པུ་བླ་གབ་མེད་པར་གློས་མི་དབབ་པོ་ཞེས་བྱ་བ་ནི། དགེ་སློང་གིས་གཅིག་པུ་བླ་གབ་མེད་པར་གློས་དབབ་པར་མི་བྱ་བ་སྟེ། དགེ་སློང་གཅིག་པུ་བླ་གབ་མེད་པར་གློས་ཕབ་སྟེ། གཉིད་ལོག་པ་དེའི་ཤམ་ཐབས་ཕུད་པ་ན་དགེ་སློང་དེ་བུད་མེད་ཀྱིས་བརྩལ་བས་དེའི་ཕྱིར་འདིར་གཞག་གོ །དགེ་སློང་མས་གནས་ཁང་སྒོ་མ་བཅད་པར་སྙོམས་པར་འཇུག་པ་ཡང་མི་བྱའོ་ཞེས་བྱ་བ་ལ། སྒོ་མ་བཅད་པར་ཞེས་བྱ་བ་ནི། གནས་ཁང་སྒོ་ཕྱེ་བ་སྟེ། དགེ་སློང་མས་དེར་སྙོམས་པར་འཇུག་པར་མི་བྱའོ། །ཡང་ཞེས་བྱ་བ་ནི། གྲོགས་མོ་དེ་ཡོངས་སུ་ཟིན་ཀྱང་དེས་གློས་དབབ་པར་ཡང་མི་བྱ་བར་སྟོན་ཏོ། །ཕམ་པར་འགྱུར་བ་དང་པོ་འདུལ་བྱེད་ཀྱི་སྐབས་སོ་ཞེས་བྱ་བ་ནི་མི་ཚངས་པར་སྤྱོད་པའི་ཕམ་པར་འགྱུར་བ་འདུལ་བྱེད་ཀྱི་སྐབས་ནས་འབྱུང་བ་རྫོགས་སོ། །མི་ཚངས་པར་སྤྱོད་པའི་ཕམ་པར་འགྱུར་བ་རྫོགས་སོ་ཞེས་བྱ་བ་དངོས་གཞི་དང་པོ་མི་ཚངས་པར་སྤྱོད་པའི་ཕམ་པར་འགྱུར་བ་རྫོགས་སོ།། །།བམ་པོ་དགུ་པ། གང་བྱས་ན་མ་བྱིན་པར་ལེན་པའི་ཕམ་པར་འགྱུར་ཞེ་ན། དེའི་ཕྱིར་རྐུའམ་རྐུར་བཅུག་པ་དག་ཞེས་བྱ་བ་སྨྲས་ཏེ། རྐུའམ་ཞེས་བྱ་བ་ནི་རང་གིས་བྱེད་པ་སྟེ། དགེ་སློང་གིས་གང་ལ་རྐུ་བའི་ཕྱིར་རང་ཁོ་ནས་བྱ་བ་བྱེད་པའོ། །རྐུར་བཅུག་པ་ཞེས་བྱ་བ་ནི། རང་གིས་བཅོལ་ཞིང་གཞན་བྱེད་དུ་བཅུག་པ་སྟེ། རང་གིས་བཅོལ་ནས་གཞན་གྱིས་རྫས་རྐུ་བར་བྱེད་པའོ། །རང་གི་ལུས་འབའ་ཞིག་ཏུ་ཡང་མ་ཟད་དེ། ཇི་ལྟ་ཞེ་ན། མངགས་པས་ཀྱང་ངོ་ཞེས་བྱ་བ་སྟེ། མངགས་
པ་རྒྱུར་གྱུར་པས་ཀྱང་རྐུ་བ་ནི་གང་ལ་མངགས་པ་རང་གི་ལུས་ཀྱིས་བྱེད་པའོ། །རྐུར་བཅུག་པ་ནི་གང་ལ་མངགས་པས་བཅོལ་ན་གཞན་ལ་འདི་སྐད་ཅེས་སོང་ལ་རང་གིས་རྐུས་ཤིག །སོང་ལ་རྐུར་ཆུག་ཤིག་ཅེས་བྱེད་དུ་བཅུག་པའོ། །བཅོལ་བའི་དབང་གིས་དེ་ལྟར་རྣམ་པར་གཞག་སྟེ། མངགས་པའི་མངགས་པས་བརྐུས་པ་ཡང་བྱེ་བྲག་མེད་དེ། ཐམས་ཅད་དུ་ཕམ་པར་འགྱུར་རོ། །ཅི་ཞིག་རྐུ་འམ་རྐུར་བཅུག་པ་དང་མངགས་པས་ཀྱང་ཁ་ན་མ་ཐོ་པ་དེར་འགྱུར་ཞེ་ན། དེའི་ཕྱིར། མ་བྱིན་པའོ་ཞེས་བྱ་བ་སྨྲས་ཏེ། བྱིན་པ་ལ་ཡང་རྐུ་སེམས་ཀྱིས་ལེན་པ་སྲིད་པས་དེའི་ཕྱིར་མ་བྱིན་པར་ཞེས་བྱེ་བྲག་ཏུ་བྱས་སོ། །འདིར་ལུང་ནི་དེ་ལ་བུད་མེད་དམ་སྐྱེས་པའམ་མ་ནིང་གང་གིས་ཀྱང་མ་བྱིན་པ་ཞེས་གསུངས་པ་དེ་ཡིན་ནོ། །ཚད་ཇི་ཙམ་ཞེ་ན། དེའི་ཕྱིར། མ་ཤ་ཀ་ལྔ་ལ་སོགས་པའོ་ཞེས་བྱ་བ་སྨྲས་ཏེ། མ་བྱིན་པའི་རྫས་དེ་མ་ཤ་ཀ་ལྔའི་ཚད་ཙམ་ཡིན་པ་དེ་ནི་མ་ཤ་ཀ་ལྔའོ། །སོགས་པ་དེ་གང་ལ་ཡོད་པ་དེ་ནི་དེ་ལ་སོགས་པ་སྟེ་དེའོ། །མ་བྱིན་པ་དེ་ལ་སོགས་པ་རྐུ་འམ་རྐུར་བཅུག་པ་དང་མངགས་པས་ཀྱང་ཁ་ན་མ་ཐོ་བ་དེར་འགྱུར་རོ། །སོགས་པ་ཞེས་སྨོས་པས་ནི་དྲུག་དང་བདུན་དང་བརྒྱད་དང་དགུ་དང་བཅུ་ལ་སོགས་པ་ཐམས་ཅད་བསྡུའོ། །འདིར་གཞུང་ནི་མ་ཤ་ཀ་ལྔ་འམ་མ་ཤ་ཀ་ལྔ་ལས་ལྷག་པས་ཞེས་གསུངས་པ་ཡིན་ནོ། །སེམས་ཇི་ལྟ་བུས་ཤེ་ན་དེའི་ཕྱིར་རྐུ་སེམས་ཀྱིས་སོ་ཞེས་བྱ་བ་སྨྲས་ཏེ། རྐུ་བའི་བློས་རྐུ་འམ་རྐུར་བཅུག་པ་དང༌། མངགས་པས་ཀྱང་ཁ་ན་མ་ཐོ་བ་དེར་འགྱུར་རོ། །འདི་ལྟར་ཡིད་གཅུགས་པའི་སེམས་ལ་སོགས་པ་དག་གིས་ནི་ལྟུང་བ་མེད་དོ་ཞེས་འོག་ནས་འབྱུང་ངོ༌། །ཅི་མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བའམ་ཞེ་ན། མ་ཡིན་ཏེ་དེའི་ཕྱིར། མིའི་རྒྱུད་ཀྱིས་ཡོངས་སུ་བཟུང་བའོ་ཞེས་བྱ་བ་སྨྲས་ཏེ། གང་མིའི་འགྲོ་བར་གཏོགས་པ་དེ་ནི་མིའི་རྒྱུད་དེ། དེས་ཡོངས་སུ་བཟུང་བའོ། །མིའི་རྒྱུད་ཀྱིས་ཡོངས་སུ་བཟུང་བ་དེ་རྐུའམ་རྐུར་བཅུག་པ་དང་མངགས་པས་ཀྱང་ཁ་ན་མ་ཐོ་བ་དེར་འགྱུར་རོ། །མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བ་ནི་མ་ཡིན་ཏེ། འགྲོ་བ་གཞན་གྱི་རྒྱུད་ཀྱིས་ཡོངས་སུ་བཟུང་བ་ནི་ན་སྨད་དོ་ཞེས་གསུངས་པའི་ཕྱིར་རོ། །གལ་ཏེ་མིའི་རྒྱུད་ཀྱིས་ཡོངས་སུ་བཟུང་བའི་རྫས་ལ་འགྲོ་བ་
གཞན་གྱི་རྒྱུད་ཀྱིས་ཡོངས་སུ་བཟུང་བའི་འདུ་ཤེས་ཀྱིས་རྐུ་ན་ཅི་ཁ་ན་མ་ཐོ་བ་དེ་ཉིད་དུ་འགྱུར་རམ་ཞེ་ན་མ་ཡིན་ཏེ། དེའི་ཕྱིར་དེར་འདུ་ཤེས་པས་སོ་ཞེས་བྱ་བ་སྨྲས་ཏེ། མིའི་རྒྱུད་ཀྱིས་ཡོངས་སུ་བཟུང་བ་ཡིན་པར་འདུ་ཤེས་པས་སོ་ཞེས་བྱ་བའི་ཐ་ཚིག་གོ །གལ་ཏེ་མིའི་རྐུའོ་སྙམ་དུ་འདུ་ཤེས་པར་གྱུར་ན་དེས་ཕམ་པ་ཡིན་ནོ། །འདིར་གཞུང་ནི་འདི་ལྟ་སྟེ། དགེ་སློང་གིས་འདི་ལྟར་ཡོ་བྱད་ལྕི་བ་འདི་དག་གཞན་སྐྱེས་པའམ་བུད་མེད་དམ་མ་ནིང་དག་གིས་ཡོངས་སུ་བཟུང་བར་འདུ་ཤེས་པ་སྟེ་ཞེས་བྱ་བ་ལ་སོགས་པས་གསུངས་པ་ཡིན་ནོ། །དེ་ལྟར་ན་མ་བྱིན་པར་ལེན་པའི་ཕམ་པར་འགྱུར་བ་འདི་ནི་ཡན་ལག་ལྔ་དང་ལྡན་པ་ཡིན་ཏེ། མ་བྱིན་པ་ཉིད་དང༌། མ་ཤ་ཀ་ལྔ་ལ་སོགས་པ་ཉིད་དང༌། རྐུ་སེམས་ཉིད་དང༌། མིའི་རྒྱུད་ཀྱིས་ཡོངས་སུ་བཟུང་བ་ཉིད་དང༌། དེར་འདུ་ཤེས་པ་ཉིད་དོ། །ཡན་ལག་གང་ཡང་རུང་བ་མ་ཚང་བ་ལ་ནི་ཕམ་པར་འགྱུར་བ་མེད་དེ། ན་སྨད་པ་ཁོ་ནར་འགྱུར་རོ། །མིའི་རྒྱུད་ཀྱིས་ཡོངས་སུ་བཟུང་བ་ཞེས་སྨྲས་ཏེ། གལ་ཏེ་རླུང་ལ་སོགས་པ་གཞན་གྱིས་ཁྱེར་བ་དེ་ཅི་བདག་པོ་ཉིད་དང་བྲལ་བ་ཡན་ནམ་འོན་ཏེ་མ་ཡིན་ཞེ་ན་དེའི་ཕྱིར། ཁྱེར་བ་ཉིད་ན་འདི་བསམ་པས་མ་བཏང་བ་ནི་བདག་པོ་ཉིད་དང་མ་བྲལ་བ་ཉིད་ཡིན་ནོ་ཞེས་བྱ་བ་སྨྲས་ཏེ། རླུང་དང་རྐུན་པོ་ལ་སོགས་པ་དག་གིས་གོས་ལ་སོགས་པའི་རྫས་ཁྱེར་བ་ཉིད་ན་བདག་པོས་བདག་གི་བྱ་བའི་བསམ་པས་མ་བཏང་བ་ནི་རྫས་དེ་ལས་བདག་པོ་ཉིད་དང་མ་བྲལ་བ་ཉིད་ཡིན་ནོ། །འདི་སྐད་བསྟན་ཏེ། འདི་ལྟར་རྐུན་པོ་ལ་སོགས་པས་བདག་པོའི་དྲུང་ནས་རྫས་ཁྱེར་དུ་ཟིན་ཀྱང་ཇི་སྲིད་དུ་བདག་པོས་བདག་གི་བ་ཉིད་ཀྱི་བསམ་པས་མ་བཏང་བ་དེ་སྲིད་དུ་རྫས་ཀྱི་ཡུལ་དེ་ལ་བདག་པོ་ཉིད་དང་མ་བྲལ་བ་ཡིན་ནོ། །འདིར་གཞུང་ནི། འདི་ལྟར་བཙོ་བླག་མཁན་གྱི་གོས་དག་བཏིང་བ་རླུང་གིས་ཁྱེར་ཞིང་དེ་དག་དགེ་སློད་རྣམས་ཀྱི་འཆག་ས་དག་གམ་ར་བ་དག་གམ། སྒོ་ཁང་དག་ཏུ་ལྟུང་བ་ལ་དགེ་སློང་དག་གིས་དེ་ལ་སྦྱོར་བས་གནས་ནས་གནས་སུ་སྤེད་པར་བྱེད་པའི་བར་དུ་བྱེད་པ་ནི་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་དངོས་པོ་ཚང་ན་ཕམ་པར་འགྱུར་ལ་ཞེས་གསུངས་པ་དང༌། བཅོམ་ལྡན་འདས་ཀྱིས་རྐུན་པོ་དག་
རྒྱལ་པོའི་ཕོ་བྲང་དུ་ཕུལ་ན་སྲོག་གཅོད་པ་ཀུན་ནས་སློང་བའི་ཁ་ན་མ་ཐོ་བར་གསུངས་ཀྱི། མ་བྱིན་པར་ལེན་པ་ཀུན་ནས་སློང་བའི་ཁ་ན་མ་ཐོ་བར་མ་གསུངས་ཏེ། གལ་ཏེ་བདག་གིར་བྱེད་པའི་བསམ་པ་བཏང་ཞིང་མེད་ན་ནི་བདག་པོ་ཉིད་དང་བྲལ་བས་དེའི་ཚེ་མ་བྱིན་པར་ལེན་པ་ཀུན་ནས་སློང་བ་ཡང་བརྗོད་པར་འགྱུར་རོ། །མིའི་རྒྱུད་ཀྱིས་ཡོངས་སུ་བཟུང་བ་ཞེས་གསུངས་ན་བདག་པོ་དང་བཅས་པའི་དུད་འགྲོའི་སྐྱེ་གནས་སུ་སྐྱེས་པའི་རྫས་བརྐུས་ན་ཅི་ཞིག་ཏུ་རྣམ་པར་གཞག་ཅེ་ན་དེའི་ཕྱིར། ཐ་སྙད་མི་ཤེས་པ་ནི་ཞལ་ཏ་བྱད་པ་བདག་པོ་ཉིད་ཡིན་ནོ་ཞེས་བྱ་བ་སྨྲས་ཏེ། ཐ་སྙད་ཤེས་པ་ནི་འཇིག་རྟེན་གྱི་ཐ་སྙད་སྨྲ་ནུས་པ་སྟེ། དེའི་རྒྱུད་དུ་གཏོགས་པའི་རྫས་ནི་ཐ་སྙད་ཤེས་པའོ། །ཐ་སྙད་མི་ཤེས་པ་ནི་འཇིག་རྟེན་གྱི་ཐ་སྙད་སྨྲ་མི་ནུས་པ་སྟེ། དེའི་རྒྱུད་དུ་གཏོགས་པའི་རྫས་ནི་ཐ་སྙད་མི་ཤེས་པའོ། །རྫས་དེ་ལ་ནི་ཞལ་ཏ་བྱེད་པ་སྐྱོང་བར་བྱེད་པ་བདག་པོ་ཉིད་ཡིན་ནོ། །བྱ་རྣམས་ཀྱི་ཡིན་ན་ཡང་དེ་ལ་བདག་པོ་ཉིད་ཡོད་དེ། རྫས་ནི་དེའི་རྒྱུད་དུ་གཏོགས་པ་ཡིན་པའི་ཕྱིར་རོ། །གཉི་ག་བདག་པོ་ཉིད་ཡིན་ན་ནི་འདུ་ཤེས་ཀྱི་དབང་གིས་ལྟུང་བ་རྣམ་པར་གཞག་གོ །དེ་ལྟར་འདིར་གཞུང་ནི་གལ་ཏེ་འདི་སྙམ་དུ་མི་ལས་བརྐུ་བར་བྱའི་བྱ་ལ་རྒྱན་ག་ལ་ཡོད་སྙམ་དུ་སེམས་ན་ནི་རིན་ཐང་བརྩི་བར་བྱ་ཞིང་ཞེས་བྱ་བ་ལ་སོགས་བ་གསུངས་པ་ཡིན་ནོ། །ཅི་དུད་འགྲོའི་ཟས་དང་སྒོམ་རྐུ་པ་ལ་ཡང་དེ་ཉིད་རྣམ་པ་གཞག་གམ་ཞེ་ན་མ་ཡིན་ཏེ། དེའི་ཕྱིར། བཟའ་བཏུང་གི་ཕྱིར་བྱིན་པ་ལ་ནི་བསམ་པ་དང་འབྲེལ་པ་མེད་པ་ཉིད་ཡིན་ནོ་ཞེས་བྱ་བ་སྨྲས་ཏེ། དུད་འགྲོའི་སྐྱེས་གནས་སུ་སྐྱེས་པའི་ཟས་དང༌། སྒོམ་ལ་སོགས་པ་བཟའ་བཏུང་གི་ཕྱིར་བྱིན་པ་གང་ཡིན་པ་དེ་ལ་ནི་ཞལ་ཏ་བྱེད་པའི་བསམ་པ་དང་འབྲེལ་པ་མེད་པ་ཉིད་ཡིན་པར་རིག་པར་བྱའོ། །འདི་སྐད་བསྟན་ཏེ། དུད་འགྲོའི་ཟས་དང་སྒོམ་གྱི་ཕྱིར་བཟའ་བ་དང་བཏུང་བ་གང་སྦྱིན་པར་བྱེད་ན་དེར་དེ་ལ་སྦྱིན་པར་བྱེད་པ་འདི་བདག་གིའོ་སྙམ་པའི་བསམ་པ་དང༌། འབྲལ་པ་བཟློག་པས་དེ་ཉིད་ཀྱིས་ཉེ་བར་སྦྱོར་བར་བྱེད་དེ། ཉེ་བར་སྦྱར་ནས་ཡང་ཕྱིར་བླང་ངོ་སྙམ་པ་མེད་པས་དེའི་ཕྱིར་དེ་ལ་ནི་དུད་འགྲོ་ཉིད་བདག་པོ་ཉིད་ཡིན་གྱི། ཞལ་ཏ་བྱེད་པ་ནི་མ་ཡིན་ནོ། །འདིར་ལུང་ནི་དུད་འགྲོའི་སྐལ་བ་ཆུའི་རིན་ཐང་བརྩི་བར་བྱ་ཞིང་ཞེས་
གསུངས་པ་དེ་ཡིན་ནོ། །ནགས་མེས་བཏང་བ་ལ་སོགས་པ་དག་གིས་རི་དགས་ལ་སོགས་པ་གསོད་པ་ན་དེ་དག་ལ་བདག་པོ་ཉིད་གང་ཡིན་ཞེ་ན་དེའི་ཕྱིར། ནགས་མེས་བཏང་བ་ལ་སོགས་པ་དག་གིས་བཟུང་བའི་ཕྱིར་རི་དགས་དང་བྱ་དང་སྡིག་སྦྲུལ་ལིངས་བཏབ་པ་རྣམས་ལ་ནི་ལིངས་པ་མ་ཡིན་པ་བདག་པོ་ཉིད་མ་ཡིན་ནོ་ཞེས་བྱ་བ་སྨྲས་ཏེ། རྔོན་པ་ལ་སོགས་པ་ལིངས་བདག་གིས་ནགས་མེས་བཏད་བ་ལ་སོགས་པ་དག་གི་ཐབས་ཀྱིས་བཟུང་བའི་ཕྱིར་རི་དགས་ལ་སོགས་པ་ལིངས་བཏབ་པ་བཤོར་བ་གང་དག་ཡིན་པའི་རི་དགས་ལ་སོགས་པ་ལིངས་བཏབ་པ་དེ་རྣམས་ནི་ལིངས་པ་ཁོ་ན་བདག་པོ་དབང་བ་ཉིད་ཡིན་གྱི། ལིངས་པ་མ་ཡིན་པ་བདག་པོ་དབང་བ་ཉིད་མ་ཡིན་ནོ། །དེ་ལྟ་བས་ན་ལིངས་པ་མ་ཡིན་པས་གལ་ཏེ་རྐུ་སེམས་ཀྱིས་ལེན་པར་བྱེད་ན་དེ་ལས་རྐུན་པོར་འགྱུར་རོ། །རི་དགས་ལ་སོགས་པ་སྨོས་པ་ནི་དཔེ་ཡིན་ཏེ། ཕྱུགས་དང་མི་ལིངས་བཏབ་པ་བདག་པོ་དང་བཅས་པ་དང༌། བདག་པོ་མེད་པ་དག་ལིངས་པ་ལས་བཀྲུས་ན་རྐུན་པོ་ཉིད་དུ་འགྱུར་ཏེ། བདག་པོ་གཞན་ཡོད་དུ་ཟིན་ཀྱང་འདི་ལྟར་དེའི་ཚེ་ན་ལིངས་པ་ཁོ་ན་ཉིད་དབང་བ་ཉིད་ཡིན་པའི་ཕྱིར་རོ། །བདག་པོ་མ་ངེས་པའི་རྫས་ལ་ལྟུང་བ་ཇི་ལྟར་རྣམ་པར་གཞག་ཅེ་ན་དེའི་ཕྱིར། བྱེ་བྲག་མ་ཕྱེད་པ་ལ་ནི་གཞི་ལས་རྣམ་པར་གཞག་གོ་ཞེས་བྱ་བ་སྨྲས་ཏེ། བྱེ་བྲག་ཕྱེད་པ་ནི་ཡོངས་སུ་བཅད་པ་ངེས་པའོ། །བྱེ་བྲག་མ་ཕྱེད་པ་ནི་ཡོངས་སུ་བཅད་པ་མ་ངེས་པ་སྟེ། འདི་བདག་པོ་དང་བཅས་པ་ཞིག་གམ་འོན་ཏེ་མ་ཡིན་ཞེས་བྱེ་བྲག་མ་ཕྱེད་པ་གཏེར་ལ་སོགས་པའི་རྫས་གང་ཅི་ཡང་རུང་བ་བརྐུས་པ་ལ་ནི་གཞིའི་ངོ་བོ་ཉིད་ལས་ལྟུང་བ་རྣམ་པར་གཞག་གི་འདུ་ཤེས་ལ་ནི་མི་གཞག་གོ །གལ་ཏེ་བདག་པོ་དང་བཅས་པ་ཞིག་ན་ནི་གཞི་ལས་ཡན་ལག་ཚང་ན་ཕམ་པར་འགྱུར་རོ། །བདག་པོ་མེད་པ་ཞིག་ན་ནི་སྦོམ་པོར་རྣམ་པར་གཞག་གོ །རིན་ཐང་བརྩི་བར་བྱའོ་ཞེས་སྨྲས་ན། གནས་དང་དུས་ཐ་དད་པས་རྫས་རྣམས་ཀྱི་རིན་ཐང་ཡང་ཐ་དད་པར་སྣང་ན། གང་གི་ཚེ་རིན་ཐང་རྣམ་པར་གཞག་པར་བྱ་ཞེ་ན་དེའི་ཕྱིར། རིན་ཐང་ནི་བརྐུས་པའི་གནས་དང་དུས་ཀྱིས་སོ་ཞེས་བྱ་བ་སྨྲས་ཏེ། རྣམ་པར་གཞག་གོ་ཞེས་བྱ་བར་སྦྱར་རོ། །རིན་ཐང་ནི་བརྐུས་པའི་གནས་གང་ཡིན་པ་དང༌། དུས་
གང་ཡིན་པ་དེས་རྣམ་པར་གཞག་གོ །འདི་སྐད་བསྟན་ཏེ། ཡུལ་གང་དུ་བརྐུས་པ་དང༌། དུས་གང་གི་ཚེ་བརྐུས་པའི་ཡུལ་དེ་ཉིད་ཀྱི་དང་དུས་དེ་ཉིད་ཀྱི་ཚེའི་རྫས་དེའི་རིན་ཐང་དང་སྦྱར་བར་བྱ་སྟེ། དེས་ལྟུང་བ་རྣམ་པར་གཞག་གོ །རྐུ་འམ་རྐུར་བཅུག་པ་དག་གིས་སོ་ཞེས་སྨྲས་ན། མ་བསམས་པ་བརྐུས་ན་ཅི་ཞིག་ཏུ་རྣམ་པར་གཞག་ཅེ་ན་དེའི་ཕྱིར། མ་བསམས་པ་ལ་ལྟུང་བ་མེད་དོ་ཞེས་བྱ་བ་སྨྲས་ཏེ། མ་བསམས་པའི་དངོས་པོ་འཁྲུལ་པས་བརྐུས་པ་གང་ཡིན་པ་དེ་ལ་ནི་ལྟུང་བ་མེད་དོ། །དེ་ལྟར་ཡང་ཉེ་བ་འཁོར་གྱིས་ཞུས་པ་ལས། བཙུན་པ་རེ་ཞིག་དགེ་སློང་གིས་རྐུ་སེམས་ཀྱིས་ཆོས་གོས་ཀྱི་གདང་བུ་བརྐུས་པ་དེར་ཆོས་གོས་དག་ཀྱང་ཞར་ལ་མཆིས་ན་ལྟུང་བ་ཅིར་འགྱུར། ཆོས་གོས་ཀྱི་གདང་བུའི་རིན་ཐང་བརྩི་བར་བྱའོ་ཞེས་གསུངས་པ་ཡིན་ཏེ། ཆོས་གོས་དག་གི་རིན་ཐང་བརྩི་བ་ནི་མ་གསུངས་ཏེ། མ་བསམས་པའི་ཕྱིར་རོ། །རྐུ་སེམས་ཀྱིས་སོ་ཞེས་བྱ་བ་སྨྲས་ན། སེམས་གཞན་གྱིས་ཅིར་འགྱུར་ཞེ་ན་དེའི་ཕྱིར། རང་དང་བརྙ་བ་དང་ཡིད་གཅུགས་པའི་སེམས་དག་གིས་གཞན་ལ་གོ་བར་བྱ་སྟེ། བླངས་ན་ལྟུང་བ་མེད་དོ་ཞེས་བྱ་བར་སྦྱར་རོ། །རང་གི་སེམས་དང་བརྙ་བའི་སེམས་དང༌། ཡིད་གཅུགས་པའི་སེམས་ནི་རང་དང་བརྙ་བ་དང་ཡིད་གཅུགས་པའི་སེམས་ཏེ། རང་གི་སེམས་ལ་སོགས་པ་དེ་དག་གིས་རྐུ་སེམས་མེད་པར་གཞན་ལ་གོ་བར་བྱས་ཏེ་བླངས་ན་ལྟུང་བ་མེད་དོ། །ལ་ལ་འདི་ལ་རྐུ་སེམས་མེད་པར་ཞེས་བྱ་བ་དེ་སྨོས་མི་དགོས་ཏེ། རང་གི་རྫས་ལ་རྐུ་སེམས་མི་སྲིད་པའི་ཕྱིར་རོ་ཞེས་ཟེར་ན། དེ་ལྟ་མ་ཡིན་ཏེ། རང་གི་རྫས་ལ་ཡང་རྐུ་སེམས་སྲིད་པ་ཁོ་ན་སྟེ། གང་གི་ཚེ་རང་གི་རྫས་གཞན་གྱི་ལག་ཏུ་འདོམས་ཤིང་ཕྱིས་རྐུ་སེམས་ཀྱིས་ཅི་ནས་ཀྱང་སྐྱིན་པ་འཇལ་དུ་གཞུག་གོ་སྙམ་ནས་དེ་ལས་རྐུ་བར་བྱེད་པ་ཡོད་པས་དེའི་ཕྱིར་རྐུ་སེམས་མེད་པ་ཞེས་བྱེ་བྲག་ཏུ་བྱ་བའོ། །དེ་ལྟར་ཡང་དགེ་སློང་གིས་རང་གི་ལྷུང་བཟེད་དང་ཆོས་གོས་ཀྱང་རྐུ་སེམས་ཀྱིས་ལེན་ན་ཉེས་པ་སྦོམ་པོར་འགྱུར་བས། དགེ་སློང་གིས་རང་དང་བརྙ་བ་དང་ཡིད་གཅུགས་པའི་སེམས་དག་གིས་བླང་བར་བྱའོ་ཞེས་གསུངས་པ་ཡིན་ནོ། །ཇི་སྐད་དུ་འདི་བདག་གིས་བསྐུར་རོ་ཞེས་གཞན་ལ་གོ་བར་བྱའོ་ཞེས་གསུངས་ན་མདོ་བྱེད་པས། གཞན་
ལ་གོ་བར་བྱས་ཏེ་ཞེས་ཅིའི་ཕྱིར་སྨྲས་ཤེ་ན། དེ་ལྟར་ཡང་གཞུང་ལས་གཞན་ལ་གོ་བར་བྱའོ་ཞེས་འབྱུང་བའི་ཕྱིར་རོ། །རྐུ་སེམས་མེད་པ་གཞན་གྱིས་ཀྱང་ངོ་ཞེས་བྱ་བ་ནི། རྣམ་པ་གསུམ་པོ་དེ་དག་མ་གཏོགས་པ་རྐུ་སེམས་མེད་པ་རྣམ་པ་གཞན་གྱིས་བླངས་པ་ཡང་ཉེས་པ་མེད་པའོ། །རྣམ་པ་གཞན་གྱིས་ཀྱང་ཇི་ལྟར་ཉེས་པ་མེད་ཅེ་ན། ཉེ་བ་འཁོར་གྱིས་ཞུས་པ་ལས་དགེ་སློང་གིས་དགེ་སློང་ལ་འདི་སྐད་ཅེས་སྨྲས་ཏེ། ཁྱོད་ཀྱིས་དགེ་སློང་ཆེ་གེ་མོའི་ཡོ་བྱད་དེ་དང་དེ་དག་ཤེས་སམ་ཤེས་སོ། །འོ་ན་སོང་ལ་དེ་དག་རྐུས་ཤིག་དེ་དག་ཕྲོགས་ཤིག །དེ་དག་གནས་གཞན་ནས་གཞན་དུ་སྤོས་ཤིག་ཅེས་བསྒོ་ནས། གལ་ཏེ་དེ་རྐུ་སེམས་ཀྱིས་དེ་དག་རྐུ་བར་བྱེད། དེ་དག་འཕྲོག་པར་བྱེད། དེ་དག་གནས་ནས་གནས་གཞན་དུ་སྤོ་བར་བྱེད་ན་ནི་གཉི་ག་ལ་འདྲ་བར་ལྟུང་བར་འགྱུར་རོ། །འོན་ཏེ་དེ་འདི་སྙམ་དུ་འདི་ནི་དེའི་འོ་སྙམ་ན་ལེན་པ་པོ་ལ་ལྟུང་བར་མི་འགྱུར་གྱི། རྐུར་འཇུག་པ་པོ་གང་ཡིན་པ་དེ་ནི་གཞི་ཇི་ལྟ་བ་བཞིན་དུ་ལྟུང་བར་འགྱུར་རོ་ཞེས་གསུངས་པ་ཡིན་ནོ། །སྙིང་རྗེ་རྫུ་འཕྲུལ་གྱིས་ཕྲོགས་ནའོ་ཞེས་བྱ་བ་ནི། ལྟུང་བ་མེད་དོ་ཞེས་བྱ་བར་སྦྱར་ཏེ། སྙིང་རྗེས་རྒྱུ་བྱས་པའི་སྙིང་རྗེ་སྔོན་དུ་བཏང་བའི་རྫུ་འཕྲུལ་གན་གྱིན་པའི་རྫུ་འཕྲུལ་དེས་ཕྲོག་པ་པོ་ལས་མི་ལ་སོགས་པ་ཕྲོགས་ན་ལྟུང་བ་མེད་དོ། །འདི་ལྟར་སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་སོ་ཞེས་འོག་ནས་འབྱུང་མོད་ཀྱི། འོན་ཀྱང་སྙིང་རྗེ་སྔོན་དུ་བཏང་བའི་རྫུ་འཕྲུལ་གྱི་སེམས་ཀྱི་རིགས་དེ་འདྲ་བ་དེ་ནི་བསྒོམས་པ་ལས་བྱུང་བ་ཡིན་པས་དེ་ལ་ནི་ལྟུང་བར་འགྱུར་བ་མེད་དོ། །དངོས་གཞིའི་ལྟུང་བ་བསྟན་པའི་འོག་ཏུ་སྦྱོར་བའི་ལྟུང་བ་བསྟན་པའི་ཕྱིར། ཐམས་ཅད་དུ་སྦྱོར་བ་ལ་ནི་ཉེས་བྱས་སོ་ཞེས་བྱ་བ་སྨྲས་ཏེ། ལྟུང་བ་ཐམས་ཅད་ལའང་སྦྱོར་བ་གང་ཡིན་པ་དེ་ལ་ནི་ཉེས་བྱས་སོ། །དེ་ནི་སྤྱིར་བཏང་བ་སྟེ། དེའི་དམིགས་ཀྱིས་བསལ་བ་བསྟན་པའི་ཕྱིར། སྡེ་ཚན་དེ་ལ་གལ་ཏེ་དངོས་གཞིའི་ཡིན་ན་སྦོམ་པོའོ་ཞེས་བྱ་བ་སྨྲས་ཏེ། ཕམ་བར་འགྱུར་བའི་སྡེ་ཚན་དེ་ལ་སྦྱོར་བ་དེ་གལ་ཏེ་དངོས་གཞིའི་ཡིན་ན་སྦྱོར་བ་དེ་ལ་སྦོམ་པོའོ། །ཇི་སྟེ་སྦྱོར་བའི་སྦྱོར་བ་ཡིན་ན་དེ་ལ་ནི་ཉེས་བྱས་ཁོ་ནའོ། །དེ་ཉིད་དགེ་འདུན་ལྷག་མ་ཞེས་བྱ་བའི་སྡེ་ཚན་ལ་ཡང་འདྲ་བར་
བསྟན་པའི་ཕྱིར། འོག་མ་ལ་ཡང་དེ་བཞིན་ནོ་ཞེས་བྱ་བ་སྨྲས་ཏེ། ཕམ་པར་འགྱུར་བའི་སྡེ་ཚན་གང་ལ་སྦྱོར་བ་དེ་ལ་དངོས་གཞིའི་སྦོམ་པོ་ཞེས་གང་གསུངས་པ་དེ་བཞིན་དུ་འོག་མ་དགེ་འདུན་ལྷག་མ་ཞེས་བྱ་བའི་སྡེ་ཚན་ལ་ཡང་དེ་བཞིན་དུ་རིག་པར་བྱ་སྟེ། གལ་ཏེ་དངོས་གཞིའི་སྦྱོར་བ་ཡིན་ན་ནི་སྦོམ་པོའོ། །སྦྱོར་བའི་སྦྱོར་བ་ཡིན་ན་ནི་ཉེས་བྱས་སོ། །མ་ཤ་ཀ་ལྔ་ལ་སོགས་པ་བརྐུས་སམ་རྐུར་བཅུག་པ་དག་གིས་ཕམ་པར་འགྱུར་བར་བསྟན་ན། མ་ཆོག་པའི་བརྗོད་པར་བྱ་བ་བསྟེན་པའི་ཕྱིར་མ་ཚོག་པ་བརྐུས་ནའོ་ཞེས་བྱ་བ་སྨྲས་ཏེ། འདི་མན་ཆད་འོག་ནས་སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་སོ་ཞེས་འབྱུང་བའི་མདོ་ཡན་ཆད་ནི་སྦོམ་པོའོ་ཞེས་བྱ་བའི་དབང་དུ་བྱའོ། །མ་ཤ་ཀ་ལྔར་མཆོག་བ་བརྐུས་ན་ཡན་ལག་གཞན་ཐམས་ཅད་ཡོད་ཀྱང་སྦོམ་པོར་རིག་པར་བྱ་སྟེ། འདི་ལྟ་སྟེ། མ་བྱིན་པ་དང༌། རྐུ་སེམས་ཀྱིས་དང༌། མིའི་རྒྱུད་ཀྱིས་ཡོངས་སུ་བཟུང་བ་དང༌། དེར་འདུ་ཤེས་པས་ཞེས་བྱ་བ་ཡན་ལག་དེ་དག་ཡོད་ཀྱང་མ་ཤ་ཀ་ལྡར་མ་ཆོག་པ་བརྐུས་སམ། རྐུར་བཅུག་པ་དང༌། མངགས་པས་ཀྱང་སྦོམ་པོ་ཁོ་ནའོ། །ཁ་ཅིག་ཏུ་ནི་ཡན་ལག་གསུམ་མམ་གཉིས་མ་ཚང་བ་ལ་ཉེས་བྱས་སུ་འདོད་དེ། འདི་ལྟ་སྟེ། མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བ་ལ་དེར་འདུ་ཤེས་བའམ། མིའི་རྒྱུད་ཀྱིས་ཡོངས་སུ་བཟུང་བར་འདུ་ཤེས་པ་དང༌། མ་ཆོག་པ་བརྐུས་པ་ནི་ཉེས་བྱས་ཏེ། ཡན་ལག་རྣམས་མ་ཚང་བའི་ཕྱིར་རོ། །དེ་བཞིན་དུ་བདག་པོ་གང་ཡང་རུང་བས་ཡོངས་སུ་མ་བཟུང་བ་དང༌། མ་ཆོག་པ་དང༌། མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བ་དང༌། དེར་འདུ་ཤེས་མེད་པ་ལ་ཡང་ཉེས་བྱས་ཁོ་ནའོ། །རྐུ་སེམས་མེད་ན་ནི་ཐམས་ཅད་དུ་ལྟུང་བར་མི་འགྱུར་རོ། །དེའི་ཕྱིར་འདིར་རྐུ་སེམས་ནི་དངོས་གཞིའི་ཡན་ལག་ཡིན་ལ། ལྷག་མ་རྣམས་ནི་དེའི་བྱེ་བྲག་ཡིན་ནོ། །མིའི་རྒྱུད་ཀྱིས་ཡོངས་སུ་བཟུང་བ་ཞེས་བྱ་བ་དེས་ནི་བདག་པོ་དང་བཅས་པ་བརྐུས་ནས་ཕམ་པར་འགྱུར་བ་བསྟན་ན། བདག་པོ་མེད་པ་བརྐུས་ན་ཅིར་འགྱུར་ཞེ་ན་དེའི་ཕྱིར། བདག་པོ་མེད་པའི་གཏེར་རོ་ཞེས་བྱ་བ་སྨྲས་ཏེ། བརྐུས་ན་སྦོམ་པོའོ། །གཏེར་དེ་ཡང་གལ་ཏེ་བདག་པོས་དོན་མ་རྟོགས་པ་ཡིན་པའོ། །འདི་ལྟར་
དངོས་སུ་ན་དེ་ལ་བདག་པོ་ཡོད་མོད་ཀྱི་འོན་ཀྱང་དེས་དོན་མ་རྟོགས་པར་གྱུར་པ་ནི་བདག་པོ་མེད་པ་ཞེས་བྱའོ། །དེ་ལྟར་གཞུང་ནི། དེས་ནད་གཡོགས་ལ་སྨྲས་པ། ཁུར་བ་སྣ་གསུམ་པ་དང་ཐུག་པ་སྟ་གོན་གྱིས་ཤིག་དང༌། དགེ་འདུན་ལ་ཡང་དབུལ་རང་ཡང་བཟའ་བཏུང་བྱའོ་ཞེས་བྱས་ནས་དེས་དེ་དག་ལ་ཟོང་ཕོག་གོ །དེ་དག་འདི་སྙམ་དུ་བདག་ཅག་ལ་ཁུར་བ་སྣ་གསུམ་པ་དང༌། ཐུག་པས་ཅི་བྱ། འདི་ལ་ཁུར་བ་སྣ་གསུམ་པ་དང༌། ཐུག་པ་ཞིག་བྱིན་ལ་ཟོང་བདག་ཅག་གིས་བགོ་བར་བྱའོ་སྙམ་ནས། དེ་དག་གིས་དེ་ལ་ཁུར་བ་སྣ་གསུམ་པ་དང༌། ཐུག་པ་ཞིག་བྱིན་ཏེ་ཟོང་བགོས་སོ། །དེ་དག་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕམ་པར་འགྱུར་བའི་ལྟུང་བ་ནི་མེད་དེ། ཉེས་པ་སྦོམ་པོའི་ལྟུང་བར་འགྱུར་རོ་ཞེས་གསུངས་པ་ཡིན་ཏེ། གང་དག་ལ་ཕུལ་བ་དེ་དག་ལ་དེར་བདག་གིར་བྱ་བ་སྐྱེས་པར་མ་གྱུར་པས་དེའི་ཕྱིར་ཕམ་པར་འགྱུར་བའི་རྒྱུ་མེད་པར་སྣང་ངོ༌། །གཏེར་གང་ལ་བདག་པོའི་དོན་རྟོགས་པ་དང༌། དོན་མ་རྟོགས་པ་གཉི་ག་མེད་པ་དེ་ལ་ཇི་ལྟར་བསྒྲུབ་ཅེ་ན། དཔེར་ན་བྱང་གི་སྒྲ་མི་སྙན་པ་རྣམས་ཀྱི་རྫས་བརྐུས་པ་བཞིན་ཏེ། གལ་ཏེ་རྐུ་སེམས་མེད་ན་དེའི་ཚེ་ལྟུང་བ་མེད་དེ། བདག་གི་བ་མེད་པའི་ཕྱིར་རོ། །ཇི་སྟེ་རྐུ་སེམས་སྐྱེད་པར་བྱེད་ན་ཉེས་པ་སྦོམ་པོར་འགྱུར་རོ། །གལ་ཏེ་བདག་པོས་དོན་མ་རྟོགས་པའི་གཏེར་དེ་ཉིད་མ་ཤ་ཀ་ལྔ་ལ་སོགས་པ་ལས་ཉུང་བ་ལ་བདག་པོ་མེད་པར་འདུ་ཤེས་པས་སམ། བདག་པོ་དང་བཅས་པར་འདུ་ཤེས་པས་སམ། བདག་པོ་མིས་སམ། མི་མ་ཡིན་པས་ཡོངས་སུ་བཟུང་བར་འདུ་ཤེས་པས་དེ་བརྐུས་ན་ཉེས་བྱས་ཏེ། སྦོམ་པོའི་དབང་དུ་བྱས་པའི་ཡན་ལག་དག་པས་ཉུང་བའི་ཕྱིར་རོ། །གཞན་གྱིས་བརྐུས་ན་དངོས་གཞིར་འགྱུར་ལ། རང་གི་ཅིར་འགྱུར་ཞེ་ན་དེའི་ཕྱིར། རང་གིའོ་ཞེས་བྱ་བ་སྨྲས་ཏེ། རང་གི་རྫས་མ་ཤ་ཀ་ལྔ་ལ་སོགས་པ་རྐུ་སེམས་ཀྱིས་དེར་འདུ་ཤེས་པས་རྐུ་འམ། རྐུར་བཅུག་པ་དང་མངགས་པས་ཀྱང་སྦོམ་པོར་འགྱུར་རོ། །དེར་འདུ་ཤེས་པ་ཞེས་བྱ་བའི་ཚིག་དེ་སྐབས་འདིར་ནི་རང་གིར་འདུ་ཤེས་པ་ཞེས་བྱ་བར་
རིག་པར་བྱའོ། །དེ་ལྟར་ཡང་གཞུང་ནི་དེའི་ཕྱིར་དགེ་སློང་གིས་རང་གི་ལྷུང་བཟེད་དང༌། ཆོས་གོས་ཀྱང་རྐུ་སེམས་ཀྱིས་བླང་བར་མི་བྱའོ། །དགེ་སློང་གིས་རང་གི་ལྷུང་བཟེད་དང༌། ཆོས་གོས་རྐུ་སེམས་ཀྱིས་ལེན་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །རང་གི་ལ་གཞན་གྱིས་ཡོངས་སུ་བཟུང་བར་འདུ་ཤེས་པ་ལ་ཡང་སྦོམ་པོ་ཁོ་ན་སྟེ། རྐུ་སེམས་ཤིན་ཏུ་ལྕི་བའི་ཕྱིར་རོ། །དེ་ལྟར་ཡང་གཞུང་ནི་དགེ་སློང་དག་མི་ཕམ་པ་མི་གཏི་མུག་ཅན་འདི་ནི་རང་གི་ཆོས་གོས་རྙང་རྙིང་དག་གིས་ཉེས་པ་སྦོམ་པོའི་ལྟུང་བ་བྱུང་ངོ་ཞེས་གསུངས་པ་ཡིན་ནོ། །རང་གི་ལ་གཞན་གྱིས་ཡོངས་སུ་མ་བཟུང་བར་འདུ་ཤེས་པ་ལ་ཡང་སྦོམ་པོ་ཁོ་ན་སྟེ། རང་གིར་འདུ་ཤེས་པ་དང་ཡོངས་སུ་མ་བཟུང་བར་འདུ་ཤེས་པ་ནི་ལྷན་ཅིག་ལྟུང་བ་འདྲ་བའི་ཕྱིར་རོ། །དེ་བཞིན་དུ་ཡོངས་སུ་མ་བཟུང་བ་ལ་ཡོངས་སུ་མ་བཟུང་བར་འདུ་ཤེས་པའམ། ཡོངས་སུ་བཟུང་བ་དང་བཅས་པར་འདུ་ཤེས་བ་ཡང་སྦོམ་པོ་ཁོ་ནའོ། །འགྲོ་བ་གཞན་གྱིར་རོ་ཞེས་བྱ་བ་ནི་རང་གི་རྫས་ལ་འགྲོ་བ་གཞན་གྱིར་འདུ་ཤེས་ན་ཞེས་བྱ་བར་སྦྱར་ཏེ། མིའི་འགྲོ་བ་ལས་གཞན་པའི་འགྲོ་བ་གང་ཡིན་པ་དེ་ནི་འགྲོ་བ་གཞན་ནོ། །རང་གི་རྫས་ལ་འགྲོ་བ་གཞན་གྱིས་ཡོངས་སུ་བཟུང་བར་འདུ་ཤེས་པས་བརྐུས་ན། དངོས་གཞིའི་ཡན་ལག་ཡོད་དུ་ཟིན་ཀྱང་སྦོམ་པོ་སྟེ། དེར་འདུ་ཤེས་པས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་དེ་འདི་སྙམ་དུ་གལ་ཏེ་བྱའི་བརྐུའི་མིའི་ནི་མ་ཡིན་ནོ་སྙམ་ན་ཞེས་བྱ་བ་ལ་སོགས་པ་ཡིན་ནོ། །འགྲོ་བ་གཞན་གྱི་ལ་མིའི་འགྲོ་བ་པར་འདུ་ཤེས་པ་ན་ཡང་སྦོམ་པོ་ཁོ་ནའོ། །ཡོངས་སུམ་བཟུང་བར་འདུ་ཤེས་པ་ན་ཡང་སྦོམ་པོ་ཁོ་ནའོ། །བདག་ཉིད་ཀྱིར་བདག་གིར་བྱ་བར་བརྐུས་ན་ཕམ་པར་འགྱུར་བར་བསྟན་ན། བདག་པོ་དང་དབྲལ་བའི་སེམས་འབའ་ཞིག་གིས་ན་ཅིར་འགྱུར་ཞེ་ན་དེའི་ཕྱིར། བདག་གིར་མ་བྱས་པ་སྦ་བ་དང༌། ཆུད་གཟན་པ་དང༌། ཟིན་པ་བཏང་བ་ལ་སོགས་པས་བྲལ་བར་བྱེད་ན་ཡང་ངོ་ཞེས་བྱ་བ་སྨྲས་ཏེ། བདག་གིར་མ་བྱས་པར་སྦ་བ་ལ་སོགས་པས་བདག་པོ་དང་བྲལ་བར་བྱེད་ན་ཡང་སྦོམ་པོའོ་ཞེས་བྱ་བར་སྦྱར་རོ། །སྦ་བ་ཞེས་བྱ་བ་ནི་འདིར་འདམ་རྫབ་ཏུ་གཞུག་པ་ལ་སོགས་པར་བསྟན་ཏོ། །ཆུད་གཟན་པ་ཞེས་བྱ་བ་ནི། བསྲེགས་པ་དང་བཅད་པ་དང་དྲལ་བ་ལ་སོགས་པའི་
བདག་ཉིད་དོ། །ཟིན་པ་བཏང་བ་ཞེས་བྱ་བ་ནི། རི་དགས་དང་ཉ་ལ་སོགས་པ་རླུབས་དང་དོལ་ལ་སོགས་པས་ཟིན་པ་དག་དེའི་ཡང་མ་གྱུར་ཅིག །བདག་གིར་ཡང་མ་གྱུར་ཅིག་སྙམ་ནས། གཞན་གྱི་རྔོན་རྙིལ་སོགས་པས་ཟིན་པ་བདག་གིས་ཐུག་ཐུབ་ཏུ་བཏང་བ་སྟེ། དེ་དག་ཐམས་ཅད་སྦོམ་པོར་འགྱུར་རོ། །སོགས་པ་ཞེས་སྨོས་པས་ནེ་རྣམ་པ་གཞན་ཡང་བསྡུ་བའི་ཕྱིར་ཏེ། དེས་ན་བཅིང་བ་དང༌། དྲལ་བ་དང༌། སྐྲོད་པ་དང་གསོད་པ་ལ་སོགས་བ་གང་དག་སོགས་པའི་སྒྲས་བསྡུས་པ་འདིར་རྐུ་འམ་རྐུར་བཅུག་པ་དག་དང༌། རྐུ་སེམས་ཀྱི་ཡན་ལག་དེ་གཉིས་ནི་མེད་ཀྱང་གལ་ཏེ་མངགས་པ་དང༌། མ་བྱིན་པ་དང༌། མ་ཤ་ཀ་ལྔ་ལ་སོགས་པ་དང༌། མིའི་རྒྱུད་ཀྱིས་ཡོངས་སུ་བཟུང་བ་དང༌། དེར་འདུ་ཤེས་པའི་ཡན་ལག་གཞན་ཐམས་ཅད་ཡོད་ཅིང་ཡན་ལག་དེ་དག་དང་ལྡན་ན་མངགས་པས་ཀྱང་སྦོམ་པོའོ། །སྦོམ་པོའི་དབང་དུ་བྱས་པའི་ཡན་ལག་དག་ལས་ཆེས་ཉུང་ན་ཉེས་བྱས་སོ། །ཇི་ལྟར་གང་ཡང་རུང་བའི་རྒྱུད་ཀྱིས་ཡོངས་སུ་བཟུང་བ་ལ་གང་ཡང་རུང་བར་འདུ་ཤེས་པས་མ་ཤ་ཀ་ལྔ་ལ་སོགས་པ་ལས་ཉུང་བ་བྲལ་བར་བྱས་ན་ཉེས་བྱས་ཡིན་བ་དེ་བཞིན་དུ་མིའི་རྒྱུད་ཀྱིས་ཡོངས་སུ་བཟུང་བ་ལ་འགྲོ་བ་གཞན་གྱི་རྒྱུད་ཀྱིས་ཡོངས་སུ་བཟུང་བར་འདུ་ཤེས་པས་བྲལ་བར་བྱས་པ་ལ་སྦོམ་པོའི་དབང་དུ་བྱས་པ་ལས་ཉུང་བས་ཀྱང་ཉེས་བྱས་སོ། །དེ་བཞིན་དུ་མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བ་ལ་མིའི་རྒྱུད་ཀྱིས་ཡོངས་སུ་བཟུང་བའམ། མི་མ་ཡིན་པའི་རྒྱུད་ཀྱིས་ཡོངས་སུ་བཟུང་བར་འདུ་ཤེས་པས་བྲལ་བར་བྱས་ཀྱང་ཉེས་བྱས་ཁོ་ནའོ། །ཇི་ལྟར་གཞན་དུ་རྐུ་སེམས་ཀྱིས་ལྟུང་བར་བྱས་པ་བཞིན་དུ་འདིར་ནི་དབྲལ་བའི་འདུ་ཤེས་ཀྱིས་ལྟུང་བར་བྱས་པ་ཉིད་དོ། །ཡོངས་སུ་མ་བཟུང་བ་ལ་ཡོངས་སུ་བཟུང་བ་དང་བཅས་པའམ། ཡོངས་སུ་མ་བཟུང་བར་འདུ་ཤེས་པ་ལ་ནི་ལྟུང་བ་མེད་དེ། དབྲལ་བའི་བསམ་པ་མེད་པའི་ཕྱིར་རོ། །གནོད་པ་བྱས་པའི་སེམས་ཀྱིས་ཕྲལ་བ་ལས་སྦོམ་པོར་སྨྲས་ན་སེམས་གཞན་གྱིས་ཕྲལ་བ་ལ་ཇི་ལྟར་འགྱུར་ཞེ་ན། དེའི་ཕྱིར་སྙིང་རྗེ་དང་ལྡན་པའི་སེམས་ཀྱིས་ན་ཉེས་བྱས་སོ་ཞེས་བྱ་བ་སྨྲས་ཏེ། བཟུང་བ་བཏང་བ་ལ་སོགས་བ་གཞན་གྱི་དོན་དང་བྲལ་བར་བྱད་པ་ལ་སྙིང་རྗེའི་སེམས་ཀྱིས་བྱེད་ན་ནི་གཞན་
གྱིས་ཡོངས་སུ་བཟུང་བ་དང་བཅས་པར་འདུ་ཤེས་ན་ཡང་ཉེས་བྱས་སོ། །ཕམ་པར་འགྱུར་བ་ཞེས་བྱ་བའི་དངོས་གཞིའི་སྦྱོར་བ་ལ་སྦོམ་པོར་སྨྲས་ན། ཕམ་པར་འགྱུར་བ་མ་བྱས་པ་ཁོ་ནར་གལ་ཏེ་བར་སྐབས་སུ་ཕྱིར་ལོག་པར་གྱུར་ན་དེ་ལ་སྦོམ་པོར་མི་འགྱུར་བར་དོགས་པ་ལྡོག་པའི་ཕྱིར། སྔར་བྱས་ན་ཕྱིར་བཅོས་ཀྱང་མ་བྱས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། ཁྱིམ་དེ་ན་བུད་མེད་ནི་མང་སྐྱེས་པ་ནི་ཉུང་ངོ་ཞེས་སྔར་སྦྲན་པ་ལ་སོགས་པས་བྱུང་བའི་མཐའི་སྦྱོར་བ་བྱས་ན། འདི་ལྟར་ཕྱིས་བཅོས་པ་རྐུན་པོ་རྣམས་ཕྱིར་བཟློག་པའི་ཕྱིར་གཉེན་པོ་བྱས་སུ་ཟིན་ཀྱང་དེ་ལྟ་མོས་ཀྱི། རྐུན་པོ་དེའི་རྩོམ་པའི་དང་པོར་གྱུར་པ་གང་ཡིན་པའི་རྩོམ་པའི་དང་པོར་གྱུར་པ་དེ་མ་བྱས་པ་ཉིད་མ་ཡིན་གྱི་བྱས་པ་ཉིད་ཡིན་ཏེ། སྦོམ་པོ་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །སྦྱོར་བ་ལ་ནི་སྦོམ་པོར་སྨྲས་ལ། སྦྱོར་བའི་སྦྱོར་བ་ལ་ནི་ཉེས་བྱས་སུ་སྨྲས་ན། ད་ནི་དེ་གཉིས་ཀྱི་ཡུལ་གྱི་དབྱེ་བ་བསྟན་པའི་ཕྱིར། ནོམ་པའི་སྔ་རོལ་ནི་སྦྱོར་བའི་སྦྱོར་བ་ཉིད་དོ་ཞེས་བྱ་བ་སྨྲས་ཏེ། བརྐུ་བར་བྱ་བའི་རྫས་ལ་ནོམ་པ་གང་ཡིན་པ་དེའི་སྔ་རོལ་དུ་རང་གི་གནས་ནས་ཁྲི་ལས་ལྡང་བ་དང༌། ཤམ་ཐབས་ལ་འཛིན་པ་ལ་སོགས་པའི་བྱ་བ་གང་ཡིན་པའི་བྱ་བ་དེ་ནི་སྦྱོར་བའི་སྦྱོར་བ་ཉིད་དེ། སྦྱོར་བ་སྦོམ་པོའི་སྦྱོར་བ་ནི་སྦྱོར་བའི་སྦྱོར་བའོ། །དེའི་དངོས་པོ་ནི་དེ་ཉིད་དོ། །རིམ་པ་ནི་འདི་ཡིན་ཏེ། བསམ་པའི་དབྱེ་བས་བྱ་བ་དབྱེའོ། །བྱ་བའི་དབྱེ་བས་ལྟུང་བ་དབྱེའོ་ཞེས་བྱ་བས་གྲུབ་པོ། །འདིར་གཞུང་ནི་ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་བ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདིར་ཡང་ནོམ་པ་མང་པོ་དག་ལ་ཡང་ཇི་སྲིད་དུ་རྐུ་བའི་བསམ་པ་ཕྱིར་མ་ལོག་བའི་བར་དུ་ནི་སྦོམ་པོ་གཅིག་ཁོ་ནའོ། །ཕྱིར་བཟློག་པའི་བསམ་པ་བྱུང་ན་ནི་ཡང་ཕྱིས་ནོམ་པར་བྱེད་པ་ན་སྦོམ་པོ་གཞན་དུ་འགྱུར་རོ། །སྦྱོར་བ་ཐམས་ཅད་ལ་ཉེས་བྱས་ཞེས་སྨྲས་ན། ཇི་ལྟར་ཁྲི་ལས་ལྡང་བར་བྱེད་པ་དེ་ལ་སོགས་བའི་སྦྱོར་བ་དག་ལ་ཉེས་བྱས་གཅིག་ཁོ་ནར་འདོད་པ་དེ་བཞིན་དུ་ཐམས་ཅད་ལ་ཡང་ཡིན་ནམ་ཞེ་ན་དེའི་ཕྱིར། ཕྲི་བའི་གོམ་པ་རེ་རེ་ལ་ཐ་དད་པ་ཡིན་ནོ་ཞེས་བྱ་བ་སྨྲས་ཏེ། དགེ་
སློང་ལམ་དུ་ཞུགས་པ་གང་ཞིག་གཞན་གྱི་རྒྱུད་ཀྱིས་ཡོངས་སུ་བཟུང་བའི་རྫས་གོམ་པ་ཕྲི་བས་བརྐུ་བར་འདོད་ནས་གོམ་པ་འབྲི་བར་བྱེད་ཅིང་ཁད་ཀྱིས་ཁད་ཀྱིས་ཕྱིར་ནུར་ན་གོམ་པ་ཕྲི་བ་དེའི་ཕྲི་བའི་གོམ་པ་རེ་རེ་ལ་སྦྱོར་བའི་སྦྱོར་བ་ཐ་དད་པ་ཡིན་པར་ཤེས་པར་བྱའོ། །འདི་སྐད་བསྟན་ཏེ། གང་ནས་མི་སྣང་བར་འགྲོ་བའི་རྐང་པ་བཏེག་པའི་རྐང་པ་བཏེག་པ་དེ་ནི་སྦྱོར་པ་ཉིད་ཡིན་ནོ། །རྐང་པ་བཏེག་པ་སྔ་མ་གཞན་དག་ལ་ནི་སྦྱོར་བ་ཐ་དད་པ་ཉིད་ཡིན་ནོ། །དེས་ན་མི་སྣང་བར་འགྲོ་བའི་ཕྱིར་རྐང་པ་བཏེག་པའི་སྔ་རོལ་གྱི་རྐང་པ་བཏེག་བ་གཞན་རེ་རེ་ལ་ཉེས་བྱས་རེ་རེར་འགྱུར་རོ། །འདིར་གཞུང་ནི་འདི་ལྟར་མཁན་པོ་དང་སློབ་དཔོན་ལམ་གྱི་བགྲོད་པར་ཞུགས་པ་དེ་དག་གིས་ལྷན་ཅིག་གནས་པ་དང༌། ཉེ་གནས་དེ་དག་གི་ལག་ཏུ་ཆོས་གོས་དག་གཏད་པ་ན་ད་ལ་དེ་དག་རྐུ་སེམས་ཉེ་བར་གནས་པར་གྱུར་ཅིང་དེ་དག་གོམ་པ་བསྲི་བས་འགྲོ་ཞིང་སྤྱང་འབྲང་དུ་འགྲོ་བ་ན་ཇི་སྲིད་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་པ་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་ཞེས་བྱ་བ་ལ་སོགས་པ་གསུངས་པ་ཡིན་ནོ། །བྱ་བ་གཅིག་ཡིན་པའི་ཕྱིར་ལྟུང་བ་གཅིག་ཏུ་འགྱུར་རོ་སྙམ་དུ་དོགས་པ་བསལ་བའི་ཕྱིར། དེའི་གཞི་ལ་ནི་སེམས་ཅན་སོ་སོ་ལའོ་ཞེས་བྱ་བ་སྨྲས་ཏེ། ཐ་དད་པར་འགྱུར་རོ་ཞེས་བྱ་བར་སྦྱར་རོ། །དེའི་གཞི་ལ་ནི་ཞེས་བྱ་བ་ནི། སེམས་ཅན་གྱི་གཞི་ལ་སྟེ། སེམས་ཅན་གྱི་གཞི་ལ་བརྐུས་པ་དང༌། མཚོན་གྱིས་བཏབ་པ་དང༌། གཟས་པ་དང༌། སྐུར་པ་བཏབ་པ་ལ་སོགས་པ་བྱེད་པ་ན། སེམས་ཅན་སོ་སོ་ལ་དངོས་གཞི་དང་སྦྱོར་བའི་བདག་ཉིད་ཀྱི་ལྟུང་བ་ཐ་དད་དོ། །དཔེར་ན་དགེ་སློང་གིས་གནས་ནས་སྤོ་བ་ལ་སོགས་བའི་སྦྱོར་བ་གཅིག་གིས་བདག་པོ་མང་པོའི་རྫས་རྐུ་ཞིང་མ་ཤ་ཀ་ལྔ་ལ་སོགས་པའི་གཞི་ཡང་ཚང་བར་གྱུར་ན་སེམས་ཅན་སོ་སོ་ལས་ཕམ་པར་འགྱུར་ཞིང་སྦོམ་པོ་ཞེས་བྱ་བའི་སྦྱོར་བ་ནི་གཅིག་ཁོ་ནར་འགྱུར་བ་ལྟ་བུའོ། །གང་གི་ཚེ་སེམས་ཅན་སོ་སོ་ལས་གཞི་མ་ཚང་བར་གྱུར་ན་ནི་དེའི་ཚེ་སེམས་ཅན་སོ་སོ་ལས་སྦོམ་པོ་ཐ་དད་པར་འགྱུར་ཏེ། དཔེར་ན་དགེ་སློང་གིས་མདའི་སྦྱོར་བ་གཅིག་གིས་མི་མང་བོ་དག་ལ་འཕངས་ན་དེའི་ཚེ་སེམས་ཅན་སོ་སོ་ལས་སྤོམ་པོ་ཐ་དད་པར་འགྱུར་ལ།
ཉེས་བྱས་ནི་གཅིག་ཁོ་ནར་འགྱུར་བ་ལྟ་བུའོ། །ནོམ་པ་དང་ཉུག་པ་སྦོམ་པོར་སྨྲས་ན་གྲུ་ལ་ཐག་པས་བཏགས་པ་དེ་ལ་རེག་པས་ཐག་པ་དང་ཕུར་བ་ལ་ནོམ་པ་དང༌། ཉུག་པའི་ཚེ་སྦོམ་པོར་དོགས་པ་བསལ་བའི་ཕྱིར། ཕུར་པ་ལས་བཀྲོལ་བ་ནི་གྲུ་ལ་རེག་པ་མ་ཡིན་ནོ་ཞེས་བྱ་བ་སྨྲས་ཏེ། ཇི་ལྟར་གྲུ་ཕུར་པ་ལས་དགྲོལ་བར་བྱེད་པ་ན། དེ་ལ་རེག་པར་མི་འགྱུར་ཏེ། དེས་ན་ཐག་པ་ལ་རེག་པ་ན་སྦྱོར་བའི་སྦྱོར་བ་ཉིད་དེ། ཉེས་བྱས་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་རྐུ་སེམས་ཀྱིས་གྲུ་ཕུར་པ་ལ་བཏགས་པ་སྐྱོད་པར་བྱེད་ན་ཉེས་སུ་འགྱུར་རོ་ཞེས་གསུངས་པ་ཡིན་ནོ། །གནས་ནས་གནས་སུ་སྦེད་པར་བྱེད་ན་བརྐུས་བ་ཞེས་བྱའོ་ཞེས་སྤྱིར་སྦྱོར་བ་བྱས་པ་དེའི་དམིགས་ཀྱིས་བསལ་བར་བྱ་བར་འདོད་ནས། དེ་བྱས་ནས་རྐུ་བ་ལ་ནི་ཁུར་བརྐུས་པས་ནའོ་ཞེས་བྱ་བ་སྨྲས་ཏེ། དེ་བྱས་ནས་ཞེས་བྱ་བ་ནི། ཁུར་དུ་བྱས་ནས་གཟོད་རྐུའོ་སྙམ་པའོ། །དེ་ལྟར་རྐུ་བ་ལ་ནི་ནམ་ཁུར་དུ་དྲགས་ཏེ་ཁུར་བརྐུས་པ་ན་བརྐུས་པ་ཁོ་ན་ཡིན་པར་རིག་པར་བྱའི། ཡན་ལག་དེ་དག་བསྡུས་པའི་ཚེ་ན་ནི་བཀྲུས་པ་མ་ཡིན་ནོ། །འདི་སྐད་བསྟན་ཏེ། གང་གི་ཚེ་རླུང་གིས་གོས་དག་རྣམ་པར་གཏོར་བར་གྱུར་པའམ། རྫས་གཞན་གཏོར་བར་གྱུར་པ་ན་དགེ་སློང་གིས་དེ་དག་ཁུར་དུ་དྲགས་ཏེ། རྐུའོ་སྙམ་པའི་བསམ་པ་དེས་དེ་དག་སྡུད་པར་བྱེད་ན། འདི་ལྟར་མ་ཤ་ཀ་ལྔ་ལ་སོགས་པའི་རིན་ཐང་གི་ཚད་ཀྱིས་གོས་ལ་སོགས་པ་དག་ཁུར་དྲགས་པའི་སྔ་རོལ་དུ་གནས་ནས་སྤོ་བར་བྱེད་ཀྱང་དེ་ལྟར་ན་ཡང་ཕམ་བར་མི་འགྱུར་ཏེ། དེའི་ཚེ་ན་དེ་ལ་བསྡུའོ་སྙམ་པའི་བློ་ཡོད་ཀྱི། རྐུའོ་སྙམ་པའི་བློ་མེད་པའི་ཕྱིར་རོ། །འདིར་གཞུང་ནི་འདི་ལྟར་བཙོ་བླག་མཁན་གྱི་གོས་དག་བཏིང་བ་རླུང་གིས་ཁྱེར་ཞིང་དགེ་སློང་གིས་དེ་ལ་སྦྱོར་བས་ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོན་པར་བྱེད་ཉུག་པར་བྱེད་གོས་དག་སྡུད་པར་བྱེད་བམ་པོར་བསྒྲེ་བར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །གནས་ནས་གནས་སུ་སྤེད་པར་བྱེད་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱ་ཞིང་ཞེས་བྱ་བ་ལ་སོགས་པ་གསུངས་པ་ཡིན་ནོ། །བསྡུས་ནས་ནི་ཕུང་པོ་ནའོ་ཞེས་བྱ་བ་སྨྲས་ཏེ། བཏུས་ནས་ཞེས་བྱ་བ་ནི། བཏུས་ཟིན་ནས་གཟོད་རྐུའོ་སྙམ་
པའོ། །དེ་ལྟར་རྐུ་བ་ལ་ནི་ནམ་བཏུས་ཟིན་ཏེ་སྤུངས་པའི་ཕུང་པོ་བརྐུས་ན་བརྐུས་པ་ཁོ་ན་ཡིན་པར་རིག་པར་བྱའི། ཡན་ལག་དེ་དག་བཏུས་པའི་ཚེ་ན་ནི་བརྐུས་པ་མ་ཡིན་ནོ། །འདི་སྐད་བསྟན་ཏེ། གང་གི་ཚེ་དགེ་སློང་མེ་ཏོག་དང་འབྲས་བུ་དག་འཐོག་པར་བྱེད་ཅིང་བཏོགས་ནས་གཟོད་བརྐུའོ་སྙམ་པའི་བསམ་པ་དེས་རིན་ཐང་མ་ཤ་ཀ་ལྔ་ལ་སོགས་པའི་ཚད་ཅིག་བཏོགས་ན་ཡང་དེའི་ཚེ་ནམ་ཕུང་པོར་བཅེར་བ་ཁོ་ན་བརྐུས་ན་བརྐུས་པ་ཡིན་གྱི། མེ་ཏོག་ལ་སོགས་པ་བཏོགས་པ་དེ་ནི་བརྐུས་པ་མ་ཡིན་ཏེ། འདི་ལྟར་དེ་ལ་བཏོགས་པའི་བསམ་པ་ཡོད་པར་ཟད་ཀྱི། རྐུ་བའི་བསམ་པ་མེད་པའི་ཕྱིར་རོ། །འདིར་གཞུང་ནི་འདི་ལྟར་དགེ་སློང་ཁྲི་ལས་ལྡང་བ་ནས། ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ། །ནོམ་པར་བྱེད་ཉུག་པར་བྱེད་མེ་ཏོག་གི་ཤིང་ལ་འཛེག་པར་བྱེད་མེ་ཏོག་འཐོག་པར་བྱེད་ཐུ་བ་འགེངས་པར་བྱེད་ཅིང་ཇི་སྲིད་དུ་གནས་ནས་གནས་སུ་སྦེད་པར་མི་བྱེད་པ་དེ་སྲིད་དུ་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གལ་ཏེ་དགེ་སློང་གིས་ཆུ་ལ་སོགས་པ་དག་ཏུ་ཤིང་ལ་སོགས་པ་དག་སྤྱིངས་ཏེ། རྐུ་ན་གང་གི་ཚེ་བརྐུས་པར་འགྱུར་ཞེ་ན། དེའི་ཕྱིར། སྤྱིངས་པ་ལ་ནི་གནས་ཀྱི་སྟེང་ནས་རྫས་ཀྱི་སྟེང་བྱིང་ནའོ་ཞེས་བྱ་བ་སྨྲས་ཏེ། བརྐུ་བའི་རྫས་ཀྱི་སྟེང་གནས་ཀྱི་སྟེང་ནས་བྱིང་ན་སྤྱིངས་པའི་ཚེ་བརྐུས་པ་ཡིན་པར་སྦྱར་རོ། །ཆུ་ལ་སོགས་པར་སྤྱིངས་པ་ལ་ནི། བརྐུ་བར་བྱ་བའི་རྫས་ཀྱི་གནས་ནི་ཆུ་ལ་སོགས་པ་གང་ཡིན་པའོ། །གནས་དེའི་སྟེང་ནི་ཡ་མཐའི་ཆའི་སྟེང་རིམ་མོ། །སྟེང་རིམ་དེ་ནས་འདས་ཤིང་ནུབ་པ་ནི་བྱིང་བའོ། །གང་བྱིང་ཞེ་ན་དེའི་ཕྱིར་རྫས་ཀྱི་སྟེང་ཞེས་བྱ་བ་སྨྲས་ཏེ། བརྐུ་བར་བྱ་བའི་རྫས་དེའི་ཡ་བླའི་ཆའི་སྟེང་རིམ་དེ་བྱིང་ནའོ། །རྫས་ཀྱི་སྟེང་དེ་གནས་ཀྱི་སྟེང་བྱིང་ན་རྫས་དེ་བརྐུས་པར་རིག་པར་བྱ་སྟེ། རྫས་ཀྱི་སྟེང་ཞེས་བྱ་བའི་ཚིག་གིས་ནི་རྫས་ཀྱི་དངོས་པོ་དེའི་མཐའ་དག་ནུབ་པར་བསྟན་པ་ཡིན་གྱི། ཐུར་དུ་ལྟ་བའི་ངོས་འོག་མའི་ཆུ་ནུབ་པ་ཙམ་གྱིས་ནི་མ་ཡིན་པར་བསྟན་ཏོ། །འདི་སྐད་བསྟན་ཏེ། བརྐུ་བར་བྱ་བའི་རྫས་ཤིང་ལ་སོགས་པ་གང་ཡིན་པ་དེ་གལ་ཏེ་གནས་ཀྱི་རྫས་ཆུ་ལ་སོགས་པར་ཐམས་ཅད་རིལ་
གྱིས་ནུབ་པར་གྱུར་ན་དེའི་ཚེ་ན་བརྐུས་པ་ཞེས་བྱའོ་ཞེས་བྱ་བའི་ཐ་ཚིག་གོ །འདི་ལ་ཁ་ཅིག་འདི་སྐད་རྒོལ་ཏེ། གལ་ཏེ་དགེ་སློང་དེའི་བསམ་པ་འདི་སྙམ་དུ་ད་ནི་རེ་ཞིག་སྤྱིང་བར་བྱའི་ཕྱིས་ནི་དབྱུང་བར་བྱའོ་སྙམ་པ་ཡིན་ན། དེ་ལ་གནས་ཀྱི་སྟེང་ནས་རྫས་ཀྱི་སྟེང་དུ་བྱིང་ན་བརྐུས་པའོ་ཞེས་བྱ་བ་འདི་མི་རུང་སྟེ། རྐུ་བའི་བསམ་པ་དེའི་ཚེ་ན་མེད་པའི་ཕྱིར་རོ་ཞེ་ན། རྒོལ་བ་དེ་བསལ་བའི་ཕྱིར་ཕྱིས་དབྱུང་ངོ་སྙམ་པའི་བློ་གྲོས་གང་ཡིན་པ་དེ་ནི་བསྐུར་བའི་འོ་ཞེས་བྱ་བ་སྨྲས་ཏེ། སྤྱིང་བ་དེར་ཕྱིས་དབྱུང་ངོ་སྙམ་པའི་བློ་གྲོས་གང་ཡིན་པའི་བློ་གྲོས་དེ་ནི་བསྐུར་བའི་བློ་གྲོས་ཡིན་གྱི་གཟོད་རྐུ་བའི་བློ་གྲོས་ནི་མ་ཡིན་ནོ། །གང་གི་ཕྱིར་ཕྱིས་དབྱུང་ངོ་སྙམ་ན་ཡང་འོན་ཀྱང་དེ་ཉིད་ན་རྐུ་སེམས་སྐྱེས་པ་ཡིན་གྱི། གཞན་དུ་ན་ཅིའི་ཕྱིར་སྤྱིངས་པར་བྱེད་དེ། དེའི་ཕྱིར་དགེ་སློང་རྐུ་སེམས་སྐྱེས་པས་རྫས་སྤྱིང་བ་ལ་སོགས་པ་བྱེད་པར་འགྱུར་རོ། །ཕྱིས་དབྱུང་ངོ་སྙམ་པའོ་ཞེས་བྱ་བ་འབྱིན་པར་བྱེད་ཅེས་བྱ་བའི་སྐད་ཀྱི་བྱིངས་འདི་ཡང་བསྐུར་བའི་དོན་ཡིན་གྱི། རྐུ་བའི་དོན་མ་ཡིན་ནོ། །དེ་ལྟར་ཡང་གཞུང་ནི་དགེ་སློང་གིས་ཟོང་སྤྱིང་བའི་ཁྲི་ལས་ལྡང་བར་བྱེད། ཆུར་འཇུག་པར་བྱེད་ཅིང་ཇི་སྲིད་དུ་ནོམ་པར་མི་བྱེད་ཉུག་པར་མི་བྱེད་པ་དེ་སྲིད་དུ་ཉེས་བྱས་སུ་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གལ་ཏེ་དེའི་ཚེ་ན་དགེ་སློང་དེ་ལ་རྐུ་སེམས་མེད་པར་གྱུར་ན་བཅོམ་ལྡན་འདས་ཀྱིས་ཅིའི་ཕྱིར་ལྟུང་བ་རྣམ་པར་གཞག་པ་མཛད། དེ་བས་ན་དང་པོ་སྤྱིངས་པར་བྱེད་པ་ན་རྐུ་སེམས་ཡོད་པས་བྱིང་བ་ན་བརྐུས་པར་འགྱུར་རོ། །བཤལ་བས་རྐུ་བ་ལ་ནི་འདིར་བརྐུས་པ་གང་ཡིན་པར་ཤེས་པར་བྱ་ཞེ་ན། དེའི་ཕྱིར། བཤལ་བ་ལ་སོགས་པ་ནི་ངོས་ཀྱི་གཞིའི་མཚམས་ལས་ངོས་ཅིག་ཤོས་འདས་ནའོ་ཞེས་བྱ་བ་སྨྲས་ཏེ། གང་ནས་འདས་ན་ཞེ་ན་དེའི་ཕྱིར་མཚམས་ལས་ཞེས་བྱ་བ་སྨྲས་སོ། །གང་ནས་འདས་ན་བརྐུས་པ་ཡིན་པའི་མཚམས་དེ་གང་གི་ཞེ་ན། དེའི་ཕྱིར། ངོས་ཀྱི་གཞིའི་ཞེས་བྱ་བ་སྨྲས་སོ། །གང་འདས་ཤེ་ན་དེའི་ཕྱིར་ངོས་ཅིག་ཤོས་ཞེས་བྱ་བ་སྨྲས་ཏེ། དེ་ནི་རེ་ཞིག་སྦྱར་བ་ཡིན་ནོ། །ད་ནི་ཡན་ལག་གི་དོན་བཤད་པར་བྱ་སྟེ། བརྐུ་བར་བྱ་བའི་རྫས་ཀྱི་ཤར་ལ་སོགས་པའི་ཕྱོགས་ཆ་གང་ནས་བཤལ་བ་འདྲེན་པར་བྱེད་པའི་ཕྱོགས་དེ་ནས་ཤིང་ལ་སོགས་པའི་ངོས་གང་ཡིན་པའི་ངོས་དེའི་གཞི་ས་
ལ་སོགས་པ་གང་ཡིན་པས་ས་ལ་སོགས་པའི་ཕྱོགས་གྱོང་གྲུགས་དང་གས་པ་ལ་སོགས་པ་གང་ཡིན་པ་གྱོང་གྲུགས་དང་གས་པ་ལ་སོགས་པ་དེ་ལས་བརྐུ་བར་བྱ་བའི་རྫས་ཤིང་ལ་སོགས་པ་བཤལ་བ་འདྲེན་པར་བྱེད་པའི་ཚེ་འདས་ན་བརྐུས་པ་ཡིན་ནོ། །ཅི་ཆ་གང་ཡང་རུང་བ་འདས་ནའམ་ཞེ་ན་མ་ཡིན་ཏེ། དེའི་ཕྱིར་ངོས་ཅིག་ཤོས་ཞེས་བྱ་བ་སྨྲས་ཏེ། ཤིང་ལ་སོགས་པ་མདུན་དུ་གྱུར་པའི་ངོས་གང་ནས་བཤལ་བ་དེ་ལས་གཞན་པའི་ངོས་ཕྱིས་མར་གྱུར་པ་ཐ་མ་ཤོས་ནི་ཅིག་ཤོས་སོ། །བཤལ་བ་ན་ངོས་ཅིག་ཤོས་དེ་ངོས་ཀྱི་གཞིའི་མཚམས་གྱོང་གྲུགས་དང་གས་པ་ལ་སོགས་པ་ལས་འདས་ན་བརྐུས་པ་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་བཤལ་བའི་སྦྱོར་བས་རྫས་རྐུ་བར་བྱེད་ནས་ལ་སོགས་པའི་ཕྱོགས་གང་དུ་རྫས་དེ་བཤལ་བར་བྱེད་པ་དེ་ན་གལ་ཏེ་གྱོང་གྲུགས་དང་གས་པ་ལ་སོགས་པའི་མཚམས་ཡོད་ན་རྫས་དེ་མཚམས་དེ་ལས་ཐམས་ཅད་བཟླས་ན་དེའི་ཚེ་བརྐུས་པ་ཞེས་བྱའོ། །གལ་ཏེ་བརྐུ་བར་བྱ་བའི་རྫས་ཀྱིས་ས་ལ་སོགས་པའི་གཞི་གང་ཡིན་པ་དེ་ཁྱབ་ལ་དེ་ན་ཡང་གྱོང་གྲུགས་དང་གས་པ་ལ་སོགས་པ་ཁོངས་སུ་གཏོགས་པ་དག་ཡོད་ན་ཅི་ཁྱབ་པའི་ཁོངས་སུ་གཏོགས་པའི་མཚམས་དེ་ལས་ངོས་ཅིག་ཤོས་དེ་འདས་ན་ཡང་བརྐུས་པ་ཡིན་ནམ། འོན་ཏེ་མ་ཡིན་ཞེ་ན་དེའི་ཕྱིར་ཁྱབ་པའི་ཁོངས་སུ་གཏོགས་པའི་དེ་དང་ལྡན་པ་ཉིད་ནི་མ་ཡིན་ནོ་ཞེས་བྱ་བ་སྨྲས་ཏེ། བརྐུ་བར་བྱ་བའི་རྫས་ཀྱི་གཞི་ཞེས་བྱ་བའི་ཕྱོགས་ཅི་ཙམ་ཁྱབ་པའི་ཕྱོགས་ཁྱབ་པ་དེའི་ཁོངས་སུ་གཏོགས་པའི་ཕྱོགས་ཀྱི་ཆ་ཤས་གང་ཡིན་པའི་ཁྱབ་པའི་ཁོངས་སུ་གཏོགས་པའི་ཕྱོགས་ཀྱི་ཆ་ཤས་ཀྱི་དེ་དང་ལྡན་པ་ཉིད་མཚམས་དང་ལྡན་པ་གྱོང་གྲུགས་དང་གས་པ་ལ་སོགས་པ་དང་ལྡན་པ་ཉིད་ཡིན་ན། ཁྱབ་པའི་ཁོངས་སུ་གཏོགས་པའི་ཕྱོགས་ཀྱི་ཆ་ཤས་ཀྱི་མཚམས་གྱོང་གྲུགས་དང་གས་པ་ལ་སོགས་བ་གང་ཡིན་པ་དེ་ལས་ངོས་ཅིག་ཤོས་འདས་སུ་ཟིན་ཀྱང་དེའི་ཚེ་ན་བརྐུས་པར་མི་འགྱུར་རོ། །དེ་ཅིའི་ཕྱིར་ཞེ་ན། འདི་ལྟར་ཁྱབ་པའི་ཁོངས་སུ་གཏོགས་པའི་ཆ་ཤས་དང་འབྲེལ་པའི་མཚམས་ལས་འདས་པས་ནི། རྫས་ཟད་པར་བརྐུས་པར་མི་འགྲུབ་སྟེ། འདི་ལྟར་གནས་ནས་སྤོས་པ་ནི་རྫས་ཀྱི་ཕྱི་མཐའི་དུམ་བུ་དེ་ཙམ་འདས་པ་ཡིན་པའི་ཕྱིར་རོ། །རྫས་གཅིག་ཏུ་འབྲེལ་པ་ལ་
དུམ་བུར་རྐུར་ཡང་མི་རུང་སྟེ། དེ་བས་ན་བརྐུ་བར་བྱ་བའི་རྫས་ཤིང་ལ་སོགས་པ་དེས་ཁྱབ་པའི་ཕྱོགས་གང་ཡིན་པ་དེ་ན་གྱོང་གྲུགས་དང་གས་པ་ལ་སོགས་པའི་མཚམས་ཡོད་ཅིང་དེ་ལས་ཤིང་ལ་སོགས་པའི་ཕྱད་ཕྱེད་འདས་སུ་ཟིན་ཀྱང་འདིར་འདས་པའི་བརྐུས་པར་མི་འགྱུར་རོ། །དེ་བས་ན་ཁྱབ་པའི་ཁོངས་སུ་གཏོགས་པའི་ཕྱོགས་ལས་ཕྱི་རོལ་དུ་གྱུར་པའི་གྱོང་གྲུགས་དང་གས་པ་ལ་སོགས་པ་ནི་མཚམས་ཉིད་དུ་དགོངས་པ་ཡིན་གྱི། དེའི་ཁོངས་སུ་གཏོགས་པ་དག་ནི་མ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་ཡང་དགེ་སློང་གིས་ཡོ་བྱད་ལྕི་བ་ཤིན་ཏུ་ཐག་རིང་པོར་བཤལ་ཏེ་བརྐུས་ཀྱང་མཐའི་ལྟུང་བར་མི་འགྱུར་བར་མཆིས་སམ་ཡོད་དེ། འདི་ལྟར་དགེ་སློང་གིས་ཡོ་བྱད་ལྕི་བའི་ངོས་གཅིག་ཁོ་ན་ནས་བཟུང་སྟེ་ཤིན་ཏུ་ཐག་རིང་པོར་བཤལ་ཀྱང་ངོས་ཅིག་ཤོས་གནས་དེ་ནས་མ་འདས་ན་ཉེས་པ་སྦོམ་པོར་འགྱུར་རོ་ཞེས་གསུངས་སོ། །མདོ་སྔ་མར་མཚམས་ལས་ཞེས་སྨྲས་ན་དེའི་མཚན་ཉིད་མ་བསྟན་པས་དེའི་ཕྱིར། དེའི་མཚན་ཉིད་ནི་གྱོང་གྲུགས་དང་གས་པ་དང་བྲིས་པ་དང་ཁ་དོག་གཞན་དང་བར་མཚམས་དང་བར་ཆད་དག་གོ་ཞེས་བྱ་བ་སྨྲས་ཏེ། མཚམས་ནི་རྣམ་པ་གཉིས་ཏེ། གསལ་བས་གཅད་པའི་མཚན་ཉིད་ནི་འདི་ལྟ་སྟེ། བརྐོས་པ་དང་རྩིག་པ་དང་ཆུ་ཀླུང་དག་གིས་བཅད་པ་འཇིག་རྟེན་ལ་གྲགས་པ་དག་གོ །ཅིག་ཤོས་ནི་རབ་ཏུ་མི་མངོན་པས་བཅད་པ་འཇིག་རྟེན་ལ་ཡང་ངོ་བོ་ཉིད་དུ་མ་གྲགས་པ་སྟེ། དེའི་མཚན་ཉིད་བཤད་པར་བྱའོ། །མཚམས་དེའི་མཚན་ཉིད་དམ་ངོ་བོ་ཉིད་ནི་དེའི་མཚན་ཉིད་དེ་གྱོང་གྲུགས་དང་གས་པ་ལ་སོགས་པའོ། །མཚམས་དེའི་མཚན་ཉིད་ནི། བཅོམ་ལྡན་འདས་ཀྱིས་ཀྱང་གསུངས་ཏེ། གལ་ཏེ་ས་གཞི་དེ་གྱང་གྱོང་དུ་གྱུར་པའམ། སེར་གའམ། ཡི་གེར་བྲིས་པའམ། ཚོན་སྣ་ཚོགས་བཀྲམ་པའམ། མཚམས་ཡོད་ན་ཕྱོགས་ཐ་དད་པ་དག་ཏུ་བརྗོད་པར་བྱའོ་ཞེས་གསུངས་སོ། །དེ་ལ་གྱོང་གྲུགས་ཞེས་བྱ་བ་ནི་གྱང་གྱོང་ཞེས་གསུངས་པས་བསྡུས་ཏེ། ས་གཞི་འདྲ་བར་གྱོང་ཞིང་གྲུགས་པ་ཉིད་ནི་གྱོང་གྲུགས་ཞེས་བྱའོ། །གས་པ་ཞེས་བྱ་བ་ནི། སེར་ག་ཞེས་གསུངས་པས་བསྡུས་ཏེ། ཕྱོགས་གཅིག་ཏུ་རལ་བ་ནི་གས་པ་ཞེས་བྱའོ། །བྲིས་པ་ཞེས་བྱ་བས་ནི་ཡི་གེར་བྲིས་པ་ཞེས་གསུངས་པ་བསྡུས་ཏེ། ཡིག་འབྲུ་བྲིས་པ་ནི་བྲིས་པ་
ཞེས་བྱའོ། །ཁ་དོག་གཞན་ཞེས་བྱ་བས་ནི་ཚོན་སྣ་ཚོགས་བཀྲ་བ་ཞེས་གསུངས་པ་བསྡུས་ཏེ། ཚོན་ཁ་དོག་གཅིག་ལས་ཁ་དོག་གཞན་ཐ་དད་པར་གྱུར་པ་ནི་ཁ་དོག་གཞན་ཏེ། དེ་ནི་མཚམས་གཞན་ཡིན་ནོ། །བར་མཚམས་ཞེས་བྱ་བས་ནི་མཚམས་ཞེས་བྱ་བ་བསྡུས་ཏེ། དེས་ནི་སྒོ་གླེགས་དང་སེག་དང་རེ་ལྡེ་ལ་སོགས་པ་བར་མཚམས་ཡོད་པ་དག་བསྡུས་སོ། །བར་ཆད་ཅེས་བྱ་བས་ནི་ཞིང་ལ་སོགས་པའི་རྣང་སྒལ་ལ་སོགས་པ་དག་བསྡུས་ཏེ། འདི་ལྟར་རྣང་སྒལ་གྱི་ངོས་གཉིས་ན་ཁོངས་སུ་གཏོགས་པ་ཡིན་ཡང་འདི་ལྟར་ངོས་དེ་གཉིས་ན་གནས་པའི་ས་གཞིའི་ཆ་གཉིས་ཀྱི་བར་དུ་བཅད་པ་ཉིད་ཀྱིས་དབུས་ན་གནས་པ་ཡིན་པའི་ཕྱིར་མཚམས་སུ་འགྱུར་རོ། །གལ་ཏེ་བརྐོས་པ་དེ་ཁ་ད་ཆད་དུ་གང་བ་ནི་ཕྱོགས་གཅིག་ཏུ་བརྗོད་པར་བྱའོ། །གལ་ཏེ་མ་གང་བར་གྱུར་ཏེ་དེར་དབྱིག་གུས་བར་དུ་བཅད་དམ། སེག་གིས་བར་དུ་བཅད་དམ། རེ་ལྡེས་བར་དུ་བཅད་པ་གང་ཡིན་པ་དེ་དག་ནི་ཕྱོགས་སོ་སོར་བརྗོད་པར་བྱ་སྟེ། དེ་དག་ཐམས་ཅད་ནི་བར་ཆད་ཅེས་བྱ་བས་བསྡུས་པ་ཡིན་ནོ། །སྲོག་ཆགས་དག་གི་ལུས་གཅིག་པའི་ཕྱིར་བར་ཆད་གཅིག་ཡིན་པར་དོགས་པ་བསལ་བའི་ཕྱིར། སྲོག་ཆགས་ལ་ནི་རྩིབ་མ་ལ་སོགས་པ་ཐ་དད་པར་བརྟག་ཏུ་རུང་བ་རྣམས་བར་ཆད་ཉིད་ཡིན་ནོ་ཞེས་བྱ་བ་སྨྲས་ཏེ། སྲོག་ཆགས་ལ་ནི་རྩིབ་མ་ལ་སོགས་པ་ཐ་དད་པར་སོ་སོར་བརྟག་ཏུ་རུང་བས་དེ་དག་བར་ཆད་སོ་སོར་ཐ་དད་པར་གནས་པ་ཉིད་ཡིན་པར་རིག་པར་བྱའོ། །སོགས་པ་ཞེས་བྱ་བ་ནི། སོ་དང་སྣས་བར་དུ་བཅད་པ་ལ་སོགས་པ་དག་བསྡུས་ཏེ། དེས་ན་རྩིབ་མ་ཞིག་གཅིག་གི་ཕྱོགས་ནས་རྩིབ་མ་ཐ་དད་བར་བརྟག་ཏུ་རུང་བ་གཞན་གྱི་བར་དུ་སྤོས་ན་བརྐུས་པ་ཉིད་དུ་བརྗོད་པར་བྱའོ། །ས་ལ་སོགས་པ་རྩྭ་ལ་སོགས་པ་དག་གིས་གཡོགས་པ་ཉིད་ལ་ཡང་ས་ལ་སོགས་པ་དེ་གཞིའི་དངོས་ཡིན་པའི་ཕྱིར་གནས་ཉིད་ཡིན་གྱི། གཡོགས་མ་ནི་མ་ཡིན་ནོ་སྙམ་དུ་དོགས་པ་བསལ་བའི་ཕྱིར་གདིང་བ་བཏིང་བ་ཉིད་གནས་ཉིད་ཡིན་ནོ་ཞེས་བྱ་བ་སྨྲས་ཏེ། ས་ལ་སོགས་པའི་གཞིར་རྩྭ་ལ་སོགས་པའི་གདིང་བ་བཏིང་བ་ཉིད་ཡོད་ན། རྩྭ་ལ་སོགས་པའི་གདིང་བ་བཏིང་བ་དེ་ཉིད་དེ་ན་གནས་པའི་རྫས་ཀྱི་ཕྱིར་གནས་ཉིད་དོ། །ས་ལ་སོགས་པ་
ནི་མ་ཡིན་ཏེ། དེ་ནི་དེས་བར་དུ་བཅད་པའི་ཕྱིར་རོ། །སྐྱེ་བ་ནི་གཞག་པ་དང་འདྲའོ་ཞེས་བྱ་བ་ནི། རྩྭ་དང་གེལ་པ་དང༌། རྩི་དང་ནགས་ལ་སོགས་བ་བྱུང་བའི་སྐྱེ་བ་ནི་དཔེར་ན་རྫས་གཞག་པ་བསྐྱོད་པ་ཙམ་ཁོ་ནས་བརྐུས་པར་བརྗོད་པར་བྱ་བ་དང་འདྲ་བར་སྐྱེ་བ་ཡང་གནས་ནས་བསྐྱོད་པ་ཁོ་ནས་བརྐུས་པ་ཞེས་བྱའི། རྩྭ་བ་ནས་བཏོན་པ་ཙམ་གྱིས་ནི་མ་ཡིན་ཏེ། འདི་ལྟར་རིལ་གྱིས་ཁྱེར་ནའོ། །འདིར་གཞུང་ནི་དགེ་སློང་གིས་མེ་ཏོག་གི་ཤིང་ལྗོན་པ་ཕྱུང་སྟེ། །རྐུ་ན་ཇི་སྲིད་དུ་ནོམ་པར་མི་བྱེད་པའི་བར་དུ་ནི་ཉེས་བྱས་སུ་འགྱུར་རོ། །ནོམ་པ་ནས་གནས་ནས་སྤོས་པའི་བར་གྱིས་ནི་བརྐུས་པ་ཞེས་བྱ་སྟེ། མེ་ཏོག་གི་ཤིང་གི་རིན་ཐང་བརྩི་བར་བྱའོ་ཞེས་གསུངས་པ་ཡིན་ནོ། །ལག་པ་ལ་སོགས་པ་ཡན་ལག་ལ་གདུ་བུ་རྒྱན་ཅན་ལ་སོགས་པ་བསྐོན་པ་ནི་འཁྲུལ་པའི་ཕྱིར་ཇི་ལྟར་བརྐུས་པར་རྣམ་པར་གཞག་པར་བྱ་ཞེ་ན་དེའི་ཕྱིར། བསྐོན་པ་ནི་ཕུད་ནའོ་ཞེས་བྱ་བ་སྨྲས་ཏེ། ལག་པ་ལ་སོགས་པ་ལ་བསྐོན་པའི་རྫས་ནི་ཕུད་ན་བརྐུས་པ་ཡིན་ནོ། །ལག་པ་ལ་སོགས་པ་ཡན་ལག་ལ་བསྐོན་པ་བཏགས་པ་དང་གྱོན་ཞིང་བགོས་པ་ནི་ཡན་ལག་དེ་ལས་ཕུད་པ་ཕྱུང་བ་དང་བཀྲོལ་བ་དང་ཕྲལ་བ་ན་དེ་བརྐུས་པ་ཡིན་པར་རིག་པར་བྱའོ། །འདིར་གཞུང་ནི་དེ་དག་རྒྱན་སྣ་ཚོགས་དག་གིས་བརྒྱན་པར་གྱུར་པ་དགེ་སློང་གིས་དེའི་སྦྱོར་བས་ཁྲི་ལས་ལྡང་བ་ནས་གནས་ནས་གནས་གཞན་དུ་སྤོས་པའི་བར་དུ་བྱེད་ན་བརྐུས་ཞེས་བྱའོ་ཞེས་བྱ་བ་ལ་སོགས་བ་གསུངས་པ་ཡིན་ནོ། །འདིར་གནས་ནས་གནས་གཞན་དུ་སྤོས་པ་ཞེས་བྱ་བ་ནི་ཕུད་པ་ཡིན་པར་ཤེས་པར་བྱའི། གཞན་དུ་ན་ལག་པ་ལ་སོགས་པ་དེ་ཉིད་དུ་རྒྱན་བསྐོན་པ་དཔུང་མགོའི་བར་དུ་འཁྲུལ་ཞིང་ཡང་ཕྱིར་མཁྲིག་མའི་བར་དུ་བསྐྲུལ་དུ་རུང་བར་ཟད་ཀྱི་དབུད་པར་མི་ནུས་པ་དག་ཇི་ལྟར་གནས་ནས་སྦོས་པ་ཙམ་གྱིས་བརྐུས་པར་འགྱུར་ཏེ། དེ་བས་ན་ལག་པ་ལ་སོགས་པ་ལས་ཕུད་པ་ན་བརྐུས་པར་འགྱུར་རོ། །ཤོ་གམ་རང་གི་གནས་ན་འདུག་པའི་ཕྱིར་དེ་ཇི་ལྟར་བརྐུས་པར་འགྱུར་ཞེན་དེའི་ཕྱིར། ཤོ་གམ་ནི་ས་ལས་འདས་ནའོ་ཞེས་བྱ་བ་སྨྲས་ཏེ། བརྐུས་པ་ཞེས་བྱ་བར་སྦྱར་རོ། །ཤོ་གམ་གྱི་གནས་ནི་འདིར་ས་ཞེས་བྱ་བའི་སྒྲས་བརྗོད་དེ། དེ་ལས་འདས་ནའོ་ཞེས་བྱ་བ་ནི། ཤོ་གམ་གྱིས་དེ་
ལས་འདས་པ་ནི་དེ་ལས་འདས་པའོ། །ཤོ་ག་མ་གཅོད་པའི་གནས་ཇི་ཙམ་དུ་ཞུགས་ན་ཤོ་གམ་གཞལ་དགོས་པ་ཉིད་ཡིན་པ་དེ་ནི་ཤོ་གམ་གྱི་གནས་ཡིན་པར་ཤས་པར་བྱ་སྟེ། དེ་ཉིད་འདིར་ཤོ་གམ་གྱིས་ཞེས་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ཤོ་གམ་གྱི་རྫས་གཞལ་དགོས་པའི་ཤོ་གམ་གྱི་གནས་སུ་ཕྱིན་ལ་ཤོ་གམ་མ་ཕུལ་བར་ཤོ་གམ་གྱི་གནས་ལས་འདས་ན་ཤོ་གམ་བརྐུས་པ་ཡིན་ཏེ། འདི་ལྟར་ཤོ་གམ་གཞལ་དགོས་པ་ལས་འདས་ན་ཡང་དེར་ཤོ་གམ་གྱི་ཚད་ཁོ་ན་བརྐུས་པ་ཡིན་གྱི་གཞན་ནི་མ་ཡིན་ནོ། །ས་དེ་ལས་འདས་ན་ཞེས་བྱ་བའི་ཚིག་གིས་ནི་འདིར་གཞན་ནས་གཞན་དུ་བརྒྱུད་བ་ཐམས་ཅད་ཀྱང་བསྡུས་བར་རིག་པར་བྱའོ། །འདི་ལྟར་བཞོན་པ་གླང་པོ་ཆེ་དང་རྟ་ལ་སོགས་པ་དང་རང་གི་ལུས་ཀྱི་རྐང་ལག་ལ་སོགས་པ་དང༌། མདའ་ལ་སོགས་པ་ལ་བཏགས་ཏེ་བསྐུར་བའི་ཐབས་དེ་དག་གིས་ཤོ་གམ་གཞལ་དགོས་པའི་ས་ལས་འདས་ན་ཡང་ཤོ་གམ་གྱི་གནས་དེ་ལས་འདས་པ་ཁོ་ན་ཡིན་ནོ། །འདི་ལྟར་དེ་ཤོ་གམ་གྱི་སར་གཏོགས་པ་ཡིན་ན་གལ་ཏེ་ཤོ་གམ་གྱི་གནས་སུ་ཤོ་གམ་གཞལ་དགོས་པར་ཕྱིན་ནས་ཡང་ཕྱིར་ལོག་གམ་སྐབས་སུ་བཟུར་ཏེ་འགྲོ་བ་དེ་ལ་ནི་ཡུལ་ཆོས་གང་ཡིན་པའི་ཁྲིམས་དང་སྦྱར་བར་བྱ་སྟེ། འདི་ལྟར་ཡུལ་དེ་ན་གལ་ཏེ་ཕྱིར་ལོག་ཀྱང་གཞལ་དགོས་པའི་ཁྲིམས་སུ་བྱས་པ་ཡོད་ན་ནི་འདས་པ་ཁོ་ནར་འགྱུར་རོ། །ཇི་སྟེ་ཕྱིར་ལོག་ན་གཞལ་མི་དགོས་པའི་ཁྲིམས་སུ་བྱས་པ་ཡོད་ན་ནི་འདས་པར་མི་འགྱུར་རོ། །མི་ནི་འགྲོ་བ་དང་འོང་བ་ལ་སོགས་པ་དང་ལྡན་པ་ཡིན་ན་དེ་ཇི་ལྟར་བརྐུས་པར་འགྱུར་ཞེ་ན། དེའི་ཕྱིར་མི་ལ་གལ་ཏེ་བརྡས་ན་ནི་དེ་གྲུབ་ནའོ་ཞེས་བྱ་བ་སྨྲས་ཏེ། མི་རྐུ་བ་ནི་རྣམ་པ་མང་དུ་སྣང་སྟེ། མི་འདོད་བཞིན་དུ་བཀྲི་བ་དང༌། གཞན་པ་དག་གིས་རྐུ་བ་དང༌། དེ་བཞིན་དུ་བསྡིགས་པ་ལ་སོགས་པ་དག་གིས་རྐུ་བ་དག་སྟེ། དེ་དག་ནི་མདོ་འདིར་མ་བསམས་སོ། །འདིར་ནི་གལ་ཏེ་བརྡས་ནི་ཞེས་བྱ་བ་བསམས་ཏེ། གལ་ཏེ་བརྡས་མི་རྐུ་བར་བྱེད་ན་བརྡ་དེ་གྲུབ་ན་བརྐུས་པ་ཡིན་ནོ། །འདི་སྐད་བསྟན་ཏེ། གལ་ཏེ་བརྡས་རྐུ་བར་བྱེད་ན་གང་གི་ཚེ་བརྡ་དེ་གྲུབ་པ་དེའི་ཚེ་ན་མི་དེ་བརྐུས་བར་བརྗོད་པར་བྱའོ། །འདི་ལྟར་གཞུང་ལས་མི་རྐུ་བ་རྣམ་པ་གསུམ་པོ་ཡུལ་ཕྱོགས་དང་མཚན་མ་དང་
བརྡས་རྐུ་བ་གསུམ་གསུངས་པ་ཡང་འདིར་བརྡ་ཞེས་སྨོས་པས་གཉིས་ཀྱང་བསྡུས་པར་རིག་པར་བྱ་སྟེ། འདིར་མི་རྐུ་བ་ནི་རང་དགར་ཕྱི་བཞིན་འོང་བ་དང༌། ཁས་ལེན་པ་ཡིན་པར་དགོངས་པས་དེ་ལྟ་བུས་རྐུ་བ་ཐམས་ཅད་ནི་བརྡ་སྔོན་དུ་བཏང་བ་ཡིན་ནོ། །དེ་ལ་ཡུལ་ཕྱོགས་ཞེས་བྱ་བ་ནི་འདིར་ཚོགས་ལ་སོགས་པའི་ཡུལ་ཡིན་པར་གསུངས་སོ། །མཚན་མ་ནི་བརྟགས་ཏེ་སྐྲ་དང་ཁ་སྤུ་བྲེ་གས་ནས་རིང་པོ་མ་ལོན་པ་ཞེས་བྱ་བ་ལ་སོགས་པའོ། །བརྡ་ནི་སྔ་དྲོ་ལ་སོགས་པའོ། །མདོ་ལ་ས་ནི་བརྡ་ཞེས་བྱ་བ་འདན་ཚབ་སྦྱར་བ་ཡིན་པར་འདོད་དེ། གང་གི་ཚེ་ཁྱོད་ཀྱིས་ཁོ་བོས་འདི་དང་འདི་ལྟ་བུར་མཐོང་བ་དེའི་ཚེ་ཁྱོད་ཁོ་བོའི་གན་དུ་ཤོག་ཤིག་ཅེས་བྱ་བ་ལྟ་བུ་སྟེ། གང་གི་ཚེ་བརྡ་དེ་གྲུབ་པ་དེའི་ཚེ་མི་དེ་བརྐུས་པར་རིག་པར་བྱའོ། །གལ་ཏེ་གསང་སྔགས་ཀྱིས་དྲང་བ་ལ་སོགས་པའི་ཐབས་གཞན་དག་གིས་མི་རྐུ་པར་བྱེད་ན་ནི་གང་གི་ཚེ་སྣང་བར་གྱུར་པ་དེའི་ཚེ་ན་བརྐུས་པ་ཡིན་པར་རིག་བར་བྱའོ། །གལ་ཏེ་བྱ་རྐུ་ན་དེ་ལ་ཇི་ལྟར་བརྐུས་པར་རྣམ་པར་གཞག་ཅེ་ན། དེའི་ཕྱིར། གལ་ཏེ་དེ་ལྟར་ན་བྱ་སྤར་བ་ན་ཞེས་བྱ་བ་སྨྲས་ཏེ། གལ་ཏེ་དེ་ལྟར་ན་ཞེས་བྱ་བ་ནི། གལ་ཏེ་བྱ་སྤར་ཏེ་རྐུ་བར་བྱེད་ནའོ། །དེའི་ཚེ་ན་བྱ་སྤར་བ་ན་བརྐུས་པ་ཁོ་ན་ཡིན་ནོ། །འདིར་གཞུང་ནི་དགེ་སློང་གིས་བྱ་སྤར་ཏེ་རྐུ་བར་བྱེད་ན་བྱ་སྤར་བ་ན་བྱའི་རིན་ཐང་བརྩི་བར་བྱའོ་ཞེས་གསུངས་པ་ཡིན་ནོ། །སྤར་ནས་རྐུ་བར་བྱེད་ཅེས་བྱ་བ་ནི་འདིར་འཕུར་དུ་བཅུག་ནས་རྐུའོ་ཞེས་བྱ་བའི་ཐ་ཚིག་གོ །སྤར་བ་ཐམས་ཅད་ནི་མཚམས་གཞན་དུ་འགྲོ་བ་སྟེ། འཕུར་བ་ནི་ནམ་མཁའ་ལ་འགྲོ་བའི་རང་བཞིན་ཡིན་པའི་ཕྱིར་རོ། །འདིར་བྱ་སྨོས་པ་ནི་དཔེ་ཙམ་སྟེ། རྫས་ཐམས་ཅད་ཀྱང་ནམ་མཁའི་མཚམས་གཞན་དུ་སོང་ན་བརྐུས་པ་ཡིན་ཏེ། ནམ་མཁའ་ནི་མཚམས་གཞན་ཡིན་པའི་ཕྱིར་རོ། །བཏགས་པ་ཇི་ལྟར་བརྐུས་པར་རྣམ་པར་གཞག་ཅེ་ན་དེའི་ཕྱིར། དུད་འགྲོ་བཏགས་པ་ནི་བཀྲོལ་བ་ནའོ་ཞེས་བྱ་བ་སྨྲས་ཏེ། དུད་འགྲོ་བཏགས་པ་རྐུ་བ་ནི་བཀྲོལ་བ་ན་བརྐུས་པ་ཡིན་ནོ། །འདིས་ནི་དགེ་སློང་གིས་རི་དགས་རླུབས་སུ་ཆུད་པ་ཕྱུང་ན་རི་དགས་ཀྱི་རིན་ཐང་བརྩི་བར་བྱའོ། །དགེ་སློང་གིས་ཉ་དོ་ལ་ལ་ཐོགས་པ་ཕྱུང་ན་ཉའི་རིན་ཐང་བརྩི་བར་བྱའོ་ཞེས་གསུངས་པ་དག་བསྡུས་
པ་ཡིན་ནོ། །དུད་འགྲོ་བརྟོད་པས་སམ་ཁྱུ་ལས་བཀར་བས་རྐུ་བར་འདོད་པ་ལ་ཇི་ལྟར་བརྐུས་པར་རྣམ་པར་གཞག་ཅེ་ན། དེའི་ཕྱིར། བརྟོད་པ་དང་ཁྱུ་ལས་བཀར་བ་ནི་མི་སྣང་བར་གྱུར་པ་ཉིད་ནའོ་ཞེས་བྱ་བ་སྨྲས་ཏེ། བརྟོད་པ་ཞེས་བྱ་བ་ནི་དུད་འགྲོ་ཁྱུའི་ནང་ན་འགྲོ་བ་ཕུར་པ་ལ་སོགས་པ་འགའ་ཞིག་ལ་བཏགས་པའོ། །ཁྱུ་ལས་བཀར་བ་ཞེས་བྱ་བ་ནི། ཁྱུའི་གནས་ནས་ལོགས་ཤིག་ཏུ་ཕྱེ་སྟེ་འདས་པའོ། །གལ་ཏེ་དུད་འགྲོ་བརྟོད་པས་སམ་ཁྱུ་ལས་བཀར་བས་རྐུ་བར་འདོད་ན་དེ་ལ་ཇི་ལྟར་བརྐུས་པར་འགྱུར་ཞེ་ན། མི་སྣང་བར་གྱུར་པ་ཉིད་ན་བརྐུས་པ་ཡིན་གྱི་གནས་ནས་བསྐྱོད་པ་ཙམ་གྱིས་ནི་མ་ཡིན་ནོ། །གལ་ཏེ་བདག་པོ་དང་རྫི་བོ་ཕྱི་བཞིན་འབྲང་བར་གྱུར་ན་ནི། དེའི་ཚེ་བདག་བོ་དང་རྫི་བོ་ལས་མི་སྣང་བར་གྱུར་པ་ཉིད་ནའོ། །གལ་ཏེ་བདག་པོ་དང་རྫི་པོ་གཤེད་ན་འདུག་ན་ནི་དེའི་ཚེ་དེ་ལས་མི་སྣང་བར་གྱུར་པ་ཉིད་ནའོ། །གལ་ཏེ་བདག་པོ་དང་རྫི་བོ་མེད་ན་ནི་དེའི་ཚེ་ཁྱུ་ལས་མི་སྣང་བར་གྱུར་པ་ཉིད་ན་བརྐུས་པ་ཡིན་ཏེ། དེ་ནི་དུད་འགྲོ་རང་གི་ངང་གིས་འགྲོ་བ་བརྐུས་པ་ཡིན་ནོ། །གང་མཐུས་བཀྲི་དགོས་སམ་སྒྲ་ཕྱུང་སྟེ་བརྡ་དགོས་པ་ཞིག་ན་ནི་དེ་མི་སྣང་བར་གྱུར་པ་ཉིད་དུ་ཕྱིན་ཀྱང་བརྐུས་པ་མ་ཡིན་ཏེ། ཇི་སྲིད་དུ་བག་ཆ་བ་མེད་པའི་ཡུལ་དུ་མ་ཕྱིན་ཏམ་དབང་དུ་བྱས་པར་མ་གྱུར་གྱི་བར་དུ་བརྐུས་པ་མ་ཡིན་ནོ། །དུད་འགྲོ་སྨོས་པ་ནི་དཔེ་ཙམ་སྟེ། འདིར་མི་ལ་སོགས་པ་རྣམ་པ་དེ་ལྟ་བུ་དག་ལ་ཡང་དེ་ཁོ་ན་ཉིད་དུ་བསྒྲུབ་པར་བྱའོ། །འདིར་གཞུང་ནི། མིག་ལམ་དུ་སྣང་བར་མ་གྱུར་ན་བརྐུས་ཞེས་བྱའོ་ཞེས་བྱ་བ་གསུངས་པ་ཡིན་ནོ། །གསང་སྔགས་དག་གིས་གཏེར་ལ་སོགས་པ་ལ་འདྲེན་པར་བྱེད་ན་གང་གི་ཚེ་བརྐུས་པར་འགྱུར་ཞེ་ན་དེའི་ཕྱིར། གསང་སྔགས་དག་གིས་འདྲེན་པ་ནི་སྣང་བ་ནའོ་ཞེས་བྱ་བ་སྨྲས་ཏེ། གསང་སྔགས་དག་གིས་གཏེར་ལ་སོགས་པ་འདྲེན་པ་ན། གཏེར་ལ་སོགས་པ་སྣང་བ་ན་བརྐུས་པ་ཡིན་ནོ། །འདི་སྐད་བསྟེན་ཏེ། གལ་ཏེ་གཏེར་ལ་སོགས་པ་རང་གི་གནས་ན་གནས་སུ་ཟིན་ཀྱང་དེའི་ཁ་བྱེ་བ་ལ་སོགས་པ་སྣང་བར་གྱུར་ན་དེའི་ཚེ་བརྐུས་པ་ཞེས་བྱའོ། །ཇི་སྟེ་ཤིན་ཏུ་ཐག་རིང་པོ་ནས་དྲངས་ཏེ། རྐང་པའི་དྲུང་དུ་འོངས་ཀྱང་ཇི་སྲིད་དུ་སྣང་བར་མ་གྱུར་ན་དེ་
ཡང་བརྐུས་པར་མི་འགྱུར་ཏེ། གྲུབ་པའི་བློ་མེད་པའི་ཕྱིར་རོ། །གལ་ཏེ་རྐུན་མ་མང་པོ་ཞིག་ཡོད་པ་ལས་གཅིག་ཁོ་ན་ཞིག་གིས་གལ་ཏེ་མཐོང་ན་ཡང་དེའི་ཚེ་ཐམས་ཅད་ཀྱིས་མཐོང་བ་ཁོ་ན་ཡིན་ནོ། །འདི་ལྟར་གཏེར་ལ་བསྟན་པ་ཁོ་ན་བཞིན་དུ་རྣམ་པ་དེ་ལྟ་བུ་རྐུ་བ་གཞན་དག་ལ་ཡང་དེ་ཁོ་ན་བཞིན་དུ་བསྒྲུབ་པར་བྱའོ། །གོམ་པ་འབྲི་བ་ལ་སོགས་པས་རྐུ་བར་འདོད་པ་ལ་གང་གི་ཚེ་བརྐུས་པར་འགྱུར་ཞེ་ན་དེའི་ཕྱིར། ཕྱི་བཞིན་འབྲང་བ་དང༌། སྒྲུབ་པར་བྱེད་པ་གཉིས་ནུར་བ་དང༌། འབྱངས་པ་དང༌། འབྱམ་པ་དང༌། འཇུག་པ་དང༌། འཛེགས་པ་དག་གིས་སྔ་མ་ལྟར་ཡིན་གྱི་དེ་གཉིས་ཀྱིས་བླངས་པ་ནི་མ་ཡིན་ནོ་ཞེས་བྱ་བ་སྨྲས་ཏེ། སྔ་མ་ལྟར་ཡིན་གྱི་ཞེས་བྱ་བ་ལ་སྔ་མ་ཞེས་བྱ་བ་ནི། མདོ་སྔ་མ་ལས་གསང་སྔགས་དག་གིས་འདྲེན་པ་ནི་སྣང་བ་ནའོ་ཞེས་སྨོས་པའི་མདོ་དེའི་སྔོན་དུ་བརྟོད་པ་དང༌། ཁྱུ་ལས་བཀར་བ་གཉིས་ནི་མི་སྣང་བར་གྱུར་པ་ཉིད་ནའོ་ཞེས་སྨོས་པའི་མདོ་དེ་སྔར་བསྟན་པའི་ཕྱིར་སྔ་མ་ཞེས་བྱ་སྟེ། སྔ་མ་དེ་ལས་མི་སྣང་བར་གྱུར་པ་ཉིད་ན་ཞེས་སྨོས་པ་དེ་ལྟ་ར་མི་སྣང་བ་ཉིད་དུ་གྱུར་ན་འདིར་ཡང་བརྐུས་བ་ཡིན་ནོ་ཞེས་བྱ་བར་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མི་སྣང་བར་གྱུར་པ་ཉིད་ན་བརྐུས་པ་ཡིན་ནོ། །གང་དག་མི་སྣང་བར་གྱུར་པ་ཉིད་ན་ཞེ་ན་དེའི་ཕྱིར། ཕྱི་བཞིན་འབྲང་བ་དང༌། སྒྲུབ་པར་བྱེད་པ་གཉིས་ཞེས་བྱ་བ་སྨྲས་ཏེ། ཕྱི་བཞིན་འགྲོ་བ་དང་ཆོས་གོས་ལ་སོགས་པ་འབུལ་བར་བྱེད་པ་དེ་གཉིས་སོ། །ཐབས་གང་དག་གིས་དེ་གཉིས་མི་སྣང་བར་གྱུར་པ་ཉིད་ན་བརྐུས་པ་ཡིན་ཞེ་ན་དེའི་ཕྱིར། ནུར་བ་དང་འབྱངས་པ་ལ་སོགས་པས་ཡིན་གྱི་དེ་གཉིས་ཀྱིས་བླངས་པ་ནི་མ་ཡིན་ནོ་ཞེས་བྱ་བ་སྨྲས་ཏེ། ཕྱི་བཞིན་འབྲང་བ་དང༌། སྒྲུབ་པར་བྱེད་པ་དེ་གཉིས་བླངས་བའི་རྫས་དེ་མི་སྣང་བར་གྱུར་པ་ཉིད་ན་ནི་བརྐུས་པ་མ་ཡིན་ཏེ། འདི་ལྟར་དེའི་ཚེ་ན་དེ་གཉིས་ལ་རྫས་དེ་བརྐུས་པའི་བསམ་པ་ཡོད་དུ་ཟིན་ཀྱང་དེའི་ཚེ་ན་གནས་ནས་སྤོ་བའི་མཚམས་ལས་མ་འདས་པའི་ཕྱིར་རོ། །འདི་ལྟར་དང་པོའི་གོམ་པ་ཕྱིར་བསྣུར་བའི་དུས་ཁོ་ན་ན་རྫས་མཆན་ན་འདུག་པ་དེ་བརྐུས་པར་གྱུར་ཏེ། རྫས་དེ་མི་སྣང་བ་ཉིད་དུ་གྱུར་པའི་ཕྱིར་རོ་ཞེ་ན། དེ་ལྟར་མི་བཞེད་དེ་དེ་བས་ན་ཕྱི་བཞིན་འབྲང་བ་དང༌། སྒྲུབ་པར་
བྱེད་པ་གཉིས་མི་སྣང་བར་གྱུར་པ་ཉིད་བརྐུས་པ་ཡིན་གྱི། དེ་གཉིས་ཀྱིས་བླངས་པའི་རྫས་མི་སྣང་བར་གྱུར་པ་ཉིད་ན་ནི་བརྐུས་པ་མ་ཡིན་ནོ། །དེ་གཉིས་མི་སྣང་བ་ཉིད་དུ་གྱུར་པའི་ཐབས་ཀྱི་ཚིག་དེ་དག་གི་དོན་བཤད་པར་བྱ་སྟེ། ནུར་བ་ཞེས་བྱ་བ་ནི་གོམ་པ་ཕྱི་ཕྱིར་འབྲི་ཞིང་ཕྱི་ནུར་དུ་འགྲོ་བའོ། །འབྱངས་པ་ཞེས་བྱ་བ་ནི་ཕྱིར་ལུས་པ་སྟེ། རྫས་ཀྱི་བདག་པོའི་མདུན་ནས་ཕྱིར་ནུར་ཏེ་སོང་བའོ། །གསང་སྔགས་དང་སྨན་དག་གིས་དེ་ཉིད་དུ་མི་སྣང་བའམ། གཟུགས་གཞན་དུ་བསྒྱུར་བ་ལ་སོགས་པ་ཡང་འདིས་བསྡུས་པར་ཤེས་པར་བྱའོ། །འབྱམ་པ་ཞེས་བྱ་བ་ནི་གནས་བཏང་བ་སྟེ། འདི་ལྟ་སྟེ་གཤོང་ནས་ཐང་ལ་ཕྱུང་བ་དང༌། ཐང་ལས་གཤོང་དུ་འབབ་པ་དང༌། མངོན་པར་སྐབས་ཡོད་པ་ནས་ཐིབས་པོར་འཇུག་པ་དང༌། ཐིབས་པོ་ནས་མངོན་པར་སྐབས་ཡོད་པར་འགྲོ་བ་དང༌། གནས་ཁང་ནས་ཁྱམས་སུ་དང༌། ཁྱམས་ནས་གནས་ཁང་དུ་དང༌། ཡང་ཏོག་ནས་ཡང་ཏོག་གཞན་དུ་འཛེག་པ་དང༌། ཡང་ཏོག་ནས་ཡང་ཏོག་གཞན་དུ་འབབ་པ་དང༌། ཁྱམས་ནས་སྒོ་ཁང་དུ་འཇུག་པ་དང༌། སྒོ་ཁང་ནས་དང་ར་ཁྱད་ཁྱུད་དུ་འགྲོ་བ་ལ་སོགས་པ་སྟེ། དེ་དག་ཐམས་ཅད་ནི་འབྱམ་པའི་སྒྲས་བསྡུས་པ་ཡིན་ནོ། །འཇུག་པ་ཞེས་བྱ་བ་ནི་གནས་ཁང་དུའོ། །འཛེག་པ་ཞེས་བྱ་བ་ནི་ཡང་ཏོག་གཞན་དུ་འཛེག་པའོ། །འདི་སྐད་བསྟན་ཏེ། ནུར་བ་ལ་སོགས་པ་དེ་དག་གིས་ཕྱི་བཞིན་འབྲང་བ་དང་སྒྲུབ་པར་བྱེད་པ་གཉིས་མི་སྣང་བར་གྱུར་པ་ཉིད་ན་བརྐུས་པ་ཡིན་པར་རིག་པར་བྱའི། དེ་གཉིས་ཀྱིས་བླངས་པའི་རྫས་མི་སྣང་བ་ཉིད་དུ་གྱུར་ན་ནི་བརྐུས་པ་མ་ཡིན་ནོ། །འདིར་གཞུང་ནི་འདི་ལྟར་མཁན་པོ་དང་སློབ་དཔོན་ལམ་གྱིས་བགྲོད་པར་ཞུགས་པ་དེ་དག་གིས་ལྷན་ཅིག་གནས་པ་དང༌། ཉེ་གནས་དག་གི་ལག་ཏུ་ཆོས་གོས་དག་གཏད་པ་ན་དེ་ལ་དེ་དག་རྐུ་སེམས་ཉེ་བར་གནས་པར་གྱུར་ཅིང་དེ་དག་གོམ་པ་བསྲི་བས་འགྲོ་ཞིང་སྤྱང་འབྲང་དུ་འགྲོ་ན་གོམ་པ་རེ་རེ་ལ་ཉེས་བྱས་སུ་འགྱུར་རོ། །ཇི་སྲིད་དུ་མིག་སྔར་སྣང་བར་གྱུར་པ་དེ་སྲིད་དུ་ཉེས་པ་སྦོམ་པོར་འགྱུར་རོ། །མིག་སྔར་སྣང་བར་མ་གྱུར་ན་བརྐུས་པར་བརྗོད་པར་བྱ་སྟེ། རིན་ཐང་བརྩི་བར་བྱའོ། །འདི་ལྟར་ལྷན་ཅིག་གནས་པ་དང༌། ཉེ་གནས་དག་གིས་རྐུ་སེམས་ཀྱིས་སློབ་དཔོན་དང་
མཁན་པོ་དག་གི་ཆོས་གོས་དག་རྐུ་བར་བྱེད་ཅིང་དེ་དག་གིས་དེ་དག་ཁྱེར་ཏེ། གཤོང་ནས་ཐང་ལ་འབྱུང་བ་ནི་ཉེན་ཀོར་དུ་ཁྱེར་པ་ཡིན་ཡང་དེ་ལ་དེ་དག་གིས་རྐུ་སེམས་ཉེ་བར་གནས་སོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གནས་ཁང་ལ་སོགས་བ་ནས་ཁྱམས་ལ་སོགས་པར་འགྲོ་བ་དང། དེ་ནས་དེར་འགྲོ་བ་དང༌། དེར་འཇུག་པ་ན་ཇི་ལྟར་བརྐུས་པར་འགྱུར་ཞེ་ན། དེར་རྐུན་པོ་མི་སྣང་བར་གྱུར་པ་ཁོ་ན་ན་མཐར་ཐུག་པར་རིག་པར་བྱ་སྟེ། དེའི་ཕྱིར་ཉེས་པ་མེད་དོ། །གྲུ་ཇི་ལྟར་བརྐུས་པར་རྣམ་པར་གཞག་ཅེ་ན་དེའི་ཕྱིར། གྲུ་ནི་སྐམ་ས་དང་ཡུར་པོ་ཆེ་དང་ཆུ་བདལ་བ་དག་གིས་སོ་ཞེས་བྱ་བ་སྨྲས་ཏེ། སྐམ་ས་དང་ཡུར་པོ་ཆེ་དང་ཆུ་བདལ་བ་ནི། སྐམ་ས་དང་ཡུར་པོ་ཆེ་དང་ཆུ་བདལ་བ་དག་གོ །དེ་བས་ན་དེ་དག་གིས་གྲུ་དེ་རྐུ་བའི་བསམ་པས་མི་སྣང་བར་གྱུར་པ་ཉིད་ན་བརྐུས་པ་ཡིན་ནོ། དེ་ནི་དཔེ་སྟེ་ཤིང་དང་སྣོད་ལ་སོགས་པ་ཐམས་ཅད་ལ་ཡང་ཆོ་ག་དེ་བཞིན་ནོ། །ཆུ་ཀླུང་ཆེན་པོ་དག་ཏུ་ཇི་ལྟར་བརྐུས་བར་འགྱུར་ཞེ་ན་དེའི་ཕྱིར། རྒྱུན་ཕྱོགས་ཀྱིས་སོ་ཞེས་བྱ་བ་སྨྲས་ཏེ། རྒྱུན་འབབ་པའི་ཕྱོགས་དང་མཐུན་པ་ནི་རྒྱུན་ཕྱོགས་སོ། །གྲུ་ནི་རྣམ་པ་གང་གིས་རྐུ་ཡང་རྐུ་སེམས་ཀྱིས་མི་སྣང་བ་ཉིད་དུ་གྱུར་པ་ན་བརྐུས་པ་ཁོ་ན་ཡིན་གྱི། གནས་ནས་བསྐྱོད་པ་ཙམ་གྱིས་ནི་མ་ཡིན་ནོ། །ཐད་ཀར་ནི་ཇི་ལྟར་བརྐུས་པར་འགྱུར་ཞེ་ན། དེའི་ཕྱིར། ཐད་ཀར་ཡང་ཕ་རོལ་གྱི་འགྲམ་དུ་མི་སྣང་བར་གྱུར་ནའོ་ཞེས་བྱ་བ་སྨྲས་ཏེ། འགྲམ་གང་ནས་གྲུ་རྐུ་བར་བྱེད་པ་དེ་ནས་ཕ་རོལ་གྱི་དོགས་ཀྱི་འགྲམ་སྟེ། ཐད་ཀར་རྐུ་བའི་བསམ་པས་ཕ་རོལ་གྱི་འགྲམ་དེར་མི་སྣང་བར་གྱུར་ན་བརྐུས་པ་ཡིན་ནོ། །ཇི་སྟེ་ཕ་རོལ་གྱི་འགྲམ་ཡང་སྣང་བ་ཉིད་ཡིན་ན་ཇི་ལྟར་བརྐུས་པ་ཡིན་ཞེ་ན། དེའི་ཕྱིར། དེ་ལས་གཞན་པ་ཉིད་ལ་ནི་དེར་ཕྱིན་ནའོ་ཞེས་བྱ་བ་སྨྲས་ཏེ། དེ་ལས་གཞན་པ་ཉིད་ལ་ནི་ཞེས་བྱ་བ་ནི། སྔར་མི་སྣང་བར་གྱུར་པ་ཞེས་སྨོས་པ་ལས་གཞན་པ་ཉིད་དེ། སྣང་བ་ཉིད་ལའོ། །དེར་ཕྱིན་ནས་ཞེས་བྱ་བ་ནི། ཕ་རོལ་གྱི་འགྲམ་ན་སྣང་བ་དེའི་འགྲམ་ཕ་རོལ་དེར་ཕྱིན་ན་བརྐུས་པ་ཡིན་ནོ་ཞེས་བྱ་བའི་ཐ་ཚིག་གོ །རྒྱུན་ལས་བཟློག་བའི་ཕྱོགས་ལ་ཇི་ལྟར་བརྐུས་པ་ཡིན་ཞེ་ན། དེའི་ཕྱིར། རྒྱུན་ལས་བཟློག་པ་ལ་ནི་གྲུ་ཚུགས་ལས་འདས་ནའོ་ཞེས་བྱ་བ་སྨྲས་ཏེ།
རྒྱུན་ལས་བཟློག་སྟེ་རྐུ་བའི་བསམ་པས་ནི་གྲུ་ཚུགས་ལས་འདས་ན་བརྐུས་པ་ཡིན་ནོ། །ཕྱོགས་གང་ནས་གྲུ་ཕུར་བ་ལ་བརྟོད་ཅིང་འདུག་པ་ན་དེའི་ཚེ་གྲུ་པས་གྲུ་དེ་ཕ་རོལ་དུ་བརྐུ་བར་འདོད་ནས་དེ་ནས་ཁྲིད་དེ་ཇི་སྲིད་དུ་བསྒུལ་བའི་ཕྱིར་ཆུ་ལ་བཏང་པའི་གནས་སུ་ཕྱིན་པ་དེ་སྲིད་དུ་ཁྲིད་པར་བྱེད་པའི་ཕྱོགས་དེ་ནི་གྲུ་ཚུགས་ཞེས་བྱ་སྟེ། དེ་ལས་འདས་ན་བརྐུས་པ་ཡིན་ནོ། །གཞན་གྱི་ཞིང་ལ་སོགས་པ་དག་ལ་ཆུ་གཏོང་ངམ། འགོག་པ་དེ་ལ་ཇི་ལྟར་བརྐུས་པར་རིག་པར་བྱ་ཞེ་ན། དེའི་ཕྱིར། གཞན་གྱི་ལས་ཀྱི་མཐའ་དག་ལ་ཆུ་གཏོང་ངམ་འགོག་པ་ལ་རང་གི་ལས་ཀྱི་མཐའ་གྲུབ་པ་སྐྱེད་མ་གཏོགས་པ་དེའི་ཆེད་དུ་དེར་འདུན་པས་གཞན་དུ་གྱུར་ནའོ་ཞེས་བྱ་བ་སྨྲས་ཏེ། གྲུབ་པ་ན་བརྐུས་པ་ཡིན་ནོ། །གང་གྲུབ་པ་ཞེ་ན་དེའི་ཕྱིར། རང་གི་ལས་ཀྱི་མཐའོ་ཞེས་བྱ་བ་སྨྲས་སོ། །གང་གི་ཞེ་ན་དེའི་ཕྱིར། ཆུ་གཏོང་ངམ་འགོག་པ་ཞེས་བྱ་བ་སྨོས་སོ། །གང་དུ་ཞེ་ན། དེའི་ཕྱིར་གཞན་གྱི་ལས་ཀྱི་མཐའ་དག་ལ་ཞེས་བྱ་བ་སྨྲས་སོ། །ཅིའི་ཆེད་དུ་ཞེ་ན་དེའི་ཕྱིར་དེའི་ཆེད་དུ་ཞེས་བྱ་བ་སྨྲས་ཏེ། རང་གི་ལས་ཀྱི་མཐའ་གྲུབ་པའི་ཆེད་དུའོ། །གྲུབ་པ་ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར། སྐྱེད་མ་གཏོགས་པ་ཞེས་བྱ་བ་སྨྲས་ཏེ། སྐྱེད་བཀོལ་བ་ནི་སྐྱེད་མ་གཏོགས་པ་སྟེ། ཞིང་གི་ཡོན་ཏན་ལ་སོགས་པས་རང་གི་ལས་ཀྱི་མཐའ་གྲུབ་པ་གང་ཡིན་པ་དེ་འདིར་བརྩི་བར་མི་བྱའོ། འདི་ལྟར་ཆུ་བཏང་བའམ་བགགས་པ་ལས་གྱུར་པའི་གྲུབ་པ་གང་ཡིན་པ་འདིར་བརྩི་བར་བྱའོ། །གལ་ཏེ་གཞན་གྱི་ལས་ཀྱི་མཐའ་ཡང་གྲུབ་པར་གྱུར་ན་དེའི་ཚེ་དེར་ཅི་ཞིག་བརྐུས་པར་འགྱུར་ཞེ་ན་དེའི་ཕྱིར། གཞན་དུ་གྱུར་པ་ནའོ་ཞེས་བྱ་བ་སྨྲས་ཏེ། གྲུབ་པ་ལས་གཞན་དུ་གྱུར་པ་ནི་གྲུབ་པའི་དགྲར་གྱུར་པ་སྟེ། ཕུང་བར་གྱུར་པའོ། །བསམ་པ་གང་གིས་ཆུ་བཏང་བའམ་བགགས་པས་རང་གི་ལས་ཀྱི་མཐའ་གྲུབ་པ་དང༌། གཞན་གྱི་ལས་ཀྱི་མཐའ་ཕུང་བར་བྱས་ན་བརྐུས་པ་ཡིན་ཞེ་ན་དེའི་ཕྱིར། དེར་འདུན་པས་ཞེས་བྱ་བ་སྨྲས་ཏེ། བདག་གི་ནི་གྲུབ་པར་བྱའོ། །གཞན་གྱི་ནི་ཕུང་བར་བྱའོ་སྙམ་པའི་བསམ་པས་སོ། །འདི་སྐད་བསྟན་ཏེ། གལ་ཏེ་དགེ་སློང་གིས་རང་གི་ལས་ཀྱི་མཐའ་གྲུབ་པར་བྱ་བའི་ཆེད་དུ་གཞན་གྱི་ལས་ཀྱི་མཐའ་དག་ཏུ་ཆུ་དཀོན་པའི་དུས་
སུ་ཆུ་འགོག་པའམ། ཆུ་མོད་པའི་དུས་སུ་ཆུ་གཏོང་བར་བྱེད་པ་རང་གི་ལས་ཀྱི་མཐའ་གྲུབ་པའི་བསམ་པ་དང༌། གཞན་གྱི་ལས་ཀྱི་མཐའ་ཕུང་པར་བྱེད་པའི་བསམ་པས་བྱེད་ལ། རྒྱུ་དེས་རང་གི་ལས་ཀྱི་མཐའ་གྲུབ་ཅིང་གཞན་གྱི་ལས་ཀྱི་མཐའ་ཕུང་བར་གྱུར་ན་དེའི་ཚེ་ཞིང་གི་ཡོན་ཏན་ལས་གྱུར་བའི་སྐྱེད་གྲུབ་པ་མ་གཏོགས་པ་ཆུ་བཏང་བའམ། བགགས་པ་ལས་གྱུར་པའི་རང་གི་ལས་ཀྱི་མཐའ་གྲུབ་པ་གང་ཡིན་པ་དང༌། གཞན་གྱི་ལས་ཀྱི་མཐའ་ཕུང་བར་བྱེད་པ་གང་ཡིན་པ་དེ་གྲུབ་པ་ཉིད་བརྐུས་པ་ཡིན་ནོ།། །།བམ་པོ་བཅུ་པ། གལ་ཏེ་དགེ་སློང་གིས་ཤས་ཐོབ་པར་བྱ་བའི་ཕྱིར་རྐུན་པོ་རྣམས་ལ་ལམ་རྒྱུས་གོ་བར་བྱེད་ན་དེའི་ཚེ་ཇི་ལྟར་བརྐུས་པར་རྣམ་པར་གཞག་ཅེ་ན། དེའི་ཕྱིར། རྐུན་པོ་རྣམས་ལ་དེའི་ཆེད་དུ་ལམ་རྒྱུས་གོ་བར་བྱེད་པ་ལ་ནི་ཤས་ཐོབ་ནའོ་ཞེས་བྱ་བ་སྨྲས་ཏེ། རྐུན་པོ་རྣམས་ལ་ཞེས་བྱ་བ་ནི། ཆོམ་རྐུན་པ་རྣམས་ལའོ། །དེའི་ཆེད་དུ་ཞེས་བྱ་བ་ནི། ཤས་ཐོབ་པར་བྱ་བའི་ཆེད་དུའོ། །ལམ་རྒྱུས་གོ་བར་བྱེད་པ་ལ་ནི་ཞེས་བྱ་བ་ལ། ལམ་རྒྱུས་ནི་ལམ་གྱི་རྒྱུས་ཏེ། ལམ་ཆེ་གེ་མོ་ནས་དེར་འགྲོ་བར་བྱའོ། །དེ་ལྟར་འཇུག་པར་བྱའོ་ཞེས་བྱ་བ་ལ་སོགས་པའོ། །དེ་གོ་བར་བྱེད་པ་ནི་སྨྲ་བར་བྱེད་པ་སྟེ། དེ་ལྟར་ལམ་རྒྱུས་གོ་བར་བྱེད་པ་ལའོ། །ཤས་ཐོབ་ནའོ་ཞེས་བྱ་བ་ནི། རྐུན་པོ་རྣམས་རྐུན་ཤས་ཐོབ་ན་བརྐུས་པ་ཡིན་པའོ། །འདི་སྐད་བསྟན་ཏེ། དགེ་སློང་གིས་རྐུན་ཤས་ཐོབ་པར་བྱ་བའི་ཕྱིར་རྐུན་པོ་རྣམས་ལ་གྲོང་ལ་སོགས་པར་འགྲོ་བ་དང་འཇུག་པ་དང༌། འབྱུང་བ་ལ་སོགས་པའི་རྒྱུས་གོ་བར་བྱེད་ན་དེའི་ཤས་ཐོབ་པ་དེའི་ཚེ་ན་ལྷུང་བ་རྣམ་པར་གཞག་པར་བྱའོ་ཞེས་བྱ་བའི་ཐ་ཚིག་གོ །གལ་ཏེ་དགེ་སློང་གིས་བསྐོར་བས་ས་གཞི་ལ་སོགས་པ་རྐུ་བར་བྱེད་ན་གང་གི་ཚེ་བརྐུས་པར་རིག་པར་བྱ་ཞེ་ན་དེའི་ཕྱིར། ས་གཞི་དང་ཁང་ཁྱིམ་དག་ཡོངས་སུ་བསྐོར་བས་ནི་མཚམས་འབྱོར་ནའོ་ཞེས་བྱ་བ་སྨྲས་ཏེ། རིབ་མ་དང་རྩིག་པ་ལ་སོགས་པས་ཡོངས་སུ་བསྐོར་བའི་ས་གཞི་ལ་སོགས་པ་རྐུ་བའི་བསམ་པས་ཡོངས་སུ་བསྐོར་བ་ལ་ནི་རིབ་མ་ལ་སོགས་པའི་ཕ་ཐོག་ཚུ་ཐོག་གི་མཚམས་གང་ཡིན་པ་འབྱོར་པ་ན་བརྐུས་པར་རིག་པར་བྱའོ། །ཤགས་ཀྱིས་གཞན་གྱི་ནོར་འཕྲོག་པ་ལས་བརྐུས་པ་གང་ཡིན་ཞེ་ན་དེའི་ཕྱིར།
ཤགས་ཀྱིས་གལ་ཏེ་བླའི་གྲྭར་ནི་རྒྱལ་ནའོ་ཞེས་བྱ་བ་སྨྲས་ཏེ། གལ་ཏེ་ཤགས་ཀྱིས་གཞན་གྱི་རྫས་དབྲོག་པར་འདོད་ལ་ཤགས་དེ་ཡང་བླའི་གྲྭར་བཀྱེ་ན་ནི་རྒྱལ་བ་ན་བརྐུས་པ་ཡིན་ནོ། །གལ་ཏེ་འོག་གཟུར་ན་ཕ་རོལ་པོའི་སྦྱོར་བ་ཉིད་བཏང་ནའོ་ཞེས་བྱ་བ་སྨྲས་ཏེ། ཇི་སྟེ་ཤགས་དེའི་འོག་གཟུར་བཀྱེ་ན་ནི་ཤགས་ཟླ་ཕམ་པར་བྱ་བ་ཕ་རོལ་པོའི་སྦྱོར་བ་ཉིད་བཏང་བ་སྤྲོ་བ་བཏང་ཞིང་ཡུས་བཏང་བ་ན་བརྐུས་པ་ཡིན་ནོ། །འདི་སྐད་བསྟན་ཏེ། གལ་ཏེ་འོག་གཟུར་ཡུལ་མིའི་ནང་དུ་ཤགས་འགྱེད་ན་གང་གི་ཚེ་ཕ་རོལ་པོ་ནོར་བདག་གིས་ཤགས་ཀྱི་སྦྱོར་བ་ཐམས་ཅད་ཀྱིས་ཐམས་ཅད་དུ་བཏང་བ་དེའི་ཚེ་ན་དེ་བརྐུས་པ་ཡིན་གྱི། རྒྱལ་བས་ནི་བརྐུས་པར་མི་འགྱུར་རོ། །འོ་ན་དེ་ལྟ་ན་རྒྱལ་ན་ཅིར་འགྱུར་ཞེ་ན་དེའི་ཕྱིར། དེ་ནི་སྦྱོར་བ་ཉིད་དོ་ཞེས་བྱ་བ་སྨྲས་ཏེ། འོག་གཟུར་ཤགས་བ་ཀྱེ་བའི་རྒྱལ་བ་ཕ་རོལ་པོས་སྦྱོར་བ་ཉིད་མ་བཏང་བའི་རྒྱལ་བ་དེ་ནི་ཕམ་པར་འགྱུར་བའི་དངོས་གཞིའི་སྦྱོར་བ་ཉིད་དེ་སྦོམ་པོར་འགྱུར་རོ། །ཕ་རོལ་པོས་སྦྱོར་བ་ཉིད་བཏང་ན་ནི་བརྐུས་པ་ཉིད་དུ་འགྱུར་རོ། །འདི་སྐད་བསྟན་ཏེ། གང་ལ་རྐུ་བའི་དངོས་པོ་ཚང་བ་དེ་ལ་ནི་འོག་གཟུར་ཤགས་རྒྱལ་ན་སྦྱོར་བ་ཉིད་དེ་སྦོམ་པོར་འགྱུར་རོ། །གང་ལ་རྐུ་བའི་དངོས་པོ་མ་ཚང་བ་དེ་ལ་ནི་ཉེས་བྱས་སུ་འགྱུར་རོ། །ཤོ་གམ་གྱི་ས་ལས་འདས་ན་ཞེས་བྱ་བ་སྨོས་པ་དེར་ཤོ་གམ་གྱི་བརྐུས་པ་ཉིད་ནི་བསྟན་ན། དེ་དང་འབྲེལ་པའི་སྤྲོས་པ་བསྡུ་བ་ནི་མ་བྱས་པས་དེའི་ཕྱིར་ད་ནི་ཤོ་གམ་གཞལ་དགོས་པ་དང་འབྲེལ་པ་བྱུང་བ་དང་བཅས་པ་ལྟུང་བར་འགྱུར་བའི་ཚིག་དང༌། ལྟུང་བར་མི་འགྱུར་བའི་ཚིག་གང་དག་རྣམ་པར་འབྱེད་པ་ལས་གསུངས་པ་དེ་དག་བསྡུ་བར་བྱ་སྟེ། རྐུ་སེམས་མེད་པ་ལ་ཤོ་གམ་དུ་གཏོགས་པའི་ཉེས་པ་འབྱུང་བར་དོགས་པར་མི་བྱའོ་ཞེས་བྱ་བ་ལ། དགེ་སློང་གང་ལ་རྐུ་སེམས་མེད་ཅིང་མ་སྐྱེས་པ་དེ་ནི་རྐུ་སེམས་མེད་པ་སྟེ། དགེ་སློང་གང་རྐུ་སེམས་མེད་པ་དེ་ལ་ནི་ཤོ་གམ་དུ་གཏོགས་པ་ཤོ་གམ་གྱི་ཡུལ་དང་ཐ་སྙད་ཀྱི་ཉེས་པ་རྐུ་བ་ཞེས་བྱ་བ་འབྱུང་བར་དོགས་པར་མི་བྱ་སྟེ། དོགས་པ་མེད་པར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་ཤོ་གམ་མི་གཅད་པར་གནང་བ་མེད་ལ་རྐུ་སེམས་མེད་པས་བདག་གི་རྫས་ཤོ་གམ་གཞལ་དགོས་པ་མི་
གཞན་གྱི་ལག་ནས་ཤོ་གམ་གྱི་གནས་ནས་འདའ་བར་བྱེད་པ་དང༌། དགེ་སློང་ཤོ་གམ་མི་གཅད་པར་གནང་ལ་རྐུ་སེམས་མེད་པས། གལ་ཏེ་གཞན་གྱི་རྫས་ཤོ་གམ་གཞལ་དགོས་པ་བདག་གིས་ཤོ་གམ་གྱི་གནས་ནས་འདའ་བར་བྱེད་པ་ལ་ནི་དེའི་ཚེ་ན་མ་བྱིན་པར་ལེན་པར་གཏོགས་པའི་ཉེས་པ་འབྱུང་བ་མེད་དེ། དེ་ལྟར་ནི་རྣམ་པར་འབྱེད་པ་ལས་འདི་སྐད་འབྱུང་སྟེ། དགེ་སློང་ཤོ་གམ་མི་གཅད་པར་གནང་བ་མ་ཐོབ་པ་དག་གིས་བདག་གི་སྣོད་ཤོ་གམ་གཞལ་དགོས་པ་ཤོ་གམ་གྱི་གནས་ནས་བ་ཟླ་བའི་ཕྱིར་ཚོང་པའི་ལག་ཏུ་གཏད་པ་དེ་ལ་ལྟུང་བར་མི་འགྱུར་བའི་ཚིག་གང་ཡིན་པ་དགེ་སློང་དག་དགེ་སློང་དེ་དག་ལ་ནི་ལྟུང་བར་མི་འགྱུར་རོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལྟུང་བར་མི་འགྱུར་བའི་ཚིག་ནི་འདི་ལྟར་ཤེས་ཏེ། གལ་ཏེ་དགེ་སློང་རྣམས་ཀྱི་བསམ་པ་འདི་སྙམ་དུ་ཚོང་པ་འདི་དག་ནི་ཤོ་གམ་སྦྱིན་པ་ལ་སོགས་པས་ཤོ་གམ་པ་རྣམས་ཀྱི་སེམས་ལེན་པར་བྱེད་པ་ཡིན་ནོ་སྙམ་ན་དེ་ལྷན་དགེ་སློང་དེ་ལ་རྐུ་སེམས་མེད་པའི་རིགས་ཀྱི་གཞན་དུ་ནི་མ་ཡིན་ནོ། །གང་དུ་དགེ་སློང་ཤོ་གམ་མི་གཅད་པར་གནང་བ་ཐོབ་པས་ཀྱང་གཞན་གྱི་རྫས་ཤོ་གམ་གྱི་གནས་ནས་བཟླས་ན་ལྟུང་བར་མི་འགྱུར་བའི་ཚིག་གང་ཡིན་པ་ཡང་འབྱུང་སྟེ། དེ་ལ་ཡང་གལ་ཏེ་དགེ་སློང་དེས་རང་གི་རྫས་ཤོ་གམ་མི་གཅད་པར་གནང་གི །གཞན་གྱི་ནི་མ་ཡིན་པར་བྱེ་བྲག་མི་ཤེས་ན། དེའི་ཚེ་ལྟུང་བར་མི་འགྱུར་བའི་ཚིག་ཏུ་རུང་གི །གང་གི་ཚེ་བྱེ་བྲག་ཤེས་པ་དེའི་ཚེ་ན་ནི་ཉེས་པར་འགྱུར་བ་ཁོ་ན་ཡིན་ནོ། །དེ་དག་ཐམས་ཅད་ནི་རྐུ་སེམས་མེད་པ་ཞེས་བྱ་བ་དེས་བསྡུས་པ་ཡིན་པར་རིག་པར་བྱ་སྟེ། མདོ་འདིས་ནི་རྣམ་པར་འབྱེད་པ་ལས་ལྟུང་བར་མི་འགྱུར་བའི་ཚིག་སྣང་བ་གང་ཡིན་པ་དེའི་དགོངས་པ་རྣམ་པར་བཤད་པ་ཡིན་ནོ། །ད་ནི་ཤོ་གམ་གྱི་གནས་ནས་ཤོ་གམ་གཞལ་དགོས་པའི་སྣོད་འདའ་བར་བྱ་བ་ལ་གང་གིས་ཤོ་གམ་གཞལ་བར་བྱ་བ་དེ་བསྟན་པའི་ཕྱིར། གང་གིས་བླངས་བ་ཉིད་ཀྱི་སྣོད་ལས་དེས་སྦྱིན་པར་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། སུས་བླངས་པ་ནི་གང་གིས་བླངས་པ་སྟེ། ཚོང་བ་གང་གིས་དགེ་སློང་ལས་ཤོ་གམ་གཞལ་དགོས་པའི་སྣོད་ཤོ་གམ་གྱི་གནས་ནས་བཟླ་བའི་ཕྱིར་བླངས་པ་གང་ཡིན་པ་དེ་ནི་གང་གིས་བླངས་པ་ཞེས་བྱའོ། །གང་གིས་བླངས་པའི་དངོས་པོ་ནི་གང་
གིས་བླངས་པ་ཉིད་དེ། མནོས་པ་ཉིད་དོ། །གང་ཞིག་ཅེ་ན། སྣོད་དེ་ཉིད་ལས་ལེན་པ་དེས་ཤོ་གམ་སྦྱིན་པར་བྱ་བ་ཉིད་ཡིན་ནོ། །འདི་སྐད་བསྟན་ཏེ། ཚོང་བ་ལ་སོགས་པ་གང་གིས་དགེ་སློང་ལས་ཤོ་གམ་གཞལ་དགོས་པའི་སྣོད་བླངས་པ་དེ་ཉིད་ཀྱིས་དེ་ལ་ཤོ་གམ་སྦྱིན་པར་བྱ་ཞིང༌། དགེ་སློང་གིས་ཀྱང་བསམ་པ་འདི་ལྟ་བུས་གཞན་གྱི་ལག་ཏུ་སྣོད་གཏད་པར་བྱ་སྟེ། འདིས་རང་གི་ཤོ་གམ་སྦྱིན་པར་འགྱུར་རོ་སྙམ་པས་གཏད་པར་བྱའོ། །དེ་ལྟར་ན་རྣམ་པར་འབྱེད་པ་ལས་ལྟུང་བར་མི་འགྱུར་བའི་ཚིག་གཉིས་གྲགས་པ་དེ་རིགས་པ་ཁོ་ན་ཡིན་ཏེ། གཅིག་ནི་དགེ་སློང་གིས་ཚོང་པའི་ལག་ནས་སྣོད་ཤོ་གམ་གྱི་གནས་ནས་བཟླས་པ་གང་ཡིན་པའོ། །གཉིས་པ་ནི་ཆེས་རྒན་བས་གསར་བུའི་ལག་ནས་བཟླས་པ་གང་ཡིན་ནོ། །མདོ་སྔ་མས་བཅོམ་ལྡན་འདས་ཀྱིས་དགེ་སློང་གི་ཤོ་གམ་མི་གཅད་པར་གནང་བ་ཐོབ་པ་དག་གིས་ཚོང་པ་དབང་བའི་རྫས་ཤོ་གམ་གནས་ནས་བཟླས་པ་ལ་ལྟུང་བར་མི་འགྱུར་བར་གསུངས་པ་གང་ཡིན་པ་དེའི་དགོངས་པ་བརྗོད་ནས། ད་ནི་རྣམ་པར་གཞག་པ་བསྟན་པའི་ཕྱིར། གནང་བ་ལ་གཞན་གྱིས་བཟླས་ན་མ་བརྐུས་པ་མ་ཡིན་ནོ་ཞེས་བྱ་བ་སྨྲས་ཏེ། གནང་བ་ལ་ཞེས་བྱ་བ་ནི། ཤོ་གམ་མི་གཅད་པར་གནང་བ་ཐོབ་པ་སྟེ། དབང་པོ་གང་ཡང་རུང་བས་ཁྱོད་ཀྱིས་ཤོ་གམ་གཞལ་མི་དགོས་སོ་ཞེས་གནང་ངོ༌། །གནང་བ་ཤོ་གམ་མི་གཅད་པར་གནང་བ་ཐོབ་པའི་གང་ཟག་གི་ཡུལ་དུ་གྱུར་པ་དེ་ལ་ཚོང་པ་ལ་སོགས་པ་གཞན་གྱི་རྫས་ཤོ་གམ་གྱི་གནས་ནས་བཟླས་ན་མ་བརྐུས་པ་མ་ཡིན་ཏེ། བརྐུས་པ་ཁོ་ན་ཡིན་ནོ། །དེ་ལྟར་ནི་དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་འདའ་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ཏེ། དེ་མདོ་འདིར་བསྡུས་པ་ཡིན་ནོ། །འདིར་འགལ་ཚབས་ཅན་ཞེས་གསུངས་པའི་ཚིག་ཀྱང་གཞི་ཇི་ལྟ་བ་ལས་བྱུང་བ་ཡིན་གྱི། ཉེས་བྱས་ཉིད་ནི་མ་ཡིན་ནོ། །མ་གནང་བས་གཞན་གྱིས་བཟླ་བར་མི་བྱའོ་ཞེས་བྱ་བ་ནི། དགེ་སློང་ཤོ་གམ་མི་གཅོད་པར་མ་གནང་བས་ཚོང་པ་ལ་སོགས་པ་གཞན་གྱི་ཤོ་གམ་གནང་པའམ་གསུག་བྱིན་པ་ལ་སོགས་པས་མི་གཅད་པར་བྱས་པ་དག་གིས་དགེ་སློང་རང་གི་རྫས་ཤོ་གམ་
གཞལ་དགོས་པ་བཟླ་བར་མི་བྱའོ། །དེ་ནི་ཚོང་པ་དག་གིས་དགེ་སློང་དག་རྫས་འདའ་བར་བྱེད་པའི་སྐབས་བསྟན་པ་ཡིན་ཏེ། དགེ་སློང་གིས་སར་ཕྱིན་པའི་ཤོ་གམ་བཟླ་བར་མི་བྱའོ། །དགེ་སློང་གིས་སར་ཕྱིན་པའི་ཤོ་གམ་འདའ་བར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་དེའི་དོན་བསྡུ་བའི་ཕྱིར་མདོ་འདི་བྱས་སོ། །དེ་ནི་མ་བྱིན་པར་ལེན་པའི་བསླབ་པའི་གཞི་དང་འབྲེལ་པ་ནི་མ་ཡིན་ཏེ། ཐབས་དེས་འདའ་བར་བྱེད་པ་ལ་ཉེས་པ་མེད་པའི་ཕྱིར་རོ། །འོན་ཀྱང་ཚུལ་མ་ཡིན་པའི་ཕྱིར་བཀག་སྟེ། འདི་ལྟར་འཇིག་རྟེན་ན་ཁ་ཟེར་བར་འགྱུར་བའི་ཕྱིར་རོ། །དེ་ནི་རྐུན་མའི་ཐབས་དང་གཡོ་ཅན་ཉིད་ཡིན་ཏེ། དགེ་སྦྱོང་འདི་དག་ནི་སྒྱུ་ཐབས་འདིས་རྫས་འདའ་བར་བྱེད་པས་ཐབས་ཀྱིས་རྐུའོ་ཞེས་ཟེར་བ་དེའི་ཕྱིར་འདི་དགག་བ་མཛད་དོ། །གཞན་གྱི་རྫས་ཀྱང་གཞན་གྱིས་བཟླ་བར་མི་བྱ་སྟེ། དེ་ནི་སྔ་མའི་རྗེས་ལས་རྟོགས་པར་བྱའོ། །རྣམ་པ་གཞན་གྱིས་ཀྱང་རྐུན་མའི་ཐབས་ཀྱི་ཉེས་བ་སྤང་བའི་ཕྱིར། མ་ཚོར་བར་འདའ་བར་བྱེད་པ་མི་འགྲུབ་པར་བྱ་བའི་ཕྱིར་འབད་པར་མི་བྱའོ་ཞེས་བྱ་བ་སྨྲས་ཏེ། དགེ་སློང་གིས་མ་ཚོར་མ་རིག་པར་རྫས་འདའ་བར་བྱེད་པ་ནི་མཚོར་བར་འདའ་བར་བྱེད་པའོ། །དེ་མི་འགྲུབ་པར་བྱ་བའི་ཕྱིར་ཞེས་བྱ་བ་ནི་དེ་མི་འགྲུབ་པར་བྱ་བའི་ཕྱིར་ཏེ། མཚོར་བར་གཞན་གྱི་རྫས་བདག་གི་སྣོད་ཀྱིས་འདའ་བར་བྱེད་པ་དེ་མི་འགྲུབ་པར་བྱ་བ་དེའི་ཆེད་དུའོ། །མི་འབད་པར་མི་བྱའོ་ཞེས་བྱ་བ་ནི། འབད་པ་དང་ལྡན་པར་མི་བྱ་སྟེ། འབད་པར་བྱ་བའོ། །འདི་སྐད་བསྟན་ཏེ། དེད་དཔོན་ལ་སོགས་པ་གཞན་གྱིས་བདག་གི་རྫས་བླངས་པ་དང༌། བདག་གི་སྣོད་དུ་གཞན་གྱི་རྫས་འཛུད་པ་དེ་གཉིས་ཀྱིས་མཚོར་བར་ཤོ་གམ་གྱི་གནས་ནས་འདའ་བར་བྱེད་པ་དེ་མི་འགྲུབ་པར་བྱ་བའི་ཆེད་དུ་མི་འབད་པར་མི་བྱ་སྟེ། ཤེས་བཞིན་དུ་འབད་པ་ལྷུར་བླང་བར་བྱའོ་ཞེས་བྱ་བའི་ཐ་ཚིག་གོ །ཇི་ལྟར་འབད་པར་བྱ་བ་དེ་བསྟན་པའི་ཕྱིར་སྲུང་མ་དགེ་སློང་དུ་མ་གཞག་པར་བྱའོ་ཞེས་བྱ་བ་སྨྲས་ཏེ། སྲུང་མ་གཞག་པར་བྱ་བ་ཇི་ལྟ་བུ་ཞིག་ཅེ་ན། དེའི་ཕྱིར་དགེ་སློང་ཞེས་བྱ་བ་སྨྲས་ཏེ། འཁྲུལ་པ་མེད་པའི་ཕྱིར་རོ། །གྲངས་དུ་ཞེ་ན་དེའི་ཕྱིར་དུ་མ་ཞེས་བྱ་བ་སྨྲས་ཏེ། གཉིས་ཡན་ཆད་ནས་བརྩམས་ཏེ་བསྲུང་བའི་
ཕྱིར་ཇི་སྙེད་ཀྱིས་འགྲུབ་པ་དེ་སྙེད་གཞག་གོ་ཞེས་བྱ་བའི་ཐ་ཚིག་གོ །སྲུང་མ་བསོད་སྙོམས་ལ་འགྲོ་བ་མེད་པས་དེའི་ཕྱིར་དེའི་ཟན་བསྐྱལ་བར་བྱ་བ་ཉིད་དོ་ཞེས་བྱ་བ་སྨྲས་ཏེ། སྲུང་མ་དེའི་ཟན་ནི་དེའི་ཟན་ཏེ། དེའི་ཟན་དེ་དགེ་སློང་དག་གིས་བསྐྱལ་བར་བྱ་བ་ཉིད་དོ། །རིགས་པའི་ཕྱིར་དེ་སྐད་བརྗོད་པ་ཡིན་གྱི། བཅོམ་ལྡན་འདས་ཀྱིས་འགའ་ཞིག་ཏུ་བསླབ་པའི་གཞི་བཅས་པ་ནི་མ་ཡིན་ནོ། །སྲུང་མས་ཇི་ལྟར་བསྲུང་བར་བྱ་བ་དེ་བསྟན་པའི་ཕྱིར། དེས་བཟློག་པར་བྱའོ་ཞེས་བྱ་བ་སྨྲས་ཏེ། དགེ་སློང་སྲུང་མ་དེས་གལ་ཏེ་ཚོང་པ་གང་དག་ཤོ་གམ་གཞལ་དགོས་པའི་སྣོད་དེར་འཛུད་པར་བྱེད་དམ། དེ་ནས་འབྱིན་པར་བྱེད་པ་དེ་དག་བཟློག་པར་བྱའོ། །བཟློག་ཏུ་ཟིན་ཀྱང་གལ་ཏེ་མ་བཟློགས་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་བཅུག་པ་ཉིད་བརྗོད་པར་བྱའོ་ཞེས་བྱ་བ་སྨྲས་ཏེ། དགེ་སློང་སྲུང་མ་དེས་ཚོང་པ་དག་གིས་རྫས་བཅུག་པ་ཉིད་བརྗོད་པར་བྱའོ་ཞེས་སྨྲ་བར་བྱའོ། །སུ་དག་ལ་བརྗོད་པར་བྱ་ཞེ་ན། དགེ་སློང་གང་དག་གིས་སྲུང་མ་དེ་གཞག་པ་དེ་དག་ལ་བརྗོད་པར་བྱ་སྟེ། དེ་ནི་ཤུགས་ཀྱིས་ཤེས་པར་བྱའོ། །གལ་ཏེ་སྲུང་མ་མེད་ན་དེའི་ཚེ་ཇི་ལྟར་བྱ་ཞེ་ན་དེའི་ཕྱིར། མེད་ན་མཚན་མ་གདབ་པོ་ཞེས་བྱ་བ་སྨྲས་ཏེ། སྲུང་མ་མེད་ན་བསོད་སྙོམས་ལ་སོགས་པ་འགྲོ་བའི་དགེ་སློང་གིས་བདག་བསོད་སྙོམས་ལ་ཞུགས་པ་ན་ཤོ་གམ་གཞལ་དགོས་པ་ལ་ལས་མི་ཕྱུང་མི་བཅུག་པར་བྱ་བའི་ཕྱིར་རང་གི་སྣོད་དག་ལ་མཚན་མ་གདབ་པར་བྱའོ། །ཁྱེར་ཏེ་འོངས་པ་ལ་དྲི་བར་བྱའོ་ཞེས་བྱ་བ་ནི། གཞན་གྱི་ལྷུང་བཟེད་ཀྱི་སྣོད་ལ་སོགས་པ་གང་ཡང་རུང་བ་ཤོ་གམ་གཞལ་དགོས་པ་དག་ཤོ་གམ་གྱི་གནས་ནས་བཟླ་བའི་ཕྱིར། ཁྱེར་ཏེ་འོངས་པ་ལ་ལེན་པ་པོས་དེ་ལ་འདི་ན་ཤོ་གམ་གཞལ་དགོས་པའི་རྫས་ཆུང་ཟད་མེད་དམ་ཞེས་དྲི་བར་བྱའོ། །གལ་ཏེ་ཚོང་པས་གསེར་ལ་སོགས་པ་དག་དགེ་སློང་གི་གཏུར་བུར་བཅུག་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར། གཞན་གྱིས་དོར་བར་མི་འགྲུབ་ན་རེག་པ་ཉིད་དུ་བྱའོ་ཞེས་བྱ་བ་སྨྲས་ཏེ། གལ་ཏེ་རང་གིས་རེག་བར་མ་བྱས་ན་རྣམ་པ་གཞན་གྱིས་གསེར་ལ་སོགས་པ་དོར་བ་དབྱུང་བ་མི་འགྲུབ་ན་དེའི་ཚེ་དེ་དབྱུང་བའི་ཆེད་དུ་རང་ཉིད་ཀྱིས་རེག་པ་ཉིད་དུ་བྱ་སྟེ། དེ་ལ་ནི་ལྟུང་བྱེད་འབའ་ཞིག་ཏུ་འགྱུར་བ་བག་
ཡངས་སུ་གནང་ངོ༌། །དཀོན་མཆོག་གསུམ་ལ་སོགས་པ་དག་ལ་བསྔོས་པའི་རྫས་ཀྱི་ཆོ་ག་གང་ཡིན་པ་དེ་སྨྲ་བར་འདོད་ནས་མ་ཕུལ་ཡང་ངེས་པ་སྐྱེས་ན་ཕུལ་བ་ཉིད་ཡིན་ནོ་ཞེས་བྱ་བ་སྨྲས་ཏེ། ཤོ་གམ་གྱི་གནས་ནས་འདའ་བའི་ཕྱིར་རྫས་གང་བླངས་པ་དེ་དཀོན་མཆོག་གསུམ་ལ་སོགས་པ་ལ་ལུས་དང་ངག་གིས་མ་ཕུལ་ཡང་བདག་གིས་འདི་དཀོན་མཆོག་གསུམ་ལ་སོགས་པ་ལ་ཕུལ་ལོ་སྙམ་དུ་སེམས་ལ་ངེས་པ་སྐྱེས་ཤིང་ངེས་པ་ཐོབ་ན་རྫས་དེ་དཀོན་མཆོག་གསུམ་ལ་སོགས་པ་ལ་ཕུལ་བ་ཉིད་ཡིན་པར་ཤེས་པར་བྱའོ། །དེ་བཟླས་ན་གཞན་གྱི་རྫས་བཟླས་པའི་ཆོ་ག་དེ་ཉིད་འདིར་རིག་པར་བྱའོ། །དེ་དག་གིས་རྫས་གནང་བར་བྱ་བའི་ཕྱིར་ཕ་མའི་བསྔགས་པ་བརྗོད་དོ་ཞེས་བྱ་བ་ལ། ཕ་མ་དག་གི་ཆེད་དུ་བསྐུར་བའི་རྫས་ནི་དེ་དག་གི་རྫས་ཏེ། དེ་དག་གི་རྫས་དེའི་ཤོ་གམ་གནང་བར་བྱ་བ་ནི་གནང་བར་བྱ་བའི་ཕྱིར་རོ། །དེའི་ཕྱིར་ཕ་མའི་བསྔགས་པ་བརྗོད་པར་བྱ་སྟེ། ཕ་དང་མ་ནི་ཕ་མ་སྟེ་དེ་གཉིས་ཀྱི་བསྔགས་པ་བརྗོད་པ་མདོ་སྡེ་ལས་གསུངས་པ་ཁྱིམ་གང་ན་ཕ་མ་ལ་མཆོད་པ་བྱེད་པའི་ཁྱིམ་དེའི་སློབ་དཔོན་དང་བཅས་པ་ཉིད་ཡིན་ཚངས་པ་དང་བཅས་པ་ཉིད་ཡིན་ཞེས་བྱ་བ་ལ་སོགས་པ་ངག་བརྗོད་པར་བྱའོ་ཞེས་བྱ་བའི་ཐ་ཚིག་གོ །དཀོན་མཆོག་རྣམས་ཀྱི་ཡང་ངོ་ཞེས་བྱ་བ་ནི་ཡང་ངོ་ཞེས་བྱ་བའི་སྒྲ་ནི་དེ་དག་གི་རྫས་གནང་བར་བྱ་བའི་ཕྱིར་བསྔགས་པ་བརྗོད་དོ་ཞེས་བྱ་བའི་རྗེས་སུ་བསྙགས་པའི་ཕྱིར་ཏེ། སངས་རྒྱས་དང་ཆོས་དང་དགེ་འདུན་དཀོན་མཆོག་གསུམ་པོ་དེ་དག་གི་རྫས་གནང་བར་བྱ་བའི་ཕྱིར་དཀོན་མཆོག་གསུམ་མངའ་བའི་རྫས་ཀྱི་ཤོ་གམ་གནང་བར་བྱ་བའི་ཆེད་དུ་དཀོན་མཆོག་རྣམས་ཀྱི་བསྔགས་པ་ཡང་བརྗོད་པར་བྱའོ་ཞེས་བྱ་བའི་ཐ་ཚིག་གོ །དཀོན་མཆོག་གསུམ་ལ་སོགས་པའི་བསྔགས་པ་བརྗོད་ཀྱང་མ་གནང་ན་མ་ཐོགས་པར་སྦྱིན་པར་བྱའོ་ཞེས་བསྟན་པའི་ཕྱིར་རོ། །དོན་དུ་གང་ཡང་རུང་བའི་དཀོར་གང་ཡང་རུང་བ་ལས་སྐྱིན་པོར་བླང་བའི་ཆོས་སུ་སྦྱིན་པར་བྱའོ་ཞེས་བྱ་བ་སྨྲས་ཏེ། ཤོ་གམ་སྦྱིན་པ་མི་ཐོགས་པར་སྦྱིན་པར་བྱ་བའི་དོན་དུ་སངས་རྒྱས་ལ་སོགས་པ་དཀོན་མཆོག་གང་ཡང་རུང་བའི་དཀོར་ཟ་འུག་ལ་སོགས་པ་དག་སངས་རྒྱས་དང་ཆོས་དང་དགེ་འདུན་དཀོན་མཆོག་གང་ཡང་རུང་བ་ལས་སྐྱིན་པོར་བླང་བའི་ཆོས་སུ་ཤོ་གམ་སྦྱིན་པར་བྱ་
པ་ལ་ཉེས་པ་མེད་དོ། །སྐྱིན་པོའི་ཆོས་ཞེས་བྱ་བ་ནི། དེས་སྔ་སྐྱིན་དུ་བླངས་པ་ཡིན་པས་སྐྱིན་པོར་བླང་བའོ། །དེ་ཉིད་ཆོས་དེ་ངོ་བོ་ཉིད་འཛིན་པའི་ཕྱིར་རོ། །དེའི་ཕྱིར་སྐྱིན་པོར་བླང་བའི་ཆོས་དེ་སྐྱིན་པོར་བླང་བའི་ཆོས་དེས་གང་ལ་སྔ་སྐྱིན་དུ་བླངས་པ་དེ་ལ་སྐྱིན་པ་བསབ་པར་བྱའོ་ཞེས་བྱ་བའི་ཐ་ཚིག་གོ །ཤོ་གམ་གཞལ་བ་ལ་སོགས་པའི་ཁ་མཆུར་འགྱུར་བ་བཟློག་པའི་ཕྱིར། ཤོ་གམ་གཞལ་དགོས་པ་དང་བཅས་པ་འགྲོ་བར་མི་བྱའོ་ཞེས་བྱ་བ་སྨྲས་ཏེ། ཤོ་ག་མ་གཞལ་དགོས་པར་འགྱུར་པ་དང་བཅས་པའི་དགེ་སློང་ཤོ་གམ་གཞལ་དགོས་པ་དང་བཅས་པ་སྟེ། དེ་ལམ་དུ་འགྲོ་ཞིང་འཇུག་པར་མི་བྱ་བའོ། །འདི་སྐད་བསྟན་ཏེ། དགེ་སློང་ཤོ་གམ་གཞལ་དགོས་པའི་རྫས་དང་བཅས་པ་ལམ་དུ་འཇུག་པར་མི་བྱའོ། །གང་ལམ་དུ་འཛུད་ན་དེ་ལ་ཉེས་བྱས་སུ་འགྱུར་ཏེ། འདིར་ལམ་རྒྱང་གྲགས་ཀྱི་བདག་ཉིད་གཅིག་ཏུ་སོང་ན་དེ་ལ་རྒྱང་གྲགས་རེ་རེ་ཞིང་ཉེས་བྱས་ཀྱི་དངོས་གཞིར་གྱུར་པ་རེ་རེར་རོ། །རྒྱང་གྲགས་ཕྱེད་ཕྱེད་ཅིང་དེའི་སྦྱོར་བར་གྱུར་པའི་ཉེས་བྱས་ཕྲ་མོར་འགྱུར་རོ། །ཚིག་དེ་ནི་ཕོངས་པའི་དུས་དག་ཏུ་དམིགས་ཀྱིས་བསལ་བ་དང་བཅས་པ་ཡིན་ཏེ། དེར་དགེ་འདུན་གྱི་ལ་སོགས་པ་གསེར་གྱི་མཐར་ཐུག་པར་ཡང་བསྐུར་བར་བྱའོ་ཞེས་གསུངས་པའི་ཕྱིར་རོ། །ཤོག་མ་གཞལ་དགོས་པ་དང༌། ཤོ་གམ་གཞལ་མི་དགོས་པའི་རྫས་ཀྱི་བྱེ་བྲག་བསྟན་པའི་ཕྱིར། དེ་མ་ཡིན་པ་ཉིད་ནི་བ་ལང་གིས་ལྕི་བ་བཙིར་བས་ཀྱང་ཁ་བསྒྱུར་བ་དང༌། ཁ་ཚར་དང་ཕུན་ཚར་བཅད་པ་ཡང་ངོ་ཞེས་བྱ་བ་སྨྲས་ཏེ། དེ་མ་ཡིན་པ་ཉིད་ཅེས་བྱ་བ་ནི། ཤོ་གམ་གཞལ་དགོས་པ་མ་ཡིན་པ་ཉིད་དོ། །གོས་ཁ་བསྒྱུར་བ་ནི་ཐ་ན་བ་ལང་གི་ལྕི་བ་བཙིར་བས་ཀྱང་ཁ་བསྒྱུར་བ་ནི་ཤོ་གམ་གཞལ་དགོས་པ་མ་ཡིན་པ་ཉིད་དེ། གཞལ་མི་དགོས་སོ། །ཁ་མ་བསྒྱུར་བ་ཡང་ཁ་ཚར་དང་ཕུན་ཚར་བཅད་པ་ཡང་ཤོ་གམ་གཞལ་དགོས་པ་མ་ཡིན་པ་ཉིད་དེ་གཞལ་མི་དགོས་སོ། །དེ་ལ་ཁ་ཚར་བཅད་པ་ཞེས་བྱ་བ་ནི། རས་དང་སྣམ་བུ་ལ་སོགས་པ་བཏགས་ཟིན་པའི་ཆིབ་ལོགས་ཀྱི་ཁ་ཚར་བཅད་པའོ། །ཕུན་ཚར་བཅད་པ་ཞེས་བྱ་བ་ནི་དེ་དག་དང་པོ་འཐག་པ་རྩོམ་པའི་སྲོག་ཤིང་གི་སྦུབས་ཀྱི་ཕུན་ཚར་བཅད་པའོ། །
ཡང་ངོ་ཞེས་བྱ་བའི་སྒྲས་ནི་དེ་མ་ཡིན་པ་ཉིད་ཅེས་བྱ་བར་སྦྱར་ཏེ། དེ་མ་ཡིན་པ་ནི་དེ་མ་ཡིན་པའོ། །དེ་མ་ཡིན་པའི་དངོས་པོ་ནི་དེ་མ་ཡིན་པ་ཉིད་དེ། ཤོ་གམ་གཞལ་དགོས་པ་མ་ཡིན་པ་ཉིད་ཅེས་བྱ་བའི་ཐ་ཚིག་གོ །མདོ་དེ་གཉིས་ནི་གཉི་ག་ཡང་སོ་སོར་ཤོ་གམ་གཞལ་དགོས་པ་མ་ཡིན་པ་ཉིད་ཀྱི་རྒྱུ་ཡིན་ཏེ། ཁ་བསྒྱུར་བ་དང་བཅད་པའོ། །དེ་གཉི་ག་ཡང་མངོན་སུམ་ཁོ་ནར་བལྟ་དགོས་པ་བསྟན་པའི་ཕྱིར། མ་མཐོང་བ་ལ་བློ་དེ་མི་འཆགས་སོ་ཞེས་བྱ་བ་སྨྲས་ཏེ། དངོས་པོ་མ་མཐོང་བ་ལ་དེ་ཁ་བསྒྱུར་ཏ་མ་འོན་ཏེ་མ་བསྒྱུར་བར་བཅད་དམ་འོན་ཏེ་མ་བཅད་སྙམ་པའི་བློ་དེ་མི་འཆགས་པས་མི་གནང་ངོ༌། །འདིར་གཞུང་ནི་རང་གི་མིག་གིས་བལྟ་བར་བྱའོ། །མ་བལྟས་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ཤོ་གམ་གྱི་སྐབས་སྤྲོས་པ་དང་བཅས་པ་དེ་བཤད་ཟིན་ཏོ།། །།རྣམ་པར་འབྱེད་པ་ལས་གསུངས་པ་འབའ་ཞིག་ཅུང་ཟད་བརྗོད་པར་བྱ་སྟེ། གཞན་གྱི་སྤྱོད་པ་བརྟོལ་བར་མི་བྱའོ་ཞེས་བྱ་བ་ལ། གཞན་གྱི་སྤྱོད་པ་ཞེས་བྱ་བ་ནི། གཞན་གྱི་འཚོ་བའི་ཐབས་སོ། །བརྟོལ་བར་མི་བྱའོ་ཞེས་བྱ་བ་ནི། དགེ་སློང་གིས་དེ་བདག་པོ་ལ་སོགས་པ་གཞན་ལ་འདམ་པར་མི་བྱའོ། །རང་གི་འམ་གཞན་གྱི་ཤོ་གམ་གཞལ་དགོས་པའི་རྫས་རང་ངམ། གཞན་གྱི་ཤོ་གམ་གྱི་གནས་ནས་འདའ་བར་བྱེད་པ་གང་ཡིན་པ་དེ་དགག་པ་མཛད་པའི་ཕྱིར་གཞན་གྱི་སྤྱོད་པ་བརྟོལ་བར་བྱེད་པ་འདི་ཡང་བཀག་པར་རིག་པར་བྱའོ། །ཡིད་གཅུགས་པས་གཞན་གྱི་རྫས་བླང་བ་རྣམ་བར་གཞག་པའི་རྒྱུ་བསྟན་པའི་ཕྱིར། ཡིད་གཅུགས་པ་མ་ཡིན་པ་ལ་ཡིད་གཅུགས་པ་ཉིད་དུ་མི་བྱའོ་ཞེས་བྱ་བ་སྨྲས་ཏེ། ཡིད་གཅུགས་པ་མ་ཡིན་པའི་གང་ཟག་ལ་ལྷུང་བཟེད་དང་ཆོས་གོས་ལ་སོགས་པ་བླང་བདག་གིས་ཡིད་གཅུགས་པ་ཉིད་དུ་མི་བྱའོ། །ཚིག་དེ་ནི་གཞན་གྱི་ཚིག་གི་སྐབས་བཟློག་པའི་ཕྱིར་རོ། །ཡིད་གཅུགས་པ་མ་ཡིན་པ་ཉིད་ཀྱི་མཚན་ཉིད་བརྗོད་པར་འདོད་ནས་དེ་ཉིད་ནི་འོག་མ་ལ་གོང་མའོ་ཞེས་བྱ་བ་སྨྲས་ཏེ། དེ་ཉིད་ནི་ཞེས་བྱ་བ་ནི་ཡིད་གཅུགས་པ་མ་ཡིན་པ་ཉིད་ནའོ། །འོག་མ་ལ་ཞེས་བྱ་བ་ནི་ཡིད་གཅུགས་པ་ཐ་མ་ལའོ། །གོང་མའོ་ཞེས་བྱ་བ་ནི། ཡིད་གཅུགས་པ་ཉིད་ཆན་པོ་མི་བྱ་བའོ། །འདི་སྐད་བསྟན་ཏེ།
མཛའ་བཤེས་ཐམ་ལ་ཡིད་གཅུགས་པ་འབྲིང་དང་ཆེན་པོ་མི་བྱའོ། །འབྲིང་ལ་ནི་ཆེན་པོ་མི་བྱའོ། །ཡིད་གཅུགས་པར་མི་བྱ་བའི་རྣམ་པར་གཞག་པ་བྱས་ནས་ད་ནི་ཡིད་གཅུགས་པར་བྱ་བའི་རྣམ་པར་གཞག་པ་དེའི་རྒྱུས་བསྟན་པའི་ཕྱིར་དེ་ནི་སྡུག་པ་དང་ཡིད་དུ་འཐད་པ་དང༌། བླ་མ་དང་བསྒྲུབ་པར་འོས་པ་དང་མཆོད་པར་འོས་པ་དང༌། བསྟོད་པར་འོས་པ་དང༌། བླངས་ན་དགའ་བའོ་ཞེས་བྱ་བ་སྨྲས་ཏེ། སྡུག་པ་ཞེས་བྱ་བ་ནི་འདིར་འགྲོགས་བཤེས་ལ་བྱའོ། །ཡིད་དུ་འཐད་པ་ཞེས་བྱ་བ་ནི་སྨོས་འདྲིན་ནོ། །བླ་མ་ཞེས་བྱ་བ་ནི་སློབ་དཔོན་དང་མཁན་པོའོ། །བསྒྲུབ་པར་འོས་པ་ཞེས་བྱ་བ་ནི། གང་གི་ཚུལ་ཁྲིམས་དང་ཐོས་པ་དང༌། གཏོང་པ་ལ་སོགས་པའི་ཡོན་ཏན་རྗེས་སུ་དྲན་ཞིང་རྗེས་སུ་དྲན་ན། དེའི་ཡོན་ཏན་དེ་དག་རྗེས་སུ་སྒྲུབ་པར་བྱེད་པའོ། །མཆོད་པར་འོས་པ་ཞེས་བྱ་བ་ནི། གང་སྦྱིན་པ་དང་བསྙེན་བཀུར་ལ་སོགས་པས་མཆོད་པར་བྱའོ། །བསྟོད་པར་འོས་པ་ཞེས་བྱ་བ་ནི། གང་ཚུལ་ཁྲིམས་དང༌། ཐོས་པ་དང༌། གཏོང་བ་ལ་སོགས་པས་བསྟོད་པར་བྱ་བའོ། །བླངས་ན་དགའ་བའོ་ཞེས་བྱ་བ་ནི། གང་ལ་བདག་གིས་དེའི་ལྷུང་བཟེད་དང་ཆོས་གོས་ལ་སོགས་པ་དག་བླངས་ན་དེ་དགའོ་སྙམ་དུ་ཡིད་ཆེས་པ་ཡོད་པ་སྟེ། དེ་ནི་ཡིད་གཅུགས་པར་བྱ་བ་ཡིན་ནོ། དེ་ལྟར་སྡུག་པ་ལ་སོགས་པ་དེ་དག་ཐམས་ཅད་ནི་ཡིད་གཅུགས་པར་བྱ་བ་ཡིན་པར་རིག་པར་བྱ་སྟེ། ཆུང་ངུ་དང་འབྲིང་དང་ཆེན་པོ་ལ་སོགས་པའི་བྱེ་བྲག་གིས་སོ། །ལག་པོད་ཀྱི་ལས་ཀྱིས་ལས་བྱ་ཞིང་བསོད་ནམས་ཀྱི་བློས་ཀྱང་སྟེ། གླ་རྔན་གྱིས་ནི་མ་ཡིན་ནོ་ཞེས་བྱ་བ་ལ། ལག་པོད་ཀྱི་ལས་ཀྱིས་ཞེས་བྱ་བ་ནི། བཙོ་བླག་གི་ལས་ལ་སོགས་པས་སོ། །ལས་ཞེས་བྱ་བ་ནི། དྲུབ་པ་ལ་སོགས་པའི་ལས་ཏེ་དེ་བྱའོ། །བསོད་ནམས་ཀྱི་བློས་ཀྱང་སྟེ་ཞེས་བྱ་བ་ཡང་ལས་བྱའོ་ཞེས་བྱ་བར་སྦྱར་རོ། །གླ་རྔན་གྱིས་ནི་མ་ཡིན་ནོ་ཞེས་བྱ་བ་ནི་རིན་གྱིས་མ་ཡིན་ནོ་ཞེས་བྱ་བའི་ཐ་ཚིག་གོ །ཡུལ་གྱི་ངེས་པའི་ཚིག་ནི་འདྲིད་པ་མ་ཡིན་ནོ་ཞེས་བྱ་བ་ལ། ཡུལ་གྱི་ངེས་བའི་ཚིག་ཅེས་བྱ་བ་ནི། ཡུལ་སོ་སོའི་སྐད་དོ། །འདྲིད་པ་མ་ཡིན་ནོ་ཞེས་བྱ་བ་ནི། བསླུ་བར་མི་འགྱུར་རོ་ཞེས་བྱ་བའི་ཐ་ཚིག་གོ །དེ་ལྟར་ཡང་
རྣམ་པར་འབྱེད་པ་ལས་བཅོམ་ལྡན་འདས་ཀྱིས། དགེ་སློང་མ་ཁྱོད་ཀྱིས་ཨ་བ་སྭ་ཐ་ཞེས་གང་བརྗོད་པ་ཅིའི་ཐ་ཚིག་ཅེས་སྨྲས་པ་དང༌། གསོལ་པ། བཙུན་པ་འཇིག་རྟེན་ན་ལྷུང་ངོ་ཞེས་བགྱི་བ་གང་ལགས་པའི་ཐ་ཚིག་གོ །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་ཡུལ་གྱི་ངེས་པའི་ཚིག་གིས་ནི་ལྟུང་བར་མི་འགྱུར་རོ་ཞེས་གསུངས་པ་ཡིན་ནོ། །རྐུ་བའི་ཤན་བསལ་བའི་ཕྱིར། ལྷུང་བ་བླངས་ན་ཡུན་རིང་དུ་མི་བསྲེལ་ལོ་ཞེས་བྱ་བ་སྨྲས་ཏེ། ལྷུང་བ་ཞེས་བྱ་བ་ནི། ཆོས་གོས་ལ་སོགས་པ་ཕྱི་རོལ་དུ་ལྟུང་བའོ། །བླངས་ན་ཞེས་བྱ་བ་ནི་གཞན་གྱི་ཆོས་གོས་ལ་སོགས་པ་ཕྱི་རོལ་དུ་ལྟུང་བ་དགེ་སློང་གིས་མི་འཁྱམས་པར་བྱ་བའི་བསམ་པས་རེ་ཞིག་བླངས་པའོ། །ཡུན་རིང་དུ་མི་བསྲེལ་ལོ་ཞེས་བྱ་བ་ལ། འདིར་ཡུན་རིང་པོ་ཞེས་བྱ་བ་ནི་དུས་ཇི་སྲིད་ཀྱིས་ན། འདིས་བཅབས་སོ་སྙམ་དུ་གཞན་དོགས་པ་སྐྱེ་བའི་དུས་དེ་སྲིད་ནི་ཡུན་རིང་བ་ཉིད་དུ་རིགས་པར་བྱ་སྟེ། དེ་སྲིད་དུ་བསྲེལ་བར་མི་བྱའོ། །བདག་པོ་གང་ཡིན་པ་མི་ཤེས་ན་སུ་ལ་གཏད་པ་ཉིད་དུ་བྱ་ཞེན་དེའི་ཕྱིར། དེ་དགེ་སྐོས་ལ་གཏད་པ་ཉིད་དུ་བྱའོ་ཞེས་བྱ་བ་སྨྲས་ཏེ། ཆོས་གོས་ལ་སོགས་པ་ལྟུང་བ་བླངས་པ་དེ་དགེ་འདུན་གྱི་དགེ་སྐོས་ལ་གཏད་པ་ཉིད་དུ་བྱའོ། །དེས་ཇི་ལྟར་བྱ་ཞེ་ན་དེའི་ཕྱིར། དེས་རབ་ཏུ་བྱུང་བའི་ཡིན་པར་དོགས་ན་དགེ་འདུན་ལ་བསྟན་པར་བྱའོ་ཞེས་བྱ་བ་སྨྲས་ཏེ། དགེ་སྐོས་དེས་གལ་ཏེ་མཚན་མ་འགའ་ཞིག་ལས་དེ་རབ་ཏུ་བྱུང་བའི་ཡིན་པར་དོགས་པ་སྐྱེས་ན་དེའི་ཚེ་རྫས་དེའི་བདག་པོ་ངེས་པར་ཤེས་པར་བྱ་བའི་ཕྱིར། དགེ་འདུན་ལ་བསྟན་པར་བྱའོ། །གལ་ཏེ་རྫས་དེའི་བདག་པོ་མ་བྱུང་ན་དེའི་ཚེ་ཇི་ལྟར་བྱ་ཞེ་ན་དེའི་ཕྱིར། བདག་པོ་མ་བྱུང་ན་གཟར་ཐག་ལ་བཏགས་ཏེ་གཞག་གོ་ཞེས་བྱ་བ་སྨྲས་ཏེ། གལ་ཏེ་བདག་པོ་འགའ་ཡང་འདི་བདག་གིའོ་ཞེས་བདག་ཉིད་ཉེ་བར་སྟོན་པར་མི་བྱེད་ཅིང་དེའི་བདག་པོ་མ་བྱུང་ན་དེའི་ཚེ་དགེ་སྐོས་ཀྱིས་རྫས་དེ་གཟར་ཐག་ཅེས་བྱ་བ་ཐག་པའི་བྲེང་ལ་བཏགས་ཏེ་གཞག་གོ །དེ་ལ་ཆོས་གོས་ལ་སོགས་པ་བསྐམ་པ་ལ་སོགས་པའི་ཆེད་དུ་གཟར་ཏེ་འཇོག་པས་གཟར་ཐག་ཅེས་བྱ་སྟེ། དེ་ཡང་ཐམས་ཅད་ཀྱིས་མངོན་སུམ་དུ་མཐོང་བར་བྱ་བའི་ཕྱིར། མངོན་པའི་གནས་སུ་ཀ་བ་ལ་སོགས་པ་ལ་གདགས་པར་བྱའོ། །
རྐུའོ་ཞེས་སྐུར་པ་འདེབས་པ་སྤང་བའི་ཕྱིར། ནད་པས་མ་གནང་བ་དེ་ལ་སྨན་མི་བསླང་ངོ་ཞེས་བྱ་བ་སྨྲས་ཏེ། ནད་པས་མ་སྤྲིང་བའི་གང་ཟག་དེ་ལ་ནད་གཡོག་གམ་གཞན་གྱིས་སྨན་མི་བསླང་ངོ༌། །མ་བྱིན་པར་ལེན་པའི་ཕམ་པར་འགྱུར་བའི་རྣམ་པར་འབྱེད་པའོ་ཞེས་བྱ་བ་མ་བྱིན་པར་ལེན་པའི་ཕམ་པར་འགྱུར་བའི་སྐབས་རྣམ་པར་འབྱེད་པ་ལས་འབྱུང་བ་རྫོགས་སོ།། །།མ་བྱིན་པར་ལེན་པ་རྣམ་པར་འབྱེད་པའི་སྐབས་བཤད་ནས། ད་ནི་ཕན་ཚེགས་ཀྱི་སྐབས་བརྗོད་པར་བྱ་སྟེ། ཡོངས་སུ་གཟུང་བ་དང་བཅས་པ་གནང་བ་ལས་གཞན་པའི་ཐབས་ཀྱིས་བདག་གིར་མི་བྱའོ་ཞེས་བྱ་བ་ནི། ཆོམ་རྐུན་པ་དག་གིས་འདྲོན་པ་བཅོམ་པ་དང༌། ཡོངས་སུ་འཛིན་པ་དང་བཅས་པའི་དུར་ཁྲོད་དང༌། འཇིག་རྟེན་པའི་ལྷ་ཁང་དང༌། སྲོག་ཤིང་གི་དབང་ཕྱུག་དང༌། དེ་ལྟ་བུ་ལ་སོགས་པ་ཡོངས་སུ་བཟུང་བ་དང་བཅས་པའི་རྫས་གང་ཡིན་པ་དེ་བདག་པོས་གནང་བ་ལས་གཞན་པའི་ཐབས་འདི་ཕྱག་དར་ཁྲོད་དོ་ཞེས་བྱ་བ་དང༌། འདི་ནི་ངས་འཇིག་རྟེན་པའི་ལྷ་ཁང་བརྩིགས་པ་ལས་འབྱོར་པར་གྱུར་པའི་ཕྱིར་ངའི་ཡིན་ནོ་ཞེས་བྱ་བ་ལ་སོགས་པའི་ཐབས་ཀྱིས་བདག་གིར་མི་བྱའོ། །བདག་གིར་ཐོབ་པར་མི་བྱའོ། །ཅི་དགེ་སློང་གིས་རྫས་རྐུན་པོ་ལ་སོགས་པས་ཕྲོགས་པ་ལ་རང་གིར་འདུ་ཤེས་ཀྱི་ནན་ཁུགས་ཀྱིས་ཀྱང་དགུག་པར་བྱའམ་ཞེ་ན་མ་ཡིན་ཏེ་དེའི་ཕྱིར། བདག་གིར་བྱས་པ་དགུག་པར་མི་བྱའོ་ཞེས་བྱ་བ་སྨྲས་ཏེ། བདག་གིར་བྱས་པ་ཞེས་བྱ་བ་ནི། རྐུན་པོ་ལ་སོགས་པ་གཞན་གྱི་རྫས་གང་ཡིན་པ་རྐུ་འཕྲོག་ལ་སོགས་པས་བདག་གིར་བསྒྲུབས་པ་སྟེ། དེ་ནི་འདིར་བདག་གིར་བྱས་པ་ཞེས་བྱའོ། །སྦྱིན་པ་ལ་སོགས་པས་ཐོབ་པ་གང་ཡིན་པ་དེ་ནི་འདིར་བདག་གིར་བྱས་པ་མ་ཡིན་ཏེ། འདི་ལྟར་འཇིག་རྟེན་ན་རྫས་མི་བདོག་པ་ལས། རྐུ་འཕྲོག་པ་ལ་སོགས་པས་རང་ཉིད་ཀྱིར་བསྒྲུབས་པ་གང་ཡིན་པ་དེ་ནི་བདག་གིར་བྱས་པ་ཞེས་གྲགས་པ་ཡིན་ཏེ། བདག་གིར་བྱེད་པ་ཙམ་དང་འབྲེལ་པའི་ཕྱིར་རོ། །བྱིན་ལེན་ལ་སོགས་པས་ཐོབ་པ་གང་ཡིན་པ་དེ་ལ་ནི་སྦྱིན་པ་ལ་སོགས་པ་ལ་ལྟོས་པ་ཡང་ཡོད་པས། དེས་ན་འདིར་རྐུ་འཕྲོག་ལ་སོགས་པས་བདག་གིར་བྱས་པ་གང་ཡིན་པ་དེ་ཁོ་ན་
བདག་གིར་བྱས་པ་ཡིན་པར་ཤེས་པར་བྱའོ། །དགུག་པར་མི་བྱའོ་ཞེས་བྱ་བ་ལ། དགུག་པ་ཞེས་བྱ་བ་ནི་རྒྱལ་པོ་ལ་གསོལ་པ་ལ་སོགས་པའི་ནན་ཁུགས་ཀྱིས་འགུགས་པ་ལ་བྱའི། ཉོ་བ་ལ་སོགས་པས་འགུགས་པ་ལ་ནི་མི་བྱ་སྟེ། འདི་ལྟར་ཉོ་བ་ལ་སོགས་པ་ནི་འོག་ནས་གནང་བར་འབྱུང་བའི་ཕྱིར་རོ། །འདིར་ནི་རང་གི་འདུ་ཤེས་ཀྱིས་འགུགས་པ་དེ་དགག་པར་མཛད་ཀྱི། གཞན་གྱིར་འདུ་ཤེས་པས་འགུགས་པ་ནི་སྔར་ཕམ་པར་འགྱུར་བ་ལ་སོགས་པའི་ཁ་ན་མ་ཐོ་བར་བསྟན་པ་ཁོ་ན་ཡིན་ནོ། །དེ་བས་ན་རང་གིར་འདུ་ཤེས་པས་རང་གི་རྫས་ནན་ཁུགས་ཀྱིས་འགུགས་པར་བྱེད་ན་ཉེས་བྱས་སུ་འགྱུར་རོ། །དེ་ལྟར་ཡང་དགེ་སློང་གིས་གཞན་གྱིས་བདག་གིར་བྱས་པ་དགུག་པར་མི་བྱ་སྟེ། དེ་ནི་གང་གིས་ཕྲོགས་པ་དེའི་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །གང་གིས་ཕྲོགས་པ་དེས་རྫས་དེ་བདག་གིར་བྱས་པའི་ཕྱིར་དེའི་བདག་གིར་འགྱུར་རོ། །རབ་ཏུ་བྱུང་བས་དེ་ལ་མི་འདོད་བཞིན་དུ་ནན་ཁུགས་ཀྱིས་དབྲོག་པ་དེ་ནི་རིགས་པའི་ཚུལ་མ་ཡིན་ཏེ། དེ་བས་ན་འདིར་བརྐུས་པར་གཏོགས་པའི་ཁ་ན་མ་ཐོ་བ་ཡོད་པས་བཀག་པ་ནི་མ་ཡིན་གྱི། འདི་ལྟར་རབ་ཏུ་བྱུང་བའི་ཚུལ་དང་མཐུན་པ་མ་ཡིན་བས་དགག་པར་མཛད་དོ། །གལ་ཏེ་ནན་ཁུགས་ཀྱིས་དགུག་པར་མི་བྱ་ན། དེ་ལ་ཇི་ལྟར་བསྒྲུབ་པར་བྱ་ཞེ་ན་དེའི་ཕྱིར། དེ་ནི་ཆོས་བཤད་པས་བསླང་བར་བྱའོ་ཞེས་བྱ་བ་སྨྲས་ཏེ། རྫས་ཕྲོགས་པ་དེ་ནི་དགེ་སློང་གིས་ཆོས་བཤད་པས་བསླང་བར་བྱའོ། །རིན་ཕྱེད་དུ་ཉེ་བས་ཀྱང་ངོ་ཞེས་བྱ་བ་ནི། རིན་ཕྱེད་དུ་ཉེ་བས་ཀྱང་བླུ་བར་བྱའོ། །ཉེ་བ་ཞེས་བྱ་བ་ནི་ཁད་ཉེ་བའི་ཚིག་སྟེ། རིན་ཕྱེད་དུ་ཅུང་ཟད་མ་ཆོག་པའམ། ཕྱེད་པས་ཅུང་ཟད་ལྷག་པས་ཀྱང་བླུའོ་ཞེས་བྱ་བའི་ཐ་ཚིག་གོ །ལྷུང་བཟེད་དང་ཆོས་གོས་ནི་རིན་ཆེན་པོས་བླུགས་ཀྱང་རུང་ངོ་ཞེས་བྱ་བ་ནི། གལ་ཏེ་དེས་ཆོས་བཤད་པའི་ཐབས་ཀྱིས་ཀྱང་མ་ཁུགས་ན་དེའི་ཚེ་ལྷུང་བཟེད་དང་ཆོས་གོས་ཕྲོགས་པའི་རྫས་ནི་རིན་ཆེན་པོས་བླུགས་ཀྱང་རུང་སྟེ། དེ་ནི་ཁ་བསྒྱུར་བའི་ལས་ལ་སོགས་པའི་ཉོན་མོངས་པ་སྤང་བའི་ཕྱིར་རོ། །མི་སྙན་པ་འབྱུང་བར་འགྱུར་བ་ནི་བོར་བའོ་ཞེས་སྐྱེ་བོ་ཕལ་པོ་ཆེའི་མངོན་སུམ་དུ་མ་བབ་པར་བསྐུར་བར་ནི་བྱའོ་ཞེས་
བྱ་བ་ནི། དངོས་པོ་གང་ལས་འདི་ཉིད་ཀྱིས་འདི་བསད་དོ། །འདི་ཉིད་ཀྱིས་འདི་བརྐུས་སོ་ཞེས་བྱ་བའི་མི་སྙན་པ་མི་མཛེས་པ་འབྱུང་བར་འགྱུར་བ་ནི་བདེན་དུ་བོར་བ་ཉིད་ཡིན་ན་ཡང་འདི་བོར་བའོ་ཞེས་བདག་གིས་ངེས་པར་བྱ་སྟེ། སྐྱི་བོ་ཕལ་པོ་ཆེ་སུའི་ཡང་མངོན་སུམ་དུ་མ་བབ་པར་དགེ་སློང་གིས་བསྐུར་བར་མི་བྱ་བླང་བར་མི་བྱའོ་ཞེས་བྱ་བའི་ཐ་ཚིག་གོ །དེ་ནི་མ་དད་པ་སྤང་བའི་ཕྱིར་རོ། །སྐྱེ་བོ་ཕལ་པོ་ཆེའི་མངོན་སུམ་ཞེས་སྨོས་པས་ནི་ཉེས་པ་འདི་མི་འབྱུང་སྟེ། དེ་ལྟར་དྲུག་སྡེ་དག་གིས་རྐུན་པོ་རྣམས་ཀྱིས་ཕག་གི་མགོ་བཅད་དེ་བོར་བ་ཕྱག་དར་ཁྲོད་དོ་ཞེས་བླངས་པ་དང༌། ཚོལ་བའི་མི་རྣམས་ཀྱིས་དེ་དག་ལ་འཕགས་པ་དག་ཇི་ལྟ་དྲང་སྲོང་གི་རྒྱལ་མཚན་ཐོགས་ཤིང་བྱ་བ་འདི་ལྟ་བུ་ཡང་བྱེད་ཅེས་སྨྲས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་ཕྱག་དར་ཁྲོད་དེ་ལྟ་བུ་སྐྱེ་བོ་ཕལ་བོ་ཆེའི་མངོན་སུམ་དུ་མ་བབ་པར་བླང་བར་མི་བྱའོ། །ལེན་ན་འགལ་ཚབས་ཅན་དུ་འགྱུར་རོ་ཞེས་བྱ་བའི་བར་དུ་གསུངས་བ་ཡིན་ནོ། །རོའི་རྫས་འདི་ལྟར་མི་མ་ཡིན་པས་བླངས་པར་གྱུར་ན་འོན་ཀྱང་དེའི་མ་ཡིན་ནོ། །སྙམ་པ་བཟློག་པའི་ཕྱིར་རོ། །རོའི་རྫས་མི་མ་ཡིན་པས་བླངས་པ་ཉིད་ནི་ཡོངས་སུ་མ་བཟུང་བ་ཉིད་མ་ཡིན་ནོ་ཞེས་བྱ་བ་སྨྲས་ཏེ། རོའི་རྒྱུད་དུ་གཏོགས་པའི་རྫས་གང་ཡིན་པ་དེ་གལ་ཏེ་མི་མ་ཡིན་པས་བླངས་པར་གྱུར་ན་དེ་ཡོངས་སུ་མ་བཟུང་བའོ་སྙམ་དུ་ཤེས་པར་མི་བྱ་སྟེ། དེ་བརྐུས་ན་ཉེས་པ་སྦོམ་པོར་འགྱུར་བར་རིག་པར་བྱའོ། །མི་མ་ཡིན་པས་ཡོངས་སུ་བཟུང་བའི་རྫས་གང་ཡིན་པ་དེ་དུར་ཁྲོད་དེ་ཉིད་དུ་བསྐྱལ་བར་བྱ་དགོས་ན། དེར་ཇི་ལྟར་འགྲོ་བར་བྱ་ཞེ་ན་དེའི་ཕྱིར། རབ་ཏུ་གཏུམ་པ་དེའི་ཕྱི་བཞིན་དུ་འགྲོ་བར་བྱའོ་ཞེས་བྱ་བ་སྨྲས་ཏེ། མི་མ་ཡིན་པ་རབ་ཏུ་གཏུམ་པ་འཁྲུགས་པ་དེའི་ཕྱི་བཞིན་དུ་དགེ་སློང་འགྲོ་བར་བྱ་སྟེ། དེ་ནི་གནོད་པ་བྱེད་པ་སྤང་བའི་ཕྱིར་རོ། །དུར་ཁྲོད་དེར་ཁྱེར་ནས་རྫས་དེ་མི་མ་ཡིན་པ་དེའི་སྟེང་དུ་ཇི་ལྟར་གཡོགས་བར་བྱ་ཞེ་ན་དེའི་ཕྱིར། ཁས་སྤུབ་ཏུ་བསྙལ་པ་ལ་རྐང་བའི་མཐའ་ནས་བརྩམས་ཏེ་གཡོགས་པར་བྱའོ་ཞེས་བྱ་བ་སྨྲས་ཏེ། རོ་བསྙལ་བ་ལ་རོའི་རྫས་ཀྱིས་གཡོགས་པར་བྱའོ་ཞེས་བྱ་བར་སྦྱར་རོ། །ཇི་ལྟར་བསྙལ་བ་ལ་གཡོགས་པར་བྱ་ཞེ་ན་དེའི་ཕྱིར། ཁས་སྤུབ་ཏུ་བསྙལ་བ་ལ་ཞེས་
བྱ་བ་སྨོས་ཏེ། ཁ་ས་ལ་བསྟན་ཏེ་ལྟོས་བསྙལ་བ་ལ། དེའི་སྟེང་ནས་དེས་བླངས་པའི་ལ་བ་ལ་སོགས་པས་གཡོགས་པར་བྱའོ། །ཇི་ལྟར་གཡོགས་པར་བྱ་ཞེ་ན། དེའི་ཕྱིར། རྐང་པའི་མཐའ་ནས་བརྩམས་ཏེ་གཡོགས་པར་བྱའོ་ཞེས་བྱ་བ་སྨྲས་ཏེ། རྐང་པའི་མཐའ་ནས་བརྩམས་ཏེ་མགོར་ཐུག་གི་བར་དུ་མས་ཡར་མཐར་གྱིས་གཡོགས་པར་བྱའི། གཞན་དུ་མ་ཡིན་ཏེ། དེ་ཡང་གནོད་པ་བྱེད་པ་སྤང་བ་ཁོ་ནའི་ཕྱིར་རོ། །རོ་མ་སྨས་པ་ལ་མི་མ་ཡིན་པ་འཇུག་པར་འགྱུར་བའི་སྐབས་ཡོད་པས་དེའི་རྫས་བླངས་པ་ལས་ཉེས་དམིགས་དེ་དག་འབྱུང་བར་འགྱུར་བ་བསལ་བའི་ཕྱིར། མ་སྨས་པ་ལས་བླང་བར་མི་བྱའོ་ཞེས་བྱ་པ་སྨྲས་ཏེ། རོ་མ་སྨས་པ་ལས་རྫས་བླངས་བར་མི་བྱའོ། །འོ་ན་ཅི་སྟེ་དེ་ལྟ་ན་རང་གིས་སྨས་པར་བྱས་ཏེ་འམ། གཞན་སྨན་པར་བྱེད་དུ་བཅུག་སྟེ། དེའི་ཕྱིར་རང་གིས་སྨས་པ་དང་སྨས་པར་བྱེད་དུ་གཞུག་པར་མི་བྱའོ་ཞེས་བྱ་བ་སྨྲས་ཏེ། འདིར་རོ་ཞེས་བྱ་བ་མཐའ་གཉི་གར་སྦྱར་ཏེ་རོ་དེ་རང་གིས་ཀྱང་སྨས་པར་མི་བྱའོ། །རོ་དེ་གཞན་ཡང་སྨས་པར་བྱེད་དུ་གཞུག་པར་མི་བྱའོ་ཞེས་བྱ་བའི་ཐ་ཚིག་གོ །ཐམས་ཅད་དུ་སོ་ཤིང་ལ་སོགས་པ་ཡང་མ་བསྟབས་ཀྱི་བར་དུ་བླང་བར་མི་བྱའོ་སྙམ་དུ་དོགས་པ་བསལ་བའི་ཕྱིར། བསྟི་གནས་ཉིད་དུ་སོ་ཤིང་དང་ཆུ་དང་འདག་རྫས་དང་ལྕི་བ་དང་ས་ཅི་བ་དེར་བྱའོ་ཞེས་བྱ་བ་སྨྲས་ཏེ། བསྟི་གནས་ཉིད་དུ་དགེ་སློང་གིས་སོ་ཤིང་ལ་སོགས་པ་ཅི་བདེར་བྱའོ་ཞེས་བྱ་བར་སྦྱར་རོ། །འདིར་གཞུང་ནི་དགེ་སློང་གང་དུ་བསྟི་བ་དེར་རྣམ་པ་ལྔ་པོ་དག་ཅི་བདེར་བྱས་པར་བརྗོད་པར་བྱ་སྟེ། སོ་ཤིང་དང་ཆུ་དང་འདག་རྫས་དང་ལྕི་བ་དང་སའོ་ཞེས་གསུངས་པ་ཡིན་ནོ། །གལ་ཏེ་དགེ་སློང་སྔོན་ཆུང་མ་ལ་སོགས་པས་མཐུས་ཁྲིད་པ་ན་དེའི་ཚེ་དགེ་སློང་གཞན་གྱིས་ཇི་ལྟར་བསྒྲུབ་པར་བྱ་ཞེ་ན། དེའི་ཕྱིར་དགེ་སློང་དང་དགེ་ཚུལ་མི་འདོད་བཞིན་དུ་འབྲེལ་པས་ཁྲིད་པ་ན་བཟུང་བར་བྱའོ་ཞེས་བྱ་བ་སྨྲས་ཏེ། མི་འདོད་བཞིན་དུ་ཞེས་བྱ་བ་མི་དགའ་བཞིན་དུའོ། །འབྲེལ་པས་ཞེས་བྱ་བ་ནི་ཕུ་ནུ་དང༌། བུ་སྲིང་དང་ཆུང་མ་ལ་སོགས་པས་སོ། །དེ་དག་གིས་དེ་ལྟར་ཁྲིད་པ་ན་དགེ་སློང་གིས་བཟུང་བར་བྱའོ་ཞེས་བྱ་བར་སྦྱར་རོ། །དེ་ལྟར་ཡང་གཞུང་ནི་དེ་ལ་ལག་པ་གང་ཤོས་ན་ཞེས་དྲིའོ། །གལ་ཏེ་སྔོན་གྱི་ཆུང་མས་བཟུང་
བ་ཤོས་ནའོ་ཞེས་ཟེར་ན་མི་བཏང་ངོ༌། །གལ་ཏེ་ཁྱོད་ཀྱིས་བཟུང་བ་ཤོས་ནའོ། །ཞེས་ཟེར་ན་ནི་བསམ་པ་ལས་ཆུང་མ་འདོད་པ་འདྲས་ཐོང་ཤིག་ཅེས་གསུངས་པ་ཡིན་ནོ། །མ་བྱིན་པར་ལེན་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་སོ་ཞེས་བྱ་བ་མ་བྱིན་པར་ལེན་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་ནས་འབྱུང་བ་རྫོགས་སོ།། །།ད་ནི་ཞུ་བའི་སྐབས་བརྗོད་པར་བྱ་སྟེ། ཀ་ཀ་ནི་བཞི་ལ་མ་ཤ་ཀའོ་ཞེས་བྱ་བ་ལ། ཀ་ཀ་ནི་ཞེས་བྱ་བ་ནི། བོན་ཏི་ཀ་ཞེས་བྱ་སྟེ། དེ་ཡང་འགྲོ་ན་བུ་ཉི་ཤུའི་རིན་ཐང་གི་མིང་ཡིན་ནོ། །ཀ་ཀ་ནི་བཞི་ལ་ནི་མ་ཤ་ཀ་གཅིག་སྟེ། འགྲོ་ན་བུ་བརྒྱད་ཅུའི་རིན་ཐང་གི་མིང་ཡིན་ནོ། །མདོ་འདི་ནི་འོག་ནས་གང་ན་དེའི་ཚིགས་ཉིད་ཉི་ཤུ་ཡིན་པ་དེད་ལ་བརྟེན་ནས་སོ་ཞེས་འབྱུང་བའི་ཚིགས་དེའི་རང་གི་ངོ་བོ་བསྟན་པའི་ཕྱིར་ཏེ། དེ་ནས་ཀྱང་ཚིགས་ཞེས་བྱ་བ་ནི་མ་ཤ་ཀ་བརྗོད་དོ། །ཚིགས་ཞེས་བྱ་བའི་ཚིགས་ནི་ཀཱར་ཤཱ་པ་ཎ་རང་གི་ངོ་བོ་ཤེས་པར་བྱ་བའི་ཕྱིར་རོ། །ཀཱར་ཥཱ་པ་ཎའི་རང་གི་ངོ་བོ་ཤེས་པ་ནི་དེའི་བཞི་ཆ་གཅིག་བསྐུས་ན་ཕམ་པར་འགྱུར་བ་ཉིད་ཡིན་པར་བསྟན་པའི་ཕྱིར་རོ། །མ་ཤ་ཀ་ལྔ་ལ་སོགས་པ་ཞེས་བྱ་བ་སྨྲས་པས་ད་ནི་གང་ལ་མ་ཤ་ཀ་ལྔ་ཁོ་ན་རྐུ་བ་དེ་ནི་དེས་ཕམ་པར་འགྱུར་གྱི། གང་བཞི་རྐུ་བ་དེ་ནི་ཕམ་པར་མི་འགྱུར་རོ་ཞེ་ན་དེའི་ཕྱིར། ལྔ་ཉིད་ནི་ཀཱར་ཥཱ་པ་ཎའི་བཞི་ཆའི་དཔེ་ཡིན་ནོ་ཞེས་བྱ་བ་སྨྲས་ཏེ། རྣམ་པར་འབྱེད་པའི་མདོ་ལས་མ་ཤ་ཀ་ལྔ་ལ་སོགས་པ་ཞེས་གསུངས་པ་དེ་ནི་ཀཱ་ར་ཥཱ་པ་ཎའི་བཞི་ཆའི་དཔེ་ཡིན་པར་རིག་པར་བྱའོ། །དེ་བས་ན་མ་ཤ་ཀ་ལྔ་ལ་སོགས་པ་ཞེས་བྱ་བའི་ཚིག་དེ་ནི་ཀཱར་ཥཱ་པ་ཎའི་བཞི་ཆའི་གཅིག་རྐུ་ན་ཞེས་བྱ་བ་དེའི་མཐའ་ཡིན་ནོ། །ལྔ་ཉིད་ནི་ཀཱར་ཥཱ་པ་ཎའི་བཞི་ཆའི་དཔེ་ཡིན་ནོ་ཞེས་བྱ་བ་སྨྲས་ན་གནས་དང་དུས་ཀྱི་དབྱེ་བས་ཀཱར་ཥཱ་པ་ཎའི་དབྱེ་བ་ཡང་མང་དུ་སྣང་སྟེ། ལ་ལར་ནི་མ་ཤ་ཀ་བཅུ་གཉིས་ཉིད་ལ་ཀཱར་ཥཱ་པ་ཎ་གཅིག། ལ་ལར་ནི་མ་ཤ་ཀ་བཅུ་དྲུག་ཉིད་ལ་ཀཱར་ཥཱ་པ་ཎ་གཅིག །ལ་ལར་ནི་མ་ཤ་ཀ་སུམ་ཅུ་རྩ་གཉིས་ཉིད་ལ་ཀཱ་ར་ཥཱ་པ་ཎ་གཅིག་ཡིན་པས་དེའི་ཕྱིར། འདིར་གནས་གང་དང་དུས་གང་ལ་བརྟེན་ཏེ། མ་ཤ་ཀ་ལྔ་ཉིད་ཀཱར་ཥཱ་པ་ཎའི་བཞི་ཆའི་དཔེ་ཡིན་ཞེ་ན་དེའི་ཕྱིར། གང་ན་དེའི་ཚིགས་ཉིད་ཉི་ཤུ་ཡིན་པ་
དེ་ལ་བརྟེན་ནས་སོ་ཞེས་བྱ་བ་སྨྲས་ཏེ། གནས་དང་དུས་གང་ན་ཀཱར་ཥཱ་པ་ཎ་དེའི་ཚིགས་ཉིད་མ་ཤ་ཀ་ཉི་ཤུ་ཡིན་པ་དེ་ལ་བརྟེན་ནས་མ་ཤ་ཀ་ཉིད་ཀཱར་ཥཱ་པ་ཎའི་བཞི་ཆའི་དཔེ་ཡིན་ནོ། །འདི་སྐད་བསྟན་ཏེ། རྐུ་བའི་གནས་དང་རྐུ་བའི་དུས་ལ་བརྟེན་ནས་མ་ཤ་ཀ་ལྔ་ཉིད་ཀཱར་ཥཱ་པ་ཎའི་བཞི་ཆའི་དཔེ་ཡིན་ཏེ། དེ་བས་ན་ཀཱར་ཥཱ་པ་ཎའི་བཞི་ཆ་གཅིག་བརྐུས་པ་ནི་ཕམ་པར་འགྱུར་བའི་རྒྱུའི་གཙོ་བོར་གྱུར་པ་ཡིན་གྱི། ཀཱར་ཥཱ་པ་ཎའི་བཞི་ཆ་གཅིག་ལ་མ་ཤ་ཀ་དུ་ཡོད་པའི་གྲངས་ནི་ངེས་པ་མེད་པར་རིག་པར་བྱའོ་ཞེས་བྱ་བའི་ཐ་ཚིག་གོ །དེ་ལྟར་ཡང་གཏམ་གྱི་གཞིའི་སྐབས་ནས། བཙུན་པ་མ་ཤ་ཀ་གསུམ་བརྐུས་ན་ཕམ་པར་འགྱུར་བ་མཆིས་སམ། བཀའ་སྩལ་པ། ཡོད་དེ་གང་ན་མ་ཤ་ཀ་བཅུ་གཉིས་ལ་ཀཱ་རཱ་ཥཱ་པ་ཎ་གཅིག་ཏུ་འགྱུར་བའོ། །མ་ཤ་ཀ་ལྔ་ལས་ལྷག་པ་བརྐུས་ན་ཕམ་པར་མི་འགྱུར་བ་མཆིས་སམ། བཀའ་སྩལ་བ་ཡོད་དེ། གང་ན་མ་ཤ་ཀ་བཞི་བཅུ་ལ་ཀཱར་ཥཱ་པ་ཎ་གཅིག་ཏུ་གྱུར་ནའོ་ཞེས་གསུངས་པ་ཡིན་ཏེ། །དེར་ནི་མ་ཤ་ཀ་བཅུ་བརྐུས་པན་ཕམ་པར་འགྱུར་བར་དགོངས་སོ། །དེང་སང་ནི་མ་ཤ་ཀ་བཞི་བརྐུས་ན། ཕམ་པར་འགྱུར་བར་རིག་པར་བྱ་སྟེ། ཀཱ་ར་ཥཱ་པ་ཎ་གཅིག་ནི་པཎ་བཅུ་དྲུག་གི་ཚད་ཡིན་པའི་ཕྱིར་རོ། །ཀཱར་ཥཱ་པ་ཎའི་དབྱེ་བ་གནས་དང་དུས་ཀྱི་དབྱེ་བས་ཐ་དད་པའི་ཕྱིར་དེའི་རིན་ཐང་བརྩི་བ་ཇི་ལྟར་བྱ་ཞེ་ན་དེའི་ཕྱིར། རྐུ་བའི་གནས་དང་དུས་ཀྱིས་དེའི་བརྩི་བ་རྣམ་པར་གཞག་གོ་ཞེས་བྱ་བ་སྨྲས་ཏེ། རྐུ་བའི་གནས་དང་རྐུ་བའི་དུས་ཀྱི་རིན་ཐང་བརྩི་བ་གང་ཡིན་པས་ཀཱར་ཥཱ་པ་ཎ་དེའི་རིན་ཐང་མ་ཤ་ཀ་བཅུ་གཉིས་ལ་ཀཱར་ཥཱ་པ་ཎ་གཅིག་གམ། མ་ཤ་ཀ་བཅུ་དྲུག་གམ། མ་ཤ་ཀ་ཉི་ཤུའམ། མ་ཤ་ཀ་བཞི་བཅུའམ། དེ་ལ་སོགས་པའི་རིན་ཐང་བརྩི་བ་དེས་བརྩིས་པའི་ཀཱར་ཥཱ་པ་ཎའི་བཞི་ཆ་གཅིག་བརྐུས་ན་ཕམ་པར་འགྱུར་བར་ཤེས་པར་བྱའི། ཡུལ་གཞན་དང་དུས་གཞན་དང༌། གླིང་གཞན་གྱི་རིན་ཐང་བརྩི་བ་དེས་ཡུལ་དང་དུས་དང་གླིང་གཞན་དུ་བརྩི་བར་ནི་མི་བྱའོ། །མ་ཤ་ཀ་ལྔ་ལ་སོགས་པ་ཞེས་སྨྲས་ན་རྫས་གང་ཆེ་བ་ཉིད་ཀྱིས། མ་ཤ་ཀ་ལྔ་ལ་སོགས་པ་ཉིད་ཀྱིས་རིན་ཐང་གདབ་པར་མི་ནུས་པ་དེ་ལ་ནི་རིན་ཐང་མེད་དོ་ཞེས་ཏེ་དེ་བརྐུས་ན་དེ་ལ་ཕམ་པར་འགྱུར་བ་མེད་དོ་སྙམ་དུ་སེམས་པ་དེ་བཟློག་པའི་ཕྱིར། ཆེ་བ་ཉིད་ཀྱིས་རིན་ཐང་
གདབ་པར་མི་ནུས་པ་ནི་རབ་ཀྱི་མཐར་ཕྱིན་པ་ཉིད་དོ་ཞེས་བྱ་བ་སྨྲས་ཏེ། རྡོ་རྗེ་ལ་སོགས་པ་རིན་པོ་ཆེ་གང་ཆེ་བ་ཉིད་ཀྱིས་རིན་ཐང་གདབ་པར་མི་ནུས་པ་དེ་ནི་རབ་ཀྱི་མཐར་ཕྱིན་པ་ཉིད་ཡིན་ཏེ་རིན་ཐང་མཐའ་ཡས་པ་ཉིད་དོ། །ཕུལ་དུ་གྱུར་པའི་མཐར་ཐུག་པ་ནི་རབ་ཀྱི་མཐར་ཕྱིན་པ་སྟེ། མཆོག་ཏུ་བཀྲབས་པའི་རབ་ཀྱི་མཐར་ཕྱིན་པར་གྱུར་པ་ཉིད་ཡིན་པའི་ཕྱིར་རོ། །དེ་ནི་འདིར་མ་ཤ་ཀ་ལྔ་ལ་སོགས་པ་ཞེས་སྨོས་པའི་སོགས་པས་འཕངས་པ་དྲུག་ནས་གྲངས་མེད་པའི་མཐར་ཐུག་པ་ཉིད་ཡིན་པར་རིག་པར་བྱའོ། །ཧ་ཅང་ཆུང་བ་ཉིད་ཀྱིས་རིན་ཐང་གདབ་པར་མི་ཆོག་པ་གང་ཡིན་པ་དེ་ནི་དངོས་པོར་གྱུར་པ་མ་ཡིན་པའི་ཕྱིར་བརྐུས་ཀྱང་ལྟུང་བར་མི་འགྱུར་རོ་སྙམ་དུ་དོགས་པ་བསལ་བའི་ཕྱིར། ཆུང་བ་ཉིད་ཀྱིས་དེར་མི་ཆོག་པ་ཉིད་ནི་ཁོངས་སུ་མ་གཏོགས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། མདོ་འདི་ལ་ཆུང་བ་ཉིད་ཀྱིས་རིན་ཐང་གདབ་པ་དེར་མི་ཆོག་པ་ཉིད་དེ་དེ་ནི་ཆུང་བ་ཉིད་ཀྱིས་རིན་ཐང་གདབ་པར་མི་ཆོག་པ་སྟེ། དེར་ཞེས་བྱ་བ་ནི་རིན་ཐང་གདབ་པར་རོ། །མི་ཆོག་པ་ཉིད་གང་ཡིན་པ་དེ་བརྐུས་ན་ཁོངས་སུམ་གཏོགས་པ་ཉིད་མ་ཡིན་གྱི། ཁོངས་སུ་གཏོགས་པ་ཁོ་ན་ཉིད་ཡིན་ཏེ། དེ་ལ་ཉེས་པ་སྦོམ་པོའམ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །སངས་རྒྱས་ཀྱི་སྐུ་གདུང་ནི་བཙོང་བར་བྱ་བ་མ་ཡིན་པའི་ཕྱིར་དེ་བརྐུས་ན་ལྟུང་བ་ཇི་ལྟར་རྣམ་པར་གཞག་ཅེ་ན་དེའི་ཕྱིར། དེ་ལ་སངས་རྒྱས་ཀྱི་སྐུ་གདུང་ནི་གཞལ་དུ་མེད་པའི་རིན་པོ་ཆེ་ཉིད་ཡིན་ནོ་ཞེས་བྱ་བ་སྨྲས་ཏེ། རིན་ཐང་གདབ་པར་མི་ནུས་པ་རྐུ་བདེ་ལ་སངས་རྒྱས་ཀྱི་སྐུ་གདུང་ནི་གཞལ་དུ་མེད་པའི་རིན་པོ་ཆེ་ཉིད་ཡིན་ཏེ། རབ་ཀྱི་མཐར་ཕྱིན་པར་གྱུར་པ་ཉིད་ཡིན་པར་རིག་པར་བྱའོ། །རིན་པོ་ཆེ་གང་གཞལ་བ་དང་ཡོངས་སུ་དཔག་པ་དང༌། རིན་ཐང་བརྩི་བར་མི་ནུས་པ་དེ་ནི་གཞལ་དུ་མེད་པའོ། །དེ་ནི་གཞལ་དུ་མེད་པ་ཡང་ཡིན་ལ། རིན་པོ་ཆེ་ཡང་ཡིན་ཏེ། དེའི་དངོས་པོ་ནི་དེ་ཉིད་དོ། །འདི་སྐད་བསྟན་ཏེ། དཔེར་ན་གཞལ་དུ་མེད་པའི་རིན་པོ་ཆེ་མིའི་རྒྱུད་ཀྱིས་ཡོངས་སུ་བཟུང་བ་ཞིག་རྐུ་སེམས་ཀྱིས་རྐུ་ན་གལ་ཏེ་ཡུལ་དེ་ན་གཞལ་དུ་མེད་པའི་རིན་པོ་ཆེ་དེའི་དོན་གྱིས་རིན་ཐང་ཇི་ལྟ་བ་བཞིན་དུ་རྣམ་པར་གནས་པ་ཡིན་ན་ནི་དེའི་ཚེ་ཕམ་པར་འགྱུར་རོ། །གལ་ཏེ་དེའི་
རིན་ཐང་དེ་བཞིན་རྣམ་པར་གནས་པ་མ་ཡིན་ན་ནི་རིན་ཐང་ཇི་ལྟ་བ་ལས་ལྟུང་བ་རྣམ་པར་གཞག་པ་དེ་བཞིན་དུ། སངས་རྒྱས་ཀྱི་སྐུ་གདུང་གི་རྣམ་པར་ག་ཞག་པ་ཡང་དེ་བཞིན་ནོ། །རྐུ་སེམས་གང་ཡང་རུང་བས་རྐུ་བ་ཐམས་ཅད་དུ་ཕམ་པར་འགྱུར་བ་བསལ་བའི་ཕྱིར། མཆོད་པའི་དོན་ཉིད་དུ་ན་ཉེས་བྱས་སོ་ཞེས་བྱ་བ་སྨྲས་ཏེ། མཆོད་པའི་དོན་མཆོད་པའི་རྒྱུར་གང་རྐུ་བ་དེ་ནི་མཆོད་པའི་དོན་ཏོ། །དེའི་དངོས་པོ་ནི་དེ་ཉིད་དུའོ། །མཆོད་པའི་དོན་དེ་ཉིད་དུ་རྐུ་ན་ཉེས་བྱས་སོ། །འདིར་གཞུང་ནི། ཇི་སྟེ་མཆོད་པའི་དོན་དུ་འདི་ནི་བདག་གི་སྟོན་པའོ། །བདག་གིས་འདི་ལ་བཀུར་སྟི་བྱའོ་སྙམ་དུ་རྐུ་བར་བྱེད་ན་ཉེས་བྱས་སོ་ཞེས་གསུངས་པ་ཡིན་ནོ། །རྐུ་སེམས་ཡོད་དུ་ཟིན་ཀྱང་རེ་ཞིག་དཔེ་བྲི་བར་རྐུ་བ་ཉེས་པ་མེད་པར་བསྟན་པའི་ཕྱིར། དཔེ་བྲི་བ་ལ་ནི་ཉེས་པ་མེད་དོ་ཞེས་བྱ་བ་སྨྲས་ཏེ། གང་ལ་བལྟས་ནས་གཞན་དུ་འདྲི་བར་བྱེད་པ་དེ་ནི་དཔེ་བྲི་བའོ། །དེ་ནི་གཞན་ལས་བརྐུས་ཏེ་བླངས་ཀྱང་ཉེས་པ་མེད་པ་ཉིད་དེ། ལྟུང་བར་འགྱུར་བའི་བྱེད་པ་པོ་ཉིད་མ་ཡིན་ནོ། །གདུབ་ཀོར་ལ་སོགས་པ་གང་དག་བཤིག་སྟེ། རྐུ་བར་བྱེད་པ་དེ་ལ་གནས་སྐབས་གང་དུ་དེའི་རིན་ཐང་བརྩི་བར་བྱ་ཞེ་ན་དེའི་ཕྱིར། བཤིག་སྟེ་རྐུ་བ་ལ་ནི་དེའི་གནས་སྐབས་རྐུ་བའི་དངོས་པོ་ཉིད་ཡིན་ནོ་ཞེས་བྱ་བ་སྨྲས་ཏེ། གསེར་ལ་སོགས་པའི་རྒྱན་ལ་སོགས་པའི་རྫས་གང་བཤིག་སྟེ་རྐུ་བ་ལ་ནི་བཤིག་པའི་གནས་སྐབས་རྐུ་བའི་དངོས་པོ་ཉིད་དེ་རྐུ་བའི་གཞི་ཉིད་ཡིན་གྱི། མ་བཤིག་པའི་སྔ་རོལ་ནི་མ་ཡིན་ཏེ། དེའི་ཚེ་ན་གཞིག་པ་ཙམ་གྱི་བསམ་པར་ཐད་པའི་ཕྱིར་རོ། །འདི་སྐད་བསྟན་ཏེ། འཇིག་པའི་གནས་སྐབས་ན་ནི་སྦྱོར་བའི་ལྟུང་བའོ། །བཤིག་པར་གྱུར་ན་ནི་དངོས་གཞིའི་ལྟུང་བར་འགྱུར་རོ། །འདིར་གཞུང་ནི་བཙུན་པ་དགེ་སློང་གིས་མི་རྣམས་ཀྱི་རིན་པོ་ཆེའམ་རིན་པོ་ཆེར་སྨོས་པ་བཤིག་སྟེ་རྐུ་ན་ལྟུང་བ་ཅིར་འགྱུར། བཀའ་སྩལ་པ། རིན་ཐང་བརྩི་བར་བྱའོ་ཞེས་གསུངས་པ་ཡིན་ནོ། །འདིར་གཞུང་ནི་དེའི་དགོངས་པ་ནི་དེའི་གནས་སྐབས་ཀྱི་རིན་ཐང་བརྩི་པར་བྱའོ་ཞེས་བྱ་བ་ཡིན་ནོ། །ཇི་ལྟར་གླིང་གཞན་དག་ན་རྫས་ལ་ཡོངས་སུ་འཛིན་པ་དང་བཅས་པ་ཉིད་ཡིན་པ་བཞིན་དུ་བྱང་གི་སྒྲ་མི་སྙན་ན་ཡང་དེ་བཞིན་ནམ་ཞེ་ན་མ་ཡིན་ཏེ། དེའི་ཕྱིར་
བྱང་གི་སྒྲ་མི་སྙན་ན་ནི་ཡོངས་སུ་འཛིན་པ་མེད་པ་ཉིད་དོ་ཞེས་བྱ་བ་སྨྲས་ཏེ། བྱང་གི་སྒྲ་མི་སྙན་གྱི་རྫས་གང་ཡིན་པ་དེ་ནི་ཡོངས་སུ་འཛིན་པ་མེད་པ་ཉིད་ཡིན་པར་བལྟ་བར་བྱའོ། །ཡོངས་སུ་འཛིན་པ་མེད་ན་དེ་དག་གི་རྫས་ཇི་ལྟར་བརྐུས་པར་རྣམ་པར་གཞག་ཅེ་ན། དེའི་ཕྱིར་དེ་ནི་རང་གི་དང་འདྲའོ་ཞེས་བྱ་བ་སྨྲས་ཏེ། ཡོངས་སུ་འཛིན་པ་མེད་པའི་རྫས་དེ་ནི་རང་གི་དང་འདྲ་བར་བལྟ་བར་བྱ་སྟེ། ཇི་ལྟར་རང་གི་རྫས་རྐུ་སེམས་ཀྱིས་བརྐུས་ན་ཉེས་པ་སྤོམ་པོར་འགྱུར་བ་བཞིན་དུ་འདི་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ །ཞུ་བའི་སྐབས་འདིས་དངོས་པོའི་སྐབས་དང། བདག་པོའི་སྐབས་དང༌། རྗེས་སུ་བསྒྲུབ་པའི་སྐབས་དང༌། མཐར་ཐུག་པའི་སྐབས་ཞེས་བྱ་བ་རྣམ་པ་བཞི་བསྡུས་པ་དེ་དག་ལས་དེ་ཡན་ཆད་དུ་དངོས་པོའི་སྐབས་བཤད་ཟིན་ཏོ།། །།ཀ་ཀ་ནི་བཞི་ལ་མ་ཤ་ཀའོ་ཞེས་བྱ་བ་ལ་སོགས་པས་དངོས་པོ་བརྟགས་ནས། ད་ནི་བདག་པོའི་སྐབས་བརྗོད་པར་བྱ་སྟེ། བདག་པོ་ཇི་ལྟ་བུ་བདག་པོ་ཉིད་ཡིན་ཞེ་ན། དེའི་ཕྱིར། དེའི་དུས་ནི་བདག་ཉིད་ཡོད་པ་བདག་པོ་ཉིད་དོ་ཞེས་བྱ་བ་སྨྲས་ཏེ། རྐུ་བ་དེའི་དུས་ཀྱི་ཚེ་ན་སྲིད་པའི་ངོ་བོ་ཉིད་དུ་བདག་ཉིད་ཡོད་པ་གང་ཡིན་པ་དེ་ནི་དེའི་དུས་ན་བདག་ཉིད་ཡོད་པའོ། །དེའི་དུས་ནི་བདག་ཉིད་ཡོད་པ་གང་ཡིན་པ་དེ་ནི་བདག་པོ་ཉིད་དོ། །འདི་སྐད་བསྟན་ཏེ། རྐུ་བའི་དུས་ན་རྫས་དེའི་བདག་པོ་ལྷ་ཉིད་ལ་སོགས་པའི་ངོ་བོ་ཉིད་དུ་བདག་ཉིད་ཡོད་པ་གང་ཡིན་པ་དེ་ནི་རྫས་དེའི་བདག་པོ་ཉིད་ཡིན་གྱི། འདས་པར་གྱུར་པའམ། ཕྱིས་འབྱུང་བ་གང་ཡིན་པ་དེ་ནི་དེའི་བདག་པོ་ཉིད་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟ་སྟེ་དཔེར་ན། མིས་རང་གི་རྫས་གཏེར་དུ་བཅུག་ནས་ཤི་བ་དང༌། དེ་ཉིད་དུ་སྲུང་མ་འདྲེ་ཞིག་སྐྱེས་པ་ན། གལ་ཏེ་དགེ་སློང་གིས་རྫས་དེ་བརྐུས་ན་འདྲེ་ལས་བརྐུས་པར་འགྱུར་གྱི། མིའི་རྒྱུད་ལས་ནི་མ་ཡིན་པ་བཞིན་ཏེ། དེ་བས་ན་དེ་བརྐུ་བའི་དུས་ན་འདྲེ་ཉིད་རྫས་དེའི་བདག་པོ་ཉིད་ཡིན་པས་ན། དེའི་ཕྱིར་སྦོམ་པོར་འགྱུར་གྱི་ཕམ་པར་ནི་མི་འགྱུར་རོ། །དེས་ན་འདི་ཡང་བསྡུས་པ་ཡིན་ཏེ། མཆོད་རྟེན་ལས་བརྐུས་པ་ཡང་མེའི་རྒྱུད་ཀྱིས་ཡོངས་སུ་བཟུང་བ་མེད་པའི་ཕྱིར། དངོས་པོ་ཚང་ན་ཉེས་པ་སྦོམ་པོར་འགྱུར་རོ། །
དེ་ལྟར་ཡང་འདིར་གཞུང་ནི་བཙུན་པ་དགེ་སློང་གིས་རེ་ཞིག་མཆོད་རྟེན་དང༌། མཆོད་རྟེན་གྱི་འཁོར་ས་ནས་རྒྱན་བརྐུས་ན་ལྟུང་བ་ཅིར་འགྱུར། བཀའ་སྩལ་པ། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །བཅོམ་ལྡན་འདས་ཡོངས་སུ་མྱ་ངན་ལས་འདས་པའི་དཀོར་ཡང་མིའི་རྒྱུད་དུ་གཏོགས་པ་ཡིན་པའི་ཕྱིར། དེ་བརྐུས་ན་ཕམ་པར་འགྱུར་བར་དོགས་པ་བསལ་བའི་ཕྱིར། མྱ་ངན་ལས་འདས་པ་ནི་ལྷ་ཉིད་དོ་ཞེས་བྱ་བ་སྨྲས་ཏེ། ཕུང་པོའི་ལྷག་མ་མེད་པའི་དབྱིངས་སུ་ཡོངས་སུ་མྱ་ངན་ལས་འདས་པ་ནི་རྣམ་པར་དག་པའི་ལྷ་ཉིད་དུ་བཞེད་དོ། །བརྙན་པ་ངེས་པར་བྱིན་པ་ཉིད་བཞིན་དུ་ཉེ་བར་སྤྱོད་ན་སྦྱོར་བ་བཞིན་ནོ་ཞེས་བྱ་བ་ནི། ལ་ལ་ཞིག་གིས་དགོས་པ་འགའ་ཞིག་གི་ཕྱིར་དགེ་སློང་གི་གོས་ལ་སོགས་པའི་དངོས་པོ་ཞིག་སྤྱད་པར་བརྙན་པར་གྱུར་པ་ན་དགེ་སློང་དེས་དངོས་པོ་དགོས་པ་འགའ་ཞིག་གི་ཕྱིར་སྤྱད་པར་བརྙན་པ་དེ་ངེས་པར་བྱིན་པ་ཉིད་བཞིན་དུ་ཉེ་བར་སྤྱོད་དེ། དཔེར་ན་ངེས་པར་བྱིན་པ་གཏན་དུ་ཐམས་ཅད་ཀྱི་ཐམས་ཅད་དུ་བྱིན་པའི་དངོས་པོ་བདག་ཉིད་དབང་བ་ཉིད་ཀྱིས་བསྲི་བ་མེད་པར་ཉེ་བར་སྤྱོད་པར་བྱེད་པ་དེ་བཞིན་དུ། དགོས་པ་འགའ་ཞིག་གི་ཕྱིར་སྤྱད་པར་བརྙན་པའི་དངོས་པོ་དེ་ཡང་བསྲི་བ་མེད་པར་ཉེ་བར་སྤྱོད་ན་སྦྱོར་བ་བཞིན་ཏེ། ཉེས་པ་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །གཞན་དུ་རྐུ་སེམས་མེད་པས་ནི་ལྟུང་བར་མི་འགྱུར་རོ་ཞེས་ཀྱང་གསུངས་པའི་ཕྱིར། འདིར་ནི་རྐུ་སེམས་ཀྱིས་ཡིན་པར་ཤེས་པར་བྱ་སྟེ། དངོས་པོ་མ་ཚང་བ་ལ་ཉེས་པ་སྦོམ་པོར་རོ་ཞེས་བྱ་བ་ནི་མ་སྨོས་ཀྱང་གྲུབ་པ་ཡིན་ནོ། །དེ་བས་ན་འདིར་ནི་དངོས་པོ་ཚང་ན་སྦོམ་པོའི་དངོས་གཞིར་འགྱུར་བར་རིག་པར་བྱ་སྟེ། བརྙན་པའི་རྟོག་པའི་དབང་གི་ཕྱིར་དང༌། བཞིན་ནོ་ཞེས་བྱ་བའི་སྒྲ་སྨོས་པའི་ཕྱིར་རོ། །འདིར་གཞུང་ནི་བཙུན་པ་དགེ་སློང་གིས་ཁྱིམ་བདག་གི་གོས་བརྙས་པ་བརྟགས་ཏེ་རྐུ་ན་ལྟུང་བ་ཅིར་འགྱུར། ཉེས་པ་སྦོམ་པོར་འགྱུར་རོ། །ཇི་སྟེ་ཁྱིམ་བདག་འདི་སྐད་ཅེས་འཕགས་པ་དག་གིས་འདི་ཁྱོད་ལ་བརྙན་ནོ་ཞེས་ཟེར་ནས་དགེ་སློང་གིས་ངེས་པར་བྱིན་པ་ཉིད་བཞིན་དུ་ཉེ་བར་སྤྱད་ན་ཡང་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་དག་འདིར་བསྡུས་སོ། །
གསང་སྔགས་དང་སྨན་དག་གིས་འབུལ་དུ་བཅུག་ན་ཡང་ངོ་ཞེས་བྱ་བ་ནི་རྐུ་སེམས་ཀྱིས་ན་སྦྱོར་བ་བཞིན་ནོ་ཞེས་བྱ་བའི་རྗེས་སུ་སྦྱར་བར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། རྐུ་སེམས་ཀྱིས་གསང་སྔགས་དང་སྨན་གྱི་ཐབས་ཀྱིས་འབུལ་དུ་བཅུག་ན་སྦྱོར་བ་བཞིན་ཏེ། དངོས་གཞིའི་དངོས་པོ་ཚང་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །དེ་ནི་ཆད་པས་བཅད་པའི་རྣམ་པ་ལྟ་བུ་ཡིན་པས་དེས་ན་ཕམ་པར་ནི་མི་འགྱུར་རོ། །འདིར་གཞུང་ནི་ཇི་སྟེ་དེས་གསང་སྔགས་དག་གིས་སམ། མེ་ཏོག་དང་འབྲས་བུ་དག་གིས་བརྩལ་ནས། ཁྱིམ་བདག་དེ་འདི་སྐད་ཅེས་བདག་གི་འདི་ཁྱོད་ལ་བརྙན་ནོ་ཞེས་ཟེར་ནས་དགེ་སློང་གིས་དེ་ངེས་པར་བྱིན་པ་ཉིད་ཀྱི་འདུ་ཤེས་ཀྱིས་ཉེ་བར་སྤྱད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དབང་དུ་བྱེད་པའི་སྨན་དུ་གྱུར་པའི་མེ་ཏོག་དང་འབྲས་བུ་དག་དེས་བསྡུས་པ་ཡིན་གྱི། ཡོངས་སུ་ཚིམ་པར་བྱ་བའི་ཕྱིར་བྱིན་པ་གང་ཡིན་པ་དེ་ནི་མ་གཏོགས་ཏེ། དེ་ནི་ལོག་པས་འཚོ་བ་ཡིན་གྱི། མ་བྱིན་པར་ལེན་པར་གཏོགས་པའི་ཁ་ན་མ་ཐོ་བ་ནི་མེད་དོ། །གཞན་གྱི་དོན་ཉིད་དུ་ན་དངོས་གཞིའི་རྣམ་པའོ་ཞེས་བྱ་བ་ལ་གཞན་དག་གི་དོན་ནི་གཞན་གྱི་དོན་ཏོ། །གཞན་གྱི་དོན་གྱི་དངོས་པོ་ནི་གཞན་གྱི་དོན་ཉིད་དོ། །གཞན་གྱི་དོན་དེ་ཉིད་དུ་ཞེས་བྱ་བ་གཞན་གྱི་ཆེད་ཉིད་དུ་རྐུན་པོ་བདག་གིས་བྱས་པ་མ་སྐྱེས་པས་གང་རྐུ་པར་བྱེད་ན་ཡང་དེ་ལ་དངོས་གཞིའི་རྣམ་པའོ་ཞེས་བྱ་བ་དངོས་གཞིའི་སྦྱོར་བ་སྟེ། དངོས་གཞིའི་ཁ་ན་མ་ཐོ་བར་མཚང་བ་ཉེས་པ་སྦོམ་པོའི་དངོས་གཞིར་གཏོགས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་དགེ་སློང་གིས་མ་བསྒོ་བར་གཞན་གྱི་དོན་དུ་རྐུ་ན་ལྟུང་བ་ཅིར་འགྱུར། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །རྟོག་པས་ཀྱང་ངོ་ཞེས་བྱ་བ་ནི། རྟོག་པས་རྐུ་ན་ཡན་ལག་ལྷག་མ་ཡོད་དུ་ཟིན་ཀྱང་དངོས་གཞིའི་རྣམ་པར་འགྱུར་ཏེ། གང་ལ་ཕམ་པར་འགྱུར་བ་དེ་ལ་ནི་སྦོམ་པོའོ། །གང་ལ་སྦོམ་པོར་འགྱུར་བ་དེ་ལ་ཉེས་བྱས་སོ་ཞེས་བྱ་བ་ལ་སོགས་པའོ། །རྟོག་པ་ནི་རྣམ་པ་གཉིས་ཏེ། ཁ་ཅིག་ནི་ཤགས་འགྱེད་པའི་དུས་ན་ཁ་སད་ཀྱིས་གསོད་པ་ཕ་རོལ་པོའི་ཚིག་གི་
སྐབས་མེད་པར་བྱ་བའི་ཕྱིར་ལན་འདེབས་པ་གང་ཡིན་པ་དེ་རྟོག་པ་དེ་ལྟ་བུ་ལ་ནི་དངོས་གཞི་ཉིད་དུ་འགྱུར་གྱི། དངོས་གཞིའི་རྣམ་པར་མི་འགྱུར་རོ། །ཁ་ཅིག་ནི་རྟོག་པར་བྱེད་པའི་དུས་ཉིད་ན་བསམ་པའི་དབང་གིས་རང་གི་ཡིན་པའི་འདུ་ཤེས་སྐྱེ་སྟེ། འོན་ཀྱང་དེ་ཉེས་པའི་རྣམ་པའི་དོགས་པ་དང་འབྲེལ་པ་ཡིན་པས་དེས་ན་དེ་ལ་ནི་དངོས་གཞིའི་རྣམ་པར་འགྱུར་གྱི། དངོས་གཞིར་ནི་མི་འགྱུར་ཏེ། འདི་ལྟ་སྟེ་དཔེར་ན། འདི་ནི་བདག་གི་ཡིན་ནོ་སྙམ་པའམ། ཡོངས་སུ་བཟུང་བ་མ་ཡིན་ནོ་སྙམ་པའམ། ལྷ་སྦྱིན་ལ་སོགས་པ་དེས་བདག་ལ་བྱིན་ནོ་སྙམ་པའམ། དེ་ལྟ་བུ་ལ་སོགས་པ་རྟོག་པ་སྟེ། རྟོག་པ་འདི་ནི་གཞན་གྱིས་ཡོངས་སུ་བཟུང་བ་ལ་སོགས་པའི་འདུ་ཤེས་ཀྱིས་ཉེས་པ་དང་འབྲེལ་པའི་ཕྱིར་དེས་ན་དངོས་གཞིའི་རྣམ་པ་ཡིན་ནོ། །མདོ་འདིའི་ཡུལ་འདི་ལ་འདུ་ཤེས་བཞིན་དུ་ཡིད་གཉིས་ནི་མེད་དེ། གང་ཡང་རུང་བའོ་སྙམ་པ་དེ་ལྟ་བུའི་ཡུལ་ཡིན་པའི་ཕྱིར་རོ། །འདི་ནི་ཁ་ན་མ་ཐོ་བ་དང་བཅས་པ་ཡིན་ནོ་ཞེས་ངེས་པར་བྱས་ནས་དེ་ལྟ་ན་ཡང་འཇུག་པར་བྱེད་དེ། དེས་ན་ཡུལ་གཞན་ཁོ་ན་ཡིན་ནོ། །གདམས་ཏེ་བཟང་པོ་བརྐུ་བར་འདོད་པ་ལ་ཡང་ངོ་ཞེས་བྱ་བ་ནི། དངོས་གཞིའི་རྣམ་པའོ་ཞེས་བྱ་བར་སྦྱར་ཏེ། །གདམས་ཤིང་གདམས་ཤིང་གང་བཟང་བ་དེ་རྐུའོ་སྙམ་པ་དེ་ལྟར་འདོད་པ་ལ་ཡང་གང་གདམས་པ་ལ་དངོས་གཞིའི་རྣམ་པར་འགྱུར་ཏེ། དེ་ལ་ཡང་ཁ་ན་མ་ཐོ་བ་སྦོམ་པོར་འགྱུར་རོ། །འདིར་ནི་སྐབས་གཞན་དུ་རྐུ་བའི་ཕྱིར་ནོམ་བར་བྱེད་པ་ལ་སྦོམ་པོར་བསྟན་པ་དེ་ལས་ཐ་དད་པའི་སྦོམ་པོ་གཞན་དུ་འགྱུར་རོ་ཞེས་བསྟན་པའི་ཕྱིར་མདོ་འདི་བསྟན་ཏེ། འདི་ལྟར་གཞན་དུ་ནི་ནོམ་པའི་སྔ་རོལ་དུ་ཁྲི་ལས་ལྡང་བ་ལ་སོགས་པའི་ཚེ་ན་ཉེས་བྱས་སོ། །ནོམ་པ་ན་ཉེས་པ་སྦོམ་པོའོ། །གནས་ནས་སྤགས་ན་ཕམ་པར་བསྟན་གྱི། འདིར་ནི་གདམས་ཏེ་ལོགས་ཤིག་ཏུ་བཀར་ཀྱང་རུང་སྟེ། སྦོམ་པོ་ཁོ་ནར་བཞེད་དོ། །དེ་བས་ན་གདམས་པ་ན་ཡང་སྦོམ་པོ་གཅིག་གོ །གདམས་ཏེ་རྐུ་བའི་ཆེད་དུ་ནི་ནོམ་པ་ཡང་སྦོམ་པོ་གཞན་གཉིས་པར་འགྱུར་རོ། །རྒྱུན་ལ་དོར་བྱེད་ན་གལ་ཏེ་རྒྱལ་བ་ཉིད་དུ་མི་འགྱུར་བའི་ཚེ་སྦྱོར་བའོ་ཞེས་བྱ་བ་ནི། རྒྱན་ལ་དོར་བྱེད་ན་གལ་ཏེ་དོར་ཏེ་རྒྱལ་བ་ཉིད་དུ་མ་གྱུར་གྱི་བར་དུ་ནི་དོར་ཏེ་སྦྱོར་བར་འགྱུར་རོ། །དེ་ལ་
དེ་ནི་བརྐུས་པ་ཡིན་ནོ་ཞེས་བྱ་བ་ནི། རྒྱན་དེ་ལ་དོར་གྱིས་རྒྱལ་བ་ཉིད་དུ་གྱུར་པ་དེ་ནི་བརྐུས་པ་ཡིན་པར་རིག་པར་བྱའོ། །གྲངས་ལ་ནི་དེའིའོ་ཞེས་བྱ་བ་ནི། གྲངས་རྩིས་ལས་དོར་བྱས་པ་ལ་ནི་སྦྱོར་བ་དེའི་སྦྱོར་བའོ་ཞེས་བྱ་བར་རིག་པར་བྱ་སྟེ། དངོས་གཞིའི་སྦྱོར་བ་ནི་མ་ཡིན་ནོ། །འདི་སྐད་བསྟན་ཏེ། གྲངས་ཀྱི་སྐབས་སུ་དོར་བྱེད་པ་ནི་ཉེས་བྱས་ཡིན་གྱི་སྤོམ་པོར་མི་འགྱུར་རོ། །གཞན་དུ་ཡང་སྦྱོར་བའི་སྦྱོར་བ་ཉིད་བསྟན་པའི་ཕྱིར། མཚན་མ་ཕྱིས་པ་དང་བསྣན་པ་གཉིས་དང་གནས་གཞན་དུ་གཞག་པ་ཡང་དེ་ཉིད་དོ་ཞེས་བྱ་བ་སྨྲས་ཏེ། མཚན་མ་ཞེས་བྱ་བ་ནི། ཤོད་ཐབས་དང་ཁྲམ་ཐབས་ལ་སོགས་པའི་གཅིག་ལ་སོགས་པའི་རྟགས་ཀྱི་མཚན་མའོ། །དེ་ཕྱིས་པ་ཞེས་བྱ་བ་ནི་མེད་པར་བྱས་པའོ། །བསྣན་པ་ཞེས་བྱ་བ་ནི་ལྷག་པར་བསྣན་པ་གང་ཡིན་པ་སྟེ། ཕྱིས་པ་དང་བསྣན་པ་དེ་གཉིས་ཀྱང་དོར་བྱེད་པ་ཉིད་དོ། །སྦྱོར་བའི་སྦྱོར་བ་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །དེ་གཉིས་འབའ་ཞིག་དེ་ཉིད་ཡིན་པར་མ་ཟད་དེ། འདི་ལྟར་མཚན་མ་དེ་ཤོད་མིག་དང་ཁྲམ་གྱིས་ལ་སོགས་པའི་གནས་གང་ན་འདུག་པའི་གནས་དེ་ནས་གནས་གཞན་དུ་ལྟག་འོག་བསྣོར་ཞིང་གཞག་པ་ཡང་དེ་ཉིད་དེ་དོར་བྱེད་པ་ཉིད་དེ། མདོ་འདི་ནི་གནས་སྐབས་ཐམས་ཅད་ཀྱི་དབང་དུ་བྱས་པ་ཡིན་གྱི། རྒྱན་དང་གྲངས་འབའ་ཞིག་གི་དབང་དུ་བྱས་པ་ནི་མ་ཡིན་ནོ། །དེ་བས་ན་གླེགས་བུ་ལ་བྲིས་པ་ལ་སོགས་པའི་མཚན་མ་ཤོད་ཐབས་དང་ཁྲག་ཐབས་དང་ཡིག་འབྲུ་དང་མདོ་རིས་ལ་སོགས་པ་ཕྱིས་པ་དང་བསྣན་པ་དང༌། གནས་གཞན་དུ་སྤོས་པ་ཡང་ཉེས་བྱས་ཉིད་དོ། །དེ་ལ་གྲུབ་པ་ན་བརྐུས་པ་ཡིན་ནོ་ཞེས་བྱ་བ་ལ་ནི་གྲངས་ལའོ། །གྲུབ་པ་ན་ཞེས་བྱ་བ་ནི་ནོར་ཐོབ་པ་ན་སྟེ། དེའི་ཚེ་ན་བརྐུས་པ་ཡིན་ནོ། །དེ་ལྟར་ན་འདིར་གྲངས་ཀྱི་སྐབས་སུ་དོར་བྱེད་པ་ནི་སྦྱོར་བའི་སྦྱོར་བ་ཉིད་དེ་ཉེས་བྱས་ཉིད་དོ། །ཐོབ་པར་བྱ་བའི་ཕྱིར་དེའི་འོག་ཏུ་རྩོལ་བའི་སྦྱོར་བ་ཉིད་དེ་སྦོམ་པོའོ། །ཐབས་གང་ཡང་རུང་བས་ཐོབ་པའི་ཚེ་ན་ནི་བརྐུས་པ་ཉིད་ཡིན་ནོ། །གཞན་དུ་ཡང་སྦྱོར་བའི་སྦྱོར་བ་དང་བརྐུས་པ་དེ་ཉིད་འདྲེ་པར་སྦྱར་བའི་ཕྱིར། ཚོམས་གཞན་དུ་ལ་གྲང་བ་ལ་ཡང་དེ་དང་འདྲའོ་ཞེས་བྱ་བ་སྨྲས་ཏེ། ཚོམས་ཅིག་ཤོས་ཀྱི་ནང་དུ་ཡང་བདག་
ཉིད་བགྲངས་ན་ཡང་རྙེད་པའི་ཕྱིར་བདག་ཉིད་ཚོམས་གཞན་དུ་བགྲང་བ་ཡང་དེ་དང་འདྲ་སྟེ། གྲངས་ཀྱི་སྐབས་སུ་དོར་བྱེད་པ་དང་འདྲ་བར་བལྟ་བར་བྱའོ། །འདིར་ཡང་བགྲང་བ་ནི་སྦྱོར་བའི་སྦྱོར་བ་ཉིད་དེ་ཉེས་བྱས་ཉིད་དོ། །གྲུབ་པའི་ཚེ་ནི་བརྐུས་པ་ཡིན་ནོ། །འདིར་གཞུང་ནི་བཙུན་པ་དགེ་སློང་གིས་རེ་ཞིག་བདག་ཉིད་ཚོམས་གཉི་གར་བགྲང་ན་ལྟུང་བ་ཅིར་འགྱུར། ཉེས་པ་སྦོམ་པོར་སྦྱོར་བའི་ཉེས་བྱས་སོ་ཞེས་གསུངས་པ་ཡིན་ནོ། །སྔ་མ་ཉིད་ཕྱི་མ་དང༌། ལ་ཡང་ཕྱི་མ་ཉིད་སྔ་མ་དག་ལ་བསྙོན་པ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲ་ནི་དེ་དང་འདྲའོ་ཞེས་བྱ་བའི་རྗེས་སུ་བསྙགས་པའི་ཕྱིར་རོ། །ཚོམས་སྔ་མ་ཤོས་ཀྱི་དངོས་པོ་ནི་སྔ་མ་ཉིད་དོ། །ཚོམས་སྔ་མ་ཉིད་གང་དུ་དེས་བདག་ཉིད་སྔར་བགྲངས་ཟིན་པའི་ཚོམས་དེ་བསྙོན་པ་གང་ཡིན་པའོ། །གང་དག་ལ་བསྙོན་ཞེ་ན་དེའི་ཕྱིར། ཕྱི་མ་དག་ལ་ཞེས་བྱ་བ་སྨྲས་ཏེ། སྔར་བགྲངས་པའི་ཚོམས་ལས་གཞན་པའི་ཚོམས་ཕྱི་མ་གཞན་དག་ལ་བསྙོན་ཞེས་བྱ་བའི་ཐ་ཚིག་གོ །ཚོམས་ཕྱི་མ་ཤོས་ཀྱི་དངོས་པོ་ནི་ཕྱི་མ་ཉིད་དེ། ཚོམས་ཕྱི་མ་ཉིད་གང་དུ་དེས་བདག་ཉིད་ཕྱིས་ཀྱང་བགྲངས་པར་གྱུར་པའི་ཚོམས་དེ་ཡང་བསྙོན་པ་གང་ཡིན་པ་སྟེ། གང་དག་ལ་བསྙོན་ཞེ་ན་དེའི་ཕྱིར། སྔ་མ་དག་ལ་ཞེས་བྱ་བ་སྨྲས་ཏེ། ཚོམས་གང་དུ་དེས་བདག་ཉིད་སྔར་བགྲངས་ཟིན་པའི་ཚོམས་དེར་གཏོགས་པའི་གང་ཟག་དག་ལ་བསྙོན་པའོ། །བསྙོན་པ་དེ་ཡང་དེ་དང་འདྲ་སྟེ། གྲངས་ཀྱི་སྐབས་སུ་དོར་བྱེད་པ་དང་འདྲ་བར་བལྟ་བར་བྱའོ། །འདིར་ཡང་བསྙོན་པ་ནི་སྦྱོར་བ་ཉིད་དེ་ཉེས་བྱས་སོ། །གྲུབ་པའི་ཚེ་ནི་བརྐུས་པ་ཉིད་དོ། །འདིར་གཞུང་ནི་བཙུན་པ་དགེ་སློང་གིས་རེ་ཞིག་བདག་ཉིད་བགྲང་དུ་སྩལ་ནས་བསྙོན་ན་ལྟུང་བ་ཅིར་འགྱུར། ཉེས་པ་སྦོམ་པོར་སྦྱོར་བའི་ཉེས་བྱས་སུའོ་ཞེས་གསུངས་པ་ཡིན་ནོ། །དེའི་རྙེད་པ་ཚོམས་གང་ལས་བླང་བར་བྱ་ཞེ་ན་དེའི་ཕྱིར། སྐལ་བ་ཉིད་ན་དེ་དག་གང་དུ་ཐམས་ཅད་ཀྱི་དང་པོར་བགྲངས་པ་དེར་རོ་ཞེས་བྱ་བ་སྨྲས་ཏེ། དེའི་སྐལ་བ་ཉིད་ནི་ཚོམས་དེ་དག་གང་དུ་ཚོམས་ཐམས་ཅད་ཀྱི་དང་པོར་བགྲངས་པ་དེར་གཏོགས་སོ། །དེ་ཚོམས་གང་དུ་ཐམས་ཅད་ཀྱི་དང་པོར་བགྲངས་པ་དེར་སྐལ་བ་ཉིད་དབང་སྟེ། ཚོམས་དེ་ལས་སྐལ་བ་བླངས་པ་ལ་ནི་ལྟུང་བ་མེད་དོ། །མི་
དབང་བ་དབང་བར་སྒྲོགས་པ་ཡང་ངོ་ཞེས་བྱ་བ་ལ་མི་དབང་བ་ཞེས་བྱ་བ་ནི། སྐལ་བ་མི་དབང་བའི་གང་ཟག་སྟེ། དེ་ཡང་འདིར་གཏོགས་སོ་ཞེས་དབང་བར་སྒྲོགས་ཤིང་སྨྲ་ན། དེ་ཡང་དེ་དང་འདྲ་སྟེ་གྲངས་ཀྱི་སྐབས་སུ་དོར་བྱེད་པ་དང་འདྲ་བར་བལྟ་བར་བྱའོ། །འདིར་ཡང་དབང་བར་སྒྲོགས་པ་ནི་སྦྱོར་བའི་སྦྱོར་བ་ཉིད་དེ་ཉེས་བྱས་སོ། །གྲུབ་པའི་ཚེ་ན་ནི་བརྐུས་པ་ཉིད་དོ། །འདིར་གཞུང་ནི་བཙུན་པ་དགེ་སློང་གིས་རེ་ཞིག་རྙེད་པ་གློ་བུར་བ་མི་དབང་བ་ལས་བདག་ཀྱང་དབང་ངོ་ཞེས་དབང་བར་སྒྲོགས་ན་ལྟུང་བ་ཅིར་འགྱུར། ཉེས་པ་སྦོམ་པོར་སྦྱོར་བའི་ཉེས་བྱས་སུའོ་ཞེས་གསུངས་པ་ཡིན་ནོ། །མ་བསྒོ་བར་སློང་བ་ཡང་ངོ་ཞེས་བྱ་བ་ཡང་གྲངས་ཀྱི་སྐབས་སུ་དོར་བྱེད་པ་དང་འདྲ་བར་བལྟ་བར་བྱ་སྟེ། འདིར་ཡང་མ་བསྒོ་བར་སློང་བ་ནི་སྦྱོར་བའི་སྦྱོར་བ་ཉིད་དེ་ཉེས་བྱས་སོ། །གྲུབ་པའི་ཚེ་ན་ནི་བརྐུས་པ་ཉིད་དོ། །འདིར་གཞུང་ནི་བཙུན་པ་དགེ་སློང་ཁྱིམ་བདག་གི་མདུན་དུ་མཆིས་པས་རེ་ཞིག་དེ་ཁྱིམ་བདག་དེའི་ཉེ་དུའི་ཐད་དུ་མཆིས་ནས་ཁྱིམ་བདག་ན་རེ་འདི་སྐད་ཅེས་དངོས་པོ་ཆེ་གེ་མོ་ཞིག་དང་མང་གེ་མོ་ཞིག་བྱིན་ཅིག་ཅེས་ཟེར་རོ་ཞེས་བགྱིས་ན་ལྟུང་བ་ཅིར་འགྱུར་ཉེས་པ་སྦོམ་པོར་སྦྱོར་བའི་ཉེས་བྱས་སུའོ་ཞེས་གསུངས་པ་ཡིན་ནོ།། །། བམ་པོ་བཅུ་གཅིག་པ། བརྙས་པ་དང་བ་སྐྱིས་པ་དང་གཏམས་པ་རྣམས་བསྙོན་པ་ནི་སྦྱོར་བའོ་ཞེས་བྱ་བ་ནི་བརྙས་པ་དང་བསྐྱིས་པ་དང་གཏམས་པ་རྣམས་བསྙོན་པ་ནི་སྦྱོར་བ་སྟེ་སྦོམ་པོར་རིག་པར་བྱའི་སྦྱོར་བའི་སྦྱོར་བ་ཉེས་བྱས་ནི་མ་ཡིན་ཏེ། འདིར་བརྣོག་ཅིང་མི་སྦྱིན་པར་ངེས་ན་ནི་བརྐུས་པ་ཉིད་ཡིན་པར་བཞེད་དོ། །དེ་ལ་བརྙས་པ་ཞེས་བྱ་བ་ནི་བརྙན་པོ་ཁུགས་པའོ། །བསྐྱིས་པ་ཞེས་བྱ་བ་ནི་སྐྱིན་པ་སྦྱིན་ནོ་ཞེས་སྔ་ཤུགས་སུ་ཐོབ་པའོ། །གཏམས་པ་ཞེས་བྱ་བ་ནི་གཏད་དེ་གཞག་པའོ། །བརྣོགས་ན་བརྐུས་པ་ཡིན་ནོ་ཞེས་བྱ་བ་ནི། བརྙས་པ་ལ་སོགས་པས་དེ་དག་གི་ཚེ་བརྣོག་ཅིང་མི་སྦྱིན་པར་ངེས་པ་དེའི་ཚེ་ན་བརྐུས་པ་ཡིན་ནོ། །གང་གི་ཚེ་བརྐུའོ་མ་འོན་ཏེ་བཏང་སྙམ་དུ་ཡིད་གཉིས་ཟ་བར་གྱུར་པ་དེའི་ཚེ་ན་ནི་གནས་ནས་སྤོ་བར་བྱེད་ཅིང་དངོས་པོ་ཚང་བར་ཡིན་དུ་ཟིན་ཀྱང་སྦོམ་པོར་འགྱུར་གྱི། ཕམ་པར་ནི་མི་འགྱུར་ཏེ། རྐུ་བར་ངེས་པ་མེད་པའི་
ཕྱིར་རོ། །འདིར་གཞུང་ནི་བཙུན་པ་དགེ་སློང་གིས་རེ་ཞིག་གཡར་བ་བསྙོན་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ། །བསྐྱིས་པ་བསྙོན་ན་ལྟུང་བ་ཅིར་འགྱུར་ཉེས་པ་སྦོམ་པོར་རོ། །དེ་གཉིས་ལན་འགའ་མཐར་གྱུར་པ་ཡང་ཡོད་དེ། གང་གི་ཚེ་བརྣོགས་པ་ནའོ། །དགེ་སློང་གི་ཐད་དུ་གཞན་གྱིས་གཏམས་ཏེ་གཞག་པ་དེ་ལེན་པའི་ཚེ་བསྙོན་ན་ལྟུང་བ་ཅིར་འགྱུར། ཉེས་པ་སྤོམ་པོར་རོ། །ལན་འགའ་ནི་མཐར་འགྱུར་ཏེ་གང་གི་ཚེ་བརྣོགས་པ་ནའོ་ཞེས་གསུངས་པ་ཡིན་ནོ། །གཏམས་པ་ནི་རྣམ་པ་གཉིས་ཏེ། བདག་པོས་མི་ཤེས་པར་ཞལ་ཏ་པ་ཉིད་ཀྱིས་རང་གིས་སྦས་པ་དང༌། ཞལ་ཏ་བའི་མངོན་སུམ་དུ་བདག་པོ་ཉིད་ཀྱིས་རང་གིས་སྦས་པའོ། །དེ་ལ་བདག་པོས་མི་ཤེས་པར་ཞལ་ཏ་པ་རང་ཉིད་ཀྱིས་རང་གིས་སྦས་པ་ནི་གང་གི་ཚེ་བརྣོགས་པ་དེའི་ཚེ་ཁོ་ན་བརྐུས་པར་འགྱུར་ཏེ། དེ་ཡང་མདོ་སྔ་མར་གཏམས་པ་ཞེས་སྨོས་པ་ཉིད་ཀྱིས་བསྟན་པ་བཞིན་དུ་བརྗོད་དོ། །ཞལ་ཏ་བའི་མངོན་སུམ་དུ་བདག་པོ་ཉིད་ཀྱིས་རང་གིས་སྦས་པ་ནི་གནས་གང་དུ་གཞག་པ་དེར་བརྣོགས་པ་ཙམ་གྱིས་བརྐུས་པ་ཁོ་ནར་མི་རུང་སྟེ། འདི་ལྟར་གལ་ཏེ་གནས་ནས་སྦོ་བར་བྱེད་པ་ན་བརྐུས་པ་ཡིན་པར་བསྟན་པའི་ཕྱིར། གཏམས་པ་སྦས་པ་ལ་གལ་ཏེ་སྤོ་བ་དང་ལྷན་ཅིག་ཏུ་དང་སྤོས་པའི་འོག་ཏུ་དང༌། གལ་ཏེ་སྔར་ན་ནི་སྦྱོར་བ་གཞན་ཉིད་དོ་ཞེས་བྱ་བ་སྨྲས་ཏེ། ཞལ་ཏ་པའི་མངོན་སུམ་དུ་བདག་པོ་ཉིད་ཀྱིས་རང་གི་གནས་གང་དུ་གཏམས་པ་སྦས་པ་ལ་ནི་གལ་ཏེ་ཞལ་ཏ་པས་གནས་ནས་སྤོ་བ་དང་ལྷན་ཅིག་ཏུ་བརྣོག་པར་བྱེད་ན་ནི་དེའི་ཚེ་ཁ་ན་མ་ཐོ་བ་ཡོངས་སུ་རྫོགས་པ་ཡིན་ནོ། །ཅི་སྟེ་སྔར་གནས་ནས་སྤོ་བར་བྱེད་ལ། སྤོས་པའི་འོག་ཏུ་བརྣོག་པར་བྱེད་ན་ནི་དེ་ལྟར་བརྣོགས་པའི་ཚེ་ཁོ་ན་ནི་བརྐུས་པར་འགྱུར་རོ། །གལ་ཏེ་གནས་ནས་སྤོ་བའི་སྔ་རོལ་དུ་སྔར་བརྣོག་པར་བྱེད་ན་ནི་དེའི་ཚེ་ན་བརྣོགས་པ་དེ་སྦྱོར་བ་གཞན་ཉིད་ཡིན་ཏེ། སྦོམ་པོ་གཞན་ཐ་དད་གཅིག་ཡིན་པར་རིག་པར་བྱའོ། །དེ་བས་ན་བརྣོགས་པ་དེ་ནི་བསྙོན་པ་ལས་སྦྱོར་བ་ཐ་དད་པ་གཞན་ཡིན་པར་རིག་པར་བྱའོ། །དེའི་ཕྱིར་གལ་ཏེ་སྔར་བརྣོག་པར་བྱེད་ལ་ཕྱིས་བསྙོན་ན་དེ་ལྟན་བརྣོགས་པ་དེ་བསྙོན་པས་རབ་ཏུ་ཆོད་པས་སྦྱོར་བ་ཉིད་དེ་བརྣོགས་པ་ནི་
དངོས་གཞིའི་རྣམ་པ་སྦོམ་པོ་ཡིན་པའི་ཕྱིར་རོ། །དེ་ལྟར་ན་གོ་རིམས་འདི་ལ་ནི་སྦྱོར་བ་གཉིས་ཏེ། བརྣོགས་པ་དང་བསྙོན་པའོ། །ཇི་སྟེ་སྔར་བསྙོན་པར་བྱེད་ལ་ཕྱིས་བརྣོག་པར་བྱེད་ན་ནི་དེའི་ཚེ་བསྙོན་པ་དེ་བརྣོགས་པས་བར་དུ་ཆོད་པའི་ཕྱིར་སྦྱོར་བའི་སྦྱོར་བ་ཉིད་དེ། བསྙོན་པ་ནི་རྟོག་པའི་སྦྱོར་བ་ཡིན་བའི་ཕྱིར་རོ། །བརྣོགས་པའི་ཚེ་ན་ནི་སྦྱོར་བ་ཉིད་དེ་སྦོམ་པོའོ། །གནས་ནས་སྤགས་པའི་ཚེ་ན་ནི་བརྐུས་པ་ཉིད་དོ། །འདིར་གཞུང་ནི་དགེ་སློང་གི་ཐད་དུ་གཞན་གྱིས་གཏམས་ཏེ་གཞག་པ་དེ་ལེན་པའི་ཚེ་ན་བསྙོན་ན་ཉེས་པ་སྦོམ་པོར་འགྱུར་རོ། །ལན་འགའ་ནི་མཐར་ཡང་འགྱུར་ཏེ། གང་གི་ཚེ་བརྣོག་བར་བྱེད་ཅིང་དངོས་པོ་ཚང་ན་ནི་མཐར་འགྱུར་རོ། །གལ་ཏེ་མཚང་ན་ཉེས་པ་སྦོམ་པོར་རོ། །སྔར་བརྣོག་པར་བྱེད་ཅིང་ཕྱིས་གནས་ནས་སྤོ་བར་བྱེད་ན། བརྣོག་པའི་ཚེ་ཉིད་ན་ཉེས་པ་སྦོམ་པོར་འགྱུར་རོ། །ཇི་སྟེ་སྔར་གནས་ནས་སྤོ་བར་བྱེད་ཅིང་ཕྱིས་བརྣོག་པར་བྱེད་ན་དངོས་པོ་ཚང་ན་མཐར་འགྱུར་རོ། །དངོས་པོ་མཚང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །སྒྱིད་པ་གཅོད་པ་དང་གསོད་པ་ཞེས་བྱ་བ་འདི་གཉིས་སྔར་ཆུད་གཟན་པ་ཞེས་མདོ་ལས་སྨོས་པའི་ཁོངས་སུ་གཏོགས་པར་བསྟན་པའི་ཕྱིར་སྒྱིད་པ་གཅོད་པ་དང་གསོད་པ་ནི་ཆུད་གཟན་པ་ཡིན་ནོ་ཞེས་བྱ་བ་སྨྲས་ཏེ། བ་ལང་ལ་སོགས་པ་དག་གི་པུས་མོ་ལྷ་ངའི་བར་གྱི་ཐོང་རྒྱུད་ཀྱི་ཆུབ་ནི་སྒྱིད་པ་ཞེས་བྱའོ། །བ་ལང་ལ་སོགས་པ་སྲོག་དང་བྲལ་བར་བྱེད་པ་ནི་གསོད་པའོ། །དགྲ་ལ་སོགས་པའི་རྐྱེན་གྱིས་རིངས་དྲགས་པ་བྱུང་བ་ན་བ་ལང་ལ་སོགས་པ་ཆད་པ་ལ་སོགས་པས་བདའ་བ་ལ་སོགས་པར་མ་ནུས་པ་དག་སུ་ལ་ཡང་ཕན་པར་མ་གྱུར་ཅིག་ཅེས་སྒྱིད་པ་གཅོད་པ་དང་གསོད་པར་བྱེད་པ་ནི་ཆུད་གཟན་པ་ཡིན་པར་རིག་པར་བྱ་སྟེ། དེ་ཡང་སྔར་མདོ་ལས་བདག་གིར་མ་བྱས་པར་སྦས་པ་དང་ཆུད་གཟན་པ་དང་ཟིན་པ་བཏང་བ་ལ་སོགས་པས་བྲལ་བར་བྱེད་ན་ཡང་ངོ་ཞེས་སྨོས་པའི་ཆུད་གཟན་པ་ཞེས་བྱ་བ་དེའི་ཁོངས་སུ་འདི་གཉིས་ཀྱང་གཏོགས་པ་ཉིད་དུ་རིག་པར་བྱའོ། །དེའི་ཕྱིར་འདི་གཉིས་ནི་དངོས་པོ་ཚང་དུ་ཟིན་ན་ཡང་ཉེས་པ་སྤོམ་པོར་འགྱུར་གྱི་ཕམ་པར་ནི་མི་འགྱུར་པར་ཤེས་པར་བྱའོ། །འདིར་སྒྱིད་པ་
གཅོད་པ་ཞེས་སྨོས་པ་ནི་དཔེ་ཙམ་སྟེ། རྩིབ་མ་གཅོད་པ་ལ་སོགས་པ་གནོད་པ་བྱེད་པ་གཞན་དག་ཀྱང་དེ་བཞིན་དུ་རིག་པར་བྱའོ། །འདིར་གཞུང་ནི་ཇི་སྟེ་ཕན་པར་མ་གྱུར་ཅིག་ཅེས་གསོད་པར་བྱེད་ན་ཉེས་པ་སྦོམ་པོར་འགྱུར་རོ། །ཇི་སྟེ་ཕན་པར་མ་གྱུར་ཅིག་ཅེས་སྒྱིད་པ་གཅོད་པར་བྱེད་ན་ཡང་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །མཚམས་ཀྱི་ནམ་མཁའ་ལས་ཤོ་གམ་འདྲལ་ན་ཡང་སྦོམ་པོའི་དབང་དུ་བྱས་པ་ཉིད་དོ་ཞེས་བྱ་བ་ལ་མཚམས་དང་འབྲེལ་པའི་ནམ་མཁའ་གང་ཡིན་པ་དེ་ནི་མཚམས་ཀྱི་ནམ་མཁའོ། །དེ་ནས་ཤོ་གམ་འདྲལ་བ་ནི་ཤོ་གམ་གཞལ་དགོས་པའི་རྫས་མཚམས་དེ་ནས་ནམ་མཁའ་ལས་ཤོ་གམ་གྱི་གནས་ནས་འདའ་བར་བྱེད་པའོ། །དེ་ལྟར་བྱེད་ན་ཡང་སྦོམ་པོའི་དབང་དུ་བྱས་པ་ཉིད་དོ་ཞེས་བྱ་བ་ལ་སྦོམ་པོར་བྱེད་པས་ན་སྦོམ་པོའི་དབང་དུ་བྱས་པའོ། །དེའི་དངོས་པོ་ནི་དེ་ཉིད་དོ། །འདི་སྐད་བསྟན་ཏེ། གལ་ཏེ་དགེ་སློང་ཤོ་གམ་གྱི་མཚམས་སུ་ཕྱིན་པས་ཤོ་གམ་གཞལ་དགོས་པའི་རྫས་ལུས་ཀྱི་བརྩལ་བ་མངའ་འཕར་བ་ལ་སོགས་པས་སམ། ངག་གི་བརྩལ་བ་གསང་སྔགས་ཀྱི་བཟླས་བརྗོད་ལ་སོགས་པས་སམ། ཡིད་ཀྱི་བརྩལ་བ་མངོན་པར་ཤེས་པ་ལས་བྱུང་བ་མ་གཏོགས་པའི་རྫུ་འཕྲུལ་མངོན་པར་འདུ་བྱ་བ་ལ་སོགས་བདག་གིས་ཤོ་གམ་གྱི་ས་ནས་ནམ་མཁའ་ལས་འདའ་བར་བྱེད་ན་ཉེས་པ་སྦོམ་པོར་འགྱུར་རོ། །ཤོ་གམ་ལ་ཡང་མ་ཤ་ཀ་ལྔ་ལ་སོགས་པའི་དངོས་པོར་མ་ཚང་བ་དེ་ཉེས་པ་སྦོམ་པོ་ཡིན་ནོ། །གང་གི་ཚེ་དགེ་སློང་ནམ་མཁའ་ཁོ་ན་ལ་རྣམ་པར་གནས་པས་ཤོ་གམ་གྱི་སའི་ཕྱི་རོལ་གྱི་མཚམས་ནས་ནམ་མཁའ་ལ་ཤོ་གམ་གཞལ་དགོས་པའི་རྫས་ཤོ་གམ་གྱི་ས་ལས་འདའ་བར་བྱེད་པ་དེ་ལ་ལྟུང་བ་མེད་དོ། །ཁ་ཅིག་འདི་སྐད་ཅེས་ཟེར་ཏེ་དགེ་སློང་ཤོ་གམ་གྱི་མཚམས་ཀྱི་ཕྱི་རོལ་ན་འདུག་པས་ཤོ་གམ་གཞལ་དགོས་པའི་རྫས་སྔར་བསྟན་པའི་ཐབས་ཀྱིས་ནམ་མཁའ་ལས་ཤོ་གམ་གྱི་ས་ལས་འདའ་བར་བྱེད་ན་ཡང་ཉེས་པ་སྦོམ་པོར་འགྱུར་ལ། ཤོ་གམ་གྱི་མཚམས་ཀྱི་ནང་ནས་གལ་ཏེ་ནམ་མཁའ་ལས་འདའ་བར་བྱེད་ན་ནི་དེའི་ཚེ་ཕམ་པར་འགྱུར་རོ་ཞེས་ཏེ། དེ་ནི་དེ་ལྟར་མི་བཞེད་དེ་རྒྱལ་པོ་དག་ནི་ས་ལ་དབང་བ་
ཡིན་གྱི། ནམ་མཁའ་ལ་མ་ཡིན་པས་གལ་ཏེ་མཚམས་སུ་ཕྱིན་པར་མ་གྱུར་ན་དེའི་ཚེ་གཞལ་བ་ཉིད་ཀྱང་མི་འབྱུང་ན་ལྟུང་བར་འགྱུར་བ་འབྱུང་རེ་སྐན། རྫུ་འཕྲུལ་གྱིས་ཁྱེར་བ་ལ་ནི་ཉེས་པ་མེད་པ་ཉིད་དོ་ཞེས་བྱ་བ་ནི་ཤོ་གམ་འདྲལ་ན་ཡང་ཞེས་བྱ་བར་སྦྱར་རོ། །དགེ་སློང་ཤོ་གམ་གྱི་མཚམས་ཀྱི་ནང་དུ་ཕྱིན་པས་བསྒོམས་པ་ལས་བྱུང་བའི་རྫུ་འཕྲུལ་གྱིས་ཤོ་གམ་གཞལ་དགོས་པའི་རྫས་ནམ་མཁའ་ལས་སམ་གང་ཡང་རུང་བས་ཤོ་གམ་གྱི་ས་ལས་འདས་པར་བྱེད་ན་དེ་ལ་ནི་ལྟུང་པ་མེད་དེ། དེ་ལ་རྐུ་སེམས་མེད་པའི་ཕྱིར་རོ། །འདིར་གཞུང་ནི་བཙུན་བ་དགེ་སློང་གིས་རེ་ཞིག་ནམ་མཁའ་ལས་ཤོ་གམ་འདའ་བར་བགྱིད་ན་ལྟུང་བ་ཅིར་འགྱུར། གལ་ཏེ་རྫུ་འཕྲུལ་གྱི་ས་འདའ་བར་བྱེད་ན་ནི་ལྟུང་བ་མེད་དོ། །ཇི་སྟེ་རྣམ་པ་གཞན་དག་གིས་ན་ཉེས་པ་སྦོམ་པོར་གསུངས་པ་ཡིན་ནོ། །མཚམས་གཞན་དུ་ཡང་ངོ་ཞེས་བྱ་བ་ནི་ཤོ་གམ་འདྲལ་ན་ཡང་ཉེས་པ་མེད་པ་ཉིད་དོ་ཞེས་བྱ་བར་སྦྱར་རོ། །མཚམས་གཞན་དུ་ཞེས་བྱ་བ་ནི། ཤོ་གམ་གྱི་མཚམས་གང་ཡིན་པ་ལས་གཞན་པའི་མཚམས་སུ་སྟེ། དེར་ཤོ་གམ་འདྲལ་ན་ཡང་ཉེས་པ་མེད་པ་ཉིད་དེ། ལྟུང་བ་མེད་དོ་ཞེས་བྱ་བའི་ཐ་ཚིག་གོ །བསྒོ་ན་ཉེས་བྱས་སོ་ཞེས་བྱ་བ་ནི། ཤོ་གམ་འདྲལ་བ་ཞེས་བྱ་བར་སྦྱར་ཏེ། གཞན་ལ་ཤོ་གམ་དྲོལ་ཅིག་ཅེས་བསྒོ་བ་གང་ཡིན་པ་དེ་ནི་ཉེས་བྱས་ཡིན་པར་རིག་པར་བྱའོ། །འདི་སྐད་བསྟན་ཏེ། དགེ་སློང་ཤོ་གམ་གྱི་སར་ཕྱིན་པ་ཡང་རུང་མ་ཕྱིན་པ་ཡང་རུང་བས། གཞན་དག་ས་དེར་འགྲོ་བ་ལས་བཟློག་པར་བྱ་བའི་ཕྱིར་ཤོ་གམ་གྱི་ས་དེ་ནས་གཡས་གཡོན་དུ་འགྲོ་བའམ་ཕྱིར་བཟློག་པར་བསྒོ་ན། སྒོ་བར་བྱེད་པའི་དགེ་སློང་དེ་ལ་ཉེས་བྱས་སུ་འགྱུར་རོ། །ལམ་གཞན་སྟོན་པ་ཡང་ངོ་ཞེས་བྱ་བ་ཡང་ཤོ་གམ་དྲལ་བའི་ཞེས་བྱ་བར་སྦྱར་ཏེ། ཤོ་གམ་དྲལ་བའི་ལམ་གཞན་སྟོན་པ་གང་ཡིན་པ་དེ་ལ་ཡང་ཉེས་བྱས་སུ་འགྱུར་རོ། །འདི་སྐད་བསྟན་ཏེ། དགེ་སློང་ཤོ་གམ་གྱི་སར་ཕྱིན་ཀྱང་རུང་བ་མ་ཕྱིན་ཀྱང་རུང་བ་གང་གཞན་དག་ཕྱིར་ལྡོག་པར་བྱ་བའི་ཕྱིར་རམ་གཡས་གཡོན་དུ་འགྲོ་བར་བྱ་བའི་ཕྱིར་འགྲོ་བའི་ཆེད་དུ་ལམ་གཞན་སྟོན་པར་བྱེད་ན། ལམ་གཞན་སྟོན་པར་བྱེད་པ་དེ་ལ་ཉེས་བྱས་སུ་འགྱུར་རོ་
ཞེས་བྱ་བའི་ཐ་ཚིག་གོ །ཐབས་ཀྱིས་བརྗོད་པ་ན་ཕྲ་མོང་རོ་ཞེས་བྱ་བ་ནི། བསྒོ་བ་དང་ལམ་གཞན་སྟོན་པ་དེ་གཉིས་ཀ་དངོས་སུ་མི་བྱེད་པར་ཐབས་ཀྱིས་བརྗོད་པ་གང་ཡིན་པ་དེ་ནི་ཉེས་བྱས་ཕྲ་མོར་འགྱུར་བར་རིག་པར་བྱའོ། །ཐབས་ཀྱིས་བརྗོད་པ་ཞེས་བྱ་བ་ནི་ཟུར་གྱི་ས་སྨྲ་བ་སྟེ་དཔེར་ན་འདྲོན་པ་གང་དག་ལ་ཤོ་གམ་གཞལ་དགོས་པའི་རྫས་བདོག་པ་དེ་དག་གི་དབུས་སུ་དགེ་སློང་གིས་སྤྱིར་འདི་སྐད་ཅེས་གང་སུ་དག་མཚན་མོ་ནམ་ཕྱེད་ན་ཤོ་གམ་གྱི་གནས་ནས་འདའ་བར་བྱེད་པ་དེ་དག་ལ་ནི་ཤོ་གམ་གཞལ་དགོས་པ་མེད་དོ་ཞེས་ཟེར་ཞིང་འདི་ལྟ་འདི་ལྟར་གྱིས་ཤིག་ཅེས་གསལ་བར་དངོས་སུ་མི་སྨྲ་བ་ལྟ་བུ་སྟེ། དེ་ལ་ཉེས་བྱས་ཕྲ་མོར་འགྱུར་རོ་ཞེས་བྱ་བའི་ཐ་ཚིག་གོ །ལམ་གོལ་བ་ནི་ལམ་འདྲའོ་ཞེས་བྱ་བ་ནི་ལམ་གོལ་བ་ནི་ལམ་དང་མཚུངས་པར་རིག་པར་བྱའོ། །འདི་སྐད་བསྟན་ཏེ། དགེ་སློང་ཤོ་གམ་གྱི་སར་ཕྱིན་པས་ལམ་ནས་མ་འདས་པར་ཤོ་གམ་གཞལ་དགོས་པའི་རྫས་འདའ་བར་བྱེད་ན་ཇི་ལྟར་ལམ་དྲང་པོ་ནས་འདའ་བར་བྱེད་པ་དང་འདྲ་བར་ཁ་ན་མ་ཐོ་བ་རྫོགས་པར་འགྱུར་རོ། །ཁ་དང་ཚེམ་བུ་ནི་སྐུངས་གཞན་དང་འདྲའོ་ཞེས་བྱ་བ་ནི། ཇི་ལྟར་སྒྲོ་བ་དང་ད་གལ་ལ་སོགས་པའི་སྐུངས་གཞན་གྱིས་ཤོ་གམ་གཞལ་དགོས་པའི་རྫུས་རྐུ་འམ་འདའ་བར་བྱེད་ན་ཕམ་པར་འགྱུར་བ་ལ་སོགས་པའི་ཉེས་པར་འགྱུར་བ་དེ་བཞིན་དུ་ཁ་དང་ཚེམ་བུའི་ནང་དང་བར་དུ་བཅུག་སྟེ་རྐུ་བ་འདའ་བར་བྱེད་པ་ཡང་དངོས་པོ་ཇི་ལྟ་བ་བཞིན་དུ་ཉེས་པར་འགྱུར་ཏེ། གཞན་དུ་མ་ཡིན་ནོ་ཞེས་འདྲ་བར་བསྟན་པའི་ཕྱིར་མདོ་འདི་བཤད་དོ། །གཞན་དག་འདི་སྙམ་དུ་ཇི་ལྟར་ལུས་དང་ཚེམ་བུ་ལ་ཤོ་གམ་མེད་པ་བཞིན་དུ་ལུས་དང་ཚེམ་བུའི་ནང་དུ་བཅུག་པའི་རྫས་ལ་ཡང་དེ་བཞིན་ནོ་སྙམ་དུ་སེམས་པ་བཟློག་པའི་ཕྱིར་འདྲ་བར་བསྟན་པ་འདི་བརྗོད་དོ། །རྐུ་སེམས་དང་བྲལ་ན་མཐའི་མཐར་ཐུག་པ་ཉིད་མ་ཡིན་ནོ་ཞེས་བྱ་བ་ལ། མཐའི་ཞེས་བྱ་བ་ནི། ཕམ་པར་འགྱུར་བ་ལ་སོགས་པའིའོ། །མཐར་ཐུག་པ་ཉིད་མ་ཡིན་ནོ་ཞེས་བྱ་བ་ནི། ཡོངས་སུ་རྫོགས་པ་ཉིད་མ་ཡིན་ནོ། །གང་གི་ཚེ་ཞེ་ན་དེའི་ཕྱིར། རྐུ་སེམས་དང་བྲལ་ན་ཞེས་བྱ་བ་སྨྲས་སོ། །འདི་སྐད་བསྟན་ཏེ། རྫས་གང་རྐུ་
བའི་སྦྱོར་བའི་གནས་སྐབས་ན་རྐུ་སེམས་མངོན་དུ་གྱུར་ལ། དངོས་གཞིའི་དུས་ན་ནི་རྐུ་སེམས་མེད་པར་གནས་ནས་སྦོམ་པ་ལ་སོགས་པ་བྱེད་པ་ན་དེའི་ཚེ་སྦྱོར་བའི་ལྟུང་བ་ཉི་ཚེ་ཙམ་ལྟུང་བར་འགྱུར་གྱི། དངོས་གཞིའི་ལྟུང་བར་ནི་མི་འགྱུར་རོ། །སྦྱོར་བ་ལ་མེད་ན་དེ་མ་བྱས་པ་ཉིད་མ་ཡིན་ནོ་ཞེས་བྱ་བ་ལ། སྦྱོར་བ་ལ་ཞེས་བྱ་བ་ནི་སྦྱོར་བའི་གནས་སྐབས་ལའོ། །དེ་མེད་ན་ཞེས་བྱ་བ་ནི། རྐུ་སེམས་དེ་མེད་ལ་དངོས་གཞིའི་དུས་ན་ནི་རྐུ་སེམས་དེ་ཡོད་ནའོ། །དེ་མ་བྱས་པ་ཉིད་མ་ཡིན་ནོ་ཞེས་བྱ་བ་ནི་དངོས་གཞིའི་དེ་མ་བྱས་པ་མ་ཡིན་ཏེ། འདི་ལྟར་བྱས་པ་ཁོ་ན་ཉིད་མིན་པའོ། །འདི་སྐད་བསྟན་ཏེ། གལ་ཏེ་དགེ་སློང་གིས་རྐུ་སེམས་མེད་པར་སྦྱོར་བར་བྱེད་པ་ལ། ཕྱིས་གནས་ནས་སྤོ་བ་ལ་སོགས་པའི་དུས་ན་རྐུ་སེམས་སྐྱེད་པར་བྱེད་ན་དེའི་ཚེ་སྦྱོར་བའི་ལྟུང་བ་ཉི་ཚེ་འབྱུང་བར་མི་འགྱུར་གྱི། དངོས་གཞིའི་ལྟུང་བ་ཡོངས་སུ་རྫོགས་པར་འགྱུར་རོ། །འདིར་མདོ་དེ་གཉིས་ཀྱི་གཞུང་ནི་བཙུན་པ་དགེ་སློང་གིས་ཆོས་གོས་ཀྱི་གདང་ལས་ཆོས་གོས་ལེན་པའི་སྔ་རོལ་དུ་རྐུ་སེམས་བྱུང་ལ། སླད་ཀྱིས་རང་གི་འདུ་ཤེས་ཀྱིས་ལེན་པར་བགྱིད་ན་ལྟུང་བ་ཅིར་འགྱུར། སྔར་ནི་ཉེས་པ་སྦོམ་པོར་རོ། །ཕྱི་མ་ལ་ནི་ལྟུང་བ་མེད་དོ། །སྔར་རང་གི་འདུ་ཤེས་ཀྱིས་ལེན་ལ་སླད་ཀྱིས་རྐུ་སེམས་ཀྱིས་རྐུ་ན་ལྟུང་བ་ཅིར་འགྱུར། སྔར་ནི་ལྟུང་བ་མེད་དོ། །ཕྱིས་ནི་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ཏེ། འདིར་ཉེས་པ་སྦོམ་པོ་ཞེས་བྱ་བའི་ཚིག་ནི་རྐུ་སེམས་ཀྱི་ཡུལ་རང་གིར་འདུ་ཤེས་པ་ཡིན་པའི་ཕྱིར་རོ། །སྤྲིང་ཡིག་ལ་སོགས་པ་ནི་ན་སྨད་པ་མེད་དོ་ཞེས་བྱ་བ་ནི། ལག་ཡིག་ལ་སོགས་པ་གང་ལ་སྤྲིང་ཡིག་དང་པོ་ན་ཡོད་པ་དེ་ནི་སྤྲིང་ཡིག་ལ་སོགས་པ་སྟེ། སྤྲིང་ཡིག་ལ་སོགས་པས་རྐུ་བ་དེ་ལྟུང་བ་ན་སྨད་པ་མེད་དོ། །འདིར་གཞུང་ནི་སྤྲིང་ཡིག་དག་དང་ལག་ཡིག་དག་དང༌། ལག་རྩིས་ཀྱིས་རྐུ་ན་རིན་ཐང་བརྩི་བར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ཏེ། རྣམ་པ་གང་ཡང་རུང་བས་རྐུ་ན་ཡང་ན་སྨད་པ་མེད་དོ། །རྗེས་སུ་བསྒྲུབ་པའི་སྐབས་སྨྲས་ནས། ད་ནི་མཐར་ཐུག་པའི་སྐབས་བརྗོད་པར་བྱ་སྟེ། ནན་ཁུགས་དང་དང་ན་འཐེན་ཡང་མ་བརྐུས་པ་མ་ཡིན་ནོ་ཞེས་བྱ་བ་ལ། ནན་ཁུགས་
ཞེས་བྱ་བ་ནི་མཐུས་རྐུ་བའོ། །དང་ན་འཐེན་ཞེས་བྱ་བ་ནི། རྫས་ཁྱེར་བ་མི་སྟེར་བའོ། །དེ་གཉིས་ཀྱང་མ་བརྐུས་པ་མ་ཡིན་ཏེ། བརྐུས་པ་ཁོ་ན་ཡིན་ནོ། །དེ་ལྟར་ཡང་འདིར་གཞུང་ནི་བཙུན་པ་རྐུ་བ་རྣམ་པ་དུ་མཆིས། ཉེ་བ་འཁོར་དྲུག་སྟེ། ནན་ཁུགས་ཀྱིས་རྐུ་བ་དང༌། སྒྱུ་ཐབས་ཀྱིས་རྐུ་བ་དང༌། གཏམས་པ་རྐུབ་དང༌། ཕྱིར་བསབ་པ་རྐུ་བ་དང༌། དང་ན་འཐེན་གྱིས་རྐུ་བ་དང༌། ཆོས་རྐུ་བའོ། །བཙུན་པ་བཅོམ་ལྡན་འདས་ཀྱིས་རྐུ་བ་དྲུག་པོ་དེ་དག་བཀའ་སྩལ་ན། དེ་དག་ལས་དུ་ཞིག་གིས་མཐའི་ལྟུང་བར་འགྱུར། ཉེ་བ་འཁོར་ཆོས་རྐུ་བ་མ་གཏོགས་པ་གཞན་ཐམས་ཅད་ཀྱིས་མཐའི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །དེ་ལ་ཆོས་རྐུ་བ་ལ་ཉེས་པ་མེད་དེ་རྐུ་སེམས་མེད་པའི་ཕྱིར་རོ། །འདི་ལྟར་མདོ་སྡེ་ལ་སོགས་པའི་ཆོས་འཛིན་པའི་རང་བཞིན་ནི་འདིར་རྐུ་བ་ཞེས་བྱ་བ་སྟེ། དེ་ལ་ནི་རྐུ་སེམས་ཀྱི་ཀུན་དུ་སྤྱོད་པ་མེད་དོ། །སྒྱུ་ཐབས་ཀྱིས་རྐུ་བ་ནི་རྣམ་པ་གཉིས་ཏེ། ཆོམ་རྐུན་གྱིས་ལེན་པ་དང༌། དོར་བྱེད་པའོ། །དེ་ལ་ཆོམ་རྐུན་གྱིས་ལེན་པ་ནི་རྐུ་བ་ཉིད་དེ་ཡིན་པས་དོགས་པར་བྱ་བ་མེད་དོ། །དོར་བྱེད་པ་ནི་སྔར་རྒྱན་ལ་དོར་བྱེད་ན་གལ་ཏེ་རྒྱལ་བ་ཉིད་དུ་མ་གྱུར་པའི་ཚེ་སྦྱོར་བའོ་ཞེས་སྨྲས་པ་རྐུ་བ་ཉིད་ཡིན་ནོ། །གཏམས་པ་རྐུ་བ་ནི་སྔར་གཏམས་པ་རྣམས་བསྙེན་པ་ནི་སྦྱོར་བའོ་ཞེས་སྨྲས་པ་ཡིན་ནོ། །ཕྱིས་བསབ་པ་རྐུ་བ་ནི་སྔར་བརྙས་པ་དང༌། བསྐྱིས་པ་ཞེས་སྨྲས་པ་ཡིན་ནོ། །ནན་ཁུགས་ཀྱིས་རྐུ་བ་ནི་དབང་གིས་མནན་ཅིང་ལེན་པ་སྟེ། དེའི་ཕྱིར་དེ་བརྐུས་པ་མ་ཡིན་ནོ་སྙམ་དུ་དོགས་པ་འགའ་ཡང་ཡོད་ལ་དང་ན་འཐེན་གྱིས་རྐུ་བ་ཡང་དེ་མི་སྟེར་བ་ཙམ་དུ་ཟད་ཀྱི་བརྐུས་པ་མ་ཡིན་ནོ་སྙམ་དུ་དོགས་པ་ཡོད་པས། དོགས་པ་དེ་གཉིས་བསལ་བའི་ཕྱིར་མདོ་འདི་བསྟན་པར་རིག་པར་བྱའོ། །གནས་དང་བཅས་པ་ཡང་མ་ཡིན་ནོ་ཞེས་བྱ་བ་ནི། མ་བརྐུས་པ་ཞེས་བྱ་བར་བསྟན་ཏེ། རྫས་གང་གནས་དང་བཅས་ཏེ་བརྐུས་པ་དེ་ཡང་མ་བརྐུས་པ་མ་ཡིན་ཏེ་བརྐུས་པ་ཁོ་ན་ཡིན་པའོ། །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་ཡོ་བྱད་ལྕིབ་གནས་ནས་སྤོ་བར་བྱེད་ན་མཐའི་ལྟུང་བར་འགྱུར་རོ་ཞེས་བཀའ་སྩལ་ན། དགེ་སློང་གིས་ཡོ་བྱད་ལྕིབ་གནས་ནས་མ་སྤོས་པར་བརྐུས་ན་
མཐའི་ལྟུང་བར་འགྱུར་བ་མཆིས་སམ། ཡོད་དེ་གནས་གང་ན་འདུག་པ་དེ་གནས་དང་བཅས་ཏེ་བརྐུས་ནའོ་ཞེས་གསུངས་པ་ཡིན་ནོ། །ཅི་བསད་ན་བརྐུས་པའི་མཐར་ཐུག་པ་ཡིན་ནམ་མཐར་ཐུག་པ་མ་ཡིན་ཞེ་ན་དེའི་ཕྱིར། བསད་པ་ཉིད་ནི་བརྐུས་པ་མ་ཡིན་ནོ་ཞེས་བྱ་བ་སྨྲས་ཏེ། བསད་པ་དེ་ནི་ཆུད་གསན་པ་ཉིད་ཡིན་གྱི། བརྐུས་པ་ནི་མ་ཡིན་ནོ། །དེ་བས་ན་སྲོག་གཅད་པ་ནི་བརྐུས་པ་མ་ཡིན་ནོ། །གལ་ཏེ་སྐད་ཅིག་དེ་ཉིད་ལ་འམ་ཕྱིས་གནས་ནས་སྤོ་བར་བྱེད་ན་ནི་དེའི་ཚེ་ན་བརྐུས་བར་འགྱུར་རོ། །ཕྱོགས་གཅིག་གནས་ནས་མ་འཕགས་པ་ཡང་མ་ཡིན་ནོ་ཞེས་བྱ་བ་ནི། དོ་ཤལ་དང་སེ་མོ་དོ་ལ་སོགས་པའི་རྫས་རྒྱུད་གཅིག་ལ་བརྒྱུས་བ་རྐུ་བར་བྱེད་དེ་དྲངས་པ་ན་ཕྱོགས་འགའ་ཞིག་གནས་ནས་མ་འཕགས་ན་ཡང་དེས་ན་ཕྱོགས་གཅིག་གནས་ནས་མ་འཕགས་པས་བརྐུས་པ་ཉིད་མ་ཡིན་ཏེ། ཕྱོགས་ཐམས་ཅད་གནས་ནས་འཕགས་ན་བརྐུས་པ་ཉིད་ཡིན་པའི་ཕྱིར་རོ། །ལྷུང་བ་ནི་དེ་ལས་ཁྱེར་ན་བརྐུས་པ་ཡིན་ནོ་ཞེས་བྱ་བ་ནི། ལྷུང་བ་རྐུ་ན་ལྷུང་བ་དེ་ལས་ཁྱེར་ན་བརྐུས་པ་ཡིན་གྱི། རྩ་བ་དག་ལ་སོགས་པ་འབྲེལ་བའི་གནས་ནས་སྤོས་པས་བརྐུས་པ་ནི་མ་ཡིན་ཏེ། འདི་ལྟར་འོག་གི་གཞི་དེ་ནས་སམ་གོས་ལ་སོགས་པ་གཞི་ཉིད་དུ་གནས་པ་གང་ཡིན་པ་དེར་ལྷུང་ན་བརྐུས་པ་ཡིན་ནོ། །འདི་སྐད་བསྟན་ཏེ། འདོད་པའི་གནས་སུ་ལྷུང་བ་ན་བརྐུས་པ་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་དགེ་སློང་གིས་ཤིང་ཏོག་དག་སྦྲུགས་ཏེ་བརྐུས་ན་ལྟུང་བ་ཅིར་འགྱུར། གལ་ཏེ་སྦྱོར་བ་གཅིག་གིས་མ་ཤ་ཀ་ལྔ་ལ་སོགས་པར་ཚང་ན་མཐར་འགྱུར་རོ། །མ་ཚང་ན་ཉེས་པ་སྦོམ་པོར་རོ་ཞེས་གསུངས་སོ། །འཛག་པ་དང་འབྲུལ་བར་བྱེད་པའི་པུ་གུ་ནས་ནི་བྱུང་ནའོ་ཞེས་བྱ་བ་ལ། འཛག་པར་བྱེད་པའི་བུ་གུ་ཞེས་བྱ་བ་ནི་ཙ་ར་ར་འཛག་པར་བྱེད་པའི་བུ་གུ་གང་ཡིན་པ་སྟེ། དཔེར་ན། འབྲུ་མར་དང་སྤྲང་རྩི་ལ་སོགས་པ་འཛག་པར་བྱེད་པའི་འབྲག་གི་བུ་གུ་ལྟ་བུའོ། །འབྲུལ་བར་བྱེད་པའི་བུ་གུ་ཞེས་བྱ་བ་ནི་ཕྲུ་ལུ་ལུ་འབྲུལ་བར་བྱེད་པའི་བུ་གུ་གང་ཡིན་པ་སྟེ། དཔེར་ན་མོན་སྲན་སྡེའུ་དང་མོན་སྲན་གྲེའུ་དང་གྲོ་ལ་སོགས་པ་འབྲུལ་བར་འགྱུར་བའི་བང་བ་དང༌།
ད་གལ་གྱི་བུ་གུ་ལྟ་བུའོ། །འཛག་པར་བྱེད་པའི་བུ་གུ་དང་འབྲུལ་བར་བྱེད་པའི་བུ་གུ་དེ་ནས་ཁྱེར་བར་འདོད་ན་ནི་འབྲག་དང་བང་བ་ལ་སོགས་པའི་བུ་གུ་དེ་ནས་འཛག་པ་དང་འབྲུལ་བའི་ཆོས་ཅན་གྱི་རྫས་བྱུང་ཞིང་ཟགས་པ་དང༌། འབྲུལ་བར་གྱུར་པ་གང་ཡིན་པ་དེ་ནི་བརྐུས་པ་ཡིན་ནོ། །རྒྱུན་ལ་ནི་སྐད་ཅིག་མའི་ཚོགས་དུ་མ་ཡོད་པའི་ཕྱིར་སྐད་ཅིག་མ་རེ་རེ་ལ་རིན་ཐང་བརྩི་བར་བྱའམ། འོན་ཏེ་རྒྱུན་གཅིག་པའི་ཕྱིར་མཇུག་ཏུ་རིན་ཐང་བརྩི་བར་བྱ་ཞེ་ན་དེའི་ཕྱིར། འདིར་ཐ་མ་དེ་ཚུན་ཆད་རྫས་གཅིག་པ་ཉིད་ཡིན་ནོ་ཞེས་བྱ་བ་སྨྲས་ཏེ། བུ་གུ་ནས་འབྱིན་པ་འདིར་བྱུང་བ་ཐ་མ་དེ་ཚུན་ཆད་རྫས་ཚོམས་གཅིག་པ་ཉིད་ཡིན་ནོ། །ཆུ་རྐུ་བ་འདི་ནི་རང་གི་ལས་ཀྱི་མཐའ་གྲུབ་པར་བྱ་བའི་ཕྱིར་མ་ཡིན་མོད་ཀྱི། འོན་ཀྱང་ཁྲུས་དང་བཏུང་བ་ལ་སོགས་པའི་ཕྱིར་ཏེ། དེས་ན་ཆུའི་ཡུལ་ཐ་དད་པའི་ཕྱིར་རིན་ཐང་བརྩི་བར་བྱའོ། །དེར་ནི་སཱ་ལུ་ལ་སོགས་པའིའོ། །འདིར་གཞུང་ནི་བཙུན་པ་དགེ་སློང་གིས་འབབ་ཆུ་བཀུམ་སྟེ། ཆབ་རྐུ་ན་ལྟུང་བ་ཅིར་འགྱུར། ཆུའི་ཕུང་པོ་དང་པོ་ནས་བཟུང་སྟེ། ཐ་མའི་བར་གྱི་ཆུའི་རིན་ཐང་བརྩི་བར་བྱ་སྟེ། དངོས་པོ་ཚང་ན་ནི་མཐར་འགྱུར་རོ། །མ་ཚང་ན་ནི་ཉེས་པ་སྦོམ་པོར་རོ། །བཙུན་པ་དགེ་སློང་གིས་བང་བ་བརྟོལ་ཏེ་འབྲུ་རྐུ་ན་ལྟུང་བ་ཅིར་འགྱུར། སྦྱོར་བ་གཅིག་གིས་རྐུ་བ་ཚུན་ཆད་ཀྱི་རིན་ཐང་བརྩི་བར་བྱའོ་ཞེས་གསུངས་པ་ཡིན་ནོ། །ཕུང་པོ་ལས་རྐུ་ན་ལན་རེ་རེ་ཞིང་བླངས་པ་ཐ་དད་དོ་ཞེས་བྱ་བ་ནི། ཕུང་པོ་ལས་རྐུ་ན་བླངས་པ་ལ་རེ་རེ་ཞིང་ཐ་དད་དེ་ལྟུང་བའི་དངོས་གཞི་དག་ཀྱང་ཐ་དད་པ་ཉིད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་བཙུན་པ་དགེ་སློང་གིས་འབྲུའི་ཕུང་པོ་ལས་བཀུམ་སྟེ། འབྲུ་རྐུ་ན་ལྟུང་བ་ཅིར་འགྱུར། རིན་ཐང་བརྩི་བར་བྱ་སྟེ་གལ་ཏེ་སྦྱོར་བ་གཅིག་གིས་དངོས་པོ་ཚང་ན་ནི་མཐར་འགྱུར་རོ། །གལ་ཏེ་མ་ཚང་ན་ནི་ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །དབྲལ་བར་བྱ་བ་དུ་མ་ཉིད་ཡིན་ན་དེའི་ཆ་སོ་སོའོ་ཞེས་བྱ་བ་ནི། བརྐུས་པ་ཐ་དད་དོ་ཞེས་བྱ་བར་སྦྱར་རོ། འདིར་གང་དག་གི་རྫས་བ་རྐུ་བར་བྱ་བའི་རྫས་ཀྱི་བདག་པོ་དེ་དག་ནི་འབྲལ་བར་བྱ་བ་སྟེ། དབྲལ་བར་བྱ་བ་དེ་དག་དུ་མ་ཉིད་
ཡིན་ན་དཔྲལ་བར་བྱ་བ་རེ་རེའི་སྐལ་བ་གང་ཡིན་པ་དེའི་ཆ་དེ་དག་ཉིད་བརྐུས་པ་སོ་སོ་སྟེ། དངོས་གཞི་དང་སྦྱོར་བའི་བདག་ཉིད་ཐ་དད་དོ། །དེ་བས་ན་གཅིག་གི་སྐལ་བའི་ཆ་ཇི་སྙེད་བརྐུས་པ་དེ་སྙེད་ཀྱི་ལྟུང་བ་དག་འབྱུང་བར་འགྱུར་རོ། །རྐུན་པོ་དག་ཀྱང་ངོ་ཞེས་བྱ་བ་ཡང་རུ་མ་ཉིད་ཡིན་ན་སོ་སོའི་སྐལ་བའི་ཆ་བརྐུས་པ་ཐ་དད་དོ་ཞེས་བྱ་བར་སྦྱར་རོ། །གང་དག་གཞན་གྱི་རྫས་རྐུ་བར་བྱེད་པ་དེ་དག་ནི་རྐུན་པོ་རྣམས་ཞེས་བྱ་སྟེ། དེ་དག་དུ་མ་ཡོད་དེ་དུ་མ་ཉིད་ཡིན་ན་རྐུན་པོ་དེ་དག་སོ་སོའི་བགོ་སྐལ་གྱི་ཆ་གང་ཡིན་པའི་ཆ་རེ་རེ་བརྐུས་པ་ཐ་དད་པར་རྣམ་པར་གཞག་གོ །འདི་སྐད་བསྟན་ཏེ། རྐུན་པོ་དུ་མ་ཇི་སྙེད་པ་དེ་དག་སོ་སོའི་སྐལ་བའི་ཆ་ཇི་སྙེད་པ་རེ་རེའི་རིན་ཐང་གིས་དེ་རེ་རེ་ལ་སོ་སོར་ལྟུང་བར་འགྱུར་ཏེ། དེ་བཞིན་དུ་རྐུན་པོ་གཉིས་པའི་ཆ་གང་ཡིན་པ་དེའི་རིན་ཐང་ཇི་ཙམ་པས་དེའི་ལྟུང་བ་རྣམ་པར་གཞག་པ་ལ་སོགས་པ་ལྟ་བུའོ། །དབྲལ་བར་བྱ་བ་ཡང་དུ་མ་ཉིད་ཡིན་ལ་རྐུན་པོ་རྣམས་ཀྱང་དུ་མ་ཉིད་ཡིན་ན་ལྟུང་བ་ཅི་ལྟ་བུ་ཡིན་ཞེ་ན། དབྲལ་བར་བྱ་བ་གཅིག་གི་སྐལ་བའི་ཆ་ཇི་ཙམ་པ་དེ་ལ་རྐུན་པོ་དུ་མ་ཉིད་ཀྱིས་བགོས་པ་ན། རྐུན་པོ་གཅིག་གི་སྐལ་བའི་ཆ་ཅི་ཐོབ་པ་དེའི་རིན་ཐང་གིས་རྐུན་པོ་གཅིག་གི་ལྟུང་བ་རྣམ་པར་གཞག་ལ་དེ་བཞིན་དུ་དབྲལ་བར་བྱ་བ་གཉིས་པའི་སྐལ་བའི་ཆ་ཇི་ཙམ་པ་དེ་རྐུན་པོ་དུ་མ་ཉིད་ཀྱིས་བགོས་པ་ན། རྐུན་པོ་གཉིས་པའི་སྐལ་བའི་ཆ་ཅི་ཐོབ་པ་དེའི་རིན་ཐང་གིས། རྐུན་པོ་གཉིས་པའི་ལྟུང་བ་རྣམ་པར་གཞག་པ་ལ་སོགས་པ་ལྟ་བུའོ། །མདོ་འདི་གཉིས་ཀྱི་གཞུང་ནི་བཙུན་པ་བཅོམ་ལྡན་འདས་ཀྱིས་དགེ་སློང་གིས་མ་ཤ་ཀ་ལྔ་ལ་སོགས་པ་བརྐུས་ན་མཐར་འགྱུར་རོ་ཞེས་གསུངས་པ་ལ་དགེ་སློང་ཤིན་ཏུ་མང་པོ་དག་གིས་བརྐུས་ན་མཐར་མི་འགྱུར་བ་མཆིས་སམ་ཡོད་དེ། སྐྱེ་བོ་མང་པོ་ལ་ཉེས་པ་སྦོམ་པོར་འགྱུར་རོ། །དེ་བཞིན་དུ་སྐྱེ་བོ་མང་པོ་རྣམས་དང་ལྷན་ཅིག་རྐུ་ན་ཡང་ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །འདིར་སྐྱེ་བོ་མང་པོ་ཞེས་བྱ་བའི་ཚད་ནི་གཅིག་གི་ཆས་དངོས་པོ་ཚང་བར་མི་འགྱུར་བ་དེ་སྙེད་ཡིན་པར་རིག་པར་བྱའོ། །འདི་ལ་བློ་གྲོས་དུ་མ་ཉིད་ཡིན་ན་ཐོབ་ན་བརྐུས་པ་ཡིན་ནོ་ཞེས་བྱ་བ་ནི། རྐུན་པ་དུ་མ་ཉིད་ཡིན་པ་
འདི་ལ་རྐུན་པོ་རྣམས་བློ་གྲོས་མི་མཐུན་པ། བློ་གྲོས་དུ་མ་ཡིན་ན་བགོ་སྐལ་ཐོབ་ན་བརྐུས་པ་ཡིན་གྱི་གནས་ནས་སྤགས་པ་ན་བརྐུས་པ་ནི་མ་ཡིན་ནོ། །འདི་སྐད་བསྟན་ཏེ། གལ་ཏེ་རྐུན་པོ་དུ་མ་བློ་གྲོས་གཅིག་ཏུ་མ་བྱས་པར་བསམ་པ་སྣ་ཚོགས་ཀྱིས་བྱ་རོག་དང་ཏཱ་ལའི་ཚུལ་ཁོ་ནས་རྫས་གཅིག་ལ་འདུས་པར་གྱུར་ན་དེར་གནས་ནས་སྤགས་པས་བརྐུས་པར་མི་འགྱུར་གྱི། སྐལ་བ་ཐོབ་ན་བརྐུས་པར་འགྱུར་ཏེ། ཕན་ཚུན་མི་མཐུན་པས་རྣམ་པར་གནས་པ་ཡིན་པའི་ཕྱིར་རོ། །འདིར་གཞུང་ནི་བཙུན་པ་མུན་ཁྲོད་དུ་ཆོས་གོས་གཞག་པ་ལ། དགེ་སློང་བཞིས་རྐུན་ལྟུང་བ་ཅིར་འགྱུར། བཀའ་སྩལ་པ། ཉེས་པ་སྦོམ་པོར་རོ། །ལན་འགའ་མཐར་ཡང་འགྱུར་ཏེ། གང་གི་ཚེ་ཆ་བཞིར་བྱེད་ཅིང་རེ་རེའི་ཆས་ཀྱང་དངོས་པོ་ཚང་ན་མཐར་འགྱུར་རོ། །མ་ཚང་ན་ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །མ་བྱིན་པར་ལེན་པའི་མཐར་ཐུག་པའི་སྐབས་སྨྲས་ཟིན་ཏེ། དེ་ལྟར་དངོས་པོ་དང༌། བདག་པོ་དང༌། རྗེས་སུ་སྒྲུབ་པ་དང༌། མཐར་ཐུག་པའི་སྐབས་དེ་དག་གིས་ནི་མ་བྱིན་པར་ལེན་པའི་སྐབས་དག་གི་ཆོ་ག་རྣམས་རིག་པར་བྱའོ། །མ་བྱིན་པར་ལེན་པའི་ཕམ་པར་འགྱུར་བ་ཞུ་བའི་སྐབས་སོ་ཞེས་བྱ་བ་ནི། མ་བྱིན་པར་ལེན་པའི་ཕམ་པར་འགྱུར་བཞུ་བའི་སྐབས་ནས་འབྱུང་བ་བཤད་ཟིན་ཏོ།། །།ཞུ་བའི་སྐབས་བསྟན་ནས། ད་ནི་འདུལ་བྱེད་ཀྱི་སྐབས་བརྗོད་པར་བྱ་སྟེ། བླང་བའི་སྔ་རོལ་དུ་ཤི་བ་ཉིད་དུ་གྱུར་ན་གཞག་པ་ཉིད་དོ་ཞེས་བྱ་བ་ནི། སྐལ་བ་བླང་བ་གནོད་པ་བཟུང་བ་སྔ་རོལ་འགོད་པའི་ཚེ་ན་གལ་ཏེ་དགེ་སློང་དེ་ཤི་བ་ཉིད་དུ་གྱུར་ན་གང་ནས་དེའི་སྐལ་བ་དབང་བ་དེ་ཉིད་དུ་གཞག་པ་ཡིན་གྱི། ཤི་བའི་ཡོ་བྱད་ཉིད་མ་ཡིན་པར་རིག་པར་བྱའོ། །བཟློག་པ་ནི་ཤི་བའི་ཡོ་བྱད་ཉིད་དོ་ཞེས་བྱ་བ་ནི། གལ་ཏེ་ཤི་བ་ཉིད་པས་སྔར་རྫས་བླངས་ཟིན་ན་དེ་ནི་ཤི་བའི་ཡོ་བྱད་ཉིད་ཡིན་པར་རིག་པར་བྱའོ། །དགེ་འདུན་ནི་ཕུ་ནུ་དང་འདྲ་བས་དེའི་ཆེད་དུ་རྐུ་བ་ནི་བདག་གིར་མི་བྱེད་པ་མ་ཡིན་ནོ་ཞེས་བྱ་བ་ནི། དཔེར་ན་ཕུ་ནུ་པོ་ནོར་མ་བགོས་པ་རྣམས་ནོར་ཐམས་ཅད་ལ་སྤྱིར་བདག་གིར་བྱ་བའི་བློ་འབྱུང་བ་དེ་
བཞིན་དུ་དགེ་སློང་རྣམས་ཀྱང་དགེ་འདུན་གྱི་དཀོར་སོ་སོར་བགོ་བར་བྱ་བ་མ་ཡིན་པ་ལ་མི་བགོ་བས་བདག་གིར་བྱ་བའི་བློ་སྐྱེ་བས། དེའི་ཕྱིར་གང་དགེ་འདུན་གྱི་ཆེད་དུ་རྐུ་བར་བྱེད་པ་དེ་བདག་གིར་མི་བྱེད་པ་མ་ཡིན་ཏེ། དེ་བས་ན་གང་ཟག་གཅིག་གིས་དགེ་འདུན་གྱི་ཆེད་དུ་རྐུ་བར་བྱེད་ན་གང་ཟག་གཅིག་པོ་དེ་ཉིད་ཕམ་པར་འགྱུར་ཏེ། དངོས་པོ་ཚང་བའི་ཕྱིར་རོ། །དགེ་འདུན་གཞན་ལ་སོ་སོར་ཉེས་པར་འགྱུར་བ་ནི་མེད་དེ། འདིར་ཆ་མ་བགོས་པས་ཐ་སྙད་དུ་མི་བྱའོ། །འདིར་གཞུང་ནི་དགེ་སློང་གཉུག་མར་གནས་པ་དགེ་འདུན་ཞིང་རྨེད་དུ་འཇུག་པ་དེས་ཉེན་ཀོར་ན་ཁྱིམ་བདག་གི་ཞིང་འདུག་པ་ཡང་རྨེད་དུ་བཅུག་པ་དང༌། ཁྱིམ་བདག་འོངས་ཏེ་སྨྲས་པ། བཙུན་པ་ཅིའི་ཕྱིར་བདག་གི་ཞིང་འདི་རྨེད་དུ་བཅུག །སྨྲས་པ། འདི་ཁྱོད་ཀྱི་མ་ཡིན་གྱི། དགེ་འདུན་གྱི་ཞིང་ཡིན་ནོ། །སྨྲས་པ། བཙུན་པ་ཁོ་བོས་མི་མ་ཡིན་པའི་ཆེ་བཞི་བསྟན་པར་བྱའོ་ཞེས་བྱ་བ་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དངོས་པོ་ཚད་ན་ཕམ་པར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །བདག་པོ་ཐ་དད་པ་མ་ཡིན་པ་ནི་རང་གི་དང་འདྲའོ་ཞེས་བྱ་བ་ནི། །གནས་གང་དུ་སྦྱིན་བདག་གིས་ཟངས་ལ་སོགས་པའི་རྫས་བྱིན་པར་གྱུར་ལ་གལ་ཏེ་དགེ་སློང་གིས་རྐུ་སེམས་ཀྱིས་རྫས་དེ་དག་གནས་ནས་གནས་གཞན་དུ་སྤོ་བར་བྱེད་ཅིང་གནས་དེ་གཉིས་ན་སྡེ་པ་ཐ་དད་པ་ལ་སོགས་པས་བདག་པོ་ཐ་དད་པ་མེད་ན། དེའི་ཚེ་བཀྲུས་པ་དེ་རང་གི་དང་འདྲ་བར་རིག་པར་བྱ་སྟེ། ཇི་ལྟར་རང་གི་རྫས་རྐུ་སེམས་ཀྱིས་བླངས་ན་སྦོམ་པོར་འགྱུར་བ་བཞིན་དུ། འདིར་ཡང་དེ་བཞིན་ནོ་ཞེས་བྱ་བའི་ཐ་ཚིག་གོ །གལ་ཏེ་དགེ་སློང་དེ་གནས་གང་ནས་དགེ་འདུན་གྱི་རྫས་ལེན་པར་བྱེད་པ་དེ་ལ་བདག་པོ་ཉིད་མ་ཡིན་ལ། དགེ་སློང་དེ་གནས་གང་དུ་དགེ་འདུན་གྱི་དོན་དུ་སྤྱིན་པར་བྱེད་པ་དེ་ན་བདག་པོ་ཉིད་ཡིན་ན་ནི། དེའི་ཚེ་དངོས་པོ་ཚང་ན་ཕམ་པར་འགྱུར་རོ། །གལ་ཏེ་མ་ཚང་ན་ནི་སྦོམ་པོར་འགྱུར་ཏེ། དེ་ཡང་བདག་པོ་ཐ་དད་པ་ལས་འགྱུར་རོ། །འདིར་གཞུང་ནི་དགེ་སློང་གཉུག་མར་གནས་པས་ཕྱོགས་བཞིའི་དགེ་འདུན་གྱི་དཀོར་རྐུ་
སེམས་ཀྱིས་གནས་ནས་གནས་གཞན་དུ་སྤོས་པ་དང༌། དེ་འགྱོད་པ་སྐྱེས་ནས་བཅོམ་ལྡན་འདས་ཀྱིས་བཀའ་སྩལ་པ། ཕམ་པར་ནི་མི་འགྱུར་རོ། །ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཕྱིར་ལོག་གམ་མི་བླང་བར་ངེས་པ་ནི་ལྷག་མ་རྣམས་ཀྱིས་བརྐུས་པ་ནི་དེའི་ཡན་ལག་ཉིད་མ་ཡིན་ནོ་ཞེས་བྱ་བ་ནི། གང་གི་ཚེ་རྐུན་པོ་མང་པོའི་ཚོགས་རྐུ་བའི་ཆེད་དུ་ཞུགས་པ་ན་གལ་ཏེ་དགེ་སློང་དེ་དེའི་ནང་ནས་ཕྱིར་ལོག་སྟེ། ལམ་གཞན་དུ་འགྲོ་འམ་ཡང་ན་དེར་འགྲོར་ཟིན་ཀྱང་གལ་ཏེ་མི་བླང་བར་ངེས་པ་མ་བྱིན་པར་བླང་བར་མི་བྱའོ་ཞེས་ངེས་པར་བྱེད་ན་དེར་རྐུན་པོ་ལྷག་མ་རྣམས་ཀྱིས་བརྐུས་པ་ནི་དགེ་སློང་དེ་ཕྱིར་ལྡོག་གམ་མི་བླང་བར་ངེས་པ་ན་རྐུ་བ་དེའི་ཡན་ལག་ཉིད་མི་ཡིན་ཏེ། རྐུན་པོ་རྣམས་དང་ལྷན་ཅིག་བྱ་བ་མེད་པའི་ཕྱིར་རོ། །དང་པོ་ཞུགས་པའི་དུས་ན་སྦྱོར་བའི་སྦྱོར་བ་ཞེས་བྱ་བའི་ཉེས་བྱས་སུ་རིག་པར་བྱའོ། །ཆ་བདག་གིར་བྱ་བར་འདོད་པ་ནི་མི་བླང་བའི་བསམ་པ་མ་ཡིན་ནོ་ཞེས་བྱ་བ་ནི་མ་བྱིན་པར་ནི་མི་བླང་ངོ༌། །བགོ་སྐལ་གྱི་ཆ་ནི་བདག་གིར་བྱའོ། །ཆ་བདག་གིར་བྱ་བར་འདོད་པ་དེ་ལྟ་བུའི་བདག་གིར་བྱ་བར་འདོད་པ་གང་ཡིན་པས་དེའི་གྲོགས་སུ་འགྲོ་བའི་དགེ་སློང་དེའི་བསམ་པ་དེ་ནི་མི་བླང་བའི་བསམ་པ་མ་ཡིན་ཏེ། འདི་ལྟར་བླང་བའི་བསམ་པ་ཁོ་ན་ཡིན་ནོ། །འདི་སྐད་བསྟན་ཏེ། གལ་ཏེ་ཆ་ལེན་ཅིང་དངོས་པོ་ཡང་ཚང་ན་ཕམ་པ་ཁོ་ནར་འགྱུར་རོ། །དེར་གཏོགས་པའི་ལས་རྗེས་སུ་སྒྲུབ་པ་ནི་དེའི་མ་ཡིན་ནོ་ཞེས་བྱ་བ་ནི། །རྐུན་པོ་བྱ་བ་དེར་གཏོགས་པའི་ལས་ལ་སྲུང་བ་ལ་སོགས་པ་དག་རྗེས་སུ་སྒྲུབ་པ་ནི་རྐུ་བ་དེའི་རྗེས་སུ་སྒྲུབ་པ་མ་ཡིན་པ་མ་ཡིན་ཏེ་ཡིན་པ་ཁོ་ནའོ། །ལྷན་ཅིག་གནས་པ་ཉིད་དང་ཉེ་གནས་ཉིད་ཀྱང་བརྐུས་པར་མི་འགྱུར་བའི་རྒྱུ་མ་ཡིན་ནོ་ཞེས་བྱ་བ་ནི། ལྷན་ཅིག་གནས་པ་ཉིད་དང་ཉེ་གནས་ཉིད་བརྐུས་པ་ཡང་བརྐུས་པའི་ཉེས་པར་མི་འགྱུར་བའི་རྒྱུ་མ་ཡིན་ཏེ། འདིར་བརྐུས་པ་ཁོ་ནར་འགྱུར་བའོ། །འདི་སྐད་བསྟན་ཏེ། གལ་ཏེ་རྐུན་པོ་རྣམས་ཀྱིས་ལ་ལའི་ལྷན་ཅིག་གནས་པ་ཉིད་དང༌། ཉེ་གནས་ཉིད་བརྐུས་ཏེ་བདག་གིར་བྱས་ཤིང་དབང་བའི་དངོས་པོ་བསྒྲུབས་པར་གྱུར་པ་
ལས་ཕྱིས་མཁན་པོའམ་སློབ་དཔོན་དེས་ལྷན་ཅིག་གནས་པ་དང༌། ཉེ་གནས་དེ་དབང་དུ་བྱས་ཤིང་རྐུན་པོ་དག་ལས་རྐུ་ཐབས་སམ་ནན་ཁུགས་ཀྱིས་ཕྱིར་འཕྲོག་པར་བྱེད་ན་དེའི་ཚེ་ལྷན་ཅིག་གནས་པ་ཉིད་དང་ཉེ་གནས་ཉིད་ཀྱང་བརྐུས་པར་འགྱུར་བའི་རྒྱུ་ཡིན་ནོ། །ཡོངས་སུ་བསྐོར་བ་ལ་མཚམས་ཉིད་གཙོ་བོའོ་ཞེས་བྱ་བ་ནི། སྔར་ཡོངས་སུ་བསྐོར་བས་རྐུ་བ་ལས་མཚམས་འབྱོར་ན་བརྐུས་པའོ་ཞེས་གང་སྨྲས་པ་ལ། འདིར་ནི་ཡོངས་སུ་བསྐོར་བ་ཞེས་བྱ་བ་སྨོས་པ་མཚམས་གཙོ་བོར་རིག་པར་བྱའོ། །རིབ་མས་བཅད་པ་ལ་སོགས་པའི་ཡོངས་སུ་བསྐོར་བ་ལ་ནི་མི་བྱའོ། །མཚམས་ན་གནས་པ་སྤོས་པ་ཡང་འདིས་མ་བསྡུས་པ་མ་ཡིན་ནོ་ཞེས་བྱ་བ་ནི། གང་གི་ཕྱིར་ཡོངས་སུ་བསྐོར་བ་ལ་མཚམས་གཙོ་བོ་ཉིད་ཡིན་པ་དེའི་ཕྱིར། ཟླ་དང་བདག་གིས་ས་མཚམས་སུ་ས་བརྐོས་ཏེ། ཕུར་བ་བཏབ་པ་ལ་སོགས་པ་མཚམས་གནས་པ་སྤོས་པ་དེ་ཡང་ཡོངས་སུ་བསྐོར་བ་ཞེས་བྱ་བ་འདིས་མ་བསྡུས་པ་མ་ཡིན་ཏེ། འདི་ལྟར་བསྡུས་པ་ཁོ་ནའོ། །འདི་སྐད་བསྟན་ཏེ། མཚམས་གནས་པ་སྤོས་པ་ཡང་འདིར་ཡོངས་སུ་བསྐོར་བ་རྐུ་བའི་རྐུ་བ་ཉིད་ཀྱིས་བསྡུས་པར་ཤེས་པར་བྱའོ། །མངོན་སུམ་དུ་བླངས་པ་ཡང་མི་སྣང་བ་ཉིད་ན་བརྐུས་པ་ཡིན་ནོ་ཞེས་བྱ་བ་ལ། མངོན་སུམ་ཞེས་བྱ་བ་ནི། མངོན་དུ་གྱུར་པ་སྟེ། མིག་ལ་སོགས་པའི་དབང་པོ་དག་ལ་གང་གི་ཚེ་སྣང་བར་གྱུར་པ་ནི་མངོན་སུམ་ཉིད་ཅེས་བྱའོ། །དེས་བླངས་པ་ནི་ཁྱེར་བ་སྟེ། དེ་ནི་མངོན་སུམ་དུ་བླངས་པ་སྟེ། མངོན་སུམ་དུ་བརྐུས་ཞེས་བྱ་བར་བསམ་པའོ། འདིར་ནི་རྫས་དེ་ཉིད་བདག་པོའི་མིག་སྔ་ནས་མི་སྣང་བ་ཉིད་ན་བརྐུས་པ་ཡིན་གྱི་ཕྱི་བཞིན་འབྲང་བ་དང༌། སྒྲུབ་པར་བྱེད་པ་གཉིས་མི་སྣང་བར་འགྱུར་བ་འབའ་ཞིག་ན་བརྐུས་པར་འགྱུར་བ་ནི་མ་ཡིན་ནོ། །འདིར་གཞུང་ནི་དགེ་སློང་གིས་བེའུ་རས་འཚོང་བ་བག་མེད་པར་འགྱུར་བ་ལས་བེའུ་རས་བརྐུས་ཏེ། དེས་དེ་ཁྱེར་ཏེ་འགྲོ་བ་ན་བེའུ་རས་འཚོང་བ་དེས་མཐོང་ནས་དེས་དགེ་སློང་དེ་ལ་སྨྲས་པ། བེའུ་རས་མ་དབྲོག་ཤིག །དགེ་སློང་གིས་སྨྲས་པ། བསྟན་ལ་ཁྱེར་ཏེ་འོང་བར་བྱའོ། །དེ་འགྱོད་པ་
སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བར་ནི་མི་འགྱུར་རོ། །ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །མི་མཐུས་བརྐུས་པ་ནི་དབང་དུ་བྱས་པ་ཉིད་ནའོ་ཞེས་བྱ་བ་ནི། མི་མཐུས་བཟུང་སྟེ་བརྐུས་པ་ནི་ནམ་བག་ཕེབས་ཤིང་དབང་དུ་བྱས་པ་ཉིད་ན་བརྐུས་པ་ཡིན་ནོ། །འདིར་མི་ཞེས་སྨོས་པའི་སྒྲ་འདི་ནི་རིགས་ལ་བསྙེགས་པས་དེ་ན་སྐྱེས་པ་འབའ་ཞིག་ཏུ་མ་ཟད་ཀྱི། བུད་མེད་ལ་སོགས་པ་མཐུས་བརྐུས་པ་ཡང་ཉེས་པ་འདྲའོ། །དབང་དུ་བྱས་པ་ཉིད་ཅེས་བྱ་བ་ནི་རྗེས་སུ་མཐུན་པར་གྱུར་པའི་གནས་སྐབས་ལ་བྱའོ། །དེ་བདག་ཉིད་ནི་མ་ཡིན་ནོ་ཞེས་བྱ་བ་ནི། དགེ་སློང་བདག་ཉིད་རྐུན་པོ་གཞན་དག་གིས་བརྐུས་པ་ན་དགེ་སློང་གིས་འཇིགས་པ་ལ་སོགས་པས་བདག་ཉིད་དབང་དུ་བྱས་ཏེ། རྐུ་ཐབས་ཀྱིས་ཐར་པར་བྱས་པ་དེ་ལ་ནི་བརྐུས་པ་མེད་པར་ཤེས་པར་བྱའོ།། འདིར་གཞུང་ནི་བདག་ཉིད་ལ་བརྐུས་པ་མེད་དོ་ཞེས་གསུངས་པ་ཡིན་ནོ། །གང་བསམས་པ་དེ་དང་འབྲེལ་པས་མ་བསམས་པ་བླངས་པ་ནི་བརྐུས་པ་མ་ཡིན་ནོ་ཞེས་བྱ་བ་ནི། གང་རྐུ་བ་ལ་གང་བསམས་པའི་དངོས་པོ་རྐུ་བར་འདོད་པ་དེ་དང༌། འབྲེལ་པ་ཞེས་བྱ་བ་མ་བསམས་པའི་དངོས་པོ་དང་འབྲེལ་པས་མ་བསམས་པའི་དངོས་པོ་རྐུ་བར་མི་འདོད་པ་བླངས་པ་ནི་དེ་བརྐུས་པ་མ་ཡིན་པར་རིག་པར་བྱའོ། །འདིར་གཞུང་ནི་དགེ་སློང་གིས་རས་སྦྱར་མ་མ་བྱིན་པར་བླངས་ནས་དེས་དེ་བརྐུས་ཏེ་བར་ཕྱེ་བ་དང༌། དེའི་བར་ནས་དར་རིན་ཐང་ཆེན་པོ་བྱུང་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། རས་སྦྱར་མའི་རིན་ཐང་བརྩི་བར་བྱའོ་ཞེས་གསུངས་པ་ཡིན་ནོ། །འདིར་དར་རིན་ཐང་ཆེན་པོ་ནི་རྐུ་བར་མ་བསམས་པས་དེ་ལས་ལྟུང་བར་མི་འགྱུར་རོ། །སྦོམ་པོ་ནི་གང་གིས་གང་ལེན་པ་དེ་དེའི་རྣམ་པར་གཞག་པ་ལ་གཞན་གྱིར་རྐུ་བའོ་ཞེས་བྱ་བ་ལ། སྦོམ་པོ་ནི་ཞེས་བྱ་བའི་ཚིག་དེ་དང་པོར་སྨོས་པ་ནི་དབང་དུ་བྱ་བ་ཉིད་བསྟན་པའི་ཕྱིར་རོ། །གང་ཟག་གང་གིས་དངོས་པོ་གང་ལེན་པའི་དངོས་པོ་དེ་གང་ཟག་དེ་ཡིར་གྱུར་ཅིག །ཅེས་རྐུན་པོ་རྣམས་ཀྱིས་རྣམ་པར་གཞག་
པའི་ཁྲིམས་སུ་བྱས་པ་ལ་དགེ་སློང་གིས་གཞན་གྱིར་རྐུ་བ་ཞེས་བྱ་བ་གཞན་གྱི་ཆེད་དུ་རྐུ་བ་ན་དེ་ལྟ་ན་སྦོམ་པོའོ། །འདི་སྐད་བསྟན་ཏེ། གལ་ཏེ་རྐུན་པོ་མང་པོ་དག་སྔར་བསྟན་པའི་རྣམ་པར་གཞག་པས་གཞན་གྱི་རྫས་རྐུབ་ན་དགེ་སློང་ཡང་དེར་འགྲོ་ཞིང་གཞན་གྱི་གྲོགས་ཀྱི་ཆེད་དུ་ཡིན་གྱི། བདག་གི་ཆེད་དུ་ནི་མ་ཡིན་པར་གཞན་གྱི་ཆེད་དུ་རྫས་རྐུ་བར་བྱེད་ཅིང་བདག་ཉིད་ཀྱིས་བདག་གིར་བྱ་བའི་བསམ་པས་ནི་མ་ཡིན་ལ། དེའི་ཚེ་སྦོམ་པོ་སྟེ། འདི་ནི་སྔར་གཞན་གྱི་དོན་ཉིད་དུ་ཡང་དངོས་གཞིའི་རྣམ་པའོ་ཞེས་སྨོས་པ་དེའི་སྤྲོས་པའི་ཡུལ་བསྟན་པའི་ཕྱིར་རོ། །ཡོངས་སུ་འཛིན་པ་དང་བཅས་པའི་དུར་ཁྲོད་ནས་ལེན་པའོ་ཞེས་བྱ་བ་ནི། ཡོངས་སུ་འཛིན་པ་དང་བཅས་པའི་དུར་ཁྲོད་ནས་རྐུ་སེམས་ཀྱིས་གོས་ལ་སོགས་པ་རྐུ་ན་སྦོམ་པོར་འགྱུར་བའོ། །དུར་ཁྲོད་ཀྱིས་ཡོངས་སུ་འཛིན་པ་དང་བཅས་པ་ནི་རྣམ་པ་གཉིས་ཏེ། བདག་ཉིད་ཀྱིས་བདག་གིར་བྱས་པ་དུར་ཁྲོད་འདི་ཐམས་ཅད་བདག་གིའོ་ཞེས་བདག་པོས་བདག་གིར་བྱས་པ་གང་ཡིན་པ་དེ་བརྐུས་ན་ནི་ཕམ་པར་འགྱུར་རོ། །གཞན་ཡང་བསད་པའི་གཤེད་མ་ལ་སོགས་པས་འཐོབ་པ་ཉིད་ཀྱིས་བདག་གིར་བྱས་པ་གང་ཡིན་པ་དེ་བརྐུས་ན་སྦོམ་པོར་འགྱུར་རོ། །འདི་ལྟར་དུར་ཁྲོད་ཀྱི་རྫས་དེ་དག་ལ་བདག་པོ་ནི་མེད་མོད་ཀྱི། འོན་ཀྱང་བཀྲེན་པ་ལ་སོགས་པས་འདི་བདག་གིས་འཐོབ་པོ་སྙམ་དུ་དེ་ལ་བདག་གིར་བྱ་བའི་བློ་སྐྱེ་བ་དེ་གལ་ཏེ་དགེ་སློང་གིས་རྐུ་སེམས་ཀྱིས་ལེན་ན་དེའི་ཚེ་སྦོམ་པོར་འགྱུར་རོ། །རྩ་བའི་ལྡུམ་ཞིང་དང་སྡོང་བུ་དང་ལོ་མ་དང་མེ་ཏོག་དང་འབྲས་བུའི་ཀུན་དགའ་ར་བ་ལ་སོགས་པ་གསང་སྔགས་དག་གིས་སྐམས་པར་བྱེད་པའོ་ཞེས་བྱ་བའི་རྩ་བ་ལ་ཕུག་ལ་སོགས་པའི་ལྡུམ་ཞིང་དང་སྡོང་བུ་ལ་སོགས་པའི་ཀུན་དགའ་ར་བ་གསང་སྔགས་དག་གིས་སྐམས་པར་བྱེད་ན་སྦོམ་པོར་འགྱུར་བའོ། །སྔར་ཡང་སྦེད་པ་དང་ཆུད་གསོན་པ་ཞེས་སྨོས་པའི་ཆུད་གསོན་པ་ཞེས་བྱ་བས་ཆུད་གཟོན་པ་བསྟན་མོད་ཀྱི། འོན་ཀྱང་འདིར་གསང་སྔགས་དག་གིས་ཆུད་གཟོན་པས་ཆུད་གཟོན་པ་དེ་བསྟན་པའི་ཕྱིར་ཡང་རྣམ་པ་གཞན་བསྟན་པ་ཡིན་ནོ། །ཆས་ཀྱིས་བརྔོད་པས་རྟ་བཀྲི་བ་དང་ཞོན་ཏེ་
འདི་བརྐུ་བར་བྱའོ་སྙམ་ནས་ལུས་འགྱུར་བའོ་ཞེས་བྱ་བ་ནི་དགེ་སློང་གིས་རྩྭ་ལ་སོགས་པའི་ཆས་ཀྱིས་བརྔོད་པས་རྟ་འདི་བཀྲི་ཞིང་བརྐུ་བར་བྱའོ་སྙམ་ནས་དེ་ལྟར་རྣམ་པ་དེས་རྟ་འདི་བརྐུ་བར་བྱའོ་སྙམ་དུ་སེམས་ཤིང་མྱུར་དུ་གོམ་པ་འདོར་བ་ལ་སོགས་པའི་ལུས་འགྱུར་བར་བྱེད་ན་སྦོམ་པོའོ། །དེ་བཞིན་དུ་ཞོན་ཏེ་རྟ་འདི་བརྐུ་བར་བྱའོ་སྙམ་ནས་དེ་ལྟར་སེམས་ཤིང་ལུས་གཡོ་བ་ལ་སོགས་པས་ལུས་འགྱུར་བ་ཡང་སྦོམ་པོར་འགྱུར་བའོ། །གྲུ་ཡང་ངོ་ཞེས་བྱ་བ་ཡང་དགེ་སློང་གིས་གྲུ་འདིར་ཞུགས་ཏེ་འདི་བརྐུ་བར་བྱའོ་སྙམ་དུ་སེམས་ཤིང་ལུས་འགྱུར་བར་བྱེད་ན་སྦོམ་པོར་འགྱུར་བའོ། །འདི་ལས་འདི་ལྟར་བྱའོ་སྙམ་པ་ཡང་ངོ་ཞེས་བྱ་བ་ནི། སྔར་འདི་ཞེས་སྨོས་པའི་ཚིག་གི་གནས་སུ་འདིར་འདི་ལས་ཞེས་བྱ་བའི་ཚིག་བཅུག་པའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། རྟ་འདི་ལས་སམ་གྲུ་འདི་ལས་འདི་ལྟར་རྐུའོ་སྙམ་ནས་ལུས་འགྱུར་བ་ཡང་སྦོམ་པོའོ། །འདིར་གཞུང་ནི་དགེ་སློང་གྲུ་རིན་པོ་ཆེས་བཀང་བ་རྒལ་བར་བྱེད་པ་དེས་འདི་ལས་འདི་ལྟར་བརྐུ་བར་བྱའོ་སྙམ་ནས་དེར་ལུས་འགྱུར་བ་བྱས་ནས། དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕམ་པར་ནི་མི་འགྱུར་ཏེ། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཚིག་དེ་ནི་འཐོབ་པར་ངེས་པའི་མངོན་པར་སྤྲོ་བས་ལུས་འགྱུར་བར་བྱེད་པའོ། །ཕ་མ་དང་ཕུ་ནུ་དང་བུ་སྲིང་དང་མཁན་པོ་དང་སློབ་དཔོན་དང་མཆོད་རྟེན་དང་དགེ་འདུན་ལ་སོགས་པ་ལ་བསྔོས་པ་ཤོ་གམ་གཞལ་དགོས་པ་བཟླས་པའོ་ཞེས་བྱ་བ་ནི། ཕ་མ་ལ་སོགས་པ་དེ་དག་ལ་བདག་གི་དར་ལ་སོགས་པ་ཤོ་གམ་གཞལ་དགོས་པ་འདི་དབུལ་ལོ་ཞེས་བསྔོས་པའི་བརྣག་པ་བསྐྱེད་ནས་ཤོ་གམ་གྱི་གནས་ནས་ཤོ་གམ་གཞལ་དགོས་པའི་ཤོ་གམ་མ་བྱིན་པར་འདའ་བར་བྱེད་ན་སྦོམ་པོར་འགྱུར་བ་སྟེ། འདི་ཡང་སྔར་གཞན་གྱི་དོན་ཉིད་དུ་ཡང་དངོས་གཞིའི་རྣམ་པའོ་ཞེས་སྨོས་པ་དེའི་སྤྲོས་པའི་ཡུལ་བསྟན་པའི་ཕྱིར་རོ། །བརྙས་པ་དང་བསྐྱིས་པ་དག་མི་སྦྱིན་པར་སེམས་པའོ་ཞེས་བྱ་བ་ནི། བརྙས་པའི་ཡུལ་དང་བསྐྱིས་བའི་ཡུལ་ལ་གལ་ཏེ་དགེ་སློང་གིས་ཕྱིར་མི་སྦྱིན་ནོ་སྙམ་
དུ་སེམས་པར་བྱེད་ཅིང་བརྙས་པ་དང་བསྐྱིས་པའི་དངོས་པོ་འདི་མི་སྦྱིན་ནོ་སྙམ་དུ་དེ་གཉིས་བརྣོགས་པའི་སེམས་བསྐྱེད་ན་སྦོམ་པོར་འགྱུར་བའོ། །བརྙས་པ་དང་བསྐྱིས་པ་བརྣོགས་པ་དང་བསྙོན་པ་གཉིས་ཀྱང་སྦོམ་པོ་ཡིན་ཏེ། མི་སྦྱིན་པར་སེམས་པ་འབའ་ཞིག་ཏུ་མ་ཟད་དོ། །གཞན་གྱི་དོན་དུ་བྱིན་པ་འགོད་པ་ཡང་ངོ་ཞེས་བྱ་བ་ནི། ཡོན་བདག་གིས་དགེ་འདུན་ལ་ཆོས་སྟོན་ལ་སོགས་པའི་དོན་དུ་རྫས་དགེ་སློང་དག་གི་ལག་ཏུ་སྦྱིན་པ་གལ་ཏེ་དགེ་སློང་དེ་དག་གིས་རྫས་དེ་དགེ་འདུན་གྱི་མཆོད་སྟོན་ལ་སོགས་པར་མ་སྤྱད་པར་དགེ་འདུན་ལ་བཅབས་ཏེ་བགོས་ན་དེའི་ཚེ་དགེ་སློང་དེ་དག་ལ་སྦོམ་པོར་འགྱུར་ཏེ། དགེ་འདུན་གྱིས་མཚོར་བས་དེ་ལ་བདག་གིར་བྱ་བའི་སེམས་མ་སྐྱེས་པའི་ཕྱིར་དེ་ལ་སྔོན་པོར་གཞག་གོ །ཡོངས་སུ་མ་བཟུང་བ་ལ་ཡོངས་སུ་བཟུང་བར་འདུ་ཤེས་པའོ་ཞེས་བྱ་བ་ནི། དངོས་པོ་གང་སུས་ཀྱང་ཡོངས་སུ་མ་བཟུང་བ་ལ། གལ་ཏེ་དགེ་སློང་གིས་གཞན་གྱིས་ཡོངས་སུ་བཟུང་བར་འདུ་ཤེས་པས་རྐུན་དེའི་ཚེ་ཉེས་པ་སྦོམ་པོར་འགྱུར་བའོ། །ཡན་ལག་གཅིག་མ་ཚང་བའི་ཕྱིར་སྦོམ་པོ་སྟེ། འདི་ལྟར་མིའི་རྒྱུད་ཀྱིས་ཡོངས་སུ་བཟུང་བ་ཉིད་ཅེས་བྱ་བའི་ཡན་ལག་དེ་འདི་ལ་མེད་པའི་ཕྱིར་རོ། །ཟན་དྲོན་དང་འབྲས་ཆན་དང་ཕྱེ་དང་ཉ་ཤ་དང་ཤ་དང་ཁུར་བ་ལ་སོགས་པའི་བསོད་སྙོམས་གཞི་མེད་པ་ནོད་པའོ་ཞེས་བྱ་བ་ནི། ཟན་དྲོན་ལ་སོགས་པའི་བསོད་སྙོམས་གཞི་མེད་པ་མི་དབང་བ་ནོད་ན་སྦོམ་པོར་འགྱུར་བའོ། །གཞི་མེད་པ་ཞེས་བྱ་བ་ནི་མི་དབང་བའོ། །འདིར་གཞུང་ནི་དགེ་སློང་གིས་བསོད་སྙོམས་འབྲས་ཆན་གཞི་མེད་པ་བླངས་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པར་མི་འགྱུར་ཏེ་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །བསོད་སྙོམས་འབྲས་ཆན་ལ་ཇི་ལྟ་བ་བཞིན་དུ། བསོད་སྙོམས་ཕྱེ་ལ་སོགས་པ་ལ་ཡང་དེ་བཞིན་དུ་རིག་པར་བྱའོ། །གཞན་གྱིས་བླངས་པར་མི་ཤེས་པ་ནི་གཞི་མེད་པ་ཉིད་མ་ཡིན་ནོ་ཞེས་བྱ་བ་ལ་གཞན་གྱི་བླངས་པར་མི་ཤེས་པ་ན་རང་གི་དོན་ཏམ་གཞན་གྱི་དོན་གྱིས་བསོད་སྙོམས་ལ་སོགས་པ་མི་དབང་བ་
ལེན་ན་བསོད་སྙོམས་དེ་གཞི་མེད་པ་མ་ཡིན་ནོ། །འདི་སྐད་བསྟན་ཏེ། གང་དུ་དགེ་སློང་གི་སྐལ་བ་དགེ་སློང་གཞན་གྱིས་བླངས་ལ་དེས་ཀྱང་མི་ཤེས་ནས། གལ་ཏེ་ཡང་རང་གི་དོན་དུ་ལེན་ན་དེ་གཞི་མེད་པ་ཉིད་མ་ཡིན་ནོ། །དེ་བཞིན་དུ་གཞན་གྱིས་སྐལ་བ་དགེ་སློང་གཞན་གྱིས་བླངས་བ་ལ་ཡང་དེ་ཉིད་ཀྱི་སྐལ་བ་གཞན་གྱིས་ལེན་ན་དེ་ལ་ཡང་ཉེས་པ་མེད་དོ། །མ་བཅོལ་བས་མ་ཡིན་ནོ་ཞེས་བྱ་བ་ནི། གལ་ཏེ་དགེ་སློང་གིས་བདག་ལ་དགེ་སློང་འགས་ཀྱང་སྐལ་པ་མནོད་པའི་ཕྱིར་ཁོ་བོའི་སྐལ་པ་ཁྱོད་ཀྱིས་ལོང་ཤིག་ཅེས་མ་བཅོལ་ལ་འོན་ཀྱང་མ་བཅོལ་བའི་དགེ་སློང་དེས་བདག་པོར་གྱུར་པའི་དགེ་སློང་དེའི་མི་དབང་བའི་སྐལ་བ་མནོས་ན་བདག་པོར་གྱུར་པ་དེ་ལ་ནི་གཞི་ཉིད་མེད་པ་མ་ཡིན་ཏེ། རང་གིས་མ་བླངས་པའི་ཕྱིར་དང༌། གཞན་ལ་ཡང་མ་བཅོལ་བའི་ཕྱིར་རོ། །གཞན་དག་ནི་མདོ་འདིའི་དོན་འདི་སྐད་གཞན་དུ་བརྗོད་དེ། མ་བཅོལ་བར་དགེ་སློང་གིས་གཞན་གྱི་དོན་དུ་མི་དབང་བ་གང་ཡིན་པ་དེ་ལ་དབང་བའི་བློས་བླངས་ན་དེ་ལ་གཞི་མེད་པ་ཉིད་མ་ཡིན་པར་ཤེས་པར་བྱའོ་ཞེས་ཟེར་རོ། །དེ་ལྟར་ཡང་གཞུང་སྣང་སྟེ། ཀོ་ས་ལའི་ལྗོངས་དག་ན་དགེ་འདུན་གྱི་ཟན་འགོད་པ་ན་དགེ་སློང་གཉུག་མར་གནས་པ་ཞིག་གྲོང་གཞན་དུ་སོང་ནས་དེའི་སྨོས་འདྲིན་གྱི་དགེ་སློང་དེས་དེའི་ཟན་མནོས་ནས་དེ་འོངས་པ་ན་ཁྱོད་ཀྱི་ཟན་ཁོ་བོས་མནོས་སོ་ཞེས་བརྗོད་པ་དང༌། དགེ་སློང་དེས་སྨྲས་པ། ཁྱོད་ཀྱིས་ཅིའི་ཕྱིར་ཁོ་བོའི་ཟན་མ་བཅོལ་བར་མནོས། དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་མེད་དེ་འོན་ཀྱང་མ་བཅོལ་བར་བླང་བར་མི་བྱའོ་ཞེས་གསུངས་པ་ཡིན་ནོ། །མགྲོན་དུ་མ་བོས་པར་ཟན་ཟ་ན་ཉེས་བྱས་སོ་ཞེས་བྱ་བ་ནི། དགེ་སློང་མགྲོན་དུ་མ་བོས་པར་སྦྱིན་བདག་གི་ཟན་ཟ་ན་ཉེས་བྱས་སོ། །མགྲོན་དུ་མ་བོས་པའི་རྙེད་པ་ནི་རྣམ་པ་གཉིས་ཏེ། བརྒྱ་ལ་བདག་པོས་ཤེས་ཏེ་འདི་བདག་གིས་མགྲོན་དུ་ནི་མ་བོས་མོད་ཀྱི། འོན་ཀྱང་སྤྱིན་ནོ་སྙམ་པ་དང་མི་ཤེས་པར་སྦྱིན་པར་བྱེད་པ་སྟེ། འདི་ལྟར་ཕྱོགས་དེ་གཉི་ག་ལ་ཉེས་བྱས་ཉིད་དེ། དེ་ཡང་རབས་ཀྱི་ཚུལ་མ་ཡིན་པའི་ཕྱིར་རོ། །མ་བྱིན་པ་མ་ཡིན་
པའི་ཕྱིར་དང༌། རྐུ་སེམས་ཉིད་མེད་པའི་ཕྱིར་ཕམ་པར་ཡང་མི་འགྱུར་ལ་སྦོམ་པོར་ཡང་མི་འགྱུར་རོ། །འདི་ལ་ཁ་ཅིག་ཕམ་པར་འགྱུར་བ་སྨྲས་ཏེ། དེ་དག་གིས་ནི་ལེགས་པར་མ་བརྟགས་སོ། །དེ་ལྟར་ཡང་གཞུང་འདི་ཡིན་ཏེ། དགེ་སློང་གིས་མགྲོན་དུ་མ་བོས་པར་ཟན་ཟོས་ནས་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕམ་པར་མི་འགྱུར་ཏེ་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདི་ལ་ནི་གདོན་མི་ཟ་བར་རྐུ་སེམས་མེད་པ་ཁོ་ནར་ཁས་བླང་བར་བྱ་སྟེ། སྦྱིན་པ་པོ་རང་ཁོ་ནས་སྦྱིན་པར་བྱེད་པས་དེ་ལ་རྐུ་སེམས་གང་ལས་འབྱུང༌། གལ་ཏེ་ཡོན་ཟོང་ལ་སོགས་པ་ཐོབ་ཏུ་ཟིན་ཀྱང་ཉེས་བྱས་ཁོ་ན་སྟེ། དམ་པའི་སྤྱོད་པ་མ་ཡིན་པའི་ཕྱིར་རོ། །རྐུ་བའི་ཆེད་དུ་འགྲོ་བ་ཡང་ངོ་ཞེས་བྱ་བ་ནི། རྐུན་པོ་བྱ་བའི་ཕྱིར་འགྲོ་བ་ཡང་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ ། འོ་ན་མདོ་འདི་བརྩམ་པར་བྱ་མི་དགོས་ཏེ། སྦྱོར་བའི་སྦྱོར་བ་ཉིད་དོ་ཞེས་བྱ་བས་འདི་རྟོགས་པའི་ཕྱིར་རོ་ཞེ་ན། བདེན་མོད་འོན་ཀྱང་མདོ་འོག་མའི་ཡུལ་བསྟན་པའི་ཕྱིར་འདི་བརྩམས་ཏེ། གལ་ཏེ་མདོ་འདི་མ་བྱས་སུ་ཟིན་ན་དེའི་ཆེ་མདོ་འོག་མ་ཉིད་གང་ལས་ཐ་དད་པ་ཉིད་མ་ཡིན་པ་མི་ཤེས་པར་འགྱུར་རོ། །དེ་ལས་གྲོས་བྱེད་པ་ཐ་དད་པ་ཉིད་མ་ཡིན་ནོ་ཞེས་བྱ་བ་ནི། རྐུ་པའི་ཆེད་དུ་འགྲོ་བ་ཞེས་བྱ་བ་དེ་ལས་གྲོས་བྱེད་པ་ཞེས་བྱ་བ་འདི་ཐ་དད་པ་ཉིད་མ་ཡིན་ཏེ། དེ་ཉིད་ཀྱི་ཁོངས་སུ་གཏོགས་པའི་ཕྱིར་རོ། །འདི་སྐད་བསྟན་ཏེ། འགོར་བའི་སྔོན་རོལ་དུ་གྲོས་བྱེད་པ་གང་ཡིན་པ་ཅི་དེར་འདོང་ངམ་འོན་ཏེ་མི་འདོང་ཞེས་ངག་གི་ལས་བྱེད་པ་དང༌། ལག་པ་རྐྱོང་བ་དང༌། མགོ་བསྒྱུར་བ་ལ་སོགས་པ་ཐམས་ཅད་དེའི་ཁོངས་སུ་གཏོགས་པས་དེ་ལ་ཉེས་བྱས་ཐ་དད་པར་མི་འགྱུར་ཏེ། འདི་ལྟར་གྲོས་བྱེད་པ་ནས་བརྩམས་ཏེ། ནོམ་པར་བྱེད་པའི་སྔ་རོལ་ཚུན་ཆད་ལ་ཉེས་བྱས་གཅིག་ཁོ་ནར་རིག་པར་བྱའོ། །ཀུན་དུ་བཟུང་བ་མ་ཡིན་ནམ་ཞེས་ལེགས་པར་སོ་སོར་བརྟག་པར་བྱ་སྟེ་བླང་བར་བྱའོ་ཞེས་བྱ་བ་ནི། ཕྱག་དར་ཁྲོད་ལ་སོགས་པ་དག་ཅི་ནས་ཀྱང་ཀུན་དུ་བཟུང་བ་མ་ཡིན་ནམ་ཞེས་འདི་གཞན་དག་
གིས་ཡོངས་སུ་བཟུང་བ་མ་ཡིན་ནམ་ཞེས་བྱ་བ་དེ་ལྟར་ལེགས་པར་སོ་སོར་བརྟག་པར་བྱ་སྟེ། སུས་ཀྱང་ཡོངས་སུ་བཟུང་བ་མ་ཡིན་པར་བསམ་པ་བརྟན་པར་གྱུར་ན་བླང་བར་བྱའོ། །དེ་ལྟར་བྱས་ན་རང་ཡང་འགྱོད་པ་མི་སྐྱེ་ལ། གཞན་གྱི་ཚིག་གི་སྐབས་ཀྱང་མེད་པར་འགྱུར་རོ། །ལུས་བསྙལ་བར་མི་བྱའོ་ཞེས་བྱ་བ་ལ། ལུས་བསྒྱེལ་ཅིང་བསྙལ་བ་ནི་ལུས་བསྙལ་བ་སྟེ། རྣམ་པ་འཁྲུགས་པར་གྱུར་པས་ལུས་བསྙལ་བར་མི་བྱའོ། །འདི་ནི་དགེ་སློང་གིས་ཞིང་རྨེད་པའི་མདུན་དུ་བདག་ཉིད་འགྲེལ་ཏེ་ཉལ་བ་དང༌། བཅོམ་ལྡན་འདས་ཀྱིས་དགེ་སློང་གིས་ལུས་བསྒྱུར་བའི་རྣམ་པ་དེ་ལྟ་བུ་མི་བྱའོ་ཞེས་གསུངས་པ་གང་ཡིན་པ་དེ་བསྡུས་པ་ཡིན་ནོ། །ཚང་གཞིག་པར་མི་བྱའོ་ཞེས་བྱ་བ་ནི་བྱིའུ་དང་ཕུག་རོན་ལ་སོགས་པའི་ཚང་གནས་པ་དགེ་སློང་གིས་གཞིག་པར་མི་བྱའོ། །སྒོ་ང་མེད་པ་གང་དག་ཡིན་པ་དེ་དག་གཞིག་པར་བྱའོ་ཞེས་གསུངས་པ་ནི་དགེ་སློང་གི་གནས་སུའོ། །མདོ་འདི་ནི་དམིགས་ཀྱིས་བསལ་བ་དང་བཅས་པ་ཡིན་ཏེ། དེས་ན་འདི་སྐད་བསྟན་ཏེ། དགེ་སློང་དག་གི་གནས་མ་གཏོགས་པ་གཞན་དུ་སྒོ་པ་མེད་པའི་ཚང་གཞིག་པར་མི་བྱའོ། །མི་གནས་པ་དེར་ཆོས་གོས་ཀྱི་ཆ་མི་བླང་ངོ་ཞེས་བྱ་བ་ནི། དགེ་སློང་གཙུག་ལག་ཁང་དུ་དབྱར་མ་གནས་པའི་གཙུག་ལག་ཁང་དེར་དབྱར་གྱི་རྙེད་པའི་ཆོས་གོས་ཀྱི་ཆ་མི་བླང་བའོ། །འདི་སྐད་བསྟན་ཏེ། དགེ་སློང་གང་དུ་མ་གནས་པའི་གཙུག་ལག་ཁང་དེ་ནས་ཆོས་གོས་ཀྱི་རྙེད་པ་མི་བླང་ངོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་དབྱར་གཞན་དུ་གནས་ལ་གཞན་དུ་དབྱར་གྱི་སོ་སོའི་ཆ་བླང་བར་མི་བྱའོ་ཞེས་གསུངས་པ་ཡིན་ནོ། །འདིར་དབྱར་གྱི་ཞེས་སྨོས་པ་ནི་མཚོན་པ་སྟེ། གཞན་དུ་ཡང་རྙེད་པ་མི་དབང་བ་བླང་བ་དགག་པ་དེ་བཞིན་ནོ། །ཆོམ་རྐུན་པ་ལས་སྦྱིན་བདག་གི་སེམས་ཀྱིས་ལན་པ་ལ་ཉེས་པ་མེད་དོ་ཞེས་བྱ་བ་ལ། ཆོམ་རྐུན་པ་ཞེས་བྱ་བ་ནི། རྐུ་འཕྲོག་བྱེད་པ་སྟེ། ཆོམ་རྐུན་པ་རྐུན་པོ་ལ་སོགས་པ་དེ་ལས་བྱིན་པ་བླང་བ་གང་ཡིན་པ་དེ་ལ་འདི་ནི་སྤྱིན་བདག་གོ་སྙམ་པའི་སེམས་ཀྱིས་ལེན་ན་དེ་ལ་ཉེ་པ་མེད་དེ། རྫས་འདིའི་
བདག་པོ་ནི་འདི་ཉིད་ཡིན་ནོ་ཞེས་བྱ་བའི་དབང་དུ་བྱས་པའི་ཕྱིར་རོ། །འོང་བ་རྐུ་ཐབས་ཅན་གྱི་ཆོམ་རྐུན་པར་མ་གྲགས་པ་ལས་བླང་བར་མི་བྱའོ་ཞེས་བྱ་བ་ལ། དེ་འོང་བ་རྐུ་ཐབས་ཅན་ཡང་ཡིན་ལ་ཆོམ་རྐུན་པ་ཡང་ཡིན་པས། འོང་བ་རྐུ་ཐབས་ཅན་གྱི་ཆོམ་རྐུན་པའོ། །འོང་བ་རྐུ་ཐབས་ཅན་གྱི་ཆོམ་རྐུན་པ་དེ་ནི་ཆོམ་རྐུན་པར་མ་གྲགས་པ་དེ་ལས་ཆོས་གོས་ལ་སོགས་པ་རྙེད་པ་དང་ལྷུང་བཟེད་ཀྱང་བླང་བར་མི་བྱའོ་ཞེས་བྱ་བ་བར་སྦྱར་རོ། །ཆོམ་རྐུན་པར་མ་གྲགས་པའི་ཆོམ་རྐུན་པ་ནི་འོང་བ་རྐུ་ཐབས་ཅན་གྱི་ཆོམ་རྐུན་པ་ཡིན་པར་ཤེས་པར་བྱ་སྟེ། འདི་ལྟར་ཆོམ་རྐུན་པར་མ་གྲགས་པ་དེ་ལས་ཆོས་གོས་ལ་སོགས་པའི་རྫས་འོང་བ་འབྱུང་བ་ནི་གང་ནས་ཀྱང་འོང་བ་མི་ཤེས་ཏེ། འོང་བ་དེ་རྐུ་ཐབས་ཅན་དུ་གྱུར་པའི་ཕྱིར་ཏེ། མི་ཚོར་བའི་རང་བཞིན་ཅན་གྱིན་པའི་ཕྱིར་རོ་ཞེས་བྱ་བའི་ཐ་ཚིག་གོ །ཆོམ་རྐུན་པ་གུད་ལ་འོང་བ་རྐུ་ཐབས་ཅན་མཁྱུད་བུ་ཡོད་པ་དེ་ནི་འོང་བ་རྐུ་ཐབས་ཅན་ཏེ། འོང་བ་རྐུ་ཐབས་ཅན་དེ་ཡང་ཆོམ་རྐུན་པ་ཡིན་ནོ། །འདི་ལྟར་འདུལ་བྱེད་དག་ལ་བཅོམ་ལྡན་འདས་ཀྱིས་འོང་བ་རྐུ་ཐབས་ཅན་གྱི་ཆོམ་རྐུན་པ་ལས་ཆོས་གོས་བླང་བར་མི་བྱའོ་ཞེས་གསུངས་པའི་ཚིག་དེ་ཉིད་རྣམ་པར་བཤད་པར་མི་བྱ་བའི་ཕྱིར་འདིར་མདོ་བྱེད་པས་མ་གྲགས་པ་ཞེས་བྱ་བ་སྨོས་ཏེ། དེ་བས་ན་ཟློས་པའི་ཉེས་པར་ཡང་མི་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། འོང་བ་རྐུ་ཐབས་ཅན་གྱི་ཆོམ་རྐུན་པ་ལས་ཆོས་གོས་ལ་སོགས་པ་བླང་བར་མི་བྱ་བར་གང་ལས་ཆོས་གོས་ལ་སོགས་པ་འོང་པ་ནི་འཇིག་རྟེན་ན་གྲགས་པར་གྱུར་པ་དེ་ལས་བླང་བར་བྱ་སྟེ། གྲགས་པར་གྱུར་པ་ལས་ཆོས་གོས་ལ་སོགས་པ་འོང་བ་ནི་འཇིག་རྟེན་ན་གྲགས་པ་ཡིན་གྱི། གཞན་གྱི་ནི་མ་ཡིན་ནོ། །དེ་ལས་བླངས་པ་མཚོན་གྱིས་བཅད་པ་དང༌། ཁ་དོག་ངན་པར་བྱས་ཏེ་བཅང་པར་བྱའོ་ཞེས་བྱ་བ་ནི། གྲགས་པ་དེ་ལས་ཆོས་གོས་ལ་སོགས་པ་གང་བླངས་པ་གྲི་ལ་སོགས་པའི་མཚོན་གྱིས་ཁ་ཚར་དང་ཕུན་ཚར་བཏོགས་པ་ལ་སོགས་པ་གཅད་པ་དང༌། ཁ་བསྒྱུར་བ་ལ་སོགས་པས་ཁ་དོག་ངན་པར་བྱ་བ་དེ་
བྱས་ཏེ་བསྲེལ་ཞིང་བཅང་བར་བྱའོ་ཞེས་བྱ་བའི་ཐ་ཚིག་གོ །དེ་ལྟར་བྱས་ཀྱང་སློང་ན་སྦྱིན་ནོ་ཞེས་བྱ་བ་ནི་མཚོན་གྱིས་གཅད་པ་དང༌། ཁ་དོག་ངན་པར་བྱས་པ་དེ་ལྟར་བྱས་ཀྱང་སྔོན་བདག་པོ་གཞན་ཞིག་ན་རེ་འདི་བདག་གི་རྫས་སྔོན་གྱི་ཆོམ་རྐུན་པར་གྲགས་པས་ཁྱེར་པ་ཡིན་པས་བདག་ལ་བྱིན་ཅིག་ཅེས་སློང་ན་དགེ་སློང་གིས་སྦྱིན་ནོ། །འདི་སྐད་བསྟན་ཏེ། དེ་གང་ལས་ཕྲོགས་པའི་བདག་པོ་དེ་གལ་ཏེ་འདི་བདག་གི་ཡིན་ནོ་ཞེས་སློང་ན་དེ་དེ་ལ་སྦྱིན་པར་བྱའོ་ཞེས་བྱ་བའི་ཐ་ཚིག་གོ །གནད་ལ་བསྒྲེ་བར་བྱའོ་ཞེས་བྱ་བ་ལ་འདིར་གནད་ལ་བསྒྲེ་བར་ཞེས་བྱ་བ་ནི་ཡོན་པོ་དང་གྱ་གྱུའི་རྣམ་པས་གནོད་པར་བྱ་བ་ལ་བྱ་སྟེ། དེ་སུ་ལ་ཡང་མི་བྱའོ་ཞེས་བྱ་བའི་ཐ་ཚིག་གོ །ཚེ་དང་ལྡན་པ་སྤོང་བྱེད་ཀྱིས་བཟོད་པར་བྱ་བའི་ཕྱིར་ཁྱིམ་པ་རྣམས་ཀྱིས་འཕགས་པ་ཀུན་དགའ་བོ་ལ་ཁྱེའུ་དང་བུ་མོ་དུ་བ་དག་སྡུད་དུ་བཅུག་སྟེ། གནོད་པར་བྱེད་པ་གང་ཡིན་ལ་ལྟ་བུ་སྟེ། དེ་ཐམས་ཅད་དུ་སྦྱར་བར་བྱ་བ་ཡིན་པར་སྣང་བས་ཐམས་ཅད་ཀྱི་དབང་དུ་བྱས་སོ། །མ་བྱིན་པར་ལེན་པ་ལ་ཡང་འདི་སྦྱར་བ་ཡོད་དེ། གནད་ལ་བསྒྲེ་བས་གཏོང་བ་དང་སྦྱིན་དུ་འཇུག་པ་ན་བརྐུས་པར་འགྱུར་བའོ། །གསང་སྔགས་དག་གིས་གཏོང་བ་ལ་ཉེས་པ་མེད་དོ་ཞེས་བྱ་བ་ནི། རྫུ་འཕྲུལ་དང་འདྲ་བའི་ཡིད་རྣམ་པར་དག་པས། གཞན་གྱིས་ཕྲོགས་པའི་རྫས་གཏོང་བར་བྱེད་པ་ལ་ནི་ཉེས་པར་མི་འགྱུར་རོ། །བྱི་པས་ཁྱེར་བ་བདག་པོས་བླངས་པ་ལ་ཡང་ངོ་ཞེས་བྱ་བ་ནི། དག་སློང་ལེན་པ་པོ་གང་ཡིན་པ་དེའི་རྫས་བྱི་བས་ཁྱེར་བ་ཕྱིར་བླངས་པ་ལ་ཡང་ཉེས་པ་མེད་དེ། འདི་བདག་གི་ཡིན་ནོ་སྙམ་པའི་བསམ་པ་དེས་ལེན་པ་ལ་ཉེས་པ་མེད་དོ། །དགེ་སློང་གཞན་གྱི་རྫས་ལ་དེའི་རྫས་སུ་ན་ཡང་ངོ་ཞེས་བྱ་བ་ནི། དགེ་སློང་གཞན་གྱི་རྫས་བྱི་བས་ཁྱེར་བར་གྱུར་པའི་རྫས་དེ་དགེ་སློང་གཞན་གྱིས་དགེ་སློང་གཞན་གྱི་རྫས་ཡིན་གྱི། བདག་གི་རྫས་ནི་མ་ཡིན་ནོ་ཞེས་དེའི་རྫས་སུ་ལེན་པར་བྱེད་པ་དེ་ལ་ཡང་ཉེས་པ་མེད་དེ་རྐུ་སེམས་མེད་པའི་ཕྱིར་རོ། །རྔོན་པ་དག་གིས་མངོན་པར་གཙེས་པར་གྱུར་པའི་རི་དགས་གནས་ཁང་དུ་ཞུགས་པ་བླངས་པ་ལ་ཡང་ངོ་ཞེས་བྱ་
བ་ནི། གལ་ཏེ་རྔོན་པ་དག་རི་དགས་ལ་འཚེ་བར་བྱེད་ཅིང་རི་དགས་དེ་ཡང་གནས་ཁང་དུ་འཇུག་ན་རྔོན་པ་དེ་དག་གིས་མངོན་པར་གཙེས་པའི་རི་དགས་གནས་ཁང་དུ་ཞུགས་པ་བཟུང་ཞིང་བླངས་པ་ལ་ཉེས་པ་མེད་དེ། ཡོངས་སུ་བསྐྱབས་པའི་བསམ་པས་བཟུང་བའི་ཕྱིར་རོ། །ཁྱད་པར་དེ་ལྟ་བུ་ཅན་གྱི་རི་དགས་དེ་ཤི་ན་ཇི་ལྟར་བྱ་ཞེ་ན་དེའི་ཕྱིར། དེ་ཤི་ན་དེ་དག་ལ་སྦྱིན་པར་བྱ་བ་ཉིད་དོ་ཞེས་བྱ་བ་སྨྲས་ཏེ། དེ་དག་གིས་གཙེས་པའི་རི་དགས་དེར་ཡང་ཞུགས་ནས་ཤི་ན་ཤི་བ་དེ་དེ་དག་ལ་སྦྱིན་པར་བྱ་བ་ཉིད་དོ། །དེ་དག་རང་གིས་བླང་བ་ཉིད་དུ་མི་བྱའོ། །གཞན་དག་ལ་ཡང་སྦྱིན་པར་མི་བྱ་བ་ཉིད་དོ། །མ་བྱིན་པར་ལེན་པའི་ཕམ་པར་འགྱུར་པ་འདུལ་བྱེད་ཀྱི་སྐབས་དག་གོ་ཞེས་བྱ་བ་འདུལ་བྱེད་ཀྱི་སྐབས་རྫོགས་སོ། །མ་བྱིན་པར་ལེན་པའི་ཕམ་པར་འགྱུར་བ་རྫོགས་སོ་ཞེས་བྱ་བ་དེ་བཤད་ཟིན་ཏོ།། །། མཁྱེན་པར་ལེན་པའི་ཕམ་པར་འགྱུར་བ་སྨྲས་ནས། ད་ནི་གསོར་པའི་ཕམ་པར་འགྱུར་བ་བརྗོད་པར་བྱ་སྟེ། དེའི་ཕྱིར་ནད་པ་ལ་འཆི་བའི་སེམས་པ་དང་རྗེས་སུ་མཐུན་པའི་ཉེ་བར་བསྒྲུབ་པ་ཉེ་བར་བསྒྲུབ་པར་མི་བྱའོ་ཞེས་བྱ་བ་སྨྲས་ཏེ། འཆི་བའི་ཕྱིར་སེམས་པ་ནི། འཆི་བའི་སེམས་པའོ། །དེ་དང་རྗེས་སུ་མཐུན་པ་ནི་མཐུན་པའོ། །དེའི་ཉེ་བར་བསྒྲུབ་པ་ནི་ཚོགས་པའི་བྱེ་བྲག་གང་ཡིན་པའོ། །དེ་ཉ་བར་བསྒྲུབ་པར་མི་བྱ་བ་ནི་ནད་པ་ལ་དེ་བསྟབས་པར་མི་བྱ་བའོ། །ནད་པ་སྨོས་པ་ནི་མཚོན་པ་སྟེ། མི་ན་བ་ལ་ཡང་ཉེ་བར་བསྒྲུབ་པར་མི་བྱའོ། །འདི་སྐད་བསྟན་ཏེ། ཉེ་བར་བསྒྲུབ་པ་གང་གིས་ནད་པ་འཆི་བའི་བསམ་བ་སྐྱེ་བར་འགྱུར་བའི་ཉེ་བར་བསྒྲུབ་པར་གྱུར་པ། ཁྱོད་དུ་གཟོས་པར་གྱུར་པ་ནི་བླའི། འདི་ལྟ་བུའི་མི་འཕྲོད་པ་ཟ་བར་བྱེད་པ་ནི་དེ་ལྟ་མ་ཡིན་ནོ་ཞེས་བྱ་བ་ལ་སོགས་པ་དེ་ཉེ་བར་བསྒྲུབ་པར་མི་བྱ་སྟེ། འདི་ནི་བསམ་པའི་ཉེས་པ་མེད་པའི་ཉེས་བྱས་སུ་རྣམ་པར་གཞག་པ་ཡིན་ནོ། །བསམ་པའི་ཉེས་པ་ཀྱེ་མ་འདི་ཤི་བར་གྱུར་ཅིག་སྙམ་ན་ནི་དེའི་ཚེ་སྦོམ་པོར་རྣམ་པར་གཞག་གོ །མི་ཤེས་པ་ལ་འཆི་བའི་དགྲ་བོ་མ་སྨྲས་པར། དེའི་ནད་གཡོག་ཏུ་མི་བཞག་གོ་ཞེས་བྱ་བ་ནི།
ནད་གཡོག་མི་ཤེས་པ་གླེན་པ་མི་ཤེས་པ་ལ་ནད་པ་འཆི་བའི་དགྲ་བོ་མི་འཆི་བར་བྱ་བའི་ཐབས་འདི་སྐད་བརྗོད་པར་བྱ་བ་ཁྱོད་ཀྱིས་འདི་འཆི་བ་ལ་དགྲ་བོས་གནས་པར་བྱ་སྟེ། གལ་ཏེ་རང་ཉིད་འཆི་བར་འདོད་ན་ཁྱོད་ཀྱིས་ཡལ་བར་དོར་བར་མི་བྱའོ། །གྲོགས་ཀྱང་མ་བྱེད་ཅིག་ཅེས་མ་སྨྲས་པར་ནད་པ་དེའི་དྲུང་དུ་ནད་གཡོག་ཏུ་མི་གཞག་གོ་ཞེས་བྱ་བའི་ཐ་ཚིག་གོ །གནས་ཡོད་ན་མི་གཞག་གོ་ཞེས་བྱ་བ་ནི། གལ་ཏེ་གནས་གཞན་ཡོད་དེ་ཇི་སྟེ་ནད་གཡོག་མཛངས་པ་གཞག་པའི་སྐབས་ཡོད་ན་ནི་དེའི་ཚེ་མི་ཤེས་པ་ལ་གོ་བར་བྱས་སུ་ཟིན་ཀྱང་གཞག་པར་མི་བྱ་སྟེ། མཛངས་བ་ཡོད་པའི་ཕྱིར་རོ། །འཆི་བའི་འཚོག་ཆས་མི་གཞག་གོ་ཞེས་བྱ་བ་ནི། འཆི་བའི་འཚོག་ཆས་མཚོན་ཆ་ལ་སོགས་པ་ནད་གཡོག་གིས་ནད་པའི་དྲུང་དུ་མེ་གཞག་གོ །འཆི་བའི་ཕྱིར་རྗེས་སུ་སྒྲུབ་པ་ལས་ནད་གཡོག་གིས་བཟློག་པར་བྱའོ་ཞེས་བྱ་བ་ནི། ནད་པ་དེ་འཆི་བའི་ཕྱིར་རྗེས་སུ་བསྒྲུབ་པ་དུག་ཟ་བ་དང་ཐག་པས་འཆིང་བ་དང༌། མཚོན་འབྱིན་པ་ལ་སོགས་པ་ལས་ནད་གཡོག་གིས་བཟློག་པར་བྱའོ། །རྫས་ཀྱི་ཕྱིར་གཞན་ཤི་བར་འདོད་པར་མི་བྱའོ་ཞེས་བྱ་བ་ནི་ལྷུང་བཟེད་དང་ཆོས་གོས་ལ་སོགས་པའི་རྫས་ཐོབ་པར་བྱ་བའི་ཕྱིར་སེམས་ཅན་གཞན་འཆི་བར་མངོན་བར་དགའ་བར་མི་བྱའོ། །བྱ་བ་མ་ཡིན་པ་བྱེད་པ་ལ་སེམས་ཀྱིས་རྗེས་སུ་ཡི་རང་བར་མི་བྱའོ་ཞེས་བྱ་བ་ནི། བྱ་བ་མ་ཡིན་པ་མངལ་ན་གནས་པ་རླུགས་པར་བྱ་བ་ལ་སོགས་པའི་བྱེད་པ་ནི་བྱ་བ་མ་ཡིན་པ་སྟེ་བྱ་བ་མ་ཡིན་པ་བྱེད་པ་དེ་ལ་སེམས་ཀྱིས་རྗེས་སུ་ཡི་རང་བར་མི་བྱའོ། །ལུས་དང་ངག་གི་འཇུག་པའི་སྔོན་དུ་འགྲོ་བ་ནི་སེམས་ཡིན་པའི་ཕྱིར་དེ་བཀག་པས་ལུས་དང་ངག་ཀྱང་བཀག་པར་གྲུབ་པ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། རབ་ཏུ་བྱུང་བས་བྱ་བ་མ་ཡིན་པ་མངལ་ན་གནས་པ་རླུགས་པར་བྱ་བ་ལ་སོགས་པ་གང་ཡིན་པའི་དངོས་པོ་དེ་དག་གཞན་གྱིས་ད་ལྟར་དང་འདས་པ་དང་མ་འོངས་པའི་རྗེས་སུ་བསྒྲུབ་པ་ལ་སོགས་པ་ལ་རི་རང་བ་སེམས་ཀྱིས་ཞེས་བྱ་བ་ནི་མཚོན་པ་ཙམ་སྟེ། ལུས་དང་ངག་གིས་ཡི་རང་བ་དེ་ཡང་
དགེ་སློང་གིས་མི་བྱའོ་ཞེས་བྱ་བའི་ཐ་ཚིག་གོ །གཞུང་ཁ་ཅིག་ལས་ཚེ་དང་ལྡན་པ་ཉེ་སྡེའི་དབང་དུ་མཛད་དེ་གསུངས་པ་ཉེ་སྡེ་ཁྱོད་ཀྱིས་མངལ་ན་གནས་པ་རླུགས་པར་བྱས་པ་བདེན་ནམ། བཙུན་པ་མད་ལགས་ཏེ། འདི་ལྟར་བདག་གིས་རྗེས་སུ་ཡི་རང་བར་ནི་བགྱིས་སོ། །བཀའ་སྩལ་པ། དགེ་སློང་དག་དགེ་སློང་ཉེ་སྡེ་ལ་ལྟུང་བ་མེད་དེ། དགེ་སློང་གིས་མངལ་ན་གནས་པ་རླུགས་པར་མི་བྱའོ། །དགེ་སློང་གིས་མངལ་ན་གནས་པ་རླུགས་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་ཏེ། གཞན་ཡང་རབ་ཏུ་བྱུང་བས་བྱ་བ་མ་ཡིན་པ་ཅི་ཡང་རུང་བ་ཐམས་ཅད་བསྡུས་ཏེ། སྤྱིར་མདོ་འདི་བྱས་སོ། །སྐབས་འབྱུང་བ་སྨྲས་ནས། དེ་ནི་གསོད་པའི་ཕམ་པར་འགྱུར་བ་བརྗོད་པར་བྱ་སྟེ། གན་བྱས་ནས་གསོད་པའི་ཕམ་པར་འགྱུར་ཞེ་ན་དེའི་ཕྱིར། སྲོག་གཅད་ནའོ་ཞེ་བྱ་བ་སྨྲས་ཏེ། སྲོག་གི་སྐད་ཅིག་མ་འོངས་པ་རྣམས་གཅད་པ་ནི་སྐྱེ་པ་འགགས་པའི་བྱ་བ་གསོད་པ་ཞེས་བྱ་བ་དེ་བྱས་ན་ཕམ་པར་འགྱུར་རོ་ཞེས་བྱ་བའི་ཐ་ཚིག་གོ །བསམ་པ་ཇི་ལྟ་བུས་ཤེ་ན་དེའི་ཕྱིར་དེ་ལྟར་བསམས་པས་སོ་ཞེ་བྱ་བ་སྨྲས་ཏེ། སྲོག་གཅད་པར་བསམས་པའི་སེམས་ཀྱིས་ཞེས་བྱ་བའི་ཐ་ཚིག་སྟེ། གཞན་གྱིས་ཀྱང་སྲིད་པའི་ཕྱིར་རོ། །གང་གི་སྲོག་གཅད་ཞེ་ན་དེའི་ཕྱིར། མིར་གྱུར་པའི་འོ་ཞེས་བྱ་བ་སྨྲས་ཏེ། འདིར་ཡང་ཕམ་པར་འགྱུར་བའི་རྒྱུད་ཀྱིས་མཚན་མ་བསྟན་ཏེ། བུད་མེད་དང་སྐྱེས་པ་དང༌། མ་ནིང་དང་མཚན་མེད་པ་དང༌། མཚན་གཉིས་པ་དང༌། མངལ་ནས་སྐྱེས་པ་དང༌། མངལ་ནས་མ་སྐྱེས་པ་དང༌། གཞོན་ནུ་དང༌། རྒན་པོ་ཉིད་ལ་སོགས་པའི་བྱེ་བྲག་གི་རྒྱུད་འགའ་མ་བྱས་པར་སྤྱིར་བཟུང་ངོ༌། །གཞན་དུ་འདུ་ཤེས་པས་སམ་ཞེ་ན་མ་ཡིན་ཏེ། དེའི་ཕྱིར་དེ་ལྟར་འདུ་ཤེས་པས་སོ་ཞེས་བྱ་བ་སྨྲས་ཏེ། མ་ནོར་བར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། མ་ནོར་བར་འདུ་ཤེས་པས་སྲོག་གཅོད་པའི་སེམས་ཀྱིས་མིར་གྱུར་པ་སྲོག་གཅད་པ་བྱས་ན་ཕམ་པར་འགྱུར་རོ། །དུག་དང་མཚོན་དང་གསང་སྔགས་ལ་སོགས་པའི་སྦྱོར་བ་དག་གིས་
སྲོག་གཅོད་པ་སྲིད་པས་དེའི་ཕྱིར་འདི་བརྗོད་པར་བྱ་སྟེ། རྣམ་པ་གང་གིས་ཤེ་ན་དེའི་ཕྱིར་གང་ཡང་རུང་བས་སོ་ཞེས་བྱ་བ་སྨྲས་ཏེ། རྣམ་པ་གང་ཡང་རུང་བས་སོ། །དེ་ཉིད་ཀྱི་སྤྲོས་པ་བསྟན་པའི་ཕྱིར། བྱེ་བྲག་མེད་པ་ནི་ལུས་དང་དེ་དང་འབྲེལ་པ་དན། འཕངས་པ་དང༌། གཞན་དང་བསྒོ་བ་རྣམས་སོ་ཞེས་བྱ་བ་སྨྲས་ཏེ། བྱེ་བྲག་མེད་པ་ཞེས་བྱ་བ་ནི། འདི་མན་ཆད་འོག་གི་མདོ་ལས་གཞི་དེས་གཞན་གྱི་ཚེ་ཤི་ན་འོ་ཞེས་བྱ་བ་ནི་བྱུང་བ་ཡན་ཆད་ཀྱི་དབང་དུ་བྱ་བ་ཡིན་ཏེ། ལུས་ཞེས་བྱ་བ་ལ་སོགས་པ་སྲོག་གཅོད་པའི་སྤྱོར་བ་འདི་དག་ནི་གསོད་པ་ལ་བྱེ་བྲག་མེད་དེ་ཁྱད་པར་མེད་དོ་ཞེས་བྱ་བའི་ཐ་ཚིག་གོ །ལུས་ཞེས་བྱ་བ་ནི་ལུས་ཉིད་དོ། །དེ་དང་འབྲེལ་པ་ཞེས་བྱ་བ་ནི། ལུས་དང་འབྲེལ་པ་དབྱིག་པ་ལ་སོགས་པའོ། །འཕངས་པ་ཞེས་བྱ་བ་ནི་རྣམ་པ་གཉིས་ཏེ། ལུས་དེས་བོང་བ་ལ་སོགས་པ་འཕངས་པ་དང༌། དེ་དང་འབྲེལ་པས་གཞུས་མདའ་ལ་སོགས་པ་འཕངས་པའོ། །གཞན་ཞེས་བྱ་བ་ནི། གསད་པར་བྱ་བ་གསད་པའི་ཕྱིར་བསྒོས་པ་གཞན་གང་ཡིན་པའོ། །བསྒོ་བ་ཞེས་བྱ་བ་ནི། གསད་པར་བྱ་བ་དེ་ཉིད་ལ་རང་གིས་གྱིས་ཤིག་ཅེས་བསྒོ་བའོ། །དུག་དང་ཕྱེ་མ་དང༌། དོང་དང་ཤིང་དང་རང་བཞིན་ཉམས་པ་གཏོང་བ་དང༌། བྲང་དུ་འདེབས་པ་དང༌། འཁྲུལ་འཁོར་དང་སྒྱུ་ཐབས་དང་རོ་ལངས་རྗེས་སུ་སྦྱོར་བ་རྣམས་སོ་ཞེས་བྱ་བ་ལ། དུག་གི་སྦྱོར་བ་ནི། དུག་དང་བཅས་པའི་ཁ་ཟས་ལ་སོགས་པ་སྦྱིན་པའོ། །ཕྱེ་མའི་སྦྱོར་བ་ནི་དུག་གི་ཕྱེ་མས་བཏབ་པའི་གོས་ལ་སོགས་པ་བསྐོན་པའོ། །དོང་གི་སྦྱོར་པ་ནི་རླུབས་རྐོ་བ་ལ་སོགས་པའོ། །ཤིང་གི་སྦྱོར་བ་ནི་སྡོང་པོ་བསྒྱེལ་བ་ལ་སོགས་པའོ། །རང་བཞིན་ཉམས་པ་གཏོང་བའི་སྦྱོར་བ་ནི་མྱོས་པར་བྱས་ཏེ། དགོན་པར་གཏོང་བ་ལ་སོགས་པའོ། །བྲང་དུ་འདེབས་པའི་སྦྱོར་པ་ནི། འཇིམ་པའི་གཟུགས་ལ་སོགས་པ་རལ་གྲི་ཐོགས་པས་བྲང་དུ་འདེབས་བ་སྟེ། བྲང་དུ་མཚོན་གྱིས་འདེབས་པའི་ཕྱིར་རོ། །འཁྲུལ་འཁོར་གྱི་སྦྱོར་བ་ནི་ས་མདའ་ལ་སོགས་པ་འཛུགས་པའོ། །སྒྱུ་ཐབས་ཀྱི་སྦྱོར་བ་ནི་
མིག་བཀབ་སྟེ་གཡང་སར་གཏོང་བ་ལ་སོགས་པའོ། །རོ་ལངས་ཀྱི་སྦྱོར་བ་ནི་རོ་ལངས་སྤྱོད་པ་ལ་སོགས་པའོ། །རོ་ལངས་ཕྱེད་ཀྱང་དེ་ཉིད་ཀྱིས་བསྡུས་པར་རིག་པར་བྱའོ། །དེ་ན་ལོགས་ཤིག་ཏུ་མ་བྱས་སོ། །རྗེས་སུ་སྦྱོར་བ་ནི་ཆོལ་པ་ལ་སོགས་པ་སྟེ། དེ་དག་ཀྱང་འཆི་བ་ལ་བྱེ་བྲག་འགའ་ཡང་མེད་དོ། །གཡང་དུ་གཏོང་པའོ་ཞེས་བྱ་བ་བྱེ་བྲག་མེད་དོ་ཞེས་བྱ་བར་སྦྱར་རོ། །གང་ལས་ཤེ་ན་གད་པ་ལ་སོགས་པ་ལས་ཞེས་བྱ་བར་དོན་གྱིས་ཤེས་པར་བྱའོ། །མེ་དང་ཆུར་འཛུད་པའོ་ཞེས་བྱ་བ་ཡང་མེ་དང་ཆུར་འཕུལ་བ་ཡང་བྱེ་བྲག་མེད་པའོ། །གྲང་བ་དང་ཚ་བར་འདོགས་པའོ་ཞེས་བྱ་བ་ཡང་ལྷགས་ཁྲོད་དང་ཚད་ཁུངས་སུ་སྲོག་གཅོད་པའི་ཕྱི་འདོགས་པར་བྱེད་པ་ཡང་བྱེ་བྲག་མེད་པའོ། །ཕོ་ཉར་གཏོང་བ་ལ་སོགས་པའོ་ཞེས་བྱ་བ་ཡང་གང་དུ་འཆི་བར་འགྱུར་བ་སྲིད་པ་དེར་ཕོ་ཉ་དང་མངགས་པ་ཉིད་དུ་གཏོང་བའོ། །སོགས་པ་ཞེས་བྱ་བའི་སྒྲས་ནི་དེར་སོང་ན་འདི་དང་འདི་ལྟ་བུ་རྙེད་པར་འགྱུར་རོ་ཞེའམ། ཕ་མ་མཐོང་པར་འགྱུར་རོ་ཞེས་འདྲིད་པས། གཏོང་བ་ལ་སོགས་པ་བསྡུས་ཏེ་དེ་དག་ལ་སོགས་པ་གསད་པའི་ཐབས་རྣམས་ལ་བྱེ་བྲག་མེད་དོ། །དེ་རྗེས་སུ་བསྒྲུབ་པ་ཆུང་དུ་ཉིད་ཀྱང་ངོ་ཞེས་བྱ་བ་ནི། གསང་པའི་རྗེས་སུ་སྒྲུབ་པ་ཆུང་དུ་ལ་ཡང་བྱེ་བྲག་མེད་པ་སྟེ། དེ་རྗེས་སུ་སྒྲུབ་པ་ཆུང་ངུ་ཉིད་ནི་རྐང་པའི་མཐེ་བོ་དང་རྒྱ་ཤུག་གི་ཚི་གུ་དང་ཤིང་བལ་ལ་སོགས་པ་བསྣུན་པ་ལྟ་བུ་དག་གོ །འདི་ལྟར་དེ་དག་ནི་སྔར་གང་ཡང་རུང་བས་སོ་ཞེས་བྱ་བ་དེས་བསྡུས་པ་ཡིན་མོད་ཀྱི་འོང་ཀྱང་དེ་ཉིད་གསལ་བར་བསྟན་པའི་ཕྱིར་ཚིག་འདི་སྨོས་སོ། །གསད་པར་བྱ་བ་ནི་སྐྱེས་པ་དང་བུད་མེད་དང་མ་ནིང་ཉིད་དོ་ཞེས་བྱ་བ་ནི། གསད་པར་བྱ་བའི་སེམས་ཅན་ནི་སྐྱེས་པ་ཉིད་དང་བུད་མེད་ཉིད་དང་མ་ནིང་ཉིད་ལ་བྱེ་བྲག་མེད་པ་སྟེ། གནས་དེ་དག་སྨོས་པ་ནི་སྤྲོས་པའི་དོན་བསྟན་པ་ཡིན་ནོ། །གཞི་དེས་གཞན་གྱི་ཚེ་ཤི་ནའོ་ཞེས་བྱ་བ་ལ། གཞི་དེས་ཞེས་བྱ་བ་ནི། སྦྱོར་བ་སྔ་མའི་གཞི་དེས་སོ། །གཞན་གྱི་ཚེ་ཤི་ནའོ་ཞེ་བྱ་བ་ནི་དེའི་ཚེ་ན་ཤི་བ་དང༌། གཞན་
གྱི་ཚེ་ན་ཤི་བ་ལ་བྱེ་བྲག་འགའ་ཡང་མེད་པ་སྟེ། འདིར་གཞུང་ནི་དེས་དེའི་ཚེ་མ་ཡིན་ཡང་དེས་འོན་ཀྱང་དེས་དེའི་འོག་ཏུ་འོ་ཞེས་གསུངས་པ་ཡིན་ནོ།། །།བམ་པོ་བཅུ་གཉིས་པ། འདུན་པ་བཟློག་པའི་འོག་ཏུ་ནི་རྒྱུ་ཉིད་མ་ཡིན་ནོ་ཞེས་བྱ་བ་ནི། ཤི་ན་ཞེས་བྱ་བ་བར་སྦྱར་རོ། །སྔར་དགེ་སློང་གིས་མིར་གྱུར་པ་ཞིག་འཆི་བའི་རིགས་པར་གྲོས་བཏབ་ནས་དེའི་འོག་ཏུ་འཆི་བ་ལས་འདུན་པ་བཟློག་སྟེ། མི་འཆི་བར་བཟློག་པའི་འོག་ཏུ་ཕྱིས་རུས་གཞན་ན་མི་དེ་དག་སློག་གིས་གྲོས་སྔ་མ་དེ་བཟུང་སྟ། ཤི་ན་སྦྱོར་བ་སྔ་མ་དེ་རྒྱུ་ཉིད་མ་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྔར་མི་གཞན་འཆི་བར་གྲོས་བཏབ་པའི་འོག་ཏུ་མི་དེ་འཇིགས་པ་དང་བཅས་པ་ལ་སོགས་པའི་གན་དག་ན་འདུན་པ་ཟློག་པར་བྱེད་པ་ན་དེའི་ཚེ་ཕ་རོལ་པོ་ཁས་མི་ལེན་ཅིང་ཕྱིས་རང་དགར་བདག་ཉིད་གསོད་པར་བྱེད་ན་དགེ་སློང་དེའི་སྦྱོར་བ་སྔ་མ་དེའི་རྒྱུ་ཉིད་མ་ཡིན་ཏེ། ཕམ་པར་མི་འགྱུར་རོ། །སྦྱོར་བ་སྔ་མ་ལས་ནི་སྦོམ་པོར་འགྱུར་རོ། །དཀུ་མཉེས་པས་མ་དང་མངལ་ན་གནས་པ་གཉིས་ལས་མ་བསམས་པ་ཤོས་ན་སྦོམ་པོའོ་ཞེས་བྱ་བ་ནི། དཀུ་མཉེས་པའི་རྒྱུས་མ་དང་མངལ་ན་གནས་པ་གཉིས་ལས་གང་ཡང་རུང་བ་མ་བསམས་པ་ཤི་ན་དེའི་ཚེ་སྦོམ་པོར་སྦྱར་རོ། །དཀུ་མཉེས་པས་ཞེས་བྱ་བ་ནི། དཀུ་མཉེས་པའི་རྒྱུས་སོ། །མ་དང་མངལ་ན་གནས་པ་ཞེས་བྱ་བ་ནི། མ་དང་མངལ་ན་གནས་པ་གཉིས་ཏེ། དེ་གཉིས་ལས་གང་ཡང་རུང་བའོ། །མ་བསམས་པ་ཞེས་བྱ་བ་ནི། ཆེད་དུ་མ་བསམས་པའོ། །མ་བསམས་པ་ཤོས་དེ་ཤི་ན་དེའི་ཚེ་སྦོམ་པོའོ། །འདི་སྐད་བསྟན་ཏེ། མངལ་ན་གནས་པ་དང་བཅས་པའི་དཀུ་མཉེས་པས་གལ་ཏེ་མ་དང་མངལ་ན་གནས་པ་གཉིས་ལས་མ་བསམས་པ་ཤོས་ཤི་ན་སྦོམ་པོ་སྟེ། གནོད་པ་བྱ་བར་ངེས་པ་ཡོད་པའི་ཕྱིར་རོ། །བསམས་པ་ཤོས་ཤི་ན་ཕམ་པར་འགྱུར་རོ། །གཞི་དེ་ལས་གསོད་པ་ལ་འཇུག་པ་དང་ལེན་ནའོ་ཞེས་བྱ་བ་ནི། སྦོམ་པོའོ་ཞེས་བྱ་བར་སྦྱར་རོ། །གཞི་དེ་ལས་ཞེས་བྱ་བ་ནི་དང་རུ་ལེན་པའི་གཞི་དེ་ལས་སོ། །གསོད་པ་ལ་འཇུག་པ་
ཞེས་བྱ་བ་ནི་དང་དུ་བླངས་པའི་གཞི་དེས་ན་གསོད་པར་བྱེད་ན་གསོད་པ་ལ་འཇུག་པའོ། །འཇུག་པའི་གཞི་དེ་དང་དུ་ལེན་ན་སྤོམ་པོའོ། །འདིར་གཞུང་ནི་གཞན་ལས་ཚེ་དང་ལྡན་པ་ཉེ་སྡེའི་དབང་དུ་མཛད་དེ། ཉེ་སྡེ་ཁྱོད་ཀྱིས་མངལ་ན་གནས་པ་རླུགས་པར་བྱས་སམ། བཙུན་པ་བདག་གིས་མངལ་ན་གནས་པ་རླུགས་པར་ནི་མ་བགྱིས་ཏེ། འོན་ཀྱང་བདག་གིས་དང་དུ་བླངས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་གནས་དེ་ལྟ་བུ་དང་དུ་བླང་བར་མི་བྱའོ། །དང་དུ་ལེན་པར་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །རྣམ་པ་དེ་ལྟ་བུ་དང་དུ་ལེན་པའི་རྣམ་པ་དེ་ལ་འཇུག་པ་ན་ལུས་འགྱུར་བ་ཡང་གདོན་མི་ཟ་བར་སྐྱེ་ལ། ངག་གི་འགྱུར་པ་ཁོ་བོ་ནི་འགོག་པར་ཡང་མི་བྱེད་ལ། སྐུལ་བར་ཡང་མི་བྱེད་དེ་ཁྱོད་ཉིད་ཤེས་སོ་ཞེས་བྱ་བ་ཡང་འབྱུང་བས་དེའི་ཕྱིར་སྦོམ་པོར་གཞག་གོ །ཁྱོད་ཀྱི་མིང་གིས་འཆི་བའི་ཡོད་བྱད་སྦྱིན་ནོ་ཞེ་ཟེར་བ་ཡང་ངོ་ཞེས་བྱ་བ་ཡང་དང་དུ་ལེན་པར་བྱེད་ན་སྦོམ་པོའོ་ཞེས་བ་བར་སྦྱར་རོ། །གཞན་ཞིག་དགེ་སློང་ལ་འདི་སྐད་ཅེས་ཁྱོད་ཀྱི་མིང་གིས་གསད་པར་བྱ་བའི་མི་ལ་དུག་སྦྱར་མ་ལ་སོགས་པ་འཆི་བའི་ཡོ་བྱད་སྦྱིན་ནོ་ཞེས་རྣམ་པ་དེ་ལྟ་བུའི་ཚིག་ཟེར་བ་དེ་དགེ་སློང་དེས་དང་དུ་ལེན་པར་བྱེད་ན་ཡང་སྦོམ་པོའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་མའི་རྣམ་པར་འབྱེད་པ་ལས། ཁྱོད་ཀྱི་མིང་གིས་ཕྱེ་མ་སྦྱིན་ནོ་ཞེས་ཟར་བ་དགེ་སློང་མས་དང་དུ་བླངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་མ་ཁྱོད་ཀྱིས་མངལ་ན་གནས་པ་རླུགས་པར་བྱས་པ་བདེན་ནམ། བཙུན་པ་བདག་གིས་མངལ་ན་གནས་པ་རླུགས་པར་མ་བགྱིས་ཏེ། འོན་ཀྱང་བདག་གིས་དང་དུ་བླངས་སོ། །བཅོམ་ལྡན་འདས་ཀྱིས་དགེ་སློང་མ་རྣམས་ལ་བཀའ་སྩལ་པ། དགེ་སློང་མས་རྣམ་པ་དེ་ལྟ་བུ་དང་དུ་བླང་བར་མི་བྱའོ། །དང་དུ་ལེན་པར་བྱེད་ན་ཉེས་པ་སྦོམ་པོའི་ལྟུང་བ་འཕེལ་བར་འགྱུར་རོ་ཞེས་བྱ་བའི་བར་དུ་གསུང་པ་ཡིན་ཏེ། དེ་མདོ་འདིར་བྱས་པ་ཡིན་ནོ། །དང་དུ་ལེན་པའི་མཚན་ཉིད་
ནི་མདོ་སྔ་མ་ལ་བསྟན་པ་ཡིན་ནོ། །ཅང་མི་སྨྲ་བས་དང་དུ་ལེན་ན་ཡང་སྦོམ་པོ་ཁོ་ནའོ། །གཞན་དུད་འགྲོ་མ་ཡིན་པ་དན་སྤྲུལ་པ་བསད་པ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲ་ནི་སྦོམ་པོའོ་ཞེས་བྱ་བའི་རྗེས་བསྙགས་པའི་ཕྱིར་རོ། །མིར་གྱུར་པའི་ལས་གཞན་པའི་འགྲོ་བ་བསད་ན་སྦོམ་པོའོ། །ཅི་དུད་འགྲོའི་འགྲོ་བ་པ་བསད་ན་ཡང་སྦོམ་པོའམ་ཞེ་ན་མ་ཡིན་ཏེ་དེའི་ཕྱིར། དུད་འགྲོ་མ་ཡིན་པ་ཞེས་བྱ་བ་སྨྲས་ཏེ། དུད་འགྲོའི་འགྲོ་བ་པ་མ་གཏོགས་ཏེ། དེ་ལས་ནི་ལྟུང་བྱེད་དུ་གསུང་པའི་ཕྱིར་རོ། །སྤྲུལ་པ་བསད་པ་ཡང་སྦོམ་པོ་ཁོ་ནའོ། །སྤྲུལ་པ་ཡང་རྣམ་པ་གཉིས་སུ་བཞེད་དེ། སྲོག་ཆགས་སུ་གྱུར་པ་དང༌། སྲོག་ཆགས་མ་ཡིན་པའོ། །དེ་ལ་འདིར་ནི་སྲོག་ཆགས་སུ་གྱུར་པའི་སྤྲུལ་པ་གཟུང་གི་སྲོག་ཆགས་མ་ཡིན་པ་ནི་མི་གཟུང་སྟེ། དེ་ལ་སྲོག་གཅད་པ་མེད་པའི་ཕྱིར་རོ། །འདིར་ཡང་སྲོག་གཅོད་པའི་རྒྱུ་ལས་ལྟུང་བ་རྣམ་པར་གཞག་པར་བྱེད་དེ། གཞིའི་རྣམ་པ་ལ་ལྟོས་པའི་ཕྱིར་རོ། །འདིར་གཞུང་ནི་ཚེ་དང་ལྡན་པ་དག་མི་མ་ཡིན་པ་ནི་ཤིན་ཏུ་ཆེན་པོ་བསད་ཀྱང་སྦོམ་པོར་ཟད་དོ་ཞེས་གསུངས་པ་ཡིན་ནོ། །སྤྲུལ་པའི་ཕྱི་ནས་གཞུང་ནི་གཏམ་གྱི་གཞི་ལས་འགྲོ་བ་ཐམས་ཅད་དུ་མ་གཏོགས་པ་གང་ཡིན་པའོ་ཞེས་གསུངས་པ་ཡིན་ནོ། །འོ་ན་དེ་ལྟ་ན་དགྲ་བཅོམ་པ་ཡིན་པར་འགྱུར་རོ་ཞེ་ན་མ་ཡིན་ཏེ། དེའི་ཕྱིར་ན་མྱ་ངན་ལས་འདས་པ་ཡང་མ་ཡིན་ནོ་ཞེས་གསུང་སོ། །འོ་ན་དེ་ལྟ་ན་ཕྱིར་མི་འོང་པ་བར་མ་དོར་ཡོངས་སུ་མྱ་ངན་ལས་འདའ་བ་སྲིད་པ་བར་མ་ལ་གནས་པ་ཡིན་ནོ་ཞེ་ན་མ་ཡིན་ཏེ། དེའི་ཕྱིར་རྒྱལ་བའི་བསྟན་པ་ལ་མི་འཇུག་པའོ་ཞེས་གསུངས་སོ། །འོ་ན་དེ་ལྟ་ན་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཞུགས་པ་ཡིན་པར་ཐལ་པར་འགྱུར་རོ་ཞེ་ན་མ་ཡིན་ཏེ། དེའི་ཕྱིར་ཡོངས་སུ་མྱ་ངན་ལས་འདས་པ་མ་ཡིན་ནོ་ཞེས་གསུངས་སོ། །འོ་ན་དེ་གང་ཡིན་ཞེ་ན། བཅོམ་ལྡན་འདས་ཀྱིས་བཀའ་སྩལ་པ། སྤྲུལ་པ་སྟེ་སེམས་ཅན་དུ་བགྲང་བ་མ་ཡིན་པའི་ཕྱི་སྤྲུལ་པ་ལ་ཡང་དེ་དག་ཐམས་ཅད་ཡོད་དོ། །དེ་སྲོག་བཅད་ན་ལྟུང་བ་ཅིར་
འགྱུར་ཞེ་ན་ཉེས་པ་སྦོམ་པོ་སྟེ། དེ་ལ་ཡང་སེམས་ཅན་དུ་བགྲང་བའི་བསམ་པ་ཡོད་ན་ནི་ཉེས་པ་སྦོམ་པོ་ཁོ་ནར་འགྱུར་རོ། །གཞན་ལས་ནི་རོ་ལངས་ཀྱི་བསམ་པས་སྤྲུལ་པ་གསོད་པར་བྱེད་ན་ཞེས་གསུངས་སོ། །འདིར་ནི་སྤྲུལ་པ་ཞེས་སྨོས་པ་དུད་འགྲོ་མ་གཏོགས་པ་ཐམས་ཅད་ཡིན་པར་རིག་པར་བྱའོ། །འདི་ལ་ལྟུང་བ་རྣམ་པར་གཞག་པ་ནི་འདི་ལྟར་རིག་པར་བྱ་སྟེ། སེམས་ཅན་དུ་བགྲང་བ་མ་ཡིན་པའི་སྤྲུལ་པ་ལ་མིར་འདུ་ཤེས་པས་གསོད་པར་བྱེད་པ་ལ་ནི་སྦོམ་པོ་སྟེ། མིར་འདུ་ཤེས་པས་ཞུགས་པའི་ཕྱིར་རོ། །དངོས་གཞི་ལ་ནི་ལྟུང་བ་མེད་དེ་གང་གི་ཡང་སྲོག་གཅད་པ་མེད་པའི་ཕྱིར་རོ། །མི་མ་ཡིན་པར་འདུ་ཤེས་པས་གསོད་པར་བྱེད་པ་ལ་ནི་སྦྱོར་བ་ལ་ཉེས་བྱས་ཏེ། ལྷ་ལ་སོགས་པར་འདུ་ཤེས་པས་ཞུགས་པའི་ཕྱིར་རོ། །དངོས་གཞི་ལ་ནི་ལྟུང་བ་མེད་དེ་སྔ་མ་བཞིན་ནོ། །དུད་འགྲོའི་འགྲོ་བ་པའི་སྤྲུལ་པ་ལ་མིར་འདུ་ཤེས་པས་གསོད་པར་བྱེད་པ་ལ་ནི་སྦོམ་པོ་སྟེ། མིར་འདུ་ཤེས་པས་ཞུགས་པའི་ཕྱིར་རོ། །དངོས་གཞི་ལ་ནི་ལྟུང་བྱེད་དེ་དུད་འགྲོའི་འགྲོ་བ་པ་བསད་པའི་ཕྱིར་རོ། །དུད་འགྲོའི་འགྲོ་བ་པར་འདུ་ཤེས་པས་གསོད་པ་ལ་སྦྱོར་བ་ལ་ནི་ཉེས་བྱས་སོ། །དངོས་གཞི་ལ་ལྟུང་བྱེད་དོ། །ལྷ་ལ་སོགས་པར་འདུ་ཤེས་པས་གསོད་པར་བྱེད་པ་ལ་ཡང་སྦྱོར་བ་ལ་ཉེས་བྱས་སོ། །དངོས་གཞི་ལ་ལྟུང་བྱེད་དོ། །ལྷའི་འགྲོ་བ་པའི་སྤྲུལ་པ་ལ་མིར་འདུ་ཤེས་པས་གསོད་པར་བྱེད་བ་ལ་ནི་སྦྱོར་བ་ལ་སྦོམ་པོའོ། །དངོས་གཞི་ལ་ཡང་སྦོམ་པོའོ། །བསྡུས་པའི་བསམ་པས་ཞུགས་ན་བསྡུས་པ་དེའི་སྲོག་གཅད་པ་བྱས་པ་ཁོ་ནའོ། །ལྷར་འདུ་ཤེས་པས་གསོད་པ་ལ་ནི་སྦྱོར་བ་ལ་ཉེས་བྱས་སོ། །དངོས་གཞི་ལ་སྦོམ་པོའོ། །མི་མ་ཡིན་པ་གཞན་དུ་འདུ་ཤེས་པས་གསོད་པར་བྱེད་པ་ལ་ཡང་སྦྱོར་བ་ལ་ཉེས་བྱས་སོ། །དངོས་གཞི་ལ་སྦོམ་པོའོ། །དེ་བཞིན་དུ་ཡི་དགས་ཀྱི་འགྲོ་བ་པ་དང༌། སེམས་ཅན་དམྱལ་བའི་འགྲོ་བ་པའི་སྤྲུལ་པ་ལ་མིར་འདུ་ཤེས་པས་གསོད་པར་བྱེད་པ་ལ་ནི་སྤྱོར་བ་ལ་སྦོམ་པོའོ། །དངོས་གཞི་ལ་ཡང་སྦོམ་པོ་ཁོ་ནའོ། །རང་རང་དུ་འདུ་ཤེས་པས་གསོད་
བར་བྱེད་པ་ལ་ནི་སྦྱོར་བ་ལ་ཉེས་བྱས་སོ། །དངོས་གཞི་ལ་སྦོམ་པོའོ། །མི་མ་ཡིན་པ་གཞན་དུ་འདུ་ཤེས་པས་གསོད་པར་བྱེད་པ་ཡང་སྦྱོར་བ་ལ་ཉེས་བྱས་སོ། །དངོས་གཞི་ལ་སྦོམ་པོའོ། །དྲི་བར་བྱ་བ་ལ་མ་སྨྲས་པར་ནད་པ་ལ་སྨན་སྦྱིན་པར་མི་བྱའོ་ཞེས་བྱ་བ་ནི་དྲི་བར་འོས་པས་དྲི་བར་བྱ་བ་སྟེ། སྨན་པ་ལ་སོགས་པའོ། །དགེ་སློང་མི་མཁས་པས་དེ་ལ་མ་སྨྲས་མ་དྲིས་པར་ནད་པ་ལ་གྱ་ཚོམ་དུ་སྨན་སྦྱིན་པར་མི་བྱའོ། །གསོ་བ་ལ་མཁས་པས་ཚངས་པ་མཚུངས་པར་སྤྱོད་པའི་ནད་གཡོག་བྱའོ་ཞེས་གསུངས་པས་དེའི་ཕྱིར་འདི་ནི་མི་མཁས་པའི་ཡུལ་ལ་བཀག་པ་ཡིན་ནོ། །འདིར་སུ་ལ་དྲི་བར་བསམས་ཤེ་ན་དེའི་ཕྱིར། འདིར་སྨན་པ་དང་དེ་རབ་ཏུ་བྱུང་བ་དང་བཀོལ་བ་རྣམས་ལ་དྲི་བར་བྱ་བ་ཉིད་དོ་ཞེས་བྱ་བ་སྨྲས་ཏེ། ནད་པ་ལ་སྨན་སྦྱིན་པར་བྱ་བ་དྲི་བའི་སྐབས་འདིར་སྨན་པ་ཞེས་བྱ་བ་ནི་སྨན་དཔྱད་ཀྱི་བསྟན་བཅོས་ཤེས་པ་དང༌། སྦྱོར་བ་ཤེས་པའོ། །དེ་རབ་ཏུ་བྱུང་བ་ཞེས་བྱ་བ་ནི་སྨན་པ་རབ་ཏུ་བྱུང་བའོ། །དེ་ཞེས་བྱ་བའི་སྒྲ་བཀོལ་བ་ཞེས་བྱ་བ་དང་ཡང་སྦྱར་བར་བྱ་སྟེ། དེས་བ་ཀོལ་བ་ཞེས་བྱ་བ་སྨན་པས་བཀོལ་བ་སྨན་པ་དང་ལྷན་ཅིག་སྤྱོད་སྤྱོད་པའི་སྨན་གཡོག་བྱ་བ་ལ་མཁས་པ་སྟེ། དེ་རྣམས་ལ་དྲི་བར་བྱ་བ་ཉིད་དེ། དགེ་སློང་མི་མཁས་པས་དེ་དག་ལ་དྲིས་ལ་ནད་པ་ལ་སྨན་སྦྱིན་པར་བྱའོ་ཞེས་བྱ་བའི་ཐ་ཚིག་གོ །ནད་ཀྱིས་ཀྱང་ངོ་ཞེས་བྱ་བ་ནི། བཀོལ་བ་ཞེས་བྱ་བར་སྦྱར་ཏེ། ནད་ཀྱིས་བཀོལ་བར་གྱུར་པ་དག་ལ་ཡང་དྲི་བར་བྱ་བ་ཉིད་དོ། །དགེ་སློང་རྒན་རབས་རྒན་རབས་ཤེས་རབ་ཅན་རྣམས་ལ་ཡང་ངོ་ཞེས་བྱ་བ་ནི། དགེ་སློང་གནས་བརྟན་ལ་སོགས་པ་ནི་རྒན་རབས་རྒན་རབས་སོ། །དེ་དག་ནི་གལ་ཏེ་ན་ཤེས་རབ་ཅན་ཡིན་ཏེ་དུས་ཡུན་རིང་པོ་འདས་པ་ནས་འཕྲད་པ་དང་མི་འཕྲོད་པ་ཡོངས་སུ་བསྐྱེད་པའི་ཕྱིར་ཏེ། དེ་དག་ལ་ཡང་ཡོངས་སུ་དྲི་བར་བྱའོ་ཞེས་བྱ་བར་སྦྱར་རོ། །སྔ་མ་མེད་ན་ཕྱི་མ་ལའོ་ཞེས་བྱ་བ་ནི་དྲི་བར་བྱའོ་ཞེས་བྱ་བར་སྦྱར་རོ། །སྔ་མ་མེད་ན་ཞེས་བྱ་བ་ནི་སྨན་པ་མེད་ནའོ། །ཕྱི་མ་ལའོ་ཞེས་བྱ་བ་ནི། དེ་རབ་ཏུ་བྱུང་བ་ལ་དྲི་བར་བྱ་བའོ། །དེ་བཞིན་དུ་དེ་རབ་ཏུ་བྱུང་བ་མེད་ན་དེས་
བཀོལ་པ་ལའོ། །དེ་མེད་ན་ནད་ཀྱིས་བཀོལ་བ་ལའོ། །དེ་མེད་ན་དགེ་སློང་རྒན་རབས་རྒན་རབས་ཤེས་རབ་ཅན་རྣམས་ལ་དྲི་བར་བྱའོ་ཞེས་བྱ་བར་སྦྱར་རོ། །ཕན་པར་འདོད་པ་ཉིད་ཀྱིས་འཆི་བའི་ཕྱིར་སྨན་མ་ཡིན་པ་བྱིན་པ་ལ་ནི་ན་སྨད་ཕ་མེད་དོ་ཞེས་བྱ་བ་ནི། མྱུར་དུ་ཤི་ན་སྡུག་བསྔལ་མེད་དོ་སྙམ་པ་དེ་ལྟ་བུའི་ཕན་པར་འདོད་པ་ཉིད་ཀྱིས་དགེ་སློང་གིས་ནད་པ་འཆི་བའི་ཕྱིར་སྨན་མ་ཡིན་པ་དུག་ལ་སོགས་པ་བྱིན་ཏེ་ཤི་བ་ལ་ནི་ན་སྨད་པ་མེད་པར་བལྟ་བར་བྱ་སྟེ། གསད་པའི་སེམས་ཡད་པའི་ཕྱིར་རོ། །ཕན་པའི་བསམ་པས་དུག་ལ་སོགས་པས་གསད་པ་དེ་ལ་ཉེས་པ་མེད་དོ་སྙམ་དུ་དོགས་པ་བསལ་བའི་ཕྱིར་ཚིག་འདི་སྨོས་ཏེ། ཆོམ་རྐུན་པ་དག་གི་ལག་པ་ལ་སོགས་པ་བཅད་དེ་ཚོར་བས་གནོད་པར་གྱུར་པ་དག་ལ་འཆི་བར་བྱ་བའི་ཕྱིར་དགེ་སློང་མས་འགྱུར་བྱེད་ཀྱི་ལན་ཚྭ་བྱིན་པ་ལས་མདོ་འདི་བྱས་སོ། །ཁུར་འདེགས་པར་མི་ནུས་པ་གྲོགས་ཉིད་མི་བྱའོ་ཞེས་བྱ་བ་ལ་ཁུར་འདེགས་པར་མི་ནུས་པ་ནི་ཁུར་མི་ཐེག་པ་སྟེ། གང་དུ་བདག་དང་གཞན་དག་ལ་གནོད་པར་འགྱུར་བ་དེ་ལ་གྲོགས་མི་བྱའོ། །ཅི་སྟེ་གཏན་དུ་བཀག་པ་ཡིན་ནམ་ཞེ་ན། དམིགས་ཀྱིས་བསལ་བ་བསྟན་པའི་ཕྱིར། གལ་ཏེ་དེ་ལྟ་བུའི་རྐྱེན་གྱིས་ན་ཁྱིམ་པ་དག་རུབ་པ་ཉིད་ལ་ཅིག་ཅར་གདེག་པར་སྐད་སྦྱར་ཏེ་བྱའོ་ཞེས་བྱ་བ་སྨྲས་ཏེ་བྱའོ་ཞེས་བྱ་བ་བྱེད་པའི་ཚིག་དང་པོར་སྨོས་པ་ན་འདི་ཡང་ཅི་དགར་བསྟན་པ་ཡིན་ནོ། །གལ་ཏེ་དེ་ལྟ་བུའི་རྐྱེན་གྱིས་ན་ཞེས་བྱ་བ་ནི། གལ་ཏེ་མེ་ཤོར་བ་ལ་སོགས་པའི་རྐྱེན་ཏམ་འདེགས་པའི་ལས་སུ་བསྐོས་པར་གྱུར་ནའོ། །ཁྱིམ་བདག་རུབ་པ་ཉིད་ལ་ཞེས་བྱ་བ་ནི། ཁུར་འདེགས་པར་མི་ནུས་པ་དེ་ལ་ཁྱིམ་པ་དག་མདོ་མདོ་ནས་འཛིན་ཅིང་རུབ་པ་ཉིད་ལ་སྟེ། ཁུར་འདེགས་པའི་ཕྱིར་ལག་རུབ་ཏུ་རུབ་པ་ཉིད་བྱའི་གྱི་ན་འདུས་ཤིང་འདུག་པ་ཙམ་གྱིས་རུབ་པ་ལ་ནི་མ་ཡིན་ནོ། །ཅིག་ཆར་འདེགས་པར་སྐད་སྦྱར་ཏེ་ཞེས་བྱ་བ་ནི། དེ་ལྟར་རུབ་པ་ཉིད་དེ་ལ་ད་ཅིག་ཅར་ཐེག་ཅེས་ཁྱིམ་པ་དེ་དག་ལ་བསྒོ་བར་བྱ་ཞིང་སྐད་སྦྱར་ནས་བདག་ཀྱང་ལོག་སྟེ་གདེག་པར་བྱའོ། །འདི་སྐད་བསྟན་ཏེ། གལ་ཏེ་
རྐྱེན་དེ་ལྟ་བུ་བྱུང་བར་གྱུར་ལ། ཁྱིམ་བདག་ཀྱང་མདོ་མདོ་མདོར་རུབ་པར་གྱུར་ཅིང་ཅིག་ཅར་གདེག་པར་སྐད་སྦྱར་ཀྱང་དེའི་ཚེ་དེ་དག་གིས་ཁུར་དེ་གདེག་པར་མི་ནུས་ན་དགེ་སློང་གིས་རང་དགར་གདེག་པའི་གྲོགས་བྱའོ་ཞེས་བྱ་བའི་ཐ་ཚིག་གོ །བཞག་པ་ལ་ཡང་ཅིག་ཅར་ཉིད་དུ་སྐད་སྦྱར་རོ་ཞེས་བྱ་བ་ནི། ཁུར་འདེགས་དཀའ་བ་དེ་གཞག་པའི་ཚེ་ན་ཡང་ཅིག་ཅར་བཞག་པ་ཉིད་དུ་ཐམས་ཅད་ལ་བསྒོ་བར་བྱ་བའོ། །སོ་ཕག་མི་འཕང་ངོ་ཞེས་བྱ་བ་ནི། ལག་ནས་ལག་ཏུ་སྦྱིན་པར་བྱའོ་ཞེས་བྱ་བའི་ཐ་ཚིག་གོ །དེ་ནི་ལག་གིས་ལས་དག་བྱེད་པ་ལ་བསྟན་པ་ཡིན་ནོ། །རྐྱེན་དེ་ལྟ་བུ་ཡུལ་ལ་རིགས་པར་ཡིན་པས། དེས་ན་དེ་ཡུལ་ཐམས་ཅད་ལ་བཀག་པ་ཡིན་ནོ། །བྱེ་བ་དང་གས་པ་མ་བརྗོད་པར་དེ་ཉིད་སྦྱིན་པར་མི་བྱའོ་ཞེས་བྱ་བ་ལ་སོ་ཕག་གི་སྟེང་གི་ངོས་སམ་འོག་གི་ངོས་འགོག་པ་ནི་བྱེ་བའོ། །སེར་ཀ་བྱུང་བ་ནི་གས་པའོ། །དེ་དག་མ་བརྗོད་པར་ཞེས་བྱ་བ་ནི་མ་སྦྲན་པར་རོ། །དེ་ཉིད་ཅེས་བྱ་བ་ནི། བྱེ་བ་ཉིད་དང་གས་པ་ཉིད་དོ། །དེ་ཉིད་ལེན་པ་པོ་ལ་མ་བརྗོད་པར་སྦྱིན་པར་མི་བྱ་བ་སྟེ། དབུལ་བར་མི་བྱའོ་ཞེས་བྱ་བའི་ཐ་ཚིག་གོ །ཚིག་དེ་ནི་ལེན་པ་པོ་ལ་གནོད་པར་འགྱུར་བ་སྤང་བའི་ཕྱིར་རོ། །རྐུན་པོ་སྤ་བཀོང་བའི་ཕྱིར་ཚམ་རྔམ་བྱའོ་ཞེས་བྱ་བ་ཡང་བྱེད་པའི་ཚིག་དང་པོར་སྨོས་པས་ཅི་དགར་བྱ་བ་ཡིན་ནོ། །རྐུན་པོ་སྤ་བཀོད་བའི་ཕྱིར་ཞེས་བྱ་བ་ནི། ཆོམ་རྐུན་པ་བསྡིགས་པའི་ཕྱིར་རོ། །ཚམ་རྔམ་ཞེས་བྱ་བ་ནི། གནོད་པ་མེད་པའི་བསམ་པས་ལུས་དང་ངག་གཉིས་ཀྱིས་འཇིགས་པ་སྟོན་པའོ། །འདི་སྐད་བསྟན་ཏེ། དགེ་སློང་གིས་ཆོམ་རྐུན་པ་དག་འབྲོས་པར་བྱ་བའི་ཕྱིར་ལུས་ཀྱི་ཚམ་རྔམ་ཕུག་ཏྲིག་དང༌། ངག་གི་ཨག་ཚམ་ཆེར་བྱའོ་ཞེས་བྱ་བའི་ཐ་ཚིག་གོ །ཚམ་རྔམ་བསྟན་པའི་ཕྱིར། གཎྜཱི་ལ་སོགས་པ་མི་ཕོག་པར་འཕང་ངོ་ཞེས་བྱ་བ་སྨྲས་ཏེ། གཎྜཱི་ལ་སོགས་པ་ཆོམ་རྐུན་པ་རྣམས་ལ་འཕངས་པའོ། །ཅི་ནས་ཀྱང་གཎྜཱི་ལ་སོགས་པས་ཆོམ་རྐུན་པ་རྣམས་ལ་རེག་པར་མི་འགྱུར་བ་དེ་ལྟར་འཕང་བར་བྱ་སྟེ། ཅི་ནས་ཀྱང་
གནོད་པར་མི་འགྱུར་བར་ཞེས་བྱ་བའི་ཐ་ཚིག་གོ །སོགས་པ་ཞེས་བྱ་བའི་སྒྲས་ནི་ལུས་ཀྱི་ཐིག་རིང་བྱ་བ་དང༌། དག་གིས་ཁབ་ཕྲེང་འོན་ཅིག །གཟར་ཐག་འོན་ཅིག །སིལ་བྱེད་འོན་ཅིག་ཅེས་བྱ་བ་ལ་སོགས་པ་བསྡུའོ། །རྫི་ཕྱོགས་ནས་རྡུལ་གྱི་བུམ་པ་དང་ཐལ་བའི་གྱོ་མོ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲ་ལས་འཕང་ངོ་ཞེས་བྱ་བར་སྦྱར་རོ། །རྫི་ཕྱོགས་ནས་ཞེས་བྱ་བའི་ཚིག་ནི་རྡུལ་དང་ཐལ་བས་ཕོག་པར་བྱ་བའི་ཕྱིར་འདི་བརྩམས་པ་ཡིན་གྱི། གཞན་དུ་ན་མདོ་སྔ་མ་ལ་སོགས་པ་སྨོས་པས་བསྡུས་ཟིན་པས་བརྩམས་པ་འདི་དོན་མེད་པར་འགྱུར་རོ། །རྡུལ་གྱིས་བཀང་བའི་བུམ་པ་ནི། རྡུལ་གྱི་བུམ་པའོ། །དེ་བཞིན་དུ་ཐལ་བས་བཀང་བའི་གྱོ་མོ་ནི་ཐལ་པའི་གྱོ་མོ་སྟེ་བར་གྱི་ཚིག་མི་མངོན་པར་བསྡུ་བར་བྱ་སྟེ། དཔེར་ན་མར་གྱི་བུམ་པ་བཞིན་ནོ། །འདི་དག་ནི་མཚོན་པའི་ཕྱིར་ཏེ། རྡུལ་འབྱུང་བའི་རྫས་གཞན་དག་ཀྱང་དེ་བཞིན་ནོ། །འུར་རྡོ་བཅང་བར་བྱའོ་ཞེས་བྱ་བ་ཡང་རྐུན་པོ་སྤ་བཀོང་བའི་ཕྱིར་ཞེས་བྱ་བར་སྦྱར་རོ། །བཅང་བར་བྱའོ་ཞེས་སྨོས་པ་ལས་ན་བོང་པ་ལ་སོགས་པ་བཅུག་སྟེ་མ་ཕོག་པར་འཕང་ངོ་ཞེས་བྱ་བ་ནི། མ་བསྟན་པར་ཡང་བྱ་བར་ཤེས་པར་བྱའོ། །དགེ་སློང་ངལ་བ་མི་དབུལ་ལོ་ཞེས་བྱ་བ་ནི་ཚིག་གཉིས་སྨོས་པའི་ཕྱིར་དགེ་སློང་མ་ཡིན་པ་ཕུལ་བ་དང༌། ངལ་པ་མ་ཡིན་པ་ཕུལ་བ་ཡང་ཉེས་བྱས་ཕྲ་མོར་རིག་པར་བྱའོ། །དེའི་གྲོགས་བྱའོ་ཞེས་བྱ་བ་ནི་དགེ་སློང་ངལ་བ་དེའི་གྲོགས་བྱ་བའོ། །འདིར་དགེ་སློང་ཞེས་སྨོས་པ་ནི་མཚོན་པ་སྟེ། ཆོས་འདི་པ་ཐམས་ཅད་ཀྱིའོ། །གྲོགས་ཇི་ལྟ་བུ་ཞེ་ན། དེའི་ཕྱིར་ངལ་སོར་གཞུག་གོ་ཞེས་བྱ་བ་སྨྲས་ཏེ། རེ་ཞེས་བྱ་བར་སྦྱར་རོ། །སྣོད་སྦྱར་བླང་བར་བྱའོ་ཞེས་བྱ་བ་ནི། དགེ་སློང་ངལ་བ་དེ་ལས་སྣོད་སྤྱད་ལུས་ལ་ཁྱེར་བ་དག་ལ་བླང་བར་བྱའོ། །གལ་ཏེ་ལྷན་ཅིག་ཏུ་གནས་སུ་ཕྱིན་པར་མི་ནུས་ལ། ཟན་དང་སྐོམ་གྱི་དུས་སུ་མ་ཡིན་ན་ནི། ལྷུང་བཟེད་བཀྲུ་བ་དང་བྱུག་རིས་གཞག་པ་དང་བྱིན་ལེན་དད་བརྟག་པར་བྱའོ་ཞེས་བྱ་བ་ནི། གལ་ཏེ་དགེ་སློང་ངལ་བ་དེ་གྲོགས་དང་ལྷན་ཅིག་ཏུ་གནས་སུ་
ཕྱིན་པར་མྱུར་དུ་འགྲོ་མི་ནུས་ལ་ཟན་དང་སྐོམ་གྱི་དུས་སུ་གནས་སུ་ཕྱིན་པར་འོང་མི་ནུས་པ་ནི་མ་ཡིན་ཏེ། འོང་ནུས་པ་ཡིན་ན་དེའི་ཚེ་གྲོགས་ཀྱིས་གཙུག་ལག་ཁང་དུ་མྱུར་བ་ཁོ་ནར་སོང་སྟེ། དེའི་ལྷུང་བཟེད་བཀྲུ་བར་བྱ། བྱུག་རིས་གཞག་པ་བཀད་སར་ཆུས་བྱུགས་ཏེ། རེའུ་ཆུང་བྲི་བར་བྱ། ཟས་ཀྱི་བྱིན་ལེན་བྱ། འོངས་སམ་མ་འོངས་པ་བརྟག་པར་བྱའོ། །གལ་ཏེ་དུས་སུ་ན་ཁྱེར་ཏེ་བསུ་བར་བྱའོ་ཞེས་བྱ་བ་ནི། ཇི་སྟེ་དགེ་སློང་ངལ་བ་དེ་ཟན་དང་སྐོམ་གྱི་དུས་སུ་ཡང་གནས་སུ་ཕྱིན་པར་འོང་མི་ནུས་ན། དེའི་ཕྱིར་གྲོགས་དེས་དེའི་ཟན་དང་སྐོམ་ཁྱེར་ཏེ་དེ་བསུ་བར་བྱའོ། །འདིར་ཕྱིར་དྲོ་ཡིན་ན་ནི་སྐོམ་ཁྱེར་ཏེ་བསུ་བར་རིག་པར་བྱའོ། །གསོད་པའི་ཕམ་པར་འགྱུར་བ་རྣམ་པར་འབྱེད་པ་ཞེས་བྱ་བ་གསོད་པའི་ཕམ་པར་འགྱུར་བ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །། ད་ནི་གསོད་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་ནས་འབྱུང་བ་བསྡུ་བའི་ཕྱིར། མིའི་འགྲོ་པ་པའི་ལག་པ་གཅོད་ན་སྦོམ་པོའོ་ཞེས་བྱ་བ་སྨྲས་ཏེ། འདི་ལ་ཁ་ཅིག་འདི་སྐད་ཅེས་གསད་པའི་བསམ་པས་ལག་པ་གཅོད་ན་དེ་སྦོམ་པོའོ་ཞེས་ཟེར་ཏེ། དེ་ནི་མི་རིགས་པར་སྨྲ་བ་ཡིན་ཏེ། གཞན་ནས་ཕམ་པར་འགྱུར་བའི་སྦྱོར་བ་ལ་སྦོམ་པོར་གསུངས་པའི་ཕྱིར་རོ། །དེ་བས་ན་ལག་པ་གཅད་པ་ཙམ་གྱི་བསམ་པས་ལག་པ་གཅོད་ན་དེ་ལ་སྦོམ་པོར་གཞག་གོ །ནགས་མེས་གཏོང་བ་ནའོ་ཞེས་བྱ་བ་ཡང་སྤོམ་པོའོ་ཞེས་བྱ་བར་སྦྱར་རོ།། ནགས་དགོན་པ་ཞེས་བྱ་བའི་ཕྱོགས་ནི་ནགས་ཞེས་བྱ་སྟེ། དེར་མེ་གཏོང་ན་སྦོམ་པོའོ། །དེ་ལ་ཡང་ཕྱོགས་གསུམ་དུ་བཞེད་དེ། སྲོག་ཆགས་ཡོད་པར་བཞེད་པའི་ཕྱོགས་དང༌། དོགས་པའི་ཕྱོགས་དང༌། མེད་པའི་ཕྱོགས་སོ། །དེ་ལ་སྲོག་ཆགས་ཡོད་པར་ཤེས་པའི་ཕྱོགས་ནི་རྣམ་པ་གཉིས་ཏེ། མང་བ་དང་ཉུང་བའི་བྱེ་བྲག་དག་གིས་སོ། །དེ་ལ་སྲོག་ཆགས་གསོད་པར་མ་བསམས་ཀྱང་སྤྱིར་སྲོག་ཆགས་མང་པོ་ཡོད་པའི་བློས་མེ་གཏོང་ན་སྦོམ་པོ་སྟེ། འདི་ལྟར་སྲོག་ཆགས་ཀྱི་ཡུལ་ཐམས་ཅད་ལ་དེ་ལ་གསོད་པའི་བསམ་པ་མེད་མོད་
ཀྱི། འོན་ཀྱང་དགོས་པ་གཞན་ལ་ལྟོས་པས་ནགས་སྲེག་པར་བྱེད་པ་དེས་སྲོག་ཆགས་ལ་མ་ལྟོས་པས་དེའི་ཕྱིར་སྲོག་ཆགས་དུ་མའི་ཡུལ་ལ་མི་ལྟོས་པར་སྤྱོད་པའི་ཕྱིར་རོ། །སྲོག་ཆགས་ཉུང་དུ་ཡོད་པའི་བློས་མེ་གཏོང་བ་ནི་ཉེས་བྱས་སུ་འགྱུར་ཏེ། འདི་ནི་ལྟུང་བ་གཞན་ཡིན་ཏེ། མི་ལ་སོགས་པ་གསད་པའི་བསམ་པ་མེད་པའི་ཕྱིར་རོ། །གང་གི་ཚེ་སྲོག་ཆགས་གསད་པའི་བསམ་པ་ཡོད་ན་ནི་དེའི་ཚེ་ན་ལྟུང་བའི་དངོས་གཞི་རྣམས་མཚན་ཉིད་ཇི་ལྟ་བ་བཞིན་དུ་འབྱུང་སྟེ། མིར་གྱུར་པ་བསད་ན་ནི་ཕམ་པར་རོ། །དུད་འགྲོ་བསད་ན་ནི་ལྟུང་བྱེད་དོ། །འགྲོ་བ་གཞན་དུ་གཏོགས་པ་བསད་ན་ནི་སྦོམ་པོའོ། །དོགས་པའི་ཕྱོགས་ལ་ཡང་དེ་བཞིན་དུ་མཚན་ཉིད་ཇི་ལྟ་བ་བཞིན་ལས་ལྟུང་བ་རྣམ་པར་གཞག་པར་རིག་པར་བྱའོ། །མེད་པའི་ཕྱོགས་ལ་ནི་ལྟུང་བ་མེད་དོ། །སྐྲ་ཅན་འཚོང་ནའོ་ཞེས་བྱ་བ་ཡང་སྦོམ་པོའོ་ཞེས་བྱ་བར་སྦྱར་རོ། །མིའི་འགྲོ་བ་པ་འཚོང་ན་སྦོམ་པོའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཉེ་དགས་ཤ་ཟའི་བུ་གཅིག་བཟུང་སྟེ། བྲོ་གར་མཁན་ལ་བཙངས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྐྲ་ཅན་བཙོང་བར་མི་བྱའོ། །བྱེད་ན་ཉེས་པ་སྦོམ་པོར་འགྱུར་རོ་ཞེས་བྱ་བ་ལ་སོགས་པའི་བར་དུ་གསུངས་པ་ཡིན་ནོ། །གང་གིས་བརྐུས་པ་དེ་བླའི་གྲར་འབུལ་ནའོ་ཞེས་བྱ་བ་ཡང་སྦོམ་པོའོ་ཞེས་བྱ་བར་སྦྱར་རོ། །གང་གིས་བརྐུས་པ་ཞེས་བྱ་བ་ནི་ཆོམ་རྐུན་པ་ལ་སོགས་པའོ། །ཆོམ་རྐུན་པ་ལ་སོགས་པ་དེའི་བླའི་གྲར་འབུལ་ནའོ། །གལ་ཏེ་བསད་པའི་བསམ་པ་དེ་ལ་ཡོད་ན་ནི་དེ་གྲུབ་པ་ན་མཚན་ཉིད་ཇི་ལྟ་བ་བཞིན་དུ་ཁན་མ་ཐོ་བར་འགྱུར་རོ། །གསོད་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་སོ་ཞེས་བྱ་བ་གསོད་པའི་ཕམ་པར་འགྱུར་བ་ཕྲན་ཚེགས་ཀྱི་སྐབས་ནས་འབྱུང་བ་རྫོགས་སོ།། །། ད་ནི་གསོད་པའི་ཕམ་པར་འགྱུར་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། སྟོན་པས་བསྒོ་ནའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་གིས་གསད་པར་བྱ་བ་སྟོན་པར་བྱེད་དེ། གསད་པའི་བསམ་པས་འདིར་འགྲོའོ། །དེར་སོང་ངོ་ཞེས་ཟེར་ན་དེས་ན་དགེ་སློང་གིས་གསོད་
པར་བྱེད་པ་ལ་གསད་པར་བྱ་བ་གསད་པའི་ཕྱིར་བསྒོ་བ་བྱས་པ་ཡིན་ཏེ། དེ་གསོད་པར་བསམས་པས་བསད་དུ་ཟིན་ཀྱང༌། དེས་བསྟན་པས་དེས་བསད་པར་གྱུར་པ་ཕམ་པ་ཞེས་བྱ་བའི་ཁ་ན་མ་ཐོ་བར་འགྱུར་རོ་ཞེས་བྱ་བའི་ཐ་ཚིག་སྟེ། སྟོན་པ་ནི་བསྒོ་བའི་རང་བཞིན་ཡིན་པའི་ཕྱིར་རོ། །མ་དང་མངལ་ན་གནས་པ་གཉིས་ནི་དཔེའོ་ཞེས་བྱ་བ་ནི། གང་གི་ཚེ་གསད་པར་བྱ་བ་མང་པོའི་རྗེས་སུ་གསོད་པར་བྱེད་པ་འབྲང་བ་དེ་དག་གི་ནང་ན་གསད་པར་བྱ་བ་གང་ལ་གསོད་པའི་སེམས་ཉེ་བར་གནས་པར་གྱུར་པ་དེ་བསྟན་པའི་ཕྱིར་མ་བསམས་པ་གཞན་ཐམས་ཅད་ཀྱང་སྟོན་པར་བྱེད་ཅིང་དེ་དག་ཀྱང་བསད་པར་གྱུར་ན་སྦོམ་པོའོ། །བསམས་པ་བསད་ན་ཕམ་པར་འགྱུར་ཏེ། སྤོམ་པོ་དེ་ནི་སྔར་དཀུ་མཉེས་པས་མ་དང་མངལ་ན་གནས་པ་གཉིས་ལས་མ་བསམས་པ་ཤོས་ན་སྤོམ་པོའོ་ཞེས་བྱ་བ་སྨྲས་པ་དེས་འདྲ་བ་བསྟན་པས་ན་མ་དང་མངལ་ན་གནས་པ་གཉིས་ནི་འདིའི་དཔེ་ཡིན་པར་རིག་པར་བྱའོ། །བདག་ཉིད་གསོད་ན་སྦོམ་པོའོ་ཞེས་བྱ་བ་ནི། བསད་པའི་ཕྱིར་རྗེས་སུ་སྒྲུབ་པ་ལས་འདིར་ལྟུང་བ་རྣམ་པར་གཞག་གི་བསད་པ་ལས་ནི་མ་ཡིན་ཏེ་ཚེ་རབས་གཞན་དུ་ལས་ཀྱི་ལམ་སྐྱེ་བ་མེད་དོ་ཞེས་གྲུབ་པའི་མཐའ་ལས་གསུངས་པའི་ཕྱིར་རོ། །དེ་བས་ན་འདིར་སྦྱོར་བ་ལས་ལྟུང་བར་རིག་པར་བྱའོ། །སེམས་གྱུར་པ་མེད་པར་མ་ལེགས་པ་བྱས་ན་ཉེས་བྱེད་དོ་ཞེས་བྱ་བ་ནི། གསོད་པའི་བསམས་པ་མ་བཞག་པ་སེམས་གྱུར་པ་མེད་པར་མ་ལེགས་པ་བྱས་པ་ལུས་དང་ངག་གི་ལས་མ་ལེགས་པ་གང་ཡིན་པ་དཔེར་ན་གསད་པར་བྱ་བ་སྟོན་པ་དེ་ནི་ཉེས་བྱེད་དེ། ལེགས་པར་བྱ་བ་མ་ཡིན་པར་རིག་པར་བྱའོ། །ཉེས་བྱེད་ཡིན་པའི་ཕྱིར་འདིར་ཉེས་བྱས་ཡིན་པར་རིག་པར་བྱ་སྟེ། ཤེས་བཞིན་མ་ཡིན་པར་ཞུགས་པའི་ཕྱིར་རོ། །ཆེད་དུ་མ་བསམས་པར་གྲུབ་པ་ནི་བྱེད་པ་པོ་ཉིད་མ་ཡིན་ནོ་ཞེས་བྱ་བ་ནི། བསད་པ་ལ་སོགས་པར་ཆེད་དུ་མ་བསམས་པར་གྲུབ་པ་གང་ཡིན་པའི་གྲུབ་པ་དེ་ནི་ལྟུང་བའི་བྱེད་པ་པོ་ཉིད་མ་ཡིན་པ་སྟེ། དཔེར་ན་བཞད་གད་ཀྱི་བསམ་པས་མཚོན་འཕང་པས་ཤི་བའི་གསོད་
པར་གཏོགས་པ་གྲུབ་པ་དེ་ནི་བྱེད་པ་པོ་ཉིད་མ་ཡིན་ཏེ། དེ་ལ་ནི་མཚོན་འཕངས་པ་ལས་ལྟུང་བ་ཁོ་ན་ཡོད་ཀྱི། ཤི་བ་ལས་ནི་མ་ཡིན་ནོ། །འདིར་གཞུང་ནི་བཙུན་པ་དགེ་སློང་གིས་བཞད་གད་དུ་གཞན་ལ་མཚོན་འཕངས་པས་རྐྱེན་དེས་དེ་དུས་བགྱིས་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །ཚེ་རབས་གཞན་དུ་ལས་སྐྱེ་བ་མེད་དོ་ཞེས་བྱ་བ་ནི། འགའ་ཞིག་ལ་བསད་པ་ལ་སོགས་པའི་སྦྱོར་བ་བྱས་ནས། གསད་པར་བྱ་བ་ཤི་བའི་མདུན་རོལ་དུ་སྡར་གསོད་པར་བྱེད་པ་ཤིའམ་སྙམ་དུ་ཤི་ན་སྲོག་གཅད་པ་ལ་སོགས་པ་ཁ་ན་མ་ཐོ་བའི་དངོས་གཞིར་མི་འགྱུར་ཏེ། ཚེ་རབས་གཞན་དུ་ལས་སྐྱེ་བ་མི་སྲིད་པའི་ཕྱིར་རོ། །སྔར་རམ་མཉམ་དུ་ཤི་ན་ལས་ཀྱི་ལམ་གྱི་དངོས་གཞི་མེད་དེ། ལུས་གཞན་སྐྱེས་པའི་ཕྱིར་རོ་ཞེས་གྲུབ་པའི་མཐའ་ལས་གསུངས་པའི་ཕྱིར་རོ། །གསོད་པའི་ཕམ་པར་འགྱུར་བ་ཞུ་བའི་སྐབས་སོ་ཞེས་བྱ་བ་གསོད་པའི་ཕམ་པར་འགྱུར་བ་ཞུ་བའི་སྐབས་ནས་འབྱུང་བ་རྫོགས་སོ།། །།གསོད་པའི་ཕམ་པར་འགྱུར་བའི་འདུལ་བྱེད་ཀྱི་སྐབས་ནས་འབྱུང་བ་བསྟན་པའི་ཕྱིར། སྦོམ་པོ་ནི་ཁོ་བོ་འཆི་བར་འོང་ངོ་ཞེས་དེ་སྐད་ཟེར་བ་ལ་ཡིད་མི་ཆེས་ཤིང༌། དེ་བཞིན་ཉིད་དུ་སྒྲུབ་པར་བྱེད་ནའོ་ཞེས་བྱ་བ་སྨྲས་ཏེ། སྤོམ་པོ་ནི་ཞེས་བྱ་བའི་ཚིག་དང་པོར་སྨོས་པ་ནི་དབང་དུ་བྱ་བ་བསྟན་པའི་ཕྱིར་ཏེ། འདི་མན་ཆད་ནས་འོག་ནས་ནང་བ་ལ་བབ་ཅོལ་དུ་མཚོན་དང་ཐག་པ་སྦྱིན་པར་མི་བྱའོ་ཞེས་འབྱུང་བ་ཡན་ཆད་ནི་སྦོམ་པོ་ཞེས་བྱ་བ་འདིའི་དབང་དུ་བྱས་པ་ཡིན་ནོ། །གལ་ཏེ་ནད་པ་ན་རེ་བདག་ལ་ཁྲུས་དང་བསྐྱོད་པ་ལ་སོགས་པ་ཅུང་ཟད་བྱེད་ན་གདོན་མི་ཟ་བར་ཁོ་བོ་འཆི་བར་འོང་ངོ་ཞེས་དེ་སྐད་ཟེར་བ་ལ་ཡིད་མི་ཆེས་ཤིང་ཡིད་ཆེས་པར་མི་བྱེད་པར་ཁྲུས་དང་བསྐྱོད་པ་ལ་སོགས་པ་དེ་བཞིན་ཉིད་དུ་སྒྲུབ་པར་བྱེད་ཅིང་རྗེས་སུ་སྒྲུབ་པར་བྱེད་ན་སྦོམ་པོའོ། །ནད་པ་ཤི་བླའོ་ཞེས་གཡོག་མི་བྱེད་ནའོ་བྱ་བ་ནི་ནད་པ་འདི་མྱུར་དུ་ཤི་བླའོ་ཞེས་དེའི་དོན་དུ་ནད་གཡོག་མི་བྱེད་ན་སྦོམ་པོའོ། །མིད་པར་
བྱ་བ་མི་འཕྲོད་པ་སྦྱིན་ནའོ་ཞེས་བྱ་བ་ནི་སྨན་ལ་སོགས་པ་མིང་པར་བྱ་བ་མི་འཕྲོད་པ་མི་མཐུན་པ་སྦྱིན་པར་བྱེད་ཅིང་གལ་ཏེ་མིང་པར་བྱ་བ་དེ་ཡང་མི་འཕྲོད་པ་ཉིད་དུ་ཤེས་ན་དེའི་ཚེ་སྦོམ་པོའོ། །འབྲས་ཡོངས་སུ་མ་སྨིན་པ་བརྟོལ་ནའོ་ཞེས་བྱ་བ་ནི། འབྲས་ཡོངས་སུ་མ་སྨིན་པ་བརྟོལ་བར་བྱེད་ཅིང་འདྲལ་བར་བྱེད་ན་སྦོམ་པོ་སྟེ། ཐམས་ཅད་དུ་ཡང་ཁྲོ་བ་ཉིད་ལ་གནས་པ་ཁོ་ན་ཡིན་པའི་ཕྱིར་རོ། །དོང་དུ་འཛུད་པ་དང༌། སྒོ་གླེགས་ཀྱིས་བཙིར་བ་ལ་སོགས་པས་སྙོན་རྨོངས་པར་བྱེད་ནའོ་ཞེས་བྱ་བ་ནི། དོང་དུ་གཞུག་པ་དང་སྒོ་གླེགས་ཀྱིས་བཅིར་བ་ལ་སོགས་པས་ཉོན་མོངས་ཤིང་གནོད་པ་བྱེད་པ་དང༌། རྣམ་པ་གཞན་གྱིས་ཀྱང་ཉོན་མོངས་པར་བྱེད་ན་སྦོམ་པོའོ། །དེ་ནི་བསད་པའི་སྤྱོར་བའི་རྣམ་པ་ཡིན་པས་དེའི་ཕྱིར་འདིར་སྦོམ་པོར་རྣམ་པར་གཞག་གོ །འདིར་དེ་དག་གི་གཞུང་ནི་འདུལ་བྱེད་དག་ལས་དགེ་སློང་ནད་པ་སྟན་ལ་འདུག་པར་གྱུར་པ་ལ་དེའི་ནད་གཡོག་གིས་ས་སྨྲས་པ། ཚེ་དང་ལྡན་པ་ལོངས་ཤིག །དེས་སྨྲས་པ། ཁོ་བོ་ཤི་བར་འོང་གིས་མ་བསླང་ཤིག །དེ་ཡང་ཚེ་དང་ལྡན་པ་ལོངས་ཤིག་ཅས་སྨྲས་ནས་དེ་ལངས་པ་དང༌། དུས་ལ་བབ་པོ། དགེ་སློང་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ། ཕམ་པའི་ལྟུང་བར་ནི་མི་འགྱུར་ཏེ། ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དང༌། དགེ་སློང་ན་བས་ཡུན་རིང་དུ་གནོད་པར་འགྱུར་བ་དེའི་ནད་གཡོག་དག་སྐྱོ་ནས་དེ་དག་གིས་ཁྱོད་ཀྱི་ནད་གཡོག་མི་བྱེད་དོ། །མྱུར་དུ་འཆི་བར་ཡང་འགྱུར་རོ་ཞེས་སྨས་ནས་དེ་དག་གིས་དེའི་ནད་གཡོག་མ་བྱས་པ་དང༌། དུས་ལ་བབ་ན་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དང༌། དགེ་སློང་ནད་པ་དེའི་ཟས་འཕྲོད་པ་མ་རྙེད་ནས། དེའི་ནད་གཡོག་གིས་ཟས་མི་འཕྲོད་པ་རྙེད་ནས་ཚེ་དང་ལྡན་པ་རེ་ཞིག་འདི་རྙེད་ཀྱིས་ཟོ་ཤིག །དེ་ཟོས་ནས་དུས་ལ་བབ་པ་ནས་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དང༌། དགེ་སློང་གིས་འབྲས་ཡོངས་སུ་མ་སྨིན་པ་བརྟོལ་ནས་དེ་ཡང་དུས་ལ་བབ་པ་ནས་ཉེས་པ་སྦོམ་པོར་འགྱུར་རོ་ཞེས་བྱ་བ་བའི་བར་དང༌། དགེ་སློང་
དེ་དག་གིས་འདི་སྐད་མི་སྨྲ་ན་སོང་ལ་དོང་དུ་ཆུག་ཤིག་ཅེས་སྨྲས་ནས་དེ་དག་གིས་དོང་དུ་བཅུག་སྟེ། དུས་ལ་བབ་པ་ནས་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དང༌། དེ་དག་གིས་སྨྲས་པ། དེ་སྐད་མི་སྨྲ་ན་སོང་ལ་འདི་སྒོ་གླེགས་ཀྱིས་ཚིར་ཅིག །དེ་དག་གིས་སྒོ་གླེགས་ཀྱིས་བཙིར་བ་དང༌། དུས་ལ་བབ་པ་ནས་ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ཏེ། འདིར་གསད་པར་བྱ་བ་ཤི་ན་ཡང་ཕམ་པའི་ལྟུང་བར་མི་འགྱུར་རོ་ཞེས་གསུངས་པའི་ཚིག་ལས་ནི་སྨྲ་བ་པོ་དེ་ལ་བསད་པའི་བསམ་པ་མ་བྱུང་བར་ཉོན་མོངས་པ་འབའ་ཞིག་གི་བསམ་པས་དེ་སྐད་སྨྲས་པས་དེའི་ཕྱིར་ནི་ཁྲོ་བ་ཉིད་ལྷག་པར་སྦྱར་བའི་སྐབས་ཡིན་པས་སྦོམ་པོ་གཞན་ཡིན་པར་རིག་པར་བྱའོ། །གཡང་ས་ནས་མཆོད་བ་དང་འཆིང་བ་ལ་སོགས་པ་འཆི་བའི་དོན་དུ་སྒྲུབ་པ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་རྗེས་བསྙགས་པ་འདི་ནི་སྔ་མའི་རྗེས་བསྙགས་པ་ནི་མ་ཡིན་གྱི། སྦོམ་པོ་ཞེས་བྱ་བ་དེ་ཙམ་གྱི་རྗེས་སུ་འཇུག་པ་ཡིན་ནོ། །གཡངས་ནས་མཆོད་བ་དང་འཆིང་བ་ལ་སོགས་པ་དང༌། གཞན་ཡང་འཆི་བའི་དོན་དུ་འཆི་བའི་རྒྱུར་སྒྲུབ་པར་བྱེད་ན་ཡང་སྦོམ་པོའོ། །འདིར་ཡང་བསད་པའི་བསམ་པས་གཞན་གཡང་ས་ནས་མཆོད་དུ་འཇུག་པ་དང༌། བཅིང་བ་ལ་སོགས་པ་ལ་ནི་ཤི་ན་ནི་ཕམ་པར་འགྱུར་ལ་མ་ཤི་ན་ནི་སྦྱོར་བ་ཡིན་པས། སྦོམ་པོར་འགྱུར་བ་ཡིན་པས་ན་དེའི་ཕྱིར་འདིར་གཡང་ས་ནས་མཆོད་བ་དང༌། འཆིང་བ་ལ་སོགས་པ་སྨོས་པ་འདི་ནི་བདག་ཉིད་དང་འབྲེལ་པ་ཡིན་ཏེ་དེ་ཡང་སྔར་བདག་ཉིད་གསོད་ན་སྦོམ་པོའོ་ཞེས་སྨོས་པས་དེའི་མཚན་ཉིད་འདིར་བསྟན་པ་ཡིན་པས་དེའི་ཕྱིར་མ་ཤི་ན་སྦོམ་པོའོ་ཞེས་བྱ་བར་ཤེས་པར་བྱའོ། །འདིར་གཞུང་ནི་འདུལ་བྱེད་དག་ལས་དགེ་སློང་ནད་ཀྱིས་སྒུར་བོར་གྱུར་པ་འདི་སྙམ་དུ་བདག་གསོན་ན་ཅིར་རུང་གིས་སོང་ལ་བདག་ཉིད་གཡང་ས་ནས་མཆོང་ངོ་སྙམ་ནས་དེས་བདག་ཉིད་གཡང་ས་ནས་མཆོངས་པ་དང༌། དྲང་པོར་གྱུར་ནས་དེ་འགྱོད་པ་སྐྱེས་ནས། བཅོམ་ལྡན་འདས་ཀྱིས་བཀའ་སྩལ་པ།
ཉེས་པ་སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །ནད་པ་ལ་བབ་ཆོལ་དུ་མཚོན་དང་ཐག་པ་སྤྱིན་པར་མི་བྱའོ་ཞེས་བྱ་བ་ལ། སྔར་འཆི་བའི་འཚོག་ཆས་མི་གཞག་གོ་ཞེས་སྨོས་པ་དེར་ནི་ནད་གཡོག་གི་དགག་པ་བསྟན་པ་ཡིན་གྱི། འདིར་ནི་ནད་གཡོག་མ་ཡིན་པ་ལ་དགག་པ་ཡིན་པར་རིག་པར་བྱའོ། །བབ་ཆོལ་དུ་ཞེས་བྱ་བ་ནི་བརྟག་པ་མ་བྱས་པར་སྦྱིན་པར་མི་བྱའོ། །དོན་གཞན་གྱི་ཕྱིར་ནི་བསམ་མི་དགོས་པར་སྦྱིན་པར་བྱའོ། །ཐག་པ་ལ་སོགས་པ་སྨོས་པ་ནི་དཔེ་སྟེ། ཁབ་ལ་སོགས་པ་ཡང་བཀག་པར་ཤེས་པར་བྱའོ། །ཞལ་ཏ་པ་ཤེས་བཞིན་དུ་བྱའོ་ཞེས་བྱ་བ་ལ། ཞལ་ཏ་བ་ཞེས་བྱ་བ་ནི། ལག་གི་ལས་བྱེད་པའི་ཞལ་ཏ་བྱེད་པ་ལ་སོགས་པ་སྟེ། དེ་ཤེས་བཞིན་དུ་བྱའོ། །གསང་སྔགས་ཀྱིས་ཐལ་ལྕག་བྱ་བ་ཡང་ངོ་ཞེས་བྱ་བ་ཡང་ཤེས་བཞིན་ཁོ་ནར་བྱའོ་ཞེས་བྱ་བར་སྦྱར་རོ། །གདོན་གྱིས་ཟིན་པ་ཐར་པར་བྱ་བའི་ཕྱིར་གསང་སྔགས་སྔོན་དུ་འགྲོ་བས་གདོང་དུ་ཐལ་ལྕག་གིས་བསྣུན་པའོ། །ཐོགས་པ་བསལ་བའི་ཕྱིར་བསྣུན་པ་ཡང་ངོ་ཞེས་བྱ་བ་ལ། ཐོགས་པ་ཞེས་བྱ་བ་ནི་མིད་པ་ལ་སོགས་པ་ལུས་ལ་ལུས་ལས་དོན་གཞན་དུ་གྱུར་པ་ཁམ་ལ་སོགས་པ་ཆགས་པ་གང་ཅི་ཡང་རུང་བ་ལ་བྱའོ། །དེ་བསལ་བའི་ཕྱིར་ཁུ་ཚུར་ལ་སོགས་པ་བསྣུན་པར་བྱ་བ་གང་ཡིན་པ་དེ་ཡང་ཤེས་བཞིན་དུ་བྱའོ། །དེར་གྱུར་པ་ལེགས་པར་སོ་སོར་བརྟག་པར་བྱ་སྟེ་དྲིལ་བར་བྱའོ་ཞེས་བྱ་བ་ནི། ཤེས་བཞིན་དུ་གྱུར་པ་ཤེས་བཞིན་ཁོ་ན་ལ་གནས་པས། ཅི་ནས་ཀྱང་མི་ལ་སོགས་པ་གང་ལ་ཡང་གནོད་པར་མི་འགྱུར་བ་དེ་ལྟར་ལེགས་པར་སོ་སོར་བརྟག་པར་བྱ་སྟེ། རྡོ་བ་དང་ཤིང་ལ་སོགས་པ་དག་དྲིལ་བར་བྱའོ། །འདི་ལྟར་རྡོ་བ་དང་ཤིང་ལ་སོགས་པ་དག་འདིར་མ་སྨོས་མོད་ཀྱི། འོན་ཀྱང་ཤུགས་ཀྱིས་འཐོབ་སྟེ། ཤུགས་ཀྱིས་ཇི་ལྟར་འཐོབ་ཅེ་ན་ལེགས་པར་སོ་སོར་བརྟག་པར་བྱ་སྟེ། དྲིལ་བར་བྱའོ་ཞེས་བྱ་བ་སྨོས་པ་ལས་ན་དྲིལ་བར་བྱ་བ་རྡོ་བ་ལ་སོགས་པ་ཡོད་ན་ཚིག་འདིའི་དོན་དང་བཅས་པར་འགྱུར་རོ། །ཕྱོགས་ཉུང་དུས་གདེག་པ་ལྕི་བ་ལ་
འབད་པར་མི་བྱའོ་ཞེས་བྱ་བ་ནི། དགེ་སློང་འབད་པ་བྱེད་པའི་ཚོམས་ཀྱི་ཕྱོགས་ཉུང་དུ་དང་ལྡན་པ་གང་ཡིན་པས། གདེག་པ་ལྕི་བ་གདེག་པར་བྱ་བ་ལ་འབད་པར་མི་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཚོམས་གང་གི་ཕྱོགས་སུ་དགེ་སློང་གཏོགས་པའི་ཚོམས་དེ་གལ་ཏེ་ཉུང་བར་གྱུར་ན་དེའི་ཚེ་དགེ་སློང་དེས་དེར་གྲོགས་ཀྱི་དངོས་པོ་མི་བྱའོ། །སྤྱིའུ་ཚུགས་སུ་འགྲོ་བར་མི་བྱའོ་ཞེས་བྱ་བ་ནི། སྤྱིའུ་ཚུགས་མཁན་ལྟར་རམ་སྟོབས་ལ་གོམས་པའི་གྱད་ཐབས་མཁན་བཞིན་དུ་ཞེས་བྱ་བའི་ཐ་ཚིག་གོ །གཞན་ཡང་ཇི་ལྟར་ཁྱི་འཚོད་པ་དག་གར་བྱེད་པའི་དུས་ན་ལག་པ་གཉིས་ས་ལ་བཙུགས་ལ་རྐང་པ་གཉིས་གནམ་དུ་བསྒྲེང་སྟེ། སྤྱིའུ་ཚུགས་སུ་འགྲོ་བ་དེ་ལྟར་འགྲོ་བར་མི་བྱ་བའོ། །མ་བསླབས་པས་བསླབ་པ་ལ་སྦྱར་བར་མི་བྱའོ་ཞེས་བྱ་བ་ནི། དགེ་སློང་མ་བསླབས་པས་གཞན་གྱི་ཕྱིར་བསླབ་པ་ལ་སྦྱར་བར་མི་བྱའོ། །མཚོན་གྱི་ལས་ལ་སོགས་པས་གཞན་ལ་གནོད་པར་ནུས་པའི་ཕྱིར་མི་མཁས་པས་བསླབ་པ་ལ་སྦྱར་བར་མི་བྱའོ། །མཚོན་འཕངས་པ་ལ་བསྒོ་བར་མི་བྱའོ་ཞེས་བྱ་བ་ནི་མདའ་འཕངས་པ་ལ་སོགས་པ་མཚོན་འཕངས་པ་ལ་མདའ་ལྟ་ཞེ་འམ་འཕོངས་ཤིག་དང་ལྟའོ་ཞེས་བྱ་བ་དེ་ལྟ་བུ་ལ་སོགས་པ་བསྒོ་བ་དང་སྨྲ་བར་མི་བྱའོ་ཞེས་བྱ་བའི་ཐ་ཚིག་གོ །ནད་པ་མི་ནུས་པ་ལ་ལམ་དུ་མི་བཀྲིའོ་ཞེས་བྱ་བ་ནི། ནད་པ་ལམ་དུ་འགྲོ་མི་ནུས་པ་ལམ་དུ་བཀྲི་བར་མི་བྱའོ། །འདི་ནི་ལམ་གྱི་ངལ་བས་འདིའི་སྲོག་འཆད་པ་ལ་སོགས་པ་གནོད་པར་གྱུར་ན་མི་རུང་ངོ་ཞེས་དེའི་ཕྱིར་དགག་པ་མཛད་དོ། །གསོད་པའི་ཕམ་པར་འགྱུར་བ་འདུལ་བྱེད་དག་གོ་ཞེས་བྱ་བ་གསོད་པའི་ཕམ་པར་འགྱུར་བ་འདུལ་བྱེད་ཀྱི་སྐབས་ནས་འབྱུང་བ་རྫོགས་སོ། །གསོད་པའི་ཕམ་པར་འགྱུར་བ་རྫོགས་སོ་ཞེས་བྱ་བ་གསོད་པའི་ཕམ་པར་འགྱུར་བ་བཤད་ཟིན་ཏོ།། །།གསོད་པའི་ཕམ་པར་འགྱུར་བ་སྨྲས་ནས། ད་ནི་སྨྲ་བ་ཞེས་བྱ་བའི་ཕམ་པར་འགྱུར་བ་བཞི་པ་བརྗོད་པར་བྱ་སྟེ། གང་བྱས་ན་སྨྲ་བའི་ཕམ་པར་འགྱུར་ཞེ་
ན། དེའི་ཕྱིར་འདུ་ཤེས་བསྒྱུར་ཏེ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲ་ནའོ་ཞེས་བྱ་བ་སྨྲས་ཏེ། སྨྲ་བ་པོ་དེས་བརྗོད་པར་བྱ་བའི་དོན་ལ་བདེན་པར་གྱུར་པའི་འདུ་ཤེས་གང་ཡིན་པ་དེ་བསྒྱུར་ཅིང་སྦས་ཏེ་བརྫུན་པའི་དོན་གྱི་འདུ་ཤེས་གཞན་གྱིས་བཀབ་ནས། བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་ལྡན་པ་ཉིད་དེ་སྨྲས་ཤིང་བརྗོད་ན། སྨྲ་བ་ཞེས་བྱ་བའི་ཕམ་པར་འགྱུར་རོ། །ད་ནི་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲ་བ་ཉིད་བསྟན་པའི་ཕྱིར། མཐོང་ངོ་བདག་གིས་མཐོང་ངོ༌། །སྒྲ་ཐོས་སོ་བདག་གིས་ཐོས་སོ། །འགྲོའོ།། བདག་གི་དྲུང་དུ་འོང་ངོ༌། །ལྷན་ཅིག་གཏམ་འདྲེའོ། །ཕེབས་པར་སྨྲའོ། །སོ་སོར་ཀུན་དགའོ། །བདག་དང་རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་སྨྲས་པ་ཉིད་དོ་ཞེས་བྱ་བ་སྨྲས་ཏེ། མཐོང་ངོ་བདག་མཐོང་ངོ་ཞེས་བྱ་བ་དེ་ལ་སོགས་པ་སྨྲ་བ་གང་ཡིན་པ་དེ་ཉིད་དེ། བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲས་པ་ཉིད་ཡིན་པར་བལྟ་བར་བྱའོ། །དེ་ལྟར་འདུ་ཤེས་བསྒྱུར་ཏེ་སྨྲས་ན་ཕམ་པར་འགྱུར་རོ། །བདག་དང་ལྷན་ཅིག་གཏམ་འདྲེའོ་ཞེས་བྱ་བ་ལ་སོགས་པའི་ཚིག་རྣམས་དང་སྤྱར་དུ་མི་རུང་བས་དེའི་ཕྱིར་སྐྱེས་བུ་དང་པོར་བསྒྱུར་བར་བྱ་སྟེ། གཏམ་འདྲེ་བར་བྱེད། ཕེབས་པར་སྨྲ་བར་བྱེད། ཕན་ཚུན་ཀུན་དགའ་བར་བྱེད། རྟག་ཏུ་ཡང་ལྷན་ཅིག་གནས་པར་བྱེད་དོ་ཞེས་དེ་ལྟར་སྦྱར་བར་ཡང་ཤེས་པར་བྱའོ། །ཅི་མཐོང་ངོ་བདག་མཐོང་ངོ་ཞེས་བྱ་བ་དེ་ཙམ་གྱི་ཚིག་ཁོ་ན་ལས་ཕམ་པར་འགྱུར་རམ། འོན་ཏེ་ཟླ་ཅུང་ཟད་ཅིག་ལ་ལྟོས་ནས་ཡིན། དེ་ལྟ་ན་ཡང་ཟླ་གང་ཡང་རུང་བ་ཞིག་ཡིན་ནམ་འོན་ཏེ་ཁྱད་པར་ཅན་ཞིག་ཡིན་ཞེ་ན་དེའི་ཕྱིར། ལྷ་དང་ཀླུ་དང་གནོད་སྦྱིན་དང་དྲི་ཟ་དང་མི་འམ་ཅི་དང་ལྟོ་འཕྱེ་ཆེན་པོ་དང་ཡི་དགས་དང་ཤ་ཟ་དང་གྲུལ་བུམ་དང་ལུས་སྲུལ་པོའི་ཟླ་ཉིད་དོ་ཞེས་བྱ་བ་སྨྲས་ཏེ། ཇེ་ལྷ་ལ་སོགས་པ་རེ་རེར་ཕྱེ་ལ། དེ་ནས་ཟླ་ཉིད་དུ་སྦྱར་བར་བྱའོ། །གང་གི་ཕྱིར་ལྷ་ལ་སོགས་པ་དེ་དག་ནི་ལྷའི་མིག་ཅན་མིའི་ཆོས་བླ་མ་དང་ལྡན་པ་རྣམས་ཀྱིས་མཐོང་བ་དེའི་ཕྱིར་དེ་དག་མཐོང་བ་ལ་སོགས་པའི་སྒོ་ནས་ཟླ་ཉིད་ཡོད་པས། བདག་
ཉིད་མིའི་ཆོས་བླ་མ་དང་ལྡན་པ་ཉིད་དུ་བསྟན་པ་ཡིན་ནོ། །དེ་བས་ན་ལྷ་མཐོང་ངོ༌། །ལྷས་བདག་མཐོང་ངོ་ཞེས་བྱ་བ་ལ་སོགས་པའི་ཚིག་གིས་ན་བདག་ཉིད་མིའི་ཆོས་བླ་མ་དང་ལྡན་པ་ཉིད་བསྟན་ཏོ། །རྟག་པའི་དངོས་པོ་ནི་རྟག་པ་ཉིད་དེ། རྒྱུན་དུ་ལྷན་ཅིག་གནས་གཅིག་ན་རྟག་ཏུ་ཡང་ལྷན་ཅིག་གནས་སོ་ཞེས་བྱ་བའི་ཐ་ཚིག་གོ །སྦོམ་པོའི་དབང་དུ་བྱས་པ་ཉིད་ནི་དུར་ཁྲོད་ཀྱི་ཤ་ཟའོ་ཞེས་བྱ་བ་ནི། ཟླ་ཉིད་ཅེས་བྱ་བར་སྦྱར་ཏེ། མཐོང་ངོ་ཞེས་བྱ་བ་ལ་སོགས་པ་བདག་ཉིད་མིའི་ཆོས་བླ་མ་དང་ལྡན་པ་ཉིད་དུ་སྨྲ་བ་དག་ལ། ཟླ་དུར་ཁྲོད་ཀྱི་ཤ་ཟ་བ་ཉིད་ལ་ནི་སྦོམ་པོའི་དབང་དུ་བྱས་པ་ཉིད་དེ། སྦོམ་པོར་བྱེད་པས་སྦོམ་པོའི་དབང་དུ་བྱས་པ་སྟེ། དེའི་དངོས་པོ་ནི་དེ་ཉིད་དོ། །ལྷ་ལ་སོགས་པ་མཐོང་བ་ནི་མིའི་ཆོས་བླ་མའི་འབྲས་བུ་ཡིན་པའི་ཕྱིར། དེའི་སྒོ་ནས་དེ་བསྟན་པ་བྱས་ནས། ད་ནི་རང་བཞིན་བསྟན་པར་བྱ་བའི་ཕྱིར། མི་རྟག་པ་ལ་སོགས་པའི་འདུ་ཤེས་དང༌། བསམ་གཏན་རྣམས་དང༌། ཚད་མེད་པ་རྣམས་དང༌། གཟུགས་མེད་པ་རྣམས་དང༌། འབྲས་བུ་རྣམས་དང༌། མངོན་པར་ཤེས་པ་ལ་སོགས་པ་ནི་ཆོས་བླ་མའོ་ཞེས་བྱ་བ་སྨྲས་ཏེ། མི་རྟག་པ་ལ་སོགས་པའི་འདུ་ཤེས་ཞེས་བྱ་བ་ནི། མི་རྟག་པའི་འདུ་ཤེས་ལ་སོགས་པའི་འདུ་ཤེས་བཅུ་དང༌། མི་སྡུག་པའི་འདུ་ཤེས་ལ་སོགས་པའི་འདུ་ཤེས་བཅུ་སྟེ། མི་རྟག་པའི་འདུ་ཤེས་དང༌། མི་རྟག་པ་ལ་སྡུག་བསྔལ་བའི་འདུ་ཤེས་དང༌། སྡུག་བསྔལ་བ་ལ་བདག་མེད་པའི་འདུ་ཤེས་དང༌། ཟས་ལ་མི་མཐུན་པའི་འདུ་ཤེས་དང༌། འཇིག་རྟེན་ཐམས་ཅད་ལ་མངོན་པར་མི་དགའ་བའི་འདུ་ཤེས་དང༌། ཉེས་དམིགས་ཀྱི་འདུ་ཤེས་དང༌། སྤོང་བའི་འདུ་ཤེས་དང༌། འདོད་ཆགས་དང་བྲལ་བའི་འདུ་ཤེས་དང༌། འགོག་པའི་འདུ་ཤེས་དང༌། འཆི་བའི་འདུ་ཤེས་དང༌། མི་སྡུག་པའི་འདུ་ཤེས་དང༌། རྣམ་པར་བསྔོས་པའི་འདུ་ཤེས་དང༌། རྣམ་པར་རྣགས་པའི་འདུ་ཤེས་དང༌། རྣམ་པར་བམ་པའི་འདུ་ཤེས་དང༌། རྣམ་པ་འབུས་གཞིགས་པའི་
འདུ་ཤེས་དང༌། རྣམ་པར་ཟོས་པའི་འདུ་ཤེས་དང༌། རྣམ་པར་དམར་བའི་འདུ་ཤེས་དང༌། རྣམ་པར་འཐོར་བའི་འདུ་ཤེས་དང༌། རུས་གོང་གི་འདུ་ཤེས་དང༌། སྟོང་པ་ཉིད་དུ་སོ་སོར་རྟོགས་པའི་འདུ་ཤེས་སོ། །སོགས་པ་ཞེས་བྱ་བའི་སྒྲ་དང་པོ་འདིས་ནི་མདོ་སྡེ་ལས་གསུངས་པའི་འདུ་ཤེས་དེ་དག་བསྡུའོ། །བསམ་གཏན་རྣམས་ཞེས་བྱ་བ་ནི་དང་པོ་ལ་སོགས་པ་དག་གོ །ཚད་མེད་པ་རྣམས་ཞེས་བྱ་བ་ནི། བྱམས་པ་ལ་སོགས་པ་དག་གོ །གཟུགས་མེད་པ་རྣམས་ཞེས་བྱ་བ་ནི། ནམ་མཁའ་མཐའ་ཡས་སྐྱེ་མཆེད་ལ་སོགས་པ་དག་གོ །འབྲས་བུ་རྣམས་ཞེས་བྱ་བ་ནི། རྒྱུན་དུ་ཞུགས་པའི་འབྲས་བུ་ལ་སོགས་པ་བཞིའོ། །མངོན་པར་ཤེས་པ་ཞེས་བྱ་བ་ནི་རྫུ་འཕྲུལ་གྱི་ཡུལ་ལ་སོགས་པ་དྲུག་གོ །སོགས་པ་ཞེས་བྱ་བའི་སྒྲ་འོག་མ་འདིས་ནི་ཟག་པ་དང་བཅས་པ་དང་ཟག་པ་མེད་པའི་ཡོན་ཏན་ལྷག་མ་རྣམས་གཟུང་པར་བྱ་སྟེ། དེ་དག་ཐམས་ཅད་ནི་མིའི་ཆོས་བླ་མ་ཞེས་བྱ་བ་བརྗོད་པ་ཡིན་ནོ། །སྦོམ་པོའི་དབང་དུ་བྱས་པ་ནི་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་ཉོན་མོངས་པ་རྣམ་པར་གནོན་པའོ་ཞེས་བྱ་བ་ལ། ཞི་གནས་ཞེས་བྱ་བ་ནི་ཏིང་ངེ་འཛིན་ཏོ། །དེ་ཡང་རྣམ་པ་གཉིས་ཏེ། མོས་པ་ཡིད་ལ་བྱེད་པ་ཞེས་བྱ་བ་ནི་ཚད་མེད་པ་ལ་སོགས་པའོ། །དེ་ཁོ་ན་ཉིད་ཡིད་ལ་བྱེད་པ་ཞེས་བྱ་བ་ནི་མི་རྟག་པའི་འདུ་ཤེས་ལ་སོགས་པའོ། །ཏིང་ངེ་འཛིན་དེ་རྣམ་པ་གཉི་ག་ཡང་བསྒོམས་པ་ལས་བྱུང་བ་མི་ལྕོགས་པ་མེད་པས་བསྡུས་པ་ཡིན་པར་རིག་པར་བྱ་སྟེ། དེ་མ་ཐོབ་པར་འདུ་ཤེས་བསྒྱུར་ཏེ་སྨྲས་ན་ནི་ཕམ་བར་འགྱུར་པར་རྣམ་པར་གཞག་གོ །འདིར་དེའི་རྒྱུ་མཚན་མ་ཐོབ་པར་འདུ་ཤེས་བསྒྱུར་ཏེ་སྨྲ་བ་ནི་སྦོམ་པོའི་དབང་དུ་བྱས་པ་རྣམ་པར་གཞག་སྟེ། དེའི་རྒྱུ་མཚན་ཞེས་བྱ་བ་ནི། རང་གི་མཚན་ཉིད་འཛིན་པ་སྟེ། འདོད་པ་ན་སྤྱོད་པའི་ཐོས་པ་དང༌། བསམས་པ་ལས་བྱུང་བའི་ཤེས་པའོ། །དེ་ཡང་རྣམ་པ་གཉིས་ཏེ། ཉོན་མོངས་པ་རྣམ་པར་གནོན་པ་དང༌། རྣམ་པར་གནོན་པ་མ་ཡིན་པའོ། །དེ་ལ་འདིར་ནི་ཉོན་མོངས་པ་རྣམ་
པར་གནོན་པ་བཟུང་སྟེ། དེ་བས་ན་ཞི་གནས་ཀྱི་རྒྱུ་མཚན་རང་གི་མཚན་ཉིད་འཛིན་པ་འདོད་པ་ན་སྤྱོད་པའི་ཐོས་པ་དང༌། བསམས་པ་ལས་བྱུང་བའི་ཤེས་པ་མི་སྡུག་པ་ལ་སོགས་པ་ལ་དམིགས་པས་ཉོན་མོངས་པ་རྣམ་པར་གནོན་པ་དེ་མ་ཐོབ་པར་བདག་ཉིད་དེ་དང་ལྡན་པ་ཉིད་དུ་འདུ་ཤེས་བསྒྱུར་ཏེ་སྟོན་ན་སྦོམ་པོའོ། །དེ་དང་ལྡན་པའི་ཆོས་ཅན་ཉིད་དུ་སྨྲ་བ་ན་དེ་དང་ལྡན་པ་ཉིད་མ་སྨྲས་པ་ཉིད་ཡིན་ནོ་ཞེས་བྱ་བ་ལ། དེ་དང་ལྡན་པའི་ཆོས་ཅན་ཉིད་དུ་སྨྲ་བ་ཞེས་བྱ་བ་ནི། གང་ལ་མིའི་ཆོས་བླ་མ་དེ་ཡོད་པ་དེ་ནི་དེ་དང་ལྡན་པའོ། །མིའི་ཆོས་བླ་མ་དང་ལྡན་པ་དེ་དང་ལྡན་པ་རྒྱུན་དུ་ཞུགས་པ་ལ་སོགས་པ་དེའི་ཆོས་སྟན་ཁྲ་བོ་བཀྲ་བ་ལ་སོགས་པ་ཐོབ་པའི་ཆོས་དེ་དེ་ལ་ཡོད་པ་ནི་དེ་དང་ལྡན་པའི་ཆོས་ཅན་ནོ། །དེའི་དངོས་པོ་ནི་དེ་དང་ལྡན་པའི་ཆོས་ཅན་ཉིད་དོ། །དེ་ཉིད་དུ་སྨྲ་བ་གང་ཡིན་པ་དེ་ནི་དེ་དང་ལྡན་པའི་ཆོས་ཅན་ཉིད་དུ་སྨྲ་བ་སྟེ། དེ་དང་ལྡན་པའི་ཆོས་ཅན་ཉིད་དུ་སྨྲ་བ་ནི་དེ་དང་ལྡན་པ་ཉིད་མ་སྨྲས་པ་མ་ཡིན་ཏེ། མིའི་ཆོས་བླ་མ་དང་མི་ལྡན་པ་ཉིད་དུ་མ་སྨྲས་པ་མ་ཡིན་ཏེ་སྨྲས་པ་ཁོ་ནའོ། །འདི་སྐད་བསྟན་ཏེ། དགེ་སློང་གནག་རྒྱུན་དུ་ཞུགས་པ་ལ་སོགས་པའི་ཆོས་སུ་གྲགས་པ་མི་མ་ཡིན་པ་ལ་སོགས་པས་མི་འཚོ་བ་ལ་སོགས་པ་གང་ཡིན་པའི་ཆོས་དེ་དང་བདག་ཉིད་ལྡན་པར་སྟོན་ན། དགེ་སློང་དེས་བདག་ཉིད་མིའི་ཆོས་བླ་མ་དང་མི་ལྡན་པར་བསྟན་པ་མ་ཡིན་གྱི། འདི་ལྟར་བསྟན་པ་ཁོ་ན་ཡིན་ནོ། །དེ་ལྟར་གཞུང་ནི་དགེ་སློང་རབ་ཏུ་མང་པོ་དག་གྲོང་མེད་པའི་དགོན་པའི་གནས་ཤིག་ན་གནས་ཤིང་ངེ་ན་དེ་དག་ལ་མི་མ་ཡིན་པ་དག་གིས་འཚེ་བ་ན། དེ་ན་དགེ་སློང་གང་རྒྱུན་དུ་ཞུགས་པ་ནས་དགྲ་བཅོམ་པའི་ཡིན་པ་དེ་ན་མི་མ་ཡིན་པ་བདག་གིས་འཚེ་བར་མི་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང༌། འདོད་པ་དང་བློ་གྲོས་དང་རྟོག་པ་དང་ལྟ་བ་བསྒྱུར་ཏེ། འདི་སྐད་ཅེས་བདག་ཀྱང་གྲོང་མེད་པའི་དགོན་པའི་གནས་ཏེ། དེ་ན་བདག་ལ་མི་མ་ཡིན་པ་རྣམས་འཚེ་བར་མི་བྱེད་དོ་ཞེས་ཟེར་ན་ཕམ་པར་འགྱུར་རོ་ཞེས་བྱ་བ་དང༌། དེ་བཞིན་དུ་འདི་ལྟར་
དགེ་སློང་རབ་ཏུ་མང་པོ་དག་ཁྱིམ་རྣམས་སུ་མགྲོན་དུ་བོས་ཏེ་ཟ་བར་བྱེད་ཅིང་དེ་ན་དེ་དག་ལ་སྟན་ཁྲ་བོ་ཉེ་བར་བཀྲ་བ་དག་བཤམས་ཤིང་དེ་ན་དགེ་སློང་གང་རྒྱུན་དུ་ཞུགས་པ་ནས་དགྲ་བཅོམ་པའི་བར་ཡིན་པ་དེ་ལ་དེ་ན་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་ནས། དགེ་སློང་གིས་འདུ་ཤེས་བསྒྱུར་ཅིང་བཟོད་པ་དང༌། འདོད་པ་དང༌། བློ་གྲོས་དང༌། རྟོག་པ་དང༌། ལྟ་བ་བསྒྱུར་ཏེ། འདི་སྐད་ཅེས་བདག་ཀྱང་ཁྱིམ་དེར་མགྲོན་དུ་བོས་ཤིང་ཟོས་ཏེ། དེ་ན་བདག་ལ་ཡང་སྟན་ཁྲ་བོ་ཉེ་བར་བཀྲ་བ་དག་ཤོམ་པར་བྱེད་དོ་ཞེས་ཟེར་ན་ཕམ་པར་འགྱུར་རོ་ཞེས་གསུངས་པ་ཡིན་ཏེ། དེ་བས་ན་དགེ་སློང་གང་རྒྱུན་དུ་ཞུགས་པ་ལ་སོགས་པའི་ཆོས་གང་ཡིན་པར་གྲགས་པ་དེ་དང་བདག་ཉིད་སྦྱོར་བར་བྱེད་པ་དེ་ནི་ཕམ་པར་འགྱུར་རོ། །དེ་ཡོད་དོ་ཞེས་རང་གི་བསམ་པ་གཞན་ལ་སྦྱོར་ཞིང་སྟོན་པ་ཉིད་དོ་ཞེས་བྱ་བ་ནི། དགེ་སློང་གང་གིས་ལྷ་དག་མཐོང་བ་དང༌། ལྷ་རྣམས་ཀྱིས་ཀྱང་དེ་མཐོང་བ་ལ་སོགས་པའི་དགེ་སློང་དེ་ཡོང་དོ་ཞེས་གང་གི་ཚེ་རང་གིས་བསམ་པར་བྱས་ལ་དེ་ཡོད་དོ་ཞེས་གཞན་ལ་སྦྱོར་ཞིང་འདོགས་པར་བྱེད་ན་སྦོམ་པོ་ཁོ་ནར་འགྱུར་ཏེ། བདག་ཉིད་ཀྱི་བསམ་པ་གཞན་ལ་སྟོན་པའི་ཕྱིར་རོ། །འདི་སྐད་བསྟན་ཏེ། དགེ་སློང་གང་གཞན་ལ་བསྟན་པའི་སྦྱོར་བས་བདག་ཉིད་མིའི་ཆོས་བླ་མ་དང་ལྡན་པར་སྟོན་པར་འདོད་ཅིང་འདི་སྐད་ཅེས་དགེ་སློང་གང་གིས་ལྷ་དག་མཐོང་བ་དེ་ཡོད་དོ་ཞེས་ཀྱང་ཟེར་ལ། རྣམ་པ་དེ་ལྟ་བུ་གཞན་ལ་སྟོན་ཅིང་སྦྱོར་བར་བྱེད་ན་རང་ཉིད་དང་སྦྱར་བའི་བསམ་པ་ཡོད་མོད་ཀྱི། འོན་ཀྱང་གཞན་ལ་བསྟན་པའི་ཕྱིར་སྦོམ་པོར་འགྱུར་རོ། །གལ་ཏེ་དེ་ཡོད་དོ་ཞེས་གཞན་ལ་སྟོན་པར་བྱེད་པ་ལ། བདག་ཉིད་ལ་ཡང་ཉེ་བར་སྦྱོར་བར་བྱེད་ན་ཅི་དེ་ལ་ཡང་གཞན་ལ་སྟོན་པ་ཉིད་ལྟ་བུར་འགྱུར་རམ་སྙམ་དུ་དོགས་པ་བསལ་བའི་ཕྱིར། ཉེ་བར་སྦྱོར་བ་ནི་མ་ཡིན་ནོ་ཞེས་བྱ་བ་སྨྲས་ཏེ། རང་ལ་ཞེས་བྱ་བར་སྦྱར་རོ། །གལ་ཏེ་གཞན་ལ་བསྟན་པས་བདག་ཉིད་ལ་ཉེ་བར་སྦྱོར་ཞིང་འདོགས་པར་བྱེད་ན་གཞན་ལ་སྟོན་པ་ཉིད་མ་ཡིན་ནོ། །འདི་སྐད་
བསྟན་ཏེ། གལ་ཏེ་དགེ་སློང་སྔར་ནི་དགེ་སློང་གང་ལྷ་དག་མཐོང་པ་དེ་ཡོད་དོ་ཞེས་གཞན་ལ་སྟོན་པར་བྱེད་ལ། དེའི་འོག་ཏུ་ནི་འདི་སྐད་ཅེས་དེ་ནི་ང་ཉིད་དོ་ཞེས་བདག་ཉིད་ལ་སྦྱོར་བར་བྱེད་ན་དེའི་ཚེ་གཞན་ལ་བསྟན་པ་ཉིད་མ་ཡིན་གྱི། འདི་ལྟར་བདག་ཉིད་ལ་བསྟན་པ་ཉིད་དོ། དེའི་ཕྱིར་ཕམ་པ་ཁོ་ནར་འགྱུར་རོ། །དེ་ལྟར་ཡང་འདིར་གཞུང་ནི་འདི་སྐད་ཅེས་ང་ཉིད་དོ་ཞེས་མི་སྨྲ་ན་ཞེས་བྱ་བ་ཡིན་ནོ། །མ་བསམས་པར་བསྟན་པར་མི་བྱའོ་ཞེས་བྱ་བ་ནི། མ་བསམས་མ་བརྟགས་ལེགས་པར་སོ་སོར་བརྟག་པར་མ་བྱས་པར་འདས་པ་དང་མ་འོངས་པ་ལ་སོགས་པའི་ཡུལ་བསྟན་པར་མི་བྱའོ་ཞེས་བྱ་བའི་ཐ་ཚིག་སྟེ། ཅི་ནས་ཀྱང་ཕྱིས་འཇིག་རྟེན་དག་ཡིད་མི་ཆེས་པར་མི་འགྱུར་བ་དེ་ལྟར་བསམ་པར་བྱའོ། །སྨྲ་བའི་ཕམ་པར་འགྱུར་བ་རྣམ་པར་འབྱེད་པའོ་ཞེས་བྱ་བ་མིའི་ཆོས་བླ་མ་སྨྲ་བའི་ཕམ་པར་འགྱུར་བ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།རྣམ་པར་འབྱེད་པ་ལས་གསུངས་པ་བསྡུས་ནས་ཕྲན་ཆོགས་ཀྱི་སྐབས་ནི་མེད་པས་དེའི་ཕྱིར་ཞུ་བའི་སྐབས་བརྗོད་པར་བྱ་སྟེ། བླ་མ་ཐོབ་པ་ཡོངས་སུ་ཉམས་པ་གོ་བར་བྱེད་པ་ནི་མ་བརྗོད་པ་མ་ཡིན་ནོ་ཞེས་བྱ་བ་ནི། མིའི་ཆོས་བླ་མ་ཐོབ་པ་ཡོངས་སུ་ཉམས་པ་གང་ཡིན་པའི་ཐོབ་པ་ཡོངས་སུ་ཉམས་པ་དེ་གོ་བར་བྱེད་པ་གང་ཡིན་པ་དེ་ཡང་དེ་མ་བརྗོད་པ་མ་ཡིན་ཏེ། མིའི་ཆོས་བླ་མ་བརྗོད་པ་མ་ཡིན་གྱི། འདི་ལྟར་བརྗོད་པ་ཁོ་ནའོ། །འདི་སྐད་བསྟན་ཏེ། བདག་ནི་དགེ་སྦྱོང་གི་འབྲས་བུ་བཞི་ལས་ཉམས་པའོ་ཞེས་བྱ་བ་ལ་སོགས་པས་ཐོབ་པ་ལས་ཡོངས་སུ་ཉམས་པ་བརྗོད་པ་གང་ཡིན་པ་དེ་ཡང་མིའི་ཆོས་བླ་མ་མ་བརྗོད་པ་མ་ཡིན་ཏེ། བརྗོད་པ་ཁོ་ན་ཡིན་པས་གལ་ཏེ་བརྫུན་ན་ནི་ཕམ་པར་འགྱུར་རོ་ཞེས་བྱ་བའི་ཐ་ཚིག་གོ །གལ་ཏེ་མ་ཐོབ་པ་ལས་ཉམས་པར་གོ་བར་བྱེད་དེ། ཇི་སྟེ་ཡོན་ཏན་ཁྱད་པར་ཅན་སོད་པར་ཡིད་ཆེས་པར་འདོད་པས་བྱེད་ན་དེའི་ཚེ། གཞོགས་སྨོས་ཀྱི་སྐབས་ཀྱི་སྦོམ་པོར་འགྱུར་རོ། །འོན་ཏེ་བསམ་པ་དྲང་པོས་ན་ནི་དེ་ལ་ཉེས་པ་མེད་པ་ཉིད་དོ། །
བླ་མ་བརྗོད་པའི་འདུན་པས་མིང་མཐུན་པའི་དོན་བརྗོད་ན་སྦོམ་པོའོ་ཞེས་བྱ་བ་ནི་མིའི་ཆོས་བླ་མ་བརྗོད་པའི་འདུན་པ་བསམ་པས་དེ་དང་མིང་མཐུན་པ་བརྗོད་པ་སྦོམ་པོ་སྟེ། དེ་དང་མིང་འདྲ་བ་ནི་མིང་མཐུན་པ་སྟེ། མིང་མཚུངས་པའོ། །མིང་མཐུན་པ་དེས་མིང་མཐུན་པའི་དོན་བརྗོད་པ་ནི་མིང་མཐུན་པའི་དོན་བརྗོད་པའོ། །མིང་མཐུན་པ་བརྗོད་པ་དེ་ལ་མིའི་ཆོས་བླ་མ་བརྗོད་པར་བྱ་བའི་བསམ་པས་ནི་སྦོམ་པོ་སྟེ། དཔེར་ན་བདག་ནི་སློབ་པ་སྟེ། སོ་སོར་ཐར་པའི་སྡོམ་པ་ལ་སོགས་པ་ལ་ལོ་མ་གཅད་པ་ལ་སོགས་པ་ལ་སློབ་པ་ཉིད་ལས་བསམས་ཏེ། བདག་ནི་སློབ་པའོ་ཞེས་བྱ་བའི་ཚིག་བརྗོད་ན་སྦོམ་པོའོ། །བདག་ནི་མི་སློབ་པ་སྟེ། སོ་སོར་ཐར་པའི་མདོ་ལ་སོགས་པ་ལ་དོན་བྱས་ཤིང་བསླབས་ཟིན་པ་ཉིད་དམ། མི་སྦྱོར་བ་ཉིད་ལས་བསམས་ནས་བདག་ནི་མི་སློབ་པའོ་ཞེས་བརྗོད་པ་ལ་སོགས་པ་ཐམས་ཅད་ལ་སྦོམ་པོར་སྦྱར་རོ། །འདི་སྐད་བསྟན་ཏེ། མིའི་ཆོས་བླ་མ་དང་མི་མཐུན་པའི་མིང་གིས་མིའི་ཆོས་བླ་མ་བརྗོད་པར་འདོད་པས་བརྗོད་པ་གཞན་གྱིས་ཀྱང་ཐོས་ན་སྦོམ་པོའོ། །ནོར་ན་ཡང་ངོ་ཞེས་བྱ་བ་ནི། བརྗོད་པ་ཞེས་བྱ་བར་སྦྱར་ཏེ་རྒྱུན་དུ་ཞུགས་པའི་འབྲས་བུ་ལ་སོགས་པ་མི་བདེན་པ་མིའི་ཆོས་བླ་མ་བརྗོད་པར་བྱའོ་སྙམ་པ་ལས་ནོར་ཏེ་ལན་ཅིག་ཕྱིར་འོང་བའི་འབྲས་བུ་ལ་སོགས་པ་གོང་མ་གོང་མ་དག་བརྗོད་ན་ཡང་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །གཞོགས་སྨོས་ཀྱང་ངོ་ཞེས་བྱ་བ་ཡང་སྦོམ་པོའོ་ཞེས་བྱ་བར་སྦྱར་ཏེ། སྒྱུར་ཅིང་སྨྲ་བས་མིའི་ཆོས་བླ་མ་གཞོགས་སྨོས་བྱེད་ན་སྦོམ་པོའོ། །འདི་ལྟ་སྟེ་དཔེར་ན་ཨེ་མའོ་ཁྱོད་ཁོ་བོ་ཅི་འདྲ་བ་དེ་དེ་འདྲ་བར་འགྱུར་རོ། །ཁོ་བ་དང་ཁྱོད་དང་འུ་བུ་ཅག་འདི་ལྟར་རྒྱུན་དུ་ཞུགས་པ་དང་ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང་དགྲ་བཅོམ་པར་འགྱུར་རོ། །ཁོ་བོ་ནི་རྒྱུན་དུ་ཞུགས་པ་དང་དགྲ་བཅོམ་པའི་བར་ཡང་ཡིན་ནོ་ཞེས་དེ་སྐད་དུ་ཟེར་ཞེས་བྱ་བ་ལ་སོགས་པ་མཐར་འགྱུར་བའི་བླ་མ་གཞོགས་སྨོས་བྱེད་ལ་གཞན་གྱིས་ཐོས་ན་སྦོམ་པོར་འགྱུར་རོ་ཞེས་བྱ་བའི་ཐ་ཚིག་གོ །ཡང་དག་པ་ཕྱི་མ་ཉིད་ལ་དེ་མི་འབྱུང་བ་མ་ཡིན་ནོ་ཞེས་བྱ་བ་ལ་ཡང་
དག་པ་ཞེས་བྱ་བ་ནི་བདེན་པའོ། །ཕྱི་མ་ཞེས་བྱ་བ་ནི་ཐ་མའོ། །གང་ལ་གཞོགས་སྨོས་ཀྱི་ཚིག་ཕྱི་མ་བདེན་པ་ཡོད་པ་དེ་ན་ཡང་དག་པའི་ཕྱི་མ་སྟེ། ཁོ་བོ་ནི་རྒྱུན་དུ་ཞུགས་པ་ཡང་མ་ཡིན་དགྲ་བཅོམ་པའི་བར་ཡང་མ་ཡིན་ནོ་ཞེས་བྱའོ། །དེའི་དངོས་པོ་ནི་དེ་ཉིད་དོ་ཡང་དག་པ་ཕྱི་མ་ཉིད་དོ། །ལ་ཞེས་བྱ་བ་ནི་ཡང་དག་པའི་ཕྱི་མ་ཉིད་དོ་སྟེ། དེ་ལ་གཞོགས་སྨོས་དེ་མི་འབྱུང་བ་མ་ཡིན་ཏེ་འབྱུང་བ་ཉིད་དོ། །འདི་སྐད་བསྟན་ཏེ། སྔར་མིའི་ཆོས་བླ་མ་ཡང་དག་པ་མ་ཡིན་པ་སྨོས་ལ་ཕྱིས་ནི་ཚིག་ཡང་དག་པ་ལ་ཞུགས་ན། བདེན་པའི་དོན་ཕྱི་མ་ལ་ཞུགས་བ་དེ་ལ་མིའི་ཆོས་བླ་མ་ཡང་གཞོགས་སྨོས་བྱས་པའི་ཚིག་སྔ་མ་དེ་གཞོགས་སྨོས་མ་བྱས་པ་ཉིད་མ་ཡིན་གྱི། གཞོགས་སྨོས་བྱས་པ་ཁོ་ན་སྟེ། འདི་ལྟར་བྱས་པ་ལ་མ་བྱས་པ་མེད་པའི་ཕྱིར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྔར་མིའི་ཆོས་བླ་མ་གཞོགས་སྨོས་བྱ་བའི་ཚིག་བརྗོད་ལ་ཕྱིས་ནི་བདེན་པར་བརྗོད་ན་དེ་ལྟ་ན་ཡང་གཞོགས་སྨོས་ཀྱི་ཚིག་སྔ་མ་དེ་གཞོགས་སྨོས་ཉིད་དུ་མི་འགྱུར་བ་མ་ཡིན་ཏེ་འགྱུར་བ་ཁོ་ནའོ། །འདིར་གཞུང་ནི་བཙུན་པ་དགེ་སློང་འདི་སྐད་ཅེས་ཁྱིམ་སློང་མོ་སྟེར་བའི་ཁྱིམ་ཆེ་གེ་མོ་དགེ་སློང་གང་གི་ཡིན་པའི་དགེ་སློང་དེ་ནི་རྒྱུན་དུ་ཞུགས་པའམ། དགྲ་བཅོམ་པའི་བར་ཡིན་ནོ། །ཁྱིམ་སློང་མོ་སྟེར་བའི་ཁྱིམ་དེ་སུའི་ཡིན། དེས་སྨྲས་པ། ཁོ་བོའི་ཡིན་ཏེ། ཁོ་བོ་ནི་རྒྱུན་དུ་ཞུགས་པ་ཡང་མ་ཡིན། དགྲ་བཅོམ་པའི་བར་ཡང་མ་ཡིན་ནོ་ཞེས་མཆི་ན་ལྟུང་བ་ཅིར་འགྱུར། བཀའ་སྩལ་པ། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །སྨྲ་བའི་ཕམ་པར་འགྱུར་བ་ཞུ་བའི་སྐབས་སོ་ཞེས་བྱ་བ་མིའི་ཆོས་བླ་མ་སྨྲ་བའི་ཕམ་པར་འགྱུར་བ་ཞུ་པའི་སྐབས་ནས་འབྱུང་བ་རྫོགས་སོ།། །།ད་ནི་སྨྲ་བའི་ཕམ་པར་འགྱུར་བ་འདུལ་བྱེད་ཀྱི་སྐབས་ནས་གསུངས་པ་བསྡུ་བའི་ཕྱིར། སྦོམ་པོ་ནི་བཙུན་པ་ནི་དགྲ་བཅོམ་པ་ཆོས་གོས་ལ་སོགས་པ་མཆོག་འོས་པ། བྲམ་ཟེ་སྡིག་པའི་ཆོས་བསལ་ལ། བཙུན་པའི་དབང་པོ་དྲུག་པོ་དག་ནི་ཤིན་ཏུ་དུལ་བ། སྦས་པ། བསྲུངས་པ། བསྒོམས་པ་དག་ཡིན་ནོ་ཞེས་ཟེར་བཅད་མི་སྨྲ་བས་དང་དུ་ལེན་པར་བྱེད་ན་འོ་ཞེས་བྱ་བ་
སྨྲས་ཏེ། བཙུན་པ་ནི་དགྲ་བཅོམ་པའོ་ཞེས་ཟེར་བ་ལ། དགེ་སློང་གིས་ཅང་མི་སྨྲ་བས་དང་དུ་ལེན་པར་བྱེད་ན་སྦོམ་པོའོ། །དེ་བཞིན་དུ་ཀྱེ་བཙུན་པ་ནི་ཆོས་གོས་ལ་སོགས་པ་མཆོག་འོས་པའོ་ཞེས་ཟེར་བ་ལ་དགེ་སློང་གིས་ཅང་མི་སྨྲ་བས་དང་དུ་ལེན་པར་བྱེད་ན་ཡང་སྦོམ་པོའོ། །དེ་བཞིན་དུ་བཙུན་པ་ནི་བྲམ་ཟེ་སྡིག་པའི་ཆོས་བསལ་པའོ་ཞེས་ཟེར་བ་ལ། དགེ་སློང་གིས་ཅང་མི་སྨྲ་བས་དང་དུ་ལེན་པར་བྱེད་ན་ཡང་སྦོམ་པོའོ། །སྡིག་པའི་ཆོས་བསལ་བ་ཞེས་བྱ་བ་ནི་སྡིག་པའི་ཆོས་དང་བྲལ་བ་ཞེས་བྱ་བའི་ཐ་ཚིག་གོ །དབང་པོ་དྲུག་པོ་དག་ནི་མིག་ལ་སོགས་པ་དག་གོ །ཤིན་ཏུ་དུལ་བ་ཞེས་བྱ་བ་ནི། མི་སྡུག་པ་ལ་སོགས་པ་བསྒོམས་པས་སོ། །ཤིན་ཏུ་སྦས་པ་ཞེས་བྱ་བ་ནི་ཟག་པ་མེད་པའི་ལམ་བསྐྱེད་པས་སོ། །ཤིན་ཏུ་བསྲུངས་པ་ཞེས་བྱ་བ་ནི། དྲན་པ་དང་ཤེས་བཞིན་དག་གིས་སོ། །ཤིན་ཏུ་བསྒོམས་པ་ཞེས་བྱ་བ་ནི་ཉོན་མོངས་པ་མེད་པ་ལ་སོགས་པ་མངོན་དུ་གྱུར་པས་སོ། །དང་དུ་ལེན་པ་ཡང་རྣམ་པ་གཉིས་ཏེ། ཚིག་གིས་དང་དུ་ལེན་པ་དང༌། ཅང་མི་སྨྲ་བས་དང་དུ་ལེན་པའོ། །དེ་ལ་ཚིག་གིས་དང་དུ་ལེན་པ་ནི་ཕམ་པར་འགྱུར་རོ། །ཅང་མི་སྨྲ་བས་དང་དུ་ལེན་པ་ནི་སྦོམ་པོར་རོ། །དེའི་ཕྱིར་འདིར་གཞུང་ནི་ཅང་མི་སྨྲ་བས་ཞེས་བྱ་བ་སྨོས་ཏེ། དང་དུ་ལེན་པ་ཙམ་གྱིས་སྦོམ་པོ་ཁོ་ནར་འགྱུར་བ་ཡང་མ་ཡིན་ཏེ། འོ་ན་ཅི་ལྟ་ཞེ་ན། གཞན་གྱིས་དེའི་དོན་གོ་ན་དེས་སྦོམ་པོར་འགྱུར་རོ། །མགོན་ན་ནི་ཉེས་བྱས་སོ། །བཙུན་པ་གལ་ཏེ་དགྲ་བཅོམ་པ་ཡིན་ན་བདག་གི་བསོད་སྙོམས་ལོང་ཤིག །ཁྱིམ་དུ་ཞུགས་ཤིག །སྙན་ལ་འདུག་ཤིག །ལག་ཆུ་ཟེད་ཅིག །བཟའ་བ་དང༌། སྲན་ཚོད་དང་བཅའ་བ་ལོང་ལ་ཟོ་ཤིག །རྗེས་སུ་ཡི་རང་བར་བྱོས་ཤིག །བྱུང་ཤིག་ཅེས་པ་ལ་དེ་བཞིན་དུ་སྒྲུབ་ནའོ་ཞེས་བྱ་བ་ནི། མདོ་སྔ་མ་ལས་ཟེར་བ་ལ་ཞེས་བྱ་བའི་རྗེས་དང་སྦྱར་ཏེ། བཙུན་པ་གལ་ཏེ་དགྲ་བཅོམ་པ་ཡིན་ན་བདག་གི་བསོད་སྙོམས་ལེན་པར་བྱེད་ན་སྦོམ་པོའོ། །མངོན་སུམ་དུ་ཚིག་གིས་གོ་བར་བྱེད་པ་མེད་པས་ཡན་ལག་མ་ཚང་བའི་ཕྱིར་དེས་ན་སྦོམ་པོ་སྟེ། བམ་པར་མི་
འགྱུར་རོ། །དེ་བཞིན་དུ་ཁྱིམ་དུ་ཞུགས་ཤིག །ཅེས་ཟེར་བ་ལ་འདུག་པ་དང༌། སྟན་ལ་འདུག་ཅིག་ཅེས་ཟེར་བ་ལ་སྟན་ལ་འདུག་པ་དང༌། ལག་ཆུ་ཟེད་ཅིག་ཅེས་ཟེར་བ་ལ་ལག་ཆུ་ཟེད་པ་དང༌། བཟའ་བ་དང་སྲན་ཚོད་དང༌། བཅའ་བ་ལོང་ལ་ཟོ་ཤིག་ཅེས་ཟེར་བ་ལ་ལེན་པ་དང༌། ཟ་བར་བྱེད་པ་སྟེ། ལོང་ལ་ཞེས་བྱ་བ་ནི་བྱིན་ལེན་གྱིས་ཤིག་ཅེས་པའོ། །ཟོ་ཤིག་ཅེས་བྱ་བ་ནི་བཟའ་བ་དང་སྲན་ཚོད་དང་བཅའ་བ་ཞེས་བྱ་བའི་ཚིག་གསུམ་ཆར་དད་སྦྱར་བར་བྱའོ། །དེ་བཞིན་དུ་རྗེས་སུ་ཡི་རང་བར་བྱོས་ཤིག་ཅེས་ཟེར་བ་ལ་རྗེས་སུ་ཡི་རང་བར་བྱེད་པ་དང༌། བྱུང་ཤིག་ཅེས་ཟེར་བ་ལ་བྱུང་ན་སྦོམ་པོའོ་ཞེས་བྱ་བར་སྦྱར་རོ། །རྗེས་སུ་ཡི་རང་བ་ཡང་རྣམ་པ་གཉིས་ཏེ། སེམས་ཀྱིས་དང་ཚིག་གིས་སོ། །དེ་ལ་སེམས་ཀྱིས་རྗེས་སུ་ཡི་རང་ན་ནི་སྦོམ་པོའོ། །ཚིག་གིས་ན་ནི་ཕམ་པར་འགྱུར་རོ། །འདི་སྐད་བསྟན་ཏེ། གལ་ཏེ་བཙུན་པ་དགྲ་བཅོམ་པ་ཡིན་ན་རྗེས་སུ་ཡི་རང་བར་བྱོས་ཤིག །ཅེས་ཟེར་བ་ལ་ཅང་མི་སྨྲ་བས་རྗེས་སུ་ཡི་རང་བར་བྱས་ན་ནི་སྦོམ་པོ་སྟེ། སྨྲ་བའི་མཚན་ཉིད་ཀྱི་ཡན་ལག་མེད་པའི་ཕྱིར་རོ། །སྨྲ་བའི་ཕམ་པར་འགྱུར་བ་འདུལ་བྱེད་དག་གོ་ཞེས་བྱ་བ་འདུལ་བྱེད་ཀྱི་སྐབས་བཤད་ཟིན་ཏོ། །སྨྲ་བའི་ཕམ་པར་འགྱུར་བ་རྫོགས་སོ་ཞེས་བྱ་བ་མིའི་ཆོས་བླ་མ་སྨྲ་བ་ཞེས་བྱ་བའི་ཕམ་པར་འགྱུར་བ་བཞི་པ་རྫོགས་སོ།། །།ཕམ་པར་འགྱུར་བ་རྣམས་བསྟན་ནས། ད་ནི་ཁུ་བ་འབྱིན་པ་ལ་སོགས་པ་དགེ་འདུན་ལྷག་མ་བརྗོད་པར་བྱ་སྟེ། ཁུ་བ་འབྱིན་པ་ལ་སོགས་པ་ནི་རྨི་ལམ་ན་ཡང་སྲིད་པས་དེའི་ཕྱིར། རྨི་ལམ་ན་ནི་མེད་པ་དང་འདྲའོ་ཞེས་བྱ་བ་སྨྲས་ཏེ། དངོས་པོ་མེད་པ་དང་འདྲ་བར་འགྱུར་བས་དེའི་ཕྱིར་མེད་པ་དང་འདྲའོ། །འདི་ལྟར་རྨི་ལམ་རྫས་སུ་ཡོད་པ་ཡིན་ཡང་དེ་ལྟ་མོད་ཀྱི། འཇིག་རྟེན་གྱི་ཐ་སྙད་ལས་ཤིན་ཏུ་འདས་པ་ཡིན་པའི་ཕྱིར་རྨི་ལམ་ནི་མེད་པ་དང་འདྲ་བ་ཉིད་ཡིན་ནོ། །དེའི་འབྲས་བུ་ནི་མ་བྱས་པ་ཉིད་དོ་ཞེས་བྱ་བ་ནི་རྨི་ལམ་གྱི་འབྲས་བུ་ལུས་དང་ངག་རྣམ་པར་འགྱུར་བ་དང༌། ཁུ་བ་འབྱིན་པ་ལ་སོགས་པ་ནི་མ་བྱས་པ་ཉིད་དུ་རིག་པར་བྱའོ། །རྨི་ལམ་ནི་རྣམ་པ་གཉིས་སུ་འདོད་
དེ། ཁ་ཅིག་ནི་གཉིད་དང་ལྡན་པའི་སེམས་རྨི་ལམ་གྱི་སྒྲར་བརྗོད་པར་འདོད་དོ། །ཁ་ཅིག་ནི་སེམས་དེའི་ཡུལ་བུད་མེད་ལ་སོགས་པ་གང་ཡིན་པ་རྨི་ལམ་གྱི་སྒྲར་བརྗོད་པར་འདོད་དེ། སེམས་དེ་དང་བུད་མེད་ལ་སོགས་པ་ཡུལ་དེས་གཉིད་ལོག་པའི་གནས་སྐབས་ན་ཁུ་བ་འབྱིན་པ་ལ་སོགས་པ་གང་བྱས་པ་དེ་ནི་མ་བྱས་པར་རིག་པར་བྱའོ། །ད་ནི་ཁུ་བ་འབྱིན་པའི་དགེ་འདུན་ལྷག་མའི་མཚན་ཉིད་བརྗོད་པ་པར་བྱ་སྟེ། གང་བྱས་ན་ཁུ་བ་འབྱིན་པའི་དགེ་འདུན་ལྷག་མ་ཞེས་བྱ་བའི་ཁ་ན་མཐོ་བར་འགྱུར་ཞེ་ན་དེའི་ཕྱིར། ཕྱུང་བ་ནའོ་ཞེས་བྱ་བ་སྨྲས་ཏེ། ཁུ་བ་ཕྱུང་ན་དགེ་འདུན་ལྷག་མར་འགྱུར་རོ། །ལྟུང་བ་གང་གི་ལྷག་མར་དགེ་འདུན་གྱིས་གསོ་བར་བྱ་བ་དེ་ནི་དགེ་འདུན་ལྷག་མ་སྟེ། དེ་ལ་དགེ་འདུན་གྱིས་གསོ་བར་བྱའོ་ཞེས་བྱ་བའི་ཐ་ཚིག་གོ །སེམས་ཇི་ལྟ་བུས་ཤེན་དེའི་ཕྱིར། དེང་འདུན་པས་སོ་ཞེས་བྱ་བ་སྨྲས་ཏེ། འབྱིན་པར་འདུན་པས་ཡིན་གྱི་རྒྱུག་པ་ལ་སོགས་པའི་སེམས་ཀྱིས་ནི་མ་ཡིན་ནོ། །རྫས་གཞན་ལ་ཡང་འབྱུང་བ་སྲིད་པས་གང་ཕྱུང་ཞེ་ན་དེའི་ཕྱིར། རང་གི་ཁུ་བའོ་ཞེས་བྱ་བ་སྨས་ཏེ། རང་གི་ཁུ་པ་ཡིན་གྱི་གཞན་གྱི་ནི་མ་ཡིན་ནོ། །ཁུ་བ་ཕྱུང་བ་ནི་མང་དུ་ཡོད་དེ་འདི་ལྟ་སྟེ། གནས་ནས་འབྱུང་བ་དང༌། སྦུབས་སུ་འོངས་པ་ལས་འབྱུང་བ་དང༌། དབང་པོའི་མཐའ་ནས་འབྱུང་བའོ། །དེའི་ཕྱིར་འབྱུང་བ་དེ་དག་ལས་ཕྱུང་བ་གང་ལ་དགེ་འདུན་ལྷག་མར་འགྱུར་ཞེ་ན་དེའི་ཕྱིར། དང་པོ་ལའོ་ཞེས་བྱ་བ་སྨྲས་ཏེ། གནས་ནས་འབྱུང་བ་ནི་དང་པོ་སྟེ། ཕྱུང་བ་དེ་ལའོ་ཞེས་བྱ་བའི་ཐ་ཚིག་གོ །ལུས་འདི་ལ་ཁུ་བའི་གནས་སུ་གྱུར་པ་ལོགས་ཤིག་ན་འཁྲིས་པ་ལྟ་བུ་མེད་དོ། །འོན་ཀྱང་དེ་ནི་ཤིང་མ་ཞོ་བཞིན་ལུས་ཐོག་དག་ལས་འབྱུང་སྟེ། དཔེར་ན་བུ་རམ་ཤིང་ལས་ཁུ་བ་དང་འབྲུ་ལས་འབྲུ་མར་བཞིན་ནོ། །དང་པོ་ལས་འབྱུང་བའི་མཚན་ཉིད་བརྗོད་པ་ནི་འདི་ཡིན་ཏེ། དེ་མྱོང་བའི་གནས་སྐབས་དེ་ན་འདོད་ཆགས་ཤས་ཆེ་རབ་ཏུ་འགྱུར་བ་དང༌། བདེ་བ་ཉམས་སུ་མྱོང་བ་ཆེན་པོ་སྐྱེ་བ་དང༌། སྙིང་འདར་བ་ལ་སོགས་པ་ལུས་འགྱུར་བ་འབྱུང་བ་ཡིན་ནོ། །མདོ་བྱེད་པས་དེ་ག་ལས་ཤེ་ན་ཉེ་བ་འཁོར་གྱིས་ཞུས་པ་ལས་ཏེ། བཙུན་
པ་ཇི་ཙམ་གྱིས་ནི་ཁུ་བ་ཕྱུང་བར་བརྗོད་པར་བགྱི། གང་ནས་སྦུབས་སུ་འོངས་པར་གྱུར་ནའོ་ཞེས་གསུངས་པ་ལས་སོ། །རྣམ་པར་འབྱེད་པའི་ཚིག་ལས་ཀྱང་ཕྱུང་བ་ཞེས་བྱ་བའི་མདོའི་ཚིག་འདི་ནི་དེ་མ་ཐག་ཏུ་ཕྱུང་བའོ་ཞེས་རྣམ་པར་འབྱེད་པ་ལས་གསུངས་ཏེ། སྦུབས་སུ་འོངས་པ་ལས་ཕྱུང་ན་ནི་ཉེས་པ་སྦོམ་པོའོ་ཞེས་གསུངས་པའི་ཕྱིར་རོ། །འབྱིན་པར་འདུན་པ་ནི་རྣམ་པ་མང་དུ་སྣང་སྟེ། ལ་ལ་ནི་བདེ་བའི་ཕྱིར། ལ་ལ་ནི་རིག་སྔགས་ཀྱི་ཕྱིར། ལ་ལ་ནི་ས་བོན་གྱི་ཕྱིར། ལ་ལ་ནི་སྨན་གྱི་ཕྱིར། ལ་ལ་ནི་བརྟག་པའི་ཕྱིར་འབྱིན་ཏེ། དེ་ལ་སོགས་པའི་རྣམ་པ་སྣང་བའི་ཕྱིར། ཅི་ཐམས་ཅད་ཁ་ན་མཐོ་བ་འདྲའམ། འོན་ཏེ་བྱེ་བྲག་ཡོད་ཅེ་ན། དེའི་ཕྱིར་བདེ་བ་དང༌། རིག་སྔགས་དང༌། ས་བོན་དང༌། །སྨན་དང༌། བརྟག་པའི་ཕྱིར་དེ་དག་ལ་བྱེ་བྲག་མེད་དོ་ཞེས་བྱ་བ་སྨྲས་ཏེ། ཕྱིར་ཞེས་བྱ་བའི་སྒྲ་རེ་རེ་དང་སྦྱར་བར་བྱ་སྟེ། བདེ་བ་དང༌། རིག་སྔགས་དང༌། ས་བོན་དང༌། སྨན་དང༌། བརྟག་པ་ཞེས་བྱ་བ་རེ་རེར་དབྱེ་བ་བྱས་ལ་དེ་ནས་བདེ་བའི་ཕྱིར་དང༌། རིག་སྔགས་ཀྱི་ཕྱིར་ཞེས་བྱ་བ་ལ་སོགས་པར་སྦྱར་རོ། །དེ་དག་གི་ཕྱིར་ཁུ་བ་འབྱིན་པ་ལ་ནི་ལྟུང་བ་ལ་བྱེ་བྲག་མེད་དེ། ཐམས་ཅད་དགེ་འདུན་ལྷག་མར་འགྱུར་བའི་ཕྱིར་རོ། །རྣམ་པ་གང་གིས་འབྱིན་པ་ཞེ་ན་དེའི་ཕྱིར། རེག་པས་སོ་ཞེས་བྱ་བ་སྨས་ཏེ། ཚུལ་བཞིན་མ་ཡིན་པ་ཡིད་ལ་བྱེད་པ་ལ་སོགས་པ་ཙམ་གྱིས་ནི་མ་ཡིན་ནོ། །ཕྲད་པ་ཙམ་གྱིས་ཀྱང་རེག་པར་སྲིད་པའི་ཕྱིར། རེག་པ་ཇི་ལྟ་བུས་ཤེ་ན། དེའི་ཕྱིར་བརྩལ་བས་སོ་ཞེས་བྱ་བ་སྨྲས་ཏེ། བྱ་བས་དྲུད་པ་ལ་སོགས་པ་ཡིན་གྱི། ཕྲད་པ་ཙམ་གྱིས་ནི་མ་ཡིན་ནོ། །དེ་ལྟར་ཡང་རྣམ་པར་འབྱེད་པ་ལས་རྩོལ་ན་ཞེས་གསུངས་བ་ལ་འདུལ་བྱེད་དག་ལས་ཀྱང་དགེ་སློང་ཡན་ལག་གི་རྣམ་པ་བཟུང་བ་ལ་མི་གཙང་བ་བྱུང་བ་དང༌། བཅོམ་ལྡན་འདས་ཀྱིས་བཀའ་སྩལ་བ། ཉེས་པ་སྦོམ་པོར་འགྱུར་རོ་ཞེས་གསུངས་སོ།། །།བམ་པོ་བཅུ་གསུམ་པ། གང་ལ་རེག་པས་ཤེ་ན་དེའི་ཕྱིར། ཡན་ལག་གི་རྣམ་པ་ལ་འོ་ཞེས་བྱ་བ་
སྨྲས་ཏེ། ཕོའི་དབང་པོ་ལའོ། །བརླའི་ཕྱོགས་ལ་སོགས་པ་གཞན་གྱི་ཕྱོགས་ལ་ནི་མ་ཡིན་ཏེ། དེ་ལ་རེག་པ་ལས་འབྱུང་བ་སྲིད་པའི་ཕྱིར་རོ། །གང་གིས་རེག་པས་ཤེ་ན། དེའི་ཕྱིར་ཕྱི་རོལ་གྱིས་ཀྱང་ངོ་ཞེས་བྱ་བ་སྨྲས་ཏེ། ནང་གི་རང་དང་གཞན་གྱི་ལག་པ་འབའ་ཞིག་གིས་ནི་མ་ཡིན་ནོ། །ཕྱི་རོལ་ཡང་རྣམ་པ་གཉིས་ཏེ། སེམས་ཅན་དུ་བགྲང་བ་ཤི་བའི་ལུས་དང་སེམས་ཅན་དུ་བགྲང་བ་ཡང་མ་ཡིན་པ་གོས་ལ་སོགས་པའོ། །དེའི་ཕྱིར་ཕྱི་རོལ་དུ་གྱུར་པ་སེམས་ཅན་དུ་བགྲང་བ་མ་ཡིན་པ་བསལ་བའི་ཕྱིར། སེམས་ཅན་དུ་བགྲང་བས་སོ་ཞེས་བྱ་བ་སྨྲས་ཏེ། ལག་པ་ལ་སོགས་པ་གཅད་པས་སོ། །ཕྱི་རོལ་དུ་གྱུར་པ་སེམས་ཅན་དུ་བགྲང་བ་ལ་ཡང་སེམས་ཅན་གྱི་རྣམ་པ་མ་ཡིན་པ་ཡང་སྲིད་པས་བྱེ་བྲག་ཏུ་བྱ་བའི་ཕྱིར། དེའི་རྣམ་པར་གནས་པའོ་ཞེས་བྱ་བ་སྨྲས་ཏེ། རང་གི་རྣམ་པ་གང་ཡིན་པ་དེར་གནས་པས་སོ། །འདི་སྐད་བསྟན་ཏེ། ཡན་ལག་གང་ཡང་རུང་བར་རང་གི་རྣམ་པ་ལས་མ་ཉམས་པས་རེག་པས་ཕྱུང་ན་ཡང་དགེ་འདུན་ལྷག་མར་འགྱུར་གྱི། ལག་པ་ཁོ་ནས་རེག་པ་ཕྱུང་བར་མ་ཟད་དོ། །ལུས་ཀྱི་རྣམ་པ་ལས་ཉམས་པས་ཕྱུང་ན་ནི་སྦོམ་པོ་སྟེ། ཤའི་དུམ་བུས་ནི་སྦོམ་པོའོ་ཞེས་གསུངས་པའི་ཕྱིར་རོ། །བརྩལ་བས་སོ་ཞེས་བྱེ་བྲག་མ་བསྟན་པས་འདི་ལྟར་རྣམ་པ་གང་ཡང་རུང་བའི་རྣམ་པའི་བརྩལ་བས་རེག་པས་སོ་ཞེས་བྱ་བར་ཤེས་པས་བཅངས་པས་བརྩལ་བའི་རང་བཞིན་འབའ་ཞིག་ཏུ་མ་ཟད་དེ། འདི་ལྟར་དེ་ཉིད་ཀྱི་དོན་བསྟན་པའི་ཕྱིར་རིལ་གྱིས་བཅངས་པ་དང༌། དམ་དུ་བཅིང་བ་གཉིས་མེད་པར་ཡང་ངོ་ཞེས་བྱ་བ་སྨྲས་ཏེ། རིལ་གྱིས་བཅང་བ་ཞེས་བྱ་བ་ནི་ཀུན་བཟུང་བའོ། །དམ་དུ་བཅང་བ་ཞེས་བྱ་བ་ནི། དེ་ལྟར་བཅངས་པ་ལ་དམ་དུ་འཛིན་པའོ། །དེ་གཉིས་མེད་པར་བརྩལ་བས་རེག་པས་ཕྱུང་ན་ཡང་དགེ་འདུན་ལྷག་མའོ། །འདི་སྐད་བསྟན་ཏེ། འདི་ལྟར་དགེ་སློང་གིས་ཡན་ལག་གི་རྣམ་པ་རིལ་གྱིས་འཆང་བར་མི་བྱེད། དམ་དུ་བཅང་བར་མི་བྱེད་དུ་ཟིན་ཀྱང་ཕྱོགས་གཅིག་བཅངས་ཤིང་ཕྱོགས་གཅིག་བསྡམས་པས་ཕྱུང་ན་ཡང་དགེ་འདུན་ལྷག་མའོ། །ད་ནི་བདེ་བ་ཉམས་སུ་
མྱོང་བ་ཤས་ཆེན་པོ་མེད་ཀྱང་དགེ་འདུན་ལྷག་མར་འགྱུར་བ་ཁོ་ནར་བསྟན་པའི་ཕྱིར། བྱེ་བྲག་ངེས་པར་མྱོང་བ་དང༌། བྱུང་ལ་ཐུག་པ་དང༌། ངད་ལས་པའི་བདེ་བ་ཉམས་སུ་མྱོང་བ་དག་ཀྱང་ངོ་ཞེས་བྱ་བ་སྨྲས་ཏེ། ཀྱང་ངོ་ཞེས་བྱ་བའི་སྒྲས་ནི་མེད་པར་ཡང་ངོ་ཞེས་བྱ་བར་སྦྱར་ཏེ། བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བ་དང༌། བྱུང་ལ་ཐུག་པའི་བདེ་བ་ཉམས་སུ་མྱོང་བ་དང༌། ངད་ལས་པའི་བདེ་བ་ཉམས་སུ་མྱོང་བ་དག་མེད་པར་ཡང་བརྩལ་བས་རེག་པས་ཕྱུང་ན་དགེ་འདུན་ལྷག་མར་འགྱུར་གྱི། རིལ་གྱིས་བཅང་བ་དང་དམ་དུ་བཅད་བ་གཉིས་མེད་པར་ཡང་ངོ་ཞེས་བྱ་བ་འབའ་ཞིག་ཏུ་མ་ཟད་དོ། །དེ་ལ་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བ་མེད་པར་ཡང་ཞེས་བྱ་བ་ལ་བྱེ་བྲག་ལས་ངེས་པར་འགྱུར་བའི་ལོངས་སྤྱད་པ་མངོན་དུ་གྱུར་པ་མྱོང་བ་ནི། བྱེ་བྲག་ངེས་པར་མྱོང་བ་སྟེ། བུད་མེད་དང་སྐྱེས་པ་ཀུན་དུ་སྤྲད་པའི་གནས་སྐབས་སོ། །དེ་ན་བདེ་བ་གང་ཡོད་པ་དེ་ནི་དེའི་བདེ་བའོ། །དེ་ཉམས་སུ་མྱོང་བ་ནི་རོ་མྱོང་བ་སྟེ། དེ་མེད་པར་ཡང་ངོ༌། །འདི་སྐད་བསྟན་ཏེ། དང་པོར་མི་ཚངས་པར་སྤྱོད་པ་ལ་ཀུན་དུ་རྟོག་པ་སྐྱེས་ནས་ཚུལ་བཞིན་མ་ཡིན་པ་ཡིད་ལ་བྱེད་པས་ཟིལ་གྱིས་ནོན་པར་གྱུར་པ་ན་ལུས་ཀྱི་དབང་པོ་རིལ་གྱིས་མནམས་པས་འདོད་ཆགས་དང་ལྡན་པའི་ལུས་ཀྱི་རྣམ་པར་ཤེས་པ་སྐྱེད་པར་བྱེད་པའི་རེག་པའི་བྱེ་བྲག་སྐྱེ་བར་འགྱུར་བ་དེའི་གནས་སྐབས་ན་བདེ་བ་གང་ཉམས་སུ་མྱོང་ཞིང་བདེ་བ་དེས་ཉེ་བར་འཚོ་བ་དེ་ནི་བྱེ་བྲག་ངེས་པར་མྱོང་བའི་བདེ་བ་ཞེས་བྱ་སྟེ། དེ་མེད་པར་ཡང་བརྩལ་བས་རེག་པར་ཕྱུང་ན་དགེ་འདུན་ལྷག་མའོ། །བྱུང་ལ་ཐུག་པའི་བདེ་བ་ཉམས་སུ་མྱོང་བ་མེད་པར་ཡང་ཞེས་བྱ་བ་ལ་ལུས་ཀྱི་དབང་པོ་ལས་ཁུ་བ་འདོན་ལ་ཐུག་པ་ནི་བྱུང་ལ་ཐུག་པ་ཞེས་བྱ་བ་སྟེ། ཁུ་བ་འབྱུང་ཀའི་གནས་སྐབས་སོ། །དེ་ན་བདེ་བ་གང་ཡོད་པ་དེ་ནི་དེའི་བདེ་བའོ། །དེ་ཉམས་སུ་མྱོང་བ་ནི་རོ་མྱོང་བ་སྟེ། དེ་མེད་པར་ཡང་ངོ༌། །འདི་སྐད་བསྟན་ཏེ། ལུས་ཀྱི་དབང་པོ་ལས་ཁུ་བ་འབྱུང་ཀའི་གནས་སྐབས་ན་དེ་ལ་གཞོལ་བས་བདེ་བ་གང་ཉམས་སུ་མྱོང་ཞིང་བདེ་བས་ཉེ་བར་འཚོ་
བ་དེ་ནི་བྱུང་ལ་ཐུག་པའི་བདེ་བ་ཉམས་སུ་མྱོང་བ་ཞེས་བྱ་སྟེ། དེ་མེད་པར་བརྩལ་ཏེ་རེག་པས་ཕྱུང་ན་དགེ་འདུན་ལྷག་མའོ། །ངད་ལས་པའི་བདེ་བ་ཉམས་སུ་མྱོང་བ་མེད་པར་ཡང་ཞེས་བྱ་བ་ལ། གདུང་བ་དང་བྲལ་བར་གྱུར་པ་ནི་ངད་ལས་པ་ཞེས་བྱ་བ་སྟེ། འདོད་ཆགས་ཀྱི་གདུང་བ་དང་བྲལ་བའི་གནས་སྐབས་སོ། །དེ་ནི་བདེ་བ་གང་ཡོད་པ་དེ་ནི་དེའི་བདེ་བའོ། །དེ་ཉམས་སུ་མྱོང་བ་ནི་རོ་མྱོང་བ་སྟེ། དེ་མེད་པར་ཡང་ངོ༌། །འདི་སྐད་བསྟན་ཏེ། ཁུ་བ་ཕྱུང་ནས་དེའི་མོད་ལ་འདོད་ཆགས་ཀྱི་གདུད་བ་དང་བྲལ་བའི་གནས་སྐབས་ན་དེ་ལ་གཞོལ་བས་བདེ་བ་གང་ཉམས་སུ་མྱོང་ཞིང་བདེ་བས་ཉེ་བར་འཚོ་བ་དེ་ནི་ངད་ལས་པའི་བདེ་བ་ཉམས་སུ་མྱོང་བ་ཞེས་བྱ་སྟེ། དེ་མེད་པར་བརྩལ་བས་རེག་པས་ཕྱུང་ན་དགེ་འདུན་ལྷག་མའོ། །དེ་ལྟར་ན་གང་ལ་ཁུ་བ་ཕྱུང་བ་ཙམ་ཁོ་ནའི་ཉེ་བར་འཚོ་བ་ཡོད་པ་དེ་ལ། དེ་དག་མེད་ཀྱང་དགེ་འདུན་ལྷག་མར་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་ཞིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །དེ་བཞིན་དུ་བྱུང་ལ་ཐུག་པའི་བདེ་བ་ཉམས་སུ་མྱོང་ཞིང་ཁུ་བ་འབྱིན་ན་དགེ་འདུན་ལྷག་མར་འགྱུར་རོ། །གལ་ཏེ་དགེ་སློང་གིས་བྱེ་བྲག་ངེས་པར་ཉམས་སུ་མྱོང་བའི་བདེ་བ་ཉམས་སུ་མྱོང་ཞིང་འོག་མ་གཉིས་མེད་པར་ཁུ་བ་འབྱིན་ན་ཡང་དགེ་འདུན་ལྷག་མའི་ལྟུང་བ་ཁོ་ནར་འགྱུར་རོ། །དེ་བཞིན་དུ་བྱུང་ལ་ཐུག་པའི་བདེ་བ་ཉམས་སུ་མྱོང་ཞིང་དང་པོ་དང་ཐ་མ་གཉིས་མེད་པར་ཁུ་བ་འབྱིན་ན་ཡང་དགེ་འདུན་ལྷག་མའི་ལྟུང་བ་ཁོ་ནར་འགྱུར་རོ་ཞེས་གསུངས་པ་ཡིན་ནོ། །དོན་འདི་ལ་ཁུངས་ནི་དེ་ཡིན་པར་རིག་པར་བྱའོ། །དེ་ལྟར་ཁུ་བ་འབྱིན་པའི་སྐབས་འདི་ལ་ཡན་ལག་བཅུ་སྟེ། ཕྱུང་བ་དང༌། དེར་འདུན་པ་དང༌། རང་གི་ཁུ་བ་དང༌། དད་པ་དང༌། རེག་པ་དང༌། བརྩལ་བ་དང༌། ཡན་ལག་གི་རྣམ་པ་དང༌། ཕྱི་རོལ་གྱིས་དང༌། སེམས་ཅན་དུ་བགྲང་བས་དང༌། དེའི་རྣམ་པར་གནས་པས་ཏེ། ཡན་ལག་བཅུ་པོ་དེ་དག་ལས་གང་ཡང་རུང་བ་ཞིག་མ་ཚད་ན་ནི་ཉེས་པ་སྦོམ་པོ་ཞེས་བྱ་བའི་ལྟུང་བར་འགྱུར་ཏེ། དགེ་འདུན་
ལྷག་མར་མི་འགྱུར་རོ། །སྦུབས་སུ་མ་འོངས་པའོ་ཞེས་བྱ་བ་ནི། ཕྱུང་ན་དགེ་འདུན་ལྷག་མའོ། །སྦུབས་སུ་འོངས་པ་བྱུང་བའི་སྦོམ་པོའོ་ཞེས་འབྱུང་ངོ༌། །ཁུ་བ་འབྱུང་བའི་གནས་ནས་མ་འཕོས་པ་ནི་སྦུབས་སུ་མ་འོངས་པ་ཞེས་བྱའོ། །དང་པོ་འཕོས་པོ་ནི་སྦུབས་སུ་འོངས་པ་ཞེས་བྱའོ། །ཤུགས་ཀྱི་གནས་སྐབས་སུ་བཏང་ན་རྫོགས་པར་མ་བྱས་པ་ཉིད་དོ་ཞེས་བྱ་བ་ནི། ཤུགས་ཀྱི་གནས་སྐབས་སུ་བཏང་ན་རྫོགས་པར་མ་བྱས་པ་ཉིད་དོ་ཞེས་བྱ་བར་སྦྱར་རོ། །དེ་མ་ཐག་ཏུ་འཕོ་བར་འགྱུར་བ་ནི་ཤུགས་ཞེས་བྱ་སྟེ། དེའི་གནས་སྐབས་སུ་ལུས་ཀྱི་བརྩལ་བ་བཏང་ན་ཁུ་བ་འབྱིན་པ་རྫོགས་པར་མ་བྱས་པ་ཉིད་དོ། །འདི་སྐད་བསྟན་ཏེ། ཤུགས་ཀྱི་གནས་སྐབས་ཞེས་བྱ་བ་དུས་ཉེ་བར་འབྱུང་བའི་གནས་སྐབས་སུ་བརྩལ་བ་བཏང་ན་སྦྱོར་བ་སྔ་མའི་དབང་གིས་ཁུ་བ་ཕྱུང་བ་གང་ཡིན་པའི་བྱུང་བ་དེ་ནི་མ་བྱས་པ་ཉིད་དེ། དེ་ལ་ཉེས་པ་སྦོམ་པོ་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི། ཤུགས་བཏང་སྟེ་ཁུ་བ་ཕྱུང་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །བཏང་བ་ཞེས་བྱ་བ་འདིར་ཡིད་ཀྱིས་བཏང་བ་ཡང་ཡོད་པ་ཡིན་མོད་ཀྱི། འོན་ཀྱང་གསལ་བར་བྱ་བའི་ཕྱིར་ལུས་ཀྱི་བརྩལ་བ་བཏང་ན་ཞེས་བྱ་བས་རྣམ་པར་བཤད་དོ། །གར་བྱེད་པ་དང་རབ་ཏུ་གར་བྱེད་པ་གཉིས་ལ་ནི་ན་སྨད་པ་ཉིད་དོ་ཞེས་བྱ་བ་ནི། གར་བྱེད་པ་དང་རབ་ཏུ་གར་བྱེད་པ་གཉིས་ལ་ཁུ་བ་ཕྱུང་བ་ནི་དགེ་འདུན་ལྷག་མ་ལས་ན་སྨད་བ་ཉིད་དེ་སྦོམ་པོའོ། །དེ་ལ་ནི་ཕྱུང་བ་དང༌། དེར་འདུན་པ་དང༌། རང་གི་ཁུ་བ་དང༌། དང་པོ་ཞེས་བྱ་བའི་ཡན་ལག་དེ་དག་ཡོད་དོ། །འདི་སྐད་བསྟན་ཏེ། དགེ་སློང་གིས་དབྱུང་བའི་བསམ་པས་གར་བྱེད་པ་དང༌། རབ་ཏུ་གར་བྱེད་པས་ཁུ་བ་འབྱིན་པར་བྱེད་ན་ཉེས་པ་སྦོམ་པོར་འགྱུར་རོ། །ནམ་མཁའ་ལ་རྐེད་པ་བསྐྱོད་པའོ་ཞེས་བྱ་བ་ནི། ནམ་མཁའ་ལ་རྐེད་པ་བསྐྱོད་པས་ཁུ་བ་འབྱིན་པར་བྱེད་ན་ན་སྨད་པ་ཉིད་དེ། དེ་ལ་ཡང་ཕྱུང་བ་དང༌། དེར་འདུན་པ་དང༌། རང་གི་ཁུ་བ་དང༌། དང་པོ་ཞེས་བྱ་བའི་ཡན་ལག་དེ་དག་
ཐམས་ཅད་ཡོད་དེ། དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་གིས་དབྱུང་བ་དང༌། དེར་འདུན་པས་ནམ་མཁའ་ལ་རྐེད་པས་འཁྱུད་ཅིང་འཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །ཕྱོགས་གཞན་དུ་རེག་པའོ་ཞེས་བྱ་བ་ནི། ཡན་ལག་གི་རྣམ་པ་ལས་གཞན་པ་དག་ཏུ་རེག་པ་ནི་ཕྱོགས་གཞན་དུ་རེག་པ་སྟེ། དེ་ཡང་སྔར་བསྟན་པའི་རིགས་པ་ཉིད་ཀྱིས་ན་སྨད་པ་ཉིད་དེ། སྦོམ་པོའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་ཀུན་དུ་མཉེད་པའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ཏེ། འདིར་ཡན་ལག་གི་རྣམ་པ་ལས་གཞན་པའི་ཕྱོགས་སུ་ཀུན་དུ་མཉེད་བར་དགོངས་པ་ཡིན་ནོ། །རྒྱུན་ལས་བཟློག་པའི་ཕྱོགས་སུ་གཏོད་པའོ་ཞེས་བྱ་བ་ནི་ཡན་ལག་གི་རྣམ་པ་འབབ་ཆུའི་རྒྱུན་ལས་བཟློག་པའི་ཕྱོགས་སུ་གཏད་དེ་ཁུ་བ་འབྱིན་ན་ན་སྨད་པ་ཉིད་དོ། །རྫི་ཕྱོགས་མ་ཡིན་པར་ཡང་ངོ་ཞེས་བྱ་བ་ཡང་དེར་གཏད་དེ་ཁུ་བ་འབྱིན་ན་ན་སྨད་པ་ཉིད་དོ། །རྣམ་པ་དེ་ཉིད་ཀྱིས་ཁུ་བ་འབྱིན་ན་ཉེས་པ་སྦོམ་པོའོ། །མངོན་པར་ངེས་པར་མྱོང་བའི་བདེ་བ་ཉམས་སུ་མྱོང་བ་བསྒྲུབ་པའོ་ཞེས་བྱ་བ་ལ་བྱེ་བྲག་ངེས་པར་མྱོང་བ་ནི། མངོན་པར་ངེས་པར་མྱོང་བ་འོ་དེ་ལས་བྱུང་བའི་བདེ་བ་ནི་བྱེ་བྲག་ངེས་པར་མྱོང་བའི་བདེ་བའོ། །དེ་ཉམས་སུ་མྱོང་བ་ཞེས་བྱ་བ་ནི་རོ་མྱོང་བའོ། །དེ་སྒྲུབ་པ་ཞེས་བྱ་བ་ནི་ནན་ཏན་བྱེད་པ་སྟེ། དེ་ཡང་ན་སྨད་པ་ཉིད་དོ། །དགེ་སློང་གིས་ཡིད་ཀྱིས་དེའི་བདག་ཉིད་ཁས་ལེན་པས་ཇི་ཙམ་དུ་མི་ཚངས་པར་སྤྱོད་པའི་བདེ་བ་ལ་རྣམ་པར་རྟོག་པ་དེ་ཙམ་དུ་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །འདིར་གཞུང་ནི་བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བར་བྱེད་ཅིང་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདིར་ཡང་ཕྱུང་བ་དང༌། དེར་འདུན་པ་དང༌། རང་གི་ཁུ་བ་དང༌། དང་པོ་ཞེས་བྱ་བའི་ཡན་ལག་དེ་དག་ཐམས་ཅད་ཡོད་དོ། །བྱེ་བྲག་ངེས་པར་མྱོང་བའི་བདེ་བ་ཞེས་བྱ་བ་ནི་དཔེ་ཙམ་སྟེ། བྱུང་ལ་ཐུག་པའི་བདེ་བ་དང༌། ངད་
ལས་པའི་བདེ་བ་ཉམས་སུ་མྱོང་བ་སྒྲུབ་པས་དགེ་སློང་གིས་ཡིད་ཀྱིས་དེའི་བདག་ཉིད་ཁས་ལེན་པས་ཇི་ཙམ་དུ་བྱུང་ལ་ཐུག་པའི་བདེ་བ་དང༌། ངད་ལས་པའི་བདེ་བ་ལ་རྣམ་པར་རྟོག་པ་དེ་ཙམ་དུ་ཁུ་བ་འབྱིན་ན་ཉེས་པ་སྦོམ་པོར་འགྱུར་རོ། །དེ་ལ་བྱེ་བྲག་ངེས་པར་མྱོང་བའི་བདེ་བ་ཞེས་བྱ་བ་ནི་བུད་མེད་དང༌། སྐྱེས་པ་ཀུན་དུ་སྤྲད་པའི་གནས་སྐབས་ཀྱི་བདེ་བ་གང་ཡོད་པའོ། །བྱུང་ལ་ཐུག་པའི་བདེ་བ་ཞེས་བྱ་བ་ནི་ཁུ་བ་འབྱུང་བའི་གནས་སྐབས་ན་བདེ་བ་གང་སྐྱེ་བའོ། །ངད་ལས་པའི་བདེ་བ་ཞེས་བྱ་བ་ནི་འདོད་ཆགས་ཀྱི་གདུང་པ་དང་བྲལ་བའི་གནས་སྐབས་ན་བདེ་བ་གང་འབྱུང་བའོ། །སྦུབས་སུ་འོངས་པའོ་ཞེས་བྱ་བ་ནི། སྦུབས་སུ་འོངས་བའི་ཁུ་བ་འབྱིན་ན་སྦོམ་པོའོ། །ཁུ་བ་འབྱུང་བའི་གནས་ནས་འཕོས་མ་ཐག་པ་ནི་སྦུབས་སུ་འོངས་པ་ཞེས་བྱའོ། །ཆགས་པའི་སེམས་དང་ལྡན་པ་ཉིད་ན་གཞལ་བའི་ཆེད་ཉིད་ཀྱིས་རེག་པ་ནི་སྦྱོར་བ་མ་ཡིན་པ་མ་ཡིན་ནོ་ཞེས་བྱ་བ་ལ། གང་ལ་ཆགས་པའི་སེམས་ཡོད་པ་དེ་ནི་ཆགས་པའི་སེམས་དང་ལྡན་པའོ། །དེའི་དངོས་པོ་ནི་དེ་ཉིད་དེ་ཆགས་པའི་སེམས་དང་ལྡན་པ་ཉིད་དེ་ནའོ། །གཞལ་བའི་ཆེད་ཀྱི་དངོས་པོ་ནི་གཞལ་བའི་ཆེད་ཉིད་དེ། དེས་ཡན་ལག་གི་རྣམ་པ་ལ་རེག་པ་གང་ཡིན་པ་དེ་ནི་སྦྱོར་བ་མ་ཡིན་པ་མ་ཡིན་ཏེ། སྦྱོར་བ་ཁོ་ན་ཡིན་ཏེ། ཉེས་པ་སྦོམ་བོའོ་ཞེས་བྱ་བའི་ཐ་ཚིག་གོ །འདིར་ཡན་ལག་གི་རྣམ་པ་ཞེས་སྨོས་པ་ནི་ཤུགས་ཀྱིས་འཐོབ་པའི་ཕྱིར་ལོགས་ཤིག་ཏུ་སྨོས་པར་བྱ་མི་དགོས་ཏེ། གཞལ་བའི་གཞི་དེ་ཡིན་པའི་ཕྱིར་རོ། །འདིར་གཞུང་ནི་དགེ་སློང་གིས་ཀུན་དུ་ཆགས་པའི་སེམས་ཀྱིས་རང་གི་ཡན་ལག་གི་རྣམ་པར་འཇལ་བར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདིར་རེག་པ་གཙོ་བོ་ཡིན་པས་དེས་ན་མདོ་ལས་རེག་པ་ནི་ཞེས་སྨོས་ཀྱི། འཇལ་བ་ནི་ཞེས་མ་སྨོས་སོ། །ལྟ་ན་ཉེས་བྱས་སོ་ཞེས་བྱ་བ་ནི། ཆགས་པའི་སེམས་དང་ལྡན་པ་ཉིད་ན་ཡན་ལག་གི་རྣམ་པ་ལའོ། །རྒྱུན་དང་རྫི་ཕྱོགས་ཀྱིས་གཏོང་པ་ཡང་ངོ་ཞེས་བྱ་བ་ལ། ཕྱོགས་སུ་ཞེས་བྱ་བའི་སྒྲ་རྒྱུན་ཕྱོགས་དང་
རྫི་ཕྱོགས་ཞེས་བྱ་བ་གཉིས་ཀར་སྦྱར་བར་བྱ་སྟེ། །རྒྱུན་ཕྱོགས་དང་རྫི་ཕྱོགས་སུ་ཆགས་པའི་སེམས་དང་ལྡན་པ་ཉིད་ན་ཡན་ལག་གི་རྣམ་པ་གཏོད་ན་ཉེས་བྱས་སོ། །ཡང་ངོ་ཞེས་བྱ་བའི་སྒྲ་ནི་ཉེས་བྱས་ཞེས་བྱ་བའི་སྒྲའི་རྗེས་བསྙག་པའི་ཕྱིར་རོ། །བརླ་དང་གོས་དང་གཞན་གྱིས་རེག་པ་དང་གཡན་པ་ཕྲུག་པ་དག་གིས་བབ་ཅོལ་དུ་དོན་མ་ཡིན་པར་ཞུགས་པ་ལ་ནི་ལྟུང་བ་མེད་དོ་ཞེས་བྱ་བ་ལ། བརླ་དང་གོས་དང་གཞན་ཏེ་དེ་དག་གིས་རེག་པ་ནི་བརླ་དང་གོས་དང་གཞན་གྱིས་རེག་པའོ། །དེ་དག་ནི་རེག་པ་རྣམས་དང༌། གཡན་པ་ཕྲུག་པ་དག་ནི་བརླ་དང་གོས་དང༌། གཞན་གྱིས་རེག་པ་དང་གཡན་པ་ཕྲུག་པ་དག་གོ །དེ་དག་གིས་བབ་ཅོལ་དུ་ཞེས་བྱ་བ་ནི་ཆེད་དུ་མ་བསམས་བློ་སྔོན་དུ་མ་བཏང་བར་རོ། །དེའི་དོན་མ་ཡིན་པར་ཞུགས་པ་ཞེས་བྱ་བ་ནི་དབྱུང་བའི་དོན་མ་ཡིན་པར་ཞུགས་པ་སྟེ། དེ་ལ་ཁུ་བ་བྱུང་བ་ལ་ནི་ལྟུང་བ་མེད་དོ།། དེ་ལ་དགེ་སློང་རྒྱུག་པ་དང་རྒོད་བག་དང༌། མཆོངས་པ་ལ་སོགས་བ་ཙམ་གྱི་བྱ་བ་ལ་ཞུགས་པ་ལ་ནི་བརླ་དང་གོས་ཀྱིས་རེག་པས་སོ། །བསྲོ་ཁང་ལ་སོགས་པའི་ལས་ཉམས་སུ་མྱོང་བར་བྱ་བའི་ཕྱིར་གཞན་དང་ལྷན་ཅིག་རེག་པ་ལ་ནི་གཞན་གྱིས་རེག་པས་སོ། །ཤུ་བ་དང་ཁྱི་རྡོ་དང་འབྲུམ་བུ་ལ་སོགས་པའི་སྡུག་བསྔལ་གྱི་གཉེན་པོའི་ཕྱིར་ནི་གཡན་པ་ཕྲུག་པ་སྟེ། དེ་དག་གིས་བབ་ཅོལ་དུ་ཤུགས་དྲག་པོར་བྱུང་བ་ལ་ནི་ལྟུང་བ་མེད་དོ། །རེག་བྱ་མ་ཡིན་པ་ཉམས་སུ་མྱོང་པའོ་ཞེས་བྱ་བ་ནི། རེག་བྱའི་ཡུལ་མ་གཏོགས་པ་གཟུགས་དང༌། སྒྲ་དང་དྲི་དང་རོ་ཞེས་བྱ་བ་མིག་དང༌། རྣ་བ་དང༌། སྣ་དང་ལྕེས་ཉམས་སུ་མྱོང་བ་ན་དེའི་དོན་མ་ཡིན་པར་ཞུགས་པ་ལ་བབ་ཅོལ་དུ་བྱུང་བ་ལ་ཡང་ཉེས་བ་མེད་དོ། །འདིར་གཞུང་ནི་ཆགས་པར་འགྱུར་བའི་གཟུགས་དག་མཐོང་བས་ཁུ་བ་བྱུང་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །དྲན་པས་དེ་ལ་ཡང་ངོ་ཞེས་བྱ་བ་ནི་རེག་བྱ་དང་རེག་བྱ་མ་ཡིན་པའི་ཡུལ་ལྔ་པོ་ཉམས་སུ་མྱོང་བས་དེའི་དོན་མ་ཡིན་པར་བབ་ཅོལ་དུ་བྱུང་བ་ལ་ལྟུང་བ་མེད་དོ་ཞེས་བྱ་བ་དེ་ནི་ཉེ་བར་གནས་པ་ལས་བྱུང་བའི་རྣམ་པར་གཞག་པ་ཡིན་གྱི། གང་གི་ཚེ་ཆགས་པར་འགྱུར་བའི་གཟུགས་
བལྟའོ་སྙམ་ཞིང༌། དེའི་དོན་མ་ཡིན་པར་ཞུགས་པ་ལ་བབ་ཅོལ་དུ་བྱུང་བ་ནི་ཉེས་བྱས་སུ་རིག་པར་བྱའོ། །དེ་ལྟར་ཡང་བཅོམ་ལྡན་འདས་ཀྱིས་དེང་ཕྱིན་ཆད་མིག་གིས་མིག་ལ་བརྟེན་ཏེ་བུད་མེད་ལ་བལྟ་བར་མི་བྱའོ་ཞེས་གསུངས་པ་ཡིན་ནོ། །འབྱིན་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་ཁུ་བ་འབྱིན་པའི་དགེ་འདུན་ལྷག་མ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ད་ནི་ཁུ་བ་འབྱིན་བའི་དགེ་འདུན་ལྷག་མ་ལ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། འཕོ་བར་འགྱུར་བ་དང་འཕོས་མ་ཐག་པ་ནི་ཤུགས་དང་སྦུབས་སུ་འོངས་པའོ་ཞེས་བྱ་བ་སྨྲས་ཏེ། འཕོ་བར་འགྱུར་བ་དང་འཕོ་བ་ནི་འཕོ་བར་འགྱུར་བ་དང་འཕོས་པའོ། །ཤུགས་དང་སྦུབས་སུ་འོངས་པ་ནི་ཤུགས་དང་སྦུབས་སུ་འོངས་པ་སྟེ། གོ་རིམས་བཞིན་དུ་སྦྱར་པར་རིག་བར་བྱའོ། །ཤུགས་ཀྱི་གནས་སྐབས་སུ་བཏང་ན་རྫོགས་པར་མ་བྱས་པ་ཉིད་དོ་ཞེས་སྨོས་པ་གང་ཡིན་པས་ནི་ཤུགས་བསྟན་ཏེ། དེ་མ་ཐག་ཏུ་སྐད་ཅིག་མ་གཉིས་པ་ལ་རང་གི་ཁུ་བ་འབྱུང་བའི་གནས་ནས་འཕོ་བར་འགྱུར་བའི་ཁུ་བ་ཡིན་པར་རིག་པར་བྱའོ། །དེའི་ཕྱིར་འདིར་གཞུང་ནི་ཤུགས་ཞེས་བྱ་བ་ཡིན་ཏེ། འབྱུང་བ་ལ་མངོན་པར་ཕྱོགས་པས་འཕངས་པ་ཞེས་བྱ་བའི་ཐ་ཚིག་གོ །སྦུབས་སུ་འོངས་པ་ཞེས་བྱ་བ་ནི་རང་གི་གནས་ནས་འཕོས་མ་ཐག་པ་ཞེས་གང་གསུངས་པ་དེ་ཡིན་པར་རིག་པར་བྱ་སྟེ། སྐད་ཅིག་མས་བར་དུ་མཆོད་པ་ཞེས་བྱ་བའི་ཐ་ཚིག་གོ །བརྩམས་པ་ཙམ་ན་སྦྱོར་བ་ཉིད་མ་ཡིན་ནོ་ཞེས་བྱ་བ་ནི། འབྱུང་བའི་ཆེད་དུ་བརྩམས་པ་ཙམ་བྱས་ནས་བཏང་ན་སྦྱོར་བ་ཉིད་མ་ཡིན་ཏེ། འདི་ལྟར་སྦྱོར་བ་ཉིད་ཁོ་ནའོ། །ཤུགས་ཀྱི་གནས་སྐབས་སུ་བཏང་ན་རྫོགས་པར་མ་བྱས་པ་ཉིད་དོ་ཞེས་བྱ་བ་དེས་ནི་འཕོ་བར་འགྱུར་བའི་གནས་སྐབས་ལ་སྦོམ་པོར་བསྟན་ཏོ། །མདོ་འདི་ནི་འཕོ་བར་འགྱུར་བའི་གནས་སྐབས་དེའི་སྔ་རོལ་དུ་ཉེས་བྱས་སོ་སྙམ་པའི་བློ་གྲོས་དེ་བསལ་བའི་ཕྱིར་བྱས་པ་ཡིན་ཏེ། དེ་ལྟར་ཡང་བརྩམས་ནས་གཏོང་ན་ལྟུང་བ་ཅིར་འགྱུར། ཉེས་པར་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །སྦྱོར་
བ་མེད་པར་ཕྱུང་བ་ལ་རོ་མྱོང་བ་ནི་དེ་དང་ལྡན་པ་ཉིད་དོ་ཞེས་བྱ་བ་ལ། སྦྱོར་བ་མེད་པར་ཞེས་བྱ་བ་ནི་སྦྱོར་བ་མེད་པ་གཉིད་མ་ལོག་པའི་བརྩལ་བ་མེད་པ་སྟེ། གཉིད་ལོག་པའི་གནས་སྐབས་སུ་ཕྱུང་བ་གང་ཡིན་པ་དང༌། བབ་ཅོལ་དུ་བྱུང་བ་གང་ཡིན་པའི་ཕྱུང་བ་དེ་གཉིས་ལ་རོ་མྱོང་བ་སྐྱེད་པར་བྱེད་པ་དེ་དག་ནི་སྦྱོར་བ་དེ་དང་ལྡན་པ་ཉིད་དོ་ཞེས་བྱ་བའི་ཐ་ཚིག་གོ །ཉལ་བའི་བརྩལ་བ་ལ་དེ་སྐད་ཅེས་བྱ་སྟེ། འདིར་གཞུང་ནི་གལ་ཏེ་རོ་མྱོང་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཉལ་བའི་བརྩལ་བ་ཞེས་བྱ་བ་ནི་གཉིད་ལོག་པའི་གནས་སྐབས་ནའོ་བྱེད་པ་དང་འཁྱུད་པ་ལ་སོགས་རྨིས་པ་ལ་བྱའོ། །ཉལ་བའི་བརྩལ་བ་ཉིད་ལ་ཁུ་བ་བྱུང་བ་ལས་སད་པའི་གནས་སྐབས་ན་རོ་མྱོང་བར་བྱེད་པ་ལ་ཉེས་པ་འདིར་རིག་པར་བྱའོ། །ཡན་ལག་གི་རྣམ་པ་ཅུང་ཟད་མཉེད་པ་དང༌། ཡོངས་སུ་མཉེད་པ་དང་འཚིར་བའོ་ཞེས་བྱ་བ་ལ་ཕྱོགས་གཅིག་ཅུང་ཟད་མཉེད་པ་ནི་ཅུང་ཟད་མཉེད་པ་སྟེ། ཅུང་ཟད་ཅེས་བྱ་བའི་སྒྲ་ནི་ཅུང་ཞིག་གི་དོན་ལ་ཞུགས་པ་ཡིན་པའི་ཕྱིར་རོ། །ཐམས་ཅད་མཉེད་པ་ནི་ཡོངས་སུ་མཉེད་པ་སྟེ། ཕྱོགས་ཐམས་ཅད་ནས་བསྡོམས་པས་སོ། །འདིར་གཞུང་ནི་དགེ་སློང་གིས་ཡན་ལག་གི་རྣམ་པ་ཅུང་ཟད་མཉེད་པ་བདག་གིར་བྱེད་ན་ཉེས་པ་སྦོམ་པོར་འགྱུར་རོ། །ཡོངས་སུ་མཉེད་པ་བདག་གིར་བྱེད་ན་ཉེས་པ་སྦོམ་པོར་འགྱུར་རོ། །མངོན་པར་འཚིར་བ་བདག་གིར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་ལས་སུ་རུང་བ་ལ་ནོམ་པའོ་ཞེས་བྱ་བ་ནི། ཡན་ལག་གི་རྣམ་པ་དེ་ལས་སུ་རུང་བ་ལ་ནོམ་བ་ནི་སྦོམ་པོའོ། །འདིར་གཞུང་ནི་ཡན་ལག་གི་རྣམ་པ་ལས་སུ་རུང་བ་ལ་ནོམ་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ནོམ་པའོ་ཞེས་བྱ་བ་ནི་ཡན་ལག་གི་རྣམ་པ་སེམས་ཅན་དུ་བགྲང་བ་ལག་པ་ལ་སོགས་པས་ནོམ་པར་བྱེད་པ་ལ་ཉེས་པ་འདི་རྣམ་པར་གཞག་གོ །སེམས་ཅན་དུ་བགྲང་བ་མ་ཡིན་པས་ནི་ཉེས་བྱས་སོ། །སྨན་གྱིས་འབྱིན་ནའོ་ཞེས་བྱ་བ་ཡང་སྦོམ་པོའོ་ཞེས་བྱ་བར་སྦྱར་རོ། །དགེ་སློང་གིས་དབྱུང་བའི་ཕྱིར་སྨན་ཟོས་ལ་གལ་ཏེ་འབྱུང་བའི་དུས་ན་དེའི་འགྱུར་བ་འབྱུང་ན་
དེའི་ཚེ་ཁ་ན་མཐོ་བ་དེར་འགྱུར་རོ། །གལ་ཏེ་དེའི་འགྱུར་བ་མི་འབྱུང་ན་ཉེས་པ་མེད་དེ་ལྕི་བར་གྱུར་པའི་ཕྱིར་རོ། །གཞན་གྱི་ལས་ཀྱང་ངོ་ཞེས་བྱ་བ་ནི། ཡན་ལག་གི་རྣམ་པ་ལས་འབྱིན་ན་ཉེས་པ་སྦོམ་པོའོ། །འགྱུར་བ་ཡོད་ཀྱང་རུང་མེད་ཀྱང་རུང་སྦོམ་པོ་སྟེ། ཤིན་ཏུ་སྨད་པར་བྱ་བ་ཉིད་ཡིན་པའི་ཕྱིར་རོ། །འབྱིན་པའི་དགེ་འདུན་ལྷག་མ་ཞུ་བའི་སྐབས་སོ་ཞེས་བྱ་བ་ཁུ་བ་འབྱིན་པའི་དགེ་འདུན་ལྷག་མ་ཞུ་བའི་སྐབས་ནས་འབྱུང་བ་རྫོགས་སོ།། །།ད་ནི་ཁུ་བ་འབྱིན་བ་འདུལ་བྱེད་ཀྱི་སྐབས་ནས་འབྱུང་བ་བརྗོད་པར་བྱ་སྟེ། རྣམ་པར་བསྔོས་པ་ལ་སོགས་པ་དང༌། རྣམ་པར་ཞིགས་པ་དང༌། ཀེང་རུས་དག་དང༌། མགོ་དང༌། རྣ་བ་དང༌། སྣ་དག་དང༌། མགུལ་པ་དང༌། རྩི་བ་ལོགས་དང༌། རྒྱབ་དང༌། བྲང་དང༌། གཉེར་མ་དག་དང༌། སྐྲའི་གསེབ་དང༌། ལག་པ་དང། ཕྲག་པ་དང༌། དཔུང་པ་དག་དང༌། དཔུང་པའི་བར་དང༌། རྐེད་པ་དང༌། བརླ་དང༌། རྐང་པ་དང༌། སྒྱིད་པ་དག་དང༌། སྒྱིད་པའི་བར་དུ་འབྱིན་ན་དངོས་གཞིའོ་ཞེས་བྱ་བ་སྨྲས་ཏེ། འདི་ནི་ཕྱི་རོལ་སེམས་ཅན་དུ་བགྲང་བ་དང༌། དེའི་རྣམ་པར་གནས་པ་ཞེས་སྨོས་པ་དེ་དག་གི་སྤྲོས་པ་ཡིན་ནོ། །རྣམ་པར་བསྔོས་པ་ལ་སོགས་པ་ཞེས་བྱ་བ་ལ་སོགས་པའི་སྒྲ་ནི་རྣམ་པར་རྣགས་པ་དང༌། རྣམ་པར་བམ་པ་དང༌། རྣམ་པར་འབུས་གཞིགས་པ་དང༌། རྣམ་པར་ཟོས་པ་དང༌། རྣམ་པར་དམར་བ་རྣམས་བསྡུའོ། །རྣམ་པར་ཞིགས་པ་ཞེས་སྨོས་པས་ནི། རྣམ་པར་འཐོར་བ་དག་བསྡུ་སྟེ། གླན་པ་དག་བོག་པ་དང༌། ཡན་ལག་དག་བྲལ་བ་ནི། རྣམ་པར་ཞིགས་པ་ཞེས་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། རྣམ་པར་བསྔོས་པ་ལ་སོགས་པའི་ཡུལ་ལ་རེག་པར་གྱུར་པ་ན་བྱུང་བ་ནི་དངོས་གཞིར་འགྱུར་རོ། །སྦོམ་པོ་ནི་ལ་བ་དང༌། ཕྱིང་བ་དང༌། དྲེའུ་རྡོག་དང༌། སྔས་ནང་ཚངས་ཅན་དང༌། ཁྲི་དང་ཁྲིའུ་དང༌། སྟན་ནང་ཚངས་ཅན་དང༌། ཁྲིའི་གསེབ་དང༌། བུམ་པ་དང༌། བུམ་བུ་དང༌། བུམ་པའི་བར་དང༌། བྱ་མ་བུམ་དང༌། ཆོལ་ཟངས་དང༌། རྡོ་བ་དང༌། སྐྱང་
ནུལ་དང༌། སྐྱང་ནུལ་གྱི་བར་དང༌། སྒོ་གཏན་དང་ཤའི་དུམ་བུ་དག་གོ་ཞེས་བྱ་བ་ནི། འདི་མན་ཆད་འོག་ནས་འཛག་སྣོད་ལ་འདྲུད་པ་ལས་ནི་ལྟུང་བ་མེད་དོ་ཞེས་འབྱུང་བ་ཡན་ཆད་ནི་ཐམས་ཅད་སྦོམ་པོའི་དབང་དུ་བྱས་པ་ཡིན་ནོ། །ལ་བ་ལ་སོགས་པར་འབྱིན་ན་སྦོམ་པོའོ། །སྦྱོར་བ་ཙམ་ལས་ཕྱུང་ན་ཉེས་བྱས་སོ། །རྨ་འཚིར་ནའོ་ཞེས་བྱ་བ་ལ་རང་གི་ཡན་ལག་གི་རྣམ་པའི་བུ་ག་གང་ཡིན་པ་དེ་ནི་འདིར་རྨ་ཞེས་བྱ་སྟེ། དེ་འཚིར་ན་སྦོམ་པོའོ། །གཞན་གྱི་རྨ་དེ་འཚིར་བ་ནི་ཉེས་བྱས་སོ། །གཞན་གྱི་ཡན་ལག་གི་རྣམ་པ་ལས་འབྱིན་ན་སྦོམ་པོའོ་ཞེས་བྱ་བ་སྨྲས་པས་འདིར་ཉེས་བྱས་སུ་ཤེས་ཏེ། འདི་ནི་དེའི་སྦྱོར་བ་ཡིན་པའི་ཕྱིར་རོ། །རྩོམ་པ་ན་བུད་མེད་དུ་བྱས་པ་འཚིར་ནའོ་ཞེས་བྱ་བ་ལ་བུད་མེད་ཉིད་དུ་དེས་བྱས་པ་ན་བུད་མེད་དུ་བྱས་པ་སྟེ། མོའི་དབང་པོ་ཞེས་བྱ་བའི་ཐ་ཚིག་གོ །བུད་མེད་དུ་བྱས་པ་དེ་འཚིར་ན་སྦོམ་པོའོ། །གང་གི་ཚེ་ཞེ་ན་དེའི་ཕྱིར་རྩོམ་པ་ན་སྟེ། མོའི་དབང་པོ་དེར་ལྷག་པར་སྤྱོད་པ་རྩོམ་པའི་ཚེ་ན་ལག་པ་ལ་སོགས་པས་དེ་འཚིར་བ་ལ་བྱའི། ལྷག་པར་སྤྱད་པ་ལ་ཞུགས་ཟིན་ནས་འཚིར་བ་ལ་ནི་མི་བྱ་སྟེ། དེའི་རྩོམ་པ་གཅིག་ཏུ་གྱུར་པའི་ཕྱིར་ལྟུང་བ་གཅིག་ཉིད་ཀྱིས་ལྷག་པར་སྤྱད་པ་ཉིད་བསྡུས་པ་ཡིན་ནོ། །དེར་མཐེ་བོ་འཛུད་པའོ་ཞེས་བྱ་བ་ནི་བུད་མེད་དུ་བྱས་པ་དེར་རོ། །སྦོམ་པོ་དེ་གཉིས་ནི་མི་ཚངས་པར་སྤྱོད་པའི་ཡན་ལག་ཏུ་གྱུར་པ་ཡིན་པར་རིག་པར་བྱ་སྟེ། མཐེ་བོ་འཛུད་པ་ནི་མི་ཚངས་པར་སྤྱོད་པའི་གཟུགས་བརྙན་ཡིན་པའི་ཕྱིར་རོ། །འབྱིན་པར་གཏོགས་པའི་སྦོམ་པོ་ནི་མ་ཡིན་ནོ། །མཐེ་བོ་འཛུད་པ་ཞེས་བྱ་བ་ནི་དཔེ་ཙམ་སྟེ། གཞུག་པར་བྱ་བ་བ་སོའི་རེང་བུ་ལ་སོགས་པའི་རྫས་གཞན་དག་ཀྱང་དེ་བཞིན་ནོ། །མོའི་དབང་པོ་ནི་དཔེ་ཙམ་སྟེ། ཕམ་པར་འགྱུར་བར་བྱེད་པའི་སྒོ་གཞན་ཁ་དང་བཤང་བའི་ལམ་དུ་ཡང་དེ་བཞིན་དུ་མཐེ་བོ་ལ་སོགས་པ་འཛུད་ན་སྦོམ་པོའོ། །ཉེ་བར་འགྲོ་བ་ལ་ཤོར་བའོ་ཞེས་བྱ་བ་ནི། མི་ཚངས་པར་སྤྱོད་པའི་དོན་དུ་ཉེ་བར་འགྲོ་བ་དང༌། དབྱུང་བའི་དོན་དུ་ཉེ་བར་འགྲོ་བ་ན་ཁུ་བ་ཤོར་ན་སྦོམ་པོ་སྟེ། མི་ཚངས་པར་
སྤྱོད་པའི་དོན་དུ་ཉེ་བར་འགྲོ་བ་ན་ཁུ་བ་ཤོར་བ་ནི་མི་ཚངས་པར་སྤྱོད་པར་གཏོགས་པའི་སྦོམ་པའོ། །འཆག་པ་ལ་སོགས་པའི་དོན་དུ་འགྲོ་བ་ན་ཤོར་བ་ལ་ནི་ལྟུང་བ་མེད་དོ། །གནས་ནས་གནས་སུ་འཕོ་བ་ལ་ཡང་ངོ་ཞེས་བྱ་བ་ནི་དབྱུང་བའི་དོན་དུ་གནས་ནས་གནས་སུ་འཕོ་བ་ལ་ཁུ་བ་བྱུང་ན་སྦོམ་པའོ། །འདིར་གཞུང་ནི་འདུལ་བྱེད་དག་ལས་དགེ་སློང་གནས་ནས་གནས་སུ་འཕོ་བ་ན་དེ་ལ་ཁུ་བ་བྱུང་ནས་དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ལྟུང་བར་མི་འགྱུར་ཏེ། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །ཚུལ་བཞིན་མ་ཡིན་པ་ཡིད་ལ་བྱེད་པ་ལས་སོ་ཞེས་བྱ་བ་ལ། སྐྱེ་གནས་འཇིག་པར་བྱེད་པས་ཚུལ་བཞིན་ཏེ། ངན་སོང་དུ་འགྲོ་བ་འཇོམས་པར་བྱེད་ཅེས་བྱ་བའི་ཐ་ཚིག་གོ །ཚུལ་བཞིན་མ་ཡིན་བ་ནི་ཚུལ་བཞིན་མ་ཡིན་ཏེ། དབྱུང་བའི་དོན་དུ་སྐྲ་དང༌། སེན་མོ་དང་སོ་དང་རྐེད་པ་དང༌། བརླ་དང་ནུ་མ་ལ་སོགས་པ་དག་ཡིད་ལ་བྱེད་པ་ལས་ཁུ་བ་བྱུང་ན་སྦོམ་པོའོ། །འདིར་གཞུང་ནི་འདུལ་བྱེད་དག་ལས་དགེ་སློང་གིས་ཚུལ་བཞིན་མ་ཡིན་པ་ཡིད་ལ་བྱེད་པས་ཁུ་བ་བྱུང་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ལྟུང་བར་མི་འགྱུར་ཏེ། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །བྱེ་བྲག་ངེས་པར་མྱོང་བའི་བདེ་བ་ཉམས་སུ་མྱོང་བ་ལ་རྟོག་པ་ལས་འདིར་ཡིད་ལ་བྱེད་པ་འདི་ནི་གཞན་ཡིན་པར་རིག་པར་བྱ་སྟེ། དེར་ལྟུང་བ་སྨྲས་ཟིན་པའི་ཕྱིར་རོ། །ཡན་ལག་གི་རྣམ་པ་འཛིན་པ་ལས་སོ་ཞེས་བྱ་བ་ནི། དབྱུང་བ་དང་དེར་འདུན་པས་ཡན་ལག་གི་རྣམ་པ་ལག་པས་བཟུང་བ་ལས་ཁུ་བ་བྱུང་ན་སྦོམ་པོའོ། །ལག་པའི་རེག་པ་ལ་སོགས་པས་བརྩལ་བ་མེད་པར་ཡན་ལག་གི་རྣམ་པ་འགུལ་བ་ལས་བྱུང་བ་གང་ཡིན་པ་དེ་ལ་ནི་ཉེས་བྱས་སོ། །ནད་ཀྱི་གཉེན་པོ་ལ་སོགས་པའི་ཆེད་དུ་ཡན་ལག་གི་རྣམ་པ་བཟུང་བ་ལས་བྱུང་བ་ལ་ཉེས་པ་མེད་དེ། བབ་ཅོལ་དུ་ཞེས་བྱ་བ་ལ་སོགས་པའི་རིགས་པ་རྣམ་པར་གནས་པའི་ཕྱིར་རོ། །འཛག་སྣོད་ལ་འདྲུད་པ་ལས་ནི་
ལྟུང་བ་མེད་དོ་ཞེས་བྱ་བ་ནི། འདོད་ཆགས་ཤས་ཆེ་བ་རྣམས་ཀྱིས་འཛག་སྣོད་བཅང་བར་བྱའོ་ཞེས་སྨོས་པས་དབྱུང་བའི་ཕྱིར་ཞུགས་པ་མ་ཡིན་པའི་དགེ་སློང་གིས་བབ་ཅོལ་དུ་འཛག་སྣོད་ཀྱིས་དྲུད་པ་ལས་ཁུ་བ་བྱུང་ན་ཉེས་པ་མེད་དོ། །སྔོན་གྱི་ཆུང་མས་འཁྱུད་པ་ལས་ཀྱང་ངོ་ཞེས་བྱ་བ་ནི། དེའི་ཕྱིར་ཞུགས་པ་མ་ཡིན་པ་ལ་སྔོན་གྱི་ཆུང་མས་འཁྱུད་པ་ལས་བབ་ཅོལ་དུ་བྱུང་བ་ལ་ཡང་ལྟུང་བ་མེད་དེ། མ་དང་སྲིང་དང་བུ་མོས་ཡུན་མི་རིང་བར་བཟུང་བ་ལ་ཉེས་པ་མེད་པ་འབའ་ཞིག་ཏུ་མ་ཟད་དེ་འདི་ལ་ཡང་ཉེས་པ་མེད་དོ། །རྐང་པ་དང་བྱིན་པ་དང་དཔུང་པ་དང་མཐེ་བོ་ལ་སོགས་པ་ནས་བུད་མེད་ཀྱིས་བཟུང་བ་ལ་ཡང་ངོ་ཞེས་བྱ་བ་ནི། དེའི་ཆེད་དུ་ཞུགས་པ་མ་ཡིན་པ་ལ་བུད་མེད་ཀྱིས་རྐང་པ་ལ་སོགས་པ་ནས་བཟུང་བ་ལས་བབ་ཅོལ་དུ་ཁུ་བ་བྱུང་བ་ལ་ལྟུང་བ་མེད་པ་སྟེ། ཡང་ངོ་ཞེས་བྱ་བའི་སྒྲ་ནི་ལྟུང་བ་མེད་དོ་ཞེས་བྱ་བའི་རྗེས་བསྙག་པའི་ཕྱིར་རོ། །འབྱིན་པའི་དགེ་འདུན་ལྷག་མ་འདུལ་བྱེད་དག་གོ་ཞེས་བྱ་བ་ཁུ་བ་འབྱིན་པའི་དགེ་འདུན་ལྷག་མ་འདུལ་བྱེད་ཀྱི་སྐབས་ནས་འབྱུང་བ་དག་བཤད་ཟིན་ཏོ། །འབྱིན་པའི་དགེ་འདུན་ལྷག་མ་རྫོགས་སོ་ཞེས་བྱ་བ་ཁུ་བ་འབྱིན་པའི་དགེ་འདུན་ལྷག་མ་རྫོགས་སོ།། །། ད་ནི་རེག་པའི་དགེ་འདུན་ལྷག་མའི་མཚན་ཉིད་བརྗོད་པར་བྱ་སྟེ། དེའི་ཕྱིར་ལྟུང་བ་འདིའི་ཡུལ་དུ་གྱུར་པའི་བྱེད་པ་པོ་གང་ཡིན་པ་དེ་བསྟན་པའི་ཕྱིར། འདི་ལ་བྱེད་པ་པོ་ཉིད་ནི་བུད་མེད་དོ་ཞེས་བྱ་བ་སྨྲས་ཏེ། རེག་པའི་བསླབ་པའི་གཞི་འདི་ལ་རེག་པའི་དགེ་འདུན་ལྷག་མའི་ལྟུང་བ་འདིའི་བྱེད་པ་པོ་ཉིད་ནི་བུད་མེད་དེ། བུད་མེད་དེ་མེད་ན་ལྟུང་བ་འདི་འབྱུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །ད་ནི་གང་དང་གང་ལ་བྱེད་པ་པོ་ཉིད་བུད་མེད་ཡིན་པ་དེ་ཐམས་ཅད་བསྟན་པའི་ཕྱིར། དབེན་པ་ན་འདུག་པ་དང་འགྲེང་བ་གཉིས་ཀྱིའོ་ཞེས་བྱ་བ་སྨྲས་ཏེ། དབེན་པ་ན་བུད་མེད་དང་འདུག་པ་གང་ཡིན་པ་དང༌། འགྲེང་བ་གང་ཡིན་པའི་ལྟུང་བ་དེ་གཉིས་གྱི་བྱེད་པ་པོ་ཉིད་ཀྱང་བུད་མེད་དོ། །དེ་ལྟར་ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་ན་སྟན་ལ་འདུག་ན་ལྟུང་བྱེད་དོ། །དེ་བཞིན་དུ་
ཡང་དགེ་སློང་གང་དགེ་སློང་མ་དང་ལྷན་ཅིག་གཅིག་པུ་གཅིག་དང་དབེན་པ་སྐྱབས་ཡོད་པ་ན་འགྲེང་ན་ལྟུང་བྱེད་དོ་ཞེས་བྱ་བ་གསུངས་སོ། །ཉལ་པོ་བྱེད་པར་ཤོམ་པ་ཉིད་ལ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲ་ནི་འདུག་པ་དང་འགྲེང་བ་གཉིས་ལ་བྱེད་པ་པོ་ཉིད་བུད་མེད་དོ་ཞེས་བྱ་བའི་རྗེས་བསྙག་པའི་ཕྱིར་རོ། །འདི་སྐད་བསྟན་ཏེ། ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་དེ། གཉིས་ལ་ཡང་བྱེད་པ་པོ་ཉིད་བུད་མེད་དོ། །དེ་ལྟར་ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་ཕྱིས་གནོན་བྱས་ཏེ་སྟན་ལ་འདུག་ན་ལྟུང་བྱེད་དོ། །དེ་བཞིན་དུ་ཡང་དགེ་སློང་གང་ཤེས་བཞིན་དུ་ཉལ་པོ་བྱེད་པར་ཤོམ་པའི་ཁྱིམ་དུ་དབེན་པ་སྐྱབས་ཡོད་པར་འགྲེང་ན་ལྟུང་བྱེད་དོ་ཞེས་གསུངས་སོ། །ལྷན་ཅིག་ཏུ་ཉལ་བ་ལའོ་ཞེས་བྱ་བ་ནི་བུད་མེད་དང་ལྷན་ཅིག་གནས་གཅིག་ན་ཉལ་བ་གང་ཡིན་པའི་ལྟུང་བྱེད་དོ། །ལྟུང་བྱེད་དེ་ལ་ཡང་བྱེད་པ་པོ་ཉིད་བུད་མེད་དོ། །དེ་ལྟར་ཡང་དགེ་སློང་གང་བུད་མེད་ཀྱི་ཡུལ་དང་ལྷན་ཅིག་གནས་གཅིག་ཏུ་ཉལ་ན། ལྟུང་བྱེད་དོ་ཞེས་གསུངས་སོ། །རིག་པའི་སྐྱེས་པ་མེད་པའི་བུད་མེད་དང་ལྷན་ཅིག་ལམ་དུ་འགྲོ་བའོ་ཞེས་བྱ་བ་ལ། བུད་མེད་གང་ལ་རེག་པའི་སྐྱེས་པ་མེད་པ་དེ་ནི་རེག་པའི་སྐྱེས་པ་མེད་པའི་བུད་མེད་དེ་དང་ལྷན་ཅིག་འགྲོགས་ཏེ་ལམ་དུ་འགྲོ་ན་ལམ་དུ་ཆ་བའི་ལྟུང་བྱེད་ལ་ཡང་བྱེད་པ་པོ་ཉིད་བུད་མེད་དོ། །དེ་ལྟར་ཡང་དགེ་སློང་གང་སྐྱེས་པ་མེད་པར་བུད་མེད་དང་ལྷན་ཅིག་འགྲོན་ལམ་དུ་འགྲོ་ན་ཐ་ན་གྲོང་བར་དུ་ཡང་རུང་སྟེ། ལྟུང་བྱེད་དོ་ཞེས་གསུངས་ཏེ། འདི་ལྟར་བཅོམ་ལྡན་འདས་ཀྱིས་སོ་སོར་ཐར་པའི་མདོ་ལས་རིག་པ་ཞེས་བྱ་བ་སྨོས་པ་མ་མཛད་མོད་ཀྱི། འོན་ཀྱང་ཚིག་དྲུག་གམ་ལྔ་ལས་ལྷག་པར་ཆོས་འཆད་པའི་བསླབ་པའི་གཞིའི་རྗེས་སུ་འབྲང་བས་མདོ་འདིར་རིག་པ་ཞེས་བྱ་བ་སྨོས་སོ། །འོག་མ་གཉིས་ལའོ་ཞེས་བྱ་བ་ནི། ལུས་ཀྱིས་རེག་པའི་དགེ་འདུན་ལྷག་མའི་འོག་ཁོ་ནར་བསྟན་པའི་བསླབ་པའི་གཞིའི་འོག་མ་གཉིས་པོ་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པའི་དགེ་འདུན་ལྷག་མ་གཉིས་པོ་དེ་དག་ལ་ཡང་བྱེད་པ་པོ་ཉིད་བུད་མེད་དོ། །ཁྱིམ་པ་མོ་ལ་སྟེན་པ་ལའོ་ཞེས་བྱ་བ་ནི། ཁྱིམ་པ་མོ་ལ་ཚིག་དྲུག་གམ་ལྔ་ལས་ལྷག་པར་ཆོས་འཆད་
པའི་ལྟུང་བྱེད་ལ་ཡང་བྱེད་པ་པོ་ཉིད་བུད་མེད་དོ། །ཕྱི་རོལ་པ་རབ་ཏུ་བྱུང་བ་མོ་ལ་ནི་ཉེས་བྱས་ཉིད་དོ། །ཅི་ཁྱིམ་པ་མོ་ལ་སྟོན་པའི་གནས་སྐབས་ཐམས་ཅད་ཀྱི་བྱེད་པ་པོ་ཉིད་བུད་མེད་ཡིན་ནམ་ཞེ་ན་མ་ཡིན་ཏེ། དེའི་ཕྱིར་སྐྱེས་པ་མེད་པར་རོ་ཞེས་བྱ་བ་སྨྲས་ཏེ། སྐྱེས་པ་མེད་པར་ཁྱིམ་པ་མོ་ལ་སྟོན་པའི་ལྟུང་བྱེད་ཀྱིས་བྱེད་པ་པོ་ཉིད་བུད་མེད་དོ། །སྐྱེས་པ་ཇི་ལྟ་བུ་ཞིག་མེད་པར་ཞེ་ན་དེའི་ཕྱིར་རིག་པའོ་ཞེས་བྱ་བ་སྨྲས་ཏེ། འཁྲིག་པ་དང་ལྡན་པའི་བརྗོད་པ་དང་སྤྱོད་པ་དག་མངོན་པར་ཤེས་པ་ཉིད་ནི་རིག་པ་ཉིད་དུ་ཤེས་པར་བྱའོ། །ཡོད་ཀྱང་མི་རུང་བ་ལའོ་ཞེས་བྱ་བ་ནི། རིག་པའི་སྐྱེས་པ་ཡོད་ཀྱང་བུད་མེད་མི་རུང་བ་ལ་ཆོས་སྟོན་པ་ནི་ལྟུང་བྱེད་ཀྱི་བྱེད་པ་པོ་ཡིན་པའོ། །བུད་མེད་མི་རུང་བ་ཞེས་བྱ་བ་ནི་སྦྱར་མའི་སྤྱོད་པ་གང་དག་ཡིན་པ་དེ་དག་ཉེ་བར་སྟོན་པར་བྱེད་པ་སྟེ། ཁྱིམ་པ་མོ་མི་རུང་བ་དེ་ལ་ཆོས་སྟོན་པ་ནི་རིག་པའི་སྐྱེས་པ་ཡོད་དུ་ཟིན་ཀྱང་ལྟུང་བྱེད་དུ་འགྱུར་བའི་བྱེད་པ་པོ་ཉིད་དོ། །ཅི་དེ་དངོས་གཞིའི་ལྟུང་བའི་ཡང་བྱེད་པ་པོ་ཉིད་ཡིན་ནམ་ཞེ་ན་མ་ཡིན་ཏེ། དེའི་ཕྱིར་དེ་ནི་ཉེས་བྱས་ཀྱིའོ་ཞེས་བྱ་བ་སྨྲས་ཏེ། རིག་པའི་སྐྱེས་པ་ཡོད་ཀྱང་བུད་མེད་མི་རུང་བ་ལ་སྟོན་པ་གང་ཡིན་པ་བྱེད་པ་པོ་ཉིད་དུ་བསྟན་པ་དེ་ནི་ཉེས་བྱས་ཀྱི་བྱེད་པ་པོ་ཉིད་ཡིན་གྱི། ལྟུང་བྱེད་ཀྱི་དངོས་གཞིའི་བྱེད་པ་པོ་ཉིད་ནི་མ་ཡིན་ནོ། །འདིར་གཞུང་ནི་ཞུ་བ་ལས་བུད་མེད་མི་རུང་བ་ལ་སྐྱེས་པ་རུང་བ་དང་ལྷན་ཅིག་ཆོས་སྟོན་ན་ཉེས་བྱས་སོ་ཞེས་གསུངས་པ་ཡིན་ནོ། །གླིང་གཞན་ནས་སྐྱེས་པ་དང་འགྱུར་བ་བསྟེན་པ་གཉིས་ནི་མཆོག་པ་ཉིད་དོ་ཞེས་བྱ་བ་ནི། བྱང་གི་སྒྲ་མི་སྙན་ལ་སོགས་པའི་གླིང་གཞན་ནས་སྐྱེས་པའི་རིག་པའི་སྐྱེས་པ་གང་ཡིན་པ་དང༌། རང་གི་གླིང་ནས་སྐྱེས་ཀྱང་སྐྱེས་པ་གང་ལུས་དང་ངག་གིས་བུད་མེད་ཀྱི་སྐབས་སམ། སྐྱེས་པའི་སྐབས་སུ་འཁྲིག་པ་དང་ལྡན་པའི་འགྱུར་བ་བསྟེན་པ་སྟེ། དཔེར་ན། སྨྱོན་ཐབས་མཁན་ནམ། མ་ནིང་ལྟ་བུ་དེ་གཉིས་ནི་སྟོན་པའི་སྐབས་འདིར་རིག་པར་མཆོག་པ་ཉིད་དོ། །འདི་སྐད་བསྟན་ཏེ། གླིང་གཞན་ནས་སྐྱེས་པའི་སྐྱེས་པ་ཡོད་དམ། འགྱུར་བ་བསྟེན་པའི་སྐྱེས་པ་ཡོད་ཀྱང་བུད་མེད་ཁྱིམ་པ་མོ་རུང་བ་ལ་ཆོས་སྟོན་ན་ཉེས་བྱས་ཏེ། དེ་གཉིས་ནི་རིག་པ་ཉིད་དུ་མཆོག་པ་ཉིད་ཡིན་པའི་ཕྱིར་རོ། །བུད་མེད་མི་རུང་བ་དེ་གཉིས་ཡོད་པ་དེ་ནི་ཉེས་བྱས་ཆེས་ལྕི་བར་འགྱུར་རོ་
ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་རེ་ཞིག་འཛམ་བུ་གླིང་པའི་བུད་མེད་ལ་བྱད་སྒྲ་མི་སྙན་པ་དང་ལྷན་ཅིག་ཆོས་སྟོན་ན་ལྟུང་བཅིར་འགྱུར་ཉེས་བྱས་སོ། །དེ་བཞིན་དུ་གླིང་གཞན་པ་དང་ལྷན་ཅིག་ཆོས་སྟོན་པ་ལ་ཡང་ཉེས་བྱས་སོ་ཞེས་གསུངས་པ་ཡིན་ནོ། །བཅོམ་ལྡན་འདས་ཀྱིས་རེག་པའི་སྐྱེས་པ་མེད་པར་བུད་མེད་ལ་ཆོས་བསྟན་པར་མི་བྱའོ་ཞེས་གང་གསུངས་པ་དེ་ལ་རིག་པའི་སྐྱེས་པ་ཇི་ལྟ་བུ་ཞིག་དང་ལྷན་ཅིག་ཏུ་བུད་མེད་ལ་ཆོས་བསྟན་པར་བྱ་ཞེ་ན་རུང་བ་གང་ཡིན་པའོ། །རུང་བ་ཇི་ལྟ་བུ་ཞེ་ན། སྨྲས་པ། ཁྱིམ་པ་ཡང་རུང་རབ་ཏུ་བྱུར་བ་ཡང་རུང་སྟེ། འགྱུར་བ་སྟེན་པར་མི་བྱེད་པ་གང་ཡིན་པའོ། །དེའི་ནི་བརྡ་ཕྲད་པ་ཉིད་དོ་ཞེས་བྱ་བ་ནི། རིག་པ་ཉིད་ཀྱི་དོན་དེ་ཉིད་ཀྱི་ཡན་ལག་ནི་བརྡ་ཕྲད་པ་ཉིད་དེ། དཔེར་ན་སྐྱོན་ནས་སྨྲ་བའི་ལྟུང་བྱེད་དག་ལ་ཉན་པ་པོ་ཡང་ཡོད་ལ་གོ་བར་བྱ་བའི་དོན་ཡང་ཡོད་ཅིང་བརྡ་ཕྲད་ན་སྐྱོན་ནས་སྨྲ་བའི་དོན་ལ་སོགས་པའི་གྲུབ་པ་ཁོ་ནར་འགྱུར་གྱི། མ་གྲུབ་ན་ནི་བྱེད་ཉིད་ཡིན་པ་དེ་བཞིན་དུ་རིག་པའི་སྐྱེས་པ་ཡོད་པ་འདི་ལ་ཡང་བརྡ་ཕྲད་ནའོ། །འདིར་གཞུང་ནི་དགེ་སློང་གིས་བུད་མེད་ཁྱིམ་པ་མོ་ལ་ཀླ་ཀློའི་སྐད་དུ་ཆོས་སྟོན་ལ་རིག་པའི་སྐྱེས་པ་དེས་བརྡ་མ་ཕྲད་ན་ཉེས་བྱས་སུ་འགྱུར་རོ། །དེ་བཞིན་དུ་གཉིད་ལོག་པ་དང༌། མྱོས་པ་དང༌། བག་མེད་པར་འགྱུར་བ་དང༌། སྙོམས་པར་ཞུགས་པ་དང༌། གླེན་པ་དང༌། འོན་པར་གྱུར་པའི་རིག་པའི་སྐྱེས་པ་ཡོད་པས། དགེ་སློང་གིས་བུད་མེད་ཁྱིམ་པ་མོ་ལ་ཆོས་སྟོན་པར་བྱེད་ལ་རིག་པའི་སྐྱེས་པ་དེ་ལ་བརྡ་ཕྲད་པ་མེད་པར་གྱུར་ན་ཉེས་བྱས་ཁོ་ནའི་ཁ་ན་མ་ཐོ་བར་འགྱུར་རོ། །རྣམ་པ་དེ་ལྟ་བུ་ཉིད་ལ་ནི་མཚན་ཅིག་ཤོས་དོན་མེད་དོ་ཞེས་བྱ་བ་ལ། རྣམ་པ་དེ་ལྟ་བུ་ཞེས་བྱ་བ་ནི། མཚན་ཉིད་པ་བུད་མེད་ཀྱི་མཚན་ཤས་ཆེ་བའམ། སྐྱེས་པའི་མཚན་ཤས་ཆེ་བའི་རྣམ་པ་དེ་ལྟ་བུའོ། །རྣམ་པ་དེ་ལྟ་བུའི་དངོས་པོ་ནི་རྣམ་པ་དེ་ལྟ་བུ་ཉིད་དེ། རྣམ་པ་དེ་ལྟ་བུ་ཉིད་ལ་ནི་བུད་མེད་ཀྱི་མཚན་ཤས་ཆེན་ནི་བུད་མེད་ཀྱི་མཚན་ལས་གཞན་པའི་སྐྱེས་པའི་མཚན་ཅིག་ཤོས་དོན་མེད་དེ། བུད་མེད་ཉིད་ལ་གནོད་པའི་ཕྱིར་ཅུང་ཟད་ཀྱང་མི་བྱེད་དེ། འབྲས་བུ་མེད་པ་ཡིན་ལ་དེ་བཞིན་དུ་སྐྱེས་པའི་མཚན་ཤས་ཆེ་ན་ནི་སྐྱེས་པའི་མཚན་ལས་གཞན་པ་ནི་བུད་མེད་
ཀྱི་མཚན་ཅིག་ཤོས་དོན་མེད་དེ། སྐྱེས་པ་ཉིད་ལ་གནོད་པའི་ཕྱིར་ཅུང་ཟད་ཀྱང་མི་བྱེད་དེ། འབྲས་བུ་མེད་པ་ཡིན་ནོ། །འདི་སྐད་བསྟན་ཏེ། གལ་ཏེ་མཚན་གཉིས་པ་བུད་མེད་ཀྱི་དབང་དུ་གྱུར་ན་ནི་དེའི་ཚེ་དགེ་སློང་ལ་བུད་མེད་ཀྱི་སྐབས་ཀྱི་ཁ་ན་མ་ཐོབ་ཡོངས་སུ་རྫོགས་པར་རོ། །ཇི་སྟེ་སྐྱེས་པའི་དབང་དུ་གྱུར་ན་ནི་དེའི་ཚེ་དགེ་སློང་ལ་སྐྱེས་པའི་སྐབས་ཀྱི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །འདིར་གཞུང་ནི་མཚན་གཉིས་པ་ལ་རེག་ན་གལ་ཏེ་བུད་མེད་ཀྱི་དབང་དུ་གྱུར་པ་ཡིན་ན་ནི། དེས་ན་དགེ་འདུན་ལྷག་མའི་ལྟུང་བར་འགྱུར་རོ། །དེ་སྐྱེས་པའི་དབང་དུ་གྱུར་པ་ཡིན་ན་ནི་དེས་ན་ཉེས་པ་སྦོམ་པོའི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །འདིར་ཕྱེད་ཉིད་བྱེད་པ་པོ་ཡིན་ནོ་ཞེས་བྱ་བ་ནི་མཚན་ཅིག་ཤོས་མོའི་མཚན་ནི་སྐབས་འདིར་རིག་པའི་སྐྱེས་པ་ཉིད་ཀྱི་སྐྱེས་པའི་ཕྱེད་ཉིད་བྱེད་པ་ཡིན་ཏེ། རིག་པའི་སྐྱེས་པ་མཚན་གཉིས་པ་དང་ལྷན་ཅིག་ཏུ་བུད་མེད་དང་ལམ་དུ་འགྲོ་བ་དང༌། བུད་མེད་ལ་ཆོས་སྟོན་པ་ནི་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །བྱེད་པ་པོ་ཉིད་བུད་མེད་དོ་ཞེས་སྨྲས་ན་ཅི་ཐམས་ཅད་ཀྱིའམ་འོན་ཏེ་བྱེ་བྲག་འགའ་ཞིག་ཡོང་ཅེ་ན། དེའི་ཕྱིར་འོག་མ་གསུམ་ལ་ལེགས་པར་སྨྲས་པ་དང་ཉེས་པར་སྨྲས་པ་དག་གི་དོན་ཀུན་ཤེས་པ་དང༌། གཞན་ལ་འཁྲིག་པ་བསྟེན་བར་བྱ་བའི་མཐུ་ཡོད་པ་དེ་ཉིད་ཡིན་ན་དངོས་གཞིའོ་ཞེས་བྱ་བ་སྨྲས་ཏེ། གལ་ཏེ་བུད་མེད་བསླབ་པའི་གཞི་འོག་མ་གསུམ་ལ་ནི་ལེགས་པར་སྨྲས་པ་དང༌། ཉེས་པར་སྨྲས་པ་དག་གི་དོན་ཀུན་ཤེས་པར་བྱ་བ་ལ་མཐུ་ཡོད་པ་ཉིད་ཡིན་ན། དེ་གསུམ་གྱི་དངོས་གཞིའི་བྱེད་པ་པོ་ཉིད་ཡིན་ནོ། །གཞན་ལ་ནི་འཁྲིག་པ་བསྟེན་པར་བྱ་བའི་མཐུ་ཡོད་པ་ཉིད་ཡིན་ན་དེ་དག་གི་དངོས་གཞིའི་བྱེད་པ་པོ་ཉིད་ཡིན་ནོ། ཞེས་བྱ་བར་སྦྱར་རོ། །དེ་ལ་བསླབ་པའི་གཞི་འོག་མ་གསུམ་གང་ཞེ་ན། དེའི་ཕྱིར་འོག་མ་གསུམ་ལ་ཞེས་བྱ་བ་སྨྲས་ཏེ། ལུས་ཀྱིས་རེག་པའི་དགེ་འདུན་ལྷག་མ་ཞེས་བྱ་བའི་བསླབ་པའི་གཞིའི་མཇུག་ཐོགས་སུ་འབྱུང་བའི་བསླབ་པའི་གཞི་གཉིས་པོ་གང་ཡིན་པ་འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་ཞེས་བྱ་བ་དང༌། ཚིག་ལྔའམ་དྲུག་ལས་ལྷག་པར་ཆོས་འཆད་པ་ཞེས་བྱ་བ་ལྟུང་བྱེད་འབའ་ཞིག་ཏུ་འགྱུར་བའི་བསླབ་པའི་གཞི་གང་ཡིན་པ་དང༌། དེ་གསུམ་ནི་འོག་མ་གཉི་ག་ལའོ། །ཁྱིམ་པ་མོ་ལ་སྟོན་པ་
ལའོ་ཞེས་དེ་སྐད་འབྱུང་བའི་ཕྱིར་སྐབས་འདི་ཁོ་ནར་འདོན་པའི་རིམ་པས་ཐ་མ་ཡིན་པའི་ཕྱིར་འོག་མ་སྟེ། དེ་མན་ཆད་བུད་མེད་བྱེད་པ་པོ་ཉིད་དུ་འགྱུར་བའི་བསླབ་པའི་གཞིའི་མདོ་གཞན་ཉེ་བར་མ་བཀོད་པས་དེས་ན་འོག་མ་ཞེས་བྱའོ། །གལ་ཏེ་བུད་མེད་ཀྱི་བསླབ་པའི་གཞི་འོག་མ་དེ་གསུམ་ལ་ནི་ལེགས་པར་སྨྲས་པ་དང་ཉེས་པར་སྨྲས་བདག་གི་དོན་གང་ཡིན་པའི་དོན་དེ་ཀུན་ཤེས་པར་བྱ་བའི་མཐུ་ཡོད་པ་ཉིད་ཡིན་ན། དེའི་ཚེ་བུད་མེད་དེ་དེ་གསུམ་གྱི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། བསླབ་པའི་གཞི་གསུམ་པོ་དེ་དག་གི་སྒྲ་དང་དོན་ཡོངས་སུ་ཤེས་པར་བྱ་བའི་ཕྱིར་མཐུ་ཡོད་པར་འགྱུར་ན་དེའི་ཚེ་བུད་མེད་དེ་བསླབ་པའི་གཞི་དེ་གསུམ་གྱི་དངོས་གཞིའི་ལྟུང་བའི་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །གཞན་གང་ཞེ་ན། དེའི་ཕྱིར་གཞན་ལ་ཞེས་བྱ་བ་སྨྲས་ཏེ། སྔར་སྨྲས་པ་གསུམ་ལས་གཞན་པ་འདིར་དབེན་པ་ན་འདུག་པ་དང༌། དབེན་པ་ན་འགྲེང་བ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འདུག་པ་དང༌། ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བ་དང༌། བུད་མེད་དང་ལྷན་ཅིག་ཉལ་བ་དང༌། སྐྱེས་པ་མེད་པར་བུད་མེད་དང་ལམ་དུ་འགྲོ་བ་ཞེས་བྱ་བའི་ལྟུང་བྱེད་འབའ་ཞིག་ཏུ་འགྱུར་བའི་བསླབ་པའི་གཞི་རྣམས་ཏེ། དེ་དག་ལ་ནི་གལ་ཏེ་བུད་མེད་དེ་འཁྲིག་པ་བསྟེན་པར་བྱ་བའི་མཐུ་ཡོད་པ་ཉིད་ཡིན་ན། བུད་མེད་དེ་ལྟུང་བྱེད་དེ་དག་གི་དངོས་གཞིའི་བྱེད་པ་པོ་ཉིད་ཡིན་ནོ། །གཞན་དུ་ན་འོག་མའི་འོ་ཞེས་བྱ་བ་ལ་གཞན་དུ་ན་ཞེས་བྱ་བ་ནི། དབེན་པ་ན་འདུག་པ་དང༌། འགྲེང་བ་ལ་སོགས་པ་འདི་ལ་ཐམས་ཅད་དུ་ཇི་སྐད་བསྟན་པའི་དོན་བཞིན་བྱེད་པའི་མཐུ་ཡོད་པ་མ་ཡིན་ནའོ། །འོག་མའི་འོ་ཞེས་བྱ་བ་ནི་ཚིག་འོག་མའི་བྱེད་པ་པོ་ཉིད་བུད་མེད་ཡིན་པ་སྟེ། མཐུ་ཡོད་པའི་བུད་མེད་ལ་ལུས་ཀྱིས་རིག་པ་ལ་དགེ་འདུན་ལྷག་མ་གང་ཡིན་པ་དེ་ལ་མཐུ་མེད་ན་ཉེས་པ་སྦོམ་པོའོ། །མཐུ་ཡོད་པར་བར་དུ་བཅད་པ་ཉིད་ལ་ཉེས་པ་སྦོམ་པོ་གང་ཡིན་པ་དེ་ལ་མཐུ་མེད་ན་ཉེས་བྱས་སོ། །མཐུ་ཡོད་པ་དང་ལྷན་ཅིག་ཁྱིམ་གཅིག་ན་ཉལ་བ་ལ་སོགས་པ་ལྟུང་བྱེད་གང་ཡིན་པ་དེ་ལ་མཐུ་མེད་ན་ཉེས་བྱས་སུ་འགྱུར་བའོ། །མ་ནིང་མོ་དང་མ་ནིང་ཕོ་དང་སྤྲུལ་པ་མོ་ལ་ཡང་དེ་བཞིན་ནོ་ཞེས་བྱ་བ་ལ། མ་ནིང་མོ་ཞེས་བྱ་བ་ནི། གང་ལ་མོའི་དབང་པོ་ཡང་མེད། ཕོའི་དབང་པོ་ཡང་མེད་ལ་ནུ་མ་ཡོད་པ་ལ་སོགས་
པས་བུད་མེད་ཀྱི་རྣམ་པ་ལ་ཅུང་ཟད་བརྟེན་པ་སྟེ། དེ་ནི་མ་ནིང་མོ་ཞེས་བྱའོ། །མ་ནིང་ཕོ་ཞེས་བྱ་བ་ནི། གང་ལ་ཕོའི་དབང་པོ་ཡང་མེད། མོའི་དབང་པོ་ཡང་མེད་ལ་ཁ་སྤུ་ལ་སོགས་པས་སྐྱེས་པའི་རྣམ་པ་ལ་ཅུང་ཟད་བརྟེན་པ་སྟེ། དེ་ནི་མ་ནིང་ཕོ་ཞེས་བྱའོ། །སྤྲུལ་པ་མོ་ཞེས་བྱ་བ་ནི། སེམས་ཅན་དུ་བགྲང་བ་ཁོ་ན་གསང་སྔགས་དང་སྨན་ལ་སོགས་པས་བསྒྱུར་བའོ། །མ་ནིང་མོ་ལ་སོགས་པ་དེ་དག་ལ་བུད་མེད་ཉིད་མེད་པས་མཐུ་མེད་པ་ཉིད་དུ་ཉེ་བར་གདགས་པའི་ཕྱིར་དེ་བཞིན་ནོ་ཞེས་བྱ་བ་སྨྲས་ཏེ། མཐུ་མེད་པ་དང་འདྲའོ་ཞེས་བྱ་བའི་ཐ་ཚིག་གོ །གསུམ་པོ་འདི་ལ་སྐྱེས་པའོ་ཞེས་བྱ་བ་ལ། གསུམ་པོ་འདི་ལ་ཞེས་བྱ་བ་ནི་ལུས་ཀྱིས་རེག་པ་དང༌། འཁྲིག་བ་དང་ལྡན་པར་སྨྲ་བ་དང༌། བསྙེན་བཀུར་བསྔགས་པ་དག་ལའོ། །སྐྱེས་པའོ་ཞེས་བྱ་བ་ནི། སྐྱེས་པ་ཡང་མཐུ་མེད་པ་དང་འདྲ་བ་ཁོ་ནའོ། །གལ་ཏེ་དེ་དག་གི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་དང་ལྡན་པས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲ་ནི་འདིར་གསུམ་པོ་འདི་ལ་ཞེས་བྱ་བའི་རྗེས་བསྙག་པའི་ཕྱིར་རོ། །དེ་དག་གི་བདེ་བ་ཉམས་སུ་མྱོང་བར་བྱ་བའི་འདུན་པ་ཞེས་བྱ་བ་ལ། དེ་དག་གི་ཞེས་བྱ་བའི་སྒྲ་ནི་ལུས་ཀྱིས་རེག་པ་དང༌། འཁྲིག་པ་དང་ལྡན་པར་སྨྲ་བ་དང༌། བསྙེན་བཀུར་བསྔགས་པ་ཞེས་བྱ་བའི་དགེ་འདུན་ལྷག་མ་གསུམ་ལ་བསྙེགས་སོ། །དེ་དག་གི་ཡུལ་ལ་བདེ་བ་གང་ཡོད་པའི་བདེ་བ་དེ་ཉམས་སུ་མྱོང་བ་ཕྲད་པར་བྱ་བའི་ཕྱིར་འདུན་པ་གང་ཡིན་པ་དེ་ནི་དེ་དག་གི་བདེ་བ་ཉམས་སུ་མྱོང་བར་བྱ་བའི་འདུན་པ་སྟེ། དེས་སོ་ཞེས་བྱ་བར་སྦྱར་རོ། །ཀུན་ཏུ་འདོད་ཆགས་དང་ལྡན་པས་ཞེས་བྱ་བ་ནི་འདུན་པ་དེའི་བྱེ་བྲག་ཡིན་ནོ། །བྱེ་བྲག་དེ་ཡང་སོ་སོར་ཐར་པའི་མདོ་ལས་གསུངས་པའི་ཚིག་བསྡུ་བའི་ཕྱིར་ཏེ། སོ་སོར་ཐར་པའི་མདོ་ལས་དྲལ་ཅིང་གྱུར་པའི་སེམས་ཀྱིས་འབྱུང་བའི་ཕྱིར་རོ། །དེ་ལ་དྲལ་བ་ཉིད་ནི་ཀུན་ནས་དཀྲིས་པ་ཉིད་དོ། །གྱུར་པ་ཉིད་ནི་བུད་མེད་དེ་ལ་རྟོག་པ་ཉིད་དོ། །ཀུན་ནས་དཀྲིས་པ་ཉིད་ཅེས་བྱ་བ་འདོད་ཆགས་མངོན་དུ་གྱུར་པ་ཉིད་དྲལ་བ་ཉིད་ཅེས་གསུངས་པ་གང་ཡིན་པ་དང༌། ཡུན་རིང་པོ་ནས་ཆགས་པར་གྱུར་པའི་སྲེད་པའི་རྗེས་སུ་ཞུགས་པ་ཉིད་དང༌། རྗེས་སུ་འབྲེལ་བ་ཉིད་གྱུར་པ་ཉིད་ཅེས་གསུངས་པ་གང་ཡིན་པའི་བྱེ་བྲག་གི་ཚིག་གཉིས་གསུངས་པ་དེས་བྱེ་བྲག་ཅན་དུ་གྱུར་པའི་འདོད་ཆགས་གང་ཡིན་པ་དེ་ནི་འདིར་ཀུན་ཏུ་འདོད་ཆགས་པ་
ཞེས་བྱ་བའི་སྒྲར་བརྗོད་པ་ཡིན་པར་རིག་པར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། །བྱེ་བྲག་བསྟན་པ་དེས་བྱེ་བྲག་ཅན་དུ་གྱུར་པའི་འདོད་ཆགས་དེ་དང་ལྡན་པ་གང་ཡིན་པ་དེ་ནི་དེ་དག་གི་བདེ་བ་ཉམས་སུ་མྱོང་བར་བྱ་བའི་འདུན་པ་ཞེས་བྱ་སྟེ། འདུན་པ་དེས་དགེ་སློང་གིས་འོག་ནས་འབྱུང་བའི་མཚན་ཉིད་དང་ལྡན་པའི་ལུས་ལ་རེག་པ་དང༌། འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་གང་ཡིན་པ་བྱས་ན་དེའི་ཚེ་དགེ་འདུན་ལྷག་མར་འགྱུར་རོ་ཞེས་བྱ་བའི་ཐ་ཚིག་གོ །འཁྲིག་པ་དང་ལྡན་པ་སྨྲ་བ་དང༌། བསྙེན་བཀུར་བསྔགས་པ་ལ་སོགས་པ་དང། ཐུན་མོང་གི་མཚན་ཉིད་བསྟན་ནས་ད་ནི་ལུས་ཀྱིས་རེག་པའི་དགེ་འདུན་ལྷག་མ་འབའ་ཞིག་གི་སྐབས་བརྗོད་པར་བྱ་སྟེ། དེའི་ཕྱིར་ལུས་ཀྱིས་རེག་པ་བདག་གིར་བྱེད་ནའོ་ཞེས་བྱ་བ་སྨྲས་ཏེ། བུད་མེད་ཀྱི་ལུས་ལ་རེག་པ་ནི་ལུས་ཀྱིས་རེག་པའོ། །དེ་ལ་བདག་གིར་བྱེད་པ་ནི་སྔར་བསྟན་པའི་ཀུན་དུ་འདོད་ཆགས་པ་དང་ལྡན་པའི་འདུན་པས་རོ་མྱོང་བར་བྱེད་ནའོ། །འདིར་ལན་བུ་ནི་དེ་དང་ལྡན་པ་ཉིད་དོ་ཞེས་བྱ་བ་ལ། འདིར་ཞེས་བྱ་བ་ནི། ལུས་ཀྱིས་རེག་པའི་དགེ་འདུན་ལྷག་མའི་སྐབས་འདིར་ཡིན་གྱི། བུད་མེད་ཀྱི་མཚན་མའི་ཁ་ན་མ་ཐོ་བ་དབེན་པ་ན་འདུག་པ་ལ་སོགས་པ་གཞན་ལ་ནི་མ་ཡིན་ནོ། །ལན་བུ་ཞེས་བྱ་བ་ནི་སྐྲ་བསྡུས་པའོ། །དེ་ནི་དེ་དང་ལྡན་པ་ཉིད་དོ་ཞེས་བྱ་བ་ནི། ལན་བུ་དེ་ནི་ལུས་དང་ལྡན་པ་ཉིད་དེ། དེ་ལ་རེག་ན་དངོས་གཞིའོ། །སྐྲ་དག་ལ་ལུས་ཀྱི་དབང་པོ་མེད་པའི་ཕྱིར། ལུས་ཀྱི་མཚན་ཉིད་མེད་པས་དེ་ལ་རེག་པ་ལ་དགེ་འདུན་ལྷག་མར་མི་འགྱུར་རོ་སྙམ་དུ་དོགས་པ་བསལ་བའི་ཕྱིར་མདོ་འདི་བསྟན་ཏེ། དེ་ལ་འདོད་ཆགས་ལྷག་པར་སྐྱེ་བའི་ཕྱིར་རོ། །དེ་དང་འབྲེལ་བའི་གོས་ལ་ཡང་ངོ་ཞེས་བྱ་བ་ནི། ལན་བུ་དང་འབྲེལ་བའི་སྐུད་པ་ལ་སོགས་པ་ལན་བུའི་ཡན་ལག་ཏུ་གྱུར་པ་ལ་རེག་ན་ཡང་དངོས་གཞིའི་ཁ་ན་མ་ཐོ་བའོ། །ཅོད་པན་དང༌། ཁ་ཆུ་ལ་སོགས་པ་ལ་རེག་པ་ནི་དཔེར་ན་སེན་མོ་དག་དང་འདྲ་བར་སྦོམ་པོའོ། །ནོམ་པ་དང་ཉུག་པ་དང་སྤྲོད་པ་དང་འཛིན་པ་དང༌། འདྲེན་པ་དང༌། ཡོངས་སུ་འདྲེན་པ་དང༌། འོག་ནས་འཁྱུད་པ་དང༌། སྟེང་ནས་འཁྱུད་པ་དང༌། དམ་དུ་སྦྱོར་བ་རྣམས་ལ་ནི་བྱེ་བྲག་མེད་པ་ཉིད་དོ་ཞེས་བྱ་བ་ལ་ནོམ་པ་ལ་སོགས་པ་ནི་ལྟུང་བ་ལ་བྱེ་
བྲག་མེད་པ་ཉིད་དེ། ཇི་ལྟར་རེག་ན་ཡང་དངོས་གཞི་ཉིད་ཡིན་གྱི། རེག་པའི་བྱེ་བྲག་ལས་ལྟུང་བའི་བྱེ་བྲག་ཏུ་འགྱུར་བ་ནི་མ་ཡིན་ནོ། །དེ་ལ་ནོམ་པ་ཞེས་བྱ་བ་ནི་དང་པོར་ལན་ཅིག་ལུས་ལ་སྦྱོར་བ་ཉིད་དོ། །ཉུག་པ་ཞེས་བྱ་བ་ནི། །ཡང་དང་ཡང་དུ་ལུས་ལ་སྦྱོར་བའོ། །སྤྲོད་པ་ཞེས་བྱ་བ་ནི། མཐང་སྦྱར་བའི་བསམ་པས་རང་གི་ལུས་བུད་མེད་ཀྱི་ལུས་དང་བར་དུ་མ་བཅད་པར་སྤྲོད་པའོ། །འཛིན་པ་ཞེས་བྱ་བ་ནི་ལག་པ་ལ་སོགས་པ་འཆང་བའོ། །འདྲེན་པ་ཞེས་བྱ་བ་ནི། ཡུལ་ཐག་རིང་པོ་ནས་ལག་པ་ལ་སོགས་པ་ནས་བཟུང་སྟེ་འདྲེན་པའོ། །ཡོངས་སུ་འདྲེན་པ་ཞེས་བྱ་བ་ནི། ཡུལ་དང་ཐག་ཉེ་བ་ནས་ཁོར་ཡུག་ཏུ་བསྐོར་བའོ། །འོག་ནས་འཁྱུད་པ་ཞེས་བྱ་བ་ནི། འོག་ན་འདུག་པ་ལུས་ཀྱི་སྟེང་དུ་འཇོག་ཅིང་འཁྱུད་པར་བྱེད་པ་སྟེ། སྟེང་དུ་བཞག་ནས་མཐང་སྦྱོར་བར་བྱེད་ཅེས་བྱ་བའི་ཐ་ཚིག་གོ །སྟེང་ནས་འཁྱུད་པ་ཞེས་བྱ་བ་ནི། ལུས་ཀྱི་སྟེང་དེ་ནས་ཀྱང་པ་བ་སྟེ། འོག་ཏུ་འཇུག་ཅིང་འཁྱུད་པར་བྱེད་དེ། འོག་ཏུ་བཅུག་ནས་མཐར་སྦྱོར་བར་བྱེད་ཅེས་བྱ་བའི་ཐ་ཚིག་གོ །དམ་དུ་སྦྱོར་བ་ཞེས་བྱ་བ་ནི་མཐང་དམ་དུ་སྦྱོར་བ་ལ་སོགས་པའོ། །བསྟེན་པར་བྱ་བས་བྱས་པ་ཉིད་ཀྱང་ངོ་ཞེས་བྱ་བ་ཡང་བྱེ་བྲག་མེད་དོ་ཞེས་བྱ་བར་སྦྱར་ཏེ། འདིར་བསྟེན་པར་བྱ་བ་ཞེས་བྱ་བ་ནི། བུད་མེད་དང༌། སྐྱེས་པ་དང༌། མ་ནིང་ལ་སོགས་པ་དག་ཡིན་པར་རིག་པར་བྱའོ། །བསྟེན་པར་བྱ་བ་དེས་ནོམ་པ་དང་ཉུག་པ་ལ་སོགས་པའི་རེག་པ་བྱས་པ་ཉིད་གང་ཡིན་པ་དེ་ལ་ཡང་འདིར་བདག་གིར་བྱ་བ་དང་བཅས་པས་རོ་མྱོང་བར་བྱེད་ན་བྱེ་བྲག་མེད་པ་ཉིད་དོ། །འདི་སྐད་བསྟན་ཏེ། དཔེར་ན་དགེ་སློང་ཀུན་དུ་འདོད་ཆགས་པའི་སེམས་ཀྱིས་བུད་མེད་ལ་སོགས་པའི་ལུས་ལ་ནོམ་པ་དང༌། ཉུག་པ་ལ་སོགས་པ་གང་ཡིན་པ་དེ་ལྟུང་བར་འགྱུར་བ་དེ་བཞིན་དུ་གལ་ཏེ་བུད་མེད་ལ་སོགས་པས་དགེ་སློང་གི་ལུས་ལ་ནོམ་པ་དང༌། ཉུག་པ་ལ་སོགས་པ་བྱེད་པ་ལ་གལ་ཏེ་དགེ་སློང་ཀུན་དུ་འདོད་ཆགས་པའི་སེམས་ཀྱིས་དེ་ལ་བདག་གིར་བྱ་བ་བྱེད་ན་དེ་ཡང་ལྟུང་བར་འགྱུར་ཏེ་ན་སྨད་པ་མེད་དོ། །བསྟེན་པར་བྱ་བས་བྱས་པའི་ནོམ་པ་དང༌། ཉུག་པ་ལ་སོགས་པ་ལ་ཡང་ཀུན་དུ་འདོད་ཆགས་པའི་སེམས་ཀྱིས་བདག་གིར་བྱེད་ན་ལྟུང་བ་ལ་བྱེ་བྲག་མེད་དོ། །བསྟེན་པར་བྱ་བ་ཞེས་སྨོས་པ་ནི་བུད་མེད་དང་སྐྱེས་པ་དང༌། མ་ནིང་ལ་སོགས་པ་སྤྱིར་བསྡུ་བའི་ཕྱིར་རོ། །ཀུན་དུ་འདོད་
ཆགས་པའི་སེམས་མེད་པར་སྙིང་བརྩེ་བ་ལ་སོགས་པའི་སེམས་གཞན་གྱིས་རེག་པ་ལ་ནི་ཉེས་པ་མེད་དོ། །གོས་ཀྱིས་བར་དུ་ཆོད་པ་ལ་ནི་འོག་མར་རོ་ཞེས་བྱ་བ་ནི། གོས་ཀྱིས་བར་དུ་ཆོད་ཅིང་བར་ཆད་ཡོད་ན། བུད་མེད་ལ་སོགས་པའི་ལུས་ལ་རེག་པ་ནི་ཚིག་འོག་མར་འགྱུར་བར་རིག་པར་བྱ་སྟེ། གང་ལ་དངོས་གཞིར་འགྱུར་བ་དེ་ལ་ནི་སྦོམ་པོའོ། །གང་ལ་སྦོམ་པོར་འགྱུར་བ་དེ་ལ་ནི་ཉེས་བྱས་སོ་ཞེས་བྱ་བའི་ཐ་ཚིག་གོ །ལུས་ཀྱིས་རེག་པ་ཚོར་བ་ལ་ཡང་ལྟུང་བ་ལ་བྱེ་བྲག་མེད་དོ། །ཐམས་ཅད་དུ་ལུས་ཀྱིས་རེག་པ་མེད་པའི་ཕྱིར་རོ། །བར་དུ་ཆོད་པ་ཞེས་བྱ་བའི་སྒྲ་ནི་བར་ཆད་ཀྱིས་ཆོད་པའི་ཚིག་ཡིན་ནོ། །ཉེས་བྱས་ཀྱི་ན་སྨད་པ་ནི་གཞན་ཉིད་མ་ཡིན་ནོ་ཞེས་བྱ་བ་ནི། ཇི་ལྟར་ཕམ་པར་འགྱུར་བ་ལ་སོགས་པ་གཞན་ལ་ལྟུང་བ་ན་སྨད་པར་གསུངས་པ་ལ་སྦོམ་པོ་ལ་སོགས་པ་ལྟུང་བ་གཞན་དུ་རྣམ་བར་གཞག་པ་ལྟར་ཉེས་བྱས་ལ་ནི་མེད་དེ། འདི་ལྟར་ཉེས་བྱས་ལན་སྨད་ན་ཡང་ཉེས་བྱས་ཡིན་པའི་ཕྱིར། གཞན་ཉིད་མ་ཡིན་ཏེ་ཉེས་བྱས་ཉིད་དེ་ཉེས་བྱས་ཕྲ་མོ་ཞེས་བྱ་བའི་ཐ་ཚིག་གོ །དགེ་སློང་མ་ལ་རེག་པར་མི་བྱའོ་ཞེས་བྱ་བ་ནི། བསམ་པའི་ཉེས་པ་མེད་དུ་ཟིན་ཀྱང་རེག་པར་མི་བྱའོ། །བུད་མེད་ལ་ཡང་མི་བྱའོ་ཞེས་བྱ་བ་ཡང་རེག་པར་ཞེས་བྱ་བར་སྦྱར་རོ། །འདིར་ཡང་བསམ་པའི་ཉེས་པ་མེད་དུ་ཟིན་ཀྱང་བཀག་པར་རིག་པར་བྱ་སྟེ། འདིར་གཉི་ག་ལ་རེག་ན་ཉེས་བྱས་སོ། །འདི་ལྟར་དགེ་སློང་མ་ནི་བུད་མེད་ཀྱི་རིགས་ལས་མ་འདས་མོད་ཀྱི། འོན་ཀྱང་དགེ་འདུན་གྱི་ཁོངས་སུ་གཏོགས་པའི་ཕྱིར་བསམ་པའི་ཉེས་པ་མེད་ན་དེ་ལ་རེག་པ་ལ་ཉེས་པ་མེད་དོ་སྙམ་དུ་དོགས་པ་བསལ་བའི་ཕྱིར་ཚིག་ལོགས་ཤིག་ཏུ་སྨོས་སོ། །ཚུར་ཉམ་ཐག་པ་བསྒྲལ་བའི་ཕྱིར་ནི་རེག་པར་བྱའོ་ཞེས་བྱ་བ་ནི། བུད་མེད་ལ་རེག་པར་མི་བྱའོ་ཞེས་བྱ་བ་སྤྱིར་སྦྱར་བའི་དམིགས་ཀྱིས་བསལ་བ་བསྟན་པའི་ཕྱིར་མདོ་འདི་བསྟན་ཏོ། །འོ་ན་འོག་ནས་ཀྱང་སྙིང་བརྩེ་བས་སྡུག་བསྔལ་ལས་ཐར་བར་བྱ་བ་ལ་ལྟུང་བ་མེད་དོ་ཞེས་འབྱུང་བས་དེས་ཀྱང་དམིགས་ཀྱིས་བསལ་བ་མི་བྱེད་དམ་ཞེ་ན། བདེན་མོད་ཀྱི་འོན་ཀྱང་འོག་ཁོ་ན་ནས་མ་དང་བུ་མོ་དང་སྲིང་མོའི་འདུ་ཤེས་ཉེ་བར་གཞག་སྟེ། ལག་པའམ་སྐྲ་དག་ལས་སོ་ཞེས་འབྱུང་བ་དེ་དག་གི་ཡུལ་བསྟན་པའི་ཕྱིར་འདིར་ཡང་བརྩམ་མོ། །ཚུར་ཞེས་བྱ་བ་ནི་
ཆུའི་ནང་དུའོ། །ཉམ་ཐག་པ་ཞེས་བྱ་བ་ནི་སྡུག་བསྔལ་ཐོབ་པར་འགྱུར་བ་སྟེ། དེ་ལྟ་བུའི་བུད་མེད་བསྒྲལ་བའི་ཕྱིར་ནི་རེག་པར་བྱའོ་ཞེས་བྱ་བའི་ཐ་ཚིག་གོ །ཇི་ལྟར་རེག་པར་བྱ་ཞེ་ན། དེའི་ཕྱིར་མ་དང་སྲིང་མོ་དང་བུ་མོའི་འདུ་ཤེས་ཉེ་བར་གཞག་སྟ། ལག་པའམ་སྒྲ་དག་ལས་སོ་ཞེས་བྱ་བ་སྨྲས་ཏེ། མ་ལ་སོགས་པའི་འདུ་ཤེས་ཉེ་བར་གཞག་སྟེ། ལག་པའམ་སྐྲ་དག་ལས་རེག་པར་བྱའོ་ཞེས་བྱ་བའི་ཐ་ཚིག་གོ །དྲན་པ་རྙེད་པར་བྱ་བའི་ཕྱིར་བྱེ་མ་བདལ་བའི་སྟེང་དུ་ཁས་སྦུབ་ཏུ་གཞག་གོ་ཞེས་བྱ་བ་ནི་བུད་མེད་བསྒྲལ་བའི་ཕྱིར་དང༌། དྲན་པ་རྙེད་པར་བྱ་བའི་ཕྱིར་བྱེ་མ་བདལ་བའི་སྟེང་དུ་ཁས་སྦུབ་ཏུ་གཞག་སྟེ། དེའི་ཚེ་ན་ཆུ་ཞུགས་པ་འཛག་པར་འགྱུར་ཞིང་དེ་ཟགས་ན་དྲན་པ་ཐོབ་པར་འགྱུར་རོ། །ཁྲིའུ་བཞིན་དུ་བསྲུང་བར་བྱའོ་ཞེས་བྱ་བ་ནི། ཇི་ལྟར་ཁྱིམ་པ་རྣམས་ལ་བསྟབས་པའི་ཁྲིའུ་དག་གིས་བསྲུང་བ་བསྟན་པ་དེའི་ཕྱོགས་གཅིག་ཏུ་འདུག་སྟེ། རང་གི་ལས་ཀྱང་བྱེད་སེམས་ཀྱང་གཏོད་དེ། ཁ་དོན་བྱེད་པའམ་ཡིད་ལ་བྱེད་པ་བསྐྱེད་ཅིང་ཕྱོགས་གཅིག་ཏུ་འདུག་སྟེ་སྲུང་བར་བྱེད་པ་དེ་བཞིན་དུ་བུད་མེད་ཆུ་ལས་བསྒྲལ་བ་དེ་ཡང་བསྲུང་བར་བྱའོ། །བ་ལང་རྫིའམ་ཕྱུགས་རྫི་དག་ལ་གཏད་དེ་ཟན་ལ་འགྲོ་བར་བྱའོ་ཞེས་བྱ་བ་ནི། གལ་ཏེ་དགེ་སློང་དེ་ཟན་ལ་འགྲོ་ན་དེའི་ཚེ། དང་པོར་བུད་མེད་དེ་བ་ལང་རྫི་ལ་སོགས་པ་དག་ལ་གཏད་དེ་ཕྱིས་འགྲོ་བར་བྱའོ། །གལ་ཏེ་རེ་ཞིག་གཏོད་པར་བྱེད་ན་ནི་དེའི་ཚེ་དགེ་སློང་དེས་ཡང་དེ་ཉིད་དུ་འགྲོ་བར་བྱའོ། །གྲོང་ལ་སོགས་པར་བཀྲི་བའི་ཕྱིར་འབད་པར་བྱ་སྟེ། གལ་ཏེ་གྲོང་ལ་སོགས་པར་བཀྲིར་མི་ནུས་ན་དེའི་ཚེ་གལ་ཏེ་བདག་ཉིད་དང་བུད་མེད་དེ་སྟག་ལ་སོགས་པའི་འཇིགས་པ་དག་ལས་ཡོངས་སུ་བསྲུང་བར་ནུས་ན་མཚན་མོ་ཡང་དེ་ཉིད་དུ་གནས་པར་བྱའོ། །འཚོ་བའམ་འོན་ཏེ་མ་ཡིན་ཞེས་ཡང་དང་ཡང་དུ་བརྟག་པར་བྱའོ་ཞེས་བྱ་བ་ནི། དགེ་སློང་དེས་དོན་མེད་པ་སྤང་བའི་ཕྱིར་བུད་མེད་དེ་ལ་འདི་འཚོ་བའམ་འོན་ཏེ་མ་ཡིན་ཞེས་ཡང་དང་ཡང་དུ་བརྟག་པར་བྱའོ། །སེམས་དག་པས་སྙིང་བརྩེ་བས་བུད་མེད་འཁྱུད་པ་ལ་ཉེས་པ་མེད་དོ་ཞེས་བྱ་བ་ནི། དགེ་སློང་སེམས་དག་པ་དགེ་ལེགས་ཀྱི་སེམས་དང་ལྡན་པས་སྙིང་བརྩེ་བས་བུད་མེད་ལ་གལ་ཏེ་འདི་བདག་གིས་འཁྱུད་པ་བཏང་ན་སྲོག་གི་བར་ཆད་དུ་འགྱུར་རོ་སྙམ་པས། འཁྱུད་པ་ལ་ཉེས་པ་མེད་དོ། །
ཡང་ན་བུད་མེད་སེམས་དག་པས་བུ་ལ་སོགས་པའི་འདུ་ཤེས་ཀྱིས་བདག་ལ་ཟུང་ཤིག་ཅེས་ཟེར་བ་ལ་འཁྱུད་པ་ལ་ཉེས་པ་མེད་དོ། །དེའི་ཆོ་ག་ནི་དེ་ཡིན་གྱི་གཞན་དུ་ནི་མ་ཡིན་ནོ། །དེ་ལྟར་ཡང་སྨན་གྱི་གཞི་དག་ལས། བཅོམ་ལྡན་འདས་ཀྱིས་ཀ་ཙང་ཀ་ལ་ལ་འཁྱུད་པ་གནང་ངོ་ཞེས་འབྱུང་བ་སྟེ། དེ་མདོ་འདིར་བསྡུས་པ་ཡིན་ནོ། །ལུས་ཀྱིས་རེག་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་ལུས་ཀྱིས་རེག་པའི་དགེ་འདུན་ལྷག་མ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ད་ནི་ལུས་ཀྱིས་རེག་པའི་དགེ་འདུན་ལྷག་མ་ཞུ་བའི་སྐབས་ནས་འབྱུང་བ་བརྗོད་པར་བྱ་སྟེ། འཇམ་པ་དང་དྲོ་བ་དང་སྙི་བའི་བསམ་པ་ཉིད་ནི་སྦོམ་པོའོ་ཞེས་བྱ་བ་ནི། འཇམ་པའི་བསམ་པ་ཉིད་དང༌། དྲོ་བའི་བསམ་པ་ཉིད་དང༌། སྙི་བའི་བསམ་པ་ཉིད་ཀྱིས་དགེ་སློང་གིས་བུད་མེད་ལ་རེག་པར་བྱེད་ཅིང་འཁྲིག་པ་དང་ལྡན་པའི་རོ་མྱོང་བའི་བསམ་པས་མ་ཡིན་ན་སྦོམ་པོའོ། །འདི་སྐད་བསྟན་ཏེ། འཇམ་པ་ལ་སོགས་པའི་བསམ་པ་ཉིད་ཀྱིས་བུད་མེད་ལ་རེག་པ་སྦོམ་པོར་འགྱུར་རོ། །འདིར་གཞུང་ནི་བཙུན་བ་དགེ་སློང་གིས་རེ་ཞིག་འཇམ་པའི་བསམ་པ་དང༌། དྲོ་བའི་བསམ་པ་དང༌། སྙི་བའི་བསམ་པས་ལུས་ལ་རེག་པར་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོའོ་ཞེས་གསུངས་པ་ཡིན་ནོ། །སྐབས་འདིར་ཞུ་བ་དང༌། འདུལ་བྱེད་དག་ལས་ཀུན་དུ་འདོད་ཆགས་བ་མེད་པར་བུད་མེད་དག་གི་ལུས་ལ་རེག་པ་རྣམ་པ་ལྔ་གསུངས་ཏེ། དེ་ནི་ཁྱད་པར་ཅན་གྱི་སྤྱོད་པ་དང༌། ཁྱད་པར་ཅན་གྱི་སྤྱོད་པ་དང་འདྲ་བ་དང༌། རྒོད་བག་གིས་རེག་པ་ཁོ་ནར་བྱ་བ་དང༌། རེག་པའི་བྱེ་བྲག་ཉམས་སུ་མྱོང་བར་འདོད་པ་དང༌། མི་འདོད་པར་སྐྱེ་པོ་མང་པོ་རྡོས་པའི་དུས་དག་ཏུ་དབང་མེད་པར་རེག་པ་གང་ཡིན་པ་དག་གོ །དེ་ལ་རེ་ཞིག་ཁྱད་པར་ཅན་གྱི་སྤྱོད་པ་ནི་རྣམ་པ་གསུམ་སྟེ། སྙིང་བརྩེ་བ་དང༌། ཉེ་དུ་བཤེས་པ་མཐོང་བ་དང༌། སྔོན་ཀུན་དགའ་བ་ཉམས་སུ་མྱོང་བའོ། །ཁྱད་པར་ཅན་གྱི་སྤྱོད་པ་དང་འདྲ་བ་ནི་གནས་མ་ཡིན་པར་འཇུག་པ་སྟེ། སྒྱེལ་བ་རང་ཉིད་ལྡང་ནུས་པ་སློང་བར་བྱེད་པའོ། །ལྔ་པོ་དེ་དག་ལས་རེག་པའི་བྱེ་བྲག་ཉམས་སུ་མྱོང་བར་འདོད་པས། རིག་པ་གང་ཡིན་པ་དེ་ལ་འཇམ་པ་དང༌། དྲོ་བ་དང༌། སྙི་བའི་བསམ་པ་ཉིད་ན་སྦོམ་པོའོ་ཞེས་བྱ་བའི་རྣམ་པ་
འདི་བསྟན་ཏོ། །ལྷག་མ་རྣམས་ནི་ལྟུང་བ་དང་ལྟུང་བ་མེད་པར་བསྟན་པའི་ཕྱིར་བརྗོད་དོ། །སྙིང་བརྩེ་བས་སྡུག་བསྔལ་ལས་ཐར་བར་བྱ་བ་ལ་ནི་ལྟུང་བ་མེད་དོ་ཞེས་བྱ་བ་ནི། ཁྱད་པར་ཅན་གྱི་སྤྱོད་པ་སྙིང་བརྩེ་བས་རེག་པ་སྟེ། མེ་དང་ཆུ་དང་གཡངས་ལ་སོགས་པའི་སྡུག་བསྔལ་ལས་ཐར་བར་བྱ་བའི་ཕྱིར་སྙིང་བརྩེ་བས་བུད་མེད་ལ་རེག་པ་དེ་ལ་ནི་ལྟུང་བ་མེད་དེ། ཁྱད་པར་ཅན་གྱི་སྤྱོད་པ་ཡིན་པའི་ཕྱིར་དང༌། ཉོན་མོངས་པ་ཅན་གྱི་སེམས་མེད་པའི་ཕྱིར་དེ་ལ་ལྟུང་བ་མེད་དོ། །མ་དང་བུ་མོ་དང་སྲིང་མོ་དག་ལ་དེ་དག་ཏུ་འདུ་ཤེས་པའོ་ཞེས་བྱ་བ་ནི། ཁྱད་པར་ཅན་གྱི་སྤྱོད་པ་ཉེ་དུ་བཤེས་པ་མཐོང་བས་རེག་པ་སྟེ། མ་ལ་སོགས་པ་དག་ལ་མ་ལ་སོགས་པ་དེ་དག་ཏུ་འདུ་ཤེས་པས་མ་ལ་སོགས་པ་དག་ལ་རེག་པ་ལ་ལྟུང་བ་མེད་དོ། །འདི་སྐད་བསྟན་ཏེ། དགེ་སློང་གིས་མ་ལ་སོགས་པའི་ཡུལ་ལ་མ་ལ་སོགས་པར་འདུ་ཤེས་པས་རེག་པ་ལ་ལྟུང་བ་མེད་དོ། འདི་ཡང་ཁྱད་པར་ཅན་གྱི་སྤྱོད་པ་ཁོ་ན་ཡིན་པས་དེའི་ཕྱིར་ལྟུང་བ་མེད་དོ། །སྔོན་སྤྱད་པ་ཉིད་ལ་ནི་ཀུན་དགའ་བར་བྱའོ་ཞེས་བྱ་བ་ནི། འདིར་ཡང་ཁྱད་པར་ཅན་གྱི་སྤྱོད་པ་ཡིན་པའི་ཕྱིར་ཉེས་པ་མེད་དེ། ཀུན་དགའ་བར་བྱ་བ་ནི་ཀུན་དུ་ཆགས་པ་མེད་པའི་ཡིད་ཀྱིས་གཅུགས་པར་སྟོན་པ་སྟེ། དེའི་ཆེད་དུ་རེག་པ་ལ་ལྟུང་བ་མེད་དོ། །ལུས་ཀྱིས་རེག་པ་ཞུ་བའི་སྐབས་སོ་ཞེས་བྱ་བ་ལ་ལུས་ཀྱིས་རེག་པའི་དགེ་འདུན་ལྷག་མ་ཞུ་བའི་སྐབས་ནས་འབྱུང་བ་རྫོགས་སོ།། །།ད་ནི་ལུས་ཀྱིས་རེག་པར་བྱ་བའི་དགེ་འདུན་ལྷག་མ་འདུལ་བྱེད་ཀྱི་སྐབས་ནས་འབྱུང་བ་བརྗོད་པར་བྱ་སྟེ། དེའི་ཕྱིར་ཟས་དང་ས་དང་བོང་བ་ལ་སོགས་པ་མོའི་དབང་པོར་འཛུད་ན་སྦོམ་པོའོ་ཞེས་བྱ་བ་སྨྲས་ཏེ། ཟས་ལ་སོགས་པ་མོའི་དབང་པོར་འཛུད་ན་སྦོམ་པོའོ། །འདི་སྐད་བསྟན་ཏེ། གལ་ཏེ་དགེ་སློང་གིས་ཕྱེ་ལ་སོགས་པའི་ཟས་དང་ས་རྡུལ་དང༌། བོང་བ་ལ་སོགས་པ་མོའི་དབང་པོར་འཐོར་ན་ཉེས་པ་སྦོམ་པོར་འགྱུར་རོ། །རྐང་པ་དང་ཕྲག་པ་ལ་སོགས་པས་བུད་མེད་ལ་འཕུལ་ན་ཉེས་བྱས་སོ་ཞེས་བྱ་བ་ནི། རྐང་པ་དང་ཕྲག་པ་དང་གཞན་ཡང་རྩིབ་ལོགས་ལ་སོགས་པས་བུད་མེད་ལ་འཕུལ་ན་ཉེས་བྱས་སོ། །འདིར་གཞུང་ནི་དགེ་སློང་གིས་རྐང་པ་ལ་སོགས་པས་བུད་མེད་བསྒུལ་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །དེའི་
སྟན་ལ་ཡང་ངོ་ཞེས་བྱ་བ་ནི། བུད་མེད་དེའི་སྟན་ཁྲིའུ་ལ་སོགས་པ་བུད་མེད་དང་བཅས་པའམ། བུད་མེད་མེད་པ་ལ་ཡང་རྐང་པ་ལ་སོགས་པས་འཕུལ་ན་ཉེས་བྱས་སོ། །འདིར་གཞུང་ནི་དགེ་སློང་གིས་བུད་མེད་དང་བཅས་པའམ། བུད་མེད་མེད་པའི་སྟན་བསྒུལ་ན་ཉེས་བྱས་སོ་ཞེས་གསུངས་པ་ཡིན་ནོ། །དེ་ལྟར་ན་མདོ་དེ་གཉིས་ཀྱིས་ནི་རྒོད་བག་གིས་རེག་པ་ཁོ་ནར་བྱ་བས་རེག་པ་བསྟན་ཏོ། །ད་ནི་ཁྱད་པར་ཅན་གྱི་སྤྱོད་པ་དང་འདྲ་བར་བརྗོད་པར་བྱ་སྟེ། འདྲེད་པར་སྒྱེལ་བའི་བུད་མེད་སློང་བའོ་ཞེས་བྱ་བ་ནི། རྫ་བ་ལ་སོགས་པ་ལས་གྱུར་པའི་འདྲེད་པ་ཉམ་དབར་སྒྱེལ་བའི་བུད་མེད་རང་ཉིད་ལྡང་ནུས་པ་སློང་ན་ཉེས་བྱས་སོ། །བུད་མེད་ཀྱིས་དེ་གསུམ་བྱེད་པ་ལ་ནི་ལྟུང་བ་མེད་དོ་ཞེས་བྱ་བ་ནི། བུད་མེད་ཀྱིས་རྐང་པ་དང་ཕྲག་པ་ལ་སོགས་པས་འཕུལ་བ་དང༌། དགེ་སློང་གི་སྟན་ལ་འཕུལ་བ་དང༌། འདྲེད་པར་སྒྱེལ་བ་སློང་བ་དེ་གསུམ་དགེ་སློང་ལ་བྱེད་པ་ལ་ནི་ལྟུང་བ་མེད་དེ། འདིར་གཞུང་ནི་བུད་མེད་ཀྱིས་དགེ་སློང་ལ་རྐང་པ་དང་ཕྲག་པ་ལ་སོགས་པས་མི་འདོད་བཞིན་དུ་འཕུལ་བ་དེ་ལ་ནི་ཉེས་པ་མེད་དོ་ཞེས་གསུངས་པ་ཡིན་ནོ། །བཟུང་བ་ལ་ཡང་ངོ་ཞེས་བྱ་བ་ནི། དགེ་སློང་མི་འདོད་བཞིན་དུ་བུད་མེད་ཀྱིས་བཟུང་བ་ལ་ལྟུང་བ་མེད་དོ། །མས་འཁྱུད་པ་ལ་ཡང་ངོ་ཞེས་བྱ་བ་ཡང་དགེ་སློང་མི་འདོད་བཞིན་དུ་མས་འཁྱུད་པ་ཙམ་ལ་རོ་མྱོང་བ་མེད་ན་ལྟུང་བ་མེད་དོ། །པང་པར་བུ་མོ་འདུག་པ་ལ་ཡང་ངོ་ཞེས་བྱ་བ་ཡང་ལྟུང་བ་མེད་དོ་ཞེས་བྱ་བར་སྦྱར་རོ། །བུད་མེད་འཁྲུལ་པ་སྟེང་དུ་འགྱེལ་བ་ལ་ཡང་ངོ་ཞེས་བྱ་བ་ནི། བུད་མེད་རབ་ཏུ་འཁྲུལ་པ་དགེ་སློང་གི་སྟེང་དུ་སྒྱེལ་བ་ལ་ཡང་ལྟུང་བ་མེད་བའོ། །མདོ་དེ་ནི་མི་འདོད་པར་སྐྱེ་བོ་མང་པོ་རྡོས་པའི་དུས་དག་ཏུ་དབང་མེད་པར་རེག་པ་དང་སྦྱར་རོ། །ལུས་ཀྱིས་རེག་པ་འདུལ་བྱེད་དག་གོ་ཞེས་བྱ་བ་ལུས་ཀྱིས་རེག་པའི་དགེ་འདུན་ལྷག་མ་འདུལ་བྱེད་ཀྱི་སྐབས་ནས་འབྱུང་བ་རྫོགས་སོ། །ལུས་ཀྱིས་རེག་པའི་དགེ་འདུན་ལྷག་མའོ་ཞེས་བྱ་བ་དེ་རྫོགས་སོ།། །། འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་བརྗོད་པར་འདོད་ནས། འཁྲིག་པས་སྨྲས་ནའོ་ཞེས་བྱ་བ་སྨྲས་ཏེ། སྔར་བུད་མེད་ལེགས་པར་སྨྲས་པ་དང༌། ཉེས་པར་སྨྲས་པ་དག་གི་དོན་ཀུན་ཤེས་པར་བྱ་བའི་མཐུ་ཡོད་པ་ལ་དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་དང་ལྡན།
པས་ཞེས་སྨོས་པ་འདིར་དེ་བཞིན་སྦྱར་རོ། །འཁྲིག་པ་ཞེས་བྱ་བ་ནི། གཉིས་ཀྱིས་གཉིས་སྤྲོད་པ་སྐྱེས་པ་དང་བུད་མེད་གཉིས་ཀྱི་ཀུན་དུ་སྦྱོར་བ་ལས་བྱུང་བའོ། །དེ་སྨྲས་ན་འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་སྨྲ་བ་པོས་བུད་མེད་ལེགས་པར་སྨྲས་པ་དང༌། ཉེས་པར་སྨྲས་པ་དག་གི་དོན་ཀུན་ཤེས་པར་བྱ་བའི་མཐུ་ཡོད་པ་ལ་དེའི་བདེ་བ་ཉམས་སུ་མྱོང་པར་བྱ་བའི་འདུན་པ་ཀུན་དུ་འདོད་ཆགས་པ་དང་ལྡན་པས་འཁྲིག་པ་དང་ལྡན་པ་སྨྲས་ན་དགེ་འདུན་ལྷག་མར་འགྱུར་རོ། །སྒྲ་ཇི་ལྟ་བུས་དེ་སྨྲས་ཤེ་ན། དེའི་ཕྱིར་རྒྱ་ལ་སོགས་པའི་དོན་གྱིས་ཞེས་བྱ་བ་སྨྲས་ཏེ། རྒྱལ་སོགས་པ་ཞེས་བྱ་བ་ནི། རྒྱོ་བ་འཁྲིག་པ་ཞེས་བྱ་བ་ནི་སྒྲ་གང་ལ་རང་བཞིན་ངོ་བོ་ཉིད་གཞི་རྒྱ་ཞེས་བྱ་བ་དང༌། རྣ་རུ་ཞེས་བྱ་བ་དག་ཡོད་པ་སྟེ་དེ་ནི་རྒྱལ་སོགས་པའོ། །རྒྱལ་སོགས་པ་དེའི་དོན་དེ་གཉིས་ཀྱིས་གཉིས་སྤྲོད་པ་ཞེས་བྱ་བའི་ཆོས་ཏེ། དེ་ནི་རྒྱལ་སོགས་པའི་དོན་ཏོ། །རྒྱལ་སོགས་པའི་དོན་གྱི་དོན་གཞན་ཉལ་བོ་ཞེས་བྱ་བ་ལ་སོགས་པའི་སྒྲ་གང་ཡིན་པ་དེ་ཡང་རྒྱལ་སོགས་པའི་དོན་ཡིན་ནོ། །འདིར་དོན་ཅེས་བྱ་བའི་སྒྲ་ཅིག་ཤོས་དབྲི་བར་རིག་པར་བྱ་སྟེ། རྒྱལ་སོགས་པ་དོན་རྒྱལ་སོགས་པ་གྲགས་པས་དེ་དང༌། རྒྱལ་སོགས་པ་དང་འདྲ་བར་དོན་གསལ་བར་བརྗོད་པའི་སྒྲས་སྨྲས་ན་ཁ་ན་མ་ཐོབ་དེར་འགྱུར་རོ། །འཁྲིག་པའི་དོན་གོ་བར་བྱེད་པའི་སྒྲ་ནི་རྣམ་པ་གཉིས་ཏེ། དངོས་དང་ཉེ་བར་འདོགས་པའོ། །དེ་ལ་དངོས་ལ་ནི་འདི་རྣམ་པར་གཞག་གོ །ཉེ་བར་འདོགས་པ་ལ་ནི་གལ་ཏེ་རྒྱལ་སོགས་པའི་དོན་ཡུལ་དང་དུས་དེར་ཆགས་པ་ཡིན་པ་དེ་སྨྲས་ནི་དངོས་གཞི་ཉིད་དུ་འགྱུར་རོ། །གལ་ཏེ་མ་ཆགས་པ་དཔེར་ན་ཕྲད་པ་དང་ཉལ་བ་ཞེས་བྱ་བ་ལ་སོགས་པ་བརྗོད་པ་ནི་སྦོམ་པོའོ། །འདི་ལྟར་བུད་མེད་དེ་སྒྲེན་མོ་ཞིག་ཡིན་པའི་ཕྱིར་ཉེ་བར་འདོགས་པའི་ཚིག་དེ་བརྡ་ཕྲད་པར་གྱུར་དུ་ཟིན་ཀྱང་རྒྱལ་སོགས་བའི་དོན་ཆགས་པ་མེད་པའི་ཕྱིར་དངོས་གཞིར་མི་འགྱུར་རོ། །དེ་ལྟར་ཡང་བཅོམ་ལྡན་འདས་ཀྱིས་ཁོ་བོ་དང་ལྷན་ཅིག་ཕྲད་པར་གྱིས་ཤིག་ཅེས་བྱ་བ་དེ་ལ་སྦོམ་པོར་གསུངས་པ་ཡིན་ཏེ། རྒྱལ་སོགས་པའི་དོན་དག་ལ་དངོས་སུ་ཞུགས་པ་མེད་པའི་ཕྱིར་ཏེ། ཕ་དང་བུ་ཕྲད་པ་ཞེས་བྱ་བའི་སྒྲ་བཞིན་ནོ། །བདག་ཉིད་ཀྱི་བསམ་པས་ནི་རྒྱོ་བ་དང་འཁྲིག་པ་དང་ཉལ་པོ་དང་ལྷག་པར་སྤྱོད་པ་ཞེས་བྱ་བ་ལ་སོགས་པ་བདག་དང་སྦྱར་བ་མེད་པར་སྤྱིར་བརྗོད་དུ་ཟིན་ཀྱང་དངོས་གཞིར་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་བདག་ཉིད་ཀྱི་བསམ་པས་སྤྱིར་བུད་མེད་ཀྱི་ཡུལ་ལ་རྒྱ་ལ་སོགས་པའི་དོན་བྱེད་པའི་
ཚིག་མེད་པར་རྗོད་པར་བྱེད་ཅིང་བུད་མེད་དེས་ཀྱང་དེ་ཐོས་ལ། དེའི་དོན་ཀྱང་བརྡ་ཕྲད་པར་གྱུར་ན་དེའི་ཚེ་དེ་ལ་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །གལ་ཏེ་གཞན་གྱི་བསམ་པས་ན་ནི་སྦོམ་པོར་རོ།། །།བམ་པོ་བཅུ་བཞི་པ། རྒྱ་ལ་སོགས་པའི་དོན་བརྗོད་པ་དག་ལ་ཡི་གེ་དང་ཚིག་མང་དུ་གྲགས་ན་ཡི་གེ་དང་ཚིག་གང་ལ་ཁ་ན་མ་ཐོབ་དེར་འགྱུར་བ་གོ་བར་བྱ་བའི་ཕྱིར། གང་ལ་གོ་བར་བྱ་བ་དེ་ཉིད་དེ་བརྡ་ཕྲད་པ་ན་མཐའོ་ཞེས་བྱ་བ་སྨྲས་ཏེ། སྨྲ་བ་པོས་སྨྲས་པའི་དོན་ཉན་པ་པོའི་རྒྱུད་ལ་བརྡ་ཕྲད་པ་ཙམ་ནི་བརྡ་ཕྲད་པའོ། །སྨྲ་བ་པོའི་ཁ་དེ་ནས་རྐན་དང་མཆུ་ལ་སོགས་པའི་བྱ་བའི་སྦྱོར་བས་སྒྲ་འབྱུང་བའི་ཡི་གེ་ལ་སོགས་པ་གང་ལ་སྨྲས་བའི་དོན་ཉན་པ་པོས་གོ་བར་བྱ་བ་ཉིད་འབྱུང་བ་དེ་བརྡ་ཕྲད་པ་ན་མཐའ་སྟེ། ཡོངས་སུ་རྫོགས་ཤིང་མཐར་ཐུག་གོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་ཡི་གེ་དང་པོ་བརྗོད་པའི་དུས་ན་ཉན་པ་པོས་དོན་དེ་བརྡ་ཕྲད་ན་དེ་ཉིད་དངོས་གཞིའི་ཁ་ན་མ་ཐོ་བའོ། །ཕྱིས་གང་ཅུང་ཟད་བརྗོད་པར་བྱ་བའི་ལྟུང་བ་དེ་ཐམས་ཅད་ནི་ཉིད་ཀྱི་ཁོངས་སུ་གཏོགས་ཏེ་རྩོལ་བའི་རྩོམ་པ་གཅིག་ཏུ་གྱུར་པའི་ཕྱིར་རོ། །དེ་དང་འབྲེལ་པའི་དོན་སྨྲས་པ་ནི་སྦྱོར་བ་མ་ཡིན་པ་མ་ཡིན་ནོ་ཞེས་བྱ་བ་ལ་དེ་ཞེས་བྱ་བའི་སྒྲ་ནི་དངོས་གཞིའི་དབང་དུ་བྱས་བརྒྱ་ཞེས་བྱ་བ་དང་རྣ་རུ་ཞེས་བྱ་བའི་ཚིག་ལ་བསྙེགས་སོ། །དེ་དང་འབྲེལ་པའི་དོན་ཞེས་བྱ་བ་ལ་འབྲེལ་པ་ཞེས་བྱ་བ་ནི་དངོས་གཞིའི་དོན་གྱི་ཚིག་དང་འབྲེལ་པ་སྟེ། དངོས་གཞིའི་དོན་གྱི་ཚིག་དང་སྦྱར་བ་འཁྲིག་པ་སྨྲ་བ་དང་ལྡན་པའོ། །དེའི་དོན་ནི་རྨའི་སྒོ་ལ་སོགས་པ་གང་ཡིན་པའོ། །དེ་སྨྲས་པ་ནི་འདི་ལྟ་སྟེ་དཔེར་ན། སྲུ་ཁྱོད་ཀྱི་རྨའི་སྒོ་གསུམ་པོ་དག་ལེགས་པར་འདོད་པ་དང༌། ལེགས་པར་གནས་པ་དང། ལེགས་པར་གྱུར་པ་ཡིན་མོད་ཅེས་སྨྲས་པ་ལྟ་བུ་སྟེ། དོན་དེ་སྨྲས་པ་གང་ཡིན་པའོ། །དེ་སྨྲས་པ་ནི་སྦྱོར་བ་མ་ཡིན་པ་མ་ཡིན་ཏེ། འདི་ལྟར་སྦྱོར་བ་ཉིད་དོ། །འདི་སྐད་བསྟན་ཏེ། དགེ་སློང་གིས་དངོས་གཞིའི་དབང་དུ་བྱས་བརྒྱ་ཞེས་བྱ་བ་དང༌། རྣ་རུ་ཞེས་བྱ་བ་ལ་སོགས་པའི་ཚིག་བྱེད་པར་དངོས་གཞིའི་དོན་དང་འབྲེལ་པའི་ཚིག་རྗོད་པར་བྱེད་ན་ཚིག་དེ་ནི་སྦྱོར་བ་ཉིད་དེ་སྦོམ་པོ་ཞེས་བྱ་བའི་ཐ་ཚིག་གོ །འདི་ལྟར་དངོས་གཞིའི་དབང་དུ་བྱས་པའི་ཚིག་རྗོད་པར་མི་བྱེད་ན། ཅིའི་ཕྱིར་ཚིག་དེ་སྦྱོར་བར་གྱུར་པ་ཡིན་སྙམ་དུ་དོགས་པར་བསལ་བའི་ཕྱིར་མདོ་འདི་བྱས་སོ། །རྒྱ་ཞེས་བྱ་བ་དང༌། རྣ་རུ་ཞེས་བྱ་བ་ལ་སོགས་པའི་སྒྲ་བརྗོད་པ་ལ་ནི་དེ་ནི་དངོས་གཞི་དང་
འབྲེལ་བའི་དོན་འདི་འབྱུང་བའི་སྦྱོར་བ་ཉིད་དེ་དག་ཡོད་པར་ཐེ་ཚོམ་མེད་དོ། །བསྔགས་པ་དང་བསྔགས་པ་མ་ཡིན་པ་དང༌། གསོལ་བ་དང༌། ཉེ་བར་གསོལ་བ་དང༌། འདྲི་བ་དང༌། ཡོངས་སུ་འདྲི་བ་དང༌། བརྗོད་པ་དང༌། སྨོན་པ་དང༌། གཤེ་བ་དང༌། ཕྱིར་སྨྲ་བསྒྲུབ་པ་དག་ལ་ནི་བྱེ་བྲག་མེད་པ་ཉིད་དོ་ཞེས་བྱ་བ་ནི། བསྔགས་པ་ལ་སོགས་པའི་ངོ་བོ་ཉིད་སྦྱོར་བར་གྱུར་པ་འཁྲིག་པ་སྨྲ་བ་སྒྲུབ་པ་འཁྲིག་པ་སྨྲ་བར་འགྱུར་བ་འདི་དག་ནི་དངོས་གཞིའི་དབང་དུ་བྱས་པའི་སྦྱོར་བ་ཉིད་ཡིན་པར་བྱེ་བྲག་འགའ་ཡང་མེད་དེ། སྒྲུབ་པ་དེ་དག་སྔར་བརྗོད་ནས་ཕྱིས་འཁྲིག་པ་སྨྲ་བར་བྱེད་བ་ཐམས་ཅད་ལ་ནི་དགེ་འདུན་ལྷག་མ་ཡོངས་སུ་རྫོགས་པར་འགྱུར་རོ། །དེ་ལ་བསྔགས་བ་ཞེས་བྱ་བ་ནི། སྲུའི་རྨའི་སྒོ་གསུམ་པོ་དག་ནི་ལེགས་པར་འདོད་པ། ལེགས་པར་གནས་པ། ལེགས་པར་གྱུར་པ་དག་གོ་ཞེས་བསྟོད་པའོ། །བསྔགས་པ་མ་ཡིན་པ་ཞེས་བྱ་བ་ནི་དེ་ལས་བཟློག་པས་སྨོད་པའོ། །གསོལ་པ་ཞེས་བྱ་བ་ནི། སྲུ་ཚུར་ཤོག་དེ་དང་དེ་བྱའོ་ཞེས་བརྗོད་ཅིང་རྒྱ་ཞེས་བྱ་བ་དང༌། རྣ་རུ་ཞེས་བྱ་བ་གཉིས་ཀྱི་རང་བཞིན་བྱེ་བྲག་ཏུ་བསྒྲུབ་པ་གང་ཡིན་པ་དེ་ནི་དངོས་སུ་མི་བརྗོད་པའོ། །ཉེ་བར་གསོལ་བ་ཞེས་བྱ་བ་དེ་ནི་བུད་མེད་དང་སྐྱེས་པ་དེ་དང་དེ་བྱེད་པ་གང་ཡིན་པ་དེ་དང་དེ་ནི་དགའ་བ་དང་ཡིད་དུ་འོང་བ་ཡིན་གྱིས། སྲུ་བདག་ཅག་ཀྱང་དེ་དང་དེ་བྱས་ན་དགའ་བ་དང་ཡིད་རུ་འོང་བར་འགྱུར་རོ་ཞེས་དགའ་བ་ཉེ་བར་བསྒྲུབ་པས་འདུན་པ་སྐྱེད་པ་སྟེ། དེ་ནི་ཉེ་བར་གསོལ་བའོ། །འདྲི་བ་ཞེས་བྱ་བ་ནི། སྲུ་སྐྱེས་པ་གང་བུད་མེད་གང་ལ་དེ་དང་དེ་བྱེད་པ་དེ་ནི་དེའི་དགའ་བ་དང་ཡིད་དུ་འོང་བར་འགྱུར་ན། ཁོ་བོས་ཀྱང་སྲུ་ལ་དེ་དང་དེ་བྱ་ན། སྲུ་ཁོ་བོ་ལ་དགའ་བ་དང་ཡིད་དུ་འོང་བར་འགྱུར་རམ་ཞེས་འདྲིའོ། །ཡོངས་སུ་འདྲི་བ་ཞེས་བྱ་བ་ནི། སྲུ་རྨའི་སྒོ་གསུམ་པོ་དག་ལེགས་པར་དོད་པ་དང༌། ལེགས་པར་གནས་པ་དང༌། ལེགས་པར་གྱུར་པ་བདེན་ནམ་ཞེས་ཡོངས་སུ་འདྲི་པའོ། །རྗོད་པ་ཞེས་བྱ་བ་ནི། སྲུ་ཁོ་བོ་ནི་ཁྱོད་ལ་དགའ་བ་དང་ཡིད་དུ་འོང་བ་བདེན་ན་ཁྱོད་དེ་ལ་ཇི་ལྟ་ཞེས་བརྗོད་པའོ། །སྨོན་བ་ཞེས་བྱ་བ་ནི། སྲུ་ནམ་ཞིག་ན་ཁོ་བོ་ཁྱོད་དང་ལྷན་ཅིག་དེ་དང་དེ་ལྟར་བྱེད་ཅིག་གུ་ཞེས་སྨོན་པའོ། །གཤེ་བ་ཞེས་བྱ་བ་ནི། ཁྱོད་ལ་བོང་བུ་དག་དེ་ལྟར་བྱེད་པར་
གྱུར་ཅིག །ཁྱོད་ཀྱི་དེར་མགལ་དུམ་དག་ཆུག་ཅིག་ཅེས་བྱ་བ་ལ་སོགས་པ་བརྗོད་པ་སྟེ། དེ་ནི་གཤེ་བའོ། །ཕྱིར་སྨྲ་བ་ཞེས་བྱ་བ་ནི། བུད་མེད་ཀྱིས་བསྔགས་པ་དང་བསྔགས་པ་མ་ཡིན་པ་གང་ཡིན་པ་དང༌། གཤེ་བ་ལ་སོགས་པ་དག་དགེ་སློང་ལ་བྱེད་པ་ན་དེ་ལ་དགེ་སློང་གིས་ཕྱིར་རྣམ་པ་དེ་དག་ཉིད་ཀྱིས་ལན་འདེབས་པའོ། །དེ་ལྟར་ན་དེ་དག་ཐམས་ཅད་ནི་གང་གི་ཚེ་རྒྱ་ཞེས་བྱ་བ་དང༌། རྣ་རུ་ཞེས་བྱ་བ་མེད་པར་བརྗོད་པར་བྱེད་པ་དེའི་ཚེ་ན་ནི་སྦོམ་པོའོ། །དེ་དག་ཐམས་ཅད་ཀྱང་དཔེ་ཙམ་སྟེ། གཞན་ཡང་རྒྱ་ཞེས་བྱ་བ་དང༌། རྣ་རུ་ཞེས་བྱ་བ་ལ་སོགས་པ་ལྟ་བུ་གང་ཡང་རུང་བའི་སྒྲས་དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་པ་དང་ལྡན་པས་རྗོད་པར་བྱེད་ན་ནི་དངོས་གཞིར་འགྱུར་བ་ཁོ་ན་སྟེ། འཁྲིག་པ་སྨྲ་བ་དེ་ལ་ཡོད་པའི་ཕྱིར་རོ། །དོན་གཞན་ལ་བསམ་པས་ལྗོངས་ཀྱི་ངེས་པའི་ཚིག་གི་དབང་གིས་ན་ལྟུང་བ་མེད་དོ་ཞེས་བྱ་བ་ནི། དོན་གཞན་ལ་བསམ་པས་ལྗོངས་ཀྱི་ངེས་པའི་ཚིག་གི་དབང་གིས་དོན་གཞན་སྨྲས་པ་ལ་ལྟུང་བ་མེད་པ་སྟེ། དཔེར་ན་ཡུལ་དབུས་ན་ནི་ཆུ་སྣོད་ཀྱི་བྱེ་བྲག་ཅིག་ལ་ཀུན་དི་ཀ་དི་ཀ་ཞེས་ཟེར་ལ། ཡུལ་ཀོ་ས་ལ་ཞེས་བྱ་བ་ན་ནི་མོའི་དབང་པོ་ལ་ཀུན་དི་ཀ་ཞེས་ཟེར་ཏེ། དེ་ལ་གལ་ཏེ་ཡུལ་དབུས་ནས་སྐྱེས་པའི་དགེ་སློང་ཞིག་ཡུལ་ཀོ་ས་ལར་སོང་སྟེ་ཆུ་སྣོད་ཀྱི་བསམ་པས་བུད་མེད་ཀྱི་ཡུལ་ལ་ཀུན་དི་ཀ་བརྙའོ་ཞེས་དེ་སྐད་དུ་སྦྱོར་བར་བྱེད་ན། ཡུལ་དེ་ན་གནས་ངན་ལེན་གྱི་ཚིག་ཡིན་དུ་ཟིན་ཀྱང་དེ་ལ་ལྟུང་བ་མེད་པ་ལྟ་བུ་སྟེ། བསམ་པ་དག་པའི་ཕྱིར་ཉེས་པ་མེད་དོ། །མིང་གི་ཆ་ཉིད་འདྲ་བ་ལ་ཡང་ངོ་ཞེས་བྱ་བ་ཡང་ཉེས་པ་མེད་པར་སྦྱར་རོ། །མིང་གི་ཆ་ཉིད་འདྲ་བ་ནི་མིང་གི་ཆ་ཤས་འདྲ་བས་འཁྲིག་པ་ལས་བྱུང་བ་སྨྲས་པ་གང་ཡིན་པ་སྟེ། དཔེར་ན་རྒྱ་གར་སྐད་དུ་ནས་ལ་ནི་ཡ་བ་ཞེས་བྱ་བ་འཁྲིག་པ་ལ་ནི་ཡ་བྷ་ཞེས་བྱ་བ་དེ་ལ་ནས་ཀྱི་མིང་ཡ་བ་ཞེས་བྱ་བ་བརྗོད་པའི་བསམ་པས་དྲག་ཏུ་བརྗོད་པའི་དབང་གིས་ཡ་བ་ཞེས་བྱ་བའི་གནས་སུ་ཡ་བྷ་ཞེས་བརྗོད་པ་ལ་ཉེས་པ་མེད་པ་དང༌། བོད་སྐད་ལ་ཡང་རྒྱོངས་ཞེས་བྱ་བ་དང༌། རྒྱོབ་ཅེས་བྱ་བ་དང་རྒྱུའོ་ཞེས་བྱ་བའི་བསམ་པས་དོན་དེ་དག་ཉིད་བརྗོད་པར་འདོད་པ་ལས་ཟུར་ཆག་པའི་དབང་གིས་རྒྱོས་ཞེས་བྱ་བ་དང༌། རྒྱོ་བ་
ཞེས་བྱ་བ་དང༌། རྒྱོ་བོ་ཞེས་བྱ་བར་བརྗོད་པ་ལ་ཉེས་པ་མེད་པ་ལྟ་བུ་སྟེ། དེ་ལ་ནི་དེ་སྨྲ་བར་མི་འདོད་པའི་དོན་ཟུར་ཆག་པའི་དབང་གིས་སྨྲས་པའི་ཕྱིར་མིང་གི་ཆ་མཐུན་པར་སྨྲས་ཀྱང་ཉེས་པ་མེད་དོ། །མདོ་སྔ་མ་ལ་ནི་སྨྲ་བར་འདོད་པའི་སྒྲ་ཉིད་བརྗོད་ཀྱང་དོན་གཞན་ལ་སེམས་པ་དང༌། ཡུལ་གྱི་སྐད་ཐ་དད་པས་ཉེས་པ་མེད་དོ། །འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་ལ་འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ད་ནི་འཁྲིག་པ་ལས་བྱུང་བ་དང་ལྡན་པ་སྨྲ་བའི་དགེ་འདུན་ལྷག་མའི་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། མཛེས་པ་ཡིན་ནོ། །སྡིག་པ་ཅན་ཡིན་ནོ། །རྨའི་སྒོ་མཛེས་པའམ་སྡིག་པ་ཅན་ཡིན་ནོ། །བགོ་བཤའ་གྱིས་ཤིག །ཁོ་བོ་ལ་བགོ་བཤའ་གྱིས་ཤིག །ཁོ་བོ་དང་ལྷན་ཅིག་ཉོལ་ཅིག །ཕྲད་པར་གྱིས་ཤིག་ཅེས་སྨྲས་ན་ཉེས་པ་སྦོམ་པོའོ་ཞེས་བྱ་བ་སྨྲས་ཏེ། སྨྲ་ན་སྦོམ་པོའོ་ཞེས་བྱ་བ་མཛེས་པ་ཡིན་ནོ་ཞེས་བྱ་བ་ལ་སོགས་པ་ཐམས་ཅད་དང་སོ་སོར་སྦྱར་རོ། །མཛེས་པ་ཡིན་ནོ་ཞེས་བྱ་བ་ནི། ཁྱོད་ནི་མཛེས་པ་སྡུག་གུ་ཡིན་ནོ་ཞེས་སྨྲ་ཞིང་བརྗོད་ན་སྦོམ་པོའོ། །སྡིག་པ་ཅན་ཡིན་ནོ་ཞེས་བྱ་བ་ནི་ཁྱོད་ནི་སྡིག་པ་ཅན་སྡིག་པ་དང་ལྡན་པ་ཡིན་ནོ་ཞེས་སྨྲ་ན་སྦོམ་པོའོ། །རྨའི་སྒོ་མཛེས་པའམ་སྡིག་པ་ཅན་ཡིན་ནོ་ཞེས་བྱ་བ་ནི། ཁྱོད་ཀྱི་རྨའི་སྒོ་གསུམ་པོ་དག་མཛེས་པ་ཡིན་ནོ་ཞེས་སྨྲ་འམ། ཁྱོད་ཀྱི་རྨའི་སྒོ་གསུམ་པོ་དག་སྡིག་པ་ཅན་ཡིན་ནོ་ཞེས་སྨྲ་ན་སྦོམ་པོའོ། །དེ་བཞིན་དུ་ལྷག་མ་ཐམས་ཅད་ལ་ཡང་སྦྱར་རོ། །རྣམ་པ་ཐམས་ཅད་དུ་བུད་མེད་ཀྱི་ཡུལ་ལ་གནས་ངན་ལེན་གྱི་སེམས་ཀྱིས་གནས་ངན་ལེན་གྱི་ཚིག་སྨྲ་ན་ཐ་ན་རྒོད་བག་ཙམ་གྱིས་སྨྲས་ན་ཡང་ཐམས་ཅད་དུ་སྦོམ་པོར་རིག་པར་བྱའོ། །འཁྲིག་པ་ལས་བྱུང་བ་དང་ལྡན་པ་ཉིད་སྨྲ་བའི་དགེ་འདུན་ལྷག་མ་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ།། །།ད་ནི་འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མ་འདུལ་བྱེད་ཀྱི་སྐབས་ནས་འབྱུང་བ་བསྡུ་བའི་ཕྱིར། དེ་བཞིན་དུ་རྫུ་འཕྲུལ་གྱི་རྣམ་པར་འཕྲུལ་པའི་ཆོས་ཅན་ལ་སྨྲ་ནའོ་ཞེས་བྱ་བ་ལ། དེ་བཞིན་དུ་ཞེས་བྱ་བའི་སྒྲ་ནི་སྦོམ་པོའོ་ཞེས་སྔར་བསྟན་པའི་རྗེས་
བསྙག་པའི་ཕྱིར་རོ། །རྫུ་འཕྲུལ་ཞེས་བྱ་བ་ནི་ནམ་མཁའ་ལ་འགྲོ་བ་ལ་སོགས་པའོ། །རྫུ་འཕྲུལ་གྱི་རྣམ་པར་འཕྲུལ་པ་ནི་རྫུ་འཕྲུལ་གྱི་རྣམ་པར་འཕྲུལ་པའོ། །ཆོས་དེ་གང་ལ་ཡོད་པ་དེ་ནི་རྫུ་འཕྲུལ་གྱི་རྣམ་པར་འཕྲུལ་པའི་ཆོས་ཅན་ཏེ། རྣམ་པ་དེ་ལྟ་བུའི་ཆོས་ཅན་གྱི་བུད་མེད་དེ་ལ་རྒྱལ་སོགས་པའི་དོན་གྱིས་སྨྲས་ན་སྦོམ་པོའོ། །དེ་བཞིན་དུ་ཞེས་བྱ་བ་དེས་སྦོམ་པོའོ་ཞེས་བྱ་བའི་རྗེས་བསྙག་པའི་ཕྱིར། ཐམས་ཅད་ཀྱི་དབང་དུ་བྱ་བར་རིག་པར་བྱ་སྟེ། དེའི་ཕྱིར་དེས་དབང་དུ་བྱ་བའི་ཡུལ་གཞན་ཡང་བསྟན་པའི་ཕྱིར། སྲུ་ཁོ་བོ་ལ་ནས་བྱིན་ཅིག །སྲུ་ཁྱོད་ལ་ཅི་མཐོང་བ་དེ་བྱིན་ཅིག །སྲུ་ཁྱོད་ཀྱི་མདུན་ན་མོ་གང་ཡིན་པ་དེ་བྱིན་ཅིག་སྲུ་ཁྱོད་ཀྱི་ཡིད་དུ་འོང་བ་གང་ཡིན་པ་དེ་བྱིན་ཅིག །ཁྱོད་ཅི་ལ་དགའ་བ་བྱིན་ཅིག་ཅེས་བདག་ལ་སྨྲས་པ་ཁྱོད་ཅི་ལ་དགའ་ཞེས་ཟེར་བ་ལ་སྲུ་ཁྱོད་ལ་ཁོ་བོ་དགའོ་ཞེས་བྱ་བ་དང༌། སྲུ་ཁོ་བོ་ལ་ཆུ་དང༌། བཅའ་བ་དང༌། ཐུག་པ་དང་བཟའ་བ་བྱིན་ཅིག་།ཁྱོད་ཉིད་དེ་དག་ཡིན་ན་ཞེས་སྨྲས་པ་དག་ལའོ་ཞེས་བྱ་བ་སྨྲས་ཏེ། ནས་ཞེས་བྱ་བའི་སྒྲ་ཡ་བ་ཞེས་བྱ་བ་དང༌། འཁྲིག་པ་ལས་བྱུང་བའི་སྒྲ་ཡ་བྷ་ཞེས་བྱ་བ་ནི་ཆ་ཤས་མཐུན་པའི་སྒོ་ནས་འཁྲིག་པ་དང་ལྡན་པ་སྨྲ་བ་ཡིན་པས་སྦོམ་པོར་སྦྱར་རོ། །སྲུ་ཁྱོད་ལ་ཅི་མཐོང་བ་ཞེས་བྱ་བ་ལ་སོགས་པ་ཐམས་ཅད་ཀྱང་ཉེ་བར་འདོགས་པའི་སྒོ་ནས་འཁྲིག་པ་དང་ལྡན་པ་སྨྲ་བ་ཡིན་པས་སྦོམ་པོར་སྦྱར་རོ། །ཁྱོད་ཅི་ལ་ཡང་དགའ་བ་བྱིན་ཅིག་ཅེས་བདག་ལ་སྨྲས་པ་ཞེས་བྱ་བ་ལ་སོགས་པའི་ད་ནི་བཤད་པ་རྣམ་པ་གཉིས་སུ་བྱེད་དེ། དགེ་སློང་ལ་ལས་བུད་མེད་ལ་ཁྱོད་ཅི་ལ་དགའ་བ་བྱིན་ཅིག་ཅེས་སྨྲས་པ་དང༌། བུད་མེད་དེས་སྨྲས་པ་ཁྱོད་ཀྱིས་བདག་ལ་སྨྲས་པ་དེ་ཁྱོད་ལ་འདྲི་བར་བྱ་སྟེ། ཁྱོད་ཅི་ལ་དགའ་ཞེས་བུད་མེད་དེ་དེ་སྐད་ཟེར་བ་ལ་དགེ་སློང་གིས་སུ་ཁྱོད་ལ་ཁོ་བོ་དགའོ་ཞེས་བྱ་བ་དང་གཅིག་ནི་བུད་མེད་ཀྱིས་སྨྲས་པ། བཙུན་པ་ཁྱོད་ཅི་ལ་དགའ་བ་བྱིན་ཅིག་ཅེས་བདག་ལ་ཁྱིམ་ཐབ་ཀྱིས་དེ་སྐད་ཅེས་སྨྲས་པ་དེ་བཙུན་པས་གསུངས་ཤིག་དང༌། བདག་གིས་དེ་གསོལ་ལོ་ཞེས་བུད་མེད་དེ་དགེ་སློང་ལ་ཁྱོད་ཅི་ལ་དགའ་ཞེས་ཟེར་བ་ལ་དགེ་སློང་དེས་སྲུ་ཁྱོད་ལ་ཁོ་བོ་དགའོ་ཞེས་བྱ་བ་སྨྲས་ཏེ། དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་པ་དང་ལྡན་པས་དེ་སྐད་
སྨྲས་ན་སྦོམ་པོའོ། །དེའི་རྣམ་པར་བཤད་པ་ནི་ལུང་གིས་གོ་བར་བྱེད་དེ། འདིར་གཞུང་ནི་དགེ་སློང་ཁྱིམ་གཞན་གྱི་ཁྱིམ་དུ་ཉེ་བར་འགྲོ་བ་ན་ཁྱིམ་བདག་གི་ཆུང་མ་ལ་འདི་སྐད་ཅེས་དགེ་སློང་དེ་ཅི་ལ་དགའ་བ་བྱིན་ཅིག་ཅེས་སྨྲས་ནས་བྱུང་བ་དང༌། དགེ་སློང་དེས་སྔ་དྲོ་ཆོས་གོས་དང་ཤམ་ཐབས་བགོས་ལྷུང་བཟེད་ཐོགས་ཏེ་ཁྱིམ་དེར་ཞུགས་པ་ན་བུད་མེད་དེས་སྨྲས་པ། བཙུན་པ་ཁྱིམ་བདག་ན་རེ་དགེ་སློང་དེ་ཅི་ལ་དགའ་བ་བྱིན་ཅིག་ཅེས་མཆིན། འཕགས་པ་ཁྱོད་ཅི་ལ་དགྱེས། དགེ་སློང་གིས་སྨྲས་པ། སྲུ་ཁྱོད་ལ་ཁོ་བོ་དགའོ། །བུད་མེད་དེས་ཤེས་ནས་དེས་སྨྲས་པ། འཕགས་པ་བཤམ་པར་བགྱིའོ། །དེ་ནས་དགེ་སློང་དེ་བདག་ལ་དགེ་འདུན་ལྷག་མའི་ལྟུང་བ་མ་བྱུང་ངམ་སྙམ་དུ་འགྱོད་པ་སྐྱེས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ལྟུང་བར་མི་འགྱུར་ཏེ། སྦོམ་པོར་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །སྲུ་ཁོ་བོ་ལ་ཆུ་དང་བཅའ་བ་དང་ཐུག་བ་དང་བཟའ་བ་བྱིན་ཅིག་ཅེས་བྱ་བ་ལ་ཁོ་བོ་ལ་ཞེས་བྱ་བ་དང༌། བྱིན་ཅིག་ཅེས་བྱ་བའི་སྒྲ་འདི་ཆུ་ལ་སོགས་པ་བཞི་ཆར་བ་སྦྱར་རོ། །དེ་བཞིན་དུ་ཁྱོད་ཉིད་དེ་དག་ཡིན་ནོ་ཞེས་བྱ་བ་ཡང་ཁྱོད་ཉིད་ཆུ་ལ་སོགས་པ་བཞི་ཆར་ཡིན་ནོ་ཞེས་བྱ་བར་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སྲུ་ཁོ་བོ་ལ་ཆུ་བྱིན་ཅིག །སྲུ་ཉིད་ཆུ་ཡིན་ནོ། །དེ་བཞིན་དུ་སྲུ་ཁོ་བོ་ལ་བཟའ་བའི་བར་དུ་བྱིན་ཅིག །སྲུ་ཉིད་བཟའ་བ་ཡིན་ནོ་ཞེས་བྱ་བའི་བར་དུའོ་ཞེས་བྱ་བ་སྨྲས་པ་དག་ལའོ་ཞེས་བྱ་བ་ནི། རྣམ་པ་སྔ་མ་ལྟ་བུ་དེ་དག་དང༌། བཞི་པོ་དེ་དག་སྨྲས་པ་དག་ལ་ཉེས་པ་སྦོམ་པོར་འགྱུར་པའོ། །ཁྱོད་ལ་བོང་བུ་དག་དེ་བྱེད་པར་གྱུར་ཅིག་ཅེས་བྱ་བ་ནི། བུད་མེད་ཁྱོད་ལ་བོང་རེང་དག་འཁྲིག་པ་བྱེད་པར་གྱུར་ཅིག་ཅེས་སྨྲས་ན་ཡང་སྦོམ་པོའོ། །སྲུ་སྐྱེས་བུ་འཕྱོན་མ་པ་དག་ལ་བསོད་སྙོམས་སྤྱོད་དམ་ཞེ་ན་ཡང་ངོ་ཞེས་བྱ་བ་ནི། སུ་ཁྱོད་སྐྱེས་བུ་འཕྱོན་མ་པའི་ཇོ་སྒེག་ཅན་དེ་དག་སྣང་བ་ན་འཁྲིག་པའི་བསམ་པ་བསྐྱེད་དེ། བསོད་སྙོམས་སྤྱོད་མོད་ཅེས་སྨྲས་ན་སྦོམ་པོའོ། །འདིར་བསོད་སྙོམས་ཞེས་བྱ་བ་སྨོས་པ་ནི་གླེང་གཞིའི་དབང་གིས་བསྟན་པ་ཡིན་ནོ། །འདིར་གཞུང་ནི་དགེ་སློང་མ་ནང་བར་སྔར་ལངས་ཏེ་ཁྲུས་བྱས་མིག་ཏུ་མིག་སྨན་གྱིས་བྱུགས། མགོ་བསྐུས་ནས་དུར་སྨྲིག་སར་
བ་བགོས་ཏེ། མཉན་ཡོད་དུ་བསོད་སྙོམས་ལ་ཞུགས་པ་ན། དགེ་སློང་ཞིག་ཀྱང་བསོད་སྙོམས་ལ་སོང་ནས་དེས་དེ་མཐོང་བ་དང༌། འདི་སྐད་ཅེས་སྲུ་ཁྱོད་སྐྱེས་བུ་འཕྱོན་མ་བ་དག་ལ་བསོད་སྙོམས་སྤྱོད་དམ་ཞེས་སྨྲས་ནས། དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེར་མགལ་དུམ་དག་ཆུག་ཅིག་ཅེས་ན་ཡང་ངོ་ཞེས་བྱ་བ་ལ། དེར་ཞེས་བྱ་བ་ནི་མོའི་དབང་པོར་རོ། །མགལ་དུ་མ་ཞེས་བྱ་བ་ནི་ཤིང་ཕྱེད་ཚིག་པའོ། །དེ་མོའི་དབང་པོ་དེར་ཆུག་ཅིག་ཅེས་སྨྲས་ན་ཡང་སྦོམ་པོའོ། །རང་བཞིན་གྱིས་གནས་ངན་ལེན་བརྗོད་པས་གནས་ངན་ལེན་སྨྲས་པ་ཡང་ངོ་ཞེས་བྱ་བ་ནི། གལ་ཏེ་དགེ་སློང་རང་བཞིན་གྱི་ངོ་བོ་ཉིད་ཀྱིས་གནས་ངན་ལེན་བརྗོད་པ་ལ་གོམས་པ་ཞིག་ཡིན་ན་དགེ་སློང་གནས་ངན་ལེན་བརྗོད་པ་དེས་གནས་ངན་ལེན་བརྗོད་པ་རྒྱལ་སོགས་པ་གོ་བར་བྱ་བའི་ཚིག་སྨྲས་ན་ཡང་སྦོམ་པོའོ། །འདི་སྐད་བསྟན་ཏེ། གལ་ཏེ་དགེ་སློང་ཚེར་བས་གཞན་ནས་གོམས་པའི་དབང་གིས་རྒྱལ་སོགས་པའི་དོན་གྱི་སྒྲ་དག་གིས་བུད་མེད་ལ་སྨྲ་བར་བྱེད་ན་དེ་ལྟ་ན་ཡང་སྦོམ་པོ་ཁོ་ནར་འགྱུར་ཏེ། ཀུན་དུ་འདོད་ཆགས་པ་མེད་པའི་ཕྱིར་རོ། །གལ་ཏེ་འདོད་ཆགས་དང་ལྡན་པའི་སེམས་ཀྱིས་སྨྲ་ན་ནི་དེའི་ཚེ་དངོས་གཞིར་འགྱུར་རོ། །འཁྲིག་པ་དང་ལྡན་པ་སྨྲ་བ་འདུལ་བྱེད་དག་གོ་ཞེས་བྱ་བ་འདུལ་བྱེད་ཀྱི་སྐབས་ནས་འབྱུང་བ་རྫོགས་སོ། །འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།བསྙེན་བཀུར་བསྔགས་པའི་དགེ་འདུན་ལྷག་མ་བརྗོད་པར་འདོད་ནས། བདག་ཉིད་དང་འཁྲིག་པ་ཀུན་དུ་སྤྱོད་པ་བསྔགས་ནའོ་ཞེས་བྱ་བ་སྨྲས་ཏེ། བུད་མེད་ལེགས་པར་སྨྲས་པ་དང་ཉེས་པར་སྨྲས་པ་དག་གི་དོན་ཀུན་ཤེས་པར་བྱ་བའི་མཐུ་ཡོད་པ་ལ་དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་པ་དང་ལྡན་པས་དེ་བསྔགས་ནའོ་ཞེས་བྱ་བར་དེ་ཐམས་ཅད་འདིར་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། བུད་མེད་དོན་ཀུན་ཤེས་པའི་མཐུ་ཡོད་པའི་ཡུལ་ལ་དེའི་བདེ་བ་ཉམས་སུ་མྱོང་བར་བྱ་བའི་འདུན་པ་ཀུན་དུ་འདོད་ཆགས་པ་དང་ལྡན་པས་
བདག་ཉིད་དང་འཁྲིག་བ་ཀུན་དུ་སྤྱོད་པ་ཉེ་བར་བསྙེན་བཀུར་ལོག་པར་སྒྲུབ་པ་དེའི་བསྔགས་པ་དེ་ནི་མཆོག་གོ་ཞེས་བྱ་བ་ལ་སོགས་པས་མཛེས་པ་ཉིད་དུ་བརྗོད་ན། དེ་ལྟར་གྱུར་པ་ན་ཁ་ན་མ་ཐོ་བ་དེ་ཉིད་རྣམ་པར་གཞག་གོ །གལ་ཏེ་རྒྱལ་སོགས་པའི་དོན་གྱི་སྒྲས་འཁྲིག་པ་སྒྲུབ་པར་བྱེད་ན་ནི། དེའི་ཚེ་རྒྱལ་སོགས་པའི་དོན་གྱི་སྒྲས་འཁྲིག་པ་དང་ལྡན་པ་སྨྲ་བའི་དགེ་འདུན་ལྷག་མར་ཡང་འགྱུར་རོ། །གལ་ཏེ་བསྙེན་བཀུར་ཉི་ཚེ་བསྔགས་པ་བྱེད་ན་ནི་དེའི་ཚེ་བསྙེན་བཀུར་བསྔགས་པའི་དགེ་འདུན་ལྷག་མ་འབའ་ཞིག་ཏུ་འགྱུར་རོ། །དེས་བསྔགས་པ་ལ་རྗེས་སུ་ཡི་རང་བའི་དོན་གྱི་ཚིག་ནི་དེ་དང་འདྲའོ་ཞེས་བྱ་བ་ལ། དེས་ཞེས་བྱ་བའི་སྒྲ་ནི་འདིར་བུད་མེད་གང་བསྟེན་ཟླ་ཉིད་དུ་གནས་པ་དེ་ལ་བསྙེགས་ཏེ་བུད་མེད་དེས་སོ། །བུད་མེད་དེས་བསྔགས་པ་ནི་དེས་བསྔགས་པ་སྟེ། བསྙེན་བཀུར་བསྔགས་པ་བྱས་པའོ། །དེས་བསྔགས་པ་དེ་ལ་རྗེས་སུ་ཡི་རང་བ་ནི་དེས་བསྔགས་པ་ལ་དགེ་སློང་དེ་རྗེས་སུ་ཡི་རང་བ་སྟེ། དེ་ཉིད་དོན་ཏོ། །དེའི་ཚིག་ནི་དགོས་པ་དེའི་ཚིག་སྟེ། དེ་ནི་དེས་བསྔགས་པ་ལ་རྗེས་སུ་ཡི་རང་བའི་དོན་གྱི་ཚིག་གོ །དཔེར་ན་འཕགས་པ་ཁྱོད་ལྟ་བུའི་དགེ་སློང་ཚུལ་ཁྲིམས་དང་ལྡན་པ་ལ་བསྙེན་བཀུར་བྱས་པ་གང་ཡིན་པ་དེ་ནི་མཆོག་གོ་ཞེས་བྱ་བ་ལ་སོགས་པ་བསྔགས་པ་དགེ་སློང་གིས་སྲུ་དེ་དེ་བཞིན་ནོ་ཞེས་རྗེས་སུ་ཡི་རང་བའི་དོན་གྱི་ཚིག་གང་ཡིན་པ་དེ་ནི་བདག་ཉིད་ཀྱིས་བསྔགས་པ་དང་འདྲའོ། །འདི་སྐད་བསྟན་ཏེ། གལ་ཏེ་བུད་མེད་ཀྱིས་དགེ་སློང་ལ་འདི་སྐད་ཅེས་འཕགས་པ་ཁྱོད་ལྟ་བུའི་དགེ་སློང་ཚུལ་ཁྲིམས་དང་ལྡན་པ་ཡོན་ཏན་དང་ལྡན་པ་ལ་ཆོས་འདིས་བསྙེན་བཀུར་བྱས་ན་བསྒྲུབ་པ་འདི་ནི་མཆོག་ཡིན་ནོ་ཞེས་ཟེར་གལ་དགེ་སློང་གིས་ཀྱང་འདི་སྐད་ཅེས་སྲུ་དེ་དེ་བཞིན་ནོ་ཞེས་སྨྲས་ཏེ། རྗེས་སུ་ཡི་རང་ན་དེ་ནི་དངོས་གཞིའི་ཁ་ན་མ་ཐོ་བ་ཉིད་དུ་འགྱུར་རོ། །དེ་ཉིད་ཕྱིར་བཟླས་ནའོ་ཞེས་བྱ་བ་ནི། ཁྱོད་ལྟ་བུའི་དགེ་སློང་ཚུལ་ཁྲིམས་དང་ལྡན་པ་ལ་འཁྲིག་པའི་ཆོས་ཀྱིས་བསྙེན་བཀུར་བྱས་པར་གྱུར་ན། དེ་ནི་བསྙེན་བཀུར་རྣམས་ཀྱི་མཆོག་གོ་ཞེས་བུད་མེད་ཀྱིས་དེ་སྐད་དུ་སྨྲས་པའི་ཚིག་དེ་དགེ་སློང་གིས་ཕྱིར་ཟློག་པར་བྱེད་དེ། སྲུ་ཁོ་བོ་ལྟ་བུའི་དགེ་སློང་ཚུལ་ཁྲིམས་དང་ལྡན་པ་འཁྲིག་པའི་ཆོས་
ཀྱིས་བསྙེན་བཀུར་བྱས་པར་གྱུར་ན་དེ་ནི་བསྙེན་བཀུར་རྣམས་ཀྱི་མཆོག་གོ་ཞེས་དགེ་སློང་དེས་ཕྱིར་བཟླས་པ་བྱས་ན་དེ་ཉིད་བསྔགས་པ་ཡིན་པར་རིག་པར་བྱ་སྟེ། དངོས་གཞི་ཉིད་དུ་འགྱུར་རོ་ཞེས་བྱ་བའི་ཐ་ཚིག་གོ །འདིས་ནི་དེ་ལྟ་དེ་ལྟར་རྗེས་སུ་སྨྲ་བ་ཞེས་བྱ་བའི་གང་གསུངས་པ་བསྡུས་པ་ཡིན་ནོ། །དེ་དང་འཁྲིག་པ་དང་ཉེ་བར་མི་སྦྱོར་ན་སྦྱོར་བ་ཉིད་དོ་ཞེས་བྱ་བ་ནི་ལྟུང་བ་འབྱིན་པ་པོ་དེ་དང་ཉེ་བར་མ་སྦྱར་ན་དེ་རང་གི་མིང་མ་བརྗོད་པར་བསྔགས་པ་ན་སྦྱོར་བ་ཉིད་དེ་དཔེར་ན་འདི་ལྟ་སྟེ། དགེ་སློང་ལ་འཁྲིག་པས་བསྙེན་བཀུར་བྱས་པར་གྱུར་ན་ནི་བསྙེན་བཀུར་རྣམས་ཀྱི་མཆོག་གོ་ཞེས་ཟེར་བ་ལྟ་བུའོ། །འཁྲིག་པ་དང་ཉེ་བར་མ་སྦྱར་བ་ཡང་སྦྱོར་བ་ཉིད་དེ། དཔེར་ན་འདི་ལྟ་སྟེ་ཁོ་བོ་ལྟ་བུའི་དགེ་སློང་ལ་བསྙེན་བཀུར་བྱས་པར་གྱུར་ན་དེ་ནི་བསྙེན་བཀུར་རྣམས་ཀྱི་མཆོག་གོ་ཞེས་ཟེར་བ་ལྟ་བུ་སྟེ། དེ་གཉི་ག་སྦོམ་པོའོ། །གཉི་ག་དང་ན་ནི་དེའི་འོ་ཞེས་བྱ་བ་ནི་སྔ་མ་དེ་གཉི་ག་དང་ཉེ་བར་མ་སྦྱར་མ་སྨོས་པར་བརྗོད་ན་ནི་སྦྱོར་བ་དེའི་སྦྱོར་བ་ཉིད་དེ་ཉེས་བྱས་སོ། །དཔེར་ན་འདི་ལྟ་སྟེ། དགེ་སློང་ལ་བསྙེན་བཀུར་བྱས་པར་གྱུར་ན་དེ་ནི་བསྙེན་རྣམས་ཀྱི་མཆོག་གོ་ཞེས་ཟེར་བ་ལྟ་བུ་སྟེ། ཁོ་བོ་ལྟ་བུ་ཞེས་བྱ་བ་དང༌། འཁྲིག་པ་ཞེས་བྱ་བ་དེ་གཉི་ག་དང་ཉེ་བར་མ་སྦྱར་བས་སྦྱོར་བ་དེའི་སྦྱོར་བ་སྟེ་ཉེས་བྱས་སོ། །བསྙེན་བཀུར་བསྔགས་པའི་དགེ་འདུན་ལྷག་མའོ་ཞེས་བྱ་བ་དེ་རྣམ་པར་འབྱེད་པ་ལས་འབྱུང་བ་རྫོགས་ཏེ། འདི་ལ་ཞུ་བ་དང་འདུལ་བྱེད་ལས་འབྱུང་བ་ནི་མེད་དོ།། །།།སྨྱན་བྱེད་པའི་དགེ་འདུན་ལྷག་མ་བརྗོད་པར་འདོད་ནས། ཕྲད་ནའོ་ཞེས་བྱ་བ་སྨྲས་ཏེ། གཉིས་ཀྱིས་གཉིས་ཕྲད་ནའོ་ཞེས་བྱ་བའི་ཐ་ཚིག་གོ །ཕྲད་པ་མེད་པར་ཕྲིན་ཕར་བསྐྱལ་ཚུར་བསྐྱལ་བ་ཙམ་ཁོ་ན་ལས་ནི་ཁ་ན་མ་ཐོ་བར་མི་འགྱུར་རོ། །དེ་ལྟར་ཡང་ཞུ་བའི་སྐབས་ནས་བཙུན་པ་དགེ་སློང་མས་གཞན་བརྟུལ་ཞུགས་ལ་གནས་པ་ཚངས་པར་སྤྱོད་པ་མོ་དག་གས་སྨྱན་བགྱིས་ན་ལྟུང་བ་ཅིར་འགྱུར། ཉེས་པ་སྤོམ་པོར་རོ། །དེ་བཞིན་དུ་བཙུན་པ་ཟ་མའི་སྤྱན་བགྱིས་ན་ལྟུང་བ་ཅིར་འགྱུར། ཉེས་པ་སྦོམ་བོར་རོ་ཞེས་གསུངས་པ་ཡིན་ཏེ། དེ་ནི་འདིར་ཕྲད་པ་མེད་པས་སྦོམ་པོར་གསུངས་པ་ཡིན་
པས་དེའི་ཕྱིར་ཕྲད་པ་ཡོད་ན་ཁ་ན་མཐོ་བ་དེར་འགྱུར་རོ། །སུ་དང་ཕྲད་ན་ཞེ་ན། དེའི་ཕྱིར་གཞན་དང་ངོ་ཞེས་བྱ་བ་སྨྲས་ཏེ། བདག་ཉིད་དང་སྨན་བྱེད་པ་མ་ཡིན་གྱི། མིའི་འགྲོ་བ་བསྟེན་པར་བྱེད་པ་པོའི་དབང་པོ་དང་ལྡན་པ་གཞན་དང་ངོ༌། །སུར་ཕྲད་ཅེ་ན་དེའི་ཕྱིར་གཞན་དུའོ་ཞེས་བྱ་བ་སྨྲས་ཏེ། བདག་ཉིད་དུ་ཕྲད་པ་མ་ཡིན་གྱི། གང་ཟག་གཞན་དུ་ཕྲད་ནའོ། །ཁྱད་པར་ཇི་ལྟ་བུ་ཅན་ཞིག་ཏུ་ཕྲད་ཅེ་ན། མིའི་འགྲོ་བ་པའི་བུད་མེད་ལ་སོགས་པ་བསྟེན་པར་བྱ་བའི་རྨའི་སྒོ་དང་ལྡན་པར་རོ། །རྒྱུ་གང་གིས་གཞན་དང་གཞན་དུ་ཕྲད་ན་ལྟུང་བ་འདིར་འགྱུར་ཞེ་ན། དེའི་ཕྱིར་དེའི་དོན་དུ་མི་མཐུན་པ་མཐུན་པར་བསྒྲུབ་པའི་ཕྱིར་སྤྲད་པར་བྱ་བ་ལས་སྤྲིང་བ་མནོས་པས་གཞན་དེ་ལ་གོ་བར་བྱས་ཤིང་དེས་སྨྲས་པ་སྔ་མ་ལ་བརྗོད་ནའོ་ཞེས་བྱ་བ་སྨྲས་ཏེ། འདིར་བསྡུས་པའི་དོན་ནི་ལྟུང་བ་འབྱིན་པ་པོས་མདོ་ལས་སྨོས་པའི་རྣམ་པ་འདིས་རྗེས་སུ་བསྒྲུབས་པས་སྤྲད་པར་བྱ་བ་གཉི་ག་ཕྲད་ན་ལྟུང་བ་འདི་འབྱུང་བར་འགྱུར་བའོ། །ཡན་ལག་གི་དོན་བཤད་པར་བྱ་སྟེ། དེའི་དོན་དུ་ཞེས་བྱ་བ་ནི་ཕྲད་པའི་དོན་དུའོ། །མི་མཐུན་པ་མཐུན་པར་བསྒྲུབ་པའི་ཕྱིར་ཞེས་བྱ་བ་ལ་མི་མཐུན་པ་ཞེས་བྱ་བ་ནི། སྤྲད་པར་བྱ་བ་དེ་གཉིས་མི་མཐུན་པ་གཅུགས་པར་མ་གྱུར་ཕན་ཚུན་པག་ཕེབས་པར་མ་གྱུར་པའོ། །མཐུན་པར་ཞེས་བྱ་བ་ནི་མི་མཐུན་པ་དེ་གཉིས་མཐུན་པར་བྱ་བ་གཅུགས་པ་དང་བག་ཕེབས་པར་བྱ་བའོ། །དེ་བསྒྲུབ་པའི་ཕྱིར་ཞེས་བྱ་བ་ནི་གྲུབ་པར་བྱ་བའི་ཕྱིར་རོ། །འདིར་མཐུན་པར་ཞེས་བྱ་བ་ཡང་ཡིད་གཅུགས་པའི་དངོས་པོ་ཉིད་དུ་བྱ་བ་ཡིན་གྱི། གཉིས་ཀྱིས་གཉིས་སྤྲད་བར་ནི་མ་ཡིན་ཏེ། དེ་ཡང་ཇི་ལྟར་ན་འགྲུབ་པར་འགྱུར་ཞེས་དེའི་དོན་དུ་མཐུན་པར་བྱེད་པ་ཡིན་ནོ། །སྤྱད་པར་བྱ་བ་ལས་ཞེས་བྱ་བ་ལས་ཞེས་བྱ་བ་ནི་གང་དང་གང་དུ་སྤྲད་པར་བྱ་བ་སྟེ། དེ་ལས་སོ། །སྤྲིང་བ་མནོས་པས་ཞེས་བྱ་བ་ནི། ལྟུང་བ་འབྱིན་པ་པོའི་དགེ་སློང་གང་གིས་སྤྲིང་བ་མནོས་པ་སྟེ། སྤྲིང་བ་མནོས་པ་བྲིན་བླངས་པའི་དགེ་སློང་ངེས་སོ། །གང་ལས་སྤྲིང་བ་མནོས་ཤེ་ན། དེའི་ཕྱིར་སྤྲད་པར་བྱ་བ་ལས་ཞེས་སྨོས་པ་ཡིན་ཏེ། དེ་ལས་སོ། །སྤྲིང་བ་མནོས་པ་དེ་སུ་ལ་གོ་བར་བྱས་ན་ཞེ་ན་
དེའི་ཕྱིར་གཞན་དེ་ལ་གོ་བར་བྱས་ཤིང་ཞེས་བྱ་བ་སྨྲས་ཏེ། སྤྲད་པར་བྱ་བ་ནི་གཉིས་ཡོད་པའི་ཕྱིར་སྤྲད་པར་བྱ་བ་གང་ལ་གོ་བར་བྱས་ཤེ་ན། དེའི་ཕྱིར་གཞན་ཞེས་བྱ་བ་ལ་སྟེ། གང་ལས་སྤྲིང་བ་མནོས་པ་དེ་ལས་གཞན་པ་དེ་ལའོ། །དེ་ཡང་གང་ཞེ་ན། དེའི་ཕྱིར་དེ་ལ་ཞེས་བྱ་བ་སྟེ། སྤྲད་པར་བྱ་བ་གང་ལས་སྤྲིང་བ་མནོས་པ་དེ་ལས་གཞན་པ་སྤྲད་པར་པ་གང་ལ་གོ་བར་བྱ་བ་དེ་ལའོ། །གོ་བར་བྱས་ཤིང་ཞེས་བྱ་བ་ནི་སྤྲིང་བ་མནོས་པའི་དགེ་སློང་དེས་སྤྲིང་བ་དེ་གཞན་དེ་ལ་གོ་བར་བྱས་ཤིང་བརྡ་སྤྲད་པའོ། །སྤྲད་པར་བྱ་བ་ལས་སྤྲིང་བ་མནོས་པས་གཞན་དེ་ལས་གོ་བར་བྱས་པ་ཙམ་ཁོ་ནས་དེར་འགྱུར་རམ་ཞེན་མ་ཡིན་ཏེ། དེའི་ཕྱིར་དས་སྨྲས་པ། སྔ་མ་ལ་བརྗོད་ནའོ་ཞེས་བྱ་བ་སྨྲས་ཏེ། དེས་སྨས་པ་ཞེས་བྱ་བ་ནི་སྤྲད་པར་བྱ་བ་གང་ལ་སྤྲིང་བ་གོ་པར་བྱ་བའི་སྤྲད་བར་བྱ་བ་གཞན་དེས་སྤྲིང་བའི་ལན་གང་སྨྲས་པ་དེ་ནི་དེས་སྨྲས་པའོ། །དེས་སྨྲས་པའི་སྤྲིང་བའི་ལན་དེ་སུ་ལ་བརྗོད་ན་ཞེ་ན། དེའི་ཕྱིར་སྔ་མ་ལ་ཞེས་བྱ་བ་སྨྲས་ཏེ། སྤྲད་པར་བྱ་བ་སྔ་མ་ལ་སྟེ། དང་པོ་གང་ལས་སྤྲིང་བ་མནོས་པ་དེ་ལའོ་ཞེས་བྱ་བའི་ཐ་ཚིག་གོ །སྔ་མ་དེ་ལ་གཞན་དེས་སྨྲས་པ་དེ་ཇི་ལྟར་བྱས་ན་ཞེ་ན་དེའི་ཕྱིར་བརྗོད་ན་ཞེས་བྱ་བ་སྨྲས་ཏེ། དེས་སྨྲས་པ་དགེ་སློང་སྤྲིང་བ་མནོས་པ་དེས་སྤྲད་པར་བྱ་བ་སྔ་མ་ལ་བརྗོད་ཅིང་བཟླས་ཏེ་གོ་བར་བྱས་ན་འོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། སྤྲད་པར་བྱ་བའི་དོན་དུ་མཐུན་བ་གང་ཡིན་པ་དེ་བསྒྲུབ་པའི་ཕྱིར་སྤྲད་པར་བྱ་བ་སྔ་མ་ཤོས་ལས་སྤྲིང་བ་མནོས་པས་ཕྲིན་བླངས་པ་དེས་སྤྲད་པར་བྱ་བ་གཞན་དེ་ལ་བསྐྱལ་ལ་སྤྲད་པར་བྱ་བ་གཞན་དེ་ལས་སྤྲིང་བའི་ལན་མནོས་པ་གང་ཡིན་པ་དེ་ཡང་སྤྲད་པར་བྱ་བ་སྔ་མ་ཤོས་ཉིད་ལ་བསྐྱལ་ཏེ་དེ་ལྟར་དགེ་སློང་སྨྱན་བྱེད་པས་གལ་ཏེ་ཕྲིན་མནོས་པ་དང༌། ཕར་བསྐྱལ་བ་དང་ཕྱིར་བསྐྱལ་བ་དེ་དག་རྗེས་སུ་སྒྲུབ་པར་བྱེད་ལ་སྤྲད་པར་བྱ་བ་དེ་གཉིས་ཀྱང་ཕྲད་བར་གཉིས་ཀྱིས་གཉིས་སྤྲད་པར་གྱུར་ན་དེའི་ཚེ་དགེ་འདུན་ལྷག་མ་འདིར་འགྱུར་གྱི། གཞན་གྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འཇུག་པ་བར་མའི་ཕྱང་ཡར་ཐོས་པ་ཉིད་ན་ད་བྱས་པ་ཉིད་དོ་ཞེས་བྱ་བ་ལ་འཇུག་པ་བར་མ་ཞེས་བྱ་བ་ནི། འཇུག་པ་དེ་བར་མར་གཏོགས་པས་འཇུག་པ་བར་
མ་སྟེ། གཞན་གྱི་ཕྲིན་ལས་གང་ཡིན་པའོ། །དེ་ཇི་ལྟར་ཕར་མ་ཞེན་མནོས་པ་དང་ཕྲིན་ཚུར་བསྐྱལ་བ་གཉིས་ཀྱི་བར་གྱི་དངོས་པོ་ཡིན་པས་བར་མ་སྟེ། སྤྲད་པར་བྱ་བ་གཞན་གྱི་ཕྲིན་ལན་ལུས་ཀྱི་རྣམ་པར་རིག་བྱེད་དམ། ངག་གི་རྣམ་པར་རིག་བྱེད་དམ། ཅང་མི་སྨྲ་བས་འཇུག་པ་གང་ཡིན་པ་དེ་ནི་འདིར་འཇུག་པ་བར་མ་ཡིན་པར་རིག་པར་བྱའོ། །འཇུག་པ་བར་མ་དེའི་མྱང་ཡར་ཐོས་པ་ཉིད་ན་ཞེས་བྱ་བ་ནི་དང་པོ་སྤྲིང་བར་བྱེད་པའི་སྤྲད་པར་བྱ་བ་དེས་འཇུག་པ་བར་མ་དེ་སྨྱན་བྱེད་པའི་དགེ་སློང་ཉིད་མ་ཡིན་པ་གཞན་གང་ཡང་རུང་བ་མངགས་པ་ལས་སམ། སྤྲད་པར་བྱ་བ་གཞན་ཉིད་ལས་མངོན་སུམ་དུའམ། གཞན་ལས་མིག་གི་རྣམ་པར་ཤེས་པས་སམ། རྣ་བའི་རྣམ་པས་ཤེས་པས་སམ། ཡིད་ཀྱི་རྣམ་པར་ཤེས་པས་རྣམ་པར་རིག་པའི་སྒོ་ནས་ཕྱང་ཡར་ཐོས་པ་ཉིད་ནའོ། །དེ་བྱས་པ་ཉིད་དོ་ཞེས་བྱ་བ་ནི། སྔར་བསྟན་མ་ཐག་པའི་མདོ་ལས་སྔ་མ་ལ་བརྗོད་ནའོ་ཞེས་བྱ་བ་དེ་བྱས་པ་ཉིད་དེ་མཐར་ཐུག་པ་ཉིད་དོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་དགེ་སློང་གིས་སྤྲད་པར་བྱས་སྔ་མ་ཤོས་ལས་སྤྲིང་བ་ནོད་ཅིང༌། སྤྲད་པར་བྱ་བ་གཞན་སྤྲད་པར་བྱ་བ་གཞན་ལ་སྤྲིང་བ་དེ་གོ་བར་བྱེད་ན་སྤྲད་པར་བྱ་བ་གཞན་དེའི་ཕྲིན་ལན་སྤྲད་པར་བྱ་བ་སྔ་མ་ཤོས་ཀྱིས་སྨྱན་བྱེད་པའི་དགེ་སློང་དེ་ཉིད་མ་ཡིན་པ་གཞན་གང་ཡང་རུང་བ་ལས་ཐོས་པར་གྱུར་ལ་སྤྲད་པར་བྱ་བ་དེ་ཉིད་ཀྱང་གཞི་དེ་ཁོ་ན་ལས་ཕྲད་ཅིང་གཉིས་ཀྱིས་གཉིས་སྤྲད་པར་གྱུར་ན། དགེ་སློང་དང་པོ་ཕྲིན་མནོས་པ་དང་ཕྲིན་ཕར་བསྐྱལ་བ་ཙམ་དེ་ཁོ་ནས་དགེ་འདུན་ལྷག་མར་འགྱུར་ན། གལ་ཏེ་ཕྲིན་ཚུར་སྐྱེལ་བར་བྱེད་ན་ལྟ་སྨོས་ཀྱང་ཅི་དགོས། དེ་ལྟར་ཡང་རྣམ་པར་འབྱེད་པའི་གཞུང་འདི་ཡིན་ཏེ། དགེ་སློང་གཅིག་ཁྱིམ་པ་གཅིག་དང་ཁྱིམ་པ་མོ་གཅིག་དང་འགྲོན་ལམ་དུ་འགྲོ་བ་ན། དེ་ན་གལ་ཏེ་ཁྱིམ་པ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་མོ་འདི་ལ་འདི་སྐད་ཅེས་ཁྱོད་ཁྱིམ་པ་འདིའི་ཆུང་མའམ་མཛའ་ན་མོའམ། སྨོས་འགྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་རམ། ཡང་ན་ཁྱིམ་པ་མོ་དེ་དགེ་སློང་དེ་ལ་འདི་སྐད་ཅེས་འཕགས་པ་ཁྱོད་ཁྱིམ་པ་འདི་ལ་འདི་སྐད་ཅེས་ཁྱོད་ཁྱིམ་པ་མོ་འདིའི་ཁྱོའམ། མཛའ་ན་མོའམ་སྨོས་འགྲིན་གྱིས་ཤིག་ཅེས་སྨྲ་ནུས་སམ་ཞེས་ཟེར་བ་ལ། དགེ་སློང་
དེས་སྤྲིང་བ་རྣམ་པ་དེ་ལྟ་བུ་དེ་མནོས་ཏེ། ཕྲིན་ཕར་སྐྱེལ་བར་བྱེད་དམ། ཕྲིན་ཚུར་སྐྱེལ་བར་བྱེད་ན། དགེ་འདུན་ལྷག་མར་འགྱུར་རོ་ཞེས་གསུངས་པ་ཡིན་ནོ། །འདིར་ཕྲིན་མནོས་ཏེ་ཕར་བསྐྱལ་བ་ན་བར་གྱི་འཇུག་པ་སྤྲད་པ་གཞན་དེ་གཉིས་ལས་སྤྱོད་པ་སྔ་མ་ཤོས་ཀྱིས་ཐོས་པས་ན། ཕྲིན་ཚུར་མ་བསྐྱལ་ཡང་སྔ་མ་ལ་བརྗོད་པ་ཉིད་ཡིན་ལ། ཕྲིན་ཚུར་བསྐྱལ་ན་ཡང་དེ་ཉིད་ཡིན་པས་གང་བྱས་ཀྱང་དགེ་འདུན་ལྷག་མར་འགྱུར་རོ། །གསུམ་པོ་དེ་དག་གི་བྱ་བ་ཐ་དད་པ་ཉིད་དོ་ཞེས་བྱ་བ་ན། འདིར་རྗེས་སུ་བསྒྲུབ་པར་བྱ་བའི་ཚིག་གསུམ་པ་གང་དག་སྔར་བསྟན་པ་ནོད་པ་དང༌། གོ་བར་བྱེད་པ་དང༌། བརྗོད་པ་ཞེས་བྱ་བའི་ཚིག་གསུམ་པོ་དེ་དག་གི་བྱ་བ་ཉིད་ཅེས་བྱ་བ་རྗེས་སུ་བསྒྲུབ་པར་བྱ་བ་ཉིད་དེ། སྦྱོར་བ་ཐ་དད་པ་ཉིད་ཡིན་ནོ། །འདིར་གཞུང་ནི་དགེ་སློང་གཉིས་ཀྱིས་རང་གིས་སྤྲིང་བ་མནོས་ནས་དེ་ན་གཅིག་འདི་སྐད་ཅེས་ཁོ་ངོ་ནི་ཕྲིན་ཕར་ནི་སྐྱེལ་ལོ། །ཚུར་ནི་མི་སྐྱེལ་ལོ་ཞེས་ཟེར་ན། དེ་གཉིས་ལས་ཕྲིན་ཕར་ཡང་སྐྱེལ་བར་བྱེད། ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་རོ། །གང་ཕྲིན་ཕར་སྐྱེལ་བར་ནི་བྱེད་ལ་ཚུར་སྐྱེལ་བར་ནི་མི་བྱེད་པ་དེ་ལ་ནི་ཉེས་པ་སྦོམ་པོ་གཉིས་སུ་འགྱུར་རོ། །དགེ་སློང་གཉིས་ཀྱིས་རང་གིས་སྤྲིང་བ་མནོས་ནས་གཅིག་འདི་སྐད་ཅེས་ཁོ་བོ་ནི་ཕྲིན་ཕར་ཡང་མི་སྐྱེལ་ལོ། །ཚུར་ཡང་མི་སྐྱེལ་ལོ་ཞེས་ཟེར་ན་དེ་གཉིས་ལས་ཕྲིན་ཕར་ཡང་སྐྱེལ་བར་བྱེད་དེ། ཚུར་ཡང་སྐྱེལ་བར་བྱེད་པ་དེ་ལ་ནི་དགེ་འདུན་ལྷག་མར་འགྱུར་རོ། །གང་ཕྲིན་ཕར་ཡང་སྐྱེལ་བར་མི་བྱེད་ཚུར་ཡང་སྐྱེལ་བར་མི་བྱེད་པ་ད་ལ་ན་ཉེས་པ་སྦོམ་པོ་གཅིག་ཏུ་གྱུར་རོ་ཞེས་གསུངས་པ་ཡིན་ཏེ། དེ་ལྟར་ནད་པ་ལ་སོགས་པ་རེ་རེ་དག་ལ་ཕྱི་མ་མེད་ན་ཡང་ཚིག་སྔ་མ་ལ་ཉེས་པ་སྦོམ་པོར་གསུངས་པ་གང་ཡིན་པ་དེ་དག་འདིར་བསྡུས་པ་ཡིན་ནོ། །མི་ཉིད་ལ་མཐའི་བྱེད་པ་པོ་ཉིད་མ་ཡིན་ཡང་སྦྱོར་བ་ཉིད་མ་ཡིན་པ་མ་ཡིན་ནོ་ཞེས་བྱ་བ་ལ། མི་ཉིད་ལ་ཞེས་བྱ་བ་ནི་མིའི་འགྲོ་བ་ཉིད་ལ་སྤྲད་པར་བྱ་བ་གཉིས་པོ་མངལ་ན་གནས་པ་དང༌། ཟམ་དང༌། ཁྱོ་ཤུག་སྔར་མཐུན་པར་གྱུར་པ་བར་དུ་མི་མཐུན་པར་གྱུར་པ་བར་དུ་མི་མཐུན་པར་གྱུར་པའི་ཡུལ་ལ་སྤྲིང་བ་ནོད་པ་དང༌། ཕྲིན་ཕར་སྐྱེལ་བ་དང༌། ཕྲིན་
ཚུར་སྐྱེལ་བར་བྱེད་པ་དག་ལའོ། །མཐའ་བྱེད་པ་པོ་ཉིད་མ་ཡིན་ཡང་ཞེས་བྱ་བ་ནི་མངལ་ན་གནས་པ་དང༌། ཟ་མ་ལ་ཕྲད་པ་མེད་པའི་ཕྱིར་དང༌། ཁྱོ་ཤུག་སྔར་མཐུན་པར་གྱུར་པ། བར་དུ་མི་མཐུན་པར་གྱུར་པ་ལ། མི་མཐུན་པ་མཐུན་པར་བསྒྲུབས་པ་མེད་པའི་ཕྱིར་མཐའ་ཞེས་བྱ་བ་དངོས་གཞིའི་ཁ་ན་མཐོ་བའི་བྱེད་པ་པོ་ཉིད་མ་ཡིན་པའོ། །སྦྱོར་བ་པོ་ཉིད་མ་ཡིན་ནོ་ཞེས་བྱ་བ་ནི། ནོད་པ་དང་ཕྲིན་ཕར་སྐྱེལ་བ་དང༌། ཕྲིན་ཚུར་སྐྱེལ་བའི་ཚིག་གསུམ་པོ་དེ་དག་རྗེས་སུ་སྒྲུབ་པར་བྱེད་པ་སྦྱོར་བ་ཉིད་མ་ཡིན་པ་མ་ཡིན་ཏེ། འདི་ལྟར་སྦྱོར་བ་ཁོ་ན་ཡིན་ཏེ། སྦོམ་པོའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཉེར་འཁོར་གྱིས་ཞུས་པ་ལས། བཙུན་པ་དགེ་སློང་གིས་རེ་ཞིག་མངལ་ན་གནས་པ་དག་གི་སྨྱན་བགྱིས་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ། །བཙུན་པ་དགེ་ལོང་གིས་རེ་ཞིག་ཟ་མ་དག་གི་སྤྱན་བགྱིས་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་དང༌། རྣམ་པར་འབྱེད་པ་ལས་དགེ་སློང་གིས་ཆུང་མ་སྔ་མ་གསུམ་པོ་ཆུ་ཚིགས་ཀྱིས་ཕྱིན་པ་དང༌། རིན་ཆས་ཉོས་པ་དང༌། བཙན་ཕྲོགས་སུ་ཐོབ་པ་འཐབ་པའི་མོད་ལ་དང༌། འཐབ་པའི་འོག་ཏུ་དང༌། དུམ་བ་གཅད་པ་དང༌། རྡེའུ་གསུམ་པོ་གཏོར་པ་དང༌། ཆོག་བཏང་བ་དང༌། ཆུང་མ་མ་ཡིན་པར་བསྒྲགས་པ་དང༌། དྲི་ལམ་བསྒྲགས་པ་དེ་དག་གི་སྡུམས་བྱེད་ཅིང་མཐུན་པར་སྦྱོར་ན་ཉེས་བྱས་གསུམ་དང༌། ཉེས་པ་སྦོམ་པོ་གཉིས་སུ་འགྱུར་རོ་ཞེས་གསུངས་པ་ཡིན་ཏེ། དེ་ལ་ཉེ་བ་འཁོར་གྱིས་ཞུས་པ་ལས་མངལ་ན་གནས་པ་དང། ཟ་མའི་སྨྱན་བྱས་ན་ཉེས་པ་སྦོམ་པོར་གསུངས་པ་དང༌། རྣམ་པར་འབྱེད་པ་ལས་རྡེའུ་གསུམ་གཏོར་བ་དང༌། ཆོ་ག་བཏང་བ་གཉིས་ཀྱིས་ཉེས་པ་སྦོམ་པོར་གསུངས་པ་གང་ཡིན་པ་དེ་དག་གིས་འདིར་ལུང་གི་དོན་ཁོང་དུ་ཆུད་པར་བྱའོ། །འདི་ལྟར་ལུང་དེ་གཉིས་ལ་ཡང་ཕྲད་པ་མེད་པའི་ཕྱིར་དང༌། མི་མཐུན་པ་མཐུན་པར་བསྒྲུབས་པ་མེད་པའི་ཕྱིར་མཐའི་བྱེད་པ་པོ་ཉིད་མ་ཡིན་ཏེ། སྦྱོར་བ་ཉིད་ཡིན་ནོ། །འབྲས་བུ་གཅིག་པ་ཉིད་ཀྱི་ཕྱིར་བྱེད་པ་པོ་སོ་སོ་ལ་བྱ་བ་རྫོགས་པར་མེད་པ་མ་ཡིན་ནོ་ཞེས་བྱ་བ་ལ། འབྲས་བུ་གཅིག་པ་ཉིད་ཀྱི་ཕྱིར་ཞེས་བྱ་བ་ནི་གཅིག་པའི་
དངོས་པོ་ནི་གཅིག་པ་ཉིད་དེ། འབྲས་བུ་གཅིག་པ་ཉིད་ནི་འབྲས་བུ་གཅིག་པ་ཉིད་དོ། །འདི་ལྟར་སྤྲད་པར་བྱ་བའི་རྒྱུད་དུ་གཏོགས་པའི་ཕྲད་པ་ཞེས་བྱ་བའི་འབྲས་བུ་ཐ་མི་དད་པར་གཅིག་པ་ཉིད་དུ་གྲུབ་པ་ནི་འབྲས་བུ་གཅིག་པ་ཉིད་དོ། །དེ་ལྟར་འབྲས་བུ་གཅིག་པ་ཉིད་ཀྱི་ཕྱིར། བྱེད་པ་པོ་སོ་སོ་ལ་བྱ་བ་རྫོགས་པར་མེད་པ་མ་ཡིན་ཏེ། དངོས་གཞིའི་བྱ་བ་རྫོགས་པར་མེད་པ་མ་ཡིན་ནོ་ཞེས་བྱ་བའི་ཐ་ཚིག་གོ །འདི་ལྟར་བྱེད་པ་པོ་རེ་རེ་རེ་རེ་ལ་བྱ་བ་རྫོགས་པར་བྱ་བ་ཡོད་པ་ཉིད་ཡིན་པས་རེ་རེ་ལ་ལྟུང་བ་རེ་རེར་འགྱུར་ཏེ། དེས་ན་དེ་དག་ཐམས་ཅད་སོ་སོ་ལ་བྱ་བ་ཡོད་པའི་ཕྱིར་རོ། །འདི་སྐད་བསྟན་ཏེ། གལ་ཏེ་དགེ་སློང་མང་པོ་དགེ་འདུན་དུ་གྱུར་པས་ཀྱང་དུས་གཅིག་ཏུ་སྤྲད་པའི་བྱ་བའི་ཡུལ་གཅིག་ལ་སྤྲིང་པ་མནོད་པ་དང༌། ཕྲིན་ཕར་བསྐྱལ་བ་དང༌། ཕྲིན་ཚུར་བསྐྱལ་བ་དག་གི་བྱ་བ་བྱེད་ལ། འདི་ལྟར་སྤྱད་པར་བྱ་བ་དེ་གཉིས་ཀྱི་ཕྲད་པ་ཞེས་བྱ་བའི་འབྲས་བུ་གཅིག་པ་ཉིད་ཀྱང་བྱུང་བར་གྱུར་ན། དེ་ལྟ་ན་བྱེད་པ་པོ་དེ་དག་གི་རྒྱུད་ལ་བྱ་བ་ཐ་དད་པར་འགྱུར་བས་བྱ་བ་ཐ་དད་པ་དེ་ལས་དོན་དགེ་སློང་བྱེད་པ་པོ་ཇི་སྙེད་ཡོད་པ་དེ་དག་སོ་སོའི་རྒྱུད་ལ་ཉེས་བྱས་དང༌། སྦོམ་པོ་དང༌། དགེ་འདུན་ལྷག་མ་ཞེས་བྱ་བའི་ལྟུང་བ་ཡང་ཐ་དད་པར་འགྱུར་ཏེ། འདི་ལྟར་གང་ཟག་སོ་སོའི་རང་གི་བྱ་བ་རྫོགས་པའི་དབང་གིས་ལྟུང་བ་རྣམས་འབྱུང་བའི་ཕྱིར་རོ། །འདིར་མངགས་པ་ནི་རང་ཉིད་དང་འདྲའོ་ཞེས་བྱ་བ་ནི། སྨྱན་བྱེད་པའི་སྐབས་འདིར་མངགས་པས་སྨྱན་བྱས་པ་ནི་རང་ཉིད་དང་འདྲ་སྟེ། བདག་ཉིད་ཀྱིས་བྱས་པ་དང་འདྲའོ། །ཇི་ལྟར་གནས་ངན་ལེན་སྨྲ་བ་ལ་སོགས་པ་ལྟ་བུ་ནི་མ་ཡིན་ཏེ། དེར་ནི་མངགས་པས་བྱས་པ་གང་ཡིན་པ་དེ་རང་གིས་བྱས་པ་དང་འདྲ་བ་ཉིད་ཡིན་ནོ། །སྨྱན་བྱེད་པ་འདིར་ནི་མངགས་པ་དང་མངགས་པས་མངགས་པས་ཀྱང་བྱས་པ་གང་ཡིན་པ་དེ་རང་གིས་བྱས་པ་དང་འདྲ་བར་རིག་པར་བྱའོ། །དེའི་ཕྱིར་སྤྲད་པར་བྱ་བ་ཉིད་ཀྱིས་དེ་ལ་སྤྲིང་བ་གང་ཡིན་པ་དེ་མངགས་པ་ལས་སྤྲིང་བ་དང༌། སྤྲད་པར་བྱ་བ་ལ་བརྗོད་པར་བྱ་བ་གང་ཡིན་པ་མངགས་པ་ལས་བརྗོད་པ་མངགས་པས་བྱས་པ་གང་ཡིན་པ་དེ་ནི་ལྟུང་བ་འབྱིན་པ་པོ་ཁོ་ནས་བྱས་པ་ཡིན་ཏེ། འདིར་དེ་དག་གི་རྣམ་པར་གཞག་པ་དེ་
ཡིན་ནོ། །མངགས་པས་མངགས་པ་ལ་ཡང་དེ་བཞིན་དུ་སྦྱར་རོ། །དེ་གཉིས་ཀྱི་བདག་པོ་དག་ནི་སྤྲད་པར་བྱ་བ་ཉིད་དང་འདྲའོ་ཞེས་བྱ་བ་ནི། སྤྲད་པར་བྱ་བ་ཁྱེའུ་དང་བུ་མོ་དེ་གཉིས་ཀྱི་བདག་པོ་དབང་པོ་དབང་བྱེད་པ་ཕ་མ་ལ་སོགས་པ་གང་དག་ཡིན་པ་དེ་དག་ནི་སྤྲད་པར་བྱ་བ་ཉིད་དང་འདྲ་སྟེ། འདི་ལྟར་ཕ་ནི་བསྒོ་བ་དང༌། བཟློག་པ་ལ་བདག་པོ་ཉིད་ཡིན་ལ་མ་ནི་སྦྱིན་པ་དང་དབྲོག་པ་ལ་བདག་པོ་ཉིད་ཡིན་པའམ། ཡང་ཡུ་ཆོས་བཞིན་དུ་ཡང་སྦྱར་བར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྤྲད་པར་བྱ་བ་གཉིས་ཀྱི་བདག་པོ་ཕ་མ་ལ་སོགས་པ་དག་ལས་སྤྲིང་བ་ནོད་པ་དང༌། ཕྲིན་ཕར་སྐྱེལ་པ་དང༌། ཕྲིན་ཚུར་སྐྱེལ་བ་བྱེད་ཅིང་གཞི་དེ་ཁོ་ན་ལས་སྤྲད་པར་བྱ་བ་ཁྱེའུ་དང་བུ་མོ་དེ་གཉིས་ཕྲད་བར་གྱུར་ན་ཁ་ན་མ་ཐོ་བའི་དངོས་གཞི་ཉིད་དུ་འགྱུར་ཏེ། ཇི་ལྟར་སྤྲད་པར་བྱ་བ་གཉིས་ལས་མངོན་སུམ་དུ་སྤྲིང་པ་ནོད་པ་དང༌། ཕྲིན་ཕར་སྐྱེལ་བ་དང༌། ཕྲིན་ཚུར་སྐྱེལ་བ་ལ་དངོས་གཞིའི་ཁ་ན་མཐོ་བར་བསྟན་པ་བཞིན་ནོ། །གཞལ་ལ་བྱས་པ་ཉིད་ནི་ཉེས་བྱས་སོ་ཞེས་བྱ་བ་ནི། དེ་གཉིས་ཀྱི་བདག་པོ་མ་ཡིན་བ་དེ་གཉིས་དང་འབྲེལ་བའམ། དེ་གཉིས་དང་འབྲེལ་བ་མ་ཡིན་པ་གཞན་ལ་སྤྲིང་བ་མནོས་པ་དང༌། ཕྲིན་ཕར་སྐྱེལ་བ་དང༌། ཕྲིན་ཚུལ་སྐྱེལ་བ་བྱས་པ་ཉིད་ནི་ཉེས་བྱས་ཏེ། དེ་དག་སྤྲད་པར་བྱ་བའི་ཡུལ་ལ་བདག་པོ་མ་ཡིན་པའི་ཕྱིར་རོ། །སྤྲིང་ཡིག་དང་ལག་ཡིག་དང་ཡུལ་ཕྱོགས་དང༌། བརྡ་དང་མཚན་མ་རྣམས་ནི་ཚིག་ཉིད་དང་འདྲའོ་ཞེས་བྱ་བ་ནི། སྤྲིང་ཡིག་དང་ལག་ཡིག་ལ་སོགས་པ་ནི་ཚིག་ཉིད་དང་འདྲ་སྟེ་ཚིག་གི་ངོ་བོ་ཉིད་དང་འདྲ་བར་རིག་པར་བྱའོ། །ཇི་ལྟར་ཚིག་གིས་སྤྲིང་བས་དོན་གྲུབ་ན་ལྟུང་བར་འགྱུར་བ་བཞིན་དུ་སྤྲིང་ཡིག་ལ་སོགས་པ་ཡང་དེ་དང་འདྲའོ། །འདིར་དོན་གྲུབ་པ་དགོས་པས་སྤྲིང་ཡིག་ལ་སོགས་པས་ཀྱང་དོན་དེ་འགྲུབ་པར་འགྱུར་བའི་ཕྱིར་ཚིག་ཉིད་དང་འདྲའོ་ཞེས་བསྟན་ཏོ། །སྤྲིང་ཡིག་དང་ལག་ཡིག་ནི་གོ་སླ་བས་མ་བཤད་དོ། །ཡུལ་ཕྱོགས་ཞས་བྱ་བ་ནི་སྐྱེད་མོས་ཚལ་ལ་སོགས་པའི་ས་ཕྱོགས་སོ། །བརྡ་ཞེས་བྱ་བ་ནི་དངོས་པོ་མ་ཡིན་པའི་མཚན་མ་སྟེ། དཔེར་ན་སྔ་དྲོ་ལ་སོགས་པ་དུས་ཀྱི་བྱེ་བྲག་གོ །མཚན་མ་ཞེས་བྱ་བ་ནི། གང་མཐོང་ན་
བརྡར་བྱ་བའི་དོན་གོ་བར་འགྱུར་བ་སྟེ། དཔེར་ན་སྐྲ་དང་ཁ་སྤུ་བྲེགས་ནས་རིང་པོ་མ་ལོན་པའམ་གོས་དམར་སེར་གྱོན་པ་ཉིད་ནའོ་ཞེས་བྱ་བ་ལྟ་བུའོ། །འདིར་གཞུང་ནི་རྒྱུ་གསུམ་གྱིས་སྤྲིང་པའི་ཕྲིན་ཚུར་སྐྱེལ་ལ་ཕར་མི་སྐྱེལ་ཏེ། གསུམ་གང་ཞེ་ན། ཡུལ་ཕྱོགས་དང་བརྡ་དང་མཚན་མས་སོ་ཞེས་གསུངས་པ་ཡིན་ནོ། །སྨད་འཚོང་མ་ནི་སྐྱེས་པ་ཐམས་ཅད་དང་མཐུན་ཞེས་གྲགས་པས། གལ་ཏེ་དགེ་སློང་གིས་དེའི་ཡུལ་ལ་སྤྲིང་བ་ནོད་པ་དང༌། ཕྲིན་པར་བསྐྱལ་བ་དང༌། ཕྲིན་ཚུར་བསྐྱལ་བ་ལ་སོགས་པ་དག་བྱེད་ན། དེ་ལྟར་ན་ཡང་དགེ་འདུན་ལྷག་མར་མི་འགྱུར་ཏེ། དང་པོ་ཉིད་ནས་ཐམས་ཅད་དང་མཐུན་བར་གྱུར་པའི་ཕྱིར་རོ་སྙམ་པའི་བློ་གྲོས་དེ་བསལ་བའི་ཕྱིར། སྨད་འཚོང་མ་ནི་མི་མཐུན་པ་ཉིད་དོ་ཞེས་བྱ་བ་སྨྲས་ཏེ། ཆུང་མ་དྲུག་པོ་ཆུ་ཚིགས་ཀྱིས་བྱིན་པ་དང༌། རིན་ཆས་ཉོས་པ་དང༌། བཙན་ཕྲོགས་སུ་ཐོབ་པ་དང༌། དང་སམ་དུ་འདུས་པ་དང༌། གོས་ཟས་ཀྱིས་འཚོས་པ་དང༌། ཁ་དུམ་པ་རྣམས་ལ་ཡང་མི་མཐུན་པ་ཉིད་སྲིད་ལ། ཐང་འགའ་འཕྲད་པ་ཡང་དེ་བཞིན་ནོ། །དེའི་ཕྱིར་སྨད་འཚོད་མ་ནི་ཐང་འགའ་འཕྲད་པ་ཞེས་བྱ་སྟེ། ཡུན་ཐུང་ངུར་མཐུན་པའི་ཕྱིར་ཡུན་ཐུང་བས་མཚན་གཅིག་ཙམ་ལ་སོགས་པའི་མཐའ་ཡིན་པའི་ཕྱིར་སྔོན་དང་ཕྱིས་མི་མཐུན་པ་ཉིད་དུ་འགྱུར་བའི་ཕྱིར་རོ། །དེ་བས་ན་བུད་མེད་མི་མཐུན་པར་གྱུར་པ་གཞན་དག་ལ་སྤྲིང་བ་མནོས་པ་དང༌། ཕྲིན་ཕར་བསྐྱལ་བ་དང༌། ཕྲིན་འཚུར་བསྐྱལ་བ་དག་བྱེད་པ་ལ་དངོས་གཞི་ལ་སོགས་པའི་ཁ་ན་མཐོ་བར་འགྱུར་བ་བཞིན་དུ་སྨད་འཚོང་མ་ལ་ཡང་དེ་བཞིན་ཏེ། དེ་ལྟ་བས་ན་སྨད་འཚོང་མའི་ཕྱིར་མདོ་བརྩམ་པ་དོན་དང་བཅས་པ་ཁོ་ན་ཡིན་ནོ། །བདག་པོ་ཉིད་མ་ཡིན་པས་བཞི་པ་མན་ཆད་ཞུགས་པ་ཉིད་དོ་ཞེས་བྱ་བ་ནི། བདག་པོ་ཉིད་མ་ཡིན་པས་སྤྲད་པར་བྱ་བ་དང༌། ལན་གསུམ་པ་མན་ཆད་སྤྲད་པ་ཡང་མི་མཐུན་བ་ཉིད་ཡིན་པས་དགེ་སློང་གིས་དེ་སྤྲད་ན་དངོས་གཞིར་འགྱུར་རོ་ཞེས་བྱ་པར་སྦྱར་རོ། །ཇི་ལྟ་བུའི་དངོས་པོར་ཞུགས་པ་ཉིད་ཅེ་ན། དེའི་ཕྱིར། བདག་པོ་ཉིད་མ་ཡིན་པས་ཞེས་བྱ་བ་སྨྲས་ཏེ། བདག་གིར་ཁས་བླངས་པ་མེད་པས་བདག་པོ་དང་བཅས་པ་མེད་པས་སོ། །བཞི་བ་མན་ཆད་ཅེས་བྱ་བ་ནི།
ལན་བཞི་པའི་འོག་མ་སྟེ། ལན་གསུམ་པ་མན་ཆད་དོ། །ཞུགས་པ་ཉིད་དོ་ཞེས་བྱ་བ་ནི། སྤྲད་པར་བྱ་བ་དང་སྤྲད་པར་བྱ་བ་གཞན་དུ་ལྷན་ཅིག་སྤྲད་པ་ཉིད་དེ། དེ་ཡང་མི་མཐུན་པ་ཉིད་ཡིན་པར་རིག་པར་བྱའོ། །འདི་སྐད་བསྟན་ཏེ། མཛའ་གཅུགས་པ་ཙམ་གྱིས་བཤེས་བའི་དབང་གིས་གླ་མེད་བར་སྨད་འཚོང་མའམ། བུད་མེད་གཞན་དང་ལྷན་ཅིག་ལན་གསུམ་ཕྲད་པ་ཞེས་བྱ་བ་འཇུག་པར་བྱེད་དུ་ཟིན་ཀྱང༌། དེ་མི་མཐུན་པ་ཉིད་ཡིན་པས། གལ་ཏེ་དགེ་སློང་གིས་དེ་ལ་སྤྲིང་བ་ནོད་པ་དང༌། ཕྲིན་ཕར་བསྐྱལ་བ་དང༌། ཕྲིན་ཚུར་བསྐྱལ་བ་བྱེད་ན་དངོས་གཞི་ལ་སོགས་པའི་ཁ་ན་མ་ཐོ་པར་འགྱུར་རོ། །དེས་ནི་རྣམ་པར་འབྱེད་པ་ལས་མཛའ་ན་མེ་ལ་སྤྲིང་བ་ནོད་པ་ཞེས་འབྱུང་པ་དེ་བསྡུས་པ་ཡིན་ནོ། །ཉེ་བ་འཁོར་གྱིས་ཞུས་པ་ལས་དགེ་སློང་གིས་ལན་གྲངས་གཉིས་ལས་ལྷག་པ་ལ་སྤྲིང་བ་མནོས་ཏེ། ཕྲིན་ཕར་སྐྱེལ་ཚུར་སྐྱེལ་བགྱིད་ན་ལྟུང་བ་ཅིར་འགྱུར། དགེ་འདུན་ལྷག་མར་རོ། །དགེ་སློང་གིས་ལན་གྲངས་མང་པོ་ལས་ལྷག་པ་ལ་སྤྲིང་བ་མནོས་ཏེ། ཕྲིན་ཕར་སྐྱེལ་ཚུར་སྐྱེལ་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡང་བསྡུས་པ་ཡིན་ནོ། །འདིར་ལན་གྲངས་ཞེས་བྱ་བ་ལ་ལན་ཅེས་བྱ་བ་ནི་རེས་ལ་བྱའོ། །ལན་གྱི་དོན་དེའི་ཡང་དང་ཡང་དུ་གོམས་པ་ནི་ལན་གྲངས་ཞེས་བྱའོ། །བུད་མེད་གང་ལན་གྲངས་གཉིས་ཕྲད་པའི་རེས་ལ་གྲུབ་པ་དེ་ནི་ལན་གྲངས་གཉིས་ཞེས་བྱའོ། །གང་དང་ལན་གྲངས་མང་དུ་ཕྲད་པའི་རེས་གྲུབ་པ་དེ་ནི་ལན་གྲངས་མང་པོ་ཞེས་བྱའོ། །ལན་གྲངས་གཉིས་པ་ལས་ལྷག་བ་ནི་གསུམ་པ་སྟེ། དེ་ལ་ཡང་དགེ་འདུན་ལྷག་མར་གསུངས་སོ། །ལན་གྲངས་གསུམ་པ་ལས་ལྷག་པ་ནི་བཞི་པ་སྟེ། དེ་ལ་ནི་སྦོམ་པོར་གསུངས་ཏེ། དེ་བས་ན་བཞི་པ་མན་ཆད་ཅེས་བྱ་བ་སྨོས་སོ། །འཐབ་པ་ཉིད་ན་ཉམས་པ་ཉིད་དོ་ཞེས་བྱ་བ་ནི། མཐུན་པ་ཉིད་ཅེས་བྱ་བར་སྦྱར་རོ། །སྤྲད་པར་བྱ་བ་གཉིས་འཐབ་པ་ཉིད་ན་མཐུན་པ་ཉིད་ཉམས་པ་ཉིད་ཡིན་ནོ། །འཐབ་པ་ཞེས་བྱ་བ་ནི་འདིར་རྩུབ་མོ་སྨྲས་པ་དང་ཕྱིར་ཡང་རྩུབ་མོ་སྨྲས་པ་ཡིན་པར་རིག་པར་བྱའོ། །འཐབ་པ་གང་ལ་མཛའ་གཅུགས་ཉམས་པར་གྱུར་པ་དང༌། མ་འཐབ་ཏུ་ཟིན་ཀྱང་གལ་ཏེ་ཕྲ་མལ་
སོགས་པ་མཛའ་གཅུགས་ཉམས་པར་གྱུར་པ་དེ་ལ་ནི་མཐུན་པ་ཉིད་ཉམས་པ་ཡིན་ནོ། །འདིར་གཞུང་ནི་དགེ་སློང་གིས་ཆུང་མ་ཐ་མ་བཞི་པོ་དང་སམ་དུ་འདུས་པ་དང་གོས་ཟས་ཀྱིས་འཆོས་པ་དང༌། ཁ་དུམ་པ་དང༌། ཐང་འགའ་ཕྲད་པ་ཞེས་བྱ་བ་འཐབ་པའི་མོད་དང༌། འཐབ་པའི་འོག་ཏུ་སྡུམས་བྱེད་ཅིང་མཐུན་པར་བྱེད་ན་དགེ་འདུག་ལྷག་མར་འགྱུར་རོ་ཞེས་གསུངས་པ་ཡིན་ནོ། །འཐབ་པའི་མོད་ཅེས་བྱ་བའི་སྒྲས་ནི་འཐབ་མོའི་གནས་སྐབས་སྟོན་ཏོ། །འཐབ་པའི་འོག་ཏུ་ཞེས་བྱ་བའི་སྒྲས་ནི་འདས་པའི་གནས་སྐབས་སྟོན་ཏེ། སྐད་ཅིག་མ་དང་པོ་འདས་པ་ལ་ཡང་འཐབ་པ་ཞེས་བྱ་བའི་སྒྲར་འགྱུར་རོ། །དེའི་དམིགས་ཀྱིས་བསལ་བ་བྱས་ཏེ། གལ་ཏེ་དེ་དབང་བ་ཆུང་མ་མ་ཡིན་པར་བསྒྲགས་པ་ཉིད་ཀྱང་ངོ་ཞེས་བྱ་བ་ཡང་མཐུན་པ་ཉིད་ཉམས་པ་ཉིད་དོ་ཞེས་བྱ་བར་སྦྱར་ཏེ། བུད་མེད་གང་དང་སྐྱེས་པ་གང་དུ་མཐུན་པར་གྱུར་ལ་གལ་ཏེ་བུད་མེད་དེ་ཡང་སྐྱེས་པ་དེ་དབང་བ་ཡིན་ཏེ། རིན་ཆས་ཉོས་པ་ལ་སོགས་པས་སྐྱེས་པ་ལ་རག་ལས་པ་ཡིན་པ་ལ་གང་གི་ཚེ་ལམ་པོ་ཆེ་ལ་སོགས་པར་འདི་ཁོ་བོའི་ཆུང་མ་མ་ཡིན་ནོ། །ཁོ་བོ་ཡང་འདིའི་ཁྱིམ་ཐབ་མ་ཡིན་ནོ་ཞེས་ཆུང་མ་མ་ཡིན་པར་བསྒྲགས་པ་ཉིད་ཀྱང་དེའི་ཚེ་ན་མཐུན་པ་ཉིད་ཉམས་པ་ཡིན་ཏེ། འཐབ་པ་ཙམ་འབའ་ཞིག་གིས་དེ་ཉམས་པར་མ་ཟད་དོ། །དེ་བཞིན་དུ་གལ་ཏེ་ལྷ་ཁང་ལ་སོགས་པར་དྲིལ་བསྒྲགས་པ་བྱས་ན་ཡང་དེའི་ཚེ་མཐུན་པ་ཉིད་ཡིན་ནོ། །འཐབ་པ་ཉིད་གྱི་མོད་ལ་དང་འོག་ཏུ་དང་དུམ་པ་བཅད་པ་ཉིད་དང༌། རྡེའུ་གསུམ་གཏོར་བ་ཉིད་དང༌། ཆོ་ག་བཏང་བ་ཉིད་དང་ཆུང་མ་མ་ཡིན་པར་བསྒྲགས་པ་ཉིད་དང༌། དྲིལ་བསྒྲགས་པ་ཉིད་དག་ནི་སྲོག་དང་ལྡན་པ་ཉིད་དག་བཞིན་ནོ་ཞེས་བྱ་བ་ལ་གང་དག་ལ་སྲོག་ཡོད་པ་དེ་དག་ནི་སྲོག་དང་ལྡན་པ་སྟེ། དེའི་དངོས་པོ་ནི་དེ་ཉིད་དོ། །སྲོག་ཆགས་དག་དང་འདྲ་བར་འགྱུར་བ་ནི། སྲོག་དང་ལྡན་པ་ཉིད་དག་བཞིན་ནོ། །དེ་ལ་ཇི་ལྟར་སྤྲད་པར་བྱ་བ་སྲོག་དང་ལྡན་པ་ཉིད་ཇི་སྙེད་སྤྲད་པར་འདོད་པ་དེ་དག་ལ་སྨྱན་བྱེད་ན་ལྟུང་བ་ཡང་དེ་སྙེད་དུ་འགྱུར་བ་དེ་བཞིན་དུ་འཐབ་པ་ཉིད་ཀྱི་མོད་ལ་སོགས་པའི་ཚེགས་བདུན་པོ་འདི་དག་ལས་ཇི་སྙེད་བྱུང་བ་དེ་དག་ལ་གལ་ཏེ་དགེ་སློང་གིས་སྨྱན་བྱེད་ན་ཆིགས་སོ་སོ་དེ་སྙེད་ཀྱི་ལྟུང་བ་དག་དེ་ལ་འབྱུང་བར་འགྱུར་
རོ། །དེ་ལ་འཐབ་པ་ཉིད་ཀྱི་མོད་ལ་ཞེས་བྱ་བ་ནི་འཐབ་མོ་ཉིད་ཀྱི་རྩོམ་པ་ཡོངས་སུ་མ་རྫོགས་བར་ཏེ། དེ་ལྟར་འཐབ་པ་ཉིད་ན་ཞེས་བྱ་བའི་ཐ་ཚིག་གོ །འོག་ཏུ་ཞེས་བྱ་བ་ནི་འཐབ་མོ་མཐར་ཕྱིན་པ་ཉིད་ནའོ། །དུམ་པ་བཅད་པ་ཉིད་ཅེས་བྱ་བ་ནི་དུམ་པ་ཞེས་བྱ་བ་ཤིང་གི་རྣམ་པ་ཡོད་དེ། སྤྲད་པར་བྱ་བ་དེ་གཉིས་ཀྱིས་ཤིང་དེ་རྐེད་དུ་གཅོད་པར་བྱེད་ཅིང༌། འདི་སྐད་ཅེས་ཇི་ལྟར་ཤིང་དུམ་འདི་གཉིས་ཕན་ཚུན་འབྱོར་པ་མེད་པ་དེ་བཞིན་དུ་ཡུ་བུ་ཅག་གཉིས་ཀྱང་དེ་བཞིན་ནོ་ཞེས་སྨྲས་པ་ནི་དུམ་པ་བཅད་པ་ཉིད་དོ། །ཁ་ཅིག་ནི་འདི་སྐད་ཅེས་རྩྭའི་རིགས་ཏི་ལིན་ཏི་ལ་ཀ་ཞེས་བྱ་བ་ཡོད་དེ། དེ་གཉིས་ཀྱིས་དེ་དུམ་པར་བཅད་ནས་དེ་སྐད་ཟེར་བ་ནི་དུམ་པ་བཅད་པ་ཞེས་བྱའོ་ཞེས་ཀྱང་ཟེར་རོ། །རྡེའུ་གསུམ་གཏོར་བ་ཉིད་ཅེས་བྱ་བ་ནི། དེ་གཉིས་ཀྱིས་རྡེའུ་གསུམ་ཕྱོགས་དང་ཕྱོགས་མཚམས་སུ་འཕངས་ནས། འདི་སྐད་ཅེས་ཇི་ལྟར་རྡེའུ་འདི་གསུམ་ཕན་ཚུན་ཕྲད་པ་མེད་པ་བཞིན་དུ། ཡུ་བུ་ཅག་གཉིས་ཀྱང་དེ་བཞིན་ནོ་ཞེས་ཟེར་བའོ། །གཞན་དག་ནི་འདི་སྐད་ཅེས་རྡེའུ་མང་པོའི་བསྣུན་པ་ཉིད་ཀྱིས་བརྡེགས་པ་ནི་རྡེའུ་གསུམ་གཏོར་བ་ཉིད་དོ་ཞེས་ཀྱང་ཟེར་རོ། །ཆོ་ག་བཏང་བ་ཉིད་ཅེས་བྱ་བ་ནི། ཁྱིམ་གྱི་ལས་སམ་ཁྱིམ་ཐབ་ཀྱི་རྐང་པ་བཀྲུ་བ་ལ་སོགས་པ་འཕྲལ་གྱི་བྱ་བ་ནི་ཆོ་ག་སྟེ། དེ་བཏང་བའོ། །ཆུང་མ་མ་ཡིན་པར་བསྒྲགས་པ་ཉིད་ཅེས་བྱ་བ་ནི། དེ་གཉིས་ཀྱིས་ཁྱོ་ཤུག་མ་ཡིན་པར་བསྒྲགས་པ་ཉིད་དོ། །དྲིལ་བསྒྲགས་པ་ཉིད་ཅེས་བྱ་བ་ནི། བདག་པོ་བཏང་བའི་ཕྱིར་ལྷ་ཁང་ལ་སོགས་པར་དྲིལ་བསྒྲགས་པའོ། །དེའི་དང་པོ་གསུམ་པ་ནི་ཉེས་བྱས་ཀྱི་དབང་དུ་བྱས་པ་ཉིད་དོ་ཞེས་བྱ་བ་ནི། སྔར་བསྟན་པའི་ཆུང་མ་དེ་དབང་བ་དེའི་དང་པོ་གསུམ་པོ་འཐད་པ་ཉིད་ཀྱི་མོད་ལ་དང༌། འོག་ཏུ་དང༌། དུམ་པ་བཅད་པ་དག་ལ་སྨྱན་བྱེད་པ་ནི་ཉེས་བྱས་ཀྱི་དབང་དུ་བྱས་པ་ཉིད་དོ། །འདིར་མདོ་དེ་གཉིས་ཀྱི་གཞུང་ནི་འདི་ཡིན་ཏེ། དགེ་སློང་གིས་ཆུང་མ་དང་པོ་གསུམ་པོ་ཆུ་ཚིགས་ཀྱིས་བྱིན་པ་དང༌། རིན་ཆས་ཉོས་པ་དང༌། བཙན་ཕྲོགས་སུ་ཐོབ་པ་འཐབ་པའི་མོད་ལ་ཡིན་ལ། འཐབ་པའི་འོག་ཏུ་མ་ཡིན་པ་དང༌། དུམ་པ་མ་བཅད་པ་དང༌། རྡེའུ་གསུམ་མ་གཏོར་བ་དང༌། ཆོ་ག་མ་བཏང་བ་དང༌། ཆུང་མ་མ་
ཡིན་པར་མ་བསྒྲགས་པ་དང༌། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གཅིག་ཏུ་འགྱུར་རོ། །དགེ་སློང་གིས་ཆུང་མ་དང་པོ་གསུམ་པོ་འཐབ་པའི་མོད་ལ་དང༌། འཐབ་པའི་འོག་ཏུ་ཡིན་ལ་དུམ་པ་མ་བཅད་པ་དང༌། དྲིལ་མ་བསྒྲགས་པའི་བར་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གཉིས་སུ་འགྱུར་རོ་དགེ་སློང་གིས་ཆུང་མ་སྔ་མ་གསུམ་པོ་འཐབ་པའི་མོད་ལ་དང༌། འཐབ་པའི་འོག་ཏུ་དང༌། དུམ་པ་བཅད་པ་ཡིན་ལ། རྡེའུ་གསུམ་མ་གཏོར་བ་དང༌། དྲིལ་མ་བསྒྲགས་པའི་བར་དག་གི་སྡུམས་བྱེད་ཅིང༌། མཐུན་པར་གྱུར་ན་ཉེས་བྱས་གསུམ་དུ་འགྱུར་རོ། །དགེ་སློང་གིས་ཆུང་མ་སྔ་མ་གསུམ་པོ་འཐབ་པའི་མོད་ལ་དང༌། འཐབ་པའི་འོག་ཏུ་དང༌། དུམ་པ་བཅད་པ་དང༌། རྡེའུ་གསུམ་གཏོར་བ་ཡིན་ལ། ཆོ་ག་མ་བཏང་བ་དང༌། དྲིལ་མ་བསྒྲགས་པའི་བར་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་སྦོམ་པོ་གཅིག་ཏུ་འགྱུར་རོ། །དགེ་སློང་གིས་ཆུང་མ་སྔ་མ་གསུམ་པོ་འཐབ་པའི་མོད་ལ་དང༌། འཐབ་པའི་འོག་ཏུ་དང༌། དུམ་པ་བཅད་པ་དང༌། རྡེའུ་གསུམ་གཏོར་བ་དང༌། ཆོ་ག་བཏང་བ་ཡིན་ལ། ཆུང་མ་མ་ཡིན་པར་མ་བསྒྲགས་པ་དང༌། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང༌། སྦོམ་པོ་གཉིས་སུ་འགྱུར་རོ། །དགེ་སློང་གིས་ཆུང་མ་སྔ་མ་གསུམ་པོ་འཐབ་པའི་མོད་ལ་དང༌། འཐབ་པའི་འོག་ཏུ་དང༌། དུམ་པ་བཅད་པ་དང༌། རྡེའུ་གསུམ་གཏོར་བ་དང༌། ཆོ་ག་བཏང་བ་དང༌། ཆུང་མ་མ་ཡིན་པར་བསྒྲགས་པ་ཡིན་ལ། དྲིལ་མ་བསྒྲགས་པ་དག་གི་སྡུམས་བྱེད་ཅིང་མཐུན་བར་གྱུར་ན་ཉེས་བྱས་གསུམ་དང༌། །སྦོམ་པོ་གསུམ་དང༌། དགེ་འདུན་ལྷག་མ་གཅིག་ཏུ་འགྱུར་རོ། །དགེ་སློང་གིས་ཆུང་མ་སྔ་མ་གསུམ་པོ་དྲིལ་བསྒྲགས་པའི་བར་དག་གི་སྡུམས་བྱེད་ཅིང་མཐུན་པར་གྱུར་ན་ཉེས་བྱས་གསུམ་དང་སྦོམ་པོ་བཞི་དང་དགེ་འདུན་ལྷག་མ་གཉིས་སུ་འགྱུར་རོ་ཞེས་གསུངས་པ་ཡིན་ཏེ། དེ་ལྟར་ན་འདིར་ཆུང་མ་དང་བོ་གསུམ་པོ་དག་གི་ཡུལ་ལ་ཚིགས་བདུན་ཡོད་བ་ལས། ཚིགས་གསུམ་ནི་ཉེས་བྱས་བྱེད་པ་ཡིན། ཚིགས་གཉིས་ནི་སྦོམ་པོ་བྱེད་པ་ཡིན། ཚིགས་དྲུག་པ་དང་བདུན་པ་ཞེས་བྱ་བ་
གཉིས་ནི་དགེ་འདུན་ལྷག་མ་བྱེད་པ་ཡིན་ནོ། །ཅིའི་ཕྱིར་འདིའམ་འདི་མི་སྤྲད་པ། གྱོས་བོའི་གན་དུ་མི་འགྲོ་མི་བཀྲི་ཞེས་ཟེར་བ་དག་ཀྱང་ངོ་ཞེས་བྱ་བ་ལ་ཀྱང་ངོ་ཞེས་བྱ་བའི་སྒྲ་ནི་ཉེས་བྱས་ཀྱི་དབང་དུ་བྱས་པ་ཉིད་དོ་ཞེས་བྱ་བའི་རྗེས་བསྙགས་པའི་ཕྱིར་རོ། །ཅིའི་ཕྱིར་ཞེས་བྱ་བའི་སྒྲ་ནི་ཐམས་ཅད་དང་སྦྱར་བར་བྱ་བ་ཡིན་ནོ། །འདི་འམ་ཞེས་བྱ་བའི་གནས་སུ་སྐྱེས་པའི་ཡུལ་ལ་སྦྱར་བ་ཡིན་ནོ། །འདི་ཞེས་བྱ་བའི་གནས་སུ་ནི་བུད་མེད་ཀྱི་ཡུལ་ལ་སྦྱར་བ་ཡིན་པར་བལྟ་བར་བྱའོ། །མི་སྤྲད་ཅེས་བྱ་བའི་སྒྲ་ནི་གཉི་ག་དང་སྦྱར་བར་བྱ་བ་ཡིན་ཏེ། ཁྱིམ་མི་དབུབ། གནས་མི་བཙལ་ཞེས་བྱ་བའི་ཐ་ཚིག་གོ །གྱོས་པོའི་གན་དུ་ཞེས་བྱ་བའི་སྒྲ་ཡང་གཉི་ག་དང་སྦྱར་ཏེ། སྐྱེས་པའི་ཕ་དང་བུད་མེད་ཀྱི་ཕའི་གན་དུའོ། །མི་འགྲོ་ཞེས་བྱ་བ་ནི་སྐྱེས་པ་ཉིད་དོ། །མི་བཀྲི་ཞེས་བྱ་བ་ནི། བུད་མེད་དོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ཅིའི་ཕྱིར་ཁྱེའུ་འདི་མི་སྤྲད་ཁྱིམ་མི་དབུབ། ཅིའི་ཕྱིར་བུ་མོ་འདི་མི་སྤྲད་གནས་མི་བཙལ། ཅིའི་ཕྱིར་ཁྱེའུ་འདི་གྱོས་པོའི་གན་དུ་མི་འགྲོ་བག་མ་མི་ལེན། ཅིའི་ཕྱིར་བུ་མོ་འདི་གྱོས་པོའི་གན་དུ་མི་བཀྲི་བག་མར་མི་བཏང་ཞེས་རྣམ་པ་དེ་ལྟ་བུ་དག་སྨྲ་བ་ནི་ཉེས་བྱས་ཀྱི་དབང་དུ་བྱས་པ་ཡིན་ནོ། །སྨྱན་བྱེད་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བའོ། །སྨྱན་བྱེད་པའི་དགེ་འདུན་ལྷག་མ་ཞུ་བའི་སྐབས་ནས་འབྱུང་བ་བརྗོད་པར་བྱ་སྟེ། དེའི་ཕྱིར། མང་ལ་ན་གནས་པ་དང༌། མེད་པ་དང༌། དེས་པ་དང༌། མི་བསྟེན་པ་དང༌། ཉོས་པ་དང༌། མཐུན་པ་དང། བདག་གི་སྨྱན་བྱེད་པ་ནི་སྦོམ་པོའོ་ཞེས་བྱ་བ་སྨྲས་ཏེ། མངག་པ་འགྲོ་བའི་ལས་སྤྲིང་བ་ནོད་པ་དང༌། ཕྲིན་པར་སྐྱེལ་ཚུལ་སྐྱེལ་བ་ནི་སྨྱན་བྱེད་པ་སྟེ། མངལ་ན་གནས་པ་ལ་སོགས་པ་དང༌། སྨྱན་བྱེད་པ་ཞེས་བྱ་བའི་སྒྲ་འདི་སོ་སོར་སྦྱར་བར་བྱ་སྟེ། མངལ་ན་གནས་པ་དག་གི་སྨྱན་བྱེད་པ་ཞེས་བྱ་བ་ལ་སོགས་པར་སྦྱར་རོ། །མངལ་ན་གནས་པ་དང༌། མེད་པ་དང༌། ངེས་པ་དང༌། མི་བསྟེན་པ་དང༌། ཉོས་པ་དང༌། མཐུན་པ་དང༌། བདག་ནི་དེ་དག་ཉིད་ཡིན་ཏེ། དེ་དག་གི་སྨྱན་བྱེད་ན་སྦོམ་པོར་འགྱུར་རོ། །དེ་ལ་མངལ་ན་གནས་པ་ཞེས་བྱ་བ་ནི། ལྟོར་ཞུགས་པའི་
སེམས་ཅན་དེ། དེ་དག་གི་སྨྱན་བྱེད་ན་སྦོམ་པོར་འགྱུར་རོ། །འདིར་གཞུང་ནི་མངལ་ན་གནས་པ་དག་གི་སྨྱན་བྱེད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །མེད་པ་ཞེས་བྱ་བ་ནི། འབྱུང་བར་འགྱུར་བ་ཉིད་དུ་འདོད་ལ། ད་དུང་མངལ་དུ་ནི་མ་ཞུགས་པ་སྟེ། འདི་ལྟར་དེའི་ཚེ་ན་སྤྲད་པར་བྱ་བ་མེད་མོད་ཀྱི། འོན་ཀྱང་ཕྱིས་འབྱུང་བར་འགྱུར་བའི་བདག་པོ་དག་ལ་སྨྱན་བྱེད་པ་ལས་ཁ་ནམ་ཐོ་བར་རྣམ་པར་གཞག་གོ །འདིར་གཞུང་ནི་ཁྱིམ་བདག་བུ་མེད་པ་རྣམས་ཀྱི་སྨྱན་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །ངེས་པ་ཞེས་བྱ་བ་ནི། བརྟུལ་ཞུགས་ལ་གནས་པ་སྦྱོར་བ་སྤངས་པ་སྟེ། དེ་དག་གི་སྨྱན་བྱེད་ན་སྦོམ་པོའོ། །འདིར་གཞུང་ནི་དགེ་སློང་མ་ལ་སྨྱན་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ཏེ། བརྟུལ་ཞུགས་ལ་གནས་པ་གཞན་ཐམས་ཅད་ལ་ཡང་དེ་བཞིན་དུ་ཤེས་པར་བྱའོ། །མི་བསྟེན་པ་ཞེས་བྱ་བ་ནི་དབང་པོ་མེད་པ་སྟེ། དེ་དག་གི་སྨྱན་བྱེད་པ་ཡང་སྦོམ་པོའོ། །འདིར་གཞུང་ནི་ཟ་མ་དང་མ་ནིང་ཕོ་དང་མ་ནིང་མོ་དག་གི་སྨྱན་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །ཉོས་པ་ཞེས་བྱ་བ་ནི་རིན་གྱིས་ཐོབ་པ་སྟེ། དེ་དག་གི་སྨྱན་བྱེད་པ་ཡང་སྦོམ་པོའོ། །འདིར་གཞུང་ནི་བུད་མེད་ཉོས་པ་ལ་སྨྱན་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ཏེ། མཐུན་པ་ཞེས་བྱ་བ་ནི་གཅུགས་པར་གྱུར་པ་སྟེ། དེ་དག་གི་སྨྱན་བྱེད་ན་ཡང་སྦོམ་པོའོ། །འདིར་གཞུང་ནི་དགེ་སློང་གིས་ལན་གྲངས་མང་པོ་ལས་ལྷག་པར་སྤྲིང་བ་མནོས་ཏེ། ཕྲིན་ཕར་སྐྱེལ་ཚུར་སྐྱེལ་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ནོ། །བདག་གི་སྨྱན་བྱེད་པ་ཞེས་བྱ་བ་ནི། བདག་ཉིད་ཀྱི་ཕྱིར་བདག་ཉིད་སྨྱན་བྱེད་པ་སྟེ། དེ་ཡང་སྦོམ་པོའོ། །འདིར་གཞུང་ནི་བདག་ཉིད་ཀྱི་སྨྱན་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་རོ་ཞེས་གསུངས་པ་ཡིན་ཏེ། འདི་ལ་ནི་པར་བསྐྱལ་བ་འབའ་ཞིག་ཡོད་ཀྱི་མནོད་པ་དང་ཚུར་བསྐྱལ་བ་ནི་མེད་དོ། །སྐད་སྦྱར་བ་ཉིད་སྟོན་ནའོ་ཞེས་བྱ་བ་ལ། སྐད་སྤྱར་བ་ཉིད་ཅེས་བྱ་བ་ནི་ཁས་བླངས་པ་
མཐུན་པར་གྱུར་པ་སྟེ། དེ་དང་སྤྲང་པར་བྱ་བའི་ཕྱིར་ལྟུང་བ་འབྱིན་པ་པོས་དེ་ག་གེ་མོ་ཞིག་ན་འདུག་གོ་ཞེས་སྟོན་པར་བྱེད་མཚོན་པར་བྱེད་ན་དེ་ལ་སྦོམ་པོར་འགྱུར་རོ། །འདིར་གཞུང་ནི་སྐྱེས་པས་བུད་མེད་དང་ལྷན་ཅིག་བརྡ་བགྱིས་ནས་དེ་དགེ་སློང་ལ་འདི་སྐད་ཅེས་འཕགས་པ་བུད་མེད་ཅིག་མཐོང་ངམ་ཞེས་མཆི་བ་ལ། དེས་འདི་སྐད་ཅེས་རྩིག་པ་འདིའི་དྲུང་ན་འདུག་གོ་ཞེས་བགྱིད་ན་ལྟུང་བ་ཅིར་འགྱུར། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འཐབ་ཀྲོལ་གྱིས་འཕྲོག་ཏུ་འཇུད་ནའོ་ཞེས་བྱ་བ་ནི། ཁྱོད་ཀྱིས་དེར་འཐབ་ཀྲོལ་གྱིས་ཁྲག་ཁྲུག་ཉིད་གྱིས་ཤིག་དང༌། ཁོ་བོས་དེ་དབྲོག་པར་བྱའོ་ཞེས་དེ་སྐད་ཟེར་བའི་སྤྲིང་བ་དགེ་སློང་གིས་མནོས་ཏེ་འཐབ་ཀྲོལ་གྱིས་འཕྲོག་ཏུ་འཇུད་ན་ཉེས་པ་སྦོམ་པོར་འགྱུར་བའོ། །འདིར་གཞུང་ནི་འཐབ་ཀྲོལ་གྱིས་འཕྲོག་ཏུ་སྩལ་ན་ལྟུང་བ་ཅིར་འགྱུར། ཉེས་པ་སྦོམ་པོའོ་ཞེས་གསུངས་པ་ཡིན་ནོ། །ཆུང་མའམ་བུད་མེད་ཆེ་གེ་མོ་ཞིག་ཉོས་ཤིག་ཅེས་ཟེར་ནའོ་ཞེས་བྱ་བ་ནི། གཞུང་ཁ་ཅིག་ལས་ཆུང་མ་འདི་ཉོས་ཤིག་ཅེས་མཆི་ན་ལྟུང་བ་ཅིར་འགྱུར་ཉེས་པ་སྦོམ་པོར་རོ་ཞེས་གསུངས་པ་དང༌། གཞུང་ཁ་ཅིག་ལས་བུད་མེད་ཆེ་གེ་མོ་ཞིག་ཉོས་ཤིག་ཅེས་མཆི་ན་ལྟུང་བ་ཅིར་འགྱུར་ཉེས་པ་སྦོམ་པོའོ་ཞེས་གསུངས་པ་དེ་བསྡུས་པ་ཡིན་ནོ། །བུད་མེད་ཅེས་ཟེར་ན་ཉེས་བྱས་སོ་ཞེས་བྱ་བ་ནི། ཉོས་ཤིག་ཅེས་བྱ་བར་སྦྱར་ཏེ། འདིར་གཞུང་ནི་བཙུན་པ་དགེ་སློང་གིས་འདི་སྐད་ཅེས་བུད་མེད་ཉོས་ཤིག་ཅེས་བགྱིས་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །འདིར་ནི་སྤྱིར་བུད་མེད་ཅེས་བྱ་བ་ཙམ་སྨྲས་པ་ལ་ཉེས་བྱས་སོ། །མདོ་སྔ་མ་འདི་ཞེས་བྱེ་བྲག་ཏུ་བྱ་བ་ལ་བརྟེན་ནས་སྨྲས་པས་དེར་ནི་སྦོམ་པོར་རྣམ་པར་གཞག་གོ །རྙེད་མོད་ཅེས་བྱ་བ་ཡང་ངོ་ཞེས་བྱ་བའི་སྒྲ་ནི་སྨྲས་ན་ཉེས་བྱས་སོ་ཞེས་བྱ་བའི་རྗེས་བསྙགས་པའི་ཕྱིར་རོ། །འདིར་གཞུང་ནི་བཙུན་པ་རེ་ཞིག་སྐྱེས་པས་བུད་མེད་དང་ལྷན་ཅིག་བརྡ་བགྱིས་པ་ན་དགེ་སློང་ད་རེ་མཆིས་ནས་འདི་སྐད་ཅེས་རྙེད་མོད་ཅེས་མཆི་ན་ལྟུང་བ་ཅིར་འགྱུར། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །འདི་ལྟར་གཙུག་ལག་ལས་ཉེས་པ་སྦོམ་པོར་རོ་ཞེས་ཚིག་ཁ་ཅིག་ལས་འབྱུང་མོད་ཀྱི། དེ་ནི་ལུང་གི་ཡི་གེར་ནོར་བ་འདྲ་སྟེ། ཉེས་བྱས་སུ་རིགས་པར་སྣང་ནས། སློབ་དཔོན་
གྱིས་ཉེས་བྱས་སོ་ཞེས་མདོར་བྱས་སོ། །སྨྱན་བྱེད་པ་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ།། །།འདུལ་བྱེད་ལས་གསུངས་པ་བསྡུ་བའི་ཕྱིར། བྱིན་པ་ལས་དོར་བྱས་པ་སྤྲད་པས་ནི་སྦོམ་པོའོ་ཞེས་བྱ་བ་སྨྲས་ཏེ། སྔར་བྱིན་ཟིན་པ་ཉིད་ལ་ཕྱིས་དོར་བྱེད་དེ། བུ་མོ་འདི་ངས་མ་བྱིན་ནོ་ཞེས་འདའ་པར་བྱེད་པ་དེ་སྤྲད་ཅིང་ཡང་སྦྱིན་དུ་བཅུག་ནས་ཕྲད་ན་སྦོམ་པོའོ། །འདིར་གཞུང་ནི་འཕགས་པ་ཁྱོད་བུ་མོ་ཆེ་གེ་མོ་ལ་འདི་སྐད་ཅེས་ཁྱོད་ཕ་མ་དག་གིས་མ་བཙས་པ་ཉིད་ནས་ཁོ་བོ་ལ་བྱིན་ན། ཁོ་བོ་ལས་ཀྱི་ཚོགས་པས་ལོངས་སྤྱོད་དག་ལས་ཡོངས་སུ་ཉམས་པ་གང་ཡིན་པ་དེ་ཁོ་བོ་ལ་ཡང་ལོངས་སྤྱོད་འབྱུང་པར་འགྱུར་ན་ཁོ་བོ་མ་བཏང་ཞིག་ཅེས་སྨྲ་ནུས་སམ། དེས་ནུས་སོ་ཞེས་སྨྲས་ནས་དེས་སོང་སྟེ། སྨྲས་པ་དང༌། དེ་ཕ་མའི་ཐད་ནས་བྲོས་ཏེ་དེའི་དྲུང་དུ་སོང་ནས་དེ་གཉིས་ཕྲད་པར་གྱུར་པ་ན་དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ལྟུང་བར་མི་འགྱུར་ཏེ། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཆོས་ཀྱི་ཕུང་པོ་སྔོན་དུ་བཏང་སྟེ་བོས་པས་སོ་ཞེས་བྱ་བ་ནི། དགེ་འདུན་མཆོད་སྟོན་གསོལ་པ་ལ་སོགས་པ་ཆོས་ཀྱི་ཕུང་པོ་བསོད་ནམས་ཀྱི་རྒྱུ་མཚན་གྱི་ཕྱིར། བུད་མེད་ཀྱིས་སྐྱེས་པ་ལ་མངག་པའི་ཚིག་གིས་གཞན་བོས་ནས་དེས་དེ་ཕྲད་ན་སྦོམ་པོའོ། །འདིར་གཞུང་ནི་འཕགས་པ་ཁྱིམ་བདག་ཆེ་གེ་མོ་ལ་འདི་སྐད་ཅེས་ཚུར་ཤོག་ཤིག་ཅེས་སྨྲ་ནུས་སམ། དེས་སྨྲས་པ། གལ་ཏེ་ཁྱོད་དགེ་འདུན་ལ་མཆོད་སྟོན་བྱེད་པ་ལྟ་ན་ནུས་ཏེ་དེར་དེ་བོད་དོ། །དེས་དེ་ལ་རྒྱུ་བྱིན་པ་དང། དགེ་སློང་དེས་མཆོད་སྟོན་བཤམས་ནས་ཁྱིམ་བདག་དེ་ལ་འབོད་པ་བཏང་བ་དང༌། དེ་གཉིས་ཕྲད་པར་གྱུར་ནས་དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དོན་གཞན་དང་ལྡན་པས་ཀྱང་ངོ་ཞེས་བྱ་བ་ལ་ཀྱང་ངོ་ཞེས་བྱ་བའི་སྒྲས་ནི་བོས་ན་ཞེས་བྱ་བའི་རྗེས་བསྙགས་པའི་ཕྱིར་ཏེ། ཆོས་ཀྱི་ཕུང་པོ་ལས་གཞན་པའི་དོན་ནི་དོན་གཞན་ནོ། །དོན་དང་ལྡན་པ་ནི་དོན་གཞན་དང་ལྡན་པ་སྟེ། འདི་ནི་ཁྱོད་ཀྱི་ཁྱིམ་མོ། །འདི་ནི་ཁྱོད་ཀྱི་མི་སྟེ། དོན་ཐམས་ཅད་ལ་བསྐྱང་བར་བྱ་དགོས་སོ་ཞེས་བྱ་བ་ལ་སོགས་
པ་རྒྱུར་བྱས་ནས་བོས་ཏེ་ཕྲད་ན་སྦོམ་པོའོ། །འདིར་གཞུང་ནི་འཕགས་པ་སྣ་ཆེན་པོ་ལ་གཏོགས་པ་ཆེ་གེ་མོ་ལ་འདི་སྐད་ཅེས་འདི་ནི་ཁྱོད་ཀྱི་ཁྱིམ་མོ། །འདི་ནི་ཁྱོད་ཀྱི་མི་སྟེ། དོན་ཐམས་ཅད་ལ་བསྐྱང་བར་བྱ་དགོས་ཀྱིས་ཚུར་ཤོག་ཤིག་ཅེས་སྨྲ་ནུས་སམ། དེས་ནུས་སོ་ཞེས་སྨྲས་ནས་སོང་སྟེ་སྨྲས་པ་དང༌། དེ་གཉིས་ཕྲད་པར་གྱུར་ནས་དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །གཞན་ཞེས་བྱ་བས་སྐྱོན་ཆགས་པ་མེད་པར་སེམས་ཅན་ལ་བསྣུན་པ་ཡང་མ་འཕངས་པ་ཉིད་མ་ཡིན་ནོ་ཞེས་བྱ་བ་ནི། གཞུང་ལས་ཀ་བ་ལ་བསྣུན་པས་བསྣུན་པར་མི་བྱའོ། །གཞན་ལ་ཡང་མི་བྱའོ་ཞེས་གསུངས་པའི་སྐབས་དེར་གཞན་ལ་ཞེས་བྱ་བའི་ཚིག་བྱས་པ་གང་ཡིན་པའི་གཞན་ཞེས་བྱ་བའི་ཚིག་དེས་སྐྱོན་ཆགས་པ་མེད་པར་ཞེས་བྱ་བ་ཞེ་སྡང་བར་གྱུར་པ་མེད་པར་སེམས་ཅན་མི་ལ་སོགས་པ་ལ་ཁུ་ཚུར་ལ་སོགས་པས་བསྣུན་པ་ཡང་མ་འཕངས་པ་ཉིད་མ་ཡིན་ཏེ། འཕངས་པ་ཁོ་ནའོ། །འདི་སྐད་བསྟན་ཏེ། ཇི་ལྟར་ཤིང་ལ་སོགས་པ་ལ་བསྣུན་པས་བསྣུན་པ་ལས་ཉེས་བྱས་སུ་འགྱུར་བ་བཞིན་དུ་སྐྱོན་ཆགས་པ་མེད་པའི་སེམས་ཀྱིས་སེམས་ཅན་ལ་བསྣུན་པས་སྣུན་པར་བྱེད་པ་ལས་ཀྱང་ཉེས་བྱས་སུ་འགྱུར་ཏེ། དེ་ཡང་གཞན་ལ་ཡང་མི་བྱའོ་ཞེས་བྱ་བའི་ཚིག་ངེས་འཕངས་བ་ཉིད་དུ་ཤེས་པར་བྱའོ། །འདིར་གཞུང་ནི་ཁྱིམ་བདག་གིས་བུད་མེད་ལ་སྨྲས་པ། ཁོ་བོ་ལ་སྐབས་ཕྱེ་ཤིག །དེས་སྨྲས་པ། ཁོ་མོ་མི་ཁོམ་མོ། །སྨྲས་པ་ཁྱོད་དུས་གང་གི་ཚེ་ཁོམ་པར་འགྱུར་བ་ཁོ་བོས་ཇི་ལྟར་ཤེས་པར་བྱ། སྨྲས་པ་ཁོ་མོའི་ཁྱིམ་ན་དགེ་སློང་ཁྱིམ་དུ་ཉེ་བར་འགྲོ་བ་ཡོད་དེ། དེས་ཁྱོད་ཀྱི་རྒྱབ་ཏུ་ཁུ་ཚུར་སྣུན་བར་བྱེད་པ་ནའོ། །དེ་ནས་དགེ་སློང་ཁྱིམ་དེར་ཞུགས་པ་ན་དེ་ལ་བུད་མེད་དེས་སྨྲས་པ། འཕགས་པ་ཁྱིམ་བདག་ཆེ་གེ་མོའི་རྒྱབ་ཏུ་ཁུ་ཚུར་བསྣུན་ནུས་སམ། དེས་ནུས་སོ་ཞེས་སྨྲས་ཏེ། དེ་སོང་ནས་ཁྱིམ་བདག་དེའི་རྒྱབ་ཏུ་ཁུ་ཚུར་བསྣུན་པ་དང༌། དེས་སྨྲས་པ་བཙུན་པ་ལེགས་སོ་ལེགས་སོ་དོན་གྲུབ་པོ། །དེས་སྨྲས་པ། འདི་ཅི་ཞིག་ཡིན། སྨྲས་པ། བརྡའོ། །དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་འདུན་ལྷག་མའི་ལྟུང་བར་མི་འགྱུར་ཏེ། ཉེས་བྱས་སུ་འགྱུར་རོ་ཞེས་གསུངས་པ་
ཡིན་ནོ། །སྨྱན་བྱེད་པ་འདུལ་བྱེད་དག་གོ་ཞེས་བྱ་བ་དེ་འདུལ་བྱེད་ཀྱི་སྐབས་ནས་འབྱུང་བ་རྫོགས་སོ། །སྨྱན་བྱེད་པའི་དགེ་འདུན་ལྷག་མའོ་ཞེས་བྱ་བ་དེ་བཤད་ཟིན་ཏོ།། །།ཁང་པའི་དགེ་འདུན་ལྷག་མ་བརྗོད་པར་འདོད་ནས། སྤྱོད་ལམ་བཞིའི་སྣོད་མ་ཡིན་པ་ཉིད་ལ་ནི་ཉེས་པ་མེད་དོ་ཞེས་བྱ་བ་སྨྲས་ཏེ། སྤྱོད་ལམ་བཞི་པོ་འགྲེང་བ་དང༌། འདུག་པ་དང༌། ཉལ་བ་དང༌། འཆག་པ་ཞེས་བྱ་བའི་སྣོད་མ་ཡིན་པ་ཞེས་བྱ་བ་བཞིར་མི་རུང་བའི་གནས་ཏེ། གནས་དེ་ལྟ་བུ་བྱེད་དུ་བཅུག་པ་ལ་ནི་ཉེས་པ་མེད་དེ་ཉེས་པའི་གཞི་མེད་དོ། །ཉེས་པ་ཡོད་པ་མ་ཡིན་པ་ནི་ཉེས་པ་མེད་པ་སྟེ། འདི་སྐད་བསྟན་ཏེ། གནས་གང་དུ་སྤྱོད་ལམ་རྣམ་བཞི་བྱར་མི་ནུས་པ་བྱེད་དུ་བཅུག་པ་ལ་ནི་ལྟུང་བ་ཅིར་ཡང་མི་འགྱུར་ཏེ། གནས་གང་དུ་ལུས་མ་བཏུད་པར་འགྲེང་བར་མི་ནུས་པའི་གནས་དེ་ནི་འགྲེང་བའི་སྣོད་མ་ཡིན་ནོ། །དེ་བཞིན་དུ་གང་དུ་རྒྱར་སྐྱིལ་མོ་ཀྲུང་བཅས་ཏེ་འདུག་པར་མི་ནུས་པ་དེ་ནི་འདུག་པའི་སྣོད་མ་ཡིན་ནོ། །གང་དུ་ཉལ་བས་མིའི་རྐང་པ་བརྐྱང་བ་ལ་སོགས་པ་བྱར་མི་ནུས་པ་དེ་ནི་ཉལ་བའི་སྣོད་མ་ཡིན་ནོ། །གནས་གང་དུ་གོམ་པ་ཐ་མལ་པ་གསུམ་དོར་བའི་སྐབས་མེད་པ་དེ་ནི་འཆག་པའི་སྣོད་མ་ཡིན་པ་ཉིད་དེ། ཕར་འགྲོ་བ་དང་ཚུར་འགྲོ་བ་ནི་འཆག་པ་ཞེས་བྱའོ། །འདིར་ཁང་པ་དང་གཙུག་ལག་ཁང་གི་དགེ་འདུན་ལྷག་མ་གཉིས་ཀྱི་ཡན་ལག་ནི་འདི་དག་ཡིན་ཏེ། གལ་ཏེ་ས་གཞིའི་བདག་ཉིད་ཀྱི་དང༌། ཤིང་དང་རིན་ལ་སོགས་པ་ཡོ་བྱད་གཞན་ངག་ལས་བཙལ་བ་དང༌། ཡན་ལག་བཞི་པོ་རུང་བ་ཉིད་དང༌། རྩོད་པ་མེད་པ་ཉིད་དང༌། བརྩམ་དུ་མི་རུང་བ་ཉིད་དང༌། བསྟན་པ་ཉིད་སྒྲུབ་པར་མི་བྱེད་པ་དང༌། ཚད་ལས་ལྷག་པར་བྱེད་ན་མཐར་ནི་དགེ་འདུན་ལྷག་མར་འགྱུར་རོ། །སྔར་ནི་སྒོམ་པོར་འགྱུར་རོ། །ཡན་ལག་དེ་དག་མ་ཚད་བ་ཉིད་ལ་ནི་མཐར་ནི་སྦོམ་པོར་འགྱུར་ལ། སྔར་ནི་ཉེས་བྱས་སུ་འགྱུར་ཏེ། འདི་ལྟ་སྟེ་དཔེར་ན། ས་གཞི་ལ་སོགས་པ་ཐམས་ཅད་གཞན་ནས་བཙལ་བ་ཡིན་ལ། ཚད་ལས་ཀྱང་ལྷག་པར་བྱེད་ཅིང་རུང་བ་ཉིད་ལ་སོགས་པའི་ཡན་ལག་ལས་ཁ་ཅིག་ནི་སྒྲུབ་པར་བྱེད། ཁ་ཅིག་ནི་སྒྲུབ་པར་མི་བྱེད་ན། མཐར་ནི་སྦོམ་པོར་འགྱུར་ལ་སྔར་ནི་ཉེས་བྱས་སོ། །དེ་བཞིན་དུས་གཞི་ལ་སོགས་པ་བཙལ་བ་
ཡིན་ལ། ཚད་ལས་ལྷག་པར་མི་བྱེད་ན་རུང་བ་ཉིད་ལ་སོགས་པའི་ཡན་ལག་བཞི་པོ་དག་སྒྲུབ་པར་བྱེད་ཀྱང་རུང་སྒྲུབ་པར་མི་བྱེད་ཀྱང་རུང་སྟེ། མཐར་ནི་སྦོམ་པོར་འགྱུར་ལ་སྔར་ནི་ཉེས་བྱས་སོ། །ཚད་ལས་ལྷག་པར་བྱེད་ཅིང་ཡན་ལག་བཞི་བོ་ཐམས་ཅད་སྒྲུབ་པར་མི་བྱེད་ཀྱང་ས་གཞི་ལ་སོགས་པ་ཚོལ་བར་མི་བྱེད་ན་ཡང་མཐར་ནི་སྦོམ་པོར་འགྱུར་བ་ལ་སྔར་ནི་ཉེས་བྱས་སོ། །ས་གཞི་ལ་སོགས་པ་ཚོལ་བར་མི་བྱེད་ཅིང༌། ཚད་ལས་ལྷག་པར་ཡང་མི་བྱེད་ལ། ཡན་ལག་བཞི་པོ་ཐམས་ཅད་ནི་སྒྲུབ་པར་མི་བྱེད་པ་འདི་ལ་ནི་འགྲེལ་པ་བྱེད་པ་ནི་མཐར་ཡང་ཉེས་བྱས་སུ་འགྱུར་ལ་སྔར་ཡང་ཉེས་བྱས་སོ་ཞེས་ཟེར་རོ། །གཞན་དག་ནི་མཐར་སྦོམ་པོ་ཁོ་ནར་སྨྲའོ། །དེ་བཞིན་དུ་ས་གཞི་ལ་སོགས་པ་ཚོལ་བར་མི་བྱེད་ལ། ཚད་ལས་ལྷག་པར་ཡང་མི་བྱེད་ཅིང༌། རུང་བ་ཉིད་ལ་སོགས་པའི་ཡན་ལག་ཅུང་ཞིག་སྒྲུབ་པར་མི་བྱེད་བ་ལ་ཡང་འགྲེལ་བ་བྱེད་པའི་བློས་ནི་མཐར་ཡང་ཉེས་བྱས་སུ་འགྱུར་ལ། སྔར་ཡང་ཉེས་བྱས་སུ་འདོད་དོ། །གཞན་དག་ནི་འདིར་ཡང་མཐར་སྦོམ་པོར་འགྱུར་རོ། །འདིར་གཞུད་ནི་དགེ་སློང་གིས་ཁང་བ་བྱེད་དུ་འཇུད་ཅིང་མི་རུང་བར་བྱེད་དུ་འཇུག་ན་ཉེས་པ་སྦོམ་པོར་འགྱུར་རོ། །རྩོད་པ་དང་བཅས་པ་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །བརྩམ་དུ་མི་རུང་བ་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །མ་བསྟན་པར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །ཚད་ལས་འདས་པར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ། །ཐམས་ཅད་ལས་འདས་པར་བྱེད་དུ་འཇུད་ན་དགེ་འདུན་ལྷག་མར་འགྱུར་རོ་ཞེས་གསུངས་པ་ཡིན་ནོ། །རྣམ་པར་འབྱེད་པའི་གཞུད་འདིར་ཐམས་ཅད་དུ་བརྩལ་བ་ཉིད་ཅེས་བྱ་བའི་ཡན་ལག་ལྷག་པར་ཡོད་དེ། དེས་ན་སྦོམ་པོར་གསུངས་སོ། །གང་ལ་བཙལ་བ་ཉིད་ཅེས་བྱ་བའི་ཡན་ལག་མེད་ལ། ཚད་ལས་ལྷག་པ་ཉིད་ཀྱང་མ་ཡིན་ལ། མི་རུང་བ་ཉིད་ལ་སོགས་པའི་ཡན་ལག་ཉི་ཚེ་ཡོད་པ་དེ་ལ་ནི་ཉེས་བྱས་སོ།། །།བམ་པོ་བཅོ་ལྔ་པ། བསྐོས་པ་ཉིད་དང་མ་བསྐོས་པ་ཉིད་དག་ནི་གཙོ་བོ་ཉིད་མ་ཡིན་ནོ་ཞེས་བྱ་བ་ལ། བསྐོས་པ་ཉིད་ཅེས་བྱ་བ་ནི་གཞན་གྱིས་བྱེད་དུ་འཇུད་པ་ཉིད་དོ། །མ་བསྐོས་པ་ཉིད་ཅེས་བྱ་བ་ནི་རང་གིས་བྱེད་པ་ཉིད་དོ། །དེ་གཉིས་ནི་གཙོ་བོ་ཉིད་མ་ཡིན་ཏེ། ལྟུང་བ་
ལས་གཙོ་ཆེར་གཞག་པ་ཉིད་མ་ཡིན་ནོ། །འདི་སྐད་བསྟན་ཏེ། དགེ་སློང་བསྐོས་པའི་དབང་གིས་ཁང་བའམ་གཙུག་ལག་ཁང་བྱེད་དུ་འཇུད་པ་ལ་ཡང་རང་དགར་བྱེད་དུ་འཇུད་པའི་ལྟུང་བའི་རྣམ་པ་གང་ཡིན་པའི་རྣམ་པ་ཉིད་དུ་འགྱུར་རོ། །བསྐོས་པ་ན་རང་ཉིད་དང་འདྲའོ་ཞེས་བྱ་བ་ནི་བསྐོས་པས་བྱས་པ་ནི་སྐོ་བར་བྱེད་པ་རང་ཉིད་ཀྱིས་བྱས་པ་དང་འདྲའོ། །འདི་སྐད་བསྟན་ཏེ། ཇི་ལྟར་བདག་ཉིད་ཀྱིས་ཁང་པ་དང་གཙུག་ལག་ཁང་དག་ལོག་པ་ཉིད་དུ་སྒྲུབ་པར་བྱེད་པ་ལ་ཁ་ན་མ་ཐོ་བར་འགྱུར་པ་དེ་བཞིན་དུ་བསྐོས་པས་ལོག་པ་ཉིད་དུ་སྒྲུབ་པར་བྱེད་ན་ཡང་སྐོ་བར་བྱེད་པ་ཉིད་ལ་ཁ་ན་མ་ཐོ་བར་འགྱུར་རོ། །མདོ་སྔ་མས་ནི་བསྐོས་པའི་ལྟུང་བ་རྣམ་པར་གཞག་པ་བྱས་སོ། །འདིས་ནི་སྐོ་བར་བྱེད་པའི་ལྟུང་བ་རྣམ་པར་གཞག་པ་བྱས་སོ། །དེའི་ཕྱིར་བསྐོས་པས་གད་བྱེད་པ་དེ་ནི་སྐོ་བར་བྱེད་པ་ཉིད་ཀྱིས་བྱས་པར་འགྱུར་རོ། །བསྐོས་པས་ནི་རང་ཉིད་དང་འདྲའོ་ཞེས་སྨྲས་ན། གལ་ཏེ་སྐོ་བར་བྱེད་པས་ཇི་སྐད་བསྒོ་བ་བཞིན་དུ་བསྐོས་པས་དེ་བཞིན་དུ་མི་བྱེད་ན་ཅི་བསྐོས་པ་དེ་སྒོ་བར་བྱེད་པ་རང་ཉིད་དང་འདྲའམ་སྙམ་དུ་དོགས་པའི་ཕྱིར། ཇི་སྐད་བསྒོ་བ་བཞིན་དུ་མི་བྱེད་པ་ལ་ལུས་དང་ངག་གིས་ནོད་ནའོ་ཞེས་བྱ་བ་སྨྲས་ཏེ། སྒོ་བར་བྱེད་པའི་ཚིག་ལས་འདས་ཏེ། གཞན་དུ་བྱེད་པ་ནི་ཇི་སྐད་བསྒོ་བ་བཞིན་མི་བྱེད་པའོ། །ཇི་སྐད་བསྒོ་བ་བཞིན་མི་བྱེད་པ་བསྐོས་པ་རང་གིས་བྱས་པའམ། གཞན་གྱིས་བྱེད་དུ་བཅུག་པ་དེ་ལ། གལ་ཏེ་སྐོ་བར་བྱེད་པས་ལུས་ཀྱིས་སོ་ཕག་སྦྱིན་པ་ལ་སོགས་པ་དང༌། ངག་གིས་ལེགས་པར་བྱས་སོ་ཞེས་བྱ་བ་ལ་སོགས་པས་ཇི་སྐད་བསྒོ་བ་བཞིན་མི་བྱེད་པ་དེ་ནོད་པ་དང་དུ་ལེན་པར་བྱེད་ཁས་ལེན་པར་བྱེད་ན་དེའི་ཚེ་བསྐོས་པས་བྱེད་པ་དེ་སྒོ་བར་བྱེད་པ་རང་ཉིད་ཀྱིས་བྱེད་པ་དང་འདྲ་བར་རིག་པར་བྱའོ། །འདིར་གཞུང་ན་གལ་ཏེ་དེ་ལ་འདི་སྐད་ཅེས་ལེགས་པར་བྱས་སོ། །ཤིན་ཏུ་བྱས་སོ། །ངས་ཁྱོད་ལ་འདི་ལྟར་བསྒོའོ་ཞེས་ཟེར་ཞིང༌། དེ་དེ་ལ་ཤིང་ངམ་ཙའམ་ས་འཇིམ་དག་འབུལ་བར་བྱེད་དེ། གང་མི་རུང་བ་བྱེད་དུ་འཇུད་ན་གཉི་ག་ལ་ཡང་གཞི་ཇི་ལྟ་བ་བཞིན་དུ་ལྟུང་བར་འགྱུར་རོ་ཞེས་གསུངས་པ་ཡིན་ནོ། །བྱས་པ་ནི་གཅིག་ཉིད་དོ་ཞེས་བྱ་བ་ལ། བྱས་པ་ནི་ཞེས་བྱ་བ་ནི། གནས་རྗེས་སུ་བསྒྲུབ་པའི་ཕྱིར་ལས་ཀྱི་བྱ་བ་བྱས་པའོ། །དེ་ནི་དུས་ཡུན་རིང་ཐུང་དུ་མས་བར་དུ་ཆོད་དུ་ཟིན་ཀྱང་ལྟུང་བ་རྣམ་
པར་གཞག་པ་ལ། གཅིག་པ་ཉིད་དོ། །འདི་སྐད་བསྟན་ཏེ། དུས་ཀྱིས་བར་དུ་ཆོད་པ་ལོ་ལ་སོགས་པའི་ཚད་དག་གིས་གནས་ཤིང་ཡང་རྩོམ་པར་བྱེད་དུ་ཟིན་ན་ཡང་དེ་ལྟ་མོད་ཀྱི་རྩོམ་པ་དེ་དག་ཐམས་ཅད་ནི་གཅིག་པ་ཉིད་དེ། ལྟུང་བ་གཅིག་བྱེད་པ་ཡིན་ནོ་ཞེས་བྱ་བའི་ཐ་ཚིག་གོ །མི་ལྟོས་པས་བཏང་བ་ནི་གཞན་ཡིན་ཏེ། མི་ལྟོས་པས་བར་དུ་ཡེ་བཏང་བ་ལས་ཕྱིས་ཡང་བསམ་པ་གཞན་གྱིས་རྩོམ་པ་ལ་ནི་ལྟུང་བ་ཐ་དད་དོ། །འཕྲོ་ཟིན་པར་བྱེད་ན་ཉེས་བ་སྦོམ་པོར་འགྱུར་རོ་མ་ཟིན་པར་རང་བཞིན་གཞན་གྱིས་རྗེས་སུ་སྒྲུབ་པ་ལ་ནི་ཉེས་བྱས་སོ་ཞེས་གསུངས་པའི་ཕྱིར་རོ། །རྗེས་སུ་སྒྲུབ་པ་གཅིག་ཁོ་ན་ཡིན་དུ་ཟིན་ཀྱང༌། དཔེར་ན་འཐབ་པའི་མོད་ལ་དང༌། འཐབ་པའི་འོག་ཏུ་སྡུམས་བྱེད་པ་ལ་སོགས་པའི་ཚིགས་དག་ལ་ལྟུང་བ་ཐ་དད་པར་བྱས་པ་བཞིན་དུ། ཅི་འདིར་ཡང་རུང་བ་ཉིད་མ་ཡིན་པ་ལ་སོགས་པའི་ཡན་ལག་དག་ལ་ལྟུང་བ་ཐ་དད་པར་བྱའམ་སྙམ་དུ་དོགས་པ་བསལ་བའི་ཕྱིར། ཡན་ལག་རྣམས་ནི་བྱེད་པ་པོ་ཐ་དད་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། རུང་པ་ཉིད་མ་ཡིན་པ་ལ་སོགས་པ་ཡན་ལག་རྣམས་ནི་ལྟུང་བའི་ཕྱིར་བྱེད་པ་པོ་ཐ་དད་པ་ཉིད་མ་ཡིན་ནོ། །འདི་སྐད་བསྟན་ཏེ། རུང་བ་ཉིད་མ་ཡིན་པ་ལ་སོགས་པ་ཡན་ལག་ཇི་སྙེད་ཡོད་པ་དེ་སྙེད་ཀྱི་ལྟུང་བ་དག་འདིར་འབྱུང་བ་མ་ཡིན་ཏེ། འོ་ན་ཇི་ལྟ་ཞེ་ན། ལྟུང་བ་གཅིག་ཁོ་ནར་ཟད་དེ། ཡན་ལག་རྣམས་ནི་ལྟུང་བའི་བྱེད་པ་པོ་ཐ་དད་པ་ཉིད་མ་ཡིན་པའི་ཕྱིར་རོ། །གང་ལ་ཁང་པའི་དགེ་འདུན་ལྷག་མར་འགྱུར་ཞེ་ན་དེའི་ཕྱིར། བཙལ་བ་ལའོ། །དེས་རྗེས་སུ་གནང་བ་ལའོ། །རྣམ་པ་དེ་ལྟ་བུས་སོ། །གཞི་མ་དག་པ་ལའོ། །མ་བསྟན་པ་ལའོ། །གནས་བྱེད་དུ་བཅུག་ནའོ། །མཐར་རོ་ཞེས་བྱ་བ་དག་སྨས་ཏེ། བཙལ་བ་ལའོ་ཞེས་བྱ་བ་ནི་གཞི་སྟེ། གཞི་ཞེས་བྱ་བའི་སྒྲས་ནི་ས་གཞི་བརྗོད་དེ། གལ་ཏེ་གཞི་དེ་ཆོས་འདི་ལ་རབ་ཏུ་བྱུང་བ་ལས་ཀྱང་བཙལ་ནའོ། །སུས་བཙལ་ཞེ་ན། དེ་ནི་འདིར་སྐབས་ཡིན་པས་ལྟུང་བ་འབྱིན་པ་པོས་ཞེས་བྱ་བར་ཤེས་པར་བྱའོ། །དེས་རྗེས་སུ་གནང་བ་ལའོ་ཞེས་བྱ་བ་ནི། དགེ་སློང་གང་གིས་ས་གཞི་བཙལ་བར་གྱུར་པ་དེས་གལ་ཏེ་རྗེས་སུ་གནང་པའི་གཞི་ལའོ། །རྣམ་པ་དེ་ལྟ་བུས་སོ་ཞེས་བྱ་བ་ནི་སྒྲུབ་པར་བྱེད་པ་སྟེ། གནས་རྗེས་སུ་བསྒྲུབ་པར་བྱ་བའི་ཡོ་བྱད་ཤིང་དང་སོ་
ཕག་དང་མི་གླས་དང༌། གླ་རྔན་ལ་སོགས་པས་སོ། །ཇི་ལྟར་ན་སྒྲུབ་པར་བྱེད་པ་དེ་རྣམ་པ་དེ་ལྟ་བུ་ཞེས་བྱ་བའི་སྒྲར་བརྗོད་ཅེ་ན་གང་གི་ཕྱིར་ཇི་ལྟར་ལྟུང་བ་འབྱིན་པ་པོའམ། ལྟུང་བ་འབྱིན་པ་པོས་རྗེས་སུ་གནང་བ་ས། གཞིའི་རྣམ་པ་གང་ཞིག་བཙལ་བའི་རྣམ་པ་དེས་གཞི་མ་དག་པ་དང༌། མ་བསྟན་པར་གནས་བྱད་དུ་བཅུག་པ་དེ་ལྟར་གལ་ཏེ་སྒྲུབ་པར་བྱེ་པ་ཤིང་དང་སོ་ཕག་དང་མི་གླས་དང༌། གླ་རྔན་ལ་སོགས་པ་འདི་ཡང་ལྟུང་བ་འབྱིན་པ་པོའམ། ལྟུང་བ་འབྱིན་པ་བོས་རྗེས་སུ་གནང་བའི་སློང་བ་པོས་བཙལ་བ་ཡིན་པས་དེའི་ཕྱིར་ཇི་ལྟར་ས་གཞི་བཙལ་བ་བཞིན་དུ་སྒྲུབ་པར་བྱེད་པ་འདི་ཡང་བཙལ་བ་ཡིན་པས་དེའི་ཕྱིར་བཙལ་བར་མཚུངས་པའི་ཕྱིར་སྒྲུབ་པར་བྱེད་པ་ལ་ཡང་རྣམ་པ་དེ་ལྟ་བུ་ཞེས་བྱ་བའི་སྒྲར་བརྗོད་དེ། སྒྲུབ་པར་བྱེད་པ་རྣམ་པ་དེ་ལྟ་བུས་གནས་བྱེད་དུ་བཅུག་ན་སྟེ། བཙལ་བས་ཞེས་བྱ་བའི་ཐ་ཚིག་གོ །བཙལ་བ་ཉིད་འདི་ལ་ལུང་འདི་དག་ཀྱང་སྣང་སྟེ། ཉེ་བ་འཁོར་གྱིས་ཞུས་པ་ལས། ལ་ལས་འདི་སྐད་ཅེས་ཅི་ཙམ་གྱིས་ན་རང་གིས་བཙལ་བའི་ཁང་པ་ཞེས་བགྱི། གང་ལས་གཉིས་ཡོངས་སུ་འགྲུབ་པར་འགྱུར་བ་སྟེ། ཡོ་བྱད་དང་ས་གཞིའོ་ཞེས་གསུངས་པ་དང༌། དེ་ཉིད་ལས་གཞུང་འདི་སྐད་དུ་གང་ཟག་གི་གཞིར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ་ཞེས་གསུངས་པའོ། །སོ་སོར་ཐར་པའི་མདོ་ལས་ཀྱང་རང་གིས་བཙལ་བ་ཞེས་གསུངས་སོ། །གཞི་མ་དག་པ་ལའོ་ཞེས་བྱ་བ་ནི་མི་དུང་བ་ཉིད་དང༌། རྩོད་པ་དང་བཅས་པ་ཉིད་དང༌། བརྩམ་དུ་མི་རུང་བ་ཉིད་ནི་མ་དག་པའོ་ཞེས་འོག་ནས་འབྱུང་ངོ༌། །མ་བསྟན་པ་ལའོ་ཞེས་བྱ་བ་ནི། དགེ་འདུན་ལས་བསྟན་པ་ཐོབ་པ་ཉིད་ནི་བསྟན་པ་ཉིད་དོ་ཞེས་བསྟན་པ་ཉིད་ཀྱང་འོག་ནས་འབྱུང་སྟེ། དེ་ལས་བཟློག་པ་ནི་མ་བསྟན་པ་ཉིད་དོ། །གནས་བྱེད་དུ་བཅུག་ནའོ་ཞེས་བྱ་བ་ནི། ཁང་བ་བྱེད་དུ་བཅུག་ནའོ། །མཐང་ངོ་ཞེས་བྱ་བ་ནི། ཟིན་ན་སྟེ། གནས་ཀྱི་ངོ་བོ་ནི་ཐོག་བཀབ་ཅིང་སྒོམ་གཏོགས་པ་ཀུན་ནས་བསྐོར་བ་ཉིད་དོ། །དེ་ཟིན་པའི་སྐད་ཅིག་མ་ལ་ནི་དགེ་འདུན་ལྷག་མར་འགྱུར་རོ། །སྔར་ནི་སྦོམ་པོར་རོ། །འདི་སྐད་བསྟན་ཏེ། གལ་ཏེ་གཞི་དེ་ལྟུང་བ་འབྱིན་པ་པོས་བཙལ་བའམ། དེ་ཉིད་ཀྱིས་བཙལ་བའི་ཕྱིར་རྗེས་སུ་གནང་བ་ཡིན་ལ། སྒྲུབ་
པར་བྱེད་པ་ཡང་བཙལ་བ་དེ་ཉིད་དུ་རྗེས་སུ་གནང་བ་ཡིན་ཞིང༌། གཞི་མ་དག་པ་རུང་བ་ཉིད་མ་ཡིན་པ་ལ་སོགས་པར་སྒྲུབ་པར་བྱེད་པ། ཤིང་དང་སོ་ཕག་དང༌། མི་གླས་དང༌། གླ་རྔན་བཅལ་བས་གནས་བྱེད་དུ་བཅུག་ན་ཟིན་པའི་སྐད་ཅིག་མ་ལ་དངོས་གཞིའི་ལྟུང་བར་འགྱུར་རོ། །སྔར་ནི་སྦོམ་ཕོར་རོ། །གང་ལ་གཙུག་ལག་ཁང་གི་དགེ་འདུན་ལྷག་མར་འགྱུར་ཞེ་ན། དེའི་ཕྱིར། འོག་མ་ལ་ཡང་དེ་དག་ཉིད་དེ་མ་བཙལ་བ་ཉིད་དོ་ཞེས་བྱ་བ་སྨྲས་ཏེ། ཁང་བའི་སྐབས་སུ་སྤྱོད་ལམ་བཞིའི་སྣོད་མ་ཡིན་པ་ཉིད་ལ་ནི་ཉེས་པ་མེད་དོ་ཞེས་བྱ་བ་ལ་སོགས་པ་གང་དག་བསྟན་པ་དེ་དག་ཉིད་ཐམས་ཅད་གཙུག་ལག་ཁང་གི་བསླབ་པའི་གཞི་འོག་མ་ལ་ཡང་བལྟ་བར་བྱ་སྟེ་དེར་ནི་མ་བཙལ་བ་ཉིད་དེ་བཙལ་བ་ཉིད་མ་གཏོགས་སོ། །བཙལ་བ་ཉིད་མ་གཏོགས་ན་འདིར་ཚིག་གི་དོན་འདི་འབྱུང་སྟེ། གནས་པ་བདག་ཉིད་ཀྱིས་སམ། རྗེས་སུ་གནང་བའི་ས་གཞིར་སྒྲུབ་པར་བྱེད་པ་རང་གིའམ་རྗེས་སུ་གནང་བས་གཞི་མ་དག་པར་བསྟན་པའི་གཙུག་ལག་ཁང་བྱེད་དུ་བཅུག་ན་གཙུག་ལག་ཁང་ཟིན་པའི་མཐར་དགེ་འདུན་ལྷག་མར་འགྱུར་རོ། །སྔར་ནི་སྦོམ་པོར་རོ། །གཙུག་ལག་ལས་ནི་གླེང་གཞིའི་དབང་གིས་བདག་པོ་དང་བཅས་པ་ཞེས་བྱ་བ་སྨོས་པར་ཟད་ཀྱི། དེ་ཡན་ལག་ནི་མ་ཡིན་ཏེ། བདག་པོ་མེད་པ་ཉིད་ལ་ཡང་ས་གཞི་ཉོ་བ་ལ་སོགས་པ་སྲིད་པའི་ཕྱིར་རོ། །དགེ་འདུན་གྱིས་གཞིར་བྱེད་དུ་འཇུད་ན་ཡང་དེ་བཞིན་ནོ། །ཁང་བའི་དགེ་འདུན་ལྷག་མ་ལ་ཡན་ལག་གཞན་གཉིས་བརྗོད་པར་བྱ་སྟེ། གཅིག་གི་དོན་དུའོ་ཞེས་བྱ་བ་ནི། གང་ཟག་གཅིག་གི་དོན་དུ་འཇུད་ན་དགེ་འདུན་ལྷག་མར་འགྱུར་གྱི། གཉིས་དང་མང་པོ་དག་གི་དོན་དུ་ན་སྦོམ་པོར་འགྱུར་རོ། །འདིར་གཞུང་ནི་ཉེ་བ་འཁོར་གྱིས་ཞུས་པའི་གཞུང་ཁ་ཅིག་ལས་གཉིས་ཀྱི་སྤྱི་ལ་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ་ཞེས་འབྱུང་ངོ༌། །ཞུ་བ་ལས་གཉིས་ཞེས་སྨོས་པ་ནི་ཉེ་བར་མཚོན་པ་སྟེ། མང་པོའི་དོན་དུ་བྱེད་དུ་འཇུད་ན་ཡང་སྦོམ་པོ་ཁོ་ནའོ། །དེ་བས་ན་བདག་ཉིད་གཅིག་པུའམ་དགེ་སློང་གཞན་གཅིག་གམ་ཁྱིམ་པ་གཅིག་གི་དོན་དུ་བྱེད་དུ་བཅུག་ན་དགེ་འདུན་ལྷག་མ་སྟེ། གཅིག་གི་དོན་དུའོ་ཞེས་བྱ་བ་གཅིག་གི་སྒྲ་བྱེ་བྲག་ཏུ་མ་བྱས་པའི་ཕྱིར་རོ། །
ཅི་ནས་བྱེད་དུ་བཅུག་པ་ཐམས་ཅད་ལས་དེར་འགྱུར་རམ་ཞེ་ན་མ་ཡིན་ཏེ། དེའི་ཕྱིར། ཚད་ལས་ལྷག་པའོ་ཞེས་བྱ་བ་སྨྲས་ཏེ། ཚད་ལས་འདས་པའི་གནས་ལས་ཏེ། ཚད་གནག་བསྟན་པ་དེ་ལས་ལྷག་པ་བྱེད་དུ་འཇུད་ནའོ། །གཞི་མ་དག་པ་ལའོ་ཞེས་སྨྲས་ན་འདིར་མ་དག་པ་གང་ཡིན་ཞེ་ན། དེའི་ཕྱིར་མི་རུང་བ་ཉིད་དང༌། རྩོད་པ་དང་བཅས་པ་ཉིད་དང༌། བརྩམ་དུ་མི་རུང་བ་ཉིད་ནི་མ་དག་པའོ་ཞེས་བྱ་བ་སྨྲས་ཏེ། མི་རུང་བ་ཉིད་དང༌། རྩོད་པ་དང་བཅས་པ་ཉིད་དང༌། བརྩམ་དུ་མི་རུང་བ་ཉིད་ཅེས་བྱ་བ་དེ་གསུམ་ནི་མ་དག་པའི་སྒྲར་བརྗོད་དོ། །དེ་གསུམ་གྱི་རང་བཞིན་ཇི་ལྟ་བུ་ཞེ་ན། དེའི་ཕྱིར་སྐྱེ་བ་པོ་ཕྲ་མོའི་གནས་དང་ལྡན་པ་ཉིད་དང༌། རྒྱལ་པོ་དང༌། ལྷའི་གནས་དང༌། མུ་སྟེགས་ཅན་གྱི་འདུག་གནས་ལ་བརྟེན་པ་ཉིད་དང༌། ཤིང་ལྗོན་པ་གཅད་པར་བྱ་བ་མ་ཡིན་པ་ཉིད་དང༌། ཕྱི་རོལ་འདོམ་གང་གི་མཐའི་ཉེན་འཁོར་གྱི་ནང་རོལ་ན་ཆུ་ཀླུང་ངམ། ངམ་གྲོག་གམ། ཁྲོན་པ་དང༌། འདོམ་པ་ཉིད་ནི་གོ་རིམས་བཞིན་དུ་དེ་དག་ཡིན་ནོ་ཞེས་བྱ་བ་སྨྲས་ཏེ། དེ་ལ་སྐྱེ་བ་པོ་ཕྲ་མོ་གནས་དང་ལྡན་པ་ཉིད་དང་འདོམ་པ་ཉིད་ནི་མི་རུང་བ་ཉིད་དོ། །སྐྱེ་བ་པོ་ཕྲ་མོའི་གནས་ངང་ལྡན་པ་ཉིད་ཅེས་བྱ་བ་ནི་སྤྲུལ་དང་སྡིག་པ་ལ་སོགས་པའི་གནས་དང་ལྡན་པ་ཉིད་དེ། དེ་དང་འདོན་པ་ཉིད་ནི་མི་རུང་བ་ཉིད་དོ། །འདིར་གཞུང་ནི་གལ་ཏེ་དེ་ན་སྦྲུལ་གྱི་གནས་སམ། སྡིག་པའི་གནས་སམ། སྦྲང་བུ་ཏྲེ་མ་བུ་ཀ་དང༌། ཏྲཻ་ལ་ཏའི་གནས་ཡོད་པ་མ་ཡིན་ནོ་ཞེས་གསུངས་པ་ཡིན་ནོ། །དེ་དག་ནི་དཔེ་ཙམ་སྟེ་གྲོག་སྦུར་ལ་སོགས་པ་སྐྱེ་བ་པོ་ཕྲ་མོ་ཐམས་ཅད་ཀྱང་གཟུང་ངོ༌། །རྒྱལ་པོ་དང་ལྷའི་གནས་དང༌། མུ་སྟེགས་ཅན་གྱི་འདུག་གནས་ལ་བརྟེན་པ་ཉིད་དང༌། ཤིང་ལྗོན་པ་གཅད་པར་བྱ་བ་མ་ཡིན་པ་ཉིད་དང༌། འདོམ་པ་ནི་རྩོད་པ་དང་བཅས་པ་ཉིད་ཡིན་ཏེ། རྒྱལ་པོའི་གནས་དང༌། འཇིག་རྟེན་པའི་ལྷའི་གནས་དང༌། མུ་སྟེགས་ཅན་གྱི་འདུག་གནས་ལ་བརྟེན་པ་ཉིད་ཅེས་བྱ་བ་ནི་དེ་དག་དང་ཉེ་བར་གྱུར་པ་ཉིད་དེ། དེ་ནི་སྐྱེ་བོ་ཕལ་པོ་ཆེ་དག་དང༌། གླང་པོ་ཆེ་དང༌། རྟ་དང་རྔ་མོ་ལ་སོགས་པ་དག་དང༌། དེ་དག་གི་སྒྲ་དག་གིས་གནོད་པར་འགྱུར་པའི་སྐྱོན་ཡོད་པ་ཉིད་ཡིན་ནོ། །ཤིང་ལྗོན་པ་གཅང་བར་བྱ་བ་མ་ཡིན་པ་ཉིད་ཅེས་བྱ་བ་ནི་དེར་ཞེས་
བྱ་བར་ཚིག་རྣམ་པར་སྦྱར་ཏེ། དེ་ནི་སྐྱེ་བོ་ཕལ་ཕོ་ཆེ་ལ་མཁོ་བ་ཡིན་པའི་ཕྱིར། འཇིག་རྟེན་དག་ལས་ཁ་མཆུ་འབྱུང་བས་དེས་ན་རྩོད་པ་དང་བཅས་པ་ཡིན་ནོ། །ཕྱི་རོལ་འདོམ་གང་གི་མཐའི་ཉེན་ཀོར་གྱི་ནང་རོལ་ན་ཆུ་ཀླུང་ངམ། ངམ་གྲོག་གམ་ཁྲོན་པ་དང་འདོམ་པ་ཉིད་ཅེས་བྱ་བ་ནི་བརྩམ་དུ་མི་རུང་བ་ཉིད་ཡིན་ཏེ། གནས་ཀྱི་ཕྱི་རོལ་ནས་འདོམ་གང་གི་མཐའི་ཉེན་ཀོར་གྱི་ནང་རོལ་ན་ཆུ་ཀླུང་ཡང་རུང༌། ངམ་གྲོག་ཀྱང་རུང༌། ཁྲོན་པ་ཡང་རུང་སྟེ། དེ་དག་གཅིག་དང་འདོམ་ན་ཡང་གནས་ཚེ་ཐུང་བར་འགྱུར་བས་བརྩམ་དུ་མི་རུང་བའི་སྐྱོན་ཅན་ཡིན་ནོ། །དེ་ལ་ཕྱི་རོལ་ཅེས་བྱ་བ་ནི་གནས་ཀྱི་ར་བའི་ཕྱི་རོལ་ནས་སོ། །འདོམ་གང་ཞེས་བྱ་བ་ནི་ཁྲུ་བཞིའོ། །འདོམ་གང་གི་མཐའ་ཞེས་བྱ་བ་ནི་འདོམ་གང་གི་མཚམས་སོ། །དེའི་ཉེན་ཀོར་ཞེས་བྱ་བ་ནི་དེ་དང་ཉེ་བ་ཉིད་དེ། དེའི་ཉེན་ཀོར་ཏེ་འདོམ་གང་གི་མཐའ་དང་ཉེ་བ་ཕ་མཐའི་ཆའོ། །དེའི་ནང་རོལ་ཅེས་བྱ་བ་ནི་ཕ་མཐའི་ཆ་དེ་ནས་ཚུ་རོལ་ཏེ། འདོམ་གང་གི་ནང་ཉིད་དོ། །ནང་རོལ་དེའི་དབུས་སམ་མཐའི་ཕྱོགས་གང་ཡང་རུང་བ་དེ་ན་ཆུ་ཀླུང་ལ་སོགས་པ་གང་ཡང་རུང་བ་ཅིག་དང་འདོམ་པར་གྱུར་ན་ཡང་དེར་དེ་ཡུན་ཐུང་དུ་གནས་པར་འགྱུར་བས་བརྩམ་དུ་མི་རུང་བ་ཉིད་དོ། །ཕྱོགས་ཐམས་ཅད་དུ་ཁོར་ཁོར་ཡུག་ཀུན་དུ་ཆུ་ཀླུང་ལ་སོགས་པ་ཐམས་ཅད་དང་འདོམ་པ་ཁོ་ན་ལ་ནི་མི་བསྙེགས་སོ། །འདིར་གཞུང་ནི་འདོམ་གང་གི་མཐའི་ཉེན་ཀོར་བརྟག་པར་བྱ་སྟེ། གལ་ཏེ་གཞི་ཆུ་ཀླུང་ལ་བརྟེན་ཏམ་ངམ་གྲོག་ལ་བརྟེན་པ་ཡིན་ན་བརྩམ་དུ་མི་རུང་བའི་ཕྱིར་བསྟན་པར་མི་བྱའོ་ཞེས་གསུངས་པ་ཡིན་ནོ། །གང་ལས་འདས་ན་གནས་ཚད་ལས་ལྷག་པར་འགྱུར་བའི་ཚད་དེ་གང་ཡིན་ཞེ་ན། དེའི་ཕྱིར་ཚད་དང་ལྡན་པའི་ཁྲུ་ཕྱེད་དང་དོ་ནི་བདེ་བར་གཤེགས་པའི་མཐོ་གང་སྟེ་ནང་རོལ་ནས་དེ་བཅུ་གཉིས་དང་བདུན་གྱི་ཚད་དོ་ཞེས་བྱ་བ་སྨྲས་ཏེ། རྡུལ་ཕྲ་རབ་ལ་སོགས་པའི་རིམ་པས་བསྒྲེས་པའི་སོར་ཉི་ཤུ་རྩ་བཞི་ལ་ནི་ཚད་དང་ལྡན་པའི་ཁྲུ་གང་ངོ༌། །ཁྲུ་དེའི་ཕྱེད་དང་དོ་ནི་བདེ་བར་གཤེགས་པའི་མཐོ་གང་ངོ༌། །ཁང་པ་དེའི་ནང་རོལ་ནས་ཆུར་སོར་ཉི་ཤུ་རྩ་བཞིའི་ཚད་ལས་ཁྲུ་གང་དུ་བརྩིས་པའི་ཁྲུ་དེའི་ཕྱེད་དང་དོ་ལ་བདེ་བར་གཤེགས་པའི་མཐོ་གང་གི་ཚད་ཡིན་པའི་བདེ་བར་གཤེགས་པའི་མཐོ་དེ་
བཅུ་གཉིས་དང་ཞེང་དུ་བདེ་བར་གཤེགས་པའི་མཐོ་དེ་བདུན་ནི་འདིར་ཁང་པ་དེའི་ཚད་ཡིན་པར་བལྟའོ། །དེ་ལས་བཟློག་པ་ནི་མ་བསྟན་པ་ཉིད་དོ་ཞེས་སྨྲས་ན་བསྟན་པ་ཉིད་དེ་གང་ཞེ་ན། དེའི་ཕྱིར་དགེ་འདུན་ལས་བསྟན་པ་ཐོབ་པ་བསྟན་པ་ཉིད་དོ་ཞེས་བྱ་བ་སྨྲས་ཏེ། གཞི་གང་ལ་བསྟན་པ་ཐོབ་པ་དེ་ནི་བསྟན་པ་ཐོབ་པ་སྟེ། དེའི་དངོས་པོ་ནི་དེ་ཉིད་དོ། །གང་ལས་ཐོབ་ཅེ་ན་དེའི་ཕྱིར། དགེ་འདུན་ལས་ཞེས་བྱ་བ་སྨྲས་ཏེ། དགེ་འདུན་ལས་བསྟན་པ་ཐོབ་པའི་གཞི་དེ་ནི་བསྟན་པ་ཉིད་དོ། །འདི་སྐད་བསྟན་ཏེ། ཁང་པའི་ས་གཞིའི་གཞི་དེའི་གནང་བའི་ལས་ནི། དགེ་འདུན་བཙུན་པ་རྣམས་གསན་དུ་གསོལ། དགེ་སློང་ལག་གི་བླ་མིང་འདི་ཞེས་བགྱི་བ་འདི་ཁང་པའི་གཞི་རུང་བ་རྩོད་པ་མ་མ་ཆིས་པ་བརྩམ་དུ་རུང་བ་ཞིག་བཙལ་ཏེ། དགེ་སློང་ལག་གི་བླ་མིང་འདི་ཞེས་བགྱི་བ་འདི་དགེ་འདུན་ལས་ཁང་པའི་གཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་བསྟན་པ་གསོལ་ན། གལ་ཏེ་དགེ་འདུན་གྱིས་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་དགེ་སློང་ལག་གི་བླ་མིང་འདི་ཞེས་བགྱི་བ་ལ། ཁང་པའི་གཞི་རུང་བ་རྩོད་པ་མ་མཆིས་པ་བརྩམ་དུ་རུང་བ་བསྟན་པ་སྩོལ་ཏོ་ཞེས་བྱ་བ་ལ་སོགས་པ་གསོལ་བ་དང་གཉིས་ཀྱི་ལས་དང༌། གཙུག་ལག་ཁང་གི་གཞི་ལ་ཡང་དེ་བཞིན་དུ་སྦྱར་བའི་གསོལ་བ་དང༌། གཉིས་ཀྱི་ལས་ཀྱི་ཚིག་གང་ཡིན་པ་དེ་ནི་དེའི་བསྟན་པ་ཡིན་ཏེ། གཞི་གང་ལ་བསྟན་པ་རྣམ་པ་དེ་ཉིད་གང་ལས་ཐོབ་པ་དེ་ནི་འདིར་བསྟན་པ་ཡིན་པར་དགོངས་སོ། །མ་དག་པ་གསོལ་བར་མི་བྱའོ་ཞེས་བྱ་བ་ནི། གཞི་མི་རུང་བ་ཉིད་ལ་སོགས་པ་དང་ལྡན་པ་མ་དག་པ་དགེ་འདུན་ལས་བསྟན་པ་གསོལ་བར་མི་བྱའོ། །རང་དག་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་གོ་ཞེས་བྱ་བ་ནི། དགེ་སློང་དེས་དགེ་འདུན་དུ་གྱུར་པའི་དགེ་སློང་གང་དག་ལ་གཞི་བསྟན་པ་གསོལ་བའི་དགེ་སློང་དེ་དག་རང་དག་གཞི་འདིའི་དག་པ་ཉིད་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་རྟོག་ཏུ་གཏང་བར་བྱའི་གཞན་ནི་མ་ཡིན་ནོ། །སྟན་ལ་ཡང་དེ་བཞིན་ནོ་ཞེས་བྱ་བ་ནི། གལ་ཏེ་དགེ་སློང་ལོ་དྲུག་ཚུན་ཆད་དུ་སྟན་བྱ་བའི་ཕྱིར། དགེ་
འདུན་ལས་གནང་བ་གསོལ་བར་བྱེད་ན། སྟན་དེ་ལ་ཡང་རྙིངས་པ་ཉིད་བརྟག་པའི་ཕྱིར་གང་དག་ལ་གསོལ་བའི་དགེ་སློང་དེ་དག་རང་ཉིད་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་རྟོག་ཏུ་གཏང་བར་བྱའི་གཞན་ནི་མ་ཡིན་ནོ། །བྱས་པ་རྙེད་པ་དང༌། བྱས་པ་ལ་ལོངས་སྤྱོད་པ་དག་ལ་ནི་ལྟུང་ང་མེད་དོ་ཞེས་བྱ་བ་ནི། གནས་གཞན་གྱིས་བྱས་ཟིན་པ་རྙེད་པ་དང༌། གཞན་གྱིས་བྱས་ཟིན་པ་ལ་ལོངས་སྤྱོད་པ་དག་ལ་ནི་ལྟུང་བ་མེད་དོ། །རྙིང་པ་འཆོས་པ་ལ་ཡང་ངོ་ཞེས་བྱ་བ་ལ་ཡང་ངོ་ཞེས་བྱ་བའི་སྒྲས་ནི་ལྟུང་བ་མེད་དོ་ཞེས་བྱ་བའི་རྗེས་སྙེགས་པར་བྱེད་དོ། །གནས་རྙིང་པ་འཆོས་ཤིང་བྱི་དོར་བྱེད་བ་ལ་ནི་ལྟུང་བ་མེད་དོ། །རྙིང་པ་འཆོས་པ་ཞེས་བྱ་བ་ནི་དཔེ་སྟེ། སར་པ་འཆོས་ཤིང་བྱི་དོར་བྱེད་པ་ལ་ཡང་ལྟུང་བ་མེད་པ་ཁོ་ནའོ། །ཁང་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།གང་བྱས་ན་གཙུག་ལག་ཁང་གི་དགེ་འདུན་ལྷག་མར་འགྱུར་ཞེ་ན། འདིར་སྔར་འོག་མ་ལ་ཡང་དེ་དག་ཉིད་དེ་མ་བཙལ་བའོ་ཞེས་སྨོས་པའི་རྣམ་པ་ཉིད་ཁས་བླངས་ནས་བྱེ་བྲག་བརྗོད་པར་བྱ་སྟེ། ཚོགས་ཀྱི་དོན་དུའོ་ཞེས་བྱ་བ་ནི། འདིར་ཁྱིམ་པ་ཡན་ཆད་རབ་ཏུ་བྱུང་བ་དང༌། རབ་ཏུ་མ་བྱུང་བ་ལ་ཡང་རུང་སྟེ། གང་ཟག་བཞི་ཡན་ཆད་ལ་ཚོགས་ཞེས་བྱ་བར་དོངས་སོ། །རྣམ་པར་འབྱེད་པ་ལས་ཚོགས་ཀྱི་ཕྱིར་ཞེས་བྱ་བ་ནི་དེ་བཞིན་གཤེགས་པའི་ཉན་ཐོས་ཀྱི་དགེ་འདུན་ནོ་ཞེས་གསུངས་པ་དེ་ནི་གླེང་གཞིའི་དབང་གིས་ཏེ། དཔེ་ཙམ་དུ་ཟད་བས་འདི་ལ་ཉེས་པ་མེད་དོ། །གཙུག་ལག་ཁང་ལ་ནི་ཚད་ངེས་པར་མེད་དོ། །གཙུག་ལག་ཁང་གི་དགེ་འདུན་ལྷག་མ་རྣམ་པར་འབྱེད་པའི་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།དགེ་འདུན་ལྷག་མ་དེ་གཉི་གའི་སྐབས་ཞུ་བ་ལས་གསུངས་པ་ནི་འདྲ་བས། སྐབས་གཅིག་ཁོ་ནས་བསྡུ་བའི་ཕྱིར། རྩོམ་པ་ནི་སྦྱོར་བ་ཉིད་དོ་ཞེས་བྱ་བ་སྨྲས་ཏེ། གནས་རྩོམ་པ་ནི་སྦྱོར་བ་ཉིད་དེ། སྤོམ་པོའི་དབང་དུ་བྱས་པའོ་ཞེས་བྱ་བའི་ཐ་ཚིག་གོ །དེ་ཡང་གང་ལ་མཐར་དངོས་གཞིར་འགྱུར་བ་དེ་ལ་ནི་སྦྱོར་བ་ལ་སྦོམ་པོའོ། །གང་ལ་མཐར་སྦོམ་པོར་འགྱུར་བ་དེ་ལ་ནི་སྦྱོར་བ་ལ་ཉེས་བྱས་སོ། །འདིར་གཞུང་ནི་བརྩམས་ནས་
བདག་ཉིད་གསོད་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །མ་གཡོགས་པ་བྱེད་དུ་འཇུད་པའི་མཐར་ཡང་དེ་དང་འདྲའོ་ཞེས་བྱ་བ་དེ་ཁང་པའམ་གཙུག་ལག་ཁང་སྟེང་མ་གཡོགས་པ་ཞིག་བྱེད་དུ་གཞུག་གོ་སྙམ་པའི་བསམ་པས་ཞུགས་པའི་དགེ་སློང་གི་གནས་དེའི་མཐའ་གང་ཡིན་པ་དེ་ཡང་དེ་དང་འདྲ་སྟེ། སྦྱོར་བ་དང་འདྲ་བར་བལྟ་བར་བྱ་སྟེ། སྦོམ་པོའོ་ཞེས་བྱ་བའི་ཐ་ཚིག་གོ །འདིར་གཞུང་ནི་མ་གཡོགས་པ་ཞིག་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །སྔར་ནི་ཉེས་བྱས་སོ། །དུ་མའི་དོན་དུའོ་ཞེས་བྱ་བ་ནི་ཁང་པ་མི་རུང་བ་ཉིད་ལ་སོགས་པའི་ཡན་ལག་ཐམས་ཅད་ལས་འདས་པ་དུ་མའི་དོན་དུ་བྱེད་དུ་བཅུག་པའི་མཐའ་གང་ཡིན་པ་དེ་ཡང་སྦྱོར་བ་དང་འདྲ་བར་བལྟ་བར་བྱའོ། །འདིར་གཞུང་ནི་གཉིས་ཀྱི་སྤྱི་ལ་བྱེད་དུ་འཇུད་ན་ཉེས་པ་སྤོམ་པོར་འགྱུར་རོ་ཞེས་གསུངས་པ་ཡིན་ནོ། །མ་བསྐོས་པར་རོ་ཞེས་བྱ་བ་ལ། མ་བསྐོས་པ་ཞེས་བྱ་བ་ནི་ཚོལ་བ་པོའམ་གནས་པ་པོས་རྗེས་སུ་མ་གནང་བར་བྱེད་དུ་འཇུད་པ་སྟེ། དེའི་མཐའ་གང་ཡིན་པ་དེ་ཡང་སྦྱོར་བ་དང་འདྲ་བར་བལྟ་བར་བྱའོ། །དངོས་པོ་ཚང་ན་ཡང་ཕམ་པར་མི་འགྱུར་ཏེ། གཞི་དེ་གང་དབང་བ་དེ་ཉིད་ཀྱི་ཕྱིར་གཙུག་ལག་ཁང་རྩིག་ཏུ་འཇུད་པའི་ཕྱིར་རོ། །དངོས་གཞིར་ཡང་མི་འགྱུར་ཏེ། བཙལ་བའི་ཡན་ལག་མེད་པའི་ཕྱིར་རོ། །དེ་བས་ན་རྗེས་སུ་གནང་བ་ལ་ཡང་ཡན་ལག་ཐམས་ཅད་ཆད་ན་དངོས་གཞིའོ། །རྗེས་སུ་མ་གནང་པ་ལ་ནི་སྦོམ་པོའོ། །འདིར་གཞུང་ནི་ཡི་གེ་ཁ་ཅིག་ལས་མ་བསྐོས་པར་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །གང་ཟག་གིས་སོ་ཞེས་བྱ་བ་ནི་གིས་སོ་ཞེས་བསྟན་པའི་ཕྱིར་སྔར་རྣམ་པ་དེ་ལྟ་བུས་སོ་ཞེས་བྱ་བས་སྒྲུབ་པར་བྱེད་པ་བསྟན་པའི་བྱེ་བྲག་ཡིན་པར་ཤེས་པར་བྱའོ། །དེའི་ཕྱིར་གང་ཟག་གི་སྒྲུབ་པར་བྱེད་པས་བྱེད་དུ་འཇུད་ན་དེ་དང་འདྲ་སྟེ། སྦྱོར་བ་དང་འདྲ་བར་རིག་པར་བྱ་སྟེ་བཙལ་པ་ཉིད་མེད་པའི་ཕྱིར་རོ། །འདིར་གཞུང་ནི་གང་ཟག་གི་གཞིས་བྱེད་དུ་འཇུད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །ཞུ་བའི་སྐབས་འདི་ཐམས་ཅད་ཁང་པ་དང་གཙུག་ལག་ཁང་གི་བསླབ་པའི་གཞི་གཉི་གའི་དབང་དུ་བྱས་པར་
རིག་པར་བྱ་སྟེ། གང་ཟག་གིས་སོ་ཞེས་བྱ་བ་འདི་འབའ་ཞིག་མ་གཏོགས་ཏེ། གཙུག་ལག་ཁང་གི་བསླབ་པའི་གཞིལ་བཙལ་བ་ཞེས་བྱ་བའི་ཡན་ལག་རྣམ་པར་མ་བཞག་པའི་ཕྱིར་རོ། །འཕྲོ་ཟིན་པར་བྱེད་ན་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲ་ནི་བྱེད་དུ་འཇུད་ན་མཐའ་དེ་དང་འདྲའོ་ཞེས་བྱ་བའི་རྗེས་བསྙགས་པའི་ཕྱིར་རོ། །འདིར་གཞུང་ནི་འཕྲོ་ཟིན་པར་བྱེད་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །གསོལ་བའི་འོག་ཏུ་མ་གྲུབ་ན་ཉེས་བྱས་སོ་ཞེས་བྱ་བ་ནི། བདག་པོ་ལས་གཞི་བཙལ་པ་གསོལ་བ་དང༌། དགེ་འདུན་ལས་རུང་བ་བསྟན་པ་གསོལ་བའི་འོག་ཏུ་གནས་ཏེ་པོར་མ་གྲུབ་པ་ན་ཉེས་བྱས་ཏེ། གཞི་ཡང་བཙལ་ཟིན་ལ་གསོལ་བ་དང་ལས་བརྗོད་པ་ཡང་བྱས་པའི་འོག་ཏུ་གནས་བྱེད་དུ་བཅུག་པའི་དུས་ན་ཏེ་པོར་མ་གྲུབ་པ་གང་ཡིན་པ་དེ་ལས་ཉེས་བྱས་སུ་ཤེས་པར་བྱའོ། །མི་འདོད་པའི་བསམ་པས་མ་གྲུབ་པ་ལ་འདི་རྣམ་པར་གཞག་གི་བར་ཆད་ཀྱི་དབང་གིས་མ་གྲུབ་པ་ལ་ནི་མ་ཡིན་ནོ། །འདིར་གཞུང་ནི་བཙུན་པ་རེ་ཞིག་གཞི་བཙལ་ནས་མི་བགྱིད་ན་ལྟུང་བཅིར་འགྱུར་ཉེས་བྱས་སུའོ། །ཁང་པ་བསྟན་པ་གསོལ་ནས་བགྱིད་དུ་མི་གསོལ་ན་ལྟུང་བ་ཅིར་འགྱུར་ཉེས་བྱས་སུའོ་ཞེས་གསུངས་པ་ཡིན་ནོ། །ཁང་པ་དང་གཙུག་ལག་ཁང་གི་དགེ་འདུན་ལྷག་མ་ཞུ་བའི་སྐབས་སོ་ཞེས་བྱ་བ་དེ་གཉིས་ཞུ་བའི་སྐབས་ནས་འབྱུང་བ་རྫོགས་སོ། །ཁང་པ་དང་གཙུག་ལག་ཁང་གི་དགེ་འདུན་ལྷག་མ་གཉིས་སོ་ཞེས་བྱ་བ་དེ་གཉིས་བཤད་ཟིན་ཏོ།། །།གཞི་མེད་པར་སྐུར་པ་འདེབས་པའི་དགེ་འདུན་ལྷག་མ་བརྗོད་པར་འདོད་ནས། ཕམ་པར་འགྱུར་བ་ལྷག་པར་སྤྱོད་པས་དགེ་སློང་ཉམས་པ་ལ་ཡང་ངོ་ཞེས་བྱ་བ་སྨྲས་ཏེ། མི་ཚངས་པར་སྤྱོད་པ་ལ་སོགས་པ་ཕམ་པར་འགྱུར་བ་ལྷག་མར་སྤྱོད་པ་ཀུན་དུ་སྤྱོད་པས་སྐུར་པ་འདེབས་པ་ལ་ནི་ཕམ་པར་འགྱུར་བ་ལྷག་པར་སྤྱོད་པ་སྟེ། ཕམ་པར་འགྱུར་བ་ལྷག་པར་སྤྱོད་པ་དེས་སྐུར་པ་འདེ་བས་ན་དགེ་འདུན་ལྷག་མའོ། །སུ་ལ་ལྷག་པར་སྤྱོད་པ་དེས་སྐུར་པ་འདེབས་ན་ཞེ་ན། དེའི་ཕྱིར་དགེ་སློང་ལ་ཞེས་བྱ་བ་སྨྲས་ཏེ། དགེ་ཚུལ་ལ་སོགས་པ་ལ་མ་ཡིན་ནོ། །ཉམས་པ་ལ་ཡང་ངོ་ཞེས་བྱ་བ་ནི། ཚུལ་ཁྲིམས་དང་ལྡན་པ་
འབའ་ཞིག་ལ་མ་ཡིན་གྱི། ཉམས་པ་ལ་སྐུར་པ་བཏབ་ན་ཡང་ངོ༌། །བསྙེན་པར་རྫོགས་པ་དང་བཅས་པ་མ་ཉམས་པའི་དགེ་སློང་དང༌། དགེ་སློང་མ་ཉིད་ཀྱིས་དམིགས་ཀྱིས་བསལ་བ་བསྟན་པའི་ཕྱིར་ཉམས་པ་ཡང་ངོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། དགེ་སློང་ཉམས་པ་ལ་ཡང་ཕམ་པར་འགྱུར་བས་སྐུར་པ་འདེབས་ན་དགེ་འདུན་ལྷག་མར་འགྱུར་རོ། །མ་དག་པ་ལ་སྐུར་པ་འདེབས་པའི་གཞུང་ནི་འདི་ཡིན་ཏེ། གང་ཟག་མ་དག་པ་ལ་སྐུར་པ་འདེབས་པར་བྱེད་ན་ལྟུང་པ་གཞི་བཅུ་གཅིག་དང༌། ལྟུང་བ་མེད་པའི་གཞི་དྲུག་སྟེ། ལྟུང་བའི་གཞི་བཅུ་གཅིག་ལས་ཇི་ལྟ་ཞེ་ན། དེས་མ་མཐོང་བ་དང༌། མ་ཐོས་པ་དང༌། མི་དོགས་པ་དང༌། འདུ་ཤེས་བསྒྱུར་བ་དང་བཅས་ན་ཇི་སྙེད་བརྗོད་དོ་ཅོག་ལ་དགེ་འདུན་ལྷག་མའོ། །ཞུ་བ་ལས་ཀྱང་བཙུན་པ་དགེ་སློང་རང་འདི་སྐད་ཅེས་བདག་གིས་མི་ཚངས་པར་སྤྱོད་པ་འཁྲིག་པའི་ཆོས་བསྟན་ཏོ་ཞེས་མཆི་བ་དེ་ལ་དགེ་སློང་གིས་གཞི་མ་མཆིས་པར་རྐུ་བའམ། འགུམས་པའམ། སྨྲ་བས་སྐུར་པ་འདེབས་ན་ལྟུང་བ་ཅིར་འགྱུར། དགེ་འདུན་ལྷག་མར་རོ་ཞེས་གསུངས་པ་ཡིན་ནོ། །སྤྱིར་བསྟན་པའི་མདོ་ལས་རང་གི་ཕྱོགས་དང་མཐུན་པ་ནི་མཚན་དང་ཁས་ལེན་པས་བཟུང་ངོ་ཞེས་འབྱུང་བ་དེའི་དམིགས་ཀྱིས་བསལ་བ་བསྟན་པའི་ཕྱིར། ཕྱོགས་ལས་རང་ཉིད་ནི་འདིར་ཡན་ལག་མ་ཡིན་ནོ་ཞེས་བྱ་བ་སྨྲས་ཏེ། མཚན་གྱི་དབང་དང་ལྟ་བ་ཁས་ལེན་པའི་དབང་གིས་ཕྱོགས་ལས་རང་ཉིད་དུ་གསུངས་པ་གང་ཡིན་པ་དགེ་སློང་རྣམས་དང༌། དགེ་སློང་རྣམས་སུ་དགེ་སློང་མ་རྣམས་དང་དགེ་སློང་མ་རྣམས་སུ་ཁས་ལེན་པ་རྣམས་དང༌། ཁས་ལེན་པ་རྣམས་སུ་ཁས་མི་ལེན་པ་རྣམས་དང༌། ཁས་མི་ལེན་པ་རྣམས་སུ་ཕྱོགས་ལས་རང་ཉིད་དོ་ཞེས་བྱ་བ་དེ་ནི་སྐུར་བ་འདེབས་པའི་སྐབས་འདིར་ཁས་མི་བླང་ངོ༌། །འོ་ན་ཇི་ལྟར་ཞེ་ན། མཚན་མི་མཐུན་པ་ལ་སྐུར་པ་འདེབས་པ་དང༌། ལྟ་བ་མི་མཐུན་པ་ལ་སྐུར་པ་འདེབས་པ་ཡང་དགེ་འདུན་ལྷག་མའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་དགེ་སློང་གིས་དགེ་སློང་མ་ལ་གཞི་མེད་པར་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་ན་དགེ་འདུན་ལྷག་མའོ། །དེ་བཞིན་དུ་དགེ་སློང་མས་དགེ་སློང་ལ་གཞི་མེད་
པའི་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་ན་དགེ་འདུན་ལྷག་མའོ་ཞེས་གསུངས་པའོ། །དེ་བཞིན་དུ་ཁས་ལེན་པ་ལ་ཁས་མི་ལེན་པ་དང༌། ཁས་མི་ལེན་པ་ལ་ཁས་ལེན་པས་གཞི་མེད་པའི་ཕམ་པར་འགྱུར་བའི་ཆོས་ཀྱིས་སྐུར་པ་འདེབས་པ་ཡང་དགེ་འདུན་ལྷག་མ་སྟེ། ཉམས་པ་ལ་སྐུར་པ་འདེབས་པ་ལ་ཡང་ཁ་ན་མཐོ་བ་ཡོངས་སུ་རྫོགས་པར་འགྱུར་རོ་ཞེས་གསུངས་པ་ལས་ན་ཁས་ལེན་པ་དང༌། ཁས་མི་ལེན་པ་གཉིས་ལ་སྐུར་པ་འདེབས་པ་ལྟ་བ་ལ་ཤིན་ཏུ་ཁ་ན་མ་ཐོ་བ་ཡོངས་སུ་རྫོགས་པར་འགྱུར་ཏེ། ཕམ་པར་མ་གྱུར་པའི་ཕྱིར་རོ། །མཚན་མི་མཐུན་པ་ལ་ཡང་ཉམས་པ་དང་འདྲ་བའི་ཁ་ན་མ་ཐོ་ཕ་ཁོ་ནར་འགྱུར་རོ། །ཅི་ཡང་དག་པས་སམ་འོན་ཏེ་ཡང་དག་པ་མ་ཡིན་པས་ཤེ་ན་དེའི་ཕྱིར། བརྫུན་དུ་སྨྲ་བས་སོ་ཞེས་བྱ་བ་སྨྲས་ཏེ། ཡང་དག་པ་མ་ཡིན་པས་སྐུར་པ་འདེབས་ན་དགེ་འདུན་ལྷག་མར་འགྱུར་གྱི། ཡང་དག་པས་ནི་མ་ཡིན་པ་སྟེ། མཐོང་བ་དང༌། ཐོས་པ་དང༌། དོགས་པའི་གཞི་རྣམས་མེད་པར་ཡང་དག་པ་མ་ཡིན་པར་བརྗོད་ནའོ། །ཅི་སྐུར་པ་གདབ་ཕར་བྱ་བ་ཉིད་ཉེ་བར་གྱུར་པ་ཁོ་ན་ལའམ་ཞེ་ན་མ་ཡིན་ཏེ། དེའི་ཕྱིར་གང་ཡང་རུང་བ་ལ་གོ་བར་བྱས་ནའོ་ཞེས་བྱ་བ་སྨྲས་ཏེ། མིའི་འགྲོ་བ་པ་གང་ཡང་རུང་བ་ལ་གོ་བར་བྱས་བརྡ་ཕྲད་པར་བྱས་ན་ཡང་དགེ་འདུན་ལྷག་མར་འགྱུར་གྱི། གླེངས་པ་འབའ་ཞིག་གིས་དེར་འགྱུར་པར་མ་ཟད་དོ་ཞེས་བྱ་བའི་ཐ་ཚིག་གོ །ཅི་བསམ་པ་གང་ཡང་རུང་བས་མི་གང་ཡང་རུང་བ་ལ་གོ་བར་བྱས་ན་འམ་ཞེ་ན། མ་ཡིན་ཏེ། དེའི་ཕྱིར་ཉམས་པས་འདུན་པས་སོ་ཞེས་བྱ་བ་སྨྲས་ཏེ། ཉམས་པར་བྱ་བ་བསྐྱེད་པའི་བསམ་པས་ཡིན་གྱི། ཁྲོས་པར་གྱུར་པའམ། རྒོད་བག་གམ། བྱུང་རྒྱལ་གྱིས་ནི་མ་ཡིན་ཏེ། འདི་ལྟར་ལྟུང་བས་ཉམས་པར་བྱ་བའི་བསམ་པས་བརྫུན་གྱིས་ཕ་རོལ་པོ་ལ་གླེངས་སམ་གཞན་ལ་གོ་བར་བྱ་བའི་ཕྱིར་བརྡ་སྤྲོད་བར་བྱེད་པ་ན་དེར་འགྱུར་རོ། །དེ་ལ་ལྟུང་བ་རྣམ་པར་གཞག་པ་ནི་འདི་ཡིན་ཏེ། ཕམ་པར་འགྱུར་བས་སྐུར་ན་ནི་དགེ་འདུན་ལྷག་མའོ། །དགེ་འདུན་ལྷག་མས་སྐུར་ན་ལྟུང་བྱེད་དོ། །ལྟུང་བ་གཞན་གྱིས་སྐུར་ན་ཉེས་བྱས་སོ། །ཉེས་བྱས་ཀྱིས་སྐུར་ན་ཉེས་བྱས་ཕྲ་མོར་འགྱུར་རོ། །
ཐེ་ཚོམ་དང་བཅས་པས་སྐུར་ན་ཡིད་གཉིས་ནི་འདུ་ཤེས་དང་འདྲའོ། །དེ་ནི་གཞི་གཞན་མ་ཡིན་ནོ་ཞེས་བྱ་བ་ལ། དེ་ནི་ཞེས་བྱ་བའི་སྒྲ་ནི་མཐོང་བ་དང༌། ཐོས་པ་དང༌། དོགས་པའི་གཞི་ལ་བསྙེགས་སོ། །གཞི་གཞན་མ་ཡིན་ནོ་ཞེས་བྱ་བ་ནི། གང་ལ་མཐོང་བ་དེ་ནི་ཐོས་པ་མ་ཡིན། དོགས་པ་ཡང་མ་ཡིན་ལ། གང་ཐོས་པ་དེ་མཐོང་བ་མ་ཡིན་དོགས་པ་ཡང་མ་ཡིན་ཞིང༌། གང་དོགས་པ་དེ་མཐོང་བ་ཡང་མ་ཡིན་ཐོས་པ་ཡང་མ་ཡིན་པར་ཤེས་པར་བྱའོ། །འདི་སྐད་བསྟན་ཏེ། གཞི་གཞན་ཡོད་དུ་ཟིན་ཀྱང་གཞི་གང་གིས་གླེང་བའི་གཞི་དེ་གལ་ཏེ་མེད་ན་དགེ་འདུན་ལྷག་མ་ཁོ་ནར་འགྱུར་རོ། །འདིར་གཞུང་ནི་ཐོས་པ་ལ་ཡིད་ཆེས་ནས་བདག་གིས་མཐོང་ངོ་ཞེས་ཟེར་བ་དང༌། ཐོས་པ་ལ་ཡིད་མ་ཆེས་པར་བདག་གིས་མཐོང་ངོ་ཞེས་ཟེར་བ་དང༌། ཐོས་པ་ལ་དོགས་པན་བདག་གིས་མཐོང་ངོ་ཞེས་ཟེར་བ་དང༌། ཐོས་པ་ན་མི་དོགས་པ་ན་བདག་གིས་མཐོང་ངོ་ཞེས་ཟེར་བ་དང༌། དོགས་པ་ལ་དོགས་པ་ན་བདག་གིས་མཐོང་ངོ་ཞེས་ཟེར་བ་ན། བརྗོད་དོ་ཅོག་དགེ་འདུ་ན་ལྷག་མའོ་ཞེས་གསུངས་པ་ཡིན་ནོ། །བརྗེད་པ་ནི་ཡོད་པ་ཉིད་མ་ཡིན་ནོ་ཞེས་བྱ་བ་ནི་མི་དྲན་པ་ནི་ཡོད་པ་ཉིད་མ་ཡིན་ཏེ། མི་དྲན་པའི་དངོས་པོ་བརྗེད་པ་ནི་ཡང་དག་པ་མ་ཡིན་པ་སྨྲས་པ་ཡིན་ནོ། །འདིར་གཞུང་ནི་དེས་མཐོང་ལ་དེ་ཡང་བརྗེད་བཞིན་དུ་འདུ་ཤེས་བསྒྱུར་བ་དང་བཅས་པས་བདག་གིས་མཐོང་རོ་ཞེས་ཟེར་བ་དང༌། དེས་ཐོས་ལ་དེ་ཡང་བརྗེད་བཞིན་དུ་འདུ་ཤེས་བསྒྱུར་བ་དང་བཅས་པ་བདག་གིས་ཐོས་སོ་ཞེས་ཟེར་བ་དང༌། དེ་དོགས་ལ་དེ་ཡང་བརྗེད་བཞིན་དུ་འདུ་ཤེས་བསྒྱུར་བ་དང་བཅས་པས་བདག་དོགས་སོ་ཞེས་ཟེར་ན་བརྗོད་དོ་ཅོག་དགེ་འདུན་ལྷག་མའོ་ཞེས་གསུངས་པ་ཡིན་ནོ། །ཅིའི་ཕྱིར་ན་གང་དངོས་སུ་དེ་བཞིན་ཡིན་ཡང་གཞི་གཞན་ལ་གཞི་ཉིད་ཅེས་མི་བྱ་ཞིང་བརྗེད་པ་ཡང་ཡོད་པ་ཉིད་མ་ཡིན་སྙམ་དུ་དོགས་པ་བསལ་བའི་ཕྱིར། དོན་གྱི་དེ་ཉིད་ནི་མི་བརྫུན་པར་སྨྲ་བ་ཉིད་ཀྱི་རྒྱུ་མ་ཡིན་ནོ་ཞེས་བྱ་བ་སྨྲས་ཏེ། དོན་གྱི་དེ་ཉིད་ནི་མི་བརྫུན་པར་སྨྲ་བ་བདེན་པར་སྨྲ་པའི་རྒྱུ་མ་ཡིན་གྱི། འདི་ལྟར་འདུ་ཤེས་ནི་རྒྱུ་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་འདུ་ཤེས་སྒྱུར་བར་བྱེད་ན་དོན་གྱི་དེ་ཉིད་ཡོད་
དུ་ཟིན་ཀྱང་དེ་བརྫུན་དུ་སྨྲ་བ་ཉིད་ཡིན་པས་དགེ་འདུན་ལྷག་མ་ཁོ་ནར་འགྱུར་རོ། །ཇི་སྟེ་འདུ་ཤེས་སྒྱུར་བར་མི་བྱེད་ན་ནི་དོན་གྱི་དེ་ཉིད་མེད་དུ་ཟིན་ཀྱང་དེ་བདེན་པར་སྨྲ་བ་ཉིད་ཡིན་པས་དགེ་འདུན་ལྷག་མར་མི་འགྱུར་ཏེ། བརྫུན་པ་དང་བདེན་པ་གཉིས་ནི་འདུ་ཤེས་དང་འབྲེལ་པ་ཡིན་གྱི། དོན་གྱི་དེ་ཉིད་དང་འབྲེལ་པ་མ་ཡིན་པའི་ཕྱིར་རོ། །དེ་ནི་གཞི་གཞན་མ་ཡིན་ནོ་ཞེས་བྱ་བ་དང༌། བརྗེད་པ་ནི་ཡོད་པ་ཉིད་མ་ཡིན་ནོ་ཞེས་བྱ་བའི་མདོ་དེ་གཉིས་ནི་ཉམས་པའི་ཡུལ་ལ་མ་དག་པ་ལ་སྐུར་པ་འདེབས་པ་ལ་དགེ་འདུན་ལྷག་མར་འགྱུར་བའི་ཁུངས་ཡིན་ལ། ཁུངས་དེ་གཉིས་སྒྲུབ་པར་བྱེད་པ་ནི་དོན་གྱི་དེ་ཉིད་ནི་མི་བརྫུན་པར་སྨྲ་བ་ཉིད་ཀྱི་རྒྱུ་མ་ཡིན་ནོ་ཞེས་བྱ་བའི་མདོ་ཡིན་ནོ། །ཁྲོས་འཁྲུགས་པས་སྐུར་པ་འདེབས་ན་ཞེས་བྱ་བ་ནི་གླེང་གཞིའི་དབང་ཁོ་ནས་དེར་གསུངས་པ་ཡིན་གྱི་ཡན་ལག་ནི་མ་ཡིན་ཏེ། འདིར་སྐུར་པ་འདེབས་པའི་བསམ་པ་ཡན་ལག་ཡིན་ནོ། །གཞི་མེད་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།གཞན་གྱི་ཆ་དང་མཐུན་པའི་དགེ་འདུན་ལྷག་མ་བརྗོད་པར་བྱ་སྟེ། གཞན་ལ་བརྟེན་པ་ནི་གཞན་གྱི་ཆའོ། །དེ་དང་རྗེས་སུ་མཐུན་པ་ནི་གཞན་གྱི་ཆ་དང་མཐུན་པའོ། །གཞི་མེད་པར་སྐུར་པ་འདེབས་པ་དོན་གསལ་བར་གོ་བར་བྱེད་པ་ལས་རྣམ་པ་གཞན་པའི་སྐུར་པ་འདེབས་བ་དོན་མི་གསལ་བས་གོ་བར་བྱེད་པའི་ཚིག་དགེ་འདུན་ལྷག་མ་བྱེད་པ་ནི་གཞན་གྱི་ཆ་དང་མཐུན་པ་ཞེས་བྱ་སྟེ། བག་ཙམ་ཞེས་ཀྱང་བྱའོ། །ད་ནི་དགེ་འདུན་ལྷག་མ་སྔར་བསྟན་པའི་སྐབས་སུ་ཕམ་པར་འགྱུར་བ་ལྷག་པར་སྤྱོད་པས་དགེ་སློང་ཉམས་པ་ལ་ཡང་ངོ་ཞེས་བྱ་བ་ལ་སོགས་པའི་རྣམ་པ་བསྟན་པ་ཐམས་ཅད་འདིར་ཁས་བླངས་ནས་བརྫུན་དུ་སྨྲ་བས་སོ་ཞེས་བྱ་བ་སྨོས་པ་དེའི་བྱེ་བྲག་འགའ་ཞིག་འདིར་བརྗོད་པར་བྱ་སྟེ། བརྗོད་པར་བྱ་བ་གཞན་ལ་གནས་པའི་ཚིག་གིས་བརྫུན་ནའོ་ཞེས་བྱ་བ་ལ། བརྗོད་པར་བྱ་བ་གཞན་ཞེས་བྱ་བ་ནི། གང་ཟག་འདིས་ཕམ་པར་འགྱུར་བ་ལྷག་པར་སྤྱད་པ་བྱས་སོ་ཞེས་བྱ་བའི་བརྗོད་པར་བྱ་བ་དོན་གསལ་བ་དེ་ལས་གཞན་པའི་བརྗོད་པར་བྱ་བ་དོན་མི་གསལ་བའོ། །དེ་ལ་གནས་པའི་ཚིག་ཅེས་བྱ་བ་
ནི་གནས་དེ་ལ་གནས་པའི་ཚིག་གང་ཡིན་པ་དེ་ནི་བརྗོད་པར་བྱ་བ་གཞན་ལ་གནས་པའི་ཚིག་གོ །བརྗོད་པར་བྱ་བ་གཞན་ལ་གནས་པའི་ཚིག་དེས་དགེ་སློང་ཉམས་པ་ལ་ཡང་བརྫུན་གྱིས་ཕམ་པར་འགྱུར་བས་སྐུར་པ་འདེབས་སམ། གང་ཡང་རུང་བ་ལ་གོ་བར་བྱེད་ན་དགེ་འདུན་ལྷག་མར་འགྱུར་རོ་ཞེས་འདིར་མདོའི་དོན་ནི་དེ་ཡིན་ནོ། །འདིར་དཔེ་ནི་དཔེར་ན་ཁོ་བོ་ཅག་གིས་ཚེ་དང་ལྡན་པ་གྱད་བུ་ནོར་མཐོང་ངོ༌། །དགེ་སློང་མ་ཨུཔྟ་ལའི་མདོག་མཐོང་ངོ༌། །མི་ཚངས་པར་སྤྱོད་པ་འཁྲིག་པའི་ཆོས་བསྟེན་པ་མཐོང་ངོ་ཞེས་སྒྲ་དེ་གསུམ་གཅིག་ལ་གཅིག་མ་སྦྱར་བར་ཁོ་བོ་ཅག་གིས་མཐོང་ངོ་མཐོང་ངོ་ཞེས་ཟེར་བ་ལྟ་བུ་སྟེ། དེ་དང་འདིར་ལྷན་ཅིག་དེ་བྱས་སོ་ཞེས་བྱེད་བ་པོ་དང་བྱ་བར་སྦྱར་བ་སྨྲ་བར་འདོད་པའི་དོན་གོ་པར་བྱེད་པའི་ཚིག་མ་བརྗོད་པའི་ཕྱིར་འདིས་ཕམ་པར་འགྱུར་བའི་ཆོས་ལྷག་པར་སྤྱོད་དོ་ཞེས་བྱ་བའི་དོན་གསལ་བ་དེ་ལས་གཞན་པ་མི་ཚངས་པར་སྤྱོད་པ་བསྟེན་པ་མཐོང་ངོ་ཞེས་ཆ་དང་བག་ཙམ་སྨྲ་བར་བྱེད་དེ། བརྗོད་པར་བྱ་བ་གཞན་གྱི་དོན་དེ་ལ་མི་ཚངས་པར་སྤྱོད་པ་བསྟེན་པ་མཐོང་ངོ་ཞེས་བྱ་བའི་ཚིག་དེ་གནས་ཏེ། བརྗོད་པར་བྱ་བ་གཞན་ལ་གནས་པའི་ཚིག་དེས་དགེ་སློང་ཉམས་པ་ལ་ཡང་ཕམ་པར་འགྱུར་བ་ལྷག་པར་སྤྱོད་དོ་ཞེས་གང་ཡང་རུང་བ་ལ་གོ་བར་བྱས་ན་དགེ་འདུན་ལྷག་མར་འགྱུར་རོ་ཞེས་བྱ་བའི་ཐ་ཚིག་གོ །བརྗོད་པར་བྱ་བ་གཞན་ལ་གནས་པའི་ཚིག་ཡང་དག་པ་ཡང་སྲིད་པས་དེ་བསལ་བའི་ཕྱིར། བརྫུན་ནའོ་ཞེས་བྱ་བ་སྨོས་སོ། །གཞན་གྱི་ཆ་དང་མཐུན་པའི་དགེ་འདུན་ལྷག་མ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ད་ནི་གཞི་མེད་པ་དང་བག་ཙམ་སྨྲ་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། མི་བསྟེན་པས་སྐུར་པ་འདེབས་ན་སྦོམ་པོའོ་ཞེས་བྱ་བ་སྨྲས་ཏེ། དགེ་སློང་མ་ལ་ཕོའི་དབང་པོ་མེད་པའི་བསྟེན་པར་བྱེད་པས་སྐུར་པ་འདེབས་ན་སྦོམ་པོ་སྟེ། དཔེར་ན་མ་ནིང་ཕོ་ལྟ་བུའོ། །དགེ་སློང་ལ་མོའི་དབང་པོ་མེད་པའི་བསྟེན་པར་བྱ་བས་སྐུར་པ་འདེབས་ན་ཡང་སྦོམ་པོ་སྟེ། དཔེར་ན་མ་ནིང་མོ་ལྟ་བུའོ། །དེ་གཉིས་ཀྱང་ཁ་དང་བཤང་བའི་ལམ་གྱི་དབང་དུ་
བྱས་པ་ནི་མ་ཡིན་ནོ། །ཁ་དང་བཤང་བའི་ལམ་གྱིས་སྐུར་པ་འདེབས་ན་ནི་དགེ་འདུན་ལྷག་མར་འགྱུར་རོ། །མིང་མ་སྨོས་པ་ཡང་ངོ་ཞེས་བྱ་བ་ནི། ཉམས་པར་བྱ་བའི་མིང་མ་སྨོས་པར་སྐུར་པ་འདེབས་པ་ཡང་སྦོམ་པོའོ། །འདིར་གཞུང་ནི་དགེ་འདུན་གྱི་དབུས་སུ་ངེས་པ་མེད་པར་འདི་སྐད་ཅེས་མི་ཚངས་པར་སྤྱོད་པ་བྱས་སོ། །མ་ཤ་ཀ་ལྔ་ལས་ལྷག་པར་བརྐུས་སོ། །མི་སྲོག་དང་ཕྲལ་ལོ། །མིའི་ཆོས་བླ་མ་ལ་ཡང་དག་པ་མ་ཡིན་པ་སྨྲས་སོ་ཞེས་ཟེར་ཞིང་ཆེ་གེ་མོས་སོ་ཞེས་མི་ཟེར་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། དགེ་འདུན་གྱི་དབྱེན་བྱས་པའོ་ཞེས་བྱ་བ་ནི་མཚམས་མེད་པ་འདི་གཉིས་ནི་སྦོམ་པོའོ། །དེ་ལ་ངན་སེམས་ཀྱིས་ཁྲག་ཕྱུང་བར་གཏོགས་པའི་ཉེས་པ་སྦོམ་པོ་ནི་མི་གསོད་པའི་ཕམ་པར་འགྱུར་བའི་ཕྱོགས་དང་མཐུན་པ་ཡིན་པར་ཤེས་པར་བྱ་སྟེ། གསོད་པའི་བསམ་པས་ཞུགས་པ་ཡིན་པའི་ཕྱིར་རོ། །དགེ་འདུན་གྱི་དབྱེན་དུ་གཏོགས་པ་གང་ཡིན་པ་དེ་ནི་དགེ་འདུན་དབྱེ་བར་བརྟུལ་པ་མི་སྤོང་བའི་ཕྱོགས་དང་མཐུན་པ་ཡིན་གྱི། སྐུར་པ་འདེབས་པའི་ཕྱོགས་དང་མཐུན་པ་ནི་མ་ཡིན་ཏེ། དེར་གཏོགས་པའི་བྱ་བ་མེད་པའི་ཕྱིར་རོ། །དེ་གཉིས་ཀྱིས་སྐུར་པ་འདེབས་ན་ཉེས་བྱས་སོ། །བསམས་ཏེ་སྨྲས་སོ་ཞེས་བྱ་བ་ལ་སོགས་པས་གཞོགས་སྨོས་བྱེད་ན་ཉེས་བྱས་སོ་ཞེས་བྱ་བ་ནི། བསམས་ཏེ་སྨྲས་སོ་ཞེས་རྣམ་པ་དེ་ལྟ་བུས་གཞོགས་སྨོས་བྱེད་ན་ཉེས་བྱས་སོ། །འདིར་སོགས་པ་ཞེས་བྱ་བའི་སྒྲ་ནི་རྣམ་པ་གཞན་གྱི་དོན་བསྟན་པའི་ཕྱིར་རོ། །ཞུ་བ་ལས་དགེ་སློང་སྟན་ལས་ལངས་ཏེ་བདག་གིས་བསམས་ཏེ་སྨྲས་སོ་ཞེས་ཟེར་ཞིང་སྐྱེ་བོ་ཐམས་ཅད་ལས་ཉེས་བྱས་སུ་འགྱུར་རོ་ཞེས་བྱེ་བ་ལྟ་བུའོ། །བག་ཙམ་ལའང་རྣམ་པ་དེ་དག་ཤེས་པར་བྱ་སྟེ། བདག་གིས་དགེ་སློང་མ་ཆེ་གེ་མོ་ཞེས་བྱ་བ་མ་ནིང་ཕོ་དང་མི་ཚངས་པར་སྦྱོར་པ་འཁྲིག་པའི་ཆོས་བསྟེན་པ་མཐོང་ངོ་ཞེས་བྱ་བ་ལ་སོགས་པའོ། །གཞི་མེད་པ་དང་བག་ཙམ་གྱི་ཞུ་བའོ་ཞེས་བྱ་བ་དེ་གཉིས་ཞུ་བའི་སྐབས་ནས་འབྱུང་བ་རྫོགས་སོ།། །།ད་ནི་དགེ་འདུན་གྱི་དབྱེན་བྱེད་པའི་དགེ་འདུན་ལྷག་མ་བརྗོད་པར་འདོད་ནས་དེའི་ཞར་ལ་འདི་
བརྗོད་དོ། །གཞན་གྱི་འཁོར་ཁ་འདྲེན་ན་སྦོམ་པོའོ་ཞེས་བྱ་བ་ནི། གཞན་གྱི་འཁོར་ནི་གཞན་གྱི་འཁོར་ཏེ། དེ་ཁ་འདྲེན་པ་ནི་བདག་ཉིད་ཀྱི་ཕྱོགས་སུ་ཁ་འདྲེན་ཞིང་གཞོག་པ་སྟེ། དེ་ནི་སྤོམ་པོའོ། །འདི་མན་ཆད་ནི་བཟློག་པའི་ཚུལ་གྱི་ཞེས་བྱ་བ་ལ་སོགས་པས་དགེ་འདུན་གྱི་དབྱེན་བྱེད་པ་ལ་སོགས་པའི་དགེ་འདུན་ལྷག་མ་བསྒོ་བ་ལས་འབྱུང་བ་བཞི་པོ་དག་གི་ཐུན་མོང་གི་རྣམ་པ་བརྗོད་པར་བྱ་སྟེ། བཟློག་པའི་ཚུལ་གྱིས་མི་གཏོང་བར་རྗེས་སུ་སྒྲུབ་པའི་རང་བཞིན་ནི་རྗེས་སུ་མཐུན་ནོ་ཞེས་བྱ་བ་ནི། དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མེ་བདེ་བ་དག་བཟློག་པའི་ཚུལ་གྱིས་བཟློག་པ་ནི་མི་གཏོང་མི་སྤོང་བར་དེ་རྗེས་སུ་སྒྲུབ་པ་བྱ་བ་རྩོམ་པར་མི་བྱེད་ཅིང་མི་གཏོང་བར་རྗེས་སུ་སྒྲུབ་པའི་བདག་ཉིད་དེའི་རང་བཞིན་རྣམ་པ་ལུས་དང་ངག་གི་རྣམ་པར་རིག་བྱེད་དུ་གྱུར་པ་གང་ཡིན་པའམ་ཅང་མི་སྨྲ་བའི་གནས་སྐབས་སུ་གྱུར་པ་གང་ཡིན་པའམ། གཉི་གར་གྱུར་པ་གང་ཡིན་པ་སྟེ། བཟློག་པའི་ཚུལ་གྱིས་མི་གཏོང་བར་རྗེས་སུ་སྒྲུབ་པའི་རང་བཞིན་དེ་ནི་གསོལ་བ་ཞེས་བྱ་བ་ངག་གི་རྣམ་པར་རིག་བྱེད་ཀྱི་མཚན་ཉིད་ཀྱིས་རྗེས་སུ་མཐུན་ཏེ། རྗེས་སུ་འགྲོ་བ་དང་འདྲ་བ་དང་མཚུངས་པར་རིག་པར་བྱའོ། །འདི་སྐད་བསྟན་ཏེ། གང་གི་ཕྱིར་དགེ་འདུན་ལྷག་མ་བཞི་པོ་དེ་དག་བཟློག་པ་དང༌། འབྲེལ་པ་ཡིན་པ་དེའི་ཕྱིར་བཟློག་པ་ཇི་སྙེད་བྱེད་པ་ལྟུང་བ་ཡང་དེ་སྙེད་དུ་འགྱུར་རོ། །དེའི་ཕྱིར་མི་གཏོང་བར་རྗེས་སུ་སྒྲུབ་པའི་རང་བཞིན་དེ་ནི་བཟློག་པའི་ཚུལ་གྱིས་རྗེས་སུ་མཐུན་པ་ཡིན་ཏེ། བཟློག་པ་གཅིག་ལ་མི་གཏོང་བར་རྗེས་སུ་སྒྲུབ་པའི་རང་བཞིན་ཡང་གཅིག་ཁོ་ནའོ། །བཟློག་པ་སྦྱོར་བར་གྱུར་པ་ལ་ནི་ལྟུང་བ་ཡང་སྦྱོར་བར་གྱུར་པ་ཉིད་དོ། །ཐར་ཐུག་པར་གྱུར་པ་ལ་ནི་དགེ་འདུན་ལྷག་མ་ཞེས་བྱ་བའི་མཐར་ཐུག་པ་གྱུར་པ་ཉིད་དོ། །གསོལ་བ་ནི་བཟློག་པ་དང་འདྲ་བ་ཉིད་དོ་ཞེས་བྱ་བ་ནི། བཟློག་པར་བྱ་བ་ཉིད་ལ་ནི་དགེ་འདུན་ལ་གསོལ་བ་གོ་བར་བྱ་བ་གང་ཡིན་པ་དེ་ནི་དངོས་སུ་བཟློག་པ་ཉིད་མ་ཡིན་གྱི། བཟློག་པའི་ཐབས་གང་ཡིན་པས་དེའི་ཕྱིར་འདྲ་བ་ཉིད་དུ་སྟོན་པར་བྱེད་དེ། ཇི་ལྟར་ལས་བརྗོད་པ་དག་མི་གཏོང་བར་རྗེས་སུ་སྒྲུབ་པའི་ལྟུང་བའི་བྱེད་པ་པོ་ཉིད་ཡིན་པ་
བཞིན་དུ་གསོལ་བ་ཡང་དེ་དང་འདྲའོ། །བཟློག་པ་དང་འདྲ་བར་གྱུར་པས་ན་བཟློག་པ་དང་འདྲའོ། །དེའི་དངོས་པོ་ནི་དེ་ཉིད་དོ། །དེའི་ཕྱིར་འདིར་སྦྱོར་བར་གྱུར་པ་ལ་ཡང་ལྟུང་བར་འགྱུར་བ་ཁོ་ན་ཡིན་ནོ། །གསོལ་བའི་ཚིག་ནི་ལྟུང་བའི་བྱེད་པ་པོ་ཉིད་ཡིན་ནོ་ཞེས་སྨྲས་པ་ལ་ཚིག་དེ་ཡང་ཆ་ཤས་དུ་མ་ཡོད་ན། ཅི་ཆ་ཤས་ཇི་སྙེད་ཡོད་པ་དེ་སྙེད་ཁོ་ནའི་ལྟུང་བར་འགྱུར་རམ་སྙམ་དུ་དོགས་པ་བསལ་བའི་ཕྱིར། ཚིག་གི་སྐད་ཅིག་མ་གཅིག་པ་ཉིད་དོ་ཞེས་བྱ་བ་སྨྲས་ཏེ། ཚིག་གང་ལ་སྐད་ཅིག་མ་གཅིག་ལ་ལྟུང་བ་འབྱུང་བར་འགྱུར་བའི་སྐད་ཅིག་མ་དེའི་ཁོངས་སུ་ཚིག་མཐའ་དག་འདུས་སོ། །དེས་ན་ཤིན་ཏུ་རྒྱུན་རིང་དུ་ཟིན་ན་ཡང་ཚིག་གཅིག་ཏུ་ཟད་དེ། ལྟུང་བ་ཡང་གཅིག་ཁོ་ན་འབྱུང་བ་ཡིན་གྱི། ཆ་ཤས་རེ་རེ་ལ་ཡང་མ་ཡིན། རྩ་བ་རེ་རེ་ལ་ཡང་མ་ཡིན་ནོ། །སྐད་ཅིག་མ་གང་ལ་ཚེ་དང་ལྡན་པ་ལྷ་སྦྱིན་ཁྱོད་དགེ་འདུན་དབྱེ་བར་བྱེད་པའི་དངོས་པོ་འདི་ལྟ་བུ་ཐོང་ཤིག་ཅེས་བྱ་བ་ལ་སོགས་པ་བརྗོད་པ་ན་ཚིག་ཕལ་ཆེར་བྱས་པ་ཉིད་ཡིན་པས་དེ་ནི་འདིར་དངོས་གཞིའི་དུས་ཡིན་ཏེ། གསོལ་པ་དང༌། ལ་རྗོད་པའི་དུས་དེ་གཉིས་ནི་ལྟུང་བའི་བྱེད་པ་པོ་ཉིད་ཡིན་གྱིས། དུས་ཕྱི་མ་གཞན་ནི་རྩོམ་པ་གཅིག་ཏུ་གྱུར་པའི་ཕྱིར། དེའི་ཁོངས་སུ་གཏོགས་པ་ཉིད་དོ། །འདིར་གཞུང་ནི་གསོལ་བ་བྱེད་པ་ན་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལས་བརྗོད་པ་བྱས་པ་ན་ཉེས་པ་སྦོམ་པོར་འགྱུར་རོ་ཞེས་གསུངས་པ་ཡིན་ནོ། །བཟླས་པ་རྣམས་ཀྱང་གཅིག་ཏུ་དོགས་པ་བསལ་བའི་ཕྱིར་རོ། །བཟླས་པ་ནི་ཐ་དད་པ་ཉིད་དོ་ཞེས་བྱ་བ་སྨྲས་ཏེ། ལས་བརྗོད་པ་རྣམས་ཀྱི་བཟླས་པ་གང་དག་ཡིན་པ་དེ་དག་ནི་ཐ་དད་པ་ཉིད་དེ། ཡང་དང་ཡང་དུ་བཟླས་པ་རྩོམ་པའི་ཕྱིར་རོ། །དེ་ལྟར་ན་ལས་བརྗོད་པ་ལན་རེ་རེ་ལ་ལྟུང་བ་རེ་རེར་འགྱུར་རོ། །འདིར་གཞུང་ནི་ལས་བརྗོད་པ་དང་པོ་མ་རྫོགས་པར་གཞི་དེར་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་རྫོགས་པར་བརྗོད་པ་ན་ཉེས་པ་སྦོམ་པོར་འགྱུར་རོ། །དེ་བཞིན་དུ་ལས་བརྗོད་པ་གཉིས་པ་དང་གསུམ་པ་མ་རྫོགས་པར་གཞི་དེ་གཏོང་ན་དེ་ལྟ་ན་ལེགས། གལ་ཏེ་མི་གཏོང་ན་ལས་བརྗོད་པ་གཉིས་པ་རྫོགས་པར་བརྗོད་ན་ཉེས་པ་སྦོམ་པོར་འགྱུར་རོ། །ལས་བརྗོད་པ་གསུམ་བ་རྫོགས་པར་བརྗོད་ན་དགེ་འདུན་ལྷག་
མར་འགྱུར་རོ་ཞེས་གསུངས་པ་ཡིན་ནོ། །མཇུག་སྡུད་པ་ནི་མ་ཡིན་ནོ་ཞེས་བྱ་བ་ནི། དགེ་འདུན་གྱིས་བཟོད་ཅིང་གནང་ནས། དགེ་འདུན་གྱིས་ལྷ་སྦྱིན་ལ་གསོལ་བ་དང་བཞིའི་ལས་ཀྱིས་བསྒོ་བ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བ་ལྟ་བུ་མཇུག་སྡུད་པའི་ཚིག་དེ་ནི་ཐ་དད་པ་ཉིད་མ་ཡིན་ཏེ། འདི་ལྟར་མཇུག་སྡུད་པ་ནི་འདིར་ལས་བྱེད་པ་གོ་བར་བྱེད་པ་ཙམ་ཡིན་པའི་ཕྱིར་རོ། །དེ་ཡང་བཟླས་པ་ཐ་མའི་ནང་དུ་གཏོགས་པར་རིགས་སོ། །འཇུག་པ་ནི་སྦྱོར་བ་ཉིད་དོ་ཞེས་བྱ་བ་ནི། དགེ་འདུན་གྱི་དབྱེན་བྱ་བ་ལ་སོགས་པའི་འཇུག་པ་ནི་སྦྱོར་བ་ཉིད་དེ་སྤོམ་པོ་ཡིན་ནོ། །འཇུག་པ་ཞེས་བྱ་བའི་གནས་སྐབས་ཀྱི་བྱེ་བྲག་མ་བསྟན་པས་ན་བཞོམས་ཏེ་བསྒོ་བ་དང༌། གསོལ་བ་བྱ་བ་ལ་སོགས་པ་དག་གི་འོག་དང་སྔ་རོལ་ཡང་ཡིན་པར་རིག་པར་བྱའོ། །བཞམས་ཏེ་བསྒོ་བ་ཞེས་བྱ་བ་ནི། འདིར་དགེ་འདུན་དུ་མ་གྱུར་པའི་དགེ་སློང་ཚངས་པ་མཚུངས་པར་སྤྱོད་པས་གཅུགས་པས་ཕན་ཚུན་ཟློག་པར་བྱེད་པ་ཡིན་པར་རིག་པར་བྱའོ། །འཇུག་པ་ཉིད་ནི་མི་གཏོང་བའི་བདག་ཉིད་ཀྱི་འཇུག་པ་བས་ཤས་ཆུང་བ་ཡིན་ནོ། །དེས་ན་འདི་སྐད་བསྟན་ཏེ། ཐ་མ་མ་གཏོགས་པའི་མི་གཏོང་བ་ནི་སྦྱོར་བ་ཉིད་དོ། །ཐ་མ་ལ་ནི་དངོས་གཞིའོ། །དེ་ལྟ་ན་དགེ་སློང་བསྐྲད་པ་ལ་སོགས་པའི་ལས་མ་བྱས་པར་འདུན་པས་འགྲོ་ཞེས་ཟེར་བ་ལ་ཡང་སྦྱོར་བ་ཉིད་དུ་ཐལ་བར་འགྱུར་ལ། གླེང་བ་དང་དྲན་པར་མ་བྱས་པར་ངག་མི་ཉན་པ་ཡང་སྦྱོར་བ་ཉིད་དུ་ཐལ་བར་འགྱུར་བ་དེ་བསལ་བའི་ཕྱིར། བསྐྲད་པ་དང་གླེང་བ་དང་དྲན་པར་མ་བྱས་པ་ནི་དེའོ་ཞེས་བྱ་བ་སྨྲས་ཏེ། སྦྱོར་བ་ཉིད་དེའིའོ་ཞེས་བྱ་བར་སྦྱར་རོ། །དགེ་སློང་བསྐྲད་པ་མ་བྱས་པར་འདུན་པས་འགྲོའོ་ཞེས་བྱ་བ་ལ་སོགས་པ་ཟེར་བ་དང༌། གླེང་བ་དང་དྲན་པར་མ་བྱས་པས་ངག་མི་ཉན་པར་བྱེད་པ་ནི་སྦྱོར་བ་ཉིད་དེའི་སྦྱོར་བ་ཉིད་དེ་ཉེས་བྱས་སོ། འདི་སྐད་བསྟན་ཏེ། དགེ་སློང་ཁྱིམ་སུན་འབྱིན་པ་ལ་ཇི་སྲིད་དུ་བསྐྲད་པའི་ལས་མི་བྱེད་པར་འདུན་པས་འགྲོའོ་ཞེས་བྱ་བ་ལ་སོགས་པ་ཟེར་བ་ནི་སྦྱོར་བའི་སྦྱོར་བ་ཉིད་དོ། །དེ་བཞིན་དུ་དགེ་སློང་བཀའ་བློ་མི་བདེ་བ་ལ་ཇི་སྲིད་དུ་གླེང་བ་དང་དྲན་པར་མི་བྱེད་པར་
ངག་གི་མཉན་པ་ཉིད་དུ་བྱེད་པ་ནི་སྦྱོར་བའི་སྦྱོར་བ་ཉིད་དེ། སྦྱོར་བ་སྤོམ་པོའི་སྦྱོར་བ་ཉིད་ནི་ཉེས་བྱས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་བསྐྲད་པའི་ལས་མ་བགྱིས་པར་དགེ་འདུན་ལ་འདུན་པས་མཆིའོ་ཞེས་མཆི་བ་དང༌། འཇིགས་པས་མཆིའོ་ཞེས་བགྱི་བའི་བར་དུ་མཆི་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ། །བསྒོ་བར་བགྱིའམ་འོན་ཏེ་བསྒོ་བར་མི་བགྱི། བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་སམ། མི་འཆགས་བཀའ་སྩལ་པ། མི་འཆགས་སོ། །གླེང་བ་མ་བགྱིས་དྲན་པར་མ་བགྱིས་པར་བདག་ཉིད་དང་མི་ཉན་པ་ཉིད་དུ་འཇིག་པར་བགྱིད་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ། །བསྒོ་བར་བགྱིའམ་འོན་ཏེ་བསྒོ་བར་མི་བགྱི། བཀའ་སྩལ་པ། བསྒོ་བར་མི་བྱའོ། །བསྒོ་བ་འཆགས་སམ་མི་འཆགས། བཀའ་སྩལ་པ། མི་འཆགས་སོ་ཞེས་གསུངས་པ་ཡིན་ནོ། །གནས་སྐབས་འདི་ལ་ནི་མངོན་པར་ཞེན་པ་ཉིད་དང༌། སྡིག་པའི་བསམ་པ་ཤས་ཆུང་བའི་ཕྱིར་རོ། །དེས་ན་ཉེས་བྱས་སུ་གསུངས་སོ། །དྲན་པར་བྱས་པའི་གནས་སྐབས་ན་ནི། བདག་ཉིད་ཀྱི་ཁ་ན་མཐོ་བ་དྲན་དུ་ཟིན་ཀྱང་ཡོངས་སུ་མི་གཏོང་བས་མངོན་པར་ཞེན་པ་ཆེས་དམ་པ་ཉིད་དང༌། སྡིག་པའི་བསམ་པ་ཡང་ཆེས་ལྕི་བ་ཉིད་ཡིན་པར་ཤེས་པས་དེའི་ཚེ་ན་ནི་སྦོམ་པོར་གསུངས་སོ། །གླེང་བ་ནི་ཕྱོགས་གཅིག་ཏུ་གྱུར་པ་གླེང་བ་ཡིན་ནོ། །དྲན་པར་བྱེད་པ་ནི་ཡོངས་སུ་རྫོགས་པར་དྲན་པར་བྱེད་པ་སྟེ། ཚིག་འདི་གཉིས་ཀྱིས་ནི་གླེང་བ་ཡོངས་སུ་རྫོགས་པར་བསྟན་པ་བྱས་པ་ཡིན་ནོ། །དེ་ལ་ནི་བསྒོ་བར་མི་བྱ་བ་ཉིད་དོ་ཞེས་བྱ་བ་ནི། བསྐྲད་པའི་ལས་མ་བྱས་པ་དང༌། གླེང་བ་དང་དྲན་པར་མ་བྱས་པའི་དེ་སློང་དེ་ལ་བསྒོ་བར་མི་བྱ་བ་ཉིད་དོ། །བསྒོ་བ་ཞེས་བྱ་བ་བྱེ་བྲག་ཏུ་མ་བྱས་པས་ལས་ཀྱིས་བསྒོ་བ་འབའ་ཞིག་ཏུ་མ་ཟད་ཀྱི། བཞམས་ཏེ་བསྒོ་བ་ཡང་མི་བྱ་བར་ཤེས་པར་བྱའོ། །དེ་དག་ལ་བཞམས་པ་དང་ལས་ཀྱིས་མི་བསྒོ་བར་མི་བྱའོ་ཞེས་བྱ་བ་ནི། དགེ་འདུན་གྱི་དབྱེན་བྱེད་པ་དང༌། དེའི་རྗེས་སུ་ཕྱོགས་པ་དང༌། ཁྱིམ་སུན་འབྱིན་པ་དང༌། བཀའ་བློ་མི་བདེ་བའི་བསླབ་པའི་གཞིའི་ཡུལ་དུ་གྱུར་པ་དེ་དག་ལ་བཞམས་ཏེ་བསྒོ་བ་དང་ལས་ཀྱིས་བསྒོ་བས་མི་བསྒོ་བར་མི་
བྱ་སྟེ་གདོན་མི་ཟ་བར་བསྒོ་བར་བྱའོ། །དེ་ལྟར་ཡང་དགེ་སློང་དག་ཁྱེད་ཀྱིས་བཞམས་པ་དང༌། གསོལ་བ་དང༌། བཞིའི་ལས་ཀྱིས་བསྒོ་བར་གྱིས་ཤིག་ཅེས་གསུངས་པ་ཡིན་ནོ། །བསྒོ་བ་ལས་གྱུར་པའི་དགེ་འདུན་ལྷག་མ་བཞི་པོ་འདི་དག་གནས་སྐབས་གང་ལས་འབྱུང་བར་འགྱུར་ཞེ་ན་དེའི་ཕྱིར། དེའི་མཐའ་ལ་ནི་མི་གཏོང་ནའོ་ཞེས་བྱ་བ་སྨྲས་ཏེ། དེའི་ཞེས་བྱ་བ་ནི། བསྟན་མ་ཐག་པའི་མདོ་ལས། ལས་ཀྱིས་ཞེས་སྨོས་པ་དེའིའོ། །དེའི་མཐའ་ནི་ལས་ཀྱིས་བསྒོ་བའི་མཐའ་སྟེ་དེ་ལའོ། །དེ་ཡང་ལས་བརྗོད་པ་གསུམ་པའི་མཐའ་ལའོ། །དེ་ལ་བརྟུལ་བ་མི་གཏོང་ན་དེ་ལ་བསྒོ་བ་ལས་འགྱུར་བའི་དགེ་འདུན་ལྷག་མ་བཞི་པོ་དེ་དག་འབྱུང་ངོ་ཞེས་བྱ་བའི་ཐ་ཚིག་གོ །དེ་ལྟར་རེ་ཞིག་བསྒོ་བ་ལས་འགྱུར་བའི་དགེ་འདུན་ལྷག་མ་བཞི་པོ་དེ་དག་གི་མཚན་ཉིད་ཐུན་མོང་བ་བསྟན་ནས། ད་ནི་དེ་དག་ཉིད་ཀྱི་བྱེ་བྲག་གོ་རིམས་བཞིན་དུ་བརྗོད་པར་བྱའོ། །དོན་གང་མི་གཏོང་ན་དགེ་འདུན་གྱི་དབྱེན་བྱེད་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་རྟུལ་བར་བྱེད་པ་ཉིད་དོ་ཞེས་བྱ་བ་སྨྲས་སོ། །གང་ལ་རྟུལ་བར་བྱེད་པའི་ངང་ཚུལ་ཡོད་པ་དེ་ནི་རྟུལ་བར་བྱེད་པའོ། །ཡང་ན་ཕ་རོལ་གནོན་པར་བྱེད་པས་རྟུལ་བར་བྱེད་པའོ། །དེའི་དངོས་པོ་ནི་དེ་ཉིད་དེ། དེ་མི་གཏོང་ནའོ། །ཡུལ་གར་ལ་རྟུལ་བར་བྱེད་པ་ཉིད་ཅེ་ན། དེའི་ཕྱིར་དབྱེན་ལའོ་ཞེས་བྱ་བ་སྨྲས་ཏེ། དབྱེན་བྱེད་པའི་ཡུལ་ལའོ། །གང་གི་དབྱེན་བྱེད་པ་ལ་ཞེ་ན། དེའི་ཕྱིར་དགེ་འདུན་གྱིའོ་ཞེས་བྱ་བ་སྨྲས་ཏེ། འདི་སྐད་བསྟན་ཏེ། དགེ་འདུན་གྱི་དབྱེན་བྱ་བའི་ཡུལ་ལ་རང་གི་བརྟུལ་བས་བརྗོད་པ་གསུམ་པའི་མཐར་མི་གཏོང་ན་དགེ་འདུན་དབྱེན་བྱེད་པའི་དགེ་འདུན་ལྷག་མར་འགྱུར་རོ། །དགེ་འདུན་གྱི་དབྱེན་བྱེད་པའི་དགེ་འདུན་ལྷག་མའོ་ཞེས་བྱ་བ་དེ་རྫོགས་སོ།། །།ད་ནི་དེའི་རྗེས་སུ་ཕྱོགས་པའི་དགེ་འདུན་ལྷག་མ་བརྗོད་པར་བྱ་སྟེ། གང་ཞིག་མི་གཏོང་ན་དེའི་རྗེས་སུ་ཕྱོགས་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་དེའི་གྲོགས་ཉིད་རྗེས་སུ་སྒྲུབ་པར་བྱེད་པའོ་ཞེས་བྱ་བ་སྨྲས་ཏེ། དེའི་ཞེས་བྱའི་སྒྲ་ནི་དགེ་འདུན་གྱི་དབྱེན་ཞེས་བྱ་བ་ལ་བསྙེགས་སོ། །གྲོགས་ཞེས་
བྱ་བ་ནི་དགེ་འདུན་གྱི་དབྱེན་བྱེད་པའི་ཡུལ་ལ་གྲོགས་བྱེད་པའོ། །གྲོགས་ཀྱི་དངོས་པོ་ནི་དེའི་གྲོགས་ཉིད་དོ། །དེའི་གྲོགས་ཀྱི་དངོས་པོ་དེ་རྗེས་སུ་སྒྲུབ་པར་བྱེད་པ་ནི་ནན་ཏན་བྱེད་པ་ཉིད་དེ། དེ་མི་གཏོང་ན་དེའི་རྗེས་སུ་ཕྱོགས་པའི་དགེ་འདུན་ལྷག་མར་འགྱུར་རོ། །རྗེས་སུ་ཕྱོགས་པའི་དགེ་འདུན་ལྷག་མའོ་ཞེས་བྱ་བ་དེ་རྫོགས་སོ།། །།ཐུན་མོང་གི་རྣམ་པ་སྔར་བསྟན་པ་ཐམས་ཅད་ཁས་བླངས་ནས་གང་ཞིག་མི་གཏོང་ན་ཁྱིམ་སུན་འབྱིན་པའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་རང་སྐྲོད་པར་བྱེད་པའི་དགེ་འདུན་ལ་ལོག་པའི་བསམ་པས་དེ་དེ་ལ་དེ་ལྟར་ཞུགས་སོ་ཞེས་བརྫུན་དུ་སྨྲ་བ་ཉིད་དོ་ཞེས་བྱ་བ་སྨྲས་ཏེ། ལྟུང་བ་འབྱིན་པ་པོ་རང་བསྐྲད་པ་གང་ཡིན་པའི་སྐྲོད་པར་བྱེད་པའི་དགེ་འདུན་གང་ཡིན་པའི་དགེ་འདུན་རང་སྐྲོད་པར་བྱེད་པ་ཡུལ་དུ་གྱུར་པ་དེ་ལ་ལོག་པའི་བསམ་པ་ལོག་པའི་སེམས་འདུན་པ་དང༌། ཞེ་སྡང་དང་གཏི་མུག་དང་འཇིགས་པའི་དབང་ཉིད་གང་ཡིན་པས་དགེ་འདུན་དེ་བསྐྲད་པའི་ལས་གང་ཡིན་པ་དེ་ལས་དེ་ལྟར་ཞུགས་པར་གྱུར་ཏོ་ཞེས་ལྕེ་དེ་ཉིད་དུ་བརྫུན་དུ་སྨྲ་པ་ཉིད་མི་གཏོང་ནའོ། །འདི་སྐད་བསྟན་ཏེ། གལ་ཏེ་ཁྱིམ་སུན་འབྱིན་པར་བྱེད་པའི་དགེ་སློང་རང་སྐྲོད་པར་བྱེད་པའི་བྱེད་པ་པོ་གང་ཡིན་པའི་དགེ་འདུན་ཡུལ་དུ་གྱུར་པ་ལ་བརྫུན་དུ་སྨྲ་བ་ཉིད་ཀྱིས་དགེ་འདུན་འདིས་ལོག་པ་ཉིད་དུ་འདུན་པ་དང༌། ཞེ་སྡང་དང༌། གཏི་མུག་དང༌། འཇིགས་པ་ཞེས་བྱ་བས་བདག་བསྐྲད་པའི་ལས་བྱས་སོ་ཞེས་ཟེར་ཞིང་བརྫུན་དུ་སྨྲ་བ་རྣམ་པ་དེ་ལྟ་བུ་ཉིད་དེ་མཐར་མི་གཏོང་ན་དེ་ལ་བསྐྲད་པའི་དགེ་འདུན་ལྷག་མར་འགྱུར་རོ། །ཁྱིམ་སུན་འབྱིན་པའི་དགེ་འདུན་ལྷག་མའོ་ཞེས་བྱ་བ་དེ་རྫོགས་སོ།། །།གང་ཞིག་མི་གཏོང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་ཞེ་ན། དེའི་ཕྱིར་དགེ་སློང་གིས་ལྷག་པའི་ཚུལ་ཁྲིམས་ཀྱིས་གླེངས་པ་ཉིད་ན། བདག་ཉིད་ཀྱི་དེ་ལ་དགེ་སློང་དག་གིས་བརྗོད་པར་མི་བྱ་བ་ཉིད་དུ་བྱེད་པའོ་ཞེས་བྱ་བ་སྨྲས་ཏེ། དགེ་སློང་གིས་ལྟུང་བ་འབྱིན་པ་པོ་ལ་ལྷག་པའི་ཚུལ་ཁྲིམས་ཀྱི་དབང་དུ་བྱས་པ་སྟེ། གླེངས་པ་ཉིད་ན་འདི་སྐད་ཅེས་བདག་ལ་དགེ་སློང་གང་གིས་ཀྱང་ཚུལ་ཁྲིམས་འགའ་ལ་ཡང་གླེང་བར་མི་བྱའོ་ཞེས་ཟེར་ཞིང་དེ་ལྟར་བདག་ཉིད་ཀྱི་རྒྱུད་དུ་གཏོགས་པའི་ཚུལ་ཁྲིམས་དེ་ལ་དགེ་སློང་ཐམས་ཅད་དག་གིས་བརྗོད་པར་མི་བྱ་བ་
ཉིད་དུ་བྱེད་པའི་བྱེད་པ་དེ་མཐར་མི་གཏོང་ན་བཀའ་བློ་མི་བདེ་བའི་དགེ་འདུན་ལྷག་མར་འགྱུར་རོ། །དགེ་སློང་དག་གིས་ཞེས་སྨྲས་ན། དགེ་སློང་གང་དག་གིས་ཤེ་ན། ཕྱོགས་བཅུ་ན་གནས་པ་དེ་བཞིན་གཤེགས་པའི་དགེ་སློང་དག་སྟེ། དེ་དག་གིས་བདག་ཉིད་ལ་བརྗོད་པར་མི་བྱ་བར་བྱེད་པའོ། །ལྷག་པའི་ཚུལ་ཁྲིམས་ཞེས་བྱ་བས་ནི་འདིར་འདུལ་བའི་རྣམ་པ་ཐམས་ཅད་བསྟན་པ་ཡིན་ནོ། །དེ་ལྟ་བུ་ཡོངས་སུ་རྫོགས་པར་གྱུར་ན་བཀའ་བློ་མི་བདེ་བར་འགྱུར་གྱི། གཞན་གྱིས་ནི་མ་ཡིན་ནོ། །དགེ་སློང་དམིགས་ཀྱིས་བསལ་བ་དག་གཅིག་གིས་བརྗོད་པར་མི་བྱ་བར་བྱེད་པས་ནི་དེར་མི་འགྱུར་ཏེ། དགེ་སློང་ཇི་སྙེད་ཁ་ཅིག་གི་རྒྱུད་དུ་གཏོགས་པ་དག་གིས་བརྗོད་པར་མི་བྱ་བར་བྱེད་པའི་ཚིག་གིས་ནི་ཉེས་བྱས་སུ་འགྱུར་བར་རིག་པར་བྱའོ། །བསླབ་པའི་གཞི་དམིགས་ཀྱིས་བསལ་བ་ཁ་ཅིག་གིས་བདག་ལ་བརྗོད་པར་མི་བྱ་བར་བྱེད་ན་ཡང་ཉེས་བྱས་ཁོ་ནའོ། །བཀའ་བློ་མི་བདེ་བའི་དགེ་འདུན་ལྷག་མའོ་ཞེས་བྱ་བ་དེ་རྫོགས་སོ། །དགེ་འདུན་ལྷག་མ་རྣམས་རྫོགས་སོ་ཞེས་བྱ་བ་དགེ་འདུན་ལྷག་མ་བཅུ་གསུམ་བཤད་ཟིན་ཏོ།། །།སྤང་བའི་ལྟུང་བྱེད་རྣམས་བརྗོད་པར་འདོད་ནས། དང་པོ་ཁོ་ནར་འཆང་བ་དང༌། འབྲལ་བ་ལ་སོགས་པའི་བསླབ་པའི་གཞི་རྣམས་ཀྱི་ཐུན་མོང་གི་མཚན་ཉིད་རྣམ་པར་གཞག་པ་བསྟན་པའི་ཕྱིར། ཉིན་མཚན་གྱི་དང་པོ་མ་ཡིན་པ་ལ་ཐ་མ་མ་ཡིན་པ་མེད་པ་ཉིད་དོ་ཞེས་བྱ་བ་སྨྲས་ཏེ། མདོ་འདི་དང་འོག་མ་གཉིས་ཀྱང་ཐུན་མོང་གི་མཚན་ཉིད་ཁོ་ན་ཡིན་ནོ། །ཉིན་མཚན་གང་ལ་ཉིན་མཚན་གྱི་དང་པོ་མེད་པ་དེ་ནི་ཉིན་མཚན་གྱི་དང་པོ་མ་ཡིན་པ་སྟེ། མཐའི་སྐད་ཅིག་མའོ། །མཐའི་སྐད་ཅིག་མ་ཞེས་བྱ་བའི་ཉིན་མཚན་དེ་ལ་སྐད་ཅིག་མ་གཅིག་མ་གཏོགས་པ་ཐ་མ་མ་ཡིན་པ་ཐུན་ཚོད་བཅུ་ཞེས་བྱ་བའི་ཉིན་མཚན་མེད་པ་ཉིད་དོ། །འདི་སྐད་བསྟན་ཏེ། ཞག་བཅུ་འདས་པ་དང༌། ཟླ་བ་གཅིག་འདས་པ་དང༌། ཞག་དྲུག་འདས་པ་དང༌། ཞག་བདུན་འདས་པ་ལ་ཡང་ཉིན་མཚན་དང་པོའི་མཐར་གྱུར་པའི་སྐད་ཅིག་མ་གང་ཡིན་པ་དེ་ཁོ་ན་ལ་ཉིན་མཚན་ཞེས་བྱ་བའི་མིང་འཐོབ་པས་སྤང་བ་ལ་ཡང་དེ་ཉིད་ཡན་ལག་ཏུ་གྱུར་པ་ཡིན་པར་རིག་པར་བྱའོ། །སྐད་ཅིག་མ་ལྷག་མ་ཐུན་བཅུའི་ཁོངས་སུ་
གཏོགས་པ་རྣམས་ནི་སྤང་བ་རྣམ་པར་གཞག་པའི་ཡན་ལག་ཉིད་མ་ཡིན་ནོ། །འདིར་ལུང་ནི་འཆང་བའི་བསླབ་པའི་གཞི་ལས་དགེ་སློང་གིས་ཚེས་ལ་ཆོས་གོས་རྙེད་དམ། ཚེས་ལ་ལྷུང་བཟེད་རྙེད་ན་ཞེས་གསུངས་པས། ཚེས་དེའི་དང་པོ་ཐུན་ཚོད་ངེས་པར་མ་སྨོས་པར་ཚེས་བཅུ་གཅིག་གི་ཉིན་པར་སྐྱ་རེངས་ཤར་ན་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །གལ་ཏེ་མཐའི་སྐད་ཅིག་མ་མ་གཏོགས་པའི་སྐད་ཅིག་མ་ལྷག་མ་རྣམས་ཀྱང་ཡན་ལག་ཉིད་ཡིན་པར་གྱུར་ན་ནི་དེའི་ཚེ་ན་འདི་སྐད་ཅེས་ཚེས་ཀྱི་སྔ་དྲོ་ནས་ཚེས་བཅུ་གཅིག་གི་སྔ་དྲོས་སོ་ཞེ་འམ། དེ་བཞིན་དུ་ཚེས་ཀྱི་གུང་ཚིགས་སམ། ཕྱི་དྲོ་ནས་ཚེས་བཅུ་གཅིག་གི་གུར་ཚིགས་སམ། ཕྱི་དྲོ་ལ་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པར་འགྱུར་བ་ཞིག་ན་དེ་སྐད་མ་གསུངས་ཏེ། དེ་བས་ན་ཉིན་མཚན་དང་པོའི་ཐུན་ཚོད་ཀྱི་ཚིགས་ནི་ངེས་པ་མེད་དེ། ཉིན་མཚན་དང་པོ་དེ་ཉིད་ཀྱི་མཐའི་སྐད་ཅིག་མ་གཅིག་ལ་ཉིན་མཚན་ཞེས་བྱ་བའི་མིང་འཐོབ་བོ། །དེས་ན་མཐའི་སྐད་ཅིག་མ་དེ་ཉིད་མ་གཏོགས་པ་དེའི་ལྷག་མ་ཐུན་བཅུ་པོ་དག་གི་སྐད་ཅིག་མ་གཞན་ནི་འདིར་སྤང་བའི་ཡན་ལག་ཉིད་མ་ཡིན་གྱི། མཐའི་སྐད་ཅིག་མ་གཅིག་པོ་དེ་ཉིན་མཚན་དང་པོ་གཅིག་ཏུ་བརྩིས་ཏེ། དེ་ཚུན་ཆད་ནས་ཉིད་ཞག་བརྩི་ཞིང་ཞག་བཅུའམ། ཟླ་བ་གཅིག་གམ། ཞག་དྲུག་གམ། ཞག་བདུན་འདས་ན་སྤང་བར་འགྱུར་བ་ཅི་རིགས་པར་སྦྱར་བར་རིག་པར་བྱའོ། །གནས་པ་ལ་ནི་སྦྱོར་བའི་སྣོད་ཉིད་དོ་ཞེས་བྱ་བ་ནི། གནས་པ་ལ་ཞེས་བྱ་བ་གནས་པ་དང་འབྲེལ་པའི་བསླབ་པའི་གཞི་ལ་ནི་མཐའི་སྐད་ཅིག་མ་གཅིག་གི་ལྷག་མ་སྔ་མ་རྣམས་སྦྱོར་བའི་སྣོད་ཉིད་དེ། ཉེས་བྱས་སུ་འགྱུར་རོ་ཞེས་བྱ་བར་སྦྱར་རོ། །འདི་ལྟ་སྟེ་བསྙེན་པར་མ་རྫོགས་པ་དང༌། ལྷན་ཅིག་གནས་པ་དང༌། བསྙེན་པར་རྫོགས་ན་ཡང་ལྟ་བ་མི་གཏོང་བ་དང༌། ལྷན་ཅིག་གནས་པ་དང༌། དགེ་ཚུལ་བསྙིལ་བ་དང༌། མཚན་མི་མཐུན་པ་དང༌། གནས་གཅིག་ན་ལྷན་ཅིག་ཉལ་བ་དང༌། མར་མེ་དང་བཅས་པར་ཉལ་བ་དང༌། དམག་གི་ནང་ན་གནས་པ་ལ་མཐའི་སྐད་ཅིག་མ་མ་ཡིན་པའི་དུས་རྣམས་ཀྱང་མེད་པ་ཉིད་མ་ཡིན་ཏེ། སྦྱོར་བའི་སྣོད་ཉིད་ཡིན་པའི་ཕྱིར་རོ། །འདི་སྐད་བསྟན་ཏེ། བསྙེན་པར་མ་
རྫོགས་པ་དང་ལྷན་ཅིག་ཉལ་བ་ལ་སོགས་པའི་བསླབ་པའི་གཞི་རྣམས་དང༌། དམག་གི་ནང་ན་གནས་པའི་བསླབ་པའི་གཞི་ལ་མཐའི་སྐད་ཅིག་མ་མ་གཏོགས་པའི་ཉིན་མཚན་གྱི་དུས་ཀྱི་ཆ་ཡང་སྦྱོར་བའི་སྣོད་ཉིད་ཡིན་ཏེ། ཉེས་བྱས་ཉིད་ཡིན་པས་ཉེས་པ་མེད་པ་མ་ཡིན་ནོ། ཞེས་བྱ་བའི་ཐ་ཚིག་གོ །དམག་གི་ནང་ན་གནས་པ་མ་གཏོགས་པ་གནས་པའི་བསླབ་པའི་གཞི་གཞན་དག་ལ་ནི་མཚན་མོར་གཏོགས་པའི་དུས་ཁོ་ན་སྦྱོར་བའི་སྣོད་ཉིད་ཡིན་གྱི། ཉིན་པར་གནས་པ་ནི་མ་ཡིན་ནོ། །དེ་དག་གིས་དེ་མཚན་མོ་གསུམ་པ་ལ་འདྲོན་པ་དག་གི་ཕྱི་རོལ་དུ་དགར་བར་བྱའོ་ཞེས་གསུངས་པ་ལས་མཚན་མོ་ཞེས་སྨོས་པའི་ཕྱིར་རོ། །དམག་གི་ནང་ན་གནས་པ་ལ་ནི་ཉིན་པར་གནས་ན་ཡང་སྦྱོར་བའི་སྣོད་ཉིད་ཀྱི་རྒྱུའི་དངོས་པོར་འགྱུར་ཏེ། དེར་གནས་པ་ཙམ་ཉིད་ཉེས་པར་འགྱུར་བ་ཡིན་པའི་ཕྱིར་རོ། །ཉིན་མཚན་གྱི་དང་པོ་སྨྲ་བར་འདོད་ནས། དེའི་དང་པོ་ནི་སྐྱ་རེངས་དང་པོ་དེའི་འོ་ཞེས་བྱ་བ་སྨྲས་ཏེ། ཉིན་མཚན་དེའི་དང་པོ་ནི། སྐྱ་རེངས་དང་པོ་དང༌། སྐྱ་རེངས་པར་མ་དང༌། སྐྱ་རེངས་ཐ་མ་དག་ལས་སྐྱ་རེངས་དང་པོ་དེའི་སྐད་ཅིག་མ་དང་པོར་གྱུར་པ་གང་ཡིན་པ་དེའོ། །མཚན་ཉིད་འདི་ནི་ཆོས་གོས་དང་འབྲལ་བ་ལ་སོགས་པ་དག་ལ་དགོས་ཏེ་ཉི་མ་བཅུ་གཅིག་གི་སྐྱ་རེངས་ཤར་ནའོ་ཞེས་གསུངས་པའི་ཕྱིར་རོ། །མཚན་ཉིད་འདིའི་དམིགས་ཀྱིས་བསལ་བ་བསྟན་པའི་ཕྱིར། ལས་ལ་ནི་འདས་ན་ཉི་མ་ཤར་བའི་འོ་ཞེས་བྱ་བ་སྨྲས་ཏེ། གསོ་སྦྱོང་དང་དགག་དབྱེ་ལ་སོགས་པ་ཚེས་གྲངས་ཀྱི་བྱེ་བྲག་དང་འབྲེལ་པའི་ལས་དག་ལ་ནི་དུས་འདས་ཤིང་ཡོལ་བར་གྱུར་ན། ཉི་མ་ཤར་བའི་སྐད་ཅིག་མ་དེའི་དང་པོར་གྱུར་པ་གང་ཡིན་པ་དེ་ཉིན་མཚན་གྱི་དང་པོ་ཡིན་ནོ། །འདི་སྐད་བསྟན་ཏེ། ཚེས་ཞེས་བྱ་བའི་སྐྱ་རེངས་ཤར་དུ་ཟིན་ཀྱང་ཇི་སྲིད་དུ་ཉི་མ་ཤར་བར་མ་གྱུར་ན་དེའི་ཚེ་གསོ་སྦྱོང་ལ་སོགས་པའི་ལས་བྱའོ། །འདིར་གཞུང་ནི་ཞུ་བ་ལས་བཙུན་པར་ཞིག་དགེ་སློང་དག་གིས་སྐྱ་རེངས་ཤར་བ་ན་བདག་ཅག་གིས་གསོ་སྦྱོར་མ་བྱས་སོ་སྙམ་དུ་དྲན་པ་སླར་རྙེད་པར་གྱུར་ནས་དེ་དག་དེའི་ཚེ་ན་གསོ་སྦྱོང་བགྱིད་ཅིང་སོ་སོལ་ཐར་པ་འདོན་པར་བགྱིད་ན་དགེ་འདུན་གྱིས་གསོ་སྦྱོང་
བགྱིས་པ་དང༌། སོ་སོར་ཐར་པ་བཏོན་པ་ཞེས་བགྱིའམ། ཉེ་བ་འཁོར་དགེ་འདུན་དག་གིས་གསོ་སྦྱོང་བྱས་པ་དང༌། སོ་སོར་ཐར་པ་བཏོན་ཞེས་བྱའོ་ཞེས་གསུངས་པ་ཡིན་ནོ། །སྤང་བ་ལ་ནི་འདུ་ཤེས་ལས་གཙོ་ཆེར་རང་གི་ཉིད་དོ་ཞེས་བྱ་བ་ནི་སྤང་བའི་དངོས་པོ་ལ་ནི་འདུ་ཤེས་ལས་གཙོ་ཆེར་རང་གི་ཉིད་ཡིན་གྱི། གཞན་གྱི་དངོས་པོ་ལས་ནི་མ་ཡིན་ནོ། །མ་བྱིན་པར་ལེན་པ་དང༌། ཤི་བའི་ཡོ་བྱད་གཉིས་ནི་དངོས་པོ་ལས་གཙོ་ཆེར་རང་གི་ཉིད་ཡིན་གྱི། འདུ་ཤེས་ལས་ནི་མ་ཡིན་ནོ། །འདིར་གཞུང་ནི་ཀོ་ལྤགས་ཀྱི་གཞི་ལས་དགེ་སློང་གིས་དགེ་སློང་ལ་ཆོས་གོས་དག་བསྐུར་ཞིང་འདི་ནས་བཏང་པ་དེར་མ་ཕྱིན་པ་དག་ལ་ནི་གང་ལ་ཡང་སྤང་བར་མི་འགྱུར་རོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། འདི་ལྟར་ཆོས་གོས་ལ་སོགས་པ་བསྐུར་བ་དེ་ཐག་རིང་པོ་ན་གནས་པའི་དགེ་སློང་དེ་དབང་བར་བྱས་སུ་ཟིན་ཀྱང་དངོས་པོ་དེ་ལ་དགེ་སློང་དེ་རང་གི་ཉིད་ཡིན་པའི་འདུ་ཤེས་མེད་པས་དེས་ན་སྤང་བར་མི་འགྱུར་རོ། །གལ་ཏེ་བརྐུས་པའི་དངོས་པོ་དེ་ཉིད་ལ་ལས་བསྐུར་ན་ཡང་གང་ལ་བསྐུར་བ་དེ་ལས་བསྐུས་པར་མི་འགྱུར་གྱི། གང་གིས་བསྐུར་བ་དེ་ལས་བརྐུས་པ་ཡིན་ནོ། །དེ་བཞིན་དུ་གལ་ཏེ་དགེ་སློང་ཡང་དག་པར་བྱིན་པའི་འདུ་ཤེས་ཅན་གྱིས་བསྐུར་བའི་དངོས་པོ་དེ་མ་ཐོབ་པ་དེ་ཁོ་ནར་ཤིའམ། སྐུར་བར་བྱེད་པ་དང་གཉི་ག་ཤི་བར་གྱུར་ན་དེ་ལྟ་ན་ཡང་དངོས་པོ་དེ་སྐུར་བར་བྱེད་པའི་ཤི་བའི་ཡོ་བྱད་ཁོ་ན་ཡིན་པར་རིག་པར་བྱའོ། །ཡང་དག་པར་བྱིན་པ་ནི་མ་ཡིན་ཏེ། དེ་ལ་ནི་དངོས་པོ་ལས་རྣམ་པར་གཞག་གི །འདུ་ཤེས་ལ་ནི་མ་ཡིན་ནོ། །དེ་ལྟར་ན་འདུ་ཤེས་ཡོད་པ་ཉིད་ལ་ནི་དངོས་གཞིར་འགྱུར་ལ། འདུ་ཤེས་མེད་པ་ཉིད་ལ་ནི་ལྟུང་བར་མི་འགྱུར་རོ། །དེ་ལས་ཀྱང་རང་གི་མ་ཡིན་པ་ལ་རང་གིར་འདུ་ཤེས་པ་ནི་ཉེས་བྱས་སོ། །རང་གི་ལ་ཡིད་གཉིས་ཟ་བ་ནི་སྤང་བར་འགྱུར་ཏེ། དོན་ཇི་ལྟ་བ་ཉིད་ལ་ནི་དངོས་གཞིའོ། །དོན་ཇི་ལྟ་བ་ཉིད་མ་ཡིན་པ་ལ་ནི་དངོས་གཞི་མ་ཡིན་ནོ་ཞེས་གསུངས་པའི་ཕྱིར་རོ། །རང་གི་མ་ཡིན་པ་ལ་ཡིད་གཉིས་ཟ་བ་ལ་ནི་ཉེས་བྱས་ཏེ། ཡིད་གཉིས་ནི་འདུ་ཤེས་དང་འདྲའོ་ཞེས་གསུངས་པའི་ཕྱིར་རོ། །དེ་ནི་བསྔོས་པ་ཉིད་ན་བྲལ་བ་ཉིད་དོ་ཞེས་བྱ་བ་ནི། སྤང་བར་
འགྱུར་བ་རང་གི་ཉིད་གང་ཡིན་པ་དེ་ནི་སེམས་ཀྱིས་ཡོངས་སུ་བཏང་སྟེ། བསྔོས་པ་ཉིད་ན་བྱིན་གྱིས་མ་བརླབས་སམ་རྣམ་པར་མ་བརྟགས་སུ་ཟིན་ཀྱང་རང་གི་ཉིད་དང་བྲལ་བ་ཉིད་དེ། རང་གི་ཉིད་མ་ཡིན་ནོ། །འདི་སྐད་བསྟན་ཏེ། དགེ་སློང་གིས་ཆོས་གོས་ལ་སོགས་པ་དག་དགེ་འདུན་ལའམ་གང་ཟག་ལའམ་གཞན་ལ་སྔོ་བར་བྱེད་ན། གང་ལ་སྔོ་བར་བྱེད་པ་དེས་དེ་ཤེས་ཀྱང་རུང་མི་ཤེས་ཀྱང་རུང༌། དེའི་གན་དུ་བསྐུར་ཡང་རུང་མ་བསྐུར་ཡང་རུང་སྟེ། རང་གི་ཉིད་དང་བྲལ་བའི་ཕྱིར་བྱིན་གྱིས་མ་བརླབས་སམ་རྣམ་པར་མ་བརྟགས་ཀྱང་སྤང་བར་བྱ་བར་མི་འགྱུར་རོ། །འདིར་གཞུང་ནི་ཀོ་ལྤགས་ཀྱི་གཞི་ལས་གང་གིས་གོས་བསྐུར་བ་དེ་ལ་སྤང་བ་འབྱུང་བར་མི་འགྱུར་རོ་ཞེས་གསུངས་པ་གང་ཡིན་པ་དེ་ཉིད་ཡིན་ནོ། །ཤི་བའི་ཡོ་བྱད་ལ་ནི་དངོས་པོ་ལས་རྣམ་པར་གཞག་གི །འདུ་ཤེས་ལས་ནི་མ་ཡིན་ཏེ། དེ་ལྟར་ཡང་འདིར་གཞུང་ནི་དགེ་སློང་གིས་དགེ་སློང་ལ་ཆོས་གོས་དག་བསྐུར་བ་གང་གིས་བསྐུར་བ་དེས་ཀྱང་སྤངས་པར་གྱུར། གང་ལ་བསྐུར་བ་དེས་ཀྱང་སྤངས་པར་གྱུར་ན་དེ་ལ་དེ་དག་གང་ལ་བསྐུར་བ་དེ་ལ་བྱིན་གྱིས་རློབ་པར་བྱེད་ན་ནི་བྱིན་གྱིས་མ་བརླབས་པ་ཡིན་ནོ། །གང་གིས་བསྐུར་བ་དེ་ལ་བྱིན་གྱིས་རློབ་པར་བྱེད་ན་ནི་བྱིན་གྱིས་བརླབས་པ་ཡིན་ཏེ། ལེགས་པར་བྱིན་གྱིས་བརླབས་པ་ཡིན་ནོ་ཞེས་གསུངས་པ་ཡིན་ནོ། །དེ་ལྟ་བས་ན་རྫས་དེ་གང་གིས་བསྒྲུབས་པ་དེ་ཉིད་ཀྱི་ཤི་བའི་ཡོ་བྱད་དུ་རྣམ་པར་གཞག་གི །གང་ལ་བསྔོས་པ་དེའི་ནི་མ་ཡིན་ནོ། །རབ་ཏུ་བྱུང་བའི་དོན་དུ་ངེས་པར་བྱས་པ་ཡང་དེ་ཉིད་དོ་ཞེས་བྱ་བ་ནི། རབ་ཏུ་འབྱུང་བའི་རྒྱུར་ངེས་པར་བྱས། རྣམ་པར་གཞག་པ་ངེས་པར་བསྔོས་པ་ཡང་དེ་ཉིད་དེ་བསྔོས་པ་ཉིད་ཡིན་པའོ། །འདིར་གཞུང་ནི་རབ་ཏུ་འབྱུང་བའི་དོན་དུ་སྲེལ་བར་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ཡང་འདི་ལྟར་ལྟུང་བཟེད་ལ་གསུངས་མོད་ཀྱི། འོན་ཀྱང་ཆོས་གོས་ལ་སོགས་པ་དག་ལ་ཡང་རུང་བས་སྤྱིར་བསྟན་ཏོ། །ཆོས་གོས་ལས་ཀྱང་རྣམ་པར་བརྟགས་ནའོ་ཞེས་བྱ་བ་ལ། ཀྱང་ཞེས་བྱ་བས་ནི་རྣམ་པར་བརྟགས་པའི་བསྔོ་བ་བྱས་ན་ཆོས་གོས་ལས་ཀྱང་རང་གི་ཉིད་དང་འབྲལ་བར་སྟོན་ཏོ། །
རྣམ་པར་བརྟགས་པ་ཞེས་བྱ་བ་ནི། ཚེ་དང་ལྡན་པ་དགོངས་སུ་གསོལ། །བདག་མིང་འདི་ཞེས་བགྱི་བའི་གོས་ལྷག་པ་རྣམ་པར་མ་བརྟགས་པ་རྣམ་པར་བརྟག་པར་འོས་པ་འདི་མཁན་པོའི་ལགས་པར་རྣམ་པར་བརྟག་པར་བགྱིའོ། །མཁན་པོ་ལ་ཡིད་བརྟན་ཏེ་བཅང་བར་བགྱིའོ། །རྐྱེན་ཇི་ལྟ་བ་བཞིན་དུ་བགྱིའོ་ཞེས་བྱ་བའི་སྔགས་ཀྱིས་ལན་གསུམ་རྣམ་པར་བརྟགས་པ་ཡིན་པར་རིག་པར་བྱའོ། །མཁན་པོ་ལས་གཞན་པ་ཞིག་ལ་རྣམ་པར་བརྟགས་ན་ཡང་ཆེ་གེ་མོ་ཞེས་བྱ་བར་མིང་བརྗོད་པར་བྱའོ།། །།བམ་པོ་བཅུ་དྲུག་པ། འདི་ལ་རྗེས་སུ་ཞུགས་པ་ཉིད་ཀྱང་ཉམས་པ་ཡིན་ནོ་ཞེས་བྱ་བ་ནི། རང་གི་ཉིད་ཅེས་བྱ་བའི་ལྟུང་བ་འདི་ལ་བསྔོས་པ་ཉིད་དང་རྣམ་པར་བརྟགས་པ་ཉིད་ཀྱི་ཐབས་ཀྱིས་ནི་རང་གི་ཉིད་ཀྱི་རྗེས་སུ་ཞུགས་པ་ཉིད་ཅེས་བྱ་བ་རྒྱུན་འབྲེལ་པ་ཉིད་ཀྱང་ཉམས་པ་ཡིན་པར་རིག་པར་བྱའི། རང་གི་ཉིད་འབའ་ཞིག་ཉམས་པར་མ་ཟད་དོ། །འདི་སྐད་བསྟན་ཏེ། གལ་ཏེ་དགེ་སློང་གིས་ཚེས་ལ་ཆོས་གོས་རྙེད་ལ། ཚེས་ལྔའི་ཉིན་པར་ཆོས་གོས་དེ་རྣམ་པར་རྟོག་པར་བྱེད་དམ་སྟོ་བར་བྱེད་ན། ཕྱིས་དེའི་ཉིན་མོ་ཉིད་ལ་ཆོས་གོས་གཞན་ཞིག་རྙེད་ཀྱང༌། སྔ་མའི་ཤན་དེས་ཤན་འདྲེས་པར་མི་འགྱུར་ཏེ། རྗེས་སུ་ཞུགས་པ་ཉིད་ཉམས་པའི་ཕྱིར་རོ། །རང་བཞིན་ལས་ཉམས་པ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲ་ནི་རྗེས་སུ་ཞུགས་པ་ཉིད་ཉམས་པ་ཉིད་དེ་ཞེས་བྱ་བའི་རྗེས་བསྙེགས་པའི་ཕྱིར་རོ། །རང་བཞིན་ལས་ཞེས་བྱ་བ་ནི། །ངོ་བོ་ཉིད་ལས་སོ། །ཉམས་ན་ཞེས་བྱ་བ་ནི་སེམས་རྣམ་པར་འཁྲུགས་ན་སྟེ། དེའི་ཚེ་ན་ཡང་རང་གི་ཉིད་ཀྱི་རྗེས་སུ་ཞུགས་པ་ཉིད་ཉམས་པར་རིག་པར་བྱའོ། །འདི་སྐད་བསྟན་ཏེ། དགེ་སློང་རང་ཉིད་སེམས་རྣམ་པར་འཁྲུགས་པ་ལ་སོགས་པས་རང་བཞིན་ཐ་མལ་པའི་ངོ་བོ་ཉིད་ལས་ཉམས་པར་གྱུར་ན་ཡང༌། དེའི་ཚེ་ཡང་རང་གི་ཉིད་ཀྱི་རྗེས་སུ་མཐུན་པའི་རྒྱུན་འབྲེལ་བ་ཉམས་པ་ཡིན་པས་སྔར་རང་བཞིན་ལས་མ་ཉམས་པའི་རྗེས་སུ་མཐུན་པའི་ཤན་དེས་ཕྱིས་རང་གི་སེམས་ཕྱིར་རྙེད་པའི་གནས་སྐབས་ཀྱི་རང་གི་ཉིད་ལ་ཤན་འདྲེས་པར་མི་འགྱུར་རོ། །འདིར་གཞུང་ནི་ཉེ་བ་འཁོར་གྱིས་ཞུས་པ་ལས། བཙུན་པ་དགེ་སློང་གིས་ཆོས་གོས་
རྙེད་ནས་དགུང་ལྔ་ལགས་ན། སེམས་རྣམ་པར་འཁྲུགས་པར་གྱུར་ན། དེའི་དགུང་བཅུ་པོ་སླད་མ་གང་ཚུན་ཆད་ནས་བགྲང་བར་བགྱི། ཉེ་བ་འཁོར་གང་ཚུན་ཆད་ནས་རང་གི་སེམས་ཕྱིར་རྙེད་པ་ནས་སོ་ཞེས་གསུངས་པ་ཡིན་ནོ། །ཞག་ལྔ་པོ་སྔ་མ་དག་མི་བགྲང་བ་ལས་ན། རྗེས་སུ་ཞུགས་པའི་རྒྱུན་འབྲེལ་པ་ཉམས་པར་མངོན་ཏེ། སེམས་རྣམ་པར་འཁྲུགས་པའི་ཕྱིར་རོ། །དེ་ཡོད་ན་དངོས་པོ་དེ་ལྟ་བུ་གཞན་ལ་ཡང་འབྱུང་བ་ཉིད་དོ་ཞེས་བྱ་བ་ནི། རྗེ་སུ་ཞུགས་པ་ཉིད་དེ། ཡོད་ཅིང་མེད་པ་མ་ཡིན་ན་ཕྱིས་རྙེད་པའི་དངོས་པོ་དེ་ལྟ་བུ་གཞན་ལ་ཡང་འབྱུང་བ་ཉིད་དོ། །དངོས་པོ་དེ་ལྟ་བུ་ཞེས་བྱ་བ་ཁྱད་པར་ཇི་ལྟ་བུ་ཅན་ཞིག་ཅེ་ན། དངོས་པོ་གང་ལ་རྗེ་སུ་མཐུན་པ་ཉིད་དེ་ཡོད་པ་དེ་ལྟ་བུའི་དངོས་པོ་ལ་སྟེ། འདི་ལྟ་སྟེ་ཆོས་གོས་ཞག་བཅུ་པར་གཏོགས་པའི་ནི་ཞག་བཅུ་པ་ལས་འབྱུང་བ་ཉིད་དོ། །ཟླ་བ་གཅིག་པར་གཏོགས་པའི་ནི་ཟླ་བ་གཅིག་པ་ལའོ། །ལྟུང་བཟེད་དུ་གཏོགས་པའི་ནི་ལྷུང་བཟེད་ལའོ། །སྨན་ཞག་བདུན་པར་གཏོགས་པའི་ནི་སྨན་ཞག་བདུན་པ་ལ་འབྱུང་བ་འདི་ལྟ་བུའོ། །འདི་སྐད་བསྟན་ཏེ། ཆོས་གོས་སྔར་རྙེད་པ་ལ་རང་གི་ཉིད་ཀྱི་རྗེས་སུ་ཞུགས་པ་ཉིད་དེ་ཡོད་ན། ཆོས་གོས་ཕྱིས་རྙེད་པ་ལ་ཡང་རང་གི་ཉིད་ཀྱི་རྗེས་སུ་ཞུགས་པ་ཉིད་འབྱུང་པ་ཉིད་དུ་རིག་པར་བྱའོ། །དེ་བས་ན་ཆོས་གོས་སྔར་རྙེད་པ་དེ་ཉིད་དང༌། ལྷན་ཅིག་ཏུ་ཕྱིས་རྙེད་པའི་ཆོས་གོས་དེ་ཡང་ཞག་བཅུའི་ནང་རོལ་དེ་ཉིད་དུ་བྱིན་གྱིས་བརླབ་པར་བྱ་བའམ་སྤང་བར་བྱ་བ་ཡིན་གྱི། ཆོས་གོས་ཕྱིས་རྙེད་པ་དེའི་ཞག་བཅུར་བགྲང་པ་ལོགས་ཤིག་ཏུ་ནི་མི་བྱ་སྟེ། ཆོས་གོས་སྔར་རྙེད་པ་དེ་ཉིད་ཀྱི་ཤན་དེས། ཕྱིས་རྙེད་པ་དེ་ཡང་ཤན་འདྲེས་པར་འགྱུར་བར་བྱས་པའི་ཕྱིར་རོ། །འདིར་གཞུང་ནི་དགེ་སློང་གིས་ཚེས་ལ་ཆོས་གོས་ཤིག་རྙེད་ལ་དེས་ཚེས་གཉིས་ལ་ཆོས་གོས་གཞན་ཞིག་ཀྱང་རྙེད་པར་གྱུར་ན། དགེ་སློང་དེས་ཞག་བཅུ་པོ་དེ་ཉིད་ཀྱི་ནང་རོལ་དུ་སྔ་མ་ཤོས་བྱིན་གྱིས་བརླབ་པར་བྱ་ཞིང༌། ཕྱི་མ་ཤོས་གཞན་ལ་གཏང་པར་བྱ་བའམ། རྣམ་པར་བརྟག་པར་བྱ་བའམ། གཞན་ལ་སྦྱིན་པར་བྱའོ། །གཏོང་བར་མི་བྱེད་དམ། རྣམ་པར་རྟོག་པར་མི་བྱེད་དམ། གཞན་ལ་སྦྱིན་
པར་མི་བྱེད་ན་ཞག་བཅུ་གཅིག་པའི་སྐྱ་རེངས་ཤར་ན་ཡང་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །ཞག་བདུན་པའི་བྱེ་བྲག་བསྟན་པའི་ཕྱིར། ཞག་བདུན་པ་ལ་ནི་རིགས་མཐུན་པ་ལའོ་ཞེས་བྱ་བ་སྨྲས་ཏེ། ཞག་བདུན་པ་ལ་ནི་ཞེས་བྱ་བ་ནི་མར་དང་འབྲུ་མར་ལ་སོགས་པའི་རྫས་ཞག་བདུན་པ་ཉིད་དུ་བྱིན་གྱིས་བརླབས་པ་ལའོ། །རིགས་མཐུན་པ་ལའོ་ཞེས་བྱ་བ་ནི། ཕྱིས་རྙེད་པའི་རྫས་ཀྱི་རིགས་མཐུན་པ་རང་བཞིན་འདྲ་བ་ལ། རང་གི་ཉིད་ཀྱི་རྗེས་སུ་ཞུགས་པ་ཉིད་དེ་འབྱུང་བ་ཉིད་དུ་ཤེས་པར་བྱའོ། །དངོས་པོ་དེ་ལྟ་བུ་ཐམས་ཅད་ལ་འབྱུང་བ་ནི་མ་ཡིན་པ་སྟེ། འདི་ལྟ་སྟེ་རང་ཉིད་ཀྱི་རྗེས་སུ་ཞུགས་པ་ཉིད་མར་དུ་གཏོགས་པ་ནི་མར་ཕྱིས་རྙེད་པ་ལ་འབྱུང་བ་ཉིད་ཡིན་གྱི། འབྲུ་མར་ལ་སོགས་པ་དག་ལ་མི་འབྱུང་བ་དང༌། དེ་བཞིན་དུ་རང་གི་ཉིད་ཀྱི་རྗེས་སུ་ཞུགས་པ་ཉིད་འབྲུ་མར་ཕྱིས་རྙེད་པ་ལ་འབྱུང་བ་ཉིད་ཡིན་གྱི། མར་ལ་སོགས་པ་དག་ལ་མི་འབྱུང་བ་ལྟ་བུའོ། །འདིར་གཞུང་ནི་རྣམ་པར་འབྱེད་པ་ལས། དགེ་སློང་གིས་ཚེས་ལ་མར་རྙེད་ལ་དེས་ཚེས་གཉིས་ལ་གཞན་ཞིག་ཀྱང་རྙེད་པར་གྱུར་ན། དགེ་སློང་དེས་སྔ་མ་ཤོས་བཟའ་བར་བྱ་ཞིང༌། ཕྱི་མ་ཤོས་གཏོང་བར་བྱ་བའམ། རྣམ་པར་བརྟག་པར་བྱ་བའམ། གཞན་ལ་སྦྱིན་པར་བྱའོ། །གཏོང་བར་མི་བྱེད་དམ་རྣམ་པར་རྟོག་པར་མི་བྱེད་དམ། གཞན་ལ་སྦྱིན་པར་མི་བྱེད་ན་ཞག་བརྒྱད་པའི་སྐྱ་རེངས་ཤར་ན་སྤང་བཱ་ལྟུང་བྱེད་དོ་ཞེས་གསུངས་པ་ཡིན་ནོ། །ལྟུང་བདེ་ཡོད་ན་ཡོ་བྱད་ཙམ་བདག་གིར་བྱས་པ་ལ་སྤང་བ་ཉིད་དོ་ཞེས་བྱ་བ་ནི། འབྱུང་ངོ་ཞེ་བྱ་བར་སྦྱར་རོ། །ལྟུང་བ་དེ་ཡོད་ན་ཞེས་བྱ་བ་ནི། སྤང་པའི་ལྟུང་བྱེད་དེ་ཡོད་ནའོ། །ཡོད་བྱད་ཙམ་བདག་གིར་བྱས་པ་ལ་ཞེས་བྱ་བ་ནི། ཕྱིས་རིགས་མཐུན་པའམ། རིགས་མི་མཐུན་པའི་ཡོ་བྱད་ཙམ་བདག་གིར་བྱས་པ་ལའོ། །སྤང་བ་ཉིད་དོ་ཞེས་བྱ་བ་ནི། སྤང་བར་བྱ་དགོས་པ་ཉིད་འབྱུང་གི་ལྟུང་བ་ནི་མི་འབྱུང་བའོ། །འདི་སྐད་བསྟན་ཏེ། དགེ་སློང་གང་ལ་སྤང་བའི་ལྟུང་བྱེད་ཡོད་པའི་དགེ་སློང་དེས། གལ་ཏེ་ཕྱིས་རིགས་མཐུན་པའམ། རིགས་མི་མཐུན་པའི་ཡོ་བྱད་ཙམ་རྙེད་ན། དེའི་ཚེ་བཤགས་པའི་དུས་ན། དགེ་སློང་དེས་དེ་ཡང་སྤང་བར་བྱའོ། །དེའི་ཕྱིར་ལྟུང་བ་ནི་བཤགས་པར་བྱ་མི་དགོས་ཏེ། དེའི་གཞི་ལས་ལྟུང་བ་མ་
བྱུང་བའི་ཕྱིར་རོ། །འདིར་གཞུང་ནི་དགེ་སློང་གིས་ཆོས་གོས་སྤང་བ་མ་སྤངས་ཤིང་བྲལ་བར་མ་བྱས་ལ་ལྟུང་བ་དེ་ཡང་མ་བཤགས་པར་གཞན་ཞིག་རྙེད་ན་དེ་ཡང་སྤང་བ་ཡིན་ཏེ། སྔ་མའི་ཤུགས་ཀྱིས་སོ་ཞེས་བྱ་བ་ལ་སོགས་བ་གསུངས་པ་ཡིན་ནོ། །ཆུང་བ་ཉིད་ཀྱི་དུམ་བུ་དེ་ནི་མི་འགྱུར་རོ་ཞེས་བྱ་བ་ནི། ཁྲུ་གང་ཁོར་ཡུག་ལས་ཆུང་བ་ཉིད་ཀྱི་དུམ་བུ་དེ་ནི་སྤང་བ་ཉིད་དུ་མི་འགྱུར་རོ། །འདི་སྐད་བསྟན་ཏེ། སྤང་བར་བྱ་བའི་དངོས་པོ་དམ་དུམ་དུ་གྱུར་ན། བཤགས་པའི་དུས་ན་སྤང་བར་བྱ་མི་དགོས་ཏེ། ཁྲུ་གང་ཁོར་ཡུག་པས་ཆུང་བའི་ཕྱིར་དང་ཆུང་བ་ནི་སྤང་བར་འོས་པ་མ་ཡིན་པའི་ཕྱིར་རོ། །འདིར་གཞུང་ནི་ཉེ་བ་འཁོར་གྱིས་ཞུས་པ་ལས། བཙུན་པ་དགེ་སློང་གི་ཆོས་གོས་སྤང་བ་ཚིག་གམ། སྲོག་ཆགས་དག་དང་སྲིལ་དག་གིས་འཚལ་བར་གྱུར་ནས། དེ་ལ་དམ་དུམ་གང་དག་མཆིས་པ་དག་སྤང་བར་བགྱིའམ། ཉེ་བ་འཁོར་མི་བྱ་སྟེ། ལྟུང་བྱེད་འབའ་ཞིག་བཤགས་པར་བྱའོ་ཞེས་གསུངས་པ་དེ་འདིར་བསྡུས་བ་ཡིན་ནོ། །དགེ་འདུན་གྱི་ཡང་ངོ་ཞེས་བྱ་བ་ནི། དགེ་འདུན་མངའ་བའི་རྫས་རིས་སུ་མ་བཅད་པ་ཡང་སྤང་བར་མི་བྱ་བ་ཉིད་དོ། །དགེ་འདུན་མངའ་བའི་དངོས་པོ་ནི་རྣམ་པ་གཉིས་ཏེ། དགེ་འདུན་མངའ་བ་གང་ཟག་གི་བདག་ཉིད་དུ་རིས་སུ་བཅད་པ་དང༌། དགེ་འདུན་མངའ་བ་རིས་སུ་མ་བཅད་པའོ། །དེ་ལ་དགེ་འདུན་མངའ་བ་གང་ཟག་གི་བདག་ཉིད་དུ་རིས་སུ་བཅད་པའི་དངོས་པོ་ལ་ནི་འཆང་བ་དང༌། འབྲལ་བ་དང༌། འཇོག་པའི་རྒྱུས་སྤང་བའི་ལྟུང་བྱེད་དག་འབྱུང་སྟེ། དེ་ལ་ཐམས་ཅད་གང་ཟག་གི་དང་འདྲ་བར་བདག་གིར་བྱ་བ་འབྱུང་བའི་ཕྱིར་རོ། །དགེ་འདུན་མངའ་བའི་རིས་སུ་མ་བཅད་པ་ལ་ནི། གང་ཟག་གཞན་གྱི་དང་འདྲ་བར་བདག་གིར་བྱ་བ་མི་འབྱུང་བས་དེ་ལ་ནི་སྔར་བསྟན་པ་ཐམས་ཅད་མི་འབྱུང་ངོ༌། །གལ་ཏེ་དགེ་འདུན་མངའ་བ་རིས་སུ་མ་བཅད་པའི་ཆོས་གོས་གང་ཟག་འགའ་ཞིག་གིས་བྱིན་གྱིས་རློབ་པར་བྱེད་ཅིང༌། ཆོས་གོས་དེ་དང་འབྲལ་བར་བྱེད་ན་དེའི་ཚེ་ལྟུང་བྱེད་འབའ་ཞིག་བཤགས་པར་བྱའི། ཆོས་གོས་དེ་སྤང་བར་ནི་མི་བྱའོ། །འདིར་གཞུང་ནི་ཉེ་བ་འཁོར་གྱིས་ཞུས་པ་ལས། བཙུན་པ་དགེ་སློང་གིས་དགེ་འདུན་གྱི་ཆོས་གོས་བྱིན་གྱིས་བརླབས་ནས། མཚམས་ཀྱི་སླད་རོལ་དུ་དབྲལ་
བར་བགྱིད་ན། ཆོས་གོས་དང་བྲལ་ཞེས་བགྱིའམ། མ་བྲལ་ཞེས་བགྱི། བཀའ་སྩལ་པ། ཆོས་གོས་དང་བྲལ་ཞེས་བྱའོ། །ཆོས་གོས་དེ་སྤང་བར་བགྱི་འམ། ཉེ་བ་འཁོར་མི་བྱ་སྟེ། ལྟུང་བྱེད་འབའ་ཞིག་བཤགས་པར་བྱའོ་ཞེས་གསུངས་པ་ཡིན་ཏེ། དེའི་མ་ཡིན་པའི་ཕྱིར་ཏེ། དེ་ལ་དབྲལ་བར་བྱ་བ་མི་དགོས་སོ། །འདི་ལ་མེད་པ་དེ་ཉིད་གཙོ་བོའོ་ཞེས་བྱ་བ་ནི། སྤང་བར་བྱ་བ་འདི་ལ་དངོས་པོ་དེ་གང་ཟག་དེ་ལ་མི་བདོག་པ་ནི་མེད་པ་དེའོ། །དེའི་དངོས་པོ་ནི་མེད་པ་དེ་ཉིད་དོ། །དེ་ཉིད་སྤང་བ་དེ་ཉིད་ལ། གཙོ་བོ་ཡིན་གྱི། སྤང་བར་བྱ་བའི་རྫས་ནི་གཙོ་བོ་མ་ཡིན་ནོ། །དེ་བས་ན་ཚིག་པ་ལ་སོགས་པས། ཉམས་པའི་ཆོས་གོས་ལ་ནི་ལྟུང་བྱེད་འབའ་ཞིག་བཤགས་པར་བྱའོ། །འདིར་གཞུང་ནི་ཞུ་བ་ལས། བཙུན་པ་དགེ་སློང་གིས་ཆོས་གོས་སྤང་བ་ཉམས་པར་གྱུར་ན། ལྟུང་བྱེད་བཤགས་པར་བགྱིའམ། ཉེ་བ་འཁོར་ལྟུང་བྱེད་འབའ་ཞིག་བཤགས་པར་བྱའོ་ཞེས་གསུངས་པ་ཡིན་ནོ། །འདི་གསུམ་ནི་སྲ་བརྐྱང་བཏིང་བ་ལ་མི་འབྱུང་ངོ་ཞེས་བྱ་བ་ནི། འོག་ཁོ་ན་ནས་འབྱུང་བ་འཆང་བ་དང་འབྲལ་བ་དང༌། འཇོག་པ་ཞེས་བྱ་བའི་སྤང་བའི་ལྟུང་བྱེད་འདི་གསུམ་ནི། དགེ་སློང་སྲ་བརྐྱང་བཏིང་བ་ལ་མི་འབྱུང་ངོ༌། །གང་གིས་སྲ་བརྐྱང་བཏིང་བ་ལ་དེའི་སྲ་བརྐྱང་བཏིང་བ་སྟེ་དེ་ལའོ། །སྤང་བའི་ལྟུང་བྱེད་རྣམས་ཀྱི་ཐུན་མོང་གི་མཚན་ཉིད་བཤད་ཟིན་ཏོ།། །།ད་ནི་སོ་སོའི་སྐབས་བརྗོད་པར་བྱ་སྟེ། དེ་ལ་རེ་ཞིག་འཆང་བའི་སྤང་བའི་ལྟུང་བྱེད་ཀྱི་མཚན་ཉིད་བརྗོད་པར་འདོད་ནས་ཡོད་ནའོ་ཞེས་བྱ་བ་སྨྲས་ཏེ། བདོག་ནའོ། །སུའི་ཡོད་ཅེ་ན། དེའི་ཕྱིར་རང་གི་ཉིད་དོ་ཞེས་བྱ་བ་སྨྲས་ཏེ། བདག་ཉིད་ཀྱི་ཉིད་དོ། །རང་གི་ཉིད་ཐམས་ཅད་ཀྱང་ཡན་ལག་ཉིད་མ་ཡིན་ཏེ། འོ་ན་གང་ཞེ་ན་དེའི་ཕྱིར་ཞག་བཅུར་རྗེས་སུ་ཞུགས་པ་ཉིད་དོ་ཞེས་བྱ་བ་སྨྲས་ཏེ། གལ་ཏེ་དངོས་པོ་དེ་ཞག་བཅུར་བྱིན་གྱིས་མ་བརླབས་སམ། རྣམ་པར་མ་བརྟགས་པར་ངར་གི་ཉིད་ཀྱི་རྗེས་སུ་ཞུགས་པ་ཉིད་ཡིན་ནོ། །དུས་གང་གི་ཚེ་སྤང་བར་འགྱུར་ཞེ་ན། དེའི་ཕྱིར་གཞན་གྱིས། ཉི་མའི་དང་པོ་ལའོ་ཞེས་བྱ་བ་སྨྲས་ཏེ། སྔར་ཞག་བཅུར་རྗེས་སུ་ཞུགས་པ་ཉིད་ཅེས་སྨྲས་མ་ཐག་པ་གང་ཡིན་པ་དེ་ལས་གཞན་པའི་ཉི་མའི་དང་པོ་སྐྱ་རེངས་འཆང་བའི་སྐད་ཅིག་མ་དང་པོ་ལ་
སྤང་བར་འགྱུར་རོ། །འདི་སྐད་བསྟན་ཏེ། ཞག་བཅུར་རྒྱུན་མ་ཆད་པར་རྗེས་སུ་ཞུགས་པ་ཉིད་དུ་བདག་གིར་བྱས་པ་ཡོད་ན་ཞག་བཅུ་གཅིག་པའི་སྐྱ་རེངས་དང་པོ་འཆར་བའི་ཚེ་ན། འཆང་བའི་སྤང་བའི་ལྟུང་བྱེད་དུ་འགྱུར་རོ། །ཡུལ་གང་ལ་རང་གི་ཉིད་ཡོད་ན་སྤང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་གོས་ལའོ་ཞེས་བྱ་བ་སྨྲས་ཏེ། གོས་ལ་སྟེ། ལྷུང་བཟེད་དང་སྨན་ལ་མ་ཡིན་ནོ་ཞེས་བྱ་བའི་ཐ་ཚིག་གོ །གོས་ཐམས་ཅད་ལ་ཡང་མ་ཡིན་ཏེ། འདི་ལྟར་འཁོར་གསུམ་ཁེབས་པའི་མཐའི་ཚད་ལའོ་ཞེས་བྱ་བ་ལ། འཁོར་གསུམ་ཞེས་བྱ་བ་ནི། ལྟེ་བའི་དཀྱིལ་འཁོར་དང༌། པུས་མོའི་ལྷ་བའི་ཚིགས་གཉིས་སོ། །འཁོར་གསུམ་པོ་དེ་དག་ཆུབ་པར་ཁེབས་པའི་མཐར་གྱུར་པའི་ཁྱོན་གྱི་ཚད་གོས་གང་ལ་ཡོད་པ་གོས་རྣམ་པ་དེ་ལྟ་བུ་རང་གི་ཉིད་དུ་བདོག་པ་དེ་ལ་སྤང་བ་འབྱུང་ངོ༌། །གོས་རྣམ་པ་དེ་ལྟ་བུ་ལའང་ཐམས་ཅད་དུ་མ་ཡིན་ཏེ། འདི་ལྟར་བྱིན་གྱིས་བརླབས་པ་དང་མ་འབྲེལ་བ་ལའོ་ཞེས་བྱ་བ་ནི། རྣམ་པར་བརྟག་པ་ལ་སོགས་པའི་བྱིན་གྱིས་མ་བརླབས་པའི་གོས་ལའོ། །དེ་འབའ་ཞིག་ལ་ཡང་མ་ཡིན་ཏེ། གཞན་ཡང་འབྲེལ་ཀྱང་རྗེས་སུ་ཞུགས་པ་དང༌། བཅས་པ་ལའོ་ཞེས་བྱ་བ་ལ། འབྲེལ་ཀྱང་ཞེས་བྱ་བ་ནི། བྱིན་གྱིས་བརླབས་པ་དང་འབྲེལ་ཀྱང་ངོ༌། །རྗེས་སུ་ཞུགས་པ་དང་བཅས་ཏེ་ཞེས་བྱ་བ་ནི། རང་གི་ཉིད་ཀྱི་རྗེས་སུ་ཞུགས་པ་དང་བཅས་པའོ། །དེ་ལ་ཡང་སྤང་བ་འབྱུང་ངོ༌། །འདི་སྐད་བསྟན་ཏེ། གལ་ཏེ་གོས་དེ་བྱིན་གྱིས་བརླབས་པ་དང༌། འབྲེལ་པ་ཡིན་དུ་ཟིན་ཀྱང་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་ཡིན་ན་གོས་དེ་ལ་ཡང་སྤང་བ་འབྱུང་བ་ཁོ་ནར་འགྱུར་རོ། །རང་གི་ཉིད་ཀྱི་རྗེས་སུ་ཞུགས་པ་དང་བཅས་པའི་ཆོས་གོས་ནི་རྣམ་པ་གཉིས་ཏེ། རང་ཉིད་ལས་བྱུང་བ་དང་གཞན་ལས་བྱུང་བའོ། །དེ་ལ་འདིར་ནི་གཞན་ལས་བྱུང་བའི་གོས་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་གང་ཡིན་པའི་གོས་དེ་ལ་ནི་བྱིན་གྱིས་བརླབས་པ་དང་འབྲེལ་ཀྱང་སྤང་བར་འགྱུར་བར་བསྟན་ཏོ། །ད་ནི་བྱིན་གྱིས་བརླབས་པ་དང་འབྲེལ་བའི་གོས་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་དེའི་ཡུལ་བྱེ་བྲག་ཅན་བསྟན་པའི་ཕྱིར། འདི་ལ་གཞན་ཡོད་ན་བྱིན་གྱིས་མ་བརླབས་
པ་དེའི་ཤན་ཚུན་ཆད་ནས་སོ་ཞེས་བྱ་བ་སྨྲས་ཏེ། འདི་ལ་ཞེས་བྱ་བ་ནི། གཞན་གྱི་ཤན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་པ་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་འདི་ལའོ། །གཞན་ཡོད་ན་ཞེས་བྱ་བ་ནི། གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་བ་རང་གི་ཉིད་རྗེས་སུ་ཞུགས་པ་དེ་ལས་གཞན་པའི་གོས་སྔར་རྙེད་པ་བྱིན་གྱིས་མ་བརླབས་པར་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་ཡོད་ནའོ། །བྱིན་གྱིས་མ་བརླབས་པ་དེའི་ཞེས་བྱ་བ་ནི། སྔར་རྙེད་པ་བྱིན་གྱིས་མ་བརླབས་པར་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་དེའོ། །ཤན་ཚུན་ཆད་ནས་སོ་ཞེས་བྱ་བ་ནི། སྔར་རྙེད་པ་བྱིན་གྱིས་མ་བརླབས་པ་རང་གི་ཉིད་ཀྱི་རྗེས་སུ་ཞུགས་པ་དེའི་ཤན་ཚུན་ཆད་ནས་ཏེ། དེ་ཚུན་ཆད་ནས་བརྩམས་ཏེ། གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་པ་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་དེ་ལ་ཡང༌། སྔ་མ་ཤོས་ཀྱི་ཞག་བཅུར་བགྲང་བ་འདས་ན་སྤང་བ་ཉིད་འབྱུང་བར་འགྱུར་བའོ། །འདི་སྐད་བསྟན་ཏེ། གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་བ་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་དེ་ལ། དེ་ལས་གཞན་པའི་གོས་སྔར་རྙེད་པ་བྱིན་གྱིས་མ་བརླབས་པ་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་ཞིག་ཡོད་ན། དེ་བྱིན་གྱིས་མ་བརླབས་པའི་ཤན་ཞག་ཏུ་ཡོད་པ་ཚུན་ཆད་ནས་བགྲངས་ཏེ་ཞག་བཅུ་འདས་པའི་སྤང་བ་ལ་ཐུག་པ་ན། དེའི་ཤུགས་ཀྱིས་གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་བ་རང་གི་ཉིད་ཀྱི་རྗེས་སུ་ཞུགས་པ་དེ་ཡང་འཆང་བའི་སྤང་བ་ཁོ་ནར་འགྱུར་རོ། །འདིར་གཞན་ལས་བྱུང་བའི་གོས་ཕྱིས་རྙེད་པ་བྱིན་གྱིས་བརླབས་པ་དང་འབྲེལ་བ་རང་གི་ཉིད་ཀྱི་རྗེས་སུ་ཞུགས་པ་དང་བཅས་པ་དེ་ལ། སྔ་མ་ཤོས་ཀྱི་ཤན་གྱིས་ལྟུང་བ་འདི་རྣམ་པར་གཞག་གི །ཕྱི་མ་ཤོས་དེ་བདག་ཉིད་ལས་བྱུང་བ་ཡིན་ན་ནི་དེ་ལ་ལྟུང་བ་འདི་མེད་དོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་དགེ་སློང་གིས་ཉིན་མཚན་དུ་རིམ་གྱིས་ཆོས་གོས་གཉིས་ཤིག་བདག་གིར་བྱེད་ལ། ཆོས་གོས་སྔ་མ་ཤོས་བྱིན་གྱིས་རློབ་པར་བྱེད་ལ་བྱི་མ་ཤོས་ནི་བྱིན་གྱིས་རློབ་པར་མི་བྱེད་
ན། དེ་ལ་ནི་ཆོས་གོས་ཕྱི་མ་ཤོས་བདག་གིར་བྱས་པའི་ཉིན་མཚན་ཚུན་ཆད་ནས་ཞག་བཅུ་འདས་ན། འཆང་བའི་སྤང་བར་འགྱུར་གྱི། ཆོས་གོས་སྔ་མ་ཤོས་བྱིན་གྱིས་བརླབས་པའི་ཉིན་མཚན་ཚུན་ཆད་ནས་ནི་མ་ཡིན་ཏེ། བྱིན་གྱིས་བརླབས་བས་ན་དེའི་རང་གི་ཉིད་དང་བྲལ་བའི་ཕྱིར་དེ་སྤང་བར་མི་འགྱུར་རོ། །གང་ཕྱི་མ་ཤོས་བྱིན་གྱིས་རློབ་པར་བྱེད་ལ། སྔ་མ་ཤོས་མི་བྱེད་ན་ནི་དེ་ལ་ཆོས་གོས་སྔ་མ་ཤོས་བདག་གིར་བྱས་པའི་ཉིན་མཚན་ཚུན་ཆད་ནས་ཞག་བཅུ་འདས་ན། ཆོས་གོས་སྔ་མ་དང་ཕྱི་མ་གཉིས་ཀ་སྤང་བར་འགྱུར་ཏེ། རང་ཉིད་ཀྱི་རྒྱུད་དུ་གཏོགས་པ་སྔ་མ་ཤོས་ཤན་འདྲེས་པར་གྱུར་པའི་ཕྱིར་དེའི་ཤན་གྱིས་ཕྱི་མ་ཤོས་ཀྱང་ཤན་འདྲེས་པར་འགྱུར་རོ། །གང་གིས་ཉིན་གཅིག་ཁོ་ནར་དུས་གཅིག་ཏུ་ཆོས་གོས་གཉིས་བདག་གིར་བྱེད་ལ། ཆོས་གོས་གཅིག་ནི་བྱིན་གྱིས་རློབ་པར་བྱེད་ལ། ཅིག་ཤོས་ནི་མི་བྱེད་ན། དེ་ལ་ནི་ཆོས་གོས་དེ་གཉི་ག་ཞག་བཅུ་འདས་ན་སྤང་བ་ཁོ་ནར་འགྱུར་ཏེ། གཉི་ག་ཡང་ཉིན་གཅིག་ཁོ་ནར་བདག་གིར་བྱས་པའི་ཕྱིར་རོ། །སྔ་མའི་ཤན་གྱིས་དབང་གིས་ནི་ཕྱི་མ་ཡང་ཤན་འདྲེས་པར་འགྱུར་གྱི། ཕྱི་མའི་ཤན་གྱི་དབང་གིས་ནི་སྔ་མ་ཤན་འདྲེས་པར་མི་འགྱུར་བར་ཤེས་པར་བྱའོ། །འདིར་གཞུང་ནི་ཉེ་བ་འཁོར་གྱིས་ཞུས་པ་ལས། བཙུན་པ་དགེ་སློང་གི་ཆོས་གོས་དེ་ཉིད་ཞག་བཅུ་འདས་པ་ཡང་ལགས་ལ། དེ་ཉིད་ཞག་གཅིག་བྲལ་བ་ཡང་ལགས་པ་མ་མཆིས་སམ། ཉེ་བ་འཁོར་ཡོད་དེ་འདི་ལྟ་སྟེ་དགེ་སློང་གི་ཆོས་གོས་རྒྱུན་མ་ཆད་པར་རྒྱུན་འབྱུང་བཞིན་པ་ལས། ཞག་བཅུ་པ་ལ་ཆོས་གོས་ཤིག་རྙེད་ལ་དེ་བྱིན་གྱིས་བརླབས་ནས་མཚམས་ཀྱི་ཕྱི་རོལ་དུ་ཆོས་གོས་དེ་མེད་པར་སྐྱ་རེངས་འཆར་བར་བྱེད་ན་དེ་ལྟ་ན་ཆོས་གོས་དེ་ནི་དེ་ཉིད་ཞག་བཅུ་འདས་པ་ཡང་ཡིན་ལ། དེ་ཉིད་ཞག་གཅིག་བྲལ་བ་ཡང་ཡིན་ནོ་ཞེས་གསུངས་པ་ཡིན་ནོ། །གཞུང་དེ་ནི་མདོ་གཉིས་པོ་འབྲེལ་ཀྱང་རྗེས་སུ་ཞུགས་པ་དང་བཅས་པ་ལའོ་ཞེས་བྱ་བ་དང༌། འདི་ལ་གཞན་ཡོད་ན་བྱིན་གྱིས་མ་བརླབས་པ་དེའི་ཤན་ཚུན་ཆད་ནས་སོ་ཞེས་བྱ་བ་དེ་དག་གི་ཁུངས་ཡིན་ཏེ། དེ་ལ་མདོ་སྔ་མ་ཤོས་ཀྱི་ཁུངས་ནི་ལུང་ལས་ཆོས་གོས་རྒྱུན་མ་ཆད་པར་རྒྱུན་འབྱུང་བཞིན་བ་ལས་ཞེས་བྱ་བ་དང༌། དེས་ཆོས་གོས་དེ་བྱིན་
གྱིས་བརླབས་ནས་ཞེས་གསུངས་པ་ཡིན་ནོ། །མདོ་ཕྱི་མ་ཤོས་ཀྱི་ཁུངས་ནི་ལུང་ལས་ཞག་བཅུ་པ་ལ་ཆོས་གོས་ཤིག་རྙེད་ལ་ཞེས་བྱ་བ་དང༌། དེ་ལྟ་ན་ཆོས་གོས་དེ་ནི་དེ་ཉིད་ཞག་བཅུ་འདས་པ་ཡང་ཡིན་ལ། དེ་ཉིད་ཞག་གཅིག་བྲལ་བ་ཡང་ཡིན་ནོ་ཞེས་གསུངས་པ་ཡིན་ནོ། །འཆང་བའི་སྤང་པའོ་ཞེས་བྱ་བ་འཆང་བའི་སྤང་བའི་ལྟུང་བྱེད་རྫོགས་སོ།། །།ད་ནི་འབྲལ་བའི་སྤང་བ་བརྗོད་བར་འདོད་ནས་འབྲལ་བའི་ཞར་ལ་འོངས་པ་འདི་སྨྲས་ཏེ། གདིང་བ་དང་བྲལ་བ་ལ་ནི་ཉེས་པ་མེད་དོ་ཞེས་བྱ་བ་ནི། གདིང་བ་བྱིན་གྱིས་བརླབས་པ་དང་བྲལ་བ་གང་ཡིན་པ་དེ་ལ་ནི་ཉེས་པ་མེད་པར་རིག་པར་བྱའོ། །ཅི་དུས་ཐམས་ཅད་དུའམ་ཞེ་ན་དེའི་ཕྱིར། གལ་ཏེ་དེང་ཉིད་ཕྱིར་ལྡོག་ཅིང་གནས་པར་བྱའོ་སྙམ་པ་མེད་ན། གདིང་བ་བཞག་སྟེ་འགྲོ་བར་མི་བྱའོ་ཞེས་བྱ་བ་སྨྲས་ཏེ། གལ་ཏེ་དེང་ཉིད་ཕྱིར་ལྡོག་ཅིང༌། འདིར་གནས་པར་བྱའོ་སྙམ་པའི་བསམ་པ་མེད་ན། གདིང་བ་བཞག་སྟེ་གྲོང་གཞན་དུ་འགྲོ་བར་མི་བྱའོ། །གལ་ཏེ་བསམ་པ་དེས་སོང་བ་ན་བར་ཆད་ཀྱི་དབང་གིས་ཕྱིར་ལྡོག་པར་མི་ནུས་ན་དེའི་ཚེ་ཇི་ལྟར་བྱ་སྙམ་དུ་དོགས་པ་ལ། དེ་ལྟར་བསམས་ཏེ་སོང་ནས་དུས་མ་འབྱོར་ན་དེ་བརྙས་ཏེ་དེར་གནས་པར་བྱའོ་ཞེས་བྱ་བ་སྨྲས་ཏེ། དེ་ཉིད་ཕྱིར་ལྡོག་པར་བྱའོ་སྙམ་པ་དེ་ལྟར་བསམས་ཏེ། གདིང་བ་མེད་པར་གང་དུ་སོང་བ་དེ་ནས་ཕྱིར་ལྡོག་པའི་དུས་མ་འབྱོར་ན་གདིང་བ་དེ་བརྙས་ཏེ། དེ་ཉིད་དུ་གནས་པར་བྱའོ། །གལ་ཏེ་གདིང་བ་བརྙས་མ་ན་མ་རྙེད་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་མ་རྙེད་ན་བླ་གོས་བཞི་བལྟབ་ཏུ་བྱས་པའི་སྟེང་དུ་ཡང་ཡུན་རིང་དུ་མི་ཉལ་བར་རོ་ཞེས་བྱ་བ་སྨྲས་ཏེ། གདིང་བ་བརྙར་མ་རྙེད་ན་བླ་གོས་བཞི་བལྟབ་ཏུ་བྱས་པའི་སྟེང་དུ་ཉལ་བར་བྱའོ། །ཅི་མཚན་ཐོག་ཐག་དུའམ་ཞེ་ན་མ་ཡིན་ཏེ། ཡུན་རིང་དུ་མི་ཉལ་བར་རོ་ཞེས་བྱ་བ་སྨྲས་ཏེ། དགེ་སློང་དེས་ཡུན་རིང་དུ་མི་ཉལ་བར་མཚན་མོ་འདའ་བར་བྱའོ། །འདིར་གཞུང་ནི་ཕྲན་ཚེགས་ལས། དེ་ལྟ་བས་ན་དགེ་སློང་གིས་གདིང་བ་མེད་པར་འགྲོ་བར་མི་བྱའོ། །དགེ་སློང་ཁ་ཅིག་དེང་ཉིད་ཕྱིར་ལྡོག་གོ་སྙམ་པས་གདིང་བ་མེད་པར་གྲོང་གཞན་དུ་སོང་བ་དང༌། དེ་དག་ལ་གང་གིས་ནམ་སྲོས་པར་གྱུར་པ་དེ་ལྟ་བུའི་བྱ་བ་བྱུང་ནས། དེ་དག་བསླབ་པ་འདོད་པས་མཚན་མོ་ཡང་ཕྱིར་འོང་བར་བྱེད་པ་ན། དེ་དག་སེང་
གེ་ལ་སོགས་པའི་བགྲོད་པར་གྱུར་ཏོ། །དེ་ལྟ་བུའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་ལྟར་བསམས་ཏེ་དོང་བ་དག་དེར་ནམ་སྲོས་པར་གྱུར་ན་དེ་ཉིད་དུ་གནས་པར་བྱ་སྟེ། དེ་ལྟར་ཚངས་པ་མཚུངས་པར་སྤྱོད་པ་དག་ལས་གདིང་བ་བརྙས་ཏེ་ཉལ་བར་བྱའོ། །གལ་ཏེ་རྙེད་ན་དེ་ལྟ་ན་ལེགས། གལ་ཏེ་མ་རྙེད་ན་བླ་གོས་བཞི་བལྟབ་ཏུ་བྱས་ཏེ། བཏིང་ལ་ཡུན་ཐུང་དུ་ནི་ཉལ། ཡུན་རིང་དུ་ནི་མི་ཉལ་བར་མཚན་མོ་འདའ་བར་བྱའོ་ཞེས་གསུངས་པ་ཡིན་ནོ། །དེ་ལ་ལུང་དེ་ལས་འདི་ལྟར་དེ་ཉིད་དུ་གནས་པར་བྱ་སྟེ་ཞེས་གསུངས་པས། དེའི་ཕྱིར་གདིང་བ་དང་བྲལ་བ་ལ་ནི་ཉེས་པ་མེད་དོ་ཞེས་བྱ་བའི་མདོ་དེ་བྱས་སོ། །སྣམ་སྦྱར་བཞག་པར་མི་འོས་པའི་གནས་སུ་དབྱར་གྱི་རས་ཆེན་ཡང་གཞག་པར་མི་བྱའོ་ཞེས་བྱ་བ་ལ། སྣམ་སྦྱར་གྱི་བཞག་པ་ནི། སྣམ་སྦྱར་བཞག་པ་སྟེ། སྣམ་སྦྱར་བཞག་པར་མི་འོས་བར་བཞག་ཏུ་མི་རུང་བའི་གནས་དེར་དབྱར་གྱི་གོས་རས་ཆེན་ཡང་གཞག་པར་མི་བྱའོ། །གནས་གང་ན་དགེ་སློང་མེད་པ་དང་སྒོ་གླེགས་མེད་པ་གཉི་ག་འདོམ་པ་དེར་གཞག་པར་མི་བྱེའོ་ཞེས་བྱ་བའི་ཐ་ཚིག་གོ །གང་ཡང་རུང་བ་ཞིག་མེད་པར་བཞག་ན་ཉེས་བྱས་ཕྲ་མོར་འགྱུར་རོ། །ཆར་འབབ་ན་མི་བཞག་གོ་ཞེས་བྱ་བ་ནི། ཆར་འབབ་ན་དབྱར་གྱི་གོས་རས་ཆེན་མི་བཞག་སྟེ། དེ་ནི་དེ་བསྐྱབ་པ་ཡིན་པའི་ཕྱིར་རོ། །ཆུ་ཀླུང་གིས་ཆོད་པར་འགྲོ་བ་ལ་ཡང་མི་བཞག་གོ་ཞེས་བྱ་བ་ནི། གལ་ཏེ་བགྲོད་པར་བྱ་བའི་གནས་སུ་ཆུ་ཀླུང་གིས་ཆོད་ཅིང་བར་དུ་བཙལ་བ་ཡིན་ན་དེའི་ཚེ་ཡང་དབྱར་གྱི་གོས་རས་ཆེན་གཞག་པར་མི་བྱའོ། །གལ་ཏེ་ཆུ་ཀླུང་ལ་ཟམ་པ་བརྟན་པོ་ཡོད་པ་ནི་མ་གཏོགས་སོ། །དེ་གཉིས་དོགས་པར་ཡང་མི་བཞག་གོ་ཞེས་བྱ་བ་ནི། ཆར་འབབ་པ་དང་ཆུ་ཀླུང་གིས་ཆོད་པ་དེ་གཉིས་ཡོད་པར་དོགས་པའི་གནས་སུ་འགྲོ་ན་ཡང༌། དབྱར་གྱི་གོས་རས་ཆེན་མི་བཞག་པར་བསྐུར་རོ། །དགེ་སློང་དང་བཅས་པ་ཉིད་དང་སྒོ་གླེགས་དང་བཅས་པ་ཉིད་དུ་བཅས་པའི་གནས་དང༌། ཆར་འབབ་པ་དང་ཆར་འབབ་པར་དོགས་པ་དང༌། བགྲོད་པར་བྱ་བ་ཆུ་ཀླུང་གིས་ཆོད་པ་ཉིད་ལྟ་བུ་མེད་ན། གནང་བ་མ་བྱིན་པ་དང༌། སྲ་བརྐྱང་མ་བཏིང་བས་སྣམ་སྦྱར་མེད་པར་གར་ཡང་
འགྲོ་བར་མི་བྱའོ་ཞེས་བྱ་བ་ལ། དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པ་ཉིད་དུ་བཅས་པའི་གནས་མེད་ན་ཞེས་བྱ་བ་དང༌། ཆར་པ་འབབ་པ་དང་ཆར་པ་འབབ་པར་དོགས་པ་མེད་ན་ཞེས་བྱ་བ་དང༌། བགྲོད་པར་བྱ་བ་ཆུ་ཀླུང་གིས་ཆོད་པ་ཉིད་ལྟ་བུ་མེད་ན་ཞེས་བྱ་བར་སྦྱར་ཏེ། རྐྱེན་དེ་ལྟ་བུ་མེད་ན། སྣམ་སྦྱར་མེད་པར་གར་ཡང་འགྲོ་བར་མི་བྱའོ། །རྐྱེན་དེ་ལྟ་བུ་ཡོད་ན་ཡང་སྣམ་སྦྱར་དང་མི་འབྲལ་བའི་གནང་བ་མ་ཐོབ་པ་དང༌། སྲ་བརྐྱང་མ་བཏིང་བས་སྣམ་སྦྱར་མེད་པར་གང་ཡང་འགྲོ་བར་མི་བྱའོ། །དེ་ལ་དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པ་ཉིད་དུ་བཅས་པའི་གནས་ཞེས་བྱ་བར་སྦྱར་ཏེ། དེ་མེད་པ་ཞེས་བྱ་བ་ནི་དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པ་ཉིད་གཉི་ག་དུས་གཅིག་ཏུ་མེད་ནའོ། །ཆར་པ་འབབ་པ་དང༌། ཆར་པ་འབབ་པར་དོགས་པ་མེད་པར་ཞེས་བྱ་བ་ཡང༌། དེ་གཉི་ག་མེད་ནའོ། །བགྲོད་པར་བྱ་བ་ཆུ་ཀླུང་གིས་ཆོད་པ་ལྟ་བུ་མེད་ནའོ་ཞེས་བྱ་བ་ནི། བགྲོད་པར་བྱ་བའི་ཡུལ་དང་འབྲེལ་པ་ནི། བར་དུ་ཆུ་ཀླུང་གིས་ཆོད་པ་ལྟ་བུ་མེད་ནའོ། །གང་གིས་མི་འབྲལ་བའི་གནང་བ་མ་ཐོབ་པ་དེ་ནི་གནང་བ་མ་བྱིན་པའོ། །གང་གིས་སྲ་བརྐྱང་མ་བཏིང་བ་དེ་ནི་སྲ་བརྐྱང་མ་བཏིང་བ་སྟེ། དེ་ལྟ་བུའི་དགེ་སློང་གིས་སྣམ་སྦྱར་མེད་པར་གནས་གཞན་གར་ཡང་འགྲོ་བར་མི་བྱའོ། །དགེ་སློང་དང་བཅས་པ་ཉིད་ལ་སོགས་པ་དེ་དག་ཡོད་ན་ནི། སྨན་སྦྱར་དེ་མེད་པར་འགྲོ་བ་ལ་ཉེས་པ་མེད་དོ། །དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པ་ཉིད་གཉིས་ལས་གང་ཡང་རུང་བ་ཅིག་མེད་ན་ནི་ཉེས་བྱས་ཕྲ་མོར་འགྱུར་རོ། །ཆར་པ་འབབ་པ་དང་ཆར་པ་འབབ་པར་དོགས་པ་ལ་སོགས་པ་དེ་ནི་ཉེས་བྱས་སོ། །དགེ་སློང་དང་བཅས་པ་ཉིད་དང༌། སྒོ་གླེགས་དང་བཅས་པ་ཉིད་མེད་ན། འོན་ཀྱང་དེ་ལྟ་ན་བསྙེན་པར་མ་རྫོགས་པའི་ལག་ཏུ་སྣམ་སྦྱར་གཏམས་པ་ལ་ཡང་རུང་བར་སྣང་ངོ༌། །གལ་ཏེ་དགེ་སློང་ཆར་འབབ་པ་ལ་སོགས་པའི་རྐྱེན་གྱིས་སྣམ་སྦྱར་མེད་པར་གྲོང་གཞན་དུ་འགྲོ་ཞིང་ཉི་མ་དེ་ཉིད་ལ་ཕྱིར་འོང་བར་མི་ནུས་ན་དེའི་ཚེ་དེས་ཇི་ལྟར་བྱ་ཞེ་ན། དེའི་ཕྱིར་གནས་སུ་ཕྱིན་པར་མི་འགྱུར་ན་ཆོས་གོས་ཀྱི་ཕྱུང་སྟེ། གཞན་ལ་བྱིན་གྱིས་བརླབས་པ་ནི་ཆོ་གའི་རྣམ་པའོ་ཞེས་བྱ་བ་སྨྲས་ཏེ།
ཆོས་གོས་ཀྱི་གནས་དེར་ཕྱིན་པར་མི་འགྱུར་ན། ཆོས་གོས་བྱིན་གྱིས་བརླབས་པ་གནས་གཞན་ན་འདུག་པའི་བྱིན་གྱིས་བརླབས་པ་ཕྱུང་སྟེ། ཁྱིམ་པ་ཡན་ཆད་ཀྱི་གོས་སམ། གཞན་ལས་བརྙས་པ་ལ་ཡང་བྱིན་གྱིས་བརླབ་པར་བྱའོ། །དེ་ནི་ཆོ་གའི་རྣམ་པ་སྟེ། ཐབས་སོ་ཞེས་བྱ་བའི་ཐ་ཚིག་གོ །སྣམ་སྦྱར་ལྕི་བ་ཉིད་ཡིན་ན། རྒན་པ་དང་ནད་པ་དག་ལ་མི་འབྲལ་བའི་གནང་བ་སྦྱིན་ནོ་ཞེས་བྱ་བ་ནི། མི་འབྲལ་བའི་གནང་བ་སྦྱིན་པར་བྱའོ། །ནམ་གྱི་ཚེ་ཞེ་ན། སྣམ་སྦྱར་ལྕི་བ་ཉིད་ནའོ། །སུ་ལ་ཞེ་ན། རྒན་པོ་དང་ནད་པ་དག་ལ་སྟེ། རྒས་པ་དང་ནད་པ་དག་ལའོ་ཞེས་བྱ་བའི་ཐ་ཚིག་གོ །འབྲལ་བའི་སྤང་བའི་ལྟུང་བྱེད་ཀྱི་བྱེད་པ་པོ་ཉིད་གང་ཡིན་ཞེ་ན། དེའི་ཕྱིར་བྱིན་གྱིས་བརླབས་པ་དང་གནང་བ་མ་ཐོབ་པ་ནི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། ཆོས་གོས་བྱིན་གྱིས་བརླབས་པ་དང་གང་ཟག་མི་འབྲལ་བའི་གནང་བ་མ་ཐོབ་པ་ནི་འབྲལ་བའི་སྤང་བའི་ལྟུང་བྱེད་ཀྱི་བྱེད་པ་པོ་ཉིད་ཡིན་ནོ། །ཅི་གནས་སྐབས་ཐམས་ཅད་ལ་གང་ཟག་དེ་བྱེད་པ་པོ་ཉིད་ཡིན་ནམ་ཞེ་ན་མ་ཡིན་ཏེ་དེའི་ཕྱིར། དེའི་གནས་ཉེ་འཁོར་དང་བཅས་པ་ནས་གཞན་གནས་པ་ལ་སྐྱ་རེངས་ཤར་ནའོ་ཞེས་བྱ་བ་སྨྲས་ཏེ། ཆོས་གོས་བྱིན་གྱིས་བརླབས་པ་དེའི་གནས་གང་ཡིན་པ་ཉེ་འཁོར་དང་བཅས་པར་གྱུར་པ་ནི། ཉེ་འཁོར་དང་བཅས་པ་སྟེ། གནས་ཉེ་འཁོར་དང་བཅས་པ་དེ་ནས་གནས་གཞན་ན་གནས་པའི་དགེ་སློང་ལའོ། །ཅི་དུས་ཐམས་ཅད་དུའམ་ཞེ་ན་མ་ཡིན་ཏེ། འདི་ལྟར་སྐྱ་རེངས་ཤར་ནའོ་ཞེས་བྱ་བ་སྨྲས་ཏེ། སྐྱ་རེངས་དང་པོ་འཆར་ཀའི་སྐད་ཅིག་མ་དང་པོ་ལའོ་ཞེས་བྱ་བའི་ཐ་ཚིག་གོ །དེའི་གནས་ཉ་འཁོར་དང་བཅས་པ་ནས་ཞེས་སྨྲས་པ་ནི། འདིར་ནོན་པ་ཙམ་ལ་གནས་སུ་མི་བཞེད་དེ་དེའི་ཕྱིར། འདི་མན་ཆད་གནས་དེའི་མཚན་ཉིད་བསྟན་པར་བྱ་སྟེ། མཚམས་བྱས་པ་ལ་ནི་མཚམས་གནས་ཀྱི་མཐའོ་ཞེས་བྱ་བ་ནི། གཙུག་ལག་ཁང་གང་ལ་མཚམས་བྱས་པ་དེ་ནི་མཚམས་བྱས་པའི་གཙུག་ལག་ཁང་དེ་ལ་ནི། མཚམས་གནས་ཀྱི་མཐའ་སྟེ། པ་མཐའ་དང་མུ་ཐུག་ཅེས་བྱ་བའི་ཐ་ཚིག་གོ །མཚམས་བཅད་པ་འབའ་ཞིག་མཚམས་ཡིན་པར་མ་ཟད་དེ། འདི་ལྟར་རྩིག་པ་དང༌། རིབ་མ་དང༌།
འོབས་ཀྱིས་བསྐོར་བ་ལ་སོགས་པ་དག་ཀྱང་མཚམས་ཉིད་ཡིན་ནོ། །ཇི་ལྟར་བདག་པོ་གཅིག་ཉིད་མ་ཡིན་པའི་བར་གྱི་མཚམས་རྣམས་ཐ་དད་པ་ཉིད་ཡིན་པ་དེ་བཞིན་དུ་བདག་པོ་གཅིག་ཉིད་ཀྱི་བར་གྱི་མཚམས་རྣམས་ནི་ཐ་དད་པ་ཉིད་དུ་མི་འགྱུར་བས་དེའི་ཕྱིར། བདག་པོ་གཅིག་ཉིད་མ་ཡིན་པའི་བར་གྱི་མཚམས་རྣམས་ནི་ཐ་དད་པ་ཉིད་དོ་ཞེས་བྱ་བ་སྨྲས་ཏེ། བདག་པོ་གཅིག་གི་དངོས་པོ་ནི་གཅིག་ཉིད་དོ། །གཅིག་ཉིད་མ་ཡིན་པ་ནི་གཅིག་ཉིད་མ་ཡིན་པ་སྟེ། འདི་ལྟར་གཉིས་ཉིད་དམ་མང་པོ་ཉིད་དོ། །བདག་པོ་ཡོངས་སུ་འཛིན་པ་གཅིག་ཉིད་མ་ཡིན་པ་མང་པོ་ཉིད་ཀྱི་བར་གྱི་མཚམས་རྣམས་ནི་ཐ་དད་པ་ཉིད་དོ། །ཕྱི་སྒོ་ལ་སོགས་པ་ཐུན་མོང་བ་དག་ནི་ཐ་དད་པ་ཉིད་མ་ཡིན་ནོ། །འདི་སྐད་བསྟན་ཏེ། གང་ན་བདག་པོ་མང་པོ་དག་ཆ་སོ་སོར་ཁྱིམ་ཐ་དད་པས། གནས་པ་དེ་ན་ནི་ཁང་ཁྱིམ་གྱི་སྒོ་དང་ར་བ་ལ་སོགས་པའི་བར་མཚམས་རྣམས་ཐ་དད་པ་ཉིད་དོ། །ཁྱིམ་པ་ལ་སོགས་པའི་གནས་གང་ན་བདག་པོ་མང་པོ་དོན་གཅིག་པ་དག་ཆ་སོ་སོ་མ་ཡིན་པར་ཁྱིམ་གཅིག་པའི་ཚུལ་གྱིས་གནས་པ་དེ་ན་ནི། ཁང་ཁྱིམ་གྱི་སྒོ་དང་ར་བ་ལ་སོགས་པའི་བར་མཚམས་རྣམས་ཐ་དད་པ་ཉིད་མ་ཡིན་ཏེ་སྤུན་ལ་སོགས་པ་ཐམས་ཅད་ལ་ཁྱིམ་གྱི་རྗེ་དཔོན་ཉིད་ཡིན་པའི་ཕྱིར་རོ། །དེ་ནི་མདོ་བརྩམས་པ་འདིའི་འབྲས་བུ་བསྟན་པར་བྱ་སྟེ། བདག་པོ་མང་པོ་དག་ཉིད་ཀྱི་བར་གྱི་མཚམས་རྣམས་ནི་ཐ་དད་པ་ཉིད་དོ། །དེ་དག་གི་གནས་ཐུན་མོང་བ་ཕྱི་སྒོ་ལ་སོགས་པ་དག་ནི་ཐ་དད་པ་ཉིད་མ་ཡིན་ཏེ། འདི་ལྟ་སྟེ་དཔེར་ན། ཉེ་འཁོར་ཐ་དད་པའི་ཁྱིམ་ལ་སྒོ་ཐུན་མོང་པ་ནི་ཐ་དད་པ་ཉིད་མ་ཡིན་པ་ལྟ་བུའོ། །དེ་ལྟར་ཡང་རྣམ་པར་འབྱེད་པ་ལས། ཁྱིམ་ཉེ་འཁོར་ཐ་དད་པ་གང་ཞེ་ན། མི་ཐ་དད་པ་དག་གི་ཁྱིམ་གང་ཡིན་པའམ། སྤུན་སྒོ་བྱེ་བ་དག་གིའོ། །དེའི་ཉེ་འཁོར་གང་ཞེ་ན། སོ་སོ་ཐ་དད་པའོ། །ཅི་ཞིག་ཐུན་མོང་ཞེ་ན་སྒོའོ། །དེ་བཞིན་དུ་གཡུལ་གྱི་ཚོམས་ཉེ་འཁོར་ཐ་དད་པ་གང་ཞེ་ན། འདི་ལྟ་སྟེ། མི་ཐ་དད་པ་དག་གི་གཡུལ་གྱི་ཚོམས་གང་ཡིན་པའམ། སྤུན་སྒོ་བྱེ་བ་དག་གིའོ། །དེའི་ཉེ་འཁོར་གང་ཞེ་ན་སོ་སོ་ཐ་དད་པའོ། །ཅི་ཞིག་ཐུན་མོང་ཞེ་ན་སྒོའོ། །དེ་བཞིན་དུ་མུ་སྟེགས་ཅན་གྱི་ཁྱིམ་ལ་ཡང་ལྷའི་གནས་ཐུན་མོང་ཡིན་ནོ། །དེ་བཞིན་དུ་ཚོང་
རྡལ་ལ་ནི་བཞག་སྟེགས་ཐུན་མོང་ཡིན་ཏེ། ཚོང་རྡལ་ཞེས་བྱ་བ་ནི། གང་དུ་ཚོང་པ་དག་ཟོང་འཚོང་བར་བྱེད་པའི་གནས་སོ། །བཞག་སྟེགས་ཞེས་བྱ་བ་ནི། ཚོང་བྱེད་པའི་དུས་ན་ཤིང་ལ་སོགས་པའི་གཞིའི་བྱེ་བྲག་གང་དུ་ཟོང་དང་རིན་དག་འཇོག་པར་བྱེད་པ་སྟེ། དེ་ནི་རིམ་གྱིས་ཐམས་ཅད་ལ་དགོས་པ་ཡིན་པས་ཐུན་མོང་ཡིན་ནོ། །དེ་བཞིན་དུ་ཚོང་ཁང་ལ་ནི་འདུག་སྟེགས་ཐུན་མོང་ཡིན་ཏེ། ཚོང་ཁང་ཞེས་བྱ་བ་ནི་ཟོང་དགྲམ་པ་ལ་སོགས་པའི་གནས་སོ། །འདུག་སྟེགས་ཞེས་བྱ་བ་ནི། སྟེགས་བུ་གང་ལ་ཚོང་པ་འདུག་སྟེ། ཨ་རུ་ར་ལ་སོགས་པ་འཚོང་པར་བྱེད་པའོ། །དེ་བཞིན་དུ་དགྲ་ཁང་ལ་ནི་ཡ་གད་ཐུན་མོང་ཡིན་ནོ། །དེ་བཞིན་དུ་གཡུལ་ལ་ནི་དཀྱིལ་ཐུན་མོང་ཡིན་ཏེ། གཡུལ་ཞེས་བྱ་བ་ནི་ལོ་ཏོག་བཅག་པའི་གཞིའོ། །དཀྱིལ་ཞེས་བྱ་བ་ནི། རྟེན་གནས་ཏེ། གང་དུ་གཏོར་མ་འབུལ་བ་ལ་སོགས་པ་བྱེད་པའམ། གང་དུ་འབྲུ་སྤུང་པར་བྱེད་པའི་གནས་སོ། །དེ་བཞིན་དུ་རོལ་མོ་མཁན་གྱི་ཁྱིམ་ལ་ནི་རོལ་མོའི་ཆ་བྱད་བཞག་པའི་གནས་ཐུན་མོང་ཡིན་ནོ། །དེ་བཞིན་དུ་ཤིང་རྟ་ལ་ནི་ཁ་ལོ་པའི་གནས་ཐུན་མོང་ཡིན་ཏེ། ཁ་ལོ་བའི་གནས་ཞེས་བྱ་བ་ནི་ཁ་ལོ་བ་གང་དུ་འདུག་པས། གླང་ལ་སོགས་པ་ཤིང་རྟ་དང་ལྡན་པ་དག་དེད་པའོ། །དེ་བཞིན་དུ་གྲུ་ལ་ནི་གྲུ་གདོང་ཐུན་མོང་ཡིན་ཏེ། གྲུ་གདོང་ཞེས་བྱ་བ་ནི། གྲུ་པ་གང་དུ་འདུག་ནས་གྲུ་སྐྱོད་པར་བྱེད་པའོ། །དེ་བཞིན་དུ་ཀུན་དགའ་ར་བ་ལ་ནི་ཁྲོན་པ་ཐུན་མོང་ཡིན་ནོ་ཞེས་གསུངས་པ་ཡིན་ཏེ། ཐམས་ཅད་ལ་ཡང་དེ་དག་ལ་མཁོ་བར་འགྱུར་བ་ནི་ཐུན་མོང་ཞེས་བྱའོ། །མདོ་འདི་ལ་དགག་པའི་བསྡུ་བར་ནི་མི་འགྱུར་ཏེ། དེས་ནི་མདོ་འོག་མའི་རྗེས་སུ་ཡང་སྦྱར་རོ། །ནོར་ལས་དང་ལྟ་བ་ལས་དད་པ་ཐ་དད་པ་མ་ཡིན་པའི་ཡང་ངོ་ཞེས་བྱ་བ་ལ། ནོར་ལས་ནི་འདི་ལྟ་སྟེ་དཔེར་ན་སྤུན་རྣམས་ཀྱི་ལྟ་བུའོ། །ལྟ་བ་ལས་ནི་འདི་ལྟ་སྟེ་དཔེར་ན་མུ་སྟེགས་རྣམས་ཀྱི་ལྟ་བུའོ། །དེ་གཉིས་ཀྱི་སྒོ་ནས་དད་པ་ཐ་དད་པ་མ་ཡིན་པའི་བདག་པོ་རྣམས་ཀྱི་གནས་ཀྱི་བར་མཚམས་ཀྱང་ཐ་དད་པ་ཉིད་མ་ཡིན་ནོ། །དད་པ་ཐ་དད་པའི་ནི་ཐ་དད་པ་ཉིད་དོ། །དེ་ལྟ་བས་ན་དགེ་སློང་གིས་སྤུན་ནོར་དག་ལ་དད་པ་ཐ་དད་པའི་ཁྱིམ་དག་ཏུ་ཆོས་གོས་བཞག་སྟེ། རང་ཉིད་
སྒོ་ཁང་དུ་སྐྱ་རེངས་འཆར་བར་བྱེད་ན། ཆོས་གོས་དང་འབྲལ་བར་མི་འགྱུར་རོ། །དེ་བཞིན་དུ་སྒོ་ཁང་དུ་ཆོས་གོས་བཞག་སྟེ། རང་ཉིད་སྤུན་རྣམས་ཀྱི་ཁྱིམ་དག་ཏུ་སྐྱ་རེངས་འཆར་བར་བྱེད་ན་ཡང་ཉེས་པ་མེད་དོ། །ཡང་ན་མདོ་སྔ་མ་ཤོས་དེ་འདི་ལྟར་ཡང་བཤད་དེ། བདག་པོ་གཅིག་ཉིད་ཀྱི་བར་གྱི་མཚམས་རྣམས་ནི་ཐ་དད་པ་ཉིད་མ་ཡིན་ནོ་ཞེས་བྱ་བར་ཡང་མདོའི་ཚིག་རྣམ་པར་སྦྱར་བར་བྱ་སྟེ། བདག་པོ་གཅིག་ཉིད་ཀྱི་བར་གྱི་མཚམས་ཁང་ཁྱིམ་ལ་སོགས་པ་རྣམས་ཀྱང་ཐ་དད་པ་ཉིད་མ་ཡིན་ནོ། །སྒོ་ཁང་ལ་སོགས་པ་དག་ལྟ་སྨོས་ཀྱང་ཅི་དགོས་ཏེ། ཐ་དད་པ་ཉིད་མ་ཡིན་ནོ། །བདག་པོ་གཅིག་ཉིད་མ་ཡིན་པའི་བར་གྱི་མཚམས་རྣམས་ནི་ཐ་དད་པ་ཉིད་མ་ཡིན་ལ། སྒོ་ཁང་ལ་སོགས་པ་དག་ནི་ཐ་དད་པ་ཉིད་མ་ཡིན་ཏེ། ཐམས་ཅད་ཀྱི་ཐུན་མོང་མ་ཡིན་པའི་ཕྱིར་རོ། །ཡལ་ག་དང་ཡལ་ག་ཕྲ་མོ་དག་མ་རེག་པ་ནི་གནས་ཐ་དད་པ་ཉིད་དོ་ཞེས་བྱ་བ་ནི། ཡལ་ག་དང་ཡལ་ག་ཕྲ་མོ་དེ་དག་མ་རེག་ཕན་ཚུན་མ་ཕྲད་པ་ནི་གནས་ཐ་དད་པ་ཉིད་དོ། །རེག་པ་ནི་གནས་གཅིག་པ་ཉིད་དོ། །དེ་ལྟ་བས་ན་དགེ་སློང་གིས་ཤིང་ལྗོན་པ་གཅིག་ཁོ་ནའི་ཡལ་ག་མ་རེག་པ་གཞན་ལ་ཆོས་གོས་འཇོག་ཅིང་ཡལ་ག་མ་རེག་པ་གཞན་དུ་སྐྱ་རེངས་འཆར་བར་བྱེད་ན། ཡང་ཆོས་གོས་དང་འབྲལ་བར་འགྱུར་ལ། རེག་པ་ལ་ནི་མི་འགྱུར་རོ། །རྩ་བ་ནི་ཐུན་མོང་ངོ་ཞེས་བྱ་བ་ནི། ཡལ་ག་དེ་དག་གི་རྩ་བ་ནི་ཐུན་མོང་བ་སྟེ། གང་ཕན་ཆད་ནས་ཡལ་ག་དག་གྱེས་པ་དེ་ནི་དེ་དག་གི་རྩ་བའོ། །དེ་ལྟ་བས་ན། དགེ་སློང་གིས་རྩ་བ་ལ་ཆོས་གོས་འཇོག་ཅིང༌། ཡལ་ག་གང་ཡང་རུང་བར་སྐྱ་རེངས་འཆར་བར་བྱེད་པ་ལ་ནི་ཉེས་པ་མེད་དོ། །དེ་བཞིན་དུ་ཡལ་ག་གང་ཡང་རུང་བར་ཆོས་གོས་འཇོག་ཅིང་རྩ་བར་སྐྱ་རེངས་འཆར་བར་བྱེད་ན་ཡང་ཉེས་པ་མེད་དོ། །རྩ་བའི་རྩ་བ་ལ་སོགས་པ་ཡང་ངོ་ཞེས་བྱ་བ་ནི། རྩ་བའི་རྩ་བ་ལ་སོགས་པ་ཡང་ཡལ་ག་དང་ཡལ་ག་ཕྲ་མོ་ཐམས་ཅད་ཀྱི་ཐུན་མོང་ཡིན་ཏེ། དེ་ནི་རེ་ཞིག་སྤྱིའི་དོན་ཏོ། །ཡན་ལག་གི་དོན་ནི་རྩ་བ་ཞེས་བྱ་བ་ནི། ཤིང་ལྗོན་པའི་སྟེང་གི་ཐམས་ཅད་ཀྱི་ཕྱོགས་གང་ནས་ཡལ་ག་དུ་མ་གྱེས་པར་གྱུར་པ་དེའི་མདོ་ཁོ་ནའི་འོག་ན་ཡལ་ག་མེད་པའི་ཤིང་ལྗོན་པ་སྡོང་པོའི་ཕྱོགས་ལ་བྱ་སྟེ། དེ་ནི་རྩ་བའོ། །རྩ་བའི་རྩ་བ་ཞེས་བྱ་བ་ནི།
སྟེང་གི་ཐམས་ཅད་ཀྱི་རྩ་བར་གྱུར་པའི་ཤིང་ལྗོན་པའི་ཕྱོགས་དེ་ནས་ཡལ་ག་མེད་པའི་འོག་གི་ཆ་ལས་ཡལ་ག་གཅིག་ཏུ་གྱུར་ཏམ། ཡལ་ག་དུ་མར་གྱུར་པའི་ཡལ་ག་ཇི་སྙེད་གྱེས་པ་དེའི་མདོ་ཁོ་ནའི་འོག་ན་ཡལ་ག་མེད་པའི་ཕྱོགས་ཀྱི་ཆ་ཡོད་པ་ལ་བྱ་སྟེ། དེ་ནི་རྩ་བའི་རྩ་བའོ། །སོགས་པ་ཞེས་སྨོས་པས་ནི། དེ་མན་ཆད་ནས་ས་གཞི་ལ་ཐུག་པ་ཡན་ཆད་ཀྱི་པར་བཟུང་སྟེ། སོགས་བའི་སྒྲས་བསྡུས་པ་ཤིང་ལྗོན་བ་དང་འབྲེལ་པའི་ས་གཞི་ཡན་ཆད་ནས། རྩ་བའི་རྩ་བ་ལ་ཐུག་པ་མན་ཆད་ཀྱི་བར་དེ་ནི། རྩ་བའི་རྩ་བ་དང༌། རྩ་བ་དང་འབྲེལ་བའི་ཡལ་ག་དང༌། ཡལ་ག་ཕྲ་མོ་ཐམས་ཅད་ཀྱི་ཐུན་མོང་ཡིན་ནོ། །རྩ་བའི་རྩ་བ་ནི། རང་དང་རྩ་བ་དང་འབྲེལ་པའི་ཡལ་ག་དང༌། ཡལ་ག་ཕྲ་མོ་ཐམས་ཅད་ཀྱི་ཐུན་མོང་ཡིན་ནོ། །རྩ་བ་ནི་དེ་ཉིད་དང་འབྲེལ་བའི་ཡལ་ག་དང༌། ཡལ་ག་ཕྲ་མོ་རྣམས་ཉི་ཚེའི་ཐུན་མོང་ཡིན་ནོ། །དེ་དག་གི་ཡལ་ག་དང་ཡལ་ག་ཕྲ་མོ་མ་རེག་པ་རྣམས་ནི་ཕན་ཚུན་ཐ་དད་པ་ཡིན་ནོ། །འདིར་གཞུང་ནི་འདི་ལྟ་སྟེ། ཤིང་ལྗོན་པ་ཡལ་ག་དང༌། ལོ་མ་མ་རེག་པ་དེའི་ཉེན་ཀོར་གད་ལགས། སོ་སོ་ཐ་དད་པའོ། །ཇི་ཞིག་ཐུན་མོང་ལགས། རྩ་བའོ་ཞེས་གསུངས་པ་དེ་འདིར་གཞུང་ཡིན་ནོ། །ཡལ་ག་དང་ལོ་མ་རེག་བའི་ཤིང་ལྗོན་པ་རྣམས་ནི་གནས་གཅིག་པ་ཉིད་དོ་ཞེས་བྱ་བ་ལ། ཤིང་ལྗོན་པ་གང་དག་གི་ཡལ་ག་དང་ལོ་མ་རེག་པ་དེ་དག་ནི། ཡལ་ག་དང་ལོ་མ་རེག་པའི་ཤིང་ལྗོན་པ་རྣམས་ཏེ། ཤིང་ལྗོན་པ་དེ་དག་ནི་གནས་གཅིག་པ་ཉིད་དོ། །མེ་ཏོག་དང་འབྲས་བུ་དག་ནི་དེའི་ཁོངས་སུ་གཏོགས་པའི་ཕྱིར་ཚིག་ལོགས་ཤིག་ཏུ་མ་བྱས་སོ། །དེའི་ཆ་འོག་མར་དཔྱངས་པ་ནི་སྟེང་གཡོགས་དང་འདྲའོ་ཞེས་བྱ་བ་ནི། སྟེང་གཡོགས་ཞེས་བྱ་བ་བླ་གབ་ཀྱི་རིམ་པའི་ཆ་འོག་མ་བླ་གབ་ཀྱི་རིམ་པའི་ཁོངས་སུ་གཏོགས་པ་དེ་བཞིན་དུ་ཤིང་ལྗོན་པ་དེའི་ཆ་འོག་མ་གང་ཡིན་པའི་ཆ་འོག་མ་དེ་ནི་གནས་དེའི་ཁོངས་སུ་གཏོགས་པ་ཡིན་ནོ། །འདི་སྐད་བསྟན་ཏེ། དགེ་སློང་གིས་ཤིང་ལྗོན་བའི་སྟེང་གི་ཆ་འོག་མར་ཆོས་གོས་དབྱངས་ཏེ་བཞག་པ་དེ་ཉིད་ཀྱིས་གཞིར་སྐྱ་རེངས་འཆར་བར་བྱེད་ན། དེའི་ཆོས་གོས་དང་འབྲལ་བར་མི་འགྱུར་རོ། གྲུ་དང་ཤིང་རྟ་དག་གི་ཡང་ངོ་ཞེས་བྱ་བ་ནི།
གྲུ་དང་ཤིང་རྟ་དག་གི་ཆ་འོག་མ་ཡང་སྟེང་གཡོགས་དང་འདྲ་བར་ཁོངས་སུ་གཏོགས་པར་ཤེས་པར་བྱའོ། །ནམ་མཁའ་ནི་མཚམས་སུ་གཏོགས་བ་མ་ཡིན་ནོ། །དེ་ལྟ་བས་ན་གྲུ་དང་ཤིང་རྟས་སའི་ཆ་གང་ནོན་པའི་སའི་ཆ་དེ་དང་འབྲེལ་པ་དང༌། འོག་གི་ཆ་དང་འབྲེལ་པ་དང༌། ངོས་དང་འབྲེལ་པ་དང༌། འཁོར་ལོ་དང་རྩིབས་ཐག་དང༌། ཕུར་པ་ལ་སོགས་པ་དང་འབྲེལ་པའི་རྫས་ནི་མདོ་འདི་གཉིས་ཀྱི་གནས་ཉིད་ཡིན་པར་བྱས་པར་རིག་པར་བྱའོ། །མཚམས་མེད་པ་ལ་ནི་ཡན་ལག་གིས་ཁྱབ་པ་མཐའོ་ཞེས་བྱ་བ་ལ་གནས་གང་མཚམས་མེད་པ་དེ་ནི་མཚམས་མེད་པ་སྟེ། དགོན་པ་ལ་སོགས་པའི་གནས་མཚམས་མེད་པ་དེ་ལ་ནི་རྐ་ལག་ལ་སོགས་པའི་ཡན་ལག་གིས་ཁྱབ་པ་གང་ཡིན་པའི་ཡན་ལག་གིས་ཁྱབ་པའི་མཐའ་དེ་གནས་དེའི་མཐའ་ཡིན་པར་རིག་པར་བྱའོ། །འདིར་ལུང་ནི་ལམ་དུ་ཞུགས་པ་ལ་ལུས་དང་འབྲེལ་པའི་ཕྱོགས་ནས་བརྩམས་ཏེ། འདོམ་བཞི་བཅུ་རྩ་དགུ་ཚུན་ཆད་ཉེ་འཁོར་ཡིན་པར་གསུངས་པ་གང་ཡིན་པ་དང༌། མཚམས་གཞན་པ་ལ་ལུས་ཀྱིས་ནོན་པ་ཉི་ཚེ་གནས་ཉིད་ཡིན་པར་གསུངས་པ་གང་ཡིན་པ་དེ་ཡིན་ནོ། །འདིར་མཚམས་ཞེས་བྱ་བའི་སྒྲ་ནི། ཁང་ཁྱིམ་ལ་སོགས་པ་དག་ལ་བྱ་སྟེ། དེ་མེད་པ་ནི་མཚམས་མེད་པའི་གནས་ཡིན་ནོ། །གནས་བསྟན་ནས། ད་ནི་གནས་དེའི་ཉེ་འཁོར་བརྗོད་པར་བྱ་སྟེ། དེ་ཡང་རྣམ་པ་གཉིས་ཏེ། བརྩམ་དུ་རུང་བ་ཉིད་ཀྱིས་ཉེ་འཁོར་ཡིན་པ་ནི། བརྩམ་དུ་རུང་བ་ཉིད་ཀྱིས་གནས་ཀྱི་ཁོངས་སུ་གཏོགས་པ་ཞེས་བྱ་བ་སྟེ། འདི་ལྟར་གང་ལ་ལ་ཞིག་འགའ་ཞིག་ཏུ་གནས་བྱེད་པ་ན་དེ་ལ་དེའི་ཁོར་ཁོར་ཡུག་བརྩམ་དུ་རུང་བའི་སྐབས་ཡོད་པར་བྱ་བའི་བསམ་པ་གདོན་མི་ཟ་བར་འབྱུང་བའི་ཕྱིར་རོ། །གཉིས་པ་ཉེ་བར་སྤྱོད་པ་ཉིད་ཀྱིས་ཉེ་འཁོར་ཡིན་པ་ནི་ཉེ་བར་སྤྱོད་པ་ཉིད་ཀྱིས་གནས་དང་ཉེ་བར་གྱུར་པ་སྟེ། འདི་ལྟར་གནས་དེ་ནི་ཉེ་བར་སྤྱོད་པ་ཉིད་དང་ཡང་གདོན་མི་ཟ་བར་འབྲེལ་པའི་ཕྱིར་རོ། །དེ་ལ་རེ་ཞིག་ཉེ་འཁོར་སྔ་མ་ཤོས་བསྟན་པའི་ཕྱིར། ཉེ་འཁོར་ནི་ཁོར་ཁོར་ཡུག་ཏུ་འདོམ་རེ་རེའོ་ཞེས་བྱ་བ་སྨྲས་ཏེ། ཁོ་ར་ཁོར་ཡུག་ཏུ་ཞེས་བྱ་བ་ནི། སྟེང་དང་འོག་དང་ཕྱོགས་ཀྱི་མཚམས་ཐམས་ཅད་ནས་ཕྱི་རོལ་གྱི་ཉེ་འཁོར་དུའོ། །འདོམ་
རེ་རེའོ་ཞེས་བྱ་བ་ནི། ཐམས་ཅད་དུ་འདོམ་རེ་རེར་འདྲ་བར་གྱུར་པའོ། །གྲོང་གི་བྱེ་བྲག་གསུམ་གྱི་གཞི་ལས་ནི་ཉེ་འཁོར་གྱི་བྱེ་བྲག་རིས་སུ་ཆད་པ་དང་བསྒྲུབ་པ་ཞེས་བྱ་བ་དག་ཡོད་དེ་དེ་དག་བསྟན་པའི་ཕྱིར་རྩིག་པས་བསྐོར་བའི་གྲོང་ལ་ནི། ཇི་ཙམ་དུ་བ་ལང་དྲུག་དང་ལྡན་པའི་ཤིང་རྟ་སྨྱིག་མ་ཅན་གྱི་འམ། བྱ་གག་སྦར་ནས་འདུག་པའི་ལམ་གྱིས་ཁྱབ་པའོ་ཞེས་བྱ་བ་སྨྲས་ཏེ། རྩིག་པས་ཞེས་བྱ་བར་བས་བསྐོར་བའི་ཞེས་བྱ་བ་དཀྲིས་པའི་གྲོང་ལ་ནི་ཞེས་བྱ་བ་ཡུལ་དུ་གྱུར་པ་ལན་ཇི་ཙམ་དུ་ལམ་གྱིས་ཁྱབ་པ་དེ་ཚུན་ཆད་དེ་ཉེ་འཁོར་རོ། །གང་གི་ལམ་གྱིས་ཁྱབ་པ་ཞེ་ན་དེའི་ཕྱིར། བ་ལང་དྲུག་དང་ལྡན་པའི་ཤིང་རྟ་སྨྱིག་མ་ཅན་གྱིའམ་ཞེས་བྱ་བ་སྨྲས་ཏེ། བ་ལང་དྲུག་གིས་དྲང་དགོས་པའི་ཤིང་རྟ་སྨྱིག་མས་བཀང་བ་གཅིག་གི་ལམ་གྱིས་ཁྱབ་པའམ་ཡང་ན་བྱ་གག་སྦར་ནས་འདུག་པའི་ལམ་གྱིས་ཁྱབ་པ་སྟེ། བྱ་གག་འཕུར་དུ་བཅུག་ནས་གང་དུ་ས་ལ་འབབ་པའི་བར་གྱི་ལམ་གྱིས་ཁྱབ་པ་སྟེ། རྩིག་པས་བསྐོར་བའི་གྲོང་ལ་ནི་འདི་འམ་སྔ་མ་གང་ཡང་རུང་བ་ཉེ་འཁོར་ཡིན་ནོ། །རིབ་མས་བསྐོར་བ་ལ་ནི་ར་ལུག་གི་རྡུལ་གྱི་འམ། མི་རང་བཞིན་གྱིས་ངོ་ཚ་དང་ལྡན་པའི་བཤང་བའི་ལམ་གྱིས་སོ་ཞེས་བྱ་བ་ནི། རིབ་མས་བསྐོར་བའི་གྲོང་ལ་ནི་ཇི་ཙམ་དུ་ར་ལུག་དག་རིབ་མའི་དྲུང་ནས་འདོང་བ་ན། རྡུལ་འཐོན་པའི་རྡུལ་གྱི་ལམ་དེས་ཁྱབ་པ་ལའམ། ཡང་ན་མི་རང་བཞིན་གྱིས་ཞེས་བྱ་བ་ངོ་བོ་ཉིད་ཀྱིས་ངོ་ཚ་དང་ལྡན་པའི་ཞེས་བྱ་བ། ངོ་ཚ་ཤེས་པའི་བཤང་བའི་ལམ་གྱིས་ཕྱོགས་ཅི་ཙམ་དུ་ཁྱབ་པ་དེ་ཚུན་ཆད་དེ། རིབ་མས་བསྐོར་བའི་གྲོང་ལ་ནི་འདིའམ་སྔ་མ་གང་ཡང་རུང་བ་ཉེ་འཁོར་ཡིན་ནོ། །འོབས་ཀྱིས་བསྐོར་བ་ལ་ནི། སྐས་གདང་བུ་བཅུ་གཉིས་པའམ། ཕྱག་དར་བོར་པའི་བོང་བ་རགས་པའི་ལམ་གྱིས་སོ་ཞེས་བྱ་བ་ནི། འོབས་ཀྱིས་བསྐོར་བའི་གྲོང་ལ་ནི་སྐས་གདང་བུ་བཅུ་གཉིས་པའི་སྲིད་ཀྱི་ཆད་ཀྱི་ཕྱོགས་ཇི་ཙམ་དུ་སླེབས་པའི་ལམ་གྱིས་ཁྱབ་པའམ། ཡང་ན་ཕྱག་དར་པོར་བའི་ཡན་ལག་ཏུ་གྱུར་པའི་བོང་བ་རགས་པ་རང་གི་ཤུགས་ཀྱིས་འདྲིལ་བས་ལམ་ཇི་སྲིད་དུ་ཕྱིན་པའི་ལམ་གྱིས་ཁྱབ་པ་དེ་ཚུན་ཆད་དེ། འོབས་ཀྱིས་བསྐོར་བའི་གྲོང་ལ་ནི། འདི་འམ་སྔ་མ་གང་ཡང་རུང་བ་ཉེ་འཁོར་ཡིན་ནོ། །གྲོང་
གི་བྱེ་བྲག་གསུམ་གྱི་གཞི་ལས་ཉེ་འཁོར་གྱི་བྱེ་བྲག་དེ་ལས། རྩིག་པས་བསྐོར་བའི་གྲོང་གི་ཉེ་འཁོར་རྣམ་གཉིས་དང༌། འོབས་ཀྱིས་བསྐོར་བའི་གྲོང་གི་ཉེ་འཁོར་དང་པོ་ཤོས་ནི་རིས་སུ་ཆད་པའི་ཉེ་འཁོར་ཡིན་ནོ། །རིབ་མས་བསྐོར་བའི་གྲོང་གི་ཉེ་འཁོར་རྣམ་གཉིས་དང༌། འོབས་ཀྱིས་བསྐོར་བའི་གྲོང་གི་ཉེ་འཁོར་འོག་མ་ཤོས་ནི། བསྒྲུབ་པའི་ཉེ་འཁོར་ཡིན་ཏེ། དེ་དག་ནི་བརྩམ་དུ་རུང་བ་ཉིད་ཀྱིས་གནས་ཀྱི་ཁོངས་སུ་གཏོགས་པ་ཞེས་བྱ་བའི་ཉེ་འཁོར་རོ། །ད་ནི་ཉེ་བར་སྤྱོད་པ་ཉིད་ཀྱིས་གནས་དང་ཉེ་བར་གྱུར་པའི་ཉེ་འཁོར་བརྗོད་པར་བྱ་སྟེ། གནས་དེའི་འཕྲལ་གྱི་བྱ་བ་དང། འགྲོ་བ་དང༌། འདུག་པ་དང༌། རྡུལ་དག་གིས་དེར་གཏོགས་པ་ཁྱབ་པའོ་ཞེས་བྱ་བ་ནི། གནས་གང་དུ་ཉེ་འཁོར་རྣམ་པར་འཇོག་པའི་གནས་དེའི་འཕྲལ་གྱི་བྱ་བ་དང༌། འགྲོ་བ་དང༌། འདུག་པ་དང༌། རྡུལ་གང་དག་ཡིན་པའི་གནས་དེའི་འཕྲལ་གྱི་བྱ་བ་དང༌། འགྲོ་བ་དང༌། འདུག་པ་དང། རྡུལ་དེ་དག་གིས་དེར་གཏོགས་པ་ཞེས་བྱ་བ་གནས་དེའི་ཕྱོགས་ཇི་ཙམ་ཡོད་པ་ཁྱབ་པ་ཞེས་བྱ་བ་ཆུབ་པར་གྱུར་པ་སྟེ། དེ་ནི་ཉེ་བར་སྤྱོད་པ་ཉིད་ཀྱིས་གནས་དང་ཉེ་བར་གྱུར་པའི་ཉེ་འཁོར་ཡིན་པར་རིག་པར་བྱའོ། །མདོ་འདི་ནི་ལུང་ལས། ཁྱིམ་ལ་སོགས་པ་གང་ན། དེ་དག་འདུ་བར་བྱེད་པ་དང༌། རྔོ་བར་བྱེད་པ་དང༌། འཐག་པར་བྱེད་པ་དང༌། ཁྱེའུ་སུས་བྱེད་པ་ལ་སོགས་པ་ནི་ཉེ་འཁོར་རོ་ཞེས་གསུངས་པ་གང་ཡིན་པ་དེ་བསྡུ་བའི་ཕྱིར་བྱས་སོ། །མཚམས་མེད་པའི་ལམ་དུ་ཐ་དད་པ་མ་ཡིན་པར་འགྲོ་བའི་མི་ལ་ནི་འདོམ་བཞི་བཅུ་རྩ་དགུའོ་ཞེས་བྱ་བ་ལ། ལམ་གང་ན་མཚམས་མེད་པ་དེ་ནི་མཚམས་མེད་པའི་ལམ་སྟེ། མཚམས་མེད་པའི་ལམ་དེར་རོ། །ཐ་དད་པ་མ་ཡིན་པར་འགྲོ་བའི་མི་ཞེས་བྱ་བ་ནི། དགེ་སློང་ལྟུང་བ་འབྱིན་པ་པོ་ལ་ལྟོས་ནས། ལམ་ཐ་དད་པ་མ་ཡིན་པར་འགྲོ་བའི་མི་དགེ་སློང་གི་ཆོས་གོས་ཁྱེར་བ་སྟེ། དེ་ལ་ནི་འདོམ་བཞི་བཅུ་རྩ་དགུ་ཚུན་ཆད་ཉེ་འཁོར་ཡིན་ནོ། །འདི་སྐད་བསྟན་ཏེ། ལྟུང་བ་འབྱིན་པ་པོ་ལམ་གང་དུ་འགྲོ་བའི་ལམ་དེ་ཉིད་དུ་ཆོས་གོས་ཁྱེར་པའི་མི་ཡང་གལ་ཏེ་འགྲོ་ན། དེ་ནི་འདིར་ཐ་དད་པ་མ་ཡིན་པར་འགྲོ་བའི་མི་ཡིན་ཏེ། མཚམས་མེད་པ་དགོན་པ་ལ་སོགས་པའི་ལམ་དུ་ཐ་དད་པ་མ་ཡིན་པར་འགྲོ་བའི་མི་དེ་དང་འགྲོ་བ་
ལ་ནི་འདོམ་བཞི་བཅུ་རྩ་དགུ་ཚུན་ཆད་ཉེ་འཁོར་ཡིན་ནོ། །མཚམས་བྱས་པའི་ལམ་དུ་ནི་མཚམས་ཉིད་རྣམ་པར་གཞག་ཏུ་རུང་ངོ༌། །ཞེང་དུ་ལམ་གཅིག་ཏུ་གཏོགས་པ་ཉིད་ཇི་ལྟར་རིག་པར་བྱ་ཞེ་ན། ཞེང་ཇི་ཙམ་ཚུན་ཆད་དུ་འགྲོ་བ་ན། སྐྱེ་བོ་དག་གིས་ལམ་གཅིག་ཏུ་གཏོགས་པ་ཉིད་དུ་ཤེས་པ་དེ་ཙམ་ཚུན་ཆད་ནི་འདིར་ཞེང་ལས་ལམ་གཅིག་ཏུ་གཏོགས་པ་ཉིད་ཡིན་ནོ། །འདིར་མི་ཞེས་སྨོས་པ་ནི་མཚོན་པ་ཙམ་དུ་ཟད་ངོ༌། །སྔར་ཕྱིར་ཆོས་གོས་ཐལ་བ་དང༌། །ལུས་པ་ཐམས་ཅད་ལ་ཚིགས་དེ་ཚུན་ཆད་ཉེ་འཁོར་ཡིན་ནོ། །གང་གི་ཕྱིར་ཉེ་འཁོར་ནི། ཁོར་ཁོར་ཡུག་ཏུ་འདོམ་རེ་རེའོ་ཞེས་བྱ་བའི་མདོ་དེའི་དམིགས་ཀྱིས་བསལ་བའི་རྣམ་པ་དེ་དག་ཡིན་པ་དེའི་ཕྱིར། འདིར་ལུས་ཀྱིས་ནོན་པའི་ཕྱོགས་ཉིད་ནས་བརྩམས་ཏེ། འདོམ་བཞི་བཅུ་རྩ་དགུར་གཞལ་བར་རིག་པར་བྱའི། འདོམ་གང་གི་མཐའ་ནས་ནི་མ་ཡིན་ནོ། །མཚམས་གཞན་ནི་མ་ཡིན་ནོ་ཞེས་བྱ་བ་ལ། གཞན་གྱི་མཚམས་ནི་མཚམས་གཞན་ཏེ། མཚམས་གཞན་དེ་ནི་དྲུང་ན་འདུག་ཀྱང་ཉེ་འཁོར་མ་ཡིན་ཏེ། མཚམས་རྣམ་པར་གཞག་པ་ནི་རང་དབང་ཐ་དད་པའི་ཕྱིར་རོ། །དབུས་ནས་རྒྱང་གྲགས་ཀྱི་མཐའ་ཕན་ཆད་ན་ནི་ཐ་དད་པ་ཉིད་དོ་ཞེས་བྱ་བ་ནི། ཕྱོགས་ཐམས་ཅད་དུ་ཤིང་ལྗོན་པའི་ཡལ་ག་དང༌། ལོ་མ་ལ་སོགས་པ་འབྲེལ་པ་དང༌། གྲོང་ཁྱེར་གྱི་སྟེང་ལ་སོགས་པ་འབྲེལ་པ་དང༌། ཐག་པས་འབྲེལ་པ་ལ་སོགས་པས་ཁྱབ་པའི་གནས་སུ་ནི་དབུས་ནས་བརྩམས་ཏེ། ཕྱོགས་ཐམས་ཅད་དུ་རྒྱང་གྲགས་གཅིག་གི་ནང་ཚུན་ཆད་ནི་ཉེ་འཁོར་ཡིན་གྱི། རྒྱང་གྲགས་གཅིག་གི་མཐའ་ཕན་ཆད་ནི་གནས་དང་ཉེ་འཁོར་ཐ་དད་པ་ཉིད་དོ། །འདི་སྐད་བསྟན་ཏེ། དགེ་སློང་གིས་དབུས་ནས་ལྟོས་ཏེ། རྒྱང་གྲགས་གཅིག་གི་མཐའི་ཕྱི་རོལ་དུ་ཆོས་གོས་འཇོག་ཅིང་རང་དབུས་ཀྱི་གནས་སུ་སྐྱ་རེངས་འཆར་བར་བྱེད་ན། འདི་ལྟར་དཔག་ཚད་ཙམ་དུ་ཤིང་ལྗོན་བའི་ཡལ་ག་དང༌། ལོ་མ་དང་འབྲེལ་བ་ཉིད་ལ་སོགས་པ་ཡོད་དུ་ཟིན་ཀྱང༌། དགེ་སློང་དེ་ཆོས་གོས་དང་འབྲལ་བ་ཁོ་ནར་འགྱུར་རོ། །ལུང་གི་གཞུང་བསྟན་པའི་ཕྱིར་ནགས་ཞེས་བྱ་བ་ནི། ཤིང་ལྗོན་པའི་གནས་སོ། །དེ་ལ་ཇི་སྲིད་དུ་ཡལ་ག་དང༌། ལོ་མ་དང༌། མེ་ཏོག་དང༌། འདབ་མ་
དང། འབྲས་བུ་དག་ཕན་ཚུན་འབྲེལ་པར་གྱུར་བ་དེར་དགེ་སློང་གིས་རྒྱང་གྲགས་ཁོར་ཁོར་ཡུག་གར་དགའ་བར་ཆོས་གོས་བཞག་སྟེ། དེར་གར་དགར་བར་སྐྱ་རེངས་འཆར་བར་བྱའོ་ཞེས་མ་མོ་ལས་གསུངས་པ་དེ་མདོ་འདིར་བསྡུས་པ་ཡིན་ཏེ། གྲོང་ཁྱེར་ཐོག་འབྲེལ་པ་ལ་སོགས་པ་གཞན་དུ་ཡང་རུང་བའི་ཕྱིར་སྤྱིར་རྣམ་པར་གཞག་གོ །འབྲལ་བའི་སྤང་བ་རྣམ་བར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་རྫོགས་སོ།། །།འབྲལ་བའི་སྤང་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། དམ་དུམ་དུ་གྱུར་པ་ལ་བྱིན་གྱིས་བརླབས་པ་མེད་པར་མི་འགྱུར་རོ་ཞེས་བྱ་བ་སྨྲས་ཏེ། ཆོས་གོས་ལ་སོགས་པ་དམ་དུམ་དུ་གྱུར་པ་ལ་བྱིན་གྱིས་བརླབས་པ་མེད་པར་མི་འགྱུར་ཏེ། འདི་ལྟར་བྱིན་གྱིས་བརླབས་པ་ནི་རང་གི་ཉིད་ལ་བརྟེན་པ་ཡིན་པས། དམ་དུམ་དུ་གྱུར་པ་དེ་ལས། རང་གི་ཉིད་དང་འབྲལ་བར་མི་འགྱུར་བའི་ཕྱིར་རོ། །སྤང་བ་ལ་མ་ཆགས་པ་མ་ཡིན་ནོ་ཞེས་བྱ་བ་ནི། ཆོས་གོས་ལ་སོགས་པ་སྤང་བ་ལ་བྱིན་གྱིས་བརླབས་པ་མི་འཆགས་པ་མ་ཡིན་ཏེ། འཆགས་པ་ཁོ་ནའོ། །གཞུང་ཁ་ཅིག་ལས་དགེ་སློང་གིས་ཆོས་གོས་དེ་ཉིད་དགུང་བཅུ་འདས་པ་ཡང་ལགས་ལ། དེ་ཉིད་དུ་དགུང་གཅིག་འབྲལ་བ་ཡང་ལགས་པ་མཆིས་སམ། བཀའ་སྩལ་པ། ཡོད་དེ་ཆོས་གོས་ཞག་བཅུ་འདས་པ་ཡིན་ལ། དགེ་སློང་གིས་ཀྱང་དེ་བྱིན་གྱིས་བརླབས་ཏེ། མཚམས་ཀྱི་ཕྱི་རོལ་དུ་སྐྱ་རེངས་འཆར་བར་བྱེད་པའོ་ཞེས་གསུངས་པ་དེ་བསྡུས་པ་ཡིན་ནོ། །དགེ་འདུན་གྱི་ལ་ཡང་ངོ་ཞེས་བྱ་བ་ནི། ཆོས་གོས་ལ་སོགས་པ་ལ་བྱིན་གྱིས་བརླབ་པ་མི་འཆགས་པ་མ་ཡིན་ནོ། །དེ་ལས་འབྲལ་བར་འགྱུར་རོ་ཞེས་བྱ་བ་ནི། དགེ་འདུན་གྱིས་བྱིན་གྱིས་བརླབས་པ་དེ་ལས་འབྲལ་བར་འགྱུར་བ་ཁོ་ན་སྟེ། འབྲལ་བའི་རྒྱུ་ནི་བྱིན་གྱིས་བརླབས་པ་ཡིན་གྱི། རང་གི་ཉིད་ནི་མ་ཡིན་པའི་ཕྱིར་རོ། །གཞན་གནས་པས་གཞན་གྱི་གནས་མི་ཉམས་སོ་ཞེས་བྱ་བ་ནི། ལྟ་བ་མི་མཐུན་པ་དང༌། མཚན་མི་མཐུན་པ་གཞན་གནས་པས་དེའི་རྒྱུས་དགེ་སློང་གཞན་གྱི་གནས་གང་ཡིན་པ་དེ་མི་ཉམས་ཏེ། ཡོངས་སུ་བཏང་བར་མི་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཡོན་བདག་ཅིག་གིས་ཆོས་འདི་པ་དང༌། ཕྱི་རོལ་པའི་རབ་ཏུ་བྱུང་
པའི་སྤྱི་ལ་བསྔོས་པའི་གནས་ཐུན་མོང་དེ་ན་དགེ་སློང་གནས་པ་ལས། གལ་ཏེ་དགེ་སློང་གི་གནས་དེར་མུ་སྟེགས་ཅན་ནམ་དགེ་ཚུལ་ལ་སོགས་པ་ཡང་གནས་པར་བྱེད་ན་དེ་ལྟ་ན་ཡང་གནས་དེ་ཉིད་དགེ་སློང་དེས་སྔ་ན་གནས་པས་སམ། རིས་སུ་བཅད་པའི་བར་ཆད་ཀྱིས་བཅད་པ་ལ་སོགས་པས་བདག་གིར་བསྒྲུབས་ཟིན་པས་ཇི་སྲིད་དུ་དགེ་སློང་དེ་གནས་དེ་ལ་འཇོག་པ་དང༌། འཇུག་པ་དང༌། འབྱུང་བ་ལ་སོགས་པའི་དབང་ཡོད་པ་དེ་སྲིད་དུ་གནས་དེ་མི་ཉམས་ཏེ་བྲལ་བར་མི་འགྱུར་རོ། །དེ་བཞིན་དུ་གནས་དེ་ན་གལ་ཏེ་མུ་སྟེགས་ཅན་ནམ་དགེ་ཚུལ་ལ་སོགས་པ་གནས་པར་གྱུར་པ་ལས། དགེ་སློང་ཡང་གནས་པར་བྱེད་ན་ཡང་མི་དབང་བ་མ་ཡིན་པར་ཤེས་པར་བྱའོ། །འདིར་གཞུང་འདི་ཡི་གེ་ཁ་ཅིག་ལས་དགེ་སློང་གིས་མུ་སྟེགས་ཅན་གྱི་གནས་སུ་ཆོས་གོས་བཞག་སྟེ། དགེ་འདུན་གྱི་གནས་ཉེ་འཁོར་གཅིག་པར་གནས་པར་བགྱིད་ན། ལྟུང་བར་མི་འགྱུར་བ་མཆིས་སམ། བཀའ་སྩལ་པ་ཡོད་དེ། མུ་སྟེགས་ཅན་དང་ལྷན་ཅིག་ཏུ་བསྐོས་པར་གྱུར་པར་རོ་ཞེས་གསུངས་པ་ཡིན་ནོ། །ཤིང་ལྗོན་པ་ལ་ཡང་དེ་དང་འདྲའོ། །འདིར་བསྐོས་པ་ཞེས་བྱ་བ་ནི་གནས་གཅིག་ལ་གཉིས་དབང་བར་བྱས་པ་ཡིན་པར་རིག་པར་བྱའོ། །གལ་ཏེ་དེ་ལ་གཅིག་ཁོ་ན་དབང་བ་ཡིན་གྱི། ཅིག་ཤོས་མི་དབང་ན་ནི་དེའི་ཚེ། གནས་ཐ་དད་པ་ཁོ་ན་ཡིན་ནོ། །ཆོས་གཞན་པ་དང་འདི་པ་དག་ནི་ལྟ་བ་ལས་ཞེས་བྱ་བས་མ་འཕངས་པ་མ་ཡིན་ནོ་ཞེས་བྱ་བ་ནི། ཆོས་གཞན་པ་དང་ཆོས་འདི་པ་ནི་ཆོས་གཞན་པ་དང་འདི་པ་དག་སྟེ་དེ་གཉིས་ནི་སྔར་མདོ་ལས་ལྟ་བ་ལས་ཞེས་སྨོས་པ་དེས་མ་འཕངས་པ་མ་ཡིན་ཏེ། འདི་ལྟར་འཕངས་པ་ཁོ་ན་ཡིན་ནོ། འདི་སྐད་བསྟན་ཏེ། སྔར་མདོ་ལས་ནོར་ལས་དང༌། ལྟ་བ་ལས་དད་པ་ཐ་དད་པ་མ་ཡིན་པའི་ཡང་ངོ་ཞེས་སྨོས་པ་དེར་བདག་པོ་ནོར་ལས་དང་ལྟ་བ་ལས་དད་པ་ཐ་དད་པ་མ་ཡིན་པ་རྣམས་ཀྱི་གནས་ནི་ཐ་དད་བ་ཉིད་མ་ཡིན་ལ། ནོར་ལས་དང་ལྟ་བ་ལས་དད་པ་ཐ་དད་པ་རྣམས་ཀྱི་གནས་ནི་ཐ་དད་པ་ཉིད་དོ་ཞེས་བསྟན་པའི་མདོ་དེའི་ལྟ་བ་ལས་དད་པ་ཐ་དད་པ་རྣམས་ཀྱི་གནས་ཐ་དད་པ་ཉིད་དོ་ཞེས་བྱ་བའི་ཚིག་དེས་ཆོས་གཞན་པ་མུ་སྟེགས་ཅན་ལ་སོགས་པ་དང༌། ཆོས་འདི་པས་དེ་བཞིན་གཤེགས་པའི་
ཉན་ཐོས་དག་མ་འཕངས་པ་ཉིད་མ་ཡིན་ཏེ། འདི་ལྟར་འཕངས་པ་ཉིད་ཡིན་ནོ། །དེ་ལྟར་ན་དགེ་སློང་གིས་ཆོས་གཞན་པའི་གནས་སུ་ཆོས་གོས་འཇོག་ལ། ཆོས་འདི་པའི་གནས་སུ་སྐྱ་རེངས་འཆར་བར་བྱེད་ན་དེའི་ཚེ་དེ་ཆོས་གོས་དང་འབྲལ་བ་ཁོ་ནར་འགྱུར་རོ། །ཐུན་མོང་མ་ཡིན་པ་དག་གིས་སྒོ་གང་ཡང་མ་ཡིན་ནོ་ཞེས་བྱ་བ་ནི། མོད་སྔ་མས་བསྟན་པའི་ཐུན་མོང་བ་དག་གིས་ཞེས་བྱ་བ་དེ་དག་གིས་སྒོ་གང་ཡང་མ་བསྡུས་པ་མ་ཡིན་ཏེ། བསྡུས་པ་ཁོ་ནའོ། །འདི་སྐད་བསྟན་ཏེ། སྔར་མདོ་ལས་བདག་པོ་གཅིག་པ་ཉིད་མ་ཡིན་པའི་བར་གྱི་མཚམས་རྣམས་ནི་ཐ་དད་པ་ཉིད་དོ་ཞེས་སྨོས་པ་དེར་གནས་རྣམས་ནི་ཐ་དད་པ་ཉིད་དོ། །སྒོ་ལ་སོགས་པ་གང་དག་ཡིན་པ་དེ་དག་ནི་ཐུན་མོང་ངོ་ཞེས་བསྟན་པ་དེས་སྒོ་གང་དང༌། སྒོ་དང་འབྲེལ་པའི་གནས་ཐུན་མོང་བ་ཉིད་མ་འཕངས་པ་མ་ཡིན་ཏེ། འཕངས་པ་ཁོ་ནར་ཤེས་པར་བྱའོ། །དེས་ན་མཚམས་ཐ་དད་པའི་ཁྱིམ་དུ་ཆོས་གོས་གཞག་སྟེ། སྒོ་གང་དུ་སྐྱ་རེངས་འཆར་བར་བྱེད་ན་ལྟུང་བ་མེད་དོ། །མདོ་དེ་གཉིས་ཀྱི་གཞུང་ནི་འདི་ཡིན་ཏེ། དགེ་འདུན་གྱི་གནས་དང༌། མུ་སྟེགས་ཅན་གྱི་གནས་ཉེ་འཁོར་གཅིག་པར་གནས་པར་བྱེད་ན། སྒོ་གང་དུ་གནས་བ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །ནོར་ལས་ཞེས་བྱ་བས་ཕ་དང་བུ་དག་ལས་ཀྱང་མ་ཡིན་ནོ་ཞེས་བྱ་བ་ནི། སྔར་མདོ་ལས་ནོར་ལས་དང་ལྟ་བ་ལས་དད་པ་ཐ་དད་བ་མ་ཡིན་པའི་ཡང་ངོ་ཞེས་སྨོས་པ་དེར་བདག་པོ་ནོར་ལས་དང༌། ལྟ་བ་ལས་དད་པ་ཐ་དད་པ་མ་ཡིན་པ་རྣམས་ཀྱི་གནས་ནི་ཐ་དད་པ་ཉིད་མ་ཡིན་ལ་ནོར་ལས་དང༌། ལྟ་བ་ལས་དད་པ་ཐ་དད་པ་རྣམས་ཀྱི་གནས་ནི་ཐ་དད་པ་ཉིད་དོ་ཞེས་བསྟན་པའི་མདོ་དེའི་ནོར་ལས་དད་པ་ཐ་དད་པ་རྣམས་ཀྱི་གནས་ཐ་དད་པ་ཉིད་དོ་ཞེས་བྱ་བའི་ཚིག་དེས་ཕ་དང་བུ་དག་ཀྱང་མ་འཕངས་པ་མ་ཡིན་ཏེ། འདི་ལྟར་འཕངས་པ་ཁོ་ནའོ། །དེ་ལྟར་ན་དགེ་སློང་གིས་ནོར་ཐ་དད་པའི་བུའི་ཁྱིམ་དུ་ཆོས་གོས་བཞག་སྟེ། ཕའི་ཁྱིམ་དུ་སྐྱ་རེངས་འཆར་བར་བྱེད་ན་དེ་ཆོས་གོས་དང་འབྲལ་བ་ཁོ་ནར་འགྱུར་རོ། །སྤངས་པ་ཉིད་ཀྱང་དེ་དང་འདྲའོ་ཞེས་བྱ་བ་ནི། ཕ་དང་བུ་དག་ནོར་གྱིས་ཐ་དད་པ་ཉིད་ཀྱིས་ནི་ཐ་དད་པ་ཉིད་དུ་བསྟན་ལ། ཐ་དད་པ་མ་ཡིན་པ་ཉིད་ཀྱིས་ནི་ཐ་དད་པ་མ་ཡིན་པར་བསྟན་པ་དེ་ཉིད་ཀྱིས་ལྷུང་བཟེད་ཁས་
ཕུབ་པས་སམ། ཁྲིམས་སུ་བྱ་བས་སྤངས་པ་ཉིད་ཀྱང་དེ་དང་འདྲ་བར་རིག་པར་བྱའོ། །དེ་ལྟར་ན་ནོར་ཐ་དད་པའི་ཕ་སྤངས་ཏེ། བུ་ལས་བསོད་སྙོམས་ལ་སོགས་པ་ལེན་པར་བྱེད་ན་ལྟུང་བར་མི་འགྱུར་ལ། ནོར་ཐ་དད་པའི་བུ་སྤངས་ཏེ་ཕ་ལས་བསོད་སྙོམས་ལ་སོགས་པ་ལེན་པར་བྱེད་ན་ཡང་ལྟུང་བ་མེད་པར་རིག་པར་བྱའོ། །ཉལ་པོ་བྱེད་པར་ཤོམ་པ་ཉིད་ཀྱང་ངོ་ཞེས་བྱ་བ་ཡང་ནོར་གྱིས་ཐ་དད་པ་ཉིད་ཀྱིས་ཐ་དད་པ་ཉིད་དུ་བསྟན་ལ། ཐ་དད་པ་མ་ཡིན་པ་ཉིད་ཀྱིས་ནི་ཐ་དད་པ་མ་ཡིན་པར་བསྟན་པ་དེ་ཉིད་ཀྱིས་ཉལ་པོ་བྱེད་པར་ཤོམ་པ་ཉིད་ཀྱི་ཁྱིམ་ཡང་དེ་དང་འདྲ་བར་རིག་པར་བྱའོ། །འདི་སྐད་བསྟན་ཏེ། ཁྱམས་སམ། དག་ར་འམ། ཁང་ཁྱིམ་མམ། ཕོ་བྲང་གཅིག་ན་གནས་མལ་དུ་མ་ཡོད་ལ། གནས་མལ་དེ་དག་ན་སྐྱེས་པ་དང་བུད་མེད་དག་ཉལ་པོ་བྱེད་པ་ལ་དགེ་སློང་གིས་ཕྱིས་གནོན་བྱས་ནས་འདུག་གམ། སྐྱབས་ཡོད་པ་ན་འགྲེང་བར་བྱེད་ན་གལ་ཏེ་སྐྱེས་པ་དེ་དག་ནོར་ཐ་དད་པ་ཉིད་མ་ཡིན་པར་གྱུར་ན་ནི་ནོར་ཐ་དད་པ་ཉིད་མ་ཡིན་པའི་གནས་མལ་དེ་དག་ན་འདུག་པའམ་འགྲེང་བར་བྱེད་པའི་དགེ་སློང་ལ་ལྟུང་བ་གཅིག་ཁོ་ནར་འགྱུར་རོ། །འོན་ཏེ་སྐྱེས་པ་དེ་དག་ནོར་ཐ་དད་པ་ཉིད་ཡིན་པར་གྱུར་ན་ནི་ནོར་ཐ་དད་པ་ཉིད་ཡིན་པའི་གནས་མལ་དེ་དག་ན་འདུག་པའམ་འགྲེང་བར་བྱེད་པའི་དགེ་སློང་ལ་ཉལ་པོ་ཤོམ་པར་བྱེད་པའི་ཁྱིམ་ན་འདུག་པའམ་འགྲེང་བ་ལས་བྱུང་བའི་ལྟུང་བྱེད་ཀྱང་ཉལ་པོ་བྱེད་པའི་གྲ་དུ་ཡོད་པ་དེ་རེ་རེ་ལས་རེ་རེ་འབྱུང་བར་འགྱུར་རོ། །འདིར་གཞུང་ནི་ཕྲན་ཚེགས་ཀྱི་ཞུ་བ་ལྷུང་བཟེད་ཁས་དབུབ་པ་ལས་ཁྱིམ་བདག་ལ་ཁྱིམ་ཞིག་ཡོད་ལ་དེ་ལ་བུ་རབ་ཏུ་མང་པོ་དག་བདོག་ཅིང༌། དེ་ཡང་ནོར་ཐ་དད་པའི་ཁྱིམ་མ་ཡིན་ལ། ཁྱིམ་བདག་རྣམས་ཀྱང་ལྷན་ཅིག་གནས་པ་ཡིན་ན། ཁྱིམ་གཅིག་ཡིན་པར་བརྗོད་པར་བྱ་སྟེ། ཕྱིས་གནོན་མ་བྱས་ཤིང་མ་འདུག་པ་ཡང་མ་ཡིན་ལ། སྐྱབས་མེད་པ་ཡང་མ་ཡིན་ཏེ། ཕྱིས་གནོན་དང༌། འདུག་པ་གཅིག་དང༌། སྐྱབས་ཡོད་པ་ན་འགྲེང་བ་ཡང་གཅིག་ཁོ་ནར་འགྱུར་རོ། །གལ་ཏེ་དེ་ནོར་ཐ་དད་པའི་ཁྱིམ་ཡིན་ལ། ཁྱིམ་བདག་རྣམས་ཀྱང་ལྷན་ཅིག་གནས་པ་མ་ཡིན་ན་ནི་ཁྱིམ་ཐ་དད་པར་བརྗོད་པར་བྱ་སྟེ། བུ་དེ་དག་ཇི་སྙེད་པ་དག་དང་འབྲེལ་པ་ཇི་
སྙེད་ཡོད་པ་དག་དང༌། མནའ་མ་ཇི་སྙེད་དེ་དག་ན་འཁོད་པ་ཐམས་ཅད་ལས་ཕྱིས་གནོན་བྱས་ཤིང་འདུག་པའམ། སྐྱབས་ཡོད་པ་ན་འགྲེང་བ་ཐམས་ཅད་ལ་ཕྱིས་གནོན་དང༌། འདུག་པ་དང་སྐྱབས་ཡོད་པ་ན་འགྲེང་བའི་ལྟུང་བྱེད་རེ་རེར་འགྱུར་རོ་ཞེས་གསུངས་པ་ཡིན་ནོ། །ཁྱིམ་བདག་རྣམས་ཀྱང་ལྷན་ཅིག་གནས་པ་ཡིན་ལ་ཞེས་བྱ་བས་ནི་ཁྱིམ་གཅིག་ཏུ་གྱུར་པ་ཉིད་བསྟན་ཏོ། །གྲོང་ལ་དེ་ཡོད་པ་དེ་ནི་གཙུག་ལག་ཁང་གི་ཉེ་འཁོར་ཉིད་མ་ཡིན་ནོ་ཞེས་བྱ་བ་ནི། གྲོང་ལ་ཉེ་འཁོར་ཡོད་པ་ཞེས་བྱ་བ་བདོག་པ་ནི་གཙུག་ལག་ཁང་གི་ཉེ་འཁོར་ཉིད་མ་ཡིན་ནོ། །འདི་སྐད་བསྟན་ཏེ། འདི་ལྟར་གྲོང་དང་གཙུག་ལག་ཁང་གཉི་གའི་ཉེ་འཁོར་འབྲེལ་པ་ཉིད་ཡིན་དུ་ཟིན་ཀྱང་གྲོང་གི་ཉེ་འཁོར་གང་ཡིན་པ་དེ་གཙུག་ལག་ཁང་གི་ཉེན་ཀོར་ཉིད་མ་ཡིན་ནོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་གྲོང་དང་གཙུག་ལག་ཁང་གི་ཉེ་འཁོར་འབྲེལ་པར་གྱུར་ན་ཆོས་གོས་དང་མི་འབྲལ་བ་ཇི་ལྟར་འཚལ་བར་བགྱི། ཉེ་བ་འཁོར་གྲོང་གི་ཉེ་འཁོར་མ་གཏོགས་པ་ལྷག་མ་ལས་ཆོས་གོས་དང་མི་འབྲལ་བར་ཤེས་པར་བྱ་སྟེ། །དཔེར་ན་གྲོང་གི་ཉེ་འཁོར་དུ་མཚམས་གཅོད་པར་བྱེད་ན་ཡང་མཚམས་སུ་མི་འགྱུར་ལ། མཚམས་སུ་གྱུར་ཟིན་པའི་ནང་དུ་གྲོང་གི་ཉེ་འཁོར་ཞིག་ཕྱིས་བྱུང་ན་ཡང་དེའི་ཚེ་མཚམས་སུ་མ་གཏོགས་པར་ཁོལ་དུ་དབྱུང་བར་བྱ་སྟེ། ཁྱིམ་པ་མི་བགྲུངས་པ་དག་ལྷག་པར་གནས་པ་ཉིད་ཡིན་པས་ཐ་དད་པར་གྱུར་པའི་ཕྱིར་རོ། །དེ་བཞིན་དུ་གྲོང་གི་ཉེ་འཁོར་ཡང་གཙུག་ལག་ཁང་གི་ཉེ་འཁོར་དུ་མི་འགྱུར་རོ་ཞེས་གསུངས་པ་ཡིན་ནོ། །འབྲལ་བའི་སྤང་བ་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །འབྲལ་བའི་སྤང་བའོ་ཞེས་བྱ་བ་ཞག་གཅིག་གིས་འབྲལ་བའི་སྤང་བའི་ལྟུང་བྱེད་བཤད་ཟིན་ཏོ།། །།བམ་པོ་བཅུ་བདུན་པ། ཟླ་བ་གཅིག་གིས་སྤང་བ་བརྗོད་པར་འདོད་ནས། ཁ་བསྐང་བ་ལ་རེ་བ་མེད་ན་ཆུང་བ་ཁྲུ་གང་ཡན་ཆད་ཀྱང་ཆོག་པ་དང་འདྲའོ་ཞེས་བྱ་བ་སྨྲས་ཏེ། མདོ་སྔ་མ་དག་ལས་གོས་ཞེས་སྨོས་པའི་རྗེས་དང་སྦྱར་རོ། །གོས་འཁོར་གསུམ་ཁེབས་པའི་ཚད་དུ་ཆོག་པ་བས་ཆུང་བ་ཁྲུ་གང་ཡན་ཆད་ཀྱང་འཁོར་གསུམ་ཁེབས་པའི་ཚད་དུ་ཆོག་པ་དང་འདྲ་བར་བལྟ་བར་བྱའོ་ཞེས་སྟོན་
ཏོ། །གང་གི་ཚེ་ཞེ་ན། དེའི་ཕྱིར་ཁ་བསྐང་བ་ལ་རེ་བ་མེད་ན་ཞེས་བྱ་བ་སྨྲས་ཏེ། འཁོར་གསུམ་ཁེབས་པའི་ཚད་དུ་ཆོག་པར་རེ་བ་མེད་ན་སྟེ། གལ་ཏེ་སྤྱིར་ཐམས་ཅད་ཀྱི་ཐམས་ཅད་དུ་ཆོས་གོས་རྙེད་པར་རེ་བ་རྒྱུན་ཆད་ནའོ། །དེའི་ཚེ་ན། ཆུང་བ་ཁྲུ་གང་ཡན་ཆད་ཀྱང་ཆོག་པ་དང་འདྲ་སྟེ། ཇི་ལྟར་འཆང་བའི་བསླབ་པའི་གཞིར་འཁོར་གསུམ་ཁེབས་པའི་ཚད་དུ་ཆོག་པ་ཞག་བཅུ་འདས་ན་སྤང་བར་བསྡུས་པ་དེ་བཞིན་དུ་ཆུང་བ་ཁྲུ་གང་ཡན་ཆད་པ་འདི་ཡང་དེ་ཉིད་དུ་འདུས་པར་རིག་པར་བྱ་སྟེ། དེའི་ཚེ་ན་ཆུང་བ་ཁྲུ་གང་ཡན་ཆད་པ་འདི་ཡང་འཁོར་གསུམ་ཁེབས་པའི་ཚད་དུ་ཆོག་པ་དེ་དང་འདྲ་བར་ཞག་བཅུ་པོ་དེ་ཉིད་ཀྱི་ནང་རོལ་དུ་གཏང་བར་བྱ་བའམ། བྱིན་གྱིས་བརླབ་པའམ། གཞན་ལ་སྦྱིན་པར་བྱ་བའོ། །ཆུང་བ་དེ་འཁོར་གསུམ་ཁེབས་པའི་ཚད་དུ་ཆོག་པ་བས་ཆུང་བའོ་ཞེས་བྱ་བ་སྨྲས་ན་ཅི་ཙམ་དུ་ཆུང་བ་ཡིན་ཞེ་ན་དེའི་ཕྱིར་ཁྲུ་གང་ཡན་ཆད་ཅེས་བྱ་བ་སྨྲས་ཏེ། ཁྲུ་གང་ཡན་ཆད་ཀྱི་གོས་ཏེ། ཁྲུ་གང་གི་ཚད་ཡན་ཆད་ཡིན་གྱི། དེ་བས་ཆུང་བ་གྲུ་གང་བ་ནི་མ་ཡིན་ནོ། །འདིར་གཞུང་ནི་དེ་ཆོས་གོས་དེ་ལ་རེ་བ་ཐམས་ཅད་ཀྱི་ཐམས་ཅད་དུ་རྒྱུན་ཆད་པར་གྱུར་ན། དགེ་སློང་དེས་ཆོས་གོས་དེ་ཞག་བཅུ་པ་དེ་ཉིད་ཀྱི་ནང་རོལ་དུ་གཏང་བར་བྱའོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། ཁ་བསྐང་བའི་བསམ་པ་མེད་ན་ནི་ཆུང་བ་གྲུ་གང་ཡན་ཆད་པ་དེ་ཞག་བཅུ་ན་ཐུག་པར་བཅང་བར་བྱའོ། །ཁ་བསྐང་བའི་བསམ་པ་ཡོད་ན་ནི་ཟླ་བ་གཅིག་ལ་ཐུག་བར་གཞག་པར་བྱའོ་ཞེས་བྱ་བ་དེ་འདིར་རྣམ་པར་གཞག་གོ ། བྱིན་གྱིས་བརླབ་པར་བྱ་བ་ཡོད་པ་ཉིད་ན་ཡང་ངོ་ཞེས་བྱ་བ་ནི། བྱིན་གྱིས་བརླབ་ཏུ་རུང་བའི་ཆོས་གོས་གསུམ་ཡོད་པ་ཉིད་ཡིན་ན་ཡང་ཆུང་བ་ཁྲུ་གང་ཡན་ཆད་པ་དེ་ཆོག་པ་དང་འདྲ་བར་བལྟ་བར་བྱའོ། །འདིར་གཞུང་ནི་མདོའི་ཚིག་ལས་ཆུང་ན་ཁ་བསྐང་བར་བྱའོ་ཞེས་གསུངས་པ་དང༌། དེའི་རྣམ་པར་འབྱེད་པ་ནི་འདི་ཡིན་ཏེ། སྣམ་སྦྱར་གྱིའམ། བླ་གོས་ཀྱིའམ། མཐང་གོས་ཀྱིའམ་ཞེས་གསུངས་པ་ཡིན་ནོ། །ཕྲན་ཚེགས་ཀྱི་ཞུ་བའི་སྐབས་ཀྱི་ནང་ནས་ཀྱང་གཞུང་འདི་ཡིན་ཏེ། ཟླ་བ་གཅིག་གི་མཐར་ཆོག་པའི་ཆོས་གོས་ནི་འདི་ཡིན་ཏེ། གང་ལ་ཆོས་གོས་གསུམ་ཚང་
བར་ཡོད་ན་དེས་དེ་གཞག་པར་མི་བྱའོ། །ཇི་སྟེ་འཇོག་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །གང་ལ་འཇོག་པའི་སྤང་བ་འབྱུང་ཞེ་ན་དེའི་ཕྱིར། གཞན་དུ་ན་དེ་ནི་ཞག་སུམ་ཅུ་འདས་ནའོ་ཞེས་བྱ་བ་སྨྲས་ཏེ། གཞན་དུ་ན་ཞེས་བྱ་བ་ནི་མདོ་སྔར་བསྟན་མ་ཐག་པའི་གཉིས་པོ་ལས་གཞན་པ་སྟེ། ཁ་བསྐང་བ་ལ་རེ་བ་ཡོད་པ་དང༌། བྱིན་གྱིས་བརླབ་པར་བྱ་བ་མེད་པ་ཉིད་ནའོ། །དེ་ནི་ཞེས་བྱ་བ་ནི་ཆུང་བ་ཁྲུ་གང་ཡན་ཆད་པའོ། །ཞག་སུམ་ཅུ་འདས་ནའོ་ཞེས་བྱ་བ་ནི་ཞག་སུམ་ཅུ་རྩ་གཅིག་གི་སྐྱ་རེངས་དང་པོ་ཤར་ནའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་ཚེས་ལ་ཆོས་གོས་སྔོན་པོ་རྙེད་ལ་བྱེད་དུ་མི་འཇུག་ཅེས་བྱ་བ་ལ་སོགས་པ་དང༌། ཞུ་བ་ལས་ཀྱང༌། བཅོམ་ལྡན་འདས་ཀྱིས་དགེ་སློང་དེས་ཟླ་བ་གཅིག་གི་མཐར་ཐུག་པར་ཆོས་གོས་གཞག་པར་བྱའོ། །ཆོས་གོས་ཇི་ལྟ་བུ་ཞིག་ཅེ་ན། འཁོར་གསུམ་མི་ཁེབས་པ་གང་ཡིན་པའོ་ཞེས་གསུངས་པ་གང་ཡིན་པའོ། །ཁ་དོག་ལ་སོགས་པ་ལས་རིགས་མི་མཐུན་པ་ནི་ཆོག་པ་ཉིད་མ་ཡིན་ནོ་ཞེས་བྱ་བ་ནི། ཁ་དོག་ལ་སོགས་པ་ལས་རིགས་མི་མཐུན་པ་རྙེད་པ་ནི་ཁ་ཚང་པ་ཉིད་མ་ཡིན་ནོ། །འདིར་རིགས་མི་མཐུན་པ་ཉིད་ཀྱིས་ཁ་བསྐང་བར་རེ་བ་གང་ཡིན་པའི་རེ་བ་དེ་ཉིད་ཀྱིས་ཀྱང་བཞག་ཏུ་མི་རུང་ངོ༌། །འདི་སྐད་བསྟན་ཏེ། ཁ་དོག་ལ་སོགས་པ་ལས་རིགས་མི་མཐུན་པ་འགྲུབ་པ་ཉིད་དུ་རེ་བ་གང་ཡིན་པས་ནི་ཞག་སུམ་ཅུར་བཞག་ཏུ་མི་རུང་སྟེ། རིགས་གཞན་ལ་རེ་བ་མ་ཡིན་པའི་ཕྱིར་རོ། །དེ་བཞིན་དུ་འདི་ལྟར་སྤྱིར་ཁ་བསྐང་བ་ལ་རེ་བས་གོས་ཁྲུ་གང་པ་ཞིག་འཇོག་པར་བྱེད་ལ། ཕྱིས་རིགས་མི་མཐུན་པ་རྙེད་ཅིང་སྔར་བཞག་པ་དང་བསྡོངས་ན་འཁོར་གསུམ་ཁེབས་པའི་ཚད་ཡིན་དུ་ཟིན་ཀྱང་དེ་རྙེད་པས་དེ་ཞག་བཅུའི་མཐར་ཐུག་པར་མི་རུང་སྟེ། རིགས་མི་མཐུན་པ་ནི་མ་རྙེད་པ་དང་འདྲ་བའི་ཕྱིར་རོ། །འདིར་གཞུང་ནི་འདི་ལྟར་གང་གི་ཚེ་དེ་དང་འདྲ་བར་རྙེད་པར་གྱུར་ནའོ་ཞེས་གསུངས་པ་ཡིན་ནོ། །སོགས་པ་ཞེས་བྱ་བའི་སྒྲས་རིགས་མི་མཐུན་པས་ཐ་དད་པ་བལ་གོས་དང་རས་གོས་ལ་སོགས་པ་ལྟ་བུ་ཐམས་ཅད་བསྡུའོ། །ཁ་དོག་ཅེས་བྱ་བའི་སྒྲས་ནི་འདིར་སྔོན་པོ་དང༌། སེར་པོ་དང༌། དམར་པོ་དང༌། དེ་དག་གི་བྱེ་བྲག་ལས་བྱས་པ་
དག་ཀྱང་བསྡུའོ། །དེའི་དམིགས་ཀྱིས་བསལ་བ་བསྟན་པའི་ཕྱིར། དཀར་པོ་ཉིད་ནི་ཁ་དོག་ཐམས་ཅད་པ་ཉིད་དོ་ཞེས་བྱ་བ་སྨྲས་ཏེ། དཀར་པོའི་དངོས་པོ་ནི་དཀར་པོ་ཉིད་དོ། །དེ་ནི་ཁ་དོག་ཀྱང་ཡིན་ལ་ཐམས་ཅད་པ་ཡང་ཡིན་པས། ཁ་དོག་ཐམས་ཅད་པ་སྟེ། དེའི་དངོས་པོ་ནི་ཁ་དོག་ཐམས་ཅད་པ་ཉིད་དོ། །གོས་དཀར་པོ་ཉིད་དེ་ལ་ནི་ཁ་དོག་ཐམས་ཅད་ཡོད་བར་བལྟ་བར་བྱ་སྟེ། དཀར་པོ་ནི་ཁ་དོག་ཐམས་ཅད་དུ་བསྒྱུར་དུ་རུང་བའི་ཕྱིར་རོ། །འདི་སྐད་བསྟན་ཏེ། ཁ་སོགས་ཀྱི་གོས་སྔོན་པོ་ལ་སོགས་པ་བཞག་པ་ལ་ཁ་བསྐང་བའི་ཆོས་གོས་དཀར་པོ་རྙེད་པ་གང་ཡིན་པ་དེ་ནི་རིགས་མི་མཐུན་པ་མ་ཡིན་པར་ཤེས་པར་བྱ་སྟེ། དཀར་པོ་ནི་སྔོན་པོ་ལ་སོགས་པར་བསྒྱུར་དུ་རུང་བའི་ཕྱིར་རོ། །དེ་བཞིན་དུ་གོས་དཀར་པོ་བཞག་པ་ལ་སྔོན་པོ་རྙེད་པ་གང་ཡིན་པ་དེ་ཡང་རིགས་མི་མཐུན་པ་མ་ཡིན་ཏེ། བཞག་པ་དེ་སྔོན་པོ་ལ་སོགས་པའི་ཁ་དོག་ཏུ་བསྒྱུར་དུ་རུང་བའི་ཕྱིར་རོ། །འདིར་ལུང་ནི་ཇི་ལྟར་གོས་སྔོན་པོའམ། སེར་པོའམ། དམར་པོའམ། མཐུག་པོའམ། སྲབ་མོ་རྙེད་པ་ཞེས་བྱ་བ་དེར་སྔོན་པོ་ལ་སོགས་པའི་ནང་དུ་དཀར་པོ་མ་སྨོས་པ་ཡིན་པར་རིག་པར་བྱའོ། །གལ་ཏེ་གོས་ཀྱི་ཁ་སོགས་ཟླ་བ་གཅིག་ཏུ་བཞག་པ་ལས་བར་དུ་ཁ་བསྐང་བ་འཁོར་གསུམ་ཁེབས་པའི་ཚད་ཅིག་རྙེད་པར་གྱུར་ན། ཅི་འོན་ཀྱང་ཟླ་བ་གཅིག་གི་བར་དུ་གཞག་པར་བྱའམ་སྙམ་དུ་དོགས་པ་བསལ་བའི་ཕྱིར། དེ་རྙེད་ན་ཞག་བཅུ་པ་དེའི་དང་པོ་ལ་པག་ལ་གློན་པ་ཉིད་དོ་ཞེས་བྱ་བ་སྨྲས་ཏེ། དེ་ཞེས་བྱ་བ་ནི་ཁ་སོགས་ཀྱི་གོས་བཞག་པ་གང་ཡིན་པ་དེ་དང་རིགས་མཐུན་པ་ཁ་བསྐང་བའི་གོས་དེའོ། །རྙེད་ན་ཞེས་བྱ་བ་ནི་གྲུབ་ཅིང་ཐོབ་ནའོ། །དེ་རྙེད་ན་རྙེད་པའི་དུས་དེའི་ཚེ་ན། ཞག་བཅུ་པ་དེའི་དང་པོ་ལ་བག་ལ་གློན་པ་ཉིད་ཡིན་ཏེ། ཞག་བཅུ་པ་དེའི་དང་པོ་ཞེས་བྱ་བ་ནི། ཁ་སོགས་ཀྱི་གོས་བཞག་པ་དང་འབྲེལ་བའི་དུས་ཀྱི་ཞག་བཅུ་པ་དང་པོའམ་གཉིས་བའམ། གསུམ་པ་གང་ཡིན་པའི་ཞག་བཅུ་པའི་སྐབས་དེའི་དང་པོ་ཞེས་བྱ་བ་ཉི་མ་དང་པོ་གང་ཡིན་པ་དེ་ལའོ། །བག་ལ་གློན་པ་ཉིད་དོ་ཞེས་བྱ་བ་ནི། ཞག་བཅུ་པ་དེའི་དང་པོ་དེ་ལ་ཁ་བསྐང་བའི་གོས་ཕྱིས་རྙེད་པ་དེ་གང༌། ཁ་སོགས་ཀྱི་གོས་སྔར་བཞག་
པ་དེ་གཉིས་སོ་སོ་ན་འདུག་ཀྱང་བླ་སྟེ། དེ་དེའི་བག་ལ་གློན་པ་ཉིད་ཡིན་ནོ། །དེ་ཡང་གལ་ཏེ་དེའི་ཚེ་ན་པག་ལ་གློན་པ་ཉིད་ན་འཁོར་གསུམ་ཁེབས་པའི་ཚད་དུ་ཆོག་པ་ཉིད་ཡིན་ན་ནི་དེའི་ཚེ་ཞག་བཅུ་འདས་པ་དེ་ཉིད་ལ་བྱིན་གྱིས་བརླབ་པར་བྱའོ། །གལ་ཏེ་བྱིན་གྱིས་མ་བརླབས་ན་ཞག་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །ཇི་སྟེ་དེ་གཉིས་བསྡོངས་ཀྱང་འཁོར་གསུམ་ཁེབས་པའི་ཚད་དུ་མ་ཆོག་པ་ཉིད་ཡིན་ན་ནི། དེའི་ཚེ་ན་ཕྱིས་རྙེད་པ་དེ་ཡང་སྔར་བཞག་པ་དང་འདྲ་བར་ཟླ་བ་གཅིག་པའི་ཁོངས་སུ་གཏོགས་པ་ཡིན་པར་ཤེས་པར་བྱ་སྟེ། སྔར་བཞག་པ་དེའི་ཤན་གྱི་དབང་གིས་ཕྱི་མ་དེ་སྔ་མའི་བག་ལ་གློན་པ་ཉིད་ཡིན་པའི་ཕྱིར་རོ། །ཕྱི་མ་དེ་ལ་ཡང་ཟླ་བ་གཅིག་པ་དེ་ཉིད་རྣམ་པར་གཞག་པར་རིག་པར་བྱའོ། །འདིར་གཞུང་ནི་དགེ་སློང་དེས་ཞག་བཅུ་པ་དེ་ཉིད་ཀྱི་ནང་རོལ་དུ་ཞེས་གསུངས་པ་ཡིན་ནོ། །ཟླ་བ་གཅིག་པའི་སྤང་པ་འདི་ལ་ཞག་བཅུ་པ་དང་པོ་དང་གཉིས་པ་དང་གསུམ་པ་དག་ནི་ཤན་གྱི་ཕྱིར་ཕན་ཚུན་ལྟོས་པ་ནི་མེད་དོ། །དེ་ལྟར་ན་ཡང་གལ་ཏེ་དགེ་སློང་གིས་ཁ་སོགས་ཀྱི་གོས་ཁྲུ་གང་གི་ཚད་ཅིག་བཞག་ནས་ཞག་བཅུ་གཅིག་པ་ལ་ཁ་བསྐང་བ་རྙེད་དོ། །ཆོ་ག་ན་ནི་ཞག་བཅུ་གཉིས་པ་དེ་ཉིད་ཀྱི་ནང་རོལ་དུ་བྱིན་གྱིས་བརླབ་པར་བྱ་བའམ། གཏང་བར་བྱའོ། །གལ་ཏེ་བྱིན་གྱིས་རློབ་པར་མི་བྱེད་པར་གཏོང་བར་མི་བྱེད་ན་ཞག་ཉི་ཤུ་གཅིག་ལ་སྤང་བའི་ལྟུང་བྱེད་དུ་འགྱུར་བ་ཡིན་ནོ། །དེ་ལྟ་མ་ཡིན་ཏེ་གལ་ཏེ་ཞག་བཅུ་པ་དང་པོའི་ཤན་གྱི་ཤུགས་ཀྱིས་ཕྱི་མ་དེ་ལ་ཡང་ཤན་རྣམ་པར་གཞག་པར་གྱུར་ན་ནི་དེའི་ཚེ་ཉི་མ་དེ་ཉིད་ལ་གོས་དེ་བྱིན་གྱིས་བརླབ་པར་བྱ་བའམ། གཏང་བར་བྱ་དགོས་པར་འགྱུར་ཞིང་བྱིན་གྱིས་མི་རློབ་བམ་གཏོང་བར་མི་བྱེད་ན་ཞག་བཅུ་གཉིས་པ་ལ་སྤང་པའི་ལྟུང་བྱེད་དུ་འགྱུར་བ་ཞིག་ན། དེ་ལྟར་ནི་མི་བཞེད་དེ། དེ་ལྟར་ཡང་འདིར་ཞག་བཅུ་པ་ཉིད་མ་ཡིན་ཏེ། འདི་ལྟར་དགེ་སློང་དེས་ཞག་བཅུ་དགུ་ཚུན་ཆད་དུ་ཆོས་གོས་སྔོན་པོ་རྙེད་ན་ཆོས་གོས་དེ་ཞག་ཉི་ཤུ་པོ་དེ་ཉིད་ཀྱི་ནང་རོལ་དུ་བྱིན་གྱིས་བརླབ་པར་བྱ་བའམ། གཏང་བར་བྱ་བའམ། གཞན་ལ་སྦྱིན་པར་བྱའོ། །བྱིན་གྱིས་མི་རློབ་བམ། མི་གཏོང་ངམ། གཞན་ལ་མི་སྦྱིན་ན་ཞག་ཉི་ཤུ་གཅིག་གི་སྐྱ་རེངས་ཤར་ན་སྤང་པའི་ལྟུང་བྱེད་དུ་འགྱུར་བ་ཡིན་ནོ།།
གང་གི་ཕྱིར་འདིར་རང་གི་ཞག་བཅུ་པ་ལ་ལྟོས་ཏེ། རྣམ་པར་གཞག་པར་མཛད་པ་དེའི་ཕྱིར་ཞག་བཅུ་པ་དང་པོའི་ཤན་ལ་ལྟོས་ཏེ་འདིར་རྣམ་པར་གཞག་པར་མི་བྱའོ། །འདི་མན་ཆད་ནི་གོས་ཇི་ལྟ་བུ་ལ་དང༌། ཚད་ཇི་ཙམ་དུ་བྱིན་གྱིས་བརླབ་པ་འཆགས་པར་འགྱུར་བ་དང། དེ་ལས་བཟློག་པ་ལ་སྤང་བར་འགྱུར་བ་དེ་བརྗོད་པར་བྱ་སྟེ། སར་པ་ལས་སྣམ་སྦྱར་གྱི་མཐའ་ནི་ཉི་རིམ་མོ་ཞེས་བྱ་བ་ནི། གལ་ཏེ་སར་བ་ལས་སྣམ་སྦྱར་བྱེད་ན་སྣམ་སྦྱར་དེའི་རིམ་པའི་ཚད་ཀྱི་མཐའ་ནི་ཉི་རིམ་སྟེ། དེ་ལ་རིམ་པ་ལྷག་པ་གཞན་མི་བྱའོ་ཞེས་བྱ་བའི་ཐ་ཚིག་གོ །སར་པ་ཞེས་བྱ་བ་ནི་གང་དུས་ཚིགས་གཅིག་རངས་བར་མ་སྤྱད་པ་དེ་ནི་སར་པ་ཞེས་བྱའོ། །གདིང་བའི་ཡང་ངོ་ཞེས་བྱ་བ་ཡང་སར་པ་ལས་བྱེད་ན་དེའི་རིམ་པའི་ཚད་ཀྱི་མཐའི་ཉི་རིམ་མོ། །བླ་གོས་དང་མཐང་གོས་གཉིས་ནི་ཆིག་རྐྱང་ངོ་ཞེས་བྱ་བ་ནི། བླ་གོས་དང་མཐང་གོས་གལ་ཏེ་སར་པ་ལས་བྱེད་ན་དེ་གཉིས་ཀྱི་རིམ་པའི་ཚད་ཀྱི་མཐའ་ནི་ཆིག་རྐྱང་ངོ༌། །འདིར་གཞུང་ནི་གལ་ཏེ་དགེ་སློང་དེས་བཅག་པ་དང༌། ཁ་བསྒྱུར་བ་དང༌། བཙེམ་པར་ནུས་ན་དགེ་སློང་དེས་གོས་དེ་ལས་སྣམ་སྦྱར་དང་གདིང་བ་ནི་ཉི་རིམ་དུ་བྱའོ། །བླ་གོས་དང་མཐང་གོས་ནི་ཚིག་རྐྱང་དུ་བྱའོ་ཞེས་གསུངས་པ་ཡིན་ནོ། །དུས་ཚིགས་སུ་སྤྱད་པ་ལས་ནི་ཉིས་འགྱུར་དུའོ་ཞེས་བྱ་བ་ནི། མདོ་སྔ་མ་དག་ལས་ཉི་རིམ་དང་ཚིག་རྐྱང་ཞེས་སྨོས་པ་དེ་དག་ལས་ལྟོས་ཏེ། གལ་ཏེ་གོས་དུས་གཅིག་ཏུ་སྤྱད་པ་ལས་དེ་དག་བྱེད་ན་ཉིས་འགྱུར་དུ་བྱ་བའོ། །འདི་སྐད་བསྟན་ཏེ། སྣམ་སྦྱར་དང་གདིང་བ་གཉིས་ནི་བཞི་རིམ་དུ་བྱའོ། །བླ་གོས་མཐང་གོས་གཉིས་ནི་ཉི་རིམ་དུ་བྱའོ་ཞེས་བྱ་བའི་ཐ་ཚིག་གོ །དུས་ཚིགས་སུ་སྤྱད་པའི་གོས་ནི་བགོ་ཟས་ཆུང་བ་ཡིན་ཏེ། དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བའི་དུས་ཚིགས་སུ་སྤྱད་པ་གང་ཡིན་པའོ་ཞེས་གསུངས་པའི་ཕྱིར་རོ། །ཕྱག་དར་ཁོད་ལས་བྱས་པ་དག་ལ་ནི་ངེས་པ་མེད་དོ་ཞེས་བྱ་བ་ནི། ཕྱག་དར་ཁྲོད་ལས་བྱས་པའི་ཆོས་གོས་དག་ལ་ནི་རིམ་པ་དག་ངེས་པ་མེད་དོ། །འདིར་གཞུང་ནི་ཕྱག་དར་ཁྲོད་ལ་ནི་ཇི་ཙམ་འདོད་པར་བྱའོ་ཞེས་གསུངས་པ་ཡིན་ནོ། །རྙིད་པ་ཉིད་དང་དེངས་པ་ཉིད་
ལ་ནི་ཅི་དགོས་པ་ལྷག་པར་སྦྱར་རོ་ཞེས་བྱ་བ་ནི། ཕྱག་དར་ཁྲོད་མ་ཡིན་པ་ལ་ཡང་ལྷན་པ་དག་ལྷག་པར་སྦྱར་བར་བྱའོ། །གང་གི་ཚེ་ཞེ་ན། དེའི་ཕྱིར་རྙིང་པ་ཉིད་དང་དེངས་པ་ཉིད་ལ་ཞེས་བྱ་བ་སྨྲས་ཏེ། ཆོས་གོས་སོ། །རྙིང་བ་ཉིད་ཅེས་བྱ་བ་ནི་རང་ཟད་པའོ། །དེངས་པ་ཉིད་ཅེས་བྱ་བ་ནི་སྒོ་སྐྱེས་ཀྱིས་བཤད་པ་ལ་སོགས་པས་བསྲབས་པར་གྱུར་པའོ། །ཅི་དགོས་པ་ཞེས་བྱ་བ་ནི། ཇི་ཙམ་དགོས་པ་སྟེ། ཇི་ཙམ་སྤྱད་པར་བྱ་དགོས་པ་ཞེས་བྱ་བའི་ཐ་ཚིག་གོ །ལྷག་པར་ཞེས་བྱ་བ་ནི། རིམ་པའི་མཐའ་སྔར་བསྟན་པ་ལས་སོ། །སྦྱར་རོ་ཞེས་བྱ་བ་ནི་ལྷན་པ་དག་གོ །མདོ་འདི་ནི་མ་མོ་ལས་གསུངས་པ་བསྡུས་པ་ཡིན་ནོ། །ལྷག་པར་སྦྱར་བ་ཉིད་དུ་མི་བྱའོ་ཞེས་བྱ་བ་ནི། སྣམ་སྦྱར་ལ་སོགས་པ་ཕྱག་དར་ཁྲོད་ལས་བྱས་པ་མ་ཡིན་པ་མ་རྙིང་མ་དེངས་པ་ལ་རིམ་པ་སྔར་བསྟན་པ་ལས་ལྷག་པར་མི་སྦྱར་བ་སྟེ། སྦྱོར་ན་སྦྱར་བ་ཉིད་ན་ཐམས་ཅད་ཉེས་བྱས་སོ། །སྤང་བར་འགྱུར་བ་ཉིད་ཀྱང་ཡིན་ནོ་ཞེས་བྱ་བ་ནི། ལྷག་པར་སྦྱར་བའི་རིམ་པ་དེ་དག་བཅུ་འདས་ན་སྤང་བའི་ལྟུང་བྱེད་དུ་འགྱུར་རོ། །འདི་སྐད་བསྟན་ཏེ། དེ་ལ་རིམ་པ་ལྷག་པར་སྦྱར་བ་གང་ཡིན་པ་དེ་སྤང་བར་འགྱུར་གྱི། རིམ་པ་ཇི་སྐད་བསྟན་པ་དག་ནི་སྤང་བར་མི་འགྱུར་རོ། །རིགས་པ་ཅན་བྱི་དོར་བྱས་ནས་འདི་ཉིད་དུ་སྦྱར་བར་བྱའོ། །སྙམ་པའི་སེམས་མ་བསྐྱེད་པར་དབོག་པར་མི་བྱ་བའོ་ཞེས་བྱ་བ་ལ། རིམ་པ་སྔ་མ་སྦྱར་ཟིན་པ་ནི་བྱིན་གྱིས་བརླབ་པའི་འོས་ཡིན་པས་རིགས་པ་དང་ལྡན་པ་ཡིན་པའི་ཕྱིར། རིགས་པ་ཅན་ཞེས་བྱ་བ་སྟེ། རིམ་པ་རིགས་པ་ཅན་དེ་སྲིད་དུ་བཅག་པ་ལ་སོགས་པའི་བྱི་དོར་བྱས་ནས་ཆོས་གོས་ཀྱི་འདི་ཉིད་དུ་ཕྱིར་སྦྱར་བར་བྱའོ་སྙམ་པའི་རྣམ་པ་དེ་ལྟ་བུའི་སེམས་མ་སྐྱེས་པ་དེ་སྲིད་དུ་དབོག་པར་མི་བྱའོ། །འདི་སྐད་བསྟན་ཏེ། གལ་ཏེ་དགེ་སློང་ཆོས་གོས་ལས་རིམ་པ་གཞན་བྱི་དོར་བྱ་བའི་ཆེད་དུ་དབོག་པར་འདོད་པས་ཇི་སྲིད་དུ་བཅག་པ་ལ་སོགས་པའི་བྱི་དོར་བྱས་ནས་ཕྱིར་འདི་ཉིད་དུ་སྦྱར་རོ་སྙམ་པའི་སེམས་མ་བསྐྱེད་ཀྱི་བར་དུ་དབོག་པར་མི་བྱའོ། །དབོག་པར་བྱེད་ན་འགལ་ཚབས་ཅན་དུ་འགྱུར་རོ། །གང་ཡང་རུང་བས་ཕོག་པ་མ་སྦྱར་བའི་སྔ་རོལ་དུ་སྤང་བར་འགྱུར་བ་ཉིད་དོ་ཞེས་བྱ་བ་ལ། གང་ཡང་རུང་
བས་ཞེས་བྱ་བ་ནི། ཇི་ལྟར་ཡང་རུང་བ་སྟེ། སྔར་བསྟན་མ་ཐག་པའི་རྣམ་པ་དེ་ལྟ་བུའི་སེམས་སམ་སེམས་ཀྱི་རྣམ་པ་གཞན་གྱིས་སོ། །དེ་ལྟ་བུའི་སེམས་ཀྱིས་སྦྱར་མ་གཞན་ཕོག་པ་ནི་ཕྱིར་དེ་ཉིད་དུ་མ་སྦྱར་བའི་སྔ་རོལ་དུ་ཞག་བཅུ་འདས་ན་སྤང་བའི་ལྟུང་བྱེད་དུ་འགྱུར་བ་ཉིད་ཡིན་ནོ། །སྦྱར་ན་ནི་གཅིག་པ་ཉིད་དུ་གྱུར་པ་ཡིན་པས་ཉེས་པ་མེད་དོ། །སྦྱར་བ་རྣམ་པར་གཞག་པ་དང་འབྲེལ་བ་ཡིན་པས་འདི་བརྗོད་པར་བྱ་སྟེ། སྣམ་སྦྱར་གྱི་སྣམ་ཕྲན་དག་ནི་དགུ་ཡན་ཆད་ཉི་ཤུ་རྩ་ལྔ་མན་ཆད་དེ་ཟུང་མ་གཏོགས་སོ་ཞེས་བྱ་བ་ནི། ཆོས་གོས་སྣམ་སྦྱར་གྱི་སྣམ་ཕྲན་གྱི་གྲངས་ནི་དགུ་ཡན་ཆད་ནས་ཉི་ཤུ་རྩ་ལྔ་མན་ཆད་གང་ཡང་རུང་བ་ཡིན་པར་རིག་པར་བྱའོ། །ཟུང་མ་གཏོགས་སོ་ཞེས་བྱ་བ་ནི་གྲངས་ཟུང་རྣམས་མ་གཏོགས་པ་སྟེ། འདི་ལྟ་སྟེ། བཅུ་དང་བཅུ་གཉིས་དང་བཅུ་བཞི་དང་བཅུ་དྲུག་དང༌། བཅོ་བརྒྱད་དང༌། ཉི་ཤུ་དང་ཉི་ཤུ་གཉིས་དང་ཉི་ཤུ་བཞི་དག་མ་གཏོགས་པའོ། །དེ་ལས་ལྷག་པ་དག་གིས་སྣམ་སྦྱར་མི་བྱའམ་ཞེ་ན་དེའི་ཕྱིར། དེ་ཡན་ཆད་ནི་ཚེམ་བུའོ་ཞེས་བྱ་བ་སྨྲས་ཏེ། སྣམ་སྦྱར་ཉི་ཤུ་རྩ་ལྔ་པོ་དེ་ཡན་ཆད་ལས་ལྷག་པ་དག་གིས་སྣམ་བུ་སྦྱར་བ་ནི་ཚེམ་བུ་སྟེ། དེ་བས་ན་སྣམ་སྦྱར་ལ་ནི་དེ་ལས་ལྷག་པར་མི་བྱའོ། །སྣམ་ཕྲན་དེ་དག་ལ་གླེགས་བུ་དང་གླེགས་བུ་ཕྱེད་ཇི་ལྟར་རྣམ་པར་གཞག་ཅོ་ན་དེའི་ཕྱིར། དང་པོ་གསུམ་ལ་ནི་དེ་དག་གི་གླེགས་བུ་ཕྱེད་དང་གསུམ་པ་ཉིད་དོ་ཞེས་བྱ་བ་ལ་ནི། དང་པོ་གསུམ་ལ་ནི་ཞེས་བྱ་བ་ནི་སྣམ་སྦྱར་གསུམ་པ་དང་པོ་ལ་སྟེ། སྣམ་ཕྲན་དགུ་པ་དང༌། བཅུ་གཅིག་དང༌། བཅུ་གསུམ་པའི་སྣམ་སྦྱར་དག་ལའོ། །དེ་དག་གི་ཞེས་བྱ་བ་ནི། སྣམ་ཕྲན་དགུ་དང༌། བཅུ་གཅིག་དང༌། བཅུ་གསུམ་དེ་དག་གིའོ། །དེ་དག་གི་ནི་གླེགས་བུ་ཕྱེད་དང་གསུམ་པ་ཉིད་དོ། །སྣམ་ཕྲན་གང་ལ་གླེགས་བུ་ཕྱེད་དང་གསུམ་ཡོད་པ་དེ་ནི་གླེགས་བུ་ཕྱེད་དང་གསུམ་པའོ། །དེའི་དངོས་པོ་ནི་གླེགས་བུ་ཕྱེད་དང་གསུམ་པ་ཉིད་དོ། །འདིར་སྣམ་ཕྲན་ཞེས་བྱ་བའི་སྒྲས་ནི་ཚལ་བུ་ལ་བྱའི། གླེགས་བུ་དང་གླེགས་བུ་ཕྱེད་ལ་ནི་མི་བྱའོ། །གཉིས་པ་ལ་ནི་གླེགས་བུ་ཕྱེད་དང་བཞི་པ་ཉིད་དོ་ཞེས་བྱ་བ་ལ། གཉིས་པ་ལ་ནི་ཞེས་བྱ་བ་ནི། སྣམ་སྦྱར་གསུམ་པ་གཉིས་པ་ལ་སྟེ། སྣམ་ཕྲན་བཅོ་ལྔ་
པ་དང༌། བཅུ་བདུན་པ་དང༌། བཅུ་དགུ་བའི་སྣམ་སྦྱར་དག་ལའོ། །སྣམ་ཕྲན་དེ་དག་ནི་གླེགས་བུ་ཕྱེད་དང་བཞི་པ་ཉིད་དོ། །གསུམ་པ་ལ་ནི་གླེགས་བུ་ཕྱེད་དང་ལྔ་པ་ཉིད་དོ་ཞེས་བྱ་བ་ལ། གསུམ་པ་ལ་ནི་ཞེས་བྱ་བ་ནི། སྣམ་སྦྱར་གསུམ་པ་ལ་སྟེ། སྣམ་ཕྲན་ཉི་ཤུ་གཅིག་པ་དང༌། ཉི་ཤུ་གསུམ་པ་དང༌། ཉི་ཤུ་ལྔ་པའི་སྣམ་སྦྱར་དག་ལའོ། །སྣམ་ཕྲན་དེ་དག་ནི་གླེགས་བུ་ཕྱེད་དང་ལྔ་པ་ཉིད་དོ། །སྣམ་ཕྲན་གང་དག་གླེགས་བུ་ཕྱེད་དང་ལྔ་ཡོད་པ་དེ་དག་ནི་གླེགས་བུ་ཕྱེད་དང་ལྔ་པའོ། །དེ་དག་གི་དངོས་པོ་ནི་དེ་ཉིད་དོ། །བླ་གོས་ནི་སྣམ་ཕྲན་བདུན་དང༌། གླེགས་བུ་ཕྱེད་དང་གསུམ་པའོ། །མཐང་གོས་ནི་སྣམ་ཕྲན་ལྔ་དང་གླེགས་བུ་ཕྱེད་དང་གཉིས་པའོ། །དེ་གཉིས་ནི་ཆོས་གོས་བྱིན་གྱིས་བརླབ་པའི་སྔགས་ལས་ཤེས་པར་བྱའོ། །གཅོམ་ལྡན་འདས་ཀྱིས་བླ་གོས་དང་མཐང་གོས་གཉིས་ཀྱི་སྣམ་ཕྲན་གྱི་ཚད་ནི་སྣམ་སྦྱར་གྱི་ཚད་ལྟར་གང་དུ་ཡང་བཀའ་མ་སྩལ་ཏོ། །སྣམ་སྦྱར་ནི་ངེས་པར་དྲས་ཏེ་བྱ་བ་ཡིན་ནོ། །བླ་གོས་དང་མཐང་གོས་གཉིས་ནི་དྲས་ཏེ་བྱ་བར་མ་ངེས་ཏེ། ཅི་དགར་སྤྱད་པ་ཡིན་པས་གང་དྲས་ཏེ་བྱེད་པར་འདོད་པ་ཡང་དེ་བཞིན་དུ་བྱར་རུང་ལ། མ་དྲས་པར་བྱེད་པར་འདོད་ན་ཡང་དེ་བཞིན་དུ་རུང་ངོ༌། །དེ་ལྟར་ཡང་མ་མོ་ལས་ཉེ་བ་འཁོར་གྱིས་ཞུས་པ་ལས། བཅོམ་ལྡན་འདས་ཀྱིས་སྣམ་སྦྱར་ནི་ངེས་པར་དྲས་ཏེ་བྱའོ། །བླ་གོས་དང་མཐང་གོས་ནི་ངེས་པ་མེད་དོ་ཞེས་གསུངས་སོ། །འདུལ་བའི་ཚིག་ལེའུར་བྱས་པ་བྱེད་པས་ཀྱང༌། སྣམ་སྦྱར་ངེས་པར་དྲས་ཏེ་བཅང༌། །གཞན་དག་མ་ངེས་གང་གི་ཕྱིར།། འདོད་ཆུང་རང་གི་ཆོས་གོས་ཀྱིས། །ལས་ཀྱི་སྡུག་བསྔལ་འགྱུར་ཕྱིར་རོ། །ཞེས་སྨྲས་སོ། །དེ་དག་གི་ཚད་ཇི་ཙམ་ཞེ་ན་དེའི་ཕྱིར། བྱིན་གྱིས་བརླབ་ཏུ་རུང་བ་ཆེན་པོ་དག་ནི་རང་གི་ཁྲུ་གསུམ་དང་ལྔ་དག་གོ་ཞེས་བྱ་བ་སྨྲས་ཏེ། སྣམ་སྦྱར་དང་བླ་གོས་དང་མཐང་གོས་བྱིན་གྱིས་བརླབ་ཏུ་རུང་བ་ཆེན་པོ་དག་ནི་ཚད་གཅིག་སྟེ་ཞིང་དུ་ཁྲུ་གསུམ་ཆུར་ཁྲུ་ལྔའོ། །ཆོས་གོས་གསུམ་པོ་བྱིན་གྱིས་བརླབ་ཏུ་རུང་བ་གང་དག་གི་ཞེང་དུ་རང་གི་ཁྲུ་གསུམ། ཆུར་རང་གི་ཁྲུ་ལྔའི་ཚད་ཇི་སྐད་བསྟན་པ་དེ་ལས་ལྷག་པར་བྱེད་ན་སྤང་བར་འགྱུར་བ་ཉིད་དོ། །དེ་བཞིན་དུ་རིམ་པ་དུ་མ་བྱའོ་སྙམ་པའི་
བསམ་པས་རིམ་པ་རིགས་པ་ཅན་དུ་དགོངས་པ་ཇི་སྙེད་པ་དེ་ལས་ལྷག་པར་བྱེད་ན་ཡང་སྤང་བར་འགྱུར་བ་ཉིད་དོ། །རིམ་པ་དུ་མ་བྱའོ་སྙམ་པའི་བསམ་པ་མེད་དེ། རིམ་པ་གཅིག་བྱའོ་སྙམ་པ་ལས་དེ་ལས་ལྷག་པར་བྱེད་ན་ཡང་སྤང་བར་འགྱུར་བ་ཉིད་དོ། །དྲས་ཏེ་བྱའོ་སྙམ་པའི་བསམ་པ་ཡོད་པས་ཆོས་གོས་དྲས་པ་གསུམ་གྱི་ཚད་ལས་ལྷག་པར་བྱེད་ན་སྤང་བར་འགྱུར་བ་ཉིད་མེད་དོ། །དྲས་ཏེ་བྱའོ་སྙམ་པའི་བསམ་པ་མེད་པས་མ་དྲས་པ་ཁོ་ན་བྱའོ་སྙམ་པ་ལས། མ་དྲས་པའི་ཚད་གང་ཡིན་པ་ལས་ལྷག་པར་བྱེད་ན་ཡང་སྤང་བར་འགྱུར་བ་ཉིད་དོ། །གོས་ལ་ཇི་ཙམ་དུ་སྣམ་ཕྲན་གྱི་བསམ་པས་འཇུག་པ་དེ་སྲིད་དུ་ཉེས་པར་འགྱུར་བ་ཉིད་མེད་དོ། །གང་གི་ཚེ་ན་སྤྱིར་གོས་ཙམ་ཞིག་བདག་གིར་བྱེད་པ་ན་ཆོས་གོས་ཆུང་དུ་བྱའོ་སྙམ་པ་ལས་ཆོས་གོས་ཆེན་པོ་འམ། འབྲིང་བྱས་ཏེ་འཇོག་པར་བྱེད་པ་ལ་ཡང་ཉེས་པ་མེད་དེ། འདི་ལྟར་ཆོས་གོས་བྱའོ་སྙམ་དུ་ཆོས་གོས་ལ་གནས་པ་ན་ཆོས་གོས་ཐམས་ཅད་ཀྱི་ཚད་དེ་ལ་ཡང་གནས་པ་ཉིད་དུ་རིག་པར་བྱ་བའི་ཕྱིར་རོ། །ཞེང་ངམ་ཆུར་གང་ཡང་རུང་བ་ལྷག་ན་བཅད་དེ་སྤྲོའོ་སྙམ་དུ་སེམས་པ་ལ་ཡང་ཉེས་པ་མེད་དོ། །ཆུང་དུ་དག་ནི་གཉི་ག་ལས་ཁྲུ་ཕྱེད་ཕྱེད་ཕྲི་བའོ་ཞེས་བྱ་བ་ནི། ཆོས་གོས་སྣམ་སྦྱར་དང་བླ་གོས་དང་མཐང་གོས་ཆུང་དུ་དག་གི་ཚད་ནི་སྔར་ཆེན་པོ་དག་གི་ཞེང་དུ་ཁྲུ་གསུམ་ཞེས་བྱ་བ་དང༌། ཆུར་ཁྲུ་ལྔ་ཞེས་བྱ་བའི་ཚད་དེ་གཉིག་ལས་ཁྲུ་ཕྱེད་ཕྱེད་ཕྲི་བ་ཡིན་པར་རིག་པར་བྱའོ། །འབྲིང་རྣམས་ཀྱི་ཚད་ནི་བར་མའོ་ཞེས་བྱ་བ་ནི། ཆོས་གོས་སྣམ་སྦྱར་དང༌། བླ་གོས་དང༌། མཐང་གོས་འབྲིང་རྣམས་ཀྱི་ཚད་ནི་ཆེན་པོ་རྣམས་ཀྱི་ཁྲུ་གསུམ་དང་ལྔ་གང་ཡིན་པ་དང༌། ཆུང་དུ་རྣམས་ཀྱི་ཁྲུ་ཕྱེད་དང་གསུམ་དང༌། ཕྱེད་དང་ལྔ་གང་ཡིན་པ་དེའི་བར་མའི་ཚིགས་གང་ཡང་རུང་བ་ཡིན་པར་རིག་པར་བྱའོ། །མཐང་གོས་ཀྱི་ཚད་ཀྱི་རྣམ་པ་གཞན་བསྟན་པའི་ཕྱིར། མཐང་གོས་ནི་དེ་དང་ལྔ་ཡང་ཡིན་ལ་དེ་དང་བཞི་ཡང་ཡིན་ནོ་ཞེས་བྱ་བ་སྨྲས་ཏེ། མཐང་གོས་ཀྱི་ཚད་ནི་ཞེང་དུ་ཁྲུ་དོ་དང་ཆུར་ཁྲུ་ལྔ་ཡང་ཡིན་ལ། ཞེང་དུ་ཁྲུ་དོ་དང་ཆུར་ཁྲུ་བཞི་ཡང་ཡིན་ནོ་ཞེས་བྱ་བར་སྦྱར་རོ། །འཁོར་གསུམ་ཁེབས་པ་ཉིད་ཡན་ཆད་ཀྱང་ངོ་ཞེས་བྱ་བ་ཡང་མཐང་གོས་ཀྱི་ཚད་ཀྱི་རྣམ་པ་
གཞན་ཏེ། ཞེང་དུ་ཁྲུ་དོ་ཆུར་ཁྲུ་བཞི་བ་མན་ཆད་ནས་འཁོར་གསུམ་ཁེབས་པ་ཉིད་ཡན་ཆད་ཀྱི་བར་གང་ཡང་རུང་བ་ཡིན་པར་རིག་པར་བྱའོ། །ཞེང་དུ་ཁྲུ་དོ་དང་ཆུར་ཁྲུ་ལྔ་པ་དང༌། ཞེང་དུ་ཁྲུ་དོ་དང་ཆུར་ཁྲུ་བཞི་པ་ཉི་ཚེར་མ་ཟད་དོ། །ཁྲུའི་དོན་ནི་ལུས་ཀྱི་ཆ་བདུན་ལས་གཉིས་སོ་ཞེས་བྱ་བ་ནི་ཁྲུ་ཞེས་སྔར་སྨོས་པའི་ཁྲུ་ཚད་སྟོན་ཏེ། ལུས་ཆ་མཉམ་པ་བདུན་དུ་རྣམ་པར་ཕྱེ་བ་གང་དག་ཡིན་པ་དེ་དག་ལས་ཆ་གཉིས་པ་ནི་ཁྲུའི་ཚད་ཀྱི་དོན་ཡིན་གྱི། ལུས་ལ་གྲུ་མོ་ནས་གུང་མོའི་རྩེ་མོའི་བར་ཡོད་བ་དེའི་ཚད་ནི་མ་ཡིན་ནོ། །དེ་བས་ན་ཚད་ཀྱི་རྣམ་པ་དེ་ཉིད་ཀྱིས་ཁྲུར་བྱས་པའི་ཁྲུ་ཚད་ཀྱིས་ཆོས་གོས་རྣམས་ཀྱི་ཚད་རིག་པར་བྱའོ། །ཚད་ཀྱི་རྣམ་པ་དེ་ཡང་ཡུལ་ཐམས་ཅད་ལ་ནི་མི་དགོས་ཏེ། འདི་ལྟར་གང་ཟག་གི་ལུས་ལ་ལྟོས་ནས་ལག་པའི་ཚད་ཐུང་བའམ། ལག་པའི་ཚད་རིང་བ་དེའི་ཆེད་དུ་འདི་གསུངས་པ་ཡིན་ཀྱི། གང་ཟག་གང་ལུས་ཀྱི་རྐྱེན་དང་ལག་པའི་ཚད་དུ་འཚམ་པ་དག་ལ་ནི་རང་རང་གི་ཁྲུ་ཉིད་འདིར་ཡང་ཚད་མ་ཡིན་ནོ། །མི་ཡོག་ན་རལ་ག་དཔུང་ཆད་བྱའོ་ཞེས་བྱ་བ་ནི། གང་གི་ལུས་ཆེ་ཆེས་པས་མཐང་གོས་ཀྱི་ཚད་དེ་ཙམ་གྱིས་ལུས་མི་ཁེབས་ན་དེའི་ཚེ། མི་ཡོག་ཅེས་བྱ་བ་ནི་མི་ཁེབས་པ་ཡིན་པས་ལུས་དང་འཚམ་པའི་རལ་ག་དཔུང་ཆད་བྱས་ཏེ་ཁེབས་པར་ཡོག་པར་བྱའོ། །ཟླ་བས་སྤང་བ་རྣམ་པར་འབྱེད་པའོ་ཞེས་བྱ་བ་འཇོག་པའི་སྤང་བའི་ལྟུང་བ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ཟླ་བས་སྤང་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར་དེ་བས་དམན་པ་ནི་ཆུང་བ་དང་འདྲ་སྟེ་ཉེས་བྱས་སུ་འགྱུར་བ་ཉིད་དོ་ཞེས་བྱ་བ་སྨྲས་ཏེ། དེ་བས་ཞེས་བྱ་བ་ལ། དེ་ཞེས་བྱ་བའི་སྒྲ་ནི་ཆུང་བ་ལ་སྙེགས་ཏེ། ཁྲུ་གང་གི་ཚད་དོ། །དེ་བས་དམན་པ་ནི་ཞེས་བྱ་བ་ནི་ཆུང་བ་དེ་བས་ཀྱང་དམན་པ་སྟེ། ཁྲུ་གང་གི་ཚད་ལས་ཆུང་བའོ། །ཆུང་བ་དང་འདྲ་བ་སྟེ་ཞེས་བྱ་བ་ཆུང་བ་ཞེས་བྱ་བའི་སྒྲ་འདི་ནི་ཁྲུ་གང་གི་ཚད་ཉིད་ལ་བྱ་སྟེ། སྔ་མ་ཁྲུ་གང་གི་ཚད་པས་དམན་པ་སྟེ། དེ་ཁྲུ་གང་གི་ཚད་འདི་དང་འདྲ་བར་འགྱུར་བ་ནི་འདྲ་བ་སྟེ། དེ་བས་དམན་པ་དེ་ཡང་ཆུང་བ་ཟླ་བ་གཅིག་འདས་ན་སྤང་བར་འགྱུར་བ་དང་འདྲ་བར་ཟླ་བ་གཅིག་འདས་
ན་ཉེས་བྱས་སུ་འགྱུར་བ་ཉིད་དོ། །འདི་སྐད་བསྟན་ཏེ། ཇི་ལྟར་ཁ་སོགས་ཀྱི་གོས་ཆུང་དུ་ཁྲུ་གང་གི་ཚད་གཞག་པ་ལ་ཁ་བསྐང་བའི་གོས་ལ་རེ་བ་ཡང་ཡོད་ཅིང་བྱིན་གྱིས་བརླབ་པར་བྱ་བ་མེད་དུ་ཟིན་ན་ཡང་ཟླ་བ་གཅིག་འདས་ན་སྤང་བར་འགྱུར་བ་དེ་བཞིན་དུ་དེ་བས་ཆུང་བ་ཁྲུ་གང་གི་ཚད་པས་ཆུང་བ་དེ་ཡང་གཞག་ན་ཁ་བསྐང་བའི་གོས་ལ་རེ་བ་ཡོད་ཅིང་བྱིན་གྱིས་བརླབ་པར་བྱ་བ་མེད་དུ་ཟིན་ཀྱང༌། ཟླ་བ་གཅིག་འདས་ན་ཉེས་བྱས་སུ་འགྱུར་རོ། །ཇི་ལྟར་ཁ་སོགས་ཀྱི་གོས་ཆུང་ངུ་ཁྲུ་གང་གི་ཚད་གཞག་པ་ལ་ཁ་བསྐང་བའི་གོས་ལ་རེ་བ་མེད་ཅིང་བྱིན་གྱིས་བརླབ་པར་བྱ་བ་མེད་དུ་ཟིན་ན་ཡང་ཞག་བཅུ་འདས་ན་སྤང་བར་འགྱུར་བ་དེ་བཞིན་དུ་དེ་བས་ཆུང་བ་ཁྲུ་གང་གི་ཚད་པས་ཆུང་བ་དེ་ཡང་བཞག་ན། ཞག་བཅུ་འདས་ན་ཉེས་བྱས་སུ་འགྱུར་རོ། །དེའི་དམིགས་ཀྱིས་བསལ་བ་བསྟན་པའི་ཕྱིར། འཁོར་གྱི་ཕྱེད་མ་ཁེབས་ན་ནི་རེ་བ་མེད་པ་ཉིད་དོ་ཞེས་བྱ་བ་ནི། འཁོར་གསུམ་གྱི་ཚད་སྔར་བསྟན་པ་དེ་ལས་འཁོར་གྱི་མཆུ་དང་ཞེང་གི་ཕྱེད་ཚུན་ཆང་མི་ཁེབས་པའི་གོས་ཁ་བསྐང་པ་ལ་རེ་བ་མེད་པ་ཉིད་ནི་ཞག་བཅུས་སྤང་བའི་ཕྱོགས་སུ་གཏོགས་པ་ཡིན་གྱི། ཟླ་བ་གཅིག་པར་གཏོགས་པ་ནི་མ་ཡིན་ནོ། །འདི་སྐད་བསྟན་ཏེ། གོས་གང་གིས་འཁོར་གསུམ་གྱི་ཕྱེད་མི་ཁེབས་པ་དེ་ལ་ཁ་བསྐང་བ་ལ་རེ་བ་ཡང་གཏན་མེད་པ་དེ་ནི་ཞག་བཅུས་སྤང་བའི་ཕྱོགས་སུ་གཏོགས་པ་ཡིན་གྱི། ཟླ་བས་སྤང་བར་གཏོགས་པ་ཉིད་ནི་མ་ཡིན་ནོ། །དེ་བས་ན་དེ་ནི་རང་གི་ཞག་བཅུ་པ་འདིས་ན་ཉེས་བྱས་སུ་འགྱུར་བ་ཉིད་ཡིན་གྱི། ཟླ་བ་འདས་པས་ཉེས་བྱས་སུ་འགྱུར་བ་ནི་མ་ཡིན་ནོ། །རུང་བ་མ་ཡིན་པ་ཡང་ངོ་ཞེས་བྱ་བ་ནི། ཁ་བསྐང་བ་ལ་རེ་བ་མེད་པ་ཉིད་ཡིན་ནོ། །འདིར་གཞུང་ནི་གོས་ཇི་ལྟ་བུ་ཞིག་གཞག་པར་བགྱི། རུང་བ་གང་ཡིན་པའོ། །རུང་བ་ཇི་ལྟ་བུ་ལགས། བཅོམ་ལྡན་འདས་ཀྱིས་མ་བཀག་པ་གང་ཡིན་པའོ་ཞེས་གསུངས་པ་ཡིན་ནོ། །གདོང་ཕྱིས་དང་ཆུ་ཚགས་དང༌། སྟན་འཇམ་དང་དྲེའུ་རྡོག་ལ་སོགས་པའི་ཡོ་བྱད་ཀྱི་གོས་བྱིན་གྱིས་མ་བརླབས་པ་དག་གོ་ཞེས་བྱ་བ་ནི། གདོང་ཕྱིས་ལ་སོགས་པ་ཡོ་བྱད་དུ་གྱུར་པའི་གོས་གདོང་ཕྱིས་ལ་སོགས་པ་ཉིད་དུ་བྱིན་གྱིས་མ་བརླབས་པ་དེ་
དག་ཀྱང་ཁ་བསྐང་བ་ལ་རེ་བ་མེད་པ་ཉིད་ཡིན་ཏེ། ཞག་བཅུས་སྤང་བ་ཁོ་ན་ཉིད་དོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཡོ་བྱད་དུ་གྱུར་པའི་གོས་གདོང་ཕྱིས་ལ་སོགས་པ་གང་དག་གདོང་ཕྱིས་ལ་སོགས་པར་བྱིན་གྱིས་བརླབས་པས་བྱིན་གྱིས་མ་བརླབས་པ་དེ་དག་ནི་ཟླ་བས་སྤང་བའི་ཕྱིར་རེ་བ་མེད་པར་གྱུར་པ་ཡིན་པར་རིག་པར་བྱ་སྟེ། ཞག་བཅུ་འདས་ན་སྤང་བར་འགྱུར་བ་ཉིད་ཡིན་པའི་ཕྱིར་རོ། །དེ་དག་ནི་དེ་ལྟར་གདོང་ཕྱིས་ལ་སོགས་པ་ཉིད་དུ་བྱ་བར་འོས་པ་ཉིད་ཡིན་གྱི། གཞག་པར་འོས་པ་ནི་མ་ཡིན་ནོ། །གང་དག་གདོང་ཕྱིས་ལ་སོགས་བར་འདིར་གཞུང་ནི་ཡི་གེ་ཁ་ཅིག་ལས་ཡོ་བྱད་ཀྱི་གོས་བྱིན་གྱིས་མ་བརླབས་པ་ནི་ཞག་བཅུ་འདས་ན་སྤང་བར་འགྱུར་རོ། །གདོང་ཕྱིས་དང་ཆུ་ཚགས་དང་སྟན་འཇམ་དང༌། དྲེའུ་རྡོག་བྱིན་གྱིས་བརླབས་པ་དག་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཡོ་བྱད་ཀྱི་གོས་གང་དག་གདོང་ཕྱིས་ལ་སོགས་པ་ཉིད་དུ་མ་བྱས་པ་དེ་དག་ནི་ཟླ་བ་གཞག་པར་འོས་པ་དང༌། དེ་ལས་འདས་ན་ཡང་སྤང་བར་འགྱུར་བ་ཉིད་ཡིན་ནོ། །ཟླ་བས་སྤང་བ་ཞུ་བའོ་ཞེས་བྱ་བ་འཇོག་པའི་སྤང་བའི་ལྟུང་བྱེད་ཞུ་བའི་སྐབས་ནས་འབྱུང་བ་རྫོགས་སོ། །ཟླ་བས་སྤང་བའོ་ཞེས་བྱ་བ་འཇོག་པའི་སྤང་བའི་ལྟུང་བྱེད་བཤད་ཟིན་ཏོ།། །།འཁྲུར་འཇུག་པའི་སྤང་བ་བརྗོད་པའི་སྐབས་དང་བཅས་པ་བརྗོད་པར་འདོད་ནས། སྦྲུམ་མ་དབེན་པར་གཞག་གོ་ཞེས་བྱ་བ་སྨྲས་ཏེ། སྦྲུམ་མ་ཞེས་བྱ་བ་ནི། མངལ་ན་བུ་ཡོད་པ་སྟེ། རབ་ཏུ་བྱུང་བ་མངལ་ན་བུ་ཡོད་པ་དེ་དབེན་པའི་ཕྱོགས་སུ་གཞག་པར་རིག་པར་བྱའོ། །གཞན་དུ་འདུག་ན་དེ་ལ་ཉེས་བྱས་སུ་འགྱུར་རོ། །དེར་དགེ་སློང་མ་རྣམས་ཀྱིས་ཡལ་བར་མི་དོར་རོ་ཞེས་བྱ་བ་ནི། མདོ་སྔ་མར་བསྟན་པའི་གནས་དབེན་པའི་རྣམ་པ་དེ་ལྟ་བུའི་གནས་དེར་གལ་ཏེ་དགེ་སློང་མ་དེ་མི་སྒྲུབ་ན་དགེ་སློང་མ་གཞན་རྣམས་ཀྱིས་ཡལ་བར་མི་དོར་རོ་ཞེས་བྱ་བའི་ཐ་ཚིག་གོ །དེ་ལ་ཟན་སྦྱིན་པར་བྱའོ་ཞེས་བྱ་བ་ནི་དགེ་སློང་མ་སྦྲུམ་མ་དེ་ལ་དགེ་སློང་མ་གཞན་དག་གིས་ཟན་སྦྱིན་པར་བྱའོ། །ལྟུང་བའོ་གནས་འབྱུང་བ་དག་གི་ཡན་ལག་ནི་ཉེ་དུ་དང་ཉེ་དུ་མ་ཡིན་པ་དག་ཡིན་པས་དེའི་ཕྱིར་ཉེ་དུའི་མཚན་ཉིད་བརྗོད་པར་འདོད་ནས། ཕ་མ་དག་ནས་བདུན་པ་ཚུན་ཆད་ལས་གང་ཡང་རུང་བ་སྔ་མ་
གཅིག་ལས་སྐྱེས་པ་ཡང་ཉེ་དུ་ཡིན་ནོ་ཞེས་བྱ་བ་སྨྲས་ཏེ། ཕ་མ་དག་ཅེས་བྱ་བ་ནི་ཕ་དང་མ་ནི་ཕ་མ་དག་གོ །དེ་བས་ན་ཕ་མ་དག་ནས་བདུན་པ་ཚུན་ཆད་ཅེས་བྱ་བ་ནི་ཕའི་ཕྲུགས་བདུན་པ་ཚུན་ཆད་དང་མའི་ཕྲུགས་བདུན་པ་ཚུན་ཆད་ཅེས་བྱ་བའི་ཐ་ཚིག་གོ །མདོ་ལས་ཕ་མ་ཞེས་སྨོས་པའི་སྦུ་ནི་ཕའི་རྒྱུད་མའི་ཡན་ལག་དང་བཅས་པ་དང༌། དེ་བཞིན་དུ་མའི་རྒྱུད་ཕའི་ཡན་ལག་དང་བཅས་པར་ཞེས་བྱ་བར་སྦྱར་རོ། །དེ་ལྟར་ན་ཕའི་ཕ་དང་དེའི་ཡང་ཕ་དང༌། དེ་ལྟ་བུ་ལ་སོགས་པ་ནི་ཕའི་རྒྱུད་དོ། །ཕ་དེའི་མ་གང་ཡིན་པ་དང༌། མ་དེའི་ཡང་མ་དང༌། དེ་ལྟ་བུ་ལ་སོགས་པ་ནི་ཕའི་རྒྱུད་མའི་ཡན་ལག་དང་བཅས་པའོ། །དེ་བཞིན་དུ་མའི་མ་དང༌། མ་དེའི་ཡང་མ་དང༌། དེ་ལྟ་བུ་ལ་སོགས་པ་ནི་མའི་རྒྱུད་དོ། །མ་དེའི་ཕ་གང་ཡིན་པ་དང༌། ཕ་དེའི་ཡང་ཕ་དང༌། དེ་ལྟ་བུ་ལ་སོགས་པ་ནི་མའི་རྒྱུད་ཕའི་ཡན་ལག་དང་བཅས་པ་ཡིན་པར་རིག་པར་བྱའོ། །དེ་ལྟར་བྱས་ན་ཕའི་རྒྱུད་ཀྱང་མའི་ཡན་ལག་དང་བཅས་པ་ཡིན་པའི་ཕྱིར་ཕྲུགས་སུ་གྱུར་པ་ཡིན་ལ། དེ་བཞིན་དུ་མའི་རྒྱུད་ཀྱང་ཕའི་ཡན་ལག་དང་བཅས་པ་ཡིན་པའི་ཕྱིར་ཕྲུགས་སུ་གྱུར་པ་ཡིན་ནོ། །ཕ་མ་དག་ནས་བདུན་པ་ཚུན་ཆད་ལས་ཕའི་རྒྱུད་མའི་ཡན་ལག་དང་བཅས་པ་ཕྲུགས་སུ་གྱུར་པ་དག་གམ་མའི་རྒྱུད་ཕའི་ཡན་ལག་དང་བཅས་པ་ཕྲུགས་སུ་གྱུར་པ་དག་ལས། གང་ཡང་རུང་བ་ཕའི་རྒྱུད་མའི་ཡན་ལག་དང་བཅས་པའམ། མའི་རྒྱུད་ཕའི་ཡན་ལག་དང་བཅས་པ་སྔ་མ་གཅིག་ལས་སྐྱེས་པ་སྟེ། སྔ་མའི་ཕའི་རྒྱུད་ལས་སྐྱེས་པའམ། སྔ་མ་མའི་ཡན་ལག་ལས་སྐྱེས་པའམ། སྔ་མ་མའི་རྒྱུད་ལས་སྐྱེས་པའམ། སྔ་མ་ཕའི་ཡན་ལག་ལས་སྐྱེས་པ་དེ་ནི་ཉེ་དུ་ཞེས་བྱའོ། །ཡང་ཞེས་བྱ་བའི་སྒྲས་ནི་གཉིས་པོ་ལས་སྔ་ནས་སྐྱེས་པ་འབའ་ཞིག་ཉེ་དུ་ཡིན་པར་མ་ཟད་པའོ། །འདི་སྐད་བསྟན་ཏེ། འདིར་ཉེ་དུ་ཞེས་བྱ་བ་ནི་སྔ་མའམ་ཕྱི་མ་ཕའི་རྒྱུད་མའི་ཡན་ལག་དང་བཅས་པའམ། མའི་རྒྱུད་ཕའི་ཡན་ལག་དང་བཅས་པའམ། གཉི་གའི་རིགས་གྲངས་བདུན་པ་ཚུན་ཆད་དུ་སྐྱེས་པ་དེ་ཡིན་ནོ། །ཇི་སྐད་སྨྲས་པ་ལས་གཞན་པ་ནི་ཉེ་དུ་མ་ཡིན་ནོ། །འཁྲུར་འཇུག་པའི་སྤང་བའི་བྱེད་པ་པོ་ཉིད་གང་ཡིན་ཞི་ན། དེའི་ཕྱིར་འདུ་ཤེས་གཙོ་
ཆེར་བྱེད་པ་པོ་ཉིད་ཡིན་ནོ་ཞེས་སྨྲས་ཏེ། དོན་མེད་ན་ཡང་འདུ་ཤེས་ནི་གཙོ་ཆེར་བྱེད་པ་པོ་ཉིད་ཡིན་ནོ། །དེ་ནི་དངོས་གཞི་ལ་ཡང་ཚིག་འོག་མར་གྱུར་པའི་བྱེད་པ་པོ་ཉིད་ཡིན་ལ་སྦྱོར་བ་ལ་ཡང་བྱེད་པ་པོ་ཉིད་དོ་ཞེས་བྱ་བའི་ཐ་ཚིག་གོ །འདིར་ཡང་ཐབས་སླ་བས་ཐ་སྙང་དུ་བྱ་བའི་ཕྱིར་མིང་དང་མིང་ཅན་དུ་སྦྱར་བ་བསྡེབས་པའི་ཕྱིར། དེ་ནི་ཤེས་གཙོ་བོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི་མིང་ཅན་ཏེ། འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །འདུ་ཤེས་གཙོ་བོའོ་ཞེས་བྱ་བ་ནི་མིང་སྟེ། འདུ་ཤེས་གཙོ་ཆེར་བྱེད་པ་པོ་ཉིད་ཡིན་པ་དེའི་མིང་ངོ༌། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། འདི་མན་ཆད་ཀྱི་མདོ་གང་དང་གང་ལ་འདུ་ཤེས་གཙོ་ཞེས་བྱ་བའི་མིང་སྨོས་པ་དེ་དང་དེར་མིང་དེའི་རང་གི་མིང་ཅན་དུ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བ་སྟོན་པར་ཤེས་པར་བྱའོ། །དོན་གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་དགེ་སློང་མ་ཉིད་དང་དེའི་ཉེ་དུ་མ་ཡིན་པ་ཉིད་དག་ལའོ་ཞེས་བྱ་བ་སྨྲས་ཏེ། དགེ་སློང་མ་དེ་ཉེ་དུ་མ་ཡིན་པ་ཉིད་གང་ཡིན་པ་ཉིད་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །གཞན་ལ་ཡང་འདྲ་བར་བསྟན་པའི་ཕྱིར། འོག་མ་ལ་ཡང་ངོ་ཞེས་བྱ་བ་སྨྲས་ཏེ། འཁྲུར་འཇུག་པའི་བསླབ་པའི་གཞི་འདི་ཉིད་ཀྱི་འོག་མ་ལེན་པ་ཞེས་བྱ་བའི་བསླབ་པའི་གཞི་གང་ཡིན་པ་དེ་ལ་ཡང་དགེ་སློང་མ་ཉིད་དང༌། དེ་ཉེ་དུ་མ་ཡིན་པ་ཉིད་དག་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བར་འདྲ་བར་བསྟན་པའོ། །ཅི་ཞིག་བྱས་ན་འཁྲུར་འཇུག་པའི་སྤང་བར་འགྱུར་ཞེ་ན། དེའི་ཕྱིར་བྱིན་གྱིས་བརླབས་པ་རང་གི་རྙིང་པ་འཁྲུར་འཇུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁྲུར་བཅུག་གམ། འཚེད་དུ་བཅུག་གམ། འཆག་ཏུ་བཅུག་པ་དག་ནའོ་ཞེས་བྱ་བ་སྨྲས་ཏེ། བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་བར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁྲུར་བཅུག་པ་དང༌། འཚེད་དུ་བཅུག་པ་དང༌། འཆག་ཏུ་བཅུག་པ་དག་བྱས་ན་སྤང་བའི་ལྟུང་བར་འགྱུར་རོ་ཞེས་བྱ་བར་སྦྱར་རོ། །བྱིན་གྱིས་བརླབས་པ་ཞེས་སྨོས་པ་ནི།
བྱིན་གྱིས་མ་བརླབས་བ་འཁྲུར་བཅུག་པ་ལ་སོགས་པ་བྱས་ན་ཉེས་བྱས་སུ་བསྟན་པའི་ཕྱིར་རོ། །རང་གི་ཞེས་སྨོས་པ་ནི་གཞན་གྱིས་བསལ་བའི་ཕྱིར་རོ། །རྙིང་པ་ཞེས་སྨོས་པ་ནི་སར་བ་དགག་པའི་ཕྱིར་རོ། །འཁྲུར་གཞུག་པར་འོས་པ་ཆོས་གོས་དང་གདིང་བ་ཞེས་སྨོས་པ་ནི། དེ་དག་ལས་བཟློག་པ་ཐམས་ཅད་ལ་ཉེས་བྱས་ཀྱི་ལྟུང་བར་བསྟན་པའི་ཕྱིར་རོ། །བྱིན་གྱིས་བརླབས་པ་རང་གི་རྙིང་པ་ཇི་སྲིད་དུ་སྤྱད་ཀྱང་རུང་བ་འཁྲུར་གཞུག་པ་ལ་སོགས་པར་འོས་པ་རྫབ་ལ་སོགས་པས་གོས་པ་ཆོས་གོས་དང་གདིང་བ་དག་ལས་གཅིག་འགའ་སྣམ་སྦྱར་ལ་སོགས་པ་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅུག་པ་དང༌། འཚེད་དུ་བཅུག་པ་དང༌། འཆག་ཏུ་བཅུག་པ་དག་བྱས་ན་འཁྲུར་བཅུག་པའི་སྤང་བར་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་བྱིན་གྱིས་བརླབས་པ་རང་གི་རྙིད་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་དགེ་སློང་མ་ཉེ་དུ་མ་ཡིན་པའི་ལག་ཏུ་བསྒོ་བར་འཁྲུར་བཅུག་པ་དང༌། འཚེད་དུ་བཅུག་པ་དང༌། འཆག་ཏུ་བཅུག་པ་དག་བྱས་ན་སྤང་བའི་ལྷུང་བྱེད་དུ་འགྱུར་རོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ཆོས་གོས་སྤངས་པ་འཁྲུར་སྩོལ་ན་ལྟུང་བ་ཅིར་འགྱུར། གལ་ཏེ་མ་སྤངས་པ་འཁྲུར་བཅུག་ན་ནི་སྤང་བར་འགྱུར་རོ། །འོན་ཏེ་སྤངས་པ་འཁྲུར་བཅུག་ན་ནི་ཉེས་བྱས་སུ་འགྱུར་རོ་ཞེས་གསུངས་པ་དེ་ནི་བྱིན་གྱིས་བརླབས་པ་ཞེས་སྨོས་པའི་གཞུང་ཡིན་ནོ། །བཙུན་པ་རེ་ཞིག་དགེ་སློང་གིས་གཞན་དབང་བའི་ཆོས་གོས་འཁྲུར་སྩོལ་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་དེ་ནི་རང་གི་ཞེས་སྨོས་པའི་གཞུང་ཡིན་ནོ། །རྙིང་བ་ཞེས་བྱ་བ་ནི་དུས་ཚིགས་གསུམ་པོ་དག་ལས་དུས་ཚིགས་གང་ཡང་རུང་བར་སྤྱད་པ་གང་ཡིན་པའོ་ཞེས་གསུངས་པ་དེ་ནི་རྙིང་པ་ཞེས་སྨོས་པའི་གཞུང་ཡིན་ནོ། །དེ་ཡང་མཚོན་པ་ཡིན་པར་རིག་པར་བྱ་སྟེ། གལ་ཏེ་ཇི་སྲིད་སྤྱད་ཀྱང་རུང་མི་གཙང་བ་ལ་སོགས་པས་གོས་པས་འཁྲུར་གཞུག་པར་འོས་པ་ནི་དུས་ཚིགས་སུ་མ་སྤྱད་ན་ཡང་སྤང་བར་འགྱུར་བ་སྐྱེད་པ་ཁོ་ནའོ། །འདིར་གཞུང་ནི་བཙུན་པ་དགེ་སློང་ཆོས་གོས་རུང་བས་གྲོང་དུ་ཞུགས་ཤིང་དེའི་ཚེ་
ཆོས་གོས་དེ་ཡང་ལུས་ལས་མ་ཕུད་བར་དེ་སྤང་བར་འགྱུར་བས་དབྱུང་བར་འགྱུར་བ་མཆིས་སམ། ཉེ་བ་འཁོར་ཡོད་དེ། འདི་ལྟ་སྟེ། ཁྱིམ་གྱི་ནང་དུ་ཞུགས་པའི་ཆོས་གོས་མི་གཙང་བ་ལ་སོགས་པས་གོས་པར་གྱུར་བ་དེ་དགེ་སློང་མ་ཉེ་དུ་མ་ཡིན་པ་ལ་འཁྲུར་བཅུག་ན་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །བཙུན་པ་རེ་ཞིག་དགེ་སློང་གིས་དགེ་འདུན་གྱི་ཆོས་གོས་འཁྲུར་སྩོལ་ན་ལྟུང་བ་ཅིར་འགྱུར། གལ་ཏེ་གང་ཟག་གིས་སྤྱད་པས་དྲི་མ་ཅན་དུ་གྱུར་པ་ཡིན་ན་ནི་ཉེས་བྱས་སུ་འགྱུར་རོ་ཞེས་གསུངས་པ་དེ་ནི་འཁྲུར་གཞུག་པར་འོས་པའི་གཞུང་ཡིན་ནོ། །ཆོས་གོས་ཞེས་བྱ་བ་ནི་བདུན་པོ་དག་ལས་གང་ཡང་རུང་བའོ་ཞེས་གསུངས་པ་དེ་ནི་ཆོས་གོས་ཞེས་སྨོས་པ་ནི་གཞུང་ཡིན་ནོ། །འཁྲུར་འཇུག་པ་དང༌། འཚེད་དུ་འཇུག་པ་དང༌། འཆག་ཏུ་འཇུག་པ་ཞེས་གསུངས་པ་དེ་ནི་འཁྲུར་བཅུག་པ་ལ་སོགས་པ་སྨོས་པའི་གཞུང་ཡིན་ནོ། །བཙུན་པ་རེ་ཞིག་དགེ་སློང་གིས་དགེ་སློང་མཉེ་དུ་མ་ཡིན་པ་ལ་མངགས་པས་ཆོས་གོས་འཁྲུར་སྩོལ་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་དེ་ནི་བསྒོ་བས་ཞེས་བྱ་བ་དང༌། དགེ་སློང་མ་ཉེ་དུ་མ་ཡིན་པ་ཞེས་སྨོས་པའི་གཞུང་ཡིན་ནོ། །ཕྱོགས་ལ་བྱས་པ་ཡང་ལས་བྱས་པ་ཉིད་དོ་ཞེས་བྱ་བ་ནི། ཆོས་གོས་ཀྱི་ཕྱོགས་གཅིག་ལ་འཁྲུར་འཇུག་པ་ལ་སོགས་པའམ། བྱ་བའི་ཕྱོགས་གཅིག་བྱས་པ་ནི་ལྟུང་བ་བྱེད་པའི་ལས་བྱས་པ་ཉིད་ཡིན་པར་རིག་པར་བྱའོ། །འདིར་གཞུང་ནི་བཙུན་པ་དགེ་སློང་ཆོས་གོས་རུང་བས་གྲོང་དུ་ཞུགས་ཤིང་དེའི་ཆོས་གོས་དེ་ཡང་ལུས་ལས་མ་ཕུད་པར་དེ་སྤང་བར་འགྱུར་བས་དབྱུང་བར་འགྱུར་བ་མཆིས་སམ་ཞེས་སྔར་བསྟན་པ་དེ་ནི་ཆོས་གོས་ཀྱི་ཕྱོགས་གཅིག་གི་གཞུང་ཡིན་ནོ། །ཐ་ན་ཆུར་སྨྱུག་པར་བྱེད་དམ། ཆོན་དུ་སྨྱུག་པར་བྱེད་དམ། ཐ་ན་ཐལ་མོ་རྡེབ་པར་བྱེད་ན་ཡང་ངོ་ཞེས་གསུངས་པ་ནི་བྱ་བའི་ཕྱོགས་གཅིག་གི་གཞུང་ཡིན་ནོ། །བྱས་པ་ཉིད་ན་བྱེད་དུ་བཅུག་པ་ཉིད་ཡིན་ནོ་ཞེས་བྱ་བ་ནི། བསྐོས་པའི་དགེ་སློང་མ་ཞེས་བྱ་བའི་གང་ཟག་མོས་གང་གི་ཚེ་འཁྲུར་བཅུག་པ་ལ་སོགས་པའི་ལས་དེ་བྱས་ཤིང་མཐར་ཐུག་པར་གྱུར་པ་ན་ཡང་དེའི་ཚེ་འཁྲུར་བཅུག་པ་ལ་སོགས་པའི་ལས་དེ་བྱས་པ་ཉིད་ཡིན་པར་རིག་པར་བྱའོ། །
བསྐོས་པ་ཙམ་ཁོ་ནས་ནི་མ་ཡིན་ནོ། །འབྲས་བུའི་མཐའ་མན་ཆད་གཅིག་པ་ཉིད་དོ་ཞེས་བྱ་བ་ནི། ཇི་སྲིད་དུ་དེས་འཁྲུར་བཅུག་པ་ལ་སོགས་པ་བསམས་པའི་འབྲས་བུ་གྲུབ་པར་མ་གྱུར་གྱི་བར་དུ་འཁྲུར་འཇུག་པ་ལ་སོགས་པའི་ལས་དེ་གཅིག་པ་ཉིད་ཡིན་པར་རིག་པར་བྱའོ། །པར་སྐབས་སུ་ཆད་པ་དག་ཐ་དད་པ་ཉིད་མ་ཡིན་ཏེ། དེ་ནི་ཐམས་ཅད་ཀྱི་དབང་དུ་བྱ་བ་ཉིད་ཡིན་པར་རིག་པར་བྱའོ། །རིགས་མཐུན་པའི་ལས་ལ་ནི་གཅིག་པ་ཉིད་དུ་ཡང་རུང་ན། རིགས་མི་མཐུན་པའི་ལས་འཁྲུར་འཇུག་པ་དང༌། འཚེད་དུ་འཇུག་པ་དང༌། འཆག་ཏུ་འཇུག་པ་ཞེས་བྱ་བ་དག་ཇི་ལྟར་གཅིག་པ་ཉིད་དུ་རུང་སྙམ་དུ་དོགས་པ་བསལ་བའི་ཕྱིར། ཚིགས་སུ་གྱུར་པ་ཉིད་ལ་འབྲས་བུ་རྣམས་གཅིག་པ་ཉིད་དོ་ཞེས་བྱ་བ་སྨྲས་ཏེ། ཚིགས་སུ་གྱུར་པ་ཉིད་ལ་ཞེས་བྱ་བ་ནི། བར་དུ་ཆད་པར་གྱུར་པ་ཉིད་དང་རིགས་མི་མཐུན་པར་གྱུར་པ་ཉིད་ལ་ཡང་འབྲས་བུ་རྣམས་གཅིག་པ་ཉིད་དེ། ཁྲུ་བ་ཉིད་དང༌། འཚེད་པ་ཉིད་དང༌། འཆག་པ་ཉིད་ཅེས་བྱ་བའི་འབྲས་བུ་རྣམས་གཅིག་པ་ཉིད་ཡིན་པར་རིག་པར་བྱའོ། །དེ་དག་ཐ་དད་པའི་དབང་གིས་ལས་ཐ་དད་པ་ཡང་མ་ཡིན་ནོ། །འདིར་གཞུང་ནི་གང་དུ་འཁྲུར་འཇུག་པ་དང༌། འཚེད་དུ་འཇུག་པ་དང༌། འཆག་ཏུ་འཇུག་པར་བྱེད་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ཏེ། དེ་ལྟར་འཁྲུར་འཇུག་པ་ལ་སོགས་པ་ནས་རྣམ་པ་གསུམ་ཆར་རྫོགས་པ་ན་ལྟུང་བྱེད་གཅིག་ཏུ་གསུངས་པ་གང་ཡིན་པ་དེ་འདིར་ཁུང་ཡིན་ནོ། །འདུ་ཤེས་གཙོ་བོ་ཉིད་ལ་ནི་དོན་ཇི་ལྟ་བ་ཉིད་ལ་ནི་དངོས་གཞིའོ། །དོན་ཇི་ལྟ་བ་ཉིད་མ་ཡིན་པ་ལ་ནི་དངོས་གཞི་དང་ཉེ་བའོ་ཞེས་བྱ་བ་ནི། འདུ་ཤེས་གཙོ་ཆེ་བ་ཉིད་ནི། འདུ་ཤེས་གཙོ་བོ་ཉིད་དེ་དེ་ལ་ནི་བསྟན་བཅོས་གང་དང་གང་དུ་འདུ་ཤེས་གཙོ་ཆེར་བསྟན་པ་དེ་དང་དེར། དོན་ཇི་ལྟ་བ་ཉིད་ལ་ནི་དངོས་གཞི་སྟེ་ཞེས་བྱ་བ་ལ། དོན་ཇི་ལྟ་ཇི་ལྟ་བ་ནི་དོན་ཇི་ལྟ་བའོ། །དེའི་དངོས་པོ་ནི་དེ་ཉིད་དེ་དེ་ལ་ནི་དངོས་གཞི་སྟེ་སྤང་བ་ཉིད་དུ་འགྱུར་བའོ། །འདི་སྐད་བསྟན་ཏེ། གལ་ཏེ་འདུ་ཤེས་ཇི་ལྟ་བ་བཞིན་དུ་དོན་ཀྱང་གལ་ཏེ་དེ་ལྟ་བུ་ཉིད་ཡིན་ཏེ། དགེ་སློང་མཉེ་དུ་མ་ཡིན་པ་ཉིད་དུ་འདུ་ཤེས་ཤིང་དགེ་སློང་མ་ཉིད་ཀྱང་ཉེ་དུ་མ་ཡིན་པ་ཉིད་ཡིན་ན་དངོས་
གཞི་སྟེ། སྤང་བ་ཉིད་དུ་འགྱུར་རོ། །དོན་ཇི་ལྟ་བ་ཉིད་མ་ཡིན་པ་ལ་ནི་དངོས་གཞི་དང་ཉེ་དུའོ་ཞེས་བྱ་བ་ནི། འདུ་ཤེས་ཀྱང་གཞན་ཏེ། དགེ་སློང་མ་ཉེ་དུ་ཡིན་ནོ་སྙམ་ལ་དོན་ཀྱང་གཞན་ཏེ། དགེ་སློང་མ་ཉིད་ཉེ་དུ་མ་ཡིན་པ་ཉིད་ཡིན་ན། དེའི་ཚེ་དངོས་གཞི་དང་ཉེ་བའི་ལྟུང་བར་འགྱུར་ཏེ། ཉེ་བའི་ཚིགས་འོག་མར་གྱུར་བའི་ལྟུང་བར་འགྱུར་རོ། །འདི་ལྟ་སྟེ་དཔེར་ན། སྲོག་ཆགས་དང་བཅས་པའི་ཆུ་ལ་སྲོག་ཆགས་དང་བཅས་པར་འདུ་ཤེས་པས་སྤྱད་ན་ནི་ལྟུང་བྱེད་དུ་འགྱུར་ལ། སྲོག་ཆགས་མེད་པ་ལ་སྲོག་ཆགས་དང་བཅས་པར་འདུ་ཤེས་ན་ནི་ཉེས་བྱས་སུ་འགྱུར་བ་ལྟ་བུའོ། །ཡིད་གཉིས་ནི་འདུ་ཤེས་དང་འདྲའོ་ཞེས་བྱ་བ་ནི། ཡིད་གཉིས་ནི་ལྟུང་བ་ལ་འདུ་ཤེས་དང་འདྲ་བར་འགྱུར་བར་རིག་པར་བྱའོ། །དོན་དེ་ལ་ཡིད་གཉིས་ཟ་བ་ལ་ཡང་ཇི་ལྟར་འདུ་ཤེས་ལྟུང་བར་འགྱུར་བ་དེ་བཞིན་དུ་ལྟུང་བ་དེ་ཉིད་དུ་འགྱུར་རོ། །འདི་ལྟ་སྟེ་དཔེར་ན། སྲོག་ཆགས་དང་བཅས་པའི་ཆུ་ལ་ཡིད་གཉིས་ཟ་བའི་འདུ་ཤེས་ཀྱིས་སྤྱད་ན་ནི་ལྟུང་བྱེད་དུ་འགྱུར་ལ། སྲོག་ཆགས་མེད་པ་ལ་ཡིད་གཉིས་ཀྱི་འདུ་ཤེས་ཀྱིས་སྤྱད་ན་ནི་ཉེས་བྱས་སུ་འགྱུར་རོ། །འདིར་རྣམ་པར་འབྱེད་པ་ལས་སྐབས་སུ་གསུངས་པ་གང་ཡིན་པ་དེ་ཡང་བསྡུ་བའི་ཕྱིར། དགེ་འདུན་གྱི་ཁྲིམས་སུ་བྱ་བ་བསྲུང་བར་བྱའོ་ཞེས་བྱ་བ་སྨྲས་ཏེ། དགེ་འདུན་གྱི་ཁྲིམས་སུ་བྱ་བ་གང་བྱས་པ་དེ་གང་ཟག་གིས་ཀྱང་བསྲུང་བར་བྱའོ། །གློ་བུར་དུ་འོངས་པས་ཀྱང་དེ་ལས་མི་འགལ་བ་ཉིད་དུ་བྱའོ་ཞེས་བྱ་བ་ནི། གང་ཟག་གློ་བུར་དུ་འོངས་པས་ཀྱང་དགེ་འདུན་ན་གཉུག་མར་གནས་པས་ཁྲིམས་སུ་བྱ་བ་བསྲུང་བར་བྱ་བ་དེ་ལས་མི་འགལ་བ་ཉིད་དུ་བསྲུང་བར་བྱ་སྟེ། ཇི་ལྟར་གཉུག་མར་གནས་པ་དག་གིས་བསྲུང་བར་བྱ་བ་དེ་བཞིན་དུ་གློ་བུར་དུ་འོངས་པས་ཀྱང་བསྲུང་བར་བྱའོ། །ཡོང་དམ་མེད་པ་ཉིད་དང༌། ཇི་ལྟ་བུ་ཡོངས་སུ་ཤེས་པར་བྱ་བའི་ཕྱིར་དེས་དེ་དྲི་བར་བྱའོ་ཞེས་བྱ་བ་ནི། ཁྲིམས་སུ་བྱ་བ་ཡོད་པ་དང་མེད་པ་ནི་ཡོད་དམ་མེད་པའོ། །དེའི་དངོས་བོ་ནི་ཡོད་དམ་མེད་པ་ཉིད་དོ། །ཁྲིམས་སུ་བྱ་བ་དེ་ཡོད་དམ་མེད་པ་དང་ཡོད་པར་གྱུར་ན་ཇི་ལྟ་བུའི་རང་བཞིན་ཡོང་པ་ཡང་ཡོངས་སུ་ཤེས་པར་བྱ་བའི་ཕྱིར། གློ་བུར་དུ་འོངས་པ་དེས་ཁྲིམས་སུ་བྱ་བ་ཡོད་བ་དང་མེད་པ་དང༌། ཇི་ལྟ་བུ་ཡོད་པ་དེ་གཉུག་མར་
གནས་པ་དག་ལ་དྲི་བར་བྱའོ། །འདི་སྐད་བསྟན་ཏེ། ཚོགས་འདི་ན་དགེ་འདུན་གྱི་ཁྲིམས་སུ་བྱ་བ་འགའ་ཞིག་ཡོད་དམ། འོན་ཏེ་མེད། ཡོད་ན་ཇི་ལྟ་བུ་ཞིག་ཅེས་དེ་ཡོངས་སུ་ཤེས་པར་བྱ་བའི་ཕྱིར་གློ་བུར་དུ་འོངས་པ་དེས་དེ་དྲི་བར་བྱའོ། །གང་གི་ཚེ་ཞེ་ན། དེའི་ཕྱིར་ཧ་ཅང་ཡུན་མི་རིང་བར་རོ་ཞེས་བྱ་བ་སྨྲས་ཏེ། ཧ་ཅང་ཡུན་རིང་པོ་འདའ་བར་མ་བྱས་པ་སྟེ། དེ་ཧ་ཅང་ཡུན་རིང་དུ་ངལ་བསོ་བ་མ་བྱས་པར་ཧ་ཅང་ཡུན་རིང་དུ་གནས་པ་བས་སྔ་རོལ་དུ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། འཇུག་པ་དང༌། འཇུག་བའི་གནས་བཙལ་བ་དང༌། རྫས་གཞག་པ་དང༌། རེ་ཞིག་བསྡད་པ་དེ་དག་ཐམས་ཅད་ཇེ་དང་པོར་བྱའོ། །དེའི་འོག་ཏུ་ཁྲིམས་སུ་བྱ་བ་དྲི་བར་བྱའོ། །དགེ་འདུན་གྱི་ཁྲིམས་སུ་བྱ་བ་བསྲུང་བར་བྱའོ་ཞེས་བྱ་བ་དེའི་དམིགས་ཀྱིས་བསལ་བ་བསྟན་པའི་ཕྱིར། སངས་རྒྱས་ཀྱིས་གསུངས་པ་དགེ་འདུན་ལས་གཡོ་བ་མེད་དོ་ཞེས་བྱ་བ་སྨྲས་ཏེ། སངས་རྒྱས་ཀྱིས་གསུངས་པ། བཅོམ་ལྡན་འདས་ཀྱི་བཀའ་དགེ་འདུན་ལས་འབྲེལ་བའི་ཁྲིམས་ཀྱི་རྣམ་པ་རྒྱུར་གྱུར་པས་གཡོ་བ་མེད་དེ། གཡོ་བ་ཞེས་བྱ་བ་ནི་འདའ་བ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། དགེ་འདུན་གྱི་ཁྲིམས་སུ་བྱ་བའི་དབང་གིས་བཅོམ་ལྡན་འདས་ཀྱི་བཀའ་ལས་འདའ་བར་མི་བྱའོ། །དེ་ལྟར་ཡང་བཅོམ་ལྡན་འདས་ཀྱིས་ཉེ་སྡེ་ལངས་དགེ་སློང་དགོན་པ་པ་ལ་དགོན་པ་པའི་ཡོངས་སུ་སྤང་བ་སྦྱིན་པར་བྱ་སྟེ། དགེ་སློང་དགོན་པ་པ་ལ་དེ་བཞིན་གཤེགས་པ་ལ་བསྙེན་བཀུར་བྱ་བ་དང་བལྟར་འགྲོ་བའི་དུས་མ་ཡིན་པ་མེད་དོ་ཞེས་གསུངས་པའི་བཅོམ་ལྡན་འདས་ཀྱི་བཀའི་དབང་གིས་ཚེ་དང་ལྡན་པ་ཉེ་སྡེས་དགེ་འདུན་གྱི་ཁྲིམས་སུ་བྱ་བ་དྲལ་ཀྱང་ལྟུང་བ་མི་འབྱུང་བ་སྟེ། འདི་ལྟར་ཚེ་དང་ལྡན་པ་ཉེ་སྡེས་དང་པོར་ཁྲིམས་སུ་བྱ་བ་དྲལ་ལ་ཕྱིས་བཅོམ་ལྡན་འདས་ཀྱིས་བག་ཡངས་སུ་མཛད་དུ་ཟིན་ཀྱང་དེ་ལྟ་མོད་ཀྱི་ཉེ་སྡེས་བྱས་པ་གང་ཡིན་པ་དེ་དག་ཐམས་ཅད་བཅོམ་ལྡན་འདས་ཀྱིས་དང་པོ་ཉིད་ནས་དགོངས་པར་གྱུར་ཟིན་ཏོ། །ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལྷག་པར་འབུལ་བ་ན་དགེ་འདུན་གྱིས་ཉེ་བར་གཞག་པའི་དོན་དུ་བླང་བར་བྱའོ་
ཞེས་བྱ་བ་ནི། གང་ཟག་གང་ཡང་རུང་བས་རྐྱེན་འགའ་ཞིག་གི་དབང་གིས་ཆོས་གོས་ལ་སོགས་པ་ལྷག་པ་འབུལ་བ་ན། དགེ་འདུན་དང་གང་ཟག་གིས་ཀྱང་དགེ་འདུན་གྱི་ཆེད་དུ་བླང་བར་བྱ་སྟེ། ཉེ་བར་གཞག་པའི་དོན་དུ་ཞེས་བྱ་བ་ནི་གཞག་པའི་ཆེད་དུ་ཞེས་བྱ་བའི་ཐ་ཚིག་གོ །དེ་ལྟར་ཉེ་བར་གཞག་པ་ནི་དེ་དག་མེད་པ་དག་གིས་ཅི་དགར་བཀུར་རོ་ཞེས་བྱ་བ་ནི། ལྷུང་བཟེད་ལ་སོགས་པ་དེ་དག་མེད་པའི་རབ་ཏུ་བྱུང་བ་དག་གིས་ཅི་བདེར་བླང་བར་བྱ་བའོ། །འཁྲུར་འཇུག་པའི་སྤང་བ་རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །། འཁྲུར་འཇུག་པའི་སྤང་བ་ཞུ་བའི་སྐབས་ནས་འབྱུང་བ་བསྡུ་བའི་ཕྱིར། བཤང་བ་དང༌། གཅི་བ་དང༌། ལྗན་ལྗིན་དང་འདམ་རྫབ་ལ་སོགས་པས་མ་རུང་བར་གྱུར་པ་འཁྲུར་འཇུག་པ་ཡང་ན་སྨད་པ་མེད་དོ་ཞེས་བྱ་བ་སྨྲས་ཏེ། བཤང་བ་ལ་སོགས་པས་མ་རུང་བར་གྱུར་པ་འཁྲུར་འཇུག་པ་ལ་ལྟུང་བ་ན་སྨད་པ་མེད་དོ། །འདི་སྐད་བསྟན་ཏེ། ཅུང་ཟད་ཙམ་གྱིས་བཀྲུ་བར་འོས་པ་ཉིད་ལ་ཡང་ལྟུང་བ་ཆུང་བ་མེད་པ་ཉིད་དོ། །དྲེའུ་རྔོག་དང་ཁྱིམ་པའི་གོས་དང་སྔས་ནང་ཚངས་ཅན་དང་རུང་བར་བྱས་པ་དང་སྤངས་པ་དང་དགེ་འདུན་གྱི་རྣམས་ལ་ནི་ཉེས་བྱས་སོ་ཞེས་བྱ་བ་ནི། ཉེ་དུ་མ་ཡིན་པའི་དགེ་སློང་མ་ལ་དྲེའུ་རྡོག་ལ་སོགས་པ་དག་འཁྲུ་བ་ལ་སོགས་པ་བྱེད་དུ་འཇུག་ན་ཉེས་བྱས་སོ། །འཁྲུར་འཇུག་པའི་སྤང་བ་ཞུ་བའི་སྐབས་སོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །འཁྲུར་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ལེན་པའི་སྤང་བ་སྨྲ་བར་འདོད་ནས་ཞར་ལས་འོངས་བ་བསྟན་པའི་ཕྱིར། དགེ་སློང་མས་གོས་རིན་པོ་ཆེ་བརྗེ་བའི་ཕྱིར་བླང་བར་བྱའོ་ཞེས་བྱ་བ་སྨྲས་ཏེ། དགེ་སློང་མས་གོས་རིན་པོ་ཆེ་བརྗེ་བའི་ཕྱིར་བླང་བར་བྱའི། ལོངས་སྤྱད་པའི་ཕྱིར་མི་ན་ཡིན་ནོ། །དགེ་སློང་མ་དང་ལྷན་ཅིག་བརྗེ་བར་བྱའོ་ཞེས་བྱ་བ་ནི། དགེ་སློང་གིས་དགེ་སློང་མ་དང་ལྷན་ཅིག་གོས་ལ་སོགས་པ་བརྗེ་བར་བྱའོ་ཞེས་བྱ་བའི་ཐ་ཚིག་གོ །རྫས་ཇི་ལྟ་བུས་ཤེ་ན། དེའི་ཕྱིར་མཉམ་པས་སོ་ཞེས་བྱ་བ་སྨྲས་ཏེ། རིན་གྱི་ཕྱིར་མཉམ་པས་སོ། །ཡང་ན་དེ་དགའ་བ་ཉིད་ཀྱིས་སོ་ཞེས་བྱ་བ་ནི། དགེ་སློང་མ་གང་དང་ལྷན་ཅིག་དེ་བརྗེ་བར་བྱེད་
པའི་དགེ་སློང་མ་དེ་དགའ་བར་འགྱུར་བས་ཞེས་བྱ་བའི་ཐ་ཚིག་གོ །ཅི་ཞིག་བྱས་ན་ལེན་པའི་སྤང་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར་ལེན་ནའོ་ཞེས་བྱ་བ་སྨྲས་ཏེ། ཉེ་དུ་མ་ཡིན་པའི་དགེ་སློང་མ་ལ་དེར་འདུ་ཤེས་པའམ་ཡིད་གཉིས་ཟ་བ་ཞེས་སྔར་བསྟན་པ་ལས་ལེན་ནའོ། །ཇི་ལྟར་ལེན་ཞེ་ན། དེའི་ཕྱིར་རྣམ་པར་རིག་བྱེད་ཀྱིས་སོ་ཞེས་བྱ་བ་སྨྲས་ཏེ། ཅང་མི་སྨྲ་བས་དང་དུ་ལེན་པས་ཀྱང་མ་ཡིན་ལ། ཚིག་ལས་གཞན་པའི་རྣམ་པར་རིག་བྱེད་ཀྱིས་ཀྱང་མ་ཡིན་ནོ། །ཅི་ཞིག་ལེན་ན་ཞེ་ན། དེའི་ཕྱིར་གོས་སོ་ཞེས་བྱ་བ་སྨྲས་ཏེ། ལྷུང་བཟེད་དང་སྨན་ལ་སོགས་པ་དག་མ་ཡིན་ནོ། །རྣམ་པ་དེ་དག་ཐམས་ཅད་ཀྱི་དམིགས་ཀྱིས་བསལ་བ་བསྟན་པའི་ཕྱིར། དགེ་འདུན་ལ་གོས་འབུལ་བ་དང་ལེགས་པར་སྨྲ་བ་ལ་ལྟུང་བ་མེད་དོ་ཞེས་བྱ་བ་སྨྲས་ཏེ། དགེ་འདུན་ལ་གོས་འབུལ་བ་དང༌། ལེགས་པར་སྨྲ་བ་ལ་འབུལ་བ་ལ་ལྟུང་བ་མེད་དོ། །བསྙེན་པར་རྫོགས་པར་བྱེད་པ་དང༌། བོར་རླག་བྱུང་བ་དག་ལའོ་ཞེས་བྱ་བ་ནི། དགེ་སློང་བསྙེན་པར་རྫོགས་པར་བྱེད་པ་དང༌། བོར་རླག་བྱུང་བ་དག་གིས་ཉེ་དུ་མ་ཡིན་པའི་དགེ་སློང་མ་ལས་ལེན་པ་ལ་ཡང་ལྟུང་བ་མེད་དོ། །འདི་སྐད་བསྟན་ཏེ། དགེ་སློང་བསྙེན་པར་རྫོགས་པར་བྱེད་པ་དང༌། བོར་རླག་བྱུང་བ་དག་གིས་ཉེ་དུ་མ་ཡིན་པའི་དགེ་སློང་མ་ལས་ཆོས་གོས་ལ་སོགས་པ་ལེན་བར་བྱེད་ན་དེ་དག་ལ་ལྷུང་བ་མེད་དོ། །དང་རྫས་བརྗོད་དེ་མདུན་དུ་བཞག་ནས་མི་ལྟོས་པར་སོང་བ་ལའོ་ཞེས་བྱ་བ་ནི། དགེ་སློང་མ་གང་ཞིག་ཆོས་གོས་འབུལ་བར་བྱེད་པ་ན། གལ་ཏེ་དགེ་སློང་གིས་དགེ་སློང་མ་དེ་ལ་མི་ལེན་ཏོ་ཞེས་ཕྱིར་སྤོང་བར་བྱེད་ལ་དགེ་སློང་མ་དེས་ཀྱང་དང་རྫས་བརྗོད་དེ། བདག་ལ་རྫས་འདི་ལྟ་དག་མཆིས་ཀྱིས་འཕགས་པས་རྗེས་སུ་ཐུགས་བརྩེ་བའི་སླད་བུ་བཞེས་ཤིག །ཅེས་རྫས་དེ་མདུན་དུ་བཞག་ནས་མི་ལྟོས་པར་སོང་བ་ན་དེའི་ཚེ་བླངས་ན་ལྟུང་བ་མེད་དོ། །དད་རྫས་ཞེས་བྱ་བ་ནི་ཁ་ཅིག་ན་རེ་བདག་ཉིད་ཀྱི་དད་པ་གྲགས་པ་ལ་བྱ་སྟེ། དེ་བརྗོད་ཅིང་རབ་ཏུ་བསྟན་པ་ལ་བྱའོ་ཞེས་ཟེར་རོ། །ཁ་ཅིག་ན་རེ་རྫས་ནི་ནོར་རྫས་ཏེ། བདག་ཉིད་ཀྱི་དད་པ་དང་ནོར་རྫས་བརྗོད་པ་ཡིན་ནོ་ཞེས་ཀྱང་ཟེར་རོ། །ལེན་པའི་སྤང་བ་རྣམ་པར་འབྱེད་པའོ་
ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་རྫོགས་སོ།། །།ཞུ་བའི་སྐབས་བརྗོད་པར་འདོད་ནས། ལག་ཏུ་འོངས་པ་ཉིད་ཐོབ་པ་ཉིད་དོ་ཞེས་བྱ་བ་སྨྲས་ཏེ། ལག་ཏུ་འོངས་པ་ནི་དོན་ལ་གྲུབ་པའི་བློ་སྐྱེ་བས་དེའི་ཚེ་ན་དོན་དེ་ཐོབ་པ་ཉིད་ཡིན་པར་རིག་པར་བྱའོ། །བལྟ་བའི་ཉེ་འཁོར་དུ་གྱུར་པ་ནི་དེའི་དང་པོའོ་ཞེས་བྱ་བ་ནི། བལྟ་བའི་ཉེ་འཁོར་དུ་ཕྱིན་པ་ནི་ལག་ཏུ་འོངས་པ་ཉིད་དེའི་དང་པོ་རྩོམ་པ་སྟེ། དེ་ཚུན་ཆད་རྫས་དེ་ལག་ཏུ་འོངས་པ་ཡིན་ནོ། །འདིར་གཞུང་ནི་གོས་ཀྱི་གཞིའི་ཞུ་བ་ལས་ཇི་ཙམ་གྱིས་ན་གོས་ཐོབ་པ་ལགས། གང་ཚུན་ཆད་དེའི་ལག་ཏུ་འོངས་པར་འགྱུར་པའམ། བལྟ་བའི་ཉེ་འཁོར་དུ་གྱུར་པ་ཡིན་ནོ་ཞེས་གསུངས་པ་ཡིན་ནོ། །ཉེ་བར་མ་གྱུར་པ་ནོད་པ་ནི་སྦྱོར་བ་ཉིད་དོ་ཞེས་བྱ་བ་ནི། ཉེ་དུ་མ་ཡིན་པའི་དགེ་སློང་མ་ལས་གོས་ཉེ་བར་མ་གྱུར་པ་ནོད་པ་ལེན་ན། ནོད་པ་དེ་ནི་སྦྱོར་བ་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཁ་ཅིག་ལས་གྲོད་ཆེ་གེ་མོ་ཞིག་ན་གོས་མཆིས་ཀྱིས། དེ་ཚེ་དང་ལྡན་པ་ལ་གསོལ་ལོ་ཞེས་ཟེར་བ་ནོད་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །རྒྱ་ཆེ་བ་དང་ཐ་སྙད་ཀྱི་དབང་མ་ཡིན་པ་ཉིད་ལ་ནི་གོས་སྦྱིན་པ་ལ་སོགས་པ་གཙོ་བོ་ཡིན་ནོ་ཞེས་བྱ་བ་ལ། རྒྱ་ཆེ་བ་ཞེས་བྱ་བ་ནི་ཡངས་པའོ། །ཐ་སྙད་ཀྱི་དབང་མ་ཡིན་པ་ཉིད་ཅེས་བྱ་བ་ནི་ཉོ་ཚོང་དང་བྲལ་བ་ཉིད་དེ། དེ་གཉིས་ཀ་ཚོགས་པ་ན་གོས་སྦྱིན་པ་ལ་སོགས་པ་གཙོ་བོ་ཡིན་ཏེ། གཙོ་བོ་ཡིན་ནོ་ཞེས་བྱ་བའི་ཐ་ཚིག་གོ །གལ་ཏེ་དགེ་སློང་མ་རྒྱ་ཆེ་བ་ཡང་ཡིན་ལ། ཉོ་ཚོང་དང་བྲལ་བ་ཡང་ཡིན་པས་དགེ་སློང་ལ་གོས་སྤྱིན་པར་བྱེད་ལ། དགེ་སློང་དེས་ཀྱང་ལེན་པར་བྱེད་ན་དགེ་སློང་དེ་ལ་ལྟུང་བར་མི་འགྱུར་རོ། །དེ་ལྟར་ཡང་གཞུང་ན་འདི་ཡིན་ཏེ། སྔར་བཞག་པར་འགྱུར་ནས་སྨྲས་པ། རྗེས་སུ་གནང་བར་བགྱི་ཡིས་འཕགས་པས་ལོངས་སྤྱད་དུ་གསོལ། བདག་ལ་བསོད་ནམས་སུ་འགྱུར་རོ་ཞེས་ཟེར་ན་ལྟུང་བ་མེད་དོ་ཞེས་གསུངས་པའོ། །ཡང་ན་ཕྱིར་བསབ་མི་འཆེལ་བར་འབུལ་གྱིས་ལོངས་སྤྱད་དུ་གསོལ་ཞེ་འམ། གོས་ཆ་མི་མཐུན་པ་འམ། བརྗེའོ་ཞེས་ཟེར་བ་བླངས་པར་གྱུར་པ་ལས། ཕྱིས་ཚེ་དང་ལྡན་པ་རིན་སྩལ་མི་འཚལ་ལོ་ཞེས་ཟེར་པ་ལ། ལྟུང་བ་མེད་དོ་
ཞེས་གསུངས་པ་གང་ཡིན་པ་དེ་མདོ་འདིས་བསྡུས་པ་ཡིན་ནོ། །རེ་ཞིག་གི་སེམས་ཀྱིས་ནི་ལྟུང་བ་མེད་དོ་ཞེས་བྱ་བ་ནི། ཉེ་དུ་མ་ཡིན་པའི་དགེ་སློང་མ་ལས་རེ་ཞིག་གི་སེམས་ཀྱིས་ཆོས་གོས་ལ་སོགས་པ་ལེན་པ་ལ་ལྟུང་བ་མེད་པ་སྟེ། ཡིད་གཅུགས་པས་གོས་ལ་སོགས་པ་རེ་ཞིག་གི་ཚུལ་གྱིས་ལེན་པ་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །རིན་སྦྱིན་པ་བརྗེད་པ་ལའོ་ཞེས་བྱ་བ་ནི། རིན་གྱིས་བླངས་ནས་རིན་སྦྱིན་པ་བརྗེད་ན། འདི་ལྟར་དགེ་སློང་མ་ལས་བླངས་པར་གྱུར་དུ་ཟིན་ཀྱང་དེ་ལྟ་མོད་ཀྱི་ཉེས་པ་མེད་དོ། །འདིར་གཞུང་ནི་བཅོམ་ལྡན་འདས་ཀྱིས་ཚེ་དང་ལྡན་པ་རིན་སྩལ་མི་འཚལ་ལོ་ཞེས་ཟེར་བ་ལ་ལྟུང་བ་མེད་དོ་ཞེས་གསུངས་པ་སྔར་བསྟན་མ་ཐག་པ་ཉིད་ཡིན་ཏེ། དེ་ལྟར་གང་གིས་མི་དྲན་པ་ལ་ཉེས་པ་མེད་པའོ། །ལེན་པའི་སྤང་བ་ཞུ་བའོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །ལེན་པའི་སྤང་པའོ་ཞེས་བྱ་བ་དེ་བཤད་ཟིན་ཏོ།། །།སློང་བའི་སྤང་བ་འདི་ལ་ལྟུང་བ་བྱེད་པ་གང་ཞེ་ན། དེའི་ཕྱིར་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ནི་ལྟུང་བའི་བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། མིའི་འགྲོ་བ་པར་གཏོགས་པ་ཞེས་བྱ་བ་ནི་མིའི་རྒྱུད་དུ་སྐྱེས་པའོ་ཁྱིམ་པར་གྱུར་པ་ཞེས་བྱ་བ་ནི་རབ་ཏུ་བྱུང་བ་ནི་མ་ཡིན་པའོ། །སྲོག་དང་ལྡན་པ་ཞེས་བྱ་བ་ནི། སྲོག་དང་བྲལ་བ་ནི་མ་ཡིན་པའོ། །ཉེ་དུ་མ་ཡིན་པ་ཞེས་བྱ་བ་ནི། ཉེ་ངུའི་མཚན་ཉིད་དང་བྲལ་བའོ། །ལྟུང་བའི་བྱེད་པ་ཞེས་བྱ་བ་ནི། ལྟུང་བ་བྱེད་པས་ན་ལྟུང་བའི་བྱེད་པའོ། །དོན་སླ་བས་འདྲ་བར་བསྟན་པའི་ཕྱིར། འོག་མ་གསུམ་ལ་ཡང་ངོ་ཞེས་བྱ་བ་སྨྲས་ཏེ། འོག་ཁོ་ན་ནས་འབྱུང་བའི་བསླབ་པའི་གཞི་འོག་མ་གསུམ་ལ་ཡང་དེ་ཉིད་དུ་ལྟུང་བའི་བྱེད་པའོ། །འདིར་དགེ་སློང་ཇི་ལྟ་བུ་ལ་དེ་ལྟུང་བའི་བྱེད་པ་ཡིན་ཞེ་ན། དེའི་ཕྱིར་གོས་ཕྲོགས་པ་དང་རླག་པ་དང༌། ཚིག་པ་དང་རླུང་གིས་ཁྱེར་བ་དང་ཆུས་ཁྱེར་བར་མ་གྱུར་པ་ལའོ་ཞེས་བྱ་བ་སྨྲས་ཏེ། གོས་ཕྲོགས་པར་མ་གྱུར་པ་དང༌། རླག་པར་མ་གྱུར་པ་ལ་སོགས་པ་ལའོ། །ཅི་ཞིག་ལྷག་པར་སྤྱད་ན་ལྟུང་བ་ཇི་ལྟ་བུར་འགྱུར་ཞེ་ན། དེའི་ཕྱིར་བསླངས་ན་ཉེས་བྱས་ཀྱིའོ་ཞེས་བྱ་བ་སྨྲས་ཏེ།
བསླངས་པ་ན་ཉེས་བྱས་ཀྱི་བྱེད་པ་པོར་འགྱུར་རོ། །ཐོབ་ན་དངོས་གཞིའོ་ཞེས་བྱ་བ་ནི། བསླངས་པའི་རྒྱུ་དེ་ལས་ཐོབ་པར་གྱུར་ན་དངོས་གཞིའི་སྤང་བའི་ལྟུང་བྱེད་ཅེས་བྱ་བའི་བྱེད་པ་པོར་འགྱུར་རོ། །ཅི་ཞིག་ཐོབ་ཅེ་ན་དེའི་ཕྱིར་ཆོས་གོས་སོ་ཞེས་བྱ་བ་སྨྲས་ཏེ། ཚད་ཅི་ཙམ་ཞིག་ཅེ་ན། དེའི་ཕྱིར་མི་ཆུང་བ་ཉིད་དོ་ཞེས་བྱ་བ་སྨྲས་ཏེ། ཆོས་གོས་རང་གི་ཚད་དང་ལྡན་པ་ཞེས་བྱ་བའི་ཐ་ཚིག་གོ །ཅི་ལྟ་བུ་ཞིག་ཅེ་ན། དེའི་ཕྱིར་རིན་ཐང་དང་ཁ་དོག་དང་ཁྲུ་ཚད་ལས་རྣམ་པ་གང་བསླངས་བའོ་ཞེས་བྱ་བ་སྨྲས་ཏེ། རིན་ཐང་ངམ་ཁ་དོག་གམ་ཁྲུ་ཚད་ལས་རྣམ་པ་གང་བསླངས་པའི་རྣམ་པ་དེ་ལྟ་བུ་ཉིད་ཐོབ་ན་དངོས་གཞིའི་བྱེད་པ་པོ་ཉིད་ཡིན་ནོ། །འདིར་ཡང་གཙུག་ལག་ལས་ཁ་དོག་ཅན་ཞེས་བྱ་བའི་སྒྲ་ནི་སྔོན་པོ་ལ་སོགས་པའི་ཁ་དོག་ཉིད་ལ་སྙེགས་སོ། །དེས་ན་རིན་ཐང་ངམ། ཁ་དོག་གམ། ཁྲུ་ཚད་ཇི་ལྟ་བུ་བསླངས་པ་དེ་ལྟ་བུ་ཉིད་ཐོབ་ན་ལྟུང་བར་འགྱུར་གྱི། གཞན་གྱིས་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འོ་ན་གཞན་ཐོབ་ན་ཅིར་འགྱུར་ཞེ་ན། དེའི་ཕྱིར་གཞན་ལ་ནི་ལྟུང་བ་མེད་དོ་ཞེས་བྱ་བ་སྨྲས་ཏེ། རིན་ཐང་གཞན་ནམ་ཁ་དོག་གཞན་ནམ། ཁྲུ་ཚད་གཞན་ཐོབ་པ་ལ་ནི་ལྟུང་བ་མེད་དོ། །འདིར་ཁ་དོག་གི་གཞུང་ནི་དགེ་སློང་གིས་ཆོས་གོས་སྔོན་པོ་སློང་བར་བྱེད་ཅིང༌། སྔོན་པོ་ཉིད་ཐོབ་ན་དེ་ལ་སློང་བ་ལ་ཉེས་བྱས་སུ་འགྱུར་ལ། ཐོབ་པ་ནི་སྤང་བའི་ལྟུང་བྱེད་དུ་འགྱུར་རོ། །གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །རིན་ཐང་གི་གཞུང་ནི་དགེ་སློང་མའི་རྣམ་པར་འབྱེད་པ་ལས། དགེ་སློང་མས་ཆོས་གོས་ཀཱར་ཥཱ་པ་ཎ་ལྔར་རི་བ་ཞིག་སློང་བར་བྱེད་ཅིང༌། ཀཱར་sH'A་པ་ཎ་ལྔ་རི་བེ་དེ་ཉིད་ཐོབ་ན། དེ་ལ་སློང་བ་ཉེས་བྱ་སོ། །ཐོབ་པ་ན་སྤང་བའི་ལྟུང་བྱེད་དོ། །དེ་ལས་གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཚད་ཀྱི་གཞུང་ཡང་དགེ་སློང་གིས་ཆོས་གོས་ཁྲུ་ལྔ་པ་སློང་བར་བྱེད་ཅིང་དེས་གོས་ཁྲུ་ལྔ་པ་ཉིད་ཐོབ་ན། དེ་ལ་སློང་བ་ན་ཉེས་བྱས་སོ། །ཐོབ་པ་ན་སྤང་བའི་ལྟུང་བྱེད་དོ། །གཞན་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །འདིར་གཞན་ལ་ལྟུང་བ་མེད་དོ་ཞེས་བྱ་བ་ནི་ཐ་དད་པར་གྱུར་པ་ཉིད་ལ་ཡིན་པར་རིག་པར་བྱའི། རྒྱུ་གཅིག་ལ་ལྷག་པར་ཐོབ་
པ་ལ་ལྟུང་བ་མེད་པ་མ་ཡིན་ནོ། །ཁ་དོག་ལ་སོགས་པའི་དབྱེ་བ་མ་བྱས་པར་སྤྱིར་བསླངས་པ་ན་གང་ཡང་རུང་བ་ཞིག་ཐོབ་ན་ཡང་སྤང་བའི་ལྟུང་བྱེད་དོ། །རས་མ་དང་ཁ་ཚར་དག་སློང་ནའོ་ཞེས་བྱ་བ་ནི། རས་མ་དང་ཁ་ཚར་དག་སློང་བ་ལ་ལྟུང་བ་མེད་དོ། །ཁ་ཚར་བསླངས་པ་ལས་རས་མ་ཐོབ་པ་ལ་ཡང་ལྟུང་བ་མེད་དོ། །རས་མ་བསླངས་ན་རས་ཡུག་ཆེན་དང༌། རས་ཡུག་ཕྲན་དག་ཐོབ་པོ་སྙམ་ནས་བསླངས་ཤིང་ཐོབ་ན་ཡང་ལྟུང་བ་མེད་པར་རིག་པར་བྱའོ། །རྒྱུ་དང་སྤུན་ལ་ནི་སྨད་པ་ཉིད་དོ་ཞེས་བྱ་བ་ནི། རྒྱུ་ཅི་ཙམ་དང་སྤུན་ཇི་ཙམ་གྱིས་ཆོས་གོས་ཚད་དང་ལྡན་པ་ལངས་པར་འགྱུར་བ་དེ་ཅི་ཙམ་གྱི་རྒྱུ་དང་སྤུན་དག་སློང་ཞིང་ཐོབ་ན་ཉེས་བྱས་སོ། །འདིས་ནི་ཞུ་བ་ལས་ཉེ་དུ་མ་ཡིན་པ་ལས་ཆོས་གོས་མི་ཆོག་བ་ཉིད་སློང་ན་ཉེས་བྱས་སོ། །རྒྱུ་སློང་ན་ཡང་ཉེས་བྱས་སོ། །སྤུན་སློང་ན་ཡང་ཉེས་བྱས་སོ་ཞེས་གསུངས་པ་དེ་དག་བསྡུས་པ་ཡིན་ནོ། །དེའི་རང་བཞིན་ནི་དེ་དང་འདྲའོ་ཞེས་བྱ་བ་ནི་རྒྱུ་སྤུན་གྱི་སྐུད་པའི་རང་བཞིན་ནི་རྒྱུ་སྤུན་གྱི་སྐུད་པ་དང་འདྲ་བ་སྟེ། རྒྱུ་སྤུན་གྱི་སྐུད་པའི་རང་བཞིན་ཞེས་བྱ་བ་ནི་བ་ལ་དང་རས་བལ་ལ་སོགས་པའོ། །འདིས་ནི་འཐག་པའི་ཞུ་བ་ལས་བཙུན་པ་རེ་ཞིག་དགེ་སློང་རས་བལ་སློང་བར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་དེ་བསྡུས་པ་ཡིན་ནོ། །སློང་བའི་སྤང་བའོ་ཞེས་བྱ་བ་དེ་རྣམ་པར་འབྱེད་པ་དང་ཞུ་བའི་སྐབས་ཅིག་ཅར་བཤད་ཟིན་ཏོ།། །།བམ་པོ་བཅོམ་བརྒྱད་པ། སློང་བར་རིགས་པའི་སྤང་བ་བསྡུ་བའི་ཕྱིར། བྱིན་གྱིས་བརླབ་པར་བྱ་བ་ཐམས་ཅད་མེད་ན་སློང་བར་རིགས་པ་ཉིད་དོ་ཤེས་བྱ་བ་སྨྲས་ཏེ། དགེ་སློང་གན་ལ་ཆོ་གོས་གསུམ་ལ་སོགས་པ་བྱིན་གྱིས་བརླབ་པར་བྱ་བ་ཐམས་ཅད་མེད་ན། བྱིན་གྱིས་བརླབ་པར་བྱ་བ་དེ་ཐམས་ཅད་བསླང་བར་རིགས་པ་ཉིད་དོ། །འདི་སྐད་བསྟན་ཏེ། བཅོམ་ལྡན་འདས་ཀྱིས་ཆོས་གོས་བཅུ་གསུམ་པོ་གང་དག་གསུངས་པ་འདི་ལྟ་སྟེ། སྣམ་སྦྱར་དང༌། བླ་གོས་དང༌། མཐང་གོས་དང༌། གདིང་བ་དང༌། རྡུལ་གཟན་དང༌། རྡུལ་གཟན་གྱི་གཟན་དང༌། ཤམ་ཐབས་དང༌། ཤམ་ཐབས་ཀྱི་གཟན་དང༌། ལུས་ཕྱིས་དང༌། སྐྲ་བཟེད་དང༌། གཡན་པ་དགབ་པ་དང༌། དབྱར་གྱི་རས་ཆེན་དང༌། ཡོ་བྱད་ཀྱི་གོས་སོ། །བཅུ་
གསུམ་པོ་དེ་དག་ལས་ཁ་ཅིག་ལས་ནི་དབྱར་གྱི་རས་ཆེན་མི་སྨོས་པར་ཁྲུས་རས་ཞེས་འབྱུང་སྟེ། དེ་དག་ཞི་ནང་ནས་གང་དང་གང་མེད་པ་དེ་དང་དེ་ཉིད་སློང་བར་རིགས་པ་ཉིད་ཡིན་ནོ། །མདོར་ན་གང་ལ་དགེ་སྦྱོང་གི་ཡོ་བྱད་ཅེས་བྱ་བའི་དངོས་པོ་གང་གིས་བྲེལ་བ་ཡོད་པ་དེ་ཉིད་དུ་མ་ཡིན་པ་ལས་སློང་པར་བྱེད་ན་དེ་ལ་ཉེས་པ་མེད་དོ། །འདི་ལ་ལྟུང་བའི་བྱེད་པ་པོ་ཉིད་གང་ཞེ་ན། དེའི་ཕྱིར་དེ་ནི་ལྟུང་བའི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི་སྔར་བསྟན་མ་ཐག་པའི་དགེ་སློང་སློང་བར་རིགས་པ་སྟེ། དེ་འདིར་ལྟུང་བའི་བྱེད་པ་པོ་ཉིད་ཡིན་གྱི། ཆོས་གོས་ནི་མ་ཡིན་ཏེ། མི་སྲིད་པའི་ཕྱིར་རོ། །ཇི་ལྟར་ན་དགེ་སློང་སློང་བར་རིགས་པ་ཡིན་ཞེ་ན། ཉེ་དུ་མ་ཡིན་པ་ལས་ཆོས་གོས་སློང་བར་རིགས་པའི་ཕྱིར་རོ། །དེ་ཡང་གང་ཞེ་ན། ཆོས་གོས་ཕྲོགས་པ་ལ་སོགས་པའོ། །སློང་བར་མི་རིགས་པ་སློང་བར་བྱེད་ན་ནི་སློང་བའི་སྤང་བར་གཏོགས་པའི་ལྟུང་བའོ། །སློང་བར་རིགས་པ་སློང་བར་བྱེད་ན་ནི་དེ་ལས་ལྷག་པ་ལེན་ན་ལེན་པའི་སྤང་བར་གཏོགས་པའི་ལྟུང་བར་འགྱུར་རོ། །དེའི་མདོར་བསྡུས་པ་རྣམ་པར་དབྱེ་བ་ཡིན་ནོ། །དེ་གང་ལས་འབྱུང་ཞེ་ན། སོ་སོར་ཐར་པའི་མདོ་ལས་ཆོས་གོས་ཆུས་ཁྱེར་ན་ཉེ་དུ་མ་ཡིན་པའི་ཁྱིམ་བདག་གམ་ཁྱིམ་བདག་གི་ཆུང་མའི་གན་དུ་སོང་སྟེ། ཆོས་གོས་བསླང་བར་བྱའོ། །དེ་ལ་གལ་ཏེ་བྲམ་ཟ་དང་ཁྱིམ་བདག་དད་པ་ཅན་དག་གིས་ཆོས་གོས་རབ་ཏུ་མང་པོ་དག་གིས་སྟོབས་པར་བྱེད་པར་གྱུར་ན། དགེ་སློང་དེས་འདོད་ན་ཆོས་གོས་དེ་ལས་སྟོད་གཡོགས་སྨད་གཡོགས་དང་བཅས་པ་མན་ཆད་བླང་བར་བྱའོ། །དེ་ལས་ལྷག་པ་ལེན་ན་སྤང་བའི་ལྟུང་བྱེད་དོ་ཞེས་སློང་བར་རིགས་པས་བསླངས་ཏེ་ཐོབ་པ་ན་ལྟུང་བྱེད་དོ་ཞེས་རྣམ་པར་གཞག་པའི་ཕྱིར་རོ། །ཟུང་བསླང་བར་བྱ་བ་ཉིད་དོ་ཞེས་འོག་ནས་འབྱུང་བ་དེའི་རང་བཞིན་བསྟན་པར་བྱ་སྟེ། ཁྱིམ་པའི་སྟོད་གཡོགས་ཆེ་ཚད་ནི་རས་ཡུག་ཆེན་ཁྲུ་བཅུ་གཉིས་པའོ། །སྨད་གཡོགས་ནི་རས་ཡུག་ཕྲན་བདུན་པ་དང་དོ་པའོ་ཞེས་བྱ་བ་ནི། ཁྱིམ་པའི་སྟོད་གཡོགས་དང་སྨད་གཡོགས་ཆེ་ཚང་ནི་འདི་ཡིན་པར་རིགས་པར་བྱ་སྟེ། འདི་ལྟ་སྟེ། ཁྱིམ་པའི་སྟོད་གཡོགས་ཆེ་ཚད་རབ་ཀྱི་མཐར་ཕྱིན་པ་ནི། རས་ཡུག་ཆེན་ཁྲུ་བཅུ་གཉིས་པ་སྟེ། རས་ཡུག་ཆན་གང་ལ་སྲིད་དུ་ཁྲུ་བཅུ་གཉིས་ཀྱི་ཚད་
ཡོད་པ་དེ་ནི་ཁུ་བཅུ་གཉིས་པའོ། །རས་ཡུག་ཆེན་དེ་ལྟ་བུ་དེ་ནི་ཁྱིམ་པའི་སྟོད་གཡོགས་དེ་གོས་ཆེན་པོའི་ཚད་ཡིན་ནོ། །འདིར་དེའི་རྐྱེན་ཉིད་ཀྱིས་ཞེང་དུ་ནི་ཤུགས་ཀྱིས་ན་ཁྲུག་སུམ་པ་ཡིན་པར་ཤེས་པར་བྱའོ། །ཁྱིམ་པའི་སྨད་གཡོགས་ཆེ་ཚད་རབ་ཀྱི་མཐར་ཕྱིན་པ་ནི་རས་ཡུག་ཕྲན་སྲིད་དུ་ཁྲུ་བདུན་པ་དང་ཞེང་དུ་ཁྲུ་དོ་པ་སྟེ། རས་ཡུག་ཕྲན་དེ་ལྟ་བུ་ནི་ཁྱིམ་པའི་སྨད་གཡོགས་ཏེ། འདིར་ཡང་ཆེ་ཚད་ཆེས་བྱ་བར་སྦྱར་རོ། །དགེ་སློང་གི་ཆེ་ཚད་ནི་སྣམ་སྦྱར་དང༌། ཤམ་ཐབས་ཀྱི་རིམ་པ་ཇི་སྐད་བསྟན་པའོ་ཞེས་བྱ་བ་ནི་ཆེ་ཚད་ཅེས་བྱ་བར་སྦྱར་རོ། །སྣམ་སྦྱར་དང་ཤམ་ཐབས་ནི། སྣམ་སྤྱར་དང་ཤམ་ཐབས་སོ། །རིམ་པ་ཇི་སྐད་བསྟན་པའོ་ཞེས་བྱ་བ་ནི། རིམ་པ་གཉིས་པ་ལ་སོགས་པ་སྟེ། དེ་ནི་ཆོས་གོས་ཆེ་ཚད་ཡིན་པར་རིག་པར་བྱའོ། །འདི་སྐད་བསྟན་ཏེ། དགེ་སློང་གི་སྟོད་གཡོགས་ཆེ་ཚད་ནི་སྣམ་སྦྱར་གྱི་རིམ་པ་ཇི་སྐད་བསྟན་པའོ། །སྨད་གཡོགས་ཆེ་ཚད་ནི་ཤམ་ཐབས་ཀྱི་རིམ་པ་ཇི་སྐད་བསྟན་པའོ། །ཆོས་གོས་ཇི་སྙེད་བསླང་བར་བྱ་བ་ཉིད་ཡིན་ཞེ་ན། དེའི་ཕྱིར་ཟུང་བསླང་བར་བྱ་བ་ཉིད་དོ་ཞེ་བྱ་བ་སྨྲས་ཏེ། སྟོད་གཡོགས་སྨད་གཡོགས་སུ་བཅས་པ་བཟུང་འདི་སླང་བར་བྱ་བ་ཉིད་ཡིན་ཏེ། ལྷག་ན་ཐ་དད་པར་གྱུར་ཀྱང་རུང་ཐ་དད་པར་གྱུར་པ་མ་ཡིན་པ་ཡང་རུང་སྟེ། ལྟུང་བའི་བྱེད་པ་པོ་ཉིད་ཡིན་ནོ། །ཁྱིམ་པ་དང་དགེ་སློང་གི་ཟུང་འདི་གཉིས་ལས་གང་བསླང་བར་བྱ་བ་ཉིད་ཡིན་ཞེ་ན། དེའི་ཕྱིར་གང་ཡང་རུང་བའོ་ཞེས་བྱ་བ་སྨྲས་ཏེ། ཁྱིམ་པའི་སྟོད་གཡོགས་སྨད་གཡོགས་དང་བཅས་པའམ། དགེ་སློང་གི་སྟོད་གཡོགས་སྨད་གཡོགས་དང་བཅས་པའོ། །ཚད་དེ་ལས་ལྟག་པ་ནི་བསླང་བར་བྱ་བ་ཉིད་མ་ཡིན་པའོ་ཞེས་བྱ་བ་ནི། སྔར་བསྟན་པའི་ཚད་དེ་ལས་ལྷག་པ་ནི་བསླང་བར་བྱ་བ་ཉིད་མ་ཡིན་པའོ། །དེ་ཉིད་བསྟན་པའི་ཕྱིར་སྔ་མ་ཐོབ་ན་ཁ་བསྐང་བ་ཡང་ངོ་ཞེས་བྱ་བ་སྨྲས་ཏེ། བསླང་བར་བྱ་བ་ཉིད་མ་ཡིན་པའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །སྔ་མ་ཐོབ་ན་ཞོས་བྱ་བ་ལ་སྔ་མ་ཞེས་བྱ་བ་ནི་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་སྔར་སྨོས་པ་སྟེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་བས་གོ་རིམས་སྔར་བསྟན་པའི་ཕྱིར་རོ། །ཐོབ་ན་ཞེས་བྱ་བ་ནི་ཁྱིམ་པའི་སྟོད་གཡོགས་སྨད་
གཡོགས་དང་བཅས་པ་སྔ་མའི་ཚད་པས་ཆུང་བ་ཞིག་ཐོབ་ནའོ། །ཁ་བསྐང་བ་ཞེས་བྱ་བ་ནི་དེའི་ཁ་བསྐང་བ་ཡང་བསླང་བར་མི་བྱ་བའོ། །ཚད་ཅི་ཙམ་གྱིས་ཆུང་བ་ཐོབ་ན་དེའི་ཁ་བསྐང་བ་བསླང་བར་མི་བྱ་ཞེ་ན། རས་ཡུག་ཆེན་ཁྲུ་བཅུ་གཉིས་པ་དང༌། རས་ཡུག་ཕྲན་བདུན་པ་དང་དོ་བ་མན་ཆད་རས་ཡུག་ཆེན་ཁྲུ་ཕྱེད་དང་གསུམ་པ་དང་ཕྱེད་དང་ལྔ་པའི་བར་དང༌། རས་ཡུག་ཕྲན་འཁོར་གསུམ་ཁེབས་པའི་ཚད་ཀྱི་བར་ནི་ཆུང་བའི་མཐའ་ཡིན་པར་རིག་པར་བྱའོ། །དེ་བས་ཆེས་ཆུང་བ་ཞིག་ཐོབ་ན་ནི་དེའི་ཁ་བསྐང་བ་བསླང་བར་བྱ་སྟེ། ཆེས་ཆུང་བ་ལ་ནི་བྱིན་གྱིས་བརླབ་ཏུ་མི་རུང་བའི་ཕྱིར་རོ། །རས་ཡུག་ཆེན་ཁྲུ་ཕྱེད་དང་གསུམ་པ་དང་ཕྱེད་དང་ལྔ་བ་དང་རས་ཡུག་ཕྲན་འཁོར་གསུམ་ཁེབས་པའི་ཚད་ནི་འདོད་ལ་ཞེས་བྱ་བའི་སྒྲ་མེད་པར་བྱིན་གྱིས་བརླབ་ཏུ་རུང་སྟེ། མ་དྲས་པ་ཡིན་པའི་ཕྱིར་རོ། །དེ་ལྟར་ཡང་སློབ་དཔོན་ཡོན་ཏན་འོད་ཀྱིས་རང་གི་རྣམ་པར་བཤད་པ་ལས་སྨོས་སོ། །ཆོས་གོས་མ་དྲས་པ་འཆང་བར་འདོད་པ་གང་ཡིན་པ་དེ་ཉིད་ཁྱིམ་པའི་སྟོད་གཡོགས་སྨད་གཡོགས་དང་བཅས་བ་འདོད་པ་ཡིན་ཏེ། འགྲེལ་པ་བྱེད་པས་ཀྱང་དེ་ཁོ་ན་སྐད་བཤད་དོ། །གལ་ཏེ་ཆོས་གོས་མ་དྲས་པ་བྱས་ཟིན་པར་མི་འགྱུར་ན་ནི་དེ་བཅད་པར་འདོད་པ་ཉིད་ཀྱང་བསྐྱེད་པར་མི་བྱ་སྟེ། འདོད་ན་ཞེས་བྱ་བར་སེམས་པའི་ཕྱིར་རོ། །དེའི་ཁ་བསྐང་བ་ཡང་ཅིའི་ཕྱིར་བསླང་བར་མི་བྱ་སྟེ། དེའི་ཕྱིར་དེ་བསམ་མོ། །གལ་ཏེ་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་ལས་ལྷག་པ་ཞིག་ཐོབ་ན་ནི་དེའི་ཚེ། ལྷག་པར་སྦྱིན་པར་བྱ་བ་ཉིད་མ་ཡིན་ནོ། །གལ་ཏེ་དགེ་སློང་གིས་སྟོད་གཡོགས་སྨད་གཡོགས་དང་བཅས་པ་སློང་བར་བྱེད་པ་ན་ཚད་ལས་ཆེས་ལྷག་པ་ཞིག་ཐོབ་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་ཕྱི་མ་ཐོབ་ན་ལྷག་པ་སྦྱིན་པར་བྱ་བ་ཉིད་དོ་ཞེས་བྱ་བ་སྨྲས་ཏེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ནི་འདིར་ཁྱིམ་པའི་སྟོད་གཡོགས་སྨད་གཡོགས་དང་བཅས་པ་བས་བྱིས་བསྟན་པའི་ཕྱིར། ཕྱི་མ་ཞེས་བྱ་བའི་སྒྲར་བརྗོད་དེ། དགེ་སློང་གི་སྟོད་གཡོགས་སྨད་གཡོགས་དང་བཅས་པ་ཕྱིས་མ་ཐོབ་ན་གལ་ཏེ་ལྷག་པར་ཐོབ་ན་ཡང་ལྷག་པ་སྦྱིན་པ་དག་ལ་སྦྱིན་པར་བྱ་བ་ཉིད་དེ། དོན་ཡོངས་སུ་རྫོགས་པ་ལས་དེ་ལྷག་པའི་ཕྱིར་རོ། །བསམ་པའི་དབང་གིས་ཀྱང་ཡོངས་སུ་རྫོགས་པ་
ཉིད་ཡིན་ཏེ། ཆིག་རྐྱང་དང་དྲས་པ་ལ་སོགས་པའི་བསམ་པས་སོ། །སློང་བར་མི་རིགས་པའི་དགེ་སློང་གིས་བདག་ནི་སློང་བར་རིགས་པ་ཡིན་ནོ་སྙམ་དུ་རྟོག་པ་འདིས་སློང་བ་ལ་ཞུགས་ན་བྱ་བ་གང་ལ་ལྟུང་བ་ཇི་ལྟ་བུར་འགྱུར་ཞེ་ན། དེའི་ཕྱིར་བསླང་བར་བྱ་བ་མ་ཡིན་བ་བསླངས་ན་ཉེས་བྱས་སོ་ཞེས་བྱ་བ་སྨྲས་ཏེ། བསླང་བར་བྱ་བ་མ་ཡིན་པ་བསླང་བར་མི་འོས་པའི་གོས་རྔ་བལ་ལ་སོགས་པ་བསླངས་ན་སྦྱོར་བ་ལས་གྱུར་པའི་ཉེས་བྱས་སོ། །ཐོབ་ན་དངོས་གཞིའོ་ཞེས་བྱ་བ་ནི་རུང་བ་མ་ཡིན་པའི་ཕྱིར་ཏེ། དངོས་གཞི་ནི་ཉེས་བྱས་ལྕི་བ་ཡིན་ནོ། །འདི་སྐད་བསྟན་ཏེ། དངོས་པོ་གང་དང་གང་གི་ཆོས་དང་ལྡན་པའི་དགོས་པ་ཡོད་པ་དེ་དང་དེས་བྲེལ་བ་ཡོད་ན་དགེ་སློང་དེས་སངས་རྒྱས་མཆོད་པ་ལ་སོགས་པའི་དགོས་པས་དངོས་པོ་དེ་ཤིན་ཏུ་མང་པོ་ཡིན་ན་ཡང་བསླང་བར་བྱའོ། །བྲེལ་བ་མེད་ན་རྩྭ་ཙམ་ཡང་བདག་གིར་མི་བྱ་ན། གོས་ལ་སོགས་པ་ལྟ་ཕར་ཞོག་སྟེ། དེ་ནི་ཉེས་བྱས་སྔ་མར་གཏོགས་སོ། །སྦྱིན་པར་བྱ་བ་མི་སྦྱིན་ན་ཡང་ངོ་ཞེས་བྱ་བ་ལ་དངོས་གཞིའོ་ཞེས་བྱ་བའི་རྗེས་བསྙགས་པའི་ཕྱིར་ཡང་ངོ་ཞེས་བྱ་བའི་སྒྲ་སྨོས་སོ། །ལྷག་པ་སྦྱིན་པར་བྱ་བ་ཉིད་དོ་ཞེས་སྨོས་པ་མ་སྦྱིན་ན་དངོས་གཞི་སྟེ་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །དེ་ལྟ་བས་ན་བསླབ་པའི་གཞི་འདི་ལ་ལྷག་པ་འདི་ཉིད་མ་བྱིན་ན་དངོས་གཞི་ཡིན་པར་ཁོང་དུ་ཆུད་པར་བྱའོ། །སློང་བར་རིགས་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སྤགས་པ་སློང་བའི་སྤང་བ་ནི་སློང་བའི་སྤང་བའི་རབ་ཏུ་དབྱེ་བར་གྱུར་པ་ཡིན་པས་དེའི་ཕྱིར་སློང་བའི་སྤང་བའི་སྐབས་སུ་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ནི་ལྟུང་བའི་བྱེད་པ་ཡིན་ནོ་ཞེས་བྱ་བ་ལ་སོགས་པ་སྨོས་པའི་རྣམ་པ་ཁས་བླངས་ནས་དེའི་བྱེ་བྲག་བརྗོད་པར་བྱ་སྟེ། དེའི་ཕྱིར་སྤགས་པ་མ་ཕུལ་བར་ཤེས་པ་ནི་མ་སྤགས་པ་དང་འདྲའོ་ཞེས་བྱ་བ་སྨྲས་ཏེ། མ་ཕུལ་བ་ཞེས་བྱ་བ་ནི་སྦྱིན་བདག་གིས་ལྟུང་བ་འབྱིན་པའི་གང་ཟག་ལ་འདི་ལ་ཆོས་གོས་སྤགས་པ་གང་ཡིན་པ་དེ་སྦྱིན་ནོ་ཞེས་ཆོས་གོས་ཀྱིས་མགྲོན་དུ་མ་གཉེར་བའོ། །ཤེས་པ་ཞེས་བྱ་བ་ནི་དགེ་སློང་དེས་གང་ཡང་རུང་བ་ཞིག་གིས་ཤེས་པའོ། །ཆོས་གོས་སྤགས་པ་དེ་ནི་སློང་བའི་ཕྱིར། མ་སྤགས་
པ་དང་འདྲ་བར་ཤེས་པར་བྱའོ། །འདི་སྐད་བསྟན་ཏེ། ཇི་ལྟར་ཆོས་གོས་མ་སྤགས་པ་མིའི་འགྲོ་བ་པར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པ་ལས་སློང་བ་ན་ཉེས་བྱས་སུ་འགྱུར་ལ་ཐོབ་ན་དངོས་གཞིར་འགྱུར་པ་ཁོ་ན་བཞིན་དུ་སྤགས་བ་ཡང་དེ་དང་འདྲའོ་ཞེས་བྱ་བའི་ཐ་ཚིག་གོ ། སྤགས་པའམ་སྤགས་པ་མི་ཤེས་པར་གྱུར་པ་ནི་སློང་བའི་སྤང་བའི་ཡུལ་ཡིན་ལ། སྤགས་པ་ཞེས་པ་ནི་འདིའི་ཡུལ་ཡིན་ནོ། །དོན་དེ་ཉིད་བསྟན་པའི་ཕྱིར་དེ་ཉིད་གཞན་ཡིན་ནོ་ཞེས་བྱ་བ་སྨྲས་ཏེ། དེ་ཉིད་ཅེས་བྱ་བ་ནི་ཆོས་གོས་སྤགས་པ་ལྟུང་བ་ལ་ཕྱིན་པའི་གང་ཟག་གིས་མི་ཤེས་པའོ། །གཞན་ཡིན་ནོ་ཞེས་བྱ་བ་ནི་མ་སྤགས་པ་ཉིད་ཡིན་པའོ། །འདི་སྐད་བསྟན་ཏེ། འདི་ནི་སློང་བའི་སྤང་བའི་གཞི་ཉིད་ཀྱི་ཁོངས་སུ་གཏོགས་པར་རིག་པར་བྱའོ། །གལ་ཏེ་སྤགས་པ་མི་ཤེས་པ་སློང་བར་བྱེད་ན་ནི་སློང་བའི་སྤང་བའི་ཁོངས་སུ་གཏོགས་པའི་ཉེས་བྱས་ཡིན་པར་རིག་པར་བྱའོ། །ཤེས་ན་ནི་ཐོབ་ན་དེའི་ཚེ་སྤགས་པ་སློང་བའི་སྤང་བའི་ཁོངས་སུ་གཏོགས་པའི་དངོས་གཞི་ཡིན་པར་རིག་པར་བྱའོ། །སྤགས་པ་སློང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།འདི་ལྟར་སོ་སོ་ནས་སྤགས་པ་སློང་བ་འདི་ནི་སྤགས་པ་སློང་བའི་སྤང་བའི་རྣམ་པ་ཡིན་མོད་ཀྱི། འོན་ཀྱང་སྦྱིན་པར་བྱེད་པའི་སྤུངས་ཀྱི་བྱེ་བྲག་ལས་ལྟུང་བ་ཐ་དད་པར་རྣམ་པར་གཞག་པར་བྱ་སྟེ། འདི་ལྟར་ཚེ་དང་ལྡན་པ་ཉེ་དགས་ཁྱིམ་བདག་དང་ཁྱིམ་བདག་གི་ཆུང་མ་ལ་སོ་སོ་ནས་རས་ཡུག་ཆེན་ཡང་དག་པར་སྦྱིན་དུ་གཞུག་པར་བྱས་པའི་ཕྱིར་རོ། །སྤགས་པ་སློང་བར་འདྲ་མོད་ཀྱི་འོན་ཀྱང་བྱེ་བྲག་བརྗོད་པར་བྱ་སྟེ། སྦྱིན་པར་བྱེད་པ་སྦུངས་ཆེ་བ་ཡང་ངོ་ཞེས་བྱ་བ་ནི་སྤགས་པ་མ་ཕུལ་བར་ཤེས་པ་ནི་མ་སྤགས་པ་དང་འདྲའོ་ཞེས་བྱ་བ་དང་དེ་ཉིད་གཞན་ཡིན་ནོ་ཞེས་བྱ་བ་དེ་དག་ཐམས་ཅད་ཀྱི་རྗེས་སུ་སྦྱར་རོ། །སྦྱིན་པར་བྱེད་པ་སྦུངས་ཆེ་བ་ཞེས་བྱ་བ་ནི་ཚམ་ཚོམ་མེད་པའོ། །ཡང་ངོ་ཞེས་བྱ་བའི་སྒྲས་ནི་སྔར་བསྟན་པའི་རྣམ་པས་སོ་སོ་བའི་སྤང་བ་རྣམ་པར་འཇོག་པར་བྱེད་དོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། སྦྱིན་པར་བྱེད་པ་སྦུངས་ཆེ་བ་མིའི་འགྲོ་བར་གཏོགས་པ་ཁྱིམ་པར་གྱུར་པ་སྲོག་དང་ལྡན་པ་ཉེ་དུ་མ་ཡིན་པས་ཆོས་གོས་སྤགས་པ་གང་ཟག་ལམ་ཕུལ་བར་ཤེས་པ་སློང་
པར་བྱེད་ན་ནི་ཉེས་བྱས་སོ། །ཐོབ་ན་ནི་སོ་སོ་ནས་སྤགས་པ་སློང་བའི་སྤང་བའི་ལྟུང་བྱེད་དོ། །སྤགས་པར་མི་ཤས་པ་སློང་བར་བྱེད་ན་ནི་སློང་བའི་སྤང་བར་འགྱུར་རོ། །སྦྱོར་བ་གཅིག་བའི་ཕྱིར་ཐོབ་ན་གཅིག་ཉིད་དོ་ཞེས་བྱ་བ་ནི། སྦྱོར་བ་གཅིག་པ་ནི་སྦྱོར་བ་གཅིག་པ་སྟེ། སྦྱོར་བ་གཅིག་པའི་ཕྱིར་ཐོབ་ན་རྫས་དུ་མ་ཉིད་ཡིན་དུ་ཟིན་ཀྱང་གཅིག་པ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་སྦྱོར་བ་གཅིག་གིས་ཆོས་གོས་སོ་སོ་བ་ཞིག་ཐོབ་ན་དེ་ལྟ་ན་ཡང་ལྟུང་བ་གཅིག་ཁོ་ནར་འགྱུར་རོ། །དེ་ལྟར་གྱུར་ན་ལེན་པ་དང་སློང་བ་དང་སློང་བར་རིགས་པ་དང་སྤགས་པ་སློང་བ་དང་སོ་སོ་ནས་སྤགས་པ་སློང་བའི་སྤང་བ་དག་ལ་སྦྱོར་བ་གཅིག་གིས་གོས་དུ་མ་ཐོབ་པ་དེ་དག་ལ་ལྟུང་བ་གཅིག་ཁོ་ནར་འགྱུར་རོ། །དགེ་སློང་མ་འམ་ཉེ་དུ་མ་ཡིན་པ་ལ་གོས་དུ་མ་སྦྱིན་པ་དང་ལྷུང་བཟེད་དང་དབྱར་གྱི་རས་ཆེན་ཐོབ་པ་ལ་ཡང་སྦྱོར་བ་གཅིག་ཉིད་ཡིན་ན་འབྲས་བུ་དུ་མ་ཉིད་ཡིན་དུ་ཟིན་ཀྱང་ལྟུང་བ་གཅིག་ཁོ་ནར་འགྱུར་རོ། །སོ་སོ་ནས་སྤགས་པ་སློང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བསྐུལ་བའི་སྤང་བར་འགྱུར་ཞེ་ན། དེའི་ཕྱིར་བསྐུལ་བ་རུང་བ་མ་ཡིན་པ་ཆོས་གོས་ཀྱི་རིན་སྤངས་ནས་ཡོངས་སུ་དྲི་བ་སྔོན་དུ་བཏང་ཞིང་བསྟན་ཏེ་བསྒོ་ཞིང་སྨྲས་པ་བྱུང་བའི་མཐའ་རྗེས་སུ་བརྗོད་པ་སྔར་བྱས་པའི་ཞལ་ཏ་བྱེད་པ་ལ་བསྐུལ་པར་གྱུར་ནའོ་ཞེས་བྱ་བ་སྨྲས་ཏེ། བསྐུལ་བ་ཞེས་བྱ་བ་ནི་ཡོན་བདག་གིས་སོ། །རུང་བ་མ་ཡིན་པ་ཞེས་བྱ་བ་ནི་གསེར་ལ་སོགས་པ་དབྱིག་གོ །ཆོས་གོས་ཀྱི་རིན་ཞེས་བྱ་བ་ནི། གསེར་ལ་སོགས་པ་གང་གིས་ཆོས་གོས་ཉོ་བར་བྱེད་པའོ། །སྤངས་ནས་ཞེས་བྱ་བ་ནི། ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ། བདག་ཅག་གོས་སུ་རུང་བ་དུས་སུ་རྙེད་ན་ནི་ལེན་ཏོ་ཞེས་བྱ་བས་སྤངས་ནས་སོ། །ཡོངས་སུ་དྲི་བ་སྔོན་དུ་བཏང་ཞིང་ཞེས་བྱ་བ་ནི། གལ་ཏེ་ཕོ་ཉ་དེ་དགེ་སློང་དེ་ལ་འདི་སྐད་ཅེས་འཕགས་པ་རྣམས་ཀྱི་ཞལ་ཏ་བགྱིད་པ་འཕགས་པ་རྣམས་ཀྱི་ཞལ་ཏ་ཉམས་སུ་ལེན་པ་གང་ལགས་པ་འགའ་མཆིས་སམ་ཞེས་འདྲི་བར་བྱེད་པ་སྟེ། ཞལ་ཏ་བྱེད་པའི་ཡུལ་གང་ལ་ཡོངས་སུ་དྲི་བ་སྔར་བྱས་པ་གང་ཡིན་པ་དེ་ནི་ཡོངས་སུ་དྲི་བ་སྔོན་དུ་བཏང་བ་སྟེ།
ཡོངས་སུ་དྲི་བ་སྔོན་དུ་བཏང་བའི་ཞལ་ཏ་བྱེད་པ་དེ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །ཁྱད་པར་ཅི་ལྟ་བུ་ཞིག་ལ་ཞེ་ན། དེའི་ཕྱིར་བསྟན་ཏེ་ཞེས་བྱ་བ་སྨྲས་ཏེ། སྤོང་བར་བྱེད་པའི་དགེ་སློང་གི་ཕོ་ཉ་འདི་ནི་དགེ་སློང་རྣམས་ཀྱི་ཞལ་ཏ་བྱེད་པ་སྟེ། འདི་ནི་དགེ་སློང་རྣམས་ཀྱི་ཞལ་ཏ་ཉམས་སུ་ལེན་པའོ་ཞེས་ཀུན་དགའ་ར་བའམ་དགེ་བསྙེན་ཞལ་ཏ་བྱེད་པ་ལ་བསྟན་པར་བྱའོ་ཞེས་བྱ་བས་བསྟན་ཅིང་སྨྲས་པ་ཡིན་པར་ཤུགས་ཀྱིས་ཁོང་དུ་ཆུད་པར་བྱའོ། །བསྒོ་ཞིང་ཞེས་བྱ་བ་ནི། དེ་ནས་ཕོ་ཉ་དེས་གོས་ཀྱི་རིན་དེ་དག་ཁྱེར་ནས་ཞལ་ཏ་བྱེད་པ་ག་ལ་བ་དེར་འགྲོ་བར་བྱ་ཞིང་ཕྱིན་ནས་ཞལ་ཏ་བྱེད་པ་དེ་ལ་འདི་སྐད་ཅེས་ཚེ་དང་ལྡན་པ་ཞལ་ཏ་བྱེད་པ་ཤེས་པར་གྱིས་ཤིག །ཁྱོད་ཀྱི་གོས་ཀྱི་རིན་འདི་དག་གིས་གོས་འདི་དང་འདི་ལྟ་བུ་ཅན་ཞིག་ཉོས་ལ་དགེ་སློང་མིང་འདི་ཞེས་བྱ་བ་འོངས་པ་དང་དེ་ལ་གོས་རུང་བ་དུས་སུ་བསྐོན་ཅིག་ཅེས་བྱ་བས་གལ་ཏེ་ཕོ་ཉས་ཞལ་ཏ་བྱེད་པ་དེ་ལ་བསྒོ་བ་སྟེ། བསྒོ་བའི་ཞལ་ཏ་བྱེད་པ་དེ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །སྨྲས་པ་ཞེས་བྱ་བ་ནི། དེ་ནས་ཕོ་ཉ་དེས་ཞལ་ཏ་བྱེད་པ་དེ་ལ་ཤིན་ཏུ་ལེགས་པར་ཡང་དག་པར་བསྒོ་ཞིང་ཡང་དག་པར་བསྟན་ནས་དགེ་སློང་དེ་ག་ལ་བ་དེར་འགྲོ་བར་བྱ་ཞིང་ཕྱིན་ནས་ཞེས་བྱ་བ་ལ་སོགས་པས་གལ་ཏེ་ཕོ་ཉ་དེས་དགེ་སློང་དེ་ལ་སྨྲས་པ་དང་སྦྱར་རོ། །ཇི་སྐད་སྨྲས་ཤེ་ན། དེའི་ཕྱིར་བྱུང་བའི་མཐའ་རྗེས་སུ་བརྗོད་ཏ་བྱེད་པ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། སྐད་ཅེས་འཕགས་པས་ཞལ་ཏ་བགྱིད་པ་བསྟན་པ་གང་ལགས་པ་དེ་ལ་བདག་གིས་ཡང་དག་པར་བསྟན་པར་བགྱི་ལགས་ཀྱིས་དེའི་གན་དུ་བཞུད་ཅིག་དང་དེས་ཁྱོད་ལ་གོས་རུང་བ་དུས་སུ་བསྐོན་པར་འགྱུར་རོ་ཞེས་བྱ་བ་སྨྲས་སོ། །དེ་ལྟ་བུའི་ཁྱད་པར་ཅན་གྱི་ཞལ་ཏ་བྱེད་པ་ལ་བསྐུལ་བར་གྱུར་ནའོ་ཞེས་བྱ་བར་སྦྱར་རོ། །བསྐུལ་བར་གྱུར་ནའོ་ཞེས་བྱ་བ་ནི། དགེ་སློང་གིས་ཞལ་ཏ་བྱེད་པ་ལ་བསྐུལ་བར་གྱུར་ན་སྟེ། དགེ་སློང་གོས་འདོད་པས་ཞལ་ཏ་བྱེད་པའི་གན་དུ་སོང་ལ། ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ། །ཚེ་དང་ལྡན་པ་ཞལ་ཏ་བྱེད་པ་བདག་གོས་འདོད་དོ་ཞེས་ལན་གཉིས་ལན་གསུམ་དུ་བསྐུལ་བར་བྱ་ཞེས་བྱ་བ་ལ་སོགས་པས་སོ། །གལ་ཏེ་སྐུལ་བར་བྱེད་པས་བསྐུར་བར་བྱ་བ་ལ་བསྐུལ་བ་ན་དེས་
ཀྱང་བརྡ་མ་ཕྲད་ན་དེ་བསྐུལ་བ་ཉིད་མ་ཡིན་པར་བསྟན་པའི་ཕྱིར། འགྲོ་བ་མ་ནུས་པ་ཉིད་ན་བསྐུལ་བ་ཉིད་མ་ཡིན་ནོ་ཞེས་བྱ་བ་སྨྲས་ཏེ། འགྲོ་བ་ཞེས་བྱ་བ་ནི་གོ་བར་བྱ་ན་ཁོང་དུ་ཆུད་པར་བྱ་བ་ཡུལ་དུ་གྱུར་པའོ། །མ་ནུས་པའི་དངོས་པོ་ནི་མ་ནུས་པ་ཉིད་དེ་འགྲོ་བ་དེ་གོ་བར་བྱེད་མ་ནུས་པ་ཉིད་ན་བསྐུལ་བར་བྱ་བ་བསྐུལ་བ་ཉིད་མ་ཡིན་ནོ། །འདི་སྐད་བསྟན་ཏེ། བརྟད་པར་སྨྲས་པ་འམ། གཉིད་ལོག་པའམ། ར་རོ་བ་འམ། བྲེལ་བ་ཉིད་དམ། འོན་པ་ཉིད་དམ། ནད་ཀྱིས་བཏབ་པའམ། གཞན་གྱི་དབང་དུ་གྱུར་པ་ལ་སོགས་པའི་རྐྱེན་དག་གིས་གལ་ཏེ་ལེགས་པར་བརྡ་ཕྲད་པར་མ་ནུས་ན་དེའི་ཚེ་བསྐུལ་བ་ཉིད་མ་ཡིན་ནོ། །འགྲོ་བ་མ་གོ་བས་བསྐུལ་བ་ཉིད་མ་ཡིན་པ་འབའ་ཞིག་ཏུ་མ་ཟད་ཀྱི། དེ་དང་འབྲེལ་བའི་ཚིག་དད་དོན་དང་བརྡ་དང་བྱ་བ་གཞན་གང་ཡིན་པ་ཐམས་ཅད་ཀྱི་འགྲོ་བ་མ་ནུས་ན་ཡང་དེ་མ་བྱས་པ་ཁོ་ན་ཡིན་ནོ། །བཅོམ་ལྡན་འདས་ཀྱིས་བསྐུལ་བའི་སྒོ་དྲུག་པོ་གང་དག་གསུངས་པ་དེ་དག་ཀྱང་བགྲོས་ན་བསྐུལ་བ་དག་ཡིན་གྱི། མ་བགྲོས་ན་ནི་མ་ཡིན་ཏེ། འདི་ལྟ་སྟེ་མངོན་པར་སྨྲ་བ་དང༌། ལེགས་པར་སྦྱོར་བ་དང༌། ཟན་སྐོམ་དག་གི་དབང་དུ་བྱས་ནས་རེ་རེ་ལ་ཡང་གཉིས་གཉིས་ཏེ་དྲུག་ཏུ་འགྱུར་རོ། །དེ་ལ་མངོན་པར་སྨྲ་བ་ནི་ཁྱོད་འོངས་སམ་ཞེས་ཟེར་བ་ལ། དེའི་ཕྱིར་རོ་ཞེས་ཟེར་བ་དང༌། ལེགས་པར་འོངས་སམ་ཞེས་ཟེར་བ་ལ་དེའི་ཕྱིར་རོ་ཞེས་ཟེར་བའོ། །ལེགས་པར་སྦྱོར་བ་ནི་སྟན་འདི་ལ་འདུག་ཤིག་ཅེས་ཟེར་བ་ལ། དེའི་ཕྱིར་རོ་ཞེས་ཟེར་བ་དང༌། རྐང་བ་ཁྲུས་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བ་ལ། ཟན་སྐོམ་གྱི་དབང་དུ་བྱས་པ་ནི། ཟན་ཟོ་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བ་དང༌། སྐོམ་འཐུང་ཤིག་ཅེས་ཟེར་བ་ལ་དེའི་ཕྱིར་རོ་ཞེས་ཟེར་བའོ། །དེ་དག་ཐམས་ཅད་ཀྱང་སོ་སོར་དབྱེ་བར་བྱ་སྟེ་སྦྱོར་བ་གཅིག་གིས་བྱས་ན་ནི་དྲུག་པོ་ཐམས་ཅད་ཀྱང་བསྐུལ་བའི་སྒོ་གཅིག་ཁོ་ནར་འགྱུར་བས་དེའི་ཕྱིར་སོ་སོར་དབྱེ་བར་བྱའོ། །མ་གྲུབ་ན་ལན་གཉིས་སུ་ཡང་ངོ་ཞེས་བྱ་བ་ནི། བསྐུལ་བ་དང་པོ་དེས་གོས་ཐོག་མར་མ་གྲུབ་ན་ལན་གཉིས་སུ་ཡང་བསྐུལ་བར་བྱའོ། །ལན་གསུམ་དུ་ཡང་ངོ་ཞེས་བྱ་བ་ནི་ལན་གཉིས་སུ་བསྐུལ་བ་དེས་ཀྱང་མ་གྲུབ་ན་ལན་གསུམ་དུ་
ཡང་བསྐུལ་བར་བྱ་བའོ། །དེའི་འོག་ཏུ་ལན་གསུམ་གྱི་བར་དུ་ཕྱོགས་སུ་བསྡད་པར་བྱའོ་ཞེས་བྱ་བ་ནི། ལན་གསུམ་བསྐུལ་བས་གོས་ཀྱི་རྙེད་པ་མ་གྲུབ་ན་དེའི་འོག་ཏུ་དགེ་སློང་དེས་ལན་གསུམ་གྱི་བར་དུ་ནོར་སྦྱིན་པའི་ཞལ་ཏ་བྱེད་པ་དེ་གནས་གང་ན་འདུག་པའི་ཕྱོགས་སུ་མཚན་མའི་དངོས་པོ་ཙམ་གྱིས་ཅང་མི་སྨྲ་བར་བསྡད་པར་བྱའོ། །འོ་ན་རྣམ་པར་འབྱེད་པ་ལས་ལན་བཞི་འམ་ལན་ལྔ་འམ་དྲུག་གི་བར་དུ་ཅང་མི་སྨྲ་བར་ཕྱོགས་སུ་བསྡད་པར་བྱའོ་ཞེས་གསུངས་ལ། འདིར་ཇི་ལྟར་ལན་གསུམ་གྱི་བར་དུ་ཕྱོགས་སུ་བསྡད་པར་བྱ་ཞེས་བཤད་ཅེ་ན། རྣམ་པར་འབྱེད་པ་ལས་ནི་བསྐུལ་བ་གཅིག་གམ་གཉིས་སམ་གསུམ་དང་བཅས་པའི་གྲངས་ཀྱིས་གྲངས་དེ་སྐད་གསུངས་ཀྱི། ཕྱོགས་སུ་བསྡད་པ་འབའ་ཞིག་ཏུ་དེ་སྐད་གསུངས་པ་ནི་མ་ཡིན་ནོ། །འདིར་ནི་གནས་གྲགས་པ་གང་ན་ཀུན་ནས་སྡོད་པ་དེ་ཡིན་པར་རིག་པར་བྱའོ། །མ་གྲུབ་ན་སྦྱིན་པར་བྱེད་པ་ལ་བསྒྲག་པར་བྱའོ་ཞེས་བྱ་བ་ནི། ཇི་སྐད་བསྟན་པའི་རྣམ་པ་དེ་དག་གིས་གོས་ཀྱི་རྙེད་པ་མ་གྲུབ་ཅིང་རེ་བ་མེད་པར་གྱུར་ན་སྦྱིན་པར་བྱེད་པའི་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས་ཁྱོད་ཉིད་ཤེས་པར་གྱིས་ཤིག་ཅེས་བསྒྲག་པར་བྱ་བའོ། །དེ་ལྟར་སྤངས་པར་གྱུར་ཟིན་པ་ན་འབུལ་བར་བྱེད་ན་སྤངས་པ་སྨྲས་ཏེ་སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་ལེན་པ་ལས་བླང་བར་བྱའོ་ཞེས་བྱ་བ་ལ། དེ་ལྟར་ཞེས་བྱ་བ་ནི། སྔར་བསྟན་པའི་རིམ་པ་ལྟར་རོ། །སྤངས་པར་གྱུར་ཞེས་བྱ་བ་ནི་བཏང་བར་གྱུར་པའོ། །ཟིན་པ་ན་ཞེས་བྱ་བ་ནི། དེ་ལྟར་སྤངས་པར་གྱུར་པའི་མཐར་ཐུག་པར་གྱུར་ཟིན་པ་ནའོ། །འབུལ་བར་བྱེད་ན་ཞེས་བྱ་བ་ནི། ཞལ་ཏ་བྱེད་པས་དེའི་འོག་ཏུ་ཕྱིས་དགེ་སློང་དེ་ལ་གོས་འབུལ་བར་བྱེད་ན་སྟེ། འབུལ་བར་བྱེད་ན་དེ་ལས་དགེ་སློང་གིས་གོས་བླང་བར་བྱའོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཅན་ཞིག་ལས་ཤེ་ན། དེའི་ཕྱིར་སྤངས་པ་སྨྲས་ཏེ་ཞེས་བྱ་བ་སྨྲས་ཏེ། དགེ་སློང་དེས་ཞལ་ཏ་བྱེད་པ་ལ་ཁོ་བོས་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས། ཁྱོད་ཉིད་ཤེས་པར་གྱིས་ཤིག་ཅེས་བསྒྲགས་ཟིན་ཏོ་ཞེས་སྨྲས་པ་སྟེ། དེ་སྐད་གང་ལ་སྨྲས་པའི་ཞལ་ཏ་བྱེད་པ་དེ་ལས་སོ། །གཞན་ཡང་
སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་ལེན་པ་ལ་སྟེ། སྦྱིན་པར་བྱེད་པའི་སེམས་ནི་སྦྱིན་བདག་གི་སེམས་སོ། །དེ་བསྡུ་བར་རྗེས་སུ་བསྒྲུབ་པ་ཁས་ལེན་པ་ནི་ཞལ་ཏ་བྱེད་པ་གང་གིས་སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་དགེ་སློང་ལ་ཁས་ལེན་པ་སྟེ། དེ་ལས་དགེ་སློང་དེས་གོས་དེ་བླང་བར་བྱའོ། །འདི་སྐད་བསྟན་ཏེ། དགེ་སློང་གིས་སྔར་ཇི་སྐད་བསྟན་པའི་རྣམ་པ་དེ་དག་གིས་ཞལ་ཏ་བྱེད་པ་ལས་གོས་ཀྱི་རྙེད་པ་མ་གྲུབ་ཅིང་རེ་བ་མེད་པར་གྱུར་ནས་སྦྱིན་པར་བྱེད་པའི་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས་ཁྱོད་ཉིད་ཤེས་པར་གྱིས་ཤིག་ཅེས་བསྒྲགས་ཤིང་སྤངས་པར་གྱུར་ཟིན་པའི་འོག་ཏུ་ཕྱིས་ཞལ་ཏ་བྱེད་པས་དགེ་སློང་ལ་གོས་འབུལ་བར་བྱེད་ན། དེའི་ཚེ་དགེ་སློང་དེས་ཞལ་ཏ་བྱེད་པ་ལ་འདི་སྐད་ཅེས་ཁོ་བོས་སྦྱིན་བདག་ལ་ཞལ་ཏ་བྱེད་པས་བདག་ལ་ཅི་ཡང་མ་བྱིན་གྱིས་ཁྱོད་ཉིད་ཤེས་པར་གྱིས་ཤིག་ཅེས་གོས་སྤངས་པ་སྨྲས་ཟིན་ཏོ་ཞེས་རྗེས་སུ་བསྒྲག་པར་བྱའོ། །དེ་ལྟར་གོས་སྤངས་པ་ཤེས་པར་བྱས་ཀྱང་གལ་ཏེ་ཞལ་ཏ་བྱེད་པ་དེ་འདི་སྐད་ཅེས་འཕགས་པས་བདག་ལ་གོས་འདི་ལོང་ཤིག་དང༌། བདག་གིས་སྦྱིན་བདག་གི་སེམས་བསྡུ་བར་བྱའོ་ཞེས་ཁས་ལེན་པར་བྱེད་ན། དེའི་ཚེ་དགེ་སློང་དེས་ཞལ་ཏ་བྱེད་པ་དེ་ལས་གོས་དེ་བླང་བར་བྱའོ། །ཇི་ལྟར་བསྐུལ་བ་ལ་སོགས་པའི་བྱ་བ་བསྟན་ནས། ད་ནི་ལེན་པའི་སྔོན་རོལ་དུ་ཅི་ཞིག་རྗེས་སུ་སྒྲུབ་པར་བྱེད་ན་བསྐུལ་བའི་སྤང་བར་འབྱུང་བ་བསྟན་པའི་ཕྱིར། བསྐུལ་བ་དང་སྡུད་པ་ལྷག་གམ་ཁས་མ་བླངས་ནའོ་ཞེས་བྱ་བ་སྨས་ཏེ། བསྐུལ་བ་ལྷག་པ་ཞེས་བྱ་བ་ནི་ལན་གསུམ་ལས་ལྷག་པར་བསྐུལ་ནའོ། །བསྡད་པ་ལྷག་པ་ཞེས་བྱ་བ་ཡང་དེ་བཞིན་དུ་ལན་གསུམ་ལས་ལྷག་པར་ཕྱོགས་སུ་བསྡད་ནའོ། །ཁས་མ་བླངས་ནའོ་ཞེས་བྱ་བ་ནི་སྤངས་པར་གྱུར་པ་ན་སྦྱིན་པར་བྱེད་པའི་སེམས་བསྡུ་བར་རྗེས་སུ་བསྒྲུབ་པ་ཁས་མ་བླངས་ནའོ། །བསྐུལ་བའི་སྒོ་དྲུག་པོ་གང་དག་གསུངས་པ་དེ་དག་ལས་གསུམ་ནི་ཚིག་གི་བདག་ཉིད་དོ། །གསུམ་ནི་ཕྱོགས་སུ་སྡོད་པའི་བདག་ཉིད་དེ་དེ་དག་ལ་གོ་རིམས་ནི་མེད་དོ། །གལ་ཏེ་སྔར་ཕྱོགས་ན་སྡོད་པར་བྱེད་ལ་ཕྱིས་སྐུལ་
བར་བྱེད་ན་དེ་ལྟན་ཡང་ཉེས་པ་མེད་དོ། །དེ་བཞིན་དུ་གལ་ཏེ་བསྐུལ་བ་གཉིས་བྱེད་ཅིང་སྡོད་པ་བཞི་བྱེད་ན་ཡང་དེ་ལྟ་ན་ཡང་ཉེས་པ་མེད་དེ། སྡོད་པའི་གནས་སྐབས་དམན་པའི་ཕྱིར་རོ། །དེ་ལས་བཟློག་པ་ནི་མི་བྱའོ། །ལེན་བའི་སྔོན་རོལ་གྱི་ཆར་གྱུར་པའི་རྗེས་སུ་བསྒྲུབ་པ་བསྟན་ནས། ད་ནི་དུས་སུ་གཏོགས་པའི་རྗེས་སུ་བསྒྲུབ་པ་བརྗོད་པར་བྱ་སྟེ། ཅི་ཞིག་བྱས་ན་སྤང་བར་འགྱུར་ཞེ་ན། དེའི་ཕྱིར་བླངས་ནའོ་ཞེས་བྱ་བ་སྨྲས་ཏེ། གོས་ཞེས་བྱ་བའི་ཐ་ཚིག་གོ །སྦྱིན་པར་བྱེད་པ་དང་ཕོ་ཉ་དང༌། ཞལ་ཏ་བྱེད་པ་དག་ཅི་ལྟ་བུ་ཞིག་ཡིན་ཞེ་ན། དེའི་ཕྱིར་གསུམ་ཆར་མི་ཉིད་དང་ཁྱིམ་པ་ཉིད་ཡིན་ནའོ་ཞེས་བྱ་བ་སྨྲས་ཏེ། སྦྱིན་བར་བྱེད་པ་དང་ཕོ་ཉ་དང༌། ཞལ་ཏ་བྱེད་པ་ཞེས་བྱ་བ་གསུམ་ཆར་མི་ཉིད་དང་ཁྱིམ་པ་ཉིད་ཡིན་ནའོ། །འདི་སྐད་བསྟན་ཏེ། གལ་ཏེ་སྦྱིན་པར་བྱེད་པ་དང་ཕོ་ཉ་དང༌། ཞལ་ཏ་བྱེད་པ་དག་མིའི་འགྲོ་བར་གཏོགས་པ་དང༌། ཁྱིམ་པ་ཡང་ཡིན་ལ། སྔར་བསྟན་པའི་འགལ་བ་བྱེད་པ་ཐམས་ཅད་ཀྱང་ཡོད་ཅིང༌། ཞལ་ཏ་བྱེད་པ་ལས་གོས་ཀྱང་བླངས་པར་གྱུར་ན་སྤང་བ་ཞེས་བྱ་བའི་ཁ་ནམ་ཐོ་བ་ཡོངས་སུ་རྫོགས་པར་འགྱུར་རོ། །གཞན་དུ་ན་ནི་འགལ་ན་ཡང་ཉེས་བྱས་སུ་འགྱུར་རོ། །འདིར་གཞུང་ནི་མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མིའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མིའི་ཕོ་ཉ་དང་མི་མ་ཡིན་པས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་པར་བྱེད་ཅིང་མི་མ་ཡིན་པའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མི་མ་ཡིན་པས་སྦྱིན་པར་བྱེད་ཅིང་མིའི་ཕོ་ཉ་དང་མིས་རུང་བར་བྱེད་ན་ཡང་ཉེས་བྱས་སུ་འགྱུར་རོ། །མིས་སྦྱིན་བར་བྱེད་ཅིང་མིའི་ཕོ་ཉ་དང་མིས་རུང་བར་བྱེད་ན་ནི་སྤང་བའི་ལྟུང་བྱེད་དུ་འགྱུར་ཏེ། བསྡུ་བའི་ཚིགས་སུ་བཅད་པ་ནི། མི་མ་ཡིན་པ་གསུམ་གཅིག་དང༌། །
གཉིས་པ་གསུམ་དུ་བྱས་པ་ཡིན། །མི་ཡིས་གཉིས་པ་གསུམ་དག་དང༌། །གསུམ་གཅིག་དེ་དག་མུ་བརྒྱད་དོ། །ཞེས་བྱ་བ་གསུངས་པ་ཡིན་ནོ། །མ་སྨྲས་ན་ཉེས་བྱས་སོ་ཞེས་བྱ་བ་ནི། གལ་ཏེ་ཕོ་ཉས་བྱུང་བའི་མཐའ་རྗེས་སུ་བརྗོད་པ་སྔར་བྱས་པ་མ་སྨྲས་པར་དགེ་སློང་གི་ས་ཞལ་ཏ་བྱེད་པ་ལ་སྐུལ་བར་བྱེད་ན་དེ་ལས་ཉེས་བྱས་སུ་འགྱུར་རོ། །མ་སྤངས་པ་ལའོ་ཞེས་བྱ་བ་ནི། རུང་བ་མ་ཡིན་པ་དབྱིག་ལ་སོགས་པ་ཆོས་གོས་ཀྱི་རིན་དགེ་སློང་དེས་ཕོ་ཉ་དེ་ལ་འདི་སྐད་ཅེས་ཚེ་དང་ལྡན་པ་ཕོ་ཉ་དགེ་སློང་དག་ནི་གོས་ཀྱི་རིན་དག་ལེན་དུ་མི་རུང་སྟེ་ཞེས་བྱ་བ་ལ་སོགས་པའི་ཚིག་གིས་མ་སྤངས་པར་ལེན་ན་ཉེས་བྱས་སོ། །བསྐུལ་བ་བྱས་པ་དང༌། ཕྱོགས་སུ་བསྡད་པ་བྱས་པས་སྤང་བ་བྱས་པ་ན་ཞལ་ཏ་བྱེད་པས་གོས་སྦྱིན་པར་བྱེད་པ་ན་ཁོ་བོས་འདི་ཡོངས་སུ་སྤངས་ཀྱིས་སོང་ལ་སྦྱིན་བདག་ཉིད་ལ་ཕྱིར་བྱིན་ཅིག་ཅེས་དེ་སྐད་དུ་སྤོང་བར་མི་བྱེད་པར་ལེན་ན་ཡང་ཉེས་བྱས་ཁོ་ནའོ། །འདིར་ཁ་ཅིག་འདི་སྐད་ཅེས་ཟེར་ཏེ། གོས་ཀྱི་རིན་གསེར་ལ་སོགས་པ་རུང་བར་མ་བྱས་པ་དག་ནི་རིགས་པ་འདི་ཉིད་ཀྱིས་ཉེ་བར་སྦྱར་བར་བྱའོ། །གོས་ཀྱི་རིན་གསེར་ལ་སོགས་པ་རུང་བར་བྱས་པ་དག་ནི་བླངས་ཀྱང་ཉེས་པ་མེད་དེ་དེ་སྐད་དུ་ཡང་བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་བརྟན་ཏེ་བཅད་བར་བྱའོ་ཞེས་གསུངས་པ་ཡིན་ནོ་ཞེས་ཟེར་རོ། །ཁོ་བོ་ནི་འདི་སྐད་ཟེར་ཏེ། གལ་ཏེ་སྦྱིན་བདག་གིས་གོས་ཀྱི་རིན་གྱི་བསམ་པས་སྦྱིན་པར་བྱེད་ཅིང༌། དགེ་སློང་ལ་ཡང་གོས་ཀྱི་དགོས་པ་ཡོད་ན་དེའི་ཚེ་གོས་ཀྱི་རིན་སྔར་བསྟན་པའི་རིམ་པ་འདི་ཉིད་ཀྱིས་ཉེ་བར་སྦྱར་བར་བྱའོ། །ཇི་སྟེ་སྤྱིའི་བསམ་པས་སྦྱིན་པར་བྱེད་ཅིང༌། དགེ་སློང་ལ་ཡང་སངས་རྒྱས་མཆོད་པ་ལ་སོགས་པ་དང་དགེ་འདུན་མཆོད་སྟོན་གསོལ་བ་ལ་སོགས་པ་དག་ལ་དགོས་པ་ཡོད་ན་བཅོམ་ལྡན་འདས་ཀྱིས་གསུངས་པའི་རུང་བ་བྱས་ནས་བདག་གིར་བྱའོ། །མ་དྲིས་པར་སྟོན་ན་ཡང་ངོ་ཞེས་བྱ་བ་ནི། དགེ་སློང་ལ་ཕོ་ཉས་མ་དྲིས་པར་ཞལ་ཏ་བྱེད་པ་སྟོན་ན་ཉེས་བྱས་སོ། །འདི་སྐད་བསྟན་ཏེ། ཕོ་ཉ་དེས་དགེ་སློང་དེ་ལ་འདི་སྐད་ཅེས་འཕགས་པ་རྣམས་ཀྱི་ཞལ་ཏ་བགྱིད་པ་འཕགས་པ་རྣམས་ཀྱི་
ཞལ་ཏ་ཉམས་སུ་ལེན་པ་གང་ལགས་པ་འགའ་ཞིག་མཆིས་སམ་ཞེས་མ་དྲིས་པ་ཁོ་ནར་དགེ་སློང་གིས་ཕོ་ཉ་ལ་ཞལ་ཏ་བྱེད་པ་སྟོན་པར་བྱེད་ན་དེ་ལ་ཡང་ཉེས་བྱས་ཁོ་ནར་འགྱུར་བའོ། །རེ་བ་མེད་པ་ཉིད་ན་མ་སྦྲན་ན་ཡང་ངོ་ཞེས་བྱ་བ་ནི། ཞལ་ཏ་བྱེད་པའི་ལག་ནས་གོས་འཐོབ་པའི་ཕྱིར་རེ་བ་མེད་པ་ཉིད་ན་སྦྱིན་པར་བྱེད་པ་ལ་མ་སྦྲན་ན་ཡང་ཉེས་བྱས་སུ་འགྱུར་བའོ། །བསྐུལ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།སྲིན་བལ་གྱི་སྟན་གྱི་སྤང་བ་བརྗོད་པར་འདོད་ནས། སྟན་བཅང་བར་བྱའོ་ཞེས་བྱ་བ་སྨྲས་ཏེ། སྟན་ནི་རྣམ་པ་གཉིས་ཏེ། ནང་ཚངས་ཅན་དང་བླིངས་པའོ། །དེ་གཉིས་ཀྱི་མིང་གི་རྣམ་གྲངས་ནི་རས་བལ་ཅན་དང་དབྱམ་པོ་ཞེས་ཀྱང་བྱའོ། །སྤྱིར་སྟན་ཞེས་སྨོས་པ་འདིས་གཉི་ག་ཡང་བཟུང་བ་ཉིད་ཡིན་ནོ། །ནང་ཚངས་ཅན་ཞེས་བྱ་བའི་ཚིག་གིས་ཕྱི་ཤུན་གྱི་རྫས་ཀྱང་སྟན་ཉིད་ཀྱི་ཁོངས་སུ་གཏོགས་པ་ཉིད་ཡིན་ཏེ། དེའི་ཕྱིར་སྟན་དེ་ཉིད་ཕྱི་ཤུན་གྱི་རྫས་འཆད་བ་ལ་ནི་སྤང་བ་ཉིད་དུ་མི་འགྱུར་རོ། །གདིང་བ་ནི་སྟན་མ་ཡིན་ཏེ། འདི་ལྟར་གདིང་བ་ནི་གོས་ཀྱི་ངོ་བོ་ཉིད་ཡིན་ཏེ། ཆིག་རྐྱང་དང་སྦྱར་མ་ཞེས་བྱ་བ་ལ་སོགས་པར་བརྗོད་པའི་ཕྱིར་རོ། །སྟན་ནི་ནང་ཚངས་ཅན་དང་བླིངས་པའི་ངོ་བོ་ཉིད་ཡིན་ནོ། །དགོས་པ་ཐ་དད་པའི་ཡང་ཕྱིར་ཏེ་སྟན་ནི་གྲང་པའི་གཉེན་པོ་ཡིན་ཏེ། འདི་ལྟར་འཕྲོག་ཕྱོགས་དག་ཏུ་གྲང་བས་གནོད་པར་གྱུར་པ་དག་གི་དབང་དུ་མཛད་ནས་སྟན་རྗེས་སུ་གནང་བ་ཡིན་ལ། གདིང་བ་ནི་མལ་སྟན་གཡོགས་པའི་ཕྱིར་དང༌། ཀུན་དུ་བསྲུང་བའི་ཕྱིར་གནང་བ་ཡིན་ཏེ། དེ་ལྟ་བས་ན་གདིང་བ་ལས་སྟན་ཐ་དད་པ་ཡིན་པར་རིག་པར་བྱའོ། །རྣམ་པར་འབྱེད་པ་ལས་ཀྱང་གདིང་བ་ནི་སོ་སོར་གདིང་བ་ཞེས་རྒྱ་ཆེར་གསུངས་སོ། །མདོ་སྡེ་ལས་ཀྱང་གདིང་བ་ཕྲག་པས་བླངས་ནས་ཞེས་འབྱུང་སྟེ། ལམ་དུ་འགྲོ་བས་དབྱམ་པོ་འམ་རས་བལ་ཅན་ཕྲག་པས་བླངས་ནས་ཁྱེར་བ་ནི་ཚུལ་མ་ཡིན་པས་དེའི་ཕྱིར་གདིང་བ་དང་སྟན་ནི་ཐ་དད་དོ། །སྟན་གྱི་ཚད་ནི་གདིང་བ་དང་འདྲ་བར་རིག་པར་བྱ་སྟེ། འཁོར་གསུམ་ཁེབས་པའི་མཐར་ཐུག་པའི་ཚད་དེ་ཙམ་གྱིས་ན་ལྟུང་བའི་དངོས་གཞིར་འགྱུར་བ་ཡིན་ནོ། །དེ་བས་ཆུང་ན་ནི་ཉེས་བྱས་སུ་འགྱུར་རོ། །སྟན་གྱི་ཚད་ནི་བཅོམ་ལྡན་
འདས་ཉིད་ཀྱིས་གསུངས་པ་ཡིན་ཏེ། བཙུན་བསྟན་གྱི་ཚང་གང་ལགས། ཉེ་བ་འཁོར་གསུམ་སྟེ། སྟན་ཆེན་པོ་དང༌། འབྲིང་དང་ཆུང་དུའོ། །དེ་ལ་ཆེན་པོ་ནི་ཁྲུ་ཕྱེད་དང་ལྔའོ། །ཆུང་དུ་ནི་ཁྲུ་ཕྱེད་དང་གསུམ་མོ། །འབྲིང་ནི་དེ་གཉིས་ཀྱི་བར་རོ། །ཞེང་གི་ཚད་ནི་གདིང་བའི་ཚད་དང་མཉམ་མོ། །ཅི་ཞིག་བྱས་ན་སྲིན་བལ་གྱི་སྤང་བར་འགྱུར་ཞེ་ན། དེའི་ཕྱིར་སྲིན་བལ་གྱི་བྱས་སམ་བྱེད་དུ་བཅུག་ནའོ་ཞེས་བྱ་བ་སྨྲས་ཏེ། སྲིན་བལ་གྱི་ཞེས་བྱ་བ་ནི། སྲིན་བལ་གྱི་སྟན་ནང་ཚངས་ཅན་ནམ་བླིངས་བའོ། །བྱས་སམ་ཞེས་བྱ་བ་ནི་རང་གིས་སོ། །བྱེད་དུ་བཅུག་ནའོ་ཞེས་བྱ་བ་ནི། གཞན་ལ་བཅོལ་བ་སྟེ། དེས་ན་སྲིན་བལ་གྱི་སྤང་བར་འགྱུར་རོ། །བྱས་པ་དང་བྱེད་དུ་བཅུག་པ་གཉིས་ཀྱི་གྲུབ་པ་བསྟན་པའི་ཕྱིར། སྟན་ལ་ནི་བཀྲམ་པ་ཉིད་བྱེད་པ་མཐར་ཐུག་པའི་དང་པོ་ཡིན་ནོ་ཞེས་བྱ་བ་སྨྲས་ཏེ། སྟན་བྱེད་པ་ལ་དེར་དགོས་པའི་སྲིན་བལ་གྱི་མཐའ་དག་བཀྲམ་པ་ཉིད་གང་ཡིན་པ་དེ་ནི་བྱེད་བ་མཐར་ཐུག་པ་དང་པོ་ཡིན་པར་རིག་པར་བྱའོ། །བྱེད་པ་ཞེས་བྱ་བ་ནི་སྟན་བྱེད་པའོ། །བྱེད་པ་མཐར་ཐུག་པ་ཞེས་བྱ་བ་ནི་ཟིན་པ་སྟེ། བྱེད་པ་མཐར་ཐུག་པ་བྱས་ཟིན་པ་དེའི་དང་པོ་ནི་བཀྲམ་པ་ཉིད་ཅེས་བྱ་བ་སྲིན་བལ་གྱི་བལ་བཏིང་བ་ཉིད་ཡིན་པར་རིག་པར་བྱའོ། །འདི་སྐད་བསྟན་ཏེ། དེ་ཙམ་བྱས་ན་དངོས་གཞིར་འགྱུར་རོ། །དེ་ཕྱིན་ཆད་གང་བྱེད་པ་དེ་ནི་དེའི་ཁོངས་སུ་འདུས་པ་ཡིན་ཏེ། རྩོམ་པ་གཅིག་ཏུ་གྱུར་པའི་ཕྱིར་རོ། །འདིར་གཞུང་ནི་ཞུ་བ་ཁ་ཅིག་ལས་ཇི་ཙམ་གྱིས་ན་ལྟུང་བ་རྫོགས་པར་འགྱུར། གང་ཚུན་ཆད་བཀྲམ་པར་གྱུར་ནའོ་ཞེས་གསུངས་པ་ཡིན་ནོ། །བྱས་ཟིན་པ་རྙེད་པ་དང་ཡོངས་སུ་ལོངས་སྤྱོད་པ་དང་མངོན་པར་འདུ་བྱེད་པ་དག་ལ་ནི་ལྟུང་བ་མེད་དོ་ཞེས་བྱ་བ་ནི། བྱས་ཟིན་པ་རྙེད་པ་དང༌། གཞན་གྱིས་བྱས་ཟིན་པ་ལ་ཡོངས་སུ་ལོངས་སྤྱོད་པ་དང༌། རྙིང་བའི་བྱི་དོར་མངོན་པར་འདུ་བྱེད་པ་དག་ལ་ནི་ལྟུང་བ་མེད་དེ། འདི་ལྟར་བདག་གིར་བྱེད་པ་དང༌། ཡོངས་སུ་ལོངས་སྤྱོད་པ་ལ་ནི་ཉེས་པ་མེད་ཀྱི་རྩོམ་པ་དང་རྗེས་སུ་བསྒྲུབ་པ་གཉིས་ལ་ཉེས་པར་འགྱུར་བར་བཞེད་པའི་ཕྱིར་རོ། །སྲིན་བལ་གྱི་སྤང་བ་རྣམ་བར་འབྱེད་བའོ་ཞེས་བྱ་བ་དེ་རྣམ་པར་འབྱེད་པ་ལས་འབྱུང་བ་བཤད་ཟིན་ཏོ།། །།
ཞུ་བའི་སྐབས་ནས་འབྱུང་བ་བསྡུ་བའི་ཕྱིར། ཉུང་དུ་དང་བསྲེས་པ་ཉིད་ན་ན་སྨད་པ་ཉིད་དོ་ཞེས་བྱ་བ་སྨྲས་ཏེ། སྲིན་པ་ལ་དང་བལ་དཀར་པོའམ། ཤ་ནའི་རས་བལ་ལམ། གསོ་བལ་ལ་སོགས་པའི་རྫས་ཉུང་དུ་དང་བསྲེས་ཏེ་སྟན་བྱེད་པ་ཉིད་ན་ན་སྨད་པ་ཉིད་དེ། ཁ་ན་མཐོ་བ་ན་སྨད་པ་ཉིད་དེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །དེ་ནི་སྟན་ཐམས་ཅད་ཀྱི་དབང་དུ་བྱས་པ་ཡིན་ནོ། །རྫས་ཉམས་བ་ཉིད་ལ་ཡང་ངོ་ཞེས་བྱ་བ་ལ། ཡང་ངོ་ཞེས་བྱ་བའི་སྒྲས་ནི་ན་སྨད་པ་ཉིད་དོ་ཞེས་བྱ་བའི་རྗེས་སྙེགས་པར་བྱེད་དོ། །རྫས་ཉམས་པ་ཉིད་ཅེས་བྱ་བ་ནི། སྲིན་བལ་ཉམས་པ་ཉིད་དེ་རྫས་དེ་ལས་སྟན་བྱེད་དམ་དེ་དང་བསྲེས་ཏེ་བྱེད་ན་ཡང་ན་སྨད་པ་ཉིད་དེ་ཉེས་བྱས་ཉིད་དོ། །བལ་ལ་སོགས་པ་ལ་ཡང་དེ་བཞིན་དུ་ཤེས་པར་བྱ་སྟེ། ལྟུང་བ་རྣམ་པར་གཞག་པ་འདྲ་བའི་ཕྱིར་རོ། །ཆ་མཉམ་པར་བསྲེས་པ་ཉིད་ལ་ནི་ཁ་ན་མཐོ་བ་རྫོགས་པར་འགྱུར་ཏེ། འདི་ལྟ་སྟེ། སྲིན་བལ་གྱི་བལ་དང་བལ་ནག་པོ་ཆ་མཉམ་པར་བསྲེས་ཏེ་སྟན་བྱེད་ན་སྤང་བ་ཁོ་ནར་འགྱུར་རོ། །སྲིན་བལ་གྱི་སྤང་བ་ཞུ་བའོ་ཞེས་བྱ་བ་དེ་ཞུ་བའི་སྐབས་ནས་འབྱུང་བ་རྫོགས་སོ། །སྲིན་བལ་གྱི་སྤང་པའོ་ཞེས་བྱ་བ་དེ་བཤད་ཟིན་ཏོ།། །།བལ་ནག་པོ་འབའ་ཞིག་གི་སྤང་བ་བརྗོད་པར་བྱ་སྟེ། སྲིན་བལ་གྱི་སྤང་བའི་རྣམ་པ་སྔར་བསྟན་མ་ཐག་པ་ཁས་བླངས་ནས། སྲིན་བལ་ཞེས་བྱ་བ་དེའི་གནས་སུ་བལ་ནག་པོ་འབའ་ཞིག་པའི་མིང་གཞན་བརྗོད་པར་བྱ་སྟེ། དེའི་ཕྱིར་ལུག་གི་བལ་ནག་པོ་འབའ་ཞིག་དག་གོ་ཞེས་བྱ་བ་སྨྲས་སོ། །འདི་སྐད་བསྟན་ཏེ། ལུག་གི་བལ་ནག་པོ་འབའ་ཞིག་དག་ལས་སྟན་བྱས་སམ་བྱེད་དུ་བཅུག་ན་སྤང་བར་འགྱུར་རོ། །ཅི་ཞིག་གིས་བལ་ནག་པོར་གྱུར་པ་ཡིན། རང་བཞིན་གྱིས་སམ། ཁ་བསྒྱུར་བས་སམ། གཉི་གས་ཤེ་ན། དེའི་ཕྱིར་རང་བཞིན་གྱིས་སོ་ཞེས་བྱ་བ་སྨྲས་ཏེ། གཞན་གྱིས་མ་ཡིན་ནོ། །སྔོན་པོ་དང་འདམ་ཁ་དང་ཁམ་པ་དག་ཀྱང་དེ་ཉིད་དོ་ཞེས་བྱ་བ་ནི་སྔོན་པོ་ལ་སོགས་པ་དག་ཀྱང་དེ་ཉིད་དེ། བལ་ནག་པོ་འབའ་ཞིག་ཉིད་དང་འདྲ་བར་རིག་པར་བྱའོ་ཞེས་བྱ་བའི་ཐ་ཚིག་གོ །བལ་ནག་པོ་འབའ་ཞིག་གི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཆ་གཉིས་བསྲེ་བའི་སྤང་བ་བརྗོད་པར་བྱ་སྟེ། བལ་ནག་པོ་
བས་དཀར་པོ་དང་འཁོབ་བལ་དག་དམན་པས་དེའི་ཕྱིར་དམན་པ་ཉིད་དམ། དམན་པ་དང་བསྲེས་པ་ཉིད་ཅེས་བྱ་བའི་རྣམ་པས་དཀར་པོ་དང་འཁོབ་བལ་དམན་པ་དང་བལ་ནག་པོའི་རྫས་བསྲེས་པ་དེ་ལས་སྟན་བྱེད་ན་ཉེས་བྱས་སུ་ཐལ་བར་འགྱུར་བ་བསལ་བའི་ཕྱིར། ཆ་གཉིས་བསྲེ་བའི་སྤང་བ་བཅའ་བ་མཛད་དོ། །གང་གི་ཚེ་ཤ་ནའི་རས་བལ་དང༌། གསོ་བལ་ལ་སོགས་པའི་རྫས་དམན་པ་དག་དང༌། བལ་ནག་པོར་སྲེ་བར་བྱེད་ན་ནི་དེའི་ཚེ་བལ་ནག་པོ་འབའ་ཞིག་གི་སྤང་བར་གཏོགས་པའི་ཉེས་བྱས་སུ་འགྱུར་རོ། །གང་གི་ཚེ་དཀར་པོ་དང་འཁོབ་བལ་གྱི་རྫས་ཚད་པས་ཉུང་བ་དག་དང་སྲེ་བར་བྱེད་ན་ནི་དེའི་ཚེ་ཆ་གཉིས་བསྲེ་བའི་སྤང་བར་འགྱུར་རོ། །འདིར་ཡང་སྔར་བསྟན་པའི་ཆོ་ག་ཁས་བླངས་ནས་ཚད་ཀྱི་བྱེ་བྲག་འབའ་ཞིག་བརྗོད་པར་བྱ་སྟེ། དེ་དག་ཕྱེད་པས་ལྷག་པ་ཉིད་ནའོ་ཞེས་བྱ་བ་ནི། ལུག་གི་བལ་ནག་པོ་དེ་དག་ཕྱེད་ཀྱི་ཆ་བས་ལྷག་པ་ཉིད་ན་ཆ་གཉིས་བསྲེ་བའི་སྤང་བར་འགྱུར་རོ་གང་གི་ཚེ་དཀར་པོ་དང་འཁོབ་བལ་དག་ནི་ལྷག་པར་གྱུར་ལ། ལུག་གི་བལ་ནག་པོ་དག་ནི་ཉུང་བའམ། མཉམ་པར་གྱུར་ན་ནི་དེའི་ཚེ་ལྟུང་བ་མེད་དོ། །ཕྱེད་དཀར་པོ་དང་འཁོབ་བལ་དག་ལས་ཆ་མཉམ་པ་ཉིད་དུའོ་ཞེས་བྱ་བ་ནི། བལ་ནག་པོ་ནི་དཀར་པོ་དང་འཁོབ་བལ་དག་ནི་སོ་སོའི་ཆ་བས་ལྷག་པར་བྱ་སྟེ། སྤྱིར་ཕྱེད་ཀྱི་ཆ་ནི་ནག་པོ་ལས་བྱའོ། །ཕྱེད་ནི་དཀར་པོ་དང་འཁོབ་བལ་ལས་ཆ་མཉམ་པ་ཉིད་དུ་བྱའོ། །འདི་སྐད་བསྟན་ཏེ། སྤྱིའི་ཚོམས་ལས་ཕྱེད་ནི་ལུག་གི་བལ་ནག་པོ་ལས་བྱའོ། །བཞི་ཆ་གཅིག་ནི་དཀར་པོ་ལས་བྱའོ། །བཞི་ཆ་གཅིག་ནི་འཁོབ་བལ་ལས་བྱའོ། །གང་གི་ཚེ་འཁོབ་བལ་བས་དཀར་པོ་ལྷག་པར་བྱེད་ན་ནི་དེའི་ཚེ་ཉེས་བྱས་སོ། །ཅི་སྟེ་དཀར་པོ་བས་འཁོབ་བལ་ལྷག་པར་བྱེད་ན་ནི་དེའི་ཚེ་ལྟུང་བ་མེད་དེ་མོད་པ་དང་རིན་ཆུང་བའི་ཕྱིར་རོ། །ཡུལ་གང་ན་བལ་དཀར་པོ་རིན་ཆེ་ཞིང་ཤིན་ཏུ་དཀོན་ལ་སྲིན་བལ་གྱི་བལ་ནི་རིན་ཆུང་ཞིང་ཤིན་ཏུ་མོད་པ་དེར་ནི་སྲིན་བལ་གྱི་གནས་སུ་བལ་དཀར་པོར་རིག་པར་བྱའོ། །ནག་པོ་ལ་ཡང་དེ་བཞིན་དུ་སྦྱར་བར་བྱའོ། །དེ་ལྟར་ན་སྲིན་བལ་ལ་ནི་ལྟུང་བ་མེད་ལ། བལ་ལ་ནི་ལྟུང་བར་འགྱུར་བ་དང༌། བལ་ནག་པོ་འབའ་ཞིག་ལ་ནི་
ལྟུང་བ་མེད་ལ། དཀར་པོ་ལ་ནི་ལྟུང་བར་འགྱུར་རོ། །ལུག་གི་བལ་དཀར་པོ་ནི་གང་ཡིན། འཁོབ་བལ་ནི་གང་ཡིན་ཞེ་ན། དེའི་ཕྱིར་གློ་དང་རྒྱབ་དང་གཉའ་བ་ནས་སྐྱེས་པ་ནི་སྔ་མའོ་ཞེས་བྱ་བ་སྨྲས་ཏེ། གློ་དང་རྒྱབ་དང་གཉའ་བ་ནི་དེ་དག་ཉིད་དེ། གློ་དང་རྒྱབ་དང་གཉའ་བ་ནས་སྐྱེས་པ་ནི་བལ་སྔ་མ་སྟེ། དཀར་པོ་ཡིན་པར་རིག་པར་བྱའོ། །མགོ་དང་རྐང་པ་དང་ལྟོ་ནས་སྐྱེས་པ་ནི་ཕྱི་མའོ་ཞེས་བྱ་བ་ནི། འཁོབ་བལ་ལོ་ཞེས་བྱ་བའི་ཐ་ཚིག་གོ །ཆ་གཉིས་བསྲེ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ལོ་དྲུག་ཏུ་བཅང་པའི་སྤང་བ་བརྗོད་པར་འདོད་ནས། མ་དག་པ་གསོལ་བར་མི་བྱའོ། །རང་དག་རྟོག་ཏུ་འདོང་བར་བྱའོ། །ཡང་ན་དགེ་སློང་བསྐོས་པ་དག་གོ །སྟན་ལ་ཡང་དེ་བཞིན་ནོ་ཞེས་སྔར་ཁར་བའི་དགེ་འདུན་ལྷག་མ་རྣམ་པར་འབྱེད་པའི་སྐབས་སུ་འདྲ་བར་བསྟན་པ་དག་འདིར་ཡང་དྲན་པར་བྱ་སྟེ། སྟན་བརྟག་པར་བྱ་བ་ལ་རྟོག་པར་བྱེད་པའི་དགེ་སློང་དག་གིས་གང་བྱ་བ་དེ་བརྗོད་པར་བྱ་སྟེ། ཆུ་དང་ཞེང་གཉི་གར་ལྷག་པ་ཉིད་ཡིན་ན་གཅད་པར་བྱའོ་ཞེས་བྱ་བ་ནི། ཆུ་དང་ཞེང་ནི་ཆུ་དང་ཞེང་སྟེ། ཆུ་དང་ཞེང་གཉི་གར་དེ་ལྷག་པ་ཉིད་ཡིན་ཏེ། ཚད་ལས་འདས་པ་ཉིད་ཡིན་ན་དགེ་སློང་དེ་དག་གིས་གཅད་པར་བྱའོ། །ཐུང་བ་ཉིད་དང་དོག་པ་ཉིད་དག་ནི་བསྐྱེད་པར་བྱའོ་ཞེས་བྱ་བ་ནི། ཐུང་བ་ཉིད་དང་དོག་པ་ཉིད་ནི་ཐུང་བ་ཉིད་དང་དོག་པ་ཉིད་དེ་དེ་གཉིས་ནི་བསྐྱེད་པར་བྱའོ། །འདི་སྐད་བསྟན་ཏེ། གལ་ཏེ་ཆུ་ཞེང་གཉི་གར་ལྷག་པ་ཉིད་ཡིན་ན་ནི་དེའི་ཚེ་གཅད་པར་བྱའོ། །གལ་ཏེ་ཐུང་བ་ཉིད་དང༌། དོག་པ་ཉིད་ཡིན་ན་ནི་དེའི་ཚེ་བསྐྱེད་པར་བྱ་སྟེ། མདོ་སྔ་མ་གཉི་གའི་བསྡུས་པའི་དོན་ནི་དེ་ཡིན་ནོ། །རལ་ན་བཙེམ་པར་བྱའོ་ཞེས་བྱ་བ་ནི། སྟན་རལ་ན་དྲུབ་པ་ལ་སོགས་པས་བཙེམ་པར་བྱའོ། །འདི་སྐད་བསྟན་ཏེ། གལ་ཏེ་རལ་བར་གྱུར་ན་དེའི་ཚེ་དྲུབ་པས་བཙེམ་པར་བྱའོ། །བུག་རྡོལ་དུ་གྱུར་ཏམ་ཤ་ཟད་པ་དག་ནི་སྦྱར་བར་བྱའོ་ཞེས་བྱ་བ་ནི། བུག་རྡོལ་དུ་གྱུར་པ་དང༌། ཤ་ཟད་པ་ནི་བུག་རྡོལ་དུ་གྱུར་བ་དང་ཤ་ཟད་པ་སྟེ། དེ་གཉིས་ལ་ནི་སྦྱར་བས་གླན་བར་བྱའོ། །གལ་ཏེ་བུག་རྡོལ་དུ་གྱུར་ཏེ་བར་སྐབས་བར་སྐབས་སུ་བུག་རྡོ་ལ་བྱུང་བར་གྱུར་ཏམ་ཤ་ཟད་པར་གྱུར་ཏེ། སྲབ་མོར་གྱུར་ན་དེའི་ཚེ་སྟན་བུག་རྡོལ་
དུ་གྱུར་ཏམ་ཤ་ཟད་པར་གྱུར་ན་དེ་ལ་སྦྱར་བ་ཞེས་བྱ་བ་རིམ་གཅིག་གིས་གླན་པར་བྱའོ་ཞེས་བྱ་བའི་ཐ་ཚིག་གོ །བཅོས་དཀའ་བ་ཉིད་ཡིན་ན་སྦྱིན་ནོ་ཞེས་བྱ་བ་ལ། བཅོས་དཀའ་བ་ཉིད་ཅེས་བྱ་བ་ནི། དཀའ་བས་ཕྱིར་བཅོས་པར་མི་ནུས་པ་སྟེ། དེའི་དངོས་པོ་ནི་དེ་ཉིད་དོ། །བཅོས་དཀའ་བ་ཉིད་དེ་ལ་ནི་གནང་བ་སྦྱིན་ནོ། །འདི་སྐད་བསྟན་ཏེ། གལ་ཏེ་སྔར་བསྟན་པའི་བཅོས་པའི་ཐབས་ཀྱིས་ཕྱིར་བཅོས་པར་མི་ནུས་པ་ཡིན་ན་དེའི་ཚེ་སྟན་གཞན་བྱ་བའི་ཕྱིར་གནང་བ་སྦྱིན་པར་བྱའོ། །འདི་ལྟར་ལག་གི་བླའི་ཕྱིར་གསུངས་པ་ནི་གླེང་གཞིའི་དབང་གི་ཕྱིར་ཡིན་གྱི་གཞན་ལ་ཡང་ཉེ་བར་སྦྱར་དུ་རུང་བའི་ཕྱིར་སྤྱིར་མདོར་བྲིས་སོ། །ཅི་ཞིག་བྱས་ན་ལོ་དྲུག་ཏུ་བཅད་པའི་སྤང་བར་འགྱུར་ཞེ་ན། དེའི་ཕྱིར་གནང་བ་མ་ཐོབ་པ་གཞན་ཡོད་པའམ་རང་དགར་བཏང་བས་ལོ་དྲུག་མ་ལོན་པར་སྟན་བྱས་པ་ཉིད་ནའོ་ཞེས་བྱ་བ་སྨྲས་ཏེ། དགེ་སློང་གང་གིས་སྟན་བྱ་བའི་ཕྱིར་དགེ་འདུན་ལས་གནང་བ་མ་ཐོབ་བ་དེ་ནི་གནང་བ་མ་ཐོབ་པ་སྟེ་དེས་སོ། །གཞན་ཡོད་པའམ་ཞེས་བྱ་བ་ནི། སྟན་གཞན་ཡོད་པའོ། །རང་དགར་བཏང་བས་ཞེས་བྱ་བ་ནི། རང་གི་མོས་པས་ཡོངས་སུ་བཏང་བའོ། །ལོ་དྲུག་མ་ལོན་པར་ཞེས་བྱ་བ་ནི། གང་གིས་སྟན་གཞན་བྱས་ནས་སམ་རང་དགར་བཏང་ནས་ལོ་དྲུག་མ་ལོན་པ་སྟེ། དེའི་ཚེའོ། །སྟན་བྱས་པ་ཉིད་ནའོ་ཞེས་བྱ་བ་ནི། དེའི་ཚེ་སྟན་ཟིན་པར་བྱས་པ་ཉིད་ན་སྤང་བའི་ལྟུང་བྱེད་དུ་འགྱུར་བའོ། །འདི་སྐད་བསྟན་ཏེ། གལ་ཏེ་དགེ་སློང་ལ་རང་གི་སྟན་ཡོད་དམ། འོན་ཏེ་རང་དགར་དེ་ཡོངས་སུ་གཏོང་བར་བྱེད་ཅིང་ལོ་དྲུག་ཀྱང་མ་ལོན་ལ་དགེ་འདུན་ལས་གནང་བ་ཡང་མ་ཐོབ་པའི་བར་དུ་སྟན་གཞན་བྱེད་ན་སྤང་བའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །བླིངས་པའི་སྟན་གྱི་ལྟུང་བའི་དབང་དུ་བྱས་པ་ཡིན་པར་བལྟ་བར་བྱའོ། །བརྩམས་པ་ཉིད་ན་རྩོམ་ན་ཟིན་པ་དང་འདྲའོ་ཞེས་བྱ་བ་ལ། བརྩམས་པ་ཉིད་ན་ཞེས་བྱ་བ་ནི། སྟན་དང་པོ་བརྩམས་པ་ཉིད་ནའོ། །རྩོམ་ན་ཞེས་བྱ་བ་ནི། བརྩམས་པ་དེ་ཉིད་དང་ལྷན་ཅིག་ཏུའམ། ཕྱིས་སྟན་གཞན་རྩོམ་ནའོ། །ཟིན་པ་དང་འདྲའོ་ཞེས་བྱ་བ་ནི། སྔ་མ་ཤོས་བྱས་ཟིན་ནས་ཅིག་ཤོས་རྩོམ་པ་དང་འདྲ་སྟེ་
ཉེས་བྱས་སུ་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྟན་རྩོམ་པར་བྱེད་ཅིང་བརྩམས་པ་དེ་ཉིད་དང་ལྷན་ཅིག་ཏུའམ་ཕྱིས་སྟན་གཉིས་པ་རྩོམ་པར་བྱེད་ན་ཇི་ལྟར་སྔ་མ་ཤོས་ཟིན་ནས་གཞན་རྩོམ་པ་ན་ཉེས་བྱས་སུ་འགྱུར་བ་དེ་བཞིན་དུ་སྟན་བརྩམས་ནས་ལྷན་ཅིག་ཏུའམ་ཕྱིས་གཉིས་པ་ཡང་ཉེས་བྱས་ཁོ་ནར་འགྱུར་རོ། །མཐར་ཐུག་ན་སྦྱོར་བའི་ལྟུང་བར་མི་འགྱུར་བ་ཉིད་མ་ཡིན་ནོ་ཞེས་བྱ་བ་ནི། སྟན་ཕྱིས་བརྩམས་པ་ཤོས་སྔར་མཐར་ཐུག་སྟེ་ཟིན་པར་གྱུར་ན་ཡང་སྦྱོར་བའི་ལྟུང་བར་མི་འགྱུར་བ་ཉིད་མ་ཡིན་ཏེ། སྦྱོར་བའི་ལྟུང་བ་ཉེས་བྱས་སུ་འགྱུར་བ་ཁོ་ན་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་གིས་སྔར་སྟན་གཅིག་རྩོམ་པར་བྱེད་ཅིང་ཕྱིས་གཉིས་པ་རྩོམ་པར་བྱེད་ལ་ཕྱིས་བརྩམས་པ་ཤོས་སྔར་ཟིན་པར་བྱེད་ན་དེའི་ཚེ་དངོས་གཞིའི་ལྟུང་བར་མི་འགྱུར་ཏེ་དེའི་ཚེ་ན་གཉིས་པ་ཟིན་པ་མེད་པའི་ཕྱིར་རོ། །ཕྱི་མ་ཤོས་རྩོམ་པའི་དུས་ཉིད་ན་སྦྱོར་བའི་ལྟུང་བ་ཉེས་བྱས་ཉིད་དུ་ནི་འགྱུར་རོ། །འདི་ལྟར་གང་ཁོ་ན་ལས་སྦྱོར་བའི་ལྟུང་བར་འགྱུར་བ་དེ་ཁོ་ན་ལས་དངོས་གཞིའི་ལྟུང་བར་འགྱུར་བ་དེ་ལྟར་ནི་རིག་པར་མི་བྱ་སྟེ། སྟན་གཉིས་པ་ཟིན་པའི་གནས་སྐབས་ལ་དངོས་གཞིའི་ལྟུང་བར་འགྱུར་བའི་ཕྱིར་རོ། །རབ་ཏུ་བྱུང་བ་གཞན་གྱི་ནི་ཐ་དད་པ་ཉིད་དོ་ཞེས་བྱ་བ་ནི། སྔོན་དང་ཕྱིས་རབ་ཏུ་བྱུང་བ་གཉིས་ནི་ཐ་དད་པ་ཉིད་དེ། རྒྱུན་ཐ་དད་པ་ཉིད་དོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། དགེ་སློང་གིས་རབ་ཏུ་བྱུང་བ་སྔ་མའི་ཚེ་སྟན་རྩོམ་པར་བྱེད་དམ། ཟིན་པར་བྱེད་ཅིང་དེ་ནས་རབ་ཏུ་བྱུང་བ་ཕྱི་མའི་ཚེ་སྟན་གཞན་རྩོམ་མམ་བྱེད་ན། དུས་ཡོངས་སུ་རྫོགས་པའི་སྔོན་རོལ་ཡིན་དུ་ཟིན་ཀྱང༌། དེ་ལྟ་མོད་ཀྱི་ཉེས་པ་མེད་དེ་རབ་ཏུ་བྱུང་བ་གཞན་ནི་ཐ་དད་པ་ཡིན་པའི་ཕྱིར་རོ། །ཁྱིམ་པའི་གནས་སྐབས་བཞིན་ཏེ། ཇི་ལྟར་ཁྱིམ་པས་སྟན་རྩོམ་མ་བྱེད་ཀྱང་རུང་སྟེ། ཕྱིས་རབ་ཏུ་འབྱུང་ཞིང་སྟན་གཞན་རྩོམ་པའམ་བྱེད་ན་དེ་ལ་ལྟུང་བར་མི་འགྱུར་བ་བཞིན་དུ་འདིར་ཡང་དེ་དང་འདྲའོ། །འདིར་གཞུང་ནི་ཞུ་བ་ཁ་ཅིག་ལས་དགེ་སློང་གིས་ལོ་དྲུག་གི་མདུན་རོལ་དུ་སྟན་བགྱིད་ཅིང༌། ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་ལོ་དྲུག་གི་མདུན་རོལ་དུ་བབས་ཤིང་དེ་ཡང་བསྙེན་པར་རྫོགས་ནས་སྟན་གཞན་བྱེད་པ་ལ་ལྟུང་བ་མེད་པ་
ཡིན་ནོ། །སྟན་བརྩམས་ཏེ་བབས་པ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ལོ་དྲུག་ཏུ་བཅང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བམ་པོ་བཅུ་དགུ་པ། ཅི་ཞིག་བྱས་ན་མཐོ་གང་གི་སྤང་བར་འགྱུར་ཞེ་ན། དེའི་ཕྱིར་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་པ་སྤྱོད་ནའོ་ཞེས་བྱ་བ་སྨྲས་ཏེ། གདིང་བ་གསར་པ་གང་ལ་གདིང་བ་རྙིང་བ་ལས་བདེ་བར་གཤེགས་པའི་མཐོ་གང་གིས་མ་གླན་པ་དེ་ནི་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་མ་གླན་པ་སྟེ། ཁྱད་པར་དེ་ལྟ་བུ་ཅན་གྱི་གདིང་བ་གསར་པ་སོ་སོར་གདིང་བ་སྤྱོད་ན་སྤྱོད་པའི་སྤང་བའི་ལྟུང་བྱེད་དུ་འགྱུར་རོ། །སར་པ་ཞེས་བྱ་བ་ནི་གསར་དུ་བྱས་པས་སར་པ་དང༌། གསར་དུ་རྙེད་པས་སར་པ་སྟེ། དེ་ལས་འདིར་ནི་གསར་དུ་བྱས་པས་སར་པ་བཟུང་ངོ༌། །དེའི་ཕྱིར་གལ་ཏེ་གདིང་བ་གསར་དུ་བྱས་པ་ཞིག་ག་ལས་རྙེད་ཀྱང་རུང་སྟེ། དགེ་སློང་དེས་དེ་ལ་ཡང་རང་གི་གདིང་བ་རྙིང་པ་ལས་བདེ་བར་གཤེགས་པའི་མཐོ་གང་གིས་གླན་པར་བྱའོ། །ཅི་གདིང་བ་རྙིང་པ་མེད་ན་ཡང་བདེ་བར་གཤེགས་པའི་མཐོ་གང་གིས་མ་གླན་པའི་གདིང་བ་གསར་པ་སྤྱོད་པ་ལ་ལྟུང་བ་འདི་རྣམ་པར་གཞག་གམ་ཞེ་ན་མ་ཡིན་ཏེ་དེའི་ཕྱིར། གལ་ཏེ་ཡོད་ནའོ་ཞེས་བྱ་བ་སྨྲས་ཏེ། གལ་ཏེ་གདིང་བ་རྙིང་པ་ཡོད་ན་དེས་དེ་ལྟར་བྱའོ། །ཅི་གལ་ཏེ་རིལ་གྱིས་ཡོད་ན་ཡང་དེའི་ཕྱིར་ལྟུང་བ་འདིར་འགྱུར་རམ་ཞེ་ན། དེའི་ཕྱིར་དེ་ཙམ་ན་ཡང་ངོ་ཞེས་བྱ་བ་སྨྲས་ཏེ། གལ་ཏེ་བདེ་བར་གཤེགས་པའི་མཐོ་གང་ཙམ་ཞིག་ཡོད་ན་ཡང་ཞེས་བྱ་བའི་ཐ་ཚིག་གོ །ཅི་གལ་ཏེ་སྲ་བ་དེ་ཙམ་ཞིག་ཡོད་ནའམ་ཞེ་ན། དེའི་ཕྱིར་བཅོས་པར་ནུས་ན་ཡང་ངོ་ཞེས་བྱ་བ་སྨྲས་ཏེ། གལ་ཏེ་བཅོས་པར་ནུས་ན་སྟེ། གལ་ཏེ་བཅོས་སུ་རུང་བ་ཡིན་ན་ཞེས་བྱ་བའི་ཐ་ཚིག་གོ །མཐུད་ཅིང་སྦྱར་དུ་རུང་བས་ཀྱང་ངོ་ཞེས་བྱ་བ་ནི། དམ་དུམ་མཐུད་ཅིང་སྦྱར་དུ་རུང་ན་ངེས་ཀྱང་ཞེས་བྱ་བའི་ཐ་ཚིག་སྟེ། དེ་ལྟ་བུ་མེད་ན་ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །མཐོ་གང་གི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བལ་ཐོགས་པའི་སྤང་བར་འགྱུར་ཞེ་ན། དེའི་ཕྱིར་ཁྱེར་བ་མེད་ན་དཔག་ཚད་གསུམ་ལས་འདས་
པར་ལུག་གི་བལ་ཁྱེར་ནའོ་ཡོད་ན་ཡང་ངོ་ཞེས་བྱ་བ་སྨྲས་ཏེ། ཁྱེར་བ་མེད་ན་དཔག་ཚད་གསུམ་ལས་འདས་པར་ལུག་གི་བལ་ཁྱེར་ན་རྒྱང་གྲགས་ཀྱི་མཐར་ཕྱིན་ན་སྤང་བའོ། །རྒྱང་གྲགས་ཕྱེད་དུ་ཕྱིན་ན་ཉེས་བྱས་སོ། །ཁྱེར་བ་ཡོད་བཞིན་དུ་བདག་ཉིད་ཀྱིས་ཁྱེར་ན་ནི་རྩོམ་པའི་དུས་ཁོ་ན་ནི་ཉེས་བྱས་གཞན་གཅིག་གོ །རྒྱང་གྲགས་ཕྱེད་དུ་ཕྱིན་ན་ཉེས་བྱས་གཞན་གཅིག་གོ །རྒྱང་གྲགས་ཀྱི་མཐར་ཕྱིན་ན་སྤང་བའི་ལྟུང་བྱེད་དུ་འགྱུར་རོ། །འགྲོ་བ་ནི་གཉིས་སུ་གསུངས་ཏེ་ལྟུང་བ་དང་བཅས་པ་དང༌། ལྟུང་བ་མེད་པའོ། །དེ་ལ་ལྟུང་བ་དང་བཅས་པ་ནི་བལ་ཐོགས་པ་དང་དགེ་སློང་མ་དང་ལྷན་ཅིག་ལམ་དུ་འགྲོ་བ་དང༌། དགེ་སློང་མ་དང་ལྷན་ཅིག་གྲུར་འཇུག་པ་དང༌། སྐྱེས་པ་མེད་པར་བུད་མེད་དང་ལམ་དུ་འགྲོ་བ་དང༌། རྐུན་མ་དང་ལྷན་ཅིག་ལམ་དུ་འགྲོ་བའོ། །ལྟུང་བ་མེད་པ་ནི་ཡང་ཡང་ཟ་བ་དང༌། འདུས་ཤིང་ཟ་བ་དང་ཁྲུས་བྱེད་པའོ། །དེ་ལ་ལྟུང་བ་མེད་པ་ནི་དཔག་ཚད་ཕྱེད་ཕྱེད་དོ་ཞེས་འོག་ནས་འབྱུང་ངོ༌། །ལྟུང་བ་དང་བཅས་པ་བསྟན་པའི་ཕྱིར། ལམ་དུ་འགྲོ་བ་ནི་རྒྱང་གྲགས་ཀྱི་བདག་ཉིད་དོ་ཞེས་བྱ་བ་སྨྲས་ཏེ། ལམ་དུ་འགྲོ་བ་ནི་ལམ་དུ་ཞུགས་ཏེ་འགྲོ་བའོ། །འགྲོ་བ་དེ་ནི་རྒྱང་གྲགས་ཀྱི་བདག་ཉིད་དེ་རྒྱང་གྲགས་ཀྱི་མཐར་ཕྱིན་ན་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། བལ་ཐོགས་པ་ལ་སོགས་པ་ལམ་དུ་འགྲོ་བའི་རྒྱུ་ལས་ཁ་ན་མ་ཐོ་བར་འགྱུར་བ་དག་ལ་ནི་རྒྱང་གྲགས་ཀྱི་ཚད་ཙམ་དུ་སོང་ན་དངོས་གཞིར་འགྱུར་རོ། །ཕྱེད་དུ་ན་སྦྱོར་བའོ་ཞེས་བྱ་བ་ནི། རྒྱང་གྲགས་ཀྱི་ཕྱེད་ཀྱི་བདག་ཉིད་དུ་སོན་ན་སྦྱོར་བར་འགྱུར་ཏེ། དེ་ཙམ་དུ་སོན་ན་སྦྱོར་བ་ཡོངས་སུ་རྫོགས་པ་ཉིད་ཡིན་ནོ། །འདིར་གཞུང་ནི་རྒྱང་གྲགས་ཕྱེད་དུ་སོང་ན་ཉེས་བྱས་སུ་འགྱུར་རོ། །རྒྱང་གྲགས་སུ་སོན་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །རྫུ་འཕྲུལ་ལས་གཞན་པས་ནམ་མཁའ་ལ་འགྲོ་ན་ཉེས་བྱས་སོ་ཞེས་བྱ་བ་ལ། རྫུ་འཕྲུལ་ལས་གཞན་པས་ཞེས་བྱ་བ་ནི། རྫུ་འཕྲུལ་ལས་གཞན་པ་གསང་སྔགས་ལ་སོགས་པ་ཐབས་གཞན་གྱིས་ཏེ། དེས་ནམ་མཁའ་ལ་འགྲོ་ན་ཉེས་བྱས་སོ། །རྫུ་འཕྲུལ་གྱིས་འགྲོ་ན་ལྟུང་བ་མེད་དོ། །སྤྲུལ་པས་ཀྱང་ངོ་ཞེས་བྱ་བ་ལ། ཀྱང་ངོ་
ཞེས་བྱ་བའི་སྒྲ་ནི་ཉེས་བྱས་སོ་ཞེས་བྱ་བའི་རྗེས་བསྙགས་པའི་ཕྱིར་རོ། །སྤྲུལ་པ་ཡང་རྫུ་འཕྲུལ་གྱིས་བྱས་པ་ཡིན་པས་དེས་འགྲོ་ན་ཡང་ཉེས་པ་མེད་དོ་སྙམ་པ་བསལ་བའི་ཕྱིར་ཉེས་བྱས་སོ་ཞེས་བྱ་བ་སྨྲས་ཏེ། དེ་ནི་ལུས་ཀྱི་རྣམ་པར་རིག་བྱེད་ཀྱི་དབང་དུ་བྱས་པ་ཡིན་པའི་ཕྱིར་རོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་ནམ་མཁའ་ལས་བལ་འཚལ་ན་ལྟུང་བ་ཅིར་འགྱུར། རྫུ་འཕྲུལ་གྱིས་ཁྱེར་ན་ནི་ལྟུང་བ་མེད་དོ། །རྣམ་པ་གཞན་གྱི་ཁྱེར་ན་ནི་ཉེས་བྱས་སོ། །བཙུན་པ་རེ་ཞིག་དགེ་སློང་གིས་སྤྲུལ་པ་རུང་བ་བགྱིས་པས་འཚལ་ན་ལྟུང་བ་ཅིར་འགྱུར། ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཞྭ་དང་ལྷམ་སྒྲོག་གུ་ཅན་དང༌། སྟོད་ཀོར་ནང་ཚངས་ཅན་དང༌། རྒྱ་ཅང་དང༌། ལྕག་པོ་དང༌། ཤུར་བུ་ཕྲེའུ་ལ་སོགས་པའི་དོན་དུ་དེ་ཙམ་དག་ལ་ནི་ཉེས་པ་མེད་དོ་ཞེས་བྱ་བ་ནི། ཞྭ་ལ་སོགས་པའི་ཚད་ལྡང་བ་ཙམ་ཞྭ་ལ་སོགས་པའི་ཆེད་དུ་ཁྱེར་བ་ལ་ནི་ལྟུང་བ་མེད་དོ་ཞེས་བྱ་བའི་ཐ་ཚིག་གོ །རྒྱང་གྲགས་དང་དཔག་ཚད་ཀྱི་ཚད་རྡུལ་ཕྲ་རབ་ལ་སོགས་པ་ལས་བསྒྱུར་ཏེ་བསྒྲེ་བ་བསྟན་པའི་ཕྱིར། རྡུལ་ཕྲ་རབ་དང༌། རྡུལ་ཕྲ་མོ་དང༌། ཆུ་དང༌། ལྕགས་དང༌། རི་བོང་དང༌། ལུག་དང༌། གླང་དང། ཉི་ཟེར་གྱི་རྡུལ་དང༌། སྲོ་མ་དང༌། ཤིག་དང༌། ནས་དང༌། སོར་རྣམས་ནི་སྔ་མ་དྲུག་ལ་ཕྱི་མའོ་ཞེས་བྱ་བ་སྨྲས་ཏེ། རྡུལ་ཕྲ་རབ་དང༌། རྡུལ་ཕྲ་མོ་དང༌། ཆུ་དང་ལྕགས་དང་རི་བོང་དང༌། ལུག་དང་གླང་དང་ཉི་ཟེར་ནི་དེ་དག་ཉིད་དེ་སོ་སོར་ཕྱེ་ནས་ཕྱིས་རྡུལ་ཞེས་བྱ་བའི་སྒྲ་དང་སྦྱར་ཏེ་དྲུག་ལ་ཕྱི་མ་གཅིག་གོ་ཞེས་བྱ་བར་སྦྱར་རོ། །རྡུལ་ཞེས་བྱ་བའི་སྒྲ་ནི་ཆུ་ལ་སོགས་པ་མན་ཆད་དང་སོ་སོར་སྦྱར་བར་བྱ་སྟེ། ཆུ་རྡུལ་དང༌། ལྕགས་རྡུལ་དང༌། རི་བོང་རྡུལ་དང༌། ལུག་རྡུལ་དང༌། གླང་རྡུལ་དང༌། ཉི་ཟེར་གྱི་རྡུལ་ཞེས་བྱ་བར་སྦྱར་རོ། །དེ་བཞིན་དུ་སྲོ་མ་དང་ཤིག་དང་ནས་དང་སོར་ཡང་དེ་དག་ཉིད་ཡིན་ཏེ། རྡུལ་ཕྲ་རབ་ལ་སོགས་པ་སོར་གྱི་མཐར་ཐུག་པ་དེ་རྣམས་ནི་སྔ་མ་དྲུག་ལ་ཕྱི་མ་གཅིག་ཏུ་བསྒྱུར་ཅིང་བསྒྲེའོ། །འདི་སྐད་བསྟན་ཏེ། རྡུལ་ཕྲ་རབ་དྲུག་ལ་རྡུལ་ཕྲ་མོ་གཅིག་གོ །རྡུལ་ཕྲ་མོ་དྲུག་ལ་ཆུ་རྡུལ་གཅིག་གོ །ཆུ་རྡུལ་དྲུག་ལ་ལྕགས་རྡུལ་གཅིག་
གོ །ལྕགས་རྡུལ་དྲུག་ལ་རི་བོང་རྡུལ་གཅིག་གོ །རི་བོང་རྡུལ་དྲུག་ལ་ལུག་རྡུལ་གཅིག་གོ །ལུག་རྡུལ་དྲུག་ལ་གླང་རྡུལ་གཅིག་གོ །གླང་རྡུལ་དྲུག་ལ་ཉི་ཟེར་གྱི་རྡུལ་གཅིག་གོ །ཉི་ཟེར་གྱི་རྡུལ་དྲུག་ལ་སྲོ་མ་གཅིག་གོ །སྲོ་མ་དྲུག་ལ་ཤིག་གཅིག་གོ །ཤིག་དྲུག་ལ་ནས་གཅིག་གོ །ནས་དྲུག་ལ་སོར་གཅིག་གོ །སོར་བཞི་དྲུག་ལ་ཁྲུ་གང་ངོ༌། །ཁྲུ་ཕྱེད་དང་བཞི་ལ་མིའི་སྲིད་དོ། །ཁྲུ་བཞི་ལ་གཞུའོ། །དེ་ལྔ་བརྒྱལ་རྒྱང་གྲགས་སོ་ཞེས་བྱ་བ་ལ། སོར་བཞི་དྲུག་ལ་ཁྲུ་གང་ངོ་ཞེས་བྱ་བ་ནི་སོར་བཞི་ཕྲག་དྲུག་ལ་ཁྲུ་གང་སྟེ། སོར་ཉི་ཤུ་རྩ་བཞི་ལ་ཁྲུ་གང་དུ་བརྩིའོ་ཞེས་བྱ་བའི་ཐ་ཚིག་གོ །ཁྲུ་ཕྱེད་དང་བཞི་ལ་མིའི་སྲིད་དོ་ཞེས་བྱ་བ་ནི། མི་གང་ལ་སྲིད་དུ་ཁྲུ་ཕྱེད་དང་བཞི་ཡོད་པ་དེ་དག་ནི་ཁྲུ་ཕྱེད་དང་བཞི་པ་སྟེ། དེ་ནི་ཁྲུ་ཕྱེད་དང་བཞི་ལ་མིའི་སྲིད་ཅེས་བྱའོ། །ཁྲུ་བཞི་ལ་གཞུའོ་ཞེས་བྱ་བ་ནི། གཞུ་གང་ལ་ཁྲུ་བཞིའི་ཚད་ཡོད་པ་དེ་ནི་ཁྲུ་བཞི་པའི་གཞུའོ། །དེ་ལྔ་བརྒྱ་ལ་རྒྱང་གྲགས་སོ་ཞེས་བྱ་བ་ནི། གཞུ་དེ་ལྔ་བརྒྱ་ལ་རྒྱང་གྲགས་གཅིག་ཅེས་བྱའོ། །རྒྱང་གྲགས་བརྒྱད་ལ་ནི་དཔག་ཚད་གཅིག་གོ །ནས་འབྲུ་དྲུག་གློས་གཤིབས་པ་ལ་སོར་གཅིག་ཏུ་རིག་པར་བྱ་སྟེ། འདིར་གཞུང་ནི་ནས་དྲུག་ལ་སོར་མོའི་ཚིགས་གཅིག་གོ་ཞེས་གསུངས་པ་ཡིན་ནོ། །དགོན་པས་འདུལ་བ་ལ་ཐ་སྙད་བཏགས་པའི་ཕྱིར་འདིར་དེའི་ཚད་ཀྱང་བསྟན་པའི་ཕྱིར། དགོན་པའི་དང་པོ་ནི་དེའི་མཐའོ་ཞེས་བྱ་བ་སྨྲས་ཏེ། དགོན་པའི་དང་པོ་ནི་རྒྱང་གྲགས་དེའི་མཐའ་ཡིན་པར་རིག་པར་བྱའོ། །དེ་ཕན་ཆད་ནི་དགོན་པ་ཡིན་པར་མ་སྨྲས་ཀྱང་གྲུབ་པོ། །ལུས་ཀྱིས་ཁུར་མི་བསྐུར་རོ་ཞེས་བྱ་བ་ལ། ལུས་ཀྱི་ཁུར་ཞེས་བྱ་བ་ནི། ཕྲག་རྡང་གི་ཁུར་ལ་བྱ་སྟེ། ཕྲག་རྡང་གིས་ཁུར་བསྐུར་བར་མི་བྱའོ། །གློ་དང་རྒྱབ་དང་རྐེད་པ་དང་མགོ་བོ་དག་གིས་མི་བསྐུར་རོ་ཞེས་བྱ་བ་ནི། གློ་ལ་སོགས་པས་ཁུར་གང་ཡང་བསྐུར་བར་མི་བྱའོ། །འདིར་ཐུན་མོང་མ་ཡིན་པ་ཉིད་དུ་དོགས་པར་མི་བྱའོ་ཞེས་བྱ་བ་ནི། ཁུར་བསྐུར་བའི་སྐབས་འདིར་དགེ་སློང་དང་དགེ་སློང་མའི་བསླབ་པའི་གཞི་ཐུན་མོང་མ་ཡིན་པ་ཉིད་དུ་དོགས་པར་མི་བྱ་སྟེ། འདི་ལྟར་ཐུན་མོང་ཉིད་ཡིན་པར་ཤེས་པར་བྱའོ། །འདི་སྐད་བསྟན་ཏེ།
དགེ་སློང་དག་འབའ་ཞིག་གིས་ལུས་ཀྱི་ཁུར་ལ་སོགས་པ་བསྐུར་བར་མི་བྱ་བར་མ་ཟད་ཀྱི་དགེ་སློང་མ་རྣམས་ཀྱིས་ཀྱང་བསྐུར་བར་མི་བྱའོ། །ཁུར་ཕྱེད་ལས་ལྷག་པར་བསྐུར་བར་མི་བྱའོ་ཞེས་བྱ་བ་ནི། མིའི་ཁུར་གྱི་ཕྱེད་གང་ཡིན་པ་དེ་ལས་ལྷག་པའི་ཁུར་དགེ་སློང་གིས་བསྐུར་བར་མི་བྱའོ། །འདིར་གཞུང་ནི་མིའི་ཁུར་གཅིག་གང་ཡིན་པ་དེ་དགེ་སློང་གཉིས་ཀྱིས་ཁུར་བར་བྱའོ་ཞེས་གསུངས་པ་ཡིན་ནོ། །བལ་ཐོགས་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བལ་རྨེལ་དུ་འཇུག་པའི་སྤང་བ་བརྗོད་པར་བྱ་སྟེ། དེ་ནི་སྔར་འཁྲུར་འཇུག་པའི་སྤང་བའི་སྐབས་སུ་བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་བསྒོ་བས་འཁུར་བཅུག་གམ། འཚེད་དུ་བཅུག་གམ། འཆག་ཏུ་བཅུག་པ་ཉིད་ནའོ་ཞེས་སྨོས་པ་ཉིད་དང་རྣམ་པ་འདྲ་བ་ཁོ་ནར་རིག་པར་བྱ་སྟེ། འདིར་བྱེ་བྲག་འགའ་ཙམ་ཡོད་པ་གང་ཡིན་པ་དེ་བརྗོད་པར་བྱ་སྟེ། ཆོས་གོས་རྙིང་པའི་གནས་སུ་ལུག་གི་བལ་དག་གོ་ཞེས་བྱ་བ་ནི། སྔར་འཁྲུར་འཇུག་པའི་སྤང་བའི་སྐབས་སུ་བྱིན་གྱིས་བརླབས་པ་རང་གི་རྙིང་པ་འཁྲུར་གཞུག་པར་འོས་པ་ཆོས་གོས་དང་གདིང་བ་དག་ལས་འགའ་ཞིག་ཅེས་སྨོས་པའི་གནས་སུ་འདིར་ལུག་གི་བལ་དག་ཅེས་བྱ་བར་གཟུང་བར་བྱའོ། །འཆག་པ་རྨེལ་བའོ་ཞེས་བྱ་བ་ནི། འཁྲུར་འཇུག་པའི་སྤང་བའི་སྐབས་སུ་འཆག་པ་ཞེས་སྨོས་པའི་གནས་སུ་འདིར་རྨེལ་བ་ཞེས་བརྗོད་པར་བྱ་སྟེ། འཁྲུར་བཅུག་པའི་སྤང་བའི་སྐབས་སུ་འཁྲུར་འཇུག་གམ། འཚེད་དུ་འཇུག་གམ། འཆག་ཏུ་བཅུག་པ་དག་ནའོ་ཞེས་སྨོས་པ་དེ་འདིར་ནི་འཁྲུར་བཅུག་གམ། འཚེད་དུ་བཅུག་གམ། རྨེལ་དུ་བཅུག་པ་དག་ནའོ་ཞེས་བརྗོད་པར་བྱའོ། །བལ་རྨེལ་དུ་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་གསེར་དངུལ་ལ་རེག་པའི་སྤང་བར་འགྱུར་ཞེ་ན། དེའི་ཕྱིར་རིན་པོ་ཆེ་བདག་གིར་བྱས་ནའོ་ཞེས་བྱ་བ་སྨྲས་ཏེ། པདྨ་རཱ་ག་ལ་སོགས་པ་བདག་གིར་བྱས་ཤིང་དང་དུ་ལེན་ན་སྤང་བའི་ལྟུང་བྱེད་དོ། །འདིར་གཞུང་ནི་ཞུ་བ་ཁ་ཅིག་ལས་རྐང་པའི་དྲུང་ན་མོའི་རོ་མྱོང་ངམ། །འཐོབ་པའི་གནས་ནས་ལེ་སྦྲམ་གྱི་རྫས་འདུག་པ་བདག་གིར་བྱེད་ན་སྤང་བར་འགྱུར་རོ་ཞེས་གསུངས་པ་ཡིན་ནོ། །གནས་
སྐབས་གང་ལ་བདག་གིར་བྱེད་པ་ཡོངས་སུ་རྫོགས་པར་འགྱུར་ཞེ་ན། དེའི་ཕྱིར་ལྕོགས་པ་ཉིད་ན་དེ་རྫོགས་སོ་ཞེས་བྱ་བ་སྨྲས་ཏེ། བདག་གིར་བྱ་བའི་དངོས་པོ་རིན་པོ་ཆེ་ལ་སོགས་པ་ལྕོགས་པ་ཉིད་དུ་འགྱུར་ཏེ། ཐོབ་པར་ནུས་པ་ཉིད་དང་ལག་ཏུ་འོང་བར་ནུས་པ་ཉིད་ན་བདག་གིར་བྱ་བ་དེ་ཡོངས་སུ་རྫོགས་པ་ཡིན་ནོ། །དེ་བས་ཕ་ཟད་ན་ནི་ཕྱེད་ཉིད་དོ་ཞེས་བྱ་བ་ནི། ལྕོགས་པ་ཉིད་ཀྱི་གནས་སྐབས་པས་པ་ཟད་ན་འདུག་ན་ནི་བདག་གིར་བྱ་བའི་ཕྱེད་ཉིད་དེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། བདག་གིར་བྱ་བའི་དངོས་པོ་རིན་པོ་ཆེ་ལ་སོགས་པ་ལག་ཏུ་ཐོབ་པར་རུང་བ་ཉིད་ཡིན་ལ་དེ་བདག་གིར་བྱེད་ན་ནི་དངོས་གཞིའོ། །མི་རུང་བ་ཉིད་ལ་བདག་གིར་བྱེད་ན་ནི་ཉེས་བྱས་སོ། །དེ་ཡང་ཐོབ་པའི་གནས་ཞེས་བྱ་བ་ལས་རིག་པར་བྱ་སྟེ། ཐོབ་པའི་གནས་ནས་ས་ལེ་སྦྲམ་གྱི་རྫས་འདུག་པ་བདག་གིར་བྱད་ན་ཞེས་གསུངས་པའི་ཕྱིར་རོ། །ཅི་འདིར་བདག་གིར་བྱེད་པ་ཞེས་བྱ་བ་གཅིག་པུ་རྗེས་སུ་སྒྲུབ་ན་སྤང་བ་འདིར་འགྱུར་རམ་ཞེ་ན། དེའི་ཕྱིར་རང་གི་རུང་བར་མ་བྱས་པ་ཡང་ངོ་ཞེས་བྱ་བ་སྨྲས་ཏེ། རུང་བ་མ་བྱས་པ་ཞེས་བྱ་བ་ནི། དངོས་པོ་གང་ལ་འོག་ནས་འབྱུང་བའི་རུང་བར་བྱས་པ་ཞེས་བྱ་བ་དེ་མ་བྱས་པ་དེ་ནི་རུང་བར་མ་བྱས་པ་སྟེ། རིན་པོ་ཆེ་ལ་སོགས་པའི་དངོས་པོ་རུང་བར་མ་བྱས་པ་དེ་ལ་འོག་ནས་འབྱུང་བའི་རིག་པ་དང༌། རེག་ཏུ་བཅུག་ན་ཞེས་བྱ་བར་སྦྱར་རོ། །དེ་བས་ན་རིན་པོ་ཆེ་ལ་སོགས་པ་རུང་བར་མ་བྱས་པ་ནི་ལྟུང་བའི་བྱེད་པ་པོ་ཉིད་ཡིན་ནོ། །འོག་ནས་འབྱུང་བའི་ཆོ་གས་རུང་བར་བྱས་པ་ནི་བཟུང་ཡང་ཉེས་པ་མེད་དོ། །འདི་ལྟར་གཞན་གྱི་རིན་པོ་ཆེ་ལ་རེག་པ་ལྟུང་བྱེད་འབའ་ཞིག་ཏུ་བསྟན་པས་ལྷག་མ་རང་གི་ནི་སྤང་བའི་ཆོ་གར་མཛད་པ་ཡིན་ཏེ། གཞན་གྱི་ལ་སྤང་བ་མེད་པའི་ཕྱིར་རོ། །འདི་ལྟར་སོ་སོར་ཐར་པའི་མདོ་ལས་རང་གི་ཞེས་མ་སྨོས་མོད་གྱི་འོན་ཀྱང་ཤུགས་ཀྱིས་ན་དེ་ཡིན་པར་མངོན་ནོ། །དེ་ལྟར་ཡང་གཞུང་ནི་ཡང་དགེ་སློང་རང་གི་རིན་པོ་ཆེའམ། རིན་པོ་ཆེར་སྨོས་པ་རང་གི་ལག་གིས་ལེན་ཏམ་ལེན་དུ་བཅུག་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཅི་ཞིག་བྱས་ན་ལྟུང་བར་འགྱུར་ཞེ་ན། དེའི་ཕྱིར་རེག་གམ་རེག་ཏུ་བཅུག་ནའོ་ཞེས་བྱ་བ་སྨྲས་ཏེ། རེག་གམ་ཞེས་བྱ་བ་ནི་རང་གི་ལུས་ཀྱིས་སོ། །རེག་ཏུ་བཅུག་ནའོ་ཞེས་བྱ་བ་ནི་
གཞན་ནོ། །ཚིག་གིས་ཀྱང་བྱེད་ལ་སྤྲིང་ཡིག་ལ་སོགས་པས་ཀྱང་བྱེད་ན་དེ་དག་ལས་འདིར་རེག་པ་གང་ཡིན་པར་རིག་པར་བྱ་ཞེ་ན། དེའི་ཕྱིར་གང་ཡང་རུང་བས་སོ་ཞེས་བྱ་བ་སྨྲས་ཏེ། རྣམ་པ་གང་ཡང་རུང་བས་འདི་ནས་ལོང་ལ་འདིར་ཆུག་ཅིག་ཅེས་བྱ་བ་ལྟ་བུ་དམིགས་ཀྱིས་མ་སྨྲས་པར་ཕྱོགས་གཅིག་པར་རེག་ན་ཡང་སྤང་བར་འགྱུར་རོ། །སྙད་གདགས་སུ་རུང་བའི་ཟངས་མ་ལ་ནི་ཉེས་བྱས་སོ་ཞེས་བྱ་བ་ནི། དོང་ཙེ་དང་པ་ཎ་ལ་སོགས་པའི་མིང་དུ་བྱས་ཤིང་མཚན་བྱས་པའི་ཟངས་མ་གང་ཡིན་པ་དེ་ནི་སྙད་གདགས་སུ་རུང་བ་ཞེས་བྱ་སྟེ། དེ་ལ་རང་གིས་རེག་གམ། གཞན་རེག་ཏུ་བཅུག་ན་ཉེས་བྱས་སོ། །གཞན་ལ་ནི་ལྟུང་བ་མེད་དོ་ཞེས་བྱ་བ་ནི། སྙད་གདགས་སུ་རུང་བའི་ཟངས་མ་མཚན་བྱས་པ་ལས་གཞན་པའི་ཟངས་མ་ལའོ་ཞེས་བྱ་བའི་ཐ་ཚིག་གོ །ཞ་ཉེ་དང་ཁྲོ་ཆུ་དང་རོ་ཉེ་དང་ལྕགས་དག་ལ་ཡང་ངོ་ཞེས་བྱ་བ་ནི། ཞ་ཉེ་ལ་སོགས་པ་ནི་རིན་པོ་ཆེ་མ་ཡིན་པའི་ཕྱིར་ཞེས་བྱ་བའི་ཐ་ཚིག་སྟེ། དེ་དག་ལ་རེག་གམ་རེག་ཏུ་བཅུག་ན་ལྟུང་བ་མེད་དོ། །དགེ་ཚུལ་གཉིས་ཀྱིས་ཀྱང་ངོ་ཞེས་བྱ་བ་ནི། དགེ་ཚུལ་དང་དགེ་ཚུལ་མ་གཉིས་གྱིས་རིན་པོ་ཆེ་ལ་རེག་གམ་རེག་ཏུ་བཅུག་ན་ལྟུང་བ་མེད་དོ། །རང་གི་རུང་བ་མ་བྱས་པ་ཡང་ངོ་ཞེས་སྨྲས་ན་རུང་བ་གང་མ་ཡིན་པའི་རུང་བ་དེ་ཅི་འདྲ་བ་ཞིག་ཅེ་ན། དེའི་ཕྱིར་སྦྱིན་བདག་བདག་པོ་ཉིད་དུ་མོས་སུ་གཞུག་པ་དང༌། ཞལ་ཏ་བྱེད་པ་བདག་པོ་ཉིད་དུ་ཁས་ལན་དུ་གཞུག་པ་དང༌། བྱིན་གྱིས་བརླབས་པ་ཞེས་བྱ་བ་ནི་རུང་བ་དག་ཡིན་ནོ་ཞེས་བྱ་བ་སྨྲས་ཏེ། དགེ་སློང་དག་དེ་ལྟ་བས་ན་ཆོས་གོས་གྱི་རིན་དག་རྙེད་པ་ན་བླང་བར་བྱ་ཞིང་བླངས་ནས་ཀྱང་སྦྱིན་བདག་དེ་ཉིད་ལ་ཡིད་བརྟན་ཏེ་བཅང་བར་བྱ་བར་ངས་རྗེས་སུ་གནང་ངོ་ཞེས་གསུངས་པ་དེ་ནི་རུང་བ་དང་པོ་ཡིན་ནོ། །དེ་བཞིན་དུ་དགེ་སློང་རྣམས་ཀྱིས་ཇི་སྲིད་འཚོའི་བར་དུ་རུང་བ་མ་ཡིན་པའི་དངོས་པོ་གང་ཅུང་ཟད་ཇི་སྙེད་པ་དེ་ཐམས་ཅད་སྦྱིན་བདག་སྤྲོ་བར་བྱ་ཞིང་དེའི་མིང་གིས་བཅད་བར་བྱའོ་ཞེས་གསུངས་པ་དེ་ནི་རུང་བ་གཉིས་པ་ཡིན་ནོ། །རུང་བ་གསུམ་པ་ནི་བྱིན་གྱིས་བརླབས་པ་ཞེས་བྱ་བ་ཡིན་པར་རིག་པར་བྱའོ། །དེ་ལྟར་ཡང་དགེ་སློང་བྲམ་ཟེའི་བུ་མོས་ཞུས་པའི་མདོ་ལས་དགེ་སློང་རྣམས་ཀྱིས་ཆོས་གོས་ཀྱི་རིན་གར་རྙེད་པར་གྱུར་ལ་སྦྱིན་བདག་མེད་པར་
གྱུར་ནས་དགེ་སློང་དག་འགྱོད་བར་གྱུར་ཏེ། མི་ལེན་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། བླང་བར་བྱ་ཞིང་བླངས་ནས་ཀྱང་དགེ་སློང་གི་མདུན་དུ་འགྲེང་སྟེ་འདི་སྐད་ཅེས། ཚེ་དང་ལྡན་པ་དགོངས་སུ་གསོལ། བདག་དགེ་སློང་མིང་འདི་ཞེས་བྱ་བས་དངོས་པོ་རུང་བམ་ལགས་པ་འདི་རྙེད་དེ། བདག་དགེ་སློང་མིང་འདི་ཞེས་བགྱི་བས་དངོས་པོ་རུང་བ་མ་ལགས་པ་འདི་བྱིན་གྱིས་བརླབ་བོ། །དངོས་པོ་རུང་བ་མ་ལགས་པ་འདིས་དངོས་པོ་རུང་བ་བསྒྲུབ་པར་བགྱིའོ་ཞེས་དེ་སྐད་ལན་གཉིས་ལན་གསུམ་དུ་བརྗོད་པར་བྱ་ཞིང་འགྱོད་པར་ཡང་མི་བྱའོ་ཞེས་གསུངས་པ་ཡིན་ནོ། །དེ་ལྟ་བས་ན་དངོས་པོ་རུང་བ་མ་ཡིན་པ་རུང་བར་བྱས་པ་ལ་རེག་གམ་རེག་ཏུ་བཅུག་ན་ཡང་ལྟུང་བ་མེད་དོ། །དེ་ལ་བདག་ཉིད་ཀྱིས་བདག་གིར་ཡང་མི་བྱ་སྟེ། དེའི་ཕྱིར་སྦྱིན་བདག་ལ་ཡིད་བརྟན་ཏེ་བཅང་བར་བྱའོ་ཞེས་གསུངས་སོ། །གང་ལ་བདག་ཉིད་ཀྱིས་བདག་གིར་བྱེད་པ་ཡོད་པ་དེ་ལ་ནི་རང་གིས་ཀྱང་རེག་པར་མི་བྱ་ལ། གཞན་ཡང་རེག་ཏུ་གཞུག་པར་མི་བྱ་སྟེ། དེ་ལ་རུང་བར་བྱ་བ་གསུམ་ཆར་མི་འཆགས་པའི་ཕྱིར་རོ། །འདི་ལྟར་བདག་གིར་བྱེད་པ་དང་འབྲེལ་བའི་ཕྱིར་རུང་བ་ཉིད་བྱེད་པའི་ཕྱིར་ཏེ། དེ་ལྟར་ན་བྱིན་གྱིས་བརླབ་པའི་སྔགས་ཉིད་ལས་ཀྱང་འདི་སྐད་ཅེས། བདག་གིས་དངོས་པོ་རུང་བ་མ་ལགས་པ་འདིས་རུང་བ་བསྒྲུབ་པར་བགྱིའོ་ཞེས་གསུངས་པའི་ཕྱིར་རོ། །དངོས་པོ་རུང་བ་ལ་བདག་གིར་བྱའི་མི་རུང་བ་ལ་ནི་མ་ཡིན་ནོ། །རུང་བ་བརྗོད་པའི་ཕྱིར་རེག་ན་ལྟུང་བར་ཡང་མི་འགྱུར་རོ། །བཅོམ་ལྡན་འདས་ཀྱིས་གཞན་གྱི་རྫས་ལ་ནི་རུང་བ་རྣམ་པ་གསུམ་མ་བསྟན་ཏེ། དེས་ན་དེ་ལ་རེག་གམ་རེག་ཏུ་བཅུག་ན་ལྟུང་བྱེད་འབའ་ཞིག་ཏུ་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་བདག་ཉིད་ཀྱིས་བདག་གིར་བྱ་བ་སྤང་བའི་ཕྱིར་རུང་བ་གསུམ་ལས་རུང་བ་གང་ཡང་རུང་བས་རུང་བར་བྱེད་ན་དེའི་ཚེ་དངོས་པོ་རུང་བ་མ་ཡིན་པ་ལ་དགོས་པའི་དབང་གིས་རེག་གམ་རེག་ཏུ་བཅུག་ན་ལྟུང་བར་མི་འགྱུར་རོ། །ཇི་སྟེ་རུང་བ་གསུམ་ཡང་བྱེད་བཞིན་དུ་རྫས་དེ་ལ་བདག་ཉིད་ཀྱིས་བདག་གིར་བྱེད་པ་དང་རྗེས་སུ་འབྲེལ་ན་ནི། དེ་ལྟ་ན་ཡང་ཐམས་ཅད་དུ་ལྟུང་བར་འགྱུར་
བ་ཁོ་ན་ཡིན་ནོ། །ཆོས་དང་ལྡན་པའི་དོན་བདོག་པའི་རྐྱེན་ལས་གཞན་པ་ལ་མི་འཆགས་སོ་ཞེས་བྱ་བ་ལ། ཆོས་དང་ལྡན་པ་ཞེས་བྱ་བ་ནི། ཆོས་ལས་མི་འབྲལ་བ་སྟེ། རང་གི་ལྷུང་བཟེད་དང་ཆོས་གོས་དང་སྨན་ལ་སོགས་པ་ཡོ་བྱད་དག་གོ །དེ་ནི་ཆོས་དང་ལྡན་པ་ཡང་ཡིན་ལ་དོན་ཡང་ཡིན་པས་ཆོས་དང་ལྡན་པའི་དོན་ཏོ། །དེ་ནི་ཆོས་དང་ལྡན་པའི་དོན་ཀྱང་ཡིན་ལ། མི་བདོག་པ་ཡང་ཡིན་པས་ཆོས་དང་ལྡན་པའི་དོན་མི་བདོག་པའོ། །དེའི་རྐྱེན་ཞེས་བྱ་བ་ནི། དེ་བསྒྲུབ་པའི་རྫས་གང་ཡིན་པ་སྟེ། རྫས་ཅི་ཙམ་གྱིས་ཆོས་དང་ལྡན་པའི་དོན་ཏེ་འགྲུབ་པར་འགྱུར་བའོ། །རྫས་དེ་ལ་ནི་རུང་བ་དེ་དག་འཆགས་སོ། །རྐྱེན་དེ་ལས་གཞན་པ་ལ་ཞེས་བྱ་བ་ནི་ཆོས་དང་ལྡན་པའི་དོན་བདོག་གོ །དེའི་རྐྱེན་དུ་མི་དགོས་པའི་རྫས་གཞན་ལ་སྟེ། དེ་ལ་ནི་བྱིན་གྱིས་བརླབ་པ་དེ་དག་མི་འཆགས་སོ། །དེའི་ཕྱིར་ཆོས་དང་ལྡན་པའི་དོན་མི་བདོག་པའི་རྐྱེན་ལས་གཞན་པ་ལ་མི་འཆགས་སོ་ཞེས་སྨྲས་སོ། །འདི་སྐད་བསྟན་ཏེ། གལ་ཏེ་ཆོས་དང་ལྡན་པའི་དོན་བདོག་པ་ཁོ་ན་ཡིན་ནམ། ཡང་ན་ཆོས་དང་ལྡན་པའི་དོན་ལྷུང་བཟེད་དང་ཆོས་གོས་ལ་སོགས་པ་དེ་དག་གི་རྐྱེན་དུ་གྱུར་པའི་རྫས་གང་ཡིན་པ་དེ་ཡང་བདོག་ལ། ཆོས་ཀྱི་དོན་གྱི་རྐྱེན་མ་ཡིན་པར་བྱིན་གྱིས་རློབ་པར་བྱེད་ན་དེའི་ཚེ་རུང་བ་དེ་དག་མི་འཆགས་སོ། །དེ་ལྟ་བས་ན་ཆོས་དང་ལྡན་པ་ཞེས་བྱ་བའི་རྐྱེན་ལས་གཞན་པ་ལ་གལ་ཏེ་རུང་བ་གསུམ་བྱེད་དུ་ཟིན་ཀྱང་དགེ་སློང་དེས་དེ་ལ་རེག་གམ་རེག་ཏུ་བཅུག་ན་སྤང་བའི་ལྟུང་བྱེད་དུ་འགྱུར་རོ། །རྐྱེན་ཞེས་སྨོས་པའི་ལུང་ནི་འདི་ཡིན་པར་རིག་པར་བྱ་སྟེ། ཆོས་གོས་ཀྱི་རིན་དག་རྙེད་པ་ན་སྦྱིན་བདག་ལ་ཡིད་བརྟན་ཏེ་བཅང་བར་བྱའོ་ཞེས་གསུངས་པ་ཡིན་ནོ། །ཆོས་གོས་ལ་སོགས་པའི་ཆེད་དུ་སེམས་པར་བྱེད་པ་ནི་ཆོས་གོས་ལ་སོགས་པའི་རིན་ཏེ། དེ་དག་གིས་ཆོས་གོས་ལ་སོགས་པ་སེམས་པར་བྱེད། སྒྲུབ་པར་བྱེད་ཅེས་བྱ་བའི་ཐ་ཚིག་གོ །བདག་པོ་རིང་བ་ཉིད་ཡིན་ན་ཡང་ཉམས་པ་མེད་དོ་ཞེས་བྱ་བ་ནི། བདག་པོ་སྦྱིན་བདག་གམ་ཞལ་ཏ་བྱེད་པ་རིང་བ་ཉིད་ཡིན་ཏེ་ཡུལ་ཐག་རིང་བ་ཉིད་དུ་སོང་ཞིང་ཡུལ་གྱིས་བསྐལ་པ་ཉིད་ཡིན་ན་ཡང་རུང་བ་དག་ལ་ཉེས་པ་མེད་དོ། །བདག་ཉིད་ཀྱི་
དོན་དུ་བཟའ་བ་བྱེད་དུ་གཞུག་ཏུ་རུང་ངོ་ཞེས་བྱ་བ་ནི། བདག་ཉིད་ཀྱི་དོན་དུ་ཞེས་བྱ་བ་བདག་ཉིད་ཀྱི་ཕྱིར་ཟན་སྦྱོར་དུ་གཞུག་ཏུ་རུང་ངོ༌། །འདི་སྐད་བསྟན་ཏེ། གལ་ཏེ་དགེ་སློང་གིས་རང་ལ་མཁོ་བའི་ཕྱིར་ལུས་འཚོ་བར་བྱ་བའི་དོན་དུ་ཟོང་དེས་བཟའ་བཏུང་སྦྱོར་དུ་བཅུག་ན་ཡང་དེ་ལྟོ་འདུན་ཆེ་བར་མི་འགྱུར་ཏེ། འདི་ལྟར་རིགས་པ་ཡིན་ནོ། །ཕྲན་ཚེགས་དག་ལས་ཀྱང་དེ་ཉིད་དང་པོར་བྱས་ནས་ལས་བྱས་པའོ་ཞེས་བྱ་བའི་བར་དུ་གསུངས་པ་དག་འདིར་བཏུས་སོ། །ལམ་བརྒྱགས་ནི་རིན་པོ་ཆེ་མན་ཆད་ལས་སོ་ཞེས་འགོ་ནས་འབྱུང་བ་འབའ་ཞིག་ཕྲན་ཚེགས་སུ་མ་གཏོགས་ཏེ། གཞུང་དེ་ནི་རྣམ་པར་འབྱེད་པ་དག་ལས་སྣང་བའི་ཕྱིར་རོ། །དེ་བྱེད་པ་ལ་དབུལ་བའི་ཕྱིར་ཀཱ་ར་ཥཱ་པ་ཎ་བླང་བར་ཡང་ངོ་ཞེས་བྱ་བ་ལ། དེ་བྱེད་པ་ལ་ཞེས་བྱ་བ་ནི་བཟའ་བ་བྱེད་པ་ལ་སྟེ་བྱེན་པོ་ལ་སོགས་པའི་གང་ཟག་པའོ། །དབུལ་བའི་ཕྱིར་ཞེས་བྱ་བ་ནི། བཟའ་བ་བྱེད་དུ་གཞུག་པའི་དོན་དུ་རིན་དུ་དབུལ་བའི་ཕྱིར་རོ། །དེའི་ཕྱིར་ཀཱ་ར་ཥཱ་པ་ཎ་བླང་བ་ཡང་རུང་ངོ༌། །དེའི་ཕྱིར་ཀཱ་ར་ཥཱ་པ་ཎ་བླང་པ་ལ་སོགས་པ་ཡང་རུང་བ་མེད་པར་ནི་བླང་བར་མི་བྱའོ། །དེ་ལྟར་ཡང་ཡོན་བདག་ལ་ཡིད་བརྟན་ཏེ་ཀཱ་ར་ཥཱ་པ་ཎ་བླངས་ནས་ཅི་འདོད་པར་ལོངས་སྤྱད་པར་བྱའོ་ཞེས་གསུངས་བ་ཡིན་ནོ། །སྦྱིན་བདག་ལ་ཡིད་བརྟན་ཏེ་ཞེས་བྱ་བའི་ཚིག་ལས་ཐམས་ཅད་དུ་ཡང་རུང་བ་བྱས་ཏེ་བླང་བར་བྱ་བ་ཡིན་ནོ། །རུང་བ་མེད་པར་བདག་ཉིད་ལ་སོགས་པའི་དགོས་པའི་དབང་ཁོ་ནས་ནི་བླང་བར་མི་བྱའོ། །ལམ་བརྒྱགས་ནི་རིན་པོ་ཆེ་མན་ཆད་ལས་སོ་ཞེས་བྱ་བ་ནི། ལམ་བརྒྱགས་ནི་རིན་པོ་ཆེ་མན་ཆད་རིན་པོ་ཆེའི་མཐར་ཐུག་པ་ལས་བསྐུར་དུ་རུང་ངོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་དག་གིས་ལམ་བརྒྱགས་ཇི་ལྟ་བུ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་ལམ་བརྒྱགས་ནི་བཟའ་བ་ལྔ་དང་བཟའ་བར་སྨོས་པ་ལྔ་དང་རིན་བ་ཆེར་སྨོས་པ་ལྔའོ། །བཟའ་བ་ལྔ་གང་ཞེ་ན། འབྲས་ཆན་དང་ཟན་དྲོན་དང་ཤ་དང་ཉ་ཤ་དང་སྣུམ་ཁུར་རོ། །བཟའ་བར་སྨོས་པ་གང་ཞེ་ན། ཅི་ཚེ་དང་ཁྲེ་རྒོད་དང་རྒྱ་སྲན་དང་བྲ་རྒོད་དང་ཁྲེའོ། །རིན་པོ་ཆེ་ལྔ་གང་ཞེ་ན། གསེར་དང་དངུལ་དང༌། བཻ་ཌཱུཪྻ་དང༌། ཤེལ་དང༌། མུ་ཏིག་གོ །རིན་
པོ་ཆེར་སྨོས་པ་ལྔ་གང་ཞེ་ན། ཞ་ཉེ་དང༌། ཟངས་དང༌། རོ་ཉེ་དང༌། ཁྲོ་ཆུ་དང་ལྕགས་སོ་ཞེས་གསུངས་པ་ཡིན་ནོ། །མེའི་དོན་དུ་མེ་ཤེལ་ཉེ་བར་གཞག་པར་བྱའོ་ཞེས་བྱ་བ་ནི། དགེ་སློང་གིས་མེའི་དོན་དུ་རིན་པོ་ཆེ་མེ་ཤེལ་བཅང་བར་བྱ་སྟེ། འདི་ཡང་ཆོས་དང་ལྡན་པའི་དགོས་པ་ཡིན་ནོ། །དེ་མ་སྦས་པར་གཞག་པར་མི་བྱའོ་ཞེས་བྱ་བ་ནི་མེ་ཤེལ་དེ་མ་སྦས་མ་བསྲུངས་པར་གཞག་པར་མི་བྱ་བའོ། །མ་བྱིན་པར་ལེན་པ་ལ་བསྟན་པར་མི་བྱའོ་ཞེས་བྱ་བ་ནི། མེ་ཤེལ་དེ་རྐུན་པོ་ལ་བསྟན་པར་མི་བྱའོ། །དེའི་འབྲས་བུ་ཕྱུང་ནས་དེ་ལ་སྦྱིན་པར་བྱའོ་ཞེས་བྱ་བ་ནི། མེ་ཤེལ་དེའི་འབྲས་བུ་མེ་ཞེས་བྱ་བ་དེ་ཕྱུང་ནས་རྐུན་པོ་དེ་ལ་མེ་སྦྱིན་པར་བྱའོ། །ཆུའི་དོན་དུ་ཆུ་ཤེལ་ཡང་ངོ་ཞེས་བྱ་བ་ནི། དགེ་སློང་གིས་ཆུའི་དོན་དུ་ཆུ་ཤེལ་ཡང་ཉེ་བར་གཞག་པར་བྱ་བ་སྟེ། ཡང་ངོ་ཞེས་བྱ་བའི་སྒྲ་ནི་ཉེ་བར་གཞག་པར་བྱའོ་ཞེས་བྱ་བའི་རྗེས་བསྙགས་པའི་ཕྱིར་རོ། །བསྲུང་བའི་ཆོག་འདི་འདྲའོ་ཞེས་བྱ་བ་ནི། བསྲུང་བའི་ཆོག་སྦ་བའི་རྣམ་པ་ནི་དེ་མ་སྦས་བར་གཞག་པར་མི་བྱའོ་ཞེས་བྱ་བ་ལ་སོགས་པ་མེ་ཤེལ་སྦ་བའི་ཆོ་ག་སྔར་བསྟན་པ་དང་འདྲ་བར་རིག་པར་བྱའོ། །ཡོ་བྱད་རྗེས་སུ་གནང་བར་རིན་པོ་ཆེ་བདག་གིར་བྱ་བའི་ཤན་བསྲེ་བར་མི་བྱ་བ་ཉིད་དོ་ཞེས་བྱ་བ་ནི། རྒྱ་ལ་སོགས་པའི་འཚོག་ཆས་ནི་ཡོ་བྱད་དེ། དེ་ནི་རྗེས་སུ་གནང་བ་ཡིན་ནོ། །དེ་རྗེས་སུ་གནང་བའི་ཁོངས་སུ་རིན་པོ་ཆེ་བདག་གིར་བྱ་བའི་ཤན་བསྲེ་བ་གཞུག་པར་མི་བྱ་བ་ཉིད་དོ། །འདི་སྐད་བསྟན་ཏེ། འདི་ལྟར་བཅོམ་ལྡན་འདས་ཀྱིས་རྒྱལ་སོགས་པའི་ཡོ་བྱད་འཆད་བར་རྗེས་སུ་གནང་མོད་ཀྱི། འོན་ཀྱང་དགེ་སློང་གིས་རིན་པོ་ཆེ་ལས་བྱས་པའི་རྒྱ་ལ་སོགས་པ་བདག་གིར་མི་བྱའོ། །རྒྱ་ལ་སོགས་པ་རྗེས་སུ་གནང་བའི་རྫས་ནི་ངེས་པར་གསུངས་པས་ནི་དེའི་ཕྱིར་མདོ་འདི་བྱས་སོ། །དེ་ལྟར་ཡང་ཕྲན་ཚེགས་དག་ལས་བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་དགེ་སློང་དག་གིས་རྒྱ་བཅང་བ་དང༌། དགེ་སློང་དག་གིས་ཁབ་དང་སྨན་ཕོར་དང༌། ཕུལ་བའི་བཏུང་ཕོར་བཅང་བར་རྗེས་སུ་གནང་ངོ༌། །དགེ་སློང་གིས་གསེར་དང༌། དངུལ་དང༌། བཻ་ཌཱུཪྻ་དང༌། ཤེལ་ལས་བྱས་པའི་རྒྱ་བཅང་བར་མི་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །གླེང་གཞི་དག་ལས་
ཀྱང་བཅོམ་ལྡན་འདས་ཀྱིས་དུད་པའི་སྨན་གཅེའུ་བཅང་བར་བྱའོ་ཞེས་གསུངས་པ་དང༌། ཞུས་པ་ཇི་ལྟ་བུ་ཞིག་བཅང་བར་བགྱི། བཀའ་སྩལ་པ། ཉེ་བ་འཁོར་རིན་པོ་ཆེ་ལས་བྱས་པ་མ་གཏོགས་སོ། །སྣར་བླུགས་པའི་སྤྱད་དང༌། ཕུལ་བའི་བཏུང་ཕོར་དང༌། ཁབ་དང་ཁབ་རལ་དང། མིག་སྨན་གྱི་གབ་ཚེ་དང༌། སྨན་ཕོར་དང༌། རྐང་རྟེན་དང༌། ཁྲེའུ་དང༌། སྨན་གྱི་ནལ་ཟེ་བཅང་བར་བྱའོ། །ལྕགས་ཀྱི་གར་བུ་ལ་ལུ་གུ་རྒྱུད་གདགས་པར་བྱའོ་ཞེས་གསུངས་པ་ཐམས་ཅད་ལ་ཡང་ཇི་ལྟ་བུ་ཞིག་བཅང་བར་བགྱི་ཞེས་བྱ་བ་ནས། ཇི་ལྟ་བུ་ཞིག་གདགས་པར་བགྱི་ཞེས་བྱ་བའི་བར་དུ་ཞུས་པ་དང༌། ཉེ་བ་འཁོར་རིན་པོ་ཆེ་ལས་བྱས་པ་མ་གཏོགས་སོ་ཞེས་བཀའ་སྩལ་པ་དེ་ལྟ་བུའི་ཚིག་ཡོད་དོ། །ར་གན་དང་ཟངས་དང་འཁར་བ་དང་ཤིང་གི་ལྷུང་བཟེད་བདག་གིར་མི་བྱའོ་ཞེས་བྱ་བ་ནི། ལྷུང་བཟེད་ཅེས་བྱ་བའི་སྒྲ་ར་གན་ལ་སོགས་པ་སོ་སོ་དང་སྦྱར་ཏེ། ར་གན་གྱི་ལྷུང་བཟེད་བདག་གིར་མི་བྱའོ་ཞེས་བྱ་བ་ལ་སོགས་པར་སྦྱར་རོ། །དེ་དག་བདག་གིར་བྱས་པའམ་གཞན་ཡང་རུང་སྟེ། གལ་ཏེ་ཡོངས་སུ་སྤྱད་དགོས་པར་གྱུར་ན་སྨན་ཕོར་གྱིས་ཡོངས་སུ་སྤྱད་པས་སོ་ཞེས་བྱ་བ་ལ། དེ་དག་བདག་གིར་བྱས་པའམ་ཞེས་བྱ་བ་ནི། ར་གན་ལ་སོགས་པའི་ལྷུང་བཟེད་དེ་དག་བསྙེན་པར་རྫོགས་པའི་གནས་སྐབས་ཀྱི་སྔོན་རོལ་བསྙེན་པར་མ་རྫོགས་པའི་ཚེ་བདག་གིར་བྱས་པའོ། །གཞན་ཡང་རུང་སྟེ་ཞེས་བྱ་བ་ནི། བདག་གིར་མ་བྱས་པ་གཞན་དང་འབྲེལ་བ་དག་གོ །གལ་ཏེ་ཡོངས་སུ་སྤྱད་དགོས་པར་གྱུར་ན་ཞེས་བྱ་བ་ནི། དེ་ལྟ་བུའི་རྐྱེན་ཅིག་བྱུང་བར་གྱུར་ནའོ། །སྨན་ཕོར་གྱིས་ཡོངས་སུ་སྤྱད་པས་སོ་ཞེས་བྱ་བ་ནི། དེ་ལྟ་བུའི་རྐྱེན་བྱུང་ནར་གནས་སོགས་པའི་ལྷུང་བཟེད་བདག་གིར་བྱས་པ་དང་མ་བྱས་པ་དེ་དག་སྨན་ཕོར་དུ་བསྔོས་ཏེ། དེ་དག་གིས་བཟའ་བ་དང་བཏུང་བ་དག་ཀྱང་ཡོངས་སུ་ལོངས་སྤྱད་པར་བྱའི། ར་གན་ལ་སོགས་པའི་ལྷུང་བཟེད་ཐམས་ཅད་ཀྱིས་ཐམས་ཅད་དུ་སྤང་བར་བྱ་བ་ནི་མ་ཡིན་ནོ། །བྱིན་གྱིས་མ་བརླབས་པའི་ལྷུང་བཟེད་དང་འདྲ་བར་བསོད་སྙོམས་ལ་སོགས་པ་ལ་བསྐུར་བར་ནི་མི་བྱའོ། །མདོ་སྔ་མ་ཤོས་ཀྱི་ལུང་ནི་འདི་ཡིན་ཏེ། ཉེ་བར་མ་བཞག་པ་དག་ནི་ཉེ་བར་གཞག་པར་མི་བྱའོ་ཞེས་གསུངས་
པའོ། །མདོ་ཕྱི་མ་ཤོས་ཀྱི་ལུང་ནི་འདི་ཡིན་ཏེ། ཉེ་བར་གཞག་པ་དག་ནི་སྨན་ཕོར་གྱིས་ཡོངས་སུ་སྤྱད་པས་ཡོངས་སུ་ལོངས་སྤྱོད་པར་བྱའོ་ཞེས་གསུངས་པ་ཡིན་ནོ། །ལྷུང་བཟེད་ཀྱི་ཞར་ལ་འདི་བརྗོད་དེ། བྱིན་གྱིས་བརླབ་ཏུ་རུང་བ་ནི་གཉིས་ཏེ། ལྕགས་ལས་བྱས་པ་དང་ས་ལས་བྱས་པའོ་ཞེས་བྱ་བ་ནི། ལྷུང་བཟེད་བྱིན་གྱིས་བརླབ་ཏུ་རུང་བ་ནི་རྣམ་པ་གཉིས་ཁོ་ན་སྟེ། ལྕགས་ལས་བྱས་པ་དང༌། ས་ལས་བྱས་པའོ། །རིན་པོ་ཆེ་བདག་གིར་བྱས་ནའོ་ཞེས་འདི་ལྟར་བསྟན་པའི་རིན་པོ་ཆེ་གང་ཡིན་པ་བསྟན་པར་འདོད་ནས། ནོར་བུ་དང༌། མུ་ཏིག་དང། བཻ་ཌཱུཪྻ་དང༌། མན་ཤེལ་དཀར་པོ་དང༌། བྱི་རུ་དང༌། དངུལ་དང༌། གསེར་དང༌། རྡོའི་སྙིང་པོ་དང༌། སྤུག་དང༌། དམར་པོ་དང༌། གཡས་སུ་འཁྱིལ་པ་ལ་སོགས་པ་ནི་རིན་པོ་ཆེའོ་ཞེས་བྱ་བ་སྨྲས་ཏེ། ནོར་བུ་ཞེས་སྨོས་པས་ནི་ཆུ་ཤེལ་དང༌། མེ་ཤེལ་དང༌། ཤེལ་དག་འཕངས་སོ། །ནོར་བུར་གྱུར་པའི་ཁབ་ལོང་ཡང་འཕངས་ཏེ། རྡོ་བར་གྱུར་བའི་ཁབ་ལོང་ནི་རིན་པོ་ཆེ་དག་མ་ཡིན་ཏེ། དེ་ལ་རིན་པོ་ཆེ་ཉིད་མེད་པའི་ཕྱིར་རོ། །དངུལ་ཞེས་བྱ་བ་ནི་དངུལ་སྐྱའོ། །གསེར་ཞེས་བྱ་བ་ནིས་ལེ་སྦྲམ་མོ། །སོ་སོར་ཐར་པའི་མདོ་ལས་དེ་གཉིས་འབའ་ཞིག་སྨོས་ཏེ། ཡང་དགེ་སློང་གང་རང་གི་ལག་གིས་གསེར་དང་དངུལ་ལེན་ཏམ་ལེན་དུ་འཇུག་ན་ཞེས་གསུངས་པ་གང་ཡིན་པ་དེ་ནི་དཔེ་ཙམ་ཡིན་པར་རིག་པར་བྱ་སྟེ། རྣམ་པར་འབྱེད་པ་གཞན་ལས་ནོར་བུ་ལ་སོགས་པ་དག་ལེན་ཏམ་ལེན་དུ་བཅུག་ན་ཡང་སྤང་བའི་ལྟུང་བྱེད་དོ་ཞེས་གསུངས་པའི་ཕྱིར་རོ། །དེ་ལྟར་ཡང་ནོར་བུ་དང༌། མུ་ཏིག་དང༌། བཻ་ཌཱུཪྻ་ལ་སོགས་པ་ལེན་ན་སྤང་བའི་ལྟུང་བྱེད་དོ་ཞེས་གསུངས་སོ། །རིན་པོ་ཆེ་མ་ཡིན་པ་ཟངས་མ་ལ་སོགས་པ་ལས་སྙད་གདགས་སུ་རུང་བའི་མངོན་མཚན་ཅན་དག་ལེན་པ་ནི་ཉེས་བྱས་སུ་རིག་པར་བྱའོ། །སོགས་བ་ཞེས་སྨོས་པས་ནི། སངས་རྒྱས་ཀྱི་སྐུ་གདུང་ལ་སོགས་པ་དག་བསྡུའོ། །སྙད་གདགས་སུ་མི་རུང་བ་ལ་ནི་ན་སྨད་པ་ཉིད་དོ་ཞེས་བྱ་བ་ལ། སྙད་གདགས་སུ་མི་རུང་བ་ཞེས་བྱ་བ་ནི། ཉོ་ཚོང་བྱར་མི་རུང་བ་སྟེ། ནོར་བུ་ལ་སོགས་པའི་དོན་སྙད་གདགས་སུ་མི་རུང་བ་ཉོ་ཚོང་བྱར་མི་རུང་བ་དེ་ལེན་ཏམ། ལེན་དུ་བཅུག་ན་དེ་གཉི་ག་ལ་ལྟུང་བ་ན་སྨད་པ་ཉིད་དེ།
ཉེས་བྱས་སོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་ནོར་བུ་ལ་སོགས་པའི་དངོས་པོ་འགའ་ཞིག་གིས་མེ་ལ་སོགས་པ་ཉམས་པར་བྱས་པར་གྱུར་ནས་དེ་ཉོ་ཚོང་བྱར་མི་ནུས་པ་གང་ཡིན་པ་དེ་ལེན་ཏམ། ལེན་དུ་བཅུག་ན་ཉེས་བྱས་སོ། །དཔེར་ན་པདྨ་རཱ་ག་ལ་སོགས་པ་རིན་པོ་ཆེ་ཉིད་དུ་མ་གྱུར་པ་དང་འདྲའོ། །དེ་ཉིད་བསླབ་པའི་གཞི་འོག་མ་མངོན་མཚན་ཅན་གྱིས་སྤྱོད་པ་ཞེས་བྱ་བ་ལ་ཡང་འདྲ་བར་བསྟན་པར་བྱ་བའི་ཕྱིར། འོག་མ་ལ་ཡང་ངོ་ཞེས་བྱ་བ་སྨྲས་ཏེ། དེ་ལ་ཡང་སྙད་གདགས་སུ་མི་རུང་བ་ལ་ནི་ན་སྨད་དོ་ཞེས་བྱ་བ་ཐ་ཚིག་གོ །སྙད་གདགས་སུ་མི་རུང་བ་ཞེས་བྱ་བ་དེ་ཇི་ལྟ་བུ་ཞིག་ཡིན་པར་རིག་པར་བྱ་ཞེ་ན། དེའི་ཕྱིར་དེ་ནི་གས་པ་དང༌། ཆག་པ་དང༌། དུམ་བུ་དང༌། ཚིག་པ་དང༌། སྔོན་མ་སྤྱང་པ་དང༌། མ་བྱས་པ་དང༌། མཚན་དང་མི་ལྡན་པ་དང༌། བཅོས་པའོ་ཞེས་བྱ་བ་སྨྲས་ཏེ། དེ་ནི་ཞེས་བྱ་བ་ནི། སྙད་གདགས་སུ་མི་རུང་བའོ། །གས་པ་ཞེས་བྱ་བ་ནི། སེར་ག་བྱུང་བ་སྟེ། འབྱར་ཀྱང་རུང་མ་འབྱར་ཀྱང་རུང་བའོ། །ཆག་པ་ཞེས་བྱ་བ་ནི་བུ་ག་བྱུང་བའོ། །དུམ་བུ་ཞེས་བྱ་བ་ནི་ཕྱོགས་གཅིག་མེད་པའོ། །ཚིག་པ་ཞེས་བྱ་བ་ནི། རིན་པོ་ཆེ་དེ་མེ་དང་ཕྲད་པས་རིན་པོ་ཆེ་མ་ཡིན་པ་ཉིད་དུ་གྱུར་ཏེ། ཉོ་ཚོང་བྱར་མི་རུང་བར་གྱུར་པ་གང་ཡིན་པར་ཤེས་པར་བྱའོ། །པ་ཎ་ནི་མངོན་མཚན་ཅན་ལྷག་མ་ཡོད་པ་ཙམ་དུ་ཉམས་པ་ཡིན་གྱི། ཐམས་ཅད་ཀྱི་ཐམས་ཅད་དུ་ཐལ་བར་གྱུར་པ་ནི་མ་ཡིན་ཏེ། དེ་ལེན་པ་ལ་ཉེས་པ་མེད་པའི་ཕྱིར་རོ། །སྔོན་མ་སྤྱད་པ་ཞེས་བྱ་བ་ནི། སྔོན་ཉོ་ཚོང་བྱས་པ་ཙམ་ཡང་མི་དྲན་པའི་མངོན་མཚན་གང་ཡིན་པ་སྟེ། མངོན་མཚན་ཅན་གང་ལ་ཉོ་ཚོང་བྱས་པའི་དུས་ཀྱང་འཇིག་རྟེན་ན་མི་གྲག་པའོ། །མ་བྱས་པ་ཞེས་བྱ་བ་ནི། མངོན་མཚན་ཅན་གང་ལ་མཚན་དུ་མ་བྱས་པ་ཉིད་དོ། །མཚན་དང་མི་ལྡན་པ་ཞེས་བྱ་བ་ནི། དྲུད་པ་ལ་སོགས་པའི་ཉེས་པས་མཚན་དང་བྲལ་བར་གྱུར་པའོ། །བཅོས་པ་ཞེས་བྱ་བ་ནི། ས་དང་རྩྭ་དང་རྡོ་བ་ལ་སོགས་པ་དག་ལས་ནོར་བུ་དང༌། དོང་ཙེ་དང༌། མངོན་མཚན་ཅན་དང༌། རྒྱན་དང༌། འགྲོ་ན་བུ་ལ་སོགས་པའི་རྣམ་པར་གཞག་པ་བྱས་པའོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་གིས་གསེར་གྱི་ཕྲེང་བ་ལ་རེག་ན་སྤང་བའི་ལྟུང་བྱེད་དོ། །དགེ་
སློང་གིས་སོག་མའི་ཕྲེང་བ་ལ་རེག་ན་ཉེས་བྱས་སོ་ཞེས་གསུངས་པ་ཡིན་ནོ། །གསེར་དང་དངུལ་ལ་རེག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་མངོན་མཚན་ཅན་གྱིས་སྤྱོད་པའི་སྤང་བ་བརྗོད་པར་བྱ་སྟེ། གང་ལ་ལྟུང་བ་འདི་འབྱུང་བར་འགྱུར་ཞེ་ན། དེའི་ཕྱིར་རྙེད་པ་འདོད་པ་ལ་ལྟུང་བ་འབྱུང་ངོ་ཞེས་བྱ་བ་སྨྲས་ཏེ། ཁེ་སྤོགས་འདོད་པ་ཉིད་ཀྱིས་རྙེད་པ་བསྒྲུབ་ཅིང་འདོད་པ་དང་བསྡུ་བ་གང་ཡིན་པ་དེ་ནི་རྙེད་པ་འདོད་པ་སྟེ། རྙེད་པ་འདོད་པའི་ལྟུང་བ་འབྱིན་པ་པོ་དེ་ལ་ལྟུང་བ་འདི་རྣམ་པར་གཞག་གོ །དེའི་ཕྱིར་འདིར་ནི་སྐྱེད་ཕྱིན་ན་རྙེད་པ་ཡིན་གྱི་ཐོབ་པ་ཙམ་གྱིས་མ་ཡིན་ནོ། །འདི་སྐད་བསྟན་ཏེ། སྐྱེད་འདོད་པས་སྐྱེད་ཕྱིན་པ་ལ་མངོན་མཚན་ཅན་གྱིས་སྤྱོད་པའི་སྤང་བ་འདི་འབྱུང་ངོ༌། །གལ་ཏེ་བདག་ཉིད་ཀྱི་དོན་དུ་རྙེད་པ་འདོད་པ་ཉིད་ཡིན་ན་ནི་སྦྱོར་བ་ལ་ཉེས་བྱས་སུ་འགྱུར་རོ། །གཞན་གྱི་དོན་དུ་ན་ནི་དངོས་གཞིའི་གནས་ལ་ཉེས་བྱས་སུ་འགྱུར་ལ། སྦྱོར་བ་ལ་ཉེས་བྱས་ཕྲ་མོར་འགྱུར་རོ་ཞེས་བྱ་བའི་ཐ་ཚིག་གོ །དངོས་གཞིའི་ལྟུང་བ་ཇི་ལྟར་འབྱུང་ཞེ་ན། དེའི་ཕྱིར་ཕ་རོལ་པོ་ཁྱིམ་པ་ཉིད་དང༌། ཉེ་དུ་མ་ཡིན་པ་ཉིད་ཡིན་ན་དངོས་གཞིའོ་ཞེས་བྱ་བ་སྨྲས་ཏེ། ཕ་རོལ་པོ་གང་དང་ལྷན་ཅིག་ཏུ་མངོན་མཚན་ཅན་གྱིས་སྤྱོད་པ་འདི་བྱེད་པ་དེ་གལ་ཏེ་ཁྱིམ་པ་ཉིད་དང་ཉེ་དུ་མ་ཡིན་ན། ཕ་རོལ་པོ་ཁྱིམ་པ་ཉིད་དང༌། ཉེ་དུ་མ་ཡིན་པ་ཉིད་ཀྱི་ཡུལ་ལས་དེའི་ཚེ་དངོས་གཞིའི་ལྟུང་བར་འགྱུར་རོ། །འདིར་གཞུང་ནི་ཞུ་བ་ལས་ཉེ་དུ་དང་ལྷན་ཅིག་སྤྱོད་ན་ཉེས་བྱས་སོ། །དེས་ཉེ་དུ་མ་ཡིན་པ་རྣམས་དང་སྤྱོད་ན་དངོས་གཞིའོ་ཞེས་གསུངས་པ་ཡིན་ནོ། །མངོན་མཚན་ཅན་གྱིས་སྤྱོད་པ་གང་ལ་དངོས་གཞིའི་ལྟུང་བར་འགྱུར་ཞེ་ན། དེའི་ཕྱིར་སྐྱེད་ཕྱིན་ནའོ་ཞེས་བྱ་བ་སྨྲས་ཏེ། གང་གི་ཚེ་སྐྱེད་ཕྱིན་པ་དེའི་ཚེ་ན་དངོས་གཞིའི་ལྟུང་བར་འགྱུར་རོ། །སྐྱེད་མེད་ན་ནི་སྦྱོར་བ་ཙམ་དུ་ཟད་དོ། །འདིར་གཞུང་ནི་སྐྱེད་ཕྱིན་ན་དངོས་གཞིའི་ལྟུང་བར་འགྱུར་རོ་ཞེས་གསུངས་པ་ཡིན་ནོ། །བཤགས་པའི་དུས་ན་ཡང་སྐྱེད་ཉིད་སྤང་བར་འོས་པ་ཉིད་ཡིན་གྱི། རྩ་བར་གྱུར་པའི་རྫས་ནི་མ་ཡིན་ནོ། །གལ་ཏེ་རྩ་བ་བས་སྔོན་ནམ་ཕྱིས་སྐྱེད་ཐོབ་པ་དེ་ལ་འདི་རྣམ་པར་གཞག་གོ །གང་གི་ཚེ་སྐྱེད་དང་རྩ་བ་གཉིས་དུས་གཅིག་ཏུ་
བྱུང་ན་དེའི་ཚེ་ཆ་གང་ལ་ལྟུང་བ་འབྱིན་པ་པོའི་གང་ཟག་སྐྱེད་དུ་གྱུར་པ་ཉིད་དུ་ལྷག་པར་ཆགས་པ་སྐྱེ་བ་དེའི་ཚེ་དེ་ཉིད་སྤང་བར་བྱ་བ་ཡིན་ནོ། །འདིར་གཞུང་ནི་ཇི་སྲིད་དུ་རྙེད་པ་བདག་གིར་མི་བྱེད་པ་དེ་སྲིད་དུ་ཉེས་བྱས་སོ། །རྙེད་པ་བདག་གིར་བྱེད་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །ད་ནི་མཚན་ཉིད་འདྲ་བར་བྱ་བ་བསྟན་པའི་ཕྱིར། འོག་མ་ལ་ཡང་ངོ་ཞེས་བྱ་བ་སྨྲས་ཏེ། འདིའི་འོག་མར་གྱུར་པའི་བསླབ་པའི་གཞི་ཉོ་ཚོང་བྱེད་པ་ཞེས་བྱ་བ་ལ་སོགས་པ་ལ་ཡང་རྙེད་པ་འདོད་པ་ཁོ་ན་ལ་ལྟུང་བ་འབྱུང་བར་བལྟ་བར་བྱའོ། །དེ་ལ་ཡང་ཕ་རོལ་པོ་ཁྱིམ་པ་ཉིད་དང༌། ཉེ་དུ་མ་ཡིན་པ་ཉིད་དང༌། སྐྱེད་ཕྱིན་ན་དངོས་གཞིའི་ལྟུང་བར་འགྱུར་ལ། དེ་ཉིད་སྤང་བར་འོས་པ་ཉིད་ཡིན་ནོ། །སྐྱེད་ཕྱིན་ནའོ་ཞེས་སྨྲས་ན། སྐྱེད་ཕྱིན་པ་ནི་ཚོང་པ་ལ་སོགས་པ་ལས་ཀྱང་འབྱུང་ལ། ཁེ་སྤོགས་འདོད་པ་ཉིད་ལས་ཀྱང་འབྱུང་ན། དེའི་ཕྱིར་མངོན་མཚན་ཅན་གྱིས་སྤྱོད་པའི་སྤང་བ་འདི་ལ་སྐྱེད་ག་ལས་ཕྱིན་ན། དངོས་གཞིའི་ལྟུང་བར་འགྱུར་ཞེ་ན། དེའི་ཕྱིར་པ་ཎའམ། རིན་པོ་ཆེས་སྤྱོད་པ་ལས་སོ་ཞེས་བྱ་བ་སྨྲས་ཏེ། པ་ཎ་དང་རིན་པོ་ཆེ་དག་གིས་རྙེད་པའི་དོན་དུ་སྐྱེད་བཀྱེ་ཞིང་སྤྱོད་པ་གང་ཡིན་པ་དེ་ལས་སྐྱེད་གང་ཕྱིན་པ་དེ་ལ་མངོན་མཚན་ཅན་གྱིས་སྤྱོད་པའི་སྤང་བར་འགྱུར་རོ། །གལ་ཏེ་དགེ་སློང་གིས་མངོན་མཚན་ཅན་གྱིས་སྤྱོད་པའི་ཕྱིར་རིན་པོ་ཆེ་ལ་སོགས་པ་ལ་རེག་གམ་རེག་ཏུ་འཇུག་ན་དེ་ལྟ་ན་ནི། རེག་གམ་རེག་ཏུ་འཇུག་པ་ལས་བྱུང་བའི་སྤང་བའི་ལྟུང་བྱེད་སྔ་མས་བསྡུས་པ་ཡིན་པར་རིག་པར་བྱའི། འདིར་གཏོགས་པ་ནི་མ་ཡིན་ནོ། །དགེ་སློང་གང་གིས་ཉོ་ཚོང་བྱས་ནས་སྐྱེད་པར་བྱེད་པ་དང༌། གང་གིས་ཉོ་ཚོང་མ་བྱས་པར་སྔར་ཐོབ་པ་ལ་སོགས་པ་དག་སྐྱེད་པར་བྱེད་པ་དེ་གཉི་ག་ལ་ཡང་རྙེད་པ་གྲུབ་ན་དངོས་གཞིའི་ཁ་ན་མ་ཐོ་བར་འགྱུར་རོ། །གལ་ཏེ་རྙེད་པ་མ་གྲུབ་ན་ནི་དེའི་ཚེ་སྦྱོར་བ་ཞེས་བྱ་བའི་ཉེས་བྱས་སུ་འགྱུར་ཏེ། འདི་ལ་ཉོ་ཚོང་ནི་ཡན་ལག་མ་ཡིན་པའི་ཕྱིར་རོ། །དེ་ལྟ་བས་ན་ཉོ་ཚོང་མ་བྱས་པར་སྔ་མ་བསྐྱེད་པ་ཙམ་ཁོ་ན་ལས་རྙེད་པ་གྲུབ་ན་ཡང་དེར་གཏོགས་པའི་ཁ་ན་མ་ཐོ་བར་འགྱུར་རོ། །སྦྱོར་བ་ལ་ནི་གཅིག་པ་ཉིད་དོ་ཞེས་བྱ་བ་ནི། སྐྱེད་གྲུབ་པ་བས་མདུན་རོལ་དུ་དགེ་སློང་གིས་རྙེད་པ་བསྒྲུབ་པའི་
ཕྱིར་བཙལ་བ་གང་ཆུད་ཟད་བྱེད་ན་བཙལ་བ་དེ་ཐམས་ཅད་ནི་གཅིག་པ་ཉིད་དོ། །དེ་ལྟར་ཡང་འདིར་གཞུང་ནི་ཇི་སྲིད་དུ་རྙེད་པ་སྒྲུབ་པར་མི་བྱེད་ཀྱི་བར་དུ་ནི་ཉེས་བྱས་སོ། །རྙེད་པ་གྲུབ་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །ཀུན་དགའ་ར་བ་པའམ། དགེ་བསྙེན་དག་ཡོད་ན་བསྐོ་བས་དཀོན་མཆོག་གི་དོན་དུ་བསྐྱེད་པར་བྱའོ་ཞེས་བྱ་བ་ནི། ཀུན་དགའ་ར་བ་པའམ། དགེ་བསྙེན་དག་ཡོད་ན་དེ་གཉིས་བསྐོ་བས་དཀོན་མཆོག་གསུམ་གྱི་ཆེད་དུ་པ་ཎ་དང༌། རིན་པོ་ཆེ་ལ་སོགས་པ་དག་བསྐྱེད་པའི་ཆེད་དུ་སྐྱེད་དགྱེ་བར་བྱའོ། །འདི་སྐད་བསྟན་ཏེ། གཙུག་ལག་ཁང་གང་ན་གཙུག་ལག་ཁང་དང་འབྲེལ་བའི་མི་ཀུན་དགའ་རབ་བའམ། དགེ་བསྙེན་དག་ཡོད་ན་དེར་དགེ་སློང་དག་གིས་འདི་ལྟ་སྟེ། དཀོན་མཆོག་གསུམ་གྱི་དོན་དུ་རིན་པོ་ཆེ་ལ་སོགས་པ་དེ་དག་ཉིད་བསྐྱེད་པའི་ཆེད་དུ་དེ་གཉིས་བསྐོ་ཞིང་སྐྱེད་དགྱེ་བར་བྱའོ། །འདིར་གཞུང་ནི་མ་མོ་ལས་འདི་ལྟ་སྟེ། ཡངས་པ་ཅན་གྱི་ཚོང་པ་རྣམས་ཀྱིས། བཅོམ་ལྡན་འདས་ཀྱི་མཆོད་རྟེན་ཡང་བྱེད་དུ་བཅུག །གཙང་ཁང་བྱུར་བུ་ཡང་བྱེད་དུ་བཅུག་ནས། དགེ་སློང་རྣམས་ལ་མཆོད་རྟེན་དང་གཙང་ཁང་བྱུར་བུ་དེ་དག་ཞིག་རལ་དུ་མི་འགྱུར་བའི་ཡོ་བྱད་རྗེས་སུ་གཏད་པ་ན་དགེ་སློང་དག་འགྱོད་ཅིང་ལེན་པར་མི་བྱེད་ནས། སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་བ། ཀུན་དགའ་ར་བའམ། དགེ་བསྙེན་དག་གིས་མཆོད་རྟེན་ཞིག་རལ་དུ་མི་འགྱུར་བའི་ཡོ་བྱད་བླང་བར་བྱ་ཞིང་བླངས་ནས་ཀྱང་བསྐྱེད་པར་བྱ་སྟེ། དེ་ལས་རྙེད་པ་ཇི་ཙམ་འབྱུང་བ་དེས་མཆོད་རྟེན་ལ་མཆོད་པར་བྱ་བར་ངས་རྗེས་སུ་གནང་ངོ་ཞེས་གསུངས་པ་ཡིན་ནོ། །གཏའ་ཉི་རིར་བླང་བར་བྱའོ་ཞེས་བྱ་བ་ནི། སངས་རྒྱས་ལ་སོགས་པའི་དཀོར་ཆུང་མི་ཟ་བར་བྱ་བའི་ཕྱིར་གཏའ་ཉི་རིར་བླངས་ནས་དེ་བསྐྱེད་དུ་གཏང་བར་བྱའོ། །ཇི་ལྟར་བསྐྱེད་དུ་གཏང་བར་བྱ་ཞེ་ན། དེའི་ཕྱིར་དཔང་པོ་དང་ལོ་དང་ཟླ་བ་དང་ཉི་མ་དང་དགེ་འདུན་གྱི་གནས་བརྟན་དང༌། དགེ་སྐོས་དང༌། ལེན་པ་པོ་དང༌། རྫས་དང་སྐྱེད་རྣམས་དཔང་རྒྱར་བྲིས་ནས་སོ་ཞེས་བྱ་བ་སྨྲས་ཏེ། དཔང་པོ་དང༌། ལོ་དང་ཟླ་བ་ལ་སོགས་པ་སྐྱེད་ཀྱི་མཐར་ཐུག་པ་དག་དབང་
རྒྱར་བྲིས་ནས་ཕྱིས་རྫས་དེ་སྦྱིན་པར་བྱའོ། །རྒྱུས་ཤེས་པས་དེ་གཞན་ལ་ཡང་ཁོང་དུ་ཆུད་པར་བྱའོ་ཞེས་བྱ་བ་ལ། རྒྱུས་ཤེས་པ་ཞེས་བྱ་བ་ནི། དགེ་སློང་གང་གིས་གཏའ་དང་བུ་ལོན་ལ་སོགས་པའི་འབྱུང་བའི་མཐའ་དེ་ཤེས་ཤིང་རྫས་དེ་ཙམ་ཞིག་གང་ཟག་ལེན་པ་པོ་ཆེ་གེ་མོ་ཞིག་ལ་གཏད་དེ་དེས་དུས་ཆེ་གེ་མོ་ཞིག་ན་སྐྱེད་འདི་ཙམ་ཞིག་དང་བཅས་ཏེ་འབུལ་བར་ཤེས་པ་སྟེ། དེ་ནི་རྒྱུས་ཤེས་པ་ཞེས་བྱ་སྟེ་དེས་སོ། །དེ་ཞེས་བྱ་བ་ནི་གཏའ་དང་བུ་ལོན་བདའ་བའི་རྒྱུས་དེའོ། །གཞན་ལ་ཡང་ཞེས་བྱ་བ་ནི། གང་གིས་བྱུང་བའི་མཐའ་དེའི་རྒྱུས་མི་ཤེས་པའི་དགེ་སློང་གཞན་དག་ལ་ཡང་ངོ༌། །ཁོང་དུ་ཆུད་པར་བྱའོ་ཞེས་བྱ་བ་ནི། དགེ་སློང་རྒྱུས་ཤེས་པ་དེས་བྱུང་བའི་མཐའ་དེ་དགེ་སློང་རྒྱུས་མི་ཤེས་པ་གཞན་དག་ལ་སྐབས་སུ་བབ་པ་ན་ཐམས་ཅད་བསྙད་ཅིང་ཁོང་དུ་ཆུད་པར་བྱ་བའོ། །འདིར་གཞུང་ནི་དགེ་སློང་གཉུག་མར་གནས་པ་དག་གིས་དགེ་སློང་གློ་བུར་དུ་ལྷགས་པ་དག་ལ་གང་ཟག་ཆེ་གེ་མོ་ཞིག་ལས་ཟླ་བ་རེ་རེ་ཞིང་འདི་ཙམ་ཞིག་མནོད་དོ་ཞེས་བརྗོད་པར་བྱའོ་ཞེས་གསུངས་པ་ཡིན་ནོ། །མངོན་མཚན་ཅན་གྱིས་སྤྱོད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ཉོ་ཚོང་བྱེད་པའི་སྤང་བ་བརྗོད་པར་བྱ་སྟེ། སྔར་བསྟན་མ་ཐག་པའི་བསླབ་པའི་གཞིར་སྐྱེད་ཕྱིན་ན་དངོས་གཞིའོ་ཞེས་སྨྲས་ན་གང་གིས་ཡིན་པ་མ་བསྟན་པས། དེའི་ཕྱིར་གཞན་གྱིས་སོ་ཞེས་བྱ་བ་སྨྲས་ཏེ། སྤྱོད་པ་ཞེས་བྱ་བར་སྦྱར་རོ། །པ་ཎ་དང་རིན་པོ་ཆེ་དག་ལས་གཞན་པ་གཞལ་བར་བྱ་བ་ལ་སོགས་པའི་སྤྱོད་པ་དག་ལས་སྐྱེད་ཕྱིན་ན་ལྟུང་བ་འདིར་འགྱུར་རོ། །ཡང་ན་གཞན་གྱིས་སོ་ཞེས་བྱ་བ་ནི་བསྐྱེད་པའི་ཁ་སྤོགས་འདོད་པ་ལས་གཞན་པ་ཉོ་ཚོང་གི་སྤྱོད་པ་ལས་སྐྱེད་ཕྱིན་ན་ལྟུང་བ་འདིར་འགྱུར་བའོ། །དེ་ལྟ་བས་ན་སྤང་བ་འདི་གསུམ་གྱི་ཡུལ་ལ་བྱེ་བྲག་ནི་འདི་ཡིན་པར་རིག་པར་བྱ་སྟེ། དང་པོ་ནི་རིན་པོ་ཆེ་ལ་སོགས་པ་ལ་རིག་པ་ལས་སོ། །གཉིས་པ་ནི་ཁེ་སྤོགས་འདོད་པ་ཉིད་ཀྱིས་པ་ཎ་དང་རིན་པོ་ཆེ་ལ་སོགས་པ་སྤྱོད་པ་ལས་སོ། །གསུམ་པ་ནི་གང་ཡང་རུང་བས་རྙེད་པ་འདོད་ཅིང་ཉོ་ཚང་ལ་སོགས་པས་སྤྱོད་པ་ལས་སྐྱེད་ཕྱིན་ནའོ། །དགེ་འདུན་གྱི་བཤོས་ཀྱི་ཕྱིར་དགེ་འདུན་གྱི་འབྲས་རིན་གྱིས་ཉོ་བ་ལ་སྦྱིན་པར་བྱའོ་ཞེས་བྱ་བ་ནི། དགེ་འདུན་གྱི་བཤོས་ཀྱི་ཕྱིར་ཞེས་བྱ་བ་དགེ་འདུན་གྱི་འཚོ་
བའི་ཕྱིར། དགེ་འདུན་གྱི་འབྲས་མ་དྲུས་པ་རིན་གྱིས་ཉོ་འདོད་པའི་གང་ཟག་ལ་སྦྱིན་པར་བྱ་སྟེ། ཉོར་ཕྱིན་ཡང་དེ་ལ་ཉོ་ཚོང་གི་ཉེས་པ་མེད་དོ། །འབྲས་ཞེས་སྨོས་པ་ནི་མཚོན་པ་ཙམ་སྟེ། ཏིལ་དང་མོན་སྲན་སྡེའུ་ལ་སོགས་པ་འབྲུ་ཐམས་ཅད་དང་རས་བལ་ལ་སོགས་པ་རྫས་ཐམས་ཅད་ལ་ཡང་དེ་བཞིན་དུ་རིག་པར་བྱའོ། །གལ་ཏེ་དེ་ཉིད་ཀྱི་ན་ཐེབ་དང་བཅས་པར་རོ་ཞེས་བྱ་བ་ནི། དགེ་འདུན་མངའ་བའི་འབྲས་ལ་སོགས་པ་ལས་གལ་ཏེ་དེ་ཉིད་ཀྱི་དགེ་འདུན་གྱི་བཤོས་ཀྱི་ཕྱིར་ཉོ་བར་བྱེད་ན་དེ་ལ་ཐེབ་དང་བཅས་པར་བསྐྱེད་དེ། སྦྱིན་པར་བྱའི་རིན་ཐང་བསྙམས་ཏེ་སྦྱིན་པར་མི་བྱའོ། །ཟད་ན་དགེ་འདུན་གྱིས་ཉོ་བར་བྱའོ་ཞེས་བྱ་བ་ནི། དགེ་འདུན་གྱི་འབྲས་ལ་སོགས་པ་ཟད་ན། དགེ་འདུན་གྱིས་ཀྱང་འབྲས་ལ་སོགས་པ་གཞན་ལས་ཉོ་བར་བྱ་བའོ། །སར་པ་ཡང་ངོ་ཞེས་བྱ་བ་ནི་དགེ་འདུན་གྱིས་འབྲས་ལ་སོགས་པ་འབྲུ་སར་བ་ཡང་ཉོ་བར་བྱའོ།། །། བམ་བོ་ཉི་ཤུ་པ། གལ་ཏེ་སྲོག་ཆགས་མེད་ན་རྙིང་བ་བཙོང་བར་བྱའོ་ཞེས་བྱ་བ་ནི། འབྲས་ལ་སོགས་པ་རྙིང་པ་དག་ལ་གལ་ཏེ་སྲོག་ཆགས་མེད་ན་རྙིང་པ་དེ་བཙོངས་ནས་སར་པ་ཉོ་བར་བྱའོ། །རིན་ཐང་མི་གདབ་བོ་ཞེས་བྱ་བ་ནི། རྫས་འདིའི་རིན་ཐང་འདི་ཙམ་མོ་ཞེས་དེ་རང་གིས་གདབ་པར་མི་བྱའོ་ཞེས་བྱ་བའི་ཐ་ཚིག་གོ །ཁྱིམ་པའི་ཉོ་ཚོང་དག་ཏུ་ལག་གཞུག་པར་མི་བྱའོ་ཞེས་བྱ་བ་ནི། ཁྱིམ་པའི་ཉོ་ཚོང་བྱེད་པ་དག་གི་ནང་དུ་དགེ་སློང་གིས་ལག་གཞུག་པར་མི་བྱ་སྟེ། དགེ་སློང་དེས་དེ་དག་ཏུ་གཏོགས་འདོད་དང་བར་ཚངས་མི་བྱ་བའོ། །རང་གི་ཆོས་གོས་ལ་སོགས་པ་དག་ཇི་ལྟར་ཉོ་བར་བྱ་ཞེ་ན། དེའི་ཕྱིར་ཁྱིམ་པ་ཉོར་གཞུག་གོ་ཞེས་བྱ་བ་སྨྲས་ཏེ། ཆོས་གོས་ལ་སོགས་པ་དག་ཁྱིམ་པ་ཉོར་གཞུག་པར་བྱའོ། །གལ་ཏེ་ཁྱིམ་པ་མེད་ན་དེའི་ཚེ་སུས་ཉོ་བར་བྱ་ཞེ་ན། དེའི་ཕྱིར་མེད་ན་ལན་གསུམ་གྱི་བར་དུ་ཚིག་བརྗོད་པར་བྱའོ་ཞེས་བྱ་བ་སྨྲས་ཏེ། གལ་ཏེ་ཁྱིམ་པ་མེད་ན་དེའི་ཚེ་དགེ་སློང་དེས་རང་གི་རྫས་དེའི་རིན་ཐང་ངེས་པར་གཅད་པར་བྱ་ཞིང་ལན་གསུམ་གྱི་བར་དུ་དྲི་བའི་ཚིག་བརྗོད་པར་བྱ་སྟེ། རིན་འདི་ཙམ་གྱིས་བྱིན་ཅིག་ཅེས་ལན་གསུམ་བརྗོད་པར་བྱའོ་ཞེས་བྱ་བའི་ཐ་ཚིག་གོ །ཟོང་ལ་རྩིག་པ་ནི་གཞན་གྱི་དོན་དུ་ཡང་མི་བྱ་སྟེ། དཀོན་མཆོག་གསུམ་ནི་མ་
གཏོགས་སོ་ཞེས་བྱ་བ་ལ། ཟོང་ཞེས་བྱ་བ་ནི། ཀ་ཀ་ནི་དང་བ་རཱ་ཏ་ཀ་ལ་སོགས་པའོ། །རྩེག་པ་ཞེས་བྱ་བ་ནི། ཉོ་བར་བྱེད་པའི་ཚེ་ན་ཅུང་ཟད་ཅུང་ཟད་བསྐྱེད་པ་དང་འཚོང་བར་བྱེད་པའི་ཚེ་ན་ཅུང་ཟད་ཅུང་ཟད་འབྲི་བར་བྱེད་པ་སྟེ། དེ་ནི་ཟོང་ལ་རྩེག་པ་བྱེད་པ་ཡིན་པར་གྲགས་སོ། །དེའི་ཕྱིར་དེ་ནི་གཞན་གྱི་དོན་དུ་ཡང་མི་བྱ་ན་རང་གི་དོན་དུ་ལྟ་སྨོས་ཀྱང་ཅི་དགོས། དེ་ལྟར་ན་སྤྱིར་བཏང་བ་བྱས་ནས། དམིགས་ཀྱིས་བསལ་བ་བསྟན་པའི་ཕྱིར། དཀོན་མཆོག་གསུམ་ནི་མ་གཏོགས་སོ་ཞེས་བྱ་བ་སྨྲས་ཏེ། དཀོན་མཆོག་གསུམ་གྱི་དོན་དུ་ནི་ཟོང་ལ་བརྩེག་པར་བྱའོ་ཞེས་བྱ་བའི་ཐ་ཚིག་གོ །གཏའ་གཞུག་པར་མི་བྱའོ་ཞེས་བྱ་བ་ལ། གཏའ་ཞེས་བྱ་བ་ནི། གལ་ཏེ་དེ་ཁོ་ན་ལྟ་བུ་མ་ཡིན་ན་ངས་ཀཱར་ཥཱ་པ་ཎ་ལྔ་སྦྱིན་པར་བྱའོ་ཞེས་ཡལ་ཟུག་འཁྲས་པ་མ་ཐུབ་སྟེ་ཡལ་བ་ན་ཞྭ་ལ་སོགས་པའི་རྫས་དེའི་གཏར་འཇོག་པ་སྟེ། དེ་ལྟ་བུའི་གཏའ་གཞུག་པར་མི་བྱའོ། །འདིར་གཞུང་ནི་དྲུག་སྡེ་དག་ཡལ་ཟུག་འཁྲ་ཞིང་ལྷུང་བཟེད་ལ་སོགས་པ་གཏར་འཇུད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གི་ཡལ་ཟུག་འཁྲ་ཞིང་གཏའ་གཞུག་པར་མི་བྱའོ། །དགེ་སློང་ཡལ་ཟུག་འཁྲ་ཞིང་གཏའ་འཇུད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དགེ་འདུན་གྱི་སྦྱིན་པར་བྱའོ་ཞེས་སྨྲས་ན། དེ་ལ་ཇི་ལྟར་སྦྱིན་པར་བྱ། སུས་རྗེས་སུ་སྦྱིན་པར་བྱ་ཞེ་ན། དེའི་ཕྱིར་དགེ་འདུན་གྱིས་རྫས་དེ་སྤོགས་པ་ལ་དགེ་འདུན་གྱི་ལས་བྱེད་པ་ལས་གཏད་དོ་ཞེས་བྱ་བ་སྨྲས་ཏེ། དགེ་འདུན་གྱིས་དབྱིག་ལ་སོགས་པའི་རྫས་དེ་ཉོ་བ་ལ་སོགས་པའི་སྤྱོད་པས་དགེ་འདུན་གྱི་རྙེད་པ་བསྒྲུབ་པར་བྱའོ་ཞེས་སྤོགས་བྱེད་ཅིང་འབད་པའི་དགེ་སློང་སྤོགས་པ་ལ་གཏད་པར་བྱའོ། །ཅི་དགེ་འདུན་གྱིས་རང་གི་དབྱིག་ལ་སོགས་པ་སྤོགས་བ་ལ་གཏད་པར་བྱའམ་ཞེ་ན་མ་ཡིན་ཏེ། དེའི་ཕྱིར་དགེ་འདུན་གྱི་ལས་བྱེད་པ་ལ་གཏད་དོ་ཞེས་བྱ་བ་སྨྲས་ཏེ། དགེ་འདུན་གྱི་ལས་བྱེད་པ་ཞེས་བྱ་བ་དམ་གཞག་པ་ལ་སོགས་པ་ལས་སོ། །འདི་སྐད་བསྟན་ཏེ། དགེ་འདུན་མངའ་བདག་ཏུ་གྱུར་པས་དགེ་འདུན་གྱི་ལས་བྱེད་པ་ལ་དགེ་སློང་སྤོགས་པ་འདི་ལ་དབྱིག་ལ་སོགས་པ་ཕོག་ཤིག་ཅེས་བཀའ་སྩལ་བར་བྱ་ཞིང༌། དམ་གཞག་པ་ལ་སོགས་པ་དེས་དགེ་སློང་སྤོགས་པ་
དེ་ལ་དབྱིག་ལ་སོགས་པ་གཏད་པར་བྱ་སྟེ། དགེ་སློང་སྤོགས་པ་དེས་ཆོས་བཞིན་ཚུལ་བཞིན་དུ་དགེ་འདུན་གྱི་རྙེད་པ་བསྒྲུབ་པར་བྱའོ། །འདི་མན་ཆད་ནི་དགེ་སློང་སྤོགས་པ་དེའི་བྱ་བ་བརྗོད་པར་བྱའོ། །རྒན་རབས་རྒན་རབས་དག་ལ་མ་ཞུས་པར་དགེ་འདུན་གྱི་དོན་དུ་བརྩོན་པར་མི་བྱའོ་ཞེས་བྱ་བ་ནི། དགེ་སློང་སྤོགས་པ་དེས་དགེ་སློང་རྒན་རབས་རྒན་རབས་དག་ལ་མ་ཞུས་པར་དགེ་འདུན་གྱི་དོན་དུ་བརྩོན་པར་མི་བྱ་བའོ། །དེའི་ཚིག་ཡི་གེ་བྲི་བའི་དམ་གཞག་ལ་ནན་ཏན་བྱའོ་ཞེས་བྱ་བ་ནི། དགེ་སློང་སྤོགས་པ་དེས་དབྱིག་ལ་སོགས་པ་མནོས་བ་དང༌། བསབ་པ་དེའི་ཚིག་ཡི་གེ་བྲི་བའི་དམ་གཞག་ལ་ནན་ཏན་བྱ་བའོ། །འདི་སྐད་བསྟན་ཏེ། གང་གི་ཚེ་དགེ་སློང་སྤོགས་པ་དེས་དགེ་འདུན་གྱི་ལས་བྱེད་པ་ལས་དབྱིག་ལ་སོགས་པ་མནོས་པ་དེའི་ཚེ་དེ་མ་ཐག་ཁོ་ནར་ཚིག་ཡི་གེར་བྲི་བར་བྱ་སྟེ། དུས་ཆེ་གེ་མོ་ཞིག་གི་ཚེ་དགེ་འདུན་དང་དགེ་འདུན་གྱི་ལས་བྱེད་པ་ཆེ་གེ་མོ་དང༌། ཞལ་ཏ་བྱེད་པ་ཆེ་གེ་མོས་བདག་ལ་རྫས་འདི་ཙམ་ཞིག་གཏད་པ་ལས་བདག་གིས་དུས་ཆེ་གེ་མོའི་ཚེ་རྫས་དེས་དངོས་པོ་འདི་ལྟ་བུ་ཞིག་རིན་ཐང་འདི་ཙམ་གྱིས་ཉོས་ནས་ཡང་དུས་ཆེ་གེ་མོའི་ཚེ་དངོས་པོ་དེ་ཉིད་རིན་ཐང་འདི་ཙམ་ཞིག་ཏུ་བཙོངས་ཏེ། དེ་ལས་སྐྱེད་འདི་ཙམ་ཞིག་བྱུང་ནས། དེ་ཡང་དེའི་ཚེ་དགེ་འདུན་གྱི་ལས་མང་ཆེ་གེ་མོ་ཞིག་ཏུ་སྤྱད་དོ་ཞེས་བྱ་བ་ལ་སོགས་པའི་ཚིག་ཡི་གེར་བྲི་བའི་དམ་གཞག་ལ་དགེ་སློང་དེས་ནན་ཏན་བྱའོ། །དེ་དག་ཐམས་ཅད་ནི་གཞན་གྱི་ཕྱར་ཀའི་སྐབས་བསལ་བའི་ཕྱིར་དང༌། བདག་ཉིད་ཀྱིས་དྲན་པར་བྱ་བའི་ཕྱིར་དང། འགྱེད་བ་མི་བསྐྱེད་པར་བྱ་བའི་ཕྱིར་རོ། །ཉོ་ཚོང་བྱེད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ལྷུང་བཟེད་འཆང་བའི་སྤང་བ་བརྗོད་པར་བྱ་སྟེ། དེའི་ཕྱིར་ལྷུང་བཟེད་ཀྱིའོ་ཞེས་བྱ་བ་སྨྲས་ཏེ། བྱིན་གྱིས་མ་བརླབས་པའིའོ་ཞེས་བྱ་བར་སྦྱར་རོ། །སྔར་འཆང་བའི་སྤང་བའི་སྐབས་སུ་ཞག་བཅུར་གོས་འཆང་བར་གཏོགས་པའི་རྣམ་པ་བསྟན་པ་གང་ཡིན་པ་དེ་ཉིད་འདིར་ཡང་སྦྱར་བར་བྱ་སྟེ། སྔར་གོས་ལའོ་ཞེས་བྱ་བ་སྨོས་པའི་གནས་སུ་འདིར་ལྷུང་བཟེད་ཀྱིའོ་ཞེས་བྱ་བ་གཞུག་པར་བྱའོ། །རྣམ་པར་དབྱེ་བ་ཐ་དད་དུ་ཟིན་ཀྱང་དོན་ལ་ཐ་དད་པ་འགའ་
ཡང་མི་འབྱུང་སྟེ། འདི་ལྟར་འདིར་ནི་ཡུལ་དང་ཡུལ་ཅན་གྱི་འབྲེལ་པས་ལྷུང་བཟེད་ཀྱིའོ་ཞེས་སྨོས་པར་རིག་པར་བྱའོ། །དཔེར་ན་སྔར་གོས་ལའོ་ཞེས་སྨོས་པ་ཡུལ་དུ་གྱུར་པ་ལ་རང་གི་ཉིད་དོ་ཞེས་བྱ་བ་གང་ཡིན་པ་དེ་ཡོད་ནའོ་ཞེས་བྱ་བ་དང་འདྲ་བར་ལྷུང་བཟེད་ཀྱིའོ་ཞེས་བྱ་བ་ཡུལ་དུ་གྱུར་པ་ལ་ཡང་རང་གི་ཉིད་དོ་ཞེས་བྱ་བ་གང་ཡིན་པ་དེ་ཡོད་ནའོ་ཞེས་བྱ་བ་དང་འབྲེལ་བས་ན་དེའི་ཕྱིར་དོན་འདྲ་བ་ཉིད་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལྷུང་བཟེད་བྱིན་གྱིས་མ་བརླབས་པ་དང༌། བྱིན་གྱིས་བརླབས་པ་ཡོད་ནའོ་ཞེས་བྱ་བ་དང༌། རང་གི་ཉིད་དོ་ཞེས་བྱ་བ་དང། ཞག་བཅུར་རྗེས་སུ་ཞུགས་པ་ཉིད་དོ་ཞེས་བྱ་བ་དང༌། གཞན་གྱི་ཉི་མའི་དང་པོ་ལའོ་ཞེས་བྱ་བ་དང༌། འདི་ལ་གཞན་ཡོད་ན་བྱིན་གྱིས་མ་བརླབས་པ་དེའི་ཤན་ཚུན་ཆད་ནས་སོ་ཞེས་བྱ་བར་སྦྱར་ཏེ། ཚིག་དེ་དག་ནི་སྔར་གོས་འཆང་བའི་སྤང་བའི་སྐབས་སུ་བཤད་ཟིན་ཏོ།། །། རབ་ཏུ་བྱུང་བ་ལ་ལྟས་པའི་དོན་ཉིད་དུ་ངེས་པར་བྱས་པ་ནི་སྤངས་པ་ཉིད་ཡིན་ནོ་ཞེས་བྱ་བ་ནི། རབ་ཏུ་བྱུང་བ་ལ་ལྟོས་པའི་དོན་ཉིད་དུ་ལྷུང་བཟེད་བསྔོས་ཤིང་ངེས་པར་བྱས་པ་སྟེ། གལ་ཏེ་དགེ་ཚུལ་ཕྱིས་འབྱུང་བར་འགྱུར་བ་དེ་ལ་སྦྱིན་པར་བྱའོ་ཞེས་རབ་ཏུ་འབྱུང་བ་ལ་ལྟོས་པའི་དོན་ཉིད་དུ་ལྷུང་བཟེད་བསྔོས་ཤིང་ངེས་པར་བྱས་པ་གང་ཡིན་པ་དེ་ནི་སྤངས་པ་ཉིད་ཡིན་པས་དེ་འཆང་ཡང་སྤང་བར་མི་འགྱུར་རོ་ཞེས་བྱ་བའི་ཐ་ཚིག་གོ །སྐྱ་བ་དང་དཀར་བ་དང་ཆེ་བ་རྣམས་ནི་རུང་བ་ཉིད་མ་ཡིན་ནོ་ཞེས་བྱ་བ་ནི། ལྷུང་བཟེད་སྐྱ་བ་དང༌། དཀར་བ་དང་ཆེ་བ་རྣམས་ནི་རུང་བ་ཉིད་མ་ཡིན་ཏེ། རུང་བ་ཉིད་མ་ཡིན་པའི་ཕྱིར་བྱིན་གྱིས་བརླབ་པར་བྱ་བ་མ་ཡིན་པས་དེ་འཆང་ན་ཉེས་བྱས་སོ། །མ་ཚོས་པ་ཡང་ཆུང་དུ་ཉིད་ཡིན་ནོ་ཞེས་བྱ་བ་ལ། རུང་བ་ཉིད་མ་ཡིན་ནོ་ཞེས་བྱ་བའི་རྗེས་བསྙགས་པའི་ཕྱིར། ཡང་ཞེས་བྱ་བའི་སྒྲ་སྨོས་སོ། །ཇི་ལྟར་ལྷུང་བཟེད་ཆུང་དུས་ལྷུང་བཟེད་ཀྱི་བྱ་བ་བྱེད་མི་ནུས་པ་དེ་བཞིན་དུ་ལྷུང་བཟེད་མ་ཚོས་པ་ཡང་དོན་དེ་དང་འདྲ་བས་ཆུང་དུ་ཉིད་ཅས་སྨོས་ཏེ། ལྷུང་བཟེད་ནག་པོར་གྱུར་ཀྱང་མ་ཚོས་ན་ཆུང་དུ་ཉིད་ཀྱང་རུང་བ་མ་ཡིན་པ་ཉིད་ཡིན་པར་རིག་པར་བྱའོ་ཞེས་བྱ་བའི་ཐ་ཚིག་གོ །འདིར་མདོ་དེ་གཉིས་ཀྱི་གཞུང་ནི་ཞུ་བ་ལས་ལྷུང་བཟེད་མ་ཚོས་བ་འཆང་ན་ཉེས་
བྱས་སོ། །དེ་བཞིན་དུ་ལྷུང་བཟེད་སྐྱ་བོ་དང༌། ལྷུང་བཟེད་དཀར་པོ་དང༌། ལྷུང་བཟེད་ཆེན་པོ་འཆང་ན་ཉེས་བྱས་སོ་ཞེས་གསུངས་སོ། །འདི་ལྟར་རྣམ་པར་འབྱེད་པ་ལས་ལྷུང་བཟེད་ཆུང་དུ་འཆང་བ་ལ་ལྷུང་བ་མེད་དོ་ཞེས་བྱ་བ་ལ་སོགས་པ་གསུངས་བ་དེ་ནི་སྨན་ཕོར་དུ་ཡོངས་སུ་སྤྱད་པའི་བསམ་པས་འཆང་ན་དེ་ལ་ལྷུང་བ་མེད་པར་གསུངས་པ་ཡིན་གྱི། འདིར་ནི་ལྷུང་བཟེད་འཆང་བའི་གནས་སྐབས་དང༌། ལྷུང་བཟེད་མེད་པའི་གནས་སྐབས་སུ་དེ་དག་ལྷུང་བཟེད་ཀྱི་དོན་དུ་འཆང་བ་ཉིད་ན་ཉེས་བྱས་སུ་གསུངས་པ་ཡིན་ནོ། །ལྷུང་བཟེད་ཆུང་དུ་གཅིག་ལ་ནི་ཉེས་པ་མེད་དོ་ཞེས་བྱ་བ་ནི། ལྷུང་བཟེད་ཆུང་དུ་གཅིག་ལྷག་པར་འཆང་བ་ལ་ནི་ཉེས་པ་མེད་པ་ཉིད་དུ་རིག་པར་བྱ་སྟེ། འཇིགས་པ་དང་བཅས་པ་ཉིད་དུ་ལྷུང་བཟེད་ཆུང་དུས་ལྗོངས་རྒྱུར་འགྲོ་བར་བྱའོ་ཞེས་གསུངས་པའི་ཕྱིར་ཏེ། གལ་ཏེ་འཆའ་བར་མི་བྱ་ན་ལྷུང་བཟེད་ཆུང་དུས་ཇི་ལྟར་འགྲོ་བར་བྱ་ཞེས་བསམས་པ་ཡིན་ནོ། །ལྷུང་བཟེད་འཆང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་ལྷུང་བཟེད་ལྷག་པ་ཚོལ་བའི་སྤང་བ་བརྗོད་པར་བྱ་སྟེ། ཚོལ་བ་དེ་ཡང་ཆགས་པའི་དབང་ལས་འབྱུང་བས་དེའི་ཕྱིར་སྤྱིར་འདི་བརྗོད་པར་བྱ་སྟེ། ཧ་ཅང་ཆགས་པར་མི་བྱའོ་ཞེས་བྱ་བ་ནི། དགེ་སློང་གིས་དངོས་པོ་ཐམས་ཅད་ལ་ཧ་ཅང་ཆགས་པར་མི་བྱ་བ་སྟེ། ཆགས་པའི་ཕྱིར་འདིར་གཞུང་ནི་གནས་མལ་གྱི་གཞིར་ཉེ་དགའི་སྐབས་སུ་གསུངས་པ་ཡིན་ནོ། །ཡོ་བྱད་ལ་ཧ་ཅང་ལྷག་པར་ཆགས་པར་མི་བྱའོ་ཞེས་བྱ་བ་ནི་ལྷུང་བཟེད་ལ་སོགས་པ་ཡོ་བྱད་ལ་དགེ་སློང་གིས་ཧ་ཅང་ལྷག་པར་ཆགས་པ་ཞེས་བྱ་བ་ནི་ཧ་ཅང་ཞེན་པར་མི་བྱ་བ་སྟེ། འདིར་ཞེན་པར་མི་བྱའོ་ཞེས་བྱ་བའི་ཐ་ཚིག་གོ །གང་ལ་ཞེན་པ་དེ་བཅང་བར་མི་བྱའོ་ཞེས་བྱ་བ་ལ། ཞེན་པ་ཞེས་བྱ་བ་ནི། ལྷག་པར་ཆགས་པ་སྟེ། ལྷུང་བཟེད་ལ་སོགས་པའི་དངོས་པོ་གང་ལ་ལྷག་པར་ཆགས་པ་འབྱུང་བ་དེ་བཅང་པར་མི་བྱ་སྟེ། ཡོངས་སུ་སྤང་བར་བྱའོ་ཞེས་བྱ་བའི་ཐ་ཚིག་གོ །མདོ་དེ་གཉིས་ནི་གོས་ཀྱི་གཞི་ལས་འབྱུང་སྟེ། འདིར་གཞུང་ནི་དེ་ལྟ་བས་ན་དགེ་སློང་གིས་ཡོ་བྱད་ལ་ཧ་ཅང་ལྷག་པར་ཆགས་པ་བསྐྱེད་པར་མི་བྱའོ། །དངོས་པོ་གང་ལ་ཧ་ཅང་ལྷག་པར་ཆགས་པ་འབྱུང་བ་དེ་
ཡོངས་སུ་སྤང་བར་བྱ་སྟེ། ཡོངས་སུ་མི་སྤོང་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ལྷུང་བཟེད་ཀྱང་མེད་ན་བསླང་བར་བྱའོ་ཞེས་བྱ་བ་ནི། སློང་བ་དགག་པའོ་གནས་འབྱུང་བ་བཟློག་པའི་ཕྱིར་ཚིག་འདི་བྱས་ཏེ། ལྷུང་བཟེད་ལ་སོགས་པའི་དངོས་པོ་མེད་ན་ལྷུང་བཟེད་ཀྱང་བསླང་བར་བྱའོ། །ཀྱང་ཞེས་བྱ་བའི་སྒྲས་ནི་ཆོས་གོས་ལ་སོགས་པ་ཡང་མེད་ན་བསླང་བར་བྱ་བ་བསྡུའོ། །དངོས་པོ་གང་ཡོད་ན་ལྷུང་བཟེད་ཚོལ་བ་ལས་འབྱུང་བའི་ཁ་ན་མ་ཐོ་བར་འགྱུར་ཞེ་ན། དེའི་ཕྱིར་དེ་ཡོད་པ་ཉིད་ནའོ་ཞེས་བྱ་བ་སྨྲས་ཏེ། ཚོལ་བར་བྱེད་པ་དེ་ལ་ལྷུང་བཟེད་དེ་ཡོད་པ་ཉིད་དེ་བདོག་པ་ཉིད་ཡིན་ན་ལྟུང་བ་འདི་འབྱུང་ངོ༌། །ཇི་ལྟ་བུ་ཞིག་ཡོད་པ་ཉིད་ན། དེའི་ཕྱིར་ལྷན་པ་བཞི་མན་ཆད་ནས་དེ་དག་རུང་ཞིང་ཡོངས་སུ་སྤྱད་བཟོད་པའོ་ཞེས་བྱ་བ་སྨྲས་ཏེ། ལྷན་པ་བཞི་མན་ཆད་ནས་དེ་དག་རུང་ཞིང་ཞེས་བྱ་བ་ནི། ལྷན་པ་བཞི་མན་ཆད་ནས་གླན་ཟིན་པ་ནས་དེ་དག་གླན་དུ་རུང་བ་སྟེ། ལྷུང་བཟེད་སྐྱོན་མེད་པ་ཚུན་ཆད་ལྷན་པ་བཞི་མན་ཆད་ནས་གླན་པ་དང༌། ལྷན་པ་བཞི་གླན་དུ་རུང་བའི་བར་གྱི་ལྷུང་བཟེད་གང་ཡིན་པ་དེ་ཡོངས་སུ་ལོངས་སྤྱད་པར་བཟོད་པའི་ལྷུང་བཟེད་ཀྱང་ཡིན་པ་དེ་ཡོད་པ་ཉིད་ན་ལྷུང་བཟེད་གཞན་ཚོལ་བར་བྱེད་ན། དེ་ལ་དེ་ལས་བྱུང་བའི་ཁ་ན་མ་ཐོ་བར་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ལྷུང་བཟེད་སྐྱོན་མེད་པ་ཡོངས་སུ་ལོངས་སྤྱད་པར་བཟོད་པས་སྙི་བ་ཉིད་ལ་སོགས་པའི་སྐྱོན་དང་བྲལ་བ་གང་ཡིན་པ་དེ་དང་ལྷན་པ་གཅིག་གམ། གཉིས་སམ། གསུམ་མམ། བཞིས་གླན་ཟིན་པ་གང་དག་ཡིན་པ་དང༌། ལྷན་པ་གཅིག་གམ། གཉིས་སམ། གསུམ་མམ། བཞིས་གླན་དུ་རུང་ཞིང་བྱེད་དུ་གཞག་ནུས་པ་གང་དག་ཡིན་པ་དེ་དག་གི་ནང་ནས་ལྷུང་བཟེད་ཡོངས་སུ་ལོངས་སྤྱད་པར་བཟོད་པ་གང་ཡང་རུང་བ་ཞིག་ཡོད་ཅིང་བདོག་བཞིན་དུ་ལྷུང་བཟེད་གཞན་ཚོལ་བར་བྱེད་ན། དེ་ལ་དེ་ལས་བྱུང་བ་ཁ་ན་མ་ཐོ་བར་འགྱུར་རོ། །ད་ནི་འདི་བརྗོད་པར་བྱ་སྟེ། ལྷུང་བཟེད་དེ་ཡོད་པ་ཉིད་ན་ཅི་ཞིག་ལྟག་པར་སྤྱད་ན་ཁ་ན་ཐོ་བ་ཅི་འདྲ་བར་འགྱུར་ཞེ་ན། དེའི་ཕྱིར་ཁྱིམ་པ་ཉེ་དུ་མ་ཡིན་པ་ལས་བསླང་བས་ཡོངས་སུ་བཙལ་ནའོ་ཞེས་བྱ་བ་སྨྲས་ཏེ། ཁྱིམ་པ་ཉེ་དུ་མ་ཡིན་པ་ལས་བསླངས་ཏེ་ཡོངས་སུ་
བཙལ་ན་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གང་ལས་ལྷུང་བཟེད་ཡོངས་སུ་ཚོལ་བར་བྱེད་པ་དེ་གལ་ཏེ་ཁྱིམ་པ་ཡང་ཡིན་ལ་ཉེ་དུ་མ་ཡིན་པ་ཡང་མ་ཡིན་ཞིང༌། དེ་ལས་ངག་གི་རྣམ་པར་རིག་བྱེད་ཀྱིས་བསླང་བས་ལྷུང་བཟེད་བཙལ་ཏེ་ཐོབ་ན་དེ་ལས་བྱུང་བའི་ཁ་ན་མ་ཐོ་བར་འགྱུར་རོ། །དེ་ཉིད་བསླབ་པའི་གཞི་གཞན་ལ་ཡང་འདྲ་བར་བསྟན་པའི་ཕྱིར། དེ་གཉིས་ནི་འོག་མ་གཉིས་ལ་ཡང་ངོ་ཞེས་བྱ་བ་སྨྲས་ཏེ། འདིའི་འོག་མ་བསླབ་པའི་གཞི་གཉིས་པོ་གང་དག་ཡིན་པ་དེ་དག་ལ་ཡང་ཉེ་དུ་མ་ཡིན་པ་དང༌། ཁྱིམ་པ་ཉིད་ཅེས་བྱ་བ་འདི་གཉིས་རིག་པར་བྱའོ་ཞེས་བྱ་བའི་ཐ་ཚིག་གོ །འོག་མ་གཉིས་ལ་ཡང་ངོ་ཞེས་སྤྱིར་བསྟན་པ་དེའི་བྱེ་བྲག་སྤྱིར་བསྟན་པའི་ཕྱིར། ཐག་པ་དང་སྦྱིན་པ་དང་གཞན་དག་ལའོ་ཞེས་བྱ་བ་སྨྲས་ཏེ། ཐག་པ་དང༌། སྦྱིན་པ་དང༌། གཞན་ནི་ཐག་པ་དང༌། སྦྱིན་པ་དང༌། གཞན་དག་སྟེ། དེ་དག་ཉེ་དུ་མ་ཡིན་པ་དང་ཁྱིམ་པ་དག་ལའོ། །འདི་ལྟར་གཙུག་ལག་ལས་གཞན་གྱིས་ཀྱང་ངོ་ཞེས་གསུངས་མོད་ཀྱི། འོན་ཀྱང་གཞན་ཞེས་བྱ་བའི་སྒྲས་དེ་གཟུང་བར་རིག་པར་བྱ་སྟེ། དེ་ལྟར་ཡང་དེ་ལས་རིན་མེད་པར་ཚོལ་བས་ཕོ་ཉ་ལ་སོགས་བ་གཞན་ལ་འཐག་ཏུ་བཅུག་ན་ཞེས་གསུངས་པ་དེའི་དོན་གཞན་ཞེས་སྨོས་པས་བསྡུས་པར་རིག་པར་བྱའོ། །འདི་སྐད་བསྟན་ཏེ། ཐ་ག་པ་འཐག་པ་དང༌། སྦྱིན་པར་བྱེད་པ་ཁྱིམ་བདག་ལ་སོགས་པ་ལས་གཞན་པའི་ཕོ་ཉ་ལ་སོགས་པ་ཉེ་དུ་མ་ཡིན་པ་ཉིད་དང༌། ཁྱིམ་པ་ཉིད་ཡིན་ན་ལྟུང་བ་འོག་མ་གཉིས་སུ་འགྱུར་རོ་ཞེས་བྱ་བའི་ཐ་ཚིག་གོ །ཉེ་དུ་མ་ཡིན་པ་ལྟར་ཉེ་དུ་ལས་ནི་སྐྱེད་དང་ལྷུང་བཟེད་གཉིས་མ་གཏོགས་པ་ལ་ཉེས་པ་མེད་དོ་ཞེས་བྱ་བ་ལ། ཉེ་དུ་མ་ཡིན་པ་ལྟར་ཞེས་བྱ་བ་དེ་ནི་ཉེ་དུ་མ་ཡིན་པའི་ཡུལ་ལ་ལྟུང་བ་རྣམ་པར་གཞག་པ་སྟེ། ཉེ་དུ་མ་ཡིན་པ་ལ་བསོད་པ་སློང་བ་ལ་སོགས་པའི་ཁ་ནམ་ཐོབ་གང་ཡིན་པ་དེ་ཉེ་དུ་ལས་སློང་བར་བྱེད་ན་ཁ་ན་མ་ཐོ་བའི་ཉེས་པར་མི་འགྱུར་བར་ཤེས་པར་བྱ་སྟེ། དོན་ནི་དེ་ཡིན་ནོ། །ཉེ་དུ་ལས་ནི་སྐྱེད་དང་ལྷུང་བཟེད་གཉིས་མ་གཏོགས་པ་ལ་ཉེས་པ་མེད་དོ་ཞེས་བྱ་བ་ནི། ཉེ་དུ་ལས་ཀྱང་སྐྱེད་ཀྱི་བསླབ་པའི་གཞི་ལ་སྤོགས་འདོད་པ་ཉིད་ཀྱིས་འདི་ལྟ་སྟེ། མངོན་མཚན་ཅན་གྱི་སྤྱོད་པ་དང༌། ཉོ་
ཚོང་དག་གི་སྤྱོད་པ་དག་ལས་རྙེད་པ་གྲུབ་པ་དང༌། ལྷུང་བཟེད་ཚོལ་བའི་བསླབ་པའི་གཞི་ལ་ལྷུང་བཟེད་ལྷག་པར་གྱུར་པའི་ཉེས་པ་ནི་འབྱུང་བར་འགྱུར་བ་ཉིད་ཡིན་ནོ། །དེ་ལས་གཞན་པ་ཐམས་ཅད་ལ་ནི་ཇི་ལྟར་ཉེ་དུ་མ་ཡིན་པ་ལས་ཉེས་པར་འགྱུར་བ་ལྟར་ཉེ་དུ་ལས་ཉེས་པ་མེད་པར་ཤེས་པར་བྱའོ། །དེ་གཉིས་ཀྱང་ན་སྨད་པ་ཉིད་ཡིན་གྱི། དངོས་གཞིའི་ལྟུང་བར་ནི་མི་འགྱུར་རོ། །འདིར་གཞུང་ནི་རྣམ་པར་འབྱེད་པ་ལས་ཐ་ག་པ་ཉེ་དུས་ཆོས་གོས་འཐག་ན་ཉེ་དུ་ཡིན་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དང༌། གཅེར་བུ་པ་ལ་བཟའ་བ་ལ་སོགས་པ་སྦྱིན་ན་ཉེ་དུ་ཡིན་ན་ལྟུང་བ་མེད་དོ་ཞེས་གསུངས་པ་གང་ཡིན་པ་དང༌། ཞུ་བ་ལས་ཀྱང་ཉེ་དུ་ལས་ཟས་བསོད་པ་བླངས་ཏེ་རང་ཟ་བ་དང༌། གཅེར་བུ་བལ་སྦྱིན་ཞིང་སྡིག་པ་ཅན་གྱི་ལྟ་བའི་རྣམ་པ་ལས་དབྲལ་བར་འདོད་པས་སྦྱིན་པར་བྱེད་ན་ལྟུང་བ་མེད་དོ། །ཉེ་དུ་ཡིན་ན་ཡང་དེ་བཞིན་ནོ་ཞེས་གང་གསུངས་པ་དེ་ཡིན་ནོ། །ཞར་ལས་བྱུང་བ་བསྟན་ནས་ཁྱིམ་པ་ཉེ་དུ་མ་ཡིན་པ་ལས་བསླང་བས་ཡོངས་སུ་བཙལ་ནའོ་ཞེས་གང་སྨྲས་པའི་ལྟུང་བ་དེའི་སྐབས་སུ་གཏོགས་པ་བསྟན་པའི་ཕྱིར་འདི་བརྗོད་པར་བྱ་སྟེ། ཉེས་བྱས་སོ་ཞེས་བྱ་བ་ནི་ལྷུང་བཟེད་ཚོལ་བ་ཙམ་ལས་ཉེས་བྱས་སུ་འགྱུར་བའོ། །དེ་ལས་གྲུབ་ན་དངོས་གཞིའོ་ཞེས་བྱ་བ་ནི། ཁྱིམ་པ་ཉེ་དུ་མ་ཡིན་པ་དེ་ལས་བསླང་བས་ལྷུང་བཟེད་བཙལ་ཏེ་ལྷུང་བཟེད་ཐོབ་ན་དངོས་གཞིའི་ཁ་ན་མ་ཐོ་བར་འགྱུར་བའོ། །མེད་པ་ཉིད་ལས་ཡོད་པའི་བློ་ཅན་ལ་ནི་ན་སྨད་དོ་ཞེས་བྱ་བ་ལ། མེད་པ་ཉིད་ལ་ཞེས་བྱ་བ་ནི། ལྷུང་བཟེད་སྔ་མ་བྱིན་གྱིས་བརླབ་ཏུ་རུང་བ་ཤོས་མེད་པ་ཉིད་ལ་སྟེ། ཆག་པ་འམ་སྟོར་བ་ལ་སོགས་པའི་ཉེས་པས་མེད་པར་གྱུར་པ་ལའོ། །ཡོད་པའི་བློ་ཅན་ལ་ནི་ཞེས་བྱ་བ་ནི། ཡོད་པའི་བློ་དང་བཅས་པ་ལ་སྟེ། བདག་ལ་ལྷུང་བཟེད་གཞན་ཡོད་དོ་སྙམ་པའི་བློ་གང་ལ་ཡོད་པ་ལའོ། །ན་སྨད་དོ་ཞེས་བྱ་བ་ནི། དེ་ལྟར་དགེ་སློང་གང་ལྷུང་བཟེད་སྔ་མ་ཤོས་བྱིན་གྱིས་བརླབ་ཏུ་རུང་བ་ཤོས་མེད་བཞིན་དུ་བདག་ལ་ལྷུང་བཟེད་གཞན་ཡོད་དོ་སྙམ་པའི་བློ་ཡོད་ཅིང་དེའི་ཚེ། གལ་ཏེ་ལྷུང་བཟེད་གཞན་ཚོལ་བར་བྱེད་ན་དེ་ལ་ནི་དངོས་གཞིའི་ལྷུང་བ་ན་སྨད་པར་ཤེས་པར་བྱ་སྟེ། ཉེས་བྱས་སུ་འགྱུར་རོ་ཞེས་བྱ་བའི་ཐ་
ཚིག་གོ །ལྷུང་བཟེད་བཙལ་བ་རྙེད་པའི་དུས་ན་སྔ་མ་ཤོས་དགེ་སློང་དེ་ལ་མེད་པའི་ཕྱིར་ལྷུང་བཟེད་ལྷག་པ་ཉིད་དུ་མི་འགྱུར་རོ། །འདིར་གཞུང་ནི་དགེ་སློང་གིས་ལྷུང་བཟེད་མ་ཆིས་བཞིན་དུ་ལྷུང་བཟེད་གཞན་བླངས་པར་གྱུར་ལ་ལྟུང་བར་ཡང་མི་འགྱུར་བ་འགའ་མཆིས་སམ། བཀའ་སྩལ་པ། ཡོད་དེ་གལ་ཏེ་བླངས་པ་དང༌། སྔ་ཕྱི་མེད་པར་ལྷུང་བཟེད་ཆག་བར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །འདིར་སྤང་བ་མེད་པ་ལས་དགོངས་ནས་ལྟུང་བ་མེད་དོ་ཞེས་གསུངས་པ་ཡིན་པས། དེའི་ཕྱིར་སྦྱོར་བ་ལས་བྱུང་བའི་ཉེས་བྱས་ནི་དང་པོ་ཉིད་ནས་བྱས་པ་ཡིན་ནོ། །དངོས་གཞིའི་དུས་ན་ནི་ལྷུང་བཟེད་སྔ་མ་ཆུད་ཟོས་པ་ཉིད་ཀྱི་ཕྱིར་ཉེས་བྱས་ཁོ་ནར་ཟད་དོ། །གལ་ཏེ་ཚོལ་བའི་དུས་ན་ཡང་ལྷུང་བཟེད་དེ་ཆུད་ཟོས་པར་གྱུར་ཟིན་ན་ནི། དེའི་ཚེ་ན་སྦྱོར་བའི་ལྟུང་བ་ཡང་ན་སྨད་པ་ཁོ་ནར་འགྱུར་རོ། །རང་གི་ཡོ་བྱད་དག་གིས་སོ་ཞེས་བྱ་བ་ནི། ལྷུང་བཟེད་ཡོད་དུ་ཟིན་ན་ཡང་གལ་ཏེ་རང་གི་རིན་དུ་གྱུར་པའི་ཡོ་བྱད་དག་གིས་ལྷུང་བཟེད་གཞན་ཚོལ་ལམ་ཉོ་བར་བྱེད་ན་ད་ལྟ་ན་ཡང་ལྟུང་བ་ན་སྨད་པར་རིག་པར་བྱ་སྟེ། བསླང་བས་བཙལ་བ་དང་ཐོབ་པ་མ་ཡིན་པའི་ཕྱིར་རོ། །དེ་དག་ཡོད་པ་ཉིད་ན་ཡང་ངོ་ཞེས་བྱ་བ་ནི། རང་གི་ཡོ་བྱད་དག་ཅེས་བྱ་བར་སྦྱར་ཏེ། ལྷུང་བཟེད་ཀྱི་རིན་དུ་གྱུར་པ་རང་གི་ཡོ་བྱད་དག་ཡོད་ཅིང་བདོག་པ་ཉིད་ན་ལྷུང་བཟེད་མེད་ཀྱང་གལ་ཏེ་ལྷུང་བཟེད་རང་གི་ཡོ་བྱད་དག་གིས་ཉོ་བར་མི་བྱེད་པར་འདི་ལྟར་ལྷུང་བཟེད་དེ་སློང་བར་བྱེད་ན་དེ་ལ་ཡང་ལྟུང་བ་ན་སྨད་པར་རིག་པར་བྱ་སྟེ། སློང་བའི་ཚེ་ན་ནི་སྦྱོར་བ་ཞེས་བྱ་བའི་ཉེས་བྱས་ཕྲ་མོར་འགྱུར་ལ། ཐོབ་ན་ནི་དངོས་གཞི་ཞེས་བྱ་བའི་ཉེས་བྱས་ཁོ་ནར་འགྱུར་རོ། །ཆོས་གོས་ལ་སོགས་པ་དག་ལ་ཡང་རིགས་པ་འདི་ཉིད་རིག་པར་བྱའོ། །བཟང་པོ་འདོད་པས་བརྗེ་ནའོ་ཞེས་བྱ་བ་ལ། ལྷུང་བཟེད་བཟང་པོ་འདོད་པ་ནི་ལྷུང་བཟེད་བཟང་པོ་འདོད་པ་སྟེ། ཨེ་མའོ་ལྷུང་བཟེད་བཟང་པོ་མཛེས་པ་བདག་གི་ལྷུང་བཟེད་དུ་གྱུར་ཅིག་སྙམ་དུ་དེ་ལྟར་ཞུགས་པའི་འདོད་པ་གང་ཡིན་པ་དེ་ནི་བཟང་པོ་འདོད་པ་ཡིན་ནོ། །བཟང་པོ་འདོད་པ་དེས་བརྗེ་བའི་དོན་དུ་ལྷུང་བཟེད་བཅེལ་ཞིང་དེ་སྔོན་དུ་བཏང་སྟེ། རྗེ་བར་བྱེད་ན་ལྟུང་བ་ན་སྨད་པར་ཤེས་པར་
བྱའོ། །འོ་ན་བརྗེ་བ་ལས་ལེན་ན་ལྟུང་བ་མེད་དོ་ཞེས་བྱ་བ་དེར་ལྟུང་བ་མེད་པར་མ་གསུངས་སམ་ཞེ་ན། བདེན་མོད་ཀྱི་འོན་ཀྱང་བཟང་པོ་འདོད་པ་མེད་པར་བརྗེ་བའི་དབང་དུ་བྱས་ཏེ་གསུངས་པ་ཡིན་ནོ། །འདིར་ལྟུང་བ་རྣམ་པར་གཞག་པ་ནི་འདི་ཡིན་ཏེ། ཁྱིམ་པ་ཉེ་དུ་མ་ཡིན་པ་ལས་བསླངས་ཏེ་ཐོབ་ན་ནི་དངོས་གཞིའོ། །མ་བསླངས་པར་རིན་ལ་སོགས་པས་བཙལ་ན་ཉེ་དུ་ཡིན་ཡང་རུང་ཉེ་དུ་མ་ཡིན་ཡང་རུང་ཁྱིམ་པའམ་རབ་ཏུ་བྱུང་བ་ལས་ཐོབ་ན་ནི་ཉེས་བྱས་སོ། །བདག་པོ་མེད་པའི་ལྷུང་བཟེད་བཙལ་བ་ལས་གྲུབ་པ་གང་ཡིན་པ་དེ་ལ་ཡང་ཉེས་བྱས་སོ། །བཟང་པོ་འདོད་པས་སྔ་མ་བརྗེས་ནས་གྲུབ་པ་གང་ཡིན་པ་དེ་ལ་ཡང་ཉེས་བྱས་སོ། །སྦྱོར་བ་ཐམས་ཅད་ལ་ཡང་ཉེས་བྱས་སོ། །བཟང་པོ་འདོད་པ་ཉིད་མེད་པར་ལྷུང་བཟེད་བརྗེ་བས་ལྷུང་བཟེད་གྲུབ་ན་ནི་ལྟུང་བ་མེད་དོ། །གང་དག་ལྷུང་བཟེད་ཚོལ་བ་ལས་བྱུང་བའི་ལྟུང་བ་ཐམས་ཅད་བཟང་པོ་འདོད་པ་ཉིད་ཡན་ལག་ ཏུ་རྣམ་པར་འཇོག་པར་བྱེད་པའི་བཟང ་པོ་འདོད་པ་ཉིད་དེ་ལ་ནི། ཁྱིམ་པ་ཉེ་དུ་མ་ཡིན་པ་ཉིད་ལས་ལྷུང་བཟེད་ལྷག་པ་གྲུབ་པའི་དངོས་གཞི་ལ་ནི་སྤང་བར་འགྱུར་རོ། །སྦྱོར་བ་ལ་ནི་ཉེས་བྱས་སོ། །ཡན་ལག་གང་ཡང་རུང་བ་མ་ཚང་བ་ལ་ནི་དངོས་གཞི་ལ་ཉེས་བྱས་སོ། །སྦྱོར་བ་ལ་ནི་ཉེས་བྱས་ཕྲ་མོའོ།། ཡན་ལག་ཏུ་མ་ཚང་བ་ལ་ནི་དངོས་གཞི་ལ་ཉེས་བྱས་ཕྲ་མོའོ། །སྦྱོར་བ་ལ་ནི་ཤིན་ཏུ་ཕྲ་མོའོ། །གལ་ཏེ་ལྷུང་བཟེད་དེ་ཉིད་ཞག་བཅུ་འདས་པར་གྱུར་ན་ནི་དེ་ལ་སྤང་བ་གཞན་ཅིག་ཀྱང་འབྱུང་བར་འགྱུར་ཏེ། བཤགས་པའི་དུས་ན་ཡང་ལྟུང་བ་སྤང་བ་གཉིས་བཤགས་པར་བྱ་དགོས་སོ། །ད་ནི་སྤང་བ་བཤགས་པའི་སྦྱོར་བ་གཞན་དག་ལས་འདིའི་བཤགས་པའི་སྦྱོར་བའི་བྱེ་བྲག་བསྟན་པའི་ཕྱིར། འདི་ནི་དགེ་འདུན་ལ་སྤང་བའོ་ཞེས་བྱ་བ་སྨྲས་ཏེ། ལྷུང་བཟེད་ལྷག་པ་འདི་ནི་ཞེས་བྱ་བར་སྦྱར་རོ། །ཆོས་གོས་ལ་སོགས་པ་སྤང་བའི་རྫས་གཞན་ནི་གང་ཟག་ལ་སྤང་བར་བྱ་སྟེ། འདི་ལྟར་ལྷུང་བཟེད་འབྲེལ་བ་མེད་པར་ནི་དགེ་འདུན་ཁོ་ན་ལས་འཐོབ་ཀྱི། གང་ཟག་ལས་མ་ཡིན་པས་དེའི་ཕྱིར་འདི་ནི་དགེ་འདུན་ཁོ་ན་ལ་སྤང་བར་བསྟན་ཏོ། །ཅི་ལྷུང་བཟེད་ཐམས་ཅད་དགེ་འདུན་ལ་སྤང་བར་བྱ་བ་ཡིན་ནམ་ཞེ་ན། མ་ཡིན་ཏེ་དེའི་ཕྱིར་དུ་མ་ཉིད་ཡིན་ན་མཆོག་ཏུ་འདོད་པ་གཅིག་
གོ་ཞེས་བྱ་བ་སྨྲས་ཏེ། ལྷུང་བཟེད་ལྷག་པ་དུ་མ་ཉིད་ཡིན་ན་དེ་དག་གི་ནང་ནས་ལྷུང་བཟེད་མཆོག་ཏུ་འདོད་པ་ཞེས་བྱ་བ་མཆོག་ཏུ་གདམས་པ་གཅིག་དགེ་འདུན་ལ་སྤང་བར་བྱ་བའོ། །འོ་ན་ལྷུང་བཟེད་ལྷག་མ་གཞན་ཇི་ལྟར་བྱ་ཞེ་ན། དེའི་ཕྱིར་གཞན་ནི་ཐམས་ཅད་ཀྱི་ཐམས་ཅད་དུ་སྤང་བར་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། ལྷུང་བཟེད་གཞན་ནི་ཐམས་ཅད་ཀྱི་ཐམས་ཅད་ཁོ་ནར་སྤང་བར་བྱ་བ་ཉིད་ཡིན་གྱི། ཡང་ཕྱིར་བླང་བར་བྱ་བ་ནི་མ་ཡིན་ནོ། །འོ་ན་སུ་ལ་སྤང་བར་བྱ་བ་ཉིད་ཡིན་ཞེ་ན། དེའི་ཕྱིར་རབ་ཏུ་བྱུང་བ་འདི་པ་ལའོ་ཞེས་བྱ་བ་སྨྲས་ཏེ། རབ་ཏུ་བྱུང་བ་འདི་གང་ལ་ཡོད་པ་དེ་ནི་རབ་ཏུ་བྱུང་བ་འདི་པ་སྟེ་དེ་ལའོ། །དགེ་ཚུལ་ལ་སོགས་པ་གང་ཟག་ཐམས་ཅད་ལ་སྤང་བར་བྱ་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ལྷུང་བཟེད་ལྷག་མ་རྣམས་ནི་དགེ་སློང་རྣམས་ལ་གོ་བར་བྱའོ་ཞེས་གསུངས་པ་ཡིན་ནོ། །དགེ་སློང་ཞེས་སྨོས་པ་ནི་མཚོན་པ་ཙམ་དུ་ཟད་དེ། ཆོས་འདི་ལ་རབ་ཏུ་བྱུང་བ་ཐམས་ཅད་ཀྱང་སྤྱིར་བསྡུའོ། །ལྷུང་བཟེད་ལྷག་པོ་ཚོལ་བ་ལས་བྱུང་བའི་ལྷུང་བ་འབྱིན་པ་པོའི་དགེ་སློང་དི་ལ་ལྷུང་བཟེད་གང་སྦྱིན་པར་བྱ་ཞེ་ན། དེའི་ཕྱིར་དེ་ལ་ཐ་ཆད་སྦྱིན་པར་བྱའོ་ཞེས་བྱ་བ་སྨྲས་ཏེ། དགེ་སློང་ཐམས་ཅད་ཀྱི་ལྷུང་བཟེད་གང་དག་ཡིན་པ་དེ་དག་གི་ནང་ན་ལྷུང་བཟེད་ཐ་ཆད་གང་ཡིན་པ་ཐམས་ཅད་ཀྱི་ནང་ན་ངན་བསྙིགས་དེ་ལྟུང་བ་འབྱིན་པ་པོ་དེ་ལ་སྦྱིན་པར་བྱའི། སྤངས་པ་དེ་དག་ཉི་ཚེའི་ནང་ན་ཐ་ཆད་འབའ་ཞིག་ནི་མ་ཡིན་ནོ། །ཐ་ཆད་ཅེས་བྱ་བ་ནི་དགེ་འདུན་ཐམས་ཅད་ཀྱི་ལྷུང་བཟེད་དག་ལས་ཐ་ཆད་གང་ཡིན་པ་སྟེ། དེ་ཉིད་དགེ་སློང་ལྟུང་བ་འབྱིན་པ་པོ་དེ་ལ་སྦྱིན་པར་བྱ་བ་ཉིད་ཡིན་ནོ། །ཐབས་གང་གིས་དགེ་འདུན་ལ་ཐ་ཆད་དེ་བསྙིག་པར་བྱ་ཞེ་ན། དེའི་ཕྱིར་བྲིམ་པས་བསྙིག་པར་བྱའོ་ཞེས་བྱ་བ་སྨྲས་ཏེ། སྤང་པའི་ལྷུང་བཟེད་དེ་བྲིམ་པས་དགེ་འདུན་ལས་ལྷུང་བཟེད་ཐ་ཆད་དེ་བསྙིག་པར་བྱ་བའོ། །བྱེད་པ་པོ་ཅི་ལྟ་བུས་བྲིམ་པས་དགེ་འདུན་ལས་ལྷུང་བཟེད་ཐ་ཆད་དེ་བསྙིག་པར་བྱ་ཞེ་ན། དེའི་ཕྱིར་བསྐོས་པས་སོ་ཞེས་བྱ་བ་སྨྲས་ཏེ། གསོལ་བ་དང་གཉིས་ཀྱི་ལས་ཀྱིས་བསྐོས་པའི་དགེ་སློང་གིས་སོ། །དགེ་སློང་བསྐོས་པ་དེས་ལྷུང་བཟེད་བསྙིགས་
པའི་ཕྱིར་འདྲིམ་པ་ན་དེའི་ཀུན་དུ་སྤྱད་བདག་བསྟན་པའི་ཕྱིར། དེས་སང་དེ་བྱེད་པར་འགྱུར་པ་ན་ཚོགས་པའི་དུས་སུ་དགེ་འདུན་ལ་འཇལ་བར་བྱའོ་ཞེས་བྱ་བ་སྨྲས་ཏེ། བསྐོས་པའི་དགེ་སློང་དེས་སང་ཞེས་བྱ་བ་ཕྱི་དེ་ཉིན་པར་འདྲི་མ་པར་དེ་བྱེད་པར་འགྱུར་བ་ན་དེས་དགོངས་ཀ་ཚུན་ཆད་དགེ་འདུན་ནམ་ཚོགས་པའི་དུས་སུ་ཞེས་བྱ་བ་གང་གི་ཚེ་དགེ་འདུན་དུ་གྱུར་པའི་དགེ་སློང་དག་མཆོད་པ་ལ་སོགས་པ་ལ་གནས་གཅིག་ཏུ་ཚོགས་པར་གྱུར་པའི་དུས་སུ་དགེ་སློང་རྣམས་ལ་འཇལ་བར་བྱའོ། །ཇི་སྐད་འཇལ་བར་བྱ་ཞེ་ན། དེའི་ཕྱིར་ཚེ་དང་ལྡན་པ་དག་བདག་སང་ལྷུང་བཟེད་འབྲེལ་པ་མེད་པར་འདྲིམ་པར་འགྱུར་གྱི། ཁྱེད་ཅག་རང་རང་གི་ལྷུང་བཟེད་དག་ཐོགས་ལ་དགེ་འདུན་གྱི་ནང་དུ་གཤེགས་པར་མཛོད་ཅིག་ཅེས་སོ་ཞེས་བྱ་བ་སྨྲས་ཏེ། ལྷུང་བཟེད་འབྲེལ་བ་མེད་པ་ཞེས་བྱ་བ་ནི་དགེ་འདུན་ལས་ཐོབ་པའི་ལྷུང་བཟེད་ཐ་ཆད་ཀྱི་མིང་ཡིན་པར་རིག་པར་བྱའོ། །དེ་ཡང་ཨུན་ན་ཧ་ན་ཞེས་བྱ་བ་ནི་འབྲེལ་པ་མེད་པ་ཞེས་བྱ་བ་སྟེ། འདི་ལྟར་ན་ཧ་ཞེས་བྱ་བ་ནི་ཧ་ན་བན་དྷ་ཞེས་བྱ་སྟེ། འབྲེལ་བ་ཡིན་ནོ་ཞེས་སྐད་ཀྱི་དབྱིངས་ལས་འབྱུང་བའི་ཕྱིར་རོ། །ཨུན་ཞེས་བྱ་བ་ནི་ཨུད་ག་ཏ་ཞེས་བྱ་སྟེ། མེད་པའི་དོན་ཡིན་པས་ལྷུང་བཟེད་དེ་འབྲེལ་པ་མེད་པའམ། འབྲེལ་པ་དང་བྲལ་བ་ཡིན་པས་ན་དེའི་ཕྱིར་དེའི་མིང་འབྲེལ་པ་མེད་པ་ཞེས་བྱའོ། །དེ་ཡང་དགེ་སློང་རྣམས་ཀྱི་ལྷུང་བཟེད་ཀྱི་ཡུལ་ལ་འབྲེལ་པ་ནི་འདི་གཉིས་ཁོ་ནར་ཟད་དེ། བྱིན་གྱིས་བརླབས་པས་བདག་ཉིད་ཀྱིས་སྤྱད་བ་དང༌། ཡོངས་སུ་སྤང་བའི་དུས་ན་ཡང་རང་དབང་ཉིད་དུ་བསྟན་པར་བྱ་བ་ཡིན་ནོ། ལྷུང་བཟེད་རྣམ་པ་དེ་ལྟ་བུ་འབྲེལ་བ་མེད་པ་འབྲེལ་པ་ལས་འདས་པ་འབྲེལ་བ་དང་བྲལ་བ་དེ་ནི་བྱིན་གྱིས་བརླབ་པའི་འབྲེལ་པ་མེད་པའི་ཕྱིར་དང༌། ཡོངས་སུ་སྤང་བའི་འབྲེལ་པ་མེད་པའི་ཕྱིར་འབྲེལ་པ་མེད་པ་ཞེས་བྱ་སྟེ། དེ་ནི་ལྷུང་བཟེད་ཀྱང་ཡིན་ལ་འབྲེལ་བ་མེད་པ་ཡང་ཡིན་པས་ན་ལྷུང་བཟེད་འབྲེལ་པ་མེད་པ་ཞེས་བྱའོ། །དེ་ནི་བྲན་གནམ་ཁོལ་དུ་ཕྱུང་བ་དང་འདྲ་སྟེ། གནམ་ཁོལ་དུ་ཕྱུང་བ་ཡིན་པའི་ཕྱིར་བྲན་གྱི་ལས་སུ་ཡང་མི་བསྐོ་ལ་བྲན་ཡིན་པའི་ཕྱིར་ཡོངས་སུ་གཏང་བར་ཡང་མི་ནུས་མོད་ཀྱི། འོན་ཀྱང་དེ་ལ་བཟའ་བ་དང་བཏུང་བ་ལ་སོགས་པ་སྦྱིན་པར་
བྱ་དགོས་པ་དེ་བཞིན་དུ་ལྷུང་བཟེད་འདི་ཡང་བྱིན་གྱིས་བརླབ་པར་བྱ་བ་ཡང་མ་ཡིན་ལ། ཡོངས་སུ་སྤང་བར་བྱ་བ་ཡང་མ་ཡིན་མོད་ཀྱི། འོན་ཀྱང་དེ་ལ་ཁ་བསྒྱུར་བ་དང༌། བསྲེག་པ་དང༌། བྱི་དོར་ལ་སོགས་པ་ལྷུང་བཟེད་ཀྱི་ནན་ཏན་ཡང་བྱ་དགོས་པས་དེའི་ཕྱིར་ལྷུང་བཟེད་དེ་ནི་བྲན་གནམ་ཁོལ་དུ་ཕྱུང་བ་དང་འདྲ་བས་འབྲེལ་བ་མེད་པ་ཞེས་བྱའོ། །འཁོད་པའི་དོན་དུ་ནན་ཏན་བྱའོ་ཞེས་བྱ་བ་ནི། བསྐོས་པའི་དགེ་སློང་དེས་དགེ་སློང་རྣམས་འཁོད་པའི་དོན་དུ་སྟན་གདིང་བ་ལ་སོགས་པ་དག་གི་ནན་ཏན་བྱ་བའོ། །བསྔགས་པ་བརྩམ་ཞིང་དབུལ་བར་བྱའོ་ཞེས་བྱ་བ་ནི། ལྷུང་བཟེད་ཀྱིའོ་ཞེས་བྱ་བར་སྦྱར་རོ། །བསྔགས་པ་ཞེས་བྱ་བ་ནི་ཡོན་ཏན་བསྔགས་པའོ། །བརྩམ་ཞིང་ཞེས་བྱ་བ་ནི་བསྔགས་པ་བརྩམ་པ་སྟེ། ལྷུང་བཟེད་དབུལ་བ་གང་ལ་བསྔགས་པ་བརྩམ་པ་ཡོད་པ་དེ་ནི། བསྔགས་པ་བརྩམ་ཞིང་དབུལ་བ་སྟེ། དགེ་སློང་བསྐོས་པ་དེས་དགེ་སློང་རྒན་རིམས་ལ་ལྷུང་བཟེད་འབུལ་བའི་ཚེ་ལྷུང་བཟེད་དེའི་བསྔགས་པ་བརྩམ་ཞིང་དབུལ་བར་བྱའོ། །འདི་སྐད་བསྟན་ཏེ། དགེ་སློང་བསྐོས་པ་དེས་ལྷུང་བཟེད་ཀྱི་ཡོན་ཏན་བསྔགས་པ་དང་པོར་བྱས་ཏེ། དགེ་སློང་རྣམས་ཀྱི་མདུན་དུ་བཟུང་ཞིང་དབུལ་བར་བྱའོ། །བསྔགས་བ་རྣམ་པ་ཇི་ལྟ་བུ་ཞིག་བརྗོད་པས་ཤེ་ན། དེའི་ཕྱིར་གནས་བརྟན་ལྷུང་བཟེད་འདི་ནི་ཤིན་ཏུ་གསལ་བ་དབྱིབས་ལེགས་པ་ལོངས་སྤྱད་པར་བཟོད་པ་ལགས་ཀྱིས། གལ་ཏེ་བཞེད་ན་སྣོམས་ཤིག་ཅེས་སོ་ཞེས་བྱ་བ་སྨྲས་ཏེ། གནས་བརྟན་ཞེས་བྱ་བ་ནི། དགེ་སློང་རྒན་རིམས་རྣམས་ལ་བོད་པའི་ཚིག་གོ །ལྷུང་བཟེད་འདི་ནི་ཤིན་ཏུ་གསལ་བ་ཞེས་བྱ་བ་ནི། མདོག་ལ་ནག་ནོག་མེད་ཅིང་ཤིན་ཏུ་མཛེས་པ་ཡིན་ནོ་ཞེས་བྱ་བའི་ཐ་ཚིག་གོ །དབྱིབས་ལགས་པ་ཞེས་བྱ་བ་ནི་ཚད་དང་ལྡན་པའོ། །ལོངས་སྤྱད་པར་བཟོད་པ་ཞེས་བྱ་བ་ནི། བུ་གུ་དང་ཆག་གྲུམ་ལ་སོགས་པའི་སྐྱོན་མེད་པའི་ཕྱིར་རོ། །གལ་ཏེ་བཞེད་ན་ཞེས་བྱ་བ་ནི། གལ་ཏེ་ལེན་པར་འདོད་ནའོ་ཞེས་བྱ་བའི་ཐ་ཚིག་གོ །སྣོམས་ཤིག་ཅེས་བྱ་བ་ནི། ཁྱེར་ཅིག་ཅེས་བྱ་བའི་ཐ་ཚིག་གོ །ཅི་ལྷུང་བཟེད་ཐམས་ཅད་ལ་དེ་སྐད་བརྗོད་པར་བྱ་འམ་ཞེ་ན། དེའི་ཕྱིར་ཡོན་ཏན་ཇི་ལྟ་བ་
བཞིན་དུའོ་ཞེས་བྱ་བ་སྨྲས་ཏེ། ལྷུང་བཟེད་གང་ལ་ཡོན་ཏན་གང་དང་གང་དག་ཡོད་པ་དེ་དང་དེ་དག་ལ་བརྗོད་པར་བྱ་སྟེ། ཤིན་ཏུ་གསལ་བ་ཞེས་བྱ་བ་ལ་སོགས་པ་སྨོས་པ་ནི་མཚོན་པའི་ཕྱིར་རོ། །འདོད་ན་བླང་བར་བྱའོ་ཞེས་བྱ་བ་ནི། དགེ་སློང་རྣམས་ཀྱིས་ཀྱང་གལ་ཏེ་འདོད་ན་ལྷུང་བཟེད་དེ་བླང་བར་བྱའི། མི་འདོད་ན་ནི་མི་བླང་ངོ་ཞེས་བྱ་བའི་ཐ་ཚིག་གོ །བར་དུ་ཆོད་པས་བླངས་པ་བསླང་བར་མི་བྱའོ་ཞེས་བྱ་བ་ནི། དགེ་འདུན་གྱི་གནས་བརྟན་ལ་སོགས་པ་ཆེས་རྒན་པས་ཀྱང་དགེ་སློང་བསྐོས་པ་དེས་བདག་ཉིད་ལ་བསྟབས་པའི་ཚེ་མ་བླངས་ནས། དགེ་སློང་གཅིག་གིས་བར་དུ་ཆོད་པའི་འོག་མ་དགེ་སློང་གསུམ་པས་ལྷུང་བཟེད་དེ་བླངས་པ་ན་ཁོ་བོ་འདོད་དོ་ཞེས་བླང་བར་མི་བྱའོ། །དེ་ལྟར་ཡང་འདིར་གཞུང་ནི་གལ་ཏེ་གནས་བརྟན་གསུམ་པས་ལྷུང་བཟེད་བླངས་པ་ན་དགེ་འདུན་གྱི་གནས་བརྟན་སློང་བར་བྱེད་ན་བརྗོད་པ་དང་པོ་ལ་སྦྱིན་པར་མི་བྱའོ། །བརྗོད་པ་གཉིས་པ་ལ་ཡང་སྦྱིན་པར་མི་བྱའོ། །བརྗོད་པ་གསུམ་པ་ལ་ནི་སྦྱིན་པར་བྱ་བ་སྟེ། དགེ་འདུན་གྱི་གནས་བརྟན་གྱིས་ནི་འདུལ་བ་དང་འགལ་བའི་ཉེས་བྱས་བཤགས་པར་བྱའོ་ཞེས་གསུངས་པ་ཡིན་ནོ། །དུ་མས་བར་དུ་ཆོད་པ་ཉིད་ལ་ནི་ཤིན་ཏུ་ཡང་བསླང་བར་མི་བྱ་བ་ཉིད་ཡིན་པར་རིག་པར་བྱའོ། །སློང་བ་ཡོད་ན་ནི་ཚིག་གཉིས་ལ་ནི་མི་སྦྱིན་ཞིང་འོག་མ་ལ་ནི་མ་ཡིན་ནོ་ཞེས་བྱ་བ་ནི། བར་དུ་ཆོད་པས་བླངས་པ་ན་གོང་མ་སློང་བ་ཡོད་ན་ཚིག་དང་པོ་དང་གཉིས་པ་གཉིས་ལ་ནི་ལྷུང་བཟེད་དེ་མི་སྦྱིན་ནོ། །འོག་མ་ལ་ནི་མ་ཡིན་ནོ་ཞེས་བྱ་བ་ནི་ཚིག་གསུམ་པ་ལ་ལྷུང་བཟེད་དེ་འདྲིམ་པར་བྱེད་པའི་དགེ་སློང་གིས་སྦྱིན་པར་མི་བྱ་བ་མ་ཡིན་ནོ་ཞེས་བྱ་བའི་ཐ་ཚིག་གོ །ལྟུང་བ་བྱུང་བ་ལ་སྤང་བར་མི་བྱ་བ་ཉིད་དང༌། བྱིན་གྱིས་བརླབ་པར་མི་བྱ་བ་ཉིད་དག་གོ་བར་བྱའོ་ཞེས་བྱ་བ་ནི་དགེ་སློང་ལྟུང་བ་བྱུང་བ་ལ་ལྷུང་བཟེད་འབྲེལ་པ་མེད་པ་དེ་སྤང་བར་མི་བྱ་བ་ཉིད་དང༌། བྱིན་གྱི་བརླབ་པར་མི་བྱ་བ་ཉིད་དག་གོ་བར་བྱའོ། །འདི་སྐད་བསྟན་ཏེ། གང་གི་ཚེ་ལྷུང་བཟེད་བསྙིགས་ནས་ལྟུང་བ་བྱུང་བའི་དགེ་སློང་དེ་ལ་སྦྱིན་པར་བྱེད་པ་ན་དེའི་ཚེ་དགེ་སློང་བསྐོས་པ་དེས་དེ་ལ་འོག་མ་འདི་གཉིས་གོ་བར་བྱ་སྟེ། ལྷུང་བཟེད་འདི་ཁྱོད་ཀྱིས་བྱིན་གྱིས་བརླབ་པར་ཡང་མི་བྱ་ལ་ཡོངས་སུ་སྤང་བར་ཡང་མི་བྱ་
སྟེ། ལྷུང་བཟེད་འདི་ནི་བྱིན་གྱིས་བརླབ་པས་བདག་ཉིད་ཀྱིས་སྤྱད་པ་དང་འབྲེལ་བ་དང་ཡོངས་སུ་སྤང་བའི་དུས་ན་རང་དབང་ཉིད་དུ་བསྟན་པའི་འབྲེལ་བ་མེད་པ་ཡིན་པས་ཁྱོད་ཀྱིས་དེང་ཕྱིན་ཆད་ནས་ནམ་མ་ཆག་གི་བར་དུ་ཆོང་ཤིག་ཅེས་ཀྱང་བསྒོ་བར་བྱའོ། །ཉེ་བར་སྤྱོད་པ་ལ་མ་ཆག་གི་བར་དུ་དལ་བུ་དལ་བུས་སྤྱོད་ཅིག་ཅེས་སོ་ཞེས་བྱ་བ་ནི། ལྷུང་བཟེད་དེ་ཉེ་བར་སྤྱོད་པ་ལྟུང་བ་འབྱུང་བའི་དགེ་སློང་ལ་དགེ་སློང་བསྐོས་པ་དེས་འདི་སྐད་ཅེས་ལྷུང་བཟེད་འབྲེལ་པ་མེད་པ་འདི་མ་ཆག་གི་བར་དུ་དལ་བུ་དལ་བུས་སྤྱོད་ཅིག་ཅེས་ཀྱང་བསྒོ་བར་བྱ་སྟེ། ཁད་ཀྱིས་དལ་བུ་དལ་བུས་སྤྱད་པར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ནམ་ཆག་པའི་མཐར་ཐུག་གི་བར་དུའོ་ཞེས་གསུངས་པ་ཡིན་ནོ། །དེས་གཉི་གས་ཀུན་དུ་སྤྱད་པར་བྱའོ་ཞེས་བྱ་བ་ནི། ལྷུང་བ་བྱུང་བའི་དགེ་སློང་དེས་ལྷུང་བཟེད་བྱིན་གྱིས་བརླབས་པ་དང༌། ལྷུང་བཟེད་འབྲེལ་པ་མེད་པ་གཉི་གས་ཀུན་དུ་སྤྱད་པར་བྱ་བའོ། །དེ་ལ་ཡོད་བྱད་ཆེས་བཟང་པོ་ངེས་པར་སྦྱར་བར་བྱའོ་ཞེས་བྱ་བ་ནི། ལྷུང་བཟེད་འབྲེལ་བ་མེད་པ་དེ་ལ་ལྷུང་བཟེད་ཀྱི་སྣོད་དང༌། ཁ་གཡོགས་ལ་སོགས་ཡོ་བྱད་ཆེས་བཟང་པོ་ཆེས་མཛེས་པ་ངེས་པར་སྦྱར་བར་བྱའོ། །འདི་སྐད་བསྟན་ཏེ། ལྷུང་བཟེད་འབྲེལ་བ་མེད་པ་དེ་ལ་ལྷུང་བཟེད་ཀྱི་སྣོད་ལ་སོགས་པ་ཡོ་བྱད་ཆེས་བཟང་པོ་ཤོས་ངེས་པར་སྦྱར་བར་བྱ་ཞིང་ལྷུང་བཟེད་བྱིན་གྱིས་བརླབས་པ་ལ་ནི་མ་ཡིན་ནོ། །སྤྱད་པ་ན་ཆེས་ཡང་བའོ་ཞེས་བྱ་བ་ནི་བསོད་སྙོམས་བླང་བ་ལ་སོགས་པ་སྤྱད་པ་ན་ཕྱེ་ལ་སོགས་པའི་དོན་ཆེས་ཡང་བ་ལྷུང་བཟེད་འབྲེལ་པ་མེད་པ་དེར་ངེས་པར་སྦྱར་བར་བྱ། བླུགས་པར་བྱ་ཞིང་ཆེས་ལྕི་བ་ལྷུང་བཟེད་བྱིན་གྱིས་བརླབས་པ་ཤོས་སུ་ངེས་པར་སྦྱར་བར་བྱ་བླུགས་པར་བྱའོ། །འདི་སྐད་བསྟན་ཏེ། བྱ་བ་ལ་ངེས་པར་སྦྱར་བའི་དུས་ཟས་ལ་སོགས་པ་ཉེ་བར་གནས་པར་གྱུར་པ་ན་ལྷུང་བཟེད་འབྲེལ་པ་མེད་པས། ལས་ཆེས་ཡང་བ་ཞེས་བྱ་ཞིང་ཅིག་ཤོས་ཀྱིས་ལས་ཆེས་ལྕི་བ་བྱའོ། །ཟས་ཀྱི་བྱ་བ་ཉིད་ལ་ནི་མི་བྱ་བ་ཁོ་ནའོ་ཞེས་བྱ་བ་ནི་ཟས་བཟའ་བའི་བྱ་བ་བསྒྲུབ་པ་ཉིད་ལ་ནི་ལྷུང་བཟེད་འབྲེལ་པ་མེད་པས། ངེས་པར་སྦྱར་བར་མི་བྱ་བ་ཁོ་ན་སྟེ། དེའི་ནང་ནས་ཟས་བཟའ་བར་མི་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ལྷུང་
བཟེད་འབྲེལ་པ་མེད་པར་ཟས་བཟའ་བར་མི་བྱའོ། །བྱི་དོར་ཡང་དང་པོར་བྱའོ་ཞེས་བྱ་བ་ནི་ཁ་ཟས་འབགས་པའི་དྲིལ་ཕྱི་ལ་སོགས་པའི་བྱི་དོར་ཡང་དང་པོར་ལྷུང་བཟེད་འབྲེལ་བ་མེད་པ་ལ་ངེས་པར་སྦྱར་བར་བྱ་ཞིང་ཕྱིས་བྱིན་གྱིས་བརླབས་པ་ཤོས་ལ་བྱ་བའོ། །ལྷུང་བཟེད་ཚོལ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་ལྷག་པར་སྤྱད་ན་འཐག་ཏུ་འཇུག་པའི་སྤང་བར་འགྱུར་ཞེ་ན། དེའི་ཕྱིར་རིན་མེད་པར་བསྐོ་བས་སམ་གཞན་གྱིས་ཀྱང་འཐག་ཏུ་འཇུག་ནའོ་ཞེས་བྱ་བ་སྨྲས་ཏེ། ཁྱིམ་པ་ཉེ་དུ་མ་ཡིན་པ་ཞེས་སྔར་བསྟན་པ་དེ་གཉིས་ཀྱི་རྗེས་སུ་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། ཐ་ག་བ་ཁྱིམ་པ་ཉེ་དུ་མ་ཡིན་པ་ལ་རིན་མེད་པར་ངག་གི་བསྒོ་པས་སམ་ཕོ་ཉ་ལ་སོགས་པ་གཞན་གྱིས་ཀྱང་འཐག་ཏུ་བཅུག་ན་དངོས་གཞིའི་ལྟུང་བར་འགྱུར་རོ། །འདི་ལྟར་སོ་སོ་ཐར་པའི་མདོ་ལས་རང་གིས་བསླངས་པའི་དོག་པ་ཞེས་གསུངས་མོད་ཀྱིས། འདིར་ནི་རང་གིས་བསླངས་པ་ཉིད་ཁས་བླང་བར་མི་བྱ་སྟེ། དེར་གསུངས་པ་ནི་གླེང་གཞིའི་དབང་གིས་སོ། །གཞན་ལས་ཀྱང་དགེ་སློང་གིས་ཉེ་དུ་ལས་དོག་པ་བསླངས་ནས་ཐག་པ་ཉེ་དུ་མ་ཡིན་པ་ལ་འཐག་ཏུ་བཅུག་ན་སློང་བ་དེ་ལ་ནི་ལྟུང་བ་མེད་ལ། ཐ་ག་པ་ཉེ་དུ་མ་ཡིན་པ་ལ་འཐག་ཏུ་འཇུག་པ་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པས་དེའི་ཕྱིར་འདིར་དོག་པ་སློང་བ་ནི་སྤང་བའི་ལྟུང་བྱེད་ཀྱི་དངོས་གཞིའི་རྒྱུར་འགྱུར་བ་མ་ཡིན་གྱི། འདི་ལྟར་འཐག་ཏུ་འཇུག་པ་ནི་དེའི་རྒྱུ་ཡིན་ནོ། །འཐག་ཏུ་འཇུག་པ་དེ་ཡང་ལན་འགའ་ཐ་ག་པ་ཁྱིམ་པ་ཉེ་དུ་མ་ཡིན་པས་འགྲུབ་པ་ཡང་ཡོད། ལན་འགའ་ཉེ་དུ་དང་ཉེ་དུ་མ་ཡིན་པ་གཉི་གས་ཅིག་ཆར་འགྲུབ་པ་ཡང་ཡོད། ལན་འགའ་ཁྱིམ་པ་དང་རབ་ཏུ་བྱུང་བ་གཉི་གས་ཅིག་ཅར་འགྲུབ་པ་ཡང་ཡོད་པས་འདི་ལྟར་དེ་དག་ཐམས་ཅད་དངོས་གཞིའི་ལྟུང་བར་འགྱུར་བ་བསྒྲུབ་པའི་ཕྱིར། གཞན་ཉིད་དང་བཅས་པ་ལ་ནི་དེ་མ་བྱས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། འདི་ལྟར་ཉེ་དུ་དང་ཉེ་དུ་མ་ཡིན་པ་གཞན་ཉིད་བཅས་པ་ལ་འཐག་ཏུ་བཅུག་ན་དེ་ལྟ་ན་ཡང་འཐག་ཏུ་བཅུག་པ་དེ་ཐ་ག་པ་ཉེ་དུ་མ་ཡིན་པ་དེས་མ་བྱས་པ་ཉིད་མ་ཡིན་ཏེ། འདི་ལྟར་བྱས་པ་ཁོ་ན་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟ་བས་ན་ཉེ་དུ་
དང་ཉེ་དུ་མ་ཡིན་པ་གཉི་ག་ལ་འཐག་ཏུ་བཅུག་ན་ཡང་ཉེ་དུའི་ཕྱིར་ན་ལྟུང་བ་མེད་མོད་ཀྱི། ཉེ་དུ་མ་ཡིན་པའི་དབང་གིས་ཉེ་དུ་མ་ཡིན་པ་སྤང་བའི་ལྟུང་བྱེད་དུ་འགྱུར་རོ། །བདག་ཉིད་དང་ཉེ་དུ་མ་ཡིན་པར་བཅས་པས་འཐག་ན་ཡང་དེ་དང་འདྲ་སྟེ། བདག་ཉིད་ཀྱིས་འཐག་པས་ཉེས་བྱས་སུ་གསུངས་པ་གང་ཡིན་པ་དེ་ནི་བཟོ་མི་བྱ་བའི་སྤྱིར་གསུངས་པ་ཡིན་ཏེ། འདིར་གཞུང་ནི་བཟོ་རྗེས་སུ་བསྒྲུབ་པར་མི་བྱའོ་ཞེས་གསུངས་པ་ཡིན་ཏེ། དེ་ནི་སྤང་བ་དང་འབྲེལ་པ་ནི་མ་ཡིན་ནོ། །དེ་བཞིན་དུ་རིན་བྱིན་པ་དང་མ་བྱིན་པ་གཉི་ག་ལ་འཐག་ཏུ་བཅུག་ན་ཡང་རིན་བྱིན་པའི་ཕྱིར་ནི་ལྟུང་བ་མེད་ཀྱི། རིན་མ་བྱིན་པའི་དབང་གིས་སྤང་བའི་ལྟུང་བྱེད་དུ་འགྱུར་ཏེ། གཞན་ཉིད་དང་བཅས་པས་བྱས་པ་ཉིད་ཡིན་དུ་ཟིན་ཀྱང་དེར་འགྱུར་རོ། །འཐག་ཏུ་འཇུག་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་འཐག་པ་བསྐྱེད་པའི་སྤང་བ་བརྗོད་པར་བྱ་སྟེ། དེ་ལ་ཡང་ཡན་ལག་གང་དག་བྱེད་པ་པོར་འགྱུར་བ་དེ་དག་བསྟན་པའི་ཕྱིར། དེའི་ཕྱིར་བཏག་པར་བྱ་བ་བསམ་པ་ལས་བྱུང་བ་ཉིད་དོ་ཞེས་བྱ་བ་སྨྲས་ཏེ། དེའི་ཕྱིར་ཞེས་བྱ་བ་ནི་ལྟུང་བ་འབྱིན་པར་བྱེད་པའི་དགེ་སློང་དེའི་ཕྱིར་རོ། །བཏག་པར་བྱ་བ་ཞེས་བྱ་བ་ནི་གོས་སོ། །བསམ་པ་ཞེས་བྱ་བ་ནི་གོས་འདི་དེ་ལ་སྦྱིན་ནོ་སྙམ་པའི་བསམ་པ་སྟེ། གོས་གང་གི་དགོས་པའི་རྒྱུ་མཚན་གྱི་ཕྱིར་སེམས་པའོ། །བསམ་པ་དེ་ལས་བྱུང་བ་ཞེས་བྱ་བ་ནི་གོས་དེ་ཉིད་ཡིན་ནོ། །ལྟུང་བ་འབྱིན་པར་བྱེད་པའི་དགེ་སློང་དེའི་ཕྱིར་བསམ་པ་ལས་བྱུང་བ་ནི་དེའི་བསམ་པ་ལས་བྱུང་བའོ། །དེའི་དངོས་པོ་ནི་དེའི་ཕྱིར་བསམ་པ་ལས་བྱུང་བ་ཉིད་དེ། དགེ་སློང་དེའི་ཕྱིར་སྦྱིན་བདག་གི་བསམ་པ་ལས་བྱུང་བའི་གོས་ཉིད་དོ། །འདི་སྐད་བསྟན་ཏེ། གལ་ཏེ་བཏག་པར་བྱ་བའི་གོས་དེ་ལྟུང་བ་འབྱིན་པར་བྱེད་པའི་ཕྱིར་སྦྱིན་བདག་གིས་བསམ་པ་ཡིན་ལ། དེ་འཐག་པ་བསྐྱེད་པ་དེ་ནི་འཐག་པ་བསྐྱེད་པའི་སྤང་བའི་ཡན་ལག་ ཏུ་གྱུར་པའི་བྱེད་པ་པོ་ཡིན་ནོ་ཞེས་བྱ་བའི་ཐ་ཚིག་གོ །ཁོ་ལག་ཆེ་བ་ཉིད་དམ་འབྲས་བཟང ་བ་ཉིད་ལ་ཐ་ག་པ་ངེས་པར་སྦྱར་བའོ་ཞེས་བྱ་བ་ཡང༌། འཐག་པ་བསྐྱེད་པའི་སྤང་བའི་ཡན་ལག་ཏུ་གྱུར་པའི་བྱེད་པ་པོ་ཡིན་པར་སྦྱར་རོ། །ཁོ་ལག་ཆེ་བ་ཞེས་བྱ་བ་ནི་ཞེང་ཆེ་བ་དང་
ཁྲུན་རིང་བ་སྟེ། དེའི་དངོས་པོ་ནི་དེ་ཉིད་དོ། །དེ་ལ་ལྟུང་བ་འབྱིན་པར་བྱེད་པས་གལ་ཏེ་ཁོ་ལག་ཆེ་བ་ཉིད་ལ་ཐ་ག་པ་ངེས་པར་སྦྱོར་བར་བྱེད་པའོ། །འབྲས་བཟང་བ་ཉིད་ཅེས་བྱ་བ་ནི། ཐར་གྱིས་ཞག་པ་དང༌། ཐག་རན་བཟང་བ་ཉིད་ལ་སོགས་པ་སྟེ། དེ་ལ་ཐ་ག་པ་ངེས་པར་སྦྱར་བར་བྱས་པའོ། །དེ་ལྟར་ཡང་ཁོ་ལག་ཆེ་བ་དང༌། འབྲས་བཟང་བའི་སྐབས་ནས། ཚེ་དང་ལྡན་པ་ཐ་ག་པ་གོས་འདི་ཞེང་ཆེ་བ་དང༌། ཁྲུན་རིང་བ་དང༌། ཐར་གྱིས་ཞག་པ་དང༌། ཐག་རན་བཟང་བར་ལེགས་པར་གྱིས་ཤིག་ཅེས་གསུངས་པ་ཡིན་ནོ། །ཐག་རན་བཟང་བ་ཞེས་བྱ་བ་ནི་ཕྱིར་ཟུག་སྙོམས་པ་དང༌། ཤས་བཟང་བ་དང༌། སང་སེང་མེད་པ་ཞེས་གསུངས་པས་རྣམ་པར་བཤད་པར་སྦྱར་རོ། །གལ་ཏེ་སྦྱིན་བདག་གི་ཟད་ནའོ་ཞེས་བྱ་བ་ནི། དེ་ལྟར་ཐ་ག་པ་ངེས་པར་སྦྱར་བ་ན་གལ་ཏེ་སྦྱིན་བདག་གི་དོག་པ་ལ་སོགས་པ་ཟད་པར་གྱུར་ན་སྟེ། འཐག་པ་བསྐྱེད་པས་རིན་སྐྱེ་ལ། དེ་སྐྱེས་པས་སྦྱིན་བདག་གི་ཟད་པར་གྱུར་པར་རིག་པར་བྱ་སྟེ། དེས་ན་དངོས་གཞིའི་ལྟུང་བར་འགྱུར་རོ། །རྔན་པ་མ་བྱིན་ན་ཡང་ངོ་ཞེས་བྱ་བ་ནི། ལྟུང་བ་འབྱིན་པར་བྱེད་པས་ཐ་ག་པ་ལ་རྔན་པ་མ་བྱིན་ནའོ། །འདི་སྐད་བསྟན་ཏེ། གང་གི་ཚེ་ལྟུང་བ་འབྱིན་པ་པོས་ཤིན་ ཏུ་བཟང ་པོར་བསྒྲུབ་པར་བྱའོ་ཞེས་ཐ་ག་པ་ངེས་པར་སྦྱར་བར་བྱས་ནས་དེས་དེའི་ཐར་གྱིས་ཞག་པར་བྱ་བ་ལ་སོགས་པ་ལག་བྱད་ཀྱི་ལས་སྐྱེས་པར་ནི་གྱུར་ལ་རྔན་པ་ནི་མ་བྱིན་ན་དེའི་ཚེ་ན་དངོས་གཞིར་འགྱུར་བའོ། །དེ་ལྟར་ཡང་ཚེ་དང་ལྡན་པ་ཐ་ག་པ་འདི་ལྟར་ཁོ་བོས་གླ་རྔན་འདི་ལྟ་སྟེ། བཟའ་བའམ་བཅའ་བ་ཙམ་མམ་བཟའ་རྒྱུ་ཅུང་ཟད་ཅིག་སྦྱིན་ནོ་ཞེས་སྨྲས་ནས་ཞེས་གསུངས་པ་ཡིན་ནོ། །ཡང་ངོ་ཞེས་བྱ་བ་སྨོས་པ་ནི། སྦྱིན་པར་བྱེད་པའི་དོག་པ་ལ་སོགས་པ་ཟད་པ་དང༌། ཐ་ག་པ་རྔན་པ་མ་བྱིན་པ་གཉི་ག་ཡང་སོ་སོར་ལྟུང་བའི་བྱེད་པ་པོའི་གཙོ་བོ་ཡིན་པར་ཤེས་པར་བྱ་བའི་ཕྱིར་རོ། །དེས་ན་དེ་གཉི་ག་ཡང་རུང་བ་གཅིག་ཡོད་པ་ན་ཡང་འདིར་དངོས་གཞིར་འགྱུར་བ་ཁོ་ན་ཡིན་ནོ། །རྔན་པ་ཁས་བླངས་ཀྱང་རུང་མ་བླངས་ཀྱང་རུང་སྟེ། བཅོལ་བས་ཁོ་ལག་ཆེ་བ་ཉིད་དང་འབྲས་བཟང་བ་ཉིད་གྲུབ་ན་འདིར་དངོས་གཞིའི་ཁ་ན་མ་ཐོ་བར་འགྱུར་བ་ཁོ་ན་ཡིན་ནོ། །
ཁས་བླངས་པ་མ་བྱིན་ན་ནི་མ་བྱིན་པར་ལེན་པ་ལས་བྱུང་བའི་ཁན་མ་ཐོ་བར་ཡང་འགྱུར་བ་ཉིད་དོ།། །།བམ་པོ་ཉི་ཤུ་རྩ་གཅིག་པ། སྦྱིན་པར་བྱེད་བས་དེའི་དོན་དུ་རྗེས་སུ་མ་གནང་བ་ལྟ་བུ་ནི་བྱེད་པ་པོ་དག་ཡིན་ནོ་ཞེས་བྱ་བ་ནི། སྦྱིན་པར་བྱེད་པས་དགེ་སློང་གང་ལ་ཁོ་ལག་ཆེ་བ་དང་འབྲས་བཟང་བ་ཞེས་སྔར་བསྟན་པ་དེའི་དོན་དུ་རྗེས་སུ་མ་གནང་ཞིང་ཁས་མ་བླངས་པ་གང་ཡིན་པ་དེ་ནི་སྦྱིན་པར་བྱེད་པས་དེའི་དོན་དུ་རྗེས་སུ་མ་གནང་བ་ཡིན་ཏེ། ཁྱོད་ཉིད་ཅི་དགའ་བར་གོས་བྱེད་དུ་ཆུག་ཅིག་ཅེས་དེ་ལྟར་སྦྱིན་པར་བྱེད་པས་དགེ་སློང་གང་ལ་རྗེས་སུ་གནང་བར་མ་བྱས་པ་ཞེས་བྱ་བའི་ཐ་ཚིག་གོ །ཡང་ན་སྦྱིན་པར་བྱེད་པས་གལ་ཏེ་གོས་གང་ལ་གོས་འདི་རྣམ་པ་ཐམས་ཅད་དུ་མཛེས་པར་བྱའོ་ཞེས་དོན་དེ་རྗེས་སུ་མ་གནང་ཞིང་ཁས་མ་བླངས་པ་སྟེ། དེའི་ཚེ་ན་གོས་ཀྱི་དོན་དེ་རྗེས་སུ་མ་གནང་བ་ཡིན་ནོ། །སུས་ཤེ་ན་སྦྱིན་པར་བྱེད་པས་ཏེ། སྦྱིན་བདག་གིས་སོ།། འདིར་གལ་ཏེ་ཁས་བླངས་པ་ལེན་པར་མི་བྱེད་ན་ཐ་ག་པ་ཡང་སྦྱིན་བདག་ཡིན་ནོ། །འདི་སྐད་བསྟན་ཏེ། གལ་ཏེ་སྦྱིན་བདག་གིས་དོན་དེ་རྗེས་སུ་མ་གནང་བ་ཡིན་ནོ། །ཡན་ལག་དེ་ཡང་ལྟུང་བའི་བྱེད་པ་པོ་ཡིན་ནོ། །དེ་ལྟར་ཡང་འཚོལ་བའི་མདུན་རོལ་དུ་སྔར་རྗེས་སུ་མ་གནང་ན་ཞེས་གསུངས་པ་ཡིན་ནོ། །གལ་ཏེ་རང་གི་དད་པས་མགྲོན་དུ་གཉེར་བ་མ་ཡིན་ན་ཞེས་བྱ་བའི་ཐ་ཚིག་གོ །ཡན་ལག་དེ་དག་ནི་ལྟུང་བའི་བྱེད་པ་པོ་ཡིན་ནོ། །གནས་སྐབས་གང་ལ་ཡན་ལག་དེ་དག་ཁ་ན་མ་ཐོ་བ་དེ་འདིའི་བྱེད་པ་པོ་དག་ཡིན་ཞེ་ན། དེའི་ཕྱིར་གྲུབ་པ་ན་དངོས་གཞིའོ་ཞེས་བྱ་བ་སྨྲས་ཏེ། གོས་གྲུབ་བའི་གནས་སྐབས་ན་ཡན་ལག་དེ་དག་དངོས་གཞིའི་ཁ་ན་མ་ཐོ་བའི་བྱེད་པ་པོ་དག་ཡིན་ནོ། །འདི་སྐད་བསྟན་ཏེ། གོས་གྲུབ་ན་དངོས་གཞིའི་ཁ་ན་མ་ཐོ་བར་འགྱུར་རོ། །མདུན་རོལ་དུ་དེའི་ཕྱིར་བསམ་པ་ལས་བྱུང་བ་རྗེས་སུ་བསྒྲུབ་པ་ཐ་དད་པ་ནི་ཉེས་བྱས་ཀྱིའོ་ཞེས་བྱ་བ་ནི། གོས་གྲུབ་པའི་མདུན་རོལ་དུ་སྦྱོར་བའི་གནས་སྐབས་ན་དགེ་སློང་དེའི་ཕྱིར་བསམ་པ་ལས་བྱུང་བའི་རྗེས་སུ་བསྒྲུབ་པ་ཐ་དད་པ་བསོད་སྙོམས་ལ་སོགས་པ་ལ་འགྲོ་བ་དང་བཅས་པ་ལ་སོགས་པ་ཚོལ་ཞིང་དེར་ཁྱེར་བ་ནི་ཐམས་ཅད་སྦྱོར་བ་གཅིག་པའི་ཕྱིར་ཉེས་བྱས་ཀྱི་བྱེད་པ་པོ་ཡིན་ནོ། །འདི་སྐད་བསྟན་ཏེ། གོས་གྲུབ་
པའི་མདུན་རོལ་དུ་གོས་བསྒྲུབ་པའི་དོན་དུ་རྩོམ་པ་གཅིག་ཏུ་གྱུར་པའི་རྗེས་སུ་བསྒྲུབ་པ་གང་ཅི་བྱེད་ཀྱང་རུང་སྟེ། སྦྱོར་བ་གཅིག་ཏུ་གྱུར་བའི་རྗེས་སུ་བསྒྲུབ་པ་ཐམས་ཅད་ལ་ཡན་ལག་དེ་དག་ཐམས་ཅད་ཉེས་བྱས་གཅིག་གི་བྱེད་པ་པོ་དག་ཡིན་གྱི། ཁྲི་ལས་ལྡང་བ་ལ་སོགས་པ་དག་སོ་སོ་ཐ་དད་པ་ནི་མ་ཡིན་ནོ། །དེ་ལྟར་འདིར་གཞུང་ནི་དགེ་སློང་གིས་གོས་ཀྱི་དོན་དུ་ཅི་ཙམ་ཅུང་ཟད་ལག་པ་དག་འཁྲུ་བར་བྱེད་པ་དང༌། ལྷུང་བཟེད་འཁྲུ་བར་བྱེད་པ་དང༌། འགྲོ་བ་དང༌། འོང་བ་དང༌། བསོད་སྙོམས་ཐོབ་ནས་ཐ་ག་པ་ལ་སྦྱིན་པར་བྱེད་ན་ཐམས་ཅད་ཉེས་བྱས་སུ་འགྱུར་རོ། །གོས་གྲུབ་ན་ནི་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །ཅི་ཙམ་ཅུང་ཟད་ཅེས་བྱ་བ་དང༌། ཐམས་ཅད་ཅེས་བྱ་བའི་ཚིག་ནི་རྩོམ་པ་གཅིག་ཏུ་གྱུར་པའི་བྱ་བ་རྣམས་ལ་ཡང་དང་ཡང་དུ་རྗེས་སུ་བསྒྲུབ་ཅིང་རྣམ་པར་གནས་པ་ལ་བྱའི། ལག་པ་འཁྲུ་བ་ལ་སོགས་པ་དག་ཐ་དད་པར་གྱུར་པ་ནི་མ་ཡིན་ནོ། །མ་བསྒོ་བར་ཉེ་བར་འགྲོ་བ་ནི་དེ་ཉིད་དོ་ཞེས་བྱ་བ་ནི། ཉེས་བྱས་ཉིད་དོ་ཞེས་བྱ་བར་སྦྱར་ཏེ། མ་བསྒོ་བར་ཞེས་བྱ་བ་སྦྱིན་བདག་གིས་དགེ་སློང་ལ་མ་སྨྲས་མ་བསྒོ་བར་སྦྱིན་བདག་གི་དྲུང་དུ་ཉེ་བར་འགྲོ་བ་གང་ཡིན་པའི་ཉེ་བར་འགྲོ་བ་དེ་ནི་ཉེས་བྱས་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་སྦྱིན་བདག་གིས་དགེ་སློང་དེ་ལ་ཁྱོད་ཀྱི་ཕྱིར་གོས་འཐག་ཏུ་གཞུག་གིས། དུས་དུས་སུ་བཞུང་ལ་གོས་འཐག་པ་གཟིགས་ཤིག་ཅེས་མ་བསྒོ་བར་འོན་ཀྱང་དགེ་སློང་དེ་ཆེས་མཛེས་པར་བསྒྲུབ་པའི་བསམ་པས་ཉེ་བར་འགྲོ་ཞིང་ཅུང་ཟད་ཀྱང་མི་སྨྲ་མོད་ཀྱི། འོན་ཀྱང་ཉེས་བྱས་སུ་འགྱུར་རོ། །འདིར་གཞུང་ནི་ཞུ་བ་ལས་དགེ་སློང་གི་ཕྱིར་ཁྱིམ་པས་གོས་འཐག་ཏུ་བཅུག་ནས་དགེ་སློང་དེ་ཡང་ཉེ་བར་འགྲོ་ན་ཐ་དད་པར་མི་བྱེད་ཀྱང་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཐ་དད་པར་མི་བྱེད་ཅེས་བྱ་བའི་ཐ་ཚིག་དེ་ནི་འདི་ལྟར་དགྲོལ་བར་ཤེས་པར་བྱ་སྟེ། ཀྱེ་མ་བདག་གི་ཕྱིར་གོས་འཐག་པ་དེར་བདག་སོང་ནས་གོས་དེ་ཤིན་ཏུ་མཛེས་བར་གྱུར་ན་ཅི་མ་རུང་སྙམ་པ་དེ་ལྟ་བུའི་བསམ་པས་དེར་འགྲོ་མོད་ཀྱི། འོན་ཀྱང་གོས་ལ་ཐ་དད་པར་དབྱེ་བའི་ཕྱིར་དང༌། སྣ་ཚོགས་པ་ཉིད་ཀྱི་ཕྱིར་དང༌། ཤིན་ཏུ་མཛེས་པ་ཉིད་ཀྱི་ཕྱིར་འཚོལ་བར་མི་བྱེད་ན་ཡང་ཉེས་བྱས་སུ་འགྱུར་བ་སྟེ། དེ་ཡང་སྦྱོར་བ་
ལས་བྱུང་བའི་ཉེས་བྱས་ཡིན་ནོ། །འཐག་པ་བསྐྱེད་པའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།འཕྲོག་པའི་སྤང་བ་ལ་ཡན་ལག་གང་དག་བྱེད་པ་པོ་དག་ཡིན་ཞེ་ན། དེའི་ཕྱིར་དབྲལ་བར་བྱ་བ་དགེ་སློང་ཉིད་དོ་ཞེས་བྱ་བ་སྨྲས་ཏེ། དབྲལ་བར་བྱ་བ་གང་ལས་གོས་འཕྲོག་པར་བྱ་བ་དེ་དགེ་སློང་ཉིད་ཡིན་ན་ཡན་ལག་ཡིན་ནོ། །འདི་སྐད་བསྟན་ཏེ། གང་ལས་གོས་འཕྲོག་པར་བྱ་བ་དེ་གལ་ཏེ་དགེ་སློང་ཡིན་ཏེ། གལ་ཏེ་གསོལ་བ་དང་བཞིའི་ལས་ཀྱིས་བསྙེན་པར་རྫོགས་པ་ཡིན་ན་ཞེས་བྱ་བའི་ཐ་ཚིག་གོ །ཅི་བདག་ཉིད་ཀྱི་ཁོ་ན་ཕྲོགས་ན་ཁ་ན་མ་ཐོ་འདི་ཉིད་དུ་འགྱུར་རམ། འོན་ཏེ་གཞན་གྱི་ཞེ་ན། དེའི་ཕྱིར་དབྲོག་པར་བྱ་བ་རང་གི་ཉིད་མ་ཡིན་ནོ་ཞེས་བྱ་བ་སྨྲས་ཏེ། དབྲོག་པར་བྱ་བའི་གོས་རང་གི་ཉིད་མ་ཡིན་ན་ལྟུང་བའི་ཡན་ལག་ཡིན་ནོ། །འདི་སྐད་བསྟན་ཏེ། གོས་གང་ཡང་རུང་བ་དབྲོག་པར་བྱ་བ་དེ་གལ་ཏེ་གཞན་གྱིས་བྱིན་པ་ཡིན་ནམ་རང་གིས་ལྟོས་པ་མེད་པའི་སེམས་ཀྱིས་བྱིན་པ་ཡིན་ལ། དེ་ཕྲོགས་ན་ཁ་ན་མ་ཐོ་བ་འདིར་འགྱུར་རོ། །འོ་ན་གཙུག་ལག་ལས་རང་གིས་བྱིན་པ་ཁོ་ན་ཡན་ལག་ཏུ་གསུངས་ཏེ། ཡང་དགེ་སློང་གང་གིས་དགེ་སློང་ལ་གོས་བྱིན་ནས་ཞེས་གསུངས་སོ་ཞེ་ན། བདེན་མོད་ཀྱི། འོན་ཀྱང་གླེང་གཞིའི་དབང་གིས་དེ་སྐད་གསུངས་ཏེ། འདི་ལྟར་རང་གིས་བྱིན་པ་ཕྲོགས་ན་ཉེས་པར་འགྱུར་བ་ལས་ན། གཞན་གྱིས་བྱིན་པ་ཕྲོགས་ན་ལྟ་ཆེས་ཉེས་པར་འགྱུར་བར་ཤེས་པར་བྱའོ། །དེ་ལྟར་ཡང་དགེ་སློང་གང་དགེ་སློང་ལ་གོས་བྱིན་ནས་དེའི་འོག་ཏུ་ཁྲོས་འཁྲུགས་རྔམས་པར་གྱུར་ཏེ། ཡི་མ་རངས་ནས་འཕྲོག་གམ་འཕྲོག་ཏུ་བཅུག་ཅིང༌། ཇི་ཙམ་དུ་གོས་ཀྱི་གྲྭ་ལུས་ལས་བྲལ་བར་བྱེད་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །ཁ་ན་མ་ཐོ་བ་འདི་རྐུ་སེམས་མེད་པ་ཡིན་གྱི། རྐུ་སེམས་ཡོད་ན་ནི་མ་བྱིན་པར་ལེན་པར་གཏོགས་པའི་ཁ་ན་མ་ཐོ་བར་ཡང་འགྱུར་རོ། །དེ་གོས་ཉིད་ཡིན་ནའོ་ཞེས་བྱ་བ་ནི། དབྲོག་པར་བྱ་བ་དེ་གོས་ཉིད་ཡིན་ན་ལྟུང་བའི་ཡན་ལག་ཏུ་འགྱུར་བའོ། །འདི་སྐད་བསྟན་ཏེ། གལ་ཏེ་དབྲོག་པར་བྱ་བའི་དངོས་པོ་དེ་གོས་ཉིད་ཡིན་ན་ལྟུང་བའི་ཡན་ལག་ཏུ་འགྱུར་རོ། །འདིར་གོས་ཞེས་སྨོས་པ་ནི་མཚོན་པ་སྟེ། དགེ་སློང་གི་ཡོ་བྱད་གཞན་ཡང་ཕྲོགས་ན་དངོས་གཞིའི་ཁ་ན་མ་
ཐོ་བར་འགྱུར་རོ། །དེའི་འམ་དེས་བསྒོས་པའི་ལུས་དང་ངག་བསྡུས་པའམ། ཐ་དད་པ་དག་གིས་དབྲོག་པའི་དོན་དུ་ཞུགས་པ་ལྟ་བུ་ནི་བྱེད་པ་པོ་དག་ཡིན་ནོ་ཞེས་བྱ་བ་ལ། དེའི་ཞེས་བྱ་བ་ནི་ལྟུང་བ་འབྱིན་པར་བྱེད་པའི་འོ། །དེས་བསྐོས་པའི་ཞེས་བྱ་བ་ནི་ལྟུང་བ་འབྱིན་པར་བྱེད་པ་དེས་བསྐོས་པའིའོ། །ལུས་དང་ངག་བསྡུས་པ་ཞེས་བྱ་བ་ནི། ལུས་དང་ངག་གཉི་ག་བསྡུས་པས་དབྲོག་པའི་དོན་དུ་ཞུགས་པའོ། །ཐ་དད་པ་དག་གིས་ཞེས་བྱ་བ་ནི། ལུས་ཀྱང་ཐ་དད་པར་ཞུགས་ལ། ངག་ཀྱང་ཐ་དད་པར་ཞུགས་པ་སྟེ། འོན་ཀྱང་ལྟུང་བ་ནི་གཅིག་ཏུ་འགྱུར་རོ། །ལྟ་བུ་ནི་བྱེད་པ་པོ་དག་ཡིན་ནོ་ཞེས་བྱ་བ་ནི། ཡན་ལག་དེ་ལྟ་བུ་དག་ནི་བྱེད་པ་པོ་དག་ཡིན་ནོ། །འདི་སྐད་བསྟན་ཏེ། གལ་ཏེ་ལྟུང་བ་འབྱིན་པར་བྱེད་པའི་ལུས་དང་ངག་དག་གིས་ཅིག་ཅར་དབྲོག་པའི་ཕྱིར་བྱ་བ་བྱེད་དམ་རིམ་གྱིས་བྱེད་དུ་བཅུག་ཀྱང་རུང་སྟེ། ལྟུང་བ་གཅིག་ཁོ་ནར་འགྱུར་རོ། །གཞན་ལ་བཅོལ་བས་ཀྱང་དེ་དང་འདྲའོ། །གང་གི་ཕྱིར་རང་གིས་བྱས་པ་དང༌། གཞན་བྱེད་དུ་བཅུག་པ་ལ་བྱེ་བྲག་མེད་པ་དེའི་ཕྱིར་རང་གི་ལུས་དང་ངག་བསྡུས་པས་བྱས་སམ། གཞན་བྱེད་དུ་བཅུག་ན་ཡང་ཡན་ལག་ཉིད་ཡིན་ཏེ། དེའི་ཕྱིར་ཡན་ལག་དེ་དག་ནི་བྱེད་པ་པོ་དག་ཡིན་ནོ། །གནས་སྐབས་གང་ལ་ཡན་ལག་དེ་དག་ཁ་ན་མ་ཐོ་བ་གང་གི་བྱེད་པ་པོ་དག་ཡིན་ཞེ་ན། དེའི་ཕྱིར་ལུས་ལས་ཐ་དད་པའི་དངོས་པོར་གྱུར་པ་མཐར་ཐུག་པ་ན་མཐའི་འོ་ཞེས་བྱ་བ་སྨྲས་ཏེ། འདིར་དབྲལ་བར་བྱ་བའི་དགེ་སློང་གང་ཡིན་པ་དེའི་ལུས་ལས་ཆོས་གོས་ལ་སོགས་པ་རང་གི་ཉིད་མ་ཡིན་པ་ཐ་དད་པའི་དངོས་པོར་གྱུར་པ་ཞེས་བྱ་བ་ཐ་དད་པར་བྱས་པར་གྱུར་པའི་མཐར་ཐུག་པ་ན་ཞེས་བྱ་བ་མཐར་ཐུག་པར་གྱུར་པའི་དུས་ན་མཐའི་ཞེས་བྱ་བ་ནི་དངོས་གཞིའི་ཁ་ན་མ་ཐོ་བའི་བྱེད་པ་པོ་དག་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་གིས་དགེ་སློང་ལས་གཞན་གྱིས་བྱིན་པའི་གོས་རང་ངམ། གཞན་གྱི་ལུས་དང་ངག་དག་གིས་ཅིག་ཅར་རམ་རིམ་གྱིས་ཀྱང་རུང་སྟེ། འཕྲོག་པར་བྱེད་ཅིང་ལུས་ལས་ཐ་དད་པའི་དངོས་པོར་གྱུར་པའི་མཐར་ཐུག་པའི་དུས་ན་དངོས་གཞིའི་ཁ་ན་མ་ཐོ་བར་འགྱུར་རོ། །སྦྱོར་བ་ལ་ནི་ཉེས་བྱས་ཀྱིའོ་ཞེས་བྱ་བ་ནི། ཡན་ལག་དེ་དག་སྦྱོར་བའི་གནས་སྐབས་ལ་ནི་ཉེས་བྱས་ཀྱི་བྱེད་པ་པོ་དག་
ཡིན་ནོ་ཞེས་བྱ་བའི་ཐ་ཚིག་གོ །དེ་ནི་ཕྱིར་སྦྱིན་པར་བྱ་བ་ཉིད་དོ་ཞེས་བྱ་བ་ནི། གོས་ཕྲོགས་པ་དེ་ནི་བདག་པོ་དེ་ལ་ཕྱིར་སྦྱིན་བར་བྱ་བ་ཉིད་ཡིན་པའོ། །དེ་སྐད་བསྟན་ཏེ། ཕྲོགས་པའི་གོས་གང་ཡིན་པ་དེ་ཡོངས་སུ་ལོངས་སྤྱད་པར་མི་བྱའོ། །ཇི་སྟེ་ཡོངས་སུ་སྤྱད་པར་གྱུར་ན་ཡང་དེའི་ལྷག་མ་ཡོད་པ་གང་ཡིན་པ་དེ་ལ་ཕྱིར་སྦྱིན་པར་བྱ་སྟེ། ཇི་སྲིད་དུ་མི་སྦྱིན་པ་དེ་སྲིད་དུ་ལྟུང་བ་བཤགས་སུ་མི་རུང་པོ། །དེ་ལྟར་ཡང་འདིར་གཞུང་ནི་དགེ་སློང་དེས་གོས་དེའི་ལྷག་མ་ཡོད་པ་ཕྱིར་སྦྱིན་བར་བྱ་ཞེས་གསུངས་པ་ཡིན་ནོ། །འདི་ལ་རང་གི་དོན་ཉིད་ནི་ཡན་ལག་མ་ཡིན་ནོ་ཞེས་བྱ་བ་ནི། གཞན་ལ་འཕྲོག་པ་འདི་ལ་རང་གི་དོན་ཉིད་ནི་ཡན་ལག་མ་ཡིན་ཏེ། བྱེད་རྒྱུ་མ་ཡིན་པའོ། །འདི་སྐད་བསྟན་ཏེ། གོས་འཕྲོག་པ་འདི་ལ་དགེ་སློང་གིས་རང་གི་དོན་ཉིད་དུ་ལྟུང་བའི་བྱེད་རྒྱུ་མ་ཡིན་ཏེ། དེས་ན་གཞན་གྱི་དོན་གྱི་ཕྱིར་ཚིག་གིས་ཀྱང་འཕྲོག་ན་དངོས་གཞིའི་ཁ་ན་མ་ཐོ་བར་འགྱུར་རོ། །བསྙེན་པར་མ་རྫོགས་པ་ལ་ནི་སྐྲོད་པ་དང་འདྲའོ་ཞེས་བྱ་བ་ནི། དཔེར་ན་གཙུག་ལག་ཁང་ནས་དགེ་སློང་མ་ལ་སོགས་པ་དགེ་སློང་ངམ། དགེ་སློང་མ་འམ། དགེ་སློབ་མ་ལ་སོགས་པས་སྐྲོང་པར་བྱེད་པ་ཉེས་བྱས་སུ་གསུངས་པ་དང༌། དེ་བཞིན་དུ་དགེ་སློང་དང་དགེ་སློང་མ་དག་དགེ་སློབ་མ་ལ་སོགས་བས་སྐྲོད་པར་བྱེད་པ་ཡང་ཉེས་བྱས་སུ་གསུངས་པ་དང་འདྲ་བར་འཕྲོག་པའི་བསླབ་པའི་གཞི་འདི་ལ་ཡང་བསྙེན་པར་མ་རྫོགས་པ་ལ་ནི་ཉེས་བྱས་སུ་རྣམ་པར་གཞག་པར་རིག་པར་བྱའོ། །དེ་ལྟར་ཡང་འདིར་གཞུང་ནི་དགེ་ཚུལ་ལ་སོགས་པའི་འཕྲོག་པ་ཉིད་ལ་གཞུང་ནི་དགེ་སློབ་མ་དང་དགེ་ཚུལ་དང་དགེ་ཚུལ་མས་ནི་ཉེས་བྱས་ཀྱི་ལྟུང་བར་འགྱུར་རོ། །ཁྱིམ་པ་དང་ཁྱིམ་པ་མོས་ནི་བསོད་ནམས་མ་ཡིན་པ་མང་དུ་འཕེལ་བར་འགྱུར་རོ་ཞེས་གསུངས་པ་ཡིན་ནོ། །འཕྲོག་པ་ནི་རྣམ་པ་གསུམ་སྟེ། རང་གི་ཉིད་སེལ་བར་འགྱུར་བ་དང༌། བློ་གྲོས་ངན་པས་བྱས་པ་དང༌། རིགས་པའི་དོན་གྱི་དབང་གིས་བྱས་པའོ། །དེ་ལ་རང་གི་ཉིད་སེལ་བར་གྱུར་བ་ཁོ་ན་འཕྲོག་པའི་ལྟུང་བའི་བྱེད་པ་པོ་ཡིན་པར་བསྟན་པའི་ཕྱིར། རང་གི་ཉིད་སེལ་བར་གྱུར་པའི་འཕྲོག་པ་འདིར་བསྡུས་པ་ཡིན་ནོ་ཞེས་བྱ་བ་སྨྲས་ཏེ། རང་གི་ཉིད་ཀྱི་སེལ་བ་འདིར་རང་གི་ཉིད་སེལ་བའོ། །
དེར་གྱུར་པ་ནི་དེའི་ངོ་བོ་ཉིད་དུ་གྱུར་བའི་འཕྲོག་པ་སྟེ། དེ་བསླབ་པའི་གཞི་འདིར་བསྡུས་པ་ཡིན་པར་རིག་པར་བྱའི། གཞན་མ་ཡིན་ནོ། །འདི་སྐད་བསྟན་ཏེ། འཕྲོག་པ་རྣམ་པ་གསུམ་ལས་རང་གི་ཉིད་སེལ་བར་གྱུར་པ་ཞེས་བྱ་བའི་འཕྲོག་པ་གཅིག་བུ་ཁོ་ན་ལས་ཁ་ན་མ་ཐོ་བ་འདིར་འགྱུར་ལ། སྦྱོར་བ་ལ་ནི་ཉེས་བྱས་སོ། །འདིར་གཞུང་ནི་དགེ་སློང་ཁྱོད་ལ་གོས་མི་སྦྱིན་གྱི་ཕྱིར་བྱིན་ཅིག་ཅེས་གསུངས་པ་ཡིན་ནོ། །འཕྲོག་པ་ལྷག་མ་གཉིས་པོ་དག་གི་ངོ་བོ་ཉིད་བསྟན་པ་སྟེ། དེ་ལ་རེ་ཞིག་བློ་གྲོས་ངན་པས་བྱས་པའི་འཕྲོག་པའི་ངོ་བོ་ཉིད་བསྟན་པའི་ཕྱིར། བློ་གྲོས་ངན་པས་བྱས་པ་ནི་རྗེས་སུ་འཕྲོག་པ་ཉིད་ཡིན་ནོ་ཞེས་བྱ་བ་སྨྲས་ཏེ། བློ་གྲོས་ངན་པ་ཞེས་བྱ་བ་ནི། བློ་གྲོས་བཟང་པོ་མ་ཡིན་པ་བློ་གྲོས་མི་མཛེས་པ་སྟེ། དེས་བྱས་པའི་འཕྲོག་པ་ནི་འདི་ལྟ་སྟེ། ཡི་ཆད་པར་གྱུར་ཅིག །ཅོ་དྲིས་པར་གྱུར་ཅིག །གནོད་པར་གྱུར་ཅིག །མཐུ་བསྟན་པར་གྱུར་ཅིག །ཅེས་དེ་ལྟ་བུས་དབྲོག་པར་བྱས་ནས་ཕྱིར་སྦྱིན་པར་བྱའོ་ཞེས་བྱ་བ་ལ་སོགས་པ་ལྟ་བུ་སྟེ། བློ་གྲོས་ངན་པ་དེས་དབྲོག་པར་བྱེད་པ་གང་ཡིན་པ་དེ་ནི་རྗེས་སུ་འཕྲོག་པ་ཉིད་ཡིན་ཏེ། དངོས་གཞིའི་ཁ་ན་མ་ཐོ་བའི་རྗེས་སུ་མཐུན་པ་ཉིད་ཀྱི་ཉེས་བྱས་ཡིན་ནོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་རྒོད་པའི་བསམ་པས་དུས་ཅུང་ཟད་ཙམ་ཞིག་སེམས་གདུང་བར་བྱའོ་སྙམ་ནས་ཆོས་གོས་ལ་སོགས་པ་འཕྲོག་པར་བྱེད་ན་འཕྲོག་པ་དེ་ཡོངས་སུ་རྫོགས་པ་མ་ཡིན་པའི་ཉེས་བྱས་སུ་འགྱུར་ལ། སྦྱོར་བ་ལ་ནི་ཉེས་བྱས་ཕྲ་མོར་འགྱུར་རོ། །རིགས་པའི་དོན་གྱི་དབང་གིས་བྱས་པའི་འཕྲོག་པ་ལ་ནི་ཉེས་པ་མེད་པར་བསྟན་པའི་ཕྱིར། གནོད་པ་དང་མི་ཕན་པར་བྱེད་པ་ལ་འཇུག་པའི་བགེགས་བྱ་བའི་ཕྱིར་ནི་ལྟུང་བ་མེད་དོ་ཞེས་བྱ་བ་སྨྲས་ཏེ། གནོད་པ་བྱེད་པའི་ཕྱིར་གནོད་པ་བྱེད་པ་སྟེ། གནོད་པ་ནི་ཚེ་འདིའི་ལུས་ལ་གནོད་བར་འགྱུར་བའོ། །མི་ཕན་པ་བྱེད་པའི་ཕྱིར་མི་ཕན་པ་བྱེད་པ་སྟེ། མི་ཕན་པ་ནི་འཇིག་རྟེན་ཕ་རོལ་དུ་འབྲས་བུ་མི་འདོད་པ་འབྱིན་པའི་སེམས་ཀུན་ནས་ཉོན་མོངས་པའོ། །དེ་ལྟར་གནོད་པ་བྱེད་པ་དང༌། མི་ཕན་པ་བྱེད་པ་ལ་འཇུག་པ་གང་ཡིན་པའི་འཇུག་པ་དེའི་བགེགས་བྱ་བའི་ཕྱིར་ཞེས་བྱ་བ་བར་ཆད་བྱ་བའི་ཕྱིར་ཆོས་གོས་ལ་སོགས་པ་འཕྲོག་པ་ལ་ནི་ལྟུང་བ་མེད་དོ། །
འདི་སྐད་བསྟན་ཏེ། རྐུན་པོ་དང༌། ཆུ་ཀླུང་དང༌། སྟག་གི་འཇིགས་པ་ལ་སོགས་པ་གནོད་པ་བྱེད་པའི་ནང་དུ་འཇུག་པ་དང༌། སྡིག་པ་དང་སྟེན་ཅིང་འབྲས་བུ་མི་འདོད་པ་འབྱིན་པ་ལ་སོགས་པ་མི་ཕན་པ་བྱེད་པ་ལ་འཇུག་པའི་བགེགས་བྱ་ཞིང་བར་ཆད་བྱ་བའི་ཕྱིར་ཆོས་གོས་ལ་སོགས་པ་འཕྲོག་པར་བྱེད་ན་དེ་ལ་ནི་ལྟུང་བ་མེད་དོ། །དེ་ལྟར་ཡང་གཞུང་ནི་དོན་གཞན་དང་འདུལ་བའི་ཡོ་བྱད་ཀྱི་ཕྱིར་ནི་ལྟུང་བ་མེད་དེ། ཇི་ལྟར་དོན་གཞན་གྱིས་ཤེ་ན། འདི་ལྟ་སྟེ་སློབ་དཔོན་དང་མཁན་པོའི་ལྷན་ཅིག་གནས་པ་དང༌། ཉེ་གནས་དག་འཇིགས་པ་དང་བཅས་པའི་ཕྱོགས་སུ་དུས་མ་ཡིན་པ་དང༌། ཆུ་ཀླུང་གི་ཁའམ་ཡུར་བོ་ཆེའི་ཁར་འགྲོ་བ་དེ་དག་ལ་སློབ་དཔོན་དང་མཁན་པོས་ཆོམ་རྐུན་དང་གཡོན་ཅན་དག་གིས་གོས་འཕྲོག་པར་གྱུར་ན་མི་རུང་ངོ་སྙམ་པས་འཕྲོག་གམ་འཕྲོག་ཏུ་འཇུག་བ་ལྟ་བུ་ཡིན་ནོ། །ཇི་ལྟར་འདུལ་བའི་ཡོ་བྱད་ཀྱིས་ཤེ་ན། འདི་ལྟ་སྟེ་དགེ་སློང་རྣམས་ཀྱིས་ལྷན་ཅིག་གནས་པ་དང༌། ཉེ་གནས་དག་སྡིག་པའི་གྲོགས་པོ་དང༌། སྡིག་པའི་ཟླ་བོ་དང༌། སྡིག་པའི་བསྟེན་གྲོགས་དང༌། ལྷན་ཅག་སྡིག་པ་བསྟེན་ཅིང་ལམ་དུ་འགྲོ་བར་གྱུར་ན་དེ་དག་ལ་མཁན་པོ་དང་སློབ་དཔོན་གྱིས་འདི་དག་སྡིག་པའི་གྲོགས་པོ་དང༌། སྡིག་བའི་ཟླ་པོ་དང༌། སྡིག་པའི་བསྟེན་གྲོགས་ལ་བསྙེན་པར་གྱུར་ན་མི་རུང་ངོ་སྙམ་པས་གོས་དག་འཕྲོག་གམ་འཕྲོག་ཏུ་འཇུག་བ་ལྟ་བུའོ་ཞེས་གསུངས་པ་ཡིན་ནོ། །འཕྲོག་བའི་སྤང་པའོ་ཞེས་བྱ་བ་དེ་བཤད་ཟིན་ཏོ།། །།འདི་ལྟར་སོ་སོར་ཐར་པ་དང་རྣམ་པར་འབྱེད་པ་ལས་འཕྲོག་པའི་སྤང་བའི་འོག་ཏུ་བརྟད་པ་ལས་བྱུང་བའི་སྤང་བ་འབྱུང་མོད་ཀྱེ། ཞུ་བ་ལས་འཕྲོག་པའི་སྤང་བའི་འོག་ཏུ་ཞག་བདུན་ན་འབྲལ་བའི་སྤང་བ་འབྱུང་བས་ཞུ་བའི་གཞུང་བས་བླངས་ཏེ། གོ་རིམས་ཀྱི་གནས་མ་ཡིན་པར་ཞག་བདུན་ན་འབྲལ་བའི་སྤང་བ་ཉིད་ཉེ་བར་གཞག་ནས་དུས་གཞན་གྱི་རྒྱུ་ལས་བྱུང་བའི་ལྟུང་བ་དག་སྐབས་གཅིག་ཏུ་རྣམ་པར་གཞག་པའི་ཕྱིར། དགོན་པ་བའི་ཆོས་གོས་གཅིག་ལ་ནི་འཇིགས་པ་དང་བཅས་པ་ཉིད་ཡིན་ན་གྲོང་ཡང་རང་གི་གནས་དང་འདྲའོ་ཞེས་བྱ་བ་སྨྲས་ཏེ། དགེ་སློང་དགོན་པ་བའི་ཆོས་གོས་གཅིག་ལ་ནི་ཞེས་བྱ་བ་ནི། ཆོས་གོས་གསུམ་
ལས་གང་ཡང་རུང་བ་ཅིག་གི་ཕྱིར་རོ། །འཇིགས་པ་དང་བཅས་པ་ཉིད་ཡིན་ན་ཞེས་བྱ་བ་ནི། དགེ་སློང་དགོན་པ་པའི་རང་གི་གནས་དགོན་པ་དེ་རྐུན་པོ་ལ་སོགས་པ་དག་གི་འཇིགས་པ་དང་བཅས་པ་ཉིད་ཡིན་ནའོ། །གྲོང་ཡང་ཞེས་བྱ་བ་དགོན་པ་དེའི་སྤྱོད་ཡུལ་དུ་གྱུར་བའི་གྲོང་གང་ཡིན་པ་ཡང་ངོ། །རང་གི་གནས་དང་འདྲའོ་ཞེས་བྱ་བ་ནི། དགེ་སློང་དགོན་པ་པ་རང་གི་གནས་དགོན་པ་བ་དང་འདྲ་བར་ཤེས་པར་བྱ་བའོ། །འདི་སྐད་བསྟན་ཏེ། ཇི་ལྟར་དགེ་སློང་དགོན་པ་བའི་རང་གི་གནས་ན་འདུག་པའི་ཆོས་གོས་ལས་འབྲལ་བའི་ཉེས་པ་འབྱུང་བར་མི་འགྱུར་བ་དེ་བཞིན་དུ་རྒྱལ་པོ་དང་རྐུན་པ་ལ་སོགས་པའི་དབང་གིས་འཇིགས་པ་དང་བཅས་པ་ཉིད་ཡིན་ན། ཆོས་གོས་གཅིག་དགོན་པའི་སྤྱོད་ཡུལ་དུ་གྱུར་པའི་གྲོང་དུ་བཞག་སྟེ། ཆོས་གོས་གཅིག་པོ་དེ་དང་གནས་ཐ་དད་པ་ཡིན་དུ་ཟིན་ཀྱང༌། ཞག་དྲུག་ཚུན་ཆད་དུ་འབྲལ་བའི་ཉེས་པར་མི་འགྱུར་རོ། །འདིར་གཞུང་ནི་ཆོས་གོས་གསུམ་ལས་ཆོས་གོས་གང་ཡང་རུང་བ་ཅིག་ཁྱིམ་གཞན་དུ་གཞག་པར་བྱའོ་ཞེས་གསུངས་པ་ཡིན་ནོ། །འདི་ལྟར་དེར་ནི་དབྱར་ཕྱི་མ་ཞེས་སྨོས་ཏེ། དབྱར་ཕྱི་མར་གྱུར་པ་ཞེས་གསུངས་མོད་གྱི། འདིར་ནི་དེ་ཁས་མི་བླང་སྟེ། ལྟུང་བ་བསྟན་པ་ལས་དེ་ལ་མི་བརྟེན་པའི་ཕྱིར་ཏེ། དགེ་སློང་དགོན་པ་བ་དེས་ཞག་དྲུག་གི་མཐའ་ཚུན་ཆད་དུ་ཆོས་གོས་དེ་དང་མཚམས་ཀྱི་ཕྱི་རོལ་དུ་འབྲལ་བར་བྱའོ། །དེ་ལས་འདས་བར་བྲལ་ན་སྤང་བའི་ལྟུང་བྱེད་དོ་ཞེས་གསུངས་པའི་ཕྱིར་རོ། །གླེང་གཞིའི་དབང་གིས་ནི་སོ་སོར་ཐར་པའི་མདོ་ལ་སོགས་པ་དབྱར་ཕྱི་སྨ་ཞེས་སྨོས་པ་མཛད་དོ། །འབྲལ་བའི་དུས་ཀྱི་མཚམས་བརྗོད་པར་འདོད་ནས་དེས་དོན་གྱི་དབང་གིས་གྲོང་གཞན་ན་འདུག་པ་དེ་ལས་ཞག་དྲུག་ཚུན་ཆད་དུ་འབྲལ་བར་བྱའོ་ཞེས་བྱ་བ་སྨྲས་ཏེ། དེས་ཞེས་བྱ་བ་ནི་དགེ་སློང་དགོན་པ་བས་སོ། །དོན་གྱི་དབང་གིས་ཞེས་བྱ་བ་ནི། ཆོས་དང་ལྡན་པའི་དགོས་པའི་དབང་གིས་སོ། །གྲོང་གཞན་ན་འདུག་པ་དེ་ལས་ཞེས་བྱ་བ་ནི། ཆོས་གོས་གཅིག་དགོན་པའི་སྤྱོད་ཡུལ་དུ་གྱུར་པའི་གྲོང་གཞན་དུ་གཞག་ཅིང་འདུག་པ་དེ་ལས་སོ། །གལ་ཏེ་སྤྱོད་ཡུལ་དུ་གྱུར་བའི་གྲོང་ཡང་འཇིགས་པ་དང་བཅས་པར་གྱུར་ན། དེའི་ཚེ་གྲོང་གཞན་དུ་ཡང་གཞག་པར་བྱའོ་ཞེས་བསྡུས་བའི་ཕྱིར་གྲོང་
གཞན་ཞེས་སྨོས་སོ། །གནས་དགོན་པ་དེ་ན་ཆོས་གོས་འཆང་བ་དེའི་ཉེན་ཀོར་འདོམ་གང་ལ་སོགས་པ་གང་ཡིན་པ་དེ་ལས་ཕྱི་རོལ་དུ་སྐྱ་རེངས་ཤར་བ་ནི་འདིར་འབྲལ་བ་ཡིན་པར་རིག་པར་བྱའོ། །དུས་ཇི་སྲིད་ཅིག་ཏུ་དགོས་པའི་དབང་གིས་འབྲལ་དུ་གནང་ཞེ་ན། དེའི་ཕྱིར་ཞག་དྲུག་ཚུན་ཆད་དུ་ཞེས་བྱ་བ་སྨྲས་ཏེ། ཞག་དྲུག་པའི་མཐར་ཐུག་ཅིང་ཞག་བདུན་པའི་སྐྱ་རེངས་མ་ཤར་བ་ཚུན་ཆད་དུའོ། །འབྲལ་བར་བྱའོ་ཞེས་བྱ་བ་ནི་ཆོས་གོས་ཀྱི་གནས་མཚམས་དག་ལས་གཞན་དུ་ཡང་སྟེ། མཚམས་ཀྱི་ཕྱི་རོལ་དུ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། དགེ་སློང་དགོན་པ་པས་ཆོས་དང་ལྡན་པའི་དགོས་པའི་དབང་གིས་ན་ཆོས་གོས་གྲོང་གཞན་ན་འདུག་པའམ། རང་གི་གནས་ན་འདུག་པ་དེ་ལས་ཞག་དྲུག་ཚུན་ཆད་དུ་གཞན་དུ་འབྲལ་བར་བྱའི། དེ་ལས་ལྷག་པར་ནི་མི་བྱའོ། །ལྷག་པ་ལ་ནི་བག་ཡངས་མེད་དོ་ཞེས་བྱ་བ་ནི། ཞག་དྲུག་པ་ལས་ལྷག་པ་ཞག་བདུན་པ་ལ་ནི་འབྲལ་བར་གནང་བའི་བག་ཡངས་མེད་དེ་ལྟུང་བར་འགྱུར་བའོ། །འདི་སྐད་བསྟན་ཏེ། ཞག་བདུན་པའི་སྐྱ་རེངས་ཤར་ན་ནི་འབྲལ་བ་ཞེས་བྱ་བའི་ལྟུང་བ་འབྱུང་ངོ་ཞེས་བྱ་བའི་ཐ་ཚིག་གོ །བར་ཆད་ཀྱི་དབང་གིས་མ་འོངས་པ་ལ་ཉེས་པ་མེད་དོ་ཞེས་བྱ་བ་ནི། དགོན་པ་པ་གཞན་དུ་སོང་བ་རྐུན་པོ་ལ་སོགས་པ་བར་ཆད་ཀྱི་དབང་གིས་ཞག་དྲུག་ལས་ལྷག་པར་ཕྱིར་མ་འོངས་ཤིང་ཞག་བདུན་པ་ལ་སོགས་པར་ཐལ་བ་ལ་ནི་ཉེས་པ་མེད་པའོ། །འདི་སྐད་བསྟན་ཏེ། གལ་ཏེ་དགེ་སློང་དགོན་བ་པ་མཚམས་ཀྱི་ཕྱི་རོལ་དུ་སོང་བ་རྐུན་པོ་ལ་སོགས་བ་གནོད་པ་བྱེད་པའི་འཇིགས་པས་ཞག་དྲུག་ལས་ལྷག་པར་ཕྱིར་མ་འཁོར་ན་དེ་ལྟ་ན་ཡང་འབྲལ་བར་མི་འགྱུར་བར་བག་ཡངས་སུ་གནང་ངོ༌། །འདིར་གཞུང་ནི་བཙུན་པ་དགེ་སློང་དགོན་པ་བས་གྲོང་གཞན་དུ་ཆོས་གོས་བཞག་སྟེ། བགྱི་བ་འགའ་ཞིག་གི་སླད་དུ་མཚམས་ཀྱི་སླང་རོལ་དུ་མཆི་ཞིང༌། དེ་ཉིད་དུ་སླར་ལོག་པར་བགྱིའོ་སྙམ་པ་ལས་གལ་ཏེ་དེ་ལ་བར་ཆད་འགའ་ཞིག་བྱུང་ནས་སླར་མཆི་བར་རྔོ་མ་ཐོགས་ན་ཆོས་གོས་དེ་དང་བྲལ་ཞེས་བགྱིའམ། ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །ཁ་ཅིག་འདི་ལྟར་རྣམ་པར་རྟོག་སྟེ། གལ་ཏེ་དགེ་སློང་གིས་བདག་གིས་ཞག་དྲུག་ཕྱི་རོལ་དུ་འགྲོ་བར་བྱའོ་སྙམ་
དུ་བརྣག་པ་སྔོན་དུ་བྱས་ཏེ། འགྲོ་ཞིང་ཞག་དྲུག་པ་ལས་འདས་པ་ལ་ནི་འབྲལ་བའི་ཉེས་པ་འདི་མེད་པ་ཡིན་གྱི། གལ་ཏེ་དེ་ལྟར་བརྣག་པ་མ་བྱས་པར་ཉིན་གཅིག་གམ་མཚན་གཅིག་འགྲོ་བར་བརྣགས་ཏེ་སོང་བ་ལས་ཞག་དྲུག་འདས་པ་དེ་ལ་ནི་ཉེས་པ་ཁོ་ནར་འགྱུར་རོ་སྙམ་དུ་རྟོག་པ་དག་ཡོད་པས་དེ་བསྩལ་བའི་ཕྱིར། འདིར་ཞག་དྲུག་ཏུ་འགྲོ་བ་ཧ་ཅང་ཐལ་བ་ཉིད་ལ་ནི་བརྣག་བ་ཡན་ལག་མ་ཡིན་ནོ་ཞེས་བྱ་བ་སྨྲས་ཏེ། བསླབ་པའི་གཞི་འདིར་བརྣག་པ་ནི་ཡན་ལག་མ་ཡིན་ཏེ། འདི་ལྟར་ཞག་དྲུག་ཏུ་འགྲོ་བའི་དུས་དེ་ལས་ཧ་ཅང་ཐལ་བར་བྱའོ་སྙམ་པའི་བརྣག་པ་དེ་ནི་ཉེས་པར་འགྱུར་བའི་ཡན་ལག་མ་ཡིན་ཏེ། བརྣག་པ་མེད་པར་ཇི་ལྟར་སོང་ཡང་རུང་སྟེ། ཉིན་མཚན་གཅིག་ཏུ་བརྣགས་ཏེ་སོང་བ་ལས་ཞག་དྲུག་ལས་འདས་པར་གྱུར་ལ་ཉིད་པ་ཡང་ཉེས་པ་མེད་དོ། །ཞག་བདུན་ན་འབྲལ་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་དབྱར་གྱི་རས་ཆེན་གྱི་སྤང་བ་བརྗོད་པར་འདོད་ནས། བདག་ཉིད་གནས་པར་ཁས་བླངས་པའི་ཉིན་མོའི་ཟླ་བ་སྔ་མའི་དང་པོ་ཚུན་ཆད་ནས་དབྱར་གྱི་རས་ཆེན་བཙལ་བར་བྱའོ་ཞེས་བྱ་བ་སྨྲས་ཏེ། དབྱར་གྱི་རས་ཆེན་འདི་ཚོལ་བའི་དགེ་སློང་གིས་བདག་ཉིད་གནས་པར་ཁས་བླངས་པའི་ཉིན་མོ་ཞེས་བྱ་བ་ནི། དགེ་སློང་དེ་བདག་ཉིད་དབྱར་གནས་པར་ཁས་བླངས་པའི་ཉི་མ་གང་ཡིན་པ་དེའི་ཉིན་མོ་སྟེ། དབྱར་གནས་པར་ཁས་བླངས་པ་སྔ་མའི་ཉིན་མོ་ནི་དབྱར་ཟླ་འབྲིང་པོའི་ཚེས་བཅུ་དྲུག་གོ །དབྱར་གནས་པར་ཁས་བླངས་པ་ཕྱི་མའི་ཉིན་མོ་ནི་དབྱར་ཟླ་ཐ་ཆུངས་ཚེས་བཅུ་དྲུག་གོ །དེ་ནི་བདག་ཉིད་གནས་པར་ཁས་བླངས་པའི་ཉིན་མོ་སྟེ། དེའི་ཟླ་བ་སྔ་མ་ནི་དབྱར་ཟླར་བ་ཉ་ནས་དབྱར་ཟླ་འབྲིང་པོ་ཉའི་བར་རམ། དབྱར་ཟླ་འབྲིང་པོའི་ཉ་ནས་དབྱར་ཟླ་ཐ་ཆུངས་ཉའི་བར་རོ། །དེ་ནི་བདག་ཉིད་གནས་པར་ཁས་བླངས་བའི་ཉིན་མོའི་ཟླ་བ་སྔ་མ་སྟེ། དེའི་ཉི་མའི་དང་པོ་ནི་དབྱར་ཟླ་ར་བ་ཚེས་བཅུ་དྲུག་གམ་དབྱར་ཟླ་འབྲིང་པོ་ཚེས་བཅུ་དྲུག་གོ །ཚུན་ཆད་ནས་ཞེས་བྱ་བ་ནི། ཉི་མ་དང་པོ་དེ་གཉིས་དང་པོར་བྱས་ནས་དེ་ཚུན་ཆད་ནས་སོ། །དབྱར་གྱི་རས་ཆེན་བཙལ་བར་བྱའོ་ཞེས་བྱ་བ་ནི། དགེ་སློང་གིས་དབྱར་གྱི་གོས་རས་ཆེན་བཙལ་བར་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་དགེ་སློང་དབྱར་
གྱི་གོས་རས་ཆེན་ཚོལ་བར་བྱེད་ན་གང་གི་ཚེ་དབྱར་སྔ་མར་གནས་པར་ཁས་ལེན་ན་ནི་དེའི་ཚེ་དབྱར་ཟླ་ར་བ་ཚེས་བཅུ་དྲུག་ནས་བརྩམས་ནས་དགེ་སློང་དེས་ཇི་སྲིད་དབྱར་གྱི་གོས་རས་ཆེན་འཆང་བར་གནང་བའི་དུས་ཀྱི་མཐའ་ཚུན་ཆད་ཀྱི་བར་དུ་དབྱར་གྱི་རས་ཆེན་བཙལ་བར་བྱའོ།། གལ་ཏེ་གང་གི་ཚེ་དབྱར་ཕྱི་མར་གནས་པར་ཁས་ལེན་ན་ནི་དེའི་ཚེ་དབྱར་ཟླ་འབྲིང་པོ་ཚེས་བཅུ་དྲུག་ནས་བརྩམས་ནས་དགེ་སློང་དེས་ཇི་སྲིད་དུ་དབྱར་གྱི་གོས་རས་ཆེན་འཆང་བར་གནང་བའི་དུས་ཀྱི་མཐའ་ཚུན་ཆད་དུ་དབྱར་གྱི་རས་ཆེན་བཙལ་བར་བྱ་སྟེ། མདོ་འདིས་ནི་དབྱར་གྱི་རས་ཆེན་དང་པོ་བཙལ་བའི་དུས་བསྟན་ཏོ།། །།ད་ནི་བཅང་བའི་དུས་བརྗོད་པར་འདོད་ནས། བདག་ཉིད་ཀྱི་དབྱར་གྱི་འོག་གི་ཟླ་བ་ཕྱེད་ཀྱི་མཐའི་བར་དུ་བཅང་བར་བྱའོ་ཞེས་བྱ་བ་སྨྲས་ཏེ། དགེ་སློང་དེའི་དབྱར་གནས་པར་ཁས་བླངས་པའི་དབང་གིས་བདག་ཉིད་ཀྱི་དབྱར་སྔ་མའམ་ཕྱི་མ་རྣམ་པར་གཞག་པ་གང་ཡིན་པ་དེའི་འོག་མར་གྱུར་པ་དུས་ཕྱིས་འབྱུང་བའི་ཟླ་བ་ཕྱེད་གང་ཡིན་པ་དེ་ནི་བདག་ཉིད་ཀྱི་དབྱར་གྱི་འོག་གི་ཟླ་བ་ཕྱེད་ཡིན་ནོ། །དེའི་མཐའ་ནི་མཐར་ཐུག་པར་གྱུར་བ་སྟེ། དུས་དེ་སྲིད་ཀྱི་བར་དུ་དབྱར་གྱི་གོས་རས་ཆེན་བཅང་བར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་དེས་དབྱར་གནས་པར་ཁས་བླངས་པ་སྔ་མར་ཁས་ལེན་པར་འདོད་ན་ནི། དེའི་ཚེ་དབྱར་ཟླ་ར་བ་ཚེས་བཅུ་དྲུག་ནས་བརྩམས་ནས་སྟོན་ཟླ་ཐ་ཆུངས་ཚེས་ཀྱི་བར་དུ་ཟླ་བ་ཕྱེད་དང་ལྔར་དབྱར་གྱི་གོས་རས་ཆེན་དེ་བཅང་བའི་དུས་ཡིན་ནོ། །གལ་ཏེ་དགེ་སློང་དེས་དབྱར་གནས་པར་ཁས་བླངས་པ་ཕྱི་མར་ཁས་ལེན་པར་འདོད་ན་ནི། དེའི་ཚེ་དབྱར་ཟླ་འབྲིང་པོའི་ཚེས་བཅུ་དྲུག་ནས་བརྩམས་ནས་དགུན་ཟླ་རབ་ཚེས་ཀྱི་བར་དུ་ཟླ་བ་ཕྱེད་དང་ལྔར་དབྱར་གྱི་གོས་རས་ཆེན་དེ་བཅང་བའི་དུས་ཡིན་ཏེ། དེ་ལས་ཐལ་བར་འཆང་དུ་ནི་མི་གནང་ངོ༌། །དེ་ལྟ་བས་ན་འདིར་སྟོན་ཟླ་ཐ་ཆུངས་ཚེས་གཅིག་གམ། དགུན་ཟླ་ར་བ་ཚེས་གཅིག་གི་སྐྱ་རེངས་དང་པོ་ཤར་ན་སྤང་བའི་ལྟུང་བྱེད་དུ་འགྱུར་རོ། །དེ་ལྟར་ཡང་འདིར་གཞུང་ནི་བཙུན་པ་རེ་ཞིག་དགེ་སློང་གིས་དབྱར་གྱི་རས་ཆེན་རུང་བ་མ་ལགས་པ་དགུན་ཟླ་ཕྱེད་དང་ལྔ་ལས་འདས་པར་འཆང་ན་ལྟུང་བ་ཅིར་འགྱུར། ཉེ་བ་འཁོར་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །གང་ལ་
དབྱར་གྱི་རས་ཆེན་གྱི་སྤང་བར་འགྱུར་ཞེ་ན། དེའི་ཕྱིར་སྔོན་དང་ཕྱི་མ་གཉིས་ལས་དེ་མ་ཡིན་པའི་དུས་གཉིས་ནི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། བཙལ་བའི་དུས་བསྟན་པ་བས་སྔོན་རོལ་གྱི་དུས་གང་ཡིན་པ་དང༌། བཅང་བའི་དུས་བསྟན་པ་པས་ཕྱི་མའི་དུས་གང་ཡིན་པའི་དུས་སྔ་མ་དང་ཕྱི་མ་དེ་གཉིས་ནི་འདིར་ལྟུང་བའི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། དབྱར་ཟླ་ར་བ་ཉ་ནས་དབྱར་ཟླ་འབྲིང་པོ་ཉའི་བར་ཞེས་བྱ་བའི་ཟླ་བས་སྔོན་རོལ་གྱི་དུས་གང་ཡིན་པ་དང༌། སྟོན་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཚེས་ཞེས་བྱ་བའི་བར་གྱི་ཟླ་བ་ཕྱེད་ཀྱ་འོག་མའི་དུས་དེ་གཉིས་ནི་ལྟུང་བའི་བྱེད་པ་པོ་ཉིད་ཡིན་ནོ། །ཡུལ་གང་ལ་དེ་གཉིས་བྱེད་པ་པོ་ཉིད་ཡིན་ཞེ་ན། དེའི་ཕྱིར་རེ་ཞིག་འཆང་བ་ལ་ནི་གཞན་དུ་འཆང་བ་ལའོ་ཞེས་བྱ་བ་སྨྲས་ཏེ། འཆང་བའི་དུས་སྔར་བསྟན་པ་ལས་གཞན་པའི་དུས་སུ་འཆང་ན་དངོས་གཞིའི་ཁ་ན་མ་ཐོ་བའི་བྱེད་པ་པོ་ཉིད་ཡིན་ནོ། །སྔར་བཙལ་བ་ལ་ནི་ཉེས་བྱས་ཀྱིའོ་ཞེས་བྱ་བ་ནི་བཙལ་བའི་དུས་སྔར་བསྟན་པ་བས་སྔོན་རོལ་གྱི་དུས་གང་ཡིན་པའི་དུས་དེར་བཙལ་ན་བཙལ་བ་ཙམ་ལ་སྦྱོར་བ་ཞེས་བྱ་བ་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །དངོས་གཞིའི་ཁ་ན་མ་ཐོ་བའི་ཡུལ་གང་ལ་བྱེད་པ་པོ་ཉིད་ཡིན་ཞེ་ན། དེའི་ཕྱིར་གྲུབ་ན་མཐའིའོ་ཞེས་བྱ་བ་སྨྲས་ཏེ། བཙལ་བའི་དུས་བསྟན་པ་བས་སྔོན་རོལ་གྱི་དུས་སུ་དབྱར་གྱི་རས་ཆེན་དེ་གྲུབ་ན་སྔོན་རོལ་གྱི་དུས་དེ་མཐའི་ཞེས་བྱ་བ་དངོས་གཞིའི་ཁ་ན་མ་ཐོ་བའི་བྱེད་པ་པོ་ཉིད་ཡིན་ནོ། །དུས་སྔ་ཞིག་ཏུ་གང་ཚོལ་བ་རྩོམ་པར་བྱེད་ཅིང་རིགས་པའི་དུས་སུ་ཐོབ་པར་བྱེད་པ་གང་ཡིན་པ་དེ་ནི། སྦྱོར་བའི་ཁ་ན་མ་ཐོ་བ་ཉིད་དུ་འགྱུར་བ་ཡིན་གྱི་དངོས་གཞིའི་ཁ་ན་མ་ཐོ་བར་འགྱུར་བ་ནི་མ་ཡིན་ནོ། །རྙང་རྙིང་ལ་ནི་ན་སྨད་པ་ཉིད་དོ་ཞེས་བྱ་བ་ནི། དབྱར་གྱི་གོས་རས་ཆེན་རྙང་རྙིང་དུ་གྱུར་ཅིང་དེངས་པ་ཞིག་བཙལ་བའི་དུས་མ་ཡིན་པར་བཙལ་བ་དང་ཐོབ་ནས་དུས་ལས་ཡོལ་བར་འཆང་བར་བྱེད་པ་ལ་ནི་ན་སྨད་པ་ཉིད་དེ་ཉེས་བྱས་སུ་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་དབྱར་གྱི་གོས་རས་ཆེན་རྙང་རྙིང་དུ་གྱུར་པ་ཞིག་ཟླ་བ་ཕྱེད་དང་ལྔ་ལས་ལྷག་པར་འཆང་ན་ཉེས་བྱས་སོ། །དེ་བཞིན་དུ་དབྱར་གྱི་གོས་རས་ཆེན་བུག་རྡོལ་དུ་གྱུར་པ་ཧ་ཅང་ཚོགས་ཏེ་ཚོལ་བར་བྱེད་ན་ཡང་ཉེས་
བྱས་སོ་ཞེས་གསུངས་པ་ཡིན་ནོ། །དབྱར་གནས་པར་ཁས་བླང་བ་དང་འབྲེལ་བའི་བྱ་བ་དག་ནི་མང་དུ་སྣང་ན་ཅི་བྱ་བ་གང་དག་དབྱར་གནས་པར་ཁས་བླང་བ་སྔ་མ་དང་འབྲེལ་བ་དེ་དག་ཉིད་དབྱར་གནས་པར་ཁས་བླང་བ་ཕྱི་མ་དང་འབྲེལ་བ་དག་ཀྱང་ཡིན་ནམ་ཞེ་ན། དེའི་ཕྱིར་དེའི་རྗེས་སུ་འགྲོ་བ་ནི་ཁས་བླང་བ་ཇི་ལྟ་བ་བཞིན་ནོ་ཞེས་བྱ་བ་སྨྲས་ཏེ། དེའི་རྗེས་སུ་འགྲོ་བ་ཞེས་བྱ་བ་ནི། ཁས་བླང་བའི་རྗེས་སུ་འགྲོ་བ་ཁས་བླང་བ་དང་འབྲེལ་བ་ཁས་བླང་བ་ལ་བརྟེན་ནས་བྱ་བ་གང་འབྱུང་བར་འགྱུར་བའོ། །ཁས་བླང་བ་ཇི་ལྟ་བ་བཞིན་ནོ་ཞེས་བྱ་བ་ནི། དེ་ཐམས་ཅད་ཁས་བླང་བའི་རྗེས་སུ་མཐུན་པ་ཡིན་པར་རིག་པར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་དབྱར་གནས་པར་ཁས་བླང་བ་སྔ་མར་ཁས་ལེན་པར་བྱེད་ན་ནི་དགེ་སློང་དེས་དབྱར་གནས་པར་ཁས་བླང་བ་སྔ་མ་དང་འབྲེལ་བའི་བྱ་བ་གང་དག་ཡིན་པ་དེ་དག་ཐམས་ཅད་དེ་ཉིད་དུ་བྱའོ། །འོན་ཏེ་དགེ་སློང་དབྱར་གནས་པར་ཁས་བླང་བ་ཕྱི་མར་ཁས་ལེན་པར་བྱེད་ན་ནི། དགེ་སློང་དེས་དབྱར་གནས་པར་ཁས་བླང་བ་ཕྱི་མ་དང་འབྲེལ་བའི་བྱ་བ་གང་དག་ཡིན་པ་དེ་དག་ཐམས་ཅད་དེ་ཉིད་དུ་བྱ་སྟེ། འདི་ལྟ་སྟེ། མཐའི་ཞག་བཅུ་ལ་བརྟད་པ་ལས་བྱུང་བའི་གོས་བླང་ངོ་ཞེས་གསུངས་པ་ནི་བདག་ཉིད་ཀྱི་དབྱར་གྱི་མཐའི་ཞག་བཅུ་གང་ཡིན་པ་ལ་བྱ་སྟེ། སྟོན་ཟླ་འབྲིང་པོའི་ཚེས་ལྔ་ནས་ཉའི་བར་གྱི་ཞག་བཅུ་འམ། སྟོན་ཟླ་ཐ་ཆུངས་ཚེས་ལྔ་ནས་ཉའི་བར་གྱི་ཞག་བཅུ་ལ་བྱ་བ་ལྟ་བུའོ། །དེ་ལྟར་ན་གནས་པར་བྱ་བའི་དབྱར་གྱི་ཚད་ལས་ལྟོས་ནས་དབྱར་གྱི་རས་ཆེན་བཙལ་བ་དང་བཅང་བ་ཁོང་དུ་ཆུད་པར་བྱའོ།། དེ་བཞིན་དུ་དགག་དབྱེ་ཡང་སྟོན་ཟླ་འབྲིང་པོ་ཉའམ། སྟོན་ཟླ་ཐ་ཆུངས་ཉ་ལ་བྱ་བ་ལྟ་བུ་ཡིན་ནོ། །སྲ་བརྐྱང་གདིང་བ་ནི་དབྱར་གནས་པར་ཁས་བླང་བ་སྔ་མ་ཤོས་དང་འབྲེལ་བ་ཁོ་ན་ཡིན་ནོ། །དབྱར་གྱི་རས་ཆེན་གྱི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།བརྟད་པ་ལས་བྱུང་བའི་སྤང་བ་ལ་དོན་གང་ཞིག་བྱེད་པ་པོ་ཉིད་ཡིན་ཞེ་ན། དེའི་ཕྱིར་དབྱར་གྱི་རྙེད་པ་ནི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། དབྱར་གནས་པའི་ཕྱིར་རྙེད་པ་གང་ཡིན་པ་དེ་ནི་འདིར་དབྱར་གྱི་རྙེད་པ་ཞེས་བྱ་སྟེ། དེ་ནི་ལྟུང་བའི་བྱེད་པ་པོ་ཉིད་ཡིན་གྱི། འཕྲལ་གྱི་མཆོད་སྟོན་ལ་སོགས་པའི་ཕྱིར་རྙེད་པ་གཞན་ནི་མ་ཡིན་
ནོ། །འདི་སྐད་བསྟན་ཏེ། དབྱར་གནས་པའི་ཕྱིར་བྱུང་བའི་རྙེད་པ་གང་ཡིན་པ་དེ་འདིར་ལྟུང་བའི་བྱེད་པ་པོ་ཉིད་ཡིན་གྱི། རྙེད་པ་གཞན་ནི་མ་ཡིན་ནོ། །ཇི་ཞིག་རྗེས་སུ་བསྒྲུབ་ན་དེ་ལྟུང་བའི་བྱེད་པ་པོ་ཉིད་ཡིན་ཞེ་ན། དེའི་ཕྱིར་དབྱར་གྱི་ནང་ལོགས་སུ་བདག་གིར་བྱེད་ནའོ་ཞེས་བྱ་བ་སྨྲས་ཏེ། དབྱར་གནས་པར་བྱ་བའི་ཟླ་བ་གསུམ་པོ་དག་གི་ནང་རོལ་དུ་དབྱར་གྱི་རྙེད་པ་བདག་གིར་བྱེད་ནའོ། །འདི་སྐད་བསྟན་ཏེ། གལ་ཏེ་དགེ་སློང་གིས་དབྱར་གནས་པའི་ཕྱིར་བྱུང་བའི་རྙེད་པ་དབྱར་གྱི་ནང་ལོགས་སུ་བདག་གིར་བྱེད་ན་དེའི་ཚེ་སྤང་བའི་ལྟུང་བྱེད་དུ་འགྱུར་རོ། །སྤྱིར་བཏང་བ་བྱས་ནས་དམིགས་ཀྱིས་བསལ་བར་བྱ་བར་འདོད་ནས། བརྟད་པའི་དབང་གིས་མཐའི་ཞག་བཅུ་ལ་རྙེད་པ་ནི་མ་གཏོགས་སོ་ཞེས་བྱ་བ་སྨྲས་ཏེ། བརྟད་པའི་དབང་གིས་ཞེས་བྱ་བ་ནི། གློ་བུར་གྱི་དོན་གྱི་དབང་གིས་སོ། །མ་ཐའི་ཞག་བཅུ་ལ་ཞེས་བྱ་བ་ནི། དབྱར་གནས་པར་བྱ་བའི་ཟླ་བ་གསུམ་པོ་དག་གི་མཐའི་ཞག་བཅུ་པོ་ལས་ཏེ། སྟོན་ཟླ་འབྲིང་པོ་ཚེས་ལྔ་ནས་ཉའི་བར་རམ། སྟོན་ཟླ་ཐ་ཆུངས་ཚེས་ལྔ་ནས་ཉའི་བར་གྱི་ཞག་བཅུ་ལའོ། །རྙེད་པ་ནི་ཞེས་བྱ་བ་ནི་དབྱར་གནས་པའི་ཕྱིར་བྱུང་བའི་རྙེད་པའོ། །མ་གཏོགས་སོ་ཞེས་བྱ་བ་ནི། བདག་གིས་བྱས་ཀྱང་ཉེས་པ་མེད་བའོ། །འདི་སྐད་བསྟན་ཏེ། གལ་ཏེ་དགེ་སློང་རྣམས་ཀྱིས་དགེ་སློང་དག་གི་རྙེད་པའི་བར་ཆད་ཀྱི་དབང་གིས་སམ། ཡོན་བདག་གི་བསོད་ནམས་ཀྱི་བར་ཆད་ཀྱི་དབང་གིས་མཐའི་ཞག་བཅུ་ལ་དབྱར་གནས་པའི་ཕྱིར་བྱུང་བའི་རྙེད་པ་བདག་གིར་བྱེད་ན་ཡང་དེའི་ཚེ་ཁ་ན་མ་ཐོ་བར་མི་འགྱུར་རོ། །བརྟད་པ་ལས་བྱུང་བའི་གོས་ལྔ་པོ་ནད་པ་ལ་སྦྱིན་པ་དང༌། ནད་པའི་ཕྱིར་སྦྱིན་པ་དང༌། འཆི་བ་ལ་སྦྱིན་པ་དང༌། ཤི་བའི་ཕྱིར་སྦྱིན་པ་དང༌། འགྲོ་བར་ཆས་པ་ལ་སྦྱིན་པ་ཞེས་གསུངས་པ་གང་ཡིན་པ་དེ་ནི་དཔེ་ཙམ་དུ་ཟད་དེ། རྒྱལ་པོ་དང༌། ཆོམ་རྐུན་དང༌། རིགས་རྒྱུད་དང༌། ཆུ་ལ་སོགས་པས་ཁྱེར་དུ་དོགས་པ་དང༌། མཆོད་གནས་བགོ་སྐལ་ལ་གཏོགས་པ་འཆིང་དོགས་པ་ལ་སོགས་པ་དག་ཀྱང་ཡོངས་སུ་བསྡུ་བའི་ཕྱིར་གསུངས་པ་ཡིན་ནོ། །དེ་བགོས་ན་ཡང་ངོ་ཞེས་བྱ་བ་ནི་བརྟད་པ་ལས་བྱུང་བའི་རྙེད་པ་དེ་དབྱར་གྱི་ནང་ལོགས་སུ་བགོས་ན་ཡང་ལྟུང་བའི་བྱེད་པ་པོ་ཉིད་ཡིན་པའོ། །
འདི་སྐད་བསྟན་ཏེ། གལ་ཏེ་བརྟད་པ་ལས་བྱུང་བའི་རྙེད་པ་བདག་གིར་བྱས་པ་དེ་དབྱར་གྱི་ནང་ལོགས་སུ་འགོད་པར་བྱེད་ན་དེ་ལྟ་ན་ཡང་སྤང་བའི་ལྟུང་བྱེད་དུ་འགྱུར་རོ། །དེ་ལྟ་བས་ན་དབྱར་གྱི་ནང་གི་རྙེད་པ་དབྱར་གྱི་ནང་ལོགས་སུ་བདག་གིར་བྱེད་པ་འབའ་ཞིག་ལྟུང་བའི་བྱེད་པ་པོ་ཉིད་ཡིན་པར་མ་ཟད་ཀྱི་བདག་གིར་བྱེད་པ་འདི་ཡང་ཡིན་ནོ། །འདིར་གཞུང་ནི་བླང་བར་བྱའོ། །བླངས་ནས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ་ཞེས་གསུངས་པ་ཡིན་ནོ། །བརྟད་པ་ལས་བྱུང་བའི་རྙེད་པ་བདག་གིར་བྱས་ཀྱང་བགོ་བར་མི་བྱ་སྟེ། འགོད་ན་སྤང་བའི་ལྟུང་བྱེད་དུ་འགྱུར་རོ། །དབྱར་གྱི་ནང་ལོགས་སུ་བྱུང་བའི་རྙེད་པ་བདག་གིར་བྱེད་ན་ཡང་སྤང་བའི་ལྟུང་བྱེད་དུ་འགྱུར་ལ། འགོད་ན་ཡང་སྤང་བའི་ལྟུང་བྱེད་དུ་འགྱུར་རོ། །གཙུག་ལག་ཁང་གང་དག་ན་ཆོས་གོས་ཀྱི་ཟོང་ངེས་པར་གྱུར་བ་ཡོད་པ་ནི་ཇི་སྲིད་དུ་མ་ཐོབ་པ་དེ་སྲིད་དུ་དེ་ལ་བདག་གིར་བྱ་བ་མི་འབྱུང་ལ་ཐོབ་ན་ནི་བདག་གིར་བྱས་པ་ཡིན་ནོ། །མ་བགོས་ན་ཡང་ངོ་ཞེས་བྱ་བ་ནི། དེ་ཞེས་བྱ་བའི་རྗེས་སུ་སྦྱར་རོ། །བརྟད་པ་ལས་བྱུང་བའི་རྙེད་པ་དབྱར་དག་ལ་བྱུང་བ་དེ་གོས་སྦྱིན་པའི་དུས་སུ་མ་བགོས་པར་དེ་ལས་འདས་པར་བཅང་ན་ཡང་ལྟུང་བའི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། ལྟུང་བའི་བྱེད་པ་པོ་རྣམ་པ་གསུམ་པོ་དབྱར་གྱི་ནང་ལོགས་སུ་བདག་གིར་བྱེད་པ་དང༌། འགོད་པ་དང་མི་འགོད་པ་ཞེས་གསུངས་པ་རྣམ་པ་གསུམ་པོ་དེ་དག་ཐམས་ཅད་ནི་བདག་གིར་བྱེད་པ་དང༌། འགོད་པ་དང༌། མི་འགོད་པ་ཞེས་བྱ་བའི་དངོས་གཞིའི་བྱེད་པ་པོ་ཉིད་ཡིན་གྱི། སྦྱོར་བའི་ནི་མ་ཡིན་ནོ། །འདིར་གཞུང་ནི་དགེ་སློང་གིས་དབྱར་གྱི་ནང་ཚུན་ཆད་དུ་དབྱར་གྱི་རྙེད་པ་འགོད་པར་བྱེད་དམ་གོས་སྦྱིན་པའི་དུས་ལས་འདས་པར་འཆད་པར་བྱེད་ན་ཐམས་ཅད་དུ་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །མ་བགོས་ན་ཡང་ངོ་ཞེས་སྤྱིར་གཏང་བ་སྨྲས་པ་དེའི་དམིགས་ཀྱིས་བསལ་བ་སྨྲ་བར་འདོད་ནས། སྦྱིན་པ་དག་གི་ཚིག་གིས་དབང་མེད་ནའོ་ཞེས་བྱ་བ་སྨྲས་ཏེ། གལ་ཏེ་སྦྱིན་བདག་འདི་སྐད་ཅེས་རེ་ཞིག་ཁྱེད་ཅག་གིས་མ་བགོ་ཤིག་བདག་མཆིས་ནས་རང་གི་ལག་ནས་དབུལ་ལོ་ཞེས་ཟེར་ན་དེའི་དབང་གིས་མ་བགོས་ན་ཡང་ཉེས་པ་མེད་
དོ། །སྦྱིན་བདག་གི་ཚིག་མེད་པར་མ་བགོས་ན་ནི་ཉེས་པ་ཁོ་ནར་འགྱུར་རོ། །དུས་གང་གི་ཚེ་མ་བགོས་ན་ཞེ་ན། དེའི་ཕྱིར་དགག་དབྱེའི་ཉིན་མོའི་ཕྱི་དེ་ཉིན་པར་དེ་སྤེད་པ་མ་བསྐོས་པ་རྣམས་ལའོ་ཞེས་བྱ་བ་སྨྲས་ཏེ། དགག་དབྱེའི་ཉིན་མོ་ཞེས་བྱ་བ་ནི། དབྱར་གནས་པར་ཁས་བླངས་པ་སྔ་མའི་སྟོན་ཟླ་འབྲིང་པོ་ཉའོ། །དབྱར་གནས་པར་ཁས་བླངས་པ་ཕྱི་མ་ནི་སྟོན་ཟླ་ཐ་ཆུངས་ཉའོ། །དེའི་ཕྱི་དེ་ཉིན་པར་ཞེས་བྱ་བ་ནི། སྟོན་ཟླ་འབྲིང་པོའི་ཚེས་བཅུ་དྲུག་གམ། སྟོན་ཟླ་ཐ་ཆུངས་ཚེས་བཅུ་དྲུག་སྟེ། དུས་དེར་དབྱར་གྱི་རྙེད་པ་མ་བགོས་ན་སྤང་བའི་ལྟུང་བྱེད་དུ་འགྱུར་རོ། །སུ་དག་ལ་ཞེ་ན། དེའི་ཕྱིར་དེ་སྦེད་པ་མ་བསྐོས་པ་རྣམས་ལའོ་ཞེས་བྱ་བ་སྨྲས་ཏེ། གང་དག་གིས་དེ་སྤེད་པའི་དགེ་སློང་མ་བསྐོས་པ་དེ་དག་ནི་དེ་སྤེད་པ་མ་བསྐོས་པ་རྣམས་ཏེ། དེ་དག་ལའོ། །འདི་སྐད་བསྟན་ཏེ། དགེ་སློང་གང་དག་གིས་གོས་སྤེད་པའི་དགེ་སློང་མ་བསྐོས་པ་དེ་དག་གིས་དགག་དབྱེའི་ཉིན་མོའི་ཕྱི་དེ་ཉིན་པར་གལ་ཏེ་དབྱར་གྱི་རྙེད་པ་འགོད་པར་མི་བྱེད་ན་དེའི་ཚེ་དེ་དག་ལ་སྤང་བའི་ལྟུང་བྱེད་དུ་འགྱུར་རོ། །དེ་ལྟར་ཡང་འདིར་གཞུང་ནི་སོ་སོར་ཐར་བའི་མདོ་ལས་གོས་སྦྱིན་པའི་དུས་ཀྱི་བར་དུ་བཅང་བར་བྱའོ། །དེ་ལས་འདས་པར་འཆང་ན་སྤང་བའི་ལྟུང་བྱེད་དོ་ཞེས་གསུངས་པ་ཡིན་ནོ། །དེ་བཞིན་དུ་དེའི་རྣམ་པར་འབྱེད་པ་ལས་ཀྱང་དགེ་སློང་གིས་གོས་སྦྱིན་པའི་དུས་དང་སྐབས་མ་ཡིན་པ་གང་ཡིན་ཞེ་ན། སྲ་བརྐྱང་མ་བཏིང་བའི་གནས་ན་ནི་སྟོན་ཟླ་ཐ་ཆུངས་ཉ་ཚུན་ཆད་དོ། །སྲ་བརྐྱང་བ་ཏིང་བའི་གནས་ན་ནི་སྟོན་ཟླ་ཐ་ཆུངས་ཉ་ཕན་ཆད་ནས་དཔྱིད་ཟླ་འབྲིང་པོ་ཉའི་བར་ཏེ། དེ་ནི་དགེ་སློང་གི་ཆོས་གོས་སྦྱིན་པའི་དུས་མ་ཡིན་ལ་ལྷག་མ་རྣམས་ནི་དུས་ཡིན་ནོ་ཞེས་གསུངས་པ་ཡིན་ནོ། །དབྱར་གནས་པར་ཁས་བླངས་པ་ཕྱི་མ་ཤོས་ངེས་པར་བྱས་ན་ནི་སྟོན་ཟླ་ཐ་ཆུངས་ཉ་ཚུན་ཆད་དོ་ཞེས་གསུངས་པ་ཡིན་ནོ། །དབྱར་གནས་པར་ཁས་བླངས་པ་སྔ་མ་ལ་ནི་སྟོན་ཟླ་འབྲིང་པོ་ཉ་ཚུན་ཆད་དུས་མ་ཡིན་ནོ། །འདི་སྐད་བསྟན་ཏེ། སྲ་བརྐྱང་མ་བཏིང་བའི་གནས་ན་ནི་ཇི་སྲིད་དུ་སྲ་བརྐྱང་འདིང་བར་མི་བྱེད་ཀྱི་བར་དུ་སྟོན་ཟླ་འབྲིང་པོ་ཚེས་བཅུ་དྲུག་ཁོ་ན་གོས་སྦྱིན་པའི་དུས་ཡིན་ནོ། །དེ་ནི་མི་བསྐོ་བར་མི་བྱའོ་ཞེས་བྱ་བ་ནི། གོས་སྤེད་པའི་དགེ་སློང་དེ་མི་བསྐོ་བར་མི་བྱ་སྟེ།
བསྐོ་བ་ཁོ་ནར་བྱ་བའོ། །འདི་སྐད་བསྟན་ཏེ། གོས་བརྟད་པ་ལས་བྱུང་བ་དང༌། དུས་སུ་བྱུང་བ་དང༌། གཞན་ཡང་རུང་སྟེ། དེ་དག་སྤ་བའི་ཕྱིར་དགེ་སློང་བསྐོ་བར་བྱའོ། །འདི་ལྟར་རྣམ་པར་འབྱེད་པ་ལས་འཕྲོག་པའི་སྤང་བའི་འོག་ཏུ་བརྟད་པ་ལས་བྱུང་བའི་སྤང་བ་འབྱུང་མོད་ཀྱི། འོན་ཀྱང་ཞུ་བ་ལས་གསུངས་པའི་གཞུང་ཁས་བླངས་ནས་རིམ་པ་འདི་ལྟར་བསྟན་ཏེ། དབྱར་གྱི་རས་ཆེན་དང་བརྟད་པ་ལས་བྱུང་བ་གཉིས་ཀྱིས་བཅང་བ་སྤྱིར་འདྲ་བ་ལ་བརྟེན་པར་བྱས་སོ། །བརྟད་པ་ལས་བྱུང་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་བསྔོས་པ་ལས་བསྒྱུར་བའི་སྤང་བ་བརྗོད་པར་བྱ་སྟེ། ཅི་ཞིག་བྱས་ན་བསྔོས་པ་ལས་བསྒྱུར་བའི་སྤང་བར་འགྱུར་ཞེ་ན། དེའི་ཕྱིར་གཞན་གྱིས་གང་ཟག་གཞན་ནམ་དགེ་འདུན་ལ་བསྔོས་པའི་གོས་ཤེས་བཞིན་དུ་བདག་ཉིད་ལ་བསྒྱུར་ཏེ་ཐོབ་ནའོ་ཞེས་བྱ་བ་སྨྲས་ཏེ། གཞན་གྱིས་ཞེས་བྱ་བ་ནི་ཡོན་བདག་གིས་སོ། །གང་ཟག་གཞན་ནམ་ཞེས་བྱ་བ་ནི་གང་ཟག་གཞན་ལ་ལྟོས་པའི་གོས་སོ། །གཞན་ཞེས་དམིགས་ཀྱིས་སྨོས་པ་ནི་ལྟུང་བ་འབྱིན་པར་བྱེད་པ་ལས་གཞན་པའི་གང་ཟག་ལ་བསྔོས་པ་ཡིན་གྱི་ལྟུང་བ་འབྱིན་པར་བྱེད་པ་ལ་ནི་མ་ཡིན་ནོ་ཞེས་བསྟན་པའི་ཕྱིར་རོ། །དགེ་འདུན་ལ་ཞེས་བྱ་བ་ནི། དགེ་འདུན་སྤྱིལ་བསྔོས་པའི་གོས་སོ། །བསྔོས་བའི་ཞེས་བྱ་བ་ནི་ཡིད་ཀྱིས་ཕུལ་བའི་འོ། །གོས་ཞེས་བྱ་བ་ནི་གོས་ཀྱི་རྙེད་པ་ཡིན་གྱི། ཟས་ཀྱི་རྙེད་པ་ནི་མ་ཡིན་ཏེ། དེ་ལྟར་ཡང་འདིར་གཞུང་ནི་རྣམ་པར་འབྱེད་པ་ལས་གོས་ཀྱི་རྙེད་པ་ཡིན་པར་དགོངས་སོ་ཞེས་གསུངས་པ་ཡིན་ནོ། །ཤེས་བཞིན་དུ་ཞེས་བྱ་བ་ནི། གལ་ཏེ་དགེ་སློང་གིས་འདི་ལྟར་གོས་འདི་སྦྱིན་བདག་འདིས་གང་ཟག་གཞན་ནམ་དགེ་འདུན་ལ་བསྔོས་ཤིང་ཡིད་ཀྱིས་ཕུལ་བར་ཤེས་བཞིན་དུའོ་བདག་ཉིད་ལ་བསྒྱུར་ཏེ་ཞེས་བྱ་བ་ནི། ལྟུང་བ་འབྱིན་པར་བྱེད་པས་དེ་ལྟར་ཤེས་བཞིན་དུ་གོས་དེ་བདག་ཉིད་ཀྱི་ཡུལ་ལ་བསྒྱུར་དུ་བཅུག་སྟེའོ། །ཐོབ་ནའོ་ཞེས་བྱ་བ་ནི་ཇི་སྐད་སྨོས་པའི་རྣམ་པ་དེ་དག་གིས་གོས་དེ་ཐོབ་ན་དངོས་གཞིའི་ཁ་ན་མ་ཐོ་བར་འགྱུར་བའོ། །འདི་ལྟར་སོ་སོར་ཐར་པའི་མདོ་ལས་ཡང་དགེ་སློང་གང་དགེ་འདུན་ལ་བསྔོས་པའི་རྙེད་པ་ཤེས་བཞིན་དུ་གང་ཟག་བདག་ལ་བསྔོར་འཇུག་ན་སྤང་བའི་ལྟུང་བྱེད་དོ་ཞེས་དགེ་འདུན་གྱི་
འབའ་ཞིག་སྨོས་མོད་ཀྱི། འོན་ཀྱང་ལྟུང་བ་བསྟན་པ་ལས་གང་ཟག་ཀྱང་སྨོས་པའི་ཕྱིར། འདིར་གང་ཟག་གཞན་ནམ་ཞེས་གང་ཟག་ཀྱང་སྨོས་ཏེ། དགེ་སློང་གིས་གང་ཟག་གཅིག་ལ་བསྔོས་པའི་རྙེད་པ་གང་ཟག་བདག་ཉིད་ལ་སྒྱུར་བར་བྱེད་ན་སྒྱུར་བར་བྱེད་པ་དེ་ལ་ཉེས་བྱས་སུ་འགྱུར་ལ། ཐོབ་ན་སྤང་བའི་ལྟུང་བྱེད་དུ་འགྱུར་རོ། །དེ་ལྟར་འདིར་ཚིག་གི་དོན་འདི་འབྱུང་སྟེ། གལ་ཏེ་ཡོན་བདག་གཞན་འགའ་ཞིག་གིས་དགེ་འདུན་གྱི་ཕྱིར་རམ། གང་ཟག་གཞན་གྱི་ཕྱིར་གོས་ཤིག་དེ་ལ་སྦྱིན་ནོ་ཞེས་བསྔོས་པ་ལས་དགེ་སློང་གིས་ཀྱང་དེ་ལྟར་ཤེས་བཞིན་དུ་འོན་ཀྱང་བདག་ཉིད་ལ་སྒྱུར་བར་བྱེད་ན་སྒྱུར་བར་བྱེད་པ་དེ་ལ་ཉེས་བྱས་སུ་འགྱུར་ལ་ཐོབ་ན་ནི་སྤང་བའི་ལྟུང་བྱེད་དུ་འགྱུར་རོ། །གལ་ཏེ་ཐོབ་ན་དངོས་གཞིར་འགྱུར་ན་བསྒྱུར་བ་ལ་ཁ་ན་མ་ཐོ་བ་ཅིར་འགྱུར་ཞེ་ན། དེའི་ཕྱིར་བསྒྱུར་བ་ལ་ནི་ཉེས་བྱས་སོ་ཞེས་བྱ་བ་སྨྲས་ཏེ། ཟས་ཀྱི་རྙེད་པ་ལས་གཞན་པ་གོས་ཀྱི་རྙེད་པ་ལ་ནི། བསྒྱུར་བ་ལ་སྦྱོར་བར་འགྱུར་བའི་ཉེས་བྱས་སོ། །ཟས་ཀྱི་རྙེད་པ་ལ་ནི་སྦྱོར་བ་ལ་ཡང་ཉེས་བྱས་ལ་དངོས་གཞི་ལ་ཡང་ཉེས་བྱས་སོ། །འདིར་ཉེ་དུ་མ་ཡིན་པ་ཉིད་ནི་ཡན་ལག་མ་ཡིན་ཏེ། འདི་ལྟར་ཞུ་བ་ལས་བཙུན་པ་བཅོམ་ལྡན་འདས་ཀྱིས་ཉེ་དུ་མ་ལགས་པ་ལས་གོས་ལེན་ན་སྤང་བའི་ལྟུང་བྱེད་དུ་འགྱུར་རོ་ཞེས་གསུངས་ན། དགེ་སློང་གིས་མ་ལས་གོས་ལེན་པར་བགྱིད་ཅིང་དེ་ཡང་སྤང་བའི་ལྟུང་བྱེད་དུ་འགྱུར་བ་མཆིས་སམ། ཡོད་དེ་གལ་ཏེ་དེས་དགེ་འདུན་གྱི་ཕྱིར་ཉེ་བར་གཞག་པ་ཡིན་ལ། དེ་དགེ་སློང་གིས་བདག་ཉིད་ལ་སྒྱུར་བར་བྱེད་ནའོ་ཞེས་གསུངས་པ་ཡིན་ནོ། །ཇི་ལྟར་འདིར་ཉེ་དུ་མ་ཡིན་པ་ཉིད་ཡན་ལག་མ་ཡིན་པ་བཞིན་དུ་ཚིག་ཉིད་ཀྱང་དེ་དང་འདྲའོ། །གལ་ཏེ་འབྲལ་བར་བྱ་བ་དགེ་སློང་ཡིན་ན། དེ་ནི་ཡན་ལག་ཉིད་ཡིན་ནོ། །འདིར་གཞན་ལ་ཡང་ངོ་ཞེས་བྱ་བ་ལ། འདིར་ཞེས་བྱ་བ་ནི། བསྔོས་པ་ལས་བསྒྱུར་བའི་སྐབས་འདིར་རོ། །གཞན་ལ་ཡང་ངོ་ཞེས་བྱ་བ་ནི། གང་ཟག་གཞན་ལ་བསྔོས་པ་གང་ཟག་གཞན་ལ་སྒྱུར་བར་བྱེད་ན་ཡང་ཉེས་བྱས་སུ་འགྱུར་བ་སྟེ། ཡང་ངོ་ཞེས་བྱ་བའི་སྒྲ་ནི་ཉེས་བྱས་སོ་ཞེས་བྱ་བའི་རྗེས་བསྙེགས་པའི་ཕྱིར་རོ། །དེའི་འབྲས་བུ་ལ་ཡང་ངོ་ཞེས་བྱ་བ་ལ། བསྒྱུར་པའི་འབྲས་བུ་ཐོབ་པ་སྟེ། ཐོབ་པ་ཞེས་བྱ་བ་དངོས་གཞིར་འགྱུར་བ་དེ་ལ་ཡང་ཉེས་
བྱས་ཁོ་ནའོ། །འདི་སྐད་བསྟན་ཏེ། བདག་ཉིད་ལས་གཞན་པ་ལ་སྒྱུར་བར་བྱེད་ན་དངོས་གཞི་ལ་ཡང་ཉེས་བྱས་ཡིན་ལ། སྦྱོར་བ་ལ་ཡང་ཉེས་བྱས་སོ། །གཞན་ལ་ཡང་ངོ་ཞེས་བྱ་བ་ལ། གོས་ཀྱི་རྙེད་པ་སྔར་བསྟན་པ་ལས་གཞན་པ་ནི་ཐས་ཀྱི་རྙེད་པ་སྟེ། ཟས་ཀྱི་རྙེད་པ་དེ་ཡང་གཞན་ལ་སྒྱུར་བར་བྱེད་ན་སྦྱོར་བ་དང་དངོས་གཞི་གཉི་ག་ལ་ཉེས་བྱས་ཁོ་ནར་འགྱུར་བ་སྟེ། དཔེར་ན་མུ་ཏོ་བ་ཅིག་ལ་བསྔོས་པའི་ཟས་མུ་ཏོབ་གཞན་ལ་སྒྱུར་བར་བྱེད་ན་ཉེས་བྱས་སུ་འགྱུར་བ་ལྟ་བུའོ། །དབྲལ་བ་དང་སྦྱར་བ་གཉི་ག་སེམས་ཅན་དུ་བགྲང་བ་ཉིད་མ་ཡིན་པ་ལ་ཡང་ངོ་ཞེས་བྱ་བ་ལ། དབྲལ་བ་ཞེས་བྱ་བ་ནི། རྙེད་པ་གང་ལས་བསྔོས་པ་ལས་དབྲོག་པར་བྱ་བའོ། །སྦྱར་བ་ཞེས་བྱ་བ་ནི། གང་ལ་སྦྱིན་པར་བྱ་བའོ། །དབྲལ་བ་དང་སྦྱར་བ་དེ་གཉི་ག་སེམས་ཅན་དུ་བགྲང་བ་ཉིད་མ་ཡིན་པ་ཞེས་བྱ་བ་ནི། འདིར་གནས་ཁང་ལ་སོགས་པ་དག་གོ་དེ་གཉིས་གཅིག་ལ་བསྔོས་པ་གཅིག་ལ་སྒྱུར་བར་བྱེད་པ་ལ་ཡང་ཉེས་བྱས་སོ། །འདི་སྐད་བསྟན་ཏེ། གནས་ཁང་གཞན་ལ་བསྔོས་པའི་རྙེད་པ་དགེ་སློང་གི་ཁྲི་ལ་སོགས་པ་གཞན་ལ་སྒྱུར་པར་བྱེད་ན་སྦྱོར་བ་དང་དངོས་གཞི་གཉི་ག་ལ་ཉེས་བྱས་སུ་འགྱུར་རོ། །ཕྱོགས་གཅིག་ཉིད་ལ་ཡང་ངོ་ཞེས་བྱ་བ་ནི། དབྲལ་བ་དང་སྦྱར་བ་གཉིས་ཀྱི་ཕྱོགས་གཅིག་ཉིད་ལ་ཡང་ཉེས་བྱས་ཁོ་ནར་འགྱུར་བའོ། །འདི་སྐད་བསྟན་ཏེ། འདི་ལྟ་སྟེ་དཔེར་ན། ཐེམ་སྐས་ཀྱི་རིམ་པ་ཐམས་ཅད་ཐེམ་སྐས་གཅིག་གི་སྒྲར་འགྱུར་མོད་ཀྱི། འོན་ཀྱང་ཐེམ་སྐས་གཅིག་གི་ཕྱོགས་སུ་གྱུར་པའི་ཐེམ་སྐས་ཀྱི་རིམ་པ་གཅིག་ལ་ཡོན་བདག་གིས་བསྔོས་པ་དགེ་སློང་གིས་ཐེམ་སྐས་ཀྱི་རིམ་པ་གཞན་དུ་སྒྱུར་བར་བྱེད་ན་གནས་སྐབས་གཉི་ག་ལ་ཡང་ཉེས་བྱས་སུ་འགྱུར་བ་ལྟ་བུའོ། །ལྷག་མ་ཟ་བ་དུད་འགྲོ་ལ་སོགས་པ་བཙལ་ཏེ་མ་རྙེད་པ་ལ་ནི་ལྟུང་བ་མེད་དོ་ཞེས་བྱ་བ་ནི། ལྷག་མ་ཟ་བ་དུད་འགྲོ་ལ་སོགས་པ་གང་ལ་བསྔོས་པ་དེ་བཙལ་ཏེ། མ་རྙེད་ན་གཞན་ལ་བསྒྱུར་ན་ཡང་ལྟུང་བ་མེད་པའོ། །འདི་སྐད་བསྟན་ཏེ། ལྷག་མ་ཟ་བ་དུད་འགྲོ་ལ་སོགས་པ་གང་ལ་བསྔོས་པ་དེ་བཙལ་ཏེ། མ་རྙེད་ན་དེ་ལས་གཞན་པ་ལས་བསྒྱུར་ན་ཡང་ལྟུང་བ་མེད་དོ། །བདེ་བར་གཤེགས་པའི་སྐུ་གཟུགས་གཞན་ལ་ནི་གཡར་པོར་སྦྱིན་དུ་རུང་ངོ་
ཞེས་བྱ་བ་ནི། བདེ་བར་གཤེགས་པ་སངས་རྒྱས་བཅོམ་ལྡན་འདས་ཀྱི་སྐུ་གཟུགས་སྐུའི་གཟུགས་བརྙན་གཞན་གྱི་རྒྱན་ལ་སོགས་པ་སྐུ་གཟུགས་གཞན་ལ་གཡར་པོར་རེ་ཞིག་གཡར་པོའི་ཚུལ་གྱིས་སྦྱིན་དུ་རུང་བའོ། །འདི་སྐད་བསྟན་ཏེ། བཅོམ་ལྡན་འདས་ཀྱི་སྐུ་གཟུགས་གཞན་མངའ་བའི་རྒྱན་ལ་སོགས་པ་དག་གལ་ཏེ་སྐུ་གཟུགས་གཞན་ལ་མཆོད་པའི་ཕྱིར་གཡར་པོར་སྦྱིན་པར་བྱེད་ན་དེ་ལ་ཉེས་པ་མེད་དོ། །བསྔོས་པ་མི་སྦྱིན་ན་ཉེས་བྱས་སོ་ཞེས་བྱ་བ་ནི། ཆེ་གེ་མོ་ཞིག་ལ་སྦྱིན་ནོ་ཞེས་བསྔོས་པ་དེ་དེའི་འོག་ཏུ་དེ་ལ་སྦྱིན་པར་མི་བྱེད་ན་ཉེས་བྱས་སུ་འགྱུར་བའོ།། །། བམ་པོ་ཉི་ཤུ་རྩ་གཉིས་པ། མཚམས་ཀྱི་ཕྱི་རོལ་དུ་སོང་སྟེ། དགེ་འདུན་གྱིས་བྱིན་གྱིས་རློབ་པར་བྱེད་ནའོ་ཞེས་བྱ་བ་ནི། མཚམས་ཀྱི་ཕྱི་རོལ་དུ་སོང་སྟེ། དགེ་འདུན་གྱིས་ཤི་བའི་ཡོ་བྱད་ལ་སོགས་པའི་རྙེད་པ་བྱིན་གྱིས་རློབ་པར་བྱེད་ན་ཉེས་བྱས་སོ། །འདི་སྐད་བསྟན་ཏེ། དགེ་འདུན་གྱི་རྙེད་པར་བསྔོས་པ་དགེ་སློང་གིས་མཚམས་ཀྱི་ཕྱི་རོལ་དུ་སོང་སྟེ། བྱིན་གྱིས་རློབ་པར་བྱེད་ན་ཉེས་བྱས་སུ་འགྱུར་རོ། །མ་ཚོགས་པ་དག་གིས་འགོད་ནའོ་ཞེས་བྱ་བ་ནི། དགེ་སློང་ཇི་སྙེད་ཅིག་གིས་དེ་ལས་སྐལ་པ་མནོད་པར་བྱ་བ་དེ་དག་ཚོགས་པར་མ་གྱུར་པར་རྙེད་པ་འགོད་པར་བྱེད་ན། དེའི་ཚེ་མ་ཚོགས་པར་འགོད་པའི་དགེ་སློང་རྣམས་ལ་ཉེས་བྱས་སུ་འགྱུར་རོ། །བྱིན་གྱིས་མ་བརླབས་པར་ཡང་ངོ་ཞེས་བྱ་བ་ནི། ཤི་བའི་ཡོ་བྱད་ལ་སོགས་པའི་རྙེད་པ་བྱིན་གྱིས་མ་བརླབས་པར་དེ་འགོད་ན་ཡང་ཉེས་བྱས་སོ། །ཀུན་དབང་བའི་རྙེད་པ་དགེ་འདུན་ལས་གཅིག་གམ་གཉིས་སམ་གསུམ་གྱིས་ལེན་ནའོ་ཞེས་བྱ་བ་ལ། ཀུན་དབང་བའི་རྙེད་པ་ཞེས་བྱ་བ་ནི། དབྱར་གྱི་རྙེད་པ་ལ་སོགས་པ་སྤྱིར་དབང་བ་སྟེ། དེ་དགེ་འདུན་ལས་དགེ་སློང་གཅིག་གམ་གཉིས་སམ་གསུམ་གྱིས་ལེན་ན་ཉེས་བྱས་སོ། །འདི་སྐད་བསྟན་ཏེ། གལ་ཏེ་དགེ་འདུན་སྤྱིར་མངའ་བའི་རྙེད་པ་གང་ཟག་གཅིག་གིས་ལེན་ཏམ། གཉིས་སམ་གསུམ་གྱིས་ལེན་པར་བྱེད་ན་ལེན་པ་པོ་དེ་དག་ལ་ཉེས་བྱས་སུ་འགྱུར་ཏེ། གཞན་ཡང་དབང་བ་ཉིད་ཡིན་པའི་ཕྱིར་རོ། །གལ་ཏེ་རྙེད་པ་དེ་ལེན་པ་པོ་དེ་དག་ཀྱང་དབང་བ་ཉིད་ཡིན་ན་ཅིའི་ཕྱིར་ཉེས་བྱས་སུ་འགྱུར་ཞེ་ན། དེའི་ཕྱིར་དེ་ལ་གཞན་དག་གི་ཤས་ཉིད་མ་བྲལ་ལོ་ཞེས་བྱ་བ་
སྨྲས་ཏེ། གང་དག་གིས་རྙེད་པ་བླངས་པ་དེ་ལས་གཞན་པའི་དགེ་སློང་དག་ཀྱང་རྙེད་པ་དེ་ལ་སྤྱིར་དབང་བ་ཡིན་པས་དེ་དག་གི་ཤས་ཉིད་མ་བྲལ་བར་དེ་ན་ཡོད་པའི་ཕྱིར་རོ། །འདི་སྐད་བསྟན་ཏེ། འདི་ལྟར་རྙེད་པ་བླང་བ་འདི་ལ་གཞན་དག་གི་ཤས་ཉིད་བྲལ་བ་མེད་པས་དེའི་ཕྱིར་རྙེད་པ་ལེན་པ་དེ་དག་ལ་ཉེས་བྱས་སུ་འགྱུར་རོ། །རྐུ་སེམས་མེད་པ་ལ་འདི་རྣམ་པར་གཞག་པ་ཡིན་གྱི་རྐུ་སེམས་ཡོད་པ་ལ་ཁ་ན་མ་ཐོ་བ་ཅིར་འགྱུར་ཞེ་ན། དེའི་ཕྱིར་རྐུ་སེམས་ཀྱིས་ན་བརྐུས་པ་ཉིད་ཡིན་ནོ་ཞེས་བྱ་བ་སྨྲས་ཏེ། རྐུ་སེམས་ཀྱིས་སྒྱུར་བར་བྱེད་ན་ཐམས་ཅད་བརྐུས་པ་ཉིད་ཡིན་ཏེ། གཞི་ཇི་ལྟ་བུ་ལས་བརྐུས་པའི་ཁ་ན་མ་ཐོབ་ཉིད་དུ་འགྱུར་བར་ཤེས་པར་བྱའོ། །འདིར་གཞུང་ནི་དགེ་སློང་བྲམ་ཟེའི་བུ་མོས་ཞུས་པ་ལས་དགེ་སློང་གང་ཡང་རུང་བ་གཅིག་པུ་ཞིག་གནས་ན་འདུག་པ་དེར་མི་དག་གིས་དགེ་འདུན་གྱི་གོས་བགོ་བཤའ་བྱ་བ་མངོན་སུམ་དུ་གྱུར་པའི་དགེ་འདུན་ལ་གསེ་བར་བྱ་བ་ཞིག་སྦྱིན་པར་བྱེད་ན། དགེ་སློང་དེས་གོས་དེ་བླང་བ་ན་འདི་ལྟར་གནས་འདི་ན་བདག་གཅིག་པུ་གནས་ཏེ། དགེ་འདུན་གྱི་གོས་བགོ་བཤའ་བྱ་བ་མངོན་སུམ་དུ་གྱུར་པའི་དགེ་འདུན་ལ་གསེ་བར་བྱ་བ་འདི་བྱུང་ན། བདག་གིས་གོས་གསེ་བར་བྱ་བ་འདི་བྱི་དོར་བྱའོ། །སྦ་བརྟུལ་བྱའོ། །བྱིན་གྱིས་བརླབ་པར་བྱའོ། །གོས་བྱི་དོར་བྱས་པ་སྦ་བརྟུལ་བྱས་པ་བྱིན་གྱིས་བརླབས་པ་འདི་ནི་བདག་གི་ཡིན་ནོ་ཞེས་སེམས་བསྐྱེད་པར་བྱ་ཚིག་ཏུ་བརྗོད་པར་བྱའོ། །གལ་ཏེ་དེ་ལྟར་མི་བྱེད་ན་དགེ་སློང་དེས་གོས་དེ་གཅིག་པུས་བདག་གིར་མི་བྱའོ། །བདག་གིར་བྱས་ན་ཉེས་བྱས་ཏེ། དེ་དག་ལས་དགེ་སློང་གཞན་ཡང་སྤྱིར་དབང་བ་ཡིན་ནོ། །དགེ་འདུན་ལ་བསྔོས་པའི་རྙེད་པ་གཅིག་གིས་མཚམས་ཀྱི་ཕྱི་རོལ་དུ་སོང་སྟེ་བདག་གིར་བྱེད་ན་ཉེས་བྱས་སུ་འགྱུར་རོ། །འོན་ཏེ་དེ་དག་རྐུ་སེམས་ཀྱིས་རྐུ་ཞིང་བདག་གིར་བྱེད་ན་ནི་འགལ་ཚབས་ཅན་དུ་འགྱུར་རོ། །གཉིས་དང་རབ་ཏུ་མང་པོ་དག་ཀྱང་དེ་བཞིན་ནོ་ཞེས་གསུངས་པ་ཡིན་ཏེ། རབ་ཏུ་མང་པོ་ཞེས་སྨོས་པ་ནི་གསུམ་ཡན་ཆད་ཅེས་བྱ་བའི་ཐ་ཚིག་གོ །གཙུག་ལག་ཁང་དུ་གནས་པར་མི་བྱེད་པའི་ཚེ་དེར་དབང་བའི་རྫས་གཙུག་ལག་ཁང་གཞན་དུ་གཞག་པར་བྱེ་ཞིང་བསྔོ་བར་མི་བྱའོ་ཞེས་གསུངས་པ་
དེའི་ཞར་ལ་འདི་བརྗོད་པར་བྱ་སྟེ། གྱ་ཚོམ་དུ་གཙུག་ལག་ཁང་དོར་བར་མི་བྱའོ་ཞེས་བྱ་བ་ནི། ཕ་རོལ་གྱི་དམག་ཚོགས་དང་ཆོམ་རྐུན་ལ་སོགས་པའི་གནོད་པ་མེད་པར་གྱ་ཚོམ་དུ་མ་བརྟགས་པར་གཙུག་ལག་ཁང་སྟོང་པར་དོར་བར་མི་བྱའོ། །རྗེས་སུ་ཆགས་པ་དང་བཅས་པ་དེར་སྲུང་མར་གཞག་གོ་ཞེས་བྱ་བ་ནི། དགེ་སློང་གང་གཙུག་ལག་ཁང་དེ་ལ་རྗེས་སུ་ཆགས་པ་ཤས་ཆེན་པོ་ཡོད་པའི་རྗེས་སུ་ཆགས་པ་དང་བཅས་པ་དེ་གཙུག་ལག་ཁང་བསྲུང་བའི་ཆེད་དུ་དེར་སྲུང་མ་གཞག་པར་བྱའོ། །མ་ལྷགས་ན་ལོ་བཅུ་འདའ་བར་བྱའོ་ཞེས་བྱ་བ་ནི། དགེ་འདུན་མ་ལྷགས་ཤིང་མ་བྱོན་ན་དགེ་སློང་གཙུག་ལག་ཁང་དེར་བཞག་པ་དེས་གཙུག་ལག་ཁང་དེ་ཉིད་དུ་ལོ་བཅུ་འདའ་བར་བྱ་བའོ། །ཇི་ལྟར་འདའ་བར་བྱ་ཞེ་ན། དེའི་ཕྱིར་ལྔ་ནི་བསོད་སྙོམས་ཀྱིས་སོ་ཞེས་བྱ་བ་སྨྲས་ཏེ། དགེ་སློང་དེས་གཙུག་ལག་ཁང་དེར་ལོ་ལྔ་ནི་བསོད་སྙོམས་ཀྱིས་འདའ་བར་བྱའོ། །དེར་དུས་སུ་སྦྱིན་བདག་མ་བྱུང་ན་ལོ་གཞན་ལྔ་ནི་ཉེ་འཁོར་གྱི་གཙུག་ལག་ཁང་དང་ལྷན་ཅིག་ཏུའོ་ཞེས་བྱ་བ་ནི། གཙུག་ལག་ཁང་དེར་ལོ་ལྔ་པོ་དག་འདས་པའི་དུས་སུ་གལ་ཏེ་སྦྱིན་བདག་བཙོན་ར་ལ་སོགས་པ་དག་ནས་བྱུང་བར་མ་གྱུར་ན། དེའི་ཚེ་ལོ་གཞན་ལྔ་པོ་དག་ནི་ཉེ་འཁོར་གྱི་གཙུག་ལག་ཁང་དང་འཚོ་བ་ལྷན་ཅིག་ཐུན་མོང་དུ་བྱ་བས་འདའ་བར་བྱ་བའོ། །འདིར་གཞུང་ནི་ཁ་ཅིག་ལས་ལྔ་ནི་བསོད་ནམས་ཀྱིས་སོ། །ལྔ་ནི་ཉེ་འཁོར་གྱི་གཙུག་ལག་ཁང་ལ་བརྟེན་པས་ཏེ། དེ་ལྟར་ན་ལོ་བཅུར་འགྱུར་རོ་ཞེས་གསུངས་པ་ཡིན་ནོ། །གསོ་སྦྱོང་ཐ་དད་པ་དང་རྙེད་པ་ཐུན་མོང་བའི་ལས་བྱའོ་ཞེས་བྱ་བ་ནི། གཙུག་ལག་ཁང་དེ་དང་ཉེ་འཁོར་གྱི་གཙུག་ལག་ཁང་དེར་རྙེད་པ་ནི་ཐུན་མོང་ལ། གསོ་སྦྱོང་ནི་ཐ་དད་པའི་ལས་བྱ་བ་སྟེ། དགེ་འདུན་བཙུན་པ་རྣམས་གསན་དུ་གསོལ། གཙུག་ལག་ཁང་འདིའི་གཙུག་ལག་ཁང་གི་བདག་པོ་བཅོམ་མམ་བཅིངས་སམ་གུམ་མམ་སྤྱུགས་ན། གལ་ཏེ་དགེ་འདུན་གྱི་དུས་ལ་བབ་ཅིང་བཟོད་ན་དགེ་འདུན་གྱིས་གནང་བར་མཛོད་ཅིག་དང༌། དགེ་འདུན་གྱིས་གཙུག་ལག་ཁང་འདི་དང་ཕ་བི་ལོ་ལྔར་རྙེད་པ་ནི་ཐུན་མོང་ལ་གསོ་སྦྱོང་ནི་ཐ་དད་པ་མཛད་དོ། །འདི་ནི་གསོལ་བའོ། །དགེ་འདུན་བཙུན་བ་རྣམས་གསན་དུ་གསོལ། གཙུག་ལག་ཁང་འདིའི་གཙུག་ལག་
ཁང་གི་བདག་པོ་བཅོམ་མམ་བཅིངས་སམ་གུམ་མམ། སྤྱུགས་ཏེ་དེའི་སླད་དུ་དགེ་འདུན་གྱིས་གཙུག་ལག་ཁང་འདི་དང་ཕ་བི་ལོ་ལྔར་རྙེད་པ་ནི་ཐུན་མོང་ལ་གསོ་སྦྱོང་ནི་ཐ་དད་དུ་མཛད་ཀྱི། ཚེ་དང་ལྡན་པ་གང་དག་གཙུག་ལག་ཁང་འདི་དང་ཕ་བི་ལོ་ལྔར་རྙེད་པ་ནི་ཐུན་མོང་ལ་གསོ་སྦྱོང་ནི་ཐ་དད་དུ་མཛད་པར་བཟོད་པ་དེ་དག་ནི་ཅང་མ་གསུང་ཤིག །གང་དག་མི་བཟོད་པ་དེ་ནི་གསུངས་ཤིག །དགེ་འདུན་གྱིས་བཟོད་ཅིང་གནང་ནས་དགེ་འདུན་གྱིས་གཙུག་ལག་ཁང་འདི་དང་ཕ་བི་ལོ་ལྔར་རྙེད་པ་ནི་ཐུན་མོང་ལ། གསོ་སྦྱོང་ནི་ཐ་དད་དུ་མཛད་པ་མཛད་ལགས་ཏེ། འདི་ལྟར་ཅང་མི་གསུང་བས་དེ་དེ་བཞིན་དུ་འཛིན་ཏོ་ཞེས་བྱ་བའི་གསོལ་བ་དང་གཉིས་ཀྱི་ལས་ཀྱིས་སོ། །གལ་ཏེ་སྲུང་མ་ཡང་འགྲོ་ན་དེའི་ཚེ་དེས་ཇི་ཞིག་བྱ་ཞེ་ན། དེའི་ཕྱིར་འགྲོ་ན་དངོས་པོ་རྣམས་ཉེ་འཁོར་གྱི་གཙུག་ལག་ཁང་དག་ཏུ་གདམས་པར་བྱའོ་ཞེས་བྱ་བ་སྨྲས་ཏེ། དགེ་སློང་གང་ལ་གཙུག་ལག་ཁང་གཏད་པའི་དགེ་སློང་དེ་ཡང་གལ་ཏེ་གཙུག་ལག་ཁང་དེ་ནས་འགྲོ་བར་འདོད་ན་དེ་འགྲོ་བའི་དུས་ཀྱི་ཚེ། གཙུག་ལག་ཁང་དེའི་མལ་སྟན་དང་སྣོད་ལ་སོགས་པ་དངོས་པོ་རྣམས་ཉེ་འཁོར་གྱི་གཙུག་ལག་ཁང་དག་ཏུ་གདམས་པར་བྱ་བའོ། །གཉུག་མར་གནས་ན་སྦྱིན་པར་བྱའོ་ཞེས་བྱ་བ་ནི། གཙུག་ལག་ཁང་པོར་བ་དེར་དགེ་སློང་དག་ལྷགས་ཏེ། གཉུག་མར་གནས་ན་ཉེ་འཁོར་གྱི་གཙུག་ལག་ཁང་གཞན་ན་གནས་པའི་དགེ་སློང་དེ་དག་གིས་མལ་སྟན་དང་སྣོད་ལ་སོགས་པའི་དངོས་པོ་དེ་དག་གཙུག་ལག་ཁང་དེ་ཉིད་དུ་ཕྱིར་སྦྱིན་པར་བྱ་བའོ། །གནས་གཞན་གྱི་རྫས་གཞན་དུ་མི་སྦྱིན་ནོ་ཞེས་བྱ་བ་ནི། དགེ་འདུན་དུ་འགྱུར་བའི་དགེ་སློང་དེ་དག་གིས་ཀྱང་གནས་གཞན་གྱི་རྫས་མལ་སྟན་དང་སྣོད་ལ་སོགས་པ་དག་གནས་གཞན་དུ་མི་སྦྱིན་པའོ། །འདི་ནི་མདོ་འོག་མ་རྣམས་ཀྱི་ཡུལ་བསྟན་པར་བྱ་བའི་ཕྱིར། འོག་གི་མདོ་ལས་རྙེད་པ་རྣམ་པར་གཞག་པ་ནི་ཇི་ལྟར་ངེས་པར་བྱས་པ་ཡིན་ནོ་ཞེས་འབྱུང་བ་དེ་རྗེས་སུ་བཟླས་པ་ཡིན་ནོ། །མི་སྟེར་ན་དེ་དག་གིས་སྦྱིན་པར་བྱ་བ་ཉིད་ཡིན་ནོ་ཞེས་བྱ་བ་ནི། གཙུག་ལག་ཁང་གཞན་དུ་གདམས་པའི་རྫས་དེ་དག་གཙུག་ལག་ཁང་དེའི་ཉེ་འཁོར་ན་མི་སྣང་ཞིང་ཕྱིར་མི་སྟེར་ན་དགེ་སློང་གང་དག་གིས་རྫས་དེ་དག་དང་པོ་གནས་གཞན་དེར་གཞག་པའི་དགེ་སློང་དེ་དག་གིས་རྨ་ཞིང་ཕྱིར་སྦྱིན་པར་བྱ་བ་ཉིད་ཡིན་
ནོ། །འདི་སྐད་བསྟན་ཏེ། གལ་ཏེ་གཙུག་ལག་ཁང་གཞན་ན་གནས་པའི་དགེ་སློང་ལ་སོགས་པས་རྫས་གཏམས་པ་དེ་དག་བརྣོགས་ཤིང་ཕྱིར་མི་སྟེར་ན་དེའི་ཚེ་དང་པོ་འདོམས་པའི་དགེ་སློང་རྣམས་ཀྱིས་ཁུངས་སུ་རྨ་ཞིང་ཕྱིར་དགུག་པར་བྱའོ། །འོ་ན་གང་གི་ཚེ་གཙུག་ལག་ཁང་གི་བདག་པོ་དེ་ཉིད་ཀྱིས་རང་གིས་བྱས་པའི་གཙུག་ལག་ཁང་དེ་ནས་རྫས་དག་གཙུག་ལག་ཁང་གཞན་དུ་སྦྱིན་པར་བྱེད་ན། དེའི་ཚེ་དགེ་སློང་རྣམས་ཀྱིས་ཇི་ལྟར་བྱ་ཞེ་ན། དེའི་ཕྱིར་ཁྱིམ་བདག་དེ་ཉིད་ཡིན་ཡང་ངེས་པ་ལ་གཞིག་པ་མེད་དོ་ཞེས་བྱ་བ་སྨྲས་ཏེ། གཙུག་ལག་ཁང་གི་བདག་པོའི་ཁྱིམ་བདག་དེ་གནས་གཞན་གྱི་སྦྱིན་བདག་དེ་ཉིད་ཡིན་ཡང་སྔར་བྱས་པའི་ངེས་པ་ལ་གཞིག་པ་མེད་དོ། །འདི་སྐད་བསྟན་ཏེ། འདི་ལྟར་ཁྱིམ་བདག་དེ་ཉིད་གནས་གཞན་གྱི་སྦྱིན་བདག་ཏུ་གྱུར་ཅིང་དེས་དངོས་པོ་དེ་དག་གནས་གཞན་དུ་ཕུལ་ཟིན་ཀྱང་དེ་ལྟ་མོད་ཀྱི། སྔར་རྫས་དེ་དག་གཙུག་ལག་ཁང་གང་དུ་ཕུལ་ཟིན་པ་དེ་ཉིད་དུ་སྤྱད་པར་བྱ་བ་ཡིན་ཏེ། དང་པོ་ཉིད་ནས་གནས་སྔ་མ་ཤོས་དེ་ཉིད་དུ་བྱིན་ཟིན་པའི་ཕྱིར་རོ། །མི་སྟེར་ན་མཐུས་གཟུང་བར་བྱའོ་ཞེས་བྱ་བ་ནི། ཁྱིམ་བདག་དེས་རྫས་དེ་དག་སྔར་ཕུལ་བའི་གཙུག་ལག་ཁང་དེར་མི་སྟེར་ན། གཙུག་ལག་ཁང་དེ་ན་གནས་པའི་དགེ་སློང་རྣམས་ཀྱིས་མཐུས་གཟུང་བར་བྱའོ། །གལ་ཏེ་རྫས་དེ་མི་སྣང་ན་ནི་དེའི་ཚེ་མདོ་སྔ་མ་ལས་མི་སྟེར་ན་དེ་དག་གིས་སྦྱིན་པར་བྱ་བ་ཉིད་ཡིན་ནོ་ཞེས་སྨོས་པའི་རྣམ་པ་དེ་ལྟ་བུའི་ཡུལ་ཡིན་ནོ། །འོན་ཏེ་སྣང་ན་ནི་མི་སྟེར་ན་མཐུས་གཟུང་བར་བྱའོ་ཞེས་བྱ་བའི་མདོ་འདི་ཉིད་ཀྱི་ཡུལ་ཡིན་ནོ། །གཡར་པོ་ཉིད་དུ་ནི་སྦྱིན་པར་བྱའོ་ཞེས་བྱ་བ་ནི། གནས་གཞན་གྱི་རྫས་གནས་གཞན་དུ་གཡར་པོ་ཉིད་དུ་ནི་སྦྱིན་པར་བྱའོ། །མཆོད་རྟེན་གཞན་ལ་བསྔོས་པའི་རྙེད་པ་མ་གྲུབ་པ་ལ་ནི་ཉེས་པ་མེད་དེ། བྱང་ཆུབ་ཆེན་པོ་དང་ཆོས་ཀྱི་འཁོར་ལོ་དང༌། ཆོ་འཕྲུལ་ཆེན་པོ་དང་ལྷ་ལས་བབས་པ་རྣམས་ཀྱི་དེ་དག་ལས་གཞན་པ་ལ་ནི་མ་གཏོགས་སོ་ཞེས་བྱ་བ་ནི། མཆོད་རྟེན་གཞན་གང་ལ་བསྔོས་པའི་རྙེད་པ་མཆོད་རྟེན་དེ་ལ་དབུལ་བར་མ་གྲུབ་ཅིང་དེར་ཁྱེར་ཡང་མི་ནུས་ན་མཆོད་རྟེན་གཞན་ལ་བསྒྱུར་བ་ལ་ནི་ཉེས་པ་མེད་དོ། །ཧ་ཅང་ཐལ་བར་འགྱུར་བའི་དམིགས་ཀྱིས་བསལ་བ་བསྟན་པའི་ཕྱིར། བྱང་ཆུབ་ཆེན་པོ་དང་ཆོས་ཀྱི་འཁོར་ལོ་དང་ཆོ་འཕྲུལ་ཆེན་པོ་དང་ལྷ་ལས་བབས་པ་རྣམས་ཀྱི་རྒྱུད་དུ་མངའ་བའི་རྙེད་པ་མཆོད་རྟེན་
ཆེན་པོ་བཞི་པོ་དེ་དག་ལས་གཞན་པའི་མཆོད་རྟེན་གཞན་ལ་སྒྱུར་བར་བྱེད་པ་ནི་མ་གཏོགས་སོ། །དེ་ནི་ཉེས་པར་འགྱུར་བ་ཁོ་ན་ཡིན་ནོ། །མཆོད་རྟེན་ཆེན་པོ་བཞི་པོ་དེ་དག་གི་ནང་ནས་གཅིག་ལ་བསྔོས་པའི་རྙེད་པ་གཞན་གསུམ་པོ་གང་ཡང་རུང་བ་ལ་བསྒྱུར་བ་ལ་ནི་ཉེས་པ་མེད་དོ། །འདི་སྐད་བསྟན་ཏེ། མཆོད་རྟེན་ཆེན་པོ་བཞི་པོ་དེ་དག་ལས་གཞན་པའི་མཆོད་རྟེན་ལ་བསྔོས་པའི་དངོས་པོ་གང་ཡིན་པ་ནི་གལ་ཏེ་དེར་བསྐུར་བ་མི་འགྲུབ་ན་དངོས་པོ་དེ་ཉིད་མཆོད་རྟེན་གཞན་ལ་བསྒྱུར་ཞིང་སྤྱད་བར་བྱའོ། །མཆོད་རྟེན་ཆེན་པོ་བཞི་པོ་དེ་དག་ལ་བསྔོས་པའི་དངོས་པོ་གང་ཡིན་པ་དེ་ནི། དེ་དག་ལས་གཞན་པའི་མཆོད་རྟེན་དག་ལས་བསྒྱུར་ཞིང་སྤྱད་པར་མི་བྱ་སྟེ། གང་ལ་བསྔོས་པ་དེ་ཉིད་ལ་དབུལ་བར་བྱ་བའམ། གལ་ཏེ་གང་ལ་བསྔོས་པ་དེ་ཉིད་ལ་དབུལ་བར་མ་གྲུབ་ན་བཞི་པོ་དེ་དག་ཉིད་ལས་གང་ཉེ་བར་གྱུར་པ་གཅིག་ལ་གཞན་གསུམ་ལ་བསྔོས་པ་ཡང་བསྒྱུར་ཅིང་སྤྱད་དུ་རུང་ངོ༌། །བསྔོས་པ་ལས་བསྒྱུར་བའི་སྤང་བའོ་ཞེས་བྱ་བ་དེ་བཤད་ཟིན་ཏོ།། །།ད་ནི་སོག་འཇོག་གི་སྤང་བ་སྨྲ་བར་འདོད་ནས་དེའི་ཞར་ལ་འདི་བརྗོད་པར་བྱ་སྟེ། ཞག་བདུན་པར་བྱིན་གྱིས་བརླབས་པའི་ཉི་མ་འདས་སོ་ཅོག་དགེ་སློང་ལ་བརྗོད་པར་བྱའོ་ཞེས་བྱ་བ་ནི། ཞག་བདུན་པར་བྱིན་གྱིས་བརླབས་པ་འབྲུ་མར་ལ་སོགས་པ་རྫས་ཀྱི་ཉི་མ་འདས་ཤིང་ཐལ་ལོ་ཅོག་དགེ་སློང་ལ་འདི་སྐད་ཅེས་དེང་ཕན་ཆད་དུ་ཉི་མ་དང་པོ་འདས་ཏེ་དེང་ནི་ཉི་མ་གཉིས་པ་ལགས་སོ་ཞེས་བྱ་བ་ལ་སོགས་པ་བརྗོད་པར་བྱ་བའོ། །ཇི་ཞིག་བྱས་ན་སོག་འཇོག་གི་སྤང་བར་འགྱུར་ཞེ་ན། དེའི་ཕྱིར་བཟའ་བའི་ཕྱིར་འཆང་ནའོ་ཞེས་བྱ་བ་སྨྲས་ཏེ། ཞག་བདུན་པའི་རྫས་ཞེས་བྱ་བར་སྦྱར་རོ། །འཆང་བ་ལ་ལྟུང་བ་འདི་རྣམ་པར་གཞག་པ་ཡིན་གྱི། ཟ་བ་ལ་ནི་མ་ཡིན་ཏེ། འདི་ལྟར་སོག་འཇོག་བྱས་པའི་ཟས་ཟ་བ་ལ་ལྟུང་བ་འབའ་ཞིག་ཏུ་འགྱུར་བའི་ཕྱིར་རོ། །དེ་ལྟར་ཡང་འདིར་གཞུང་ནི། སོ་སོར་ཐར་པའི་མདོ་ལས། ཡང་དགེ་སློང་གང་བཟའ་བ་དང་བཅའ་བ་སོག་འཇོག་བྱས་པ་འཆོས་སམ་ཟོས་ན་ལྟུང་བྱེད་དོ་ཞེས་གསུངས་པ་ཡིན་ནོ། །ཟོས་ཟིན་པའི་དོན་ལ་སྤང་བར་བྱ་བ་མེད་པས་དེས་ན་ཟོས་པ་ནི་འདིའི་ཡུལ་མ་ཡིན་ནོ། །འོ་ན་སོ་སོར་ཐར་པའི་མདོ་ལས། དེ་ལས་འདས་པར་ཡོངས་སུ་ལོངས་སྤྱད་པར་བྱེད་ན་སྤང་བའི་ལྟུང་བྱེད་དོ་ཞེས་གསུངས་སོ་ཞེ་ན། བདེན་
མོད་ཀྱི་འོན་ཀྱང་འཆང་བ་དེ་ཉེ་བར་མཚོན་པའི་དོན་དུ་དེར་ཟ་ན་ཞེས་བྱ་བའི་སྒྲ་སྨོས་པ་ཡིན་ཏེ། འཆང་བ་མེད་པར་ཟ་བ་མི་སྲིད་པའི་ཕྱིར་རོ། །ལྟུང་བ་བསྟན་པར་ཡང་འཆང་བའི་རྒྱུ་ལས་ཁ་ན་མ་ཐོ་བར་གསུངས་ཀྱི་ཟ་བའི་རྒྱུ་ལས་ནི་མ་ཡིན་ཏེ། དགེ་སློང་གིས་ཚེས་ལ་སྨན་ཞིག་རྙེད་ཅིང་དེས་ཚེས་གཉིས་ལ་ཡང་གཞན་ཞིག་རྙེད་ན་དགེ་སློང་དེས་ཉི་མ་བདུན་པོ་དེ་ཉིད་ཀྱི་ནང་དུ་སྨན་སྔ་མ་ཤོས་ཡོངས་སུ་ལོངས་སྤྱད་པར་བྱ་ཞིང་ཕྱི་མ་ཤོས་གཏང་བར་བྱ་བའམ། གཞན་ལ་སྦྱིན་པར་བྱའོ། །ཡང་ན་ཕྱི་མ་ཤོས་ཡོངས་སུ་ལོངས་སྤྱད་པར་བྱ་ཞིང་སྔ་མ་ཤོས་གཏང་བར་བྱ་བའམ། གཞན་ལ་སྦྱིན་པར་བྱ་བའོ། །ཡོངས་སུ་སྤྱོད་པར་མི་བྱེད་དམ་གཏོང་བར་མི་བྱེད་དམ་གཞན་ལ་སྦྱིན་པར་མི་བྱེད་ན། ཉི་མ་བརྒྱད་པའི་སྐྱ་རེངས་ཤར་ན་སྤང་བའི་ལྟུང་བྱེད་དོ་ཞེས་གསུངས་པའི་ཕྱིར་རོ། །ཇི་ཞིག་འཆང་ན་ཞེ་ན། དེའི་ཕྱིར་དེའོ་ཞེས་བྱ་བ་སྨྲས་ཏེ། ཞག་བདུན་པར་བྱིན་གྱིས་བརླབས་པ་དེའོ། །བྱིན་གྱིས་མ་བརླབས་པ་ནི་ཞག་བདུན་ལས་འདས་པར་འཆང་དུ་ཟིན་ཀྱང་ཉེས་པ་མེད་དེ། རུང་བའི་ཕྱིར་གསེར་ལ་སོགས་པ་དང་འདྲའོ། །ནམ་གྱི་ཚེ་སྤང་བར་འགྱུར་ཞེ་ན། དེའི་ཕྱིར་སྐྱ་རེངས་བརྒྱད་པ་ཤར་ནའོ་ཞེས་བྱ་བ་སྨྲས་ཏེ། ཞག་བདུན་པར་བྱིན་གྱིས་བརླབས་པའི་རྫས་སྐྱ་རེངས་བརྒྱད་པ་ཤར་བར་འཆང་ན་སྤང་བའི་ལྟུང་བྱེད་དུ་འགྱུར་རོ། །ཞག་བདུན་པར་བྱིན་གྱིས་བརླབས་པའི་རྫས་བཟའ་བའི་ཕྱིར་འཆང་བ་ལས་ཁ་ན་མ་ཐོ་བ་འདིར་འགྱུར་བ་འབའ་ཞིག་ཏུ་ཡང་མ་ཟད་དེ། འདི་ལྟར་བྱིན་ལེན་མ་བྱས་པ་དང༌། རུང་བ་མ་ཡིན་པ་མི་ཤ་ལ་སོགས་པ་དང༌། རུང་བ་མ་ཡིན་པ་དང་འདྲེས་པ་དང༌། བརྟག་པ་གཞན་དང་འདྲེས་པ་འཆང་བ་ལ་ཡང་ཁ་ན་མ་ཐོབ་འདིར་འགྱུར་ཏེ། འདི་ལྟ་སྟེ། དཔེར་ན་དུས་སུ་རུང་བའི་རྫས་དང་འདྲེས་པའི་ཐུན་ཚོད་དུ་རུང་བ་བཟར་མི་རུང་བར་གཏོགས་པའི་ཉི་མ་ཕྱེད་ཡོལ་ཕན་ཆད་དུ་བཟའ་བའི་ཕྱིར་འཆང་ན་འདིར་གཏོགས་པའི་ཁ་ན་མ་ཐོ་བར་འགྱུར་བ་ལྟ་བུ་དང༌། དེ་བཞིན་དུ་ནང་དུ་བཙོས་པ་ཉིད་ལ་སོགས་པའི་སྐྱོན་གྱིས་རུང་བ་མ་ཡིན་པ་ཉིད་དུ་གྱུར་པ་བཟའ་བའི་འཆང་བ་དང༌། དེ་བཞིན་དུ་དུས་སུ་རུང་བ་དང༌། ཐུན་ཚོད་དུ་རུང་བ་དང༌། འཚོ་བའི་བར་དུ་བཅང་བ་མི་རུང་བ་ཉིད་དུ་གྱུར་པ་དག་བཟའ་བའི་ཕྱིར་འཆང་བ་ལ་ཡང་བྱེ་བྲག་འགའ་ཡང་མེད་དེ། དེ་ལྟ་བས་ན་འདིར་ཞག་བདུན་པ་ཞེས་སྨོས་པ་ནི་དཔེ་ཙམ་དུ་ཟད་པར་
རིག་པར་བྱའོ། །འོ་ན་འདིར་ལྟུང་བ་རྣམ་པར་གཞག་པ་གང་ཞེ་ན། དེའི་ཕྱིར་བཟའ་བར་བྱ་བ་རུང་བ་མ་ཡིན་པ་ཉིན་མཚན་འདས་པ་ནི་འདིར་ཟོས་པ་དང་འདྲ་བར་རྣམ་པར་གཞག་གོ་ཞེས་བྱ་བ་སྨྲས་ཏེ། བཟའ་བར་བྱ་བ་རུང་བ་མ་ཡིན་པ་ཉིན་མཚན་འདས་པ་ནི་ཟོས་པ་དང་འདྲའོ་ཞེས་བྱ་བ་ནི། ཟོས་ན་ཁ་ན་མ་ཐོ་བ་ཅི་འདྲ་བ་དེ་བཞིན་དུ་འཆང་བ་ལ་ཡང་དེ་དང་འདྲ་བ་སྟེ། གལ་ཏེ་ཟོས་ན་ལྟུང་བྱེད་དུ་འགྱུར་བ་ནི་འཆང་ན་ཡང་སྤང་བར་འགྱུར་བ་དང༌། འོན་ཏེ་ཟོས་ན་ཉེས་བྱས་སུ་འགྱུར་བ་ནི་འཆང་ན་ཡང་ཉེས་བྱས་སུ་འགྱུར་བའོ། །འདི་སྐད་བསྟན་ཏེ། དུས་སུ་རུང་བ་དང་ཐུན་ཚོད་དུ་རུང་བ་དང་ཞག་བདུན་པ་དང༌། འཚོ་བའི་བར་དུ་བཅང་བ་ལ་སོགས་པ་སོག་འཇོག་བྱས་པ་དེ་དག་ཐམས་ཅད་ནི་ཇི་ལྟར་ཟོས་ན་ལྟུང་བྱེད་དུ་འགྱུར་བ་དེ་བཞིན་དུ་འཆང་ན་ཡང་སྤང་བའི་ལྟུང་བྱེད་དུ་འགྱུར་ཏེ། ཉིན་མཚན་འདས་པ་ནི་སྤང་བའི་ལྟུང་བྱེད་དང་ལྟུང་བྱེད་འབའ་ཞིག་དང་འདྲ་བའི་ཕྱིར་རོ། །ནང་དུ་ཞག་ལོན་བ་དང༌། ནང་དུ་བཙོས་པ་དང༌། བྱིན་ལེན་མ་བྱས་པ་ལ་སོགས་པ་ནི་ཇི་ལྟར་ཟོས་ན་ཉེས་བྱས་སུ་འགྱུར་བ་བཞིན་དུ་འཆང་ན་ཡང་ཉེས་བྱས་ཁོ་ནར་འགྱུར་རོ་ཞེས་བྱ་བའི་ཐ་ཚིག་གོ །དེ་དོན་གང་གི་ཕྱིར་བརྟགས་པ་དེའི་ཕྱིར་ནི་ལྟུང་བ་མེད་དོ་ཞེས་བྱ་བ་ལ། དེ་ཞེས་བྱ་བ་ནི། ཞག་བདུན་པའི་འབྲུ་མར་ལ་སོགས་པའོ། །དོན་གང་གི་ཕྱིར་ཞེས་བྱ་བ་ནི། རྐང་པ་བསྐུ་བ་ལ་སོགས་པའི་དགོས་པའི་ཕྱིར་རོ། །བརྟག་པ་ཞེས་བྱ་བ་ནི། རུང་བར་བྱས་པ་དེ་ཉིད་དེ། དེའི་ཕྱིར་འཆང་བ་ལ་ནི་ལྟུང་བ་མེད་དོ། །བློས་ཡོངས་སུ་མ་བཅད་པར་འཆང་བ་ལ་ཡང་ཁ་ན་མ་ཐོ་བ་འདྲ་སྟེ། བྱེ་བྲག་ནི་སྤྱིའི་ཁོངས་སུ་གཏོགས་པའི་ཕྱིར། བཟའ་བའི་ཕྱིར་ཡང་དེའི་ཁོངས་སུ་གཏོགས་པ་ཡིན་ནོ། །དེ་ལྟ་བས་ན་བག་མེད་པ་དང་དྲན་བ་ཉམས་པས་འཆང་བ་ནི་བཟའ་བའི་ཕྱིར་ཡིད་ཀྱིས་མ་བསྡུས་པའི་ཕྱིར་ཁ་ན་མཐོ་བ་འདྲའོ། །སྣར་བླུགས་པ་དང་བསྐུ་མཉེ་བྱ་བ་དག་ནི་སོག་འཇོག་བྱས་ཀྱང་རུང་ངོ་ཞེས་བྱ་བ་ནི། སྣར་བླུགས་པ་དང་ལུས་ཀྱི་བསྐུ་མཉེ་བྱ་བའི་འབྲུ་མར་ལ་སོགས་པ་དག་ནི་སོག་འཇོག་བྱར་རུང་བའོ། །སོག་འཇོག་གི་སྤང་བའོ་ཞེས་བྱ་བ་དེ་བཤད་ཟིན་ཏོ། །སྤང་བ་རྣམས་རྫོགས་སོ་ཞེས་བྱ་བ་སྤང་བའི་ལྟུང་བྱེད་སུམ་ཅུ་པོ་དག་བཤད་ཟིན་ཏོ།། །།སྤང་བའི་ལྟུང་བྱེད་རྣམས་ཀྱི་འོག་ཏུ་ལྟུང་བདེ་འབའ་ཞིག་ཏུ་འགྱུར་བ་རྣམས་
བརྗོད་པར་བྱ་སྟེ། སྤང་བར་བྱ་བའི་དངོས་པོ་མེད་པའི་ཕྱིར་དེས་ན་འབའ་ཞིག་ཅེས་བྱ་བའི་མིང་འཐོབ་སྟེ། དེ་དག་ནི་གྲངས་དགུ་བཅུར་ཆད་པ་ཡིན་ནོ། །སོ་སོར་ཐར་པའི་མདོ་ལས་བརྫུན་དུ་སྨྲ་བའི་ལྟུང་བྱེད་དང་པོ་ཁོ་ནར་གསུངས་པ་ལ་འདུལ་བ་ལས་བརྫུན་དུ་སྨྲ་བ་ནི་རྣམ་པ་ལྔ་གསུངས་ཏེ། ཕམ་པར་འགྱུར་བ་དང༌། དགེ་འདུན་ལྷག་མར་འགྱུར་བ་དང༌། ཉེས་པ་སྦོམ་པོར་འགྱུར་བ་དང༌། ཉེས་བྱས་སུ་འགྱུར་བ་དང༌། ལྟུང་བྱེད་དུ་འགྱུར་བའོ། །དེ་ལ་ཕམ་པར་འགྱུར་བ་དང༌། དགེ་འདུན་ལྷག་མར་འགྱུར་བའི་བརྫུན་དུ་སྨྲ་བ་གཉིས་ཀྱི་མཚན་ཉིད་ནི་དེ་དག་ཉིད་ཀྱི་སྐབས་སུ་བཤད་ཟིན་ཏོ།། །། ད་ནི་གསུམ་པོ་དག་གི་མཚན་ཉིད་བརྗོད་པར་བྱ་སྟེ། དེ་ལ་ཉེས་པ་སྦོམ་པོར་འགྱུར་བ་དང༌། ཉེས་བྱས་སུ་འགྱུར་བའི་བརྫུན་དུ་སྨྲ་བ་གཉིས་ཀྱི་མཚན་ཉིད་ནི་བརྫུན་དུ་སྨྲ་བའི་སྐབས་ཡིན་པའི་ཕྱིར་དང༌། བརྗོད་པར་བྱ་བ་ཉུང་བའི་ཕྱིར་འདིར་དང་པོར་བརྗོད་པར་བྱ་སྟེ། དགེ་འདུན་འདུས་པ་ལ་ཤེས་བཞིན་དུ་ཆོས་མ་ཡིན་པ་ཆོས་སུ་དང་ཆོས་ཆོས་མ་ཡིན་པར་སྟོན་པ་ནི་ཉེས་བ་སྦོམ་པོའོ་ཞེས་བྱ་བ་ལ། དགེ་འདུན་འདུས་པ་ལ་ཞེས་བྱ་བ་ནི། དགེ་འདུན་གྱི་སྤྱན་སྔར་དགེ་འདུན་གྱི་དབྱེན་གྱི་སྦྱོར་བས་དབྱེ་བར་རུང་གི་གཞན་དུ་མ་ཡིན་པས། དེའི་ཕྱིར་དགེ་འདུན་འདུས་པ་ལ་དགེ་འདུན་དབྱེ་བའི་ཕྱིར། ཆོས་མ་ཡིན་པ་ཆོས་སུ་སྟོན་པ་ལ་སོགས་པའི་བརྫུན་སྨྲས་པ་ནི་ཉེས་པ་སྦོམ་པོར་འགྱུར་བ་ཡིན་གྱི། གཞན་དུ་བརྫུན་སྨྲས་པ་ནི་ལྟུང་བྱེད་འབའ་ཞིག་ཏུ་འགྱུར་བ་ཁོ་ན་ཡིན་ནོ། །ཤེས་བཞིན་དུ་ཞེས་བྱ་བ་ནི། ཆོས་དང་ཆོས་མ་ཡིན་པ་གཉིས་ཀྱི་རང་གི་ངོ་བོ་ཤེས་བཞིན་དུ་ལོག་པར་སྟོན་པས། དེའི་ཕྱིར་དེ་ནི་ཉེས་པ་སྦོམ་པོ་ཡིན་པར་གཞག་གོ །ཆོས་མ་ཡིན་པ་ཞེས་བྱ་བ་ནི། རིགས་པ་མ་ཡིན་པ་བྱ་བ་མ་ཡིན་པའོ། །ཆོས་སུ་སྟོན་པ་ཞེས་བྱ་བ་ནི། ཆོས་ཉིད་དང་བྱ་བ་ཉིད་དུ་སྟོན་པའོ། །ཆོས་དང་ཆོས་མ་ཡིན་པར་སྟོན་པ་ཞེས་བྱ་བ་ཡང་དེ་ལས་བཟློག་པའི་ཚུལ་གྱིས་དེ་བཞིན་དུ་སྦྱར་ཏེ། དེ་ནི་ཉེས་པ་སྦོམ་པོའོ། །འདི་སྐད་བསྟན་ཏེ། གང་ལ་ལ་ཞིག་དགེ་འདུན་གྱི་དབུས་སུ་བཅོམ་ལྡན་འདས་ཀྱིས་གསུངས་པའི་བྱ་བ་མ་ཡིན་པ་ནི་བྱ་བ་ཉིད་དུ་སྟོན་པར་བྱེད། བྱ་བ་ནི་བྱ་བ་མ་ཡིན་པ་ཉིད་དུ་སྟོན་པར་བྱེད་ན། དེའི་ཚེ་དེ་ལ་ཉེས་པ་སྦོམ་པོ་ཞེས་བྱ་བའི་ལྟུང་བར་འགྱུར་རོ། །ཉེས་བྱས་སུ་འགྱུར་བའི་བརྫུན་དུ་སྨྲ་བའི་མཚན་ཉིད་བརྗོད་པར་འདོད་ནས། གསོ་སྦྱོང་ལ་ཅི་འདི་ལ་ཁྱེད་
ཡོངས་སུ་དག་གམ་ཞེས་ལན་གསུམ་གྱི་བར་དུ་དྲིས་པ་ལས་མ་དག་པར་ཤེས་བཞིན་དུ་ཅང་མི་སྨྲ་བས་འདའ་བར་བྱེད་ན་ཉེས་བྱས་སོ་ཞེས་བྱ་བ་སྨྲས་ཏེ། གསོ་སྦྱོང་ལ་ཞེས་བྱ་བ་ནི། དགེ་འདུན་གསོ་སྦྱོང་མཛད་པའི་ནང་དུའོ། །ཅི་ཞེས་བྱ་བ་ནི་ཡོངས་སུ་དྲི་བའོ། །འདི་ལ་ཞེས་བྱ་བ་ནི། གསོ་སྦྱོང་ལའོ། །ཁྱེད་ཅེས་བྱ་བ་ནི། ཁྱེད་ཅག་གོ །ཡོངས་སུ་དག་གམ་ཞེས་བྱ་བ་ནི། ལྟུང་བ་མ་བྱུང་ངམ་ཞེས་བྱ་བའོ། །ཞེས་ཞེས་བྱ་བ་ནི་དྲི་བ་སྤྱི་ལ་སྙེགས་སོ། །ལན་གསུམ་གྱི་བར་དུ་དྲིས་པ་ལས་ཞེས་བྱ་བ་ནི། ལན་གསུམ་ཁོ་ན་དྲི་བར་བྱ་དགོས་པ་ལན་གསུམ་པ་རྫོགས་ཀྱི་བར་དུ་དྲིས་པ་ལས་སོ། །འདི་སྐད་བསྟན་ཏེ། དགེ་འདུན་གསོ་སྦྱོང་ལ་ཚོགས་པ་ན་སོ་སོར་ཐར་པའི་མདོ་གདོན་པས་དགེ་འདུན་ལ་ལན་གསུམ་ཁོ་ནར་འདི་སྐད་ཅེས་ཅི་འདི་ལ་ཁྱེད་ཡོངས་སུ་དག་གམ་ཞེས་དྲི་བར་བྱ་སྟེ། བཤགས་པ་དང་བྱིན་གྱིས་བརླབས་པ་གཉིས་ཀྱིས་ལྟུང་བ་མ་བཅབས་པ་ཤ་སྟག་ཚོགས་པ་ཡིན་ནམ་ཞེས་བྱ་བའི་ཐ་ཚིག་གོ །སོ་སོར་ཐར་པའི་མདོ་གདོན་པས་དེ་སྐད་དྲིས་པ་ན་གང་ལ་ལ་ཞིག་མ་དག་པར་ཤེས་བཞིན་དུ་ཅང་མི་སྨྲ་བས་བདག་ཉིད་ཡོངས་སུ་དག་པར་སྟོན་ཅིང་དྲི་བ་གསུམ་པའི་དུས་འདའ་བར་བྱེད་ན་དེ་ལ་ཉེས་བྱས་ཀྱི་ལྟུང་བ་འདི་འབྱུང་བར་འགྱུར་ཏེ། དེ་ནི་ཉེས་བྱས་ཡོངས་སུ་རྫོགས་པ་ཡིན་གྱི་ཡིད་ཀྱིས་ནི་མ་ཡིན་ཏེ། ཁ་རྣམ་པར་འགྱུར་བ་ལ་སོགས་པའི་རྣམ་པར་རིག་བྱེད་དེ་ལ་ཡོད་པའི་ཕྱིར་རོ། །ད་ནི་ལྟུང་བྱེད་དུ་གྱུར་པའི་བརྫུན་དུ་སྨྲ་བའི་མཚན་ཉིད་སྨྲ་བར་འདོད་ནས། དེ་གཉིས་དང་ཕམ་པར་འགྱུར་བ་དང་དགེ་འདུན་ལྷག་མར་གྱུར་པ་གཉིས་ལས་གཞན་པའི་བརྫུན་དུ་སྨྲ་བའོ་ཞེས་བྱ་བ་སྨྲས་ཏེ། དེ་གཉིས་དང་ཞེས་བྱ་བ་ནི། བསྟན་མ་ཐག་པའི་ཉེས་པ་སྦོམ་པོར་འགྱུར་བ་དང༌། ཉེས་བྱས་སུ་འགྱུར་བའི་བརྫུན་དུ་སྨྲ་བ་གཉིས་སོ། །ཕམ་པར་འགྱུར་བ་དང་དགེ་འདུན་ལྷག་མར་གྱུར་པ་གཉིས་ལས་ཞེས་བྱ་བ་ནི། དེ་གཉིས་སྔར་བསྟན་པ་ལས་ཏེ། བརྫུན་དུ་སྨྲ་བ་རྣམ་པ་བཞི་བོ་དེ་དག་ལས་གཞན་པའི་བརྫུན་དུ་སྨྲ་བ་འདུ་ཤེས་བསྒྱུར་བ་ནི། ལྟུང་བྱེད་དུ་གྱུར་པའི་བརྫུན་དུ་སྨྲ་བ་ཞེས་བྱ་སྟེ། དེ་ལས་ལྟུང་བ་འདིར་འགྱུར་རོ། །འདི་སྐད་བསྟན་ཏེ། བརྫུན་དུ་སྨྲ་བ་བསྟན་མ་ཐག་པ་གཉིས་དང༌། སྔར་བསྟན་པ་གཉིས་ཏེ། རྣམ་པ་བཞི་པོ་དེ་དག་ལས་གཞན་པའི་བརྫུན་
དུ་སྨྲ་བ་དོན་ཤེས་པའི་ཡུལ་ལ་འདུ་ཤེས་གཞན་དུ་བསྒྱུར་བ་ལས་ལྟུང་བྱེད་འདི་རྣམ་པར་གཞག་སྟེ། བརྫུན་དུ་སྨྲ་བ་ནི་འདུ་ཤེས་ཀྱི་དབང་གིས་རྣམ་པར་གཞག་པ་ཡིན་གྱི། དངོས་པོའི་དབང་གིས་ནི་མ་ཡིན་ནོ། །སྨྲ་བར་འདོད་པ་ལ་འདུ་ཤེས་གཞན་འབྱུང་བ་བརྫུན་དུ་སྨྲ་བ་ཡིན་པ་དེ་ལ་ནི་ཐེ་ཚོམ་མེད་ཀྱི་སྨྲ་བའི་ཚེ་ན་འདུ་ཤེས་གཞན་འབྱུང་བ་ནི་བརྫུན་དུ་སྨྲ་བར་མི་འགྱུར་ཏེ། དང་པོའི་འདུ་ཤེས་ཉིད་ཀྱིས་ཀུན་ནས་བསླང་བ་ཡིན་པའི་ཕྱིར་རོ་སྙམ་དུ་དོགས་པ་བསལ་བའི་ཕྱིར། སྨྲ་བའི་ཚེ་ཉིད་ན་ཡང་འདུ་ཤེས་བྱུང་ན་དེ་ཀུན་ནས་སློང་བ་ཡིན་ནོ་ཞེས་བྱ་བ་སྨྲས་ཏེ། སྨྲ་བར་བྱེད་པ་དེ་ནི་སྨྲ་བའི་ཚེ་སྟེ། སྨྲ་བའི་ཚེ་དེའི་དོན་གང་ཡིན་པའི་དོན་དེ་ལ་འདུ་ཤེས་གཞན་བྱུང་ན་བརྫུན་དུ་སྨྲ་བ་དེ་ཀུན་ནས་སློང་བ་ཡིན་ནོ། །འདི་སྐད་བསྟན་ཏེ། ཚིག་བརྗོད་པའི་གནས་སྐབས་ན་ཡང་འདི་ལྟ་བུའི་འདུ་ཤེས་འབྱུང་སྟེ། དོན་གང་སྨྲ་བ་དེ་གཞན་དུ་རྣམ་པར་གནས་ལ་བདག་གིས་ནི་གཞན་དུ་སྨྲ་བར་བྱའོ་སྙམ་ན་དེ་ལ་ཡང་བརྫུན་དུ་སྨྲ་པར་འགྱུར་བ་ཁོ་ན་ཡིན་ནོ། །ཡང་ཞེས་བྱ་བའི་སྒྲ་ལས་ནི་དང་པོ་ཁོ་ན་རྣམ་པར་དཔྱོད་པའི་གནས་སྐབས་ན་འདུ་ཤེས་གཞན་དུ་འབྱུང་བལྟ་སྨོས་ཀྱང་ཅི་དགོས་ཞེས་བསྟན་པ་ཡིན་ནོ། །འདིར་གཞུང་ནི། བརྫུན་དུ་སྨྲ་བ་རྣམ་པ་གཉིས་གང་ཞེ་ན། ཤེས་བཞིན་དུ་བརྫུན་གྱི་ཚིག་སྨྲ་བ་ནི་འདི་སྙམ་དུ་བརྫུན་གྱི་ཚིག་སྨྲའོ་སྙམ་པ་དང༌། དེ་ནས་སྨྲས་པའི་འོག་ཏུ་འདི་སྙམ་དུ་བདག་གིས་བརྫུན་གྱི་ཚིག་སྨྲས་སོ་སྙམ་པ་སྟེ། དེའི་ཕྱིར་བརྫུན་དུ་སྨྲ་བ་རྣམ་པ་གཅིག་ནི་མེད་དོ་ཞེས་གསུངས་པ་ཡིན་ནོ། །ལན་འགའ་ནི་སྦྱོར་བ་དང་བཅས་པའི་དངོས་གཞི་ཡིན་ལ། ལན་འགའ་ནི་དངོས་གཞི་མཇུག་དང་བཅས་པ་ཡིན་ནོ། །བརྫུན་དུ་སྨྲ་བ་མཇུག་ཉི་ཚེ་ལ་ནི་མེད་དེ་ཚིག་ཐལ་ཟིན་པའི་ཕྱིར་རོ། །མནའ་འདོར་བར་མི་བྱའོ་ཞེས་བྱ་བ་ནི། ཕྲན་ཚེགས་དག་ལས་བཏུས་པ་ཡིན་ཏེ། དྲུག་སྡེ་དག་སངས་རྒྱས་ཀྱིས་མནའ་འདོར་བར་བྱེད་པའི་གླེང་གཞི་ལས། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན། དགེ་སློང་གིས་མནའ་འདོར་བར་མི་བྱའོ་ཞེས་གསུངས་པ་ཡིན་ནོ། །འདི་ལྟར་མནའ་འདོར་བར་བྱེད་པ་ལས་ནི་འདི་ལྟར་བསྒྲགས་པར་འགྱུར་ཏེ། ཁོ་བོ་དོན་ཐམས་ཅད་ལ་བདེན་པས་ཞུགས་པ་མ་ཡིན་ཏེ། གང་ལ་མནའ་འདོར་བ་དེ་ལ་མནའི་དབང་གིས་ཁོ་བོ་བདེན་པར་ཞུགས་པ་ཡིན་ནོ་ཞེས་བསྒྲགས་པའི་སྐྱོན་དུ་འགྱུར་
བས་དེའི་ཕྱིར་དགེ་སློང་གིས་མནའ་འདོར་བར་མི་བྱའོ། །བརྫུན་དུ་སྨྲ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྐྱོན་ནས་སྨྲ་བའི་ལྟུང་བྱེད་སྨྲ་བར་འདོད་ནས་དགེ་སློང་གིའོ་ཞེས་བྱ་བ་སྨྲས་ཏེ། མདོ་འདི་དང་འོག་གི་མདོ་ལས་རུང་བ་མ་ཡིན་པར་བསམ་པ་གང་ཡང་རུང་བ་སྨྲས་ནའོ་ཞེས་འབྱུང་བ་དང་སྦྱར་བར་བྱའོ། །འདི་སྐད་བསྟན་ཏེ། རུང་བ་མ་ཡིན་པར་བསམ་པ་གང་ཡང་རུང་བ་སྨྲས་ན་སྐྱོན་ནས་སྨྲ་བའི་ལྟུང་བྱེད་དོ། །དེ་ཉིད་དགེ་སློང་གི་ཡུལ་ཁོ་ན་ལ་ཡིན་པར་རིག་པར་བྱ་སྟེ། དགེ་སློང་གིས་དགེ་སློང་ལ་སྨྲ་ན་ཁ་ན་མ་ཐོ་བ་འདིར་འགྱུར་གྱི། དགེ་ཚུལ་ལ་སོགས་པ་གཞན་ལ་ནི་མ་ཡིན་ཏེ། དེ་ལ་ནི་ཉེས་བྱས་སུ་གསུངས་པའི་ཕྱིར་རོ། །འོག་མ་ལ་ཡང་ངོ་ཞེས་བྱ་བ་ནི། བསླབ་པའི་གཞི་འདིའི་འོག་མ་དགེ་སློང་ལ་ཕྲ་མ་བྱེད་པ་ཞེས་བྱ་བ་ལ་ཡང་དགེ་སློང་ཁོ་ན་ལ་སྨྲས་ན་སྟེ། དེ་ལ་ཡང་དགེ་སློང་གི་ཡུལ་ཁོ་ན་ལ་ཁ་ན་མ་ཐོ་བར་འགྱུར་བ་ཡིན་གྱི། དགེ་ཚུལ་ལ་སོགས་པ་གཞན་དག་ལ་ནི་ཉེས་བྱས་ཁོ་ནའོ། །དེ་ལྟ་བས་ན་སྐྱོན་ནས་སྨྲ་བ་དང༌། དགེ་སློང་ལ་ཕྲ་མ་བྱེད་པ་ཞེས་བྱ་བའི་བསླབ་པའི་གཞི་གཉི་ག་ཡང་དགེ་སློང་གི་ཡུལ་ཁོ་ན་ལ་རིག་པར་བྱའོ། །ཕྲ་མ་ལ་སོགས་པ་མེད་པར་ཚིག་ཀྱལ་པ་འབའ་ཞིག་སྨྲ་བ་ལ་ནི་ཉེས་བྱས་ཁོ་ནའོ། །སེམས་ཡོངས་སུ་དག་པས་ཀྱང་རུང་བ་མ་ཡིན་པར་བསམ་པ་གང་ཡང་རུང་བ་སྨྲ་བ་སྲིད་པས་དེ་ལས་བྱེ་བྲག་ཏུ་བྱ་བའི་ཕྱིར། སྐྱོན་ཉིད་བརྗོད་པར་འདོད་པས་སོ་ཞེས་བྱ་བ་སྨྲས་ཏེ། འདིའི་སྐྱོན་ཉིད་བརྗོད་པར་བྱའོ་སྙམ་པའི་བསམ་པས་དགེ་སློང་གི་སྐྱོན་ནས་སྨྲས་ན་ཁ་ན་མ་ཐོ་བ་འདིར་འགྱུར་རོ། །ཚིག་ཇི་ལྟ་བུས་ཤེ་ན། དེའི་ཕྱིར་འཇམ་པོས་ཀྱང་རུང་རྩུབ་མོས་ཀྱང་རུང་ངོ་ཞེས་བྱ་བ་སྨྲས་ཏེ། ཚིག་འཇམ་པོས་ཀྱང་རུང་ཚིག་རྩུབ་མོས་ཀྱང་རུང་སྟེ། དགེ་སློང་གི་སྐྱོན་ཉིད་བརྗོད་པར་འདོད་པས། རུང་བ་མ་ཡིན་པར་བསམ་པས་བརྗོད་ན་ཁ་ན་མ་ཐོ་བ་འདིར་འགྱུར་རོ། །གང་གི་ཕྱིར་སྐྱོན་ནས་སྨྲ་བ་དང་བཅས་པའི་ཚིག་རྩུབ་པོ་སྨྲས་ན། དངོས་གཞིར་འགྱུར་བ་དེའི་ཕྱིར་ཚིག་རྩུབ་པོ་སྨྲ་བ་ཡང་བསླབ་པའི་གཞི་འདི་ཉིད་ཀྱི་ཁོངས་སུ་འདུས་པ་ཡིན་ནོ། །རུང་བ་མ་ཡིན་པར་བསམ་པ་གང་ཡང་རུང་བས་སྨྲ་ནའོ་ཞེས་བྱ་བ་ནི། རུང་བ་མ་ཡིན་པར་བསམ་པ་ཞེས་བྱ་བ་དམན་པར་བསམ་པ་གང་ཡང་རུང་བ་ཞེས་བྱ་བ་ལུས་ཀྱི་འམ་སེམས་ཀྱི་གང་ཡང་རུང་
བ་སྨྲས་ན། སྐྱོན་ནས་སྨྲ་བའི་ལྟུང་བྱེད་དུ་འགྱུར་ཏེ། འདི་ལྟ་སྟེ་དཔེར་ན། ཁྱོད་ནི་མཛེ་ཅན་ནོ་ཞེ་འམ། ཞར་བའོ་ཞེས་བྱ་བ་ལྟ་བུ་དང༌། ཁྱོད་ནི་ཁྲོ་བའོ་ཞེ་འམ། འཁྲུག་པ་ཅན་ནོ་ཞེས་བྱ་བ་ལ་སོགས་པ་ལྟ་བུའོ། །མི་དགའ་བ་ཉིད་དུ་མ་གྱུར་ན་ཡང་ངོ་ཞེས་བྱ་བ་ལ། མི་དགའ་བ་ཉིད་ཅེས་བྱ་བ་ནི། ཁྲོས་པ་དང༌། འཁྲུགས་པ་དང༌། ཡི་ཆད་པ་དང༌། སྐྱེས་པ་དང༌། ཡུལ་ཡུལ་པོར་གྱུར་པ་ཞེས་བྱ་བ་དག་དང་དོན་གཅིག་གོ །མ་གྱུར་ན་ཞེས་བྱ་བ་ནི། ཉན་པ་པོ་མི་དགའ་བ་ཉིད་དེ་དག་ཏུ་མ་གྱུར་ནའོ། །ཡང་ངོ་ཞེས་བྱ་བ་ནི། འོན་ཀྱང་སྐྱོན་ནས་སྨྲ་བའི་ཁ་ན་མ་ཐོ་བ་ཉིད་དུ་འགྱུར་བའོ། །དེ་ལྟར་ཡང་འདིར་གཞུང་ནི། དགེ་སློང་མི་དགའ་བ་ཉིད་དུ་གྱུར་ཀྱང་རུང་མ་གྱུར་ཀྱང་རུང་ཞེས་གསུངས་པ་ཡིན་ནོ། །གཞན་རྒྱལ་རིགས་ཉིད་དང་བྲམ་ཟེ་ཉིད་ལ་སོགས་པ་ནི་ཉེས་བྱས་སོ་ཞེས་བྱ་བ་ལ། གཞན་ཞེས་བྱ་བ་ནི། རུང་པ་མ་ཡིན་པར་བསམ་པ་ལས་གཞན་པ་སྟེ། དགེ་སློང་ལ་རྒྱལ་རིགས་ཉིད་དང༌། བྲམ་ཟེ་ཉིད་ལ་སོགས་པའི་སྐྱེས་བུའི་ཚིག་སྨྲས་ན་ཉེས་བྱས་སོ། །དགེ་འདུན་ལ་སོགས་པ་ལ་སྨྲས་ན་ནི་ཉེས་བྱས་ཕྲ་མོར་འགྱུར་རོ། །སྐྱོན་ནས་སྨྲ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཕྲ་མ་བྱེད་པའི་ལྟུང་བྱེད་སྨྲ་བར་འདོད་ནས། ཕྲ་མ་བྱེད་འདོད་པས་ཆེ་གེ་མོ་ཞིག་ཟེར་རོ་ཞེས་སྨྲས་ནའོ་ཞེས་བྱ་བ་སྨྲས་ཏེ། ཕྲ་མ་བྱེད་འདོད་པས་ཞེས་བྱ་བ་ནི། གཞན་དབྱེ་བའི་བསམ་པ་སྟེ། དགེ་སློང་ཆེ་གེ་མོ་ཞིག་འདི་སྐད་ཅེས་ཟེར་རོ་ཞེས་དགེ་སློང་གཞན་ལ་སྨྲས་ན་དངོས་གཞིའོ། །འདིར་སྐྱོན་ཉིད་ཀྱང་ཡན་ལག་མ་ཡིན་ལ། རུང་བ་མ་ཡིན་པར་བསམ་པ་ཉིད་ཀྱང་ཡན་ལག་མ་ཡིན་ཏེ། དབྱེ་བའི་བསམ་པ་བྱེད་པ་པོ་ཉིད་ཡིན་པའི་ཕྱིར་རོ། །ཅི་སྤྱིས་སམ་ཞེ་ན། དེའི་ཕྱིར་གལ་ཏེ་མིང་ནས་སོ་ཞེས་བྱ་བ་སྨྲས་ཏེ། དགེ་སློང་མིང་འདི་ཞེས་བྱ་བ་འདི་སྐད་ཅེས་ཟེར་རོ་ཞེས་གལ་ཏེ་ཕྱིར་སྨྲ་བ་དེའི་མིང་ནས་སྨོས་པར་བྱེད་ནའོ། །དེ་ཡང་དགེ་སློང་དེ་ཉིད་ཡིན་ནའོ་ཞེས་བྱ་བ་ནི། གང་གི་མིང་ནས་སྨོས་པར་བྱེད་པ་དེ་གལ་ཏེ་དགེ་སློང་ཉིད་ཡིན་ནའོ། །ཡང་ཞེས་བྱ་བའི་སྒྲས་ནི་གང་ལ་བསླབ་པར་བྱ་བ་དེ་ཡང་གལ་ཏེ་དགེ་སློང་ཉིད་ཡིན་ནའོ་ཞེས་བྱ་བ་བསྡུའོ། །འདི་སྐད་བསྟན་ཏེ། དབྱེ་བར་བྱ་བ་གཉི་ག་དགེ་སློང་ཡིན་ན་ཁ་ན་མ་ཐོ་བ་འདིར་འགྱུར་རོ། །འབྱེད་པར་བྱེད་པ་ནི་དགེ་སློང་ཉིད་ཡིན་པར་མ་སྨོས་ཀྱང་གྲུབ་བ་ཁོ་ན་ཡིན་ཏེ། དགེ་སློང་
ཁོ་ན་ལ་ལྟུང་བྱེད་སྲིད་པའི་ཕྱིར་རོ། །དེ་ལྟར་ན་གལ་ཏེ་དབྱེ་བར་བྱ་བ་གཉིས་དགེ་སློང་ཉིད་མ་ཡིན་ན་ནི་དེའི་ཚེ་འབྱེད་པར་བྱེད་པ་ཉེས་བྱས་སོ། །གཞན་དུ་ན་ཉེས་བྱས་སོ་ཞེས་བྱ་བ་ནི། གལ་ཏེ་སྔར་བསྟན་པའི་མཚན་ཉིད་རྣམ་པར་གཞག་པ་ལས་ཡན་ལག་གཅིག་གིས་ཉུང་བར་གྱུར་ན་ཡང་ཉེས་བྱས་ཏེ། དཔེར་ན་རྒྱལ་རིགས་སམ་བྲམ་ཟེ་འམ། འོད་སྲུངས་ཀྱི་རིགས་ཤིག་འདི་སྐད་ཟེར་རོ་ཞེས་སྨྲས་པ་ལྟ་བུའོ། །ཕྲ་མ་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྐྱོ་སྔོགས་བྱེད་པའི་ལྟུང་བྱེད་སྨྲ་བར་འདོད་ནས། འདུ་ཤེས་གཙོ་བོ་ཞེས་བྱ་བ་སྨྲས་ཏེ། འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བས་མིང་དང་མིང་ཅན་གོ་བར་བྱེད་དོ། །མིང་གི་ཡུལ་བསྟན་པའི་ཕྱིར། དགེ་སློང་གཉིས་ཀྱི་རྩོད་པ་ཉིད་དགེ་འདུན་གྱིས་ལེགས་པར་ཞི་བར་བྱ་བ་ཉིད་ལའོ་ཞེས་བྱ་བ་སྨྲས་ཏེ། དགེ་སློང་གཉིས་འཐབ་པའི་ཕྱིར་རྩོད་པར་གྱུར་པའི་རྩོད་པ་དེ་ཉིད་དགེ་འདུན་གྱིས་ལེགས་པར་ཞི་བར་བྱས་པ་ཉིད་ལ་སྟེ། ཡུལ་རྣམ་པ་དེ་ལྟ་བུ་ལ་འདུ་ཤེས་པ་ནི་ཡོངས་སུ་ཤེས་པ་གང་ཡིན་པ་སྟེ། འདུ་ཤེས་དེ་ནི་གཙོ་ཆེར་ལྟུང་བ་འདིའི་བྱེད་པ་པོ་ཡིན་ནོ། །འདིར་གཞུང་ནི། འཐབ་པའི་ཕྱིར་རྩོད་པ་ལ་འཐབ་པའི་ཕྱིར་རྩོད་པར་འདུ་ཤེས་ན་ཞེས་གསུངས་པ་ཡིན་ནོ། །འདིར་རྒོལ་བ་དང་ཕྱིར་རྒོལ་བ་གཉི་ག་དགེ་སློང་ཉིད་ཡིན་ན་སྐྱོ་སྔོགས་བྱེད་པའི་དངོས་གཞིའོ། །གཅིག་གམ་གཉི་ག་དགེ་སློང་མ་ལ་སོགས་པ་ཉིད་ཡིན་ན་ནི་ཉེས་བྱས་སོ། །འདིར་གཞུང་ནི་ཞུ་བ་ལས་བཙུན་དུ་དགེ་སློང་གིས་དགེ་སློང་མ་དང་རྩོད་པ་ལས་སྐྱོ་སྔོགས་བགྱིད་ན་ལྟུང་བ་ཅིར་འགྱུར། ཉེ་བ་འཁོར་ཉེས་བྱས་སུ་འགྱུར་རོ། །དགེ་སློང་མ་དང༌། དགེ་སློང་མ་དང༌། དགེ་ཚུལ་མ་དང་རྩོད་པ་ལ་ཡང་དེ་བཞིན་ནོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ཇི་ཞིག་བྱས་ན་ཁ་ན་མ་ཐོ་བ་འདིར་འགྱུར་ཞེ་ན། དེའི་ཕྱིར་སྐྱོ་སྔོགས་སོ་ཞེས་བྱ་བ་སྨྲས་ཏེ། སྐྱོ་སྔོགས་བྱེད་པ་ཞེས་བྱ་བ་ནི། འཁྲུག་ལོང་བྱེད་པ་སྟེ། ལེགས་པར་བྱས་པ་ཉིད་མ་ཡིན་ཞིང་ཆོས་ཀྱིས་ཉེ་བར་ཞི་བར་བྱས་པ་ཉིད་མ་ཡིན་ནོ་ཞེས་སྐྱོ་སྔོགས་བྱེད་པའོ། །དེའི་ཕྱིར་ཡང་ལས་ཀྱི་སྐྱོ་སྔོགས་བྱེད་ན་ཞེས་གསུངས་ཏེ། ཡང་བྱ་བ་ཉིད་ཀྱིས་ཞེས་བྱ་བའི་ཐ་ཚིག་གོ །འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བ་སྨྲས་ན། གང་དག་ལ་
འདུ་ཤེས་དེ་ཁ་ན་མ་ཐོ་བ་ཇི་ལྟ་བུའི་བྱེད་པ་པོ་ཉིད་ཡིན་ཞེ་ན། དེའི་ཕྱིར་གཉུག་མར་གནས་པ་དང་ལས་བྱེད་པ་དང་འདུན་པ་འབུལ་བ་དག་ཁོ་ན་ལ་དངོས་གཞིའོ་ཞེས་བྱ་བ་སྨྲས་ཏེ། འདུ་ཤེས་གང་ཡིན་པ་དེ་དངོས་གཞིའི་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །གཉུག་མར་གནས་པ་ཞེས་བྱ་བ་ནི། གང་གིས་རྩོད་པ་དེའི་ཐོག་མ་དང༌། དབུས་དང༌། ཐམ་དག་ཤེས་པའོ། །ལས་བྱེད་པ་ཞེས་བྱ་བ་ནི། གང་གིས་རྩོད་པ་དེ་ཉེ་བར་ཞི་བར་བྱ་བའི་ཕྱིར་ལས་བྱས་པའོ། །དད་པ་འབུལ་བ་ཞེས་བྱ་བ་ནི། གང་གིས་ལས་དེ་བྱ་བའི་ཕྱིར་དད་པ་ཕུལ་བར་གྱུར་པའོ། །དེའི་ཕྱིར་བཏུབ་པར་གྱུར་ནས་ཕྱིས་སྐྱོ་སྔོགས་བྱེད་ན་ཞེས་གསུངས་ཏེ། སྔར་རྗེས་སུ་གནང་བ་བྱིན་ནས་ཕྱིས་སྐྱོ་སྔོགས་བྱེད་ན་ཞེས་བྱ་བའི་ཐ་ཚིག་གོ །ལྟ་བ་སྨྲ་བ་དང་གློ་བུར་དུ་འོངས་པ་དག་ལ་ནི་ཉེས་བྱས་ཁོ་ནའོ་ཞེས་བྱ་བ་ནི། ལྟ་བ་སྨྲ་བ་དང༌། གློ་བུར་དུ་འོངས་པ་དག་ལ་འདུ་ཤེས་གང་ཡིན་པ་དེ་ནི་ཉེས་བྱས་ཁོ་ནའི་བྱེད་པ་པོ་ཉིད་ཡིན་ཏེ། ལྟ་བ་སྨྲ་བ་ཉིད་ཡིན་པས་རྣལ་དུ་མ་ཕེབས་པའི་ཕྱིར་དང༌། གློ་བུར་དུ་འོངས་པ་ཉིད་ཡིན་པས་རྒྱུས་མི་ཤེས་པའི་ཕྱིར་རོ། །རྩོད་པ་གཞན་ཉིད་ལ་རྩོད་པ་གཞན་དུ་འདུ་ཤེས་པ་ནི་དེ་དང་འདྲ་བ་ཉིད་ཡིན་ནོ་ཞེས་བྱ་བ་ནི། འཐབ་པའི་ཕྱིར་རྩོད་པ་ལ་ལྟུང་བ་འདིར་རྩོད་པ་ཉིད་དུ་འདུ་ཤེས་པ་ལ་ནི་ན་སྨད་པ་མེད་དེ་དེ་དང་འདྲ་བ་ཉིད་དོ། །དེ་ཡང་འཐབ་པའི་ཕྱིར་རྩོད་པ་ཉིད་དང་འདྲ་བ་ཉིད་དེ། དངོས་གཞིའི་ཁ་ན་མཐོ་བ་ཉིད་དུ་འགྱུར་རོ་ཞེས་བྱ་བའི་ཐ་ཚིག་གོ །འདིར་རྩོད་པ་ཙམ་ཉིད་ཚད་མ་ཡིན་གྱི། རྩོད་པའི་བྱེ་བྲག་ནི་ཚད་མ་མ་ཡིན་ནོ། །ལས་ཀྱི་འབྲས་བུ་ལ་གནས་པ་ལ་དེ་མ་ཡིན་པ་ཉིད་ཀྱིས་ཀུན་དུ་སྤྱོད་པ་ལ་ནི་ཕྱེད་ཉིད་དོ་ཞེས་བྱ་བ་ལ། ལས་ཀྱི་འབྲས་བུ་ཞེས་བྱ་བ་ནི། གསོལ་བ་ལ་སོགས་པའི་རང་བཞིན་གྱི་ལས་ཀྱི་འབྲས་བུར་བརྗོད་པ་བསླབ་པ་བྱིན་པ་ཉིད་ལ་སོགས་པ་གང་ཡིན་པའོ། །འབྲས་བུ་དེ་ལ་གནས་པ་ལ་ཞེས་བྱ་བ་ནི། འབྲས་བུ་དེ་ཐོབ་ཅིང་འབྲས་བུ་དེ་ལ་རྣམ་པར་གནས་པ་ལའོ། །དེ་མ་ཡིན་པ་ཉིད་ཀྱིས་ཞེས་བྱ་བ་ནི། དེ་ལ་གནས་པ་མ་ཡིན་པ་ཉིད་ཀྱིས་སོ། །ཀུན་དུ་སྤྱོད་པ་ཞེས་བྱ་བ་ནི་སྐྱོ་སྔོགས་བྱེད་པའོ། །ཕྱེད་ཉིད་དོ་ཞེས་བྱ་བ་ནི། དེ་ལ་ཉེས་བྱས་ཉིད་དུ་འགྱུར་བའོ། །འདིར་གཞུང་ནི། ཞུ་བ་ལས་བཙུན་པ་དགེ་སློང་གིས་བསླབ་པ་ལ་འདི་སྐད་ཅེས་ཁྱོད་བསླབ་པ་བྱིན་པ་མ་ཡིན་ནོ། །
ཞེས་བགྱིས་ན་ལྟུང་བ་ཅིར་འགྱུར། ཉེ་བ་འཁོར་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །སྐྱོ་སྔོགས་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྟོན་པའི་ལྟུང་བྱེད་སྨྲ་བར་འདོད་ནས། སྔར་དེ་དང་འབྲེལ་བར་བསྟན་པ་དག་ཇེ་དྲན་པར་བྱ་སྟེ། འདི་ལ་བྱེད་པ་པོ་ཉིད་ནི་བུད་མེད་དོ། །ཁྱིམ་པ་མོ་ལ་སྟོན་པ་ལའོ། །སྐྱེས་པ་མེད་པར་རོ། །རིག་པའོ་ཞེས་སྔར་བསྟན་པ་དག་དྲན་པར་བྱས་ནས་འདིར་ལྷག་མ་རྣམས་བརྗོད་པར་བྱ་སྟེ། གང་ལ་བྱེད་པ་པོ་ཉིད་བུད་མེད་ཡིན་ཞེ་ན། དེའི་ཕྱིར་སྟོན་པ་ལའོ་ཞེས་བྱ་བ་སྨྲས་སོ། །ཇི་ཞིག་སྟོན་པ་ལ་ཞེ་ན། དེའི་ཕྱིར་ཆོས་སོ་ཞེས་བྱ་བ་སྨྲས་ཏེ། །དེ་བཞིན་གཤེགས་པས་གསུངས་པའི་ཆོས་སྟོན་པ་ལ་ཡིན་གྱི། ལམ་འདྲི་བ་ལ་སོགས་པ་ལ་ལམ་རྒྱུས་ལ་སོགས་པ་སྟོན་པ་ལ་ནི་མ་ཡིན་ནོ། །སྟོན་པའི་ཚིག་བསྟན་པའི་ཕྱིར། ཚིག་དྲུག་ལས་ལྷག་པར་རོ་ཞེས་བྱ་བ་སྨྲས་ཏེ། སྟོན་པ་ལའོ་ཞེས་བྱ་བར་སྦྱར་རོ། །འདི་སྐད་བསྟན་ཏེ། གལ་ཏེ་ཚིག་དྲུག་པ་ལས་ལྷག་པར་ཆོས་སྟོན་ན། དེའི་ཚེ་དངོས་གཞིའི་ཁ་ན་མ་ཐོ་བར་འགྱུར་རོ། །གང་ཟག་ཇི་ལྟ་བུ་ལ་ཞེ་ན། དེའི་ཕྱིར་ལྷག་པ་ཉིད་དང་ཤེས་པ་ལའོ་ཞེས་བྱ་བ་སྨྲས་ཏེ། གལ་ཏེ་ཚིག་དྲུག་པ་ལས་ལྷག་པ་ཉིད་དུ་ཤེས་ན་དེའི་ཚེ། ཤེས་པ་དེ་ལ་ཁ་ན་མ་ཐོ་བ་འདིར་འགྱུར་རོ། །ཤེས་པ་ཞེས་སྨོས་པས་ནི། འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བ་ནི། རྣམ་པ་དེ་ཉིད་འདི་ལ་ཡང་ཡོད་པར་སྟོན་ཏོ། །འདི་སྐད་བསྟན་ཏེ། ཚིག་དྲུག་པ་ལས་ལྷག་པ་ཉིད་ཀྱང་ཡིན་ལ། ལྷག་པ་ཉིད་དུ་འདུ་ཤེས་པ་ཡང་ཡོད་ན་དངོས་གཞིའོ། །མ་ལྷག་པ་ཉིད་ལ་ལྷག་པར་འདུ་ཤེས་ཤིང་སྟོན་ན་ཉེས་བྱས་སོ། །ཡིད་གཉིས་ཟན་ནི་ཡིད་གཉིས་ནི་འདུ་ཤེས་དང་འདྲའོ་ཞེས་བྱ་བས་ལྟུང་བ་རྣམ་པར་གཞག་པར་རིག་པར་བྱའོ། །ཚིག་ལྔ་པ་ནི་རྩོམ་པ་ལྔ་པ་ལས་སོ་ཞེས་བྱ་བ་ལ། སྟོན་པ་གང་ལ་ཚིག་ལྔ་ཡོད་པ་དེ་ནི་ཚིག་ལྔ་པའོ། །དེ་རྩོམ་པ་ནི་བརྩམ་པ་སྟེ། ཚིག་ལྔ་པ་ལས་ལྷག་པར་སྟོན་ན་དངོས་གཞིའོ། །ཚིག་གཅིག་པ་ལ་སོགས་པ་གཞན་ཐམས་ཅད་ཀྱི་རྩོམ་པ་ལ་ནི་ཚིག་དྲུག་པ་ལས་ལྷག་པར་སྟོན་ན་དངོས་གཞིའོ། །འདིར་ཚིག་ཅེས་བྱ་བ་ནི། སྨྲ་བར་འདོད་པའི་དོན་གཅིག་གོ་བར་བྱེད་པའི་ཚིག་ལ་བྱ་སྟེ། དཔེར་ན་སྨྲ་བར་འདོད་པའི་དབང་གིས་གཟུགས་མི་རྟག་པ་བྱེ་བྲག་དང་བཅས་པ་ནི་ཚིག་གཅིག་ཅེས་བྱ་བ་ལྟ་བུའོ། །གཟུགས་ཙམ་རྗེས་སུ་བཤད་
པ་སྨྲ་བར་འདོད་པ་ལ་ཕུང་པོ་ནི་ལྔ་སྟེ། གཟུགས་དང་ཚོར་བ་དང་འདུ་ཤེས་དང༌། འདུ་བྱེད་དང་རྣམ་པར་ཤེས་པའོ་ཞེས་བྱ་བ་དག་ནི་ཐ་དད་པ་ཉིད་དོ། །མདོར་བསྟན་པ་ལ་ནི་རྒྱས་པར་བཤད་པ་གཙོ་བོ་ཡིན་པའི་ཕྱིར་རོ། །མདོར་བསྟན་པ་དེ་རྒྱས་པར་བཤད་པ་ལས་ཐ་མི་དད་དེ། དཔེར་ན་ཕུང་པོ་ནི་ལྔ་སྟེ་ཞེས་བྱ་བ་དེ་རྒྱས་པར་བཤད་པ་ལས་ཐ་མི་དད་པ་ལྟ་བུའོ། །མཁས་པས་གོང་ནས་གོང་དུ་དྲིས་པ་གཏན་ལ་དབབ་པ་བྱས་པ་དང༌། སློབ་གཉེར་གསོད་པ་དང༌། ཁ་དོན་ཞུ་བ་དང༌། དམིགས་ཀྱིས་འདྲི་བ་དང༌། དུས་ཁྲིམས་དབོག་པ་དང༌། ཡོན་བཤད་པ་དག་ནི་མ་ཡིན་ནོ་ཞེས་བྱ་བ་ནི། ཚིག་དྲུག་པ་ལས་ལྷག་ན་ཞེས་བྱ་བ་སྤྱིར་གཏང་བ་དེ་དམིགས་ཀྱིས་བསལ་བ་ཡིན་ཏེ། མཁས་པས་གོང་ནས་གོང་དུ་དྲིས་པ་གཏན་ལ་དབབ་པར་བྱས་པ་ནི་ལྷག་པར་སྟོན་པའི་བྱེད་པ་པོ་ཉིད་མ་ཡིན་ནོ། །དེ་བཞིན་དུ་སློབ་གཉེར་གསོད་པ་དང༌། ཁ་ཏོན་ཞུ་བ་དང༌། དམིགས་ཀྱིས་འདྲི་བ་དང༌། དུས་ཁྲིམས་དབོག་པ་དང༌། ཡོན་བཤད་པ་དག་ཀྱང་ལྷག་པར་སྟོན་པའི་བྱེད་པ་པོ་ཉིད་མ་ཡིན་ཏེ། དེ་ལ་ལྟུང་བ་མེད་དོ། །ཁ་ཏོན་ཞུ་བ་སྨོས་པས་ཀློག་པ་ཡང་བསྡུས་པ་ཡིན་ཏེ། བཙུན་མོ་ཕྲེང་ལྡན་མ་དང་དབྱར་ཚུལ་མ་གཉིས་ཀྱི་ཀློག་པའི་ཕྱིར་འཕགས་པ་ཤཱ་རིའི་བུ་དང༌། འཆར་ཀ་གཉིས་ཀྱིས་བཅོམ་ལྡན་འདས་ལ་ཅི་ཀླག་ལགས་སོ་ཞེས་ཞུས་པ་དང༌། བཅོམ་ལྡན་འདས་ཀྱིས་ལྷོགས་ཤིག་ཅེས་གསུངས་པ་ཡིན་ནོ། །དུས་ཁྲིམས་དབོག་པ་དང༌། ཡོན་བཤད་པ་གཉིས་ཀྱི་གཞུང་ནི། ཞུ་བའི་གཞུང་ལས་ཡོན་བཤད་པ་ལ་ལྟུང་བ་མེད་དོ། །བསྙེན་གནས་ཡན་ལག་བརྒྱད་དང་ལྡན་པ་དབོག་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །གནས་གཞན་དུ་ནི་སྔ་མ་མ་བྱས་པ་ཉིད་དོ་ཞེས་བྱ་བ་ནི། ཁྱམས་ལ་སོགས་པ་གནས་གཞན་དུ་བསྟན་པ་བྱས་པ་ནི་སྔ་མ་གནས་ཁང་ལ་སོགས་པར་བྱས་པ་དང༌། ལྷན་ཅིག་མ་བྱས་པ་ཉིད་དེ། དེ་ལ་ལྟུང་བ་རྣམ་པར་གཞག་པར་མི་བྱའོ། །སྟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།འདོན་པའི་ལྟུང་བྱེད་སྨྲ་བར་འདོད་ནས་རྫོགས་པར་མ་བསྙེན་པ་དང་ཅིག་ཅར་རམ་མཇུག་ཐོགས་སུ་སྟོན་བྱེད་དུ་གྱུར་པའི་ཆོས་དང་ཡི་གེ་ཡང་འདོན་ནའོ་ཞེས་བྱ་བ་སྨྲས་ཏེ། དགེ་སློང་གིས་རྫོགས་པར་མ་བསྙེན་པ་དང༌། ཅིག་ཅར་ཞེས་བྱ་བ་ནི་དུས་གཅིག་ཏུའོ། །མཇུག་ཐོགས་སུ་ཞེས་བྱ་བ་ནི། རྫོགས་པར་མ་བསྙེན་པས་བཏོན་པའི་མཇུག་ཐོགས་སུ་
འདོན་པའོ། །སྟོན་བྱེད་ཅེས་བྱ་བ་ནི། འདིར་མདོ་སྡེ་ལ་སོགས་པ་ལུང་ཡིན་པར་བསམས་ཏེ། འདི་ལྟར་ལུང་གི་དོན་ཉན་པ་པོའི་རྒྱུད་དག་ལ་སྟོན་པར་བྱེད་པ་གསལ་བར་བྱེད་པས་ན་དེའི་ཕྱིར་ལུང་ནི་སྟོན་བྱེད་ཅེས་བྱའོ། །དེར་གྱུར་པ་ཞེས་བྱ་བ་ནི་དེར་གཏོགས་པ་སྟེ། ལུང་དུ་གཏོགས་པ་ཞེས་བྱ་བའི་ཐ་ཚིག་གོ །ཆོས་དང་ཡི་གེ་ཡང་འདོན་ནའོ་ཞེས་བྱ་བ་ནི། ལུང་དུ་གཏོགས་པ་དྲང་སྲོང་གིས་གསུངས་པའི་ཆོས་དང༌། ཡི་གེ་རྫོགས་པར་མ་བསྙེན་པ་དང༌། ཅིར་ཅར་རམ་མཇུག་ཐོགས་སུ་འདོན་ན། འདོན་པའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །འོ་ན་ཆོས་ཞེས་སྨོས་པ་ཉིད་ཀྱིས་སྟོན་བྱེད་ཀྱང་ཐོབ་པ་ཡིན་ན་སྟོན་བྱེད་དང་ཆོས་ཞེས་བྱ་བའི་ཚིག་གཉི་ག་ཅིའི་ཕྱིར་སྨོས་ཤེ་ན། འདི་ལྟར་མུ་སྟེགས་ཅན་གྱི་བསྟན་བཅོས་ལ་ཡང་སྟོན་བྱེད་ཅེས་བྱ་བའི་ཚིག་དེ་ཡོད་པས་དེ་བསལ་བའི་ཕྱིར་ཆོས་ཞེས་བྱ་བ་སྨོས་ཏེ། འདིར་ལྟར་ལུང་ལས་བཏུས་པའི་ཚིག་གཞན་དུ་སྦྱར་བ་ཡང་ཆོས་ཞེས་བྱ་བ་ཉིད་ཡིན་ཏེ། དཔེར་ན་ཆོས་ཐམས་ཅད་བདག་མེད་དོ། །འདུས་བྱས་ཐམས་ཅད་སྐད་ཅིག་མའོ་ཞེས་བྱ་བ་ལ་སོགས་པ་ལྟ་བུ་དང༌། དེ་བཞིན་དུ་ལུང་གི་དོན་ལས་བཏུས་ཤིང་ལུང་གི་ཡི་གེ་མེད་པ་མིང་དང་ཚིག་དན་གྱི་གེ་གཞན་གྱི་བྱེ་བྲག་དང་ལྡན་པ་ཡང་ཆོས་ཞེས་བྱ་བ་ཉིད་ཡིན་མོད་ཀྱི་དེ་དག་ནི་སྟོན་བྱེད་དུ་འགྱུར་བ་ཉིད་མ་ཡིན་ཏེ། དཔེར་ན་སློབ་དཔོན་དཔའ་བོས་བྱས་པའི་སྐྱེས་པའི་རབས་ཀྱི་རྒྱུད་ལ་སོགས་པ་དག་ལྟ་བུའོ། །དེའི་ཕྱིར་ལུང་ཉིད་དུ་གནས་པའི་ལུང་ཉིད་ཡིན་པར་བསྟན་པའི་ཕྱིར་ཚིག་གཉི་ག་སྨོས་སོ། །ཆོས་ཞེས་བྱ་བ་ནི་སངས་རྒྱས་ཀྱིས་གསུངས་པའམ། དེའི་ཉན་ཐོས་ཀྱིས་བཤད་པ་མིང་དང་ཚིག་གོ་བདག་ཉིད་དོ། །མིང་ཞེས་བྱ་བ་ནི། སངས་རྒྱས་ཆོས་དགེ་འདུན་ཞེས་བྱ་བ་ལ་སོགས་པ་ལྟ་བུའོ། །ཚིག་ཅེས་བྱ་བ་ནི། དཔེར་ན། བསོད་ནམས་དག་གི་རྣམ་སྨིན་བ་དེ། །ཞེས་བྱ་བ་ལ་སོགས་པ་ལྟ་བུ་སྨྲ་བར་འདོད་པའི་དོན་ཤེས་པར་བྱེད་པའོ། །ཡི་གེ་ཡང་ཞེས་བྱ་བ་ནི་ཡིག་འབྲུ་ཙམ་ཡང་ངོ༌། །དེ་ལྟར་ཡང་འདིར་གཞུང་ནི། ཚིག་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །ཚིག་སྔ་བས་ཆོས་འདོན་ན་ལྟུང་བྱེད་དུ་འགྱུར་རོ། །ཡི་གེ་མཉམ་པས་ཆོས་འདོན་ན་ལྟུང་བྱེད་དུ་འགྱུར་རོ། །ཡི་གེ་སྔ་བས་ཚིག་འདོན་ན་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །དེ་ལྟ་བས་ན་ཡི་གེ་དང་མིང་དང་ཚིག་ལས་ལྷག་པའི་ཚིག་རྗོད་པར་བྱེད་པ་དེ་ཡང་འདིའི་ཁོངས་སུ་འདུས་
སོ། །འདོན་པ་ཞེས་བྱ་བ་ནི། ཀླག་པའི་ཕྱིར་བརྗོད་པ་ཡིན་པར་བསམས་ཏེ། ཁ་དོན་ཞུ་བ་ལ་སོགས་པ་དག་ལ་ལྟུང་བ་མེད་དོ་ཞེས་གསུངས་པའི་ཕྱིར་རོ། །མི་འདོད་བཞིན་དུ་གྲུབ་པ་ནི་མ་གཏོགས་སོ་ཞེས་བྱ་བ་ནི། ཅིག་ཅར་འདོན་པར་མི་འདོད་བཞིན་དུ་གཡམ་ལ་གྲུབ་པ་ནི་མ་གཏོགས་སོ། །འདི་སྐད་བསྟན་ཏེ། གལ་ཏེ་ཅིག་ཅར་འདོན་པར་མི་འདོད་བཞིན་དུ་བརྟད་པར་སྨྲ་བ་ཉིད་ཡིན་པའི་ཕྱིར། ཅིག་ཅར་བརྗོད་པར་གྱུར་ན་དེ་ལ་ནི་ལྟུང་བ་མེད་དོ། །དེ་ལྟར་ཡང་འདིར་གཞུང་ནི། ལྡང་ལྡིབ་ཅན་བརྟད་པར་སྨྲ་བར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །རྗེས་སུ་ཉན་དུ་གཞུག་པར་བྱ་བ་འདོན་པ་ཡང་ངོ་ཞེས་བྱ་བ་ནི་མ་གཏོགས་སོ་ཞེས་བྱ་བར་སྦྱར་རོ། །རྗེས་སུ་ཉན་དུ་གཞུག་པར་བྱ་བ་ཞེས་བྱ་བ་ནི། འདོན་པར་བྱེད་པའི་དགེ་སློང་གིས་གཞན་གང་རྗེས་སུ་ཉན་དུ་གཞུག་པར་བྱ་བ་སྟེ། ཁྱོད་ཀྱིས་ཁོ་བོ་དང་ལྷན་ཅིག་ཏུ་ཅིག་ཅར་རམ་སྔར་བརྗོད་པར་མི་བྱའོ་ཞེས་བསྒོ་བ་ལས་གལ་ཏེ་དེ་ལྟར་བྱའོ་ཞེས་ཟེར་བཞིན་དུ་འོན་ཀྱང་ཅིག་ཅར་འདོན་པར་བྱེད་ན་དེ་ལྟ་ན་ཡང་ལྟུང་བ་མེད་དོ། །ཁ་ཏོན་ཞུ་བ་དང་སློབ་གཉེར་གསོད་པ་དང༌། དམིགས་ཀྱིས་འདྲི་བ་ཡང་ངོ་ཞེས་བྱ་བ་ཡང་མ་གཏོགས་སོ་ཞེས་བྱ་བར་སྦྱར་རོ། །ཁ་ཏོན་ཞུ་བ་ཞེས་བྱ་བ་ནི། སྔར་བཏོན་པ་མི་བརྗེད་པར་བྱ་བའི་ཕྱིར་སྦྱོར་བའོ། །སློབ་གཉེར་གསོད་པ་ཞེས་བྱ་བ་ནི། བཏོན་པ་འདོན་དུ་འཇུག་པའི་མདུན་དུ་ཕྱིར་ཟློས་ཤིང་སྟོན་པའོ། །དམིགས་ཀྱིས་འདྲི་བ་ཞེས་བྱ་བ་ནི། སྐབས་སྐབས་སུ་བརྗོད་པའམ་ཐེ་ཚོམ་ཟ་བ་དྲན་པར་བྱ་བའི་ཕྱིར་རམ། ཐེ་ཚོམ་བཅད་པའི་ཕྱིར་གཞན་ལས་གསལ་བར་བྱེད་པའོ། །ཅིའི་ཕྱིར་གནས་སྐབས་དེ་དག་ལ་ལྟུང་བར་མི་འགྱུར་ཞེ་ན། འདི་ལྟར་དང་པོ་ལེན་པ་དང་འདོན་པའི་དུས་ན་རང་དབང་དུ་བརྗོད་པ་གང་ཡིན་པ་ནི་འདོན་དུ་འཇུག་པ་དེ་དང་ཆོས་ལ་ཡང་མ་གུས་པས་བསམ་པ་རྒུད་པར་གནས་པ་ཡིན་པས་དེའི་གནས་སྐབས་ལ་ལྟུང་བ་འདི་རྣམ་པར་གཞག་སྟེ། ལུང་དབོག་པ་ལ་མི་ལྟོས་པའི་ཕྱིར་རོ། །འདིར་གཞུང་ནི་ཞུ་བ་ཁ་ཅིག་ལས་དགེ་སློང་གིས་དགེ་སློང་མ་དང་ཚིག་རེ་རེ་ནས་ཆོས་འདོན་ན་ལྟུང་བ་ཅིར་འགྱུར་ཉེས་བྱས་སོ། །དགེ་སློང་མས་དགེ་སློང་དང་ཡང་དེ་བཞིན་ནོ་ཞེས་གསུངས་པ་ཡིན་ནོ། །གལ་ཏེ་དགེ་སློང་གིས་རྫོགས་པར་མ་བསྙེན་པ་ལས་ལྟུང་ནོད་པར་བྱེད་ན། རྫོགས་བར་མ་སྙེན་པ་དང་ཅིག་ཅར་རམ་མཇུག་ཐོགས་སུ་སྟོན་བྱེད་དུ་གྱུར་པའི་ཆོས་དང་ཡི་གེ་
འདོན་ན་དེ་ལ་ནི། གཉི་ག་ལ་ཡང་ཉེས་བྱས་སུ་འགྱུར་རོ། །འདོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བམ་པོ་ཉི་ཤུ་རྩ་གསུམ་པ། གནས་ངན་ལེན་བརྗོད་པའི་ལྟུང་བྱེད་སྨ་བར་འདོད་ནས་དངོས་པོ་ཁོ་ནར་དེ་དང་འབྲེལ་པ་ཅུང་ཞིག་བརྗོད་པར་བྱ་སྟེ། དགེ་སློང་དང་དགེ་སློང་མ་སྡིག་ཅན་དག་ཁྱིམ་དུ་སོ་སོར་གོ་བར་བྱེད་པ་བསྐོ་བར་བྱའོ་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་གིས་ཁྱིམ་དུ་སོ་སོར་གོ་བར་བྱེད་པ་བསྐོ་བར་བྱའོ་ཞེས་བྱ་བར་སྦྱར་རོ། །གང་དག་ཁྱིམ་དུ་སོ་སོར་གོ་བར་བྱེད་པ་ཞེ་ན། དགེ་སློང་དང་དགེ་སློང་མ་སྡིག་ཅན་དག་སྟེ། སྡིག་ཅན་ཞེས་བྱ་བ་ནི་ཚུལ་ཁྲིམས་འཆལ་བའོ། །དགེ་སློང་ཁྱིམ་དུ་སོ་སོར་གོ་བར་བྱེད་པས་ཁྱིམ་རྣམས་སུ་སོང་ནས་ཇི་སྐད་བརྗོད་པར་བྱ་ཞེ་ན། དེའི་ཕྱིར་ཁྱིམ་པ་རྣམས་སུ་སོ་སོར་གོ་བར་བྱེད་པས་ཚེ་དང་ལྡན་པ་དག་ཁྱོད་ཉོན་ཅིག །ཁྱིམ་རྣམས་སུ་ཁྱིམ་སུན་པར་བྱེད་པ་དང༌། གནས་རྣམས་སུ་གནས་སུན་པར་བྱེད་པ་འདི་ལྟ་སྟེ། དཔེར་ན་འབྲས་སཱ་ལུའི་ཞིང་ཕུན་སུམ་ཚོགས་པ་ལ་སེར་བ་འཁོར་ལོ་མི་བཟད་པ་བབ་ན་འདི་ལྟར་འབྲས་སཱ་ལུ་དེ་ཉིད་ཤིན་ཏེ་མ་དང་ཆུད་ཟ་བ་དང༌། ཚུལ་མ་ཡིན་པས་མ་རུང་བར་འགྱུར་བ་དང༌། བུར་མ་ཤིང་གི་ཞིང་ཕུན་སུམ་ཚོགས་པ་ལ་ནད་ཀྱི་རིགས་དམར་པོ་ཞེས་བྱ་བ་བྱུང་ན་འདི་ལྟར་བུ་རམ་ཤིང་དེ་ཉིད་ཤིན་ཏེ་མ་དང༌། ཆུད་ཟ་བ་དང༌། ཚུལ་མ་ཡིན་པས་མ་རུང་བར་འགྱུར་བ་ལྟ་བུ་དག་ཡོད་ཀྱི། ཚེ་དང་ལྡན་པ་ཁྱེད་ཅག་དགེ་སློང་འདི་དང་དགེ་སློང་མ་འདིས་བསྟན་པའི་ཚོད་མ་འཛིན་ཅིག །འདི་ལྟར་དགེ་སློང་འདི་དང་དགེ་སློང་མ་འདི་ནི་ཡོས་ཚིག་པ་བཞིན་དུ་ཆོས་འདུལ་བ་འདི་ལ་སྐྱེར་མི་རུང་བའི་ཆོས་ཅན་ཡིན་གྱིས་བཅོམ་ལྡན་འདས་དང་དགེ་སློང་གནས་བརྟན་གནས་བརྟན་རྣམས་ལ་ལྟོས་ཤིག་ཅེས་སྨྲ་བར་བྱའོ་ཞེས་བྱ་བ་སྨྲས་ཏེ། སེར་བ་འཁོར་ལོ་མི་བཟད་པ་ཞེས་བྱ་བ་ནི། འཁོར་ལོ་ལྟར་མི་བཟད་པ་སྟེ། ཤིན་ཏུ་མཐུ་ཆེར་འབབ་ཅིང་འབབ་པ་བཟོད་པར་དཀའ་བ་ཡིན་ནོ། །སེར་བའི་བྱེ་བྲག་ནི་གནམ་ལུགས་ལ་སོགས་པ་འབབ་པ་དང་བཅས་པ་དེ་ཡང་ཡིན་ནོ། །ནད་ཀྱི་རིགས་དམར་པོ་ཞེས་བྱ་བ་ནི། ར་རི་དམར་པོའི་རྣམ་པ་འབྱུང་བ་ལ་བྱའོ། །ཤིན་ཏེ་མ་ཞེས་བྱ་བ་ནི། མཐུ་ཆུང་བར་བྱེད་པའོ། །ཆུད་ཟ་བཞེས་བྱ་བ་ནི་སྐམ་པའོ། །ཚུལ་མ་ཡིན་པས་མ་རུང་བར་འགྱུར་བ་
ཞེས་བྱ་བ་ལ་ཚུལ་མ་ཡིན་པས་ཞེས་བྱ་བ་ནི། རིགས་པ་མ་ཡིན་པ་སྟེ། དུས་མ་ཡིན་པའོ། །མ་རུང་བར་འགྱུར་བ་ཞེས་བྱ་བ་ནི། ཆག་གྲུགས་ལ་སོགས་པ་བྱེད་པ་སྟེ། མི་མཁོ་བར་བྱེད་ཅེས་བྱ་བའི་ཐ་ཚིག་གོ །ཡོས་ཚིག་པ་བཞིན་དུ་ཞེས་བྱ་བ་ནི། གང་གི་ཚེ་འབྲས་སཱ་ལུ་འབྲས་ཡེས་ཀྱི་གནས་སྐབས་སུ་གྱུར་པ་དེའི་ཚེ་ན་ཡོས་ཞེས་བྱའོ། །སྐྱེར་མི་རུང་བའི་ཆོས་ཅན་ཞེས་བྱ་བ་ནི། མྱུ་གུ་བསྐྱེད་པའི་མཐུ་མེད་པའི་ཕྱིར་རོ། །མི་སྤྲོ་ན་གསོལ་བ་བྱའོ་ཞེས་བྱ་བ་ནི། གལ་ཏེ་དགེ་སློང་ཁྱིམ་དུ་སོ་སོར་གོ་བར་བྱེད་པའི་ཁྱིམ་རྣམས་སུ་སོ་སོར་གོ་བར་བྱེད་པར་མི་སྤྲོ་ན་དེའི་ཚེ་དགེ་སློང་ཐམས་ཅད་ཀྱིས་དགེ་སློང་དང་དགེ་སློང་མ་འདི་གཉིས་སྡིག་ཅན་ཡིན་ནོ་ཞེས་ཁྱིམ་དུ་སོ་སོར་གོ་བར་བྱ་བའི་གསོལ་བ་བྱའོ། །ཤེས་གཙོ་བོ་ཞེས་བྱ་བ་ནི། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །ཡུལ་གང་ལ་ཞེ་ན། དེའི་ཕྱིར་ཉན་པ་པོ་མི་ཤེས་པ་ཉིད་དང་བསྙེན་པར་མ་རྫོགས་པ་ཉིད་དག་དང་ལྡན་པའོ་ཞེས་བྱ་བ་སྨྲས་ཏེ། ཉན་པ་པོ་མི་ཤེས་པ་ཉིད་དང༌། བསྙེན་པར་མ་རྫོགས་པ་ཉིད་དག་དང་ལྡན་པའི་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། ལྟུང་བ་འབྱིན་པར་བྱེད་པའི་དགེ་སློང་གང་གིས་ཉན་པ་པོ་ཕམ་པར་འགྱུར་བ་དང༌། དགེ་འདུན་ལྷག་མ་ཞེས་བྱ་བའི་ལྟུང་བ་མི་ཤེས་པ་ཉིད་དང༌། བསྙེན་པར་མ་རྫོགས་པ་ཉིད་ཡིན་པར་ཤེས་ན་ཉན་པ་པོའི་ཡུལ་དེ་གཉིས་ལ་ལྟུང་བ་འབྱིན་པར་བྱེད་པའི་དགེ་སློང་གི་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་རྗེས་སུ་སྒྲུབ་ན་གནས་ངན་ལེན་བརྗོད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་སྨྲས་ནའོ་ཞེས་བྱ་བ་སྨྲས་ཏེ། ཚིག་ཏུ་སྨྲ་ནའོ། །བརྗོད་པར་བྱ་བ་ཅི་ཞིག་སྨྲས་ན་ཞེ་ན། དེའི་ཕྱིར་ཕམ་པར་འགྱུར་བ་དང་དགེ་འདུན་ལྷག་མ་དག་སོ་སོར་ཡང་རུང༌། བསྡུས་པ་ཡང་རུང་ངོ་ཞེས་བྱ་བ་སྨྲས་ཏེ། གནས་ངན་ལེན་བརྗོད་པར་བྱ་བ་ཕམ་པར་འགྱུར་བ་དང༌། དགེ་འདུན་ལྷག་མ་དག་སོ་སོ་ཞེས་བྱ་བ་ཐ་དད་པ་དག་ཀྱང་རུང་བསྡུས་པ་ཞེས་བྱ་བ་བསྡུས་པའི་རང་བཞིན་ཡང་རུང་བའོ། །འོ་ན་གང་གི་ཚེ་དེ་གཉིས་བསྡུས་པ་དག་སྨྲས་པ་དེའི་ཚེ་ཅི་ལྟུང་བ་གཅིག་ཏུ་འགྱུར་རམ། འོན་ཏེ་དུ་མར་འགྱུར་ཞེ་ན། དེའི་ཕྱིར་དོན་དུ་མ་ཉིད་ལ་ཚིག་ཐ་དད་པ་མེད་དོ་ཞེས་བྱ་བ་སྨྲས་ཏེ། དོན་དུ་མ་ཉད་ལ་ཚིག་ཐ་དད་
པ་མེད་པས་དེའི་ཕྱིར་ཚིག་གཅིག་ལ་དོན་དུ་མ་ཡོད་ཀྱང་དོན་དུ་མ་བརྗོད་པར་འདོད་པ་ལ་ཚིག་ཐ་དད་པར་མི་འགྱུར་བས་ལྟུང་བ་གཅིག་ཏུ་འགྱུར་རོ། །འདི་སྐད་བསྟན་ཏེ། ཚིག་གཅིག་ཡིན་པའི་ཕྱིར་ལྟུང་བ་བསྡུས་པ་དེ་གཉིས་ལ་ཇི་ལྟར་ལྟུང་བྱེད་གཅིག་ཏུ་འགྱུར་ཞེ་ན། འདི་ལྟ་སྟེ་དཔེར་ན། དགེ་སློང་གང་ལ་ལ་ཞིག་གིས་བརྫུན་གྱི་ཚིག་འདི་སྐད་ཅེས་འདིས་དུད་འགྲོའི་སྐྱེ་གནས་སུ་གཏོགས་པའི་སྲོག་ཆགས་ལྔ་བསད་དོ་ཞེས་སྨྲ་ན་ཚིག་གཅིག་ཡིན་པའི་ཕྱིར་བརྫུན་དུ་སྨྲ་བའི་ལྟུང་བྱེད་གཅིག་ཏུ་འགྱུར་བ་བཞིན་ནོ། །འདི་གཉིས་ལས་གཞན་པའི་ཁ་ན་མ་ཐོ་བ་བརྗོད་པ་ནི་འདིའི་རྗེས་སུ་འབྲང་བ་ཉེས་བྱས་ཡིན་པར་རིག་པར་བྱའོ། །རྗོད་པར་བྱེད་པ་ཇི་ལྟ་བུ་ལ་ལྟུང་བ་འདི་འབྱུང་ཞེ་ན། དེའི་ཕྱིར་བསྐོ་བ་བྱས་པ་ལའོ་ཞེས་བྱ་བ་སྨྲས་ཏེ། བརྗོད་པའི་ཕྱིར་གང་ལ་དགེ་འདུན་གྱིས་བསྐོ་བ་མ་བྱས་པ་དེ་ནི་བསྐོ་བ་མ་བྱས་པ་སྟེ། རྗོད་པར་བྱེད་པ་བསྐོ་བ་མ་བྱས་པ་དེ་ལའོ། །ཅི་གནས་སྐབས་ཐམས་ཅད་ལའམ་ཞེ་ན། དེའི་ཕྱིར་དགེ་འདུན་ལ་མ་གསོལ་པ་ལའོ་ཞེས་བྱ་བ་སྨྲས་ཏེ། གལ་ཏེ་དགེ་འདུན་ལ་མ་གསོལ་བ་ལ་སྟེ། གསོལ་བ་ཞེས་བྱ་བ་གོ་བར་བྱ་བ་བྱས་པ་ལའོ། །དགེ་འདུན་ལ་བརྗོད་པར་བྱ་བའི་ཕྱིར་གསོལ་བ་ལ་ནི་བརྗོད་ཀྱང་ལྟུང་བ་མེད་དོ། །བདེན་པར་སྨྲ་བ་ལ་ཁ་ན་མ་ཐོ་བ་འདིར་འགྱུར་གྱི། བརྫུན་དུ་སྨྲས་ན་ནི་ལྟུང་བ་གཞན་སྨྲས་པ་ཡང་ཡིན་ནོ། །བསྙེན་པར་རྫོགས་པའི་གནས་ངན་ལེན་བརྗོད་པར་བྱས་ན་ཁ་ན་མ་ཐོ་བ་འདིར་འགྱུར་གྱི། བསྙེན་པར་མ་རྫོགས་པའི་ནི་ན་སྨད་པ་ཉིད་དོ། །གནས་ངན་ལེན་བརྗོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།མིའི་ཆོས་བླ་མ་བརྗོད་པའི་ལྟུང་བྱེད་སྨྲ་བར་འདོད་ནས་དེའི་ཕྱིར་བདེན་པ་ཉིད་ནའོ་ཞེས་བྱ་བ་སྨྲས་ཏེ། སྨྲ་བའི་ཕམ་པར་འགྱུར་བའི་རྣམ་པ་བསྟན་པ་གང་ཡིན་པ་དེ་ཉིད་འདིར་ཡང་སྦྱར་བར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། བདག་ཉིད་ཀྱི་ཡུལ་ལ་མིའི་ཆོས་བླ་མ་དང་ལྡན་པར་སྨྲས་ན་གལ་ཏེ་བདེན་པ་ཉིད་ཡིན་ན་དེའི་ཚེ་ཁ་ན་མ་ཐོ་བ་འདིར་འགྱུར་རོ། །དེའི་ཚེ་འདུ་ཤེས་མ་བསྒྱུར་བར་བདག་ཉིད་མིའི་ཆོས་བླ་མ་ཡོད་པ་དང་ལྡན་པར་སྨྲས་ན་མིའི་ཆོས་བླ་མ་བརྗོད་པའི་ལྟུང་བྱེད་དུ་འགྱུར་ཞེས་བྱ་བའི་ཐ་ཚིག་གོ །གང་ཟག་ཅི་འདྲ་བ་ལ་བརྗོད་ན་ཞེ་ན། དེའི་ཕྱིར་བདེན་པ་མ་མཐོང་བ་བསྙེན་པར་མ་
རྫོགས་པ་ལའོ་ཞེས་བྱ་བ་སྨྲས་ཏེ། གང་གིས་བདེན་པ་མ་མཐོང་བ་དེ་ནི་བདེན་པ་མ་མཐོང་བ་སྟེ། བདེན་པ་མ་མཐོང་བའི་གང་ཟག་བསྙེན་པར་མ་རྫོགས་པ་དེ་ལ་བརྗོད་ནའོ། །འདིར་གཞུང་ནི་ཞུ་བ་ཁ་ཅིག་ལས་བདེན་པ་མཐོང་བ་ལྟ་བ་ཕུན་སུམ་ཚོགས་པ་ལ་བརྗོད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །ཁྱིམ་པའི་མདུན་དུ་རྫུ་འཕྲུལ་རྣམ་པར་བསྟན་པར་མི་བྱའོ་ཞེས་བྱ་བ་ནི། ཁྱིམ་པའི་མདུན་དུ་རྫུ་འཕྲུལ་རྣམ་པར་བསྟན་པར་མི་བྱ་བའོ། །འདུལ་བའི་དོན་ཉིད་དུ་ན་ནི་ལྟུང་བ་མེད་དེ། སྟེང་རྒྱས་འོད་སྲུངས་ལ་རྫུ་འཕྲུལ་རྣམ་པར་བསྟན་པར་བཀའ་སྩལ་བའི་བྱུང་བའི་མཐའ་དག་ལས་ཁོང་དུ་ཆུད་པར་བྱའོ། །དགེ་སློང་མས་སྟོན་པའི་སྤྱན་སྔར་མི་བྱའོ་ཞེས་བྱ་བ་ནི། དགེ་སློང་མས་སྟོན་པ་སངས་རྒྱས་བཅོམ་ལྡན་འདས་ཀྱི་སྤྱན་སྔར་རྫུ་འཕྲུལ་རྣམ་པར་བསྟན་པར་མི་བྱའོ། །རྣམ་པ་འདི་གཉིས་ནི་ཕྲན་ཚེགས་དག་ལས་འབྱུང་ངོ༌། །མིའི་ཆོས་བླ་མ་བརྗོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྐུར་པ་འདེབས་པའི་ལྟུང་བྱིད་སྨྲ་བར་འདོད་ནས། ཇེ་དང་པོ་ཁོ་ནར་འདུལ་བ་ཐམས་ཅད་ལ་ཉེ་བར་སྦྱར་བའི་དགོས་པ་བརྗོད་པར་བྱ་སྟེ། གལ་ཏེ་བརྟན་པ་ཉིད་དུ་དགོས་ན་གསོལ་བ་སྔར་བཏང་བའི་དོན་བྱའོ་ཞེས་བྱ་བ་ནི། གལ་ཏེ་འདུལ་བར་གཏོགས་པའི་བྱ་བ་བརྟན་པ་ཉིད་དུ་དགོས་པ་ཡོད་ན་དེའི་ཚེ་གསོལ་བ་སྔོན་དུ་བཏང་བའི་དོན་གྱི་ལས་བྱའོ། །འདི་སྐད་བསྟན་ཏེ། གལ་ཏེ་གནས་མ་ལ་སྟོབས་པ་ལ་སོགས་པ་བསྐོ་བར་བརྟན་ཅིང་མི་འགྱུར་བ་ཉིད་དུ་འདོད་ན་གསོལ་བ་སྔོན་དུ་གཏང་བར་བྱ་ཞིང་གསོལ་བ་བྱས་ནས་བསྐོ་བར་བྱའོ། །འདིས་ནི་མི་གཡོ་བར་འགྱུར་རོ་ཞེས་གསུངས་པ་དེ་བསྡུས་པ་ཡིན་ནོ། །གང་ལ་སྐུར་པ་འདེབས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དད་པ་ཕུལ་བ་ལའོ་ཞེས་བྱ་བ་སྨྲས་ཏེ། གང་གིས་བློ་མཐུན་པར་བྱས་པ་དེ་ནི་དད་པ་ཕུལ་བ་སྟེ། དེ་ལའོ། །འདིར་གཞུང་ནི་སྔར་མཐུན་ཏེ་རུང་བར་བྱས་ནས་ཞེས་གསུངས་པ་ཡིན་ཏེ། དེའི་རྣམ་པར་འབྱེད་པ་ནི་དད་པ་ཕུལ་ནས་ཞེས་གསུངས་པ་ཡིན་ནོ། །ཅི་ཞིག་བྱས་ན་སྐུར་པ་འདེབས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་གི་དགེ་འདུན་གྱི་ཟས་ཀྱི་རྙེད་པ་མ་ཡིན་པ་དགེ་སློང་གིས་གང་ཟག་ལ་ལོག་པར་བསྔོས་པ་ཡང་དག་པ་མ་ཡིན་པའི་དོན་ཉིད་གཞན་ལ་ཡང་
མིང་མ་སྨོས་པར་བརྗོད་ན་ཡང་ངོ་ཞེས་བྱ་བ་སྨྲས་ཏེ། དགེ་སློང་གི་དགེ་འདུན་གྱི་ཞེས་བྱ་བ་ནི། དགེ་སློང་གི་དགེ་འདུན་གྱིས་མངའ་བའི་རྙེད་པའོ། །ཟས་ཀྱི་རྙེད་པ་མ་ཡིན་པ་ཞེས་བྱ་བ་ནི། ཟས་ཀྱི་རྙེད་པ་ལས་གཞན་པ་གོས་ཀྱི་རྙེད་པའོ། །དགེ་སློང་གིས་ཞེས་བྱ་བ་ནི། གང་ལ་སྐུར་པ་གདབ་པར་བྱ་བའི་དགེ་སློང་གིས་སོ། །གང་ཟག་ལ་ཞེས་བྱ་བ་ནི། སྤྱིར་བསྟན་པའི་ཚིག་ཡིན་པས་མིའི་འགྲོ་པར་གཏོགས་པ་རབ་ཏུ་བྱུང་བའམ་ཁྱིམ་ན་གནས་པ་ལའོ། །ལོག་པར་བསྔོས་པ་ཞེས་བྱ་བ་ནི། མི་རིགས་པར་བསྔོས་པའོ། །ཡང་དག་པར་མ་ཡིན་པའི་དོན་ཉིད་ཅེས་བྱ་བ་ནི། དེ་ཡང་དག་པ་མ་ཡིན་པ་ཡང་ཡིན་ལ། དོན་ཀྱང་ཡིན་པས་ཡང་དག་པ་མ་ཡིན་པའི་དོན་ཏོ། །དེའི་དངོས་པོ་ནི་དེ་ཉིད་དེ་བརྫུན་གྱི་དོན་ཉིད་ཅེས་བྱ་བའི་ཐ་ཚིག་གོ །གཞན་ལ་ཡང་ཞེས་བྱ་བ་ནི། སྐུར་པ་གདབ་པར་བྱ་བ་འབའ་ཞིག་ཏུ་མ་ཟད་ཀྱི། ཉན་པ་པོ་གཞན་ལ་ཡང་ངོ༌། །མིང་མ་སྨོས་པར་ཞེས་བྱ་བ་ནི། མིང་ནས་སྨོས་པ་འབའ་ཞིག་གིས་མ་ཡིན་གྱི། མིང་མ་སྨོས་པར་ཡང་ངོ༌། །བརྗོད་ན་ཡང་ངོ་ཞེས་བྱ་བ་ནི་རྣམ་པ་དེ་ལྟ་བུ་བརྗོད་ན་ཡང་སྐུར་པ་འདེབས་པའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །ཟས་ཀྱི་རྙེད་པ་ལ་ནི་ཉེས་བྱས་ཏེ། རྣམ་པར་འབྱེད་པ་ལས་ཟས་ཀྱི་རྙེད་པ་མ་སྨོས་པའི་ཕྱིར་རོ། །འདི་ལྟར་དེ་ཉིད་ལས་རྙེད་པ་ཞེས་བྱ་བ་ནི་རྙེད་པ་གཉིས་ཏེ། གོས་ཀྱི་རྙེད་པ་དང༌། ཟས་ཀྱི་རྙེད་པའོ། །དོན་འདིར་ནི་གོས་ཀྱི་རྙེད་པ་ཡིན་པར་དགོངས་སོ་ཞེས་གསུངས་པས། འདིར་ཟས་ཀྱི་རྙེད་པ་མ་ཡིན་པ་ཞེས་སྨོས་སོ། །གང་ཟག་ལ་ཞེས་བྱ་བའི་ཚིག་ནི་གང་ཟག་ལ་བདག་གིས་བསྔོས་སོ་ཞེས་བྱ་བའི་ཚིག་དེ་བསལ་བའི་ཕྱིར་ཏེ། འདི་ལྟར་བཤེས་ངོར་བྱས་ཏེ་ཞེས་གསུངས་པའི་ཕྱིར་རོ། །ཞུ་བ་ལས་ཀྱང་བཅོམ་ལྡན་འདས་ཀྱིས་ཡང་དགེ་སློང་གང་འདི་སྐད་ཅེས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ། དགེ་འདུན་གྱི་རྙེད་པར་བསྔོས་པ་གང་ཟག་ལ་སྔོ་བར་བྱེད་དོ་ཞེས་ཟེར་ན་ཞེས་གསུངས་ཏེ། བཤེས་ངོར་བྱས་ཏེ་ཞེས་གསུངས་པ་ལས་ནི་བདག་ཉིད་ཅེས་བྱ་བའི་ཚིག་ཏུ་བརྗོད་པར་མི་བྱའོ། །སོ་སོར་ཐར་པའི་མདོ་ལས་ཚེ་དང་ལྡན་པ་དག་གིས་འདི་ལྟར་བཤེས་ངོར་བྱས་ཏེ། འདི་ལྟར་དགེ་འདུན་གྱི་རྙེད་
པར་བསྔོས་པ་བདག་གིས་གང་ཟག་ལ་བསྔོས་སོ་ཞེས་དེ་སྐད་ཟེར་ན་ལྟུང་བྱེད་དོ་ཞེས་མང་པོའི་ཚིག་ཏུ་བྱས་པ་གང་ཡིན་པ་དེ་ནི་གཙོ་བོ་མ་ཡིན་ཏེ། འདི་ལྟར་གཅིག་ལ་བརྗོད་ན་ཡང་ལྟུང་བྱེད་དུ་འགྱུར་བ་ཁོ་ན་ཡིན་ནོ། །དགེ་སློང་མང་པོ་དག་ལ་མཉམ་དུ་བརྗོད་ན་ཡང་དགེ་སློང་ཇི་སྙེད་ལ་སྐུར་བ་འདེབས་པར་བྱེད་པ་དེ་རྙེད་ཀྱི་ལྟུང་བར་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་གིས་དང་པ་བྱིན་ནས་དགེ་སློང་ལ་སྐུར་པ་འདེབས་པར་བྱེད་དེ། དགེ་སློང་འདིས་དགེ་འདུན་གྱི་རྙེད་པར་བསྔོས་པ་ཟས་ཀྱི་རྙེད་པ་མ་གཏོགས་པའི་རྙེད་པ་གཞན་མི་རིགས་པར་འདི་ལྟར་བཤེས་ངོར་བྱས་ཏེ། གང་ཟག་ལ་བསྔོས་སོ་ཞེས་དེ་ཉིད་དམ་གཞན་གྱི་མདུན་དུ་མིང་ནས་སྨོས་ཀྱང་རུང་མིང་ནས་མ་སྨོས་ཀྱང་རུང་སྟེ། བརྫུན་དུ་དེ་སྐད་སྨྲས་ན་དེ་ལ་སྐུར་པ་འདེབས་པའི་ལྟུང་བྱེད་དུ་འགྱུར་རོ། །གང་ཟག་ལ་ཞེས་སྨོས་པ་ལས་ན་དགེ་འདུན་གཞན་ལ་ནི་ཉེས་བྱས་སོ། །དགེ་འདུན་གྱི་རྙེད་པ་ཞེས་སྨོས་པ་ལས་ན་གང་ཟག་གི་རྙེད་པ་གཞན་ལ་བསྔོས་ཞེས་བརྗོད་ན་ཡང་ཉེས་བྱས་ཁོ་ནའོ། །སྐུར་པ་འདེབས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཁྱད་དུ་གསོད་པའི་ལྟུང་བྱེད་སྨྲ་བར་འདོད་ནས། འདུལ་བ་དང་ལྡན་པ་ཉིད་དོ་ཞེས་བྱ་བ་སྨྲས་ཏེ། སོ་སོར་ཐར་པ་དང་དེ་རྣམ་པར་འབྱེད་པ་ལ་སོགས་པར་གཏོགས་པའི་ཚིག་གང་ཡིན་པའི་ཚིག་དེ་ལ་བརྙས་ཐབས་སུ་གྱུར་པ་བརྗོད་ན་ཁྱད་དུ་གསོད་པའི་ལྟུང་བྱེད་དུ་འགྱུར་རོ། །འདིར་བརྙས་ཐབས་ཀྱི་བྱེ་བྲག་ལས་ལྟུང་བའི་བྱེ་བྲག་ཏུ་ཤེས་པར་བྱའི། འདོན་པའི་བྱེ་བྲག་ལས་ནི་མ་ཡིན་ཏེ། འདི་ལྟར་བརྙས་ཐབས་སུ་གྱུར་པའི་ཚིག་ཇི་སྙེད་པ་དེ་སྙེད་ཁོ་ནའི་ལྟུང་བར་འགྱུར་བས། དེའི་ཕྱིར་ཚིག་གི་བྱེ་བྲག་གཞན་ལས་ལྟུང་བའི་བྱེ་བྲག་ཏུ་ཤེས་པར་བྱའི། འདོན་པའི་བྱེ་བྲག་ལས་ནི་མ་ཡིན་ནོ། །འོ་ན་སོ་སོར་ཐར་པའི་མདོ་ལས་ཡང་དགེ་སློང་གང་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་འདོན་པ་ན་བསླབ་པ་ཁྱད་དུ་བསད་ནས་ཞེས་གསུངས་པ་དེས་འདུལ་བ་མཐའ་དག་ཏུ་གཏོགས་པའི་བསླབ་པའི་གཞི་ལ་བརྙས་ཐབས་བྱེད་པའི་ཁ་ན་མ་ཐོ་བ་འདི་ཇི་ལྟར་རྣམ་པར་གཞག་པར་བྱ་ཞེ་ན། སོ་སོར་ཐར་པའི་མདོ་ལས་གསུངས་པ་ནི་འདུ་ལ་བ་ལྷག་མ་རྣམས་ཀྱི་དཔེ་ཙམ་དུ་ཟད་དེ། དགེ་འདུན་གྱི་
འདུལ་བ་དང་ལྡན་པ་གང་ཅི་ཙམ་བརྗོད་པ་ལ་བརྙས་ཐབས་སུ་བྱེད་ན་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་གསུངས་པའི་ཕྱིར་རོ། །མདོ་སྡེ་ལ་ནི་ཉེས་བྱས་སོ་ཞེས་བྱ་བ་ནི། འདུལ་བ་དང་ལྡན་པ་དུས་མ་ཡིན་པའི་ཟས་དང༌། འབྲུ་རློན་པ་ལེན་པ་ལ་སོགས་པ་ལས་གཞན་པ་མདོ་སྡེར་གཏོགས་པའི་བརྗོད་པ་གཞན་ལ་ཁྱད་དུ་གསོད་ན་ཉེས་བྱས་སོ། །ཆོས་མངོན་པ་ནི་འདུལ་བ་དང་མདོ་སྡེ་དག་ལས་ཐ་དད་པ་མ་ཡིན་ཏེ། འདི་ལྟར་དགེ་སློང་གིས་སྡོམ་པ་ལ་སོགས་པ་འདུལ་བ་ལས་གསུངས་པ་ཡང་དེར་རྣམ་པར་དཔྱོད་པར་བྱེད་པ་ལ་མདོ་སྡེའི་དོན་དང༌། མདོ་སྡེའི་གདར་ལྟ་བུ་དང༌། མདོ་སྡེ་རྣམ་པར་འཆད་པ་ཡང་ཆོས་མངོན་པ་ཡིན་པའི་ཕྱིར་རོ། །ཁྱད་དུ་གསོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ས་བོན་དང་སྐྱེ་བ་འཇིག་པའི་ལྟུང་བྱེད་སྨྲ་བར་འདོད་ནས་དེ་བྱ་བའི་ཚུལ་བསྟན་པའི་ཕྱིར། ལག་གི་བླས་མཆོད་རྟེན་དང་དགེ་འདུན་གྱི་དོན་དུ་ཤིང་ལྗོན་པ་གཅད་པར་བྱའོ་ཞེས་བྱ་བ་སྨྲས་ཏེ། དགེ་སློང་གང་ལས་སར་པ་དག་བྱེད་པའི་ངང་ཚུལ་ཅན་དེ་ནི་ལག་གི་བླ་ཞེས་བྱའོ། །མཆོད་རྟེན་གྱི་ཕྱིར་ཞེས་བྱ་བ་ནི་མཆོག་རྟེན་གྱི་རྒྱུར་རོ། །མཆོད་རྟེན་སྨོས་པས་ཆོས་དཀོན་མཆོག་སྨོས་པ་ཡིན་ཏེ། མཆོད་རྟེན་ནི་ཆོས་ཀྱི་སྐུ་ཡིན་པའི་ཕྱིར་རོ། །དགེ་འདུན་གྱི་ཕྱིར་ཞེས་བྱ་བ་ནི། དགེ་འདུན་གྱི་ཡོ་བྱད་ཀྱི་ཕྱིར་རོ། །གཅད་པའི་ཕྱིར་སྟ་གོན་བྱ་བ་སྨྲ་བར་འདོད་ནས། དེའི་མདུན་རོལ་དུ་ཉི་མ་བདུན་ནམ་བརྒྱད་ནས་དེའི་དྲུང་དུ་དཀྱིལ་འཁོར་དང་དྲི་དང་མེ་ཏོག་དང༌། བདུག་པ་དང་མར་མེ་དང་གཏོར་མ་སྦྱིན་པ་དང༌། རྒྱུད་ཆགས་གསུམ་པ་གདོན་པ་དང༌། སྦྱིན་པ་བཤད་པར་བྱས་ནས་ལྷ་གང་དག་ཤིང་ལྗོན་པ་འདི་ལ་གནས་པ་དེ་དག་གནས་གཞན་ཚོལ་ཅིག །ཤིང་ལྗོན་པ་འདིས་མཆོད་རྟེན་ནམ་དགེ་འདུན་གྱི་བྱ་བ་བྱེད་པར་འགྱུར་རོ་ཞེས་བརྗོད་ནས་སྨྲ་བ་པོས་ཤེས་པར་གྱིས་ཤིག་ཅེས་སོ་ཞེས་བྱ་བ་སྨྲས་ཏེ། དེའི་མདུན་རོལ་དུ་ཞེས་བྱ་བ་ནི། གཅད་པ་དེའི་མདུན་རོལ་དུའོ། །ཉི་མ་བདུན་ནམ་བརྒྱད་ནས་ཞེས་བྱ་བ་ནི། ཉི་མ་བདུན་ནམ་ཉི་མ་བརྒྱད་ཀྱི་མདུན་རོལ་ནས་སོ། །དེའི་དྲུང་དུ་ཞེས་བྱ་བ་ནི། ཤིང་ལྗོན་པ་དེའི་དྲུང་དུའོ། །ལག་གི་བླས་ཤིང་ལྗོན་པའི་ལྷའི་ཕྱིར་དཀྱིལ་འཁོར་བྱས་ཏེ། དྲི་ལ་སོགས་པ་སྦྱིན་པ་ནས་སྦྱིན་པ་
བཤད་པའི་བར་དག་བྱས་ནས་འདི་སྐད་བརྗོད་པར་བྱ་སྟེ། ལྷ་གང་དག་ཤིང་ལྗོན་པ་འདི་ལ་གནས་པ་དེ་དག་གནས་གཞན་ཚོལ་ཅིག་ཅེས་བྱ་བ་ལ་སོགས་པ་བརྗོད་ནས་སོ། །མཆོད་རྟེན་ནམ་དགེ་འདུན་གྱི་ཞེས་བྱ་བ་ནི། དེ་གཉིས་ཀྱི་དོན་གྱི་ཆེད་ཉིད་དུ་བྱ་བ་བྱེད་པར་འགྱུར་རོ་ཞེས་བརྗོད་ནས་གཅོད་དུ་གཞུག་པར་བྱ་བའོ། །ཇི་ལྟར་གཅོད་དུ་གཞུག་པར་བྱ་ཞེ་ན། དེའི་ཕྱིར་དགེ་སློང་ལག་གི་བླ་སྨྲ་བ་པོས་རང་གི་ལག་དར་ཏེ་མི་གཅད་པར་ཁྱིམ་པ་ཤིང་མཁན་ལ་སོགས་པ་དག་ལ་ཤེས་པར་གྱིས་ཤིག་ཅེས་ཟུར་གྱིས་བསྒོ་སྟེ། གཅོད་དུ་གཞུག་པར་བྱའོ། །གལ་ཏེ་མེ་འབྱུང་བའམ་ཁྲག་འཛག་པ་འམ། ཡན་ལག་འགུལ་བའམ། ལོ་མ་ལྷགས་པ་ལ་སོགས་པ་རྣམ་པར་འགྱུར་བ་སྟོན་ན་དེས་ཞིང་ལ་སྦྱིན་པ་དང༌། སེར་སྣ་དག་གི་བསྔགས་པ་དང་བསྔགས་པ་མ་ཡིན་པ་བརྗོད་པར་བྱའོ་ཞེས་བྱ་བ་ནི། དེ་ལྟར་ཤིང་ལྗོན་པ་དེ་གཅོད་དུ་བཅུག་པ་ན། གལ་ཏེ་མེ་འབྱུང་བ་ལ་སོགས་པ་རྣམ་པར་འགྱུར་བ་སྟོན་ན་དེའི་ཚེ་ལག་གི་བླ་དེས་ཞེས་བྱ་བ་ལ་སོགས་པ་བྱའོ། །ཞིང་ལ་ཞེས་བྱ་བ་ནི། བསོད་ནམས་ཀྱི་ཞིང་མཆོད་རྟེན་དང་དགེ་འདུན་ལའོ། །དེ་ལ་སྦྱིན་པ་དང་སེར་སྣ་དག་བྱེད་པ་ནི། དེ་དག་ཉིད་དེ་སྦྱིན་པའི་བསྔགས་པ་དང༌། སེར་སྣའི་བསྔགས་པ་མ་ཡིན་པ་བརྗོད་པར་བྱའོ། །འདི་སྐད་བསྟན་ཏེ། སངས་རྒྱས་དང་ཆོས་དང་དགེ་འདུན་གྱི་བདག་ཉིད་ཀྱི་ཞིང་ལ་སྦྱིན་པའི་བསྔགས་པ་བརྗོད་པར་བྱ་ཞིང༌། སེར་སྣའི་བསྔགས་པ་མ་ཡིན་པ་ཡང་བརྗོད་པར་བྱའོ། །མི་གཏོང་ན་གཅད་པར་མི་བྱའོ་ཞེས་བྱ་བ་ནི། དེ་ལྟར་བྱས་ཀྱང་མེ་འབྱུང་བ་ལ་སོགས་པའི་རྣམ་པར་འགྱུར་བ་མི་གཏོང་ན་ཤིང་ལྗོན་པ་དེ་གཅད་པར་མི་བྱ་སྟེ། ཤིང་ལྗོན་པ་མི་གཅད་དོ་ཞེས་བྱ་བའི་ཐ་ཚིག་གོ །ཤེས་གཙོ་བོ་ཞེས་བྱ་བ་ནི། འདིར་ཡང་ཤེས་གཙོ་བོའོ་ཞེས་བྱ་བའི་མིང་དང༌། འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་བྱེད་པ་པོ་ཉིད་ཡིན་ཞེ་ན། དེའི་ཕྱིར་མ་ཉམས་པ་ཉིད་ལའོ་ཞེས་བྱ་བ་སྨྲས་ཏེ། གལ་ཏེ་མ་ཉམས་པ་ཉིད་ཀྱི་ཡུལ་ལ་ཡོངས་སུ་ཤེས་པ་ཡིན་ནའོ། །གང་གིས་མ་ཉམས་པ་ཉིད་ལ་ཞེ་ན། དེའི་ཕྱིར་ས་བོན་དང་ཁྱེའུ་ཁ་འཐོན་པར་རུང་བར་མ་བྱས་པ་དག་གིའོ་ཞེས་བྱ་བ་སྨྲས་ཏེ། མེ་ལ་སོགས་པ་གང་གིས་ས་བོན་དང་ཁྱེའུ་ཁ་
འཐོན་པ་དག་རུང་བར་མ་བྱས་པ་དེ་ནི་ས་བོན་དང་ཁྱེའུ་ཁ་འཐོན་པ་རུང་བར་མ་བྱས་པ་དག་གོ །ས་བོན་དང་ཁྱེའུ་ཁ་འཐོན་པ་རུང་བར་མ་བྱས་པ་དག་ནི་ས་བོན་དང་ཁྱེའུ་ཁ་འཐོན་པ་རུང་བ་མ་བྱས་པ་སྟེ་དེ་དག་གིའོ། །འདི་སྐད་བསྟན་ཏེ། ས་བོན་དང་ཁྱེའུ་ཁ་འཐོན་པ་རུང་བར་མ་བྱས་པ་དག་གི་མ་ཉམས་པ་ཉིད་ཤེས་ནའོ། །ཁྱེའུ་ཁ་འཐོན་པ་ཞེས་སྨོས་པ་ནི། རྩྭ་ལ་སོགས་པ་སྐྱེ་བ་དག་གཟུང་ངོ༌། །རུང་བར་མ་བྱས་པ་ཞེས་སྨོས་པས་ནི་ས་བོན་རུང་བར་མ་བྱས་པ་མ་ཉམས་པ་དག་ཉམས་པར་བྱས་པ་ལ་ལྟུང་བ་མེད་པར་སྟོན་ཏོ། །ཅི་ཞིག་རྗེས་སུ་སྒྲུབ་ན་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེ་ན། དེའི་ཕྱིར་ཐ་ན་རྩ་རྒྱུན་ཡན་ཆད་ཉམས་པར་བྱས་ནའོ་ཞེས་བྱ་བ་སྨྲས་ཏེ། འདིར་མངོན་པར་ཁྱབ་པར་བྱ་བའི་ཕྱིར། ཐ་ན་ཞེས་བྱ་བ་སྨྲས་སོ། །རྩ་རྒྱུན་ཞེས་བྱ་བ་ནི། རྩ་བ་དང་འབྲེལ་པའི་རྒྱུན་ཕྲ་མོའོ། །ཐ་ན་དེ་ཡན་ཆད་ཉམས་པར་བྱས་ནའོ། །འདི་སྐད་བསྟན་ཏེ། ས་བོན་དང་ཁྱེའུ་ཁ་འཐོན་པ་དག་དངོས་ཉམས་པར་བྱས་པ་འབའ་ཞིག་ཏུ་མ་ཟད་ཀྱི། དེ་དག་གི་རྩ་རྒྱུན་ཡན་ཆད་ཉམས་པར་བྱེད་ནའོ། །འདིར་གཞུང་ནི་ཤིང་ལྗོན་པའི་རྩ་རྒྱུན་འཐོག་པར་བྱེད་ན་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །ཇི་ལྟར་ཉམས་པར་བྱེད་ན་ཞེ་ན། དེའི་ཕྱིར་ཇི་ལྟར་ཡང་རུང་ངོ་ཞེས་བྱ་བ་སྨྲས་ཏེ། རྣམ་པ་གང་ཡང་རུང་བས་སོ། །དེ་ཉིད་བསྟན་པའི་ཕྱིར་སྤྲུགས་པས་ཀྱང་ངོ་ཞེས་བྱ་བ་སྨྲས་ཏེ། འདིར་གཞུང་ནི་བཙུན་པ་དགེ་སློང་གིས་ཤིང་ཏོག་དག་སྤྲུག་ཅིང་ཀློག་པར་བགྱིད་ན་ལྟུང་བ་ཅིར་འགྱུར། གལ་ཏེ་ཤིང་ཏོག་སྨིན་པ་དག་ཡིན་ན་ནི་ཉེས་བྱས་སོ། །ཇི་སྟེ་མ་ཡིན་པ་དག་ཡིན་ན་ནི་ལྟུང་བྱེད་དོ་ཞེས་གསུངས་པ་ཡིན་ནོ། །རྩྭ་དང་འདམ་རྫབ་དང་ས་རྡུལ་ལ་སོགས་པ་དག་གིས་མནན་ནས་ཀྱང་ངོ་ཞེས་བྱ་བ་ནི། གལ་ཏེ་ཉམས་པར་བྱེད་ན་ལྟུང་བྱེད་དོ་ཞེས་བྱ་བར་སྦྱར་རོ། །འདིར་གཞུང་ནི་བཙུན་པ་དགེ་སློང་གིས་རན་ནམ་འདམ་རྫབ་བམ་ས་རྡུལ་དག་གིས་ཤིང་ལྗོན་པ་ཉམས་པར་གྱུར་ཅིག །རྣམ་པར་ཉམས་པར་གྱུར་ཅིག་ཅེས་གནོན་པར་བགྱིད་ན་ལྟུང་བ་ཅིར་འགྱུར་ཉེས་བྱས་སོ། །བཙུན་པ་དགེ་སློང་གིས་རན་སྔོན་པོས་རྡུལ་ལམ་བྱེ་མའམ་གཞན་གང་ཡང་རུང་བས་འདེབས་པར་བགྱིད་ན་ལྟུང་བ་ཅིར་འགྱུར་ཉེས་
བྱས་སོ་ཞེས་གསུངས་པ་ཡིན་ནོ། །འདིར་སྦྱོར་བ་ཙམ་ལ་དགོངས་ནས་ཉེས་བྱས་སུ་གསུངས་པར་ཟད་ཀྱི་གལ་ཏེ་ཉམས་པར་བྱེད་ན་ནི་ལྟུང་བྱེད་ཁོ་ནར་འགྱུར་རོ། །འདིར་འདམ་རྫབ་ཅེས་བྱ་བ་ནི་འཇིམ་པ་ཡིན་པར་རིག་པར་བྱའོ། །ཁུ་ཚན་ལ་སོགས་པས་ཀྱང་ངོ་ཞེས་བྱ་བ་ལ། ཁུ་ཚན་ཞེས་བྱ་བ་ནི་འུ་ཤ་ལ་སོགས་པའི་ཁུ་བ་ཚ་བ་གཏོར་བའོ། །སོགས་པ་ཞེས་བྱ་བའི་སྒྲས་འཆག་པ་དང༌། ཡལ་ག་ལ་སོགས་པ་འདྲེན་པ་དང༌། དཀྱིལ་འཁོར་དང་སྐྱད་ནུལ་ལ་སོགས་པ་དག་ཀྱང་བསྡུའོ། །འདིར་གཞུང་ནི་བཙུན་པ་སྔོའི་ཕྱོགས་སུ་འུ་ཤ་ཚ་བ་འཐོར་ན་ཞེས་བྱ་བ་ལ་སོགས་པ་ཡིན་ནོ། །རླུང་དང་ཉ་མ་ལ་འཇོག་པས་ཀྱང་ངོ་ཞེས་བྱ་བ་ནི་ས་བོན་ཉམས་པར་བྱེད་ན་ནི་ལྟུང་བྱེད་དུ་འགྱུར་རོ། །གལ་ཏེ་མ་ཡིན་ན་ནི་སྦྱོར་བ་ཙམ་གྱིས་ཉེས་བྱས་སོ། །འདིར་གཞུང་ནི་དགེ་སློང་མའི་རྣམ་པར་འབྱེད་པ་ལས། དགེ་སློང་མས་ས་བོན་གྱི་རིགས་ལྔ་པོ་འདི་དག་ཉམས་པར་གྱུར་ཅིག་ཅེས་རླུང་དང་ཉི་མ་ལ་འཇོག་པར་བྱེད་ན། གལ་ཏེ་ས་བོན་རྣམ་པར་ཉམས་ན་ནི་ལྟུང་བྱེད་དོ། །རྣམ་པར་མ་ཉམས་ན་ནི་ཉེས་བྱས་སོ་ཞེས་གསུངས་པ་ཡིན་ནོ། །ས་གཞི་སྐམ་པོར་ཡང་ངོ་ཞེས་བྱ་བ་ནི། འཇོག་པས་ཀྱང་ངོ་ཞེས་བྱ་བར་སྦྱར་རོ། །འདིར་གཞུང་ནི་དགེ་སློང་གིས་ས་བོན་གྱི་རིགས་ལྔ་པོ་དག་ཉམས་པར་གྱུར་ཅིག་ཅེས་ས་གཞི་སྐམ་པོར་འཇོག་པར་བྱེད་ན། གལ་ཏེ་ས་བོན་རྣམ་པར་ཉམས་ན་ནི་ལྟུང་བྱེད་ལྔར་འགྱུར་རོ། །གལ་ཏེ་རྣམ་པར་མ་ཉམས་ན་ནི་ཉེས་བྱས་ལྔར་འགྱུར་རོ་ཞེས་གསུངས་པ་ཡིན་ནོ། །བསམ་པ་ཇི་ལྟ་བུས་ཤེ་ན། དེའི་ཕྱིར་དེར་འདུན་པས་སོ་ཞེས་བྱ་བ་སྨྲས་ཏེ། ཉམས་པར་འདུན་པས་སོ། །ཅི་རང་ཁོ་ནས་སམ་ཞེ་ན། དེའི་ཕྱིར་རང་ངམ་གཞན་གྱིས་ཀྱང་རུང་ངོ་ཞེས་བྱ་བ་སྨྲས་ཏེ། རང་གི་ལག་གིས་སམ། གཞན་གྱི་ལག་དག་གིས་སོ་ཞེས་བྱ་བའི་ཐ་ཚིག་གོ །གནས་སྐབས་གང་ལ་ལྟུང་བ་ཇི་ལྟ་བུ་དག་འབྱུང་ཞེ་ན། དེའི་ཕྱིར་ཉམས་པར་གྱུར་ན། དངོས་གཞི་དག་གོ་ཞེས་བྱ་བ་སྨྲས་ཏེ། ཉམས་པར་གྱུར་པ་ན་དངོས་གཞིའི་ལྟུང་བ་དག་འབྱུང་ངོ༌། །དེའི་སྦྱོར་བ་ལ་ནི་ཉེས་བྱས་དག་གོ །གལ་ཏེ་སྦྱོར་བ་གཅིག་གི་དབང་གིས་ས་བོན་མང་པོ་དག་ཉམས་པར་བྱེད་ན་ཅི་སྦྱོར་བ་གཅིག་གི་དབང་ཡིན་པས་ལྟུང་བའང་
གཅིག་ཁོ་ནར་འགྱུར་རམ། འོན་ཏེ་ཉམས་པར་བྱ་བའི་གྲངས་ཀྱི་དབང་གིས་ལྟུང་བ་ཡང་མང་པོར་འགྱུར་ཞེ་ན། དེའི་ཕྱིར་ཉམས་པར་བྱ་བའི་གྲངས་དག་གིའོ་ཞེས་བྱ་བ་སྨྲས་ཏེ། ཉམས་པར་བྱ་བའི་གྲངས་དག་གིས་ལྟུང་བའི་གྲངས་ཀྱང་རྣམ་པར་གཞག་གོ་ཞེས་བྱ་བ་སྦྱར་ཏེ། ཉམས་པར་བྱ་བ་དག་གི་གྲངས་ཇི་སྙེད་པ་དེ་སྙེད་ཀྱི་ལྟུང་བར་འགྱུར་རོ་ཞེས་བྱ་བའི་ཐ་ཚིག་གོ །ཉམས་པར་བྱ་བདག་གི་གྲངས་ཀྱི་ལྟུང་བ་རྣམ་པར་གཞག་པར་བསྟན་ན་ཅི་ལོ་མ་དང་ཡལ་གདང་འདབ་མ་ལས་གྲངས་རྣམ་པར་གཞག་པར་བྱའམ་ཞེ་ན། དེའི་ཕྱིར་སྡོང་བུ་ལས་སོ་ཞེས་བྱ་བ་སྨྲས་ཏེ། ཤིང་ལྗོན་པ་དྲུང་བར་གྱུར་པའི་སྡོང་བུ་ལས་བཅད་ན་ཡལ་ག་དང་ཡལ་ག་ཕྲ་མོ་དང་འདབ་མ་ལ་སོགས་པ་དུ་མ་ཉིད་ཡོད་དུ་ཟིན་ཀྱང་དེ་ལྟ་མོད་ཀྱི་ལྟུང་བ་གཅིག་ཁོ་ནར་འགྱུར་ཏེ། ཤིང་ལྗོན་པའི་སྡོང་བུ་གཅིག་ཡིན་པའི་ཕྱིར་རོ། །དེ་བཞིན་དུ་ཡལ་ག་དག་རང་གི་སྡོང་བུ་ལས་བཅད་པ་ལ་ཡལ་ག་ཕྲ་མོ་དང་འདབ་མ་མང་པོ་ཉིད་ཡོད་པ་དང༌། ཡལ་ག་ཕྲ་མོ་དག་རང་གི་སྡོང་བུ་ལས་བཅད་པ་ལ་འདབ་མ་མང་པོ་ཉིད་ཡོད་པ་དང༌། འདབ་མ་དག་རང་གི་སྡོང་བུ་ལས་བཅད་པ་ལ་འདབ་མ་བདུན་པ་ལྟར་འདབ་མ་མང་པོ་ཉིད་ཡོད་པ་དང༌། ཨེ་རཎྜའི་འདབ་མ་ལྟར་ཡལ་ག་མང་པོ་ཉིད་ཡོད་དུ་ཟིན་ཀྱང་དེ་ལྟ་མོད་ཀྱི། ལྟུང་བྱེད་གཅིག་ཁོ་ནར་འགྱུར་རོ། །སྡོང་བུ་ཞེས་བྱ་བ་ནི། འོག་མའི་ཆའི་དཔེ་ཡིན་པར་རིག་པར་བྱའོ། །དེ་ལྟ་བས་ན་འདབ་མའི་ཡལ་ག་གཅད་པ་དང༌། ལྕུག་མའི་མགོ་ལྕོགས་བཅད་ན་ཡང་ལྟུང་བྱེད་དོ། །སྡོང་བུའི་ངོས་ནས་ཅུང་ཟད་བརྩེགས་པ་དང༌། འདབ་མའི་རིམ་པ་ནས་ཅུང་ཟད་བརྩེགས་པ་ནི་སྦྱོར་བའི་ཉེས་བྱས་སོ། །འདིར་གཞུང་ནི། དགེ་སློང་གིས་ཤིང་ལྗོན་པ་གཅིག་སྦྱོར་བ་གཅིག་གིས་གཅོད་ན་ཉེས་བྱས་གཅིག་དང་ལྟུང་བྱེད་གཅིག་གོ །དགེ་སློང་གིས་ཤིང་ལྗོན་པ་གཅིག་སྦྱོར་བ་གཉིས་ཀྱིས་གཅོད་ན་ཉེས་བྱས་གཉིས་དང་ལྟུང་བྱེད་གཅིག་གོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །སྐྱེ་བའི་ཕྱིར་མདོ་རྣམ་པར་བཤད་ནས་མདོ་དེ་ཉིད་ས་བོན་གྱི་ཕྱིར་རྣམ་པར་བཤད་པར་བྱ་སྟེ། ཉམས་པར་བྱ་བའི་གྲངས་དག་གིའོ་ཞེས་བྱ་བ་ལ། ས་བོན་གྱི་རིགས་ནི་རྣམ་པ་ལྔ་སྟེ། འདི་ལྟ་སྟེ། རྩ་བའི་ས་
བོན་དང༌། སྡོང་བུའི་ས་བོན་དང༌། ཐོ་གུའི་ས་བོན་དང༌། འགས་པའི་ས་བོན་དང༌། ས་བོན་གྱི་ས་བོན་ནོ། །དེ་ལ་རྩ་བའི་ས་བོན་ལ་སོགས་པ་ལྔ་པོ་ཐམས་ཅད་ལ་གཟུགས་ཇི་སྙེད་ཡོད་པ་དེ་དག་ཐམས་ཅད་འདིར་སྡོང་བུ་ཉིད་ཀྱི་རྣམ་པར་བཤད་པར་རིག་པར་བྱ་སྟེ། དེའི་ཕྱིར་ས་བོན་དུ་གྱུར་པའི་གཟུགས་གཅིག་ལ་སྡོང་བུ་ཇི་སྙེད་ཡོད་པ་དེ་སྙེད་ཀྱི་ལྟུང་བའི་དངོས་གཞིར་འགྱུར་རོ། །དེ་ལྟ་བས་ན་གང་བུ་ཞེས་བྱ་བའི་སྦུབས་གང་དག་ན་ཏིལ་དང་སྲན་མ་ལ་སོགས་པའི་འབྲུ་ཇི་སྙེད་པ་ཡོད་པ་དང༌། ཡལ་གའི་ཐོ་གུ་གང་དག་ནི་གོ་སྙོད་དང་ཅི་ཚེ་ལ་སོགས་པའི་འབྲུ་ཇི་སྙེད་ཡོད་པ་དེ་དག་ནི། འབྲུའི་ཕྱིར་གཟུགས་ཐ་དད་པ་ཡིན་གྱི། སྦུབས་ཀྱི་ཕྱིར་གཟུགས་གཅིག་པ་ཡང་མ་ཡིན་ལ། ཐོ་གུའི་ཕྱིར་གཟུགས་གཅིག་པ་ཡང་མ་ཡིན་ཏེ། དེ་ལྟ་བས་ན་སྦུབས་དང་ཐོ་གུ་དག་ལ་འབྲུ་ཇི་སྙེད་རྣམ་པར་གནས་པ་དེ་དག་ནི་སྡོང་བུ་ཞེས་བྱ་བའི་ཚིག་འདིས་གཅིག་པ་ཉིད་དུ་གནས་པར་མི་འགྱུར་ཏེ། འདི་ལྟར་སྦུབས་དེ་ན་འབྲུའི་རྫས་ཇི་སྙེད་ཡོད་པ་དང༌། ཐོ་གུ་དང་སྙེ་མ་ལ་འབྲུའི་རྫས་ཇི་སྙེད་ཡོད་པ་དེ་ཁོ་ན་སྙེད་ཀྱི་དངོས་གཞིའི་ལྟུང་བར་འགྱུར་རོ། །སྦྱོར་བ་ལ་ནི་འབྲུའི་གཟུགས་གཅིག་ལ་སྦྱོར་བ་དུ་བརྩམས་པ་དེ་སྙེད་ཀྱི་ཉེས་བྱས་སུ་འགྱུར་རོ། །སྦྱོར་བ་ལ་ནི་ཉེས་བྱས་དག་ཏུའོ་ཞེས་བྱ་བ་ནི། ས་བོན་དང་སྐྱེ་བའི་རྫས་གཅིག་ལ་སྦྱོར་བ་དུ་བརྩམས་པ་དེ་སྙེད་ཀྱི་ཉེས་བྱས་དག་ཏུ་འགྱུར་བའོ། །འདི་ལ་བསྣུན་པ་རེ་རེ་ལས་དེ་ཐ་དད་པ་ཡིན་གྱི་དངོས་པོ་ལས་ནི་མ་ཡིན་ནོ་ཞེས་བྱ་བ་སྨྲས་ཏེ། འདི་ལ་ཞེས་བྱ་བ་ནི་བསྣུན་པའི་སྤྱོད་པ་ཉིད་ཀྱིས་འཇུག་པ་འདི་ལའོ། །བསྣུན་པ་རེ་རེ་ལ་དེ་ཐ་དད་པ་ཡིན་གྱི་ཞེས་བྱ་བ་ནི། ས་བོན་དང་སྐྱེ་བ་ཉམས་པར་བྱ་བ་དང༌། སྤྱད་པར་བྱ་བའི་ཕྱིར་གཏུན་བུ་དང་སྟ་རེ་ལ་སོགས་པས་བསྣུན་པ་རེ་རེ་ལ་སྦྱོར་བ་ཞེས་བྱ་བའི་ཉེས་བྱས་ཐ་དད་པ་ཡིན་པར་ཤེས་པར་བྱའོ། །དངོས་པོ་ལ་ནི་མ་ཡིན་ནོ་ཞེས་བྱ་བ་ནི། ས་བོན་དང་སྐྱེ་བའི་དངོས་པོ་གཅིག་ཡིན་པས་སྦྱོར་བ་གཅིག་ཏུ་འགྱུར་བ་ནི་མ་ཡིན་ཏེ། བསྣུན་པ་ཇི་སྙེད་པ་དེ་ཁོ་ན་སྙེད་ཀྱི་སྦྱོར་བ་དག་ཏུ་འགྱུར་རོ་ཞེས་བྱ་བའི་ཐ་ཚིག་གོ །བཏོན་ན་བསྐྱེད་པར་བྱ་བ་ཉིད་ཡིན་དུ་ཟིན་ཀྱང་མཐའ་ཉིད་དོ་ཞེས་བྱ་བ་ནི། ཤིང་ལྗོན་པ་ལ་སོགས་པ་རང་གི་གནས་ནས་རྩ་ཐོན་དུ་བཏོན་པ་ལ་
སོགས་པའི་རྣམ་པས་བཏོན་ན་བཏོན་པ་དེ་གནས་གཞན་དུ་བསྐྱེད་པར་བྱ་བ་ཉིད་ཡིན་དུ་ཟིན་ཀྱང་འདོན་པའི་སྦྱོར་བའི་གྲངས་ཀྱང་སྔར་བསྟན་པ་བཞིན་ལ་བཏོན་ཟིན་པ་ན། དངོས་གཞི་ཡང་མཐའ་ཉིད་དེ་ལྟུང་བྱེད་ཉིད་དུ་འགྱུར་རོ། །འདི་སྐད་བསྟན་ཏེ། གལ་ཏེ་ཤིང་ལྗོན་པ་ལ་སོགས་པ་རང་གི་གནས་ནས་རྩ་ཐོན་དུ་འདོན་པར་གྱུར་ན་འདི་ལྟར་སྐྱེར་རུང་བའི་ཆོས་ཉིད་ཡོད་དུ་ཟིན་ཀྱང་དེ་ལྟ་མོད་ཀྱི་རང་གི་གནས་ནས་བཏོན་ཅིང་ཕྱུང་བ་དེ་ཉིད་བཤིག་ཅིང་ཉམས་པར་བྱས་པ་ཡིན་པར་རིག་པར་བྱའོ། །དེ་ཕྱིན་ཆད་གནས་གཞན་དུ་རྩ་བ་མ་ཟུག་གི་བར་དུ་ནི་ཡལ་ག་དང་འདབ་མ་དང་མེ་ཏོག་ལ་སོགས་པ་བཏོགས་པ་ལ་ཉེས་པ་མེད་དོ། །ཉ་ལྕིབས་དང་ཉ་ཚང་དག་ཆུ་ནས་བཏོན་པ་ནི་དེ་ཉིད་དོ་ཞེས་བྱ་བ་ནི། ཉ་ཚང་ནི་ཆུའི་རྩ་ཉ་ལྕིབས་འདྲ་བ་ཞིག་སྟེ། ཉ་ལྕིབས་དང་ཉ་ཚང་དག་ཆུ་ནས་བཏོན་པ་ནི་དེ་ཉིད་དེ་བཏོན་པ་ཉིད་དོ། །འདི་སྐད་བསྟན་ཏེ། ཉ་ལྕིབས་དང༌། ཉ་ཚང་དག་ཆུ་ནས་བཏོན་པར་གྱུར་ན་སྐྱེར་རུང་བའི་ཆོས་ཉིད་ཡིན་དུ་ཟིན་ཀྱང་དེ་དག་བཏོན་པ་ན་བཅད་པ་ཉིད་ཡིན་པར་རིག་པར་བྱ་སྟེ། ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ཚི་གུ་མ་བཅེམ་པར་རིལ་མིད་བྱེད་པ་ནི་ཕྱེད་དོ་ཞེས་བྱ་བ་ནི། རྒྱ་ཤུག་གི་ཚི་གུ་དང༌། ཁམ་ཚིགས་དང༌། སྟར་ག་དང༌། འབྲ་གོའི་རུས་བ་ལ་སོགས་པའི་ཚི་གུ་སོ་དག་གིས་མ་བཅེམ་མ་དཀྲུམ་པར་རིལ་མིད་དུ་གྲ་རྡེག་བྱེད་པ་ནི་ས་བོན་ཉམས་པར་བྱ་བའི་བྱ་བ་བྱེད་པ་ཡིན་པས་དེ་ནི་ཕྱེད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །ཐམས་ཅད་དུ་ཡང་ལྟུང་བའི་སྐབས་ནས་ཕྱེད་ཅེས་བྱ་བའི་ཚིག་སྨོས་པ་ནི་ཉེས་བྱས་ཡིན་པར་གོ་བར་བྱེད་དོ། །འདིར་གཞུང་ནི་བཙུན་པ་དགེ་སློང་གིས་རྒྱ་ཤུག་གི་ཚི་གུ་མ་བཅེམ་པར་རིལ་མིད་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །གལ་ཏེ་འདི་བཅད་པར་གྱུར་ན་ལེགས་སོ་ཞེས་སྨྲས་ན་བཏོན་པའི་འོ་ཞེས་བྱ་བ་ནི། དགེ་སློང་གིས་གལ་ཏེ་ཤིང་ལྗོན་པ་འདི་ལ་ལ་ཞིག་གིས་བཅད་པར་གྱུར་ན་ལེགས་སོ། །སྟེས་སོ་ཞེས་བྱ་བ་སྨྲས་ན་གཞོགས་ཀྱིས་བཅོལ་བ་དེའི་ཚེ་ན་སྔར་བཏོན་པ་ཞེས་བྱ་བ་དངོས་གཞིར་བཤད་པ་དེའི་ཕྱེད་དེ་སྦྱོར་བའི་ཉེས་བྱས་ཞེས་བྱ་བའི་ཐ་ཚིག་གོ །གཞི་དེ་ལས་བཅད་པར་གྱུར་ན་ནི་མཐའི་དངོས་གཞི་ཉིད་དུ་རིག་པར་བྱའོ། །འདིར་
གཞུང་ནི་ཞུ་བ་ལས་བཙུན་པ་དགེ་སློང་གིས་འདི་སྐད་ཅེས་འདིས་ཤིང་ལྗོན་པ་འདི་བཅད་བར་གྱུར་ན་ལེགས་སོ་སྟེས་སོ་ཞེས་མཆི་ཞིང་དེས་དེ་འགུམས་པར་བགྱིད་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །རྫུ་འཕྲུལ་གྱིས་ནི་མ་བྱས་པ་ཉིད་དོ་ཞེས་བྱ་བ་ནི། དགེ་སློང་གིས་རྫུ་འཕྲུལ་གྱིས་ཤིང་ལྗོན་པ་འདི་གཅོད་པར་བྱེད་ན་ལྟུང་བ་མ་བྱས་པ་ཉིད་དོ། །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་རྫུ་འཕྲུལ་གྱིས་ཤིང་ལྗོན་པ་འགུམས་པར་མོས་པར་བགྱིད་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ་ཞེས་གསུངས་པ་ཡིན་ནོ། །ས་བོན་ལ་ས་བོན་གཞན་ཉིད་དུ་འདུ་ཤེས་པ་ནི་དེ་དང་འདྲ་བ་ཉིད་དོ་ཞེས་བྱ་བ་ནི། སྡོང་བུ་ནི་སྡོང་བུའི་ས་བོན་ལ་སོགས་པ་ལ་རྩ་བའི་ས་བོན་ཉིད་དུ་འདུ་ཤེས་པ་ནི་དེ་དང་འདྲ་བ་ཉིད་དོ། །སྡོང་བུའི་ས་བོན་ལ་སོགས་པ་དང་འདྲ་བ་ཉིད་དེ་ཕྱེད་ཉིད་མ་ཡིན་ནོ། །དེ་བཞིན་དུ་སྐྱེ་བ་ལ་ས་བོན་དུ་འདུ་ཤེས་པ་ཡང་སྐྱེ་བ་དང་འདྲ་བ་ཉིད་ཡིན་ལ། ས་བོན་ལ་སྐྱེ་བར་འདུ་ཤེས་པ་ཡང་ས་བོན་དང་འདྲ་བ་ཉིད་དེ་ཕྱེད་ཉིད་མ་ཡིན་ཏེ། ཐམས་ཅད་ལ་ས་བོན་ལ་སོགས་པ་ཉམས་པར་བྱ་བ་ཡོད་པའི་ཕྱིར་རོ། །དགེ་སློང་ས་བོན་ལ་སོགས་པ་ཉམས་པར་བྱ་བའི་འདུ་ཤེས་ཡོད་ན་བཟློག་པའི་བསམ་པས་ཉམས་པར་བྱེད་དུ་ཟིན་ཀྱང་དངོས་གཞི་ཁོ་ནར་འགྱུར་རོ། །ཤུན་པ་དང་ཕྲི་དང་འདབ་མ་སྐྱ་བོ་དང་མེ་ཏོག་ཁ་བྱེ་བ་དང་འབྲས་བུ་སྨིན་པ་རྣམས་ནི་ཕྱེད་ཤི་བ་ཉིད་དུ་རྗེས་སུ་ཐ་སྙད་གདགས་སོ་ཞེས་བྱ་བ་ནི། ཤུན་པ་དང་ཕྲི་དང་འདབ་མ་སྐྱ་བོ་དང༌། མེ་ཏོག་ཁ་བྱེ་བ་དང་འབྲས་བུ་སྨིན་པ་ཞེས་བྱ་བར་ཚིག་རྣམ་པར་སྦྱར་ཏེ། དེ་རྣམས་ནི་ཕྱེད་ཤི་བ་ཉིད་དུ་འཇིག་རྟེན་ན་གྲགས་པ་ཡིན་པས་འདིར་ཡང་གྲགས་པ་དེའི་རྗེས་སུ་ཕྱེད་ཤི་བ་ཉིད་ཅེས་བྱ་བར་ཐ་སྙད་གདགས་ཏེ་ཕྱེད་ཤི་བ་ཉིད་དེ་དག་བཤིག་ཅིང་ཉམས་པར་བྱས་པ་ལ་ནི་ཉེས་བྱས་སུ་འགྱུར་རོ། །དེ་དག་གི་རྩ་བར་གྱུར་པ་རང་བཞིན་ལས་མ་བྱེ་བ་ནི་མ་ཡིན་ནོ་ཞེས་བྱ་བ་ནི། ཤུན་པ་ལ་སོགས་པ་དེ་དག་གི་རྩ་བར་གྱུར་པ་གང་ཡིན་པ་དངོས་ཀྱི་རང་བཞིན་ལས་གལ་ཏེ་མ་བྱེ་བ་མ་བྲལ་བ་ཡིན་ན་དེ་དག་གི་རྩ་བར་གྱུར་པ་རང་བཞིན་ལས་མ་བྱེ་མ་བྲལ་བ་དེ་ནི་ཕྱེད་ཤི་བ་དེ་ཉིད་དུ་རྗེས་སུ་ཐ་སྙད་གདགས་པ་མ་ཡིན་ཏེ། དེ་དག་ཕྱོགས་དེ་ནས་ཕྱེ་ཞིང་ཕྲལ་ན་དངོས་གཞི་
ཁོ་ནར་འགྱུར་རོ། །འདིར་ཤུན་པའི་གཞུང་ནི། ཤུན་པ་འཆུ་བར་བྱེད་ན་སྙིང་པོ་དང་འབྲེལ་པ་འཆུ་བར་བྱེད་ན་ནི་ལྟུང་བྱེད་དུ་འགྱུར་རོ། །སྙིང་པོ་དང་མ་འབྲེལ་པ་འཆུ་བར་བྱེད་ན་ནི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ཏེ། ཕྲི་དང་འདབ་མ་སྐྱ་པོ་དང༌། མེ་ཏོག་ཁ་བྱེ་བ་དང༌། འབྲས་བུ་སྨིན་པ་རྣམས་ལ་ཡང་འདི་ཉིད་རྣམ་པར་གཞག་གོ །དེ་ལ་མེ་ཏོག་དང་འབྲས་བུ་རྣམས་ཀྱི་རྩ་བ་དག་དང༌། ཆུ་བ་ནི་དེ་དག་ཉིད་དང་ལྷན་ཅིག་ཆོས་མཚུངས་པ་ཉིད་ཡིན་ཏེ། སྨིན་པ་རྣམས་ཀྱི་ནི་སྨིན་པ་ཉིད་ཡིན་ལ། མ་སྨིན་པ་རྣམས་ཀྱི་ནི་མ་སྨིན་པ་ཉིད་ཡིན་ཏེ། དེ་དག་ཉིད་ཀྱི་ཕྱོགས་གཅིག་ཏུ་གྱུར་པ་ཉིད་ཡིན་པར་རིག་པར་བྱའོ། །མེ་ཏོག་གི་ཆུ་བ་ནི་མེ་ཏོག་ཉིད་ཀྱི་ཁོངས་སུ་གཏོགས་པ་ཡིན་ལ། རྩ་བ་དག་ནི་དེའི་རྩ་བ་ལས་རིག་པར་བྱའོ། །འདིར་གཞུང་ནི། ཞུ་བ་ལས་ཅིག་ཅར་འབྱུང་སྟེ། ཆུ་བ་གཅོད་ན་ཉེས་བྱས་སོ། །ཕ་བོང་གི་དྲེག་པ་ལས་འཆུ་ན་ཉེས་བྱས་སོ་ཞེས་གསུངས་པ་ཡིན་ནོ། །འདིར་ཆུ་བ་ཞེས་བྱ་བའི་སྒྲས་ནི་ཨུཏྤ་ལ་ལ་སོགས་པ་ཁ་བྱེ་བའི་ཆུ་བ་དང་འདབ་མའི་ཆུ་བ་བསྡུས་པར་རིག་པར་བྱའོ། །འདིར་ཕ་བོང་གི་དྲེག་པ་ཞེས་བྱ་བ་ནི་རྡོའི་དྲེག་པ་ཡིན་པར་རིག་པར་བྱའི་སྲུ་སྲུ་ནི་མ་ཡིན་ནོ། །ས་བོན་གྱི་ཁམས་བཏབ་པ་ལ་རྩ་བ་མ་སྐྱེས་པ་ནི་ཕྱེད་སྐྱེས་པ་ཉིད་དུའོ་ཞེས་བྱ་བ་ནི། ས་བོན་གྱི་ཁམས་བཏབ་པ་ལ་ད་དུང་རྩ་བ་མ་སྐྱེས་པ་ལྷག་ལྷོག་ཙམ་དུ་རྩབས་སུ་གྱུར་པ་ནི་ཕྱེད་སྐྱེས་པ་ཉིད་དུ་རྗེས་སུ་ཐ་སྙད་གདགས་ཏེ། དེ་ལ་ནི་ཉེས་བྱས་སོ་ཞེས་བྱ་བའི་ཐ་ཚིག་གོ །ས་འབུས་པ་དང༌། ཤ་མོ་དང༌། ཤ་བལ་དང༌། སྣོད་དང་གོས་ལ་སོགས་པའི་རླམ་རྣམས་ནི་བྱེད་སྐྱེས་པ་ཉིད་དུའོ་ཞེས་བྱ་བ་ནི། རྗེས་སུ་ཐ་སྙད་གདགས་སོ་ཞེས་བྱ་བར་སྦྱར་རོ། །ས་འབུས་པ་དང༌། ཤ་མོ་དང༌། ཤ་བལ་དང༌། སྣོད་ཀྱི་རླམ་དང༌། གོས་ཀྱི་རླམ་དང༌། སོགས་པའི་སྒྲས་ཁུར་བ་ལ་སོགས་པའི་རླམ་བསྡུས་ཏེ། དེ་རྣམས་ནི་ཕྱེད་སྐྱེས་པ་ཉིད་དུ་རྗེས་སུ་ཐ་སྙད་གདགས་ཏེ། དེ་དག་བཤིག་ཅིང་ཉམས་པར་བྱས་ན་ཉེས་བྱས་སོ། །འུ་ཤའི་ཁུ་ཚན་ལ་སོགས་པ་དབོ་བ་དང༌། འཆག་པ་དང༌། ཡལ་ག་ལ་སོགས་པ་འདྲེས་བ་དང༌། དཀྱིལ་འཁོར་དང༌། སྐྱང་ནུལ་དང༌། དེ་དག་གི་བསམ་པ་ཉིད་
ལ་ནི་ལྟུང་བ་མེད་དོ་ཞེས་བྱ་བ་ནི། འུ་ཤའི་ཁུ་ཚན་ལ་སོགས་པའི་སྔོའི་སྟེང་དུ་འབོ་ན་དབོ་བ་ལ་སོགས་པའི་བསམ་པ་ཉིད་ལ་ནི་ལྟུང་བ་མེད་དོ། །དེ་བཞིན་དུ་འཆག་པ་ལ་སོགས་པ་དག་ལ་ཡང་འཆག་པ་ལ་སོགས་པའི་བསམ་པ་ཉིད་ལ་ནི་ལྟུང་བ་མེད་དོ། །སྡོ་ལ་སོགས་པ་གཞིག་ཅིང་ཉམས་པར་བྱ་བའི་བསམ་པ་མེད་པའི་ཕྱིར་རོ། །ཕོངས་པའི་ཚེ་རྩྭ་ཀུ་ཤ་ལ་སོགས་པས་བཅིངས་པ་དེས་མི་ཐར་ན་བཅད་ན་ཡང་ངོ་ཞེས་བྱ་བ་ནི། རྩྭ་ཀུ་ཤ་ལ་སོགས་པ་བཅད་ན་ཡང་ལྟུང་བ་མེད་དོ། །གང་གི་ཚེ་ཞེ་ན། དེའི་ཕྱིར་ཕོངས་པའི་ཚེ་ཞེས་བྱ་བ་སྨྲས་ཏེ། ཕོངས་པའི་དུས་ཀྱི་ཚེའོ། །ཕོངས་པ་བསྟན་པའི་ཕྱིར། རྩྭ་ཀུ་ཤ་ལ་སོགས་པས་བཅིངས་པ་ཞེས་བྱ་བ་སྨྲས་ཏེ། གལ་ཏེ་དགེ་སློང་རྩྭ་ཀུ་ཤ་ལ་སོགས་པ་དེས་བཅིངས་པའོ། །དགེ་སློང་གང་གིས་བཅད་ན་ལྟུང་བ་མེད་ཅེ་ན། དེའི་ཕྱིར་དེས་ཞེས་བྱ་བ་སྨྲས་ཏེ། རྩྭ་ཀུ་ཤ་ལ་སོགས་པས་བདག་ཉིད་བཅིངས་པའི་དགེ་སློང་དེས་སོ། །ཅི་གནས་སྐབས་ཐམས་ཅད་དུ་ལྟུང་བ་མེད་དམ་ཞེ་ན། མ་ཡིན་ཏེ་དེའི་ཕྱིར་མི་ཐར་ན་ཞེས་བྱ་བ་སྨྲས་ཏེ། གལ་ཏེ་ཐབས་གཞན་གང་གིས་ཀྱང་མི་ཐར་ནའོ། །དེ་ལྟར་ཇི་སྐད་དུ་བསྟན་པའི་རྣམ་པ་དེ་ལྟ་བུས་ཕོངས་པའི་ཚེ་དགེ་སློང་གིས་རྩྭ་ཀུ་ཤ་ལ་སོགས་པ་བཅད་ན་ཡང་ལྟུང་བ་མེད་དོ། །འདི་སྐད་བསྟན་ཏེ། གལ་ཏེ་ཆོམ་རྐུན་པ་དག་གིས་རྩྭ་ཀུ་ཤ་ལ་སོགས་པ་དྲུང་མ་ཕྱུང་བ་དགེ་སློང་བཅིངས་པར་གྱུར་ལ། ཐར་པའི་ཐབས་གཞན་འགའ་ཡང་མེད་ན། དགེ་སློང་བཅིངས་པ་དེས་རྩྭ་ཀུ་ཤ་ལ་སོགས་པ་བཅད་ན་ཡང་ལྟུང་བ་མེད་དོ། །གལ་ཏེ་རྩྭ་ཀུ་ཤ་དག་གིས་དགེ་སློང་མང་པོ་དག་བཅིངས་པར་གྱུར་ན་ཅི་དེའི་ཚེ་ཐམས་ཅད་ཀྱིས་གཅད་པར་བྱའམ་ཞེ་ན། མ་ཡིན་ཏེ་དེའི་ཕྱིར་དུ་མ་ཉིད་ཡིན་ན་དེ་ལས་གཞན་གཅིག་གིས་སོ་ཞེས་བྱ་བ་སྨྲས་ཏེ། དགེ་སློང་བཅིངས་པ་དུ་མ་ཉིད་ཡིན་ན་མི་ཐར་པ་དེ་ལས་དགེ་སློང་གཅིག་གིས་གཅད་པར་བྱ་ཞིང་དེས་གཞན་ཡང་དགྲོལ་བར་བྱའི། ཐམས་ཅད་ཀྱིས་གཅད་པར་མི་བྱའོ། །ས་བོན་གྱི་ཆོས་མེད་པ་ནི་ཉེས་པ་མེད་པ་ཉིད་མ་ཡིན་ནོ་ཞེས་བྱ་བ་ནི། རུང་བ་ལྔ་པོ་ཕྱུང་བ་དང༌། དཀྲུམ་པ་དང༌། བཀས་པ་དང༌། གཅད་པ་དང༌། ས་བོན་གྱི་ཆོས་ཉིད་མེད་པ་
ནི་ལྔ་པ་ཡིན་ཏེ། རུང་བ་ལྔ་པོ་དེ་བསྡུ་བའི་ཕྱིར་མདོ་འདི་བྱས་སོ། །གང་ལ་ས་བོན་གྱི་ཆོས་ཉིད་མེད་པ་དེ་ནི་ཉམས་པར་བྱས་ཀྱང་ཉེས་པར་བྱེད་པ་ཉིད་མ་ཡིན་ཏེ། དཔེར་ན་ག་གོན་ལ་སོགས་པ་ས་བོན་དུ་མ་རེད་པ་ཉིད་དག་ལྟ་བུའོ། །མེས་རེག་པ་དང་མཚོན་དང་སེན་མོ་དང་ནེ་ཙོ་དག་གིས་རྨ་ཕྱུང་བ་དང༌། རྙིང་པ་དང༌། ཕྱུར་བ་དང༌། དཀྲུམ་པ་དང༌། བཀས་པ་དང༌། བཅད་པ་ལྟ་བུ་དག་ནི་རུང་བའོ་ཞེས་བྱ་བ་ནི་དགུ་པོ་དེ་དག་ནི་རུང་བ་སྟེ། མེས་རེག་པ་ཞེས་བྱ་བ་ནི་ཤིང་ཏོག་ལ་སོགས་པ་མེས་རེག་པར་བྱས་པའོ། །མཚོན་གྱིས་རྨ་ཕྱུང་བ་དང༌། སེན་མོས་རྨ་ཕྱུང་བ་དང༌། ནེ་ཙོ་དག་གིས་རྨ་ཕྱུང་བ་ཞེས་བྱ་བ་ནི། ཤིང་ཏོག་ལ་སོགས་པ་དེ་དག་གིས་རྨ་ཕྱུང་བ་གང་ཡིན་པའོ། །འདིར་མཚོན་ལ་སོགས་པ་སྨོས་པ་ནི་མཚོན་པ་ཙམ་དུ་ཟད་དེ། ཤིང་ལ་སོགས་པས་རྨ་ཕྱུང་བ་གང་ཡིན་པ་ཡང་རུང་བ་ཁོ་ན་ཡིན་ནོ། །རྙིང་པ་ཞེས་བྱ་བ་ནི། རྒུན་སྐམ་ལ་སོགས་པ་དག་གོ །ཕྱུང་བ་ཞེས་བྱ་བ་ནི། དྲུང་ནས་ཕྱུང་བ་སྟེ། དཔེར་ན་ལ་ཕུག་ལ་སོགས་པ་རྩ་ཐོན་དུ་ཕྱུང་བ་ལྟ་བུ་དག་སྟེ། དེ་ནི་བརྟག་པ་གཞན་གྱིས་རུང་བར་བྱ་བ་ལ་ལྟོས་མི་དགོས་སོ། །དཀྲུམ་བ་ཞེས་བྱ་བ་ནི་བརྡུངས་པ་སྟེ། མཆིག་ལ་སོགས་པས་སྲན་མ་ལ་སོགས་པ་ཕྱེད་ཚལ་དུ་དཀྲུམ་པ་ལྟ་བུའོ། །བཀས་པ་ཞེས་བྱ་བ་ནི་གས་པར་གྱུར་པ་སྟེ། དེ་ཡང་བལ་པོ་སེའུ་ལ་སོགས་པ་ལྟ་བུ་རང་གས་པ་ཉིད་གང་ཡིན་པ་དེ་ནི་རུང་བ་ཉིད་མ་ཡིན་གྱི། གཞན་དག་གིས་བྱས་པ་ནི་རུང་བ་ཉིད་ཡིན་ནོ། །གཅད་པ་ཞེས་བྱ་བ་ནི་བརྡས་པ་སྟེ། དཔེར་ན་ལྕང་མ་ལ་སོགས་པའི་ཡལ་ག་བཅད་ཟིན་པ་དེ་ལ་སོ་ཤིང་ལ་སོགས་པ་བྱ་བ་ལ་བརྟག་པ་གཞན་གྱིས་རུང་བར་བྱ་མི་དགོས་པ་ལྟ་བུའོ། །རུང་བ་བྱེད་པ་ནི་ས་བོན་མ་ཡིན་པ་ཉིད་དུ་གྱུར་གྱི་བར་དུ་ལྟོས་པར་བྱ་མི་དགོས་པ་ཉིད་དོ་ཞེས་བྱ་བ་ནི། བརྟག་པས་རུང་བར་བྱེད་པ་ནི་ཇི་སྲིད་དུ་ས་བོན་མ་ཡིན་པ་ཉིད་དུ་གྱུར་གྱི་བར་དེ་སྲིད་དུ་དེ་ལ་བསྡད་པར་མི་བྱ་བའོ། །འདི་སྐད་བསྟན་ཏེ། མོན་སྲན་སྡེའུ་ལ་སོགས་པ་དག་མེ་ལ་སོགས་པའི་བརྟག་པས་རུང་བར་བྱའོ་ཞེས་བསྟན་པ་ནི། ཇི་སྲིད་དུ་མོན་སྲན་སྡེའུ་ལ་སོགས་པ་དེ་དག་ས་བོན་མ་ཡིན་པ་ཉིད་དུ་གྱུར་གྱི་བར་དེ་སྲིད་དུ་བརྟག་པར་མི་བྱ་སྟེ། འདི་ལྟར་དགེ་སློང་གིས་བརྟག་པ་ཡིན་པའི་ཕྱིར་མེ་ལ་སོགས་པས་རེག་པ་ཙམ་ཁོ་ནས་བརྟགས་ཤིང་རུང་བ་ཡིན་
པར་རིག་པར་བྱའོ། །འདི་ལ་རླངས་པ་ནི་མེ་མ་ཡིན་པ་ཉིད་མ་ཡིན་ནོ་ཞེས་བྱ་བ་ནི། བརྟག་པས་རུང་བར་བྱ་བ་འདི་ལ་རླངས་པ་ནི་མེ་མ་ཡིན་པ་ཉིད་མ་ཡིན་ཏེ། འདི་ལྟར་མེ་ཉིད་དང་འདྲའོ། །འདི་སྐད་བསྟན་ཏེ། བརྟག་པས་རུང་བར་བྱ་བ་འདི་ལ་རླངས་པས་བདུགས་པ་ཉིད་ཀྱང་མེས་རེག་པ་ཉིད་དང་འདྲ་སྟེ། འདི་ལྟར་མེ་དང༌། རླངས་པས་རེག་ན་མོན་སྲན་སྡེའུ་ལ་སོགས་པ་དག་རུང་བ་ཉིད་དུ་གྱུར་པ་ཡིན་ནོ། །འདིར་མདོ་དེ་གཉིས་ཀྱི་གཞུང་ནི་དགེ་སློང་དག་ས་བོན་གྱི་རིགས་མི་ཚོས་པ་ཞེས་བྱ་བ་ཡོད་པས་དེའི་ཕྱིར་རླངས་པས་བརླན་ཏེ་བཟའ་བར་རྗེས་སུ་གནང་གིས་འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །འབྲས་བུ་དག་མེས་རུང་བར་བྱ་བ་ལ་སྤྱིའི་ཚོམས་ནི་གཙོ་ཆེར་བྱ་བ་ཡང་དག་པའི་གྲངས་ཉིད་དོ་ཞེས་བྱ་བ་ནི། རྒུན་འབྲུ་ལ་སོགས་པའི་འབྲས་བུ་དག་མེའི་བརྟག་པས་རུང་བར་བྱ་བ་ལ་སྤྱིའི་ཚོམས་སྤྱི་བུངས་སུ་བཅེར་བ་ནི་གཙོ་ཆེར་བྱ་བ་གཙོ་བོར་བསྟན་པ་ཡིན་ཏེ། དེ་ནི་ཡང་དག་པ་ཡིན་པའི་གྲངས་ཉིད་དུ་འགྲོ་བར་རིག་པར་བྱའོ། །འདི་ལྟར་སྤྱི་ལ་རུང་བར་བྱས་ན། དེའི་ཡན་ལག་ཐམས་ཅད་དུ་རུང་བ་ཉིད་ཡིན་པར་ཡིད་ལ་སྣང་བའི་ཕྱིར་རོ། །འདིར་གཞུང་ནི་འདི་ལྟར་དགེ་སློང་དག་འབྲས་བུ་རྣམས་རེ་རེ་ནས་རུང་བར་བྱེད་པས་རིང་དུ་ཐོགས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཕུང་པོར་བྱས་ནས་མེས་གནས་གཉིས་སམ་གསུམ་དག་ཏུ་རེག་པར་བྱས་ན་ཐམས་ཅད་དུ་རུང་བ་ཉིད་དོ་ཞེས་གསུངས་པ་ཡིན་ནོ། །ཕྱོགས་གཅིག་ནས་ནི་སྤྱིའི་རུང་བ་མི་འབྱུང་ངོ་ཞེས་བྱ་བ་ནི། མེས་ཕྱོགས་གཅིག་ནས་རེག་པ་ལ་ནི་ཕུང་པོ་ཐམས་ཅད་ཀྱི་སྤྱིའི་བརྟག་པར་བྱས་པ་ཞེས་བྱ་བའི་རུང་བ་མི་འབྱུང་ངོ༌། །འདིས་ནི་དེ་ལྟ་བས་ནས་སྤྱི་ངོས་ཐམས་ཅད་ལ་མེས་ཕྱོགས་གཉིས་སམ་གསུམ་དག་ཏུ་རེག་པར་བྱའོ་ཞེས་གསུངས་པ་དེ་བསྡུས་པ་ཡིན་ནོ། །དགེ་སློང་གིས་རུང་བ་དག་བྱས་པ་ཉིད་ནི་བྱས་པ་ཉིད་ཡིན་ནོ་ཞེས་བྱ་བ་ནི། དགེ་སློང་གིས་བརྟགས་པས་རུང་བ་དག་བྱས་པ་ནི། དགེ་སློང་གིས་རུང་བ་དག་བྱས་པ་སྟེ། དེའི་དངོས་པོ་ནི་དེ་ཉིད་དོ། །དེ་ལ་ནི་མེས་རུང་བར་བྱས་བམ་གཏོགས་པ་གཞན་གྱིས་རུང་བར་བྱས་པ་ཉིད་ཡིན་ནོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ཞུགས་ཀྱིས་སམ་སེན་མོས་སམ་མཚོན་གྱིས་ས་བོན་གྱི་རིགས་ལྔ་པོ་དག་རུང་བར་བགྱིས་པ་ཞེས་བགྱི་འམ་ཉེ་བ་
འཁོར་རུང་བར་བྱས་པ་ཞེས་བྱ་སྟེ། ཉེ་བ་འཁོར་མེས་རུང་བར་བྱས་པ་མ་གཏོགས་པ་ལྷག་མ་རྣམས་བཟར་རུང་སྟེ། བཟའ་བར་བྱ་བ་དག་ཡིན་ནོ། །གང་རུང་བར་བྱེད་ན་ས་བོན་གྱི་ཚོགས་འཇིག་པའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །གང་རུང་བར་བྱེད་ན་ཞེས་བྱ་བའི་ཚིག་གིས་ནི་འདིར་རུང་བར་བྱེད་པ་ནི་འབྱུང་པོའི་ཚོགས་འཇིག་པར་བྱེད་པ་ཡིན་པར་རིག་པར་བྱའོ། །དེ་ལྟ་མ་ཡིན་དུ་ཟིན་ན་ས་བོན་གྱི་ཚོགས་འཇིག་པ་ལས་ལྟུང་བྱེད་ཀྱི་ཚིག་ཏུ་མི་གསུང་བར་ཉེས་བྱས་སུ་གསུངས་པའི་རིགས་ན་དེ་སྐད་མ་གསུངས་སོ། །འདིར་ཉེ་བ་འཁོར་མས་རུང་བར་བྱས་པ་མ་གཏོགས་པ་ཞེས་གསུངས་པ་དེས་ནི་མེས་རུང་བར་བྱའོ། །དེ་ལྟ་མ་ཡིན་ཏེ། དེའི་ཕྱིར་མདོ་དེ་ནི་དགེ་སློང་གིས་བཙོས་པའི་དབང་དུ་བྱས་ནས། དེ་མི་བཟའ་བ་ཉིད་བསྟན་པ་ཡིན་པར་རིག་པར་བྱའོ། །ས་རུང་བ་མ་ཡིན་པར་ཡང་ངོ་ཞེས་བྱ་བ་ནི། རུང་བའི་ཁང་པ་མ་ཡིན་པའི་ས་རུང་བ་མ་ཡིན་པར་འབྲུ་ལ་སོགས་པ་གཞག་སྟེ། མེས་རུང་བར་བྱས་པ་གང་ཡིན་པ་དེ་ཡང་རུང་བར་བྱས་པ་ཉིད་ཡིན་ནོ། །ཞག་བདུན་པ་དང༌། འཚོ་བའི་བར་དུ་བཅང་བ་ཆུ་གྲང་མོས་མ་གཏོར་བར་བཟའ་བར་མི་བྱའོ་ཞེས་བྱ་བ་ནི། དེ་རུང་བར་བྱ་བ་དང་འབྲེལ་བ་ཡིན་པས་འདིར་མདོར་བྲིས་ཏེ། སྨན་ཞག་བདུན་པ་དང༌། འཚོ་བའི་བར་དུ་བཅང་བ་དག་ཆུ་གྲང་མོས་མ་བཏབ་མ་གཏོར་བར་བཟའ་བར་མི་བྱའོ། །རུང་བར་བྱ་བ་ནི་གང་གིས་དུས་སུ་བྱས་ཀྱང་རུང་བ་ཉིད་ཡིན་གྱི། བཟའ་བའི་དུས་ཁོ་ནར་བྱ་བ་ནི་མ་ངེས་སོ། །འདིར་གཞུང་ནི་བཙུན་པ་བཏུང་བ་བརྒྱད་པོ་ཙོ་ཙའི་འབྲས་བུ་ལས་བྱུང་བ་དང༌། ཆུ་ཤིང་གི་འབྲས་བུ་ལས་བྱུང་བ་དང༌། རྒྱ་ཤུག་ལས་བྱུང་བ་དང༌། འབྲ་གོ་ལས་བྱུང་བ་དང༌། རྩུབ་འགྱུར་ལས་བྱུང་བ་དང༌། རྒུན་དང་ཨུ་དུམ་བཱ་ར་ལས་བྱུང་བ་དང༌། ནྱ་གྲོ་དྷ་ལས་བྱུང་བ་དང༌། ཁྱབ་གནས་ལས་བྱུང་བ་གང་དག་ལགས་པ་དེ་དག་རྩ་བའི་ཁུ་བའམ། སྡོང་བུའི་ཁུ་བའམ། འདབ་མའི་ཁུ་བའམ། མེ་ཏོག་གི་ཁུ་བ་དང་བསྲེས་ཤིང་སྦྱར་ན་འཚལ་དུ་རུང་ངམ། གལ་ཏེ་མི་སྐྱུར་བ་དང་མྱོས་བར་མི་འགྱུར་བ་དང༌། མི་བསྐ་བ་དག་ཡིན་ན་བཏུང་དུ་རུང་ངོ༌། །དེ་ལས་ལྷག་པ་ཆུས་བཏབ་པ་དག་ནི་ཞག་བདུན་པའམ། འཚོ་བའི་བར་དུ་བཅང་བ་དག་ཡིན་ནོ་ཞེས་གསུངས་པ་ཡིན་ནོ། །ཐུན་ཚོད་དུ་རུང་བ་ཡང་དེས་མ་གཏོར་བར་བྱའོ་ཞེས་བྱ་བ་ནི། ཐུན་ཚོད་དུ་རུང་བའི་རྫས་
གྲོ་འཇའ་ལ་སོགས་པ་ཡང་ཆུ་གྲང་མོ་དེས་མ་གཏོར་མ་བཏབ་པར་བཏུང་བར་མི་བྱའོ། །མར་སྲུབ་པའི་ཚེ་དང་འབྲུ་མར་འཚོར་བའི་ཚེ་ན་ཡང་ཆུ་གྲང་མོས་གདབ་དགོས་མོད་ཀྱི། འོན་ཀྱང་དེའི་ཚེ་ན་བཏབ་པ་ནི་རུང་མ་བྱས་པ་ཉིད་མ་ཡིན་ཏེ། སྦྱོར་བ་དེ་ནི་མ་གྲུབ་པའི་གནས་སྐབས་ཡིན་པའི་ཕྱིར་རོ། །མར་དང་འབྲུ་མར་དག་ནི་གྲུབ་པ་ལ་རུང་བར་བྱ་བར་བཞེད་དོ། །བུ་རམ་ཡང་མེས་བསྐོལ་བ་ན་ཆུ་གྲང་མོས་གདབ་པར་བྱ་བ་ཡིན་མོད་ཀྱི། དེའི་ཚེ་ཆུས་བཏབ་པ་དེས་རུང་བར་བྱས་པ་ཉིད་དུ་མི་ཆུད་དོ། །ཞག་བདུན་པ་ལ་ནི་མེས་རུང་བར་བྱ་བ་མི་སྲིད་དེ། འདིར་གཞུང་ནི། དེ་ནས་སྤྲེའུ་དེ་ཕྱོགས་གཅིག་ཏུ་སོང་སྟེ། སྤྲང་རྩིའི་ལྷུང་བཟེད་དེ་ཆུ་གྲང་མོས་གཏོར་ནས་བཅོམ་ལྡན་འདས་ལ་ཕུལ་བ་དང༌། བཅོམ་ལྡན་འདས་ཀྱིས་དེ་བཞེས་ཏེ་རུང་བར་བྱས་པའི་ཕྱིར་རོ་ཞེས་གསུངས་པ་ཡིན་ནོ། །དེ་ལྟ་བས་ན་ཐམས་ཅད་དུ་ཡང་ཆུ་ནི་གྲང་མོ་ཉིད་ཡིན་པར་ཁས་བླང་ངོ༌། །ས་བོན་དང་སྐྱེ་བ་འཇིག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།འཕྱ་བའི་ལྟུང་བྱེད་སྨྲ་བར་འདོད་ནས། གང་ཟག་བཅུ་གཉིས་པོ་དག་བྱེད་པ་པོ་ཉིད་ཡིན་ནོ་ཞེས་བྱ་བ་སྨྲས་ཏེ། འཕྱ་བའི་ལྟུང་བྱེད་འདི་ལ་གནས་ཁང་བསྐོ་བ་ལ་སོགས་པ་གང་ཟག་བཅུ་གཉིས་པོ་དག་བྱེད་པ་པོ་དག་ཡིན་ཏེ། དེ་དག་གི་ཡུལ་ལ་འཕྱན་ལྟུང་བྱེད་འབྱུང་བའི་ཕྱིར་རོ། །གང་ཟག་བཅུ་གཉིས་པོ་དག་གང་ཞེ་ན། གནས་ཁང་ཟས་ལ་བསྐོ་བ་གཉིས། །ཐུག་པ་བག་ཆོས་འབྲིམ་པ་གཉིས། །ཕྲན་ཚེགས་འབྲིམ་པར་བྱེད་པ་དང༌། །སྣོད་སྤྱད་འབྲུབ་དང་གོས་ཀྱི་གཉིས། །དབྱར་གྱི་རས་ཆེན་སྤེད་དང་འགེད། །མངག་གཞུག་པ་དང་མཛེས་ཆོས་ཏེ། །གང་ཟག་བཅུ་དང་གཉིས་པོ་དག །སྟོན་པས་ཡང་དག་བཤད་པ་ཡིན། །ཞེས་གསུངས་པ་ཡིན་ཏེ། དེ་དག་ནི་དགེ་འདུན་གྱི་ལས་བྱེད་པ་བསྙེན་པར་རྫོགས་པའི་དཔེ་ཙམ་དུ་ཟད་ཀྱི། འདིར་ཤིང་ཏོག་འབྲིམ་པ་ལ་སོགས་པ་དག་ཀྱང་བསྡུའོ། །མ་བསྐོས་པ་དག་ཀྱང་ངོ་ཞེས་བྱ་བ་ཡང་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །ཀྱང་ངོ་ཞེས་བྱ་བའི་སྒྲས་ནི། བསྐོས་པས་དག་ཀྱང་བྱེད་པ་པོ་ཉིད་ཡིན་པར་བསྡུའོ། །འདི་སྐད་བསྟན་ཏེ། གལ་ཏེ་དགེ་འདུན་གྱི་ལས་བྱེད་པའི་དགེ་སློང་བསྐོས་ཀྱང་རུང་མ་བསྐོས་ཀྱང་རུང་བ་སྟེ། དེ་ལ་འཕྱའམ་གཞོགས་འཕྱས་བྱེད་ན་ལྟུང་བྱེད་དོ། །སྦྱོར་བ་དག་བག་ཡངས་སུ་བྱས་པ་ཡང་ངོ་ཞེས་བྱ་བ་ཡང་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །ཡང་ངོ་ཞེས་བྱ་བའི་སྒྲ་ནི་སྔར་ཀྱང་ངོ་ཞེས་སྨོས་པའི་རྗེས་
བསྙགས་པའི་ཕྱིར་ཏེ། སྦྱོར་བ་དག་བག་ཡངས་སུ་མ་བྱས་པ་ཡང་བྱེད་པ་པོ་ཉིད་ཡིན་པར་བསྡུའོ། །འདི་སྐད་བསྟན་ཏེ། དགེ་འདུན་གྱིས་ལས་ཀྱི་སྦྱོར་བ་བཏང་བ་ཡང་རུང་སྟེ། མ་བཏང་བ་ཡང་རུང་སྟེ། དེ་ལ་འཕྱ་འམ་གཞོགས་འཕྱས་བྱེད་ན་ལྟུང་བྱེད་དོ། །འདིར་མདོ་དེ་གཉིས་ཀྱི་གཞུང་ནི་མདོ་སྔ་མ་ནི་གང་ཟག་བཅུ་གཉིས་སུ་མ་བསྐོས་པ་སྦྱོར་བ་མ་བཏང་བ་དག་ལ་འཕྱ་བ་དང་གཞོགས་འཕྱས་བྱེད་ན་ལྟུང་བྱེད་དོ་ཞེས་གསུངས་པ་ཡིན་པའི་ཕྱིར་རོ། །མདོ་འོག་མ་ཤོས་ཀྱི་ནི་བསྐོས་པ་སྦྱོར་བ་བཏང་བ་དག་ལ་འཕྱ་བ་དང༌། གཞོགས་འཕྱས་བྱེད་ན་ལྟུང་བྱེད་དོ་ཞེས་གསུངས་པ་ཡིན་ནོ། །ཅི་ཞིག་རྗེས་སུ་སྒྲུབ་ན་དེ་དག་བྱེད་པ་པོ་ཉིད་ཡིན་ཞེ་ན། དེའི་ཕྱིར་བདག་དང་འབྲེལ་པའི་དོན་གྱིས་ཐོས་པར་འཕྱ་འང་རུང་ཟུར་གྱིས་གཞོགས་འཕྱས་བྱེད་ཀྱང་རུང་ངོ་ཞེས་བྱ་བ་སྨྲས་ཏེ། རུང་ངོ་ཞེས་བྱ་བའི་སྒྲས་ཁ་གཉིས་སུ་སྨོས་པ་ནི་ཕྱོགས་དེ་གཉིས་གང་བྱས་ཀྱང་རུང་ངོ་ཞེས་བསྟན་པའི་ཕྱིར་རོ། །བདག་དང་འབྲེལ་པའི་དོན་གྱིས་ཞེས་བྱ་བ་ནི། བདག་ཉིད་ཀྱི་དགོས་པས་འཕྱ་འམ་གཞོགས་འཕྱས་བྱེད་པའོ། །འདིར་གཞུང་ནི་གཞན་གྱི་དོན་དུ་འཕྱ་འམ། གཞོགས་འཕྱས་བྱེད་ན་ཉེས་བྱས་སོ་ཞེས་གསུངས་པ་ཡིན་ནོ། །ཐོས་པར་ཞེས་བྱ་བ་ནི། ཅི་ནས་ཀྱང་དཔྱས་བྱ་བའི་དགེ་སློང་གིས་མངོན་སུམ་དུ་ཐོས་པར་འགྱུར་བ་དེ་ལྟར་འཕྱ་འམ་གཞོགས་འཕྱས་བྱེད་པའོ། །འཕྱ་ཞེས་བྱ་བ་ནི། མིང་ནས་འབྱིན་ཅིང་ཐོས་པར་དོར་འཕྱ་བའི་རང་བཞིན་གོ་བར་བྱེད་པའོ། །ཟུར་གྱིས་ཞེས་བྱ་བ་ནི། གང་ལ་དཔྱས་བྱ་བ་དེའི་མིང་ནས་མི་འབྱིན་པར་འཕྱ་བ་སྟེ། ཁ་ཅིག་འདི་ལྟར་བྱེད་དོ་ཞེས་ཟེར་བའོ། །གཞོགས་འཕྱས་ཞེས་བྱ་བ་ནི་མིང་ནས་མི་འབྱིན་པར་གཞན་ལ་བརྗོད་པའི་ཚུལ་གྱིས་ཐོས་པར་འཕྱ་བའི་རང་བཞིན་གོ་བར་བྱེད་པའོ། །འཕྱ་བ་དང་གཞོགས་འཕྱས་བྱེད་པ་དེ་གཉིས་ཀྱང་གལ་ཏེ་བསྐུར་བར་གྱུར་པ་ཡིན་ན། དེའི་ཚེ་ཁ་ན་མ་ཐོ་བ་འདིར་འགྱུར་གྱི་བདེན་པ་ཡིན་ན་ནི་མི་འགྱུར་རོ། །བདག་དང་འབྲེལ་པའི་དོན་གྱིས་ཞེས་བྱ་བ་དང༌། ཐོས་པར་ཞེས་བྱ་བའི་ཚིག་ནི་འཕྱ་བ་དང༌། གཞོགས་འཕྱས་བྱེད་པའི་ཕྱོགས་གཉི་ག་དང་སྦྱར་བར་རིག་པར་བྱའོ། །འདིར་གཞུང་ནི་མཛའ་བོ་དང་ས་ལས་སྐྱེས་གཉིས་ཚེ་དང་ལྡན་པ་ཉེ་དགའ་དང་ལྷན་ཅིག་འདུ་འཛིའི་གཏམ་གྱི་ཕྱིར་འཁོད་པ་དང༌། ཚེ་དང་ལྡན་པ་གྱད་བུ་ནོར་ཕྱོགས་དེར་འོངས་པ་དང་ཞེས་གསུངས་པ་ཡིན་ནོ། །བགྲངས་པ་ལ་ནི་
དངོས་གཞིའོ་ཞེས་བྱ་བ་ལ། བགྲངས་པ་ཞེས་བྱ་བ་ནི་ལྟུང་བ་འབྱིན་པར་བྱེད་པ་དེ་དགེ་འདུན་གྱིས་གསོལ་བའི་ལས་ཀྱིས་འཕྱ་བ་དང༌། གཞོགས་འཕྱས་བྱེད་པའི་གྲངས་སུ་བགྲངས་པ་སྟེ། གལ་ཏེ་དེ་ལྟར་བགྲངས་ཀྱང་ཡང་འཕྱ་བ་དང༌། གཞོགས་འཕྱས་བྱེད་ན་གང་ཟག་རྣམ་པ་དེ་ལྟ་བུ་ལ་གང་ཟག་བཅུ་གཉིས་པོ་དེ་དག་དངོས་གཞིའི་ཁ་ན་མ་ཐོ་བའི་བྱེད་པ་པོ་ཉིད་ཡིན་ནོ། །མ་བགྲངས་པ་ལ་ནི་ཉེས་བྱས་ཀྱིའོ་ཞེས་བྱ་བའི་ཐ་ཚིག་གོ །ཅུང་ཟད་ཙམ་ཡང་དང་དུ་ལེན་པར་མི་ནུས་པ་ལ་ནི་བརྗོད་པར་མི་བྱའོ་ཞེས་བྱ་བ་ནི། ཅུང་ཟད་ཙམ་ཡང་དང་དུ་ལེན་པར་མི་ནུས་པའི་གང་ཟག་ལ་བསྐུལ་བ་དང་དྲན་པར་བྱ་བ་ལ་སོགས་པ་མངོན་སུམ་དུ་བརྗོད་པར་མི་བྱ་བའི་ཐ་ཚིག་གོ །འདི་སྐད་བསྟན་ཏེ། ཅུང་ཟད་ཙམ་ཡང་དང་དུ་ལེན་པར་མི་ནུས་པ་ལས་བསྐུལ་བ་དང༌། དྲན་པ་བྱ་བ་ལ་སོགས་པ་མངོན་སུམ་དུ་ཅུང་ཟད་ཀྱང་བརྗོད་པར་མི་བྱའོ། །ངོར་འཕྱ་བ་དང་གཞོགས་འཕྱས་བྱེད་པ་གཉིས་ལས་གཞན་པའི་བརྗོད་པ་གང་ཡིན་པ་དེ་འདིར་བསྡུས་པ་ཡིན་ནོ། །ཞེ་སྡང་བར་གྱུར་པ་དེ་རང་གིས་ལས་སུ་བསྐོ་བར་མི་བྱའོ་ཞེས་བྱ་བ་ནི། ཅུང་ཟད་ཙམ་ཡང་དང་དུ་ལེན་པར་མི་ནུས་པའི་གང་ཟག་གང་ཡིན་པ་དེ། ཞེ་སྡང་བར་གྱུར་ཅིང་མི་དགའ་བར་གྱུར་ན། ཞེ་སྡང་བར་གྱུར་པ་དེ་དགེ་འདུན་གྱི་ལས་བྱེད་པའི་དགེ་སློང་རང་གིས་དགེ་འདུན་གྱི་ལས་སུ་བསྐོ་བར་མི་བྱ་སྟེ། བརྒྱུད་པས་ནི་བསྐོ་བར་བྱའོ། །འཕྱ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བམ་པོ་ཉི་ཤུ་རྩ་བཞི་པ། བསྒོ་བ་རྣ་ལ་གཟོན་པའི་ལྟུང་བྱེད་སྨྲ་བར་འདོད་ནས། ཞར་ལ་འདི་བརྗོད་པར་བྱ་སྟེ། གླེང་བར་གཏོགས་པའི་བསྒོ་བ་ཚིག་གིས་རྣལ་གཟོན་པ་དང༌། ཅང་མི་སྨྲ་བས་རྣ་ལ་གཟོན་པ་དང༌། གང་ཟག་བསྟན་པ་རྣམས་ལ་ངོར་འཕྱ་བ་དང་ཟུར་གྱིས་གཞོགས་འཕྱས་བྱེད་པ་གསོལ་བས་མི་བགྲང་བར་མི་བྱའོ་ཞེས་བྱ་བ་ནི། གླེང་བར་གཏོགས་པའི་བསྒོ་བ་ཚིག་གིས་རྣ་ལ་གཟོན་པ་དང༌། ཅང་མི་སྨྲ་བས་རྣ་ལ་གཟོན་པ་དང༌། གང་ཟག་བསྟན་པ་རྣམས་ལ་ངོར་འཕྱ་བ་དང༌། ཟུར་གྱིས་གཞོགས་འཕྱས་བྱེད་པ་ཞེས་བྱ་བར་ཚིག་རྣམ་པར་སྦྱར་ཏེ། དེ་དག་ལ་གསོལ་བའི་ལས་ཀྱིས་མི་བགྲང་བར་མི་བྱ་ཞིང་བགྲང་བར་བྱའོ་ཞེས་བྱ་བའི་ཐ་ཚིག་གོ །གླེང་བར་གཏོགས་པའི་བསྒོ་བ་ཚིག་གིས་རྣ་ལ་གཟོན་པ་ཞེས་བྱ་བ་ལ་སོགས་པ་བཞིའི་ཚིག་གི་དོན་བཤད་པ་བརྗོད་
པར་བྱ་སྟེ། གླེང་བར་གཏོགས་པའི་བསྒོ་བ་ཚིག་གིས་རྣ་ལ་གཟོན་པ་ཞེས་བྱ་བ་ལ། གླེང་བར་གཏོགས་པའི་ཞེས་བྱ་བ་ནི་གླེང་བ་དང་འབྲེལ་པ་གླིང་བའི་རྣམ་པའོ། །དེའི་བསྒོ་བ་ཞེས་བྱ་བ་ནི་གླེང་བར་གཏོགས་པ་བསྒོ་བའི་ཚིག་སྟེ། གླེང་བ་པོས་དྲིས་པའི་ཚིག་གང་ཡིན་པའོ། །བསྒོ་བ་དེ་རྣ་ལ་གཟོན་པ་རྣམ་པ་གཉིས་ཏེ། ཚིག་གིས་རྣ་ལ་གཟོན་པ་དང༌། ཅང་མི་སྨྲ་བས་རྣ་ལ་གཟོན་པའོ། །དེ་ལ་ཚིག་གིས་རྣ་ལ་གཟོན་པ་ནི་ཚིག་མི་མཐུན་པས་རྣ་ལ་གཟོན་པ་སྟེ། གླེང་བ་པོས་གླེང་བར་བྱ་བའི་གང་ཟག་གིས་གླེང་བར་གཏོགས་པའི་བསྒོ་བ་རྣ་ལ་གཟོན་པའི་ཚིག་གང་ཡིན་པའོ། །ཅང་མི་སྨྲ་བས་རྣ་ལ་གཟོན་པ་ནི། ཅང་མི་སྨྲ་བས་རྣ་ལ་གཟོན་པ་ཞེས་བྱ་བས་བསྟན་ཏོ། །གང་ཟག་བསྟན་པ་རྣམས་ལ་ངོར་འཕྱ་བ་ཞེས་བྱ་བ་ནི། གང་ཟག་བཅུ་གཉིས་སྔར་བསྟན་པ་རྣམས་ལ་ངོར་འཕྱ་བའོ། །ཟུར་གྱིས་གཞོགས་འཕྱས་བྱེད་པ་ཞེས་བྱ་བ་ནི། གང་ཟག་བཅུ་གཉིས་པོ་དེ་དག་ཉིད་ལ་ཟུར་གྱིས་གཞོགས་འཕྱས་བྱེད་པའོ། །གསོལ་བས་མི་བགྲང་བར་མི་བྱའོ་ཞེས་བྱ་བ་ནི། གང་ཟག་བཞི་པོ་དེ་དག་གསོལ་བ་སྔོན་དུ་བཏང་བའི་ལས་ཀྱིས་བསྒོ་བ་ཚིག་གིས་རྣ་ལ་གཟོན་པ་ཉིད་དང༌། ཅང་མི་སྨྲ་བས་རྣ་ལ་གཟོན་པ་ཉིད་དང༌། ངོར་འཕྱ་བ་ཉིད་དང༌། ཟུར་གྱིས་གཞོགས་འཕྱས་བྱེད་པ་ཉིད་དུ་གོ་རིམས་བཞིན་དུ་བགྲང་བར་བྱ་སྟེ། བགྲང་བ་ཞེས་བྱ་བ་ནི། ངེད་ཀྱིས་ཁྱོད་ཀྱི་སྤྱོད་པ་དམ་པ་མ་ཡིན་པ་འདི་འདྲ་བ་ཤེས་ཏེ། ཁྱོད་གང་ཟག་སྤྱོད་པ་དམ་པ་མ་ཡིན་པ་དང་ལྡན་པ་དེ་ལྟ་བུ་དག་གི་ནང་དུ་བཅུག་གོ་ཞེས་ཁྲེལ་མེད་པ་རྣམ་པ་དེ་ལྟ་བུ་ཉིད་ཀྱི་གྲངས་སུ་དེ་དག་བགྲང་བའོ། །ཇི་ཞིག་བྱས་ན་བསྒོ་བ་རྣ་ལ་གཟོན་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར་དགེ་སློང་གིས་བསྒོ་བ་རྣ་ལ་གཟོན་ནའོ་ཞེས་བྱ་བ་སྨྲས་ཏེ། དགེ་སློང་རྣམས་ཀྱིས་བསྒོ་བ་དེ་རྣ་ལ་གཟོན་ནའོ། །བསམ་པ་ཇི་ལྟ་བུས་ཤེ་ན། དེའི་ཕྱིར་དེར་འདུན་པས་སོ་ཞེས་བྱ་བ་སྨྲས་ཏེ། རྣ་ལ་གཟོན་པར་འདུན་པས་སོ། །ཇི་ལྟར་ཞེ་ན། དེའི་ཕྱིར་གཞན་བརྗོད་པས་སོ་ཞེས་བྱ་བ་སྨྲས་ཏེ། དགེ་སློང་གིས་བསྒོ་བ་ནི། དགེ་སློང་གིས་དྲི་བ་ལས་གཞན་པ་མི་མཐུན་པ་ལོག་པ་བརྗོད་པ་གང་ཡིན་པ་དེས་རྣ་ལ་གཟོན་ནའོ། །དེ་ལྟར་ཡང་འདིར་གཞུང་ནི་རྣམ་པར་འབྱེད་པ་ལས་དགེ་སློང་གིས་ཇི་ཙམ་དུ་གཞན་འདྲི་བ་ལ་ལན་གཞན་འདེབས་ན་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་
ནོ། །འདིས་ལོག་པར་སྨྲས་སོ་ཞེས་གོ་ན་ཁ་ན་མ་ཐོ་བ་འདིར་འགྱུར་ཏེ་དེ་ལྟར་ཡང་གཞུང་ནི་ཞུ་བ་ལས་དབུས་པའི་ཚིག་གིས་མཐའ་འཁོབ་པ་ལ་འམ། མཐའ་འཁོབ་པའི་ཚིག་གིས་དབུས་པ་ལ་གཞན་དང་གཞན་དུ་བརྗོད་ན་ཉེས་བྱས་སོ་ཞེས་གསུངས་པ་ཡིན་ནོ། །ཅང་མི་སྨྲ་བས་ན་ཉེས་བྱས་སོ་ཞེས་བྱ་བ་ནི། ཅང་མི་སྨྲ་བས་དགེ་སློང་གིས་བསྒོ་བ་རྣ་ལ་གཟོན་ན་ནི་ཉེས་བྱས་སོ། །མི་དྲན་ནོ་ཞེ་ན། ཡང་ངོ་ཞེས་བྱ་བ་ནི། དགེ་སློང་གིས་བསྒོ་བ་རྣ་ལ་གཟོན་ན་ཉེས་བྱས་སོ། །འདིར་གཞུང་ནི་ཞུ་བ་ཁ་ཅིག་ལས་མི་དྲན་ནོ་ཞེས་ཟེར་ན་ཉེས་བྱས་སོ་ཞེས་གསུངས་པ་ཡིན་ནོ། །གལ་ཏེ་བརྗོད་པར་བྱ་བ་སྡུག་བསྔལ་བར་འགྱུར་བ་ཡིན་ན་མེད་དོ་ཞེས་བྱ་བ་ནི། གལ་ཏེ་བརྗོད་པར་བྱ་བ་སྨྲ་བར་བྱ་བའི་གཞན་ལ་སྡུག་བསྔལ་བར་འགྱུར་བའི་རྒྱུ་ཡིན་ན་གཞན་བརྗོད་ཀྱང་ལྟུང་བ་མེད་དོ། །དེའི་ཕྱིར་གསད་པར་བྱ་བ་མཐོང་ངམ་ཞེས་འདྲི་བ་ལ་རེ་ཞིག་མེ་འདེ་ཤིག །རེ་ཞིག་སྐོམ་འཐུང་ཤིག །རེ་ཞིག་ངལ་སོ་ཤིག་ནམ་མཁའ་མཐོང་ངོ༌།། སེན་མོ་མཐང་ངོ༌། །དོན་དམ་པར་ན་སེམས་ཅན་ནམ་གསད་པར་བྱ་བ་མ་མཐོང་ངོ་ཞེས་སྨྲས་ན་ལྟུང་བ་མེད་དོ་ཞེས་བྱ་བ་འདིས་ནི་བརྗོད་པར་བྱ་བ་སྡུག་བསྔལ་བར་འགྱུར་བ་སྟོན་ཏོ། །གསད་པར་བྱ་བ་མཐོང་བ་ནི་གསད་པར་བྱ་བ་མཐོང་བ་སྟེ། དེ་མཐོང་ངམ་ཞེས་འདྲི་བའམ་ཞེས་བྱ་བ་ནི། གལ་ཏེ་གསད་པར་བྱ་བའི་གཤེད་མ་དག་དགེ་སློང་ལ་འདི་སྐད་ཅེས་ཁྱོད་ཀྱིས་གསད་པར་བྱ་བ་མཐོང་ངམ་ཞེས་འདྲི་བའོ། །དེ་ལ་དགེ་སློང་གིས་མཐོང་བཞིན་དུ་འདི་སྐད་ཅེས། རེ་ཞིག་མེ་འདེ་ཤིག་ཅེས་བྱ་བ་ལ་སོགས་པ་གཞན་བརྗོད་པར་བྱའོ། །དོན་དམ་པར་ན་སེམས་ཅན་ནམ་གསད་པར་བྱ་བ་མ་མཐོང་ངོ་ཞེས་བྱ་བ་ནི། མུ་སྟེགས་ཅན་གྱིས་ཀུན་བརྟགས་པའི་སེམས་ཅན་མ་མཐོང་བ་སྟེ། བསམ་པ་དེ་ལྟར་བྱས་ནས་རྣམ་པ་དེ་ལྟ་བུ་མ་མཐོང་ངོ་ཞེས་སྨྲས་ན་ལྟུང་བ་མེད་དོ། །གང་དུ་ཆེ་བཞི་ཉིད་བྱ་དགོས་པར་འགྱུར་བའི་གནས་དེར་བསྟེན་པར་མི་བྱའོ་ཞེས་བྱ་བ་ནི། ཕྱོགས་གང་དུ་ཆེ་བཞི་ཉིད་བྱ་དགོས་པར་འགྱུར་བ་ཞལ་ཆེ་དཔང་དུ་གསོལ་ལོ་ཞེས་ཟེར་བར་འགྱུར་བའམ། རྣ་ལ་འཛིན་པར་འགྱུར་བའི་གནས་དེར་བསྟེན་པར་མི་བྱའོ། །དེ་ལྟར་ཡང་འདིར་གཞུང་ནི་དེ་ལྟ་བས་ན་དགེ་སློང་འཐབ་མོའི་ནང་དུ་གནས་པར་མི་བྱ་ཞིང་ཆེ་བཞི་དབྱེ་བར་མི་བྱ་སྟེ། ཐག་རིང་པོ་ཁོ་ནར་བྱོལ་བར་བྱའོ། །དགེ་སློང་འཐབ་མོའི་ནང་དུ་གནས་སམ་ཆེ་བཞི་
འབྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གནོད་པའི་སྒོ་མ་བཅད་པས་ཆེ་བཞི་དབྱེ་བར་མི་བྱའོ་ཞེས་བྱ་བ་ནི། གང་གིས་ཆད་པ་ལ་སོགས་པ་གནོད་པའི་སྒོ་མ་བཅད་པ་དེ་ནི་གནོད་པའི་སྒོ་མ་བཅད་པའི་དགེ་སློང་སྟེ། དེས་ཆེ་བཞི་དབྱེ་བར་མི་བྱའོ། །འདི་སྐད་བསྟན་ཏེ། ཆེ་བཞི་ཕྱེ་བ་ལས་གཞན་གསད་པ་དང་བཅིང་བ་ལ་སོགས་པའི་གནོད་པ་འབྱུང་དུ་དོགས་པ་གང་ཡིན་པའི་གནོད་པ་དེའི་སྒོ་དང་སྲང་དང་རྒྱུར་གྱུར་པ་སྒོ་གང་ནས་གནོད་པ་དེ་འབྱུང་བར་འགྱུར་བའི་སྒོ་དེ་གཅད་པ་མ་བྱས་པར་ཆེ་བཞི་དབྱེ་བར་མི་བྱའོ། །བསྒོ་བ་རྣ་ལ་གཟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གནས་མལ་གྱི་ལྟུང་བྱེད་སྨྲ་བར་འདོད་ནས། ཁྲི་དང་ཁྲིའུ་དང༌། སྟན་ནང་ཚངས་ཅན་དང༌། ལ་བ་དང༌། སྔས་དང༌། གོར་བུ་ཞེས་བྱ་བ་ནི་གནས་མལ་ལོ་ཞེས་བྱ་བ་སྨྲས་ཏེ། ཁྲི་ཞེས་བྱ་བ་ནི་མལ་ཁྲི་ལ་སོགས་པའོ། །ཁྲིའུ་ཞེས་བྱ་བ་ནི་རྐང་རྟེན་གྱི་ཁྲིའུ་ལ་སོགས་པའོ། །སྟན་ནང་ཚངས་ཅན་ཞེས་བྱ་བ་ནི་རས་བལ་ལ་སོགས་པས་བརྫངས་པའོ། །ལ་བ་ཞེས་བྱ་བ་ནི་བལ་ལས་བྱས་པའི་གོས་སྤུ་དང་བཅས་པའོ། །སྔས་ཞེས་བྱ་བ་ནི་སྔས་ནང་ཚངས་ཅན་ལ་སོགས་པའོ། །གོར་བུ་ཞེས་བྱ་བ་ནི་སྟན་ཟླུམ་པོ་ལ་སོགས་པའོ། །ཁྲི་ལ་སོགས་པ་སྨོས་པ་ནི་མཚོན་པ་ཙམ་དུ་ཟད་དེ། དྲེའུ་རྡོག་དང༌། དབྱམ་པོ་དང༌། བེའུ་རས་ལ་སོགས་པ་གནས་མལ་གྱི་ཡན་ལག་ཏུ་གཏོགས་པ་ཐམས་ཅད་ཀྱང་བསྡུ་སྟེ། དེ་དག་ནི་གནས་མལ་ལོ། །འདོམ་བཞི་བཅུ་རྩ་དགུ་ཚུན་ཆད་ནི་དེའི་ཉེན་ཀོར་རོ་ཞེས་བྱ་བ་ནི། གནས་མལ་འདུག་པའི་ཕྱོགས་ནས་བརྩམས་ཏེ། འདོམ་བཞི་བཅུ་རྩ་དགུ་ཚུན་ཆད་ནི་དེའི་གནས་མལ་ཉེན་ཀོར་ཡིན་ནོ། །བསྐོར་བ་ལ་ནི་སྒོ་ཁང་ནས་སོ་ཞེས་བྱ་བ་ནི། གཙུག་ལག་ཁང་དང་ཁང་ཁྱིམ་རྩིག་པ་ལ་སོགས་པས་བསྐོར་བ་ལ་ནི་སྒོ་ཁང་ནས་བརྩམས་ནས་འདོམ་བཞི་བཅུ་རྩ་དགུ་ཚུན་ཆད་དེའི་ཉེན་ཀོར་ཡིན་ནོ། །འདིར་གཞུང་ནི་མ་མོ་ལས་དགེ་སློང་ཕྱི་རོལ་བླ་གབ་མེད་པར་གནས་མལ་བཤམས་ནས་སྒོ་ཁང་གི་ཕྱི་རོལ་ནས་འདོམ་བཞི་བཅུ་རྩ་དགུ་ཕན་ཆད་དུ་འགྲོ་བར་མི་བྱའོ། །གལ་ཏེ་འགྲོ་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དེ་ལས་འདའ་བའི་ཕྱིར་བརྗེད་པས་ཀྱང་འགྲོ་བ་དང་ནང་དུ་གཉིད་ལོག་པ་དང་སྙོམས་པར་ཞུགས་པ་ལ་སོགས་པས་ནི་ལྐོག་ཏུ་
གྱུར་པ་ཡིན་ནོ་ཞེས་བྱ་བ་ནི། ལྟུང་པའི་རྒྱུར་གྱུར་པ་གནས་མལ་དེ་ལས་འདའ་བའི་ཕྱིར་ཞེས་བྱ་བ་ཡོངས་སུ་བཏང་བའི་ཕྱིར། བརྗེད་པས་ཀྱང་རུང་མ་བརྗེད་པར་བློ་སྔོན་དུ་བཏང་བས་ཀྱང་རུང་སྟེ། གནས་གཞན་དུ་འཕགས་ཤིང་འགྲོ་བ་གང་ཡིན་པ་དང༌། ནང་དུ་ཞེས་བྱ་བ་གནས་མལ་གྱི་གནས་དེའི་ནང་ཉིད་དུ་གཉིད་ལོག་པ་དང༌། སྙོམས་པར་ཞུགས་པ་ལ་སོགས་པས་ནི་ལྐོག་ཏུ་གྱུར་པ་ཡིན་ནོ། །ཁ་ན་མ་ཐོ་བ་འདིའི་རྒྱུར་གྱུར་པ་ལྐོག་ཏུ་གྱུར་པ་ནི་རྣམ་པ་གཉིས་ཏེ། ལྐོག་ཏུ་གྱུར་པ་རྣམ་པ་གཉིས་དང༌། གོ་རིམས་བཞིན་དུ་འདིར་གཞུང་ནི་གལ་ཏེ་ལམ་ཁར་བདག་གིས་དགེ་འདུན་གྱི་གནས་མལ་ཕྱོགས་འདི་ལྟ་བུ་ཞིག་ཏུ་གཞག་གོ་སྙམ་དུ་དྲན་ཞིང་ཞེས་བྱ་བ་ནས་ལྟུང་བ་དེ་ཡང་ཆོས་བཞིན་དུ་ཕྱིར་བྱའོ་ཞེས་བྱ་བའི་བར་དུ་གསུངས་པ་དང༌། བླ་གབ་མེད་པར་བཏིང་ངམ་འདིང་དུ་བཅུག་པ་ལས་མ་བརྟུལ་ལམ་བརྟུལ་དུ་མ་བཅུག་པར་གཙུག་ལག་ཁང་དུ་ཞུགས་ཏེ། གཉིད་ལོག་གམ་སྙོམས་པར་ཞུགས་ན་ཞེས་གསུངས་པ་ཡིན་ནོ། །སྤྱིའི་ཚིག་ཀྱང་ཡོད་དེ་བླ་གབ་མེད་པར་གནས་མལ་བཞག་སྟེ་ཞེས་བྱ་བ་ནས་གཙུག་ལག་ཁང་དུ་འཇུག་ཅིང་ཕན་ཕུན་དུ་གྱུར་ན་ལྟུང་བྱེད་དོ་ཞེས་བྱ་བའི་བར་དུ་གསུངས་པ་ཡིན་ནོ། །སོགས་པ་ཞེས་བྱ་བའི་སྒྲས་ནི་ཕན་ཕུན་གཞན་ཡང་བསྡུ་བར་རིག་པར་བྱའོ། །གནས་སྐབས་གང་ལ་ཁ་ན་མ་ཐོ་བ་གང་དུ་འགྱུར་ཞེ་ན། དེའི་ཕྱིར་ཕན་ཕུན་གྱི་མདུན་རོལ་དུ་ནི་སྦྱོར་བའོ་ཞེས་བྱ་བ་སྨྲས་ཏེ། གནས་མལ་དེ་ཕན་ཕུན་དུ་གྱུར་པའི་མདུན་རོལ་དུ་ཕན་ཕུན་དུ་མ་གྱུར་པའི་གནས་སྐབས་སུ་སྦྱོར་བའི་ཁ་ན་མ་ཐོ་བར་འགྱུར་རོ། །ཕན་ཕུན་དུ་གྱུར་པ་དང་འདས་པ་དེ་ལ་ནི་མཐའོ་ཞེས་བྱ་བ་ནི། གནས་མལ་ཕན་ཕུན་དུ་གྱུར་པ་དང༌། མཚམས་ལས་འདས་པ་ལ་ནི་མཐའ་སྟེ། དངོས་གཞིའི་ཁ་ན་མ་ཐོ་བར་འགྱུར་རོ་ཞེས་བྱ་བའི་ཐ་ཚིག་གོ །ལྐོག་ཏུ་གྱུར་པ་ཞེས་བྱ་བའི་འགྲོ་བ་དང༌། མཚམས་མ་འདས་སུ་ཟིན་ཀྱང་གནས་མལ་ཕན་ཕུན་དུ་གྱུར་པ་དེ་ལྟ་ན་ཡང་དངོས་གཞིའི་ཁ་ན་མ་ཐོ་བ་ཁོ་ནར་འགྱུར་ཏེ། གནས་མལ་གྱི་མཚམས་ལས་འདས་ན་ཕན་ཕུན་དུ་མ་གྱུར་ཀྱང་མཚམས་ལས་འདས་པ་ཁོ་ན་དངོས་གཞིའི་ཁ་ན་མཐོ་བ་ཁོ་ནར་འགྱུར་རོ། །མཚམས་ལས་མ་འདས་ཀྱང་ཕན་ཕུན་དུ་གྱུར་ན་ཡང་དངོས་གཞིའི་ཁ་ན་མ་ཐོ་བར་འགྱུར་རོ། །མཚམས་ལས་
ཀྱང་འདས་པ་ལ་ཕན་ཕུན་དུ་གྱུར་ན་ཡང་དངོས་གཞི་ཁོ་ནའོ། །མཚམས་ཀྱི་ནང་དུ་ཞུགས་ལ་ཕན་ཕུན་དུ་མ་གྱུར་ན་ནི་ཉེས་བྱས་སུ་འགྱུར་རོ། །བརྟུལ་བ་བྱས་སམ་བྱེད་དུ་བཅུག་པ་ལ་དེ་དག་མི་འབྱུང་ངོ་ཞེས་བྱ་བ་ནི། གནས་མལ་བརྟུལ་བ་རང་གིས་བྱས་སམ་གཞན་བྱེད་དུ་བཅུག་པ་ལ་ནི་སྦྱོར་བ་དང་མཐའ་དེ་དག་མི་འབྱུང་ངོ༌། །བཅོལ་བའི་དགེ་སློང་ཡོད་པ་ལ་ཡང་མི་འབྱུང་ངོ་ཞེས་བྱ་བ་ནི། གང་གིས་བླ་ག་བ་མེད་པར་གནས་མལ་བཏིང་ངམ་འདིང་དུ་བཅུག་པའི་མཚན་ཉིད་ཀྱི་ཕྱིར་དག་སློང་ལ་བཅོལ་བ་ཡོད་པ་དེ་ནི་བཅོལ་བའི་དགེ་སློང་ཡོད་པ་སྟེ། བཅོལ་བའི་དགེ་སློང་ཡོད་པའི་དགེ་སློང་དེ་ལ་ཡང་སྦྱོར་བ་དང་མཐའ་དེ་དག་མི་འབྱུང་ངོ༌། །ཉམ་ང་བ་དང་ཕྲད་པ་ལ་ཡང་མི་འབྱུང་ངོ་ཞེས་བྱ་བ་ནི། ཚུལ་ཁྲིམས་དང་སྲོག་གི་བར་ཆད་ལ་སོགས་པའི་ཉམ་ང་བ་དང་ཕྲད་པ་ལ་ཡང་སྦྱོར་བ་དང་མཐའ་དེ་དག་མི་འབྱུང་ངོ༌། །སྤྱོད་པ་ནི་བྱེད་པ་དང་འདྲའོ་ཞེས་བྱ་བ་ནི། གཞན་གྱི་གནས་མལ་བླག་བ་མེད་པར་བཏིང་བ་ལ་སྤྱོད་པ་གང་ཡིན་པ་དེ་འགྲོ་བ་ནི་རང་གིས་གདིང་བར་བྱེད་པ་དང་འདྲའོ། །འདི་སྐད་བསྟན་ཏེ། ཇི་ལྟར་རང་གིས་བླ་གབ་མེད་པར་གནས་མལ་བཏིང་བ་བཅོལ་བའི་དགེ་སློང་མེད་པར་འགྲོ་བ་ལ་ཁ་ན་མ་ཐོ་བར་འདིར་འགྱུར་བ་དེ་བཞིན་དུ་གཞན་གྱིས་བཏིང་བ་ལ་ལོངས་སྤྱོད་སྤྱོད་པ། བཅོལ་བའི་དགེ་སློང་མེད་པར་འགྲོ་བ་ལ་ཡང་ཁ་ན་མ་ཐོ་བ་འདིར་འགྱུར་ཏེ། དེ་ལྟ་བས་ན་གཞན་གྱིས་བྱེད་དུ་བཅུག་པ་ལ་ལོངས་སྤྱོད་པ་ཡང་རང་གིས་བྱས་པ་དང༌། ཁ་ན་མ་ཐོ་བ་འདྲའོ། །གཉི་གཅིག་ཅར་སྤྱོད་སྤྱོད་པ་ལ་ནི་ཕྱིས་ལངས་པར་བྱ་བ་དང་ལྡན་པ་ཡིན་ནོ་ཞེས་བྱ་བ་ནི། གནས་མལ་བརྟུལ་བའོ་ཞེས་བྱ་བར་སྦྱར་ཏེ། དགེ་སློང་གཉིས་ཁྲི་ལ་སོགས་པ་གནས་མལ་ལ་ཅིག་ཅར་སྤྱོད་སྤྱོད་པ་ལ་ནི་གང་ཕྱིས་ལངས་པའི་ངང་ཚུལ་ཅན་དེ་ནི་ཕྱིས་ལངས་པ་སྟེ། དགེ་སློང་གང་ཕྱིས་ལངས་པ་དེས་གནས་མལ་དེ་བརྟུལ་བར་བྱ་བ་དང་ལྡན་པ་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་གཉིས་ཅིག་ཅར་གནས་མལ་གཅིག་ལ་འཁོད་འཁོད་བར་གྱུར་ན། གང་ཕྱིས་ལངས་པ་ཤོས་དེས་གནས་མལ་དེ་བླ་གབ་མེད་པ་ནས་བརྟུལ་བར་བྱ་བ་ཡིན་ནོ། །གལ་ཏེ་མཉམ་དུ་ན་གཞོན་པས་སོ་ཞེས་བྱ་བས་ནི། གལ་ཏེ་གཉི་ག་མཉམ་དུ་ལངས་པར་གྱུར་ན་གཞོན་པ་ཤོས་ཀྱིས་གནས་མལ་
བརྟུལ་བར་བྱའོ། །མཉམ་པ་ཉིད་ཡིན་ན་གཉི་གས་སོ་ཞེས་བྱ་བ་ནི། ལོ་གྲངས་མཉམ་པ་ཉིད་ཡིན་ན་གཉི་གས་གནས་མལ་བརྟུལ་བར་བྱའོ། །འདི་སྐད་བསྟན་ཏེ། གལ་ཏེ་གཉི་ག་ལོའི་མགོ་མཉམ་པ་ཉིད་ཡིན་ན། གཉི་ག་ཁོ་ནས་གནས་མལ་བརྟུལ་བར་བྱའོ། །བཅོལ་ཏེ་འགྲོ་བར་བྱའོ་ཞེས་བྱ་བ་སྨྲས་ན་བཅོལ་པའི་ཡུལ་གྱི་རང་གི་ངོ་བོ་ཉིད་བསྟན་པའི་ཕྱིར། ངོ་ཚ་མེད་པ་དང་ནང་དང་བཅས་པ་དང་རྒས་པ་དང་ན་བ་དང༌། བསྙེན་པར་མ་རྫོགས་པ་རྣམས་ལ་ནི་འདི་བཅོལ་བར་བྱ་བ་མ་ཡིན་པ་ཉིད་དོ་ཞེས་བྱ་བ་སྨྲས་ཏེ། ངོ་ཚ་མེད་པ་ཞེས་བྱ་བ་ནི་ཚུལ་ཁྲིམས་ལ་གཡེམ་པ་ཡིན་པར་རིག་པར་བྱའོ། །ནང་དང་བཅས་པ་ཞེས་བྱ་བ་ནི་ཞེ་འགྲས་པའོ། །རྒས་པ་ཞེས་བྱ་བ་ནི་རྒས་པས་ཉམ་ཆུང་བའོ། །ན་བ་ཞེས་བྱ་བ་ནི། སྦྱོར་མི་བཟོད་པའོ། །བསྙེན་པར་མ་རྫོགས་པ་རྣམས་ཞེས་བྱ་བ་ནི། བསྙེན་པར་མ་རྫོགས་པ་ཐམས་ཅད་དོ། །འདི་ཞེས་བྱ་བ་ནི་གནས་མལ་ལོ། །བཅོལ་བར་བྱ་བ་མ་ཡིན་པ་ཉིད་དོ་ཞེས་བྱ་བ་ནི། གནས་མལ་བརྟུལ་དུ་གཞུག་པར་བྱ་བ་མ་ཡིན་པ་ཉིད་དོ། །འདི་སྐད་བསྟན་ཏེ། ངོ་ཚ་མེད་པ་ལ་སོགས་པ་དེ་དག་ལ་གནས་མལ་བཏུལ་བ་རྣམ་པ་ཐམས་ཅད་དུ་བཅོལ་བར་མི་བྱ་བ་ཉིད་ཡིན་ནོ། །ད་ནི་བཅོལ་བའི་རང་གི་ངོ་བོ་བསྟན་པའི་ཕྱིར། གཙུག་ལག་ཁང་འདི་རེ་ཞེ་འམ་ལྟོས་ཤིག་ཅེ་འམ། གནས་མལ་འདེ་རེ་ཞེ་འམ། བསྡུས་ཤིག་ཅེའམ། སྒོ་ལྕགས་ཆུགས་ཤིག་ཅེས་བྱ་བ་ལྟ་བུ་ནི་བཅོལ་བ་དག་ཡིན་ནོ་ཞེས་བྱ་བ་སྨྲས་ཏེ། བཅོལ་བ་ནི་རྣམ་པ་ལྔ་སྟེ། གཙུག་ལག་ཁང་འདེ་རེ་ཞེའམ། གཙུག་ལག་ཁང་འདི་ལྟོས་ཤིག་ཅེའམ། གནས་མལ་འདེ་རེ་ཞེ་འམ། གནས་མལ་བསྡུས་ཤིག་ཅེ་འམ། སྒོ་ལྕགས་ཆུགས་ཤིག་ཅེས་བྱ་བ་དག་གོ །ལྟ་བུ་ཞེས་བྱ་བའི་སྒྲ་ནི་རྣམ་པ་ཞེས་བྱ་བའི་དོན་ཏེ། བཅོལ་བ་རྣམ་པ་ལྔ་པོ་དེ་ལྟ་བུ་དག་གོ །བཅོལ་བ་དག་ཡིན་ནོ་ཞེས་བྱ་བ་ནི། བཅོལ་བ་རྣམ་པ་ལྔ་པོ་དེ་དག་ནི་བཅོལ་བ་དག་ཡིན་ཏེ། དེ་དག་གི་ནང་ནས་གང་ཡང་རུང་བ་ཅིག་བསྒོ་ན་ཡང་བཅོལ་བ་ཉིད་ཡིན་ནོ། །སྔར་ཕན་ཕུན་ཞེས་སྨོས་པ་དེའི་རང་གི་ངོ་བོ་བསྟན་པའི་ཕྱིར། ཕན་ཕུན་ནི་གསུམ་སྟེ་རླུང་གིས་བཟློག་པ་དང༌། ཆར་པས་རིམ་པ་གཞན་སླེབས་པ་དང༌། སྲིལ་ལ་སོགས་པས་ཀྱང་ངོ་ཞེས་བྱ་བ་སྨྲས་ཏེ། ཕན་ཕུན་ནི་
གསུམ་སྟེ། རླུང་གིས་གནས་མལ་བཟློག་པ་དང༌། ཆར་པས་གནས་མལ་གྱི་རིམ་པ་གཞན་ལ་སླེབས་པ་དང༌། སྲིལ་དང་གྲོག་མཁར་བྱེད་པ་ལ་སོགས་པས་གནས་མལ་གྱི་རིམ་པ་གཞན་སླེབས་པ་སྟེ། རིམ་པ་གཞན་སླེབས་པ་ཞེས་བྱ་བའི་རྗེས་བསྙགས་པའི་ཕྱིར། ཀྱང་ངོ་ཞེས་བྱ་བའི་སྒྲ་སྨོས་སོ། །ཕན་ཕུན་རྣམ་པ་དེ་གསུམ་ལས་གང་བྱུང་བ་ཡང་རུང་སྟེ། གནས་མལ་ཕན་ཕུན་དུ་གྱུར་ཅེས་བྱའོ། །སྦྱོར་བ་དང་མཐའ་གཉིས་ཀྱི་ངོ་བོ་ཉིད་བསྟན་ནས། འདིར་ཁ་ན་མ་ཐོ་བ་ཇི་ལྟ་བུ་དང་གང་གི་བྱེད་པ་པོ་ཉིད་ཡིན་ཞེ་ན། དེའི་ཕྱིར་དེ་ལ་དགེ་འདུན་གྱི་གནས་མ་ཉིད་རང་ངམ་བསྐོས་པས་བླ་གབ་མེད་པར་གཞག་པར་བྱས་པ་ལྟ་བུ་ནི་བྱེད་པ་པོ་དག་ཡིན་ནོ་ཞེས་བྱ་བ་སྨྲས་ཏེ། དེ་ལ་ཞེས་བྱ་བ་ནི། གནས་མལ་བླ་གབ་མེད་པར་འཇོག་པ་ལ་སྟེ། དེ་ལ་བྱེད་པ་པོ་ནི་དགེ་འདུན་གྱི་གནས་མལ་ཉིད་ཅེས་བྱ་བ་ལ་སོགས་པ་ཚིག་ལྷག་མ་རྣམས་ཡིན་པར་རིག་པར་བྱའོ། །དེ་ལ་བླ་གབ་མེད་པར་གཞག་པར་བྱ་བ་ནི། དགེ་འདུན་གྱི་གནས་མལ་ཉིད་དེ། དེ་གང་ཟག་གི་མ་ཡིན་ནོ། །འཇོག་པར་བྱེད་པ་ནི་དགེ་སློང་རང་ངམ། རང་གིས་བསྐོས་པའི་དགེ་སློང་དག་གིས་སོ། །དགེ་འདུན་གྱི་གནས་མལ་དེ་རང་ངམ་བསྐོས་པས་ཅི་ཞིག་བྱས་ན་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ཞེ་ན། བླ་གབ་མེད་པར་གཞག་པར་བྱས་པ་ནའོ། །ཡན་ལག་དེ་ལྟ་བུ་ནི་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །གནས་སྐབས་གང་ལ་ཁན་མ་ཐོ་བ་ཇི་ལྟ་བུའི་བྱེད་པ་པོ་ཡིན་ཞེ་ན། དེའི་ཕྱིར་མཐར་ཐུག་ན་དངོས་གཞིའོ་ཞེས་བྱ་བ་སྨྲས་ཏེ། ཕན་ཕུན་དུ་གྱུར་པའི་མཐར་ཐུག་པའི་གནས་སྐབས་ན་དངོས་གཞིའི་ཁ་ན་མ་ཐོ་བའི་བྱེད་པ་པོ་ཉིད་ཡིན་ནོ། །སྦྱོར་བ་ལ་ནི་ཉེས་བྱས་ཀྱིའོ་ཞེས་བྱ་བ་ནི། སྦྱོར་བའི་གནས་སྐབས་ན་ནི་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །རེ་ཞིག་གི་དུས་སུ་གཞན་འདུག་པའི་བར་དུ་ཡང་དེའོ་ཞེས་བྱ་བ་ལ། རེ་ཞིག་གི་དུས་སུ་ཞེས་བྱ་བ་ནི། དུས་ཡུན་ཅུང་ཟད་ཅིག་གོ །གཞན་ཞེས་བྱ་བ་ནི། གང་ཟག་གཞན་ནོ། །འདུག་པའི་ཞེས་བྱ་བ་ནི། གནས་མལ་དེ་ལ་འདུག་པའིའོ། །བར་དུ་ཞེས་བྱ་བ་ནི། བར་སྐབས་དེར་རོ། །ཡང་ཞེས་བྱ་བ་ནི། གནས་མལ་དེ་ཕན་ཕུན་དུ་གྱུར་ན་ཡང་ངོ༌། །དེའོ་ཞེས་བྱ་བ་ནི་ཉེས་བྱས་སོ། །འདི་སྐད་བསྟན་ཏེ། གནས་མལ་བླ་གབ་
མེད་པར་གཞག་པ་ལ་དུས་ཡུན་ཅུང་ཟད་ཅིག་གང་ཟག་གཞན་འདུག་པའི་བར་སྐབས་སུ་གལ་ཏེ་རླུང་ལ་སོགས་པས་ཕན་ཕུན་དུ་གྱུར་ན་དེ་ལྟ་ན་ཡང་དང་པོ་འཇོག་པའི་དགེ་སློང་དེ་ལ་ཉེས་བྱས་སུ་འགྱུར་ཏེ། ལྟུང་བྱེད་དུ་ནི་མི་འགྱུར་རོ། །འདིར་གཞུང་ནི་ཞུ་བ་ལས་འཆག་པའི་གནས་མལ་མནོས་པ་དགེ་སློང་གིས་དུས་ཅུང་ཟད་ཅིག་བླངས་ནས། དགེ་སློང་གིས་བཏིང་བ་དེ་ཡང་མི་བརྟུལ་ལམ། བརྟུལ་དུ་མི་འཇུག་ན་ཉེས་བྱས་སོ་ཞེས་གསུངས་པ་ཡིན་ནོ། །གང་ཟག་ཡང་ངོ་ཞེས་བྱ་བ་ཡང་ཉེས་བྱས་ཏེ། གང་ཟག་གིས་གནས་མལ་བླ་གབ་མེད་པར་གཞག་པ་ཆར་པ་ལ་སོགས་པས་ཕན་ཕུན་དུ་གྱུར་ན་དེ་ལྟར་ན་ཡང་ཉེས་བྱས་ཁོ་ནའོ། །འདིར་གཞུང་ནི་ཞུ་བ་ལས་གང་ཟག་གི་གནས་མལ་ཡིན་ལ། དེ་དགེ་སློང་གིས་འདིང་དུ་བཅུག་ནས་དགེ་སློང་འདུག་པ་ལ་མ་བཅོལ་བར་དེ་ནས་འགྲོ་ན་ཉེས་བྱས་སོ་ཞེས་གསུངས་པ་ཡིན་ནོ། །དེ་ཉིད་བསླབ་པའི་གཞི་འོག་མ་བཞི་ལ་ཡང་འདྲ་བར་བསྟན་པའི་ཕྱིར། འོག་མ་བཞི་ལ་ཡང་ངོ་ཞིས་བྱ་བ་སྨྲས་ཏེ། བསླབ་པའི་གཞི་འདིའི་འོག་མ་བསླབ་པའི་གཞི་བཞི་པོ་འདིང་བ་དང༌། སྐྲོད་པ་དང༌། ཕྱིས་གནོན་འབྱུང་བ་དང༌། རྩ་བ་འབྱུང་བ་ལ་འདུག་པ་ཞེས་བྱ་བ་དག་ལ་ཡང་གང་ཟག་གི་གནས་སུ་ནི་ཉེས་བྱས་སོ། །འདིར་གཞུང་ནི་ཞུ་བ་ལས་གང་ཟག་གིས་གཙུག་ལག་ཁང་དུ་འདིང་ན་ཉེས་བྱས་སོ། །གང་ཟག་གི་གནས་མལ་ནས་སྐྲོད་ན་ཉེས་བྱས་སོ། །གང་ཟག་གི་གཙུག་ལག་ཁང་ཡིན་ལ། དེར་དགེ་སློང་གིས་ཕྱིས་གནོན་བྱས་ཏེ། གནས་མལ་བཅའ་ན་ཉེས་བྱས་སོ། །གང་ཟག་གི་གཙུག་ལག་ཁང་གི་སྟེང་གི་ནམ་མཁའ་ལ་ཡང་ཏོག་བྱས་པ་ལྗིད་ཀྱིས་ཕབ་སྟེ། འདུག་གམ་ཉལ་ན་ཉེས་བྱས་སོ་ཞེས་གསུངས་པ་ཡིན་ནོ། །རེག་པར་བྱ་བ་མ་ཡིན་པ་ཉིད་ལ་ནི་མི་འགྱུར་རོ་ཞེས་བྱ་བ་ནི། གསེར་ལ་སོགས་པ་ལས་བྱས་པའི་ཁྲི་ལ་སོགས་པ་དགེ་སློང་གིས་རེག་པར་བྱ་བ་མ་ཡིན་པ་ཉིད་ནི་བླ་གབ་མེད་པར་བཞག་སྟེ། མ་བརྟུལ་ལམ། བརྟུལ་དུ་མ་བཅུག་པར་དེ་ནས་སོང་ན་ཉེས་བྱས་སུ་ཡང་མི་འགྱུར་ཏེ། དེ་དག་བརླིང་བས་རླུང་ལ་སོགས་པས་ཕན་ཕུན་དུ་མི་འགྱུར་བའི་ཕྱིར་རོ། །འདིར་གཞུང་ནི་ཞུ་བ་ལས་དགེ་སློང་གིས་ཁྲི་འམ་ཁྲིའུ་བླ་གབ་མ་མཆིས་བར་བཞག་སྟེ། མ་བརྟུལ་ལམ་བརྟུལ་དུ་མ་སྩལ་བར་དེ་ནས་གཞན་དུ་
མཆིས་ན་ལྟུང་བར་མི་འགྱུར་བ་འགའ་མཆིས་སམ། ཡོད་དེ་རིན་པོ་ཆེ་ལས་བྱས་པ་ཡིན་ནའོ་ཞེས་གསུངས་པ་ཡིན་ནོ། །བསྡུ་བར་བྱ་བ་བཏིང་སྟེ་བསོད་སྙོམས་ལ་ཞུགས་བ་ན་གལ་ཏེ་རླུང་དང་ཆར་པ་འོང་ན་གཙུག་ལག་ཁང་ན་འཁོད་པ་རྣམས་ཀྱིས་བསྡུ་བར་བྱའོ་ཞེས་བྱ་བ་ནི། བསྡུ་བར་བྱ་བ་གནས་མལ་ཏེ་དགེ་སློང་གིས་བླ་གབ་མེད་བར་བཏིང་སྟེ་བསོད་སྙོམས་ལ་ཞུགས་པ་ན་དེའི་ཚེ་གལ་ཏེ་རླུང་དང་ཆར་པ་འོང་ན་དགེ་སློང་གཙུག་ལག་ཁང་ན་འཁོད་པ་རྣམས་ཀྱིས་གནས་མལ་དེ་དག་བསྡུ་བར་བྱའོ། །འདི་སྐད་བསྟན་ཏེ། གལ་ཏེ་དགེ་སློང་གིས་བླ་གབ་མེད་པར་གནས་མལ་འཇོག་ཅིང་རང་ཡང་བསོད་སྙོམས་ལ་འགྲོ་བ་ལ། དེའི་ཚེ་རླུང་དང་ཆར་བ་འོང་ན་གཙུག་ལག་ཁང་ན་འཁོད་པའི་དགེ་སློང་རྣམས་ཀྱིས་གནས་མལ་དེ་དག་བརྟུལ་བར་བྱའོ། །བསོད་སྙོམས་ལ་ཞུགས་པའི་དགེ་སློང་དེ་ཉིད་ཀྱིས་ཀྱང༌། རླུང་དང་ཆར་པ་མཐོང་ནས་གུས་པར་བྱས་ཏེ། མྱུར་དུ་ཕྱིར་འོང་བར་བྱའོ། །དེའི་དོན་ཉིད་ལ་ངེས་པ་མེད་པ་དང་ན་སྨད་པ་མ་ཡིན་ནོ་ཞེས་བྱ་བ་ནི། བསོད་སྙོམས་ཀྱི་དོན་ཉིད་དུ་བསོད་སྙོམས་ཀྱི་དགོས་པའི་དབང་གིས་སོང་བ་ལ་ནི་ཉེས་པ་མེད་པ་ཡང་མ་ཡིན་ལ། ན་སྨད་པ་ཡང་མ་ཡིན་ཏེ། འདི་ལྟར་ཁ་ན་མ་ཐོ་བ་ཡོངས་སུ་རྫོགས་པར་འགྱུར་ངོ། །འདིར་གཞུང་ནི་བརྟུལ་བར་བྱ་བ་བཏིང་སྟེ་བསོད་སྙོམས་ལ་འཇུག་པར་མི་བྱའོ། །འཇུག་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །གལ་ཏེ་བརྗེད་པས་ལམ་རིང་དུ་འདས་སམ་ཕྱིས་དྲན་པ་རྙེད་ན་ཕྱིན་ཆད་འདི་ལྟར་མི་བྱའོ་ཞེས་སེམས་བསྐྱེད་པར་བྱ་ཞིང་ཚིག་ཏུ་ཡང་བརྗོད་པར་ཡང་བྱའོ་ཞེས་བྱ་བ་ནི། གལ་ཏེ་བརྗེད་པས་ཡུལ་གཞན་དུ་འགྲོ་ཞིང་ལམ་རིང་དུ་འདས་པར་གྱུར་ཏམ། གནས་སུ་ཕྱིན་ནས་བདག་གིས་བླ་གབ་མེད་པར་གནས་མལ་བཞག་པར་གྱུར་ཏོ་སྙམ་དུ་དྲན་པ་རྙེད་ན་ཕྱིན་ཆད་འདི་ལྟར་མི་བྱའོ་ཞེས་བྱ་བ་ཡང་དང་ཡང་དུ་འདི་ལྟར་མི་བྱའོ་ཞེས་སེམས་བསྐྱེད་པར་བྱ་ཞིང་ཚིག་ཏུ་བརྗོད་པར་ཡང་བྱའོ། །གལ་ཏེ་ལམ་རིང་པོར་མ་ཕྱིན་པར་དྲན་པ་རྙེད་ན་ནི་དགེ་སློང་དེས་ཕྱིར་ལྡོག་པར་བྱའོ། །གལ་ཏེ་དགེ་སློང་ལམ་ནས་ཚུར་འོང་བ་ཞིག་དང་ཕྲད་པར་གྱུར་ན་བསྡུ་བའི་ཕྱིར་དེ་ལ་བཅོལ་བར་བྱའོ་ཞེས་བྱ་བ་ནི། གལ་ཏེ་དགེ་སློང་དེ་ཕར་འགྲོ་བ་ན་དགེ་སློང་ལམ་ནས་ཚུར་འོང་
བ་ཞིག་དང་མངོན་སུམ་དུ་ཕྲད་པར་གྱུར་ན། གནས་མལ་བརྗེད་དེ་བླ་གབ་མེད་པ་ནས་མ་བསྡུས་པ་དེ་བསྡུ་བའི་ཕྱིར་ཚུར་འོང་བ་དེ་ལ་བཅོལ་བར་བྱའོ། །ཁས་བླངས་པས་སོན་པ་ཉིད་ན་དེ་བྱ་བ་ཉིད་དོ་ཞེས་བྱ་བ་ནི། ཚུར་འོང་བའི་དགེ་སློང་གང་གིས་འདི་སྐད་ཅེས་ཁོ་བོ་དེར་ཕྱིན་ནས་བསྡུ་བར་བྱའོ་ཞེས་ཁས་བླངས་པ་དེས་གནས་མལ་གྱི་གནས་སུ་སོན་པ་ཉིད་ན་གནས་མལ་བསྡུ་བ་དེ་བྱ་བ་ཉིད་ཡིན་ནོ། །འདིར་གཞུང་ནི་དགེ་སློང་དེས་ཀྱང་དགེ་སློང་དེ་ལ་ཁས་བླངས་ནས་གུས་པར་བྱས་ཏེ་བསྡུ་བར་བྱའོ། །གལ་ཏེ་སྡུད་པར་མི་བྱེད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ལམ་ནས་ཚུར་འོངས་པ་ཞེས་སྨོས་པ་ནི་མཚོན་པ་ཙམ་དུ་ཟད་དེ། གཞན་ལ་ཡང་རུང་བའི་ཕྱིར་རོ། །གནས་ནས་འཕགས་པར་འགྱུར་བ་ན་ཉམ་ང་བ་དང་ཕྲད་པར་མི་འགྱུར་བ་ལྟ་ན་གནས་མལ་བསྡུ་བར་བྱའོ་ཞེས་བྱ་བ་ནི། དགེ་སློང་གནས་ནས་འཕགས་པར་འགྱུར་བ་ན་ཉམ་ང་བ་དང་ཕྲད་པ་ཚུལ་ཁྲིམས་དང་སྲོག་ལ་སོགས་པའི་བར་ཆད་དུ་འགྱུར་བ་མེད་པ་ལྟ་ན། གནས་མལ་སྐྱབས་ཡོད་པ་ན་འདུག་ཀྱང་རུང་ངོ༌། །བླ་གབ་མེད་པ་ན་འདུག་ཀྱང་རུང་སྟེ་བསྡུ་བར་བྱའོ། །འདིར་གཞུང་ནི་ཕྲན་ཚེགས་དག་ལས་དགེ་སློང་གིས་གནས་མལ་བསྡུས་ནས་འགྲོ་བར་བྱའོ། །མི་སྡུད་ན་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །ཉམ་ང་བ་དང་ཕྲད་པར་མི་འགྱུར་བ་ལྟ་ན་ཞེས་སྨོས་པ་ནི། གནས་མལ་སྡུད་པར་བྱེད་པ་ན་འཕྱིས་པའི་དབང་གིས་གལ་ཏེ་ན་སྲོག་གི་བར་ཆད་ལ་སོགས་པ་འབྱུང་བར་འགྱུར་དུ་དོགས་པ་བསལ་བའི་ཕྱིར་རོ། །གལ་ཏེ་དྲི་མ་ཅན་དུ་གྱུར་ན་སྤྲུག་པར་བྱའོ་ཞེས་བྱ་བ་ནི། འགྲོ་བས་གལ་ཏེ་གནས་མལ་ས་རྡུལ་ལ་སོགས་པས་དྲི་མ་ཅན་དུ་གྱུར་ན་ཕྱི་རོལ་རླུང་ཁ་ལ་སོགས་པར་སྤྲུག་པར་བྱའོ། །འདིར་གཞུང་ནི་མ་མོ་ལས་དགེ་སློང་འགྲོ་བར་ཆས་པ་ཞེས་བྱ་བ་ནས་གནས་མལ་དྲི་མ་ཅན་དུ་གྱུར་ན་སྤྲུག་པར་བྱ་བའི་བར་དུ་གསུངས་པ་ཡིན་ནོ། །དེ་འབུལ་བར་བྱའོ་ཞེས་བྱ་བ་ནི། དགེ་སློང་འགྲོ་བར་ཆས་པས་དགེ་འདུན་ནམ་གང་ཟག་གཞན་གྱི་གནས་མལ་བདག་སྤྱོད་སྤྱོད་པ་དེ་གལ་ཏེ་དུས་ཀྱིས་ཐུབ་ཅིང་ཉམ་ང་བ་དང་ཕྲད་པར་མི་འགྱུར་བ་ལྟ་ན་ཁུངས་སུ་ཕྱིར་དབུལ་བར་བྱའོ། །ཡང་ན་བཅོལ་བར་བྱའོ་ཞེས་བྱ་བ་ནི། གལ་ཏེ་དུས་ཀྱིས་མི་ཐུབ་ཅིང་ཉམ་ང་བ་དང་ཕྲད་པར་འགྱུར་བ་
ལྟ་ན་གནས་མལ་གཞན་ལ་བཅོལ་བར་བྱའོ། །སུ་ལ་ཞེ་ན། དེའི་ཕྱིར་དགེ་སློང་ལའོ་ཞེས་བྱ་བ་སྨྲས་སོ། །དེ་མེད་ན་དགེ་ཚུལ་ལའོ་ཞེས་བྱ་བ་ནི། དགེ་སློང་མེད་ན་དགེ་ཚུལ་ལ་དེ་བཅོལ་བར་བྱའོ། །དེ་ཡང་མེད་ན་ཁྱིམ་བདག་ལའོ་ཞེས་བྱ་བ་དང་དགེ་ཚུལ་དེ་ཡང་མེད་ན་ཁྱིམ་བདག་དེ་ལ་བཅོལ་བར་བྱའོ། །ཐམས་ཅད་མེད་ན་ཕྱོགས་བཞིར་རྣམ་པར་བལྟས་ཏེ་ལྡེ་མིག་སྦས་ནས་འགྲོ་བར་བྱའོ་ཞེས་བྱ་བ་ནི། བཅོལ་བར་བྱ་བ་ཐམས་ཅད་མེད་ན་འགྲོ་བའི་ཕྱིར་ཕྱོགས་བཞིར་བལྟས་ཏེ། ལྡེ་མིག་ཀྱོག་པོ་ལ་སོགས་པ་གཞན་གྱིས་མ་མཐོང་བར་སྦས་ཏེ་འགྲོ་བར་བྱའོ། །གལ་ཏེ་ལམ་ཁར་དགེ་སློང་མཐོང་ན་ཕྱོགས་དེ་ལ་བརྗོད་པར་བྱའོ་ཞེས་བྱ་བ་ནི་གལ་ཏེ་ལམ་ཁར་བདག་གིས་གནས་དེར་གཏོགས་པའི་དགེ་སློང་ཚུར་འོང་བ་མཐོང་ན་ཕྱོགས་གང་དུ་ལྡེ་མིག་སྦས་པའི་ཕྱོགས་དེ་ལམ་ཁར་ཕྲད་པའི་དགེ་སློང་དེ་ལ་བརྗོད་པར་བྱའོ། །གལ་ཏེ་འོངས་པ་ན་ཁྱི་མ་གཞན་དུ་མགྲོན་དུ་བོས་ཤིང་སྒོ་བཅད་པར་གྱུར་ན་རྩིག་དྲུང་ངམ་ཤིང་ལྗོན་པའི་དྲུང་དུ་སྟན་བཞག་སྟེ་འཇུག་པར་བྱའོ་ཞེས་བྱ་བ་ནི། གལ་ཏེ་དགེ་སློང་སོང་བ་དེའི་ཕྱིར་འོངས་པ་ན་དགེ་སློང་རྣམས་ཡོན་བདག་གི་ཁྱིམ་གཞན་དུ་མགྲོན་དུ་བོས་ཤིང་གཙུག་ལག་ཁང་གི་སྒོ་བཅད་པར་གྱུར་ན་དགེ་སློང་དེས་གཙུག་ལག་ཁང་གི་ཉེན་ཀོར་གྱི་རྩིག་དྲུང་ངམ་ཤིང་ལྗོན་པའི་དྲུང་དུ་རང་གི་སྟན་བཞག་སྟེ། དགེ་སློང་རྣམས་གང་མགྲོན་དུ་བོས་པའི་ཁྱིམ་གཞན་དེར་ཟན་གྱི་ཕྱིར་འཇུག་པར་བྱའོ། །རྩིག་དྲུང་ངམ་ཤིང་ལྗོན་པའི་དྲུང་ཞེས་སྨོས་པ་ནི། ཉིན་མཚན་བསྐྱབ་པའི་དཔེ་དེ་ཙམ་དུ་ཟད་དེ། གར་འོས་པའི་ཕྱོགས་གཞན་དུ་ཡང་བཞག་ཏུ་རུང་ངོ༌། །དེ་ལྟར་ཡང་འདིར་གཞུང་ནི་ཞུ་བ་ལས་རྩིག་དྲུང་ངམ། གང་དུ་ཉི་མས་ཆུད་ཟོས་པར་མི་འགྱུར་བར་གཞག་པར་བྱའོ་ཞེས་གསུངས་པ་ཡིན་ནོ། །དེར་སྟན་དག་གཡར་པོར་སྤྱིན་ནོ་ཞེས་བྱ་བ་ནི། དགེ་སློང་དག་མགྲོན་དུ་འབོད་པའི་ཁྱིམ་གཞན་དེར་གཙུག་ལག་ཁང་དང་འབྲེལ་བའི་སྟན་དག་གཡར་པོར་སྦྱིན་ནོ། །རང་གིས་བསྐུར་བར་མི་བྱའོ་ཞེས་བྱ་བ་ནི། དགེ་སློང་དག་རང་གི་ཁྱིམ་གཞན་དེ་ནས་སྟན་དེ་དག་ཕྱིར་བསྐུར་བར་མི་བྱའོ། །དེ་ནི་ཁྱིམ་པ་དང་དགེ་ཚུལ་དག་གིའོ་ཞེས་བྱ་བ་ནི། སྟན་བསྐུར་བ་དེ་ནི་ཁྱིམ་པ་དང་དགེ་ཚུལ་དག་གི་ལས་ཁོ་ན་ཡིན་ནོ། །འདི་
སྐད་བསྟན་ཏེ། ཁྱིམ་པ་དང་དགེ་ཚུལ་དག་གིས་གཙུག་ལག་ཁང་དུ་སྟན་དེ་དག་བསྐུར་བར་བྱའོ། །མེད་ན་བསྐྱལ་བའི་ཕྱིར་ཁྱིམ་པ་ལ་བཅོལ་ཏེ་འདོང་བར་བྱའོ་ཞེས་བྱ་བ་ནི། ཁྱིམ་པ་དང་དགེ་ཚུལ་དག་མེད་ན་སྟན་དག་བསྐྱལ་བའི་ཕྱིར་ཁྱིམ་བདག་ལ་བཅོལ་ཏེ། དགེ་སློང་རྣམས་གཙུག་ལག་ཁང་དུ་འདོང་བར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་དག་ཟན་ཟོས་ནས་སྟན་རང་ཉིད་ཀྱི་མཆན་ཁུང་ནས་བླངས་ཏེ། འགྲོ་བ་ན་བྲམ་ཟེ་དང་ཁྱིམ་བདག་དག་ཅི་འཕགས་པ་དག་རོལ་མོ་དག་འདོང་ངམ་ཞེས་ཅོ་འདྲི་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། རང་གིས་སྟན་བསྐུར་བར་མི་བྱ་བར་ཁྱིམ་པ་དང༌། དགེ་ཚུལ་དག་གིས་བསྐུར་བར་བྱའོ། །གལ་ཏེ་ཁྱིམ་པ་དང་དགེ་ཚུལ་མེད་ན་ཁྱིམ་བདག་དེ་ཉིད་ལ་བཅོལ་ཏེ་འདོང་བར་བྱའོ་ཞེས་གསུངས་པ་ཡིན་ནོ། །བདག་ཅག་གིས་བསྐྱལ་ལོ་ཞེས་ཟེར་ན་བཞག་སྟེ་འདོང་བར་བྱའོ་ཞེས་བྱ་བ་ནི། གལ་ཏེ་ཁྱིམ་བདག་དག་འདི་སྐད་ཅེས་བདག་ཅག་གིས་བསྐྱལ་བར་བྱའོ་ཞེས་ཟེར་ན་དགེ་སློང་རྣམས་ཀྱིས་སྟན་དག་བཞག་སྟེ་འདོང་བར་བྱའོ། །དེ་དག་གིས་མ་བསྐྱལ་ན་གནས་པར་བྱེད་པ་དག་གིས་བླང་པར་བྱའོ་ཞེས་བྱ་བ་ནི། ཁྱིམ་པ་དེ་དག་གིས་བསྐྱ་ལ་བར་ཁས་བླངས་སུ་ཟིན་ཀྱང་མ་བསྐྱལ་ན་གནས་པར་བྱེད་པ་ཉེ་གནས་དག་གིས་སྟན་དེ་དག་བླང་བར་བྱའོ། །འདི་སྐད་བསྟན་ཏེ། གལ་ཏེ་ཁྱིམ་བདག་གིས་སྟན་དེ་དག་མ་བསྐྱལ་ན་གནས་པར་བྱེད་པ་དག་གིས་བླང་བར་བྱའོ། །མེད་ན་རང་གིས་བྱའོ་ཞེས་བྱ་བ་ནི། གནས་པར་བྱེད་པ་དག་ཀྱང་མེད་ན་རང་གིས་བླང་བར་བྱ་སྟེ། གནས་བརྟན་དེ་དག་དང་དགེ་སློང་རྣམས་ཀྱིས་རང་གིས་བླང་བར་བྱའོ་ཞེས་བྱ་བའི་ཐ་ཚིག་གོ །ཐམས་ཅད་ཀྱིས་ན་གཎྜཱི་བརྡུང་བར་བྱའོ་ཞེས་བྱ་བ་ནི། གལ་ཏེ་དགེ་སློང་ཐམས་ཅད་ཀྱིས་བླང་བར་བྱ་དགོས་པ་ཞིག་ཡིན་ན། དེའི་ཚེ་ཐམས་ཅད་འདུས་ཏེ་ལེན་དུ་འདོང་བའི་ཕྱིར་གཎྜཱི་བརྡུང་བར་བྱའོ། །འདི་སྐད་བསྟན་ཏེ། གལ་ཏེ་དག་སློང་ཐམས་ཅད་ཀྱིས་བྲི་བཀོལ་མེད་པར་སྟན་དེ་དག་བླང་དགོས་ན་དེའི་ཚེ། ཐམས་ཅད་ཀྱིས་སྟན་བླང་བའི་ཕྱིར་གཎྜཱི་བརྡུང་བར་བྱའོ། །ཡོན་བདག་གིས་གཙུག་ལག་ཁང་དུ་རང་གི་དོན་དུ་སྟན་དག་གཡར་པོ་བྱེད་ན་སྦྱིན་པར་བྱའོ་ཞེས་བྱ་བ་ནི། གལ་ཏེ་ཡོན་བདག་དག་གཙུག་ལག་ཁང་དུ་
ལྷགས་ཏེ། གཙུག་ལག་ཁང་དུ་ཡོན་བདག་དག་རང་གི་དོན་དུ་དགེ་འདུན་གྱི་གདན་ཆ་དག་གཡར་པོ་བྱེད་ན་དགེ་འདུན་གྱིས་དེ་དག་ལ་གཡར་པོར་སྤྱིན་པར་བྱའོ་ཞེས་བྱ་བའི་ཐ་ཚིག་གོ །དེ་དག་བསྲུང་བའི་ཕྱིར་དགེ་སློང་ཡང་གཞག་པར་བྱའོ་ཞེས་བྱ་བ་ནི། གཙུག་ལག་ཁང་དུ་ཡོན་བདག་ལ་གཡར་བའི་གདན་ཆ་དེ་དག་བསྲུང་བའི་ཕྱིར་དགེ་སློང་རྣམས་ཀྱིས་དགེ་སློང་ཅིག་གཞག་པར་བྱའོ། །དེས་ཕྱོགས་གཅིག་ཏུ་བསྡད་པར་བྱའོ་ཞེས་བྱ་བ་ནི། དགེ་སློང་སྲུང་མར་གཞག་པ་དེས་ཁྱིམ་བདག་བཟའ་བཏུང་བྱེད་ཅིང་གཏམ་ཟེར་བའི་ནང་དུ་མི་འཇུག་པར་ཕ་ཟད་ཙམ་དུ་ཕྱོགས་གཅིག་ཏུ་ཡངས་ཀྱིས་བསྡད་པར་བྱའོ། །རང་གི་ལས་བྱའོ་ཞེས་བྱ་བ་ནི། དགེ་སློང་དེས་རང་གི་ལས་བསམ་གཏན་དང༌། ཁ་དོན་དང་ཀློག་འདྲི་ལ་སོགས་པ་གང་ཡིན་པ་དེ་དག་ཀྱང་བྱའོ། །སེམས་གཏད་པ་ཡང་ངོ་ཞེས་བྱ་བ་ནི། དགེ་སློང་ཕྱོགས་གཅིག་ན་སྡོང་པ་དེས་གདན་ཆ་དེ་དག་ལ་སེམས་གཏད་ཅིང་ཡེ་རིག་ཆེ་བར་བྱ་བའོ། །དོང་ན་བསྡུ་བར་བྱའོ་ཞེས་བྱ་བ་ནི། ཡོན་བདག་དོང་ན་གདན་ཆ་དེ་དག་བསྡུ་བར་བྱ་བའོ། །མ་རུང་བ་དག་བྱི་དོར་བྱའོ་ཞེས་བྱ་བ་ནི། གདན་ཆ་ཁྱིམ་པས་མ་རུང་བར་བྱས་པ་དག་དགེ་སྐོས་ལ་སོགས་པས་བྱི་དོར་བྱའོ། །ཆང་གིས་ན་ཆུ་དག་གིས་སོ་ཞེས་བྱ་བ་ནི། ཆང་གི་སྙིགས་མས་མ་རུང་བར་གྱུར་ན་ཆུ་དག་གིས་བཀྲུ་ཞིང་བྱི་དོར་བྱའོ། །སྣུམ་གྱིས་ན་ཆལ་གྱིས་སོ་ཞེས་བྱ་བ་ནི། སྣུམ་གྱིས་མ་རུང་བར་གྱུར་ན་འདག་པའི་ཆལ་གྱིས་བྱི་དོར་བྱའོ། །མི་གཙང་བས་ན་སའམ་འདག་རྫས་སམ་ལྕིབས་སོ་ཞེས་བྱ་བ་ནི། གདན་ཆ་དག་མི་གཙང་བས་མ་རུང་བར་གྱུར་ན་ས་འམ་འདག་རྫས་སམ་ལྕི་བས་བྱི་དོར་བྱའོ། །གལ་ཏེ་ཐགས་མ་མི་གཙང་བར་གྱུར་པ་འདག་རྫས་ཀྱིས་དག་པར་མ་གྱུར་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར་ཐགས་མ་མ་དག་ན་གཅད་པར་བྱའོ་ཞེས་བྱ་བ་སྨྲས་ཏེ། འབྲེང་བུ་ལ་སོགས་པ་ལས་བྱས་པའི་ཐགས་མ་མ་དག་ན་གཅད་པར་བྱའོ། །འདིར་གཞུང་ནི་གལ་ཏེ་རེ་ཞིག་སྦྱང་བར་ནུས་ན་དེ་ལྟ་ན་ལེགས། གལ་ཏེ་མི་ནུས་ན་འབྲེང་བུ་བཅད་དེ་དོར་བར་བྱ་ཞིང་འབྲེང་བུ་སར་པ་དག་གིས་ཡང་བསླང་བར་བྱའོ་ཞེས་གསུངས་པ་ཡིན་ནོ། །ཁྱིམ་པ་འདུག་འདུག་པའི་སྟན་མ་བསྡུས་པ་མཐོང་ན་བསྡུ་བར་བྱ་བ་ཉིད་དོ་ཞེས་བྱ་བ་ནི། ཁྱིམ་པ་འདུག་འདུག་པ་ཞེས་བྱ་བ་
ཁྱིམ་པས་སྟན་དུ་བཏིང་བའི་གདན་ཆ་མ་བསྡུས་པ་མཐོང་ན་གང་སུས་མཐོང་ཡང་རུང་སྟེ། དེ་ཉིད་ཀྱིས་བསྡུ་བར་བྱ་བ་ཉིད་དོ། །འདི་སྐད་བསྟན་ཏེ། གདན་ཆ་གང་དག་ལ་ཁྱིམ་པ་དག་འཁོད་འཁོད་པའི་གདན་ཆ་དེ་དག་གལ་ཏེ་མ་བསྡུས་པ་གྱུར་ན་དགེ་སློང་གང་གིས་དེ་དག་མཐོང་བ་དེ་ཉིད་ཀྱིས་བསྡུ་བར་བྱའོ། །གལ་ཏེ་རྒས་པ་དད་ན་བ་ཡིན་ན་དགེ་སྐོས་ཀྱིས་སོ་ཞེས་བྱ་བ་ནི། གལ་ཏེ་མཐོང་བ་རྒས་པའམ་ན་བ་ཡིན་ན་དགེ་སྐོས་ཀྱིས་བསྡུ་བར་བྱ་བ་ཉིད་ཡིན་ནོ། །དེས་སྦྲན་པར་བྱ་བ་ཉིད་དོ་ཞེས་བྱ་བ་ནི་རྒན་པོའམ། ནད་པ་དེས་གདན་ཆ་མ་བསྡུས་པ་མཐོང་བ་དེ་དགེ་སྐོས་ལ་སྦྲན་པར་བྱ་བ་ཉིད་ཡིན་ནོ། །ཐམས་ཅད་ཀྱིས་ནད་པ་བལྟ་བར་བྱའོ་ཞེས་བྱ་བ་ནི། མཚམས་དེར་གཏོགས་པའི་དགེ་སློང་མི་ན་བ་ཐམས་ཅད་ཀྱིས་ནད་པ་བལྟ་བར་བྱའོ། །འདུག་སྟེའོ་ཞེས་བྱ་བ་ནི། འདུག་སྟེ་ནད་པར་བལྟ་བར་བྱའོ། །འགྲེང་སྟེ་ནི་མ་ཡིན་ནོ། །དེར་སྟན་ཐོགས་ཏེ་འགྲོ་བར་མི་བྱའོ་ཞེས་བྱ་བ་ནི། ནད་པ་བལྟ་བ་དེར་རང་གི་སྟན་ཐོགས་ཏེ་འགྲོ་བར་མི་བྱའོ། །ནད་པའི་ནད་གཡོག་གིས་དེར་སྟན་དག་བཤམ་པར་བྱའོ་ཞེས་བྱ་བ་ནི། ནད་པའི་ནང་གཡོག་གིས་གང་ན་ནད་པ་འདུག་པ་དེར་དགེ་སློང་དག་འཁོད་པའི་སྟན་བཤམ་པར་བྱའོ། །མཁན་པོ་འམ་སློབ་དཔོན་དགེ་བའི་ཕྱོགས་ལ་འགྲོ་ན། གལ་ཏེ་གཞན་གྱི་དགེ་བའི་ཕྱོགས་མི་འཕེལ་ན་ཕྱི་བཞིན་འགྲོ་བར་བྱའོ་ཞེས་བྱ་བ་ནི། མཁན་པོ་འམ་སློབ་དཔོན་དགེ་བའི་ཕྱོགས་ལ་འགྲོ་ན། གལ་ཏེ་སློབ་མ་དང་ཉེ་གནས་དག་གིས་ཕྱི་བཞིན་འགྲོ་བ་མ་གཏོགས་པར་གཞན་གྱི་དགེ་བའི་ཕྱོགས་མི་འཕེལ་བ་ལྟ་ན་མཁན་པོའམ་སློབ་དཔོན་དེའི་ཕྱི་བཞིན་འགྲོ་བར་བྱ་བའོ། །དེའི་ཕྱིར་རང་གིས་སྟན་བསྐུར་བར་བྱའོ་ཞེས་བྱ་བ་ནི་མཁན་པོའམ། སློབ་དཔོན་དེའི་འདུག་པར་བྱ་བའི་ཕྱིར་སློབ་མའམ་ཉེ་གནས་དག་གིས་རང་གི་སྟན་བསྐུར་བར་བྱ་བའོ། །འགྲོ་བ་མ་ཞུས་པར་མི་བསྐུར་རོ་ཞེས་བྱ་བ་ནི། སློབ་མའམ་ཉེ་གནས་དེས་བདག་ཉིད་ཕྱི་བཞིན་འགྲོ་བ་མ་ཞུས་པར་སྟན་མི་བསྐུར་བའོ། །འདི་སྐད་བསྟན་ཏེ། བདག་ཀྱང་སླད་བཞིན་མཆིའོ་ཞེས་མ་ཞུས་པར་མཁན་པོའམ་སློབ་དཔོན་གྱི་སྟན་མི་བསྐུར་རོ། །དེ་རང་ཉིད་ཀྱིས་བསྐུར་རོ་ཞེས་བྱ་བ་ནི། སྟན་སློབ་མ་ལ་སོགས་པས་ཕར་ཁྱེར་བ་དེ་སློབ་དཔོན་ལ་སོགས་པ་རང་ཉིད་ཀྱིས་ཕྱིར་བསྐུར་བར་བྱ་བའོ། །བླ་
གབ་མེད་པར་ཆོས་ཉན་པ་ན་རླུང་དང་ཆར་པ་བྱུང་ན་བསྡུ་བར་བྱའོ་ཞེས་བྱ་བ་ནི། བླ་གབ་མེད་པར་ཆོས་ཉན་དུ་བཅུག་པ་ན་རླུང་ངམ་ཆར་པ་འོང་ན་གང་གིས་སྟན་གང་ཡིན་པ་དེ་ཉིད་ཀྱིས་དེ་གནས་མལ་དུ་བསྐུར་བར་བྱ་བའོ། །རྒན་པོ་རྣམས་ཀྱི་ལྕི་བ་ཉིད་ཀྱི་ཕྱིར་རང་གིས་མི་ནུས་ན་གཞོན་ནུ་རྣམས་དང་ལྷན་ཅིག་བརྗེ་བར་བྱའོ་ཞེས་བྱ་བ་ནི། རྒན་པོ་རྣམས་ཀྱི་གནས་མལ་ལྕི་བ་ཉིད་ཀྱི་ཕྱིར་རང་གིས་བརྟུལ་མི་ནུས་ན་གཞོན་ནུ་རྣམས་དང༌། རྒན་པོ་རྣམས་ཕན་ཚུན་ལྕི་བ་ཡང་བརྗེས་ཏེ་བསྐུར་བར་བྱའོ། །འདི་སྐད་བསྟན་ཏེ། གཞོན་ནུ་རྣམས་ཀྱི་གནས་མལ་གང་ཡིན་པ་དེ་ནི། ཡང་བའི་ཕྱིར་རྒན་པོ་རྣམས་ཀྱིས་བསྐུར་བར་བྱའོ། །རྒན་པོ་རྣམས་ཀྱི་ནི་ལྕི་བའི་ཕྱིར་གཞོན་ནུ་རྣམས་ཀྱིས་བསྐུར་བར་བྱའོ་ཞེས་བྱ་བའི་ཐ་ཚིག་གོ །མཐུན་པ་དང་མཐུན་པར་གཞག་པར་བྱའོ་ཞེས་བྱ་བ་ནི། གནས་མལ་མཐུན་པ་དང༌། མཐུན་པར་ལྷན་ཅིག་གཞག་པར་བྱའི། མི་མཐུན་པ་དང་ལྷན་ཅིག་གཞག་པར་མི་བྱ་བ་སྟེ། དཔེར་ན་གོར་བུ་ཡང་གོར་བུ་དག་དང༌། དབྱམ་པོ་ཡང་དབྱམ་མོ་དག་དང༌། ཁྲི་ལ་སོགས་པ་ཡང་ཁྲི་ལ་སོགས་པ་དག་དང་མཐུན་མཐུན་དུ་བཞག་པ་ལྟ་བུའོ། །གཙུག་ལག་ཁང་གཞན་དུ་གདན་ཆ་དང་རྫས་རྙེད་ན་བསྐུར་བར་བྱའོ་ཞེས་བྱ་བ་ནི། གཙུག་ལག་ཁང་གཞན་དུ་དགེ་སློང་དག་གདན་ཆ་དང༌། མཆོད་པའི་རྫས་དག་རྙེད་ན་དགེ་འདུན་དུ་གྱུར་པའི་དགེ་སློང་དག་གིས་གཡར་པོར་བསྐུར་བར་བྱའོ། །གལ་ཏེ་ཆར་འབབ་པ་དང་ཆར་འབབ་ཏུ་དོགས་པ་མེད་ནའོ་ཞེས་བྱ་བ་ནི། དེའི་ཚེ་ཆར་འབབ་པ་དང་དེའི་འོག་ཏུ་ཆར་འབབ་ཏུ་དོགས་པ་མེད་ན་བསྐུར་བར་བྱའོ། །གལ་ཏེ་ལམ་ཀར་རླུང་དང་ཆར་པ་བྱུང་ན་ཤིང་ལྗོན་པའམ་རྩིག་དྲུང་དུ་བཅེར་བར་བྱའོ་ཞེས་བྱ་བ་ནི། གལ་ཏེ་ལམ་ཁར་རླུང་ངམ་ཆར་པ་བྱུང་ན། དེའི་ཚེ་དགེ་སློང་སྲུང་བ་དག་གིས་ཤིང་ལྗོན་པའི་དྲུང་ངམ་རྩིག་དྲུང་དུ་གདན་དང་མཆོད་པའི་རྫས་དེ་དག་ཕུང་པོར་བཅེར་བར་བྱའོ། །རྫས་ངན་པ་གཅིག་གིས་གཡོགས་པར་བྱའོ་ཞེས་བྱ་བ་ནི། སྲུང་བ་དག་གིས་དེ་དག་རྫས་ཐམས་ཅད་ཀྱི་ནང་ན་རྙིང་པ་དག་ངན་པ་གཅིག་གིས་གཡོགས་པར་བྱའོ། །གཙུག་ལག་ཁང་དུ་ཕྱིན་ནས་རྫས་
རྣམས་བསྐམ་པར་བྱའོ་ཞེས་བྱ་བ་ནི། གཙུག་ལག་ཁང་དུ་ཕྱིན་ནས་རྫས་གཤེར་བ་རྣམས་བསྐམ་པར་བྱ་བའོ། །འདིར་གཞུང་ནི་ཁྱིམ་བདག་ཅིག་ལ་གཙུག་ལག་ཁང་གྲོང་མཐའ་བ་དང་དགོན་པ་པ་གཉིས་ཡོད་ནས་དགེ་སློང་དགོན་པ་པ་དག་གིས་དགེ་སློང་གྲོང་མཐའ་རྣམས་ལས་རྫས་དང་གནས་མལ་དག་བརྙས་པ་དང་དེ་དག་གིས་མ་སྟེར་ནས། བཅོམ་ལྡན་འདས་ཀྱིས་བཀའ་སྩལ་པ། བརྙན་པར་བྱའོ། །དེ་དག་གིས་བསྐུར་བ་དང་ཆར་འབབ་པས་རྫས་ཁ་དོག་སྣ་ཚོགས་དག་མ་རུང་བར་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་ཆར་འབབ་བམ་ཆར་འབབ་ཏུ་དོགས་པ་ན་བསྐུར་བར་མི་བྱའོ། །གལ་ཏེ་ལམ་ཁར་ཆར་འབབ་ན་ཤིང་ལྗོན་པའི་དྲུང་དུ་གཞག་པར་བྱའོ། །གཙུག་ལག་ཁང་དུ་སོན་ནས་རྫས་རྣམས་བསྐམ་པར་བྱའོ་ཞེས་གསུངས་པ་ཡིན་ནོ། །མེ་ཤོར་ཏམ་ཆུ་བྱུང་ན་དགེ་འདུན་གྱི་ཡང་གདོན་པར་བྱའོ་ཞེས་བྱ་བ་ནི། མེ་ཤོར་ཏམ་ཆུ་བྱུང་ན་དང་པོར་གང་ཟག་གི་རྫས་གདོན་པར་བྱ་ཞིང༌། ཕྱིས་དགེ་འདུན་གྱི་ཡང་གདོན་པར་བྱ་བའོ། །གང་གི་ཚེ་ཞེ་ན། དེའི་ཕྱིར་རང་གི་ལྷུང་བཟེད་དང་ཆོས་གོས་ཐོན་ཟིན་ནའོ་ཞེས་བྱ་བ་སྨྲས་ཏེ། རང་གི་ཆོས་གོས་དང་ལྷུང་བཟེད་དག་ཐོན་ཟིན་ན་དེའི་འོག་ཏུ་དགེ་འདུན་གྱི་ཡང་གདོན་པར་བྱའོ། །ཇེ་དང་པོར་རང་གི་ལྷུང་བཟེད་དང༌། ཆོས་གོས་གདོན་པར་བྱ་ཞིང་དེའི་འོག་ཏུ་དགེ་འདུན་གྱི་ཡང་གདོན་པར་བྱའོ་ཞེས་བྱ་བའི་ཐ་ཚིག་སྟེ། གང་ཟག་ནི་ཕོངས་པར་འགྱུར་གྱི། དགེ་འདུན་ནི་ཕོངས་པར་མི་འགྱུར་བའི་ཕྱིར་རོ། །བཏོན་ཟིན་བ་བསྲུང་བའི་ཕྱིར་དགེ་སློང་ཆེན་པོ་མི་ནུས་པ་གཞག་པར་བྱའོ་ཞེས་བྱ་བ་ནི། མེ་དང་ཆུའི་ནང་ནས་རྫས་བཏོན་ཟིན་པ་བསྲུང་བའི་ཕྱིར་དགེ་སློང་ཆེན་པོ་མི་ནུས་པ་ཞེས་བྱ་བ་གདོན་པའི་ལས་ཀྱི་འོས་སུ་རུང་བ་མ་ཡིན་པ་གཞག་པར་བྱ་བའོ། །མི་བཟོད་པ་ཉིད་དུ་འཇུག་པར་མི་བྱའོ་ཞེས་བྱ་བ་ནི། མེ་དང་ཆུ་མི་བཟོད་པ་ཁྱད་དུ་བསད་དུ་མི་རུང་བའི་ནང་དུ་རྫས་གདོན་པའི་ཆེད་དུ་འཇུག་པར་མི་བྱའོ། །གནས་མལ་གྱི་ལྟུང་བྱེད་དོ་ཞེས་བྱ་བ་དེ་
བཤད་ཟིན་ཏོ།། །།འདིང་བའི་ལྟུང་བྱེད་སྨྲ་བར་འདོད་ནས། ཁྱིམ་གཞན་དུ་འདིང་བར་བྱས་པ་ཁྱིམ་བདག་ལ་དྲིས་ཏེ་དོར་བར་བྱའོ་ཞེས་བྱ་བ་སྨྲས་ཏེ། ཁྱིམ་པའི་ཁྱིམ་གཞན་དུ་རྩྭ་དང་ལོ་མ་ལ་སོགས་པའི་གདིང་བ་རང་གིས་བྱས་སམ། གཞན་འདིང་དུ་བཅུག་པ་འགྲོ་ཁར་ཁྱིམ་བདག་ལ་དྲིས་ཏེ་དོར་བར་བྱའོ། །དགོན་པར་ནི་ཡང་ན་གློང་བར་བྱའོ་ཞེས་བྱ་བ་ནི། གལ་ཏེ་དགོན་པར་གདིང་བ་བྱས་པར་གྱུར་ན་ཡང་གློང་བར་བྱའོ། །ཡང་ན་གནས་དེ་ནས་གཞན་དུ་དོར་བར་བྱ་སྟེ། ཡང་ན་ཞེས་བྱ་བའི་སྒྲ་ནི་ཐ་དད་པར་བརྟག་པའི་དོན་ཏོ། །དེ་ནི་མགོ་འམ་མཇུག་བཟློག་པ་བྱས་པ་ཉིད་དོ་ཞེས་བྱ་བ་ནི། སློང་བ་དེ་ནི་རྩྭ་ལ་སོགས་པའི་མགོ་འམ་མཇུག་བཟློག་པ་ཙམ་བྱས་པ་ཉིད་ན་བྱས་པ་ཉིད་ཡིན་པར་རིག་པར་བྱའོ། །འདིར་གཞུང་ནི་དེ་དག་ཇི་སྲིད་དུ་འདིང་བ་འདོར་བར་བྱེད་པ་དང༌། ཆོམ་རྐུན་པ་དག་གིས་བཅོམ་མོ། །ཐམས་ཅད་གློང་བར་བྱེད་པ་ན་དེ་དག་ལ་ཉེས་དམིགས་སུ་གྱུར་ནས། བཅོམ་ལྡན་འདས་ཀྱིས་བཀའ་སྩལ་པ། མགོ་འམ་མཇུག་བཟློག་པས་གློང་བར་བྱ་སྟེ། འགྲོ་བར་བྱའོ་ཞེས་གསུངས་པ་ཡིན་ནོ། །གོས་དག་བསྐམ་པའི་ཕྱིར་རྩྭ་བཏིང་བ་ཡང་དོར་བར་བྱ་བ་ཉིད་དོ་ཞེས་བྱ་བ་ནི། གོས་དག་བསྐམ་པའི་ཕྱིར་གོས་དག་བསྐམ་པའི་གཅལ་དུ་རྩྭ་བཏིང་བ་བྱས་པ་དེ་ཡང་དོར་བར་བྱ་བ་སྟེ། དེ་ཡང་དོར་བར་བྱ་བ་ཉིད་དོ་ཞེས་བྱ་བའི་ཐ་ཚིག་གོ །སློང་བ་ལ་དོར་བར་ཁས་ལེན་ན་སྦྱིན་ནོ་ཞེས་བྱ་བ་ནི། རྩྭ་དག་བཏིང་བ་གང་ཟག་འགའ་ཞིག་གལ་ཏེ་སློང་ན་དེ་ལ་སྦྱིན་པར་བྱའོ། །ཁྱད་པར་ཅི་ལྟ་བུ་ཅན་ཞིག་ལ་ཞེ་ན། དོར་བར་ཁས་ལེན་པ་སྟེ། གང་གིས་རང་གི་དགོས་པ་བསྒྲུབས་ནས་དོར་བར་ཁས་ལེན་པ་དེ་ནི་དོར་བར་ཁས་ལེན་པ་སྟེ། དེ་ལའོ། །འཆགས་དག་ཏུ་རྐང་མཐིལ་གཉིས་ལ་རྩུབ་ན་རྩྭ་དག་གདིང་བར་བྱའོ་ཞེས་བྱ་བ་ནི། དགེ་སློང་ཡུན་རིང་དུ་འཆག་པས་དགེ་བའི་ཕྱོགས་རྒྱ་ཆེར་བྱེད་པ་དག་གིས་འཆག་ས་དག་ཏུ་རྐང་མཐིལ་གཉིས་ལ་རྩུབ་ན་རྩྭ་དག་གདིང་བར་བྱ་བའོ། །འདི་སྐད་བསྟན་ཏེ། གལ་ཏེ་དགེ་སློང་འཆག་པའི་རྐང་མཐིལ་དག་ལ་རྩུབ་ན་དེའི་ཚེ་འཆགས་དག་ཏུ་རྩྭ་དག་གདིང་བར་བྱའོ། །དེ་དག་ཀྱང་དོར་བར་བྱ་བ་ཉིད་དོ་ཞེས་བྱ་བ་ནི། འཆག་སར་བཏིང་བའི་རྩྭ་དེ་དག་ཀྱང་དོར་བར་བྱ་བ་ཉིད་དོ། །གཏོང་ན་དོར་བར་བྱ་བ་མ་ཡིན་
པ་ཉིད་དུ་མ་གྱུར་པ་དོར་བར་བྱ་བའོ་ཞེས་བྱ་བ་ལ། གཏོང་ན་ཞེས་བྱ་བ་ནི། འཆག་ས་བཏང་བའི་དུས་ལ་བབ་ཅིང་གུད་དུ་འགྲོ་བའི་དུས་ལ་ཉེ་བར་གནས་པར་གྱུར་ནའོ། །དོར་བར་བྱ་བ་ཞེས་བྱ་བ་ནི་འཆག་སར་རྩྭ་ལ་སོགས་པ་བཀྲམ་པའོ། །བྱ་བ་མ་ཡིན་པ་ཉིད་དུ་མ་གྱུར་པ་ཞེས་བྱ་བ་ལ་བྱ་བ་མ་ཡིན་པ་ཉིད་ཅེས་བྱ་བ་ནི། ཡང་དགྲམ་དུ་རུང་བ་ཉིད་མ་ཡིན་པ་སྟེ། རྡོག་ཆགས་ལ་སོགས་པས་ཕྱེ་མར་གྱུར་པའོ། །གལ་ཏེ་དེ་ལྟར་གྱུར་ན་ནི་དེའི་ཚེ་ས་རྡུལ་དང་འདྲ་བར་གནས་པས། དེ་ལ་བརྟེན་ནས་སྲོག་ཆགས་དག་མི་སྐྱེ་བའི་ཕྱིར་དེ་ནི་དོར་བར་བྱ་མི་དགོས་པས་དེའི་ཕྱིར་བྱ་བ་མ་ཡིན་པ་ཉིད་དུ་མ་གྱུར་པ་ཞེས་སྨོས་ཏེ། དེ་ལྟར་ས་རྡུལ་དང་འདྲ་བར་མ་གྱུར་ཅིང་དགྲམ་དུ་རུང་བ་ཉིད་ཡིན་པ་སྟེ། རྩྭ་ལ་སོགས་པ་དངོས་པོ་མ་ཉམས་པར་འདུག་པའོ། །དེ་ལས་ནི་སྲོག་ཆགས་དག་སྐྱེ་བའི་ཕྱིར་དེ་ནི་དོར་བར་བྱའོ་ཞེས་བྱ་བར་སྦྱར་རོ། །གཞན་གྱི་ཚེ་ན་དུས་དུས་སུ་སོ་སོར་བརྟག་པ་དང་བསྒྱུར་ལོག་བྱའོ་ཞེས་བྱ་བ་ནི། གཏང་བའི་དུས་ལས་གཞན་པའི་ཚེ་མི་གཏོང་བའི་དུས་དག་ཏུ་ནི། རྩྭ་ལ་སོགས་པ་དེ་དག་ལ་སྲོག་ཆགས་ཡོད་དམ་མེད་པ་དུས་དུས་སུ་སོ་སོར་བརྟག་པ་དང༌། སྲོག་ཆགས་མི་སྐྱེ་བར་བྱ་བའི་ཕྱིར་དུས་དུས་སུ་བསྒྱུར་ལོག་བྱའོ། །ས་སྣུམ་པ་དང་མངར་བ་ནི་ཉིན་རེ་ཞིང་ངོ་ཞེས་བྱ་བ་ལ་ཡུལ་གང་ན་ས་སྣུམ་པ་དང། མངར་བལ་གཞན་པ་ཡོད་པ་དེ་ནི་ས་སྣུམ་པ་དང་མངར་བ་སྟེ། ཡུལ་དེར་ནི་ཉིན་རེ་ཞིང་ལན་རེ་བསྒྱུར་ལོག་བྱའོ་ཞེས་བྱ་བར་སྦྱར་ཏེ། སྲིན་བལ་ལ་སོགས་པ་སྲོག་ཆགས་འཕེལ་བའི་ཉེས་པ་སྤང་བའི་ཕྱིར་རོ། །གཞན་དུ་ནི་ཟླ་བ་ཕྱེད་ཕྱེད་ཅིང་ངོ་ཞེས་བྱ་བ་ནི། ས་སྣུམ་པ་དང་མངར་བ་ལས་གཞན་པའི་ཡུལ་དུ་ནི་ཟླ་བ་ཕྱེད་ཕྱེད་ཅིང་ལན་རེ་བསྒྱུར་ལོག་བྱའོ། །འདིར་གཞུང་ནི་གལ་ཏེ་ས་ཕྱོགས་སྣུམ་པ་དང་མངར་བ་ཡིན་ན་བཏིང་བ་ཉིན་རེ་ཞིང་བསྒྱུར་ལོག་བྱའོ། །འོན་ཏེ་ས་ཕྱོགས་སྣུམ་པ་དང་མངར་བ་མ་ཡིན་ན་ནི་ཟླ་བ་ཕྱེད་ཕྱེད་ཅིང་བསྒྱུར་ལོག་བྱའོ་ཞེས་གསུངས་པ་ཡིན་ནོ། །འཆགས་དག་ཏུ་རྩྭའི་ཆུན་པོ་དག་ཐག་པས་བཅིངས་ཏེ་ཤིང་ལྗོན་པ་ལ་དཔྱངས་ཤིང་གཞག་པར་བྱའོ་ཞེས་བྱ་བ་ནི། འཆག་ས་དག་ཏུ་འཆག་སར་དགྲམ་པའི་ཐེབ་ཏུ་རྩྭའི་ཆུན་པོ་དག་ཐག་པས་བཅིངས་ཏེ་ཤིང་ལྗོན་པ་ལ་དཔྱངས་ཤིང་གཞག་པར་བྱའོ། །ལྕི་བ་གྱོ་མོར་གཞག་པར་བྱའོ་ཞེས་བྱ་བ་ནི། འདག་རྫས་ཀྱི་རྒྱུ་ལྕི་བ་བུམ་པ་ལ་སོགས་པ་
འཆག་པའི་གྱོ་མོའི་སྟེང་དུ་གཞག་པར་བྱའོ། །གནས་ནས་འཕགས་པར་འགྱུར་བ་ན་ཞེས་བྱ་བ་ཡན་ཆད་སྔར་ཐལ་བའོ་ཞེས་བྱ་བ་ནི། སྔར་མདོ་ལས་གནས་ནས་འཕགས་པར་འགྱུར་བ་ན་ཉམ་ངབ་དང་ཕྲད་པར་མི་འགྱུར་བ་ལྟ་ན་གནས་མལ་བསྡུ་བར་བྱའོ་ཞེས་སྨོས་པ་དེ་ཡན་ཆད་དུ་གནས་མལ་གྱི་བསླབ་པའི་གཞིར་གཏོགས་པ་བསླབ་པའི་གཞི་དེ་དང་འབྲེལ་བ་གང་ཇི་སྙེད་གོང་དུ་སྨོས་པ་དེ་དག་ཐམས་ཅད་འདིང་བའི་བསླབ་པའི་གཞི་འདིར་ཅི་འོས་སུ་སྦྱར་བར་རིག་པར་བྱ་སྟེ། དེ་ལས་ཁྲི་ལ་སོགས་པ་སྨོས་པ་ནི་འདིར་སྦྱར་བར་མི་བྱའི། འདི་ལྟར་འདོམ་བཞི་བཅུ་རྩ་དགུ་ཚུན་ཆད་ནི་དེའི་ཉེན་ཀོར་རོ་ཞེས་བྱ་བ་ལ་སོགས་པ་སྨོས་པ་ནི་འདིར་ཡང་འདྲ་བར་སྦྱར་རོ། །ཇི་ལྟར་གནས་མལ་གྱི་བསླབ་པའི་གཞིར་དགེ་སློང་འཁོད་པ་ལ་ཡང་མ་བཅོལ་ན་དེ་དང་འདྲ་བའི་རྐྱེན་མ་གཏོགས་ཏེ་ལྟུང་བྱེད་དོ་ཞེས་གསུངས་པའི་ལྟུང་བ་བསྟན་པའི་གཞུང་རྒྱ་ཆེར་འབྱུང་བ་དེ་དག་འདིང་བའི་བསླབ་པའི་གཞི་འདིར་ཡང་འདྲ་བར་སྦྱར་བར་རིག་པར་བྱའོ། །ཅིག་ཅར་སྤྱོད་སྤྱོད་པ་ནི་འདྲ་བ་ཉིད་དོ་ཞེས་བྱ་བ་ནི་ཅིག་ཅར་སྤྱོད་ན་ཐམས་ཅད་ཀྱིས་དོར་བ་ལ་སོགས་པ་བྱ་བར་འདྲ་བ་ཉིད་ཡིན་ནོ། །ཇི་ལྟར་གནས་མལ་གྱི་སྐབས་སུ་གཉི་ག་ཅིག་ཅར་སྤྱོད་སྤྱོད་པ་ལ་ནི་ཕྱིས་ལངས་པས་བྱ་བ་དང་ལྡན་པ་ཡིན་ནོ་ཞེས་སྨོས་པ་ལྟ་བུ་མ་ཡིན་ཏེ། འདིང་བ་ནི་སོ་སོར་ལོངས་སྤྱད་པའི་ཡན་ལག་ཡིན་པའི་ཕྱིར་རོ། །དེ་ལྟ་བས་ན་འདི་ལ་ནི་ཆ་གང་ལ་ཆ་གང་གིས་ལོངས་སྤྱད་པ་དེ་དེ་ཉིད་ཀྱིས་དོར་བར་བྱའོ་ཞེས་བྱ་བའི་ཐ་ཚིག་གོ །དགེ་འདུན་གྱི་མ་ཡིན་པར་ནི་གནས་དེའི་བདག་པོ་རྣམས་ལ་འདྲི་བར་བྱ་བ་ཉིད་ཡིན་ནོ་ཞེས་བྱ་བ་ནི། དགེ་འདུན་གྱི་གནས་མ་ཡིན་པར་འདིང་བདོར་བ་ནི། གནས་དེའི་བདག་པོ་རྣམས་ལ་དྲི་བར་བྱ་ཞིང་དོར་བར་བྱ་བ་ཉིད་ཡིན་ནོ། །རྣམས་ལ་ཞེས་མང་པོའི་ཚིག་ཏུ་བསྟན་པ་ནི་བུ་དང་ཆུང་མ་ལ་སོགས་པ་དག་ཀྱང་དྲི་བའི་ཕྱིར་ནི་གནས་དེའི་བདག་པོ་དག་ཡིན་པར་ཤེས་པའི་ཕྱིར་རོ། །བསླབ་པའི་གཞི་འདི་ལ་ཡན་ལག་གང་དག་ལྟུང་བའི་བྱེད་བ་པོ་ཉིད་ཡིན་ཞེ་ན། དེའི་ཕྱིར་དགེ་འདུན་གྱི་གཙུག་ལག་ཁང་ཉིད་དང༌། རྡོ་བ་དང་བྱེ་མའི་གཞི་ཉིད་ལ་སོགས་པའི་བདག་ཉིད་མ་ཡིན་པ་ཉིད་དང༌། དེ་ལྟ་བུའི་ཉེས་དམིགས་ཡོད་པ་ཉིད་ཀྱིས་གཞིར་རང་དང་བསྐོས་པས་གདིང་བ་བྱས་པ་ཉིད་ལྟ་བུ་
ནི་བྱེད་པ་པོ་དག་ཡིན་ནོ་ཞེས་བྱ་བ་སྨྲས་ཏེ། དགེ་འདུན་གྱི་གཙུག་ལག་ཁང་ཉིད་ཅེས་བྱ་བ་ལ། ས་གཞི་གང་དགེ་འདུན་གྱི་གཙུག་ལག་ཁང་ཡིན་པ་དེ་ནི་དགེ་འདུན་གྱི་གཙུག་ལག་ཁང་ངོ༌། །དེའི་དངོས་པོ་ནི་དེ་ཉིད་དེ། དགེ་འདུན་གྱི་གཙུག་ལག་ཁང་ཉིད་དོ། །གལ་ཏེ་གཙུག་ལག་ཁང་དེ་དགེ་འདུན་གྱི་ཡིན་ན་ཞེས་བྱ་བའི་ཐ་ཚིག་གོ །རྡོ་བ་དང་བྱེ་མའི་གཞི་ཉིད་ལ་སོགས་པའི་བདག་ཉིད་མ་ཡིན་པ་ཉིད་ཅེས་བྱ་བ་ལ། རྡོ་བ་ཞེས་བྱ་བ་ནི་རྡོ་ཐལ་རྒྱུ་ལ་སོགས་པའོ། །བྱེ་མའི་གཞི་ཞེས་བྱ་བ་ནི་བྱེ་མ་མང་བའོ། །དེའི་དངོས་པོ་ནི་དེ་ཉིད་དོ། །སོགས་པའི་སྒྲས་ནི་རྡོ་བ་གཞན་དག་དང༌། རྡོ་ལས་གཞན་པ་ས་མ་ཡིན་པ་ཡང་བསྡུའོ། །བདག་ཉིད་མ་ཡིན་པ་ཞེས་བྱ་བ་ནི་ས་གཞི་གང་རྡོ་བ་དང་བྱེ་མའི་གཞི་ཉིད་ལ་སོགས་པའི་བདག་ཉིད་མེད་པ་དེ་ནི་དེ་དག་གི་བདག་ཉིད་མ་ཡིན་པའོ། །དེའི་དངོས་པོ་ནི་དེ་ཉིད་དོ། །དེ་ལྟ་བུའི་ཉེས་དམིགས་ཡོད་པ་ཉིད་ཀྱི་ཞེས་བྱ་བ་ལ། དེ་ལྟ་བུའི་ཉེས་དམིགས་ཞེས་བྱ་བ་ནི། སྲིལ་ལ་སོགས་པ་སྲོག་ཆགས་སྐྱེ་བའི་ཉེས་དམིགས་སོ། །ཡོད་པ་ཉིད་ཀྱི་གཞི་ཞེས་བྱ་བ་ནི། ས་གཞི་གང་ན་དེ་ལྟ་བུའི་ཉེས་དམིགས་ཡོད་པའོ། །དེའི་དངོས་པོ་ནི་དེ་ཉིད་དོ། །ས་གཞིར་ཞེས་བྱ་བ་ནི། གོང་དུ་སྨོས་པ་ཐམས་ཅད་དང་སྦྱར་བར་བྱ་སྟེ། ས་གཞི་རྣམ་པ་དེ་ལྟ་བུར་རོ། །ས་གཞི་རྣམ་པ་དེ་ལྟ་བུ་གང་ཡང་རུང་བར་རང་གིས་རྩྭ་དང་ལོ་མ་ལ་སོགས་པའི་གདིང་བ་བཏིང་བ་བྱས་པ་ཉིད་དང༌། རང་གིས་བསྐོས་པས་རྩྭ་དང་ལོ་མ་ལ་སོགས་པའི་གདིང་བ་བཏིང་བ་བྱས་པ་ཉིད་ལྟ་བུ་ནི་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །འདི་སྐད་བསྟན་ཏེ། གལ་ཏེ་ས་གཞི་དེ་དགེ་འདུན་གྱི་གཙུག་ལག་ཁང་ཉིད་ཀྱང་ཡིན་ལ། རྡོ་བ་དང་བྱེ་མའི་གཞི་ཉིད་ལ་སོགས་པའི་བདག་ཉིད་མ་ཡིན་པ་ཡང་ཡིན། དེ་ལྟ་བུའི་ཉེས་དམིགས་ཡོད་པ་ཉིད་ཀྱང་ཡིན་ལ། ས་གཞི་དེར་དགེ་སློང་རང་ངམ་རང་གིས་བསྐོས་པས་རྩྭ་དང་ལོ་མ་ལ་སོགས་པའི་གདིང་བ་བཏིང་བ་ལ་མ་བསྡུས་སམ། སྡུད་དུ་མ་བཅུག་ཅིང༌། དགེ་སློང་འཁོད་པ་ལ་ཡང་མ་བཅོལ་བར་དེ་ནས་འདོམ་བཞི་བཅུ་རྩ་དགུ་ཚུན་ཆད་དུ་འགྲོ་བ་ལ་སོགས་པ་ཇི་སྐད་དུ་སྔར་བསྟན་པ་ཐམས་ཅད་འདིར་ཡང་སྦྱར་བར་བྱ་སྟེ། ཡན་ལག་དེ་དག་ནི་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །གདིང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།
བམ་པོ་ཉི་ཤུ་རྩ་ལྔ་པ། སྐྲོད་པའི་ལྟུང་བྱེད་ལ་བྱེད་པ་པོ་ཉིད་གང་ཞེ་ན་དེའི་ཕྱིར། དགེ་སློང་ཉིད་དང་དགེ་འདུན་གྱི་གཙུག་ལག་ཁང་ཉིད་དག་ནི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། གལ་ཏེ་བསྐྲད་པར་བྱ་བ་ཡང་དགེ་སློང་ཉིད་ཡིན་ལ། གཙུག་ལག་ཁང་གང་ནས་བསྐྲད་པར་བྱ་བའི་གཙུག་ལག་ཁང་དེ་ཡང་གལ་ཏེ་དགེ་འདུན་གྱི་གཙུག་ལག་ཁང་ཉེད་ཡིན་ན་དེ་གཉིས་ནི་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །ཅི་བསམ་པ་ཐམས་ཅད་ཀྱིས་དེ་གཉིས་བྱེད་པ་པོ་ཉིད་ཡིན་ནམ་ཞེ་ན་དེའི་ཕྱིར། གལ་ཏེ་དེ་ལ་གནོད་པ་དང༌། དགེ་འདུན་འཁྲུག་པ་སྐྱེ་བ་ཉེ་བར་ཞི་བར་མི་འགྱུར་བའི་གཉེན་པོར་འདོད་པ་མ་ཡིན་ནའོ་ཞེས་བྱ་བ་སྨྲས་ཏེ། དེ་ལ་གནོད་པ་དང་དགེ་འདུན་འཁྲུག་པ་ནི་དེ་ལ་གནོད་པ་དང༌། དགེ་འདུན་འཁྲུག་པ་གཉིས་སོ། །དེ་གཉིས་སྐྱེ་བ་དང་ཉེ་བར་ཞི་བར་མི་འགྱུར་བ་ནི། སྐྱེ་བ་དང་ཉེ་བར་ཞི་བར་མི་འགྱུར་བ་གཉིས་ཏེ། གལ་ཏེ་དེའི་གཉེན་པོར་འདོད་པ་མ་ཡིན་ན་དེའི་ཚེ་ཡན་ལག་སྔར་བསྟན་པ་གཉིས་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། བསྐྲད་པར་བྱ་བའི་དགེ་སློང་དེ་ལ་གནོད་པ་སྲོག་གི་བར་ཆད་ལ་སོགས་པ་སྐྱེ་བར་དོགས་པ་ཡོད་དམ་སྐྱེས་པ་ཉེ་བར་ཞི་བར་མི་འགྱུར་བར་དོགས་པ་ཡོད་པ་དང༌། དེ་བཞིན་དུ་དགེ་འདུན་འཁྲུག་པ་སྐྱེ་བར་དོགས་པ་ཡོད་དམ། སྐྱེས་པ་ཉེ་བར་ཞི་བར་མི་འགྱུར་བར་དོགས་པ་ཡོད་ན། གལ་ཏེ་དེ་དག་གི་གཉེན་པོའི་བསམ་པས་དགེ་སློང་གིས་དགེ་སློང་དགེ་འདུན་གྱི་གཙུག་ལག་ཁང་ནས་སྐྲོད་པར་བྱེད་ན་ནི་དེའི་ཚེ་ཉེས་པ་མེད་དོ། །གལ་ཏེ་དེ་དག་གི་གཉེན་པོར་འདོད་པ་མ་ཡིན་ན་ནི་དེའི་ཚེ་ཡན་ལག་སྔར་བསྟན་པ་གཉིས་བྱེད་པ་པོ་ཉིད་ཡིན་ནོ། །དེ་གཉིས་གང་ལ་བྱེད་པ་པོ་ཉིད་ཡིན་ཞེ་ན་དེའི་ཕྱིར། སྐྲོད་པ་ལའོ་ཞེས་བྱ་བ་སྨྲས་ཏེ། དགེ་སློང་སྐྲོད་པ་ལའོ། །སུས་ཤེ་ན་དེའི་ཕྱིར་གཞན་གྱིས་ཀྱང་ངོ་ཞེས་བྱ་བ་སྨྲས་ཏེ། དགེ་སློང་གཞན་གྱིས་ཀྱང་ངོ༌། །ཀྱང་ངོ་ཞེས་བྱ་བའི་སྒྲས་ནི། གཉི་ག་ཡང་དགེ་སློང་ཉིད་ཡིན་པར་སྟོན་པའོ། །གཞན་གྱི་རྗེས་སུ་འཇུག་པས་ཀྱང་ངོ་ཞེས་བྱ་བ་ནི། གཞན་གྱི་དྲིང་འཇོག་པས་དགེ་སློང་གིས་དགེ་སློང་གཙུག་ལག་ཁང་ནས་སྐྲོད་པར་བྱེད་ན་ལྟུང་བྱེད་དོ། །འདིར་གཞུང་ནི་དགེ་སློང་སྐྲོད་པར་བྱེད་དམ་དགེ་སློང་གིས་སྐྲོད་པར་བྱེད་ན་གཉི་ག་ལ་ལྟུང་བྱེད་དོ་ཞེས་གསུངས་པ་ཡིན་ནོ། །དགེ་སློབ་མ་དང་དགེ་ཚུལ་དང༌། དགེ་
ཚུལ་མ་རྣམས་ཀྱི་ནི་ཉེས་བྱས་ཀྱིའོ་ཞེས་བྱ་བ་ནི། དགེ་སློང་གིས་དགེ་སློབ་མ་དང༌། དགེ་ཚུལ་དང༌། དགེ་ཚུལ་མ་ལྟུང་བ་འབྱིན་པར་བྱེད་པ་རྣམས་དགེ་སློང་སྐྲོད་དུ་བཅུག་ན་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །འདིར་གཞུང་ནི་རྣམ་པར་འབྱེད་པ་ལས་དགེ་སློང་གིས་དགེ་སློབ་མ་དང༌། དགེ་ཚུལ་མས་དགེ་སློང་སྐྲོད་པར་བྱེད་ན་ལྟུང་བྱེད་དོ། །དགེ་སློང་མ་དང་དགེ་ཚུལ་དང་དགེ་ཚུལ་མ་ལ་ནི་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །དེ་དག་ཀྱང་ངོ་ཞེས་བྱ་བ་ནི་བསྐྲད་པར་བྱ་བ་དགེ་སློབ་མ་དང༌། དགེ་ཚུལ་དང༌། དགེ་ཚུལ་མ་དེ་དག་སྐྲོད་ན་ཡང་ཉེས་བྱས་སོ། །འདིར་གཞུང་ནི་དགེ་སློང་གིས་དགེ་ཚུལ་སྐྲོད་ན་ཉེས་བྱས་སོ་ཞེས་གསུངས་པ་ཡིན་ནོ། །བཞད་གད་ཀྱིས་ཀྱང་ངོ་ཞེས་བྱ་བ་ནི། སྐྲོད་ན་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །ཁྱིམ་པ་རྣམས་ལ་ནི་བསོད་ནམས་མ་ཡིན་པ་མང་ངོ་ཞེས་བྱ་བ་ནི། སྐྲོད་པར་བྱེད་པའི་ཁྱིམ་པ་དག་ཡིན་ན་དེ་དག་ནི་བསོད་ནམས་མ་ཡིན་པ་མང་པོའི་བྱེད་པ་པོ་ཉིད་ཡིན་ནོ། །འདིར་གཞུང་ནི་དགེ་སློང་གིས་ཁྱིམ་པ་དང༌། ཁྱིམ་པ་མོས་དགེ་སློང་སྐྲོད་དུ་བཅུག་ན་ལྟུང་བྱེད་དོ། །ཁྱིམ་པ་དང་ཁྱིམ་པ་མོ་ལ་ནི་བསོད་ནམས་མ་ཡིན་པ་མང་དུ་སྐྱེ་བར་འགྱུར་རོ་ཞེས་གསུངས་པ་ཡིན་ནོ། །སྐྲོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཕྱིས་གནོན་གྱི་ལྟུང་བྱད་སྨྲ་བར་འདོད་ནས། ཤེས་གཙོའོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང༌། འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་དགེ་འདུན་གྱི་གཙུག་ལག་ཁང་གི་གནས་སུ་དགེ་སློང་ཞུགས་པ་ཉིད་ལའོ་ཞེས་བྱ་བ་སྨྲས་ཏེ། དེ་ནི་དགེ་འདུན་གྱི་ཡང་ཡིན་ལ་གཙུག་ལག་ཁང་ཡང་ཡིན་པས་ན། དགེ་འདུན་གྱི་གཙུག་ལག་ཁང་ངོ༌། །དེའི་གནས་ནི་ཁྱམས་ལ་སོགས་པ་སྟེ། གནས་དེར་སྔར་འོངས་པའི་དགེ་སློང་གི་བཞུགས་པ་ཉིད་ཅེས་བྱ་བ་གནས་པར་གྱུར་ཟིན་པ་ཉིད་ལ་སྟེ། དེ་ལ་ལྟུང་བ་འབྱིན་པར་བྱེད་པའི་འདུ་ཤེས་གནས་འདི་ན་དགེ་སློང་གཞན་གནས་སོ་སྙམ་དུ་ཤེས་པ་གང་ཡིན་པ་དེ་ནི་ལྟུང་བའི་བྱེད་པ་པོ་ཉིད་ཡིན་ནོ། །དེ་ལྟར་ཡང་འདིར་གཞུང་ནི་སོ་སོར་ཐར་པའི་མདོ་ལས་ཡང་དགེ་སློང་གང་དགེ་འདུན་གྱི་གཙུག་ལག་ཁང་ན་དགེ་སློང་དག་སྔ་ན་འཁོད་པར་ཤེས་བཞིན་དུ་ཕྱིས་འོངས་ནས་
ཕྱིས་གནོན་བྱེད་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །འདུ་ཤེས་རྣམ་པ་འདི་ལྟ་བུ་དེ་གང་ལ་བྱེད་པ་པོ་ཉིད་ཡིན་ཞེ་ན་དེའི་ཕྱིར། ན་བ་དང་འཇིགས་པའི་དབང་མ་གཏོགས་པར་ཕྱིས་གནོན་བྱེད་པ་ལ་ཞེས་བྱ་བ་སྨྲས་ཏེ། གཞན་གནས་པའི་གནས་སུ་གཞན་དེ་མ་དད་བཞིན་དུ་འདུག་པ་ལའོ། །ཅི་དུས་ཐམས་ཅད་དུ་འམ་ཞེ་ན་དེའི་ཕྱིར། ན་བ་དང་འཇིགས་པའི་དབང་མ་གཏོགས་པ་ཞེས་བྱ་བ་སྨྲས་སོ། །འདིར་གཞུང་ནི་གལ་ཏེ་ན་འམ་འཇིགས་པར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ནི་དཔེ་སྟེ། ཐོ་འཚམས་པར་འདུན་པས་དགེ་སློང་ལ་ཐོ་འཚམས་པ་དག་ཀྱང་ངོ་ཞེས་བྱ་བ་ནི། ཕྱིས་གནོན་བྱེད་པ་དེ་ནི་དགེ་སློང་ལ་ཐོ་འཚམས་པ་དག་གི་དཔེ་སྟེ། གཞན་ཡང་ཐོ་འཚམས་པར་འདུན་པས་དགེ་སློང་ལ་ཐོ་འཚམས་པ་དག་ཀྱང་བསླབ་པའི་གཞི་འདིར་གཏོགས་པའི་ལྟུང་བྱེད་ཡིན་ནོ། །འདིར་གཞུང་ནི་བར་སྡོམ་ལས། ངན་དང་གསོད་དང་གྲང་དྲོ་དང༌། །ཆོལ་ཟངས་དང་ནི་བཀྲུ་སྨན་དང༌། །རྣལ་འབྱོར་མཐུན་དང་ཁ་ཏོན་དང༌། །འཇིགས་དང་བཅས་དང་འཇིགས་མེད་དོ། །ཞེས་བྱ་བས་དགེ་སློང་གིས་དགེ་སློང་ལ་ཅི་ཙམ་ཅུང་ཟད་ཐོ་འཚམས་པར་བྱེད་ན་ཐམས་ཅད་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །བསྒོ་བ་རྣ་ལ་གཟོན་པ་ལ་སོགས་པ་དག་ལ་ཡང་སྤྱིར་ཐོ་འཚམས་པ་ཡོད་མོད་ཀྱི། འོན་ཀྱང་གནས་ལ་སོགས་པའི་རྣམ་པའི་བྱེ་བྲག་ཡོད་པའི་ཕྱིར་ལྟུང་བྱེད་ཐ་དད་པ་ཉིད་ཡིན་ནོ། །ལྟུང་བྱེད་དུ་བསྟན་པའི་ཐོ་འཚམས་པ་དེ་དག་ལས་གཞན་པའི་ཐོ་འཚམས་པ་ནི་ཐམས་ཅད་ཉེས་བྱས་སོ། །ཕྱིས་གནོན་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།རྩ་བ་འབྱུང་བ་ལ་འཇུག་པའི་ལྟུང་བྱེད་སྨྲ་བར་འདོད་ནས་དགེ་འདུན་གྱི་གཙུག་ལག་ཁང་གི་སྟེང་གི་ཐོག་ཉིད་ནི་བྱེད་པ་པོའོ་ཞེས་བྱ་བ་སྨྲས་ཏེ། དགེ་འདུན་གྱི་གཙུག་ལག་ཁང་གི་སྟེང་གི་ཐོག་ཉིད་ནི་ལྟུང་བའི་བྱེད་པ་པོ་ཡིན་ནོ། །འདི་སྐད་བསྟན་ཏེ། གལ་ཏེ་གཙུག་ལག་ཁང་དགེ་འདུན་གྱི་ཡིན་ལ། དེ་ཡང་སྟེང་གི་ཐོག་ཡོད་ན་དེ་ནི་ལྟུང་བའི་བྱེད་པ་པོ་ཡིན་ནོ། །ཅི་རྣམ་པ་ཐམས་ཅད་ལ་སྔར་བསྟན་པ་དེ་བྱེད་པ་པོ་ཡིན་ནམ་ཞེ་ན་མ་ཡིན་ཏེ་དེའི་ཕྱིར། གལ་ཏེ་བྱིན་གྱིས་གཞོལ་བ་ཉིད་དམ་སྤང་ལེབ་ཉིད་དམ་དེ་དང་འདྲ་བས་གཡོགས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། གལ་ཏེ་སྟེང་གི་ཐོག་བྱིན་གྱིས་གཞོལ་བར་གཡོགས་
པ་མ་ཡིན་པ་དང་སྤང་ལེབ་ཀྱིས་གཡོགས་པ་མ་ཡིན་པ་དང༌། །སྤང་ལེབ་དང་འདྲ་བས་གཡོགས་པ་མ་ཡིན་པ་ཉིད་ཡིན་ན་ཁ་ན་མ་ཐོ་བ་འདིའི་བྱེད་པ་པོ་ཉིད་ཡིན་ནོ། །གལ་ཏེ་བྱིན་གྱིས་གཞོལ་བ་ལ་སོགས་པ་ཡིན་ན་དེ་ལ་ནི་ལྟུང་བ་མེད་དོ། །དེ་ལྟར་ཡང་འདིར་གཞུང་ནི་བྱིན་གྱིས་གཞོལ་བ་ཡིན་ན་ལྟུང་བ་མེད་དོ་ཞེས་གསུངས་པ་ཡིན་ནོ། །འདི་ནི་འདིར་མདོར་བསྟན་པ་ཡིན་ཏེ། གང་ལ་རྩ་བ་འགྲོ་བའི་སྐབས་མེད་པ་དེ་ལ་ལྟུང་བ་མེད་དོ། །བྱེད་པ་པོ་གཞན་ཡང་བསྟན་པའི་ཕྱིར། མནན་པར་འོས་པའི་རྩ་བ་ཕུར་བུ་ལྟ་བུ་ཉིད་ཀྱང་ངོ་ཞེས་བྱ་བ་སྨྲས་ཏེ། མནན་པར་འོས་པ་ཞེས་བྱ་བ་ནི། ཁྲི་ལ་སོགས་པའོ། །དེའི་རྩ་བ་ཕུར་བུ་ལྟ་བུ་ཉིད་ཀྱང་ལྟུང་བའི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་ཁྲི་ལ་སོགས་པ་དག་གི་རྩ་བ་ཕུར་བུ་ལྟ་བུ་ཉིད་ཡིན་ན་ཁ་ན་མ་ཐོ་བ་འདིའི་བྱེད་པ་པོ་ཉིད་ཡིན་ནོ། །ཁྲི་ལ་སོགས་པ་གང་དག་ལ་ཕུར་བུ་ལྟ་བུའི་རྐང་པ་ཡོད་པ་དེ་དག་ནི་ཕུར་བུ་ལྟ་བུའི་རྩ་བ་ཅན་གྱི་ཁྲི་དག་སྟེ། ཕུར་བུ་བཞིན་དུ་གཞུག་ཏུ་ཡང་རུང་དབྱུང་དུ་ཡང་རུང་བས། དེའི་ཕྱིར་རྩ་བ་འབྱུང་བ་ཞེས་བྱའོ། །ཅི་ཁྲི་ལ་སོགས་པ་ཕུར་བུ་ལྟ་བུའི་རྐང་པ་ཅན་དག་དུས་ཐམས་ཅད་དུ་ལྟུང་བའི་བྱེད་པ་པོ་ཉིད་ཡིན་ནམ་ཞེ་ན་དེའི་ཕྱིར། བཀན་པ་ཉིད་དང༌། རྐང་རྟེན་བཅུག་པ་ཉིད་ནི་མ་གཏོགས་སོ་ཞེས་བྱ་བ་སྨྲས་ཏེ། ཁྲི་ལ་སོགས་པ་བཀན་པ་ཉིད་དང༌། རྐང་རྟེན་བཅུག་པ་ཉིད་ནི་མ་གཏོགས་སོ། །ཁྲི་ལ་སོགས་པ་གང་དག་གན་རྐྱལ་དུ་བཀན་པ་དེ་དག་ནི་བཀན་པ་སྟེ། དེ་དག་གི་དངོས་པོ་ནི་དེ་དག་ཉིད་དོ། །ཁྲི་ལ་སོགས་པ་གང་དག་གི་རྩ་བ་ལ་རྐང་རྟེན་བཅུག་པ་དེ་དག་ནི་རྐང་རྟེན་བཅུག་པ་སྟེ། དེ་དག་གི་དངོས་པོ་ནི་དེ་དག་ཉིད་དོ། །འདི་སྐད་བསྟན་ཏེ། གལ་ཏེ་ཁྲི་ལ་སོགས་པ་དག་གན་རྐྱལ་དུ་བཀན་པར་གྱུར་ཏམ། རྐང་རྟེན་བཅུག་པར་གྱུར་ན་དེའི་ཚེ་དེ་དག་ལ་ལྟུང་བའི་བྱེད་པ་པོ་ཉིད་མེད་དོ། །གང་ལ་ཐོག་ཉིད་དང༌། རྩ་བ་ཕུར་བུ་ལྟ་བུ་ཉིད་དེ། དེ་གཉིས་བྱེད་པ་པོ་ཉིད་ཡིན་ཞེ་ན་དེའི་ཕྱིར། གནོན་པ་ལའོ་ཞེས་བྱ་བ་སྨྲས་ཏེ། གནོན་པར་འོས་པ་ཁྲི་ལ་སོགས་པ་ཞེས་བྱ་བར་སྦྱར་རོ། །འདིར་གཞུང་ནི་ལྗིད་ཀྱིས་ཕབ་ཏེ་འདུག་གམ་ཉལ་ན་ལྟུང་བྱེད་དོ་ཞེས་གསུངས་པ་ཡིན་ནོ། །ཅི་མི་ཤེས་པ་ལ་ཡང་དེ་གཉིས་ལྟུང་བའི་བྱེད་པ་པོ་ཉིད་ཡིན་ནམ་ཞེ་ན་དེའི་ཕྱིར། ཤེས་གཙོའོ་ཞེས་བྱ་བ་སྨྲས་ཏེ། འདུ་
ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་རྣམ་པས་སོ། །འདིར་གཞུང་ནི་ཡང་དགེ་སློང་གང་དགེ་འདུན་གྱི་གཙུག་ལག་ཁང་གི་སྟེང་གི་ནམ་མཁའ་ལ་ཐོག་བོར་བ་དང་ཁྲི་འམ་ཁྲིའུ་རྩ་བ་འབྱུང་བ་ལ་ཤེས་བཞིན་དུ་ཞེས་གསུངས་པའི་ཤེས་བཞིན་དུ་ཞེས་བྱ་བ་ཉིད་ཡིན་ནོ། །རྣམ་པར་འབྱེད་པ་ལས་ཀྱང་རང་ཉིད་ཀྱིས་རིག་པར་འགྱུར་པ་འམ། གཞན་དག་གིས་བརྗོད་པས་སོ་ཞེས་གསུངས་སོ། །རྩ་བ་འབྱུང་བ་ལ་འདུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་བརྗོད་པར་བྱ་སྟེ། ལྟུང་བྱེད་འདི་དང་འོག་ནས་སྲོག་ཆགས་དང་བཅས་པའི་ཆུ་ལ་སྤྱོད་པ་ཞེས་བྱ་བའི་ལྟུང་བྱེད་འབྱུང་བ་དེ་གཉིས་ནི་སོ་སོར་ཐར་པའི་མདོ་ལས་ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུས་རྩྭ་འམ་ལྕི་བའམ་ས་ལ་འདེབས་སམ། འདེབས་སུ་འཇུག་ན་ལྟུང་བྱེད་དོ་ཞེས་བྱ་བ་དང༌། ཡང་དགེ་སློང་གང་ཤེས་བཞིན་དུ་སྲོག་ཆགས་དང་བཅས་པའི་ཆུ་ལ་སྤྱོད་ན་ལྟུང་བྱེད་དོ་ཞེས་གསུངས་པས་ཚུལ་དང་འདྲ་བར་སྣང་སྟེ། རང་སྤྱོད་པ་མ་ཡིན་པ་དང༌། རང་སྤྱོད་པ་ཞེས་བྱ་བའི་ཡུལ་གྱི་བྱེ་བྲག་གིས་ནི་དེ་གཉིས་ལྟུང་བ་ཐ་དད་པ་ཉིད་ཡིན་པར་བསྟན་པའི་ཕྱིར། རང་སྤྱོད་པའི་དོན་ཉིད་དེ་ལས་གཞན་ལའོ་ཞེས་བྱ་བ་སྨྲས་ཏེ། རང་གི་སྤྱོད་པ་ནི་རང་སྤྱོད་པའོ། །གང་ལ་དགོས་པ་དེ་ཡོད་པ་ནི་དེའི་དོན་ཏེ། དེ་ནི་རང་སྤྱོད་པའི་དོན་ཏོ། །དེའི་དངོས་པོ་ནི་དེ་ཉིད་དོ། །རང་སྤྱོད་པའི་དོན་ཉིད་ལ་ནི་འོག་ནས་སྲོག་ཆགས་དང་བཅས་པའི་ཆུ་ལ་སྤྱོད་པ་ཞེས་འབྱུང་བའི་བསླབ་པའི་གཞི་དེ་རྣམ་པར་གཞག་གོ །དེ་ལས་གཞན་ལའོ་ཞེས་བྱ་བ་ནི། རང་སྤྱོད་པའི་དོན་ཉིད་ཅེས་བྱ་བ་དེ་ལས་གཞན་བ་སྟེ། རང་སྤྱོད་པ་མ་ཡིན་པ་ལའོ། །དེ་ལ་སྲོག་ཆགས་དང་བཅས་པ་ལ་སྤྱོད་པ་ཞེས་བྱ་བའི་བསླབ་པའི་གཞི་འདི་ཉིད་རྣམ་པར་གཞག་གོ །ལྷག་མ་ནི་འོག་མ་ཁོ་ན་ལས་ཁོང་དུ་ཆུད་པར་བྱའོ། །སྲོག་ཆགས་དང་བཅས་པ་ལ་སྤྱོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གཙུག་ལག་ཁང་གི་ལྟུང་བྱེད་སྨྲ་བར་འདོད་ནས། སྒོ་ཆ་གཞུག་པར་བྱའོ་ཞེས་བྱ་བ་སྨྲས་ཏེ། སྒོ་ཆ་ཞེས་བྱ་བ་ནི་སྒོ་སྐྱེས་ལ་སོགས་པ་སྒོ་དང་འབྲེལ་པའི་ཡོ་བྱད་དོ། །དེ་དག་གཞུག་པར་བྱའོ་ཞེས་བྱ་བ་ནི་དེ་དང་པོར་
གཟུགས་པར་བྱའོ་ཞེས་བྱ་བའི་ཐ་ཚིག་གོ །འདིར་སྒོ་ཆ་ཞེས་སྨོས་པས་སྒོ་དང་འབྲེལ་བའི་ཡོ་བྱད་ཐམས་ཅད་ཀྱང་མ་བསྡུས་ཏེ། འདི་ལྟར་ཡ་ཕུབས་ལ་སོགས་པ་ལྷག་མ་དག་ནི་འཕྲལ་ལ་གཞུག་པར་བྱ་བ་ཡིན་པའི་ཕྱིར། འདིར་གཞུང་ནི་སྒོ་ཆ་གོང་མ་བཅུག་ན་ནི་དངོས་གཞིའོ། །སྒོ་ཆ་གཞན་མ་བཅུག་ན་ནི་ཉེས་བྱས་སོ་ཞེས་གསུངས་པ་ཡིན་ནོ། །སྒོ་གླེགས་ཀྱང་ངོ་ཞེས་བྱ་བ་ལ་འདིར་སྒོ་གླེགས་ཞེས་བྱ་བ་ནི་སྒོ་ལེབ་ལ་བྱ་སྟེ། དེ་ཡང་གཞུག་པར་བྱའོ། །སྐར་ཁུང་དག་ཀྱང་གདོད་པར་བྱའོ་ཞེས་བྱ་བ་ནི། ངོས་ཀྱི་སྐར་ཁུང་དག་ཀྱང་གདོད་པར་བྱ་བའོ། །ལྟུང་བ་འདི་ལ་བྱེད་པ་པོ་ཉིད་གང་ཞེ་ན། དེའི་ཕྱིར། གཙུག་ལག་ཁང་ནི་བྱེད་པ་པོ་ཉིད་དོ་ཞེས་བྱ་བ་སྨྲས་སོ། །ཚད་ཇི་ཙམ་ཞེ་ན་དེའི་ཕྱིར། སྤྱོད་ལམ་བཞི་ཤོང་བའོ་ཞེས་བྱ་བ་སྨྲས་ཏེ། གཙུག་ལག་ཁང་དུ་སྤྱོད་ལམ་རྣམ་བཞི་བྱར་རུང་ཞིང་ཤོང་བའོ། །ཅི་གཙུག་ལག་ཁང་ཚད་དེ་ཙམ་དང་ལྡན་པ་ཐམས་ཅད་བྱེད་པ་པོ་ཡིན་ནམ་ཞེ་ན། དེའི་ཕྱིར་གལ་ཏེ་ཐམས་ཅད་རྡོ་འམ་སོ་ཕག་གམ་ཤིང་ལས་བྱས་པ་མ་ཡིན་ནའོ་ཞེས་བྱ་བ་སྨྲས་ཏེ། གལ་ཏེ་ཐམས་ཅད་རིལ་གྱིས་རྡོ་ལས་བྱས་པ་འམ། སོ་ཕག་སོ་བཏང་བ་ལས་བྱས་པ་འམ། ཤིང་ལས་བྱས་པ་མ་ཡིན་ན་བྱེད་པ་པོ་ཉིད་ཡིན་ནོ། །དེ་དག་ལས་བྱས་པ་ན་བྱེད་པ་པོ་ཉིད་མ་ཡིན་ནོ། །གཙུག་ལག་ཁང་ནི་ཐམས་ཅད་ཀྱང་བྱེད་པ་པོ་ཉིད་ཡིན་ཏེ། དགེ་འདུན་མངའ་བ་འབའ་ཞིག་ཏུ་མ་ཟད་ཀྱི། གང་ཟག་དང་ཁྱིམ་པ་དབང་བ་ཡང་བྱེད་པ་པོ་ཉིད་ཡིན་ནོ། །ཆར་ཆུ་བསྐྱབ་པའི་གཡོགས་པ་ཡང་ངོ་ཞེས་བྱ་བ་ནི། གལ་ཏེ་མ་བྱས་ན་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་ཏེ། གལ་ཏེ་ཆར་ཆུ་བསྐྱབ་པའི་ཕྱིར་ལོ་མ་ལ་སོགས་པས་འཕྲོ་མ་གཡོགས་ནའོ། །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་རྩིག་པའི་རིམ་པ་གཉིས་སམ་གསུམ་དག་ལས་ལྷག་པར་བརྩིག་ཅིང་དེ་ལ་ལྟུང་བྱེད་དུ་ཡང་མི་འགྱུར་བ་མཆིས་སམ། ཡོད་དེ་རྩ་དག་གིས་གཡོགས་པར་བྱེད་ན་ལྟུང་བ་མེད་དོ། །སྤང་ལེབ་དག་གིས་གཡོགས་པར་བྱེད་ན་ལྟུང་བ་མེད་དོ། །ཤིང་ལེབ་དག་གིས་གཡོགས་པར་བྱེད་ན་ལྟུང་བ་མེད་དོ་ཞེས་གསུངས་པ་ཡིན་ནོ། །ཅི་ལྟུང་བ་འབྱིན་པར་བྱེད་པ་ཐམས་ཅད་ལ་གཙུག་ལག་ཁང་འདི་བྱེད་པ་པོ་ཉིད་ཡིན་ནམ་ཞེ་ན་མ་ཡིན་ཏེ། དེའི་ཕྱིར་ཡོན་བདག་གིས་བྱས་སམ་ཟིན་ནས་བལྟའོ་
མ་སྨྲས་པ་ལའོ་ཞེས་བྱ་བ་སྨྲས་ཏེ། གལ་ཏེ་ཡོན་བདག་གིས་འདི་སྐད་ཅེས་གཙུག་ལག་ཁང་བྱས་ནས་བལྟའོ་ཞེའམ་ཟིན་ནས་བལྟའོ་ཞེས་དགེ་སློང་མ་ལ་སྨྲས་ན་དགེ་སློང་དེ་ལ་གཙུག་ལག་ཁང་དེ་བྱེད་པ་པོ་ཉིད་ཡིན་ནོ། །གལ་ཏེ་དེ་སྐད་སྨྲ་ན་དེ་ལ་ཉེས་པར་མི་འགྱུར་རོ། །གང་ལ་དེ་བྱེད་པ་པོ་ཉིད་ཡིན་ཞེ་ན། དེའི་ཕྱིར་ཕ་གུ་རིམ་པ་གསུམ་ལས་ལྷག་པར་རྩིག་པ་བྱས་པ་ལའོ་ཞེས་བྱ་བ་སྨྲས་ཏེ། ཕ་གུ་རིམ་པ་གསུམ་ལས་ལྷག་པར་རྩིག་པ་བྱས་པ་ལ་གཙུག་ལག་ཁང་དེ་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། ཉིན་གཅིག་ལ་ཕ་གུ་དག་གིས་རིམ་པ་གསུམ་བརྩིག་པར་བྱའི། དེ་ལས་ལྷག་པར་བརྩིག་པར་མི་བྱའོ་ཞེས་བྱ་བའི་ཐ་ཚིག་གོ །ཅི་བདག་ཉིད་ཁོ་ནས་སམ་ཞེ་ན་དེའི་ཕྱིར། གཞན་གྱིས་ཀྱང་ངོ་ཞེས་བྱ་བ་སྨྲས་ཏེ། འདིར་གཞུང་ནི་བྱེད་དུ་བཅུག་ན་ཞེས་བྱ་བ་གསུངས་པ་ཡིན་ནོ། །གང་གི་ཚེ་བརྩིགས་ན་ཞེ་ན། དེའི་ཕྱིར། ཉི་མ་དེ་ལའོ་ཞེས་བྱ་བ་སྨྲས་ཏེ། ཉི་མ་གང་ལ་རིམ་པ་གསུམ་རྩིག་པའི་ཉི་མ་དེ་ཉིད་ལ་གལ་ཏེ་ལྷག་པར་བརྩིགས་ནའོ། །ཉི་མ་དང་པོ་ལ་རིམ་པ་བཞི་རྩིག་ཅིང་ཉི་མ་གཉིས་བ་ལ་རིམ་པ་གཉིས་བརྩེགས་ན་ཡང་ཉི་མ་དང་པོ་ལ་ལྷག་པ་གང་ཡིན་པ་དེ་ཉི་མ་གཉིས་པའི་ཉུང་བའི་ཁར་བརྩི་བར་མི་འགྱུར། དེ་བཞིན་དུ་ཉི་མ་གཉིས་པ་ལ་ལྷག་པར་རྩིག་པ་གང་ཡིན་པ་དེ་ཡང་ཉི་མ་དང་པོའི་རིམ་པ་ཉུང་བའི་ཁར་བརྩི་བར་མི་བྱའོ། །གཞན་ལ་ཡང་འཇིམ་པ་མེད་པ་ལས་སོ་ཞེས་བྱ་བ་ནི། ཉི་མ་གཞན་ལ་ཡང་ཕ་གུ་འཇིམ་པ་མེད་པ་གསུམ་ལས་ལྷག་པར་རྩིག་པ་བྱས་ན་གཙུག་ལག་ཁང་དེ། ལྟུང་བའི་བྱེད་པ་པོ་ཉིད་ཡིན་ནོ། །དེ་ལྟ་བས་ན་འཇིམ་པ་མེད་པ་ཡང་རིམ་པར་བགྲང་བར་བྱའོ། །ཆུ་ཁུང་དག་མ་བཏོད་པ་རུང་ངོ་ཞེས་བྱ་བ་ནི། ཆུ་ཁུང་དག་མ་བཏོད་པ་ལ་ནི་ཉི་མ་གཞན་ལ་ཕ་གུ་རིམ་པ་གསུམ་ལས་ལྷག་པར་རིམ་བརྩིག་པ་བྱས་ན་གཙུག་ལག་ཁང་དེ་ལྟུང་བའི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་རང་གི་གནས་སུ་ཆུ་ཁུང་བཏོད་པ་ལ་ནི་ཕ་གུ་རིམ་པ་ལས་ལྷག་པར་རྩིག་པ་བྱས་ན་ཡང་ཉེས་པ་མེད་ལ། རང་གི་གནས་སུ་ཆུ་ཁུང་མ་བཏོད་པ་ལ་ནི་ཕ་གུ་རིམ་པ་གསུམ་ལས་ལྷག་པར་རྩིག་པ་བྱས་ན་དངོས་གཞིའི་ཁ་ན་མ་ཐོ་བར་འགྱུར་ཏེ། ཆུ་ཁུང་བཏོད་པའི་གནས་ཡན་ཆད་ནས་རིམ་པ་གསུམ་བགྲང་བར་བྱའོ། །
བརྐོས་ཏེ་རྨང་གང་གི་རྩིག་པ་མ་བཙུགས་པ་ཉིད་ཀྱང་རུང་ངོ་ཞེས་བྱ་བ་ནི། ས་བརྐོས་ཏེ་རྨང་གི་རྩ་བ་གཟུགས་པར་བྱའོ། །བརྐོས་ཏེ་རྨང་གི་རྩ་བ་མ་བཙུགས་པ་ཉིད་ཡིན་ན་དེ་ལ་ནི་ཉི་མ་གཞན་ལ་ཡང་ཕ་གུ་རིམ་པ་གསུམ་ལས་ལྷག་པར་རྩིག་པ་བདག་ཉིད་ཀྱིས་བྱས་སམ། གཞན་བྱེད་དུ་བཅུག་ན་ཡང་ཐམས་ཅད་དུ་དངོས་གཞིའི་ཁ་ན་མ་ཐོ་བར་འགྱུར་རོ། །གལ་ཏེ་བརྐོས་ཏེ་རྨང་གི་རྩ་བ་བཙུགས་པ་ཉིད་ཡིན་ན་དེ་ལ་ནི་ཉི་མ་གཞན་ལ་ཕ་གུ་རིམ་པ་གསུམ་ལས་ལྷག་པར་བརྩིགས་ཀྱང་ཉེས་པ་མེད་དོ། །སྒོ་ཆ་གོང་མ་མ་བཙུགས་པ་ཡང་རུང་ངོ་ཞེས་བྱ་བ་ལ། སྒོ་ཆ་གོང་མ་ཞེས་བྱ་བ་ནི། ཡ་ཕུབས་ལ་སོགས་པའི་སྒོ་ཆ་ནི་སྒོ་ཆ་གོང་མ་སྟེ། དེ་མ་བཙུགས་པ་ལ་ཡང་ཉི་མ་གཞན་ལ་ཕ་གུ་རིམ་པ་གསུམ་ལས་ལྷག་པར་བརྩིགས་ན་ཡང་དངོས་གཞིའི་ཁ་ན་མ་ཐོ་བར་འགྱུར་རོ། །གལ་ཏེ་སྒོ་ཆ་གོང་མ་དེ་བཙུགས་པ་ཡིན་ན་དེ་ལ་ནི་ཕ་གུ་རིམ་པ་གསུམ་ལས་ལྷག་པར་བརྩིགས་ཀྱང་ཉེས་པ་མེད་དེ། སྒོ་ཆ་བཙུགས་པ་ཡན་ཆད་ནས་རིམ་པ་གསུམ་བགྲང་བར་བྱ་བ་ཡིན་ནོ། །མདོ་གོང་མ་གསུམ་ཆར་ལས་རུང་ངོ་ཞེས་བྱ་བའི་སྒྲ་སྨོས་པ་ནི་དེ་དག་གི་རིམ་པ་རྣམས་ལ་ལྟུང་བའི་ཕྱིར་སོ་སོར་གཙོ་བོ་ཡིན་བར་བསྟན་པའི་ཕྱིར་རོ། །དང་པོའི་མདུན་རོལ་ནི་ཉེས་པ་མེད་དེ་ཞེས་བྱ་བ་ནི། ཕ་གུ་རིམ་པ་གསུམ་ལས་ལྷག་པར་རྩིག་པ་བྱས་ན་དངོས་གཞིའོ་ཞེས་བསྟན་པས་ན་འདིར་ཡང་དངོས་གཞིའི་རྒྱུར་གྱུར་པ་རིམ་པ་ལྷག་པར་རྩིག་གོ་སྙམ་པ་ན། ལྷག་པ་དང་པོ་རྩིག་པའི་མདུན་རོལ་དུ་རིམ་པ་གསུམ་རྩིག་པའི་ཚེ་ན་ནི་སྦྱོར་བའི་ཉེས་བྱས་སུ་འགྱུར་ཏེ། སྦྱོར་བ་ཐམས་ཅད་ལ་ཉེས་བྱས་སོ་ཞེས་གསུངས་པའི་ཕྱིར་རོ། །དེ་ལྟར་དངོས་གཞིའི་མདུན་རོལ་དུ་ནི་སྦྱོར་བ་ཡིན་པས་དེའི་ཕྱིར་ཉེས་པ་དེ་ཀུན་ལ་ཐལ་བར་འགྱུར་བ་བསལ་བའི་ཕྱིར་མདོ་འདི་བརྗོད་དེ། ལྟུང་བའི་རྒྱུར་གྱུར་པ་ལྷག་པ་དང་པོ་རིམ་པ་བཞི་པའི་མདུན་རོལ་དུ་ཉི་མ་གཞན་ལ་རིམ་པ་སྔ་མ་དག་བརྩིགས་པ་དེ་ལ་ནི་སྦྱོར་བ་ཞེས་བྱ་བའི་ཉེས་པ་མེད་དོ། །འདི་ལྟར་རིམ་པ་གསུམ་བརྩིགས་པའི་སྟེང་དུ་ཉི་མ་དེ་ཉིད་ལ་རིམ་པ་བཞི་པ་རྩིག་པའི་ཕྱིར་ཕ་གུ་ལ་སོགས་པ་ལ་འཛིན་པ་རྩོམ་པར་བྱེད་པ་དེའི་ཚེ་ན་ནི། སྦྱོར་བ་ཞེས་བྱ་བའི་ཉེས་བྱས་སོ། །དེ་བརྩིགས་ན་ནི་དངོས་གཞིར་འགྱུར་རོ་ཞེས་བྱ་བའི་ཐ་ཚིག་གོ །གཙུག་ལག་ཁང་གི་
ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།མ་བསྐོས་པར་སྟོན་པའི་ལྟུང་བྱེད་སྨྲ་བར་འདོད་ནས། ཕམ་པར་འགྱུར་བ་མ་བྱུང་བ་མདོ་སྡེ་དང་འདུལ་བ་དང་མ་མོ་འཛིན་པ་ལོ་ཉི་ཤུ་ལས་མི་ཉུང་བ་གྲོང་ཁྱེར་པའི་སྐད་སྨྲ་བ་དགེ་སློང་མ་ལ་ལུས་ཉེ་བར་གཞོལ་བ་ཉིད་ཀྱི་ཕྱིར་བཅོས་པ་བྱས་པ་དགེ་སློང་མའི་སྟོན་པར་བསྐོའོ་ཞེས་བྱ་བ་སྨྲས་ཏེ། དགེ་སློང་ཕམ་པར་འགྱུར་བ་མ་བྱུང་བ་ཞེས་བྱ་བ་ལ་སོགས་པའི་ཡོན་ཏན་དང་ལྡན་པ་དགེ་སློང་མའི་སྟོན་པར་བསྐོའོ་ཞེས་བྱ་བར་སྦྱར་རོ། །ཕམ་པར་འགྱུར་བ་མ་བྱུང་བ་ཞེས་བྱ་བ་ནི། ཕམ་པར་འགྱུར་བའི་ལྟུང་བ་མ་བྱུང་བ་སྟེ། ཕམ་པར་འགྱུར་བ་མ་བྱུང་བ་ནི་ཕམ་པར་མ་གྱུར་པ་ཞེས་བྱ་བའི་ཐ་ཚིག་གོ །མདོ་སྡེ་དང་འདུལ་བ་དང་མ་མོ་འཛིན་པ་ཞེས་བྱ་བ་ནི། སྡེ་སྣོད་གསུམ་དོན་དང་ཚིག་གི་སྒོ་ནས་མངོན་པར་ཤེས་པའོ། །ལོ་ཉི་ཤུ་ལས་མི་ཉུང་བ་ཞེས་བྱ་བ་ནི། གང་ལ་ལོ་ཉི་ཤུ་ལས་ཉུང་བ་ཉིད་མེད་པ་དེ་ནི་ལོ་ཉི་ཤུ་ལས་མི་ཉུང་བ་སྟེ། དེ་ཡང་བསྙེན་པར་རྫོགས་པ་ནས་བརྩམས་ཏེ་ལོ་ཉི་ཤུ་ལོན་པའོ། །འདིས་ནི་གནས་བརྟན་རྒྱལ་ཚབས་ལྟ་བུ་ཞེས་བྱ་བར་བསྒྲུབ་པ་ཡིན་ནོ། །གྲོང་ཁྱེར་བའི་སྐད་སྨྲ་བ་ཞེས་བྱ་བ་ནི། སྨྲ་མཁས་ཏེ་རིགས་པ་དང་གྲོལ་བར་སྨྲ་བ་ཞེས་བྱ་བའི་ཐ་ཚིག་གོ །དེ་ཕོ་བྲང་འཁོར་གྱི་སྐད་དམ་མྱ་ངན་ལས་འདས་པ་གྲོང་ཁྱེར་དང་འདྲ་བར་འགྲོ་བ་དང༌། མཐུན་པའི་སྐད་སྨྲ་བ་ཡིན་པས་ན་གྲོང་བའི་སྐད་མི་སྨྲ་བའི་ཕྱིར་རབ་ཏུ་མ་ཞི་བ་དང་མཐུན་པར་འཁྲིགས་པ་དང་ལྡན་པའི་ཚིག་དག་གིས་དགེ་སློང་མ་ལ་ཐོ་འཚམས་པ། ཀྱེ་གྲགས་ལྡན་མ་ཞེས་བྱ་བ་ལ་སོགས་པའི་ཚིག་མི་བརྗོད་པ་ཡིན་ནོ། །འདིར་བོད་པའི་ཕྱིར་ཀྱེ་ཞེས་བྱ་བའི་སྒྲ་སྨོས་པས་ནི། འཁྲིག་པའི་ཕྱིར་བོད་པ་དང་འདྲ་བ་སྟོན་ཏོ། །དགེ་སློང་མ་ལ་ལུས་ཉེ་བར་གཞོལ་བ་ཉིད་ཕྱིར་བཅོས་པ་བྱས་པའོ་ཞེས་བྱ་བ་ནི། གང་གིས་དགེ་སློང་མ་ལུས་ཉེ་བར་གཞོལ་བ་བྱས་པས་དེ་ནི་དགེ་སློང་མ་ལ་ལུས་ཉེ་བར་གཞོལ་བ་སྟེ། དེའི་དངོས་པོ་ནི་དེ་ཉིད་དོ། །དགེ་སློང་མ་ལ་ལུས་ཉེ་བར་གཞོལ་བ་ཉིད་གང་ཡིན་པ་དེ་དག་གིས་བཤགས་པ་ལ་སོགས་པ་དེས་ཕྱིར་བཅོས་པ་བྱས་པ་ཞེས་བྱ་བ་དེ་ནི་ཕྱིར་བཅོས་པ་བྱས་པ་སྟེ། དེས་ནི་དགེ་སློང་མ་དང་ལྷན་ཅིག་ལུས་ལ་ལུས་ཀྱིས་རེག་པ་མེད་པར་སྟོན་ཏོ། །འདིར་གཞུང་ནི་སུན་ཕྱུང་བར་གྱུར་ན་ཡང་
དེས་ལྟུང་བ་དེ་ཡང་ཆོས་བཞིན་དུ་ཕྱིར་བྱས་པ་ཞེས་གསུངས་པ་ཡིན་ནོ། །དགེ་སློང་ཡོན་ཏན་དེ་ལྟ་བུ་དང་ལྡན་པ་དགེ་འདུན་གྱིས་དགེ་སློང་མའི་སྟོན་པར་བསྐོའོ་ཞེས་བྱ་བར་སྦྱར་རོ། །ཉི་མ་གང་ལ་བསྐོ་བར་བྱ་ཞེ་ན་དེའི་ཕྱིར། །གསོ་སྦྱོང་བཅོ་ལྔ་པ་ལའོ་ཞེས་བྱ་བ་སྨྲས་ཏེ། དེ་ནི་མཐུན་པའི་གསོ་སྦྱོང་ལ་སོགས་པ་བསལ་བའི་ཕྱིར་རོ། །འདིས་གསོ་སྦྱོང་བཅུ་བཞི་པ་ནི་མ་བརྩལ་ཏེ། གསོ་སྦྱོང་བཅུ་བཞི་པ་ཞེས་བྱ་བ་ནི་ཟླ་བ་དེའི་ངོ་ལ་བར་དུ་ཞག་གཅིག་ཆོད་པས། འཇིག་རྟེན་གྱི་ཐ་སྙད་ཀྱི་དབང་དུ་བྱས་ཏེ། ཚེ་བཅུ་བཞི་ཞེས་གདགས་པར་ཟད་ཀྱི་དངོས་སུ་ན་དེང་གསོ་སྦྱོང་བཅུ་བཞི་པ་ཞེས་བྱ་བ་དེ་ཉིད་ཚེས་བཅོ་ལྔ་པ་ཡིན་པའི་ཕྱིར་རོ། །གསོ་སྦྱོང་ཞེས་སྨོས་པ་འདིས་ནི་དགེ་འདུན་གྱིས་དེའི་ཉིན་མོ་སྔར་གསོ་སྦྱོང་བྱ་ཞིང་དེའི་འོག་ཏུ་དགེ་སློང་མའི་སྟོན་པ་བསྐོ་བར་བྱ་བའི་དོན་དེ་སྟོན་པར་བྱེད་དོ། །ཕྱོགས་གང་དུ་བསྐོ་བར་བྱ་ཞེ་ན། དེའི་ཕྱིར་མཚམས་ཀྱི་ནང་དུའོ་ཞེས་བྱ་བ་སྨྲས་སོ། །གལ་ཏེ་མདོ་སྡེ་ལ་སོགས་པ་འཛིན་པ་མེད་ན་ཇི་ལྟ་བུ་ལས་བསྐོ་བར་བྱ་ཞེ་ན་དེའི་ཕྱིར། མདོ་སྡེ་ལ་སོགས་པ་འཛིན་པ་མེད་ན་སོ་སོར་ཐར་པ་ཐོན་པའོ་ཞེས་བྱ་བ་སྨྲས་ཏེ། གལ་ཏེ་མདོ་སྡེ་ལ་སོགས་པ་འཛིན་པ་མེད་ན་སོ་སོར་ཐར་པའི་མདོ་ཁ་ཏོན་དུ་བཏོན་པ་དགེ་སློང་མའི་སྟོན་པར་བསྐོ་བར་བྱའོ། །དེ་ཡང་ན་ཕམ་པར་འགྱུར་བའམ་ལྕི་བའི་ཆོས་རྣམས་སྟོན་པར་ནུས་པའོ་ཞེས་བྱ་བ་ནི། སོ་སོར་ཐར་པ་ཐོན་པ་དེ་ཡང་མེད་ན་དགེ་སློང་མའི་ཕམ་པར་འགྱུར་བ་བརྒྱད་དམ། ལྕི་བའི་ཆོས་རྣམས་གང་གིས་དོན་དང་ཚིག་གི་སྒོ་ནས་སྟོན་ནུས་པའི་ངང་ཚུལ་ཅན་དེ་བསྐོ་བར་བྱའོ། །དེ་ཡང་མེད་ན་ཇི་ལྟ་བུ་ལས་བསྐོ་བར་བྱ་ཞེ་ན་དེའི་ཕྱིར་ཕྱི་མ་ནི་སྲིང་མོ་དག་ཅི་ཁྱེད་ཅག་དགེ་སློང་མའི་དགེ་འདུན་ཚོགས་སམ་ཡོངས་སུ་དག་གམ་མཐུན་ནམ་ཁ་ན་མ་ཐོ་བ་མེད་དམ། ཁྱེད་ཅག་ལ་དགེ་འདུན་གྱིས་མ་བསྐོས་པའི་གང་ཟག་འབའ་ཞིག་སྟེན་པར་མི་བྱེད་དམ་ཁྱེད་ཅག་ལ་སྟོན་པའི་གང་ཟག་ནི་འགའ་ཞིག་དགེ་འདུན་ལས་འོང་ངོ༌། །ཁྱེད་ཅག་ལ་དགེ་སློང་འགའ་ཞིག་ཡང་སྟོན་པར་མི་སྤྲོའོ། །ཁྱེད་ཅག་གི་གདམས་ངག་དང་རྗེས་སུ་བསྟན་པ་ནི་དགེ་འདུན་ལས་སོ། །སྲིང་མོ་དག་གིས་བག་ཡོད་པར་སྒྲུབས་ཤིག་ཅེས་བྱ་བ་དེ་སྟོན་ནུས་པའོ་ཞེས་བྱ་བ་སྨྲས་ཏེ། དགེ་སློང་མའི་སྟོན་པ་ཕྱི་མ་ནི་དེ་ལྟ་བུ་ལས་བསྐོ་བར་བྱའོ་ཞེས་
བྱ་བར་སྦྱར་རོ། །སྲིང་མོ་དག་ཅེས་བྱ་བ་ནི། ཀྱེ་སྲིང་མོ་དག་ཅེས་བོད་པའོ། །ཅི་ཞེས་བྱ་བ་ནི་དྲི་བའི་ཚིག་གོ །ཁྱེད་ཅག་དགེ་སློང་མའི་དགེ་འདུན་ཚོགས་སམ་ཞེས་བྱ་བ་ནི། ཁྱེད་ཅག་དགེ་སློང་མའི་དགེ་འདུན་ལས་གཅིག་ཏུ་བྱེད་དམ་ཞེས་བྱ་བའོ། །ཡོངས་སུ་དག་གམ་ཞེས་བྱ་བ་ནི། ཕམ་པར་འགྱུར་བ་མ་བྱུང་ངམ། ལྟུང་བ་གཞན་དག་ཀྱང་བཤགས་པ་དང་བྱིན་གྱིས་བརླབས་པ་གཉིས་ཀྱིས་ཕྱིར་བཅོས་པ་བྱས་སམ་ཞེས་བྱ་བའོ། །མཐུན་ནམ་ཞེས་བྱ་བ་ནི། ཕན་ཚུན་མཐུན་ནམ་ཞེས་བྱ་བའོ། །ཁ་ན་མ་ཐོ་བ་མེད་དམ་ཞེས་བྱ་བ་ནི། འཐབ་མོ་ལ་སོགས་པའི་སྐྱོན་དང་བྲལ་ལམ་ཞེས་བྱ་བའོ། །ཁྱེད་ཅག་ལ་དགེ་འདུན་གྱིས་མ་བསྐོས་པའི་གང་ཟག་འགའ་ཞིག་སྟོན་པར་མི་བྱེད་དམ་ཞེས་བྱ་བ་ནི། ཁྱེད་ཅག་ལ་དགེ་སློང་གི་དགེ་འདུན་གྱིས་མ་བསྐོས་པའི་གང་ཟག་འགའ་ཞིག་ཐུགས་ཐུབ་ཏུ་སྟོན་པ་མེད་གྲང་ཞེས་འདྲི་བའོ། །ཁྱེད་ཅག་ལ་སྟོན་པའི་གང་ཟག་ནི་འགའ་ཞིག་དགེ་འདུན་ལས་འོང་ངོ་ཞེས་བྱ་བ་ནི། ཁྱེད་ཅག་ལ་སྟོན་པའི་གང་ཟག་སུ་ལ་འབབ་པ་ནི་འགའ་ཞིག་དགེ་འདུན་གྱིས་བསྐོས་ཏེ་འོང་གི །གཞན་ལ་མི་འོང་ངོ་ཞེས་སྤྱིར་བསྒོ་བའོ། །ཁྱེད་ཅག་ལ་དགེ་སློང་འགའ་ཡང་སྟོན་པར་མི་སྤྲོའོ་ཞེས་བྱ་བ་ནི། ང་ཡང་དགེ་འདུན་གྱིས་གསོལ་བ་དང་ལས་ཀྱིས་བསྐོས་ཏེ་འོངས་པར་ཟད་ཀྱི། རང་དགར་འོངས་པ་ནི་མ་ཡིན་པས་གཞན་སུ་ཡང་ཁྱེད་ཅག་ལ་སྟོན་པར་སྒྲོ་བ་མེད་དོ་ཞེས་སྤ་བཀོད་པའི་ཚིག་ཡིན་ནོ། །ཁྱེད་ཅག་གིས་གདམས་ངག་དང་རྗེས་སུ་བསྟན་པ་ནི་དགེ་འདུན་ལས་སོ་ཞེས་བྱ་བ་ནི། ཀྱེ་སྲིང་མོ་དག་ཁྱེད་ཅག་གིས་ཟླ་བ་ཕྱེད་ཕྱེད་ཅིང་གསོ་སྤྱོད་བྱ་བ་དང༌། དབྱར་གནས་པར་ཁས་བླངས་པའི་རྗེས་ལ་དགག་དབྱེ་བྱ་བ་ལ་སོགས་པའི་གདམས་ངག་དང་རྗེས་སུ་བསྟན་པ་ནི་དགེ་སློང་གི་དགེ་འདུན་ལས་འཐོབ་པོ་ཞེས་དམིགས་ཀྱིས་བསྟན་པའོ། །སྲིང་མོ་དག་གིས་བག་ཡོད་པར་སྒྲུབས་ཤིག་ཅེས་བྱ་བ་ནི། སྲིང་མོ་དག་གིས་བསླབ་པའི་གཞི་ཡང་དག་པར་བླངས་པ་དག་བག་ཡོད་པར་སྒྲུབས་ཤིག །འདི་ནི་དགེ་འདུན་གྱིས་ཁྱེད་ཅག་ལ་གདམས་ཤིང་རྗེས་སུ་བསྟན་པ་ཡིན་ནོ་ཞེས་སྟོན་པ་སྙིང་བརྩེ་བ་ཅན་གྱིས། སྙིང་བརྩེ་བའི་ཕྱིར་དགེ་སློང་མའི་དགེ་འདུན་ལ་གདམས་ཤིང་རྗེས་སུ་བསྟན་པའི་ཚིག་ཡིན་ནོ་ཞེས་བྱ་བ་དེ་སྟོན་
ནུས་པའོ་ཞེས་བྱ་བ་ནི། ཇི་སྐད་སྔར་བསྟན་པའི་རྣམ་པ་སྟོན་ནུས་པའི་དགེ་སློང་གི་དགེ་འདུན་གྱིས་དགེ་སློང་མའི་སྟོན་པར་བསྐོ་བར་བྱའོ། །འདི་སྐད་བསྟན་ཏེ་ཕམ་པར་འགྱུར་བ་མ་བྱུང་བ་ཉིད་ལ་སོགས་པའི་ཡོན་ཏན་དང་ལྡན་པ་ཡིན་ལ། འདི་ལྟར་ལྕི་བའི་ཆོས་ལ་སོགས་པ་སྟོན་མི་ནུས་སུ་ཟིན་ཀྱང་ཇི་སྐད་བསྟན་མ་ཐག་པ་དེ་དག་ཙམ་ཡང་སྟོན་ནུས་པ་ཡིན་ན་ནི། དགེ་སློང་ཕྱི་མ་འདི་དགེ་འདུན་གྱིས་དགེ་སློང་མའི་སྟོན་པར་བསྐོ་བར་བྱའོ། །ཆོས་བླ་མའི་མཐུ་དང་ལྡན་པ་ནི་མ་གཏོགས་སོ་ཞེས་བྱ་བ་ནི། དེ་ཆོས་ཀྱང་ཡིན་ལ། བླ་མ་ཡང་ཡིན་པས་ན་ཆོས་བླ་མའོ། །དེའི་མཐུ་ནི་ཉོན་མོངས་པ་སྤངས་པའོ། །ཡང་ན་ཆོས་བླ་མ་ཞེས་བྱ་བ་ནི་མིའི་ཆོས་བླ་མ་སྟེ། ཉོན་མོངས་པ་མེད་པར་གནས་པ་ལ་སོགས་པའོ། །དེ་ལ་གང་ཡོད་པ་དེ་ནི་དེའི་མཐུ་དང་ལྡན་པའོ། །མཐུ་དེ་དང་ལྡན་པའི་དགེ་སློང་ནི་མ་གཏོགས་ཏེ་དེ་ནི་དགེ་འདུན་གྱིས་མ་བསྐོས་པར་དགེ་སློང་མ་རྣམས་ལ་སྟོན་ན་ཡང་ཉེས་པ་མེད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་སོ་སོར་ཐར་པའི་མདོ་ལས་ཆོས་འདི་ལྟ་བུ་དང་ལྡན་པ་མ་གཏོགས་ཏེ་ཞེས་བྱ་བ་གསུངས་པ་ཡིན་ནོ། །ཅི་ཞིག་རྗེས་སུ་བསྒྲུབས་ན་མ་བསྐོས་པར་སྟོན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བསྐོས་པ་དེ་དག་ལས་གཅིག་དང་ཡང་མི་ལྡན་པ་དང་མ་བསྐོས་པ་དགེ་སློང་མ་ལ་སྟོན་ནའོ་ཞེས་བྱ་བ་སྨྲས་ཏེ། དགེ་སློང་གང་དགེ་འདུན་གྱིས་བསྐོས་ཀྱང་ཡན་ལག་ཇི་སྐད་སྨོས་པ་དེ་དག་ལས་གཅིག་དང་ཡང་མི་ལྡན་པ་དང༌། དགེ་སློང་གང་དགེ་འདུན་གྱིས་མ་བསྐོས་པར་ཡན་ལག་ཇི་སྐད་སྨོས་པ་དེ་དག་དང་ལྡན་ཡང་རུང་མི་ལྡན་ཡང་རུང་བ་དེ་དགེ་སློང་མ་ལས་སྟོན་ན་མ་བསྐོས་པར་སྟོན་པའི་ལྟུང་བྱེད་དུ་འགྱུར་རོ། །སྔར་བསྐོས་པ་ནི་མ་བསྐོས་པ་ཉིད་མ་ཡིན་ནོ་ཞེས་བྱ་བ་ནི། དགེ་སློང་གང་དགེ་འདུན་གྱིས་དག་སློང་མའི་སྟོན་པར་སྔར་བསྐོས་པ་ནི་མ་བསྐོས་པ་ཉིད་མ་ཡིན་ཏེ། འདི་ལྟར་བསྐོས་པ་ཉིད་ཡིན་པས་ལན་ཅིག་བསྐོས་པས་ཇི་སྲིད་འཚོའི་བར་དུ་དགེ་སློང་མ་ལ་བསྟན་པར་བྱའོ། །འདིར་གཞུང་ནི་བཙུན་པ་རེ་ཞིག་ལན་ཅིག་དགེ་སློང་མའི་སྟོན་པར་སྔར་བསྐོས་པ་གང་ལགས་པ་དེ་ཅི་དུས་གཞན་གྱི་ཚེ་ཡང་བསྐོ་བར་བགྱིའམ། འོན་ཏེ་མ་བསྐོས་པར་བསྟན་པར་བགྱི། ཉེ་བ་འཁོར་དེས་བསྐོས་པ་དེ་ཉིད་ཀྱིས་བསྟན་པར་བྱའོ་
ཞེས་གསུངས་པ་ཡིན་ནོ། །འདིར་གཞུང་ཁ་ཅིག་ལས་ཀྱང་ལན་ཅིག་བསྐོས་པས་ཇི་སྲིད་འཚོའི་བར་དུ་བསྟན་པར་བྱའི། ཡང་ཡང་བསྐོ་བར་མི་བྱའོ་ཞེས་གསུངས་སོ། །ཆོས་བཤད་པར་གསོལ་བ་ན་ཡང་རྣམ་པ་འདི་ཡིན་པས་གསུངས་ཏེ། འདིར་གཞུང་ནི་དགེ་སློང་མ་གསོལ་བར་ཆོས་སྨྲ་བ་ལ་ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་སྔར་གསོལ་ཟིན་པའོ་ཞེས་གསུངས་པ་ཡིན་ནོ། །དགེ་འདུན་དུ་མ་ལངས་ཤིང་འོས་པ་ལ་གསོལ་ན་ཉེས་པ་མེད་དོ་ཞེས་བྱ་བ་ནི། གནས་གང་ན་དགེ་འདུན་དུ་མ་ལངས་པ་དེ་ན། དགེ་འདུན་དུ་མ་ལངས་ཤིང་དེ་ན་དགེ་སློང་གང་དགེ་སློང་མའི་སྟོན་པར་འོས་པ་ཕམ་པར་འགྱུར་བ་མ་བྱུང་བ་ལ་སོགས་པའི་ཡན་ལག་དང་ལྡན་པ་ཡོད་ལ། །དེ་དགེ་སློང་མའི་སྟོན་པར་མ་བསྐོས་པར་དེ་ལ་དགེ་སློང་མ་རྣམས་ཀྱིས་གསོལ་བ་ཉིད་ན་ཁྱད་པར་དེ་ལྟ་བུ་དང་ལྡན་པའི་དགེ་སློང་དེ་དགེ་སློང་མ་རྣམས་ལ་སྟོན་པ་ན་ཉེས་པ་མེད་དོ་ཞེས་བྱ་བའི་ཐ་ཚིག་གོ །དེ་དག་ལ་ཡང་ངོ་ཞེས་བྱ་བ་ནི། དགེ་སློང་གང་ལ་དགེ་སློང་མ་རྣམས་ཀྱིས་གསོལ་བ་འདེབས་པར་བྱེད་པའི་དགེ་སློང་མ་གང་དག་ཡིན་པ་དེ་དག་ལ་ཡང་ལྟུང་བ་མེད་པའོ། །འདིར་གཞུང་ནི་ཞུ་བ་ལས་གང་ན་དགེ་སློང་གཅིག་གམ་གང་ན་གཉིས་སམ། གང་ན་གསུམ་གནས་ལ། གལ་ཏེ་སྟོན་པའི་འོས་ཡིན་ན་ཉེ་བར་སོང་བ་ལ་གསོལ་བར་བྱའོ་ཞེས་གསུངས་པ་ཡིན་ཏེ། སྟོན་པའི་འོས་སུ་རུང་བ་ཡིན་ན་ཞེས་བྱ་བའི་ཐ་ཚིག་གོ །མ་བསྐོས་པར་སྟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་སྨྲ་བར་འདོད་ནས། ཤེས་གཙོའོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བར་མིང་ཅན་དུ་སྦྱོར་བར་བྱེད་དོ། །གང་དུ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། ཉི་མ་ནུབ་པ་ཉིད་ལའོ་ཞེས་བྱ་བ་སྨྲས་ཏེ། ཉི་མ་ནུབ་པའི་དངོས་པོ་ནི་ཉི་མ་ནུབ་པ་ཉིད་དོ། །དེ་ལ་དེར་འདུ་ཤེས་ན་སྟེ། གལ་ཏེ་ཉི་མ་ཡང་ནུབ་པར་གྱུར་ལ་དགེ་སློང་གིས་ཀྱང་ཉི་མ་ནུབ་པར་ཤེས་ན། དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་རྗེས་སུ་བསྒྲུབ་ན། འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་མཚན་ཐོག་ཐག་ཏུ་ཆོས་སྟོན་པ་མ་གཏོགས་པར་དགེ་སློང་མ་ལ་སྟོན་ནའོ་ཞེས་བྱ་བར་སྨྲས་ཏེ། དགེ་
སློང་མ་ལ་སྟོན་ན་སྟེ། མཚན་ཐོག་ཐག་ཏུ་ཆོས་སྟོན་པ་ནི་མ་གཏོགས་སོ། །འདི་སྐད་བསྟན་ཏེ། མཚན་ཐོག་ཐག་ཆོས་སྟོན་པ་མ་གཏོགས་པར་ཉི་མ་ནུབ་པའི་དུས་ཀྱི་ཚེ་ན་དགེ་སློང་གིས་དགེ་སློང་མ་རྣམས་ལ་སྟོན་པར་བྱེད་ན་ལྟུང་བྱེད་དོ། །ཅི་གནས་ཐམས་ཅད་དུའམ་ཞེ་ན་དེའི་ཕྱིར། དེའི་ཚེ་གལ་ཏེ་སྒོ་ཕྱེ་ཞིང་དེ་ལྟ་བུའི་གཙུག་ལག་ཁང་གི་མདུན་ན་དབྱར་ཁང་འདུག་པ་ནི་མ་ཡིན་པར་རོ་ཞེས་བྱ་བ་སྨྲས་ཏེ། དེའི་ཚེ་ཞེས་བྱ་བ་ནི་སྟོན་པའི་དུས་ཀྱི་ཚེའོ། །གལ་ཏེ་སྒོ་ཕྱེ་ཞིང་ཞེས་བྱ་བ་ནི། དགེ་སློང་གི་དགེ་འདུན་གྱི་གཙུག་ལག་ཁང་ངོ༌། །དེ་ལྟ་བུའི་གཙུག་ལག་ཁང་གི་མདུན་ན་ཞེས་བྱ་བ་ནི་སྟོན་པའི་དུས་ཀྱི་ཚེ་སྒོ་ཕྱེ་བའི་གཙུག་ལག་ཁང་དེའི་མདུན་ནའོ། །དབྱར་ཁང་འདུག་པ་ཞེས་བྱ་བ་ནི། གལ་ཏེ་དེའི་མདུན་ན་དགེ་སློང་མའི་དབྱར་ཁང་འདུག་ན་ནི། དེའི་ཚེ་མྱུར་དུ་ཐགས་ཐོགས་མེད་པར་རང་གི་གནས་སུ་འཇུག་ཏུ་ཡོད་པས་དེར་ཉི་མ་ནུབ་ཀྱི་བར་དུ་སྟོན་ཀྱང་ལྟུང་བར་མི་འགྱུར་བས། དེའི་ཕྱིར་མ་ཡིན་པར་རོ་ཞེས་བྱ་བ་སྨྲས་ཏེ། ཇི་སྐད་བསྟན་པའི་རྣམ་པ་དེ་ལྟ་བུ་མ་ཡིན་པའི་གནས་སུ་ཉི་མ་ནུབ་ཀྱི་བར་དུ་སྟོན་ན་ལྟུང་བྱེད་དོ། །འདི་ནི་མཚོན་པ་ཙམ་དུ་ཟད་དེ་མྱུར་དུ་ཐགས་ཐོགས་མེད་པར་རང་གི་གནས་སུ་ཕྱིན་པར་རུང་བའི་གནས་གཞན་དུ་ཡང་ཉི་མ་ནུབ་ཀྱི་བར་དུ་སྟོན་པ་ལ་ལྟུང་བ་མེད་ལ། དེ་ལྟ་བུ་མ་ཡིན་པར་ཉི་མ་ནུབ་ཀྱི་བར་སྟོན་ན་ལྟུང་བྱེད་དོ།། འདིར་གཞུང་ནི་ཞུ་བ་ཁ་ཅིག་ལས་དགེ་སློང་གིས་གདུགས་བས་པའི་དུས་ཀྱི་ཚེའི་བར་དུ་དགེ་སློང་མ་ལ་སྟོན་པར་བགྱིད་ལ། ལྟུང་བར་ཡང་མི་འགྱུར་བ་འགའ་མཆིས་སམ། བཀའ་སྩལ་པ། ཡོད་དེ་དགེ་སློང་མ་རྣམས་ཀྱི་དབྱར་ཁང་དུ་སྟོན་ནམ་གྲོང་མཐའི་གཙུག་ལག་ཁང་ངམ་ཁང་ཁྱིམ་དག་ཏུ་སྟོན་ན་ལྟུང་བ་མེད་དོ། །གང་གི་ནི་རབ་ཏུ་སྟོན་པ་ནི་མ་གཏོགས་སོ་ཞེས་གསུངས་པ་ཡིན་ནོ། །ཉི་མ་ནུབ་ཀྱི་བར་དུ་སྟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཟས་ཆུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་སྨྲ་བར་འདོད་ནས། དགེ་སློང་མས་ཆོས་དྲི་བ་ལ་མི་འཇིགས་པར་བྱ་བའི་ཕྱིར་དགེ་སློང་ལ་ཟས་དབུལ་བར་བྱའོ་ཞེས་བྱ་བ་སྨྲས་ཏེ། དགེ་སློང་མས་དགེ་སློང་ལ་ཟས་དབུལ་བར་བྱའོ། །ཅི་ཞིག་གི་ཕྱིར་ཞེ་ན། མི་འཇིགས་པར་བྱ་བའི་ཕྱིར་རོ། །ཡུལ་གང་ལ་མི་འཇིགས་པར་བྱ་བའི་ཕྱིར་ཞེ་ན། ཆོས་དྲི་བ་ལ་སྟེ། བདག་གིས་ཆོས་ཞུ་བར་བྱའོ་སྙམ་པ་ལའོ། །རྒྱ་ཅང་དང་ཤུར་བུ་དང་ལྕག་
པོད་དང་ཤུར་བུ་ཕྲེའུ་ཡང་ང་ཞེས་བྱ་བ་ལ། རྒྱ་ཅང་ལ་སོགས་པ་ནི་སྐ་རགས་ཀྱི་རྣམ་པ་སྟེ། དགེ་སློང་མས་རྒྱ་ཅང་ལ་སོགས་པ་ཡང་སྦྱིན་པར་དགེ་སློང་ལ་དབུལ་བར་བྱའོ། །དགེ་སློང་གིས་དེ་དག་བླང་བར་བྱའོ་ཞེས་བྱ་བ་ནི། དགེ་སློང་གིས་ཟས་ལ་སོགས་པ་དེ་དག་དགེ་སློང་མ་དག་ལས་བླང་བར་བྱའོ། །ཅི་ཞིག་རྗེས་སུ་བསྒྲུབ་ན་ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་དེ་ལྟར་གྱུར་པ་མ་ཡིན་པ་ལ་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་བྱ་བ་སྨྲས་ནའོ་ཞེས་བྱ་བ་སྨྲས་ཏེ། དགེ་སློང་མ་ལ་སྟོན་པའི་དགེ་སློང་ཟས་ཅུང་ཟད་ཙམ་གྱི་ཕྱིར་སྟོན་པ་མ་ཡིན་པ་ལ་དགེ་སློང་འདི་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་ཏོ་ཞེས་དེ་སྐད་སྨྲ་ན་ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དུ་འགྱུར་རོ། །བདེན་པ་ཉིད་ལ་ནི་ལྟུང་བ་མེད་དོ། །འདིར་གཞུང་ནི་ཟས་ཅུང་ཟད་ཙམ་གྱི་ཕྱིར་དགེ་སློང་མ་ལ་སྟོན་པ་བདེན་ན་ལྟུང་བ་མེད་དོ་ཞེས་གསུངས་པ་ཡིན་ནོ།། ཟས་ཅུང་ཟད་ཙམ་གྱི་ཕྱིར་སྟོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གོས་བྱེད་པའི་ལྟུང་བྱེད་སྨྲ་བར་འདོད་ནས། ཤེས་གཙོའོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། དགེ་སློང་མ་ཉེ་དུ་མ་ཡིན་པ་ཉིད་ལའོ་ཞེས་བྱ་བ་སྨྲས་ཏེ། གང་གི་གོས་བྱ་བའི་དགེ་སློང་མ་དེ་ཡང་ཉེ་དུ་མ་ཡིན་པ་ཉིད་ཡིན་ལ། གོས་བྱེད་པའི་དགེ་སློང་གིས་ཀྱང་དེ་ཉེ་དུ་མ་ཡིན་པ་ཉིད་དུ་ཤེས་ན་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་རྗེས་སུ་བསྒྲུབ་ན་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། གོས་བྱེད་ནའོ་ཞེས་བྱ་བ་སྨྲས་ཏེ། མཐར་ཐུག་ན་དངོས་གཞིའོ། །མདུན་རོལ་དུ་ནི་སྦྱོར་བའོ། །གོས་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གོས་སྦྱིན་པའི་ལྟུང་བྱེད་བརྗོད་པར་བྱ་སྟེ། ཤེས་གཙོའོ་ཞེས་བྱ་བ་དང༌། དགེ་སློང་མ་ཉེ་དུ་མ་ཡིན་པ་ཉིད་ལའོ་ཞེས་བྱ་བ་བསླབ་པའི་གཞི་སྔ་མ་ལས་དྲངས་ཏེ་འདིར་ཁས་བླངས་ཏེ། ཅི་ཞིག་རྗེས་སུ་བསྒྲུབ་ན་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། གོས་བྱིན་ནའོ་ཞེས་བྱ་བ་སྨྲས་ཏེ། དགེ་སློང་གིས་དགེ་སློང་མ་ལའོ། །ཇི་ལྟ་བུ་ཞིག་བྱིན་ཞེ་ན་དེའི་ཕྱིར་གོས་དབུལ་བ་མ་ཡིན་པ་ལའོ་
ཞེས་བྱ་བ་སྨྲས་ཏེ། དགེ་སློང་གིས་དགེ་སློང་མའི་དགེ་འདུན་ལ་གོས་དབུལ་བ་མ་གཏོགས་པ་སྟེ། ངོ་བཤེས་པར་གྱུར་པ་ལ་སོགས་པ་གཞན་ལ་སྦྱིན་པར་གྱུར་ན་ཞེས་བྱ་བའི་ཐ་ཚིག་གོ །ཅི་དགེ་འདུན་ལ་གོས་དབུལ་བ་མ་གཏོགས་པ་གཞན་ཐམས་ཅད་ལ་སྦྱིན་ན་ལྟུང་བྱེད་དུ་འགྱུར་རམ་ཞེ་ན་དེའི་ཕྱིར། གལ་ཏེ་བོར་རླག་བྱུང་བ་དང༌། ལེགས་པར་སྨྲ་བ་དང༌། བསྙེན་པར་རྫོགས་པར་བྱེད་པ་དང༌། བརྗེ་བའི་ཕྱིར་མ་ཡིན་པ་ལའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་མ་བོར་རླག་བྱུང་བ་དེ་ལ་སྦྱིན་པ་དང༌། ལེགས་པར་སྨྲ་བ་སྦྱིན་པ་དང༌། བསྙེན་པར་རྫོགས་པ་བྱེད་པའི་ཚེ་སྦྱིན་པ་དང༌། བརྗེ་བའི་ཕྱིར་སྦྱིན་པའི་དོན་བཞི་པོ་དེ་དག་ལ་བྱིན་པ་གང་ཡིན་པ་དེ་ལ་ནི་ལྟུང་བ་མེད་དོ་ཞེས་བྱ་བའི་ཐ་ཚིག་གོ །མ་ཡིན་པ་ལའོ་ཞེས་བྱ་བ་སྨོས་པ་ནི། བཞི་པོ་དེ་དག་མ་ཡིན་པ་གཞན་ལ་བྱིན་ན་ལྟུང་བྱེད་དོ། །གོས་བྱིན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དགེ་སློང་མ་དང་ལྷན་ཅིག་འདྲོན་ལམ་དུ་འཇུག་པའི་ལྟུང་བྱེད་སྨྲ་བར་འདོད་ནས། ལམ་རྒྱགས་བསྐུར་བར་བྱའོ་ཞེས་བྱ་བ་སྨྲས་ཏེ། དགེ་སློང་དང་འདྲོན་ལམ་དུ་འགྲོ་བས་ལམ་རྒྱགས་རིན་པོ་ཆེ་ལྔའམ། རིན་པོ་ཆེར་སྨོས་པ་ལྔའམ། བཟའ་བ་ལྔའམ། བཟའ་བར་སྨོས་པ་ལྔ་ལས་གང་འབྱོར་ཅིང་འོས་པར་བསྐུར་བར་བྱའོ། །སུ་དག་གིས་བསྐུར་བར་བྱ་ཞེ་ན་དེའི་ཕྱིར། རྩེ་རྒོད་དང་རྩེ་རྒོད་མ་དང་དགེ་ཚུལ་དང་དགེ་ཚུལ་མ་དག་གིས་སོ་ཞེས་བྱ་བ་སྨྲས་ཏེ། དེ་དག་ཁྱེར་དུ་གཞུག་གོ །དགེ་སློང་དང་དགེ་སློང་མ་རྣམས་གཅིག་གི་ལམ་རྒྱགས་གཅིག་གིས་བསྐུར་དུ་རུང་ངོ་ཞེས་བྱ་བ་ནི། དགེ་སློང་དང་དགེ་སློང་མ་དེ་དག་གིས་ལམ་རྒྱགས་རང་རང་གི་འཁོར་མེད་ན་གཅིག་གིས་གཅིག་གི་བསྐུར་དུ་རུང་སྟེ་རིགས་པ་ཉིད་ཡིན་ནོ། །གཅིག་གིས་གཅིག་གི་བྱིན་ལེན་ཡང་ངོ་ཞེས་བྱ་བ་ནི་དགེ་སློང་དང་དགེ་སློང་མ་རྣམས་གཅིག་གི་བྱིན་ལེན་ཡང་གཅིག་གིས་བྱར་རུང་ངོ༌། ཚངས་པ་མཚུངས་པར་སྤྱོད་པ་ན་བ་ལམ་དུ་དོར་བར་མི་བྱའོ་ཞེས་བྱ་བ་ནི། དགེ་སློང་ལམ་དུ་འགྲོ་བ་དག་གིས་ཚངས་པ་མཚུངས་པར་སྤྱོད་པ་ན་བ་ལམ་དུ་དོར་བར་མི་བྱའོ། །དེ་བསྐུར་བར་བྱའོ་ཞེས་བྱ་བ་ནི། ནད་པ་དེ་དགེ་སློང་ལམ་དུ་འགྲོ་བ་དག་གིས་བསྐུར་བར་བྱ་བའོ། །དགེ་སློང་མ་ལ་ཡང་དེ་བཞིན་ནོ་ཞེས་བྱ་བ་ནི། དགེ་སློང་མ་རྣམས་ཀྱིས་ཀྱང་ཚངས་པ་མཚུངས་པར་སྤྱོད་པ་ན་བ་ལམ་དུ་དོར་བར་
མི་བྱ་བ་དང༌། དེ་བསྐུར་བར་བྱའོ་ཞེས་བྱ་བའི་ཐ་ཚིག་གོ །དེ་ལ་ཕན་ཚུན་གྲོགས་བྱའོ་ཞེས་བྱ་བ་ནི། ནད་པ་བསྐུར་བ་དེ་ལ་དགེ་སློང་དང༌། དགེ་སློང་མ་རྣམས་ཕན་ཚུན་གཅིག་གི་གྲོགས་གཅིག་གིས་བྱའོ། །ཇི་ལྟར་གྲོགས་བྱ་ཞེ་ན་དེའི་ཕྱིར་ལོགས་ནས་བཟུང་བས་སོ་ཞེས་བྱ་བ་སྨྲས་ཏེ། གལ་ཏེ་དགེ་སློང་ན་བར་གྱུར་ན། དགེ་སློང་མས་མགོ་ལོགས་ནས་བཟུང་བར་བྱ་ཞིང་གལ་ཏེ་དགེ་སློང་མ་ན་བར་གྱུར་ན་ཡང་དགེ་སློང་གིས་མགོ་ལོགས་ནས་བཟུང་བར་བྱ་སྟེ། རྐང་པ་ལོགས་ནས་ནི་རིགས་མཐུན་པས་གཟུང་བར་བྱ་བའོ། །གྲོང་དུ་ཕྱིན་པ་ཉིད་ན་སོང་ཡང་ཉེས་པ་མེད་དོ་ཞེས་བྱ་བ་དགེ་སློང་དང་དགེ་སློང་མ་དེ་དག་གིས་ནད་པ་ཁྲིད་དེ་གྲོང་དུ་ཕྱིན་པ་ཉིད་ན་ནད་པ་བཞག་སྟེ། གཞན་དུ་འགྲོ་ན་དེའི་ཚེ་ཉེས་པ་མེད་པའོ། །ཅི་དུས་ཐམས་ཅད་དུ་འགྲོ་བ་ལ་ཉེས་པ་མེད་དམ་ཞེ་ན་དེའི་ཕྱིར། ནད་པའི་སྨན་དང་ཟས་ལེགས་པར་སྦྱར་ཏེ་རང་བཞིན་མཐུན་པའི་ནད་གཡོག་གཅིག་ཀྱང་བཞག་ནས་སོ་ཞེས་བྱ་བ་སྨྲས་ཏེ། ནད་པའི་སྨན་སྦྱར་ཅིང་ཟན་ཡང་ལེགས་པར་བསྒྲུབས་ནས་རང་བཞིན་མཐུན་པའི་ནད་གཡོག་མཚན་འདྲ་བ་གཅིག་ཀྱང་ཉེ་བར་བཞག་ནས་ཕྱིས་དེ་ལ་འགྲོ་བར་བྱའོ། །གང་ལ་དགེ་སློང་མ་དང་ལྷན་ཅིག་འདྲོན་ལམ་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། འཇིགས་པ་དང་བཅས་པའི་ལམ་ཉིད་དུ་འགྲོ་ན་ཐབས་གཅིག་ཏུ་ཞུགས་ཤིང་ཐ་མི་དད་པར་འགྲོ་བ་ཉིད་མ་གཏོགས་པར་དགེ་སློང་མ་གཅིག་དང་ལམ་ལས་འདའ་ཞིང་འགྲོ་ནའོ་ཞེས་བྱ་བ་སྨྲས་ཏེ། ཆོམ་རྐུན་ལ་སོགས་པའི་འཇིགས་པ་དང་བཅས་པའི་ལམ་ཉིད་དུ་སྔར་མ་འཐབས་པར་དགེ་སློང་དང་དགེ་སློང་མས་འདྲོན་ཐབས་གཅིག་ཏུ་ཞུགས་ཤིང་ལྷན་ཅིག་འགྲོ་བ་ཉིད་མ་གཏོགས་པར་དེ་ལས་གཞན་དུ་འགྲོ་བ་ཉིད་ལ་འདྲོན་ཐབས་གཅིག་ཉིད་དུ་དགེ་སློང་གང་དགེ་སློང་མ་གཅིག་དང་ཡང་ལམ་ལས་འདས་ཤིང་འགྲོ་ན་ལྟུང་བྱེད་དུ་འགྱུར་རོ། །འདི་སྐད་བསྟན་ཏེ། གལ་ཏེ་དགེ་སློང་དགེ་སློང་མ་དང་ལྷན་ཅིག་སྔར་འཐམས་ཀྱང་རུང་མ་འཐམས་ཀྱང་རུང་སྟེ། འདྲོན་ཐབས་གཅིག་ཏུ་འགྲོགས་ཏེ། འགྲོ་བ་ཉིད་ཀྱིས་ལམ་ལས་འདའ་བར་འགྲོ་ན་ལྟུང་བྱེད་དུ་འགྱུར་རོ། །གལ་ཏེ་ལམ་ཡང་འཇིགས་པ་དང་བཅས་པ་ཉིད་ཡིན་ལ། དེ་དག་གིས་ཀྱང་འདྲོན་ཐབས་དེར་སྔར་མ་འཐམས་པར་འདྲོན་ཐབས་གཅིག་ཏུ་
འདོད་ཅིང་འགྲོགས་ཏེ་ལམ་དུ་འགྲོ་བ་ཉིད་ལ་ནི་ཉེས་པ་མེད་དོ། །འདིར་དགེ་སློང་མའི་དོན་མཐུན་དང་ལྷན་ཅིག་ཅེས་གསུངས་པ་ནི། རིགས་ཙམ་གཙོ་ཆེ་བ་ཡིན་པས། དགེ་སློང་མ་གཅིག་གམ་གཉིས་སམ་མང་པོ་གང་ཡང་རུང་བའོ། །འདི་ཇི་སྲིད་དུ་འདས་ན་ཞེ་ན་དེའི་ཕྱིར། རྒྱང་གྲགས་རེ་རེར་རོ་ཞེས་བྱ་བ་སྨྲས་ཏེ། རྒྱང་གྲགས་རེ་རེ་ཞིང་དངོས་གཞི་རེ་རེར་འགྱུར་ཏེ། རྒྱང་གྲགས་གཅིག་འདས་ན་དངོས་གཞི་གཅིག །རྒྱང་གྲགས་གཉིས་འདས་ན་དངོས་གཞི་གཉིས། རྒྱང་གྲགས་གསུམ་འདས་ན་དངོས་གཞི་གསུམ་དུ་གྱུར་པ་ལ་སོགས་པ་ལྟ་བུའོ། །དེའི་ཕྱིར་རེ་རེར་ནི་ཉེས་བྱས་སོ་ཞེས་བྱ་བ་ནི། རྒྱང་གྲགས་ཀྱི་ཕྱེད་རེ་རེར་འདས་ན་ཉེས་བྱས་ཏེ། རྒྱང་གྲགས་ཕྱེད་ཕྱེད་ཅིང་ཉེས་བྱས་རེ་རེར་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་རྒྱང་གྲགས་རེ་རེར་ནི་དངོས་གཞིའོ། །རྒྱང་གྲགས་ཕྱེད་ཕྱེད་དུ་ནི་ཉེས་བྱས་སོ་ཞེས་གསུངས་པ་ཡིན་ནོ། །དགེ་སློང་མ་དང་ལྷན་ཅིག་འདྲོན་ལམ་དུ་འཇུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་རྗེས་སུ་བསྒྲུབ་ན་དགེ་སློང་མ་དང་ལྷན་ཅིག་གྲུང་འདུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། འགྲམ་གཉིས་འཇིགས་པ་དང་བཅས་པ་ཉིད་མ་གཏོགས་པར་འཐམས་ནས་ཅིག་ཅར་གྲུ་གཅིག་གིས་ལམ་ལས་འདའ་ཞིང་འགྲོ་ནའོ་ཞེས་བྱ་བ་སྨྲས་ཏེ། བསླབ་པའི་གཞི་སྔ་མ་ལས་དགེ་སློང་མ་གཅིག་དང་ཡང་ལམ་ལས་འདའ་ཞིང་འགྲོ་ནའོ་ཞེས་སྨོས་པ་ཉིད་འདིར་ཡང་སྦྱར་བར་བྱའོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་གང་དགེ་སློང་མ་གཅིག་དང་ཡང་ལྷན་ཅིག་སྔར་འཐམས་ཀྱང་རུང་མ་འཐམས་ཀྱང་རུང་སྟེ། ཅིག་ཅར་དུས་གཅིག་ཏུ་གྲུ་གཅིག་གིས་ཆུའི་ལམ་ལས་འདའ་ཞིང་འགྲོ་ན། རྒྱང་གྲགས་རེ་རེར་ནི་དངོས་གཞིའོ། །རྒྱང་གྲགས་ཕྱེད་ཕྱེད་དུ་ནི་ཉེས་བྱས་སོ། །འགྲམ་གཉི་ག་བར་ཆད་བརྒྱད་པོ་དག་གི་ནང་ནས་བར་ཆད་གཅིག་གིས་བར་ཆད་དང་བཅས་པ་ཉིད་ཡིན་ན་ཡང་མ་གཏོགས་སོ། །གལ་ཏེ་འགྲམ་གཅིག་བར་ཆད་དང་བཅས་པ་ཉིད་ཡིན་ན་དགེ་སློང་དང་དགེ་སློང་མ་རྣམས་ཀྱིས་བར་ཆད་མེད་པའི་འགྲམ་ཅིག་ཤོས་སུ་གནས་པར་བྱའོ། །ཅི་ཐམས་ཅད་དུ་འམ་ཞེ་ན་དེའི་ཕྱིར། ཐད་ཀར་ཕ་རོལ་དུ་འགྲོ་བ་མ་གཏོགས་སོ་ཞེས་བྱ་བ་སྨྲས་ཏེ། ཐད་ཀར་ཕ་རོལ་
དུ་འགྲོ་བ་མ་གཏོགས་པར་ཆུའི་རྒྱུན་ལས་བཟློག་ཕྱོགས་སམ་རྒྱུན་ཕྱོགས་སུ་འགྲོ་བ་ལ་ཁ་ན་མ་ཐོ་བ་འདིར་འགྱུར་རོ། །དེའི་ཕྱིར་ཞུགས་པ་ནི་ཡོ་བ་དང༌། གཏིབ་ཆད་པ་དང༌། དབའ་ཀློང་ལས་བཟུར་བ་དང༌། རུ་སྐྱ་དང༌། གདོས་པ་ཆག་པ་དང༌། རུ་སྐྱ་འཛིན་པའི་དབང་གིས་འཇུག་པ་གཞན་དུ་སོང་བ་ལ་ནི་ཉེས་པ་མེད་དོ་ཞེས་བྱ་བ་ནི། ཐད་ཀར་ཕ་རོལ་དུ་འགྲོ་བ་དེའི་ཕྱིར་ཞུགས་པ་ན་ཡོ་བ་དང༌། གཏིབ་ཆད་པ་དང༌། དབའ་ཀློང་ལས་བཟུར་བའི་དབང་དང༌། རུ་སྐྱ་དང་གདོས་པ་ཆག་པའི་དབང་དང༌། རུ་སྐྱ་འཛིན་པའི་དབང་གི་རྐྱེན་གྱིས་རྒྱུན་ལས་བཟློག་པའི་ཕྱོགས་སམ་རྒྱུན་ཕྱོགས་སུ་འཇུག་པ་གཞན་དུ་སོང་བ་ལ་ནི་ཉེས་པ་མེད་དེ་ཞེས་བྱ་བར་སྦྱར་རོ། །ཡོ་བ་ཞེས་བྱ་བ་ནི་ཆུའི་གཞུང་ཡོ་བའོ། །གཏིབ་ཆད་པ་ཞེས་བྱ་བ་ནི། ཆུ་ཀླུང་གི་འགྲམ་གཏིབ་ཆད་པ་ཉིད་དོ། །དབའ་ཀློང་ཞེས་བྱ་བ་ནི། ཆུ་སྲུབ་ཆེན་པོ་འཁྱིལ་ཞིང་འཁྲུག་པའོ། །བཟུར་བ་ཞེས་བྱ་བ་ནི། ཡོ་བ་དང་གཏིབ་ཆད་པ་དང་དབའ་ཀློང་ལས་བཟུར་བའོ། །རུ་སྐྱ་ཞེས་བྱ་བ་ནི། གྲུ་བསྐྱེད་ཀྱི་སྐྱ་བ་ཆེན་པོའོ། །གདོས་པ་ཞེས་བྱ་བ་ནི་སྲོག་ཤིང་ངོ༌། །རུ་སྐྱ་འཛིན་པ་ཞེས་བྱ་བ་ནི། རླུང་ཡོར་ཐོགས་པའོ། །འཇུག་པ་གཞན་དུ་སོང་བའོ་ཞེས་བྱ་བ་ནི་རྒྱུན་ལས་བཟློག་ཕྱོགས་སམ་རྒྱུན་ཕྱོགས་སུ་སོང་བའོ། །དགེ་སློང་མ་དང་ལྷན་ཅིག་གྲུར་འཇུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བམ་པོ་ཉི་ཤུ་རྩ་དྲུག་པ། གཅིག་པུ་འདུག་པའི་ལྟུང་བྱེད་ལ་ཡན་ལག་གང་དག་བྱེད་པ་པོ་ཉིད་དག་ཡིན་ཞེ་ན། དེའི་ཕྱིར་བུད་མེད་གཅིག་པུ་ཉིད་དང་སྐྱེ་བོའི་རྒྱུན་ལུགས་མེད་པ་ཉིད་ཀྱིས་ཕྱོགས་དབེན་པ་ཉིད་དང་སྐྱབས་དང་བཅས་པ་ཉིད་དང༌། བར་འདོམ་གང་ཉིད་ནི་བྱེད་པ་པོ་དག་ཡིན་ནོ་ཞེས་བྱ་བ་སྨྲས་ཏེ། བུད་མེད་གཅིག་པུ་ཉིད་ཅེས་བྱ་བ་ལ་གཅིག་པུ་ཉིད་ཅེས་བྱ་བའི་སྒྲ་ནི་བུད་མེད་ཀྱི་བྱེ་བྲག་ཏུ་བྱས་པ་ཡིན་ཏེ། དགེ་སློང་ནི་གཅིག་པུ་ཉིད་ཡིན་པར་སྐབས་ཉིད་ཀྱིས་ཁོང་དུ་ཆུད་པར་བྱའོ། །སྐྱེ་བོའི་རྒྱུན་ལུགས་མེད་པ་ཉིད་ཀྱིས་ཕྱོགས་དབེན་པ་ཉིད་ཅེས་བྱ་བ་ནི། སྐྱེ་བོ་མང་པོའི་རྒྱུན་ལུགས་མེད་པ་ཉིད་ཀྱིས་ཕྱོགས་དེ་དབེན་པ་ཉིད་ཡིན་པའོ། །སྐྱབས་དང་བཅས་པ་ཉིད་ཅེས་བྱ་བ་ནི། རྩིག་པ་ལ་སོགས་པ་དག་གིས་ཕྱོགས་དེ་བསྐྱབས་
པ་སྟེ། འདིར་གཞུང་ནི་རྩིག་པས་བསྐྱབས་པ་དང༌། རིབ་མས་བསྐྱབས་པ་དང༌། ཡོལ་བས་བསྐྱབས་པ་ཞེས་གསུངས་པ་ཡིན་ནོ། །དེ་ཡང་མཚོན་པ་ཙམ་དུ་ཟད་དེ། །མུན་ནག་ལ་སོགས་པ་དག་ཀྱང་བསྡུའོ། །བར་འདོམ་གང་ཉིད་ཅེས་བྱ་བ་ནི། དེ་ནི་བུད་མེད་དང་བར་འདོམ་གང་ཚུན་ཆད་ན་འདུག་ན་དེ་དགེ་སློང་ལ་ཁ་ན་མ་ཐོ་བ་འདིར་འགྱུར་རོ། །གང་ལ་དེ་དག་བྱེད་པ་པོ་ཉིད་ཡིན་ཞེ་ན་དེའི་ཕྱིར། འདུག་པ་ལའོ་ཞེས་བྱ་བ་སྨྲས་ཏེ། བུད་མེད་ཀྱི་དབང་དུ་བྱས་པ་ཉིད་ཡིན་མོད་ཀྱི། གཉི་ག་ལ་ཡང་རིག་པར་བྱའོ། །འདུག་པ་དེའི་ངོ་བོ་ཉིད་ཇི་ལྟ་བུ་ཞེ་ན། དེའི་ཕྱིར། དེ་ནི་རྐུབ་ཚོས་ཙམ་བཞག་པའོ་ཞེས་བྱ་བ་སྨྲས་ཏེ། འདུག་པ་ཞེས་བྱ་བར་བསམས་སོ། །གཅིག་པུར་འདུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གཅིག་པུ་འགྲེང་བའི་ལྟུང་བྱེད་སྨྲ་བར་འདོད་ནས། བསྟན་མ་ཐག་པའི་བསླབ་པའི་གཞིར་སྨོས་པའི་རྣམ་པ་དག་ཁས་བླངས་ནས་བྱེ་བྲག་འགའ་ཞིག་བརྗོད་པར་བྱ་སྟེ། དེའི་ཕྱིར་དགེ་སློང་མ་དང་ངོ་ཞེས་བྱ་བ་སྨྲས་ཏེ། སྔར་བུད་མེད་ཅེས་སྨོས་པའི་གནས་སུ་འདིར་དགེ་སློང་མ་ཞེས་བྱ་བ་འདི་གཞུག་གོ །བསླབ་པའི་གཞི་བསྟན་མ་ཐག་པ་ལ་གང་དང་གང་དུ་བུད་མེད་ཅེས་སྨོས་པའི་གནས་དེ་དང་དེར་འདིར་དགེ་སློང་མ་ཞེས་བྱེ་བྲག་ཏུ་གཞུག་པར་རིག་པར་བྱ་སྟེ། དེས་ན་འདིར་དགེ་སློང་མ་ཉིད་བྱེད་པ་པོ་ཉིད་ཡིན་གྱི་བུད་མེད་ནི་མ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་མ་གཅིག་པུ་ཉིད་དང་སྐྱེ་བོའི་རྒྱུན་ལུགས་མེད་པ་ཉིད་ཀྱིས་ཕྱོགས་དབེན་པ་ཉིད་དང༌། སྐྱབས་དང་བཅས་པ་ཉིད་དང༌། བར་འདོམ་གང་ཉིད་ནི་བྱེད་པ་པོ་དག་ཡིན་ནོ། །གང་ལ་དེ་དག་བྱེད་པ་པོ་དག་ཡིན་ཞེ་ན། དེའི་ཕྱིར་འགྲེང་བ་ལའོ་ཞེས་བྱ་བ་སྨྲས་ཏེ། སྔར་འདུག་པ་ལའོ་ཞེས་བྱ་བའི་གནས་སུ་འདིར་འགྲེང་བ་ལའོ་ཞེས་བྱེ་བྲག་ཏུ་སྨོས་ཏེ། དགེ་སློང་རྣམས་དང་དགེ་སློང་མ་དག་གོ ། གཅིག་པུ་འགྲེང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དགེ་སློང་མས་སྦྱོར་དུ་བཅུག་པ་ཟ་བའི་ལྟུང་བྱེད་སྨྲ་བར་འདོད་ནས་དེའི་ཕྱིར་ཤེས་གཙོའོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང༌། འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་
དུ་སྦྱོར་བར་བྱེད་དོ། །དེ་ལྟར་ཡང་འདིར་གཞུང་ནི་སོ་སོར་ཐར་པའི་མདོ་ལས་ཡང་དགེ་སློང་གང་ཤེས་བཞིན་དུ་ཞེས་གསུངས་པ་ཡིན་ནོ། །དེའི་རྣམ་པར་འབྱེད་པ་ལས་ཀྱང་གལ་ཏེ་དགེ་སློང་གིས་གལ་ཏེ་དེ་ཤེས་ལ་ཟོས་ན་ཞེས་གསུངས་ཏེ། གལ་ཏེ་དགེ་སློང་མས་སྦྱོར་དུ་བཅུག་པ་ལ་དགེ་སློང་མས་སྦྱོར་དུ་བཅུག་པར་ཤེས་ན་ཞེས་གསུངས་པ་ཡིན་ནོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་དགེ་སློང་མས་སྦྱོར་དུ་བཅུག་པ་ཉིད་ལའོ་ཞེས་བྱ་བ་སྨྲས་ཏེ། སྦྱོར་དུ་བཅུག་པའི་དངོས་པོ་ནི་སྦྱོར་དུ་བཅུག་པའི་དངོས་པོ་ཉིད་དེ། དགེ་སློང་མས་སྦྱོར་དུ་བཅུག་པ་ཉིད་དེ་ལ་དེ་ལྟར་ཤེས་ན་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །འདིར་སྦྱོར་དུ་བཅུག་པ་ཞེས་བྱ་བ་ནི། བྱེད་དུ་བཅུག་པ་སྟེ། དེ་ཡང་གལ་ཏེ་ཚིག་གིས་བཅོལ་ཞིང་ངག་གི་རྣམ་པར་རིག་བྱེད་ཀྱིས་སྦྱོར་དུ་བཅུག་པ་ཡིན་ན་སྟེ། སྤྲིང་ཡིག་ལ་སོགས་པས་ནི་ཉེས་བྱས་སོ་ཞེས་གསུངས་པའི་ཕྱིར་རོ། །འདིར་གཞུང་ནི་ཞུ་བ་ལས་སྤྲིང་ཡིག་དག་དང་ལག་ཡིག་དག་དང་ལག་རྩིས་དང་མངགས་པ་དང་བརྒྱུད་པ་དང་ཟུར་གྱིས་བསོད་སྙོམས་སྦྱོར་དུ་བཅུག་པ་ཟོས་ན་ཉེས་བྱས་སོ་ཞེས་གསུངས་པ་ཡིན་ནོ། །ཇི་ལྟར་སྦྱོར་དུ་བཅུག་པ་ཉིད་ལ་ཞེ་ན་དེའི་ཕྱིར། ཡང་དག་པ་མ་ཡིན་པའི་ཡོན་ཏན་དག་གིས་སོ་ཞེས་བྱ་བ་སྨྲས་ཏེ། འདིར་གཞུང་ནི་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང༌། ཕྱིར་མི་འོང་བ་དང༌། དགྲ་བཅོམ་པ་ཡིན་པ་བདེན་ན་ལྟུང་བ་མེད་དོ། །མདོ་སྡེ་འཛིན་པ་དང༌། འདུལ་བ་འཛིན་པ་དང༌། མ་མོ་འཛིན་པ་དག་ཡིན་པ་བདེན་ན་ལྟུང་བ་མེད་དོ་ཞེས་གསུངས་པ་ཡིན་ནོ། །གང་ལ་སྦྱོར་དུ་བཅུག་པ་ཉིད་ལ་ཞེ་ན་དེའི་ཕྱིར། མགྲོན་དུ་མ་བོས་པ་ལའོ་ཞེས་བྱ་བ་སྨྲས་ཏེ། དེ་ནི་མགྲོན་ཡང་ཡིན་ལ་མ་བོས་པ་ཡང་ཡིན་པས་མགྲོན་དུ་མ་བོས་པ་སྟེ་དེ་ལའོ། །བོས་པ་ཡང་ལྷག་ནའོ་ཞེས་བྱ་བ་ནི། མགྲོན་དུ་བོས་པ་ལ་ཡང་ལྷག་པར་སྦྱོར་དུ་བཅུག་པ་ཉིད་ལའོ། །འདི་སྐད་བསྟན་ཏེ། གལ་ཏེ་མགྲོན་དུ་བོས་ཀྱང་ལྷག་པར་སྦྱོར་དུ་འཇུག་པ་ལའོ། །འདིར་གཞུང་ནི་འདི་ལྟ་སྟེ། དགེ་སློང་རབ་ཏུ་མང་པོ་དག་ཁྱིམ་གཞན་དུ་མགྲོན་དུ་བོས་པར་གྱུར་པ་ན་
དེར་དགེ་སློང་མ་འོངས་ཏེ་དྲིས་པ། ཁྱེད་ཅག་གིས་དགེ་སློང་གང་དག་མགྲོན་དུ་བོས། མིང་ཆེ་གེ་མོ་དང་ཆེ་གེ་མོ་དག་གོ །ཟན་ཇི་ལྟ་བུ་དག་སྦྱིན་སུམ་འཕེལ་གྱི་ཟན་དག་གོ །མི་རུང་སྟེ་དགེ་སློང་དེ་དག་ནི་རྒྱུན་དུ་ཞུགས་པ་ཡིན་པས་དེ་དག་ལ་རྩང་ཕྱེ་དག་སྦྱིན་པར་བྱའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ལྟ་བས་ན་མགྲོན་དུ་བོས་སུ་ཟིན་ཀྱང་སྦྱིན་བདག་གིས་མ་བསམས་པ་བཞིན་དུ་འཇུག་པ་གང་ཡིན་པ་དེ་ཡང་བཟའ་བར་མི་བྱ་སྟེ། ཟོས་ན་ལྟུང་བྱེད་དོ། །ཅི་ཞིག་སྦྱོར་དུ་བཅུག་པ་ཉིད་ལ་ཞེ་ན་དེའི་ཕྱིར། བཟའ་བར་བྱ་བའོ་ཞེས་བྱ་བ་སྨྲས་ཏེ། འབྲས་ཆན་ལ་སོགས་པའོ། །ཡང་དག་པ་མ་ཡིན་པའི་ཡོན་ཏན་དག་གིས་སོ་ཞེས་སྨྲས་ན། ཡང་དག་པའི་ཡོན་ཏན་ཇི་ལྟ་བུ་དག་གིས་ཤེ་ན་དེའི་ཕྱིར། བསྒྲུབ་པ་ཕུན་སུམ་ཚོགས་པས་སོ་ཞེས་བྱ་བ་སྨྲས་ཏེ། བསྒྲུབ་པ་ཕུན་སུམ་ཚོགས་པ་རྫོགས་པ་ནི་བསྒྲུབ་པ་ཕུན་སུམ་ཚོགས་པ་སྟེ་དེས་སོ། །བསྒྲུབ་པ་ཞེས་བྱ་བའི་སྒྲས་ནི་ཚུལ་ཁྲིམས་ནས་བརྩམས་ཏེ། དགྲ་བཅོམ་པ་ཉིད་ཀྱི་བར་དག་བཟུང་ངོ༌། །དེ་ཐོས་པས་ཀྱང་རུང་ངོ་ཞེས་བྱ་བ་ནི། བསྒྲུབ་པ་ཕུན་སུམ་ཚོགས་པའི་ཐབས་སུ་གྱུར་པའི་ཐོས་པ་གང་ཡིན་པ་དེས་སྦྱོར་དུ་བཅུག་ན་ཡང་ཉེས་པ་མེད་དོ། །བྲོ་གར་དང༌། གླུ་གླིང་དང་མཁས་པ་ལ་སོགས་པ་གཞན་དག་གིས་སྦྱོར་དུ་བཅུག་པ་ནི་འདིའི་རྗེས་སུ་འབྲང་བས་ཉེས་བྱས་སུ་རིག་པར་བྱའོ། །བསོད་སྙོམས་སྦྱོར་དུ་བཅུག་པ་ནི་གཉིས་ཏེ། ཚུལ་ཁྲིམས་ཀྱིས་སྦྱོར་དུ་བཅུག་པ་དང༌། ཐོས་པས་སྦྱོར་དུ་བཅུག་པ་སྟེ། མདོ་སྔ་མ་གཉིས་དང་གོ་རིམས་བཞིན་ནོ། །ཅི་ཞིག་རྗེས་སུ་བསྒྲུབ་ན་བཟའ་བར་བྱ་བ་བྱེད་པ་པོ་ཉིད་ཡིན་ཞེ་ན་དེའི་ཕྱིར་ཟོས་ནའོ་ཞེས་བྱ་བ་སྨྲས་སོ། །ཟོས་པའི་ངོ་བོ་ཉིད་བསྟན་པའི་ཕྱིར། དེ་ནི་མིད་ན་དེའོ་ཞེས་བྱ་བ་སྨྲས་ཏེ། ཟོས་པ་དེ་ནི་མིད་ན་དངོས་གཞིར་གྱུར་པའོ་ཟོས་པ་དེ་ཡིན་གྱི་ཁར་བཅུག་པ་ཙམ་ཁོ་ནས་ནི་མ་ཡིན་ནོ། །གཞན་གྱི་དོན་དུ་ན་སྨད་པར་བྱ་བ་ཉིད་དོ་ཞེས་བྱ་བ་ནི། གཞན་གྱི་དོན་དུ་སྦྱོར་དུ་བཅུག་པ་ལ་ནི་ན་སྨད་པར་བྱ་བ་ཉིད་དོ། །ན་སྨད་པར་བྱེད་པའི་ཕྱིར་ན་སྨད་པར་བྱ་བ་སྟེ། དེའི་དངོས་པོ་ནི་དེ་ཉིད་དོ། །འདི་སྐད་བསྟན་ཏེ། དགེ་སློང་མས་གཞན་གྱི་དོན་དུ་སྦྱོར་དུ་བཅུག་པ་དགེ་
སློང་གཞན་གྱིས་ཟོས་ན་ཉེས་བྱས་སོ། །འདིར་གཞུང་ནི་ཞུ་བ་ལས་གཞན་གྱི་དོན་དུ་སྦྱོར་དུ་བཅུག་པར་ཤེས་བཞིན་དུ་ཟོས་ན་ཉེས་བྱས་སོ། །འདི་དགེ་སློང་མས་སྦྱོར་དུ་བཅུག་པ་ཡིན་ནོ་ཞེས་བྱ་བར་མི་ཤེས་པའི་དགེ་སློང་གིས་དགེ་སློང་མས་སྦྱོར་དུ་བཅུག་པ་དེ་ཟོས་པ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །བསོད་སྙོམས་ལ་ཞུགས་པ་ན་བྱིན་ཅིག་ཅེས་ཟེར་བ་ཡང་ངོ་ཞེས་བྱ་བ་ནི། དགེ་སློང་བསོད་སྙོམས་ལ་ཞུགས་པ་ན་དགེ་སློང་མ་འདི་སྐད་ཅེས་དགེ་སློང་འདི་ལ་བསོད་སྙོམས་བྱིན་ཅིག་ཅེས་ཟེར་བ་དགེ་སློང་གིས་བླངས་ཏེ་ཟོས་ན་ཡང་ཉེས་བྱས་སོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་བསོད་སྙོམས་ལ་ཞུགས་པ་ན་དེ་ན་དགེ་སློང་མ་ཞིག་ཁྱིམ་བདག་ལ་འདི་སྐད་ཅེས། དགེ་སློང་འདི་ལ་བསོད་སྙོམས་བྱིན་ཅིག་ཅེས་མཆི་ཞིང་དགེ་སློང་དེས་ཀྱང་དེ་བླངས་ཏེ་འཚལ་ན་ལྟུང་བ་ཅིར་འགྱུར་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །དགེ་སློང་མས་སྦྱོར་དུ་བཅུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཡང་ཡང་ཟ་བའི་ལྟུང་བྱེད་སྨྲ་བར་འདོད་ནས། ཁྱིམ་གཞན་དུ་ཡང་ཟན་ལ་བོས་པ་དང་དུ་བླང་བར་བྱའོ་ཞེས་བྱ་བ་སྨྲས་ཏེ། དགེ་སློང་གིས་ཁྱིམ་གཞན་དུ་ཡང་ཟན་ལ་མགྲོན་དུ་བོས་པ་དང་དུ་བླང་ཞིང་བདག་གིར་བྱའོ། །ཡང་ཞེས་བྱ་བའི་སྒྲས་ནི་གཙུག་ལག་ཁང་འབའ་ཞིག་ཏུ་མ་ཟད་ཀྱི་ཁྱིམ་གཞན་དུ་ཡང་ངོ་ཞེས་བྱ་བར་སྟོན་ཏོ། །དུས་ཤེས་པར་བྱ་སྟེ་འཇུག་པར་བྱའི་སྔ་ཚོགས་སུ་མི་བྱའོ་ཞེས་བྱ་བ་ནི། གལ་ཏེ་ཁྱིམ་བདག་གཞན་དུ་མགྲོན་དུ་བོས་པ་དང་དུ་བླངས་པར་གྱུར་ན་དེར་ཟན་ལ་སོགས་པའི་དུས་ཤེས་པར་བྱ་སྟེ་འཇུག་པར་བྱའི། ཧ་ཅང་སྔ་ཚོགས་སུ་འགྲོ་བར་མི་བྱའོ། །དེའི་ཕྱིར་གཎྜཱི་བརྡུངས་ཏེ་རང་རང་གི་འཁོར་དེ་ལ་བལྟ་བར་བྱའོ་ཞེས་བྱ་བ་ནི། ཁྱིམ་གཞན་དུ་མགྲོན་དུ་བོས་པ་དེའི་ཕྱིར་དུས་ལ་བབ་པར་གཎྜཱི་བརྡུངས་ཏེ་གནས་བརྟན་གནས་བརྟན་རྣམས་ཀྱིས་རང་གི་འཁོར་གང་དང་གང་ཡིན་པ་དག་ལ་བལྟ་བར་བྱའོ། །གློ་བུར་དུ་འོངས་པ་ལ་ནི་གནས་བརྟན་གྱིས་སོ་ཞེས་བྱ་བ་ནི། དགེ་སློང་གློ་བུར་དུ་འོངས་པ་རྣམས་ལ་ནི་དགེ་འདུན་གྱི་གནས་བརྟན་གྱིས་བལྟ་བར་བྱའོ། །འདིར་གཞུང་ནི་དགེ་སློང་འཁོར་དང་སྤྱོད་པ་རྣམས་ཀྱིས་ནི་རང་རང་གི་འཁོར་རྣམས་ལ་
བལྟས་ཏེ་འདོང་བར་བྱའོ། །དགེ་སློང་གང་ལ་ལ་གློ་བུར་དུ་འོངས་པ་དེ་ལ་ནི་དགེ་འདུན་གྱི་གནས་བརྟན་གྱིས་བལྟ་བར་བྱའོ་ཞེས་གསུངས་པ་ཡིན་ནོ། །གྱ་ཚོམ་དུ་ཟན་གཅད་པར་མི་བྱའོ་ཞེས་བྱ་བ་ནི། ནད་ལ་སོགས་པའི་རྒྱུ་མེད་པར་ཁྲོ་བ་ལ་སོགས་པས་སམ། ལེ་ལོ་ལ་སོགས་པས་གྱ་ཚོམ་དུ་རང་གི་ཟན་གཅད་པར་མི་བྱའོ། །སྐོམ་གྱི་ཕྱིར་གསོལ་བ་དག་འདེབས་ན་བསྡད་པར་བྱའོ་ཞེས་བྱ་བ་ནི། གལ་ཏེ་ཡོན་བདག་གསོལ་བ་འདེབས་ཏེ། འདིར་དགེ་སློང་དག་གིས་སྐོམ་བཏུང་བར་བྱའོ་ཞེས་གསོལ་བ་དག་འདེབས་པར་བྱེད་ན། དགེ་སློང་དག་གིས་ཁྱིམ་གཞན་དེར་ཅི་རན་ཅིག་བསྡད་པར་བྱའོ། །ཡང་ཡང་ཟ་བའི་ལྟུང་བྱེད་ལ་བྱེད་པ་པོ་གང་ཡིན་ཞེ་ན་དེའི་ཕྱིར། ཅིག་ཅར་ཡང་རུང༌། ཕྱིས་ཀྱང་རུང་སྟེ། གོས་ཀྱི་རྙེད་པ་མེད་པའི་མགྲོན་དུ་བོས་པས་གཉིས་པ་རྙེད་པའོ་ཞེས་བྱ་བ་སྨྲས་ཏེ། ཉི་མ་གཅིག་ལ་ཅིག་ཅར་ཡང་རུང་ཕྱིས་ཀྱང་རུང་སྟེ། གོས་ཀྱི་རྙེད་པ་མེད་པའི་མགྲོན་དུ་བོས་པ་གཉིས་པ་རྙེད་པ་ནི་ཁ་ན་མ་ཐོ་བ་འདིའི་བྱེད་པ་པོ་ཉིད་ཡིན་ནོ། །ཅིག་ཅར་དང་དུ་བླངས་པ་ལ་ནི་ཉེས་བྱས་སུ་འགྱུར་རོ་ཞེས་འོག་ནས་འབྱུང་བས། དེའི་ཕྱིར་གང་གི་ཚེ་མགྲོན་དུ་བོས་པ་གཉི་ག་དང་དུ་ལེན་པར་བྱེད་ཅིང༌། བཟའ་བའི་ཕྱིར་སྔ་ཕྱི་སེམས་པར་མི་བྱེད་པ་དེའི་ཚེ་ནི་གང་གི་བཟའ་བ་ཕྱིས་འགྲུབ་པར་འགྱུར་བ་དེ་ཁོ་ན་ལས་ཆོས་ཉིད་ཀྱི་དབང་གིས་ཉེས་བྱས་སུ་འགྱུར་བར་ཤེས་པར་བྱའོ། །ཇི་སྟེ་མགྲོན་དུ་བོས་པ་གཅིག་ལ་གོས་མེད་པ་ཉིད་ཡིན་ན་དེ་ལྟ་ན་ནི་གོས་མེད་པ་ཁོ་ན་ལས་ཉེས་བྱས་སུ་འགྱུར་ཏེ། གོས་དང་བཅས་པ་དང༌། གོས་མེད་པ་དང༌། གོས་དང་བཅས་ཤིང་གོས་ཀྱི་རིན་དང་ཡང་བཅས་པ་དང༌། གོས་མེད་ཅིང་གོས་ཀྱི་རིན་ཡང་མེད་པ་ཞེས་བྱ་བ་རྣམ་པ་བཞིས་ལྟུང་བ་བསྟན་པ་མཛད་དོ། །དེ་ལ་གོས་དང་བཅས་པ་ཞེས་བྱ་བ་ནི་གོས་དང་བཅས་པ་གཞན་ནས་འདིར་གོས་ལ་བོས་པ་སྟེ། མགྲོན་དུ་བོས་པ་གཉི་ག་ཡང་གོས་དང་བཅས་པ་ཡིན་ནོ་ཞེས་བྱ་བའི་ཐ་ཚིག་གོ ། གོས་མེད་པ་ཞེས་བྱ་བ་ནི་གོས་དང་བཅས་པ་གཞན་ནས་འདིར་གོས་མེད་པ་ལ་བོས་པ་སྟེ། སྔ་མ་ནི་གོས་དང་བཅས་པ་ཡིན་ལ། ཕྱི་མ་ནི་གོས་མེད་པ་ཡིན་ནོ་ཞེས་བྱ་བའི་ཐ་ཚིག་གོ །གོས་དང་བཅས་ཤིང་གོས་ཀྱི་རིན་དང་ཡང་བཅས་པ་ཞེས་བྱ་བ་ནི། གོས་ཀྱང་ཡོད་ཅིང་གོས་ཀྱི་རིན་
ཡང་ཡོད་པའོ། །གོས་མེད་ཅིང་གོས་ཀྱི་རིན་ཡང་མེད་པ་ཞེས་བྱ་བ་ནི། གོས་ཀྱིས་ཀྱང་སྟོང་ཞིང་གོས་ཀྱི་རིན་གྱིས་ཀྱང་སྟོང་པའོ། །དེ་ལ་གོས་ཀྱི་རིན་ཞེས་བྱ་བ་ནི། གོས་ཀྱི་ཟོང་ཡིན་པར་ཤེས་པར་བྱའོ། །ཇི་ཞིག་ལ་མགྲོན་དུ་བོས་པ་རྙེད་ན་བྱེད་པ་པོ་ཉིད་ཡིན་ཞེ་ན་དེའི་ཕྱིར། བཟའ་བར་བྱ་བ་ལའོ་ཞེས་བྱ་བ་སྨྲས་སོ། །བཟའ་བར་བྱ་བ་ཇི་ལྟ་བུ་ལ་ཞེ་ན། ལྔའི་ཁོངས་སུ་གཏོགས་པ་ལའོ་ཞེས་བྱ་བ་སྨྲས་ཏེ། འབྲས་ཆན་དང༌། ཟན་དྲོན་དང༌། འདེ་གུ་དང༌། ཤ་དང༌། སྣུམ་ཁུར་ཞེས་བྱ་བ་ལྔ་པོ་དེ་དག་གི་ཁོངས་སུ་གཏོགས་པ་ལ་སྟེ། ལྔ་པོ་དེ་དག་གི་ནང་ནས་གང་ཡང་རུང་བ་ལ་ཞེས་བྱ་བའི་ཐ་ཚིག་གོ །མགྲོན་དུ་བོས་པ་སྔ་མ་ལས། ཅིག་ཤོས་རྣམ་པ་ཇི་ལྟ་བུ་རྙེད་ན་བྱེད་པ་པོ་ཉིད་ཡིན་ཞེ་ན། དེའི་ཕྱིར། གལ་ཏེ་གཞན་ཡང་དེ་ཉིད་ཡིན་ནའོ་ཞེས་བྱ་བ་སྨྲས་ཏེ། གལ་ཏེ་མགྲོན་དུ་བོས་པ་གཞན་ཅིག་ཤོས་ཀྱང་བཟའ་བར་བྱ་བ་དེ་ཉིད་ཀྱི་ཁོངས་སུ་གཏོགས་པ་ཡིན་ན། དེའི་ཚེ་དེ་རྙེད་ན་བྱེད་པ་པོ་ཉིད་ཡིན་ལ། གལ་ཏེ་དེ་ཉིད་མ་ཡིན་ན་ལྟུང་བ་མེད་དོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་སྔར་བཟའ་བ་མ་ལགས་པ་ལ་གཡར་དྲངས་ནས་དེ་སླད་ཀྱིས་བཟའ་བ་ལ་གཡར་དྲངས་ཏེ། དེས་དེ་འཚལ་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ། །བཙུན་པ་རེ་ཞིག་དགེ་སློང་བཟའ་བ་ལྔ་པོ་དག་མ་གཏོགས་པ་དེ་ལས་གཞན་པའི་བཟའ་བ་དག་ལ་སྔར་གཡར་དྲངས་ནས་དེ་སླད་ཀྱིས་བཟའ་བ་ལྔ་པོ་དག་ལ་གཡར་དྲངས་ཏེ་དེས་དེ་འཚལ་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ་ཞེས་གསུངས་པ་ཡིན་ནོ། །དགེ་སློང་ཇི་ལྟ་བུ་ལ་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། ན་བ་མ་ཡིན་པ་དང་ལས་མ་བྱས་པ་དང་ལམ་དུ་མ་སོང་བ་ལའོ་ཞེས་བྱ་བ་སྨྲས་ཏེ། ན་བ་མ་ཡིན་པ་ནི་མི་ན་བའོ། །གང་གིས་ལས་མ་བྱས་པ་དེ་ནི་ལས་མ་བྱས་པའོ། །གང་ལམ་དུ་མ་སོང་བ་དེ་ནི་ལམ་དུ་མ་སོང་བ་སྟེ། དེ་དག་ལ་དེ་བྱེད་པ་པོ་ཉིད་ཡིན་ནོ། །དེ་ལྟ་བས་ན་ན་བ་ལ་སོགས་པར་གནས་པའི་དུས་དག་ལ་ནི་ལྟུང་བ་མེད་དོ། །གནས་མ་ཡིན་པའི་དུས་དག་ལ་ནི་ཉེས་བྱས་ཏེ། །གནས་མ་ཡིན་པའི་དུས་ཐམས་ཅད་ལ་ནི་ཉེས་བྱས་སོ་ཞེས་གསུངས་པའི་ཕྱིར་རོ། །དེ་དག་རྙེད་པ་གང་ལ་གང་གིས་བྱེད་པ་པོ་ཡིན་ཞེ་ན་དེའི་ཕྱིར། དང་དུ་བླངས་ན་ཉེས་བྱས་ཀྱིའོ་ཞེས་བྱ་བ་སྨྲས་
ཏེ། ཁས་བླངས་པའི་དུས་ན་ཉེས་བྱས་ཀྱི་བྱེད་པ་པོ་ཡིན་ནོ། །འདིར་དང་དུ་བླངས་པ་ནི་ཡིད་ཀྱི་ཡིན་པའི་ཕྱིར་དེ་ནི་བསྡམས་པར་བྱ་བའི་ཉེས་བྱས་སོ། །ཁར་ཟ་བའི་མདུན་རོལ་དུ་འགྲོ་བ་ལ་སོགས་པས་རྗེས་སུ་བསྒྲུབ་པ་ནི་བཤགས་པར་བྱ་བའི་ཉེས་བྱས་ཡིན་པར་རིག་པར་བྱའོ། །ཟོས་ན་དངོས་གཞིའོ་ཞེས་བྱ་བ་ནི། མགུལ་དུ་མིད་ཟིན་པའི་དུས་ན་དངོས་གཞིའི་བྱེད་པ་པོ་ཡིན་ནོ། །གོས་ཀྱི་རྙེད་པ་ཞེས་སྨོས་ན་གོས་ཀྱི་ཚད་ཇི་ཙམ་ལ་ཞེ་ན་དེའི་ཕྱིར། འདིར་གོས་ཀྱི་མཐར་གྱུར་པ་ནི་ཁྲུ་གང་གི་ཁྱོན་ནོ་ཞེས་བྱ་བ་སྨྲས་ཏེ། གོས་ལ་བོས་པ་འདིར་གོས་ཀྱི་ཚད་མཐར་གྱུར་པ་ནི་ཁྲུ་གང་གི་ཁྱོན་ཡིན་པར་རིག་པར་བྱའོ། །གལ་ཏེ་གོས་ཁྲུ་གང་གི་ཁྱོན་ལས་ཆུང་བའི་གོས་དང་བཅས་པར་བོས་པ་དེ་ནི་གོས་མེད་པ་ཉིད་ཡིན་པར་རིག་པར་བྱ་སྟེ། དངོས་གཞིའི་ཁ་ན་མ་ཐོ་བ་ཉིད་ཁོ་ནར་འགྱུར་རོ། །གོས་སྦྱིན་པར་བྱེད་པ་ལ་སོགས་པ་གཞན་དག་ལ་ནི་ཁྲུ་གང་གི་ཁྱོན་ནི་དངོས་གཞིའི་བྱེད་པ་པོ་ཡིན་ལ་དེ་བས་ཆུང་བ་ནི་ཉེས་བྱས་བྱེད་པ་པོ་ཡིན་གྱི། འདིར་ནི་དེ་བས་ཆུང་བས་དངོས་གཞིའི་བྱེད་པ་པོ་ཡིན་ནོ། །སྔར་ན་བ་མ་ཡིན་པ་དང་ལས་མ་བྱས་པ་དང༌། ལམ་དུ་མ་སོང་བ་ལའོ་ཞེས་སྨོས་ན་ལམ་གྱི་ཚད་ཇི་ཙམ་ཞེ་ན་དེའི་ཕྱིར། ལམ་ནི་དཔག་ཚད་ཕྱེད་དོ་ཞེས་བྱ་བ་སྨོས་ཏེ། འདིར་ལམ་གྱི་མཐར་གྱུར་པ་ནི་དཔག་ཚད་ཕྱེད་དོ། །གཞན་ལ་ཡང་ངོ་ཞེས་བྱ་བ་ནི། ཡང་ཡང་ཟ་བ་ལས་གཞན་པ་འདུས་ཤིང་ཟ་བ་ལ་སོགས་པའི་བསླབ་པའི་གཞི་དག་ལ་ཡང་སྟེ། ཡང་ངོ་ཞེས་བྱ་བའི་སྒྲས་ནི་བསླབ་པའི་གཞི་དེ་དག་ལ་ཡང་ལམ་གྱི་མཐར་གྱུར་པ་ནི་དཔག་ཚད་ཕྱེད་དོ་ཞེས་འདིས་འདྲ་བར་བསྟན་པ་ཡིན་ནོ། །འདིར་རམ་གྲུར་འགྲོ་བ་ལ་ཡང་ངོ་ཞེས་བྱ་བ་ལ། འདིར་ཞེས་བྱ་བ་ནི་སྐམ་ལ་འགྲོ་བའི་ལམ་མོ། །གྲུར་འགྲོ་ཞེས་བྱ་བ་ནི་གྲུར་ཞུགས་ཏེ་འགྲོ་བའི་ལམ་སྟེ། དེ་གཉིས་ལ་ཡང་མཐར་གྱུར་པའི་ཚད་ནི་དཔག་ཚད་ཕྱེད་ཡིན་པར་རིག་པར་བྱའོ། །ལས་ཀྱི་མཚན་ཉིད་གང་ཞེ་ན། དེའི་ཕྱིར། ལས་ཀྱི་ཕྱག་དར་རེ་ལྡེ་ཙམ་མམ་དཀྱིལ་འཁོར་བ་མལ་ཙམ་ཡིན་ནོ་ཞེས་བྱ་བ་སྨྲས་ཏེ། ལས་ཀྱི་མཐར་གྱུར་པའི་ཚད་ནི་གལ་ཏེ་ཕྱག་དར་རེ་ལྡེ་ཙམ་བྱས་པ་འམ། གལ་ཏེ་བྱུག་པ་མལ་ཙམ་བས་པ་དེ་ཡིན་པར་རིག་པར་བྱའོ། །གཞན་ལ་ཡང་ངོ་ཞེས་བྱ་བ་འདིར་ཡང་སྦྱར་བར་བྱ་སྟེ།
དེས་ན་འདུས་ཤིང་ཟ་བ་ལ་སོགས་པ་དག་ལ་ཡང་ལས་ཀྱི་མཚན་ཉིད་འདི་ཡིན་པར་རིག་པར་བྱའོ། །དེ་ཡང་དགེ་འདུན་གྱི་ཉིད་དམ་མཆོད་རྟེན་གྱི་ཉིད་ཡིན་ནའོ་ཞེས་བྱ་བ་ནི། ཕྱག་དར་ལ་སོགས་པའི་ལས་བསྟན་པ་གང་ཡིན་པ་དེ་ཡང་གལ་ཏེ་དགེ་འདུན་གྱི་ཉིད་ཡིན་ནམ། གལ་ཏེ་མཆོད་རྟེན་གྱི་ཉིད་ཡིན་ན་དེའི་ཚེ་ལས་དུས་སོ་ཞེས་བྱ་བ་ཡིན་ནོ། །ན་བའི་ཚད་གང་ཞེ་ན་དེའི་ཕྱིར། ན་བ་ཉིད་ཀྱི་ཚད་ནི་མི་ནུས་པའོ་ཞེས་བྱ་བ་སྨྲས་ཏེ། ན་བའི་དངོས་པོ་ནི་ན་བ་ཉིད་དེ་དེའི་ཚད་ནི་མི་ནུས་པ་ཉིད་དོ། །འདི་སྐད་བསྟན་ཏེ། ཇི་ལྟར་ན་མགྲོན་དུ་བོས་པ་གཅིག་གང་ཡིན་པས་འཚོ་བར་མི་ནུས་པ་དེ་ལྟ་བུའི་ན་བ་ཉིད་དུ་གྱུར་པ་ཡིན་ན། དེའི་ཚེ་ཇི་སྙེད་པ་ཁས་བླང་བར་བྱའོ། །གཞན་ལ་ཡང་ངོ་ཞེས་བྱ་བ་འདིར་ཡང་སྦྱར་བར་བྱ་སྟེ། དེས་ན་དེ་དག་ལ་ཡང་འདི་དང་འདྲ་བར་རིག་པར་བྱའོ། །བཤམས་པ་ནི་མགྲོན་དུ་བོས་པ་ཉིད་མ་ཡིན་ནོ་ཞེས་བྱ་བ་ནི། ཉིན་གཅིག་མི་ཆད་པར་བཤམས་པའི་ཟན་ནར་མ་ཟོས་པ་གང་ཡིན་པ་དེ་ནི་དུས་སྟོན་ལ་སོགས་པའི་ཉི་མ་དག་ལ་ལན་འགའ་གང་དུ་བོས་པ་དེའི་མགྲོན་དུ་བོས་པ་གཞན་མ་ཡིན་པར་རིག་པར་བྱའོ། །འདིར་གཞུང་ནི་ཞུ་བ་ལས་མངོན་པར་ལྷག་པ་ཟོས་ན་ལྟུང་བ་མེད་དོ་ཞེས་གསུངས་པ་ཡིན་ནོ། །མངོན་པར་ལྷག་པ་ཞེས་བྱ་བ་ནི། དགེ་སློང་ལ་བཤམས་པའི་བསོད་སྙོམས་ཀྱི་ཕུད་དེ། དེ་ཟོས་ན་ལྟུང་བ་མེད་དོ། །དགེ་སློང་གི་ཕྱིར་བཤམས་པ་ལ་ནི་དགེ་སློང་ལ་བཤམས་པའོ། །ཀུན་ཏུ་ལྟ་བ་ཡང་ངོ་ཞེས་བྱ་བ་ནི། མགྲོན་དུ་བོས་པ་ཉིད་མ་ཡིན་ནོ་ཞེས་བྱ་བར་སྦྱར་རོ། །འཇིག་རྟེན་གྱི་ཐ་སྙད་ཀྱི་དབང་ངམ་ཤེས་པའི་དབང་གིས་ཉེ་བར་ལྟ་བ་ནི་ཀུན་ཏུ་ལྟ་བ་སྟེ། དེ་ལ་མགྲོན་དུ་བྱས་པ་ཟོས་པ་ཡང་མགྲོན་དུ་བོས་པ་ཉིད་མ་ཡིན་ནོ། །འདིར་གཞུང་ནི་ཞུ་བ་ལས་འདིར་སྤྱན་གཟིགས་ཙམ་གསོལ་ལ་གདུགས་ཚོད་གཞན་དུ་གསོལ་ཅིག་ཅེས་ཟེར་བ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །མགྲོན་དུ་བོས་པ་གཞན་ཡོང་ན་ཟན་སྔ་མ་ལ་སྤོང་བ་བསྲུང་ཞིང་འཇུག་པར་བྱའོ་ཞེས་བྱ་བ་ནི། གལ་ཏེ་དགེ་སློང་ཉི་མ་གཅིག་ལ་སྔར་གོས་དང་བཅས་པ་ཡང་རུང༌། གོས་མེད་པ་ཡང་རུང་བ་ཞིག་ཏུ་མགྲོན་དུ་བོས་པའི་རྗེས་ལ་གོས་དང་བཅས་པའི་མགྲོན་དུ་བོས་པ་གཞན་ཞིག་ཀྱང་བྱུང་ན། དེའི་ཚེ་དགེ་སློང་དེས་མགྲོན་དུ་བོས་པ་སྔ་མ་ལ་སྤོང་བ་བསྲུང་ཞིང་འཇུག་པར་བྱ་སྟེ། དེའི་
རྗེས་ལ་ཕྱི་མར་ཡང་འགྲོ་བར་བྱའོ་ཞེས་བྱ་བར་སྦྱར་རོ། །མགྲོན་དུ་བོས་པ་གཞན་ཡོད་ན་ཞེས་བྱ་བ་ནི། གོས་དང་བཅས་པའི་མགྲོན་དུ་བོས་པ་ཕྱི་མ་གཞན་ཡོད་ནའོ། །ཟན་སྔ་མ་ཞེས་བྱ་བ་ནི། སྔར་གོས་དང་བཅས་པ་ཡང་རུང་གོས་མེད་པ་ཡང་རུང་བ་ཞིག་ཏུ་མགྲོན་དུ་བོས་པའི་ཟན་སྔ་མ་ལའོ། །སྤོང་བ་བསྲུང་ཞིང་ཞེས་བྱ་བ་ལ། སྤོང་བ་ཞེས་བྱ་བ་ནི། འགྲངས་པར་ཟོས་ནས་དེང་བདག་གིས་འདི་ལས་ཡང་བཟའ་བར་མི་བྱའོ་ཞེས་ལྟོས་པ་མེད་པའི་བསམ་པས་ཟན་གྱི་སྟན་ལས་ལྡང་བ་སྟེ། དགེ་སློང་གི་སྤོང་བ་དེ་བསྲུང་ཞིང་ཟན་སྔ་མ་ལ་འཇུག་པར་བྱ་སྟེ། དེའི་རྗེས་ལ་ཕྱི་མར་ཡང་འགྲོ་བར་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་དགེ་སློང་གིས་ཁ་གཉིས་སུ་མགྲོན་དུ་བོས་པ་ཁས་བླངས་པར་གྱུར་ན་མགྲོན་དུ་བོས་པ་སྔ་མ་ཤོས་ལ་ཇི་ནས་ཀྱང་སྤོང་བར་མི་འགྱུར་བ་དེ་ལྟར་སྤོང་བ་བསྲུང་ཞིང་དེའི་རྗེས་སུ་མགྲོན་དུ་བོས་པ་ཅིག་ཤོས་དང་བཅས་པ་ཡིན་ན་དེར་ཡང་འགྲོ་ཞིང་བཟའ་བར་བྱའོ། །གལ་ཏེ་ཟན་སྔ་མ་ལ་སྤོང་བ་མ་བསྲུངས་ཤིང་སྤངས་པར་གྱུར་ན་ནི་ཕྱི་མར་སོང་ཡང་བཟའ་བར་མི་བྱའོ། །ཐོ་འཚམས་པར་བྱས་པ་ནི་མ་ཡིན་པ་ཉིད་དོ་ཞེས་བྱ་བ་ནི། མགྲོན་དུ་བོས་པ་ཞེས་བྱ་བར་སྦྱར་ཏེ། ཐོ་འཚམས་པའི་བསམ་པས་མགྲོན་དུ་བོས་པ་ནི་མགྲོན་དུ་བོས་པ་མ་ཡིན་པ་ཉིད་དུ་རིག་པར་བྱའོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་ལ་སྔར་ཐོ་འཚམས་པའི་རྟོག་པ་ཙམ་གྱིས་གཡར་དྲངས་པར་གྱུར་ནས། སླད་ཀྱིས་ཐ་མལ་པའི་གནས་སྐབས་སུ་གཡར་དྲངས་པ་གཞན་རྙེད་ཅིང་དེ་འཚལ་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ་ཞེས་གསུངས་པ་ཡིན་ནོ། །ཐོ་འཚམས་པའི་རྟོག་པ་ནི་ཐོ་འཚམས་པར་རྟོག་པ་སྟེ། གང་ལ་ལ་གཞན་ཐོ་འཚམས་པའི་རྟོག་པ་དེ་ཡོད་པ་དེ་ནི་ཐོ་འཚམས་པའི་རྟོག་པ་ཅན་ཡིན་ནོ། །འདི་སྐད་བསྟན་ཏེ། གལ་ཏེ་ཐོ་འཚམས་པའི་བསམ་པ་ཅན་འགའ་ཞིག་གིས། དགེ་སློང་མགྲོན་དུ་བོས་སུ་ཟིན་ཀྱང༌། དགེ་སློང་དེས་མགྲོན་དུ་བོས་པ་གཞན་དུ་སོང་སྟེ། ཟན་ཟོས་ན་དེ་ལྟར་ན་ཡང་ལྟུང་བ་མེད་དོ། །མི་རུང་བ་ལས་བོས་པ་ཡོང་ང་ཞེས་བྱ་བ་ནི། བཟའ་བར་བྱ་བ་མི་རུང་བ་བྱིན་ལེན་མ་བྱས་པ་དང༌། རྨིག་གཅིག་པའི་ཤ་ལ་སོགས་པ་ལ་མགྲོན་དུ་བོས་པ་ཡང་མགྲོན་དུ་བོས་པ་མ་ཡིན་པ་ཉིད་དུ་རིག་པར་བྱའོ། །དེའི་ཕྱིར་མ་ཡིན་པར་དགེ་འདུན་ལ་ཡང་ངོ་ཞེས་བྱ་བ་ནི། དགེ་
སློང་གང་ལ་མགྲོན་དུ་བོས་པ་གཞན་ཡོད་པ་དེའི་ཕྱིར་མ་ཡིན་པར་དགེ་འདུན་སྤྱིར་སྤྱན་དྲངས་པ་ཡང་དགེ་སློང་དེའི་མགྲོན་དུ་བོས་པ་ཅིག་ཤོས་ཉིད་མ་ཡིན་ནོ། །གལ་ཏེ་དེའི་ཕྱིར་དགེ་འདུན་སྤྱིར་སྤྱན་དྲངས་པ་ཡིན་ན་ནི། དེའི་ཚེ་དགེ་སློང་དེའི་མགྲོན་དུ་བོས་པ་གཞན་ཉིད་ཡིན་ནོ། །འདིར་ཁུངས་ནི་འཕགས་པ་ལེགས་འོངས་ཀྱི་ཕྱིར་ཆུ་སྲིན་ཕྱིས་པ་གསོད་ཀྱི་རི་བའི་བྲམ་ཟེ་དང་ཁྱིམ་བདག་རྣམས་ཀྱིས་སངས་རྒྱས་ལ་སོགས་པའི་དགེ་སློང་གི་དགེ་འདུན་སྤྱན་དྲངས་པ་ན། ཕྱིས་འཕགས་པ་ལེགས་འོངས་བྲམ་ཟེ་དང་ཁྱིམ་བདག་རྣམས་ཀྱིས་མགྲོན་དུ་བོས་པས་སྨྲས་པ། ཆུ་སྲིན་བྱིས་པ་གསོད་ཀྱི་རི་བའི་བྲམ་ཟེ་དང་ཁྱིམ་བདག་རྣམས་ཀྱིས་ཁོ་བོའི་ཕྱིར། སངས་རྒྱས་ལ་སོགས་པ་དགེ་སློང་གི་དགེ་འདུན་ཞག་བདུན་དུ་བ་ཤོས་ལ་སྤྱན་དྲངས་པས་དེའི་ཚེ་ཁོ་བོས་དང་དུ་མ་བླངས་སོ་ཞེས་གསུངས་པ་ཡིན་ཏེ། དེའི་ཕྱིར་མདོ་འདི་བྱས་སོ། །གཞན་དུ་ལྔ་པོ་འཇོག་པ་ཡང་ངོ་ཞེས་བྱ་བ་ཡང་མགྲོན་དུ་བོས་པ་མ་ཡིན་པ་ཉིད་དོ་ཞེས་བྱ་བར་སྦྱར་ཏེ། གཞན་དུ་ཞེས་བྱ་བ་ནི། གང་ལ་བདག་ཉིད་ཟན་ཟ་བ་དེ་ལས་གཞན་པའི་མགྲོན་དུ་བོས་པ་ཅིག་ཤོས་སུའོ། །ལྔ་པོ་འཇོག་པ་ཡང་ཞེས་བྱ་བ་ནི་ལྔ་པོ་དགེ་སློང་དང་དགེ་སློང་མ་དང༌། དགེ་སློབ་མ་དང༌། དགེ་ཚུལ་དང་དགེ་ཚུལ་མ་དག་འཇོག་པ་ཡང་མགྲོན་དུ་བོས་པ་མ་ཡིན་པ་ཉིད་དོ། །འདི་སྐད་བསྟན་ཏེ། དགེ་སློང་ཁ་གཉིས་སུ་མགྲོན་དུ་བོས་པས་མགྲོན་དུ་བོས་པའི་གནས་གཅིག་ཏུ་ནི་བདག་ཉིད་ཟ་ཞིང་མགྲོན་དུ་བོས་པའི་གནས་གཞན་ཅིག་ཤོས་སུ་དགེ་སློང་ལ་སོགས་པ་ལྔ་པ་འཇོག་ན་མགྲོན་དུ་བོས་པས་ཅིག་ཤོས་དེ་མགྲོན་དུ་བོས་པ་མ་ཡིན་པ་ཉིད་དེ་ལྟུང་བ་མེད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་སིལ་བུ་དག་ལས་དགེ་སློང་བཅའ་བ་དང་བཟའ་བའི་ཟན་གཉིས་ལ་མགྲོན་དུ་བོས་པ་གཅིག་དགེ་སློང་ལ་རྣམ་པར་རྟོག་པར་བྱེད་ན་ལྟུང་བ་མེད་དོ། །དགེ་སློང་མ་ལ་རྣམ་པར་རྟོག་པར་བྱེད་ན་ཡང་ལྟུང་བ་མེད་དོ། །དེ་བཞིན་དུ་དགེ་སློབ་མ་དང༌། དགེ་ཚུལ་དང་དགེ་ཚུལ་མ་ལ་རྣམ་པར་རྟོག་པར་བྱེད་ན་ཡང་ལྟུང་བ་མེད་དོ། །དེ་བཞིན་དུ་སྡེ་པ་ལྔ་པོ་ཐམས་ཅད་ལ་རྣམ་པར་རྟོག་པར་བྱེད་ན་ཡང་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ནི་ཆོས་དང་ལྡན་པ་ཉིད་དོ་ཞེས་བྱ་བ་ལ། དེ་ནི་ཞེས་བྱ་བ་ནི། མགྲོན་དུ་བོས་པ་གཞན་ཅིག་ཤོས་སུ་ལྔ་པོ་འཇོག་པའོ། །ཆོས་དང་ལྡན་པ་ཞེས་བྱ་བ་ནི། ཆོས་
དང་མི་འབྲལ་བའོ། །དེའི་དངོས་པོ་ནི་དེ་ཉིད་དོ། །དེ་ནི་ཆོས་དང་ལྡན་པ་ཉིད་དེ་རིགས་པའི་ཚུལ་ཉིད་ཡིན་ནོ་ཞེས་བྱ་བའི་ཐ་ཚིག་གོ །གཞན་བླང་བ་ལ་ཡང་ངོ་ཞེས་བྱ་བ་ནི། མགྲོན་དུ་བོས་པ་གཞན་ཡོད་ན་འཇོག་པར་ལེན་པ་ཡང་ཆོས་དང་ལྡན་པ་ཉིད་དོ། །མུ་གེ་བྱུང་ན་མགྲོན་དུ་བོས་པ་ཇི་སྙེད་བྱུང་བ་དག་བདག་གིར་བྱའོ་ཞེས་བྱ་བ་ནི། མུ་གེ་བྱུང་ན་མགྲོན་དུ་བོས་པ་ཇི་སྙེད་བྱུང་བ་དེ་སྙེད་བདག་གིར་བྱའོ། །འདི་སྐད་བསྟན་ཏེ། །མུ་གེ་བྱུང་བའི་དུས་ཀྱི་ཚེ་མགྲོན་དུ་བོས་པ་ཇི་སྙེད་བྱུང་བ་དེ་སྙེད་བདག་གིར་བྱ་སྟེ། སྔ་མར་གཞག་པར་ཡང་ངོ༌། །ཟོས་ན་ཡང་ངོ་ཞེས་བྱ་བ་ནི། མགྲོན་དུ་བོས་པ་ཇི་སྙེད་བྱུང་བ་དེ་སྙེད་ཟོས་ན་ཡང་ལྟུང་བ་མེད་དོ། །སྦྱིན་དུ་ཡང་རུང་ངོ་ཞེས་བྱ་བ་ནི། ལྔ་པོ་ལའོ་ཞེས་སྔར་བསྟན་པའི་རྗེས་སུ་ཤེས་པར་བྱའོ། །སྦྱིན་པ་པོ་མངོན་པར་མི་དགའ་བར་འགྱུར་བ་ལྟ་ན་ཁ་མ་གཉིས་སམ་གསུམ་ཟོས་པའི་འོག་ཏུ་ཁྱིམ་བདག་དགེ་སློང་འདི་བསོད་སྙོམས་ཀྱིས་ཕོངས་པ་ཡིན་གྱིས་རྗེས་སུ་ཡི་རང་བར་གྱིས་ཤིག་དང༌། འདི་ལ་སྦྱིན་པར་བྱའོ་ཞེས་མངོན་པར་དགའ་བར་བྱས་ནས་སོ་ཞེས་བྱ་བ་ནི། དེ་ལྟར་དགེ་སློང་དེས་རང་གི་བསོད་སྙོམས་སྦྱིན་པ་པོས་སྦྱར་བ་དེ་ལྔ་པོ་དག་ལ་སྦྱིན་པར་བྱེད་པ་ན་གལ་ཏེ་སྦྱིན་པ་པོ་དེ་ལྔ་པོ་དག་ལ་སྦྱིན་པར་མངོན་པར་མི་དགའ་བར་འགྱུར་བ་ལྟ་ན། དེའི་ཚེ་དགེ་སློང་དེས་རང་གིས་ཁམ་གཉིས་སམ་གསུམ་ཟོས་པའི་འོག་ཏུ་སྦྱིན་པ་པོ་དེ་ལ་འདི་སྐད་ཅེས་ཁྱིམ་བདག་དགེ་སློང་འདི་བསོད་སྙོམས་ཀྱིས་ཕོངས་པ་ཡིན་གྱིས་རྗེས་སུ་ཡི་རང་བར་གྱིས་ཤིག་དང༌། འདི་ལ་སྦྱིན་པར་བྱའོ་ཞེས་བྱ་བའི་ཐབས་ཀྱིས་སྦྱིན་པ་པོ་མངོན་པར་དགའ་བར་བྱས་ནས་དེའི་འོག་ཏུ་ལྔ་པོ་དེ་དག་ལ་སྦྱིན་པར་བྱའོ། །འདི་སྐད་བསྟན་ཏེ། གལ་ཏེ་བསོད་སྙོམས་དེ་ལྔ་པོ་དག་ལ་སྦྱིན་པ་ལ་སྦྱིན་པ་པོ་མངོན་པར་དགའ་བར་མི་འགྱུར་བ་དེ་ལྟར་ན། དེའི་ཚེ་དགེ་སློང་དེས་རང་གིས་ཁམ་གཉིས་སམ་གསུམ་བཟའ་བར་བྱ་ཞིང་དེའི་འོག་ཏུ་འདི་སྐད་ཅེས་སྦྱིན་བདག་དགེ་སློང་འདི་བསོད་སྙོམས་ཀྱིས་ཕོངས་པ་ཡིན་གྱིས། རྗེས་སུ་ཡི་རང་བར་གྱིས་ཤིག་དང་འདི་ལ་སྦྱིན་པར་བྱའོ་ཞེས་མངོན་པར་དགའ་བ་བསྐྱེད་པར་བྱ་ཞིང་དེའི་འོག་ཏུ་ལྔ་པོ་དག་ལ་སྦྱིན་པར་བྱའོ། །ཡང་ཡང་ཟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།འདུག་གནས་སུ་ཟ་བའི་ལྟུང་བྱེད་ལ་བྱེད་པ་པོ་གང་ཡིན་ཞེ་ན་དེའི་ཕྱིར། ཆོས་
འདི་པ་མ་ཡིན་པ་བདག་པོ་ཁྱིམ་པ་དང་བཅས་པ་ཡ་མཚན་ཅན་ཐམས་ཅད་མ་ཡིན་པའི་འདུག་གནས་སུ་ཞེས་བྱ་བ་སྨྲས་ཏེ། ཆོས་འདི་གང་ལ་ཡོད་པ་དེ་ནི་ཆོས་འདི་པའོ། །ཆོས་འདི་པ་དེའི་འདུག་གནས་གང་ཡིན་པ་དེ་ནི་ཆོས་འདི་པའོ། །ཆོས་འདི་པའི་མ་ཡིན་པ་ནི་ཆོས་འདི་པའི་མ་ཡིན་པ་སྟེ། མུ་སྟེགས་ཅན་གྱི་འདུག་གནས་སོ། །བདག་པོ་ཁྱིམ་པ་དང་བཅས་པ་ཞེས་བྱ་བ་ནི། བདག་པོ་ཁྱིམ་པ་དང་ལྷན་ཅིག་འཇུག་པ་གང་ཡིན་པ་དེ་ནི་བདག་པོ་ཁྱིམ་པ་དང་བཅས་པའི་འདུག་གནས་སོ། །ཡ་མཚན་ཅན་ཐམས་ཅད་མ་ཡིན་པའི་འདུག་གནས་སོ་ཞེས་བྱ་བ་ལ། ཡ་མཚན་ཅན་ཞེས་བྱ་བ་ནི། ཆོས་འདི་པ་དང་གཞན་མུ་སྟེགས་ཅན་གྱི་རབ་ཏུ་བྱུང་བ་སྤྱིའི་མིང་ངོ༌། །ཐམས་ཅད་མ་ཡིན་པའི་འདུག་གནས་ཞེས་བྱ་བ་ནི། གལ་ཏེ་ཐམས་ཅད་ཀྱི་ཡིན་ན་ནི་ཆོས་འདི་པའི་རབ་ཏུ་བྱུང་བ་དག་གི་འདུག་གནས་ཀྱང་ཡིན་པར་འགྱུར་བས། དེའི་ཕྱིར་ཐམས་ཅད་མ་ཡིན་པ་ཞེས་སྨོས་ཏེ། ཆོས་འདི་ཞུ་བའི་རབ་ཏུ་བྱུང་བ་དག་མ་གཏོགས་པ་གཞན་མུ་སྟེགས་ཅན་རབ་ཏུ་བྱུང་བ་དག་གི་འདུག་གནས་སོ་ཞེས་བྱ་བའི་ཐ་ཚིག་གོ །དེ་ལྟ་བས་ན་བཅོམ་ལྡན་འདས་ཀྱི་ཉན་ཐོས་མ་གཏོགས་པ་རབ་ཏུ་བྱུང་བ་གཞན་དག་གི་ཕྱིར་བཤམས་པ་བདག་པོ་ཁྱིམ་པ་དང་བཅས་པའི་འདུག་གནས་དེ་ནི་ལྟུང་བ་འདིའི་བྱེད་པ་པོ་ཡིན་ནོ། །ལྟུང་བ་འབྱིན་པར་བྱེད་པ་ཇི་ལྟ་བུ་ལ་དེ་བྱེད་པ་པོ་ཡིན་ཞེ་ན་དེའི་ཕྱིར། མི་ན་བ་ལའོ་ཞེས་བྱ་བ་སྨྲས་ཏེ། གལ་ཏེ་ན་བ་མ་ཡིན་ན་དེ་ལའོ། །ན་བ་ནི་ཇི་སྲིད་འདོད་པ་དེ་སྲིད་དུ་དེར་ཉལ་ཞིང་ཟོས་ན་ཡང་ཉེས་པ་མེད་དོ། །འདིར་གཞུང་ནི་སོ་སོར་ཐར་པའི་མདོ་ལས་གལ་ཏེ་དགེ་སློང་མི་ན་བས་ཞེས་གསུངས་པ་ཡིན་ནོ། །སྦྱིན་བདག་གིས་མ་བསྟབས་པ་ལའོ་ཞེས་བྱ་བ་ནི། གལ་ཏེ་སྦྱིན་བདག་གིས་དགེ་སློང་དེ་ལ་བསྟབས་པ་མ་ཡིན་ན་དེ་ལའོ། །བསྟབས་པ་ནི་འདུག་གནས་བྱེད་པ་པོ་མ་ཡིན་ནོ། །འཕགས་པ་ཤཱ་རིའི་བུས་སྦྱིན་བདག་གིས་བསྟབས་པ་ཡང་ཞལ་གྱིས་མ་བཞེས་པ་གང་ཡིན་པ་དེ་ནི། དེའི་ཚེ་ན་ད་དུང་བཅོམ་ལྡན་འདས་ཀྱིས་རྗེས་སུ་གནང་བར་མ་གྱུར་པའི་ཕྱིར་ཏེ། གླེང་གཞི་དེ་ཁོ་ནའི་དབང་གིས་དེའི་མོད་ལ་བཅོམ་ལྡན་འདས་ཀྱིས་སྦྱིན་བདག་གིས་བསྟབས་པར་འདུག་པར་བྱ་བ་དང་བཟའ་བར་བྱ་བ་རྗེས་སུ་གནང་བ་མཛད་དོ། །སྦྱིན་བདག་ནི་དེ་ལ་དབང་ཡོད་པ་
ཡིན་ཏེ། ངེས་པར་མ་ཕུལ་བའི་ཕྱིར་རོ། །བསླབ་པའི་གཞི་འདི་ལ་ཇི་ཞིག་རྗེས་སུ་བསྒྲུབ་ན་འདུག་གནས་དེ་གང་ཟག་གང་ལ་ཁ་ན་མ་ཐོ་བ་གང་གི་བྱེད་པ་པོ་ཉིད་ཡིན་ཞེ་ན་དེའི་ཕྱིར། དེའི་ཟས་ནི་ཟོས་པ་ལ་དངོས་གཞིའི་འོ་ཞེས་བྱ་བ་སྨྲས་ཏེ། དེའི་ཟོས་ན་ཞེས་བྱ་བ་ནི། ཉི་མ་གཉིས་པ་དེའི་བསོད་སྙོམས་ཟོས་ནའོ། །ཟོས་པ་ལ་ཞེས་བྱ་བ་ནི། གང་གིས་ཟོས་པའི་དགེ་སློང་ལའོ། །དངོས་གཞིའོ་ཞེས་བྱ་བ་ནི། དངོས་གཞི་ནི་ཁ་ན་མ་ཐོ་བའི་བྱེད་པ་པོ་ཉིད་ཡིན་པའོ། །གནས་ན་ཞག་ལོན་པ་ལ་ཉེས་བྱས་ཀྱིའོ་ཞེས་བྱ་བ་ལ། གནས་ན་ཞེས་བྱ་བ་ནི། ཉི་མ་གཉིས་སུ་གནས་ན་སྟེ་ཉི་མ་གཉིས་པ་ལ་ཟན་མ་ཟོས་པར་གྱི་ན་གནས་ནའོ། །ཞག་ལོན་པ་ལ་ཞེས་བྱ་བ་ནི། དེར་ཞག་གཅིག་ལོན་པ་ཉི་མ་གཉིས་པའི་བར་དུ་གནས་པའི་དགེ་སློང་ལའོ། །ཉེས་བྱས་ཀྱིའོ་ཞེས་བྱ་བ་ནི། ཉེས་བྱས་ཀྱི་ཁ་ན་མ་ཐོ་བའི་བྱེད་པ་པོ་ཉིད་ཡིན་པའོ། །ཉི་མ་དང་པོ་ལ་ནི་གནས་པ་དང་ཟོས་པ་ལ་ལྟུང་བ་མེད་དོ། །ཉི་མ་གཉིས་པ་ལ་གནས་པ་དང་ཟ་བའི་དབང་དུ་མཛད་ནས་འདི་སྐད་གསུངས་ཏེ། དེར་གནས་ཤིང་དེར་ཟ་ན་གནས་པ་དེ་ལ་ནི་ཉེས་བྱས་སོ། །ཟ་བ་ལ་ནི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །དེ་ཉི་མ་གཉིས་པའི་དབང་དུ་བྱས་ཏེ་གསུངས་པ། ཅི་མངོན་ཞེ་ན། སོ་སོར་ཐར་པའི་མདོ་ལས་འདུག་གནས་གཅིག་ཏུ་ཞག་ལོན་པའི་དགེ་སློང་མི་ན་བས་བསོད་སྙོམས་གཅིག་བཟའ་བར་བྱའོ། །དེ་ལས་ལྷག་པར་ཟ་ན་ལྟུང་བྱེད་དོ་ཞེས་གསུངས་པའི་ཕྱིར་རོ། །ཡན་ལག་གཅིག་མ་ཚང་ན་ཡང་འདུག་གནས་དེར་དེའི་ཟོས་ན་ཟོས་པ་ལ་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །བདག་པོ་མེད་པ་ཡང་ངོ་ཞེས་བྱ་བ་ནི་ཆོས་འདི་པའི་མ་ཡིན་པ་ཡ་མཚན་ཅན་ཐམས་ཅད་མ་ཡིན་པའི་འདུག་གནས་བདག་པོ་མེད་པ་ཡིན་ན་ཡང་ཉེས་བྱས་ཀྱི་བྱེད་པ་པོ་ཡིན་ནོ། །འདི་ལ་རབ་ཏུ་བྱུང་བ་འདི་པ་ནི་མུ་སྟེགས་ཅན་དང་འདྲ་བ་ཉིད་དོ་ཞེས་བྱ་བ་ནི། བསླབ་པའི་གཞི་འདི་ལ་རབ་ཏུ་བྱུང་བ་འདི་པ་འདུག་གནས་ཀྱི་བདག་པོ་ཡིན་པ་ནི་མུ་སྟེགས་ཅན་འདུག་གནས་ཀྱི་བདག་པོ་ཡིན་པ་དང་འདྲ་བ་ཉིད་དོ། །དེ་གཉིས་གང་ཡང་རུང་བ་བདག་པོ་ཡིན་ན་ཡང༌། འདུག་གནས་དེ་ཉེས་བྱས་ཀྱི་བྱེད་པ་པོ་ཉིད་ཡིན་པར་རིག་པར་བྱའོ། །འདི་སྐད་བསྟན་ཏེ། ཇི་ལྟར་མུ་སྟེགས་ཅན་གྱི་རབ་ཏུ་བྱུང་བ་བདག་པོ་ཡིན་པའི་འདུག་གནས་དེ་ཉེས་བྱས་ཀྱི་བྱེད་པ་པོ་ཡིན་པ་དེ་བཞིན་དུ་རབ་ཏུ་བྱུང་བ་
འདི་པ་བདག་པོ་ཡིན་ལ། ཡ་མཚན་ཅན་ཐམས་ཅད་མ་ཡིན་པའི་འདུག་གནས་ཀྱང་ཉེས་བྱས་ཀྱི་བྱེད་པ་པོ་ཡིན་ནོ། །འདིར་གཞུང་ནི་དགེ་སློང་རབ་ཏུ་བྱུང་བས་འདུག་གནས་བགྱིད་དུ་སྩལ་བ་དེར་དགེ་སློང་གིས་དགུང་གཅིག་ལས་ལྷག་པར་གནས་ཤིང་བསོད་སྙོམས་གཅིག་ལས་ལྷག་པར་འཚལ་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །ཉེ་དུས་ཀྱང་ངོ་ཞེས་བྱ་བ་ཡང་མུ་སྟེགས་ཅན་དང་འདྲ་བ་ཉིད་དོ་ཞེས་བྱ་བར་སྦྱར་ཏེ། དགེ་སློང་དེའི་ཉེ་དུས་བྱེད་དུ་བཅུག་པའི་འདུག་གནས་ཉེ་དུ་བདག་པོ་ཡིན་ལ། ཡ་མཚན་ཅན་ཐམས་ཅད་ཀྱི་མ་ཡིན་པ་དེར་ཞག་གཅིག་ལས་ལྷག་པར་གནས་ཤིང་བསོད་སྙོམས་གཅིག་ལས་ལྷག་པར་ཟོས་ན་ཉེས་བྱས་སོ། །འདིར་གཞུང་ནི་བདག་པོ་ཉེ་དུས་བགྱིད་དུ་སྩལ་བ་ལགས་ན་ལྟུང་བ་ཅིར་འགྱུར་ཉེས་བྱས་སོ། །བཙུན་པ་རེ་ཞིག་དགེ་སློང་གིས་གཞན་ནས་བསོད་སྙོམས་བླངས་ནས་འདུག་གནས་སུ་མཆིས་ཏེ་འཚལ་ན་ལྟུང་བ་ཅི་འགྱུར། ཉེས་བྱས་སོ། །བཙུན་པ་རེ་ཞིག་དགེ་སློང་གིས་བཟའ་བར་བགྱི་བ་མ་གཏོགས་པ་དེ་ལས་གཞན་པའི་བཅའ་བ་དང་བཏུང་བ་དང་གཞིབ་པ་དང་བལྡགས་པ་དག་འཚལ་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །བཟའ་བར་བྱ་བ་ཞེས་བྱ་བ་ནི་འབྲས་ཆན་ལ་སོགས་པ་རྣམ་པ་ལྔའོ། །འདུག་གནས་སུ་ཟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ལྷུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བྱེད་སྨྲ་བར་འདོད་ནས། སྟོབས་པའི་འོ་ཞེས་བྱ་བ་སྨྲས་ཏེ། ཁྱིམ་པ་སྟོབས་པའི་བསོད་སྙོམས་ལྟུང་བ་འདིའི་བྱེད་པ་པོ་ཡིན་ནོ་ཞེས་བྱ་བར་སྦྱར་རོ། །ཁྱིམ་པའི་བསོད་སྙོམས་ཁྱད་པར་ཇི་ལྟ་བུ་ཅན་ཞིག་བྱེད་པ་པོ་ཡིན་ཞེ་ན། དེའི་ཕྱིར་སྟོབས་པའིའོ་ཞེས་བྱ་བ་ཡིན་ཏེ། གལ་ཏེ་ཁྱིམ་བ་དེ་དགེ་སློང་དེ་ལ་བསོད་སྙོམས་ཀྱིས་སྟོབས་པར་བྱེད་ན་ཁྱིམ་པ་སྟོབས་པར་བྱེད་པ་དེའི་བསོད་སྙོམས་བྱེད་པ་པོ་ཡིན་ནོ། །ཇི་ལྟར་སྟོབས་པའི་ཞེ་ན་དེའི་ཕྱིར། ཡོངས་སུ་མ་དཔགས་པའོ་ཞེས་བྱ་བ་སྨྲས་ཏེ། ལྷུང་བཟེད་འདི་སྙེད་ཅིག་བ་ཞེས་ཤིག་ཅེས་ཚད་ཡོངས་སུ་མ་བཅད་པར་སྟོབས་པར་བྱེད་པའི་སྟེ། གལ་ཏེ་ཡོངས་སུ་བཅད་དེ་སྟོབས་ན་ནི་ཆོས་དང་ལྡན་པའི་དགོས་པ་ཡོད་ན་ལྷུང་བཟེད་བརྒྱ་བླངས་ཀྱང་ཉེས་པ་མེད་དོ། །ཅི་ཁྱིམ་པ་སྟོབས་པའི་བསོད་སྙོམས་ཡོངས་སུ་མ་དཔགས་པ་ཐམས་ཅད་བྱེད་པ་པོ་ཡིན་ནམ་ཞེ་
ན་དེའི་ཕྱིར། ཅི་བདེར་མ་བྱས་པའོ་ཞེས་བྱ་བ་སྨྲས་ཏེ། གང་གིས་ཅི་བདེར་མ་བྱས་པ་དེ་ནི་ཅི་བདེར་མ་བྱས་པ་སྟེ། དེ་བྱེད་པ་པོ་ཡིན་ནོ། །ཅི་བདེར་བྱས་པ་ནི་ཉེས་པ་མེད་དོ། །ཅི་རབ་ཏུ་བྱུང་བ་སྟོབས་པའི་བསོད་སྙོམས་ཀྱང་བྱེད་པ་པོ་ཡིན་ནམ་ཞེ་ན་དེའི་ཕྱིར། །ཁྱིམ་པའིའོ་ཞེས་བྱ་བ་སྨྲས་ཏེ། ཁྱིམ་པ་སྟོབས་པའི་བསོད་སྙོམས་སོ། །བསོད་སྙོམས་ཅི་ཙམ་ཞིག་བྱེད་པ་པོ་ཡིན་ཞེ་ན་དེའི་ཕྱིར། བྲེའུ་ཆུང་དག་གི་ཚད་ནི་འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པ་ཚོད་མ་མ་གཏོགས་པ་ལས་ལྷག་པའི་བསོད་སྙོམས་ཏེ། གྲོགས་ཀྱི་སྐལ་བ་དང་ཡང་བཅས་པ་ཡིན་ནོ་ཞེས་བྱ་བ་སྨྲས་ཏེ། འབྲས་ཐུག་པོ་ཆེ་སྐམ་ཡུལ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པའི་ཆན་ཚོད་མ་མ་གཏོགས་པ་ལས་ལྷག་པའི་བསོད་སྙོམས་ནི་བྱེད་པ་པོའོ་ཞེས་བྱ་བར་སྦྱར་རོ། །བསོད་སྙོམས་ལྷག་པ་དེའི་བྲེའུ་ཆུང་གང་གི་ཚད་ཇི་ཙམ་ཞེ་ན། དེའི་ཕྱིར་འབྲས་ཐུག་པོ་ཆེ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པ་ཞེས་བྱ་བ་སྨྲས་ཏེ། འབྲས་ཐུག་པོ་ཆེ་སྐམ་ཡུལ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པའི་ཆན་ནོ། །མ་ག་དྷཱའི་བྲེའུ་ཆུང་གང་ལ་ནི་འབྲས་ཐུག་པོ་ཆེ་དྲུས་པ་སྐམ་ཡུལ་མ་ག་དྷ་པའི་སྲད་བཅུ་དྲུག་སྟེ། ཡུལ་མ་ག་དྷ་བའི་སྲད་གཅིག་ལ་བོད་ཀྱི་སྲད་གཉིས་ཡོད་དེ། འབྲས་སྐམ་བྲེའུ་ཆུང་གང་ལ་བོད་ཀྱི་སྲང་ནི་སུམ་ཅུ་རྩ་གཉིས་ཡོད། ཕུལ་ཚད་དུ་བརྩིས་ན་ནི་བདུན་ཕུལ་དོ་དང་ཁྱོར་གང་ཡོད་དོ། །ཚོད་མ་མ་གཏོགས་པ་ཞེས་བྱ་བ་ནི། དེར་ཚོད་མ་བརྩི་བར་མི་བྱ་སྟེ། དགེ་སློང་ཇི་སྙེད་ཡོད་ཀྱང་རུང་སྟེ། འབྲས་ཐུག་པོ་ཆེ་སྐམ་ཡུལ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པའི་ཆན་ཚོད་མ་མ་གཏོགས་པ་དེ་ལས་ལྷག་པའི་བསོད་སྙོམས་ལེན་ན་ཐམས་ཅད་དུ་ལྟུང་བྱེད་དོ། །འདིར་གཞུང་ནི་དགེ་སློང་ཇི་ཙམ་དུ་བྲེའུ་ཆུང་ཕྱེད་དང་ལྔ་ལས་ལྷག་པའི་བསོད་སྙོམས་ལེན་ན་ཐམས་ཅད་དུ་ལྟུང་བྱེད་དོ་ཞེས་གསུངས་པ་ཡིན་ནོ། །གལ་ཏེ་དགེ་སློང་དེ་ལ་གྲོགས་དག་ཡོད་ན་གྲོགས་དེ་དག་རེ་རེས་ཀྱང་ཚད་དེ་ཙམ་རེ་རེས་བླང་བར་བྱའམ་ཞེ་ན་མ་ཡིན་ཏེ། དེའི་ཕྱིར་གྲོགས་ཀྱི་སྐལ་པ་དང་ཡང་བཅས་པ་ཡིན་ནོ་ཞེས་བྱ་བ་སྨྲས་ཏེ། གྲོགས་ཇི་སྙེད་ཡོད་ཀྱང་རུང་སྟེ། དེ་དག་གི་སྐལ་པ་དང་བཅས་པར་ཚད་དེ་ཙམ་ཞིག་བླང་པར་བྱའི། དེ་ལས་ལྷག་པར་མི་བླང་ངོ༌། །འདིར་གཞུང་ནི་སོ་སོར་ཐར་པ་ལས་འདོད་ན་དགེ་སློང་དེ་དག་གིས་ལྷུང་བཟེད་
གང་བ་གཉིས་སམ་གསུམ་བླང་བར་བྱའོ། །དེ་ལས་ལྷག་པར་ལེན་ན་ལྟུང་བྱེད་དོ་ཞེས་གསུངས་པ་ཡིན་ནོ། །བསོད་སྙོམས་ཚད་ཇི་སྐད་བསྟན་པ་ལས་ལྷག་པ་དེ་གང་གི་ཚེ་བྱེད་པ་པོ་ཡིན་ཞེ་ན། དེའི་ཕྱིར་ཟོས་པ་ནའོ་ཞེས་བྱ་བ་སྨྲས་ཏེ། མགུལ་དུ་མིད་པ་ནའོ་ཅི་ཟོས་སོ་ཅོག་ཐམས་ཅད་ན་འམ་ཞེ་ན། དེའི་ཕྱིར་མནོས་པའོ་ཞེས་བྱ་བ་སྨྲས་ཏེ། དེ་ནས་མནོས་ཏེ་གཞན་དུ་ཁྱེར་བ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་དེ་ཉིད་དུ་འདུག་སྟེ། ཇི་སྙེད་ཟོས་ཀྱང་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ལ་ནི་ཉེས་བྱས་ཀྱིའོ་ཞེས་བྱ་བ་ནི། མནོས་པ་དེ་ལ་བསོད་སྙོམས་ལྷག་པར་ནོད་ན་སྦྱོར་བའི་ཚེ་ནི་ཉེས་བྱས་ཀྱི་བྱེད་པ་པོ་ཡིན་ནོ། །གཞན་གྱིས་མནོས་པ་ཡང་ངོ་ཞེས་བྱ་བ་ནི། གཞན་ནོད་དུ་བཅུག་པ་ཟོས་ན་ཡང་ཉེས་བྱས་ཀྱི་བྱེད་པ་པོ་ཡིན་ཏེ། འདིར་གཞུང་ནི་ཞུ་བ་ལས་འདག་གུ་དག་དང༌། སྣུམ་ཁུར་དག་བསྟབས་པ་དེ་ལ་ལྷུང་བཟེད་གཉིས་སམ་གསུམ་ལས་ལྷག་པར་གཞན་ནོད་དུ་བཅུག་ན་ཉེས་བྱས་སོ་ཞེས་གསུངས་པ་ཡིན་ནོ། །གཞན་ལ་ནི་ལྟུང་བ་མེད་དོ་ཞེས་བྱ་བ་ནི་ཟན་མནོས་པ་ལས་གཞན་པ་མ་མནོས་པ་ལ་ནི་ལྟུང་བ་མེད་པའོ། །འདིར་གཞུང་ནི་དེ་ཉིད་དུ་འདུག་སྟེ་ཇི་སྙེད་ཟོས་ཀྱང་ལྟུང་བ་མེད་དོ་ཞེས་སྔར་བསྟན་པ་དེ་ཉིད་ཡིན་ནོ། །མདོ་འདི་ནི་ཉེས་བྱས་སུ་དོགས་པ་བསལ་བའི་ཕྱིར་བྱས་སོ། །ལས་སུ་མ་བྱས་པ་ཡང་ངོ་ཞེས་བྱ་བ་ནི། འབྲས་ལ་སོགས་པ་རྔོ་བཏག་མ་བྱས་པ་མནོས་ཏེ་ཟ་བ་ལ་ཡང་ལྟུང་བ་མེད་པ་སྟེ། དེ་ལ་སྐབས་འདིའི་ཉེས་པ་མེད་པ་ལས་དགོངས་པ་ཡིན་གྱི། འབྲུ་ཙམ་པ་ལེན་པའི་ཉེས་བྱས་གཞན་ནི་ཡོད་དོ། །བླང་བར་བྱ་བ་གལ་ཏེ་མང་བ་ཉིད་ན་དགེ་སློང་དག་ལ་བགོ་བཤའ་བྱའོ་ཞེས་བྱ་བ་ལ། བླང་བར་བྱ་བ་ཞེས་བྱ་བ་ནི། བླང་བར་འོས་པ་སྟེ། འབྲས་ཐུག་པོ་ཆེའམ་མ་ག་དྷཱའི་བྲེའུ་ཆུང་ཕྱེད་དང་ལྔ་བཙོས་པ་དེའི་རྐྱེན་གྱི་ཚོད་མ་དང་བཅས་པའོ། །གལ་ཏེ་མང་བ་ཉིད་ན་ཞེས་བྱ་བ་ལ། མང་བའི་དངོས་པོ་ནི་མང་པ་ཉིད་དེ་བླང་བར་བྱ་བ་དེ་གལ་ཏེ་རང་བཟའ་བ་ལས་ལྷག་ཅིང་མང་བ་ཉིད་ཡིན་ནའོ། །དགེ་སློང་དག་ལ་བགོ་བཤའ་བྱའོ་ཞེས་བྱ་བ་ནི། དེ་ལྟར་མང་བ་དག་ཡིན་ན་དེའི་ཚེ་དགེ་སློང་དག་ལ་ཡང་བགོ་བཤའ་བྱ་བའོ། །དེ་ལྟ་བས་ན་མང་བ་ཉིད་ཅེས་སྨོས་པ་ནི་རང་བཟའ་བ་ལས་ལྷག་ན་གདོན་མི་ཟ་བར་བཟའ་བར་བྱའོ་ཞེས་བསྟན་པའི་
ཕྱིར་རོ། གལ་ཏེ་རང་བཟའ་བ་ལས་མི་ལྷག་ན་ནི་དེས་གདོན་མི་ཟ་བར་དགེ་སློང་དག་ལ་བགོ་བཤའ་བྱ་བ་མ་ཡིན་ནོ། །དེའི་ཕྱིར་སོ་སོར་ཐར་པའི་མདོ་ལས་ཀྱང་ལྷུང་བཟེད་གང་བ་གཉིས་སམ་གསུམ་བླངས་ནས་ཕྱི་རོལ་ཀུན་དགའ་ར་བར་འདོད་ལ་དགེ་སློང་འཁོད་པ་རྣམས་ལ་ཡང་བགོ་བཤའ་བྱ། བདག་ཀྱང་བཟའ་བར་བྱ་སྟེ་ཞེས་གསུངས་པ་ཡིན་ཏེ། གལ་ཏེ་བླང་བར་བྱ་བ་དེ་ལས་ལྷག་པར་ཡོད་ན་ཞེས་བྱ་བའི་ཚིག་གི་ལྷག་མ་ཡིན་ནོ། །ལྷུང་བཟེད་དོ་གསུམ་ཙམ་ལས་ལྷག་པར་ལེན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྤངས་ནས་ཟ་བའི་ལྟུང་བྱེད་སྨྲ་བར་འདོད་ནས། ཇི་ཙམ་གྱིས་ཆོག་པ་བཟའ་བར་བྱའོ་ཞེས་བྱ་བ་སྨྲས་ཏེ། ཇི་ཙམ་གྱིས་བཀྲེས་པའི་སྡུག་བསྔལ་དང་བྲལ་བར་གྱུར་པ་དེ་ཙམ་བཟའ་བར་བྱའོ། །ཟས་བརྩམས་པས་ལྡང་བར་མི་བྱའོ་ཞེས་བྱ་བ་ནི། དགེ་སློང་ཟས་བཟའ་བར་བརྩམས་པས་ཇི་སྲིད་དུ་ཆོག་པར་མ་ཟོས་པ་དེ་སྲིད་དུ་ལྡང་བར་མི་བྱ་སྟེ། སྟན་སྤང་བར་མི་བྱའོ་ཞེས་བྱ་བའི་ཐ་ཚིག་གོ །གཞན་དུ་བཟའ་བར་བྱ་བ་གང་ཡིན་པ་དེ་ནི་བྱིན་ལེན་བྱེད་པ་ཡིན་གྱི། ཟས་བརྩམས་པ་ཉིད་ནི་མ་ཡིན་ཏེ། བརྩམས་པ་ཞེས་སྨོས་པའི་ཕྱིར་དང་འོག་ནས་ཀྱང་གནས་བཏང་བ་ཞེས་འབྱུང་བའི་ཕྱིར་རོ། །དེ་ལྟ་བས་ན་བཟའ་བའི་ཕྱིར་ཞེས་བྱ་བ་ནི་མ་སྨོས་ཀྱང་གྲུབ་པས་ལོགས་ཤིག་ཏུ་བྱ་མི་དགོས་སོ། །ད་ནི་ཟས་བརྩམས་པའི་མཚན་ཉིད་བསྟན་པའི་ཕྱིར། ཐ་ན་ལན་ཚྭ་ཡན་ཆད་བཟའ་བར་བྱ་བ་གང་ཡང་རུང་བ་ཅུང་ཟད་ཅིག་བླངས་ན་རྣམ་པ་དེ་ཉིད་ཡིན་ནོ་ཞེས་བྱ་བ་སྨྲས་ཏེ། ཐ་ན་ལན་ཚྭ་ཡན་ཆད་ཅེས་བྱ་བ་ནི། ཆུང་དུ་ན་ལན་ཚྭ་ཡན་ཆད་ཙམ་ཡང་ཞེས་བྱ་བའི་ཐ་ཚིག་གོ །བཟའ་བར་བྱ་བ་གང་ཡང་རུང་བ་ཞེས་བྱ་བ་ནི། བཟའ་བ་དང་བཅའ་བའི་ཟས་གང་ཡང་རུང་བའོ། །ཅུང་ཟད་ཅིག་ཅེས་བྱ་བ་ནི་ཆུང་དུ་ཞིག་ཀྱང་ངོ༌། །བླངས་ན་ཞེས་བྱ་བ་ནི་བྱིན་ལེན་བྱས་ནའོ། །རྣམ་པ་དེ་ཉིད་ཡིན་ནོ་ཞེས་བྱ་བ་ནི། ཟས་བརྩམས་པ་དེ་ཉིད་ཡིན་ཏེ། ཟས་བརྩམས་པ་ནི་དེ་ཉིད་དུ་བཟའ་བའི་ཕྱིར་བྱིན་ལེན་བྱས་པའོ། །འོག་ནས་ཤེས་གཙོ་བོ་ཞེས་བྱ་བ་ནི་འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར་སྤངས་པ་ཉིད་དང་ལྷག་པོར་མ་བྱས་པ་ཉིད་ལའོ་ཞེས་འབྱུང་བ་དེ་ལ་སྤངས་པ་ཉིད་
ནི་གང་ཡིན། ལྷག་པོར་ནི་གང་ཡིན་པར་བརྗོད་པར་བྱ་ཞེ་ན། ཇེ་སྤངས་པ་ཉིད་བསྟན་པའི་ཕྱིར། སྤངས་པའི་ནི་གནས་བཏང་བའོ་ཞེས་བྱ་བ་སྨྲས་ཏེ། ཕྱོགས་གང་དུ་འདུག་པར་གྱུར་པ་དེ་བཏང་བ་ནི་སྤངས་པ་ཞེས་བྱའོ། །གང་གིས་བཏང་བ་ཞེ་ན། དེའི་ཕྱིར་འདུག་པའི་འོ་ཞེས་བྱ་བ་སྨྲས་ཏ། དགེ་སློང་གིའོ། །འདུག་པ་ཇི་ལྟ་བུ་ཞིག་གིས་ཤེ་ན་དེའི་ཕྱིར། རྩ་བ་ལ་སོགས་པ་བཅའ་བར་བྱ་བ་ལ་སོགས་པའི་ཟས་བརྩམས་པའིའོ་ཞེས་བྱ་བ་སྨྲས་ཏེ། གང་གིས་རྩ་བ་ལ་སོགས་པ་བཅའ་བར་བྱ་བ་ལ་སོགས་པའི་ཟས་བརྩམས་པ་ཞེས་བྱ་བའི་ཐ་ཚིག་གོ །རྩ་བ་ལ་སོགས་པ་ཞེས་བྱ་བ་ལ་སོགས་པ་སྔ་མའི་སྒྲས་ནི་སྡོང་བུ་དང་འདབ་མ་དང་མེ་ཏོག་དང་འབྲས་བུ་བཅའ་བར་གྱུར་པ་དག་བསྡུའོ། །བཅའ་བ་ལ་སོགས་པའི་ཞེས་བྱ་བ་ལ་སོགས་པ་འོག་མའི་སྒྲས་ནི་འབྲས་ཆན་དང༌། ཟན་དྲོན་དང༌། ཤ་དང་སྣུམ་ཁུར་དང་འདག་གུ་བཟའ་བར་བྱ་བ་དག་བསྡུའོ། །ཅི་ཅུང་ཟད་ཀྱང་མ་བྱས་པར་བཏང་ནའམ་ཞེ་ན་དེའི་ཕྱིར། རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་བཅའ་བར་བྱ་བ་དག་དང༌། ཐུག་པ་ལས་གཞན་པ་བཟའ་བར་བྱ་བར་རུང་བ་དང་མི་རུང་བ་དང༌། མ་འདྲེས་པའི་བྱིན་ལེན་སྟོབས་པ་འཐོབ་པའི་ཕྱོགས་ན་འགྲེང་བ་བྱས་ནས་སོ་ཞེས་བྱ་བ་སྨྲས་ཏེ། རྩ་བ་ལ་སོགས་པ་བཅའ་བར་བྱ་བ་དག་ལས་གཞན་པ་དང་ཐུགས་པ་ལས་ཀྱང་གཞན་པ་བཟའ་བར་བྱ་བ་རུང་བ། མི་རུང་བ་དང་མ་འདྲེས་པའི་བྱིན་ལེན་སྟོབས་པའི་འདྲི་མ་མཁན་དེ་སྤངས་ཏེ་གནས་བཏང་ན་སྤངས་པ་ཉིད་ཡིན་ནོ། །བྱིན་ལེན་སྟོབས་པའི་འདྲི་མ་མཁན་ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར། འཐོབ་པའི་ཕྱོགས་ན་འགྲེང་པ་ཞེས་བྱ་བ་སྨྲས་ཏེ། དགེ་སློང་གིས་བྱིན་ལེན་བྱ་བའི་ཕྱིར་ཟས་འཐོབ་པའི་ཕྱོགས་ན་འགྲེང་བ་དེའོ། །འདི་སྐད་བསྟན་ཏེ། བཟའ་བར་བྱ་བ་རྣམ་པ་དེ་ལྟ་བུ་འདྲིམ་པར་བྱེད་པའི་ཕྱག་ཚང་བྱིན་ལེན་སྟོབས་པ་དེ་སྤངས་བར་བྱས་ནས་ཟས་བརྩམས་པའི་འདུག་པའི་གནས་དེ་ནས་དགེ་སློང་གིས་གནས་བཏང་ན་སྤངས་པ་ཉིད་ཡིན་ནོ། །རྩ་བ་ལ་སོགས་པ་བཏང་བས་ནི་སྤངས་པར་མི་འགྱུར་ཏེ་ཤ་ཁ་ར་ལ་སོགས་པ་ཡང་དེ་ཉིད་ཀྱི་ཁོངས་སུ་འདུས་པ་ཡིན་ནོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་བཟའ་བ་ལྔ་པོ་དག་མ་གཏོགས་པ་དེ་ལས་གཞན་པའི་དངོས་པོ་
དག་སྤངས་པར་གྱུར་ནས། དེས་སླད་ཀྱི་བཟའ་བ་ལྔ་པོ་དག་འཚལ་ན་ལྟུང་བ་ཅིར་འགྱུར། ལྟུང་བ་མེད་དོ་ཞེས་གསུངས་པ་ཡིན་ནོ། །བཟའ་བར་བྱ་བ་ལྔ་ནི་འདག་གུ་དང་ཤ་དང་འབྲས་ཆན་དང་ཟན་དྲོན་དང་སྣུམ་ཁུར་དག་སྟེ། བཟའ་བར་བྱ་བ་དེ་དག་ལས་བྱིན་ལེན་སྤངས་ན་ཟས་ཐམས་ཅད་སྤངས་པར་འགྱུར་རོ། རྩ་བ་ལ་སོགས་པ་སྤངས་པས་ནི་བཟའ་བར་བྱ་བ་དག་སྤངས་པར་མི་འགྱུར་རོ། །གསོལ་ཅིག་ཅེས་བྱ་བ་ཡང་དེ་བཞིན་ནོ་ཞེས་བྱ་བ་ནི། གསོལ་ཅིག་ཅེས་སྨྲས་ན་དེས་ཀྱང་སྤངས་པ་ཡིན་པར་ཤེས་པར་བྱའི། སྔར་བསྟན་པ་འབའ་ཞིག་སྤངས་པར་མ་ཟད་དོ། །གསོལ་ཅིག་ཅེས་བྱ་བའི་སྒྲ་འདི་ནི་ཁ་ཅིག་ཏུ་གཞན་ཡུལ་ལ་བྱ་བའི་ཡུལ་གྱིས་འཇུག་པ་ཡང་ཡིན་པས། འདིས་ནི་གཞན་དག་ལ་བྱིན་ཅིག་ཅེས་བྱ་བར་སྟོན་ཏོ། །གལ་ཏེ་རང་ཉིད་མི་ལེན་ནའོ་ན་རང་གི་ཡུལ་ལ་བཀག་པའི་འབྲས་བུར་མི་འགྱུར་རམ་ཞེ་ན། འདྲི་མ་པ་གང་ཡིན་པ་དེ་ཉི་ཚེ་རང་གི་ཡུལ་ལས་ཕྱིར་བཀག་པར་ཟད་ཀྱི། ཟན་ཐམས་ཅད་བཀག་པ་ནི་མ་ཡིན་ནོ། །སོང་ཤིག་ཅེས་བྱ་བ་ཡང་ངོ་ཞེས་བྱ་བ་ནི། སྔར་བསྟན་པ་འབའ་ཞིག་གིས་སྤངས་པར་མ་ཟད་ཀྱི། ཕྱག་ཚད་འདྲི་མ་མཁན་ལ་མར་སོང་ཤིག་ཅེས་སྨྲས་པ་འདིས་ཀྱང་སྤངས་པ་ཡིན་ནོ། །འཚལ་ལགས་སོ་ཞེས་བྱ་བས་ཀྱང་ངོ་ཞེས་བྱ་བ་ལ། ཀྱང་ངོ་ཞེས་བྱ་བའི་སྒྲ་ནི་སྔར་ཡང་ངོ་ཞེས་བྱ་བའི་རྗེས་བསྙག་པའི་ཕྱིར་ཏེ། སྔར་བསྟན་པ་འབའ་ཞིག་གིས་སྤངས་པར་མ་ཟད་ཀྱི། ཟོས་ཟིན་ཏོ་ཞེས་བྱ་བ་འདི་སྨྲས་པས་ཀྱང་སྤངས་པ་ཡིན་ནོ། །རེ་ཞིག་ཅེས་བྱ་བའི་སྒྲ་ཉེ་བར་སྦྱར་ན་ནི་མ་ཡིན་ནོ་ཞེས་བྱ་བ་ནི། གལ་ཏེ་སྔར་སྨོས་པ་ཐམས་ཅད་ལ་རེ་ཞིག་ཅེས་བྱ་བའི་སྒྲ་ཉེ་བར་སྦྱོར་བར་བྱེད་དེ། རེ་ཞིག་གསོལ་ཅིག་ཅེ་འམ་རེ་ཞིག་སོང་ཅིག་ཅེ་འམ་རེ་ཞིག་འཚལ་ལགས་ཞེས་ཟེར་ན་ནི་དེའི་ཚེ་དེ་གསུམ་སྨྲས་པས་སྤངས་པར་མི་འགྱུར་རོ། །ཆོག་གོ་ཞེས་བྱ་བ་ཡང་ངོ་ཞེས་བྱ་བ་ནི། དེ་ལ་ཡང་རེ་ཞིག་ཅེས་བྱ་བའི་སྒྲ་ཉེ་བར་སྦྱར་ན་སྤངས་པ་མ་ཡིན་ན་གཞན་དག་ལ་ལྟ་སྨོས་ཀྱང་ཅི་དགོས། ཐུག་པའི་མཚན་ཉིད་སྨྲ་བར་འདོད་ནས། ཁ་གཟར་གྱེན་དུ་འགྲེང་དུ་མི་བཏུབ་པ་ཉིད་ཀྱི་ཐུག་པ་དག་གི་ཐུག་པ་ཉིད་དོ་ཞེས་བྱ་བ་སྨྲས་ཏེ། གང་དུ་ཁ་གཟར་བཙུགས་ན་ཁ་གཟར་གྱེན་དུ་འགྲེང་དུ་མི་བཏུབ་པ་ཉིད་ཀྱི་ཐུག་པ་ལ་སོགས་པ་དག་ནི་ཐུག་པ་ཉིད་ཡིན་ནོ། །འདི་
སྐད་བསྟན་ཏེ། གལ་ཏེ་ཐུག་པའི་ནང་དུ་ཁ་གཟར་བཙུགས་པ་དེ་གྱེན་དུ་འགྲེང་དུ་མི་བཏུབ་པ་ནི་ཐུག་པ་ཉིད་ཡིན་ནོ། །སོར་མོ་ལྔ་མི་མངོན་པ་ནི་སྐྱོ་མའོ་ཞེས་བྱ་བ་ནི། སྐྱོ་མ་གང་གི་སྟེང་དུ་སོར་མོ་ལྔ་བཞག་པའི་རྗེས་མི་མངོན་པ་སྟེ། དེ་ནི་སོར་མོ་མི་མངོན་པ་སྟེ། སོར་མོ་ལྔ་མི་མངོན་བདེ་ནི་སྐྱོ་མའི་ཐུག་པ་ཉིད་ཡིན་ནོ། །བྱིན་ལེན་སྟོབས་པ་ཞེས་སྨོས་པ་དེའི་རྣམ་པ་བསྟན་པའི་ཕྱིར། ཐོ་འཚམས་པ་ནི་བྱིན་ལེན་སྟོབས་པ་ཉིད་མ་ཡིན་ནོ་ཞེས་བྱ་བ་སྨྲས་ཏེ། ཐོ་འཚམས་པར་བྱེད་པ་ནི་བྱིན་ལེན་སྟོབས་པ་ཉིད་མ་ཡིན་ནོ། །འདི་སྐད་བསྟན་ཏེ། གལ་ཏེ་འགའ་ཞིག་ཐོ་འཚམས་པའི་བསམ་པས་དགེ་སློང་ལ་བྱིན་ལེན་སྟོབས་པར་བྱེད་ལ། དགེ་སློང་གིས་ཀྱང་དེ་ཤེས་ནས། འདི་སྐད་ཅེས་ཁོ་བོ་ལ་འདི་མི་དགོས་ཀྱིས་སོང་ཤིག་ཅེས་སྨྲས་ན། དེ་ལྟ་ན་ཡང་སྤངས་པ་བྱས་པར་མི་འགྱུར་ཏེ། དེ་ལ་བྱིན་ལེན་མེད་པའི་ཕྱིར་རོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་སྔར་ཐོ་འཚམས་པའི་རྟོག་པ་ཅན་གྱིས་བྱིན་ལེན་སྟོབས་པར་གྱུར་ལ། དེས་སླད་ཀྱིས་ཐ་མལ་པའི་གནས་སྐབས་སུ་གཞན་གྱིས་བྱིན་ལེན་སྟོབས་པ་དེ་ལ་འཚལ་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ་ཞེས་གསུངས་པ་ཡིན་ནོ། །ཐོ་འཚམས་པའི་རྟོག་པ་ཅན་ཞེས་བྱ་བ་ནི། འདི་ལ་ཐོ་འཚམས་མོ་སྙམ་པའི་རྟོག་པ་གང་ལ་ཡོད་པའོ། །སྤངས་པའི་མཚན་ཉིད་བསྟན་ཟིན་ཏོ།། །།བམ་པོ་ཉི་ཤུ་རྩ་བདུན་པ། སྤངས་པ་བསྟན་ནས། ད་ནི་ལྷག་པོར་བྱ་བ་བསྟན་པར་བྱ་སྟེ། མཚམས་ཀྱི་ཕྱི་རོལ་དང་མི་འཐོབ་པའི་ཕྱོགས་དང་མདུན་མ་ཡིན་པ་ན་འདུག་པ་ལས་ལྷག་པོར་བྱ་བ་མི་འབྱུང་ངོ་ཞེས་བྱ་བ་ནི། མཚམས་ཀྱི་ཕྱི་རོལ་ན་འདུག་པ་དང༌། མི་འཐོབ་པའི་ཕྱོགས་ན་འདུག་པ་དང༌། མདུན་མ་ཡིན་པ་ན་འདུག་པའི་གང་ཟག་རྣམ་པ་དེ་ལྟ་བུ་ལས་དགེ་སློང་གིས་ལྷག་པོར་བྱ་བ་མི་འབྱུང་ངོ༌། །ལྷག་བོར་ཞེས་བྱ་བ་ནི་ལྷག་མར་བྱས་ཤིང་བོར་བ་སྟེ། ལྷག་པོར་བྱེད་པའི་དགེ་སློང་གིས་ཟོས་པའི་ལྷག་མ་བོར་བ་ནི་ལྷག་པོར་ཞེས་བྱའོ། །ལྷག་པོར་བྱེད་པའི་དགེ་སློང་གིས་ལྷག་མར་མ་བྱས་ཤིང་མ་བོར་བ་ནི་ལྷག་པོར་མ་བྱས་པ་སྟེ། འདིར་གཞུང་ནི་རྣམ་པར་འབྱེད་པ་ལས། ལྷག་པོར་མ་བྱས་པར་ཞེས་བྱ་བ་ནི། ལྷག་མར་མ་བྱས་ཤིང་མ་བོར་ཡོངས་སུ་མ་བཏང་བར་རོ་ཞེས་གསུངས་པ་ཡིན་ནོ། །དེ་ལྟ་
བས་ན་སྔ་མ་ལས་བཟློག་པ་མཚམས་ཀྱི་ནང་དང་འཐོབ་པའི་ཕྱོགས་དང༌། མདུན་ན་འདུག་པ་ལས་དགེ་སློང་གིས་ལྷག་པོར་བྱ་བ་འབྱུང་སྟེ། དེ་ནི་རེ་ཞིག་ཕྱིར་བཏང་བའི་མཚན་ཉིད་ཡིན་ནོ། །བྱ་བ་ལག་ཏུ་མ་བླངས་པ་ལ་ཡང་མི་འབྱུང་ངོ་ཞེས་བྱ་བ་ལས་ནི། ལྷག་པོར་བྱ་བའི་དངོས་པོ་གང་ཡིན་པ་དེ་ལག་ཏུ་མ་བླངས་པ་ལ་ཡང་ལྷག་བོར་བྱ་བ་མི་འབྱུང་སྟེ། ཐུ་བར་བཞག་པ་ལ་ཡང་མི་འབྱུང་ལ་བྱུག་རིས་སུ་བཞག་པ་ལ་ཡང་མི་འབྱུང་ངོ༌། །འདིར་གཞུང་ནི་དགེ་སློང་དེས་ལག་པ་བསྙལ་ཏེ་བྱིན་ལེན་བྱས་ལ་ཞེས་གསུངས་པ་ཡིན་ནོ། །ནམ་མཁའ་ལ་ཡང་མི་འབྱུང་ངོ་ཞེས་བྱ་བ་དེ་ནི་མཚམས་ཀྱི་ཕྱི་རོལ་ཞེས་བྱ་བ་འདིའི་ཁོངས་སུ་གཏོགས་པ་ཉིད་ཡིན་ནོ། །རུད་བ་མ་ཡིན་པ་དང་འདྲེས་པ་ལ་ནི་མི་བྱ་བ་ཉིད་དོ་ཞེས་བྱ་བ་ནི། ཟས་རུང་བ་མ་ཡིན་པ་དང༌། འདྲེས་པ་ལ་ནི་ལྷག་པོར་གྱི་དངོས་པོ་མི་བྱ་བ་ཉིད་ཡིན་ནོ། །ལྷག་པོར་བྱ་བ་དེ་སུས་བྱ་བ་ཉིད་ཡིན་ཞེན། དེའི་ཕྱིར། གནས་མ་བཏང་བས་བྱ་བ་ཉིད་དོ་ཞེས་བྱ་བ་སྨས་ཏེ། དགེ་སློང་གིས་ཟན་ཟ་བའི་གནས་མ་བཏང་བ་དེ་ནི་གནས་མ་བཏང་བ་སྟེ། དེས་ལྷག་པོར་གྱི་དངོས་པོ་དེ་བྱ་བ་ཉིད་ཡིན་ནོ། །ཅི་ཆོག་པར་མ་བྱས་པའི་དགེ་སློང་འབའ་ཞིག་གིས་ལྷག་པོར་བྱ་བ་ཉིད་ཡིན་ནམ་ཞེ་ན་དེའི་ཕྱིར། མི་བཟའ་བར་བརྟག་པ་བྱས་པས་ཀྱང་ངོ་ཞེས་བྱ་བ་སྨྲས་ཏེ། མི་ཟ་བར་བརྟག་པ་བྱས་པ་ཞེས་བྱ་བ་ནི། གང་བདག་གིས་དེང་འདི་ལ་ཟས་གཞན་མི་བཟའོ་ཞེས་དེ་ལྟར་བརྟག་པ་བྱས་པ་སྟེ། དེས་ཀྱང་ལྷག་པོར་བྱ་བ་ཉིད་ཡིན་ནོ། །ཀྱང་ངོ་ཞེས་བྱ་བའི་སྒྲས་ནི་མི་བཟའ་བར་བརྟག་པ་མ་བྱས་པས་ལྟ་སྨོས་ཀྱང་ཅི་དགོས་ཞེས་བྱ་བར་སྟོན་ཏོ། །ཅི་མ་གསོལ་བས་ཀྱང་བྱའམ་ཞེ་ན། དེའི་ཕྱིར། གསོལ་བས་བྱ་བ་ཉིད་ཡིན་ནོ་ཞེས་བྱ་བ་སྨྲས་ཏེ། ཚེ་དང་ལྡན་པ་དགོངས་སུ་གསོལ། །བདག་དགེ་སློང་མིང་འདི་ཞེས་བགྱི་བ་འཚལ་མ་འཚལ་ལགས་ཤིང་སྤངས་ཏེ་ཡོངས་སུ་རྫོགས་ཤིང་མཐར་ཐུག་པར་བགྱིད་པ་ལས་བཅའ་བ་དང་བཟའ་བ་རྙེད་ཅིང་འཚལ་བར་འཚལ་ན། ལྷག་པོར་བགྱིས་ཏེ། བདག་ལ་སྩལ་དུ་གསོལ་ཞེས་གང་ལ་གསོལ་བ་བཏབ་པ་དེས། ལྷག་པོར་བྱ་བ་ཉིད་ཡིན་ནོ། །ལྷག་པོར་བྱེད་པས་ལྷག་པོར་བྱ་བ་ཇི་ལྟར་བྱ་ཞེ་ན། དེའི་ཕྱིར། ཁྱོད་ཀྱིར་གྱུར་གྱིས་བཞུད་ཅིག་ཅེས་བྱ་བའི་ཚིག་གིས་བྱའོ་ཞེས་བྱ་བ་སྨྲས་ཏེ། ཁྱོད་ཀྱིར་གྱུར་གྱིས་བཞུད་ཅིག་ཅེས་བྱ་བའི་ཚིག་བརྗོད་པར་བྱ་
བའོ། །ཁ་ཅིག་ནི་ཅི་བདེར་གསོལ་ཅིག་ཅེས་ཀྱང་ངོ་ཞེས་བྱ་བ་ནི། སློབ་དཔོན་ཁ་ཅིག་ན་རེ་ཅི་བདེར་གསོལ་ཅིག་ཅེས་བྱ་བའི་ཚིག་བརྗོད་པར་བྱའོ་ཞེས་ཀྱང་ཟེར་ཏེ། འདིར་དོན་གཙོ་ཆེ་བ་ཡིན་གྱིས། ཚིག་ནི་ངེས་པ་མེད་པས། དེས་ན་ལྷག་པོར་བྱ་བའི་ཚིག་ནི་མདོ་ལས་སྨོས་པ་འདི་གཉིས་སམ། དེ་དང་མཐུན་པ་གཞན་དག་གིས་ཀྱང་བྱར་རུང་ངོ༌། །ཇི་ཚིག་ཙམ་ཁོ་ནས་ལྷག་པོར་བྱ་བར་ཟད་དམ་ཞེ་ན། དེའི་ཕྱིར། ཁམ་གཉིས་སམ་གསུམ་ཟོས་ནས་སོ་ཞེས་བྱ་བ་སྨྲས་ཏེ། ཇེ་དང་པོར་ཁམ་གཉིས་སམ་གསུམ་ཟོས་ཏེ་ལྷག་མར་བྱས་ཤིང་དེའི་འོག་ཏུ་སྔར་བཤད་པའི་ཚིག་བརྗོད་པས་དོར་བར་བྱ་སྟེ། དེ་ཙམ་གྱིས་ན་ལྷག་མར་བྱས་པ་ཡང་ཡིན་ལ། བོར་བ་ཡང་ཡིན་པས་ལྷག་བོར་བྱས་པ་ཞེས་བྱའོ། །ཅི་གང་གིས་མི་བཟའ་བར་བརྟག་པ་བྱས་པས་ལྷག་པོར་བྱེད་ན་དེས་ཀྱང་ཁམ་གཉིས་སམ་གསུམ་ཟོས་ནས་བྱ་འམ་ཞེ་ན། དེའི་ཕྱིར་བྱ་བ་བཏང་བས་ནི་བཟའ་བར་མི་བྱའོ་ཞེས་བྱ་བ་སྨྲས་ཏེ། གང་གིས་ཟས་ཀྱི་བྱ་བ་སྤང་བ་དེ་ནི་བྱ་བ་བཏང་བ་སྟེ། དེས་ནི་བཟའ་བར་མི་བྱ་བར་ཁྱོད་ཀྱིར་གྱུར་གྱིས་བཞུད་ཅིག་ཅེས་བྱ་བ་ལ་སོགས་པའི་ཚིག་གང་ཡང་རུང་བས་ལྷག་པོར་བྱའོ། །ལྷག་པོར་བྱས་པ་གཞན་གྱིས་བཟའ་བར་བྱའོ་ཞེས་བྱ་བ་ནི། ལྷག་པོར་བྱས་པའི་ཟས་དགེ་སློང་གཅིག་གིས་མནོས་པ་དེ་དགེ་སློང་གཞན་དག་གིས་ཀྱང་བ་ཟར་རུང་ངོ༌། །འདིར་གཞུང་ནི་དགེ་སློང་གཅིག་ལ་རུང་བ་གང་ཡིན་པ་དེ་གཞན་ལ་ཡང་རུང་ངོ་ཞེས་གསུངས་པ་ཡིན་ནོ། །ཤེས་གཙོ་བོ་ཞེས་བྱ་བ་ནི། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། སྤངས་པ་ཉིད་དང་ལྷག་པོར་མ་བྱས་པ་ཉིད་དག་ལའོ་ཞེས་བྱ་བ་སྨྲས་ཏེ། བདག་ཉིད་ཀྱིས་སྤངས་པ་ཉིད་གང་ཡིན་པ་དང༌། བཟའ་བར་བྱ་བ་གཞན་གྱིས་ལྷག་པོར་མ་བྱས་པ་ཉིད་གང་ཡིན་པ་དེ་ལ་དགེ་སློང་གིས་ཀྱང་དེ་ལྟར་ཤེས་པར་གྱུར་ན་ཡུལ་དེ་ལ་དེའི་འདུ་ཤེས་དེ་གཙོ་ཆེར་བྱེད་པ་པོ་ཉིད་ཡིན་ཏེ། གལ་ཏེ་བདག་ཉིད་ཀྱིས་ཀྱང་སྤངས་པ་ཉིད་ཡིན་ལ་བཟའ་བར་བྱ་བ་དེ་ཡང་ལྷག་པོར་མ་བྱས་པ་ཉིད་ཡིན་པར་ཤེས་ན་ཞེས་བྱ་བའི་ཐ་ཚིག་གོ །ཇི་ཞིག་
རྗེས་སུ་བསྒྲུབ་ན་དེ་བྱེད་པ་པོ་ཉིད་ཡིན་ཞེ་ན། དེའི་ཕྱིར་ཟོས་ནའོ་ཞེས་བྱ་བ་སྨྲས་ཏེ། མགུལ་དུ་མིད་པར་གྱུར་ནའོ། །ཇི་ཞིག་ཟོས་ན་ཞེ་ན། དེའི་ཕྱིར་ཟས་ཙམ་མོ་ཞེས་བྱ་བ་སྨྲས་ཏེ། བཅའ་བར་བྱ་བ་ཙམ་ཡང་ཞེས་བྱ་བའི་ཐ་ཚིག་གོ །ཟས་ཙམ་མོ་ཞེས་བྱ་བ་སྨོས་པས་ཤ་ཁ་རལ་སོགས་པ་དག་ལ་ཐར་བར་མི་འགྱུར་ཏེ། སྤྱིར་བཏང་བ་དང་དམིགས་ཀྱིས་བསལ་བའི་ཚུལ་གྱིས་དུས་མ་ཡིན་པར་ཟ་བ་ལ་སོགས་པ་བཞིན་ནོ། །འདིར་སྟན་གཅིག་པའི་ཟས་དང་པོར་བཅས་པས་དེའི་ཕྱིར་དེ་དག་ཐམས་ཅད་ནི་དེའི་རྣམ་པར་ངེས་པ་ཡིན་པར་རིག་པར་བྱའོ། །སྟན་གཅིག་པའི་སྦྱངས་པའི་ཡོན་ཏན་ཡང་དག་པར་བླངས་པའི་དགེ་སློང་གིས་ནི་སྤངས་པ་ཉིད་ཡིན་ཡང་རུང་སྤངས་པ་ཉིད་མ་ཡིན་ཡང་རུང་སྟེ། ཟོས་ཟིན་ཕན་ཆད་ལྷག་པོར་བྱས་ཀྱང་རུང༌། ལྷག་པོར་མ་བྱས་ཀྱང་རུང་བའི་བཅའ་བར་བྱ་བ་དང༌། བཟའ་བར་བྱ་བ་དག་བཟའ་བར་མི་བྱ་སྟེ། ཟོས་ན་ཡི་དམ་རལ་བར་འགྱུར་རོ། །དམ་བཅས་པའི་སྐྱོན་དེ་ནི་དགེ་སློང་ཕལ་པ་དག་ལས་གཞན་བ་སྦྱངས་པའི་ཡོན་ཏན་ཅན་དག་གི་བྱེ་བྲག་ཡིན་པར་རིག་པར་བྱའོ། །སྟན་གཅིག་པའི་ཟས་ཀྱི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྤངས་པ་ལ་སྟོབས་པའི་ལྟུང་བྱེད་སྨྲས་བར་འདོད་ནས། སྟོབས་ནའོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་བོ་སྤངས་པ་ཉིད་དང༌། ལྷག་པོར་མ་བྱས་པ་ཉིད་དག་ལའོ་ཞེས་སྔར་བསྟན་པའི་ཡན་ལག་དེ་དག་ཁས་བླངས་ནས་འདི་སྐད་བརྗོད་པར་བྱ་སྟེ། ཟོས་ཤིང་སྤངས་པ་དེ་ལ་ཟས་ཙམ་སྟོབས་ན་ཁ་ན་མ་ཐོ་བ་འདིར་འགྱུར་རོ། །གང་ལ་སྟོབས་ན་ཞེ་ན། དེའི་ཕྱིར། དགེ་སློང་ལའོ་ཞེས་བྱ་བ་སྨྲས་ཏེ། རུང་བའི་དངོས་པོ་དགེ་སློང་ལ་སྟོབས་ནའོ། །རུང་བ་མ་ཡིན་པའི་དངོས་པོ་དགེ་སློང་ལ་སྟོབས་པ་ཐམས་ཅད་ལ་ནི་ཉེས་བྱས་སོ། །སྤངས་པ་ལ་སྟོབས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།འདུས་ཤིང་ཟ་བའི་ལྟུང་བྱེད་སྨྲ་བར་འདོད་ནས། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། སོ་སོར་ངེས་པའི་ཟས་ཀྱི་གནས་ཅན་དག་ལས་གཞན་པའི་དགེ་སློང་དགེ་འདུན་དུ་གྱུར་པ་
མཚམས་ཀྱི་ནང་ན་གནས་པ་དག་གིས་ཟན་ལྷན་ཅིག་མ་ཡིན་པ་ཉིད་ལའོ་ཞེས་བྱ་བ་སྨྲས་ཏེ། གནས་གང་ན་ཟས་ཐ་དད་པ་ཉིད་དུ་ངེས་པ་དེ་ནི་སོ་སོར་ངེས་པའི་ཟས་སོ། །དགེ་སློང་གང་དག་ལ་གནས་དེ་ཡོད་པ་དག་ནི་སོ་སོར་ངེས་པའི་ཟས་ཀྱི་གནས་ཅན་དག་གོ །དགེ་སློང་དེ་དག་ལས་གཞན་པའི་དགེ་སློང་གི་དགེ་འདུན་དུ་གྱུར་པ་བཞི་ཡན་ཆད་མཚམས་ཀྱི་ནང་ན་གནས་པ་དག་གི་ཟན་ལྷན་ཅིག་འདུས་ཤིང་ཟ་བ་ལྷན་ཅིག་མ་ཡིན་པ་ཉིད་ཀྱི་ཡུལ་དེ་ལ་དེ་ལྟར་ཤེས་པའི་འདུ་ཤེས་གང་ཡིན་པ་དེ་གཙོ་ཆེར་བྱེད་པ་པོ་ཉིད་ཡིན་ནོ། །ཚོགས་དང་དགེ་འདུན་ལོགས་ཤིག་ཏུ་འདུས་ཤིང་ཞེས་བྱ་བ་ལ་སོགས་པ་ཡང་དོན་འདི་ཉིད་ཡིན་པར་ཁོང་དུ་ཆུད་པར་བྱའོ། །ཅི་དགེ་སློང་གཅིག་པུ་ཞིག་གི་ཟན་ལྷན་ཅིག་མ་ཡིན་པ་ཉིད་ལ་ཡང་ལྟུང་བ་འདིར་འགྱུར་རམ་ཞེ་ན། དེའི་ཕྱིར། ལྷན་ཅིག་པའོ་ཞེས་བྱ་བ་སྨྲས་ཏེ། གཅིག་པུའི་མ་ཡིན་ནོ། །རྣམ་པ་གང་དང་ལྷན་ཅིག་པའི་ཞེ་ན། དེའི་ཕྱིར། ཅིག་ཅར་ཟ་བ་དང་པོ་ཞེས་བྱ་བ་སྨྲས་ཏེ། དུས་གཅིག་ཏུ་ཟ་བ་དང་ལྷན་ཅིག་པ་ཡིན་གྱི་རིམ་གྱིས་ཟ་བ་དང་ལྷན་ཅིག་པ་ནི་མ་ཡིན་ཏེ། མགོ་མཉམ་དུ་ཟ་བ་དང་ངོ་ཞེས་བྱ་བའི་ཐ་ཚིག་གོ །སུ་དང་ལྷན་ཅིག་པའི་ཞེ་ན། དེའི་ཕྱིར། གསུམ་ལ་སོགས་པ་དང་ངོ་ཞེས་བྱ་བ་སྨྲས་ཏེ། གསུམ་མམ་བཞི་ལ་སོགས་པའི་ཚོགས་དང་ངོ༌། །འདིར་གཞུང་ནི་བཞི་པོ་དག་ལས་གཅིག་ཞལ་ཏ་བྱེད་ཅིང་གསུམ་ཟ་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །གསུམ་ལ་སོགས་པ་དང་ངོ་ཞེས་སྨྲས་ན་ཇི་བསྙེན་པར་རྫོགས་པའམ་འོན་ཏེ་བསྙེན་པར་མ་རྫོགས་པའམ། གང་གིས་གསུམ་ལ་སོགས་པ་དང་ཞེ་ན། དེའི་ཕྱིར། དགེ་སློང་རྣམས་ཀྱིའོ་ཞེས་བྱ་བ་སྨྲས་ཏེ། དགེ་སློང་ཞེས་སྨོས་པས་བསྙེན་པར་རྫོགས་པ་རྣམས་ཀྱི་ཡིན་པར་ཤེས་པར་བྱའོ། འདིར་གཞུང་ནི་ལྟུང་བ་བསྟན་པ་ལས་གསུམ་བསྙེན་པར་རྫོགས་པ་ཡིན་ལ་གཅིག་བསྙེན་པར་མ་རྫོགས་པ་ཡིན་ན་ལྟུང་བ་མེད་དོ་ཞེས་གསུངས་པ་ཡིན་ནོ། །ཅི་དུས་ལ་ལྷན་ཅིག་བབ་པ་ཐམས་ཅད་ལ་ཡང་ཡིན་ནམ་ཞེ་ན། དེའི་ཕྱིར། དགེ་སློང་རྣམ་པ་ཇི་ལྟ་བུས་གོས་མེད་པའི་ཟས་གཉིས་པ་རྙེད་པ་བྱེད་པ་པོ་ཉིད་ཡིན་པ་བཞིན་ནོ་ཞེས་བྱ་བ་སྨྲས་ཏེ། ཇི་ལྟར་དགེ་སློང་དུས་ལ་མ་བབ་པས་གོས་
མེད་པའི་ཟས་གཉིས་པ་རྙེད་པ་ཡང་ཡང་ཟ་བའི་བྱེད་པ་པོ་ཉིད་ཡིན་པ་དེ་བཞིན་དུ་འདིར་ཡང་དགེ་སློང་མི་ན་བ་དང་ལས་མ་བྱས་པ་དང་ལམ་དུ་མ་ཞུགས་པ་དང༌། གྲུར་མ་ཞུགས་པ་དང༌། སྐམ་སའི་ལམ་དང་ཆུའི་ལམ་དུ་དཔག་ཚད་ཕྱེད་དུ་མ་སོང་བ་དག་གིས་འདུས་པ་ཡིན་པར་རིག་པར་བྱའོ། །དཔག་ཚད་ཕྱེད་ཅེས་གསུངས་པའི་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་དཔག་ཚད་ཕྱེད་འདས་པར་བགྱིས་ནས་འདུས་པ་དང་ལྷན་ཅིག་འཚལ་མ་འཚལ་ན་ལྟུང་བ་ཅིར་འགྱུར། ཉེ་བ་འཁོར་ལྟུང་བ་མེད་དོ་ཞེས་གསུངས་པ་ཡིན་ནོ། །ཅི་དབྲི་བཀོལ་མེད་པར་ཟན་ལྷན་ཅིག་མ་ཡིན་པ་ཉིད་ཐམས་ཅད་ལའམ་ཞེ་ན། དེའི་ཕྱིར། དུས་སྟོན་ཆེན་པོ་ལས་གཞན་པ་ལའོ་ཞེས་བྱ་བ་སྨྲས་ཏེ། འདིར་དུས་སྟོན་ཆེན་པོ་ཞེས་བྱ་བའི་གཞུང་ནི་ཟན་སྤགས་པ་ཞེས་གསུངས་པ་ཡིན་ནོ། །ཟན་སྤགས་པ་ཞེས་བྱ་བ་ནི། ཟན་སྤགས་ཤིང་སྐྱེད་མོས་ཚལ་ལ་སོགས་པ་དག་ཏུ་ཁྱེར་བ་ཚོམས་སོ་སོ་ཐ་དད་པར་ཟ་བ་སྟེ། དཔེར་ན་དོང་ཀའི་མེ་ཏོག་བརྔ་བ་ལ་སོགས་པའི་དུས་སྟོན་བཞིན་ཏེ། དེ་ལ་ནི་ལྟུང་བ་མེད་དོ། །དེ་ལས་གཞན་པ་ལ་ནི་ལྟུང་བར་འགྱུར་རོ། །ཟོས་ནའོ་ཞེས་འོག་ནས་འབྱུང་ན་ཅི་དུས་ལ་མ་བབ་པའི་དགེ་སློང་གིས་བཟའ་བར་བྱ་བ་གང་ཡང་རུང་བ་ཐམས་ཅད་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར་རྟགས་འདི་མེད་པའི་རབ་ཏུ་བྱུང་བའི་ཟས་ལས་གཞན་པའོ་ཞེས་བྱ་བ་སྨྲས་ཏེ། རབ་ཏུ་བྱུང་བ་གང་ལ་རྟགས་འདི་མེད་པ་དེ་ནི་རྟགས་འདི་མེད་པའི་རབ་ཏུ་བྱུང་བ་སྟེ། ཕྱི་རོལ་པའི་རབ་ཏུ་བྱུང་བའོ། །དེའི་ཟས་ལས་གཞན་བ་ཞེས་བྱ་བ་ནི། ཕྱི་རོལ་པའི་རབ་ཏུ་བྱུང་བའི་ཟས་མ་གཏོགས་པ་གཞན་དག་གི་ཟས་ཏེ། ཟས་དེ་དུས་ལ་མ་བབ་པའི་དགེ་སློང་གིས་ཟོས་ན་བྱེད་པ་པོ་ཉིད་ཡིན་ནོ། །འདི་སྐད་བསྟན་པའི་མདོ་དེ་གསུམ་གྱི་གཞུང་ནི་སོ་སོར་ཐར་པའི་མདོ་ལས་འདུས་ཤིང་ཟ་ན་དུས་མ་གཏོགས་ཏེ་ལྟུང་བྱེད་དོ། །དེ་ལ་དུས་ནི་འདི་ཡིན་ཏེ། ན་བ་དུས་སོ། །ལས་དུས་སོ། །ལམ་དུས་སོ། །གྲུར་ཞུགས་པ་དང༌། འདུས་པ་ཆེན་པོ་དང༌། དགེ་སློང་གི་ཟས་དུས་ཏེ་དེ་ལ་དེ་ནི་དུས་ཡིན་ནོ་ཞེས་གསུངས་པ་ཡིན་ནོ། །ཇི་ཞིག་རྗེས་སུ་བསྒྲུབ་ན་དེ་བྱེད་པ་པོ་ཉིད་ཡིན་ཞེ་ན། དེའི་ཕྱིར། ཟས་ཟོས་
ནའོ་ཞེས་བྱ་བ་སྨྲས་ཏེ། མགུལ་དུ་མིད་ནའོ། །དེར་འོང་བར་བྱ་བ་ཉིད་དུ་གནས་པ་མཚམས་ཀྱི་ནང་ན་འཁོད་པ་དག་གིས་འོང་བ་ཉིད་མ་དྲིས་པར་ཟ་ན་འདའ་བའི་ཕྱེད་ཡིན་ནོ་ཞེས་བྱ་བ་ལ། དེར་འོང་བར་བྱ་བ་ཉིད་དུ་གནས་པ་ཞེས་བྱ་བ་ནི། གཞིའི་འདུག་གནས་དང་ཁང་ཁྱིམ་ན་གནས་པ་གང་དག་མཚམས་ཀྱི་ནང་ན་བཀད་ས་འདུག་པ་དེར་འོང་བར་བྱ་བ་ཉིད་དུ་གནས་པའི་དགེ་སློང་དེ་དག་གོ །དིར་འོང་བར་བྱ་བ་ཉིད་དུ་གནས་པའི་དགེ་སློང་མཚམས་ཀྱི་ནང་ན་འཁོད་པ་དེ་དག་གིས་འོང་བ་ཉིད་མ་དྲིས་པར་ཟ་ན་འདའ་བའི་ཕྱེད་ཡིན་ཏེ་ཉེས་བྱས་སོ་ཞེས་བྱ་བའི་ཐ་ཚིག་གོ །དགེ་སློང་དེར་འོང་བར་བྱ་བ་ཉིད་དུ་གནས་པ་མ་ཡིན་པ་དག་གིས་འོང་བ་ཉིད་མ་དྲིས་པར་ཟན་ནི་ལྟུང་བྱེད་ཁོ་ན་སྟེ་མདོ་ལས་གནས་པ་ཞེས་སྨོས་པས་གནས་མ་ཡིན་པ་རྣམས་ཀྱི་དམིགས་ཀྱིས་བསལ་བ་དེ་མ་བྱས་པའི་ཕྱིར་རོ། །འདིར་གཞུང་ནི་གཞིའི་འདུག་གནས་ཀྱི་ཉེ་ན་ཀོར་ན་ཁང་ཁྱིམ་དག་ཡོད་ལ་གཞིའི་འདུག་གནས་སུ་དགེ་སློང་དག་ཟན་ཟ་ན་དེ་དག་གིས་ཁང་ཁྱིམ་གྱི་འདུག་གནས་ནས་དགེ་སློང་དག་འོངས་སམ་ཞེས་དྲི་བར་བྱའོ། །མ་དྲིས་པར་ཟ་ན་གཞིའི་འདུག་གནས་པ་དག་ལ་ནི་ཉེས་བྱས་སུ་འགྱུར་ལ། ཁང་ཁྱིམ་གྱི་འདུག་གནས་པ་དག་ལ་ནི་ལྟུང་བྱེད་དོ། །དགེ་སློང་དག་ཁང་ཁྱིམ་གྱི་འདུག་གནས་སུ་ཟན་ཟ་ན་དེ་དག་གིས་གཞིའི་འདུག་གནས་ནས་དགེ་སློང་དག་འོངས་སམ་ཞེས་དྲི་བར་བྱའོ། །མ་དྲིས་པར་ཟ་ན་ཁང་ཁྱིམ་གྱི་འདུག་གནས་པ་དག་ལ་ནི་ཉེས་བྱས་སུ་འགྱུར་ལ། གཞིའི་འདུག་གནས་པ་དག་ལ་ནི་ལྟུང་བྱེད་དོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། མཚམས་གཅིག་གི་ནང་ན་གཞིའི་འདུག་གནས་ལོགས་ཤིག་ན་ཡོད་ལ་གཞིའི་འདུག་གནས་དེའི་ཕྱི་རོལ་ན་ཁང་ཁྱིམ་དག་ཡོད་ཅིང་བཀད་ས་ལན་འགའ་ནི་གཞིའི་འདུག་གནས་སུ་བྱེད། ལན་འགའ་ནི་ཁང་ཁྱིམ་དག་ཏུ་བྱེད་ལ། དེ་ན་གལ་ཏེ་གཞིའི་འདུག་གནས་སུ་བཀད་ས་བྱེད་ན་ཁང་ཁྱིམ་ན་གནས་པའི་དགེ་སློང་དག་ཀྱང་ཟན་གྱི་ཕྱིར་དེར་འོང་བས། དེའི་ཚེ་གཞིའི་འདུག་ན་གནས་པའི་དགེ་སློང་དག་གིས་ཁང་ཁྱིམ་ན་གནས་པའི་དགེ་སློང་དག་འོངས་
སམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སོ། །ཁང་ཁྱིམ་ན་གནས་པའི་དགེ་སློང་དེར་མ་ལྷགས་པ་དག་གིས་ཀྱང་གཞིའི་འདུག་གནས་ན་གནས་པའི་དགེ་སློང་དག་འོངས་སམ་ཞེས་དྲི་བར་བྱའོ། མ་དྲིས་པར་ཟ་ན་ལྟུང་བྱེད་དུ་འགྱུར་རོ། །དེས་ན་གལ་ཏེ་ཁང་ཁྱིམ་དུ་བཀད་ས་བྱེད་ན་གཞིའི་འདུག་གནས་ན་གནས་པའི་དགེ་སློང་དག་ཀྱང་ཟན་གྱི་ཕྱིར་དེར་འོད་བས་དེའི་ཚེ་ཁང་ཁྱིམ་ན་གནས་པའི་དགེ་སློང་དག་གིས་གཞིའི་འདུག་གནས་ན་གནས་པའི་དགེ་སློང་དག་འོངས་སམ་ཞེས་དྲི་བར་བྱའོ། །མ་དྲིས་པར་ཟ་ན་ཉེས་བྱས་སོ། །གཞིའི་འདུག་གནས་ན་གནས་པའི་དགེ་སློང་དེར་མ་ལྷགས་པ་དག་གིས་ཀྱང་ཁང་ཁྱིམ་ན་གནས་པའི་དགེ་སློང་དག་འོངས་སམ་ཞེས་དྲི་བར་བྱའོ། །མ་དྲིས་པར་ཟ་ན་ལྟུང་བྱེད་དུ་འགྱུར་རོ། །འདིར་མི་འདྲི་བ་ནི་ཟན་ལྷན་ཅིག་མ་ཡིན་པ་ཉིད་ཀྱི་དཔེ་ཙམ་དུ་ཟད་ཀྱི། ལྟུང་བའི་རྒྱུ་ནི་ཟན་ལྷན་ཅིག་མ་ཡིན་པ་ཉིད་ཁོ་ན་ཡིན་ནོ། །དེ་ལྟ་བས་ན་ཟན་ལྷན་ཅིག་ཉིད་ཡིན་ན་ནི་མ་དྲིས་པར་ཟོས་ན་ཡང་ཉེས་པ་མེད་དོ། །དེ་ལྟར་ན་དགེ་སློང་ངེས་པ་རྣམས་ལ་ནི་ཉི་མ་གཅིག་གི་དོན་ལ་ཡང་དགེ་འདུན་གྱི་བཀད་ས་ན་སྨད་པ་ཉིད་དོ། །དགེ་སློང་མ་ངེས་པ་རྣམས་ལ་ནི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ད་ནི་དོན་གྱིས་བྱུང་བའི་གཞི་བརྗོད་པར་བྱ་སྟེ། གནས་ངེས་པ་གཅིག་ཡིན་ལ་དེ་ཉིད་ན་དགེ་སློང་གང་དག་སོ་སོ་ན་ཟན་ཟ་ཞིང་དེ་དག་གིས་ཀྱང་འདུས་ཤིང་ཟ་བར་མངོན་སུམ་དུ་ཤེས་སམ་དོགས་པ་དག་ཡོད་ན་དགེ་འདུན་གྱི་ཁོངས་སུ་གཏོགས་པའི་དགེ་སློང་དེ་དག་ཐམས་ཅད་ལ་ཉེས་བྱས་ཁོ་ནར་འགྱུར་ཏེ། འདུས་ཤིང་ཟ་བ་བཏང་སྙོམས་སུ་འཇོག་པའི་ཕྱིར་རོ། །གང་ཡང་རུང་བ་ཅུང་ཟད་ཅིག་བྲིམས་ན་ཡང་ཟན་གཅིག་པ་ཉིད་ཡིན་ནོ་ཞེས་བྱ་བ་ནི། བཟའ་བར་བྱ་བ་གང་ཡང་རུང་བ་ཆུང་ཟད་ཅིག་དགེ་འདུན་གྱིས་ཟན་ལོགས་ཤིག་ན་ཟ་བ་ལ་བྲིམས་ཀྱང་རུང༌། ཟན་ལོགས་ཤིག་ན་ཟ་བས་དགེ་འདུན་ལ་བྲིམས་ཀྱང་རུང་སྟེ། དེའི་ཚེ་ན་ཟན་གཅིག་པ་ཉིད་ཡིན་ཞིང་ཐ་དད་པ་ཉིད་མ་ཡིན་ཏེ། འདུས་ཤིང་ཟ་བའི་ལྟུང་བར་མི་འགྱུར་རོ་ཞེས་བྱ་བའི་ཐ་ཚིག་གོ །འགྲོ་བར་ཆས་པ་དང་གློ་བུར་དུ་འོངས་པ་དང་ནད་པ་
དང་ནད་གཡོག་དང་དགེ་སྐོས་ལས་གཞན་པ་ཐམས་ཅད་ཀྱིས་མ་ཟོས་པར་གཡོས་མལ་དང་སྤྱི་བུངས་ལས་མནོས་ཏེ་བཟའ་བར་མི་བྱའོ་ཞེས་བྱ་བ་ནི། འགྲོ་བར་ཆས་པ་ལ་སོགས་པའི་གང་ཟག་ལྔ་པོ་མ་གཏོགས་པ་དེ་ལས་གཞན་པའི་གང་ཟག་གིས་ཇི་སྲིད་དུ་དགེ་སློང་ཐམས་ཅད་ཀྱིས་ཟན་མ་ཟོས་ཀྱི་བར་དུ་གཡོས་མལ་དང་སྤྱི་བུངས་ལས་རང་གི་སྐལ་བ་མནོས་ཏེ་བཟའ་མི་བྱའོ། །གཞན་བས་ཞེས་བྱ་བ་ནི། འགྲོ་བར་ཆས་པ་ལ་སོགས་པའི་གང་ཟག་ལྔ་པོ་མ་གཏོགས་པ་དེ་ལས་གཞན་པའི་གང་ཟག་གིས་སོ། །ཐམས་ཅད་ཀྱིས་མ་ཟོས་པར་ཞེས་བྱ་བ་ནི། ཇི་སྲིད་དུ་དེར་གཏོགས་པའི་དགེ་སློང་ཐམས་ཅད་ཀྱིས་ཟན་མ་ཟོས་ཀྱི་བར་དུའོ། །གཡོས་མལ་ཞེས་བྱ་བ་ནི་ཟན་སྦྱོར་བའི་གནས་ཏེ་ཚང་མང་ལ་སོགས་པའོ། །སྤྱི་བུངས་ཞེས་བྱ་བ་ནི། དགེ་འདུན་གྱི་དབུས་ཀྱི་ཕྱོགས་གང་དུ་འབྲས་ཆན་ལ་སོགས་པའོ། །དེ་ལྟར་ཡང་འདིར་གཞུང་ནི་སྨན་གྱི་གཞི་ལས། མཽད་གལ་གྱི་བུ་ལྔ་པོ་འདི་དག་ནི་བརྟད་པ་ལས་བྱུང་བའི་བསོད་སྙོམས་ཡིན་ཏེ། ལྔ་གང་ཞེ་ན། གློ་བུར་དུ་འོངས་པ་དང༌། འགྲོ་བར་ཆས་པ་དང༌། ནད་པ་དང༌། ནད་གཡོགས་དང༌། དགེ་སྐོས་ཀྱི་ཟན་དག་གོ་ཞེས་གསུངས་པ་ཡིན་ནོ། །ཕྲན་ཚོགས་དག་ལས་ཀྱང་བཅོམ་ལྡན་འདས་ཀྱིས་དགེ་སློང་བྲེལ་བ་དག་གིས་ཁྱིམ་གཞན་དུ་བཟའ་བར་མི་བྱའོ་ཞེས་གསུངས་སོ། །དགེ་སློང་ཁ་ཅིག་ན་བར་གྱུར་ནས་དེ་དག་གི་ནད་གཡོག་དག་ཟན་ལ་དོང་བ་འཕྱི་བ་ཞིག་ན་འོངས་པས། དེ་དག་གི་བྱ་བ་དག་ཡོངས་སུ་ཉམས་པར་གྱུར་པའི་སྐབས་དེ་དག་དགེ་སློང་དག་གིས་བཅོམ་ལྡན་འདས་ལ་གསོལ་བ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟ་བས་ན་གང་ཟག་ལྔས་བསོད་སྙོམས་མནོས་ཏེ་བཟའ་བར་རྗེས་སུ་གནང་ངོ༌། །ལྔ་གང་ཞེ་ན། གློ་བུར་དུ་འོངས་པ་དང༌། འགྲོ་བར་ཆས་པ་དང༌། ནད་པ་དང༌། ནད་གཡོག་དང༌། ལས་སུ་བསྐོས་པ་དག་གོ་ཞེས་གསུངས་པ་ཡིན་ནོ། །དེ་ལྟ་བས་ན་གང་ཟག་མགྲོན་དུ་བོས་པས་ཀྱང་རུང༌། མགྲོན་དུ་མ་བོས་པས་ཀྱང་རུང་སྟེ། དགེ་སློང་གྲལ་དུ་
ཚོགས་པ་ཐམས་ཅད་ཀྱིས་ཟན་བཟའ་བ་མ་བརྩམས་ཀྱི་བར་དུ་རང་གི་སྐལ་བ་གཡོས་མལ་ལམ་སྤྱི་བུངས་ལས་མནོས་ཏེ་བཟའ་བར་མི་བྱའོ། །དགེ་སློང་གཉིས་སམ་གསུམ་ཞིག་མགྲོན་དུ་བོས་ན་དེར་ཡང་གཡོས་མལ་དང་སྤྱི་བུངས་ནས་མནོས་ཏེ་བཟའ་བར་མི་བྱའོ།། གཙུག་ལག་ཁང་ན་དགེ་སློང་གཅིག་པུ་ཞིག་གནས་ན་ཡང་ངེས་ཀྱང་བཀད་ས་ལས་གཞན་དུ་ཟན་བཟའ་བར་མི་བྱ་སྟེ། ཟོས་ན་འགལ་ཚབས་ཅན་དུ་འགྱུར་རོ། །དགེ་སློང་གཅིག་པུ་ཞིག་མགྲོན་དུ་བོས་པར་གྱུར་ན་དེས་ཀྱང་སྦྱིན་བདག་གིས་བསྐོས་པ་མ་གཏོགས་པར་གཡོས་མལ་ལམ་སྤྱི་བུངས་ལས་མནོས་ཏེ་བཟའ་བར་མི་བྱའོ། །ཚངས་པ་མཚུངས་པར་སྤྱོད་པ་དགེ་སློང་ངམ། དགེ་སློང་མ་ཐམས་ཅད་ཀྱིས་མ་ཟོས་ཀྱི་བར་དུ་གང་ཟག་གི་ཟན་མནོད་པར་མི་བྱའོ། །མགྲོན་དུ་བོས་པར་འགྲོ་མི་ནུས་པའི་རྐྱེན་བྱུང་ན་ཡོན་བདག་གིས་སྤགས་པ་མ་གཏོགས་པར་ཚུས་ཟན་མནོད་པར་མི་བྱའོ། །འདི་ལྟར་དགེ་སློང་དང་དགེ་སློང་མ་ནི་ལྷན་ཅིག་བཀད་ས་གཅིག་ཏུ་ཟན་བཟར་ཡང་རུང་ངོ༌། །དེ་ནི་བཅོམ་ལྡན་འདས་ཀྱིས་ཀྱང་རྗེས་སུ་གནང་སྟེ། དགེ་སློང་འགའ་འོང་ཡང་སྲིད་པ་དེའི་ཆེད་དུ་གྲལ་གྱི་དང་པོར་སྟན་ཅིག་བཞག་སྟེ། དགེ་སློང་མ་རྣམས་བཀད་པར་བྱའོ་ཞེས་གསུངས་པ་ཡིན་ནོ། །འདུས་ཤིང་ཟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དུས་མ་ཡིན་པར་ཟ་བའི་ལྟུང་བྱེད་སྨྲ་བར་འདོད་ནས། རང་གི་ཕྱེད་ཡེལ་ནས་སྐྱ་རེངས་འཆར་བའི་བར་ནི་དུས་མ་ཡིན་ནོ་ཞེས་བྱ་བ་སྨྲ་སྟེ། འཛམ་བུའི་གླིང་ལ་སོགས་པ་གནས་གང་ན་དགེ་སློང་གནས་པ་དེ་ལས་དགོངས་ནས། འདིར་རང་གི་ཞེས་བྱ་བ་སྨོས་པར་རིག་པར་བྱའོ། །དེ་བས་ན་རང་གི་ཕྱེད་ཡོལ་ཕན་ཆད་ནས་ཕྱི་དེ་ཉིན་པར་གྱི་སྐྱ་རེངས་འཆར་བའི་བར་ནི་དུས་མ་ཡིན་ཏེ། གུང་ཚིགས་ཀྱི་སྐད་ཅིག་ཕན་ཆད་སྐྱ་རེངས་ཤར་བའི་མདུན་རོལ་གྱི་བར་དེ་ནི་དུས་མ་ཡིན་པར་རིག་པར་བྱའོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་དུས་མ་ལགས་པར་བཅའ་བར་བགྱི་བ་དང༌། བཟའ་བར་བགྱི་བ་འཚལ་
ལ་ལྟུང་བར་ཡང་མི་འགྱུར་བ་མཆིས་སམ། ཡོད་དེ་འཛམ་བུ་གླིང་པའི་དུས་ཀྱིས་གླིང་གསུམ་པོ་དག་ཏུ་ཟོས་ན་ལྟུང་བར་མི་འགྱུར་བའོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །དེ་ཉིད་ལ་ཤེས་གཙོ་བོ་ཞེས་བྱ་བ་ནི། དུས་མ་ཡིན་པ་དེ་ཉིད་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཇི་ཞིག་ཀུན་ཏུ་སྤྱད་ན་ཞེ་ན། དེའི་ཕྱིར། བཅའ་བར་བྱ་བ་དང་བཟའ་བར་བྱ་བ་ཟོས་ནའོ་ཞེས་བྱ་བ་སྨྲས་ཏེ། དུས་མ་ཡིན་པར་བཅའ་བར་བྱ་བ་འམ་བཟའ་བར་བྱ་བ་ཟོས་ན་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །དུས་མ་ཡིན་པར་ཟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སོག་འཇོག་གི་ལྟུང་བྱེད་སྨྲ་བར་འདོད་ནས། ཇེ་དང་པོར་སོག་འཇོག་གི་མཚན་ཉིད་བསྟན་པར་བྱ་སྟེ། དེའི་ཕྱིར་སྔ་དྲོ་བའི་ཟས་བྱིན་ལེན་བྱས་པ་ཕྱི་དྲོ་བའི་ཟས་སུ་དང་དེ་ཐུན་ཚོད་ལས་འདས་པ་ལྟ་བུ་ནི་སོག་འཇོག་བྱས་པ་ཡིན་ནོ་ཞེས་བྱ་བ་སྨྲས་ཏེ། སྔ་དྲོ་བའི་ཟས་བཅའ་བར་བྱ་བ་དང༌། བཟའ་བར་བྱ་བའི་ཟས་ཀྱི་དུས་ནི་སྐྱ་རེངས་ཤར་ནས་བརྩམས་ནས་གུང་ཚིགས་ཀྱི་སྐད་ཅིག་མའི་བར་ཏེ། དུས་དེར་སྔ་དྲོ་བའི་ཟས་བྱིན་ལེན་བྱས་པ་བྱིན་ལེན་དེ་ཉིད་མ་ཞིག་པར་ཕྱི་དྲོ་བའི་ཟས་ཀྱི་དུས་སུ་གུད་ཚིགས་ལས་ཡོལ་བར་ཐལ་བ་ནི་སོག་འཇོག་བྱས་པ་ཡིན་ཏེ། བྱིན་ལེན་དེ་ཞིག་ན་ནི་སོག་འཇོག་བྱས་པར་མི་འགྱུར་རོ། །དེ་ཞེས་བྱ་བ་ནི། ཕྱི་དྲོ་བའི་ཟས་ཏེ་ཐུན་ཚོད་དུ་རུང་བའི་ཟས་སོ། །དེ་ཡང་བྱིན་ལེན་བྱས་ནས་བྱིན་ལེན་དེ་ཉིད་མ་ཞིག་པར་ཐུན་ཚོད་ལས་འདས་པའི་དུས་སུ་ཐལ་ན་སོག་འཇོག་བྱས་པ་ཡིན་ཏེ། དེ་ཡང་བྱིན་ལེན་དེ་ཞིག་ན་ནི་སོག་འཇོག་བྱས་པར་མི་འགྱུར་རོ། གཙུག་ལག་ལས་ཐུན་ཚོད་ཅེས་གསུངས་པ་ཉིད་ཐུན་ཚོད་འདི་ཡིན་པར་རིག་པར་བྱའོ། །དེ་ཉིད་ལས་ཤེས་གཙོ་བོ་ཞེས་བྱ་བ་ནི། བཅའ་བར་བྱ་བ་དང་བཟའ་བར་བྱ་བ་ཟ་ན་ཞེས་བྱ་བར་སྦྱར་ཏེ། དེ་ཉིད་ལ་ཞེས་བྱ་བ་ནི། སོག་འཇོག་བྱས་པ་དེ་ཉིད་ལའོ། །ཤེས་གཙོ་བོ་ཞེས་བྱ་བ་ནི། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་
བྱ་བའི་མིང་ཅན་དུ་སྦྱོར་བར་བྱེད་དོ། །བཅའ་བར་བྱ་བ་དང་བཟའ་བར་བྱ་བ་ཡང་སོག་འཇོག་བྱས་པ་ཡིན་ལ། དགེ་སློང་གིས་ཀྱང་དེ་ལྟར་ཤེས་ན་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཏེ། དེ་ཟོས་ན་ལྟུང་བྱེད་དུ་འགྱུར་རོ། །ལ་གཉར་བླངས་པ་མིད་པར་མི་བྱའོ་ཞེས་བྱ་བ་ལ། ལག་ཉར་བླངས་པ་ཞེས་བྱ་བ་ནི། བྱིན་ལེན་མ་བྱས་པར་དགེ་སློང་རང་གིས་བླངས་པའི་ཟས་ཏེ། དེ་མིད་པར་མི་བྱའོ་ཞེས་བྱ་བ་ནི། བཟའ་བར་མི་བྱའོ་ཞེས་བྱ་བའི་ཐ་ཚིག་གོ །མཚམས་ཀྱི་ནང་དུ་བཙོས་པ་དང་ཞག་ལོན་པར་ཡང་མི་བྱའོ་ཞེས་བྱ་བ་ནི། མཚམས་ཀྱི་ནང་དུ་བཙོས་པ་དང༌། མཚམས་ཀྱི་ནང་དུ་ཞག་ལོན་པའི་ཟས་ཀྱང་མིད་པར་མི་བྱའོ། །མཚམས་ཀྱི་ནང་དུ་ཞེས་བྱ་བ་ནི་མཚམས་ཀྱི་ནང་རོལ་ཞེས་བྱ་བའི་ཐ་ཚིག་གོ །བཙོས་པ་ཞེས་བྱ་བ་ནི་བསྲེགས་པ་དང་བཙོས་པ་ལ་སོགས་པའི་གཡོས་སུ་བྱས་པའོ། །ཞག་ལོན་པ་ཞེས་བྱ་བ་ནི། ཉིན་ཞག་ཕྱི་མའི་སྐད་ཅིག་མར་གཞག་པ་ཞེས་བྱ་བའི་ཐ་ཚིག་གོ །འདིར་གཞུང་ནི་ནང་དུ་བཙོས་པ་གང་ཞེ་ན། །ཀུན་དགའ་ར་བའི་ནང་དུ་བློ་མཐུན་པར་མ་བྱས་ཤིང་རུང་བ་མ་ཡིན་པའི་ས་གཞིར་བཙོས་པ་གང་ཡིན་པའོ། །ནང་དུ་ཞག་ལོན་པ་གང་ཞེ་ན། ཀུན་དགའ་ར་བའི་ནང་དུ་བློ་མཐུན་པར་མ་བྱས་ཤིང་རུང་བ་མ་ཡིན་པའི་ས་གཞིར་ཞག་ལོན་པ་གང་ཡིན་བའོ་ཞེས་གསུངས་པ་ཡིན་ཏེ། དགེ་སློང་བསྙེན་པར་རྫོགས་པས་བཟའ་བར་མི་བྱའོ། །འདིར་ཀུན་དགའ་ར་བ་ཞེས་བྱ་བའི་སྒྲས་ནི་གནས་ཀྱི་གཞི་བརྗོད་དེ། བཙོས་མ་མ་ཡིན་བའི་མཚམས་དང་བཅས་པ་བཟུང་གི །གསོལ་བ་ལ་སོགས་པའི་ལས་ཀྱིས་བཅད་པའི་མཚམས་ཉི་ཚེ་བཟུང་བར་བྱ་བ་ནི་མ་ཡིན་ནོ། །དགེ་སློང་གིས་བཙོས་པ་ཡང་ངོ་ཞེས་བྱ་བ་ཡང༌། ཡང་ངོ་ཞེས་བྱ་བའི་སྒྲས་མིད་པར་མི་བྱའོ་ཞེས་བྱ་བར་སྦྱར་ཏེ། དགེ་སློང་གིས་བཙོས་པ་ནི་མཚམས་ཀྱི་ནང་དུ་ཡང་རུང༌། མཚམས་ཀྱི་ཕྱི་རོལ་དུ་ཡང་རུང་སྟེ། དགེ་སློང་བསྙེན་པར་རྫོགས་པས་བཟའ་བར་མི་བྱའོ། །དགེ་སློང་གིས་བཙོས་པ་དེ་ཡང་དགེ་སློང་ཁོ་ནས་བཟའ་བར་བྱ་བ་མ་ཡིན་གྱི། དགེ་སློང་མ་རྣམས་ཀྱིས་
བཟའ་བར་མི་བྱ་བ་ནི་མ་ཡིན་ནོ། །དགེ་སློང་མས་བཙོས་པ་ཡང་དགེ་སློང་མ་ཁོ་ནས་བཟའ་བར་བྱ་བ་མ་ཡིན་གྱི། དགེ་སློང་རྣམས་ཀྱིས་བཟའ་བར་མི་བྱ་བ་ནི་མ་ཡིན་ནོ། །སྦྱིན་བདག་གིས་རུང་བ་མ་ཡིན་པའི་གཞིར་བཙོས་པའམ་ཞག་ཏུ་བཞག་པ་འབུལ་བར་བྱེད་པ་དེ་ལ་ནི་ཉེས་པ་མེད་དོ། །སྦྱིན་བདག་གིས་མར་དང་འབྲས་ལ་སོགས་པ་ཕུལ་ལ་རང་འོངས་ནས་བྲིམ་མོ་ཞེས་ཟེར་བ་དེ་ལ་ནི་ཉེས་པ་ཁོ་ནར་འགྱུར་ཏེ། དང་པོ་ཁོ་ནར་བདག་གིར་བྱས་པར་གྱུར་པའི་ཕྱིར་རོ། །དགེ་སློང་གིས་གྲོང་དག་ཏུ་དགེ་སློང་གི་དོན་དུ་དགོས་པའི་མཛོད་དང་བང་བ་ལ་སོགས་པ་གང་དག་བྱེད་ཅིང་དེ་དག་གི་ནང་དུ་དགེ་སློང་གིས་ཉིན་མཚན་དུ་གནས་པས་གནས་པར་བྱེད་ན་དེ་ནི་དགེ་སློང་གི་གནས་ཉིད་ཡིན་པར་རིག་པར་བྱའོ། །དེར་གནས་པ་བཏང་ན་ནི་དགེ་སློང་གི་གནས་ཀྱི་གཞི་ཉིད་དང་ཡང་བྲལ་བ་ཉིད་ཡིན་ནོ། །བདག་པོ་དག་གིས་གནས་འདིར་དགེ་སློང་སུ་ཡང་གནས་པར་མི་བྱའོ། །ཞེས་གཙུག་ལག་ཁང་གི་ཕྱོགས་ཀྱི་གནས་འགའ་ཞིག་ཏུ་དགེ་སློང་མི་འཇུག་པར་ངེས་པར་བྱས་པ་དེ་ནི་དགེ་སློང་གི་གནས་ཉིད་དང་བྲལ་བ་ཁོ་ན་ཡིན་ནོ། །དེ་བཞིན་དུ་གཙུག་ལག་ཁང་སྟོང་པར་དགེ་སློང་ཞིག་ངལ་བསོ་བའི་ཕྱིར་ཞག་འགའ་ཙམ་གནས་འཆའ་བར་བྱེད་ན་ཡང་དེ་དགེ་སློང་གི་གནས་ཉིད་དུ་གྱུར་པ་ཡིན་ལ། དགེ་སློང་དེ་ནས་སོང་ན་ནི་དགེ་སློང་གི་གནས་ཉིད་དང་བྲལ་བ་ཡིན་ནོ། །ལག་ཉར་བླངས་པ་མིད་བར་མི་བྱའོ་ཞེས་བྱ་བ་ལ་སོགས་པ་མདོ་གསུམ་པོ་དེ་དག་ནི་སོགས་འཇོག་བྱེད་པའི་ཚལ་བརྟེན་པ་ཡིན་པས་ན། དེའི་ཕྱིར་འདིར་བསྡུས་སོ། །འདིར་རྗེན་པ་བཙོས་པ་གང་ཡིན་པ་ནི་དེའོ་ཞེས་བྱ་བ་ལ། འདིར་ཞེས་བྱ་བ་ནི། མཚམས་ཀྱི་ནང་དུ་བཙོས་པ་དང་དགེ་སློང་གིས་བཙོས་པའི་སྐབས་འདིར་རོ། །དེར་ནི་རྗེན་པར་བཙོས་པ་གང་ཡིན་པ་ནི་མཚམས་ཀྱི་ནང་དུ་བཙོས་པ་དང༌། དགེ་སློང་གིས་བཙོས་པ་དེ་ཡིན་པར་རིག་པར་བྱའོ། །བཙོས་པ་ནི་བྱིན་ལེན་བྱས་ན་ཡང་བཙོ་བར་བྱ་བ་ཉིད་ཡིན་ནོ་ཞེས་གསུངས་པའི་ཕྱིར་རོ། །མི་སྙི་བ་རྣམས་ཀྱི་ནི་སུམ་ཆ་བངས་པ་ཉིད་ཀྱི་མདུན་
རོལ་དུ་ནི་དེ་ཉིད་ཡིན་ནོ་ཞེས་བྱ་བ་ལ། མི་སྙི་བ་རྣམས་ཀྱི་ཞེས་བྱ་བ་ནི། ཏིལ་དང༌། འབྲས་དང༌། ཤ་ལ་སོགས་པ་སྐམ་པོ་རྣམས་ཀྱིའོ། །དེ་དག་གི་རྗེན་པ་ཉིད་ནི་སུམ་ཆ་བངས་པ་ཉིད་ཀྱི་མདུན་རོལ་དུ་དེ་ཉིད་ཡིན་ནོ། རྗེན་པ་ཉིད་ཡིན་ནོ། །འདི་སྐད་བསྟན་ཏེ། ཏིལ་དང། འབྲས་དང༌། ཤ་སྐམ་ལ་སོགས་པ་སྲབ་རྣམས་ཀྱི་རྗེན་པ་ཉིད་ཅེས་བྱ་བ་ནི། བཤུར་བ་ལ་སོགས་པས་སུམ་ཆ་བངས་པ་ཉིད་ནི་མདུན་རོལ་དུ་ཡིན་ཏེ། སུམ་ཆ་བངས་པ་ཉིད་ཕྱིན་ཆད་ནི་རྗེན་པ་ཉིད་མ་ཡིན་ནོ། །རྫས་སྙི་བ་ནི་ཕྱེ་མར་བྱས་པ་ཉིད་ཡིན་ན་ཡང་སྙི་བ་ཉིད་དང་བྲལ་བ་ཉིད་ནི་མ་ཡིན་ནོ། །རྫས་སྲ་བ་ཡང་ཕྱེ་མར་བྱས་བ་ཉིད་ན་སྲ་བ་ཉིད་དང་བྲལ་བ་ཉིད་མ་ཡིན་ཏེ། དཔེར་ན་གྲོ་ལ་སོགས་པ་ཧ་ཅང་ཞིབ་མོར་མ་བཏགས་པ་དག་ལྟ་བུའོ། །སྙི་བ་རྣམས་ཀྱི་ནི་ཁ་དོག་ཏུ་གྱུར་པའི་འོ་ཞེས་བྱ་བ་ནི། རྫས་སྙི་བ་རྣམས་ཀྱི་རྗེན་པ་ཉིད་ནི་ཁ་དོག་ཏུ་གྱུར་པའི་མདུན་རོལ་དུ་དེ་ཉིད་ཡིན་ཏེ། རྗེན་པ་ཉིད་ཡིན་ནོ། །ཁུ་བ་རྣམས་ཀྱི་ནི་ལན་གཉིས་ཁོལ་བར་གྱུར་པ་ཉིད་ཀྱིའོ་ཞེས་བྱ་བ་ནི། འོ་མ་ལ་སོགས་པའི་རྫས་ཁུ་བ་རྣམས་ཀྱི་རྗེན་པ་ཉིད་ནི་ལན་གཉིས་ཁོལ་བར་གྱུར་པ་ཉིད་ཀྱི་མདུན་རོལ་ཉིད་དུ་དེ་ཉིད་ཡིན་ཏེ། རྗེན་པ་ཉིད་ཡིན་ནོ། །གོང་མ་ཐམས་ཅད་ལ་ཡང་མཚམས་དེ་དག་ཕྱིན་ཆད་ནི་ཚོས་པ་ཉིད་ཡིན་པར་རིག་པར་བྱའོ། །མེས་རུང་བར་བྱས་པ་ནི་མ་བཙོས་པ་ཉིད་མ་ཡིན་ནོ་ཞེས་བྱ་བ་ནི། དགུན་ལ་སོགས་པ་མེས་རུང་བར་བྱས་པ་ནི་མ་བཙོས་པ་མ་ཡིན་ཏེ། བཙོས་པ་ཁོ་ན་ཡིན་ནོ། །དེ་ལྟ་བས་ན་མཚམས་ཀྱི་ནང་དུ་མེས་རུང་བར་མི་བྱའོ། །འདུག་པའི་འགྲུབ་པ་ཉིད་སྐྱེ་བ་ལ་རག་ལས་པ་ནི་མ་ལོན་པ་ཉིད་མ་ཡིན་ནོ་ཞེས་བྱ་བ་ནི། འདུག་པ་གང་གི་འགྲུབ་པ་ཉིད་སྐྱེ་བ་ལ་རག་ལས་པ་དེ་ནི་ནང་དུ་ཞག་མ་ལོན་པ་ཉིད་མ་ཡིན་ནོ་ཞེས་བྱ་བར་སྦྱར་རོ། །འདུག་པའི་ཞེས་བྱ་བ་ནི། ཤིང་ཏོག་ལ་སོགས་པ་རུང་བའི་ས་ན་འདུག་པའི་འོ། །དེའི་གྲུབ་བ་ཉིད་ཅེས་བྱ་བ་ནི། འདུག་པ་དེ་རུང་བའི་སར་འགྲུབ་པ་ཉིད་དོ། །འགྲུབ་པ་ཉིད་གང་ཡིན་པ་དེ་སྐྱེ་བ་ལ་རག་ལས་པ་ཞེས་བྱ་བ་ནི། སྐྱེ་བ་ལ་ལྟོས་པ་སྟེ། ཤིང་
ཏོག་ལ་སོགས་པ་རུང་བའི་སར་འགྲུབ་པ་ཉིད་གང་ཡིན་པ་དེ་རང་གི་སྐྱེ་བའི་རྒྱུན་རྩ་བ་དང་སྡོང་བུ་ལ་སོགས་པ་རུང་བ་མ་ཡིན་པའི་ས་ན་འདུག་པ་དང་འབྲེལ་བ་འམ། རང་གི་སྐྱེ་བའི་རྒྱུན་རྩ་བ་དང་སྡོང་བུ་ལ་སོགས་པ་རུང་བ་མ་ཡིན་པའི་ས་ན་འདུག་པ་དེ་ལས་མིས་མ་བརྩལ་བར་རང་བྲུལ་བ་སྐྱེ་བའི་རྒྱུན་དང་འབྲེལ་བ་རུང་བའི་ས་ན་འདུག་པ་རྣམ་པ་དེ་གཉི་ག་ཡང་སྐྱེ་བ་ལ་རག་ལས་པ་ཞེས་བྱའོ། །མ་ལོན་པ་ཉིད་མ་ཡིན་ནོ་ཞེས་བྱ་བ་ནི། དེ་ལྟར་ཤིང་ཏོག་ལ་སོགས་པ་རུང་བ་མ་ཡིན་པའི་ས་ན་འདུག་པའི་འགྲུབ་པ་སྐྱེ་བ་ལ་རག་ལས་པ་རྣམ་པ་གཉིས་པོ་དེ་ནི་སྐྱེ་བའི་རྒྱུན་རུང་བ་མ་ཡིན་པའི་ས་ནས་བྱུང་བའི་དབང་གིས་གྲུབ་པ་ཡིན་པས་ནང་དུ་ཞག་མ་ལོན་པ་ཉིད་མ་ཡིན་ཏེ། ཞག་ལོན་པ་ཁོ་ན་ཉིད་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་འདུག་པའི་འགྲུབ་པ་ཉིད་སྐྱེ་བ་ལ་རག་ལས་པ་གང་ཡིན་པ་དེ་ནི་ནང་དུ་ཞག་མ་ལོན་པ་ཉིད་མ་ཡིན་ཏེ་ལོན་པ་ཁོ་ན་ཉིད་ཡིན་པས་སྐྱེ་བའི་དབང་གིས་ན་དངོས་པོ་རུང་བའི་ས་ན་འདུག་པ་དེའི་འགྲུབ་པ་རུང་བ་མ་ཡིན་པའི་ས་ནས་བྱུང་ལ། སྐྱེ་བའི་རྒྱུན་དང་མ་བྲལ་བ་དཔེར་ན་བལ་པོ་སེའུའི་ཤིང་དང༌། མ་དུ་ལུང་ག་ལ་སོགས་པའི་ཤིང་རུང་བ་མ་ཡིན་པའི་ས་ནས་སྐྱེས་པའི་འབྲས་བུ་ཡལ་ག་དང་འབྲེལ་བ་རུང་བའི་སར་འཕྱང་བ་ལྟ་བུ་དང༌། དངོས་པོ་རུང་བའི་ས་ན་འདུག་པ་དེའི་འགྲུབ་པ་རུང་བ་མ་ཡིན་པའི་ས་ནས་བྱུང་ལ། སྐྱེ་བའི་རྒྱུན་དང་བྲལ་བ་དཔེར་ན་ཤིང་ཏ་ལ་ལ་སོགས་པ་རུང་བ་མ་ཡིན་བའི་ས་ལས་སྐྱེས་པའི་འབྲས་བུ་མིས་མ་བརྩལ་བར་རང་བྲུལ་བ་ཡལ་ག་དང་མ་འབྲེལ་བ་རུང་བའི་ས་ནས་འདུག་པ་ལྟ་བུ་དག་ནི་སྐྱེ་བ་ལ་རག་ལས་པའི་དབང་གིས་ན་ནང་དུ་ཞག་ལོན་པ་ཁོ་ན་ཡིན་ནོ། །ས་བོན་མཚམས་ཀྱི་ནང་དུ་ཞག་ལོན་པ་མཚམས་ཀྱི་ཕྱི་རོལ་དུ་བཏབ་པ་ལས་རྩ་བ་དང་མྱུ་གུ་ལ་སོགས་པ་སྐྱེས་པ་གང་ཡིན་པ་དེ་ནི་མཚམས་ཀྱི་ནང་དུ་ཞག་ལོན་པ་ཉིད་མ་ཡིན་ཏེ། སྐྱེ་བ་གཞན་ཡིན་པའི་ཕྱིར་རོ། །མཚམས་ཀྱི་ནང་དུ་སྐྱེས་པའི་དངོས་པོ་མཚམས་ཀྱི་ཕྱི་རོལ་དུ་འཕེལ་བར་གྱུར་པ། དཔེར་ན་ཀུ་སྨན་ལ་སོགས་པ་ལྟ་བུ་དང༌། དེ་བཞིན་དུ་
ནང་དུ་ཞག་ལོན་པའི་འོ་མ་གནས་སྐབས་གཞན་དུ་འཕོས་པ་ཞོར་གྱུར་པ་ལྟ་བུ་ནི་ནང་དུ་ཞག་ལོན་པ་ཉིད་ཡིན་ནོ། །མཚམས་ཀྱི་ནང་དུ་ཞག་ལོན་པའི་བ་ལས་འོ་མ་བྱུང་བ་གང་ཡིན་པ་དེ་ཡང་ནང་དུ་ཞག་ལོན་པ་ཁོ་ན་ཡིན་ཏེ། འོ་མ་དེ་མཚམས་ཀྱི་ནང་ནས་བྱུང་བ་ཡིན་པའི་ཕྱིར་རོ། །སྣོད་ཕྱོགས་ན་འདུག་ན་དེས་ཀྱང་ས་དེར་བཙོས་པ་ཉིད་ཡིན་ནོ་ཞེས་བྱ་བ་ནི། བཙོ་བར་བྱ་བའི་རྫས་ཀྱི་གཞིར་གྱུར་པ་སྣོད་རུང་བ་མ་ཡིན་པའི་ཕྱོགས་ན་འདུག་ན་རྒྱུ་དེས་ཀྱང་བཙོ་བར་བྱ་བའི་རྫས་དེ་ཡང་རུང་བ་མ་ཡིན་པའི་ས་དེར་བཙོས་པ་ཉིད་ཡིན་བའི་ས་དེར་བཙོས་པ་ཉིད་ཡིན་བར་རིག་པར་བྱའོ། །བཙོ་བར་བྱ་བའི་རྫས་ཉི་ཚེ་རུང་བ་མ་ཡིན་པའི་སར་བཞག་པ་རུང་བ་མ་ཡིན་པའི་སར་བཙོས་པར་གྱུར་པ་འབའ་ཞིག་ཏུ་མ་ཟད་ཀྱི། བརྒྱུད་པའི་ཚུལ་གྱིས་ཀྱང་རུང་བ་མ་ཡིན་པའི་སར་བཙོས་པར་གྱུར་པ་ཡོད་དེ། དཔེར་ན་རུང་བ་མ་ཡིན་པའི་སར་མདག་མ་དག་གི་སྟེང་དུ་སྐྱེད་བོ་ལ་སོགས་པའམ། ལྕགས་སྒྱེད་རྐང་གསུམ་པ་ལ་སོགས་པ་བཙུགས་པའི་སྟེང་དུ། ཕྲུ་བ་ལ་སོགས་པའི་སྣོད་བཞག་པའི་ནང་དུ་ཤ་ལ་སོགས་པ་བཙོས་ན། །དེ་ཡང་རུང་བ་མ་ཡིན་པའི་སར་བཙོས་པ་ཉིད་ཡིན་པར་འགྱུར་བ་ལྟ་བུའོ། །འཚོད་པར་བྱེད་པ་དེ་ན་འདུག་པ་ཉིད་ཀྱིས་ནི་མི་འགྱུར་རོ། །ཞེས་བྱ་བ་ནི། བཙོ་བར་བྱ་བའི་རྫས་འཚོད་པར་བྱེད་པའི་མི་རུང་བ་མ་ཡིན་པའི་ས་དེ་ན་འདུག་པ་ཉིད་ཀྱིས་བཙོ་བར་བྱ་བའི་རྫས་རུང་བའི་སར་བཙོས་པས་ནི་རུང་བ་མ་ཡིན་པའི་སར་བཙོས་པར་མི་འགྱུར་རོ། །འདི་སྐད་བསྟན་ཏེ། གལ་ཏེ་འཚོད་པར་བྱེད་པའི་མི་མཚམས་ཀྱི་ནང་རོལ་ན་འདུག་ཅང༌། བཙོ་བར་བྱ་བའི་རྫས་མཚམས་ཀྱི་ཕྱི་རོལ་ལག་པས་སླེབས་ཙམ་དུ་འཚོད་པར་བྱེད་ན་བཙོ་བར་བྱ་བའི་རྫས་དེ་མཚམས་ཀྱི་ནང་དུ་བཙོས་པར་མི་འགྱུར་རོ། །མི་ནི་སྣོད་མ་ཡིན་པ་ཉིད་མ་ཡིན་ནོ་ཞེས་བྱ་བ་ནི། མེ་མདག་ནི་སྣོད་དང་འདྲ་བ་ཉིད་མ་ཡིན་པ་མ་ཡིན་ཏེ། སྣོད་དང་འདྲ་བ་ཉིད་ཡིན་ནོ། །འདི་སྐད་བསྟན་ཏེ། མཚམས་ཀྱི་ནང་ན་འདུག་པའི་མེ་མདག་དག་གི་སྟེང་དུ་བསྲེག་པར་བྱ་བའི་རྫས་གང་ཡིན་པ་དེ་བསྲེགས་པ་ནི་མཚམས་ཀྱི་ནང་དུ་བཙོས་པ་ཉིད་ཡིན་ནོ། །མེ་ལྕེའི་སྟེང་དུ་བསྲེགས་པ་ནི་མ་ཡིན་ཏེ། མེ་ལྕེ་ནི་ནམ་
མཁའ་དང་འདྲ་བ་ཉིད་ཡིན་པའི་ཕྱིར་རོ། །དེ་ལས་ཕྱུང་བ་དང་བྱུང་བ་དག་ནི་དེ་ཉིད་མ་ཡིན་ནོ་ཞེས་བྱ་བ་ནི། མཚམས་ཀྱི་ནང་ན་འདུག་པའི་མེ་དེ་ལས་འགའ་ཞིག་གིས་བོང་བ་ལ་སོགས་པ་དག་གིས་མེ་ཕྱིར་ཕྱུང་བ་དང་རླུང་ལ་སོགས་པའི་དབང་གིས་མེ་རང་བྱུང་བ་དག་ནི་དེ་ཉིད་མ་ཡིན་ཏེ། ས་དེའི་ངོ་བོ་ཉིད་ཀྱང་མ་ཡིན་ལ་ས་དེར་གཏོགས་པ་ཉིད་ཀྱང་མ་ཡིན་ནོ། །ཉེན་ཀོར་ནི་གནས་ཉིད་ཡིན་ནོ་ཞེས་བྱ་བ་ལ། གནས་ཞེས་བྱ་བ་ནི། དེར་གནས་པར་བྱ་བ་ཡིན་པས་གནས་ཏེ། གནས་དེའི་ཉེན་ཀོར་ནི་གནས་ཉིད་ཡིན་ནོ། །ཉེན་ཀོར་གྱི་ལམ་ཇི་སྲིང་ཚུན་ཆད་གནས་ཉིད་ཡིན་ཞེ་ན། དེའི་ཕྱིར་འདོམ་གང་ངོ་ཞེས་བྱ་བ་སྨྲས་ཏེ། ཕྱི་རོལ་གྱི་རྩིག་པ་ལ་སོགས་པའི་ངོས་ནས་བརྩམས་ཏེ་འདོམ་གང་ཚུད་ཆད་ནི་གནས་དེའི་ཉེན་ཀོར་ཡིན་པས་དེ་ནི་གནས་ཉིད་དང་འདྲའོ། །གནས་ནི་རྣམ་པ་གཉིས་ཏེ། གཡོགས་པ་དང་མ་གཡོགས་པའོ། །དེ་ལ་རེ་ཞིག་མ་གཡོགས་པའི་དབང་དུ་བྱས་ནས། སྟེང་དུ་ནམ་མཁའ་ལ་སླེབས་པ་མན་ཆད་དོ་ཞེས་བྱ་བ་སྨྲས་ཏེ། གནས་སྟེང་མ་གཡོགས་པ་ལ་ནི་སྟེང་དུ་ནམ་མཁའ་ལ་མགོ་བོ་རྒྱུ་བ་དག་གིས་སླེབས་པར་ནུས་པ་མན་ཆད་ཀྱང་གནས་ཉིད་ཡིན་ནོ། །གཡོགས་པའི་དབང་དུ་བྱས་ནས་ནང་ཡང་ངོ་ཞེས་བྱ་བ་སྨྲས་ཏེ། གནས་སྟེང་གཡོགས་པ་ལ་ནི་ནང་གི་ནམ་མཁའ་གང་ཡིན་པ་དེ་ཡང་གནས་ཉིད་ཡིན་ནོ། །སྟེང་གི་ཡང་ཏོག་གཞན་ཡང་དེ་ཉིད་ཡིན་ནོ་ཞེས་བྱ་བ་ནི། །འོག་ཁང་གི་སྟེང་གི་ཡང་ཐོག་གི་ཁ་ཁྱེར་གཞན་ཡང་འོག་ཁང་དེ་ཁོ་ན་ཉིད་ཡིན་ཏེ། ནམ་མཁའི་དཀྱིལ་ནི་སྟེང་གི་ཡང་ཏོག་ཐམས་ཅད་ལ་མངོན་སུམ་དུ་འཇུག་པའི་ཕྱིར་རོ། །འདི་སྐད་བསྟན་ཏེ། གལ་ཏེ་དགེ་སློང་རྣམས་འོག་ཁང་ན་གནས་པར་གྱུར་ན་སྟེང་གི་ཡང་ཏོག་དག་ཏུ་རུང་བའི་ཁང་པ་བསྐོ་བར་མི་བྱ་སྟེ། མི་འཆགས་པའི་ཕྱིར་རོ། །འདིར་གཞུང་ནི་སིལ་བུ་དག་ལས་བཙུན་པ་འོག་ཁང་གི་རུང་བའི་ཁང་པ་ལགས་བ་དེའི་ཡང་ཏོག་ཀྱང་རུང་བའི་ཁང་པ་ལགས་སམ། ཉེ་བ་འཁོར་ཡང་ཏོག་ཀྱང་ཡིན་ཏེ། ངོས་དག་ཀྱང་དེ་བཞིན་ནོ་ཞེས་གསུངས་པ་ཡིན་ནོ། །གཞན་གནས་པ་ཉིད་ནི་གཞན་གྱི་གནས་ཉིད་མ་ཡིན་ནོ་ཞེས་བྱ་བ་ནི། བདག་པོ་རིགས་མི་
མཐུན་པ་གཞན་གནས་པར་གྱུར་པ་ཉིད་ཡིན་ན་བདག་པོ་སྔ་མ་གཞན་གྱི་གནས་ཉིད་མ་ཡིན་ཏེ། དཔེར་ན་དགེ་སློང་གི་གནས་སམ་དགེ་འདུན་གྱི་གནས་སུ་ཁྱིམ་པ་གནས་པར་གྱུར་ན། འདི་ལྟར་དགེ་སློང་དག་དེ་ཉིད་ན་གནས་སུ་ཟིན་ཀྱང་དེ་དགེ་སློང་གི་གནས་ཉིད་མ་ཡིན་པ་ལྟ་བུའོ། །འདིར་གཞུང་ནི་ཞུ་བ་ལས་བཙུན་པ་དེ་ཉིད་ན་དགེ་སློང་དང་བཅས་ཤིང་དེ་ཉིད་ན་ཁྱིམ་པ་དང་བཅས་ན། དེར་དགུང་ལགས་པ་དང་དེར་བསྒྲལ་བ་འཚལ་བར་བགྱིའམ་འཚལ་བར་མི་བགྱི། ཉེ་བ་འཁོར་བཟའ་བར་བྱའོ་ཞེས་གསུངས་པ་ཡིན་ནོ། །གནས་སྟོང་པར་བྱས་པ་ཞིག་ཏུ་གལ་ཏེ་དགེ་སློང་རེ་ཞིག་གནས་པར་གྱུར་ན་དེ་ཡང་དགེ་སློང་གི་གནས་ཉིད་ཡིན་ནོ། །ཁྱིམ་པའི་རྫས་མ་སྟོན་ན་ནི་སྟོང་པར་བྱས་པ་ཉིད་མ་ཡིན་ནོ། །དགེ་ཚུལ་རྣམས་ཀྱི་གང་ཟག་གི་གནས་དང་དགེ་ཚུལ་གྱི་ཚོགས་སྤྱིར་དབང་བའི་གནས་དེ་ནི་དགེ་སློང་གི་གནས་ཉིད་མ་ཡིན་ནོ། །དགེ་སློང་གི་གནས་སམ་དགེ་སློང་གི་དགེ་འདུན་གྱི་གནས་ན་དགེ་ཚུལ་ཙམ་གནས་སུ་ཟིན་ཀྱང་དེ་ལྟ་མོད་ཀྱི། དེ་དགེ་སློང་གི་གནས་ཉིད་ཡིན་ཏེ། དགེ་ཚུལ་རྣམས་ནི་དགེ་སློང་གི་འཁོར་ཡིན་པའི་ཕྱིར་རོ། །ལག་ཉར་བླངས་པ་དང་ནང་དུ་བཙོས་པ་དང༌། དགེ་སློང་གིས་བཙོས་པ་དེ་དག་དུས་ཀྱི་ཕྱིར་དགག་པ་མཛད་པར་འཚོ་བའི་བར་དུ་བཅང་བ་དག་ནི་མ་བསྡུས་པ་ཉིད་ཡིན་ནོ་ཞེས་བྱ་བའི་མདོ་འདི་ནི་སྨན་གྱི་ཕྱིར་བྱས་པ་ཡིན་ཏེ། ལག་ཉར་བླངས་པ་དང༌། ནང་དུ་བཙོས་པ་དང༌། དགེ་སློང་གིས་བཅོས་པ་དེ་དག་དུས་ཀྱི་ཕྱིར་དགག་པ་མཛད་པར་ཞེས་བྱ་བ་ནི། ལག་ཉར་བླངས་པ་ལ་སོགས་པ་དེ་དག་མུ་གེ་བྱུང་བ་ལ་སོགས་པའི་དུས་ཁ་ཅིག་ཏུ་ནི་བཟའ་བར་བྱའོ་ཞེས་གནང་བ་མཛད་ལ། མུ་གེ་བྱུང་བ་མ་ཡིན་པ་ལ་སོགས་པའི་དུས་ཁ་ཅིག་ཏུ་ནི་དེ་དག་བཟའ་བར་མི་བྱའོ་ཞེས་དགག་པ་མཛད་པ་དེར་རོ། །དེར་འཚོ་བའི་བར་དུ་བཅང་བ་དག་ནི་མ་བསྡུས་པ་ཉིད་ཡིན་ནོ་ཞེས་བྱ་བ་ནི་འཚོ་བའི་བར་དུ་བཅང་བ་དེ་དག་བཟའ་བའི་ཕྱིར་ནི་དུས་ཀྱི་བྱེ་བྲག་མེད་དེ། དེ་ནི་འདིར་སྤྱིའི་དོན་ཡིན་ནོ། །དུས་ཀྱི་ཕྱིར་ཞེས་བྱ་བ་ནི། གུང་ཚིགས་ཚུན་ཆད་ཀྱི་སྔ་དྲོ་དང༌། དེ་ཕྱིན་ཆད་ཐུན་ཚོད་ཀྱི་བར་གྱི་དུས་དེ་གཉིས་སུ་ལག་ཉར་བླངས་པ་ལ་སོགས་པ་བྱས་ན་མུ་གེ་ལ་སོགས་པའི་དུས་ཀྱི་ཚེ་
ན། དུས་དེ་ཉིད་དུ་ལག་ཉར་བླངས་པ་ལ་སོགས་པ་དག་བཟའ་བར་བྱའི། དུས་གཞན་དུ་མ་ཡིན་པ་སྟེ། སྔ་དྲོ་དེ་ལ་སྨན་ལག་ཉར་བླངས་བ་ལ་སོགས་པ་བྱས་བ་ནི་སྔ་དྲོ་དེ་ཉིད་ལ་བཟའ་བར་བྱའི། ཕྱེད་ཡོལ་ཕན་ཆད་བཟའ་བར་མི་བྱའོ། །དེ་བཞིན་དུ་ཕྱི་དྲོ་བའི་ཟས་ལག་ཉར་བླངས་པ་ལ་སོགས་པ་བྱས་པ་ཡང་མུ་གེ་ལ་སོགས་པའི་དུས་ཀྱི་ཚེ་ཐུན་ཚོད་ཀྱི་མཐའ་ཚུན་ཆད་དུ་བཟའ་བར་བྱའི་ཐུན་ཚོད་ལས་ཡོལ་བ་ཕན་ཆད་དུ་བཟའ་བར་མི་བྱ་བའོ། །འཚོ་བའི་བར་དུ་བཅང་བ་བྱིན་གྱིས་བརླབས་པ་རྣམས་ལ་ནི་ཆོ་ག་འདི་མེད་དེ། དེ་དག་ལ་དུས་ཡོངས་སུ་ཆད་པ་མེད་པས་དུས་ཐམས་ཅད་དུ་བཟའ་བར་བྱ་བ་ཡིན་ནོ། །འཚོ་བའི་བར་དུ་བཅང་བ་བྱིན་གྱིས་མ་བརླབས་པ་རྣམས་ནི་དུས་ཀྱི་ཕྱིར་བསྡུས་པ་ཡིན་ནོ། །འབགས་པ་ནི་ཟས་ཕྱེད་ཉིད་དོ་ཞེས་བྱ་བ་ནི། ལྷུང་བཟེད་ལ་སོགས་པ་ལ་ཟས་ལ་སོགས་པས་འབགས་པ་གང་ཡིན་པ་དེ་ནི་ཟས་ཕྱེད་ཉིད་ཡིན་གྱི། ཟས་རྫོགས་པ་ཉིད་ནི་མ་ཡིན་ཏེ། ལྷུང་བཟེད་ལ་སོགས་པ་ནི་བཟའ་བ་མ་ཡིན་བའི་ཕྱིར་རོ། །འདིར་གཞུང་ནི་དགེ་སློང་གིས་ལྷུང་བཟེད་དང༌། ལྷུང་བཟེད་ཆུང་དུ་དང༌། ཁ་གཟར་དང༌། ཚྭ་ཁུག་དང༌། ལྷུང་བཟེད་ཀྱི་སྣོད་དང༌། གོས་དང༌། མན་ཤེལ་དང༌། ཁྲི་དང༌། ཁྲིའུ་དང༌། ཕྲུ་བ་དང༌། བུམ་པ་དང༌། རིལ་བ་དང༌། ལྡེ་མིག་དང༌། ལྡེ་མིག་ཀྱོག་པོ་གསོག་འཇོག་བྱས་པས་འབགས་པ་ཟ་ན་ཐམས་ཅད་ཉེས་བྱས་སུ་འགྱུར་རོ་ཞེས་གསུངས་པ་ཡིན་ནོ། །འདིར་ཟ་ན་ཞེས་བྱ་བ་ནི། དེ་དག་ལ་ཟས་ཀྱིས་འབགས་པ་དེ་ཟ་ནའོ་ཞེས་བྱ་བའི་ཐ་ཚིག་གོ །ཁ་དྲི་མ་ཅན་གྱིས་བཟའ་བ་དང་བཏུང་བ་དག་ཀྱང་ངོ་ཞེས་བྱ་བ་ནི། ཁའི་ནང་མ་དག་པས་བཟའ་བ་དང༌། བཏུང་བ་དག་ཟོས་སམ་འཐུངས་ན་ཡང་ཟས་ཀྱི་ཕྱེད་ཉིད་དོ། །ཁ་བཀྲུས་ཏེ་ཟོས་པ་དང་འཐུངས་པ་ལ་ནི་ལྟུང་བ་མེད་དོ། །འདིར་གཞུང་ནི་དགེ་སློང་གིས་ཁ་མ་བཀྲུས་པར་སྐོམ་འཐུངས་ན་ཉེས་བྱས་སོ་ཞེས་གསུངས་པ་ཡིན་ནོ། །འདི་སྐད་བསྟན་ཏེ། ཁ་དྲི་མ་ཅན་དུ་གྱུར་པས་ཟོས་སམ་འཐུངས་ན་ཟས་ཀྱི་ཕྱེད་ཉིད་དེ་ཉེས་བྱས་སོ། །ཇི་ཙམ་གྱིས་ན་ཁ་དོག་པ་ཡིན་ཞེ་ན། དེའི་ཕྱིར། དེའི་ཕྱི་རོལ་ན་ལྕེ་བའམ་སས་ཀུན་ནས་
དྲུད་དེ་ཆུས་བཤལ་ན་དག་པ་ཡིན་ནོ་ཞེས་བྱ་བ་སྨྲས་ཏེ། ཁ་དེའི་ཕྱི་རོལ་མཆུ་གཉིས་ནི་ལྕི་བ་འམ་སས་ཀུན་ནས་དྲུད་དེ་ཆུས་བཤལ་ཞིང་བཀྲུས་ན་དག་པ་ཡིན་ནོ། །ནང་ནི་ཆུ་མཁུར་བ་དོའམ་གསུམ་གྱིས་བཤལ་ནའོ་ཞེས་བྱ་བ་ནི། ཁའི་ནང་ནི་ཆུ་མཁུར་བ་དོའམ་གསུམ་གྱིས་བཤལ་ཏེ་བོར་ན་དག་པ་ཡིན་ནོ།། །།བམ་པོ་ཉི་ཤུ་རྩ་བརྒྱད་པ། ལྷུང་བཟེད་ཇི་ཙམ་གྱིས་དག་པ་ཡིན་ཞེ་ན། དེའི་ཕྱིར། ལྷུང་བཟེད་ནི་བསམ་པ་ཐག་བས་ལན་གཉིས་སམ་གསུམ་བཀྲུ་བཤལ་བྱས་ན་སྒྲ་མི་སྙན་ཀྱང་དག་པ་ཉིད་ཡིན་ནོ་ཞེས་བྱ་བ་སྨྲས་ཏེ། ལྷུང་བཟེད་ནི་བསམ་པ་ཐག་པས་གུས་པར་བྱས་ཏེ། ལན་གཉིས་སམ་གསུམ་བསྒྱུར་ལོག་བྱ་ཞིང་བཀྲུ་བཤལ་བྱས་ན་སྒྲ་མི་སྙན་ཅིང་སྒྲ་སང་སང་པོར་མ་བྱུང་དུ་ཟིན་ཀྱང་དག་པ་ཉིད་ཡིན་ནོ། །འདིར་གཞུང་ནི་དགེ་སློང་གཅིག་གིས་ལྷུང་བཟེད་བཀྲུས་ཏེ་སོར་མོས་སྒྲ་འབྱིན་པར་བྱེད་པ་ན་སྒྲ་མི་སྙན་ནས་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། བསམ་པ་ཐག་པས་ལན་གཉིས་སམ་གསུམ་བཀྲུ་བཤལ་བྱ་ཞིང་གལ་ཏེ་སྒྲ་མི་སྙན་ན་ཡང་ཡོངས་སུ་ལོངས་སྤྱད་པ་ཁོ་ནར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །རྩི་ལངས་པ་ལ་ནི་ཉེས་པ་མེད་དོ་ཞེས་བྱ་བ་ནི། ལྷུང་བཟེད་དག་པར་བྱས་པ་ལ་ཁ་དོག་གི་དྲེག་པ་ལངས་པ་ནི་རྩི་ལངས་པ་ཞེས་བྱ་སྟེ། དེ་ལ་ནི་ཉེས་པ་མེད་དོ། །འབགས་པ་མེད་པར་རེག་པ་ལ་ཡང་ངོ་ཞེས་བྱ་བ་ནི། ལྷུང་བཟེད་བཟའ་བར་བྱ་བ་ལ་རེག་ཀྱང་འབགས་པ་མེད་ན་དེ་ལ་ཡང་ཉེས་པ་མེད་དོ། །འདག་རྫས་སམ་ལྕི་བའམ་ས་གང་ཡང་རུང་བས་ལན་གསུམ་བཀྲུས་པ་ལ་སྣུམ་པ་ཉིད་ཀྱང་ངོ་ཞེས་བྱ་བ་ནི། ལྷུང་བཟེད་འདག་རྫས་སམ་ལྕི་བས་སམ་ས་དག་ལས་གང་ཡང་རུང་བས་ལན་གསུམ་བཀྲུས་པ་ལ་སྣུམ་པ་ཉིད་ཡོད་པ་ལ་ཡང་ཉེས་པ་མེད་དོ། །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་ལྷུང་བཟེད་འདག་རྫས་སམ་ལྕི་བ་འམ་དོག་སས་ལན་གསུམ་འཁྲུ་བར་བགྱིད་ཅིང་དེ་ཡང་སྣུམ་ཞིང་སྣུམ་བག་ཆགས་པར་གྱུར་ན་ཡོངས་སུ་ལོངས་སྤྱད་པར་བགྱི་འམ། ཉེ་བ་འཁོར་དེ་བཞིན་ནོ་ཞེས་གསུངས་པ་ཡིན་ཏེ། དེ་ཅིའི་ཕྱིར་ཞེ་ན། དེ་ནི་ཐ་སྙད་དུ་བྱ་བའི་ཕྱིར་མི་ཆོག་པའི་ཕྱིར་
རོ། །འདིར་འདག་རྫས་ལ་སོགས་པ་སྨོས་པ་ནི་དཔེ་ཙམ་དུ་ཟད་ཀྱི། གཞན་དག་ཀྱང་རུང་བར་རིག་པར་བྱའོ། །ལངས་པ་བསལ་བར་བྱ་བ་ཉིད་དོ་ཞེས་བྱ་བ་ནི། དེ་ལྟར་ལྷུང་བཟེད་དག་པར་བྱས་པ་ལ་སྣུམ་བག་གམ་ཚོན་རྩིའི་བག་སྐེམ་ལ་སོགས་པ་དང་ཕྲད་པས་ལངས་པར་གྱུར་ན་བསལ་བར་བྱ་བ་ཉིད་ཡིན་ནོ། །འདིར་གཞུང་ནི་དགེ་སློང་ཞིག་ལ་ལྷུང་བཟེད་འཕན་ཅན་ཞིག་ཡོད་ནས་དེས་དེར་ཁུ་བ་བྱིན་ལེན་བྱས་པ་ན་སྣུམ་བག་འཐོན་ཅིང་སྟེང་དུ་ཞག་གི་ཉ་མིག་ཆགས་ཤིང་འདུག་ནས་དགེ་སློང་དེ་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། སྟེང་གི་སྣུམ་བསལ་ཏེ་བཏུང་བར་བྱའོ་ཞེས་གསུངས་པ་ཡིན་ནོ། །འབགས་པའི་ཕྱོགས་དེ་ཉིད་ཚེ་བཀྲུ་བར་བྱ་བ་ཉིད་དོ་ཞེས་བྱ་བ་ནི། ལྷུང་བཟེད་ཀྱི་ཕྱོགས་གང་དུ་ཟས་ལ་སོགས་པས་འབགས་པར་གྱུར་ན། ལྷུང་བཟེད་ཀྱི་ཕྱོགས་གང་དུ་འབགས་པར་གྱུར་པའི་ཕྱོགས་དེ་ཉི་ཚེ་བཀྲུ་བར་བྱ་བ་ཉིད་ཡིན་གྱི། རིལ་གྱིས་བཀྲུ་བར་ནི་བྱ་མི་དགོས་སོ། །འདིར་གཞུང་ནི་དགེ་སློང་གི་ལྷུང་བཟེད་འཕན་ཅན་ཞིག་དེས་འཁྲུ་བར་བྱེད་ཕ་ན། འཕན་དེར་འབྲས་ཆན་གྱི་དུ་མ་བུ་སོང་བ་ཞིག་མཐོང་ནས་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། ཤིང་བུས་བྲུས་ཏེ་ཆུས་ལན་གཉིས་སམ་གསུམ་བཤལ་ནས་ཡོངས་སུ་ལོངས་སྤྱད་པར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །བུམ་པ་ལ་སོགས་པ་སྣུམ་བག་ཅན་དག་སྣུམ་མེད་པར་བྱ་བའི་ཕྱིར་ཆུའི་རྫིང་བུ་ཟབ་མོའི་ནང་དུ་གཞུག་གོ་ཞེས་བྱ་བ་ནི། བུམ་པ་ལ་སོགས་པ་སྣུམ་ཅན་དག་སྣུམ་མེད་པར་བྱ་བའི་ཕྱིར་ཆུའི་རྫིང་བུ་ཟབ་མོའི་ནང་དུ་དཔྱངས་ཏེ་གཞུག་པར་བྱའོ། །དུས་ཇི་སྲིད་ཀྱི་བར་དུ་གཞུག་པར་བྱ་ཞེ་ན། དེའི་ཕྱིར། ཉའམ་རུས་སྦལ་ལམ་སྦལ་པ་འམ་ཆུ་སྲིན་བྱིས་པ་གསོད་དམ་ཉ་ཁྲི་པ་དག་གིས་མ་ལུས་པར་ལྡོགས་ཀྱི་བར་དུ་བཞག་གོ་ཞེས་བྱ་བ་སྨྲས་ཏེ། ཇི་སྲིད་དུ་ཉ་ལ་སོགས་པ་དག་གིས་སྣུམ་བག་མ་ལུས་པར་ལྡོགས་པར་གྱུར་པ་དེ་སྲིད་ཀྱི་བར་དུ་གཞག་པར་བྱའོ། །བསྲེགས་པས་ཀྱང་སྣུམ་མེད་པ་ཉིད་དུ་འགྱུར་རོ་ཞེས་བྱ་བ་ནི། བུམ་པ་ལ་སོགས་པ་སྣུམ་ཅན་དག་ཡང་ན་མེར་བསྲེགས་པས་
ཀྱང་སྣུམ་མེད་པ་ཉིད་དུ་འགྱུར་རོ། །དེ་ལྟར་མ་ལུས་པར་ལྡོགས་པ་དང་བསྲེགས་པ་དག་གིས་སྣུམ་མེད་པར་གྱུར་པའི་བུམ་པ་ལ་སོགས་པ་དག་ཇི་ལྟར་དག་ཅིང་གཙང་བ་ཉིད་དུ་བྱ་ཞེ་ན། དེའི་ཕྱིར། སྣུམ་མེད་པར་གྱུར་པ་ནི། བཀྲུ་བས་སོ་ཞེས་བྱ་བ་སྨྲས་ཏེ། བུམ་པ་ལ་སོགས་པ་སྣུམ་མེད་པར་གྱུར་པ་ནི་བཀྲུ་བས་དག་ཅིང་གཙང་བ་ཉིད་དུ་འགྱུར་རོ། །གང་གིས་བཀྲུ་ཞེ་ན། དེའི་ཕྱིར། འདག་རྫས་སམ་ལྕི་བས་འདག་པ་ཉིད་དོ་ཞེས་བྱ་བ་སྨྲས་ཏེ། བུམ་པ་ལ་སོགས་པ་སྣུམ་མེད་པར་གྱུར་པ་ནི། འདག་རྫས་ལ་སོགས་པས་བཀྲུས་ན་དག་པ་ཉིད་དུ་འགྱུར་རོ། །ལན་ཚྭ་ལ་སོགས་པ་ཚྭ་ཆུ་དང་འགྱུར་བྱེད་ཀྱི་ཆུ་དང་རྙོག་ཆུར་གྱུར་པ་ནི་ཕྱེད་ཉིད་དོ་ཞེས་བྱ་བ་ནི། ལན་ཚྭ་དང་འགྱུར་བྱེད་དང་རྙོག་པ་དག་ལས། ལན་ཚྭ་ཚྭ་ཆུར་གྱུར་པ་དང༌། འགྱུར་བྱེད་འགྱུར་བྱེད་ཀྱི་ཆུ་ར་གྱུར་པ་དང༌། རྙོག་པ་རྙོག་ཆུར་གྱུར་པ་གསོག་འཇོག་བྱས་པའམ་བྱིན་ལེན་མ་བྱས་པར་འཐུང་བ་ནི་ཕྱེད་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །དེ་ནི་ཐམས་ཅད་ལ་དུས་མ་ཡིན་བར་ཡང་རུང་བ་ཉིད་དོ་ཞེས་བྱ་བ་ནི། ལན་ཚྭ་ལ་སོགས་པ་ཚྭ་ཆུ་ལ་སོགས་པར་གྱུར་པ་དེ་ནི་ནད་པ་དང་ནད་པ་མ་ཡིན་བ་ཐམས་ཅད་ལ་དུས་མ་ཡིན་པར་བྱིན་ལེན་བྱས་ན་མ་བཙགས་པར་ཡང་རུང་པ་ཉིད་དེ་ཉེས་པ་མེད་དོ་ཞེས་བྱ་བའི་ཐ་ཚིག་གོ །ལན་ཚྭ་དང༌། འགྱུར་བྱེད་རང་གི་བྱ་བ་མི་བྱེད་པ་དག་ལ་ནི་མེད་པ་ཉིད་དོ་ཞེས་བྱ་བ་ནི། དེ་གཉིས་ལན་ཚྭའི་བྱ་བ་མི་བྱེད་པ་དང༌། འགྱུར་བྱེད་ཀྱི་བྱ་བ་མི་བྱེད་པ་དག་ལ་ནི་ཕྱེད་ཉིད་ཀྱང་མེད་པ་ཉིད་དེ་དེ་ལ་ནི་ཉེས་བྱས་ཀྱི་ལྟུང་བ་ཡང་མེད་དོ་ཞེས་བྱ་བའི་ཐ་ཚིག་གོ །འདིར་མདོ་སྔ་མ་གསུམ་ལ་ལན་ཚྭ་དང་འགྱུར་བྱེད་ཅེས་སྨོས་ལ་ནི་ལྷན་ཅིག་སྐྱེས་པ་ཡིན་པར་རིག་པར་བྱའོ། །ཉེ་བར་བསྒྲུབས་བ་ནི་མ་ཡིན་ནོ། །ཉེ་བར་བསྒྲུབས་པ་ནི་རྣམ་པ་གཉིས་ཏེ། འབྱུང་ཁུངས་གྱི་དབང་གིས་དང་བཏབ་པའི་དབང་གིས་སོ། །དེ་ལ་འབྱུང་ཁུངས་ཀྱི་དབང་གིས་ཉེ་བར་བསྒྲུབས་པ་ནི་འོག་ནས་འབྱུང་ཁུངས་དག་ཏུ་བཏབ་པ་མི་མངོན་པ་ནི་ཡོད་པའི་གྲངས་ཉིད་མ་ཡིན་ནོ་ཞེས་བྱ་བས་བྱེ་བྲག་ཏུ་སྟོན་པར་བྱེད་དོ། །བཏབ་པའི་དབང་གིས་ཉེ་བར་བསྒྲུབས་པ་དེ་ལ་ནི་མི་མངོན་ཡང་ལྟུང་བྱེད་རྫོགས་པའི་བྱེད་པ་པོ་ཉིད་ཡིན་པར་རིག་པར་བྱའོ། །ལྷན་ཅིག་
སྐྱེས་པ་མ་ཡིན་པ་ལ་ཡང་གནས་སྐབས་ཀྱི་བྱེ་བྲག་གིས་ལྷན་ཅིག་སྐྱེས་པ་ཉིད་དུ་འགྱུར་བ་ཡོད་དེ། དཔེར་ན་ཆུའི་ནང་དུ་ལན་ཚྭ་འམ་འགྱུར་བྱེད་བཏབ་པ་ནམ་ཞུ་བར་གྱུར་གྱི་བར་དུ་དུས་ཅུང་ཞིག་བསྡད་ན་ནི་ལན་ཚྭ་ལ་སོགས་པའི་བྱ་བ་མི་བྱེད་པ་དེའི་ཚེ་ན་ལྷན་ཅིག་སྐྱེས་པ་མ་ཡིན་ཡང༌། ལྷན་ཅིག་སྐྱེས་པ་ཉིད་དང་འདྲ་བར་རིག་པར་བྱའོ། །འདིར་ཕྱེད་ཉིད་ཀྱི་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་ཆབ་དཔོན་ཚྭ་ཅན་དུ་བགྱིས་པ་གསོག་འཇོག་བགྱིས་ཏེ་འཚལ་ན་ལྟུང་བ་ཅིར་འགྱུར། ཉེས་བྱས་སོ། །བཙུན་པ་རེ་ཞིག་དགེ་སློང་གིས་ཆབ་དཔོན་ཚྭ་ཅན་དུ་བགྱིས་པ་བྱིན་ལན་མ་བགྱིས་པར་འཚལ་ན་ལྟུང་བ་ཅིར་འགྱུར། ཉེས་བྱས་སོ། བཙུན་པ་རེ་ཞིག་དགེ་སློང་གིས་ཆབ་འགྱུར་བྱེད་ཅན་དུ་བགྱིས་པ་བྱིན་ལེན་མ་བགྱིས་པར་འཚལ་ན་ལྟུང་བ་ཅིར་འགྱུར། ཉེས་བྱས་སོ། །བཙུན་པ་རེ་ཞིག་དགེ་སློང་གིས་ཆབ་རྙོག་པ་ཅན་བྱིན་ལེན་མ་བགྱིས་པར་འཚལ་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །ཐ་མ་ལ་ནི་གཟུགས་བརྙ་ན་བྱུང་ནའོ་ཞེས་བྱ་བ་སྨྲས་ཏེ། ཐ་མ་ལ་ཞེས་བྱ་བ་ནི། ཆུ་རྙོག་པ་ཅན་ཏེ་ཞུ་བའི་གཞུང་དང༌། མདོ་འདི་ཉིད་ལས་ཆབ་རྙོག་པ་ཅན་ཞེས་བྱ་བའི་ཚིག་དེ་ཐམས་ཅད་ཀྱི་ཐ་མར་བསྟན་པའི་ཕྱིར་རོ།། ཆུ་རྙོག་པ་ཅན་དེ་ལ་ནི་གང་གི་ཚེ་བཞིན་གྱི་གཟུགས་བརྙན་འབྱུང་བ་དེའི་ཚེ་ན་རྙོག་པ་མེད་པ་ཉིད་ཡིན་པར་རིག་པར་བྱའོ། །ཀ་ཏ་ཀའི་འབྲས་བུས་ཆུ་ཤིན་ཏུ་དངས་པར་འགྱུར་རོ་ཞེས་བྱ་བ་ནི། ཆུ་རྙོག་པ་ཅན་ནི་ཀ་ཏ་ཀའི་འབྲས་བུས་ཤིན་ཏུ་དངས་པར་འགྱུར་ཏེ། ཆུ་རྙོག་པ་ཅན་དེའི་ནང་དུ་ཀ་ཏ་ཀའི་འབྲས་བུ་བཅུག་ན་ཆུ་དེ་ཤིན་ཏུ་དངས་པར་འགྱུར་རོ། །འགྱུར་བྱེད་ཀྱིས་ཀྱང་ངོ་ཞེས་བྱ་བ་ནི། འགྱུར་བྱེད་ཀྱིས་ཀྱང་ཆུ་དེ་ཤིན་ཏུ་དངས་པར་འགྱུར་རོ། །ཟན་གྱིས་ཀྱང་ངོ་ཞེས་བྱ་བ་ནི། ཟན་གྱིས་ཀྱང་ཆུ་དེ་ཤིན་ཏུ་དངས་པར་འགྱུར་རོ། །དེ་མི་འཇིག་པར་བྱ་བའི་ཕྱིར་སྣུམ་གྱིས་བསྐུའོ་ཞེས་བྱ་བ་ནི། ཆུ་ཤིན་ཏུ་དངས་པར་བྱ་བའི་ཕྱིར་གཞུག་པར་བྱ་བའི་ཟན་དེ་མི་འཇིག་པར་བྱ་བའི་ཕྱིར་སྣུམ་གྱིས་བསྐུ་བར་བྱའོ། །འབྱུང་ཁུངས་དག་ཏུ་བཏབ་པ་མི་མངོན་པ་ནི་ཡོད་པའི་གྲངས་ཉིད་མ་ཡིན་ནོ་ཞེས་བྱ་བ་ནི། འབྱུང་ཁུངས་ཞེས་བྱ་བ་འབྱུང་པའི་གནས་དག་ཏུ་ཟས་བཏབ་
པ་མི་མངོན་བ་ནི་ཡོད་བའི་གྲངས་ཉིད་མ་ཡིན་ཏེ། འདི་ལྟར་མེད་པའི་གྲངས་ཉིད་ཁོ་ན་ཡིན་བས་དེ་ལ་ནི་མེད་པའི་ཐ་སྙད་ཁོ་ནར་བྱའོ་ཞེས་བྱ་བའི་ཐ་ཚིག་གོ །འདིས་ནི་གཞུང་ལས་དུས་སྟོན་ལ་དགེ་སློང་མང་པོ་འདུས་པ་དག་ཁྲོན་པ་དག་ཏུ་ལྷུང་བཟེད་དག་འཁྲུ་བར་བྱེད་པ་ན། ཀུན་དགའ་རབ་པ་དང་དགེ་བསྙེན་དག་གིས་དེ་དག་ཏུ་ཞུན་མར་དང་འབྲུ་མར་དང་ཞོ་དང་སྦྲང་རྩིའི་བུམ་པ་དག་འཁྲུ་བར་བྱེད་པའི་སྟེང་དུ་སྣུམ་གྱི་ཉ་མིག་ཆིལ་ཆིལ་པོ་དག་ཆགས་པར་གྱུར་ནས་དགེ་སློང་དག་འགྱོད་པ་སྐྱེས་ནས་མི་འཐུང་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་འབགས་པ་དེས་ཟས་ཀྱི་བྱ་བ་བྱར་མི་རུང་གིས། བསལ་ལ་བཏུང་བར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་དེ་བསྡུས་པ་ཡིན་ནོ། །དེ་ལྟ་བས་ན་ཆུ་དག་གི་ནང་དུ་ཟན་ལ་སོགས་པ་བཅུག་པ་མི་མངོན་བ་ཉིད་ནི་འབྱུང་ཁུངས་སུ་བཏབ་པ་ཉིད་ཡིན་ནོ། །ཕྱོགས་གཅིག་ཏུ་འདྲེས་པར་གྱུར་ན་དེ་ཉི་ཚེ་བ་བསལ་བ་ཉིད་ཡིན་ནོ་ཞེས་བྱ་བ་ནི། ཟས་ཀྱི་ཕྱོགས་གཅིག་ཏུ་རུང་བ་མ་ཡིན་ནམ་བྱིན་ལེན་མ་བྱས་པར་འདྲེས་པར་གྱུར་ན་ཕྱོགས་དེ་ཉིད་ཚེ་བསལ་བར་བྱ་བ་ཉིད་ཡིན་གྱི། ལྷག་མ་གཞན་ནི་བཟའ་བར་བྱའོ། །ཁའི་མཆུས་རེག་པ་ཉིད་ལ་ནི་ཐན་ཀོར་ཡང་ངོ་ཞེས་བྱ་བ་ནི། ཟས་ཁའི་མཆུས་རེག་པར་གྱུར་པ་ཉིད་ལ་ནི་གང་དུ་རེག་པའི་ཕྱོགས་དེ་ཉིད་དང་དེའི་ཐན་ཀོར་ཡང་བསལ་བར་བྱ་བ་ཉིད་ཡིན་ནོ། །མདོ་སྔ་མ་ཤོས་ཀྱིས་ནི་ལག་ཉར་བླངས་པ་ལ་སོགས་པའི་ཉེས་པ་བསལ་ཏོ། །ཕྱི་མ་ཤོས་ཀྱིས་ནི་བཙོག་པ་ཉིད་ཀྱི་ཉེས་པ་བསལ་ཏོ། །དེ་དང་འབྲེལ་བའི་རྒྱུན་གྱིས་རེག་པ་ནི་དེ་ལ་རེག་པ་ཉིད་མ་ཡིན་ནོ་ཞེས་བྱ་བ་ནི། རིལ་བ་ལ་སོགས་པ་དང་འབྲེལ་བའི་འོ་མ་ལ་སོགས་པའི་རྒྱུན་གྱིས་ལྷུང་བཟེད་ལ་རེག་པ་ནི་རིལ་བ་ལ་སོགས་པ་དེ་ལ་རེག་པ་ཉིད་ཀྱང་མ་ཡིན་ལ་རིལ་པ་ལ་སོགས་པ་དང་འབྲེལ་བའིའོ་མ་ལ་སོགས་པ་དག་བཙོག་པ་ཉིད་དུ་གྱུར་པ་ཡང་མ་ཡིན་ནོ། །མདོ་འདི་ནི་བཙོག་པ་ཉིད་སྤང་བའི་ཕྱིར་བྱས་སོ། །ནོར་བ་དང་བརྗེད་པས་ཀྱང་མ་ཡིན་ནོ་ཞེས་བྱ་བ་ནི། ནོར་བས་བཟའ་བར་བྱ་བ་ལ་སོགས་པ་ལ་རེག་པ་དང་བརྗེད་པས་རེག་པ་ནི་བཟའ་བར་བྱ་བ་ལ་སོགས་པ་ལ་རེག་པ་
མ་ཡིན་ནོ། །དེ་གཉིས་ཀྱིས་སྦོས་པ་གཞག་པའི་ཕྱིར་ཡང་མ་ཡིན་ནོ་ཞེས་བྱ་བ་ནི། ནོར་བ་དང་བརྗེད་པ་དེ་གཉིས་ཀྱིས་བཟའ་བར་བྱ་བ་ལ་སོགས་པ་གནས་ནས་སྤོས་པ་ཕྱིར་གཞག་པར་བྱ་བའི་དོན་དུ་རེག་པ་ཡང་རེག་པ་ཉིད་མ་ཡིན་ནོ། །མདོ་འདི་ནི་ལག་ཉར་བླངས་པ་ཉིད་སྤང་བའི་ཕྱིར་བྱས་སོ། །གནས་ཀྱི་ཐག་ཤིན་ཏུ་ཉེ་བར་བསྐུར་རོ་ཞེས་བྱ་བ་ནི། ནོར་བ་དང་བརྗེད་པ་དག་གིས་བཟའ་བར་བྱ་བ་ལ་སོགས་པ་གནས་ནས་སྤོས་པ་དེའི་ཕྱིར་གཞག་བར་བྱ་བའི་དོན་དུ་བསྐུར་བར་བྱ་བ་ཡང་གནས་གང་དུ་བར་སྐབས་ཀྱི་ཐག་ཤིན་ཏུ་ཉེ་བ་ཡོད་པ་དེར་བསྐུར་བར་བྱ་སྟེ། གནས་ཀྱི་ཐག་ཤིན་ཏུ་རིང་བར་ཁྱེར་ན་དེ་ལ་རེག་པའི་སྐྱོན་དུ་འགྱུར་བའི་ཕྱིར་རོ། །གཡེལ་བས་ལག་ཉར་བླངས་པ་ཉིད་དང་བྱིན་ལེན་བླངས་པ་ཉིད་ནི་མ་ཡིན་ནོ་ཞེས་བྱ་བ་ལ། གཡེལ་བ་ཞེས་བྱ་བ་ནི། སངས་རྒྱས་ཀྱི་འདུལ་བ་ལ་མ་མོས་བའམ་ཐེ་ཚོམ་ཟ་བས་བསླབ་པའི་གཞི་ཐམས་ཅད་ལ་གཡེལ་བ་ཡིན་གྱི། ཕན་བ་བྱུང་བ་ནི་མ་ཡིན་ནོ། །དེས་ལག་ཉར་བླངས་པ་ཡང་ལག་ཉར་བླངས་པ་ཉིད་མ་ཡིན་ལ། དེས་བྱིན་ལེན་བྱས་པ་ཡང་བྱིན་ལེན་བྱས་པ་ཉིད་མ་ཡིན་ནོ། །བྱིན་ལེན་སྟོབས་པར་འོས་པ་དང་འབྲེལ་བ་མ་བྲལ་བའི་བླངས་པ་ཡང་མ་ཡིན་ནོ་ཞེས་བྱ་བ་ནི། བཟའ་བར་བྱ་བ་གང་ལ་བྱིན་ལེན་སྟོབས་པར་འོས་པའི་གང་ཟག་དང་འབྲེལ་བ་གང་ཡིན་བ་དེ་དང་ཇི་སྲིད་དུ་མ་བྲལ་བ་དེ་སྲིད་ཀྱི་བར་དུ་བཟའ་བར་བྱ་བ་དེའི་བླང་བར་བྱ་བ་ཡང་ལག་ཉར་བླངས་པ་ཉིད་ཀྱང་མ་ཡིན་ལ། བྱིན་ལེན་བྱས་པ་ཉིད་ཀྱང་མ་ཡིན་ནོ། །འདི་སྐད་བསྟན་ཏེ། བྱིན་ལེན་སྟོབས་པའི་གང་ཟག་གིས་བཟའ་བར་བྱ་བ་བཟུང་བ་གང་ཡིན་པ་དེ་སྲིད་དུ་དེས་རེག་ཅིང་འཛིན་གྱི་བར་དུ་དེ་ལག་ཉར་བླངས་པ་ཉིད་ཀྱང་མ་ཡིན་ལ། བྱིན་ལེན་བྱས་པ་ཉིད་ཀྱང་མ་ཡིན་ནོ། །དེས་བཟུང་བའི་ཐག་པ་ལ་སོགས་པ་དང་འབྲེལ་བ་ཉིད་ནི་འབྲེལ་བ་ཉིད་ཡིན་ནོ་ཞེས་བྱ་བ་ནི། བྱིན་ལེན་སྟོབས་པར་འོས་པའི་གང་ཟག་དེས་ཐག་པ་ལ་སོགས་པ་གང་བཟུང་བའི་ཐག་པ་ལ་སོགས་པ་དེ་དང་ཟས་སུ་འབྲེལ་པ་ཉིད་ཡིན་ན་ཟས་དང་འབྲེལ་པ་ཉིད་ཡིན་ནོ། །སྡོམ་པས་མཉམ་པར་ལྟ་བ་ཐ་མི་དད་པ་དག་གིས་གསོག་འཇོག་བྱས་པ་དང༌། བྱིན་ལེན་བྱས་པ་དང༌། ལག་ཉར་བླངས་
བ་དག་ནི་གཅིག་པ་ཉིད་ཡིན་ནོ་ཞེས་བྱ་བ་ནི། སྡོམ་པས་མཉམ་བའི་དགེ་སློང་དག་དང༌། དགེ་སློང་མ་དག་དང༌། དགེ་སློང་མ་ལྟ་བ་ཐ་མི་དད་པ་དག་གིས་གསོག་འཇོག་བྱས་པ་དང༌། བྱིན་ལེན་བྱས་པ་དང༌། ལག་ཉར་བླངས་པ་དག་ནི་གཅིག་པ་ཉིད་ཡིན་ནོ། །དགེ་སློང་གཅིག་གིས་གསོག་འཇོག་བྱས་པ་ལ་སོགས་པ་གང་དག་ཡིན་པ་དེ་དག་དགེ་སློང་གཞན་ཐམས་ཅད་ཀྱི་ཡང་ཡིན་ལ། དེ་བཞིན་དུ་དགེ་སློང་མ་གཅིག་གིས་གསོག་འཇོག་བྱས་པ་ལ་སོགས་པ་གང་དག་ཡིན་པ་དེ་དག་ཀྱང་དགེ་སློང་མ་གཞན་ཐམས་ཅད་ཀྱི་ཡིན་པ་དང༌། དགེ་སློང་མ་གཅིག་གིས་གསོག་འཇོག་བྱས་པ་ལ་སོགས་པ་གང་དག་ཡིན་བ་དེ་དག་ཀྱང་དགེ་སློབ་མ་གཞན་ཐམས་ཅད་ཀྱི་ཡིན་པར་དེ་དག་ནང་མཚུངས་སོ་ཞེས་བྱ་བའི་ཐ་ཚིག་གོ །དགེ་སློང་དང་དགེ་སློང་མ་དང་དགེ་སློབ་མ་སྡོམ་པས་མཚུངས་པ་དེ་དག་ཀྱང་ལྟ་བ་ཐ་དད་པར་གྱུར་ན་ནི་གསོག་འཇོག་ལ་སོགས་པ་ཡང་མི་གཅིག་པར་འགྱུར་བས་དེའི་ཕྱིར་འདིར་ལྟ་བ་ཐ་མི་དད་པ་དག་གི་ཞེས་བྱ་བ་སྨོས་སོ། །ལྟ་བ་ཐ་མི་དད་པའི་ཕྱིར་འདིར་གཞུང་ནི་ཞུ་བ་ལས་བཙུན་པ་རྗེས་སུ་ཁས་མ་བླངས་པར་རྗེས་སུ་ཁས་བླངས་པའི་བྱིན་ལེན་བགྱིས་པ་འཚལ་བར་བགྱིའམ། ཉེ་བ་འཁོར་མི་བྱའོ། །བཙུན་པ་རྗེས་སུ་ཁས་བླངས་པས་རྗེས་སུ་ཁས་མ་བླངས་པའི་བྱིན་ལེན་བགྱིས་འཚལ་བར་བགྱིའམ། ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །མཆོག་དང་མཆོག་མ་ཡིན་པར་རོ་ཞེས་བྱ་བ་ནི། སྡོམ་པས་ཞེས་བྱ་པར་སྦྱར་ཏེ། མཆོག་དང་ཞེས་བྱ་བ་ནི། སྡོམ་པ་མཆོག་དང་ལྡན་པ་དང་ངོ། །མཆོག་མ་ཡིན་པར་རོ་ཞེས་བྱ་བ་ནི། སྡོམ་པ་མཆོག་མ་ཡིན་བ་དང་ལྡན་པར་གཅིག་ཉིད་དོ། །འདི་སྐད་བསྟན་ཏེ། སྡོམ་པ་མཆོག་དང་ལྡན་པའི་དགེ་སློང་མ་དང་བསླབ་པ་བྱིན་པ་མོ་དང༌། སྡོམ་པ་མཆོག་མ་ཡིན་པ་དང་ལྡན་བའི་དགེ་སློབ་མར་ནི་གསོ་ག་འཇོག་བྱས་པ་ལ་སོགས་པ་གཅིག་པ་ཉིད་ཡིན་ལ། སྡོམ་པ་མཆོག་མ་ཡིན་པ་དང་ལྡན་པའི་དགེ་སློབ་མ་དང༌། །སྡོམ་པ་མཆོག་དང་ལྡན་བའི་དགེ་སློང་མ་དང༌། བསླབ་པ་བྱིན་པ་མོར་ནི་གསོག་འཇོག་བྱས་པ་ལ་སོགས་པ་གཅིག་པ་ཉིད་མ་ཡིན་ནོ། །འདིར་གཞུང་ནི་དགེ་སློང་མ་དང་བསླབ་པ་བྱིན་བ་མོས་གསོག་
འཇོག་བྱས་པ་ནི་དགེ་སློབ་མའི་གསོག་འཇོག་བྱས་པ་ཉིད་ཡིན་ལ། དགེ་སློབ་མས་གསོག་འཇོག་བྱས་པ་ནི་དེ་གཉིས་ཀྱིས་གསོག་འཇོག་བྱས་པ་མ་ཡིན་ནོ་ཞེས་གསུངས་པ་ཡིན་ནོ། །སྡོམ་པས་མཉམ་པ་དག་གི་ནི་གཅིག་པ་ཉིད་ཡིན་ནོ་ཞེས་སྨོས་པས་སྐྱེས་པ་དང་བུད་མེད་དག་གི་ཡང་གཅིག་པ་ཉིད་དུ་ཐལ་བར་འགྱུར་བ་བསལ་བའི་ཕྱིར། སྐྱེས་པ་དང་བུད་མེད་དག་ནི་ཕན་ཚུན་ཁྱིམ་པ་དང་འདྲའོ་ཞེས་བྱ་བ་སྨྲས་ཏེ། དཔེར་ན་ཁྱིམ་པས་ལག་ཉར་བྱས་པ་དང༌། བྱིན་ལེན་བྱས་པ་དང༌། གསོག་འཇོག་བྱས་པ་དགེ་སློང་ལ་སོགས་པའི་ལག་ཉར་བླངས་པ་དང༌། བྱིན་ལེན་བྱས་པ་དང༌། གསོག་འཇོག་བྱས་པ་ཉིད་མ་ཡིན་པ་དེ་བཞིན་དུ། དགེ་སློང་མས་བྱས་པ་ཡང་དགེ་སློང་དང་བསླབ་པ་བྱིན་པའི་ལག་ཉར་བླངས་པ་དང༌། བྱིན་ལེན་བྱས་པ་དང༌། གསོག་འཇོག་བྱས་པ་མ་ཡིན་ལ། དགེ་སློང་གིས་བྱས་པ་ཡང་དགེ་སློང་མ་དང༌། བསླབ་པ་བྱིན་པ་མོ་དང༌། དགེ་སློབ་མ་རྣམས་ཀྱིས་མ་ཡིན་ནོ། །དགེ་ཚུལ་དག་གིས་དེ་ལ་རེག་པ་ནས་སྦེད་པའི་བར་ལ་ཉེས་པར་འགྱུར་བ་དེ་བཞིན་ནོ་ཞེས་བྱ་བ་ལ་དགེ་ཚུལ་དག་ཅེས་བྱ་བ་ནི། དགེ་ཚུལ་དང་དགེ་ཚུལ་མ་དག་གོ །དེ་དག་གི་ཞེས་བྱ་བ་ནི། དགེ་ཚུལ་དང་དགེ་ཚུལ་མ་དག་དབང་བའི་བཟའ་བར་བྱས་པ་ལ་སོགས་པའོ། །དེ་ལ་རེག་པ་ནས་སྦེད་པའི་བར་ལ་ཞེས་བྱ་བ་ནི། དགེ་སློང་གིས་རེག་པ་ནས་སྦེད་པའི་བདག་ཉིད་ཀྱི་རེག་པའི་བར་ལའོ། །ཉེས་པར་འགྱུར་བ་ནི་དེ་བཞིན་ནོ་ཞེས་བྱ་བ་ནི། དགེ་སློང་ལ་ཉེས་པར་འགྱུར་བ་ཡང་དགེ་ཚུལ་དག་བཞིན་དུ་རིག་པར་བྱ་སྟེ། དཔེར་ན་དགེ་སློང་དབང་བའི་བཟའ་བར་བྱ་བ་ལ། དགེ་ཚུལ་དག་གིས་རེག་པ་ལག་ཉར་བླངས་པ་ལ་སོགས་པའི་ཉེས་པར་མི་འགྱུར་བ་དེ་བཞིན་དུ། དགེ་ཚུལ་དབང་བའི་བཟའ་བར་བྱ་བ་ལ་དགེ་སློང་དག་གིས་རེག་པ་ལ་ཡང་ལག་ཉར་བླངས་པ་ལ་སོགས་པའི་ཉེས་པར་མི་འགྱུར་ཏེ། དགེ་ཚུལ་དབང་བ་གང་ཡིན་པ་དེ་དགེ་སློང་གིས་སྦེད་པར་བྱེད་དུ་ཟིན་ཀྱང་དེས་དགེ་སློང་ཉིད་དང་དགེ་སློང་གཞན་དག་ལ་རུང་བ་མ་ཡིན་པ་ཉིད་དུ་མི་འགྱུར་ལ། དགེ་
ཚུལ་མ་དབང་བ་གང་ཡིན་བ་དེ་དགེ་སློང་མས་སྦེད་པར་བྱེད་དུ་ཟིན་ཀྱང་དེས་དགེ་སློང་མ་དེ་ཉིད་དང་དགེ་སློང་མ་གཞན་དག་ལ་རུང་བ་མ་ཡིན་པ་ཉིད་དུ་མི་འགྱུར་རོ་ཞེས་བྱ་བའི་ཐ་ཚིག་གོ །ལྟོས་པ་དང་བཅས་པས་བྱིན་པ་ན་བཏང་བ་ཉིད་མ་ཡིན་ནོ་ཞེས་བྱ་བ་ནི། ལག་ཉར་བླངས་པ་ལ་སོགས་པའི་རྫས་དེ་ཡང་ཕྱིར་བླང་ངོ་སྙམ་པའི་འདོད་པ་དང་བཅས་པའི་སེམས་ཀྱིས་ཕར་བྱིན་པ་ནི་བཏང་བ་ཉིད་མ་ཡིན་ཏེ་བསམ་པ་ཐག་པ་ནས་མ་བཏང་བའི་ཕྱིར་རོ། །ལྟོས་པ་མེད་པར་བཏང་བ་ལ་ལྟོས་པ་དང་བཅས་པ་ཉིད་ནི་ཕྱེད་ཉིད་དོ་ཞེས་བྱ་བ་ནི། ལ་གཉར་བླངས་པ་ལ་སོགས་པའི་རྫས་ལྟོས་པ་མེད་པར་བཏང་བ་གང་ཡིན་པ་དེ་ལ་ཡང་ལྟོས་པ་དང་བཅས་པ་ཉིད་ཡིན་ན་བྱིན་ལེན་བྱས་ཏེ་ཟོས་པའི་ཚེ་ཕྱེད་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །དེའི་ཕྱིར་དེ་བླང་བར་མི་བྱའོ་ཞེས་བྱ་བ་ནི། གང་གི་ཕྱིར་ལག་ཉར་བླངས་པ་ལ་སོགས་པའི་རྫས་ལྟོས་པ་མེད་པའི་སེམས་ཀྱིས་བཏང་བ་དེ་ཡང་ལྟོས་པའི་སེམས་ཀྱིས་ཕྱིར་སློང་ན་ཉེས་བྱས་སུ་འགྱུར་བ་དེའི་ཕྱིར་དེ་བཟའ་བའི་ཕྱིར་བསླང་བར་མི་བྱ་སྟེ། ཡང་སློང་ན་གདོན་མི་ཟ་བར་ལྟོས་པ་དང་བཅས་པ་ཉིད་སྐྱེ་བའི་ཕྱིར་རོ། །ཤེས་བཞིན་དུ་མི་བླང་ངོ་ཞེས་བྱ་བ་ནི། གང་གི་ཕྱིར་ལྟོས་བ་མེད་པར་བཏང་བ་དེ་ཤེས་བཞིན་དུ་ཕྱིར་བླངས་ན་ལྟོས་པ་དང་བཅས་པ་ཉིད་དུ་འགྱུར་ལ་མི་ཤེས་ན་མི་འགྱུར་བ་དེའི་ཕྱིར་ཤེས་བཞིན་དུ་མི་བླང་སྟེ། མི་ཤེས་པས་བླངས་པ་ལ་ནི་ཉེས་པ་མེད་དོ། །རིགས་པ་འདི་ཉིད་ཀྱིས་ན་གསོག་འཇོག་བྱས་པ་དང༌། ལག་ཉར་བླངས་པ་དང༌། ནང་དུ་ཞག་ལོན་པ་དང། ནང་དུ་བཙོས་པ་དང༌། དགེ་སློང་གིས་བཙོས་པ་ལ་སོགས་པ་དག་ཀྱང་བསམ་པ་ཐག་པ་ནས་ཚིག་བཞིན་བྱེད་པ་གཞན་ལ་བཏང་ན་རུང་བ་མ་ཡིན་པ་ཉིད་དང་བྲལ་བར་འགྱུར་ཏེ། དེའི་པ་ཕྱིར་དེ་ཟོས་ན་ཉེ་ས་པ་འགའ་ཡང་མེད་དོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་གིས་ཀུན་དགའ་རབ་བའམ་དགེ་ཚུལ་ལ་ཟས་སྩལ་བ་དེ་གཉིས་ཀྱིས་དེ་ཉིད་ལ་སླར་སྩལ་ན་འཚལ་བར་བགྱིའམ། གལ་ཏེ་མངོན་པར་མ་བསམས་ན་བཟའ་བར་བྱའོ། །བསླང་བར་བགྱིའམ། ཉེ་བ་འཁོར་མི་བྱའོ་ཞེས་གསུངས་པ་ཡིན་ནོ། །མངོན་པར་མ་བསམས་ན་ཞེས་བྱ་བ་ནི་འཐོབ་བོ་
སྙམ་དུ་ཡིད་ཀྱིས་མ་བསམས་ནའོ། །གླེང་གཞི་དག་ལས་ཀྱང་ལྟོས་པ་དང་བཅས་པ་ཟོས་ནའོ་ཞེས་བྱ་བ་ལ་སོགས་པ་གསུངས་སོ། །ཤས་མནོས་པ་དེ་བྲུབ་པའི་ཕྱིར་རེག་པ་ནི་རྐྱེན་དེ་ལྟ་བུ་དག་ཡོད་ན་རུང་བ་མ་ཡིན་བ་ཉིད་དུ་མི་འགྱུར་རོ་ཞེས་བྱ་བ་ནི། ཞིང་བ་དག་ལས་འབྲས་ལ་སོགས་པའི་ཐོག་ཤས་ཐོབ་པ་དེ་དག་མནོད་བའི་ཕྱིར་དེ་ལ་རེག་པ་ནི་རུང་བ་མ་ཡིན་པ་ཉིད་དུ་མི་འགྱུར་རོ། །དེ་བཞིན་དུ་འབྲས་ལ་སོགས་པ་མནོས་པ་དག་བང་བ་ལ་སོགས་པ་དག་ཏུ་བྲུབ་བའི་ཕྱིར་རེག་པ་ཡང་རུང་བ་མ་ཡིན་བ་ཉིད་དུ་མི་འགྱུར་རོ། །ཅི་དུས་ཐམས་ཅད་དུ་འམ་ཞེན་དེའི་ཕྱིར། རྐྱེན་དེ་ལྟ་བུ་དག་ཡོད་ན་ཞེས་བྱ་བ་སྨྲས་ཏེ། ཆུད་ཟ་བའི་རྐྱེན་དག་ཉེ་བར་གྱུར་པའམ་བསྙེན་བར་མ་རྫོགས་པ་དག་མེད་དམ་འབྲུབ་པར་བྱེད་པ་གཞན་དག་མེད་པ་ལ་སོགས་པའི་རྐྱེན་དེ་ལྟ་བུ་དག་ཡོད་ནའོ། །ཤིང་རྟ་ལ་ནི་ཁ་ལོ་བའི་སྟན་མ་གཏོགས་པ་ཉིད་དོ་ཞེས་བྱ་བ་ནི། འདི་དག་ཐམས་ཅད་ཀྱང་རྐྱེན་དེ་ལྟ་བུ་དག་ཡོད་ན་ཞེས་བྱ་བའི་རྗེས་སུ་སྦྱར་བར་རིག་པར་བྱའོ། །བཟའ་བར་བྱ་བ་བཀལ་བའི་ཤིང་རྟ་ལ་རེག་པར་མི་བྱའོ། །གལ་ཏེ་དེ་ལ་རྐྱེན་དེ་ལྟ་བུ་དག་ཡོད་པར་གྱུར་ན་དེའི་ཚེ་ན་ཁ་ལོ་བའི་སྟན་འབའ་ཞིག་མ་གཏོགས་པ་ཉིད་ཀྱི་ཤིང་རྟ་ལ་རེག་པར་བྱའོ། །ཤིང་རྟ་ཉི་ཚེ་ལ་རེག་པས་ནི་ཤིང་རྟའི་ནང་ན་འདུག་པའི་ཟས་མི་རུང་བ་ཉིད་དུ་མི་འགྱུར་རོ། །དེ་གང་བ་ལ་ཡང་ངོ་ཞེས་བྱ་བ་ནི། འབྲས་ལ་སོགས་པས་གང་བའི་ཤིང་རྟ་ལ་ཡང་མི་རེག་ཏུ་མི་རུང་བའི་ཕྱིར་རྐྱེན་དེ་ལྟ་བུ་དག་ཡོད་ན་དེའི་ཚེ་ཁ་ལོ་བའི་སྟན་དེ་མ་གཏོགས་པ་ཉིད་དོ། །ནད་པ་གཞན་པ་ལ་ཡང་ངོ་ཞེས་བྱ་བ་ནི། ཟས་ཀྱིས་སྟོང་བའི་ཤིང་རྟར་ནད་པ་བཞོན་ཞིང་བརྒལ་བ་ལ་ཡང་དགེ་སློང་གིས་མི་རེག་ཏུ་མི་རུང་བའི་རྐྱེན་དེ་ལྟ་བུ་དག་ཡོད་ན་དེའི་ཚེ་ཡང་ཁ་ལོ་བའི་སྟན་དེ་མ་གཏོགས་པ་ཉིད་དོ། །གྲུལ་ནི་རུ་སྐྱའོ་ཞེས་བྱ་བ་ནི། བཟའ་བར་བྱ་བ་བཅུག་པའི་གྲུ་དང་འབྲས་ལ་སོགས་པས་གང་བའི་གྲུ་དང་གྲུར་ནད་པ་གཞུག་པ་ལ་ཡང་དེ་སློང་གིས་མི་རེག་ཏུ་མི་རུང་བའི་རྐྱེན་དེ་ལྟ་བུ་དག་ཡོད་ན་དེའི་ཚེ་གྲུ་དེ་ལ་ནི་རུ་སྐྱ་མ་གཏོགས་པ་ཉིད་དོ། །གྲུར་ནད་པ་མ་ཡིན་པ་ཡང་གཞུག་ཏུ་རུང་སྟེ། དེ་ལ་ཡང་ཚུལ་དེ་ཁོ་ན་བཞིན་ནོ། །དེ་འཛིན་པའི་སྟན་ཡང་ངོ་ཞེས་བྱ་བ་ནི། བཟའ་
བར་བྱ་བ་བཅུག་པའི་གྲུ་དང་འབྲས་ལ་སོགས་པས་གང་བའི་གྲུ་དང་གྲུར་ནད་པ་དང་མི་ན་བ་དག་གཞུག་པ་ལ་ཡང་དགེ་སློང་གིས་མི་རེག་ཏུ་མི་རུང་བའི་རྐྱེན་དེ་ལྟ་བུ་དག་ཡོད་ན་དེའི་ཚེ་གྲུ་དེ་ལ་རུ་སྐྱ་འཛིན་པའི་སྟན་ཡང་མ་གཏོགས་པ་ཉིད་དོ། །ཁ་ལོ་བའི་སྟན་དང་རུ་སྐྱ་འཛིན་པའི་སྟན་དག་ལ་དགེ་སློང་གིས་བརྡོས་པར་གྱུར་ན་དེའི་ཚེ་ཤིང་རྟ་དང་གྲུ་སྨན་པར་མི་ནུས་པས་དེའི་ཕྱིར་དགེ་སློང་ལ་རྐྱེན་དེ་ལྟ་བུ་དག་ཡོད་དུ་ཟིན་ཀྱང་དེ་དག་ལ་རེག་པ་དགག་པ་མཛད་དོ། །དགེ་འདུན་གྱི་སྨན་དག་ལུད་པ་ན་བསྐྱམ་པ་དང་དབྱུང་བ་དང་གཟར་བུའི་ལས་དང་དཔོག་པ་དག་ལ་ཡང་ངོ་ཞེས་བྱ་བ་ནི། དགེ་འདུན་གྱི་བཟའ་བ་ལ་སོགས་པ་སྨན་དག་དང་གང་ཟག་གི་ཡང་རུང་སྟེ། དེ་དག་ལུད་པ་ན་བསྐྱམ་པ་ལ་སོགས་པའི་ཕྱིར་དགེ་སློང་གིས་རེག་པ་ལ་ཡང་མི་རུང་བ་ཉིད་དུ་མི་འགྱུར་རོ་ཞེས་བྱ་བར་སྦྱར་རོ། །ལུད་པ་ན་ཞེས་བྱ་བ་ནི་ཐབ་ཏུ་བསྐོལ་བའི་ཚེ་གྱེན་དུ་ལུད་པ་ནའོ། །བསྐྱམ་པ་ཞེས་བྱ་བ་ནི། བསྐྱོད་པའོ། །དབྱུང་བ་ཞེས་བྱ་བ་ནི་གནས་ནས་ཕྱིར་དབྱུང་བའོ། །གཟར་བུའི་ལས་ཞེས་བྱ་བ་ནི། གཟར་བུས་ཕྱར་བ་ལ་སོགས་པའོ། །དབོག་པ་ཞེས་བྱ་བ་ནི་བསྐོལ་པའི་གནས་སྒྱེད་པོ་དག་ལས་ཤོད་དུ་དབོག་པའོ། །ཚིག་དེ་དག་གིས་རྫས་ཆུད་མི་ཟ་བའི་ཕྱིར་རོ། །ཅི་བསྐྱམ་པ་དེ་ལ་དང་པོ་ཉིད་ནས་རེག་པར་བྱ་བ་ཡིན་ནམ་ཞེ་ན། དེའི་ཕྱིར། དང་པོར་ཤིང་དབྲི་བ་དང་མེ་བསད་པ་དང་གོས་ཀྱི་ཐུ་བ་ལ་སོགས་པས་རླུང་གཡབ་པ་འབད་པར་བྱའོ་ཞེས་བྱ་བ་སྨྲས་ཏེ། དགེ་འདུན་གྱི་སྨན་དེ་བསྐྱམ་པ་ན་དང་པོ་ཁོ་ནར་ལུད་པ་ནི་བར་བྱ་བའི་ཕྱིར། ཤིང་དབྲི་བ་ལ་སོགས་པ་དག་གིས་འབད་པར་བྱའོ་ཞེས་བྱ་བར་སྦྱར་རོ། །འདི་སྐད་བསྟན་ཏེ། ལུད་པ་ཞི་བར་བྱ་བའི་ཕྱིར་དང་པོ་ཁོ་ནར་རེ་ཞིག་དུད་ཤིང་དབྲི་བར་བྱ། །མེ་གསད་པར་བྱ། གོས་ཀྱི་ཐུ་བ་ལ་སོགས་པས་རླུང་གཡབ་པར་བྱའོ། །འོན་ཀྱང་ཞི་བར་མ་གྱུར་ན་དེའི་ཚེ་གཟོད་བསྐྱམ་པ་ལ་སོགས་པས་རིག་པར་བྱའོ། །དེས་ན་འདི་ལྟར་ཤེས་ཏེ། དང་པོར་བུད་ཤིང་དབྲི་བ་ལ་སོགས་པས་ཞི་བར་མ་གྱུར་ན་དེའི་འོག་ཏུ་གཟོད་བསྐྱམ་པ་ལ་སོགས་པ་བྱ་བ་ཡིན་ནོ། །ཆུ་ཀླུང་རྒལ་བའི་ཕྱིར་རམ་ཁུར་ཙ་བ་བསྙག་པའི་ཕྱིར་ལག་ཉར་བླངས་པའི་ལམ་རྒྱགས་རུང་སྟེ། ཆོ་ག་མ་འབྱོར་ཏམ་ལམ་རྒྱགས་གཞན་མེད་ནའོ་ཞེས་
བྱ་བ་ནི། དགེ་སློང་ཆུ་ཀླུང་རྒལ་བའི་ཕྱིར་རམ། ལམ་རྒྱགས་ཁྱེར་བའི་ཁུར་ཙ་བ་བསྙག་པའི་ཕྱིར་ནི་ལག་ཉར་བླངས་པའི་ལམ་རྒྱགས་བཟར་རུང་ངོ༌། །གང་གི་ཚེ་ཞེ་ན། ཆོ་ག་མ་འབྱོར་ཏམ་ཞེས་བྱ་བ་སྨྲས་ཏེ། རུང་བར་བྱེད་པའི་དགེ་སྦྱོང་ལ་སོགས་པས་རེག་ན་ལག་ཉར་བླངས་པ་ཉིད་དུ་མི་འགྱུར་བ་དེ་ལྟ་བུའི་ཆོ་ག་མ་འབྱོར་ན་དགེ་སློང་དེ་ཉིད་ཀྱིས་ཆུ་ཀླུང་རྒལ་བར་བྱ་བ་དང་གནས་གང་ན་ཁུར་ཙ་བ་འདུག་པ་དེར་ཡང་དགེ་སློང་དེ་ཉིད་ཀྱིས་བསྐུར་བར་བྱའོ། །ལག་རྒྱགས་གཞན་མེད་ན་ཞེས་བྱ་བ་ནི། ལམ་རྒྱགས་རུང་བ་གཞན་མེད་ན་ཡང་དེའི་ཚེ་ལམ་རྒྱགས་ཀྱི་དོན་དུ་ལག་ཉར་བླངས་པ་བཟའ་བར་བྱའོ། །ཁུར་ཙ་བ་མེད་ན་སྦྱིན་བདག་སྤྲོ་བར་བྱའོ་ཞེས་བྱ་བ་ནི། ལམ་རྒྱགས་དེ་ཁྱེར་བའི་ཁུར་ཙ་བ་གཞན་མེད་ན་སྦྱིན་བདག་གིས་དེ་བསྐུར་བར་སྤྲོ་བ་བསྐྱེད་པར་བྱའོ། །ཁྱེར་བ་མེད་ན་རང་གིས་སོ་ཞེས་བྱ་བ་ནི། སྦྱིན་བདག་ལ་བཅོལ་བ་ཡང་མ་གྲུབ་ན་དེའི་ཚེ་དགེ་སློང་རང་གིས་ལམ་རྒྱགས་བསྐུར་བར་བྱའོ། །དེ་ཉིད་ལས་སྦྱིན་པས་བརྗེ་ཞིང་བླང་བ་བསྒྲུབ་པར་བྱའོ་ཞེས་བྱ་བ་ནི། གཞན་ཁྱེར་དུ་གཞུག་པ་མ་གྲུབ་ཅིང་རང་གིས་ཁྱེར་བར་གྱུར་ན་རང་གིས་ཁྱེར་བ་དེ་ཉིད་ལས་གཞན་ལ་སྦྱིན་པས་ལམ་རྒྱགས་བརྗེ་ཞིང་བླང་བ་བསྒྲུབ་པར་བྱའོ། །འདི་སྐད་བསྟན་ཏེ། གལ་ཏེ་རུང་བ་གཞན་མ་གྲུབ་ན་དེའི་ཚེ་རང་གིས་ཁྱེར་བའི་ལམ་རྒྱགས་དེ་ཉིད་ལས་བསྙེན་པར་མ་རྫོགས་པ་ལ་སྐལ་བ་སྦྱིན་པར་བྱ་ཞིང༌། དེའི་འོག་ཏུ་བསྙེན་པར་མ་རྫོགས་པ་དེའི་སྐལ་བ་དེ་རང་གི་སྐལ་བས་བརྗེ་ཞིང་བཟའ་བར་བྱའོ། །དེ་ཡང་མ་གྲུབ་ན་དེ་བཟའ་བར་བྱ་བ་ཉིད་དོ་ཞེས་བྱ་བ་ནི། རང་གིས་ཁྱེར་བ་དེ་ཉིད་ལས་བརྗེ་ཞིང་བླང་བ་དེ་ཡང་མ་གྲུབ་ན་རང་གིས་ཁྱེར་བ་དེ་ཡང་བཟའ་བར་བྱ་བ་ཉིད་ཡིན་ནོ། །བྱིན་ལེན་སྟོབས་པ་མེད་ན་བྱིན་ལེན་མ་བྱས་པ་དེ་འམ་གཞན་ཡང་ངོ་ཞེས་བྱ་བ་ནི། བྱིན་ལེན་སྟོབས་པར་བྱེད་པའི་མི་གཞན་མེད་ན་དེའི་ཚེ་བྱིན་ལེན་མ་བྱས་པར་རང་གིས་ཁྱེར་བ་དེའམ་གཞན་ཁྱེར་དུ་བཅུག་པ་གཞན་ཡང་བཟའ་བར་བྱ་བ་ཉིད་ཡིན་ནོ། །འདི་སྐད་བསྟན་ཏེ། རང་གིས་ཁྱེར་བའི་ལམ་རྒྱགས་དེ་བཟའ་བར་བྱ་བ་ཉིད་ཡིན་པ་འབའ་ཞིག་ཏུ་མ་ཟད་ཀྱི། དེ་ཉིད་དམ་གཞན་བྱིན་ལེན་མ་བྱས་པ་ཡང་བཟའ་བར་བྱ་བ་ཉིད་ཡིན་ནོ། །
རང་གིས་ཁྱེར་བ་དང་བྱིན་ལེན་མ་བྱས་པ་དེ་གཉིས་དགེ་སློང་གང་བཟའ་བར་བྱ་བ་ཉིད་ཡིན་ཞེ་ན། དེའི་ཕྱིར། ཟན་གཅད་པར་བྱས་པའི་འོ་ཞེས་བྱ་བ་སྨྲས་ཏེ། དགེ་སློང་གང་གིས་སྔར་ཉིན་གཅིག་ཟན་གཅད་པ་དེ་ནི་ཟན་གཅད་པར་བྱས་པ་སྟེ་དེའིའོ། །ཉི་མ་གང་ལ་ཇི་ཙམ་བཟའ་བར་བྱ་བ་ཉིད་ཡིན་ཞེ་ན། དེའི་ཕྱིར་ཉི་མ་དང་པོ་ལ་སྤར་གང་ངོ་ཞེས་བྱ་བ་སྨྲས་ཏེ། སྔར་ཉིན་གཅིག་ཟན་གཅད་པར་བྱས་པའི་ཕྱི་དེ་ཉིན་པར་ཟན་བཟའ་བའི་དུས་ལ་བབ་པ་ནི་ཉི་མ་དང་པོ་ཞེས་བྱ་བ་སྟེ། དེ་ལ་ནི་སྤར་གང་བཟའ་བར་བྱ་བ་ཉིད་ཡིན་ནོ། །སྦར་གང་ཞེས་བྱ་བ་ནི་ལག་པ་ཁས་སྤུབ་པའི་སོར་མོ་སྒུ་པོར་བཀྲམ་པ་དག་གིས་ཕྱེ་ལ་སོགས་པ་ཇི་ཙམ་བཟུང་བར་ནུས་པ་དེ་ནི་སྤར་གང་ཞེས་བྱའོ། །གཉིས་པ་ལ་ནི་དེའོ་ཞེས་བྱ་བ་ནི། ཉི་མ་གཉིས་པ་ལ་ནི་སྤར་བ་དོ་བཟའ་བར་བྱ་བ་ཉིད་ཡིན་ནོ། །གསུམ་པ་ལ་ནི་ཇི་ཙམ་གྱིས་ཆོག་བའོ་ཞེས་བྱ་བ་ནི། ཉི་མ་གསུམ་པ་ལ་ནི་ཇི་ཙམ་གྱིས་ཆོག་པར་འགྱུར་པ་དེ་ཙམ་བཟའ་བར་བྱ་བ་ཉིད་ཡིན་ནོ། །ཤིང་ཏོག་རུང་བར་མ་བྱས་པ་དང་བྱིན་ལེན་མ་བྱས་པ་དང་ལག་ཉར་བླངས་པ་དག་ཀྱང་དུས་མ་ཡིན་པར་བཟའ་བར་བྱ་བ་ཉིད་དོ་ཞེས་བྱ་བ་ནི། དགེ་སློང་ཟན་གཅད་པ་བྱས་པས་དགུན་ལ་སོགས་པ་ཤིང་ཏོག་རུང་བར་མ་བྱས་པ་དང༌། །བྱིན་ལེན་མ་བྱས་པ་དང༌། ལག་ཉར་བླངས་པ་དག་ཀྱང་དུས་མ་ཡིན་པར་ཡང་བཟའ་བར་བྱ་བ་ཉིད་ཡིན་ནོ། །ཀྱང་ཞེས་བྱ་བ་དང་ཡང་ཞེས་བྱ་བ་ཁ་གཉིས་སུ་སྨོས་པ་ནི་གཉི་ག་ཡང་ཉེས་པ་མེད་དོ་ཞེས་བསྡུ་བའི་ཕྱིར་རོ། །དེ་དག་ཐམས་ཅད་ཀྱང་གཞན་མ་གྲུབ་ན་ཞེས་བྱ་བའི་དབང་དུ་བྱས་པ་ཉིད་ཡིན་ནོ། །དེ་དག་སུའི་བཟའ་བར་བྱ་བ་ཉིད་ཡིན་ཞེ་ན་དེའི་ཕྱིར་ཟན་མེད་པའི་འོ་ཞེས་བྱ་བ་སྨྲས་ཏེ། དགེ་སློང་ཟས་མེད་པའི་འོ། །ཅི་གནས་སྐབས་ཐམས་ཅད་དུ་འམ་ཞེ་ན་དེའི་ཕྱིར། ཤིན་ཏུ་བཀྲེས་པ་ཉིད་ནའོ་ཞེས་བྱ་བ་སྨྲས་ཏེ། ཤིན་ཏུ་བཀྲེས་པའི་དངོས་པོ་ནི་ཤིན་ཏུ་བཀྲེས་པ་ཉིད་དེ་དགེ་སློང་དེ་ཤིན་ཏུ་བཀྲེས་པ་ཉིད་ཡིན་ན་བཟའ་བར་བྱ་བ་ཉིད་ཡིན་ཏེ། བཀྲེས་པས་ཤིན་ཏུ་སྲོག་ལ་ཐུག་པ་ཞེས་བྱ་བའི་ཐ་ཚིག་གོ །རྩ་བ་དག་ཀྱང་ངོ་ཞེས་བྱ་བ་ཡང༌། དགེ་སློང་ཟན་མེད་པ་ཤིན་ཏུ་བཀྲེས་པ་ཉིད་ན་རྩ་བ་རུང་བར་མ་བྱས་པ་ལ་སོགས་པ་དག་ཀྱང་དུས་མ་
ཡིན་བར་ཡང་བཟའ་བར་བྱ་བ་ཉིད་ཡིན་ནོ། །རང་གིས་ཀྱང་བཏོག་པ་ཉིད་དང་དབྱུང་བ་ཉིད་དང་བསྒྲུབ་པར་བྱ་བ་ཉིད་ཀྱང་ངོ་ཞེས་བྱ་བ་ལ། རང་གིས་ཀྱང་ཞེས་སྨོས་པའི་ཀྱང་གི་སྒྲས་ནི་གཞན་བྱེད་དུ་གཞུག་པ་ཡང་བསྡུའོ། །དགེ་སློང་ཟན་མེད་པ་ཤིན་ཏུ་བཀྲེས་པ་ཉིད་ནི་རང་གིས་གྱང་ཤིང་ཏོག་ལ་སོགས་པ་བཏོག་པ་ཉིད་དང༌། རྩ་བ་ལ་སོགས་པ་དབྱུང་བ་ཉིད་དང༌། བཙོ་བར་བྱ་བ་བསྒྲུབ་པར་བྱ་བ་ཉིད་ཀྱང་བྱར་རུང་ལ་གཞན་བྱེད་དུ་གཞུག་ཏུ་ཡང་རུང་ངོ༌། །བྱིན་ལེན་མ་བསྟབས་པ་དང་རུང་བར་མ་བྱས་པ་དང་དུས་མ་ཡིན་བར་བཟའ་བ་ལ་སོགས་པ་རུང་བར་བྱ་བ་དག་ལ་རྩོམ་པ་འདོད་པ་ནི་བྱང་གི་སྒྲ་མི་སྙན་ན་གྲགས་པའི་ཡིད་ལ་བྱེད་པ་བྱའོ་ཞེས་བྱ་བ་ནི། དགེ་སློང་ཟན་མེད་པ་ཤིན་ཏུ་བཀྲེས་པ་ཉིད་ན་བྱིན་ལེན་མ་བསྟབས་པ་དང༌། རུང་བར་མ་བྱས་པ་དང་དུས་མ་ཡིན་བར་ཟ་བ་ལ་སོགས་པ་རུང་བ་བྱ་བ་དག་ལ་རྩོམ་པའི་མདུན་རོལ་དུ་རྩོམ་པ་འདོད་པའི་ཚེ་ན་དགེ་སློང་དེས་བྱང་གི་སྒྲ་མི་སྙན་ན་གྲགས་པའི་ཡིད་ལ་བྱེད་པ་བྱ་སྟེ། འདི་ལྟར་བྱང་གི་སྒྲ་མི་སྙན་ན་གཞན་དང་འབྲེལ་བའི་ཐ་སྙད་མེད་ཅིང་སེམས་ཅན་དེ་དག་ཀྱང་བྱེ་བྲག་ཏུ་མི་རྟོག་པས་རང་གིས་བླང་བ་ལ་སོགས་པའི་ཐ་སྙད་བྱེད་པ་ཡིན་ཏེ། བསམ་པ་དྲང་ཞིང་དགེ་བ་ཡིན་པའི་ཕྱིར་བདག་གི་ཞེ་འམ་གཞན་གྱི་ཞེ་འམ་གཞན་ལས་བླང་བར་བྱ་བ་དེ་ལྟ་བུ་ལ་སོགས་པའི་བྱེ་བྲག་ཏུ་རྟོག་པ་དེ་ན་མེད་པ་ཁོ་ན་ཡིན་པས་དགེ་སློང་དེས་ཀྱང་དེའི་ཚེ་བྱིན་ལེན་མ་བསྟབས་པ་ལ་སོགས་པ་དེ་དག་ཐམས་ཅད་ལ་དེ་ལྟ་བུའི་བསམ་པས་རང་གིས་བྱའོ། །ལག་བསྙལ་བ་དང་འདབ་མ་དག་ཡོད་ན་སྐྱོགས་ཀྱིས་སྐོམ་མི་བཏུང་ངོ་ཞེས་བྱ་བ་ནི། ལག་བསྙལ་བ་དང་འདབ་མ་དག་ཡོད་ན། སྐྱོགས་ཀྱི་ནང་ནས་སྐོམ་བཏུང་བར་མི་བྱ་བའོ། །མེད་ན་མ་བསྒྲིབས་པར་མི་བྱ་བའོ་ཞེས་བྱ་བ་ནི། ལག་བསྙལ་བ་དང་འདབ་མ་དག་མེད་ན་སྐྱོགས་ཀྱིས་སྐོམ་བཏུང་བ་མ་བསྒྲིབས་པར་བཏུང་བར་མི་བྱའོ། །དེ་ཆུ་དང་བཅས་པ་ཉིད་ཡིན་ན་ཁ་མ་བཅད་པ་ཉིད་དུ་མི་གཞག་གོ་ཞེས་བྱ་བ་ནི། སྐྱོགས་དེ་ཆུ་དང་བཅས་པ་ཉིད་ཡིན་ན་ཁམ་བཅད་པ་ཉིད་དུ་མི་གཞག་སྟེ། ཁ་གབ་མེད་པར་བཅང་བར་མི་བྱའོ། །འདིར་ཆུ་དང་བཅས་པ་ཉིད་ཅེས་སྨོས་པ་ནི་མཚོན་པ་ཙམ་དུ་ཟད་
དེ། ཆུ་མེད་ན་ཡང་ཁ་མ་བཅད་པ་ཉིད་དུ་མི་གཞག་གོ །དེའི་ཁ་གབ་ནི་རྣམ་པ་གསུམ་སྟེ། ཤིང་ལས་བྱས་པ་དང༌། རྡོ་ལས་བྱས་པ་དང༌། ས་ལས་བྱས་པའོ་ཞེས་བྱ་བ་ནི། སྐྱོགས་དེའི་ཁ་གབ་ནི་རྣམ་པ་འདི་གསུམ་ལས་བྱར་རུང་བའོ། །སྐྱོགས་གཞི་ཤིང་ལས་བྱས་པའམ་རྡོ་ལས་བྱས་པ་བཅང་བར་བྱའོ་ཞེས་བྱ་བ་ལ། གང་དུ་སྐྱོགས་གཞག་པར་བྱ་བ་དེ་ནི་སྐྱོགས་གཞི་ཞེས་བྱ་སྟེ། དེ་ཤིང་ལས་བྱས་པའམ་རྡོ་ལས་བྱས་པ་བཅང་པར་བྱའོ། །འདབ་མ་དག་སྣོད་ཉིད་དུ་སྤྱོད་པ་ན་བྱིན་ལེན་མ་བྱས་པ་ཉིད་ལ་ཉེས་པ་མེད་དོ་ཞེས་བྱ་བ་ནི། འདབ་མ་དག་སྡེར་ཉིད་དུ་སྤྱོད་པ་ན་བྱིན་ལེན་མ་བསྟབས་པ་ཉིད་ལ་ཉེས་པ་མེད་དེ། འདབ་མ་བྱིན་ལེན་མ་བྱས་པ་དག་གི་སྟེང་དུ་ཟས་ལ་སོགས་པའི་བྱ་བ་བྱེད་ན་དེའི་ཚེ་ཉེས་པ་མེད་པའོ། །འདི་ལ་བརྔས་པ་དང་མ་བརྔས་པ་དག་ལ་ནི་ཁྱད་པར་མེད་དོ་ཞེས་བྱ་བ་ནི། སྣོད་ཉིད་དུ་སྤྱོད་པ་འདི་ལ་འདབ་མ་དག་ཤིང་ལྗོན་པ་ལ་སོགས་པ་དག་ལས་བརྔས་པ་དང་མ་བརྔས་པ་དག་ནི་བྱིན་ལེན་བསྟབས་པ་ཉིད་ཀྱི་ཕྱིར་ཁྱད་པར་མེད་པར་རིག་པར་བྱའོ། །གཞན་མེད་ན་མ་བརྔས་པ་དག་སྤྱད་དོ་ཞེས་བྱ་བ་ནི། འདབ་མ་བརྡས་པ་གཞན་དང་སྣོད་གཞན་མེད་ན་སྣོད་དུ་བྱ་བའི་ཕྱིར་འདབ་མ་མ་བརྡས་པ་དག་སྤྱད་པར་བྱ་ཞིང་སྡེར་དུ་བྱའོ། །གཞན་ཡོད་ན་ནི་ཤིང་ལྗོན་པ་ལ་སོགས་པ་དག་དང་འབྲེལ་བའི་འདབ་མས་སྐོམ་ལ་སོགས་པ་འཐུང་བར་བྱེད་པ་བཞད་གད་དུ་འགྱུར་བས་མི་བྱའོ། །གསོག་འཇོག་གི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ། །བྱིན་ལེན་མ་བྱས་པར་ཟ་བའི་ལྟུང་བྱེད་སྨྲ་བར་འདོད་ནས། གཞན་དང་བྱིན་ལེན་སྟོབས་པ་མེད་ན་སྦྱིན་བདག་གིས་བསམ་པ་ཐག་པས་བཏང་བ་རང་གིས་བླངས་ཏེ་བཟའ་བར་བྱའོ་ཞེས་བྱ་བ་སྨྲས་ཏེ། བྱིན་ལེན་མ་བསྟབས་པར་བཟའ་བ་ཐམས་ཅད་ལ་ཡང་བྱང་གི་སྒྲ་མི་སྙན་པའི་དུས་སུ་བྱིན་གྱིས་བརླབ་པར་བྱའོ་ཞེས་ཐམས་ཅད་དུ་ཤེས་པར་བྱའོ། །བྱིན་ལེན་བྱས་ཟིན་པའི་ཟན་གཞན་མེད་དམ་བྱིན་ལེན་སྟོབས་པའི་མི་ལ་སོགས་པ་མེད་ན་ཟས་དེ་སྦྱིན་བདག་གིས་བསམ་པ་ཐག་པས་བཏང་བ་ཡིན་ན་རང་གིས་བླངས་ཏེ་བཟའ་བར་བྱའོ། །གང་ཡང་རུང་བ་ཅིག་ཡོད་ན་ནི་ཉེས་པ་ཁོ་ནར་འགྱུར་རོ། །འདིར་གཞན་མེད་
པའི་གཞུང་ནི་དགེ་སློང་ཅིག་གིས་བསོད་སྙོམས་བླངས་ཏེ་གཙུག་ལག་ཁང་དུ་བཞག་ནས་ཕྱི་རོལ་དུ་བྱུང་བ་དང༌། ཁྱིམ་བདག་ཅིག་གིས་ཀྱང་བསོད་སྙོམས་ཤིག་ཁྱེར་ཏེ་འོངས་ནས་དེ་ཉིད་ཀྱི་སྟེང་དུ་བཞག་པ་ན་བསོད་སྙོམས་པ་ཕྱིར་འོངས་ནས་དེའི་སྟེང་དུ་བསོད་སྙོམས་གཞན་བཞག་པ་མཐོང་ནས་དེ་འགྱོད་པ་སྐྱེས་ཏེ། མི་ཟ་བའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་བྱིན་ལེན་སྟོབས་པ་ཡོད་ན་ནི། བྱིན་ལེན་བྱས་པ་དེ་བཟའ་བར་བྱའོ། །ཇི་སྟེ་མེད་ན་ནི་ཕྱིས་བྱིན་པ་གང་ཡིན་བ་དེ་བསལ་ཞིང་སྔ་མ་ཤོས་བཟའ་བར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །བྱིན་ལེན་སྟོབས་པ་མེད་པའི་གཞུང་ནི་དེ་ཉིད་ལས་ཚོང་པ་རབ་ཏུ་མང་པོ་དག་གིས་སངས་རྒྱས་ལ་སོགས་པ་དགེ་སློང་གི་དགེ་འདུན་བཤོས་ལ་སྤྱན་དྲངས་ཏེ། དེ་དག་གིས་ཟས་དག་སྤྱི་བུངས་སུ་བཅེར་བ་དང་ཚོང་ཁང་དག་ཏུ་མེ་ཤོར་ནས་དེ་དག་མེ་གསོད་པའི་ཕྱིར་དོང་པ་དང་གདུགས་ཚོད་ཀྱང་བབ་པར་གྱུར་ནས་དགེ་སློང་དག་གིས་ཇི་ལྟར་བསྒྲུབ་པར་བྱ་བ་མི་ཤེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་དག་གིས་བསམ་པ་ཐག་པས་བཏང་བ་ཡིན་པས་བྱང་གི་སྒྲ་མི་སྙན་པའི་དུས་སུ་བྱིན་གྱི་ས་བརླབ་ཅིང་བཟའ་བར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །བྱིན་ལེན་གྱི་མཚན་ཉིད་སྨྲ་བར་འདོད་ནས། མངོན་སུམ་དུ་མཚམས་ཀྱི་ནང་དུ་འཐོབ་པའི་ཕྱོགས་ན་གནས་པ་ལག་པ་བཀན་པས་ལུས་སམ་དེ་དང་འབྲེལ་པས་གྱེན་དུ་འདེགས་ནུས་པ་རྫོགས་པར་མ་བསྙེན་པ་མི་མ་ཡིན་པ་ལས་ཀྱང་སྦྱིན་པར་འདོད་པས་ཡན་ལག་གིས་སམ་དེ་དང་འབྲེལ་བའི་བྱིན་པ་མནོས་པ་ནི་བྱིན་ལེན་ནོ་ཞེས་བྱ་བ་སྨྲས་ཏེ། མངོན་སུམ་དུ་ཞེས་བྱ་བ་ནི་དྲང་ཐད་ནས་བླངས་ན་བྱིན་ལེན་ཡིན་གྱི་གློ་འམ་རྒྱབ་ནས་བླངས་པ་ནི་བྱིན་ལེན་མ་ཡིན་ནོ། །མཚམས་ཀྱི་ནང་དུ་ཞེས་བྱ་བ་ནི། མཚམས་ཀྱི་ནང་ན་གནས་པའི་དགེ་སློང་གིས་བླངས་ན་བྱིན་ལེན་ཡིན་གྱི། སྒོ་འཕར་ལ་སོགས་པས་བར་དུ་ཆོད་པའི་མཚམས་ཀྱི་ཕྱི་རོལ་ན་གནས་པས་བླངས་པ་ནི་མ་ཡིན་ནོ། །འཐོབ་པའི་ཕྱོགས་ན་
གནས་པ་ཞེས་བྱ་བ་ནི། ཕྱོགས་གང་དུ་བྱིན་ལེན་འཐོབ་པའི་ཕྱོགས་དེ་ན་གནས་པའི་དགེ་སློང་གིས་བླངས་ན་བྱིན་ལེན་ཡིན་གྱི། ཁང་སྟེང་ལ་སོགས་པ་ན་འདུག་པ་ལས་འོག་ན་འདུག་པའི་དགེ་སློང་གིས་བླངས་པ་ནི་མ་ཡིན་ནོ། །ལག་པ་བཀན་པས་ཞེས་བྱ་བ་ནི། གང་གིས་ལག་པ་གཉིས་བཀན་པ་དེ་ནི་ལག་པ་བཀན་བ་སྟེ། དེས་བླངས་ན་བྱིན་ལེན་ཡིན་གྱི་གཞན་གྱིས་ནི་མ་ཡིན་ནོ། །ལུས་སམ་ཞེས་བྱ་བ་ནི་ལག་པ་ལ་སོགས་པར་མནོས་པའོ། །དེ་དང་འབྲེལ་བར་ཞེས་བྱ་བ་ནི། ལག་པ་དང་འབྲེལ་བའི་ལྷུང་བཟེད་ལ་སོགས་པར་མནོས་པ་སྟེ། ད་གཉིས་སུ་མནོས་པ་ནི་བྱིན་ལེན་གྱི་གཞན་དུ་མནོས་པ་ནི་མ་ཡིན་ནོ། །གྱེན་དུ་འདེགས་ནུས་པ་ལས་ཞེས་བྱ་བ་ནི། གང་གིས་སྦྱིན་པར་བྱ་བའི་ཟས་དེ་གྱེན་དུ་འདེགས་ནུས་པ་སྟེ། དེ་ལས་མནོས་ན་བྱིན་ལེན་ཡིན་གྱི་དེ་ལས་གཞན་པ་ལས་ནི་མ་ཡིན་ནོ། །བསྙེན་པར་མ་རྫོགས་པ་ལས་ཞེས་བྱ་བ་ནི་བསྙེན་པར་མ་རྫོགས་པ་ལས་མནོས་ན་བྱིན་ལེན་ཡིན་གྱི། དགེ་སློང་ལས་ནི་མ་ཡིན་ནོ། །མི་མ་ཡིན་པ་ལས་ཀྱང་ཞེས་བྱ་བ་ནི། གླང་པོ་ཆེ་ཅང་ཤེས་ལ་སོགས་པ་དག་ལས་ཀྱང་མནོས་ན་བྱིན་ལེན་ཡིན་པའོ། །འདིར་གཞུང་ནི་དགེ་སློང་དགོན་པ་པ་རྣམས་ལ་དགོན་པ་ན་གནས་པའི་གླང་པོ་ཆེ་ཅང་ཤེས་པ་དང༌། རྟ་ཅང་ཤེས་དང༌། སྤྲེའུ་ཅང་ཤེས་དག་གིས་ཤིང་ཏོག་དག་འབུལ་བ་དགེ་སློང་དག་མི་ལེན་པ་དང༌། བཅོམ་ལྡན་འདས་ཀྱིས་བཀའ་སྩལ་པ། གང་ལ་གྱེན་དུ་འདེགས་པ་ཡོད་པ་དེ་ལ་བྱིན་ལེན་ཡང་ཡོད་པས་བཟའ་བར་བྱ་སྟེ། འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །སྦྱིན་པར་འདོད་པས་ཞེས་བྱ་བ་ནི། སྦྱིན་པར་འདོད་པས་བྱིན་པ་མནོས་པ་བྱིན་ལེན་ཡིན་གྱི། སྦྱིན་པར་མི་འདོད་པས་ནི་མ་ཡིན་ཏེ། འདིར་གཞུང་ནི་དབང་མེད་པ་ལ་སོགས་པས་སྦྱིན་པར་བྱེད་པ་ནི་མ་ཡིན་ནོ་ཞེས་གསུངས་པ་ཡིན་ནོ། །ཡན་ལག་གིས་སམ་ཞེས་བྱ་བ་ནི། ལག་པས་སོ། །དེ་དང་འབྲེལ་བས་བྱིན་པ་ཞེས་བྱ་བ་ནི། ལག་པ་དང་འབྲེལ་བའི་རིལ་བ་ལ་སོགས་པ་ནས། ཟས་ལ་སོགས་པ་བྱིན་པའོ། །དགེ་སློང་རྣམ་པ་དེ་ལྟ་བུས་བྱིན་ལེན་སྟོབས་པ་རྣམ་པ་དེ་ལྟ་བུ་ལས་ཟས་ལ་སོགས་པ་མནོས་པ་ནི་བྱིན་ལེན་ཡིན་ནོ།། །།
བམ་པོ་ཉི་ཤུ་དགུ་པ། ཡུལ་གྱི་མི་སྨད་པར་བྱ་བ་ཉིད་ཡིན་ན་དཀྱིལ་འཁོར་གྱི་སྟེང་དུ་ཞོག་ཤིག་ཅེས་བསྟན་ན་ཡང་ངོ་ཞེས་བྱ་བ་ནི། གལ་ཏེ་མི་རྣམས་རང་གི་ཡུལ་ན་སྨད་པར་བྱ་བ་ཉིད་ཡིན་ན། དེའི་ཕྱིར་ཡུལ་གྱི་མི་སྨད་པར་བྱ་བ་ཉིད་དེ་ལ་དཀྱིལ་འཁོར་འདིའི་སྟེང་དུ་ཞོག་ཤིག་ཅེས་དེ་སྐད་བསྟན་ན་དེ་ཡང་བྱིན་ལེན་མནོས་པ་ཡིན་གྱི། ལུས་སམ་དེ་དང་འབྲེལ་པར་མནོས་པ་འབའ་ཞིག་ཏུ་མ་ཟད་དོ། །ལྷུང་བཟེད་དང་དེའི་གཞི་དག་ནི་གཅིག་པ་ཉིད་དོ་ཞེས་བྱ་བ་ནི། ལྷུང་བཟེད་དང་ལྷུང་བཟེད་ཀྱི་གཞི་དག་ནི་འདྲ་བ་ཉིད་དེ། ལྷུང་བཟེད་དུ་མནོས་པ་དང་དེའི་གཞིར་འཇོག་པ་ནི་བྱིན་ལེན་བྱས་པ་ཉིད་ཡིན་ཏེ་གཞན་དུ་ཡང་དེ་བཞིན་ནོ། །སྤྲེའུ་རྣམས་ཀྱི་སྤྱོད་ཡུལ་ནི་ཡལ་ག་ཡིན་པས་དེ་ནས་དེའི་ཕྱིར་མི་འཐོབ་པའི་ས་ཉིད་མ་ཡིན་ནོ་ཞེས་བྱ་བ་ནི། སྤྲེའུ་རྣམས་ཀྱི་སྤྱོད་ཡུལ་ནི་ཡལ་ག་དག་ཡིན་པས་ཡལ་ག་དེ་ནས་སྤྲེའུ་ལས་བྱིན་ལེན་བསྟབས་པ་དེའི་ཕྱིར་མི་འཐོབ་པའི་ས་ཉིད་མ་ཡིན་ཏེ། ཡལ་ག་ལ་གནས་པའི་སྤྲེའུ་ལས་བྱིན་ལེན་བྱར་རུང་བ་ཁོ་ན་ཡིན་ནོ། །ཤིང་ཏོག་དག་མན་ཤེལ་དང་ཁྲི་དང་ཁྲིའུ་དང་ཐུ་བ་དང་ལྷུང་བཟེད་ཀྱི་གཞི་དག་གིས་བྱིན་ལེན་མནོད་དུ་མི་རུང་བ་ཉིད་མ་ཡིན་ནོ་ཞེས་བྱ་བ་ནི། ཤིང་ཏོག་དག་མན་ཤེལ་དང་ཁྲི་དང༌། ཁྲིའུ་དང་ཐུ་བ་དང་ལྷུང་བཟེད་ཀྱི་གཞི་བྱེད་པར་གྱུར་པ་དེ་དག་གི་བྱིན་ལེན་མནོད་དུ་མི་རུང་བ་ཉིད་མ་ཡིན་ཏེ། བྱིན་ལེན་མནོད་དུ་རུང་བ་ཉིད་ཡིན་ནོ། །དེ་དག་གནས་པ་དག་གིས་ཅང་མི་སྨྲ་བས་སོ་སོར་བརྟག་པར་བྱའོ་ཞེས་བྱ་བ་ནི། ཤིང་ཏོག་དེ་དག་གནས་པ་སློབ་མ་དང་ཉེ་གནས་དག་གིས་ཅང་མི་སྨྲ་བས་སོ་སོར་བརྟག་པར་བྱའོ། །སྙོམས་པར་འདྲིམ་པར་བྱེད་པ་མོས་པར་བྱའོ་ཞེས་བྱ་བ་ནི། གང་སྙོམས་པར་འདྲིམ་པའི་ཕྱིར་འཇུག་པ་དེ་ནི་སྙོམས་པར་འདྲིམ་པར་བྱེད་པ་སྟེ། དེ་མོས་པར་བྱ་བ་མོས་པ་བསྐྱེད་པར་བྱའོ། །འདིར་གཞུང་ནི་དེ་འདྲིམ་པའི་ཕྱིར་ཁྱིམ་པ་རྣམས་ཤིང་ཏོག་དག་མི་སྙོམས་པར་འདྲིམ་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་ཚུལ་དག་འདྲིམ་དུ་གཞུག་པར་བྱའོ། །དགེ་ཚུལ་དག་ཀྱང་མི་སྙོམས་པར་འདྲིམ་པར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་གིས་ལག་པ་དག་བསྙལ་ཏེ་བྱིན་ལེན་བྱས་
ནས་བྲིམ་པར་བྱའོ་ཞེས་གསུངས་པ་ཡིན་ནོ། །དགེ་སློང་བྱིན་ལེན་བྱས་པས་བྲིམ་པ་ཉིད་ནི་རུང་བ་ཉིད་ཡིན་ནོ་ཞེས་བྱ་བ་ནི། དགེ་སློང་ཟས་བྱིན་ལེན་བྱས་པས་བྲིམ་པ་ཉིད་ནི་རུང་བ་ཉིད་ཡིན་ཏེ། ཚུལ་དང་མི་མཐུན་པ་ཉིད་མ་ཡིན་ནོ། །ཞུན་མར་དང༌། འབྲུ་མར་དང༌། སྤྲང་རྩི་དང༌། བུ་རམ་གྱི་དབུ་བའི་བུམ་པ་དག་འདྲིམ་ན་རྩྭ་དང་ལོ་མ་དག་ལ་སོགས་པ་དག་གིས་གོས་དག་བསྐྱབ་པར་བྱའོ་ཞེས་བྱ་བ་ནི། ཞུན་མར་དང༌། འབྲུ་མར་དང༌། སྦྲང་རྩི་དང༌། བུ་རམ་གྱི་དབུ་བའི་ཕྲུ་བ་དག་འདྲིམ་པར་བྱེད་པའི་དགེ་སློང་གིས་རྩྭ་དང་འདབ་མ་ལ་སོགས་པ་དག་གིས་གོས་དག་བསྐྱབ་པར་བྱ་སྟེ། བར་དུ་གོས་མ་རུང་བར་མི་འགྱུར་བར་བྱ་བའི་ཕྱིར་གཡོགས་པར་བྱའོ། །བྲིམ་པར་བྱ་བ་གཅེས་པ་དང་བར་མ་དང་ཐ་མ་དག་སོ་སོར་བྱའོ་ཞེས་བྱ་བ་ནི། བྲིམ་པར་བྱ་བའི་ཟས་རྒུན་ལ་སོགས་པ་གཅེས་པ་དང༌། བར་མ་དང་ཐ་མ་དག་སོ་སོར་བྲིམ་པར་བྱ་སྟེ། མི་བསྲེ་བར་བྲིམ་པར་བྱའོ་ཞེས་བྱ་བའི་ཐ་ཚིག་གོ །ཨ་མྲ་ཞིམ་པོ་རྣམས་ལོགས་ཤིག་ཏུ་བསལ་ཏེ་བྲིམ་པར་བྱའོ་ཞེས་བྱ་བ་ནི། ཨ་མྲ་ཞིམ་པོ་མཆོག་ལོགས་ཤིག་ཏུ་བསལ་ཏེ་བྲིམ་པར་བྱ་བ་སྟེ། མདོ་འདི་ནི་མི་སྙོམས་པ་ཉིད་བསལ་བའི་ཕྱིར་བྱས་སོ། །དེ་ཡང་མདོ་སྔ་མའི་སྤྲོས་པ་ཡིན་ཏེ། འདི་ལྟར་ཨ་མྲ་གཅེས་པ་ཞིམ་པོ་དག་དང༌། བར་མ་དང་ཐ་མ་དང་འབྲིང་དང་མི་ཞིམ་པ་དག་ཡོད་པའི་ཕྱིར་རོ། །འདྲིམ་པར་བྱེད་པའི་ནི་མཁན་པོ་འམ་སློབ་དཔོན་གྱིས་མནོད་པར་བྱའོ་ཞེས་བྱ་བ་ནི། འདྲིམ་པར་བྱེད་པའི་སྐལ་བ་ནི་མཁན་པོ་འམ་སློབ་དཔོན་གྱིས་མནོད་པར་བྱ་བའོ། །མི་འཐོབ་པ་ཐོབ་ན་དྲུང་ན་འདུག་པས་སོ་ཞེས་བྱ་བ་ནི། མཁན་པོ་འམ་སློབ་དཔོན་གྱིས་འདྲིམ་པར་བྱེད་པའི་སྐལ་བ་མནོད་པ་ན་དེ་གཉིས་རྒན་པའི་ཕྱིར་འདྲིམ་པར་བྱེད་པས་མི་འཐོབ་པ་འཐོབ་པར་མི་རིགས་པ་ཤིན་ཏུ་བསོད་པ་དག་འཐོབ་པ་ལྟ་ན་དེ་ནི་མི་འཐོབ་པ་ཐོབ་པ་ཡིན་པས་མི་འཐོབ་པ་ཐོབ་ན་དེ་མི་རིགས་པས་དེའི་ཚེ་མཁན་པོ་དང་སློབ་དཔོན་གྱིས་མི་མནོད་པར་འདྲིམ་པར་བྱེད་པ་རང་གི་དྲུང་ན་འདུག་པའི་གྲོགས་གང་ཡིན་པ་དེས་མནོད་པར་བྱའོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། དེ་དག་གི་ནི་མཁན་པོ་དང་སློབ་དཔོན་དག་གིས་མནོད་པར་བྱའོ། །དེ་དག་
གིས་བསོད་པ་དག་འཐོབ་ནས། བཅོམ་ལྡན་འདས་ཀྱིས་བཀའ་སྩལ་པ། དེ་དག་གི་དྲུང་ན་འདུག་པ་དག་གིས་མནོད་པར་བྱའོ་ཞེས་གསུངས་པ་ཡིན་ནོ། །དུ་མ་ཉིད་ཡིན་ན་སྟན་ལས་མ་འཕགས་པས་ཇི་ཙམ་ལེན་ནུས་པའོ་ཞེས་བྱ་བ་ནི། འདྲིམ་པར་བྱེད་པ་དུ་མ་ཉིད་ཡིན་ན་དྲུང་ན་འདུག་པའི་དགེ་སློང་སྟན་ལས་མ་འཕགས་པ་གང་ཡིན་པ་དེས་དེ་དག་གི་སྐལ་བ་ཇི་ཙམ་ལེན་ནུས་པ་དེ་ཙམ་མནོད་པར་བྱ་ཞིང༌། གཞན་ནི་གཞན་དག་གིས་མནོད་པར་བྱའོ། །འདྲིལ་བ་ནི་རང་གནས་ནས་མ་འཕགས་པས་ལེན་ནུས་པ་འདི་ཡིན་ན་བྱིན་ལེན་མ་ཞིག་གོ་ཞེས་བྱ་བ་ནི། བྱིན་ལེན་བྱས་པའི་ཟས་འདྲིལ་ཞིང་གནས་ནས་གུད་དུ་སོང་བ་གང་ཡིན་པ་དེ་ནི་རང་སྟན་ལས་མ་འཕགས་པས་ལེན་ནུས་པ་ཉིད་ཡིན་ན་བྱིན་ལེན་མ་ཞིག་པ་ཡིན་ལ་གཞན་དུ་ན་ཞིག་པ་ཁོ་ན་ཡིན་ནོ། །སྦྲང་བུ་དང་གྲོག་སྦུར་ལ་སོགས་པ་དག་གིས་རེག་པ་ཡང་ངོ་ཞེས་བྱ་བ་ནི། སྦྲང་བུ་དང་གྲོག་སྦུར་ལ་སོགས་པ་དག་གིས་རེག་པས་ཀྱང་བྱིན་ལེན་མ་ཞིག་གོ །སོགས་པའི་སྒྲས་ནི་བྱི་ཕྲུག་བྱུང་མ་ཐག་པའི་ཚད་པས་ཀྱང་ཆུང་བ་ནི་སྐྱེ་བ་པོ་ཕྲ་མོ་དག་བསྡུའོ། །དགེ་སློང་གིས་མ་བཏང་བ་ལ་གཞན་གྱིས་ཀྱང་ངོ་ཞེས་བྱ་བ་ནི། དགེ་སློང་གིས་འཛིན་པ་མ་བཏང་བ་ལ་མི་ལ་སོགས་པ་གཞན་གྱིས་རེག་པས་ཀྱང་བྱིན་ལེན་མ་ཞིག་པ་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་བཀའ་སྩལ་པ། དེ་ཉིད་ཀྱིས་བྱིན་ལེན་བྱ་ཞིང་དེ་ལ་ཡང་བགོ་བཤའ་བྱས་ཏེ་བཟའ་བར་བྱའོ་ཞེས་གསུངས་པ་ཡིན་ནོ། །བྱི་བས་ནི་ཞིག་པར་བྱེད་དོ་ཞེས་བྱ་བ་ནི། བྱི་བས་རེག་པས་ནི་བྱིན་ལེན་ཞིག་པར་བྱེད་དོ། །འདིར་གཞུང་ནི་དེ་ལྟར་སྤྲང་བུ་དང་གྲོག་སྦུར་དང༌། བྱི་བའི་བར་དག་བྱུང་ནས། བཅོམ་ལྡན་འདས་ཀྱིས་བཀའ་སྩལ་པ། བྱི་མང་ལ་སོགས་པའི་བྱི་བ་དག་གིས་རེག་པ་ནི་བྱིན་ལེན་བྱས་ཏེ་བཟའ་བར་བྱའོ་ཞེས་གསུངས་པ་ཡིན་ནོ། །བྱིན་ལེན་བྱས་པའི་བྱིན་ལེན་སྟོབས་པ་ནི་མི་རིགས་པ་ཉིད་མ་ཡིན་ནོ་ཞེས་བྱ་བ་ནི། བྱིན་ལེན་བསྟབས་ཟིན་པ་ལ་ཡང་སྟོབས་པར་བྱེད་པ་ནི་མི་རིགས་པ་ཉིད་མ་ཡིན་ཏེ། རིགས་པ་ཁོ་ན་ཡིན་ནོ། དེ་ནི་འདི་ལ་གཞན་དག་གིས་རེག་པར་མ་གྱུར་ཏམ་སྙམ་པའི་ཐེ་ཚོམ་བསལ་བའི་ཕྱིར་རོ། །ཤེས་
གཙོ་བོ་ཞེས་བྱ་བ་ནི། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་བྱིན་ལེན་མ་བསྟབས་པ་ཉིད་ལའོ་ཞེས་བྱ་བ་སྨྲས་ཏེ། བྱིན་ལེན་མ་བསྟབས་པའི་དངོས་པོ་ནི་བྱིན་ལེན་མ་བསྟབས་པ་ཉིད་དེ་དེ་ལའོ། །གལ་ཏེ་འདི་ལྟར་ཟས་འདི་བྱིན་ལེན་མ་བསྟབས་པ་ཡིན་ནོ་ཞེས་བྱ་བར་ཤེས་ན་ཞེས་བྱ་བའི་ཐ་ཚིག་གོ །གང་གིས་བྱིན་ལེན་མ་བསྟབས་པ་ཉིད་ལ་ཞེ་ན། དེའི་ཕྱིར། ཆུ་དང་སོ་ཤིང་མ་གཏོགས་པར་བཟའ་བར་བྱ་བའི་འོ་ཞེས་བྱ་བ་སྨྲས་ཏེ། ཆུ་དང་སོ་ཤིང་མ་གཏོགས་པ་དེ་ལས་གཞན་པའི་བཟའ་བར་བྱ་བའི་བྱིན་ལེན་མ་བསྟབས་པ་ཉིད་དུ་ཤེས་ནའོ། །འདིར་ཆུ་དང་སོ་ཤིང་ཞེས་སྨོས་པས་ནི་དཔེ་ཙམ་དུ་ཟད་དེ་ཁ་སྦྱང་བའི་འདག་རྫས་དང་ལྕི་བ་དག་ཀྱང་འདིས་བསྡུས་པར་རིག་པར་བྱའོ། །དེ་ཡང་ཁ་སྦྱང་བའི་ཕྱིར་དེ་སྐད་སྨྲས་པ་ཡིན་གྱི། མགུལ་དུ་མིད་པའི་ཕྱིར་ནི་མ་ཡིན་ཏེ། མགུལ་དུ་མིད་པ་ལ་ནི་ལྟུང་བྱེད་ཁོ་ནར་འགྱུར་རོ། །ཁར་རོ་ཞེས་བྱ་བ་ནི། རྣ་བ་ལ་སོགས་པ་གཞན་གྱིས་མ་ཡིན་ནོ། །ཇི་ཞིག་རྗེས་སུ་བསྒྲུབ་ན་བཟའ་བར་བྱ་བ་བྱེད་པ་པོ་ཡིན་ཞེ་ན། དེའི་ཕྱིར། ཟོས་ནའོ་ཞེས་བྱ་བ་སྨྲས་ཏེ། བཅའ་བར་བྱ་བ་དང་བཟའ་བར་བྱ་བ་ལ་སོགས་པའོ། །ཅི་ཡུལ་ཐམས་ཅད་དུ་འམ་ཞེ་ན་དེའི་ཕྱིར། བྱང་གི་སྒྲ་མི་སྙན་མ་གཏོགས་པར་རོ་ཞེས་བྱ་བ་སྨྲས་ཏེ། བྱང་གི་སྒྲ་མི་སྙན་གྱི་གླིང་མ་གཏོགས་པར་རོ། །འདིར་གཞུང་ནི་ཞུ་བ་ལས་ཀྱང་བྱང་གི་སྒྲ་མི་སྙན་གྱི་གླིང་ན་ནི་ཟས་མ་བྱིན་པར་ཁའི་སྒོ་ནས་ཟ་བར་བྱེད་དེ། གལ་ཏེ་བྱང་གི་སྒྲ་མི་སྙན་པའི་དུས་སུ་བྱིན་གྱིས་རློབ་ན་ནི་ལྟུང་བ་མེད་དོ། །ཇི་སྟེ་བྱིན་གྱིས་མི་རློབ་ན་ནི་ཉེས་བྱས་སོ་ཞེས་གསུངས་པ་ཡིན་ནོ། །ནད་པས་བསྙེན་པར་རྫོགས་པ་མེད་ན་བསྙེན་པར་མ་རྫོགས་པ་ལས་ཟན་མནོད་པར་བྱའོ་ཞེས་བྱ་བ་ནི། ནད་པའི་ཁར་ཟན་མནོད་པར་བསྙེན་པར་རྫོགས་པར་མེད་ན། བསྙེན་པར་མ་རྫོགས་པ་ལས་ཀྱང་མནོད་པར་བྱའོ། །མི་ན་པས་ནི་བསྙེན་པར་རྫོགས་པ་ཡོད་དུ་ཟིན་ཀྱང་མི་སྡུག་པའི་ཕྱིར་འདི་མི་བྱ་བ་ཉིད་དོ། །བསྙེན་པར་མ་རྫོགས་པས་བཟའ་བར་བྱའོ་ཞེས་བྱ་བ་ནི། ནད་པ་ཁོ་ནས་ཏེ་ནད་པ་བསྙེན་པར་མ་རྫོགས་པས་བསྙེན་པར་རྫོགས་
པ་དག་གིས་བསྟབས་པ་བཟའ་བར་བྱའོ། །བྱིན་ལེན་མ་བྱས་པར་ཟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བསོད་པ་སློང་བའི་ལྟུང་བྱེད་སྨྲ་བར་འདོད་ནས། འོ་མ་དང༌། ཞོ་དང༌། མར་དང༌། ཉ་ཤ་དང༌། ཤ་སྐམ་ལྟ་བུ་ནི་ཟས་བསོད་པ་ཡིན་ནོ་ཞེས་བྱ་བ་སྨྲས་ཏེ། འོ་མ་དང༌། ཞོ་དང༌། མར་དང༌། ཉ་ཤ་དང༌། ཤ་དང༌། ཤ་སྐམ་ལྟ་བུ་ནི་ཟས་བསོད་པ་ཡིན་ནོ། །ལྟ་བུ་ཞེས་བྱ་བའི་སྒྲས་ནི་རྣམ་པ་ཞེས་པའི་དོན་ཏེ་རྣམ་པ་དེ་ལྟ་བུ་དག་དང་མར་ཁུ་ལ་སོགས་པ་དག་ནི་ཟས་བསོད་པ་ཡིན་ནོ། །དེ་ནི་བྱེད་པ་པོའོ་ཞེས་བྱ་བ་ནི། ཟས་བསོད་པ་དེ་ནི་ལྟུང་བ་ཉིད་བྱེད་པ་པོ་ཡིན་ནོ། །སྦྱིན་པར་བྱེད་པ་ཉེ་དུ་མ་ཡིན་པ་ཁྱིམ་པ་ཉིད་ཀྱང་ངོ་ཞེས་བྱ་བ་ལ། ཉེ་དུ་མ་ཡིན་པའི་ཁྱིམ་པ་ནི། ཉེ་དུ་མ་ཡིན་པའི་ཁྱིམ་པ་སྟེ། དེའི་དངོས་པོ་ནི་དེ་ཉིད་དོ། །གལ་ཏེ་སྦྱིན་པར་བྱེད་པ་ཉེ་དུ་མ་ཡིན་པ་ཁྱིམ་པ་ཉིད་ཡིན་ན་དེ་ཡང་ལྟུང་བ་འདིའི་བྱེད་པ་པོ་ཡིན་ནོ། ཉེ་དུ་མ་ཡིན་པ་ཞེས་སྨོས་པ་ལ་གཞུང་ནི་ཞུ་བ་ལས། བཙུན་པ་དགེ་སློང་གིས་བྲོ་མ་འཚལ་བར་བདག་ཉིད་ཀྱི་སླད་དུ་ཁྱིམ་དག་ནས་ཟས་བསོད་པ་བསླངས་ཏེ་འཆའ་འམ་འཚལ་ལ་དེ་ལ་ལྟུང་བར་མི་འགྱུར་བ་མཆིས་སམ། ཡོད་དེ་ཉེ་དུ་ལས་བསླངས་ཏེ་ཟོས་ན་ལྟུང་བ་མེད་དོ། །གལ་ཏེ་རྟགས་འདི་ལ་སྦྱིན་བདག་ཡིན་ན་དེའི་ཚེ་ཡང་ལྟུང་བ་མེད་དོ། །གལ་ཏེ་ཕྱི་རོལ་པའི་རབ་ཏུ་བྱུང་བ་སྦྱིན་བདག་ཡིན་ན་ནི་ཉེས་བྱས་སོ་ཞེས་གསུངས་པ་ཡིན་ནོ། །གང་གི་ཚེ་དེ་གཉིས་བྱེད་པ་པོ་ཉིད་ཡིན་ཞེ་ན། དེའི་ཕྱིར། རང་གིས་བསླངས་ཏེ་ཟོས་ནའོ་ཞེས་བྱ་བ་སྨྲས་ཏེ། རང་གིས་བླངས་ཤིང་ཟོས་ན་སྟེ། །གལ་ཏེ་འོ་མ་ལ་སོགས་པ་དག་གིས་བསླངས་ཏེ་རང་གིས་ཟོས་ན་ཞེས་བྱ་བའི་ཐ་ཚིག་གོ །ཟ་བ་ལས་གཞན་པ་སློང་བ་ཙམ་ལ་ཁ་ན་མ་ཐོ་བ་ཅིར་འགྱུར་ཞེ་ན་དེའི་ཕྱིར། མི་ན་བས་བསླངས་པ་དང་སློང་དུ་བཅུག་པ་ཉིད་དེ་ལ་ནི་ཉེས་བྱས་ཀྱིའོ་ཞེས་བྱ་བ་སྨྲས་ཏེ། མི་ན་བས་རང་གིས་བསླངས་པ་ཙམ་ལ་ཡང་དེ་གཉིས་ཉེས་བྱས་ཁོ་ནའི་བྱེད་པ་པོ་ཡིན་ལ། མིན་པར་གཞན་སློང་དུ་བཅུག་པ་ཉིད་ཡིན་ན་སློང་དུ་བཅུག་སྟེ་ཟོས་པ་དེ་ལ་ནི་དེ་གཉིས་ཉེས་བྱས་ཀྱི་བྱེད་པ་པོ་ཡིན་ནོ། །ན་བ་ལ་ནི་ཐམས་ཅད་དུ་ལྟུང་བ་མེད་དོ། །འདི་སྐད་བསྟན་ཏེ། མི་ན་བར་གང་གི་ཚེ་རང་སློང་
ངམ་གཞན་སློང་དུ་བཅུག་སྟེ་ཐོབ་ནས་ཟས་བསོད་པ་ཟ་བར་མི་བྱེད་ན་དེའི་ཚེ་ཉེས་བྱས་སོ། །མི་ན་བར་གང་གི་ཚེ་གཞན་སློང་དུ་བཅུག་ཀྱང་ཟ་བར་མི་བྱེད་ན་ནི་དེའི་ཚེ་སྦྱོར་བ་ལས་བྱུང་བའི་ཉེས་བྱས་ཕྲ་མོར་འགྱུར་རོ། །ན་བ་ལ་ནི་ཐམས་ཅད་དུ་ཅིར་ཡང་མི་འགྱུར་རོ། །མི་ན་བ་ཐམས་ཅད་ལ་དེ་གཉིས་ཁ་ནམ་ཐོ་བ་འདིའི་བྱེད་པ་པོ་ཡིན་ནམ་ཞེ་ན་དེའི་ཕྱིར་ཅི་བདེར་བསྟབས་པ་མ་བྱས་པ་ལའོ་ཞེས་བྱ་བ་སྨྲས་ཏེ། གང་ལས་སློང་བར་བྱེད་པ་དེས་དགེ་སློང་གང་ལ་ཅི་བདེ་བའི་བདག་ཉིད་དུ་བསྟབས་པ་མ་བྱས་པ་དེ་ནི་ཅི་བདེར་བསྟབས་པ་མ་བྱས་པ་སྟེ། དགེ་སློང་མི་ན་བདེ་ལ་དེ་གཉིས་ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །འདིར་གཞུང་ནི། དགེ་སློང་བསོད་སྙོམས་ལ་རྒྱུ་བ་ཁྱིམ་དག་ཏུ་ཉེ་བར་ཕྱིན་པ་ན་བུད་མེད་ཟས་ཁྱེར་ཏེ་ཕྱིར་བྱུང་བས་དགེ་སློང་ཅང་མི་སྨྲ་བས་སམ། ཕྱིར་སྤོང་བ་ལ་བུད་མེད་ཀྱིས་འཕགས་པ་འོ་ན་ཇི་སློང་ཞེས་འདྲི་ན་བསྟབས་པ་ཡིན་པར་བརྗོད་པར་བྱ་སྟེ་ཅི་འདོད་པ་བསླངས་ཀྱང་ལྟུང་བ་མེད་དོ། །སྦྱིན་བདག་གིས་ཅི་བདེར་བྱས་པར་གྱུར་ན་ཡང་ལྟུང་བ་མེད་དོ་ཞེས་གསུངས་པ་ཡིན་ནོ། །དེའི་ཕྱིར་ངན་པ་འམ་བསོད་པའམ་ཐ་མལ་པའམ་བཟང་པོ་འཐོབ་པ་ནི་གལ་ཏེ་བསླངས་ན་ཡང་ངོ་ཞེས་བྱ་བ་ནི། གང་གི་ཕྱིར་འདིར་བསྟབས་པ་ཁོ་ན་འབའ་ཞིག་ལྟུང་བ་ལས་འབྱིན་པ་ཡིན་པ་དེའི་ཕྱིར། དགེ་སློང་བསྟབས་པ་མ་བྱས་པ་དེས་ངན་བའམ་བསོད་པའམ་ཐ་མལ་པའམ། བཟང་པོ་འཐོབ་པ་མཐོང་བ་ན་གལ་ཏེ་ཟས་བསོད་པའི་ཡུལ་ལ་སློང་བར་བྱེད་ན། དེ་ལྟ་ན་ཡང་ཟས་བསོད་པའི་མཚན་ཉིད་དང་ཉེ་དུ་མ་ཡིན་པ་ཁྱིམ་པའི་མཚན་ཉིད་ཀྱི་ཡན་ལག་དེ་གཉིས་བླངས་ན་ནི་ཉེས་བྱས་ཀྱི་བྱེད་པ་པོ་ཡིན་ལ། དེ་སྔོན་དུ་བཏང་སྟེ་ཟོས་ན་ནི་དངོས་གཞིའི་བྱེད་པ་པོ་ཡིན་ནོ། །ངན་པ་ཞེས་བྱ་བ་ནི། འོ་མ་ལ་སོགས་པ་ལས་གཞན་པ་འབྲུ་མར་ལ་སོགས་པའོ། །བསོད་པ་ཞེས་བྱ་བ་ནི། འོ་མ་ལ་སོགས་པའོ། །ཐ་མལ་པ་ཞེས་བྱ་བ་ནི། འོ་མ་དེ་ཉིད་ར་ལ་སོགས་པའི་ཡིན་པའོ། །བཟང་པོ་ཞེས་བྱ་བ་ནི། འོ་མ་དེ་ཉིད་བ་ལ་སོགས་པའི་ཡིན་པའོ། །ཡང་ན་ངན་པ་ཞེས་བྱ་བ་ནི་རའི་འོ་མའོ། །བསོད་པ་ཞེས་བྱ་བ་ནི་འབྲས་ཀྱི་འོ་ཐུག་མར་དང་ཤ་ཁ་ར་དང་བསྲེས་པའོ། །ཐ་མལ་པ་ཞེས་བྱ་བ་ནི་བའི་འོ་མའོ། །བཟང་པོ་ཞེས་བྱ་བ་ནི་གོང་མ་སྲེག་ལ་སོགས་པའི་
ཤ་བལ་པོ་སེའུའི་ཁུ་པ་ན་ལེ་ཤམ་ལ་སོགས་པ་སྤོད་ཀྱི་བྱེ་བྲག་དག་དང་སྦྱར་བའོ། །ངན་པ་འདི་ལ་ནི་ཕྱེད་ཉིད་དོ་ཞེས་བྱ་བ་ནི། ཟས་བསོད་པ་བླངས་ཏེ། ཟ་བ་ལ་ལྟུང་བ་རྣམ་པར་གཞག་པ་བྱས་པ་གང་ཡིན་པ་དེ་ངན་པ་རང་གིས་བླངས་ཏེ་ཟ་བ་འདི་ལ་ནི་ཕྱེད་ཉིད་དེ་སྦྱོར་བ་ལ་ཡང་ཉེས་བྱས་ཡིན་ལ། དངོས་གཞི་ལ་ཡང་ཉེས་བྱས་ཡིན་ནོ། །གཞན་སློང་དུ་བཅུག་པ་ཟོས་ན་ནི་ཉེས་བྱས་ཕྲ་མོར་འགྱུར་རོ། །འདིར་ལྟུང་བ་ནི། དགེ་སློང་གིས་འོ་མ་འཐོབ་པ་ན་ཞོ་སློང་བར་བྱེད་ན་དེ་སློང་བ་ལ་ནི་ཉེས་བྱས་ལ་འཐུངས་ན་ནི་ལྟུང་བྱེད་དོ། །དགེ་སློང་གིས་བསོད་པ་འཐོབ་པ་ན་ངན་པ་སློང་བར་བྱེད་ན་དེ་སློང་བ་ལ་ཡང་ཉེས་བྱས་ལ་ཟོས་པ་ལ་ཡང་ཉེས་བྱས་སོ། །ངན་པ་མི་འཐོབ་པ་ཉིད་ན་ནི་ཐམས་ཅད་དུ་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །ཅི་བདེར་བསྟབས་པའི་མཚན་ཉིད་སྨྲ་བར་འདོད་ནས། ཟས་ཁྱེར་ཏེ་ཕྱིར་བྱུང་བས་ཅང་མི་སྨྲ་པའམ་ཕྱིར་སྤང་བ་ལ་འོ་ན་ཅི་སློང་ཞེས་དྲིས་པ་ནི་ཅི་བདེར་བསྟབས་པ་ཉིད་ཡིན་ནོ་ཞེས་བྱ་བ་སྨྲས་ཏེ། ཟས་ཁྱེར་ཏེ་ཕྱིར་བྱུང་བའི་སྦྱིན་པ་པོས་དགེ་སློང་ཅང་མི་སྨྲ་བའམ། ཁོ་བོ་ལ་འདི་མི་དགོས་སོ་ཞེས་ཕྱིར་སྤོང་བ་ལ་གལ་ཏེ་དེའི་ཚེ་འདི་སྐད་ཅེས་འོ་ན་ཅི་སླང་ཞེས་དྲི་བར་གྱུར་ན་དེ་སྐད་དྲིས་པ་དེ་ནི་ཅི་བདེར་བསྟབས་པ་ཡིན་ནོ། །བསོད་པ་སློང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་སྨྲ་བར་འདོད་ནས། རང་སྤྱད་པའི་དོན་གཉིས་ལ་འཇུག་པ་དང་འཇུག་ཏུ་འཛུད་པ་དག་ལའོ་ཞེས་བྱ་བ་སྨྲས་ཏེ། རང་ཉིད་ཉེ་བར་སྤྱད་པ་ནི་རང་སྤྱད་པའོ། །དེ་ཉིད་དོན་ཡིན་ཏེ་དེའི་དངོས་པོ་ནི་དེ་ཉིད་དོ། །དེ་ལ་བདག་ཉིད་འཇུག་པ་དང་གཞན་འཇུག་ཏུ་འཛུད་པ་དག་གང་ཡིན་པ་དེ་གཉིས་ལའོ། །འདི་སྐད་བསྟན་ཏེ། བདག་ཉིད་ཀྱི་དོན་དུ་སྲོག་ཆགས་དང་བཅས་པའི་ཆུ་ལ་སོགས་པ་སྤྱོད་པ་ལ་རང་འཇུག་པ་དང་གཞན་འཇུག་ཏུ་འཛུད་པར་བྱེད་ན་རང་སྤྱོད་པའི་དོན་ཉིད་ལ་རང་འཇུག་པ་དང༌། གཞན་འཇུག་ཏུ་འཛུད་པར་བྱེད་པའི་ལྟུང་བྱེད་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །གཞན་སྤྱད་པའི་དོན་ཉིད་ལ་འཇུག་པ་དང་གཞན་འཇུག་ཏུ་འཛུད་པ་དེ་གཉིས་ནི་སྔར་སྲོག་ཆགས་ངང་བཅས་པ་ལ་སྤྱོད་པའི་ལྟུང་བྱེད་བསྟན་པ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །ཤེས་
གཙོའོ་ཞེས་བྱ་བ་ནི། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར་སྲོག་ཆགས་དང་བཅས་པ་ཉིད་ལའོ་ཞེས་བྱ་བ་སྨྲས་ཏེ། ཆུ་ལ་སོགས་པ་གང་ལ་སྲོག་ཆགས་དག་དང་ལྷན་ཅིག་འཇུག་པ་དེ་ནི་སྲོག་ཆགས་དང་བཅས་པའོ། །དེའི་དངོས་པོ་ནི་དེ་ཉིད་དོ། །སྲོག་ཆགས་དང་བཅས་པ་ཉིད་དེ་ལ་དེར་འདུ་ཤེས་པ་ནི་ཁ་ན་མ་ཐོ་བ་འདིའི་བྱེད་པ་པོ་ཉིད་ཡིན་ནོ། །གལ་ཏེ་ཆུ་ལ་སོགས་པ་ཡང་སྲོག་ཆགས་དང་བཅས་པ་ཉིད་ཡིན་ལ། དགེ་སློང་གིས་ཀྱང་དེ་ལྟར་ཤེས་བཞིན་དུ་སྤྱད་ན་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །གང་ཞིག་སྲོག་ཆགས་དང་བཅས་པ་ཉིད་ལ་ཡིན་ཞེ་ན། དེའི་ཕྱིར་ཆུ་དང༌། ཞུན་མར་དང༌། འབྲུ་མར་དང༌། སྦྲང་རྩི་དང༌། བུ་རམ་གྱི་དབུ་བ་དང༌། འོ་མ་དང༌། ཞོ་དང༌། མར་དང༌། ཚྭ་དང༌། འབྲུའི་ཚ་དང༌། ཞོ་ག་ཆུ་དང༌། རྩབ་མོ་དང༌། ཤིང་ཏོག་དང༌། བཅའ་བར་བྱ་བ་ལ་སོགས་པར་ཉེ་བར་སྤྱད་པར་བྱའོ་ཞེས་བྱ་བ་སྨྲས་ཏེ། ཆུ་དང༌། ཞུན་མར་དང༌། འབྲུ་མར་དང༌། སྦྲང་རྩི་དང༌། བུ་རམ་གྱི་དབུ་བ་དང༌། འོ་མ་དང༌། ཞོ་དང༌། མར་དང༌། ཚྭ་དང༌། འབྲུའི་ཚ་དང༌། ཞོ་ག་ཆུ་དང༌། རྩ་བ་མོ་དང༌། ཤིང་ཏོག་དང༌། བཅའ་བར་བྱ་བ་ལ་སོགས་པ་ཉེ་བར་སྦྱར་བར་བྱ་བ་སྲོག་ཆགས་དང་བཅས་པ་ཉིད་ལའོ། །ཉེ་བར་སྤྱར་བར་བྱ་བ་དེ་དག་སྲོག་ཆགས་ཇི་ལྟ་བུ་དག་གིས་སྲོག་ཆགས་དང་བཅས་པ་ཉིད་ལ་ཡིན་ཞེ་ན། དེའི་ཕྱིར་སྣང་བ་དག་གིས་སོ་ཞེས་བྱ་བ་སྨྲས་ཏེ། གང་དག་ལྟར་ནུས་པ་དེ་དག་གི་ནི་སྣང་བ་དག་སྟེ། དེའི་ཕྱིར་དེ་དག་གིས་སྲོག་ཆགས་ངང་བཅས་པ་ཉིད་ལ་ཡིན་གྱི། མི་སྣང་བ་དག་གིས་སྲོག་ཆགས་དང་བཅས་པ་ཉིད་ལ་ནི་མ་ཡིན་ནོ། །གང་གི་ཚེ་སྲོག་ཆགས་དང་བཅས་པ་ལ་སྤྱོད་པ་དེ་ཁ་ན་མ་ཐོ་བ་འདིའི་བྱེད་པ་པོ་ཉིད་ཡིན་ཞེ་ན། དེའི་ཕྱིར་ཤི་ནའོ་ཞེས་བྱ་བ་སྨྲས་ཏེ། སྲོག་ཆགས་དག་གི་སྲོག་གི་དབང་པོ་འགག་པའི་མཚན་ཉིད་ཀྱི་སྐད་ཅིག་མ་གཉིས་པ་ལའོ། །ཅི་སྲོག་ཆགས་དུ་མ་ཤི་ན་ཡང་ཁ་ན་མ་ཐོ་བ་གཅིག་གི་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར་སྲོག་ཆགས་རེ་རེའིའོ་ཞེས་བྱ་བ་སྨྲས་ཏེ། དུད་
འགྲོའི་སྐྱེ་གནས་སུ་སྐྱེས་པའི་སྲོག་ཆགས་ཇི་སྙེད་སྦྱོར་བའི་དེའི་དབང་གིས་སྲོག་བཅད་དེ་དུས་བྱས་ན་དེ་སྙེད་ཁོ་ནའི་ལྟུང་བྱེད་དུ་འགྱུར་ཏེ། དངོས་གཞི་འདི་ནི་ངེས་པ་ཡིན་ནོ། །སྦྱོར་བ་ནི་རྩོམ་པའི་དབང་གིས་མ་ངེས་ཏེ། རྩོམ་པ་གཅིག་གིས་སྔར་མང་པོ་དེ་དག་ཤི་བར་གྱུར་ན་ཡང་སྦྱོར་བའི་ཁ་ན་མ་ཐོ་བ་གཅིག་ཁོ་ནའི་ཡིན་ལ། ཇི་སྟེ་སྲོག་ཆགས་ཇི་སྙེད་པ་རྩོམ་པ་ལ་ཡང་དེ་སྙེད་ཀྱིས་བསད་ན་ནི་སྦྱོར་བ་ཡང་དེ་སྙེད་ཁོ་ནར་སོ་སོར་འགྱུར་བས། རྩོམ་པ་ཇི་སྙེད་པ་དེ་སྙེད་ཁོ་ནའི་སྦྱོར་བའི་ཁ་ན་མ་ཐོ་བར་འགྱུར་རོ། །སྤྱོད་པ་ནི་ལུས་ཀྱིར་ཉེ་བར་སྤྱོད་པའོ་ཞེས་བྱ་བ་ནི། ལུས་ཀྱིར་ཉེ་བར་སྤྱད་པ་ཡིན་ཏེ། དེ་ནི་སྤྱོད་པ་མཚན་ཉིད་ཀྱི་སྒོ་ནས་བསྟན་པ་ཡིན་ནོ། །ད་ནི་སྤྱོད་པ་ངོ་བོ་ཉིད་ཀྱི་སྒོ་ནས་བསྟན་པའི་ཕྱིར། འདི་ལྟ་སྟེ། ཁྲུས་དང་བཏུང་བ་དང་སོ་ཤིང་དོར་བ་དང་ལག་པ་དང་རྐང་བ་བཀྲུ་བའོ་ཞེས་བྱ་བ་སྨྲས་ཏེ། འདི་ལྟ་སྟེ་ཞེས་བྱ་བ་ནི་ཉེ་བར་བསྟན་པ་ཡིན་ནོ། །ཁྲུས་དང་བཏུང་བ་དང་སོ་ཤིང་དོར་བ་དང་ལག་པ་དང་རྐང་བ་བཀྲུ་བ་ལུས་ཀྱི་ཉེ་བར་སྤྱད་པ་ནི་སྤྱོད་པའི་ངོ་བོ་ཉིད་ཡིན་ནོ། །ལུས་ཀྱི་ཡོ་བྱད་དག་ཏུ་ཉེ་བར་སྦྱར་བ་གང་ཡིན་པ་དེ་ནི་ལུས་ཀྱི་ཉེ་བར་སྤྱད་པ་ཁོ་ན་ཡིན་པར་ཤེས་པར་བྱའོ་ཞེས་བསྟན་པའི་ཕྱིར། ཡོ་བྱད་དག་ཏུ་ཉེ་བར་སྤྱད་པ་གང་ཡིན་པ་དེ་ནི་ལུས་ཀྱིང་ཡིན་ནོ་ཞེས་བྱ་བ་སྨྲས་ཏེ། ཟས་ལ་སོགས་པ་ཡོ་བྱད་དག་ཏུ་ཉེ་བར་སྤྱད་པ་གང་ཡིན་པ་དེ་ནི་ལུས་ཀྱིར་ཉེ་བར་སྤྱད་པ་ཁོ་ན་ཡིན་པར་ཤེས་པར་བྱའོ། །ལུས་ཀྱི་ཡོ་བྱད་དེ་དག་གང་དག་ཡིན་ཞེ་ན། དེའི་ཕྱིར། བཟའ་བར་བྱ་བ་དང་ལྷུང་བཟེད་དང༌། ཆོས་གོས་དང་གནས་དང་སོ་བཀྲུ་བ་དང་མེ་ལ་སོགས་པ་ནི་ལུས་ཀྱི་ཡོ་བྱད་དག་ཡིན་ནོ་ཞེས་བྱ་བ་སྨྲས་ཏེ། བཟའ་བར་བྱ་བ་ཞེས་བྱ་བ་ནི། བཟའ་བ་ངང་བཏུང་བ་ལ་སོགས་པའོ། །ལྷུང་བཟེད་དང༌། ཆོས་གོས་དང་གནས་དང་སོ་བཀྲུ་བ་དང་མེ་ལ་སོགས་པ་ཞེས་བྱ་བ་ལ་སོགས་པ་ཞེས་བྱ་བའི་སྒྲས་ནི་ཁྲི་དང་ཁྲིའུ་དང་སྟན་ནང་ཚངས་ཅན་དང་ལ་བ་ལ་སོགས་པ་དག་བསྡུས་ཏེ། དེ་དག་ནི་ལུས་ཀྱི་ཡོ་བྱད་དག་ཡིན་པར་རིག་པར་བྱའོ། །འོ་ན་ལུས་ཀྱི་ཡོ་བྱད་དེ་དག་ཏུ་ཉེ་བར་སྦྱར་བ་གང་ཡིན་པར་བལྟ་བར་བྱ་ཞེ་ན་དེའི་ཕྱིར། དེ་དག་ཏུ་ནི་ས་དང༌། ལྕི་བ་དང༌། ཚོན་
དང་རྩྭ་དང་ཤིང་ལ་སོགས་པའོ་ཞེས་བྱ་བ་སྨྲས་ཏེ། ལུས་ཀྱི་ཡོ་བྱད་དེ་དག་ཏུ་ཉེ་བར་སྦྱར་བ་ནི་ས་དང་ལྕི་བ་དང༌། ཚོན་དང་རྩྭ་དང་ཤིང་ལ་སོགས་པ་དག་ཡིན་པར་རིག་པར་བྱའོ། །ལུས་ཀྱི་ཡོ་བྱད་དེ་དག་ཏུ་ཉེ་བར་སྦྱོར་བ་དེ་དག་ལ་ཆུ་ལ་སོགས་པ་ཇི་ལྟར་དགོས་ཤེ་ན། དེའི་ཕྱིར་དེ་དག་ཏུ་དགོས་པ་ནི་འདི་ལྟ་སྟེ། བྱི་དོར་བྱ་བ་དང༌། བཀྲུ་བ་དང་ཁ་བསྒྱུར་བ་དང༌། ཆག་ཆག་གདབ་པ་དང་ཕྱག་དར་བྱ་བ་དང་ཞལ་ཞལ་བྱ་བ་དང་འུ་ཤ་དང༌། ཐང་དང་ཐུག་པ་དག་ཏུ་བྱའོ་ཞེས་བྱ་བ་སྨྲས་ཏེ། ལུས་ཀྱི་ཡོ་བྱད་དག་ཏུ་ཉེ་བར་སྦྱར་བར་དེ་དག་ཏུ་ཆུ་ལ་སོགས་པ་དགོས་པའོ། །འདི་ལྟ་སྟེ་ཞེས་བྱ་བ་ནི། ཉེ་བར་བསྟན་པའི་ཚིག་གོ །བྱི་དོར་བྱ་བ་དང༌། བཀྲུ་བ་དང༌། ཁ་བསྒྱུར་བ་ཞེས་བྱ་བ་ནི་ལྷུང་བཟེད་ལ་སོགས་པའོ། །ཆག་ཆག་གདབ་པ་དང༌། ཕྱག་དར་བྱ་བ་དང༌། ཞལ་ཞལ་བྱ་བ་ཞེས་བྱ་བ་ནི། གནས་གང་ལ་སོགས་པའོ། །འུ་ཤ་དང་ཐང་དང་ཐུག་པ་དག་ཏུ་ཞེས་བྱ་བ་ནི་བཟའ་བ་དང་བཏུང་བ་དག་ཏུའོ། །བྱ་བའོ་ཞེས་བྱ་བ་ནི། གོང་མ་ཐམས་ཅད་དང་སྦྱར་བར་བྱའོ། །འོག་གི་མདོ་ལས་ལྟ་བུ་ཡང་སྦྱོར་བ་དག་ཡིན་ནོ་ཞེས་འབྱུང་བ་དེ་ནི་འདིར་ཡང་སྦྱར་བར་བྱའོ། །ཆུའི་སྲོལ་དགག་པ་དང་བསལ་བ་དག་ཀྱང་ངོ་ཞེས་བྱ་བ་ནི། ཆུའི་སྲོལ་ཞེས་བྱ་བ་ཡུར་བ་ལ་སོགས་པའི་ཆུའི་ལམ་དགག་པ་དང་བསལ་བ་དག་བྱ་བ་ལྟ་བུ་ཡང་སྤྱོད་པ་དག་ཡིན་ནོ། །ཤིང་དང་གཡེང་བ་དག་གཞུག་པ་དང་དྲང་བ་དང་བཤལ་བ་དག་ཀྱང་ངོ་ཞེས་བྱ་བ་ནི། ཤིང་ཆུའི་ནང་དུ་གཞུག་པ་དང་ཆུའི་ནང་ཉིད་དུ་དྲང་བ་དང༌། ཆུའི་ནང་ནས་སྐམ་སར་བཤལ་བ་དང༌། ཆུ་ལོན་ལ་སོགས་པ་ཆུར་གཡེང་བ་དག་ཆུར་གཞུག་པ་དང༌། ཆུའི་ནང་ཉིད་དུ་དྲང་བ་དང༌། ཆུའི་ནང་ནས་སྐམ་སར་བཤལ་བ་དག་བྱ་བ་ལྟ་བུ་ཡང་སྦྱོར་བ་དག་ཡིན་ནོ། །ཤིང་དང་གཡེང་བ་ཞེས་སྨོས་པ་དཔེ་ཙམ་དུ་ཟད་དེ། དེ་ལྟ་བུ་མཐུན་པ་གཞན་དག་ཀྱང་བསྡུའོ། །རིམ་པ་གཅིག་པ་ལས་གཞན་པ་སྤུ་ཅན་ལ་སོགས་པ་བཀྲུ་བ་ཡང་ངོ་ཞེས་བྱ་བ་ནི། རིམ་པ་གཅིག་པ་ལས་གཞན་པ་ཞེས་བྱ་བའི་ཚིག་རྐྱང་ལས་གཞན་པ་སྤུ་ཅན་ལ་སོགས་པ་བཀྲུ་བ་དག་བྱ་བ་ལྟ་བུ་ཡང་
སྦྱོར་བ་དག་ཡིན་ནོ། །སོགས་པ་ཞེས་བྱ་བའི་སྒྲས་ནི་གོས་ལྷན་པ་ཅན་ལ་སོགས་པ་དག་ཀྱང་བསྡུའོ། །དེ་ཡང་སྲོག་ཆགས་ཀྱི་ཁམས་ལྷག་པར་མང་བའི་ཆུར་འཁྲུ་བ་ལྟ་བུ་ཡང་སྦྱོར་བ་དག་ཡིན་ནོ་ཞེས་བྱ་བ་ལ། དེ་ཡང་ཞེས་བྱ་བ་ནི། གོས་རིམ་པ་གཅིག་བ་དེ་ཡང་སྟེ། སྲོག་ཆགས་ཀྱི་ཁམས་ལྷག་པར་མང་བའི་ཆུར་འཁྲུ་བ་ལྟ་བུ་ཡང་ཞེས་བྱ་བ་རྣམ་པ་དེ་ལྟ་བུ་ཡང་སྦྱོར་བ་དག་ཡིན་ནོ། །འདིར་གཞུང་ནི་དགེ་སློང་གི་སྲོག་ཆགས་དང་བཅས་པའི་ཆུས་ཆག་ཆག་འདེབས་སམ། ཕྱག་དར་བྱེད་དམ། འུ་ཤ་དང་ཐང་དང་ཐུག་པ་དག་བྱེད་ན་སྲོག་ཆགས་ཇི་སྙེད་འཆི་བ་དེ་སྙེད་ཀྱི་ལྟུང་བྱེད་དུ་གྱུར་ལ། མི་འཆི་ན་ནི་ཉེས་བྱས་སོ། །དགེ་སློང་གིས་སྲོག་ཆགས་དང་བཅས་པའི་ཆུའི་ཡུར་བ་འགོག་གམ་སེལ་བར་བྱེད་ན་སྲོག་ཆགས་ཇི་སྙེད་འཆི་བ་དེ་སྙེད་ཀྱི་ལྟུང་བྱེད་དུ་འགྱུར་ལ། མི་འཆི་ན་ནི་ཉེས་བྱས་སོ། །དགེ་སློང་གིས་སྲོག་ཆགས་དང་བཅད་པའི་ཆུར་ཤིང་འཛུད་དམ་འདྲེན་ཏམ། ཆུའི་ནང་ནས་སྐམ་སར་བཤལ་ལམ་གཡེང་བག་གཡེན་བར་བྱེད་དམ་འདྲེན་ཏམ། ཆུའི་ནང་ནས་སྐམ་སར་བཤལ་བར་བྱེད་ན། སྲོག་ཆགས་ཇི་སྙེད་འཆི་བ་དེ་སྙེད་ཀྱི་ལྟུང་བྱེད་དུ་འགྱུར་ལ། མི་འཆི་ན་ནི་ཉེས་བྱས་སོ། །དགེ་སློང་གིས་ཆུ་སྲོག་ཆགས་དང་བཅས་པར་གོས་སྤུ་ཅན་དང་ལྷན་པ་ཅན་དག་འཁྲུ་བར་བྱེད་ན་སྲོག་ཆགས་ཇི་སྙེད་འཆི་བ་དེ་སྙེད་ཀྱི་ལྟུང་བྱེད་དུ་འགྱུར་ལ་མི་འཆི་ན་ནི་ཉེས་བྱས་སོ། །བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་སྤུ་ཅན་དང་ལྷན་པ་ཅན་དག་བཀྲུ་བར་མི་བྱ་སྟེ། འཁྲུ་ན་འགལ་ཆབས་ཅན་དུ་འགྱུར་རོ། །འདི་ལྟར་རིམ་པ་གཅིག་པ་ནི་བཀྲུ་བར་བྱའོ། །དགེ་སློང་དག་གིས་བཀྲུ་བ་གཏན་བཏང་བ་དང༌། བཅོམ་ལྡན་འདས་ཀྱིས་བཀའ་སྩལ་པ། གང་ན་སྲོག་ཆགས་ཀྱི་ཁམས་མང་ལ་ཆུའི་ཁམས་ཉུང་བ་དེར་བཀྲུ་བར་མི་བྱའི། གང་ན་ཆུའི་ཁམས་མང་ལ་སྲོག་ཆགས་ཀྱི་ཁམས་ཉུང་བ་དེར་བཀྲུ་བར་བྱའོ། །འདིར་འགལ་ཚབས་ཅན་དུ་འགྱུར་རོ་ཞེས་གསུངས་པ་ནི་ལྟུང་བྱེད་དུ་འགྱུར་རོ་ཞེས་བྱ་བར་དགོངས་པར་རིག་པར་བྱ་སྟེ། སྲོག་ཆགས་དང་བཅས་པའི་ཆུ་ལ་སྤྱོད་པའི་ཕྱིར་རོ། །སྲོག་ཆགས་དང་བཅས་པའི་ཆུ་ལ་སྤྱོད་པ་
རྣམ་པར་འབྱེད་པའོ་ཞེས་བྱ་བ་དེ་རྣམ་པར་འབྱེད་པའི་སྐབས་ནས་འབྱུང་བ་བཤད་ཟིན་ཏོ།། །།ད་ནི་སྲོག་ཆགས་དང་བཅས་པའི་ཆུ་ལེགས་པར་བཙགས་པ་ལ་སོགས་པ་དང་འབྲེལ་པ་ཕྲན་ཚེགས་ལ་སོགས་པ་ལས་གསུངས་པ་བརྗོད་པར་བྱ་སྟེ། དཔྱང་ཚགས་བཅད་པར་བྱའོ་ཞེས་བྱ་བ་ནི། ཆུ་བཙགས་པའི་ཕྱིར་ཤིང་བུ་གསུམ་ལ་དབྱང་བའི་ཚགས་ནི། དཔྱང་ཚགས་ཞེས་བྱ་སྟེ་དེ་བཅང་བར་བྱའོ། །དཔྱང་ཚགས་ཀྱི་རང་གི་ངོ་བོ་བསྟན་པའི་ཕྱིར། ཟེད་སྣོད་ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང༌། བཙགས་པར་བྱ་བའི་ཆུ་བཟེད་པར་བྱེད་པ་ཚགས་གདགས་པར་བྱ་བའི་ལྕགས་གཟེར་དག་བཏབ་པའི་ཤིང་བུ་གསུམ་དང་ལྡན་པ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། ཤིང་བུ་གསུམ་དང་ལྡན་པ་ནི་དེ་ཞེས་བྱའོ་ཞེས་བྱ་བ་ནི། སྣོལ་མར་སྦྲེལ་བ་ཡིན་ནོ། །དཔྱང་ཚགས་ཞེས་བྱ་བ་ནི། ཆུ་ཚགས་གྲུ་གསུམ་ལ་སོགས་པའི་རྫས་ཡིན་པར་རིག་པར་བྱའོ། །ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར། ཟེད་སྣོད་ཀྱི་ཞེས་བྱ་བ་ལ་སོགས་པ་སྨྲས་ཏེ། དེ་ནི་ཟེད་པ་ཡང་ཡིན་ལ། །སྣོད་ཀྱང་ཡིན་པས་ན་ཟེད་སྣོད་ཅེས་བྱ་སྟེ། ཤིང་བུ་གསུམ་པོ་གང་ལ་བུམ་པ་ལ་སོགས་པ་ཡོད་པ་དེ་ནི་ཟེད་སྣོད་དེ། ཟེད་སྣོད་དེའི་སྟེང་གི་ནམ་མཁའ་ཞེས་བྱ་བ་ནི། ཤིང་བུ་གསུམ་གྱི་ནང་དུ་གཏོགས་པའི་ནམ་མཁའ་གང་ཡིན་པ་སྟེ། དེ་ནི་ཟེད་སྣོད་ཀྱི་སྟེང་གི་ནམ་མཁའོ། །ནམ་མཁའ་དེ་ལ་གཞག་པར་བྱ་ཞིང་ཞེས་བྱ་བ་ནི་ནམ་མཁའ་དེ་ལ་གཞག་པར་བྱ་བ་ཟེད་པར་བྱེད་ཅིང་འཛིན་པར་བྱེད་པ་ཆུ་ཚགས་ལ་སོགས་པའོ། །གང་གི་ཟེད་པར་བྱེད་པ་ཞེ་ན། དགང་བ་དང་བཙགས་པར་བྱ་བའི་ཆུའི་སྟེ། དགང་བ་ཞེས་བྱ་བ་ནི་ཆུ་ཚགས་སུ་བླུགས་པར་བྱ་བ་སྟེ། དེ་དང་བཙགས་པར་བྱ་བའི་ཆུ་ཞེས་བྱ་བ་ནི་ཡོངས་སུ་བཙགས་པར་བྱ་བའི་ཆུ་སྟེ། དེ་གཉིས་ཟེད་པར་བྱེད་པ་གང་ཡིན་པ་དེ་ནི་ཟེད་སྣོད་ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང་བཙགས་པར་བྱ་བའི་ཆུ་ཟེད་པར་བྱེད་པའོ། །ཟེད་པར་བྱེད་པ་དེ་ཉིད་ཚགས་ཡིན་ཏེ། འཚག་པར་བྱེད་པ་ཆུ་ཚགས་གྲུ་གསུམ་ལ་སོགས་པ་ཆུ་ཚགས་ཡིན་ཏེ། ཟེད་པར་བྱེད་པ་དེ་ཉིད་ཚགས་དེ་ནི་ཟེད་སྣོད་
ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང་བཙགས་པར་བྱ་བའི་ཆུ་ཟེད་པར་བྱེད་པ་ཚགས་སོ། །ཚགས་དེ་གདགས་པ་ཞེས་བྱ་བ་ནི། །ཤིང་བུ་གསུམ་པོ་དེ་ཉིད་ལ་ཚགས་དེ་གདགས་པ་སྟེ། དེ་ནི་ཟེད་སྣོད་ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང་བཙགས་པར་བྱ་པའི་ཆུ་ཟེད་པར་བྱེད་པ་ཚགས་གདགས་པའོ། །གདགས་པ་དེ་ཉིད་བྱ་བ་ཡིན་ཏེ། ལྕགས་གཟེར་གང་དག་ལ་ཟེད་པར་བྱེད་པ་ཚགས་དེ་གདགས་པར་བྱ་དགོས་པ་སྟེ། དེ་ནི་ཟེད་སྣོད་ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང་བཙགས་པར་བྱ་བའི་ཆུ་ཟེད་པར་བྱེད་པ་ཚགས་གདགས་པར་བྱ་བའི་ལྕགས་གཟེར་དག་ཡིན་ནོ། །ལྕགས་གཟེར་དེ་དག་ཤིང་བུ་གསུམ་པོ་གང་ལ་བཏབ་པའི་ཤིང་བུ་གསུམ་པོ་དེ་ནི་ཟེད་སྣོད་ཀྱི་སྟེང་གི་ནམ་མཁའ་ལ་གཞག་པར་བྱ་ཞིང་དགང་བ་དང་བཙགས་པར་བྱ་བའི་ཆུ་ཟེད་པར་བྱེད་པ་ཚགས་གདགས་པར་བྱ་བའི་ལྕགས་གཟེར་དག་བཏབ་པའི་ཤིང་བུ་གསུམ་སྟེ། དཔྱང་ཚགས་གང་ལ་ཤིང་བུ་གསུམ་ཡོད་པ་དེ་ནི་ཤིང་བུ་གསུམ་དང་ལྡན་པ་ཡིན་ནོ། །དེ་ཞེས་བྱའོ་ཞེས་བྱ་བ་ནི། དཔྱང་ཚགས་ཞེས་བྱའོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། ཆུ་བཙགས་པའི་ཕྱིར་དཔྱང་ཚགས་བཅང་བར་བྱའོ། །དེ་ཇི་ལྟ་བུ་ཞིག་ཅེ་ན། དཔྱང་ཚགས་གང་ལ་ཤིང་བུ་གསུམ་སྣོལ་མར་སྦྲེལ་ཞིང་དེ་ལ་ཡང་ལྕགས་གཟེར་དག་ཆུ་ཚགས་གདགས་པའི་དོན་དུ་བཏབ་པ་ཡིན་ནོ། །ཆུ་ཚགས་ཁྱད་པར་ཇི་ལྟ་བུ་ཅན་ཞིག་ཅེ་ན། དགང་བར་བྱ་བ་དང་བཙགས་པར་བྱ་བའི་ཆུ་ཟེད་པར་བྱེད་པའོ། །དེ་ཕྱོགས་གང་དུ་གཞག་པར་བྱ་ཞེ་ན། ས་ལ་གཞག་པའི་སྣོད་བུམ་པ་ལ་སོགས་པ་ཆུ་ཚགས་ནས་འཛག་པའི་ཆུ་ཟེད་པར་བྱེད་པ་གང་ཡིན་པ་དེའི་སྟེང་གི་ནམ་མཁའ་དེ་ལ་ཤིང་བུ་གསུམ་ལ་བཏགས་ཏེ་གཞག་པར་བྱའོ། །དེ་ལྟར་ཡང་འདིང་གཞུང་ནི། བཅོམ་ལྡན་འདས་ཀྱིས་བཀའ་སྩལ་པ། དཔྱང་ཆགས་བྱ་ཞིང་དེའི་ཡང་ཐོག་ཏུ་ལྕགས་གཟེར་གདབ་པར་བྱའོ། །དེ་ལ་ཆུ་ཚགས་གདགས་པར་བྱ་ཞིང་དེའི་འོག་ཏུ་བུམ་པ་གཞག་པར་བྱའོ། །ཆུ་སྣོད་ཀྱི་བུམ་པ་དགང་བར་བྱའོ་ཞེས་གསུངས་པ་ཡིན་ནོ། །འདིར་ཆུ་སྣོད་ཀྱི་བུམ་པ་དགང་བར་བྱའོ་ཞེས་
གསུངས་པའི་དོན་ནི། ཆུ་སྣོད་ཀྱི་ཆུ་ཚགས་ཀྱི་ནང་དུ་ཆུས་དགང་བར་བྱ་ཞིང་ཆུ་ཆགས་དེས་བཙགས་པའི་ཆུས་ཟེད་སྣོད་ཀྱི་བུམ་པ་འོག་མ་གང་བར་འགྱུར་བ་ཡིན་པར་རིག་པར་བྱའོ། །ཆུ་གནས་པར་བྱ་བའི་ཕྱིར་ཆུ་ཚགས་སུ་གཅལ་གཞུག་པར་བྱའོ་ཞེས་བྱ་བ་ནི། ཆུ་གནས་པར་བྱ་བའི་ཕྱིར་ཆུ་ཚགས་དེའི་ནང་དུ་གཅལ་གཞུག་པར་བྱ་བ་སྟེ། ཚིག་འདི་ནི་དགེ་སློང་གིས་སྤྱད་པའི་ཆུ་ཚགས་ཟིན་པའི་འོག་ཏུ་ཚགས་ཀྱི་ནང་ན་གནས་པའི་ཆུ་མྱུར་དུ་ཟད་ན་དེ་ན་གནས་པའི་སྲོག་ཆགས་རྣམས་འཆི་བར་འགྱུར་བ་དེ་ཡོངས་སུ་སྤངས་པའི་ཕྱིར་རོ། །གཅལ་ཇི་ཞིག་གཞུག་པར་བྱ་ཞེ་ན་དེའི་ཕྱིར། བྱེ་མའམ་ལྕི་བའོ་ཞེས་བྱ་བ་སྨྲས་ཏེ། དེ་གཉིས་གང་ཡང་རུང་བ་གཅལ་དུ་གཞུག་གོ །ཡང་ན་ཚགས་རྟེན་སྣོད་དོ་ཞེས་བྱ་བ་ནི། ཆུ་གནས་པར་བྱ་བའི་ཕྱིར་ཆུ་ཚགས་ལ་ཡང་ན་ཚགས་རྟེན་སྣོད་གཞུག་གི །དེ་ཇི་འདྲ་བ་ཞིག་ཅེ་ན་དེའི་ཕྱིར། ས་དང་ཟངས་མ་ལས་བྱས་པ་གང་ཡང་རུང་ངོ་ཞེས་བྱ་བ་སྨྲས་ཏེ། གང་ཡང་རུང་ངོ་ཞེས་བྱ་བ་ནི་ས་ལས་བྱས་པ་ཡང་རུང༌། ཟངས་མ་ལས་བྱས་པ་ཡང་རུང་ངོ་ཞེས་བྱ་བའི་ཐ་ཚིག་གོ །དེ་ནི་ཤིང་བུ་གསུམ་གྱི་ཐོག་མ་ལ་གདགས་སོ་ཞེས་བྱ་བ་ནི། ཚགས་རྟེན་སྣོད་དེ་ནི་ཤིང་བུ་གསུམ་གྱི་ཐོག་མ་ལ་གདགས་པའོ། །ཐབས་གང་གིས་ཤེ་ན་དེའི་ཕྱིར། བུ་གུར་ལུང་བྱས་ཏེའོ་ཞེས་བྱ་བ་སྨྲས་ཏེ། བུ་གུ་པུག་ནས་དེང་ལུང་བཏགས་ཏེ་དེ་ཤིང་བུ་གསུམ་གྱི་ཐོག་མ་ལ་བཏགས་སོ། །དེ་ནི་ངོས་གཉིས་ནས་བཏགས་ན་ཡང་འདུག་ཏུ་བཏུབ་པོ་ཞེས་བྱ་བ་ནི། བུ་གུ་དུ་མ་ཞིག་དགོས་ན་ཡང་ཚགས་རྟེན་སྣོད་ལ་བུ་གུ་དུ་མ་ཙམ་གྱིས་ཤིང་བུ་ལ་གདགས་སུ་རུང་བ་དེ་སྙེད་ཀྱི་བུ་གུ་བྱའོ། །ཕྱི་རོལ་གྱི་ངོས་སུ་ཚགས་རྟེན་སྣོད་བཞག་པར་བྱའོ་ཞེས་བྱ་བ་ནི། གལ་ཏེ་ཆུ་ཚགས་ཀྱི་ནང་རོལ་དུ་ཚགས་རྟེན་སྣོད་གཞག་པར་གྱུར་ན། དེའི་ཚེ་ཚགས་རྟེན་སྣོད་ཀྱི་འོག་ཏུ་སོང་བའི་སྲོག་ཆགས་དག་འཆི་བར་འགྱུར་སྲིད་པས་ཉེས་དམིགས་དེར་མི་འགྱུར་བར་བྱ་བའི་ཕྱིར་མདོ་འདི་བྱས་སོ། །དེ་ཇི་ཞིག་གིས་གདགས་ཤེ་ན་དེའི་ཕྱིར། སྔ་མ་ནི་ཐ་གུས་སོ། །ཕྱི་མ་ནི་ལྕགས་ཐག་འཇམ་པོས་སོ་ཞེས་བྱ་བ་སྨྲས་ཏེ། སྔ་མ་ལས་བྱས་པ་ནི་ཐ་གུས་གདགས་སོ། །ཕྱི་མ་ཟངས་ལས་བྱས་པ་ནི་ལྕགས་ཐག་འཇམ་
པོས་གདགས་སོ་ཞེས་བྱ་བའི་ཐ་ཚིག་གོ །དེ་བཅང་བར་བྱའོ་ཞེས་བྱ་བ་ནི་ཚགས་རྟེན་སྣོད་དེ་གང་ཟག་གིས་ཀྱང་བཅང་བར་བྱའོ། །ཆུ་མི་འཛག་ན་ཤིང་ལེབ་ཀྱིས་ཆུ་ཚགས་ལ་དལ་བུ་དལ་བུས་ཡང་དང་ཡང་དུ་བརྡབ་པར་བྱའོ་ཞེས་བྱ་བ་ནི། གལ་ཏེ་ཆུ་ཚགས་ལས་ཆུ་མི་འཛག་ན་དེའི་ཚེ་ཤིང་ལེབ་ཀྱིས་ཆུ་ཚགས་ལ་དལ་བུ་དལ་བུས་ཡང་དང་ཡང་དུ་བརྡབ་པར་བྱའོ། །འདི་སྐད་བསྟན་ཏེ། གལ་ཏེ་ཆུ་ཚགས་གྲུ་གསུམ་ལ་སོགས་པ་ཐགས་བཟང་བས་ཆུ་མི་འཛག་ན་དེ་ལ་ཤིང་ལེབ་ཀྱིས་ཆུ་ཚགས་ལ་དལ་བུ་དལ་བུས་ཡང་དང་ཡང་དུ་བརྡབ་པར་བྱའོ། །བུམ་ཚགས་གཅེའུ་ཅན་ནི་ཚེགས་ཆུང་ངོ་ཞེས་བྱ་བ་ནི། བུམ་ཚགས་གཅེའུ་ཅན་ནི་ཚེགས་ཆུང་ཞིང་བྱ་སླ་བ་ཡིན་པས། དེ་ལ་འདོད་པ་བསྐྱེད་པར་བྱ་བའི་ཐ་ཚིག་གོ །བུམ་ཚགས་གཅེའུ་ཅན་ནི་དེ་ནས་ཆུའི་སྒྲ་ཏིག་ཏིག་སྒྲོག་ཅིང་འཛག་པའམ་ཡང་ན་དེའི་ནང་དུ་ཆུའི་སྒྲ་སྒྲོག་ཅིང་འགྲོ་བ་དང་འབབ་པ་དང་འཛག་པར་འགྱུར་བའི་ཕྱིར་སྒྲ་སྒྲོག་ཅེས་བྱ་བའོ། །དེ་བཅང་བར་བྱའོ་ཞེས་བྱ་བ་ནི་བུམ་ཚགས་གཅེའུ་ཅན་དེ་གང་ཟག་གིས་ཀྱང་བཅང་བར་བྱ་བའོ། །དེ་ཅི་ལས་བྱས་པ་ཞེ་ན། དེའི་ཕྱིར་སའམ་ཟངས་མ་ལས་བྱས་པའོ་ཞེས་བྱ་བ་སྨྲས་ཏེ། ས་ལས་བྱས་པ་ཡང་རུང་ཟངས་མ་ལས་བྱས་པ་ཡང་རུང་རོ་ཞེས་བྱ་བའི་ཐ་ཚིག་གོ །དེའི་དབྱིབས་ཅི་འདྲ་ཞེ་ན་དེའི་ཕྱིར་དེ་ནི་བུམ་པའི་དབྱིབས་ཅན་ནང་པདྨའི་བུ་གུ་ལྟ་བུ་དང་ལྡན་པ་འོག་སྦུབས་ཅན་ཡིན་ནོ་ཞེས་བྱ་བ་སྨྲས་ཏེ། བུམ་ཚགས་གཅེའུ་ཅན་གང་ལ་བུམ་པ་ལྟ་བུའི་དབྱིབས་ཀྱི་རྣམ་པ་ཡོད་པ་དེ་ནི་བུམ་པའི་དབྱིབས་ཅན་ཞེས་བྱའོ། །བུམ་ཚགས་གཅེའུ་ཅན་གང་གི་ནང་ན་པདྨའི་བུ་གུ་ལྟ་བུའི་བུ་གུ་དག་ཡོད་པ་དེ་ནི། ནང་པདྨའི་བུ་གུ་ལྟ་བུ་དང་ལྡན་པ་ཞེས་བྱ་སྟེ། པདྨའི་སྙིང་པོའི་ནང་ན་གནས་པའི་བུ་གུ་དག་ལྟ་བུའི་བུ་གུ་དག་འདིའི་ནང་ན་ཡང་ཡོད་པ་ཡིན་ནོ། །འོག་སྦུབས་ཅན་ཡིན་ནོ་ཞེས་བྱ་བ་ནི། བུ་གུ་དེ་དག་གི་ངོས་འོག་མ་རྣམས་ལ་གཅེའུ་ལྟ་བུའི་སྦུབས་དག་ཡོད་པ་ཡིན་ཏེ། དེའི་ནང་གི་བུ་གུ་རྣམས་ཀྱི་འོག་སྦུབས་ཅན་དག་ཏུ་བྱ་བའོ། །འདིར་གཞུང་ནི་བུམ་པའི་དབྱིབས་ལྟ་བུར་བྱ་ཞིང་དེའི་ནང་དུ་པདྨའི་རྣམ་པ་ལྟ་བུའི་བུ་གུ་དག་གདོད་པར་བྱའོ། །
དེ་དག་བསྡུ་བའི་ཕྱིར་དེ་དག་གི་སྟེང་དུ་བུ་གུ་ཆེན་པོ་གཅིག་གདོད་པར་བྱའོ། །དེ་དག་ཉིད་བསྡུ་བའི་ཕྱིར་འོག་སྦུབས་ཅན་དུ་བྱའོ་ཞེས་གསུངས་པ་ཡིན་ནོ། །འདིར་སྟེང་དུ་བུ་གུ་ཆེན་པོ་གཅིག་གདོད་པར་བྱའོ་ཞེས་གསུངས་པ་ནི་བུམ་པའི་ཁ་ཉིད་ཡིན་པར་བལྟ་བར་བྱའོ། །དེ་དག་ཏུ་རས་མས་འདགས་པ་ཉིད་དོ་ཞེས་བྱ་བ་ནི། ནང་གི་བུ་གུ་དེ་དག་ཏུ་ཆུ་འཛག་པ་རྣམས་རས་མས་བཙགས་པར་བྱ་བ་ཉིད་ཡིན་ནོ། །འདི་སྐད་བསྟན་ཏེ། ཆུ་ཚགས་པའི་བུ་གུ་དག་གི་སྟེང་དུ་བུམ་པའི་གཅལ་ཐབས་སུ་ཆུ་ཚགས་སུ་རུང་བའི་རྫས་ཀྱི་རས་མ་ཇི་ཙམ་གྱིས་གཡོགས་པ་དེ་ཙམ་གྱིས་བཙགས་ཤིང་སྲོག་ཆགས་མེད་པར་བྱའོ། །འདིར་གཞུང་ནི་དེ་དག་གི་སྟེང་དུ་རས་མས་གཡོགས་ཏེ་ཆུ་བཙགས་པར་བྱའོ་ཞེས་གསུངས་པ་ཡིན་ནོ། །ཆུ་ཚགས་ཉེ་བར་གཞག་པར་བྱའོ་ཞེས་བྱ་བ་ནི། ཆུ་ལ་སོགས་པས་ཀུན་ནས་འཛག་པར་བྱེད་པའི་ཕྱིར་ཆུ་ཚགས་ཞེས་བྱ་བ་སྟེ། དེ་གང་ཟག་གིས་ཀྱང་བྱ་ཞིང་ཉེ་བར་གཞག་གོ་ཞེས་བྱ་བའི་ཐ་ཚིག་གོ །ཆུ་ཚགས་གྲུ་གསུམ་མམ་རིལ་བ་ཞབས་ཚགས་ཅན་ནམ་བསལ་ཚགས་ཀྱང་ངོ་ཞེས་བྱ་བ་ནི། ཆུ་ཚགས་གྲུ་གསུམ་མམ་རིལ་བ་ཞབས་ཚགས་ཅན་ནམ་བསལ་ཚགས་ཉེ་བར་གཞག་པར་བྱའོ། །ཆུ་ཚགས་གྲུ་གསུམ་སྨོས་པས་ནི་རིལ་ཚགས་ཀྱང་བཟུང་བར་ཤེས་པར་བྱའོ། །བསལ་ཚགས་སྨོས་པས་ནི་བུམ་ཚགས་གཅེའུ་ཅན་ལ་དགོས་པའི་རས་མ་ཡང་བཟུང་བ་ཉིད་ཡིན་ནོ། །འམ་ཞེས་བྱ་བའི་སྒྲ་ནི་ཐམས་ཅད་སོགས་པ་སླང་བའི་ཕྱིར་ཏེ། གཅིག་དགོས་པ་འགྲུབ་པའི་ཕྱིར་རོ། །འོག་གི་མདོ་ལས་དེ་ལ་དེ་མེད་པར་ལྗོངས་རྒྱུ་ཞིང་འགྲོ་བར་མི་བྱའོ་ཞེས་འབྱུང་བ་དེའི་དམིགས་ཀྱིས་བསལ་བ་བསྟན་པའི་ཕྱིར། བྱ་མ་བུམ་དང་རིལ་བ་དག་གིས་ཆུ་རུང་བ་བཅུས་པ་ཉིད་དང་ཡོད་པ་ཉིད་ཀྱང་དེ་དང་ལྡན་པ་ཉིད་དོ་ཞེས་བྱ་བ་སྨྲས་ཏེ། བྱ་མ་བུམ་དང་རིལ་བ་དག་གིས་ཆུ་རུང་བ་བཅུས་ཤིང་བླངས་པ་ཉིད་ནི་ཆུ་ཚགས་དེ་དང་ལྡན་པ་ཉིད་ཡིན་ནོ། །ཡོད་པ་ཉིད་ཀྱང་དེ་དང་ལྡན་པ་ཉིད་དོ་ཞེས་བྱ་བ་ནི། ལམ་ཇི་ཙམ་དུ་ཆུ་རུང་བ་ཡོད་པ་ཉིད་ཡིན་ན་དེ་ཡང་ཆུ་ཚགས་དེ་དང་ལྡན་པ་ཉིད་ཡིན་ནོ། །འདི་སྐད་བསྟན་ཏེ། ལམ་ཇི་སྲིད་དུ་ཆུ་རུང་བ་བཅུར་ཡོད་པ་དེ་སྲིད་དུ་ཆུ་ཚགས་དང་ལྡན་པ་ཉིད་ཡིན་གྱི་ལྷག་པར་ནི་མ་
ཡིན་ཏེ། དེ་ནི་ཤུགས་ཀྱིས་འཐོབ་པོ། །དེ་མེད་པར་ལྗོངས་རྒྱུ་ཞིང་འགྲོ་བར་མི་བྱའོ་ཞེས་བྱ་བ་ནི། ཆུ་ཚགས་ལ་སོགས་པ་མེད་པར་ལྗོངས་རྒྱུ་ཞིང་འགྲོ་བར་མི་བྱ་བའོ། །ནང་དང་བཅས་པ་དང་ལྷན་ཅིག་ཏུ་མི་བྱའོ་ཞེས་བྱ་བ་ནི། དགེ་སློང་ཞེ་འགྲས་པ་དང་ལྷན་ཅིག་ལྗོངས་རྒྱུ་ཞིང་འགྲོ་བར་མི་བྱ་བའོ། །གལ་ཏེ་རྐྱེན་དེ་ལྟ་བུ་ཡོད་ན་བཟོད་པ་གསོལ་ཏེའོ་ཞེས་བྱ་བ་ནི། གལ་ཏེ་དེ་དང་འགྲོགས་ཏེ་མི་འགྲོ་ན་ཚུལ་ཁྲིམས་དང་སྲོག་ལ་སོགས་པའི་བར་ཆད་བྱེད་པ་དེ་ལྟ་བུའི་རྐྱེན་དག་ཡོད་ན་གཙུག་ལག་ཁང་དེ་ཉིད་དུ་ནང་དང་བཅས་པའི་དགེ་སློང་དེ་ལ་བཟོད་པ་གསོལ་ནས་སམ་བཟོད་པར་བྱས་ཏེ་ལྷན་ཅིག་ལྗོངས་རྒྱུ་ཞིང་འགྲོ་བར་བྱའོ། །བྱ་བ་བྱེད་པ་ན་ཡོད་པ་ཉིད་ནི་ཡོད་པ་ཉིད་ཡིན་ནོ་ཞེས་བྱ་བ་ནི། དགོས་པ་བསྒྲུབ་པའི་དུས་ན་གལ་ཏེ་དེ་སྒྲུབ་པར་བྱེད་པའི་ཡོ་བྱད་ཡོད་པ་ཉིད་ཡིན་ན། དེའི་ཚེ་ཡོ་བྱད་དེ་ཡོད་པ་ཉིད་ཡིན་པར་རིག་པར་བྱའོ། །སྔར་ཡང་མ་ཡིན་ཕྱིས་ཀྱང་མ་ཡིན་ཏེ། འདི་ལྟ་སྟེ་དཔེར་ན་ཆུ་བཙགས་པའི་དུས་ན་ཆུ་ཚགས་ཡོད་པ་ཉིད་ནི་ཡོད་པ་ཉིད་ཡིན་པ་ལྟ་བུའོ། །གཞན་གྱིས་འདི་ལྟར་དེ་སྦྱིན་ནོ་ཞེས་ཁས་བླངས་པ་ནི་དེ་དང་ལྡན་པ་ཉིད་ཡིན་ནོ་ཞེས་བྱ་བ་ནི། གཞན་གང་གིས་འདི་སྐད་ཅེས་འདི་ལྟར་ཆུ་བཙགས་པའི་དུས་དེར་ཆུ་ཚགས་སྦྱིན་ནོ་ཞེས་ཁས་བླངས་པ་ནི་ཆུ་ཚགས་དེ་དང་ལྡན་པ་ཉིད་ཡིན་ནོ། །གལ་ཏེ་ཁས་མ་བླངས་ན་ནི་དགེ་སློང་གཞན་དག་ལ་ཆུ་ཚགས་ཡོད་དུ་ཟིན་ཀྱང་དགེ་སློང་དེ་ལ་ཆུ་ཚགས་ཡོད་པ་ཉིད་མ་ཡིན་ནོ། །ལྗོངས་རྒྱུ་བའི་ཚེ་འབྲལ་བ་ན་སྦྱིན་པར་ཁས་མ་བླངས་ན་དེ་ལ་བརྟེན་པར་མི་བྱའོ་ཞེས་བྱ་བ་ནི། ལྗོངས་རྒྱུ་བའི་ཚེ་འབྲལ་ཞིང་གྲོང་གཞན་དུ་འགྲོ་བར་འགྱུར་བའི་ཚེ་ཆུ་ཚགས་སྦྱིན་ནོ་ཞེས་ཆུ་ཚགས་དང་ལྡན་པའི་དགེ་སློང་གིས་ཁས་མ་བླངས་ན་ལྗོངས་རྒྱུ་བའི་ཚེ་ཆུ་ཚགས་དེ་ལ་བརྟེན་པར་མི་བྱ་སྟེ། འབྲལ་བའི་མདུན་རོལ་དུ་མ་བྲལ་བའི་ཚེ་ན་རེ་ཞིག་སྦྱིན་པར་ཁས་བླངས་པ་ནི་ཕྱིས་འབྲལ་བའི་ཚེ་ན་མེད་པའི་ཕྱོགས་དང་མཐུན་པ་ཉིད་ཡིན་པའི་ཕྱིར་རོ། །ཕོངས་པར་མི་འགྱུར་བའི་ཉེན་ཀོར་དུ་འགྲོ་བ་ནི་རྒྱུ་བ་མ་ཡིན་ནོ་ཞེས་བྱ་བ་ནི་ཆུས་ཕོངས་པར་མི་འགྱུར་བའི་ཉེན་ཀོར་གྱི་ཕྱོགས་སུ་འགྲོ་བ་གང་ཡིན་པ་དེ་ནི་ལྗོངས་རྒྱུ་བ་མ་ཡིན་པར་ཤེས་པར་བྱ་སྟེ། དེར་ནི་ཆུ་ཚགས་མེད་ཀྱང་ཉེས་པ་འགར་ཡང་མི་འགྱུར་རོ་ཞེས་བྱ་བའི་ཐ་
ཚིག་གོ །དེ་ནི་རྒྱང་གྲངས་ལྔ་ཉིད་ཡིན་ནོ་ཞེས་བྱ་བ་ནི། ཕོངས་པར་མི་འགྱུར་བའི་ཉེན་ཀོར་དེ་ནི་རྒྱང་གྲགས་ལྔ་ཉིད་ཡིན་ནོ། །འདིར་དེ་དག་གི་གཞུང་ནི་གཞུང་ཁ་ཅིག་ལས། བཙུན་པ་ཆབ་ཚགས་མ་མཆིས་པར་གྲོང་གཞན་ནམ་གཙུག་ལག་ཁང་གཞན་དུ་མཆིར་རུང་ངམ། རུང་སྟེ་གལ་ཏེ་དེར་སོང་ཡང་ཕོངས་པར་མི་འགྱུར་ནའོ་ཞེས་བྱ་བ་དང༌། ཅིག་ཤོས་ཀྱི་ནི་བཙུན་པ་ཆབ་ཚགས་མ་མཆིས་པར་ཤུལ་དུ་ཞུགས་ཏེ་མཆིར་རུང་ངམ། རུང་སྟེ་གལ་ཏེ་དེར་སོང་ཡང་ཕོངས་པར་མི་འགྱུར་བའི་རྒྱང་གྲགས་ལྔ་ཚུན་ཆད་དོ་ཞེས་གསུངས་པ་ཡིན་ནོ། །མདོ་སྔ་མས་ནི་གཞུང་སྔ་མ་བསྡུས་པ་ཡིན་ལ་མདོ་འདིས་ནི་གཞུང་ཕྱི་མ་ཤོས་བསྡུས་པ་ཡིན་ནོ།། །།བམ་པོ་སུམ་ཅུ་པ། སྔར་ཕོངས་པར་མི་འགྱུར་བའི་ཉེན་ཀོར་དུ་འགྲོ་བ་ནི་རྒྱུ་བ་མ་ཡིན་ནོ་ཞེས་སྤྱིར་བཏང་བ་བྱས་པ་དེའི་དམིགས་ཀྱིས་བསལ་བ་བསྟན་པའི་ཕྱིར། གནས་སུ་བཞག་སྟེ་སོང་བ་དེ་དང་ལྡན་པ་ཉིད་མ་ཡིན་པ་དེ་ནི་རང་དགའ་བྱེད་པ་མ་ཡིན་པ་མ་ཡིན་ནོ་ཞེས་བྱ་བ་སྨྲས་ཏེ། དགེ་སློང་གནས་སུ་ཆུ་ཚགས་བཞག་སྟེ་གནས་གཞན་དུ་སོང་བ་ཆུ་ཚགས་དེ་དང་ལྡན་པ་ཉིད་མ་ཡིན་པ་ནི་དེའི་ཚེ་ན་རང་དགའ་བྱེད་པ་མ་ཡིན་པ་མ་ཡིན་ཏེ། རང་དགའ་བྱེད་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ ། འདི་སྐད་བསྟན་ཏེ། གལ་ཏེ་བདག་དེར་སོང་ན་ཆུ་ཚགས་ཡོད་པར་འགྱུར་རོ་ཞེས་དེ་ལྟར་ངེས་པ་མེད་ན་དེའི་ཚེ་ཆུ་ཚགས་མེད་པར་དེས་དེར་འགྲོ་བར་མི་བྱའོ། །གཅིག་གིས་དགེ་འདུན་མན་ཆད་དུ་མ་དེ་དང་ལྡན་པ་ཉིད་མ་ཡིན་པར་མི་འགྱུར་རོ་ཞེས་བྱ་བ་ནི། ཆུ་ཚགས་གཅིག་ཡོད་ན་དེས་དགེ་འདུན་མན་ཆད་དགེ་སློང་དུ་མ་དག་ཆུ་ཚགས་དང་ལྡན་པ་ཉིད་མ་ཡིན་པར་མི་འགྱུར་ཏེ། ལྡན་པ་ཉིད་དུ་འགྱུར་རོ། །འདི་སྐད་བསྟན་ཏེ། གལ་ཏེ་དགེ་འདུན་དུ་གྱུར་པའི་དགེ་སློང་དུ་མ་དག་ཆུ་ཚགས་གཅིག་གིས་ལྗོངས་རྒྱུ་ཞིང་འདོད་ན་དེའི་ཚེ་ཉེས་པ་མེད་དོ། །རྒྱུན་མགྱོགས་པ་ལ་ནི་ཕོངས་པར་འགྱུར་བ་ཉིད་མ་ཡིན་ནོ་ཞེས་བྱ་བ་ནི། སྔར་དེ་ནི་རྒྱང་གྲགས་ལྔ་ཉིད་ཡིན་ནོ་ཞེས་སྨོས་པ་དེ་ལ་ནི་ཆུའི་རྒྱུན་མགྱོགས་པ་ལ་ཡང་ཕོགས་པར་མི་འགྱུར་བ་ཉིད་དུ་རིག་པར་བྱའི། ཆུའི་རྒྱུན་མགྱོགས་པ་དེ་ལ་རྒྱང་གྲགས་ལྔ་ཕན་ཆད་ནི་ཕོངས་པར་མི་འགྱུར་བ་ཉིད་མ་ཡིན་ཏེ། འདི་ལྟར་
ཕོངས་པར་འགྱུར་བ་ཉིད་ཡིན་ནོ། །འདིར་གཞུང་ནི་བཙུན་པ་ཆུ་ཀླུང་འབབ་པ་ལ་ཆབ་ཚགས་མ་མཆིས་པར་མཆིར་རུང་ངམ། ཉེ་བ་འཁོར་རུང་སྟེ་རྒྱང་གྲགས་ལྔ་ཚུན་ཆད་དུ་རུང་ངོ་ཞེས་གསུངས་པ་ཡིན་ནོ། །དེ་རྒྱུན་ཕྱོགས་སུ་རྗེས་སུ་འབྲེལ་པར་འགྲོ་བས་ན་དེས་རྒྱང་གྲགས་ཀྱི་བར་དུ་འཇུག་ཏུ་རུང་ངོ་ཞེས་བྱ་བ་ལ། དེ་ལ་ཞེས་བྱ་བ་ནི། ཆུའི་རྒྱུན་མགྱོགས་པ་དེ་ལའོ། །རྒྱུན་ཕྱོགས་སུ་ཞེས་བྱ་བ་ནི། ཆུའི་རྒྱུན་ཕྱོགས་སུ་འགྲོ་བས་ཡིན་གྱི། རྒྱུན་ལས་བཟློག་ཕྱོགས་སུ་འགྲོ་བས་ནི་མ་ཡིན་ནོ། །རྗེས་སུ་འབྲེལ་པར་ཞེས་བྱ་བ་ནི། ཆུའི་རྒྱུན་སོང་མ་ཐག་པའི་རྗེས་སུ་འབྲེལ་པར་ཕྱི་བཞིན་དུ་འགྲོ་བས་ཡིན་གྱི། ཆུའི་རྒྱུན་སོང་བའི་འོག་ཏུ་དུས་གཞན་ན་ཕྱི་བཞིན་འགྲོ་བས་ནི་མ་ཡིན་ནོ། །འགྲོ་བས་ནི་ཞེས་བྱ་བ་ནི་དེ་ལྟར་འགྲོ་བའི་དགེ་སློང་གིས་སོ། །དེས་ཞེས་བྱ་བ་ནི་སྔར་རྒྱང་གྲགས་ཀྱི་མགོར་ཆུ་བརྟག་པ་བྱས་པ་དེ་ཉིད་ཀྱིས་སོ་རྒྱང་གྲགས་ཀྱི་བར་དུ་ཞེས་བྱ་བ་ནི་སྔར་རྒྱང་གྲགས་ཀྱི་མགོར་ཆུ་བ་རྟགས་པའི་གནས་དེ་མན་ཆད་ནས་བརྩམས་ཏེ་རྒྱང་གྲགས་གཅིག་གི་མཐར་ཐུག་གི་བར་དུའོ། །འཇུག་ཏུ་རུང་ངོ་ཞེས་བྱ་བ་ནི་དེ་ལྟར་འགྲོ་བའི་དགེ་སློང་གིས་ནི་སྔར་རྒྱང་གྲགས་ཀྱི་མགོར་ཆུ་བརྟག་པ་བྱས་པ་དེ་ཉིད་ཀྱིས་རྒྱང་གྲགས་གཅིག་གི་མཐར་ཐུག་གི་བར་དུ་ཆུ་བརྟག་མི་དགོས་པར་འདོད་དགུར་སྤྱད་ཅིང་འཇུག་ཏུ་རུང་ངོ༌། །དེ་མན་ཆད་ནི་ཡང་དགེ་སློང་དེས་ཆུ་བརྟག་པར་བྱ་དགོས་ཏེ། སྔ་མ་བཞིན་དུ་ཅི་རིགས་པར་སྦྱར་རོ། །སྤྱིར་བཏང་བ་བྱས་པ་དེའི་དམིགས་ཀྱིས་བསལ་བ་བསྟན་པའི་ཕྱིར། གལ་ཏེ་དེ་ཆུ་གཞན་དང་འདྲེས་པར་གྱུར་ན་དེ་ཡན་ཆད་དུའོ་ཞེས་བྱ་བ་སྨྲས་ཏེ། གལ་ཏེ་ཆུའི་རྒྱུན་མགྱོགས་པ་དེ་རྒྱང་གྲགས་གཅིག་གི་མཐར་ཐུག་པའི་ནང་ཡན་ཆད་དུ་ཆུ་གཞན་དང་འདྲེས་པར་གྱུར་ན་གང་དུ་འདྲེས་པར་གྱུར་པ། དེ་ཡན་ཆད་དུ་དགེ་སློང་དེས་སྔར་རྒྱང་གྲགས་ཀྱི་མགོར་ཆུ་བརྟག་པ་བྱས་པ་དེ་ཉིད་ཀྱིས་འདོད་དགུར་སྤྱད་ཅིང་འཇུག་ཏུ་རུང་གི། འདྲེས་པ་མན་ཆད་ལ་ནི་དེས་ཡང་བརྟག་ཅིང་འཇུག་པར་བྱའོ་ཞེས་བྱ་བའི་ཐ་ཚིག་གོ །བརྟགས་པ་ནས་འདོམ་གང་ཁོར་ཡུག་ནི་དེ་ཉིད་ཡིན་ནོ་ཞེས་བྱ་བ་ནི། ཆུ་བརྟག་པའི་གནས་ནས་འདོམ་གང་ཁོ་ར་ཁོར་ཡུག་ཚུན་ཆད་ནི་བརྟག་པ་ཉིད་ཡིན་ནོ། །འདིར་གཞུང་ནི་བཙུན་པ་ཆབ་ཀྱི་
ཉན་ཀོར་གང་ལགས། ཉེ་བ་འཁོར་འདོམ་གང་ངོ་ཞེས་གསུངས་པ་ཡིན་ནོ། །མིག་གིས་དག་པ་ཉིད་ཀྱི་ཆུ་ནི་དག་པ་ཡིན་ནོ་ཞེས་བྱ་བ་ནི། ཆུ་གང་གིས་དག་པ་ཡིན་ཞེ་ན། མིག་གིས་དག་པ་ཉིད་ཀྱི་ཆུ་ནི་དག་པ་ཉིད་ཡིན་ནོ། །འདི་སྐད་བསྟན་ཏེ། ཆུ་ནི་མིག་གིས་བརྟག་པར་བྱ་སྟེ། གལ་ཏེ་དེ་ན་སྲོག་ཆགས་མི་སྣང་ན་དེའི་ཚེ་ཆུ་དག་པ་ཡིན་པར་རིག་པར་བྱའོ། །མིག་གང་གིས་ཤེ་ན་དེའི་ཕྱིར། ཐ་མལ་པས་སོ་ཞེས་བྱ་བ་སྨྲས་ཏེ། ཤའི་མིག་གིས་ཐ་སྙད་གདགས་སུ་རུང་བས་སོ། །འདིར་གཞུང་ནི་ཚེ་དང་ལྡན་པ་མ་འགགས་པས་ལྷའི་མིག་གིས་ཆུ་བརྟགས་པ་ན་དེའི་ཚེ་སྲིད་པ་བར་མའི་སྲོག་ཆགས་དག་གིས་ཐམས་ཅད་ཁྱབ་པར་མཐོང་ནས། བཅོམ་ལྡན་འདས་ཀྱིས་བཀའ་སྩལ་པ། ལྷའི་མིག་ནི་ཐ་སྙད་གདགས་སུ་མི་རུང་སྟེ། དེ་བས་ན་ལྷའི་མིག་གིས་ཆུ་བརྟག་པར་མི་བྱ་བར་འདི་ལྟར་ཆུ་རུང་བ་ལྔ་སྔར་སྤྱད་པར་བྱའོ་ཞེས་གསུངས་པ་ཡིན་ནོ། །མི་གཡོ་བ་ཉིད་དང་རྙོག་པ་མེད་པ་ལ་བརྟག་པར་བྱའོ་ཞེས་བྱ་བ་ནི། བརྟག་པར་བྱ་བའི་ཆུ་མི་གཡོ་མི་འགུལ་བ་ཉིད་དང༌། རྡུལ་དང་དལ་དུལ་གྱི་རྙོག་པ་མེད་ཅིང་ཤིན་ཏུ་དངས་པ་ལ་བརྟག་པར་བྱའོ། །བུམ་པ་གང་བ་ཉིད་ལའོ་ཞེས་བྱ་བ་ནི། ཆུ་བུམ་པ་གང་བ་ཉིད་ལ་བརྟག་པར་བྱ་བའོ། །དེ་ལ་བྱ་བ་ལས་འདས་པར་བགྲང་བའི་ཡུན་རིང་པོ་ཉིད་དུ་མི་བྱའོ་ཞེས་བྱ་བ་ནི། ཆུ་བརྟག་པ་དེ་ལ་དེ་བྱ་བ་ལས་འདས་པ་ཡིན་ནོ་ཞེས་བྱ་བར་ཡུན་རིང་བ་ཉིད་ཀྱི་གྲངས་སུ་གྲགས་པའི་ཐ་སྙད་ཀྱི་ཚིག་གང་ཡིན་པར་འགྱུར་བ་དེ་ལྟ་བུའི་ཡུན་རིང་པོ་ཉིད་དུ་བརྟག་པར་མི་བྱའོ། །འདི་སྐད་བསྟན་ཏེ། ཡུན་རིང་ཡང་རུང་ཐུང་ཡང་རུང་སྟེ། ཇི་ཙམ་གྱིས་སེམས་དག་པར་གྱུར་པ་དེ་ཙམ་དུ་བརྟག་པར་བྱའོ། །དེ་ལྟར་ཡང་འདིར་གཞུང་ནི་ཧ་ཅང་ཡུན་རིང་དུ་བརྟག་པར་མི་བྱ་བར་འདི་ལྟར་ཇི་སྲིད་ཀྱིས་བ་ལང་དྲུག་དང་ལྡན་པའི་ཤིང་རྟ་སྨྱིག་མའི་ཤར་བས་བཀང་བ་ལ་ཡངས་ཀྱིས་འཁོར་བར་འགྱུར་བ་དེ་སྲིད་དུ་བརྟག་པར་བྱའོ། །ཡང་ན་ཇི་སྲིད་ཀྱིས་སེམས་དག་པར་གྱུར་པ་དེ་སྲིད་དུ་བརྟག་པར་བྱའོ་ཞེས་གསུངས་པ་ཡིན་ནོ། །དེ་ལ་སེམས་དག་པར་གྱུར་པ་ཞེས་བྱ་བ་དེ་ལ་སེམས་དག་པར་གྱུར་ཅེས་བྱ་བ་ནི། མིག་གིས་དག་པ་ཉིད་ཅེས་བྱ་བ་དེ་ཡིན་
པས་དེའི་ཕྱིར་དེ་ལས་རིང་དུ་མི་བྱ་སྟེ། དེས་ན་འདིར་སེམས་དག་པ་ཞེས་བྱ་བ་དེ་ལོགས་ཤིག་ཏུ་མ་བསྡུས་སོ། །རྩེ་མོ་འཇམ་པོས་སྲོག་ཆགས་དག་བསྟན་སླའོ་ཞེས་བྱ་བ་ནི། ཐུར་མ་འམ་རྩྭ་ལ་སོགས་པའི་རྩེ་མོ་འཇམ་པོས་སྲོག་ཆགས་དག་བསྟན་པར་བྱའོ། །འདི་སྐད་བསྟན་ཏེ། གལ་ཏེ་ལ་ལ་ཆུའི་སྲོག་ཆགས་ལ་ཐེ་ཚོམ་ཟ་འམ་མི་མཐོང་ན་དེའི་ཚེ་ཐུར་མའམ་རྩྭ་འམ་ཤིང་བུ་འཇམ་པོའི་རྩེ་མོས་བསྟན་པར་བྱའོ། །དེ་དག་འཆི་བར་འགྱུར་བའི་ལམ་དུ་མི་དོར་རོ་ཞེས་བྱ་བ་ནི། ཆུའི་སྲོག་ཆགས་དེ་དག་དོར་བའི་ལམ་གྱི་ཐག་ཇི་སྲིད་ཀྱིས་འཆི་བར་འགྱུར་བའི་ལམ་གྱི་ཐག་དེ་སྲིད་དུ་དོར་བར་མི་བྱ་སྟེ། མི་འཕང་ངོ་ཞེས་བྱ་བའི་ཐ་ཚིག་གོ །གཞན་ཡང་མི་དོར་རོ་ཞེས་བྱ་བ་ནི། ཆུའི་སྲོག་ཆགས་དག་ལས་གཞན་པ་ཤིག་དང་རྩྭ་ཤིག་ལ་སོགས་པ་དག་ཀྱང་འཆི་བར་འགྱུར་བའི་ལམ་གྱི་ཐག་དེ་སྲིད་དུ་མི་དོར་རོ། །གལ་ཏེ་མར་མེའི་ནང་དུ་སྲོག་ཆགས་ལྟུང་ན་དེ་བྱེད་པས་དེ་གཡོགས་པར་བྱའོ་ཞེས་བྱ་བ་ནི། གལ་ཏེ་མར་མེའི་ནང་དུ་སྲོག་ཆགས་དག་ལྟུང་བར་འགྱུར་ན་དེའི་ཚེ་དེ་བྱེད་པས་ཞེས་བྱ་བ་མར་མེ་སྣང་བར་བྱེད་པས་མར་མེ་ལ་མི་སྒྲིབ་པའི་འོད་ཁང་གིས་མར་མེ་དེ་གཡོགས་པར་བྱའོ། །མར་མེ་སྣང་བར་བྱེད་པའི་འོད་ཁང་དེའི་ངོ་བོ་ཉིད་ཇི་ལྟ་བུ་ཞེ་ན་དེའི་ཕྱིར། སྨྱིག་ཚལ་གྱི་གཟེབ་དར་དཀར་རམ་ལྷང་ཚེར་སྲབ་མོས་གཡོགས་པ་ནི་དེ་ཞེས་བྱའོ་ཞེས་བྱ་བ་སྨྲས་ཏེ། སྨྱིག་མའི་ཚལ་པའི་གཟེབ་དར་དཀར་ལ་སོགས་པས་གཡོགས་པའམ། ལྷང་ཚེར་རིམ་ཕར་ཕྱེ་བ་སྲབ་མོས་གཡོགས་པ་ནི་དེ་ཞེས་བྱ་སྟེ། འོད་ཁང་ཞེས་བྱའོ་ཞེས་བྱ་བའི་ཐ་ཚིག་གོ །མིག་བརྒྱ་པ་ཡང་རུང་ངོ༌། །འདིར་གཞུང་ནི་འོད་ཁང་གི་གཟེབ་དར་དཀར་གྱིས་གཡོགས་པར་བྱའོ། །དེ་མི་རྙེད་ན་ལྷང་ཚེར་སྲབ་མོས་གཡོགས་པར་བྱའོ། །དེ་ཡང་མ་རྙེད་ནས། བཅོམ་ལྡན་འདས་ཀྱིས་བཀའ་སྩལ་པ། མིག་བརྒྱ་པ་བྱའོ་ཞེས་གསུང་པ་ཡིན་ནོ། །མིག་བརྒྱ་པ་ཇི་ལྟ་བུ་ཞེ་ན་དེའི་ཕྱིར། དང་པོ་ནས་བྱས་པའམ་བུམ་པ་ལ་སོགས་པའི་སྣོད་བུ་གུ་ཅན་ནོ་ཞེས་བྱ་བ་སྨྲས་ཏེ། དང་པོ་ནས་བྱས་པ་ཞེས་བྱ་བ་ནི། དེ་དང་པོ་འབྱུང་བ་ཉིད་ཀྱི་ཚེ་ན་རྫ་
མཁན་གྱིས་བྱས་པ་སྟེ། ས་ལས་བྱས་པའི་སྣོད་བུམ་པའི་དབྱིབས་འདྲ་བ། ཚགས་འདྲ་བ་བུ་གུ་མང་པོ་བཏོད་ནས་སོ་བཏང་བ་ཞེས་བྱ་བའི་ཐ་ཚིག་གོ །བུམ་པ་ལ་སོགས་པའི་སྣོད་བུ་གུ་ཅན་ཞེས་བྱ་བ་ནི། བུམ་པ་ལ་སོགས་པའི་སྣོད་ལ་ཕྱིས་རང་བཟོར་སྔ་མ་དང་འདྲ་བར་བུ་གུ་མང་པོ་བཏོད་པའོ།། དེ་གཉིས་ཀ་ཡང་འོད་ཁང་མིག་བརྒྱ་པ་ཞེས་བྱ་སྟེ། བརྒྱ་ཞེས་སྨོས་པ་ནི་བུ་གུ་མང་བ་ཉིད་དུ་བསྟན་པའི་དཔེ་ཙམ་དུ་ཟད་ཀྱི། གྲངས་བརྒྱ་ཁོ་ནར་ངེས་པ་ནི་མ་ཡིན་ནོ། །སྐྲའི་རྙིས་སྦྲུལ་གཟུང་བར་མི་བྱའོ་ཞེས་བྱ་བ་ནི། སྐྲ་ལས་བྱས་པའི་རྙིས་སྦྲུལ་བཅིང་བར་མི་བྱ་བའོ། །འདིར་སྐྲ་ཞེས་སྨོས་པའི་སྒྲ་ནི་སྐྲ་དང་རྔ་མ་དང་རྔོག་མ་ལ་སོགས་སྤྱི་ལ་སྙེགས་ཏེ་དེ་དག་གི་རྙི་གང་གིས་ཀྱང་སྦྲུལ་གཟུང་བར་མི་བྱ་བའོ། །ཆོ་ག་འདི་ནི་སྦྲུལ་སྣད་པར་འགྱུར་བ་སྤང་བའི་ཕྱིར་རོ། །སྦྲུལ་བསལ་བ་ཅི་ལྟར་བྱ་ཞེ་ན་དེའི་ཕྱིར། སེ་གོལ་གྱི་སྒྲ་ཕྱུང་སྟེ། བཞིན་བཟངས་མིག་ལམ་ན་མ་འདུག་ཤིག་ཅེས་བརྗོད་པར་བྱའོ་ཞེས་བྱ་བ་སྨྲས་ཏེ། སྔར་སེ་གོལ་གྱི་སྒྲ་ཕྱུང་སྟེ། དེའི་འོག་ཏུ་ཀྱེ་བཞིན་བཟངས་མིག་ལམ་ན་མ་འདུག་པར་གང་དུ་མི་རྣམས་ཀྱི་སྤྱོད་ཡུལ་དུ་མི་འགྱུར་བ་དེར་འདུག་ཤིག་ཅེས་དེ་སྐད་བརྗོད་པར་བྱའོ། །དེ་སྐད་བརྗོད་ཀྱང་གལ་ཏེ་མིག་ལམ་ན་འདུག་ན་དེའི་ཚེ་ཇི་ལྟར་བྱ་ཞེ་ན། དེའི་ཕྱིར། མི་འདུག་ན་དབྱུག་གུ་སྒམ་ཁས་དལ་བུས་རྫ་མའམ་བུམ་པར་བཅུག་ཏེ་ཁ་བཅད་ནས་བུ་གུ་དག་བཏོད་དེ་བསལ་བར་བྱའོ་ཞེས་བྱ་བ་སྨྲས་ཏེ། མིག་ལམ་ན་མི་སྣང་བའི་ཕྱོགས་ན་འདུག་ན་དབྱུག་གུ་སྐམ་ཁ་ར་རྐང་འདྲ་བ་ཁ་བྲག་གིས་དལ་བུས་རྫ་མ་འམ་བུམ་པར་བཅུག་སྟེ་ཁ་བཅད་ནས་རྫ་མ་འམ་བུམ་པ་དེ་ལ་རླུང་འབྱུང་བར་བྱ་བའི་ཕྱིར་ངོས་དག་ཏུ་བུ་གུ་ཕྲ་མོ་དག་བཏོད་དེ་གཙུག་ལག་ཁང་ནས་ཐབས་དེས་སྦྲུལ་དེ་བསལ་བར་བྱའོ། །མ་གྲུབ་ན་ལྕག་པོད་དམ་ཤུར་བུ་འམ་ཤུར་བུ་ཕྲེའུས་སམ་ཐ་གུ་རས་མས་དགྲིས་པའི་ཞགས་མིག་གིས་མགུལ་པ་བཅིངས་ཏེ་དོར་བར་བྱའོ་ཞེས་བྱ་བ་ནི། གལ་ཏེ་ཐབས་སྔ་མ་དེས་གཙུག་ལག་ཁང་ནས་དབྱུང་བར་མ་གྲུབ་ན་དེའི་ཚེ་ལྕག་པོད་དམ་ཤུར་བུའམ་ཤུར་བུ་ཕྲེའུས་མགུལ་བར་བཅིངས་ཏེ་དོར་བའམ། ཡང་ན་ཐ་གུ་རས་མས་དཀྲིས་པའི་ཞགས་མིག་གིས་མགུལ་པ་བཅིངས་ཏེ་དོར་བར་བྱའོ། །དེ་དག་ནི་གཞུག་པ་ལ་ཡང་
ངོ་ཞེས་བྱ་བ་ནི། ལྕག་པོད་ལ་སོགས་པས་བཅིང་པའི་ཐབས་དེ་དག་ནི་དོར་བ་འབའ་ཞིག་ལ་བྱ་བར་མ་ཟད་ཀྱི། རྫ་མའམ་བུམ་པར་གཞུག་པའི་ཐབས་སྔར་བསྟན་པ་དེ་ལ་ཡང་འདི་ལྟར་བྱ་བ་ཡིན་ནོ། །ཚང་ཚིང་གི་ནང་དུ་དོར་བར་མི་བྱའོ་ཞེས་བྱ་བ་ནི། སྦྲུལ་དེ་ནགས་དང་རྩྭ་ལ་སོགས་པ་ཚང་ཚིང་གི་ནང་དུ་དོར་བར་མི་བྱ་སྟེ། དེ་ནི་མེ་གཏོང་བའི་ཉེས་པ་སྤང་བའི་ཕྱིར་རོ། །དེ་ལྟ་བས་ན་ས་སྒྲེ་བོ་ལ་ཁུང་ལ་སོགས་པ་ཡོད་པར་དོར་བར་བྱའི་ནགས་ལ་སོགས་པའི་ཐིབས་པོའི་ནང་དུ་དོར་བར་མི་བྱའོ། །ཁུང་དུ་ཞུགས་ཀྱི་བར་དུ་བསྡད་པར་བྱའོ་ཞེས་བྱ་བ་ནི། ཁྱེར་བའི་མི་དེས་སྦྲུལ་དེ་ཚང་དུ་ཞུགས་ཞུགས་ཀྱི་བར་དུ་བསྡད་པར་བྱའོ། །དེ་ནི་འོལ་བ་ལ་སོགས་པས་ཁྱེར་བའི་ཉེས་པ་སྤང་བའི་ཕྱིར་རོ། །ཤིག་རྣམས་ནི་རས་མར་གཞུག་པར་བྱའོ་ཞེས་བྱ་བ་ནི། ཤིག་རྣམས་ནི་རས་མ་དག་གི་ནང་དུ་གཞུག་པར་བྱའོ། །དེ་ནི་གསེབ་དག་ཏུའོ་ཞེས་བྱ་བ་ནི། རས་མ་དེ་ནི་ཀ་བ་ལ་སོགས་པའི་གསེབ་དག་ཏུ་གཞུག་པར་བྱའོ། །འདིར་གཞུང་ནི་རས་མའི་ནང་དུ་དཀྲིས་ཏེ་ཀ་བའི་གསེབ་བམ་རྩིག་པའི་གསེབ་དག་ཏུ་གཞུག་པར་བྱའོ་ཞེས་གསུངས་པ་ཡིན་ནོ། །རྩྭ་ཤིག་རྣམས་ནི་གསིང་མར་རོ་ཞེས་བྱ་བ་ནི། རྩྭ་ཤིག་རྣམས་ནི་རྩྭ་སྔོན་པོའི་ཕྱོགས་སུ་གཞག་པར་བྱའོ། །ཡང་ན་ཕྱོགས་བསིལ་བར་རོ་ཞེས་བྱ་བ་ནི། དེ་དག་གི་གནས་གང་དུ་འོས་པ་དེར་བཞག་གོ །སྔ་མ་གཞུག་པའི་ཕྱིར་བསལ་སྣོད་བཅང་བར་བྱའོ་ཞེས་བྱ་བ་ལ། སྔ་མ་ཞེས་བྱ་བ་ནི། ལྟུང་བྱེད་འདི་ལ་ཆུའི་སྲོག་ཆགས་རྣམས་ཀྱི་སྐབས་སྔར་མཛད་པས་སྔ་མ་ནི་ཆུའི་སྲོག་ཆགས་རྣམས་ཏེ། དེ་དག་ཁྲོན་པ་ལ་སོགས་པ་ཐག་རིང་པོར་ཕྱིར་གཞུག་པའི་ཕྱིར་གང་ཟག་གིས་ཀྱང་བསལ་སྣོད་བཅད་བར་བྱའོ་ཞེས་འདིར་བསལ་སྣོད་ཅེས་བྱ་བ་ནི། བུམ་པ་གང་བཞིན་དུ་གཞུག་ཅིང་སྟོང་པར་དབྱུང་དུ་རུང་བ་གང་ཡིན་པ་དེ་ཡིན་པར་དགོངས་སོ། །དེ་ལྟར་ན་མགྲིན་པ་དང་ཞབས་གཉི་གར་དཔྱད་ཐག་གཉིས་ཀྱིས་བཏགས་ཤིང་གཞུག་པར་བྱ་བ་ཡིན་ཏེ། ཆུའི་ནང་དུ་ཕྱིན་པ་ན་མགྲིན་པར་བཏགས་པའི་དཔྱང་ཐག་གློད་པར་བྱ་ཞིང་ཞབས་ནས་བཏགས་པའི་དཔྱང་ཐག་དྲང་བར་བྱ་སྟེ། དེས་ན་དེ་ཁས་བུབ་ཏུ་འགྱུར་རོ། །ཐབས་དེ་དག་ཐམས་ཅད་ནི་
བསལ་སྣོད་ཅེས་བྱ་བའི་ཚིག་ཉིད་ལས་འཐོབ་བོ། །ཡང་ན་ཆུ་ཚགས་དེ་ཉིད་ཀྱིས་གཞུག་པར་བྱའོ་ཞེས་བྱ་བ་ནི། ཡང་ན་ཆུ་ཆགས་གང་གིས་སྲོག་ཆགས་དེ་དག་བཙགས་པར་གྱུར་པའི་ཆུ་ཚགས་དེ་ཉིད་ཀྱིས་སྲོག་ཆགས་དེ་དག་ཁྲོན་པ་ལ་སོགས་པའི་ནང་དུ་ཕྱིར་གཞུག་པར་བྱ་སྟེ། དེ་ལ་ཡང་ཁ་དང་ཞབས་གཉི་གར་དཔྱང་ཐག་གཉིས་ཀྱིས་གདགས་པའི་ཚུལ་ནི་སྔ་མ་བཞིན་ནོ། །ཆུ་ཚགས་ལ་སྲོག་ཆགས་ཆགས་པ་བསལ་བའི་ཐབས་ནི་བཤལ་བ་ཡིན་ནོ་ཞེས་བྱ་བ་ནི། ཆུ་ཚགས་ལ་སྲོག་ཆགས་དག་ཆགས་པ་བསལ་ཞིང་མེད་པར་བྱ་བའི་ཐབས་ནི་ཆུས་བཤལ་བ་ཡིན་ནོ། །དྲི་མ་ནི་བཀྲུ་བའོ་ཞེས་བྱ་བ་ནི། ཆུ་ཚགས་ལ་ཆགས་པའི་དྲི་མ་བསལ་བའི་ཐབས་ནི་ཆུས་བཀྲུ་བའོ། །རུལ་པ་ཉིད་དུ་མི་འགྱུར་བའི་ནི་སྐམ་པའོ་ཞེས་བྱ་བ་ཡང་ཐབས་ཞེས་བྱ་བར་སྦྱར་རོ། །རུལ་པའི་དངོས་པོ་ནི་རུལ་པ་ཉིད་དེ་ཆུ་ཚགས་རུལ་བ་ཉིད་དུ་མི་འགྱུར་བར་བྱ་བའི་ཐབས་ནི་ཉི་མ་ལ་སོགས་པས་སྐམ་པའོ། །དེ་གཉི་ག་ལ་ཡང་དམ་དུ་བཙིར་ན་ཕན་པ་ཉིད་དོ་ཞེས་བྱ་བ་ནི། ཆུ་ཚགས་ཀྱི་ཆོ་ག་དྲི་མ་བསལ་བ་དང་རུལ་པ་ཉིད་དུ་མི་འགྱུར་བར་བྱ་བ་སྔར་བསྟན་པ་དེ་གཉི་ག་ལ་ཡང་དམ་དུ་བཙིར་ཏེ་ཆུ་གཟགས་ན་ཕན་པ་ཉིད་དོ། །དགེ་འདུན་དང་གང་ཟག་དང་ཆུ་ཚགས་དང་ཆུ་ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་དོ་ཞེས་བྱ་བ་ལ། ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་དོ་ཞེས་བྱ་བའི་སྒྲ་ནི། དགེ་འདུན་ལ་སོགས་པ་བཞི་དང་སོ་སོར་སྦྱར་བར་བྱ་སྟེ། དགེ་འདུན་ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་པ་དང༌། གང་ཟག་ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་པ་དང༌། ཆུ་ཚགས་ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་པ་དང༌། ཆུ་ཚད་མ་རྙེད་པའི་ཤེས་པས་འཇུག་པ་ལ་ཁ་ན་མ་ཐོ་བ་མེད་དོ་ཞེས་བྱ་བར་སྦྱར་རོ། །དེ་ལ་དགེ་འདུན་ཚད་མ་ཞེས་བྱ་བ་ནི་དགེ་འདུན་འདི་ལ་སྲོག་ཆགས་དང་བཅས་པའི་ཆུས་ཐ་སྙད་བྱེད་པ་མེད་དོ་ཞེས་བྱའོ། །གང་ཟག་ཚད་མ་ཞེས་བྱ་བ་ནི། གང་ཟག་འདི་སྲོག་ཆགས་དང་བཅས་པའི་ཆུ་མི་སྤྱོད་དོ་ཞེས་བྱ་བའོ། །ཆུ་ཚགས་ཚད་མ་ཞེས་བྱ་བ་ནི། ཆུ་ཚགས་འདིས་བཙགས་པའི་ཆུ་དུས་ཐམས་
ཅད་དུ་དག་པ་ཡིན་ནོ་ཞེས་བྱའོ། །ཆུ་ཚད་མ་ཞེས་བྱ་བ་ནི། ཁྲོན་པའི་ཆུ་འདི་ལ་ནམ་ཡང་ཆུ་སྲོག་ཆགས་དང་བཅས་པར་མ་གྱུར་ཏོ་ཞེས་བྱ་བའོ། །ཁྱིམ་པ་ཡང་གལ་ཏེ་ལན་འགའ་ཡང་སྲོག་ཆགས་དང་བཅས་པའི་ཆུས་ཐ་སྙད་མི་བྱེད་པ་ཡིན་ན་དེ་ཡང་འདིར་གང་ཟག་ཚད་མ་ཞེས་བྱ་བ་ཉིད་ཀྱིས་སྡུས་པ་ཉིད་ཡིན་ནོ། །འདིར་གཞུང་ནི་ཆུ་རུང་བ་ནི་རྣམ་པ་ལྔ་སྟེ། དགེ་འདུན་གྱིས་རུང་བ་དང༌། གང་ཟག་གིས་རུང་བ་དང༌། ཆུ་ཚགས་ཀྱིས་རུང་བ་དང༌། ཁྲོན་པས་རུང་བ་དང༌། གང་ཉིན་ཞག་ཅིག་ཏུ་རུང་བའོ་ཞེས་གསུངས་པ་ཡིན་ནོ། །དེ་ལ་རུང་བ་དང་པོ་བཞི་ནི་མདོ་འདིས་བསྡུས་པ་ཡིན་ཏེ། གོ་རིམས་བཞིན་ནོ། །ལྔ་པ་ཉིན་ཞག་གཅིག་རུང་བའི་བསྡུ་བ་བསྟན་པའི་ཕྱིར། བཅུས་པ་དང་ཁྲོན་པ་དག་ནི་ཉི་མ་འཆར་ཀ་ཚུན་ཆད་བརྟགས་པ་ཉིད་ཀྱི་རྗེས་སུ་འཇུག་གོ་ཞེས་བྱ་བ་སྨྲས་ཏེ། ཆུ་བཅུས་པ་དང་ཁྲོན་པ་ནི་ཉི་མ་འཆར་ཀ་ཚུན་ཆད་བརྟགས་པའི་རྗེས་སུ་འཇུག་པ་ཡིན་ནོ། །འདིར་ཁྲོན་པ་ཞེས་བྱ་བ་ནི་ཆུ་དོང་ཡིན་པར་རིག་པར་བྱའོ། །རྐང་ཁྲུས་སྣོད་སྟོང་པར་མཐོང་ན་དགང་བར་བྱའོ་ཞེས་བྱ་བ་ལ། རྐང་ཁྲུས་སྣོད་ཅེས་བྱ་བ་ནི། དགེ་འདུན་ལ་དགོས་པ་རྐང་པ་ལ་སོགས་པ་བཀྲུ་བའི་རིལ་བ་ལ་བྱ་སྟེ། རྐང་ཁྲུས་སྣོད་དེ་ཆུས་སྟོང་པ་ཉིད་དུ་མཐོང་ན་དགང་བར་བྱའོ། །ཆུ་དང་གཞན་གྱི་སྣོད་ཀྱང་ཉེ་བར་གཞག་པར་བྱའོ་ཞེས་བྱ་བ་ནི། ཆུའི་སྣོད་དང་མར་དང་འབྲུ་མར་ལ་སོགས་པ་གཞན་གྱི་སྣོད་ཀྱང་དགེ་འདུན་གྱིས་བཅང་བར་བྱ་བའོ། །དགེ་འདུན་གྱི་དེར་གཏོགས་པ་ནི་སྣོད་སྤྱད་འདྲུབ་པའི་ལས་ཡིན་ནོ་ཞེས་བྱ་བ་ནི། དགེ་འདུན་གྱི་ཆུའི་སྣོད་དང་གཞན་གྱི་སྣོད་དེའི་ཁོངས་སུ་གཏོགས་པ་དེ་དང་འབྲེལ་བའི་སྣོད་སྤྱད་བྲུབ་པ་ནི་གང་ཟག་སྣོད་སྤྱད་འདྲུབ་པར་བསྐོས་པའི་ལས་ཡིན་པར་རིག་པར་བྱའོ། །འདིར་གཞུང་ནི་གནས་མལ་གྱི་གཞི་ལས་ཡོན་བདག་དག་གཙུག་ལག་ཁང་དུ་ལྷགས་ཏེ་དེ་དག་རྫ་མཁན་གྱིས་བྱས་པའི་སྣོད་དག་རྙེད་པ་དང༌། བཅོམ་ལྡན་འདས་ཀྱིས་སྐུར་ཅིག་ཅེས་བཀའ་སྩལ་ཏོ། །དེ་དག་སུས་ཀྱང་མ་བསྡུས་པས་དེ་དག་ཆུད་ཟོས་དང༌། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་སྣོད་སྤྱད་འདྲུབ་པར་བསྐོ་བར་བྱ་ཞིང་དེས་ཀྱང་འོངས་
པ་དག་ལ་སྦྱིན་པར་བྱའོ་ཞེས་གསུངས་པ་ཡིན་ནོ། །འདིར་སྦྱིན་པ་དང་བླང་བ་དག་ཀྱང་མ་འདུས་པ་མ་ཡིན་ནོ་ཞེས་བྱ་བ་ནི། སྣོད་སྤྱད་འདྲུབ་པའི་ལས་བསྟན་པ་འདིར་སྣོད་སྤྱད་སྦྱིན་བ་དང་བླང་བ་དག་ཀྱང་མ་འདུས་པ་མ་ཡིན་ཏེ། འདུས་པ་ཁོ་ན་ཡིན་ནོ། །འདི་སྐད་བསྟན་ཏེ། སྦྱིན་བ་དང་བླང་བ་ཡང་སྣོད་སྤྱད་འདྲུབ་པས་བྱ་བ་ཡིན་ནོ། །ཁྱིམ་པ་རྙིང་པ་བརྙན་བ་ཉིད་ལ་དེ་ཡོད་པ་ཉིད་ན་སྦྱིན་པར་བྱའོ་ཞེས་བྱ་བ་ནི། ཁྱིམ་པ་དག་དགེ་འདུན་ལ་སྣོད་སྤྱད་རྙིང་པ་བརྙན་ན་དགེ་སློང་སྣོད་སྤྱད་འདྲུབ་པས་སྣོད་སྤྱད་རྙིང་པ་དེ་ཡོད་པ་ཉིད་ཡིན་ན་གཡར་པོར་སྦྱིན་པར་བྱའོ། །དེས་གཙུག་ལག་ཁང་དུ་ཡོན་བདག་རྣམས་ལ་སྦྱིན་བར་བྱ་བ་ཉིད་ཀྱང་མ་བསྟན་པ་མ་ཡིན་ནོ་ཞེས་བྱ་བ་ནི། མདོ་སྔ་མར་ཁྱིམ་པ་རྙིང་པ་བརྙན་པ་ཉིད་ལ་དེ་ཡོད་པ་ཉིད་ན་སྦྱིན་པར་བྱའོ་ཞེས་བསྟན་པའི་ཚིག་དེས་གཙུག་ལག་ཁང་དུ་ཡོན་བདག་རྣམས་འོངས་ཏེ། སྣོད་སྤྱད་རྙིང་པ་བརྙན་པ་དག་ལ་གཡར་པོར་སྦྱིན་བར་བྱ་བ་ཉིད་ཀྱང་མ་བསྟན་པ་མ་ཡིན་ཏེ། དེས་ནི་སྔར་གཞུང་ལས་ཡོན་བདག་དག་གཙུག་ལག་ཁང་དུ་ལྷགས་ཏེ་དེ་དག་རྫ་མཁན་གྱིས་བྱས་པའི་སྣོད་དག་བརྙན་པ་དང༌། བཅོམ་ལྡན་འདས་ཀྱིས་སྐུར་ཅིག་ཅེས་བཀའ་སྩལ་ཏོ་ཞེས་གསུངས་པ་དེ་ཉིད་བསྡུས་པ་ཡིན་ནོ། །དགེ་སློང་ལ་ནི་སར་པ་ཕྱིར་བླང་བ་མེད་པ་ཉིད་དུའོ་ཞེས་བྱ་བ་ནི། དགེ་སློང་གི་དགེ་འདུན་ལ་སྣོད་སྤྱད་དག་བརྙན་ཏམ་སློང་ན་དགེ་སློང་སྣོད་སྤྱད་འདྲུབ་པས་སྣོད་སྤྱད་སར་པ་དག་ཡོད་ན་སྣོད་སྤྱང་སར་པ་ཕྱིར་བླང་བ་མེད་པ་ཉིད་དུ་གཏན་སྦྱིན་བར་བྱའོ། །འདིར་གཞུང་ནི་དགེ་སློང་རྣམས་ལ་ནི་སར་པ་དག་སྦྱིན་པར་བྱའོ། །ཁྱིམ་པ་རྣམས་ལ་ནི་རྙིང་པ་དག་བརྙན་པར་བྱའོ་ཞེས་གསུངས་པ་ཡིན་ནོ། །སྣོད་སྤྱད་ཀྱི་ཆེད་དུ་མཛོད་ཁང་བསྐོ་བར་བྱའོ་ཞེས་བྱ་བ་ནི། སྣོད་སྤྱད་གཞག་པའི་ཆེད་དུ་མཛོད་ཁང་བསྐོ་བར་བྱའོ། །ས་དང་ཟངས་མའི་སྣོད་སྤྱད་དག་སོ་སོར་གཞག་པར་བྱའོ་ཞེས་བྱ་བ་ནི། ས་ལས་བྱས་པའི་སྣོད་སྤྱད་དང་ཟངས་མ་ལས་བྱས་པ་དག་གལ་ཏེ་མཛོད་ཁང་གཞན་མེད་ན་མཛོད་ཁང་གཅིག་གི་ནང་ན་ཡང་སོ་སོར་གཞག་པར་བྱའོ། །ཡང་ན་གང་དུ་ཟངས་མ་ལས་བྱས་པའི་སྣོད་སྤྱད་གཞག་པའི་མཛོད་གཞན་ཅིག་སྦྱིན་པར་བྱའོ། །དེ་ནི་མ་ངེས་ཏེ་མཛོད་ཁང་མེད་དམ་
སྣོད་སྤྱད་ཉུང་ན་མི་སྦྱིན་ནོ། །ཆུ་ཉེ་བར་གཞག་པར་བྱའོ་ཞེས་བྱ་བ་ནི། དགེ་འདུན་གྱི་དོན་དུ་ཆུ་ཉེ་བར་གཞག་པར་བྱའོ། །གནས་གང་དུ་གཞག་པར་བྱ་ཞེ་ན་དེའི་ཕྱིར། གར་བབ་བབ་ཏུ་མི་གཞག་གོ་ཞེས་བྱ་བ་སྨྲས་སོ། །འོ་ན་གར་གཞག་ཅེ་ན་དེའི་ཕྱིར། དེའི་ཆེད་དུ་ཆུ་ཁང་བྱའོ་ཞེས་བྱ་བ་སྨྲས་ཏེ། ཆུ་གཞག་པ་དེའི་ཆེད་དུ་ཆུ་ཁང་བྱའོ། །ཕྱོགས་གང་དུ་བྱ་ཞེ་ན་དེའི་ཕྱིར། གཙུག་ལག་ཁང་གི་ནང་གི་ལྷོ་ནུབ་ཀྱི་མཚམས་སུའོ་ཞེས་བྱ་བ་སྨྲས་ཏེ། གཙུག་ལག་ཁང་གི་ནང་གི་ལྷོ་དང་ནུབ་ཀྱི་མཚམས་སུ་བྱ་སྟེ། དེར་རྟག་ཏུ་གྲིབ་མ་འབབ་པའི་ཕྱིར་རོ། །གཙུག་ལག་ཁང་གི་སྒོ་ཤར་ཕྱོགས་སུ་ལྟ་བ་ལ་ལྟོས་ཏེ་དེ་སྐད་གསུངས་སོ། །གཙུག་ལག་ཁང་གི་སྒོ་ཕྱོགས་གཞན་དུ་ལྟ་བ་ལ་ནི་ཆབ་ཁུང་གི་གྲྭ་མ་གཏོགས་པར་གཙུག་ལག་ཁང་ལ་ལྟོས་ཏེ་ལྷོ་དང་ནུབ་ཀྱི་མཚམས་ཁོ་ནར་ཆུ་ཁང་བྱའོ། །སྐར་ཁུང་གདོད་པ་དང་སོ་ཕག་གི་གཅལ་དགྲམ་པ་དང་ཆུ་ཁུང་གདོད་པ་དང་སྒོ་གདོད་པ་དང༌། སྒོ་གླེགས་དང་ཡང་མིག་གཞུག་པར་བྱའོ་ཞེས་བྱ་བ་ནི། ཆུ་ཁང་དེ་ལ་སྐར་ཁུང་གདོད་པར་བྱ་བ་དང༌། ས་གཞིར་སོ་ཕག་གི་གཅལ་དགྲམ་པར་བྱ་བ་དང༌། གང་ནས་ཆུ་ཕྱིར་འབབ་པར་འགྱུར་བ་ལོགས་སུ་ཆུ་ཁུང་གདོད་པར་བྱ་བ་དང༌། སྒོ་གདོད་པར་བྱ་བ་དང༌། སྒོ་དེར་སྒོ་གླེགས་གཞུག་པར་བྱ་བ་དང༌། སྒོ་གླེགས་དེ་ལ་ལག་གཟུངས་ཀྱི་ཡང་མིག་གཞུག་པར་བྱ་བའོ། །ཆུ་ཚགས་གཞག་པའི་ཕྱིར་གདང་བུ་བྱའོ་ཞེས་བྱ་བ་སྨྲས་ཏེ། ཆུ་ཁང་དེའི་ནང་དུ་གདང་བུ་གདགས་པར་བྱའོ། །འདིར་གཞུང་ནི་དེར་ཆུ་ཚགས་རུང་བ་དག་གཞག་པར་བྱའོ་ཞེས་གསུངས་པ་ཡིན་ནོ། །ཤིང་གི་ཁྲིའུ་དག་ལ་གཞག་གོ་ཞེས་བྱ་བ་ནི། ཆུ་སྣོད་ཤིང་གི་ཁྲིའུ་དག་གི་སྟེང་དུ་གཞག་པར་བྱའོ་ཞེས་བྱ་བའི་ཐ་ཚིག་གོ །ཡང་ན་སོ་ཕག་གི་སྟེགས་བུའི་སྟེང་དུའོ་ཞེས་བྱ་བ་ནི། ཡང་ན་ཆུ་སྣོད་སོ་ཕག་གི་སྟེགས་བུ་བྱས་པའི་སྟེང་དུ་གཞག་གོ །དེ་ཉི་ཚེའི་སྟེང་དུ་གཞག་ཏུ་ཡང་མེ་རུང་སྟེ། དེའི་ཕྱིར་གཞི་དེ་ལའོ་ཞེས་བྱ་བ་སྨྲས་ཏེ། སོ་ཕག་གི་སྟེགས་བུའི་སྟེང་དུ་ཤིང་ལེབ་བམ་ལྕུག་ཀོར་ལ་སོགས་པ་དག་གི་སྟེང་དུ་ཆུ་སྣོད་གཞག་པར་བྱའོ། །ཆུ་སྣོད་ནི་ཁྲུས་ཆུའི་ཆེད་ཀྱི་བར་ཡན་ཆད་ཀྱང་གཙང་སྦྲ་བྱའོ་ཞེས་བྱ་བ་ནི།
ཆུ་སྣོད་ནི་དྲི་མ་མེད་པར་གཙང་སྦྲ་བྱ་སྟེ། ཐ་ན་ཕྱི་རོལ་ཆེ་ཆུང་དུ་འགྲོ་བའི་ཁྲུས་ཆུའི་ཆེད་ཀྱི་སྣོད་ཡན་ཆད་ཀྱང་དྲི་མ་མེད་པར་གཙང་སྤྲ་བྱའོ། །དེ་ནི་བདག་ཉིད་ཀྱི་འབའ་ཞིག་ཏུ་མ་ཟད་ཀྱི། དགེ་འདུན་གྱི་དང་གཞན་གྱི་ཡང་དྲི་མ་མེད་པར་གཙང་སྤྲ་བྱའོ། །དྲི་མ་མེད་པར་བྱ་བ་བསྟན་ནས་ད་ནི་གཙང་བར་བྱ་བ་བསྟན་པའི་ཕྱིར། གཙང་བར་རོ་ཞེས་བྱ་བ་སྨྲས་ཏེ། ཆུ་སྣོད་དུ་རུང་བ་དང་ཁྲུས་ཆུའི་ཆེད་ཀྱི་སྣོད་ཡན་ཆད་ཀྱང་གཙང་བར་བྱའོ། །དེ་ལྟར་ཡང་གནས་ཐམས་ཅད་དུ་གཞག་པ་བཀག་པའི་ཕྱིར་དང་སས་བྱི་དོར་བྱའོ་ཞེས་གསུངས་པའི་ཕྱིར་རོ། །བཏུང་བར་བྱ་བའི་ཆུ་ཡང་ངོ་ཞེས་བྱ་བ་ནི། བཏུང་བར་བྱ་བའི་ཆུ་ཡང་གཙང་སྦྲ་དང་གཙང་བར་བྱའོ། །ཁྲུས་ཆུ་ཡང་དེ་དང་འདྲ་བར་བྱའོ། །དེ་ལག་པ་དང་གོས་རུང་བ་མ་ཡིན་པ་དག་གིས་བྲིམ་པར་མི་བྱའོ་ཞེས་བྱ་བ་ནི། བཏུང་བར་བྱ་བའི་ཆུ་དེ་ལག་པ་དང་གོས་རུང་བ་མ་ཡིན་པ་རེག་པ་དང་འབགས་པ་དག་གིས་བྲིམ་པར་མི་བྱ་བའོ། །དེ་ལྟར་ཡང་འདིར་གཞུང་ནི་ཆུ་རའི་ཚུལ་གང་ཞེ་ན། ཆུ་ར་ནི་བཅོམ་ལྡན་འདས་ཀྱིས་དགེ་སློང་རྣམས་ལ་དགེ་འདུན་གྱི་དང་གང་ཟག་གི་ཆུ་སྣོད་དང་ཆུའི་ཁ་གབ་རྗེས་སུ་གནང་བ་ཡིན་ཏེ། དེ་དག་དགེ་སློང་གིས་ཤིན་ཏུ་གཙང་སྦྲ་དང་གཙང་བར་སྤྱད་པར་བྱས་ཤིང་བཅང་བར་བྱ་སྟེ། ལག་པ་རུང་བ་དག་དང་གོས་རུང་བ་དག་གིས་གཟུང་བར་བྱ་བྲིམ་པར་བྱ་ཞིང་བྲམ་ཟེ་དང་ཁྱིམ་བདག་འོངས་སོ་ཅོག་ལ་ཡང་སྦྱིན་པར་བྱའོ། །དགེ་སློང་གིས་ཆུ་ཤིན་ཏུ་ལེགས་པར་བརྟག་པར་བྱས་ཏེ། རྣམ་པར་དངས་པ་རྙོག་པ་མེད་པ་མ་འདྲེས་པ་དག་པ་གཙང་བ་བཏུང་བར་བྱའོ་ཞེས་གསུངས་པ་ཡིན་ནོ། །ཆུ་སྣོད་རྣམས་ཀྱི་ནང་དུས་དུས་སུ་སྤྱད་བར་བྱའོ་ཞེས་བྱ་བ་ནི། ཆུ་སྣོད་རྣམས་ཀྱི་ནང་དུས་དུས་སུ་བཀྲུ་བཤལ་བྱ་ཞིང་སྦྱང་བར་བྱའོ། །ཕྱི་རོལ་སྦྱང་བ་ནི་སྡར་གཙང་སྒྲ་བྱའོ་ཞེས་བསྟན་པ་ཉིད་ཀྱིས་ཁོང་དུ་ཆུད་པར་བྱའོ། །ཟབ་མོ་རྣམས་ཀྱིས་ནི་པུ་ཤེལ་ཙིའི་ཁྲུ་ད་ཤིང་ངམ་འདབ་མའི་ཆང་བུའམ། རས་མ་ཤིང་བུའི་རྩེ་མོ་ལ་བཏགས་པས་སོ་ཞེས་བྱ་བ་ནི། ཆུ་སྣོད་ཟབ་མོ་རྣམས་ཀྱི་ནང་ལག་པས་ཞབས་མི་སླེབ་པ་དག་ནི་པུ་ཤེལ་རྩིའི་ཁྲུ་ད་བྱ་ཞིང་ཤིང་བུའི་རྩེ་མོ་ལ་བཏགས་པས་སམ། འདབ་མའི་ཆང་བུ་ཞེས་
བྱ་བ་ལོ་མའམ་འདབ་མའི་ཚོགས་བསྡུས་པ་ཅང་ཅང་པོ་ཁྲུ་ད་ཤིང་བུ་བྱས་པ་ཤིང་བུའི་རྩེ་མོ་ལ་བཏགས་པས་སམ། རས་མ་དྲིལ་བ་ཤིང་བུའི་རྩེ་མོ་ལ་བཏགས་པས་དྲུད་ཅིང་བཀྲུ་བཤལ་བྱའོ། །དེ་ལ་ཟས་ཀྱི་འབྲམ་ཟེར་མི་བསྲུང་བ་ཉིད་དུ་མི་བྱ་བའོ་ཞེས་བྱ་བ་ནི། པུ་ཤེལ་ཙིའི་ཁྲུ་ད་ཤིང་ལ་སོགས་པ་དེ་དག་ལས་ཟས་ཀྱི་འབྲམ་ཟེར་ཞེས་བྱ་བ་ཟས་ཀྱི་དུམ་གྲུགས་ཀྱིས་གོས་ཤིང་ཟང་ཟིང་ཅན་དུ་འགྱུར་བ་དེ་མི་བསྲུང་བ་ཉིད་དུ་མི་བྱ་སྟེ། བསྲུང་བ་ཉིད་དུ་བྱའོ། །འདི་སྐད་བསྟན་ཏེ། ཟང་ཟིང་མེད་པའི་པུ་ཤེལ་ཅིའི་ཁྲུད་ཤིང་ལ་སོགས་པས་སྤྱར་བར་བྱའོ། །བསྐམ་པར་བྱའོ་ཞེས་བྱ་བ་ནི། ཆུ་སྣོད་བཀྲུ་བཤལ་བྱས་པ་རྣམས་བསྐམ་པར་ཡང་བྱའོ། །དེའི་ཚེ་བྲེལ་བར་མི་འགྱུར་བར་བྱ་བའི་ཕྱིར་ཅིག་ཅར་ཉིད་དུ་མི་བྱའོ་ཞེས་བྱ་བ་ནི། བཀྲུ་བ་དང་སྐམ་པ་དེ་དག་བྱེད་པ་དེའི་ཚེ་སྣོད་སྤྱད་ཀྱིས་བྲེལ་བར་གྱུར་པ་ན་མི་རུང་བས་བྲེལ་བར་མི་འགྱུར་བའི་ཕྱིར་ཅིག་ཅར་དུས་གཅིག་ཉིད་དུ་མི་བྱ་བར་མཐར་གྱིས་བཀྲུ་བ་དང་བསྐམ་པར་བྱ་སྟེ། སྣོད་ཐམས་ཅད་དུས་གཅིག་ཏུ་བཀྲུ་བ་དང༌། བསྐམ་པར་མི་བྱའོ་ཞེས་བྱ་བའི་ཐ་ཚིག་གོ །ཆུ་དང་འབྲེལ་བའི་ལས་ནི་གནས་པས་བྱ་བ་ཡིན་ནོ་ཞེས་བྱ་བ་ནི། ཆུ་དང་འབྲེལ་པའི་ལས་ཇི་སྐད་སྔར་བསྟན་པ་དེ་དག་དང་གཞན་དག་ཀྱང་གནས་པ་སློབ་མ་དང་ཉེ་གནས་དག་གིས་བྱ་བ་ཡིན་ནོ། །འདིར་གཞུང་ནི་བཅོམ་ལྡན་འདས་ཀྱིས་ཆུ་བླང་བར་བྱའོ་ཞེས་གསུངས་པ་དང༌། དགེ་སློང་དག་གིས་སུས་བླང་བར་བྱ་བ་མི་ཤེས་ནས། བཅོམ་ལྡན་འདས་ཀྱིས་བཀའ་སྩལ་པ། གནས་པ་དག་གིས་བྱའོ་ཞེས་གསུངས་པ་ཡིན་ནོ། །ཆུ་གང་གི་འཁོར་དུ་གཏོགས་པ་དང་ཆུ་ཚགས་ལ་སོགས་པའི་ནི་ཆུ་དང་འབྲེལ་པའི་ལས་ཡིན་ནོ། །སྲོག་ཆགས་དང་བཅས་པའི་ཆུ་དང་འབྲེལ་བ་ཕྲན་ཚེགས་ལ་སོགས་པའི་སྐབས་སོ་ཞེས་བྱ་བ་དེ་རྫོགས་སོ། །སྲོག་ཆགས་དང་བཅས་པའི་ཆུ་ལ་སྤྱོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་སྨྲ་བར་འདོད་ནས། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་
དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། ཞུགས་པའམ་ཕྱོགས་པ་ལའོ་ཞེས་སྨྲས་ཏེ། ཞུགས་པ་ཞེས་བྱ་བ་ནི། འཁྲིག་པ་སྤྱོད་པ་ལ་ཞུགས་པའོ། །ཕྱོགས་པ་ཞེས་བྱ་བ་ནི་འཁྲིག་པའི་ཕྱིར་རྩོམ་པ་ཉིད་དོ། །དེ་གཉིས་ལ་དེ་ལྟར་ཤེས་ན་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཇི་ཞིག་ལ་ཞུགས་པའམ་ཕྱོགས་པ་ལ་ཞེ་ན་དེའི་ཕྱིར། འཁྲིག་པ་ལའོ་ཞེས་བྱ་བ་སྨྲས་ཏེ། གཉིས་ཀྱིས་གཉིས་སྤྲོད་པ་ལ་ཞེས་བྱ་བའི་ཐ་ཚིག་གོ །གང་གི་འཁྲིག་པ་ལ་ཞེ་ན་དེའི་ཕྱིར། སྐྱེས་པ་དང་བུད་མེད་ཀྱིའོ་ཞེས་བྱ་བ་སྨྲས་ཏེ། སྐྱེས་པ་དང་བུད་མེད་ཀྱི་འཁྲིག་པ་ལའོ། །སྐྱེས་པ་དང་བུད་མེད་ཇི་ལྟར་གྱུར་པ་ཞིག་གིས་ཤེ་ན། དེའི་ཕྱིར། ཁྱིམ་པ་ཉིད་དོ་ཞེས་བྱ་བ་སྨྲས་ཏེ། གལ་ཏེ་སྐྱེས་པ་དང་བུད་མེད་དེ་གཉིས་ཁྱིམ་པ་ཉིད་ཡིན་ནའོ། །གལ་ཏེ་སྤྱིར་ཟླ་གཅིག་མུ་སྟེགས་ཅན་གྱི་དགེ་སྦྱོང་ལ་སོགས་པ་ཁྱིམ་པ་མ་ཡིན་ན་དེའི་ཚེ་ཉེས་བྱས་སོ། །ཇི་དེ་གཉིས་གནས་གང་ན་འདུག་ཀྱང་རུང་ངམ་ཞེ་ན། དེའི་ཕྱིར། གནས་གཞན་ཉིད་ནའོ་ཞེས་བྱ་བ་སྨྲས་ཏེ། གནས་དེ་གལ་ཏེ་དགེ་སློང་དེ་ཉིད་ཀྱི་མ་ཡིན་ན་སྟེ་གནས་དེ་སྐྱེས་པ་དང་བུད་མེད་དེ་གཉིས་ཀྱི་གཉི་གའི་འམ། གང་ཡང་རུང་བའི་གནས་ཡིན་ན་ཞེས་བྱ་བའི་ཐ་ཚིག་གོ །ཉེས་པ་འདི་ནི་དེ་གཉིས་ལ་གནོད་པར་གྱུར་པ་ལས་བཞག་པ་ཡིན་གྱི། དགེ་སློང་གི་རང་གི་གནས་ཉིད་དུ་ནི་ཉེས་པ་འདིར་མི་འགྱུར་རོ། །གལ་ཏེ་ཁྱིམ་པའི་གནས་དེ་ཁྱིམ་བདག་གིས་དགེ་སློང་ལ་གཡར་པོར་བྱིན་ཞིང་དེ་ན་དགེ་སློང་འདུག་པ་ཡིན་ན་ནི་དེའི་ཚེ་ལྟུང་བ་མེད་དོ། །གལ་ཏེ་གནས་དེ་དགེ་སློང་གི་ཡིན་ལ། དགེ་སློང་གིས་ཁྱིམ་པ་ལ་གཡར་པོར་བྱིན་ཞིང་དགེ་སློང་དེར་འདུག་ན་ནི་དེའི་ཚེ་ཁ་ན་མ་ཐོ་བ་རྫོགས་པར་འགྱུར་རོ། །དེ་བཞིན་དུ་དགོན་པ་ལ་ཡང་གལ་ཏེ་དགེ་སློང་སྔ་མ་གནས་པ་ཡིན་ན་ནི་དེ་ལ་ལྟུང་བ་མེད་དོ། །ཁྱིམ་པ་སྔ་ན་གནས་པའི་དྲུང་དུ་དགེ་སློང་ཕྱིས་འོངས་ཏེ་འདུག་ན་ནི་ཁ་ན་མ་ཐོ་བ་རྫོགས་པར་འགྱུར་རོ། །མུ་སྟེགས་ཅན་དང་རབ་ཏུ་བྱུང་བ་འདི་གཉིས་གཙུག་ལག་ཁང་གཅིག་ན་གནས་པ་གང་ཡིན་པ་དེ་ཡང་གནས་
གཞན་ཉིད་ཡིན་པར་རིག་པར་བྱའོ། །ཇི་གནས་གཞན་ཙམ་འབའ་ཞིག་ལ་འདི་རྣམ་པར་གཞག་གམ་ཞེ་ན་དེའི་ཕྱིར། གཞན་མེད་པ་ཉིད་ཀྱིས་སྤྲད་དུ་རུང་བ་ཉིད་ནའོ་ཞེས་བྱ་བ་སྨྲས་ཏེ། གནས་གཞན་དེ་ན་སྐྱེས་པ་དང་བུད་མེད་དེ་གཉིས་ཀྱི་དྲུང་ན་མི་གཞན་མེད་པ་ཉིད་ཀྱིས་འཁྲིག་པ་སྤྱད་པ་སྤྲད་དུ་རུང་བ་ཉིད་ཡིན་ན་དེའི་ཚེ་དགེ་སློང་དེར་འདུག་ན་ཁ་ན་མ་ཐོ་བ་འདིར་འགྱུར་རོ། །འདི་སྐད་བསྟན་ཏེ། གལ་ཏེ་གནས་དེ་ན་དགེ་སློང་དེ་མ་གཏོགས་པར་མི་གཞན་མེད་པ་ཉིད་ཀྱིས་སྐྱེས་པ་དང་བུད་མེད་དེ་གཉིས་འཁྲིག་པ་སྤྱད་དུ་རུང་བ་ཉིད་ཡིན་ལ་དེའི་ཚེ་དགེ་སློང་དེར་འདུག་ན་ཁ་ན་ཐོ་བ་འདིར་འགྱུར་གྱི། མི་གཞན་ཡོད་ན་ནི་ལྟུང་བ་མེད་དོ། །ཇི་ཞིག་རྗེས་སུ་སྒྲུབ་ན་དེ་བྱེད་པ་པོ་ཉིད་ཡིན་ཞེ་ན། དེའི་ཕྱིར། མངོན་སུམ་དུ་བརྣག་པས་འདུག་ནའོ་ཞེས་བྱ་བ་སྨྲས་ཏེ། མ་བསྒྲིབས་པར་མངོན་སུམ་དུ་བྲང་པས་འདུག་ནའོ། །མངོན་སུམ་དུ་བྲང་པས་ཞེས་བྱ་བ་འདི་ནི་སོ་སོར་ཐར་པའི་མདོ་ལས་ནན་གྱིས་ཐེན་ཏེ་སྟན་ལ་འདུག་ན་ལྟུང་བྱེད་དོ་ཞེས་གསུངས་པ་དེ་བསྡུས་པ་ཡིན་ནོ། །ཉལ་པོ་བྱེད་པར་ཤོམ་པའི་ཁྱིམ་ན་འདུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་སྨྲ་བར་འདོད་ནས། ཤེས་གཙོ་བོ་ཞེས་བྱ་བ་དང་ཞུགས་པའམ་ཕྱོགས་པ་ལའོ་ཞེས་བྱ་བ་དང༌། འཁྲིག་པ་ལའོ་ཞེས་བྱ་བ་དང༌། སྐྱེས་པ་དང་བུད་མེད་ཀྱིའོ་ཞེས་བྱ་བ་དང༌། ཁྱིམ་པ་ཉིད་དོ་ཞེས་བྱ་བ་དང༌། གནས་གཞན་ཉིད་ནའོ་ཞེས་བྱ་བ་དང༌། གཞན་མེད་པ་ཉིད་ཀྱིས་སྤྱད་དུ་རུང་བ་ཉིད་ཡིན་ནའོ་ཞེས་བསླབ་པའི་གཞི་སྔ་མར་བསྟན་པ་དེ་དག་ཐམས་ཅད་འདིར་ཡང་ཁས་བླངས་ནས་བྱེ་བྲག་འགའ་ཞིག་བརྗོད་པར་བྱ་སྟེ། ཇི་ཞིག་རྗེས་སུ་བསྒྲུབ་ན་འདིར་དེ་བྱེད་པ་པོ་ཉིད་ཡིན་ཞེན་དེའི་ཕྱི། དབེན་པར་བརྣག་པར་འགྲེང་ནའོ་ཞེས་བྱ་བ་སྨྲས་ཏེ། དབེན་པ་སྐྱབས་ཡོད་པར་བརྣག་པས་འགྲེང་ན་དངོས་གཞིའི་ཁ་ན་མ་ཐོ་བར་འགྱུར་རོ། །བསླབ་པའི་གཞི་སྔ་མ་དང་འདི་གཉིས་ལ་བྱེ་བྲག་ནི་འདི་ཡོད་དེ་སྔ་མ་ལ་ནི་མངོན་སུམ་དུ་བརྣག་པས་འདུག་ནའོ། །འདི་ལ་ནི་དབེན་པར་བརྣག་པས་འགྲེང་ནའོ། །དེས་ན་
སྔ་མ་ལ་ནི་དབེན་པ་བརྣག་པས་འདུག་ན་ཉེས་བྱས་སུ་འགྱུར་ལ། འདི་ལ་ནི་མངོན་སུམ་དུ་བརྣག་པས་འགྲེང་ན་ཉེས་བྱས་སུ་འགྱུར་རོ། །དེའི་ཕྱིར་འདིར་དབེན་པ་སྐྱབས་ཡོད་པ་ཞེས་བྱ་བ་བསྡུས་སོ། །སྔ་མ་དང་འདི་གཉི་ག་ལ་འགྲོ་བ་དང་ཉལ་བ་གཉིས་ལ་ནི་ཉེས་པ་ཁོ་ནར་འགྱུར་རོ། །ཅི་གནས་ཐམས་ཅད་ན་འགྲེང་བའི་དགེ་སློང་ལའམ་ཞེ་ན་དེའི་ཕྱིར། སྐྱབས་ཡོད་པར་རོ་ཞེས་བྱ་བ་སྨྲས་ཏེ། རྩིག་པའམ་ས་བ་མོའམ་ཡོལ་བའམ་མུན་ནག་ལ་སོགས་པའི་སྒྲིབ་པ་གང་ཡིན་པ་དེས་བསྒྲིབས་པའི་གནས་སྐྱབས་ཡོད་པར་འགྲེང་བའི་དགེ་སློང་ལའོ། །ཅི་དགོས་པ་གང་ཡང་རུང་བས་བགྲེང་ནའམ་ཞེ་ན་དེའི་ཕྱིར། གལ་ཏེ་འཇིགས་པའི་དབང་གིས་མ་ཡིན་ནའོ་ཞེས་བྱ་བ་སྨྲས་སྟེ། གལ་ཏེ་གླང་པོ་ཆེ་ལ་སོགས་པ་འཇིགས་པའི་དབང་གིས་དེར་འགྲེང་བར་གྱུར་ན་དེའི་ཚེ་ཉེས་པ་མེད་དོ། །འདིར་གཞུང་ནི་གལ་ཏེ་འཇིགས་པར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །མངོན་སུམ་དུ་བྲང་པས་འདུག་པ་ལ་ཡང་འཇིགས་པའི་དབང་གིས་ན་ལྟུང་བ་མེད་པར་སྤྱར་རོ། །ཅི་གནས་དེར་འགྲེང་བ་ཐམས་ཅད་དངོས་གཞིའི་བྱེད་པ་པོ་ཡིན་ནམ་ཞེ་ན་དེའི་ཕྱིར། ཚོར་བྱ་དག་དང་ཚོར་བྱེད་ཉིད་ཀྱིས་མ་ཚོར་ན་ཉེས་བྱས་ཀྱིའོ་ཞེས་བྱ་བ་སྨྲས་ཏེ། ཚོར་བྱ་དག་ཅེས་བྱ་བའི་སྒྲས་ནི་སྤྲོད་པར་བྱེད་པ་གཉིས་བརྗོད་དོ། །ཚོར་བྱེད་ཅེས་བྱ་བའི་སྒྲས་ནི་ལྟུང་བ་འབྱིན་བ་བརྗོད་དོ། །དེ་ལྟར་ན་ཚོར་བྱ་གཉིས་དང་ཚོར་བྱེད་གཅིག་ནི་ཚོར་བྱ་དག་དང་ཚོར་བྱེད་དེ་དེ་དག་གི་དངོས་པོ་ནི་དེ་ཉིད་དོ། །དེ་ཉིད་ཀྱིས་མ་ཚོར་ན་ཞེས་བྱ་བ་ནི། ཚོར་བྱ་དག་དང་ཚོར་བྱེད་ཉིད་ཀྱིས་མ་ཚོར་ན་སྟེ། གལ་ཏེ་རྩིག་པ་ལ་སོགས་པའི་སྐྱབས་དེ་དག་ཡོད་པས་དེ་ན་ཚོར་བྱ་དག་དང་ཚོར་བྱེད་ཉིད་ཀྱིས་སྒྲ་གྲགས་པ་ཙམ་ཡང་མ་ཚོར་ན་དེའི་ཚེ་དེ་ན་འགྲེང་བ་ནི་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། ཕྱོགས་དེ་ན་འགྲེང་བའི་ལྟུང་བ་འབྱིན་པར་བྱེད་པས་ཀྱང་སྤྲོད་པར་བྱེད་པ་གཉིས་མ་ཚོར་ལ་སྤྲོད་པར་བྱེད་པ་གཉིས་ཀྱིས་ཀྱང་ཕྱོགས་དེན་འགྲེང་བའི་ལྟུང་བ་འབྱིན་པར་བྱེད་པ་མ་ཚོར་ན་དེའི་ཚེ་ཕྱོགས་དེ་ན་འགྲེང་བ་ནི་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །གནས་གཞན་ལ་སེམས་གཏོད་པ་ཡང་
ངོ་ཞེས་བྱ་བ་ཡང་ཉེས་བྱས་ཀྱི་བྱེད་པ་པོ་ཉིད་དོ་ཞེས་བྱ་བར་སྦྱར་ཏེ། མངོན་སུམ་དུ་བརྣག་པས་འདུག་པ་དང་དབེན་བར་བརྣག་པས་འགྲེང་བའི་དགེ་སློང་གི་ལྟ་བ་དང་ཉན་པ་སྤྲོད་པར་བྱེད་པ་གཉིས་ཀྱིས་གནས་ལས་གཞན་པའི་གནས་ལ་སེམས་གཏོད་པ་ཡང་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །འདི་མན་ཆད་ནི་ལྟུང་བྱེད་གཉི་གའི་ལྷག་པར་གྱུར་པའི་གཞུང་བརྗོད་པར་བྱ་སྟེ། འོ་ན་བསླབ་པའི་གཞི་འདི་གཉིས་ལ་ཇི་ཙམ་གྱིས་ན་གནས་གཅིག་པ་ཉིད་ཡིན་ཞེ་ན། དེའི་ཕྱིར། འདི་ལ་མཐོང་བའི་སྤྱོད་ཡུལ་གྱི་མཐའ་ཚུན་ཆད་ནི་གནས་ཀྱི་མཐའ་ཡིན་ནོ་ཞེས་བྱ་བ་སྨྲས་ཏེ། བསླབ་པའི་གཞི་གཉིས་པོ་འདི་ལ་མཐོང་བའི་སྤྱོད་ཡུལ་གྱི་མཐའ་ཚུན་ཆད་ཅེས་བྱ་བ་མིག་གི་སྤྱོད་ཡུལ་གྱི་མཐའ་ཚུན་ཆད་ནི་མཐའ་ཡིན་ཏེ། དེ་ཚུན་ཆད་གནས་གཅིག་ཏུ་གཏོགས་སོ། །མཛོད་ནི་ཁོངས་སུ་གཏོགས་པ་ཉིད་ཡིན་ནོ་ཞེས་བྱ་བ་ནི། མཛོད་དེ་ནི་ཁྱམས་ཀྱི་བདག་ཉིད་ཀྱི་ཁང་ཁྱིམ་དང་ལྷན་ཅིག་པའི་ཁོངས་སུ་གཏོགས་པ་ཉིད་ཡིན་ཏེ། གནས་གཅིག་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །ཁྱིམ་གཞན་ནི་ཐ་དད་པ་ཉིད་དོ་ཞེས་བྱ་བ་ནི། ཉལ་པོ་བྱེད་པའི་ཁྱིམ་དེ་ལས་གཞན་པའི་ཁྱིམ་ནི་ཁྱིམ་གཞན་ཞེས་བྱ་སྟེ། ཁྱིམ་གཞན་དེའི་སྒོའི་བྱང་སྟོད་ཁྱམས་ལ་སོགས་པས་ཆོད་པ་ན་འདུག་པའི་དགེ་སློང་གིས་ཉལ་པོ་བྱེད་པའི་ཁྱིམ་ན་འཁྲིག་པར་བྱེད་པ་གཉིས་ཞུགས་པའམ་ཕྱོགས་པ་མཐོང་བ་ནི་གལ་ཏེ་བཟའ་ཐ་དད་པ་ཉིད་ཡིན་ན་ནི་གནས་ཀྱང་ཐ་དད་པ་ཉིད་ཡིན་ནོ། །གལ་ཏེ་བཟའ་གཅིག་པ་ཉིད་ཡིན་ན་ནི་གནས་ཀྱང་གཅིག་པ་ཉིད་ཡིན་ནོ། །ཉལ་པོ་བྱེད་པར་ཤོམ་པའི་ཁྱིམ་ན་འགྲེང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གཅེར་བུ་ལ་སྦྱིན་པའི་ལྟུང་བྱེད་སྨྲ་བར་འདོད་ནས། ཕོ་ཡང་རུང་མོ་ཡང་རུང་བ་ལའོ་ཞེས་བྱ་བ་སྨྲས་ཏེ། འོག་ནས་རྟགས་འདི་དང་རབ་ཏུ་བྱུང་བ་འདི་མེད་པའི་གཅེར་བུའོ་ཞེས་འབྱུང་བ་དང་སྦྱར་རོ། །སྤྱིར་བཏང་བ་བྱས་ནས་དམིགས་ཀྱིས་བསལ་བ་བསྟན་པའི་ཕྱིར། ཉེ་དུ་དང་རབ་ཏུ་བྱུང་བ་ལ་ལྟོས་པ་དང་ནད་པ་མ་གཏོགས་སོ་ཞེས་བྱ་བ་སྨྲས་ཏེ། རྟགས་འདི་དང་རབ་ཏུ་བྱུང་བ་འདི་མེད་པའི་གཅེར་
བུ་ཉེ་དུའམ་རབ་ཏུ་འབྱུང་བ་ལ་ལྟོས་པའམ་ནད་པ་ནི་མ་གཏོགས་སོ། །འདིར་གཞུང་ནི་ཞུ་བ་ལས་བཙུན་བ་དགེ་སློང་གིས་གཅེར་བུ་ལ་རང་གི་སུག་པ་ནས་བཟའ་བ་དང་བཅའ་བ་སྩལ་བ་ལ་ལྟུང་བར་ཡང་མི་འགྱུར་བ་འགའ་མཆིས་སམ། ཡོད་དེ་ཉེ་དུ་ལ་སྦྱིན་པ་དང་རབ་ཏུ་འབྱུང་བ་ལ་ལྟོས་པ་དང་ནད་པ་ལ་སྦྱིན་བ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ཇི་ལྟ་བུར་གྱུར་པ་ཞིག་ཡིན་ཞེ་ན་དེའི་ཕྱིར། རྟགས་འདི་དང་རབ་ཏུ་བྱུང་བ་འདི་མེད་པའི་གཅེར་བུའོ་ཞེས་བྱ་བ་སྨྲས་ཏེ། གང་ལ་རྟགས་འདི་མེད་པ་དེ་ནི་རྟགས་འདི་མེད་པའོ། །དེ་བཞིན་དུ་གང་ལ་རབ་ཏུ་འབྱུང་བ་འདི་མེད་པ་དེ་ནི་རབ་ཏུ་བྱུང་བ་འདི་མེད་པ་སྟེ་མུ་སྟེགས་ཅན་གྱི་རབ་ཏུ་བྱུང་བའོ། །མུ་སྟེགས་ཅན་གྱི་རབ་ཏུ་བྱུང་བ་དེ་ལ་བྱིན་ནའོ། །དེ་ལ་གང་དུ་བྱིན་ན་ཞེ་ན་དེའི་ཕྱིར། ལུས་སམ་ལུས་དང་འབྲེལ་བར་རོ་ཞེས་བྱ་བ་སྨྲས་ཏེ། གཅེར་བུ་དེའི་ལུས་ལག་པ་ལ་སོགས་པར་རམ་ལུས་དང་འབྲེལ་པར་ལྷུང་བཟེད་ལ་སོགས་པར་རོ། །དངོས་པོ་ཇི་ཞིག་བྱིན་ན་ཞེ་ན་དེའི་ཕྱིར། བཅའ་བར་བྱ་བ་དང་བཟའ་བར་བྱ་བ་དག་གོ་ཞེས་བྱ་བ་སྨྲས་སོ། །ཅི་རྣམ་པ་གང་ཡང་རུང་བ་ཞིག་གམ་ཞེ་ན། དེའི་ཕྱིར། རུང་བ་དག་གོ་ཞེས་བྱ་བ་སྨྲས་ཏེ། སུ་ལ་རུང་བ་ཞེ་ན་དེའི་ཕྱིར། རང་དང་དེ་ལའོ་ཞེས་བྱ་བ་སྨྲས་ཏེ། རང་ཞེས་བྱ་བ་ནི་ལྟུང་བ་འབྱིན་པར་བྱེད་པར་རང་ལའོ། །དེ་ལ་ཞེས་བྱ་བ་ནི། སྦྱིན་པར་བྱ་བ་གཅེར་བུ་དེ་ལའོ།། འདིར་གཞུང་ནི། ཞུ་བ་ལས་བཙུན་པ་རེ་ཞིག་དགེ་སློང་གིས་གཅེར་བུ་པའམ་གཅེར་བུ་མ་ལ་བཅའ་བར་བགྱི་བ་དང༌། བཟའ་བར་བགྱི་བ་རུང་བ་མ་ལགས་པ་སྩོལ་ན་ལྟུང་བ་ཅིར་འགྱུར། ཉེས་བྱས་སོ། །གལ་ཏེ་དེ་ལ་རུང་བ་མ་ལགས་པ་དེ་འདྲ་བའི་བཅའ་བར་བགྱི་བ་དང༌། བཟའ་བར་བགྱི་བ་སྩོལ་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །ཅི་དོན་གང་ཡང་རུང་བའི་ཕྱིར་བྱིན་ནའམ་ཞེ་ན་དེའི་ཕྱིར། སྡིག་པ་ཅན་གྱི་ལྟ་བའི་རྣམ་པ་དང་དབྲལ་བ་ཉིད་ཀྱི་ཕྱིར་མ་གཏོགས་སོ་ཞེས་བྱ་བ་སྨྲས་ཏེ། དོན་དེའི་ཕྱིར་སྦྱིན་པན་མ་གཏོགས་སོ། །འདིར་གཞུང་ནི་སྡིག་པ་ཅན་གྱི་ལྟ་བའི་རྣམ་པ་དང་དབྲལ་བར་འདོད་པ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །ཇི་ཞིག་རྗེས་སུ་
སྒྲུབ་ན་གཅེར་བུ་ལ་སྦྱིན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རང་གིས་སྦྱིན་ནའོ་ཞེས་བྱ་བ་སྨྲས་ཏེ། གལ་ཏེ་རང་གིས་སྦྱིན་པར་བྱེད་ནའོ། །མི་རུང་བ་ཉིད་དག་ནི་ཉེས་བྱས་སོ་ཞེས་བྱ་བ་ནི། རང་དང་དེ་ལ་མི་རུང་བའི་བཅའ་བ་དང་བཟའ་བ་དག་རང་གིས་སྦྱིན་པར་བྱེད་ན་ནི་ཉེས་བྱས་སོ། །སྦྱིན་དུ་འཇུག་ན་ཡང་ངོ་ཞེས་བྱ་བ་ནི། བཅའ་བར་བྱ་བ་དང་བཟའ་བར་བྱ་བའམ་གོས་ལ་སོགས་པ་སྦྱིན་པར་བྱ་བ་དག་རང་གིས་དེ་ལ་གཞན་སྦྱིན་དུ་འཇུག་ན་ཡང་ཉེས་བྱས་སོ། །འོ་ན་སྦྱིན་དུ་འཇུག་པ་དེ་ལ་ལྟུང་བ་མེད་དོ་ཞེས་མ་གསུངས་སམ་ཞེ་ན་བདེན་མོད་ཀྱི། དེ་ནི་དུམ་བུར་བྱས་ནས་སྦྱིན་པར་བྱེད་དམ། གཞན་སྦྱིན་དུ་འཇུད་པ་ཡིན་གྱི། འདིར་ནི་རང་གིས་ཞལ་ཏ་བྱས་ཏེ་སྦྱིན་དུ་འཇུད་ན་ཉེས་བྱས་སུ་གསུངས་པ་ཡིན་ཏེ། དེ་བས་ན་བྱེ་བྲག་བསྟན་པའི་ཕྱིར། རང་གིས་ཞལ་ཏ་བྱས་པ་ནའོ་ཞེས་བྱ་བ་སྨྲས་ཏེ། རང་གིས་དེའི་ལུས་སམ་དེ་དང་འབྲེལ་བར་སྦྱིན་དུ་བཅུག་ན་ཉེས་བྱས་སོ། །བགོ་བཤའ་བྱེད་ན་ཡང་ངོ་ཞེས་བྱ་བ་ནི། ལུས་སམ་དེ་དང་འབྲེལ་བ་ལས་གཞན་པའི་ཕྱོགས་སུ་བཅའ་བ་དང་བཟའ་བ་དག་བགོ་བཤའ་བྱ་བའི་ཚུལ་གྱིས་འཇོག་ན་ཡང་ཉེས་བྱས་སོ། །ཞན་པའི་བློས་གདོལ་པ་བཞིན་དུ་གཞན་དུ་འཇོག་ན་ནི་ལྟུང་བ་མེད་དོ། །འདིར་གཞུང་ནི་ཞུ་བ་ལས་གཞུང་གཅིག་ཏུ་བགོ་བཤའ་བྱས་ཏེ་ཟ་ན་ཉེས་བྱས་སོ། །དེ་ཉིད་དང་ལྷན་ཅིག་བགོ་བཤའ་བྱེད་ན་ཉེས་བྱས་ཕྲ་མོའོ། །གལ་ཏེ་ན་བར་གྱུར་ན་ལྟུང་བ་མེད་དོ་ཞེས་གསུངས་པ་ཡིན་ནོ། །གཅེར་བུ་ལ་སྦྱིན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དམག་ལ་ལྟ་བའི་ལྟུང་བྱེད་སྨྲ་བར་འདོད་ནས་ཅི་ཞིག་བྱས་ན་དམག་ལ་ལྟ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། གཡུལ་ལ་མངོན་པར་དགའ་བའི་དམག་ལ་བལྟ་བའི་དོན་ཉིད་ཀྱིས་སོ་ཞེས་བྱ་བ་སྨྲས་ཏེ། གཡུལ་ལ་མངོན་པར་དགའ་བའི་དམག་ཅེས་བྱ་བ་ནི། གཡུལ་སྤྲད་པའི་ཕྱིར་ཆས་པའི་དམག་ལའོ། །བལྟ་བའི་དོན་ཉིད་ཀྱིས་ཞེས་བྱ་བ་ནི། བལྟ་བའི་དགོས་པ་ཉིད་ཀྱིས་ཞུགས་པའི་དགེ་སློང་ལ་ཁ་ན་མ་ཐོ་བ་འདིར་འགྱུར་རོ། །དགེ་སློང་བསོད་སྙོམས་ལ་སོགས་པའི་དོན་
དུ་བྱུང་བས་དམག་ལ་ལྟ་བ་བྱེད་ན་ཡང་ལྟུང་བྱེད་དོ། །ཅི་དམག་ལ་བལྟའོ་ཅོག་ལས་ཤེ་ན་དེའི་ཕྱིར། རྒྱལ་པོ་དང༌། བཅུན་མོ་དང༌། གཞོན་ནུ་དང༌། ཞང་བློན་དང༌། ཁྲོམ་གྱི་རུ་སྣ་དང༌། གྲོང་རྡལ་གྱི་མི་དང༌། ལྗོངས་ཀྱི་མིས་བཀུག་པ་དང༌། བར་ཆད་བྱུང་བའི་དབང་ཉིད་མ་གཏོགས་སོ་ཞེས་བྱ་བ་སྨྲས་ཏེ། རྒྱལ་པོ་དང༌། བཙུན་མོ་དང༌། གཞོན་ནུ་དང༌། ཞང་བློན་དང༌། ཁྲོམ་གྱི་རུ་སྣ་དང༌། གྲོང་རྡལ་གྱི་མི་དང༌། ལྗོངས་ཀྱི་མི་དག་གི་བཀུག་ཚིག་གིས་བཀུག་པ་ནི་མ་གཏོགས་སོ། །ཚུལ་ཁྲིམས་སམ་སྲོག་གི་བར་ཆད་ལ་སོགས་པ་གང་ཡང་རུང་བ་འགའ་ཞིག་ཉེ་བར་གྱུར་པའི་དབང་གིས་དེར་མི་འགྲོར་མི་རུང་ཞིང་དམག་མཐོང་བ་ཡང་མ་གཏོགས་སོ། །འདི་སྐད་བསྟན་ཏེ། གལ་ཏེ་རྒྱལ་པོ་ལ་སོགས་པས་ཁྱོད་འདིར་ཤོག་ཤིག་ཅེས་སྤྲིང་བའམ་ཡང་ན་ཚུལ་ཁྲིམས་དང་སྲོག་ལ་སོགས་པའི་བར་ཆད་ཉེ་བར་གྱུར་པའི་དབང་གིས་དགེ་སློང་དམག་ལ་ལྟ་བར་བྱེད་ན་དེའི་ཚེ་ལྟུང་བ་མེད་དོ། །དགེ་སློང་ཅི་ཞིག་རྗེས་སུ་བསྒྲུབ་པ་ལ་ལྟུང་བྱེད་འདིར་འགྱུར་ཞེ་ན། དེའི་ཕྱིར། འཕགས་པའི་ཉེན་ཀོར་གྱི་མཐའ་ལས་འདས་ཏེ་མཐོང་ནའོ་ཞེས་བྱ་བ་སྨྲས་ཏེ། གནས་གང་ནས་འཕགས་པའི་གནས་དེའི་ཉེན་ཀོར་གང་ཡིན་པ་དེའི་མཐའ་དེ་ལས་འདས་ཏེ། མཐོང་ན་མཐོང་བའི་དགེ་སློང་དེ་ལ་ཁ་ན་མ་ཐོ་བ་འདིར་འགྱུར་རོ། །ཆོས་གོས་ཀྱི་ཉེན་ཀོར་སྔར་བསྟན་པ་གང་ཡིན་པ་དེ་ཉིད་འདིར་ཡང་ཉེན་ཀོར་ཡིན་པར་རིག་པར་བྱའོ། །དགེ་སློང་གླང་པོ་ཆེའི་ཚོགས་ལྟ་བའི་ཕྱིར་འགྲོ་ན་ཇི་སྲིད་དུ་མིག་གིས་མ་མཐོང་གི་བར་དུ་ཉེས་བྱས་སོ། །མིག་གིས་མཐོང་བར་གྱུར་ན་ནི་ལྟུང་བྱེད་དོ། །འདིར་ནི་མཐོང་བ་ཙམ་ལ་དངོས་གཞིར་གསུངས་སོ། །ཉེན་ཀོར་གྱི་མཐའ་ལས་མ་འདས་པར་དགེ་སློང་གིས་བཞིན་བསྒྱུར་བ་ཙམ་གྱིས་མཐོང་བ་ལ་ནི་ཉེས་བྱས་སུ་གསུངས་སོ། །དམག་ལ་ལྟ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བམ་པོ་སུམ་ཅུ་གཅིག་པ། ཇི་ཞིག་རྗེས་སུ་སྒྲུབ་ན་དམག་གི་ནང་ན་གནས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དེ་དག་མེད་པར་དེར་ཉིན་མཚན་གཉིས་ལས་ལྷག་པར་འདུག་ནའོ་ཞེས་བྱ་བ་སྨྲས་ཏེ། རྒྱལ་
པོ་ལ་སོགས་པས་བཀུག་པ་དང་འཇིགས་པའི་དབང་དེ་དག་མེད་པར་གཡུལ་ལ་མངོན་པར་དགའ་བའི་དམག་དེར་ཉིན་མཚན་གཉིས་ལས་ལྷག་པར་འདུག་ན་ཁ་ན་མ་ཐོ་བ་འདིར་འགྱུར་རོ། །འདུལ་བ་ལས་ཉིན་མཚན་གྱི་མཐའི་སྐད་ཅིག་ལ་ཐ་སྙད་དུ་བྱ་བར་སྣང་བས་དེའི་ཕྱིར་ཉིན་མཚན་གཉིས་ཀྱི་མཐའི་སྐད་ཅིག་ཅེས་བྱ་བ་ཉིན་མཚན་གསུམ་པའི་སྐྱ་རེངས་དང་པོ་ཤར་ན་དངོས་གཞིའི་ཁ་ན་མ་ཐོ་བར་འགྱུར་ལ། དེའི་མདུན་རོལ་དུ་ནི་སྦྱོར་བའི་ཁ་ན་མ་ཐོ་བར་འགྱུར་རོ། །དེ་ཕྱིན་ཆད་ནི་ཉི་མ་རེ་རེ་ཞིང་དངོས་གཞིའི་ཁ་ན་མ་ཐོ་བ་རེ་རེར་འགྱུར་ལ། མདུན་རོལ་དུ་ནི་སྦྱོར་བའི་ཁ་ན་མ་ཐོ་བ་རེ་རེར་འགྱུར་རོ། །དགོས་པ་མེད་ན་སྔ་མ་ལ་ཡང་ངོ་ཞེས་བྱ་བ་ནི། རིགས་པའི་ཚུལ་གྱིས་དགོས་པ་མེད་ན་ཉིན་ཞག་གསུམ་པར་འདུག་པའི་སྔ་མ་ཉིན་ཞག་གཉིས་སུ་གནས་པའི་མཐའི་སྐད་ཅིག་ལ་ཡང་ཉི་མ་རེ་རེ་ཞིང་དངོས་གཞིའི་ཁ་ན་མ་ཐོ་བ་རེ་རེར་འགྱུར་ལ་མདུན་རོལ་དུ་ནི་སྦྱོར་བའི་ཁ་ན་མ་ཐོ་བ་རེ་རེར་འགྱུར་རོ། །དགོས་པ་མེད་པར་འདུག་པ་ལ་ནི་ཉེས་བྱས་ཁོ་ནར་འགྱུར་བ་ནི་མཐོང་བ་ལ་བཀག་པ་ལས་མངོན་ནོ། །དེ་བས་ན་དགེ་བའི་རང་བཞིན་དུ་གྲགས་པའི་དགོས་པ་མེད་པར་དམག་གི་ནང་དུ་འགྲོ་བ་ཉམས་སུ་མྱོང་བར་མི་བྱའོ། །དམག་གི་ནང་ན་གནས་པའི་ལྟུང་བྱེད་དོ་ཞེས་བྱ་བ་བཤད་ཟིན་ཏོ།། །།དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་སྨྲ་བར་འདོད་ནས། དཔུང་གི་ཡན་ལག་རྣམས་ནི་བྱེད་པ་པོ་ཉིད་དོ་ཞེས་བྱ་བ་སྨྲས་ཏེ། གཡུལ་ལ་མངོན་པར་དགའ་བའི་དམག་གི་དཔུང་གི་ཡན་ལག་གླང་པོ་ཆེ་དང་རྟ་དང་ཤིང་རྟ་དང་རྐང་ཐང་དག་ནི་བྱེད་པ་པོ་ཉིད་ཡིན་ནོ། །ཅི་དགེ་སློང་ཐམས་ཅད་ལ་དེ་དག་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར། བར་ཆད་ཀྱི་དབང་གིས་འགྲོ་བ་མ་ཡིན་པ་ལའོ་ཞེས་བྱ་བ་སྨྲས་ཏེ། བར་ཆད་ཀྱི་དབང་གིས་འགྲོ་བ་མ་ཡིན་པ་ལ་ཁ་ན་མ་ཐོབ་འདིར་འགྱུར་རོ། །བར་ཆད་ཡོད་ན་ནི་ལྟུང་བ་མེད་དེ་བར་ཆད་བརྒྱད་པོ་དག་ལས་བར་ཆད་གང་ཡང་རུང་བ་ཉེ་བར་གནས་པར་གྱུར་ན་ཉེས་པ་མེད་དོ་ཞེས་གསུངས་པའི་ཕྱིར་རོ། །དེ་ཡང་དཔེ་ཙམ་དུ་ཟད་ཀྱི། གནོད་པ་ཉེ་བར་ཞི་བར་བྱ་བའི་དོན་དུ་འགྲོ་བ་ཐམས་ཅད་ལ་ཡང་ཉེས་པ་མེད་
དོ། །བསྡུས་པ་དང་སོ་སོ་དག་གོ་ཞེས་བྱ་བ་ནི། དཔུང་གི་ཡན་ལག་བསྡུས་པའམ་སོ་སོ་བ་དག་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །བསྡུས་པ་ཞེས་བྱ་བས་ནི། རྒྱལ་མཚན་གྱི་མཆོག་གམ་དཔུང་གི་མཆོག་ཅེས་བྱ་བ་བསྡུས་པ་ཡིན་ཏེ། འདིར་དཔུང་གི་མཆོག་ཅེས་བྱ་བ་ནི། དཔུང་གི་ཚོགས་ཡན་ལག་བཞི་པ་ཡིན་པར་རིག་པར་བྱའོ། །སོ་སོ་ཞེས་བྱ་བས་ནི། གཡུལ་བཀོད་ཅིང་བཤམས་པའི་དམག་ལ་ལྟ་ན་ཞེས་བྱ་བ་ནི་བསྡུས་པ་ཡིན་ཏེ། བཤམས་པ་དང་བཀོད་པ་ཞེས་བྱ་བའི་སྒྲ་ནི་རྣམ་གྲངས་ཀྱི་ཚིག་ཡིན་པས་དོན་གཅིག་པར་རིག་པར་བྱ་སྟེ། འདི་ལྟར་གཡུལ་བཀོད་པ་ཉམས་སུ་མྱོང་བར་བྱས་ན་ཞེས་བསྟན་པ་དེའི་རྣམ་པར་བཤད་པ་བཤམས་པ་ལ་ལྟ་བ་ཉམས་སུ་མྱོང་བར་བྱས་ན་ཞེས་བྱ་བ་ཡིན་པའི་ཕྱིར་རོ། །གཡུལ་བཀོད་པ་ཞེས་བྱ་བ་ནི་བཀོད་པ་རྣམ་པ་བཞི་སྟེ། འབྲུའི་ཁ་ལྟ་བུ་དང་ཤིང་རྟའི་དབྱིབས་ལྟ་བུ་དང་ཟླ་གམ་གྱི་རྣམ་པ་ལྟ་བུ་དང༌། ནམ་མཁའ་ལྡིང་གི་འདབ་མ་ལྟ་བུའོ། །བཤམས་པ་ཡང་རྣམ་པ་བཞི་སྟེ། འབྲུའི་ཁ་ལྟ་བུ་དང༌། ཤིང་རྟའི་དབྱིབས་ལྟ་བུ་དང༌། ཟླ་གམ་གྱི་རྣམ་པ་ལྟ་བུ་དང༌། ནམ་མཁའ་ལྡིང་གི་འདབ་མ་ལྟ་བུའོ། །དེ་ལ་འབྲུའི་ཁ་ལྟ་བུ་ཞེས་བྱ་བ་ནི། མདུན་དུ་ཡང་རུ་དངར་རྒྱབ་ཏུ་ཡང་རུ་དངར་ལ་དབུས་ན་རྒྱལ་པོ་འདུག་པའོ། །ཤིང་རྟའི་དབྱིབས་ལྟ་བུ་ཞེས་བྱ་བ་ནི། མདུན་དུ་ཡང་རུ་དངར་བ་དང༌། གློར་ཡང་རུ་དངར་ལ་རྒྱབ་ན་རྒྱལ་པོ་འདུག་པའོ། །ཟླ་གམ་གྱི་རྣམ་པ་ལྟ་བུ་ཞེས་བྱ་བ་ནི། མདུན་དུ་ཡང་དུ་དངར་རྒྱབ་ཏུ་ཡང་རུ་དངར་ལ་དབུས་ན་རྒྱལ་པོ་འདུག་པའོ། །ནམ་མཁའ་ལྡིང་གི་འདབ་མ་ལྟ་བུ་ཞེས་བྱ་བ་ནི། གློར་རུ་དངར་ལ་མདུན་ན་རྒྱལ་པོ་འདུག་པའོ། །དཔུང་གི་ཡན་ལག་ཇི་ལྟ་བུ་དག་ཁ་ན་མ་ཐོ་བའི་རྣམ་པ་ཇི་ལྟ་བུའི་བྱེད་པ་པོ་ཡིན་ཞེ་ན། དེའི་ཕྱིར། སྟ་གོན་བྱས་པ་རྣམས་ཀྱི་དངོས་ལ་དངོས་གཞིའོ་ཞེས་བྱ་བ་སྨྲས་ཏེ། སྟ་གོན་བྱས་པ་ཞེས་བྱ་བ་ནི། གླང་པོ་ཆེ་ལ་སོགས་པ་གོ་བསྐོན་པ་དང༌། ཤིང་རྟ་བཤམས་པ་དང་རྒྱལ་མཚན་བསྒྲེང་བ་དང་གཞུ་བདུངས་པ་དང་མདའ་མདེའུ་ཅན་བསྟར་བ་དང་རལ་གྲི་ཕྱུང་བ་ཉིད་ལ་སོགས་པ་ཡིན་པར་རིག་པར་བྱའོ། །དེ་རྣམས་ཀྱི་
དངོས་ལ་ཞེས་བྱ་བ་ནི། དེ་རྣམས་ལ་རེག་པ་དང་བཤམས་པ་དཀྲུགས་པ་ལ་སོགས་པ་དངོས་གཞིའི་རྒྱུར་གྱུར་པའི་དངོས་པོ་ལའོ། །དངོས་གཞིའོ་ཞེས་བྱ་བ་ནི། དངོས་གཞིའི་ཁ་ན་མ་ཐོ་བའི་བྱེད་པ་པོ་ཉིད་ཡིན་ནོ། །སྦྱོར་བ་དེ་ལ་ནི་ཉེས་བྱས་ཀྱིའོ་ཞེས་བྱ་བ་ནི། སྦྱོར་བ་ལ་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །གླང་པོ་ཆེ་ལ་སོགས་པ་སྟ་གོན་མ་བྱས་པ་དེ་ལ་ནི་དངོས་དང་སྦྱོར་བ་གཉི་ག་ལ་ཡང་ཉེས་བྱས་ཁོ་ནའི་བྱེད་པ་པོ་ཉིད་ཡིན་ནོ། །སྟ་གོན་བྱས་པ་རྣམས་ཀྱི་དངོས་ལ་དངོས་གཞིའོ་ཞེས་བསྟན་པའི་དངོས་ལ་ཞེས་བྱ་བ་དེ་ཇི་ཞིག་ཡིན་པར་རིག་པར་བྱ་ཞེ་ན། དེའི་ཕྱིར་རེག་པ་དང༌། བཤམས་པ་དཀྲུགས་པ་དང༌། ལྟ་བའི་ཕྱིར་འཕགས་ཤིང་ཉེན་ཀོར་གྱི་མཐའ་ལས་འདས་ཏེ་མཐོང་བ་དེ་ལྟ་བུ་ནི་དངོས་དག་ཡིན་ནོ་ཞེས་བྱ་བ་སྨྲས་ཏེ། གླང་པོ་ཆེ་ལ་སོགས་པ་སྟ་གོན་བྱས་པ་རྣམས་ཞེས་བྱ་བར་སྦྱར་རོ། །རེག་པ་ཞེས་བྱ་བ་ནི། གླང་པོ་ཆེ་ལ་སོགས་པ་སྟ་གོན་བྱས་པ་རྣམས་ལ་རེག་པ་སྟེ་དཔུང་གི་ཡན་ལག་ལ་རེག་པ་ནི་རིན་པོ་ཆེར་སྨོས་པ་ལ་རེག་པའི་ལྟུང་བྱེད་ལས་ཡུལ་གཞན་ཡིན་པར་རིག་པར་བྱའོ། །བཤམས་པ་དཀྲུགས་པ་ཞེས་བྱ་བ་ནི། གླང་པོ་ཆེ་ལ་སོགས་པ་གནས་ནས་བསྐྱོད་པའོ། །བལྟ་བའི་ཕྱིར་འཕགས་ཤིང་ཉེན་ཀོར་གྱི་མཐའ་ལས་འདས་ཏེ་མཐོང་བ་ཞེས་བྱ་བ་ནི། དགེ་སློང་གིས་དཔུང་གི་ཡན་ལག་བལྟ་བའི་ཕྱིར་གནས་ནས་འཕགས་ཤིང་ཉེན་ཀོར་གྱི་དཔུང་གི་མཐའ་ལས་འདས་ཏེ་དཔུང་གི་ཚོགས་ཡན་ལག་དག་མཐོང་བ་གང་ཡིན་པའོ། །ལྟ་བུ་ནི་དངོས་དག་ཡིན་ནོ་ཞེས་བྱ་བ་ནི་རེག་པ་དང་བཤམས་པ་དཀྲུགས་པ་དང་བལྟ་བའི་ཕྱིར་འཕགས་ཤིང་ཉེན་ཀོར་གྱི་མཐའ་ལས་འདས་ཏེ། མཐོང་བ་ཞེས་བྱ་བ་རྣམ་པ་གསུམ་པོ་དེ་ལྟ་བུ་ཉིད་ནི་དངོས་གཞིའི་ཁ་ན་མཐོ་བའི་རྒྱུར་གྱུར་པའི་དངོས་དག་ཡིན་ནོ། །འདིར་གཞུང་ནི་ཁ་ཅིག་ལས་དགེ་སློང་གིས་གླང་པོ་ཆེ་གོ་བསྐོན་པའི་བཤམས་པ་དཀྲུགས་ན་ཞེས་གསུངས་པ་དང་ཁ་ཅིག་གླང་པོ་ཆེའི་ཚོགས་ལྟ་བའི་ཕྱིར་འགྲོ་བ་དང༌། དགེ་སློང་གིས་གླང་པོ་ཆེ་གོ་བསྐོན་པ་ལ་རེག་ན་ཞེས་བྱ་བ་ལ་སོགས་པ་གསུངས་པ་ཡིན་ནོ། །མ་ཆས་པ་ཉིད་ལ་ནི་ན་སྨད་པ་ཉིད་དོ་ཞེས་བྱ་བ་ལ་མ་ཆས་པ་ཉིད་ཅེས་བྱ་བ་ནི། གཡུལ་ལ་མངོན་པར་དགའ་བ་ཉིད་
མ་ཡིན་པ་དང་སྟ་གོན་མ་བྱས་པ་ཉིད་ཀྱི་དཔུང་གི་ཡན་ལག་རྣམས་སོ། །ན་སྨད་པ་ཉིད་དོ་ཞེས་བྱ་བ་ནི། དངོས་གཞིའི་ཁ་ན་མ་ཐོ་བ་ལས་ན་སྨད་པ་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །དམག་ལ་ལྟ་བ་དང་དམག་གི་ནང་ན་གནས་པ་དང་དཔུང་གི་ཡན་ལག་ཉམས་སུ་མྱོང་བ་ཞེས་བྱ་བའི་བསླབ་པའི་གཞི་གསུམ་པོ་དག་ལ་དམག་གཡུལ་གྱི་ཕྱིར་མ་ཆས་པ་ཉིད་ལ་ནི་དངོས་གཞིའི་གནས་སུ་ནི་ཉེས་བྱས་ལ་ཉེས་བྱས་ཀྱི་གནས་སུ་ནི་ཉེས་བྱས་ཕྲ་མོར་འགྱུར་རོ། །གླང་པོ་ཆེ་དང་རྟ་དང་བྱ་གག་དང་བྱ་ལ་བ་ཀ་དང་བྱ་བརྟ་ཀ་དང༌། སྐྱེས་པ་དང་བུད་མེད་འཐབ་པ་ལ་སོགས་པ་བྱ་བ་དང་བྱེད་དུ་གཞུག་པ་དང་བལྟ་བར་མི་བྱའོ་ཞེས་བྱ་བ་ནི། གླང་པོ་ཆེ་འཐབ་པ་མི་བྱ་བྱེད་དུ་མི་གཞུག་བལྟ་བར་ཡང་མི་བྱའོ། །དེ་བཞིན་དུ་རྟ་དང་བྱ་གག་དང༌། བྱ་ལ་བ་ཀ་དང༌། བྱ་བརྟ་ཀ་དང་སྐྱེས་པ་དང་བུད་མེད་འཐབ་པ་ལ་སོགས་པ་ཡང་མི་བྱ། བྱེད་དུ་མི་གཞུག་བལྟ་བར་ཡང་མི་བྱའོ། །འདིར་དཔུང་གི་ཡན་ལག་ཏུ་གྱུར་པའི་གླང་པོ་ཆེ་ལ་སོགས་པ་ནི་མི་གཟུང་ངོ༌། །དཔུང་གི་ཡན་ལག་ཉམས་སུ་མྱོང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་རྡེག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རྙོག་པ་ཅན་གྱི་སེམས་ཉིད་ཀྱིས་དགེ་སློང་ཕ་རོལ་ལ་ལུས་སམ་དེས་འཕངས་པའམ་དེ་དང་འབྲེལ་པ་དག་གང་ཡང་རུང་བ་ཐ་ན་རྐང་པའི་མཐེ་བོང་ངམ་ཡུངས་ཀར་རམ་རྩྭ་དག་གིས་བརྡེགས་ནའོ་ཞེས་བྱ་བ་སྨྲས་ཏེ། སེམས་གང་ལ་རྙོག་པ་ཡོད་པ་དེ་ནི་རྙོག་པ་ཅན་གྱི་སེམས་སོ། །དེའི་དངོས་པོ་ནི་དེ་ཉིད་དེ་དེས་བརྡེགས་ནའོ་ཞེས་བྱ་བར་སྦྱར་རོ།། སུ་ལ་བརྡེགས་ན་ཞེ་ན་དེའི་ཕྱིར་དགེ་སློང་ཞེས་བྱ་བ་སྨྲས་སོ། །ཇི་དགེ་སློང་བདག་ཉིད་ལ་བརྡེགས་ན་འམ་ཞེ་ན་དེའི་ཕྱིར་ཕ་རོལ་ལ་ཞེས་བྱ་བ་སྨྲས་ཏེ། བདག་ཉིད་མ་ཡིན་པ་གཞན་ལའོ། །ཇི་ཞིག་གིས་བརྡེགས་ན་ཞེ་ན་དེའི་ཕྱིར། ལུས་སམ་དེས་འཕངས་པའམ་དེ་དང་འབྲེལ་བ་དག་ཅེས་བྱ་བ་ལ་སོགས་པ་སྨྲས་ཏེ། ལུས་ཀྱིས་ཞེས་བྱ་བ་ནི་ལག་པ་ལ་སོགས་པས་སོ། །ལུས་ཀྱིས་འཕངས་པ་ཞེས་བྱ་བ་ནི། རྡོ་ལ་སོགས་པས་སོ། །ལུས་དང་འབྲེལ་བ་ཞེས་བྱ་བ་ནི། དབྱུག་པ་ལ་སོགས་པས་སོ། །གདོན་མི་ཟ་བར་སྣང་བར་འགྱུར་བས་བརྡེག་པ་ལས་ཁ་ན་མ་ཐོ་བ་
འདིར་འགྱུར་བར་མ་ཟད་དེ་འདི་ལྟར་གང་ཡང་རུང་བ་ཞེས་བྱ་བ་ལ་སོགས་སྨྲས་སོ། །ཐ་ན་རྐང་པའི་མ་ཐེ་བོའམ། ཡུངས་ཀར་རམ་རྩྭ་དག་གིས་བརྡེགས་ནའོ་ཞེས་བྱ་བ་ནི། བརྡེགས་པར་བྱ་བའི་སྤྱད་ཀྱི་མཐའ་བསྟན་པ་ཡིན་ཏེ། དེ་བས་ཀྱང་ཆེས་ཆུང་བའི་དངོས་པོས་བརྡེགས་ན་ཡང་ལྟུང་བ་ན་སྨད་པ་མེད་དོ། །གཞན་དག་ལ་ཡང་ངོ་ཞེས་བྱ་བ་ནི། །བསླབ་པའི་གཞི་འོག་མ་གཟས་པ་དང༌། གནས་ངན་ལེན་བརྡེགས་པའི་འོག་ཏུ་གང་གི་ཚེ་སྐྲངས་པར་སློང་ཕ་རོལ་ལ་ཞེས་བྱ་བ་འདི་ཉིད་སྦྱོར་བར་བྱའོ། །ཅི་བརྡེགས་པའི་འོག་ཏུ་གང་གི་ཚེ་སྐྲངས་པར་གྱུར་པ་དེའི་ཚེ་ན་དངོས་གཞིར་རམ། འོན་ཏེ་རྡེག་པའི་ཚེ་འདི་ཉིད་ན་ཞེ་ན་དེའི་ཕྱིར། རེག་ནའོ་ཞེས་བྱ་བ་སྨྲས་ཏེ། ལུས་ལ་སོགས་པ་ལ་རེག་ན་རེག་མ་ཐག་པའི་སྐད་ཅིག་དེ་ཉིད་ལ་དངོས་གཞིར་འགྱུར་རོ། །ཅི་བརྡེག་སྤྱད་མང་པོ་ཉིད་ཡིན་ན་ཡང་ལྟུང་བྱེད་གཅིག་ཏུ་འགྱུར་རམ་ཞེ་ན། དེའི་ཕྱིར། བརྡེག་སྤྱད་རེ་རེ་ལའོ་ཞེས་བྱ་བ་སྨྲས་ཏེ། བརྡེག་སྤྱད་རེ་རེ་ལ་ལྟུང་བྱེད་རེ་རེར་འགྱུར་ཏེ་སོར་མོ་ལ་སོགས་པ་བརྡེག་སྤྱད་ཇི་སྙེད་ཀྱིས་དགེ་སློང་ལ་རེག་པར་འགྱུར་བ་དེ་སྙེད་ཀྱི་ལྟུང་བྱེད་དུ་འགྱུར་རོ། །མ་ཕོག་ན་ཉེས་བྱས་སོ་ཞེས་བྱ་བ་ནི། སོར་མོ་ལ་སོགས་པ་བརྡེག་སྤྱད་དག་གིས་མ་ཕོག་ན་བརྡེག་སྤྱད་རེ་རེ་ལ་ཉེས་བྱས་རེ་རེའོ། །བརྡེག་པར་བྱ་བ་གཞན་ཡིན་ལ་གཞན་ལ་བརྡེག་པར་མི་བྱའོ་ཞེས་བྱ་བ་ལ། བརྡེག་པར་བྱ་བ་གཞན་ཡིན་ལ་ཞེས་བྱ་བ་ནི། སེམས་བརྡེག་པར་བྱ་བ་ཡིན་པ་ལའོ། །གཞན་ལ་བརྡེག་པར་མི་བྱའོ་ཞེས་བྱ་བ་ནི། རང་གི་ལུས་ལ་རྡེག་པར་མི་བྱ་བའོ། །ཚིག་འདི་ནི་སེམས་རྙོག་པ་ཅན་ཉིད་ཀྱིས་རང་གི་ལུས་ལ་རྡེག་པ་དགག་པའི་ཕྱིར་བྱས་སོ། །འདིར་གཞུང་ནི་དེ་ལྟ་བས་ན་དགེ་སློང་གིས་བརྡེག་པར་བྱ་བ་གཞན་ཡིན་ལ་གཞན་ལ་བརྡེག་པར་མི་བྱའོ་ཞེས་བྱ་བ་གསུངས་པ་ཡིན་ནོ། །ཀ་བ་ལ་རྡེག་པར་མི་བྱའོ་ཞེས་བྱ་བ་ནི། རྙོག་པ་ཅན་གྱི་སེམས་ཉིད་ཀྱིས་ཀ་བ་ལ་བརྡེག་པར་མི་བྱའོ། །རྩིག་པ་དང༌། ས་དང༌། ཤིང་ལྗོན་པ་དང༌། གཞན་ལ་ཡང་མི་བྱའོ་ཞེས་བྱ་བ་ནི། རྙོག་པ་ཅན་གྱི་སེམས་ཉིད་ཀྱིས་རྩིག་པ་དང་ས་དང་ཤིང་ལྗོན་པ་དང་སྒོ་གླེགས་ལ་སོགས་པ་གཞན་ལ་བརྡེག་པར་མི་བྱའོ། །
ཤིང་ཏོག་བརླག་པའི་ཕྱིར་བརྡེག་པ་གང་ཡིན་པ་དེ་ནི་འབྱུང་བའི་ཚོགས་འཇིག་པའི་ལྟུང་བྱེད་ཀྱི་ཁོངས་སུ་འདུས་སོ། །འདི་ལ་བྱེ་བྲག་ནི་འདི་ཡིན་ཏེ། དགོས་པའི་དབང་གིས་ཤིང་གཅོག་པ་དང་ས་བརྡུང་བ་ལ་སོགས་པ་ལ་ནི་ཉེས་པ་མེད་དོ། །དེ་ལྟར་ཡང་འདིར་ཁུངས་ནི་ས་རིས་དགེ་འདུན་གྱིས་བསྲོ་གང་གི་ཤིང་གཤེགས་པ་དང་ཞེས་གསུངས་པ་ཡིན་ནོ། །བརྡེག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་གཟས་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། བརྡེག་པར་གཟས་ནའོ་ཞེས་བྱ་བ་སྨྲས་ཏེ། འདིར་ཡང་རྙོག་པ་ཅན་གྱི་སེམས་ཉིད་ཀྱིས་དགེ་སློང་ཕ་རོལ་ལ་ལུས་སམ་དེས་འཕངས་པའམ་དེ་དང་འབྲེལ་བ་དག་གང་ཡང་རུང་བ་ཐ་ན་རྐང་པའི་མཐེ་བོའམ་ཡུངས་ཀར་རམ་རྩྭ་དག་གཟས་ནའོ་ཞེས་བྱ་བ་ལ་སོགས་པ་སྔར་བསྟེན་པའི་གཞུང་ཐམས་ཅད་ཅི་རིགས་པར་སྦྱར་རོ། །དེ་ལྟར་ན་འདིར་ཚིགས་གི་དོན་འདི་འབྱུང་སྟེ། རྙོག་པ་ཅན་གྱི་སེམས་ཉིད་ཀྱིས་དགེ་སློང་ཕ་རོལ་ལ་ལུས་ལ་སོགས་པ་དག་གང་ཡང་རུང་བ་ཐ་ན་རྐང་པའི་མཐེ་བོ་ལ་སོགས་པ་དག་གིས་བརྡེག་པར་གཟས་ན་ཁ་ན་མ་ཐོ་བ་འདིར་འགྱུར་རོ། །ཇི་རྫས་མང་པོ་ཉིད་ཡིན་ན་ཡང་ཁ་ན་མ་ཐོ་བ་གཅིག་ཏུ་འགྱུར་རམ་ཞེ་ན་དེའི་ཕྱིར། རྫས་རེ་རེ་ལའོ་ཞེས་བྱ་བ་སྨྲས་ཏེ། སོར་མོ་ལ་སོགས་པའི་རྫས་ཇི་སྙེད་གཟས་པ་དེ་སྙེད་ཀྱི་ལྟུང་བྱེད་དུ་འགྱུར་རོ། །སྦྱོར་བ་ལ་ནི་དེ་སྙེད་ཀྱི་ཉེས་བྱས་སུ་འགྱུར་རོ། །གཟས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་གནས་ངན་ལེན་འཆབ་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཕམ་པར་འགྱུར་བ་དང་དགེ་འདུན་ལྷག་མ་དག་བཅབས་ནའོ་ཞེས་བྱ་བ་སྨྲས་སོ། །དགེ་སློང་གཞན་གྱི་ཕམ་པར་འགྱུར་བ་དང༌། དགེ་འདུན་ལྷག་མའི་གནས་ངན་ལེན་གྱི་ཉེས་པ་ཤེས་བཞིན་དུ་འཆབ་ན་ལྟུང་བྱེད་དོ། །ཅི་བཅབས་པ་རྣམ་པ་ཐམས་ཅད་ལའམ་ཞེ་ན། དེའི་ཕྱིར་བདེ་བ་ལ་མི་རེག་པ་དང་དགེ་སློང་གི་ཚུལ་དང་ཚངས་པར་སྤྱོད་པའི་བར་ཆད་དང་དགེ་འདུན་འཁྲུག་ཏུ་དོགས་པའི་དབང་ཉིད་མ་གཏོགས་པར་འཆབ་ནའོ་ཞེས་བྱ་བ་སྨྲས་ཏེ། དབང་ཉིད་ཅེས་བྱ་བའི་སྒྲ་ནི་བདེ་བ་ལ་མི་རེག་པ་ལ་སོགས་པ་ཐམས་ཅད་སྤྱར་བར་བྱའོ། །བར་ཆད་ཅེས་བྱ་བའི་སྒྲ་ནི་དགེ་སྦྱོང་གི་ཚུལ་
དང་ཚངས་པར་སྤྱོད་པ་གཉིས་དང་སྦྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། བདེ་བ་ལ་མི་རེག་པའི་དབང་ཉིད་དང༌། དགེ་སྦྱོང་གི་ཚུལ་གྱིས་བར་ཆད་ཀྱི་དབང་ཉིད་དང༌། ཚངས་པར་སྤྱོད་པའི་བར་ཆད་ཀྱི་དབང་ཉིད་དང༌། དགེ་འདུན་འཁྲུག་ཏུ་དོགས་པའི་དབང་ཉིད་མ་གཏོགས་པར་གཞན་གྱིས་ཕམ་པར་འགྱུར་བ་དང༌། དགེ་འདུན་ལྷག་མ་དག་འཆབ་ན་ལྟུང་བྱེད་དོ། །དགེ་སློང་གི་ཚུལ་ཞེས་བྱ་བ་ནི་འདི་འཕགས་པའི་ལམ་ཡིན་པར་རིག་པར་བྱའོ། །བྱེ་བྲག་གཞན་ཡང་བསྙེན་པར་རྫོགས་པ་དང་བཅས་པ་དང་མཚན་མཐུན་པ་དང་ལྟ་བ་མཐུན་པ་དང་མཚམས་ཀྱི་ནང་ན་འདུག་པ་ཡིན་ལ་ཉིན་མཚན་གྱི་མཐའི་བར་དུ་འཆབ་ན་དངོས་གཞིའོ་ཞེས་བྱ་བ་ལ་སོགས་པར་བྱེ་བྲག་ཏུ་བྱས་ཏེ་དེ་ནི་གང་ཟག་གི་གཞི་ཁོ་ན་དང་བཅས་པ་ལས་ཤེས་པར་བྱའོ། །དུས་གང་གི་ཚེ་བཅབས་ན་ཞེ་ན་དེའི་ཕྱིར། ཉིན་མཚན་གྱི་མཐར་རོ་ཞེས་བྱ་བ་སྨྲས་ཏེ། སྐྱ་རེངས་འཆར་ཀ་ཚུན་ཆད་ཅེས་བྱ་བའི་ཐ་ཚིག་གོ །སྔ་རོལ་དུ་ནི་ཉེས་བྱས་སོ་ཞེས་བྱ་བ་ནི། ཉིན་མཚན་གྱི་མཐའི་སྔ་རོལ་དུ་ནི་ཉེས་བྱས་སོ། །ལྟུང་བ་གཞན་ཡང་ངོ་ཞེས་བྱ་བ་ནི། ཕམ་པར་འགྱུར་བ་དང་དགེ་འདུན་ལྷག་མ་དག་ལས་གཞན་པའི་ལྟུང་བྱེད་བཅབས་ན་ནི་ཉིན་མཚན་གྱི་མཐར་ཡང་ཉེས་བྱས་ལ་སྔ་རོལ་དུ་ཡང་ཉེས་བྱས་སོ། །གནས་ངན་ལེན་འཆབ་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་ཟན་གཅོད་དུ་འཇུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ནད་ཀྱི་གཉེན་པོའི་དོན་ཉིད་མ་གཏོགས་པར་ཆེད་དུ་བསམས་ཏེ། སྦྱིན་པ་པོ་ཁྱིམ་པའི་ཟན་གཅོད་དུ་བཅུག་ནའོ་ཞེས་བྱ་བ་སྨྲས་ཏེ། ཟན་གང་གི་སྦྱིན་པ་པོ་ཁྱིམ་པ་ཡིན་ན་དེ་ནི་སྦྱིན་པ་པོའི་ཁྱིམ་པའི་ཟན་ཏེ། ནད་ཀྱི་གཉེན་པོའི་དོན་ཉིད་མ་གཏོགས་པར་དགེ་སློང་གིས་ཆེད་དུ་བསམས་ཏེ། དགེ་སློང་ཕ་རོལ་གྱི་སྦྱིན་པ་པོ་ཁྱིམ་པའི་ཟན་གཅོད་དུ་བཅུག་ན་ལྟུང་བྱེད་དོ། །དེ་ཡང་ཚིག་གིས་བསྒོ་སྟེ་ཟན་གཅོད་དུ་བཅུག་ན་ལྟུང་བྱེད་དོ། །སྤྲིང་ཡིག་དང་ལག་ཡིག་དང་ལག་རྩིས་དང་མངགས་པ་དང༌། བརྒྱུད་པ་དང་ཟུར་གྱིས་གཅོད་དུ་བཅུག་ན་ནི་ཉེས་བྱས་སོ། །འདིར་གཞུང་ནི་ཞུ་བ་ཁ་ཅིག་ལས་མུ་སྟེགས་ཅན་གྱི་ཁྱིམ་དག་ཏུ་གཅོད་དུ་བཅུག་ན་ཉེས་བྱས་སོ་ཞེས་
གསུངས་པ་ཡིན་ནོ། །ཟན་གཅོད་དུ་འཇུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།མེ་ལ་རེག་པའི་ལྟུང་བྱེད་སྨྲ་བར་འདོད་ནས། འདིར་དེ་དང་འདྲ་བ་ལ་རེག་པ་ཡང་དགག་པའི་ཕྱིར། སེང་གེ་ལ་རེག་པར་མི་བྱའོ་ཞེས་བྱ་བ་སྨྲས་ཏེ། སེང་གེ་ནི་མེ་དང་འདྲ་བར་བསྙེན་པར་དཀའ་ཞིང་བཟོད་པར་དཀའ་བ་ཉིད་ཡིན་པའི་ཕྱིར་རོ། །དུས་བྱིན་གྱིས་བརླབ་པ་སྔར་བྱས་ཏེ། མེ་ལ་རེག་པར་བྱའོ་ཞེས་གསུངས་པ་དེའི་ཕྱིར་དང་པོར་དུས་བྱིན་གྱིས་བརླབ་པའི་རྣམ་པ་བསྟན་པའི་ཕྱིར་སྟོན་པ་དང་ཆོས་དང་དགེ་འདུན་དང་ཚངས་པ་མཚུངས་པར་སྤྱོད་པ་རྣམས་ཀྱི་ཆོས་དང་ལྡན་པའི་བྱ་བའི་དོན་ཉིད་དང་ལྷུང་བཟེད་དང་ཚོན་གྱི་ལས་ལ་བརྟག་པ་ནི་དུས་བྱིན་གྱིས་བརླབ་པ་ཡིན་ནོ་ཞེས་བྱ་བ་སྨྲས་ཏེ། སྟོན་པ་དང་ཆོས་དང་དགེ་འདུན་དང་ཚངས་པ་མཚུངས་པར་སྤྱོད་པ་རྣམས་ཀྱི་ཆོས་དང་ལྡན་པའི་བྱ་བ་མར་མེ་དང་བདུག་སྤོས་གསོལ་བ་ལ་སོགས་པ་གང་ཡིན་པའི་དགོས་པ་དེའི་དོན་ཡིན་ཏེ། མེ་ལ་རེག་པ་གང་ལ་ཆོས་དང་ལྡན་པའི་བྱ་བའི་དོན་དེ་ཡོད་པ་དེ་ནི་ཆོས་དང་ལྡན་པའི་བྱ་བའི་དོན་ཅན་གྱི་མེ་ལ་རེག་པ་ཡིན་ནོ། །དེའི་དངོས་པོ་ནི་ཆོས་དང་ལྡན་པའི་བྱ་བའི་དོན་ཉིད་ཡིན་ཏེ། དེ་ལ་བརྟག་པ་ངེས་པར་བརྟག་པ་གང་ཡིན་པ་དང་ལྷུང་བཟེད་དང་ཚོན་གྱི་ལས་ལ་བརྟག་པ་གང་ཡིན་པ་དེ་དག་ཉིད་ནི་དུས་བྱིན་གྱིས་བརླབས་པ་ཡིན་ཏེ། དེ་ཡང་འདི་ལྟར་བྱའོ་ཞེས་སེམས་ཀྱིས་མངོན་པར་འདུ་བྱ་ཞིང་བལྟ་བ་ཡིན་ནོ། །འདིར་གཞུང་ནི། དུས་བྱིན་གྱིས་བརླབ་པར་བྱའོ་ཞེས་གསུངས་པ་དང་དེ་དག་གིས་གང་གི་དོན་དུ་བྱིན་གྱིས་བརླབ་པ་མི་ཤེས་ནས་བཅོམ་ལྡན་འདས་ཀྱིས་བཀའ་སྩལ་པ། སྟོན་པའི་བྱ་བ་དང་ཆེས་དང་དགེ་འདུན་དང་མཁན་པོ་དང་སློབ་དཔོན་དང་ཚངས་པ་མཚུངས་པར་སྤྱོད་པའི་བྱ་བས་བྱིན་གྱིས་བརླབ་པར་བྱའོ་ཞེས་གསུངས་པ་ཡིན་ནོ། །ལྷུང་བཟེད་དང་ཚོན་གྱི་ལས་ཞེས་སྨོས་པས་ནི་རང་གི་ལྷུང་བཟེད་དང་ཆོས་གོས་ཀྱི་ལས་བསྟན་ཏོ། །ལྷུང་བཟེད་ཀྱི་ལས་བྱའོ་ཞེ་འམ་ཚོན་གྱི་ལས་བྱའོ་ཞེས་ཡིད་ཀྱིས་བརྟག་པ་གང་ཡིན་པ་དེ་ནི་དུས་བྱིན་གྱིས་བརླབ་པ་ཡིན་ནོ། །ཡུན་རིང་དུ་བྱིན་གྱིས་བརླབ་པར་བྱའོ་ཞེས་བྱ་བ་ནི། དུས་ཤེས་པར་བྱ་བར་སྦྱར་རོ། །འདིར་གཞུང་ནི་དགེ་སློང་དག་ལྷུང་བཟེད་ཀྱི་ལས་དང་
ཚོན་གྱི་ལས་དག་བྱེད་པ་ན་ཡང་དང་ཡང་དུ་བརྗེད་ངས་པས་དེ་ལ་རེག་ནས་དེ་དག་འགྱོད་པ་སྐྱེས་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དུས་ཡུན་རིང་དུ་བྱིན་གྱིས་བརླབ་པར་བྱའོ་ཞེས་གསུངས་པ་ཡིན་ནོ། །ཇི་ཞིག་བྱས་ན་མེའི་ཐ་སྙད་ཀྱི་ལྟུང་བྱེད་དུ་འགྱུར་ཞེན་དེའི་ཕྱིར། རྩེ་བ་ཉིད་ནའོ་ཞེས་བྱ་བ་སྨྲས་སོ། །དེ་རྣམ་པ་གང་གིས་ཡིན་ཞེ་ན་དེའི་ཕྱིར། གཞན་ལ་གཏོང་བས་ཟླ་བ་དང་ཉི་མ་དང་མགལ་མེའི་འཁོར་ལོ་ལ་སོགས་པས་སོ་ཞེས་བྱ་བ་སྨྲས་སོ། །བྱིས་པས་ཤིང་བུ་མེས་སྤར་ཏེ། གཅིག་གི་ལག་ནས་གཅིག་གི་ལག་ཏུ་གཞན་ལ་ཐོང་ཤིག་ཅེས་གཞན་ལ་གཏོང་བར་བྱེད་པ་དེའི་རྩེད་མོ་གང་ལ་ཡོད་པ་དེ་ནི་གཞན་ལ་གཏོང་བའོ། །དེས་ཟླ་བ་ལྟ་བུར་བྱེད་པ་དང༌། ཉི་མ་ལྟ་བུར་བྱེད་པ་དང་མགལ་མེའི་འཁོར་ལོ་ལ་སོགས་པ་བྱེད་པས་རྩེ་བ་ཡིན་ནོ། །ཇི་ཞིག་གིས་རྩེ་བ་ལ་ཞེ་ན་དེའི་ཕྱིར་མེས་སོ་ཞེས་བྱ་བ་སྨྲས་སོ། །ཅི་རྩེ་བ་འབའ་ཞིག་ལ་ལྟུང་བ་འདིར་འགྱུར་རམ་ཞེ་ན་དེའི་ཕྱིར། དུས་བྱིན་གྱིས་མ་བརླབས་པའི་དགེ་སློང་ན་བའི་དབང་ཉིད་དུ་གནས་པ་མ་ཡིན་པ་ལ་རེག་ནའོ་ཞེས་བྱ་བ་སྨྲས་ཏེ། གལ་ཏེ་དགེ་སློང་དུས་བྱིན་གྱིས་མ་བརླབས་པ་ན་བའི་དབང་ཉིད་དུ་གནས་པ་མ་ཡིན་པ་དེས་མེ་ལ་རེག་ནའོ། །ཇི་ལྟར་རེག་ན་ཞེ་ན་དེའི་ཕྱིར། རང་ངམ་བསྒོ་བས་སོ་ཞེས་བྱ་བ་སྨྲས་ཏེ། རང་གིས་རེག་གམ་གཞན་ལ་བསྒོ་བས་རེག་ཏུ་བཅུག་ནའོ། །ཅི་རྩེ་བས་རེག་པ་འབའ་ཞིག་ལ་ལྟུང་བྱེད་འདིར་འགྱུར་རམ་ཞེ་ན་དེའི་ཕྱིར། སྤར་བ་དང་གསོད་པ་དང་རེག་པ་དང་མ་རེག་པའི་བུད་ཤིང་བསྐུལ་བ་དང་བཅས་པ་འདྲེན་པ་དང་མདག་མ་སྤུང་པ་དང་འདྲུ་བ་དག་ལའོ་ཞེས་བྱ་བ་སྨྲས་ཏེ། དུས་བྱིན་གྱིས་མ་བརླབས་པའི་དགེ་སློང་ན་བའི་དབང་ཉིད་དུ་གནས་པ་མ་ཡིན་པ་རང་ངམ་བསྒོ་བས་མེ་སྦར་ཏམ་གསོད་དམ་མེས་རེག་པའི་བུད་ཤིང་བསྐུལ་ཏམ་མེས་མ་རེག་པའི་བུད་ཤིང་བསྐུལ་ཏམ་མེ་དང་བཅས་པའི་བུད་ཤིང་འདྲེན་ཏམ། བསྐུལ་ཏམ་མདག་མ་སྤུངས་པ་འདྲུ་བར་བྱེད་ན་ཐམས་ཅད་ལྟུང་བྱེད་དོ་ཞེས་བྱ་བར་སྤྱར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། དགེ་སློང་དུས་བྱིན་གྱིས་མ་བརླབས་པ་ན་བའི་དབང་ཉིད་དུ་གནས་པ་མ་ཡིན་པས་རང་ངམ་གཞན་ལ་
བསྒོ་པས་མེ་སྦར་ན་ལྟུང་བྱེད་དོ། །དེ་བཞིན་དུ་མེ་གསོད་དམ་མེས་རེག་པའི་བུད་ཤིང་བསྐུལ་ཏམ་མེས་མ་རེག་པའི་བུད་ཤིང་བསྐུལ་ཏམ་མེ་དང་བཅས་ཤིང་འབྲེལ་པའི་བུད་ཤིང་ཕྱིར་དྲངས་སམ་མདག་མ་དག་སྤུངས་སམ་བྲུས་ན་ཐམས་ཅད་དུ་ལྟུང་བྱེད་དོ། །འདིར་གཞུང་ནི་དགེ་སློང་མེ་སྦར་བར་བྱེད་ན་དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་པར་སྦར་པར་བྱེད་ན་ལྟུང་བྱེད་དོ། །དགེ་སློང་མེ་གསོད་པར་བྱེད་ན། དེས་དུས་བྱིན་གྱིས་བརླབ་པར་བྱའོ། །བྱིན་གྱིས་མ་བརླབས་པར་གསོད་པར་བྱེད་ན་ལྟུང་བྱེད་དོ། །དེ་བཞིན་དུ་མགལ་བ་སྐུལ་བར་བྱེད་དམ་མགལ་བ་འདྲེན་པར་བྱེད་དམ། ཤིང་འཇུག་པར་བྱེད་ན་ཐམས་ཅད་དུ་ལྟུང་བྱེད་དོ་ཞེས་གསུངས་པ་ཡིན་ནོ། །བསྐུལ་བ་ནི་བཅོས་པའོ། །སྐུལ་དུ་འཇུད་པ་ནི་གཞན་འཆོས་སུ་བཅུག་པ་ཡིན་པས་དེའི་ཕྱིར། འདིར་གཞན་ལ་བསྒོ་བས་ཞེས་བྱ་བ་ཡང་སྨོས་སོ། །མེ་མ་མུར་ནི་ཕྱེད་ཤི་བ་ཉིད་དོ་ཞེས་བྱ་བ་ནི། མི་མ་མུར་ནི་ཕྱེད་ཤི་བ་ཉིད་ཡིན་པས་ཉེས་བྱས་བྱེད་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་མེ་མ་མུར་ལ་རེག་ན་ཉེས་བྱས་སོ་ཞེས་གསུངས་པ་ཡིན་ནོ། །མེ་ལྕེ་དག་ཀྱང་ངོ་ཞེས་བྱ་བ་ཡང་ཕྱེད་ཤི་བ་ཉིད་དོ་ཞེས་བྱ་བའི་རྗེས་སྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །འདིར་གཞུང་ནི་མེ་ལྕེ་ལ་རེག་ན་ཉེས་བྱས་སོ་ཞེས་གསུངས་པ་ཡིན་ནོ། །དེར་བུད་ཤིང་འཇུད་པ་དང་འབྱིན་པ་ནི་མེ་གཞན་གྱིས་ཉེས་པ་ཡིན་ནོ་ཞེས་བྱ་བ་ནི། མེ་མ་མུར་དང་མེ་ལྕེ་དེར་བུད་ཤིང་འཇུག་པ་དང་འབྱིན་པ་ནི་མེ་གཞན་གྱི་ཉེས་པ་ཁོ་ན་ཡིན་གྱི་མེ་མ་མུར་དང་མེ་ལྕེའི་ཉེས་པ་ནི་མ་ཡིན་ནོ། །དེ་ལྟ་བས་ན་མེ་མ་མུར་དང་མེ་ལྕེ་དག་ཏུ་བུད་ཤིང་འཇུད་ན་ལྟུང་བྱེད་ཁོ་ནར་འགྱུར་རོ། །སྐྲ་དང་ཁ་སྤུ་དང་རུས་པ་དང་སེན་མོ་དང་མཆིལ་མ་དང་སྣ་བས་དང་སྐྱུགས་པ་དང་རླུགས་པ་དང་མོན་སྲན་སྡེའུ་དང་མོན་སྲན་གྲེའུ་དང་ཏིལ་དང་འབྲུ་མར་དང་སྦྲང་རྩི་དང་མར་དག་ནི་བུད་ཤིང་གི་ཕྱེད་ཉིད་དོ་ཞེས་བྱ་བ་ནི་སྐྲ་ལ་སོགས་པ་དག་ནི་བུད་ཤིང་གི་ཕྱེད་ཉིད་ཡིན་ནོ། །དེ་དག་བུད་ཤིང་གི་ཕྱེད་ཉིད་ཡིན་པས་ན་དེ་དག་མེར་བཅུག་པ་དང་ཕྱུང་བ་ན་ཉེས་བྱས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་མེའི་ནད་དུ་སྐྲ་
དང་སྤུ་དང་རུས་པ་དང་སེན་མོ་དག་འཇུད་ན་ཉེས་བྱས་སོ། །དེ་བཞིན་དུ་མེའི་ནང་དུ་མཆིལ་མ་དང་སྣབས་དང་སྐྱུགས་པ་དང་རླུགས་པ་དག་འཇུད་ན་ཉེས་བྱས་སོ་ཞེས་གསུངས་པ་དང༌། ཞུ་བ་ལས་ཀྱང་བཙུན་པ་རེ་ཞིག་དགེ་སློང་གིས་ཏིལ་ལམ་མོན་སྲན་སྡེའུའམ་མོན་སྲན་གྲེའུ་ཞུགས་སུ་སྩོལ་ན་ལྟུང་བ་ཅིར་འགྱུར། ཉེས་བྱས་སོ། །བཙུན་པ་རེ་ཞིག་དགེ་སློང་གིས་མར་དང་འབྲུ་མར་དང་སྦྲང་རྩི་ཞུགས་སུ་སྩོལ་ན་ལྟུང་བ་ཅིར་འགྱུར། ཉེས་བྱས་སོ། །དེ་བཞིན་དུ་རུས་པ་དང་མཆིལ་མ་སྲེག་ན་ཉེས་བྱས་སོ་ཞེས་གསུངས་པ་ཡིན་ནོ། །དེ་དག་ནི་བསྡུས་ཏེ་སྨྲས་སོ། །དེ་དག་ཀྱང་དཔེ་ཙམ་དུ་ཟད་དེ་རས་བལ་དང་བལ་ལ་སོགས་པ་ཡང་བསྡུའོ། །འབར་བའི་ཆོས་ཅན་ཡང་དེ་དང་འདྲའོ། །གཞན་གྱི་བྱ་བ་གཞན་ལ་བྱིན་གྱིས་བརླབ་པ་ནི་ཕྱེད་བྱིན་གྱིས་བརླབས་པ་ཡིན་ནོ་ཞེས་བྱ་བ་ནི། མཁན་པོ་ལ་སོགས་པ་གཞན་གྱི་བྱ་བ་སློབ་དཔོན་ལ་སོགས་པའི་གཞན་ལ་བྱིན་གྱིས་རློབ་པ་ནི། བྱིན་གྱིས་བརླབས་པའི་ཕྱེད་ཉིད་དེ་ཉེས་བྱས་སོ། །འདིར་གཞུང་ནི་དགེ་སློང་གིས་དུས་བྱིན་གྱིས་མ་བརླབས་པ་མཁན་པོའི་བྱ་བས་མེ་ལ་རེག་ན་ཉེས་བྱས་སོ་ཞེས་བྱ་བ་ལ་སོགས་པ་གསུངས་པ་ཡིན་ནོ། །ལོག་པར་བྱིན་གྱིས་རློབ་པ་ཐམས་ཅད་ཀྱང་ཉེས་བྱས་སོ། །མེ་ལ་རེག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་འདུན་པ་ཕྱིར་བསྒྱུར་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་གི་དོན་གྱི་ཆེད་ཀྱི་ལས་བྱས་པ་ལ་འདུན་པ་ཕུལ་བ་ཕྱིར་སྒྱུར་བའི་ཕྱིར་སྨྲས་ནའོ་ཞེས་བྱ་བ་སྨྲས་ཏེ། ལས་བྱ་བ་དགེ་སློང་དང་འབྲེལ་ཞིང་དགེ་སློང་དང་ལྡན་པའི་དོན་དགོས་པ་གང་ཡིན་པ་དེ་ནི་དགེ་སློང་གི་དོན་ཏོ། །དགེ་སློང་གི་དོན་དེའི་ཕྱིར་ལས་བྱ་བ་གང་ཡིན་པ་དེ་ནི་དགེ་སློང་གི་དོན་གྱི་ཆེད་དོ། །དགེ་སློང་གི་དོན་གྱི་ཆེད་དེ་ལ་གསོལ་བ་དང་བརྗོད་པ་དང་དགག་དབྱེ་དང་བསྒོ་བའི་བདག་ཉིད་ཀྱི་ལས་གང་བྱ་བ་དེ་ནི་དགེ་སློང་གི་དོན་གྱི་ཆེད་ཀྱི་ལས་སོ། །ལས་དེ་བྱས་པ་ལ་ཞེས་བྱ་བ་ནི་བྱས་ཟིན་པ་ལའོ། །ལས་དེ་བྱས་པ་དེ་ལ་འདུན་པ་ཕུལ་བ་ཕྱིར་བསྒྱུར་བའི་ཕྱིར་སྨྲས་པ་ནི་དགེ་སློང་ལ་སླར་བྱིན་ཅིག་ཁྱོད་ལ་མི་སྦྱིན་ནོ་ཞེས་དེ་སྐད་ཟེར་ཞིང་ཕྱིར་འཕྲོག་པ་སྟེ། དེ་བྱས་ན་
འདུན་པ་ཕྱིར་བསྒྱུར་བའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །འདུན་པ་ཕྱིར་བསྒྱུར་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་སྨྲ་བར་འདོད་ནས། ཟླ་བ་ཉི་མ་མ་གཏོགས་པའི་སྣང་བ་དང་བཅས་པའི་གནས་ཀྱི་ཕྱོགས་སུ་ཉལ་བར་མི་བྱའོ་ཞེས་བྱ་བ་སྨྲས་ཏེ། ཟླ་བ་དང་ཉི་མ་དག་མ་གཏོགས་པའི་སྣང་བ་བཅས་པའི་མར་མེ་དང་རིན་པོ་ཆེ་དང་སྨན་ལ་སོགས་པའི་རྫས་གཞན་གྱི་སྣང་བ་གནས་གང་ན་ཡོད་པའི་ཕྱོགས་དེ་ནི་ཟླ་བ་དང་ཉི་མ་མ་གཏོགས་པའི་སྣང་བ་དང་བཅས་པའི་གནས་ཀྱི་ཕྱོགས་ཏེ། དེར་ཉལ་བར་མི་བྱའོ། །འདིར་གནས་ཞེས་བྱ་བ་ནི་ཁང་ཁྱིམ་ལ་བྱ་སྟེ། དེའི་མཚན་ཉིད་ནི་འོག་ནས་བརྗོད་པར་བྱའོ། །ཕྱོགས་སུ་ཞེས་སྨོས་པས་ནི་གནས་ཀྱི་ཕྱོགས་གང་ན་སྣང་བ་མེད་པ་དེར་ཉལ་བ་ལ་ནི་ཉེས་པ་མེད་དོ་ཞེས་བྱ་བར་བསྟན་ཏོ། །འདི་ནི་ལོངས་སྤྱོད་ཅན་གྱི་ཡོ་ལང་སྤང་བའི་ཕྱིར་ཡིན་གྱི་བལྟ་བའི་ཕྱིར་བཀག་པ་ནི་མ་ཡིན་ནོ། །ཉལ་བར་མི་བྱའོ་ཞེས་བྱ་བ་ནི་གཉིད་ལོག་པར་མི་བྱའོ། །དེར་ཉལ་ན་མཚན་མོའི་མཐར་ནི་དངོས་གཞིར་གྱུར་པའི་མདུན་རོལ་དུ་ནི་སྦྱོར་བར་གྱུར་པའི་ཉེས་བྱས་སོ། །སྤྱིར་བཏང་བ་བྱས་ནས་དམིགས་ཀྱིས་བསལ་བ་བསྟན་པའི་ཕྱིར། ནད་པ་དང་ནད་གཡོག་གི་དབང་ཉིད་མ་གཏོགས་སོ་ཞེས་བྱ་བ་སྨྲས་ཏེ། ནད་པའི་དབང་ཉིད་དང་ནད་གཡོག་གི་དབང་ཉིད་ཀྱིས་དེར་ཉལ་བ་ནི་མ་གཏོགས་སོ། །འདི་ལ་ཁ་ཅིག་ནི་ལྟུང་བྱེད་ཅེའོ་ཞེས་བྱ་བ་ནི། སྣང་བ་དང་བཅས་པའི་གནས་ཀྱི་ཕྱོགས་སུ་ཉལ་བ་འདི་ལ་འདུལ་བ་འཛིན་པ་ཁ་ཅིག་ནི་ལྟུང་བྱེད་དུ་འདོད་དོ། །དེ་ནི་མི་རིགས་པ་ཁོ་ནར་སྣང་སྟེ། འདི་ལྟར་རྣམ་པར་འབྱེད་པ་ལས་དངོས་སུ་བསྙེན་པར་མ་རྫོགས་པ་དང་ལྷན་ཅིག་ཉལ་བ་དགག་པ་མཛད་པའི་ཕྱིར་ཏེ། དེ་ལྟ་བས་ན་དགེ་སློང་གིས་སྣང་བ་དང་བཅས་པའི་ཁྱིམ་དུ་བསྙེན་པར་མ་རྫོགས་པ་དང་ལྷན་ཅིག་ཉལ་བར་མི་བྱའོ། །ཉལ་ན་ལྟུང་བྱེད་དོ་ཞེས་གསུངས་ཏེ། དེར་སྣང་བ་ཞེས་སྨོས་པ་ནི་གླིང་གཞིའི་དབང་གིས་མཛད་དོ། །འདི་ལྟར་དེ་ཉིད་ཀྱི་རྣམ་པར་འབྱེད་པ་ལས་ཕྱིས་སྣང་བ་མེད་པར་ལྟུང་བྱེད་བཅའ་བ་མཛད་དེ་ཉེ་དགའ་ལ་དགེ་ཚུལ་ཚེར་མ་དང་ཆེན་པོ་
པ་ཞེས་བྱ་བ་གཉིས་ཡོད་དེ། དེ་དེ་གཉིས་དང་དུས་ཐམས་ཅད་དུ་ལྷན་ཅིག་ཉལ་བར་བྱེད་ནས། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ་ཞེས་བྱ་བའི་བར་དུ་གསུངས་ཏེ། ཡང་དགེ་སློང་གང་ཟག་བསྙེན་པར་མ་རྫོགས་པ་དང་ཁྱིམ་གཅིག་གི་ནང་དུ་ནུབ་གཉིས་ལས་ལྷག་པར་ཉལ་ན་ལྟུང་བྱེད་དོ་ཞེས་གསུངས་པའི་ཕྱིར་རོ། །སྣང་བ་དང་བཅས་པ་དང་བསྙེན་པར་མ་རྫོགས་པར་འདི་གཉིས་ནི་རིགས་གཅིག་པ་ཉིད་མ་ཡིན་ཏེ། ཤིན་ཏུ་ཐ་དད་པའི་ཕྱིར་རོ། །ཉལ་བ་མ་ཡིན་པ་ནི་ཕྱེད་ཉིད་དོ་ཞེས་བྱ་བ་ནི། བསྙེན་པར་མ་རྫོགས་པ་དང་ལྷན་ཅིག་ཉལ་བ་དང་ལྟ་བར་གྱུར་པ་མི་འདོར་བ་དང་སྤངས་པའི་རྗེས་སུ་ཕྱོགས་པ་དང༌། བསྙིལ་བ་དང་བསྡུས་པ་དང༌། བུད་མེད་དང་ལྷན་ཅིག་ཉལ་བ་ཞེས་བྱ་བ་བསླབ་པའི་གཞི་ཐམས་ཅད་ལ་ཡང་ཉལ་བ་མ་ཡིན་པ་ཞེས་བྱ་བ་ཉལ་བ་ལས་གཞན་པའི་སྤྱོད་ལམ་གྱིས་གཉིད་ལོག་པ་ནི་ཕྱེད་ཉིད་དེ་མཚན་མོའི་མཐའ་ནི་ཉེས་བྱས་ལ་དེའི་མདུན་རོལ་དུ་ནི་ཉེས་བྱས་ཕྲ་མོའོ། །དེ་བཞིན་དུ་སྣང་བ་ལ་ཡང་ཉལ་བ་ལས་གཞན་པའི་སྤྱོད་ལམ་གྱིས་གཉིད་ལོག་ན་མཚན་མོའི་མཐར་ནི་ཉེས་བྱས་ཕྲ་མོ་ལ་དེའི་མདུན་རོལ་དུ་ནི་ཆེས་ཤིན་ཏུ་ཕྲ་མོའོ། །དེ་བཞིན་དུ་གལ་ཏེ་དགེ་སློང་ཉལ་བས་གཉིད་ལོག་པར་གྱུར་ལ་བསྙེན་པར་མ་རྫོགས་པ་དང༌། བུད་མེད་ལ་སོགས་པ་དག་ཉལ་བ་ལས་གཞན་པའི་སྤྱོད་ལམ་གྱིས་གཉིད་ལོག་པར་གྱུར་ན་དེ་ལ་ཡང་ཉེས་བྱས་ཁོ་ན་ཡིན་གྱི་ལྟུང་བྱེད་དུ་མི་འགྱུར་རོ། །དེ་ལྟར་ཡང་བུད་མེད་དང་ལྷན་ཅིག་ཉལ་བ་ལ་ནི་དགེ་སློང་ཡིད་བརྟན་པ་མི་འཇོག་པར་གློས་འབེབས་སམ་གཉིད་ལོག་པར་བྱེད་ན་ཞེས་བྱ་བའི་ཡན་ལག་གཉིས་གསུངས་ལ་བསྙེན་པར་མ་རྫོགས་པ་དང་ལྷན་ཅིག་ཉལ་བ་འདི་ལ་ནི་བསྙེན་པར་མ་རྫོགས་པའི་གང་ཟག་དང་ཁྱིམ་གཅིག་གི་ནང་དུ་ནུབ་གཉིས་ལས་ལྷག་པར་ཉལ་ན་ཞེས་ལྷན་ཅིག་གི་སྒྲ་སྨོས་པའི་ཕྱིར་རོ། །ཉིན་མོ་ཐ་དད་པ་ཉིད་ཀྱང་ངོ་ཞེས་བྱ་བ་ནི། ཉིན་མོ་ནི་མཚན་མོ་ལས་ལྟུང་བ་ཐ་དད་པ་ཉིད་ཡིན་ཏེ་དེ་ཡང་ཕྱེད་ཉིད་དོ་ཞེས་བྱ་བའི་རྗེས་བསྙག་པའི་ཕྱིར་ཀྱང་ངོ་ཞེས་བྱ་བའི་སྒྲ་སྨོས་སོ། །འདི་
སྐད་བསྟན་ཏེ། ཇི་ལྟར་མཚན་མོ་བསྙེན་པར་མ་རྫོགས་པའི་གང་ཟག་དང་གནས་གཅིག་གི་ནང་དུ་ནུབ་གཉིས་ལས་ལྷག་པར་ཉལ་བ་ལྟུང་བྱེད་དུ་བསྟན་པ་དེ་བཞིན་དུ་ཉིན་མོ་ཡང་བསྙེན་པར་མ་རྫོགས་པའི་གང་ཟག་དང་གནས་གཅིག་གི་ནང་དུ་ཉི་མ་གཉིས་ལྷག་པར་ཉལ་བ་ཡང་ཉེས་བྱས་སུ་འགྱུར་རོ། །འདི་ནི་སྣང་བ་དང་བཅས་པར་ཉལ་བ་ལ་ཉི་མའི་སྣང་བ་དམིགས་ཀྱིས་བསལ་བར་ཤེས་པར་བྱ་སྟེ། འདི་ལྟར་མཚན་མོ་ཉི་མའི་སྣང་བ་མེད་པས་སོ། །གལ་ཏེ་དེར་ཉལ་ན་ཡང་ཉེས་པ་འབྱུང་བར་མི་འགྱུར་ན་ཅིའི་ཕྱིར་ཉི་མའི་སྣང་བ་དམིགས་ཀྱིས་བསལ་བར་བྱེད་དེ་དེ་བས་ན་ཉིན་མོ་ཡང་ཉལ་བར་བྱེད་ན་ཉེས་པ་ཡོད་པ་ཁོ་ནའོ། །སྣང་བ་དང་བཅས་པར་ཉལ་བ་དང་བསྙེན་པར་མ་རྫོགས་པ་དང༌། བུད་མེད་དང་ལྷན་ཅིག་གནས་གཅིག་ན་ཉལ་བ་དག་ནི་འདྲ་བའི་ཕྱིར་རོ། །བསྙེན་པར་མ་རྫོགས་པ་དང་ལྷན་ཅིག་གནས་གཅིག་ན་ཉལ་བ་ཞེས་འོག་ནས་འབྱུང་བ་ལ་རེ་ཞིག་གནས་ཀྱི་མཚན་ཉིད་སྨྲ་བར་འདོད་ནས། ཕལ་ཆེར་གཡོགས་པ་དང་བསྐོར་བ་ནི་གནས་ཀྱི་མཐའ་མ་ཡིན་ནོ་ཞེས་བྱ་བ་སྨྲས་ཏེ། སྟེང་ཕལ་ཆེར་གཡོགས་པ་དང་ངོས་ཕལ་ཆེར་བསྐོར་བ་གང་ཡིན་པ་དེ་ནི་གནས་ཀྱི་མཐའ་ཡིན་ནོ། །འདིར་ཕལ་ཆེར་ཞེས་བྱ་བ་ནི་སུམ་ཆ་གཅིག་ལུས་པར་རིག་པར་བྱ་སྟེ། དེ་ཡང་ཐམས་ཅད་པས་དམན་པའི་གནས་ཡིན་ནོ། །འདི་ལྟར་གནས་ནི་རྣམ་པ་བཞི་སྟེ་ཐམས་ཅད་གཡོགས་ཤིང་ཐམས་ཅད་བསྐོར་བ་འདི་ལྟ་སྟེ། གནས་ཁང་ངམ་འཁོར་གྱི་ཁྱམས་སམ་ཁང་པ་བརྩེགས་པ་དག་ལྟ་བུ་དང༌། ཐམས་ཅད་གཡོགས་ཤིང་བལ་ཆེར་བསྐོར་བ་འདི་ལྟ་སྟེ། སྒོ་བཅུ་པ་དང་སྒོ་བཅུ་གཉིས་པ་དག་ལྟ་བུ་དང༌། ཕལ་ཆེར་གཡོགས་ཤིང་ཐམས་ཅད་བསྐོར་བ་འདི་ལྟ་སྟེ། ཁྱམས་ངོས་བཞི་པ་ལྟ་བུ་དང༌། ཕལ་ཆེར་གཡོགས་ཤིང་ཕལ་ཆེར་བསྐོར་བ་འདི་ལྟ་སྟེ། ཁྱམས་ངོས་གསུམ་པའམ་འཁོར་གྱི་ཁྱམས་ལྟ་བུའོ། །ཁྱམས་ངོས་བཞི་པ་ཞེས་བྱ་བ་ནི། གང་ལ་ངོས་བཞི་ཆར་དང་འབྲེལ་པའི་སྟེང་གཡོགས་ཡོད་ལ། དབུས་ཀྱི་མཐོངས་ཁབ་མེད་པའོ། །ཁྱམས་ངོས་གསུམ་པ་ཞེས་བྱ་བ་ནི། གང་ལ་ངོས་གསུམ་དང་
འབྲེལ་པའི་སྟེང་གཡོགས་ཡོད་ལ་འོས་གཅིག་སྟེང་གཡོགས་དང་དབུས་ཀྱི་མཐོངས་ཁབ་མེད་པའོ། །འདིར་གནས་ཀྱི་མཐའ་ཡིན་ནོ་ཞེས་སྨོས་པའི་སྒྲ་ནི་གནས་རྣམ་པ་བཞི་པོ་དེ་དག་བསྡུས་པའི་ཕྱིར་རོ། །དེའི་སྒོའི་ངོས་དང་འབྲེལ་བའི་ཉེན་ཀོར་གྱི་གནས་སུ་གྱུར་པ་ནི་དེའི་ཁོངས་སུ་གཏོགས་པ་ཉིད་ཡིན་ནོ་ཞེས་བྱ་བ་ལ། དེའི་སྒོའི་ངོས་དང་འབྲེལ་པ་ཡིན་ཞེས་བྱ་བ་ནི། གནས་གང་གི་ཉེན་ཀོར་བསམ་བར་བྱ་བ་དེའི་སྒོ་ངོས་གང་ཡིན་པའི་སྒོའི་ངོས་དེ་དག་དང་ལྷན་ཅིག་འབྲེལ་བ་ཡིན་གྱི། ལམ་པོ་ཆེ་ལ་སོགས་པས་བར་དུ་ཆོད་པ་ནི་མ་ཡིན་ནོ། །གནས་དེའི་སྒོའི་ངོས་དང་འབྲེལ་བའི་ཉེན་ཀོར་ཞེས་བྱ་བ་ནི། གནས་གང་གི་ཉེན་ཀོར་བསམ་པར་བྱ་བ་དེའི་སྒོའི་ངོས་གང་ཡིན་པ་དེ་དང་ལྷན་ཅིག་འབྲེལ་བའི་ཉེན་ཀོར་གང་ཡིན་པ་སྟེ། དེ་ཉིད་གནས་དེའི་ཁོངས་སུ་གཏོགས་པ་ཉིད་ཡིན་ནོ་ཞེས་བྱ་བར་སྦྱར་རོ། །གནས་སུ་གྱུར་པ་ཞེས་བྱ་བ་ནི། དེའི་སྒོའི་ངོས་དང་འབྲེལ་བའི་ཉེན་ཀོར་དེ་ཡང་གལ་ཏེ་གནས་སུ་བུར་པ་ཡིན་ན། གནས་དེའི་ཁོངས་སུ་གཏོགས་པ་ཉིད་ཡིན་གྱི། བླ་གབ་མེད་པ་ལྟ་བུ་གནས་སུ་གྱུར་པ་མ་ཡིན་པ་ནི་དེའི་ཁོངས་སུ་གཏོགས་པ་ཉིད་མ་ཡིན་ནོ། །གནས་དེའི་སྒོའི་ངོས་དང་འབྲེལ་པའི་ཉེན་ཀོར་གནས་སུ་གྱུར་པ་རྣམ་པ་དེ་ལྟ་བུ་དེ་ནི་དེའི་ཁོངས་སུ་གཏོགས་པ་ཉིད་ཡིན་ཏེ། གནས་དེའི་ཁོངས་སུ་གཏོགས་པ་ཉིད་ཡིན་ཞིང་གནས་དེ་དང་ལྷན་ཅིག་གཅིག་ཏུ་གྱུར་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །ཁྱེར་གཞན་པར་དུ་མ་ཆོད་པ་སྒོ་དེ་དང་འབྲེལ་པར་ཡང་ངོ་ཞེས་བྱ་བ་ནི། ཁྱེར་གཞན་ཡིན་ལ་ཁྱེར་གཞན་གྱིས་བར་དུ་མ་ཆོད་པ་གནས་སུ་གྱུར་པ་སྒོ་གཞན་ཡོད་དུ་ཟིན་ཀྱང་གནས་དེ་དང་སྒོ་འབྲེལ་བ་ཡིན་ན་ཁྱད་པར་དེ་ལྟ་བུ་ཅན་གྱི་ཁྱེར་གཞན་དེ་ཡང་དེའི་ཁོངས་སུ་གཏོགས་པ་ཉིད་ཡིན་ཏེ། གནས་དེ་དང་ལྷན་ཅིག་གཅིག་ཏུ་གྱུར་པ་ཉིད་ཡིན་ནོ། །ཁྱེར་གཞན་གྱིས་བར་དུ་ཆོད་པ་ནི་དེའི་ཁོངས་སུ་གཏོགས་པ་ཉིད་ཡིན་ནོ། །ཉེན་ཀོར་དང་བཅས་པའི་གནས་ཁར་ཙམ་གྱི་ཕ་རོལ་ན་ཐ་དད་པར་གྱུར་ཅིང་གནས་པ་ནི་མ་ཡིན་ནོ་ཞེས་བྱ་བ་ལ། ཉེན་ཀོར་དང་བཅས་པ་ཞེས་བྱ་བ་ནི། བར་ཉེན་ཀོར་འདོམ་གང་ཙམ་དང་བཅས་པའི་མཐའ་ནས་སོ། །
གནས་ཁང་ཙམ་གྱི་ཕྱི་རོལ་ན་ཞེས་བྱ་བ་ནི། སྤྱོད་ལམ་རྣམ་བཞི་ཤོང་བའི་གནས་ཁང་གི་ཚད་ཙམ་གྱི་ཕ་རོལ་གྱི་གནས་ཀྱི་ཕྱོགས་ནའོ། །ཐ་དད་པར་གྱུར་ཅིང་གནས་པ་ནི་ཞེས་བྱ་བ་ནི། བསྙེན་པར་མ་རྫོགས་པ་དང་ཐ་དད་པར་གྱུར་ཅིང་གནས་པའོ། །མ་ཡིན་ནོ་ཞེས་བྱ་བ་ནི་དེའི་ཁོངས་སུ་གཏོགས་པ་ཉིད་མ་ཡིན་ཏེ། དེ་དང་ལྷན་ཅིག་གནས་གཅིག་ཏུ་གྱུར་པ་ཉིད་མ་ཡིན་ཞིང་གནས་ཐ་དད་པར་གྱུར་ཏོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་གནས་ཆེན་པོ་གཅིག་སྟེང་གཡོགས་གཅིག་གིས་བཀབ་པར་གྱུར་པ་དེའི་ནང་གི་གྲྭ་གཉིས་ན་བསྙེན་པར་རྫོགས་པ་དང་བསྙེན་པར་མ་རྫོགས་པ་དག་ཐ་དད་པར་གྱུར་ཅིང་གནས་ལ་དེ་གཉིས་ཀྱི་བར་ཉེན་ཀོར་དང་བཅས་པའི་གནས་ཁང་གི་ཚད་ཙམ་གྱི་ཁྱོན་གྱིས་བར་དུ་ཆོད་པ་ཡིན་ན། དེའི་ནང་དུ་ཉལ་ཡང་ལྷན་ཅིག་ཉལ་བའི་ཉེས་པར་མི་འགྱུར་བར་ཤེས་པར་བྱའོ། །འདིར་ཁུངས་ནི་འདྲོན་པ་ལས་ཕྱི་རོལ་དུ་དབྱུང་བར་མི་བྱ་བར་འདི་ལྟར་འདྲོན་པ་དང་ཁ་གཉིས་སུ་གཅད་དོ་ཞེས་གསུངས་པ་ཡིན་ནོ། །དབྱེ་དགོན་པར་ནི་ལྷན་ཅིག་ཉལ་ཡང་ཉེས་པར་མི་འགྱུར་རོ། །ཤིང་ལྗོན་པའི་དྲུང་དང་རྩིག་པའི་བར་དང་ཚང་ཚིག་གི་དྲུང་དག་ནི་ཕྱེད་ཉིད་དོ་ཞེས་བྱ་བ་ནི། ཤིང་ལྗོན་པའི་དྲུང་དང་རྩིག་པའི་བར་དང་ནགས་མ་འམ་ལྗོན་ཤིང་གཞོན་ནུ་ཚང་ཚིག་གི་དྲུང་དག་ནི་གནས་ཀྱི་ཕྱེད་ཉིད་དེ་ཉེས་བྱས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་ཤིང་ལྗོན་པའི་དྲུང་དུ་བསྙེན་པར་མ་རྫོགས་པ་དང་ལྷན་ཅིག་མཆིས་ཉལ་བར་བགྱིད་ན་ལྟུང་བ་ཅིར་འགྱུར། ཉེས་བྱས་སོ། །བཙུན་པ་རེ་ཞིག་དགེ་སློང་རྩིག་པའི་བར་དང་ཚང་ཚིང་གི་དྲུང་དག་ཏུ་བསྙེན་པར་མ་རྫོགས་པ་དང་ལྷན་ཅིག་མཆིས་ཉལ་བར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །དེ་ནི་དཔེ་ཙམ་དུ་ཟད་དེ་མ་བསྐོར་བ་དང་མ་བཀབ་པ་དང་བསྐོར་བའི་སྣོད་མ་ཕྲད་པ་དང༌། བྱ་སྐྱིབས་དང་ཤིང་ལྗོན་པའི་བར་ལ་སོགས་པ་དག་ཀྱང་རྣམ་པ་འདི་བཞིན་དུ་ཤེས་པར་བྱའོ། །འདིར་ཤིང་ལྗོན་པའི་བར་ཞེས་བྱ་བ་ནི་གང་གི་ཕལ་ཆེར་མ་འཁོར་བ་ཡིན་པར་རིག་པར་བྱའོ། །ཐིབས་
པོ་དང་བཅས་པ་དག་ཏུ་བུད་མེད་དང་ལྷན་ཅིག་ཉལ་བ་ཡང་ངོ་ཞེས་བྱ་བ་ནི། ཐིབས་པོ་ཞེས་བྱ་བ་རྩའམ་ནགས་སམ་འོད་མ་འམ་ཚེར་མ་ལ་སོགས་པ་དང་བཅས་པ་དག་གི་ནང་དུ་བུད་མེད་དང་ལྷན་ཅིག་ཉལ་ཡང་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །འདིས་ནི་ཀུན་ནས་བསྐོར་ལ་མ་གཡོགས་པ་དང་གནས་སུ་གྱུར་པ་མ་ཡིན་པའི་ཕྱོགས་གཞན་དག་ཀྱང་འཕངས་པར་རིག་པར་བྱའོ། །དེ་ལྟར་ཡང་འདིར་གཞུང་ནི་བཙུན་པ་རེ་ཞིག་དགེ་སློང་ཀུན་ནས་བསྐོར་བ་སྟེང་མ་གཡོགས་པའམ་ཕྱེད་གཡོགས་པ་དག་ཏུ་བུད་མེད་དང་ལྷན་ཅིག་མཆིས་ཉལ་བར་བགྱིད་ན་ལྟུང་བ་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །ཉེན་ཀོར་དང་བཅས་པའི་གནས་ཁང་ཙམ་གྱི་ཕ་རོལ་ན་ཐ་དད་པར་གྱུར་ཅིང་གནས་པ་ནི་མ་ཡིན་ནོ་ཞེས་བྱ་བ་སྔར་བསྙེན་པར་མ་རྫོགས་པ་དང་ལྷན་ཅིག་ཉལ་བ་དགག་པ་སྤྱིར་བསྟན་པ་དེ་བུད་མེད་དང་ལྷན་ཅིག་ཉལ་བ་ལ་དམིགས་ཀྱིས་བསལ་བའི་བྱེ་བྲག་གཞན་བསྟན་པའི་ཕྱིར། འདི་ལ་ནི་བྱ་གག་འཕུར་ནས་བབ་པའི་ལམ་ནི་བར་དུ་ཆོད་པར་གྱུར་པ་ཉིད་ཡིན་ནོ་ཞེས་བྱ་བ་སྨྲས་ཏེ། བུད་མེད་དང་ལྷན་ཅིག་ཉལ་བ་འདི་ལ་ནི་བྱ་གག་འཕུར་ནས་བབ་པའི་བར་གྱི་ལམ་ཇི་སྲིད་ཡོད་པ་དེ་སྲིད་ཀྱིས་བར་དུ་ཆོད་པར་གྱུར་ན་བར་ཆད་དང་བཅས་པ་ཉིད་ཡིན་ནོ། །འདི་སྐད་བསྟན་ཏེ། གནས་གཅིག་ཡིན་ལ་བར་ཆད་དུ་བསྒྲིབས་ཀྱང་རུང་མ་བསྒྲིབས་ཀྱང་རུང་སྟེ། གནས་དེའི་ཕྱོགས་གཅིག་ན་ཐ་དད་པར་གྱུར་ཅིང་གནས་ནས་པར་དུ་བྱ་གག་འཕུར་བ་ནས་བབ་པའི་བར་གྱི་ལམ་ཙམ་གྱིས་ཆོད་ན་གནས་ཐ་དད་པ་ཉིད་ཡིན་ཏེ་གནས་གཅིག་པ་ཉིད་དུ་མི་འགྱུར་རོ། །ནང་གཅིག་ཏུ་རྒྱུ་ཞིང་བར་བར་ན་གནས་མེད་པ་མ་ཡིན་པ་ཅན་ཉིད་ལ་ནི་གཡོགས་པ་ཐམས་ཅད་གཅིག་པ་ཉིད་ཡིན་ནོ་ཞེས་བྱ་བ་ནི། གཡོགས་པ་ཐམས་ཅད་གཅིག་པ་ཉིད་ཡིན་ཏེ། གནས་གཅིག་པ་ཉིད་ཡིན་ནོ་ཞེས་བྱ་བར་སྦྱར་རོ། །ཁྱད་པར་ཇི་ལྟ་བུ་ཅན་ཞིག་ཅེ་ན་དེའི་ཕྱིར། ནང་གཅིག་ཏུ་རྒྱུ་ཞིང་ཞེས་བྱ་བ་སྨྲས་ཏེ། གཡོགས་པ་གང་གི་ནང་གཅིག་ཏུ་རྒྱུ་ཞིང་འཇུག་པ་གང་ཡིན་པ་དེ་ནི་ནང་གཅིག་ཏུ་རྒྱུ་བ་སྟེ་དེའོ། །བར་ན་གནས་མེད་པ་མ་ཡིན་པ་ཅན་ཉིད་
ཅེས་བྱ་བ་ནི་གཡོགས་པ་གང་ལ་བར་ཏེ་བར་སྐབས་ན་གནས་མེད་པ་ཉིད་མ་ཡིན་ཞིང་གནས་མེད་པ་དང་བྲལ་བ་ཡོད་པ་དེ་ནི། གནས་གཞན་མེད་པ་མ་ཡིན་པ་ཅན་ཏེ། གནས་མ་ཡིན་པས་བར་དུ་ཆོད་པ་དང་བྲལ་བ་ཡིན་ནོ། །དེའི་དངོས་པོ་ནི་དེ་ཉིད་དེ་དེ་ལ་ནི་གཡོགས་པ་ཐམས་ཅད་གཅིག་པ་ཉིད་ཡིན་ནོ། །འདི་སྐད་བསྟན་ཏེ། ཉེན་ཀོར་དུ་གྱུར་པ་མ་ཡིན་པ་ཕལ་ཆེར་གཡོགས་ཤིང་མཐའ་བསྐོར་བའི་གནས་གཞན་ཐམས་ཅད་གནས་ཐ་དད་པ་ཉིད་ནི་མ་ཡིན་ནོ། །འོན་ཀྱང་གནས་གཞན་ལ་ལ་ཉེན་ཀོར་དུ་གྱུར་པ་མ་ཡིན་ཡང་ནང་གཅིག་ཏུ་རྒྱུ་བ་ཡོད་པ་ཉིད་དེ་ནི་གནས་གཅིག་པ་ཉིད་དེ། དེ་ལྟ་བས་ན་གཡོགས་མ་གཅིག་གི་ཕན་ཚུན་འདབ་ཆགས་པར་གྱུར་ཅིང་རྒྱུན་སྲང་བཏགས་པ་ལ་སོགས་པའི་ལམ་ནས་ཇི་སྲིད་ཚུན་ཆད་དུ་བླ་གབ་མེད་པར་མ་བྱུང་བར་རྒྱུ་བར་ནུས་པ་དེ་ནི་གནས་གཅིག་པ་ཉིད་ཡིན་ནོ། །སྔར་མདོ་ལས་ཉེན་ཀོར་དང་བཅས་པའི་གནས་ཁང་ཙམ་གྱི་ཕ་རོལ་ན་ཐ་དད་པར་གྱུར་ཅིང་གནས་པ་ནི་མ་ཡིན་ནོ་ཞེས་བསྟན་པ་དང༌། འདི་ལ་ནི་བྱ་གག་འཕུར་ནས་བབ་པའི་ལམ་ནི་བར་དུ་ཆོད་པར་གྱུར་པ་ཉིད་ཡིན་ནོ་ཞེས་བསྟན་པའི་མདོ་དེ་གཉིས་ཀྱི་ཡུལ་མ་གཏོགས་པ་ལྷག་མ་ཐམས་ཅད་ནི་གནས་གཅིག་པ་ཉིད་ཡིན་ནོ། །དེ་ལྟ་བས་ན་གནས་གཞན་ཅིག་ཤོས་འབའ་ཞིག་ན་གནས་པའི་བསྙེན་པར་མ་རྫོགས་པ་ལ་སོགས་པ་དང་ལྷན་ཅིག་ཉལ་བར་བྱེད་ན་ཡང་དངོས་གཞིར་འགྱུར་བ་ཡང་ཡོད་དོ། །གལ་ཏེ་རྒྱུ་བའི་ལམ་གཡོགས་པ་མ་ཡིན་ན་ནི། དེའི་ཚེ་ལྟུང་བ་མེད་དོ། །གལ་ཏེ་གཡོགས་པ་ལ་ལ་མ་བསྐོར་བ་ཡིན་ན་ནི་འདྲ་བས་ཉེས་བྱས་སོ། །རང་གི་ཆར་གཏོགས་པའི་སྒོ་གཅད་པས་བཅད་པ་ལ་ནི་ཉེན་ཀོར་ཡང་ཐ་དད་པ་ཉིད་དོ་ཞེས་བྱ་བ་ནི། ལྟུང་བ་འབྱིན་པ་པོའི་ཆར་གཏོགས་པའི་སྒོ་གང་ཡིན་པ་དེ་ནི་རང་གི་ཆར་གཏོགས་པའི་སྒོ་ཞེས་བྱ་སྟེ། བདག་ཉིད་དབང་བའི་སྒོའོ། །བུད་མད་དང་ལྷན་ཅིག་ཉལ་བ་ལ་སྒོ་དེ་དེར་གཏོགས་པའི་གཅད་པས་བཅད་པ་ཉིད་མ་ཡིན་ན་དེའི་ཚེ་ཉེན་ཀོར་པ་ཡང་ཐ་དད་པ་ཉིད་ཡིན་ཏེ། གནས་ཐ་དད་པ་ཉིད་ཡིན་ན། ཁྱམས་ལ་སོགས་པའི་ཕྱོགས་གཞན་དང༌། གནས་ཁང་གཞན་དང༌། སྒོ་ཁང་གཞན་དང༌། བང་
རིམ་ཁང་ལ་སོགས་པ་གཞན་དག་གི་སྒོ་གཅད་པས་བཅད་པ་ལ་ཐ་དད་པ་ཉིད་ཡིན་པ་ལྟ་སྨོས་ཀྱང་ཅི་དགོས་ཏེ། འདི་ནི་བསྙེན་པར་མ་རྫོགས་པ་དང་ལྷན་ཅིག་ཉལ་བ་ལ་ཡང་རུང་བར་སྣང་ངོ༌། །ལྟུང་བ་འབྱིན་པར་བྱེད་པ་དགེ་སློང་གིས་བསྲུངས་པ་ཉིད་དང་བུད་མེད་བདག་པོས་བསྲུངས་པ་ཉིད་ནི་དེ་དང་འདྲའོ་ཞེས་བྱ་བ་ནི། ལྟུང་བ་འབྱིན་པར་བྱེད་པའི་དགེ་སློང་གལ་ཏེ་དགེ་སློང་གཞན་གྱིས་བསྲུངས་པ་ཉིད་ཡིན་ནམ་བུད་མེད་བདག་པོས་བསྲུངས་པ་ཉིད་ཡིན་ན་ཡང་དེའི་ཚེ་བུད་མེད་དང་ལྷན་ཅིག་ཉལ་བ་ལ་རང་གི་ཆར་གཏོགས་པའི་སྒོ་གཅད་པས་བཅད་པ་ཞེས་བསྟན་པ་གང་ཡིན་པ་དེ་དང་འདྲ་བར་བལྟ་བར་བྱའོ། །འདིར་གཞུང་ནི་དགེ་སློང་བང་རིམ་ཁང་པ་ན་ཉལ་བར་བྱེད་ཅིང་བུད་མེད་སྒོ་ཁང་ན་ཉལ་ན་དགེ་སློང་དེས་ཕྱི་གཏན་བཅུག་ཏེ་སྒོ་གཅད་པར་བྱའམ། དགེ་སློང་སྲུང་མ་གཞག་པར་བྱའོ། །ཕྱི་གཏན་བཅུག་སྟེ་གཅོད་པར་མི་བྱེད་དམ་དགེ་སློང་སྲུང་མ་གཞོག་པར་མི་བྱེད་པར་གློས་ཕབ་ནས་གཉིད་ལོག་པར་བྱེད་ན་ཇི་སྲིད་དུ་སྐྱ་རེངས་མ་ཤར་གྱི་བར་དུ་ནི་ཉེས་བྱས་སོ། །སྐྱ་རེངས་ཤར་ན་ནི་ལྟུང་བྱེད་དོ། །བདག་པོས་བསྲུངས་བར་གྱུར་ན་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །གནས་ཐ་དད་པ་ཉིད་ལ་ནི་བདག་པོས་བསྲུངས་པ་ཉིད་ལ་ལྟུང་བ་མེད་པ་ཡིན་གྱི་གནས་གཅིག་པ་ཉིད་ལ་ནི་བདག་པོས་བསྲུངས་པ་ཉིད་ལ་ཡང་འཁྲིག་པའི་ཆ་དང་ལྷན་ཅིག་ཉལ་བའི་ཕྱིར་ཉེས་བྱས་སུ་འགྱུར་རོ། །མ་ལ་སོགས་པས་བསྲུངས་པ་ཉིད་ལ་ཡང་ལྟུང་བ་མེད་པ་ཡིན་པས་དེའི་ཕྱིར་འདིར་བདག་པོ་ཞེས་སྨོས་པ་ནི་དཔེ་ཙམ་དུ་ཟད་དོ། །རིམ་ཁང་གཞན་ལ་ནི་སྐས་སྟེང་དུ་བརྟུལ་པ་ཉིད་དོ་ཞེས་བྱ་བ་ནི། རིམ་ཁང་གི་ཁ་ཁྱེར་གཞན་ལ་ནི་སྐས་སྟེང་དུ་བརྟུལ་བ་ཉིད་རང་གི་ཆར་གཏོགས་པའི་སྒོ་གཅད་པས་བཅད་པ་དང་འདྲ་བར་རིག་པར་བྱའོ། །གཞན་གནས་མ་ཡིན་པ་ཉིད་ལ་ནི་ན་སྨད་དོ་ཞེས་བྱ་བ་ལ། གཞན་ཞེས་བྱ་བ་ནི་གནས་ལས་གཞན་དུ་གྱུར་པ་སྟེ་ཉེན་ཀོར་རོ། །ཉེན་ཀོར་དེ་གནས་ཉིད་མ་ཡིན་པ་ལ་ནི་ཁ་ན་མ་ཐོ་བ་ན་སྨད་ཀྱི་མེད་པ་ནི་མ་ཡིན་ནོ། །འདི་སྐད་བསྟན་ཏེ། གལ་ཏེ་ཉེན་ཀོར་ལ་སོགས་པ་གནས་སུ་
གྱུར་པ་ཡིན་ན་ནི་ཁ་ན་མ་ཐོ་བ་རྫོགས་པར་བྱེད་པར་འགྱུར་ལ་གནས་སུ་གྱུར་པ་མ་ཡིན་ན་ནི་ཉེས་བྱས་བྱེད་པ་ཡིན་ནོ།། །།བམ་པོ་སུམ་ཅུ་གཉིས་པ། ཇི་ཞིག་བྱས་ན་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དུ་འགྱུར་ཞེ་ན། དེའི་ཕྱིར། བསྙེན་པར་མ་རྫོགས་པ་དང་ལྷན་ཅིག་གནས་གཅིག་ཏུ་མཚན་མོ་གསུམ་པ་ལ་ཉལ་ནའོ་ཞེས་བྱ་བ་སྨྲས་ཏེ། བསྙེན་པར་མ་རྫོགས་པ་དང་ལྷན་ཅིག་གནས་གཅིག་ཏུ་མཚན་མོ་གསུམ་པ་ལ་ཉལ་བས་གཉིད་ལོག་ན་དངོས་གཞིའི་ཁ་ན་མ་ཐོ་བར་འགྱུར་རོ། །ལྷན་ཅིག་ཅེས་སྨོས་པས་ནི་གལ་ཏེ་བསྙེན་པར་རྫོགས་པ་དང༌། བསྙེན་པར་མ་རྫོགས་པ་གཉི་ག་ཉལ་ཞིང་སྤྱོད་ལམ་དེ་ཉིད་ཀྱིས་གཉིད་ལོག་ན་དེའི་ཚེ་དངོས་གཞིར་འགྱུར་བ་བསྟན་ཏོ། །གཅིག་སྤྱོད་ལམ་གཞན་གྱིས་ཉལ་ན་ནི་ཉེས་བྱས་སོ། །གཅིག་སྤྱོད་ལམ་གཞན་གྱིས་གཉིད་མི་ལོག་པར་བྱེད་ཅིང་གཅིག་ཉལ་བ་ལ་ནི་ལྟུང་བ་མེད་དེ་ལྷན་ཅིག་གཉིད་ལོག་པ་མ་གྲུབ་པའི་ཕྱིར་རོ། །མཚན་མོ་གསུམ་པའི་དུས་གང་ལ་བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་མཐར་རོ་ཞེས་བྱ་བ་སྨྲས་ཏེ། མཚན་མོའི་མཐར་དེ་སྐད་ཅིག་གང་གི་མཇུག་ཐོགས་སུ་སྐྱ་རེངས་འཆར་བ་དེར་རོ་ཞེས་བྱ་བའི་ཐ་ཚིག་གོ །འོ་ན་གནས་བཞི་པོ་དེ་དག་ཏུ་སྐྱ་རེངས་འཆར་བར་བྱེད་ཅིང་སྐྱ་རེངས་ཤར་ན་ལྟུང་བྱེད་དུ་འགྱུར་བ་ཁོ་ནར་གསུངས་པ་ཡིན་ན་ཇི་ལྟར་མཐར་རོ་ཞེས་བརྗོད་ཅེ་ན། ཉེས་པ་མེད་དེ་སྐྱ་རེངས་འཆར་བའི་སྐད་ཅིག་གང་གིས་མཚན་མོ་མཐའ་སྐད་ཅིག་བདེ་བླག་ཏུ་གོ་བར་ནུས་པས་དེའི་ཕྱིར་དེ་སྐད་བསྟན་ཏོ། །མདུན་རོལ་དུ་ནི་ཉེས་བྱས་སོ་ཞེས་བྱ་བ་ནི། མཚན་མོའི་མཐའི་སྐད་ཅིག་གི་མདུན་རོལ་དུ་ནི་ཉེས་བྱས་སོ། །སྔར་ཉིན་མོ་ཐ་དད་པ་ཉིད་ཀྱང་ངོ་ཞེས་བྱ་བས་ཉིན་མོ་ནི་མཚན་མོ་ལས་ལྟུང་བ་ཐ་དད་པ་ཉིད་ཡིན་ནོ་ཞེས་བསྟན་པའི་སྐབས་དེ་ལས་ཉེས་བྱས་འདི་གཞན་ཡིན་ནོ། །ལམ་གྱིས་དུབ་པ་རྨྱ་བ་ལ་ནི་ཉེས་པ་མེད་དོ་ཞེས་བྱ་བ་ནི། དགེ་སློང་ལམ་གྱིས་དུབ་པ་རྨྱ་བ་ལ་ནི་གལ་ཏེ་བསྙེན་པར་མ་རྫོགས་པ་མེད་པའི་གནས་རྙེད་པ་མེད་ན་མཚན་མོའི་མཐའི་མདུན་རོལ་དུ་གཉིད་ལོག་
པ་ལ་ཉེས་པ་མེད་དོ། །མཐར་ནི་ཉེས་པ་ཁོ་ནར་འགྱུར་རོ། །མཐར་ཡང་དེ་བཞིན་ནོ་ཞེས་བྱ་བ་ནི། དགེ་སློང་དེས་མདུན་རོལ་དུ་གཉིད་ལོག་པ་ཙམ་བྱས་སུ་ཟིན་ཀྱང་རྨྱ་བ་སངས་པར་མ་གྱུར་ན་དེའི་ཚེ་ན་ནི་མཐར་ཡང་ཉེས་པ་མེད་པ་ཁོ་ནའོ། །དགེ་སློང་གིས་བྱར་མི་རུང་བ་ཡོད་ན་དེ་སྒྲུབ་པར་བྱེད་པ་དང་ལྷན་ཅིག་པའི་ནད་པ་དང་ནད་གཡོག་ལ་ཡང་ངོ་ཞེས་བྱ་བ་ནི། དགེ་སློང་གིས་བྱར་མི་རུང་བ་བྱིན་ལེན་ལ་སོགས་པ་གང་ཡིན་པའི་བྱར་མི་རུང་བ་དེ་ཡོད་ན་བྱར་མི་རུང་བ་དེ་སྒྲུབ་པར་བྱེད་པའི་བསྙེན་པར་མ་རྫོགས་པ་དེ་དང་ལྷན་ཅིག་པ་ལ་མདུན་རོལ་དང་མཐར་ཡང་ཉེས་པ་མེད་པ་ཁོ་ན་ཡིན་ཏེ། དེ་ཡང་དགེ་སློང་ནད་པ་དང་ནད་གཡོག་ལ་ཉེས་པ་མེད་པ་ཁོ་ན་ཡིན་གྱི་གཞན་ལ་ནི་མ་ཡིན་ནོ། །དགེ་ཚུལ་དང་ཡང་ངོ་ཞེས་བྱ་བ་ནི། ལྷན་ཅིག་ཉལ་བ་ལ་མདུན་རོལ་དང་མཐར་ཡང་ཉེས་པ་མེད་དོ། །དགེ་སློང་གང་ལ་ཞེ་ན་དེའི་ཕྱིར་དེ་དང་ལྡན་པ་ལའོ་ཞེས་བྱ་བ་སྨྲས་ཏེ། དེ་དང་ལྡན་པ་ཞེས་བྱ་བ་ནི། དགེ་སློང་གང་ལ་དགེ་ཚུལ་ཡོད་པ་དེ་ནི་དེ་དང་ལྡན་པ་ཞེས་བྱ་བ་སྟེ། དགེ་སློང་དགེ་ཚུལ་དང་ལྡན་པ་དེ་ལ་ཉེས་པ་མེད་དོ། །གང་གི་ཚེ་ཞེ་ན་དེའི་ཕྱིར། གནས་དེ་ན་དགེ་སློང་སྡིག་ཅན་ཉེ་བར་གྱུར་པ་ཉིད་ནའོ་ཞེས་བྱ་བ་སྨྲས་ཏེ། གལ་ཏེ་གནས་དེ་ན་དགེ་སློང་སྡིག་ཅན་གཞན་ཉེ་བར་གནས་པར་གྱུར་ན་དེའི་ཚེ་དགེ་སློང་དགེ་ཚུལ་དང་ལྡན་པ་དེ་དགེ་ཚུལ་དང་ལྷན་ཅིག་ཉལ་བ་ལ་མདུན་རོལ་དང་མཐའ་ཡང་ཉེས་པ་མེད་དོ། །ཅི་དེ་དང་ལྡན་པ་ཐམས་ཅད་ལའམ་ཞེ་ན་དེའི་ཕྱིར། དེ་སྤྱུགས་པ་ལ་འབད་པ་བྱས་སམ་བྱེད་པ་ལའོ་ཞེས་བྱ་བ་སྨྲས་ཏེ། དགེ་ཚུལ་དང་ལྡན་པའི་དགེ་སློང་གང་གིས་དགེ་སློང་སྡིག་ཅན་དེ་རེ་ཞིག་སྤྱུགས་པའམ་གཏན་སྤྱུགས་པའི་ཕྱིར་འབད་པ་སྔར་བྱས་པར་གྱུར་ཏམ་ད་ལྟར་བྱེད་ཀྱང་རུང་སྟེ། དགེ་སློང་དེ་ལ་ཉེས་པ་མེད་པ་ཡིན་གྱི་གཞན་ལ་ནི་མ་ཡིན་ནོ་ཞེས་བྱ་བའི་ཐ་ཚིག་གོ །འདིར་འབད་པ་ཞེས་བྱ་བ་ནི། ཅི་ནུས་ཀྱི་སྦྱོར་བ་ཡིན་པར་རིག་པར་བྱའོ། །ཇི་དུས་ཐམས་ཅད་དུ་ཉེས་པ་མེད་པ་ཡིན་ནམ་ཞེ་ན་དེའི་ཕྱིར། གནས་པར་ཁས་བླངས་ན་དུས་ཕྱི་མ་དང་
སྔ་མའི་གཉིས་པོ་དག་ལ་བབ་པ་ནའོ་ཞེས་བྱ་བ་སྨྲས་ཏེ། གནས་པར་ཁས་བླངས་ན་ཞེས་བྱ་བ་ནི། དབྱར་གནས་པ་སྔ་མར་ཁས་བླངས་ཀྱང་རུང་ཕྱི་མར་ཁས་བླངས་ཀྱང་རུང་སྟེ། ཁས་བླངས་པའི་དུས་དེ་ནི་ཉེས་པ་མེད་དོ། །དེ་ལ་དབྱར་གནས་པ་སྔ་མར་ཁས་བླངས་པ་ལ་དུས་གང་ལ་བབ་པའི་ཚེ་ན་ཉེས་པ་མེད་ཅེ་ན་དེའི་ཕྱིར། དུས་ཕྱི་མ་དེའི་གཉིས་པོ་དག་ལ་བབ་པ་ནའོ་ཞེས་བྱ་བ་སྨྲས་ཏེ། དུས་ཕྱི་མའི་ཞེས་བྱ་བ་ནི། དབྱར་གནས་པ་སྔ་མར་ཁས་བླངས་པ་ལ་ཟླ་བ་གསུམ་ཡོད་པའི་དང་པོ་དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་གྱི་དུས་དང་པོ་དེ་མ་གཏོགས་པའོ། །འོ་ན་གང་ལ་ཞེ་ན། དུས་ཕྱི་མ་དེའི་གཉེན་པོ་དག་ལ་བབ་ན་སྟེ། དབྱར་ཟླ་ཐ་ཆུངས་ཉ་ནས་སྟོན་ཟླ་ར་བ་ཉའི་བར་གྱི་དུས་གཅིག་དང་སྟོན་ཟླ་ར་བ་ཉ་ནས་སྟོན་ཟླ་འབྲིང་པོ་ཉའི་བར་གྱི་དུས་གཉིས་པོ་དག་ལ་བབ་པ་ནི་དགེ་སློང་དེ་དགེ་ཚུལ་དང་ལྷན་ཅིག་ཉལ་བ་ལ་ཉེས་པ་མེད་དོ། །དེ་ལ་དབྱར་གནས་པ་ཕྱི་མར་ཁས་བླངས་པ་ལ་དུས་གང་ལ་བབ་པའི་ཚེ་ན་ཉེས་པ་མེད་ཅེ་ན། དེའི་ཕྱིར་སྔ་མའི་གཉིས་པོ་དག་ལ་བབ་པ་ནའོ་ཞེས་བྱ་བ་སྨྲས་ཏེ། སྔ་མའི་ཞེས་བྱ་བ་ནི། དབྱར་གནས་པ་ཕྱི་མར་ཁས་བླངས་པ་ལ་ཟླ་བ་གསུམ་ཡོད་པའི་ཐ་མ་སྟོན་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་གྱི་དུས་དེའི་སྔ་མའི་ཟླ་བ་གཉིས་པོ་དག་གོ །དེ་ཡང་གང་ཞེ་ན། དབྱར་གནས་པ་ཕྱི་མར་ཁས་བླངས་པའི་ཟླ་བ་ཐ་མ་དེའི་སྔ་མའི་གཉིས་པོ་དག་ལ་བབ་པ་ན་སྟེ། དབྱར་ཐ་ཆུངས་ཉ་ནས་སྟོན་ཟླ་ར་བ་ཉའི་བར་གྱི་དུས་གཅིག་དང༌། སྟོན་ཟླ་ར་བ་ཉ་ནས་སྟོན་ཟླ་འབྲིང་པོ་ཉའི་བར་གྱི་དུས་གཉིས་པོ་དག་ལ་བབ་པ་ན་དགེ་སློང་དེ་དགེ་ཚུལ་དང་ལྷན་ཅིག་ཉལ་བ་ལ་ཉེས་པ་མེད་དེ། གནས་པར་ཁས་མ་བླངས་པ་ལ་ནི་དེར་ཡང་ཉེས་བྱས་ཁོ་ནར་འགྱུར་བས་དེའི་ཕྱིར་གནས་པར་ཁས་བླངས་ན་ཞེས་བྱ་བ་སྨོས་སོ། །གནས་པར་ཁས་བླངས་པ་ལ་ཡང་དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་གྱིས་དུས་དང་པོ་ལ་ཡང་ཉེས་པ་ཁོ་ནར་འགྱུར་བས་དེའི་ཕྱིར་དུས་ཕྱི་མའི་ཞེས་བྱ་བ་སྨོས་སོ། །སྟོན་ཟླ་འབྲིང་པོ་ཉ་ནས་སྟོན་ཟླ་ཐ་ཆུངས་ཉའི་བར་གྱི་དུས་ཐ་མ་ལ་ཡང་ཉེས་པ་ཁོ་ནར་འགྱུར་བས་དེའི་ཕྱིར་སྔ་མའི་ཞེས་བྱ་བ་སྨོས་སོ། །དེས་
ལྷག་པར་གནས་པར་མི་བྱ་བ་ཉིད་དོ་ཞེས་བྱ་བ་ལ། དེས་ཞེས་བྱ་བ་ནི་དབྱར་གནས་པར་ཁས་བླངས་པ་ལ་བབ་པའི་དགེ་སློང་དེས་སོ། །ལྷག་པར་གནས་པར་མི་བྱ་བ་ཉིད་དོ་ཞེས་བྱ་བ་ནི། ཟླ་བ་གཉིས་ལས་ལྷག་པར་གནས་པར་མི་བྱ་བ་ཉིད་ཡིན་ནོ། །འདི་ནི་དབྱར་གནས་པར་ཁས་བླངས་པ་ཕྱི་མ་ཤོས་ཀྱི་དབང་དུ་བྱས་ཏེ་སྨྲས་པ་ཡིན་ནོ། །དབྱར་གནས་པར་ཁས་བླངས་པ་སྔ་མ་ཤོས་ལ་ནི་མ་སྨྲས་ཀྱང་གྲུབ་པའི་ཕྱིར་རོ། །གནས་པར་ཁས་བླངས་པ་སྔ་མ་ཤོས་མི་བྱ་བ་ཉིད་དོ་ཞེས་བྱ་བ་ནི། དེ་དབྱར་གནས་པར་ཁས་བླངས་པ་ཡང་ཡིན་ལ་སྔ་མ་ཡང་ཡིན་པས་ན་གནས་པར་ཁས་བླངས་པ་སྔ་མ་ཞེས་བྱ་བ་སྟེ། དེ་དགེ་ཚུལ་དང་ལྡན་པའི་དགེ་སློང་དེས་མི་བྱ་བ་ཉིད་ཡིན་ནོ་ཞེས་པས་སྔ་མ་མི་བསྲུང་བར་བྱ་བ་ཉིད་དོ་ཞེས་བྱ་བ་ནི། དབྱར་གནས་པར་ཁས་བླངས་པ་སྔ་མ་ཤོས་ཀྱི་ཟླ་བ་གཉིས་ཀྱི་སྔ་མ་དགེ་སློང་དེས་མི་བསྲུང་བར་བྱ་བ་ཉིད་ཡིན་ནོ། །དེས་དགེ་ཚུལ་ཉེ་བར་མ་བཞག་པར་ཉེ་བར་གཞག་པར་མི་བྱའོ་ཞེས་བྱ་བ་ནི། རང་གི་གནས་ན་དགེ་སློང་སྡིག་ཅན་གནས་པར་གྱུར་པའི་དགེ་སློང་དེས་གནས་སྦྱིན་པ་ལ་སོགས་པས་དགེ་ཚུལ་སྔར་ཉེ་བར་མ་བཞག་པར་ཉེ་བར་གཞག་པར་མི་བྱའོ། །ལམ་དུ་དགེ་ཚུལ་གཉིད་བྲོ་བས་རྨྱ་བར་གྱུར་ན་མདུན་དུ་བཏང་སྟེ་འགྲོ་བར་བྱའོ་ཞེས་བྱ་བ་ནི། དགེ་སློང་དེས་དགེ་ཚུལ་ཁྲིད་དེ་ལམ་དུ་འགྲོ་བ་ན་གལ་ཏེ་དགེ་ཚུལ་གཉིད་བྲོ་བས་རྨྱ་ཞིང་ཡུར་བར་གྱུར་ན་དགེ་སློང་དེས་དགེ་ཚུལ་དེ་མདུན་རོལ་དུ་བཏང་སྟེ་འགྲོ་བར་བྱའོ། །གལ་ཏེ་བྲུ་བ་ཚ་བར་གྱུར་ན་དེ་ལ་ནང་པར་གྱི་དུས་སུ་ཁ་ཟས་སྦྱིན་པར་བྱའོ་ཞེས་བྱ་བ་ནི། དགེ་ཚུལ་ལམ་དུ་ཞུགས་པ་དེ་གལ་ཏེ་བཀྲེས་ཤིང་བྲུ་བ་ཚ་བར་གྱུར་ན་དེའི་ཚེ་དགེ་སློང་དེས་ནང་པར་ཁེའུ་སུས་ཀྱི་དུས་སུ་དགེ་ཚུལ་དེ་ལ་ཁེའུ་སུས་སྦྱིན་པར་བྱའོ། །གལ་ཏེ་དྲོ་ཁར་ཡང་ན་དེའི་ཚེ་ཡང་ངོ་ཞེས་བྱ་བ་ནི། གལ་ཏེ་དགེ་ཚུལ་དེ་དྲོ་ཁར་ཡང་བཀྲེས་པར་གྱུར་ན་དྲོ་ཁ་དེའི་ཚེ་ཡང་དགེ་སློང་དེས་དགེ་ཚུལ་དེ་ལ་དྲོ་ཟན་སྦྱིན་པར་བྱའོ། །བསྙེན་པར་མ་རྫོགས་པ་དང་ལྷན་ཅིག་ཉལ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ལྟ་བའི་རྣམ་པ་མི་འདོར་བའི་ལྟུང་བྱེད་དུ་འགྱུར་ཞེ་ན་
དེའི་ཕྱིར། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་བྱ་བ་ལ་སོགས་པར་འཇུག་པའི་ཚིག་མི་གཏོང་བ་ལའོ་ཞེས་བྱ་བ་སྨྲས་ཏེ། དགེ་འདུན་གྱི་དབྱེན་བྱེད་པའི་དགེ་འདུན་ལྷག་མའི་སྐབས་སུ་བསྒོ་བ་ལས་གྱུར་པའི་མཚན་ཉིད་ཐུན་མོང་བ་སྔར་བསྟན་པ་གང་ཡིན་པ་དེ་དག་ཐམས་ཅད་སྐབས་འདིར་ཡང་སྦྱར་བར་བྱ་སྟེ། བཟློག་པའི་ཚུལ་གྱིས་མི་གཏོང་བ་རྗེས་སུ་སྒྲུབ་པའི་རང་བཞིན་ནི་རྗེས་སུ་མཐུན་ནོ། །གསོལ་བ་ནི་བཟློག་པ་དང་འདྲ་བ་ཉིད་དོ། །ཚིག་གི་སྐད་ཅིག་མ་གཅིག་ཉིད་དོ། །བཟླས་པ་ནི་ཐ་དད་པ་ཉིད་དོ། །མཇུག་སྡུད་པ་ནི་མ་ཡིན་ནོ། །འཇུག་པ་ནི་སྦྱོར་བ་ཉིད་དོ། །བསྐྲད་པ་དང༌། གླེང་བ་དང་དྲན་པར་མ་བྱས་པ་ནི་དེའིའོ། །དེ་ལ་བསྒོ་བ་མི་བྱ་བ་ཉིད་དོ། །དེ་དག་ལ་བཞམས་པ་དང་ལས་ཀྱིས་མི་བསྒོ་བར་མི་བྱའོ། །དེའི་མཐའ་ལ་མི་གཏོང་ནའོ་ཞེས་བྱ་བ་བསྒོ་བ་ལས་འགྱུར་བའི་དགེ་འདུན་ལྷག་མ་བཞི་པོ་དག་གི་མཚན་ཉིད་ཐུན་མོང་བ་སྔར་བསྟན་པ་དེ་དག་འདིར་ཡང་རིག་པར་བྱའོ། །འདིར་བྱེ་བྲག་ཅུང་ཞིག་བརྗོད་པར་བྱ་སྟེ་དེའི་ཕྱིར། ཇི་ལྟར་བཅོམ་ལྡན་འདས་ཀྱིས་ཞེས་བྱ་བ་ལ་སོགས་པ་སྨྲས་སོ། །བར་དུ་གཅོད་པའི་ཆོས་ཞེས་བྱ་བ་ནི། ཀུན་ནས་ཉོན་མོངས་པར་གྱུར་པ་ཕམ་པར་འགྱུར་བ་ལ་སོགས་པའོ། །སོགས་པ་ཞེས་བྱ་བའི་སྒྲས་ནི་འདི་ལྟར་བལྟ་བའི་རྣམ་པ་གཞན་དག་ཀྱང་བཟུང་སྟེ། ལྟ་བའི་རྣམ་པ་གཞན་དག་ལ་ཡང་བསྒྲུབ་པ་འདྲ་བའི་ཕྱིར་རོ། །འཇུག་པའི་ཚིག་མི་གཏོང་བ་ལའོ་ཞེས་བྱ་བ་ནི། རྩོམ་པའི་ཚིག་ཉིད་ཡོངས་སུ་མི་གཏོང་བ་ལ་ལྟུང་བྱེད་འདིར་འགྱུར་བའོ། །དེ་ལ་གསོལ་བས་སྨད་པ་ཉིད་དེ་དེའི་འོག་ཏུའོ་ཞེས་བྱ་བ་ནི། ལྟ་བའི་རྣམ་པ་མི་གཏོང་བའི་དགེ་སློང་དེ་ལ་གསོལ་བ་དང་བཞིའི་ལས་ཀྱིས་སྨད་པ་ཉིད་དང་གནས་ནས་དབྱུང་བ་ཅིག་ཅར་དུ་བྱ་སྟེ་སྨད་པར་འོས་པའི་ལས་དག་ནི་སྨད་པའོ། །དེའི་དངོས་པོ་ནི་དེ་ཉིད་དོ། །གང་གི་ཚེ་ཞེ་ན། དེའི་འོག་ཏུ་སྟེ་ལྟུང་བྱེད་དུ་འགྱུར་བའི་ལྟ་བའི་རྣམ་པ་མི་གཏོང་བའི་འོག་ཏུ་ལས་ཀྱི་མཐའ་
ལའོ། །འདི་སྐད་བསྟན་ཏེ། བཟློག་པའི་ཚུལ་གྱིས་མི་གཏོང་བ་རྗེས་སུ་སྒྲུབ་པའི་རང་བཞིན་རྗེས་སུ་མཐུན་ནོ་ཞེས་བྱ་བ་ལ་སོགས་པའི་རིམ་གྱིས་ལྟ་བའི་རྣམ་པ་མི་གཏོང་ན་ལས་ཀྱི་མཐའ་ལ་ལྟུང་བྱེད་དུ་འགྱུར་རོ། །དེའི་འོག་ཏུ་དེ་ལ་གསོལ་བ་དང་བཞིའི་ལས་ཀྱིས་སྨད་པ་ཉིད་དང༌། གནས་ནས་དབྱུང་བ་ཅིག་ཅར་བྱའོ། །སྨད་པ་ཉིད་ཅེས་བྱ་བ་ནི། །སྨད་པར་བྱ་བ་ཉིད་དུ་རྣམ་པར་བཞག་པར་གྱུར་པའི་སྨད་པར་བྱ་བ་སྤྱོ་ཞིང་སྨད་པ་ཡིན་ནོ། །གནས་ནས་དབྱུང་བ་ཞེས་བྱ་བ་ནི་སྤང་བའོ། །ལྟ་བའི་རྣམ་པ་མི་གཏོང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །། སྤངས་པའི་རྗེས་སུ་ཕྱོགས་པའི་ལྟུང་བྱེད་ལ་བྱད་པ་པོ་གང་ཡིན་ཞེ་ན། དེའི་ཕྱིར་ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར། དེ་སྐད་སྨྲ་བས་སྤངས་པ་ཕྱིར་བཅོས་པ་ཉིད་མ་བྱས་པའི་དགེ་སློང་ལའོ་ཞེས་བྱ་བ་སྨྲས་ཏེ། དེ་སྐད་སྨྲ་བས་ཞེས་བྱ་བ་ནི། ཇི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་བྱ་བ་ལ་སོགས་པར་འཇུག་པའི་ཚིག་དེ་སྐད་སྨྲ་བས་སོ། །སྤངས་པ་ཞེས་བྱ་བ་ནི། དེ་སྐད་སྨྲ་བའི་རྒྱུས་དགེ་འདུན་གྱིས་སྤངས་པའི་དགེ་སློང་ངོ༌། །ཕྱིར་བཅོས་པ་ཉིད་མ་བྱས་པ་ཞེས་བྱ་བ་ནི། སྤངས་པ་ཉིད་ཀྱི་བཟོད་པ་གསོལ་བ་ཉིད་མ་བྱས་པའོ། །དགེ་སློང་ལའོ་ཞེས་བྱ་བ་ནི། དེ་ལྟར་དེ་སྐད་སྨྲ་བས་སྤངས་པ་ཕྱིར་བཅོས་པ་ཉིད་མ་བྱས་པའི་དགེ་སློང་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཏེ། དགེ་སློང་དེ་ཡང་དེ་ལྟ་བུ་ཉིད་ཡིན་ལ་ལྟུང་བ་འབྱིན་པར་བྱེད་པའི་དགེ་སློང་གིས་ཀྱང་དེ་ལྟར་ཤེས་ན་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཡིན་ནོ་ཞེས་བྱ་བའི་ཐ་ཚིག་གོ །དེ་ལྟར་བས་ན་སྤངས་པ་ཉིད་ཁ་ན་མ་ཐོ་བ་འདི་འབྱུང་བའི་རྒྱུ་ཡིན་གྱི་ལྟ་བ་མ་བཏང་བ་དང་ལྟུང་བ་མ་བཤགས་པ་ནི་མ་ཡིན་ནོ། །དེ་ལྟར་
གྱུར་ན་ཇི་སྲིད་དུ་སྤང་བར་བྱ་བའི་ལས་མི་བྱེད་པ་དེ་སྲིད་ཀྱི་བར་དུ་ནི་ལྟ་བ་མ་བཏང་བའི་དགེ་སློང་དེ་ལྟུང་བའི་བྱེད་པ་པོ་ཉིད་མ་ཡིན་ལ། དེ་བཞིན་དུ་ལྟ་བ་བཏང་བ་ལྟུང་བ་མ་བཤགས་པ་ཡང་ཁ་ན་མ་ཐོ་བ་འདི་འབྱུང་བའི་རྒྱུ་མ་ཡིན་ནོ། །ཇི་ཞིག་བྱས་ན་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། ལུང་དཔོག་པ་དང་དམིགས་ཀྱིས་འདྲི་བ་དང་གནས་རྗེས་སུ་བསྟན་པ་དང་གདམས་ངག་སྦྱིན་ནའོ་ཞེས་བྱ་བ་སྨྲས་ཏེ། ལུང་དབོག་པ་སྦྱིན་པ་དང༌། དམིགས་ཀྱིས་འདྲི་བའི་ལན་སྦྱིན་པ་དང་གནས་འཆའ་བ་སྦྱིན་པ་དང༌། རྗེས་སུ་བསྟན་པ་སྦྱིན་པ་དང་གདམས་ངག་སྦྱིན་ནའོ་ཞེས་བྱ་བ་སྤྱིན་པའི་སྒྲ་ཐམས་ཅད་དང་སྦྱར་བར་བྱའོ། །ལྟ་བ་སྨྲ་ནའོ་ཞེས་བྱ་བ་ནི། དགེ་སློང་སྤངས་པ་དེ་ལ་རང་གི་ལྟ་བ་འདི་འདྲའོ་ཞེས་སྨྲ་ཞིང་སྟོན་ནའོ། །འདིར་གཞུང་ནི་ཞུ་བ་ཁ་ཅིག་ལས་དགེ་སློང་གིས་སྤངས་པ་ལ་ལྟ་བ་སྨྲ་ན་ལོངས་སྤྱོད་ལས་བྱུང་བའི་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །ཟང་ཟིང་གི་ལོངས་སྤྱོད་བྱེད་ནའོ་ཞེས་བྱ་བ་ནི། ལྷུང་བཟེད་ལ་སོགས་པ་ཟང་ཟིང་གི་ལོངས་སྤྱོད་བྱེད་ནའོ། །བསྙེན་བཀུར་བདག་གིར་བྱེད་ནའོ་ཞེས་བྱ་བ་ནི། སྤངས་པ་དེ་ལས་བསྙེན་བཀུར་བདག་གིར་བྱེད་ནའོ། །གནས་སུ་ལྷན་ཅིག་ཉལ་ན་ཡང་ངོ་ཞེས་བྱ་བ་ནི། སྤངས་པ་དེ་དང་གནས་སུ་ལྷན་ཅིག་ཉལ་ན་ཡང་ངོ༌། །གང་གི་ཚེ་ཞེ་ན་དེའི་ཕྱིར། མཐར་རོ་ཞེས་བྱ་བ་སྨྲས་སོ། །གང་གི་མཐར་ཞེ་ན་དེའི་ཕྱིར་མཚན་མོའི་ཞེས་བྱ་བ་སྨྲས་ཏེ། སྐྱ་རེངས་ཤར་ནའོ། །གཞན་གྱིས་བསྲུལ་ན་ཡང་ངོ་ཞེས་བྱ་བ་ནི། རྣམ་པ་གཞན་གྱིས་རྣམ་པར་གཏན་ལ་དབབ་པ་ལས་བརྩམས་ཏེ། ཐ་ན་འདག་རྫས་ཙམ་གྱིས་བསྲུལ་ན་ཡང་སྟེ་དེ་དང་ལྷན་ཅིག་འདུ་འཛི་བྱེད་ན་ཞེས་བྱ་བའི་ཐ་ཚིག་གོ །ནད་པ་དང་ལྟ་བ་དང་དབྲལ་བར་གཏོགས་པའི་དོན་གྱིས་ནི་མ་གཏོགས་སོ་ཞེས་བྱ་བ་ནི། ནད་པར་གཏོགས་པའི་དོན་དང་ལྟ་བ་དང་དབྲལ་བར་གཏོགས་པའི་དོན་གྱིས་བསྲུལ་བ་གང་ཡིན་པ་དེ་ནི་མ་གཏོགས་སོ་ཞེས་བྱ་བའི་ཐ་ཚིག་གོ །སྤངས་པའི་རྗེས་སུ་ཕྱོགས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བསྙིལ་པ་སྡུད་པའི་ལྟུང་བྱེད་སྨྲ་བར་འདོད་ནས། སྡར་ལྟ་བར་འགྱུར་བ་མི་གཏོར་བའི་ལྟུང་བྱེད་ཀྱི་སྐབས་སུ་དེ་ལ་མི་བསྒོ་
བར་མི་བྱ་བ་ཉིད་དོ། །དེ་དག་ལ་བཞམས་པ་དང་ལས་ཀྱིས་མི་བསྒོ་བར་མི་བྱའོ་ཞེས་བྱ་བའི་ཆོ་ག་ཇི་སྐད་བསྟན་པ་དེ་དག་ཉིད་དགེ་ཚུལ་རྣམ་པ་དེ་ལྟ་བུ་ལ་ཡང་བྱ་སྟེ། དགེ་ཚུལ་ནི་དགེ་སློང་གི་འཁོར་དུ་གྱུར་པ་ཉིད་ཡིན་པའི་ཕྱིར་རོ། །ལས་ཀྱི་མཐའ་ལ་མི་གཏོང་ན་དེའི་ཚེ་ཇི་ལྟར་བྱ་ཞེ་ན་དེའི་ཕྱིར། ཚིག་དེ་ཉིད་ལ་ཞུགས་པ་མི་གཏོང་ན་དགེ་ཚུལ་བསྙིལ་བར་བྱའོ་ཞེས་སྨྲས་ཏེ། དགེ་ཚུལ་གང་ཇི་ལྟར་བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་དེ་དག་བསྟེན་ཀྱང་བར་དུ་གཅོད་པར་མི་འགྱུར་ཏེ། དེ་ལྟར་བཅོམ་ལྡན་འདས་ཀྱིས་ཆོས་བསྟན་པ་བདག་གིས་ཤེས་སོ་ཞེས་ཟེར་བའི་ཚིག་དེ་ཉིད་ལ་ཞུགས་པ་དེ་ནི་ཚིག་དེ་ཉིད་ལ་ཞུགས་པ་སྟེ། དེའི་དངོས་པོ་ནི་དེ་ཉིད་དོ། །དེ་མི་གཏང་ན་དགེ་ཚུལ་དེ་བསྙིལ་བར་བྱའོ། །འདིར་ཇི་ལྟར་བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་པའི་ཆོས་སུ་གསུངས་པ་གང་དག་ཡིན་པ་ཞེས་བྱ་བའི་འདོད་པ་ཞེས་བྱ་བའི་སྒྲ་སྨོས་པ་ནི་ལྟ་བར་གྱུར་པ་རྣམ་པ་ཐམས་ཅད་ཀྱི་དཔེ་ཡིན་པར་རིག་པར་བྱའོ། །འདི་ལ་ནི་སྨད་པ་ཉིད་དུ་བྱ་བར་རྣམ་པར་གཞག་པ་ཡིན་གྱི་སྤང་བར་བྱ་བའི་ལས་ནི་མ་ཡིན་ཏེ། བསྟན་པ་ལ་ཞུགས་པ་ཡོངས་སུ་མ་རྫོགས་པ་ཉིད་ཡིན་བའི་ཕྱིར་རོ། །མ་གོ་བའི་དགེ་ཚུལ་ལ་ནི་བཟློག་པ་ཉིད་ཀྱང་མ་ཡིན་ལ། ཐ་དད་པའི་དངོས་པོར་བསྙིལ་བ་ཉིད་ཀྱང་མ་ཡིན་ལ། དགེ་འདུན་གྱིས་ལས་བྱས་པ་ཉི་ཚེ་ཙམ་གྱིས་ཀྱང་དགེ་ཚུལ་གྱིས་གོ་བར་མི་འགྱུར་བས་དེའི་ཕྱིར་ཆོ་ག་གང་གིས་དེས་གོ་བར་བྱ་བའི་ཆོ་ག་དེ་བསྟན་པའི་ཕྱིར། ཁྱོད་ལ་དང་པོར་གསོལ་བ་དང་བཞིའི་ལས་ཀྱིས་སོ། །དེའི་འོག་ཏུ་ཁྱོད་ལ་བསྙིལ་བ་རྩོམ་མོ་ཞེས་བྱ་བ་དང་གསོལ་བ་བྱས་སོ། །ལས་བརྗོད་པ་དང་པོ་དང་གཉིས་པ་ཡང་བྱས་ཟིན་གྱི་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་རེ་རེའི་མཐར་དགེ་སློང་གིས་དེ་ལ་བསྒྲགས་པར་བྱའོ་ཞེས་བྱ་བ་སྨྲས་ཏེ། དགེ་འདུན་དུ་གྱུར་པའི་དགེ་སློང་དག་གིས་དགེ་ཚུལ་དེ་ལ་འདི་སྐད་ཅེས་ཁྱོད་ལ་དང་པོར་དགེ་འདུན་གྱིས་གསོལ་བ་དང་བཞིའི་ལས་མཛད་དོ་ཞེས་བྱ་བ་རྩོམ་པ་དང་དེའི་འོག་ཏུ་ཁྱོད་བསྙིལ་བའི་ལས་མཛད་དོ་ཞེས་བྱ་བའི་རྩོམ་པས་བསྒོ་བར་བྱའོ། །རྩོམ་པ་དེ་ཡང་གང་ཞེ་ན་དང་པོར་
གསོལ་བ་བྱས་པའི་འོག་ཏུ་དེ་ལ་འདི་སྐད་ཅེས་ཁྱོད་ཀྱི་ཕྱིར་དགེ་འདུན་གྱིས་གསོལ་བ་བྱས་ཟིན་གྱིས་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒྲགས་པར་བྱའོ། །དེའི་འོག་ཏུ་ལས་བརྗོད་པ་དང་པོ་བྱས་པའི་འོག་ཏུ་ཡང་དེ་ལ་འདི་སྐད་ཅེས་ཁྱོད་ཀྱི་ཕྱིར་དགེ་འདུན་གྱིས་ལས་བརྗོད་པ་དང་པོ་ཡང་བྱས་ཟིན་གྱི་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒྲགས་པར་བྱའོ། །དེའི་འོག་ཏུ་ལས་བརྗོད་པ་གཉིས་པ་བྱས་པའི་འོག་ཏུ་ཡང་དེ་ལ་འདི་སྐད་ཅེས་ཁྱོད་ཀྱིས་ཕྱིར་དགེ་འདུན་གྱིས་ལས་བརྗོད་པ་གཉིས་པ་ཡང་བྱས་ཟིན་གྱི་སྡིག་པ་ཅན་གྱི་ལྟ་བའི་རྣམ་པ་འདི་ལྟ་བུ་འདི་ཐོང་ཤིག་ཅེས་བསྒྲགས་པར་བྱའོ། །རེ་རེའི་མཐར་ཞེས་བྱ་བ་ནི། གསོལ་བ་དང་ལས་བརྗོད་པ་དང་པོ་དང་ལས་བརྗོད་པ་གཉིས་པ་བྱས་ཟིན་པ་རེ་རེའི་མཐར་རོ། །དགེ་སློང་གིས་ཞེས་བྱ་བ་ནི། དགེ་འདུན་དུ་གྱུར་པའི་དགེ་སློང་གིས་སོ། །དེ་ལ་ཞེས་བྱ་བ་ནི། སྡིག་པ་ཅན་གྱི་ལྟ་བའི་རྣམ་པ་མི་གཏོང་བའི་དགེ་ཚུལ་དེ་ལའོ། །བསྒྲགས་པར་བྱའོ་ཞེས་བྱ་བ་ནི། ཁྱོད་ལ་དང་པོར་དགེ་འདུན་གྱིས་གསོལ་བ་དང་བཞིའི་ལས་མཛད་པ་རྩོམ་མོ། །དེའི་འོག་ཏུ་ཁྱོད་བསྙིལ་བའི་ལས་མཛད་པ་རྩོམ་མོ་ཞེས་བྱ་བ་དག་བསྒོ་བར་བྱའོ། །དེའི་འོག་ཏུ་དགེ་འདུན་གྱིས་གསོལ་བ་བྱས་ཟིན་གྱི་སྡིག་པ་ཅན་གྱི་ལྟ་བར་གྱུར་པ་འདི་ལྟ་བུ་ཐོང་ཤིག་ཅེས་བྱ་བ་ལ་སོགས་པ་རྩོམ་པས་གསུམ་པོ་དག་བསྒྲགས་པར་བྱའོ། །ལས་བརྗོད་པ་གསུམ་པ་བྱས་ཟིན་པའི་འོག་ཏུ་ནི་ལས་རྫོགས་པ་ཟིན་པའི་ཕྱིར་བསྒྲགས་ཀྱང་ཅི་ཡང་མི་ཕན་ཏེ་དེའི་ཚེ་ན་དགེ་ཚུལ་བསྙིལ་ཟིན་པའི་ཕྱིར་རོ། །བརྩམས་བ་མཐར་ཕྱིན་པ་བྱས་པ་ནི་རིགས་པ་ཉིད་ཡིན་ནོ་སྙམ་དུ་སེམས་པ་བསལ་བའི་ཕྱིར་བཏང་ན་ཕྱི་མ་མི་བྱའོ་ཞེས་བྱ་བ་སྨྲས་ཏེ། གསོལ་བ་ལ་སོགས་པ་སྔ་མ་དག་གིས་དགེ་ཚུལ་དེས་ལྟ་བའི་རྣམ་པ་བཏང་ན་དགེ་འདུན་གྱིས་ལས་ཕྱི་མ་མི་བྱའོ། །དགེ་འདུན་གྱི་དབྱེན་བྱེད་པ་མི་གཏོང་བ་ལ་སོགས་པ་གཏང་བར་བྱ་བའི་དོན་གྱི་ལས་ཐམས་ཅད་ལ་ཡང་དངོས་པོ་དེ་བཏང་ནས་ལས་ཕྱི་མ་མི་བྱའོ། །དགེ་ཚུལ་བསྙིལ་བ་སྡུད་པའི་ལྟུང་བྱེད་ལ་བྱེད་པ་པོ་ཉིད་ནི་གང་ཡིན། ཅི་ཞིག་
སྤྱད་ན་ཁ་ན་མ་ཐོ་བ་འདིར་འགྱུར་ཞེ་ན་དེའི་ཕྱིར། དགེ་ཚུལ་བསྙིལ་བ་ཉིད་དོ་ཞེས་བྱ་བ་སྨྲས་ཏེ། སྔར་སྤངས་པའི་རྗེས་སུ་ཕྱོགས་པའི་ལྟུང་བྱེད་ཀྱི་བྱེད་པ་པོ་གང་དག་ཡིན་པ་དེ་དག་ཉིད་འདིའི་བྱེད་པ་པོ་ཉིད་ཀྱང་ཡིན་ལ། དགེ་ཚུལ་གྱི་བསྙིལ་བ་ཉིད་ལ་ལུང་འབོགས་པ་ལ་སོགས་པ་བྱེད་ན་ཁ་ན་མ་ཐོ་བ་འདིར་འགྱུར་རོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ་ཤེས་གཙོ་བོ་ཞེས་བྱ་བས་འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་བོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱའོ། །གང་ལ་འདུ་ཤེས་གཙོ་ཆེར་བྱེད་པ་པོ་ཡིན་ཞེ་ན། དགེ་ཚུལ་བསྙིལ་བའི་གནས་སྐབས་སུ་གྱུར་པ་ལ་སྟེ། དགེ་ཚུལ་དེ་ཡང་དེ་ལྟ་བུ་ཉིད་ཡིན་ལ་ལྟུང་བ་འབྱིན་པར་བྱེད་པའི་དགེ་སློང་གིས་ཀྱང་དེ་ལྟར་ཤེས་ན་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཡིན་ནོ་ཞེས་བྱ་བའི་ཐ་ཚིག་གོ །ཅི་ཞིག་བྱས་ན་དེ་བྱེད་པ་པོ་ཉིད་ཡིན་ཞེ་ན། དགེ་ཚུལ་དེ་ལ་ལུང་དབོག་པ་དང༌། དམིགས་ཀྱིས་འདྲི་བ་དང༌། གནས་དང་རྗེས་སུ་བསྟན་པ་དང༌། གདམས་ངག་སྦྱིན་པ་དང༌། ལྟ་བ་སྨྲ་བ་དང༌། ཟང་ཟིང་གི་ལོངས་སྤྱོད་བྱེད་པ་དང༌། བསྙེན་བཀུར་བདག་གིར་བྱེད་པ་དང༌། གནས་སུ་ལྷན་ཅིག་ཉལ་ན་ཡང་ངོ༌། །མཐར་རོ་ཞེས་བྱ་བ་དང་མཚན་མོའི་འོ་ཞེས་བྱ་བའི་དུས་སུའོ། །གཞན་གྱིས་བསྲུལ་ན་ཡང་ལྟུང་བྱེད་དུ་འགྱུར་རོ། །ཕྱིར་བཟློག་པ་ན་དགེ་ཚུལ་གཞི་དེ་མི་གཏོང་ན་དེ་ལ་ནི་ཉེས་བྱས་སུ་འགྱུར་རོ། །བསྙིལ་བ་སྡུད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་ཁ་མ་བསྒྱུར་པའི་གོས་གྱོན་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྔོན་པོ་འམ་དམར་པོའམ་དུར་སྨྲིག་གིས་ཁ་མ་བསྒྱུར་བ་རང་གི་གོས་ཐ་ན་ལྷུང་བཟེད་ཀྱི་ཁ་གཡོགས་དང་སྣོད་དང་རྐང་པའི་འབོབ་དང་སྐ་རགས་དག་གི་བགོ་བ་ལ་སོགས་པ་ལ་ཡོངས་སུ་ལོངས་སྤྱོད་ནའོ་ཞེས་བྱ་བ་སྨྲས་ཏེ། སྔོན་པོ་ཞེས་བྱ་བ་ནི། སྐྱེ་བའི་ཚོན་གྱི་དཔེ་ཡིན་ནོ། །དམར་པོ་ཞེས་བྱ་བ་ནི་སའི་ཁམས་སོ། །དུར་སྨྲིག་ཅེས་བྱ་བ་ནི། མེ་ཏོག་དང་འབྲས་བུ་དག་གི་དཔེ་ཡིན་ནོ། །འམ་ཞེས་བྱ་བའི་སྒྲས་ནི་གསུམ་པོ་དེ་དག་ལས་གང་ཡང་རུང་བ་
གཅིག་བཟུང་ངོ༌། །ཁ་མ་བསྒྱུར་བ་ཞེས་བྱ་བ་ནི། དེ་དག་ལས་གང་ཡང་རུང་བས་ཁམ་བསྒྱུར་བའོ། །རང་གི་གོས་ཞེས་བྱ་བ་ནི། གཞན་གྱི་གོས་སྤྱོད་པ་ལ་ནི་ཁ་ན་མ་ཐོ་བ་ན་སྨད་པར་འགྱུར་བས་དེའི་ཕྱིར། རང་གི་ཞེས་བྱ་བ་སྨྲས་སོ། །ཐ་ན་ཞེས་བྱ་བས་ནི། ཆོས་གོས་ལ་སོགས་པ་ཆེན་པོ་དག་ལྟ་སྨོས་ཀྱང་ཅི་དགོས་ཞེས་བྱ་བར་སྟོན་ཏོ། །ལྷུང་བཟེད་ཀྱི་ཁ་གཡོགས་ཞེས་བྱ་བ་ནི། ལྷུང་བཟེད་ཀྱི་སྟེང་ནས་གཡོགས་པའི་རྫས་སོ། །སྣོད་ཅེས་བྱ་བ་ནི་ལྷུང་བཟེད་ཀྱི་སྣོད་དོ། །རྐང་པའི་འབོབ་ཅེས་བྱ་བ་ནི། རྐང་པ་དཀྲི་བའོ། །སྐ་རགས་དག་ཅེས་བྱ་བ་ནི། རྒྱ་ཅང་དང་ལྕག་པོད་ལ་སོགས་པ་དག་གོ །བགོ་བ་ཞེས་བྱ་བ་ནི། གོས་ཀྱི་རྣམ་གྲངས་སྤྱི་ལ་བསྙེགས་སོ། །སོགས་པ་ཞེས་བྱ་བའི་སྒྲས་ནི་བགོ་བ་དག་ཉི་ཚེར་མ་ཟད་ཀྱི་སླེ་འུ་ལ་སོགས་པ་དག་ཀྱང་བཟུང་ངོ༌། །ལ་ཡོངས་སུ་ལོངས་སྤྱོད་ནའོ་ཞེས་བྱ་བ་སྨྲས་ཏེ། རང་གི་གོས་ཁ་མ་བསྒྱུར་བ་དེ་དག་ལ་ལོངས་སྤྱོད་ན་ལྟུང་བྱེད་དོ། །ཆུ་ཚགས་ནི་ཁ་བསྒྱུར་བར་མི་རིགས་པར་སྣང་སྟེ། ཆུ་ལ་ལག་ཉར་བླངས་པ་དང༌། སོག་འཇོག་བྱས་པ་དང༌། བྱིན་ལེན་མ་བྱས་པ་དང༌། དུས་མ་ཡིན་པར་ཟ་བ་ལ་སོགས་པའི་ཉེས་པའི་ཆ་ལ་བརྟེན་པར་འགྱུར་བའི་ཕྱིར་ཏེ། དེ་ལྟ་བས་ན་དེ་ནི་ཡོ་བྱད་ཀྱི་གོས་བཞིན་དུ་ཁ་མི་བསྒྱུར་བར་བྱ་བ་ཡིན་ནོ། །སོ་སོར་ཐར་པའི་མདོ་ལས་གོས་སར་པ་ཞེས་སྨོས་པ་ནི་གསར་དུ་རྙེད་པས་སར་པ་ཡིན་པར་རིག་པར་བྱའི་མ་སྤྱད་པའི་སྒོ་ནས་སར་པ་ནི་མ་ཡིན་ནོ། །དེ་ལྟ་བས་ན་གོས་དུས་ཚེགས་སུ་སྤྱད་བ་རྙིང་པ་ཞིག་གསར་དུ་རྙེད་ན་ཡང་ཁ་མ་བསྒྱུར་བར་བགོ་བར་མི་བྱའོ། །སྡེ་པ་གཞན་གྱི་ནི་ཡང་རུང་བར་བྱ་མི་དགོས་པ་ཉིད་ཡིན་ནོ་ཞེས་བྱ་བ་ནི་དགེ་སློང་དང་དགེ་སློང་མ་དང་དགེ་ཚུལ་དང་དགེ་སློབ་མ་དང་དགེ་ཚུལ་མའི་སྡེ་པའི་འཁོར་རྣམས་ནི་སྡེ་པ་ཞེས་བྱ་བའི་སྒྲར་འགྱུར་རོ། །སྡེ་པ་གཞན་གང་ཡང་རུང་བའི་གོས་རང་སྤྱོད་པ་ལ་ནི་ཡང་གཟོད་རུང་བར་བྱ་མི་དགོས་པ་ཉིད་ཡིན་ནོ། །ཁྱིམ་པས་བརྐུས་པ་ཡང་མི་དགོས་ཏེ་ཞེས་བྱ་བ་ནི། ཁྱིམ་པས་གཞན་ལ་བརྐུས་པའི་གོས་རུང་བར་བྱས་ཞིན་པ་ཟིག་དགེ་སློང་གིས་ཐོབ་ན་དེ་ཡང་གཟོད་རུང་
བར་བྱ་མི་དགོས་པ་ཉིད་ཡིན་ནོ། །འདིར་མདོ་དེ་གཉིས་ཀྱི་གཞུང་ནི་ཞུ་བ་ཁ་ཅིག་ལས་དགེ་སློང་གི་གོས་རུང་བར་བྱས་པ་གང་ཡིན་པ་དེ་ནི་དགེ་སློང་མ་རྣམས་ལ་ཡང་རུང་བར་བྱས་པ་ཉིད་ཡིན་ལ། དེ་བཞིན་དུ་དེ་ནི་ལྔ་པོ་ཐམས་ཅད་ལ་ཡང་རུང་བར་བྱས་པ་ཉིད་ཡིན་ནོ། །དགེ་སློང་གིས་རྒྱལ་པོའམ་ཕྱིར་རྒོལ་བའམ་གཞན་དག་གིས་གོས་བརྐུས་པར་གྱུར་པ་ཞིག་གལ་ཏེ་སླད་ཀྱིས་ཐོབ་པར་གྱུར་ན་ཡང་རུང་བར་བགྱི་འཚལ་ལམ། ཉེ་བ་འཁོར་མི་དགོས་ཏེ། སྔ་མ་དེ་ཉིད་རུང་བ་ཡིན་པའི་ཕྱིར་རོ་ཞེས་གསུངས་པ་ཡིན་ནོ། །ཁ་དོག་ཆེན་པོར་ཁ་བསྒྱུར་བའི་གོས་བསྟེན་པར་མི་བྱའོ་ཞེས་བྱ་བ་ནི། ཁ་དོག་ཆེན་པོར་ཁ་བསྒྱུར་བའི་གོས་དེའི་བགོ་བ་བསྟེན་པར་མི་བྱའོ། །འདིར་གཞུང་ནི་དགེ་སློང་དག་ཁ་དོག་ཆེན་པོ་བརྒྱད་པོ་ལི་ཁྲི་དང་ཐིང་ཤིང་དང་རྒྱ་སྐྱེགས་དང་མཚལ་དང་གུར་ཀུམ་དང་བཙོད་དང་རྨ་ཤིང་དང་ལེ་བརྒན་རྩིས་ཁ་སྒྱུར་བར་བྱེད་ནས། བཅོམ་ལྡན་འདས་ཀྱིས་བཀའ་སྩལ་པ། ཁ་དོག་ཆེན་པོ་བརྒྱད་མ་གཏོགས་པ་ངུར་སྨྲིག་གཞན་འགའ་ཞིག་གིས་ཁ་བསྒྱུར་བར་བྱའོ་ཞེས་གསུངས་པ་ཡིན་ནོ། །ཁྱིམ་པའི་གོས་ཀྱང་མི་བྱའོ་ཞེས་བྱ་བ་ནི། ཁ་ཚར་དང་ཕུན་ཚར་མ་བཅད་པ་ནི་ཁྱིམ་པའི་གོས་ཏེ། དགེ་སློང་གོས་བགོ་བ་བསྟེན་བར་མི་བྱའོ། །ཁ་མ་བསྒྱུར་བ་དང་ཁ་དོག་ཆེན་པོར་ཁ་བསྒྱུར་བ་ཡང་རུང་སྟེ། དེ་ཡང་སོ་སོར་བཀག་པའི་ཕྱིར་རོ། །གཙུག་ལག་ཁང་གི་ནང་དུ་ངུར་སྨྲིག་གིས་གཡོགས་ཏེ་བསྟེན་པར་བྱའོ་ཞེས་བྱ་བ་ནི་དགེ་སློང་གིས་གཙུག་ལག་ཁང་གི་ནང་དུ་ནི་ཁྱིམ་པའི་གོས་དེ་སྟེང་དུ་ངུར་སྨྲིག་གིས་གཡོགས་ཏེ་བགོ་བ་བསྟེན་པར་བྱའོ། །འདིར་གཞུང་ནི་དགེ་སློང་གིས་ཁྱིམ་པའི་གོས་བགོ་བར་མི་བྱའོ། །རྐྱེན་དེ་ལྟ་བུ་དག་ཡོད་ན་སྟེང་དུ་ངུར་སྨྲིག་གིས་གཡོགས་ཏེ། གནས་ཁང་དང་གཙུག་ལག་ཁང་ནས་ཕྱིར་མི་འབྱུང་བར་བགོ་བར་བྱའོ་ཞེས་གསུངས་པ་ཡིན་ནོ། །ལམ་དུ་གོས་བརྙས་པ་ནི་ཐུན་མོང་ཉིད་ཡིན་ནོ་ཞེས་བྱ་བ་ནི། ལམ་དུ་གོས་བརྙས་པ་གཅིག་གིས་ཐོབ་པ་ཡང་གཞན་དང་ཐན་མོང་ཉིད་ཡིན་པར་ཤེས་པར་བྱའོ། །སུ་དང་ཐུན་མོང་ཉིད་ཡིན་ཞེ་ན་དེའི་ཕྱིར། གྲོགས་དག་དང་ངོ་ཞེས་བྱ་བ་སྨྲས་སོ། །གྲོགས་ཇི་ལྟ་བུ་དག་དང་ཞེན་དེའི་ཕྱིར།
དགེ་སློང་དང་དགེ་ཚུལ་དག་དང་ངོ་ཞེས་བྱ་བ་སྨྲས་སོ། །གཅིག་པ་ཉིད་ཡིན་ན་རྒན་རབས་ནས་བརྩམས་ཏེ་ཇི་སྲིད་དུ་སླེབ་པའི་སྟེང་དུ་གཡོགས་སོ་ཞེས་བྱ་བ་ནི། གོས་བརྙས་པ་གཅིག་པུ་ཞིག་ཉིད་ཡིན་ན། རྒན་རབས་ནས་བརྩམས་ཏེ་ཇི་སྲིད་དུ་སླེབས་ཤིང་གཡོགས་པ་དེ་ཚུན་ཆད་ཀྱི་སྟེང་དུ་དགབ་པར་བྱའོ། །འདིར་གཞུང་ནི། བཅོམ་ལྡན་འདས་ཀྱིས་བཀའ་སྩལ་པ། གང་གིས་རྙེད་པ་དེ་ཉིད་ཀྱིས་བགོ་བར་མི་བྱ་བར་འདི་ལྟར་ཐུན་མོང་དུ་བྱའོ། །གལ་ཏེ་གཅིག་པུ་ཞིག་ཡིན་ན་དེས་ཇི་ལྟར་རྒན་རབས་ནས་བརྩམས་ཏེ་གར་སླེབས་པ་ཚུན་ཆད་ཀྱི་སྟེང་དུ་གཡོགས་པར་བྱའོ་ཞེས་གསུངས་པ་ཡིན་ནོ། །དམིགས་ཀྱིས་མ་བསྔོས་ན་གཞན་ལས་གྱོན་ཏེ་བཅག་པར་མི་བྱའོ་ཞེས་བྱ་བ་ལ། དམིགས་ཀྱིས་མ་བསྔོས་པ་ཞེས་བྱ་བ་ནི། ཆེ་གེ་མོ་ཞིག་ལ་སྦྱིན་ནོ་ཞེས་དམིགས་ཀྱིས་མ་བསྔོས་པར་སྤྱིར་བརྙན་པོར་བྱིན་ཏེ། དེ་གཞན་ལས་བཤུས་ནས་རང་གོན་ཏེ་འཆག་ཏུ་འགྲོ་བར་མི་བྱའོ། །བསོད་ནམས་འདོད་པས་མགྲོན་དུ་བོས་ན་ཁ་ཚར་མ་བཅད་པ་མན་ཆད་སར་པ་ལ་མི་རྟག་པས་ཉེན་པར་འགྱུར་བའི་ཡིད་ལ་བྱེད་པས་སྟེང་དུ་བརྫི་བར་བྱའོ་ཞེས་བྱ་བ་ནི། སྤྱིན་བདག་བསོད་ནམས་འདོད་པས་དགེ་སློང་མགྲོན་དུ་བོས་ཏེ། གོས་སར་པ་ཁ་ཚར་མ་བཅད་པའི་བར་མན་ཆད་དག་གི་སྟེང་དུ་བརྫིར་གསོལ་ཞེས་ཟེར་ན་དེའི་ཚེ་དགེ་སློང་དེས་གོས་འདི་དེའུ་རེ་མི་རྟག་པས་ཉེན་པར་འགྱུར་བའི་ཡིད་ལ་བྱེད་པས་སྟེང་དུ་རྐང་པ་གཉིས་ཀྱིས་བརྫི་བར་བྱའོ། །འདིར་མདོ་དེ་གཉིས་ཀྱི་གཞུང་ནི། ཡང་བཅོམ་ལྡན་འདས་ཀྱིས་བཀའ་སྩལ་པ། གང་འཆག་པར་བྱེད་ན་དེས་གང་ཟག་གི་གོས་གྱོན་ཏེ་བཅག་པར་བྱའོ། །གཞན་གྱིས་འཆག་ན་འགལ་ཚབས་ཅན་དུ་འགྱུར་རོ། །ཡང་བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དགེ་སློང་ལམ་དུ་ཞུགས་པ་ལ་ཡང་བྲམ་ཟེ་དང་ཁྱིམ་བདག་དད་པ་ཅན་དག་གིས་གོས་སར་པ་ཁ་ཚར་རིང་པོ་དག་གིས་བཀབ་ཅིང་བདག་ཅག་ལ་ཕན་པའི་ཕྱིར་སྟེང་དུ་རྫིས་ཤིག་ཅེས་ཟེར་ན། མུ་སྟེགས་ཅན་ཟིལ་གྱིས་མནན་པའི་ཕྱིར་མི་རྟག་པས་ཉེན་པར་འགྱུར་བའི་ཡིད་ལ་བྱེད་བས་སྟེང་དུ་བརྫི་བར་བྱ་སྟེ་
འདི་ལ་འགྱོད་པར་མི་བྱའོ་ཞེས་གསུངས་པ་ཡིན་ནོ། །ཁ་མ་བསྒྱུར་བའི་གོས་གྱོན་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ནས་ལོངས་པའི་ལྟུང་བྱེད་དུ་འགྱུར་ཞེན། དེའི་ཕྱིར། རིན་པོ་ཆེ་རང་གི་མ་ཡིན་པ་དང་དེར་སྨོས་པ་ལ་རེག་གམ་རེག་ཏུ་བཅུག་ནའོ། །བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། ཁ་ན་མ་ཐོ་བ་འདི་ལ་བྱེད་པ་པོ་གང་ཡིན་ཞེ་ན། དེའི་ཕྱིར་རིན་པོ་ཆེ་རང་གི་མ་ཡིན་པ་ཞེས་བྱ་བ་སྨྲས་ཏེ། གཞན་གྱི་རིན་པོ་ཆེའོ། །རང་གི་ལ་ནི་སྤང་བའི་ལྟུང་བྱེད་དུ་བསྟན་པའི་ཕྱིར་རོ། །དེར་སྨོས་པ་ཞེས་བྱ་བ་ནི། རིན་པོ་ཆེར་སྨོས་པ་སྟེ། དེར་ཞེས་བྱ་བའི་སྒྲ་ནི་རིན་པོ་ཆེ་ལ་སྙེགས་སོ། །རང་གི་མ་ཡིན་པ་ཞེས་བྱ་བའི་སྒྲ་ནི་འདིར་སྦྱར་བར་མི་བྱ་སྟེ། རིན་པོ་ཆེར་སྨོས་པ་ནི་རང་གི་ཡང་རུང་རང་གི་མ་ཡིན་པ་ཡང་རུང་སྟེ། ཁ་ན་མ་ཐོ་བ་འདིའི་བྱེད་པ་པོ་དག་ཡིན་ནོ། །ཅི་ཞིག་བྱས་ན་དེ་དག་ཁ་ན་མ་ཐོ་བ་འདིའི་བྱེད་པ་པོ་ཡིན་ཞེན། དེའི་ཕྱིར་རེག་གམ་རེག་ཏུ་བཅུག་ན་བྱེད་པ་པོ་ཡིན་ནོ་ཞེས་བྱ་བ་སྨྲས་ཏེ། རིན་པོ་ཆེ་རང་གི་མ་ཡིན་པ་དང་རིན་པོ་ཆེར་སྨོས་པ་ལ་བདག་ཉིད་རེག་གམ་གཞན་རེག་ཏུ་བཅུག་ན་ཁ་ན་མ་ཐོ་བ་འདིའི་བྱེད་པ་པོ་ཡིན་ནོ། །རིན་པོ་ཆེར་སྨོས་པ་བདག་གིར་བྱེད་པ་ནི་ཉེས་བྱས་ཏེ། ལོངས་པ་ནི་ཕྱགས་པ་ཡིན་ལ་བདག་གིར་བྱས་པ་ཙམ་ལ་ནི་ལོངས་པ་ཤས་ཆུང་བའི་ཕྱིར་རོ། །རིན་པོ་ཆེར་སྨོས་པ་ཞེས་བྱ་བ་དེ་ཅི་ཞིག་ཡིན་ཞེ་ན་དེའི་ཕྱིར། དེ་ནི་གཡུལ་དུ་སྤྱད་པའི་མཚོན་ཆ་དང་རོལ་མོར་སྤྱད་པའི་ལག་ཆའོ་ཞེས་བྱ་བ་སྨྲས་ཏེ། གཡུལ་དུ་དགོས་ཤིང་གཡུལ་དང་འབྲེལ་བའི་མཚོན་ཆ་ནི་གཡུལ་དུ་སྤྱད་པའི་མཚོན་ཆའོ། །རོལ་མོར་དགོས་ཤིང་རོལ་མོ་དང་འབྲེལ་བའི་ལག་ཆ་ནི་རོལ་མོར་སྤྱད་པའི་ལག་ཆའོ། །དེ་གཉིས་ཇི་ལྟ་བུ་ཞིག་ཁ་ན་མ་ཐོབ་བ་གང་གི་བྱེད་པ་བོ་ཡིན་ཞེ་ན་དེའི་ཕྱིར། དགོས་པའི་ཕྱིར་རུང་བ་ཉིད་དུ་འགྱུར་བ་ནི་དངོས་གཞིའོ་ཞེས་བྱ་བ་སྨྲས་ཏེ། གཡུལ་དུ་དགོས་པའི་ཕྱིར་རུང་བ་ཉིད་དུ་གྱུར་པའི་མཚོན་ཆ་དང་རོལ་མོར་དགོས་པའི་ཕྱིར་རུང་བ་ཉིད་དུ་གྱུར་པའི་ལག་ཆ་སྟེ། གལ་ཏེ་མཚོན་ཆ་དང་ལག་ཆ་དེ་གཡུལ་དང་རོལ་མོར་དགོས་པ་ཡིན་ན་དངོས་གཞིའི་ཁ་ན་མ་ཐོ་
བའི་བྱེད་བ་པོ་ཉིད་ཡིན་ནོ། །གྱུར་པ་མ་ཡིན་པ་ནི་ཉེས་བྱས་ཀྱིའོ་ཞེས་བྱ་བ་ནི། མཚོན་ཆ་དང་ལག་ཆ་དེ་དག་གཡུལ་དང་རོལ་མོར་དགོས་པའི་ཕྱིར། རུང་བ་ཉིད་དུ་གྱུར་པ་མ་ཡིན་པ་ནི་ཉེས་བྱས་ཀྱི་བྱེད་པ་པོ་ཡིན་ནོ། །ཅི་དེ་གཉིས་གནས་གང་ཡང་རུང་བ་ན་འདུག་པ་བྱེད་པ་པོ་ཡིན་ནམ་ཞེ་ན་དེའི་ཕྱིར། གཙུག་ལག་ཁང་དང་དེའི་ཉེན་ཀོར་ན་འདུག་པ་ལ་བདག་གིར་བྱ་བ་དང་མ་འབྲེལ་པར་རྫས་ཆུང་མི་ཟ་བར་སེམས་ཀྱིས་ནི་མ་གཏོགས་སོ་ཞེས་བྱ་བ་སྨྲས་ཏེ། དེ་གཉིས་གནས་ཁང་གང་ཡང་རུང་བ་ན། འདུག་པ་བྱེད་པ་པོ་ཡིན་ནམ་ཞེ་ན་དེ་མ་ཡིན་ཏེ། དེའི་ཕྱིར་གཙུག་ལག་ཁང་དང་དེའི་ཉེན་ཀོར་ན་འདུག་པ་ནི་མ་གཏོགས་ཏེ། གཙུག་ལག་ཁང་དང་འབྲེལ་པ་དང་དེའི་ཉེན་ཀོར་ན་འདུག་པ་ལ་རེག་གམ་རེག་ཏུ་བཅུག་ན་ནི་མ་གཏོགས་སོ། །ཅི་སེམས་གང་ཡང་རུང་བས་རེག་ན་ཡང་དེ་གཉིས་བྱེད་པ་པོ་མ་ཡིན་ནམ་ཞེ་ན། དེའི་ཕྱིར་བདག་གིར་བྱ་བ་དང་མ་འབྲེལ་པར་རྫས་ཆུད་མི་ཟ་བར་བྱ་བའི་སེམས་ཀྱིས་ནི་མ་གཏོགས་སོ་ཞེས་བྱ་བ་སྨྲས་ཏེ། དགེ་སློང་གང་ལ་དེ་དག་བདག་གིར་བྱ་བ་དང་མ་འབྲེལ་བའི་སེམས་དང་རྫས་དེ་དང་ཆུད་མི་ཟ་བར་བྱ་བའི་སེམས་ཡོད་པའི་སེམས་དེས་གཙུག་ལག་ཁང་དང་དེའི་ཉེན་ཀོར་ན་འདུག་པའི་མཚོན་ཆ་དང་ལག་ཆ་དེ་དག་ལ་ལག་པས་རེག་གམ་རེག་ཏུ་བཅུག་པ་ནི་མ་གཏོགས་སོ། །དེ་ལྟ་བས་ན་ཡོངས་སུ་སྐྱང་བའི་ཕྱིར་རེག་པ་དང་རེག་ཏུ་བཅུག་པ་ལ་ནི་ཉེས་པ་མེད་དོ། །དེ་ཡོངས་སུ་བསྐྱང་བའི་ཆོ་ག་བསྟན་པའི་ཕྱིར། དེ་ཡལ་བར་མི་དོར་རོ་ཞེས་བྱ་བ་སྨྲས་ཏེ། གཙུག་ལག་ཁང་ན་འདུག་པའམ་གཙུག་ལག་ཁང་གི་ཉེན་ཀོར་ན་འདུག་པའི་རིན་པོ་ཆེའམ་རིན་པོ་ཆེར་སྨོས་པ་དེ་ཡལ་བར་མི་དོར་བ་སྟེ། དེ་གལ་ཏེ་བདག་པོ་ལས་འཁྱམས་པར་གྱུར་ན་བསྲུང་བའི་ཕྱིར་འབད་པར་བྱའོ།། ཇི་ལྟར་དེ་ཡལ་བར་མི་དོར་བར་བྱ་ཞེ་ན་དེའི་ཕྱིར། དེ་ཞག་བདུན་ནམ་བརྒྱད་དུ་བསྡུ་སྐྱོག་བྱའོ་ཞེས་བྱ་བ་སྨྲས་ཏེ། བདག་པོ་ལས་འཁྱམས་པའི་རིན་པོ་ཆེའམ་རིན་པོ་ཆེར་སྨོས་པ་གཙུག་ལག་ཁང་ངམ་གཙུག་ལག་ཁང་གི་ཉེན་གོར་ན་འདུག་པ་དེ་དགེ་སློང་དེས་ཞག་བདུན་
ནམ་བརྒྱད་དུ་དུས་དུས་སུ་ལྟ་བ་ལ་སོགས་པས་བསྡུ་སྐྱོག་བྱའོ། །འགྲོ་བའི་ལམ་ཕྱོགས་སུ་སའམ་ལོ་མའི་ཚོགས་དག་གིས་གཡོགས་པར་བྱའོ་ཞེས་བྱ་བ་སྨྲས་ཏེ། དགེ་སློང་བསོད་སྙོམས་ལ་སོགས་པའི་དོན་དུ་འགྲོ་བའི་ལམ་ལོགས་སུ་རིན་པོ་ཆེའམ་རིན་པོ་ཆེར་སྨོས་པ་བདག་པོ་ལས་འཁྱམས་པ་གཙུག་ལག་ཁང་གི་ཉེན་ཀོར་ན་འདུག་པ་དེ་སའམ་ལོ་མའི་ཚོགས་སམ་འདབ་མའི་ཚོགས་དག་གིས་གཡོགས་པར་བྱའོ། །བདག་པོ་རྟགས་ཐམས་ཅད་ལ་མ་བབ་པར་ཁོ་བོ་ཡིན་ནོ་ཞེས་ཟེར་བ་ལ་སྦྱིན་པར་མི་བྱའོ་ཞེས་བྱ་བ་ནི། བདག་པོར་ཁས་འཆེ་བ་ཞིག་རྫས་དེའི་རྟགས་དང་ཡིན་པ་དེ་ཐམས་ཅད་ཐོག་ཏུ་ཕེབས་པར་གྱུར་པའི་དོན་གྱི་ཚིག་མི་སྨྲ་བར་གྱི་ན་མུན་སྤྲུལ་ཙམ་དུ་ཁོ་བོའི་ཡིན་ནོ་ཞེ་ཟེར་ན་དེ་ལ་གྱ་ཚོན་དུ་སྦྱིན་པར་མི་བྱའོ། །འོང་བར་མ་གྱུར་ན་དེའི་འོག་ཏུ་དགེ་འདུན་གྱི་མཛོད་དུ་གཞུག་པར་བྱའོ་ཞེས་བྱ་བ་ནི། དེའི་བདག་པོ་ཞག་བདུན་ནམ་བརྒྱད་དུ་འོངས་པར་མ་གྱུར་ན་དེའི་འོག་ཏུ་རྫས་དེ་དགེ་འདུན་གྱི་མཛོད་དུ་གཞུག་པར་བྱའོ། །དེ་དག་དགེ་འདུན་གྱི་མཛོད་དུ་ཡུན་ཇི་སྲིད་ཅིག་ཏུ་བཅང་བར་བྱ་ཞེ་ན། དེའི་ཕྱིར། ཟླ་བ་དྲུག་གི་མཐའ་ཚུན་ཆད་དུ་བཅང་བར་བྱའོ་ཞེས་བྱ་བ་སྨྲས་ཏེ། རྫས་དེ་དགེ་འདུན་གྱི་མཛོད་དེར་ཟླ་བ་དྲུག་གི་མཐའ་ཚུན་ཆད་དུ་བཅང་བར་བྱའོ་ཞེས་བྱ་བའི་ཐ་ཚིག་གོ །འོག་ཏུ་མ་འོངས་ན་སངས་རྒྱས་སམ་དགེ་འདུན་གྱི་ས་རིས་གང་ནས་རྙེད་པ་དེར་སྤྱད་དུ་རུང་ངོ་ཞེས་བྱ་བ་ནི། ཟླ་བ་དྲུག་གི་འོག་ཏུ་བདག་པོ་མ་འོངས་ན་རྫས་དེ་དང་བོ་སངས་རྒྱས་སམ་དགེ་འདུན་གྱི་ས་རིས་ཀྱི་ཡུལ་གང་གི་ནང་ནས་རྙེད་པ་དེར་སངས་རྒྱས་སམ་དགེ་འདུན་གྱི་དངོས་པོ་དེར་སྤྱད་དུ་རུང་བ་ཉིད་ཡིན་པའོ། །དེ་རུང་བ་ཉིད་མ་ཡིན་ན་དེས་རུང་བ་བརྟན་པོ་ཉོ་བར་བྱའོ་ཞེས་བྱ་བ་ནི། རྫས་དེ་སངས་རྒྱས་དང་དགེ་འདུན་གྱི་ཡུལ་ལ་རུང་བ་ཉིད་མ་ཡིན་ན་རྫས་རུང་བ་ཉིད་མ་ཡིན་པ་དེས་རྫས་རུང་བ་བརྟན་པོ་གཞན་ཉོ་བར་བྱའོ། །གལ་ཏེ་དེའི་ཚེ་བདག་པོ་འོངས་པར་གྱུར་ན་རྗེས་སུ་གནང་བ་གསོལ་ཏེ་མི་སྟེར་ན་སྦྱིན་པར་བྱའོ་ཞེས་བྱ་བ་ནི། གལ་ཏེ་དེའི་ཚེ་ཞེས་བྱ་བ་ཉོས་སམ་མ་ཉོས་པར་སྤྱོད་པའི་གནས་སྐབས་སུ་གྱུར་པ་
དེའི་ཚེ་བདག་པོ་འོངས་པར་གྱུར་ན་དེ་འོངས་པ་ལ་རྗེས་སུ་གནང་བ་གསོལ་བར་བྱ་སྟེ། ཁྱོད་ཀྱིས་འདི་སངས་རྒྱས་སམ་དགེ་འདུན་ལ་འབུལ་བའི་རིགས་སོ་ཞེས་རྗེས་སུ་གནང་བ་གསོལ་བར་བྱའོ། །གསོལ་ཏེ་གལ་ཏེ་མི་སྟེར་ན་མི་སྟེར་བའི་བདག་པོ་དེ་ལ་རྫས་དེ་ཕྱིར་སྦྱིན་པར་བྱའོ། །གལ་ཏེ་སྐྱེད་སློང་ན་ཁོ་བོ་ཅག་གིས་ཡོངས་སུ་བསྐྱངས་པ་གང་ཡིན་པ་ཉིད་དྲིན་ཆེན་མི་སེམས་སམ་ཞེས་བརྗེད་པར་བྱའོ་ཞེས་བྱ་བ་ནི། གལ་ཏེ་བདག་པོ་དེ་སྤྱད་པའི་ཕྱི་ཁེ་ཚོལ་བར་བྱེད་ན་དེ་ལ་དེ་སྐད་ཅེས་ཁོ་བོ་ཅག་གིས་ཁྱོད་ཀྱི་རྫས་ཆུད་མ་ཟོས་པར་ཡོངས་སུ་བསྐྱངས་པ་གང་ཡིན་བ་དེ་ཉིད་ཁྱོད་དྲིན་ཆེ་བར་མི་སེམས་སམ་ཞེས་བཤད་ཀྱི་བྱང་བར་བྱ་སྟེ་སྐྱེད་སྦྱིན་པར་མི་བྱའོ། །སྔར་རུང་བ་ཉིད་དུ་གྱུར་པ་ཞེས་གང་སྨོས་པ་དེ་ལ་རུང་བ་ཉིད་གང་ཡིན་ཞེ་ན་དེའི་ཕྱིར། ནོར་བུ་ལ་སོགས་པ་ལ་ནི་བདར་བ་དང་ཕུག་པ་ཉིད་རུང་བ་ཉིད་ཡིན་ནོ་ཞེས་བྱ་བ་སྨྲས་ཏེ། ནོར་བུ་ལ་སོགས་པ་ལ་ནི་བདར་བ་དང་ཕུག་པ་ཉིད་རུང་བ་ཉིད་དུ་གྱུར་པ་ཡིན་ནོ། །སོགས་པ་ཞེས་བྱ་བའི་སྒྲས་ནི་མུ་ཏིག་དང་བཻ་ཌཱུཪྻ་ལ་སོགས་པ་དག་བསྡུའོ། །འདིར་གཞུང་ནི། དགེ་སློང་གི་ནོར་བུ་ལེན་ན་མ་བདར་བ་ལེན་ན་ནི་ཉེས་བྱས་སུ་འགྱུར་ལ་བདར་བ་ལེན་ན་ནི་ལྟུང་བྱེད་དོ། །ནོར་བུ་ཇི་ལྟ་བ་བཞིན་དུ་མུ་ཏིག་དང་བཻ་ཌཱུཪྻ་ནས་གཡས་སུ་འཁྱིལ་བའི་བར་ཡང་དེ་བཞིན་ནོ། །གཞན་ལས་ཀྱང་དགེ་སློང་གིས་ནོར་བུ་ལེན་ན་མ་ཕུག་པ་ལེན་ན་ནི་ཉེས་བྱས་སུ་འགྱུར་ལ། ཕུག་པ་ལེན་ན་ནི་ལྟུང་བྱེད་དུ་འགྱུར་རོ། །ནོར་བུ་ཇི་ལྟ་བ་བཞིན་དུ་མུ་ཏིག་དང་བཻ་ཌཱུཪྻ་ནས་གཡས་སུ་འཁྱིལ་བའི་བར་དུ་ཡང་དེ་བཞིན་ནོ་ཞེས་གསུངས་པ་ཡིན་ནོ། །མགུལ་རྒྱན་དང་གདུ་བུ་རྒྱན་ཅན་དང་དཔུང་རྒྱན་དང་དོ་ཤལ་དང་སེ་མོ་དོ་ཉིད་དུ་གནས་པ་ཡང་ངོ་ཞེས་བྱ་བ་ལ། མགུལ་རྒྱན་དང་གདུ་བུ་རྒྱན་ཅན་དང་དཔུང་རྒྱན་དང༌། དོ་ཤལ་དང་སེ་མོ་དོ་རྣམས་ཀྱི་དངོས་པོ་ནི་དེ་ཉིད་དེ་དེར་གནས་པ་ཞེས་བྱ་བ་དེའི་དབྱིབས་སུ་རེད་པ་ནི་རུང་བར་གྱུར་པ་ཉིད་ཡིན་ནོ། །འདི་སྐད་པ་སྟན་ཏེ། མགུལ་རྒྱན་དང་གདུ་བུ་རྒྱན་ཅན་ཉིད་ལ་སོགས་པ་གསེར་དང་དངུལ་ལས་བྱས་པ་ཉིད་ཡིན་ལ།
རྣམ་པ་དེ་ལྟ་བུར་འདུག་པ་ཡང་ཡིན་ན་གསེར་དང་དངུལ་དེ་གཉིས་ནི་དངོས་གཞིའི་བྱེད་པ་པོ་ཉིད་ཡིན་ནོ། །པི་ཝང་དང་འོད་མ་དང་བལ་ལ་རི་དང་མ་ཧ་ཏི་དང་སུ་གྷོ་ཤ་ཀ་རྣམས་ནི་རྒྱུད་དང་བཅས་པ་ཉིད་ཡིན་ན་འོ་ཞེས་བྱ་བ་ནི། པི་ཝང་དང་འོད་མ་དང་བལ་ལ་རི་དང་མ་ཧ་ཏི་དང་སུ་གྷོ་ཤ་ཀ་རྣམས་ནི་རྒྱུད་དང་བཅས་པ་ཉིད་ཡིན་ཞིང་རྒྱུད་ཡོད་པ་ཉིད་ཡིན་ན་རུང་བར་གྱུར་པ་ཉིད་ཡིན་ནོ། །འདིར་གཞུང་ནི་དགེ་སློང་གིས་པི་ཝང་ལེན་ན་རྒྱུད་དང་བཅས་པ་ལེན་ན་ནི་ལྟུང་བྱེད་དུ་འགྱུར་ལ། རྒྱུད་མེད་པ་ལེན་ན་ནི་ཉེས་བྱས་སུ་འགྱུར་རོ། །པི་ཝང་ཇི་ལྟ་བ་བཞིན་དུ་འོད་མ་དང་བལ་ལ་རི་དང་མ་ཧ་ཏི་དང་སུ་གྷོ་ཤ་ཀ་ཡང་དེ་བཞིན་ནོ་ཞེས་གསུངས་པ་ཡིན་ནོ། །དུང་དང་རྔ་བོ་ཆེ་དང་རྔ་པ་ཊ་ཧ་དང་རྫ་རྔ་རྣམས་ནི་སྒྲ་འབྱིན་ནའོ་ཞེས་བྱ་བ་ནི། དེ་དག་ནི་སྒྲ་འབྱིན་དུ་བཏུབ་པ་ཉིད་ཡིན་ན་རུང་བར་གྱུར་པ་ཉིད་ཡིན་ནོ། །གཞུ་ནི་རྒྱུད་དང་བཅས་པ་ཉིད་ཡིན་ནའོ་ཞེས་བྱ་བ་ནི་གཞུ་ནི་རྒྱུད་དང་བཅས་པ་ཉིད་ཡིན་ན་རུང་བར་གྱུར་པ་ཉིད་ཡིན་ནོ། །རལ་གྲི་དང་རལ་གྲི་འཁྱོག་པོ་དང་རལ་གྲི་སོ་གཅིག་པ་དང་མདུད་ཐུང་དང་འཕང་མདུད་དང་ལྕགས་ཀྱོ་རྣམས་ནི་དེ་ཉིད་ཡིན་ནའོ་ཞེས་བྱ་བ་ནི། རལ་གྲི་དང་རལ་གྲི་འཁྱོག་པོ་ལ་སོགས་པ་ནི་དེ་དག་ཉིད་ཡིན་ན་རུང་བ་ཉིད་དུ་གྱུར་བ་ཉིད་ཡིན་ནོ་ཞེས་བྱ་བའི་ཐ་ཚིག་གོ །མདའ་དད་ལྕགས་མདའ་དང་མདའ་ཕྱེད་ལྕགས་ལས་བྱས་པ་རྣམས་ནི་མདེའུ་དང་བཅས་པ་ཉིད་ཡིན་ནའོ་ཞེས་བྱ་བ་ནི། མདའ་ལ་སོགས་པ་ནི་མདེའུ་དང་བཅས་པ་ཉིད་ཡིན་ན་རུང་བར་གྱུར་པ་ཉིད་ཡིན་ནོ། །སྐུ་གཟུགས་ནི་སྐུ་གདུང་དང་བཅས་པ་ཉིད་ཡིན་ནའོ་ཞེས་བྱ་བ་ནི། རིན་པོ་ཆེ་ལས་བྱས་པའི་སངས་རྒྱས་ཀྱི་སྐུ་གཟུགས་ནི་སྐུ་གདུང་དང་བཅས་པ་ཉིད་ཡིན་ན་རུང་བར་གྱུར་པ་ཉིད་ཡིན་ནོ། །ཁན་མ་ཐོ་བ་ཡོངས་སུ་རྫོགས་པར་འགྱུར་རོ། །སྐུ་གདུང་མེད་པ་ཉིད་ཡིན་ན་ནི་ཉེས་བྱས་སོ། །རིན་པོ་ཆེ་མ་ཡིན་པ་ལས་བྱས་པ་ལ་ནི་སྐུ་གདུང་མེད་པ་ཉིད་ཡིན་ན་ལྟུང་བ་མེད་དོ། །སྐུ་གདུང་དང་བཅས་པ་ཉིད་ཡིན་ན་ནི་ཉེས་བྱས་སོ། །མཆོད་རྟེན་རིན་པོ་ཆེ་ལས་བྱས་པ་ཉིད་ལ་སྐུ་གདུང་དང་བཅས་པ་ཉིད་ཡིན་ན་ནི་དངོས་གཞིའོ། །གང་ཡང་རུང་བ་
གཅིག་མ་ཚང་ན་ནི་ཉེས་བྱས་སོ། །ཉན་ཐོས་དང་རང་སངས་རྒྱས་ཀྱི་སྐུ་གཟུགས་རིན་པོ་ཆེ་ལས་བྱས་པ་སྐུ་གདུང་དང་བཅས་པ་ཉིད་ལ་ནི་དེ་དག་གི་སྐུ་གདུང་དང་བཅས་པ་ཡང་རུང༌། སངས་རྒྱས་ཀྱི་སྐུ་གདུང་དང་བཅས་པ་ཡང་རུང་སྟེ་ཉེས་བྱས་སུ་འགྱུར་རོ། །སྲེད་མེད་ཀྱི་བུ་ལ་སོགས་པའི་གཟུགས་ནི་རིན་པོ་ཆེ་ལས་བྱས་པ་མ་ཡིན་པ་ཉིད་དེ་དག་གི་རུས་པ་དང་བཅས་པ་ཡང་རུང་སངས་རྒྱས་ཀྱི་སྐུ་གདུང་དང་བཅས་པ་ཡང་རུང་སྟེ་ཉེས་པ་མེད་དོ། །རིན་པོ་ཆེ་ལས་བྱས་པ་ཉིད་ཡིན་ན་ནི་རྫས་ཙམ་པ་ལས་ཉེས་བྱས་སུ་འགྱུར་རོ། །དེ་ལ་སྟོན་པའི་འདུ་ཤེས་ཉེ་བར་བཞག་པར་ཉེས་པ་མེད་པ་ཉིད་དོ་ཞེ་བྱ་བ་ནི། སྐུ་གཟུགས་དེ་དག་ལ་སྟོན་པའི་འདུ་ཤེས་ཉེ་བར་གཞག་སྟེ་རེག་གམ་རེག་ཏུ་བཅུག་པ་ལ་ནི་ཉེས་པ་མེད་དོ། །ནོར་བུ་མ་ཆིང་དབུ་དང་སོག་མའི་ཕྲེང་བ་དང་མཆུ་སྦྲང་དང་རྫ་རྔ་ཁ་གཅིག་པ་དང་གཞུ་དང་མདའ་ལྟར་བཅོས་པ་རྣམས་ནི་ཕྱེད་ཉིད་དོ་ཞེས་བྱ་བ་ནི། དེ་དག་ལ་རེག་གམ་རེག་ཏུ་བཅུག་པ་ནི་ཉེས་བྱས་སོ། །ནོར་བུ་མཆིང་བུ་ལ་སོགས་པ་ནི་དཔེ་ཙམ་དུ་ཟད་དེ། ས་ལས་བྱས་པའི་ནོར་བུ་དག་ཀྱང་ཕྱེད་ཉིད་དོ། །མདའ་ལྟར་བཅོས་པ་ཞེས་བྱ་བ་ནི་ཤིང་བུ་ལ་སོགས་པ་དག་ལ་ལྟོང་ཙམ་གཏོད་ཅིང་འོལ་ཕྱིར་ཙམ་མདའ་འདྲ་བར་བྱས་པ་ཡིན་པར་རིག་པར་བྱའོ། །གསེར་གྱི་སྟེགས་བུ་ནི་མི་རུང་བ་ཉིད་དོ་ཞེས་བྱ་བ་ལ། འདིར་གཞུང་ནི་ཞུ་བ་ལས་དགེ་སློང་གསེར་གྱི་སྟེགས་བུ་ལ་འདུག་ན་ཉེས་བྱས་སོ་ཞེས་གསུངས་པ་ཡིན་ནོ།། །།བམ་བོ་སུམ་ཅུ་གསུམ་པ། འཇིགས་པར་གྱུར་ན་རང་གི་ལ་མི་གནོད་ན་དགེ་འདུན་གྱི་དང་མཆོད་རྟེན་གྱི་དབྱིག་དང་གསེར་སྦས་ནས་སམ་ཁྱེར་ཏེ་འགྲོ་བར་བྱའོ་ཞེས་བྱ་བ་ནི་རྐུན་པོ་ལ་སོགས་པས་འཇིགས་པར་གྱུར་ན་གལ་ཏེ་རང་གི་རྫས་སྦས་ནས་སམ་ཁྱེར་ཏེ་འགྲོ་བ་ལ་མི་གནོད་ན་དགེ་འདུན་གྱི་དང་མཆོད་རྟེན་གྱི་དབྱིག་དང་གསེར་ཡང་སྦས་ནས་སམ་ཁྱེར་ཏེ་འགྲོ་བར་བྱའོ། །གལ་ཏེ་གནོད་པར་འགྱུར་ན་རང་གི་ཡོ་ཡད་ཆུད་མི་གཟན་པའི་ཕྱིར་དང་པོར་རང་གི་ཆོས་དང་ལྡན་པའི་རྫས་སྦ་བར་བྱ་པའམ་བསྐུར་བར་བྱའོ། །འདིར་གཞུང་ནི་དགེ་སློང་གིས་དགེ་འདུན་གྱི་ཟོང་
དག་ཁྱེར་ཏེ་ཁྱིམ་པ་དང་དགེ་ཚུལ་དག་ལ་བྱིན་པ་དང་དེ་དག་གིས་ཁྱེར་ཏེ་བྲོས་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་རང་གིས་ཁྱེར་ཏེ་འགྲོ་བར་བྱ་ཞིང་གང་གི་ཚེ་གཙུག་ལག་ཁང་དེ་ཉིད་ན་གནས་པ་ཡིན་ན་དེ་ཉིད་དུ་སྦྱིན་པར་བྱའོ་ཞེས་བྱ་བ་ལ་སོགས་པའི་བར་དུ་གསུངས་པ་དང༌། དགེ་སློང་དག་གིས་དགེ་འདུན་གྱི་ཟོང་དག་ཁྱེར་བ་དང་དེ་དག་གི་ལྷུང་བཟེད་དང་ཆོས་གོས་འཁྱམས་ནས། སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་ལྟར་མི་བྱ་སྟེ་གང་ཟག་ནི་ཕོངས་པར་འགྱུར་གྱི་དགེ་འདུན་ནི་མི་འགྱུར་བས་དེའི་ཕྱིར་དགེ་སློང་གིས་དང་པོར་རང་གི་ལྷུང་བཟེད་དང་ཆོས་གོས་བསྐུར་བར་བྱ་ཞིང་གལ་ཏེ་ནུས་ན་ཕྱིས་དགེ་འདུན་གྱི་ལ་ཡང་འབད་པར་བྱའོ། །མཆོད་རྟེན་གྱི་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ།། སྤེད་པར་གྱུར་པ་གང་གིས་སྦས་ནས་སམ། ཁྱེར་ཏེ་ཞེ་ན་དེའི་ཕྱིར། དད་པ་ཅན་ནམ་དགེ་ཚུལ་གྱིས་སོ་ཞེས་བྱ་བ་སྨྲས་ཏེ། ཁྱིམ་པ་དད་པ་ཅན་ནམ་དགེ་ཚུལ་གྱིས་སོ། །དགེ་ཚུལ་ལ་ནི་དད་པ་མ་སྨྲས་ཀྱང་གྲུབ་བོ། །མེད་ན་རང་གིས་སོ་ཞེས་བྱ་བ་ནི། དེ་གཉིས་གཅིག་ཀྱང་མེད་ན་རང་གི་ས་སྦས་ནས་སམ་ཁྱེར་ཏེ་འགྲོ་བར་བྱའོ། །དེར་བརྐོ་བར་བྱའོ་ཞེས་བྱ་བ་ནི། སྦ་བ་དང་བསྐུར་བ་དེར་ཁྱིམ་པ་དང་དང་པ་ཅན་ནམ་དགེ་ཚུལ་གྱིས་ས་བརྐོ་བར་བྱའོ། །དེ་གཉིས་མེད་ན་རང་གིས་བྱའོ། །བསྐུར་བ་ལ་ཇི་ལྟར་བརྐོ་དགོས་ཤེ་ན། རྒྱལ་རྫས་དེ་སའི་འོག་ཏུ་སྦས་པའམ་འགའ་ཞིག་ལ་ཐོགས་པ་ཡིན་ན་དེ་ལ་ཡང་བརྐོ་དགོས་པའི་ཕྱིར་རོ། །བྲལ་ན་སྦྱིན་ནོ་ཞེས་བྱ་བ་ནི། འཇིགས་པ་དང་བྲལ་ན་རྫས་སྦས་པའམ་ཁྱེར་བ་དེ་ཉིད་དུ་སྦྱིན་པའོ། །བྲུ་བ་ཡང་དེ་དང་འདྲའོ་ཞེས་བྱ་བ་ནི། སྦ་བ་དང་བསྐུར་བའི་ཆོ་ག་ཇི་སྐད་བསྟན་པ་བཞིན་དུ་རྫས་དེ་སའི་འོག་ནས་བྲུ་ཞིང་དབྱུང་བ་ཡང་དེ་དང་འདྲ་བར་རིག་པར་བྱ་སྟེ། དད་པ་ཅན་ནམ་དགེ་ཚུལ་གྱིས་བྲུའོ། །དེ་གཉིས་མེད་ན་རང་གིས་སོ། །མི་མ་ཡིན་པའི་གནས་ན་གལ་ཏེ་དེ་དག་གི་བསོད་ནམས་ཀྱིས་བྱུང་བའི་རིན་པོ་ཆེའི་རང་བཞིན་གྱི་
ས་གཞི་དང་ཐེམ་སྐས་ལ་སོགས་པ་ལ་ནི་ཉེས་པ་མེད་དོ་ཞེས་བྱ་བ་ནི། མི་མ་ཡིན་པ་ལྷ་དང་ཀླུ་ལ་སོགས་པའི་གནས་ན་དེ་དག་གིས་འཇིག་རྟེན་འཆགས་པའི་བསོད་ནམས་ཀྱིས་བྱུང་བ་རིན་པོ་ཆེའི་རང་བཞིན་གྱི་ས་གཞི་དང་ཐེམ་སྐས་ལ་སོགས་པ་དག་ཡོད་པ་དེ་ལ་གལ་ཏེ་རེག་པ་ལ་སོགས་པ་ལ་ནི་ཉེས་པ་མེད་པའོ། །ཟན་གྱི་ཕྱིར་སྣོད་གཞན་མེད་ན་རིན་པོ་ཆེ་ལས་བྱས་པ་ཡང་ངོ་ཞེས་བྱ་བ་ནི་ཟན་གྱི་ཕྱིར་ཟངས་མ་ལས་བྱས་པ་ལ་སོགས་པའི་སྣོད་གཞན་མེད་ན་རིན་པོ་ཆེ་ལས་བྱས་པ་ཡང་ཉེས་པ་མེད་དོ། །ཡང་ངོ་ཞེས་བྱ་བའི་སྒྲ་ནི་མི་མ་ཡིན་པའི་གནས་ན་གལ་ཏེ། དེ་དག་གི་བསོད་ནམས་ཀྱིས་བྱུང་བ་རིན་པོ་ཆེའི་རང་བཞིན་ལ་ནི་ཉེས་པ་མེད་དོ་ཞེས་བྱ་བའི་རྗེས་བསྙེགས་བའི་ཕྱིར་རོ། །འདུག་པའི་ཕྱིར་གནས་པ་ལ་ཡང་ངོ་ཞེས་བྱ་བ་ནི། འདུག་པའི་ཕྱིར་རིན་པོ་ཆེའི་རང་བཞིན་གྱི་གནས་མལ་ལ་ཡང་ཉེས་པ་མེད་པའོ། །ཡང་ངོ་ཞེས་བྱ་བའི་སྒྲ་ནི་མི་མ་ཡིན་པའི་གནས་ན་ཞེས་བྱ་བ་ལ་སོགས་པ་དང༌། གཞན་མེད་ན་ཞེས་བྱ་བ་ལ་སོགས་པའི་རྗེས་བསྙེགས་པའི་ཕྱིར་རོ། །འདིར་གཞུང་ནི་དགེ་སློང་དག་ལྷ་དང་ཀླུའི་གནས་དག་ཏུ་འགྲོ་བ་ན་དེ་དག་དེར་ཟན་ལ་བོས་ནས་དེ་དག་གི་གནས་ན་གསེར་ལ་སོགས་པ་ལས་བྱས་པའི་སྣོད་དག་ཡོད་ཅིང་གཞན་དག་མེད་ན་དེ་དག་དེ་རྣམས་ལ་འགྱོད་ཅིང་མི་ཟ་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་དག་དེ་ལྟ་བས་ན་གང་ན་སྣོད་གཞན་དག་རྙེད་པ་མེད་པ་དེར་གསེར་ལ་སོགས་པ་ལས་བྱས་པའི་སྣོད་དག་ཏུ་བཟའ་བར་རྗེས་སུ་གནང་གི་འདི་ལ་འགྱོད་པར་མི་བྱའོ་ཞེས་བྱ་བའི་བར་དུ་གསུངས་པ་དང༌། དེ་བཞིན་དུ་དེ་དག་གིས་དེར་རིན་པོ་ཆེ་ལས་བྱས་པའི་ཁྲི་སྟན་དག་རྙེད་ནས་མི་འདུག་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་དག་ནི་སེམས་ཅན་དེ་དག་གི་བསོད་ནམས་ལས་བྱུང་བ་ཡིན་པས་དེ་དག་ལ་འདུག་པར་བྱའོ་ཞེས་གསུངས་པ་ཡིན་ནོ། །བཞོན་པས་འགྲོ་བར་བྱའོ་ཞེས་བྱ་བ་ནི། གླང་པོ་ཆེའི་བཞོན་པ་ལ་སོགས་པས་འགྲོ་བར་བྱའོ། །ཆོས་དང་ལྡན་པའི་དོན་གྱི་དབང་ཉིད་ཀྱིས་སོ་ཞེས་བྱ་བ་ལ། ཆོས་དང་མི་འབྲལ་བའི་དགོས་པའི་
ཆེད་ནི་ཆོས་དང་ལྡན་པའི་དོན་གྱི་དབང་ངོ༌། །དེའི་དངོས་པོ་ནི་དེ་ཉིད་དེ་དེས་སོ། །ཆོས་དང་ལྡན་པའི་དགོས་པ་བསྒྲུབ་པའི་ཆེད་ཀྱིས་བཞོན་པས་འགྲོ་བར་བྱའོ་ཞེས་བྱ་བའི་ཐ་ཚིག་གོ །དེ་ལ་ཡང་ཆ་སྒེག་དང་ལྡན་པ་ཉིད་ཀྱིས་མི་བྱའོ་ཞེས་བྱ་བ་ནི། བཞོན་པ་དེ་ལ་ཡང་གསེར་དང་རྒྱ་དར་ལ་སོགས་པ་དག་གི་ཆ་སྒེག་དང་ལྡན་པ་ཉིད་ཀྱིས་བཞོན་ཞིང་འགྲོ་བར་མི་བྱ་བའོ། །རྒས་པ་དང་ན་བ་དག་ལས་གཞན་པས་མི་བྱའོ་ཞེས་བྱ་བ་ནི། དགེ་སློང་དགོས་པ་དང་བཅས་པའི་དབང་གིས་ཀྱང་རྒས་པ་དང་ན་བ་དག་མ་གཏོགས་པ་དེ་ལས་གཞན་པས་བཞོན་པས་འགྲོ་བར་མི་བྱ་བའོ། །འདིར་གཞུང་ནི་ཚེ་དང་ལྡན་པ་པི་ལིན་དའི་བུ་ལ་གཞོན་པ་རྗེས་སུ་གནང་བ་དང་དྲུག་སྡེ་དག་བཞོན་པས་འགྲོ་བར་རྩོམ་ནས། བཅོམ་ལྡན་འདས་ཀྱིས་བཀའ་སྩལ་པ། དེས་འགྲོ་བར་མི་བྱ་སྟེ་ཉེས་དམིགས་དེ་ཉིད་ཡོད་དོ། །དེ་ལྟ་བས་ན་གཉིས་ཀྱིས་བཞོན་པས་འགྲོ་བར་བྱ་སྟེ། རྒས་པ་རྒ་བས་ཉམ་ཆུང་བ་དང༌། ནད་པ་སྦྱོར་མི་བཟོད་པས་སོ་ཞེས་གསུངས་པ་ཡིན་ནོ། །ཆོས་ཉན་དུ་གཞུག་པའི་ཕྱིར་རིན་པོ་ཆེ་ལས་བྱས་པའི་སེང་གེའི་ཁྲི་ལ་མི་རྟག་པས་ཉེ་བར་འགྱུར་བའི་ཡིད་ལ་བྱེད་པས་འདུག་པར་བྱའོ་ཞེས་བྱ་བ་ནི་འདི་ལ་འདུག་སྟེ། ཉན་པ་པོ་རྣམས་ལ་ཆོས་བསྒྲགས་པར་བྱའོ་སྙམ་པའི་དོན་གྱི་ཕྱིར་རིན་པོ་ཆེ་ལས་བྱས་པའི་སེང་གེའི་ཁྲི་ལ་འདི་ནི་དེ་འུ་རེ་མི་རྟག་པས་ཉེན་པར་འགྱུར་བ་ཡིན་ན་སྙམ་པའི་ཡིད་ལ་བྱེད་པས་འདུག་པར་བྱའོ། །འདིར་གཞུང་ནི་དེ་ནས་ཁྱིམ་བདག་མགོན་མེད་ཟས་སྦྱིན་གྱིས་ཐོས་ནས་རིན་པོ་ཆེ་སྣ་བཞི་ལས་བྱས་པའི་སེང་གེའི་ཁྲི་བཤམས་པ་དག །དགེ་སློང་དག་དེ་ལ་མི་འཁོད་ནས། བཅོམ་ལྡན་འདས་གྱིས་བཀའ་སྩལ་པ། འདུ་བྱེད་ཐམས་ཅད་མི་རྟག་གོ་ཞེས་བྱ་བ་སྟེ་དེ་ལ་འདུག་ནས་ཆོས་བཤང་པར་བྱའོ་ཞེས་གསུངས་པ་ཡིན་ནོ། །ཁྱིམ་དུ་དེས་བཤམས་པ་ན་གསེར་དང་དངུལ་གྱིས་སྤྲས་པ་དྲིལ་བུ་གཡེར་ཀས་གཤིབས་པའི་གོས་དག་ལ་ཁྱིམ་པའི་ཡིན་ནོ་སྙམ་དུ་ཤེས་པར་བྱས་ནས་ཀྱང་ངོ་ཞེས་བྱ་བ་ལ། ཁྱིམ་དུ་ཞེས་བྱ་བ་ནི་ཁྱིམ་གཞན་དུའོ། །དེས་བཤམས་པ་ན་
ཞེས་བྱ་བ་ནི། ཁྱིམ་པས་བཤམས་པ་ནའོ། །གསེར་དང་དངུལ་གྱིས་སྤྲས་པ་ཞེས་བྱ་བ་ནི། དེ་དག་གིས་བརྒྱན་པའོ། །དྲིལ་བུ་གཡེར་ཀས་གཤིབས་པ་ཞེས་བྱ་བ་ནི། དྲིལ་བུ་ཆུང་དུ་དག་གིས་གཡོགས་པའོ། །གོས་དག་ལ་ཞེས་བྱ་བ་ནི། དེ་ལྟར་གསེར་དང་དངུལ་གྱིས་སྤྲས་པ་དྲིལ་བུ་གཡེར་ཀས་གཤིབས་པའི་གོས་དེ་དག་ལའོ། །ཁྱིམ་པའི་ཡིན་ནོ་སྙམ་དུ་ཤེས་པར་བྱས་ནས་ཞེས་བྱ་བ་ནི། གོས་དེ་དག་ནི་ཁྱིམ་པའི་ཡིན་ནོ་སྙམ་དུ་ཤེས་པར་བྱས་ནས་སོ། །ཀྱང་ངོ་ཞེས་བྱ་བའི་སྒྲས་ནི་མི་རྟག་པས་ཉེན་པར་འགྱུར་བའི་ཡིད་ལ་བྱེད་པས་འདུག་པར་བྱའོ་ཞེས་བྱ་བའི་རྗེས་བསྙེགས་པའི་ཕྱིར་རོ། །འདིར་གཞུང་ནི་བྲམ་ཟེ་དང་ཁྱིམ་བདག་དད་པ་ཅན་དག་གིས་དགེ་སློང་རྣམས་ཀྱི་ཕྱིར་ཁྱིམ་གྱི་ནང་དུ་གསེར་དང་དངུལ་གྱིས་སྤྲས་པ་གསེར་གྱི་དྲིལ་བུ་གཡེར་ཀས་གཤིབས་པའི་གོས་དག་བཤམས་པ་དང༌། དགེ་སློང་དག་དེ་ལ་མི་འཁོད་ནས། བཅོམ་ལྡན་འདས་ཀྱིས་བཀའ་སྩལ་པ། འདུ་བྱེད་ཐམས་ཅད་མི་རྟག་གོ་ཞེས་བྱ་བ་སྟེ། སྦྱིན་པ་པོ་རྣམས་ཀྱིས་སྦྱིན་པར་བྱ་བའི་ཆོས་དག་ལ་ཡོངས་སུ་ལོངས་སྤྱད་པར་བྱའོ་ཞེས་གསུངས་པ་ཡིན་ནོ། །དེ་ལ་ནོར་བུས་སྤྲས་པ་གསེར་དང་དངུལ་གྱིས་བརྒྱན་པ་དག་ལ་ཡང་ངོ་ཞེས་བྱ་བ་ནི། སེང་གེའི་ཁྲི་དེ་ལ་ནོར་བུས་སྤྲས་པ་གསེར་དང་དངུལ་གྱིས་བརྒྱན་པའི་གོས་དག་ལ་འདུག་པར་བྱའོ། །ཡང་ངོ་ཞེས་བྱ་བའི་སྒྲ་ནི་མི་རྟག་པས་ཉེན་པར་འགྱུར་བའི་ཡིད་ལ་བྱེད་པས་འདུག་པར་བྱའོ་ཞེས་བྱ་བའི་རྗེས་བསྙེགས་པའི་ཕྱིར་རོ། །འདི་ལྟར་སེང་གེའི་ཁྲི་རྣམས་སྔར་བསྟན་པ་འདི་དག་ཐམས་ཅད་འདུས་པ་ཡིན་མོད་ཀྱི། འོན་ཀྱང་གཞུང་ལས་དངོས་སུ་གསུངས་པའི་ཚིག་ཡོད་པས་མདོ་འདི་ལོགས་ཤིག་ཏུ་བྱས་སོ། །དེ་དག་བྲུབ་པར་བྱའོ་ཞེས་བྱ་བ་ནི། སེང་གེའི་ཁྲི་ལ་གོས་རྣམ་པ་དེ་ལྟ་བུ་བཤམས་པ་དེ་དག་དགེ་སློང་དག་གིས་བྲུབ་པར་བྱའོ། །ཁྱིམ་པ་དང་དགེ་ཚུལ་མེད་ན་སངས་རྒྱས་ཀྱི་སྐུ་གཟུགས་ལ་སྟོན་པའི་འདུ་ཤེས་ཉེ་བར་གཞག་པ་རྣམས་ཀྱིས་ཆོས་དང་ལྡན་པའི་དོན་གྱི་དབང་ཉིད་ཀྱིས་རེག་པ་ལ་མི་རུང་བ་ཉིད་མེད་དོ་ཞེས་བྱ་བ་ནི། ཁྱིམ་པ་དང་
དགེ་ཚུལ་མེད་ན་དགེ་སློང་དག་གིས་སངས་རྒྱས་ཀྱི་སྐུ་གཟུགས་ལ་སྟོན་པའི་འདུ་ཤེས་ཉེ་བར་བཞག་པ་དེ་དག་གིས་སངས་རྒྱས་ཀྱི་སྐུ་གཟུགས་རིན་པོ་ཆེ་ལས་བྱས་པ་ལ་ཆོས་དང་ལྡན་པའི་དོན་གྱི་དབང་གིས་རེག་པ་ལ་མི་རུང་བ་ཉིད་མེད་པའོ། །མཆོད་པའི་དོན་གྱི་དབང་ཉིད་དུ་ནི་གཉི་ག་ཡོད་ན་ཡང༌། རེག་པ་ལ་ཉེས་པ་མེད་དོ། །དེའི་རྫས་ལ་ཡང་ངོ་ཞེས་བྱ་བ་ནི། སངས་རྒྱས་ཀྱི་སྐུ་གཟུགས་དེའི་རྫས་རྒྱན་ལ་སོགས་པ་ལ་ཡང་དེ་གཉིས་མེད་ན་རེག་པ་ལ་མི་རུང་བ་ཉིད་མེད་པའོ། །མཆོད་པའི་དོན་གྱི་དབང་ཉིད་དུ་ནི་དེ་གཉིས་ཡོད་ན་ཡང་རེག་པ་ལ་མི་རུང་བ་ཉིད་མེད་དོ། །རྒྱན་གདགས་པ་བསྟེན་པར་མི་བྱའོ་ཞེས་བྱ་བ་ནི། གདུ་བུ་རྒྱན་ཅན་ལ་སོགས་པའི་རྒྱན་གདགས་པ་བསྟེན་པར་མི་བྱ་བའོ། །འདིར་གཞུང་ནི་དེ་ལྟ་བས་ན་དགེ་སློང་གིས་ལག་རྒྱན་དང་རྐང་རྒྱན་གདགས་པར་མི་བྱའོ། །འདོགས་ན་འགལ་ཚབས་ཅན་དུ་འགྱུར་རོ། །དེ་བཞིན་དུ་ཚོན་སྣ་ལྔའི་སྔགས་སྐུད་གདགས་པར་མི་བྱའོ། །འདོགས་ན་འགལ་ཚབས་ཅན་དུ་འགྱུར་རོ་ཞེས་བྱ་བའི་བར་དུ་གསུངས་པ་ཡིན་ནོ། །གསོ་བའི་དོན་དུ་ནི་ཉེས་པ་མེད་དོ། །རྒྱ་བཅང་བར་བྱའོ་ཞེས་བྱ་བ་ནི། སྔར་སྤྱིར་བཏང་བ་བྱས་པའི་དམིགས་ཀྱིས་བསལ་བ་ཡིན་ནོ། །རྒྱན་རྣམ་པ་ཇི་ལྟ་བུ་ཞིག་ཅེ་ན་དེའི་ཕྱིར། གདགས་སུ་མི་རུང་བའོ་ཞེས་བྱ་བ་སྨྲས་ཏེ། རྒྱན་དུ་གདགས་པར་མི་རུང་བ་ཉིད་གང་ཡིན་པ་རྣམ་པ་དེ་ལྟ་བུའི་རྒྱ་བཅང་བར་བྱའོ། །ཅི་ཞིག་ལས་བྱས་པ་ཞེ་ན། དེའི་ཕྱིར་རོ་ཉེའམ་ཟངས་སམ་ར་གན་ནམ་ཁར་བའམ་རྒྱ་སྐྱེགས་ཀྱི་ཚིགས་མའམ་ཤིང་ངམ་རྔོའམ་སའམ་བ་སོའམ་རྭ་དག་ལས་བྱས་པའོ་ཞེས་བྱ་བ་སྨྲས་ཏེ། དེ་དག་གང་ཡང་རུང་བ་ལས་བྱས་པའོ། །འདིར་གཞུང་ནི་གཞུང་གཅིག་ལས་དགེ་སློང་གིས་གསེར་ལ་སོགས་པ་ལས་བྱས་པའི་རྒྱ་བཅང་བར་མི་བྱའོ། །སོར་གདུབ་རྒྱ་ཡང་བཅང་བར་མི་བྱའོ། །འདི་ལྟར་རྒྱ་ནི་རྣམ་པ་ལྔ་སྟེ། ར་གན་ལས་བྱས་པ་དང་ཟངས་ལས་བྱས་པ་དང༌། ཁར་བ་ལས་བྱས་པ་དང༌། བ་སོ་ལས་བྱས་པ་དང༌། རྭ་ལས་བྱས་པའོ་ཞེས་གསུངས་
པ་དང༌། གཞུང་ཁ་ཅིག་ལས་འདི་ལྟར་རྒྱ་རྣམ་པ་བརྒྱད་པོ་རོ་ཉི་དང་ཟངས་མ་དང་ར་གན་དང་ཁར་བ་དང་རྒྱ་སྐྱེགས་ཀྱི་ཚིགས་མ་དང༌། ཤིང་དང་རྡོ་དང་ས་ལས་བྱས་པ་བཅང་བར་བྱའོ་ཞེས་གསུངས་པ་ཡིན་ནོ། །དེ་ཡང་རིན་པོ་ཆེ་ལས་གཞན་པའི་རྫས་ཀྱི་དཔེ་ཡིན་ནོ། །རྟགས་ནི་དགེ་འདུན་གྱི་ལ་ནི་དབུས་སུ་འཁོར་ལོ་ངོས་གཉིས་སུ་རི་དགས་སོ། །འོག་ཏུ་གཙུག་ལག་ཁང་གི་བདག་པོའི་མིང་བྲིའོ་ཞེས་བྱ་བ་ནི། དགེ་བདུན་གྱི་རྒྱ་ལ་ནི་རྟགས་འདི་ལྟ་བུ་བྱ་སྟེ་དབུས་སུ་འཁོར་ལོ་བྲིས་ནས་ངོས་གཉིས་སུ་རི་དགས་གཉིས་བྲི་བར་བྱ་ཞིང༌། འཁོར་ལོའི་འོག་ཏུ་གཙུག་ལག་ཁང་གི་བདག་པོའི་མིང་བྲི་བར་བྱའོ། །གང་ཟག་གི་ལ་ནི་རུས་པའི་ཀེང་རུས་སམ་མགོ་པོའི་ཐོད་པའོ་ཞེས་བྱ་བ་ནི། གང་ཟག་གི་རྒྱ་ལ་ནི་རུས་པའི་ཀེང་རུས་སམ་མགོ་བོའི་ཐོད་པར་བྲི་བར་བྱའོ། །སོ་མངས་ཀྱིས་སྐྲ་བཤད་པར་མི་བྱའོ་ཞེས་བྱ་བ་ནི། སོ་མངས་ཀྱིས་སྐྲ་བཤད་པར་མི་བྱ་བ་སྟེ། དེ་ལ་སོགས་པ་ནི་ལོངས་པའི་དངོས་པོ་ཡིན་པའི་ཕྱིར་ཐམས་ཅད་དུ་སྤྱར་བར་བྱའོ། །དེ་ནི་དཔེའོ་ཞེས་བྱ་བ་ནི། སོ་མངས་ཞེས་བྱ་བ་འདི་ནི་བཤད་སྤྱད་དུ་གྱུར་པའི་རྫས་གཞན་གྱི་དཔེ་ཡིན་ཏེ། སྐྲ་བཤད་པའི་སྤྱད་གཞན་གྱིས་ཀྱང་སྐྲ་བཤད་པར་མི་བྱའོ། །མེ་ལོང་གིས་བཞིན་ལྟ་བར་མི་བྱའོ་ཞེས་བྱ་བ་ནི། མེ་ལོང་གིས་བཞིན་བལྟ་བར་མི་བྱའོ། །ཆུ་ཡན་ཆད་ཀྱིས་སོ་ཞེས་བྱ་བ་ནི། ཐ་ན་ཆུ་ཡན་ཆད་ཀྱིས་ཀྱང་སྟེ། ཆུ་ཡན་ཆད་ནས་མར་དང་འབྲུ་མར་ལ་སོགས་པ་རྫས་གཞན་གྱི་བར་མན་ཆད་ཀྱིས་ཀྱང་བཞིན་བལྟ་བར་མི་བྱའོ། །ཆུ་བརྟག་པའི་ཆེད་ཉིད་དང་གཉེར་མ་དང་རྨ་དང་སྐྲ་དཀར་ལྟ་བ་དང༌། སྔ་ཕྱིའི་མཆན་མ་བཟུང་བ་ལ་ནི་ལྟུང་བ་མེད་དོ་ཞེས་བྱ་བ་ནི། ཆུ་བརྟག་པའི་ཆེད་ཉིད་དང་རྨ་དང་གཉེར་མ་དང་སྐྲ་དཀར་ལྟ་བ་དང་ལུས་ཀྱི་གནས་སྐབས་སྔ་ཕྱིའི་མཚན་མ་གཟུང་བའི་ཕྱིར་ལྟ་བ་ལ་ནི་ལྟུང་བ་མེད་དོ། །དཔྲལ་རིས་གསུམ་བསྟེན་པར་མི་བྱའོ་ཞེས་བྱ་བ་ནི། དཔྲལ་བར་ས་དཀར་གྱིས་རི་མོ་གསུམ་མི་བྱ་བའོ། །འདིར་གཞུང་ནི་དྲུག་སྡེ་དག་ས་དཀར་གྱིས་དཔྲལ་རིས་གསུམ་དུ་བྱས་ཏེ། བསོད་སྙོམས་ལ་ཞུགས་པ་ནས། བཅོམ་ལྡན་འདས་ཀྱིས་བཀའ་སྩལ་པ། དགེ་སློང་གིས་དཔྲལ་
རིས་གསུམ་མི་བྱའོ་ཞེས་བྱ་བའི་བར་དུ་གསུངས་པ་ཡིན་ནོ། །གི་ཝང་གིས་བསྐུ་བ་བསྟེན་པར་མི་བྱའོ་ཞེས་བྱ་བ་ནི། དེས་ཀྱང་བསྐུ་བར་མི་བྱའོ། །དྲི་དག་གིས་ཀྱང་མི་བྱའོ་ཞེས་བྱ་བ་ཡང༌། བསྐུ་བར་མི་བྱའོ་ཞེས་བྱ་བར་སྦྱར་རོ། །གསོ་བའི་ཆེད་ཉིད་དུ་ནི་མ་གཏོགས་སོ། །བསོད་ནམས་འདོད་པས་རྐང་པ་གཉིས་ལ་ལུས་བསྐུ་བའི་དྲིས་སྐུད་པ་བསྟེན་པར་བྱའོ་ཞེས་བྱ་བ་ནི། སྦྱིན་བདག་བསོད་ནམས་འདོད་པས་དགེ་སློང་རྣམས་ཀྱི་རྐང་པ་གཉིས་ལ་ལུས་བསྐུ་བའི་དྲིས་སྐུད་པ་བསྟེན་པར་བྱའོ། །ལུས་བསྐུ་བའི་དྲི་ཞེས་བྱ་བ་ནི། ལུས་ལ་བསྐུ་བར་བྱ་བའི་དྲི་གང་ཡིན་པའོ། །དེ་བསྟེན་པར་བྱའོ་ཞེས་བྱ་བ་ནི། བདག་གིར་བྱ་བའོ། །འདིར་གཞུང་ནི་དད་པ་ཅན་དག་གིས་དགེ་སློང་དག་ཁྱིམ་གཞན་དུ་མགྲོན་དུ་བོས་ཏེ་ཟན་སྦྱིན་པ་ན་དེ་དག་དེ་དག་གི་རྐང་པ་དག་ལ་ལུས་བསྐུ་བའི་དྲི་འབུལ་བར་བྱེད་ནས་དགེ་སློང་དག་མི་ལེན་པ་ནས་བཅོམ་ལྡན་འདས་ཀྱིས་བཀའ་སྩལ་པ། རྐང་པ་དག་གིས་དྲི་བདག་གིར་བྱའོ་ཞེས་གསུངས་པ་ཡིན་ནོ། །དེ་དེའི་མདུན་དུ་དོར་བར་མི་བྱའོ་ཞེས་བྱ་བ་ནི། སྦྱིན་བདག་བསོད་ནམས་འདོད་པས་དེའི་མདུན་དུ་དྲི་དེ་དོར་བར་མི་བྱའོ། །འདིར་གཞུང་ནི་དགེ་སློང་དག་གིས་བླངས་ནས་དེ་དག་ཉིད་ཀྱི་མདུན་དུ་དོར་བར་བྱེད་པ་དང༌། བཅོམ་ལྡན་འདས་ཀྱིས་བཀའ་སྩལ་པ། དེ་དག་ཉིད་ཀྱི་མདུན་དུ་དོར་བར་མི་བྱའོ་ཞེས་གསུངས་པ་ཡིན་ནོ། །ད་ནི་བསྐུ་བར་གཏོགས་པའི་ཆོ་ག་བརྗོད་པར་བྱ་སྟེ། དེ་དག་གིས་བསྐུས་པ་དགེ་འདུན་གྱི་ནང་དུ་འདུ་བར་མི་བྱའོ་ཞེས་བྱ་བ་ནི། དགེ་སློང་དྲི་དེ་དག་གིས་བསྐུས་པ་དགེ་འདུན་ཚོགས་པའི་ནང་དུ་འདུ་བར་མི་བྱའོ། །ཁྱིམ་པ་དག་ལ་ཆོས་བསྟན་པར་མི་བྱའོ་ཞེས་བྱ་བ་ནི། དགེ་སློང་དྲི་དེ་དག་གིས་བསྐུས་པས་ཁྱིམ་པའི་ནང་དུ་སོང་སྟེ། དེ་དག་ལ་ཆོས་བསྟན་པར་མི་བྱའོ། །ཁྱིམ་དག་ཏུ་འགྲོ་བར་མི་བྱའོ་ཞེས་བྱ་བ་ནི། དགེ་སློང་དྲི་དག་གིས་བསྐུས་པ་བསོད་སྙོམས་ལ་སོགས་པ་ལ་ཁྱིམ་དག་ཏུ་འགྲོ་བར་མི་བྱའོ། །མཇུག་ཏུ་ཁྲུས་བྱའོ་ཞེས་བྱ་བ་ནི། བསྐུ་བའི་ལས་ཟིན་པའི་མཇུག་ཏུ་ཁྲུས་
བྱའོ། །འདིར་གཞུང་ནི་དགེ་སློང་དྲི་འཆང་བས་དྲི་ཡོད་བཞིན་དུ་དགེ་འདུན་གྱི་ནང་དུ་འདུ་བར་མི་བྱའོ། །བྲམ་ཟེ་དང་ཁྱིམ་བདག་འོངས་ཤིང་ལྷགས་བ་རྣམས་ལ་ཆོས་བསྟན་པར་མི་བྱའོ། །བྲ་མ་ཟེ་དང་ཁྱིམ་བདག་གི་ཁྱིམ་དག་ཏུ་འགྲོ་བར་མི་བྱའོ། །གང་གི་ཚེ་སོས་པར་གྱུར་པ་དེའི་ཚེ་ན་ཁྲུས་བྱས་ཏེ། དྲི་བསལ་ནས་དགེ་འདུན་གྱི་ནང་དུ་འཇུག་པར་བྱའོ་ཞེས་གསུངས་པ་ཡིན་ནོ། །དེ་དག་བླང་བར་བྱའོ་ཞེས་བྱ་བ་ནི། དྲི་དེ་དག་བླང་བར་བྱའོ། །ཕྲེང་བའི་རྒྱུ་དག་ཀྱང་ངོ་ཞེས་བྱ་བ་ཡང་བླང་བར་བྱའོ། །མཆོད་རྟེན་ལ་དབུལ་བར་བྱའོ་ཞེས་བྱ་བ་ནི་དྲི་དང་ཕྲེང་བའི་རྒྱུ་བླངས་པ་དེ་དག་མ་ཆོད་རྟེན་ལ་དབུལ་བར་བྱ་བའོ། །སུའི་མཆོད་རྟེན་ལ་ཞེ་ན་དེའི་ཕྱིར། ཉན་ཐོས་ཀྱི་ལ་ཡང་ངོ་ཞེས་བྱ་བ་སྨྲས་ཏེ། ཡང་ངོ་ཞེས་བྱ་བའི་སྒྲ་ལས་སངས་རྒྱས་ཀྱི་འབའ་ཞིག་ལ་འབུལ་བར་མ་ཟད་གྱི་ཞེས་བྱ་བར་ཤེས་སོ། །སྦྱིན་པར་བྱེད་པར་མངོན་པར་མ་དད་ན་མགོ་ལོགས་སམ་རྐང་པ་ལོགས་སུ་བྱའོ་ཞེས་བྱ་བ་ནི། དྲི་དང་ཕྲེང་བ་རྒྱུ་དེ་དག་མཆོད་རྟེན་ལ་དབུལ་བར་སྦྱིན་པར་བྱེད་པ་མངོན་པར་མ་དད་ན་རང་གི་མགོ་ལོགས་གྱི་སྡས་སམ་རྐང་པ་ལོགས་གྱི་རྟེན་མར་བཞག་པར་བྱའོ། །ཇི་ལྟར་ཞེ་ན་དེའི་ཕྱིར། སྒོའི་བྱང་ཐད་མ་ཡིན་པར་རོ་ཞེས་བྱ་བ་སྨྲ་སྟེ། སྒོའི་བྱང་ཐད་མ་གཏོགས་པར་རོ། །གཞི་གང་ལ་དེ་ཉིད་བཞག་པར་བྱ་ཞེ་ན། དེའི་ཕྱིར། རྩིག་པ་ལའོ་ཞེས་བྱ་བ་སྨྲས་ཏེ། རྩིག་པའི་ངོས་སུའོ། །དྲི་ལས་དམིགས་གྱིས་བསལ་བར་གྱུར་བ་ཕྲེང་བ་རྒྱུའི་ཆོ་ག་གཞན་བརྗོད་པར་བྱ་སྟེ། དེར་ཁབ་བམ་ཚེར་མ་བཙུགས་པ་ལ་ཕྲེང་བ་རྒྱུ་དག་བཅང་བར་བྱའོ་ཞེས་བྱ་བ་ནི། རྩིག་ངོས་བརྟན་པ་ངེར་ཁབ་བམ་ཚེར་མ་བཙུགས་པ་ལ་ཕྲེང་བ་རྒྱུ་དེ་དག་བཅང་བར་བྱའོ། །མིག་ལ་ཕན་པའི་དྲི་ཞིམ་པོ་དུས་དུས་སུ་བསྣམ་བར་བྱའོ་ཞེས་བྱ་བ་ནི། མིག་ལ་ཕན་པ་མིག་སྨན་ག་ཕུར་དང་ཨུཏྤ་ལ་སྔོན་པོ་ལ་སོགས་པ་དྲི་ཞིམ་པོ་དག་དུས་དུས་སུ་སྣར་བསྣམ་པར་བྱ་བ་སྟེ། རྟག་ཏུ་ནི་མ་ཡིན་ནོ། །བྲམ་ཟེའི་སྲད་བུ་ཐོགས་པ་བསྟེན་པར་མི་བྱའོ་ཞེས་བྱ་བ་ནི། བྲམ་ཟའི་སྲད་བུ་ཞེས་བྱ་བ་མཆོད་སྦྱིན་དག་བྱེད་སྲད་བུའི་སེ་རལ་ཕྲེང་ཐག་ཐོགས་པ་བསྟེན་པར་མི་བྱ་བའོ།།
སྔགས་སྐུད་ཀྱང་ངོ་ཞེས་བྱ་བ་ཡང༌། སྔགས་སྐུད་ཐོགས་པ་ཡང་བསྟེན་པར་མི་བྱའོ་ཞེས་བྱ་བར་སྦྱར་རོ། །ནད་པ་ནི་མ་གཏོགས་སོ་ཞེས་གསུངས་པས་དེའི་ཕྱིར་གནས་གར་གདགས་པའི་བྱེ་བྲག་བསྟན་པའི་ཕྱིར། གསོ་བའི་ཕྱིར་ནི་དཔུང་བ་གཡོན་པར་རོ་ཞེས་བྱ་བ་སྨྲས་ཏེ། གསོ་བའི་ཕྱིར་ནི་ཚོན་སྣ་ལྔའི་སྔགས་སྐུད་ཐོགས་པ་ཡང་བསྟེན་པར་བྱའོ། །ལག་པ་གཡོན་པའི་གྲུ་མོའི་གོང་གི་དཔུང་པར་གདགས་པར་བྱའོ། །གར་བབ་བབ་ཏུ་མི་དོར་རོ་ཞེས་བྱ་བ་ནི། སོས་པར་གྱུར་ན་སྔགས་སྐུད་དེ་གར་བབ་བབ་ཏུ་དོར་བར་མི་བྱའོ།། གལ་ཏེ་ལྷག་མ་དང་བཅས་པར་གྱུར་ན་ཆོས་གོས་ཀྱི་མཐའ་མའམ་སྐ་རགས་ལ་གདགས་སོ་ཞེས་བྱ་བ་ནི། གལ་ཏེ་ནད་ཀྱི་ལྷག་མ་དང་བཅས་པར་གྱུར་ན་སྔགས་སྐུད་དེ་ཆོས་གོས་ཀྱི་གྲྭའམ་སྐ་རགས་ལ་གདགས་པར་བྱའོ། །གལ་ཏེ་མ་གྱུར་ན་ཀ་བའམ་རྩིག་པའི་གསེབ་ཏུ་གཞུག་གོ་ཞེས་བྱ་བ་ནི། གལ་ཏེ་ནད་ཀྱི་ལྷག་མ་དང་བཅས་པར་མ་གྱུར་ན་སྔགས་སྐུད་དེ་ཀ་བའི་གསེབ་བམ་རྩིག་པའི་གསེབ་ཏུ་གཞུག་པར་བྱའོ། །གར་དང་གླུ་དང་རོལ་མོ་ཀུན་དུ་སྤྱད་པར་མི་བྱའོ་ཞེས་བྱ་བ་ལ། གར་ནི་བྲོ་གར་རོ། །གླུ་ནི་གླུ་དབྱངས་སོ། །རོལ་མོ་ནི་ཕེག་རྡོབ་ལ་སོགས་པ་སྟེ། དེ་དག་ཀུན་དུ་སྤྱད་པར་མི་བྱ་བའོ། །བསླབ་པར་མི་བྱའོ་ཞེས་བྱ་བ་ནི། གར་ལ་སོགས་པའོ། །བཟླས་པར་མི་བྱའོ་ཞེས་བྱ་བ་ནི། གར་ལ་སོགས་པ་ལུས་ཀྱིས་བཟླས་པར་མི་བྱའོ། །བལྟ་བའི་ཕྱིར་འགྲོ་བར་མི་བྱའོ་ཞེས་བྱ་བ་ནི། གར་ལ་སོགས་པ་ལའོ། །དགེ་སློང་མ་ཀུན་དུ་གར་བྱེད་དུ་མི་གཞུག་གོ་ཞེས་བྱ་བ་ནི། དགེ་སློང་མ་དང་ལྷན་ཅིག་ཀུན་དུ་གར་བྱེད་དུ་མི་གཞུག་པ་སྟེ། ཀུན་དུ་གར་བྱེད་པ་ཞེས་བྱ་བ་ནི། ཚོམ་བུ་ཚོམ་བུར་བྲོ་གར་བྱེད་པ་སྟེ། ཚོམ་པར་བྱེད་ཅེས་བྱ་བའི་ཐ་ཚིག་གོ །སྟོན་པའི་ཡོན་ཏན་ཡང་དག་པར་བསྒྲགས་པ་དང་རྒྱུན་ཆགས་གསུམ་པ་གདོན་པ་ལ་དབྱངས་ཀྱི་ང་རོ་བྱའོ་ཞེས་བྱ་བ་ནི། སྟོན་པ་སངས་རྒྱས་བཅོམ་ལྡན་འདས་ཀྱི་ཡོན་ཏན་ཡང་དག་པར་བསྒྲག་པ་སྟོད་རབས་གདོན་པ་དང་རྒྱུན་ཆགས་གསུམ་གདོན་པ་ལ་ནི་དབྱངས་ཀྱི་ང་རོས་གཏང་རག་
བྱའོ། །གཞན་གྱི་དུས་སུ་ནི་མི་བྱ་སྟེ། གླུ་རྒྱང་གི་ཁོངས་སུ་གཏོགས་པའི་ཕྱིར་རོ། །དེ་དག་དབེན་པའི་ཕྱོགས་སུ་བསླབ་པར་བྱའོ་ཞེས་བྱ་བ་ནི། དབྱངས་ཀྱི་ང་རོ་དེ་དག་དབེན་པའི་ཕྱོགས་སུ་བསླབ་པར་བྱའོ། །ཐོ་འཚམས་པ་དད་ཀུན་དུ་རྩེ་བ་དང་ཀུན་དུ་ཅ་ཅོ་འདོན་པ་དང་རྒོད་པ་དང་དྲེགས་པ་དང་ལུས་ལ་བརྡེག་པ་དག་མི་བྱའོ་ཞེས་བྱ་བ་ལ། ཐོ་འཚམས་པ་ཞེས་བྱ་བ་ནི་གཞན་ལ་ཅོ་འདྲི་བའོ། །ཀུན་དུ་རྩེ་བ་ཞེས་བྱ་བ་ནི་འཇོ་སྒེག་བྱེད་པའོ། །ཀུན་དུ་ཅ་ཅོ་འདོན་པ་ཞེས་བྱ་བ་ནི་སྒྲ་སྐད་ཆེན་པོ་ཉིད་འབྱིན་པའོ། །རྒོད་པ་ཞེས་བྱ་བ་ནི་ལག་པ་དང་རྐང་པ་ལ་སོགས་པ་རྐྱོང་བའོ། །དྲེགས་པ་ཞེས་བྱ་བ་ནི་ངལ་བར་བྱེད་པའོ། །ལུས་ལ་བརྡེག་པ་ཞེས་བྱ་བ་ནི། ཕན་ཚུན་བཞད་གད་བྱ་བར་སྣུན་པ་སྟེ་དེ་དག་མི་བྱའོ། །རྒོད་པའི་བསམ་པས་ལུས་དང་ངག་གི་རྣམ་པར་འགྱུར་བ་མི་བྱའོ་ཞེས་བྱ་བ་ནི། རྒོད་པའི་བསམ་པས་ལུས་དང་ངག་གི་རྣམ་པར་འགྱུར་བ་མི་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཀོ་ལྤགས་ཀྱི་གཞི་ལས། ལག་འགྲོས་མཁན་རབ་ཏུ་བྱུང་བ་ཞིག་རྐང་ཁུས་སར་རྐང་པ་གཉིས་བཀྲུས་ནས་ཁ་ཆུས་བཀང་སྟེ་རྨ་བྱའི་འགྲོས་ཀྱིས་འདུག་པ་དང༌། དྲུག་སྡེ་དག་གིས་ཁས་གླུ་བླངས་པས་རོལ་མོའི་གླུ་བརྩམས་པའི་སྐབས་དེ་དགེ་སློང་དག་གིས་བཅོམ་ལྡན་འདས་ལ་གསོལ་བ་ནས། སངས་རྒྱས་བཅོམ་ལྡན་འདས་ཀྱིས་དགེ་སློང་དེ་ལ་དགེ་སློང་ཁྱོད་ཀྱི་བསམ་པ་ཇི་ལྟ་བུས་དེ་ལྟར་བྱས་ཞེས་སྨྲས་པ་དང༌། བཙུན་པ་གནས་མལ་བསྐྱབ་པའི་དོན་དུ་ཅུང་ཟད་དང་རྒོད་པའི་བསམ་པ་ཅུང་ཟད་ཀྱིས་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། གནས་མལ་བསྐྱབ་པའི་བསམ་པ་གང་ཡིན་པ་དེ་ལ་ནི་ལྟུང་བ་མེད་དོ། །རྒོད་པའི་བསམ་པས་བྱས་པ་ལ་ནི་ཉེས་བྱས་སོ། །དྲུག་སྡེ་དག་གིས་ཀྱང་གསོལ་པ། བཙུན་པ་སྨད་པའི་བསམ་བ་ཅུང་ཟད་དག་དང༌། རྒོད་པའི་བསམ་པ་ཅུང་ཟད་ཀྱིས་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། སྨད་པའི་བསམ་པ་དག་གང་ཡིན་པ་དེ་ལ་ནི་ལྟུང་བ་མེད་དོ། །རྒོད་པའི་བསམ་པས་བྱས་པ་དེ་ལ་ནི་ཉེས་བྱས་སོ་ཞེས་གསུངས་པ་ཡིན་ནོ། །འདི་ལ་ལྟུང་བ་དང་ལྟུང་བ་
མེད་པར་ཇི་ལྟར་རྣམ་པར་བཞག་སྟེ། ཅི་སེམས་རིགས་མི་མཐུན་པས་བར་དུ་ཆོད་པ་དག་ལྟུང་བ་ཐ་དད་པ་བྱེད་པ་ཉིད་ཡིན་ནམ། འོན་ཏེ་ཐམས་ཅད་གཅིག་ཏུ་བསྡུས་ནས་ལྟུང་བ་གཅིག་བྱེད་པ་ཉིད་ཡིན་ཞེ་ན། རིགས་མི་མཐུན་པས་བར་དུ་ཆོད་པ་དག་ལ་ལྟུང་བ་གཅིག་ཏུ་བསྟན་པའི་ཕྱིར། འདྲེས་པ་ནི་ཆར་བསྡམ་མོ་ཞེས་བྱ་བ་སྨྲས་ཏེ། ཉོན་མོངས་བ་ཅན་དང༌། ཉོན་མོངས་པ་ཅན་མ་ཡིན་པའི་སེམས་རྣམས་འདྲེས་ཤིང་ཕན་ཚུན་རིགས་མི་མཐུན་པས་བར་དུ་ཆོད་པ་ཉིད་ནི་ཆར་བསྡམ་པར་བྱ་སྟེ། ཉོན་མོངས་པ་ཅན་གྱི་ཆ་རྣམས་ནི་ཉོན་མོངས་པ་ཅན་དང་ལྷན་ཅིག་བསྡམ་པར་བྱ། ཉོན་མོངས་པ་ཅན་མ་ཡིན་པའི་ཆ་རྣམས་ཀྱང་ཉོན་མོངས་པ་ཅན་མ་ཡིན་པ་དང་ལྷན་ཅིག་བསྡམ་པར་བྱ་སྟེ། རྒོད་པའི་ཀུན་ནས་བསླང་བའི་སེམས་ཐམས་ཅད་ཀྱིས་འཇུག་པ་གཅིག་ཉིད་ཡིན་པའི་ཕྱིར་ལྟུང་བ་གཅིག་གི་རྒྱུ་ཉིད་ཡིན་ནོ། །དཔེར་ན་སྲོག་གཅོད་པ་ལ་སོགས་པ་དག་ལ་སྦྱོར་བའི་སེམས་རིགས་མི་མཐུན་པས་ཆོད་པ་རྣམས་ཀྱང་ལྟུང་བ་གཅིག་གི་རྒྱུ་ཉིད་ཡིན་པ་བཞིན་ཏེ། རིགས་མི་མཐུན་པས་ཆོད་པ་རྣམས་ཀྱང་སྦྱོར་བའི་རྒྱུན་མ་ཆད་པའི་ཕྱིར་རོ། །སྣོད་བརྒྱུད་པས་ཟས་ཀྱི་བྱ་བ་མི་བྱའོ་ཞེས་བྱ་བ་ནི། ཇི་ལྟར་ཆང་འཐུང་བ་དག་ཕན་ཚུན་སྐོམ་སྣོད་བརྒྱུད་པས་ཆང་འཐུང་བར་བྱེད་པ་དེ་ལྟར་མི་བྱ་བའོ། །མེ་ཏོག་རྣ་རྒྱན་བརྒྱུ་བར་མི་བྱའོ་ཞེས་བྱ་བ་ནི། མེ་ཏོག་ལ་སོགས་པ་དག་གིས་རན་རྒྱན་བརྒྱུ་བར་མི་བྱ་བ་སྟེ། དེ་ནི་བཟོ་རྗེས་སུ་བསྒྲུབ་པ་མི་བྱའོ་ཞེས་བྱ་བའི་སྤྲོས་པ་ཡིན་ནོ། །གདགས་པར་མི་བྱའོ་ཞེས་བྱ་བ་ནི། མེ་ཏོག་རྣ་རྒྱན་ལུས་ལ་གདགས་ཤིང་བཅང་བར་མི་བྱའོ་ཞེས་བྱ་བའི་ཐ་ཚིག་གོ །འདིས་ནི་ཕྲེང་བ་རྒྱུ་འདོགས་པ་ཐམས་ཅད་དགག་པ་བྱས་པ་ཡིན་ནོ། །ངོ་སོ་ལས་བྱུང་བ་སྦྱིན་པར་མི་བྱའོ་ཞེས་བྱ་བ་ལ། ངོ་སོ་ལས་བྱུང་བ་ཞེས་བྱ་བ་ནི། གར་མཁན་གྱི་ངོར་ལྟ་ལྟ་ནས་མགུ་བའི་བྱ་དགའ་སྦྱིན་པ་སྟེ་དགེ་སློང་གིས་དེ་སྦྱིན་པར་མི་བྱའོ། །མི་རིངས་པར་རྒྱུག་པར་མི་བྱའོ་ཞེས་བྱ་བ་ནི། གཏང་བ་མེད་པར་རྒྱུག་བར་མི་བྱ་བའོ། །མྱུར་བ་དང་མཆོང་བར་མི་བྱའོ་ཞེས་བྱ་བ་ལ། མྱུར་བ་ཞེས་བྱ་བ་ནི། དྲག་ཏུ་འགྲོ་བའོ། །
མཆོང་བ་ཞེས་བྱ་བ་ནི། མཆོང་ཞིང་འགྲོ་བ་སྟེ། དེ་དག་མི་བྱའོ། །བརླ་དང་ལག་པ་ཉ་ལྟར་བསྐོར་བར་མི་བྱའོ་ཞེས་བྱ་བ་ལ། བརླ་བསྐོར་བཞེས་བྱ་བ་ནི། བརླ་ཡ་གཅིག་ལ་ཕབ་སྟེ་ལུས་བསྐོར་བའོ། །ལག་པ་བསྐོར་བ་ཞེས་བྱ་བ་ནི་ལག་པ་ཕྱར་ཏེ་ལུས་ལ་བསྐོར་བའོ།། ཉ་ལྟར་བསྐོར་བ་ཞེས་བྱ་བ་ནི། ཉ་ལྟར་ཕྱིས་གན་དུ་རྒྱལ་ཞིང་བསྐོར་བ་སྟེ། དེ་ལྟར་བསྐོར་བར་མི་བྱའོ། །ཆུར་གསེག་མ་གདབ་པར་མི་བྱའོ་ཞེས་བྱ་བ་ནི། ཆུའི་ནང་ན་འཕྱོ་བའི་གསེག་མ་དག་ཆུར་འདེབས་པ་སྟེ་དེ་མི་བྱ་བའོ། །ཆུར་རྫ་རྔ་ཁ་གཅིག་པ་དང་རྔ་བོ་ཆེ་ལྟར་བརྡུང་བར་མི་བྱའོ་ཞེས་བྱ་བ་ནི། ཆུ་ལ་རྫ་རྔ་ཁ་གཅིག་པ་དང༌། རྔ་པོ་ཆེ་ལྟར་བརྡུང་ཞིང་སྒྲ་དབྱུང་བར་མི་བྱ་བའོ། །རྫ་བ་ལ་ཕྱིལ་མོ་ཉུག་པར་མི་བྱའོ་ཞེས་བྱ་བ་ནི། རྫབ་འདྲེད་པ་ལ་ཕྱིལ་མོ་ཉུག་པར་མི་བྱ་བའོ། །གླང་པོ་ཆེའི་སྐད་དང་རྟའི་སྐད་དང་ཁྱུ་མཆོག་གི་སྐད་དང་རྨ་བྱའི་སྐད་དང་ཁུ་བྱུག་གི་སྐད་མི་དབྱུང་ངོ་ཞེས་བྱ་བ་ནི། དེ་དག་གི་སྒྲ་སྐད་འདྲ་བའི་སྐད་དབྱུང་བར་མི་བྱ་བའོ། །ཁས་དུང་དང་སིལ་ཁྲོལ་དང་རྔ་བོ་ཆེའི་སྐད་མི་བྱའོ་ཞེས་བྱ་བ་ནི། ཁས་དུང་ལ་སོགས་པའི་སྐད་མི་བྱའོ། །ལོངས་པའི་གཞིར་གཏོགས་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཁྲུས་བྱེད་པའི་ལྟུང་བྱེད་སྨྲ་བར་འདོད་ནས། འོག་ནས་གཞན་གྱི་དུས་སུ་ཁྲུས་བྱེད་ནའོ་ཞེས་འབྱུང་བ་གང་ལས་གཞན་ཡིན་པའི་མཚམས་བསྟན་པའི་ཕྱིར། སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་དབྱར་རྣམས་ཀྱི་དང་པོ་ལས་སོ་ཞེས་བྱ་བ་སྨྲས་ཏེ། སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་ལས་ཞེས་བྱ་བ་ནི། དབྱར་ཟླ་ར་བ་ཚེས་ནས་དབྱར་ཟླ་ར་བ་ཉའི་བར་གྱི་ཟླ་བ་ཕྱེད་དང་དབྱར་ཟླ་ར་བ་ཉ་ནས་དབྱར་ཟླ་འབྲིང་པོ་ཉའི་བར་གྱི་ཟླ་བ་གཅིག་སྟེ། ཟླ་བ་ཕྱེད་དང་གཉིས་པོ་དེ་ལས་གཞན་པའི་དུས་སུའོ། །དབྱར་རྣམས་ཀྱི་དང་པོ་ལས་ཞེས་བྱ་བ་ནི། དབྱར་གྱི་ཟླ་བ་དང་པོ་དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་གྱི་ཟླ་བ་གཅིག་ལས་གཞན་པའི་དུས་སུའོ། །སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་དབྱར་རྣམས་ཀྱི་དང་པོ་ཟླ་བ་གཅིག་ལས་གཞན་པའི་དུས་སུ་ཁྲུས་བྱེད་ན་ཞེས་བྱ་བའི་ཐ་ཚིག་གོ །
ཟླ་བ་ཕྱེད་དང་གསུམ་པོ་དེ་དག་ལ་ནི་ཚ་བའི་གཉེན་པོའི་ཕྱིར་ཁྲུས་བྱེད་པ་རྗེས་སུ་གནང་སྟེ། དེ་ལས་གཞན་པའི་དུས་སུ་ཡང་ཉི་མ་དེ་ལ་ཚ་བ་སྐྱེས་ན་ཁྲུས་བྱའོ། །ཅི་དགེ་སློང་ཐམས་ཅད་ལ་དེར་ཁ་ན་མ་ཐོ་བར་འགྱུར་རམ་ཞེ་ན་དེའི་ཕྱིར། གོས་མེད་པའི་ཟས་གཉིས་པ་རྙེད་པའི་རྣམ་པ་གང་ཡིན་པ་ལའོ་ཞེས་བྱ་བ་སྨྲས་ཏེ། མདོ་འདི་ནི་འདྲ་བར་བསྟན་པ་ཡིན་ནོ། །ཟས་གཉིས་པ་གང་ལ་གོས་མེད་པ་དེ་ནི་གོས་མེད་པའི་ཟས་གཉིས་པ་སྟེ། གོས་མེད་པའི་ཟས་གཉིས་པ་དེ་རྙེད་པའི་དགེ་སློང་གིས་དང་དུ་བླངས་པ་དང་ཟོས་པའི་ཁ་ན་མ་ཐོ་བ་རྣམས་བ་ཇི་ལྟ་བུར་འགྱུར་བ་སྟེ། ན་བ་མ་ཡིན་པ་དང་ལས་མ་བྱས་པ་དང་ལམ་དུ་མ་ཞུགས་པ་ལ་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །ཅི་གནས་སྐབས་གཞན་ཐམས་ཅད་ལ་བབ་པ་ལ་ཡང་ཁ་ན་མ་ཐོ་བ་འདིར་འགྱུར་རམ་ཞེ་ན་དེའི་ཕྱིར། རླུང་གིས་མ་བསྐྱོད་པ་ནའོ་ཞེས་བྱ་བ་སྨྲས་ཏེ། གལ་ཏེ་རླུང་གིས་བསྐྱོད་པ་དང་གཡེངས་པར་མ་གྱུར་ནའོ། །འདིར་ཚད་ཅི་ཙམ་གྱིས་ན་བསྐྱོད་པ་ཉིད་ཡིན་པར་རིག་པར་བྱ་ཞེན། དེའི་ཕྱིར། གོས་ཀྱི་གྲྭ་འགུལ་བ་ནི་དེའི་མཐའ་ཡིན་ནོ་ཞེས་བྱ་བ་སྨྲས་ཏེ། གོས་ཀྱི་མཐའ་ཞེས་བྱ་བ་གོས་ཀྱི་ཕྱོགས་གཅིག་བསྒུལ་ཞིང་བསྐྱོད་པ་ཉིད་དེའི་མཐའ་ཡིན་ནོ། །གནས་སྐབས་དེ་དག་འབའ་ཞིག་ཏུ་ཡང་མ་ཟད་དེ། འདི་ལྟར་གཞན་དག་ལ་ཡང་བསྟན་པའི་ཕྱིར། ཆར་གྱིས་མ་ཕོག་པ་ལའོ་ཞེས་བྱ་བ་སྨྲས་ཏེ། དགེ་སློང་གང་ལ་ཆར་གྱིས་མ་ཕོག་པ་དེ་ནི་ཆར་གྱིས་མ་ཕོག་པ་སྟེ། གཞན་གྱི་དུས་སུ་ཁྲུས་བྱེད་པའོ། །ཆུས་ཕོག་པ་གང་ཡིན་པ་དེ་ནི་འདིར་ཆར་གྱིས་ཕོག་པ་ཡིན་ནོ། །ཆར་གྱིས་ཕོག་པ་འདིའི་མཐའ་གང་ཡིན་ཞེན་དེའི་ཕྱིར། དེའི་ནི་ཐིགས་པ་གཉིས་ཀྱིས་ཕོག་པའོ་ཞེས་བྱ་བ་སྨྲས་ཏེ། ཆར་གྱིས་ཕོག་པ་དེའི་མཐའ་ནི་ཐིགས་པ་གཉིས་ཀྱིས་ཕོག་པའོ། །གང་ལ་ཞེ་ན། དེའི་ཕྱིར། ལུས་ལའོ་ཞེས་བྱ་བ་སྨྲས་ཏེ། གོས་ལ་མ་ཡིན་ནོ། །འདིར་གཞུང་ནི་ཐན་ཆུའི་ཐིགས་པ་གཉིས་སམ། གསུམ་གྱིས་ལུས་ལ་ཕོག་པར་གྱུར་ན་ཞེས་གསུངས་པ་ཡིན་ནོ། །བསྒྲུབ་པའི་ཚུལ་གྱིས་ནི་འདི་སྐད་བསྟན་པ་ཡིན་ཏེ། ན་བ་དང་ལས་
བྱས་པ་དང་ལམ་དུ་ཞུགས་པ་དང་རླུང་གིས་བསྐྱོད་པ་དང༌། ཆར་གྱིས་ཕོག་པའི་དགེ་སློང་ལ་ནི་གཞན་གྱི་དུས་སུ་ཁྲུས་བྱེད་པ་ལ་ཉེས་པ་མེད་དེ་དུས་ལ་བབ་པ་ཉིད་ཡིན་པའི་ཕྱིར་རོ། །ཅི་ཞིག་རྗེས་སུ་བསྒྲུབ་ན་ཁྲུས་བྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། གཞན་གྱི་དུས་སུ་ཁྲུས་ཀྱི་ཉིན་མོ་མ་ཡིན་པ་ཞག་བཅོ་ལྔའི་མདུན་རོལ་དུ་ཁྲུས་བྱེད་ནའོ་ཞེས་བྱ་བ་སྨྲས་ཏེ། གཞན་གྱི་དུས་སུ་ཞེས་བྱ་བ་ནི། སྔར་སོ་ག་རྣམས་ཀྱི་ཟླ་བ་ལྷག་མ་ཕྱེད་དང་གཉིས་དང་དབྱར་རྣམས་ཀྱི་དང་བོ་ཟླ་བ་གཅིག་སྟེ། ཟླ་བ་ཕྱེད་དང་གསུམ་བསྟན་པ་གང་ཡིན་པ་དེ་ལས་གཞན་གྱི་དུས་སུའོ། །ཁྲུས་ཀྱི་ཉིན་མོ་མ་ཡིན་པ་ཞག་བཅོ་ལྔའི་མདུན་རོལ་དུ་ཞེས་བྱ་བ་ནི། བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་གྱིས་ཤིག་ཅེས་བཀའ་སྩལ་པ་ལས་གང་གི་ཉིན་མོ་ཁྲུས་བྱས་པར་གྱུར་པ་ནས་བརྩམས་ཏེ། ཞག་བཅུ་བཞི་ཚུན་ཆད་ཀྱི་བར་དུ་ནི་ཁྲུས་བྱར་མི་རུང་བས་དེ་ནི་ཁྲུས་ཀྱི་ཉིན་མོ་མ་ཡིན་པ་ཡང་ཡིན་ལ། ཞག་བཅོ་ལྔའི་མདུན་རོལ་ཡང་ཡིན་པས་དེར་རོ། །ཁྲུས་བྱེད་ནའོ་ཞེས་བྱ་བ་ནི། དུས་དེར་ཁྲུས་བྱེད་ན་ལྟུང་བྱེད་དོ་ཞེས་བྱ་བའི་ཐ་ཚིག་གོ །བཅོམ་ལྡན་འདས་ཀྱིས་ཟླ་བ་ཕྱེད་ཕྱེད་ཅིང་ཁྲུས་གྱིས་ཤིག་ཅེས་གསུངས་པ་ཡང་གང་གི་ཉིན་མོ་ཁྲུས་བྱས་པར་གྱུར་པ་དེ་ཉིད་ཀྱི་ཉིན་མོ་ཡང་ཁྲུས་གཞན་མི་བྱ་སྟེ་ཉི་མ་དེ་ཉིད་ཀྱང་ཉི་མ་གཅིག་ཏུ་བརྩི་ཞིང་དེ་ནས་བརྩམས་ཏེ་ཞག་བཅོ་ལྔའི་མདུན་རོལ་ཞག་བཅུ་བཞི་པ་ཚུན་ཆད་དུ་ཁྲུས་བྱེད་ན་ལྟུང་བྱེད་དུ་གསུངས་པ་ཡིན་ཏེ། དེ་ལྟར་བརྩིས་ན་བཅོམ་ལྡན་འདས་ཀྱིས་ཟླ་པ་ཕྱེད་ཕྱེད་ཅིང་ཁྲུས་གྱིས་ཤིག་ཅེས་གསུངས་པ་གང་ཡིན་པ་དེ་དང་མཐུན་པར་འགྱུར་གྱི། གལ་ཏེ་གང་གི་ཉིན་མོ་ཁྲུས་བྱས་པར་གྱུར་པ་དེའི་ཕྱིར་དེའི་ཉིན་པར་གྱི་ཉི་མ་གང་ཡིན་པ་དེ་ནས་བགྲང་བར་རྩོམ་ན་ནི་དེའི་ཚེ་ཉི་མ་བཅུ་དྲུག་པ་ལ་ཁྲུས་བྱ་བར་འགྱུར་ཏེ། བཅོ་ལྔ་པ་ལ་ཁྲུས་བྱའོ་ཞེས་གསུངས་པ་དང་འགལ་བར་འགྱུར་བས་དེའི་ཕྱིར་གང་གི་ཉིན་མོ་དགེ་སློང་ཁྲུས་བྱེད་པ་ན་ཁྲུས་ཟིན་པ་ནས་བརྩམས་ཏེ་དེ་ཉིད་ཀྱི་ཉིན་མོ་ཡང་ཁྲུས་གཞན་མི་བྱ་བ་ཡིན་པས་ཉི་མ་དེ་ཉིད་མ་གཏོགས་པར་དེ་ཕྱིན་ཆད་ཉི་མ་བཅོ་ལྔ་ནི་ཁྲུས་ཀྱི་ཉི་མ་ཡིན་པ་ཞེས་བྱ་བ་
སྟེ། དེ་དག་ཏུ་ཁྲུས་བྱེད་ན་ལྟུང་བྱེད་དུ་འགྱུར་རོ། །ཁྲུས་ཇི་ལྟར་བྱ་ཞེ་ན། དེའི་ཕྱིར། དབང་བསྐུར་བས་སམ་འཇུག་པས་སོ་ཞེས་བྱ་བ་སྨྲས་ཏེ། དབང་བསྐུར་བ་ཞེས་བྱ་བ་ནི། བུམ་པ་ལ་སོགས་པས་ལུས་ཀྱི་སྟེང་ནས་དབང་བསྐུར་བའི་ཚུལ་དུ་ཆུ་བླུགས་པ་སྟེ་དེས་བཀྲུ་བའོ། །འཇུག་པས་ཞེས་བྱ་བ་ནི། ཆུའི་ནང་དུ་ཞུགས་པ་སྟེ་དེས་བཀྲུ་བའོ། །ཆུས་ལུས་ཀྱི་ཚད་ཇི་ཙམ་དུ་ཁྱབ་ན་ཁྲུས་ཡིན་ཞེ་ན་དེའི་ཕྱིར། ལྟེ་བར་སོན་ནའོ་ཞེས་བྱ་བ་སྨྲས་ཏེ། ཆུས་ལྟེ་བར་སོན་ན་ཁྲུས་ཡིན་ནོ། །དེ་ཡང་དབང་བསྐུར་བས་སྤྱི་བོ་ནས་བརྩམས་ཏེ་ཆུས་ལྟེ་བར་སོན་པ་དང༌། འཇུག་པས་རྐང་མཐིལ་ནས་བརྩམས་ཏེ་ལྟེ་བར་སོན་པ་རྣམ་པ་གཉི་ག་ལ་ཁ་ན་མ་ཐོ་བ་རྫོགས་པར་འགྱུར་རོ། །དབང་བསྐུར་བས་མགོ་མ་གཏོགས་པ་ལག་པ་དང་རྐང་པའི་ཕྱོགས་འཁུར་བ་དང༌། དེ་བཞིན་དུ་འཇུག་པས་ཀྱང་རྐང་མཐིལ་ལས་གཞན་པ་ལག་ངར་དང་བྱིན་པ་ལ་སོགས་པའི་ཕྱོགས་འཁུར་ན་ཉེས་བྱས་སོ། །གལ་ཏེ་ལྟེ་བའི་ལྟག་ཡན་ཆད་ཉི་ཚེ་ཆུས་འཁུར་ཞིང་འོག་ཏུ་མ་སོན་པ་དང༌། འོག་མན་ཆད་ཉི་ཚེ་ཆུས་འཁུར་ཞིང་ལྟག་ཏུ་མ་སོན་པ་ཡང་ཉེས་བྱས་སོ། །གལ་ཏེ་དབང་བསྐུར་བ་དང་འཇུག་པ་གཉི་གས་དུས་གཅིག་ཏུ་ཁྲུས་རྩོམ་པ་ནི་དེ་གཉིས་ལྟེ་བའི་ཕྱོགས་སུ་གཅིག་ཏུ་ཕྲད་པར་གྱུར་པ་ལ་ནི་ཁ་ན་མ་ཐོ་བ་ཡོངས་སུ་རྫོགས་པ་གཅིག་ཏུ་འགྱུར་རོ། །འདི་ལྟར་ཡོངས་སུ་རྫོགས་པའི་ངོ་བོ་ཉིད་ཡིན་པས་དེའི་ཕྱིར་ལྟེ་བའི་ཕྱོགས་ཀྱི་གོང་ངམ་འོག་གི་ཆར་ཕྱིན་པ་དེ་ནི་འདིར་ལྟེ་བ་ཞེས་སྨོས་པ་ལ་དངོས་སུ་གནས་པ་ཡིན་ནོ། །དེ་ལྟ་བས་ན་ལྟེ་བར་མ་ཕྱིན་དུ་ཟིན་ཀྱང་ཕྱོགས་བསྡོམས་ཏེ་ཆོག་པར་གྱུར་ན་ལྟུང་བྱེད་དུ་འགྱུར་ལ་གལ་ཏེ་མ་ཆོག་ན་ནི་ཉེས་བྱས་སོ། །མདུན་རོལ་དུ་ནི་ཉེས་བྱས་སོ་ཞེས་བྱ་བ་ནི། ཆུ་ལ་རེག་པའི་མདུན་རོལ་དུ་སྦྱོར་བར་བྱེད་པ་ནི་སྦྱོར་བའི་ཉེས་བྱས་ཡིན་པར་རིག་པར་བྱའོ། །ཆུ་མ་ཡིན་པས་ཀྱང་ངོ་ཞེས་བྱ་བ་ནི། འབྲུ་མར་དང་མར་དང་ཕྲུམ་ཁུ་དང་འོ་མ་ལ་སོགས་པ་དག་གིས་ཁྲུས་བྱེད་ན་ཉེས་བྱས་སུ་འགྱུར་རོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་ཆུ་མ་ལགས་པ་དེ་ལས་གཞན་པའི་རྫས་དེ་དག་གིས་ཁྲུས་བགྱིད་ན་ལྟུང་བ་ཅིར་འགྱུར།
ཉེས་བྱས་སོ་ཞེས་གསུངས་པ་ཡིན་ནོ། །ཐམས་ཅད་ལ་དུས་དག་ཡོད་ཀྱང་བྱིན་གྱིས་མ་བརླབས་ནའོ་ཞེས་བྱ་བ་ནི། ཁྲུས་འབའ་ཞིག་ཏུ་མ་ཟད་ཀྱི། བསླབ་པའི་གཞི་ཐམས་ཅད་ལ་དུས་དག་ཡོད་དུ་ཟིན་ཀྱང་བྱིན་གྱིས་མ་བརླབས་ཤིང་མངོན་སུམ་དུ་མ་བྱས་ན་ཉེས་བྱས་སོ། །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་དུས་བྱིན་གྱིས་མ་བརླབས་པ་དེ་ལ་ཡང་ལྟུང་བར་འགྱུར་བ་མཆིས་སམ། ཉེ་བ་འཁོར་ཡོད་དེ་སྦྱོར་བ་བཏང་ནས་བྱིན་གྱིས་མི་རློབ་ནའོ་ཞེས་གསུངས་པ་ཡིན་ནོ། །སྦྱོར་བ་གང་གིས་ཁྲུས་བྱ་བ་དེ་བཏང་ནས་ཡུལ་ཡོད་པ་ཡང་མངོན་སུམ་དུ་མ་བྱས་ཤིང་བྱིན་གྱིས་མ་བརླབས་ནའོ་ཞེས་བྱ་བའི་ཐ་ཚིག་གོ །ཞག་བཅོ་ལྔ་ལ་ཁྲུས་ཀྱི་ཉིན་མོ་ལ་ཁྲུས་བྱ་བ་གང་ཡིན་པ་དེ་ནི་གྲགས་པ་ཡིན་པས་དེར་ཁྲུས་བྱེད་པ་ལ་ནི་དུས་བྱིན་གྱིས་བརླབ་པར་བྱ་མི་དགོས་སོ། །དོན་གཞན་ལ་གཞོལ་བས་ཆུ་ཉམས་སུ་མྱོང་བ་ནི་ཁྲུས་མ་ཡིན་ནོ་ཞེས་བྱ་བ་ནི། ཁྲུས་ལ་གཞོལ་བ་ཉིད་ཀྱིས་ཆུ་ཉམས་སུ་མྱོང་བ་གང་ཡིན་པ་དེ་ནི་ཁྲུས་ཡིན་གྱི། དགོས་པ་གཞན་གྱི་བསམ་པས་ཆུ་ཉམས་སུ་མྱོང་བ་གང་ཡིན་པ་དེ་ནི་ཁྲུས་མ་ཡིན་ནོ། །དེའི་ཕྱིར་མ་བསམས་པར་རྒལ་བ་དང་བརྒྱལ་བ་ལ་གདབ་པ་དག་ལ་ནི་ལྟུང་བ་མེད་དོ་ཞེས་བྱ་བ་ལ། འདིར་གཞུང་ནི་དགེ་སློང་དག་ཆུ་ཀླུང་རྒལ་བར་བྱེད་དོ་ཞེས་གསུངས་པ་དང་གཞུང་གཞན་ལས་ཀྱང་བརྒྱལ་བ་ལ་ཆུ་དབང་བསྐུར་བ་དང༌། ཟམ་པ་ལས་ལྟུང་བ་མེད་དོ། །ཆུ་ཀླུང་རྒལ་བར་བྱེད་པ་དང་ཆུས་གང་བ་ལས་མཆོད་བར་བྱེད་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །ཨ་སྨྲ་པ་རན་ཏའི་ཡུལ་དག་ན་ནི་འདི་མེད་པར་ཤེས་པར་བྱའོ་ཞེས་བྱ་བ་ནི། ཨ་སྨྲ་པ་ར་ན་ཏ་ཞེས་བྱ་པའི་ཡུལ་དག་ན་ནི་ཁྲུས་ལ་ངེས་པ་ནི་མེད་པར་ཤེས་པར་བྱའོ། །འདིར་གཞུང་ནི་ཨ་སྨྲ་པ་རན་ཏའི་ཡུལ་དག་ཏུ་ཁྲུས་བྱ་བར་རྗེས་སུ་གནང་ངོ་ཞེས་གསུངས་པ་ཡིན་ནོ། །དེའི་ཕྱིར་དེ་ནི་བློ་གྲོས་དེ་ཉེ་བར་བཞག་སྟེ་དུས་མ་ཡིན་པར་ཡང་ཁྲུས་བྱའོ། །ཆོ་ག་བཙན་པོ་ཡོད་ན་བག་ཡངས་སུ་བྱ་བ་ལ་བརྟེན་པར་མི་བྱའོ་ཞེས་བྱ་བ་ནི། འདི་ནི་ཐམས་ཅད་ཀྱི་དབང་དུ་བྱས་པ་ཡིན་ཏེ། ཆོ་ག་བཙན་པོ་ཞེས་བྱ་བ་ནི། བཅོམ་ལྡན་འདས་ཀྱིས་བཀས་བཅད་
པ་དམ་པོ་སྟེ། ཟླ་བ་ཕྱེད་ཕྱེད་ཅིང་ཁྲུས་གྱིས་ཤིག །དེ་ལས་འདུམས་པར་བྱས་ན་ལྟུང་བྱེད་དོ་ཞེས་བྱ་བ་ལ་སོགས་པ་ལྟ་བུའོ། །བག་ཡངས་སུ་ཞེས་བྱ་བ་ནི་བག་ཡངས་སུ་བྱ་བའི་ཆོ་ག་སྟེ་དུས་ལ་བབ་པ་མ་གཏོགས་ཏེ་ན་བ་དུས་སོ། །ལས་དུས་སོ། །ལམ་དུས་སོ། །རླུང་དུས་སོ། །ཆར་དུས་སོ་ཞེས་བྱ་བ་ལ་སོགས་པས་བསླབ་པའི་གཞི་གློང་ཅིང་བག་ཡངས་སུ་མཛད་པའོ། །དེ་ལྟར་ཆོ་ག་བཙན་པོ་ཡོད་ན་ཐམས་ཅད་དུ་བག་ཡངས་སུ་བྱ་བ་ལ་བརྟེན་པར་མི་བྱའོ། །འདིར་གཞུང་ནི་བཙུན་པ་བཅོམ་ལྡན་འདས་ཀྱིས་ཡུལ་མཐའ་འཁོབ་དག་ཏུ་འདུལ་བ་འཛིན་པ་དང་ལྔའི་ཚོགས་ཀྱིས་བསྙེན་པར་རྫོགས་པར་བྱའོ་ཞེས་གང་གསུངས་པ་དེ་ལ། བཙུན་པ་གལ་ཏེ་བཅུའི་ཚོགས་མཆིས་བཞིན་དུ་འདུལ་བ་འཛིན་པ་དང༌། ལྔའི་ཚོགས་ཀྱིས་བསྙེན་པར་རྫོགས་པར་བགྱིད་ན་བསྙེན་པར་རྫོགས་ཞེས་བགྱིའམ། ཉེ་བ་འཁོར་བསྙེན་པར་རྫོགས་ཞེས་བྱ་སྟེ། བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ་ཞེས་གསུངས་པ་ཡིན་ནོ། །དེ་ལྟ་བས་ན་ཟླ་བ་ཕྱེད་ཕྱེད་ཅིང་ཁྲུས་བྱའོ་ཞེས་བྱ་བ་ལ་སོགས་པ་ལྟ་བུའི་ཆོ་ག་བཙན་པོ་ཡོད་ན་ནི་ན་བ་དང་ལས་དང་ལམ་དང་རླུང་དང་ཆར་དུས་སོ་ཞེས་བྱ་བ་ལ་སོགས་པ་ལྟ་བུའོ། །ཆོ་ག་བག་ཡངས་སུ་བྱ་བ་ལ་བརྟེན་པར་མི་བྱའོ། །ཁྲུས་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་དུད་འགྲོ་གསོད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། གསོད་པའི་སེམས་ཀྱིས་དུད་འགྲོ་ལ་བསྣུན་ནའོ་ཞེས་བྱ་བ་སྨྲས་ཏེ། གསོད་པའི་སེམས་ཞེས་བྱ་བ་བསད་པའི་བསམ་པས་དུད་འགྲོ་ཞེས་བྱ་བ་ཕྱུགས་ལ་སོགས་པ་ལ་བསྣུན་ནའོ་ཞེས་བྱ་བ་མཚོན་ལ་སོགས་པས་བསྣུན་ནའོ། །ཅི་བསྣུན་པའི་དུས་ཉིད་ནའམ་ཞེ་ན་དེའི་ཕྱིར། གཞི་དེས་དེའི་ཚེའམ་གཞན་གྱི་ཚེ་ཤི་ནའོ་ཞེས་བྱ་བ་སྨྲས་ཏེ། གཞི་དེས་ཤི་ཞེས་བྱ་བ་ནི། གསོད་པའི་སེམས་ཀྱིས་བསྣུན་པའི་གཞི་དེས་སོ། །དེའི་ཚེའམ་ཞེས་བྱ་བ་ནི། བསྣུན་པའི་དུས་དེ་ཉིད་ཀྱི་ཚེ་ཤི་ནའོ། །གཞན་གྱི་ཚེ་ཤི་ནའོ་ཞེས་བྱ་བ་ནི། བསྣུན་པའི་དུས་ཀྱི་འོག་ཏུ་དུས་གཞན་གྱི་ཚེ་ཤི་ནའོ། །སྦྱོར་བ་གཅིག་གིས་བྱས་ན་ཡང་
གསད་པར་བྱ་བ་ཇི་སྙེད་པ་རེ་རེ་ལས་ལྟུང་བྱེད་རེ་རེར་འགྱུར་རོ། །ལུས་དང་དེ་དང་འབྲེལ་བ་ནི་ཐ་མི་དད་དོ་ཞེས་བྱ་བ་ལ་སོགས་པ་ཐམས་ཅད་གསོད་པའི་ཕམ་པར་འགྱུར་བ་ལས་རིག་པར་བྱའོ། །སེམས་ཅན་གྱི་གཟུགས་སེམས་ཅན་མ་ཡིན་པ་ལ་ནི་ཉེས་བྱས་བྱེད་པ་ཉིད་དོ་ཞེས་བྱ་བ་ནི། སེམས་ཅན་གྱི་གཟུགས་ཞེས་བྱ་བ་སེམས་ཅན་གྱི་དབྱིབས་རི་མོ་ལ་སོགས་པ་དངོས་སེམས་ཅན་མ་ཡིན་ཞིང་སེམས་ཅན་གྱི་གྲངས་སུ་བགྲང་བ་མ་ཡིན་པ་ལ་བསྣུན་ན་ཉེས་བྱས་བྱེད་པ་ཉིད་ཡིན་ནོ། །འདིར་གཞུང་ནི་ཞུ་བ་ཁ་ཅིག་ལས་ཤིང་ལས་བྱས་པའམ་ས་ལས་བྱས་པའི་གཟུགས་ལ་བསྣུན་ན་ཉེས་བྱས་སོ་ཞེས་གསུངས་པ་ཡིན་ཏེ། དུད་འགྲོའི་རྣམ་པ་ཉིད་ལ་ནི་འདིར་གཏོགས་པའི་ཁ་ན་མ་ཐོ་བར་འགྱུར་ལ། གཞན་གྱི་རྣམ་པ་ཉིད་ལ་ནི་མི་གསོད་པར་གཏོགས་པའི་ཁ་ན་མ་ཐོ་བར་འགྱུར་རོ། །དུད་འགྲོ་གསོད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་རྗེས་སུ་བསྒྲུབ་ན་འགྱོད་པ་བསྐྱེད་པའི་ལྟུང་བྱེད་དུ་འགྱུར་ཞེ་ན། དེའི་ཕྱིར། ཁྱོད་བསྙེན་པར་རྫོགས་པ་མ་ཡིན་ཞིང༌། ཕམ་པར་གྱུར་པ་བྱུང་ངོ་ཞེས་བྱ་བ་ལ་སོགས་པ་དགེ་སློང་མ་ཡིན་པའི་དོན་གྱིས་འགྱོད་པ་བསྐྱེད་ནའོ་ཞེས་བྱ་བ་སྨྲས་ཏེ། ཁྱོད་བསྙེན་པར་རྫོགས་པ་མ་ཡིན་ནོ་ཞེས་བྱ་བའི་ཚིག་དེ་ནི་བསྙེན་པར་རྫོགས་པའི་དངོས་པོ་མེད་པར་སྟོན་པ་ཡིན་ནོ། །ཕམ་པར་གྱུར་པ་བྱུང་ངོ་ཞེས་བྱ་བའི་ཚིག་དེ་ནི་ཉམས་པ་ཉིད་དུ་སྟོན་པ་ཡིན་ཏེ། དགེ་སློང་གང་ལ་ཚེ་དང་ལྡན་པ་ཁྱོད་ལ་དགེ་སྦྱོང་གི་ཚུལ་ག་ལ་ཡོད་བྲམ་ཟེའི་ཚུལ་ག་ལ་ཡོད་དེ། ཚེ་དང་ལྡན་པ་ནི་བྲམ་ཟེ་རབ་ཏུ་བྱུང་བ་མ་ཡིན་ནོ་ཞེས་བྱ་བ་ལ་སོགས་པས་འགྱོད་པ་བསྐྱེད་པའོ། །དགེ་སློང་མ་ཡིན་པའི་དོན་གྱིས་ཞེས་བྱ་བ་ནི་དགེ་སློང་ཉིད་མ་ཡིན་པའི་དོན་དགོས་པའི་ཚིག་གང་ལ་ཡོད་པ་དེ་ནི་དགེ་སློང་མ་ཡིན་པའི་དོན་ཏེ། དགེ་སློང་མ་ཡིན་པ་ཉིད་གོ་བར་བྱེད་པའི་ཚིག་དེས་འགྱོད་པ་བསྐྱེད་ན་ཁ་ན་མ་ཐོ་བར་འདིར་འགྱུར་རོ། །འདིར་ལྟུང་བ་རྣམ་པར་གཞག་པའི་བསམ་པའི་དབང་གིས་ཏེ་གལ་ཏེ་མིའི་སྐྱོན་ནས་སྨྲ་བའི་བསམ་པས་གོ་པར་བྱེད་ན་ནི་དེར་གཏོགས་པའི་ཁ་ན་མ་ཐོ་བར་འགྱུར་རོ། །བདེ་བ་ལ་
རེག་པར་མི་གནས་པའི་བསམ་པས་གོ་བར་བྱེད་ན་ནི་འགྱོད་པ་བསྐྱེད་པ་འདིར་གཏོགས་པའི་ཁ་ན་མ་ཐོ་བར་འགྱུར་རོ། །སྐུར་པ་གདབ་པའི་བསམ་པས་གོ་བར་བྱེད་ན་ནི་དགེ་འདུན་ལྷག་མར་གཏོགས་པའི་ཁ་ན་མ་ཐོ་བར་འགྱུར་རོ། །ཐམས་ཅད་ཀྱི་བསམ་བ་ཉིད་ཀྱིས་ན་ནི་ཐམས་ཅད་དུ་གཏོགས་པའི་ཁ་ན་མ་ཐོ་བར་འགྱུར་རོ། །མིའི་སྐྱོན་ནས་སྨྲ་བ་དང་འགྱོད་པ་བསྐྱེད་པ་དང་དགེ་འདུན་ལྷག་མ་ཞེས་བྱ་བ་ནི་རྣམ་པར་རིག་བྱེད་གཅིག་གིས་ཏེ་སྡོམ་པ་ཡང་དག་པར་བླངས་པ་ནད་པ་དང་འདྲའོ། །སུ་ལ་འགྱོད་པ་བསྐྱེད་ན་ཞེ་ན་དེའི་ཕྱིར། དགེ་སློང་མའོ་ཞེས་བྱ་བ་སྨྲས་སོ། །ཅི་བསམ་པ་གང་ཡང་རུང་བས་སམ་ཞེ་ན་དེའི་ཕྱིར། བདེ་བ་ལ་མི་རེག་པ་བསྐྱེད་པའི་སེམས་ཀྱིས་སོ་ཞེས་བྱ་བ་སྨྲས་ཏེ། འདི་བདེ་བ་ལ་མི་རེག་པ་ཞེས་བྱ་བ་ནི། དགེ་སློང་ལ་ཡིད་ལ་གཅགས་པ་བསྐྱེད་པ་གང་ཡིན་པ་དེ་ཡིན་པར་རིག་པར་བྱའོ།། བཞད་གད་ཀྱིས་ཀྱང་ངོ་ཞེས་བྱ་བ་ནི་གལ་ཏེ་བཞད་གད་ཀྱིས་ཀྱང་འགྱོད་པ་བསྐྱེད་པར་བྱེད་ན་དེ་ལྟ་ན་ཡང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །ཅི་འགྱོད་པ་སྐྱེད་པ་ཁོ་ནའམ་ཞེ་ན་མ་ཡིན་ཏེ། དེའི་ཕྱིར། འགྱོད་པ་མ་སྐྱེས་ན་ཡང་ངོ་ཞེས་བྱ་བ་སྨྲས་ཏེ། གལ་ཏེ་དགེ་སློང་དེ་འགྱོད་པ་མ་སྐྱེས་སུ་ཟིན་ཀྱང་དེ་ལྟ་ན་ཡང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །གཞན་གྱིས་ནི་ཉེས་བྱས་སོ་ཞེས་བྱ་བ་ནི། དགེ་སློང་མ་ཡིན་པའི་དོན་ལས་གཞན་པ་དགེ་འདུན་ལྷག་མལ་སོགས་པའི་དོན་གྱིས་འགྱོད་པ་བསྐྱེད་ན་ཉེས་བྱས་སུ་འགྱུར་རོ། །འགྱོད་པ་བསྐྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཇི་ཞིག་བྱས་ན་ག་ག་ཚིལ་བྱེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་ལ་སོར་མོའམ་ཁུ་ཚུར་རམ་གྲུ་མོའམ་ཕྲག་པའམ་མགོའམ་གློ་འམ་རྒྱ་བ་བམ་རྐེད་པའམ་བརླའམ་པུས་མོའམ་བྱིན་པའམ་རྐང་པའི་མཐེ་བོང་ལ་སོགས་པ་དག་གིས་ག་ག་ཚིལ་བྱེད་པས་རེག་ནའོ་ཞེས་བྱ་བ་སྨྲས་ཏེ། དགེ་སློང་ལ་སོར་མོ་ལ་སོགས་པ་དག་གིས་ག་ག་ཚིལ་བྱེད་པས་ཞེས་བྱ་བ་སྐྱི་གཡའ་བར་བྱེད་པས་རིག་ནའོ་ཞེས་བྱ་བ་ལུས་ཀྱི་དབང་པོ་དང་ལུས་ཀྱི་དབང་པོར་རེག་པ་དེ་གཉི་གས་ཉམས་སུ་མྱོང་ན་ཁ་ན་མ་ཐོ་བ་འདིར་འགྱུར་
རོ། །དེ་ལྟར་ཡང་འདིར་གཞུང་ནི་རང་གིའམ་གཞན་གྱིའམ་གཉི་གའི་ལུས་ཀྱི་དབང་པོ་ཉམས་པ་ཉིད་ལ་རེག་ན་ཉེས་བྱས་སོ་ཞེས་གསུངས་པ་ཡིན་ནོ། །དེ་ལྟ་བས་ན་སོགས་པ་ཞེས་བྱ་བའི་སྒྲས་ནི་རང་གི་ལུས་ཀྱི་ཡན་ལག་གཞན་དག་ཀྱང་འཕངས་པ་ཡིན་གྱི། གོས་ལ་སོགས་པས་ནི་མ་ཡིན་ནོ། །ལུས་མ་ཡིན་པས་ལུས་མ་ཡིན་པ་ལ་རེག་པ་དང་སྐྲ་དང་སེན་མོ་དང་སོ་དག་གིས་རེག་པ་ནི་ཉེས་བྱས་སོ། །ཅི་བསམ་པ་གང་ཡང་རུང་བས་རེག་ནའམ་ཞེ་ན་དེའི་ཕྱིར། སྐྱི་གཡའ་བར་བྱེད་པའི་སེམས་ཀྱིས་སོ་ཞེས་བྱ་བ་སྨྲས་ཏེ། འདིར་སྐྱི་གཡའ་བ་ཞེས་བྱ་བ་ནི་བག་འཁུམས་པར་བྱེད་པ་སྟེ་སྐྱི་གཡའ་བར་བྱེད་པ་བག་འཁུམས་པར་བྱེད་པ་འདར་བར་བྱེད་པ་ལ་སོགས་པའི་ལུས་ཀྱི་བྱ་བའི་རྣམ་པའི་བསམ་པས་ཞེས་བྱ་བའི་ཐ་ཚིག་གོ །སྐྱི་གཡའ་བར་བྱ་བའི་བསམ་པ་མ་ཡིན་པ་ཀུན་དུ་ཆགས་པ་མེད་པའི་སེམས་ཀྱིས་རེག་པ་ལ་ནི་ལྟུང་བ་མེད་དོ། །ཀུན་དུ་འདོད་ཆགས་དང་ལྡན་པའི་སེམས་ཀྱིས་རེག་པ་ལ་ནི་དགེ་འདུན་ལྷག་མར་གཏོགས་པའི་ཁ་ན་མ་ཐོ་བར་འགྱུར་རོ། །ཞེ་སྡང་དང་ལྡན་པའི་སེམས་ཀྱིས་རེག་པ་ལ་ནི་གསོད་པ་དང་རྡེག་པར་གཏོགས་པའི་ཁ་ནམ་ཐོ་བར་འགྱུར་རོ། །དེ་དག་ལས་གཞན་པའི་ཉོན་མོངས་པ་ཅན་གྱི་སེམས་ཀྱིས་རེག་པ་ལ་ནི་ཁ་ན་མ་ཐོ་བ་འདིར་འགྱུར་རོ། །དེའི་ཕྱིར་རྨ་དང་སྤྲང་བུ་དང་འབྲུམ་བུ་དང་སྨེ་བ་དང་སྤུའི་ཚོམས་བསྟན་པ་ལ་ནི་ལྟུང་བ་མེད་དོ་ཞེས་བྱ་བ་ནི། གང་གི་ཕྱིར་སྐྱི་གཡའ་བར་བྱ་བའི་སེམས་ཀྱིས་རེག་པ་ལ་ནི་ཁ་ན་མ་ཐོ་བ་འདིར་འགྱུར་བ་དེའི་ཕྱིར། འདི་དག་ལ་ནི་ལྟུང་བ་མེད་དོ་ཞེས་བྱ་བའི་ཐ་ཚིག་གོ །རེག་བྱེད་གཅིག་གམ་དུ་མ་ཉིད་ལའོ་ཞེས་བྱ་བ་ནི། སོར་མོ་ལ་སོགས་པ་རེག་བྱེད་གཅིག་ཉིད་ཀྱང་རུང་དུ་མ་ཉིད་ཡིན་ཀྱང་རུང་སྟེ། ལྟུང་བ་གཅིག་ཁོ་ནར་འགྱུར་གྱི། འདིར་རེག་བྱེད་རེ་རེ་ལས་ལྟུང་བ་ཐ་དད་པར་དབྱེ་པ་ནི་མེད་དོ། །འདིར་གཞུང་ནི་དགེ་སློང་གིས་སོར་མོ་གཅིག་གིས་ག་ག་ཚིལ་བྱེད་ན་ལྟུང་བྱེད་དོ། །དེ་བཞིན་དུ་གཉིས་སམ་གསུམ་མམ་བཞིའམ་ལྔ་དག་གིས་ཀྱང་ལྟུང་བྱེད་དོ་ཞེས་གསུངས་པ་ཡིན་ནོ། །ག་ག་ཚིལ་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།
བམ་པོ་སུམ་ཅུ་བཞི་པ། ཅི་ཞིག་བྱས་ན་ཆུ་ལ་རྩེ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཆུའི་ཡུལ་ལ་རྩེ་བ་རྗེས་སུ་བསྒྲུབ་ནའོ་ཞེས་བྱ་བ་སྨྲས་ཏེ། ཆུའི་ཡུལ་ལ་འོག་ནས་འབྱུང་བའི་རྩེ་བ་ནི་ཞེས་བྱ་བ་དག་རྗེས་སུ་བསྒྲུབ་ཅིང་ཡོངས་སུ་རྫོགས་པར་གྱུར་ན་འདིར་གཏོགས་པའི་ཁ་ན་མ་ཐོ་བར་འགྱུར་རོ། །སྤྱིར་བཤད་པ་བྱེ་བྲག་ཏུ་བསྟན་པའི་ཕྱིར། ཞུགས་ཤིང་ནུབ་པ་དང་དབྱུང་བ་དང་ངོགས་གཞན་དུ་རྒལ་བ་དང་རྒྱུན་ཕྱོགས་དང་རྒྱུན་ལས་བཟློག་ཕྱོགས་སུ་རྩོལ་བ་དང་ཆུ་ལ་རྔ་བོ་ཆེ་དང་རྫ་རྔ་ཁ་གཅིག་པའི་སྒྲ་འབྱིན་པ་དང་གསེག་མ་འཁྲབ་པ་དང་འཕེན་པ་དང་འཁོར་ཡུག་དང་རྡོ་རྗེ་དང་ཁྲོན་པ་དང་དཔའ་ཀློང་དང་ཆུ་བསྲུབས་འདྲེན་པ་དག་བྱེད་ན་དངོས་གཞིའོ་ཞེས་བྱ་བ་སྨྲས་ཏེ། དགེ་སློང་རྩེ་བའི་བསམ་པས་ཆུའི་ནང་དུ་ལྟེ་བ་མན་ཆད་ཙམ་ནུབ་པར་ཞུགས་ཤིང་ཆུའི་འོག་ཏུ་ནུབ་པར་བྱིའུ་ཟུལ་བྱེད་པ་དང༌། ཆུའི་འོག་ནས་སྟེང་དུ་འབྱུང་བ་དང༌། ཆུའི་ངོགས་གཞན་ནས་གཞན་དུ་རྒལ་བ་དང་ཆུའི་རྒྱུན་ཕྱོགས་སུ་རྩོལ་བ་དང་ཆུའི་རྒྱུན་ལས་བཟློག་ཕྱོགས་སུ་རྩོལ་བ་དང༌། ཆུ་ལ་རྔ་བོ་ཆེ་ནས་དབའ་ཀློང་དང་ཆུ་བསྲུབས་འདྲེན་པའི་བར་དག་བྱེད་ན་ལྟུང་བྱེད་དུ་འགྱུར་རོ། །དབང་བསྐུར་བ་ལ་ནུབ་པ་ལ་སོགས་པ་ཡོད་པ་ལ་ནི་དངོས་གཞིར་རྣམ་པར་མི་གཞག་གོ །གཏིང་ལ་སོགས་པར་འཇུག་པ་ལ་ནུབ་པ་ལ་སོགས་པ་ཡོད་པ་དེ་ལ་ནི་ཅི་རིགས་པར་རྗེས་སུ་བསྒྲུབ་པ་ལ་དངོས་གཞིར་འགྱུར་རོ། །བེམ་ཏོལ་གྱིས་རྡེག་ན་ཉེས་བྱས་སོ་ཞེས་བྱ་བ་ནི། ཞུགས་ཀྱང་བེམ་ཏོལ་གྱིས་རྡེག་པ་ལ་ནི་ཉེས་བྱས་སུ་འགྱུར་རོ། །བུམ་པ་དང་ཕྲུ་བ་ངང་རིལ་བ་དང་ཁ་ཕོར་དང་བུ་རམ་གྱི་ཁུ་བ་འཛག་པ་དང་སྲན་ཚོད་དང་འུ་ཤ་དང་ཐང་ཚ་བ་ཉིད་ཡོད་པ་ལ་ཡང་ངོ་ཞེས་བྱ་བ་ནི། གང་དུ་འཇུག་ཏུ་རུང་བ་དེར་ཞུགས་ཏེ་ནུབ་པ་ལ་སོགས་པ་རྗེས་སུ་བསྒྲུབ་པ་ལ་ནི་ལྟུང་བྱེད་དུ་འགྱུར་ལ། བེམ་ཏོལ་གྱིས་རྡེག་པ་ལ་ནི་ཉེས་བྱས་སོ། །ཆུར་མ་ཞུགས་པར་རྩེ་བ་ཐམས་ཅད་ལ་ནི་ཉེས་བྱས་ཁོ་ནའོ། །བུ་རམ་གྱི་ཁུ་བ་འཛག་པ་ཞེས་བྱ་བ་ནི་གང་དུ་བུ་རམ་གྱི་ཤིང་བ་ཙིར་བའི་ཁུ་པ་འཛག་པའོ། །ཆུ་མ་ཡིན་པ་ལ་རྩེ་བ་
ཡང་ངོ་ཞེས་བྱ་པ་ལ། ཡང་ངོ་ཞེས་བྱ་བའི་སྒྲ་ནི་ཉེས་བྱས་སོ་ཞེས་བྱ་བའི་རྗེས་བསྙེགས་པའི་ཕྱིར་ཏེ་ཆུ་ལས་གཞན་པའི་ཆུ་མ་ཡིན་པ་སྟེ་དེ་ལ་རྩེ་བ་ཡང་ཉེས་བྱས་སོ། །གར་གྱི་བདག་ཉིད་མ་ཡིན་པ་བོང་བ་ལ་སོགས་པ་འཕེན་པ་དང་ལུས་ཀྱི་རྩེད་མོར་གྱུར་པ་གཡོ་བའི་རྩེད་མོ་གཞན་ཐམས་ཅད་ཉེས་བྱས་ཡིན་ནོ། །གར་གྱི་བདག་ཉིད་ནི་སྔར་གར་དང་གླུ་དང་རོལ་མེ་ཀུན་དུ་སྤྱད་པར་མི་བྱའོ་ཞེས་སྨོས་པས་བཀག་ཟིན་ཏོ། །འདིར་གཞུང་ནི་ཞུ་བ་ལས་བཙུན་པ་རེ་ཞིག་དགེ་སློང་ཆབ་མ་ལགས་པ་དངོས་པོ་ལྷག་མ་ལ་རྩེ་བར་བགྱིད་ན་ལྟུང་བ་ཅིར་འགྱུར་ཉེས་བྱས་སོ་ཞེས་གསུངས་པ་ཡིན་ནོ། །དེ་ལྟ་བུ་ལ་བྱེད་དུ་བཅུག་པ་ནི་དེ་དང་འདྲའོ་ཞེས་བྱ་བ་ལ། དེ་ལྟ་བུ་ཞེས་བྱ་བ་ནི། ཆུ་ལས་གཞན་པའི་རྫས་ལ་སྟེ་དེ་ལས་གཞན་གཡོ་བ་ལ་སོགས་པ་བྱེད་དུ་བཅུག་པ་ནི་རང་གིས་བྱས་པ་དང་འདྲ་བར་རྣམ་པར་གཞག་པར་བལྟ་བར་བྱ་སྟེ། ཇི་ལྟར་ཆུ་ལས་གཞན་པའི་རྫས་ཀྱིས་ཡུལ་ལ་རྩེ་བ་ལ་རང་བྱེད་པས་ལྟུང་བར་རྣམ་པར་གཞག་པ་བྱས་པ་བཞིན་དུ་གཞན་བྱེད་དུ་འཇུག་པ་ཡང་དེ་དང་འདྲའོ། །བྱེད་དུ་བཅུག་པ་ལ་ཡང་རྩེ་བའི་ལྟུང་བྱེད་ཀྱི་ཡུལ་དུ་གྱུར་པ་ལ་ནི་ལྟུང་བྱེད་དུ་འགྱུར་ལ། ཉེས་བྱས་ཀྱི་ཡུལ་དུ་གྱུར་པ་ལ་ནི་ཉེས་བྱས་སུ་འགྱུར་བ་ཡིན་ཏེ། བསྙེན་པར་རྫོགས་པས་བྱེད་དུ་བཅུག་ན་བྱེད་དུ་འཇུག་པ་དང་བྱེད་པ་གཉི་ག་ལ་ཁ་ན་མ་ཐོ་བ་འདི་འདྲ་བར་འགྱུར་རོ་ཞེས་བྱ་བའི་ཐ་ཚིག་གོ །འདིར་གཞུང་ནི་རངས་པའི་བསམ་པ་ལ་ཇི་ལྟ་བ་བཞིན་དུ་རངས་སུ་གཞུག་པའི་བསམ་པ་ལ་ཡང་དེ་བཞིན་ནོ། །རྩེ་བའི་བསམ་པ་ལ་ཇི་ལྟ་བ་བཞིན་དུ་རྩེར་གཞུག་པའི་བསམ་པ་ལ་ཡང་དེ་བཞིན་ནོ། །དགའ་བའི་བསམ་པ་ལ་ཇི་ལྟ་བ་བཞིན་དུ་དགར་གཞུག་པའི་བསམ་པ་ལ་ཡང་དེ་བཞིན་ནོ་ཞེས་གསུངས་པ་ཡིན་ནོ། །ཅི་བསམ་པ་གང་ཡང་རུང་བས་བྱེད་དམ་བྱེད་དུ་བཅུག་པ་དག་ལ་ཁ་ན་མ་ཐོ་བ་འདིར་འགྱུར་རམ་ཞེ་ན་དེའི་ཕྱིར། རྒོད་པས་དགའ་བ་ཉམས་སུ་མྱོང་བར་བྱ་བའི་འདུན་པས་སོ་ཞེས་བྱ་བ་སྨྲས་ཏེ། རྒོད་པའི་སྒོ་ནས་དགའ་བ་ཉམས་སུ་མྱོང་བར་བྱའོ་སྙམ་པའི་བསམ་པས་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ཁ་ཅིག་ལས་
དགེ་སློང་གིས་བུམ་པའི་སྦྱོར་བས་ཆུས་འཐོར་ན་ཐམས་ཅད་དུ་ལྟུང་བྱེད་དོ་ཞེས་གསུངས་པ་ཡིན་ནོ། །དེའི་ཕྱིར་སིམ་པར་འདོད་པས་རྒལ་བ་ལ་སོགས་པ་ལ་ལྟུང་བ་མེད་དོ་ཞེས་བྱ་བ་ནི། གང་གི་ཕྱིར་དགོད་པས་དགའ་བ་ཉམས་སུ་མྱོང་བར་བྱ་བའི་འདུན་པས་བྱེད་དམ་བྱེད་དུ་བཅུག་པ་ལ་ལྟུང་བ་འདིར་འགྱུར་བ་དེའི་ཕྱིར་སིམ་པར་འདོད་པས་རྒལ་བ་ལ་སོགས་པ་ནི་ལྟུང་བ་མེད་དོ། །སོགས་པ་ཞེས་བྱ་བའི་སྒྲས་ནི་ནུབ་པ་དང་འབྱུང་བ་ལ་སོགས་པ་དག་བསྡུས་ཏེ་དེ་དག་བྱས་སམ་བྱེད་དུ་བཅུག་པ་ལ་ཡང་ལྟུང་བ་མེད་དོ། །རྐྱལ་སློབ་བ་ཐད་ཀའམ་ལྟག་འོག་ཏུ་སྩོལ་བ་ལ་ཡང་ངོ་ཞེས་བྱ་བ་ནི། རྐྱལ་སློབ་པའི་བསམ་པས་ཐད་ཀར་རྩོལ་བ་དང་ལྟག་འོག་ཏུ་སྩོལ་བ་ལ་ཡང་ལྟུང་བ་མེད་དོ། །གྲང་བར་འདོད་པས་ཚ་བ་དག་ལ་རི་མོ་དོད་པ་ལ་ཡང་ངོ་ཞེས་བྱ་བ་ནི། གྲང་ཞིང་དད་ལས་པར་འདོད་པས་འུ་ཤ་ལ་སོགས་པ་ཚ་བ་དག་ལས་དཀྲུགས་པ་ལ་སོགས་པས་རི་མོ་དོད་པར་བྱེད་པ་ལ་ཡང་ལྟུང་བ་མེད་པའོ། །ཆུ་ལ་རྩེ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་བུད་མེད་དང་ལྷན་ཅིག་ཉལ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། བུད་མེད་དང་ལྷན་ཅིག་གནས་གཅིག་ཏུ་གཉིད་ལོག་ནའོ་ཞེས་བྱ་བ་སྨྲས་ཏེ། དགེ་སློང་བུད་མེད་དང་ལྷན་ཅིག་གནས་གཅིག་ཏུ་གཉིད་ལོག་ནའོ། །དུས་གང་གི་ཚེ་གཉིད་ལོག་ན་ཞེ་ན་དེའི་ཕྱིར། མཚན་མོའོ་ཞེས་བྱ་བ་སྨྲས་ཏེ། ནུབ་མོའོ། །ཅི་མཚན་མོ་ཐམས་ཅད་ཀྱི་སྐད་ཅིག་གང་ཡང་རུང་བ་ལའམ་ཞེ་ན་དེའི་ཕྱིར། མཐར་རོ་ཞེས་བྱ་བ་སྨྲས་ཏེ། མཚན་མོའི་མཐའི་སྐད་ཅིག་ལའོ། །ཅི་མཚན་མོའི་མཐའི་མདུན་རོལ་དུ་ལྟུང་བ་མེད་དམ་ཞེ་ན་དེའི་ཕྱིར། མདུན་རོལ་དུ་ནི་ཉེས་བྱས་སོ་ཞེས་བྱ་བ་སྨྲས་ཏེ། མཚན་མོའི་མཐའི་མདུན་རོལ་དུ་ནི་ཉེས་བྱས་སོ། །འདིར་མིའི་བུད་མེད་མཐུ་མེད་པ་དང་མ་ནིང་ཕོ་དང་མ་ནིང་མོ་དང་མི་མ་ཡིན་པ་སྤྲུལ་པ་དང་དུད་འགྲོ་མཐུ་མེད་པ་ཉིད་ལ་ཡང་ཉེས་བྱས་ཡིན་ན་ཅི་བོང་ཚོད་གང་ཡང་རུང་བ་དང་ལྡན་པའི་མཐུ་མེད་པ་ལ་སོགས་པ་དག་ལ་དེར་ཤེས་པར་བྱའམ་ཞེ་ན་དེའི་ཕྱིར། བྱ་གག་གི་ཚད་ནི་དེ་བྱེད་
པ་ཉིད་ཀྱི་མཐའོ་ཞེས་བྱ་བ་སྨྲས་ཏེ། དངོས་གཞིའི་བྱེད་པ་ལས་གཞན་གང་ལ་བྱ་གག་གི་བོང་ཚོད་ཙམ་གྱི་ཚད་ཡོད་པ་དེ་ནི་བྱ་གག་གི་ཚད་དོ། །དེ་བྱེད་པ་ཉིད་ཀྱི་མཐའོ་ཞེས་བྱ་བ་ནི། ཉེས་བྱས་བྱེད་པ་ཉིད་ཀྱི་མཐའ་ཡིན་པར་རིག་པར་བྱའོ། །འདི་སྐད་བསྟན་ཏེ། བོང་ཚོད་དེ་ཙམ་དང་ལྷན་ཅིག་གནས་གཅིག་ཏུ་མཚན་མོ་གཉིད་ལོག་ན་ཉེས་བྱས་སུ་འགྱུར་ལ། མདུན་རོལ་དུ་ནི་ཉེས་བྱས་ཕྲ་མོར་འགྱུར་རོ། །བུད་མེད་དང་ལྷན་ཅིག་ཉལ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་སྡངས་པར་བྱེད་པའི་ཁ་ན་མ་ཐོ་བར་འགྱུར་ཞེ་ན་དེའི་ཕྱིར། བཞད་གད་བྱ་པར་བསམ་པས་ཀྱང་རུང་སྟེ། སྔགས་པར་འདོད་པས་འཇིགས་པའི་རྒྱུ་ཉེ་བར་བསྒྲུབ་པ་སྔོན་དུ་བཏང་བ་འཇིགས་པར་བྱེད་པ། ཆེ་གེ་མོ་ཞིག་ཅེས་དགེ་སློང་ལ། གཞན་གྱིས་ཀྱང་གོ་བར་བྱེད་ན། འཇིགས་པ་མ་སྐྱེས་ཀྱང་ངོ་ཞེས་བྱ་བ་སྨྲས་ཏེ། བཞད་གང་བྱ་བར་བསམ་ཀྱང་རུང་སྟེ་ཞེས་བྱ་བ་ནི། དགོད་པའི་བསམ་པས་ཀྱང་རུང་བའོ། །ཀྱང་ཞེས་བྱ་བའི་སྒྲ་ནི་ཁྲོ་བ་སྔོན་དུ་བཏང་བས་ཀྱང་རུང་བའོ། །སྡངས་པར་འདོད་པ་ཞེས་བྱ་བ་ནི། འཇིགས་པ་བསྐྱེད་པར་འདོད་པས་སོ། །འོ་ན་སྡངས་པར་འདོད་པ་ཞེས་བྱ་བའི་བྱེ་བྲག་འདི་སྨོས་ཅི་དགོས་ཏེ། འཇིགས་པའི་རྒྱུ་ཉེ་བར་བསྒྲུབ་པ་སྔོན་དུ་བཏང་བ་གོ་བར་བྱེད་པ་ཞེས་བྱ་བ་ཉིད་ཀྱིས་སྡངས་པར་འདོད་པས་ཞེས་བྱ་བ་ཉིད་དུ་འགྱུར་རོ་ཞེ་ན། དེ་ནི་དེ་ལྟ་མ་ཡིན་ཏེ། སྡངས་པར་འདོད་པ་མེད་པར་ཡང་འཇིགས་པའི་རྒྱུ་ཉེ་བར་བསྒྲུབ་པ་སྔོན་དུ་བཏང་བ། གོ་བར་བྱེད་པ་ཡོད་པ་ཁོ་ན་ཡིན་ཏེ། གལ་ཏེ་འདི་སྙམ་དུ་བདག་གིས་འདི་ནམ་ཡང་ལན་འགའ་ཡང་བདག་ལས་འཇིགས་པ་སྐྱེས་པར་མ་གྱུར་པའི་བྱུང་བའི་མཐའ་རྣམས་རྣམ་པ་མང་དུ་ཉམས་སུ་མྱོང་མོད་ཀྱི། འོན་ཀྱང་རེ་ཞིག་བཞད་གད་བྱས་པར་གྱུར་ཅིག་སྙམ་དུ་སེམས་པ་ལ་ནི་སྡངས་པར་འདོད་པ་མེད་པར་ཡང་འཇིགས་པའི་རྒྱུ་ཉེ་བར་བསྒྲུབ་པ་སྔོན་དུ་བཏང་བ་གོ་བར་བྱེད་པ་ཡོད་པས་དེའི་ཕྱིར་སྡངས་པར་འདོད་པས་ཞེས་བྱ་བའི་བྱེ་བྲག་འདི་སྨོས་དགོས་སོ། །འཇིགས་པའི་རྒྱུ་ཞེས་བྱ་བ་ནི། ཡིད་དུ་མི་འོང་བ་སྟེ་དེ་ཉེ་བར་
བསྒྲུབ་པ་སྔོན་དུ་བཏང་བ་གོ་བར་བྱེད་པ་ནི། །སྡངས་པར་བྱེད་པའི་ཁ་ན་མ་ཐོ་བར་འགྱུར་རོ། །གོ་བར་བྱེད་པ་རྣམ་པ་གཉིས་ཏེ་དོན་དང་གོ་བར་བྱ་བ་ལའོ། །དེ་ལ་དོན་གོ་བར་བྱེད་པ་ནི། འཇིགས་པར་བྱེད་པ་ཞེས་བྱ་བས་བསྟན་ཏོ། །ཇི་ལྟར་འཇིགས་པར་བྱེད་པ་གོ་བར་བྱེད་ཅེ་ན་དེའི་ཕྱིར་ཆེ་གེ་མོ་ཞིག་ཅེས་སྨྲས་སོ། །གོ་བར་བྱ་བ་གང་ལ་གོ་བར་བྱེད་ཅེ་ན། དེའི་ཕྱིར་དགེ་སློང་ལའོ་ཞེས་བྱ་བ་སྨྲས་ཏེ། དགེ་སློང་གཞན་ལའོ། །གཞན་གྱིས་ཀྱང་གོ་བར་བྱེད་ན་ཞེས་བྱ་བ་ནི། བདག་ཉིད་ཀྱིས་གོ་བར་བྱེད་པ་འབའ་ཞིག་ཏུ་མ་ཟད་ཀྱི་གཞན་གོ་བར་བྱེད་དུ་བཅུག་ན་ཡང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་རོ། །འཇིགས་པ་མ་སྐྱེས་ཀྱང་ངོ་ཞེས་བྱ་བ་ནི། དགེ་སློང་འཇིགས་པ་མ་སྐྱེས་ཀྱང་ཁ་ན་མ་ཐོ་བ་ཡོངས་སུ་རྫོགས་པར་འགྱུར་བ་སྟེ། ཀྱང་གི་སྒྲ་ནི་འཇིགས་པ་སྐྱེས་ནས་ཡང་ཁ་ན་མ་ཐོ་བ་ཁོ་ནར་འགྱུར་རོ། །འཇིགས་པའི་རྒྱུ་ཅི་འདྲ་བ་ཞིག་ཉེ་བར་བསྒྲུབ་པ་སྔོན་དུ་བཏང་བ་གོ་བར་བྱེད་ན་ཁ་ན་མ་ཐོ་བ་ཅི་འདྲ་བར་འགྱུར་ཞེ་ན་དེའི་ཕྱིར་ཡིད་དུ་མི་འོང་བ་ལ་ནི་དངོས་གཞིའོ་ཞེས་བྱ་བ་སྨྲས་ཏེ། གཟུགས་མི་སྡུག་པ་ལ་སོགས་པ་ཉེ་བར་བསྒྲུབ་པ་སྔོན་དུ་བཏང་བ་གོ་བར་བྱེད་ན་དངོས་གཞིའི་ཁ་ན་མ་ཐོ་བར་འགྱུར་རོ། །ཡིད་དུ་མི་འོང་བ་དཔེས་བསྟན་པའི་ཕྱིར། འདི་ལྟ་སྟེ་དཔེར་ན། ཡིད་དགས་དང་ཤ་ཟ་དང་གྲུལ་བུམ་དང་ལུས་སྲུལ་པོ་གཟུགས་ལ་བ་ནག་པོ་དང་སོལ་བ་དང་ཀ་བ་ཚིག་པ་ལྟ་བུ་སེང་གེ་དང་སྟག་དང་གུང་དང་མཚའ་དང་གཟིག་དང་ཝའི་སྐད་ལྟ་བུ་བཤང་བ་དང་གཅི་བ་དང་ར་བ་དང་དེའི་ཟེ་བའི་དྲི་ལྟ་བུ་སེག་དང་རེ་ལྡེ་དང་ཕྱར་བའི་རེག་པ་ལྟ་བུ་དག་ཉིད་སྒྲོགས་པའོ་ཞེས་བྱ་བ་སྨྲས་ཏེ། འདི་དག་གིས་ཡིད་དགས་ལ་སོགས་པའི་གཟུགས་དང་སྒྲ་དང་དྲི་དང་རེག་བྱའི་བྱེ་བྲག་བསྟན་པ་སྟེ་དེ་ལྟ་བུའི་གཟུགས་དང་སྒྲ་དང་དྲི་དང་རོ་དང་རེག་པ་དང་ལྡན་པའི་ཡིད་དགས་ལ་སོགས་པ་འདི་ན་ཡོད་དོ་ཞེས་སྒྲོགས་ཤིང་གོ་བར་བྱེད་ན་དངོས་གཞིའི་ཁ་ན་མ་ཐོ་བར་འགྱུར་རོ་ཞེས་བྱ་བར་སྦྱར་རོ། །ལ་བ་ནག་པོ་དང་སོལ་བ་དང་ཀ་བ་ཚིག་པ་ལྟ་བུ་ཞེས་བྱ་བའི་ཚིག་གསུམ་གྱིས་ནི་ཡིད་དགས་ལ་སོགས་པའི་གཟུགས་ཀྱི་བྱེ་བྲག་བསྟན་ཏོ། །སེང་
གེ་དང་སྟག་དང་གུང་དང་མཚའ་དང་གཟིག་དང་ཝའི་སྐད་ལྟ་བུ་ཞེས་བྱ་བ་ནི། ཡི་དགས་ལ་སོགས་པའི་སྒྲའི་བྱེ་བྲག་བསྟན་ཏོ། །བཤད་བ་དང་གཅི་བ་དང་ར་བ་དང་དེའི་ཟེ་བའི་དྲི་ལྟ་བུ་ཞེས་བྱ་བ་ནི། ཡི་དགས་ལ་སོགས་པའི་དྲིའི་བྱེད་བྲག་བསྟན་ཏོ། །སེག་དང་རེ་ལྡེ་དང་ཕྱར་བའི་རེག་པ་ལྟ་བུ་ཞེས་བྱ་བ་ནི། ཡི་དགས་ལ་སོགས་པའི་རེག་པའི་བྱེ་བྲག་བསྟན་ཏོ། །ཉིད་སྒྲོག་པའོ་ཞེས་བྱ་བ་ནི། ཡི་དགས་ལ་སོགས་པའི་བྱེ་བྲག་དེ་ལྟ་བུ་དང་ལྡན་པ་ཉིད་འདི་ན་ཡོད་དོ་ཞེས་གོ་བར་བྱེད་པའོ། །ཡིད་དུ་འོང་བ་ལ་ནི་ཉེས་བྱས་སོ་ཞེས་བྱ་བ་ནི། ཡིད་དུ་འོང་བའི་རྒྱུ་ཉེ་བར་བསྒྲུབ་པ་སྒྲོགས་ན་ཉེས་བྱས་སུ་འགྱུར་བའོ། །འདིར་ཡིད་དུ་འོང་བ་དཔེས་བསྟན་པའི་ཕྱིར། འདི་ལྟ་སྟེ་དཔེར་ན། ལྷ་དང་ཀླུ་དང་དྲི་ཟ་དང་གནོད་སྦྱིན་དང་མིའམ་ཅི་དང་ལྟོ་འཕྱེ་ཆེན་པོ་གཟུགས་ནོར་ཅན་དང་ཚོང་དཔོན་དང་དེད་དཔོན་ལ་སོགས་པ་ལྟ་བུ། པི་ཝང་ལ་སོགས་པའི་སྒྲ་ལྟ་བུ་ཨ་ཀ་རུ་དང༌། ཙན་དན་དང་གུར་ཀུམ་དང་ཏ་མ་ལའི་ལོ་མའི་དྲི་ལྟ་བུ་དང་དར་དང་རས་ཡུག་ཆེན་དང་བེའུ་རས་དང་དར་ལ་དང་དུ་གུ་ལའི་རས་དང་ཀོ་ཏམ་པའི་རས་ཀྱིས་རེག་པ་ལྟ་བུ་དག་ཉིད་སྒྲོགས་པའོ་ཞེས་བྱ་བ་སྨྲས་ཏེ། འདི་དག་གིས་ནི་ལྷ་ལ་སོགས་པའི་གཟུགས་དང་སྒྲ་དང་དྲི་དང་རེག་པའི་བྱེ་བྲག་བསྟན་ཏེ། དེ་ལྟ་བུའི་གཟུགས་དང་སྒྲ་དང་དྲི་དང་རེག་པ་དང་ལྡན་པའི་ལྷ་ལ་སོགས་པ་འདི་ན་ཡོད་དོ་ཞེས་སྒྲོགས་ཤིང་གོ་བར་བྱེད་ན་ཉེས་བྱས་སུ་འགྱུར་རོ་ཞེས་བྱ་བར་སྦྱར་རོ། །ནོར་ཅན་དང་ཚོང་དཔོན་དང་དེ་དད་དཔོན་ལ་སོགས་པ་ལྟ་བུའོ་ཞེས་བྱ་བ་ནི། ལྷ་ལ་སོགས་པའི་གཟུགས་ཀྱི་བྱེ་བྲག་བསྟན་ཏོ། །སོགས་པ་ཞེས་བྱ་བའི་སྒྲས་ནི་རྒྱལ་པོ་དང་བློན་པོ་དག་ལྟ་བུ་ཡང་བསྡུའོ། །པི་ཝང་ལ་སོགས་པའི་སྒྲ་ལྟ་བུ་ཞེས་བྱ་བ་ནི། ལྷ་ལ་སོགས་པའི་སྒྲའི་བྱེ་བྲག་བསྟན་ཏོ། །སོགས་པ་ཞེས་བྱ་བའི་སྒྲས་ནི་འོད་མ་དང་བ་ལ་རི་ལ་སོགས་པའི་སྒྲ་ལྟ་བུ་དག་ཀྱང་བསྡུའོ། །ཨ་ཀ་རུ་དང་ཙན་དན་དང་གུར་ཀུམ་དང་ཏ་མ་ལའི་ལོ་མའི་དྲི་ལྟ་བུ་ཞེས་བྱ་བས་ནི། ལྷ་ལ་སོགས་པའི་དྲིའི་བྱེ་བྲག་བསྟན་ཏོ། །དར་དང་རས་ཡུག་ཆེན་དང་བེའུ་རས་དང་དར་ལ་དང་
དུ་གུ་ལའི་རས་དང་ཀོ་ཏམ་པའི་རས་ཀྱི་རེག་པ་ལྟ་བུ་ཞེས་བྱ་བས་ནི། ལྷ་ལ་སོགས་པའི་རེག་པའི་བྱེ་བྲག་བསྟན་ཏོ། །ཉིད་སྒྲོགས་པའོ་ཞེས་བྱ་བ་ནི། ལྷ་ལ་སོགས་པའི་བྱེ་བྲག་དེ་ལྟ་བུ་དང་ལྡན་པ་ཉིད་འདི་ན་ཡོད་དོ་ཞེས་གོ་བར་བྱེད་པའོ། །འདིར་ལྷ་ལ་སོགས་པ་སྨོས་པ་ནི་མཚོན་པ་ཙམ་དུ་ཟད་དེ་ཡི་དགས་དབང་ཆེ་བར་གྲགས་པ་དག་ཀྱང་བསྡུའོ། །སྐྱོ་བར་བྱ་བའི་ཆེད་ཉིད་ནི་མ་གཏོགས་སོ་ཞེས་བྱ་བ་ནི། གལ་ཏེ་སྐྱོ་བར་བྱ་བའི་ཆེད་ཉིད་དུ་རྣམ་པ་འདི་ལྟ་བུ་དག་བྱེད་ན་དེའི་ཚེ་ཉེས་པ་མེད་དོ། །དེའི་ཕྱིར་སྐྱོ་བར་བྱ་བའི་ཆེད་ཉིད་དུ་སེམས་ཅན་དམྱལ་བ་དང་དུད་འགྲོ་དང་ཡི་དགས་ཀྱི་གཏམ་ལ་སོགས་པ་ལ་ནི་ལྟུང་བ་མེད་དོ་ཞེས་བྱ་བ་ནི། གང་གི་ཕྱིར་སྐྱོ་བར་བྱ་བའི་ཆེད་ཉིད་མ་གཏོགས་པ་དེའི་ཕྱིར་འདི་ལ་ཡང་ལྟུང་བ་མེད་དོ་ཞེས་ཕན་པར་བསྟན་ན་སེམས་ཅན་དམྱལ་བའི་གཏམ་ལ་སོགས་པས་འགའ་ཞིག་སྡངས་པར་གྱུར་ཀྱང་ལྟུང་བ་མེད་དོ། །སྡངས་པར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་སྦེད་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། རབ་ཏུ་བྱུང་བ་འདི་ལ་དབང་བའི་ལྷུང་བཟེད་དང་ཆོས་གོས་དང་དྲྭ་བ་དང་ཕོར་བུ་དང་སྐ་རགས་ལ་སོགས་པ་དང་དགེ་སྦྱོང་གི་འཚོ་བའི་ཡོ་བྱད་སྦེད་དམ་སྦེད་དུ་བཅུག་ནའོ་ཞེས་བྱ་བར་སྨྲས་ཏེ། བཅོམ་ལྡན་འདས་ཀྱིས་གསུངས་པའི་རབ་ཏུ་བྱུང་བ་འདི་པ་དགེ་སློང་དང་དགེ་སློང་མ་དང་དགེ་སློང་དང་དགེ་ཚུལ་དང་དགེ་ཚུལ་མ་ཞེས་བྱ་བའི་གང་ཟག་གང་དག་ལ་ཡོད་པ་དེ་དག་ནི་རབ་ཏུ་བྱུང་བ་འདི་པ་ཞེས་བྱ་བའོ། །རབ་ཏུ་བྱུང་བ་འདི་པ་དེ་དག་དབར་བའི་ལྷུང་བཟེད་ལ་སོགས་པ་དགེ་སྦྱོང་གི་འཚོ་བའི་ཡོ་བྱད་ཚད་དང་ལྡན་པ་རུང་བ་རང་གིས་སྦེད་དམ་གཞན་སྦེད་དུ་འཇུག་ན་ཁ་ན་མ་ཐོ་བ་འདིར་འགྱུར་རོ། །ཚད་དང་ལྡན་པ་མ་ཡིན་པ་དང་རུང་བ་མ་ཡིན་པ་ལ་ནི་ཉེས་བྱས་སོ། །ཕན་པར་འདོད་པས་ནི་མ་གཏོགས་སོ་ཞེས་བྱ་བ་ནི། ཕན་པའི་བསམ་བས་སྦེད་དམ་སྦེད་དུ་བཅུག་པ་ལ་ནི་ལྟུང་བ་མེད་དོ། །སྦེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་བྱིན་པས་ཉེ་བར་འཚོ་བའི་
ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་ལ་གོས་བླང་བ་མེད་པར་བྱིན་གྱི་དེས་གནང་བ་མེད་པར་སྤྱོད་ནའོ་ཞེས་བྱ་བ་སྨྲས་ཏེ། དགེ་སློང་གིས་དགེ་སློང་ལ་གོས་ཕྱིར་བླང་བ་མེད་པར་གཏན་བྱིན་ནས་དེའི་འོག་ཏུ་དེས་གནང་བའི་གདེང་མེད་པར་སྤྱོད་ན་ཁ་ན་མ་ཐོ་བ་འདིར་འགྱུར་རོ། །རང་གི་བློས་ཉེ་བར་འཚོ་བ་ལས་ལྟུང་བྱེད་འདིར་འགྱུར་གྱི། གཞན་གྱི་བློས་ཉེ་བར་འཚོ་བ་ནི་མ་བྱིན་པར་ལེན་པ་དང་ལྡན་པའི་སྦོམ་པོར་འགྱུར་ཏེ། བརྙན་པ་ངེས་པར་བྱིན་པ་ཉིད་བཞིན་དུ་ཉེ་བར་སྤྱོད་ན་སྦྱོར་བ་བཞིན་ནོ་ཞེས་བྱ་བའི་རྗེས་སུ་འབྲང་བའི་ཕྱིར་རོ། །དེ་བས་ན་ང་ཉིད་ཀྱིས་བྱིན་པ་ང་ཉིད་སྤྱོད་དོ་ཞེས་རྗེས་སུ་གནང་བ་མེད་པར་སྤྱོད་ན་ལྟུང་བྱེད་དོ། །གོས་ལས་གཞན་པའི་ཡོ་བྱད་སྤྱོད་པ་ལ་ནི་ཉེས་བྱས་སོ། །འདིར་གཞུང་ནི་བཙུན་པ་རེ་ཞིག་དགེ་སློང་གིས་གོས་མ་གཏོགས་པ་དེ་ལས་གཞན་པའི་དགེ་སློང་གི་ཡོ་བྱད་སྩལ་ནས། སླར་མ་བླངས་པར་སྤྱོད་ན་ཉེས་བྱས་ཅིར་འགྱུར། ཉེས་བྱས་སོ་ཞེས་གསུངས་པ་ཡིན་ནོ། །ཅི་བསམ་པ་གང་ཡང་རུང་བས་སྤྱོད་པ་ལའམ་ཞེ་ན་དེའི་ཕྱིར། གལ་ཏེ་གཞི་དེས་དགའ་བར་མི་འགྱུར་ནའོ་ཞེས་བྱ་བ་དེ་སྨྲས་ཏེ། གལ་ཏེ་བདག་གིས་སྤྱད་པའི་རྒྱུས་དགེ་སློང་གང་ལ་བྱིན་པ་དེ་དག་དགའ་བར་འགྱུར་རོ་སྙམ་པའི་བསམ་པ་དེ་ལྟ་བུ་ཡོད་ན་ཉེས་པ་མེད་དེ་ཡིད་གཅུགས་པས་སྤྱོད་པའི་ཕྱིར་རོ། །བྱིན་པས་ཉེ་བར་འཚོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་སྐུར་པ་འདེབས་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། སྐུར་པ་འདེབས་པར་འདོད་པས་དགེ་སློང་ལ་འདུ་ཤེས་བསྒྱུར་ཏེ། དགེ་འདུན་ལྷག་མས་སྐུར་པ་འདེབས་ནའོ་ཞེས་བྱ་བ་སྨྲས་ཏེ། དགེ་འདུན་ལྷག་མའི་ལྟུང་བས་སྐུར་པ་འདེབས་པར་འདོད་པས་དགེ་སློང་ལ་བདེན་པའི་ཚོར་བ་སྦས་ཤིང་འདུ་ཤེས་བསྒྱུར་ཏེ་དགེ་འདུན་ལྷག་མ་བརྫུན་པས་སྐུར་པ་གོ་བར་བྱས་ན་ཁ་ནམ་ཐོ་བ་འདིར་འགྱུར་རོ། །ཅི་གསལ་བར་བརྗོད་པ་འབའ་ཞིག་ལའམ་ཞེ་ན་དེའི་ཕྱིར། བག་ཙམ་གྱིས་ཀྱང་ངོ་ཞེས་བྱ་བ་སྨྲས་ཏེ། འདིར་གཞུང་ནི་བཙུན་པ་དགེ་སློང་གིས་རེ་ཞིག་བསླབ་པ་སྩལ་བ་ལ་བག་ཙམ་གྱི་དགེ་འདུན་ལྷག་མས་སྐུར་པ་འདེབས་ན་ལྟུང་བ་ཅིར་
འགྱུར། ལྟུང་བྱེད་དོ་ཞེས་གསུངས་པ་ཡིན་ནོ། །སྐུར་པ་འདེབས་པའི་ལྟུང་བྱེད་དོ་ཞེས་བྱ་བ་དེ་བ་ཤད་ཟིན་ཏོ།། །།བུད་མེད་དང་ལྷན་ཅིག་འགྲོ་བའི་ལྟུང་བྱེད་སྨྲ་བར་འདོད་ནས། སྔར་ལམ་དུ་འགྲོ་བ་ལ་བུད་མེད་བྱེད་པ་པོ་ཉིད་དོ་ཞེས་གང་སྨོས་པ་དེ་ལ་ཅི་གཞན་གང་ཡང་རུང་བ་ལ་བུད་མེད་བྱེད་པ་པོ་ཉིད་ཡིན་ནམ་ཞེ་ན། དེའི་ཕྱིར་འདོད་པས་ལམ་དུ་འགྲོ་ནའོ་ཞེས་བྱ་བ་སྨྲས་ཏེ། རང་དགར་ལམ་དུ་འགྲོ་ན་ཁ་ན་མ་ཐོ་བ་འདིར་འགྱུར་གྱི། གཞན་གྱི་དབང་གིས་འགྲོ་བ་ལ་ནི་མ་ཡིན་ནོ། །ལམ་ཇི་སྲིད་དུ་འགྲོ་བ་ལ་ཞེ་ན་དེའི་ཕྱིར་རྒྱང་གྲགས་རེ་རེར་རོ་ཞེས་བྱ་བ་སྨྲས་ཏེ། རྒྱང་གྲགས་རེ་རེར་རིག་པའི་སྐྱེས་པ་མེད་པར་བུད་མེད་དང་ལྷན་ཅིག་རང་དགར་ལམ་དུ་འགྲོ་བ་ལ་བུད་མེད་བྱེད་པ་པོ་ཉིད་ཡིན་ནོ། །དེའི་ཕྱིར། རེ་རེར་ནི་ཉེས་བྱས་སོ་ཞེས་བྱ་བ་ནི། རྒྱང་གྲགས་ཀྱི་ཕྱེད་ཀྱི་རེ་རེར་ནི་བུད་མེད་ཉེས་བྱས་ཀྱི་བྱེད་པ་པོ་ཉིད་ཡིན་ནོ། །ཅི་བུད་མེད་ཀྱི་གནས་སྐབས་ཐམས་ཅད་དགེ་སློང་གི་གནས་སྐབས་ཐམས་ཅད་ལ་བྱེད་པ་པོ་ཉིད་ཡིན་ནམ་ཞེ་ན་དེའི་ཕྱིར། བསེལ་བྱེད་པ་ནི་མ་གཏོགས་སོ་ཞེས་བྱ་བ་སྨྲས་ཏེ། གལ་ཏེ་བུད་མེད་དགེ་སློང་ལམ་དུ་འགྲོ་བའི་བསེལ་བྱེད་པ་ནི་མ་གཏོགས་སོ། །ཕོངས་པ་ལ་སོགས་པར་གྱུར་པ་དེ་ལ་བསེལ་བྱེད་པ་ལ་ནི་ཉེས་པ་མེད་པར་འགྱུར་རོ། །དེས་ལམ་ནོར་བ་ལམ་དུ་འཛུད་པར་བྱེད་པ་ཡང་ངོ་ཞེས་བྱ་བ་ནི། དགེ་སློང་དེས་ལམ་ནོར་བ་ཡང་ལམ་དུ་འཛུད་པར་བྱེད་པའི་བུད་མེད་ཀྱང་མ་གཏོགས་སོ། །མི་ནུས་པ་འཁྲིད་པ་ཡང་ངོ་ཞེས་བྱ་བ་ནི། དགེ་སློང་ལམ་དུ་འགྲོ་མི་ནུས་པ་བཀྲི་བའི་ཕྱིར་གྲོགས་བྱེད་པའི་བུད་མེད་ཀྱང་མ་གཏོགས་སོ། །བུད་མེད་དང་ལྷན་ཅིག་འགྲོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་རྐུན་མ་དང་ལྷན་ཅིག་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་གྲོང་འཇོམས་པར་བྱེད་པའི་ཆོན་རྐུན་པ་དག་གམ་ཤོ་གམ་འདྲལ་པའི་ཚོང་པ་དག་དང་ལྷན་ཅིག་འགྲོ་བ་ལའོ་ཞེས་བྱ་བ་སྨྲས་ཏེ། བསླབ་པའི་གཞི་སྔ་མར་འདོད་པས་འགྲོ་ནའོ། །རྒྱང་གྲགས་རེ་རེར་རོ། །དེའི་ཕྱེད་རེ་རེར་ནི་ཉེས་བྱས་སོ། །བསེལ་བྱེད་པ་ནི་མ་གཏོགས་
སོ། །དེས་ལམ་ནོར་བ་ལམ་དུ་འཛུད་པར་བྱེད་པ་ཡང་ངོ༌། །མི་ནུས་པ་འཁྲིད་པ་ཡང་ཞེས་ཇི་སྐད་བསྟན་པ་ཐམས་ཅད་འདིར་ཡང་སྦྱར་བར་བྱའོ། །ཟོལ་པ་དང་རྐུ་ཐབས་སུ་རབ་ཏུ་བྱུང་བ་དག་ནི་ལྷན་ཅིག་འགྲོ་བ་དག་ལ་ནི་ཉེས་བྱས་སོ་ཞེས་བྱ་བ་ལ། ཟོལ་པ་ཞེས་བྱ་བ་ནི་གཡོ་སྒྱུས་ཐ་སྙད་བྱེད་པའོ། རྐུ་ཐབས་སུ་རབ་ཏུ་བྱུང་བ་ཞེས་བྱ་བ་ནི། རང་གི་རྟགས་བླངས་པ་སྟེ། ལས་ཉམས་སུ་མྱོང་བ་མ་ཐོབ་པའི་དགེ་སློང་དང་དགེ་ཚུལ་ལ་སོགས་པ་རབ་ཏུ་བྱུང་བའི་རྟགས་ཅན་ཐམས་ཅད་དོ། །འདིར་ཡང་འདོད་པས་ལམ་དུ་འགྲོ་ནའོ་ཞེས་བྱ་བ་ལ་སོགས་པ་སྔར་བསྟན་པ་ཐམས་ཅད་སྦྱར་བར་བྱའོ། །རྒྱང་གྲགས་རེ་རེར་ནི་ཉེས་བྱས་སོ། །རྒྱང་གྲགས་ཕྱེད་ཕྱེད་དུ་ནི་ཉེས་བྱས་ཕྲ་མོའོ། །འདིར་གཞུང་ནི་ཞུ་བ་ལས་ཟོལ་པ་དག་དང་ཚོང་པ་རྐུན་མ་དག་དང་ལྷན་ཅིག་ལམ་དུ་འགྲོ་ན་ཉེས་བྱས་སོ། །རྐུ་ཐབས་སུ་རབ་ཏུ་བྱུང་བ་དག་དང་ལྷན་ཅིག་ལམ་དུ་འགྲོ་ན་ཉེས་བྱས་སོ་ཞེས་གསུངས་པ་ཡིན་ནོ། །རྐུན་མ་དང་ལྷན་ཅིག་འགྲོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ལོ་ཉི་ཤུ་མ་ལོན་པ་བསྙེན་པར་རྫོགས་པར་བྱེད་པའི་ལྟུང་བྱེད་ལ་བྱེད་པ་པོ་གང་ཡིན་ཞེ་ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། བསྟེན་པར་རྫོགས་པར་བྱ་བ་ལོ་ཉི་ཤུ་མ་ལོན་པ་ཉིད་ལའོ་ཞེས་བྱ་བ་སྨྲས་ཏེ། བསྙེན་པར་རྫོགས་པར་བྱ་བ་གང་ཡིན་པ་དེ་གལ་ཏེ་ལོ་ཉི་ཤུ་མ་ལོན་པ་ཉིད་ཡིན་ལ། དགེ་སློང་གིས་ཀྱང་ལོ་ཉི་ཤུ་མ་ལོན་པ་ཞེས་བྱ་བར་ཤེས་པར་གྱུར་ན་ཡུལ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཡན་ལག་གང་གིས་བསྙེན་པར་རྫོགས་པར་བྱེད་པ་ལ་ཁ་ན་མ་ཐོ་བ་འདིར་འགྱུར་ཞེ་ན་དེའི་ཕྱིར། མཁན་པོ་ཉིད་ཀྱིས་སོ་ཞེས་བྱ་བ་སྨྲས་ཏེ། འདི་ལྟར་རྣམ་པར་འབྱེད་པ་ལས་ཚིག་འགལ་ཚབས་ཅན་དུ་འགྱུར་རོ་ཞེས་གསུངས་མོད་ཀྱི། འོན་ཀྱང་མཁན་པོ་ལ་ནི་ལྟུང་བྱེད་དོ། །འདིར་ལྷག་མ་རྣམས་ལ་ཉེས་བྱས་སུ་འགྱུར་བར་ནི་གླེང་གཞི་དང་མོད་
ལས་ཀྱང་སྣང་ངོ༌། །འདིར་གཞུང་ནི་སངས་རྒྱས་བཅོམ་ལྡན་འདས་ཀྱིས་ཚེ་དང་ལྡན་པ་མཽད་གལ་གྱི་བུ་ཆེན་པོ་ལ་རྨས་ཏེ། མཽད་གལ་གྱི་བུ་ཁྱོད་ཀྱིས་ལོ་ཉི་ཤུ་མ་ལོན་པའི་གང་ཟག་དགེ་སློང་གི་དངོས་པོའི་ཕྱིར་བསྙེན་པར་རྫོགས་པར་བྱས་པ་བདེན་ནམ། བཙུན་པ་མད་དོ། །སངས་རྒྱས་བཅོམ་ལྡན་འདས་ཀྱིས་སྨད་ནས། ངའི་ཉན་ཐོས་རྣམས་ཀྱིས་འདུལ་བ་ལ་བསླབ་པའི་གཞི་འདི་ལྟར་གདོན་པར་བྱ་སྟེ། ཡང་དགེ་སློང་གང་ཟག་ལོ་ཉི་ཤུ་མ་ལོན་པ་དགེ་སློང་གི་དངོས་པོར་བསྙེན་པར་རྫོགས་པར་བྱེད་ན་ལྟུང་བྱེད་དོ་ཞེས་གསུངས་པ་ཡིན་ཏེ། མཁན་པོ་ཉིད་ཀྱིས་བསྙེན་པར་རྫོགས་པར་བྱེད་པའི་དབང་དུ་མཛད་ནས། འདི་བཅའ་བ་མཛད་དོ། །ཅི་ཞིག་བྱས་ནས་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། བསྙེན་པར་རྫོགས་པར་བྱས་ནའོ་ཞེས་བྱ་བ་སྨྲས་སོ། །དེས་དེ་ལ་ལོན་པ་ཉིད་མི་དྲི་བར་མི་བྱའོ་ཞེས་བྱ་བ་ནི། མཁན་པོ་དེས་བསྙེན་པར་རྫོགས་པར་བྱ་བ་དེ་ལ་ལོ་ཉི་ཤུ་ལོན་པ་ཉིད་མི་དྲི་བར་མི་བྱ་སྟེ། དྲི་བ་ཁོ་ནར་བྱའོ། །གཞན་གྱིས་ཀྱང་མི་བྱའོ་ཞེས་བྱ་བ་ནི། མཁན་པོ་ལས་གཞན་པ་བསྙེན་པར་རྫོགས་པར་བྱེད་པ་དག་གིས་ཀྱང་བསྙེན་པར་རྫོགས་པར་བྱ་བ་དེ་ལོ་ཉི་ཤུ་ལོན་པ་ཉིད་མི་དྲི་བར་མི་བྱའོ། །ངེས་པར་མི་ཤེས་པས་དེ་བསྙེན་པར་རྫོགས་པར་མི་བྱའོ་ཞེས་བྱ་བ་ནི་དགེ་འདུན་དུ་གྱུར་པའི་དགེ་སློང་དག་གིས་བསྙེན་པར་རྫོགས་པར་བྱ་བ་དེ་ལ་ལོ་ཉི་ཤུ་ལོན་པ་ཉིད་དུ་ངེས་པར་མི་ཤེས་པར་བསྙེན་པར་རྫོགས་པར་མི་བྱའོ། །རྣམ་པ་ཐམས་ཅད་དུ་ལོ་ཉི་ཤུ་ལོན་པ་ལ་ནི་བསྙེན་པར་རྫོགས་པ་འཆགས་སོ་ཞེས་བྱ་བ་ནི། གལ་ཏེ་བསྙེན་པར་རྫོགས་པར་བྱ་བ་དེ་ཡང་དག་པར་ལོ་ཉི་ཤུ་ལོན་པ་ཉིད་ཡིན་ན་ནི་དེའི་ཚེ་འདུ་ཤེས་གཙོ་ཆེར་བྱེད་པ་པོ་ཉིད་མེད་དེ་འདི་ལྟར་བསྙེན་པར་རྫོགས་པར་བྱ་བ་བསྙེན་པར་རྫོགས་པར་བྱེད་པ་དག་ལོ་ཉི་ཤུ་མ་ལོན་པ་ཉིད་དུ་འདུ་ཤེས་སམ་ཡིད་གཉིས་ཟ་ན་མ་དྲིས་སམ་མ་བརྗོད་པར་རྣམ་པ་ཐམས་ཅད་དུ་ལོ་ཉི་ཤུ་མ་ལོན་པ་ཉིད་དུ་འདུ་ཤེས་སུ་ཟིན་ཀྱང་གང་ཟག་ལོ་ཉི་ཤུ་ལོན་པ་ལ་བསྙེན་པར་རྫོགས་པར་འཆགས་ཏེ། ལོ་ཉི་ཤུ་ལོན་པའི་ཞིང་ཉིད་ལ་ཉམས་པར་བྱ་བར་མི་ནུས་པའི་ཕྱིར་རོ། །ཅིག་ཤོས་ལ་ནི་ལོན་པར་འདུ་
ཤེས་པ་ཉིད་ནའོ་ཞེས་བྱ་བ་ནི། ཅིག་ཤོས་ལོ་ཉི་ཤུ་མ་ལོན་པའི་གང་ཟག་ལ་ནི་ལོ་ཉི་ཤུ་ལོན་པ་ཉིད་དུ་འདུ་ཤེས་ན་བསྙེན་པར་རྫོགས་པ་འཆགས་ཏེ་འདི་ལ་ནི་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །མི་ཤེས་པ་དང་མི་དྲན་པ་དང་ཡིད་གཉིས་ཟ་བ་དག་ལ་ཡང་ངོ་ཞེས་བྱ་བ་ཡང་ཅིག་ཤོས་ལ་བསྙེན་པར་རྫོགས་པར་འཆགས་སོ་ཞེས་བྱ་བར་སྦྱར་རོ། །མི་ཤེས་པ་ཞེས་བྱ་བ་ནི། ལོ་གྲངས་མི་ཤེས་པའོ། །མི་དྲན་པ་ཞེས་བྱ་བ་ནི་ལོ་ཚིགས་མི་དྲན་པའོ། །ཡིད་གཉིས་ཟ་བ་ཞེས་བྱ་བ་ནི་ལོ་ཉི་ཤུ་ལོན་ནམ་མ་ལོན་སྙམ་དུ་ཡིད་གཉིས་ཟ་བ་སྟེ་དེ་དག་ལ་ཡང་གང་ཟག་ལོ་ཉི་ཤུ་མ་ལོན་པ་ལོ་ཉི་ཤུ་ལོན་པ་ཉིད་དུ་འདུ་ཤེས་པ་ཉིད་ཡིན་ན་གལ་ཏེ་མཁན་པོ་ལ་སོགས་པ་བསྙེན་པར་རྫོགས་པར་བྱེད་པ་དག་ལ་མི་ཤེས་པ་དང་མི་དྲན་པ་དང་ཡིད་གཉིས་ཟ་བ་དག་ཡོད་དུ་ཟིན་ཀྱང་བསྙེན་པར་རྫོགས་པར་བྱ་བ་ལ་བསྙེན་པར་རྫོགས་པ་འཆགས་སོ། །འདི་ལྟར་ལོ་ཉི་ཤུ་མ་ལོན་པ་ཞིང་ཉིད་ཡིན་ཞེ་ན། འདིར་རྣམ་པ་གཉིས་ཀྱི་ཞིང་ཉིད་དུ་རྣམ་པར་གཞག་སྟེ། དངོས་པོ་དང་ཡིད་གཉིས་སོ། །དེ་ལ་དངོས་པོ་ལས་ནི་ཞིང་ཉིད་དུ་རྣམ་པར་གཞག་པ་ནི་དེས་ལོ་ཉི་ཤུ་ལོན་པ་ཉིད་ཡིན་ནོ། །ཡིད་ཀྱིས་ཞིང་ཉིད་དུ་རྣམ་པར་གཞག་པ་ནི་ཡང་དག་པར་ལེན་པར་བྱེད་པའི་ཡིད་ཀྱི་དབང་གིས་ཞིང་ཉིད་ཡིན་པ་སྟེ། གལ་ཏེ་བདག་ཉིད་ལོ་ཉི་ཤུ་ལོན་པར་འདུ་ཤེས་པ་ཡིན་པའོ། །བསམ་པའི་དབང་གིས་ཀྱང་སྡོམ་པའི་ཞིང་ཉིད་མཐོང་སྟེ། དཔེར་ན་དགེ་བའི་རྩ་བ་ཕྱིར་འབྱོར་པ་ལྟ་བུའོ། །རྐུ་ཐབས་སུ་གནས་པ་ཉིད་ཀྱང་དེ་དང་འདྲ་བ་ཉིད་དུ་རིག་པར་བྱ་སྟེ། གལ་ཏེ་བདག་ཉིད་ཀྱི་ཆོ་ག་འཁྲུགས་པ་ལ་སོགས་པའི་ཉེས་པ་འགའ་ཞིག་གིས་སྡོམ་པ་མ་ཆགས་པ་ཉིད་དུ་ཤེས་ནས་དེའི་ཚེ་རྐུ་ཐབས་སུ་གནས་པ་ཉིད་སྐྱེ་བར་འགྱུར་ལ། གལ་ཏེ་མི་ཤེས་ན་ནི་རྐུ་ཐབས་སུ་གནས་པ་ཉིད་སྐྱེ་བར་མི་འགྱུར་ཏེ། འདི་ལྟར་རྐུ་པའི་བསམ་པས་དགེ་འདུན་གྱི་ཁོངས་སུ་གཏོགས་པར་བྱེད་པ་མེད་པའི་ཕྱིར་རོ། །ཤེས་ན་ནི་དེ་ཞིག་གོ་ཞེས་བྱ་བ་ནི། ལོ་ཉི་ཤུ་མ་ལོན་པར་བསྙེན་པར་རྫོགས་པས་ལོ་ཉི་ཤུ་མ་ལོན་པར་ཤེས་ན་སྔར་སྡོམ་པ་འཆགས་པ་དེ་ཞིག་གོ །ཅི་ཆོ་ག་གཅིག་ཏུ་ཟད་དམ་ཞེ་ན། དེའི་ཕྱིར་
གལ་ཏེ་སྐྱེས་པ་ན་མ་ལོན་པའི་འོ་ཞེས་བྱ་བ་སྨྲས་ཏེ། བསྙེན་པར་རྫོགས་པའི་འོག་ཏུ་བདག་ཉིད་ལོ་ཉི་ཤུ་མ་ལོན་ནོ་སྙམ་པའི་གནས་སྐབས་དེའི་ཚེ་གལ་ཏེ་དགེ་སློང་དེས་ལོ་ཉི་ཤུ་ལོན་པར་གྱུར་ན་དེའི་ཚེ་དེའི་སྡོམ་པ་སྔར་ཆགས་པ་དེ་ཞིག་གོ །གལ་ཏེ་བདག་ཉིད་ལོ་ཉི་ཤུ་མ་ལོན་པར་བསྙེན་པར་རྫོགས་སོ་སྙམ་པའི་འདུ་ཤེས་སྐྱེས་པའི་གནས་སྐབས་དེའི་ཚེ་ན་དེས་ལོ་ཉི་ཤུ་ལོན་པར་གྱུར་ན་ནི་དེའི་སྡོམ་པ་སྔར་ཆགས་པ་དེ་མི་འཇིག་གོ །བསམས་པ་ཙམ་གྱི་དབང་གིས་ཀྱང་སྡོམ་པ་གཏོང་བ་སྣང་སྟེ། དཔེར་ན་དགེ་བའི་རྩ་བ་ཆད་པའི་ཕྱིར་རོ་ཞེས་བྱ་བ་ལྟ་བུའོ། །ཅི་བསྙེན་པར་རྫོགས་པའི་གནས་སྐབས་ན་བདག་ཉིད་ལོ་ཉི་ཤུ་མ་ལོན་པ་བསྙེན་པར་རྫོགས་པར་ཤེས་པའི་ཚེ་དེའི་གནས་སྐབས་ཕན་ཆད་ལོ་ཉི་ཤུ་ལོན་ནམ་མ་ལོན་བརྩི་བ་སྟེ། དང་པོ་མངལ་གྱི་གནས་ནས་བཙས་པ་ནས་བརྩམས་ཏེ། དེ་ཚུན་ཆད་ནས་བརྩི་བར་བྱ་བའམ་འོན་ཏེ་དང་པོ་མངལ་དུ་ཞུགས་པ་ཚུན་ཆད་ནས་བརྩི་བར་བྱ་ཞེ་ན་དེའི་ཕྱིར། མངལ་ན་གནས་པ་དང་ཤོལ་གྱི་ཟླ་བ་དང་ཡང་བཅས་ཏེའོ་ཞེས་བྱ་བ་སྨྲས་ཏེ། མངལ་ན་གནས་པའི་ཟླ་བ་དག་དང་ཤོལ་གྱི་ཟླ་བ་ལྷག་མ་དག་དང་ཡང་བཅས་ཏེ། དེའི་ལོ་ཉི་ཤུ་ཉིད་བརྩི་བར་བྱའོ། །བསྙེན་པར་རྫོགས་པར་འདོད་པའི་གནས་སྐབས་སུ་ནི་བརྩི་བར་མི་བྱ་སྟེ། གལ་ཏེ་བརྩི་བར་བྱེད་ན་བསྙེན་པར་རྫོགས་པ་ནི་འཆགས་ལ་བསྙེན་པར་རྫོགས་པར་བྱེད་པ་དག་ལ་ནི་འགལ་ཚབས་ཅན་དུ་འགྱུར་རོ། །མ་ལོན་པ་བསྙེན་པར་རྫོགས་པར་བྱེད་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་ས་རྐོ་བའི་ཁ་ན་མ་ཐོ་བར་འགྱུར་ཞེ་ན་དེའི་ཕྱིར་རྐོའམ་རྐོར་བཅུག་པ་ལའོ་ཞེས་བྱ་བ་སྨྲས་ཏེ། རང་གིས་ས་རྐོའམ་གཞན་རྐོར་བཅུག་པ་ལའོ། །རྐོ་བ་ཞེས་བྱ་བ་ནི། ས་ལ་སོགས་པ་དེ་ཙམ་ཞིག་ས་ཕྱི་མོ་ལས་ཕྲལ་ཞིང་ཐ་དད་པར་བྱས་པ་གང་ཡིན་བའོ། །དེའི་ཕྱིར་འདིར་ནི་ལན་རེ་བཏབ་པ་ལ་སྦྱོར་བ་ཐ་དད་པར་རིག་པར་བྱ་སྟེ། འདིར་སྦྱོར་བ་ཐ་དད་པ་རེ་རེ་ལས་ལྟུང་བ་ཐ་དད་པ་རེ་རེར་རྣམ་པར་བཞག་གོ །ཅི་ཞིག་རྐོའམ་རྐོར་བཅུག་པ་ལ་ཞེ་ན་དེའི་ཕྱིར་སའི་སའོ་ཞེས་བྱ་བ་སྨྲས་ཏེ། སའི་རང་བཞིན་གྱི་ས་ཡིན་གྱི་བྱེ་མ་དང་རྡོ་ཐལ་
རྒྱུ་དང་རྡོ་ལ་སོགས་པའི་རང་བཞིན་གྱི་མ་ཡིན་ནོ་ཞེས་བྱ་བའི་ཐ་ཚིག་གོ །ཅི་དུས་ཐམས་ཅད་དུ་དེ་གཉིས་ཁ་ན་མ་ཐོ་བ་འདིར་འགྱུར་ཞེ་ན་དེའི་ཕྱིར། ལག་གི་བླས་རྒྱུ་སྐར་གྱི་སྦྱོར་བས་རུང་བར་བྱེད་པ་མེད་ན་ཐུར་མ་སོར་བཞི་ཙམ་འཛུགས་པ་མ་གཏོགས་སོ་ཞེས་བྱ་བ་སྨྲས་ཏེ། གལ་ཏེ་དགེ་སློང་ལག་གི་བླས་རྒྱུ་སྐར་གྱི་སྦྱོར་བས་གཙུག་ལག་ཁང་ལ་སོགས་པའི་ཐིག་འདེབས་པའི་ཚེ་དུས་ལས་ཡོལ་དུ་མི་རུང་ལ་དེའི་ཚེ་ན་བསྙེན་པར་མ་རྫོགས་པ་རུང་བར་བྱེད་པའི་འོས་གཞན་མེད་ན་དེའི་ཚེ་ཐུར་མ་སོར་བཞི་ཙམ་གྱི་ཚད་ས་ལ་འཛུགས་པ་ནི་མ་གཏོགས་ཏེ། དེ་ལ་ནི་ཉེས་པ་མེད་དོ་ཞེས་བྱ་བའི་ཐ་ཚིག་གོ །སའི་ས་ཇི་ལྟ་བུ་ཞིག་ཁ་ན་མ་ཐོ་བ་ཇི་ལྟ་བུར་འགྱུར་ཞེ་ན་དེའི་ཕྱིར། གལ་ཏེ་རང་བཞིན་ཅན་ཡིན་ན་དངོས་གཞིའོ་ཞེས་བྱ་བ་སྨྲས་ཏེ། གལ་ཏེ་རང་བཞིན་དུ་ཆགས་པའི་ས་ཡིན་ན་དེ་རྐོས་སམ་རྐོར་བཅུག་ན་དངོས་གཞིར་འགྱུར་རོ། །རང་བཞིན་ཅན་ཞེས་བྱ་བ་ནི་འཐས་པར་གནས་པའོ། །གལ་ཏེ་མ་ཡིན་ན་ཉེས་བྱས་སོ་ཞེས་བྱ་བ་ནི། རང་བཞིན་དུ་ཆགས་པའི་ས་མ་ཡིན་ན་དེ་རྐོས་སམ་རྐོར་བཅུག་ན་ཉེས་བྱས་ཏེ། འཐས་པ་མ་ཡིན་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །རང་བཞིན་ཅན་ཞེས་བྱ་བ་ནི། ཇི་ལྟ་བུ་ཞིག་ཡིན་རང་བཞིན་ཅན་མ་ཡིན་པ་ཞེས་བྱ་བ་ནི་ཇི་ལྟ་བུ་ཞིག་ཡིན་ཞེ་ན་དེའི་ཕྱིར། སྔ་མ་ཤོས་ནི་ཟླ་བ་གསུམ་ལོན་པའི་འཐས་པའོ་ཞེས་བྱ་བ་སྨྲས་ཏེ། སྔ་མ་ཤོས་རང་བཞིན་ཅན་ཞེས་བྱ་བ་ནི་དང་པོ་འཐས་པ་ལས་ཞིག་པའི་ཡན་ལག་རྣམས་ཟླ་བ་གསུམ་ལོན་ཅིང་ཕྱིར་འཐས་ཏེ་འབྱོར་པར་གྱུར་པ་དེའི་ཚེ་ན་རང་བཞིན་ཅན་ཞེས་བྱ་བའོ། །ཅི་དུས་ཐམས་ཅད་དུ་ཡུན་དེ་སྲིད་ཀྱིས་རང་བཞིན་ཅན་དུ་འགྱུར་རམ་ཞེ་ན་དེའི་ཕྱིར། གལ་ཏེ་ཆར་ཆུ་ཞོད་ནའོ་ཞེས་བྱ་བ་སྨྲས་ཏེ། གང་གི་ཚེ་ནམ་ཞོད་པར་གྱུར་ཅིང་ཡང་དང་ཡང་དུ་ཆར་འབབ་པར་གྱུར་པ་དེའི་ཚེ་ན་ཟླ་བ་གསུམ་གྱིས་ས་རང་བཞིན་ཅན་དུ་འགྱུར་རོ། །དུས་གཞན་གྱི་ཚེ་ན་ཟླ་བ་དུ་ལོན་ན་རང་བཞིན་དུ་འགྱུར་ཞེ་ན་དེའི་ཕྱིར་གཞན་གྱི་ཚེ་ན་དྲུག་གོ་ཞེས་བྱ་བ་སྨྲས་ཏེ། ནམ་ཞོད་པ་ལས་གཞན་གྱི་དུས་ཀྱི་ཚེ་ན་ནི་ཟླ་བ་དྲུག་ལོན་ན་རང་བཞིན་ཅན་དུ་འགྱུར་རོ། །རྩིག་པ་ནི་ས་ཉིད་མ་ཡིན་པར་ཤེས་
པར་མི་བྱའོ་ཞེས་བྱ་བ་ནི། རྩིག་པ་ནི་ས་ཉིད་མ་ཡིན་པར་ཤེས་པ་མི་བྱ་སྟེ་ས་ཉིད་ཡིན་ནོ་ཞེས་བྱ་བའི་ཐ་ཚིག་གོ །སའི་དངོས་པོ་ནི་ས་ཉིད་དོ། །འདིས་ནི་ཁང་ཐོག་ཀྱང་ས་ཉིད་ཡིན་པར་བྱས་པར་རིག་པར་བྱའོ། །ས་ཕུང་གལ་ཏེ་སྟེང་གི་ཆ་ནི་འཐས་ལ་འོག་གི་ཆའི་ཡན་ལག་མ་འཐས་པར་གྱུར་ན་དེ་ནི་ས་ཉིད་མ་ཡིན་པར་ཤེས་པར་བྱའོ། །འཐས་པར་གྱུར་ན་ནི་དེ་ས་ཉིད་དུ་རྣམ་པར་གཞག་པ་ཁོ་ན་ཡིན་ནོ། །འདུས་པ་དག་ལ་ནི་ཤས་ཆེ་བས་མཚན་ཉིད་དག་རབ་ཏུ་དབྱེ་བ་ཉིད་ཡིན་ནོ་ཞེས་བྱ་བ་ནི། འདི་ལྟར་ས་ལ་སོགས་པ་འདུས་པ་དག་ལ་ནི་ཤས་ཆེ་བ་ཉིད་ཀྱིས་མཚན་ཉིད་དག་རབ་ཏུ་དབྱེ་བ་ཉིད་ཡིན་ཏེ། འདུས་པ་གང་ལ་སྲ་བ་ཉིད་ལ་སོགས་པའི་རྫས་ཀྱི་མཚན་ཉིད་གང་གི་ཤས་ཆེ་བ་ཉིད་ཡོད་པའི་མཚན་ཉིད་དེ་ཉིད་ཀྱིས་འདུས་པ་རབ་ཏུ་དབྱེ་ཞིང་བསྟན་པ་དང་ཁས་བླང་བར་བྱ་སྟེ། འདུས་པ་དེ་ལ་དེའི་ཤས་ཆེ་བའི་ཕྱིར་རོ། །དེའི་ཕྱིར་ཉུང་དུ་གཞན་ཡོད་པའི་རྫས་ཉིད་ལ་ནི་ཕལ་ཆེ་བ་ཉིད་དོ་ཞེས་བྱ་བ་ནི། གང་གི་ཕྱིར་འདུས་པ་དག་ལ་ཤས་ཆེ་བས་མཚན་ཉིད་དག་རབ་ཏུ་དབྱེ་བ་ཉིད་ཡིན་པ་དེའི་ཕྱིར་རྫས་རིགས་མི་མཐུན་པ་གཞན་དང་འདྲེས་པ་ཉིད་ལ་ནི་ཕལ་ཆེ་བ་ཉིད་ལྷག་པ་ཡིན་པར་ཤེས་པར་བྱ་སྟེ། སའི་ཚོགས་བྱེ་མ་དང་འདྲེས་པ་ལ་ཡངས་ཕལ་ཆེན་ས་ཉིད་ཡིན་པར་བལྟ་བར་བྱའོ། །འདྲེས་པ་ཉིད་མ་ཡིན་ནོ་ཞེས་བྱ་བའི་ཐ་ཚིག་སྟེ། འདིར་དེ་རྐོས་སམ་རྐོར་བཅུག་ན་དངོས་གཞིར་འགྱུར་ལ་གཞན་ལ་ནི་ཉེས་བྱས་སོ། །ཚིག་པ་ཉིད་ནི་ཉམས་པ་ཉིད་ཡིན་ནོ་ཞེས་བྱ་བ་ནི། ས་ཉིད་ཚིག་པ་ཉིད་ནི་ཉམས་པ་ཉིད་ཡིན་པར་རིག་པར་བྱའོ། །ཉམས་པ་ཉིད་ལ་ནི་ཕྱེད་ཉིད་དོ་ཞེས་བྱ་བ་ནི། ས་ཉིད་ཉམས་པ་ཉིད་ལ་ནི་ཕྱེད་ཉིད་དེ་ཉེས་བྱས་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་ས་ཚིག་པ་རྐོ་ན་ཉེས་བྱས་སོ། །རྐོར་འཇུག་ན་ཉེས་བྱས་སོ། །རྣམ་པར་ཉམས་པ་ཡང་དེ་བཞིན་ནོ་ཞེས་གསུངས་པ་ཡིན་ནོ། །འདིར་རྣམ་པར་ཉམས་པ་ཞེས་བྱ་བ་ནི། འདམ་རྫབ་ཏུ་གྱུར་པ་ཉིད་ལ་སོགས་པ་ཡིན་པར་ཤེས་པར་བྱའོ། །ས་ཞག་དང་ངོགས་དང་རྩིག་པ་དང་དེའི་སྐྱང་ནུལ་གྲུགས་པ་དག་ཀྱང་ངོ་ཞེས་བྱ་བ་ནི། ཕྱེད་ཉིད་དོ་ཞེས་བྱ་བར་སྦྱར་རོ། །ས་ཞག་དང་ངོགས་
དང་རྩིག་པ་དང་དེའི་སྐྱང་ནུལ་དག་གལ་ཏེ་གྲུགས་པར་གྱུར་ན་དེ་དག་ནི་ཕྱེད་ཉིད་དོ། །དེའི་སྐྱང་ནུལ་ཞེས་བྱ་བའི་སྒྲས་ནི་རྩིག་པའི་སྐྱང་ནུལ་བརྗོད་དོ། །རྡོ་ཐལ་རྒྱུ་དང་བྱེ་མ་ལ་སོགས་པ་ཤས་ཆེ་བ་ཡང་ངོ་ཞེས་བྱ་བ་ཡང་ཕྱེད་ཉིད་དོ་ཞེས་བྱ་བར་སྦྱར་རོ། །རྡོ་ཐལ་རྒྱུ་ཞེས་བྱ་བའི་སྒྲས་ནི་རྡོ་རྒྱུས་ལ་སོགས་པ་བརྗོད་དོ། །ས་གང་ལ་དེ་གཉིས་ཤས་ཆེ་བ་དེ་ནི་ཕྱེད་ཉིད་དོ། །སོགས་པ་ཞེས་བྱ་བའི་སྒྲས་ནི་སའི་ངོ་བོ་ཉིད་མ་ཡིན་པའི་རྫས་ལྷག་མ་དག་ཀྱང་བསྡུའོ། །བྱ་བ་དག་ཀྱང་ངོ་ཞེས་བྱ་བ་ཡང་ཕྱེད་ཉིད་དོ། །དེ་གང་ཡིན་ཞེ་ན་དེའི་ཕྱིར། ཕུར་པ་འབྱིན་པ་དང་རི་མོ་འདྲེན་པ་དང་སའི་བྱེ་མ་འདྲེན་པ་དང་ལྕི་བ་འགོགས་པ་དང་འདམ་བསྐྱོད་པ་དང་དེ་དང་འབྲེལ་བའི་ཕྲུ་བ་ལ་སོགས་པ་འདེགས་པ་དང་འཇིག་པའི་བདག་ཉིད་ཀྱི་ཚ་སྒོ་དག་ཀྱང་ངོ་ཞེས་བྱ་བ་སྨྲས་ཏེ། དེ་དག་ཀྱང་ཕྱེད་ཉིད་དོ་ཞེས་བྱ་བར་སྦྱར་རོ། །ཕུར་པ་བཏབ་ན་ནི་ལྟུང་བྱེད་དུ་འགྱུར་ལ། ཕུར་པ་འབྱིན་པ་ནི་ཉེས་བྱས་སུ་འགྱུར་རོ།། ས་ལ་མཛུབ་མོ་ལ་སོགས་པས་རི་མོ་འདྲེན་པ་དང་ལྕི་བ་འགོགས་པ་གང་ལ་སའི་ཕྱེ་མ་འདྲེན་པར་འགྱུར་བའི་ལྕི་བ་འགོགས་པ་དེ་ནི་སའི་ཕྱེ་མ་འདྲེན་པའི་ལྕི་བ་འགོགས་པ་སྟེ། དེ་དག་དང་འདམ་མེར་མེར་པོ་བསྒུལ་ཞིང་བསྐྱོད་པ་དང་འདམ་རྫབ་དང་འབྲེལ་བའི་ཕྲུ་བ་དང་བུམ་པ་ལ་སོགས་པ་འདེགས་པ་དང་རྩིག་པ་ལ་སོགས་པ་འཇིག་ཅིང་འབྲུལ་བར་བྱེད་པའི་བདག་ཉིད་ཅན་གྱི་ཚ་སྒོའི་རྫས་ཀྱི་རང་བཞིན་གང་ཡིན་དེ་འབྲུལ་བར་བྱེད་པ་ཡང་ཉེས་བྱས་སོ། །ཅི་དགེ་སློང་གི་བསམ་བ་གང་ཡང་རུང་བས་འདིར་དེ་དག་སྤྱད་ན་ཁ་ན་ཐོ་བ་རྫོགས་པའམ་ཆུར་བར་འགྱུར་རོ་ཞེ་ན་དེའི་ཕྱིར། འདིར་གཞིག་པའི་བློ་དང་ལྡན་ན་དེའི་འོ་ཞེས་བྱ་བ་སྨྲས་ཏེ། ཕུར་པ་འབྱིན་པ་ལ་སོགས་པའི་བྱ་བ་འདིར་དགེ་སློང་གང་ལས་གཞིག་པའི་བློ་ཡོད་པ་དེ་ནི་གཞིག་པའི་བློ་དང་ལྡན་པ་སྟེ། དེ་བྱས་ན་ཁ་ན་མ་ཐོ་བ་འདིར་འགྱུར་རོ། །འདིར་ཡང་ས་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ་ཞེས་བྱ་བར་རིག་པར་བྱའོ། །འདི་ལྟར་སར་འདུ་ཤེས་པ་མེད་ན་ནི་སའི་ཡུལ་ལ་གཞིག་པའི་བློ་ཡང་མི་འབྱུང་བས་གང་ལ་གཞིག་པའི་བློ་ཡོད་པ་དེ་ལ་ནི་སར་འདུ་ཤེས་པ་ཡང་གདོན་མི་ཟ་བར་ཡོད་པར་འགྱུར་རོ། །དེའི་ཕྱིར་བགྲང་བ་དང་ཤོད་དགོད་པ་ལ་སོགས་པའི་བསམ་པ་ལ་ནི་ལྟུང་བ་མེད་དོ་ཞེས་བྱ་
བ་ནི། གང་གི་ཕྱིར་གཞིག་པའི་བསམ་པ་མེད་པ་ལ་ལྟུང་བ་མེད་པ་དེའི་ཕྱིར་འདི་ལ་ཡང་ལྟུང་བ་མེད་དོ། །ས་རྐོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།མགྲོན་དུ་གཉེར་བ་ལ་རིང་དུ་འདུག་པའི་ལྟུང་བྱེད་སྨྲ་བར་འདོད་ནས། ཧ་ཅང་བླང་བར་མི་བྱའོ་ཞེས་བྱ་བ་སྨྲས་ཏེ། མ་བསྟབས་པར་སློང་བ་ནི་མི་རིགས་པ་ཁོ་ན་ཡིན་པས་དེའི་ཕྱིར་འདི་ནི་བསྟབས་པའི་ཕྱིར་བྱས་པ་ཡིན་ནོ། །མགྲོན་དུ་བོས་པའི་ཁྱིམ་དུ་གདུགས་ཚོད་ལ་མ་བསྐུལ་བ་དེ་མེད་ན་འགྲོར་རུང་ངོ་ཞེས་བྱ་བ་ནི། མགྲོན་དུ་པོས་པའི་ཁྱིམ་དུ་འགྲོར་རུང་ངོ་ཞེས་བྱ་བར་སྦྱར་ཏེ། ཁྱིམ་གང་དུ་ཟས་སྦྱར་བར་ཁས་བླངས་པའི་ཁྱིམ་དེར་ནི་མགྲོན་དུ་བོས་པའི་ཁྱིམ་སྟེ་དེར་འགྲོར་རུང་ངོ༌། །སུ་ཞེ་ན་གདུགས་ཚོད་མ་བསྐུལ་བ་སྟེ། དགེ་སློང་ལ་སྦྱིན་བདག་གིས་ད་གདུགས་ཚོད་ལ་བབ་ན་གཤེགས་སུ་གསོལ་ཞེས་མ་བསྐུལ་བ་གང་ཡིན་པ་དེ་ནི་གདུགས་ཚོད་མ་བསྐུལ་བ་སྟེ། དེར་འགྲོར་རུང་ངོ༌། །གང་གི་ཚེ་ཞེ་ན་དེ་མེད་ན་སྟེ། གདུགས་ཚོད་བསྐུལ་བ་མེད་ནའོ། །འདིར་གཞུང་ནི་བདག་གིས་གདུགས་ཚོད་བསྐུལ་བར་མི་ནུས་ཀྱི་རང་གིས་དུས་ཤེས་ནས་ཤོག་ཤིག་ཅེས་གསུངས་པ་ཡིན་ནོ། །དུས་ལས་ཡོད་དུ་བྱེད་ན་རིམས་ཤིག་ཅེས་བསྒོ་བ་ཡང་ངོ་ཞེས་བྱ་བ་ཡང༌། མགྲོན་དུ་བོས་པའི་ཁྱིམ་དུ་སོང་བ་ན་གདུགས་ཚོད་ཡོལ་དུ་བྱེད་ན་དགེ་སློང་རང་གིས་སྦྱིན་བདག་ལ་ད་གདུགས་ཚོད་བྲིམས་ཤིག་ཅེས་བསྐུལ་དུ་རུང་བ་ཉིད་ཡིན་པའོ། །ཚིག་འབྲུ་དེ་ཉིད་མ་ཡིན་པ་ལ་གུས་པར་མི་བྱའོ་ཞེས་བྱ་བ་ནི། བཅོམ་ལྡན་འདས་ཀྱིས་གསོལ་བ་དང་བཞིའི་ལས་ལ་སོགས་པའི་ཚིག་འབྲུ་གང་དུ་གསུངས་པ་དེ་ཉིད་མ་གཏོགས་པ་དེ་ལས་གཞན་པའི་ཚིག་འབྲུ་འཇིག་རྟེན་གྱི་ཐ་སྙད་དུ་བྱ་བའི་དོན་གྱི་སྐབས་དག་ཏུ་གསུངས་པ་གང་ཡིན་པ་དེ་ལ་གཅིག་ཏུ་འཆེལ་ཞིང་གུས་པར་མི་བྱ་སྟེ། དོན་དེ་གོ་བར་བྱ་བའི་ཚིག་འབྲུ་ཡུལ་དང་དུས་གང་དུ་གང་འཇེབས་ཤིང་གོ་བར་འགྱུར་བའི་ཚིག་འབྲུ་གཞན་དུ་བསྒྱུར་ཏེ། སྨྲས་ཀྱང་ཉེས་པ་མེད་པའོ། །དེ་ལྟར་ཡང་འདིར་གཞུང་ནི་སྟན་དག་ཅི་བདེར་གྱིས་ཤིག །ཚེ་དང་ལྡན་པ་ཁྱེད་ཀྱི་ཅི་བདེ་ཞེས་བྱ་བ་ནི་བདག་མི་ཤེས་ཀྱི་འདི་ལྟར་སྟན་དག་ནི་ཁྱེད་ཁོ་ནའི་ཕྱིར་བཤམས་སོ་ཞེས་ཟེར་བ་དང༌།
བཅོམ་ལྡན་འདས་ཀྱིས་བཀའ་སྩལ་པ། གལ་ཏེ་དེ་སྐད་ཟེར་ན་ཅི་བདེར་བྱས་པར་བརྗོད་པར་བྱའོ་ཞེས་གསུངས་པ་ཡིན་ནོ། །འདི་ནི་ཐ་སྙད་ཐམས་ཅད་ལ་སྦྱར་བར་བྱ་བ་ཡིན་པའི་ཕྱིར་སྤྱིར་མདོར་བྱས་པ་ཡིན་ནོ། །སོ་སོར་མགྲོན་དུ་བོས་པ་བདག་གིར་བྱའོ་ཞེས་བྱ་བ་ནི། ཐ་དད་པ་མགྲོན་དུ་བོས་པ་བདག་གིར་བྱ་བའོ། །དགེ་འདུན་སྤྱན་དྲངས་པ་ཡོད་ན་གང་ཟག་གིས་ཁས་བླང་བར་མི་བྱ་སྟེ། མགྲོན་དུ་བོས་པ་གཉི་ག་བཀག་པའི་ཕྱིར་རོ་སྙམ་དུ་དོགས་པ་བསལ་བའི་ཕྱིར། དགེ་འདུན་དང་བཅས་ཏེ་མགྲོན་དུ་བོས་པ་ཡང་ངོ་ཞེས་བྱ་བ་སྨྲས་ཏེ། འདི་ལྟར་དགེ་འདུན་སྤྱན་དྲངས་པ་ཡོད་ན་གང་ཟག་གིས་ཀྱང་ཁས་བླངས་པ་ལ་ཉེས་པ་མེད་པའོ། །དུས་ཐམས་ཅད་དུ་ཡང་ངོ་ཞེས་བྱ་བ་ནི། དགེ་འདུན་ནམ་གང་ཟག་ཇི་སྲིད་འཚོ་བའི་བར་དུ་མགྲོན་དུ་བོས་ན་ཡང་བདག་གིར་བྱའོ་ཞེས་བྱ་བའི་ཐ་ཚིག་གོ། །།བམ་པོ་སུམ་ཅུ་ལྔ་པའོ། །ཅི་ཞིག་བྱས་ན་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། ཚིགས་རྣམ་པར་གཞག་པ་མེད་པར་མགྲོན་དུ་གཉེར་བ་དང་ལྡན་པ་ལས་ཕྱིས་གཞན་ནམ་ཡང་དང་ཡང་དུའམ་དུས་ཀྱིས་མགྲོན་དུ་གཉེར་བ་མ་བྱས་པར་ཟླ་བ་བཞི་པ་ཡོངས་སུ་རྫོགས་པའི་འོག་ཏུ་བཤམས་པ་ཟོས་ནའོ་ཞེས་བྱ་བ་སྨྲས་ཏེ། ཚིགས་རྣམ་པར་གཞག་པ་མེད་པར་ཞེས་བྱ་བ་ནི། སྦྱིན་པ་པོ་དང་སྤྱིན་བདག་གང་ཡིན་པས་བདག་གིས་ཁྱོད་དུས་འདི་སྲིད་དུ་མགྲོན་དུ་གཉེར་ཏོ་ཞེའམ་ཁྱོད་རྟག་ཏུ་མགྲོན་དུ་གཉེར་ཏོ་ཞེས་བྱ་བ་རྣམ་པ་དེ་ལྟ་བུས་དུས་ངེས་པར་བྱས་པའི་ཚིགས་རྣམ་པར་གཞག་པ་མེད་པར་རོ། །མགྲོན་དུ་གཉེར་པ་དང་ལྡན་པ་ཞེས་བྱ་བ་ནི། སྦྱིན་པ་པོའམ་སྦྱིན་བདག་དེས་གང་ཟག་གམ་དགེ་འདུན་གྱི་ཁོངས་སུ་གཏོགས་པས་མགྲོན་དུ་གཉེར་བས་དགེ་སློང་འགའ་ཞིག་མགྲོན་དུ་གཉེར་བར་འགྱུར་བའི་སྦྱིན་པ་པོའམ་སྦྱིན་བདག་གང་ཡིན་པ་དེ་ནི་མགྲོན་དུ་གཉེར་བ་དང་ལྡན་པ་ཞེས་བྱ་བ་སྟེ། དགག་པ་ཕྱེ་བ་དང་ལྡན་པའི་ཕྱིར་བཟློག་པ་བརྩལ་བ་དང་ལྡན་པ། མགྲོན་དུ་གཉེར་བ་བོས་པ་དང་ལྡན་པ་ཞེས་བྱ་བའི་ཐ་ཚིག་གོ །སྦྱིན་པ་པོའམ་སྦྱིན་བདག་མགྲོན་དུ་གཉེར་བ་དང་ལྡན་པ་དེ་ལས་ཕྱིས་དགེ་སློང་དེས་གནས་སྐབས་ཀྱི་ཁྱད་པར་ཇི་ལྟ་བུར་གྱུར་པ་
ཞིག་ཏུ་ཟོས་ན་དེའི་ཕྱིར། ཕྱིས་གཞན་ནམ་ཡང་དང་ཡང་དུའམ་དུས་ཀྱིས་མགྲོན་དུ་གཉེར་བ་མ་བྱས་པར་ཞེས་བྱ་བ་སྨྲས་ཏེ། སྦྱིན་པ་པོའམ་སྦྱིན་བདག་མགྲོན་དུ་གཉེར་བ་དང་ལྡན་པ་དེས་སྔར་དགེ་སློང་དེ་མགྲོན་དུ་གཉེར་བ་དང་ལྡན་པ་མ་གཏོགས་པར་དེ་ལས་གཞན་པའི་དུས་སུ་ཕྱིས་དགེ་སློང་དེ་མགྲོན་དུ་གཉེར་བར་མ་བྱས་པ་གང་ཡིན་པ་དེ་ནི་ཕྱིས་མགྲོན་དུ་གཉེར་བ་མ་བྱས་པ་སྟེ། རྣམ་པ་གང་གིས་ཕྱིས་མགྲོན་དུ་གཉེར་བ་མ་བྱས་པར་ཤེས་ན་དེའི་ཕྱིར་གཞན་ནམ་ཡང་དང་ཡང་དུའམ་དུས་ཀྱིས་མགྲོན་དུ་གཉེར་བ་མ་བྱས་པ་ཡིན་ནོ། །དེ་ལ་གཞན་གྱིས་མགྲོན་དུ་གཉེར་བམ་བྱས་པ་ཞེས་བྱ་བ་ནི། སྔར་ཚིགས་རྣམ་པར་གཞག་པ་མེད་པར་མགྲོན་དུ་གཉེར་བ་ལས་གཞན་པའི་རྣམ་པ་གཞན་གྱིས་མགྲོན་དུ་གཉེར་བ་མ་བྱས་པའོ། །ཡང་དང་ཡང་དུ་མགྲོན་དུ་གཉེར་བ་མ་བྱས་པ་ཞེས་བྱ་བ་ནི། ཉིན་རེ་ཉིན་རེ་ཞིང་ཡང་དང་ཡང་དུ་མགྲོན་དུ་གཉེར་བ་མ་བྱས་པའོ།། དུས་ཀྱིས་མགྲོན་དུ་གཉེར་བ་མ་བྱས་པའོ་ཞེས་བྱ་བ་ནི། བསམ་པ་ཤས་ཆེན་པོ་ཉིད་ཀྱིས་མགྲོན་དུ་གཉེར་བ་མ་བྱས་པའོ། །དེ་ལྟར་སྦྱིན་པ་པོའམ་སྦྱིན་བདག་གང་གིས་སྔར་མགྲོན་དུ་གཉེར་བ་དང་ལྡན་པ་དེས་དེ་ལས་གཞན་པའི་དུས་སུ་ཕྱིས་གཞན་ནམ་ཡང་དང་ཡང་དུའམ་དུས་ཀྱིས་མགྲོན་དུ་གཉེར་བ་མ་བྱས་པར་དེ་ལས་དགེ་སློང་དེས་ཟླ་བ་བཞི་པ་ཡོངས་སུ་རྫོགས་པའི་འོག་ཏུ་སྔར་བཤམས་པའི་ཟས་ཟོས་ན་མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དུ་འགྱུར་རོ་ཞེས་བྱ་བའི་ཐ་ཚིག་གོ །འདི་སྐད་བསྟན་ཏེ། གལ་ཏེ་སྦྱིན་པ་པོའམ་སྦྱིན་བདག་གིས་སྔར་དགེ་སློང་དེ་ཟླ་བ་བཞིའི་བར་དུ་མགྲོན་དུ་བོས་ནས་ཕྱིས་དེའི་འོག་ཏུ་དགེ་སློང་དེ་གཞན་ནམ་ཡང་དང་ཡང་དུའམ་དུས་ཀྱིས་མགྲོན་དུ་མ་བོས་པར་དགེ་སློང་དེས་ཟླ་བ་བཞི་ཚར་བའི་འོག་ཏུ་སྦྱིན་བདག་དེ་ལས་ཟས་བཤམས་པ་ཟོས་ན་ལྟུང་བྱེད་དོ། །སྔར་མགྲོན་དུ་བོས་པའི་གནས་ཀྱི་ཡུལ་ལ་ཁ་ན་མ་ཐོ་བ་འདི་རྣམ་པར་གཞག་གི་མགྲོན་དུ་མ་བོས་པའི་གནས་ཀྱི་ཡུལ་ལ་ནི་བསོད་པ་སློང་བའི་ཁ་ན་མ་ཐོ་བར་འགྱུར་ཏེ་དེ་གཉིས་ཀྱི་བྱེ་བྲག་ནི་འདི་ཡིན་ནོ། །འདི་ལ་ནི་ངན་པ་དང་བཟང་པོ་གཉིས་ལ་བྱེ་བྲག་མེད་དེ་ཐམས་ཅད་དུ་ཁ་ན་མ་ཐོ་བར་འགྱུར་རོ། །འདིར་གཞུང་ནི་ལྟུང་བ་བསྟན་པ་ལས་དགེ་སློང་ཟླ་བ་བཞིའི་བར་དུ་
མགྲོན་དུ་བོས་པ་ལས་ཅུང་ཟད་ལྷག་པར་རོ་མྱོང་བར་བྱེད་ན་སོ་སོར་མགྲོན་དུ་བོས་པ་དང༌། རྟག་ཏུ་མགྲོན་དུ་བོས་པ་མ་གཏོགས་པར་ཐམས་ཅད་དུ་ལྟུང་བྱེད་དུ་འགྱུར་རོ་ཞེས་གསུངས་པ་ཡིན་ནོ། །རྣམ་པར་རིག་བྱེད་ལ་ནི་ཉེས་བྱས་སོ་ཞེས་བྱ་བ་འདི་ནི་སྦྱོར་བ་ལ་ཉེས་བྱས་སོ་ཞེས་བྱ་བ་དེའི་སྤྲོས་པ་ཡིན་ཏེ། འདིར་རྣམ་པར་རིག་བྱེད་ཅེས་བྱ་བ་ནི་ཟླ་བ་བཞི་ལས་ལྷག་པར་བཤམས་པའི་ཟན་གྱི་ཕྱིར་ཉེ་བར་འགྲོ་བ་ཡང་ཡིན་པར་རིག་པར་བྱའོ། །ནད་པ་ལ་ནི་ལྟུང་བ་མེད་དོ་ཞེས་བྱ་བ་ནི། ནད་པའི་ཕྱིར་ལུས་དང་ངག་གི་ཕྱིར་རྣམ་པར་རིག་བྱེད་ཀྱི་ཟས་གྲུབ་པ་ལ་ནི་ལྟུང་བ་མེད་པའོ། །འདིར་གཞུང་ནི་མི་ན་བར་བླངས་ཏེ་ཟན་བླངས་པ་ལ་ནི་ཉེས་བྱས་སོ། །ཟོས་པ་ལ་ནི་ལྟུང་བྱེད་དོ་ཞེས་ཞུ་བ་ལས་གསུངས་པ་དེ་ཉིད་མདོ་འདིར་བསྡུས་པ་ཡིན་ནོ། །ཉེ་དུ་ལས་ཀྱང་ངོ་ཞེས་བྱ་བ་ནི། སྦྱིན་བདག་ཉེ་དུ་ལས་བླངས་ཏེ་ཟོས་པ་ལ་ཡང་ལྟུང་བ་མེད་པའོ། །འདིར་གཞུང་ནི་ཞུ་བ་ལས་ཁྱིམ་བདག་དེ་དེའི་ཕོ་ནུའམ་བུ་ཚའམ་བུ་སྲིང་ཡིན་ན་དེ་དག་ལས་རོ་མྱང་བར་བྱའོ་ཞེས་གསུངས་པ་ཡིན་ནོ། །རྣམ་པར་འཁྱམས་པ་ལས་སྔ་མ་ནི་ཐ་དད་པ་ཉིད་དོ་ཞེས་བྱ་བ་ནི། རྣམ་པར་འཁྱམས་པ་ཞེས་བྱ་བ་ནི་ཁྱིམ་པར་བབས་པ་ལས་སྔ་མ་ཞེས་བྱ་བ་དེ་དགེ་སློང་ཉིད་ནི་ཐ་དད་པ་ཉིད་ཡིན་པའོ། །འདིར་གཞུང་ནི་ཞུ་བ་ལས་ཚེ་དང་ལྡན་པ་ལ་གང་དག་དགོས་པ་དེ་ཁྱེར་ཅིག་ཅེས་དགེ་སློང་ལ་བསྟབས་པར་གྱུར་པ་ལས་དགེ་སློང་དེ་རྣམ་པར་འཁྱམས་པར་གྱུར་ཅིང་དེ་ཡང་བསྙེན་པར་རྫོགས་པར་བགྱིད་ན་དགེ་སློང་དེས་ཆོ་ག་སྔ་མ་དེ་ཉིད་ཀྱི་རོ་མྱོང་བར་བགྱིའམ། གལ་ཏེ་ཡང་སྟོབས་པར་བྱེད་ན་ནི་རོ་མྱང་བར་བྱའོ། །སྟོབས་པར་མི་བྱེད་ན་ནི་རོ་མྱང་བར་མི་བྱའོ་ཞེས་གསུངས་པ་ཡིན་ནོ། །དེ་ནི་མ་སྟོབས་པའི་ཉེས་པ་བྱེད་པ་ཉིད་ཡིན་ནོ་ཞེས་བྱ་བ་ནི། རྣམ་པར་འཁྱམས་པའི་འོག་ཏུ་བསོད་པ་སློང་བར་བྱེད་པ་ལ་སོགས་པ་དེ་ནི་མ་བསྟབས་པའི་ཉེས་པར་བྱེད་པ་ཡིན་ཏེ། དེ་ནི་མ་བསྟབས་པའི་ཉེས་པ་གང་ཡིན་པ་དེ་ནི་བྱེད་པ་ཉིད་ཡིན་ནོ། །འདི་སྐད་བསྟན་ཏེ། རྣམ་པར་འཁྱམས་པའི་འོག་ཏུ་ལན་གཉིས་པ་བསྙེན་པར་རྫོགས་པ་ན་དགེ་སློང་མ་བསྟབས་པར་སློང་བར་བྱེད་པ་ལ་སོགས་པ་དེའི་ཁ་ན་མ་ཐོ་བ་གང་ཡིན་པ་དེ་ནི་བསོད་པ་སློང་བའི་ཁོངས་སུ་གཏོགས་པར་རིག་པར་བྱའོ། །མདུན་རོལ་དུ་ཡང་གང་གིས་མ་བསྟབས་པའོ་ཞེས་བྱ་བ་ནི། ཟླ་བ་བཞིའི་འོག་འབའ་ཞིག་ཏུ་མ་ཟད་ཀྱི། ཟླ་བ་བཞི་མ་ཚང་བའི་མདུན་རོལ་
དུ་ཡང་བཟའ་བར་བྱ་བའི་དངོས་པོ་གང་གིས་མ་བསྟབས་པ་དེ་སློང་གནམ་ཟ་ན་མ་བསྟབས་པའི་ཉེས་པ་བྱེད་པ་ཉིད་ཡིན་པའོ། །མགྲོན་དུ་གཉེར་བ་ལས་རིང་དུ་འདུག་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།བསླབ་པ་ལ་ཉེ་བར་འཇོག་པ་སྤོང་བའི་ལྟུང་བྱེད་ལ་བྱེད་པ་པོ་ཉིད་གང་ཡིན་ཞེ་ན་དེའི་ཕྱིར། ཤེས་གཙོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། མངོན་པར་ཤེས་པ་ཉིད་ལའོ་ཞེས་བྱ་བ་སྨྲས་ཏེ། ཡོངས་སུ་ཤེས་པ་ཉིད་ལའོ། །མངོན་པར་ཤེས་པ་ཉིད་གང་ལ་ཞེ་ན། དེའི་ཕྱིར་སྨྲ་བ་པོ་ལའོ་ཞེས་བྱ་བ་སྨྲས་ཏེ། སྨྲ་བར་བྱེད་པ་ལའོ། །དེས་གང་ལ་མངོན་པར་ཤེས་པ་ཉིད་ཡིན་ཞེ་ན་དེའི་ཕྱིར་བསླབ་པ་ལའོ་ཞེས་བྱ་བ་སྨྲས་ཏེ། འདུལ་བ་ལས་གསུངས་པ་ལའོ། །འདི་སྐད་བསྟན་ཏེ་གལ་ཏེ་དགེ་སློང་དག་གིས་དགེ་སློང་འགའ་ཞིག་ལ་ཁྱོད་ཀྱིས་བསླབ་པ་འདི་ལ་སློབས་ཤིག་ཅེས་སྨྲས་ཏེ་དེ་འདི་སྐད་ཅེས་ཁོ་བོ་ནི་བྱིས་པ་གླེན་པ་མི་གསལ་བ་མི་མཁས་པ་ཁྱེད་ཅག་གི་ཚིག་གིས་བསླབ་པ་འདི་ལ་མི་སློབ་པོ་ཞེས་ཟེར་ལ་དེས་སྨྲ་བ་པོ་དེ་བསླབ་པའི་ཡུལ་ལ་མངོན་པར་ཤེས་པ་ཉིད་དུ་ཡང་ཤེས་ན་དེའི་ཚེ་ཁ་ན་མ་ཐོ་བ་འདིར་འགྱུར་རོ། །གལ་ཏེ་སྨྲ་བ་པོ་བསླབ་པའི་ཡུལ་ལ་མངོན་པར་མི་ཤེས་པ་ཉིད་ཡིན་ན་ནི་དེའི་ཚེ་ཉིས་པ་མེད་དོ། །འདིར་གཞུང་ནི་ཡང་དག་པ་ཁོ་ནར་བྱིས་པ་གླེན་པ་མི་གསལ་བ་མི་མཁས་པ་དག་ཡིན་ན་ལྟུང་བ་མེད་དོ་ཞེས་གསུངས་པ་ཡིན་ནོ། །གང་ལ་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། དགེ་སློང་གིས་ཁྱོད་ཀྱིས་འདི་ལ་བསླབ་པར་བྱའོ་ཞེས་བརྗོད་པ་ན་འམ་བསྒོ་བ་ན་མི་སློབ་པོ་ཞེས་རྒྱུའི་དངོས་པོ་དེས་གོ་བར་བྱེད་པ་ལས་མི་ཤེས་པ་ཉིད་སྒྲོགས་པར་བྱེད་པའི་ཚིག་བརྗོད་ནའོ་ཞེས་བྱ་བ་སྨྲས་ཏེ། དགེ་སློང་གིས་ཞེས་བྱ་བ་ནི། གོ་བར་བྱེད་པའི་དགེ་སློང་གིས་སོ། །ཁྱོད་ཀྱིས་ཞེས་བྱ་བ་ནི། ལྟུང་བ་འབྱིན་པར་བྱེད་པས་སོ། །འདི་ལ་ཞེས་བྱ་བ་ནི། འདུལ་བ་ལས་གསུངས་པ་ལ་སྟེ་མདོ་སྡེ་ལས་གསུངས་པ་ལ་ནི་ཉེས་བྱས་ཀྱིའོ་ཞེས་འབྱུང་བའི་ཕྱིར་རོ། །བསླབ་པར་བྱའོ་ཞེས་བརྗོད་པ་ན་ཞེས་བྱ་བ་ནི། དངོས་གཞིའི་ལྟུང་བ་སོ་སོར་ངེས་པའི་བསླབ་པ་ལ་ཁྱོད་ཀྱིས་བསླབ་པར་བྱའོ་ཞེས་བརྗོད་པ་ནའོ། །བསྒོ་བ་ནའོ་ཞེས་བྱ་བ་ནི། བརྗོད་པ་འདི་ལ་ཁྱོད་ཀྱིས་བསླབ་
པར་བྱའོ་ཞེས་སྨོས་པར་བྱས་ནའོ། །དེ་ལྟར་བྱ་བར་རྗོད་པ་ནའམ་བསྒོ་བ་ན་གོ་བར་བྱེད་པའི་དགེ་སློང་ལ་ལ་ལྟུང་བ་འབྱིན་པར་བྱེད་པས་མི་ཤེས་པ་ཉིད་སྒྲོགས་པར་བྱེད་པའི་ཚིག་བརྗོད་ན་དེ་ལ་དེ་བྱེད་པ་པོ་ཉིད་ཡིན་ནོ་ཞེས་བྱ་བར་སྦྱར་རོ། །རྣམ་པ་གང་དང་གང་ཞེ་ན་དེའི་ཕྱིར། མི་སློབ་པོ་ཞེས་རྒྱུའི་དངོས་པོ་དེས་ཞེས་བྱ་བ་སྨྲས་ཏེ། ཁོ་བོ་བསླབ་པ་འདི་ལ་མི་སློབ་པོ་ཞེས་ཟེར་ཞིང་དེའི་རྒྱུའི་དངོས་པོ་ནི་འདི་སྐད་ཅེས་བདག་དགེ་སློང་མདོ་སྡེ་འཛིན་པ་དང་འདུལ་བ་འཛིན་པ་དང་མ་མོ་འཛིན་པ་རྣམས་ལ་འདིའི་བར་དུ་མི་སློབ་བོ་ཞེས་ཟེར་བ་སྟེ། དེ་ཡང་ཡང་དག་པར་ནི་མ་ཡིན་ནོ། །གང་ལ་མི་ཤེས་པ་ཉེད་སྒྲོགས་པར་བྱེད་ཅེ་ན། དེའི་ཕྱིར་གོ་བར་བྱེད་པ་ལའོ་ཞེས་བྱ་བ་སྨྲས་ཏེ། འདུལ་བ་དང་ལྡན་པའི་བསླབ་པའི་ཡུལ་ལ་མངོན་པར་ཤེས་པ་ཉིད་དང་ལྡན་པའི་དགེ་སློང་དག་ལའོ། །མི་ཤེས་པ་ཉིད་སྒྲོགས་པར་བྱེད་པའི་ཚིག་ཇི་སྐད་བརྗོད་ཅེ་ན་དེའི་ཕྱིར་མི་ཤེས་པ་ཉིད་སྒྲོགས་པར་བྱེད་པའི་ཚིག་བརྗོད་ནའོ་ཞེས་བྱ་བ་སྨྲས་ཏེ། དེ་ནི་བྱིས་པ་གླེན་པ་མི་གསལ་བ་མི་མཁས་པ་ཁྱེད་ཀྱི་ཚིག་གིས་བསླབ་པ་འདི་ལ་མི་སློབ་པོ་ཞེས་དེ་སྐད་ཟེར་བ་སྟེ། གང་གི་ཕྱིར་ཁྱོད་མི་ཤེས་པ་དེའི་ཕྱིར་ཁོ་བོ་མི་སློབ་པོ་ཞེས་གོ་བར་བྱེད་པ་ལ་མི་ཤེས་པ་ཉིད་སྒྲོགས་པར་བྱེད་པའི་ཚིག་གང་ཡིན་པ་དེ་བརྗོད་ན་ཁ་ན་མ་ཐོ་བ་འདིར་འགྱུར་རོ་ཞེས་བྱ་བའི་ཐ་ཚིག་གོ །མདོ་སྡེ་ལས་གསུངས་པ་ལ་ནི་ཉེས་བྱས་ཀྱིའོ་ཞེས་བྱ་བ་ཡང་མངོན་པར་ཤེས་པ་ཉིད་ལའོ། །སྨྲ་བ་པོ་ལའོ། །སློབ་པ་པོ་ལའོ། །དགེ་སློང་གིས་ཁྱོད་ཀྱིས་འདི་ལ་བསླབ་པར་བྱའོ་ཞེས་བརྗོད་པ་ནའམ་བསྒོ་བ་ན་མི་སློབ་པོ་ཞེས་རྒྱུའི་དངོས་པོ་དེས་གོ་བར་བྱེད་པ་ལ་མི་ཤེས་པ་ཉིད་སྒྲོགས་པར་བྱེད་པའི་ཚིག་བརྗོད་ན་དེ་ཉིས་བྱས་ཀྱི་བྱེད་པ་པོ་ཉིད་ཡིན་ནོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ཅིག་ལས་འདུལ་བ་དང་ལྡན་པ་དག་མ་གཏོགས་པ་མདོ་སྡེ་དག་ལ་འདི་སྐད་ཅེས་ཁོ་བོ་འདི་ལ་མི་སློབ་པོ་ཞེས་ཟེར་ན་ཉེས་བྱས་སོ་ཞེས་གསུངས་པ་ཡིན་ནོ། །དེ་ལྟར་ན་འདིར་ཚིག་གི་དོན་འདི་འབྱུང་སྟེ། གལ་ཏེ་ལྟུང་བ་འབྱིན་པར་བྱེད་པའི་དགེ་སློང་གིས་དགེ་སློང་སྨྲ་བ་པོ་དེ་བསླབ་པའི་གཞིའི་ཡུལ་ལ་དགེ་སློང་འདིས་མངོན་པར་ཤེས་སོ་ཞེས་ཡོངས་སུ་ཤེས་པ་གང་ཡིན་པ་དེ་ཤེས་ཤིང་དགེ་སློང་སྨྲ་བ་པོ་དེས་ཁྱོད་ཀྱིས་བསླབ་པ་འདི་ལ་བསླབ་པར་བྱའོ་ཞེས་བརྗོད་པ་ནི་གལ་ཏེ་ལྟུང་བ་འབྱིན་པར་བྱེད་པ་དེས་གོ་བར་བྱེད་པ་དེ་ལ་མི་ཤེས་པ་ཉིད་བསྒྲགས་པར་བྱའོ་སྙམ་པའི་བསམ་པས་འདི་སྐད་
ཅེས་ཁོ་བོ་མི་སློབ་པོ་ཞེས་སྒྲོགས་པར་བྱེད་ན་ལྟུང་བ་འབྱིན་པར་བྱེད་པའི་ཚིག་གང་ཡིན་པ་དེ་བརྗོད་ན་ཁ་ན་མ་ཐོ་བ་འདིར་འགྱུར་རོ། །བསླབ་པ་ལ་ཉེ་བར་འཇོག་པ་སྤོང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་ཉན་རྣ་ལས་གྱུར་པའི་ལྟུང་བྱེད་དུ་འགྱུར་ཞེ་ན་དེའི་ཕྱིར། དགེ་སློང་དག་རྩོད་པར་གྱུར་པ་དགེ་སློང་དག་གྲོས་བྱེད་པ་ན་མཉན་པའི་ཕྱིར་རྣ་གཏོད་ན་དེ་ཉེ་བར་ཞི་བར་འདོད་པས་ནི་མ་གཏོགས་སོ་ཞེས་བྱ་བ་སྨྲས་ཏེ། ཡུལ་གྱི་དོན་གཅིག་ལ་བརྟེན་པའི་རྒོལ་བ་དང་ཕྱིར་རྒོལ་བ་དག་མང་པོ་ཞིག་ཡོད་མོད་ཀྱི་འོན་ཀྱང་རིགས་གཉིས་ཡོད་པའི་ཕྱིར། དགེ་སློང་དག་ཅེས་གཉིས་ཀྱི་ཚིག་ཏུ་བྱས་སོ། །རྒོལ་བ་དང་ཕྱིར་རྒོལ་བའི་དགེ་སློང་དག་ལ་གལ་ཏེ་རྩོད་པར་གྱུར་པ་ནི་རྩོད་པ་དེ་དགེ་སློང་དག་དང་གྲོས་བྱེད་པ་ན་དགེ་སློང་འདི་དག་ཇི་སྐད་ཟེར་བ་བཞིན་དེ་བདག་གིས་མཉན་ཏེ་དེ་ལྟར་དེ་ལྟ་བུར་སྟ་གོན་བྱའོ་སྙམ་ནས་རྐྱེན་དེ་ཉིད་ཀྱིས་མཉན་བའི་ཕྱིར་ཅིའང་མི་སྨྲ་བར་བཞབས་ཏེ་རྣ་གཏོད་ཅིང་ཉན་ན་ལྟུང་བྱེད་དོ། །ཅི་རྣ་གཏོད་པ་ཐམས་ཅད་ལའམ་ཞེ་ན་དེའི་ཕྱིར་ཉེ་བར་ཞི་བར་འདོད་པས་ནི་མ་གཏོགས་སོ་ཞེས་བྱ་བ་སྨྲས་ཏེ། རྩོད་པ་དེ་ཉེ་བར་ཞི་བར་འདོད་པས་རྣ་གཏོད་ཅིང་ཉན་པ་ནི་མ་གཏོགས་སོ་ཞེས་བྱ་བའི་ཐ་ཚིག་གོ །འདིར་གང་ལ་ཁ་ན་མ་ཐོ་བ་ཇི་ལྟར་འགྱུར་ཞེ་ན་དེའི་ཕྱིར། སྒྲ་ཐོས་པ་ལ་ནི་ཉེས་བྱས་སོ་ཞེས་བྱ་བ་སྨྲས་ཏེ། གལ་ཏེ་སྒྲ་ཙམ་ཐོས་ན་ཉེས་བྱས་སོ། །དོན་ལ་ནི་དངོས་གཞིའོ་ཞེས་བྱ་བ་སྨྲས་ཏེ། གལ་ཏེ་སྒྲའི་དོན་གོ་ན་དེའི་ཚེ་དངོས་གཞིའི་ལྟུང་བྱེད་དོ་ཞེས་བྱ་བའི་ཐ་ཚིག་གོ །ཅི་དོན་གང་ཡང་རུང་བ་གོ་ན་དངོས་གཞིར་འགྱུར་རམ་ཞེ་ན་དེའི་ཕྱིར། གལ་ཏེ་འཁྲུག་ལོང་བྱ་བ་ལ་གཞོལ་བས་སོ་ཞེས་བྱ་བ་སྨྲས་ཏེ། གལ་ཏེ་འཁྲུག་ལོང་བྱ་བ་ལ་གཞོལ་བས་དེའི་དོན་གོ་ན་དེའི་ཚེ་དངོས་གཞིའོ། །དོན་གཞན་གྱི་དབང་ཉིད་ཀྱིས་སོན་ཅིང་ཤེས་པའི་འོག་ཏུ་རྐང་བ་དང་སེ་གོལ་དང་ལུད་པའི་སྒྲ་དག་གིས་གོ་བར་མི་བྱེད་ན་ངེས་པར་ལྟུང་བ་འབྱིན་པ་ཉིད་དུ་འགྱུར་ཏེ། གལ་ཏེ་ནོར་པ་དང་ཞི་བར་འདོད་པ་ནི་མ་གཏོགས་སོ་ཞེས་བྱ་བ་ནི། དགོས་པ་གཞན་གྱི་དབང་ཉིད་ཀྱིས་གྲོས་བྱེད་པའི་གནས་སུ་སོན་ཅིང་གལ་ཏེ་དགེ་སློང་དེས་ཀྱང་འདི་ན་དགེ་སློང་དག་གྲོས་ཅུང་ཞིག་བྱེད་དོ་སྙམ་དུ་དེ་ལྟར་ཤེས་ལ་དེ་ལྟར་ཤེས་པའི་འོག་ཏུ་རྐང་
པའི་རྟིང་སྒྲའམ་སེ་གོལ་གྱི་སྒྲའམ་ལུད་པའི་སྒྲ་དག་གིས་གྲོས་བྱེད་པ་དེ་དག་ལ་གོ་བར་མི་བྱེད་ན་གོ་བར་མི་བྱེད་པའི་དགེ་སློང་དེས་ངེས་པར་ལྟུང་བ་འབྱིན་པ་ཉིད་དུ་འགྱུར་རོ། །གལ་ཏེ་ནོར་པར་གྱུར་ཏམ་ཞི་བར་འདོད་ན་ནི་མ་གཏོགས་སོ། །འཐབ་གཅུགས་མི་བྱའོ་ཞེས་བྱ་བ་ནི། འཐབ་མོ་སྤར་བར་མི་བྱའོ། །མཉན་པར་མི་བྱའོ་ཞེས་བྱ་བ་ནི་འཐབ་མོའོ། །དེ་བྱེད་པ་ལ་ཉེ་བར་བསྐོར་ཏེ་འདུག་པར་མི་བྱའོ་ཞེས་བྱ་བ་ནི། འཐབ་མོ་དེ་བྱེད་པའི་གང་ཟག་ལ་ཉེ་བར་བསྐོར་ཞིང་འདུག་པར་མི་བྱ་བ་སྟེ། དེའི་དྲུང་ན་འདུག་པར་མི་བྱ་བའོ་ཞེས་བྱ་བའི་ཐ་ཚིག་གོ །ཉེ་བར་ཞི་བར་བྱ་བའི་ཕྱིར་མི་འབད་པར་མི་བྱའོ་ཞེས་བྱ་བ་ནི། རྩོད་པ་དེ་ཉེ་བར་ཞི་བར་བྱ་བའི་ཕྱིར་འབད་པར་བྱའོ་ཞེས་བྱ་བའི་ཐ་ཚིག་གོ །ཉན་རྣ་ལས་གྱུར་པའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་མི་སྨྲ་བར་འགྲོ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་གསོལ་བ་ལ་སོགས་པའི་ལས་ལ་འདུས་པ་དགེ་སློང་ལས་སྨྲས་པར་འགྲོ་ནའོ་ཞེས་བྱ་བ་སྨྲས་ཏེ། གསོལ་བ་ལ་སོགས་པའི་ལས་ལ་ཞེས་བྱ་བ་ནི། གསོལ་བ་འབའ་ཞིག་དང་གསོལ་བ་དང་གཉིས་དང་གསོལ་བ་དང་བཞིའི་ལས་ཀྱིས་བདག་ཉིད་གསོ་སྦྱོང་དང་དགག་དབྱེ་ལ་སོགས་པ་ལ་སྟེ་རབ་ཏུ་བྱུང་བ་ལ་ལྟོས་པ་ཞུ་བ་ལ་སོགས་པ་ལ་ནི་མ་ཡིན་ནོ། །འདུས་པ་ཞེས་བྱ་བ་ནི། དགེ་འདུན་འདུས་པའི་ནང་དུ་ཞུགས་པའི་དགེ་སློང་ངོ༌། །དགེ་སློང་ལ་མ་དྲིས་པར་འགྲོ་ནའོ་ཞེས་བྱ་བ་ནི། དེར་འདུས་པའི་དགེ་སློང་དེ་འཕྲལ་གྱི་བྱ་བ་ལ་སོགས་པའི་རྐྱེན་ཅིག་བྱུང་ན་ལྟག་འོག་ན་འདུག་པའི་དགེ་སློང་ཅིག་ལ་མ་སྨྲས་པར་སྟན་ལས་ལངས་ཏེ་འགྲོ་ན་ལྟུང་བྱེད་དུ་འགྱུར་རོ། །འདིར་དགེ་སློང་ལ་སྨྲས་པ་ཞེས་བྱ་བ་ཡང་དགེ་འདུན་ཕྲིན་ལས་མཛད་པ་ལ་སྡོད་དུ་གཞུག་པའི་ཕྱིར་ནི་མ་ཡིན་གྱི། མཐུན་པ་སྒྲུབ་པའི་ཕྱིར་ཏེ་འདུན་པ་འབུལ་བ་དང་འདྲའོ། །ཐག་ཇི་སྲིད་དུ་སོང་ན་ཁ་ན་མ་ཐོ་བ་ཅིར་འགྱུར་ཞེ་ན་དེའི་ཕྱིར། ཐོས་པའི་ཉེན་ཀོར་ལས་འདས་ན་དངོས་གཞིའོ་ཞེས་བྱ་བ་སྨྲས་ཏེ། སྒྲ་ཐོས་པའི་ཉེན་ཀོར་གང་ཡིན་པ་དེ་ལས་འདས་ན་དགེ་སློང་དེ་ལ་དངོས་གཞིར་འགྱུར་རོ། །མདུན་རོལ་དུ་ཉེས་བྱས་སོ་ཞེས་བྱ་བ་ནི་ཐོས་པའི་ཉེན་ཀོར་ལས་
འདའ་བའི་མདུན་དུ་ནི་ཉེས་བྱས་སུ་འགྱུར་བའོ། །དོན་མེད་པ་དང་མི་རིགས་པར་འགྲོ་བའོ་ཞེས་བྱ་བ་ནི། དགོས་པ་མེད་པ་དང༌། མི་རིགས་པའི་ཚུལ་གྱིས་དགོས་པ་ནི། དགེ་སློང་ལ་སྨྲས་ཏེ་འགྲོ་ན་ཡང་ཉེས་བྱས་སུ་འགྱུར་བའོ། །གསོལ་བ་བྱས་པ་ཉིད་ལའོ། ཞེས་བྱ་བ་ནི། ཐོས་པའི་ཉེན་ཀོར་ལས་འདས་པ་ལ་ཡང་ཉེས་བྱས་ཁོ་ནར་འགྱུར་བའོ། །འདིར་གཞུང་ནི་བཙུན་པ་ལས་བརྗོད་པ་བགྱིས་པ་ན་དགེ་སློང་སྟན་ལས་ལངས་ཏེ་མཆི་ཞིང་དགེ་སློང་མཆིས་པ་དག་ལ་ཡང་མི་མཆི་ན་ལྟུང་བ་ཅིར་འགྱུར། ཉེ་བ་འཁོར་ཉེས་བྱས་སོ་ཞེས་གསུངས་པ་ཡིན་ནོ། །ཆོས་དང་ལྡན་པ་ཉིད་མ་ཡིན་པའི་ལས་ལ་ཡང་ངོ་ཞེས་བྱ་བ་ཡང༌། མ་སྨྲས་པར་ཐོས་པའི་ཉེན་ཀོར་ལས་འདའ་ན་ཉེས་བྱས་ཁོ་ནར་འགྱུར་བའོ། །དེ་ལྟར་མདོ་གསུམ་པོ་དེ་དག་ལ་ནི་དངོས་གཞིའི་གནས་སུ་ཉེས་བྱས་སུ་རིག་པར་བྱའོ། །འདིར་གཞུང་ནི་ཞུ་བ་ཁ་ཅིག་ལས་ཆོས་དང་ལྡན་པ་ཉིད་མ་ཡིན་པའི་ལས་བྱེད་པ་ན་འགྲོ་ན་ཉེས་བྱས་སོ་ཞེས་གསུངས་པ་ཡིན་ནོ། །ཐོས་པའི་ཡུལ་ལས་མི་འདའ་བར་འདོད་པས་ནི་ལྟུང་བ་མེད་དོ་ཞེས་བྱ་བ་ནི་ཐོས་པའི་ཡུལ་ཡོངས་སུ་མི་གཏོང་ངོ་སྙམ་པའི་བསམ་པས་འགྲོ་བ་ལ་ནི་ལྟུང་བ་མེད་དོ། །འདི་ནི་སྔར་མདུན་རོལ་དུ་ནི་ཉེས་བྱས་སོ་ཞེས་སྨྲས་པ་དེའི་དམིགས་ཀྱིས་བསལ་བ་ཡིན་ནོ། །འདིར་གཞུང་ནི་ཞུ་བ་ལས་གསོལ་བ་བརྩམས་པ་ན་བཤང་བའི་སའམ་གཅི་བའི་སར་འགྲོ་ཞིང་དགེ་སློང་འཁོད་པ་དག་ལ་མི་སྨྲ་བར་ཡང་ཐོས་པའི་ཉེན་ཀོར་ཡོངས་སུ་མི་གཏོང་བ་གང་ཡིན་པ་ལ་ནི་ལྟུང་བ་མེད་དོ། །གཏོང་ན་ནི་དངོས་གཞི་ཁོ་ནར་འགྱུར་རོ་ཞེས་གསུངས་པ་ཡིན་ནོ། །མི་སྨྲ་བར་འགྲོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་མགུས་པའི་ཚུལ་གྱིས་ལྟུང་བྱེད་དུ་འགྱུར་ཞེ་ན་དེའི་ཕྱིར། འདུག་པ་དང་འགྲོ་བ་དང་གནས་མལ་དང་གཙུག་ལག་ཁང་ལེན་པ་དང་སྨྲ་བ་ལ་སོགས་པ་བསྒོ་བའི་དོན་ལ་མ་གུས་པས་ཆོས་དང་ལྡན་པར་ཤད་ཀྱིས་སྦྱང་བ་མེད་པར་དེ་ལ་བཟློག་པ་སྟེ་འགལ་བར་བྱེད་པའོ་ཞེས་བྱ་བ་སྨྲས་ཏེ། དགེ་སློང་གི་དགེ་འདུན་གྱིས་འདུག་པ་དང་འགྲོ་བ་དང་གནས་མལ་ལེན་པ་དང་གཙུག་ལག་ཁང་ལེན་པ་དང་སྨྲ་བ་ལ་སོགས་པ་བསྒོ་བའི་དོན་ལམ་
གུས་པས་ཆོས་དང་ལྡན་པར་ཤད་ཀྱིས་སྦྱང་བ་མེད་པར་དེ་ལས་བཟློག་སྟེ་མི་འདུག་པ་དང་མི་འགྲོ་བ་དང་གནས་མལ་མི་ལེན་པ་དང༌། གཙུག་ལག་ཁང་མི་ལེན་པ་དང་མི་སྨྲ་བ་ལ་སོགས་པས་འགལ་ཞིང་འདའ་བར་བྱེད་པ་ལས་ཁ་ན་མ་ཐོ་བ་འདིར་འགྱུར་རོ། །སོགས་པ་ཞེས་སྨོས་པའི་སྒྲས་ནི་དོན་ལྷག་མ་དག་ཀྱང་བསྡུ་བའི་ཕྱིར་རོ། །མ་གུས་པས་ཞེས་བྱ་བ་དང་ཆོས་དང་ལྡན་པས་ཤད་ཀྱིས་སྦྱང་བ་མེད་པར་ཞེས་བྱ་བའི་ཚིག་གཉི་ག་སེམས་པ་ནི་ཕན་ཚུན་འཁྲུལ་པ་མེད་པར་བསྟན་པའི་ཕྱིར་ཏེ། འདི་ལྟ་སྟེ་དཔེར་ན། སྨྲོས་ཤིག་ཅེས་བྱས་ན་ཤིན་ཏུ་ཤེད་དམན་པའི་ཕྱིར་ཅུང་ཟད་ཀྱང་སྨྲ་བར་མི་ནུས་པར་ཅང་མི་སྨྲ་བར་འདུག་ཅིང་ཆོས་དང་ལྡན་པར་ཤད་ཀྱིས་སྦྱོང་བར་མི་བྱེད་ན་དེ་ལ་ནི་མ་གུས་པ་མེད་ལ། ཚིག་རྩུབ་མོས་ཆོས་དང་ལྡན་པར་ཤད་ཀྱིས་སྦྱོང་བར་བྱེད་ན་དེ་ལ་ནི་མ་གུས་པ་ཡོད་པས་དེའི་ཕྱིར་གང་ལ་གཉི་ག་ཡོད་པ་དེ་ལ་ནི་ཁ་ན་མ་ཐོ་བ་ཡོངས་སུ་རྫོགས་པར་འགྱུར་ལ། གང་ཡང་རུང་བ་མེད་པ་ལ་ནི་ཉེས་བྱས་སོ། །སུས་བསྒོ་བའི་དོན་ལས་འགལ་བར་བྱེད་པ་ལ་ལྟུང་བ་ཇི་ལྟར་འགྱུར་ཞེ་ན་དེའི་ཕྱིར། དགེ་སློང་གི་དགེ་འདུན་གྱིས་ལ་ནི་དངོས་གཞིའོ་ཞེས་བྱ་བ་སྨྲས་ཏེ། དགེ་སློང་གི་དགེ་འདུན་གྱིས་བསྒོ་བའི་དོན་ལས་འགལ་བར་བྱེད་པ་ལ་ནི་དངོས་གཞིར་འགྱུར་རོ། །མཁན་པོ་དང་སློབ་དཔོན་གྱིས་ལ་ནི་ཉེས་བྱས་སོ་ཞེས་བྱ་བ་ནི། དེ་དག་གིས་བསྒོ་བའི་དོན་ལས་འགལ་བར་བྱེད་པ་ལ་ནི་ཉེས་བྱས་སུ་འགྱུར་བའོ། །ཆོས་དང་ལྡན་པ་ཉིད་མ་ཡིན་པའི་བསྒོ་བ་ལས་ཀྱང་ངོ་ཞེས་བྱ་བ་ནི། དགེ་སློང་གི་དགེ་འདུན་གྱིས་བསྒོ་བའི་དོན་ཆོས་དང་ལྡན་པ་ཉིད་མ་ཡིན་པའི་བསྒོ་བ་ལས་འགལ་བར་བྱེད་པ་ལ་ཡང་ཉེས་བྱས་སོ་ཞེས་བྱ་བའི་ཐ་ཚིག་གོ །འདིར་གཞུང་ནི་ཞུ་བ་ལས་བཙུན་པ་དགེ་སློང་གིས་དགེ་སློང་གནས་བརྟན་རྣམས་ཆོས་དང་ལྡན་པའི་བཀའ་མཆིད་རྣམ་པར་གཏན་ལ་འབེབས་པ་ན་གློ་བུར་དུ་བཀའ་མཆིད་མཆི་ལ་ལྟུང་བར་ཡང་མི་འགྱུར་བ་མཆིས་སམ་ཡོད་དེ་འདི་ལྟ་སྟེ། དགེ་སློང་གནས་བརྟན་དག་ཆོས་མ་ཡིན་པ་སྨྲ་ལ་གསར་བུ་དག་ནི་ཆོས་སྨྲ་བས་གློ་བུར་དུ་གཏམ་ཟེར་ན་ཉེས་བྱས་སུ་འགྱུར་བའོ་ཞེས་གསུངས་པ་ཡིན་ནོ། །གཏམ་ཟེར་བ་ནི་དེ་ཉིད་དོ་ཞེས་བྱ་བ་ནི། གཞན་དག་ཆོས་དང་ལྡན་པའི་གཏམ་རྣམ་པར་གཏན་ལ་འབེབས་
པའི་བར་དུ་གློ་བུར་དུ་གཏམ་ཟེར་བ་ནི། དགེ་སློང་གི་དགེ་འདུན་གྱིས་བསྒོ་བ་ལས་འགལ་བར་བྱེད་པ་ཡིན་ཏེ་ལྟུང་བྱེད་དོ་ཞེས་བྱ་བའི་ཐ་ཚིག་གོ །འདིར་གཞུང་ནི་གླང་ཆེན་ལྷས་ཀྱི་བདག་པོའི་བུ་ནག་པ་གཏམ་གྱི་མཇུག་མོད་པར་མི་བྱེད་གུས་པར་མི་བྱེད་ཞེས་མི་བྱེད་ཅིང་ཕྱིར་སྨྲ་བར་བྱའོ་སྙམ་དུ་སེམས་སོ་ཞེས་བྱ་བའི་བར་དུ་གསུངས་པ་དེ་དང་འདིར་གཞུང་ནི་ཞུ་བའི་གཞུང་ལས་ཀྱང་གསར་བུ་ཆོས་མ་ཡིན་པ་སྨྲ་བ་དག་གནས་བརྟན་ཆོས་སྨྲ་བ་རྣམས་ལ་གློ་བུར་དུ་གཏམ་ཟེར་བ་ནི་ལྟུང་བྱེད་དོ་ཞེས་གསུངས་པ་ཡིན་ནོ། །དགེ་འདུན་གྱི་ཐ་སྙད་པ་ནི་དེའི་ཁ་ཡིན་ནོ་ཞེས་བྱ་བ་ནི། དགེ་འདུན་གྱི་ཐ་སྙད་པ་ནི་དགེ་འདུན་གྱི་ཁ་ཡིན་ཏེ། དགེ་འདུན་གྱི་ཐ་སྙད་པས་བསྒོ་བ་ཡིན་པ་དེ་ནི་དགེ་འདུན་ཉིད་ཀྱིས་བསྒོ་བ་མ་ཡིན་ནོ་ཞེས་བྱ་བའི་ཐ་ཚིག་གོ །སངས་རྒྱས་ནི་དགེ་འདུན་དང་འདྲའོ་ཞེས་བྱ་བ་ནི། སངས་རྒྱས་ལ་མ་གུས་པ་ལས་ཁ་ན་མ་ཐོ་བ་ཡོངས་སུ་རྫོགས་པར་འགྱུར་བ་ནི་དགེ་འདུན་དང་འདྲ་བ་སྟེ། བསླབ་པ་ལས་འགལ་བར་བྱེད་པའི་དུས་ན་གལ་ཏེ་དེའི་ཚིག་མི་དགོས་པ་འདིས་ཅི་ཞིག་བྱ་ཞེས་བྱ་བ་ལ་སོགས་པས་སངས་རྒྱས་བཅོམ་ལྡན་འདས་ལ་མ་གུས་པ་སྐྱེ་བ་ལ་ནི་ལྟུང་བྱེད་དོ། །གལ་ཏེ་བསླབ་པ་ཙམ་ལ་ཅུང་ཟད་ཙམ་དང་ངན་ངོན་ཙམ་འདིས་ཅི་ཞིག་བྱ་ཞེས་བྱ་བ་ལ་སོགས་པས་བསླབ་པ་ལ་མ་གུས་པ་སྐྱེ་ན་ནི་ཉེས་བྱས་སོ། །རྒྱལ་པོ་དང་དགྲ་བཅོམ་པ་དང་དགེ་འདུན་གྱི་གནས་བརྟན་རྣམས་ཀྱི་ཚིག་རྣམ་པར་དཀྲུག་པར་མི་བྱའོ་ཞེས་བྱ་བ་ལ། འདིར་གཞུང་ནི་ཤཱ་རིའི་བུ་ལྔ་པོ་དག་གི་ཚིག་ནི་མི་བསྐྱོད་པར་བྱ་བ་སྟེ། ཡང་དག་པར་རྫོགས་པའི་སངས་རྒྱས་དང༌། དགེ་སློང་དགྲ་བཅོམ་པ་ཟག་པ་ཟད་པ་དང༌། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དང༌། དགེ་འདུན་གྱི་གནས་བརྟན་དང་དགེ་སྐོས་ཀྱིའོ་ཞེས་གསུངས་པ་ཡིན་ནོ། །དེ་ལ་སངས་རྒྱས་ནི་དགེ་འདུན་དང་འདྲའོ། །དགེ་འདུན་གྱི་ཐ་སྙད་པ་ནི་དེའི་ཁ་ཡིན་ནོ་ཞེས་བྱ་བའི་མདོ་སྔ་མ་གཉིས་ཀྱིས་ནི་ཡང་དག་པར་རྫོགས་པའི་སངས་རྒྱས་ཀྱི་བཀའ་དང་དགེ་འདུན་གྱི་དགེ་སྐོས་ཀྱི་ཚིག་དང་འགལ་བར་བྱེད་པ་ལ་ལྟུང་བྱེད་དུ་བསྟན་པ་ཡིན་ནོ། །མདོ་འདིས་ནི་ལྷག་མ་གསུམ་པོ་རྒྱལ་པོ་རྒྱལ་རིགས་སྤྱི་བོ་
ནས་དབང་བསྐུར་བ་དང༌། དགེ་སློང་དགྲ་བཅོམ་པ་ཟག་པ་ཟད་པ་དང༌། དགེ་འདུན་གྱི་གནས་བརྟན་རྣམས་ཀྱི་ཚིག་ལས་འགལ་བར་བྱེད་པ་ལས་ཉེས་བྱས་སུ་བསྟན་པ་ཡིན་ནོ། །མ་གུས་པའི་ཚུལ་གྱིས་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།ཅི་ཞིག་བྱས་ན་མྱོས་པར་འགྱུར་བ་འཐུང་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར། མྱོས་པར་འགྱུར་བ་འཐུང་ནའོ་ཞེས་བྱ་བ་སྨྲས་ཏེ། མྱོས་པར་འགྱུར་བའི་བལྟུང་བ་འཐུང་ནའོ། །དེ་བསྐོལ་ན་ནི་དེ་ཉིད་ལས་ཉམས་པ་ཡིན་ནོ་ཞེས་བྱ་བ་ལ། མྱོས་པར་འགྱུར་བ་དེ་བསྐོལ་ན་ནི་མྱོས་པར་འགྱུར་བ་དེ་ཉིད་ལས་ཉམས་པ་ཡིན་ནོ། །འདིར་གཞུང་ནི་བསྐོལ་བ་འཐུང་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །སྔ་མ་དང་ཚིགས་མ་ཟ་བ་ལ་ནི་དེའི་འཇུག་པ་ཡོད་དོ་ཞེས་བྱ་བ་ནི། །སྦང་མ་དང་ཚིགས་མ་ཟ་བ་ལ་ནི་མྱོས་པར་འགྱུར་བ་དེའི་འཇུག་པ་ཡོད་དོ་ཞེས་བྱ་བའི་ཐ་ཚིག་གོ །སྦང་མ་ཞེས་བྱ་བ་ནི་འབྲུའི་ཆང་གི་སྦང་མའོ། །ཚིགས་མ་ཞེས་བྱ་བ་ནི་བཅོས་པའི་ཆང་གི་ཚིགས་མའོ། །འདིར་གཞུང་ནི་སྦང་མ་ཟ་ན་ལྟུང་བྱེད་དོ། །ཚིགས་མ་ཟ་ན་ལྟུང་བྱེད་དོ་ཞེས་གསུངས་པ་ཡིན་ནོ། །ཕབས་ཀྱི་ཆང་བུ་ནི་ཕྱེད་ཉིད་དོ་ཞེས་བྱ་བ་ནི། མྱོས་པར་འགྱུར་བའི་ཕྱེད་ཉིད་དེ་ཉེས་བྱས་ཉིད་ཡིན་ནོ་ཞེས་བྱ་བའི་ཐ་ཚིག་གོ །རྩ་བ་དང་སྡོང་བུ་དང་འདབ་མ་དང་མེ་ཏོག་དང་འབྲས་བུ་མྱོས་པར་འགྱུར་བ་རྣམས་ཀྱང་ངོ་ཞེས་བྱ་བ་ནི། མྱོས་པར་འགྱུར་བའི་ཕྱེད་ཉིད་དོ། །མྱོས་པར་འགྱུར་བའི་དྲི་དང་རོ་བྲོ་བའི་ཐུག་པ་མྱོས་པར་མི་བྱེད་པ་རྣམས་ཀྱང་ངོ་ཞེས་བྱ་བ་ཡང་མྱོས་པར་འགྱུར་བའི་ཕྱེད་ཉིད་དོ། །མདོག་ཙམ་མྱོས་པར་འགྱུར་བ་དང་འདྲ་བ་ལ་ནི་ལྟུང་བ་མེད་དོ་ཞེས་བྱ་བ་ནི། འདིར་གཞུང་ནི་མདོག་ཙམ་འབའ་ཞིག་མྱོས་པར་འགྱུར་བ་དང་འདྲ་བའི་འཐུང་བ་ལ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །མཁུར་བར་བསྲེལ་བ་དང་ལུས་སྐུད་པ་ནི་སྦྱོར་བ་དང་འདྲའོ་ཞེས་བྱ་བ་ནི། མྱོས་པར་འགྱུར་བ་མཁུར་བར་བསྲེལ་བ་དང་དེས་ལུས་སྐུད་པ་ནི་སྦྱོར་བ་དང་འདྲ་བར་རིག་པར་བྱ་སྟེ་ཉེས་བྱས་བྱེད་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །ནད་པ་ལ་ནི་ལྟུང་བ་མེད་དོ་ཞེས་བྱ་བ་ནི། ནད་པས་མཁུར་བར་བསྲེལ་བ་དང་ལུས་སྐུད་པ་དག་བྱེད་པ་ལ་ནི་ལྟུང་བ་མེད་པའོ། །འདིར་གཞུང་ནི་སྨན་
པའི་ལུང་གིས་མཁུར་བར་བསྲེལ་བ་དང་ལུས་དག་སྐུད་པ་ནི་ལྟུང་བ་མེད་དོ་ཞེས་གསུངས་པ་ཡིན་ནོ། །དེ་ཉིད་སྦྱོར་བ་དང་འདྲའོ་ཞེས་བྱ་བ་ནི་མདོ་སྔ་མ་ཤོས་ཀྱི་ཁུངས་ཡིན་ནོ། །མྱོས་པར་འགྱུར་བ་འཐུང་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།དུས་མ་ཡིན་པར་འགྲོ་བའི་ལྟུང་བྱེད་ལ་བྱེད་པ་པོ་ཉིད་གང་ཡིན་ཞེ་ན་དེའི་ཕྱིར། ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་བོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྦྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར་དུས་མ་ཡིན་པ་ཉིད་ལའོ་ཞེས་བྱ་བ་སྨྲས་ཏེ། དུས་མ་ཡིན་པའི་ཡུལ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །དུས་མ་ཡིན་པའི་མཚན་ཉིད་ནི་སྔར་དུས་མ་ཡིན་པར་ཟ་བའི་སྐབས་སུ་རང་གི་ཕྱེད་ཉིད་ཡོལ་ནས་སྐྱ་རེངས་ཤར་བའི་བར་ནི་དུས་མ་ཡིན་ནོ་ཞེས་བསྟན་པ་ཡིན་ནོ། །དགེ་སློང་ཁྱད་པར་ཇི་ལྟ་བུ་ཅན་ཞིག་ལ་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར་དགེ་སློང་འཁོད་པ་ལས་མ་སྨྲས་པ་ལའོ་ཞེས་བྱ་བ་སྨྲས་ཏེ། གང་གིས་དགེ་སློང་འཁོད་ཅིང་ཡོད་པ་ལ་མ་སྨྲས་པ་དེ་ནི་དགེ་སློང་འཁོད་པ་ལ་མ་སྨྲས་པ་སྟེ་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ནོ། །ཅི་ཞིག་བྱས་ན་དགེ་སློང་དེ་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན་དེའི་ཕྱིར་གྲོང་དུ་ཞུགས་ནའོ་ཞེས་བྱ་བ་སྨྲས་ཏེ། ཁྱམས་གཅིག་པའི་གནས་ཀྱང་གྲོང་ཉིད་ཡིན་པར་གསུངས་པས་དེའི་ཕྱིར་ཁང་པ་གཅིག་ཙམ་ཡོད་པའི་གནས་ཀྱང་གྲོང་ཉིད་ཡིན་ནོ། །གྲོང་པའི་ཆོས་དང་ལྡན་པར་ལྷག་པར་སྤྱོད་པའི་གནས་དག་ལ་ནི་གྲོང་གི་སྒྲ་འཇུག་པར་འགྱུར་བས་དེའི་ཕྱིར་མ་སྨྲས་པར་ཕྱི་རོལ་པའི་རབ་ཏུ་བྱུང་བའི་གནས་སུ་འཇུག་པ་ལ་ཉེས་པ་མེད་དོ། །བསྐོར་བ་དང་བཅས་པའི་གྲོང་ལ་ནི་སྒོ་གཏན་གྱི་བར་དུ་འཇུག་ན་ཞུགས་པ་ཡོངས་སུ་རྫོགས་པར་རིག་པར་བྱའོ། །མ་བསྐོར་བ་ལ་ནི་བསྐོར་བའི་མཐའི་འདོམ་གང་ལ་སོགས་པར་རོ། །ཅི་ཞུགས་པ་ཐམས་ཅད་ལའམ་ཞེ་ན་དེའི་ཕྱིར། གལ་ཏེ་གཏད་པའི་བྱ་བ་མ་བྱུང་ནའོ་ཞེས་བྱ་བ་སྨྲས་ཏེ། གང་ལ་ཆོམ་རྐུན་ལ་སོགས་པས་གནོད་པའི་བྱ་བ་གཏད་པ་མེད་པ་དེ་ལ་ཁ་ན་མ་
ཐོ་བ་འདིར་འགྱུར་རོ། །དེའི་དབང་གིས་འཇུག་པ་གང་ཡིན་པ་དེ་ལ་ནི་ལྟུང་བ་མེད་དོ། །གཞན་དུ་རྒྱུ་བ་ལ་ནི་ཉེས་བྱས་སོ་ཞེས་བྱ་བ་ནི། དེ་ཕྱོགས་གང་དུ་གྲོང་བའི་ཕྱིར་སྨྲས་པའི་ཕྱོགས་དེ་ལས་གཞན་པ་དེའི་ཡན་ལག་ཏུ་གྱུར་པའི་ཕྱོགས་གང་ཡིན་པ་དེར་རྒྱུ་བ་དེ་ལ་ནི་ཉེས་བྱས་སོ། །གྲོང་གཅིག་པའི་ཁྱིམ་གཞན་དུ་འགྲོ་བ་སྨྲ་ཞིང་ཁྱིམ་གཞན་དུ་རྒྱུ་བ་ཡང་ཉེས་བྱས་སོ། །གྲོང་གཞན་དུ་རྒྱུ་བ་ལ་ནི་ལྟུང་བྱེད་དོ། །གྲོང་ཡོངས་སུ་ཆད་པར་བྱེད་ཅིང་ཁྱིམ་ཡོངས་སུ་ཆད་པར་མི་བྱེད་པར་གྲོང་དེའི་ཁྱིམ་དུ་འཇུག་པ་ཡང་ཉེས་བྱས་ཁོ་ནའོ། །འདིར་གཞུང་ནི་ཞུ་བ་ལས་གང་ལ་ཉེན་ཀོར་གཅིག་ཡིན་པའི་ཉེན་ཀོར་ཤེས་པ་ལས་འདས་སྟེ་དེར་འགྲོ་ན་ཉེས་བྱས་སོ་ཞེས་གསུངས་པ་ཡིན་ནོ། །འདིར་ཉེན་ཀོར་གཅིག་ཉིད་ཅེས་བྱ་བས་ནི་གྲོང་གཅིག་ཉིད་བསྟན་པར་རིག་པར་བྱའོ། །འདི་ལ་དགེ་སློང་མེད་ན་དགེ་སློང་མ་ཡང་དེ་དང་འདྲའོ་ཞེས་བྱ་བ་ནི། དགེ་སློང་འཁོད་པ་ལ་སྨྲས་ཏེ། འགྲོ་བར་བྱ་བ་འདི་ལ་གང་ལ་སྨྲ་བར་བྱ་བའི་དགེ་སློང་མེད་ན་དགེ་སློང་མ་ཡང་དེ་དང་འདྲ་བར་རིག་པར་བྱ་སྟེ། གལ་ཏེ་དགེ་སློང་མེད་ན་དགེ་སློང་མ་དེ་ལ་སྨྲ་བར་བྱའོ་ཞེས་བྱ་བའི་ཐ་ཚིག་གོ །དེ་ཡང་མེད་ན་དགེ་ཚུལ་ལའོ་ཞེས་བྱ་བ་ནི། དགེ་སློང་མ་དེ་ཡང་མེད་ན་དགེ་ཚུལ་དགེ་སློང་དང་འདྲ་བར་རིག་པར་བྱའོ། །དེ་ཡང་མེད་ན་དགེ་སློབ་མའོ་ཞེས་བྱ་བ་ནི། དགེ་ཚུལ་དེ་ཡང་མེད་ན་དགེ་སློབ་མ་དགེ་སློང་དང་འདྲའོ། །དེ་ཡང་ན་དགེ་ཚུལ་མའོ་ཞེས་བྱ་བ་ནི། གལ་ཏེ་དགེ་སློབ་མ་དེ་ཡང་མེད་ན་དགེ་ཚུལ་མ་ཡོད་ན་དེ་ལ་སྨྲ་བར་བྱའོ་ཞེས་བྱ་བའི་ཐ་ཚིག་གོ །འདིར་གཞུང་ནི་དགེ་སློང་གིས་དགེ་སློང་ལ་སྨྲ་བར་བྱ་ཞིང་དགེ་སློང་མ་དང་དགེ་ཚུལ་དང་དགེ་སློང་མ་དང་དགེ་ཚུལ་མ་ལ་ཡང་སྨྲ་བར་བྱ་སྟེ་ཁོར་ལོ་བཞིན་དུ་སྦྱར་བར་བྱའོ་ཞེས་གསུངས་པ་ཡིན་ནོ། །བརྡ་མི་ཕྲད་པ་ནི་མེད་པ་ཉིད་དོ་ཞེས་བྱ་བ་ནི། གླེན་པ་དང་ལྐུགས་པ་དང་ཀླ་ཀློ་ལ་སོགས་པ་དག་དེས་བརྡ་མི་ཕྲད་པ་ཡིན་ན་སྨྲ་བར་བྱ་བ་ཉིད་མ་ཡིན་ནོ། །འདིར་གཞུང་ནི་ཐ་མལ་པར་སྨྲས་པ་མི་ཐོས་པ་དང་ཐ་མལ་པར་སྨྲས་པ་མི་ཤེས་པ་གང་དག་ཡིན་པ་དེ་དག་དང་ལྷན་ཅིག་འདུག་པས་དེ་དག་ལ་མ་སྨྲས་པར་འཇུག་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །
མཚམས་གཞན་ན་གནས་པ་དང༌། སྤངས་པ་དང་གཞན་གྱི་ཕྱོགས་དང་མཐུན་པ་དག་ཀྱང་ངོ་ཞེས་བྱ་བ་ཡང་མེད་པ་ཉིད་ཡིན་པའི་མཚམས་གཞན་ན་གནས་པ་ཞེས་བྱ་བ་ནི། ནམ་མཁའ་ལ་གནས་པའི་དགེ་སློང་ལ་ས་ལ་གནས་པའི་དགེ་སློང་གིས་མ་སྨྲས་པར་འཇུག་པ་ལ་ལྟུང་བ་མེད་པའོ། །དེ་བཞིན་དུ་སྤངས་པ་དང༌། གཞན་གྱི་ཕྱོགས་སུ་གྱུར་པ་ལ་མ་སྨྲས་པར་འཇུག་པ་ལ་ཡང་ལྟུང་བ་མེད་དོ། །གཞན་གྱི་ཕྱོགས་དང་མཐུན་པ་ཞེས་བྱ་བ་ནི། ཐ་དད་པར་གྱུར་པའི་དགེ་འདུན་གྱི་ཕྱོགས་གཞན་དུ་གཏོགས་པར་རིག་པར་བྱའོ། །འདིར་གཞུང་ནི་ས་ལ་གནས་པས་ནམ་མཁའ་ལ་གནས་པ་ལ་མ་སྨྲས་པར་འཇུག་པ་ལ་ལྟུང་བ་མེད་དོ། །ཐ་དད་པར་སྨྲས་པ་དང་ལྷན་ཅིག་འདུག་པས་དེ་ལ་མ་སྨྲས་པར་འཇུག་པ་ལ་ལྟུང་བ་མེད་དོ། །དེ་བཞིན་དུ་མི་མ་ཡིན་པ་རབ་ཏུ་བྱུང་ཞིང་བསྙེན་པར་རྫོགས་པ་དག་དང་ལྷན་ཅིག་འདུག་པས་དེ་ལ་མ་སྨྲས་པར་འཇུག་པ་ལ་ལྟུང་བ་མེད་དོ། །སྔོན་ལྟུང་བ་བྱུང་བ་དང༌། དང་པོ་འཁྲུགས་པ་དང༌། རྐུ་ཐབས་སུ་གནས་པ་དང༌། དགེ་སློང་མ་སུན་ཕྱུང་བ་དང༌། མཐའི་ལྟུང་བ་འབྱུང་བ་དང་ལྷན་ཅིག་འདུག་པས་དེ་དག་ལ་མ་སྨྲས་པར་འཇུག་པ་ལ་ལྟུང་བ་མེད་དོ། །དེ་ལས་གཞན་པའི་དགེ་སྦྱོང་དང་བྲམ་ཟེ་དག་དང་ལྷན་ཅིག་འདུག་པས་མ་དྲིས་པར་འཇུག་པ་ལ་ལྟུང་བ་མེད་དོ་ཞེས་གསུངས་པ་ཡིན་ནོ། །རྫུ་འཕྲུལ་གྱིས་ནི་ལྟུང་བ་མེད་དོ་ཞེས་བྱ་བ་ནི། རྫུ་འཕྲུལ་གྱིས་གྲོང་དུ་འཇུག་པ་ལ་ནི་ལྟུང་བ་མེད་དོ། །འདིར་གཞུང་ནི་རྫུ་འཕྲུལ་གྱིས་ནམ་མཁའ་ལ་འཇུག་ན་མ་སྨྲས་ཀྱང་ལྟུང་བ་མེད་དོ་ཞེས་གསུངས་པ་ཡིན་ནོ། །དུས་མ་ཡིན་པར་འགྲོ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།གང་ལ་གྲོང་རྒྱུ་བའི་ལྟུང་བྱེད་དུ་འགྱུར་ཞེ་ན་དེའི་ཕྱིར་དུས་མ་ཡིན་པར་ཁྱིམ་བཞི་པ་ལ་སོགས་པར་འགྲོ་བ་ལའོ་ཞེས་བྱ་བ་སྨྲས་ཏེ། དགེ་སློང་གུང་ཚིགས་ལས་ཡོལ་བའི་དུས་མ་ཡིན་པར་ཁྱིམ་བཞི་པ་ལ་སོགས་པར་འགྲོ་བ་དེ་ལ་ཁ་ན་མ་ཐོ་བ་འདིར་འགྱུར་རོ། །ལྟུང་བྱེད་སྔ་མ་ལ་ནི་དགེ་སློང་འཁོད་པ་དག་ལ་མ་སྨྲས་པར་འགྲོ་བ་ལ་ལྟུང་བྱེད་དུ་བསྟན་ཏོ། །འདིར་ནི་དགེ་སློང་འཁོད་པ་དག་ལ་
སྨྲས་སུ་ཟིན་ཀྱང་ལྟུང་བྱེད་དུ་འགྱུར་རོ། །ཅི་འདིར་དེ་འབའ་ཞིག་ལའམ་ཞེ་ན་དེའི་ཕྱིར། དེའི་ཚིག་གིས་དགེ་འདུན་སྤྱན་དྲངས་པ་ནི་སྦྱིན་བདག་ལ་ཁོ་བོ་མ་འོངས་པའི་དབང་གིས་བྲིམ་པ་ཡོལ་བར་མི་བྱ་ཤིག་ཅེས་མ་བསྒོ་བར་གསུམ་པ་ལ་སོགས་པར་རྒྱུ་བ་ལ་ཡང་ངོ་ཞེས་བྱ་བ་སྨྲས་ཏེ། དགེ་སློང་དེའི་ཚིག་གིས་དགེ་འདུན་ཟས་དང་བཅས་པའི་ཁྱིམ་དུ་སྤྱན་དྲངས་པ་ན་གལ་ཏེ་དགེ་སློང་དེས་སྦྱིན་པ་པོ་དང་སྦྱིན་བདག་ལ་འདི་སྐད་ཅེས་ཁོ་བོ་མ་འོངས་པའི་དབང་གིས་ཁྱོད་ཀྱིས་དགེ་སློང་རྣམས་ལ་ཟས་བྲིམ་པ་ཡོལ་བར་མི་བྱ་ཤིག་ཅེས་མ་བསྒོ་བར་ཁྱིམ་གསུམ་པ་ལ་སོགས་པར་རྒྱུ་ཞིང་འགྲོ་བ་དེ་ལ་ཡང་ཁ་ན་མ་ཐོ་བ་འདིར་འགྱུར་རོ། །དགེ་སྦྱོང་གི་ཚུལ་དང་སྲོག་ལ་སོགས་པའི་བར་ཆད་ཀྱི་དབང་གིས་ནི་ལྟུང་བ་མེད་དོ། །འདིར་ནི་ཁྱིམ་རེ་རེར་སོང་བ་ལ་ལྟུང་བྱེད་རེ་རེར་འགྱུར་བ་དེའི་ཕྱིར་ཁྱིམ་བཞི་པ་ལ་སོགས་པར་འགྲོ་བ་ལའོ་ཞེས་བྱ་བའི་མདོ་སྔ་མ་ལ་ནི་ཁྱིམ་བཞི་པ་དང་ལྔ་པ་དང་དྲུག་པ་ལ་སོགས་པར་འགྲོ་བ་ལས་ཞེས་བྱ་བའི་ཐ་ཚིག་སྟེ། ཁྱིམ་སོ་སོར་འགྲོ་བ་ལ་ནི་གསུམ་པ་ལ་སོགས་པར་རྒྱུ་བ་ལ་ཡང་ངོ་ཞེས་བྱ་བའི་མདོ་ཕྱི་མ་ལ་ནི་ཁྱིམ་གསུམ་པ་དང་བཞི་པ་དང་ལྔ་པ་ལ་སོགས་པར་འགྲོ་བ་ལ་ཞེས་བྱ་བའི་ཐ་ཚིག་སྟེ། ཁྱིམ་སོ་སོར་འགྲོ་བ་ལ་ནི་སྦྱོར་བ་ཐ་དད་པའི་ཕྱིར་རོ། །ཟན་གཅད་པར་བྱ་བའི་བསླབ་པ་ལ་ནི་འདིར་ཁྱིམ་རེ་རེ་ལ་ལྟུང་བྱེད་གཞན་ཡོད་པར་རིག་པར་བྱའོ། །གྲོང་རྒྱུ་བའི་ལྟུང་བྱེད་དོ་ཞེས་བྱ་བ་དེ་བཤད་ཟིན་ཏོ།། །།རྒྱལ་པོའི་ཕོ་བྲང་དུ་ནུབ་མོ་འགྲོ་བའི་ལྟུང་བྱེད་ལ་བྱེད་པ་པོ་གང་ཡིན་ཞེ་ན། དེའི་ཕྱིར་ཤེས་གཙོ་བོ་ཞེས་བྱ་བ་སྨྲས་ཏེ། འདིར་ཡང་ཤེས་གཙོ་ཞེས་བྱ་བའི་མིང་དང་འདུ་ཤེས་གཙོ་ཆེར་བྱེད་པ་པོ་ཉིད་དོ་ཞེས་བྱ་བའི་མིང་ཅན་དུ་སྤྱོར་བར་བྱེད་དོ། །གང་ལ་འདུ་ཤེས་གཙོ་ཆེར་བྱེད་པ་པོ་ཉིད་ཡིན་ཞེ་ན། དེའི་ཕྱིར། ནམ་མ་ལངས་པ་ཉིད་ལའོ་ཞེས་བྱ་བ་སྨྲས་ཏེ། ནམ་མ་ལངས་པའི་ཡུལ་ལ་འདུ་ཤེས་གཙོ་ཆེར་བྱེད་པ་པོ་ཡིད་ཡིན་ཏེ། ནམ་ཡང་མ་ལངས་ལ་དགེ་སློང་གིས་ཀྱང་ནམ་མ་ལངས་པར་འདུ་ཤེས་ན་ཞེས་བྱ་བའི་ཐ་ཚིག་གོ །ཉིན་མོའི་དང་པོ་ནི་སྐྱ་རེངས་དང་པོ་ཤར་བ་ཡིན་པར་གསུངས་པ་དེའི་མདུན་རོལ་ནི་
མཚན་མོའི་མཐའ་ཡིན་པར་རྣམ་པར་གཞག་ན། ཅི་འདིར་ཡང་དེ་བཞིན་དུ་རྣམ་པར་གཞག་གམ་ཞེ་ན་མ་ཡིན་ཏེ་དེའི་ཕྱིར། འདི་ནི་སྐྱ་རེངས་ཐ་མ་ཤར་བ་ཉིད་དེ་ཉིད་ཡིན་ནོ་ཞེས་བྱ་བ་སྨྲས་ཏེ། སྐབས་འདིར་ནི་སྐྱ་རེངས་ཐ་མ་མ་ཤར་བ་ཉིད་ནམ་མ་ལངས་པ་ཉིད་ཡིན་ལ། སྐྱ་རེངས་ཐ་མ་ཤར་བ་ཉིད་ནི་ནམ་ལངས་པ་ཉིད་ཡིན་ནོ་ཞེས་བྱ་བའི་ཐ་ཚིག་གོ །གནས་སྐབས་གང་ལ་དེ་བྱེད་པ་པོ་ཉིད་ཡིན་ཞེ་ན་དེའི་ཕྱིར། བཙུན་མོའི་འཁོར་འདུག་པའི་གནས་དང་འབྲེལ་བ་ཉིད་ལའོ་ཞེས་བྱ་བ་སྨྲས་ཏེ། བཙུན་མོའི་འཁོར་འདུག་པའི་གནས་དང་ལྟུང་བ་འབྱིན་པར་བྱེད་པའི་ལུས་སུ་འབྲེལ་པ་ཉིད་ལ་འདུ་ཤེས་གང་ཡིན་པ་དེ་བྱེད་པ་པོ་ཉིད་ཡིན་ནོ། །འདི་སྐད་བསྟན་ཏེ། གལ་ཏེ་དགེ་སློང་ནུབ་མོ་བཙུན་མོའི་འཁོར་གྱི་གནས་སུ་ལུས་འབྲེལ་བར་གྱུར་ཅིང་དེར་འདུ་ཤེས་བར་ཡང་གྱུར་ན་དེའི་ཚེ། ཁ་ན་མ་ཐོ་བ་འདིར་འགྱུར་རོ། །ཅི་ནུབ་མོ་གང་ལ་འབྲེལ་པ་ཉིད་དུ་འགྲོ་བའི་སྐབས་བྱེད་པ་པོ་དེ་ལ་འདུ་ཤེས་གང་ཡིན་པ་དེ་བྱེད་པ་པོ་ཉིད་ཡིན་ནམ་འོན་ཏེ་དུས་གཞན་གྱི་ཚེ་འགྲོ་བའི་སྐབས་བྱེད་པ་པོ་ལ་ཡང་ཡིན་ཞེ་ན་དེའི་ཕྱིར། དེའི་ཚེ་སྐབས་མ་ཡིན་པ་ལ་ཡང་ངོ་ཞེས་བྱ་བ་སྨྲས་ཏེ། དེའི་ནུབ་མོ་དང་འབྲེལ་བ་ཉིད་ཀྱི་སྐབས་མ་ཡིན་པ་དེ་ནི་དེའི་ཚེ་སྐབས་མ་ཡིན་པ་སྟེ། དེའི་སྐབས་མ་ཡིན་པ་དུས་གཞན་གྱི་ཚེ་དེའི་སྐབས་ལ་ཡང་འདུ་ཤེས་གང་ཡིན་པ་དེ་བྱེད་པ་པོ་ཡིན་ནོ། །འདི་སྐད་བསྟན་ཏེ། ནུབ་མོའམ་ཉིན་མོ་གཞན་གང་གི་ཚེ་འགྲོ་བའི་སྐབས་བྱེད་པ་དེ་ལ་ཡང་འདུ་ཤེས་གང་ཡིན་པ་དེ་བྱེད་པ་པོ་ཉིད་ཡིན་ནོ། །འདིར་གཞུང་ནི་གང་གི་ཚེ་འཕགས་པ་ཤཱ་རིའི་བུ་བཙུན་མོ་དཔལ་ལྡན་གྱིས་ཇི་སྲིད་དུ་བདེན་པ་དག་མ་མཐོང་གི་བར་དུ་ཆོས་དང་ལྡན་པའི་གཏམ་གྱིས་ཡང་དག་པར་སྟོན་པར་བྱེད། ཡང་དག་པར་འཛིན་དུ་འཇུག་པར་བྱེད་པའི་ཚེ་ཉི་མ་ནུབ་པའི་དུས་ལ་བབ་པ་ལ་དགེ་སློང་རྣམས་སྟན་དག་ལས་ལངས་ཏེ་དོང་བ་དང༌། ཚེ་དང་ལྡན་པ་ཤཱ་རིའི་བུས་ཀུན་དུ་བརྟགས་པ་འདི་ལྟར་བཅོམ་ལྡན་འདས་ཀྱིས་རྗེས་སུ་མ་གནང་མོད་ཀྱི།
འོན་ཀྱང་རྐྱེན་འདི་ལྟ་བུ་ཉིད་ཀྱི་དབང་དུ་བྱས་ན་རྗེས་སུ་གནང་བར་འགྱུར་བའི་གནས་དེ་ནི་ཡོད་དོ་སྙམ་ནས་འདུལ་བ་ལ་ལྟོས་པས་དེ་ཉིད་དུ་འདུག་གོ་ཞེས་གསུངས་པ་ཡིན་ཏེ། འདི་ལྟར་འཕགས་པ་ཤཱ་རིའི་བུས་ཉིན་མོ་འབྲེལ་པ་ཉིད་དུ་འགྲོ་བའི་སྐབས་བྱས་མོད་ཀྱི། འོན་ཀྱང་དོགས་པ་ཉིད་དུ་གྱུར་པས་དེའི་ཕྱིར་མདོ་འདི་བྱས་སོ། །མཚན་མོ་དུ་མར་འབྲེལ་པ་ཉིད་ལ་ཅི་ཐམས་ཅད་ལ་འདུ་ཤེས་གཅིག་ཁོ་ན་བྱེད་པ་པོ་ཉིད་ཡིན་ནམ་ཞེ་ན་དེའི་ཕྱིར། མཚན་མོ་རེ་རེ་ལའོ་ཞེས་བྱ་བ་སྨྲས་ཏེ། མཚན་མོ་རེ་རེ་ལ་འབྲེལ་པ་ཉིད་དུ་གྱུར་བ་རེ་རེའི་ནང་རོལ་དུ་འདུ་ཤེས་བྱེད་པ་པོ་ཉིད་ཡིན་ནོ། །མཚན་མོ་ཐམས་ཅད་ལ་ལྟུང་བ་ཐ་དད་པར་འགྱུར་རོ་ཞེས་བྱ་བའི་ཐ་ཚིག་གོ །མཚན་མོའི་ཆ་གང་ཡང་རུང་བ་ལ་ལྟུང་བྱེད་དུ་འགྱུར་བ་ཡིན་གྱི། མཐའ་འབའ་ཞིག་ལ་ལྟུང་བྱེད་དུ་འགྱུར་བ་ནི་མ་ཡིན་ནོ།། སྔར་འཆང་བའི་སྤང་བའི་ལྟུང་བྱེད་ལ་སོགས་པའི་ཐུན་མོང་གི་མཚན་ཉིད་རྣམ་པར་གཞག་པ་བསྟན་པའི་སྐབས་སུ་ཉིན་མཚན་གྱི་དང་པོ་མ་ཡིན་པ་ལ་ཐམ་མ་ཡིན་པ་མེད་པ་ཉིད་དོ་ཞེས་སྨོས་པ་དེས་ནི་ཉིན་མཚན་གྱི་མཚན་ཉིད་བསྟན་པ་ཡིན་གྱི་མཚན་མོ་འབའ་ཞིག་གི་མཚན་ཉིད་བསྟན་པ་ནི་མ་ཡིན་པས་དེའི་ཕྱིར་རྣམ་པ་དེ་ནི་འདིར་ཁས་མི་བླང་ངོ༌། །མཚན་མོའི་དང་པོ་གང་ཡིན་ཞེ་ན། ཉི་མ་ནུབ་པའི་འོག་ཏུ་འོད་དམར་པོ་ཆགས་པ་གང་ཡིན་པ་དེ་འདས་པར་གྱུར་པ་ནི་མཚན་མོའི་དང་པོ་ཡིན་ཏེ། དེ་ཡང་ནམ་ནངས་པ་ཉིད་བསྟན་པའི་རྗེས་སུ་འབྲངས་བ་ལ་ཁོང་དུ་ཆུང་པར་བྱའོ། །ཇི་ལྟར་འདིར་ཉིན་མོའི་དང་པོ་ནི་སྐྱ་རེངས་ཐ་མ་ཞེས་བྱ་བ་དམར་རེངས་ཤར་བ་ཡིན་པ་དེ་བཞིན་དུ་འོད་དམར་པོ་དེ་ནུབ་པ་ཡང་ཉིན་མོའི་མཐའ་ཡིན་ལ་དེ་ཕྱིན་ཆད་ནི་མཚན་མོ་ཡིན་པར་རིག་པར་བྱའོ། །དགེ་སློང་གལ་ཏེ་མཚན་གཅིག་ཐོག་ཐག་ཏུ་རྒྱུན་དུ་གནས་པར་བྱེད་པ་དེ་ལ་ཇི་ལྟར་ཁ་ན་མ་ཐོ་བ་ཉིད་ཁོ་ནར་འགྱུར་ཞེ་ན། དེའི་ཕྱིར། ཇི་སྟེ་བཙུན་མོའི་འཁོར་གྱི་མཚམས་ལས་འདས་ནས་ཕྱིར་བྱུང་ཞིང་ཡང་ནང་དུ་
འཇུག་པར་བྱེད་ན་ནི་དེ་ལྟ་ན་ནི་ལྟུང་བ་ཐ་དད་པར་འགྱུར་ཏེ་སྦྱོར་བ་ཐ་དད་པའི་ཕྱིར་རོ། །ཇི་སྟེ་མཚན་ཐོག་ཐག་འབྱུང་འཇུག་མེད་པར་འཇུག་ན་ནི་ལྟུང་བྱེད་གཅིག་ཏུ་འགྱུར་རོ། །གང་ནས་བརྩམས་ཏེ་སྒོར་འཇུག་པ་ལ་བཙུན་མོའི་འཁོར་འདུག་པའི་གནས་སུ་རིག་པར་བྱ་ཞེ་ན་དེའི་ཕྱིར། དེའི་སྒོའི་གཏན་པ་དང་ཉེན་ཀོར་གཉིས་ཀྱི་མཐའ་གཉིས་ནི་དེའི་དང་པོ་ཡིན་ནོ་ཞེས་བྱ་བ་སྨྲས་ཏེ། བཙུན་མོའི་འཁོར་གྱི་གནས་དེའི་ནང་རོལ་གྱི་སྒོའི་གཏན་པ་གང་ཡིན་པ་དེ་དང་སྒོའི་གཏན་པའི་ཉེན་ཀོར་གྱི་མཐའ་སྟེ་མུར་ཐུག་གང་དག་ཡིན་པ་དེ་གཉིས་ནི་བཙུན་མོའི་འཁོར་གྱི་གནས་དེའི་དང་པོ་ཡིན་པར་རིག་པར་བྱའོ། །འདིར་ཉེན་ཀོར་དེའང་གང་ཞེ་ན། ཕྱོགས་གང་དུ་སྒོ་གཏན་གྱི་རྩ་བ་གཏན་པ་དེ་ནས་དེའི་རྩེ་མོ་སྒོ་ལོགས་སུ་བསྟན་ཏེ་བསྙལ་བ་དང༌། དེ་ཉིད་ནས་དེའི་རྩེ་མོ་ཕྱིར་བཟློག་སྟེ་ཕུག་ལོགས་སུ་བསྙལ་བའི་སྒོའི་གཏན་པ་དེས་ཕྱོགས་ཇི་སྲིད་ཁྱབ་པ་དེ་ནི་ཉེན་ཀོར་ཡིན་པར་ཤེས་པར་བྱ་སྟེ་དེའི་མཐའ་གང་ཡིན་པ་དེ་ནི་བཙུན་མོའི་འཁོར་གྱི་དང་པོ་ཡིན་ནོ། །ཡུལ་གྱི་རྣམ་པར་དབྱེ་བ་ནི་འདི་ལྟར་ཤེས་པར་བྱ་སྟེ། གལ་ཏེ་སྒོ་མ་བཅད་ན་ནི་ཉེན་ཀོར་གྱི་མཐའ་བཙུན་མོའི་འཁོར་གྱི་དང་པོ་ཡིན་ལ། གལ་ཏེ་སྒོ་བཅད་ན་ནི་དེའི་ཚེ་སྒོ་གཏན་གྱི་མཐའ་བཙུན་མོའི་འཁོར་གྱི་དང་པོ་ཡིན་ནོ། །རྒྱལ་པོའི་ཕོ་བྲང་དང་གྲོང་ཁྱེར་དག་ཀྱང་དེ་དང་འདྲའོ་ཞེས་བྱ་བ་ནི་ཇི་ལྟར་བཙུན་མོའི་འཁོར་འདུག་པའི་གནས་ཀྱི་དང་པོ་དེའི་གཏན་པ་དང་ཉེན་ཀོར་གྱི་མཐའ་གཉིས་ཡིན་པ་བཞིན་དུ་རྒྱལ་པོའི་ཕོ་བྲང་དང་གྲོང་ཁྱེར་དག་གི་དང་པོ་ཡང་དེའི་སྒོའི་གཏན་པ་དང་ཉེན་ཀོར་གྱི་མཐའ་གཉིས་ཡིན་པའོ། །བཙུན་མོའི་འཁོར་ལ་གང་གི་ཚེ་སྒོ་བཙུགས་པར་རྣམ་པར་བཞག་པ་དེའི་ཚེ་ནི་སྒོའི་གཏན་པ་དང་ཉེན་ཀོར་གྱི་མཐའ་གཉིས་དང་པོ་ཡིན་ནོ། །གང་གི་ཚེ་བཙུན་མོའི་འཁོར་འདུག་པའི་གནས་ཀྱི་སྒོ་མ་བཙུགས་པར་རྣམ་པར་གཞག་པ་དེའི་ཚེ་ནི་འོབས་ལ་སོགས་པའི་ནང་གི་ངོས་བཙུན་མོའི་འཁོར་གྱི་དང་པོ་ཡིན་ནོ། །ཞར་ལས་བྱུང་བ་རྫོགས་སོ།། །།