འདུལ་བའི་མདོའི་འགྲེལ་པ།
ཡོན་ཏན་འོད།
རྒྱ་གར་སྐད་དུ། བི་ན་ཡ་སཱུ་ཏྲ་བྲྀཏྟི། བོད་སྐད་དུ། འདུལ་བའི་མདོའི་འགྲེལ་པ། ཐམས་ཅད་མཁྱེན་པ་ལ་ཕྱག་འཚལ་ལོ། །གཏོགས་པ་ངེས་པར་ཐེག་པའི་ཚུལ་ཏེ། གཏོགས་པ་ནི་མདོ་འོག་མ་ཀུན་དུའོ། །ངེས་པར་ནི་བླ་ན་མེད་པའི་ཐེག་པར་གདོན་མི་ཟ་བར་འགྲུབ་པའོ། །ཚུལ་ནི་ལུས་ལ་གསུམ། ངག་ལ་བཞི་སྡེ་ཚུལ་བདུན་པོ་འདིའི་ནང་དུ་འདུལ་བའི་གཞུང་ཀུན་འདུས་སོ། །དགེ་འདུན་ཐམས་ཅད་འདུས་ནས་འདིའི་ཚུལ་དུ་བྱས་ཏེ་ཕྱག་བྱས་ཐལ་མོ་སྦྱར། ཙོག་ཙོག་པོར་རྒན་རབས་ཀྱི་དྲུང་དུ་འདུག་ནས། གསོལ་བ་གསུམ་དང༌། ཞུ་བ་དང་བཞིའི་ལས་ཀྱིས་ཅིག་ཅར་རབ་ཏུ་བྱུང་བ་སྙེན་པར་རྫོགས་པ་མངོན་པར་འཐོབ་པོ་ཞེས་སྔོན་གྱི་ཆོ་གའོ། །དགེ་འདུན་ཐམས་ཅད་ཅེས་པ་ནི་ཕྱོགས་བཅུའི་དགེ་འདུན་ལ་བྱ་བ་མ་ཡིན་གྱི། མཚམས་གཅིག་གི་ནང་དུ་འཁོད་པ་ཀུན་འདུ་བ་ལ་བགྱི། མཚམས་ནི་རྣམ་པ་གཉིས་ཏེ། དགེ་འདུན་གྱི་གསོལ་བ་དང་ཞུ་བའི་ལས་ཀྱིས་བཅད་པ་དང༌། ཆུའམ་ར་བ་ལྟ་བུ་རང་མཚམས་སུ་འདུག་པའོ། །འདིའི་ཚུལ་
དུ་བྱས་ཏེ་ཞེས་པ་ནི་ཤཱཀྱ་ཐུབ་པའི་ཚུལ་དུ་བྱས་པ་སྟེ། སྐྲ་དང་ཁ་སྤུ་བྲགས་ཆོས་གོས་དང་ལྷུང་བཟེད་ལ་སོགས་པ་གྱོན་ཞིང་བླངས་པའོ། །ཕྱག་བྱས་ཞེས་པ་ནི་ལུས་དང་ངག་དང་ཡིད་གསུམ་གྱིས་གུས་པར་ལུས་སྨད་ལྔ་ས་ལ་གཏུགས་པའོ། །དེ་ལྟར་བྱས་པ་ནི་བགེགས་སུ་མི་འགྱུར་བའི་ཕྱིར་རོ། །ཐལ་མོ་སྦྱར་ཞེས་པ་ནི་ཁུ་ཚུར་རམ་བཟེད་པ་ལྟ་བུ་མ་ཡིན་གྱི་ཐལ་མོ་སྦྱར་བ་ལ་བྱ། ཙོག་ཙོག་པོར་ཞེས་པ་ནི་སྐྱིལ་མོ་ཀྲུང་ངམ་འགྲེང་བའམ་རྐང་པ་བསྐུམས་པ་ལ་སོགས་པ་ལྟ་བུ་མ་ཡིན་གྱི། རྐང་པ་གཤིབས་ལ་རྐུབ་ས་ལ་མི་རེག་པར་འདུག་པ་ལ་བྱའོ། །རྒན་རབས་ཀྱི་དྲུང་དུ་འདུག་ནས་ཞེས་པ་ནི་ཁྲིམས་རྒན་ཞིང་བཙུན་པ་ཡོན་ཏན་དང་ལྡན་པའི་དྲུང་དུ་བསྙེན་ཏེ་འདུག་པ་ལ་བྱའོ། །གསོལ་བ་གསུམ་དང་ཞེས་བྱ་བ་ནི་བདག་རབ་ཏུ་འབྱུང་བར་དགེ་འདུན་རྣམས་ཀྱིས་ཐུགས་རྗེ་ཆེར་གཟིགས་ཞེས་ལན་གསུམ་དུ་བཟླས་ཏེ་གསོལ་པའོ། །རབ་ཏུ་འབྱུང་བ་ཉིད་ཀྱིས་གསོལ་བ་གདབ་པ་ལ་བྱ། ཞུ་བ་དང་བཞིའི་ལས་ཀྱིས་ཞེས་པ་ནི་རིགས་ཀྱི་བུ་འདི་དགེ་འདུན་ལས་རབ་ཏུ་འབྱུང་བར་འཆལ་ན་མཁྱེན་པར་མཛོད་ཅིག་ཅེས་དགེ་སློང་གང་དད་པ་ཅིག་གིས་གསོལ་བ་གསུམ་གྱི་སྔོན་ལོགས་སུ་ཞུ་བ་ལ་བྱ་སྟེ་བཞི་དངོས་སུ་ཟད། བི་ཤུ་
དྷས་ནི་བཞིའི་ཁོང་ནས་ཁྲིམས་དབོག་པ་ལན་གསུམ་པ་དང་བདུན་དུ་བཤད། ཅིག་ཅར་ཤེས་པ་ནས་ཐོབ་པོ་ཞེས་ཀྱི་བར་དུ་ནི་ཚིག་ལྷག་མ་བཞིས་རབ་ཏུ་འབྱུང་བ་དང་བསྙེན་པར་རྫོགས་པ་གཉིས་ཅིག་ཅར་མངོན་པར་འཐོབ་པར་འགྱུར་བ་ལ་བྱ། སྔོན་གྱི་ཆོ་གའོ་ཞེས་པ་ནི་སངས་རྒྱས་བཞུགས་པའི་ཚེ་ན་ནི་ཀཽཎྜི་ནྱ་ལ་སོགས་པ་སྔ་ཕྱིར་ཨ་ཤི་ཕལ་མོ་ཆེ་ཞུགས་ནས་བཱ་རཱ་ཎ་སཱིར་འཁོར་ལོ་བསྐོར་ཚུན་ཆད་ལོ་བཅུ་གཉིས་ཀྱི་ཆོ་ག་ནི་འོག་ནས་བཤད་པ་འདི་ཡིན་ཏེ་སྔོན་གྱི་ཆོ་ག་ཉུང་བ་ནི་དུས་བཟང་བའི་ཕྱིར་རོ། །དགེ་སློང་སུ་ལ་ཡང་གནས་པ་ནི་དེར་མཁན་པོ་དང་རབ་ཏུ་འབྱུང་བ་དང་བསྙེན་པར་རྫོགས་པར་རོ། །དགེ་སློང་སུ་ལ་ཡང་ཞེས་པ་ནི་དགེ་སློང་མ་དང་དགེ་སྦྱོང་དང་ཁྱིམ་པ་མ་ཡིན་གྱི་གནས་བརྟན་ཆོས་ལྔ་དང་ལྡན་པ་ལས་གང་ཡང་རུང་སྟེ་རབ་ཏུ་འབྱུང་བ་གར་དད་པར་གནས་སུ་རུང་བ་ལ་བྱ། གནས་པ་ནི་ཞེས་པ་ནི་དེང་སང་དུས་ངན་པས་མཁན་པོ་ལ་གནས་དགོས་པ་ལ་བྱ། དེར་ཞེས་པ་ནས་རྫོགས་པར་རོ་ཞེས་པའི་བར་དུ་ནི་དེ་ལྟར་གནས་ནས་མཁན་པོ་ལས་རབ་ཏུ་བྱུང་བ་དང་བསྙེན་པར་རྫོགས་པར་བྱས་ཏེ། མཁན་པོ་དང་མ་བཅས་པར་མི་རུང་བར་ཆད་དྲིས་ལ་ཀུན་གཙང་ན་སྔོན་གྱི་མཁན་པོས་སྐབས་ཕྱེ་ཤིག །མཁན་པོས་ནི་འདྲི་བའི་དགེ་སློང་ལ་གཏོད་ཅིག་ཅེས་བྱ་བ་ཡན་ཆད་བྱ་སྟེ། རབ་ཏུ་འབྱུང་བ་ཉིད་ལ་མཚམས་མེད་པ་ལྔ་ལ་སོགས་པའི་བར་ཆད་དྲིས་ལ་མེད་ན་ཁྲིམས་དབོག་པར་སྐབས་དབྱེ། སྔོན་གྱི་ཞེས་པ་ནི་རབ་ཏུ་འབྱུང་བའི་ཚེ་བསྙེན་པར་རྫོགས་པ་ནི་ཕྱིས་བྱེད་ཀྱི་རབ་ཏུ་འབྱུང་བ་སྔར་བྱེད་པས་དེའི་མཁན་པོ་སུ་བྱེད་པ་ལ་བྱ། སྐབས་དབྱེ་བ་ནི་རབ་ཏུ་འབྱུང་བའི་ཆོ་ག་འོག་ནས་འབྱུང་བ་གྱིས་ཤིག་པ་རྣམས་ལ་བྱ། སྔ་མ་མ་རྫོགས་པར་དགེ་བསྙེན་དང༌། དགེ་སྦྱོང་དང་དགེ་སློང་དུ་མི་སྤར། དགེ་བསྙེན་གྱི་ཁྲིམས་ལྔ་ཕོག་ལ། དགེ་སྦྱོང་གི་ཁྲིམས་འབོགས། དེ་ནས་བསྙེན་པར་རྫོགས་པར་བྱ། འདི་ལྟར་རིམ་པས་མ་བྱས་པར་ཅིག་ཅར་བསྙེན་པར་རྫོགས་པར་མི་བྱ། སྐྱབས་སུ་འགྲོ་བའི་ཁས་ལེན་པའི་ཚིག་བརྩམས་ནས། དགེ་བསྙེན་དང༌། དགེ་སྦྱོང་དུ་ཁས་ལེན་པའི་ཚིག་བྱ། སངས་རྒྱས་དང་ཆོས་དང་དགེ་འདུན་ལ་སྐྱབས་སུ་མཆིའོ་ཞེས་སོ་སོར་བྱས་ནས། དགེ་བསྙེན་ནམ་དགེ་སྦྱོང་དུ་གཟིགས་ཤིག་
ཅེས་རབ་ཏུ་འབྱུང་བ་ཁས་ལན་དུ་གཞུག །ཚིག་འདི་རྣམས་ལན་གསུམ་དུ་བཟླས་དགོས་པ་ལ་བྱ། དེའི་འོག་ཏུ་ཁས་ལེན་པའི་ཚུལ་གྱིས་བསླབ་པ་བརྗོད་དོ། །ལྷག་མ་ལྟར་དགེ་སྦྱོང་ངམ་དགེ་བསྙེན་དུ་ཁས་བླངས་པས་ན་དགེ་བསྙེན་གྱི་ཁྲིམས་ལྔ་ཉིད་བྱ་དགོས་པས་ལན་གསུམ་གྱི་བར་དུ་བཟླས་ཏེ་ཟེར་དུ་གཞུག །ཚུལ་གྱིས་ཞེས་བྱ་བ་ནི་དགེ་བསྙེན་གྱི་གཟུགས་དང་བས་བླངས་ནས་ཚུལ་ཁྲིམས་ལྔ་ཉིད་སེམས་ནུར་བ་མེད་པས་ན་བརྗོད་དུ་གཞུག་པ་ཡིན་ནོ། །རང་གིས་དགེ་བསྙེན་དུ་ཕོག་སྟེ། དགེ་འདུན་ལ་འདྲི་བའི་དགེ་སློང་ལ་གཏོད་ཅིག །རང་གིས་དགེ་བསྙེན་དུ་ཕོག་སྟེ་ཞེས་པ་ནི་མཁན་པོ་ཉིད་ཀྱིས་དགེ་བསྙེན་གྱི་ཁྲིམས་རབ་ཏུ་འབྱུང་བར་འདོད་པ་དེ་ལ་ཕོག་པ་ལ་བྱ། དགེ་འདུན་ལ་འདྲི་བའི་དགེ་སློང་ལ་གཏོད་ཅིག་ཅེས་པ་ནི་དེ་ནས་མཁན་པོས་དགེ་སློང་ཅིག་ལ་རབ་ཏུ་འབྱུང་བ་བཀྲི་སྟེ། འདི་རབ་ཏུ་འབྱུང་ན་ནོངས་སམ་མ་ནོངས་ཞེས་དགེ་འདུན་ལ་འདྲིས་ཤིག་པར་གཏད་དེ་གཏང༌། ཅི་གཙང་ངམ་ཞེས་དྲིས་ལ་གཙང་ན་འདྲི། འདྲིར་གཏང་བའི་དགེ་སློང་དེས་སླར་དེའི་མཁན་པོ་ཉིད་ལ་ཁྱོད་ཀྱི་སློབ་མ་འདི་ལ་བར་ཆད་མེད་དམ་ཞེས་དྲིས་ལ་མེད་ཅེས་ཟེར་ན། གདོད་དགེ་འདུན་ལ་དྲི་བར་བཀྲི། ཐམས་ཅད་འདུས་འཁོད་པ་ལའམ་གནས་གནས་སུའོ། །དགེ་འདུན་ལ་དྲིན་ནི་མཚམས་གཅིག་གི་དགེ་འདུན་ཟད་པར་ལ་དྲི་དགོས་ཏེ་མདུན་ནས་འཁོད་པ་ལ་དྲི། ལ་ལ་ཞིག་མ་འོངས་ན་ཡང་གནས་ག་ལ་འདུག་གནས་སུ་དྲི། དེ་སྟེ་ཀུན་གཙང་ནའོ་ཞེས་ཐམས་ཅད་ཀྱིས་སྨྲོས་ཤིག །ལྷག་མ་ལྟར་དྲིས་པའི་ལན་དུ་དགེ་འདུན་གྱིས་དེ་སྟེ་གཙང་ནའོ་ཞེས་བྱ་བའི་དོན་ནི་བར་ཆད་མེད་ཅིང་གཙང་ན་རུང་ངོ་ཞེས་བྱ་བའི་ཚུལ་ལོ། མཁན་པོས་གསོལ་ཅིག་དགེ་འདུན་ལའང་ཞུས་ཟིན་རབ་ཏུ་འབྱུང་བར་འདོད་པ་དགེ་འདུན་གྱི་ནང་དུ་ཡང་མཁན་པོ་ལ་མཁན་པོར་གསོལ་དུ་གཞུག །དེ་ལྟར་བྱ་བ་ནི་སྔོན་ཡང་མཁན་པོ་ཡིན་མོད་ཀྱི་དགེ་འདུན་ལ་གསོལ་ནས་མཁན་པོར་མངོན་པར་བྱ་བའི་ཕྱིར་གསོལ། སྐྲ་དང་ཁ་སྤུ་བྲེགས་པ་ན་ཕུད་གཞག །དེ་ནས་སྐྲ་དང་ཁ་སྤུ་བྲེགས་པ་ན་སེམས་འགྱུར་གྱིས་དོགས་པའི་ཕྱིར་ཕུད་གཞག །ཕུང་བྲེག་གམ་ཞེས་དྲིས་ལ་བཏུབ་ན་དེ་ཡང་ངོ༌། །དེའི་འོག་ཏུ་ཕུད་འདི་ཡོད་པས་ད་རུང་དགེ་བསྙེན་
ཡིན་ཏེ་འདི་བྲེགས་ན་དགེ་སྦྱོང་དུ་འགྱུར་ན་བྲེག་གམ་མི་བྲེག་ཅེས་དྲིས་ལ་བརྟན་ཞིང་སེམས་མ་གྱུར་ཏེ་དགེ་སྦྱོང་བྱ་ཞེས་ཟེར་ན་བྲེག་ཁྲུས་བྱ་སྐྲ་བྲེགས་ནས་ཁྲུས་བྱ་བ་ནི་གཙང་བའི་ཕྱིར་རོ། །མཁན་པོས་དུར་སྨྲིག་ཅན་གྱི་གོས་སྦྱིན། ཀ་ཤ་དང་ཤམ་ཐབས་དང་རྡུལ་གཟན་གསུམ་མཁན་པོ་ཉིད་ཀྱི་ཡང་རུང་གཞན་གྱིས་སྦྱར་ཀྱང་རུང་སྟེ་མཁན་པོའི་ལག་ནས་སྦྱིན། རྐང་པ་ལ་ཕྱག་བྱས་ཏེ་བླངས། བྱིན་པའི་ཚེ་སློབ་མས་མཁན་པོའི་རྐང་པ་ལ་ཕྱག་བྱས་ཏེ་བླང་བ་ནི་གུས་པར་བྱ་བའི་ཚུལ་ལོ། །མཁན་པོས་བསྐོན། སློབ་མས་བླངས་ནས་མཁན་པོ་རང་གིས་གོས་བསྐོན་ཏེ། བགོ་བའི་ཐབས་ཀྱང་བསྟན། མ་ཚོར་བར་མཚན་བརྟག །མ་ནིང་ཡིན་ནམ་མ་ཡིན་པ་དང་མོའི་ནང་དུ་ཕོ་འཇུག་ཕོའི་ནང་དུ་མོ་འཇུག་པའི་ཕྱིར་བརྟག་གོ །རབ་ཏུ་བྱུང་བ་འཐོབ་པ་སྐྱབས་སུ་འགྲོ་བ་དང༌། རིམ་དུའོ། །དགེ་སྦྱོང་གི་ཁྲིམས་འཆགས་པ་ནི་ཤཱཀྱ་སེང་གེའི་རྗེས་སུ་འབྱུང་ངོ༌། །ཤཱཀྱ་ཐུབ་པའི་རྗེས་སུ་འབྱུང་ངོ༌། །ཤཱཀྱ་རྒྱལ་པོའི་རྗེས་སུ་འབྱུང་ངོ་ཞེས་བྱ་བས་འཆགས་ཏེ་བྱ་བའི་རིམ་ནི་སྐྱབས་སུ་འགྲོ་བའི་ཚིག་གཅིག་བྱས་ཤིང་འདི་ལན་ཅིག་བརྗོད་དེ། དེ་ལྟ་བུ་ལན་གསུམ་དུ་བཟླས། གསོལ་མ་ཐག་ཏུ་ཡང་ངོ༌། མདོ་ལྟག་མ་ལྟར་བྱ་བ་ནི་དགེ་འདུན་ལ་དྲིས་ནས་མཁན་པོར་ཡང་གསོལ་བའི་འོག་དང་སྐབས་འདི་ཉིད་གང་དུ་བྱས་ཀྱང་ཉེས་པ་མེད་དོ། །འདི་ནི་ལས་བྱེད་པས་བྱ། དགེ་སྦྱོང་འཐོབ་པར་དགེ་སློང་ལ་གཏད། མཁན་པོས་ངའི་སློབ་མ་འདི་ཁྲིམས་ཕོག་ཤིག་ཅེས་ལས་ཀྱི་སློབ་དཔོན་གང་བྱེད་པ་ལ་གཏད། ཅི་ཀུན་གཙང་ངམ་ཞེས་དྲིས་ལ་གཙང་ན་འཐོབ་པར་བྱ། དེ་ནས་ལས་ཀྱི་སློབ་དཔོན་གྱིས་སླར་མཁན་པོ་ལ་ཁྱོད་ཀྱི་སློབ་མ་འདི་བར་ཆད་མེད་དམ་དྲིས་ལ་གཙང་ཞེས་ཟེར་ན་དགེ་སྦྱོང་གི་ཁྲིམས་དབོག །དེ་ནི་སློབ་དཔོན་ནོ། མདོ་གོང་མ་ལྟར་ལས་བྱེད་པ་ནི་དགེ་སློང་གི་ལས་ཀྱི་སློབ་དཔོན་ནོ། །དགེ་སྦྱོང་གི་ཆོ་གའི་ནང་དུ་སློབ་དཔོན་ལྔ་གློ་ཐོར་དུ་བཤད་པ་ནི་མི་སྤྲོ་བར་བསྡུ་སྟེ་གོ་སླ་བར་བྱ་བའི་ཕྱིར་སློབ་དཔོན་བཞི་ཡང་འདིའི་ཞར་ལ་བཤད་དོ། གསང་སྟེ་སྟོན་པ་དང༌། ལས་བྱེད་པ་དང༌། གནས་བདག་དང༌། ལྷོགས་ཤིག་པ་ཡང་ངོ༌། གསང་སྟེ་སྟོན་པ་དང་ཞེས་པ་དང་གསང་སྟེ་སྟོན་པའི་སློབ་དཔོན་ནི་བར་ཆད་འདྲི་བའི་ལས་བྱས་ཟིན་ནས་གསང་སྟེ་སྟོན་པའི་
སློབ་དཔོན་དུ་འགྱུར་ཏེ། འོག་ནས་འཆད། ལས་བྱེད་པ་དང་ཞེས་པ་ནི་ལས་བྱེད་པའི་སློབ་དཔོན་ཏེ་འོག་ནས་འཆད་དེ་ཁྲིམས་རྫོགས་པར་བྱེད་པའི་གསོལ་བ་དང་ཞུ་བ་དང་ཁྲིམས་འབོགས་པའི་ལས་བྱེད། གནས་བདག་དང་ཞས་པ་ནི་གནས་བཅས་པའི་སློབ་དཔོན་ཏེ་འོག་ནས་འཆད་དེ་མཁན་པོ་ཤི་འམ་བྲལ་ན་གནས་བཅས་ཏེ་དྲི་བའོ། །ལྷོགས་ཤིག་པ་ཡང་ངོ་ཞེས་པ་ནི་ཀློག་པའི་སློབ་དཔོན་ཏེ། ཆོས་དང་ཁ་ཏོན་སློབ་པ་ཡིན་ཏེ་ལྷག་མ་གསུམ་ནི་འོག་ནས་ཀྱང་འཆད་དེ་སོ་སོའི་ལས་ཟིན་ན་སློབ་དཔོན་དུ་འགྱུར། དོན་འགྲུབ་པར་གྱུར་ནའོ།། གསང་སྟེ་སྟོན་པ་དང་ལས་བྱེད་པ་དང་དགེ་སྦྱོང་གི་སློབ་དཔོན་གསུམ་ནི་སོ་སོའི་ལས་བྱས་ནས་མཇུག་རྫོགས་ཏེ་ཟིན་ན་སློབ་དཔོན་དུ་འགྱུར་རོ། །ལས་བྱེད་པའི་སློབ་དཔོན་ནི་འོག་ནས་འཆད་དོ། །ཁས་བླངས་པ་མཁན་པོར་གསོལ་ན་དེ་འགྱུར་རོ། །མཁན་པོ་ནི་སློབ་མས་ཀྱང་མཁན་པོར་གསོལ། མཁན་པོས་ཀྱང་ངས་མཁན་པོ་བྱའོ་ཞེས་ཁས་བླངས་པ་ལས་མཁན་པོར་འགྱུར་ཏེ། འོག་མ་མདོ་གཉིས་ཀྱི་འོག་ནས་ཀྱང་ཇི་ཙམ་གྱིས་མཁན་པོར་གྱུར་པ་ཡང་འཆད་དོ། །གསུམ་བཟླས་པའི་ཐ་མའི་ཆས་འགྲུབ་དགེ་སྦྱོང་གི་སློབ་དཔོན་དང་ལས་བྱེད་པའི་དཔོན་ནི་སྐྱབས་སུ་འགྲོ་བ་དང་དགེ་སྦྱོང་དུ་གཟིགས་ཤིག་ཅེས་ལན་གསུམ་དུ་བཟླས་ཏེ་ལན་གཉིས་ནི་རྫོགས་ཐ་མ་ལན་ཅིག་གི་ཚིག་སུམ་ཆ་ལུས་ཀྱང་སློབ་དཔོན་དུ་འགྱུར་ཏེ། ཚིག་ལན་གསུམ་དུ་བཟླས་པ་ཉིད་གང་ཡིན་པ་དང༌། ཚིག་གི་སུམ་ཆའི་མཚམས་ནི་འོག་ནས་འཆད། དེ་འདི་ལྟ་སྟེ་ཕ་རོལ་ལ་བརྗོད་པའི་ཚེ་དགེ་སྦྱོང་བའི་ཞེ་ནའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །བཙུན་པས་བདག་དགེ་སྦྱོང་དུ་གཟིགས་ཤིག་ཅེས་བྱ་བའི་ཚིག་འདི་ལན་གཉིས་ནི་བཟླས་ཟིན་ཐ་མ་དགེ་སྦྱོང་དུ་ཞེས་པ་ཡན་ཆད་སུམ་གཉིས་ནི་རྫོགས། གཟིགས་ཤིག་ཅེས་བྱ་བའི་ལྷག་མ་ལུས་ཀྱང་སློབ་དཔོན་དུ་འགྱུར་རོ། །ཐ་མས་དེར་མཁན་པོར་དོན་ནོ། །མཁན་པོར་གསོལ་བའི་ཚིག་ལན་གསུམ་བཟླས་པ་ལན་གཉིས་ཀྱི་བར་དུ་ནི་བཙུན་པ་བདག་གི་མཁན་པོར་གསོལ་ཞེས་བྱ། ཐ་མ་ལན་ཅིག་ལ་མཁན་པོ་བདག་གི་
མཁན་པོར་གསོལ་ཞེས་བྱས་པས་དེས་མཁན་པོར་འགྱུར་རོ། །གནས་བདག་གི་མཐའ་ནི་གནས་བཅས་ནས་ནུབ་གཅིག་གནས་པས་སོ། །གནས་བཅས་པའི་སློབ་དཔོན་ནི་ཕ་དང་བུར་འདུ་ཤེས་བཞག་ལ་གནས་བཅས་པའི་སྔགས་བྱས་ནས། དེའི་ནུབ་མོ་ཉིད་མཚམས་གཅིག་གི་ནང་དུ་ལྷན་ཅིག་ཏུ་གནས་ལ་ཞག་ལོན་ཏེ་སྐྱ་རེངས་བྱུང་ན་སློབ་དཔོན་ནི་པ་དང་བུར་འདུ་ཤེས། ལྷོགས་ཤིག་པ་ནི་ཚིགས་སུ་བཅད་པ་གཅིག་ལན་གསུམ་ཀླགས་པས་སོ། །ཀློག་པའི་སློབ་དཔོན་ནི་གཉིས་ཀས་སློབ་དཔོན་དང་སློབ་མར་འདུ་ཤེས་བཞག་ལ་ཞལ་ནས་གསུངས་པའི་ཚིགས་སུ་བཅད་པ་གཅིག་ལོབས་པར་མཁན་པོས་སྨྲས་ལ་སློབ་མས་བཟླས་ཏེ་ཙོག་ཙོག་པོར་འདུག་ལ་ལན་གསུམ་དུ་བཟླས་ན་སློབ་དཔོན་དུ་འགྱུར། ལྷོགས་ཤིག་པར་མ་བསམས་པར་བརྗོད་ན་ལྷོགས་ཤིག་པ་མ་ཡིན་ནོ། །ཀློག་པའི་སློབ་དཔོན་བྱ་བར་འདུ་ཤེས་མ་བཞག་པར་བསླབས་པ་དང་བཟླས་པ་ནི་ཇི་སྙེད་ལོབས་ཀྱང་སློབ་དཔོན་དུ་མི་འགྱུར་རོ། །དེ་དག་ལ་ཉེ་བའི་ཚིག་ལས་གཞན་དུ་མ་ཡིན། མཁན་པོས་སློབ་དཔོན་ལ་བཙུན་པ་འམ་བླ་མ་ཞེས་པ་ལ་སོགས་པ་བླ་དགས་གཞན་དུ་མི་བོད་ཀྱི། མཁན་པོ་ལ་ཡང་མཁན་པོ་ཞེས་སློབ་དཔོན་ལ་ཡང་སློབ་དཔོན་ཞེས་བྱ། འདི་སྐད་གཞན་ལ་ཡང་མ་ཡིན། མཁན་པོ་དང་སློབ་དཔོན་མ་ཡིན་པ་ལ་མཁན་པོ་དང་སློབ་དཔོན་ཞེས་མི་བོད། མཁན་པོ་དང་སློབ་དཔོན་ནང་ཡང་བསྣོར་ཏེ་མི་བོད། །དོན་གྱི་ཕྱིར་མཚན་ནས་སྨོས་སོ་ཞེས་པ་དང་བཅས་ཏེ་མ་སྨྲས་པར་མཁན་པོའི་མཚན་ནས་མི་སྨོས། མཁན་པོའི་མཚན་ཉིད་ནས་དབྱུང་དགོས་ན་ཡང་དོན་གྱི་ཕྱིར་མཚན་ནས་སྨོས་སོ་ཞེས་སྔར་མ་བྱས་པར་མཁན་པོའི་མཚན་ནས་མི་དབྱུང་ངོ༌། །དགེ་སྦྱོང་འཐོབ་པའི་ཆོ་གའོ། །འདི་ཡན་ཆད་ནི་དགེ་སྦྱོང་དུ་གཞུག་པའི་ཚུལ་དང་ཆོ་ག་ཡིན་ནོ། ལ་ལ་ཞིག་ན་རེ་དགེ་སློང་གི་ཆོ་ག་མ་སྨོས་པར་དགེ་སྦྱོང་གི་ཆོ་ག་སྔར་ཅིའི་ཕྱིར་བཤད་ཅེས་ཟེར་བ་ཞིག་ཡོད་ན། དགེ་སྦྱོང་མ་བྱས་པར་དགེ་སློང་བྱར་མི་རུང་བས་སྔར་དགེ་སྦྱོང་དུ་བྱ་དགོས་པས་རིམ་བཞིན་དུ་ཚུལ་བཤད་པ་ཡིན་ནོ། །བསྙེན་པར་རྫོགས་པ་ནི་དགེ་འདུན་ལས་སོ། །བསྙེན་པར་ཞེས་པ་ནི་མྱ་ངན་ལས་འདས་པ་ལ་བསྙེན་པ་ལ་བྱ། རྫོགས་པ་ནི་ཞེས་པ་ནི་མྱ་ངན་
ལས་འདས་པ་ཉིད་ལ་བྱ། དགེ་འདུན་ལས་སོ་ཞེས་པ་ནི་མུར་འདུག་ལ་སོགས་པའི་དགེ་འདུན་མ་ཡིན་གྱི། ཉན་ཐོས་ཀྱི་དགེ་འདུན་ལ་བྱའོ། །བསྙེན་པར་རྫོགས་པ་ནི་དགེ་འདུན་དང་མཁན་པོ་དང་སློབ་དཔོན་ལས་ཐོབ་པར་འགྱུར་ཏེ། མདོ་འདི་ལས་དགེ་འདུན་འབའ་ཞིག་ལས་འཐོབ་པར་འགྱུར་བ་སྐད་ཟེར་བ་ནི་དགེ་འདུན་དང་མཁན་པོ་དང་སློབ་དཔོན་ཡང་དེའི་ནང་ནས་འོང་བར་རིག་པར་བྱའོ། །མཁན་པོར་མངོན་པར་གྱུར་ནས་ལས་བྱེད་པ་དང༌། གསང་སྟེ་སྟོན་པ་དགེ་སློང་ལས་བསྐོ། །མཁན་པོར་མངོན་པར་གྱུར་ཅེས་བྱ་བ་ནི་མཁན་པོ་བྱ་བ་སྔར་སྐད་སྦྱར་ཏེ། འཐམས་པ་དང༌། མཁན་པོ་ཉིད་མོས་པ་དང༌། དགེ་འདུན་གྱི་ནང་དུ་འོངས་པས་ན་མངོན་པར་གྱུར་ཅེས་བྱ་བ་དང༌། མངོན་པར་གྱུར་ནས་ལས་བྱེད་པ་དང༌། གསང་སྟེ་སྟོན་པའི་སློབ་དཔོན་དགེ་འདུན་གྱི་ནང་ནས་མཁས་པ་ཡོན་ཏན་དང་ལྡན་པ་ལས་ནན་གྱིས་མི་བསྐོའི། དད་པར་བྱ་བའི་ཕྱིར་གུས་པའི་ཚིག་གིས་གསོལ་ཏེ་གྱིས་ཤིག་པར་བསྐོ། །མཁན་པོར་གསོལ། དགེ་འདུན་གྱི་ནང་དུ་ཡང་མཁན་པོར་གསོལ་དགོས་པ་ནི་མདོ་ལྟག་མ་ནི་མཁན་པོར་འོང་བར་མངོན་པ་ཙམ་དུ་ཟད་ཀྱི་འདི་ལྟར་གསོལ་བས་ནི་མཁན་པོར་གྱུར་པར་ཡིད་ཆེས་ཤིང་ཀུན་ཤེས་པའི་ཕྱིར་གསོལ་དགོས་སོ། །དགེ་སྦྱོང་གི་མཁན་པོ་ཉིད་ཡིན་དུ་ཟིན་ཀྱང་བསྙེན་པར་རྫོགས་པ་དང་ལས་ཐ་དད་པའི་ཕྱིར་གསོལ་དགོས་སོ། །དེ་རང་གིས་ཆོས་གོས་གསུམ་བསྔོར་ཆུག་ཤིག །མཁན་པོར་གསོལ་ཟིན་ནས་མཁན་པོ་ཉིད་ཀྱིས་ཆོས་གོས་དང་ལྷུང་བཟེད་མཁན་པོ་དང་སློབ་མ་གཉིས་ཀ་འགྲེང་ལ་མཁན་པོས་སྨྲས་ཤིང་སློབ་མས་བཟླས་ཏེ་སྔགས་གདབ། འདུག་སྟེ་བཏབ་པ་འམ། གཞན་གྱིས་དེའི་ཚེ་བཏབ་ན་མི་འཆགས་སོ། །ཕྱིས་ནས་ནི་སུས་བཏབ་ཀྱང་རུང་ངོ༌། །དགེ་འདུན་ལ་ལྷུང་བཟེད་ཀྱང་ཉེ་བར་བསྟན་ཅིང་མ་ཆེས་སམ་མ་ཆུང་ངམ་མི་དཀར་རམ་ཞེས་སོ། །ལྷུང་བཟེད་ནི་སྔགས་ཀྱིས་མ་བཏབ་པའི་སྔ་རོལ་དུ་དགེ་འདུན་ལ་མ་ཆེས་སམ་མ་ཆུང་ངམ་མི་དཀར་རམ་ཞེས་བྱ་ཞིང་མཐར་གྱིས་སྤྱ་ང་བྲིམ། དེ་ལྟར་མ་ཡིན་ན་ཐམས་ཅད་ཀྱིས་ལྷུང་བཟེད་བཟང་ངོ་ཞེས་སྨྲོས་ཤིག །མདོ་ལྟག་མ་
ལྟར་དྲིས་ནས་མི་ཆེ་མི་ཆུང་མི་དཀར་ན་བཟང་ངོ་ཞེས་དགེ་འདུན་གྱིས་ལན་གསོལ་ཅིག །གྲལ་དཔོན་གྱིས་བརྟགས་ཏེ་བཟང་ངོ་ཞེ་ན་འོག་མ་རྣམས་ཀྱིས་ནན་ཏན་དུ་མ་མཐོང་ཡང་བཟང་ངོ་ཞེས་སྨྲས་ནའང་ཉེས་མེད། སྤོགས་ཏེ་སུས་ཞེས་སྨྲས་ལ་གསང་སྟེ་སྟོན་པ་མོས་པར་བྱས་ཏེ་ལས་བྱེད་པས་འདིའི་དགེ་འདུན་ལ་ཞུ། དེ་ནས་བསྙེན་པར་རྫོགས་པར་འདོད་པའི་མི་དེ་ཆོས་གོས་གསུམ་བསྐོན་ལ་དགེ་འདུན་ལས་བྱེད་པའི་སྒྲ་མི་ཐོས་པ་ཙམ་དུ་མིག་རྒྱང་དུ་མཐོང་བར་བཞག་སྟེ་ལས་བྱེད་པའི་སློབ་དཔོན་གྱིས་གསང་སྟེ་སྟོན་པ་སུས་བྱ་ཞེས་དགེ་འདུན་གྱི་ཁྲོད་དུ་ཞུ། གསང་སྟེ་སྟོན་པ་སྔར་མཁན་པོས་བསྐོས་པ་དེས་ངས་བྱའོ་ཞེས་དད་པར་བྱ་སྟེ་སྨྲ། དེ་ནས་ལས་བྱེད་པས་གསང་སྟེ་སྟོན་པ་བསྒོ་བའི་གསོལ་བ་བྱ། ཉོན་ཅིག་ཅེས་ནས་གསང་བ་བསྟན། །དེ་ནས་གསང་སྟེ་སྟོན་པ་སྤགས་ཏེ་བཞག་པའི་གནས་སུ་སོང་ལ་བར་ཆད་ཀྱི་ཆོས་རྣམས་ཡོད་དམ་མེད་དྲང་པོར་སྨྲོས་ཤིག་ཅེས་སྔར་བསྒོ་སྟེ་བར་ཆད་ཀྱི་ཆོས་དྲི། དགེ་འདུན་གྱི་ནང་དུའང་འདི་བཞིན་དུ་དྲིས་དང་པོར་སྨྲོས་ཞེས་བསྒོ། འདུག་ཤིག་སྒྲ་མ་ཕྱུང་གི་བར་དུ་མ་འོང་ཤིག་ཅེས་སྨྲས་ནས་དགེ་འདུན་ལ་བསྟན་ནོ། །དེ་ནས་ཆུར་ཤོག་ཅེས་མ་པོས་ཀྱི་བར་དུ་འདུག་ཅིག་ཅེས་གསང་སྟེ་སྟོན་པས་བསྒོ་ལ། དེ་ཉིད་དུ་བཞག་སྟེ་དགེ་འདུན་ལ་བར་ཆད་ཀྱི་ཆོས་རྣམས་གཙང་ངོ་ཞེས་སྨྲ། ཀུན་གཙང་ངོ་ཞེས་གསོལ་ནས་ཅི་མཆི་ཞིག་གམ་ཞེས་འོང་བའི་ཕྱིར་དྲིའོ། །མདོ་ལྟག་མ་ལྟར་གཙང་ངོ་ཞེས་སྨྲས་ནས་ཚུར་དགུག་གམ་ཇི་ལྟར་བགྱི་ཞེས་དགེ་འདུན་ལ་ཞུ། དེ་སྟེ་ཀུན་གཙང་ནའོ་ཞེས་ཐམས་ཅད་ཀྱིས་སྨྲོས་ཤིག །ལྟག་མ་ལྟར་ཞུས་ནས་བར་ཆད་ཀྱི་ཆོས་རྣམས་གཙང་ན་ཁུག་ཤིག་ཅེས་དགེ་འདུན་གྱིས་ལན་སྦྱིན། ལས་བྱེད་པར་བསྙེན་པར་རྫོགས་པ་གསོལ་དུ་གཞུག །ལས་ཀྱི་སློབ་དཔོན་གྱིས་བསྙེན་པར་རྫོགས་པར་འདོད་པ་བསྙེན་པར་རྫོགས་པར་བགྱིད་ཅི་གནང་ཞེས་དགེ་འདུན་ལ་གསོལ་དུ་གཞུག་སྟེ། ཁོ་ཉིད་ཀྱིས་མི་ཤེས་པའི་ཕྱིར་སློབ་དཔོན་གྱིས་སྨྲས་ཤིང་ཟློས་སུ་གཞུག་སྟེ། ལན་གསུམ་དུ་བྱ། དགེ་འདུན་ལ་ཞུས་ཏེ་བར་ཆད་དྲི། མདོ་ལྟག་མ་ལྟར་གསོལ་བ་བཏབ་ནས་དགེ་འདུན་ཅང་མི་གསུང་ན་གནང་བར་གོ་
བར་བྱས་ཏེ་ལས་བྱེད་པའི་སློབ་དཔོན་གྱིས་བར་ཆད་དྲི་བར་འཚལ་ལོ་ཞེས་དགེ་འདུན་ལ་ཞུས་ལ་སྔར་ལྐོག་དྲིས་པ་བཞིན་དུ་དགེ་འདུན་གྱི་ནང་དུའང་ལས་བྱེད་པས་བར་ཆད་ལན་ཅིག་དྲི། བསྙེན་པར་རྫོགས་པ་ཐོབ་པར་བྱ། བར་ཆད་དྲིས་ནས་མིང་འདི་ཞེས་བགྱི་བའི་མཁན་པོ་ལ་བསྙེན་པར་རྫོགས་པར་འཚལ་ལོ་ཞེས་ལས་བྱེད་པས་ཞུ་བ་ལན་གསུམ་བྱས་ནས་ཁྲིམས་ལས་བྱེད་པས་དབོག །འདི་ནི་དེ་མ་ཐག་ཏུ་གྲིབ་མ་བཅལ་ཏེ་བསྐོ། །ཁྲིམས་ཕོག་མ་ཐག་ཏུ་ཉི་མའི་ཚོད་ཇི་ཙམ་ཡིན་པ་གྲིབ་མ་ཚོད་འདི་ཙམ་ལ་ཁྲིམས་ཐོབ་པ་ཡིན་ནོ་ཞེས་བསྙེན་པར་རྫོགས་པ་དེ་ལ་བསྒོ། །གྲིབ་མ་ཇི་ལྟར་གཞལ་བ་ནི་འོག་ནས་འཆད་དོ། །ཕུར་བུ་སོར་བཞི་ལ་དེ་དགེའོ། །གྲིབ་མ་བཅལ་བ་ནི་ཤིང་བུ་སོར་བཞིས་བྱས་ན་རན་ཅིང་བདེ་ལ་གྲིབ་ཚོད་རྟོགས་པར་འགྱུར་བའི་ཕྱིར་དགེའི་ཞེས་བྱའོ། །འདི་ལ་སྐྱེས་བུ་ཞེས་སྤྱད་དོ། །ཕུར་བུ་སོར་བཞི་པའི་གྲིབ་མ་སོར་བཞི་ལ་སྐྱེས་བུ་གཅིག་ཏུ་བརྩི། གྲིབ་མ་སོར་གཉིས་བྱུང་ན་སྐྱེས་བུ་ཕྱེད་ཅེས་པ་ནི། དེ་ལས་ལྷག་ཆད་དུ་གྱུར་ན་སོར་བཞི་ལ་བཅུ་གཅིག་གི་ཆ་རེ་རེ་ལ་རྐང་པ་ཞེས་མིང་གདགས་སོ། །ཉིན་མཚན་གྱི་ཆ་སྔ་དྲོལ་སོགས་པའོ། །ཉིན་པར་དང་མཚན་མོ་དུས་ཇི་ཙམ་ན་ཞུགས་པ་བསྒོ་དགོས་ཏེ། མཚན་མོ་ལ་དུས་གསུམ་སྟེ་སྲོད་དང་ལྔ་ཚིགས་དང་ཐོ་རངས་དང༌། ཉིན་མོ་ལ་ཡང་གསུམ་སྟེ་སྔ་དྲོ་དང་གུང་དང་ཕྱི་དྲོ་གང་ལ་རྫོགས་པ་དུས་བཟུང་སྟེ་རྫོགས་པ་ལ་ཉིན་མཚན་གྱི་དུས་འདི་ཙམ་ལ་ཞུགས་སོ་ཞེས་བསྒོ། །དུས་ཀྱང་ངོ༌། །དབྱར་དགུན་གྱི་དུས་གང་ཡིན་པ་ཡང་བསྒོ་དགོས་ཏེ། དབྱར་དགུན་གྱི་དུས་ཉིད་ནི་འོག་ནས་འཆད། དེ་ནི་ལྔ་སྟེ་དགུན་དང་དཔྱིད་དང་དབྱར་དང་ཤི་བའི་དབྱར་དང་རིང་བའི་དབྱར་ཏེ། དེ་ནི་ལྔ་སྟེ་ཞེས་པ་ནི་དུས་ལ་རྣམ་པ་ལྔ་ཡོད་དེ་སྟོན་ཟླ་ཐ་ཆུངས་ཉ་ནས་མགོ་བཟུང་སྟེ་བརྩིའོ། །དགུན་དང་ཞེས་པ་ནི་དགུན་གྱི་དུས་ཏེ་ཟླ་བ་བཞི། དཔྱིད་དང་ཞེས་པ་ནི་དཔྱིད་ཀྱི་དུས་ཏེ་ཟླ་བ་བཞི། དབྱར་དང་ཞེས་པ་ནི་དབྱར་གྱི་དུས་ཏེ་ཟླ་བ་གཅིག་ཤི་བའི་དབྱར་དང་ཞེས་པ་ནི་ཤི་བའི་དབྱར་གྱི་དུས་ཏེ་ཉིན་ཞག་གཅིག་རིང་བའི་དབྱར་ཏེ་ཞེས་པ་ནི་རིང་བའི་དབྱར་གྱི་དུས་ཏེ། ཞག་གཅིག་གིས་མ་ཚད་པའི་ཟླ་བ་གསུམ། ཐོག་མ་གཉིས་ནི་ཟླ་བ་
བཞི་སྟོན་ཟླ་ཐ་ཆུངས་ཉ་ནས་དཔྱིད་ཟླ་ར་བ་ཉའི་བར་ཟླ་བ་བཞི་ནི་དགུན་གྱི་དུས་སོ། །དཔྱིད་ཟླ་ར་བ་ཉ་ནས་དབྱར་ཟླ་འབྲིང་པོ་ཉའི་བར་དུ་ན་དཔྱིད་ཀྱི་དུས་སོ། །ཐོག་མ་གཉིས་ཞེས་བྱ་བ་ནི་གོང་དུ་དུས་ལྔའི་གཉེར་གསོད་པ་ལ་གྲལ་ཐོག་མར་སྨོས་པས་དགུན་དང་དཔྱིད་གཉིས་ཟླ་བ་བཞི་བཞིའོ། །དེ་ཕན་ཆད་ཟླ་བ་གཅིག །དབྱར་ཟླ་འབྲིང་པོ་ཉ་ནས་དབྱར་ཟླ་ཐ་ཆུངས་ཉའི་བར་དུ་ཟླ་བ་གཅིག་སྟེ་དབྱར་གྱི་དུས་ཞེས་བྱའོ། །དེའི་འོག་མ་ཉིན་མཚན་ནོ། །དབྱར་ཟླ་ཐ་ཆུངས་ཚེས་བཅུ་དྲུག་གི་ཉིན་ཞག་གཅིག་ལ་ཡུན་ཐུང་བའི་ཕྱིར་ཤི་བའི་དབྱར་གྱི་དུས་ཞེས་བྱའོ། །མཐའ་མ་ནི་དེས་ཉུང་བའི་ཟླ་བ་གསུམ་མོ། །དབྱར་ཟླ་ཐ་ཆུངས་ཚེས་བཅུ་བདུན་ནས་སྟོན་ཟླ་ཐ་ཆུངས་ཉའི་བར་ཟླ་བ་གསུམ་དུ་ཞག་གཅིག་གིས་མ་ཚང་བ་ནི་རིང་བའི་དབྱར་གྱི་དུས་ཞེས་བྱའོ། །སྟོན་ཟླ་ཐ་ཆུངས་ཉ་ནས་དབྱར་ཟླ་ཐ་ཆུངས་ཉའི་བར་དུ་ཁྲིམས་རྫོགས་པ་ནི་རིམ་པས་རྒྱལ་བར་འགྱུར་རོ། །རིང་བའི་ཟླ་བ་གསུམ་ལ་རྫོགས་པ་ནི་ཕམ་སྟེ་ཞག་རེ་ཞིང་རིམ་གྱིས་བརྩིའོ། །གནས་བསྒོ། ཤིང་དྲུང་དང་ཚེམ་བུ་དང་སློང་མོ་དང་སྨན་བཀུས་པ་ལ་ནམ་འཚོའི་བར་དུ་སྤྱད་དོ་ཞེས་ཀྱང་བསྒོ། །དེ་ལ་ཡིད་བསྲིང་བའི་ཕྱིར་གོས་སུ་བརྟགས་པ་རྣམས་བདུན་དང་ཁ་ཟས་རོ་བརྒྱ་པ་དང་སྨན་ཞག་བདུན་པ་དང་འཚོ་བའི་བར་དུ་བཅང་བ་དང་ཁང་བུ་བདུན་བརྩེགས་དགེ་འདུན་གྱི་འམ་ཡོན་བདག་གིས་སྦྱར་ན་ཆོག་པ་ཙམ་སྤྱོད་ཅིག །ལྟུང་བའི་ཆོས་ཀྱང་ངོ༌། །མི་ཚངས་པར་སྤྱོད་པ་དང་རྐུ་བ་དང་མི་ལ་གསོད་པ་དང་བརྫུན་བཞི་བྱས་ན་རྒྱུད་གསུམ་དུ་ལྟུང་སྟེ་ཕྱིས་དགེ་སློང་དུ་མི་རུང་བའི་ཕྱིར་རིངས་པར་བསྒོ། །དགེ་སྦྱོང་གིས་བྱ་བ་རྣམས་ཀྱང་ངོ༌། །མི་གཤེ་བ་དང་མི་འཕྱ་བ་དང་མི་སྨད་པ་དང་མི་འཚོག་པ་དང་བཞི་ཕས་བྱས་ཀྱང་ལན་མི་བྱ་བ་ཡིན་ན་ཕས་མི་ཟེར་བར་ཚུས་བྱ་བ་རྣམས་ལྟ་ཅི་སྨོས། རྫོགས་པ་ཡང་དག་པར་ཏེ་རེ་བ་འང་བརྗོད་ཅིང་ཚུལ་ཁྲིམས་མཉམ་པར་གྱུར་པ་དང་རངས་པ་བསྒོའོ། །རྫོགས་པ་ཡང་དག་པར་ཏེ་ཞེས་པ་ནི་བདག་གི་བར་ཆད་ཀྱི་ཆོས་ལ་སོགས་པ་མེད་ཅིང༌། སློབ་དཔོན་དང་མཁན་པོ་ཡོན་ཏན་དང་ལྡན་པ་དང༌། ཡོ་བྱད་ཚང་བ་ལ་སོགས་པས་ཁྲིམས་ཡང་དག་པར་ཐོབ་པ་དང་ཡང་གཅིག་ཏུ་ན་སངས་རྒྱས་དང་དགྲ་བཅོམ་པ་འདས་པའི་
ཚུལ་བཞིན་དུ་རྫོགས་པས་ན་ཡང་དག་པར་རྫོགས་ཞེས་བྱའོ། །རེ་བའང་བརྗོད་ཅིང་ཞེས་པ་ནི་སྔོན་ཁྲིམས་ཡང་དག་པར་རྫོགས་པར་འདོད་པ་དང༌། རེ་བའང་དེ་རིང་རེ་བ་བཞིན་དུ་ཐོབ་བོ་ཞེས་བསྒོ། ཚུལ་ཞེས་པ་ནས་སོ་ཞེས་བྱ་བའི་བར་དུ་ནི་ཚུལ་ཁྲིམས་མཉམ་ཞིང་བསླབ་པ་མཉམ་པས་ན། ལོ་བརྒྱ་ལོན་པའི་གནས་བརྟན་དང་ཁྱོད་དེང་རྫོགས་པ་གཉིས་སུ་མཚུངས་ཤིང་མཉམ་པས་སྔ་མ་དག་ཡོན་ཏན་དང་ལྡན་པ་བཞིན་དུ་བསླབ་པ་དང་བསྲུང་བ་ལ་སྔ་མ་དང་འདྲ་བར་གྱིས་ཤིག །རངས་པར་བསྒོ་བ་ནི་བསམ་གཏན་དང༌། བརྩོན་འགྲུས་དང་ཀློག་པ་དང༌། བསླབ་པ་ལ་སོགས་པས་མྱ་ངན་ལས་འདས་པར་འགྱུར་གྱིས་སྒྲིམས་ཤིག་ཅེས་བྱས་པས། སེམས་རངས་པར་འགྱུར་རོ། །རངས་པའི་ཚིག་འདི་སྐད་དུ་བརྗོད་པ་ནི་འོག་མའི་སཱུ་ཏྲ་དག་ནི་ནང་དུ་འང་དགོས་སོ། །སྤྱོད་པས་སྨོས་པའི་གཟུགས་བརྙན་ཡང་ངོ༌། །སྔོན་ཁྱིམ་པའི་སྤྱོད་པའི་ཚེ་ཕ་མ་དང་ཕུ་ནུ་གཉེན་བཤེས་ལ་སོགས་པ་ལ་སྤྱོད་ཅིང་བརྟེན་བརྟེན་པ་ལས་དེ་དག་དང་བྲལ་ཀྱང་དེ་དང་འདྲ་བར་མཁན་པོ་ལ་ནི་ཕར་བལྟ། སློབ་དཔོན་ལ་ནི་མར་བལྟ་མཁན་པོ་གཅིག་པ་དང༌། གྲོགས་པོ་མཚུངས་པར་སྤྱོད་པ་དག་ནི་ཕུ་ནུ་དང་གཉེན་བཤེས་ལ་སོགས་པའི་ཞེས་ཡིད་བསྲིང་བའི་ཕྱིར་རངས་པར་བསྒོ། །དུལ་བར་གནས་པར་ཡང་ངོ༌། །བདག་ལུས་དང་ངག་དང་ཡིད་གསུམ་དུལ་བར་བསྡོམ་ཞིང་ཕ་རོལ་པོ་དུལ་བ་ལ་བརྟེན་ཞིང་གཞན་ཡང་དུལ་བར་བྱའོ། །དགོས་པ་ནན་ཏན་དུ་ཡང་ངོ༌། །དགོས་པའི་དོན་ནི་ཚུལ་ཁྲིམས་ཡིན་ཏེ། སྤྱད་ཅིང་བསྒོམས་ལ་ནན་ཏན་དུ་བྱ་སྟེ་རྒྱུན་མི་འཆད་པར་དྲན་པར་བྱ། དེ་བཞིན་དུ་ཕུང་པོ་དང་ཁམས་དང་སྐྱེ་མཆེད་ལ་མཉན་པ་དང༌། བསམས་པ་དང་བསྒོམས་པར་ནན་ཏན་དུ་གྱིས་ཤིག་ཅེས་ཀྱང་བསྒོ། ཡང་དག་པར་བླངས་ཏེ་མ་བཤད་པའང་ཀུན་ཤེས་པར་གྲུབ་པར་ཆུད་དོ་པ་ཡང་ངོ༌། །ཁྲིམས་རྫོགས་པར་ཡང་དག་པར་ཐོབ་པས་ན། ཕས་ཕམ་པ་ལ་སོགས་པ་ཁ་ཅིག་ནི་བཤད་དེ་ཐོས་པ་ཡིན་ལྷག་མ་ལ་སོགས་པ་མང་པོ་གཞན་ད་བཤད་དུ་མི་ཟིན་ཏེ་མ་ཐོས་མོད་ཀྱི་ཕྱིས་གསོ་སྦྱིན་འཆད་པའི་ཚེ་ཡང་ཐོས་པར་འགྱུར་ཕྱིས་ཀུན་བསླབ་ཅིང་
ཤེས་པར་བྱར་ཡོད་པས་ན། ད་བཤད་པ་དང་འདྲ་སྟེ་ཕྱིས་ལོབས་པར་འགྱུར་རོ་ཞེས་བསྒོ་གུས་པར་ཡང་བསྒོ། སྔོན་ཡང་ཚུལ་ཁྲིམས་ཀྱིས་བསོད་ནམས་ལྟ་བུས་མི་ཁོམ་པ་བརྒྱད་སྤངས་པའི་ལུས་འདི་ལྟ་བུ་ཐོབ་པ་ཡིན་ཏེ། དེའང་ཕས་ཕམ་པ་དང་དགེ་འདུན་གྱི་ལྷག་མ་ཁྲིམས་ཆེན་པོ་བསྲུངས་པ་འབའ་ཞིག་གིས་མི་ཆོག་གི་ཕྲ་མོ་ལ་ཡང་གུས་པར་སྲུངས་ཤིག་ཅེས་བསྒོ། ཐབས་དང་བཤད་པའི་བཅས་པས་སྒྲུབས་ཤིག་ཅེས་པ་ཡང་ངོ༌། །ཐབས་ནི་བདག་གིས་ཅི་ལ་ཡང་ཐབས་དང་ལྡན་པར་བག་བྱ་བ་ལ་བྱ། བཤད་པ་ནི་སངས་རྒྱས་ཤེས་རབ་མཆོག་གིས་གསུངས་པའི་ཆོས་ལ་བྱ། བཅས་པ་ནི་སངས་རྒྱས་ཀྱིས་ཆོས་བཤད་པའི་ལ་བདག་གིས་བག་བྱ་བ་དང་བཅས་པར་སྤྱད་པ་ལ་བྱ། སྒྲུབས་ཤིག་ཅེས་པ་ནི་ཚུལ་ཁྲིམས་དང་བརྟུལ་ཞུགས་ལ་སོགས་པ་ཙམ་ལ་གནས་ཤིང་སྙེམས་པས་མི་ཆོག་གིས་མྱ་ངན་ལས་འདས་པ་བསྒྲུབ་དགོས་སོ་ཞེས་བསྒོ། བསྙེན་པར་རྫོགས་པའི་ཆོ་གའོ། །འདི་ཡན་ཆད་ནི་བསྙེན་པར་རྫོགས་པར་བྱ་བའི་ཆོ་གའོ། །གནས་ལ་མ་ཞུས་པར་གནས་པས་བྱ་བ་མི་བྱ། ཨུ་པ་དེ་ཤ་འམ་གནས་བཅས་པའི་སློབ་དཔོན་ལ་མ་ཞུས་པར་གནས་པའི་སློབ་མ་ལས་ཅི་བྱའོ་ཅོག་མ་དྲིས་པར་མི་བྱའོ། །མ་དྲིས་ཀྱང་བྱར་རུང་བ་རྣམས་ནི་འོག་ནས་འཆད་དོ། །མ་གཏོགས་པ་ནི་བཤང་གཅི་དང་སོ་ཤིང་བཅའ་བ་དང༌། མཚམས་སུ་གཏོགས་པའི་གཙུག་ལག་ཁང་དུ་ཕྱག་འཚལ་བའོ། །དྲི་མི་དགོས་པའི་ནི་ཕྱི་རོལ་ཆེ་ཆུང་དུ་འགྲོ་བ་དང་སོ་ཤིང་མཚམས་ཀྱི་ནང་དུ་འདུག་སྟེ་འཆའ་བ་དང་ཕྱི་མཚམས་གཅིག་གི་ནང་གི་མཆོད་རྟེན་ལ་ཕྱག་འཚལ་བ་ལ་སོགས་པ་མ་དྲིས་པར་བྱས་ཀྱང་ཉེས་པ་མེད། གཙུག་ལག་ཁང་ནས་འདོམ་བཞི་བཅུ་རྩ་དགུའི་མཐར་འགྲོ་བ་ཡང་ངོ༌། །གཙུག་ལག་ཁང་རབས་བསྐོར་ན་ར་བའི་ཕྱི་སྒོ་ནས་གྲོང་དང་ནགས་ལ་སོགས་པས་བ་སུབ་མེད་ན། འདོམ་བཞི་བཅུ་རྩ་དགུ་ཚུན་ཆད་དུ་འཆགས་པ་དང་མཆོད་རྟེན་ལ་ཕྱག་འཚལ་བར་འགྲོ་ན་མ་ཞུས་པར་སོང་ཡང་ཉེས་མེད། ལྷུང་བཟེད་དང་ཆོས་གོས་ཀྱི་ལས་དང་ན་བའི་ག་ཡོག་དང་ཐེ་ཚོམ་བསལ་བ་དང༌། སྡིག་པ་ལ་ལྟ་བར་གྱུར་པ་
སྤང་བར་ནན་ཏན་ཆེར་བྱས་ཏེ། ཨེ་མའོ་བདག་གི་བྱ་བ་བྱེད་དུ་གཞུག་པ་ཡང་ངོ༌། །ལྷུང་བཟེད་དང་ཆོས་གོས་ཀྱི་ལས་དང་ཞེས་པ་ནི་མཁན་པོ་དང་སློབ་དཔོན་གྱི་ལྷུང་བཟེད་བཙོ་བ་དང༌། བཀྲུ་བ་དང༌། གླན་པ་དང༌། ཆོས་གོས་བཙོ་བ་དང༌། བཀྲ་བ་དང༌། བཙེམ་པ་ལ་སོགས་པ་བྱོས་ཤིག་ཅེས་བསྒོ་ན། སློབ་མ་དང་ཉེ་གནས་ཀྱིས་སླར་དྲི་མི་དགོས་པར་བྱ་མི་ནུས་ན་གཞན་ལ་བྱེད་དུ་བཅོལ་ཀྱང་ཉེས་མེད། ན་བའི་གཡོག་དང་ཞེས་པ་ནི་མཁན་པོ་དང༌། སློབ་དཔོན་ན་བའི་གཡོག་བདག་གིས་ཀྱང་གུས་པར་བྱ་མི་ནུས་ན་གཞན་ལའང་བཅོལ། ཐེ་ཚོམ་བསལ་བ་དང་ཞེས་པ་ནི་མཁན་པོ་དང་སློབ་དཔོན་ཚུལ་ཁྲིམས་ལྕི་ཡང་དང་ཉམས་མ་ཉམས་ཀྱི་ཕྱི་ནས་ཐེ་ཚོམ་ཟ་བ་ལ་སློབ་མ་འདུལ་བ་ལ་མཁས་པ་ཞིག་ན་ཐེ་ཚོམ་བསལ་བ་དང་འདུལ་བ་འཛིན་པ་གཞན་ལ་བཅོལ་ཏེ་ཐེ་ཚོམ་བསལ་ཀྱང་ཉེས་པ་མེད། སྡིག་པ་ལ་ལྟ་བར་གྱུར་པ་ཞེས་པ་ནི་སློབ་དཔོན་དང་མཁན་པོ་ཆོས་ལོག་པ་དགུ་བཅུ་རྩ་དྲུག་ལྟ་བུ་ལ་ལྟ་བར་གྱུར་ནས། སློབ་མ་མ་ལྟ་བུ་ལ་མཁས་ཏེ་ལོག་པར་ལྟ་བ་ལས་བཟློག་པ་དང༌། གཞན་མ་ལྟ་བུ་ཤེས་པ་ལ་བཅོལ་ན་ཉེས་མེད། སྤང་ཞེས་པ་ནས་ངོ་ཞེས་པའི་བར་དུ་ནི་མཁན་པོ་དང་སློབ་དཔོན་ལ་སློབ་མས་བྱ་བ་འདི་རྣམས་ནི་ལེ་ལོ་མི་བྱ་བར། ཨེ་མའོ་ཞེས་ལས་བྱེད་པའི་རིགས་པར་དམ་པའི་ཚུལ་དུ་ནན་ཏན་ཆེར་བྱ་སྟེ། བདག་གིས་ཀྱང་ནུས་མི་ནུས་ཀྱིས་བརྩལ་ཏེ་བྱའོ། །བདག་གིས་མ་ནུས་ན་གཞན་ལའང་བཅོལ་ཏེ་བྱེད་དུ་གཞུག་གོ །ལ་ལ་ཞིག་ན་རེ་ལོག་པར་ལྟ་བ་དང་ཐེ་ཚོམ་ཟ་བ་ལ་ཅིའི་ཕྱིར་མཁན་པོར་བྱ་ཞེས་ཟེར་ན་ཐོག་མ་ནས་མ་ལོབས་ཤིང་མི་ཤེས་པ་ནི་མ་ཡིན་ཏེ་མི་བྱའོ། སྔོན་ཤེས་ཤིང་མཁས་པ་ལས་ལུས་ཀྱི་ཁམས་ལ་རླུང་དང་ནད་ལ་སོགས་པ་དབང་པོ་ཉམས་ཤིང་མི་དྲན་པར་གྱུར་པ་དེ་ལྟ་བུ་ལ་བྱའོ། ཨེ་མའོ་དགེ་འདུན་གྱིས་དེ་ལ་སྨད་པར་འདོད་པ་ལ་སྨད་པའི་ལས་མ་བྱེད་པ་དང༌། བྱས་པ་འཆགས་པ་ཡང་ངོ༌། །སློབ་དཔོན་དང་མཁན་པོ་ལ་ཆད་པ་རྣམ་པ་བདུན་འཇུག་ནས་འབྱུང་བ་ལྟ་བུ་ཞིག །དགེ་འདུན་གྱིས་གཅོད་པར་བྱེད་ན་སྔ་ནས་མཁན་པོ་ལ་ཡང་དེ་ལྟ་བུའི་ཉེས་པ་མ་བྱེད་ཅིག་ཅེས་
གྲོས་གདབ་ཅིང་དགེ་འདུན་ལའང་ཆད་པས་མི་བཅད་པའི་ཚུལ་དུ་ཐབས་སུ་སྦྱར་ཞིང་གསོལ། རྒྱལ་པོ་འམ་ཞང་བློན་ལྟ་བུ་ལས་ཆད་པས་མ་བཅད་ཅིག་ཅེས་པ་ནི་མི་གསོལ་གྱི། དགེ་འདུན་ལ་མཁན་པོས་ཉེས་སུ་ཟིན་ཀྱང་ཆད་པས་མི་གཅད་པ་དང་ཆད་པས་བཅད་ན་འང་མཁན་པོ་ཆད་པ་བྱེད་ཅིང་དགེ་འདུན་ལ་འཆགས་སུ་གཞུག་སྟེ། ཨེ་མའོ་ཞེས་ནན་ཏན་ཆེར་བྱའོ། །མཁན་པོ་བསྐྲད་དེ་ཕྱི་ལོགས་ན་འཕྱན་པར་གྱུར་ན་འང་དེ་ལྟར་མ་བྱེད་པར་དགེ་འདུན་ལ་བཟོད་པ་གསོལ་ཅིག་པར་གྲོས་གདབ་ཅིང་ཅིའི་ཐབས་ཀྱིས་ཀྱང་གཙང་མར་བཅོས། མ་དྲིས་ཀྱང་ཉེས་མེད། ཆད་པ་དང་རྩ་བའི་ཆད་པ་དང་མགུ་བར་བྱ་བ་དང་རྩ་བའི་མགུ་བ་དང་དབྱུང་བའི་ཕྱིར་བྱ་བ་ལ་དབྱུང་བ་བྱིན་ཅིག་ཅེས་ཀྱང་ངོ༌། །ཆད་པ་དང་ཞེས་པ་ནི་དགེ་འདུན་གྱིས་ལྷག་མ་བྱུང་ནས་ཞག་ཏུ་བཅབས་པ་བཞིན་དུ་ཆད་པ་བྱེད་དུ་གཞུག་པ་ལ་བྱ། རྩ་བའི་ཆད་པ་དང་ཞེས་པ་ནི་ལྷག་མ་སྔར་བྱུང་བའི་ཆད་པ་མ་ཁོར་བར་ལྷག་མ་ཡང་བྱུང་སྟེ་བཅབས་པའི་ཆད་པ་བྱུང་ན་སྔ་མའི་ཆད་པ་སྤངས་ལ་ཕུབ་ལ་གདོད་བྱེད་དུ་གཞུག་པ་ལ་བྱ། མགུ་བར་བྱ་བ་དང་ཞེས་པ་ནི་ལྷག་མ་གཅིག་བྱུང་ན་ཞག་དྲུག་གི་བར་དུ་དགེ་འདུན་ལ་མགུ་བ་བྱ་བ་ཚུལ་གྱིས་བྱ་དགོས་པ་ལ་བྱ། རྩ་བའི་མགུ་བ་དང་ཞེས་པ་ནི་ལྷག་མ་སྔ་མའི་མགུ་བ་མ་ཟིན་པར་ལྷག་མ་བྱུང་ན་སྔར་མགུ་བ་ཞག་དུ་བྱས་ཀྱང་རུང་སྤངས་ལ་ཕུབ་སྟེ་གཞི་ནས་བསླང་སྟེ་བྱ་དགོས་སོ། །དབྱུང་ཞེས་པ་ནས་ངོ་ཞེས་པའི་བར་དུ་འདི་ལྟ་བུ་ཞིག་སློབ་དཔོན་དང་མཁན་པོ་ལ་བྱུང་ན་ཆད་པ་དང་མགུ་བ་མྱུར་དུ་བྱད་དུ་གཞུག་པ་དང་ཆད་པ་བྱས་ཟིན་ནས་དགེ་འདུན་ལ་ཉེས་པ་དབྱུང་དུ་ཅི་གནང་ཞེས་གསོལ་བ་མྱུར་དུ་གདབ་པ་མ་དྲིས་ཀྱང་ཉེས་མེད། དེས་ཀྱང་འདི་དག་བྱས་ཏེ་འདྲི་བ་མ་གཏོགས་སོ། །ཆོས་གོས་དང་ལྷུང་བཟེད་ཀྱི་ལས་བྱ་ཞེས་བྱུང་བ་མན་ཆད། འདི་ཡན་ཆད་མཁན་པོས་ཀྱང་སློབ་མ་ལ་བྱ་དགོས་ཏེ། དྲི་བ་ནི་སློབ་མས་མཁན་པོ་ལ་ཚུལ་གྱིས་དྲི་བ་ཡིན་གྱི། མཁན་པོས་ནི་སློབ་མ་ལ་མི་དྲིའོ། །ཡང་གཅིག་ཏུ་ན་མཁན་པོས་ཆད་པས་བཅད་པའི་ཚེ་སློབ་མས་དྲིར་མི་རུང་སྟེ། གཞན་ལ་དྲི་བར་མཁན་པོས་གཏད་དེ་དྲིར་མི་གཞུག་པ་ལ་བྱ། བསྙེན་
པར་རྫོགས་ནས་ལོ་བཅུར་མ་ལོན་པས་མཁན་པོ་དང་གནས་དང་གནས་མེད་པར་མི་བྱ། ཁྲིམས་རྫོགས་ནས་ལོ་བཅུར་མ་ལོན་གྱི་བར་དུ་བདག་གིས་མཁན་པོ་ཡང་མི་བྱ། གཞན་ཁྲིམས་རྫོགས་པ་བདག་ལ་གནས་འཆར་ཡང་མི་གཞུག །བདག་ཀྱང་གནས་མ་བཅས་པར་མི་འདུག །དགེ་སྦྱོང་གི་མཁན་པོ་ཡང་མི་བྱ། གཞན་ལོ་བཅུ་ལོན་ཞིང་ཆོས་ལྔ་དང་ལྡན་པ་མེད་དེ་ཕོངས་ན། བདག་ཚུལ་ཁྲིམས་མ་ཉམས་ཤིང་ཆོས་ལྔ་དང་མི་ལྡན་ཡང་སློབ་དཔོན་བྱར་རུང་ངོ༌། མཁན་པོར་མི་རུང་ངོ༌། མདོ་བཞིན་བསྡུས་པ་གང་དང་ཡང་མི་ལྡན་པས་ཀྱང་ངོ༌། །ཁྲིམས་རྫོགས་ནས་ལོ་བཅུ་ལོན་དུ་ཟིན་ཀྱང་འོག་ནས་ལྔ་ཕྲུགས་སུ་བསྡུས་པ་ཉི་ཤུ་གང་ཡང་རུང་སྟེ་དེ་གཅིག་དང་ཡང་མི་ལྡན་ན་མཁན་པོ་དང༌། གཞན་གནས་བཅར་གཞུག་པ་དང༌། བདག་གནས་མེད་པར་བྱར་མི་རུང་ངོ༌། །ལྔ་པོ་གང་ཡང་རུང་སྟེ་གཅིག་དང་ལྡན་ལ་ལོ་བཅུར་ལོན་ན་ནི་རུང་ངོ༌། །ནད་གཡོག་དང༌། ཐེ་ཚོམ་བསལ་བ་དང༌། ལྟ་བར་གྱུར་པ་སྤོང་བ་དང༌། མི་དགའ་བའི་གནས་ནས་གཏང་བ་བྱ་ཞིང་བྱེད་དུ་གཞུག་ནུས་པའོ། །ནད་གཡོག་དང་ཞེས་པ་ནི་སྙིང་རྗེ་ཆེ་བ་དང་ཡིད་རིང་ཞིང་སྨན་དཔྱད་མཁས་པ་ལ་བྱ། གཞན་ལ་ཡང་ནད་གཡོག་བྱེད་དུ་བཅོལ་ནུས་པའོ། །ཐེ་ཚོམ་བསལ་བ་དང་ཞེས་པ་འདུལ་བ་ལ་མཁས་ཏེ། ཁྲིམས་ལྕི་ཡང་ལ་སོགས་པའི་ཐེ་ཚོམ་མེད་ཅིང་གཞན་ལའང་ཐེ་ཚོམ་སེལ་བའོ། །ལྟ་བར་གྱུར་པ་སྤོང་བ་དང་ཞེས་པ་ནི་མ་ལྟ་བུ་ལ་མཁས་པ་སྟེ། ལོག་པ་དྲུག་ཅུ་རྩ་བཞི་ལྟ་བུ་ལ་མི་ལྟ་བ་དང་གཞན་དེ་ལྟ་བུ་ལ་ལྟ་བར་གྱུར་པ་བཟློག་ནུས་པའོ། །མི་དགའ་བའི་གནས་ནས་གཏང་བ་ཞེས་པ་ནི་སློབ་མ་མི་དགའ་ནས་བདག་གི་ཕྱི་ན་དགེ་བ་སྤྱོད་དུ་མི་བཏུབ་ཅིང་མི་ལྡོབ་པ་དང༌། འདོད་ཆགས་དང་ཞེ་སྡང་དང་གཏི་མུག་ལྟ་བུ་གཡོས་ན་བདག་གིས་ཀྱང་དེ་རྣམས་ལ་བཟློག་ནུས། གཞན་ཡོན་ཏན་དང་ལྡན་པ་ལ་བཅོལ་ན་ཡི་གེ་སྤྲིངས་པ་ཙམ་གྱིས་ཀྱང་མཉན་དུ་བཏུབ་པ་ལ་བྱ། བྱང་ཞིང་བྱེད་དུ་གཞུག་ནུས་པའོ་ཞེས་པ་ནི་འདི་གཞི་བདག་གིས་ཀྱང་བྱེད་དུ་གཞུག་ནུས་གཞན་ལ་ཡང་བྱེད་དུ་གཞུག་ནུས་པའི་སྟེང་དུ་ལོ་བཅུར་
ལོན་པ་དང་ལྔར་ལྡན་ན་གནས་བརྟན་སློབ་པ་ཞེས་པ་ཚུལ་ཆད་སྔར་མེད་པ་ལ་ཚུལ་ཁྲིམས་དང་ལྡན་པ་དང༌། མང་དུ་ཐོས་པ་དང་བཅས་པར་རོ། འོག་ནས་སློབ་པ་ཡང་ངོ་ཞེས་ཟེར་བའི་སཱུ་ཏྲ་དགྲ་བཅོམ་པའི་རིམ་པ་བདུན་འཆད་པ་ཡན་ཆད། ལྔ་ཕྲུགས་སུ་མ་ཚང་བའི་རྣམས་ལ། མང་དུ་ཐོས་པ་དང་ཚུལ་ཁྲིམས་ལྡན་པ་དང༌། གཉིས་ཀྱིས་མནན་ཏེ་ལྔ་ཕྲུགས་སུ་སྦྱར་རོ། །དེ་ལ་མང་དུ་ཐོས་པ་ནི་སྡེ་སྣོད་གསུམ་ཤེས་ཤིང་ཕྱི་རོལ་གྱི་བྱཱ་ཀ་ར་ཎ་དང༌། གཏར་ཀ་ལ་སོགས་པའི་རྒྱུས་ཤེས་པ་ལ་བྱ། ཚུལ་ཁྲིམས་དང་ལྡན་པ་ནི་ཕམ་པ་དང་ལྷག་མ་རྣམས་མ་ཉམས་པ་སྟེ། དགེ་སློང་དུ་ཆུད་པ་ལ་བྱའོ། །སྡེ་སྣོད་ཤེས་པ། སྡེ་སྣོད་ལ་གསུམ་སྟེ། འདུལ་བ་དང་མདོ་སྡེ་དང་མ་མོ་ལྟ་བུའོ། །དེ་གསུམ་ལ་མཁས་པ་སྟེ། མདོ་སྡེའི་ནང་ནས་འདུལ་བ་འབྱུང་བ་ངོས་ཟིན་པ་ལྟ་བུ། དེ་གསུམ་ལ་འཛིན་པ་སྟེ་ཁ་དོན་དུ་ཤེས་པ་དོན་འཛིན་པའོ། །དེ་གསུམ་ལ་སྟོན་ནུས་པ་སྟེ་བདག་ཀྱང་ཤེས་ལ་ཕ་རོལ་ལའང་དོན་ཆུད་པར་ནུས་པའོ། །དེ་གསུམ་ལ་གསལ་བ་སྟེ་བྱིས་པ་དང་འཆད་པ་ལྟ་བུ་ལ་མ་ནོར་བར་སྦྱོར་ནུས་པའོ། །དེ་ལྟར་སྡེ་སྣོད་གསུམ་ལ་འཛིན་པ་དང་མཁས་པ་དང་སྟོན་པ་དང་གསོལ་བ་བཞི་ལ་སོ་སོ་ན་གསུམ་གསུམ་ཡོད་པའི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པ་གཉིས་ཀྱིས་སོ་སོར་བསྣན་ཏེ་ལྔ་ཕྲུགས་བཞི། དེ་དག་འཆད་པར་ནུས་པའོ། །མདོ་སྡེ་དང་འདུལ་བ་དང་མ་མོ་ལྟ་བུ་གསུམ་གཞན་ལ་དོན་ཆུད་པ་ཉིད་དུ་ནི་མི་ནུས་ཀྱི་འཆད་ནུས་པ་ལ་བྱ་སྟེ་དེ་གསུམ་གྱི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པ་གཉིས་ཀྱིས་བསྣན་ཏེ་ལྔ་ཕྲུགས་གཅིག །ཚུལ་ཁྲིམས་དང་སེམས་དང་ཤེས་རབ་བསླབ་པ་དང་ངོ༌། ཚུལ་ཁྲིམས་དང་ཞེས་པ་ནི་འདུལ་བ་ལ་ལྕི་ཡང་ཀུན་ཤེས་ནས་ཕྲ་མོ་ཁ་ན་མ་ཐོ་བ་ཙམ་ལ་ཡང་བག་བྱེད་ཅིང་བསྲུངས་པ་ལ་བྱའོ། །སེམས་དང་ཞེས་པ་བསམ་གཏན་བཞིའི་དོན་ཁོང་དུ་ཆུད་དེ་ཤེས་ནས་བསྒོམ་པ་ལ་བྱ། ཤེས་རབ་དང་ཞེས་པ་ནི་ཟག་པ་ཟད་པར་བྱེད་པའི་ཆོས་ཤེས་པ་སྟེ། བདེན་པ་བཞིའི་དོན་ཁོང་དུ་ཆུད་ནས་བསྒོམ་པ་ལ་བྱ། བསླབ་པ་དང་ངོ་ཞེས་པ་ནི་འདི་གསུམ་གདོད་སློབ་པ་དང་གོམས་ཟིན་པ་ལ་
མི་བྱའི་དོན་མ་ཆུད་ནས་བསྒོམ་པ་ལ་བྱ། འདི་གསུམ་གྱི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པས་བསྣན་ཏེ། བསླབ་པར་ཡང་ནུས་པའོ། །སཱུ་ཏྲ་ལྟག་མའི་ཚུལ་ཁྲིམས་དང་སེམས་དང་ཤེས་རབ་གསུམ་བདག་ཀྱང་བསྒོམས་ལ་གཞན་ལ་ཡང་སློབ་ནུས་པའི་སྟེང་དུ་ཐོས་པ་དང་ཚུལ་ཁྲིམས་དང་ལྡན་པས་བསྣན་ཏེ་ལྔ་ཕྲུགས་གཅིག །དེ་ལྟར་ཀུན་སྤྱོད་པ་དང་འདུལ་བ་དང་སོ་སོར་ཐར་པ་ཡང་ངོ༌། །དེ་ལྟར་ཞེས་པ་ནི་ལྷག་མ་བདག་ཤེས་པ་དང་གཞན་ལ་སྟོན་པ་ལྔ་ཕྲུགས་གཉིས་སུ་འདྲེན་པ་གཞན་དུ་འདི་ཡང་གཉིས་སུ་དྲང་ངོ༌། །ཀུན་སྤྱོད་པ་དང་ཞེས་པ་ནི་སྤྱོད་ལམ་བཞིར་གོས་བགོ་བ་དང་ཟན་བཟའ་བ་ལ་སོགས་པ་ཚུལ་བཞིན་དུ་སྤྱོད་པ་ལ་བྱ། འདུལ་བ་དང་ཞེས་པ་ནི་བི་བང་ཀ་མ་གཏོགས་པར་གཞན་ཀུན་ཤེས་པ་ལ་བྱ། སོ་སོར་ཐར་པ་ཡང་ངོ་ཞེས་པ་ནི་པི་བང་ཀའི་གཏམ་རྒྱུད་ཚུན་ཆད་ཤེས་པ་ལ་བྱ་སྟེ། འདིའི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པས་བསྣན་ཏེ་བདག་ཤེས་པ་ལ་གཅིག་གཞན་ཤེས་པ་ལ་ལྔ་ཕྲུགས་གཅིག་སྟེ་གཉིས་ཡོད་དོ། །དད་པ་དང་ཚུལ་ཁྲིམས་དང་ཐོས་པ་དང་གཏོང་བ་དང་ཤེས་རབ་དང་ལྡན་པ་ཡང་ངོ༌། །དད་པ་དང་ཞེས་པ་ནི་དཀོན་མཆོག་དང་ལས་དང་འབྲས་བུ་དང་ཆོས་ལ་སོགས་པ་ལ་དད་པ་སྟེ། མདོར་ན་སྲོག་ལ་བབ་ཀྱང་མི་རུང་བ་ནི་དད་པ་ཞེས་བྱའོ། །ཚུལ་ཁྲིམས་དང་ཞེས་པ་ནི་འདུལ་བ་ཤེས་ཤིང་འཛིན་པ་ལ་བྱའོ། །ཐོས་པ་དང་ཞེས་པ་ནི་འཇིག་རྟེན་གྱི་ཆོས་དང་འཇིག་རྟེན་ལས་འདས་པའི་ཆོས་སྡེ་སྣོད་གསུམ་དང༌། གཏར་ཀ་དང་བྱཱ་ཀ་ར་ཎ་ཐོས་ཤིང་ཤེས་པའོ། །གཏོང་བ་དང་ཞེས་པ་ནི་ཆོག་ཤེས་པས་གཞན་ལས་མི་ལེན་པ་དང༌། ལུས་གང་གཙང་བདོག་པ་ལས་ཀྱང་ཕྲི་སྟེ་གཏོང་བ་དང་ཆགས་པའི་དངོས་པོ་ཡང་གཏོང་བའོ། །ཤེས་རབ་དང་ཞེས་པ་ནི་ཆོས་ཟབ་མོ་དང་ཕྲ་མོ་ཡང་ལྕིགས་ཤིང་ཕྱིས་ཇི་ལྟར་འབྱུང་བ་སྔ་ནས་རིག་པ་དང་གཅིག་ལས་མང་དུ་སྤྲོ་ནུས་པའོ། །ལྡན་པ་ཡང་ངོ་ཞེས་པ་ནི་ཆོས་འདི་ལྔ་དང་ལྡན་ན་ལྔ་ཕྲུགས་གཅིག་ཏུ་བརྩི་སྟེ་གནས་བརྟན་དུ་ཆུད། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་དེའི་ཡེ་ཤེས་
མཐོང་བ་ཡང་ངོ༌། །ཚུལ་ཁྲིམས་དང་ཞེས་པ་ནི་འདུལ་བ་འབུམ་པ་ཤེས་ཤིང་འཛིན་པར་བྱེད་པའོ། །ཏིང་ངེ་འཛིན་དང་ཞེས་པ་ནི་འདུ་འཛི་མང་པོ་དང་བྲལ་ཞིང་སེམས་རྩེ་གཅིག་ཏུ་ཐུབ་པར་རྒྱུན་དུ་བསྒོམ་པའོ། །ཤེས་རབ་དང་ཞེས་པ་ནི་འཇིག་རྟེན་ལས་འདས་པའི་ཤེས་རབ་དང་ཚིག་གཅིག་ལས་མང་དུ་སྤྲོ་ནུས་པའོ། །རྣམ་པར་གྲོལ་བ་དང་ཞེས་པ་ནི་ཁམས་གསུམ་གྱི་མྱ་ངན་ལས་འདས་པར་འགྱུར་བར་ཡིད་ཆེས་ཤེས་པའོ། །དེའི་ཡེ་ཤེས་མཐོང་བ་ཡང་ངོ་ཞེས་པ་ནི་མཉན་པ་དང་བསམ་པས་དགྲ་བཅོམ་པའི་མྱ་ངན་ལས་འདས་པའི་རང་བཞིན་ཞི་བ་མཐོང་བའོ། །འདི་ལྔ་དང་ལྡན་ན་ལྔ་ཕྲུགས་གཅིག་སྟེ། གནས་བརྟན་དུ་རུང་ངོ༌། །བརྩོན་འགྲུས་རྩོམ་པ་དང་ཤེས་རབ་ཏུ་བཅས་པ་དང་སྟེ། བརྩོན་འགྲུས་རྩོམ་པ་དང་ཞེས་པ་ནི་ལུས་དང་ངག་དང་ཡིད་གསུམ་གྱིས་དགེ་བ་བྱ་བར་སེམས་ཀྱིས་བརྩོན་འགྲུས་བརྩམ་པ་དང་ལུས་ཀྱིས་བརྩམས་པའོ། །ཤེས་རབ་དུ་ཞེས་པ་ནི་རྒྱུ་རྐྱེན་ཤེས་ཤིང་གཅིག་ལས་མང་དུ་སྤྲོ་ནུས་པ་དང༌། ཕྱིས་ཅི་འབྱུང་བ་སྔ་ནས་ཤེས་པའོ། །བཅས་པ་དང་སྟེ་ཞེས་པ་ནི་བརྩོན་འགྲུས་དང་ཤེས་རབ་གཉིས་གཅིག་གི་གྲོགས་སུ་གཅིག་འགྱུར་བ་ལ་བྱ་སྟེ། ལྔའི་ཡན་ལག་གཉིས། དྲན་པ་དང་ལྡན་པ་ཡང་ངོ༌། །སྔན་ཅད་བཤད་ཅིང་བསླབས་པའི་རྣམས་མ་བརྗོད་པར་དྲན་པ་དང༌། ད་བསླབས་པ་ཕྱིས་མི་བརྗེད་པའོ། །སྔ་མ་གཉིས་དང་འདི་དང་གསུམ་གྱི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པ་གཉིས་ཀྱིས་བསྣན་ཏེ་ལྔ་ཕྲུགས་གཅིག་སྟེ་དབེན་པ་ཡང་ངོ༌། །ལུས་དབེན་པ་དང་སེམས་དབེན་པ་དང་རྣམ་པ་གཉིས་ཏེ། ལུས་དབེན་པ་ནི་དགོན་པ་ན་གནས། སེམས་དབེན་པ་ནི་མྱ་ངན་མེད་པའོ། །འདིའི་སྟེང་དུ་བརྩོན་འགྲུས་དང་ཤེས་རབ་དུ་བཅས་པས་བསྣན་པའི་སྟེང་དུ་མང་དུ་ཐོས་པ་དང་ཚུལ་ཁྲིམས་དང་ལྡན་པ་གཉིས་ཀྱིས་བསྣན་ཏེ་ལྔ་ཕྲུགས་གཅིག །སེམས་གཅིག་ཏུ་འདུས་པ་ཡང་ངོ༌། །མི་དགེ་བ་ལ་ནི་མི་སེམས་དགེ་བ་ལ་སེམས་རྩེ་གཅིག་ཏུ་རྒྱུན་དུ་སེམས་པའོ། །དེའི་སྟེང་དུ་ཡང་བརྩོན་འགྲུས་དང་ཤེས་རབ་དང་མང་དུ་ཐོས་པ་དང་ཚུལ་ཁྲིམས་དང་ལྡན་པ་འདི་བཞིས་བསྣན་ཏེ་
ལྔ་ཕྲུགས་གཅིག་སློབ་པ་ཡང་ངོ༌། །གང་ཟག་བདུན་ལ་བྱ་སྟེ། ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་དེའི་ཡེ་ཤེས་ལྔ་ལ་སྤྱོད་ཅིང་སྦྱོང་བ་སྟེ་ལྔ་ཕྲུགས་གཅིག །མ་རབས་སློབ་པ་དང་མི་འདྲི་སྟེ་ཕྱིར་མི་ལྡོག་པའོ། །མི་སློབ་པ་ཡང་ངོ༌། །དགྲ་བཅོམ་པ་ལ་བྱ་སྟེ་ཚུལ་ཁྲིམས་དང་ཏིང་ངེ་འཛིན་དང་ཤེས་རབ་དང་རྣམ་པར་གྲོལ་བ་དང་དེའི་ཡེ་ཤེས་མཐོང་བ་དང༌། ལྔ་གྲུབ་ཟིན་པས་ལྔ་དང་ལྡན་པ་ཡིན་ཏེ་ལྔ་ཕྲུགས་གཅིག་ཏུ་བརྩིའོ། །འབྱུང་བ་དང་བཅས་པ་དང༌། རྗེས་སུ་བཅས་པ་དང༌། བཅད་པ་དང་གནང་བ་ཤེས་པ་ཡང་ངོ༌། །འབྱུང་བ་དང་ཞེས་པ་ནི་ཡུལ་གང་དུ་ཉེས་པའི་གཞི་བྱུང་བ་ལ་བྱའོ། །བཅས་པ་དང་ཞེས་པ་ནི་དགེ་སློང་གང་གིས་ཉེས་པ་བྱུང་སྟེ་བཅས་པ་ལ་བྱ། རྗེས་སུ་བཅས་པ་དང་ཞེས་པ་ནི་མི་ལ་མི་ཚངས་པར་སྤྱོད་དུ་མི་གནང་བར་བཅས་པའི་འོག་ཏུ་བྱོལ་སོང་དང་ཁུ་བ་ཡང་འབྱིན་དུ་མི་གནང་བར་རྗེས་སུ་བཅས་པ་ལ་བྱ། བཅད་པ་དང་ཞེས་པ་ནི་ཕ་ས་ཕམ་པ་དང་ཆང་ལྟ་བུ་སྲོག་ལ་བབ་ཀྱང་བཏུང་ཞིང་སྤྱད་དུ་མི་གནང་བར་བཅད་པ་ལ་བྱ། གནང་བ་ཞེས་པ་ནི་གདོང་ཕྱིས་ལ་སོགས་པ་འཆང་དུ་གནང་བ་སྟེ། མ་བཅངས་ཀྱང་ཉེས་མེད་པ་ལ་བྱ། ཤེས་པ་ཡང་ངོ་ཞེས་པ་ནི་འདི་ལྔ་ལྟ་བུ་འབུམ་པ་ཐམས་ཅད་ཀྱི་རྒྱུས་ཤེས་པ་ལ་བྱ་སྟེ་ལྔ་ཕྲུགས་གཅིག །བར་དུ་གཅོད་པ་དང༌། མི་གཅོད་པ་མངོན་པར་ཤེས་ཏེ། འཆང་བ་དང་གནས་པ་ཉེ་བར་གནས་པ་འཛིན་པར་གཞུག་ནུས་པ་དང་བཅས་པ་ལ་ཡང་ངོ༌། །བར་དུ་གཅོད་པ་དང་ཞེས་པ་ནི་སྡིག་ཏུ་འགྱུར་ཞིང་དགྲ་བཅོམ་པའི་རིམ་པར་འགྱུར་བ་ལ་བར་དུ་གཅོད་པ་ལ་བྱ། མི་གཅོད་པ་ནི་སྡིག་ཏུ་མི་འགྱུར་ཞིང་དགྲ་བཅོམ་པའི་རིམ་པ་ལ་བར་དུ་མི་གཅོད་པ་ལ་བྱ། མངོན་པར་ཤེས་ཏེ་ཞེས་པ་ནི་འདི་གཉིས་ལ་གསལ་བར་ཤེས་པ་ལ་བྱ་སྟེ། ཡན་ལག་གཉིས་འཆད་པ་དང་ཞེས་པ་ནི་འདི་གཉིས་གཞན་ལའང་འཆད་ནུས་པ་དང༌། ཡན་ལག་བཞི་སྟོན་པ་དང་ཞེས་པ་ནི་བཤད་ནས་ཕ་རོལ་དོན་ཆུད་པར་སྟོན་ནུས་པ་དང་ལྔ་སྟེ་ལྔ་ཕྲུགས་གཅིག །གནས་ཤེས་པ་ནས་ངོ་ཞེས་པའི་བར་དུ་ནི་བར་དུ་གཅོད་པ་དང་མི་གཅོད་པ་གཉིས་བདག་ཤེས་པ་བཞིན་དུ་
སློབ་མ་ལའང་ཁོང་དུ་ཆུད་པར་སྟེན་ནུས་པའི་མཐུ་ཡོད་པ་དང༌། བར་དུ་གཅོད་པ་དང༌། མི་གཅོད་པ་གཉིས་གསལ་བར་ཤེས་པ་དང༌། ཡན་ལག་བཞི་སྟེ་བདག་གི་སློབ་མ་ཉེ་གནས་སུ་གཏང་ན་ཡང་ཉེ་གནས་ཀྱི་སློབ་དཔོན་དེ་བདག་གི་ངག་ཉན་པ་དང་ལྔ་ཕྲུགས་གཅིག་ལྟུང་བ་དང༌། མི་ལྟུང་བ་དང༌། ཡང་བ་དང༌། ལྕི་བ་མངོན་པར་ཤེས། སོ་སོར་ཐར་པ་རྒྱས་པར་ཐོན་པ་ཡང་ངོ༌། །ལྟུང་བ་དང་ཞེས་པ་ནི་བྱོལ་སོང་ཆེན་པོ་བསད་པ་དང་ཆུང་ངུ་བསད་པ་འདྲ་བར་ལྟུང་བར་རིག་པའོ། །ལྟུང་བ་ནི་རྒྱུད་གསུམ་དུ་ལྟུང་བའོ། །མི་ལྟུང་བ་དང་ཞེས་པ་ནི་ཙོག་ཙོག་པོར་འདུག་པ་དང༌། སྐྱིལ་མོ་ཀྲུང་དུ་འདུག་པ་ལ་ལྟུང་ཞེས་ཟེར་བ་ཡོད་དེ་དེ་ཡང་མི་ལྟུང་བར་རིག་པའོ། །ཡང་བ་དང་ཞེས་པ་ནི་སྦོམ་པོ་ལྟུང་བ་དང་ཉེས་བྱས་ཀྱི་རིམ་པ་ཤེས་ལ། དེ་སོ་སོ་ཉིད་ཀྱི་ཡང་བ་གང་ཡིན་ཤེས་པའོ། །ལྕི་བ་ཤེས་པ་ནི་སྦོམ་པོ་དང་ལྟུང་བ་དང་ཉེས་བྱས་ཀྱི་རིམ་པ་ཤེས་ལ། དེ་སོ་སོ་ཉིད་ཀྱི་ལྕི་བ་གང་ཡིན་ཤེས་པའོ། །མངོན་པར་ཤེས་པ་ཞེས་པ་ནི་འདི་བཞི་གསལ་བར་ཤེས་པ་སྟེ་ཡན་ལག་བཞི་པོ་ཞེས་པ་ནས་ངོ་ཞེས་པའི་བར་དུ་ནི་ཁ་ཏོན་ཀྱང་ཤེས། དོན་ཁོང་དུ་ཆུད་པ་དང་ཕ་རོལ་ལ་འཆད་ནུས་པ་དང་འདི་ལྟར་ལྡན་ན་གནས་བརྟན་དུ་རུང་སྟེ་ལྔ་ཕྲུགས་གཅིག །རྒན་པོ་ལ་མེད་ན་གཞོན་ནུ་ལ་གནས་བཅའ། ཁྲིམས་རྫོགས་ནས་ལོ་བཅུ་ཡན་ཆད་དུ་ལོན་ཀྱང་རུང་སྟེ། ཆོས་ལྔ་དང་མི་ལྡན་ན་ལོ་བཅུ་ཡན་ཆད་ལོན་ལ། ཡོན་ཏན་ལྔ་དང་ལྡན་པ་བདག་པས་རྒན་བ་མེད་ན་གཞོན་ནུ་ལ་གནས་བཅའ། ཕྱག་འབའ་ཞིག་མ་གཏོགས་པ། སཱུ་ཏྲ་ལྟག་མ་ལྟར་རྒན་པོ་གཞོན་ནུ་ལ་གནས་བཅས་ནས་ལུས་སྨད་ལྔ་ས་ལ་གཏུགས་ཏེ་ཕྱག་འཚལ་བ་མ་གཏོགས་པར་ཐལ་མོ་སྦྱར་ཏེ་ཕྱག་བྱས་ལ། གཞན་གནས་བཅས་པ་སློབ་པའི་ཚུལ་བཞིན་དུ་བྱའོ། སྤྱོད་ཅིང་གནས་མེད་པར་ལོ་ལྔ་ལོན་ལ། ཐ་མའི་བསྡུས་པ་དང་ལྡན་ན་ཡུལ་རྒྱུ་བ་སྤྱོད་དོ། ཁྲིམས་རྫོགས་ལོ་ལྔ་ལོན་ལ་ཆོས་ལྔ་དང་ལྡན་ཞིང་བསྡུས་པ་ཉེ་ཤུ་རྩ་གཅིག་གིས་ཐ་མ་དང་ལྡན་ན་ཡུལ་གཞན་དུ་མི་འགྲོར་མི་རུང་བ་ཞིག་ཏུ་གྱུར་ན་གནས་མེད་པར་ཡུལ་རྒྱུར་སོང་ཡང་ཉེས་མེད་དོ། །ཡུལ་གང་དུ་ཕྱིན་ཅིང་འདུག་པའི་གནས་དེ་
ན་ཆོས་ལྔ་དང་ལྡན་པ་ཡོད་ན་གནས་ཆོས་ཤིག །གཞན་གསུམ་རིག་པའང་མ་ཡིན་ནོ། །ཆོས་ལྔ་དང་མི་ལྡན་ཞིང་ལོ་བཅུར་མི་ལོན་ན་ཚེ་ལྔ་མ་དང་ཕྱི་མ་དང༌། ཟག་པ་ཟད་པ་གསུམ་ཤེས་ཀྱང་གནས་མེད་པ་དང་མཁན་པོ་དང་གཞན་གནས་འཆར་མི་གནང་ངོ༌། །གནས་པ་ལ་གཏོགས་སོ། །འདི་ཡན་ཆད་གནས་བརྟན་གྱི་ཚད་དང་གནས་པའི་ཆོ་གའོ། །ཁྱོད་མུར་འདུག་པ་མ་ཡིན་ནམ་ཞེས་རབ་ཏུ་འབྱུང་བར་འོངས་པ་ལ་དྲི། ལ་ལ་ཞིག་རབ་ཏུ་འབྱུང་བའི་ཕྱིར་འོངས་ན་རབ་ཏུ་འབྱུང་བར་བྱེད་པའི་མཁན་པོས་ཁྱོད་མུར་འདུག་པ་མ་ཡིན་ནམ་ཞེས་དྲིའོ། །མུར་འདུག་ཡིན་ན་ནི་རབ་ཏུ་མི་འབྱུང་མ་ཡིན་ན་ནི་རབ་ཏུ་འབྱུང་སྟེ་མུར་འདུག་ཇི་ལྟ་བུ་ཡིན་པའི་ཚད་ནི་འོག་ནས་འཆད། བསྙེན་པར་རྫོགས་པ་དག་གིས་ཀྱང་ངོ༌། །དགེ་སྦྱོང་ལས་བསྙེན་པར་རྫོགས་པར་བྱེད་པའི་ཚེ་ན་དགེ་འདུན་གྱིས་ཀྱང་ཁྱོད་མུར་འདུག་པ་མ་ཡིན་ནམ་ཞེས་བྱ་བ་ལ་སོགས་པ་བར་ཆད་ཀྱི་ཆོས་རྣམས་དྲིའོ། །དྲི་བ་ནི་གསང་སྟེ་སྟོན་པའི་སློབ་དཔོན་བསྐོས་ནས་འདྲིར་གཏང་བ་དེ་ཉིད་དགེ་འདུན་ཀུན་གྱིས་དྲིས་པར་ཆུད་དོ། །སེམས་མ་རངས་པ་ཤཱཀྱ་དང་མེ་པ་རལ་པ་ཅན་མ་གཏོགས་པར་མུར་འདུག་རབ་ཏུ་འབྱུང་བ་དང་རབ་ཏུ་རྫོགས་པར་མི་བྱ། སེམས་མ་རངས་པ་ཞེས་ནི་རབ་ཏུ་འབྱུང་བར་འོངས་པ་ལ། སེམས་མ་རངས་ཀྱང་མུར་འདུག་ཤཱཀྱའི་རིགས་དང་མེ་ལྷ་བ་རལ་པ་ཅན་ནི་རབ་ཏུ་འབྱུང་དུ་རུང་ངོ༌། །ཤཱཀྱ་དང་ཞེས་པ་ནི་ཤཱཀྱའི་རིགས་སུ་ཆུད་པ་ནི་དགྲ་ལ་ཕྱིར་མི་ནུར་བར་དཔའ་བ་དང་ཆད་མི་འཐུང་བ་དང་དམ་པའི་ཆོས་ནམ་དུ་ཡང་མི་གཏོང་བས་ཆུད་དེ་བརྫུན་དང་གཡོ་མེད་པས་ན་མ་རངས་ཀྱང་རུང་ངོ༌། །མེ་ལྷ་པ་རལ་པ་ཅན་ཞེས་པ་ནི་མེ་ལྷ་པ་རལ་པ་ཅན་ནི་མེ་ལྷའང་རྗེད་ལ། རལ་པ་ཡང་ཡོད་པ་ལ་བྱ་སྟེ། ཁོ་བདག་གི་ལྟ་བ་མྱ་ངན་ལས་འདས་པར་འདོད་ལ་ལེགས་ཉེས་ཀྱི་རྒྱུ་རྐྱེན་ཡོད་པར་ལྟ་བས་མ་རངས་ཀྱང་རུང་ངོ༌། །མ་གཏོགས་པར་ཞེས་པ་ནི་ཤཱཀྱ་དང་མེ་ལྷ་པ་རལ་པ་ཅན་གཉིས་སེམས་མ་རངས་ཀྱང་ཀྲིད་ལ་མ་གཏོགས་པ་ལ་བྱ། མུར་ཞེས་པའི་བར་དུ་ནི་ཤཱཀྱ་དང་མེ་ལྷ་རལ་པ་ཅན་གཉིས་མ་གཏོགས་པར་མུར་འདུག་གཞན་ཐམས་ཅད་རབ་ཏུ་དབྱུང་བ་
དང་རབ་ཏུ་རྫོགས་པར་མི་བྱ་སྟེ། དབྱུང་དུ་རུང་མི་རུང་གི་བྱེ་བྲག་ནི་འོག་ནས་འཆད་དོ། །ཀྲིད་ཅེས་དེ་དག་ལ་མུར་འདུག་དང་མ་རངས་པ་ལ་སོགས་པ་མུར་འདུག་གི་བར་དུ་མ་གཏོགས། ཀྲིད་ཅེས་པ་ནི་བར་ཆད་མེད་དམ་ཞེས་དྲི་སྟེ་བར་ཆད་ཡོད་ན་མི་རུང་ཞེས་བྱ་བའི་ཚིག་གོ །དེ་ཞེས་པ་ནས་གཏོགས་ཞེས་པའི་བར་དུ་ནི་སཱུ་ཏྲ་གཉིས་ཀྱི་ལྟག་ནས་མུར་འདུག་ཅེས་བྱུང་བ་དང་སཱུ་ཏྲ་ལྟག་མ་སེམས་མ་རངས་པ་ཤཱཀྱ་དང་མེ་ལྷ་རལ་པ་ཅན་མ་གཏོགས་པར་མུར་འདུག་རྣམས་སེམས་མ་རངས་ཀྱང་རབ་ཏུ་དབྱུང་བ་དང་བསྙེན་པར་རྫོགས་པར་བྱར་མི་རུང་བ་ཉིད་མ་ཡིན་ཏེ། སེམས་རངས་ན་ནི་མུར་འདུག་ཐམས་ཅད་ཀྱང་རབ་ཏུ་དབྱུང་བ་དང་བསྙེན་པར་རྫོགས་པར་རུང་སྟེ། རངས་པར་བྱ་བའི་ཐབས་དང་རངས་མ་རངས་ཀྱི་ཚད་ནི་འོག་ནས་འཆད་དོ། །དཀོན་མཆོག་བསྔགས་མུར་འདུག་སྨད་པར་ཡང་དག་བར་སྨྲ་སྟེ་མ་འཁྲུགས་ན་སེམས་རངས་པའོ།། དཀོན་མཆོག་བསྔགས་ཞེས་པ་ནི་སངས་རྒྱས་ནི་མཚན་དང་དཔེ་བྱད་ཀྱིས་བ་སྟོད་པའོ། །ཆོས་ནི་དུས་གསུམ་གྱི་དགེ་བ་དང་འཕགས་པའི་ཡན་ལག་བརྒྱད་ཀྱིས་བསྟོད་པ། དགེ་འདུན་ནི་གང་ཟག་གི་རིམ་པ་བདུན་གྱིས་བསྟོད་དོ་བསྟོད་པའི་ཚིག་ནི་ཡོན་ཏན་ཇི་བཞིན་དུའོ། །མུར་ཞེས་པ་ནས་འོ་ཞེས་པའི་བར་དུ་ནི་མུར་འདུག་སྨད་པ་ནི་སྐྲ་འབལ་བ་དང་ཁྱིའི་ཆོས་སུ་ཉལ་བ་དང་མཚོན་གྱི་ཁར་འཆི་བ་དང་གཅེར་བུར་འགྲེང་ཞིང་ཟན་ཟ་བ་ལ་སོགས་པ་མི་བདེ་ཞིང་བཟང་བ་ལ་བདེ་བ་དང་བཟང་དུ་འཛིན་པ་ཁོ་ན་དེ་དག་གི་ཆོས་ཅི་བཞིན་པར་དྲང་པོར་སྨད་དེ་འཛུམ་དང་མདངས་བཟང་ཞིང་སེམས་མ་འཁྲུགས་ཏེ་དཀོན་མཆོག་བཟང་ངོ་ཞེས་ཟེར་ན་རངས་པར་ཆུད་དོ། །འཁྲུགས་ཤིང་ངོམ་ཟུམ་ནག་ལ་མུར་འདུག་གི་ཆོས་ཀྱང་ངན་པ་ཙམ་མ་ཡིན་ཞེས་ཟེར་ན་སེམས་མ་རངས་པའོ། །དེའི་ཕྱིར་དེ་དང་མི་ལྡན་པ་དགེ་བསྙེན་གྱིས་མཐར་བྱ་སྟེ་ཟླ་བ་བཞིར་ཞོག་ཤིག ། མུར་འདུག་རབ་ཏུ་དབྱུང་བའི་ཕྱིར་སེམས་རངས་པ་དང་མི་ལྡན་ན་ཐལ་བྱུང་མི་བསྐྲད་པར་ཁྲིམས་ལྔ་ཕོག་སྟེ་ཟླ་བ་བཞིའི་བར་དུ་དགེ་འདུན་གྱི་འདབ་ལ་བཞག་ལ་དགེ་འདུན་ཀུན་གྱིས་སྔ་ཕྱིར་རེས་ཀྱིས་དུས་གསུམ་དུ་དཀོན་མཆོག་བསྟོད་མུར་འདུག་སྨད་པར་བྱའོ། །ཟླ་བ་བཞི་ཚུན་
ཆད་རངས་མ་ཐག་ཏུ་བཅུག་ཀྱང་ཉེས་མེད་རངས་པ་རྟོགས་པར་བྱ་བའི་ཕྱིར་ཟླ་བ་བཞིར་བཞག་ཀྱང་ཉེས་མེད། དགེ་འདུན་གྱིས་གནས་པར་ལས་ཀྱིས་སྦྱིན་ཅིག །དགེ་འདུན་གྱི་འདབ་ལ་ཟླ་བ་བཞིར་དགེ་བསྙེན་དུ་བཞག་པ་དགེ་སློང་ཅིག་གིས་དགེ་འདུན་ལ་གསོལ་བ་དང་ཞུ་བའི་ལས་བྱེད་དེ་བཞག །དགེ་འདུན་ལས་དེའི་ཟས་ཟླ་བ་བཞིའི་བར་དུ་མུར་འདུག་བརྟགས་པར་བཞག་པ་དེ་དགེ་འདུན་གྱིས་ནི་ཟན་སྦྱིན་ནོ། །མཁན་པོ་ལས་གོས་མུར་འདུག་པ་མ་རངས་པ་དེ་མཁན་པོ་གང་ལས་རབ་ཏུ་འབྱུང་བའི་མཁན་པོ་དེས་གོས་སྦྱིན་ནོ། །ལས་བྱིན་པ་ཡང་བྱ། ལོ་བཅོ་ལྔ་རྫོགས་སམ་ཞེས་རབ་ཏུ་འབྱུང་བའི་ཕྱིར་འོངས་པ་ལ་དྲི། ལ་ལ་ཞིག་རབ་ཏུ་འབྱུང་བར་འོངས་ན། ཁྱོད་ལོ་བཅོ་ལྔ་ལོན་ནམ་ཞེས་མཁན་པོ་གང་ཡིན་པས་དྲིའོ། །བཅོ་ལྔ་ལོན་ཀྱང་བྱ་རོག་སྐྲོད་མི་ནུས་ན་མི་གནང་ངོ༌། །ཉུང་སྟེ་བྱ་རོག་སྐྲོད་མི་ནུས་པ་དང་ནུས་ཀྱང་ལོ་བདུན་མ་ལོན་པར་རབ་ཏུ་མི་དབྱུང༌། རབ་ཏུ་འབྱུང་བར་འོངས་པ་དེ་ལོ་བཅོ་ལྔར་མ་ལོན་པ་དེ་བྱ་རོག་སྐྲོད་མི་ནུས་པ་དང་ནུས་ཀྱང་ལོ་བདུན་མ་ལོན་ན་རབ་ཏུ་མི་དབྱུང༌། དགེ་སྦྱོང་གཅིག་ལས་ལྷག་པར་མི་གཞག །མཁན་པོ་གཅིག་ལ་དགེ་སྦྱོང་གཅིག་ལས་མང་དུ་གནས་བཅར་མི་གཞུག །གཅིག་ཏུ་མ་ཡིན་པར་རབ་ཏུ་འབྱུང་བར་མི་འདོད་ན་མང་དུ་ཕྱུང་སྟེ་མང་བ་བསྙེན་པར་རྫོགས་ཤིང༌། མི་གཅིག་གཉིས་ཡན་ཆད་ཅིག་རབ་ཏུ་འབྱུང་བར་འོངས་ཏེ་དུས་གཅིག་ཏུ་མཁན་པོ་གཅིག་ལ་མི་འཇུག་ཏུ་མི་རུང་ཞེས་ཟེར་ན་ཀུན་རབ་ཏུ་ཕྱུང་སྟེ་ལོ་ཉི་ཤུར་ཚང་པའི་རྣམས་བསྙེན་པར་རྫོགས་པར་བྱ། དེ་སྟེ་མ་ཚང་ན་གཞན་ལ་ཉེ་གནས་ཀྱི་ཕྱིར་གཏོང་ཅིག །ལྷག་མ་ལྟར་རབ་ཏུ་འབྱུང་བར་འོངས་པ་ཀུན་ལོ་ཉི་ཤུར་མ་ཚང་ན་དགེ་སློང་རེ་རེ་ལ་ཉེ་གནས་སུ་ཐོང་ཤིག །དེའི་ས་དེ་མ་དབྲོག །ཉེ་གནས་སུ་གཏད་བའི་སློབ་དཔོན་དེས་དགེ་སྦྱོང་བཞག་པ་ཐལ་བྱུང་བདག་གི་སློབ་མར་མི་དབྲོག །བསྙེན་པར་རྫོགས་པར་མི་སྟེར་ན་མཐུས་ཁུག་ཤིག །དགེ་སྦྱོང་ལོ་མ་ཚང་སྟེ་ཉེ་གནས་སུ་བཏང་བ་དེ་ལོ་ཚང་སྟེ་མཁན་པོ་གང་ཡིན་པས་ཁྲིམས་རྫོགས་པར་བྱས་པ་ལ་ཉེ་གནས་ཀྱི་སློབ་དཔོན་མི་སྟེར་ན་མཁན་པོས་དེ་མཐུས་ཕྲོགས་ཤིག་ཀྲིད་
བྲན། རབ་ཏུ་འབྱུང་བར་འོངས་པ་ལ། ཁྱོད་བྲན་མ་ཡིན་ནམ་ཞེས་དྲིས་ཏེ་ཇོ་བོས་མ་བཏང་བ་ལྟ་བུ་བྲན་ཡིན་ན་རབ་ཏུ་མི་དབྱུང༌། ཁྱོད་ཀྱིས་གང་ལ་ཡང་ཅུང་ཟད་སྦྱིན་པ་མང་ཡང་རུང་ཉུང་ཡང་རུང་མེད་དམ། རབ་ཏུ་འབྱུང་བར་འོངས་པ་ལ། ཁྱོད་ལ་བུ་ལོན་ཆགས་པ་མེད་དམ་ཞེས་དྲིས་ཏེ་བུ་ལོན་ཆགས་པ་མེད་ན་རབ་ཏུ་དབྱུང་ཆགས་པ་ཡོད་ཀྱང་སྲང་གྲངས་ཉུང་ལ། ཕྱིས་འབུལ་བར་ཁས་ལེན་ཅིང་ཕྱིར་འཁོར་བ་ཙམ་གྱི་ཚོད་ན་རབ་ཏུ་དབྱུང༌། ཕ་འཚོ་ལ་མ་གནང་སྟེ་དེ་དག་གི་ཡུལ་མི་རིང་ན་རབ་ཏུ་འབྱུང་བར་འདོད་པ་དེ་ཞག་བདུན་དུ་འཆོལ་ཤིག །རབ་ཏུ་འབྱུང་བར་འོངས་པ་དེ་ཕ་མ་གཉིས་ཀའང་མ་ཤི་སྟེ་ཡོད་ལ་རབ་ཏུ་འབྱུང་བར་གནང་བའི་ཆའང་མེད་ལ་ཕ་མའི་ཡུལ་ཀྱང་མི་རིང་ན་འདྲི་ཞིང་རྨེད་པ་ཡོད་དམ་མི་འོང་བརྟག་པའི་ཕྱིར་ཞག་བདུན་དུ་བསྡད་དེ་མ་འོངས་ན་རབ་ཏུ་དབྱུང་ཡུལ་རིང་བའི་ཚད་ནི་ཕ་མས་དགུག་པར་ཉམས་ཀྱིས་མི་ལྕོགས་ཤིང་མཐུས་མི་ཁུགས་པ་ཙམ་ལ་བྱའོ། །ཡུལ་རིང་ཡང་དགེ་འདུན་ལ་མ་གསོལ་བར་རབ་ཏུ་མི་དབྱུང༌། རབ་ཏུ་འབྱུང་བར་འོངས་པ་དེ་ཕ་མ་དག་ཡུལ་རིང་དུ་ཟིན་ཀྱང་དགེ་འདུན་ལ་མ་ཞུས་པར་རབ་ཏུ་མི་དབྱུང༌། རབ་ཏུ་འབྱུང་བར་འདོད་པ་དེ་དགེ་འདུན་གྱིས་ཟས་སྦྱིན་པའི་རིགས་སོ། །རབ་ཏུ་འབྱུང་བར་འོངས་ཏེ་འདྲི་བ་འོང་ངམ་མི་འོང་ཞག་བདུན་དུ་བརྟག་པའི་ཕྱིར་བཞག་པ་དེ་རབ་ཏུ་མ་བྱུང་གི་བར་དུ་དགེ་འདུན་གྱིས་ཟས་སྦྱིན་པའི་རིགས་སོ། །ཟན་མ་བྱིན་ཡང་ཉེས་པ་ནི་མེད། ཀྲིད་ཕ་མ་དག་གིས་གནང་ངམ། རབ་ཏུ་འབྱུང་བར་འོངས་པ་ལ་ཕ་མ་དག་གིས་གནང་ངམ་ཞེས་དྲི་སྟེ། མ་གནང་ན་རབ་ཏུ་མི་དབྱུང༌། མཐར་ཡུལ་རིང་པོ་ནི་མ་གཏོགས། རབ་ཏུ་འབྱུང་བར་འོངས་པ་དེའི་ཕ་མ་ཡུལ་རིང་པོ་ནི་ཕ་མ་ལ་དྲི་མི་དགོས། ཁྱོད་ནད་ཅན་མ་ཡིན་ནམ་ཞེས་འོངས་པ་ལ་དྲི། རབ་ཏུ་འབྱུང་བར་འོངས་པ་ལ་མཁན་པོ་གང་ཡིན་པས་ཁྱོད་ནད་ཅན་མ་ཡིན་ནམ་ཞེས་དྲིས་ཏེ་ནད་ཅན་ཡིན་ན་རབ་ཏུ་མི་དབྱུང༌། ཁྱོད་ལ་ནད་ཅུང་ཟད་ཀྱང་མེད་དམ་ཞེས་ཀྱང་ངོ༌། །སཱུ་ཏྲ་ལྟག་མ་ལྟར་ནད་ཅན་མ་ཡིན་ནམ་ཞེས་དྲིས་ཏེ་མ་ཡིན་ཞེས་ཟེར་ན་བརྟག་པར་བྱ་བའི་ཕྱིར་ནད་ཅུང་ཟད་ཀྱང་མེད་དམ་ཞེས་དྲི་བ་ལ་བྱ། སཱུ་ཏྲ་ལྟག་མ་དང་འདི་གཉིས་ནི་རབ་ཏུ་འབྱུང་བའི་ཚེ་མཁན་པོས་
དྲི་བ་ལ་བྱ། བྱེ་བྲག་ཏུ་རབ་ཏུ་རྫོགས་པས་སོ། །ཁྲིམས་རྫོགས་པར་བྱེད་པའི་ཚེ་རྫོགས་པར་བྱེད་པའི་དགེ་འདུན་གྱིས་ནད་ཀྱི་རྣམ་པ་མང་པོའི་བར་ཆད་དྲི་དགོས་པ་ལ་བྱ། །ནད་ཅན་རབ་ཏུ་དབྱུང་བའམ་བསྙེན་པར་རྫོགས་པར་མི་བྱ། རབ་ཏུ་འབྱུང་བར་འོངས་པ་དེ་ལ་ནད་རྣམ་པ་མང་པོའི་བར་ཆད་གང་ཡོད་ཀྱང་རུང་སྟེ། མཁན་པོ་དང་དགེ་འདུན་གྱིས་རབ་ཏུ་འབྱུང་བ་དང༌། བསྙེན་པར་རྫོགས་པར་མི་བྱ་འདི་ཡན་ཆད་མི་རུང་ངོ་ཞེས་འབྱུང་བ་ལ་རབ་ཏུ་ཕྱུང་ན་ཁྲིམས་ནི་འཆགས་པ་སྟེ་མཁན་པོ་དང་དགེ་འདུན་ཉེས་བྱས། ཀྲིད་སྨད་པ་ཚུན་ཆད་དོ། །འདི་མན་ཆད་འོག་སྨད་ཅེས་འབྱུང་བ་ཡན་ཆད་ནི་རབ་ཏུ་ཕྱུང་བ་དང་བསྙེན་པར་རྫོགས་པ་བྱས་ན་ཁྲིམས་ཀྱང་མི་འཆགས་ལ་མཁན་པོ་དང་དགེ་འདུན་ལ་ཡང་ཉེས་བྱས་ཡོད་དོ། །འདི་ལ་ཆོས་ཀྱི་སྐྱེ་བ་མེད་དོ། །འོག་ནས་འབྱུང་བ་འདི་རྣམས་ལྟ་བུ་ཞིག་ཡིན་ཞིང་མ་ཡིན་ཏེ་ཁྲིམས་མི་འཆགས་པས་རབ་ཏུ་དབྱུང་བ་དང༌། བསྙེན་པར་རྫོགས་པར་མི་བྱ། རྣམ་པ་འདི་ལྟ་བུའི་ཚུལ་ལ་ནི་མི་རུང་བར་བྱ། འོག་ནས་འབྱུང་བ་འདི་རྣམས་ལྟ་བུ་ཞིག་ཡོད་པ་ལས་མ་ཆོར་ཏེ་རབ་ཏུ་བྱུང་བ་དང་བསྙེན་པར་རྫོགས་པར་བྱ་ནའང་ཁྲིམས་མི་འཆགས་པ་ཡིན་པས་དགེ་བསྙེན་དང་དགེ་སློང་དབྱུང་ངོ༌། །འཕྲུལ་པ་འཕྲུལ་པ་མ་ཡིན་ནམ་ཞེས་དྲི་འཕྲུལ་པ་ནི་བདག་ཀྱང་གཞན་དུ་འཕྲུལ་ནུས་ལ། གཞན་ཡང་སྤྲུལ་ནུས་པ་སྟེ། འཕྲུལ་སྙེམས་པའི་ཕྱིར་ང་རྒྱལ་ཆེ་བས་ཁྲིམས་མི་འཆགས་མ་ནི། མ་ནིང་མ་ཡིན་ནམ་ཞེས་དྲིས་ཏེ་ཡིན་ན་རབ་ཏུ་མི་དབྱུང༌། འདི་ལ་རྣམ་ལྔ། མ་ནིང་ལ་རྣམ་ལྔ་ཡོད་དེ་འོག་ནས་བཤད་པ་ཡིན། སྐྱེས་པ་ནས་དང་ཟླ་བ་ཕྱེད་པ་དང་རེག་ནས་འགྱུར་བ་དང་ཕྲག་དོག་དང་ཉེས་བྱུང་བ་དང་ངོ༌། སྐྱེས་པ་ནས་དང་ཞེས་པ་ནི་ཐོག་མ་མའི་མངལ་ཚུན་ཆད་ཐལ་བྱུང་མ་ནིང་དུ་འདུག་པ་ལ་བྱ། ཟླ་བ་ཕྱེད་དང་ཞེས་པ་ནི་ཟླ་བ་ཕྱེད་ལ་ཕོ་མཚན་དུ་གྱུར་ཏེ་ཕོའི་འདོད་ཆགས་འབྱུང་ཟླ་བ་ཕྱེད་ལ་མོ་མཚན་དུ་གྱུར་ཏེ་མོའི་འདོད་ཆགས་འབྱུང་བའོ། །རེག་ནས་འགྱུར་བ་དང་ཞེས་པ་ནི་བུད་མེད་དང་མཐང་ཕྲད་པས་འདོད་ཆགས་འབྱུང་གི་ནམ་མ་ཕྲད་ཀྱི་བར་དུ་འདོད་ཆགས་མི་འབྱུང༌། ཕྲག་
དོག་དང་ཞེས་པ་ནི་ཕ་རོལ་མི་ཚངས་པར་སྤྱོད་པ་མཐོང་ན་གདོད་འདོད་ཆགས་འབྱུང་གི །མ་མཐོང་གི་བར་དུ་མི་འབྱུང་ངོ༌། །ཉེས་བྱུང་བ་དང་ངོ་ཞེས་པ་ནི་ཕོ་མཚན་བཅད་དམ་ནད་བྱུང་སྟེ་རུལ་པ་ལྟ་བུས་མེད་པར་སོང་བ་ལ་བྱ་སྟེ་མ་ནིང་འདི་རྣམ་ལྔའོ། །ཐ་མ་འདིའི་ཉེས་བྱེད་ན་མི་རུང་བར་བྱ། མ་ནིང་རྣམ་ལྔ་ཐ་མ་བཤད་པ་ཕོ་མཚན་མེད་པར་འགྱུར་ན་མ་ནིང་ངོ་ཞེས་བྱ་བ་ནི་ཕོ་མཚན་ཆད་ནས་མོའི་འདོད་ཆགས་བྱུང་ན་ཁྲིམས་ཕོག་ཀྱང་མི་འཆགས་སྔོན་ཁྲིམས་ཆགས་པ་ཡང་མེད་པར་གྱུར་ཏོ། །རྐུན་གནས། རབ་ཏུ་འབྱུང་བར་འོངས་པ་ལ། རྐུན་གནས་མ་ཡིན་ཞེས་དྲི། རྐུན་གནས་ཉིད་ཇི་ལྟ་བུ་ཡིན་པ་ནི་འོག་ནས་འཆད། ཡིན་ན་ཁྲིམས་མི་འཆགས་ཏེ་དབྱུང༌། ཡོ་བྱད་མ་བྱས་པ་དང་རབ་ཏུ་རྫོགས་པར་མ་ཆགས་པར་ཤེས་ལ། ལན་གཉིས་སུ་དགེ་འདུན་དང་ལྷན་ཅིག་ཏུ་ལས་བྱས་ན་དེར་རོ། །ཡོ་བྱད་མ་བྱས་པ་ནི་རབ་ཏུ་རྫོགས་པའི་ཚེ་དགེ་འདུན་གྲངས་མ་ཚང་བ་ལོ་ཉི་ཤུ་མ་ལོན་པ་མཁན་པོ་ཡོན་ཏན་དང་མི་ལྡན་པར་ཤེས་པ་དང་ལྷུང་བཟེད་དང་ཆོས་གོས་མ་ཚང་བ་དང་གསོལ་བ་དང་ཞུ་བའི་ལས་མ་བྱས་པ་ལ་སོགས་པ་གང་ཡང་རུང་སྟེ་ཁྲིམས་རྫོགས་པར་བྱེད་པའི་ཚེ་འདི་ལྟ་བུ་ཞིག་མ་བྱས་པར་དྲན་ཏེ། །ཁྲིམས་མ་ཆགས་པར་བདག་གིས་ཤེས་བཞིན་དུ་བཅབས་ཏེ་མ་མཐོལ་བར་དགེ་འདུན་དང་ལྷན་ཅིག་ཏུ་ལས་བརྒྱ་རྩ་གཅིག་ལས་གང་ཡང་རུང་ལན་གཉིས་སུ་བྱས་ན་རྐུན་གནས་སུ་གྱུར། རྐུན་གནས་སུ་འགྱུར་བ་ནི་ཁྲིམས་མ་ཆགས་ལ། དགེ་སློང་གི་ཚུལ་དང་སྤྱོད་པ་དང་འཚོ་བའི་ཡོ་བྱད་ལ་སོགས་པ་མི་དབང་བར་ཁྲིམས་མ་ཆགས་པས་བཅབས་ཏེ་སྤྱད་པས་རྐུན་གནས་སུ་འགྱུར་རོ། །འདི་ལྟ་བུའང་རབ་ཏུ་མི་འབྱུང༌། མུར་འདུག་ཏུ་འདུག་པ་རབ་ཏུ་འབྱུང་བར་འོངས་པ་ལ། མུར་འདུག་བ་མ་ཡིན་ནམ་ཞེས་མཁན་པོ་དང་རབ་ཏུ་རྫོགས་པའི་ཚེ། དགེ་འདུན་གྱིས་ཀྱང་དྲིས་ལ་ཡིན་ན་ཁྲིམས་མི་འཆགས། ཁྲིམས་རྫོགས་པ་ལས་མུར་འདུག་ཏུ་འཇུག་ནའང༌། ཁྲིམས་མེད་པར་གྱུར་ཏེ་འོག་ནས་འཆད། འདི་རབ་ཏུ་བྱུང་བ་བླངས་ནས་དེའི་ལྟ་བས་འདིའི་ཆོས་གོས་བོར་དེའི་ཚུལ་གྱིས་དེར་སྐྱ་རེངས་བྱུང་ན་
དེར་རོ་ཞེས་པ་ནས་ནམ་ཞེས་པའི་བར་དུ་ནི་ཤཱཀྱ་ཐུབ་པའི་རྗེས་སུ་དགེ་སྦྱོང་གི་ཚུལ་བླངས་ཏེ་བསྙེན་པར་རྫོགས་པ་ལ་བྱ། འདིའི་ལྟ་བས་ཞེས་པ་ནི་མུར་འདུག་གི་ཆོས་དགུ་བཅུ་རྩ་དྲུག་གང་ཡང་རུང་སྟེ་ལྟ་བ་ལ་བྱ། འདིའི་ཆོས་གོས་བོར་ན་ཞེས་པ་ནི་དགེ་སློང་གི་ཚུལ་གྱིས་ཆོས་གོས་བོར་བ་ལ་བྱ། དེའི་ཚུལ་གྱིས་ཞེས་པ་ནི་མུར་འདུག་དགུ་བཅུ་རྩ་དྲུག་གང་ཡང་རུང་སྟེ་ཐལ་བས་བྱུག་པའམ་སྐུད་པ་ཐོགས་པ་ལྟ་བུ་ལ་བྱ། དེར་སྐྱ་རེངས་བྱུང་ན་དེར་རོ་ཞེས་པ་ནི་མུར་འདུག་གི་གནས་སུ་ཞག་ལོན་ཏེ་སྐྱ་རེངས་བྱུང་ན་བསྙེན་པར་རྫོགས་པའི་ཁྲིམས་མེད་པར་འགྱུར་རོ། །དེ་དག་མ་བྱས་ཀྱང་ཇི་ལྟར་རྐུན་པོ་བཞིན་ན་ཡང་ངོ༌། །སཱུ་ཏྲ་ལྟག་མ་ལྟར་དགེ་སློང་གི་ཚུལ་བོར་ནས་མུར་འདུག་གི་ལྟ་བ་བླངས་ཏེ་མུར་འདུག་གི་གནས་སུ་ཞག་མ་ལོན་དུ་ཟིན་ཀྱང་སེམས་མུར་འདུག་གི་ཆོས་ལ་བལྟས་ཤིང་དམིགས་ན་རྐུན་གནས་དང་འདྲ་བར་དགེ་འདུན་དང་ལས་ལན་གཉིས་སུ་བྱས་ན་ཁྲིམས་མེད་བར་འགྱུར་པ་ཡིན་ཏེ། འདི་ལྟ་བུ་ཡང་རབ་ཏུ་མི་དབྱུང༌། མ་བསད་པ། ཕ་བསད་པ། རབ་ཏུ་བྱུང་བར་འོངས་པ་ལ་ཕ་དང་མ་བསད་པ་མ་ཡིན་ནམ་ཞེས་དྲི། ཡིན་ན་ཁྲིམས་མི་འཆགས་ཕ་མ་ནི་བྱོལ་སོང་ཡིན་པ་བསད་པ་ལ་མི་བྱའི་མིའི་ཡིན་པ་བསད་པ་ལ་བྱའོ། །དགྲ་བཅོམ་པ་བསད་པ། དགྲ་བཅོམ་པ་བསད་པ་མ་ཡིན་ནམ་ཞེས་ཀྱང་དྲིས་ལ་ཡིན་ན་ཁྲིམས་མི་འཆགས། དགྲ་བཅོམ་པ་ནི་ཚེ་གཅིག་གིས་ཐོགས་པ་ལ་བྱ་སྟེ་ལྷག་མ་ལུས་པའི་མྱ་ངན་ལས་འདས་པ་བསད་པ་ལྟ་བུ་ལ་བྱའོ། །དགེ་འདུན་གྱི་དབྱེན་བྱས་པ་དང༌། རབ་ཏུ་འབྱུང་བར་འོངས་པ་ལ་དགེ་འདུན་ཕྱེ་པ་མ་ཡིན་ནམ་ཞེས་དྲི་སྟེ་ཡིན་ན་ཁྲིམས་མི་འཆགས། དབྱེན་ནི་སྔོན་དགེ་སློང་བྱ་སྟེ་འཁོར་ལོའི་དབྱེན་བྱས་པ་ལྟ་བུ་ལ་བྱ། ཡང་དག་པར་གཤེགས་པ་ལ་ངན་སེམས་ཀྱིས་ཁྲག་ཕྱུང་བ། རབ་ཏུ་འབྱུང་བར་འོངས་པ་ལ། ཡང་དག་པར་གཤེགས་པ་ལ་ངན་སེམས་ཀྱིས་ཁྲག་བྱུང་བ་མ་ཡིན་ནམ་ཞེས་དྲིས་ཏེ་ཡིན་ན་ཁྲིམས་མི་འཆགས། ཁྲག་ཕྱུང་བ་ནི་ཤཱཀྱ་ཐུབ་པ་སྤྲུལ་པའི་གཟུགས་ལ། དེ་བ་ཏྟའི་ངན་སེམས་ཀྱིས་རྡོ་འཕངས་ཏེ་ཁྲག་ཕྱུང་བ་ལ་བྱ། དགེ་
སློང་མ་བསླུས་པ། དགེ་སློང་མ་བསླུས་པ་མ་ཡིན་ནམ་ཞེས་དྲི་སྟེ་ཡིན་ན་ཁྲིམས་མི་འཆགས། བསླུས་པ་ནི་དགེ་སློང་མ་ཕམ་པ་མ་ཡིན་པ་ལ་མི་ཚངས་པར་སྤྱོད་པས་ཆུད་དོ། །ཕས་ཕམ་པ་བཞི་ལས་གང་ཡང་རུང་ལྟུང་བ་བྱུང་བའོ། །རབ་ཏུ་འབྱུང་བར་འོངས་པ་ལ། ཕས་ཕམ་པ་མ་ཡིན་ནམ་ཞེས་དྲིས་ལ་ཕམ་པ་ནི་སྔོན་དགེ་སློང་བྱས་ལ་དེའི་ཚེ་མི་ཚངས་པར་སྤྱོད་པ་དང་རྐུ་བ་དང་གསོད་པ་དང་བརྫུན་དུ་སྨྲ་བ་བཞི་གང་ཡང་རུང་བ་བྱས་པའོ། །སཱུ་ཏྲ་འདི་ཡན་ཆད་ལྟ་བུ་ཞིག་ཡོད་ན་ཁྲིམས་ཡང་མི་འཆགས། ཁྲིམས་རྫོགས་ཟིན་པ་ལས་བྱུང་ན་ཡང་ཁྲིམས་མེད་པར་སོང་བས་བསྐྲད་དོ། །མཚན་མ་ལས་བཟློག་པར་ཁས་མ་བླངས་པའི་སྨད་པ་རབ་ཏུ་འབྱུང་བ་དང་བསྙེན་པར་རྫོགས་པར་མི་བྱ། སྔོན་དགེ་སྦྱོང་དང་དགེ་སློང་ཆད་པས་བཅད་པའི་ཆད་པས་མ་ཕོད་དེ་ཐལ་བྱུང་ཁྲིམས་ཕུལ་བ་ཞིག་སླར་དགེ་སྦྱོང་དང་དགེ་སློང་དུ་འཇུག་སྟེ། སྔོན་གྱི་ཉེས་པ་གཏོང་ངོ་ཞེས་མི་ཟེར་ན་དགེ་སྦྱོང་དང་དགེ་སློང་དུ་མི་གཞུག །ཉེས་པ་བྱུང་ནས་ཆད་པས་བཅད་པ་ནི་རྣམ་པ་བདུན་ཡོད་པ་ལས་གང་ཡང་རུང་ངོ༌། །བདུན་ནི་རྟག་པར་ཐབ་མོ་རྒོལ་བ་དང་དགེ་འདུན་གྱི་ལྷག་མའི་ཆད་པ་མཐོལ་ཚངས་བྱེད་དུ་མི་བཏུབ་པ་དང་རིགས་སུན་པར་བྱེད་པ་དང་ཁྱིམ་པ་དགེ་བསྙེན་དགེ་བ་སྤྱོད་པ་ལ་ལོག་པར་སྤྱོད་ཅེས་གཤེ་བ་དང་ལྟུང་བ་བྱེད་པ་མཐོང་ངོ་ཞེས་ཟེར་བ་དང༌། ལྟུང་བ་བྱས་པ་མཐོལ་དུ་མི་བཏུབ་པ་དང༌། ཕས་ཕམ་ལ་སོགས་པ་བྱུང་ཡང་བར་དུ་གཅོད་པར་མི་འགྱུར་རོ་ཞེས་ཟེར་བ་དང༌། འདི་བདུན་བྱེད་པ་ལས་ཆད་པས་བཅད་པ་གང་ཡང་རུང་ངོ༌། །བཤགས་པ་ནི་བསྙེན་པར་རྫོགས་པས་སོ། །སཱུ་ཏྲ་ལྟག་མ་ལྟར་རབ་ཏུ་འབྱུང་བ་དང་བསྙེན་པར་རྫོགས་པར་འོངས་པ་དེ། སྔོན་གྱི་ཉེས་པ་འདོར་རོ་ཞེས་ཟེར་ན་སྔོན་གྱི་ཉེས་པའི་ཆད་པ་དང་དབྱུང་བ་ནི་ཁྲིམས་རྫོགས་པའི་ལས་ཀྱི་ནང་དུ་འདུས་པས་བཅད་པ་དང་དབྱུང་བ་བྱ་མི་དགོས་སོ། །སྔོན་ཉེས་པ་བྱས་ཤིང་ཆང་པས་བཅད་པའི་དགེ་འདུན་ཉིད་ལ་སྔོན་གྱི་ཉེས་པ་མི་བྱའོ་ཞེས་འཆགས་པ་དང་ཁྲིམས་རྫོགས་པར་མི་བྱར་མི་རུང་བ་མ་ཡིན་གྱི་གང་གིས་བྱས་ཀྱང་རུང་སྟེ་ཉེས་མེད་
དོ། །བསྙེན་པར་རྫོགས་ཏེ་ཁས་མ་བླངས་ན་ཡང་དེ་སྟེ་དགེ་འདུན་མདུན་ན་སྨོད་ཅིག །སཱུ་ཏྲ་ལྟག་མ་ལྟར་རབ་ཏུ་འབྱུང་བ་དང་བསྙེན་པར་རྫོགས་པར་འོངས་ཏེ་སྔོན་གྱི་ཉེས་པ་འདོར་རོ་ཞེས་ཁས་བླངས་པ་ལས་བསྙེན་པར་རྫོགས་པར་བྱས་ཟིན་པ་དང༌། སྔོན་གྱི་ཉེས་པ་མི་འདོར་ཞིང་ཁས་མི་ལེན་ན་ཡང་དགེ་འདུན་གྱི་ཆད་པས་ཆོད་ལ་སྨོད་ཅིག །ཆད་པ་བྱེད་དུ་མི་བཏུབ་ན་སྔོན་གྱི་བཞིན་དུ་སྐྲོད་ཅིག །མ་མཐོང་ངོ་ཞེས་ཟེར་ཞིང་བརྫུན་དུ་ན་ལྟུང་བའོ། །སཱུ་ཏྲ་ལྟག་མ་དག་གིས་ཉེས་པ་བྱས་པ་ལ་མ་མཐོང་ཞེས་ཟེར་ཞིང་བཅབས་པ་ནི་བརྫུན་གྱི་ལྟུང་བར་འགྱུར་རོ། །ཆད་པ་ལྟག་མ་བཞིན་དུ་བྱའོ། །སཱུ་ཏྲ་འོག་མ་འདི་མན་ཆད་ནི་མིང་གིས་སྨྲ་བ་བཞིན་དུ་མ་ཡིན་ནམ་ཞེས་དྲིས་ཏེ་ཡིན་ན་རབ་ཏུ་དབྱུང་བ་དང་བསྙེན་པར་མི་བྱ། ཁྲིམས་ནི་འཆགས་ཏེ་མཁན་པོ་དང་དགེ་འདུན་ལ་ཉེས་བྱས། ལག་རྡུམ་རྐང་རྡུམ་ལག་པ་མཁྲིག་མར་ཆད་པ་དང༌། རྐང་པ་ལོང་བུར་ཆད་པ། ལག་སོར་རེངས་པ། དགུག་ཅིང་བརྐྱང་དུ་མི་རུང་བ། མཆུ་མེད་པ་ཡ་མཆུ་དང་མ་མཆུ་བཅད་པ་འམ་མེད་པ་ལྟ་བུ། ཡན་ལག་རི་མོ་ཅན། ཤ་བཀྲ་དང་ཙགས་པའི་རི་མོ་ཅན། རྒན་རབས། ལོ་བདུན་ཅུ་ལོན་པ་ཡན་ཆད་ལ་བྱ་སྟེ། བདུན་ཅུ་ལོན་ཀྱང་སྔོན་དགེ་བསྙེན་བྱེད་བྱེད་ལ་མདོ་སྡེ་དང་མ་ལྟ་བུ་ཤེས་པ་ནི་རུང་ངོ༌། །གཞོན་རབས་ལོ་བཅོ་ལྔ་མན་ཆད་བདུན་ཡན་ཆད་བྱ་རོག་སྐྲོད་མི་ནུས་པ་ལ་བྱ། གྲུམ་པོ། །གྲུམ་ཞིང་ཞིག་ལེགས་བྱེད་པའོ། །བརླ་རླུང་ནད་ཅན་བརླ་དང་རྐེད་པ་ལ་སོགས་པ་ལ་རླུང་ཞུགས་ཏེ་སྐམ་པ་འང་ཞུམ་པ་ལྟ་བུ་ནད་ཡོད་པ། ཞར་བ་མིག་ཡ་གཅིག་ཞར་བ། འཇས་པ་རྐང་ལག་འཇས་ནས་འཇས་པའི་ཚིགས་ནས་སོར་མོ་སྐྱེས་པའོ། །སྒུར་པོ་འགྲེང་མི་ནུས་པར་སྒུར་བ་ལ་བྱ། མིའུ་ཐུང་ངོ༌། །ལུས་ཐུང་པར་གྲགས་པའོ། །ལྦ་བ་ཅན་ལྐོག་མན་ལྦ་བ་ཆེན་པོ་ཡོད་པ་ལ་བྱ། ལྐུགས་པ་སྨྲ་མི་ཤེས་པ། འོན་བ་རྣ་བས་མི་ཐོས་པའོ། །འཕྱེའོ། །རྐང་ལག་འཁུམས་ནས་འཕྱེ་ཞིང་འགྲོ་བའོ། །རྐང་བམ་གཞན་ལས་འཕགས་པར་སྦོམ་པོར་གྱུར་པའོ། །བུད་མེད་ཀྱིས་དུབ་པ། མི་ཚངས་པ་སྤྱོད་སྤྱོད་པ་ལས་
ཆད་པ་ལ་བྱ། ཁུར་གྱིས་དུབ་པ། ཁུར་ཆེན་པོ་ཁྱེར་ཁྱེར་བས་ཆད་ཅིང་དུབ་པའོ། །ལམ་གྱིས་དུབ་པ། ལམ་རིང་པོར་སོང་སོང་ནས་ལམ་གྱིས་ཆད་ཅིང་དུབ་པ་ལྟ་བུའི་མི་དང༌། ལྟག་མ་རྣམས་ཡོད་པའི་མི་ལ་བྱ། མི་འཇུ་ཐལ་བྱུང་དང༌། ཁ་ཟས་མི་འཇུ་བ་དང༌། ལྕགས་སུ་བཅུག་པ་ལས་ཡུན་རེངས་པས་ཐལ་བྱུང་དེ་འདྲ་བར་སོང་བ་དང་རྐང་ལག་བསྐུམ་དུ་མི་རུང་བར་སོང་བ་ལ་བྱ། རྡེ་ཆགས་པ་ནད་དང་ཁ་ཟས་ལ་སོགས་པས་རྡེ་ཆགས་ཏེ། སྤྱོད་མི་ནུས་ཤིང་གསོ་དཀའ་བ་ལྟ་བུ་ལ་བྱ། དེ་ལྟ་བུའི་གཟུགས་ཀྱི་མི་ནི། ལྟག་མ་ལྟར་མིང་གིས་སྨོས་པ་ལྟ་བུའི་གཟུགས་ཀྱི་མི་ལ་བྱ། རབ་ཏུ་སྦངས་སོ། །རབ་ཏུ་འབྱུང་བ་དང་བསྙེན་པར་རྫོགས་པར་མི་བྱ་བར་སྤངས་པ་ལ་བྱ། དྲང་སྲོང་ཆེན་པོས། མུར་འདུག་ལ་སོགས་པའི་དྲང་སྲོང་མ་ཡིན་གྱི། དྲང་སྲོང་ཆེན་པོ་སྟེ་སངས་རྒྱས་ལ་བྱ། མཛེས་པ་རབ་ཏུ་དབྱུང༌། ལུས་ཀྱི་ཡན་ལག་ལ་སྐྱོན་མེད་པ་ནི་མཛེས་པ་སྟེ་རབ་ཏུ་དབྱུང་ངོ༌། །ཀུན་གཙང་བསྙེན་པར་རྫོགས། རིགས་གཙང་བ་སྟེ་རིགས་ངན་མ་ཡིན་པ་དང་མཚམས་མེད་པ་ལ་སོགས་པ་བར་ཆད་དུ་འགྱུར་བའི་ཆོས་མེད་པས་ནི་ཚུལ་ཁྲིམས་གཙང་ཞེས་བྱའོ། །གསུངས་སོ་བདེན་མིང་གྱིས། བདེན་མིང་ནི་མཚན་སངས་རྒྱས་མི་བརྫུན་པས་ན་བདེན་ཞེས་བྱ་སྟེ་དེས་གསུངས་པའོ། །ཡང་དག་སངས་རྒྱས་རབ་མཁྱེན་གྱིས། །དགྲ་བཅོམ་པ་དང༌། རང་སངས་རྒྱས་ལ་མི་བྱའོ། །བླ་ན་མེད་པའི་སངས་རྒྱས་པས་ན་ཡང་དག་རབ་མཁྱེན་ཅེས་བྱའོ། །བསྡུ་བར་གཏོགས་དང་རབ་ཏུ་འབྱུང་དང་དངོས་པོ་རྫོགས་སོ། །བསྡུ་བར་གཏོགས་པ་དང་ཞེས་པ་ནི་ཁྲིམས་མི་འཆགས་པའི་བར་ཆད་དང་ལུས་ཀྱི་སྐྱོན་ཡོད་པ་རྣམས་ནི་མི་རུང་མེད་པ་རྣམས་ནི་རུང་བར་བསྡུ་བར་བྱའོ། །རབ་ཏུ་ཞེས་པ་ནས་སོ་ཞེས་པའི་བར་དུ་ནི་འོག་ནས་འབྱུང་བ་མིང་གིས་སྨོས་པ་བཞིན་མ་ཡིན་ནམ་ཞེས་དྲི་སྟེ་ཡིན་ན་རབ་ཏུ་མི་དབྱུང་ཀྲིད་རྒྱལ་པོ་བློན་པོ་རྒྱལ་པོས་མ་གནང་ངམ་ཡུལ་མི་རིང་ནའོ། །རྒྱལ་པོའི་ས་རིགས་སུ་གཏོགས་པའི་ནང་ན་བློན་པོའི་ལས་སྣ་མ་གཏོགས་པ་རྒྱལ་པོས་མ་གནང་པར་རབ་ཏུ་མི་དབྱུང་སྟེ་རྒྱལ་པོའི་
བློན་པོ་མ་ཡིན་ནམ་ཞེས་དྲི། རྒྱལ་པོ་ཁམས་གཞན་གྱི་སློབ་དཔོན་དང་ཡུལ་རིང་བ་ནི་མ་གཏོགས་ཏེ་དྲི་མི་དགོས། ཀྲིད་རྐུན་པོའི་རྒྱལ་མཚན་བཙུགས་པ། རབ་ཏུ་བྱུང་བ་ལ་རྐུན་པོའི་རྒྱལ་མཚན་བཙུགས་པ་མ་ཡིན་ནམ་ཞེས་དྲི། རྐུན་པོའི་རྒྱལ་མཚན་བཙུགས་པ་ནི་གྲོང་འཇོམས་པ་དང་མི་རྒོད་བྱེད་པ་ལ་སོགས་པ་རྐུ་བར་གྲགས་པའོ། །མཉེད་པ་ཕྱག་དར་བ་སྨེ་ཤ་ཅན་དང་དེ་ལྟ་བུ་རབ་ཏུ་མི་དབྱུང༌། མཉེད་པ་ཞེས་པ་ནི་རིགས་ཀྱིས་ཀོ་ལྤགས་ལ་སོགས་པ་མཉེད་ཅིང་ཚེམ་དྲུབ་བྱེད་པའོ། །ཕྱག་དར་བ་ཞེས་པ་ནི་རིགས་ཀྱིས་ཕྱི་རོལ་ཆུ་ཆེ་ཆུང་ལ་སོགས་པའི་ཕྱག་དར་རོ་ཅོག་བྱེད་པའོ། །སྨེ་ཤ་ཅན་དང་ཞེས་པ་ནི་རིགས་ཀྱིས་བ་ལང་དང་བྱ་དང་སྡིག་བུར་དང་སྦལ་ལྕོང་ལ་སོགས་པ་འཆའ་ཞིང་ཟ་བའོ། །དེ་ལྟ་བུ་རབ་ཏུ་མི་དབྱུང་ཞེས་པ་ནི་རིགས་འདི་རྣམས་ལྟ་བུ་མ་ཡིན་ནམ་ཞེས་རབ་ཏུ་འབྱུང་བར་འོངས་པ་ལ་དྲི་སྟེ་ཡིན་ན་རབ་ཏུ་མི་དབྱུང༌། དཔེ་ནི་ལག་རྡུམ་ལ་སོགས་པའོ། །རྟག་ཏུ་ལག་རྡུམ་ལ་སོགས་པ་བཅུག་ན་ཉེས་བྱས་སོ་ཞེས་འབྱུང་བ་བཞིན་དུ་མིང་གིས་སྨོས་པ་འདི་རྣམས་ལྟ་བུ་ཞིག་ལས་རབ་ཏུ་བྱུང་ན་དགེ་འདུན་དང་མཁན་པོ་ལ་ཉེས་བྱས། སྐྲ་སེར་པོ་སེང་གེའི་སྐྲ་སྔོན་པོ་དང་དེ་ལྟ་བུ་ཡང་ངོ༌། །སྐྲ་སེར་པོ་ཞེས་པ་ནི་སྐྲ་ཡུང་གི་ཁ་དོག་འདྲ་བ། སེང་གེ་སྐྲ་དང་ཞེས་པ་ནི་སེང་གེ་སྐྲ་འཁྱིལ་བ། སྐྲ་ཞེས་པ་ནས་ངོ་ཞེས་པའི་བར་ནི་ཤིང་ལོའི་ཁ་དོག་འདྲ་བ། སྐྲ་དཀར་པོའི་མི་དང་བལ་བླང་གི་སྐྲ་སྐྲ་མེད་ཀྱང་ངོ༌། །སྐྲ་དཀར་པོའི་མི་དང་ཞེས་པ་ནི་ཐོག་མ་མའི་མངལ་ནས་དཀར་བ། བ་ལང་གི་སྐྲ་ངེས་པ་ནི་སྲབ་ལ་བཤོར་བ། སྐྲ་མེད་པ་ཀྱང་ངོ་ཞེས་པ་ནི་དང་པོ་ནས་བྱི་བ་སྟེ་ཀུ་བ་འདྲ་བ། མགོ་ཤང་ཤོང་ཅན། འབར་འབུར་ཅན། མགོ་བོ་ཆེ། ལུས་ཀྱི་རྐྱེན་དུ་མ་བབ་པར་འཕགས་པར་ཆེ་བ། རབ་ཏུ་སྦོམ་པ། ལུས་གཞན་ལས་འཕགས་པར་སྦོམ་པ་དང༌། ཞུམ་པ། གཞན་ལས་འཕགས་པའི་ཞུམ་པའི་ལུས་སོ། །བོང་བུ་དང་ཕག་གི་མགོ །དེ་དངོས་སུ་མཇལ་བར་བས། མགོ་གཉིས་དང༌། མགོ་གཉིས་སུ་གྱེས་ཤིང་བྱེ་བའོ། །མགོ་མེད་ཀྱང་ངོ༌། །འཕྲལ་བ་ཡན་ཆད་འབུར་རེ་འདུག་པར་མཉམ་པར་འདུག་པའོ། །
བལ་གླང་རྣ་དང་རྟ་རྣ་དང་བ་དང་སྤྲེའུ་རྣ་དང་བོང་བུ་དང༌། ཕག་གི་རྣ་བ་དང༌། རྣ་གཅིག་རྣ་མེད་ཀྱང་ངོ༌། །རྣ་བ་དང་འདི་རྣམས་ལྟ་བུར་འདུག་པ་མ་ཡིན་ནམ་ཞེས་དྲི་སྟེ་ཡིན་ན་རབ་ཏུ་མི་དབྱུང༌། མིག་དམར་པོ། །མིག་གི་འབྲས་བུ་ཁྲག་གིས་ཡོག་པ་ལྟ་བུ་སྟེ་མིག་དམར་པོར་འདུག་པའོ། །མིག་པོ་ཆེ་དང༌། ལུས་ཀྱི་རྐྱེན་དུ་མ་བབ་པར་ཆེ་བ། མིག་ཆུང་ཟླུམ་བུ་འུག་མིག་མཆིང་བུའི་མིག་ཆུ་བུར་འདྲ་བ། མིག་གཅིག་པ་མིག་མེད་ཀྱང་ངོ༌། །བལ་གླང་གི་སྣ་རྟའི་སྣ་བ་ལད་དང་སྤྲེའུའི་སྣ་བོང་བུ་དང་ཕག་གི་སྣ་སྣ་གཅིག་པ་སྣ་མེད་པ་ཡང་ངོ༌། །སྣ་འདི་རྣམས་ལྟར་འདུག་པ་ལས་རབ་ཏུ་མི་དབྱུང༌། བལ་གླང་གི་ཀོ་སྐོ་རྟའི་ཀོ་སྐོ་བ་ལང་དང་སྤྲེའུའི་ཀོ་སྐོ། །བོང་བུ་དང་ཕག་གི་ཀོ་སྐོ། །ཀོ་སྐོ་ཡ་གཅིག་པ་ཀོ་སྐོ་མེད་པ་ཡང་ཀོ་སྐོ་འདི་རྣམས་ལྟར་འདུག་པ་ལས་རབ་ཏུ་མི་དབྱུང༌། བལ་གླང་གི་སོ་རྟའི་སོ་བ་ལང་སྤྲེའུའི་སོ།། བོང་བུ་དང་ཕག་གི་སོ་སོ་གཅིག་པ་སོ་མེད་པ་ཡང་ངོ༌། །སོ་འདི་རྣམས་ལྟར་འདུག་པ་ལས་རབ་ཏུ་མི་དབྱུང༌། སོ་གཅིག་པ་ཅེས་པ་ནི་སོ་བར་མེད་པར་འདུག་པ་དང་གཅིག་པུ་ཀེ་རེ་འདུག་པ་ལ་བྱ། མགྲིན་རིང༌། ལུས་ཀྱི་རྐྱེན་དུ་མ་བབ་པར་མགྲིན་པ་རིང་པ། མགྲིན་མེད། མགྲིན་པ་རོར་ནུབ་པ། ཕྲག་མིག་ཕྲག་པ་གཉིས་ན་མིག་ཡོད་པ། རབ་ཏུ་སྒུར་བའོ། །གཉའ་བ་རབ་ཏུ་སྒུར་བ་ཕོ་མཚན་ཆད་པ་ཕོ་མཚན་ཆད་པ་འམ། ཁྱིས་ཟོས་པ་ལྟ་བུ། རླིག་ཆེན། རྐྱེན་དུ་མ་བབ་པར་རླིག་པ་ཆེ་བ། རླིག་གཅིག །འབྲས་བུ་གཅིག་ཡོད་པ་རླིག་པ་མེད་པ་ཡང་ངོ༌། །རླིག་པ་མེད་པ། ཤིན་ཏུ་རིང་བ། ལུས་གཞན་ལས་འཕགས་པར་རིང་བ། ཤིན་ཏུ་ཐུང་དུ། ལུས་དང་རྐང་ལག་ཐམས་ཅད་ཐུང་དུ། སྐེམ་པོ་ཞན་ཏེ་མ་ཡང་ངོ༌། །པགས་པའི་ཁ་དོག་རྣམ་བཞི་པ། དམར་པོ་དང་སེར་པོ་དང་དཀར་པོ་སྔོན་པོ་བཞི་ཁྲ་བོར་འདུག་ཀྱང་རུང་འདི་བཞི་སོ་སོའི་ཁ་དོག་ཏུ་འདུག་ཀྱང་རུང་རབ་ཏུ་མི་དབྱུང༌། གྱོལ་པོ་གལ་པོའང་དེ་བཞིན་ནོ། །འདི་ལྟར་འདུག་པ་ཡང་རབ་ཏུ་མི་དབྱུང༌། རྣམ་པ་འདི་རྣམས་ལྟ་བུ་དག་ཀྱང་སྤངས་པར་དེར་རྟོགས་ཤིག །ལྟག་ཏུ་སྨོས་པ་འདི་རྣམས་ལྟ་བུ་དབྱུང་བ་དང་བསྙེན་
པར་རྫོགས་པར་མི་རུང་བར་སྤང་སྟེ་ལྟག་ནས་ལག་རྡུམ་མི་གནང་བ་བཞིན་དུ་རིག་པར་བྱའོ། །རིགས་དང་ལུས་ངན་པ་ལས་རབ་ཏུ་བྱུང་བ་མ་འཆང་ཤིག །རིགས་དན་པ་ནི་སྨེ་ཤ་ཅན་དང་ཕྱག་དར་བ་དང་མཉེད་པ་ལ་སོགས་པ་ལ་བྱ། ལུས་ངན་པ་ནི་ལག་རྡུམ་ལ་སོགས་པའི་ཆ་ན་ཡོད་པ་ལ་བྱ་སྟེ། འདི་ལྟ་བུ་ལས་རབ་ཏུ་ཕྱུང་བ་དང་བསྙེན་པར་རྫོགས་པ་ཞིག་ཡོད་ན་མཁན་པོས་ཀྱང་མི་བཅང་དགེ་འདུན་གྱིས་ཀྱང་སྤོང་ངོ༌། །གཅིག་མ་ཡིན་པ་མཁན་པོ་གཅིག་དང་ཚིག་གཅིག་གིས་གསུམ་མན་ཆད་བསྙེན་པར་རྫོགས་པར་རུང་ངོ༌། །བསྙེན་པར་རྫོགས་པར་བྱ་བ་ནི་གསོལ་བ་དང་ཁྲིམས་དབོག་པའི་ཚིག་མཁན་པོ་གཅིག་གིས་སྨྲ་ལ་ནོད་པ་གསུམ་གྱིས་ཅིག་ཅར་སྨྲ་སྟེ་བཟླས་ཀྱང་ཁྲིམས་མི་འཆགས་པ་མ་ཡིན་ཏེ་དེ་ལྟར་དབོག་ཏུ་ཡང་རུང་ངོ༌། །དུས་མཉམ་པ་རྣམས་ཕན་ཚུན་དུ་ཕྱག་བྱ་བ་མེད་དོ། །སཱུ་ཏྲ་ལྟག་མ་ལྟར་མིག་གསུམ་དུས་མཉམ་པར་ཁྲིམས་ནོས་པ་ཁྲིམས་སོ་སོར་ནོས་ཀྱང་དུས་སྔ་ཕྱི་མེད་པ་རྣམས་གཅིག་ལ་གཅིག་ཕྱག་མི་བྱའོ། །ཐོབ་པ་ནི་སྔ་མས་སོ། །སཱུ་ཏྲ་ལྟག་མ་ལྟར་དུས་མཉམ་པ་གྲལ་དང་ཡོན་ལེན་པ་ན་གང་སྔར་འོངས་པ་དང་གང་བྱིན་པར་ཟད་དོ། །ལས་ནི་གང་འཕྱི་བར་འོངས་པས་བྱའོ། །སོར་གཉིས་ལས་རིང་བར་དགོན་པ་ལས་སྐྲ་མི་གཞག །དགེ་སློང་དགོན་པ་ན་གནས་པ་སྐྲ་སོར་གཉིས་ལས་རིང་དུ་མི་གཞག་པར་བྲེག་འབྲེག་མཁན་དཀོན་པའི་ཕྱིར་རོ། །དེ་ཙམ་དུའང་གྲོང་པ་ལ་མི་གནང༌། དགོན་པའི་དགེ་སློང་གི་སྐྲ་ཙམ་དུ་གྲོང་གི་གཙུག་ལག་ཁང་ན་གནས་པའི་དགེ་སློང་གིས་སྐྲ་མི་བཞག་སྟེ་སོང་ཕྱེད་དང་གཉིས་མན་ཆད་ལ་བྲེག་སྟེ་འབྲེག་མཁན་བཙལ་སླ་བའི་ཕྱིར་རོ། །ཆན་པས་སྐྲ་བྲེག་ཏུ་མི་རུང༌། སྐྲ་བྲེག་པ་ནི་སྤུ་གྲིས་བྲེག་སྟེ་ཆན་པས་བྲེག་ཏུ་མི་རུང༌། རྨའི་ཐན་ཀོར་ནི་མ་གཏོགས། མགོ་ལ་རྨ་ཡོད་དེ་སྤུ་གྲིས་བྲེག་ཏུ་མི་བདེ་ན་རྨའི་ཐན་ཀོར་ཆན་པས་བྲེག་ཀྱང་ཉེས་མེད་དོ། །ཕུད་མི་བྱ། སྐྲ་འབྲེག་པ་ལ་ཕུད་མི་གཞག །གསང་བའི་ཕྱོགས་ཀྱི་སྤུ་མི་བྲེག །ལག་པའི་མཆན་ཁུང་སྤུ་དང་རྨོངས་ལ་སོགས་པ་མི་བྲེག །རྨའི་ཕྱིར་
བྱ་སྟེ་གཞན་གྱིས་མི་འཚོ་ན་ཤེས་པའི་གནས་བརྟན་གནས་བརྟན་དག་ལ་ཞུ། རྨོངས་དང་མཆན་ཁུང་ལྟ་བུར་རྨ་ཡོད་དེ་ཐབས་དང་སྨན་གཞན་གྱིས་མི་འཚོའི། སྤུ་བྲེག་ན་འཚོ་ན་སོ་སོའི་གནས་བརྟན་ལ་དྲི་སྟེ་བྲེག །དེའི་ཕྱིར་མ་ཡིན་ན་རྐང་པའི་ཡང་མི་བྲེག །རྨ་ཡོད་པའི་ཕྱིར་བྲེག་པ་མ་ཡིན་ན་རྐང་པའི་སྤུ་ཡང་མི་བྲེག་གོ །ལུས་གཞན་ཡང་མི་བྱའོ། །ལུས་ཀྱི་སྤུའང་སཱུ་ཏྲ་ལྟག་མ་དང་འདྲའོ། །སེན་མོ་བཅད་པ་སྤུ་གྲིའི་ཁའམ་སྟེའུའི་ཁ་ལྟར་རོ། །སེན་མོ་བཅད་པའི་ཐབས་ནི་དེ་ལྟར་བཅད་དོ། །སེན་མོའི་ཁ་དོག་མི་བསྒྱུར། སེན་མོའི་ཁ་དོག་རྩིས་དམར་པོ་འམ་སྔོན་པོར་མི་བསྒྱུར། དྲི་མ་ཕྱི་བར་ནི་བྲུད་ཅིང་སྤྱོད་ཅིག །སེན་མོའི་བར་ན་དྲི་མ་ཡོད་པ་བྲུད་ཅིང་འཕྱིར་དབང་ངོ༌། །གོས་དང་སྐྲ་ཁ་སྤུ་མི་བྲེག །ལུས་ལ་ཆོས་གོས་གྱོན་བཞིན་དུ་སྐྲ་དང་ཁ་སྤུ་མི་བྲེག །འཆོང་ཤིག་སྐྲ་བཟེད་པ། སྒྲིམ་པོར་བྲེག་ཏུ་མི་རུང་སྟེ་སྐྲ་བཟེད་པས་ལུས་གཡོགས་ཏེ་བྲེག །མེད་ན་རྡུལ་གཟན་དང་ངོ༌། །སྐྲ་བཟེད་པ་མེད་ན་རྡུལ་གཟན་གྱོན་ཏེ་བྲེག་ཀྱང་ཉེས་མེད། བཏིང་བ་ལ་མི་བྱ། ཙྭ་སྟན་ཡན་ཆད་རྐོན་ལ་སོགས་པ་སྟན་བཏིང་བའི་སྟེང་དུ་སྐྲ་མི་བྲེག །གག་ཏུ་དགེ་འདུན་གྱིས་ས་ཕྱག་པར་མི་བྱ། དགེ་འདུན་འདུ་བ་དང་སྤྱོད་ཅིང་ལས་བྱེད་པའི་ས་གང་དུ་ཡང་སྐྲ་མི་བྲེག །ཁྱམས་ལ་སོགས་པར་རྒན་ནམ་ནའམ་རླུང་ཆེ་འམ་ཚའམ་ཆར་བབ་ན་འབྲེག་པར་རོ། །རྐྱེན་འདི་རྣམས་ལྟ་བུ་ཞིག་བྱུང་ན་ཁྱིམས་ལ་སོགས་པར་བྲེག་ཀྱང་ཉེས་མེད། དེའི་ཕྱོགས་སུ་ལས་བྱ། རྐྱེན་བྱུང་སྟེ་ཁང་པ་དང་ཁྱམས་སུ་སྐྲ་བྲེག་པའི་སར་ཕྱག་དར་དང་ཆག་ཆག་དང་མཎྜལ་ལ་སོགས་པའི་ལས་བྱའོ། །སྐྲ་ལུང་ཁུང་དུ་དོར། བྲེག་པའི་སྐྲ་ནི་ལུང་ཁུང་དུ་དོར་རོ། །དེ་བཞིན་དུ་སེན་མོ་བཅད་པའོ། །སྐྲ་བྲེག་པའི་ཆོ་ག་བཞིན་དུ་སེན་མོ་བཅད་པ་ཡང་དེ་ལྟར་བྱའོ། །དགེ་སློང་མ་འདི་ལྟར་མ་བསྲུངས་པར་སྐྱེས་པས་འདོད་ཆགས་དང་བྲལ་བ་མ་ཡིན་པའི་སྐྲ་མི་བྲེག །དགེ་སློང་མ་དགྲ་བཅོམ་པ་མ་ཡིན་ཏེ་འདོད་ཆགས་དང་མ་བྲལ་བ་ལ་འབྲེག་མཁན་སྐྱེས་པ་ཞིག་བྱེད་ན་སྲུང་མ་དགེ་སློང་མ་གྲོགས་མོ་ཞིག་ཞོག་ཤིག།
འབྲེག་མཁན་འདོད་ཆགས་ཆེ་བ་ཞིག་ན་སྲུང་མ་བཞག་ཀྱང་མི་གནང་ངོ༌། །ཆགས་པ་ལྟ་ན་སྲུང་མས་འདི་སྐད་བསྒོ་ཤིག །འབྲེག་མཁན་དང་དགེ་སློང་མ་ཉིད་འདོད་ཆགས་ལངས་ཏེ་ཆགས་པ་ལྟར་བྱེད་ན་སྲུང་མ་གྲོགས་མོས་ཚིག་སཱུ་ཏྲ་འོག་མ་ལས་འབྱུང་བ་སྐད་བསྒོ་ཤིག །དྲན་པར་མངོན་པར་ཞོག་ཤིག །དགེ་སློང་མ་སྐྲ་འབྲེག་པ་ལ་སྲུང་མས་དྲན་པ་ཉེ་བར་ཞོག་ཤིག་ཅེས་བསྒོ། །དྲན་པ་ཇི་ལྟར་གཞག་པ་ནི་སཱུ་ཏྲ་འོག་མ་ནས་འཆད། ཅི་འདི་རྣག་གི་ལུས་འདི་ལ་སྙིང་པོ་ཡོད་དམ་ཞེས་སོ། །སྐྲ་འབྲེག་མཁན་གྱི་ལུས་མི་གཙང་བ་དང་མི་རྟག་པ་ལ་སོགས་པ་སྙིང་པོ་མེད་པ་འདི་ལ་ཆགས་སུ་ཅི་ཡོད་རྣག་དང་འདྲ་བར་ལྟོས་ཤིག་ཅེས་སྲུང་མས་བསྒོ། །འབྲེག་མཁན་ཆགས་པ་ལྟར་བྱེད་ན་ཡང་ཚིག་འདི་བཞིན་དུ་བཟློག་སྟེ་ཞིབ་ཏུ་བསྒོ་བར་བྱོས་ཤིག །མ་དང་སྲིང་མོ་དང་བུ་མོར་འདུ་ཤེས་ཤིག་ཅེས་འབྲེག་པ་ལའོ། །འབྲེག་མཁན་ཆགས་པ་ལྟར་བྱེད་ན་མ་དང་སྲིང་མོ་དང་བུ་མོ་ཡིན་པར་སོམས་ཤིག་ཅེས་སྲུང་མས་བསྒོ། །དགེ་སློང་མ་ཆགས་པ་ལྟར་བྱེད་ན་ཕ་དང་མིང་པོ་དང་བུར་སོམས་ཤིག་བསྒོ། །དེ་བྱས་ནས་ཁྲུས་བྱ། མགོ་བྲེགས་ཟིན་ནས་གཙང་བའི་ཕྱིར་ཁྲུས་བྱའོ། །ཟླ་བ་ཕྱེད་ཅིང་བཀྲུ་བ་དང་དུས་རྣམ་ལྔ་ལ་ཡང་མ་གཏོགས་པར་འཁྲུར་གནང་ངོ༌། །ཡན་ལག་ལྔ་བཀྲུ། གྲང་བའི་རྐྱེན་བྱུང་ན་ཡན་ལག་ལྔ་བཀྲུས་ཀྱང་ཉེས་མེད་ལྔ་ནི་མགོ་དང་རྐང་ལག་བཞི་སྟེ་ལྔའོ། །སྒྲེན་མོར་མི་བཀྲུ། ཁྲུས་བྱེད་པའི་ཚེ་སྒྲེན་མོར་མི་བཀྲུའོ། །དགེ་སློང་མ་སྐྱེས་པའི་ངོགས་སུ་མ་ཡིན། སྐྱེས་པའི་ཁྲུས་ས་མི་མང་པོར་འདུ་བར་དགེ་སློང་མས་ཁྲུས་མི་བྱ། བུད་མེད་ཀྱི་དོགས་སུ་ཕྱེ་མས་མ་ཡིན། བུད་མེད་ཀྱི་ཁྲུས་སར་ཁྲུར་ནི་དབང་སྟེ་ཕྱེ་མ་བུལ་ཏོག་དང་སྲན་ཕྱེ་ལ་སོགས་པས་འཁྲུར་མི་དབང་སྟེ་དྲིལ་ཅིང་མཉེས་ན་འདོད་ཆགས་ལྡང་བའི་ཕྱིར་རོ། །སྲན་ཕྱེ་ལ་སོགས་པར་བསུང་གིས་སྤགས་པའང་བརྟགས་པའོ། །དགེ་སློང་ཕ་ཁྲུས་བྱེད་པ་ལ་ནི་སྲན་ཕྱེ་བུལ་ཏོག་ལ་སོགས་པ་བསུང་གིས་སྤགས་པའི་ཡང་དབང་ངོ༌། །བསུང་གིས་སྤགས་པ་བདག་ཉིད་འདོད་པའི་ཕྱིར་སྦྱར་རོ། །དེ་ལེན་པ་
ཡང་ངོ༌། །ཕྱེ་མ་དང་ཕྱེ་མ་བསུང་གིས་སྤགས་པ་གཞན་གྱིས་བྱིན་ན་ལེན་དུ་དབང་ངོ༌། །སྨན་གྱིས་སྤགས་པ་ནི་ནད་པ་ལའོ། །ཕྱེ་མ་སྨན་དང་བསྲེས་པ་ནི་བདག་གིས་སྦྱར་ཀྱང་རུང་གཞན་གྱིས་བྱིན་ཀྱང་རུང༌། སྤྱོད་པ་དང༌། ལེན་པ་པར་ནད་པ་དབང་ངོ། །དགེ་སློང་མས་བུད་མེད་ལ་ཕྱེས་མི་གཏོར། དགེ་སློང་མ་སྦོམ་མོ་མཐའ་ཡས་ཀྱིས་བུད་མེད་སྦ་བཟང་མོ་ཞིག་ལ་མགོ་ལ་ཕྱེས་གཏོར་བ་ལས་མོ་མི་དགའ་བར་གྱུར་ཏེ་ཁ་ཕྱར་བཏང་བ་ལས་བཅས། ཤམ་ཐབས་ཀྱི་ཁ་མདུད་རྒྱབ་མ་མདུད་པར་སྐས་ལ་མི་འཛེག ། ཤམ་ཐབས་ཀྱི་ཁ་མདུད་པ་མ་བོར་བར་སྐས་འོག་ནས་བལྟར་སྣང་བ་ལ་མི་འཛེག་སྐས་དང་ས་སྐས་དང་གྲུ་སྐས་འོག་ནས་བལྟར་མི་སྣང་བ་ལ་འཛེག་ཀྱང་ཉེས་མེད། ཤིང་མི་གང་ཙམ་ལ་འཛེག་ཅིང་འབབ་པའི་ཚེའང་མདུད་པ་དོར་རོ། །གཞན་དུ་དེ་ལྟ་མ་ཡིན་ནོ། །སྐས་ལ་མི་འཛེག་པའི་སྤྱོད་ལམ་གཞན་དུ་ནི་ཤམ་ཐབས་ཀྱི་ཁ་མདུད་པ་དོར་མི་དགོས་སོ། །ཁམ་བཀབ་པར་མི་གླལ། གླལ་བྱུང་ན་ཁ་དགབ། སྦྲིད་པའམ་འབོད་པ་ལ་སོགས་པའི་ཚེ་ཡང་དགབ། ཆོང་ཤིག་ཁྲུས་རས། སྒྲེན་མོར་མི་བཀྲུ་བའི་ཕྱིར་ཁྲུས་རས་བཅངས་ཀྱང་ཉེས་མེད། ཉི་རིམ་ལ་སྲོག་ཆགས་འཆགས་སོ། །ཁྲུས་རས་ལྷན་པ་ཅན་དང་ཉི་རིམ་ལ་སྲོག་ཆགས་འཆགས་པའི་ཕྱིར་མི་བྱ། ཆོས་གོས་གསུམ་པས་ཀྱང་ངོ༌། །སྦྱངས་པའི་ཡོན་ཏན་པས་ཁྲུས་རས་བཅངས་ཀྱང་ཉེས་མེད། མེད་ན་ལོ་མས་མདུན་དང་རྒྱབ་གཉིས་གཡོགས་ལ་དབེན་པར་ཁྲུས་ཤིག་ཁྲུས་རས་མེད་ན་ཤིང་ལོ་ལ་སོགས་པ་བཏོགས་ཟིན་པ་ཙམ་སྟེ། མདུན་དང་རྒྱབ་གཡོགས་ལ་དབེན་པར་ཁྲུས་ཤིག །སྲོག་ཆགས་ཆགས་པ་བསལ་བའི་ཕྱིར་བཤལ་ལོ། །ཁྲུས་རས་ལ་སྲོག་ཆགས་ཆགས་པ་མི་ཤི་བར་བྱ་བའི་ཕྱིར་ཆུར་བཤལ། གཙུག་ལག་ཁང་དུ་ནི་སྟོར་ཁུང་དུའོ། །གཙུག་ལག་ཁང་དུ་ཁྲུས་བྱེད་ན་སྟོར་ཁུང་དུའོ། །ཁུ་བ་དག་ཀྱང་དོར་རོ། །སྣོད་སྤྱད་བཀྲུས་པ་ལ་སོགས་པའི་ཁུ་བའང་སྟོར་ཁུང་དུ་དོར་རོ། །ཁྲུས་བྱ་ཁྲུས་བྱ་བའི་ཕྱིར། གཙུག་ལག་ཁང་གི་འཁོར་དུ་ཁྲུས་བྱས་ཀྱང་ཉེས་མེད།
ཕ་གུ་ཡང་གདིང༌། ཁྲུས་སའི་གཞིར་ཕ་གུ་གདིང་བ་ནི་འདམ་མི་ལྡང་བའི་ཕྱིར་རོ། །སྟོར་ཁུང་གདོད། ཁྲུས་སྟོར་ཆུ་མི་འཁྱིལ་བའི་ཕྱིར་སྟོར་ཁུང་གདོད། འབགས་པ་ཡང་བཀྲུ། སྣོད་སྤྱད་དང་ཁྲུས་སའི་གཞི་དྲི་མ་དག་གིས་འབགས་པ་ཡང་བཀྲུ་སྟོར་ཁུང་དུ་བཀྲུས་ན་མི་འཆགས་སོ། །སྟོར་ཁུང་གི་ཁར་བཀྲུས་ན་གཟར་ཞིང་དྲི་མ་མི་འཆགས་པའི་ཕྱིར་སྟོར་ཁུང་དུ་བཀྲུ་བར་བཤད། ཕ་གུས་རྐང་པ་ལས་གཞན་ལུས་དག་ལ་མི་བྲུད་མི་ཕྱི། ལོང་བུ་མན་ཆད་རྐང་པའི་དྲི་མ་ཕྱི་ཞིང་བཀྲུ་བར་ནི་སོ་ཕག་གིས་བྲུད་ཀྱང་ཉེས་མེད། གཞན་ལུས་དག་ལ་སོ་ཕག་གིས་མི་བྲུད་མི་ཕྱིའོ། །དེ་ནི་དཔེ་སྟེ་རྣོན་པོ་ལ་སོགས་པ་ཟེས་པ་ཡང་ངོ༌། །ཕག་དུམ་གྱིས་ལུས་མི་བྲུད་པ་མི་ཕྱི་བ་བཞིན་དུ་ས་མུ་ཏྲའི་དབུ་བ་ལ་སོགས་པ་གཞན་རྩུབ་ཅིང་རྣོན་པོ་ཅི་ཡང་རུང་སྟེ། ད་སྐྱེ་བ་དང་ཤ་སྣད་པ་དང་སེམས་དྲོག་དྲོག་པོར་འགྱུར་བའི་ཕྱིར་མི་བྲུད་དོ། །ཉ་ཕྱིས་བཀྲུ་བ་ནི་མེས་སོ། །ཉ་ཕྱིས་ཀྱིས་ལུས་བྲུད་པ་ནི་ཉེས་མེད་དོ། །ཉ་ཕྱིས་ཀྱིས་ལུས་ཀྱི་དྲི་མ་དང་གཞན་སྣུམ་ཆགས་པ་ལ་སོགས་པ་བཀྲུ་བ་ནི་མེ་ལ་བསྲོས་ཏེ་ཕྱིས་ན་དག་པར་འགྱུར་རོ། །དགེ་སློང་མ་ནི་གང་དུའང་ཁུ་ཚུར་དང་གོས་དྲིལ་བ་ལ་སོགས་པ་ཅིས་ཀྱང་མི་བྲུད། དགེ་སློང་མ་ནི་འདོད་ཆགས་སྐྱེ་བའི་ཕྱིར་འདི་ལྟར་མིང་གིས་སྨོས་པ་ལ་སོགས་པ་ཅིས་ཀྱང་མི་བྲུད་མི་ཕྱི་བ་ནི་ལུས་ཀྱི་ཡན་ལག་ལའོ། །འགྱུར་བའི་ཆུ་མེད་པར་མ་གྱུར་པར་གོས་མི་བགོ །ཁྲུས་བྱས་ནས་ལུས་ལ་ཆུ་ཕྲུམ་ཕྲུམ་པོ་གོས་མ་རུང་བར་འགྱུར་བ་མེད་པར་མ་གྱུར་གྱི་བར་དུ་གོས་མི་བགོ །ཆོངས་ཤིག་ལུས་ཕྱི་བ་སཱུ་ཏྲ་ལྟག་མ་ལྟ་བུ་ལུས་ཀྱི་ཆུ་བྱེད་པར་བྱ་བའི་ཕྱིར་ལུས་ཕྱི་བ་བཅངས་ཀྱང་ཉེས་མེད། མེད་ན་སྐད་ཅིག་ཙོག་ཙོག་པོར་འདུག་པ་ལ་ཁྲུས་རས་ཀྱིས་ཕྱི། ལུས་ཕྱི་བ་མེད་ན་སྐད་ཅིག་ཙོག་ཙོག་པོར་འདུག་སྟེ། ཁྲུས་རས་ཕྱེད་གཅུ་སྟེ་ལུས་ཕྱི་ཕྱེད་ཀྱིས་མདོམས་ཀྱང་གཡོགས་དགོས་བྱའོ། །བསྲོ་གང་ནང་གི་ཆོ་ག་བྱ་བའི་ཕྱིར་གཙུག་ལག་ཁང་གི་འཁོར་དུ་བསྲོ་གང་བྱས་ཀྱང་ཉེས་མེད་དེ་ཇི་ལྟར་བྱ་བ་འོག་ནས་འཆད། ཁང་ཟླུམ་བྱ་བ་སྐམ་སར་དགེ །བསྲོ་གང་ནི་ཁང་ཟླུམ་ལ་སྐམ་སར་
བརྩིགས་ན་དགེའོ། །ཕྱི་རུབ་ནང་ཡངས་རྒྱ་མཚོ་འདྲ་བའི་སྐར་ཁུང་དབུས་སུ་གདོད་བསྲོ་གང་གི་སྐར་ཁུང་ནི་ཕྱི་རོལ་རུབ་ལ་ནང་ཁ་ཡངས་སུ་བྱ་སྟེ་ནང་ཡངས་པ་གཞོལ་པོར་བྱ་བ་ནི་མཚོའི་མུ་དང་འདྲ་བར་བྱའོ། །སྐར་ཁུང་ཤར་དུ་སྒོ་འཕར་ཅན་ལ། ཟུང་དང་གཟེར་གཏན་དང་རྐེད་གཏན་ལས་དེར་གཞུག །སྐར་ཁུང་གི་རྐྱེན་འདི་རྣམས་བཅའ་བ་ནི་བསྲོ་གང་གིའོ། །ར་རྐང་ཅན་གྱི་དབྱིག་པ་བཅང༌། །སྐར་ཁུང་གི་སྒོ་དབྱེ་བ་དང་གཅད་པའི་ཕྱིར་དབྱིག་པའི་མགོ་རའི་རྐང་པ་འདྲ་བར་བྱས་བཅངས་ཀྱང་ཉེས་མེད། སྒོ་རེ་བཞི་དང་སྒོ་ལེབ་དང་ཡང་མིག་དང་ལག་ཟུངས་བཅའ། བསྲོ་གང་གི་སྒོའི་རྐྱེན་འདི་རྣམས་ཀྱང་བཅང་བར་བྱ། ཆུ་དྲོན་གཞག་པའི་ཕྱིར་ནང་རིམ་སྟེགས་བུའི་ཕྲེང་བ་བྱ། བསྲོ་གང་གི་ནང་དུ་ཆུ་དང་སྣོད་སྤྱད་ལ་སོགས་པ་གཞག་པའི་ཕྱིར་སྟེགས་བུ་རྩིག་དྲུང་ཐོག་དག་ཏུ་བར་ཆད་ཅན་དུ་བྱ། མེ་བུད་པའི་གནས་ཀྱི་སར་ཕ་གུ་གདིང༌། བསྲོ་གང་གི་ནང་དུ་མེ་བུད་པའི་གཞིར་ཕ་གུ་ཡང་གདིང༌། མེ་མི་འཆི་བར་གཡོགས་བསྲོ་གང་གི་མེ་བསྲོར་འོང་བའི་ཕྱིར་མེ་མི་འཆི་བར་གཡོགས། དེའི་ཕྱིར་ལྕགས་ཀྱི་ཐལ་ཕྱགས་བཅང༌། མེ་གཡོགས་པའི་ཕྱིར་ལྕགས་ཀྱི་ཐལ་ཕྱགས་བཅངས་ཀྱང་ཉེས་མེད་དོ། །མེ་འབར་བཞིན་དུ་འཇུག་པ་མྱོས་པའི་ཕྱིར་སྤང༌། བསྲོ་གང་དུ་མེ་བུས་པའི་མེ་དབལ་གྱིས་མྱོས་པར་འགྱུར་བའི་ཕྱིར་འབར་བ་མ་ཞི་བའི་བར་དུ་ནང་དུ་མི་འཇུག །མེ་དབལ་མི་འབྱུང་བའི་ཕྱིར་ཕྱེ་དང་ཡུངས་མར་ཚ་བ་གཉིས་བསྲེས་ཏེ་མེར་གདབ། མེ་དབལ་མེད་པར་བྱ་བའི་ཐབས་ནི་འདི་ལྟར་བྱའོ། །དྲི་མི་ཞིམ་པ་མེད་པར་བྱ་བའི་ཕྱིར་པོག་བླུགས། སཱུ་ཏྲ་ལྟག་མ་ལྟར་བྱས་ན་དྲི་མི་ཞིམ་པ་མེད་པར་བྱ་བའི་ཕྱིར་སྤོས་བླུགས་ཏེ་ཞིམ་པར་བྱ། ངར་ཟན་བཅང་བས་མིག་ཟག་པ་བརྟག །བསྲོ་བའི་ཚེ་རྡུལ་དང་སྣུམ་ལ་སོགས་པ་མིག་ཏུ་ཟག་ན་ངར་ཟན་གྱིས་མི་བརྟག །སྐྱུ་རུ་རའི་འབྲས་བུས་ཀྱང་ངོ༌། །མིག་ཟག་པ་བརྟག་པ་ཤིང་ཏོག་ཨམ་ལའི་ཆང་བུས་བརྟག་ཀྱང་རུང་ངོ༌། །དེར་རྩྭ་བམ་གྱི་སྟན་ཏོ། །བསྲོ་གང་གི་ནང་དུ་རྩྭ་བམ་གྱི་སྟན་གདིང༌། ས་ལ་རྩྭ་གཤེར་པ་གདིང་སྟེ་རློན་པའམ་སྤངས་པས་སོ།།
བསྲོ་གང་གི་ནང་གི་འོག་གཞིར་རྩྭ་གདིང་སྟེ་མེ་མི་མཆེད་པ་དང་ལུས་ལ་མི་འཇུག་པའི་ཕྱིར་རྩྭ་གཤེར་བསྐམས་ན་སྤངས་ཏེ་གདིང༌། གཡའ་བའི་ཕྱིར་ལྕགས་ཀྱི་གཡའ་ཕྲུག་བྱ། བསྲོ་གང་ན་སྨན་གྱི་ཆོ་ག་བྱེད་པའི་ཚེ། ལུས་ལ་གཡའ་བ་ཕྲུག་པའི་ཕྱིར་ལྕགས་ཀྱི་གཡའ་ཕྲུག་བྱ་སྟེ་བཅངས་ཀྱང་ཉེས་མེད་དོ། །མི་གུར་ཐ་གུས་ཐོགས་ཤིག །ལྕགས་ཀྱི་གཡའ་ཕྲུག་གི་ཡུ་བའི་སྤུ་གུར་ལ་གཟུངས་ཀྱི་ཐ་གུ་གདགས། གཙུག་ལག་ཁང་སྐྱོང་གིས་དབེན་པར་ཞོག་ཤིག །ལྕགས་ཀྱི་གཡའ་ཕྲུག་གཙུག་ལག་ཁང་སྐྱོང་གིས་མ་སྟོར་བར་དབེན་པར་གཞག །བཀྲུ་བ་སྦྱོར་བའི་ཕྱིར་འདི་མེར་བརྟག་པར་གྱིས་ཤིག །ལྕགས་ཀྱི་གཡའ་ཕྲུག་སྣུམ་དང་རྡུལ་དང་དྲི་མ་ལ་སོགས་པ་བཀྲུ་བའི་ཕྱིར་མེར་བསྲེག །དེར་མི་བཀྲུའོ། །བསྲོ་གང་དུ་ཁྲུས་མི་བྱ། གནས་དེའི་ཕྱིར་བྱའོ། །བསྲོ་གང་དུ་ཁྲུས་མི་བྱ་བས་ན་ཁྲུས་ས་གུད་དུ་བྱ་སྟེ་ཅི་ལྟར་བྱ་བའི་ཐབས་འོག་ནས་འཆད། འཁྲུ་བའི་གོས་མ་རུང་བར་མི་འགྱུར་བའི་ཕྱིར་ཕ་གུས་བསྐོར་བའི་ཤོང་བུ་བྱ། འཁྲུ་བའི་ཆུ་ལྡུགས་པའི་གོས་མི་གཞེར་བའི་ཕྱིར་ཕ་གུས་བསྐོར་བའི་ཤོང་བུ་བྱ་སྟེ་དབུས་སུ་མི་འདུག་ཏུ་རུང་བར་བྱ། དེར་སྟོར་ཁུང་གདོད། ཕ་གུས་བསྐོར་བའི་ཤོང་བུ་བྱས་པ་ལ་ཆུ་མི་འཁྱིལ་པའི་ཕྱིར་སྟོང་ཁུང་གདོད། ཆུ་ཚན་ཕྱི་མ་རྣམས་ལ་སྦྲོན་ཅིག །ཁྲུས་ཁང་སྔར་བྱེད་པས་ཆུ་གྲང་དྲོ་ཇི་ཙམ་པ་ཕྱི་མ་ཁྲུས་བྱེད་པ་རྣམས་ལ་བསྒོའོ། །གྲང་མོས་བསྲེས་ཤིང་ཆུ་ཚན་གྲང་མོས་བསྲེས་ཏེ་རན་པར་བྱ། འདེབས་པ་ལ་སོགས་པ་ཡང་ངོ༌། །ཆག་ཆག་དང་མཎྜལ་ལ་སོགས་པའི་ཆུ་ཡང་ལྟག་ཏུ་བཤད་པ་བཞིན་དུ་བྱ། ལྕི་བ་དང་ལྕི་སྐམ་དང་སོ་ཤིང་གྱོ་མོ་གང་བར་བཞག །བསྲོ་གང་དུ་ལྕི་བ་གཤེར་བ་དང་ལྕི་སྐམ་དང་ས་འཇམ་པོ་དང་སོ་ཤིང་སོ་སོར་གྱོ་མོ་གང་བར་བཞག །བཀྲུ་བ་ལུས་ཀྱི་ཡོ་བྱད་དུ་སྤྱད་པའི་ཕྱིར་གཞག་གོ །འོན་ཏེ་རྨྱ་ན་སྔ་དྲོའི་ཟས་བྱ། བསྲོ་གང་དུ་ནད་པའི་ཆོ་ག་བྱས་པའི་ནད་པ་དང་ལས་བྱེད་བྱེད་པ་རྣམས་བཀྲེས་ཤིང་རྨྱ་ན་གཡར་ཚུས་ཟོས་ཀྱང་ཉེས་མེད། །དབུས་སུ་འཇུག་པར་ཤོམ་གྱིས་དེར་ཞུགས་
པས་མི་ཤེས་པ་ངོ་ཤེས་པའི་ཕྱིར་དྲི། བསྲོ་གང་དུ་འཇུག་པའི་ཚེ་མུར་འདུག་ལ་སོགས་པ་མ་དད་པ། བསྲོ་གང་འཇུག་གིས་ངོ་མེ་ཤེས་པ་རྣམས་ལ་མཁན་པོ་གང་ཡིན་པ་དང་ཅི་ལ་ཞུགས་པ་ཞིབ་ཏུ་དྲི། དེའི་ཕྱིར་མི་གཞུག་པའི་ཕྱིར་དགེ་སློང་སྒོ་བ་གཞག །བསྲོ་གང་དུ་མུར་འདུག་འཇུག་ཏུ་འོང་བ་མི་གཞུག་པའི་ཕྱིར་དགེ་སློང་ཚུལ་ཤེས་སྒྲིན་པོ་ཅིག་སྒོ་བར་གཞག །མ་དད་པ་དེར་འཇུག་ཏུ་མི་གནང་ངོ༌། །དགེ་སྦྱོང་མན་ཅད་མུར་འདུག་ཡན་ཆད་ལས་མ་དད་པ་བསྲོ་གང་དུ་མི་གཞུག་སྟེ་དད་པ་ནི་ཆོས་དང་ལུས་ལ་དད་པ་དང་སྐད་ཅིག་དད་པ་ཚམ་མ་ཡིན་གྱི་རིགས་ཀྱི་ཡེ་ནས་དད་པ་ལ་བྱའོ། །ལྷན་ཅིག་ཏུ་སྤྱོད་པ་དང་ཉེ་གནས་ཀྱིས་དེའི་ལས་བྱའོ། །བསྲོ་གང་དུ་ནད་པའི་ཆོ་ག་བྱེད་པའི་གཡོག་ལས་བྱེད་པ་ནི་ལྷན་ཅིག་ཏུ་སྤྱོད་པ་དང་ཉེ་གནས་ཀྱིས་བྱའོ། །ལྷན་ཅིག་ཏུ་ཡོད་པ་ནི་མཁན་པོ་དང་སློབ་དཔོན་ལ་བྱ་ཉེ་གནས་ནི་མཁན་པོ་དང་གཞན་གྱི་སློབ་མ་བདག་ལ་གནས་པ་ལ་བྱ། །གཞོན་ནུས་ཞེས་གཞན་དག་གིས་སོ། །ལྷན་ཅིག་ཏུ་སྤྱོད་པ་དང་ཉེ་གནས་མེད་ན་བསྲོ་གང་དུ་ཆོག་བྱེད་པའི་ཚེ་དགེ་སློང་ཚངས་པ་མཚུངས་པར་སྤྱོད་པ་གང་གཞོན་པ་རྣམས་ཀྱིས་གཡོག་ལས་བྱའོ།། གནས་བརྟན་ཤ་སྟག་ཚོགས་ན་དེའི་ནང་ནས་གང་གཞོན་པས་བྱའོ། །བུད་པ་དང༌། མེ་དང་མེ་མར། ཟངས་དང༌། ཆུ་བསྐོལ་བ་དང་མེ་མར་གྱི་ཟངས་བུ། ཡུངས་མར་དང༌། ལུས་བསྐུ་བ་དང་མེ་མར་གྱི་མར། སོ་ཤིང་དང་ལྕི་སྐམ་དང་ས་དང༌། སོ་དང་ལག་པ་བཀྲུ་བར་དགོས་པ། ཕྱེ་མ་དང༌། བུལ་ཏོག་གམ་སྲན་ཕྱེ་ལ་སོགས་པ། ཆུ་ལ་སོགས་པ་གཞག །སཱུ་ཏྲ་འདི་ལས་འབྱུང་བ་དང་འོག་ནས་འབྱུང་བ་རྣམས་བསྲོ་གང་དུ་ནད་གཡོག་དང་ལས་བྱེད་པ་རྣམས་ཀྱིས་སྤོག་ཅིང་ལས་བྱའོ། །ཤིང་བརྟག་པ་དང༌། བུད་པའི་ཤིང་དང་སོ་ཤིང་བརྟག །དྲིལ་བ་དང༌། ལུས་ལ་འདེ་གུས་དྲིལ་བ། སྣུམ་དང༌། ལུས་ལ་སྣུམ་གྱིས་བསྐུ། བཀྲུ་བ་དང༌། ལུས་དང་སྣོད་སྤྱད་བཀྲུ་བ། ཕྱག་པ་དང་ཕྱག་དར། ཉལ་ཉིལ་དོར་བ་ལ་སོགས་པའོ། །ཐལ་བ་དང་ས་ཕྱགས་ལ་སོགས་པ་དོར་བ་ཡང་གཞོན་ནུ་
གཡོག་བྱེད་པས་བྱ། དེ་དག་ཕན་ཚུན་དུའོ། །མཁན་པོ་སློབ་དཔོན་དང་རྒན་རབས་རྣམས་བསྲོ་གང་དུ་ཆོ་ག་བྱས་ཟིན་ནས་གཞོན་ནུ་གཡོག་བྱེད་བྱེད་པའི་ནང་ནས་ཆོ་ག་བྱེད་པ་ཡོད་ན་གཅིག་ལ་གཅིག་ཕན་ཚུན་དུ་བྱའོ། །ཁྲིའུ་དང༌། རྩ་བམ་ཀྱི་སྟན་དང་ཁྲིའུ་དག་ལ་བྱ། ཉ་ཕྱིས་བཀྲུས་ཏེ་ཇི་ལྟ་བུའི་གནས་སུ་གཞག །འདི་རྣམས་བསྲོ་གང་དུ་ཆོ་ག་བྱས་ཟིན་ནས་སོ་སོའི་གནས། གནས་གར་རིགས་པར་གཞག་གོ །སྣོད་ཐམས་ཅད་ཀྱང་ཚུལ་དེ་བཞིན་ནོ། །ཡོ་བྱད་དང་སྣོད་སྤྱད་ལ་སོགས་པ་ཡང་བསྲོ་གང་གི་ཆོ་ག་ཟིན་ནས་སཱུ་ཏྲ་ལྟག་མ་བཞིན་དུ་སོ་སོའི་གནས་གནས་སུ་གཞག་གོ །ཡོ་བྱད་ཐམས་ཅད་རབ་ཏུ་དབེན་པ་དང་བྱི་བདར་བྱའོ། །སྣོད་སྤྱད་དང་ཡོ་བྱད་ཐམས་ཅད་མི་གཏོར་བའི་ཚུལ་དུ་བྱ་ཞིང་དབེན་པར་གཞག་པ་དང་བྱི་བདར་བཀྲུ་བ་དང་བཙེམ་པ་དང་གླན་པ་ལ་སོགས་པ་གར་རིགས་པར་གྱིས་ཤིག །དེར་སྒྲ་བསྐྱུང་ཞིང་འཇུག །ལུས་ཀྱི་སྒྲ་དང་ཁའི་སྒྲ་ལ་སོགས་པ་གཅོམ་བསྐྱུངས་ཏེ་བསྲོ་གང་དུ་འཇུག །མཛེས་པར་རོ། །སྔོན་སྐྱོན་ཡོད་པ་ལ་མཛེས་པར་བྱར་མི་རུང་གི་འཕྲལ་དུ་སྒོ་གསུམ་བསྡམས་ཏེ་འཇུག་པ་ལ་བྱ། རབ་ཏུ་བསྡམས་པའི་སྤྱོད་ལམ་མོ། །སྤྱོད་ལམ་བཞིའི་ཚུལ་བཞིན་དུ་བསྡམས་ཏེ་ཟོན་དང་བཅས་པར་བསྲོ་གང་དུ་འཇུག །ཤེས་བཞིན་དུ་བྱའོ། །མེ་ལས་མ་ཡང་བྱ་བ་དང་སྒོ་ལ་མི་རེག་པར་བྱ་བ་ལ་སོགས་པ་དང་མིང་གིས་སྨོས་པ་འདི་རྣམས་མ་བརྗེད་པར་དྲན་པ་སྔོན་དུ་བཏང་བ་ལ་བྱ། སྲོ་བའི་མདུན་དུ་མི་འདུག །བསྲོ་གང་ན་སྔ་ན་མེ་བསྲོ་བའི་མདུན་དུ་མི་འདུག །བླག་ཆེར་གཏང༌། ཁྱིམ་པ་དང་ལོག་པར་སྤྱོད་པའི་གཏམ་ཕྱལ་པ་མི་བྱ་བ་དང་སྨྲ་དགོས་པའི་རྣམས་ཀྱང་སྒྲ་བསྐྱུང་བ་དང་དལ་བུས་སྨྲ། བསྲིངས་པའི་མི་སྨྲ་བ་ལ་དམིགས། བསྲོ་གང་ན་འདུག་པའི་ཚེ་དགེ་བའི་ཆོས་དང་བསྲིངས་བའི་རང་བཞིན་ཞི་བའི་དོན་ལ་དམིགས་ཤིང་བསམ། མཇུག་ཏུ་ གསུམ་བརྒྱུད 
་མར་བཀླག །བསྲོ་གང་གི་ཆོ་ག་ཟིན་པའི་མཇུག་ཏུ་ཞལ་ནས་གསུངས་པའི་ཚིགས་སུ་བཅད་པ་གཅིག་དང༌། ཡོན་བདག་དང་ལྷ་ཁང་གི་སྲུང་མ་དང་སེམས་ཅན་ཀུན་དགེ་བར་གྱུར་ཅིག་པ་དང་དཀོན་མཆོག་ལ་བསྟོད་
པའི་བསྟོད་པ་གཅིག་དང་
གསུམ་བརྒྱུད ་མར་བཀླགས་ཤིང་འགྲོ་བའོ། །གོས་གཅིག་དང་ལས་ཀུན་མི་བྱ། ལས་ཅི་བྱེད་ཀྱང་རུང་བ་ཆར་ལྟ་བུ་གཅིག་བུ་གྱོན་ཏེ་ལས་མི་བྱའོ། །བསྲོ་གང་བྱ་བ་མན་ཆད་འདི་ཡང་ཆད་བསྲོ་གང་གི་སྐབས་སུ་བྱ་དགོས་པར་བཤད་མོད་ཀྱི། གཞན་གང་དུའང་འདི་བཞིན་དུ་སྤྱད་ཅིང་བྱ་དགོས་སོ། །མ་དད་པས་ལུས་ལ་དེ་དག་མ་བྱས་ཤིག །ལུས་ལ་མཉེ་བ་དང་བྱུག་པ་དྲིལ་བ་ལ་སོགས་པ་ཆོས་དང་ལུས་ལ་མ་དད་པའི་མི་བྱེད་དུ་མི་གཞུག་འདི་དང་སྔ་མ་ལའང་དད་པ་བརྟན་པ་ལ་གསུངས་སོ། །སཱུ་ཏྲ་ལྟག་མ་འདི་དང་གོང་ནས་མ་དད་པ་བསྲོ་གང་དུ་མི་གཞུག་ཟེར་བ་གཉིས་མ་དད་པ་བྱེད་དུ་མི་གནང་གི་དད་པ་དང་བརྟན་པས་གཡོག་གྱིས་ཤིག་ཅེས་སངས་རྒྱས་ཀྱི་ཞལ་ནས་གསུངས། སེང་གེ་ལྟ་བུས་ཝ་དང་འདྲ་བ་ལྟ་བུ་ལ་གཡོག་མི་བྱ། ཚུལ་ཁྲིམས་དང་ཡོན་ཏན་དང་ལྡན་པ་སེང་གེ་ལྟ་བུས་ཚུལ་ཁྲིམས་རལ་ཅིང་ཡོན་ཏན་མེད་པ་ཝ་ལྟ་བུ་ལ་གཡོག་མི་བྱ། ཤིན་ཏུ་ཚུལ་ཁྲིམས་ངན་ཀྱང་མཁན་པོ་དང་སློབ་དཔོན་ལ་ནི་གཡོག་བྱའོ། །མཁན་པོ་དང་སློབ་དཔོན་ནི་ཚུལ་ཁྲིམས་ངན་དུ་ཟིན་ཀྱང་བདག་ཚུལ་ཁྲིམས་ཐོབ་པར་བྱེད་པ་དང་དགེ་བའི་བཤེས་གཉེན་ཡིན་པས་ན་གཡོག་བྱ་དགོས་སོ། །གནས་ནི་མི་བཅའོ་མ་དང་ཕ་དང་ཁྱིམ་མི་ནད་པ་ལ་ཡང་ངོ༌། །ཕ་མ་དང་ཁྱིམ་མི་ནད་པ་ལའང་གཡོག་བྱའོ། །ཕ་མ་ནི་བདག་གི་ལུས་གསོས་ཤིང་བསྐྱེད་པའི་དྲིན་དང་དེ་ལྟར་བསྐྱེད་པས་བདག་དགེ་བའི་ལུས་ཐོབ་པའི་ཕྱིར་བྱ་ཁྱིམ་མི་ནད་པ་ལ་ནི་སྙིང་རྗེ་བའི་ཕྱིར་རོ། །ཁྲུས་གྱི་ར་བ་སོགས་པ་ནི་བཀྲུ་བར་རོ།། བཀྲུ་བའི་ཕྱིར་ཁྲུས་ཀྱི་ཡོ་བྱད་དུ་བསོགས་པ་དང་ན་བའི་ཕྱིར་བཀྲུ་བའི་སྨན་དུ་བསོགས་པ་ནི་བཀྲུ་བར་བརྟག་པ་ཡིན་ཏེ་ཉེས་མེད་དེ། འོག་ནས་ཀྱང་འཆད་དོ། །རླུང་འབྱིན་པ་རྩ་བ་དང་ལོ་མ་དང་སྡོང་པོ་དང་མེ་ཏོག་དང་འབྲས་བུ་བསྐོལ་བ་དེས་བཀྲུ་བར་བཤད་དོ། །རླུང་ནད་ལ་སོགས་པ་འབྱིན་པའི་སྨན་ནི་རྩ་བའི་ཆོ་ག་ལས་སྨན་དུ་འགྱུར་བ་དང་ལོ་མ་དང་འབྲས་བུ་ལས་སྨན་དུ་འགྱུར་རོ་ཅོག་བསྐོལ་བས་བཀྲུར་རུང་ངོ༌། །མི་འཁོངས་པའི་ཕྱིར་བསྐུས་ཏེའོ། །སྨན་གྱི་ཁུ་བས་བཀྲུས་ན་ཤ་འཁོངས་ཤིང་རྙེད་པར་མི་འགྱུར་བའི་ཕྱིར་མར་གྱིས་སྔར་བསྐུ། འདེ་གུས་དེ་མེད་པར་བྱ།
མར་གྱིས་བསྐུས་པའི་འོག་ཏུ་འདེ་གུས་བསྐུས་ཏེ་དྲིལ། སྔ་མའི་ཕྱིར་ཐ་མའི་ཆུར་སྣུམ་ཐིགས་པ་གཉིས་སམ་གསུམ་ལུགས་ཤིག །མར་དང་ལྡེ་གུས་བསྐུས་ནས་སྨན་གྱི་ཆུས་འཁྲུ་བའི་ཚེ་སྨན་གྱི་ཆུ་ཐ་མ་ནས་ལྡུགས་པའི་ནང་དུ་ཤ་མི་འཁོངས་པའི་སྣུམ་ཐིགས་པ་གཉིས་སམ་གསུམ་ལུགས་ཤིག །བཀྲུའོ་ལྕགས་ཀྱི་གཞོང་ཁུང་དུ། ནད་པས་ལུས་ལྕགས་ཀྱི་གཞོང་ཁུང་དུ་ཁྲུས་བྱས་ཀྱང་ཉེས་མེད་དོ། །ཆོངས་ཤིག་དེ་ནད་པས་སོ། །ལྕགས་ཀྱི་གཞོང་ཁུང་ནད་པས་བཅངས་ཀྱང་ཉེས་མེད། བླ་གབ་བྱ། དྲོད་མི་ཤོར་བའི་ཕྱིར་གཞོང་ཁུང་གི་ཁ་གབ་བྱ། དེར་མཇིང་པར་སྔས་གཞུག །ལྕགས་ཀྱི་གཞོང་ཁུང་དུ་ལུམས་བྱེད་པར་ཉལ་བའི་ཚེ་བདེ་བའི་ཕྱིར་སྔས་གཞུག །གར་བབ་བབ་ཏུ་རྐང་པ་མི་བཀྲུ། ཕྱི་རོལ་མ་གཏོགས་པར་གཙུག་ལག་ཁང་ངོ་ཅོག་གི་འཁོར་དུ་རྐང་པ་མི་བཀྲུའོ། །གར་བཀྲུ་བ་དང་བཀྲུ་བའི་ས་བྱ་བ་འོག་ནས་འཆད་པ་ཡིན་ནོ། །དེའི་གནས་ནི་ཝ་ཁར་རོ། །རྐང་པ་བཀྲུ་བའི་ས་ནི་ཁང་ཐོག་གི་ཝ་ཁར་ཀྱང་བཀྲུར་རུང་ངོ༌། །རྐང་པ་བཀྲུ་བའི་བྱ། ཝའི་ཁར་ཆུ་མི་འགྲོ་བའི་ཕྱིར་སྐྱོར་ལ་སོགས་པ་བྱ། གཙུག་ལག་ཁང་གི་སྟེང་ཤར་དང་ལྷོའི་གྲར་རོ། །ཁང་ཐོག་གི་ཝའི་ཁ་ནི་ཉི་མ་དེས་པའི་ཕྱིར་ཤར་དང་ལྷོའི་མཚམས་ཀྱི་གྲར་བྱ། རུས་སྦལ་ལྟ་བུ་རྩུབ་པོ། །ཝའི་ཁ་རྐང་པ་གཞག་པའི་གཞི་རྡོ་བ་རྩུབ་པོ་རུས་སྦལ་གྱི་རྒྱབ་འདྲ་བ་བྱ་སྟེ་གཞག །གཞག་གོ་ཁམ་པའི་ཆོལ་ཟངས། །རྐང་པ་བཀྲུ་བའི་རྐང་པའི་ཆོལ་ཟངས་ཀྱང་པའི་ཆོལ་ཟངས་ཀྱང་བྱ། བལ་གླང་གི་རྨིག་པའི་མཐིལ་ལྟ་བུ་ལྦོག་ལྦོག་པོ་ཅན། ཁམ་པའི་ཆོལ་ཟངས་ཀྱི་ཞབས་ས་ལ་འཆགས་པའི་ཕྱིར་བལ་གླང་གི་རྨིག་པ་དང་འདྲ་བ་གོར་གོར་བུ་བྱ། དབུས་སུ་གཟུགས་པ་ནི་ཀ་དམ་པའི་མེ་ཏོག་ལྟ་བུ་ལ་རྩུབ་པོར་རོ། །ཁམ་པའི་ཆོལ་ཟངས་ཀྱི་ནང་རྐང་པ་གཞག་པའི་གཞིའི་སྙིང་པོ་ཀ་དམ་པའི་མེ་ཏོག་འདྲ་བ་རྐང་པ་འཆགས་ཤིང་འདག་པའི་ཕྱིར་རྩུབ་པོར་བྱ། བཀྲུས་ཏེ་ཁ་སྦུ་བ་ལ་གཞག །རྐང་པ་བཀྲུས་ནས་རྐང་པའི་ཆོལ་ཟངས་ཉིད་ཀྱང་བཀྲུས་ཏེ། ཁས་སྦུབ་ལ་གཞག་དགེ་འདུན་གྱི་ན་སྟེང་དུའོ། ཁམ་པའི་ཆོལ་ཟངས་དགེ་འདུན་གྱི་ཡིན་ན་གཞན་འཁྲུ་བ་འོང་བའི་ཕྱིར་
ཁང་ཐོག་ཏུ་གཞག །གང་ཟག་གི་ན་གནས་ཀྱི་སྒོ་རྒྱབ་ཏུའོ། །ཁམ་པའི་ཆོལ་ཟངས་གང་ཟག་གི་ཡིན་ན་བདག་གི་གནས་ཀྱི་སྒོ་རྒྱབ་ཏུ་གཞག །ལྷུང་བཟེད་བཀྲུ་བ་ལ་སོགས་པ། གཙུག་ལག་ཁང་གི་ཕྱོགས་གང་དུ་བྱས་པ་དེས་ཆུས་བསྐུ་བའམ་བྱུག །གཙུག་ལག་ཁང་གི་ཕྱོགས་སུ་ལྷུང་བཟེད་དང་སྣོད་སྤྱད་ལ་སོགས་པ་བཀྲུས་པའི་སར་མཎྜལ་བྱ། མདུང་རྩེའམ་ཕྱི་བར་ལྟ་བུར་རོ། །བཀྲུ་བཤལ་བྱས་པའི་སར་མཎྜལ་བྱ་བ་ནི་དཀོན་མཆོག་གི་ཕྱིར་བྱས་པ་མ་ཡིན་པར་མངོན་པར་བྱ་བའི་ཕྱིར་མདུང་རྩེའི་ཕྱི་བར་འདྲ་བར་བྱའོ། །ལྕིབས་སམ་འཇིམ་བས་སོ། །མཎྜལ་ནི་ལྕི་བའམ་འཇི་པའི་སྐྱང་ནུལ་དུ་བྱ། དཀོན་མཆོག་གི་ཕྱིར་བྱུག་པ་ནི་འདྲ་བར་ཆད་པ་མེད་དོ། །དཀོན་མཆོག་གི་ཕྱིར་མཆོད་པའི་མཎྜལ་དུ་བྱ་བ་ནི་གཅིག་ཏུ་ཆད་པ་མེད་དོ། །ཅིར་དགའ་བར་བྱར་རུང་ངོ༌། །ལྷུང་བཟེད་མེད་པར་རབ་ཏུ་འབྱུང་བའམ་བསྙེན་པར་རྫོགས་པར་མི་བྱ། རབ་ཏུ་འབྱུང་བ་དང༌། བསྙེན་པར་རྫོགས་པའི་ཚེ་ལྷུང་བཟེད་མེད་པར་བྱར་མི་རུང༌། ཆུང་ན་མ་ཡིན་ཆེ་ན་མ་ཡིན་དཀར་ན་མ་ཡིན། ལྷུང་བཟེད་ནི་ཚད་ལས་ཆེ་བ་དང་ཆུང་བ་དང་ཚོན་གྱིས་མ་བསྐུས་སམ་བྱིད་པ་མི་རུང་ཆེ་ཆུང་གི་ཚད་དང་ཁ་དོག་བཙོ་བའི་ཐབས་ནི་འོག་ནས་འཆད། ཁའི་མཐའི་ཆ་ནས་མཐེབ་མོའི་སོར་གཅིག་གི་ལྷག་མར་འབྲས་བཙོས་པ་ཡང་ཡུལ་དབུས་སུ་གྱུར་འཆང་གི་སྤྱོད་པའི་ཕྲ་ཏ་གཉིས་མན་ཆད་ཚོད་མ་དང་སྔོར་དུ་བཅས་པར་ཤོང་བ་དེ་ནི་ཚད་མའོ། །ལྷུང་བཟེད་ཀྱི་ཁ་ནས་མཚོན་གང་མན་ཆད་དུ་འབྲས་བཙོས་པ་རྒྱ་གར་གྱི་ཡུལ་གྱི་དབུས་མ་ག་དྷའི་སྤྱོད་པའི་པྲ་ཏ་གཉིས་ཚོད་མ་དང་སྡོར་དུ་བཅས་པར་ཤོང་བ་ན་ལྷུང་བཟེད་ཆེན་པོའོ། །པྲ་ཏ་གཅིག་ཚོད་མ་དང་སྔོར་དུ་བཅས་པ་ཤོང་བ་ནི་ཆུང་དུའོ། །ལྷུང་བཟེད་འབྲིང་པོ་པྲ་ཏ་གཉིས་མན་ཆད་གཅིག་ཡན་ཆང་ཅི་ཙམ་ཤོང་ཡང་བླ། གྱུར་འཚོང་ཞེས་བྱ་བ་ནི་ཡུལ་ན་སྒྱུར་ཞིང་སྤྱོད་པའི་བྲེ་ཕུལ་ལྟ་བུ་སྟེ་པྲ་ཏ་ལ་བྱ། པྲ་ཏ་ནི་རྒྱ་གར་གྱི་སྲང་བཅུ་དྲུག་གི་ལྕིད་ཀྱི་འབྲས་སྐམ་ཤོང་བ་པྲ་ཏ་གཅིག་གི་ཚད་དོ། །རྒྱ་གར་ཡུལ་གྱི་སྲང་གཅིག་ལ་བོད་ཀྱི་སྲང་གཅིག་དང་ཞོ་དྲུག་ཡོད་དེ་རྒྱ་གར་ཡུལ་གྱི་སྲང་བཅུ་དྲུག་ལ་པྲ་ཏ་གཅིག་སྲང་སུམ་ཅུ་རྩ་
གཉིས་ལ་པྲ་ཏ་དོ་སྟེ་ལྷུང་བཟེད་ཆེན་པོའི་ཚད་བོད་སྲང་ཉི་ཤུ་རྩ་བརྒྱད་ལ་པྲ་ཏ་གང་གི་ཚད་དེ་བདུན་ཕུལ་དོ་དང་སྲང་གཅིག་དང་ཞོ་བྱེད་དང་དྲུག་ཤོང་པ་ནི་པྲ་ཏ་ཆུང་དུའི་ཚད་དེ་ཆེན་པོ་ནི་ཆུང་དུ་དོའི་ཚད་དོ། །དགེ་སློང་མས་དགེ་སློང་ཕའི་ཆུང་ངུ་ལས་མི་བཅང་དགེ་སློང་ཕའི་ལྷུང་བཟེད་ཆུང་ངུའི་ཚད་ལས་ཆེ་བའི་ལྷུང་བཟེད་དགེ་སློང་མས་བཅད་དུ་མི་དབང༌། །རོ་ཉེའི་དཀྱིལ་འཁོར་དེས་དེ་གཞག་པར་གདིང༌། དགེ་སློང་མའི་ལྷུང་བཟེད་ཀྱི་གཞི་ནི་རོ་ཉེ་ལ་གླེབ་སྟེ་ཟླུམ་པོར་བྱས་ཏེ་ལྷུང་བཟེད་ཞབས་ཉིད་ལ་ཐལ་བྱུང་གླན། བྱང་ཆུབ་ཀྱི་ཤིང་བེའི་ཏའི་ལོ་མའམ་ལག་མཐིལ་འདྲ་བའོ། །རོ་ཉེ་གླེབས་པའི་གཞུགས་ནི་ཤིང་བོ་དེའི་ལོ་མ་འདྲ་བའམ་ལག་མཐིལ་འདྲ་བར་བྱའོ། །འདི་འདྲི་བར་བྱ་བ་ནི་དགེ་སློང་མ་སུ་ལ་ནན་དས་ལྷུང་བཟེད་ཀྱི་གཞིག་དུ་བུ་ལ་ག་སྐོར་བྱས་པ་ལས་བཅས་ཚད་ཀྱང་དེའོ། །ཆེ་ཆུང་གི་ཚད་ཀྱང་ལག་མཐིལ་ལམ་ཤིང་པོ་དེའི་འདབ་མ་འདྲ་བར་བྱ། དེ་བས་བརྙས་ནའང་དེར་འགྱུར་རོ། །རབ་ཏུ་འབྱུང་བ་དང་བསྙེན་པར་རྫོགས་པའི་ཚེ། ལྷུང་བཟེད་མེད་ན་གཞན་གྱི་བརྙས་ཀྱང་རུང་ངོ༌། །དེ་བཞིན་ལྔ་པོ་ཡོང་ང༌། །ཆོས་གོས་གསུམ་དང་ཆུ་ཚགས་དང་གདིང་བ་ལྟ་བུ་བརྗེ་བ་བཞིན་དུ་བརྙས་ཀྱང་ཉེས་མེད། དབྱར་ལྷུང་བཟེད་མེད་པར་མི་བྱ། དབྱར་ཚུལ་དུ་ཞུགས་པའི་ཚེ་ཡུལ་རྒྱུ་བ་མི་སྤྱོད་ཅེས་ཏེ་ལྷུང་བཟེད་མེད་པར་ཀྱང་མི་རུང་ལྷུང་བཟེད་དང་འབྲལ་དུའང་མི་རུང་ངོ༌། །ཡུལ་རྒྱུ་བར་ཡང་མི་སྤྱོད། ལྷུང་བཟེད་མེད་པར་ཡུལ་རྒྱུ་བ་མི་སྤྱད། འཇིགས་པ་དང་བཅས་ན་ལྷུང་བཟེད་ཆུང་ངུ་དང་སྤྱོད་ཅིག །འཇིགས་པའི་རྐྱེན་ཅིག་འབྱུང་ངམ་ཡོད་ན་ལྷུང་བཟེད་ཆེན་པོ་གུད་དུ་གཏམས་ལ་ཆུང་ངུ་སྤྱད་ཀྱང་ཉེས་མེད། མེད་ཀྱང་རབ་ཏུ་དབྱུང༌། རབ་ཏུ་འབྱུང་བའི་ཚེ་ལྷུང་བཟེད་མེད་དམ་མ་རྙེད་ན་མེད་པར་རབ་ཏུ་དབྱུང་ངུ་རུང་ངོ༌། །ལངས་ཏེ་ལྷུང་བཟེད་འབྱུང་བའམ་གཞུག་པའམ་སྐམ་པ་མི་བྱ། ལྷུང་བཟེད་སྤྱད་པའི་ཐབས་ནི་སཱུ་ཏྲའི་འདི་མན་ཆད་འོག་ནས་འབྱུང་བ་ལྟར་བྱའོ། །ཚོད་རན་པར་ཀུན་དུ་སྤྱོད། ལྷུང་བཟེར་སློང་མོའི་ཚེ་དང་ཁ་ཟས་བཟའ་བར་སྤྱད་པ་ནི་རན་པ་ཞེས་བྱ། གཅིག་ཏུ་འོག་ནས་བཤད་པ་བཞིན་དུ་སྤྱད་པ་ལ་རན་པ་ཞེས་བྱའོ། །འདིར་
གཞན་འདོར་བ་དག་མི་གཞུག །ཐལ་བ་དང་ཉལ་ཉིལ་ལ་སོགས་པ་ལྷུང་བཟེད་ཀྱི་ནང་དུ་བཅུག་སྟེ་མི་དོར། འདིས་ཕྱག་དར་མི་དོར། ས་ཕྱགས་པ་ལྷུང་བཟེད་དུ་བླུགས་ཏེ་མི་འདོར། ལྷག་རོལ་ཡང་མི་བྱ། ཤིང་ཏོག་ལ་སོགས་པའི་ཁམ་ནས་དང་ཚིགས་མ་མི་བླུགས། ལག་པ་དང་གདོང་གི་ཆུ་མི་བླུགས། ཁ་གདོང་ལ་སོགས་པ་བཀྲུ་བའི་ཆུ་ལྷུང་བཟེད་དུ་བླུགས་ཏེ་མི་སྤྱད། དགེ་སྤྱོང་བག་མེད་པའི་ཆོས་ཅན་ལ་འདི་མི་བཀྲུ། དགེ་སྦྱོང་བག་མེད་པ་ལ་ལྷུང་བཟེད་མི་གཞག་མི་བཀྲུའོ། །བ་ལང་གི་ལྕི་བ་བྱེ་མ་ཅན་གྱིས་མ་ཡིན། ལྷུང་བཟེད་ཀྱི་རྩི་ལག་གནོད་པའི་ཕྱིར་བ་ལང་གི་ལྕི་བ་བྱེ་མ་དང་འདྲེས་པས་མི་བཀྲུ། ཏེ་པོར་གཤེར་བཞིན་དུ་མི་གཞག །ལྷུང་བཟེད་བཀྲུས་ནས་ཆུ་མ་སྐམས་པར་གཤེར་བཞིན་དུ་སྣོད་དུ་མི་གཞུག །ཕྱལ་བར་ཤིན་ཏུ་བསྐམ་པར་མི་བྱ། ཉི་མའམ་མེའི་འོད་ལ་བརྗོད་དེ་ཤིན་ཏུ་སྐམས་པར་མི་གཞག །རྡོའི་སྟེང་དུ་མི་གཞག །ལྷུང་བཟེད་མི་གཙང་བའི་ཕྱོགས་སུའང་མི་གཞག །ལྷུང་བཟེད་གར་བབ་ཏུ་མི་གཞག །ལྷུང་བཟེད་དེ་དག་ཏུ་རིང་དུ་འང་མི་གཞག །གོང་མ་ལྟ་བུ་ཞིག་ཏུ་གཞག་ཏུ་ཟིན་ནའང་རིང་དུ་མི་གཞག་པར་མྱུར་དུ་བླངས། དེའི་ཕྱིར་གློ་ཕུག་བྱ། ལྷུང་བཟེད་གཞག་པའི་ས་གནས་ཀྱི་ཁང་བུ་ལ་གློ་ཕུག་བྱ། གཙུག་ལག་ཁང་སློང་བ་ན་ཁང་བུར་རོ། །གློ་ཕུག་བྱ་བ་ནི་གཙུག་ལག་ཁང་སློང་བའི་ཚེ་ནས་གློ་ཕུག་བྱའོ། །རྩིག་པ་མི་བརྐོ། །སྔར་གློ་ཕུག་མ་བྱས་པའི་ཁང་བུ་ལ་ཕྱིས་རྩིག་པ་མི་བརྐོ། །དགོན་པ་པས་གཟེབ་ཏུའོ།། དགོན་པ་ན་གནས་པའི་ལྷུང་བཟེད་ཀྱི་གནས་ནི་གཟེབ་ཏུའོ། །ལྕུག་མའམ་ཐ་གུ་ལས་བྱའོ། གཟེབ་བུ་རྒྱུ་ལྕུག་མ་ལས་བྱས་ལ། སྤུན་ཐ་གུས་བྱས་ཏེ་བཏགས། ལྕི་བའམ་འདི་བས་བསྐུ་གཟེབ་བུ་ལ་ལྕི་བའི་སྐྱང་ནུལ་གྱིས་བསྐུ། ཁ་གབ་ཀྱང་དེའི་ཚུལ་དུའོ། །ཁ་གབ་ཀྱང་ལྟག་ཏུ་བཤད་པ་བཞིན་ནོ། །ཐ་གུས་ཤིང་ལ་དཔྱངས་ན་དགེའོ། །གཟེབ་བུ་ཐ་གུས་ཤིང་ལ་གདགས་ཏེ་ས་ལ་མི་གཞག །གཟེབ་བུ་ས་ལ་མི་གཞག་པ་ནི་སེམས་ཅན་འོང་བའི་ཕྱིར་རོ། །འདི་གཞན་དུ་མི་བསྐུར། གུད་དུ་འགྲོན་ལྷུང་བཟེད་ཀྱི་གཞི་གཟེབ་བུ་ཁྱེར་ཏེ་མི་འགྲོ།།
སྣོད་དུ་བཅུག་སྟེ་བསྐུར། །འགྲོ་བའི་ཚེ་ལྷུང་བཟེད་ཉིད་ཀྱི་སྣོད་དུ་བཅུག་སྟེ་བསྐུར། ལག་པས་མ་ཡིན། སྣོད་དུ་བཅུག་ཀྱང་ལག་ན་ཐོགས་ཤིང་མི་བསྐུར། ཕྲག་པ་ལ་བཏགས་ཏེ་མཆན་འོག་ཏུ་བཅུག་ལ་བསྐུར། ལྷུང་བཟེད་སྣོད་དུ་བཅུག་ལ་ཕྲག་པ་ལ་གདགས་ཀྱང་རུང་སེ་རལ་ཀར་བཏགས་ཀྱང་རུང་མཆན་འོག་ཏུ་བཅུག་སྟེ་བསྐུར། ལྷུང་བཟེད་དང་སྨན་དང་བར་བུར་སྣོད་སོ་སོར་གཞག །ལྷུང་བཟེད་ཀྱི་སྣོད་དང་སྨན་གྱི་སྣོད་དང་བར་བུར་གྱི་སྣོད་སོ་སོར་བྱ། བར་བུར་ནི་ཁབ་དང་སྙུང་དང་གྲི་དང་རྒྱུས་པ་དང་སྐུད་པ་དང་ལྷན་པ་ལ་སོགས་པའོ། །བཅང་ངོ་དེ་དག་སྨན་དང་བར་བུར་གྱི་སྣོད་བཅངས་ཀྱང་ཉེས་མེད། མཉམ་པར་ཕྲག་པ་ལ་འཕྱང་ཞིང་གཞག་པར་མི་བྱ། ལྷུང་བཟེད་དང་སྨན་དང་བར་བུར་གྱི་སྣོད་ཐག་པ་མཉམ་པར་གཅིག་གི་སྟེང་དུ་གཅིག་རྔོས་པར་མི་བྱ་སྟེ། རིང་ཐུང་སོ་རྙིལ་དུ་བྱའོ། །སྡུག་བསྔལ་མི་འདོད་ན་ཡངས་པར་མ་ཡིན། ལྷུང་བཟེད་ཀྱི་ཐག་པ་བདེ་བར་འདོད་ན་ཆེ་བའམ་ཆུང་དུ་མ་ཡིན་གྱི་རན་པར་བྱ། འཁུམ་དུ་འོང་གིས་བར་ཕྱིང་བུ་གཞུག །ལྷུང་བཟེད་ཀྱི་ཐག་པ་མི་འཁུམ་པའི་ཕྱིར་བར་ཕྱིང་བུ་གཞག །གནས་པའི་ཕྱིར་སྐབས་སྐབས་སུ་བྱ་རོག་གི་རྗེས་འདྲ་བར་བྱ། ཕྱིང་བུ་ཕན་ཚུན་དུ་མི་འཆུག་པའི་ཕྱིར་བྱ་རོག་གི་རྗེས་འདྲ་བར་སྐུད་པའི་ནན་དུ་བྱ། ལྷུང་བཟེད་མིག་བཞིན་དུ་བསྲུང༌། ལྷུང་བཟེད་ཀྱི་རིམ་གྲོ་བྱ་བ་ནི་བདག་གི་མིག་དང་འདྲ་བར་བྱའོ། །པགས་པ་བཞིན་དུ་སྦྱར་མའོ། །ཆོས་གསུམ་ལ་རིམ་གྲོ་བྱ་བ་ནི་པགས་པ་བཞིན་དུ་བྱའོ། །གོས་ལྷག་མ་རྣམས་ཀྱང་ངོ༌། །གོས་ལྷག་མ་རྣམས་ལ་ཡང་རིམ་གྲོ་བྱ་བ་ཆོས་གོས་གསུམ་ལ་བྱ་བ་བཞིན་ནོ། །བཅོས་པ་ལ་གཡེམ་པར་མི་བྱ། གོས་དང་ལྷུང་བཟེད་ལ་སོགས་པ་ཡོ་བྱད་ཐམས་ཅད་བཙོ་བ་དང༌། བཅེམ་པ་ལ་སོགས་པ་ནན་ཏན་མྱུར་དུ་བསྒྲུབ། །ལྷུང་བཟེད་ཀྱི་ལྷན་པའང་ནན་ཏན་དུ་ཕྱོགས་དབེན་པའོ། །ལྷུང་བཟེད་ལྷན་པ་གླན་དགོས་ན་ཡང་ནན་ཏན་དུ་དབེན་པར་གྱིས་ཤིག །ཆོངས་ཤིག་དགེ་འདུན་གྱི་ལས་བྱ་བའི་ཆ་བྱད། ལྷུང་བཟེད་ཀྱི་ལྷན་པ་གདབ་པའི་ཆ་བྱད་དགེ་འདུན་
གྱིས་བཅངས་ཀྱང་ཉེས་མེད། བུ་ག་ལ་འདི་དག་མི་དགེ་སྟེ་བུ་རམ་རྒྱ་སྐྱེགས་སྤྲ་ཚིལ་ཞོ་ཉེ་ཚོན་མོ་སྟེང་ངོ༌། །ལྷུང་བཟེད་ཀྱི་ལྷན་པའི་རྒྱུ་ནི་མིང་གིས་སྨོས་པ་འདི་རྣམས་ལས་བྱར་མི་རུང་ངོ༌། །དགེ་བ་ནི་ཤུར་ཤུར་པོ་དང་གཟེར་བུ་དང་ལེབ་ལེབ་པོ་དང་ཆུ་སྲིན་གྱི་སོ་ལྟ་བུ་དག་གོ །ལྷན་པར་རུང་བ་ནི་ལྕགས་འདི་རྣམས་ལྟ་བུ་ལས་གང་འོས་པར་གླན་ཆུ་སྲིན་གྱི་སོ་ནི་འདི་འདྲ་བའོ། །ཆུ་སྲིན་གྱི་སོ་གཅིག་ཏུ་ན་ལྷུང་བཟེད་ལྕགས་ཀྱི་སྐུད་པས་བཙེམས་ལ་ཐོ་བས་སྟེང་ནས་གླེབས་ཏེ་བཞག་པ་ལ་བྱ། ལྕགས་སམ་རྡོ་ཕྱེ་ཡང་ངོ༌། །ལྕགས་ཀྱི་ཕྱེའམ་རྡོ་ཕྱེས་བུ་གུ་ཆུང་ངུ་འམ་ལྷན་པའི་མིག་མཚམས་སུ་གླན། ཡུངས་མར་རམས་དང་བསྣལ་སྤྲ་ཚིལ་འདྲ་བར་ལྕགས་སམ་རྡོ་ཀུ་རུ་བིན་དས་སོ། །ལྕགས་ཕྱེའམ་རྡོ་ཕྱེ་ཇེ་ཟེར་ཡུངས་མར་བསྲེས་ཏེ་བསྣལ་ཏེ་སྤྲ་ཚིལ་འདྲ་བར་འགྱུར་བའི་ཕྱིར་ལྕགས་ཀྱི་གར་བུ་དང་རྡོ་ཀུ་རུ་བིན་དས་བཏབ་ཅིང་བསྣལ། དྲོན་པོ་ལ་གླན། དེ་ནས་སྤྲ་ཚིལ་འདྲ་བ་དེས་ལྷུང་བཟེད་དྲོན་པོ་ལ་གླན། གྲོ་བས་གཡོགས་ལ་འཇི་བས་བསྐུས་ཏེ་རན་པར་བསྲེག་གླན་ནས་སྟེང་དུ་དྲོ་བས་གཡོགས་ལ་འཇི་བས་བསྐུས་ཏེ་སྐམས་པའི་ཚད་དུ་རན་པར་བསྲེག །ཡུངས་མར་གྱིས་བདར། སྐམས་ནས་ཡུངས་མར་གྱིས་བསྐུས་ལ་འཇམ་པོར་བྱ་བའི་ཕྱིར་ལྕགས་སམ་རྡོ་ཀུ་རུ་བིན་དས་བ་དར། བུ་རམ་དང་འཇི་བས་ནི་ཁམ་པའི་ལའོ། །ཁམ་པའི་ལྷུང་བཟེད་ལ་ནི་ལྷན་པ་བུ་རམ་དང་འཇི་བས་བསྲེ་སྟེ་གླན། སྤྱོད་བཞིན་ན་ནི་ཟླ་བ་དྲུག་གི་མཐར་བསྲེག །ལྷུང་བཟེད་སློང་བ་ཁ་ཟས་ཟ་བར་སྤྱོད་ན་ཟླ་བ་དྲུག་ཅིང་བསྲེག་གོ །མི་སྤྱོད་ཅིང་ཁ་དོག་མ་བྱིད་ན་མ་བསྲེགས་ཀྱང་ཉེས་མེད་དོ། ཁམ་པའི་ན་ནི་ཟླ་བ་ཕྱེད་ཅིང་ངོ༌། །ཁམ་པའི་ལྷུང་བཟེད་སྤྱོད་བཞིན་ན་ཟླ་བ་ཕྱེད་ཅིང་བསྲེག་འོན་ཏེ་དབྱར་ན་བཀྲུ་ཞིང་དགོས་པའི་སྐབས་སྐབས་སུ་བསྐུ་བར་སྦྱར། དབྱར་ལྷུང་བཟེད་བཙའ་མི་ཞུགས་པའི་ཕྱིར་སྤྱོད་པའི་སྐབས་སུ་སྣུམ་གྱིས་ཉིན་རེ་ཞིང་བསྐུ་མི་སྤྱོད་ནའང་བཙའ་འཇུག་ཏུ་བྱེད་ན་བཀྲུ་ཞིང་སྣུམ་གྱིས་བསྐུ། བསྲེག་པ་འདི་ལྟར་རོ། །ལྷུང་བཟེད་བསྲེག་པའི་ཐབས་ནི་འོག་ནས་འབྱུང་བ་ལྟར་བྱའོ། །དེའི་ཕྱིར་སྒྲོ་མོ་ཆོངས་ཤིག །ལྷུང་བཟེད་
བསྲེག་པའི་ཕྱིར་རྫ་མ་བཅག་པའི་ཆ་སྤྱད་དང་རྫ་མ་བཅངས་ཀྱང་ཉེས་མེད། དེར་གྲུབ་པའམ། རྫ་མ་ནི་ལྷུང་བཟེད་བསྲེག་པར་ཕྱེད་ཀར་བྱས་ཀྱང་རུང༌། གྱོ་མོ་ལས་སོ། །རྫ་མ་ཉིད་ལས་འཕྲལ་ལ་བརྟོལ་ཏེ་བྱས་ཀྱང་རུང་ངོ༌། །རྫ་མ་བཅག་པ་ནི་ཐལ་བས་བཀང་སྟེ་བཅག་ན་དགེའོ། །རྫ་མ་ཉིད་ལས་འཕྲལ་ལ་བཅག་པ་ནི་ཐལ་བས་བཀང་སྟེ་བཅག་ན་རུང་ངོ༌། །བཅང་ངོ་དེ་རྫ་མ་བཅག་པའི་ཆ་སྤྱད་དང་རྫ་མ་བཅངས་ཀྱང་ཉེས་མེད། དུ་བ་མི་འབྲོས་པར་དེས་གཡོགས། ལྷུང་བཟེད་བསྲེག་པའི་དུ་བ་མི་འབྲོས་པར་བྱ་བའི་ཕྱིར་རྫ་མས་སྟེང་ནས་དགབ། ཕུབ་མ་དང་འཇི་བའི་སྐྱང་ནུལ་གྱིས་བསྐུ། རྫ་མའི་ཕྱི་རོལ་ཕུབ་མ་དང་འཇི་བས་བསྲེས་ཏེ་སྐྱང་ནུལ་བྱུག །ཡུངས་མར་གྱི་ཚིགས་མ་འམ་བ་ལང་གི་ལྕི་བས་ནང་བསྐུ། རྫ་མའི་ནང་ཡུངས་མར་གྱི་ཚིགས་མ་འམ་བ་ལང་གི་ལྕི་བ་གང་འབྱོར་པས་བསྐུ། སྐམས་པར་གྱུར་ནའོ། །རྫ་མ་ལ་སྐྱང་ནུལ་དུ་བསྐུས་པ་སྐམས་པར་གྱུར་ནས་ཁས་དབུབ། །སའི་ལས་ཀུན་བྱས་ནས་ཕུབ་མ་བཏིང་སྟེ་དུ་བ་བཟང་པོར་འབྱུང་བའི་ཡུངས་མར་གྱི་ཚིགས་མ་ལ་སོགས་པའི་རྫས་ཀྱིས་བཀྲམ་ལ་ཁ་སྦུབས་སྟེ་གཞག ། ས་རྐོ་བ་ལ་སོགས་པ་བྱས་ཟིན་ནས་གཞིར་ཕུབ་མ་བཏིང་སྟེ་དུ་བ་བཟང་བར་བྱ་བའི་ཕྱིར་ཡུངས་མར་གྱི་ཚིགས་མའམ་ར་རུ་དང༌། ཏར་ག་དང་ཁབ་ཙེག་དང་བེའུ་ཞོ་འཐུང་བའི་རྟུག་པ་ལ་སོགས་པས་ཕུབ་མའི་སྟེང་དུ་དགྲམ། ལྕི་པའམ་སོག་མས་གཡོགས་ཏེ་སྤར། རྫ་མའི་ཕྱི་རོལ་དུ་ལྕི་བྲུལ་དང་སོག་ཕུབ་དང་ཤིང་ལོ་ལ་སོགས་པས་གཡོགས་ཏེ་མེ་བུད། ཏེ་པོར་གྲངས་ནས་བླངས། མེ་ཤི་ནས་ཏེ་པོར་གྲངས་ནས་ལྷུང་བཟེད་དབྱུང༌། ཁ་དོག་མ་གྲུབ་ཀྱི་བར་དུ་བཟླས། ལྟག་མ་ལྟར་ལན་གཅིག་བསྲེགས་པས་ཁ་དོག་མ་ཞེན་ནམ་ཁ་དོག་ཞེན་ཞེན་གྱི་བར་དུ་བསྲེག །བཀྲུས་ཤིང་བཀྲུས་ཤིང་གཞག །ཁ་དོག་མ་གྲུབ་སྟེ་བསླས་པའི་ཚེ་ལྷུང་བཟེད་བཀྲུས་ཤིང་བཀྲུས་ཤིང་གཞག །ཐན་ཀོར་དུ་སྲོག་ཆགས་ལ་སྙིང་རྗེ་བའི་ཕྱིར་བྱུག་ཅིང་དགབ། ལྷུང་བཟེད་བསྲེགས་པའི་ཐན་ཀོར་ཟང་ཟིང་དང་སྲོག་ཆགས་ལ་འཁྲི་
ཞིང་འང་སྙིང་རྗེ་བའི་ཕྱིར་ཕྱག་དར་དང་ཆག་ཆག་བྱ། མཚན་གྱི་འཁོར་དུ་སྐྱེས་ན་ལོ་གྲངས་མི་ཤེས་ཀྱང་བསྙེན་པར་རྫོགས་པར་ཆད་པར་བྱ། བསྙེན་པར་རྫོགས་པར་འདོད་པ་ཆུང་ངུར་ཕ་མས་བོར་བ་ལྟ་བུ་ལོ་གྲངས་མི་ཤེས་ན་ཕོ་མཚན་མོ་མཚན་ཁོ་ར་ཁོར་ཡུག་ཏུ་སྤུ་སྐྱེས་ན་ལོ་ཉི་ཤུ་ལོ་ལོན་པའི་ཐང་དུ་བསྙེན་པར་རྫོགས་པར་བྱས་རུང་བུད་མེད་བག་མ་བྱས་པ་ནི་སྤུའི་ཚད་དུ་མི་བྱའི་ལོ་བཅུ་གཉིས་ལོན་པ་ཡན་ཆད་བསྙེན་པར་རྫོགས་པར་རུང་ངོ༌། །སྒྱུས་བརྟག །གསང་བའི་སྤུ་བལྟ་བ་ནི་མི་སྐྱེངས་པའི་ཕྱིར་སྒྱུ་དང་ཐབས་ཀྱིས་བརྟག་ཅིང་བལྟ་ཐབས་ནི་འོག་ནས་འཆད། བ་ལང་སོའམ་གོས་གདང་མཐོན་པོ་ལ་སོགས་པ་ལས་ནོར་དག་དབོག་པར་རོ། །མཚན་གྱི་སྤུ་སྒྱུས་བརྟག་པ་ནི་གོས་གདང་སྐས་ལ་སོགས་པ་ལ་གོས་དག་སྐྱེལ་ཅིང་དབོག་པར་བཅུག་ལ་འོག་ནས་བལྟའོ། །བསྙེན་པར་རྫོགས་པར་འདོད་པ་ཤིང་ལ་འཛེག་ཏུ་མི་གཞུག །དགེ་སྦྱོང་ཞག་ལྔ་དྲུག་ཚུན་ཆད་དུ་བསྙེན་པར་རྫོགས་པར་བྱེད་པ་ཞིག་ན་ཤིང་ལ་འཛེག་ཏུ་མི་གཞུག །དགེ་སྦྱོང་བསྙེན་པར་རྫོགས་པར་འདོད་པ་ཞིག་དྲུག་སྡེས་ཤིང་ལ་མེ་ཏོག་ཐུར་བཅུག་པ་ལས་ཤིང་ལས་ལྷུང་སྟེ་རྐང་པ་ཆག་པ་ལས་བཅས། མཚམས་ཀྱི་ཕྱི་རོལ་དུ་མི་མངག །དགེ་སྦྱོང་བསྙེན་པར་རྫོགས་པའི་ཁར་འབྲོས་པའི་ཕྱིར་མཚམས་ཀྱི་ཕྱི་རོལ་དང་ལམ་རིང་པོར་མི་མངག །མིག་རྒྱང་བསྐྱེད་དེ་མངོན་པར་ཐལ་མོ་སྦྱར་ལ་གཞག །ཁྲིམས་རྫོགས་པར་བྱེད་པའི་ཚེ། མིག་རྒྱང་དུ་མི་སྣང་བར་མི་གཞག་གི་དགེ་འདུན་ལས་བྱེད་པ་སྣང་ཞིང་སྒྲ་མི་ཐོས་པ་ཙམ་དུ་མངོན་པར་གཞག །ཁྱིམ་མི་ལ་གནས་མི་བསྒོ། །ཁྱིམ་པ་ལ་སྡངས་ཤིང་འདྲོགས་པའི་ཕྱིར་ཤིང་དྲུང་བ་དང་སློང་མོ་པ་དང་ཚེམ་བུ་བ་དང༌། སྨན་བསྐུས་པ་བཞི་མི་བསྟན། བསྙེན་པར་རྫོགས་མ་ཐག་ཏུ་མི་བསྒོ་བར་མི་བྱ། བསྙེན་པར་རྫོགས་མ་ཐག་ཏུ་སཱུ་ཏྲ་ལྟག་མའི་གནས་བཞི་བསྒོ་ཞིང་བསྟན་པར་བྱ། གང་དུ་ཡང་གནས་མེད་པར་དེར་གསོ་སྦྱིན་གྱི་བར་དུ་བསྡད་པ་དང་ཚུལ་འཇུག་པར་མི་བྱ། གནས་བརྟན་ཤིའམ་གུད་དུ་སོང་ངམ་ཁྱིམ་པར་བབ་ན་
གནས་མེད་པར་བསྡད་དུ་མི་རུང་སྟེ་གསོ་སྦྱིན་དང་ཚུལ་ནས་འབྱུང་བ་དང༌། ཚུལ་དུ་འཇུག་པ་ལའང་མི་བསྡད་པར་གནས་བརྟན་ཚོལ་དུ་འགྲོའོ། །ཚུལ་སྔ་མར་ན་ནི་མི་བསྲུང༌། ཚུལ་སྔ་མར་ཞུགས་ཟིན་ལ་གནས་བརྟན་མེད་པར་གྱུར་ན་ཡང་ཚུལ་དྲལ་ཏེ་གནས་བརྟན་ཚོལ་དུ་འགྲོའོ། །ཕྱི་མ་ཟླ་བ་གཉིས་ལས་ལྷག་པར་རོ། །ཚུལ་ཕྱི་མར་ཞུགས་པ་ལས་གནས་བརྟན་མེད་པར་གྱུར་ན་ཟླ་བ་གཉིས་ཀྱི་བར་དུ་ཚུལ་བསྲུངས་ལ་གནས་བརྟན་ཚོལ་དུ་འགྲོའོ། །དངོས་པོ་དང་ལས་དང་གཡོག་དག་སྤང་བར་དེ་ལ་ཁས་བླངས། དངོས་པོ་དང་ཞེས་པ་ནི་གནས་བརྟན་རྙེད་དེ་སྤྱན་འདྲེན་པའི་ཚེ་ཁང་བུ་བཟང་བ་སྟེ་དབུལ་བར་ཁས་བླངས་ལས་དང་ཞེས་པ་ནི་གནས་བརྟན་དག་གི་ལས་སུ་མི་གཞུག་པའོ། །དགེ་འདུན་ཕལ་མོ་ཆེ་ཞིག་གནས་གནས་པ་ལས་གནས་བརྟན་མེད་པར་གྱུར་ན་ཟད་པར་འདོང་མི་དགོས་ཀྱི། གཅིག་གམ་གཉིས་ཀྱིས་བཙལ་ཏེ་རྙེད་ན་འདི་རྣམས་ཁས་བླངས་ལ་སྤྱན་དྲང༌། གཡོག་དག་སྤང་བར་དེ་ལ་ཁས་བླངས་ཞེས་པ་ནི་གནས་བརྟན་གྱི་གཡོག་ཅིག་འོངས་ན་དེ་ཡང་ལས་སུ་མི་གཞུག་པ་དང་ཁྱིམ་པ་ལ་གནས་བརྟན་གྱི་གཡོག་སྦྱིན་པ་དང༌། དགེ་སློང་གི་ནང་ནས་གཅིག་བསྐོ་བར་ཁས་བླངས། མེད་ན་རྒན་རབས་ཀྱི་ལྟར་ལའང་དྲི། གནས་བརྟན་མེད་ན་ཚུལ་སྔ་མ་དྲལ་ཏེ་བཙལ་ན་མ་རྙེད་པ་ལ། ཚུལ་ཕྱི་མར་ཞུགས་ནས་ཡང་མེད་པར་གྱུར་པ་དང་ཚུལ་སྔ་མ་དྲལ་ཏེ་སོང་སོང་བ་ལས་གནས་བརྟན་མ་རྙེད་དེ་ཚུལ་ཕྱི་མར་ཞུགས་ནས་ཟླ་བ་གཉིས་ཀྱི་བར་དུ་འདུག་པའི་ཚེ་ནི་བདག་ཅག་འཁོད་པའི་ནང་ནས་རྒན་པ་མཁས་པ་ལ་དྲི། ཡོད་ཀྱང་ཉེ་གནས་སུ་ནིའོ། །གནས་བརྟན་ཡོད་དུ་ཟིན་ཀྱང་གནས་བརྟན་ཉིད་ལ་ཆད་པ་བྱུང་བའི་ཚེ་དང་དགེ་སྦྱོང་མང་དུ་ཡོད་ན་དེ་གནས་སུ་བཅོལ་ཏེ་དབྱེ། མ་དྲིས་ཀྱི་བར་དུ་དེ་ལྟ་བུའི་རིགས་ལ་ལས་མི་བྱ་དེས་སམ་བདག་གིས་སོ། །དགེ་སྦྱོང་ངོ་མི་ཤེས་པའམ་གསར་དུ་འོངས་པ་ལྟ་བུ་ལ་བདག་གི་མཁན་པོ་ལ་མ་དྲིས་ཀྱི་བར་དུ་བདག་གིས་ཀྱང་ཁོ་བོའི་ལས་མི་བྱ། བདག་ལའང་ལས་བྱེད་དུ་མི་གཞུག་གོ །མཁན་པོ་ལ་དྲི་དགོས་
པ་ནི་རྒྱུས་མི་ཤེས་པ་དེ་ཡོན་ཏན་དང་ལྡན་ནམ་མི་ལྡན་པ་དང་ཡོན་ཏན་དང་མི་ལྡན་ཡང་བདག་ལ་གནོད་པར་འགྱུར་བ་ལྟ་བུ་ཡོད་ན་གཡོག་བྱ་དགོས་པའི་སྐབས་ལྟ་བུ་མཁན་པོ་ཤེས་པའི་ཕྱིར་དྲིའོ། །ཉེས་མེད་པ་ནི་མེད་དེ་ཚོལ་བར་ཞུགས་པར་གནས་པར་རིགས་པར་གནས་མེད་པར་གནས་ཀྱང་ངོ༌། །གནས་བརྟན་མེད་པའི་བར་དུ་ནི་གནས་བཅའ་བའི་རིགས་པའི་དགེ་སློང་རྣམས་གནས་བརྟན་ཚོལ་གྱི་བར་དུ་མ་དྲིས་ཀྱང་ཉེས་མེད་དོ། །ཅི་སྲིད་པ་བར་དུ་མ་དྲིས་ཀྱང་ཉེས་པ་མེད་པ་ནི་འོག་ནས་འཆད་དོ། །ཞག་ལྔ་ཟད་ཀྱི་བར་དུའོ། །གནས་བརྟན་མེད་དེ་ཚོལ་བར་ཞུགས་པའི་ཚེ། མ་དྲིས་ཀྱང་ཉེས་མེད་པ་ནི་ཞག་ལྔའི་བར་དུ་ནི་གནང་ངོ༌། །དེ་ཕན་ཆད་ཀྱང་རྙེད་ཀྱང་ཉེས་པར་འགྱུར་རོ། །རྙེད་པའམ་རིགས་སོ། །ཞག་ལྔའི་བར་དུ་ནི་ཁ་ཟས་དང་ནོར་ཟས་དག་རྙེད་དེ་བླངས་ཀྱང་ཉེས་མེད་དེ་བརྟགས་པའོ། །འོངས་པའི་ཉི་མ་གཉིས་སམ་གསུམ་ངལ་བསོས་ཏེ་གནས་ཟུང་ཤིག །གནས་བརྟན་སྤྱན་དྲངས་པ་ནི་མ་ཡིན་གྱི་གུད་ནས་གསར་དུ་འོངས་པ་ཞིག་ནས་བརྟག་པའི་ཕྱིར་ཞག་གསུམ་གྱི་བར་དུ་ངལ་བསོ་ཞིང་ཚུལ་བལྟ་སྟེ་གནས་བརྟན་དུ་རུང་ན་གནས་བཅའ། བདག་གནས་བརྟན་ཚོལ་དུ་སོང་སོང་སྟེ་རྙེད་པའི་གནས་བརྟན་རྒྱུས་མི་ཤེས་པ་ཞིག་ནའང་ཞག་གསུམ་གྱི་བར་དུ་བརྟག་སྟེ་གནས་གཟུང༌། ཞག་གཅིག་གི་ཕྱིར་ཡང་མ་ཡིན། གང་དུ་ཡང་རུང་སྟེ་བདག་ཀྱང་རུང་གནས་བརྟན་ཀྱང་རུང་ཞག་གཅིག་ལས་རིང་དུ་མི་འདུག་པ་ཞིག་ན་གནས་མི་གཟུང་མི་རིགས་པའི་ཕྱིར་རོ། །གནས་བཅས་པ་མ་རྙེད་ན་གཞན་ལའང་དྲི། བདག་གི་གནས་བརྟན་དྲོའི་ལམ་ཕན་ཆད་གཅིག་ཏུ་སོང་སྟེ་སླར་འོངས་པ་ཞིག་ན་དེའི་བར་དུ་གནས་བརྟན་གཞན་སུ་ཡོད་པ་ལ་དྲི། གནས་བརྟན་མེད་ན་བདག་ཅག་གི་ནང་ན་རྒན་ཞིང་ཆོས་མཁས་པ་ལ་དྲིའོ། །ཉེས་མེད་པ་ནི་ལས་བླངས་བ་ལས་གཞན་དེར་འོངས་ན་མ་དྲིས་ཀྱང་ངོ༌། །ལས་ཤིག་བྱ་བར་མཁན་པོ་ལ་དྲིས་ཏེ་སོང་སོང་བ་ལས་ཚུལ་གྱིས་ལས་བྱ་དགོས་པ་ཞིག་འཕྲལ་ལ་འབྱུང་བ་དང༌། དགེ་འདུན་དང་གསར་པོ་རྒན་པོས་འཕྲལ་ལ་བསྒོ་བ་ནི་མཁན་པོ་ལ་མ་དྲིས་པར་བྱས་ཀྱང་ཉེས་མེད་དོ།།
གར་བབ་བབ་ཀྱི་གན་དུ་མ་ཡིན། གནས་བརྟན་དུ་བཟུང་ཞིང་བཙལ་བ་ནི་ལོ་གྲངས་ཀྱི་གནས་བརྟན་དུ་ཆུད་ཀྱང་བབ་བབ་ཏུ་མི་བཟུང་ངོ༌། །ཅི་ལྟ་བུ་ལས་གཟུང་བ་འོག་ནས་འཆད། ཁྲིམས་དང༌། གནས་བརྟན་བརྟག་པ་ནི་ཚུལ་ཁྲིམས་དང་ལྡན་ནམ་མི་ལྡན་པ་དང༌། ཤེས་པ་དང༌། ཆོས་ལྔ་དང་ལྡན་ནམ་མི་ལྡན་པ་དང༌། འཁོར་དང༌། གནས་བརྟན་གྱི་འཁོར་སྔ་ན་ཡོད་པ་སྲུན་ནམ་མི་སྲུན་པ་དང༌། སྐྱོན་ཡོད་དམ་མེད་པ་དང༌། སྐྱོང་བ་དག །གནས་བརྟན་ཉིད་སློབ་མ་ལ་སྟོན་ཅིང་སྐྱོང་ངམ་མི་སྐྱོང་བ་དང༌། ཡོ་བྱད་སྦྱོར་རམ་མི་སྦྱོར་གཞན་གནོད་པ་བྱེད་སྐྱབས་བྱེད་དམ་མི་བྱེད་པ་དང༌། དྲི་བ་ལ་སོགས་པས་ཤེས་པར་བྱ་སྟེ། འདི་རྣམས་ལྟ་བུ་དང་ལྡན་ནམ་མི་ལྡན་གཞན་དག་ལ་དྲིས་ཤིང་བརྟག་སྟེ། རྟོགས་ཤིང་ཤེས་པར་བྱས་ནས་རུང་བར་རྟོགས་ན། སྡོམ་བ་བཞིན་དུ་གཟུང༌། གནས་བཅའ་བ་ནི་སྡོམ་པ་བཞིན་དུ་གནས་བཅའ་བ་སྔགས་ལན་གསུམ་དུ་བཟླས་ཏེ་གཟུང༌། རྐང་པ་གཉིས་ཀྱིས་ལག་པ་གཉིས་ཀྱི་སྟེང་དུ་མནན་ལའོ། །གནས་བཅས་པའི་སྔགས་འདེབས་པའི་ཚེ་གནས་བརྟན་གྱི་རྐང་པ་གཉིས་ཀྱི་འོག་ནས་ལག་པ་གཉིས་ཀྱིས་བཟུང་སྟེ། སྔགས་བྱ། བརྟགས་ཏེ་སྦྱིན། གནས་བརྟན་གྱིས་ཀྱང་སློབ་མ་གནས་འཆར་འཇུག་པ་ནི་གཡོ་སྐྱོན་དང་ཚུལ་ལ་སོགས་པ་ལྡན་ནམ་མི་ལྡན་པ་ལྟག་ཏུ་གནས་བརྟན་ལ་བརྟག་པ་བཞིན་དུ་བརྟག་སྟེ་གནས་འཆར་གཞུག །ཕ་དང་བུར་འདུ་ཤེས་གཞག །གནས་བཅའ་ནས་གནས་བརྟན་ནི་ཕའི་གཟུགས་བརྙན་དུ་བལྟ་སློབ་མ་ནི་བུའི་གཟུགས་བརྙན་ཡིན་པར་འདུ་ཤེས་གཞག །དེར་ན་མཁན་པོ་བས་གནས་བ་སྟེ་དེ་བས་ན་དེར་མི་གཟུང༌། བདག་གི་མཁན་པོ་ལ་ནི་ཐོག་མར་མཁན་པོར་གསོལ་ཏེ་མཁན་པོར་གྱུར་བའི་ཚེ་གནས་བཅས་པ་ཡིན་པས་ན་ཕྱིས་གནས་བཅའ་མི་དགོས་སོ། །བླངས་པའི་གནས་གཞིག་པའི་ཕྱིར་གཉིས་ཀས་ཕྱལ་བར་གྱུར་ནའོ། །གནས་བཅས་པ་ལས་གནས་ཞིག་པར་འགྱུར་བ་ནི་གནས་བརྟན་གྱིས་ཀྱང་བདག་གི་སློབ་མ་གནས་འཆར་མི་གཞུག་ཅིང་ཡོངས་བཏང་བར་བསམས་སློབ་མས་ཀྱང་ཡོངས་བཏང་བར་བསམས་
ན་གནས་ཞིག་སྟེ་མེད་པར་གྱུར། གཅིག་གིས་བཏང་སྟེ་གཅིག་གིས་མ་བཏང་ན་ཞིག་པར་མི་འགྱུར་རོ། །མཁན་པོ་མེད་པར་འདུས་ན་གར་དགའ་བར་ཚོར་ཅིག །བདག་གིས་མཁན་པོ་མེད་ལ་གནས་བཅས་པའི་སློབ་དཔོན་མང་པོ་ཞིག་ཅིག་ཅར་འདུས་ན་གང་དགའ་བ་ལ་གཞར་ཞིང་དྲི་སྔ་དྲོ་དང་ཕྱི་དྲོ་རེ་རེ་ལ་དྲིས་ཀྱང་ཉེས་མེད་དོ། །དེ་ཉིད་ན་དེ་ལའོ། །མཁན་པོ་དང་གནས་བཅས་པའི་སློབ་དཔོན་ཀུན་འདུས་ན་མཁན་པོ་ལ་དྲིའོ། །དགེ་སྦྱོང་དང་རྫོགས་པའི་མཁན་པོ་གཉིས་ཚོགས་ན་རྫོགས་པའི་མཁན་པོ་ལ་དྲིའོ། །མཁན་པོ་མཐོང་མ་ཐག་ཏུ་སྟན་ལས་འཕགས། མཁན་པོ་ལམ་ཉེ་རིང་གང་ནས་འོང་ཡང་རུང་ལན་མང་དུ་འགྲོ་ཞིང་འདུག་ཀྱང་རུང་སྟེ་བདག་དགེ་བ་སྤྱོད་ཀྱང་རུང་སྟན་ལས་འཕགས་དགེ་བ་སྤྱོད་པ་ལ་ནི་མཁན་པོས་ཀྱང་འདུག་ཅེས་ཟེར་བའི་རིགས་ཏེ་ཟེར་ན་འདུག་ཀྱང་ཉེས་མེད་མཁན་པོ་བཞིན་དུ་སློབ་དཔོན་ལྔ་ལ་ཡང་བྱའོ། །ཉིན་གཅིག་ལ་ལན་གསུམ་གནས་པའི་གན་དུ་གཙུག་ལག་ཁང་དེ་ན་གནས་ན་འགྲོའོ། །གཙུག་ལག་ཁང་མཚམས་གཅིག་གི་ནང་ན་མཁན་པོ་དང་ལྷན་ཅིག་ཏུ་གནས་ན་ཉིན་གཅིག་ལ་ལན་གསུམ་དུ་ཞུ་ཞིང་དྲི། ལམ་རིང་ངམ་མཚམས་ཐ་དད་ན་གནས་པ་ཅི་ལྟར་དྲི་བ་ནི་འོག་ནས་འཆད། དགོན་པ་ལ་གནས་ཏེ་རྒྱང་གྲགས་ཙམ་ན་ཉིན་ཏེ། མཁན་པོ་དང་སློབ་མ་གཉིས་ཀ་དགོན་པ་ན་གནས་ཏེ་བར་རྒྱང་གྲགས་ཙམ་གྱིས་ཆོད་ལ་དགོན་པ་ཉིད་ཀྱི་མཚམས་བཅད་པའི་ནང་ཡིན་ན་ཉིན་རེ་ཞིང་ལན་རེ་ཞུས་ཀྱང་ཉེས་མེད། དེ་བཞིན་དུ་གཙུག་ལག་ཁང་གི་མཚམས་ནང་རྒྱང་གྲགས་ཙམ་ལ་ཡང་ཉིན་རེ་ཞིང་ཞུ་དགོན་པ་དང་གཙུག་ལག་ཁང་གི་མཚམས་བཅད་པ་ནི་གཙུག་ལག་ཁང་གི་རང་མཚམས་ཀྱིས་བརྩི། རྒྱང་གྲགས་སུ་མི་གནང་གཅིག་དགོན་པ་ལ་གནས་ལ་གཅིག་མཚམས་ཀྱི་ནང་ན་གནས་ན་བར་མཚམས་ཀྱིས་ཆོས་པས་མི་གནང༌། རྒྱང་གྲགས་ལྔ་ཙམ་ན་ཞག་ལྔ་དྲུག་ནའོ། །གཙུག་ལག་ཁང་ངམ་དགོན་པའི་མཚམས་གཅིག་གི་ནང་ཡིན་ན་མཁན་པོ་དང་སློབ་མའི་བར་རྒྱང་གྲགས་ལྔ་ཙམ་གྱིས་ཆོད་ཀྱང་ཞག་ལྔ་དྲུག་ཅིང་ཞུས་ཀྱང་ཉེས་མེད། དགོན་པ་དང་གཙུག་ལག་ཁང་གི་མཚམས་ཐ་དད་དམ།
མཚམས་མེད་པ་ནི་མི་གནང་ངོ༌། །དཔག་ཚད་ཕྱེད་དང་གསུམ་ན་ནི་གསོ་སྦྱིན་གྱི་ཚེའོ། །དགོན་པའམ་གཙུག་ལག་ཁང་གི་མཚམས་གང་ཡང་རུང་སྟེ་མཚམས་གཅིག་གི་ནང་ན་ཡིན་ན་མཁན་པོ་དང་སློབ་མའི་བར་རྒྱང་གྲགས་ཕྱེད་དང་གསུམ་ཙམ་གྱིས་ཆོད་ཀྱང་ཟླ་བ་ཕྱེད་ཅིང་དྲིས་ཀྱང་ཉེས་མེད། གནས་བཅས་པ་ཆད་པས་བཅད་པར་རིགས་ན་ཡང་ཆད་པས་མི་བཅད་པར་མི་བྱ། གནས་བརྟན་གྱིས་བདག་ལ་གནས་པའི་སློབ་མ་རྣམས་ཉེས་པ་ཞིག་སྤྱོད་དེ་ཆད་པས་བཅད་པའི་རིགས་ནའང་ཆད་པས་བཅད་པར་བྱའོ། །ཉེས་པ་བྱེད་པ་ལ་ཆད་པས་ཅིས་བཅད་པ་ནི་འོག་ནས་འཆད། ཆད་པ་ནི་ལྔ་སྟེ། ཆད་པས་བཅད་པ་རྣམ་ལྔ་ཡོད་དེ་ལྔ་ནི་དམིགས་ཀྱིས་འོག་ནས་འཆད་པ་ཡིན། མི་སྨྲ་བ་དང་མི་བསྟན་པ་དང་གཡོག་དང་ཆོས་དང་ཁ་ཟས་མི་སྤྱད། མི་སྨྲ་ཞེས་པ་ནས་གཡོག་དང་ཞེས་པའི་བར་དུ་ནི་མི་སྨྲ་བ་དུས་གསུམ་དུ་ཞུ་བ་ལ་བག་ཡོད་པར་གྱིས་ཤིག་ཅེས་ལན་མི་སྦྱིན་པ་དང་མི་བསྟན་པ་ནི་ཆོས་དང་ཁ་དོག་དང་བསམ་གཏན་ལྟ་བུ་མི་བསྟན་ཏེ། འདི་གཉིས་ལ་ཆད་པ་གཅིག་རྐང་པ་འཁྲུ་བ་དང་ལུས་ཉེད་པ་ལ་སོགས་པ་གཡོག་བྱེད་དུ་མི་གཞུག་པ་དང་ཆོས་དང་ཞེས་པ་ནི་ལས་བརྒྱ་རྩ་གཅིག་ལྟ་བུ་གང་བྱེད་ཀྱང་རུང་ལས་སུ་མི་གཞུག་པར་དབྱུང༌། ཁ་ཟས་མི་སྤྱད་ཅེས་པ་ནི་ཁ་ཟས་དང་གོས་བདག་གིས་ཀྱང་མི་སྦྱིན་སློབ་མ་འབུལ་ནའང་མི་བླང་བ་དང་འདི་གཉིས་ལ་ཆད་པ་གཅིག །དགེ་བའི་སྐྱབས་བརྩམས་པ་བཅད་པ་དང་གནས་དགག་པའོ། །དགེ་བའི་སྐྱབས་བརྩམས་པ་བཅད་པ་ཞེས་པ་ནི་སློབ་མ་ཅེ་ཏི་རྩིག་པ་དང་ཡི་གེ་ཀློག་པ་ལ་སོགས་པ་དགེ་བ་སྤྱོད་པ་ལ་མ་སྤྱོད་ཅིག་ཅེས་ཀུན་དུ་བཅད་དེ་སྤྱོད་དུ་མི་གཞུག་པ་དང་གནས་དགག་པའོ་ཞེས་པ་ནི་དེ་ལ་མ་གནས་པར་གུད་དུ་སོང་ཤིག་ཅེས་བསྐྲད་པ་དང་ཆད་པ་འདི་རྣམ་ལྔ་རིམ་བཞིན་དུ་གཅིག་གིས་མ་འགྱུར་ན་གཅིག་གིས་བཅད་དོ། །རིགས་པ་ནི་མ་དད་པ་དང་ལེ་ལོ་ཅན་དང་ངག་དཀའ་བ་དང་བསྟི་སྟང་མེད་པ་དང་སྡིག་པའི་གྲོགས་པོ་ཅན་ནོ། །རིགས་པ་ནི་ཞེས་པ་ནི་ཆད་པ་རྣམ་ལྔས་རིམ་པས་བཅད་པར་རིགས་པ་ནི་མིང་གིས་སྨོས་པ་འདི་ལྔའོ། །མ་དད་པ་དང་
ཞེས་པ་ནི་དཀོན་མཆོག་གསུམ་ལ་དད་པ་ཁོང་ནས་མེད་པའོ། །ལེ་ལོ་ཅན་དང་ཞེས་པ་ནི་དགེ་བ་ལ་མི་སྤྱོད་ཅིང་མི་དགེ་བ་ལ་སྤྱོད་པ་དང་ཟ་ཞིང་ཉལ་ལ་ཕྱི་རོལ་སྐྱེལ་དུ་འགྲོ་བའོ། །ངག་དཀའ་བ་དང་ཞེས་པ་ནི་དགེ་བ་དང་ལས་བསྐོས་པ་ལ་སླར་འཁྱིལ་ཞིང་མང་དུ་བཟློག་པ་དང་དམོད་མོ་དང་ཚིག་རྩུབ་པོར་སྨྲ་བའོ། །བསྟི་སྟང་མེད་པ་དང་ཞེས་པ་ནི་དཀོན་མཆོག་གསུམ་དང་མཁན་པོ་དང་བླ་མ་ལ་བསྟི་སྟང་མེད་ཅིང་འགྱིང་བ་དང་ཚུལ་ཁྲིམས་སྦོམ་པོ་བསྲུངས་པས་ཆོག་གི་ཕྲ་མོ་ལ་བསྲུངས་ཅི་དགོས་ཞེས་མ་གུས་པ་དང༌། སྡིག་པའི་གྲོགས་པོ་ཅན་ནོ་ཞེས་བྱ་བ་ནི་སྲོག་གཅོད་པ་དང་རོལ་མོ་མཁན་དང་ཆང་འཚོང་བ་དང༌། རྐུན་མ་དང་འཕྱོན་མ་ཅན་དང་བསྟེན་པ་དང་འདི་རྣམས་ལྔ་སྟེ་རིམ་བཞིན་དུ་ཆད་པ་ལྔས་བཅད་དོ། །ཆད་པས་གཅོད་པ་གཞན་གྱིས་བསྡུས་ན་སྤོམ་པོར་འགལ། སློབ་མ་ཆད་པ་རྣམས་ལ་ལྔ་གང་གིས་བཅད་ཀྱང་རུང་སྟེ་ཆད་པས་བཅད་པ་ལ་དགེ་སློང་གཞན་ཞིག་གིས་ཁ་དྲངས་ན་ཁ་འདྲེན་འདྲེན་པ་དབྱེན་གྱི་སྦོམ་པོར་འགྱུར། བསྟི་སྟང་མེད་བཞིན་ན་བསྒྱུར་བའི་ཕྱིར་དགེ་སློང་ཤེས་པ་ལ་ཆོལ་ཅིག །ཆད་པ་རྣམ་ལྔས་བཅད་པ་ལས་ཉེས་པ་འཆགས་ཤིང་བཟོད་པ་གསོལ་དུའང་མི་འོང་གུད་དུའང་མ་སོང་སྟེ་བར་མ་དོར་འདུག་པ་ན་དགེ་སློང་ཚུལ་ཁྲིམས་དང་ཆོས་མཁས་ཤིང་འདྲིད་ཅིང་སྙིང་འཇི་མཁས་པ་གཅིག་ལ་གནས་བརྟན་གྱིས་ཆོལ་ཏེ། སྔོན་གྱི་ཉེས་པ་འོར་ལ་མཁན་པོ་ལ་བཟོད་པར་གསོལ་ཏེ། ཤོགས་ལ་སླར་ཆོར་ཅིག་ཅེས་གྲོས་འདེབས་སུ་གཞུག །མཚན་མ་བཏང་སྟེ་འཆགས་ན་བཟོད་ཅིག །སློབ་མ་ཆད་པས་བཅད་པ་དེ་སྔོན་གྱི་ཉེས་པ་གཏོང་ངོ་ཞེས་ཟེར་ཞིང་བཟོད་པ་གསོལ་ཏེ་འཆགས་ཤིང་འོང་ན་གནས་བརྟན་དེས་བཟོད་པ་བྱིན་ཅིག །ཆད་པས་བཅད་པའི་མི་རིགས་ན་མི་བྱའོ། །སློབ་མ་རྟག་ཏུ་ཚུལ་ཁྲིམས་བསྡོམ་ཞིང་བརྩོན་འགྲུས་ཆེ་བར་འགའ་ཙམ་ཞུ་བ་འཕྱིས་པ་ལྟ་བུ་ཆད་པས་བཅད་པ་མི་རིགས་པ་ལ་གནས་བརྟན་གྱིས་ཆད་པས་མི་བཅད། རིགས་ན་མི་བཟོད་པར་མི་བྱ། སློབ་མ་ཆད་པས་བཅད་པ་ལ་དེ་སྔོན་གྱི་ཉེས་པ་གཏོང་ཞིང་འཆགས་སུ་འོང་སྟེ་བཟོད་པར་བྱ་བའི་རིགས་པ་ལ་བཟོད་པར་མ་བྱས་ན་ཉེས་
བྱས། མི་རིགས་ན་བཟོད་པར་མི་བྱ། སློབ་མ་ཆད་པས་བཅད་པ་ལ་སྔོན་གྱི་ཉེས་པ་མི་གཏོང་ཞིང་འཆགས་སུ་མི་འོང་ན་བདག་གིས་བཀུག་སྟེ་བཟོད་པ་གསོལ་དུ་མི་གཞུག །མ་བཏུབ་ན་ཁང་བུ་ནས་དབྱུང༌། ཆད་པ་རྣམ་ལྔ་ལ་སོགས་པའི་ཐབས་བྱ་སྟེ་ཅིས་ཀྱང་མ་གྱུར་ན་སློབ་མ་དེ་ཁང་བུ་ནས་བསྐྲད་ཕྱུང་སྟེའོ། །ཚགས་དང་རིལ་བ་སྤྱི་བླུགས་དང་ཆོག་པ་ཙམ་བྱིན་ཏེ་དགེ་སྦྱོང་ལའོ། །སློབ་མ་བསྐྲད་པ་དེ་དགེ་སྦྱོང་ཞིང་ན་ཚགས་དང་རིལ་བ་དང་གོས་ཆོག་པ་ཙམ་བྱིན་ཏེ་བཏང་ངོ༌། །དགེ་སྦྱོང་ཉིད་ལ་རྫས་མང་པོ་ཞིག་ཡོད་དུ་ཟིན་ཀྱང་མི་བྱིན་པར་སླར་འོང་བའི་ཕྱིར་གཏར་གཞག་གོ །ཕྱིར་མ་འོངས་ཏེ་ཐལ་བྱུང་གཞག་ཀྱང་རྐུ་སེམས་མེད་ཀྱི་འོང་བའི་ཕྱིར་གཏར་གཞག་པས་ཉེས་མེད་དོ། །འོན་ཏེ་བསྙེན་པར་རྫོགས་པར་འདོད་པ་ན་ཡོ་བྱད་ལྔ་དང་ངོ༌། །སློབ་མ་བསྐྲད་པ་དེ་ཉི་ཤུར་ལོན་དུ་ཉེ་སྟེ་བསྙེན་པར་རྫོགས་པར་འདོད་པ་ཞིག་ན་ལྟག་ཏུ་དགེ་སྦྱོང་ལ་བརྫངས་པའི་སྟེང་དུ་ཆོས་གོས་གསུམ་དང༌། གདིང་བ་དང་ལྷུང་བཟེད་ལྔས་བསྣན་ཏེ་སྦྱིན་ནོ། །བསྙེན་པར་རྫོགས་པ་ཡང་ངོ༌། །སློབ་མ་བསྐྲད་པའི་དེ་ཁྲིམས་རྫོགས་པ་ཞིག་ཡིན་ན་སཱུ་ཏྲ་ལྟག་མ་བསྙེན་པར་རྫོགས་པར་འདོད་པའི་ཐད་དུ་བརྫངས་ཏེ་བསྐྲད་དོ། །སེང་གེ་བཞིན་དུ་མི་རེ་བར་མི་བྱ། སློབ་མ་བསྐྲད་པ་ལ་ཕྱིས་ཡང་སློབ་མར་མི་བྱའོ་ཞེས་རེ་བ་མི་བཅད་སེང་གེ་ནི་རི་དགས་བསད་ནས་ཟོས་པའི་ལྷག་མ་ཕྱིས་བཟའ་བའི་སེམས་མེད་དོ་ཡོད་མི་ཟ་བ་དང་སེང་གེས་ཐལ་མོས་བསྣུན་པ་ལ་འཚོར་རེ་བའི་སེམས་མེད་པ་བཞིན་དུ་མི་བྱ། ཕངས་པར་འགྱུར་བའི་བྱ་བ་བཅའ་བར་མི་བྱ། དགེ་འདུན་གྱི་འོག་ཁྲིམས་བཅའ་བ་ལ། ཐམས་ཅད་ཞལ་ཚུལ་བཅད་པ་ལྟ་བུ་ཁ་ཅིག་ནང་དུ་འགྱུར་བ་དང་གནས་འདིར་དགེ་སློང་སུའང་ཞིག་ཏུ་མི་གཞག་པ་ལྟ་བུ་རྒན་པོ་དང་ནད་པ་ཤི་བར་འགྱུར་བ་མི་བཅའ། ལོན་པས་ཁ་སུ་བར་འགྱུར། ཞག་ལོན་པས་ཁ་སུ་བར་འགྱུར་ཏེ། ཁ་མ་བཀྲུས་པར་བདག་ལའང་ཕྱག་འཚལ་དུ་མི་གཞུག་བདག་གིས་ཀྱང་གཞན་ལ་ཕྱག་མི་བྱ། བཅའོ་སོ་ཤིང༌། ཁ་སུ་བར་གྱུར་པ་སོ་ཤིང་འཆོས་ལ་བཀྲུ། དབེན་
པར་རོ། །ཁ་ལག་བཀྲུ་བ་ནི་དབེན་པར་བཀྲུའོ། །བཤང་གཅི་བྱ་བ་ཡང་ངོ༌། །བཤང་བ་ཡང་དབེན་པར་བྱ། སྤྱོད་པའི་ཤིང་དྲུང་ངམ་རྩིག་དྲུང་དུ་མི་བྱ། མི་མང་པོ་སྤྱོད་པའི་ས་ཤིང་དྲུང་ངམ་རྩིག་དྲུང་ལྟ་བུར་བཤང་གཅི་དང་སོ་ཤིང་མི་བཅའ། དེའི་ཆད་ནི་སོར་བཅུ་གཉིས་ཙམ་ནས་བརྒྱད་ཡན་ཆད་དོ། །སོ་ཤིང་གི་ཚད་ནི་སོར་བཅུ་གཉིས་མན་ཆད་བརྒྱད་ཡན་ཆད་ལ་བྱ་སྟེ་ཐུང་དུ་མི་སྣང་བ་ནི་དགེ་སློང་གཅིག་ཅིག་སོ་ཤིང་ཐུང་དུ་བཅའ་བཅའ་བ་ལས་སངས་རྒྱས་བྱོན་ནས་བོར་དུ་མ་སྤོབས་ཏེ་ཐལ་བྱུང་མིད་པ་ལས་ལྐོག་མར་ཟུག་སྟེ་ཤི་བ་ལས་བཅས། རིང་བ་ནི་དྲུག་སྡེས་སོ་ཤིང་རིང་པོ་བཅའ་བཅའ་བ་ལས་མི་སྡུག་ཅིང་གཞན་ལ་རྒྱ་ལྕག་གི་ཐབས་སུ་བརྡེག་པ་ལས་བཅས། མ་ཆིལ་མ་མང་པོ་ལ་མེད་ན་བཞི་ལས་ལྷག་པ་ཡན་ཆད་ཀྱིས་སོ། །བད་ཀན་རྒྱས་ཤིང་མཆིལ་མ་མང་ལ་སོ་ཤིང་དཀོན་ཏེ་མེད་ན་སོར་བཞི་ཡན་ཆད་ལ་བྱས་ཀྱང་ཉེས་མེད་དོ། །གནས་སུ་ན་ཆོས་ཟངས་ཀྱི་སྟེང་དུ་དོར་བར་མི་རིགས་པ་མ་ཡིན་ནོ། །སོ་ཤིང་བཅའ་བ་དང་ཁ་བཀྲུ་བ་གནས་ཀྱི་ནང་དུ་བྱེད་ན་ཆོལ་ཟངས་ཀྱི་ནང་དུ་བཀྲུས་ཀྱང་ཉེས་མེད་དོ། །ཝའི་ཁར་ནའང་དབེན་པར་མི་འགྱུར་བ་མ་ཡིན་ནོ། །སོ་ཤིང་བཅའ་བ་དང་ཁ་གདོང་བཀྲུ་བ་ཁང་ཐོག་གི་ཝ་ཁར་བྱས་ནའང་དབེན་པར་ཆུད་དེ་ཉེས་མེད་དོ། །ཁྲུ་གང་འཁོར་བ་དེར་འདི་ལྟ་བུ་དག་ཀྱང་གཏོགས་སོ། །ཝའི་ཁ་ཁྲུ་གང་འཁོར་བ་ཚུན་ཆད་ཝ་ཁར་ཆུད་དོ། །དེ་ཚུན་ཆད་དུ་སོ་ཤིང་དང་ཁ་གདོང་བཀྲུས་ཀྱང་ཉེས་མེད་དོ། །དེའི་རྗེས་སུ་ལྕེ་བཞར་ཁ་བཀྲུས་པའི་རྗེས་སུ་ལྕེ་བཞར་བཅང་ངོ༌། །ལྕེ་བཞར་བ་ནི་ཁབ་ཀྱི་རྒྱུ་ལས་སོ། །ལྕེ་བཞར་བའི་རྒྱུ་ནི་ཁབ་ཀྱི་རྒྱུ་སྟེ། ལྕགས་དང་ཟངས་དང་ཁར་བ་དང་ར་གན་ལས་བྱས་ཏེ་བཅངས་ཀྱང་ཉེས་མེད་དོ། །དེའི་ཕྱིར་སོ་ཤིང་གཤགས་པའང་བརྟགས་པའོ། །ལྕེ་བཞར་བ་སཱུ་ཏྲ་ལྟག་མ་ལྟར་མ་བཅངས་ན་སོ་ཤིང་གཤགས་པས་བཞར་ཀྱང་རུང་ངོ༌། །ཕན་ཚུན་དུ་དེ་མི་རྣོ་བར་བྲུད་སོ་ཤིང་གཤགས་པ་གཅིག་ལ་གཅིག་བྲུད་དེ་ཟུར་རྣོན་པོས་ལྕེ་མི་གཅོད་པའི་ཕྱིར་མི་རྣོ་བས་བྲུད་ཅིང་དལ་བུས་བྱ། རྣོན་པོས་ལྕེ་དང་སོ་དང་རྣ་བ་མི་བྲུད། སོ་དང་ལྕེ་དང་རྣ་བ་ལ་ཅི་ཡང་
རུང་སྟེ་རྣོན་པོས་ཟུག་ཅིང་སྣད་པའི་ཕྱིར་མི་བྲུད། མེ་དལ་བར་མ་ཡིན་པར་དེའི་ཤལ་མི་ན་བར་བྱའོ། །སོ་དང་རྣ་བ་དང་ལྕེ་ལ་བྲུད་པའི་ཚེ་སྣད་ཅིང་ཁྲག་མི་འབྱུང་བའི་ཕྱིར་དལ་བུས་རན་པར་བྲུད། ཁའི་དྲི་མས་འབགས་པའི་ཕྱོགས་མ་བཀྲུས་སམ་སས་མ་ཕྱིས་པར་ལྕེ་དང་སོ་བཀྲུས་པ་མི་དོར། སོ་ཤིང་འཆའ་འཆའ་བ་དེ་ལ་ཁའི་དྲི་མ་དང་མཆིལ་མས་འབགས་པ་ཆུས་མ་བཀྲུས་སམ་སས་མ་ཕྱིས་པར་མི་དོར། སྒྲ་མ་བྱས་པར་མི་དོར། སོ་ཤིང་དོར་བ་ལ་སེ་གོལ་ལམ་ལུད་པའི་སྒྲ་མ་ཕྱུང་བར་མི་དོར་རོ། །འདི་ནི་དཔེ་སྟེ་བཤང་གཅི་དང་མཆིལ་མ་དང༌། སྣབས་དང་སྐྱུགས་པ་དང་ཚད་པ་དང་གཞན་ཡང་ངོ༌། །སོ་ཤིང་དོར་བ་ལ་སྒྲ་བྱ་བ་ནི་དཔེ་སྟེ་དེ་བཞིན་དུ་འདི་རྣམས་དོར་ནའང་སེ་གོལ་དང་ལུད་པའི་སྒྲ་དབྱུང༌། མིང་གིས་དོར་བ་འདི་རྣམས་དོར་བ་མ་ཡིན་པ་བོང་རྡོག་ལ་སོགས་པ་ཅི་དོར་ཀྱང་སྒྲ་དབྱུང་ངོ༌། །བཀྲུ་བ་ལ་འདི་དག་གིས་ཀྱང་འགྲུབ་སྟེ་གོ་འདུན་པའམ་ལྕི་སྐམ་གྱིས་ཀྱང་ངོ༌། །ཁ་འཁྲུ་བ་ལ་སོ་ཤིང་མེད་ན་འདི་རྣམས་ཀྱིས་བཀྲུས་ཀྱང་རུང་སྟེ་གོ་འདུན་ནི་གླས་གང་དང་རྩྭ་ཀུ་ཤུ་རི་དང་སྤོས་ལ་སོགས་པ་བཏགས་པའི་ཕྱེ་མ་ལ་བྱའོ། །ལུས་ཀྱི་བྱ་བ་འདི་དག་བྱས་མ་ཐག་ཏུ་མཆོད་རྟེན་ལ་ཕྱག་བྱ། ལྟག་ཏུ་སྨོས་པ་ཁ་ལག་བཀྲུ་བ་ལ་སོགས་པ་ལུས་ཀྱི་ཕྱི་བདར་བྱས་ཟིན་ནས་མཆོད་རྟེན་ལ་ཕྱག་བྱ་མཆོད་རྟེན་མེད་ཀྱང་ཡིད་ཀྱིས་དམིགས་ཏེ་ཕྱག་བྱ། གཏོགས་པ་ན་གནས་པས་ནན་ཏན་དུ་བྱའོ། །ལོ་བཅུར་མ་ལོན་ལ་ཆོས་ལྔ་དང་མི་ལྡན་གྱི་བར་དུ་བདག་གི་ལས་སུ་བྱ་བར་གཏོགས་པ་ནི་མཁན་པོ་དང་གནས་བརྟན་ལ་གཡོག་དང་རིམ་གྲོ་བྱ་བ་འོག་ནས་འབྱུང་བའི་ལས་རྣམས་ནན་ཏན་དུ་བྱའོ། །དེ་མ་ཐག་ཏུ་ནང་པར་སོང་སྟེ་ཕྱག་བྱ། ནང་པར་ཁ་བཀྲུས་ནས་མཆོད་རྟེན་ལ་ཕྱག་བྱས་མ་ཐག་ཏུ་མཁན་པོ་ལ་ཕྱག་བྱ། ཁ་མ་བཀྲུས་ན་ཡང་ལུས་སྨད་གསུམ་གྱིས་ཕྱག་བྱ། སྙུན་གསོལ། མཁན་པོ་ཐུགས་བདེའམ་མི་བདེ་སྙུན་གསོལ། གོ་འདུན་ཆུ་དང་སོ་ཤིང་བསྙེན། མཁན་པོ་ཁ་གདོང་འཁྲུ་བ་ལ་སོགས་པའི་ཡོ་བྱད་འདི་རྣམས་བསྙེན་ཅིང་སྟ་གོན་བྱ། ཚང་མང་དུ་བལྟ་སྟེ་བསྙད། མཁན་པོའི་
བཤོས་རྒྱུ་ཅི་དང་ཅི་ཡོད་པ་ལས་ཚང་མང་དུ་སྦྱོར་དུ་བཅུག་ལ་ཞལ་ཏ་བྱ་སྟེ། འདི་དང་འདི་སྦྱར་རོ་ཞེས་མཁན་པོ་ལ་བསྙད། སྲེས་པ་དབུལ་བར་ཡིད་ལ་བྱ་ཟན་ཟ་བའི་ཚེ་མཁན་པོ་གང་ལ་སྲེས་པ་མང་དུ་བྲིམ་ཞིང་བདག་གི་སྐལ་བའང་མཁན་པོ་ལ་དབུལ་བར་ཤེས་པར་བྱ། ལྷུང་བཟེད་བཀྲུ། ཟན་ཟ་བའི་མདུན་ལོགས་སུ་མཁན་པོའི་ལྷུང་བཟེད་དང༌། ཕོར་གཞོང་ལ་སོགས་བཀྲུ་བཤལ་བྱ། འོན་ཏེ་བསོད་སྙོམས་པ་ཞིག་ན་གསིལ་བ་ཡང་ངོ༌། །མཁན་པོ་བསོད་སྙོམས་པ་ཞིག་ཡིན་ཏེ་འཁར་གསིལ་ཁ་ཟས་དང་དྲི་མས་འབགས་ནའང་བཀྲུ། དེ་ལ་དེ་སྟེ་དགོས་ན་ཚགས་ཀྱང་ངོ༌། །མཁན་པོ་བསོད་སྙོམས་ལ་འགྲོ་སྟེ་ཟན་སླར་གནས་སུ་མི་ཟ་འམ། སླར་གནས་སུ་མི་འཁོར་བ་ལྟ་བུ་ལ་ཆུ་ཆགས་དགོས་ནའང་བཀྲུ་སྟེ་བརྫངས། དེའང་དེ་སྟེ་ན་དྲི། སློབ་མའང་སློང་མོ་ལ་འགྲོ་འདོད་ན་བདག་ཀྱང་བསོད་སྙོམས་ལ་མཆི་སྟེ་ལྷན་ཅིག་འགྲོགས་ཤིང་མཆིར་རུང་ངམ་མི་རུང་ཞེས་དྲི། འོན་ཏེ་ལྷན་ཅིག་ཏུ་འདོད་ན་དེ་ཉིད་དང་ལྷན་ཅིག་ཏུ་འཇུག །བསོད་སྙོམས་ལ་ལྷན་ཅིག་འགྲོགས་སུ་གནང་ངམ་མི་གནང་དྲི་ནས། འགྲོགས་སུ་རུང་ངོ་ཞེ་ན་མཁན་པོ་དང་ལྷན་ཅིག་ཏུ་འཇུག །ཉམ་ང་བ་ལ་སོགས་པ་ལ་མདུན་དུ་འགྲོའོ།། བསོད་སྙོམས་ལ་ཞུགས་པའི་ལམ་ཉམ་ང་བའམ་ཁྱི་ཟ་བའམ་ཕྱུགས་རྡུང་བ་ལ་སོགས་པ་ཡོད་པ་ལྟ་བུ་ལ་བསེལ་བྱ་བའི་ཕྱིར་སློབ་མས་བག་བྱ་སྟེ་མདུན་དུ་འགྲོའོ། །བསོད་པ་ཞིག་ན་དེ་ལ་བསྔོ། །བསོད་སྙོམས་ལེན་པའི་ཚེ་ཁྱིམ་པས་བདག་ལ་ཁ་ཟས་བཟང་པོ་བསོད་ཅིང་ཞིམ་པ་བྱིན་ན་མཁན་པོ་ལ་ཕུལ་ཅིག་ཅེས་བསྔོ། །མ་འགྲོགས་ན་འཁོར་ནས་བསྟན། མ་འགྲོགས་ཏེ་སོ་སོར་དོང་ནས་སླར་འཁོར་ན་སློབ་མས་བདག་ཁ་ཟས་ཅི་རྙེད་པ་མཁན་པོའི་སྤྱན་སྔར་བྲིམ་པར་བསྟན། རབ་ཏུ་བཟང་པོ་བཏུ་སྟེ་བསྟབ། སློབ་མས་བདག་གིས་ཁ་ཟས་ཀྱི་ནང་ནས་བཟང་པོ་བསོད་ཅིང་ཞིམ་པའི་རྣམས་མཁན་པོ་ལ་བདར། དེས་ཀྱང་ཐམས་ཅད་ལ་ཚོད་བཟུང༌། མཁན་པོས་ཀྱང་ཟས་བཟང་པོ་བདར་བ་ལ་ཚད་བཟུང་སྟེ་ཅི་རན་པར་བླང་དེ་བཞིན་དུ་བདག་གི་ཕྱིར་སློབ་མ་ལས་ཅི་བྱེད་དོ་ཅོག་ལའང་ཚོད་བཟུང་ཏེ་རན་པར་བྱེད་དུ་གཞུག །ཆུ་སྣོད་དགང༌།
ཟན་མ་ཟོས་པའི་མདུན་དུ་སློབ་མས་བརྟགས་ཆུ་དང་བཏུད་ཆུ་དང་ཕྱི་རོལ་གྱི་ཆུ་སྣོད་གསུམ་སོ་སོར་དགང༌། དུས་བསྙད་བསོད་སྙོམས་ལ་འགྲོ་རན་པའི་ཉི་ཚོད་དང་གདུགས་ཚོད་བབ་བམ་མ་བབ་པའི་ཉི་ཚོད་ལ་སོགས་པ་མཁན་པོ་ལ་བསྙད། ཟོས་ནས་ལྷུང་བཟེད་ལ་སོགས་པ་བཀྲུ། ཟན་ཟོས་ཟིན་ནས་ལྷུང་བཟེད་དང་གཞི་དང་ཕོར་གཞོང་ལ་སོགས་པ་བཀྲུ། འདི་དག་གཞག །སྣོད་སྤྱད་ལ་སོགས་པ་བཀྲུས་ནས་སོ་སོའི་གནས་གནས་སུ་གཞག་པ་ལ་འང་བྱ། མཆོད་རྟེན་ལ་ཕྱག་བྱ་བའི་ཕྱིར་གོ་འདུན་དང་ཆུ་ལ་སོགས་པ་བསྙེན། མཁན་པོ་མཆོད་རྟེན་ལ་ཕྱག་བྱེད་ཅིང་མཆོད་པའི་ཡོ་བྱད་མེ་ཏོག་དང་ཆུ་དང་སྤོས་དང་གོ་འདུན་ལ་སོགས་པ་བསྙེན་ཅིང་སྟ་གོན་བྱ། རྐང་པ་བཀྲུ་བར་གཏོགས་པ་ལ་ནན་ཏན་དུའོ། །ནུབ་མོ་མཁན་པོ་རྐང་པ་བཀྲུ་བའི་ཡོ་བྱད་ཅི་དགོས་པ་ཀུན་ནན་ཏན་དུ་བསགས། མལ་སྟན་བཅའ། མཁན་པོའི་མལ་སྟན་ལ་སོགས་པ་སྤྲུག་སྟེ་མལ་བྱ། སྨད་དཀྲིས་ཀྱང་དབུལ། མཁན་པོ་ཉལ་ཁར་སྨད་དཀྲིས་དབུལ་ཤམ་ཐབས་བླང༌། སྨད་དཀྲིས་ཕུལ་ནས་ཤམ་ཐབས་བདག་གིས་བླང༌། རྐང་པའི་ཆུ་དང་རྟེན་མ་དང་ཆོལ་ཟངས་བསྙེན། རྐང་པ་བཀྲུ་བའི་ཆུ་དང་རྐང་རྟེན་གྱི་ཤིང་དང་ཟངས་ལ་སོགས་པ་བསྙེན་ཏེ་བཀྲུ། ལྷམ་ཕྱི་མཁན་པོའི་ལྷམ་ལ་རྡུལ་དང་བྲི་མ་ཡོད་པ་ཕྱི། སློང་པའི་བྱེད་པར་མ་བསྐོ་བར་ཕྱགས་མ་ཐོགས་པ་མཐོང་ན་རྟོགས་པ་ཉུང་དུར་རོ་ཞེས་བྱ། དགེ་འདུན་གྱིས་མཁན་པོས་ཕྱགས་པ་ལ་སོགས་པར་མ་བསྐོས་པར་མཁན་པོ་ཉིད་ས་ཕྱགས་ཤིང་འདུག་ན་མཁན་པོས་བགྱི་བ་མི་རིགས་ཀྱི་བདག་གིས་བགྱིའོ་ཞེས་བྱ་སྟེ་ལས་བྱ། མཁན་པོ་ན་རེ་ངའི་བསོད་ནམས་ཀྱིས་བླའོ་ཞེས་ཟེར་ན་གཞག་ཀྱང་ཉེས་མེད། གོས་འདྲུབ་པར་མ་བསྐོས་པར་ཁབ་ཐོགས་ཏེ་འཚེམ་ན་ཡང་ངོ༌། །ལྟག་མ་བཞིན་དུ་དགེ་འདུན་གྱིས་ལས་བྱེད་པར་མ་བསྐོས་པར་གོས་འཚེམ་པ་ལ་སོགས་པའི་ལས་བྱེད་ནའང་བདག་གིས་བྱའོ་ཞེས་ལས་དེ་བླང༌། བརྟག་པ་བྱ་བ་དང་སྤན་སྤུན་བཏོགས་པ་དང་མེ་ཏོག་དང་འབྲས་བུ་བཏོགས་པ་དང་སོ་ཤིང་ལ་སོགས་པ་ཡང་དགེ་སྦྱོང་གིས་སོ། །ཁ་ར་ལ་སོགས་
པའི་གཟུགས་སེམས་ཅན་དུ་འདུག་པ་ལ་སོགས་པ་ཞིག་པ་དང་སྤན་སྤུན་ནི་གཙུག་ལག་ཁང་གི་འཁོར་ན་ལྡམ་ལྡུམ་སྐྱེས་པ་ལྟ་བུ་དང་མེ་ཏོག་དང་ཤིང་ཏོག་བཏོགས་པ་ལ་སོགས་པ་དང༌། སོ་ཤིང་རྔ་བ་ལ་སོགས་པ་ནི་སློབ་མ་དགེ་སྦྱོང་གིས་བྱ་བར་གཏོགས་སོ། །སྒོ་བརྡབ་ཅིང་ནང་ན་གནས་པ་ལ་གོ་བར་བྱ། མཁན་པོ་ལ་སོགས་པ་སུའང་རུང་སྟེ་དེའི་དྲུང་དུ་འགྲོ་ལ་སྒོ་བཅད་ན་ནང་ན་འདུག་པ་ལ་གོ་བར་བྱ་བའི་ཕྱིར་སྒོ་བརྡབ། དེ་དལ་བུས་བྱ། སྒོ་བརྡབ་བ་ལ་དལ་བུས་བརྡབས། རྒྱུན་མི་བསྲིང༌། སྒོ་བརྡབ་པའི་རྒྱུན་མི་བསྲིང༌། དྲག་ཏུ་མི་ཕུལ། སྒོ་དབྱེ་བའི་ཕྱིར་དྲག་ཏུ་མི་ཕུལ། འཆང་བ་ཡང་ངོ༌། །སྒོ་བཅད་པ་ཡང་དག་ཏུ་མི་བཅད། དལ་བུས་ཤེས་བཞིན་དུ་འབྱུང་བ་དང་འཇུག་པ་སྒོ་སྐྱེས་ལ་མི་རེག་པར་རོ། །ཕྱི་ནང་དུ་འགྲོ་བ་ལ་ཤེས་བཞིན་དུ་དལ་བུས་བྱ་སྟེ་སྒོའོ་ཅོག་གི་སྒོ་སྐྱེས་ལ་མི་རེག་པར་བྱ། དེ་ལ་རིམ་གྲོ་བྱའོ། །མཁན་པོ་ལ་རིམ་གྲོ་བཀུར་སྟི་ཆེར་བྱ། གཞར། མཁན་པོ་ལ་དུས་གསུམ་ཕྲད་པ་ཙམ་གྱིས་མི་ཆོག་གི་བསྙེན་ཅིང་གཞར། དེ་དང་མི་མཛའ་བ་ལ་མ་ཡིན། མཁན་པོ་དང་མི་མཛའ་བ་ལ་མི་གཞར་བ་ནི་མཁན་པོ་མི་དགའ་བར་འགྱུར་བའི་ཕྱིར་རོ། །དེ་ལ་འཛེམ་པར་བྱ། མཁན་པོ་དང་སློབ་དཔོན་ལ། དེའི་བྱ་བ་ལ་བརྩོན། མཁན་པོ་དང་སློབ་དཔོན་གྱི་ཕྱིར་ལས་བྱ་བ་ལ་རིང་དུ་མི་གཞག་པར་མྱུར་དུ་བརྩོན་འགྲུས་སུ་བྱ། བརྩམས་པ་གུས་ཤིང་གསོང་བོར་བྱ། མཁན་པོ་དང་སློབ་དཔོན་གྱིས་བསྒོ་བའི་ལས་བྱེད་པ་ལ་ནན་ཏན་དུ་བཟང་པོར་བྱ་བ་དང་བཀྲུ་བཤལ་ལ་སོགས་པ་དག་པར་བྱ་ལྟ་བུ་དང་ལུས་གུས་པའི་ཚུལ་དུ་གསོང་པོར་བྱ། ཟོན་དང་བླ་མར་བཅས་པས། མཁན་པོ་དང་སློབ་དཔོན་ལ་བག་ཡོད་པའི་ཟོན་དང་བཙུན་ཞིང་བླ་མར་བྱ་བ་དང་བཅས་པར་བྱ། རྗེ་བོ་ལྟ་བུ་དམའ་བའི་སེམས་ཀྱིས་སོ། །རྗེ་བོ་ཙམ་དུ་བསམས་ལ་བདག་དམའ་བའི་ཚུལ་དུ་བྱའོ། །བླ་མ་དང་རྗེ་པོ་ནི་དབང་ཆེ་ཞིང་རག་ལུས་པ་ཡིན་ཏེ་བདག་གི་ཁྲིམས་དང་ཆོས་ལ་སོགས་པའི་རག་མཁན་པོ་ལ་ལུས་པས་མཁན་པོ་དང་སློབ་དཔོན་ལ། ཇོ་བོ་ཙམ་དུ་བསམ་མོ། །ཤེས་བཞིན་དུ་བདག་གི་དོན་ཀྱང་མི་གཅད། ཤེས་བཞིན་དུ་ཞེས་པ་ནི་མཁན་པོ་དང་སློབ་དཔོན་
ལ་བྱ་བ་ལྟག་ཏུ་བཤད་པ་རྣམས་ལེ་ལོ་དང་བརྗེད་པར་མི་བཏང་ཞིང་རྟག་ཏུ་ཤེས་བཞིན་དུ་དྲན་པར་བྱ། བདག་གི་དོན་ཀྱང་མི་གཅད་ཅེས་པ་ནི་མཁན་པོ་དང་སློབ་དཔོན་ལ་གཡོག་བྱས་པས་ཆོག་པ་ཙམ་དུ་མི་བྱའི་བསླབ་པ་དང་བསྒོམ་པའི་དོན་ཀྱང་མི་གཅད་པར་བྱ། དགེ་བ་ཚོལ་བ་ཅི་འགྱུར། ཅི་ཡོད་ཀྱང་རུང་སྟེ་བདག་དགེ་བ་ཅི་ལྟར་སྤྱོད་ཅེས་བསམ་ཞིང་དགྲ་བཅོམ་པའི་རིམ་པ་བརྒྱད་ཅི་ཐོབ་ཏུ་སྤྱད་ཅིང་བསྒོམ་པར་བསམས། ལོག་བྱེད་འབྱུང་བའི་ཚེ་བཟློག །བདག་གི་མཁན་པོ་དང་སློབ་དཔོན་ལོག་པ་ལ་བལྟས་པ་འམ། ཁྲིམས་དག་འདྲལ་བར་གྱུར་ན་སློབ་མས་མང་པོའི་ཁྲོད་དུ་མི་བྱ་བར་སྐོག་ཏུ་ཁྱོད་ལ་གསོལ་བའི་སྐབས་ཡོད་ན་ཞེས་སྡར་བྱས་ལ་ལོག་པ་ལས་བཟློག་པར་གྲོས་གདབ། དགེ་བ་མི་འཕེལ་ན་གཞན་ལ་དེ་བྱ་བར་གཏོད་ཅིག་ཅེས་གསོལ། སློབ་མ་དེ་བདག་གི་མཁན་པོ་འམ་སློབ་དཔོན་གྱི་འཁོར་ན་དགེ་འདུན་གྱི་ལས་ཆེ་བ་ལ་སོགས་པ་དང་དགེ་བ་སྤྱོད་དུ་མི་ཁོམ་སྟེ་མི་ལྡོག་སྟེ་གུད་དུ་སོང་ན་ལྡོག་པ་གང་ཡོད་ན་གཞན་ལ་སློབས་ཤིག་པར་གཏད་དུ་ཅི་གནང་ཞེས་བདག་གི་མཁན་པོ་ལ་གསོལ། ཆད་པར་ཤེས་ནས་གནས་སུ་འོངས་ན་གཏད། སཱུ་ཏྲ་ལྟག་མ་ལྟར་སློབ་མ་གསོལ་ན་མཁན་པོས་ཀྱང་གུད་དུ་བཏང་ནས་ལོབས་པ་ཙམ་གྱི་ཚེ་སློབ་ཏུ་བཏང་བའི་རིགས་ན་གསོལ་བ་བཞིན་དུ་གཏང༌། སྡིག་པའི་གྲོགས་པོ་དང་བཟློག །སློབ་མ་གུད་དུ་འགྲོ་བར་གསོལ་བ་དེ་སྡིག་པའི་གྲོགས་པོ་དང་བསྟེན་པར་འགྲོ་བ་ཞིག་ཡིན་ན་མི་བཏང་བར་གཞག །དགེ་བ་འཕེལ་བའི་ཕྱིར་གཏད་དུ་ཟིན་ནའང་སྡིག་བའི་གྲོགས་པོ་དང་མ་བསྟེན་ཅིག་ཅེས་གདམས་ཏེ་གཏད། དགེ་བར་བསྐོ་བར་དེ་བཏབ། མཁན་པོ་སློབ་མ་ལ་བསོད་ནམས་སུ་འགྱུར་བ་དགེ་བ་སྤྱོད་དུ་གཞུག་པ་དང༌། གླེགས་བམ་ལ་སོགས་པ་བྱིན། ལྟུང་བ་ལས་འབྱུང་བའི་ཕྱིར་དང༌། སློབ་མལ་ལྷག་མ་མན་ཆད་ཉེས་པ་ཞིག་བྱུང་ན་ཆད་པ་དང་འཆགས་སུ་གཞུག་ཅིང་དབྱུང་བ་མཁན་པོས་བྱ་བ་དང༌། མཐུན་པར་འཚོ་བའི་ཡོ་བྱད་འགྲུབ་པར་ནན་ཏན་དུའོ། །དགེ་སློང་གི་འཚོ་བའི་ཡོ་བྱད་ཆོས་གོས་དང་རིལ་བ་ལ་སོགས་པ་སློབ་མ་ལ་མེད་ན་མཁན་པོས་སྦྱར་ཞིང་བྱའོ། །ལྷན་
ཅིག་ཏུ་སྤྱོད་པ་དང༌། བདག་གི་སློབ་མ་ལ་བྱ། ཉེ་གནས་དང༌། བདག་གི་གན་དུ་ཉེ་གནས་སུ་བཅོལ་ཞིང་འདུག་པ་ལ་བྱ། མཁན་པོ་དང༌། བདག་གི་མཁན་པོ་ལ་བྱ། སློབ་དཔོན་དང༌། བདག་གི་སློབ་དཔོན་བཞི་ལ་བྱ། མཁན་པོ་གཅིག་པ་དང༌། བདག་དང་མཁན་པོ་གཅིག་པ་ལ། སློབ་དཔོན་གཅིག་པ་དང༌། བདག་གི་གྲོགས་པོ་བདག་དང་སློབ་དཔོན་གཅིག་པ་ལ་བྱ། འཐམས་པ་དང༌། བདག་དང་མཛའ་བ་གཏམ་ཟླར་ཆུད་པ་ལ་བྱ། བརྟན་པ་དང༌། བདག་དང་མཛའ་བ་གྲོས་ཀྱི་ཟླར་ཆུད་པ་ལ་བྱ། འདྲིས་པ་དང༌། བདག་དང་མཛའ་བའི་ཕྱིར་བདག་གི་ཡོན་ཏན་བརྗོད་པ་ལ་བྱ། འཐད་པས་བདག་དང་ཡིད་དུ་འོང་བའི་ཕྱིར་ཁོ་བོ་ནོར་ཐུག་ཐུབ་ཏུ་ཁྱེར་ཀྱང་དགའ་བར་འགྱུར་བའོ། །ནད་པའི་གཡོག་བྱ། ན་བ་ཞིག་ཏུ་གྱུར་ན་མིང་གིས་སྨོས་པ་འདི་རྣམས་ཀྱི་གཡོག་བྱ། སྔ་མ་བྱེད་པ་མེད་ན་རིམ་གྱིས་སོ། །སཱུ་ཏྲ་ལྟག་མ་ལྟར་མིང་གིས་སྨོས་པ་རྣམས་ལས་རིམ་བཞིན་དུ་སྔ་མ་དག་མེད་ན་ཕྱི་མ་རིམ་གྱིས་ནད་གཡོག་བྱ། ལྷོགས་ཤིག་པའི་སློབ་དཔོན་ཡང་འདིར་འདུས་སོ། །སློབ་དཔོན་ལྔ་ལ་ལྷོགས་ཤིག་པའི་སློབ་དཔོན་རིང་མོད་ཀྱི་སློབ་དཔོན་བཞི་དང་འདྲ་བར་ནད་གཡོག་བྱ་བར་གཏོགས་སོ། །ཅིག་ཅར་དེ་མི་ནུས་ན་གནས་པ་གང་ལ་བཅར་བ་ལའོ། །མཁན་པོ་དང་སློབ་དཔོན་ཀུན་འདུས་ཏེ་ཅིག་ཅར་ན་ལ་ཀུན་གྱི་ནད་གཡོག་ནུས་ན་ཀུན་བྱའོ། །མི་ནུས་ན་མཁན་པོའི་ནད་གཡོག་བྱའོ། །མཁན་པོ་མེད་ན་སློབ་དཔོན་གནས་གང་ལ་བཅར་བ་ལ་བྱ། འདིའི་ཚུལ་དུ་བརྩམས་བ་ལའང་རབ་ཏུ་བྱུང་བ་བཞིན། དགེ་བསྙེན་རབ་ཏུ་འབྱུང་བར་འདོད་པ་ལའང་རུང་རབ་ཏུ་འབྱུང་བར་སྐྲ་བྲེགས་ཆོས་གོས་བསྐོན་ལ་ཁྲིམས་མ་ཕོག་གི་བར་དུ་ནད་ཀྱིས་བཏབ་པ་ལྟ་བུ་ཡང་དེ་དགེ་སློང་ཚངས་བ་མཚུངས་པར་སྤྱོད་པ་ན་བ་བཞིན་དུ་ནད་གཡོག་བྱ་ཞིང་གསོའོ། །ནད་པ་ཚངས་པ་མཚུངས་པར་སྤྱོད་པ་ལ་མ་གཡེལ་ཅིག་ནད་གཡོག་གོང་དུ་སྨོས་པ་རྣམས་ལས་བྱེད་པ་མེད་པ་ཞིག་ན་ཡང་དགེ་སློང་ཚངས་པ་མཚུངས་པར་སྤྱོད་པ་ཡིན་པས་དགེ་སློང་ཀུན་གྱིས་གཡོག་བྱའོ། །གཡོག་ཇི་ལྟར་བྱ་བའི་ཐབས་ནི་འོག་ནས་འཆད། དེ་ལ་གཡོག་མེད་ན་མཐའི་བར་དུ་སྦྱིན་ནད་པ་མཚུངས་པར་
སྤྱོད་པ་ལ་ནད་གཡོག་མེད་ན་དགེ་སློང་གང་ཁྲིམས་གཞོན་པས་ནད་གཡོག་བྱའོ། །དེས་མི་ཆོག་ཅིང་མི་ནུས་ན་གྲལ་རིམ་བཞིན་ན་གང་རྒན་པའི་མཐར་ཐུག་གི་བར་དུ་དགེ་འདུན་ཐམས་ཅད་ཀྱིས་ནད་གཡོག་བྱའོ། །ནད་པ་ནམ་འཆི་བ་འམ་སོས་པའི་མཐར་དགེ་བ་གཞན་བཏང་སྟེ་གཡོག་བྱའོ། །སངས་རྒྱས་ཉིད་ཀྱིས་ཀྱང་ཕྱག་དར་ཏེ་ནད་པའི་གཡོག་བྱས་པས་དགེ་འདུན་གྱིས་ཀྱང་སྙིང་རྗེ་བའི་ཕྱིར་གཡོག་བྱ་བར་རབ་ཏུ་རིགས་སོ། །དགེ་འདུན་གྱི་སྨན་ལ་ནད་པ་འབའ་ཞིག་གིས་སྤྱད་པར་བརྟགས་པའོ། །དགེ་འདུན་གྱི་སྤྱིའི་སྨན་ལ་ནད་པས་ནི་སྤྱད་ཅིང་བཟའ་བར་རིགས་ཏེ་བརྟགས་པའོ། །དེ་ནི་སྔོན་མི་ནའང་དགེ་འདུན་ཐམས་ཅད་ལ་དགེ་སློང་སྨན་གྱི་རུབ་མ་བས་སྨན་ཅི་དགོས་ཞེས་ནང་གཅིག་བཞིན་དུ་འབྲིམ་པ་ལས་དྲུག་སྡེས་གྲོགས་ཅིག་ན་བའི་ཕྱིར་མི་ན་བས་ཀྱང་སྨན་མང་དུ་བླངས་ནས་བསྒྱུར་ཅིང་བཙོངས་ཏེ་སྤྱད་པས་ན་ནད་པ་འབའ་ཞིག་གིས་སྤྱད་པར་བརྟགས་པའོ་ཞེས་བཅས། དེ་མེད་ན་གཡོག་གིས་བསླངས། དགེ་འདུན་སྤྱིའི་སྨན་མེད་ན་ནད་གཡོག་སུ་བྱེད་པས་བསླངས་ཤིང་བཙལ་ཏེ་ནད་པ་གསོའོ། །མ་རྙེད་ན་དགེ་འདུན་གྱིས་སྦྱིན། ནད་གཡོག་གིས་སྨན་བསླང་དུ་མ་རྙེད་ན་དགེ་འདུན་གྱི་དཀོར་ལས་ཟོང་ཕོག་སྟེ། ནད་གཡོག་ཚོལ་དུ་གཞུག །མེད་ན་སངས་རྒྱས་ཀྱི་སྐུ་ལ་གསོལ་བ་མན་ཆད་ཀྱང་ངོ༌། །དགེ་འདུན་གྱི་དཀོར་ལས་སྨན་གྱི་རིན་སྦྱིན་དུའང་མེད་ན་སངས་རྒྱས་ཀྱི་སྐུ་ལ་གསོལ་བའི་རྒྱན་དུ་གཏོགས་པ་མན་ཆད་དཀོར་ལས་ཀྱང་སྦྱིན། སྐོམ་དང་གདུགས་གཟུགས་པ་ལ་སོགས་པ་མཆོད་པ་དེའི་ཕྱིར་དགེ་འདུན་གྱི་ལས་བྱ། ལྟག་མ་ལྟར་སྨན་བཙལ་ཏེ་གསོས་པས་མ་སོས་ཤིང་ནད་པ་ན་རེ་བསོད་ནམས་ཤིག་བསྐྱེད་ན་ཐིག་གི་བ་སྙམ་ཞེས་ཟེར་ན། དཀོན་མཆོག་གསུམ་ལ་གདུགས་གཟུགས་པ་དང་དགེ་འདུན་ལ་སྐོམ་བྲིམ་པ་ལ་སོགས་པའི་ཡོ་བྱད་དགེ་འདུན་གྱི་དཀོར་ལས་ཕྱུང་སྟེ་སྤྱད་དོ། །དེའི་མེད་ན་སངས་རྒྱས་ཀྱི་ལས་སོ་ལྷག་མ་ལྟར་དགེ་འདུན་གྱི་དཀོར་མེད་ན་སངས་རྒྱས་ཀྱི་དཀོར་ལས་ཀྱང་ཕྱུང་སྟེ་སྤྱད་དོ། །དེ་དག་གི་བླངས་པ་ལས་མ་ཤི་ཞིང་འབྱོར་ན་སོབས་ཤིག །ལྟག་མ་རྣམས་ལྟར་སྨན་དང་
བསོད་ནམས་བསྐྱེད་དེ་ནད་པ་དེ་སོས་ནས་ནད་པས་ནད་གཡོག་ལ་དཀོན་མཆོག་དང་དགེ་འདུན་གྱི་དཀོར་ལས་བདག་གི་ཕྱིར་ཇི་ཙམ་གོད་ཅེས་སྨྲས་ལ་བདག་གིས་འབྱོར་པ་ཅི་གོད་པའི་སྐྱིན་པ་སོབས་ཤིག །གཡོག་གིས་གཡོག་མི་བྱ་བར་མི་བྱ། དགེ་སློང་ནད་པའི་གཡོག་སུ་བྱེད་པས་ནད་པ་ལ་ལེ་ལོ་དང་གཡེལ་བར་མི་བྱེད་པའི་ནད་གཡོག་གིས་གུས་ཤིང་ནན་ཏན་དུ་བྱ། དོན་དང་ཆོས་ཀྱི་ངག་མི་བཅག །དོན་དང་ཞེས་པ་ནི་དགེ་སློང་ནད་པ་ན་རེ་སྨན་དང་ཁ་ཟས་འདི་ལྟ་བུ་ཞིག་འདོད་དེ་བྱིན་ན་ནི་སོས་སོ་ཞེས་ཟེར་བ་དང༌། ཆོས་ཀྱི་དག་མི་བཅག་ཅེས་པ་ནི་ཡི་གེ་ཀླག་པ་ལ་སོགས་པ་བསོད་ནམས་འདི་ལྟ་བུ་ཞིག་སྐྱེད་ཅིག་ཅེས་ཟེར་ནའང་ནད་གཡོག་གིས་ངག་མི་བཅག་པར་སྦྱར་ཞིང་བྱ། ཆགས་པའི་དངོས་པོ་སློང་ན་མི་དགག །ནད་པ་ཁོ་བདག་གི་ནོར་བཟང་པོ་སྡུག་གུ་ཞིག་ལ་ཆགས་ཏེ་ག་རེ་ཞེས་ཟེར་ན་ནད་གཡོག་གིས་ཕྱུང་སྟེ་བསྟན་ཅིང་སྦྱིན་ནོ། །མི་བཤད་པར་མི་བྱ། ནད་གཡོག་གིས་ནད་པ་ལ་ཚད་མེད་པ་བཞི་དང་བསམ་གཏན་བཞི་དང་འཕགས་པའི་ལམ་ཡན་ལག་བརྒྱད་ལ་སོགས་པའི་ཆོས་བཤད་དེ་རྟག་ཏུ་དྲན་པར་གྱིས་ཤིག་ཅེས་བསྒོ། ནད་པས་དེའི་ངག་མི་བཅག །ནད་གཡོག་གིས་ཆོས་བཤད་པ་ལ་ནད་པས་ཀྱང་བསྒོ་བ་བཞིན་དུ་མཉན་ཅིང་དྲན་པར་བྱའི་ངག་མི་བཅག་གོ །ཤི་དོགས་ན་དེས་དགེ་འདུན་གྱི་མལ་སྟན་ལས་ཐེག་ལ་གང་ཟག་གི་ལ་ཞོག་ཤིག །དགེ་སློང་ནད་པ་དེ་ཚབས་ཆེ་སྟེ་ཤིར་དོགས་ན་དགེ་འདུན་གྱི་མལ་སྟན་གྱི་སྟེང་ནས་ཐེག་ལ་གང་ཟག་གི་མལ་སྟན་བཏིང་སྟེ་དེའི་སྟེང་དུ་སྤོ། །ཇི་ལྟར་སྤོ་བའི་ཐབས་ནི་འོག་ནས་འཆད། བྱུག་པ་དང་བཀྲུ་བའི་གཏམ་གྱི་སྔོན་དུ་སྒྱུ་ཡིས་སོ། །ནད་པ་དགེ་འདུན་གྱི་མལ་སྟན་ལས་ཐེག་ལ་གང་ཟག་གི་མལ་སྟན་ལ་སྤོ་བ་ནི་ཁྱོད་ཤིར་ཉེར་མལ་འཕོས་ཞེས་མི་བྱའི་སྨན་དཔྱད་དམ་ལུས་ལ་བཀྲུ་བའམ་བྱུག་པའི་ཕྱིར་སྤོ་བ་སྐད་དུ་བྱ་སྟེ་གང་ཟག་གི་མལ་སྟན་ལ་བཞག །དེ་ལྟ་བུར་ཆད་ན་ནན་ཏན་དུའོ། །ནད་པ་ཤིར་ཉེ་སྟེ་མི་འཚོ་བར་གྱུར་ན་ཡང་ནད་གཡོག་གིས་ལེ་ལོ་མི་བྱ་བར་ནད་གཡོག་གིས་ནན་ཏན་དུ་བསྲུང་ཞིང་བལྟ། ཤི་བའི་གོས་མ་རུང་བ་བྱས་ན་དེས་བཀྲུ་དགོས་སོ། །ནད་པ་ཤི་བ་དེས་མལ་སྟན་དང་
གོས་ལ་སོགས་པ་ངན་སྐྱུགས་དང་ཁ་ཟས་ལ་སོགས་པས་རེག་ན་ནད་གཡོག་སུ་བྱེད་བྱེད་པས་བཀྲུའོ། །དགེ་འདུན་འདུ་བར་གནས་བརྟན་ཐོག་མར་འགྲོའོ། །དགེ་འདུན་གང་དུ་འདུ་ཤིང་འདོད་བར་ལས་བརྒྱ་རྩ་གཅིག་པ་ལྟ་བུ་གནས་བརྟན་ནས་ཞུ་ཞིང་བྱ་དགོས་པ་དང་འཁོར་དང་སློབ་མ་སྟོན་ཅིང་བསྐྱང་བ་ལ་སོགས་པ་བྱ་དགོས་ཏེ་མེད་དུ་མི་རུང་བས་ན་འདོང་བའི་ཐོག་མ་ལ་གནས་བརྟན་འགྲོའོ། །འགྲོ་བའི་ཚེ་ལུས་པ་ལ་བསྡད། གྲོང་དུ་མཆོད་སྟོན་ལ་འདོང་སྟེ་གནས་བརྟན་སྔ་ལ་འཁོར་གསེར་བུ་དག་འཕྱི་སྟེ་ལུས་ན་གནས་བརྟན་གྱིས་ཀྱང་ལུས་པ་ལ་བསྡད། དེ་དག་གིས་ཀྱང་དེ་ལའོ། །གྲོང་དུ་མཆོད་སྟོན་ལ་འདོང་བ་ལས་གནས་བརྟན་ནི་ཕྱི་འཁོར་སློབ་མ་དག་སྔ་སྟེ་ཕྱི་རོལ་དུ་འཐོན་ན་ཡང་སློབ་མ་དག་གིས་གནས་བརྟན་ལ་བསྡད་དོ། །མ་བྱུང་ན་མི་རིང་བར་སོང་སྟེའོ། །སཱུ་ཏྲ་ལྟག་མ་ལྟར་བསྡད་ཀྱང་གནས་བརྟན་མ་བྱུང་ན་མི་རིང་བར་འཕགས་ཏེ་གནས་བརྟན་ལ་བསྡད། གྲོང་གི་དྲུང་དུ་ཡང་ངོ༌། །སཱུ་ཏྲ་ལྟག་མ་ལྟར་མི་རིང་བར་འཕགས་ཏེ་བསྡད་ཀྱང་གནས་བརྟན་མ་བྱུང་ན་གང་དུ་འགྲོ་བའི་གྲོང་གི་དྲུང་དེར་ཀྱང་གནས་བརྟན་ལ་བསྡད་དོ། །དེ་སྟེ་དེར་འཇུག་ཁར་ཕྱིས་འོང་ན་ཡང་ངོ། །སཱུ་ཏྲ་ལྟག་མ་ལྟར་གྲོང་དྲུང་ན་སྡོད་སྡོད་པ་ལས་གནས་བརྟན་མ་བྱུང་སྟེ་ནང་དུ་འདོང་ཁར་གནས་བརྟན་ཕྱིས་འོངས་པ་སྣང་ན་ཡང་སླར་བསྡད་དོ། །དེ་སྡེ་སྤྱན་འདྲེན་པ་འོངས་ན་གནས་བརྟན་མ་འོངས་ཀྱི་བར་དུའོ་ཞེས་སྨྲོས་ཤིག །སཱུ་ཏྲ་ལྟག་མ་ལྟར་སླར་བསྡད་པ་ལས་ཁྱིམ་བདག་སྤྱན་འདྲེན་པ་འོངས་ཏེ་ནང་དུ་གཤགས་སུ་གསོལ་ཞེས་ཟེར་ན་ཡང་གནས་བརྟན་ཕྱིས་འོངས་པ་སྣང་གིས། གནས་བརྟན་མ་ཕྱིན་གྱི་པར་དུ་སྡོད་ཅིག་ཅེས་བྱ། ལག་ཆུ་གཏོང་བའི་ཚེ་ན་དེ་སྟེ་ཟས་བཟའ་བར་འཇུག་པའི་དུས་ཡོད་ན་ཡང་ངོ༌། །སཱུ་ཏྲ་ལྟག་མ་རྣམས་ལྟར་སྡོད་སྡོད་པ་ལས་གནས་བརྟན་མ་ཕྱིན་ཏེ་གྲོང་གི་ནང་དུ་ལྷགས་ནས་ལག་ཆུ་བཏང་སྟེ་གདུགས་ཚོད་ཡོད་ན་ཡང་གནས་བརྟན་ལ་བསྡད་དོ། །མེད་དེ་སྟན་ལ་འདུག་ན་བཞག་སྟེའོ། །གནས་བརྟན་ཀྱང་མ་འོངས་ལ་གདུགས་ཚོད་ཀྱང་མེད་ན་གནས་བརྟན་ལ་མི་བསྡད་པར་གནས་
བརྟན་གྱི་གོ་གཞག་ལ་འཁོད་དོ། །འདུག་པ་དང་ཕྱི་རོལ་དུ་འང་བརྟག །གནས་བརྟན་གྱིས་བདག་གི་འཁོར་ནང་དུ་འཁོད་པའི་ཚེ་དང་མ་འཁོད་པའི་མདུན་གྱི་ཕྱི་རོལ་ཚུན་ཆད་དུ་ཚུལ་བཅོས་པའི་ཕྱིར་བརྟག་ཅིང་བལྟའོ། །སློབ་མ་འཐོར་ཏམ་མ་འཐོར་ཀྱང་བརྟག །ཉེས་པར་གྱོན་ཏམ་ཉེས་པར་དཀྲིས་ན་མཛེས་པའི་ཕྱིར་དེ་ལ་བརྡ་བྱ། སཱུ་ཏྲ་ལྟག་མ་ལྟར་བརྟགས་ཏེ་ཤམ་ཐབས་ཚུལ་མ་ཡིན་པར་ཉེས་པར་དཀྲིས་སམ་ཆོས་གོས་མི་སྡུག་པར་གྱོན་ན་གང་ཉེས་པར་གྱོན་པ་ལ་ལག་བརྡ་ལ་སོགས་པས་གོ་བར་བྱ་སྟེ་འཆོས་སུ་གཞུག །མ་གོ་ན་གན་ན་འདུག་པ་ལ་བྱ། སཱུ་ཏྲ་ལྟག་མའི་བརྡས་མ་གོ་ན་གཅིག་ནས་གཅིག་ཏུ་སྦྲན་ཏེ་ཉེས་པར་གྱོན་པའི་གན་ན་སུ་འདུག་པས་འཆོས་སུ་གཞུག །མ་གྲུབ་ན་རང་གིས་ཀྱང་ངོ༌། །སཱུ་ཏྲ་ལྟག་མ་གཉིས་ལྟར་བྱས་ཀྱང་མ་གྲུབ་ཅིང་མ་འཆོས་ན་གང་ཉེས་པར་གྱོན་པ་དེ་ཉིད་གནས་བརྟན་གྱི་གན་དུ་བཀུག་ལ་བདག་ཉིད་ཀྱིས་བཅོས་དེ་ཉིད་ཀྱིས་གསར་བུ་དག་ལ་མ་འཆལ་ཅིག །གནས་བརྟན་གྱིས་འཁོར་དང་གསར་བུ་དག་ལ་བཞད་གད་དང་རྩེད་མོ་དང་ཅལ་ཅོལ་མི་བྱའི་བཙུན་པའི་ཚུལ་དུ་བརྗིད་བྱའོ། །གང་ན་དེ་དག་གཙུག་ལག་ཁང་ངམ་དགོན་པའི་ཚུལ་གྱིས་བསྒོ་ཞིང་བསྒོ་ཤིག། དགོན་པ་ཞིག་ན་གནས་ནའང་གནས་བརྟན་གྱིས་བདག་གི་འཁོར་རྣམས་དགོན་པའི་ཚུལ་དུ་མི་རྒོད་དང་རྐུན་པོའི་དགྲ་ཐབས་དང་འདྲེ་གདོན་གནོད་པར་བྱེད་པའི་སར་མི་གནས་པ་ལ་སོགས་པ་སློབ་མ་དང་འཁོར་རྣམས་ལ་བསྟན་ཅིང་བསྒོའོ། །གཙུག་ལག་ཁང་ན་གནས་ནའང་འཁོར་དང་སློབ་མ་རྣམས་ལ་ལྷ་ཁང་གི་འཁོར་གྱི་ཞལ་ཏ་དང༌། བྱི་བདར་དང་ལྷ་རིས་ཀྱི་ཞིང་དང་དཀོར་ལ་སོགས་པའི་ལས་བསྟན་ཅིང་བསྒོ། །འོངས་པས་བརྟགས་ཏེ་གནས་པ་རྣམས་ལ་མལ་སྟན་གྱི་ཕྱིར་བསྒོ། །གུད་ནས་འཁོར་དང་བཅས་པའི་དགེ་སློང་དག་ཅིག་འོངས་ན་འོངས་པ་དེའི་གནས་བརྟན་གྱིས་བདག་གི་འཁོར་མི་དུ་ཡོད་པ་དང༌། མལ་ཆ་དང་གནས་ཁང་ཅི་དགོས་པ་བརྟག་སྟེ་སྔ་ནས་འཁོད་པའི་དགེ་སྐོས་དང་མལ་ཆ་རྫི་ལ་འདི་སྙེད་ཅིག་དགོས་སོ་ཞེས་བསྒོ། །འགྲོ་བའི་ས་ན། འཁོར་དང་བཅས་པའི་དགེ་སློང་དག་ཅིག་གུད་དུ་འདོང་ན་ལས་འདི་
ལ་བརྟག་ཅིང་བྱ་སྟེ། ཕྱོགས་དང༌། ཡུལ་ཕྱོགས་གང་དུ་འགྲོ་བའི་ལམ་དང་ས་ཕྱོགས་མ་ནོར་བར་བྱ་བ་དང༌། ལམ་གྲོགས་དང༌། ལམ་ན་མི་འཇིགས་པར་བྱ་བའི་ཕྱིར་ཚོང་བ་ལྟ་བུ་ལ་སོགས་པ་ལམ་གྲོགས་བཟང་པོ་དང༌། གནས་དང༌། གང་དུ་འདོད་བའི་གནས་དེ་བདེ་འམ་མི་བདེ་ཡ་ཀར་ཇི་ལྟ་བུ་ཡོད་པ་སྔ་ནས་དྲི་ཞིང་ཤིས་པར་བྱ་བ་དང༌། མལ་སྟན་དང༌། གནས་དེ་ན་མལ་སྟན་དང་འཚོ་བའི་ཡོ་བྱད་འབྱོར་ཏམ་མི་འབྱོར་པ་བརྟག་པ་དང༌། གྲོགས་དག་ན་བ་ལ་མི་འདོར་རམ་ཞེས་བརྟག་སྟེ་འགྲོ། །ཚུལ་འགྲོགས་ཏེ་འདོང་པའི་དགེ་སློང་དག་གྲོགས་དག་ན་ན་འདོར་མི་འདོར་བ་བརྟག་པ་དང་འདི་རྣམས་ལྟར་གནས་བརྟན་གྱིས་བརྟག་ཅིང་སྦྱར་ཏེ་འདོང་ངོ༌། །མི་རུང་བར་འཕགས་ཏེ་ཐམས་ཅད་ཀྱི་ཕྱི་ནས་གང་གིས་ཅུང་ཟད་མ་ལུས་སམ་ཞེས་དྲན་པར་བྱ། སཱུ་ཏྲ་ལྟག་མ་ལྟར་འདོང་བ་གནས་ནས་པ་ཟད་དུ་འཕགས་ཏེ་གནས་བརྟན་གྱིས་འཁོར་རྣམས་ཀྱི་ལྷུང་བཟེད་དང་ཆུ་ཚགས་ལ་སོགས་པ་བཀུར་བའི་རྫས་དག་མ་ལུས་སམ་ཞེས་བསྐུལ་ཞིང་དྲན་པར་བྱ་བའི་ཕྱིར་བསྒོའོ། །མི་གཡེང་བ་དང༌། སྒོ་དྲུག་ཡུལ་དྲུག་ལ་འབྲོས་ཤིང་འཕྱར་བར་མི་གཏང་བ་དང༌། མི་ཁེངས་པར་གསར་བུ་དག་ལ་བསྐོ། ལུས་བསྒྱུར་དང་འགྱིང་བ་ལ་སོགས་པ་མ་བྱེད་ཅིག་ཅེས་གནས་བརྟན་གྱིས་འཁོར་རྣམས་ལ་བསྒོ། གྲོང་དག་ཏུ་འཇུག་ནའང་ཐམས་ཅད་ཀྱིས་ཐམས་ཅད་ལའོ། །གྲོང་དུ་མཆོད་སྟོན་ལྟ་བུ་ལ་གནས་བརྟན་སོ་སོའི་འཁོར་མང་པོ་ཞིག་འདུས་ན་གནས་བརྟན་རྣམས་ཀྱིས་བདག་བདག་གིས་འཁོར་ལ་བཅོས་ཤིང་བསྟན་དགེ་སློང་ཐམས་ཅད་ཀྱིས་ཀྱང་གཅིག་ལ་གཅིག་བསྟན་ཅིང་བཅོས་པ་ལ་བྱ། ཀུན་ཤེས་པར་རོ། །གྲོང་དུ་འཁོད་པ་ལ་ངོ་མི་ཤེས་ཤིང་མི་བདེ་བའི་ཕྱིར་ལོ་དང་དུས་དང་ཉི་ཚོད་ཅི་ལ་ཞུགས་པ་དང་མཁན་པོ་དང༌། སློབ་དཔོན་གང་ཡིན་པ་ལ་སོགས་པ་ཀུན་གྱིས་ཤེས་པར་བྱ། སཱུ་ཏྲ་འོག་མ་ལྟར་སྤྱོད་པ་ཤེས་པར་བྱ་བ་ལའང་བྱ། སྤྱད་པ་དང༌། འགྲོ་ཉལ་འདུག་ལངས་བཞིར་ཚུལ་བཞིན་དུ་སྤྱོད་པ་དང༌། སྤྱོད་པ། བསོད་སྙོམས་བྱེད་པའི་ཚེ་ཆད་འཚོར་བ་དང༌། སྟུ་འཚོང་མ་དང་ཤན་པའི་ནང་དུ་མི་འགྲོ་བར་
བསྟན་པ། བསྟན་པ་དང༌། སྤྱད་པ་དང༌། སྤྱོད་པ་གཉིས་ཚུལ་བཞིན་དུ་ཞིབ་ཏུ་གནས་བརྟན་གྱིས་འཁོར་ལ་བསྟན་པ་ལ་བྱ། ཉེ་བར་སྟོན་པ་དང༌། ཁ་ཐོན་སློབ་ཅིང་འབུལ་བ་ལ་སོགས་པ་དང༌། བསམ་གཏན་དང༌། ཚད་མེད་པ་བཞི་དང༌། ཕུང་པོ་དང་ཁམས་དང༌། སྐྱེ་མཆེད་ལ་སོགས་པ་ལ་བྱ། ཁ་ཟས་དང༌། བདག་གི་འཁོར་དང་སློབ་མ་ལ་སོགས་པའི་ཁ་ཟས་མེད་ན་ཁྱིམ་པ་ཡོན་བདག་ལ་སྦྱོར་དུ་གཞུག་པ་དང༌། རྙེད་པ་དང༌། གོས་ལ་སོགས་པ་འཚོ་བའི་ཡོ་བྱད་ཁྱིམ་པ་ཡོན་བདག་སྦྱོར་དུ་གཞུག་པ་དང༌། ན་བའི་གསོས་ལ་སོགས་ཏེ། ན་བའི་སྨན་བཙལ་ཞིང་བསགས་པ་དང་ཡོན་བདག་སྦྱོར་དུ་གཞུག་པ་ལ་སོགས་པ་དང༌། དགོས་པ་འགྲུབ་པར་བསྡུ། དགེ་འདུན་གྱི་སོ་ནམ་དུ་བྱ་བ་ཤིང་ཏོག་དང་ཚོད་རྔད་དང་ཤིང་དང་སྣོད་སྤྱད་དང༌། གནས་ཁང་བཅོས་པ་ལ་སོགས་པ་ཡོ་བྱད་དུ་དགོས་སོ་ཅོག་གནས་བརྟན་གྱིས་སྦྱར་ཞིང་བསྡུ། དབྱར་ཚུལ་དུ་ཞུགས་པས་གཙུག་ལག་ཁང་མ་བཅོས་པ་དག་ཤེས་པར་བྱ་སྟེ་འཆོས་སུ་གཞུག །དབྱར་ཚུལ་དུ་ཞུགས་ནས་ཚུལ་གྱི་ཚེ་གཙུག་ལག་ཁང་མི་འདྲལ་ཞིང་མི་ཟག་པའི་ཕྱིར། གནས་བརྟན་གྱིས་ཡོན་བདག་གམ་བདག་གི་འཁོར་འཆོས་སུ་གཞུག །འཆོས་སུ་གཞུག་པ་ནི་གནས་བརྟན་གྱིས་བརྟགས་ཤིང་བལྟས་ལ་ཤེས་པར་བྱ་སྟེ་འཆོས་སུ་གཞུག་གོ །འཆོས་ན་སྤྲོ་བར་བྱ། ཚུལ་གྱི་ཚེ་གཙུག་ལག་ཁང་འཆོས་པ་ཡོན་བདག་དང་བདག་གི་འཁོར་སློབ་མ་གང་བྱེད་པ་དག་ལ་འདི་ལྟར་འཆོས་ན་ཤིན་ཏུ་དགེ་ཞིང་བསོད་ནམས་ཆེའོ་ཞེས་སྤྲོ་བར་བྱའོ། །ཐམས་ཅད་ཀྱི་འཁོར་དུ་ཆུད་པ་གཏམ་འདོད་པ་མཐུན་པའི་ཆོས་ཀྱིས་བསྟབས་ཤིང་བསྡུ། གནས་བརྟན་སོ་སོའི་འཁོར་དུ་གཏོགས་པའི་སློབ་མ་རྣམས་ལ་སློབ་མ་སོ་སོ་ཅི་འདོད་པ་ཡིད་བཞིན་དུ། ཕུང་པོ་དང་ཁམས་དང་འདུ་མཆེད་དང་འདུལ་བ་ལ་སོགས་པ་གང་འདོད་པ་བཞིན་དུ། གནས་བརྟན་གྱིས་བཤད་ཅིང་བསླབ་པ་ལ་བྱ། གཅིག་ཏུ་ན་གོ་ཤ་དང་རཀྵི་ཏ་དང་བར་མ་ལྟ་བུ་མིང་མཐུན་པའི་སྡེར་གཏོགས་པ་སོ་སོ་གཅིག་ལ་གཅིག་ཆོས་སློབ་ཅིང་བསྟན་པར་དགེ་བའི་བཤེས་གཉེན་བྱ་སྟེ་སློབ་
ཅིང་ཉན་དུ་གཞུག་བ་ལ་བྱ། དེ་ནི་སོ་སོ་དྲན་བའི་ཚུལ་གྱིས་དགེ་བར་འགྱུར་བའི་ཕྱིར་རོ། །ཁ་རོག་པ་ལ་བག་ཡངས་སུའོ། །སློབ་མ་བསྟན་གཏན་སྤྱོད་ཅིང་དབེན་པ་ལ་དགའ་ནའང་བག་ཡོངས་སུ་གཞག །བསམ་གཏན་སྤྱོད་ཅིང་དབེན་པར་འདུག་ཏུ་གསོལ་ནའང་བསམ་གཏན་གྱི་ལུང་བཤད་ཅིང་བག་ཡངས་སུ་གཞག་ལེ་ལོ་བྱེད་པའི་བག་ཡངས་སུ་ནི་མི་གཞག་གོ །ཁྱིམ་པ་འོངས་ན་ཟན་བགོ་ཞིང་ངོ༌། །གཙུག་ལག་ཁང་ངམ་དགེ་འདུན་གྱི་ནང་དུ་ཁྱིམ་པ་ཞིག་འོངས་ན་ཟན་སྦྱིན། མི་བྱེད་དམ་མི་འདོད་ན་ཆོས་ཀྱི་གཏམ་དེ་ལ་བྱ་ཞིང་བདག་ཅག་ལ་འདི་ཡོད་དོ་ཞེས་གྱིས་ཤིག །ཁྱིམ་པ་འོངས་པ་དེ་དགེ་འདུན་གྱིས་ཟན་མི་འབྱོར་ཏམ་མི་སྦྱོར་རམ་ཁྱིམ་པ་དེ་ཉིད་ནང་ཟན་མི་འདོད་ཅེས་ཟེར་ན་ཆོས་བཤད་ཅིང་བསྟན་ལ་བདག་དག་ལ་མགྲོན་དུ་བྱ་བ་ཆོས་ཡོད་དོ་ཞེས་བྱ། འཁོར་ཅན་གྱིས་ཐམས་ཅད་ལ་བརྟག །དགེ་འདུན་གྱིས་གནས་བརྟན་གྱིས་བདག་གི་འཁོར་དུ་གཏོགས་པའི་དགེ་སློང་རྣམས་ལེགས་པར་སྤྱོད་དམ་མི་སྤྱོད་པ་བརྟག་ཅིང་བལྟ་དོན་མེད་པ་སྤྱོད་ན་ཆད་པས་བཅད། སཱུ་ཏྲ་ལྟག་མ་ལྟར་བརྟགས་ཏེ། དོན་མེད་པ་དང་མི་དགེ་བ་སྤྱོད་ན་ཆད་པས་བཅད། དེར་འགྲོ་བ་ལ་སོགས་པ་ཇི་ལྟ་བ་དེ་བཞིན་དུ་བྱ། རིགས་ལྔ་ལ་སོགས་པའི་གྲོང་དུ་འགྲོ་ན་བདག་ཚུལ་བཞིན་དུ་བྱ་ཞིང་ཁྱིམ་པ་ཡིད་དང་མི་འགལ་བར་སྤྲོ་བར་སེམས་བསྐྱེད་པའི་ཕྱིར་ཁོ་དང་ཐབས་མཉམ་པ་དག་གིས་དགེ་བ་སྤྱོད་པའི་ཡོན་ཏན་བརྗོད་པ་དང༌། ཁོ་ཉིད་ཀྱི་ཆོས་ལས་དགེ་བར་འགྱུར་བའི་ཡོན་ཏན་ཀྱང་བརྗོད་དེ་སྤྲོ་བར་བྱ། ཐོད་རྒལ་བ་དང༌། གཏམ་གཅིག་མཇུག་མ་རྫོགས་པར་གཏམ་གཅིག་མགོ་འཛུགས་པ་ལ་བྱ། ཕྱལ་བའི་གཏམ་མི་བྱ། དོན་མེད་པ་གཏམ་སྒྲུང་ལྟ་བུ་དང་ཁྱལ་པ་གཅིག་གི་རྗེས་ནས་གཅིག་གིས་མཐུད་དེ་ཟད་མི་ཤེས་པ་ལྟ་བུ་ལ་བྱ་སྟེ། དེ་ལྟ་བུ་བྱོ་ལ་སོང་ལྟ་བུ་ལ་བྱ་སྟེ། འདི་གཉིས་ལྟ་བུ་མི་བྱ། དགེ་སྦྱོང་ཕྱི་མ་སྔར་མི་འགྲོ། །གྲོང་དུ་འགྲོ་ན་དགེ་སྤྱོང་བྲལ་དམའ་བ་སྔོན་དུ་མི་འགྲོ། །མི་འདུག །གྲོང་དུ་འགྲོ་བའི་གྲོགས་སུ་སོང་སོང་བས་གཏམ་ཟེར་བའི་མདུན་དུ་སོང་སྟེ་བར་མི་
གཅད། སྨྲ་ན་ལན་གླན། གྲོགས་སུ་སོང་སོང་བ་ལ་ཁྱིམ་མི་དེ་གཏམ་སྨྲ་ན་ལན་གདབ་པས་མི་སྨྲ་བར་སྔར་ཀྱང་མི་སྨྲ་སྨྲ་ན་ལན་མི་གདབ་པར་ཡང་མི་བྱ་བ་སྒྲུབ་པ་ཡང་ངོ༌། །འགྲོགས་སུ་སོང་སོང་བ་དེ་ལ་ཁྱིམ་མི་དེས་ཆོས་ཀྱི་ལས་ཤིག་བཅོལ་ནའང་བསྒྲུབ་ཅིང་བྱའོ། །གཏམ་གྱི་བར་ཆད་མི་གཞུག་དགེ་སློང་གྲོང་དུ་སོང་སོང་བ་དང་ཁྱིམ་པ་དེ་གཉིས་གཏམ་ཟེར་ཞིང་འཁོད་བ་ལ་འགྲོགས་སུ་སོང་སོང་བས་གཏམ་གྱི་བར་ཆད་གློ་བུར་གྱི་གཏམ་མི་བྱ། ཆོས་མ་ཡིན་པ་སྨྲ་ན་དགག །ཁྱིམ་པ་དང་དགེ་སློང་དེ་གཉིས་འཇིག་རྟེན་གྱི་ཆོས་དོན་མེད་པ་དང་ལོག་པའི་ཆོས་སྡིག་པ་སྨྲ་ན་གྲོགས་སུ་སོང་སོང་བས་དགག །ཆོས་ཤིག་ན་རྗེས་སུ་ཡི་རང༌། ལྷག་མ་དེ་གཉིས་ཆོས་ཤིག་ཏུ་སྨྲ་ན། གྲོགས་སུ་སོང་སོང་བས་བསྟོད་ཅིང་རྗེས་སུ་ཡི་རང་བ་བྱ། ཆོས་ཀྱི་ཕྱིར་གྲུབ་པ་རྙེད་ན་བླངས། ལྟག་མའི་དགེ་སློང་དེས་ཆོས་བཤད་པ་ལས་ཁྱིམ་པ་དེས་ཡོན་ཞིག་ཕུལ་ནའང༌། གྲོགས་སུ་སོང་སོང་བས་བླང་ངོ༌། །རིགས་ཀྱང་ན་མི་གཡེང་མི་ཁེངས་འདུག་པར་མ་ཡིན། རིགས་ལྔའི་གྲོང་ལ་སོགས་པར་ལྷགས་ན་དབང་པོ་ལྔ་ཡུལ་ལ་བྲོས་ཏེ་གཡེང་བ་དང་ལུས་སྒྱུར་བྱེད་ཅིང་འགྱིང་བ་མི་བྱ་ཞིང་གྲོང་བར་དུ་དོན་མེད་པར་ཡུན་རིང་དུ་མི་འདུག །མིག་དབབ། གྲོང་བར་དུ་མིག་དབབ་མིག་ཕབ་ན། དབང་པོ་གཞན་ཡང་མི་རྒོད་པའི་ཕྱིར་རོ། །ཁྱིམ་པ་ལ་ཆོས་ཀྱི་གཏམ་བྱ། ཁྱིམ་པ་ལ་ཁྱིམ་དང་གྲོང་བར་དུ་ཆོས་བཤད་དོ་ཅོག་ཅི་བཤད་པ་དང་ཅི་ལྟར་བྱ་བའི་ཐབས་ནི་འོག་ནས་འཆད་དོ། །སྦྱིན་པ་དང༌། སྦྱིན་པ་བྱས་པའི་ཡོན་ཏན་དང་བསོད་ནམས་བཤད། འདུལ་བ་དང༌། དུག་གསུམ་དང༌། ང་རྒྱལ་མེད་ཅིང་ཐུལ་བར་བྱ་བ་བཤད། བསྡམ་པ་དང༌། འདོད་པ་རྣམ་ལྔ་ལ་མི་ཆགས་པ་དང་ཚུལ་ཁྲིམས་བསྡམ་པའོ། །ཚངས་པར་འཇུག་པ་དང༌། མི་ཚངས་པར་སྤྱོད་པ་ལ་སོགས་པ་ཁྲིམས་ལྔའི་ཡན་ལག་བཤད། གསོ་སྦྱིན་དང༌། ཉིན་ཞག་གཅིག་ལ་ཁྲིམས་བཟུང་བའི་ཡོན་ཏན་བཤད། སྐྱབས་སུ་འགྲོ་བ་དང༌། དཀོན་མཆོག་གསུམ་ལ་སྐྱབས་སུ་སོང་ན་བསོད་ནམས་ཆེ་བར་བཤད། བསླབ་ཚིག་ལེན་དུ་
དེ་དག་གཞུག །ལྟག་མ་འདི་རྣམས་བཤད་ཅིང་བསྟན་ནས་གང་འདོད་པ་བཞིན་དུ་ཁྲིམས་དཔོག །རྩོམ་པ་ཐམས་ཅད་ལ་ལྷུང་བའི་སྒོར་གྱུར་པ། དྲན་པར་ནན་ཏན་བྱ། ཅི་བྱེད་དོ་ཅོག་ཐམས་ཅད་ལ་ཉེས་པར་འགྱུར་རམ་མི་འགྱུར་སྡིག་ཡོད་དམ་མེད་པ་ནན་ཏན་དུ་བརྟག་ཅིང་དྲན་པ་སྔོན་དུ་བཏང་སྟེ་ཤེས་པར་བྱ། རག་ལུས་པས་བསྒོ་པ་མི་བྱ་བར་མི་བྱ། གནས་བརྟན་དང་སློབ་དཔོན་ལ་ཆོས་དང་འདུལ་བ་ལ་སོགས་པའི་རག་ལུས་པ་ཡིན་ཏེ། སློབ་མ་ལ་ཆོས་ལ་སོགས་པ་མི་བསྟན་པར་མི་བྱ་བ་མཁན་པོ་ལ་རག་ལས་པས་བསྒོ་བ་རྣམས་ལ་སློབ་མས་ཀྱང་བྱ་ཞིང་མཉན། འོངས་པ་ལ་ཐོག་མར་མཛའ་བའི་གཏམ་གྱིས་ཚུར་བདེ་བར་འོངས་སམ་ཞེས་བྱ། དགེ་སློང་ཞིག་གུད་ནས་འོངས་ན་མཛའ་བའི་ཚུལ་དུ་བདེ་བར་འོངས་སམ་ཞེས་བྱ། གདོང་གི་ཁ་དོག་མདངས་ཅན་འཛུམ་ཞིང་ཐོག་མར་འགྲོའོ། །གུད་ནས་འོངས་པའི་གན་དུ་ངོམ་ཟུམ་ནག་པར་མི་བྱའི་གདོང་མདངས་ཅན་དུ་བྱས་ལ་འཛུམ་ཞིང་བསུ། ཁྲོ་གཉེར་མེད་པར་རོ། །བསུ་བའི་ཚེ་ཁྲོས་པ་འདྲ་བར་གདོང་བསྡུས་ཏེ་མི་འགྲོ། །འོན་ཏེ་ཁྱིམ་པ་ཞིག་ན་དེ་ལ་ཆོས་ཀྱི་གཏམ་བྱ། ཁྱིམ་པ་ཞིག་གུད་ནས་འོངས་ན་ཡང་ཆོས་བཤད་པ་ལ་སོགས་པའི་གཏམ་བྱ་ཞིང་བསུའོ། །དེར་མི་འོང་ན་གྲོང་དྲུང་བས་མགུ་བས་ཅི་ནུས་པར་བཙལ། གཙུག་ལག་ཁང་དང་དགེ་འདུན་གྱི་གན་དུ་ཁྱིམ་པ་དག་མི་འོང་ན་གྲོང་དྲུང་གི་གཙུག་ལག་ཁང་ན་འཁོད་པའི་དགེ་སློང་དག་གིས་ཁྱིམ་བདག་ལ་བྲིད་ཅིང་མགུ་བར་བྱས་ལ་ཅི་ནས་ཀྱང་གཙུག་ལག་ཁང་དང་དགེ་འདུན་གྱི་གན་དུ་འཁོར་བར་བྱ། ཆུ་དང་སྟན་དག་ཀྱང་གཞག །གཙུག་ལག་ཁང་དུ་ཁྱིམ་པ་དག་འོང་བའི་ཕྱིར་མཎྜལ་བྱ་བ་དང་ཁ་ལག་བཀྲུ་བ་དང་ཁྲི་སྟན་ལ་སོགས་པ་གདིང་པར་བྱ། ཕྱག་དར་བྱ་མལ་སྟན་བཅའ་ཆུ་གཞག །གཙུག་ལག་ཁང་དུ་ནར་མར་བྱ་དགོས་པ་ནི་འདི་རྣམས་ཏེ་གང་གཞོན་པ་ནས་ལས་བྱའོ། །ལྷ་ཁང་གི་འཁོར་ཕྱག་དར་བྱ་དགེ་འདུན་འཁོད་པའི་ཁྲི་སྟན་གདིང་མཎྜལ་དང་ཆག་ཆག་ལ་སོགས་པའི་ཆུ་གཞག །བྲིམ་ཟན་འཇོག་པ་གསར་བུས་བྱ། སྐོམ་བྲིམ་ཞིང་
ཟན་འཇོག་པ་ཡང་དགེ་སྦྱོང་ཡན་ཆད་ན་གཞོན་པས་བྱའོ། །དགེ་སློང་གིས་བྱེད་ནའང་སྔོན་དུ་བྱིན་ལེན་བྱས་ཏེ་བྲིམ། ཕྱི་འཁོར་དག་གམ་མི་མཐུན་པར་བྱེད་ན་མི་དགག །ལྷ་རིས་ཀྱི་འབངས་རྩེ་རྒོད་དང༌། ལྟུམ་པ་ལྟ་བུ་སྲོག་གཅོད་པ་དང་ཆང་འཐུང་བ་ལ་སོགས་པ་ལོག་པའི་ཆོས་བདག་ཅག་དང་མི་མཐུན་བ་ཞིག་བྱེད་ན་མི་དགག་པར་གཞག །དེ་སྟེ་བདག་དང་གཞན་ལ་མི་གནོད་པའོ། །སཱུ་ཏྲ་ལྟག་མ་ལྟར་ལོག་པའི་ཆོས་སྤྱོད་པ་གཞག་པ་ཡང་བདག་དང་གཞན་ལ་མི་གནོད་ན་མི་དགག་པར་གཞག །འོན་ཏེ་དེ་ལྟར་དེ་ནུས་ན་བཅད་ལ་ཆོས་ཀྱིས་དབྱུང་ཞིང་བསྒོ། །རྩེ་རྒོད་དམ་ལྟུམ་པ་ལ་སོགས་པ་སྤྱོད་པ་བདག་ཅག་གིས་ནུས་ཤིང་ལྕོགས་ན་ཆོས་བཤད་ཅིང་ཁྲིམས་ཕོག་ལ་ཆོས་ཀྱི་ལས་སུ་བསྒོ་ཞིང་བསོད་ནམས་བསྐྱེད་དུ་གཞུག །ཕྱི་འཁོར་དག་དང་འབྱེའམ་འབྲོས་ན་དེའི་ཕྱིར་བཅོས། །རྩེ་རྒོད་དང་ལྟུམ་པ་ལ་སོགས་པ་ཉིད་ལ་ཉེས་པ་ཞིག་ཡོད་དེ་ཚད་མ་ཐུབ་སྟེ་འབྲོས་སམ་དགེ་སློང་དག་ལ་མི་དགའ་སྟེ་གུང་དུ་འགྲོ་ན་ཅི་ནས་ཀྱང་མི་འབྲོས་པར་ཐབས་ཅི་ཡོད་པས་བཅོས། མི་ནུས་ན་གཞན་དུ་སོང་ཤིག །སཱུ་ཏྲ་ལྟག་མ་ལྟར་མི་འབྲོས་པར་འཆོལ་མ་ནུས་ན་རྩེ་རྒོད་དང་ལྟུམ་པ་མི་དགའ་བ་གུད་དུ་འབྲོས་སུ་མི་གཞུག་གི་དགེ་སློང་ཉིད་གུད་དུ་འགྲོའོ། །དེའི་ཕྱིར་འཐབ་པའི་མི་སྨྲ། རྩེ་རྒོད་མི་མཐུན་པར་བྱེད་པ་དེ་དག་ལ་འཐབ་མོ་དང་ཕྱིས་ཤ་གླན་པ་ལ་སོགས་པའི་ཚིག་མི་སྨྲ། དགེ་འདུན་གྱི་ཀུན་དགའ་ར་བ་ན་གནོད་པ་བྱེད་ན་འདི་ལྟར་བྱ་སྟེ་ཅི་ལྟར་ཐོགས་ཤིང༌། འགྲོ་བ་བདག་གིས་ཟིན་པར་རོ། །རྩེ་རྒོད་དང་ལྟུམ་པ་ལ་སོགས་པ་ཞིག་གཙུག་ལག་ཁང་གི་འཁོར་དུ་རྐུན་པོ་ཞིག་བྱེད་ན་ཤགས་ཀྱིས་ཐུབ་པར་བྱ་ཞིང་སུན་དུ་བྱུང་བའི་ཕྱིར་སྔ་ནས་རྐུ་ཞིང་མི་སྲུན་ནོ་ཞེས་མི་གཙེའི་ནམ་བརྐུས་པའི་ཚེ་རྫས་དང་བཅས་པར་མངོན་སུམ་དུ་ཟིན་པར་བྱ། རྐུན་པོ་གཞན་ལའང་འདི་འདྲ་བའི་ཚུལ་དུ་བྱ། མ་ལྕོགས་ན་སུ་ལའང་བྱུང་རྒྱལ་དུ་མི་བསྙད་པར། རྐུན་པོ་བྱེད་པ་དེ་རྫས་ལག་ནས་ཟིན་པར་མ་ནུས་ཤིང་རྐུ་བ་མ་ཆོད་ན་འདི་རྐུའོ་མི་སྲུན་ནོ་ཞེས་གཞན་ལ་བྱུང་རྒྱལ་དུ་མི་བསྙད་ཀྱིས་མིང་གིས་སྨོས་པ་འདི་རྣམས་ལ་བྱ་སྟེ། རྐུན་པོ་ཆོད་པར་
ནན་ཏུར་གྱིས་ཆེས་གསོལ། གཞོན་ནུ་དང༌། རྒྱལ་པོ་ཤི་ན་འཚབ་མ་བྱེད་པ་ལ་བྱ། མཛའ་བོ་དང༌། རྒྱལ་པོ་དང་མཛའ་བ་ལ་བྱ་སྟེ་གནང་ཆེན་ལྟ་བུ། བློན་པོ་དང༌། བློན་པོ་ཆེན་པོ་ལས་ལ་གཏོགས་པ་ལ་བྱ། དྲ་མ་དང་བློན་པོའི་ལས་ལ་མ་གཏོགས་པ་རིགས་བཙུན་པ་ཞང་བློན་དྲ་མ་ལྟ་བུ་དང༌། རྒྱལ་བུ་དང༌། རྒྱལ་པོའི་ཚབ་མར་འོང་བ་མ་ཡིན་པ་ལྟ་བུ་གཞན་ལ་བྱ། ཞབས་འབྲིང་བ་ལ་སྦྲན་ཏེ་འཁོར་དུ་གཙང་མས་ཐུལ་བར་བྱ། རྒྱལ་པོའི་ཞབས་འབྲིང་བ་ནང་འཁོར་ལྟ་བུ་དང༌། འདི་རྣམས་ལ་བྱ་སྟེ་བརྡེག་བཙོག་དང་བསད་ཕྱག་ལྟ་བུའི་ནན་ཏུར་གྱིས་ནི་མི་བྱའི། ཚིག་གི་ནན་ཏུར་གྱིས་ཕྱིན་ཆད་མི་བྱེད་པར་ཐུལ་བར་བྱ། དགེ་སློང་གི་གནས་སུ་དགེ་སློང་མའོ། །ལྟག་མ་བཤད་པ་ཐམས་ཅད་དགེ་སློང་གིས་བྱའོ། །ཞེས་འབྱུང་བ་དེ་གཞན་དུ་དགེ་སློང་མས་ཀྱང་བྱའོ། །རབ་ཏུ་འབྱུང་བ་ཐམས་ཅད་དུའོ། །ལྟག་ཏུ་དགེ་སྦྱོང་ཕ་རབ་ཏུ་དབྱུང་བའི་ཆོ་ག་བྱེད་པ་བཞིན་དུ་དགེ་སློང་མ་རབ་ཏུ་འབྱིན་པའི་ཆོ་ག་ཐམས་ཅད་ཀྱང་དེ་དང་འདྲ་བར་བྱ། བསྙེན་པར་རྫོགས་པའི་ཚེ་ནི་དེར་གསོལ་བ་དང་ལས་བྱེད་པ་ལ་སོགས་པ་ལས་གཞན་དུའོ། །དགེ་སློང་མ་བསྙེན་པར་རྫོགས་པར་བྱེད་པའི་ཚེག་གསོལ་བར་བྱེད་པ་དང་ཁྲིམས་འབོགས་པ་དང་ཞུ་བ་བྱེད་པ་ནི་དགེ་སློང་གཅིག་གིས་བྱའི། གཞན་ཆོས་གོས་བསྔོ་བ་དང་གྲིབ་མ་འཆལ་བ་ལ་སོགས་པ་ཐམས་ཅད་དགེ་སློང་བསྙེན་པར་རྫོགས་པའི་ཆོ་ག་བཞིན་དུ་དགེ་སློང་མ་དག་ཉིད་ཀྱིས་བྱའོ། །འོག་ནས་ཆོ་ག་འབྱུང་བ་ཐམས་ཅད་ཀྱང་བར་ཆད་དྲི་བའི་ཟླ་དགེ་སློང་གཅིག་གིས་བྱ། གཞན་ནི་ཐམས་ཅད་དགེ་སློང་མས་བྱའོ། །འདིར་དགེ་འདུན་གཉིས་ཀྱིས་སོ། །དགེ་སློང་མ་བསྙེན་པར་རྫོགས་པའི་ཚེ་ན་དགེ་འདུན་ཕོ་དང༌། དགེ་འདུན་མོ་སྡེ་གཉིས་ཀྱིས་བྱ་དགོས་ཏེ་ཡུལ་དབུས་སུ་དགེ་འདུན་ཕོ་བཅུ་མོ་བཅུ་གཉིས་མཐར་ནི་དགེ་སློང་དཀོན་ན་དགེ་སློང་ལྔ་དགེ་སློང་མ་དྲུག་གིས་བྱའོ། །དགེ་སློང་མ་བར་དུ་བཞག་སྟེ་བར་ཆད་སྨྲ། ཁྲིམས་འབོགས་པའི་ཚེ་བར་ཆད་འདྲི་བ་ལ་དགེ་སློང་ཕ་བར་ཆད་འདྲི་བ་དང་ཁྲིམས་རྫོགས་པར་འདོད་པ་དགེ་སློང་མ་གཉིས་ཀྱི་བར་དུ། དགེ་སློང་མ་མཁས་པ་གཅིག་
འདུག་ལ་གཅིག་ལ་གཅིག་ཚིག་བརྒྱུད་དེ་དྲིའོ། །ངོ་མི་ཚ་བར་བྱ་བའི་ཕྱིར་རོ། །དགེ་སློང་མ་ཞེས་བྱ་བ་བུད་མེད་ཀྱི་རིམ་གཞན་ནོ། །དགེ་སློང་ཕ་ལ་ནི་རབ་ཏུ་འབྱུང་བ་དང་བསྙེན་པར་རྫོགས་པའི་ཆོ་ག་གཉིས་ཡོད་ན་དགེ་སློང་མ་ནི་དེ་གཉིས་ཡོད་པའི་སྟེང་དུ། དགེ་སློང་མ་ཞེས་བྱ་བ་ལྷག་པར་ཡོད་དེ། དགེ་སློབ་མའི་ཆོ་ག་ཅི་ལྟར་བྱེད་པ་ནི་འོག་ནས་འཆད། གནས་ན་དེར་རོ། །དགེ་སློང་མའི་ཁྲིམས་ནོད་པའི་ཚེ་ནའང་མཁན་མོར་ལན་ཅིག་གསོལ་དགོས། དགེ་སྤྱོང་མ་ནས་དགེ་སློང་མའི་བར་དུ་སྟེ་དུས་ནི་ལོ་གཉིས་ཀྱི་བར་དུ་སྤྱད། དགེ་སློང་མས་སྤྱད་པའི་སྐབས་ནི། དགེ་སློང་མར་བྱ། རབ་ཏུ་བྱུང་ནས་དགེ་སློབ་མའི་ཁྲིམས་ནོད་དེ་ལོ་གཉིས་ཀྱི་བར་དུ་དགེ་སློབ་མ་བྱས་ཤིང་སྤྱད་ལ། དེ་ནས་བསྙེན་པར་རྫོགས་པར་བྱ། བསྙེན་པར་རྫོགས་པ་ལས་དེས་ཉང་ན་སྐྱེས་བའི་དུས་སོ། །བག་མ་བམ་བྱས་པའི་དགེ་སློང་མ་ལོ་བཅོ་བརྒྱད་ལོན་པ། དགེ་སློབ་མའི་ཁྲིམས་ཕོག་སྟེ་དགེ་སློབ་མའང་ལོ་གཉིས་སྤྱད་ལ་ལོ་ཉི་ཤུར་ཀྱང་ཚང་བར་བྱ་སྟེ། བསྙེན་པར་རྫོགས་པར་བྱ། བག་མ་བྱས་པའི་དགེ་སྦྱོང་མ་ནི་ལོ་བཅུ་ལོན་ལ་དགེ་སློབ་མའི་ཁྲིམས་ཕོག་སྟེ། དགེ་སློབ་མའང་ལོ་གཉིས་བྱས་ལ་ལོ་བཅུ་གཉིས་ལོན་ན་བསྙེན་པར་རྫོགས་པར་བྱར་རུང་ངོ༌། །བག་མ་བྱས་ན་ལོ་བཅུ་གཉིས་ཡན་ཆད་བསྙེན་པར་རྫོགས་པར་རོ། །དགེ་སྦྱོང་མ་བག་མ་བྱས་པ་ཞིག་ན་རྒྱོ་མྱོང་ཤིང་ཤེ་ཁྱེར་བའི་ཕྱིར་ལོ་བཅུ་གཉིས་ལོན་པ་ཡན་ཆད་བསྙེན་པར་རྫོགས་པར་བྱར་རུང་ངོ༌། །ས་བྱིན་ན་སྐྱེའོ། །དགེ་སློབ་མའི་ཁྲིམས་ཕོག་ཅིང་བྱིན་ན་དགེ་སློབ་མར་གྱུར་རོ། །ལོ་གཉིས་སུ་བརྩི་བའང་དགེ་སློབ་མའི་ཁྲིམས་ཐོབ་པ་ཚུན་ཆད་དུ་བརྩིས། དགེ་སློང་མའི་དགེ་འདུན་གྱིས་སོ། །དགེ་སློང་མའི་ཁྲིམས་དབོག་པ་ནི་དགེ་སློབ་མའི་དགེ་འདུན་གྱིས་དབོག་གོ །འབོགས་པའི་བདུན་དུ་བར་ཆད་ཀྱང་ལན་ཅིག་དྲི་སློབ་པ་སྡོམ་པའོ་ཞེས་སྦྱིན། ཁྲིམས་དབོག་པའི་ཚིག་ནི་སློབ་པ་སྡོམ་པའོ་ཞེས་བརྗོད་ཅི་གསོལ་བ་དང་ཞུ་བ་གཉིས་ཀྱིས་བྱ། དེའི་འོག་ཏུ་བསླབ་པ་བརྗོད། དགེ་སློབ་མའི་ཁྲིམས་ཕོག་ཟིན་ནས་ཁྲིམས་ཉིད་གང་ཡིན་པ་བསྟན་ཅིང་བརྗོད་དོ། །ཁྲིམས་ནི་རྒྱང་གྲངས་གཅིག་ཕན་ཆད་གྲོགས་མོ་
གཅིག་དང་འགྲོགས། །ཆུ་རྒལ་ན་ལག་པ་སྤྲེལ་སྐྱེས་པ་དང་མི་རེག་སྐྱེས་པ་དང་ཁྱིམ་གཅིག་ཏུ་མི་ཉལ་སྨྱན་མི་བྱ་གྲོགས་ཀྱི་ཉེས་པ་མི་འཆབ་གསེར་དངུལ་ལ་མི་རེག་གསང་བའི་སྤུ་མི་བྲེགས། ས་མི་རྐོ་བྱིན་ལེན་མ་བྱས་པའི་ཟས་མི་བཟའ་རྩྭ་མི་གཅད་པ་དང་དགེ་སྦྱོང་གི་ཁྲིམས་བཅུས་བསྣན་ཏེ་ཉི་ཤུ་རྩ་གཉིས། ཚངས་པར་སྤྱོད་པའི་གནས་པར་སྔོམ་པ་མ་ཐོབ་ན་བསྙེན་པར་རྫོགས་པ་མ་ཡིན་ནོ། །བསྙེན་པར་རྫོགས་པར་བྱེད་པའི་མདུན་དུ་ཚངས་པར་སྤྱོད་པའི་གནས་སྡོམ་པ་ཞེས་བྱ་བ་གསོལ་བ་དང་གཞུ་བ་གཉིས་ཀྱིས་ཆོ་ག་བྱ་དགོས་ཏེ་བར་ཆད་ཀྱང་ལན་ཅིག་དྲིས་ལ་ཚངས་པར་སྤྱོད་པའི་གནས་སྡོམ་པ་སྦྱིན་ཚངས་པར་སྤྱོད་པའི་ཆོ་ག་འདི་མ་བྱས་པར་བསྙེན་པ་རྫོགས་པར་བྱས་ཀྱང་ཁྲིམས་མི་འཆགས། སྔར་གསང་སྟེ་སྟོན་པའི་འོག་ཏུ་སྦྱིན། ཚངས་པར་སྤྱད་པའི་གནས་སྡོམ་པ་སྔར་གསང་སྟེ་སྟོན་པས་བར་ཆད་དྲིས་ལ་སྦྱིན་ཞིང་དབོག །དགེ་འདུན་གྱིས་སོ། །ཚངས་པར་སྤྱོད་པའི་གནས་སུ་སྡོམ་པའི་ཆོ་ག་སྦྱིན་པ་ནི་དགེ་སློང་མའི་དགེ་འདུན་གྱིས་བྱའོ། །བར་ཆད་དྲིས་ཏེའོ། །དགེ་སློང་མའི་དགེ་འདུན་གྱིས་ཚངས་པར་སྤྱོད་པའི་ཆོ་ག་བྱ་བ་ནི་དགེ་འདུན་མ་ཉིད་ཀྱི་གན་དུའང་ལན་ཅིག་དྲི། གསོལ་ནས་སོ། །ཚངས་པར་སྤྱོད་པ་དགེ་འདུན་གྱིས་དབོག་པ་ཡང་ཁྲིམས་ནོད་པས་གསོལ་བ་བྱས་ནས་དབོག །ཆོས་གོས་ལྔ་དང་ངོ༌། །བསྙེན་པར་རྫོགས་པར་བྱེད་པའི་ཚེ་དགེ་སློང་མ་དེ་ལ་ཆོས་གོས་ལྔ་བསྔོ། །གནས་ལ་ཤིང་དྲུང་མ་གཏོགས་པར་རོ། །གནས་བཞི་ལ་ཤིང་དྲུང་མ་གཏོགས་པར་གནས་གསུམ་བསྐོ། །ལྟུང་བ་བརྒྱད་དང༌། ཕས་ཕམ་པ་བརྒྱད་ཀྱང་བསྒོ་སྟེ་མི་ཚངས་པར་སྤྱོད་པ་དང༌། རྐུ་བ་དང་མི་ལ་གསོད་པ་དང༌། བརྫུན་དུ་སྨྲ་བ་དང༌། སྐྱེས་པས་རེག་སྟེ། འདོད་ཆགས་ལངས་པ་དང༌། གྲོགས་མོའི་ཕམ་པ་བཞི་ལས་གཞན་ཀྱང་རུང་བཅབས་པ་དང་དགེ་སློང་མ་ཆད་པས་བཅད་པ་མ་ཆགས་ཤིང་ཅེས་གྲོགས་བཏབ་པ་དང་ངོ༌། །ལྕི་བའི་ཆོས་བསྒོ་ལྕི་བའི་ཆོས་བརྒྱད་ཀྱང་བསྒོ་སྟེ། དགེ་འདུན་ཕོ་མེད་པར་ཁྲིམས་རྫོགས་པར་བྱས་པ་དང་གསོ་སྦྱིན་དགེ་སློང་ལ་མ་དྲིས་པ་དང༌། དགེ་སློང་དང་ཉེ་བར་ཚུལ་དུ་མ་ཞུགས་པ་དང༌། དགེ་
སློང་གི་ཉེས་པ་ལ་རྒོལ་བ་དང་དགེ་སློང་ཁྲིམས་པར་འཐབ་མོ་བྱེད་པ་དང༌། དགེ་སློང་ཕ་ཁྲིམས་རྫོགས་པ་ལ་ཕྱག་མ་བྱས་པ་དང་ལྷག་མའི་ཆད་པ། དགེ་འདུན་ཕོ་ལ་མ་བྱས་པར་ཕྱུང་བ་དང༌། དགེ་འདུན་སྡེ་གཉིས་མེད་པར་ཚུལ་ནས་འབྱུང་བ་འཇུག་པ་དང་བརྒྱད་དོ། །ལྟུང་བ་དང་དགེ་སྦྱོང་གིས་བྱ་བའི་མཚམས་སུའོ། །ལྕི་བ་བརྒྱད་བསྒོ་བའི་སྐབས་ནི་ཕས་ཕམ་པ་བརྒྱད་བསྒོ་བའི་འོག་ཏུ་བསྒོ། །ཀྲིད་དྲུག །དགེ་སློང་མར་མི་གནང་རྣམ་པ་དྲུག་ཡོད་དེ། འོག་ནས་མིང་གིས་བཤད་པ་རྣམས་སོ། །འདི་ལ་ཆོས་མི་སྐྱེའོ་ཞེས་སོ། །མི་ནང་པོ་རྣམ་པ་འདི་དྲུག་ལ་ནི་ཞིང་མ་ཡིན་པས་ཁྲིམས་མི་འཆགས་ཏེ་དགེ་སྦྱོང་དང་དགེ་སློང་མའི་ཁྲིམས་ཀྱང་མི་དབོག་ཁྲིམས་ཕོག་པ་ཞིག་ནའང་དབྱུང༌། མཚན་གཉིས་པ། ཕོ་མཚན་མོ་མཚན་གཉིས་ཀ་ཡོད་པ། གླེ་འདམས་པ་སྟུ་དང་རྐུབ་གཉིས་འདམས་ཏེ་གཅིག་ཏུ་གྱུར་པའོ། །རྟག་པར་ཁྲག་ཟག་པ་དང༌། རྒྱུན་མི་འཆད་པར་ཁྲག་ཟག་པའི་མོ་མཚན་ནོ། །ཁྲག་མེད་པ། སྟུ་ཁྲག་ཡང་མི་ཟག་པ་སྟེ་བཅུ་གཉིས་མན་ཆད་ལ་མི་ཟག་པ་དང་ལྔ་བཅུ་ཡན་ཆད་ལ་ཁྲག་མི་ཟག་པ་ནི་མ་གཏོགས་ཏེ་དེ་ལ་མི་བྱའོ། །མཚན་མ་ཙམ་པ། མོ་མཚན་ཆུང་ཞིང་མཚན་མ་ཙམ་དུ་འདུག་པ་ལ་བྱ། མཚན་མ་ཙམ་དུ་གྱུར་བའི་མཚན་མ་དེ་ལས་གསུངས་སོ། །སཱུ་ཏྲ་ལྟག་མ་མཚན་མ་ཞེས་བྱ་བ་ནི་གཅིན་འོང་བའི་བུ་གུ་ཡོད་པ་ཙམ་དུ་ཟད་ཀྱི་མི་ཚངས་པར་སྤྱོད་དུ་མི་བཟོད་པའོ། །སྔོན་རབ་ཏུ་བྱུང་བ། སྔོན་རབ་ཏུ་བྱུང་སྟེ་ཁྲིམས་ཕུལ་བ་དང་འདི་རྣམས་ལྟ་བུ་དམིགས་ཀྱིས་ཀྱང་མ་ཡིན་ནམ་ཞེས་དྲིས་ལ་ཡིན་ན་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱ། ཕྲ་མོ་ལ་སོགས་པའི་རབ་ཏུ་དབྱུང་བའི་དངོས་པོར་ཆུད་པའོ། །འདུལ་བའི་སྡེ་ཕྲན་ཚེགས་ཞེས་བྱ་བའི་ནད་ནས་རབ་ཏུ་དབྱུང་བའི་ཆོ་ག་འབྱུང་སྟེ་རྫོགས་སོ།། །།མི་མ་ཡིན་པའི་རྒྱུད་དང༌། བྱང་གི་སྒྲ་མི་སྙན་ནི་སྡོམ་པའི་ཞིང་མ་ཡིན་ནོ། །ལམ་རྒྱུད་ལྔ་ལ་མི་མ་གཏོགས་པའི་ལྷའི་རྒྱུད་ཀྱང་འདོད་པ་རྣམ་པ་ལྔ་ལ་ཆགས་ཤིང་སྐྱིད་པའི་ཕྱིར་ཁྲིམས་མི་འཆགས་བྱོལ་སོང་ཡང་གླེན་པའི་ཕྱིར་ཁྲིམས་མི་འཆགས། ན་རག་ཀྱང་སྡུག་བསྔལ་བས་བསྒྲིབས་པའི་ཕྱིར་
ཁྲིམས་མི་འཆགས། འདྲེ་ཡང་ཁྲོ་བའི་ཕྱིར་ཁྲིམས་མི་འཆགས། བྱང་གི་སྒྲ་མི་སྙན་གྱི་མི་ཡང་པ་དང་ཁྱོད་ཀྱི་བྱ་བ་མེད་ཅིང་བྱེ་བྲག་མི་འབྱེད་པས་ཁྲིམས་མི་འཆགས། ལམ་རྒྱུད་འདི་བཞི་དང་བྱང་གི་སྒྲ་མི་སྙན་གྱི་མི་འདི་ལྟར་ཁྲིམས་མི་འཆགས་པ་ཡིན་པས་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱ། མཚན་ལན་གསུམ་དུ་གྱུར་ན་ཡང་ཡིན་ནོ། །སྐྱེས་པ་ལས་བུད་མེད་ཀྱི་མཚན་དུ་གྱུར་ཡང་བུད་མེད་ལས་སྐྱེས་པའི་མཚན་དུ་གྱུར། དེ་ལས་ཡང་བུད་མེད་ཀྱི་མཚན་དུ་གྱུར་པ་ལྟ་བུའི་མི་ལ་ནི་ཁྲིམས་ཕོག་ཀྱང་མི་འཆགས་ཏེ་དེ་ལྟ་བུའི་མི་ལ་ནི་རབ་ཏུ་དབྱུང་བ་དང་བསྙེན་པར་རྫོགས་པར་མི་བྱའོ། །ཐོག་མ་དག་གིས་ནི་མི་ཞིག་གོ །དགེ་སློང་ཞིག་ལས་མཚན་གྱུར་ནའང་ཐོག་མ་ལན་གཉིས་ཀྱི་བར་དུ་ནི་ཁྲིམས་མེད་པར་མ་སོང་གི་ལན་གསུམ་དུ་གྱུར་པའི་ཐ་མས་ཁྲིམས་མེད་བར་སོང་སྟེ་དགེ་སློང་དུ་མི་རུང་ངོ༌། །ལེན་པའི་ཚེ་ནའང་སྐྱེའོ། །ཁྲིམས་མི་འབོགས་པའི་ཚེ་ན་སྐྱེས་པ་ལས་བུད་མེད་ཀྱི་མཚན་དུ་གྱུར་ཀྱང་སྐྱེས་པའི་ཁྲིམས་ཕོག་མོད་ཀྱི་བུད་མེད་ཀྱི་ཁྲིམས་ཐོབ་པར་འགྱུར། བུད་མེད་ལས་མཚན་གྱུར་ཀྱང་དེ་བཞིན། མཁན་པོ་མེད་ཀྱང་དེར་རོ། །མཁན་པོ་མེད་པར་དགེ་འདུན་དང་སློབ་དཔོན་གྱིས་རབ་ཏུ་དབྱུང་བ་དང༌། བསྙེན་པར་རྫོགས་པར་བྱས་ཀྱང་ཁྲིམས་འཆགས་སོ། །བསྙེན་པར་མ་རྫོགས་པས་ཀྱང་ངོ༌། །དགེ་སྦྱོང་གི་ཁྲིམས་འབོགས་པའི་ཚེ་མཁན་པོ་དགེ་སྦྱོང་ཉིད་དང་ཁྱིམ་པས་བྱས་ཀྱང་འཆགས། དགེ་སློང་བསྙེན་པར་རྫོགས་པ་ལ་ནི་མཁན་པོ་ཁྱིམ་པ་དང༌། དགེ་སྦྱོང་གིས་བྱས་ན་རུང་བ་དང་མི་རུང་ངོ་ཞེས་བཅས་པ་མེད་དོ། །དགེ་སློང་མ་ཡིན་པར་ཤེས་ན་མི་རུང་ངོ༌། །སཱུ་ཏྲ་ལྟག་མ་ལྟར་དགེ་སྦྱོང་གི་མཁན་པོ་ཁྱིམ་པ་དག་གིས་བྱ་སྟེ། དགེ་སྤྱོང་གིས་ཁྲིམས་ནོད་པ་ཉིད་ཀྱི་ཡིད་ལ་མཁན་པོ་དགེ་སྦྱོང་དང་ཁྱིམ་པ་ཡིན་པར་ཤེས་ཏེ་ཁྲིམས་མི་འཆགས་སོ་སྙམ་བསམ་པ་དང་ཕྱིས་མི་རུང་བར་ཤེས་ན་ཁྲིམས་མེད་ཅིང་མི་འཆགས་པར་འགྱུར་རོ། །ཉིད་ཀྱིས་ཕུལ་ན་མི་རུང་ངོ༌། །ཁྲིམས་ནོད་པའི་ཚེ་གང་ནོད་པ་དེས་ང་ལ་མཁན་པོ་མི་དགོས་སོ་ཞེས་ཟེར་ཞིང་མི་འདོད་ན་ཁྲིམས་མི་འཆགས་སོ། །དེ་དག་
གི་མིང་མ་བརྗོད་ན་མི་རུང་ངོ༌། །ཁྲིམས་ནོད་པའི་ཚེ་མཁན་པོ་དང་ཁྲིམས་ནོད་པ་ཉིད་ཀྱི་མིང་མ་བརྗོད་ན་ཁྲིམས་མི་འཆགས་ཏེ། མཁན་པོའི་མིང་མ་བརྗོད་པ་ནི་མི་འཆགས་པ་ཉིད་དུ་མི་འགྱུར། དབང་ལུས་པ་དགེ་འདུན་གྱི་ནའང་མི་རུང༌། ཁྲིམས་ནོད་པའི་ཚེ་དགེ་འདུན་ལས་ཁྲིམས་འཐོབ་པས་ན་དགེ་འདུན་ལས་བསྙེན་པར་རྫོགས་པར་འཚལ་ལོ་ཞེས་བྱ་བའི་མིང་མ་བརྗོད་ནའང་ཁྲིམས་མི་འཆགས། ཁྱིམ་པ་དང་མུར་འདུག་གི་ཚུལ་གྱིས་ན་མི་རུང༌། ཀ་ཤ་མེད་པར་མུར་འདུག་དང་ཁྱིམ་པའི་རྒྱུན་དུ་ཞུགས་ཏེ་རབ་ཏུ་བྱུང་བ་དང་བསྙེན་པར་རྫོགས་པའི་ཁྲིམས་ཕོག་ན་མི་འཆགས་སོ། །གཅེར་པ་དང་འཁྲུགས་པ་དང༌། གོས་མེད་པར་གཅེར་བུ་དང་སེམས་འཁྲུགས་ཤིང་ཁྲོས་པ་དང༌། གང་འཆའ་བ་མི་རུང༌། བུད་མེད་སྐྱེས་པ་དང་ཉལ་ལོ་ཅོག་ཤི་བ་དང་འདི་རྣམས་ལྟ་བུ་ལ་ཁྲིམས་ཕོག་ཀྱང་མི་འཆགས་སོ། །སྐྱེས་པ་གོང་འཆའ་བ་ནི་གནང་བ་དང་མི་གནང་བར་ཁྲིམས་བཅས་པ་ནི་མེད་དོ། །འདུལ་བ་འཛིན་པ་ཁ་ཅིག་གིས་ནི་བུད་མེད་དང་འདྲའོ་ཞེས་ཀྱང་བཤད་དོ། །སྤངས་པར་མཚན་མ་ལས་ལྡོག་པ་ཁས་མ་བླངས་ན་མི་རུང༌། ཉེས་པ་ཞིག་བྱུང་སྟེ་ཆད་པས་བཅད་ན་ཉེས་པ་མཐོང་ངོ་ཞེས་ཟེར་ཞིང་ཆད་པ་བྱེད་དུ་མི་བཏུ་བ་པ་དང་ཆད་པས་བཅད་ན་ངས་ཉེས་མེད་ཀྱི་ཆད་པ་བྱེད་དུ་མི་འདོད་དེ་ཞེས་ཟེར་བ་དང༌། སངས་རྒྱས་ཀྱིས་བར་དུ་གཅོད་དོ་ཞེས་གསུངས་པའི་ཆོས་ལ་བར་དུ་གཅོད་པར་མི་འགྱུར་རོ་ཞེས་ཟེར་བ་འདི་ལྟ་བུའི་ཆད་པ་མ་བྱས་སམ། ཉེས་པ་མ་མཐོལ་བར་ཁྲིམས་ཕུལ་ཏེ་ཁྱིམ་པར་སོང་བ་ལས་སླར་ཁྲིམས་ནོད་ན་སྔོན་གྱི་ཉེས་པ་དོར་རོ་ཞེས་ཁས་མི་ལེན་པར་རབ་ཏུ་དབྱུང་བ་དང་བསྙེན་པར་རྫོགས་པར་བྱས་ཀྱང་ཁྲིམས་མི་འཆགས། སྔ་མའི་རིམ་བཞིན་ནི་ཉེས་བྱས་པ་ཙམ་མོ། །ལྟག་ཏུ་དགེ་བསྙེན་དང་དགེ་སྦྱོང་དག་བསྙེན་པར་རྫོགས་པར་རིམ་པར་ཕོག་ཤིག་ཅེས་རིམ་པར་འབྱུང་བ་བཞིན་དུ་མ་བྱས་ཏེ། ཅིག་ཅར་བསྙེན་པར་རྫོགས་པར་བྱས་ན་ཁྲིམས་ནི་ཆགས་ཏེ་མཁན་པོ་དང་དགེ་འདུན་ལ་ཉེས་བྱས། མཁན་པོར་མི་གསོལ་བ་ཡང་ངོ༌། །མཁན་པོར་གསོལ་བའི་ཚིག་མི་བྱས་པར་ཁྲིམས་ཕོག་ན་ཁྲིམས་མི་འཆགས་ཏེ། མཁན་པོ་དང་དགེ་འདུན་ལ་ཉེས་བྱས། བར་ཆད་མ་དྲིས་
ན་ཡང་ངོ༌། །བར་ཆད་མ་དྲིས་པར་ཁྲིམས་ཕོག་ན་ཡང་མཁན་པོ་དང་དགེ་འདུན་ལ་ཉེས་བྱས་སུ་འགྱུར་ཏེ་ཁྲིམས་ནི་འཆགས་སོ། །མེད་ལ་ཁ་བླངས་ཏེ་བྱིན་ན་ཡང་ངོ༌། །བསྙེན་པར་རྫོགས་པར་བྱེད་པ་དེ་ལ་འཆགས་མད་པ་ལྟ་བུ་ཡང་མེད་པར་ཡོད་དོ་ཞེས་ཟེར་བ་ལ་ཁྲིམས་ཕོག་ན་ཁྲིམས་ནི་འཆགས་ཏེ་མཁན་པོ་དང་དགེ་འདུན་ལ་ཉེས་བྱས། སྐྱེས་པ་བུད་མེད་ལྟ་བུ་དང་བུད་མེད་སྐྱེས་པ་ལྟ་བུ་ནི་མཚན་ཐ་དད་པ་མ་ཡིན་ནོ། །སྐྱེས་པ་བུད་མེད་ཀྱི་གཟུགས་སུ་འདུག་པ་ནི་ཁྲིམས་ཕོག་ཀྱང་ཉེས་བྱས་མཁན་པོ་དང་དགེ་འདུན་ལ་ཡོད་དུ་ཟད་ཀྱི་ཁྲིམས་ནི་འཆགས་སོ། །ཉེས་པ་ཡོད་པ་ནི་བུད་མེད་སྐྱེས་པ་འདྲ་བ། དགེ་སློང་མའི་ཁྲོད་ན་འདུག་ན་བུད་མེད་ཀྱི་ཁྲོད་ནས་སྐྱེས་པ་གཅིག་ཅིག་གཡོག་བྱེད་ཅིང་འདུག་སྟེ་མི་ཚངས་པར་སྤྱོད་པ་ལྟ་ཞེས་འཕྱ་བའི་ཕྱིར་རོ། །དེ་ལག་ཆད་ལ་སོགས་པའི་ནང་དུ་གཏོགས་སོ། །ལྟག་ཏུ་བཤད་པ་ཁྲིམས་ནི་འཆགས་ཀྱི་ཉེས་བྱས་ཡོད་དོ་ཞེས་འབྱུང་བའི་སཱུ་ཏྲ་ལྟག་མ་གོང་དུ་ལག་རྡུམ་བཅུག་ན་ཉེས་བྱས་སོ་ཞེས་ཟེར་བ་བཞིན་དུ་ཁྲིམས་ནི་འཆགས་ཀྱི་མཁན་པོ་དང་དགེ་འདུན་ལ་ཉེས་བྱས་སུ་འགྱུར་བ་ལ་བྱ། སྡིག་པའི་མཚན་དང་ཚུལ་ཐ་དད་པ་གླིང་གཞན་ལས་སྐྱེས་པ་ཡང་ངོ༌། །སྨེ་བ་དང་ཤ་མཚན་ལ་སོགས་པ་སྡིག་ཏུ་འགྱུར་བའི་མཚན་དུ་འདུག་པ་དང༌། མི་ཡིན་མོད་ཀྱི་རྐང་ལག་ཕྱུགས་སུ་འདུག་པ་ལྟ་བུ་དང༌། ཤར་ཕྱོགས་དང་ནུབ་ཕྱོགས་ཀྱི་གླིང་ཆེན་པོ་དང་གླིང་ཕྲན་གྱི་མི་དང་འདི་རྣམས་ལྟ་བུ་དང་ཁྲིམས་ཕོག་ཀྱང་ཉེས་བྱས་སོ། །སེན་མོ་གཅིག་པ་དང༌། སོར་མོ་འབྱར་ཏེ་སེན་མོ་གཅིག་པ་དང་སོར་མོ་མ་འབྱར་བར་སེན་མོ་གཅིག་ཏུ་འདུག་པ། རྐང་ལག་ལྟེབས་པ་དང༌། ཤོག་ཤོག་ལྟ་བ་སྟེ་བཀུག་ནས་རྒྱས་བཏབ་པ་ལྟ་བུར་ལྟེབས་པ། ཕྱེད་ཤི་བ་དང༌། གཞོགས་ཕྱེད་སྐམས་པ་དང༌། སྤྱི་རིང་བ་དང༌། སྤྱི་བོ་ཅོག་ཅོག་པོར་རིང་པོར་འདུག་བ། སྐྲ་ར་རི་ཅན་ངང༌། སྐྲ་ཚུམ་བུ་ཚུམ་བུ་ར་རི་ཅན་དུ་འདུག་པ། མདུན་དང་རྒྱབ་སྒུར་བ་དང༌། མདུན་འབུར་ཏེ་ཕྱིར་དགྱེ་བ་དང་རྒྱབ་ཏུ་འབུར་ཏེ་ནང་དུ་སྒུ་མི་གཅིག་ལ་གཉིས་ཀར་ལྡན་ཡང་རུང་གཅིག་དང་ལྡན་ཡང་རུང་བ་ལ་བྱ། སོར་མོ་དྲུག་པ་དང༌། སོར་མོ་དྲུག་དུ་སྐྱེས་པ་དང༌། འབྱར་བ་དང༌།
སོར་མོ་འབྱར་བ་དང༌། མེད་པ་དང༌། ལག་མཐིལ་འབའ་ཞིག་ཡོད་པ། རྫི་མ་རུང་བ་ཅན་དང༌། རྫི་མའི་སྤུ་ནང་རིམ་དུ་སྐྱེས་ནས་མིག་ལ་རྡུང་ཞིང་འཚག །སྲེ་མོ་དང་འུག་པ་དང༌། སྲེ་མོའི་མིག་འདྲ་བ། འུག་པའི་མིག་འདྲ་བ། ལོག་པ་དང༌། མིག་གི་གྲྭ་མདུན་རྒྱབ་ཏུ་ལོག་པ། ཕྲད་པ་དང༌། སྣ་གོང་དུ་གྱུར་ཏེ་མིག །འཕྱང་བ་དང༌། མིག་གི་འབྲས་བུ་ལྷུང་བར་ཐུག་པར་འཕྱང་བ་དང༌། མིག་དམར་པོ་དང༌། མིག་གི་སྤྲིན་ཚིལ་བུ་དམར་པོར་འདུག་པ། དཀྱིལ་མིག་གི་མིག་ལྟ་བུ་དང༌། མིག་ལ་དཀར་པོ་རིམ་པ་གཅིག་ནག་པོ་རིམ་པ་གཅིག་ཨུ་ཤུད་ཀྱི་རི་མོ་འདྲ་བར་འདུག་པ། མིག་ཡངས་པ། མིག་རྐྱེན་དུ་མ་བབ་པར་ཆེ་བ། གྲྭ་དང༌། མིག་ཏུ། མཛེར་པ་སྐྱེས་པ། འབྲུམ་བུ་ཅན་དང་མིག་ལ་འབྲུམ་བུ་ཡོད་པ་ལ་བྱ། ཤུ་བ་ཅན་གྱི་མིག་དག་དང༌། མིག་ལ་ཤུ་བ་ཆེན་པོ་ཤུ་བར་འདུག་པ། རྣ་བ་སེར་པོ། །རྣ་བའི་ཁ་དོག་སེར་པོ་ཡུང་བ་འདྲ་པ། དཀར་པོ། རྣ་བའི་ཁ་དོག་ཤོག་ཤོག་འདྲ་བ། དམར་པོ། རྣ་བའི་ཁ་དོག་ཁྲག་འདྲ་བ། གཅེའུ་ལྟ་བུ། རྣ་བ་གཅེའུ་འདྲ་བ་སྦུ་གུ་ཅན་ནོ། །གཡན་པ། ཤ་རྟག་ཏུ་གཡའ་བ། ཤུ་བ་ཤུ། ཤུ་བ་རེ་རེ་ཙམ་འདུག་པ། ཆེན་པོ། ཤུ་བ་ཆེན་པོར་བྱུང་བ། རྔོ་དང༌། གཡན་པ་ལྟ་བུ། མཇེ་རླིག་པའི་ནང་དུ་ནུབ་པ་དང༌། རླིག་པའི་ནང་ན་མཇེ་འདུག་སྟེ་མཇེ་རླིག་པས་གཡོགས་པ། གླེན་པ། ལེགས་ཉེས་ཀྱི་བྱེ་བྲག་མི་ཕྱེད་པ་དང༌། ལྕེ་མེད་ཐོག་མ་ནས་མ་སྐྱེས་པ། རྐང་ལག་གཅིག་པ། རྐང་ལག་ཡ་གཅིག་པ། མེད་པའོ། །གཉིས་ཀ་མེད་པ། སྐྲ་སྔོན་པོ། །སྐྲ་མཐིང་གར་འདུག་པ། བལ་གླང་བ། བལ་གླང་གི་མགོར་འདུག་པ། རྟ་ཁྱི། རྟ་མགོ་འདྲ་བ་ཁྱི་མགོ་འདྲ་བ། བ་ལང༌། བ་ལང་གི་མགོ་འདྲ་བ། གཉན། ལུག་གི་མགོ་འདྲ་བ། རི་དགས་རི་དགས་གང་ཡང་རུང་གི་མགོ་འདྲ་བ། ཉ་ཉའི་མགོ་འདྲ་བ། སྦྲུལ། སྦྲུལ་མགོ་འདྲ་བ། རིང་པོ། མགོ་ལྟག་པ་ནས་འཕྲལ་བར་མཆུ་རིང་དུ་འདུག་པ། མགོ་མང་པོ། ལུས་གཅིག་ལ་མགོ་མང་དུ་ཡོད་པ། ཤིང་ཏཱ་ལའི་མགུལ། མགུལ་རིང་བ་དང་ཏཱ་ལ་འདྲ་བར་མགུལ་ལ་ཁྲམ་ཉེར་དུ་འདུག་པ། སྐྲངས་པས་སྤྱོད་ལམ་ཆད་པ། ལུས་སྐྲངས་ཏེ་སྤྱོད་ལམ་བཞིར་སྤྱོད་མི་
ནུས་པ་ལྟག་ནས་སེན་མོ་གཅིག་པ་ཞེས་བྱ་བ་མན་ཆད་ལྟ་བུར་འདུག་པ་སྤྱོད་ལམ་ཆད་པ། མི་ན་བ་འདི་དག་ཀྱང་ངོ༌། །ལྟག་ནས་སེན་མོ་གཅིག་ཅེས་འབྱུང་བ་མན་ཆད་ལྟ་བུར་འདུག་པ་མི་ནར་ཟིན་ཀྱང་བཅུག་ན་ཉེས་བྱས། ན་བ་དེ་དག་ཀྱང་དེར་རོ། །སེན་མོ་གཅིག་པ་ཞེས་བྱ་བ་མན་ཆད་ཀྱི་གཟུགས་སུ་འདུག་ལ་ན་བའང་བཅུག་ལ་ཉེས་བྱས་ཁྲིམས་ནི་འཆགས། མ་རུང་བར་ནི་རྐུན་པོར་རོ། །ཡུལ་མཐའ་འཁོབ་ཀྱི་བྱེ་བྲག་མི་ཕྱེད་ཅིང་འདུལ་དཀའ་བ་ཞིག་ལས་བཅུག་ནའང་ལྟག་ཏུ་རྐུན་པོའི་རྒྱལ་མཚན་ཅན་བཅུག་ན་ཉེས་བྱས་སོ་ཞེས་འབྱུང་བ་དང་འདྲ། ཕ་བཞིན་དུ་ཕར་བསམ་པའི་རྒྱལ་པོས་གནང་ན་ཡང་འགྱུར་རོ། །ཕ་མ་ལ་མ་དྲིས་ཀྱང་རྒྱལ་པོའི་འབངས་སུ་གཏོགས་པ་ལས་རྒྱལ་པོས་གནང་སྟེ་བཅུག་ནའང་ཉེས་མེད་དོ། །གནང་བ་དང་དྲི་བ་དང་འཆང་བ་ལ་གསོ་གསོ་བ་ཡང་ཕ་བཞིན། ཕ་མ་ལ་དྲིས་ཏེ་གནང་བ་དང་ཕ་མ་གཉིས་ཀ་ཤི་སྟེ་མེད་པ་ནི། བུ་ཞིག་གཞན་གྱིས་གསོ་སྟེ་འཆང་འཆང་གསོ་གསོ་བ་ཞིག་ཡིན་ན། ཕ་མ་ལ་དྲི་པ་མ་ཡིན་གྱི་འཆང་ཞིང་གསོ་གསོ་བའི་མི་དེས་གནང་ན། བསྙེན་པར་རྫོགས་པར་རུང་སྟེ་ཉེས་མེད་དོ། །མིའི་རྒྱུད་མ་ཡིན་པ་ལ་མ་ཡིན། ཕ་མ་མིའི་རྒྱུད་མ་ཡིན་ཏེ་བྱོལ་སོང་ལྟ་ཞིག་ཡིན་ན་དྲི་མི་དགོས་ཏེ་རབ་ཏུ་ཕྱུང་ཡང་ཉེས་མེད་མཚམས་མེད་པར་ཡང་མི་འགྱུར། ཕ་མ་མེད་དེ་གསོ་ཞིང་འཆང་འཆང་བའི་མི་དང་ཕ་མ་བྱོལ་སོད་ཡིན་པ་ཞིག་བསད་ན་མཚམས་མེད་པར་མི་འགྱུར། བསྐྱེད་པ་དག་ལ་དེའོ། །ཕ་མ་བསད་ན་མཚམས་མེད་པར་འགྱུར་ན་ནི་ཕ་མ་གང་གི་མངལ་དང་ཁུ་བ་ལས་སྐྱེས་པ་དེ་ཉིད་བསད་ན་མཚམས་མེད་པར་འགྱུར། མཚན་དུ་གྱུར་ཀྱང་ངོ༌། །བདག་གི་ལུས་བསྐྱེད་པའི་ཕ་མ་ཉིད་ཕོ་མཚན་དང༌། མོ་མཚན་གྱུར་པ་ལས་བསད་ཀྱང་མཚམས་མེད་པར་འགྱུར། དེ་ལྟར་བྱས་ན་མ་བསད་པ་ལ་སོགས་པའི་གཙོ་བོ། །སཱུ་ཏྲ་ལྟག་མ་གཉིས་ལྟར་ཕ་མ་མ་ཡིན་ནོ་ཞེས་བཤད་པ་བསད་པའི་ནང་ན་གཙོ་སྟེ། མཚམས་མེད་པར་འགྱུར་བའོ། །བསླུས་པ་ནི་མི་ཚངས་པར་སྤྱོད་བས་ཕམ་པ་ལས་མྱོང་བ་དག་ནའོ། །དགེ་སློང་མས་བསླུས་ན་ཁྲིམས་མི་འཆགས་སོ་ཞེས་འབྱུང་བ་ནི། དགེ་སློང་མ་ཕས་ཕམ་པ་མ་ཡིན་པ་ལ་མི་ཚངས་པར་
སྤྱོད་ན་དགེ་སློང་མ་བསླུས་པ་ཡིན་ཏེ། དགེ་སློང་མ་མི་འདོད་དེ་ནན་གྱིས་མི་ཚངས་པར་སྤྱོད་པ་དང༌། དགེ་སློང་མས་ལག་པ་མེར་བཅུག་སྟེ་དགའ་བར་མ་ཚོར་བ་ལྟ་བུ་སྤྱོད་པ་ཡང་དགེ་སློང་མ་བསླུས་པ་ཡིན་ནོ་ཞེས་སཱུ་ཏྲའི་ཊཱི་ཀ་ལས་འཆད་དོ། །ཁ་ཅིག་ན་རེ་དེས་ནི་བསླུས་པར་མི་ཆུད་དེ་མི་ཚངས་པར་སྤྱོད་པ་ལས་དགའ་བར་དགེ་སློང་མས་ཀྱང་ཚོར་ན་དགེ་སློང་མ་བསླུས་པ་ཡིན་ནོ་ཞེས་བཤད་དོ། །སྐྱེས་པ་མི་ཚངས་པར་སྤྱོད་པ་སོང་སོང་བ་ལས། དགེ་སློང་མ་འདོད་ཆགས་ཀྱི་སེམས་ཀྱིས་སྔར་ནས་ཕམ་ཟིན་པ་མི་ཚངས་པར་སྤྱོད་ཀྱང་དགེ་སློང་མ་བསླུས་པར་མི་ཆུད་དོ། །དམས་པ་ལས་སྐྱེས་པར་གྱུར་ན་རབ་ཏུ་དབྱུང་བ་དང༌། བསྙེན་པར་རྫོགས་པར་བྱ་བའི་རིགས་སོ། །དགེ་སློང་མ་བྱེད་བྱེད་པ་ལས་ཁྲིམས་ཕུལ་བ་ལས་མཚན་གྱུར་པ་ཞིག་བསྙེན་པར་རྫོགས་པར་འདོད་དེ་འོངས་ན་དགེ་སློང་ཕའི་ཁྲིམས་དབོག་ཏུ་རུང་སྟེ་འཆགས། མི་ཚངས་པའི་ཕས་ཕམ་པ་སྤྱོད་པ་ཡང་ངོ༌། །དགེ་སློང་མ་ལ་ཕས་ཕམ་པ་བརྒྱད་ཡོད་པ་ལས་དགེ་སློང་ཕའི་ཕས་ཕམ་པ་བཞི་མ་གཏོགས་པ་ལྷག་མ་བཞི་ལས་གང་ཡང་རུང་སྟེ་སྤྱད་པའི་འོག་ཏུ་མཚན་གྱུར་པ་ཞིག་བསྙེན་པར་རྫོགས་པའི་ཁྲིམས་ནོད་དུ་འོངས་ན་ཡང་བསྙེན་པར་རྫོགས་པར་བྱར་རུང་སྟེ་ཁྲིམས་འཆགས། གནས་པས་བུད་མེད་བསྙེན་པར་རྫོགས་པར་གཏོགས་སོ། །དགེ་སློང་མ་ཁྲིམས་རྫོགས་པར་བྱེད་ན་དགེ་འདུན་ཕ་གུད་དུ་མ་བཙལ་གྱི་གང་ཉེ་ཞིང་གསོ་སྦྱིན་དང་ཚུལ་ནས་འབྱུང་ཞིང་འཇུག་པའི་ཕྱིར་ནས་ཞུ་ཞིང་ལས་བྱེད་པའི་དེ་ཉིད་ཀྱི་དགེ་འདུན་ལས་བྱས་ཞིང་མནོད་དོ། །ཡང་གཅིག་ཏུ་ན་ཁྲིམས་ནོད་པའི་མཁན་པོ་གུད་ནས་གསར་དུ་འོངས་པ་ཞིག་ཡོད་ན་དེ་ལ་མི་བྱའི་སྔ་ན་འཁོད་འཁོད་པའི་ནང་ནས་མཁས་པ་གཅིག་གིས་མཁན་པོ་བྱའོ། །འགྱུར་བའི་གཏམ་ན་ཞིག །ཁྲིམས་ནོད་པ་ཞིག་ཁྲིམས་ཕོག་པའི་ལས་བྱེད་བཞིན་དུ། ད་ཁྲིམས་མི་ནོད་དོ་ཞེས་བྱ་སྟེ་མནོད་ན་ཁྲིམས་མི་འཆགས། དྲིས་པ་མང་པའི་རབ་ཏུ་དབྱུང་བའི་དངོས་པོར་ཆུད་པ་རྫོགས་སོ།། །།འདུལ་བ་དྲིས་པ་ཞེས་བྱ་བ་དགྲ་བཅོམ་པ་ཨུ་པཱ་ལིས་དྲིས་པ་ལས་རབ་ཏུ་འབྱུང་བའི་ཆོ་ག་འབྱུང་བའི་མདོ། །རང་བཞིན་སྟོར་བས་བྱས་ན་སླར་ཕུལ་བ་མ་ཡིན་
ནོ། །དགེ་སློང་འདྲེ་གདོན་ལ་སོགས་པས་མྱོས་ཤིང་མི་དྲན་པར་གྱུར་པ་དང་ལུས་ཀྱི་ཁམས་ལ་ནད་ཞུགས་ཏེ་ཁོང་ནས་དགེ་སློང་ཕར་མི་དྲན་རང་བཞིན་ཉམས་པས་ཁྲིམས་འབུལ་ལོ་ཞེས་ཀྱང་ཕུལ་བར་མི་འགྱུར་རོ། །དེར་མ་ཡིན་ནོ། །ཕ་རོལ་ཕོ་སཱུ་ཏྲ་ལྟག་མ་ལྟར་མི་དྲན་ཞིང་མྱོས་པ་ཞིག་ལ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །ལྐུགས་པ་ལ་མ་ཡིན་ནོ། །ཕ་རོལ་པོ་ལྐུགས་པ་སྨྲ་མི་ཤེས་པ་དང༌། འོན་པ་མི་ཐོས་པ་ཞིག་ལ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །མི་མ་ཡིན་པའི་རྒྱུད་ལའང་མ་ཡིན། ལམ་རྒྱུད་ལྔ་ལ་མི་མ་གཏོགས་པར་རྒྱུད་བཞི་གང་ཡང་རུང་སྟེ་ཁྲིམས་འབུལ་ལོ་ཞེས་བྱས་ཀྱང་ཕུལ་བར་མི་འགྱུར་རོ། །མ་གོ་བ་ལ་མ་ཡིན། ཁམས་གཞན་གྱི་སྐད་མི་མཐུན་ཏེ་བརྡ་མི་ཕྲད་པ་དང༌། བརྡ་ཕྲད་ཀྱང་སྒྲ་བསྐྱུངས་ཏེ་སྨྲས་པས་མ་གོ་བ་ལྟ་བུ་ནི་ཁྲིམས་འབུལ་ལོ་ཞེས་ཀྱང་ཕུལ་བ་མ་ཡིན་ནོ། །དབེན་པ་ལ་ཡང་མ་ཡིན་མི་མེད་པ་དགོན་པའི་ཁང་སྟོང་ལྟ་བུ་དབེན་པ་སུས་ཀྱང་མ་ཐོས་པར་ཁྲིམས་འབུལ་ལོ་ཞེས་བྱས་ཀྱང་ཕུལ་བ་མ་ཡིན་ནོ། །དབེན་པར་འདུ་ཤེས་སུ་འང་མ་ཡིན། དགོན་པ་འམ་ཁང་སྟོང་མི་མེད་པ་སྙམ་དུ་བསམས་ཏེ་ཁྲིམས་འབུལ་ལོ་ཞེས་བྱས་སུ་ཟིན་ཀྱང་ཁྲིམས་ཕུལ་བར་མི་འགྱུར་སཱུ་ཏྲ་འདི་ཡན་ཆད་ལྟག་མའི་རྣམས་སླར་བཟློག་སྟེ། དེ་རྣམས་ལྟ་བུ་མ་ཡིན་པ་ལ་ཁྲིམས་འབུལ་ལོ་ཞེས་བྱས་ན་ཕུལ་བར་འགྱུར། སློབ་བ་འབུལ་ལོ། །ཡིད་ལ་ཁྲིམས་འབུལ་བར་བསམས་ཏེ་སློབ་པ་འབུལ་ལོ་ཞེས་བྱས་པ་བདག་གནས་ཤིང་སྤྱོད་པ་སློབ་པ་འབུལ་བ་ཡིན་པས་ཕུལ་བར་འགྱུར། སངས་རྒྱས་ཡིན་ལ་ཁྲིམས་འབུལ་བར་བསམས་ཏེ་སངས་རྒྱས་འབུལ་ལོ་ཞེས་བྱས་ནས་སངས་རྒྱས་ལ་ཕྱོགས་ཤིང་བརྟེན་པ་ཡིན་པའི་ཕྱིར་ཁྲིམས་ཕུལ་བར་འགྱུར་རོ། །ཆོས་ཞི་བའི་ཆོས་མྱ་ངན་ལས་འདས་པའི་ཕྱིར་ཞུགས་པ་ཆོས་འབུལ་ལོ་ཞེས་བྱས་ནའང་ཁྲིམས་མེད་པར་འགྱུར་རོ། །དགེ་འདུན་ཐོག་མ་བདག་དགེ་འདུན་ལས་འཐོབ་ཅིང་མཚུངས་པར་སྤྱོད་པའི་གྲོགས་དགེ་འདུན་ཡིན་པས་དེ་ཕུལ་ནའང་མེད། མདོ་སྡེ་བདག་ཐོག་མ་མདོ་སྡེའི་ཕྱིར་སློབ་པ་དང་ཉན་པ་དང་སྤྱོད་ཅིང་སྒོམ་པའི་ཕྱིར་ཁྲིམས་བླངས་པ་
ཡིན་པས་མདོ་སྡེ་དབུལ་ཞེ་ན་མེད་པར་འགྱུར། འདུལ་བ། འདུལ་བའི་སྡེ་ཉིད་སློབ་པའི་ཁྲིམས་ཡོད་པས་འབུལ་ལོ་ཞེས་བྱས་ནའང་ཁྲིམས་མེད་པར་འགྱུར་རོ། །མ་ལྟ་བུ། མ་ལྟ་བུ་ནང་དུ་མདོ་སྡེ་དང་འདུལ་བ་ཀུན་འདུས་ཏེ་མྱ་ངན་ལས་འདས་པའི་ཆོས་ཉིད་ཡིན་པས་མ་ལྟ་བུ་འབུལ་ལོ་ཞེས་བྱས་ན་ཁྲིམས་མེད་པར་འགྱུར། སློབ་དཔོན་སློབ་དཔོན་ལྔ་ལ་གནས་ཤིང༌། ཆོས་དང་ཁྲིམས་ལ་སོགས་པ་དེ་ལས་སློབ་པ་ཡིན་པས། དེ་ལ་འབུལ་ལོ་ཞེས་བྱས་ན་ཁྲིམས་མེད་པར་འགྱུར། མཁན་པོ། །བདག་ཐོག་མ་ཁྲིམས་ནོད་པའི་ཚེ་མཁན་པོ་ལ་གནས་ནས་ཁིམས་ནོད་པ་དང༌། ཕྱིན་ཆད་ཀྱང་དེ་ལ་གནས་ཤིང་སྤྱོད་པ་ཡིན་པས་དེ་འབུལ་ལོ་ཞེས་བྱས་ནའང་མེད་པར་འགྱུར། ཁྱིམ་གནས་སུ་བདག་ཟུང་ཤིག་གམ། བདག་ཁྱིམ་པར་ཟུང་ཤིག་ཅེས་བྱས་ནའང་ཁྱིམ་པ་ལ་ཁྲིམས་མེད་པ་ཡིན་པས་ཁྲིམས་ཕུལ་བར་འགྱུར་ཏེ། དགེ་སྦྱོང་ངམ་བདག་དགེ་སྤྱོད་དུ་ཟུང་ཞིག་ཅེས་བྱས་ནའང༌། དགེ་སྦྱོང་ལ་ཁྲིམས་ཉིས་བརྒྱ་ལྔ་བཅུ་མེད་པས་ན། ཁྲིམས་ཆེན་པོ་ནི་ཕུལ་བར་འགྱུར། དགེ་སྦྱོང་གི་ཁྲིམས་ནི་ཡོད། ཉུག་རུམ་མམ། མ་ནིང་རྣམ་པ་ལྔ་ལ་མཚན་བཅད་པ་ལ་མ་རུལ་པའམ་སྟེ་ཉུག་རུམ་དུ་ལྟོས་ཤིག་ཅེས་བྱས་ནའང་ཁྲིམས་མི་འཆགས་ཏེ་མེད་པར་འགྱུར་རོ། །མ་ནིང་ངམ། མ་ནིང་རྣམ་བཞི་ལྟ་བུར་ལྟོས་ཤིག་བྱས་ནའང་ཁྲིམས་མི་འཆགས་པའི་ཕྱིར་ཕུལ་བར་འགྱུར་རོ། །དགེ་སློང་མ་དགེ་སློང་མ་བསླུས་པར་ལྟོས་ཤིག་ཅེས་བྱས་ནའང་དགེ་སློང་མ་བསླུས་པ་ཁྲིམས་མི་འཆགས་པ་ཡིན་པའི་ཕྱིར་ཁྲིམས་མི་འཆགས་པར་འགྱུར་ཏེ་ཕུལ་བར་འགྱུར། བསླུས་པ་འམ་རྐུན་གནས་སམ། བདག་རྐུན་གནས་སུ་གཟིགས་ཤིག་ཅེས་བྱས་ནའང་རྐུན་གནས་སུ་ཁྲིམས་མི་འཆགས་པའི་ཕྱིར་ཕུལ་བར་འགྱུར། ཐ་དད་དུ་གནས་པ་འམ། སངས་རྒྱས་ཀྱི་ཆོས་ལ་གཞན་ལོག་པར་བལྟས་པ་དེ་བ་ཧ་ཧིའི་ཆོས་ལྟ་བུ་སྟེ། ཐ་དད་པར་ལྟོས་ཤིག་ཅེས་བྱས་ནའང་ཁྲིམས་ཕུལ་བར་འགྱུར། མི་གནས་པ་འམ། ཚུལ་ཁྲིམས་དང་ལྟ་བ་དང་ལྷན་ཅིག་མི་གནས་པ་སྟེ་ཕས་ཕམ་པ་ལྟ་བུ་ལ་བྱ་སྟེ། མི་གནས་པར་ལྟོས་ཤིག་ཅེས་བྱས་ན་ཁྲིམས་མེད་པར་འགྱུར། མུར་འདུག་གམ་
མུར་འདུག་ཏུ་འཇུག་པ་འམ། དགེ་སློང་ལས་མུར་འདུག་ཏུ་ཞུགས་ཏེ་ཆོས་གོས་བོར་ནས་སྐྱ་རེངས་བྱུང་བ་འམ། ཆོས་གོས་བོར་ཀྱང་སེམས་ཀྱིས་མུར་འདུག་ལ་ཕྱོགས་ན་ཁྲིམས་མེད་པར་སོང་ངོ་ཞེས་བྱ་བ་ལྟ་བུ་སྟེ། མུར་འདུག་ཏུ་འཇུག་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར་བའི་ཕྱིར། མ་བསད་པ་མ་བསད་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར། ཕ་བསད་པ་འམ་ཕ་བསད་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར། དགྲ་བཅོམ་པ་བསད་པ། དགྲ་བཅོམ་པ་བསད་པར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར། དགེ་འདུན་ཕྱེ་དགེ་འདུན་ཕྱེ་བར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར་རོ། །ཡང་དག་པར་གཤེགས་པ་ལ་ངན་སེམས་ཀྱིས་ཁྲག་ཕྱུང་བའོ། །དེ་བཞིན་གཤེགས་པ་ལ་ངན་སེམས་ཀྱིས་ཁྲག་ཕྱུང་བར་ལྟོས་ཤིག་ཅེས་བྱས་ནའང་ཁྲིམས་མེད་པར་འགྱུར་ཏེ་ཕུལ་བར་ཆུད། མ་བསད་པ་ཞེས་འབྱུང་བའི་སཱུ་ཏྲ་མན་ཆད་མཚམས་མེད་པ་ཡིན་ཏེ། ཁྲིམས་མི་འཆགས་པས་ན་དེ་ལྟ་བུར་ལྟོས་ཤིག་ཅེས་བྱས་ནའང་ཁྲིམས་ཕུལ་བར་འགྱུར་བ་ཡིན་ནོ། །སཱུ་ཏྲ་འདི་ཡན་ཆད་ཁྲིམས་ཕུལ་བར་འགྱུར་རོ་ཞེས་འབྱུང་བ་ཀུན་དུ་སཱུ་ཏྲ་ཀུན་སེམས་གྱིས་འབུལ་བར་བསམས་ན། སཱུ་ཏྲ་ལྟག་མའི་ཚིག་གང་ཡང་རུང་སྟེ་སྨྲས་ན་ཁྲིམས་མེད་ཅིང་ཕུལ་བར་འགྱུར་རོ། །ཆོག་གོ་བདག་ནི་ཚེ་དང་ལྡན་པ་དག་ཚངས་པ་མཚུངས་པར་སྤྱོད་པ་དང་གནས་པའི་སྤྱོད་པས་ཆོག་གོ །མི་འདོད་དོ་ཞེས་བྱས་ལ་སེམས་ཀྱིས་ཀྱང་ཁྲིམས་ཕུལ་པར་བསམས་ན་ཁྲིམས་ཕུལ་བར་འགྱུར་ཏེ། དེ་ལ་གནས་པ་ཞེས་བྱ་བ་ནི་གཙུག་ལག་ཁང་ན་གནས་པར་གཅིག་དང་ཟས་དང་ནོར་རྫས་ལ་སོགས་པ་འཚོ་བའི་ཡོ་བྱད་གཅིག་ཏུ་སྤྱོད་པར་གནས་པ་ལ་བྱ། སྤྱོད་པ་ཞེས་བྱ་བ་ནི་དགེ་འདུན་གྱི་ལས་བརྒྱ་རྩ་གཅིག་ལྟ་བུ་ལ་མཐུན་པར་སྤྱོད་པ་ལ་བྱའོ། །གནས་པ་དང་སྤྱོད་པ་དང་གཉིས་ཀ་ཆོག་གོ་ཞེས་སྨྲས་ནའང་ཕུལ་བར་འགྱུར། གནས་པ་དང་སྤྱོད་པ་གཅིག་གིས་ཆོག་གོ་ཞེས་བྱས་ནའང་ཕུལ་བར་འགྱུར། ཕུལ་བའི་ཆོ་གའོ།། །།མི་ཚངས་པར་སྤྱོད་པའི་ཕས་ཕམ་པ་འཆད་དོ། །བཅུག་རེག་དགའ་བར་ཚོར་ནའོ། །མི་ཚངས་པར་སྤྱོད་པ་ཕམ་པའི་ཡན་ལག་དྲུག་
དང་ལྡན་ན་ཕམ་སྟེ་བཅུག་ཀྱང་བཅུག་རེག་ཀྱང་རེག་དགའ་བར་ཚོར་བ་དང་ཡན་ལག་གསུམ། འཛག་བྱེད་དོ། །གཅིན་འཛག་པ་སྟེ་ཕོ་མཚན་ལ་བྱ་སྟེ། ཕོ་མཚན་གྱིས་བཅུག་པ་དང་ཡན་ལག་བཞི་དེར་རོ། །ཕོ་མཚན་གྱིས་མོ་མཚན་དུ་བཅུག་པ་དང་ཡན་ལག་ལྔ་མ་ཉམས་པར་རོ། །མོ་མཚན་དང༌། ཁ་དང༌། རྐུབ་གསུམ་མ་སྣད་ཅིང་མ་ཉམས་པར་བྱས་པ་དང་ཡན་ལག་འདི་དྲུག་ལྡན་ན་ཕམ་པར་འགྱུར། ཡན་ལག་གཅིག་མ་ཚང་ན་སྦོམ་པོར་འགྱུར། ཁའམ་རྐུབ་ཀྱི་ལམ་དུའོ། །ཁ་དང་རྐུབ་ཀྱི་ལམ་དུ་མི་ཚངས་པར་སྤྱད་ན་ཡང་མོ་མཚན་དང་འདྲ་སྟེ་ཕམ་མོ། །ཉམས་བར་ན་སྦོམ་པོའོ། །མོ་མཚན་དང་ཁ་རྐུབ་གསུམ་ཉམས་ཤིང་སྣད་པ་ལྟ་བུ་ལ་མི་ཚངས་པར་སྤྱད་ན་སྦོམ་པོར་འགྱུར་རོ། །མི་བཟོད་པ་ལ་འབྲི། བུད་མེད་ལོ་བཅུ་གཉིས་ལོན་པ་མན་ཆད་རྒྱོར་མི་བཟོད་ཅེས་ཀྱང་བྱ། ཁ་ཅིག་ལོ་མང་ཡང་རྒྱོར་ཡང་མི་བཟོད་པ་ཡང་ཡོད། ཁ་ཅིག་ལོ་ཉུང་ལ་རྒྱོར་བཟོད་པ་ཡང་ཡོད། མདོར་ན་གང་ཡང་རུང་སྟེ། རྒྱོར་མི་བཟོད་པའམ་མི་རུང་བ་ཞིག་ལ་མི་ཚངས་པར་སྤྱོད་ན་སྦོམ་པོར་འགྱུར། མི་འབྲི་བ་ནི་ཕས་ཕམ་པར་འགྱུར་ཏེ། སྦོམ་པོར་མི་འབྲི་བ་ནི་འོག་ནས་འབྱུང་བ་རྣམས་ལ་མི་ཚངས་པར་སྤྱོད་ནའོ། །མིའི་རྒྱུད་མ་ཡིན་པ། ལམ་རྒྱུད་ལྔ་ལ་མི་མ་གཏོགས་པའི་ལམ་རྒྱུད་བཞི་གང་ཡང་རུང་སྟེ། སྒོ་གསུམ་ལས་གང་དུ་མི་ཚངས་པར་སྤྱོད་ཀྱང་ཕམ། ཕོ་སྐྱེས་པའི་སྒོ་གཉིས་སུ་སྤྱད་ན་ཡང་ཕམ་མ་ནིང་མ་ནིང་རྣམ་ལྔར་བཤད་པ་ལ་གང་ཡང་རུང་སྒོ་གསུམ་དུ་མི་ཚངས་པར་སྤྱོད་ན་ཕམ། འཇུག་པ། ཕོ་མཚན་དཀྲིས་ཏེ་མི་ཚངས་པར་སྤྱོད་ན་ཡང་ཕམ། མཇུག་ནས་དཀྲིས་པ། མོ་མཚན་རས་ལྟ་བུས་གཡོགས། ཕོ་མཚན་གྱིས་རས་དང་བཅས་ཏེ་ནང་དུ་བཅུག་ནས་སྤྱད་པ་ཡང་ཕམ། ཕོ་མཚན་དང་མོ་མཚན་གཅིག་དཀྲིས་གཅིག་མ་དཀྲིས་པར་སྤྱད་ཀྱང་རུང་གཉིས་ཀ་དཀྲིས་ཏེ་མི་ཚངས་པར་སྤྱད་ནའང་ཕམ། ཤི་བ་ལ་ཡང་ངོ༌། །ཤི་བའི་རོ་ལ་སྒོ་གསུམ་གང་ཡང་རུང་སྟི་མི་ཚངས་པར་སྤྱད་ན་ཕམ། མ་ཚོར། གཉིད་ལོག་པ་འམ་ར་རོ་བ་ལྟ་བུ་ལ་མི་ཚངས་པར་སྤྱོད་དེ་ཕ་རོལ་མ་ཚོར་ཡང་ཕས་ཕམ། རང་བཞིན་སྟོར་བར་གྱུར་པ། སྨྱོས་ཤིང་རང་བཞིན་སྟོར་བ་ལ་མི་ཚངས་པར་སྤྱད་དེ་ཕ་རོལ་གྱིས་མ་ཚོར་
ཡང་ཕས་ཕམ། མི་འདོད་པ་ཡང་ཆུད་དོ། །ཕ་རོལ་པོ་མི་ཚངས་པར་སྤྱད་པར་མི་བཏུབ་སྟེ་ནན་གྱིས་མི་ཚངས་པར་སྤྱད་ན་ཡང་ཕས་ཕམ། རང་གི་འཇུག་གནས་སུ་ཡང་ངོ༌། །བདག་གི་ཁ་དང་རྐུབ་ཏུ་བདག་གི་ཕོ་མཚན་གྱིས་མི་ཚངས་པར་སྤྱད་ཀྱང་ཕམ་སྟེ། མཚན་རིང་དང་རྒྱབ་མཉེན་ལས་བཅས། སྔོན་དུ་ཕྱིར་བདར་ཏེ་ནང་དུ་བཏང་བར་བསམས་ན་ཡང་ངོ༌། །མོ་མཚན་ཕྱི་རོལ་དུ་དཀུང་དཀུང་ལ་ཁུ་བ་ནང་དུ་བཏང་བ་དང་ནང་དུ་དཀུང་དཀུང་ལ་ཁུ་བ་ཕྱི་རོལ་ཏུ་ཕོ་བ་གཉིས་གང་བྱས་ཀྱང་སྟུ་འཚོང་མ་བྲད་དྲ་ཀ་ཕྱི་ལས་དགེ་སློང་སུན་དྷ་ར་ནན་ད་ལ་འདི་ལྟ་བུར་མི་ཚངས་པར་སྤྱོད་དང་ཕས་ཕམ་པར་མི་འགྱུར་རོ་ཞེས་བྱས་ནས་དགེ་སློང་དེས་འདི་འདྲ་བར་བྱས་པ་ལས་བཅས། མི་དབེན་པར་ཉིན་མོ་ལོགས་ཀྱིས་ཕབ་སྟེ་མི་ཉལ། ས་མི་དབེན་པར་དགེ་སློང་གཉིད་ལོགས་ཀྱིས་ཕབ་སྟེ་མི་ཉལ། ཉལ་ན་ཉེས་བྱས་དགེ་སློང་གཅིག་ཅིག་ལོགས་ཀྱིས་ཕབ་སྟེ་ཉལ་ཉལ་བ་ལས་ཕོ་མཚན་སྒྲེན་ཅིང་འདུག་པ་ལ། བུད་མེད་སྦོམ་མོ་ཞེས་བྱ་བས་མཐོང་ནས་ཐལ་བྱུང་མོ་མཚན་དུ་བཅུག་སྟེ་སྤྱད་པ་ལས་བཅས་དབེན་པ་ནི་འོག་ནས་འཆད། དབེན་པ་ནི་རྣམ་པ་གསུམ་སྟེ། ཉིན་མོ་ཉལ་དུ་རུང་བའི་ས་དབེན་པ་ནི་རྣམ་པ་གསུམ་ཡོད་དེ་མིང་གིས་འོག་ནས་འཆད་པ་ཡིན་ནོ། །མཐའ་བསྐོར་ཏེ་སྒོ་བཅད་ཅིང་གནས་པ་དང༌། དབེན་པའི་ས་གཅིག་ནི་ར་བའམ་ཁང་པ་ལྟ་བུ་མཐའ་བསྐོར་ཅིང་འདུག་པ་ལ་སྒོ་གཏན་པ་བཅུག་སྟེ་ཉལ་ན་ཉེས་མེད། དགེ་སློང་སྲུང་དུ་བཅུག་པ་དང༌། དབེན་པའི་ས་གཅིག་ང་མ་སད་ཀྱི་བར་དུ་སྲུངས་ཤིག་ཅེས་བསྒོ་སྟེ་ཉལ་བ་ནི་ཉེས་མེད་དེ་དབེན་པ་གཉིས་ཤམ་ཐབས་ཀྱི་མཐའ་མ་མདུད་པ་བོར་བའོ། །བདག་གི་ཤམ་ཐབས་ཀྱིས་དམ་དུ་དཀྲིས་ཏེ་མདུད་པ་བོར་ནས་ཉལ་ནའང་ཉེས་མེད་དེ་དབེན་པ་འདི་གསུམ་མོ། །ཕས་ལམ་པའི་ཐོག་མ་སྟེ་རྣམ་པར་འབྱེད་པའི་འོ། །ཕས་ཕམ་པ་དང་པོ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །། འདི་མན་ཆད་ལས་ཀྱི་དངོས་པོ་འཆད་པ་ཡན་ཆད་འདུལ་བ་གཞན་གྱི་ནང་ནས་འབྱུང་བའི་མདོའང་འཆད་མོད་ཀྱི། གཞི་རྣམ་པར་འབྱེད་པས་བཟུང་སྟེ་ཐམས་ཅད་འདུལ་བ་རྣམ་པར་འབྱེད་པའི་ནང་དུ་འདུའོ། །གང་ན་བུད་མེད་འདོད་པ་ཅན་གྱི་དེར་མི་འགྲོ། །བུད་མེད་འདོད་ཆགས་ཆེ་ཞིང་སྦྱར་བ་
སྐྱེས་པ་མཐོང་ན་ཟེ་ལྡང་བ་ལྟ་བུའི་དྲུང་དུ་མི་འགྲོ་།ཡོན་བདག་ཅིག་གིས་ཤཱཀྱའི་རིགས་དགེ་སློང་བཟང་པོ་དག་ཅིག་སྤྱན་དྲངས་ཏེ་འོངས་པ་དང་ཡོན་བདག་དེའི་ཆུང་མ་དགེ་སློང་དག་གི་ཤ་ཚུགས་བཟང་པོ་ལས་འདོད་ཆགས་ལངས་ཏེ་ཤི་བ་ལས་བཅས། གང་ན་མི་མ་ཡིན་པས་མི་བདེ་བར་བྱེད་པ་དེར་མི་གནས། དགོན་པ་འམ། ཤིང་དྲུང་ལྟ་བུ་ན་གནོད་སྦྱིན་ལ་སོགས་པ་ཀྱལ་ཀ་བྱེད་ཅིང་འོངས་པའི་གནས་སུ་མི་འདུག །དགེ་སློང་གཅིག་ཅིག་དགོན་པ་ན་བསམ་གཏན་སྤྱོད་ཅིང་འདུག་པ་ལ་གནོད་སྦྱིན་མོ་གཅིག་ཅིག་བུད་མེད་དུ་སྤྲུལ་ཏེ་འོངས་ནས་ལན་དུ་མར་མི་ཚངས་པར་སྤྱད་པར་སྟེན་ཏེ། དགེ་སློང་མ་བཏུབ་པ་དང་རྒྱལ་པོ་བིམ་བི་ས་རའི་མཐོངས་སུ་པོར་བ་ལས་བཅས། འདོད་ཆགས་ཆེ་བས་སྒྲེའུ་ཆོངས་ཤིག །འདོད་ཆགས་ཆེ་ཞིང་ཁུ་བ་རྟག་ཏུ་ཟགས་པས་སྒྲེའུ་བཅང༌། དགེ་སློང་མ་མྲྀ་ག་ར་ཏ་རྒྱུན་དུ་ཞུགས་པས། སངས་རྒྱས་ཀྱི་གཅུང་དགེ་སློང་སུན་དྷ་ར་ནན་ད་ལ་སངས་རྒྱས་དང་ནོར་ཏེ་ཕྱག་བྱས་ནས་རྐང་པ་ལས་བཟུང་བ་དང༌། འདོད་ཆགས་ལངས་ཏེ་ཁུ་བ་སྟོར་ནས། དགེ་སློང་མའི་མགོ་སྟེང་དུ་ལྟུང་བ་ལས་བཅས། ར་ལྤགས་སམ་ཤ་བ་འམ་བྱི་བའི་ཡང་ངོ༌། །མདོ་ལྟག་མ་ལྟར་སྒྲེའུ་བྱ་བའི་རྒྱུ་ནི་མི་རྩུབ་ཅིང་མི་ན་བའི་ཕྱིར་རེའུ་དང་ཤེའུ་དང་བྱི་ལའི་པགས་པ་ལས་སྒྲེའུ་བྱའོ། །དྲི་མི་ཞིམ་པར་མི་འགྱུར་བའི་ཕྱིར་བསྔལ་བས་སོ། །སྒྲེའུ་ལ་ཁུ་བ་རེག་པ་དྲི་མི་ཞིམ་པ་མེད་པར་བྱ་བའི་ཕྱིར་དར་ཕྱེ་དང༌། ཨ་རུ་ར་དང༌། ལས་ལ་སོགས་པའི་ཕྱི་མ་བསྔལ་བས་བསྐུའོ། །བཀྲུ་ཞིང་བསྐམ། སྒྲེའུ་དེ་སྐབས་སྐབས་སུ་བཀྲུ་ཞིང་བསྐམ་མོ། །དེའི་ཚེའི་ཕྱིར་གཞན་ཡང་ངོ༌། །མདོ་ལྟག་མ་ལྟར་བཀྲུ་ཞིང་བསྐམ་པའི་ཚེ་སྒྲེའུ་དགོས་པའི་ཕྱིར་འཐེབ་གཅིག་བྱ། མང་དུ་ཟགས་ན་གདིང་བར་བྱ། ཁུ་བ་མང་དུ་ཟགས་ན་སྒྲེའུའི་ནང་དུ་ཕྱེ་མ་ལ་སོགས་པ་གདིང༌། ཕྱེ་མ་འམ་སས་སོ། །མདོ་ལྟག་མ་ལྟར་སྒྲེའུ་ནང་དུ་བླུགས་པ་ནི་ཕྱེ་མ་དང་ས་ལས་བླུག་ས་སོ། །ཕྱག་འཚལ་བ་དང༌། བཟའ་བའི་ཚེ་བཞག་ལ་ཁྲུས་བྱས་ཏེའོ། །མཆོད་རྟེན་ལ་ཕྱག་འཚལ་བ་དང་ཟན་བཟའ་བའི་ཚེ་སྒྲེའུ་བཞག་སྟེ་ཁྲུས་བྱས་ལ་འགྲོའོ། །ཕྲ་མོར་གཏོགས་པའི་ཕས་ཕམ་པའི་དང་པོའོ། །འདི་ཡན་ཆད་ནི་
འདུལ་བ་ཕྲ་མོ་ཞེས་བྱ་བའི་ནང་ནས་མི་ཚངས་པར་སྤྱོད་པ་ཕས་ཕམ་པ་འཆད་པའི་མདོ་འབྱུང་བའོ།། །།ཁའི་ནི་སོ་ལས་འདས་པའོ། །མི་ཚངས་པར་སྤྱད་པ་ནི་སོ་ལས་འདས་ན་ཕམ། རྐུབ་ཀྱི་རྒྱུད་ནི་འཛུམས་པའི་མཚམས་སོ། །རྐུབ་ཏུ་མི་ཚངས་པར་སྤྱད་ན་འཛུམས་པའི་མཚམས་འདས་ན་ཕམ། འཛག་བྱེད་ཀྱི་ནི་ཁ་ཤུན་ནོ། །མོ་མཚན་དུ་མི་ཚངས་པར་སྤྱད་ན་ཕྱི་རོལ་གྱི་པགས་པ་དང་ནང་གི་ཤའི་མཚམས་ཀྱི་ཁ་ཤུན་འདས་ན་ཕམ། ཆུད་པ་ནི་དཀྲིས་སོ། །ཕོ་མཚན་ནི་སྒོ་གསུམ་གྱི་ནང་དུ་དཀྲིས་འདས་ན་ཕམ། ཕྱོགས་སུ་ཡང་ཀུན་སྣང་ན་སྣང་བའོ། །སྒོ་གསུམ་ལས་ཉམས་པ་ནི་སྦྲུལ་གྱིས་ནི་ཆུང་དུ་ཟོས་ཀྱང་ཉམས་པར་བརྩི་སྲིན་བུས་ནི་ཁ་ནང་དུ་ཆེར་ཟོས་ན་ཉམས་པར་བརྩི་སྐྲངས་པ་ནི་སྒོ་ཉིད་ཀྱི་འཁོར་སྐྲངས་ན་ཉམས་པར་བརྩི། འདི་རྣམས་ཡན་ཆད་ལྟ་བུ་ཞིག་ལ་མི་ཚངས་པར་སྤྱད་ན་སྦོམ་པོར་འགྱུར་ཆུང་ཟད་སྣང་བ་ལ་ནི་མི་བྱའོ། །སྐྲངས་སམ། སྒོ་གསུམ་ལས་སྐྲངས་པ། རུལ་ཏམ། སྒོ་གསུམ་ལས་རུལ་ཅིང་མྱགས་པའོ། །ཞིགས་སམ། སྒོ་གསུམ་ལས་ཞིགས་བ་དང་གྱེས་པ་དང་ཁམ་བུ་ཁམ་བུར་ཆད་པ་ལྟ་བུ་ལ་བྱ། སྲོག་ཆགས་ཀྱིས་ཟོས་པ་ནི་ཉམས་པའོ། །སྦྲུལ་དང་སྲིན་བུ་ལ་སོགས་པ་སེམས་ཅན་གྱིས་ཟོས་པ་ལ་བྱ་སྟེ། འདི་རྣམས་ལྟ་བུ་ལ་མི་ཚངས་པར་སྤྱད་ན་སྦོམ་པོར་འགྱུར། རྐེད་པར་བཅད་པའི་གཞུག་གནས་ལ་མི་འབྲི། རོ་ལྟ་བུ་རྐེད་པར་བཅད་པའི་སྒོ་གསུམ་དག་ཀྱང་རུང་སྟེ་སྤྱད་ན་ཕམ། གཞུག་གནས་དབུས་ནས་གཤེགས་ཏེ་སྦྱར་བའི་མཚམས་སུ་མི་མངོན་ན་ཡང་ངོ༌།། རོ་ལྟ་བུ་མོ་མཚན་ནས་ལུས་ཆུ་གཤེགས་སུ་གཤེགས་ཏེ་སླར་སྤྱར་ནས། སྦྱར་བའི་མཚམས་མི་མངོན་པ་ཞིག་ལ་མི་ཚངས་པར་སྤྱད་ན་ཕམ་པར་འགྱུར། མངོན་ན་མདོ་བཞིན་པའི་རིམ་མོ། །མདོ་ལྟག་མ་ལྟར་གཤེགས་པའི་མཚམས་མངོན་པ་ཞིག་ལས་མི་ཚངས་པར་སྤྱད་ན་སྦོམ་པོ། །སྦོམ་པོར་བྱེད་པ་ནི་ཕག་ལ་སོགས་པ་བཅོས་ཏེ་སྤུ་ཕྱི་བའོ། །ཕག་ལ་སོགས་པ་སེམས་ཅན་གྱི་གཟུགས་བཙོ་སྟེ་སྤུ་ཕྱི་བ་ལ་སོགས་པ་ལྟ་བུ་ཞིག་གི་སྒོ་གསུམ་དུ་མི་ཚངས་པར་སྤྱད་ན་སྦོམ་པོ། མགོ་བཅད་པའི་ཁར་ཡང་ངོ༌། །མགོ་ལྐོག་མ་ལྟ་བུར་བཅད་པའི་ཁར་མི་ཚངས་པར་སྤྱད་ན་སྦོམ་
པོ། །འཇུག་པ་དང་འཇུག་གནས་ལུས་དང་སོ་སོར་བྲལ་བ་ལ་ཡང་ངོ༌། །སྒོ་གསུམ་དང་ཕོ་མཚན་ལྟ་བུ་ལུས་དང་བྲལ་ཏེ་གུད་ན་བཅད་ཅིང་འདུག་པ་ལྟ་བུ་ལ་འདོད་ཆགས་ཀྱིས་བདག་གིས་སྤྱད་དམ་ཆད་ཅིང་འདུག་པ་ན་གཅིག་གི་ནང་དུ་གཅིག་བཅུག་ན་སྦོམ་པོ། །གཞན་ཡང་ཕ་རོལ་གྱི་དང་ཕ་རོལ་གྱིར་འཇུག་པའོ། །གཞན་གྱི་མོ་མཚན་དུ་གཞན་གྱི་ཕོ་མཚན་བཅུག་པ་བདག་གིས་བྱས་ན་སྦོམ་པོ་སྟེ་དཔེར་ཕྱུགས་རྒལ་བ་ལྟ་བུ་ཕོ་མཚན་མི་ཆུད་ཅིང་འདུག་པ་ལ་བདག་གིས་ཆུད་པར་བྱས་པ་ལྟ་བུའོ། །གཞན་ཡང་ལུས་བཅད་པའི་ཁུང་བུར་རོ། །རོ་ལྟ་བུ་ལ་བཅད་ཅིང་ཕུག་སྟེ་དེའི་འཕྲོ་དང་བུ་གུར་མི་ཚངས་པར་སྤྱད་ནའང་སྦོམ་པོ། མ་ནིང་གི་འཇུག་གནས་ཕུག་རྡུགས་སུའོ། །མ་ནིང་གི་མོ་མཚན་གཅིན་འོང་བའི་ཁུང་བུ་ཙམ་ཡོད་དུ་ཟད་དེ་མི་ཚངས་པར་སྤྱད་དུ་མི་རུང་བ་ཞིག་ལ་སྤྱད་ན་སྦོམ་པོ། མཆུ་དག་ལ་ཡང་ངོ༌། །མཆུ་དང་མཆུའི་ཕྱི་རོལ་དུ་འམ་འདོད་ཆགས་ཀྱི་སེམས་ཀྱིས་མི་ཚངས་པར་སྤྱད་པའི་ཕྱིར་ཕོ་མཚན་གྱིས་རེག་ན་སྦོམ་པོའོ། །མཚམས་ཀྱི་ཕྱིར་ཕན་ཆད་ཀྱང་ངོ༌། །སོའི་ཕྱི་རོལ་མཆུའི་ནང་རོལ་མཁུར་བ་ཕན་ཆད་དུ་འདོད་ཆགས་ཀྱི་སེམས་ཀྱིས་མི་ཚངས་པར་སྤྱད་ན་སྦོམ་པོ། སྒྲེའུར་ཡང་ངོ༌། །སྒྲེའུར་འདོད་ཆགས་ཀྱི་སེམས་ཀྱིས་མི་ཚངས་པར་སྤྱད་ན་སྦོམ་པོ། བལྟབ་པ་དང་མི་རེག་པར་བཅུག་པར་བྱས་པ་ཡང་ངོ༌། །སྐྲ་མི་ནུབ་པའི་ཕྱིར་ཕོ་མཚན་རྐེད་པར་བཀུག་ནས་བལྟབ་སྟེ་བཅུག་པ་དང་མོ་མཚན་ལ་མ་རེག་པ་ཞིག་ཏུ་བཅུག་སྟེ་སྤྱད་ན་སྦོམ་པོ། དེའི་ཐ་མར་བཤད་པ་དཀྲིས་པ་ཞེས་པ་ཐམས་ཅད་ཀུན་མི་རིག་པར་འགྱུར་བ་མ་ཡིན་ནོ། །ཕོ་མཚན་དཀྲིས་པ་དང་མོ་མཚན་ལ་གཡོགས་ཏེ་ཕུལ་བ་དང་གཡོགས་པ་བཅས་ཏེ་ནང་དུ་སོང་བ་གང་ཡང་རུང་བཀབ་པ་དང་དཀྲིས་པ་གཉིས་ཀ་བྱ་སྟེ། བཅུག་ཀྱང་རུང་སྟེ་འདི་ལྟར་བྱས་ཤིང་སྤྱད་དོ་ཅོག་རེག་པར་མི་འགྱུར་ཞིང་ཕས་མི་ཕམ་པར་འགྱུར་བ་ཡང་མ་ཡིན་གྱི་དར་ལྟ་བུ་སྲབ་མོས་དཀྲིས་ཏེ་རེག་པའི་དྲོད་དང་ལྡན་པར་མི་ཚངས་པར་སྤྱད་པ་ནི་ཕས་ཕམ་པའོ། གཞན་གྱི་ས་དཀྲིས་པ་ནི་མ་རེག་པར་འཇུག་པ་ལ་གསུངས་སོ། །མོ་མཚན་དང་ཕོ་མཚན་དཀྲིས་ཤིང་བཀག་པ་ཀོ་ལྤགས་སམ། སྣམ་བུ་འམ། ཕྱིང་པ་ལྟ་བུ་སྟུག་པོས་བྱས་ཏེ་རེག་པ་
དང་མི་ལྡན་པར་མི་ཚངས་པར་སྤྱད་ན་སྦོམ་པོ། ཕས་ཕམ་པ་དང་པོ་དྲིས་པའི་ཆུད་པའོ། །ཕས་ཕམ་པ་བཞིའི་དང་པོ་སྟེ་མི་ཚངས་པར་སྤྱད་པ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།དགེ་སློང་ཡིན་བར་མི་དྲན་པ་ནི་རང་བཞིན་ཉམས་པའོ། །འདྲེ་གདོན་དང་རླུང་ནད་ལ་སོགས་པས་སྨྱོས་ཤིང་མྱོས་ཏེ། དགེ་སློང་ཡིན་པར་མི་དྲན་པར་མི་ཚངས་པར་སྤྱོད་པ་ནི་ཕས་ཕམ་པར་མི་འགྱུར། ཉམས་པ་ནི་གཉིས་ཏེ་ནང་དང་ཕྱིའོ། །མོ་མཚན་ནང་ཉམས་ཤིང་སྣད་ཀྱང་རུང་གཉིས་ཀ་སྣད་ཅིང་ཉམས་ཀྱང་རུང་སྟེ་མི་ཚངས་པར་སྤྱད་ན་སྦོམ་པོ། ཕ་རོལ་གྱིས་སྨྲས་ནས་ཁས་བླངས་ན་བསླབ་པ་ཞིག་གོ །དགེ་སློབ་མ་ལ་ཕ་རོལ་པོ་ཞིག་གིས་མི་ཚངས་པར་སྤྱོད་དོ་ཞེས་ཟེར་ཞིང་འོངས་པ་ལ་མི་ཚངས་པར་སྤྱད་པར་བྱའོ་ཞེས་ཁས་བླངས་ན། དགེ་སློབ་མའི་ཁྲིམས་ཞིག་གོ །དེ་འང་དབོག་གོ །མདོ་ལྟག་མ་ལྟར་ཁྲིམས་ཞིག་པ་དེ་སླར་དབོག་ཏུ་མི་རུང་ངོ༌། །ལོ་གཉིས་སུ་བསྟད་པ་ནི་ཁྲིམས་ཕྱི་མ་ཕོག་པ་ནས་བརྩིའོ། །ཁ་ཅིག་ན་རེ་མི་ཚངས་པར་སྤྱད་པར་ཁས་བླངས་ཤིང་མི་ཚངས་པར་སྤྱད་པ་བྱས་པ་ཡང་དབོག་ཏུ་རུང་ཞེས་ཟེར་ཏེ། དེ་ལྟ་མ་ཡིན་གྱི་མི་ཚངས་པར་ནི་མ་སྤྱད་ཁས་ནི་བླངས་ཏེ་བསླབ་པ་ཞིག་པ་དེར་སླར་དབོག་ཏུ་རུང་ངོ༌། །དགེ་སློང་ཕས་ནི་སྦོམ་པོ། དགེ་སློང་ཕལ་གཞན་ཞིག་ན་རེ་ཁྱོད་ཀྱི་རྐུབ་ཏུ་མི་ཚངས་པར་སྤྱད་ན་རུང་ངམ་ཞེས་དྲིས་ཏེ། རུང་ངོ་ཞེས་སྨྲས་ན་སྦོམ་པོ། མ་ཟུམས་པར་གྱུར་པ་ལ་ཡང་ངོ༌། །མོ་མཚན་ཆེ་ལ་དངོས་པོར་མ་ཟུམས་པར་འདུག་པ་ལ་མི་ཚངས་པར་སྤྱོད་ན་ཡང་སྦོམ་པོ། གཞུག་པའི་ཕྱིར་རྨང་ཕུལ་བ་ཡང་ངོ༌། །མོ་མཚན་དུ་གཞུག་པར་འདོད་པའི་ཕྱིར་ཅི་འདྲ་བར་འདུག་ཅེས་ལག་པས་མྱངས་ཤིང་མནམས་ན་ཡང་སྦོམ་པོ། འཇིགས་ཤིང་ངོ་ཚ་བས་འདོད་ཆགས་མ་གྲུབ་པ་ཡང་ངོ༌། །འཇིགས་པ་ནི་གནོད་སྦྱིན་མོ་ཞིག་བུད་མེད་དུ་འཁྲུལ་ཏེ་མི་ཚངས་པར་སྤྱད་པ་དང་སྤྱང་པའི་ཚེ་འཕྲུལ་མ་ནུས་ནས་སླར་གནོད་སྦྱིན་ཉིད་ཀྱི་ལུས་སུ་གྱུར་ནས། དགེ་སློང་དེ་སྡངས་ཏེ་སྐྲག་པས་དགའ་བར་མཚོར་བ་ལས་བཅས། ངོ་ཚ་བ་ནི་དགེ་སློང་ཞིག་གིས་མ་ལ་མི་ཚངས་པར་སྤྱད་པ་དང་སྤྱད་པའི་ཚེ་མས་སྨྲས་པ་ཁྱོད་ཐོག་མ་ཡང་འདི་ནས་འོངས་ན་ད་ཡང་སླར་དེར་འཇུག་
ཅིང་སྤྱོད་དམ་ཞེས་བྱས་པ་དང༌། དགེ་སློང་དེ་ངོ་ཚ་སྟེ་དགའ་བར་མ་ཚོར་བ་ལས་བཅས་རྣམ་པ་འདི་གཉིས་ལྟར་སྤྱད་ན་སྦོམ་པོ། ཕོ་མཚན་གས་པས་ཁུ་བ་མ་གྲུབ་པ་ཡང་ངོ༌། །མོ་མཚན་ཆུང་དུ་ཞིག་ལ་སྤྱད་དེ་ཕོ་མཚན་སྣད་ཅིང་པགས་པ་རལ་པའམ། འཆུས་པ་ལྟ་བུའམ། ཕོ་མཚན་གས་ཤིང་སྣད་པ་ལྟ་བུ་ཞིག་གིས་མི་ཚངས་པར་སྤྱད་པ་ལས་དགའ་བར་མཚོར་ན་ཡང་སྦོམ་པོ། མ་སྒྲེན་པར་བཅུག་ན་ཡང་ངོ༌། །ཕོ་མཚན་མ་སྒྲེན་པར་མོ་མཚན་དུ་བཅུག་ན་སྦོམ་པོ། ལག་པ་ནས་ལག་པར། རྐང་པ་ནས་རྐང་པར་ཚིགས་ནས་ཚིགས་སུ། མཚན་ནས་མཚན་དུ་མ་འབྱོར་ན་ཡང་ངོ༌། །ལུས་ཆེ་ཆུང་ཞུགས་ཏེ་མོ་མཚན་དུ་མི་ཚངས་པར་སྤྱད་དུ་རུང་ཡང༌། རྐང་ལག་དང་ཚིགས་དང༌། མཚན་ལ་སོགས་པ་འཕགས་པར་ཆེ་ཆུང་ཞུགས་པ་ལས་མི་ཚངས་པར་སྤྱད་ན་འང་སྦོམ་པོར་འགྱུར་རོ། །གཡོས་པ་ཙམ་དང་ལྡན་པ་ཡང་ངོ༌། །གཞན་གྱིས་ནན་གྱིས་མི་ཚངས་པར་སྤྱད་དེ་དགའ་བར་ནི་མ་ཚོར་གྱི། ཆུང་ཟད་བག་ཙམ་གྱི་དགའ་བར་ཚོར་ན་སྦོམ་པོ། དགེ་སློང་རྡོས་བཏབ་པ་ཞིག་གཉིད་ལོག་པ་ལས་ཕོ་མཚན་སྒྲེན་པ་བུད་མེད་ཞིག་གིས་མཐོང་སྟེ་ཐལ་བྱུང་མོ་མཚན་དུ་བཅུག་སྟེ་སྟེང་ནས་བཀུད་པ་དང་དགེ་སློང་ཕས་ཚོར་ཏེ་ཉམ་ཆུང་ཞིང་རྔོན་བས་འཕྲ་འཕྲ་སྟེ་བག་ཙམ་གཡོས་པ་ལས་བཅས། ཤིང་དང་བ་སོ་དང༌། རྡོ་དང་གོས་ཀྱི་གཟུགས་ལ་དེ་ལ་བྱས་ནས་འོན་ཏེ་མཚན་གྱི་མཚན་ཙམ་ན་ཡང་ངོ༌། །མིང་གིས་སྨོས་པ་འདི་རྣམས་ལས་བུད་མེད་ཀྱི་གཟུགས་སུ་བྱས་པ་ལས་མི་ཚངས་པར་སྤྱད་བར་བརྩལ་བ་དང༌། ནང་ན་འདྲེ་གདོན་གནས་པས་མོ་མཚན་ཉིད་ཚེ་བུད་མེད་ཀྱི་དང་འདྲ་བ་མ་གྱུར་པ་ཞིག་ལ་སྤྱད་ན་སྦོམ་པོར་འགྱུར། ལུས་ཀྱི་ཡན་ལག་ཐམས་ཅད་ཀྱིས་རེག་པར་གྱུར་ན་རྩ་བའོ། །མདོ་ལྟག་མ་ལྟ་བུའི་གཟུགས་སུ་བྱས་པ་ལ་མི་ཚངས་པར་སྤྱད་པ་དང་ལུས་ཀྱི་ཡན་ལག་ཐམས་ཅད་མི་དང་འདྲ་བར་གྱུར་ན་ཕས་ཕམ་པའོ། །བསྙེན་པར་རྫོགས་པས་མོ་མཚན་དུ་རྐང་པ་བཅུག་ན་ཡང་ངོ༌། །མི་ཚངས་པར་སྤྱོད་དུ་སོང་སོང་བ་ལས་མོ་མཚན་ཆེ་བར་གྱུར་ནས་ཕོ་མཚན་གྱིས་ནི་མ་སྤྱད་ཀྱི་རྐང་པ་བཅུག་པ་ལས་བཅས་ཏེ་མི་ཚངས་པར་སྤྱད་པའི་ཕྱིར་མོ་མཚན་དུ་རྐང་པ་བཅུག་ནའང་སྦོམ་པོ། གཞུག་གནས་ཀྱི་ཕྱི་རོལ་དུ་ཕོ་མཚན་གྱིས་རེག་པ་དེ་
ཙམ་གྱིས་ཀྱང་ངོ༌། །བུད་མེད་གཅིག་ཅིག་སྒྲེན་མོར་ཁྲོན་པ་ན་ཆུ་ཆུ་བར་དགུས་པ་དང༌། བར་རམ་སབ་མོའི་རྒྱབ་ནས་དགེ་སློང་ཅིག་གིས་སབ་མོ་ལ་བུ་གུ་ཡོད་པའི་ནང་ནས། ཕོ་མཚན་བཅུག་སྟེ་མོ་མཚན་ལ་རེག་པར་བྱས་པ་ལས་བཅས་ཏེ་མོ་མཚན་ལ་ཕོ་མཚན་རེག་པ་ཙམ་གྱིས་ཀྱང་སྦོམ་པོ། བསྙེན་པའི་ཕྱིར་གཞན་ལ་བསྒོ་ན་ཡང་ངོ༌། །མི་གཞན་ལ་ཁྱོད་མི་ཚངས་པར་སྤྱོད་ཅིག་ཅེས་བསྒོ་ན་སྦོམ་པོ། རང་བཞིན་དུ་སྒྲེན་པ་ནི་མི་འབྲིའོ། །ཕོ་མཚན་ཡོད་ནས་སྒྲེན་པས་མི་ཚངས་པར་སྤྱད་ཀྱང་ཕས་ཕམ་པར་མི་འགྱུར་རོ་སྙམ་དུ་བསམས་ཏེ་སྤྱད་ཀྱང་ཕས་ཕམ་པ་ཡིན་པ་མ་ཡིན་ནོ། །མདུན་དང་རྒྱབ་གཉིས་གང་དུ་བརྩལ་ནས་དེ་ལས་གཞན་དུ་ཟིན་ན་ཡང་ངོ༌། །མོ་མཚན་དུ་མི་ཚངས་པར་སྤྱོད་པར་བསམས་ཏེ་སྤྱོད་སྤྱོད་པ་ལས་རྐུབ་ཏུ་སོང་སྟེ་འདོད་ཆགས་གྲུབ་ན་ཡང་ཕས་ཕམ་མོ། །ལམ་གྱི་ལྷག་མར་ཡང་གཞུག་གོ་ཞེ་ན་ཡང་མི་འབྲིའོ།། སྒོ་གསུམ་ཆར་དུ་མི་ཚངས་པར་སྤྱད་ལ་སྒོ་ཐ་མ་གཅིག་ཏུ་འདོད་ཆགས་གྲུབ་པར་བྱའོ་ཞེས་བསམས་ཏེ་སྤྱད་པ་ལས་སྒོ་གཉིས་སུ་ནི་མ་སྤྱད་ཀྱི་སྒོ་དང་པོར་འདོད་ཆགས་གྲུབ་ནས་གཉིས་སུ་མ་སྤྱད་པའི་ཕྱིར་ཕམ་པར་མི་འགྱུར་བ་མ་ཡིན་ཏེ་ཕམ་མོ། །ཞིག་གོ་ཞེས་བསམས་ན་ཡང་མ་ཡིན་ནོ། །ཕག་ཅིག་བཅིངས་ཤིང་འདུག་པ་ལས། དགེ་སློང་གིས་སྙིང་རྗེ་བའི་ཕྱིར་ཐུག་ཐུབ་ཏུ་བཏང་བ་ལས་ཕག་བདག་གིས་དགེ་སློང་གིས་བཏང་པར་ཐོས་ནས་དགེ་སློང་ཁྱོད་ནི་ཁྲིམས་ཞིག་ཅིང་མེད་པའོ་ཞེས་བསྒོ་བ་དང༌། ཁྲིམས་ཞིག་པ་ནི་མ་ཡིན་མོད་ཀྱི། དགེ་སློང་གིས་ཀྱང་ཁྲིམས་ཞིག་པ་ཡིན་ནོ་སྙམ་བསམས་ནས་མི་ཚངས་པར་སྤྱད་པ་ལས་བཅས་ཏེ་ཕྱིས་མི་ཚངས་པར་སྤྱོད་པའི་ཚེ་ཕམ་མོ། །ནད་དབྱུང་བའི་ཕྱིར་ཡང་མི་རུང་ངོ༌། །ཆུས་བགགས་པ་དང་ཕོ་མཚན་ལ་ཤུ་བ་བྱུང་བའི་ནད་ལ། སྨན་པ་ན་རེ་མི་ཚངས་པར་སྤྱད་ན་ཕན་ནོ་ཞེས་ཟེར་ཏེ་ནད་ལ་ཕན་པའི་ཕྱིར་མི་ཚངས་པར་སྤྱད་ཀྱང་ཕམ། ལམ་ལ་གཞན་དུ་འདུ་ཤེས་སམ་ཡིད་གཉིས་སུ་འང་མ་ཡིན། སྣར་ཕོ་མཚན་བཅུག་སྟེ་སྤྱད་པར་བསམས་པ་ལས་ཁར་སོང་སྟེ། འདོད་ཆགས་གྲུབ་པ་དང༌། འདོད་ཆགས་ནི་ཁར་སྤྱད་དུ་གྲུབ་ཀྱི། འདོད་ཆགས་ཁར་གྲུབ་བམ་སྣར་གྲུབ་གཏོལ་མེད་དེ་ཐེ་ཚོམ་ཟ་བ་ལྟ་བུ་ཡང་
ཕས་ཕམ་པར་འགྱུར་རོ། །ལམ་མ་ཡིན་པ་ཡང་དེ་ལྟར་སྦོམ་པོའོ། །སྒོ་གསུམ་མ་ཡིན་པར་རྣ་བ་དང་སྣ་ལ་སོགས་པར་མི་ཚངས་པར་སྤྱད་ནའང་སྦོམ་པོ། ལྟུང་བ་མེད་པ་རིངས་པས་བུད་མེད་ཀྱི་སྟེང་དུ་ལྷུང་ནའོ། །སྡངས་པའམ་རིངས་པ་ལྟ་བུས་རྡེག་འཆོས་ཏེ་བུད་མེད་ཀྱི་སྟེང་དུ་འགྱེལ་བ་ནི་ཉེས་མེད་དོ། །མི་འདོད་བཞིན་དུ་ཕོངས་པས་མགུལ་ནས་འཇུས་ན་ཡང་ངོ༌། །བུད་མེད་འདྲེ་ལྟ་བུས་སྡངས་ཏེ་འཇིགས་པའི་ཕྱིར། དགེ་སློང་མི་འདོད་དུ་བཞིན་མགུལ་ནས་འཇུས་ནའང་ཉེས་མེད་དོ། །མཆུ་དང་མཆུར་རེག་པ་ཡང་ངོ༌། །སྒོ་ལྟ་བུ་ལ་བུད་མེད་དང་དགེ་སློང་ཕས་བྱུང་ཚུས་བྱུང་སྟེ་འཕྲལ་ལ་གདོང་ཐུག་ཏུ་ཕྲད་ནས་མཆུ་གཉིས་རེག་ཏུ་ཟིན་ཀྱང་ཉེས་མེད། ཁྱི་མོའི་མདུན་དུ་མི་གཅི་བར་བྱ། དགེ་སློང་གཅིག་ཅིག་ཁྱི་མོའི་མདུན་དུ་ཁ་བལྟས་ཏེ་གཅིན་གཅི་བ་དང༌། ཕོ་མཚན་ལ་ཁྱིའི་སྙིང་ལ་ཤ་གཞན་ཞིག་སྙམ་སྟེ་བརྒྱུགས་ནས་ཁར་བཅུག་པ་ལས་བཅས་ཏེ། ཁྱི་མོའི་མདུན་དུ་ཉེས་བྱས་དགོན་པ་གང་དུ་སྲོག་ལ་དམའ་བ་དེར་མི་གནས། ཆུ་གང་དུ་ཕོ་མཚན་ཟིན་གྱིས་དོགས་པས་སྒྲེན་མོར་མི་འབོག་དགེ་སློང་གཅིག་ཅིག་ཆུ་རྒལ་བ་དང༌། ཆུར་གནས་པའི་སེམས་ཅན་ཞིག་གིས་ཕོ་མཚན་ཁར་བཅུག་པ་དང༌། དགེ་སློང་གི་ཡིད་ལ་ཕོ་མཚན་སེམས་ཅན་གྱི་ཁར་སོང་གིས་ཕས་ཕམ་མོ་སྙམ་དུ་ཐེ་ཚོམ་ཟོས་པ་ལས་ཕས་ཕམ་པར་ནི་མི་འགྱུར་གྱི། ཕྱིན་ཆད་ཕོ་མཚན་ཟིན་གྱིས་དོགས་པའི་ཆུ་ལ་རས་ཀྱིས་མ་དཀྲིས་པར་མ་འབོགས་ཤིག་ཅེས་བཅས་ཏེ་རས་ཀྱིས་མ་དཀྲིས་པར་འབོག་ན་ཉེས་བྱས། དེར་གྲུ་ལ་ཤེས་བཞིན་དུ་རྒལ། གྲུ་ལ་རྒལ་བའི་ཚེའང་གྲུ་བུབ་ན་བུད་མེད་ཀྱིས་མི་ཟིན་པ་དང་རྒྱལ་བའི་ཕྱིར་ཕོ་མཚན་མི་ཟིན་པར་རས་ཀྱིས་དཀྲི་བ་ཤེས་བཞིན་དུ་བྱ། དེ་ལྟར་འདུ་ཤེས་མ་བཞག་ན་ཉེས་བྱས། བའི་ནང་དུ་འགྲོ་ན་ཡང་ངོ༌། །བ་ལང་གི་ཁྲོད་དུ་འགྲོ་ན་འང་རྡུང་དུ་འོང་བའི་ཕྱིར་བག་བྱ་བ་དང་བ་ལར་མི་རེག་པར་ཤེས་བཞིན་དུ་མ་བྱས་ན་ཉེས་བྱས། ཁྲོན་པའི་ཆུར་བརྟག་པ་ཡང་ངོ༌། །ཁྲོན་པའི་ནང་ན་བུད་མེད་འགྱེལ་ལོགས་ཀྱིས་ཕབ་སྟེ་མི་ཉལ་ཐལ་བྱུང་གཉིད་ཀྱིས་ལོག་པར་འགྱུར་ནས་ཅི་ཡོད་བརྟག་པ་དང་གཅིག་ཏུ་ན་བུད་མེད་ཁྲོན་པའི་ཁ་ན་འགྲེང་ན་མོ་མཚན་གྱི་གཟུགས་བརྙན་ཆུའི་ནང་དུ་འོང་བ་མཐོང་ན་འདོད་ཆགས་སྐྱེ་བའི་ཕྱིར་བུད་མེད་ཆུ་ཆུ་བ་
ཡོད་ན་ཁྲོན་པར་མི་བརྟགས་པར་མ་བྱས་ན་ཉེས་བྱས། བསོད་སྙོམས་ཟས་ཀྱི་ཕྱིར་གྲོང་དུ་སྤྱད་པ་གྲོང་བར་དུ་བསོད་སྙོམས་སྤྱོད་པའི་ཚེ་བུད་མེད་ལ་མི་རེག་པ་ལ་སོགས་པ་ཤེས་བཞིན་དུ་མ་བྱས་ན་ཉེས་བྱས། རབ་ཏུ་བརྟག་པར་བྱ་སྟེ་རབ་ཏུ་དབྱུང༌། རབ་ཏུ་དབྱུང་བ་ཞིག་འོངས་ན་ཕོ་ཡིན་ནམ་མོ་ཡིན་པ་རྟོགས་པར་བྱ་སྟེ་རབ་ཏུ་དབྱུང༌། མ་བརྟགས་ན་ཉེས་བྱས། གཅིག་པུ་བླ་གབ་མེད་པ་ན་ལོགས་མི་དབབ། བླ་གབ་མེད་པ་ན་གྲོགས་མེད་པར་གཉིད་མ་ལོག་ཀྱང་ལོགས་ཀྱིས་ཕབ་སྟེ་མི་ཉལ་ཐལ་བྱུང་གཉིད་ཀྱིས་ལོག་པར་འགྱུར་བའི་ཕྱིར་ཏེ་ལོགས་ཀྱིས་ཕབ་ན་ཉེས་བྱས། སྒོ་མ་བཅད་པའི་ཁྱིམ་དུ་དགེ་སློང་མས་བསམ་གཏན་མི་བྱ་བ་དང་ཡང་ངོ༌། །སྒོ་མ་བཅད་པར་དགེ་སློང་མ་བསམ་གཏན་མ་བྱེད་ཅིག་མ་ཉལ་ཅིག་སྐྱེས་པ་ཐུག་ཐུབ་ཏུ་རྒྱོར་ཡང་ངོ༌། །ཕས་ཕམ་པ་དང་པོ་སྟེ་བྱེ་བྲག་ཏུ་གདོན་མི་ཟ་བའོ། །ཕས་ཕམ་པ་བཞིའི་དང་པོ་མི་ཚངས་པར་སྤྱོད་པ་འདུལ་བ་བྱེ་བྲག་ཏུ་གདོན་མི་ཟ་བ་ཞེས་བྱ་བའི་ནང་ནས་འབྱུང་བའི་མདོ་མི་ཚངས་པར་སྤྱོད་པ་དང་པོ་རྫོགས་སོ།། །།མ་བྱིན་པར་ལེན་པའི་ཕས་ཕམ་པ་ལ་འཆད་དེ། འཕྲོག་པ་དང༌། བདག་གིས་འཕྲོག་པ་དང་བརྐུས་པ་ལའང་རུང་སྟེ་ཡན་ལག་གཅིག །འཕྲོག་ཏུ་བཅུག་པའོ། །མངོན་སུམ་དུ་འཕྲོག་ཏུ་བཅུག་ཀྱང་རུང་རྐུར་བཅུག་ཀྱང་རུང་སྟེ་ཡན་ལག་གཅིག །ཕོ་ཉས་ཀྱང་ངོ༌། །ཕོ་ཉ་བཏང་སྟེ་རྐུར་བཅུག་ཀྱང་རུང་འཕྲོག་ཏུ་བཅུག་ཀྱང་རུང་ཡན་ལག་གཅིག །ཡན་ལག་བདུན་དུ་བརྩི་ན་ནི་ཡན་ལག་གོང་མ་གཉིས་དང་གསུམ་ལ་ཡན་ལག་གཅིག་ཏུ་བརྩིའོ།། མ་བྱིན་པའོ། །བདག་གི་ནོར་ཀྱང་མ་ཡིན་གཞན་གྱིས་ཀྱང་མ་བྱིན་པ་ལ་བྱ་སྟེ་ཡན་ལག་གཅིག །མ་ཤ་ཀ་ལྔ་ལ་སོགས་པའོ། །སངས་རྒྱས་བཞུགས་པའི་ཚེ་ནའང་དངུལ་ཞོའི་བརྒྱད་ཆ་གཅིག་གིས་ཕམ་དེང་སང་དུས་དང་སྦྱར་ཏེ། རྒྱ་གར་ཡུལ་གྱི་མ་ཤ་ལས་བོད་ཀྱི་དངུལ་གྱི་ཐང་དུ་བརྩིས་ན། དངུལ་ཞོའི་བརྒྱད་ཆ་གཅིག་ཡོད་དོ། །བརྒྱད་ཆ་གཅིག་ཡན་ཆད་བརྐུས་ན་ཕམ་སྟེ་ཡན་ལག་གཅིག །སངས་རྒྱས་ཀྱི་ཚེ་པ་ན་རིན་ཆུང་བས་ལྔས་ཕམ། དེང་སང་རིན་ཆེ་བས་བཞི། རྐུ་སེམས་ཀྱིས་སོ། །རྐུ་སེམས་ཀྱིས་རྐུ་བ་ལ་བྱ་སྟེ་ཡན་ལག་གཅིག །མིའི་རྒྱུད་ཀྱི་བཅངས་པ་ལའོ། །ལམ་
རྒྱུད་བཞི་མ་གཏོགས་པར་མིའི་ནོར་ལ་བྱ་སྟེ་ཡན་ལག་གཅིག །ཡན་ལག་བཅུར་བརྩིས་ན་ནི་མདོ་འདི་ཉིད་ལས་མི་ནོར་ལས་བླངས་པ་གོང་ནས་བཤད་དེ་ཡན་ལག་གཉིས་སུ་བརྩི། ཡན་ལག་བདུན་གྱིས་ཕམ་པར་བརྩི་ན་ཡང་ཡན་ལག་འདི་གཉིས་སུ་བགྲང་ངོ༌། །དེར་འདུ་ཤེས་པའོ། །མིའི་རྒྱུད་ཀྱི་ནོར་ཡིན་པར་འདུ་ཤེས་པ་ལ་ཡན་ལག་གཅིག །ནོར་བདག་གི་སེམས་ཀྱིས་ཀྱང་མ་བཏང་སྟེ་བདག་གི་ཡིན་པར་སེམས་པ་ཡན་ལག་གཅིག་སྟེ། ཡན་ལག་འདི་བཅུ་དང་ལྡན་ན་ཕམ། མ་ཚང་ན་སྦོམ་པོ། ཡན་ལག་བདུན་གྱིས་ཕམ་པར་བྱས་ན་འདི་གཉིས་ལ་གཅིག་ཏུ་བརྩིའོ། །བདག་པོ་ལས་རླག་ནས་སེམས་ཀྱིས་མ་བཏང་ན་རེ་བ་མ་ཆད་པའོ། །གོས་དང་ནོར་རྫས་ལ་སོགས་པ་རླུང་དང་ཆུས་ཁྱེར་བ་ལྟ་བུར་འཁྱམས་པ་ལ་ནོར་བདག་གི་སེམས་ལ་སླར་རྙེད་དུ་རེ་བའི་སེམས་ཡོད་པ་ལས་བརྐུས་ན་ནི་ཕམ། སླར་རྙེད་དུ་རེ་བའི་སེམས་མེད་ན་བདག་པོ་མེད་པའི་ནོར་དུ་བརྩིའོ། །གསོན་མར་བསྔོས་པ་བདག་པོར་འགྱུར་རོ། །སངས་རྒྱས་དང་ཆོས་ཀྱི་དཀོར་དང་ལྷ་མ་སྲིན་ལ་སོགས་པའི་ནོར་དུ་བསྔོས་ཤིང་སྲུང་མ་ཡོད་པ་ལས་བརྐུས་ན་ཕམ། བྱ་དང་རི་དགས་ལྟ་བུ་གསོན་མ་ལ་རྒྱན་བཏགས་པ་ལས་བརྐུས་ནའང་བདག་པོ་མི་ཡིན་པས་ཕམ་མོ། །བཟའ་བའི་ཕྱིར་བྱིན་པ་ནི་བསམ་པའི་རྒྱུད་མེད་དེ། ཕྱུགས་ལ་ཆོས་དང་རྩྭ་དང་ཆུ་ལ་སོགས་པ་སྦྱིན་པར་བསྔོས་པ་ལས་བརྐུས་པ་ནི་ཕྱུགས་ལ་བསྔོས་པའི་སྟེང་དུ་ཕྱུགས་ཀྱིས་ཟོས་ནས་མེད་པར་འགྱུར་བས་ན་སྦོམ་པོ། མ་ཞུགས་ནས་བདག་པོ་མ་ཡིན་ཏེ། རི་དགས་དང་བྱ་དང་གཅན་གཟན་ལ་སོགས་པ་བཤོར་བར་མི་བཏང་བ་དང་ལིངས་བཏབ་པ་ལ་སོགས་པ་ཁོངས་སུ་མ་ཆུད་ཅིང་དང་རུམ་འབྱོར་པ་ལས་བརྐུས་པ་ནི་བདག་པོ་མེད་པར་བརྩིའོ། །རི་དགས་དང་བྱ་དང་གཅན་གཟན་དག་བཟུང་བའི་ཕྱིར། མེ་བཏང་བ་ལ་སོགས་པའོ། །རི་དགས་དང་བྱ་དང་གཅན་གཟན་ལ་སོགས་པ་བཤོར་བའི་ཕྱིར་ལིངས་དང་མེ་ལ་སོགས་པ་དང༌། རུ་འབྱོར་ཅིང་ཁོངས་སུ་ཆུད་པ་དང༌། ཁོངས་སུ་མ་ཆུད་ཀྱང་མངའ་ལྟ་བུ་ཕོག་སྟེ་སྨས་པ་སྙགས་མ་ཕྱི་བཞིན་འོངས་པ་ལྟ་བུ་ལས་བརྐུས་ན་ནི་བདག་པོ་ཡོད་པར་འགྱུར་ཏེ་ཕམ་མོ། །ཁོངས་ནས་བརྐུས་པ་ཡང་ཕམ་མོ། །མ་ཆུད་ན་དངོས་པོ་ཅན་དུ་གཟུང་ངོ༌། །ནོར་བདག་མིའམ་བྱོལ་
སོང་གང་ཡིན་གཏོལ་མེད་པའི་ནོར་ཞིག་ལ་སུའི་ཡིན་ཀྱང་རུང་གི་བརྐུའོ་ཞེས་བསམས་པ་ནི་ནོར་བདག་མི་ཡིན་ན་ཕམ་པར་འགྱུར། ཕྱུགས་ཀྱི་ཡིན་ན་སྦོམ་པོར་འགྱུར་མི་ཡིན་ན་སླར་གཞག་གོ་ཞེས་བསམས་པ་ནི་མིའི་ཡིན་ཀྱང་བླངས་ཏེ་སླར་གཞག་ན་མི་ཕམ་མོ། །རྐུ་བའི་ཚེ་གནས་དང་དུས་ཀྱི་རིམ་གྱིས་སོ། །རྐུས་པའི་ནོར་གྱི་རིན་ཐང་བརྩི་བ་ནི་ནས་འབྲས་ལ་སོགས་པ། དབྱར་དགུན་སྟོན་དཔྱིད་ཀྱི་དུས་ཀྱི་རིན་ཐང་དུ་བརྩི། ལྷོ་བལ་ཡུལ་དང་བོད་ཡུལ་ལྟ་བུ་ནོར་རྒྱུ་གཅིག་ལ་རིན་ཆེ་ཆུང་དུ་འགྱུར་བ་ཡང་ཡུལ་ལམ་གནས་དེ་ཉིད་ཀྱི་རིང་ཐང་དུ་བརྩི་སྟེ་ཚང་ན་ཕམ་སྟེ་གླ་རྩི་དང་ཁ་ར་ལྟ་བུའོ། །མི་འདོད་པ་རྣམས་ལྟུང་བ་མེད། བུམ་པའམ་གདང་ཤིང་ངམ་ཞྭ་བརྐུས་པ་ལས། བུམ་པའི་ནང་ན་རྫས་ཡོད་པ་གདང་ཤིང་དང་ཞྭའི་ཟླ་ལ་ནོར་འོངས་ཏེ་མི་འདོད་དེ་སླར་བསྐྱལ་བར་བྱས་པ་ན་ཕམ་པར་མི་འགྱུར་རོ། །ཞྭ་དང་གདང་ཤིང་དང་བུམ་པ་ཉིད་ཀྱིས་རིན་ཐང་བརྩིའོ། །བདག་གིར་དང་གཞན་གྱི་ནོར་རྫས་ཞིག་ལ་ནོར་དེ་བདག་གི་ཡིན་པར་མཐོང་སྟེ་སྤྱད་པ་དང༌། རེ་ཞིག་གི་དུས་དང༌། གྲོགས་པོའི་རྫས་ཕྲན་ཚེགས་ཞིག་བརྙའོ་ཞེས་མ་བྱས་ཀྱང་སྐད་ཅིག་ཙམ་སྤྱད་པ་དང༌། ཡིད་བརྟན་པའི་སེམས་ཀྱིས་དང༌། གྲོགས་པོ་ཡིད་བརྟན་ཏེ་མི་དགའ་བར་མི་འགྱུར་བའི་རྫས་ཞིག་ལ་ཐུག་ཐུབ་པར་སྤྱད་པ་དང༌། གཞན་ལ་གསོལ་ཏེ་ནའོ། །རྫས་ཐུན་མོང་དུ་སྤྱད་དོ་ཞེས་སྔར་འཐམས་ཏེ་སྤྱད་པ་འཕྲལ་ལ་བརྙས་ཏེ་སྤྱད་པ་དང་འདི་རྣམས་ལྟ་བུ་སྤྱད་པ་ན་རྐུ་སེམས་མེད་ན་ཉེས་མེད་དོ། །གཞན་ཡང་རྐུ་བའི་སེམས་མེད་ནའོ། །རྐུ་སེམས་མེད་པར་ནོར་རྫས་བཟང་ངན་ལྟ་བའི་ཕྱིར་ལག་གིས་གཟུང་བ་ལྟ་བུ་དང་གཞན་ཞིག་གིས་བརྐུ་བའི་ཕྱིར་དེ་འདྲ་བ་ཞིག་ལོང་སྟེ། ང་ལ་བྱིན་ཅིག་ཅེས་ཟེར་བ་ལ་བདག་གིས་རྐུ་བར་མི་ཤེས་ཤིང་བདག་ལ་རྐུ་སེམས་མེད་པར་ཁོའི་ཁ་ཐབས་བཞིན་དུ་བླངས་ཏེ་བྱིན་པ་ལ་སོགས་པ་ནི་ཉེས་མེད་དོ། །སྙིང་རྗེ་བའི་ཕྱིར་འཁྲུལ་གྱིས་བཏང་ན་ཡང་ངོ༌། །ཨ་ནན་ཏའི་བྱིན་དའི་བུ་སྟོན་ཀའི་དུས་ཀྱི་རྐུན་པོས་བཀྲུས་པ་ལས་མཽད་གལ་གྱིས་རྐུན་པོ་བུ་གཉིས་ལ་སྙིང་རྗེ་བའི་ཕྱིར་དམག་མི་ཕལ་མོ་ཆེར་སྤྲུལ་ཏེ་བསྡིགས་ནས། རྐུན་པོས་བུ་སླར་བཏང་བ་དང༌། དྲུག་སྡེ་ཕས་ཕམ་
པར་གྱུར་ཏོ་ཞེས་བརྒལ་ནས་སྙིང་རྗེ་དང་འཕྲུལ་གྱིས་བྱས་པས་ཉེས་མེད་པའོ་ཞེས་བཅས། ཐམས་ཅད་དུ་ཡང་སྦྱོར་བའི་ཉེས་བྱས་པའོ། །ཕས་ཕམ་བ་དང་ལྷག་མ་དང་ལྟུང་བ་དང་བཞི་སོ་སོར་མཐོལ་བ་དང་མང་པོ་བསླབ་པ་དང༌། ལྟུང་བ་འདི་སྡེ་ལྔ་ཐོག་མ་བྱེད་ཅིང་སྦྱོར་བའི་ཚེ་ན་གང་ཡང་རུང་སྟེ་ཉེས་བྱས་པའོ། །དེ་སྟེ་རྩ་བའི་སྡེ་འདིར་ནི་སྦོམ་པའོ། །ཕས་ཕམ་པ་བཞི་ལས་གང་ཡང་རུང་སྟེ་ཐོག་མ་ཕམ་པར་བྱེད་ཅིང་སྦྱོར་བའི་ཚེ་ཉེས་བྱས་ཀྱི་ཐོག་ཏུ་སྦོམ་པོ་རེ་རེ་ཡང་ཡོད་དོ། །སྦོམ་པོར་འགྱུར་བ་ཞིག་སྤྱོད་ནའང་ཐོག་མར་ཉེས་བྱས་པ་ཡོད་དེ་དེའི་འོག་ཏུ་ཕམ་པ་ལ་བརྩོན་པས་སྦོམ་པོའོ། །མདོ་བཞིན་པའི་ཡང་དེ་བཞིན། བཅུ་གསུམ་དགེ་འདུན་གྱི་ལྷག་མར་འགྱུར་བ་ཞིག་སྤྱོད་ནའང་ཐོག་མ་སྦྱོར་བའི་ཚེ་ཉེས་བྱས་སུ་གྱུར་པའི་འོག་ཏུ་སྦོམ་པོ་གཅིག་ཀྱང་ཡོད་དོ། །མ་ཚང་བ་བརྐུས་ན་ཡང་ངོ༌། །མིའི་ནོར་ལས་བརྐུས་པ་ལས་དངུལ་ཞོའི་བརྒྱད་ཆ་གཅིག་ཏུ་མ་ཚང་བ་མན་ཆད་ནི་བརྐུས་ཏེ། བླངས་ཀྱང་སྦོམ་པོར་འགྱུར་རོ། །བདག་པོ་མེད་པའི་གཏེར་ཡང་ངོ༌། །ནོར་བདག་གིས་ནོར་གཏེར་དུ་སྦས་པ་ལས་ཤི་ནས། བུས་རྒྱུས་མི་ཤེས་པ་ལྟ་བུ་དང༌། རྒྱལ་པོའི་ས་རིས་ཀྱི་ནང་དཀོར་ཁུང་ཡོད་པ་མངོན་པར་མ་བཏོད་ཅིང༌། རྒྱལ་པོས་མི་ཤེས་པ་ལྟ་བུ་ལ་བརྐུས་ན་རིན་ཐང་ཚང་ཡང་སྦོམ་པོའོ། །བདག་གི་ཡང་ངོ༌། །དགེ་སློང་ཨ་ཇི་ཏ་ལ་ཆོས་གོས་བཟང་པོ་ཅིག་ཡོད་དེ། དགེ་སློང་ཅིག་གིས་མཐོང་ནས་བརྐུ་བར་བྱས་པ་དང༌། ཨ་ཛི་ཏས་ཚོར་ཏེ་བདག་གི་ཆོས་གོས་ཀྱི་གནས་སུ་ཁོའི་ཆོས་གོས་གཞག་པ་དང༌། དགེ་སློང་དེས་ཆོས་གོས་དེ་བརྐུས་ཏེ་གུད་དུ་བལྟས་ན་བདག་གི་ཆོས་གོས་ཡིན་པར་གྱུར་པ་ལས་བཅས་ཏེ། བདག་གི་རྫས་ལ་གཞན་གྱི་ནོར་དུ་བསམས་ཏེ་བརྐུས་ན་ཡང་སྦོམ་པོ། རྒྱུད་གཞན་གྱི་ཡང་ངོ༌། །མི་མ་གཏོགས་པ་ལམ་རྒྱུད་བཞི་གང་ཡང་རུང་སྟེ་ནོར་རྫས་བརྐུས་ན་སྦོམ་པོ། བདག་གིར་མ་བྱས་ཀྱང༌། བདག་གི་ནོར་དུ་བྱ་བའི་ཕྱིར་མ་བརྐུས་ཀྱང་འདི་རྣམས་ལྟར་བྱས་ན་སྦོམ་པོ། སྦས་སམ། ནོར་ཆུད་གཟན་ཅིང་མེད་པར་བྱ་བའི་ཕྱིར་སའི་ནང་ལ་སོགས་པར་སྦས་པ་དང༌། མ་རུང་བར་བྱས་པ་དང༌། ནོར་རྫས་མེར་བསྲེགས་སམ། ཆུ་ལ་བསྐུར་རམ་དྲལ་བཅོམ་པ་ལ་སོགས་པ་ཆུད་གཟན་པ་
དང། བཅིངས་པ། ནོར་བདག་དང་མི་ཕྲད་པར་བྱ་བའི་ཕྱིར་གང་རྟ་ལྟ་བུ་བཅིངས་ཤིང་བཏགས་པ་ལྟ་བུ་དང༌། འཕྲོལ་བ་ལ་སོགས་པ་དང༌། གྔག་རྟ་ལ་སོགས་པ་བཏགས་པ་ལས་སྟོར་ཅིང་མེད་པར་བྱ་བའི་ཕྱིར་འཕྲོལ་ཏེ་འཁྱམ་དུ་བཏང་བ་དང༌། ཕྲལ་བ་ཡང་ངོ། །འདི་རྣམས་ལྟ་བུ་ལ་སོགས་པ་ནོར་བདག་དང་ནོར་དུ་ཕྲལ་བའི་ཕྱིར་ཆུད་གཟན་པའི་ཕྱིར་བྱས་པ་མེད་པར་བྱས་པ་ནི་སྦོམ་པོའོ། །ཉེས་བྱས་པ་ནི་སྙིང་རྗེའི་སེམས་ཀྱིས་བཏང་ནའོ། །རི་དགས་དང་གཅན་གཟན་རྙི་དང༌། རྒྱ་ལ་ཟིན་པ་དང་ཕྱུགས་ལ་སོགས་པ་བསད་པར་བཏགས་ཤིང་བཅིངས་པ་ལ། རི་དགས་ལ་སོགས་པ་དང་བདག་པོ་གཉིས་ཀ་ལ་སྙིང་རྗེའི་ཕྱིར་ཐུག་ཐུབ་ཏུ་བཏང་བ་ནི་ཉེས་བྱས། རྒྱ་དང་རྙི་ལ་སོགས་པ་སྙིང་རྗེ་བའི་སེམས་ཀྱིས་དྲལ་ཅིང་བཏང་བ་ཡང་ཉེས་བྱས་ཏེ། སྙིང་རྗེ་ལ་རྣམ་གཉིས་སོ། །བཟློག་ཀྱང་མ་བྱས་པ་མ་ཡིན། རྐུན་པོས་དགེ་སློང་ལ་རྐུ་བའི་རྒྱུས་དྲིས་པ་ལ། དགེ་སློང་གིས་སྐྱེས་པ་མེད་དོ། ཁྱི་མི་ཟའོ་ཞེས་བྱ་སྟེ། རྐུ་བར་བསྟན་པའི་འོག་ཏུ་སྔར་སྨྲས་པ་བརྫུན་བྱ་སྟེ། རྐུ་བའི་མི་རིགས་སོ་ཞེས་སླར་བཟློག་ཀྱང་སྦོམ་པོར་འགྱུར་རོ། །མ་རེག་པ་ཚུན་ཆད་སྦྱོར་བའི་སྦྱོར་བའོ། །ནོར་རྐུ་བར་བསམས་ནས་ནེར་ལ་མ་རེག་ཚུན་ཆད་སྤོམ་པོ་ལ་སྦྱོར་པ་སྟེ་ཉེས་བྱས་སུ་འགྱུར་རོ། །བེན་ན་གོམ་པ་རེ་རེ་ཞིང་ངོ༌། །མཁན་པོ་ལྟ་བུས་སློབ་མ་ལ་ཆོས་གོས་བསྐུར་ཏེ་ཕྱི་བཞིན་དུ་འབྲང་དུ་བཅུག་པ་ལས། སློབ་མ་དེས་རྐུ་བར་བསམས་ཏེ། བེན་ན་གོམ་པ་དུ་བོར་བ་རེ་རེ་ཞིང་ཉེས་བྱས་རེ་རེར་འགྱུར་རོ། །དེའི་རྒྱུད་ན་སེམས་ཅན་སོ་སོ་ལས་སོ། །མི་གཉིས་གསུམ་ཡན་ཆད་མང་པོ་ཞིག་གི་ནོར་ལ་དགེ་སློང་ཅིག་གིས་བརྐུས་ན་མི་དེ་རྣམས་ཀྱི་སོ་སོའི་ནོར་སྐལ་ལས་རིན་ཐང་ཚང་ན་མིང་དུ་ཡོད་པ་བཞིན་དུ་ཉེས་བྱས་དང༌། སྦོམ་པོ་རེ་རེ་ཡང་ཡོད། ཕས་ཕམ་པ་ནི་སྤྱིར་གཅིག་ཏུ་ཟད་དེ་སྡིག་ནི་མི་དུ་ཡོད་པ་བཞིན་དུ་ཕས་ཕམ་པ་རེ་རེའི་སྡིག་ཡོད། རིན་ཐང་མ་ཚང་ན་སྤོམ་པོ་དང་ཉེས་བྱས་རེ་རེ་ཡོད་དུ་ཟད་དོ། །ཕུར་པ་ལས་བཀྲོལ་བ་ནི་གྲུལ་རེག་པ་མ་ཡིན་ནོ། །གྲུ་བརྐུ་བའི་ཕྱིར་ཉག་ཐག་ཕུར་པ་ལས་བཀྲོལ་བ་ནི་གྲུ་ལ་རེག་པ་མ་ཡིན་ཏེ། སྦོམ་པོར་མི་འགྱུར་གྱི་ཉེས་བྱས་པའོ། །ཁུར་གྱིས་རྐུ་བར་དེར་བྱེད་ཅིང་བརྐུས་པར་
ནའོ། །སྣམ་བུ་འམ་རས་སམ་ནོར་གང་ཡང་རུང་བ་ལས། མང་མོ་ཞིག་ཁུར་དུ་དྲགས་ཏེ་རྐུ་བ་ནི་བརྐུ་བར་བསམས་པའི་ཕྱིར་ཉེས་བྱས་ནི་གཅིག་ཏུ་ཟད། འདྲ་བའི་ཕྱིར་སྐྱེད་ཅིང་སྡུད་པ་ལ་རེག་པ་རེ་རེ་ཞིང་སྦོམ་པོ་རེ་རེ། དྲགས་ཟིན་ནས་འདེགས་པར་རེག་པའི་ཚེ་ཡང་སྦོམ་པོ་གཅིག །བཏེག་སྟེ་འཕགས་ན་ཕམ་པར་འགྱུར། བཏོགས་ནས་ཕུང་པོར་ནའོ། །ཤིང་ཏོག་བཏོགས་ནས་སྣོད་དུ་སྡུད་པའི་ཚེ་སྡུད་པར་རེག་པ་རེ་རེ་ལ་སྦོམ་པོ་རེ་རེ་བསྡུས་ཟིན་ནས་བཏེག་པར་རེག་པའི་ཚེ་སྦོམ་པོ་གཅིག་བཏེག་སྟེ་འཕགས་ན་ཕམ། ཉེས་བྱས་ནི་བརྐུ་བར་བསམས་པའི་ཕྱིར་གཅིག་ཏུ་ཟད་དོ། །ཡལ་ག་བཀལ་ཏེ་བཅད་པ་ནི་ཤིང་ཏོག་དང་མེ་ཏོག་ལ་སོགས་པ་དུ་ཡོད་ཀྱང་སྦོམ་པོ། སྤྱིང་བ་ནི་གནས་ཀྱི་སྟེང་ནས་ནོར་གྱི་སྤྱི་བོ་ནུབ་ནའོ། །ཆུ་དང་ས་ལྟ་བུའི་ནང་དུ་ནོར་བརྐུ་བའི་ཕྱིར་སྦྱོར་བ་ནི་ནོར་གྱི་སྤྱི་བོ་ནུབ་ཅིང་མི་སྣང་ན་ཕམ། ཆུའི་ཞབས་སུ་ནོར་སོང་སྟེ་ཆུ་དང་པས་སྟེང་ནས་བལྟར་སྣང་བ་ནི་སྦོམ་པོ་སྟེ་ཆུའི་འོག་གི་སའི་ནང་དུ་སྤྱིངས་ཏེ་མི་སྣང་ན་ཕམ། བཀུར་བའི་སེམས་ཀྱིས་གང་འདི་ནས་ཕྱིས་བཀུར་བར་ནའོ། །མདོ་ལྟག་མ་ལྟར་སྦས་ཏེ་བཞག་པའི་ཚེ་མི་ཕམ་གྱི་ཕྱིས་བླངས་ཏེ་ཁྱེར་པའི་ཚེ་ཕམ་མོ་ཞེས་ཀླན་ཀ་ཚོལ་བའི་ཕྱིར་མདོ་འདི་འཆད་དེ་སྦ་སྟེ་བཞག་ནས་ཕྱིས་བླངས་ཏེ་བཀུར་རོ་ཞེས་བསམས་སུ་ཟིན་ཀྱང་སྦས་པའི་ཚེ་ནོར་མི་སྣང་ན་ཕམ་པར་འགྱུར་རོ། །བཤལ་བ་ནི་ཐོག་མའི་གཞིའི་མཚམས་ལས་མཇུག་མ་འདས་ནའོ། །ནོར་ཞིག་ས་ལས་བཤལ་ཏེ་རྐུ་ན་གཞི་ག་ལ་འདུག་པའི་ནོར་གྱི་མཐའ་མ་འམ་མཇུག་མ་འདུག་པའི་མཚམས་ལས་འདས་ན་ཕམ་པར་འགྱུར། དེ་ལྟར་འགྱུར་བ་ཡང་ནོར་འདུག་པའི་གཞི་ལ་སའི་སྲུབས་སམ་བང་རིམ་ལྟ་བུའི་མཚམས་མེད་ན་ནོར་གྱི་མཇུག་མའི་མཚམས་འདས་ན་ཕམ། ཡོག་པའི་ནང་དུ་ཆུད་པ་ནི་དེར་མ་ཡིན་ནོ། །ནོར་བཤལ་ཏེ་རྐུ་བའི་འོག་ན་མཚམས་སམ་ས་སྒལ་ཞིག་ཡོད་ན་ནོར་གྱི་མཇུག་མའི་མཚམས་མ་འདས་ཀྱང་ས་སྒལ་དེ་འདས་པས་ཕམ་པར་འགྱུར་ཏེ། དཔེར་ན་ཞིང་རོལ་གྱི་སྟེང་ནས་ཤིང་རིངས་རྐུ་བ་ལྟ་བུའོ། །དེའི་གཟུགས་ནི། མཚམས་འདས་ན་ཕམ་པར་འགྱུར་བའི་མཚམས་ཀྱི་གཟུགས་ནི་འདི་རྣམས་ལྟ་བུ་གང་ཡང་རུང་ངོ༌། །འཕགས་པ་དང༌། ས་སྐྲངས་
པ་ལྟ་བུའི་བང་རིམ་དང༌། གས་པ་དང༌། ས་གས་པའི་སེར་ཁ་དང༌། ཡི་གེ་དང༌། ཡི་གེའི་འབྲུ་ཚིག་ལས་གཅིག་གི་སྟེང་དུ་ཐལ་བ་དང༌། ཁ་དོག་དང་གཞན་དང༌། ཁ་དོག་སྣ་ཚོགས་སུ་འདུག་པ་ལས་གཅིག་ལས་ཁ་དོག་གཞན་གྱི་སྟེང་དུ་ཐལ་བ་དང༌། མཚམས་དང༌། ས་ཤིང་ལ་སོགས་པའི་སྲུབས་ལྟ་བུ་དང༌། རྣང་སྒལ་ལོ། །ཞིང་གི་རྣང་སྒལ་ལྟ་བུ་དང་འདི་རྣམས་གང་ཡང་རུང་སྟེ་བཤལ་བ་ལས་མཚམས་འདས་ན་ཕམ། སྲོག་ཆགས་ཀྱི་མུ་ནི་ཐ་དད་དཔེར་མངོན་ན་རྩིབ་མ་ལ་སོགས་པ་ལས་སོ། །ཕྱུགས་ལྟ་བུ་ལ་གོས་གཡོགས་སམ་བཀལ་བ་ལས་རྐུ་ན་བསྙིལ་ཏམ་བཤལ་ཏེ། ཕྱུགས་རིང་ན་རྩི་བ་མའམ་རུལ་བ་དག་གི་གཟུགས་མངོན་པར་སྣང་བ་གང་ཡང་རུང་འདས་ན་ཕམ། ཕྱུགས་ཚོན་པོ་རུས་པ་མི་མངོན་པ་ནི་ལུས་ལས་འདས་ཤིང་འཕགས་ན་ཕམ། གདིང་བ་བཏིང་བ་ཡང་གནས་བཞིན་ནོ། །ཕྱིང་པའམ་ཕྱར་བ་ལྟ་བུ་བཏིང་བའི་སྟེང་ནས་བཤལ་ཏེ་རྐུ་ན་ས་ལ་བཤལ་བའི་མཚམས་དང་འདྲ་བར་ཕྱར་བའི་སྲུབས་སམ་ཁ་དོག་ཐ་དད་པའི་མཚམས་འདས་ན་ཕམ། བཙུགས་པ་ཡང་བཞག་པ་བཞིན་ནོ། །སྐྱེ་ཤིང་ངམ་མདའ་འཕངས་པ་ལྟ་བུ་ས་ལ་ཟུག་པ་ཞིག་ལས་རྐུ་ན་ཕྱུང་སྟེ་ས་ལས་འཕགས་ན་ཕམ་མོ། །གྱོན་པ་ནི་ཕྲལ་ནའོ། །གོས་སམ་མགོ་རྒྱན་དང་གདུ་བུ་ལ་སོགས་པ་ལུས་ལ་ཐོགས་པ་ཞིག་ལས་རྐུ་ན་ལུས་ལས་ཕྲལ་ཏེ་འཕགས་ན་ཕམ། སོར་གདུབ་ལྟ་བུ་མཛུབ་མོའི་ཚིགས་འགའ་ཙམ་འདས་ནས་མི་ཕམ་གྱི་མཛུབ་མོ་ལས་འདས་ཏེ་འཕགས་ན་ཕམ། ཤོ་གམ་ནི་དེའི་ས་འདས་ནའོ། །ཤོ་གམ་གྱི་རྒྱུད་དུ་འགྲོ་སྟེ། བདག་གི་ནོར་ལས་ཤོ་གམ་པ་དབང་བར་འགྱུར་བ་ཞིག་མི་སྤྱིན་པར་བསམས་ཏེ་སོང་བ་ནི་ཤོ་གམ་གཅོད་པའི་སའམ་མཚམས་འདས་ན་ཕམ་མོ། །མི་ནི་དུས་བྱས་ཏེ་དེ་སྟེ་དེར་གྲུབ་ནའོ། །མི་རྐུ་བ་ནི་དུས་བྱས་ཏ་དུས་མལ་དུ་ཕྲད་ན་ཕམ། དུས་ལ་རྣམ་པ་གསུམ་སྟེ་གོས་འདི་འདྲ་བ་ཞིག་གྱོན་ནས་ཤོག་ཤིག་ཅེས་བྱ་བ་ལྟ་བུ་དང༌། ཉི་ཚོད་འདི་ཙམ་ན་ཤོག་ཤིག་བྱས་པ་དང༌། ཤིང་ངམ་རྡོ་འདིའི་དྲུང་དུ་ཤོག་ཤིག་ཅེས་བྱ་བ་ལྟ་བུ་གང་ཡང་རུང་ངོ༌། །བྱ་ནི་དེ་སྟེ་དེ་ལྟར་སྤུར་ནའོ། །བྱ་རྐུ་བ་ནི་རྐུ་བའི་ས་ལོགས་སུ་བསྐྲད་སྤུར་ན་འཕུར་ཏེ། འཕགས་མ་ཐག་ཏུ་ཕམ། རྐུ་བའི་གནས་
མ་ཡིན་པར་ལོགས་ཤིག་ཏུ་འཕུར་བ་ནི་སྦོམ་པོ། བྱོལ་སོང་བཏགས་པ་ལས་བཀྲོལ་ནའོ། །རི་དགས་རྙི་ལས་ཟིན་པའམ་ཕྱུགས་ཕུར་པ་ལ་བཏགས་པ་ལྟ་བུ་རྐུ་ན་མ་འཕགས་ཀྱང་བླ་སྟེ་བཀྲོལ་མ་ཐག་ཏུ་ཕམ་མོ། །ཁྱུ་ལས་སམ་བཟུང་བ་ནི་མི་སྣང་བར་གྱུར་ན་འོ། །ཕྱུགས་ཁྱུ་ལྟ་བུ་ལས་རྐུ་ན་བཅིངས་ཏེ་བཞག་ཀྱང་རུང་བཀར་ཏེ་དེད་ཀྱང་རུང་བཟུང་སྟེ་ཁྲིད་ཀྱང་ཕྱུགས་ཕལ་མི་སྣང་བར་གྱུར་ན་ཕམ་མོ། །སྔགས་ཀྱིས་བཀུག་པ་ནི་སྣང་ནའོ། །སྔགས་བྱས་ཏེ་རྐུ་བ་ནི་སྔགས་ཀྱི་མཐུས་ནོར་རང་འོང་བ་མིག་སྔར་སྣང་ཞིང་མཐོང་ན་ཕམ། ནོར་འོང་ངམ་མི་འོང་བྱ་ར་བས་བཙུགས་ཏེ་བྱ་ར་བས་མཐོང་ན། དགེ་སློང་གིས་མ་མཐོང་ཡང་ཕམ། ཕྱི་བཞིན་དུ་འགྲོ་བ་དང༌། སློབ་མ་ལྟ་བུ་ལ་མཁན་པོའི་རྫས་ཤིག་བསྐུར་ཏེ་ཕྱི་བཞིན་དུ་འབྲང་བ་ལས་རྐུ་བ་དང༌། སྐྱེལ་བ་ནི། ནོར་ཞིག་སྐྱེལ་དུ་བཏང་བ་ལས་རྐུ་བ་དང་འདི་རྣམ་གཉིས་ལྟར་རྐུ་ལ་འོག་ནས་མིང་གིས་བཤད་པ་ལྟར་བྱས་ན་ཕམ་པར་འགྱུར་ཏེ། བེན་ཏམ། རྐུ་བའི་ཚེ་བེན་ཏེ་འདུག་པ་དང༌། ལོག་གམ་ལམ་ལས་སླར་ལོག་སྟེ་སོང་བ་དང༌། གྱུ་འམ། ལམ་ནས་གཡས་གཡོས་སུ་གྱུ་འམ། ཞུགས་སམ། ནགས་སམ་ཁང་པ་ལྟ་བུར་ཞུགས་པ་དང༌། འཛེགས་ན་དེ་ཁྱེར་བ་སྔོན་བཞིན་ནོ། །ཤིང་ངམ་བྲག་ལྟ་བུ་ལ་འཛེགས་པ་དེ་རྣམས་གང་ལྟར་བྱས་ཀྱང་རུང་སྟེ། ཕྱུགས་ཁྱུ་ལས་བརྐུས་ན་མི་སྣང་ན་ཕམ་པ་བཞིན་དུ། འདི་ཡང་མི་སྣང་བར་གྱུར་ན་ཕམ། གྲུ་ནི་ཐང་དང་ཡུར་བ་དང་མཚེའུ་ལས་ཀྱང་ངོ༌། །གྲུ་རྐུ་བ་ནི་ཐང་ལ་ཁུར་དུ་ཁྱེར་བ་དང་ཡུར་བའི་ཆུ་ལས་དྲངས་པ་དང་མཚོ་ལས་ཀྱང་རུང་སྟེ་ཐོག་མའི་གནས་མི་སྣང་བར་གྱུར་ན་ཕམ་མོ། །རྒྱུན་གྱི་རྗེས་སུ་ཡང་ངོ༌། །ཆུ་འབབ་པའི་རྒྱུན་བཞིན་དུ་གྲུ་དྲངས་ཏེ་རྐུ་བ་ཡང་ཐོག་མ་འདུག་འདུག་པའི་གནས་མི་སྣང་བར་གྱུར་ན་ཕམ། ཐད་ཀར་ནི་འགྲམ་དག་མི་སྣང་ནའོ། །མཚོ་འམ་ཆུ་ཁ་ཚོན་ཆེན་པོ་ལྟ་བུ་ལ་གྲུ་ཐད་ཀར་དྲངས་ཏེ་རྐུ་ན་ཕ་རོལ་གྱི་འགྲམ་དུ་མ་ཕྱིན་ཀྱང་ཐོག་མ་འདུག་པའི་ས་མི་སྣང་ན་ཕམ། གཞན་ནི་དེར་ཕྱིན་ནའོ། །ཆུ་ཁ་ཚོན་ཆུང་དུ་ལས་གྲུ་དྲངས་ཏེ་རྐུ་ན་ཐོག་མ་འདུག་འདུག་པའི་གནས་སྣང་ཡང་ཕ་རོལ་དུ་ཕྱིན་ན་ཕམ། རྒྱུན་ལས་བཟློག་པ་ནི་ཚུགས་འདས་ནའོ། །གྲུ་ཆུ་འབབ་པའི་རྒྱུན་
ལས་སླར་བཟློག་སྟེ་གྱེན་དུ་དྲངས་ཏེ། རྐུ་ན་ག་ལས་འདོར་བའི་གྲུ་ཚུགས་འདས་པ་ན་ཕམ། གླགས་པ་མ་གཏོགས་ཏེ་བདག་གི་ལས་ཀྱི་མཐའ་གྲུབ་པར་འདོད་པ་དེའི་ཕྱིར། ཞིང་གི་ཆུ་རྐུ་བ་ནི་ལུད་དང་རྨོ་བརྐོ་དང་ཡུར་ཁུགས་ལྟ་བུ་བཟང་དུ་བྱས་ཏེ། ནས་བཟང་པོར་སྐྱེས་པ་ནི་མ་གཏོགས་པར་བདག་གི་ཞིང་གི་ལས་བཟང་དུ་བྱས་ཤིང་ནས་བཟང་དུ་སྐྱེས་པར་གྲུབ་པར་འདོད་པའི་ཕྱིར། གཞན་གྱི་ལས་ཀྱི་མཐར་ཆུང་དུ་བཏང་ངམ། གཞན་གྱི་ཞིང་གི་ལས་བྱས་པ་ལ་ཆར་པ་ཆེ་བའི་ཚེ་གཞན་གྱི་ཞིང་དེ་ལ་བདག་ཞིང་གི་ཆུ་བྱོ་སྟེ་བཏང༌། བགགས་ནའོ། །ཐན་པ་བྱུང་བའི་ཚེ་གཞན་གྱི་ཞིང་གི་ཆུ་བཅད་དེ་བདག་གི་ཞིང་ལ་བཏང་བས། སྟོན་ཆུ་དེའི་ཡོན་ཏན་གྱིས་བཟང་ངན་གྱི་ཁྱད་ཅིག་ཞུགས་ན་ཕམ་མོ། །ཤས་འཐོབ་པའི་ཕྱིར་རྐུན་པོ་ལ་རྒྱུས་བསྟན་ནའོ། །རྐུན་ཤས་འདོད་པའི་ཕྱིར་རྐུན་པོ་ལ་རྒྱུས་བསྟན་ན་སྦོམ་པོའོ་ཞེས་མདོ་ཚིག་ལྟག་ནས་འཆད་པ་ཡིན་མོང་འདི་ནི་ཤས་འདོད་པའི་ཕྱིར། རྐུན་པོ་ལ་རྒྱུས་བསྟན་ཏེ་རྐུན་པོས་ཤས་བྱིན་ཏེ་རིང་ཐང་ཚང་ན་ཕམ་མོ། །ས་དང་ཁྱིམ་ལ་མུ་འཁོར་དུ་བཅུག་ཅིང་བསྲེས་ནའོ། །ཞིང་ས་དང་ཁྱིམ་ས་ལྟ་བུ་རྐུ་ན་བདག་གི་ཞིང་དང་མུ་བསྲེས་ཏེ་ར་བའམ་འོབས་ལྟ་བུས་བསྐོར་ནས་ར་བ་འམ། འོབས་ལྟ་བུ་སྣ་ཕྲད་དེ་ས་དེ་ལ་རིན་ཐང་བརྩིས་ཏེ་ཚང་ནའང་ཕམ་མོ། །དེ་སྟེ་རྒྱལ་པོའི་འཁོར་དུ་ཤགས་བཀྱེ་སྟེ་རྒྱལ་ནའོ། །ཞིང་ས་དང་ཁྱིམ་ས་ལྟ་བུ་ལ་གཞན་ཞིག་དང་ས་མཚམས་ལ་མི་འདུམ་མམ། ངོ་ལྡོག་སྟེ་རྒྱལ་པོ་ལ་ཤགས་བཀྱེ་ནས། དགེ་སློང་མི་དབང་བ་ལས་རྒྱལ་པོས་དགེ་སློང་དབང་ངོ་ཞེས་བཅད་ན་ཕམ། དེ་བཞིན་དུ་ནོར་རྫས་གང་ཡང་རུང་ངོ༌། །དེ་སྟེ་ཡུལ་དཔོན་ལ་བརྩམས་པ་ལས་ཕ་རོལ་གྱིས་བཏང་ནའོ། །ཞིང་ས་དང་ཁྱིམ་ས་ལ་མཚམས་དང་མུའམ། ངོ་ལྡོག་པ་ཡུལ་དཔོན་ནམ་མི་དྲ་མ་ཞིག་ལ་ཞལ་ཆེ་བཀྱེ་བ་ལས། ཡུལ་དཔོན་ཡང་རུང་ཞལ་ཆེའི་ཟླ་ཡུལ་བདག་ཀྱང་རུང་སྟེ་དགེ་སློང་མི་དབང་མོད་ཀྱི་རྩོད་དཀས་ཀྱིས་ཐོང་ཞེས་བསམས་ནས་བཏང་ངམ། ཡུལ་དཔོན་གྱིས་ཐོང་ཞེས་ཟེར་བ་བཞིན་བཏང་ན་ཕམ་པར་འགྱུར། ནོར་རྫས་གཞན་ལ་རྩོད་པའང་དེ་དང་འདྲའོ། །དེ་ནི་སྦྱོར་བའོ། །ཞིང་ས་ལྟ་བུ་ངོ་ལྡོག་པ་ཡུལ་
དཔོན་ལྟ་བུས་དགེ་སློང་མི་དབང་བ་ལ་དབང་བར་བཅད་ནས་ཡུལ་དག་མ་རངས་ཏེ་མ་བཏང་ནས་ཞལ་ཆེ་སྤོས་ཏེ་བཀྱེ་ན་གྲངས་དུ་སྤོས་པ་བཞིན་དུ་སྦོམ་པོ་རེ་རེ། དགེ་སློང་མི་དབང་ལ་ཞལ་ཆེ་ཡང་ཡུལ་བདག་དབང་བ་བཅད་པ་ལས་དགེ་སློང་གིས་མ་བཏང་སྟེ་གྲངས་སྤོས་ཏེ་བཀྱེ་ན་གྲངས་དུ་སྤོས་པ་བཞིན་དུ་སྦོམ་པོ་རེ་རེའོ། །རྐུ་བའི་སེམས་མེད་ན་ཤོ་གམ་གྱི་རྒྱུད་དུ་ཉེས་པ་འབྱུང་བར་མ་དོགས་ཤིག །ཤོ་གམ་གྱི་རྒྱུད་ཡོད་པར་མི་ཤེས་ལ་རྐུ་སེམས་ཀྱང་མེད་ན་ཤོ་གམ་དུ་འགྱུར་བའི་རྫས་ཤོ་གམ་གྱིས་འདས་ཀྱང་ཉེས་མེད་དོ། །དགེ་སློང་རྒན་པོ་ཞིག་གིས། དགེ་སློང་གཞོན་ནུ་རྒྱུས་མི་ཤེས་པ་ཞིག་ལ་ཤོ་གམ་ལས་བཟླ་བའི་ཕྱིར་ཤོ་གམ་དུ་འགྱུར་བའི་ནོར་བརྐུས་ནས། ས་མཚམས་འདས་པ་དང་སླར་བླངས་ནས། དགེ་སློང་གཞོན་ནུ་ནོར་ཁྱེར་ཁྱེར་པ་དང་ཅི་ལྟར་མཚོར་གྱི་ཕམ་པར་གྱུར་སྙམ། ཐེ་ཚོམ་ཟོས་ནས་དེ་ཉེས་པར་མི་འགྱུར་རོ་ཞེས་བཅས། ནོར་གང་གིས་ཁྱེར་བ་དེས་སྦྱིན། དགེ་སློང་ལ་གཞན་གྱི་ནོར་ཤོ་གམ་དུ་འགྱུར་བ་ཞིག་བསྐུར་ཏེ་ཤོ་གམ་པའི་སར་འོངས་ནས་ཤོ་གམ་པ་ཅི་དབང་བ། དགེ་སློང་ཁྱེར་ཁྱེར་བ་དེ་སྦྱིན་ནོ། །བཏང་བ་ལས་གཞན་གྱི་བཟླས་ན་བརྐུས་པ་མ་ཡིན། དགེ་སློང་ལ་ཤོ་གམ་མ་བཅད་ཅིག་པར་གནང་སྟེ་བཏང་བ་ལས། དགེ་སློང་དེས་གཞན་གྱི་ནོར་ཞིག་ཁྱེར་ཏེ་ཤོ་གམ་པ་ཅི་དབང་བ་ནོར་བདག་སྦྱིན་པའི་ཕྱིར་མ་བྱིན་ན་སྦོམ་པོའོ། །བདག་བཀུར་བའི་ཕྱིར་མ་བྱིན་ན་ཕམ་པ་བདག་བཀུར་བའམ། ནོར་བདག་སྦྱིན་བ་གཉིས་ཀར་ཡང་མ་བསམས་ལ་ཤོ་གམ་པ་ཅི་དབང་བ་མ་བྱིན་ན་ཉེས་བྱས་འདི་ནི་མདོའི་ཊཱིཀ་ལས་འབྱུང༌། ཞལ་ནས་གསུངས་པ་ལས་ནི་གཞན་གྱི་ནོར་ཤོ་གམ་ལས་བཟླས་ཏེ་ཤོ་གམ་པ་ཅི་དབང་བ་མ་བྱིན་ན་ཕམ་མོ་ཞེས་འབྱུང་བར་ཟད། བཅས་པའི་གཞི་ནི་རྒྱལ་པོ་འབྱི་འབྱི་ས་རས། དགེ་སློང་ལ་ཤོ་གམ་མི་གཅད་པར་གནང་བ་ལས། དགེ་སློང་གཅིག་ཅིག་གིས་འདྲོན་པོ་གཞན་གྱི་ནོར་ཤོ་གམ་དུ་འགྱུར་བ་ཁྱེར་ཏེ་ཤོ་གམ་པ་དབང་བ་མ་ཡིན་པ་ལས་བཅས། མ་བཏང་ན་གཞན་ལས་མི་བཟླ། དགེ་སློང་གི་ནོར་ལ་ཤོ་གམ་མི་གཅད་པར་གནང་བ་མེད་པ་ལ་གཞན་དབང་ཆེན་པོའམ་ཁ་དྲག་པ་ལ་བདག་གི་ནོར་ཤོ་གམ་དུ་འགྱུར་བ་དེ་བསྐུར་ཏེ། ཤོ་གམ་པ་དབང་བམ་བྱིན་ཏེ་རིན་
ཐང་ཚང་ན་ཕམ། མ་ཚོར་བར་འདའ་བར་འགྱུར་བ་ནན་ཏན་མི་བྱ་བར་མི་བྱ། བདག་གི་སྣོད་ཀྱི་ནང་དུ་གཞན་གྱིས་ཤོ་གམ་དུ་འགྱུར་བའི་ནོར་བཅུག་ནས་མ་ཚོར་བར་ཤོ་གམ་ལས་འདས་པར་འགྱུར་བའི་ཕྱིར་སྔ་ནས་བསྲུང་ཞིང་ཚོར་བར་བྱ། ཚོང་པ་དང་དགེ་སློང་དག་ཅིག་འགྲོགས་པ་དང་ཚོང་པས་ཤོ་གམ་དུ་འགྱུར་བའི་རྫས། དགེ་སློང་གི་སྣོད་དུ་མ་ཚོར་བར་བཅུག་ནས་ཤོ་གམ་འདས་ཏེ་ཚོར་ནས་ཐེ་ཚོམ་ཟོས་པ་ལས་ཉེས་བྱས་གཞན་ནི་མེད་ཀྱི་ཕྱིན་ཆད་ཚོར་བར་བྱོས་ཤིག་ཅེས་བཅས། མ་ཚོར་ན་ཉེས་བྱས། སྲུང་མ་དགེ་སློང་དུ་མ་ཞོག་ཤིག། མདོ་ལྟག་མ་ལྟར་ཤོ་གམ་དུ་འགྱུར་བའི་ནོར་བདག་གི་སྣོད་དུ་གཞན་གྱིས་མི་བཅུག་པར་བྱ་བའི་ཕྱིར། བསོད་སྙོམས་སམ་གཅིག་ལ་འགྲོ་ན། དགེ་སློང་གཉིས་གསུམ་སྲུང་མར་ཞོག་ཤིག་མ་བཞག་ན་ཉེས་བྱས། དེ་དེའི་ཟས་སྤྱིས་སྦྱིན། སློང་མོ་ལ་དོང་པ་རྣམས་ཀྱིས་སྲུང་མར་བཞག་པའི་ཟས་སོ་སོ་ནས་འཐེབ་ལྷག་པར་བླངས་ལ་ཕྱིས་སྦྱིན། དེས་དགག །སྲུང་མར་གཞག་པ་རྣམས་ཀྱིས་ཀྱང་བདག་ཅག་གི་སྤྱོད་ཤོ་གམ་དུ་འགྱུར་བའི་རྫས་ཤིག་འཇུག་ན་མི་གཞུག་པར་དགག །བཅུག་ན་བསྙད་སྲུང་མ་རྣམས་ཀྱི་མཐུས་མ་ནུས་ཏེ་བདག་ཅག་གི་སྣོད་དུ་ནོར་ཞིག་བཅུག་ན། གྲོགས་ལ་བཅུག་གོ་ཞེས་བསྙད། མེད་ན་མཚན་གདབ། སྲུང་མ་གཞག་ཏུ་དགེ་སློང་གྲངས་ཀྱིས་མེད་ན་སྣོད་ཀྱི་ཁ་རྒྱ་འམ་མཚན་མ་བཏབ་སྟེ་སློང་དུ་འགྲོའོ། །མ་བཏབ་ན་ཉེས་བྱས། དྲིས་ཏེ་བླངས། བདག་གི་རྫས་ཚོང་པ་ལ་གཏམས་པ་ཞིག་སླར་ལེན་ན་ཤོ་གམ་དུ་འགྱུར་བའི་རྫས་མ་བཅུག་གམ་ཞེས་འདྲི་སྟེ་བླང༌། གཞན་གྱི་རྫས་ཤིག་བསྐུར་ནའང་ཤོ་གམ་དུ་འགྱུར་བ་མེད་དམ་ཞེས་དྲིས་ཏེ་བླང༌། མ་དྲིས་ན་ཉེས་བྱས། དབྱུང་བར་གཞན་མ་གྲུབ་ན་རེ་ཞིག །བདག་གི་རྫས་རྒྱ་འམ་མཚན་མ་བཏབ་པ་ཉམས་ལ་དྲིས་ཀྱང་ལན་མི་སྟེར་ཏེ། དགེ་སྤྱོང་མེད་ན་དབྱུང་བའི་ཕྱིར་སྣོད་ལ་རེག་པ་དང་གསེར་དངུལ་ལྟ་བུ་ཡོད་དེ། ལག་གིས་བཟུང་སྟེ་ཕྱུང་ཡང་ཉེས་མེད། ཆད་པར་བསྔོས་པ་ལས་མ་བྱིན་པའོ། །ཤོ་གམ་དུ་འགྱུར་བའི་ནོར་ཞིག་དཀོན་མཆོག་གསུམ་མམ་ཕ་མ་ལ་བསྔོས་པ་ཞིག་ནའང༌། ཤོ་གམ་པས་མ་གནང་ན་
ཤོ་གམ་པ་ཅི་དབང་བ་སྦྱིན་དགོས་སོ། །མ་བྱིན་ན་སྦོམ་པོ། གྲོགས་པོ་དང་ཁྱིམ་པ་ལྟ་བུ་ཞིག་ལ་བསྔོས་ཏེ་མ་བྱིན་ནའང་སྦོམ་པོ་ཤོ་གམ་པས་བཏང་བར་བྱས་པའི་ཕྱིར་ཐབས་འོག་ནས་བཤད། དེ་གཏོང་བའི་ཕྱིར་ཕ་མ་དག་གི་བསྔགས། ཤོ་གམ་དུ་འགྱུར་བའི་ནོར་ཕ་མ་དག་ལ་བསྔོས་པ་ལ་ཤོ་གམ་འདོད་ཅེས་ཟེར་ན་ཕ་མའི་དྲིན་ཆེ་བའི་ཡོན་ཏན་བསྔགས་ཏེ། ཁྱོད་ཀྱིས་བཏང་བའི་རིགས་སོ་ཞེས་བྱས་ལ་མ་བཏུབ་ན་ཅི་དབང་བ་སྦྱིན་དགོས། དཀོན་མཆོག་གི་ཡང་ངོ༌། །ཤོ་གམ་དུ་འགྱུར་བའི་ནོར་དཀོན་མཆོག་གསུམ་ལ་བསྔོས་པ་ཞིག་ལ་མ་བཏང་སྟེ་ཤོ་གམ་འདོད་ཅེས་ཟེར་ན། དཀོན་མཆོག་གསུམ་གྱི་ཡོན་ཏན་བསྔགས་ཏེ་སྡིག་ཆེ་བར་བཤད་ལ་ཤོ་གམ་བཅད་པའི་མི་རིགས་སོ་ཞེས་བྱས་ལ་མ་བཏང་ན་སྤྱིན་དགོས་སོ། །སྦྱིན་པ་ནི་གཞན་གྱི་ཕྱིར་གཅིག་ལས་བསྐྱི་བའི་ཆོས་ཀྱིས་སོ། །ཕ་མ་དང་དཀོན་མཆོག་གཉི་ག་ལ་སོ་སོར་བསྔོས་པ་ཞིག་ལས་ཤོ་གམ་སྦྱིན་དགོས་པར་གྱུར་ན་ཤོ་གམ་པ་ཅི་དབང་བ་ཕ་མ་འམ། དཀོན་མཆོག་གི་ནོར་གཅིག་ལས་བསྐྱི་བའི་ཆོས་སུ་བྱས་ཏེ་སྦྱིན་ནོ། །གོད་པའི་ཁ་ཡོ་ནི་ཕྱིས་བསྙམ་མོ། །ཤོ་གམ་དུ་འགྱུར་བ་དང་བཅས་ཏེ་ལམ་དུ་མི་འགྲོ། །བདག་གི་རྫས་ཤོ་གམ་དུ་འགྱུར་བ་ཞིག་ཁྱེར་ཏེ། མི་འགྲོ་ཤོ་གམ་དུ་འགྱུར་བ་ཁྱེར་ན་རྒྱང་གྲགས་རེ་རེ་ཤོ་གམ་དུ་མི་འགྱུར་ཞིང་ཉེས་མེད་པ་ནི་རས་ཀྱི་ཁ་གཉིས་ཁ་བཅད་པའམ། ཁ་དོག་བསྒྱུར་བ་ལས་ཡོ་བྱད་དུ་གཏོགས་པ་ལུས་གང་ཉི་ཚེ་ཁྱེར་ཏེ་སོང་བ་ནི་ཉེས་མེད། བསྒྱུར་བ་ནི་དེར་མི་འགྱུར་ཏེ་ལྕི་བ་ནི་བཙིར་བས་ཀྱང་ངོ༌། །དགེ་སློང་གི་ཡོ་བྱད་དུ་གོས་ཁ་དོག་བསྒྱུར་བ་ཤོ་གམ་དུ་མི་འགྱུར་བ་ནི་ལྕི་བ་བཙིར་ཏེ་བཙོས་པ་ཡན་ཆད་དུ་ཁ་དོག་བསྒྱུར་བ་ནི་ཤོ་གམ་མི་གཅོད་དེ་བཙོང་བ་ལྟ་བུའི་ནོར་ཁ་དོག་བསྒྱུར་ཏེ་མང་དུ་ཁྱེར་བ་ནི་ཤོ་གམ་དུ་འགྱུར་རོ། །ཁ་ཚར་བཅད་ན་ཡང་ངོ༌། །རས་ལྟ་བུ་བདག་གི་ཡོ་བྱད་དུ་བྱ་བའི་ཕྱིར་ཡ་ཏོག་མ་ཏོག་གཉིས་ཀའི་ཁ་ཚར་བཅད་པ་ཡང་ཤོ་གམ་དུ་མི་འགྱུར། བཙོང་པའི་ཟོང་ལྟ་བུ་མང་དུ་ཁྱེར་བ་ནི་ཤོ་གམ་དུ་འགྱུར། མ་མཐོང་ན་དེ་ལ་ཡིད་མ་བརྟན་ཅིག །དགེ་སློང་ཤོ་གམ་གྱི་རྒྱུད་དུ་འགྲོ་བ་ཞིག་གིས། དགེ་སློང་གྲོགས་གཅིག་ལ་རས་འདི་ཁ་ཚར་ཆོད་ལ་ཁ་དོག་
བསྒྱུར་ཏེ་རྫོགས་ཤིག་པར་གཏམས་པ་ལས། དགེ་སྦྱོང་དེས་ལེ་ལོ་བྱས་ཏེ་ཁ་ཚར་ཀྱང་མ་བཅད། ཁ་དོག་ཀྱང་མ་བསྒྱུར་བར་སྣོད་དུ་བཅུག་ནས། དགེ་སློང་ནོར་བདག་གི་ཡིད་ལ་བཙོས་གྲངས་སྙམ་སྟེ། ཤོ་གམ་བས་བཙལ་བ་དང་མ་བཙོས་པར་གྱུར་ནས་ཕྱིན་ཆད་མ་མཐོང་བ་ལ་ཡིད་མ་བརྟན་ཅིག་པར་བཅས་ཏེ་བདག་གི་སྣོད་ན་ཤོ་གམ་དུ་འགྱུར་བ་ཡོད་དམ་མེད་མ་བལྟས་ན་ཉེས་བྱས། གཞན་གྱི་འཚོ་བ་མི་གཅད། ཤོ་གམ་པ་ཤོ་གམ་གྱིས་འཚོ་བ་ལ་ཤོ་གམ་མི་སྦྱིན་པའི་ཕྱིར་འདྲོན་པོ་བཀག་པའམ་ལམ་བསྒྱུར་ཏེ་མི་དགྱེ། དེ་བཞིན་དུ་རྔོན་པའམ་ཉ་བའམ་ཆང་འཚོང་བ་ལ་སོགས་པས་འཚོ་བ་ལ་ནན་ཏུར་རམ་མཐུས་འདི་ལྟར་མ་སྤྱོད་ཅེས་མི་དགག་དགག་ན་ཉེས་བྱས། མ་བརྟན་པ་ལ་བརྟན་པར་མི་བྱ། དགེ་སློང་གཅིག་ལ་ལྷུང་བཟེད་ཆེ་ཆུང་གཉིས་ཤིག་ཡོད་པ་ལས། དགེ་སློང་དེ་གུད་དུ་སོང་བའི་འོག་ཏུ་དགེ་སློང་གཅིག་གིས་ལྷུང་བཟེད་ཆུང་དུ་དེ་བདག་གི་ལྷུང་བཟེད་ཀྱི་ནང་དུ་ཤོང་ན་ཉོ་ཞེས་བཅུག་སྟེ་སོང་བའི་ཕྱིར་བཅུག་པ་དང་ལྷུང་བཟེད་བདག་པོས་མཐོང་ནས་བརྐུས་སོ་ཞེས་བརྟན་པ་ལས་བཅས་ཏེ་ཡིད་མ་བརྟན་པའི་དགེ་སློང་དང་ཁྱིམ་པའི་རྫས་ལ་ལག་མི་གཞུག་ཐུག་ཐུབ་ཏུའང་མི་སྤྱད་སྤྱད་ན་ཉེས་བྱས་སོ། །དེར་འགྱུར་བ་ནི་འོག་མའི་བླ་མ་དག་ལའོ། །གྲོགས་པོ་ཡིད་བརྟན་པར་ཆུད་པ་ནི་མཛའ་བོ་ཆེ་ཆུང་རྣམ་གསུམ་སྟེ་མཛའ་བོ་ཆེན་པོའི་གསང་བའི་ཚིག་འབྲིང་པོ་ལ་མི་བྱ་ཆུང་ངུའི་ཚིག་ཆེན་པོ་ལ་བྱ། འབྲིང་པོའི་ཚིག་ཆེན་པོ་ལ་བྱ་འབྲིང་པོའི་ཚིག་ཆུང་ངུ་ལ་མི་བྱ་དེ་ལྟར་བྱས་ན་ཉེས་བྱས་སོ། །མཛའ་བོ། མཛའ་པོ་ནི་འདི་རྣམས་ཏེ་གྲོས་མཐུན་པ་དང༌། ཡིད་མཐུན་པ། ཚིག་གསང་བ་སྤོབས་ཤིང་མྱ་ངན་ལངས་པ་ལ་མཐོང༌། མྱ་ངན་མེད་པར་ནུས་པ་དང༌། བླ་མ་དྲན་པ། མཁན་པོ་སློབ་དཔོན་དང་སྡུག་པའི་ཕྱིར་རྟག་ཏུ་དྲན་པ་དང༌། མཆོད་པ། མཛའ་པའི་ཕྱིར་ཁ་ཟས་དང་གོས་ལ་སོགས་པས་མཆོད་ཅིང་འདུལ་བ་དང༌། བསྔགས་པ་སྟེ། མཛའ་བའི་ཕྱིར་གཅིག་ལ་གཅིག་ཡོན་ཏན་བསྔགས་ཤིང་བསྟོད་པ་དང༌། བླངས་ན་དགའ་བའོ། །མཛའ་བའི་ཕྱིར་རྫས་ལ་སོགས་པ་ཐུག་ཐུབ་ཏུ་སྤྱད་ན་དགའ་བ་དང་མཛའ་བོ་འདི་རྣམས་ལ་གང་
ཡང་རུང་གཅིག་ལ་རབ་འབྲིང་རྣམ་གསུམ་དུ་ཕྱེ་སྟེ། མདོ་གོང་མ་བཞིན་དུ་མཛའ་བོ་ཆུང་ངུ་ལ་ཆེན་པོའི་ཚིག་མི་བྱ་བ་ལྟ་བུའོ། །ལས་ཀྱི་ལག་པོད་དུས་གྱིས་ཤིག །དགེ་སློང་གཅིག་ཅིག་ལ་ལྷུང་བཟེད་ཆུང་དུ་ཞིག་བདོག་པ་ལས་དགེ་འདུན་གྱིས་ལས་ཤིག་ཏུ་བསྐོས་པ་དང༌། མ་ནུས་ཏེ་གྲོགས་གཅིག་ལ་བཅོལ་བ་དང་གྲོགས་དེ་ལྷུང་བཟེད་བདོག་པ་དེ་གླར་བླངས་ནས་ལས་བྱས་པ་ལས་བཅས་ཏེ། གྲོགས་ཀྱིས་ལས་བཅོལ་བ་ལས་གླ་བླངས་ན་ཉེས་བྱས་ཏེ། ཕས་བཅོལ་ན་ཡང་ལས་དེ་ལག་པོད་དུ་བྱ། བསོད་ནམས་ཀྱི་བློས་ཀྱང་ངོ༌། །དགེ་སློང་ལས་མི་ནུས་པ་ཞིག་གིས་བྱེད་པར་བཅོལ་ན་སྙིང་རྗེ་ཞིང་ལས་མི་ནུས་པ་ལ། བསོད་ནམས་སུ་འགྱུར་བར་བསམས་ཏེ་བཅོལ་བ་ཅི་ནུས་སུ་བྱ། གླས་མ་ཡིན་ནོ། །དགེ་སློང་རྒན་པོ་ལས་མི་ནུས་པའམ་གྲོགས་གཞན་ཞིག་གིས་ལས་བཅོལ་ནའང༌། མདོ་ལྟག་མ་གཉིས་ལྟར་བསོད་ནམས་ཀྱི་བློ་དང་ལག་པོད་དུ་བྱའི་ལྷུང་བཟེད་ལྟར་གླ་མི་བླང་ངོ༌། །ཡུལ་སྐད་ཀྱིས་ནི་མི་བསླུའོ། །དགེ་སློང་མ་སྐད་མི་མཐུན་པ་གཉིས་ཤིག །སྔ་ཕྱིར་དོང་བ་ལས་སྔར་སོང་བའི་ཆོས་གོས་ལྷུང་སྟེ། ཕྱི་མས་བདག་གི་སྐད་དུ་བོས་ཏེ་བརྡ་མ་ཕྲད་ནས་བླངས་ཏེ་ཁྱེར་ཁྱེར་བ་ལས་ཆོས་གོས་བདག་མོས་བརྐུས་སོ་ཞེས་བརྡ་བ་ལས་བརྡ་མི་ཕྲོད་པ་ཉེས་མེད་དོ་ཞེས་བཅས། ལྟུང་བ་བླངས་ན་རིང་དུ་མི་བཅང༌། མདོ་ལྟག་མ་ལྟར་ཆོས་གོས་ལྟུང་པ་ལྟ་བུ་བླངས་ཏེ་ཁྱེར་ཁྱེར་བ་རིང་དུ་མི་གཞག་པར་བདག་པོ་ལ་སྦྱིན་ནོ། །རིང་དུ་བཞག་ན་ཉེས་བྱས། གཙུག་ལག་ཁང་སྐྱོང་ལ་གཏད། ནོར་རྫས་ལྟུང་བ་ཞིག་རྙེད་དེ་བླངས་ན་གཙུག་ལག་ཁང་སྐྱོང་ལ་གཏད་དེ་སུའི་ཡིན་པ་རྨེད་དུ་གཞུག །རབ་ཏུ་བྱུང་བའི་ངོ་ཤེས་ན་དགེ་འདུན་ལ་བསྟན། ནོར་རྫས་རྙེད་པ་དེ་དགེ་སློང་གི་རྫས་ཤིག་ཡིན་པར་ཤེས་ན་གཙུག་ལག་ཁང་སྐྱོང་གི་དགེ་འདུན་ལ་བསྟན་ཏེ་བདག་པོ་ཡོད་ན་སྦྱིན་ནོ། །བདག་པོ་མ་དམིགས་ན་རྒྱུ་ཐག་ལ་གདགས། ནོར་རྫས་རྙེད་པ་དེ་བདག་པོ་ཁུངས་མ་ཕྱིན་ཏེ་གང་ཡིན་གཏོལ་མེད་ན་གཙུག་ལག་ཁང་དུ་རྒྱུ་ཐག་བྲེས་ཏེ། དེ་ལ་བཏགས་ལ་གཞག །ནད་པས་མ་བསྒོ་བར་སྨན་མི་བླངས་དགེ་སློང་མ་ནད་པ་ཞིག་ལ་ཡོན་བདག་དང་བ་ཞིག་ཡོད་དེ་ནད་པས་མ་བསྒོ་བར་ནད་གཡོག་གིས་ཡོན་བདག་ཡུངས་
མར་ཐུག་ཐུབ་ཏུ་ནད་པའི་ཕྱིར་བླངས་པ་ལས་བཅས་ཏེ། ནད་བས་མ་བསྒོ་བར་ནད་གཡོག་གིས་བླངས་ན་ཉེས་བྱས། མ་བྱིན་པར་ལེན་པའི་ཕས་ཕམ་པ་སྟེ་རྣམ་པར་འབྱེད་པའོ། །མ་བྱིན་པར་ལེན་པའི་ཕས་ཕམ་པ། འདུལ་བ་རྣམ་པར་འབྱེད་པའི་མདོ།། །། བདག་པོ་དང་བཅས་པས་གནང་བ་ལས་བརྟག་པ་གཞན་དུ་བདག་གིར་མི་བྱ། ཚོང་པས་ཤིང་རྟ་ཆག་སྟེ་བལ་བོར་བ་ལ་དྲུག་སྡེས་ལྷར་བརྗེད་ནས་ཡུལ་མི་ཀུན་གྱིས་ཀྱང་ནོར་རྫས་ལ་སོགས་པས་མཆོད་པའི་ཕྱིར་ཕུལ་བ་ལས་དྲུག་སྡེས། ངེད་ཀྱི་ལྷའི་ནོར་ཡིན་གྱིས་བསྐུར་རོ་ཞེས་བྱས་ཏེ། །ཁྱེར་བ་ལས་བཅས་ཏེ་ནོར་བདག་གི་འམ་ལྷ་མ་སྲིན་གྱི་ཁྱེར་ཅིག་པར་བསྒོ་བ་མ་གཏོགས་པར། ལྷ་མ་སྲིན་གྱི་ནོར་བདག་པོ་མིས་བསྲུངས་པ་ལས་བླངས་ན་ཕམ། ཚོར་བ་ཡོད་པའི་ལྷ་མ་སྲིན་གྱི་ནོར་ལས་བླང་ན་སྦོམ་པོ། ཚོར་བ་མེད་པའི་ལྷ་མ་སྲིན་ལས་ནོར་བླངས་ན་ཉེས་བྱས་སོ།། བདག་གིར་བྱས་པ་ལས་མི་དབྲོག །བདག་གི་རྫས་རྐུན་པོས་ཁྱེར་བ་ཁོས་སླར་མ་བྱིན་པར་མི་དབྲོག །བརྐུས་ཏེ་ཁྱེར་བ་ལས་མཐོང་ཡང་རུང༌། བརྐུས་ཏེ་ཁྱེར་ལ་ངོས་ཟིན་ཀྱང་རུང་སྟེ། ཁོས་མ་བྱིན་པར་མ་བསྐུར་བར་ཞོག་ཅེས་བྱས་སམ་སླར་བླངས་ན་ཉེས་བྱས། དེ་ལ་ཆོས་བཤད་དེ་བསླངས་ན། བདག་གི་རྫས་རྐུན་པོས་ཁྱེར་བ་ལས་ཁོའི་ལག་ན་འདུག་ན་བརྐུས་པའི་སྡིག་ཏུ་འགྱུར་བ་དང༌། སླར་བྱིན་ནས་བསོད་ནམས་ཆེ་བར་བཤད་དེ་བསླང༌། རིན་ཕྱེད་ཙམ་གྱིས་ཀྱང་ངོ༌། །མདོ་ལྟག་མ་ལྟར་བྱས་ཏེ་མ་སྟེར་ན་ཅི་རི་བའི་རིན་ཕྱེད་ཙམ་གྱིས་ཀྱང་བསླུའོ། །ལྷུང་བཟེད་དང་ཆོས་གོས་ནི་རིན་ཚང་བས་ཀྱང་བླང་ངོ༌། །ལྷུང་བཟེད་དང་ཆོས་གོས་ལྟ་བུ་རྐུན་པོས་ཁྱེར་ཏེ་ཆོས་བཤད་ཀྱང་སླར་མི་སྟེར་ན་ཅི་རི་བའི་རིན་ཚང་བས་ཀྱང་སླར་བླུའོ། །རིན་ཚང་བས་སླར་བླུ་དགོས་པ་ནི་བདག་ལ་མཁོ་ཞིང་ཉེས་པ་མི་འབྱུང་བའི་ཕྱིར་རོ། །མི་སྡུག་པར་འགྱུར་བར་དོགས་པ་བོར་བའོ་ཞེས་འགྲོ་བ་མང་པོས་མ་མཐོང་བར་མི་བླང༌། ཕག་དང་བུ་རམ་ཤིང་རྐུན་པོས་ཁྱེར་བའི་ལྷག་རོལ་ལ་དྲུག་སྡེས་བླངས་ནས་ཁྱེར་བ་དང༌། ནོར་བདག་གིས་ཟིན་ཏེ་ཡུལ་མི་མ་དགའ་བ་ལས་བཅས་ཏེ་ལྷག་རོལ་དེ་ལྟ་བུ་ཞིག་བླངས་ནའང༌། མི་གཞན་གྱིས་མཐོང་ཞིང་ཤེས་པར་བྱས་
ཏེ་མ་བརྐུས་པར་དབང་དག་གིས་ཤེས་པར་བླངས། མང་པོས་མ་མཐོང་བར་བླངས་ན་ཉེས་བྱས་སུ་འགྱུར་རོ། །མི་མ་ཡིན་པས་བསྔོས་བ་རོའི་རྫས་ཀྱང་བདག་པོ་མེད་པ་མ་ཡིན་ནོ། །མི་ཞིག་ལ་བ་ལ་ཆགས་ཤིང་འདུག་པ་ལས་ཤི་སྟེ་ལ་བའི་བདག་པོར་སྐྱེས་པ་ལས་དྲུག་སྡེས་རོ་ལས་ལ་བ་བླངས་ཏེ་ཁྱེར་བ་དང་འདྲེ་དེས་ཕྱི་བཞིན་དུ་འབྲངས་ཏེ། དྲུག་སྡེས་ནི་རྒྱལ་པོའི་ཁབ་ཏུ་སོང་འདྲེ་སྒོ་ལས་མ་ཆུད་དེ་བོས་པ་དང༌། སངས་རྒྱས་ཀྱིས་ཨ་ནན་ལ་བཀའ་སྩལ་ཏེ། ལ་བ་བྱིན་ཅིག་པར་གཏད་ནས་འདྲེའི་ཕྱི་བཞིན་དུ་སྐྱེལ་བར་བཏང་བ་ལས་བཅས་ཏེ། རོའི་རྫིས་འདྲེ་གནས་པ་ལས་མི་བླང༌། བླངས་ན་ཉེས་བྱས། རབ་ཏུ་གཏུམ་པ་དེའི་ཕྱི་བཞིན་དུ་འགྲོའོ། །འདྲེས་ལ་བ་ཁྱེར་མི་ནུས་པའི་ཕྱིར་ནན་ཏན་སྐྱེལ་དུ་བཏང་སྟེ་འདྲེའི་སྔོན་དུ་སོང་ན་ཀྱལ་ཀ་བྱེད་པའི་ཕྱིར་ཕྱི་བཞིན་དུ་འབྲང་ཞིང་འགྲོའོ། །ཁས་ཕུབ་ཏུ་ཉལ་ལ་རྐང་བ་ནས་སྟེང་དུ་གཡོགས་པ་ཡང་ངོ༌། །འདྲེ་དེའི་འདུག་པའི་གནས་སུ་ཕྱིན་ན་འདྲེ་མཆིལ་མས་འཐོར་ལག་པས་འཇོ་རྐང་པ་ཕྲ་བའི་ཕྱིར། ཁས་ཕུབ་ཏུ་བསྙལ་ལ་ལ་བས་རྐང་བ་ནས་གཡོགས་དེ་ལྟར་མ་བྱས་ན་ཉེས་བྱས། མ་སྨས་པ་ལས་མི་བླང༌། རོ་ལ་རྨ་མ་བྱུང་ངམ་མ་སྨས་ན་རོ་ལངས་ཀྱི་འདྲེ་ཡོད་པའི་ཕྱིར་རྫས་མི་བླང༌། མ་སྨས་པ་ལས་རྫས་བླངས་ན་ཉེས་བྱས། རང་གིས་དབུག་པའམ། དབུག་ཏུ་གཞུག་པར་མི་བྱ། རོའི་རྫས་བླང་བའི་ཕྱིར་རོ་མ་སྨས་པ་ལ་བདག་གིས་རྨ་དབྱུང་བའམ། གཞན་རྨ་དབྱུང་དུ་མི་གཞུག །རྨ་ཕྱུང་ངམ་འབྱིན་དུ་བཅུག་ན་ཉེས་བྱས། ངལ་བསོས་པ་ཉིད་སོ་ཤིང་དང་ཆུ་དང༌། གོ་འདུན་དང་ལྕི་བ་དང་ས་དག་ཅི་བདེར་བྱའོ། །དགེ་སློང་ཞིག་ག་ཞིག་ནས་འོངས་ཏེ་གྲོགས་པོ་སྔ་ན་འདུག་པ་ན་རེ། ངལ་སོས་ཤིག་ཅེས་ཟེར་ན་རྣམ་པ་འདི་ལྔ་སྤྱོད་ཅིག་མ་བསྒོ་ཡང་ངལ་སོས་ཤིག་ཅེས་བྱས་པའི་ཚིག་རྐྱེན་གྱིས་ཅི་བདེར་སྤྱོད་ཅིག་པའི་ནང་དུ་ཆུད་དེ། མ་བླངས་མ་ཞུགས་པར་སྤྱོད་ཀྱང་ཉེས་མེད་དོ། །གཉེན་གྱིས་མི་འདོད་བཞིན་དུ་དགེ་སློང་ངམ་དགེ་སྦྱོང་འཕྲོག་ན་བཟུང༌། རབ་ཏུ་འབྱུང་བའམ་བསྙེན་པར་རྫོགས་པ་ཞིག་ལས། ཕུ་ནུ་གཉེན་བཤེས་ཀྱིས་མི་སྟེར་ཏེ། འཕྲོག་ཏུ་འོངས་ན་དགེ་སློང་གིས་ལག་པ་ཡ་གཅིག་ནས་བཟུང༌། འཕྲོག་
ཏུ་འོངས་པས་ལག་པ་ཡ་གཅིག་བཟུང་སྟེ་དྲངས་ན་དགེ་སློང་གིས་གཟུང་བའི་ལག་པ་ན་ཞེས་ཟེར་ན་བཏང༌། འཕྲོག་པས་བཟུང་བའི་ལག་པ་ན་ཞེས་ཟེར་ན་མི་གཏད། མ་བྱིན་པར་ལེན་པའི་ཕས་ཕམ་པའི་ཕྲན་ཚེགས་སུ་གཏོགས་པའོ། །མ་བྱིན་པར་ལེན་པའི་ཕས་ཕམ་པ་སྟེ། འདུལ་བའི་སྡེ་ཕྲན་ཚེགས་ཀྱི་ནང་ནས་འབྱུང་བའི་མདོ།། །།ཀ་ཀ་ནི་བཞི་ལ་མ་ཤ་ཀའོ། །དངུལ་ཞོའི་བརྒྱད་ཆའི་ཐང་དུ་བརྩི་བ་ནི་དངུལ་སྲང་གཅིག་ལ་གེ་དེར་ལྔ། གེ་དེར་གཅིག་ལ་ཀའུ་ནི་བཞི། ཀའུ་ནི་གཅིག་ལ་པ་ཎ་བཅུ་དྲུག །པ་ཎ་གཅིག་ལ་འགྲོན་བུ་བརྒྱད་ཅུ། འགྲོན་བུ་ཉེ་ཤུ་ལ། ཀ་ཀ་ནི་གཅིག །ཀ་ཀ་ནི་བཅུ་དྲུག་ལ། འགྲོན་བུ་སུམ་བརྒྱ་ཉི་ཤུ་སྟེ། དངུལ་ཞོའི་བརྒྱད་ཆ་གཅིག་ཡོད་དོ། །འདི་ལྟར་བརྩིས་ན་འགྲོན་བུ་དངུལ་ཞོ་བརྒྱད་ཆས་ཕམ། ལྔ་ནི་གཏན་པར་ཏེ་ཀཱར་ཥཱ་པ་ཎའི་བཞི་ཆས་སོ། །སངས་རྒྱས་བཞུགས་པའི་ཚེ་ནི་ཀཱ་ར་ཥཱ་པ་ཎ་བཞི་ཆ་གཅིག་ལ་མ་ཤ་ཀ་ལྔ་ཡོད་དེ། དེ་ལ་བརྩིས་ན་དངུལ་ཞོའི་བརྒྱད་ཆ་གཅིག་ཡོད་དེ་དེས་ཕམ་དེང་སང་ནི་མ་ཤ་ཀ་བཞི་ལ་དངུལ་ཞོའི་བརྒྱད་ཆ་གཅིག་སྟེ། མ་ཤ་ཀ་བཞིས་ཕམ་པར་འགྱུར། གང་ན་དེ་ལ་མ་ཤ་ཀ་ཉི་ཤུ་པ་དེ་ལ་གནས་པ་བ་ཎའོ། །སངས་རྒྱས་བཞུགས་པའི་ཚེ་མ་ཤ་ཀ་ཉི་ཤུ་ལ། ཀཱར་ཥཱ་པ་ཎ་གཅིག་ཏུ་བརྩི་བའི་ཚེ། མ་ཤ་ཀ་ལྔས་ཕམ་མོ་ཞེས་ཆད་བཙུགས་པ་བཞིན་དུ་དེང་སང་ཡུལ་གང་ནའང་རུང་སྟེ། སྔོན་བཞིན་དུ་མ་བྲི་བ་ཞིག་ཡོད་ན་ཡང་དེ་བཞིན་དུ་བརྩིའོ། །རྐུ་བའི་ཚེ་གནས་དང་དུས་སུ་བརྩི་ཞིང་བཅའ། དགེ་སློང་གིས་རྐུན་པོ་ཞིག་བྱས་ན་གནས་ག་ལ་འདུག་པའི་ཡུལ་ཐང་དང༌། དབྱར་དགུན་སྟོན་དཔྱིད་ཀྱི་དུས་ན། པ་ཎའི་རིན་ཆེ་ཆུང་ཅིར་གྱུར་པ་བཞིན་དུ་རིན་ཐང་བརྩིའོ། །ལྟག་ནས་མདོ་འདི་དང་འདྲ་བ་ཞིག་འབྱུང་བ་དང་གཉིས་ལ་ལྟག་མ་ནི་ནས་འབྲས་ལྟ་བུ་གནས་དང་དུས་སུ་བརྩི་བ་ལ་བྱ། འདི་ནི་པ་ཎ་ཉིད་གནས་དང་དུས་སུ་བརྩི་བ་ལ་བྱ། མཆོག་གི་མཐར་གྱུར་པ་རིན་གཅོད་མི་ནུས་བ་ཆེན་པོ་ཡང་ངོ༌། །ནོར་རིན་པོ་ཆེ་རིན་མི་ཆོད་པ་ཞིག་བརྐུས་ན་ཡང་ཕམ་པར་མི་འགྱུར་བ་མ་ཡིན་ཏེ་སྲང་གྲངས་མང་ཞེས་ཕམ་པའི་གྲངས་མང་བ་མ་ཡིན་ཏེ་ཕམ་པ་ནི་གཅིག །དེ་ཆུང་དུ་ཡང་འཁྱམས་
པ་ལ་ཡིན་གྱི་ནང་དུ་ཆུད་དོ། །རིན་ཐང་མ་ཚང་བ་ཏིལ་གྱི་འབྲུམ་བུ་ཡན་ཆད་བརྐུས་ཀྱང་ཉེས་པར་མི་འགྱུར་བ་ལ་ཡིན་གྱི་སྦོམ་པོར་འགྱུར་རོ། །སངས་རྒྱས་ཀྱི་རིང་བསྲེལ་གདབ་ཏུ་མེད་པའི་རིན་པོ་ཆེ་དེའོ། །སངས་རྒྱས་ཀྱི་རིང་བསྲེལ་ཡང་རིན་ཐང་གདབ་ཏུ་མེད་པར་ཆེ་སྟེ། བརྐུས་ན་ནོར་བུ་རིན་པོ་ཆེ་རིན་གདབ་ཏུ་མེད་པ་བརྐུས་པ་དང་འདྲ་སྟེ་ཕམ་པར་འགྱུར། མཆོད་པའི་ཕྱིར་ན་ཉེས་བྱས་པའོ། །རྐུ་སེམས་མེད་པར་སངས་རྒྱས་ཀྱི་རིང་བསྲེལ་མཆོད་པའི་ཕྱིར་ཁྱེར་ན་ཉེས་བྱས། རྐུ་སེམས་ཀྱིས་ཁྱེར་ན་ཕམ། བྲིས་པ་ནི་ཉེས་མེད་དོ། །ལྷའི་ཡི་གེ་དཔེ་བརྙར་མི་སྟེར་བ་ཐུག་ཐུབ་ཏུ་བླངས་ཏེ་དཔེ་འདྲིས་ཏེ་སླར་བསྐྱལ་བ་ནི་ཉེས་མེད་དོ། །ལྷའི་ཡི་གེར་རྐུ་སེམས་ཀྱིས་ཐལ་བྱུང་ཁྱེར་ན་ཕམ། ཆུད་གསན་ནས་རྐུ་ན་དེའི་ཚེ་རྐུ་བའི་དངོས་པོ། ནོར་ཕྲལ་ལ་བཅོམ་དྲལ་ཏེ་བརྐུས་ན་བཅོམ་ཟིན་པ་ལ་ཅི་རི་བའི་རིན་ཐང་གི་ཐང་དུ་བརྩི། མདོ་འདི་ཡན་ཆད་ནི་ནོར་གྱི་དངོས་པོ་ལས་ཕམ་པར་འགྱུར་རམ་མི་འགྱུར་བ་འཆད་པའོ། །བདག་པོ་མེད་པ་ནི་བྱང་གི་སྒྲ་མི་སྙན་གྱིའོ། །བྱང་གི་སྒྲ་མི་སྙན་གྱི་ནོར་ལྟ་བུ་ནི་བདག་གི་ཡིན་པར་སེམས་པ་མེད་པའི་ཕྱིར་བདག་པོ་མེད་པའི་ནོར་དང་འདྲ་སྟེ་ཅི་བདེར་སྤྱད་དུ་རུང་ངོ༌། །རྐུ་སེམས་ཀྱིས་སྤྱད་ན་སྦོམ་པོའོ། །དེ་ནི་བདག་གི་བཞིན་ནོ། །བྱང་གི་སྒྲ་མི་སྙན་གྱི་ནོར་ནི་བདག་གི་ནོར་བརྐུས་ན་སྦོམ་པོར་འགྱུར་བ་བཞིན་དུ་རྐུ་སེམས་ཀྱིས་བླངས་ན་སྦོམ་པོ། དེའི་ཚེ་བདག་ཉིད་བདག་པོའོ། །དགེ་སློང་གཅིག་ཅིག་ལྷུང་བཟེད་ལ་ཆགས་ཏེ་ཤི་བ་དང་ལྷུང་བཟེད་དེའི་ནང་དུ་སྤྲུལ་དུ་སྐྱེས་སོ། །ལྷུང་བཟེད་དེ་ལྟ་བུ་ཞིག་བརྐུས་ན་སྔོན་གྱི་དགེ་སློང་གི་ནོར་དུ་མི་བརྩིའི་སྦྲུལ་གྱི་ཡིན་པར་བརྩིའོ། །ལྷ་བཞིན་དུ་མྱ་ངན་ལས་འདས་པའོ། །ཤཱ་རིའི་བུ་དང༌། མཽད་གལ་གྱི་ཅི་ཏིའི་གདུགས་དང་རྒྱན་ལ་སོགས་པ་ཕུལ་བ་ནི་བརྐུས་མ་སྦོམ་པོའོ། །ནོར་རྫས་ལྟ་བུ་ཕུལ་བ་བརྐུས་ན་དགེ་འདུན་དབང་བས་ཕམ། འདི་ཡན་ཆད་ནི་ནོར་གྱི་བདག་པོ་ལས་ཕམ་མི་ཕམ་འཆད་པ། གནང་སྟེ་བཏང་བའོ་ཞེས་བཅད་ན་སྦྱོར་བ་བཞིན། གོས་ལ་སོགས་པ་སྐད་ཅིག་བརྙས་པ་ལས་ཡུན་རིང་དུ་སྤྱད་དེ་ཟད་དམ་དེངས་པར་བྱས་ན་སྦོམ་པོ། །གཅིག་ཏུ་ན་སེམས་ཀྱིས་མ་བཏང་བར་ཤེས་ལ། ནོར་ཐུན་མོང་ཡིན་ནོ་ཞེས་ཏེ་སྙིང་མི་
བརྩེ་བར་སྤྱད་ན་སྦོམ་པོ། །སྨན་དང་སྔགས་ཀྱིས་སྦྱིན་དུ་བཅུག་ན་ཡང་ངོ༌། །ཁོའི་སེམས་བསྒྱུར་བའི་ཕྱིར་སྔགས་སམ་སྨན་བྱིན་ཏེ་བདག་ལ་ནོར་སྦྱིན་དུ་བཅུག་ན་སྦོམ་པོའོ། །ཕ་རོལ་གྱི་ཕྱིར་ན་ཡང་རྩ་བའི་བརྩམས་པའོ། །གཞན་གྱི་ནོར་དུ་བྱ་བའི་ཕྱིར་བརྐུས་ན་ཡང་སྦོམ་པོ། །བརྟགས་པ་ཡང་ངོ༌། །མི་ཆུས་ཁྱེར་བ་ཕྱུང་བ་ལྟ་བུ་ཁོས་སྲོག་བླུག་མ་བྱིན་པ་ལ་འདི་ཙམ་གྱིས་ཆོད་ཅིག་བདག་དབང་གྲང་ཞེས་ཏེ་ཐུག་ཐུབ་ཏུ་ནོར་ཁྱེར་ན་སྦོམ་པོ། །འདོད་པ་བདམས་ལ་རྐུ་བར་འདོད་ན་ཡང་ངོ༌། །ནོར་མང་པོ་ཞིག་འདུག་པ་ལ་བཟང་པོ་བདམས་ཏེ་ཕྱིས་རྐུ་བར་བསམས་ནས་རྐུར་བླ་བར་སྤགས་ཏེ་བཞག་ན་སྦོམ་པོ་ནོར་རེ་རེ་བལྟ་ཞིང་ཐེག་ཅིང་བཞག་པ་ཐམས་ཅད་སྦོམ་པོ་རེ་རེའོ། །རྒྱན་པོ་དོར་གྱིས་རྒྱལ་བར་མ་གྱུར་གྱི་བར་དུ་ན་སྦྱོར་བའོ། །སྐུགས་བཙུགས་ཏེ་རྒྱན་པོའམ་ཆོ་ལོ་འགྱེད་པ་ལ་རྒྱལ་བར་བྱ་བའི་ཕྱིར་ཐབས་ཆུང་དུ་ཐབས་ཆེན་པོར་བསྣོར་ནས་སྒྱུ་བྱས་པ་ནི་སྦོམ་པོ། །ཐབས་བསྣོར་ཅིང་གཡོ་དུ་བྱས་པ་རེ་རེ་སྦོམ་པོ། །དེ་ནི་དེར་བ་བརྐུས་པའོ། །མདོ་ལྟག་མ་ལྟར་གཡོ་བྱས་ནས་དེའི་སྟོབས་ཀྱིས་བདག་རྒྱལ་བའི་ལྟང་མ་ཚང་ན་ཕམ། གྲངས་ཀྱི་ནའང་དེའིའོ། །བདག་རྒྱལ་བར་བྱ་འདོད་པའི་ཕྱིར་རྒྱན་པོའི་རྡོ་གྲངས་བརྐུས་པ་དང་ནོར་རྫས་བགྲང་བའི་གྲངས་བརྐུས་པ་ནི་རྐུ་བའི་ཚེ་ཉེས་བྱས། ཤོད་ལས་བསྣན་ཏམ་ཕྲི་ན་དེ་བཞིན་ནོ། །བདག་རྒྱལ་བར་བྱ་བའི་ཕྱིར་རྩིས་བྱེད་བལྟ་བུ་ལ་ཤོད་ལས་བསྣན་ཏམ་ཕྲིན་ན་དེའི་ཚེ་ཉེས་བྱས་གནས་བསྣོར་ཏེ་བཞག་ན་རྩིས་བྱེད་པ་ལ། བདག་རྒྱལ་བར་བྱེད་པའི་ཕྱིར་བཅུ་ཤོད་དང་བརྒྱ་ཤོད་ཀྱི་གོ་བསྣོར་ན་ཉེས་བྱས། དེ་དག་གྲུབ་ན་བརྐུས། མདོ་ལྟག་མ་གསུམ་ལྟར་གཡོ་བྱས་ཏེ་གྲུབ་ནས་ནོར་བདག་གི་ལག་ཏུ་ཐོབ་ན་ཕམ་མོ། །སྦོམ་པོ་རེ་རེ་ཡང་ཡོད་དོ། །སྡེའི་ནང་དུ་བརྩིས་ན་ཡང་དེ་བཞིན་ནོ། །ཡོན་བདག་གིས་དགེ་འདུན་ཁ་གཉིས་ནས་སྤྱན་དྲངས་ཏེ་ཡོན་ཀྱང་སོ་སོར་ཕུལ་བ་ལས་ཁ་གཉིས་ཀ་ནས་སྐལ་བ་བླང་བའི་ཕྱིར་ཕ་རོལ་ཚུལ་རོལ་གཉིས་ཀར་གཏོགས་པར་གཡོ་བྱས་ནས་དེའི་ཚེ་ཉེས་བྱས་པར་འགྱུར་རོ། །སྒྱུས་སྔ་མར་ན་ཕྱི་མར་ཕྱི་མར་ན་སྔ་མར་ཡང་ངོ༌། །དགེ་འདུན་ཡོན་སྔ་ཕྱིར་
འགོད་པ་ལ་སྔ་མའི་ནང་དུ་ཡང༌། ང་འདིའི་ནང་དུ་གཏོགས་སོ་ཞེས་ཟེར་ཕྱི་མའི་ནང་དུ་སྔ་མ་ལས་མ་ཐོབ་སྟེ་འདིར་གཏོགས་སོ་ཞེས་ཟེར་ཞིང༌། ཡོན་ཁ་གཉིས་བླངས་ཤིང་སྒྱུ་བྱེད་པའི་ཚེ་ཉེས་བྱས། གང་དུ་དེ་ཐམས་ཅད་དེ་ཐོག་མར་བྱུང་བ་དེ་སྐལ་པའོ། །མདོ་ལྟག་མ་གཉིས་ལྟར་ཡོན་ཁ་གཉིས་སུ་འགོད་པ་ལ་གང་ནས་ཀྱང་རུང་བདག་གི་སྐལ་བ་གང་སྔར་ཐོབ་པ་ལས་མི་དབང་ངོ༌། །ཁ་གཉིས་ཀ་ལས་བླངས་ན་ཕམ་པར་འགྱུར། མི་འཐོབ་པ་ལས་ཐོབ་པོ་ཞེས་ཟེར་བ་ཡང་ངོ༌། །ཚུལ་དུ་ཞུགས་ནས་ཟླ་བ་ཕྱེད་དང་གཉིས་སུ་མ་ལོན་པར་ཚུལ་དྲལ་བ་ལ་ཡང་བླ། ཚུལ་གྱི་ཚེ་གུད་ནས་འོངས་ཏེ། ཟླ་བ་ཕྱེད་དང་གཉིས་སུ་མ་ལོན་པ་དགེ་འདུན་ཟས་མ་གཏོགས་པར་ནོར་འགོད་དོ་ཅོག་ལ་མི་དབང༌། ཟླ་བ་ཕྱེད་དང་གཉིས་ལོན་པ་ནི་མི་གཅིག་གི་སྐལ་བ་ཕྱེད་དབང༌། ཕྱེད་དང་གཉིས་ལས་ལྷག་པ་ནི་གཞན་དང་འདྲ་བར་དབང་དེ་ལྟར་མི་ཐོབ་པར་ཤེས་བཞིན་དུ་དབང་ངོ་ཞེས་ཟེར་ཞིང་འཐོབ་པར་བྱེད་པའི་ཚེ་ཉེས་བྱས། མ་བསྒོ་བར་སློང་བ་ཡང་ངོ༌། །ནོར་བདག་གིས་ཁྱེར་ཅིག་པར་མ་བསྒོ་བར་གཡོག་ལྟ་བུའི་གན་དུ་ནོར་འདི་ཡང་བྱིངས་ཀྱིས་བླང་ངོ་ཞེས་བྱས་ན་སློང་བའི་ཚེ་ཉེས་བྱས་ཐོབ་ན་ཕམ། བསྙོན་པ་ནི་བརྙས་པ་དང་བསྐྱིས་པ་དང་གཏམས་པ་ནི་སྦྱོར་བའོ། །གཞན་གྱི་རྫས་ལས་བརྙས་སམ་བསྐྱིས་སམ་གཏམས་པ་ལས་བསྡིགས་པའི་ཕྱིར་བསྙོན་ཏེ་མ་སྦྱིན་པར་བྱས་ན་སྦོམ་པོ། །ཆང་ན་འཕྲོགས་པའོ། །མདོ་ལྟག་མ་ལྟ་བུའི་རྫས་ཤིག་ཡང་མི་སྦྱིན་པར་བསམས་ཏེ་བསྙོན་ཏེ་མ་བྱིན་ན་ཕམ་པའོ། །སྦས་ཏེ་གཏམས་པ་ལས་འོན་ཏེ་བསྐྱོད་པར་བཅས་པ་དང་ཕྱིས་ཀྱང་ངོ༌། །བདག་ལ་ནོར་གཏམས་པ་ལས་གསེར་དངུལ་ལྟ་བུ་ཞིག་སྟེ། རེག་ཏུ་མི་རུང་སྟེ་ནོར་བདག་ཉིད་ཀྱིས་ས་འོག་ཏུ་སྤྲས་ནས་གཏམས་པ་ལ། དགེ་སློང་གིས་ཕྱུང་སྟེ་བརྐུས་ན་འཕགས་མ་ཐག་ཏུ་ཕམ། ནོར་བདག་གས་ལྟག་མ་ལྟར་སྦས་པ་ལས། སྟོར་དུ་འོང་ངོ་ཞེས་དགེ་སློང་གིས་གནས་སྦོས་ཏེ་སྦས་ན་མི་སྦྱིན་པར་བསམས་ནས་མ་ཕྱུང་ཡང་ཕམ། དེ་སྟེ་དེ་ལས་སྔ་ན་བར་དུ་ཡང་སྦྱོར་བའོ། །ནོར་བདག་ཉིད་ཀྱིས་ནོར་སྦས་ཏེ་གཏམས་པ་དེ་གནས་གུད་དུ་མ་སྤོས་
པར་མི་སྦྱིན་པར་བསམས་པ་ནི་ཕམ་པར་མི་འགྱུར་ཏེ་ཉེས་བྱས། ཆུད་གཟན་པར་སྒྱིད་པ་བཅད་པ་དང་བསད་ན་ཡང་ངོ༌། །ཕྱུགས་ལྟ་བུ་ཆུད་གཟན་པའི་ཕྱིར་བསད་དམ་སྒྱིད་པ་བཅད་ན་སྦོམ་པོ། །སྲང་གྲངས་མང་དུ་རི་རེ་ཟིན་ཀྱང་ཕམ་པར་མི་འགྱུར། ལྟུང་བར་འགྱུར་བ་ནི་སྐབས་འདིར་མི་སྨོས་ཏེ་གུད་ནས་འཆད་དོ། །སྦོམ་པོར་བྱེད་པ་ནི་མཚམས་ཀྱི་ནམ་མཁའ་ལས་ཏེ་ཤོ་གམ་བཅག་ནའོ། །ཤོ་གམ་གྱི་མཚམས་སུ་ནོར་རྫས་ཤོ་གམ་དུ་འགྱུར་བ་ཤོ་གམ་པ་ལ་མི་སྦྱིན་པའི་ཕྱིར་མདའ་འམ་སྒྱོགས་ལྟ་བུ་དང༌། འཇིག་རྟེན་གྱི་ལོག་པའི་སྒྱུ་མའི་འཕྲུལ་གྱིས་ན་མཁའ་ལ་མཚམས་བཟླས་པ་ནི་སྦོམ་པོར་འགྱུར་རོ། །ཉེས་མེད་པ་ནི་འཕྲུལ་གྱིས་ཁྱེར་བའོ། །དགྲ་བཅོམ་པ་ལྟ་བུ་འཕྲུལ་དང་ལྡན་པས་ནམ་མཁའ་ལས་རྫས་ཁྱེར་བ་ནི་ཤོ་གམ་གྱི་ཉེས་པར་མི་འགྱུར་རོ། །མཚམས་གཞན་ནས་སོང་ན་ཡང་ངོ༌། །ཤོ་གམ་གྱི་རྒྱུད་ལས་བྱོལ་བའི་ཕྱིར་ཤོ་གམ་གྱི་རྒྱུད་དུ་མ་གཏོགས་པ་ཤོ་གམ་མེད་པའི་ལམ་དུ་སོང་ན་ཉེས་མེད། སྤྲུལ་ན་ཉེས་བྱས་པའོ། །འདྲོན་པོ་ཤོ་གམ་ཤོ་གམ་གྱི་རྒྱུད་དུ་འགྲོ་བ་ལ་ཤོ་གམ་པ་ཉལ་ལམ་ཟན་ཟ་བའི་ཚེ་ཐར་ཏོ་ཞེས་བསྟན་ན་ཉེས་བྱས། ལམ་གཞན་དུ་སྟོན་པ་ཡང་ངོ༌། །འདྲོན་པོ་ཤོ་གམ་གྱི་རྒྱུད་དུ་འགྲོ་བ་ལ་ལམ་གཞན་ནས་སོང་ན་ཤོ་གམ་གཅད་པ་མེད་དོ་ཞེས་བྱས་ཏེ། ལམ་གུད་བསྟན་ཏེ་བཏང་ན་ཉེས་བྱས་ཏེ། ཐབས་སུ་སྨྲས་ན་ཆུང༌། འདྲོན་པོ་ཤོ་གམ་གྱི་རྒྱུད་དུ་འགྲོ་བ་ལ་ཡེངས་མ་གཏམ་གྱི་ཚུལ་དུ་ཤོ་གམ་པ་ཟན་ཟ་བའི་ཚེ་སོང་ན་ཐར་ཅེས་བྱས་ན་ཉེས་བྱས་ཡང་བའོ། །ལམ་མ་ཡིན་པ་ཡང་ལམ་བཞིན་ནོ། །ཤོ་གམ་གྱི་རྒྱུད་དུ་འབྱུང་བའི་ལམ་ཉིད་ནི་མ་ཡིན་གྱི་ཕ་རོལ་ཚུ་རོལ་གྱི་གསེབ་བམ་ཤོ་གམ་བའི་ས་རིས་སུ་གཏོགས་པ་ཞིག་ཏུ་སོང་ན་ཕམ་མོ། །ཚེམ་བུ་དང་ཁར་ན་ཡང་སྣོད་གཞན་བཞིན་ནོ། །ཤོ་གམ་དུ་འགྱུར་བའི་ནོར་ཞིག་ཚེམ་བུའི་གསེབ་བམ། ཁའམ་ལྟོར་མིད་དེ་ཤོ་གམ་གྱི་རྒྱུད་འདས་ནའང་ཕམ་སྟེ་སྣོད་གཞན་དུ་བཅུག་སྟེ་ཁྱེར་བ་དང་འདྲའོ། །རྐུ་བའི་སེམས་མེད་ན་མཐར་མི་འགྲུབ་པོ། །ནོར་ཞིག་རྐུ་བར་བསམས་ཏེ་བཟུང་བ་ལས་མི་རྐུ་བར་བསམས་ཏེ་མ་བཏེག་པར་བཏང་ན་
ཉེས་བྱས་དང༌། སྦོམ་པོ་ནི་ཡོད་ཕམ་པ་ནི་མེད། དེའི་སྦྱོར་བ་ནི་མེད་ན་ཡང་གྱུར་པའི་ཚེ་ན་མ་བྱས་པ་མ་ཡིན་ནོ། །རྐུ་སེམས་མེད་པར་ནོར་ཞིག་བླངས་ནས་འཕྲལ་ལ་རྐུ་སེམས་བྱུང་སྟེ། བརྐུས་ན་ཉེས་བྱས་དང་སྦོམ་པོ་ནི་མེད་དེ་ཕམ་པར་ནི་འགྱུར་རོ། །ཡི་གེ་ལ་སོགས་པས་ཀྱང་མི་འདྲིའོ། །ཡི་གེ་དང་ལག་བརྡ་ལྟ་བུས་རྐུས་ཤིག་པར་བསྟན་ནས་དེས་བརྐུས་ན་ཡང་ཕམ། མཐུ་དང་བཅད་ན་ཡང་མ་བརྐུས་པ་མ་ཡིན། གླར་བླངས་ཏེ་ལས་བྱེད་བྱས་པ་ལས་མཐུ་བསྙེམས་ཏེ་གླ་མ་བྱིན་ན་ཕམ་མོ། །གནས་དང་བཅས་ནའང་མི་རུང་ངོ༌། །ནོར་ཉིད་བཏེག་ན་ཕམ་གྱིས་དོགས་པའི་ཕྱིར་གཞི་དང་བཅས་ཏེ་བརྐུས་ན་ཡང་ཕམ། བསད་པ་ནི་བརྐུས་པ་མ་ཡིན་ནོ། །མིའི་ནོར་དུ་གཏོགས་པའི་སེམས་ཅན་གྱོལ་སོང་ཆུད་གསན་པའི་ཕྱིར་བསད་ནའང་རིན་ཆེ་ཆུང་མཚུངས་ཏེ་སྦོམ་པོ་མི་མ་ཡིན་པའི་ནོར་བྱོལ་སོང་བསད་ནའང་ལྟུང་བའོ། །ཕྱོགས་གཅིག་གནས་ནས་མ་འཕགས་ནའང་མ་ཡིན། ནོར་རྫས་རྐུ་བའི་ཕྱིར་བཏེག་པ་ངོས་གཅིག་ནི་བཏེག་ངོས་གཅིག་ནི་གཞི་ལས་མ་འཕགས་ཀྱི་བར་དུ་ན་ཕམ་པར་མི་འགྱུར། སྤྲུགས་ཏེ་ལྷུང་ནའང་དེ་བརྐུས་པའོ། །ར་བ་སོ་སོ་ལ་རྩིག་སྒ་ཁ་གཅིག་སྟེ་རབ་གཅིག་གི་ནང་ནས་བཟའ་ཤིང་སྐྱེས་ཏེ། ཡལ་ག་དག་གི་རྩིག་སྒལ་འདས་ཏེ་འདུག་པ་ལ་ཤིང་ཐོག་རྐུ་བའི་ཕྱིར་ཤིང་སྤྲུགས་ཏེ་བདག་གི་ར་བའི་ནང་དུ་ལྟུང་སྟེ། རིན་ཐང་ཚང་ན་ཕམ། སྤྲུགས་པ་ནི་ཕྲུ་ལུ་ལུ་ཚ་ར་ར་འོངས་ནའོ། །ཆང་ངམ་ནས་ལྟ་བུའི་སྣོད་རྡོལ་ཏེ་ཕྲུ་ལུ་ལུ་ཙ་ར་ར་འོངས་པ་མཇུག་མ་ཆད་ཀྱི་བར་དུ་བདག་གི་སྣོད་དུ་འོངས་པ་རིན་ཐང་ཚང་ཡང་མི་ཕམ་རྫས་དེ་མཇུག་རྫོགས་ནས་སྤྱིར་རོ། །མདོ་ལྟག་མ་ལྟར་ཕྲུ་ལུ་ལུར་འོང་བ་རྒྱུན་ཆད་དེ་བདག་གི་ལག་ཏུ་འོངས་པ་ན་རིན་ཐང་ཚང་ན་ཕམ། ཕུང་པོ་ལས་ཡང་ཡང་ལེན་ན་རྐུ་བ་ཐ་དད་དོ། །ནས་ལྟ་བུ་ཕུང་པོར་འདུག་པ་ལས་བླངས་ཏེ་བརྐུས་ནས་ཡང་རྐུ་སེམས་སྐྱེས་ཏེ་བླངས་པ་ལྟ་བུར་རྐུ་སེམས་རེས་ལན་དུ་མར་བླངས་ན། བླངས་པ་དེའི་སོ་སོར་རིན་ཐང་བརྩིས་ཏེ་ཚང་ན་ཕམ། མ་ཚང་ན་སྦོམ་པོ། །ཕུང་པོ་ལས་ཡང་ཡང་རེ་རེ་ཕུང་པོ་གཅིག་རིལ་གྱིས་བརྐུ་བར་བསམས་ཏེ་ལེན་དུ་མ་ཞིག་
བླངས་ཏེ་སོ་སོར་རིན་ཐང་ཚང་ཡང་མི་ཕམ། ཕུང་པོ་ཟད་ན་ཕམ། ཕྲལ་བ་དུ་མ་ན་སོ་སོ་དེའི་ཆའོ། །མི་མང་པོ་ཞིག་གི་སྤྱི་ལ་ནོར་འདུག་པ་ཞིག་བརྐུས་ན། ནོར་བདག་ཏུ་ཡོད་པ་སོ་སོར་ཅི་ཡོད་པ་བསྒོས་ཏེ་མི་གཅིག་གི་སྐལ་པ་རིན་ཐང་ཚང་ན་ཕམ་མ་ཚང་ན་ནོར་བདག་ཏུ་ཡོད་པ་དེ་བཞིན་དུ་སྦོམ་པོ་རེ་རེ་རྐུ་བ་ཡང་ངོ༌། །ནོར་བདག་གཅིག་གི་ནོར་ལ་དགེ་སློང་མང་པོ་ཞིག་གིས་བརྐུས་ན། དགེ་སློང་དུ་ཡོད་པ་བགོས་ཏེ་གཅིག་གི་རིན་ཐང་ཚང་ན་ཕམ། དུ་མའི་ཡིད་དང་དེ་དེར་ཐོབ་ན་བརྐུས་པའོ། །རྐུན་པོར་འདོད་པའི་ཆེ་ལག་ཐབས་སུ་སོ་སོར་ཅི་ཐོབ་པ་ཁྱེར་རོ་ཞེས་འཐམས་ཏེ་བརྐུས་ན་སོ་སོར་ཅི་ཐོབ་པ་རིན་བརྩིས་ཏེ། རིན་ཐང་ཚང་ན་ཕམ། མ་བྱིན་པར་ལེན་པའི་ཕས་ཕམ་པ་སྟེ་དྲིས་པར་གཏོགས་པའོ། །མ་བྱིན་པར་ལེན་པའི་ཕས་ཕམ་པ་སྟེ། འཕགས་པ་ཨུ་པཱ་ལིས་དྲིས་པའི་འདུལ་བའི་མདོ།། །།བླངས་པའི་སྔོན་ལོགས་སུ་ཤི་ན་སླར་གཞག །དགེ་འདུན་ནོར་འགོད་པའི་ཚེ། དགེ་སློང་ནད་པ་ཞིག་ཤི་ན་ནད་གཡོག་གིས་ནོར་བགོས་ནས་བླངས་པའི་སྔོན་ལོགས་སུ། ནད་པ་དབུགས་ཆད་པ་ནི་ནོར་སྐལ་དེ་དགེ་འདུན་དབང་སྟེ་སླར་དབུལ་ལོ། །ཁྱིམ་པས་ནོར་ཡོན་ཕུལ་བ་ཡང་དེ་བཞིན་ནོ། །བཟློག་པ་ནི་ཤི་བའི་ཡོ་བྱད་དོ། །ནོར་བགོས་ནས་སྐལ་བ་ནད་གཡོག་གིས་བླངས་ཟིན་པའི་འོག་ཏུ་ཤི་ན་ཤི་བའི་ཡོ་བྱད་དང་ཤི་བའི་ནོར་བགོ་བའི་ནང་དུ་གཏོགས་སོ། །ནོར་འགོད་པའི་ཚེ་ཁྱིམ་པར་བབས་པ་ཞིག་ནའང་ནོར་དེ་ཁྱིམ་པར་བབས་པ་སྦྱིན་ནོ། །དགེ་འདུན་སྤུན་བཞིན་པས་དེའི་ཕྱིར་བརྐུས་ནའང་བདག་གིར་མ་བྱས་པ་མ་ཡིན་ནོ། །དགེ་འདུན་པ་འཚོ་བའི་ཡོ་བྱད་གཅིག་ཏུ་སྦྱར་བ་ལ་དེའི་ནང་ནས་དགེ་སློང་གཅིག་གིས། དགེ་འདུན་དེ་རྣམས་ཀྱི་ཕྱིར་གཞན་ལས་ནོར་ཞིག་བརྐུས་ན་ཡང་རིན་ཐང་བརྩིས་ཏེ་རིན་ཐང་ཚང་ན་བདག་ཀྱང་དེར་གཏོགས་པས་ཕམ། དགེ་འདུན་འཚོ་བའི་ཡོ་བྱད་གཅིག་ཏུ་སྦྱར་བ་དེའི་དགེ་སློང་གཅིག་གིས་དགེ་འདུན་དེ་ཉིད་ཀྱི་ནོར་ལས་གཞན་སྦྱིན་པའི་ཕྱིར་བརྐུས་པ་ནི་སྦོམ་པོ། བདག་པོ་ཐ་མི་དད་ན་བདག་གི་བཞིན་ནོ། །ཡོན་བདག་གཅིག་ལ་དགེ་འདུན་ཁ་གཉིས་སུ་འཁོད་དེ་ཁ་ཟས་ཀྱིས་མི་ཐུབ་ན། རྒྱུ་དག་བྲེལ་བྲེལ་དུ་འཆུགས་པ་ཞིག་ན།
ནོར་རྫས་གཅིག་ལས་བརྐུས་ཏེ་གཅིག་ཏུ་བསྣན་ན་སྦོམ་པོ། མི་ལེན་པར་ཆད་དེ་བྱུང་ནས་ལྷག་ནས་བརྐུས་ན་དེའི་ཡན་ལག་ཏུ་མ་ཡིན་ནོ། །རྐུན་པོ་བྱེད་པ་ཞིག་ཏུ་བདག་རྐུན་ཟླར་ནན་གྱིས་བཅུག་སྟེ་རྐུན་པོ་མི་བྱ་བར་བསམས་པ་ལས་རྐུན་ཟླས་བསད་ཀྱིས་དོགས་པའི་ཕྱིར། རྐུན་པོ་བྱེད་པའི་ནང་དུ་འདྲོལ་ཏེ། སོང་ནས་རྐུ་སེམས་ཀྱང་མེད། ནོར་སྐལ་ཡང་མ་བླངས་ན་ཉེས་མེད། ཤས་བདག་གིར་བྱེད་པར་འདོད་ན་མི་ལེན་པ་མ་ཡིན་ནོ། །བདག་རྐུན་པོར་ནི་མ་སོང་གི །རྐུན་ཤས་འདོད་པའི་ཕྱིར་གྲོས་ལ་གཏོགས་ཏེ་གཞན་གྱིས་བརྐུས་པའི་ཤས་བླངས་ནའང་ཕམ། དེའི་ལས་སུ་གཏོགས་ན་དེ་མ་ཡིན་ནོ། །རྐུན་པོ་བྱེད་པའི་ལས་ལ་གཏོགས་ཏེ་ཆུང་དུ་བྱ་ར་ཙམ་བྱས་ཀྱང་རུང་སྟེ། རྐུན་ཤས་བླངས་ན་ཡང་ཕམ། ལྷན་ཅིག་ཏུ་སྤྱོད་པ་དང་ཉེ་གནས་བརྐུས་ནའང་མི་འབྱུང་ཞེས་མི་བྱའོ། །བདག་གི་སློབ་མ་དང་ཉེ་གནས་ཀྱིས་བརྐུས་པ་ལས་སླར་ཐུག་ཐུབ་ཏུ་ཕྲོགས་ན་ཕམ་མོ་ཞེས་བྱི་ཤུ་ཏས་བཤད། ཉེས་བྱས་སོ་ཞེས་བྱི་ཙ་ཡ་བར་མས་བཤད། ཆུང་བ་ནི་མཚམས་བརྩན་ནོ། །ཞིང་རྐུ་བ་ནི་འདི་ཙམ་ཚུན་ཆད་བརྐུ་འོ་ཞེས་མཚན་མ་བཙུགས་ཏེ་བརྐུས་པས་ཕམ། ནོར་བདག་གིས་མ་བཏང་སྟེ་ཞལ་ཅེ་འགྱེད་པ་ནི་ལྟག་མ་དང་འདྲའོ། །མཚམས་ནི་བཙུགས་པ་ལས་བསྐྱོད་ན་འདིར་མ་གཏོགས་པ་མ་ཡིན་ནོ། །ཞིང་གི་མུའམ་མཚམས་སམ་མཚན་མ་བསྒྱུར་ཏེ་བཙུགས་ནས། དེ་ཚུན་ཆད་ལ་རིན་ཐང་བརྩིས་ཏེ་ཚང་ན་ཕམ། མངོན་པར་བླངས་ཀྱང་མི་སྣང་ན་བརྐུས་པའོ། །མཐོང་བཞིན་དུ་བརྐུས་ནས་སོང་བ་ནི་ནོར་བདག་མི་སྣང་བར་གྱུར་ན་ཕམ། མི་སྟོབས་ཀྱིས་གཟུང་ན་དབང་དུ་བྱས་ནའོ། །མི་མཐུས་བཟུང་སྟེ་བརྐུས་པ་ནི་སླར་མི་འབྲོས་པར་གྱུར་ན་ཕམ། གཅིག་ཏུ་ན་བདག་གིས་ཅི་བྱས་པ་བཞིན་དུ་ཉན་ཅིང་བྱེད་ན་ཕམ། བདག་ནི་དེ་ལྟར་མ་ཡིན་ནོ། །བདག་གཞན་ཞིག་གིས་བརྐུས་ནའང་སླར་བྲོས་ཏེ་འོངས་པ་ལ་ཉེས་མེད། གང་རྐུ་བར་བྱས་པ་དེ་ལ་འབྲེལ་པ་མ་བསམས་པ་ནི་མི་ཆུད་དོ། །མི་ཕམ་པར་བྱ་བའི་ཕྱིར་རས་ངན་པ་རིན་ཐང་མ་ཚང་བ་བརྐུས་པ་ལས་ནང་ནས་བཟང་པོ་ཞིག་བྱུང་སྟེ། སླར་བསྐྱལ་ན་ཕམ་པ་མེད་དེ་སྦོམ་པོའོ། །ལྟག་
ནས་ཀྱང་མདོ་འདི་འདྲ་བ་ཞིག་འབྱུང་སྟེ་གོང་མ་ནི་གསེར་དང་བུམ་པ་ལ་བྱ། འདི་ན་རས་བཟང་ངན་ལྟ་བུ་ལ་བྱ་སྟེ་བཅས་པ་ཐ་དད་ཙམ་དུ་ཟད་དོ། །སྦོམ་པོ་ནི་གང་གིས་ཅི་བླངས་པ་དེ་དེའི་འོ་ཞེས་བཅས་པ་ལས་གཞན་གྱིར་བརྐུས་ནའོ། །དགེ་སློང་མང་ཞིང་རྐུན་པོར་འདོད་དེ། ལག་ཐབས་སུ་ཅི་ཐོབ་པ་སོ་སོར་ཁྱེར་རོ་ཞེས་འཐམས་ནས་གཞན་གྱིས་ནི་ཐོབ་བདག་གིས་ནི་མ་ཐོབ་ཀྱང་སྦོམ་པོ་ཞེས་བྱི་ཤུ་ཏས་བཤད། བདག་རྐུན་ཟླས་ནན་གྱིས་བཅུག་སྟེ། རྐུ་བར་མི་འདོད་ན་བསད་ཀྱིས་དོགས་པའི་ཕྱིར་རྐུན་ཟླར་ནི་འགྲོ་སྐལ་བ་ནི་རྐུན་ཟླ་ལ་སྦྱིན་ནོ་ཞེས་བསམས་ཏེ། རྐུ་བའི་ཁྲོད་དུ་སོང་སྟེ་ཤས་མ་བླངས་ན་སྦོམ་པོ་ཞེས་བྱི་ཙ་ཡ་བར་མས་བཤད། བདག་པོ་དང་བཅས་པའི་དུར་ཁྲོད་ནས་བླངས་ནའོ། །དུར་ཁྲོད་ཀྱི་རོའི་རྫས་བདག་པོ་ཡོད་པ་ལ་རྣམ་པ་བཞི་སྟེ། རྒྱལ་པོས་འཚོ་བ་རོའི་རྫས་ལ་གཏད་པ་དང་ལས་བྱེད་པའི་ཕྱིར། རོའི་རྫས་ལ་གཏད་པ་དང་དཔྱ་འབུལ་བའི་ཕྱིར། རོའི་རྫས་ལ་གཏད་པ་དང་གསད་པའི་བཤེད་མར་གཏད་དེ་རོའི་རྫས་ལ་བྱིན་པའོ། །ཐ་མ་གཤེད་མ་དབང་བ་ལས་བརྐུས་ན་སྦོམ་པོ། །གོང་མ་གསུམ་ནི་ཕམ་མོ་ཞེས་ཊཱི་ཀ་ལས་བཤད། མཁན་པོ་ཁ་ཅིག་ན་རེ་རོ་རྫས་མི་གཙང་ཞིང་འདོད་པའི་ཤས་ཆུང་བའི་ཕྱིར་སྦོམ་པོ་ཞེས་ཀྱང་བཤད། རྩ་བ་དང་རྔོ་གུ་དང་སྡོང་པོ་དང་ལོ་མ་དང༌། མེ་ཏོག་དང་འབྲས་བུ་དང་སྐྱེ་ཤིང་ལ་སོགས་པ་སྔགས་ཀྱིས་བསྐམས་ན་ཡང་ངོ༌། །མིང་གིས་སྨོས་པ་འདི་རྣམས་ལྟ་བུ་མིའི་ནོར་ཞིག་ལ་ཆུད་གསན་པའི་ཕྱིར་སྔགས་བཏབ་སྟེ་སྐམས་སམ་རུལ་བར་བྱས་ན་སྦོམ་པོ། །འབྲུའམ་ཡལ་ག་སོ་སོ་གཅིག་ནས་བསྐམས་ན་ཡང་སྐམ་པ་རེ་རེ་སྦོམ་པོ་རེ་རེ། རྟ་ལ་ཁམ་གྱིས་བྲིད་ཅིང་སྦྱིན་ནམ་བཞོན་ཏེ་རྐུ་བར་འདི་ལྟར་རྐུ་བར་རོ་ཞེས་ནས་ལུས་ཀྱིས་ཞོན་ནའོ། །རྟ་བརྐུ་བའི་ཕྱིར་རྩྭས་བྲིད་དེ་བཞོན་པའམ་བཀྲི་བའམ་འདི་ལྟར་སྤྱད་དོ་ཞེས་སེམས་ཀྱིས་བརྐུའོ་ཞེས་བསམས་ན། རྟ་ལ་མ་རེག་ཀྱང་སྦོམ་པོ། གྲུ་ཡང་ངོ༌། །གྲུ་མིག་སྔ་ན་འདུག་ལ་ལུས་ཀྱིས་སྐྱ་བའི་ཐབས་དང་དྲང་བ་འདྲ་བར་སྤྱད་དེ་འདི་ལྟར་བྱས་ཏེ་བརྐུའོ་ཞེས་སེམས་ལ་བསམས་ན་མ་རེག་ཀྱང་སྦོམ་པོ། དེ་དང་འདི་དག་ལས་ཀྱང་ངོ༌། །
གྲུའི་ནང་དུ་ནོར་འདུག་པ་དང༌། རྟ་ལ་རྒྱན་ཡོད་པར་མིག་སྔ་ན་སྣང་བ་ཞིག་ལ་འདི་ལྟར་བརྐུའོ་ཞེས་ལུས་ཀྱིས་སད་དེ་བརྐུའོ་ཞེས་བསམས་ན་མ་རེག་ཀྱང་སྦོམ་པོ། ཕ་དང་མ་དང་སྤུན་དང་སྲིང་མོ་དང་མཁན་པོ་དང་སློབ་དཔོན་དང་མཆོད་རྟེན་དང་དགེ་འདུན་ལ་སོགས་པའི་བརྟགས་ཏེ་ཤོ་གམ་དུ་བྱ་བ་བཟླས་ན་ཡང་ངོ༌། །འདི་རྣམས་ལྟ་བུ་ཞིག་ལས་ཤོ་གམ་དུ་འགྱུར་བའི་རྫས་ཤིག་ཁྱེར་ཁྱེར་བ་ལས་ཤོ་གམ་པས་མ་གནང་བར་ཅི་དབང་བ་མ་སྦྱིན་ན་སྦོམ་པོར་འགྱུར་རོ། །བརྙས་པ་དང་བསྐྱིས་པ་མི་སྦྱིན་པར་བརྟགས་པ་ཡང་ངོ༌། །ནོར་རྫས་ཤིག་བརྙས་སམ་བསྐྱིས་པ་ལས་མི་སྦྱིན་ནོ་ཞེས་བསམས་པའི་ཚེ་ན་སྦོམ་པོ། །ལྟག་ནས་ཀྱང་མདོ་འདི་འདྲ་བ་ཞིག་བྱས་ཏེ་ལྟག་མ་ནི་ནོར་བདག་ལན་དུ་འོངས་པའི་ཚེ་སྦྱིན་ནོ་སྙམ་དུ་སེམས་ཤིང་བསྙོན་པའི་བྱིར་ང་ལ་མེད་དོ་ཞེས་སྨྲས་པས་སྦོམ་པོ། །གཞན་གྱི་ཕྱིར་བྱིན་པ་བགོས་ན་ཡང་ངོ༌། །དགེ་འདུན་གྱི་ཕྱིར་སྤྱན་གཟིགས་བསྐུར་བ་ལས། དགེ་འདུན་ལམ་ཕུལ་བར་བར་དུ་བགོས་ཏེ་ཁྱེར་ན་སྦོམ་པོ། །དགེ་སློང་གཅིག་གིས་ཤིང་ཏོག་ཨ་ལྟུ་ཀ་ཞིག་དགེ་འདུན་ལ་བསྐུར་བ་ལས། དགེ་སློང་ནི་ཤི་དགེ་སློང་དགེ་འདུན་ལ་མ་ཕུལ་གྱི་བར་དུ་བསྐུར་བསྐུར་བའི་དགེ་སློང་དག་གིས་བགོས་པ་ལས་བཅས་ཏེ་ནོར་བསྐུར་བའང་དེ་དང་འདྲ། བདག་པོ་མེད་པ་བདག་པོ་ཡོད་པར་འདུ་ཤེས་ན་ཡང་ངོ༌། །ནོར་སྟོར་བ་ལྟ་བུ་ནོར་བདག་གི་སེམས་ཀྱིས་བཏང་བ་ཞིག་ལས་བརྐུས་ན་སྦོམ་པོ། །ནོར་བདག་གི་སེམས་ལ་ནོར་ཡོད་པར་ཀྱང་མི་དྲན་སྟོར་བར་ཡང་མི་དྲན་པ་ཞིག་ལས་བརྐུས་ན། ཐོག་མ་ནོར་བདག་གི་སེམས་ལ་བདག་གི་ཡིན་པར་བསམས་པས་ཕྱིས་མི་དྲན་ཀྱང་ཕམ་བསྡུས་འབྲས་སྲན་ཕྱེ་ཉ་ཤ་བཅའ་བ་ལ་སོགས་པ་མི་འཐོབ་པའི་བསོད་སྙོམས་བླངས་ན་ཡང་ངོ༌། །ཁ་ཟས་འདི་རྣམས་ལྟ་བུ་ལས་དགེ་འདུན་གྱི་ནང་ནས་བདག་གི་སྐལ་བ་ཉིད་བླངས་ལ་གུང་དུ་སྤྱན་དྲངས་པའི་ཟན་སྐལ་ལའང་བླངས་ནའང་སྦོམ་པོ། ལས་མི་འདོད་པའི་ཕྱིར་དགེ་འདུན་གྱི་ནང་ནས་བྱུང་ལ་ཟན་ཟླ་ཕོགས་སུ་ནོས་ཏེ། དགེ་འདུན་ལས་མི་བྱེད་ནའང་སྦོམ་པོ། དགེ་འདུན་གྱི་ནང་དུ་ལས་བྱེད་ཀྱང་ཟན་ཟླ་ཕོགས་སུ་ནོས་ཏེ་ཟླ་ཕོགས་ཀྱི་ཟན་སྐལ་བསགས་པའི་ཕྱིར་
སླར་དགེ་འདུན་ལ་མ་ཕུལ་བར་བཞག་ལ་མགྲོན་དུ་བོས་པའི་ཟན་སྐལ་ཀྱང་ཟོས་ན་སྦོམ་པོ། མི་ཤེས་པར་གཞན་གྱིས་མི་འཐོབ་པར་བླངས་ན་མ་ཡིན་ནོ། །བདག་གུད་དུ་གཞན་གྱིས་ཟན་བྱིན་ལ་མི་ཤེས་པར་གྲོགས་པོས་ཟན་སྐལ་ནོར་སུ་ཟིན་ན་ཡང་སླར་ཕུལ་ན་ཉེས་མེད་དོ། །མ་བསྒོ་བ་ན་ཡང་མ་ཡིན། དགེ་སློང་གྲོགས་ཤིག་གུད་དུ་ཟན་ཟར་སོང་སྟེ་བདག་ལ་ཟན་སྐལ་མ་ནོད་ཅིག་ཅེས་མ་བསྒོ་བར་བདག་གིས་སྐལ་བ་ནས་གྲོགས་ཟན་ཟོས་ཟིན་པར་གྱུར་ཏེ་སླར་ཕུལ་ན་ཉེས་མེད་དོ། །ཉེས་བྱས་པ་ནི་མ་བོས་པའི་ཆོས་བསྟན་ཏོ། །དགེ་སློང་མགྲོན་དུ་མ་བོས་པར་མཆོད་སྟོན་གྱི་ཟན་ཟོས་ན་ཉེས་བྱས། མ་བོས་ཤིང་མ་བྱིན་པར་ཐུག་ཐུབ་ཏུ་ཟོས་པ་ཅིའི་ཕྱིར་ཕམ་པར་མི་འགྱུར་ཞེས་ཟེར་བ་ཡོད་དོ། །ཡོན་བདག་གི་མིག་སྔ་ན་ཟ་ཞིང་མི་སྦྱིན་པའི་སེམས་མེད་པས་ཕམ་པར་མི་འགྱུར། །བརྐུ་བར་འགྲོ་བ་ཡང་ངོ༌། རྐུ་བར་འགྲོ་བའི་ཚེ་ཉེས་བྱས། གྲོས་བྱེད་པའང་དེ་ལས་ཐ་མི་དད་དོ། །རྐུ་བར་འགྲོ་བར་བསམས་ནས་རྐུན་ཟླ་དང་གྲོས་བྱེད་པའི་ཚེ་ཡང་སྔ་མ་བསམས་པའི་ཉེས་བྱས་སུ་གཏོགས་པར་ཟད་དོ། བདག་པོ་མེད་པར་རབ་ཏུ་བརྟག་པ་བྱ་སྟེ་བླང༌། ཕྱག་དར་ཁྲོད་ཀྱི་གོས་བླངས་པ་ལྟ་བུ་ལ་བཟང་པོ་ཞིག་ན། བདག་པོ་གང་ཡིན་བདག་པོ་ཡོད་དམ་མེད་ཞིབ་ཏུ་བརྟགས་ཏེ་བླངས་ངན་པ་རྣམས་ནི་མ་བརྟགས་ཀྱང་ཉེས་མེད། ལུས་ཀྱིས་ཉལ་བར་མི་བྱ། བུ་ལོན་ཆགས་པ་ལྟ་བུ་ཕྱིར་མདུན་དུ་ཐེན་ཅིང་ཉལ་བར་མི་བྱ། བྲམ་ཟེ་ཞིག་ལ་དགེ་སློང་ཞིག་གི་བུ་ལོན་ཆགས་ཏེ་བྲམ་ཟེ་ཞིང་རྨེད་པ་ལ་བདས་ནས་མ་སྟེར་དེ་ཞིང་རྨོ་བའི་རོལ་ཁར་ཐེན་ཏེ་ཉལ་བ་ལས་བཅས། བྱ་ཚང་མི་གཞིག །གཙུག་ལག་ཁང་ན་བྱ་ཚང་འདུག་པ་སྒོ་ང་མེད་པ། དགེ་འདུན་གྱི་ལས་སུ་མ་བསྐོས་པར་བཤིག་ཀྱང་ཉེས་མེད། དེ་མ་གཏོགས་པར་བྱ་ཚང་བཤིག་ན་ཉེས་བྱས། དེར་མ་གནས་པར་དབྱར་གྱི་གོས་ཀྱི་ཤས་ལ་མི་འཇུག །དབྱར་ཚུལ་དུ་མ་ཞུགས་པའི་དགེ་འདུན་ཚུལ་དུ་ཞུགས་པའི་ཡོན་དང༌། གོས་འགོད་པའི་ཡོན་དུ་མ་གཏོགས་ཏེ་རྐུ་སེམས་ཀྱིས་ནོར་སྐལ་བླངས་ན། རིན་ཐང་ཚང་ན་ཕམ་རྐུ་སེམས་མེད་ན་སྦོམ་པོ། རྐུན་པོ་ལས་སྦྱིན་བདག་ཏུ་བསམས་ཏེ་བླངས་ན་མ་ཉེས་རྐུན་པོར་གྲགས་
པའི་མི་ཞིག་ལེན་ན་དེ་ལས་ནོར་ཞིག་ལེན་ན་དེ་ལ་སྦྱིན་བདག་ཏུ་བསམས་ཏེ་བླངས་ན་ཉེས་མེད། ནོར་བླངས་པ་དེ་ངོས་ཟིན་ན་ཡང་རྐུན་པོ་དེ་ལ་ཁུངས་ཕྱུང་ན་ཀུན་གྱིས་ཤེས་པའི་ཕྱིར་བདག་གཙང་མར་འགྱུར་བས་བླང་དུ་རུང༌། གཡུང་མ་རྒོད་རྐུན་པོའི་རྒྱལ་མཚན་མ་ཐོགས་པ་ལས་རྫས་མི་བླངས། རྐུ་མཁས་ཏེ་བུ་སྨད་ལྟ་བུས་ཀྱང་རྐུན་པོ་བྱས་པར་མི་ཚོར་ཏེ་ཁྲིམས་འཛིན་ཅིང་སྡིག་ཆུང་དུ་ལ་ཡང་འཛེམ་པ་ལྟར་བྱེད་པ་ལ་རྐུ་བའི་མི་དང་འདི་རྣམས་གཉིས་ལྟ་བུ་གཡུང་མ་རྒོད་ལས་རྫས་བླངས་པ་ནི་ཉེས་བྱས་ནོར་དེ་བླངས་ཏེ་ནོར་བདག་གིས་ངོས་ཟིན་ན་གཡུང་མ་རྒོད་ལ་ཁུངས་ཕྱུང་དུ་ཟིན་ཀྱང་ཡུལ་མིས་རྐུ་བར་མ་སྤྱད་པས། དགེ་སློང་གཙང་མར་མི་འགྱུར་བའི་ཕྱིར་མི་བླང་ངོ༌། །བླངས་ནས་མཚོན་གྱིས་བཅད་ཅིང་ཁ་དོག་བསྒྱུར་ལ་བཅང༌། རྐུན་པོར་གྲགས་པ་ལས་ནོར་བླངས་པ་དེ་ཁ་ཚར་བཅད་དེ་ཁ་དོག་བསྒྱུར་ཏེ་བཅང༌། དེ་ལྟར་བྱས་ཀྱང་སློང་ན་བྱིན་ཅིག །མདོ་ལྟག་མ་ལྟར་རྫས་བླངས་བ་ཁ་དོག་བསྒྱུར་ཏེ། བཅངས་པ་དེ་ནོར་བདག་གིས་ངོ་ཤེས་ཏེ་སླར་སོང་ན་སྦྱིན། མ་སྦྱིན་ན་ཉེས་བྱས། སྒྱུ་མི་བྱ། ལས་ལྟ་བུ་བྱེད་བྱེད་པའི་གླ་མཐོ་བྱོགས་པའི་ཕྱིར་མེད་ཅེས་སམ། མ་འབྱོར་ཅེས་མི་སྦྱིན་པར་སྒྱུ་མི་བྱ། བྱས་ན་ཉེས་བྱས། སྔགས་ཀྱིས་བཏང་ན་ནི་ཉེས་མེད། བདག་གི་རྫས་གཞན་གྱིས་བརྐུས་ནས་ཆོས་བཤད་དེ་བླངས་ཀྱང་མི་སྟེར་ན། སྔགས་བྱས་ཏེ་སེམས་བསྒྱུར་ལ། བདག་ལ་སྦྱིན་དུ་བཅུག་པ་ནི་ཉེས་མེད་དོ། །བྱི་བས་བརྐུས་པ་དག་གི་ནི་བླངས་ན་ཡང་ངོ༌། །བདག་གི་ནོར་རྫས་ལྟ་བུ་བྱི་བས་ཁྱེར་བ་ལས་སླར་ཕྲོགས་ཤིང་བླངས་པ་ནི་ཉེས་མེད། དེ་བཞིན་དུ་ཁྱི་དང་བྱ་ལ་སོགས་པ་ལས་ཕྲོགས་ཀྱང་ཉེས་མེད། དགེ་སློང་གཞན་གྱི་དོན་དེའི་ཕྱིར་ཡང་ངོ༌། །དགེ་སློང་གཞན་གྱི་ནོར་རྫས་ཤིག་བྱི་བ་དང་ཁྱི་ལ་སོགས་པས་ཁྱེར་བ་བླངས་ཤིང་ཕྲོགས་པ་ཡང་སླར་བྱིན་ན་ཉེས་མེད། བདག་དང་དགེ་སློང་ཞེས་འབྱུང་བས་ཁྱིམ་པ་དང༌། དགེ་སློང་ལ་ནི་ཉེས་ཡོད་པ་འདྲའོ། །རྔོན་པས་རི་དགས་སྨས་པ་གནས་སུ་འོངས་ཏེ་ཁྱེར་ན་ཡང་ངོ༌། །ལིངས་མིའམ་རྔོན་པ་ལྟ་བུས་རི་དགས་སྨས་ཏེ་བདག་ཅག་གི་གན་དུ་འོངས་པ་ནི་སྙིང་རྗེ་ཞིང་སྐྱབས་བྱ་བའི་ཕྱིར།
རི་དགས་བསྙགས་པའི་བདག་པོ་སླར་མ་བྱིན་ཡང་ཉེས་མེད་དོ། །དེ་ཤི་ན་དེ་དག་ལ་བྱིན་ཅིག །མདོ་ལྟག་མ་ལྟར་མ་བྱིན་པ་དེ་ཤིན་ཤ་སླར་བྱིན་ཤ་བདག་རིང་ཞིག་ཏུ་མ་འོངས་ན་ཡང་བདག་ཅག་གིས། ཤ་བརྐུས་ཤིང་མ་ཟོས་པར་ཤེས་པར་བྱ་བའི་ཕྱིར་རུལ་རུལ་དུ་ཁེངས་རུས་མངོན་པར་གཞག །མ་བྱིན་པར་ལེན་པའི་ཕས་ཕམ་པའི་བྱེ་བྲག་ཏུ་གདོན་མི་ཟ་བའོ། །མ་བྱིན་པར་ལེན་པའི་ཕས་ཕམ་པ་སྟེ། འདུལ་བ་བྱེ་བྲག་ཏུ་གདོན་མི་ཟ་བའི་ནང་ནས་འབྱུང་བའི་མདོ། མ་བྱིན་པར་ལེན་པའི་ཕས་ཕམ་པ་རྫོགས་པའོ། །མ་བྱིན་པར་ལེན་པའི་ཕས་ཕམ་པ་འདུལ་བ་སོ་སོ་ནས་འཆད་ཅིང་འབྱུང་བའི་མདོ་ཀུན་རྫོགས་སོ།། །།གསོད་པའི་ཕས་ཕམ་པའོ། །ནད་པ་འཆི་བར་འདོད་པ་ལ་དེ་དང་མཐུན་པའི་བསྙེན་པ་མི་བསྙེན། དགེ་སློང་ནད་པ་ཤི་ཡང་བླ་སྙམ་སེམས་པ་ལ་འཆི་ན་ཅི་ཉེས་ཞེས་བྱ་བའི་ཚིག་མི་བྱ། དགེ་སློང་ནད་པ་ཞིག་བཀྲེས་ཞེས་ཟེར་བ་ལ་ནད་གཡོག་དང་སྨན་པ་ལ་ཟས་ཅི་སྦྱིན་ཞེས་འདྲི་སོང་བའི་འོག་ཏུ། དགེ་སློང་གཞན་དག་གིས་སོ་སོ་ནས་ཟན་སྣ་མང་དུ་བྱིན་ཏེ་འགྲངས་ནས། ནད་གཡོག་གིས་སྨན་པས་ཟེར་བ་བཞིན་དུ་ཟན་གཡོས་ཏེ་བྱིན་པ་དང༌། ཁམ་གསུམ་ཙམ་ཟོས་ནས་མ་ཡོག་ནས་ནད་གཡོག་མི་དགའ་ཞིང་འདུག་པ་ལ། ཟན་གཞན་གྱི་བྱིན་ཏེ་འགྲངས་སོ་ཞེས་བྱས་པ་དང་ནད་གཡོག་ཁྲོས་ཏེ་ང་དེ་སྲིད་དུ་འབད་འབད་ན་ལྟོ་དེ་ཙམ་ཞིག་ཀྱང་མི་ཐུབ་ན་དུག་ཟོས་ཏེ་ཤི་ན་ཅི་ཉེས་ཞེས་བྱས་པ་དང་ནད་པས་དུག་ཟོས་ཏེ་ཤི་བ་ལས་བཅས། དེ་སྐད་བྱས་ཏེ་ཤི་ན་ཕམ། དེ་ལ་མི་ཤེས་པ་འཆི་བ་གོགས་ཤིག་པ་མ་བསྒོ་བར་གཡོག་ཏུ་མི་གཞག །དགེ་སློང་ནད་པ་ཞིག་ཤི་ཡང་བླ་སྙམ་སེམས་ཏེ། ནད་གཡོག་གི་ཚ་བོ་རྔོན་པ་སྤུན་གཉིས་ཤིག་ཡོད་པ་འདི་ནི་བདག་ལ་གསོད་དུ་བཏུབ་སྙམ་བསམས་ཏེ་ནད་གཡོག་ལ་དེ་གཉིས་ཁུགས་ཏེ་ཁྱོད་ཀྱི་རོགས་སུ་ངའི་ནད་གཡོག་བྱེད་དུ་ཆུ་གཅིག་ཅེས་བསྒོ་ནས་ནང་གཡོག་གིས་བཀུག་སྟེ་ནད་པ་ཟེར་བ་བཞིན་དུ་གཡོག་གྱིས་ཤིག་ཅེས་བསྒོ་ནས་བཞག་སྟེ། ནད་གཡོག་དགེ་སློང་གུད་དུ་སོང་བའི་འོག་ཏུ། ནད་པས་རྔོན་པ་ལ་ང་བསད་ན་མཐོ་རིས་སུ་བདེ་བར་འོང་ཞེས་ཆོས་བཤད་ནས་གསོད་དུ་བཅུག་ནས་
གསད་པ་ལས་བཅས་ཏེ། ནད་གཡོག་ཏུ་མི་བླུན་པོ་དེ་ལྟ་བུ་མི་གཞག །ནད་གཡོག་སྒྲིན་པོ་གཞག་ཏུ་སྤུས་མེད་ན་ཡང་བླུན་པོ་ལ་ནད་པ་འཆིར་མ་གཞུག་ཅིག་ཅེས་བྱ་བ་ལ་སོགས་པས་གཏམས་ཏེ་གཞག །ཐབས་གཞན་ཡོད་ན་མ་ཡིན། ནད་གཡོག་ཏུ་བཞག་པ་མི་སྒྲིན་པོ་ཚིག་ཟུར་བྱེ་བྲག་ཕྱེད་ཅིང་ལེགས་ཉེས་ཤེས་པ་དང༌། ཐབས་མཁས་པ་ནི་མ་བསྒོ་ཞིང་མ་གཏམས་པ་ཉེས་མེད། འཆི་བའི་ཡོ་བྱད་མི་གཞག །ནད་པའི་དྲུང་དུ་འགེག་ཐག་དང་མཚོན་ལ་སོགས་པ་འཆི་བར་འགྱུར་བ་མི་གཞག །དེ་འཆི་བའི་ཕྱིར་རྩོལ་ན་གཡོག་གིས་ཟློག་ཤིག །ནད་པ་ཁོ་བདག་འཆི་བར་རྩོལ་ན་ནད་གཡོག་གིས་མི་ལུས་རྙེད་དཀའ་བ་དང༌། བསོད་ནམས་སྤྱོད་པའི་ལུས་ཕངས་སོ་ཞེས་ཡིད་བསྲིངས་ལ་འཆི་བར་མི་གཞུག་ཅིང་དགག །ཕ་རོལ་གྱི་དོན་ཕྱིར་འཆི་བ་མ་དད་ཅིག །དགེ་སློང་ཕ་རོལ་པོ་ཞིག་ལ་ལྷུང་བཟེད་དམ་ཆོས་གོས་བཟང་པོ་ཡོད་པ་ལ། དེ་ཤི་ན་ངས་འཐོབ་པའི་ཕྱིར་ཤི་ཡང་བླའོ་ཞེས་དད་པ་མི་སྐྱེད་དེ་དེ་ལྟར་བསམས་ན་ཉེས་བྱས། མི་བྱ་བ་བྱེད་པ་ལ་སེམས་ཀྱིས་ཀྱང་བྱེད་པ་ལ་རྗེས་སུ་ཡི་རང་བར་མི་བྱ། ཕ་རོལ་པོ་སྲོག་གཅོད་པ་དང་རྡེག་པ་དང༌། སྲོག་གཅོད་པའི་ཐབས་བྱེད་པ་ལ་སོགས་པ་བྱ་བ་མི་རིགས་པ་ཡིན་ཏེ། དེ་ལྟ་བུ་ཞིག་བྱེད་པ་ལ་བདག་གིས་ཀྱང་དེ་བཟང་ཞིང་ཡི་རང་ངོ་ཞེས་མི་བྱ་བྱས་ན་ཉེས་བྱས་སོ། །འཚོ་བ་བགགས། སྲོག་གཅད་པ་དང༌། དེར་སེམས། སྲོག་བཅད་པར་བསམས་པ་དང༌། མིའི་རྒྱུད་ནའོ། །མིའི་རྒྱུད་ཀྱང་ཡིན་པ་དང་ཡན་ལག་འདི་གསུམ་དང་ལྡན་པར་མི་བསད་ན་ཕམ་པར་འགྱུར། ལུས་བདག་གི་ལུས་དང་ལུས་ཀྱི་ཡན་ལག་དང་པོ་ལ་སོགས་པ་བསད་པ་དང༌། དེར་གཏོགས་པ། མཚོན་ཆ་དང་རྡོ་དབྱིག་ལག་པ་ན་ཐོགས་ཏེ་བསད་པ་དང༌། བཏང་བ། མཚོན་ཆ་དང་རྡོ་དབྱིག་འཕངས་ཏེ་བསད་པ་དང༌། གཞན་ལ་བསྒོ་བ་རྣམས་ཀྱང་ཐ་མི་དད་དོ། །གཞན་ལ་བསྒོ་སྟེ་གསོད་དུ་བཅུག་པ་དང་དེ་རྣམས་ལྟར་བདག་གིས་བསད་པ་མཚུངས་ཏེ་ཕམ་མོ། དུག་དང༌། དུག་བླུད་དེ་བསད་པ་དང༌། ཕྱེ་མ་དང༌། དུག་ཕྱེ་མས་ལུས་ལ་བསྐུས་ཏེ་བསད་པ་དང༌། རླུབས་དང༌། རླུབས་ཀྱི་ནང་དུ་བསད་པ་དང༌། ཤིང་དང༌། ཤིང་དབང་དུ་བཙིར་
ཏེ་བསད་པ་དང༌། རང་བཞིན་སྟོར་ཏེ་བཏང་བ་དང༌། ཐུལ་ལྟ་བུ་བྱས་ཏེ་སྨྱོ་སྟེ་བྲག་དང་ཆུ་ལ་སོགས་པའི་ནང་དུ་ཤི་བར་བྱས་པ་དང༌། བྲང་སྐམ་བར་བྱེད་པ་དང༌། ས་མདའ་ལྟ་བུས་བསད་པ་དང༌། སྒྱོགས་དང༌། སྒྱོགས་ཀྱིས་བསད་པ་དང༌། ཁོག་ཚེ་དང༌། ཁོག་ཚེ་ལྟ་བུས་མཇུག་ཐག་གིས་བཟུང་སྟེ་བསད་པ་དང༌། རོ་སློང་བ་དང༌། སྔགས་ཀྱིས་རོ་བསླངས་ཏེ་རོ་དེས་གསོད་དུ་བཅུག་པ་དང༌། སྔགས་ཀྱི་སྦྱོར་བ་རྣམས་ཀྱིས་ཀྱང་ངོ༌། །སྔགས་ཀྱིས་ས་ལྟ་བུ་ལ་བཏབ་སྟེ་ས་གཏོར་བས་བསད་པ་དང༌། འདི་རྣམས་ལྟ་བུ་ལས་བསད་ན་གང་གིས་བསད་ཀྱང་རུང་ཕམ། ཕུལ་བ་གང་བ་དང་ཆུ་ལྟ་བུ་ལ་ཕུལ་ཏམ་མཆོད་དུ་བཅུག་པ་ཡང་ཕམ་མོ། །ཆུ་དང་མེར་བཅུག་པའོ། །ཆུར་བཅུག་གམ་མེར་བསྲེགས་ཏ་བསད་པའང་ཕམ་མོ། །གྲང་བ་དང་ཚ་བར་བཟུང་ན་ཡང་ངོ༌། །གྲང་བ་ལྷགས་པ་དང་ཚད་ཁུངས་ལྟ་བུ་ལ་བཟུང་དམ་བཅིངས་ཏེ་བཞག་ནས་བསད་པ་ཡང་ཕམ། ཕོ་ཉར་བཏང་བ་ལ་སོགས་པ་ཡང་ངོ༌། །གཅན་གཟན་ཟ་བའམ་དགྲའི་ཁྲོད་ལྟ་བུར་བསད་པའི་ཕྱིར་བསྔགས་ཏེ་བཏང་ནས་ཤི་ན་ཡང་ཕམ་པའོ། །ཆུང་ཟད་དུ་གཏོགས་ན་ཡང་ངོ༌། །བསད་པའི་ཕྱིར་བེམ་ཏོལ་ལམ་ཁབ་ཀྱིས་བཙུགས་པའམ་ཡུངས་འབྲུས་འཕངས་ཏེ་ཤི་ན་ཡང་ཕམ། སྐྱེས་པ་དང་བུད་མེད་དང་མ་ནིང་བསད་ནའོ། །སྐྱེས་པ་དང་བུད་མེད་དང་མ་ནིང་གང་བསད་ཀྱང་རུང་ཕམ་མོ། །དེའི་ཕྱིར་ཕྱིས་ཤི་ཡང་ངོ༌། །གསོད་པའི་ཕྱིར་མཚོན་ཆ་ལ་སོགས་པས་བཏབ་སྟེ། འཕྲལ་དུ་ནི་མ་ཤིའི་དེའི་ཞར་གྱིས་ཕྱིས་ཤི་ན་ཡང་ཕམ་མོ། །བཟློག་པ་ལས་ཕྱིས་ན་མཚན་མ་མ་ཡིན། ཁྱོད་ཤི་ན་སྐྱིད་དོ་ཞེས་བྱ་བ་ལ་སོགས་པས་སྔར་བསྒོ་སྟེ་ཕྱིས། ང་འཁྲུལ་པ་ཡིན་ཏེ་ཤི་བའི་མི་རིགས་སོ་ཞེས་བཟློག་ན་ཤི་ཡང་རུང༌། མ་ཤི་ཡང་རུང་སྦོམ་པོ། སྦོམ་པོ་ནི་མའི་ལྟོ་མ་ཉེ་སྟེ་མངལ་ན་ཕ་མ་དམིགས་པ་ནའོ། །བུད་མེད་རུམ་ན་བུ་ཡོད་པ་ཞིག་བུ་བསད་པའི་ཕྱིར་མའི་ལྷོ་མཉེས་ཏེ་མ་ཤི་ན་སྦོམ་པོ། མ་བསད་པའི་ཕྱིར་བུ་ཤི་ན་ཡང་སྦོམ་པོ། གང་གསད་པར་བྱས་པ་ཉིད་ཤི་ན་ཕམ། གསོད་པར་འཇུག་པ་དེའི་མཚན་མར་མོས་པ་ཡང་ངོ༌། །གཞན་ཞིག་གིས་མི་འདི་གསད་
དོ་ཞེས་དྲིས་པ་དང༌། དགེ་སློང་གིས་སོད་ཅིག་ཅེས་མ་སྨྲས་ཀྱང་གསད་པར་དགའ་བའི་ཕྱིར་ལུས་ཀྱིས་དད་པའི་བརྡ་བྱས་ན་སྦོམ་པོ། ཁྱིམ་བདག་ཨུ་པ་སེ་སྦུན་གཉིས་ལས་ཕོ་བོ་ཚོང་ལ་སོང་བའི་འོག་ཏུ་ཕོ་བོའི་ཆུང་མ་ལ་ནུ་བོས་རྒྱོས་ནས་བུར་ཆགས་ཏེ་ངོ་ཚ་བའི་ཕྱིར་ཐར་པར་ཞུགས་པ་དང༌། གྲོགས་པོ་སྨན་པ་ཞིག་འོངས་ཏེ་ཁྱོད་ངོ་ཚ་ན་སྨན་གྱིས་བུ་མེད་པར་བྱའོ་ཞེས་བྱས་པ་དང༌། ལུས་ཀྱིས་སོད་ཅིག་པའི་བརྡ་བྱས་པ་ལས་བཅས། ཁྱོད་ཀྱི་མིང་གིས་འཆི་བའི་ཡོ་བྱད་སྦྱིན་ནོ་ཞེས་ན་ཡང་ངོ༌། །མི་ཞིག་ན་རེ་ཁྱོད་ཀྱི་མིང་ནས་ཕྱུང་སྟེ། ཁྱོད་ན་རེ་དུག་འདི་འཐུང་ཤིག་ཅེས་ཟེར་རོ་ཞེས་བྱའོ་ཞེས་བྱས་པ་དང༌། གསད་པར་དགའ་བའི་ཕྱིར་ཁ་རོག་འདུག་ན་སྦོམ་པོ། གཞན་ཕྱུགས་མ་ཡིན་པ་དང༌། མི་དང་བྱོལ་སོང་གི་རྒྱུད་མ་ཡིན་པ་ན་རེག་པ་དང་འདྲེ་དང་ལྷའི་ལམ་དང་གསུམ་གྱི་རྒྱུད་ལ་གང་ཡང་རུང་སྟེ་བསད་ན་སྦོམ་པོ། སྤྲུལ་པ་བསད་ན་ཡང་ངོ༌། །སེམས་ཅན་གྱི་གཟུགས་སུ་སྤྲུལ་ཏེ་སེམས་མེད་པ་ཞིག་བསད་ན་ཉེས་བྱས། སྤྲུལ་པ་སེམས་ཡོད་པ་ཞིག་བསད་ན་སྦོམ་པོ། བྱོལ་སོང་མིར་སྤྲུལ་བ་བསད་ནའང་སྦོམ་པོ། མི་བྱོལ་སོང་དུ་སྤྲུལ་པ་བསད་ན་སྦོམ་པོ་ནི་མེད་དེ་ཕམ་པའོ། །དྲི་བསམ་བསྒོ་བར་ནད་པ་ལ་སྨན་མི་སྦྱིན། ནད་པ་སྨན་ཅིག་སྦྱིན་ན་ཤེས་པའི་སྨན་པ་ལ་དྲི་བའི་རིགས་ཏེ་མ་དྲིས་ཤིང༌། སྨན་པས་མ་བསྒོ་བར་ནད་པ་ལ་སྨན་མི་སྦྱིན། བྱིན་ན་ཉེས་བྱས་ཅི་ལྟ་བུ་ལ་དྲི་བ་འོག་ནས་བཤད། སྨན་པ་དང༌། སྨན་པ་ཉིད་དང༌། དེ་ལས་རབ་ཏུ་བྱུང་བ་དང༌། སྨན་པ་ལས་རབ་ཏུ་བྱུང་བ་དང༌། དེ་དང་འགྲོགས་པོ་དང༌། སྨན་པ་དང་རྟག་ཏུ་འགྲོགས་འགྲོགས་ཏེ་སྨན་དཔྱད་ཤེས་པ་དང༌། དེར་དྲིའོ། །འདི་རྣམ་གསུམ་ལྟ་བུ་ལ་དྲིས་ཏེ་སྨན་བྱིན་པ་ནི་ཉེས་མེད་དོ། །ནད་བུ་ཅན་ལ་ཡང་ངོ༌། །ནད་བུ་ཅན་ནི་རྟག་ཏུ་ནད་ཀྱིས་གཙེས་ཀྱི་སྨན་དཔྱད་ཤེས་པའི་རིགས་ཏེ་དེ་ལ་དྲིས་ཏེ་ནད་པ་ལ་སྨན་སྦྱིན་པའང་ཉེས་མེད་དོ། །དགེ་སློང་རྒན་པོ། དགེ་སློང་རྒན་པོ་ནི་ན་རྒན་པ་དང༌། རྒན་པོ་ཤེས་རབ་དང་བཅས་པ་རྣམས་ལ་ཡང་ངོ༌། །ཁྲིམས་རྒན་པོ་མང་དུ་མྱོང་ཞིང་ཤེས་པ་ལེགས་ཉེས་ཀྱི་བྱེ་བྲག་ཕྱེད་པ་དག་དྲིས་ཏེ། ནད་པ་ལ་སྨན་བྱིན་ཡང་ཉེས་
མེད། གོང་མ་མེད་ན་འོག་མ་ལ་ཡང་ངོ༌། །སྨན་པ་མིང་གིས་སྨོས་པ་འདི་རྣམས་ལས་རིམ་བཞིན་དུ་ལྟག་མ་དག་མེད་ན་འོག་མ་དག་ལ་དྲིས་ཏེ་ནད་པ་ལ་སྨན་སྦྱིན། ཤི་བའི་ཕྱིར་ཕན་པར་སྨན་བྱིན་ན་འབྲི་བ་མེད་དོ། །མི་ནད་ཀྱིས་ཉོན་མོངས་ཤིང་འདུག་པ་ལ། ཤི་ན་བདེ་བར་འགྱུར་ཞེས་བསམས་ཏེ་ཤི་བར་འོང་བའི་སྨན་སྦྱིན་པར་མི་བྱ། མི་དེ་ཤི་ན་ཕམ། དགེ་སློང་མ་གཅིག་ཅིག་གིས་མི་རྒོད་ཀྱི་རྐང་ལག་གཏུབས་ཏེ། ཉོན་མོངས་ཤིང་འདུག་པ་ལ་ཤི་ན་བདེ་ཞིང་སྐྱིད་ཅེས་འབྲས་ཀྱི་ཁུ་བའི་སྨན་ཞེས་བྱ་བ་བྱིན་ཏེ་བསད་པ་ལས་བཅས། ཁུར་མི་ཐག་པ་ལ་གྲོགས་མི་བྱ། མི་བཅུ་ཙམ་གྱིས་བཏེག་དགོས་པའི་ཁུར་ལ། མི་བརྒྱད་ཙམ་གྱིས་བསྐུར་བར་རྩོལ་ན་མི་ཐེག་ཅིང་སྣང་བར་འགྱུར་བའི་ཕྱིར་ནང་དུ་ཞུགས་ཤིང་བཏེག་པའི་གྲོགས་མི་བྱ། བྱས་ན་ཉེས་བྱས། བྱ་བ་ནི་དེ་སྟེ་དེའི་རྐྱེན་གཅིག་ན་ཁྱིམ་པ་དང་སྦྲེལ་ཏེ་བསྐོས་ལ་མཉམ་དུ་ཐེག་ཅིག །མདོ་ལྟག་མ་ལྟར་མི་བཅུ་ཙམ་གྱིས་བསྐུར་དགོས་པ་ཅིག་ལ་མི་བརྒྱད་ལས་མེད་དེ། མི་བསྐུར་དུ་མི་རུང་བའི་རྐྱེན་གཅིག་བྱུང་ན་ཁྱིམ་པ་དང༌། དགེ་སློང་སྤེལ་ལ་སྟོབས་མཉམ་པར་བཏེག་ཅིང་བསྐུར་དེ་ལྟར་མ་བྱས་ན་ཉེས་བྱས། གཞག་པ་ཡང་མཉམ་དུ་གྱིས་ཤིག །མདོ་ལྟག་མ་ལྟར་མཉམ་དུ་ཐེག་པའི་ཁུར་དེ་སླར་གཞག་པའི་ཚེ་ན་ཡང་སྟོབས་མཉམ་པར་གྱིས་ཏེ་ཕེག་ཏུ་འབྱོར་བར་གྱིས་ཤིག །དེ་ལྟར་མ་བྱས་ན་ཉེས་བྱས། ཕ་གུ་མི་དོར་ཕ་གུ་ལོང་བཏགས་ཤིང་སྐྱེད་པ་ལྟ་བུ་ལ་གཅིག་ལ་གཅིག་མི་དོར་ཕ་རོལ་པོའི་ལག་གིས་ཟིན་ནས་གཏད། དེ་ལྟར་མ་བྱས་ན་ཉེས་བྱས་གྲུམ་པ་དང་གས་པ་མ་བསྒོ་བར་དེ་མི་གཏད། ཕ་གུ་གྲུམ་མམ་ཆག་སྟེ་གས་པ་ཞིག་ན་ཕ་གུ་ཆག་གོ་ཞེས་བྱ་སྟེ་ཕ་རོལ་གྱི་ལག་ཏུ་སྦྱིན། མ་བྱས་ན་ཉེས་བྱས། རྐུན་པོ་ལ་འཇིགས་པའི་ཕྱིར་བསྡིགས་མོ་བྱོས་ཤིག །གཙུག་ལག་ཁང་དུ་རྐུན་པོ་འོངས་ན་འདུས་ཏེ་སྒྲ་བསྐྱེད་དེ་ལྷུང་བཟེད་དང༌། རྐུན་འདི་དང་ཡི་གེའི་པོ་ཏི་ལ་སོགས་པ་ལོང་ལ་རྒྱོབ་ཅེས་བསྡིགས། གཎྜཱི་ལ་སོགས་པས་མ་ཕོག་པར་འཕོངས་ཤིག །རྐུན་པོ་ལ་མ་ཕོག་པ་ཙམ་དུ་གཎྜཱི་ལ་སོགས་པ་འཕོངས་ལ་བསྡིགས་མོ་གྱིས་ཤིག །རླུང་ཕྱོགས་
སུ་སའམ་ཐལ་བས་གང་བའི་གྱོ་མོས་སོ། །རྐུན་པོ་འོངས་ན་རླུང་ག་ལས་ལངས་པའི་ཕྱོགས་ནས་ཐལ་བ་དང༌། ས་ལ་སོགས་པས་གཏོར་ཏེ་མིག་ཏུ་སོང་བར་བྱ། ཆོངས་ཤིག་འུར་རྡོ། །རྐུན་པོ་ལ་བསྡིགས་པའི་ཕྱིར་འུར་རྡོ་བཅངས་ཀྱང་ཉེས་མེད། ངལ་བའི་དགེ་སློང་ལ་མི་ཕུལ། མི་ཕ་སྤད་གཉིས་ཤིག་ཐར་བར་ཞུགས་པ་ལས་འཇོ་ཏ་བ་ནི་ལྷ་ཁང་ན་གདུགས་ཚོད་ཀྱི་གཎྜཱི་བརྡུང་བ་མི་སླེབ་པའི་ཕྱིར་ཕ་རྒན་པ་འགྲོ་མི་ཕོད་པ་བུས་ཕུལ་ཞིང་ཁྲིད་བ་ལས་བུ་བ་སྟེ་ཤི་བ་ལས་བཅས་ཏེ་དེ་ལྟར་བྱས་ན་ཉེས་བྱས། མགོན་དང་བཅས་པར་བྱ། དགེ་སློང་ནད་པའམ་རྒན་པོ་འགྲོ་མ་ཕོད་པ་ཞིག་ཁྲིད་ན་ལུས་ཀྱི་རིམ་གྲོ་ལུས་བསྟི་པ་དང་མཉེ་བ་ལ་སོགས་པ་རིམ་གྲོ་བྱ། ངལ་སོར་གཞུག །དགེ་སློང་ནད་པའམ་རྒན་པོ་དེ་འགྲོ་མི་ཕོད་ན་ངལ་སོར་གཞུག་ཅིང་བཀྲི། སྣོད་དག་བླང༌། དགེ་སློང་ནད་པ་འགྲོ་མི་ཕོད་པ་དེའི་ལྷུང་བཟེད་དང༌། ཆོས་གོས་དང་རྫས་ལ་སོགས་པ་བདག་གིས་ཁུར། འོན་ཏེ་ལྷན་ཅིག་ཏུ་གནས་སུ་ཟས་དང་སྐོམ་གྱི་དུས་སུ་འགྲོ་མི་ནུས་ན་ཡང་ངོ༌། །ནད་པ་རྒན་པོ་དང་འགྲོགས་ཏེ་གདོང་དུ་ཕ་རོལ་གྱི་གནས་སུ་གདུགས་ཚོད་དག་མི་སླེབས་ན་བདག་སྔར་སོང་ཡང་ཉེས་མེད། ལྷུང་བཟེད་བཀྲུ། བདག་སྔར་གནས་སུ་འོངས་ནས་ནད་པ་ཕྱིས་འོང་བའི་ལྷུང་བཟེད་དང་སྣོད་སྤྱད་ལ་སོགས་པ་བཀྲུ། གྲལ་ལ་གཞག །རྒན་པོ་ཕྱིས་འོང་པའི་གྲལ་ཐབས་གར་བབ་པ་གཞག །བྱིན་ལེན་བྱ། ཟས་བྲིམས་ན་རྒན་པོ་ཕྱིས་འོང་བའི་ཟན་སྐལ་མནོས་ཏེ་བྱིན་ལེན་བྱ། བརྟག་རྒན་པོ་ཕྱིས་འོང་བའི་ཟན་སྐལ་ལ་ཤང་ཙེ་ལ་སོགས་པ་བརྟག་དགོས་པ་ཡོད་ནའང་བརྟག །འོན་ཏེ་དུས་སུ་ན་ཁྱེར་ཏེ་བསུ། རྒན་པོ་ཕྱིས་འོང་བས་གདུགས་ཚོད་མི་སླེབས་པ་ཙམ་གྱི་ཚོད་ན་ཟན་སྐལ་མནོས་ལ་གར་ཕྲད་ཕྲད་དུ་བསུ། གསོད་པའི་ཕས་ཕམ་པ་སྟེ་རྣམ་པར་འབྱེད་པའོ། །གསོད་པའི་ཕས་ཕམ་པ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།མིའི་རྒྱུད་ཀྱི་ལག་པ་བཅད་ན་སྦོམ་པོའོ། །མིའི་རྒྱུད་དུ་གཏོགས་པའི་སེམས་ཅན་གསོད་སེམས་མེད་པར་ལག་པ་བཅད་ན་སྦོམ་པོའོ། །དེ་བཞིན་དུ་རྐང་པ་དང་ལག་པ་དང་རྐང་ལག་གི་སོར་མོ་
བཅད་ཀྱང་སྦོམ་སྟེ་བྲམ་ཟེ་གཅིག་ཅིག་གིས་དྲུག་སྡེ་ཨུ་པ་ནན་དའི་སླད་དུ་རྒྱུག་པ་གཅིག་བསྣུན་ནས། ཨུ་པ་ནན་དས་རྒྱལ་པོ་ལ་གསོལ་ཏེ་བྲམ་ཟེ་ལ་སྨྲས་པ་དང་བསྙོན་ཏེ་ཁུངས་མ་ཕྱིན་ནས་བྲམ་ཟེ་ལྔ་བརྒྱ་འམ་གཅིག་རིལ་གྱིས་ལག་པ་བཅད་པ་ལས་བཅས། གསོད་སེམས་མེད་ན་ལག་པ་བཅད་པ་ཤི་ཡང་སྦོམ་པོའོ། །སྤན་སྤུན་དུ་མེ་བཏང་ནའོ། །རྩི་ཤིང་ལ་སོགས་པ་སྤན་སྤུན་དུ་མེ་བཏང་སྟེ་སེམས་ཅན་ཡོད་པར་ཤེས་བཞིན་ན་སེམས་ཅན་རེ་རེ་ལྷུང་བ་རེ་རེ་སྤྱིར་སྦོམ་པོ་གཅིག །ལྷ་དང་འདྲེ་ཡོད་པར་ཤེས་ཏེ་བཏང་ན་སྦོམ་པོ་གཉིས་སུ་འགྱུར་རོ། །མི་ཡོད་པར་ཤེས་ཏེ་བཏང་ན་ཕམ། སྐྲ་ཅན་བཙོངས་ན་ཡང་ངོ༌། །མི་བདག་དབང་བ་བཙོང་བར་དགའ་སྟེ་བཙོངས་ནའང་སྦོམ་པོ། གང་གིས་བརྐུས་པ་རྒྱལ་པོའི་འཁོར་དུ་བཏད་ན་ཡང་ངོ༌། བདག་གི་རྫས་རྐུན་པོས་ཁྱེར་བ་ལས་རྐུན་པོ་བཟུང་སྟེ་ནོར་སླར་དགུག་པའི་ཕྱིར་གསད་དམ་མི་གསད་གཏོལ་མེད་པར་རྒྱལ་པོ་ལ་ཕུལ་ན་སྦོམ་པོ། གསོད་པར་ཤེས་བཞིན་དུ་རྒྱལ་པོ་ལ་ཕུལ་ཏེ་བསད་ན་སྦོམ་པོ་དང་ཕམ་པ་གཉིས་ཀ་ཡོད། གསོད་པའི་ཕས་ཕམ་པ་ཕྲན་ཚེགས་སུ་གཏོགས་པའོ། །མི་ལ་གསོད་པའི་ཕས་ཕམ་པ་འདུལ་བ་ཕྲན་ཚེགས་ཞེས་བྱ་བའི་ནང་ནས་འབྱུང་བའི་མདོ།། །།སྟོན་པར་བསྒོ་བའོ། །གསད་པའི་མི་ཞིག་བྲོས་ཏེ་ཡིབ་པ་དགེ་སློང་གིས་མཐོང་སྟེ། སྙེགས་མ་མི་འོངས་ནས་འདྲི་ན་གསད་པར་ཤེས་ཏེ་བསྙད་ན་སྦོམ་པོ། བསྟན་པ་ལས་བཟུང་སྟེ་བསད་ན་ཕམ་མོ། །དཔེར་མའི་མངལ་ལོ། །གསོད་པའི་མི་ལྔ་དྲུག་གཅིག་བྲོས་ཏེ་ཡིབ་པ་ལས་སྙགས་མ་མི་འདྲི་སྟེ། བདག་དང་མི་མཛའ་བ་གར་ཡིབ་པ་བསྟན་པ་ལས་གཞན་ཞིག་ཟིན་ཏེ་གསད་ན་སྦོམ་པོ། སྦོམ་པོ་ནི་བདག་གསོད་པའོ། །དགེ་སློང་བདག་གིས་བདག་བསད་ན་སྦོམ་པོ། ལུང་དུ་མ་བསྟན་པའི་སེམས་ཀྱིས་མི་དགེ་བར་བྱས་ན་ཉེས་བྱས་པའོ། །བསད་པའམ་རྡེག་པའམ་གཞུ་བའི་སེམས་མེད་པར་ཁ་ནས་བྱུང་རྒྱལ་དུ་འུ་ནི་གཞུས་སོད་རྡེགས་ཞེས་བྱས་ན་ཉེས་བྱས། གསོད་སེམས་མེད་པར་རྡོ་བོར་བ་ལ་སོགས་པའི་ཁར་མི་ལ་སོགས་པ་ཤིའང་ཉེས་བྱས། མ་
དམིགས་པའི་ཕྱིར་གྲུབ་པ་མི་བྱ། གསད་སེམས་མེད་པར་རྩེད་མོ་ལ་སོགས་པ་ལྟ་བུ་བྱས་ཏེ་ཤི་ན་ཉེས་བྱས། ཚེ་རབས་སུ་ལས་མི་འབྱུང་ངོ༌། །མི་གསད་པའི་མཚོན་ཆ་ལ་སོགས་པས་བཏབ་སྟེ། འཕྲལ་དུ་མ་ཤི་སྟེ་བདག་སྔོན་དུ་ཤི་ལ་མཚོན་གྱིས་བཏབ་པའི་མི་དེ་ཉིད་ཀྱི་ལན་བོན་གྱིས་ཕྱིས་ཤི་ནའང་ཕམ་པ་མེད་དེ་སྦོམ་པོར་ཟད་དོ། །གསོད་པའི་ཕས་ཕམ་པ་དྲིས་པ་འདིར་གཏོགས་པའོ། །མི་ལ་གསོད་པའི་ཕས་ཕམ་པ་སྟེ་འདུལ་བའི་སྡེ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།སྦོམ་པོ་ནི་བདག་འཆི་བ་འདི་ལྟར་འགྱུར་རོ་ཞེས་སྨྲ་བ་ནི་ཡིད་མི་ཆེས་ཏེ་དེ་ལྟར་གྲུབ་ནའོ། །ནད་པ་ཚབས་པོ་ཆེ་སྨན་དཔྱད་བྱ་བའི་ཕྱིར་ལོངས་ཞེས་བསླངས་པ་ལས་ནད་པ་ན་རེ་ང་བསླང་ན་འཆིའོ་ཞེས་ཟེར་བ་བཞིན་དུ་བསླང་ན་ཤི་ཡང་རུང་མ་ཤི་ཡང་རུང་སྦོམ་པོ། དགེ་སློང་ནད་པ་ཞིག་ཚབས་ཆེ་ཞིང་འདུག་པ་ལ་ནད་གཡོག །དགེ་སློང་ཞིག་གིས་སྨན་དཔྱད་བྱ་བའི་ཕྱིར་བསླངས་ནས་ནད་པ་ན་རེ་བསླང་ན་ནི་གདོན་མི་ཟ་བར་འཆིས་ཞོག་ཤིག་ཅེས་ཟེར་བ་ལས་མ་གནང་སྟེ། བསླང་བ་དང་ནད་པ་ཤི་ནས་ནད་གཡོག་ཕམ་པར་གྱུར་སྙམ་ཐེ་ཚོམ་ཟོས་ཏེ། །སངས་རྒྱས་ལ་གསོལ་པ་དང༌། ཕམ་པ་མ་ཡིན་ཏེ་སྦོམ་པོའོ་ཞེས་བཅས། ཤི་ཤིག་པར་ནད་པ་ལ་གཡོག་མ་བྱས་ནའང་སྦོམ་པོ། དགེ་སློང་ནད་པ་ལ་ནད་གཡོག་སུ་བྱེད་པར་དེ་ལྟར་གསོས་ཀྱང་མ་སོས་ན་ཤིང་ཟད་མོད་ཅེས་བསམས་ཏེ། ནད་གཡོག་མ་བྱས་པར་བོར་ན་ཤིའང་རུང་མ་ཤིའང་རུང་སྦོམ་པོ། མི་འཇུ་བའི་ཟས་བྱིན་ན་ཡང་ངོ༌། །མི་ནད་པ་རླུང་ནད་ན་བ་ལ་རླུང་ནད་ཆེ་བའི་ཁ་ཟས་བྱིན་པ་དང༌། ཚ་བ་ལ་དྲོད་ཆེ་བའི་ཁ་ཟས་མི་རུང་བར་ཤེས་བཞིན་དུ་གསོད་སེམས་མེད་པར་བྱིན་ཀྱང་སྦོམ་པོ། དགེ་སློང་ནད་པ་ཞིག་ལ་ནད་གཡོག་གིས་ཟན་ཅི་བསོད་ཅེས་དྲིས་པ་དང༌། ནད་པ་ན་རེ་སྡུན་ན་བའི་ཆེ་སྐྱུར་པོའི་ནང་དུ་ལན་ཚྭ་བཏབ་སྟེ་འཐུངས་ན་ཕན་གྱིས་བྱིན་ཅིག་ཅེས་ཟེར་བ་ལས། ནད་དེ་རླུང་ནད་ཡིན་ཏེ་སྐྱུར་པོ་དང་ལན་ཚྭ་མི་རུང་བར་བྱིན་པ་ལས་ཤི་བའི་ཕྱིར་བཅས། ཕོལ་མིག་མ་སྨིན་པར་བརྟོལ་ན་ཡང་ངོ༌། །ཕོལ་མིག་འབྲས་ལྟ་བུ་འོག་མ་བྱུང་ཞིང་མ་སྨིན་པར་བརྟོལ་ན་སྦོམ་པོ། དགེ་སློང་གཅིག་ཅིག་འབྲས་བྱུང་སྟེ་མ་
སྨིན་པ་ལ། དགེ་སློང་གཅིག་གིས་བརྟོལ་ཞེས་བྱས་པ་དང༌། མ་སྨིན་གྱིས་མ་བརྟོལ་ཞེས་ཟེར་བཞིན་དུ་མ་གནང་སྟེ། བརྟོལ་ནས་ཤི་བ་ལས་བཅས་ཏེ་མ་བརྟོལ་ཞེས་ཟེར་བ་བརྟོལ་བ་དང༌། བདག་གི་ཕོལ་མིག་མ་སྨིན་པ་བརྟོལ་པའང་སྦོམ་པོ། རླུབས་སུ་འཇུག་པ་དང་སྒོ་ཕྲག་ཏུ་འཚིར་བས་གནོད་པར་བྱེད་པ་ལ་སོགས་པ་ཡང་ངོ༌། །གསད་སེམས་མེད་པར་རླུབས་སུ་བཅུག་སྒོ་ཕྲག་ཏུ་བཙིར་བ་ལ་སོགས་པ་རྩེད་མོའི་ཕྱིར་ཉོན་མོངས་པར་བྱས་པ་དང༌། ཆེད་གར་ནན་ལ་བོར་བ་མཚུངས་ཏེ་སྦོམ་པོ། གཙུག་ལག་ཁང་གཉིས་ཀྱི་བར་ན་དགེ་བསྙེན་གཏུམ་པ་ཞིག་འདུག་པ་ལས་གཙུག་ལག་ཁང་གཅིག་གི་དགེ་སློང་ལ་རྟག་ཏུ་ཤིང་རྟོག་འབུལ་འབུལ་བ་ལས་དགེ་འདུན་ལྟ་མཚུངས་མོད་ཅེས། གཙུག་ལག་ཁང་གཅིག་གི་དགེ་འདུན་ལ་ཡང་ཕུལ་ལོ། །དེ་ནས་ཡང་སྔོན་འབུལ་འབུལ་བའི་དགེ་སློང་ལ་འབུལ་དུ་སོང་སོང་བ་ལས། དགེ་སློང་དེ་དག་གིས་ཁྱོད་ལྟ་ཤིང་ཏོག་གུད་དུ་འབུལ་འབུལ་ཞེས་སྒོ་ཕྲག་ཏུ་བཙིར་བ་ལས་བཅས་ཏེ་སྦོམ་པོ། གཡང་དུ་འདོར་བ་དང་འགེག་པ་ལ་སོགས་ཏེ་འཆི་བའི་ཕྱིར་རྩོལ་བ་ཡང་ངོ༌། །བདག་འཆི་བའི་ཕྱིར་གད་ཀ་དང༌། བྲག་ཀ་དང༌། མཚོན་ཀ་དང༌། ཆུའི་ནང་དུ་མཆང་བར་བརྩལ་ཏེ་མ་ཤི་བ་ཡང་སྦོམ་པོ། གཞན་ལའང་དེ་ལྟ་བུ་ཤི་ན་རུང་ངོ་ཞེས་བསྟན་ཏེ་མ་ཤི་ན་སྦོམ་པོ་ཤི་ན་ཕམ། ན་བའི་ཕྱིར་བབ་ཆོལ་དུ་མཚོན་ཏམ་ཐེག་བུ་མི་སྦྱིན། དགེ་སློང་ནད་པའི་དྲུང་དུ་མཚོན་ཆ་འམ་ཐེག་བུ་ལ་སོགས་པ་འཆི་བའི་ཡོ་བྱད་མི་གཞག ། གསད་སེམས་མེད་ཀྱང་གཞག་ན་ཉེས་བྱས། ཤེས་བཞིན་དུ་གཏོགས་པར་བྱ། ནད་པའི་སྨན་དང་ཟས་ལ་སོགས་པ་ལ་ཚོས་སམ་མ་ཚོས་པ་དང༌། སྒ་སྤོད་བྲོའམ་མི་བྲོ་བ་ལ་སོགས་པ་སྔ་ནས་ཤེས་བཞིན་དུ་ཞལ་ཏ་བྱ། བདག་དང་དགེ་འདུན་གྱི་ལས་ཅེ་བྱེད་ཀྱང་རུང་སྟེ་ཉེས་པར་འགྱུར་རམ་མི་འགྱུར་ཤེས་བཞིན་དུ་བརྟག་སྟེ་བྱ། དེ་ལྟར་མ་བྱས་ན་ཉེས་བྱས་སྔགས་ཀྱི་ཕྱིར་ཐལ་མོས་བསྣུན་ན་ཡང་ངོ༌། །ནད་པ་ལ་སྔགས་གདབ་པ་ལ་སོགས་པ་ཐལ་མོས་བཏབ་དགོས་པ་ཞིག་ཡོད་ན་ཡང་མི་དྲག་པར་ཤེས་བཞིན་དུ་བྱ། ཤེས་བཞིན་དུ་མ་བྱས་ན་ཉེས་བྱས། བརྣངས་པ་ལ་
འབྱུང་བའི་ཕྱིར་བརྡེག་པ་ཡང་ངོ༌། །ཁ་ཟས་ཀྱིས་བརྣངས་ཏེ་ལྟག་པར་བརྡེག་དགོས་ནའང་མི་དྲག་པར་རན་པར་ཤེས་བཞིན་དུ་བྱ། གསོད་སེམས་མེད་པར་ཤེས་བཞིན་དུ་མི་བྱས་པར་ཤི་ན་ཡང་ཉེས་བྱས། སྦབ་ཏུ་གཏང་ན་དེ་བཞིན་དུ་རབ་ཏུ་བརྟགས་ཏེའོ། །ཤིང་དང་རྡོ་ལ་སོགས་པ་སྦབ་ཏུ་བཏང་དགོས་ན་ཡང་སེམས་ཅན་ལ་སོགས་པ་ཡོད་དམ་མེད་པ་བརྟགས་ཏེ་བཏང་ངོ༌། །མ་བརྟགས་ན་ཉེས་བྱས། ཁུར་ཆེན་པོ་ལ་ཆ་ཉུང་དུས་བརྩལ་བར་མི་བྱ། བདག་གི་རྫས་ལྟ་བུ་ཁུར་ཆེན་པོ་ལྕི་བ་ལ་མི་ཐེག་བཞིན་དུ་མི་ཉུང་དུས་མི་བསྐུར་སྤྱིར་བོ་བཀུག་སྟེ་མི་འགྲོ། །སྤྱི་བོར་ཐུར་དུ་བཀུག་སྟེ་ལག་འགྲོས་མི་བྱ་དགུ་སྟེ་སྤྱི་བོ་བཀུག་ལའང་མི་འགྲོ་ལག་འགྲོས་ནི་དྲུག་སྡེ་གཅིག་རྐང་པ་བཀྲུས་པ་རྡུལ་གྱིས་མི་རེག་པར་བྱ་བ་དང་རྩལ་ངོམ་པའི་ཕྱིར་ལག་འགྲོས་བྱས་པ་ལས་བཅས། སྤྱི་བོ་བཀུག་པ་ན། དགེ་སློང་གཅིག་སྤྱི་བོ་བཀུག་སྟེ་སོང་སོང་བ་ལས་ལུག་གིས་བརྡུང་བ་ལས་བཅས། མ་བསླབས་པས་བསླབས་པར་མི་བསྒོའོ། །བདག་གཏར་དཔྱད་ལ་སོགས་བ་མ་བསླབས་ཤིང་མི་ཤེས་པར་གཞན་ལ་འདི་ལྟར་ཐོབ་ཤིག་ཅེས་ཀྱང་མི་བསྒོ་བདག་ཉིད་ཀྱིས་ཀྱང་མི་གདབ། བཏབ་ཅིང་བཅོས་ན་ཉེས་བྱས། གདབ་པ་འཕེན་པར་མི་བསྒོ། །མདའ་དང་མདུད་དང་རྡོ་ལ་སོགས་པ་ལྟད་མོ་ལྟ་བའི་ཕྱིར་ཡང་འཕེན་དུ་མི་གཞུག་ཐབས་བསླབ་པའི་ཕྱིར་ཡང༌། འདི་ལྟར་ཕོངས་ཞེས་ཀྱང་མི་བསྒོ། །ནད་པ་མི་ནུས་པ་ལས་མི་བཀྲི། ནད་པ་འགྲོ་མི་ནུས་པ་དང༌། མི་ནའང་དལ་ཞིང་ཉལ་ཉལ་བའི་མི་ལམ་དུ་ན་བར་འགྱུར་བ་མི་བཀྲི་ཁྲིད་ན་ཉེས་བྱས། གསོད་པའི་ཕས་ཕམ་པ་སྟེ་རྣམ་པར་གདོན་མི་ཟའོ། །མི་ལ་གནོད་པའི་ཕས་ཕམ་པ་སྟེ་འདུལ་བའི་སྡེ་རྣམ་པར་གདོན་མི་ཟ་བ་ཞེས་བྱ་བའི་ནང་ནས་འབྱུང་བའི་མདོ། གསོད་པའི་ཕས་ཕམ་པ་རྫོགས་སོ། །མི་ལ་གསོད་པའི་ཕས་ཕམ་པ་འདུལ་བ་སོ་སོའི་ནང་ནས་འབྱུང་བའི་མདོ་རྫོགས་སོ།། །།བརྫུན་པའི་ཕས་ཕམ་པ་ལ་འཆད་དེ། འདུ་ཤེས་སྦ་སྟེ། བདག་གེ་སེམས་ལ་མེད་དེ་མི་ཤེས་བཞིན་པ་དང༌། འོག་ནས་ཡན་ལག་བཞི་འབྱུང་བ་དང་ལྔ་ལྡན་ན་བརྫུན་གྱི་ཕས་ཕམ་པའོ། །བླ་མ་མིའི་ཆོས་ཀྱི་དང༌། བླ་མ་མིའི་ཆོས་ལ་སྨྲ་བ་དང༌།
ལྡན་པ་ལྡན་པ་ཞེས་དང༌། བདག་ལ་བདག་གི་ཕྱིར་དང༌། སྨྲས་ནའོ། །ཕ་རོལ་བརྡ་ཕྲད་པ་ལ་སྨྲས་པ་དང་འདི་ལྔ་དང་ལྡན་ན་ཕམ། མཐོང་ངོ༌། །བདག་གིས་ལྷ་དག་མཐོང་ངོ༌། །བདག་ཀྱང་མཐོང་ངོ༌། །ལྷ་དག་གིས་ཀྱང་བདག་མཐོང་ངོ༌། །སྒྲ་ཐོས་ལྷ་དག་གི་སྒྲ་བདག་གིས་ཐོས་བདག་གི་ཡང་ཐོས། བདག་གི་སྒྲ་ཡང་ལྷ་དག་གིས་ཐོས། ཉེ་བར་འགྲོ་།ལྷ་དག་གི་གན་དུ་བདག་ཀྱང་ཉེ་བར་འགྲོ། །བདག་གན་ཉེ་བར་འོང༌། ལྷ་དག་ཀྱང་བདག་གི་གན་དུ་ཉེ་བར་འོང༌། ལྷན་ཅིག་ཏུ་གཏམ་བྱས། ལྷ་དག་དང་བདག་ལྷན་ཅིག་ཏུ་གཏམ་བྱས། གཏམ་ཀུན་བྱས། ལྷ་དག་དང་ལྷན་ཅིག་གཏམ་ཀུན་ཞིབ་ཏུ་རྒྱུས་ནས་བཤད། ཀུན་མགུ་བ་ལྷ་དག་གིས་ཀྱང་བདག་མགུ་བར་བྱས་བདག་གིས་ཀྱང་ལྷ་དག་མགུ་བར་བྱས། རྟག་ཏུ་ཡང་ལྷན་ཅིག་ཏུ་བདག་དང་སྤྱོད་ཅིང་ཞེས་སྨྲས་ན་དེར་འགྱུར། བདག་དང་ལྷ་དག་རྟག་ཏུ་ལྷན་ཅིག་ཏུ་འགྲོགས་ཤིང་སྤྱོད་དོ་ཞེས་སྨྲས་པ་དང་ཚིག་གི་རིམ་པ་མིང་གིས་སྨོས་པ་འདི་རྣམས་གང་སྨྲས་ཀྱང་རུང་སྟེ། མདོ་འོག་མ་ལྷ་དང་ཀླུ་ལ་སོགས་པ་མིང་གིས་སྨོས་པ། གང་ལ་ཡང་རུང༌། དེ་དང་འདི་ལྟར་སྨྲས་ཤིང་བྱས་སོ་ཞེས་སྨྲས་ན་ཕས་ཕམ་པའོ། །ལྷ་འཕྲུལ་ཞིང་རིམ་པར་གནས་པ་དང་འཕྲུལ་མེད་ཅིང་ས་ལ་གནས་པ་ཀླུ་ཕྱུགས་ཀྱི་ཁམས་སུ་གཏོགས་མོད་ཀྱི་འཕྲུལ་ཡོད་ཅིང་ཆེ་བ་ལ་བྱ། གནོད་སྦྱིན་འཕགས་སྐྱེས་པོ་ལྟ་བུ་ཆེན་པོ་དང་ཕལ་ལ་བྱ། དྲི་ཟ་ལྔ་ཕུད་པར་མིའི་དྲི་ཟ་དང་ལྷ་ལ་རོལ་མོ་བྱེད་ཅིང་འཁོར་བ། མི་འམ་ཅི་ལུས་མི་ལ་མགོ་རྟ་དང་སྦྲུལ་དུ་འདུག་པ་ལྟོ་འཕྱེ་ཆེན་པོ་གསུས་པ་ཆེ་ལ་རྐང་ལག་ཐུང་ལ་སྦོམ་པོར་འདག་པའི་གཟུགས་ཤིག་ཡོད་པ། ཡི་དགས་འདྲེ་དང༌། ཤ་ཟ་མི་ལ་ཀྱལ་ཀ་བྱེད་པ་དེད་དཔོན་ནམ་ཐེའུ་རང་ལྟ་བུ་རིལ་བུམ་ལུས་གཟུགས་རིལ་རིལ་པོ་འམ་ཟླུམ་པོ་ཞིག་ཡོད་པ། ལུས་སྲུལ་པོ་དག་ལ་དམིགས་པའོ། །ལུས་སྲུལ་པོ་ལ་སོགས་པ་མིང་གིས་སྨོས་པ་འདི་རྣམས་གང་ཡང་རུང་སྟེ། མདོ་ལྟག་མའི་ནང་ནས་འབྱུང་བ་གཅིག་དང་ལྡན་པར་བྱས་སོ་ཞེས་སྨྲས་ན་ཕམ་པའོ། །མུར་འདུག་གི་རྫུ་འཕྲུལ་ལྔ་ལྟ་བུ་ཤེས་སོ་ཞེས་བྱས་ན་ཡང་ཕམ་པའོ། །སྦོམ་པོར་བྱེད་པ་ནི་ཕྱག་དར་ཁུང་ན་གནས་ཤིང་ཆུབ་མར་
བརྫུ་ནུས་པ་ཞིག་ཡོད་དེ་མཐོང་ཞེས་བྱས་ནའང་སྦོམ་པོ། །མི་རྟག་པ་ལ་སོགས་པའི་འདུ་ཤེས་དང༌། འདི་མན་ཆད་ནི་བླ་མའི་ཆོས་ལ་འཆད་དེ་མི་རྟག་པ་ནི་ཉི་ཤུ་སྟེ་ཆོས་ཐམས་ཅད་མི་རྟག་པ་དང༌། སྡུག་བསྔལ་པ་དང༌། ང་མེད་པ་དང་ཟས་ལ་མི་གཙང་བ་དང་རྒྱུད་ལྔ་སྡུག་བསྔལ་བ་དང་ལྔ་ཕུང་འདུག་པ་དང་མྱ་ངན་སྤངས་པ་དང༌། འདོད་ཆགས་དང་བྲལ་བ་དང་འགོག་པས་ཁྱེགས་པ་དང༌། ཚེ་ཟད་པའི་དུས་ཤེས་པ་དང༌། མི་གཙང་བར་ཤེས་པ་དང༌། རྣམ་པར་བསྔོས་པ་དང༌། རྣམ་པར་རྣགས་པ་དང༌། རྣམ་པར་དམར་བ་དང༌། རྣམ་པར་བམ་པ་དང༌། རྣམ་པར་ཞིགས་པ་དང༌། རྣམ་པར་ཟོས་པ་དང༌། རུས་པར་དཀར་བ་དང༌། རུས་མིག་འབྲེལ་བ་དང་ཉི་ཤུ་སྟེ། འདི་ཉི་ཤུ་གང་ཡང་རུང་མི་ཤེས་ཤིང་མེད་ལ་ཤེས་ཤིང་ལྡན་ནོ་ཞེས་སྨྲས་ན་བླ་མའི་ཆོས་སྨྲས་པ་ཡིན་ཏེ་ཕམ་མོ། །བསམ་གཏན་དང༌། འཇིག་རྟེན་གྱི་བསམ་གཏན་རྟོག་པ་དང་དགའ་བ་དང་བདེ་བ་དང་བཏང་སྙོམས་བཞི་དང་འཇིག་རྟེན་ལས་འདས་པའི་བསམ་གཏན་གྲུབ་པོ་ཞེས་སྨྲས་པ་དང༌། མུར་འདུག་གི་བསམ་གཏན་རྟོག་པ་དང་བདེ་བ་དང༌། དགའ་བ་དང་བཏང་སྙོམས་བཞི་གྲུབ་པོ་ཞེས་སྨྲས་ན་ཕམ་མོ། ཚད་མེད་པ་དང༌། ཚད་མེད་པ་བཞི་སྟེ་བྱམས་པ་དང༌། སྙིང་རྗེ་བ་དང༌། དགའ་བ་དང༌། བཏང་སྙོམས་བཞི་སྤྱོད་ནུས་སོ་ཞེས་སྨྲས་པ་དང༌། གཟུགས་མེད་པ་དང༌། འཇིག་རྟེན་གྱི་བསམ་གཏན་བཞི་པའི་འབྲས་བུ། ནམ་མཁའ་མཐའ་ཡས་འདུ་མཆེད་སྟེངས་དང༌། རྣམ་ཤེས་མཐའ་ཡས་འདུ་མཆེད་སྟེངས་དང༌། ཅུང་ཟད་མེད་པའི་འདུ་མཆེད་དང༌། འདུ་མཆེད་མེད་མིན་འདུ་མཆེད་སྟེངས་བཞི་གྲུབ་པོ་ཞེས་སྨྲས་པ་དང༌། འབྲས་བུ་དང༌། དགྲ་བཅོམ་པའི་རིམ་པ་རྒྱུན་དུ་ཞུགས་པ་དང༌། ལན་ཅིག་ཕྱིར་འོང་བ་དང་ཕྱིར་མི་འོང་བ་དང༌། དགྲ་བཅོམ་པ་དང་བཞི་གང་ཡང་རུང་ཐོབ་པོ་ཞེས་སྨྲས་པ་དང༌། མངོན་པར་ཤེས་པ་དང༌། དྲུག་མངོན་པར་ཤེས་པ་སྟེ་འཕྲུལ་དང་འཕྲུལ་གྱི་རྣ་པ་དང༌། ཕ་རོལ་གྱི་སེམས་ཤེས་པ་དང༌། ཚེ་སྔ་མ་དྲན་པ་དང་ཕྱི་མ་གར་སྐྱེས་པ་ཤེས་པ་དང་ཟག་པ་ཟད་པ་དང༌། དྲུག་གང་ཡང་རུང་སྨྲས་པ་དང༌། མུར་འདུག་གི་འཕྲུལ་ལྔ་སྟེ་ཟག་པ་ཟད་པ་མ་གཏོགས་པར་མིང་གོང་དུ་སྨོས་པ་དང་མཐུན་ཏེ་
སྨྲས་པ་དང༌། སྩོགས་པ་བླ་མའི་ཆོས་སོ། །ལྟག་ཏུ་མིང་གིས་སྨོས་པ་འདི་རྣམས་གང་ཡང་རུང་སྟེ། གཅིག་དང་ལྡན་ནོ་ཞེས་སྨྲས་ན་ཕམ་མོ། །འདི་རྣམས་ནི་བླ་མའི་ཆོས་ཞེས་བྱ་སྟེ་མུར་འདུག་གི་ཞེས་སྨོས་པ་ཡང་བླ་མའི་ཆོས་ནི་མ་ཡིན་མོད་ཀྱི་ལྡན་ནོ་ཞེས་སྨྲས་ན་ཕམ་མོ། །སྦོམ་པོར་བྱེད་པ་ནི་ཉིད་ཀྱི་མཚན་འཛིན་པས་མྱ་ངན་སེལ་བ་ཞི་གནས་ཀྱི་མཚན་ཞེས་བྱའོ། །དགོན་པ་བསམ་གཏན་བྱེད་ཅིང་འདུག་འདུག་པ་ལས་སེམས་ཞི་སྟེ་འདོད་ཆགས་བག་ལ་ཉལ་བ་ལ་འདོད་ཆགས་དང་བྲལ་ཏེ་མྱ་ངན་ཟག་པ་ཟད་དོ་སྙམ་བསམས་ན་འདོད་ཆགས་དང་བྲལ་ལོ་ཞེས་སྨྲས་པའི་འོག་ཏུ་བུད་མེད་མཐོང་བའི་རྐྱེན་གྱིས་འདོད་ཆགས་བྱུང་བ་ནི་སེམས་ལ་དྲང་པོར་འདོད་ཆགས་དང་བྲལ་ལོ་སྙམ་དུ་བསམས་པས་སྦོམ་མོ། །མཉེན་པ་ལྔ་བརྒྱ་ཐར་པར་ཞུགས་པས་མྱ་ངན་འདའ་བའི་ཆོས་མཁན་པོ་ལ་ལུང་ནོས་ཏེ་དབེན་པར་དོང་ནས་བསམ་གཏན་དུ་བསྒོམས་པས་སེམས་ཞི་སྟེ། འདོད་ཆགས་བག་ལ་ཉལ་བ་གཅིག་ལ་གཅིག་གཏམ་དུ་བྱས་ཏེ། འདོད་ཆགས་དང་བྲལ་ལོ་ཞེས་ནས། སླར་གྲོང་དུ་ཞུགས་པ་དང་བུད་མེད་མཐོང་བ་དང༌། འདོད་ཆགས་བག་ལ་ཉལ་བ་བསླངས་ནས་འདོད་ཆགས་དང་བྲལ་ལོ་ཞེས་སྨྲས་པ་ཕམ་པར་གྱུར་ཏོ་སྙམ་དུ་ཐེ་ཚོམ་ཟོས་པ་ལས་བཅས། དེ་འདྲ་བ་དེ་ལྟ་བུའི་ཆོས་སྨྲས་ན་མ་སྨྲས་པ་མ་ཡིན་ནོ། །བདག་དགྲ་བཅོམ་པ་ཡིན་པར་གོ་བར་བྱ་བའི་ཕྱིར། དགྲ་བཅོམ་པ་དགོན་པ་ལ་གནས་ན་གནོད་སྦྱིན་དང་ཀླུ་ལ་སོགས་པས་མི་གཙེ་ཞིང༌། སྲུང་མ་བྱས་པ་བཞིན་དུ་ང་ལ་ཡང་དེ་ལྟར་བྱས་ཞེས་སྨྲས་པ་དང༌། ཡོན་བདག་གིས་དགྲ་བཅོམ་པ་ལ་སྟན་དང་ཁ་ཟས་ཀྱིས་ཇི་ལྟར་མཆོད་པ་བཞིན་དུ་ང་ལ་ཡང་དེ་ལྟར་བྱས་སོ་ཞེས་སྨྲས་ནའང་ཕམ་མོ། །འདི་ཡོད་དོ་ཞེས་ཕ་རོལ་ལ་བསྟན་ཏེ་བདག་གི་ཕྱིར་སྨྲས་ན་ཡང་ངོ༌། །བདག་ལ་བྱ་བའི་ཕྱིར་འདི་རྣམས་ཀྱི་ནང་ན་དགྲ་བཅོམ་པ་ཡོད་དོ་ཞེས་སྨྲས་ནའང་སྦོམ་པོ། །དེ་བཞིན་དུ་བླ་མའི་ཆོས་གང་ཡང་རུང་སྟེ་ལྡན་པ་ཡོད་དོ་ཞེས་སྨྲས་ནའང་སྦོམ་པོ། །ཉེ་བར་སྨྲས་ན་མ་ཡིན་ནོ། །མདོ་ལྟག་མ་སྐད་དུ་ཟེར་བ་ལ་གཞན་ཞིག་གིས་དེ་ལྟ་བུར་ལྡན་པ་སུ་ཡིན་ཞེས་དྲིས་ནས། ང་ཡིན་ནོ་ཞེས་སྨྲས་ན་ཕམ།
མ་དགོངས་པར་ལུང་མི་བསྟན། མ་རྟོགས་སམ་ཐོག་ཏུ་མ་ཕེབས་པར་འདི་ཡིན་ནོ་ཞེས་ལུང་མི་བསྟན་བསྟན་ན་ཉེས་བྱས། མཽད་གལ་བསོད་སྙོམས་ལེན་པ་བྲམ་ཟེའི་ཆུད་མ་ལ་བུ་ཡོད་པ་ཞིག་གིས་དྲིས་པ། མངལ་ན་བུ་ཡོད་པ་འདི་ཕོ་ཡིན་ནམ་མོ་ཡིན་ཞེས་དྲིས་པ་དང༌། མཽད་གལ་གྱིས་ཕྱིས་ཅིར་འགྱུར་བ་ནི་མ་བརྟགས་ཀྱི་དེ་ཉིད་ཀྱི་ཚེ། མངལ་ན་ཕོར་འདུག་པ་རྟོགས་ཏེ་ཕོ་ཡིན་ནོ་ཞེས་སྨྲས་པ་དང༌། བུ་མོར་བྱུང་ནས་དྲུག་སྡེས། མཽད་གལ་གྱིས་བརྫུན་བྱས་སོ་ཞེས་བརྒལ་ནས། བརྫུན་མ་ཡིན་ཏེ་མ་དགོངས་པར་ལུང་མ་སྟོན་ཅིག་ཅེས་བཅས། སྨྲ་བ་སྟེ་རྣམ་པར་འབྱེད་པའོ། །བརྫུན་གྱི་ཕས་ཕམ་པ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཐོབ་པ་ལས་བྲིའོ་ཞེས་ཟེར་ན་བླ་མའི་མ་སྨྲས་པ་མ་ཡིན་ནོ། །བླ་མའི་ཆོས་ལས་གང་ཡང་རུང་སྟེ། ངས་ཐོབ་པ་ལས་ང་བྲིས་ཏེ་མེད་དོ་ཞེས་སྨྲས་ན། བླ་མའི་ཆོས་ནི་ཐོབ་པ་ལས་མི་དབྲི་བ་ཡིན་ཏེ། དེ་སྐད་དུ་སྨྲས་པ་ཡང་ཕམ་པའོ། །བླ་མ་འདིར་སྨྲར་འདོད་པས་མིང་གིས་དོན་མཚུངས་པ་སྨྲས་ན་སྦོམ་པོ། བླ་མའི་ཆོས་དང་ལྡན་པའོ་ཞེས་སྨྲ་བར་འདོད་པའི་ཕྱིར་ཤིང་ཏོག་ལག་ན་ཐོགས་ལ། འབྲས་བུ་ཐོབ་ཅེས་ཟེར་བ་དང༌། ཆུ་འབབ་བའི་ནང་དུ་ལག་པ་བཅུག་སྟེ་རྒྱུན་དུ་ཞུགས་སོ་ཞེས་ཟེར་བ་དང་ལེ་ལོ་བྱེད་ཅིང༌། མི་སློབ་པ་ལ་དགྲ་བཅོམ་པ་ལོབས་ཟིན་ཏེ། མི་སློབ་པའི་ཚུལ་དུ་མི་སློབ་པོ་ཞེས་ཟེར་བ་དང་གང་ཟག་གི་རིམ་པ་བདུན་སློབ་པ་ལྟ་བུའི་ཚུལ་དུ་བདག་ཡི་གེའམ། ཁ་ཏོན་སློབ་པ་སློབ་དཔོན་སྨྲས་པ་དང་འདི་རྣམས་གང་སྨྲས་ཀྱང་རུང་སྦོམ་པོ། །ལོག་པ་ཡང་ངོ༌། །བདག་དགྲ་བཅོམ་པ་ཡིན་ནོ་ཞེས་སྨྲ་བར་བསམས་པ་ལས་རྒྱུན་དུ་ཞུགས་པའོ་ཞེས་སྨྲས་པ་ཡང་སྦོམ་པོ། དེ་བཞིན་དུ་བླ་མའི་ཆོས་གང་ཡང་རུང་ནང་ནོར་བར་སྨྲས་པ་སྦོམ་པོ། ཡིད་འཕྲིག་བསྐུར་བ་ཡང་ངོ༌། །ང་དང་འདྲ་ན་རྒྱུན་དུ་ཞུགས་པ་བསྒྲུབ་ཏུ་རུང་ངོ་ཞེས་བདག་ནོར་རྫས་ཤིག་ཐོབ་པར་བྱ་བའི་ཕྱིར། བླ་མའི་ཆོས་དང་ལྡན་པར་ཟུང་དུ་སྨྲས་ལ་ཐོབ་ནས་ལྡན་པ་མ་ཡིན་ནོ་ཞེས་དྲུང་པོར་བྱ་བར་བསམས་ཏེ་ཁྱོད་ཀྱིས་ང་ཙམ་ཕོད་ན་ནི་རུང་ངོ་ཞེས་སྨྲས་ཏེ་འཕྲིག་ཏུ་བཅུག་ན་སྦོམ་པོ། །ཕྱིས་ཡང་དག་པར་ཡང་དེ་མ་སྐྱེས་པ་
མ་ཡིན་ནོ། །མདོ་ལྟག་མ་ལྟར་སྨྲས་པའི་འོག་ཏུ། ངས་དེ་སྐད་དུ་སྨྲས་པ་ནི་བརྫུན་ཏེ་ཡོན་ཏན་དང་ལྡན་པ་མ་ཡིན་གྱི་མ་འཕྲིག་ཤིག་ཅེས་སྨྲས་ཀྱང་སྦོམ་པོར་མི་འགྱུར་བ་མ་ཡིན་ནོ། །སྨྲ་བ་སྟེ་འབྲི་བར་ཆུད་པའོ། །བརྫུན་གྱི་ཕས་ཕམ་པ་སྟེ་འདུལ་བ་དྲིས་པའི་ནང་ནས་འབྱུང་བའི་མདོ།། །།སྦོམ་པོ་ནི་བཙུན་པ་དགྲ་བཅོམ་པ་སྟེ་གོས་ལ་སོགས་པ་མཆོག་རིགས་སོ། །བརྫུན་གྱི་སྦོམ་པོར་འགྱུར་བ་ནི་ཁྱོད་བཙུན་པ་དགྲ་བཅོམ་པ་ཡིན་ཏེ་གོས་དང་ཁ་ཟས་ལ་སོགས་པ་མཆོག་དབུལ་བའི་རིགས་སོ་ཞེས་ཟེར་བ་ལ་དགྲ་བཅོམ་པ་ཡིན་པ་ལྟར་བྱ་བའི་ཕྱིར་མི་སྨྲ་བར་ཁ་རོག་སྟེ་འདུག་ན་སྦོམ་པོ། བྲམ་ཟེ་སྟེ་ཚངས་པར་སྤྱོད་པའི་བཙུན་པའོ་ཞེས་ཟེར་བ་ལ་ཁ་རོག་འདུག་པ་དང༌། སྡིག་པའི་ཆོས་སྤངས་པ། སྡིག་པའི་ཆོས་མི་དགེ་བཅུ་སྤངས་པའོ་ཞེས་ཟེར་བ་ལ་ཁ་རོག་སྟེ་འདུག་པ་དང༌། བཙུན་པའི་དབང་པོ་དྲུག་རབ་ཏུ་འདུལ་བ། མི་རྟག་པ་དང་མི་གཙང་བ་ལ་བསྒོམས་དབང་པོ་དྲུག་རབ་ཏུ་དུལ་ཏེ་ཡུལ་ལ་མི་འབྲོས་པའོ་ཞེས་ཟེར་བ་ལ་ཁ་རོག་སྟེ་འདུག་པ་དང༌། སྦས་པ་དབང་པོ་དྲུག་ཞི་སྟེ་ཡུལ་དྲུག་ལ་བྱེ་བྲག་མི་འབྱེད་པར་འགོག་པའོ་ཞེས་སྨྲ་བ་ལ་མོས་པ་དང་དྲན་པ་ཉེ་བར་གཞག་པ་བསྲུངས་པའོ་ཞེས་བསྲུངས་པ་ཉོན་མོངས་པ་དང་སྡིག་པའི་ཆོས་བསྲུངས་པའོ་ཞེས་ཟེར་བ་ལ་མོས་ཏེ་ཁ་རོག་འདུག་པ་དང༌། སྒོམ་པ་པོའོ། །བཟོད་པ་བསྒོམས་ཤིང་ཟག་པ་ཟད་པའོ་ཞེས་ཟེར་བ་ལ་མོས་ཏེ་ཁ་རོག་འདུག་པ་དང་ཞེས་བྱས་ན་ཁ་རོག་སྟེ་མོས་ནའོ། །འདི་རྣམས་ཀྱི་མིང་གིས་སྨོས་པ་ལ་གང་ཡང་རུང་སྟེ་བསྟོད་ཅིང་སྨྲ་བ་ལ་མོས་ཤིང་ཁ་རོག་འདུག་ན་སྦོམ་པོ། སྨྲས་པ་བཞིན་དུ་ཡིན་ནོ་ཞེས་སྨྲས་ན་ནི་ཕམ། དེ་སྟེ་བཙུན་པ་དགྲ་བཅོམ་པ་ན། མིང་གིས་སྨོས་པ་འདི་རྣམས་ལྟ་བུ་ཞིག་ཏུ་སྨྲ་བ་ལ་དེ་བཞིན་དུ་བྱེད་ཅིང་ཁར་སྨྲས་ན་སྦོམ་པོར་འགྱུར་རོ། །བདག་གི་བསོད་སྙོམས་ལོང༌། ཁྱོད་དགྲ་བཅོམ་པ་ཡིན་ན་བདག་གི་བསོད་སྙོམས་འདི་ལོང་ཞེས་ཟེར་བ་ལ་ཁ་རོག་སྟེ་བླངས་པ་དང༌། ཁྱིམ་དུ་ཞུགས། ཁྱོད་དགྲ་བཅོམ་པ་ཡིན་ན་ངའི་ཁྱིམ་དུ་ཞུགས་ཞེས་ཟེར་བ་ལ་ཁ་རོག་སྟེ་ཁྱིམ་དུ་ཞུགས་པ་དང༌། སྟན་ལ་ཞུགས། ཁྱོད་དགྲ་བཅོམ་པ་ཡིན་ན་སྟན་ལ་འདུག་ཅེས་
ཟེར་བ་ལ་ཁ་རོག་སྟེ་སྟན་ལ་འདུག་པ་དང༌། ལག་ཆུ་ལོང༌། ཁྱོད་དགྲ་བཅོམ་པ་ཡིན་ན་ཆུས་གཏོར་ཏེ། ཕོག་པའི་སེམས་ཅན་ལ་ཡོན་ཡོད་ན་ཆུ་འདི་ལོང་ཞེས་ཟེར་བ་ལ་ཁ་རོག་སྟེ་བླངས་པ་དང༌། མཆོད་རྟེན་ལོང༌། ཁྱོད་དགྲ་བཅོམ་པ་ཡིན་ན་ངའི་མཆོད་རྟེན་འདི་ལོང་ཞེས་ཟེར་བ་ལ་ཁ་རོག་སྟེ་བླངས་པ་དང༌། ཚོད་མ་དང་བཅའ་བ་ཟོ། །ཁྱོད་དགྲ་བཅོམ་པ་ཡིན་ན་ཚོད་མ་དང་བཅའ་བ་འདི་ཟོ་ཞེས་ཟེར་བ་ལ་ཁ་རོག་སྟེ་ཟོས་པ་དང༌། རྗེས་སུ་ཡི་རང་ངོ༌། །ཁྱོད་དགྲ་བཅོམ་པ་ཡིན་ན་ང་ལ་རྗེས་སུ་ཡི་རང་ངོ་ཞེས་ཟེར་བ་ལ་ཁར་སྨྲས་པར་ཡི་རང་བ་དང༌། བྱུང་ཞེས་པ། ཁྱོད་དགྲ་བཅོམ་པ་ཡིན་ན་ངའི་ཁྱིམ་ནས་བྱུང་ཟེར་བ་ལ་ཁ་རོག་སྟེ་བྱུང་བ་དང༌། དེ་དག་བསྒྲུབས་ནའོ། །འདི་རྣམས་ལས་གང་ཡང་རུང་སྟེ་དགྲ་བཅོམ་པ་ཡིན་ན་འདི་ལྟར་བྱོས་ཞེས་ཟེར་བ་ལ་ཁ་རོག་འདུག་ཅིང་ཟེར་བ་བཞིན་དུ་བྱས་ན་སྦོམ་པོའོ། །དགྲ་བཅོམ་པ་བཞིན་དུ་བླ་མའི་ཆོས་གང་ཡང་རུང་སྟེ་སྦོམ་པོའོ། །སྨྲ་བའི་སྟེ་རྣམ་པར་གདོན་མི་ཟ་བའིའོ། །བརྫུན་གྱི་ཕས་ཕམ་པ་རྣམ་པར་གདོན་མི་ཟ་བའི་ནང་ནས་འབྱུང་བའི་མདོ་བླ་མར་སྨྲ་བ་རྫོགས་སོ། །བརྫུན་གྱི་ཕས་ཕམ་པ་འདུལ་བ་སྡེ་སོ་སོའི་ནང་ནས་འབྱུང་བ་རྫོགས་སོ། །ཕས་ཕམ་པ་རྫོགས་སོ། །ཕས་ཕམ་པ་བཞི་བཤད་པ་རྫོགས་སོ།། །།དགེ་འདུན་ལྷག་མའི་ཁུ་བ་ལ་འཆད་དེ། རྨི་ལམ་ནི་མེད་པ་བཞིན་ནོ། །རྨི་ལམ་ན་ཁུ་བ་བྱུང་བ་ནི། བདག་ལ་དབང་མེད་ཅིང་མཐུ་མེད་དེ་བཅོས་སུ་མི་རུང་བའི་སྟེང་དུ་དབྱུང་བར་བསམས་པའི་སེམས་མེད་པས་ཉེས་མེད་དོ། །དེའི་འབྲས་བུ་ནི་མ་བྱས་པའོ། །རྨི་ལམ་ན་ཁུ་བ་བྱུང་བའི་སྡིག་གི་འབྲས་བུའང་མེད་དོ། །རྨི་ལམ་ན་ལོག་པ་བྱས་པའི་འབྲས་བུའང་མེད། འོག་ནས་མིང་གིས་སྨོས་པ་འདི་བཅུ་དང་ལྡན་ན་ལྷག་མ་ཕྱུང་བ། ཁུ་བ་ཕྱུང་བ་དང༌། དེར་འདོད་པ་དང༌། དེར་འདོད་པ་ཁུ་བ་འབྱིན་པར་འདོད་པ་དང༌། བདག་གི་ཁུ་བ། བདག་ཉིད་ཀྱི་ཁུ་བ་དང༌། ཐོག་མ་ཁུ་བ་ལུས་ཐམས་ཅད་ཀྱི་ནང་ན་ཁྱབ་པར་འདུག་སྟེ། དཔེར་ན་བུ་རམ་ཤིང་མངར་བས་ཐམས་ཅད་དུ་ཁྱབ་པ་དང་འདྲ་བར་འདུག་པ་ལས་འདུས་ཏེ། འོང་བར་གཞུངས་པའི་ནང་དུ་འཕགས་པ་དང་འདི་ཡན་ཆད་ཡན་ལག །བདེ་བར་
འདོད་ཆགས་སྐྱེས་པ་ལས། བདེ་བར་བྱ་བའི་ཕྱིར་ཁུ་བ་ཕྱུང་བ་དང༌། རིག་སྔགས་བྱ་བའི་ཆོ་གར་དགོས་པའི་ཕྱིར་ཁུ་བ་ཕྱུང་བ་དང༌། ས་བོན་མོ་མཚན་གྱི་ནང་དུ་བླུགས་ཏེ། བུའི་ས་བོན་དུ་བྱ་བའི་ཕྱིར་ཁུ་བ་ཕྱུང་བ་དང༌། སྨིན་བདག་ན་བ་ལ་ཕན་པའི་ཕྱིར་ཁུ་བ་ཕྱུང་བ་དང་གཞན་ན་བའི་སྨན་དུ་བྱ་བར་ཁུ་བ་ཕྱུང་བ་དང༌། བརྟག་པའི་ཕྱིར་དང༌། གཞོན་ནུ་དང་རྒན་པོས་ཁུ་བ་ཡོད་དམ་མེད་པ་དང༌། ཅི་འདྲ་ཞེས་བརྟག་པའི་ཕྱིར་ཁུ་བ་ཕྱུང་བ་དང༌། ཀྱང་བྱེ་བྲག་མེད་དོ། །འདི་རྣམ་ལྔ་ལས་གང་ཡང་རུང་སྟེ། གཅིག་གི་ཕྱིར་ཕྱུང་ལ་ཡན་ལག་བཅུ་དང་ལྡན་ན་ལྷག་མར་འགྱུར་རོ། །རེག་པ་ཁུ་བ་དབྱེ་བའི་ཕྱིར་ཕོ་མཚན་ལ་རེག་པ་དང༌། འབད་པ་ཁུ་བ་དབྱུང་བར་ལས་བྱེད་ཅིང་འབད་པ། ཕོ་མཚན། ཕོ་མཚན་ཡང་ཡིན་པ་དང༌། ཕྱི་རོལ་གྱི་ཡང་ངོ༌། །བདག་གི་ཁུ་བ་གཞན་འབྱིན་དུ་བཅུག་པ་དང་བདག་ཉིད་ཀྱིས་ཕྱུང་བ་གང་ཡང་རུང་སྟེ་ཡན་ལག་གཅིག །སེམས་ཅན་དུ་གཏོགས་པ། སེམས་ཅན་དུ་གཏོགས་པའི་ལུས་གསོན་པའང་རུང་ཤི་བའི་རོ་ལའང་རུང་སྟེ་དེར་ཕྱུང་བ། དེ་བཞིན་དུ་འདུག་པ་ལའོ། །སེམས་ཅན་གྱི་གཟུགས་ཡིན་པར་ཤེས་པ་ལ་བྱ་སྟེ། ལུས་དང་ཡན་ལག་གི་ཤ་དང་རུས་པར་ཤེས་པ་དང་འདི་ཡན་ཆད་གོང་ནས་བཞི་སྨོས་པ་དང༌། ཡན་ལག་བཅུར་ལྡན་ཏེ་ཁུ་བ་ཕྱུང་ན་ལྷག་མ། ཤིན་ཏུ་མ་བཙིར། ཤིན་ཏུ་མ་བཅངས་ཀྱང་ངོ༌། །ཁུ་བ་དབྱུང་བའི་ཕྱིར་བྱ་སྟེ་ཕོ་མཚན་ལ་དྲག་ཏུ་མ་བཙིར་ཞིང༌། མ་བཅངས་པར་དལ་གྱིས་བྱས་པ་ལས་བྱུང་བ་ཡང་ལྷག་མ། དབེན་དང་སྔོན་མི་ཚངས་པར་སྤྱད་པ་དང་ཁུ་བ་ཕྱུང་བ་ཇི་སྙམ་བྱེད་ལ་དབེན་བཅས་ནས་བསམས་ཏེ། འདི་ལྟ་བུར་འདོད་པའི་ཕྱིར་ཁུ་བ་ཕྱུང་བ་དང༌། ཟག་པ་དང་ཁུ་བ་ལ་གནས་ལས་འཕགས་ནས་ཟག་ཅིང་འབྱུང་བའི་ཚེ་ཇི་སྙམ་དུ་བྱེད་སད་པའི་ཕྱིར་ཕྱུང་བ་དང༌། བདོ་བ་མེད་པའི་འདོད་ཆགས་བདོས་ཏེ། མི་བདེ་བ་ལ་ཕྱུང་བདེན་པར་འགྱུར་བར་འདོད་པ་དང༌། བདེ་བ་ཇི་སྙམ་བྱེད་སད་པའི་ཕྱུང་བ་དང༌། བདེ་བ་མྱོང་བ་ཡང་ངོ༌། །འདི་རྣམས་གང་གི་ཕྱིར་ཡང་རུང་ཡན་ལག་བཅུ་དང་ལྡན་ན་ལྷག་མར་གྱུར་ཏོ། །གཅེའུར་
མ་ཞུགས་པ་ལས་སོ། །ཁུ་བ་དབྱུང་བར་བརྩལ་ཏེ་ཕོ་མཚན་གྱི་གཅེའུར་རམ་རྩར་མ་ཞུགས་ཀྱང་ལུས་ཀྱི་གནས་ལས་འཕགས་ན་ལྷག་མར་འགྱུར་རོ། །འཕགས་པའི་ཚེ་བཏང་ན་ཟིན་པར་བྱས་པ་མ་ཡིན་ནོ། །ཁུ་བ་དབྱུང་བར་བརྩལ་ཏེ་ཁུ་བ་ལུས་ཀྱི་གནས་ལས་མ་འཕགས་པར་བཏང་ན་སྦོམ་པོ། འབྲི་བར་བྱེད་པ་ནི་བྲོ་གར་རྡུང་བ་དང་རབ་ཏུ་གར་རྡུང་བའོ། །ཁུ་བ་དབྱུང་བའི་ཕྱིར་བྲོ་བརྡུང་བ་དང་བྲོ་དྲག་ཏུ་བརྡུང་བ་དང་གང་བྱས་ཀྱང་རུང་སྟེ་ཁུ་བ་ཕྱུང་ན་སྦོམ་པོའོ། །ནམ་མཁའ་ལ་རྐུབ་བསྒུལ་བའོ། །ཁུ་བ་དབྱུང་བའི་ཕྱིར་ནམ་མཁའ་ལ་བཀུད་དེ་ཁུ་བ་ཕྱུང་ན་སྦོམ་པོ། ཕྱོགས་གུད་དུ་རེག་ནའོ། །ཁུ་བ་དབྱུང་བའི་ཕྱིར་ཕོ་མཚན་མ་ཡིན་པ་ལུས་ཀྱི་ཡན་ལག་གཞན་བྲུད་ཅིང་མཉེས་ཏེ་ཁུ་བ་བྱུང་ན་སྦོམ་པོ། རྒྱུན་བཟློག་པ་ལ་བཟེད་ནའོ། །ཁུ་བ་དབྱུང་བའི་ཕྱིར་ཆུ་འབབ་པའི་ཁང་ཕོ་མཚན་བསྟན་ཏེ་ཁུ་བ་དབྱུང་བ་ཡང་ངོ༌། །རླུང་ཁར་ན་ཡང་ངོ༌། །ཁུ་བ་དབྱུང་བའི་ཕྱིར་རླུང་འོང་བའི་ཁར་ཕོ་མཚན་བསྟན་ཏེ་ཁུ་བ་ཕྱུང་ན་སྦོམ་པོ། དབེན་གྱི་དགའ་བ་བདེ་བ་མྱོང་བར་གྲུབ་ནའོ། །ལུས་དང་ངག་གིས་ནི་མ་སྤྱད་ཀྱི་སྔོན་མི་ཚངས་པར་སྤྱད་པའི་ཆུད་མའི་ཤ་མཐང་དང་མོ་མཚན་ཡན་ཆད་བསམས་ཏེ། དེ་ལ་འདི་ལྟར་སྤྱད་དེ་ཁུ་བ་དབྱུང་ན་ཞེས་དམིགས་ཏེ་ཁུ་བ་བྱུང་བ་ཡང་སྦོམ་པོ། གཅེའུར་ཞུགས་ན་ཡང་ངོ༌། །ཁུ་བ་དབྱུང་བའི་ཕྱིར་མ་བྱས་པར་ཁུ་བ་ལུས་ཀྱི་གནས་ལས་འཕགས་ཟིན་པ་ཞིག་ལས་ཕྱུང་ན་སྦོམ་པོ། གཞལ་བའི་ཕྱིར་ཆགས་པའི་སེམས་ཀྱིས་རེག་ན་མི་སྦྱོར་བ་མ་ཡིན་ནོ། །འདོད་ཆགས་ཀྱི་སེམས་ཀྱིས་ཕོ་མཚན་ཇི་ཙམ་ཡོད་པ་བཅལ་བའི་ཕྱིར་ཁུ་བ་ཕྱུང་ན་སྦོམ་པོ། བལྟས་ན་ཉེས་བྱས་པའོ། །འདོད་ཆགས་ཀྱི་སེམས་ཀྱིས་ཕོ་མཚན་ལ་བལྟས་ན་ཉེས་བྱས། འབབ་རྒྱུན་དང་རླུང་ཕྱོགས་སུ་བཟེད་ན་ཡང་ངོ༌། །ཆུ་འབབ་པའི་རྒྱུན་དང་རླུང་ལངས་པའི་ཕྱོགས་བཞིན་དུ་ཁུ་བ་དབྱུང་བའི་ཕྱིར་བསྡད་ན་ཁུ་བ་བྱུང་ཡང་ཉེས་བྱས་མ་བྱུང་ཡང་ཉེས་བྱས། ལྟུང་བ་མེད་པ་ནི་དེའི་ཕྱིར་མ་ཞུགས་པར་ལུགས་པ། ཉེས་པར་མི་འགྱུར་བ་ནི་ཁུ་བ་དབྱུང་བར་མ་བསམས་ལ་འོག་ནས་མིང་གིས་སྨོས་པ་གང་ཡང་རུང་དེ་ལྟ་བུའི་རྐྱེན་གཅིག་གིས་ཁུ་
བ་བྱུང་བ་ནི་ཉེས་མེད་དོ། །བརླ་དང་བདག་གི་བརླ་ལ་ཕོ་མཆན་དྲུད་དེ་ཁུ་བ་བྱུང་བ་དང༌། གོས་དང་གོས་ལ་ཕོ་མཚན་དྲུད་དེ་ཁུ་བ་བྱུང་བ་དང༌། གཞན་ལ་རེག་པ་དང༌། མི་གཞན་གྱིས་བདག་གི་ལུས་ཀྱི་ཡན་ལག་གི་ཤ་དག་ལ་བཟུང་སྟེ་ཁུ་བ་ཕྱུང་བ་དང༌། ཕྲུགས་པ་ནའོ། །གཡོན་པ་དང་རྔོ་ལ་སོགས་པ་ཕོ་མཚན་དང་ཡན་ལག་ལ་སོགས་པ་ལ་ཕྲུགས་པ་ལས། ཁུ་བ་ཕྱུང་བ་དང་འདི་རྣམས་ཀྱི་ཕྱིར་ཁུ་བ་བྱུང་བ་ནི་ཉེས་མེད་དོ། །རེག་པ་མ་ཡིན་པར་མྱོང་ནའོ། །ཁུ་བ་དབྱུང་བར་མ་བསམས་འདོད་ཆགས་ཀྱི་སེམས་ཀྱང་མེད་པར་ཅུང་མ་མཐོང་བ་དང༌། ཁ་ཟས་ཞིམ་པོ་ཟོས་པ་དྲི་བསུང་ཞིམ་པོ་མྱོང་བའི་ཕྱིར་ཁུ་བ་བྱུང་བ་ནི་ཉེས་མེད་དོ། །དེ་དྲན་པས་ན་དེ་ན་ཡང་ངོ༌། །བུད་མེད་སྔོན་མཐོང་བ་ཞིག་དྲན་པ་དང༌། ཁ་ཟས་དང་དྲི་བསུང་ཞིམ་པོ་ཞིག་སྔོན་མྱོང་བ་དྲན་པ་ལས་ཁུ་བ་བྱུང་བ་ཡང་ཉེས་མེད་དོ། །འབྱིན་པའི་སྟེ་རྣམ་པར་འབྱེད་པའི་འོ། །ཁུ་བའི་དགེ་འདུན་གྱི་ལྷག་མ་སྟེ། འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འདི་མན་ཆད་ནི་ལྷག་མ་ལྟར་ཁྲིམས་སུ་བཅས་པ་ལས། ཨུ་པཱ་ལིས་དྲིས་ཏེ་ཅི་ཙམ་ལྷག་མ་དང་སྦོམ་པོར་འགྱུར་བའི་བྱེ་བྲག་ཕྱེ་བ། འབབ་མ་ཁད་པའི་ཚེ་ནི་འཕགས་པའོ། །ཁུ་བ་དབྱུང་བར་བརྩལ་ཏེ་གཞུངས་པའི་ནང་དུ་མ་ཞུགས་ཀྱི་བར་དུ་ནི་འཕགས་པ་ཞེས་བྱ་སྟེ། སྦོམ་པོའོ། །ལུས་ཀྱི་གནས་ལས་འཕགས་ཏེ་གཞུངས་པར་ཞུགས་ན་ལྷག་མ། བབ་མ་ཐག་པ་ནི་གཅེ་འུར་ཞུགས་པའོ། །རྨི་ལམ་ལྟ་བུ་ན་ཁུ་བ་དབྱུང་བར་འཕགས་པ་ནི་ལུས་ཀྱི་གནས་ལས་འཕགས་ཏེ། གཞུངས་པའི་ནང་དུ་སོང་མ་ཐག་ཏུ་གཅེ་འུར་ཞུགས་པ་ཞེས་བྱ་སྟེ། དེ་ལྟ་བུ་ཞིག་ལས་ཁུ་བ་ཐལ་བྱུང་ཕྱུང་ན་སྦོམ་པོ། །རྩོམ་པ་ནི་མི་སྦྱོར་བ་མ་ཡིན་ནོ། །ཁུ་བ་བྱུང་བའི་ཕྱིར་བརྩལ་ཏེ་སྤྱད་ན་ཁུ་བ་ལུས་ཀྱི་གནས་ལས་མ་འཕགས་ཀྱང་སྦོམ་པོ། །མ་བརྩལ་བར་བྱུང་ནས་དགའ་བར་ཚོར་ན་དེ་བཞིན་ནོ། །དང་པོ་ནི་ཁུ་བ་དབྱུང་བའི་ཕྱིར་མ་བྱས་མོད་ཀྱི། རྨི་ལམ་མམ་གོས་ལ་སོགས་པ་ལ་དྲུད་དེ་ཁུ་བ་བྱུང་བ་ལ་ཆེད་ཀར་དབྱུང་བ་ནི་ལྷག་མར་གྱུར་ན་ཁོ་རང་བྱུང་བས་སྟེས་སོ་ཞེས་རྗེས་སུ་ཡི་རང་ཞིང་དགའ་བར་ཚོར་
ན་སྦོམ་པོ། །ཕོ་མཚན་བཙིར་ཀུན་མཉེས་ནའོ། །འདོད་ཆགས་ཀྱི་སེམས་ཀྱིས་ཕོ་མཚན་བཙིར་མཉེས་ན་ཁུ་བ་མ་བྱུང་ཡང་སྦོམ་པོ། །སྒྲེན་པ་དེ་ལ་བྱུགས་ན་ཡང༌། ཕོ་མཚན་སྒྲེན་པ་ལ་ཁུ་བ་དབྱུང་བའི་ཕྱིར་ལག་པའི་སྟེང་དུ་གཞག་པ་ལྟ་བུ་ལས་ཁུ་བ་བྱུང་ན་སྦོམ་པོ། སྨན་གྱིས་ཕྱུང་ན་ཡང་ངོ༌། །ཁུ་བ་ཆེད་ཀར་ཕྱུང་བ་ལྷག་མ་ཞེས་ཏེ་སྨན་འཐུངས་ཏེ་ཁུ་བ་ཕྱུང་ན་ཡང་སྦོམ་པོ་གཞན་གྱི་ཡང་ངོ༌། །གཞན་གྱི་ཁུ་བ་བདག་གིས་ཕྱུང་ན་སྦོམ་པོ། འབྱིན་པའི་སྟེ་དྲིས་པའི་འོ། །ཁུ་བ་འབྱིན་པའི་དགེ་འདུན་གྱི་ལྷག་མ་སྟེ། འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།འདི་མན་ཆད་ནི་ཕ་རོལ་གྱི་གཞི་ཇི་ལྟ་བུ་ལ་ཁུ་བ་ཕྱུང་ན་ལྷག་མ་དང་སྦོམ་པོར་ཅི་ཙམ་གྱིས་འགྱུར་བ་བཤད་པ། བམ་པ་རོ་ལྟ་བུ་བམ་པ་ལ་སོགས་པ། རྣམ་པར་བསྔོས་པ་དང་རྣགས་པ་དང་ཞིགས་པ་དང་རྣམ་པར་ཟོས་པ་དང་རྣམ་པར་དམར་བ་དང་རྣམ་པར་འཐོར་བ་དང་རོ་ལས་འདི་རྣམས་ལྟ་བུར་གྱུར་པ་དང༌། བྲལ་བ་རུས་པ་དང་ལྷུ་ཚིགས་སོ་སོར་བྲལ་བ་དང༌། ཀེང་རུས་རུས་པ་དཀར་པོར་གྱུར་པའི་ཀེང་རུས་དང༌། མགོ་མགོ་ལ་ཁུ་བ་བྱུང་བ་དང༌། རྣ་བ་རྣ་བའི་བུ་གུར་བཅུག་སྟེ་ཁུ་བ་ཕྱུང་བ་དང༌། སྣ་སྣའི་བུ་གུར་བཅུག་སྟེ་ཁུ་བ་ཕྱུང་བ་དང༌། མགྲིན་པ་མགྲིན་པར་ཁུ་བ་ཕྱུང་བ་དང༌། མགྲིན་པའི་བར་དང༌། མགྲིན་པའི་ཤ་ཉེར་བའི་བར་དུ་ཁུ་བ་ཕྱུང་བ་དང༌། རྩིབ་ལོགས་རྩིབ་ལོགས་སུ་ཁུ་བ་ཕྱུང་བ་དང༌། རྒྱབ་རྒྱབ་ཏུ་ཁུ་བ་ཕྱུང་བ་དང༌། བྲང་བྲང་དུ་ཁུ་བ་ཕྱུང་བ་དང༌། རྩ་རྩའི་པགས་པ་དྲངས་པའི་བར་དུ་ཁུ་བ་ཕྱུང་བ་དང༌། སྐྲའི་བར་དུ་ལུས་ལ་ཆགས་པའི་སྐྲའི་གསེབ་དང༌། ལན་བུའི་བར་དང༌། ལག་པ་ལག་པར་ཁུ་བ་ཕྱུང་བ་དང༌། ཕྲག་པ་ཕྲག་པར་ཁུ་བ་ཕྱུང་བ་དང༌། དཔུང་པ་དཔུང་བར་ཁུ་བ་ཕྱུང་བ་དང༌། མཚན་ཁུང་མཆན་ཁུང་དུ་ཁུ་བ་ཕྱུང་བ་དང༌། རྐེད་པ་རྐེད་པར་ཁུ་བ་ཕྱུང་བ་དང༌། བརླ་བརླར་ཁུ་བ་ཕྱུང་བ་དང༌། རྐང་པ་རྐང་པར་ཁུ་བ་ཕྱུང་བ་དང༌། བྱིན་པ་བྱིན་པར་ཁུ་བ་ཕྱུང་བ་དང༌། འགབ་ཁུང་དུ་ཕྱུང་ན་འགབ་ཁུང་དུ་ཁུ་བ་ཕྱུང་བ་དང༌། རྩ་བའི་མིང་གིས་སྨོས་པ་འདི་
རྣམས་ལྟ་བུ་གང་ཡང་རུང་སྟེ་ཁུ་བ་དབྱུང་བའི་སེམས་ཀྱིས་འདི་གཅིག་ལ་ཕྱུང་ན་ཡང་ལྷག་མར་འགྱུར་རོ། །སྦོམ་པོ་ནི་མིང་གིས་སྨོས་པ་འདི་རྣམས་གང་ཡང་རུང་སྟེ་ཁུ་བ་དབྱུང་བའི་ཕྱིར་འདི་གཅིག་ལ་ཕྱུང་ན་སྦོམ་པོར་འགྱུར། ལ་བ་ལ་བ་ལ་ཁུ་བ་ཕྱུང་བ་དང༌། ཕྱིང་པ་ཕྱིང་པ་ལ་ཁུ་བ་ཕྱུང་བ་དང༌། དྲིའུ་རྡོག་དྲིའུ་རྡོག་གི་སྟན་ལ་ཁུ་བ་ཕྱུང་བ་དང༌། སྔས་ཁབ་སྔས་ཁབ་ལ་ཁུ་བ་ཕྱུང་བ་དང༌། ཁྲི་ཁྲི་ལ་ཁུ་བ་ཕྱུང་བ་དང༌། ཁྲིའུ་ཁྲིའུ་ལ་ཁུ་བ་ཕྱུང་བ་དང༌། ཁྲེས་རྩྭ་བམ་མམ་ཤིང་བལ་གྱི་སྟན་ལ་ཁུ་བ་ཕྱུང་བ་དང༌། ཁྲིའུའི་བར་ཁྲིའུའི་བར་དུ་ཁུ་བ་ཕྱུང་བ་དང༌། བུམ་པ་བུམ་པ་ལ་ཁུ་བ་ཕྱུང་བ་དང༌། བུམ་བུ་བུམ་བུ་ལ་ཁུ་བ་ཕྱུང་བ་དང༌། བུམ་པའི་ཁ་བུམ་པ་དང་བུམ་པའི་ཁར་ཁུ་བ་ཕྱུང་བ་དང༌། བྱ་མ་བུམ་བྱ་མ་བུམ་དུ་ཁུ་བ་ཕྱུང་བ་དང༌། ཆོལ་ཟངས་ཆོལ་ཟངས་ལ་ཁུ་བ་ཕྱུང་བ་དང༌། རྡོ་རྡོ་ལ་ཁུ་བ་ཕྱུང་བ་དང༌། སྐྱང་ནུལ་སྐྱང་ནུལ་ལ་ཁུ་བ་ཕྱུང་བ་དང༌། སྐྱང་ནུལ་གྱི་བར་སྐྱང་ནུལ་གྱི་རྩིག་པ་ལས་འཕགས་པའི་བར་དུ་ཁུ་བ་ཕྱུང་བ་དང༌། སྒོ་གཏན་སྒོ་གཏན་ལ་ཁུ་བ་ཕྱུང་བ་དང༌། ཤ་སྣ་གུ་ལའོ། །རོའི་ཤ་དུམ་བུར་གྱུར་པ་བརླའམ་ལག་པ་ལས་གང་གི་ཤ་ཡིན་པར་མི་ཤེས་པར་མིང་གིས་སྨོས་པ་འདི་རྣམས་ལ་མ་གཏོགས་པར། གཞན་ཅི་ཡང་རུང་འདོད་ཆགས་ཀྱི་སེམས་ཀྱིས་ཁུ་བ་ཕྱུང་ན་སྦོམ་པོ། རྨ་བཙིར་ན་ཡང་ངོ༌། །མི་ཚངས་པར་སྤྱོད་པ་འདོད་པའི་ཕྱིར། ཕོ་མཚན་དང༌། ཁ་དང༌། རྐུབ་གསུམ་རྨ་ཡོད་ཀྱང་རུང༌། རྨ་མེད་ཀྱང་རུང་འདོད་ཆགས་ཀྱི་སེམས་ཀྱིས་བཙིར་ཏམ་མཉེས་ན་ཕམ་པའི་སྦོམ་པོ། བུད་མེད་ལ་བྱ་བར་བརྩམས་ཏེ་བཙིར་ན་ཡང་ངོ༌། །མི་ཚངས་པར་སྤྱོད་པར་བརྩལ་ཏེ་མོ་མཚན་བཙིར་ཏམ་མཉེས་ཏེ་བཏང་ན་ཕས་ཕམ་པའི་སྦོམ་པོ། ཁ་དང་རྐུབ་གཉིས་ཀྱང་དེ་དང་འདྲ། །དེར་མཐེབ་མོ་བཅུག་ན་ཡང་ངོ༌། །མི་ཚངས་པར་སྤྱད་འདོད་པའི་ཕྱིར་མོ་མཚན་དུ་མཐེབ་མོ་བཅུག་ན་ཕས་ཕམ་པའི་སྦོམ་པོ། །འགྲོ་བ་ལས་བྱུང་བ་ཡང་ངོ༌། །མི་ཚངས་པར་སྤྱོད་དུ་སོང་སོང་བ་ལས་ལམ་དུ་ཁུ་བ་ཕྱུང་ན་ཕས་ཕམ་པའི་སྦོམ་པོ། གནས་ནས་གནས་སུ་སོང་ན་ཡང་ངོ༌། །ཁུ་བ་དབྱུང་བའི་ཕྱིར་ཕར་
སོང་ཆུར་སོང་བྱས་ཏེ་ཁུ་བ་ཕྱུང་ནའང་སྦོམ་པོ། ལོག་པ་ཡིད་ལ་བྱས་ན་ཡང་ངོ༌། །འདོད་ཆགས་ཀྱི་སེམས་ལངས་ཏེ་ཁུ་བ་དབྱུང་བར་བསམས་པ་ལས་ཁུ་བ་བྱུང་ནའང་སྦོམ་པོ། ཕོ་མཚན་བཟུང་ན་ཡང་ངོ༌། །ཁུ་བ་དབྱུང་བའི་འདོད་ཆགས་ཀྱི་སེམས་ཡོད་དེ་ཕོ་མཚན་ལ་བཟུང་བ་ལས་ཁུ་བ་བྱུང་ན་སྦོམ་པོ། ལྟུང་བ་མེད་པ་ནི་སྒྲེའུས་བྲུད་པ་ནའོ། །ཁུ་བ་མང་དུ་ཟག་པའི་ཕྱིར་སྒྲེའུ་བཏགས་པ་ལས་ཁུ་བ་དབྱུང་བའི་སེམས་མེད་པར་སྒྲེའུ་ནང་དུ་བཅུག་པ་ལས་འདྲུད་དེ་ཁུ་བ་བྱུང་བ་ནི་ཉེས་མེད་དོ། །སྔོན་གྱི་ཆུང་མས་འཁྱུད་དེ་ན་ཡང་ངོ༌། །འདོད་ཆགས་དང་ཁུ་བ་དབྱུང་བའི་སེམས་མེད་པར་སྔོན་གྱི་ཆུང་མས་སྡུག་པའི་ཕྱིར་ལུས་སམ་མགུལ་ནས་འཁྱུད་པ་ལས་ཁུ་བ་བྱུང་བའང་དགའ་བར་ཚོར་བའི་སེམས་མེད་ན་ཉེས་མེད་དོ། །རྐང་པ་དང་བྱིན་པ་དང་བརླ་དང་སོར་མོ་ལ་སོགས་པ་བུད་མེད་ཀྱིས་བཟུང་ན་ཡང་ངོ༌། །ལུས་ཀྱི་ཡན་ལག་མིང་གིས་སྨོས་པ་འདི་རྣམས་ལ་བུད་མེད་ཀྱིས་བཟུང་སྟེ་འདོད་ཆགས་ཀྱི་སེམས་མེད་ཅིང་ཁུ་བ་དབྱུང་བར་མ་བསམས་པར་ཁུ་བ་བྱུང་ན་དགའ་བར་མ་ཚོར་ཞིང་དང་བའི་སེམས་མེད་ན་ཉེས་མེད། འབྱིན་པའི་སྟེ་རྣམ་པར་གདོན་མི་ཟ་བའི་འོ། །དགེ་འདུན་གྱི་ལྷག་མའི་ཁུ་བ་འདུལ་བ་རྣམ་པར་གདོན་མི་ཟ་བ་ཞེས་བྱ་བའི་ནང་ནས་འབྱུང་བའི་མདོ་འབྱིན་བ་རྫོགས་སོ། །ཁུ་བའི་དགེ་འདུན་གྱི་ལྷག་མ་འདུལ་བའི་སྡེ་སོ་སོ་ནས་འབྱུང་བའི་མདོ་རྫོགས་སོ།། །།འདི་མན་ཆད་དགེ་འདུན་གྱི་ལྷག་མ་འཛིན་པ་ལ་འཆད། འདི་ནི་བུད་མེད་ལས་བྱེད་དོ། །འཛིན་པའི་ལྷག་མར་འགྱུར་བ་ནི་བུད་མེད་ལས་བཟུང་བ་ལས་འགྱུར་རོ། །དབེན་པའི་འདུག་པ་དང་གནས་པ་ཡང་ངོ༌། །དབེན་པ་གཉིས་ཏེ་ས་དབེན་པར་བུད་མེད་དང་འདུག་པ་དང༌། དགེ་སློང་མ་དང༌། འགྲེང་བའི་ལྟུང་བ་གཉིས་ཀྱང་བུད་མེད་ལས་འགྱུར་རོ། །སྨྱན་གནས་ཀྱང༌། སྨྱན་གནས་སུ་འདུག་པ་དང་གབ་པ་གཉིས་ཀྱི་ལྟུང་བ་ཡང་བུད་མེད་ལས་འགྱུར་རོ། །ལྷན་ཅིག་ཉལ་བ་ཡང་ངོ༌། །བུད་མེད་དང་ཁྱིམ་གཅིག་ན་ཉལ་བ་ཡང་བུད་མེད་ལས་འགྱུར་རོ། །ལམ་དུ་རིག་པའི་སྐྱེས་པ་མེད་པར་ལྷན་ཅིག་འགྲོ་བ་ཡང་ངོ༌། །ལམ་དུ་རིག་པའི་སྐྱེས་པ་མེད་
པར་བུད་མེད་དང་འགྲོགས་པའི་ལྟུང་བ་ཡང་བུད་མེད་ལས་འགྱུར་རོ། །མདོ་བཞིན་པ་གཉིས་ཀྱང་ངོ༌། །འཛིན་པའི་འོག་ནས་སྨྱེ་ཚིག་དང་ཀུན་སྤྱོད་དང་འབྱུང་བ་གཉིས་ཀྱང་བུད་མེད་ལས་ལྷག་མར་འགྱུར་རོ། །ཁྱིམ་མ་ལ་ཆོས་འཆད་པའི་ཚེ་རིག་པའི་སྐྱེས་པ་དང་ལྷན་མི་ཅིག་པ་ཡང་ངོ༌། །ཁྱིམ་མ་ལ་རིག་པའི་སྐྱེས་པ་མེད་པར་ཆོས་བཤད་པའང་བུད་མེད་ལས་ལྟུང་བར་འགྱུར་རོ། །ལྷན་ཅིག་ཀྱང་མ་བརྟགས་པ་ལ་ནའོ། །ཁྱིམ་མ་ལ་ཆོས་འཆད་པའི་ཚེ་རིག་པའི་སྐྱེས་པ་ཡོད་དུ་ཟིན་ཀྱང༌། །ཁྱིམ་མ་ཉིད་སླར་སྟེག་པའམ་མི་རྟག་པའམ་མི་གཙང་བའི་ཆོས་བཤད་པ་ནའང་རྟག་ཅིང་གཙང་ལ་བཟང་ངོ་ཞེས་ཟེར་བ་ལ་ཆོས་མི་བཤད། དེ་ལ་ཉེས་བྱས་པའོ། །མདོ་ལྟག་མ་ལྟར་ཁྱིམ་པ་སྟེག་པ་ལ་ཆོས་བཤད་ན་ཉེས་བྱས། གླིང་གཞན་ནས་སྐྱེས་པ་དང༌། ཤར་ཕྱོགས་དང་ནུབ་ཕྱོགས་དང་བྱད་ཕྱོགས་ཀྱི་གླིང་གསུམ་གྱི་མི་ལམ་དུ་འགྲོགས་པ་དང་ཆོས་བཤད་པའི་མི་རིག་པའི་སྐྱེས་པར་བཞག་ན་བརྡ་ཕྲད་ཀྱང་སྨྱེ་བ་བྱ་བའི་ཆོ་ག་དང༌། བརྡ་མི་མཐུན་པའི་ཕྱིར་ཉེས་བྱས་ཟེག་ཟེག་པོ་ཅན་འབྲི་བའོ། །བུད་མེད་དང་ལམ་དུ་འགྲོ་བ་དང་ཆོས་འཆད་པའི་རིག་པའི་སྐྱེས་པ་གླིང་གཞན་གྱི་མི་མ་ཡིན་ཞིང་བརྡ་ཕྲད་དུ་ཟིན་ཀྱང༌། རིག་པའི་སྐྱེས་པ་དེ་ཉིད་སྟེག་པའི་ཆོས་བྱེད་པ་ཞིག་ནའང་ཉེས་བྱས་ཏེ་སྟེག་པ་དེ་ལ་མ་བཤད་དེ་བཏང་ན་ཉེས་མེད། དེ་གོ་བས་སོ། །ཁྱིམ་མ་ལ་འཆད་པའི་རིག་པའི་སྐྱེས་པ་ནི་གོ་ཞིང་བརྡ་ཕྲད་པས་བྱའོ། །རིག་པའི་སྐྱེས་པ་ཡེངས་སམ་གཉིད་ལོག་པ་ལ་ཆོས་བཤད་དེ་མགོ་ན་ཉེས་བྱས། དེ་ལྟ་བུའི་ཚུལ་ན་གཉིས་པོའི་མཚན་མ་དོན་མེད་དོ། །ལྷག་མ་དང་ལྟུང་བ་བུད་མེད་ལས་འགྱུར་བ་བཅུ་ལྟག་ནས་མིང་གིས་སྨོས་པའི་རྣམས། མ་ནིང་མོ་མཚན་ཆེ་བ་ཞིག་ལ་ལྷག་མ་ཞིག་བྱས་ན་ཡང་ལྷག་མ་དང་དངོས་སུ་འགྱུར་རོ། །ལྟུང་བ་ཞིག་བྱས་ན་ཡང་ལྟུང་བ་དངོས་སུ་འགྱུར་རོ། །མོ་མཚན་ཆེ་བའི་བྱེ་བྲག་ནི། ཕོ་མཚན་དང་མོ་མཚན་ཆེ་ཆུང་དང་སྤྱད་དུ་རུང་མི་རུང་གིས་དབྱེའོ། །ཆེ་ཆུང་མེད་ན་ནུ་མ་དང་ཁ་སྤུས་བྱེ་བྲག་དབྱེའོ། །འདིར་ཕྱེད་དུ་འགྱུར་རོ། །བུད་མེད་དང་ལམ་དུ་འགྲོ་བ་དང་ཆོས་འཆད་པའི་སྐྱེས་པའི་གོར་མ་ནི་
གཞག་ན་མཚན་ཆེ་ཆུང་མཚུངས་ཏེ་ཉེས་བྱས། ཐ་མ་གསུམ་ནི་ལེགས་པར་སྨྲས་པ་དང་ཉེས་པར་སྨྲས་པའི་དོན་ཀུན་ཤེས་པའོ། །ལྟག་ཏུ་ལྷག་མ་དང་ལྟུང་བ་བུད་མེད་ལས་འགྱུར་བ་བཅུའི་ཐ་མ་རྒྱོ་ཚིག་དང་ཀུན་སྤྱོད་དང༌། ཁྱིམ་མ་ལ་ཆོས་འཆད་པ་ནི་བུད་མེད་བརྡ་ཕྲད་ཅིང་གོ་ལ་ལེགས་པར་སྨྲས་པ་དང༌། ཉེས་པར་སྨྲས་པའི་དོན་ཀུན་ཤེས་པ་ལ་བྱས་ན་ལྷག་མ་དང་ལྟུང་བར་འགྱུར། གཞན་ནི་སྨྱེ་བ་བྱ་བར་བཟོད་པ་ལ་རྩ་བའོ། །ལྷག་མ་དང་ལྟུང་བ་བུད་མེད་ལས་འགྱུར་བ་བཅུ་ལ་མདོ་ལྟག་མའི་ནང་དུ་གསུམ་སྨོས་པ་མ་གཏོགས་པར། གཞན་བདུན་ནི་བུད་མེད་མི་ཚངས་པར་བྱ་བར་བཟོད་པ་ལ་བྱས་ན་ལྷག་མ་དང་ལྟུང་བར་འགྱུར། གཞན་ནི་མདོ་བཞིན་པའོ། །ལྷག་མ་དང་ལྟུང་བ་བུད་མེད་ལས་འབྱུང་བ་བཅུ་ལ་རྒྱོ་ཚིག་དང་ཀུན་སྤྱོད་དང༌། ཁྱིམ་མ་ལ་འཆད་པ་གསུམ་བུད་མེད་བརྡ་མི་ཕྲད་པ་ལ་བྱས་ན་སྦོམ་པོ་དང་ཉེས་བྱས། འཛིན་པ་ལ་སོགས་པ་བདུན་ནི། བུད་མེད་མི་ཚངས་པར་སྤྱད་དུ་མི་བཟོད་པ་ལ་བྱས་ན་ལྷག་མ་ནི་སྦོམ་པོར་འགྱུར། ལྟུང་བ་ནི་ཉེས་བྱས་སུ་འགྱུར་རོ། །མ་ནིང་འདི་ནི་མཚན་གཉིས་ན་མེད་ཀྱི་སོ་སོའམ། མཚན་མ་ཙམ་ཡོད་པ་ལ་བྱ་སྟེ་མི་བཟོད་པ་ལ་བྱ། མ་ནིང་ཕ་དང་མ་ནིང་མ་དང་འཕྲུལ་བ་འང་དེ་བཞིན་ནོ། །ལྷག་མ་དང་ལྟུང་བ་བུད་མེད་ལས་འགྱུར་བ་རྣམས་མ་ནིང་དང་འཕྲུལ་པའི་བུད་མེད་ལ་བྱས་ན་ལྷག་མའི་སྦོམ་པོ་ལྟུང་བ་ནི་ཉེས་བྱས་སུ་འགྱུར། སྤྱད་དུ་བཟོད་ཅིང་བརྡ་ཕྲད་ཀྱང་དགའ་བའི་ཆ་ཤས་ཆུང་བའི་ཕྱིར་སྦོམ་པོར་འགྱུར་ཏེ་འབྲིའོ། །འདི་གསུམ་ནི་སྐྱེས་པ་ལ་ཡང་ངོ༌། །འཛིན་པ་དང་རྒྱོ་ཚིག་དང་ཀུན་སྤྱོད་གསུམ་འདོད་ཆགས་ཀྱི་སེམས་དང་བཅས་པས་སྐྱེས་པ་ལ་བྱས་ཀྱང་སྦོམ་པོ། དེའི་དགའ་བ་མྱོང་བར་འདོད་པ་ལས། འདོད་ཅིང་ཆགས་པ་དང༌། འོན་ཏེ་འདོད་ཆགས་དང་བཅས་ན་ཡང་ངོ༌། །བརྟུལ་བ་དང་མདོ་འོག་མ་ལས་ཡན་ལག་གཉིས་འཆད་པ་དང་བཞིར་ལྡན་ན་ལྷག་མའོ། །དེའི་ཞེས་ཟེར་བ་ནས་ཡང་ངོ་ཞེས་ཟེར་བའི་ཕྱིར་འཆད། ཆགས་ཤིང་བརྟུལ་ཏེ་བཟུང་ནས་དགའ་བར་ཚོར་ན་ལྷག་མ་ཆགས་པ་མེད་ལ་བརྟུལ་ཏེ་བཟུང་ན་ཡང་སྦོམ་པོ། བརྟུལ་པ་མེད་ལ་ཆགས་ཏེ་བཟུང་ན་སྦོམ་བོ།
ཆགས་པའང་མེད་བརྟུལ་བའང་མེད་པར་བུད་མེད་ལ་བཟུང་ན་ཉེས་བྱས། ལུས་ལ་རེག་པ། བུད་མེད་ཀྱི་ལུས་ལ་བཟུང་བ། དགའ་བར་ཚོར་ན་ཡང་ངོ༌། །བཟུང་ནས་དགའ་བར་ཚོར་བ་ཡན་ལག་འདི་བཞི་དང་ལྡན་ཏེ། བུད་མེད་ལ་བཟུང་ན་འཛིན་པའི་དགེ་འདུན་གྱི་ལྷག་མར་འགྱུར། ལན་བུ་ཡང་དེ་དང་འདྲ། བུད་མེད་ཀྱི་སྐྲའི་ལན་བུ་ལས་བཟུང་ན་ཡང་འཛིན་པའི་དགེ་འདུན་གྱི་ལྷག་མར་འགྱུར། དེ་ལ་གཏོགས་པའི་གོས་ཀྱང་ངོ༌། །སྐྲ་ཆིངས་དང་ཅོད་པན་ལས་བཟུང་ན་ཡང་སྐྲ་དང་འབྲེལ་ཅིང་ཚོར་བ་ཡོད་པའི་སྟེང་དུ་དགའ་བའི་ཤས་ཆེ་བའི་ཕྱིར་ལྷག་མར་འགྱུར། རེག་པ་དང་ལག་པས་བསྣམས་པ་དང༌། ཀུན་དུ་རེག་པ་དང༌། ལག་པས་མཉེས་པ་དང༌། སྤྲད་པ་དང་བྲང་ངམ་གདོང་ལྟ་བུ་བཅར་ཞིང་སྤྲད་པ་དང༌། བཟུང་བ་དང་ལུས་ཀྱི་ཡན་ལག་གང་ཡང་རུང་ལག་གིས་བཟུང་བ་དང༌། འདྲེན་པ་དང་བཟུང་ནས་དྲངས་པ་དང༌། ཀུན་འདྲེན་པ་དང་བཟུང་ནས་ཡང་དང་ཡང་དྲངས་པ་དང་དྲངས་ནས་བསྐོར་བ་དང༌། བཏེག་པ་དང་ཕང་དུ་བླངས་པ་དང་གནམ་དུ་བཏེག་པ་དང༌། བཞག་པ་བླངས་ཏེ་སར་བཞག་པ་དང༌། བཙིར་བ་དག་ལ་བཙིར་བའམ་བཅུམ་པའམ་མནན་པ་དང་བྱེ་བྲག་མེད་དོ། །མིང་གིས་སྨོས་པ་འདི་རྣམས་གང་ཡང་རུང་བུད་མེད་ལ་བྱས་ན་ལྷག་མར་འགྱུར་རོ། །རྟེན་གྱིས་ཀྱང་ངོ༌། །མདོ་ལྟག་མ་ནས་མིང་གིས་སྨོས་པ་གང་ཡང་རུང་བུད་མེད་ཀྱིས་དགེ་སློང་ལ་བྱ་སྟེ་ཡན་ལག་འདི་བཞི་དང་ལྡན་ན་ལྷག་མར་འགྱུར། གོས་ཀྱིས་དཀྲིས་པ་ལ་ནི་མདོ་བཞིན་པའོ། །བུད་མེད་གོས་གྱོན་པའི་སྟེ། སྟེང་ནས་བཟུང་བ་ནི་སྦོམ་པོ། དར་ལྟ་བུར་སྲབ་མོ་ལས་བཟུང་ན་ལྷག་མར་འགྱུར། ཉེས་བྱས་པ་ནི་བྲི་ཡང་ཐ་མི་དད་དོ། །ཕམ་པ་དང་ལྷག་མ་ལས་བྲི་བ་ནི་སྦོམ་པོ། སྦོམ་པོ་དང་ལྟུང་བ་ལས་བྲི་བ་ནི་ཉེས་བྱས། ཉེས་བྱས་ལས་བྲི་བ་ནི་ཉེས་བྱས་སུ་ཟད་དོ། །དགེ་སློང་མ་ལ་མི་རེག །འདོད་ཆགས་ཀྱི་སེམས་མེད་པར། དགེ་སློང་མ་ལ་རེག་ན་ཉེས་བྱས་ཡན་ལག་དང་ལྡན་པས། དགེ་སློང་མ་བཟུང་བ་ནི་ལྷག་མར་འགྱུར་བ་ལྟ་སྨོས་ཀྱང་ཅི་དགོས། བུད་མེད་
ལ་ཡང་མ་ཡིན། བུད་མེད་ལ་འདོད་ཆགས་ཀྱི་སེམས་མེད་ཀྱང་མི་རེག །རེག་ན་ཉེས་བྱས། རེག་པ་ནི་ཆུས་ཁྱེར་བ་ལས་དབྱུང་བའི་ཕྱིར་དཔུང་བའམ། སྐྲ་ལ་མ་དང་སྲིང་མོ་དང་བུ་མོར་འདུ་ཤེས་བཞག་སྟེའོ། །བུད་མེད་ཆུས་ཁྱེར་བ་ནི་མ་དང་སྲིང་མོ་དང༌། བུ་མོར་འདུ་ཤེས་བཞག་སྟེ། ཆུ་ལས་དབྱུང་བའི་ཕྱིར་རེག་ཀྱང་ཉེས་མེད་དོ། །བཟུང་བ་ནི་རོ་སྨད་ན་མི་བཟུང་གི་དཔུང་པའམ་སྐྲ་ལས་བཟུང་སྟེ་དབྱུང་ངོ༌། །བྱེ་ཕུང་ལ་དྲན་པ་ཐོབ་པའི་ཕྱིར་ཁ་སྤུབ་ཏུ་གཞག །མདོ་ལྟག་མ་ལྟར་བུད་མེད་ཆུས་ཁྱེར་བ་དབྱུང་བ་དེ་ལྟོ་ཆུས་གང་སྟེ་བརྒྱལ་ན་ཆུ་དབྱུང་ཞིང་སོས་པར་བྱ་བའི་ཕྱིར་བྱེ་མའི་སྟེང་དུ་ཁ་སྤུབ་ཏུ་གཞག །ཁྲིའུ་བཞིན་དུ་བསྲུང་ངོ༌། །མདོ་ལྟག་མ་ལྟར་བྱེ་མ་ལ་ཁ་སྤུབ་སྟེ་བཞག་པ་དེའི་དྲུང་དུ་བདག་མི་འདུག་པར་མིག་རྒྱང་གིས་ཁྱིམ་པ་ལ། དགེ་འདུན་གྱིས་ཁྲི་སྟན་བརྙར་བྱིན་པ་སྲུང་བ་བཞིན་དུ་བྱ་ར་བྱའོ། །བ་ལང་རྫི་འམ་ར་ལུག་རྫི་ལ་གཏམས་ཏེ་ཟས་ཀྱི་ཕྱིར་འགྲོའོ། །བདག་ཟས་ཀྱི་དུས་ལ་བབ་སྟེ་འགྲོ་ནའང་བྱེ་ཕུང་ལ་ཁ་སྦུབ་སྟེ་བཞག་པའི་བུད་མེད་ཕྱུགས་རྫི་བའམ། སུ་འདུག་པ་ལ་གཏམས་ཏེ་མ་ཤི་བར་བྱོས་ཤིག་པར་བསྒོ་ལ་འགྲོ། འཚོ་བའམ་མི་འཚོ་བ་ཡང་བརྟག །ཆུས་ཁྱེར་བའི་བུད་མེད་དེ་མིག་རྒྱང་དུ་བསྲུངས་བ་ལ་འཚོའམ་མི་འཚོ་ཡང་ཡང་སྐབས་སྐབས་སུ་བལྟ་ཞིང་བརྟག །ཉེས་མེད་པ་ནི་སྙིང་རྗེའི་ཕྱིར་དག་པའི་སེམས་ཀྱིས་བུད་མེད་ཀྱིས་འཁྱུད་པའོ། །བུད་མེད་ཉིད་སྙིང་རྗེ་ཞིང་དག་པའི་སེམས་ཀྱིས་བདག་ལ་བཟུང་ཞིང་འཁྱུད་པ་ནི་ཉེས་མེད་དོ། །བུད་མེད་རྒན་པོ་གཙང་ག་ལ་ཞེས་བྱ་བ་ཞིག་གིས་སངས་རྒྱས་འཁོར་དང་བཅས་ཏེ་འཆག་ཏུ་གཤེགས་པ་ལ་སངས་རྒྱས་ཀྱི་སྐུ་ལ་འཁྱུད་ནས་ཨ་ནན་གྱིས་འཁྱུད་དུ་མ་བཅུག་པ་དང༌། སངས་རྒྱས་ཀྱི་ཞལ་ནས་ཚེ་རབས་ལྔ་བརྒྱར་ངའི་མ་བྱས་ཏེ། དེའི་བག་ཆགས་ལས་སྡུག་ཅིང་དགའ་བའི་སེམས་ཀྱིས་འཛིན་པ་ཡིན་ཏེ། འཛིན་དུ་མ་བཅུག་ན་ཁྲག་ཏུ་སྐྱུགས་ཏེ་འཆི་ཡིས་ཞོག་ཤིག་ཅེས་བྱུང་བ་ལས་བཅས། ལུས་ཀྱིས་རེག་པའི་སྟེ་རྣམ་པར་འབྱེད་པའིའོ། །འཛིན་པའི་དགེ་འདུན་གྱི་ལྷག་མ་འདུལ་བ་
རྣམ་པར་འབྱེད་པའི་ནང་ནས་འབྱུང་པའི་མདོ།། །།འཇམ་མཉེན་དྲོ་བའི་བསམ་པས་སྦོམ་པོའོ། །འདོད་ཆགས་ཀྱི་སེམས་མེད་ལ་བུད་མེད་ཀྱི་ལུས་ལ་འཇམ་པའམ་མཉེན་པའམ་དྲོ་བའི་ཕྱིར་བསམས་ཏེ་སད་པའི་ཕྱིར་བཟུང་བ་ནི་སྦོམ་པོ། །ལྟུང་བ་མེད་པ་ནི་སྙིང་རྗེས་སྡུག་བསྔལ་བ་ལས་བཏང་ནའོ། །བུད་མེད་ལ་རེག་ཀྱང་ཉེས་པར་མི་འགྱུར་བ་ནི་བཅིངས་པ་དང་བཟུང་བ་དང་བཏགས་པ་དང་མེར་སོང་བ་ལ་སོགས་པ་དབྱུང་ཞིང་དགྲོལ་བའི་ཕྱིར་སྙིང་རྗེ་བའི་སེམས་ཀྱིས་རེག་པ་ནི་ཉེས་མེད་དོ། །མ་དང་སྲིང་མོ་དང་བུ་མོ་དེའི་འདུ་ཤེས་ཀྱིས་ནའོ། །མདོ་ལྟག་མ་ལྟར་བུད་མེད་ཉོན་མོངས་པ་སྙིང་རྗེས་བཏང་བའི་ཕྱིར་རེག་པ་ནི་རྒན་མོ་ལ་ནི་མར་བསམས། དེ་བས་གཞོན་ནུ་ལ་ནི་སྲིང་མོར་བསམས། གཞོན་ནུ་ཆུང་དུ་ལ་ནི་བུ་མོར་བསམས་ཏེ་རེག་ན་ཉེས་མེད་དོ། །སྔོན་སྤྱོད་པ་ལ་ཀུན་དགའ་པས་ཀྱང་ངོ༌། །སྔོན་གྱི་ཆུང་མ་སྡུག་ཅིང་དགའ་བའི་ཕྱིར་བཟུང་སྟེ། དགེ་སློང་འདོད་ཆགས་ཀྱི་སེམས་མ་ལངས་ན་ཉེས་མེད། ལུས་ཀྱི་རེག་པ་སྟེ་དྲིས་པའིའོ། །འཛིན་པའི་དགེ་འདུན་གྱི་ལྷག་མ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།བསླང་བ་དང་ཟན་དང་སྐོན་ལ་སོགས་པས་བུད་མེད་ལ་བྱ། ས་དང་བོང་བ་ལ་སོགས་བུད་མེད་ཀྱི་དབང་པོར་བཅུག་ན་སྦོམ་པོའོ། །བུད་མེད་ཀྱི་མོ་མཚན་དུ་མིང་གིས་སྨོས་པ་འདི་རྣམས་ལས་གང་ཡང་རུང་རེག་པར་འདོད་པའི་ཕྱིར་བཅུག་ན་སྦོམ་པོའོ། །ཆུང་མ་ཞིག་གཉིད་ཀྱིས་ལོག་སྟེ་མོ་མཚན་སྣང་བ་ལ་དྲུག་སྡེས་ཁ་དང་དེ་བ་སྤིབས་ཤིང་བཞུགས་ན་བཤོས་གསོལ་ཞེས་ཟེར་ཞིང་མོ་མཚན་དུ་ཟན་ལ་སོགས་པ་བཅུག་པ་ལས་བཅས། ཉེས་བྱས་པ་ནི་རྐང་པའམ་ཕྲག་པ་ལ་སོགས་པས་བུད་མེད་ལ་ཕུལ་ནའོ། །འདོད་ཆགས་ཀྱི་སེམས་མེད་ཀྱང་བུད་མེད་ཀྱི་ཁྲོད་དུ་ལུས་དང་ཕྲག་པ་དང༌། རྡོག་པ་ལ་སོགས་པས་ཕུལ་ཅིང་སོང་ན་ཉེས་བྱས། དེ་སྟན་ལ་ཡང་ངོ༌། །བུད་མེད་ཀྱི་སྟན་ལ་བུད་མེད་འདུག་ཀྱང་རུང་མི་འདུག་ཀྱང་རུང་འགྲེང་ཡང་རུང༌། འདོད་ཆགས་ཀྱི་སེམས་ཀྱིས་ཕུལ་ཏམ་རེག་ན་ཉེས་བྱས། བྲེད་དེ་འགྱེལ་བའི་བུད་མེད་
བསླང་ན་ཡང་ངོ༌། །བུད་མེད་སྟེག་འཆོས་པ་ལ་བསླང་ན་འདོད་ཆགས་ཀྱི་སེམས་མེད་ཀྱང་ཉེས་བྱས་སུ་འགྱུར་ཏེ། ཤི་བ་འམ་ལྡང་མི་ནུས་པ་མ་ཡིན་པས་བསླང་བའི་སྐབས་སུ་མི་འབབ་པས་ཉེས་བྱས། ལྟུང་བ་མེད་པ་ནི་བུད་མེད་ཀྱི་དེ་ལ་དེ་གསུམ་བྱས་པའོ། །མདོ་ལྟག་མ་གསུམ་བུད་མེད་ཀྱི་བདག་ལ་བྱ་སྟེ་འདོད་ཆགས་ཀྱི་སེམས་མ་ལངས་པ་ནི་ཉེས་མེད། བཟུང་བ་ཡང་ངོ༌། །བུད་མེད་ཀྱིས་བདག་གི་ལུས་ཀྱི་ཡན་ལག་ལས་བཟུང་སྟེ་འདོད་ཆགས་མ་གཡོས་ན་ཉེས་མེད། མས་འཁྱུད་ན་ཡང་ངོ༌། །བདག་གི་མས་སྡུག་པའི་ཕྱིར་ལུས་ལ་འཁྱུད་དེ་འདོད་ཆགས་ཀྱི་སེམས་མ་ལངས་ན་ཉེས་མེད། བུ་མོ་པང་དུ་འདུག་ན་ཡང་ངོ༌། །བདག་གི་བུ་མོ་སྔོན་འགྲོགས་འགྲོགས་པའི་དབང་གིས་བདག་གི་པང་པར་འདུག་པ་ནི་ཉེས་མེད། འགྱེལ་ཏེ་བུད་མེད་ཀྱི་སྟེང་དུ་ལྟུང་ན་ཡང་ངོ༌། །རེངས་པའམ་འཇིགས་པས་བདག་བུད་མེད་ཀྱི་སྟེང་དུ་འགྱེལ་ཏམ་སྟེག་འཆོས་ཏེ་རེག་ནའང་ཉེས་མེད། ལུས་ཀྱི་རེག་པ་སྟེ་བྱེ་བྲག་ཏུ་གདོན་མི་ཟ་བའིའོ། །འཛིན་པའི་དགེ་འདུན་གྱི་ལྷག་མ་འདུལ་བ་བྱེ་བྲག་ཏུ་གདོན་མི་ཟ་བའི་ནང་ནས་འབྱུང་བའི་མདོ་ལུས་ཀྱི་རེག་པའོ། །འཛིན་པའི་དགེ་འདུན་གྱི་ལྷག་མ་འདུལ་བ་སྡེ་སོ་སོའི་ནང་ནས་འབྱུང་བའི་མདོ་རྫོགས་སོ།། །།འདི་མན་ཆད་སྨྱེ་ཚིག་ལ་འཆད། སྨྱེ་ཚིག་ཏུ་སྨྲས། འཛིན་པའི་རྩིས་མགོ་བཞིའི་སྟེང་དུ་སྨྱེ་ཚིག་ཏུ་སྨྲས་པ་འདིས་བསྣན་ཏེ་ལྔར་ལྡན་ན་ལྷག་མའོ། །སྨྱེའི་དོན་ལས་སོ། །སྨྱེ་ཚིག་ནི་ར་རྒྱ་རྣ་རུ་བྱའོ་ཞེས་བྱས་པ་ལ་བྱ། ཆགས་པ་དང་བརྟུལ་བ་དང་རྒྱོའོ་ཞེས་སྨྲས་པ་དང་དགའ་བར་ཚོར་བ་དང་བུད་མེད་ཡིན་པ་དང༌། ཚིག་བརྡ་ཕྲད་པ་དང་ཡན་ལག་འདི་རྣམས་ལྡན་ན་སྨྱེ་ཚིག་གི་ལྷག་མར་འགྱུར་རོ། །ཊཱི་ཀ་འདི་ནི་མདོ་འདི་གཉིས་ལ་སྤྱིར་འཆད། གང་གིས་ཆད་པར་ནུས་ན་དེས་ནི་བསྒོ་བའི་མཐའོ། །མི་ཚངས་པར་སྤྱོད་དོ་ཞེས་བུད་མེད་ལ་སྨྲ་བའི་ཚེ་མི་ཚངས་པར་ཞེས་ནི་ཁར་བྱུང་གི་སྤྱོད་དོ་ཞེས་བྱ་བ་ཁར་མ་བྱུང་ཡང་སྔ་མ་ཕྱེད་བྱུང་བས་མི་ཚངས་པར་སྤྱོད་པར་བུད་མེད་ཀྱིས་གོ་ན་ལྷག་མར་འགྱུར་རོ། །དེར་ཆུད་པའི་དོན་སྨྲས་ན་སྦྱོར་བ་མ་ཡིན་པ་
མ་ཡིན་ནོ། །མི་ཚངས་པར་སྤྱོད་དོ་ཞེས་ནི་མ་སྨྲས་ཀྱི་སྟེག་སྔགས་མ་ཟུར་དུ་སྨྲས་ཏེ་བུད་མེད་ཀྱིས་མི་ཚངས་པར་སྤྱད་པར་གོ་ཡང་སྦོམ་པོ། བསྟོད་པ་དང༌། བུད་མེད་ཀྱི་ཁ་དང་རྐུབ་དང་མོ་མཚན་གསུམ་བཟང་ངོ་འཇམ་མོ་ཞེས་བསྟོད་པ་དང༌། སྨད་པ་དང་སྒོ་གསུམ་ལ་མནམ་མོ་མི་སྡུག་གོ་བཤུལ་ཞེས་སྨྲས་པ་དང༌། གསོལ་བ་དང་བུད་མེད་ཀྱི་སྒོ་གསུམ་ལ་བསླངས་པ་དང་བུད་མེད་ཉིད་སྐོག་ཏུ་འདོང་ཞེས་བསླངས་བ། ཉེ་བར་གསོལ་པ་དང༌། བུད་མེད་དང་སྐྱེས་པ་གཉིས་ཡོང་གིས་ལྷན་ཅིག་ཏུ་འདུག་བ་ཡིན་ན་ཕྲད་པའི་དུས་ཀྱང་དཀའ་ནའོ། །གཉིས་ལྷན་ཅིག་འཁོད་དམ་ཞེས་བྱས་པ་དང༌། དྲིས་པ་དང་བུད་མེད་ཀྱི་སྒོ་གསལ་ཁྱོད་ཀྱི་སྒོ་རྣམས་ཅི་འདྲ་ཞེས་དྲིས་པ་དང༌། ཀུན་དྲིས་པ་དང་བུད་མེད་པའོ། །བུ་གཉིས་ལྷན་ཅིག་འཁོད་ན་དགའ་འམ་མི་དགའ་ཞེས་དྲིས་པ་དང༌། བཤད་པ་དང་བུད་མེད་ལ་ང་ནི་ཁྱོད་ལ་དད་ཅིང་དགའ་ན་ཁྱོད་ང་ལ་དགའ་འམ་མི་དགའ་ཞེས་བྱས་པ་དང༌། མོས་པ་དང་ཁྱོད་དང་ང་གཉིས་ནམ་ལྷན་ཅིག་ཏུ་འགྲོགས་ཤིང་ཕྲད་ཅེས་སྨྲས་པ་དང༌། ཁྲོས་པ་དང་མོ་མཚན་ལ་དམར་མོ་སྦུན་མོ་གླེག་མོ་འདིར་མགལ་དུམ་ཆུག་ཅེས་བྱས་པ་དང༌། ཕྱིར་སྨྲ་བ་དང་མིང་གིས་སྨོས་པ་འདི་རྣམས་གང་ཡང་རུང་སྟེ། བུད་མེད་ཀྱིས་བདག་ལ་སླར་སྨྲས་ཏེ་བདག་གིས་སླར་ལན་གླན་པ་དང༌། ཚིག་སོ་སོ་ལ་བྱེ་བྲག་མེད་དོ། །འདི་རྣམས་གང་ཡང་རུང་སྟེ་བདག་གིས་སྨྲས་སམ་བུད་མེད་ཀྱིས་དྲིས་ཏེ་ལན་གླན་ཞིང་རྒྱོ་ཚིག་དང་ལྡན་པར་སྨྲས་ན་ལྷག་མར་འགྱུར། རྒྱོ་ཚིག་མེད་ན་གང་སྨྲས་ཀྱང་སྦོམ་པོ། ལྟུང་བ་མེད་པ་ནི་ཡུལ་གྱི་སྐད་ཀྱི་དབང་གིས་དོན་གྱི་ཕྱིར་བསམས་ནའོ། །བདག་གི་ཡུལ་གྱི་སྐད་དུ་སྨྱེ་ཚིག་ཏུ་སྨྲ་བར་མ་བསམས་པར་དོན་གཞན་གྱི་ཕྱིར་སྨྲས་པ་ལས་ཡུལ་གཞན་གྱི་སྐད་དུ་རྒྱོ་ཚིག་ཏུ་གྱུར་པ་ནི་ཉེས་མེད་དོ། །རྒྱ་གར་ཡུལ་གྱི་དགེ་སློང་གཅིག་གིས་སྟོད་ཕྱོགས་ཀྱི་ཡུལ་ཀོ་ས་ལར་ཕྱིན་ཏེ་ཀུན་དེ་མེད་ནས་ཁྱིམ་པ་ཁྱོ་ཤུག་གཉིས་ཤིག་ལས་ཀུན་དེ་བསླངས་ཞེས་བྱས་པ་དང༌། ཡུལ་ཀོ་ས་ལའི་སྐད་དུ་ཀུན་དེ་ལ་མོ་མཚན་ཞེས་ཟེར་ཏེ་འཕྱས་སུ་བྱས་པ་ལས་བཅས། མིང་འདྲ་བའི་ཆར་གཏོགས་པས་
ཀྱང་ངོ༌། །དོན་གཞན་དུ་སྨྲས་པ་ལས་ཚིག་གི་མགོ་འམ་མཇུག་སྨྱེ་ཚིག་འདྲ་བར་འབྱུང་བའང་ཉེས་མེད་དེ། སྨྱེ་ཚིག་ཏུ་སྨྲ་བའི་སྟེ། རྣམ་པར་འབྱེད་པའིའོ། །སྨྱེ་ཚིག་ཏུ་སྨྲ་བའི་དགེ་འདུན་གྱི་ལྷག་མ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྦོམ་པོ་ནི་མཛེས་སོ་ཞེས་ཟེར་ན་ཡང་ངོ༌། །བུད་མེད་ཀྱི་སྒོ་གསུམ་ལ་མཛེས་སོ་བཟང་ངོ་ཞེས་སྨྲས་ན་སྦོམ་པོ། །སྡིག་ཏོ་ཅན་ནོ་ཞེས་ན་ཡང་ངོ༌། །ཁ་དང་སྟུ་འདྲ་བའི་སྡིག་ཏོ་ཅན་འདི་ཞེས་སྨྲས་པ་དང༌། སྒོ་གསུམ་ལས་བཙོག་པ་སྡིག་ཏོ་ཅན་འདི་ཞེས་སྨྲས་པའམ་སྦོམ་པོ། ཁྱོད་ཀྱི་རྨ་ཁ་མཛེས་སམ་སྡིག་ཏོ་ཅན་འདི་ཞེས་ན་ཡང་ངོ༌། །བུད་མེད་ཀྱི་སྒོ་གསུམ་ལ་མཛེས་སམ། སྡིག་ཏོ་ཅན་འདི་ཞེས་སྨྲས་པ་དང༌། སྒོ་གསུམ་ལ་མཛེས་སོ་བཟང་ངོ་ཞེས་སྨྲས་ན་ཡང་ངོ༌། །རྒྱོ་ཚིག་དང་མི་ལྡན་ན་སྦོམ་པོ། གོ་ཤིག་ཅེས་ན་ཡང་ངོ༌། །ཁྱོད་ཀྱི་མོ་མཚན་ལས་ཤས་ནུབ་འགའ་ཙམ་ང་ལ་ཡང་བྱིན་ཅིག་ཅེས་སྨྲས་ན་ཡང་སྦོམ་པོ། ཁྱོད་དང་ལྷན་ཅིག་གོ་ཤིག་ཅེས་ན་ཡང་ངོ༌། །བུད་མེད་ལ་ཁྱོད་ཀྱི་ཁྱོ་འདི་སྙེད་བདོག་ན་དེ་སྙེད་ཀྱི་ཤས་ལས་ངའང་མོ་མཚན་གྱི་ཤས་ལས་བྱིན་ཅིག་ཅེས་སྨྲས་ན་ཡང་སྦོམ་པོ། ང་དང་ལྷན་ཅིག་ཏུ་ཉལ་བའམ་ཅོར་ཅིག་ཅེས་ན་ཡང་ངོ༌། །བུད་མེད་ལ་ང་དང་ལྷན་ཅིག་ཏུ་ཉལ་ལོ་ཞེས་བྱས་སམ་ང་ལ་ཅོར་ཅིག་ཅེས་བྱས་ན་སྦོམ་པོར་འགྱུར། སྨྱེ་ཚིག་ཏུ་སྨྲས་པ་སྟེ་དྲིས་པའིའོ། །རྒྱོ་ཚིག་ཏུ་སྨྲས་པའི་དགེ་འདུན་གྱི་ལྷག་མ་སྟེ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །། འཕྲུལ་པ་སྤྲུལ་པའི་ཆོས་ཅན་ལ་སྨྲས་ནའང་དེ་ལྟ་བུའོ། །འཕྲུལ་པའི་བུད་མེད་ནམ་མཁའ་ལ་འདུག་པ་ལས། དགེ་སློང་གིས་རྒྱོ་ཚིག་སྨྲས་ན་སྦོམ་པོ། རྒྱོ་བྱིན་ཅིག་ཅེས་ཀྱི་སྲིང་མོ་ཁོ་བོ་ལ་བྱིན། བུད་མེད་ལ་དགེ་སློང་གི་རྒྱོ་ཚིག་ཅེས་བྱ་བའི་ཚིག་ཉིད་དུ་ནི་མ་སྨྲས་ཀྱི་རྒྱའམ་རྒྱུ་བྱིན་ཞེས་སྨྲས་ཏེ། རྒྱ་ཚིག་བུད་མེད་ཀྱིས་གོ་ཡང་སྦོམ་པོ། ཀྱེ་སྲིང་མོ་གང་ཁྱོད་ལ་སྣང་བ་དེ་བྱིན། བུད་མེད་ལ་མོ་མཚན་བསླང་བའི་ཕྱིར་ཁྱོད་ལ་སྣང་ཞིང་ཡོད་པ་དེ་ང་ལ་བྱིན་ཞེས་སྨྲས་ནའང་སྦོམ་པོ། ཀྱེ་སྲིང་མོ་གང་ཁྱོད་ཀྱི་མདུན་ན་མོ་དེ་བྱིན། བུད་མེད་ལ་མོ་
མཚན་བསླང་པའི་ཕྱིར་ཁྱོད་ཀྱི་མདུན་ན་ཡོད་པ་དེ་ང་ལ་བྱིན་ཞེས་སྨྲས་ན་ཡང་སྦོམ་པོ། །ཀྱེ་སྲིང་མོ་གང་ཁྱོད་ཀྱི་ཡིད་དུ་འོང་བ་དེ་བྱིན། བུད་མེད་ལ་མོ་མཚན་བསླང་བའི་ཕྱིར་ཁྱོད་ཀྱི་ཡིད་དུའང་བ་དེ་ང་ལ་བྱིན་ཞེས་སྨྲས་ནའང་སྦོམ་པོ། ཁྱོད་འདོད་པ་བྱིན་ཅིག་ཅེས་ང་ལ་བསྒོ་ན་ཁྱོད་ཅི་འདོད་སྨྲོས་ང་ནི་སྲིང་མོ་ཁྱོད་འདོད་དོ། །ཁྱིམ་བདག་མོ་ན་རེ་ཁྱོད་ཅི་འདོད་པ་བྱིན་ཅིག་ཅེས་ངའི་ཁྱིམ་ཐབ་ཟེར་ན་ཁྱོད་ཅི་འདོད་ཅེས་ཟེར་བ་ལ། དགེ་སློང་གིས་ང་ནི་ཁྱོད་འདོད་ཅེས་བྱས་ན་ཡང་སྦོམ་པོ། ཀྱེ་སྲིང་མོ་ཆུ་དང་བཟའ་བ་དང་ཐུག་པ་དང་མཆོད་སྟོན་བཞིན་དུ་ཁྱོད་ང་ལ་བྱིན་ཞེས་སྨྲས་ན་ཡང་ངོ༌། །ཁྱིམ་བདག་མོ་བུད་མེད་ཀྱིས། དགེ་སློང་ལ་ཁ་ཟས་མིང་གིས་སྨོས་པ་འདི་རྣམས་གསོལ་ཞེས་ཟེར་བ་ལ། དགེ་སློང་གིས་ཁ་ཟས་དེ་བཞིན་དུ། ཁྱོད་ལ་ང་བཀྲེས་ཤིང་སྐོམ་གྱིས་ཁྱོད་བདག་འདོད་དོ་ཞེས་སྨྲས་ནའང་སྦོམ་པོ། བོང་བུ་དང་ཁྱོད་འདི་བྱོས་ཤིག །བུད་མེད་ལ་ཁྲོ་བའི་ཚིག་ཏུ་བོང་བུ་དང་རྒྱོ་ཤིག་ཅེས་བྱ་བའི་ཕྱིར་བོང་བུ་དང༌། བུད་མེད་ཁྱོད་འདི་བྱོས་ཤིག་ཅེས་བྱས་ནའང་སྦོམ་པོ། སྲིང་མོ་བསོད་སྙོམས་མ་སྐྱེས་བུ་ལ་འདོད་པ་གླེང་བར་སྤྱད་པ་སྤྱོད་དོ། །དགེ་སློང་མ་གདོང་འཁྲུ་བའམ་མིག་རྩིས་བསྐུས་པ་ལ་ཁྱོད་སྐྱེས་པ་འདོད་ཆགས་སློང་བའི་ཕྱིར་བྱེད་དོ་ཞེས་བྱས་ནའང་སྦོམ་པོ། མགལ་དུམ་དེར་ཆུག་བུད་མེད་ལ་མོ་མཚན་དུ་མགལ་དུ་མ་ཆུག་ཅེས་སྨྲས་ནའང་སྦོམ་པོ། རང་བཞིན་གྱི་སྨྱེ་ཚིག་ཏུ་སྨྲ་བ་ལ་སྨྱེ་ཚིག་ཏུ་སྨྲ་བ། དགེ་སློང་རྟག་ཏུ་ཁ་ངན་སྨྱེ་ཚིག་ཏུ་སྨྲ་བ་དར་བཞིན་དུ་ཟེར་ཡང་རྒྱོ་ཚིག་སྨྲས་ན་ནི་མི་འབྲི་སྟེ་མདོ་ལྟག་མ་རྣམས་སྨྲས་ན་སྦོམ་པོ། སྨྱེ་ཚིག་སྨྲ་བ་བྱེ་བྲག་ཏུ་གདོན་མི་ཟ་བའིའོ། །སྨྱེ་ཚིག་ཏུ་སྨྲ་བ་འདུལ་བའི་བྱེ་བྲག་ཏུ་གདོན་མི་ཟ་བ་ཞེས་བྱ་བའི་ནང་ནས་འབྱུང་བའི་མདོ། སྨྱེ་ཚིག་སྨྲ་བའིའོ། །སྨྱེ་ཚིག་ཏུ་སྨྲ་བ་དགེ་འདུན་གྱི་ལྷག་མ་འདུལ་བ་སོ་སོ་ནས་འབྱུང་བ་རྫོགས་སོ།། །།ཁུན་སྤྱོད་ལ་འཆད། སྨྱེ་བས་བདག་གི་གཡོག་ཏུ་བརྗོད་ན་ཡང་ངོ༌། །བུ་མོ་སྤྱོད་པའི་ནང་ན་གཙོ་བོ་སྟེང་ལྟ་བུ། དགེ་སློང་ཚུལ་ཁྲིམས་དང་ལྡན་ཡོན་ཏན་དང་ལྡན་པ་ཞེས་བདག་ལ་
བསྟོད་པ་དང་རྒྱོ་ཚིག་དང་ལྡན་པར་བུད་མེད་ལ་སྨྲས་ན། དགེ་འདུན་གྱི་ལྷག་མར་འགྱུར་རོ། །ཆགས་པ་དང་བརྟུལ་བ་དང་དགའ་བར་ཆོར་བ་དང་བུད་མེད་བརྡ་ཕྲད་ཅིང་ལེགས་ཉེས་ཤེས་པ་དང་སྤྱིའི་རྩིས་མགོ་འདི་རྣམས་གང་ཡང་རུང༌། ཀུན་སྤྱོད་ཀྱི་ལྷག་མའི་ཡན་ལག་ཏུ་གཏོགས་སོ། །བསྟོད་ནས་རྗེས་སུ་ཡི་རང་བའི་ཚིག་ཀྱང་དེ་བཞིན་ནོ། །བུད་མེད་ཀྱིས་འདི་ནི་སྤྱོད་པའི་ནང་ན་གཙོ་བོ་སྟེ། ཁྱོད་ལྟ་བུ་དགེ་སློང་ཚུལ་ཁྲིམས་དང་ལྡན་ན་ཡོན་ཏན་དང་ལྡན། དགེ་བའི་ཆོས་དང་ཚངས་པར་སྤྱོད་པའོ་ཞེས་བསྟོད་ཅིང་སྨྲ་བ་ལ། དགེ་སློང་དགའ་ནས་ཁྱོད་ཟེར་བ་བཞིན་དུ་ང་ཡིན་ནོ་ཞེས་སྨྲས་ན། བུད་མེད་དེ་སྐད་ཟེར་བ་རྒྱོ་ཚིག་དང་ལྡན་ན་དགེ་འདུན་གྱི་ལྷག་མའོ། །དེ་ལ་ཟློས་ཤིང་སྨྲ་དེ་ནའོ། །བུད་མེད་དེ་ན་རེ་འདི་ནི་སྤྱོད་པའི་ན་གཙོ་སྟེ་ཁྱོད་ལྟ་བུའོ། །དགེ་སློང་ཚུལ་ཁྲིམས་དང་ལྡན་ཡོན་ཏན་དང་ལྡན། དགེ་བའི་ཆོས་དང་ཚངས་པར་སྤྱོད་པའོ་ཞེས་བསྟོད་ཅིང་རྒྱོ་ཚིག་དང་ལྡན་པར་སྨྲ་བ་ལ་དགེ་སློང་གིས་དེ་བཞིན་དུ་བཟླས་ཏེ་སྨྲས་ན་ཡང་ལྷག་མའོ། །དེས་སྨྱེ་ཚིག་གམ་མ་བྱུང་ན་སྦྱོར་བའོ། །དགེ་སློང་གིས་སྨྱེ་ཚིག་ཏུའང་སྨྲས། བདག་ཅེས་ཀྱང་བྱས་ན་ལྷག་མ་བདག་གམ་རྒྱོ་ཚིག་གང་ཡང་རུང་གཅིག་མ་ཕྱུང་ན་སྦོམ་པོ། གཉིས་ཀ་ན་ནི་དེའོ། །སྨྱེ་ཚིག་ཀྱང་མ་ཕྱུང་བདག་ཅེས་ཀྱང་མ་བྱས་པར་དགེ་སློང་ཡོན་ཏན་དང་ལྡན་པའི་གཡོག་བྱས་ན་བསོད་ནམས་ཆེའོ་ཞེས་བྱས་ན་ཉེས་བྱས། ཀུན་སྤྱོད་བསྔགས་པའོ། །ཀུན་སྤྱོད་པ་བསྔགས་པའི་དགེ་འདུན་གྱི་ལྷག་མ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྨྱན་གྱི་ལྷག་མ་ལ་འཆད་དེ། སྡུད་པ་བུད་མེད་དང་སྐྱེས་པ་གཉིས་བསྡུས་དང༌། གཞན་ལའོ་ཕ་རོལ་གཞན་གཉིས་བསྡུས་པ་དང༌། གཞན་གྱིས་བདག་དང་གཞན་དུ་འདུ་བ་ལ་མི་བྱའི་གཞན་དང་གཞན་དུ་བསྡུས་པ་དང༌། དེའི་ཕྱིར་བསྡུ་བར་བྱ་བའི་ཕྱིར་དང༌། མི་མཐུན་པ་ལ་མཐུན་པར་གྲུབ་པའི་ཕྱིར། ཁྱོ་ཤུག་ལྟ་བུ་སྔོན་འདུས་ཟིན་པ་དང༌། སྔར་མི་ཚངས་པར་སྤྱོད་སྤྱོད་པ་མ་ཡིན་པ་མ་འདུས་ཤིང་མ་ཕྲད་པ་ལ་གཉིས་བསྡུས་པ་དང༌། ཕོ་ཉར་ཕྲིན་པ་བསྡུ་བའི་ཕྱིར་བདག་གིས་ཕོ་ཉར་ཕྲིན་བྱས་པ་དང༌།
སྤྲད་པ་ལས་གཉིས་བསྡུ་བའི་ཕྱིར་བུད་མེད་དམ་སྐྱེས་པ་གང་རུང་གཅིག་ལས་སྤྲད་པར་བྱ་བའི་ཆ་མནོས་པ་དང༌། ཕ་རོལ་དུ་སྦྲོན་པ་མདོ་ལྟག་མ་ལྟར་ཆ་ནོས་ནས་གང་དང་བསྡུ་བའི་མི་ཕ་རོལ་པོ་དེ་ལ་ཕྲིན་བསྐྱལ་བ་དང༌། དེར་སྨྲས་ནས་སྔ་མ་ལ་སྦྲོན་པ། མདོ་ལྟག་མ་ལྟར་ཕྲིན་བསྐྱལ་ནས་དེ་ལྟར་རུང་ངོ་ཞེས་ཟེར་བའི་ལན་སླར་བསྐྱལ་བ་དང་ཡན་ལག་འདི་རྣམས་ལྡན་ན་སྨྱན་བྱེད་པའི་ལྷག་མར་འགྱུར་རོ། །ཆ་ནོས་ཏེ་སྦྲན་ནས་དེས་ཐོབ་པ། དགེ་སློང་དང་བུད་མེད་དང་སྐྱེས་པ་གསུམ་མངོན་སུམ་དུ་འཁོད་དེ་སྐྱེས་པས། དགེ་སློང་ལ་བུད་མེད་འོ་ནི་ལ་ང་དང་ཉལ་དུ་རུང་ངམ་མི་རུང་ཞེས་ཕྲིན་ཟེར་དུ་བཅུག་སྟེ་སྐྱེས་པའི་ཚིག་ཀྱང་བུད་མེད་ཀྱིས་ཐོས་བུད་མེད་ལ་ཕྲིན་བྱས་ནས་རུང་ངོ་ཞེས་བྱས་པའང་སྐྱེས་པས་ཐོས་བཞིན་དུ་རུང་བའི་ལན་སླར་བསྐྱལ་བ་དང༌། ལྷག་མ་མངོན་སུམ་དུ་ཀུན་ཐོས་ཏེ་ལན་རིང་ནས་མ་བསྡུས་ཞེས་ལྷག་མར་མི་འགྱུར་དུ་མ་རེ་ཤིག །འདི་དག་བྱེད་པ་ནི་ཐ་དད་དུའོ། །སྨྱན་བྱ་བར་ཆ་མནོས་ཤིང་ཕྲིན་བསྐྱལ་བ་ལན་རེ་རེ་ལ་སྦོམ་པོ་རེ་རེར་འགྱུར་ཏེ། ལན་བརྒྱ་ཞིག་བསྐྱལ་ཏེ་ཕྲིན་བྱས་ན་སྦོམ་པོ་བརྒྱའོ། །ཐ་མར་བྱས་ཀྱང་མི་ན་མི་སྦྱོར་བ་མ་ཡིན། སྨྱན་བྱ་བའི་ཕྱིར་ཕྲིན་བྱེད་པ་ལས་ཕོ་མོ་གཉིས་མ་འདུས་ཤིང་མ་ཕྲད་དུ་ཟིན་ཀྱང་ཕྲིན་པ་ལན་རེ་རེ་ལ་སྦོམ་པོ་རེ་རེ་ཡོད་དོ། །འབྲས་བུ་གཅིག་ཀྱང་བྱེད་པས་ཟིན་ན་བྱེད་པ་སོ་སོ་ལ་མེད་པར་མི་འགྱུར་རོ། །ཆུང་མའམ་མི་ཚངས་པར་སྤྱོད་དུ་མི་ཁུགས་པའི་ཕྱིར། དགེ་སློང་མང་མོ་ཞིག་ལ་ཕེའུ་བྱེད་པར་བཅོལ་ཏེ། སྨྱན་བྱེད་དུ་བཅུག་ནས་འདུས་པར་གྱུར་ན་ཡང་དགེ་སློང་ཀུན་ལ་ལྷག་མ་རེ་རེར་འགྱུར་རོ། །ཕན་ཚུན་དུ་ཕྲིན་བྱེད་པའི་ཚེ་ཡང་དགེ་སློང་ཀུན་ལ་སྦོམ་པོ་རེ་རེ་ཡོད་དོ། །དགེ་སློང་མང་ཞིག་ལ་ཕེའུར་བཅོལ་བའི་ནང་ནས་སྨྱན་གྱི་ཕེའུར་པར་མ་བཏུབ་པའི་རྣམས་ལ་ཉེས་མེད་དོ། །འདིར་བདག་བཞིན་དུ་ཕོ་ཉས་ཀྱང་བདག་སྨྱན་གྱི་ཕྲིན་པ་བྱེད་དུ་བཅུག་པ་ལས། བདག་གི་ཡང་གཞན་ཞིག་ལ་སྨྱན་གྱི་ཕྲིན་པར་བཅུག་སྟེ་སྨྱན་གྱི་དོན་གྲུབ་ན་འདུས་པར་གྱུར་ན་ཡང་ལྷག་མ། སྦྱར་ན་བདག་པོ་ལ་ཡང་ངོ༌། །ཇོ་བོའམ་ཕ་མའམ་དཔོན་
པོ་ལྟ་བུ་ཁྱོ་ཤུག་སྡུད་ཅིག་འཚེམ་པའི་དབང་ཡོད་པ་ཞིག་ལ། སྡུས་ཤིག་ཅེས་བྱས་ཏེ་འདུས་ནའང་ལྷག་མར་འགྱུར། ཉེས་བྱས་པ་ནི་གཞན་ལའོ། །སྡུད་ཅིང་འཚེམ་པའི་དབང་མེད་པ་ཞིག་ལ་དེ་གཉིས་སྡུས་ཤིག་ཅེས་བྱས་ན་བསྡུ་བའི་དབང་མེད་པས་ཉེས་བྱས། ངག་བཞིན་དུ་སྨྱན་བྱ་བའི་ཕྲིན་བྱེད་པ་བཞིན་མིང་གིས་སྨོས་པ་འདི་རྣམས་ཀྱི་དོན་གྲུབ་པར་གྱུར་ན་ལྷག་མ། ཡི་གེ་དང་ཡི་གེ་སྤྲིང་སྟེ་བསྡུས་པ་དང་ས་ལ་བྲིས་ཏེ་བརྡ་ཕྲད་ནས་བསྡུས་པ་དང༌། ལག་བརྡ་དང་ལག་པས་བརྡ་བྱས་ཏེ་བསྡུས་པ་དང༌། བཏུས་པ་དང་ཤིང་ངམ་རྡོ་འམ་ས་ཚིགས་འདིར་ཤོག་ཤིག་ཅེས་བཏུས་ཏེ་བསྡུས་པ་དང༌། དུས་དང༌། ཉི་ཚོད་འདི་ཙམ་ན་ཤོག་ཤིག་ཅེས་བྱས་ཏེ་བསྡུས་པ་དང༌། མཚན་མ་དག་ཀྱང་ངོ༌། །གོས་འདི་འདྲ་བ་ཞིག་བསྒྱུར་ཏེ་གྱོན་ན་འདིར་ཤོག་ཤིག་ཅེས་བྱས་ཏེ་བསྡུས་པ་དང་འདི་རྣམས་གང་ཡང་རུང་འདུས་པར་གྱུར་ན་ལྷག་མ། སྟུ་འཚོང་མ་ལ་ཡང་མཐུན་པ་མ་ཡིན། སྟུ་འཚོང་མ་དང་མི་ཚངས་པར་སྤྱོད་པའི་སྨྱན་བྱས་ཏེ་བསྡུས་ན་ཡང་ལྷག་མ་སྟེ་ཡོང་གིས། སྟུ་འཚོང་མ་ལྟ་ཀུན་དབང་གིས་སྙམ་སྟེ་སྐད་ཅིག་སྤྲད་པས་ལྷག་མར་མི་འགྱུར་སྙམ་མ་རེ་ཤིག །བཞི་ཚུན་ཆད་བདག་གི་མ་ཡིན་བ་སྦྱར་ན་ཡང་ངོ༌། །སྐྱེས་པ་དང་བུད་མེད་སྔོན་མི་ཚངས་པར་སྤྱོད་པ་ལན་གསུམ་མན་ཆད་ཅིག་ཕྲད་ཟིན་བ་ལས་བསྡུས་ཏེ་དགེ་སློང་གིས་སྨྱན་བྱས་ན་ལྷག་མར་འགྱུར། ལན་གསུམ་ན་སྔར་ཕྲད་དུ་ཟིན་ཀྱང་ལན་བཞིའི་ཚེ་དགེ་སློང་སྨྱན་བྱས་ཏེ་བསྡུས་པ་ནི་སྦོམ་པོའོ། །ལན་བཞི་ཡན་ཆད་སྔར་ཕྲད་ཟིན་པ་ལས་བསྡུས་ནའང་སྦོམ་པོ། འཐབས་ན་ཞིག་པའོ། །ཁྱིམ་པ་ཁྱོ་ཤུག་འཐབས་ཏེ་བྱེ་བ་ལས་དགེ་སློང་གིས་བཅུག་སྟེ་སླར་བསྡུམས་ན་ལྷག་མར་འགྱུར་རོ། །ཆུང་མ་ཇི་ལྟ་བུ་ལས་བྱེ་སྟེ་བསྡུམས་ན་ལྷག་མར་འགྱུར་བ་འོག་ནས་བཤད། དེ་སྟེ་དེའི་དབང་གིས་ཆུང་མ་མ་ཡིན་པར་བསྒོ་བ་ཡང་ངོ༌། །ཆུང་མ་དང་བྱེ་བ་ནི་ཆུང་མ་ལ་རྣམ་པ་བདུན་ཡོད་དེ་ལག་ཏུ་ཆུ་བྱིན་པ་དང་རིན་གྱིས་ཉོས་པ་དང་གནངས་སུ་ཐོབ་པ་དང་གསུམ་ནི་ཁྱོ་ལ་དབང་ཡོད་པ་སྟེ། ཁྱོས་བཏང་བ་ལ་ལས་བསྡུམས་ན་ལྷག་མར་འགྱུར། བདག་དང་
དེ་གནས་པ་དང་འཚོ་བའི་ཕྱིར་གནས་པ་དང་འཚོ་བ་སྤྱིར་བསྡུས་ཏེ་གནས་པ་དང༌། སྐད་ཅིག་འཁོད་པ་དང་བཞི་ནི་འཐབས་མ་ཐག་ཏུ་བྱེ་བ་པ་ཡིན་ཏེ་དེ་ལས་བསྡུམས་ན་ལྷག་མར་འགྱུར་རོ། །འཐབས་པའི་ཚད་ཇི་ཙམ་གྱིས་ན་བྱེ་བ་ཡིན་པ་དང༌། ཇི་ཙམ་འཐབས་པ་ལས་བསྡུམས་ན་ལྷག་མར་འགྱུར་བ་དང༌། སྦོམ་པོར་འགྱུར་བ་དང་ཉེས་བྱས་སུ་འགྱུར་བ་འོག་ནས་བཤད། སྲོག་ཆགས་བཞིན་དུ་བུད་མེད་དང་སྐྱེས་པ་གཉིས་ཤིང་བསྡུས་པ་དུའི་སྨྱན་བྱས་པ་བཞིན་དུ་མིང་གིས་སྨོས་པ་འདི་རྣམས་གང་ཡང་རུང་སྟེ་རེ་རེ་ལ་ལྷག་མར་འགྱུར། དེའི་ཚེ་དང་དེ་གནས་པ་ལ་སོགས་པ་ཆུང་མ་བཞི་ནི་ཁྱོ་ཤུགས་འཐབས་པའི་ཚེ་བསྡུམས་ན་ལྷག་མ། ཁྱོ་ལ་དབང་ཡོད་པའི་ཆུང་མ་གསུམ་གང་ཡང་རུང་བ་འཐབས་པའི་ཚེ་བསྡུམས་ན་ཉེས་བྱས་གཅིག །དེ་མ་ཐག་མ་དང་དད་དེ་གནས་པ་ལ་སོགས་པ་ཆུང་མ་བཞི་འཐབས་ནི་ཟིན་གྱི་དང་མ་ལས་ཤིང་སོ་སོ་ནས་འཁོད་པ་ལ་བསྡུམས་ན་ལྷག་མ། ཁྱོ་ལ་དབང་ཡོད་པའི་བུད་མེད་གསུམ་གང་ཡང་རུང་ཁྱོ་ཤུག་འཐབས་ཏེ་དང་མ་ལས་པ་ལས་བསྡུས་ན་ཉེས་བྱས་གཉིས། འཐབས་པ་རྩ་བཅད་པ་དང༌། དད་དེ་གནས་པ་ལ་སོགས་པའི་བུད་མེད་བཞི་གང་ཡང་རུང་ཁྱོ་ཤུག་འཐབས་ནས་རྩ་བཅད་དེ་བོར་བ་འཕྲོ་སླར་མི་འབྱོར་བ་བཞིན་དུ་དེང་གཉིས་ཀྱང་མི་འདུམ་སྟེ་བྱེའོ་ཞེས་ཟེར་བ་ལ་བསྡུམས་ན་ལྷག་མ། ཁྱོ་ལ་དབང་ཡོད་པའི་བུད་མེད་གང་ཡང་རུང་གསུམ་ཁྱོ་ཤུག་འཐབས་ཏེ་རྩ་བཅད་བཞིན་དུ་མི་འདུམ་མོ་ཞེས་ཟེར་བ་ལས་བསྡུམས་ན་ཉེས་བྱས་གསུམ། རྡོ་གསུམ་པོར་བ་དང༌། དེ་གནས་པ་ལ་སོགས་པའི་བུད་མེད་བཞི་གང་ཡང་རུང་ཁྱོ་ཤུག་འཐབས་ཏེ་རྡོ་གསུམ་ཕྱོགས་བཞིར་བོར་བ་བཞིན་དུ་ངེད་གཉིས་ཀྱང་སླར་མི་འདུམ་སྟེ་བྱེའོ་ཞེས་ཟེར་བ་ལ་བསྡུམས་ན་ལྷག་མའོ། །ཁྱོ་ལ་དབང་ཡོད་པའི་ཆུང་མ་གསུམ་གང་ཡང་རུང་སྟེ་ཁྱོ་ཤུག་འཐབས་ཏེ་ཕྱོགས་བཞིར་རྡོ་བོར་བ་བཞིན་ང་དང་གཉིས་མི་འདུམ་ཞེས་ཟེར་བ་ལ་བསྡུམས་ན་ཉེས་བྱས་གསུམ་སྦོམ་པོ་གཅིག །སྤྱོད་པ་བཏང་བ་དང༌། དང་དེ་གནས་པ་ལ་སོགས་པ་ཆུང་མ་བཞི་གང་ཡང་རུང་སྟེ་ཁྱོ་ཤུག་འཐབས་ནས་སོ་ནམ་
དང་སྤྱོད་པ་བཏང་སྟེ་སོ་སོ་ན་འཁོད་པ་ལས་བསྡུམས་ན་ལྷག་མ། ཁྱོ་ལ་དབང་ཡོད་པའི་ཆུང་མ་གསུམ་གང་ཡང་རུང་འཐབས་ཏེ་སྤྱོད་པ་བཏང་བ་ལས་བསྡུམས་ན་ཉེས་བྱས་གསུམ་སྦོམ་པོ་གཉིས། ཆུང་མ་མ་ཡིན་པར་བསྒོ་བ་དང༌། དང་དེ་གནས་པ་ལ་སོགས་པའི་ཆུང་མ་བཞི་གང་ཡང་རུང་འཐབས་པ་ནས་མི་མང་པོའི་དྲུང་དུ་བྱེ་སྟེ། ཁྱོ་ཤུག་མ་ཡིན་ནོ་ཞེས་བསྒོ་བ་ལས་བསྡུམས་ན་ལྷག་མ་ཁྱོ་ལ་དབང་ཡོད་པའི་ཆུང་མ་གསུམ་གང་ཡང་རུང་ཆུང་མ་མ་ཡིན་པར་བསྒོ་བ་ལས་བསྡུམས་ན་ཉེས་བྱས་གསུམ་སྦོམ་པོ་གསུམ་ལྷག་མ་གཅིག །དྲིལ་བརྡུངས་པ་དག་གོ །དང་དེ་གནས་པ་ལ་སོགས་པའི་ཆུང་མ་བཞི་གང་ཡང་རུང་ཁྱོ་ཤུག་འཐབས་ཏེ་ཆུང་མས་མུར་འདུག་གི་ལྷ་རིས་སུ་བདག་གི་ལུས་ཕུལ་ལོ་ཞེས་བྱས་པ་ལས་སླར་བསྡུམས་ན་ལྷག་མ། ཁྱོ་ལ་དབང་ཡོད་པའི་ཆུང་མ་གསུམ་གང་ཡང་རུང་འཐབས་ཏེ་བུད་མེད་ཀྱིས་དྲིལ་བརྡུངས་ཏེ་མུར་འདུག་གི་ལྷ་རིས་སུ་ལུས་ཕུལ་བས་བསྡུམས་ན་ཉེས་བྱས་གསུམ་སྦོམ་པོ་གསུམ་ལྷག་མ་གཉིས་ཊཱི་ཀ་ལས་སྦོམ་པོ་བཞིར་བཤད་དོ། །ཉེས་བྱས་པ་ནི་འདིའི་ཐོག་མ་གསུམ་པོ། མདོ་ལྷག་མ་ལ་བྱེ་བའི་རིམ་པ་རྣམ་པ་བདུན་སྨོས་པ་ལ་རིམ་བཞིན་དུ་ཐོག་མ་གསུམ་ནི་ཉེས་བྱས། བར་མ་གཉིས་ནི་སྦོམ་པོ་ཐ་མ་གཉིས་ནི་ལྷག་མ་སྟེ་ཁྱོ་ལ་དབང་ཡོད་པའི་བུད་མེད་གསུམ་ལ་འཆད་དེ་ཞིབ་ཏུ་ནི་མིང་གིས་སྨོས་པ་རྣམས་བདུན་གྱི་ཐད་ཀ་ཐད་ཀར་བཤད་པ་ཡིན་ནོ། །ཅིའི་ཕྱིར་ན་འདིའི་ཁྱིམ་མི་དབུབ་ཕ་དང་གྱོས་པོའི་ཁྱིམ་དུ་མི་གཏང༌། དགེ་སློང་གྲོང་དུ་འོངས་པ་དག་གིས་ཁྱིམ་པའི་བུས་པའི་ཕ་མ་དག་བསྒོ་བ་བུས་པ་འདི་དག་ཅིའི་ཕྱིར་ཁྱིམ་མི་དབུབ་ཅེས་སྨྲས་ན་སྦོམ་པོ་བུད་མེད་ཁྱིམ་ཐབ་ལ་སོང་བ་ཞིག་སླར་ཕ་མའི་པང་དུ་འོང་ཞིང་འདུག་པ་ལ། དགེ་སློང་ན་རེ་འདི་ཅིའི་ཕྱིར་གྱོས་པོའི་གན་དུ་མི་གཏང་ཞེས་བྱས་ན་སྦོམ་པོ། མི་བཀྲི་ཞེས་སྨྲས་ན་ཡང་ངོ༌། །བུད་མེད་ཁྱིམ་ཐབ་ལ་བཏང་བ་སླར་ཕ་མའི་པང་དུ་འོངས་ཤིང་འདུག་པ་ལ། དགེ་སློང་གིས་བུ་མོའི་ཁྱིམ་ཐབ་དང་གྱོས་རྒྱུག་གི་གན་དུ་བུ་མོ་འདི་མི་བཀྲི་མི་དགུག་ཇི་བྱ་ཞེས་བྱས་ན་སྦོམ་པོ། སྨྱན་གྱི་སྟེ་རྣམ་པར་འབྱེད་པའིའོ།།
སྨྱན་གྱི་དགེ་འདུན་གྱི་ལྷག་མ་སྟེ། འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྨྱན་བྱས་ཏེ་ལྷག་མར་མི་འགྱུར་སྦོམ་པོར་འགྱུར་ཏེ་འོག་ནས་བཤད། སྦོམ་པོ་ནི་མངལ་གྱི་དང༌། དགེ་སློང་གི་བུ་མངལ་ན་ཡོད་པ་གཉིས་ལ། གཅིག་ཕོ་གཅིག་མོ་ཡིན་ན་ཁྱོ་ཤུག་ཏུ་སྡུས་ཤིག་ཅེས་བྱས་ན་སྦོམ་པོ། མེད་པ་དང་བུས་མངལ་ན་ཡང་མེད་པ་ལ་བུ་གཅིག་ཕོ་བུ་གཅིག་མོ་ཞིག་ཡོད་པར་གྱུར་ན་སྡུས་ཤིག་ཅེས་བྱས་ན་སྦོམ་པོ། སྡོམ་པ་དང༌། མུར་འདུག་གི་རབ་ཏུ་བྱུང་བ་མི་ཚངས་པར་མི་སྤྱོད་པ་ཞིག་ལ་ཁྱིམ་མ་དང་འདུ་ཤེས་ཞེས་བྱས་སམ་སྡོམ་པ་ནང་འདུ་ཤིག་ཅེས་བྱས་ན་སྦོམ་པོ། གཞུག་གནས་མེད་པ་དང་མ་ནིང་ཕོའི་མཚན་དང་མ་ནིང་མོ་མཚན་སྤྱད་དུ་མི་རུང་བ་ཞིག་ནང་བསྡུས་སམ་གཞན་དང་བསྡུས་ན་སྦོམ་པོ། ཉོས་པ་དང་བྲན་དུ་ཉོས་ཏེ་རིན་བྱིན་པ་ལས་བསྡུས་པའང་སྦོམ་པོ། འབྱོར་པ་དང༌། སྔོན་ལན་གསུམ་ཕྲད་ཟིན་པ་དང་ཆུང་མར་ཉོས་ཏེ་རིན་བྱིན་པ་ལས་བསྡུས་ན་སྦོམ་པོ། བདག་གིར་སྨྱན་བྱས་པའོ། །བདག་བུད་མེད་དེ་དང་སྤྲོད་ཅིག་ཅེས་བྱས་སམ་བུད་མེད་དེ་ངའི་མི་ཚངས་པར་སྤྱོད་པ་བྱས་ཁྲིད་དེ་ཤོག་ཤིག་ཅེས་བྱས་ན་སྦོམ་པོ། ཁས་བླངས་པ་ལ་བསྟན་ན་ཡང་ངོ༌། །བུད་མེད་དང་སྐྱེས་པ་གཉིས་ཤིག་མི་ཚངས་པར་སྤྱོད་པར་དུས་བྱས་པ་ལས། དུས་ལམ་དུ་མ་ཕྲད་དེ་ལམ་སྣོལ་ནས་འདྲི་བ་དེ་ལ། དགེ་སློང་གིས་མི་ཚངས་པར་སྤྱོད་པར་ཤེས་ཏེ་བསྟན་ན་སྦོམ་པོ། འཐབ་མོས་བརྐུས་ན་ཡང་ངོ༌། །སྔར་ཆུང་མར་བྱིན་པའམ་སྔོན་མི་ཚངས་པར་སྤྱོད་སྤྱོད་པ་ཞིག་ཕ་མས་བགགས་ཏེ་མི་སྟེར་བ་ལ་དགེ་སློང་གིས། ཕ་མ་འཐབ་མོད་བརྗོད་དེ་བུ་མོ་སྐྱེས་པར་བརྐུར་བཅུག་གམ་བུད་མེད་དུས་མལ་དུ་བཏང་ན་སྦོམ་པོ། བུད་མེད་ཆེ་གེ་མོ་ཞིག་ཆུང་མར་ཉོས་ཤིག་ཅེས་སྨྲས་ན་ཡང་ངོ༌། །དགེ་སློང་གིས་སྐྱེས་པ་ལ་བུད་མེད་མིང་དང་སྙོ་གེ་མོ་ཞིག་ཆུང་མར་ཉོས་ཤིག་ཅེས་བསྒོ་ན་ཡང་སྦོམ་པོ། །ཉེས་བྱས་པ་ནི་བུད་མེད་ཅེས་ནའོ། །སྐྱེས་པ་ཆུང་མ་མེད་པ་ལ་ཁྱོད་ལ་ཆུང་མ་མེད་དམ་ཆུང་མ་བླངས་སམ་ཞེས་སྨྲས་ན་ཉེས་བྱས། དེ་ཐོབ་བམ་ཞེས་ན་ཡང་ངོ༌། །སྐྱེས་པ་ཆུང་མ་མེད་པ་ལ་ཁྱོད་
ལ་ལས་བྱེད་པ་དང་སྤ་བརྟུལ་བྱེད་པ་མེད་དམ་ཞེས་བྱས་ན་ཉེས་བྱས། སྨྱན་གྱི་སྟེ་དྲིས་པའིའོ། །སྨྱན་གྱི་དགེ་འདུན་གྱི་ལྷག་མ་སྟེ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།སྦོམ་པོ་ནི་སྦྱིན་པ་ལས་གྱུར་པ་བཅུག་པའོ། །ཕ་མས་སྔར་ཆུང་མ་བྱིན་པ་ལ་ཕྱིས་མི་སྟེར་བ་ལ། དགེ་སློང་ལ་ཕ་འུར་བཅོལ་ཏེ་ཕ་བུར་བྱས་ཏེ་བསྡུས་ན་སྦོམ་པོ། ཁྱེའུ་དང་བུ་མོ་གཉིས་ཤིག་གི་ཕ་མ་འཐབས་ཏེ་བྱས་པ་ཁྱོ་ཤུག་ཏུ་བསྡུ་བར་བྱས་ནས་ཁྱེའུ་གཅིག་གི་ཕ་མ་ཤི་བ་དང་བུ་མོའི་ཕ་མས་མ་སྟེར་ཏེ་ཁྱེའུས་དགེ་སློང་ལ་ཕྲིན་པར་བཅོལ་ཏེ། དགེ་སློང་གིས་བུ་མོ་ཉིད་ལ་ཁྱོད་ནི་ཁྱེའུ་འདི་དབང་བ་ཡིན་ན་འགྲོ་བའི་རིགས་སོ་ཞེས་བྱས་ནས་འདུས་པ་ལས་བཅས། ཆོས་ཀྱི་ཕྱིར་ནོར་གྱིས་མདུན་དུ་བྱས་ཏེ་བོས་ན་ཡང་ངོ༌། །བུད་མེད་དང་སྐྱེས་པ་སྔོན་ཕྲད་པ་ཞིག་ལས་བྱེད་དེ་ཕྲད་དུ་མི་སྤོབས་པ་ལས། དགེ་སློང་གིས་མཆོད་སྟོན་གྱི་ནང་དུ་བཀུག་སྟེ་སྤྲད་ན་ཡང་སྦོམ་པོ། བུད་མེད་དང་སྐྱེས་པ་གཉིས་ཤིག་སྔོན་ཕྲད་ཟིན་པ་ལས་འཐབས་ནས་ཕྲད་མི་སྤོབས་པ་ལས། དགེ་སློང་གིས་ཐབས་བྱས་ཏེ་མཆོད་སྟོན་གྱི་རྒྱུ་བུད་མེད་སྦྱོར་དུ་བཅུག་ནས་སྐྱེས་པ་ལས་མི་བརྙས་ཏེ་སྤྲད་པར་བྱས་ནས་མི་ཚངས་པར་སྤྱོད་དུ་བཅུག་པ་ལས་བཅས། གཞན་གྱི་ཕྱིར་ལྡན་ན་ཡང་ངོ༌། །ཁྱིམ་ཐབ་བྱེས་སུ་སོང་བའི་བུད་མེད་གཅིག་ལ་མི་དྲ་མ་ཞིག་ཆུང་མར་བླངས་པར་བྱས་པ་ལས་བུད་མེད་དེ་མ་བཏུབ་ནས་ཁྱིམ་ཐབ་ཀྱང་བྱེས་སུ་ཤི་མི་དྲ་མ་དེས་ཤ་ནར་བྱས་ཏེ། བུད་མེད་དེ་སྨན་ཀུན་དོང་དུ་བཅུག་པ་ལས་ཆུང་མ་དེའི་མས། དགེ་སློང་གཅིག་ལ་སྤྲིང་སྟེ་བདག་ཅག་མ་སྨད་ནི་ཁྱོད་མངའ་སྟེ་ཁྱོད་ཀྱིས་བཀའ་ཅི་སྩལ་བར་བས་སོ་ཞེས་བྱས་ནས། དགེ་སློང་གིས་ཕྲིན་བྱས་ཏེ་བསྡུས་པ་ལས་བཅས། དེ་ལྟར་བྱས་ན་སྦོམ་པོ། མ་ཁྲོས་པར་སེམས་ཅན་ལ་བ་གཞན་དུ་ཡང་མ་ཡིན་ཞེས་པར་མ་ཆུད་པ་མ་ཡིན་ནོ། །ཁྲོ་སེམས་མེད་པར་སེམས་ཅན་ནམ་རྡོ་ཤིང་ཅི་ཡང་རུང་ཐལ་མོ་དང་ཁུ་ཚུར་གྱིས་བསྣུན་ན་ཉེས་བྱས། བུད་མེད་དང་སྐྱེས་པ་སྔོན་ཕྲད་པ་ཞིག་ལས་སྐྱེས་པས་བུད་མེད་ལ་མི་ཚངས་པར་སྤྱོད་དུ་དོང་ཞེས་བྱས་པ་དང༌། བུད་མེད་ན་རེ་བྲེལ་གྱི་དགེ་སློང་
ཞིག་མངགས་ཏེ་དེས་ཁྱེད་ཀྱི་རྒྱབ་ཏུ་ཁུ་ཚུར་ཅིག་བསྣུན་ན་ཤོག་ཤིག་ཅེས་བྱས་ཏེ་བུད་མེད་ཀྱིས་དགེ་སློང་ལ་སྐྱེས་པ་དེའི་རྒྱབ་ཏུ་ཁུ་ཚུར་ཅིག་སྣུན་ཅིག་ཅེས་བསྒོས་ནས་དགེ་སློང་གིས་སྐྱེས་པ་ལ་ཁུ་ཚུར་ཅིག་བསྣུན་པ་དང༌། སྐྱེས་པ་ན་རེ་ངེད་མི་ཚངས་པར་སྤྱོད་པའི་ཐན་ཁྱོད་ཀྱིས་བྱས་ཀྱི་དགེའོ་ཞེས་བྱས། འདུས་པའི་འོག་ཏུ་དགེ་སློང་ཐེ་ཚོམ་ཟོས་ནས་ཕྱིན་ཆད་ཁྲོ་སེམས་མེད་པར་སེམས་ཅན་དང་རྡོ་ཤིང་ལ་ཁུ་ཚུར་གྱིས་བརྡེགས་ན་ཉེས་བྱས་ཞེས་བཅས། སྨྱན་གྱིས་ཏ་རྣམ་པར་གདོན་མི་ཟ་བའིའོ། །སྨྱན་གྱི་དགེ་འདུན་གྱི་ལྷག་མ་སྟེ་འདུལ་བ་བྱེ་བྲག་ཏུ་གདོན་མི་ཟ་བའི་ནང་ནས་འབྱུང་བའི་མདོ། །སྨྱན་གྱིའོ། །སྨྱན་གྱི་དགེ་འདུན་གྱི་ལྷག་མ་སྟེ་འདུལ་བ་སྡེ་སོ་སོའི་ནང་ནས་འབྱུང་བའི་མདོ་རྫོགས་སོ།། །།ཁང་པའི་དགེ་འདུན་གྱི་ལྷག་མ་ལ་འཆད། ཉེས་མེད་པ་ནི་སྤྱོད་ལམ་བཞིའི་སྣོད་མེད་པའོ། ཁང་བུ་ཆུར་གོམ་པ་གསུམ་མམ་ལུས་འཕྲེས་ན་ཤོང་བ་དང་ཞེང་དུ་སྐྱིལ་མོ་ཀྲུང་བཅས་ན་བདེ་བླག་ཏུ་ཤོང་བ་དང་འཕང་དུ་འགྲེང་ན་སྤྱི་བོ་རེག་ཙམ་བྱས་ཏེ་བརྩིགས་པ་ནི་ཉེས་མེད་དོ། །བསྒོས་པ་དང་མ་བསྒོས་པའང་ཐ་མི་དད་དོ། །གང་ཟག་ཅིག་གི་ཕྱིར་ཁང་པ་བརྩིགས་ལ་བདག་གིས་རྒྱུ་ཕྱུང་སྟེ་ས་མི་གཙང་ཡང་གླས་རྩིགས་ཤིག་ཅེས། དགེ་སློང་ཅིག་ལ་བཅོལ་ན་ལྷག་མ་བཅོལ་བའི་དགེ་སློང་གིས་ཀྱང་མི་གཙང་བཞིན་དུ་བརྩིགས་ན་ལྷག་མ་རྒྱུ་ཕོག་སྟེ་ལྷག་མར་མི་འགྱུར། ཚུལ་བཞིན་དུ་རྩིགས་ཤིག་བྱས་པ་ལས་དེ་བཞིན་དུ་མ་བྱས་ལ་རྗེས་སུ་ཡི་རང་སྟེ་རྒྱུ་ཕྱི་མས་ཀྱང་བསྣན་ཏེ་བྱེད་དུ་བཅུག་ན་ལྷག་མ། ཚུལ་བཞིན་དུ་རྩིག་ཏུ་བཅུག་པ་ལས་ཉེས་པར་བརྩིགས་ཏེ་ཉེས་སོ་ཞེས་བྱས་ནས་རྒྱུ་ཕྱི་མ་ཡང་མ་ཡིན་པར་བཏང་ན་ཉེས་མེད། བཅོལ་བ་ཡང་བདག་པོ་བཞིན་ནོ། །མདོ་ལྟག་མ་ལྟར་རྒྱུ་ཕོག་སྟེ་གཞན་རྩིག་ཏུ་བཅུག་པ་བདག་གིས་རྒྱུ་ཕྱུང་ཡང་ལག་དར་ཏེ་མ་བརྩིགས་པས་ལྷག་མར་མི་འགྱུར་རོ་སྙམ་བསམས་ཀྱང་ལྷག་མར་འགྱུར་རོ། །བཅོལ་པའི་དགེ་སློང་དེས་ཀྱང་བདག་གིས་བརྩིགས་ཀྱང་རྒྱུ་གཞན་གྱི་ཡིན་པས་ལྷག་མར་མི་འགྱུར་རོ་སྙམ་བསམས་ཀྱང་མི་ཕན་ཏེ་ལྷག་མར་འགྱུར་རོ། །སྨྲས་པ་བཞིན་དུ་མ་བྱས་པ་ལ་ལུས་དང་ངག་གིས་མོས་པ་ཡང་ངོ༌། །
མདོ་ལྟག་མའི་ཡང་ལྟག་མའི་ནང་ནས་འབྱུང་བ་བཞིན་དུ་ཁང་པ་ཚུལ་བཞིན་དུ་རྩིགས་ཤིག་ཅེས་བསྒོ་སྟེ་རྒྱུ་བྱིན་པ་ལས་བསྒོ་བ་བཞིན་དུ་མ་བྱས་ཏེ་ཉེས་པར་བརྩིགས་པ་ལ་ངག་གིས་དེ་ལྟར་བརྩིགས་ཀྱང་རུང་ངོ༌། །རྗེས་སུ་ཡི་རང་བར་སྨྲས་པ་དང་ལུས་ཀྱིས་རྗེས་སུ་ཡི་རང་སྟེ་ལས་བྱེད་པའི་གྲོགས་བྱས་པ་རྩམ་གྱིས་ལྷག་མར་འགྱུར་རོ། །བྱས་པ་ལ་གཅིག་གོ །ཁང་པ་ལྷག་མར་འགྱུར་བ་ཞིག་བརྩིགས་ཏེ་སྐབས་སྐབས་སུ་བཞག་ཅིང་བརྩིགས་པའམ་རྨད་བྲེས་པའམ་ཐོག་བོར་བ་ལྟ་བུ་རེ་རེ་ལ་སྦོམ་པོ་རེ་རེར་མི་འགྱུར་གྱི་སྦོམ་པོ་གཅིག་དང་ཟིན་ན་ལྷག་མར་འགྱུར་དུ་ཟད་དོ། །ཡན་ལག་ནི་ཐ་དད་དུ་མི་བྱེད་དོ། །ས་ནི་གཙང་བ་དང་ཚད་ལས་འདས་པ་དང་དགེ་འདུན་ལ་མ་གསོལ་བ་ལ་སོགས་པ་ཡན་ལག་རེ་རེ་ལ་སྦོམ་པོ་རེ་རེར་མི་འགྱུར་གྱི་ཡན་ལག་གཅིག་དང་ལྡན་པ་གཞན་དང་མ་ལྡན་ན་སྦོམ་པོ། །བསླངས་པ་དེས་བསྒོ་ནའོ། །བདག་གི་ཕྱིར་ཁང་པ་བརྩིགས་པའི་རྒྱུ་བདག་ཉིད་ཀྱིས་བསླངས་ཀྱང་རུང་གཞན་བཏང་སྟེ་སློང་དུ་བཅུག་ཀྱང་རུང་ཡན་ལག་གཅིག །དེའི་རྣམ་པས་སོ། །གསེར་དངུལ་དང་ཤིང་དང་ཕ་གུ་ལ་སོགས་པ་ཡན་ལག་གཅིག །ཁང་པའི་གཞི་བསླངས་པ་ལ་ཡན་ལག་གཅིག་སྟེ། ཡན་ལག་འདི་གཉིས་ལ་གཅིག་ཏུའང་བརྩི། དངོས་པོ་མི་གཙང་ནའོ། །ཁང་པ་བརྩིགས་པའི་ས་མི་གཙང་བ་དང༌། མ་གསོལ་ནའོ། །ཁང་པ་བརྩིགས་པ་དང་དགེ་འདུན་ལ་མ་གསོལ་བ་དང༌། གནས་ཁང་ཡིན་པ་དང༌། བྱེད་དུ་བཅུག་ནའོ། །བདག་གིས་བྱེད་དམ་གཞན་བྱེད་དུ་བཅུག་པ་དང༌། མཐའ་སོ་ཁང་པ་ཟིན་པར་ཡང་བྱས་པ་དང༌། བསླངས་པ་མ་གཏོགས་ཏེ་དེ་མ་ཐག་པའང་འདི་བཞིན་ནོ། །དགེ་འདུན་གྱི་ཕྱིར་ཁང་ཆེན་བརྩིགས་པ་ཡན་ལག་ལྟག་ཏུ་སྨོས་པ་རྣམས་ལས་མདོ་བསླངས་པ་དང་དེའི་རྣམ་པ་གཉིས་ཞེས་ཟེར་བ་གཉིས་མ་གཏོགས་པར་གཞན་ཀུན་ཁང་ཆེན་གྱི་ཡན་ལག་ཏུ་གཏོགས་སོ། །གཅིག་གི་ཕྱིར་རོ། །བདག་གཅིག་པུའི་ཕྱིར་བརྩིགས་ཀྱང་རུང་གྲོགས་དགེ་སློང་གཅིག་གི་ཕྱིར་བརྩིགས་ཀྱང་རུང་ཡན་ལག་གཅིག །ཚད་ལས་འདས་པའོ། །ཚད་ལས་ཀྱང་འདས་པར་བརྩིགས་པ་དང་ཡན་ལག་དགུ་དང་ལྡན་ན་བདག་གི་ཕྱིར་ཁང་པ་བརྩིགས་པའི་ལྷག་མར་འགྱུར་རོ། །མ་བརྟགས་པ་དང་རྩོད་པ་དང་མི་ཡངས་པ་ནི་མི་གཙང་བའོ། །ལྟག་ན་མདོ་
མི་གཙང་ཞེས་འབྱུང་བ་ནི་མ་བརྟགས་པ་དང་རྩོད་པ་དང་མི་ཡངས་པ་གསུམ་ནི་མི་གཙང་བ་ཞེས་བྱའོ། །ཇི་ལྟར་མ་བརྟགས་པ་དང་རྩོད་པ་དང་མི་ཡངས་པ་ནི་མདོ་འོག་མ་ལས་འཆད་པ་ཡིན། འགྲོ་བ་ཕྲེའུའི་ཚད་དང༌། ཁང་པ་བརྩིགས་པའི་ས་དང་སྤྲུལ་ལམ་སྡིག་སྦྲུལ་ལ་སོགས་པའི་ཚང་ཡོད་པ་ནི་མ་བརྟགས་པ་ཞེས་བྱའོ། །རྒྱལ་པོ་དང༌། རྒྱལ་པོའི་ཁྲིམས་དང་མི་འདྲ་བ་ལ་སོགས་པའི་གྲོང་དང་ཉེ་བར་བརྩིགས་པ་དང༌། ལྷའི་གྲོང་དང༌། མུར་འདུག་གི་གནས་སུ་ཉེ་བ་དང༌། མུར་འདུག་ཉིད་ཀྱི་གྲོང་དང་ཉེ་བར་བརྩིགས་པ་དང༌། ཤིང་མི་གཙང་བ་དང༌། ཡུལ་མི་སྤྱོད་པའི་གྲིབ་ཤིང་བཅད་ཅིང་མི་བརྩིགས་པ་དང་འདི་རྣམས་ནི་རྩོད་པ་ཞེས་བྱའོ། །འདོམ་གྱི་མཐའ་ཚུན་ཆད་དང༌། མིང་གིས་སྨོས་པ་འདི་རྣམས་ནི་ཁང་པའི་རྨང་ལ་མི་གནོད་ན་བར་འདོམ་གང་ཙམ་གྱིས་བཅད་ནས་བརྩིག །ཁང་པ་ལ་གནོད་ཅིང་དོག་ན་འདོམ་དུས་བཅད་ཀྱང་མི་ཕན་ཏེ་མི་ཡངས་པ་ཞེས་བྱ་སྟེ། ཕྱི་རོལ་གྱི་ཆུ་བོ་དང༌། འབབ་ཆུ་དང་གཙང་པོ་ལ་སོགས་པའི་འགྲམ་དུ་མི་བརྩིག །གད་ཁ་དང་གད་པ་དང་གྲོག་པོ་ལ་སོགས་པའི་ཁར་ཉེ་བར་མི་བརྩིག །ཁྲོན་པས་ཡོག་སྟེ་ཁྲོན་པ་དང་རྫིང་བུ་དང་མཚེའུ་ལ་སོགས་པ་དང་ཉེ་བར་མི་བརྩིག་སྟེ་འདི་རྣམས་ནི་མི་ཡངས་པ་ཞེས་བྱའོ། །འདི་རྣམས་ནི་གྲངས་ཇི་བཞིན་པའོ། །མདོ་ལྟག་མ་མ་བརྟགས་པ་རྩོད་པ་དང་མི་ཡངས་པ་ཞེས་འབྱུང་བ་ལ་མདོ་འདིས་གོ་རིམས་བཞིན་དུ་འཆད་ཅིང་གཉེར་སོང་བ་ལ་བྱ། ཚད་མའི་ཁྲུ་ཕྱེད་དང་དོ་ལ་བདེ་བར་གཤེགས་པའི་མཐོའོ། །ལྟག་ནས་མདོ་ཚད་ལས་འདས་ཞེས་འབྱུང་བ་ལ་འཆད་དེ། ཚད་ནི་མི་འབྲིང་པོའི་ལུས་ལ་ཁྲུ་ཕྱེད་དང་བཞི་ཡོད་པའི་ཁྲུ་ཕྱེད་དང་དོ་ལ་བདེ་བར་གཤེགས་པའི་མཐོ་གང་གི་ཚད་དུ་བརྩིའོ། །དེའི་མཐོ་བཅུ་གཉིས་དང་བདུན་ཏེ་ནང་རྒྱའི་ཚད་དོ། །ཁང་པའི་ཆུར་ནི་བདེ་བར་གཤེགས་པའི་མཐོ་བཅུ་གཉིས། ཞེང་དུ་བདེ་བར་གཤེགས་པའི་མཐོ་བདུན་གྱི་ཚད་དུ་རྨང་གི་ནང་ལོགས་ནས་བཅལ། གསོལ་བ་ནི་དགེ་འདུན་ལ་གསོལ་ཏེ་ཐོས་ནའོ། །ལྟག་ན་མདོ་མ་གསོལ་ན་ཞེས་འབྱུང་བ་ལ་འཆད་དེ། གསོལ་བ་ནི་མཚམས་གཅིག་གི་དགེ་འདུན་ཐམས་ཅད་ལ་ལས་བྱེད་པའི་དགེ་སློང་གཅིག་གིས་གསོལ་ཏེ་གནང་ན་བརྩིགས། གནང་བ་མ་བྱིན་ན་
དགེ་འདུན་ལ་ཉེས་བྱས། མི་གཙང་ན་མི་གསོལ། ཁང་པ་བརྩིག་པའི་ས་མ་བརྟགས་པ་དང་མི་ཡངས་པ་ན་ཁང་པ་སུ་བརྩིག་པའི་དགེ་སློང་དེས་མི་གསོལ། གསོལ་ན་གསོལ་བའི་ཚེ་ཉེས་བྱས། བདག་ཅག་གམ་དགེ་སློང་དག་ལ་བསྐོས་ཏེ་ཐོང་ལ་ཡིད་ཆེས་པར་གྱིས་ཤིག །དགེ་སློང་ཁང་པ་བརྩིགས་པར་དགེ་འདུན་ལ་གསོལ་ན་ཁང་པའི་ས་དགེ་འདུན་གྱིས་བལྟའོ། །དགེ་འདུན་ལ་ཟད་པ་ལྟར་ནུས་ན་ཡང་དགེ་སློང་ཁྲིམས་ལ་མཁས་ཤིང་ཅོང་རོལ་མི་བྱེད་པ་ཡིད་ཆེས་ཤིང་བརྟན་པ་ལས་ཁང་པའི་ས་ལྟར་དགྱེའོ། །གདིང་བ་ཡང་དེ་བཞིན་ནོ། །གདིང་བ་ལོ་དྲུག་ལོན་པ་སར་པས་བརྗེ་ན། སྙིང་པོ་སྤྱད་དུ་བཟོད་དམ་མི་བཟོད་དགེ་འདུན་གྱིས་བལྟ་བ་ཡང་ཁང་ས་དགེ་འདུན་གྱིས་བལྟ་བ་དང་འདྲའོ། །ལྟུང་བ་མེད་པ་ནི་བྱས་པའི་རྙེད་པ་དང་སྤྱོད་པའོ། །ཁང་པ་ལ་ཉེས་པར་མི་འགྱུར་བ་ནི་བརྩིགས་ཟིན་པ་ཅིག་གཞན་གྱིས་སྦྱིན་པ་དང་གཞན་གྱིས་བརྩིགས་པའི་ནང་ནས་གནས་ཤིང་སྤྱོད་པ་ནི་ཉེས་མེད་དོ། །གདིང་པ་ཡང་ལོ་དྲུག་མ་ལོན་ཞིང་སྤྱད་དུ་བཟོད་པ་ལས་གཞན་གྱིས་སར་པ་ཞིག་བྱིན་ཏེ་བཅངས་ཤིང་སྤྱད་ཀྱང་ཉེས་མེད་དོ། །རྙིང་པ་ལ་བཅོས་ན་ཡང་ངོ༌། །ཁང་པ་རྙིང་པ་གྲུམ་པ་དང་གས་པ་དང་རལ་བ་བཅོས་པའང་ཉེས་མེད། གདིང་བའང་དེ་དང་འདྲ། ཁང་པའི་སྟེ་དགེ་འདུན་གྱི་ལྷག་མའོ། །ཁང་པའི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།དགེ་འདུན་གྱི་ཕྱིར་རོ། །ཁང་ཆེན་ནི་དགེ་འདུན་གྱི་ཕྱིར་བྱས་པ་ཡན་ལག་གཅིག་ཏུ་བརྩིས་ཏེ་ལྟག་ཏུ་བདག་གི་ཕྱིར་ཁང་པ་བརྩིགས་པའི་ཡན་ལག་རྣམས་ཀྱི་སྟེང་དུ་འདིས་བསྣན་ཏེ་སྔར་ལྡན་ན་ལྷག་མར་འགྱུར། གཙུག་ལག་ཁང་གི་དགེ་འདུན་གྱི་ལྷག་མའོ། །ཁང་ཆེན་གྱི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བརྩམས་པས་ན་སྦྱོར་བའིའོ། །བདག་གིས་ཁང་པ་བརྩིགས་པ་ལྷག་མར་འགྱུར་བ་ཞིག་ལས་ཟིན་པར་མ་བྱས་ཏེ་རྐེད་ཆད་དུ་པོར་ན་སྦོམ་པོ། ཟིན་ན་སྦོམ་པོར་འགྱུར་བ་ལས་རྐེད་ཆད་དུ་བོར་ན་ཉེས་བྱས། ཐོག་མ་ཕུབ་པར་ཟིན་པ་ཡང་དེ་བཞིན་ནོ། །ཁང་པ་བརྩིགས་ནས་ཐོག་མ་ཕུབ་པར་བོར་ན་སྦོམ་པོ་ཐོག་མི་དབུབ་པར་བསམས་ཏེ་ཐོག་མ་ཕུབ་པར་བཞག་ན་སྦོམ་པོ། །དུ་མའི་
ཕྱིར་བའོ། །ཕྱོགས་བཅུའི་དགེ་འདུན་གྱི་ཕྱིར་ཡང་མ་ཡིན་མི་གཅིག་གི་ཕྱིར་ཡང་མ་ཡིན་པར་གཉིས་ཡན་ཆད་དུ་ཡང་རུང་མིང་གིས་བསྔོས་ཏེ། འདི་རྣམས་ཀྱི་ཕྱིར་བྱའོ་ཞེས་བརྩིགས་ན་སྦོམ་པོ། མ་བཏང་བའོ། །ཁང་པའི་གཞི་གཞན་གྱིས་མ་བྱིན་ནམ་མ་ཉོས་པར་ཐུག་ཐུབ་ཏུ་བརྩིགས་ཏེ་རྐུ་སེམས་དང་མི་ལྡན་པར་བརྩིགས་ན་སྦོམ་པོ། རྐུ་སེམས་དང་ལྡན་པ་ནི་ཕམ་པའི་སྐབས་སུ་འཆད། གང་ཟག་གིས་སོ། །ཁང་པའི་ས་དང་རིན་བདག་ཉིད་ཀྱི་ཡིན་པ་ལས་བརྩིགས་ནའང་སྦོམ་པོ། །བརྩམས་པ་ཡང་ངོ༌། །གཞན་ཞིག་གིས་ཁང་པ་བརྩིགས་ཏེ་ལྷག་མར་འགྱུར་བ་ཞིག་འཕྲོ་བོར་ཏེ་ལུས་པ་ལས་དགེ་སློང་ཅིག་གིས་འཕྲོ་བརྩིགས་ན་སྦོམ་པོ། ཉེས་བྱས་པ་ནི་གསོལ་བའི་འོག་ཏུ་ཟིན་པར་མ་བྱས་པའོ། །ཁང་པ་བརྩིགས་པར་དགེ་འདུན་ལ་གསོལ་ཏོ། །གནས་པ་ལས་ཕྱིས་མ་བརྩིགས་པར་བོར་ན་ཉེས་བྱས། ཁང་པའི་གཙུག་ལག་ཁང་དགེ་འདུན་གྱི་ལྷག་མར་གཏོགས་པ་སྟེ་དྲིས་པའིའོ། །ཁང་པ་དང་གཙུག་ལག་ཁང་གི་དགེ་འདུན་གྱི་ལྷག་མ་སྟེ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།རྩ་བ་མེད་པའི་ལྷག་མ་ལ་འཆད་དེ། དགེ་སློང་ཕས་ཕམ་པའི་ཀུན་སྤྱོད་པ། དགེ་སློང་ཕས་ཕམ་པ་མེད་པ་ལ་ཕས་ཕམ་པ་གང་ཀྱང་རུང་བྱས་སོ་ཞེས་སྐུར་པ་དང༌། དགེ་སློང་ཕམ་པ་ཡོད་པ་ཞིག་ལ་ཕམ་པས་སྐུར་ནའང་ལྷག་མར་འགྱུར། ལྟུང་བ་ཡང་འདིར་བདག་གི་ཕྱོགས་སུ་ཡན་ལག་ཏུ་མ་ཡིན་ཏེ། དགེ་སློང་ཕས་དགེ་སློང་མ་ལ་ཕས་ཕམ་པར་སྐུར་བ་དང༌། དགེ་སློང་མས་དགེ་སློང་ཕ་ལ་ཕས་ཕམ་པས་སྐུར་པ་ཡང༌། སྡེ་མི་མཐུན་པའི་ཕྱིར་ལྷག་མར་མི་འགྱུར་བ་ནི་མ་ཡིན་ཏེ་ལྷག་མར་འགྱུར་རོ། །ལ་ལ་བརྫུན་གྱིས་བསྒོ་ནའོ། །དགེ་སློང་ཚུལ་ཁྲིམས་དང་ལྡན་པ་དང་ཆོས་ལོག་པ་ལ་བལྟས་པ་ལ་དགེ་སློང་ཚུལ་ཁྲིམས་ལ་དམ་ཞིང་ལོག་པ་ལ་མ་བལྟས་པས་སྐུར་ཀྱང་ལྷག་མར་འགྱུར། དེ་བཞིན་དུ་ལོག་པ་ལ་བལྟས་པས་ལོག་པ་ལ་མ་བལྟས་པ་ལ་སྐུར་ན་ཡང་ལྷག་མར་འགྱུར། འཕོ་བར་འདོད་པས་སོ། །དགེ་སློང་ཚངས་པར་སྤྱོད་པ་དང་སངས་རྒྱས་ཀྱི་ཆོས་དང་དབྲལ་བར་བྱ་བའི་ཕྱིར་བྱས་པ་དང༌། དགེ་སློང་ཕས་ཕམ་པ་མེད་དེ་གཙང་བ་དང་བརྫུན་དུ་
སྐུར་བ་དང༌། བདག་གིས་སྨྲས་ཏེ་གཞན་གྱིས་ཐོས་ཏེ་གོ་བ་དང༌། ཡན་ལག་འདི་བཞི་དང་ལྡན་ན་རྩ་བ་མེད་པ་ལ་སྐུར་ན་ལྷག་མ། དེ་རྩ་བ་གཞན་དུ་མ་ཡིན་ནོ། །དགེ་སློང་ཕས་ཕམ་པ་བཞི་ལས་གང་ཡང་རུང་བ་ཅིག་ཡོད་པ་ལས་ཕམ་པ་གཞན་དུ་མིང་གིས་བསྣོར་ཏེ་སྐུར་ན་ཡང་ལྷག་མ། ཕས་ཕམ་པ་མེད་པ་ལ་བརྐུས་པའི་ཕས་ཕམ་པར་སྐུར་བར་བསམ་པ་ལས་བརྫུན་གྱི་ཕས་ཕམ་པ་བྱས་སོ་ཞེས་སྨྲས་ནའང་ལྷག་མར་འགྱུར། བརྗེད་ན་མེད་པའོ། །དགེ་སློང་ཕས་ཕམ་པ་ཡོད་པར་སྔོན་ཤེས་ཤེས་པ་ལས་བརྗེད་དེ་མི་དྲན་པ་བཞིན་དུ་ཕས་ཕམ་པ་བྱས་སོ་ཞེས་སྐུར་ནའང་ལྷག་མ། རྐྱེན་མ་ཡིན་པ་ནི་མི་བརྫུན་པར་ཡང་དག་པའི་དོན་ཏོ། །ཕས་ཕམ་པ་ཡོད་པར་མི་ཤེས་བཞིན་དུ་སྐུར་པ་དང་ཕས་ཕམ་པ་ཡོད་པ་ལ་བརྗེད་དེ་སྐུར་བ་དང་ཕས་ཕམ་པ་ཡོད་ལ་མིང་བསྣོར་ཏེ་སྐུར་པ་རྣམས་ནི་ཕས་ཕམ་པ་ཡོད་དེ་བདེན་ཀྱང་བདག་གི་སེམས་ལ་སངས་རྒྱས་ཀྱི་ཆོས་དང་བྲལ་ཞིང་སྐུར་པ་གདབ་པར་བསམ་པའི་ཕྱིར་ལྷག་མར་མི་འགྱུར་བའི་རྐྱེན་མ་ཡིན་ཏེ་ལྷག་མར་འགྱུར་རོ། །རྩ་བ་མེད་པའི་དགེ་འདུན་གྱི་ལྷག་མའོ། །རྩ་བ་མེད་པའི་དགེ་འདུན་གྱི་ལྷག་མ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རྣམ་པར་མ་ཡིན་པའི་ཆས་སྐུར་པའི་ལྷག་མ་ལ་འཆད་དེ། ཚིག་ལས་གཞན་པ་ལ་གནས་ཏེ་ངག་གིས་བརྫུན་ནའོ། །དགེ་སློང་ཕ་དང་དགེ་སློང་མ་གཉིས་ཤིག་ཀྱང་འདུག་ཕ་རོལ་ན་ཤ་བ་རྒྱོ་ཞིང་འཁོད་པ་ལས་ཧ་བ་རྒྱོ་བའི་ཆ་བླངས་ཏེ། དགེ་སློང་ཕོ་མོ་གཉིས་ཤིག་འཁོད་པ་ལ་རྒྱོ་བོ་ཞེས་སྐུར་བ་ལས་བཅས་ཏེ། དགེ་སློང་གཙང་མ་ལ་གཞན་རྐུ་བ་དང་རྒྱོ་བའི་ཆ་བླངས་ཏེ་སྐུར་ན་ལྷག་མ། ལྷག་མ་རྩ་བ་མེད་པ་རྩིས་མགོ་སྔ་མ་བཞིའི་སྟེང་དུ་རྣམ་པར་མ་ཡིན་པའི་ཆས་སྐུར་པ་འདིས་བསྣན་ཏེ་ལྔར་ལྡན་ན་ལྷག་མ། གཞན་གྱི་ཆས་སྐུར་བའི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་མདོ།། །།སྦོམ་པོ་ནི་གཞུག་གནས་མེད་པ་ལ་སྐུར་བའོ། །དགེ་སློང་ཕོ་མཚན་ཆད་པ་མི་ཚངས་པར་སྤྱོད་དུ་མི་རུང་བ་ཞིག་ལ་མི་ཚངས་པར་སྤྱོད་དོ་ཞེས་སྐུར་ན་རྩ་བ་མེད་པ་དང་རྣམ་པར་མ་ཡིན་པའི་ཆ་གང་ཡང་རུང་སྟེ་སྦོམ་པོ། མིང་མ་ཕྱུང་བ་ཡང་ངོ༌། །དགེ་འདུན་ནམ་དགེ་སློང་མང་ཞིག་འཁོད་པའི་ནང་
དུ་མིང་ནས་མ་ཕྱུང་ཞིང་དམིགས་ཀྱིས་མ་བསྔོས་པར་འདིའི་ནང་ན་ནི་ཕམ་པ་ཡོད་ཅེས་སྨྲས་ཏེ་འཕྲིག་ཏུ་བཅུག་པ་ནི་སྦོམ་པོ། ཡང་དག་པར་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང་དགེ་འདུན་གྱི་དབྱེན་ཀྱང༌། ཡང་དག་པར་གཤེགས་པ་ལ་ངན་སེམས་ཀྱིས་ཁྲག་ཕྱུང་བ་དང༌། དགེ་འདུན་གྱི་དབྱེན་བྱས་ཏེ་གསོལ་བ་དང་ཞུ་བ་ལན་གསུམ་དུ་མ་བསྒོ་བ་ནི་སྡིག་གི་འབྲས་བུ་མཚམས་མེད་པར་འགྱུར། ལྟུང་བའི་རིམ་པ་ནི་སྦོམ་པོར་འགྱུར་ཏེ་ངན་སེམས་ཀྱིས་ཁྲག་ཕྱུང་ངོ་ཞེས་སྐུར་པ་དང་དགེ་འདུན་གྱི་དབྱེན་བྱས་སོ་ཞེས་སྐུར་བ་ནི་རྩ་བ་མེད་པའི་དགེ་འདུན་གྱི་ལྷག་མའི་སྦོམ་པོ། འཕྲིག་དུ་བཅུག་པ་ནི་སྨྲ་སེམས་ཐ་དད་པར་སྨྲས་པ་ལ་སོགས་པ་ནི་ཉེས་བྱས་པའོ། །དགེ་སློང་མང་ཞིག་གི་ཁྲོད་དུ་ལྡེམ་པོ་ངག་ཏུ་ཕས་ཕམ་པ་ཡང་བྱེད་པ་ཡོད་པ་ལྟ་ཞིག་ཅེས་བྱ་བ་དང་འདྲ་བའི་ཚིག་ཟུར་དུ་སྨྲས་ཏེ། དགེ་སློང་དུ་འཕྲིག་ཏུ་བཅུག་པ་བཞིན་དུ་ཉེས་བྱས་རེ་རེར་འགྱུར་རོ། །རྩ་བ་མེད་པ་དང་བག་སྟེ་དྲིས་པའི་འོ། །རྩ་བ་མེད་པ་དང་བདག་གི་དགེ་འདུན་གྱི་ལྷག་མ་སྟེ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོའོ།། །།དབྱེན་གྱི་ལྷག་མ་ལ་འཆད་དེ། སྦོམ་པོ་ནི་ཕ་རོལ་གྱི་འཁོར་ལས་དྲངས་པའོ། །གཞན་གྱི་སློབ་མ་དགེ་སློང་ཅིག་གིས་ཁ་དྲངས་ཏེ་བདག་གི་སློབ་མར་བྱས་ན་དགེ་འདུན་གྱི་ལྷག་མའི་དབྱེན་གྱི་སྦོམ་པོ། བཟློག་པ་ལྟ་བུས་མི་གཏོང་བར་ནན་ཏན་བྱེད་པ་ལྟ་བུ་དང་མཐུན་ནོ། །དེ་བ་དཏྟ་ལྟ་བུར་འཁོར་ལོའི་དབྱེན་བྱས་ཏེ་དབྱེན་མ་བྱེད་ཅེས་དགེ་འདུན་གྱིས་གསོལ་བ་དང༌། ཞུ་བའི་ལས་ཀྱིས་ལན་གསུམ་དུ་བསྒོས་ཏེ་མ་ཉན་ནས་དབྱེན་བྱེད་པ་ལྟ་བུ་ལས་ལྡོག་ཏུ་མ་བཏུབ་ན་དགེ་འདུན་གྱི་ལྷག་མར་འགྱུར། རྗེས་སུ་ཕྱོགས་པ་དང་རིགས་སུན་པ་དང་བཀའ་བློ་མི་བདེ་བ་གསུམ་ཡན་ལག་གསུམ་དུ་བསྒོས་ཏེ་མ་བཏང་ན་ལྷག་མར་འགྱུར་རོ། །བཟློག་པ་བཞིན་དུ་ཞུ་བའོ། །འོག་ནས་གསོལ་བའི་ལས་གསུམ་གྱིས་བསྒོ་བ་ལན་རེ་ལ་སྤོམ་པོ་རེ་རེར་འགྱུར་བ་བཞིན་དུ། དགེ་སློང་མིང་འདི་ཞེས་བྱ་བ་དབྱེན་ལ་ཞུགས་ཀྱིས་དགེ་འདུན་གྱིས་བསྒོ་བའི་ལས་བྱའོ་ཞེས་ཞུ་བའི་ཚེའང་སྦོམ་པོ་གཅིག །དག་ཐང་ཅིག་གིས་སོ། །གསོལ་བའི་ལས་ཀྱི་བསྒོ་བ་
ལན་གསུམ་དང་ཞུ་བ་དང་བཞི་བྱེད་པའི་ཚེ་ཚིག་རེ་རེ་ལ་ཉེས་པ་རེ་རེར་མི་འགྱུར་གྱི་བསྒོ་བ་ལན་རེ་རེ་དང་དང་ཞུ་བ་སོ་སོའི་ཚིག་མཇུག་རྫོགས་ཤིང་ཉེས་པ་སོ་སོར་སྦོམ་པོར་འགྱུར། བསླབ་པ་ནི་སོ་སོར་རོ། །དབྱེན་དང་རྗེས་སུ་ཕྱོགས་པ་དང་རིགས་སུན་པ་དང་ངག་དཀའ་བ་གང་ཡང་རུང་དགེ་འདུན་གྱིས་བྱེད་དུ་མི་གཞུག་པར་ཞུ་བའི་ལས་བྱེད་པའི་ཚེ་སྦོམ་པོ་གཅིག་ཞུས་ནས་ལན་གསུམ་དུ་བསྒོ་བའི་ཚེ་སྦོམ་པོ་རེ་རེ། བསྒོ་བ་དང་ཡང་མ་ཡིན་ནོ། །མདོ་ལྟག་མ་ལྟར་གསོལ་བ་དང༌། ཞུ་བ་བཞིས་བསྒོ་ཟིན་ནས་མ་ཉན་ཏེ་སྒོ་བ་བྱེད་པའི་ཕྲིན་པས་བདག་གིས་བསྒོ་བའི་ལས་བགྱིས་ལགས་ཏེ་མ་ཉན་ནས་དབྱེན་ལ་ཞུགས་སོ་ཞེས་སླར་དགེ་འདུན་ལ་ཟེར་བའི་ཚེ་ན་ལྷག་མར་གྱུར་ཟིན་ནས་ཉེས་པ་གཞན་མེད་དོ། །འཇུག་པར་ནི་སྦྱོར་བ་བཞིན་ནོ། །གསོལ་བ་དང་ཞུ་བའི་ལས་ཀྱིས་བསྒོ་བ་ལན་རེའི་ཚེ་གཏོང་དུ་མི་བཏུབ་ཅིང་ལྷག་མ་བྱེད་པར་འཇུག་པ་ནི་སྤོམ་པོ་རེ་རེར་འགྱུར་རོ། །བསྐྲད་པའི་དྲན་པ་དང་བརྩད་པ་མ་བྱས་པར་ན་དེའིའོ། །རིགས་སུན་པའི་ཆོས་སྤྱོད་པ་ལས་དགེ་འདུན་གྱིས་བསྐྲད་པའི་ལས་མ་བྱས་པར་རང་དབང་དང་ལྡན། ཞེ་སྡང་དང་ལྡན། གཏི་མུག་དང་ལྡན། འཇིགས་པ་དང་ལྡན་ནོ་ཞེས་བསུ་སྟེ་སྨྲ་བ་དེའི་ཚེ་ཉེས་བྱས། ངག་དཀའ་བ་ལ་ཡང་གསོལ་བ་དང༌། ཞུ་བས་བསྒོ་བ་མ་བྱས་པར་ཁྱོད་ཀྱང་ང་ལ་ཅང་མ་ཟེར་ཅིག་ང་ཡང་ཁྱེད་ལ་ཅང་མི་ཟེར་རོ་ཞེས་ཟེར་བའི་ཚེ་ཉེས་བྱས། འདི་ལ་མི་བསྒོ་བར་བྱ། མདོ་ལྟག་མ་ལྟར་མ་བསྐྲད་ཅིང་མ་བསྒོ་བར་ཚིག་སྔར་འདོར་ཏེ་སྨྲས་པ་ལ་དགེ་འདུན་གྱིས་ལན་གསུམ་བསྒོ་མི་དགོས་ཀྱིས་བསྐྲད་དོ་ཞེས་བྱི་ཤུ་ཏ་རས་ཤི་ཏས་བཤད། རིགས་སུན་པ་ནི་སྔར་མ་བསྐྲད་པར་ལན་གསུམ་དུ་བསྒོ་བར་མི་བྱ། ངག་དཀའ་བ་ནི་ལན་གསུམ་མ་བསྒོ་བར་བསྐྲད་པར་མི་བྱའོ། །ཞེས་བྱི་ཙ་ཡ་བར་མས་བཤད། འདི་དག་ལ་མཛའ་བ་དང་ལས་ཀྱིས་མི་བསྒོ་བར་མི་བྱ། དབྱེན་དང་རྗེས་སུ་ཕྱོགས་པ་དང་རིགས་སུན་པ་དང་ངག་དཀའ་བ་བཞི་ལ་ཞུགས་པ་ཞིག་ཡོད་ན་ཐོག་མར་སུ་དང་མཛའ་བ་དེས་དེ་ལྟར་མ་བྱེད་ཅིག་ཅེས་གྲོས་གདབ་ཅིང་བཅོས། གྲོས་ཉན་དུ་མ་བཏུབ་ན་བསྐྲད་པར་འགྱུར་ཏེ་མཁན་པོ་དང་སློབ་དཔོན་དང་ཡང་བྲལ། དགེ་འདུན་གྱི་ནང་དུ་ཡང་མི་ཆུད་དོ་ཞེས་
བསྡིགས། དེ་ལྟར་བྱས་དང་ཉན་དུ་མ་བཏུབ་ན་དགེ་འདུན་གྱིས་འཕྲིན་པའི་དགེ་སློང་ཐབས་མཁས་པ་ཞིག་བསྐོས་ཏེ་བསྒོ། །འདི་ལྟར་མ་བྱས་ན་མཛའ་བོ་དང་དགེ་འདུན་ལ་ཉེས་བྱས། དེའི་མཐར་མ་བཏང་ནའོ། །དབྱེན་གྱི་ལྷག་མ་ནི་ཡང་ཡན་ལག་མིང་གིས་སྨོས་པ་འདི་རྣམས་དང་ལྡན་ན་ལྷག་མར་འགྱུར་རོ། །དབྱེན་ལ་ཞུགས་ཏེ་དགེ་འདུན་གྱིས་གསོལ་བ་དང་ཞུ་བའི་ལས་བཞིས་བསྒོས་ཏེ་མ་བཏང་བར་འཛིན་ཅིང་འདུག་པ་དང༌། ཞུགས་པ་ལས་སོ། །དགེ་འདུན་ཆོས་སོ་སོ་ལ་བལྟ་བར་བྱ་བའི་ཕྱིར་དབྱེ་བར་ཡང་ཞུགས་པ་དང༌། དབྱེན། དབྱེན་ཡང་བྱས་ཏེ་ཕྱེ་བ་དང་དགེ་འདུན་གྱིའོ། །དགེ་སློང་གི་དགེ་འདུན་ཡང་ཡིན་ལ་ཕྱེ་བ་གཉིས་ཀ་སོ་སོར་དགེ་འདུན་དུ་ཡང་ཚང་བ་དང་ཡན་ལག་འདི་བཞིའི་སྟེང་དུ་ལྟག་ནས་བཟློག་པ་ལྟ་བུས་མི་གཏོང་བར་ནན་ཏན་བྱེད་པས་བསྣན་ཏེ་ལྔར་ལྡན་ན་ལྷག་མར་འགྱུར། དགེ་འདུན་གྱི་དབྱེན་ཏེ་དགེ་འདུན་གྱི་ལྷག་མའོ། །དབྱེན་གྱི་དགེ་འདུན་གྱི་ལྷག་མ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རྗེས་སུ་ཕྱོགས་པའི་ལྷག་མ་ལ་འཆད་དེ། གྲོགས་སུ་ནན་ཏན་བྱེད་པའོ། །དགེ་འདུན་གྱི་དབྱེན་དུ་ཞུགས་པའི་དགེ་སློང་དེ་རྗེས་སུ་ཕྱོགས་ཏེ་དབྱེན་ལ་ཞུགས་པའི་དགེ་སློང་དེ་ལ་ཅིའང་མ་ཟེར་ཅིག །དགེ་ཡང་རུང་སྡིག་ཀྱང་རུང་སྟེ་འདུལ་བ་འཛིན་པའོ། །ཆོས་དང་ལྡན་པ་སྟེ་དེ་བཞིན་དུ་བྱེད་དོ་ཞེས་ཟེར་ན་ལྷག་མར་འགྱུར་ཏེ་དབྱེན་གྱི་རྩིས་མགོ་ལྔའི་སྟེང་དུ་འདིས་བསྣན་ཏེ་དྲུག་ཏུ་ལྡན་ན་ལྷག་མ་གསོལ་བ་དང་ཞུ་བ་ལ་སོགས་པ་བཤད་པ་གཞན་ནི་ལྟག་ཏུ་དབྱེན་བཤད་པ་དང་འདྲའོ། །རྗེས་སུ་ཕྱོགས་པའི་དགེ་འདུན་གྱི་ལྷག་མའོ། །རྗེས་སུ་ཕྱོགས་པའི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རིགས་སུན་པའི་ལྷག་མ་ལ་འཆད་དེ། བདག་བསྐྲད་པའི་ཕྱིར་བྱེད་པའི་དགེ་འདུན་ལ་ལོག་པའི་བསམ་པས་འདི་ལྟ་བུར་བྱས་སོ་ཞེས་བརྫུན་དུ་སྨྲས་ནའོ། །དགེ་སློང་རིགས་སུན་པའི་ཆོས་སྤྱོད་པ་ལ་དགེ་འདུན་གྱིས་རིགས་སུན་པའི་ཆོས་སྤྱད་པ་ཉེས་ཀྱིས་དེར་ཤིག་ཅེས་སྨྲས་ན་བསྐྲད་པ་ལས་སླར་དགེ་འདུན་ལ་རང་དབང་ཅན་གྱི་ཚེ་དང་ལྡན་པ་ཁྱེད། ཞེ་སྡང་དང་ལྡན།
གཏི་མུག་དང་ལྡན། འཇིགས་པ་དང་ལྡན་ནོ་ཞེས་སྨྲ་ཞིང་སྐུར་ནས་གསོལ་བ་དང་ཞུ་བ་བཞིས་བསྒོས་ཏེ་རིགས་སུན་ཅིང་སྡིག་པའི་ཆོས་སྤྱོད་པ་གཏོང་དུ་མ་བཏུབ་ན་དགེ་འདུན་གྱི་ལྷག་མར་འགྱུར་ཏེ། དབྱེན་གྱི་ཡན་ལག་དང་འདྲ་བར་ལྔ་དང་ལྡན་པའི་སྟེང་དུ་འདིས་བསྣན་ཏེ། ལྡན་པར་བྱས་ན་ལྷག་མར་འགྱུར། རིགས་སུན་པའི་དགེ་འདུན་གྱི་ལྷག་མའོ། །རིགས་སུན་པའི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ངག་དཀའ་བའི་དགེ་འདུན་གྱི་ལྷག་མ་ལ་འཆད་དེ། དགེ་སློང་རྣམས་ཀྱིས་དགེ་སློང་གི་ཚུལ་ཁྲིམས་ལ་བསྐུལ་བ་ལ་ཚིག་ཏུ་མི་འབྱེད་པར་དེར་རང་གིས་བྱེད་ནའོ། །དགེ་སློང་ཚུལ་ཁྲིམས་འདྲལ་ཞིང་ཆུའི་ནང་ན་སྲིན་བུ་མི་རྟོག་པར་གསོད་པ་ལ་སོགས་པ་ཁྲིམས་འདྲལ་ཞིང་ལྟུང་བར་གྱུར་པ་དེ་མཐོལ་ཚངས་བྱོས་སྡིག་པ་དང་ལྟུང་བར་འགྱུར་བ་དེ་མ་བྱེད་ཅིག་ཅེས་བསྒོ་བ་ལ་སླར་འཁྱལ་ཞིང་ཁོ་བོ་ལ་ཚེ་དང་ལྡན་པ་ཁྱོད་ཅི་ཡང་མ་ཟེར་ཅིག །དགེ་འང་རུང་སྡིག་ཀྱང་རུང་བདག་ཀྱང་ཅང་མི་ཟེར་རོ་ཞེས་ཟེར་ཞིང་སླར་ལན་ལོག་པས་ལྡོན་ནམ་ཅང་མི་སྨྲ་བར་འདུག་ཅིང་ངག་དཀའ་བར་བྱེད་པ་ལ་དགེ་འདུན་གྱིས་ཚུལ་ཁྲིམས་དང་ལྡན་པའི་དགེ་སློང་ལ་ངག་དཀའ་བར་མ་བྱེད་པར་ཚུལ་ཁྲིམས་དང་ལྡན་པས་བསྒོ་བ་བཞིན་དུ་ཉོན་ལ་མཐོལ་ཚངས་བྱོས་ཞེས་གསོལ་བ་གསུམ་དང་ཞུ་བ་དང་བཞིས་བསྒོ་སྟེ་མ་ཉན་ན་ལྷག་མར་འགྱུར་ཏེ་དབྱེན་གྱི་རྩིས་མགོ་དང་འདྲ་བ་ལྔའི་སྟེང་དུ་འདིས་བསྣན་ཏེ། ལྡན་པར་བྱས་ན་ལྷག་མར་འགྱུར་ཏེ། ངག་དཀའ་བའི་དགེ་འདུན་གྱི་ལྷག་མའོ། །ངག་དཀའ་བའི་དགེ་འདུན་གྱི་ལྷག་མ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ་དགེ་འདུན་གྱི་ལྷག་མ་རྫོགས་སོ།། །།བཅུ་གསུམ་དགེ་འདུན་གྱི་ལྷག་མ་ལ་འཆད་པ་འདུལ་བ་སོ་སོའི་ནང་ནས་འབྱུང་བའི་མདོ་སྡེ་ལྷག་མ་ལ་འཆད་པ་རྫོགས་སོ།། །།འདི་མན་ཆད་སུམ་ཅུ་སྤང་པའི་ལྟུང་བ་ལ་འཆད་དེ། སྤང་པའི་འཆང་བ་ལ་འཆད་དེ། སྔ་མ་མེད་པའི་ཉིན་ཞག་གི་མཐའ་མ་གཏོགས་ཏེ་མེད་པའོ། །གོས་ཤིག་རྙེད་ན་རྙེད་པའི་ནང་པར་གྱི་སྐྱ་རེངས་ཕན་ཆད་སྔར་འདས་པའི་ཞག་རྣམས་ནི་གྲངས་སུ་མི་བརྩིའོ། །ནམ་རྙེད་པ་ནས་མགོ་བཙུགས་ཏེ་དེ་
བཞིན་དུ་དགེ་སློང་དང་ཉལ་བ་དང༌། བུད་མེད་དང་ཉལ་བ་དང༌། ཞག་བདུན་པའི་སྨན་དང་དབྱེ་བའི་ཆོས་གོས་ཞག་དྲུག་པ་དང༌། གོས་ཁ་སོགས་ཟླ་བ་གཅིག་པ་དང་གཡུལ་ན་ཞག་གཉིས་གནས་པ་ལ་སོགས་པ་ལས། ལྟུང་བར་འགྱུར་རོ་ཅོག་ཐམས་ཅད་ཞག་གི་མཚམས་བརྩི་བའང་འདི་དང་འདྲ་སྟེ་སྐྱ་རེངས་ཀྱིས་གཅོད་དེ། སྦྱོར་བའི་སྣོད་གནས། སྦྱོར་བ་ནི་ལྟུང་བར་སྦྱོར་བ། སྣོད་ནི་ཞག་བསགས་ནས་ལྟུང་བར་འགྱུར་བ་ལ་བྱ། གནས་ནི་བུད་མེད་དང་དགེ་སློང་ཁྱིམ་གཅིག་ན་འཁོད་ཅིང་གནས་པ་ལ་བྱ་སྟེ་འཆད་པའི་སྤང་བ་ནི་ཞག་བཅུར་སྔགས་མ་བཏབ་ན་ཉེས་བྱས། བཅུ་གཅིག་གི་སྐྱ་རེངས་བྱུང་ན་ལྟུང་བའོ། །བུད་མེད་དང་ཉལ་བ་ནི་ཐོག་མ་ཉལ་བ་ནས་ཉེས་བྱས་ལ་ཞག་ལོན་ན་ལྟུང་བ། ཞག་ལས་འགྱུར་བ་གཞན་ཡང་དེ་བཞིན་དུ་འདྲ་བར་གོ་བར་བྱ། སྐྱ་རེངས་དང་བོའི་ཐོག་མ་འདིའོ། །སྐྱ་རེངས་ཀྱིས་ཚད་གཟུང་བ་སྐྱ་རེངས་རྣམ་གསུམ་ཡོད་དེ་སྔོ་རེངས་ནི་དང་པོར་འབྱུང་སྟེ། ལྷོ་ཕྱོགས་ཀྱི་གླིང་དུ་ཉི་མ་ཤར་ནས་ཤིང་འཛམ་བུའི་གློར་བབ་པ་དང་འཛམ་བུའི་གསེབ་ནས་འོང་བྱུང་བ་འཛམ་བུའི་ལོ་མའི་འོད་ཀྱིས་སྔོན་པོར་འབྱུང་སྟེ་དེ་བྱུང་བའི་ཚད་དུ་བརྩིའོ། །དམར་རེངས་ནི་ཤིང་འཛམ་བུ་ལས་ཉི་མ་འཕགས་པ་དང་འོད་དམར་པོར་བྱུང་བ་ལ་བྱ། སེར་རེངས་ནི་ཉི་མ་ནམ་མཁའ་ལ་མངོན་པར་བྱུང་ནས་འོད་སེར་པོར་བྱུང་པ་ལ་བྱ་སྟེ། སྐྱ་རེངས་ཕྱི་མ་གཉིས་ཀྱིས་ནི་མི་བརྩིའོ། །ཉི་མ་ཤར་ནས་ལས་སུ་མི་རུང་ངོ༌། །གསོ་སྦྱིན་དང་ཚུལ་ནས་འབྱུང་བ་དང་ཚུལ་དུ་འཇུག་པ་ནི་ཞག་དུས་ལས་ཀྱང་སྐྱ་རེངས་ཀྱིས་ནི་ཚད་མི་གཟུང་གི་ཉི་མ་ཤར་ཚུན་ཆད་ལས་བྱར་རུང་ངོ༌། །སྤང་བ་ནི་བདག་གིར་འདུ་ཤེས་པ་གཙོ་བའོ། །སྤང་བའི་ལྟུང་བར་འགྱུར་བ་ནི་རྫས་བདག་གི་ལག་ཏུ་འོངས་ཤིང་ཐོབ་ལ་བདག་གི་ཡིན་པར་བསམས་ཤིང་ཤེས་པ་ལས་སྤང་བའི་ལྟུང་བར་འགྱུར་ཏེ་གོས་ཀྱི་སྤུ་ནི། དགེ་སློང་ལ་བརྟགས་པ་བལ་དང་དར་དང་ཟར་མ་དང་དུ་གུ་ལ་དང་ཀོ་ཏམ་པ་དང༌། ཨ་བ་རན་ཏ་ཀ་དང་རས་དང་བདུན་ལས་སྔགས་མ་ཐེབས་ན་སྤང་བར་འགྱུར། མ་བརྟགས་པ་ནི་རྔ་མོ་རེའུ་རི་དགས་ཀྱི་བལ་དང་མཐོ་རིས་ཀྱི་གོས་རྣམས་ནི་སྔགས་མི་འཆགས། འདི་བསྔོས་ན་མེད་པའོ། །གོས་ཤིག་གུད་
ནས་འོངས་ཏེ་རྙེད་པའི་མི་གཞན་ཞིག་སྦྱིན་པ་དང་གཞན་དུ་གཏང་བར་བསམས་ནས་བསྔོས་ཏེ་བཞག་པ་ནི་སྔགས་མ་བཏབ་ཀྱང་ཉེས་མེད་དོ། །རབ་ཏུ་འབྱུང་བར་འདོད་པའི་ཕྱིར་བསྔོས་ན་ཡང་དེའོ། །གོས་ཤིག་རྙེད་ན་གསར་དུ་རབ་ཏུ་འབྱུང་བ་ཞིག་ཡོད། དེའི་གོས་དང་ཡོ་བྱད་དུ་བྱའོ་ཞེས་བསྔོས་ཏེ་བཞག་པ་ཡང་སྔགས་མ་བཏབ་ཀྱང་ཉེས་པར་མི་འགྱུར་རོ། །གོས་བརྟགས་པ་ཡང་ངོ༌། །གོས་ཤིག་རྙེད་ན་བདག་གི་ཡོ་བྱད་བཅུ་གསུམ་དུ་བསྔོ་བའི་སྔགས་ཀྱིས་བཏབ་པ་དང་གོས་ལྷག་པའི་སྔགས་ཀྱིས་བཏབ་པ་དང་བདག་ལ་མི་དགོས་ཏེ་སླར་བྱིན་པ་དང་བླངས་ནས་གཞན་སྦྱིན་པར་བསྔོས་པ་དང་འདི་བཞི་གང་ལྟར་བྱས་ཀྱང་ཉེས་པར་མི་འགྱུར་རོ། །འདིར་རྒྱུད་ནི་ཞིགས་པའོ། །གོས་ཤིག་རྙེད་དེ་ཞག་དགུ་ཙམ་ན་སྔགས་ཀྱིས་བཏབ་ན་ཞག་བརྒྱད་ཀྱི་བར་ཏུ་སྔགས་ཀྱིས་མ་བཏབ་པ་ཞག་དེ་རྣམས་ཞིགས་ཉེས་པར་མི་འགྱུར་བའང་བྱ། ལྷག་པའི་སྔགས་ཀྱིས་བཏབ་ན་མཁན་པོ་ཡིན་པར་བསམ་པས་བདག་གིས་སེམས་པ་མེད་དེ་ཞིགས་པ་ལ་ཡང་བྱ། སྤང་པར་གྱུར་ཏེ་གཞན་བྱིན་པའི་ཚེ་བདག་གི་བར་སེམས་པ་མེད་པས་ལྟུང་བ་བྱང་བར་འགྱུར་བ་ལའང་བྱའོ། །རང་བཞིན་ལས་ཉམས་པ་ཡང་ངོ༌། །གོས་ཤིག་གསར་དུ་འོངས་ཏེ་རྙེད་ན་ཞག་བརྒྱད་དགུའི་བར་དུ་སྔགས་ཀྱིས་མ་ཐེབས་པ་ལས། དགེ་སློང་སྨྱོས་ན་ཞག་དུ་ལོན་ཀྱང་རུང་སྤང་བའི་ལྟུང་བར་མི་འགྱུར་རོ། །ནམ་དྲན་པ་ནས་ཞག་བཅུ་ཚུན་ཆད་དུ་སྔགས་གདབ། འདི་ཡོད་པ་ལས་གཞན་ཡང་འདི་ལྟ་བུའི་དངོས་པོ་སྐྱེས་སོ། །གོས་ཤིག་རྙེད་ན་སྔགས་ཀྱིས་མ་བཏབ་སྟེ་སྤང་བའི་ལྟུང་བར་འགྱུར་ན་གོས་སྤང་བར་གྱུར་པ་དེ་རྙེད་ཚུན་ཆད་གོས་གཞན་རྙེད་དོ་ཅོག་སྤང་བར་འགྱུར་རོ། །ལྷན་ཅིག་ཏུ་སྐྱེས་པ་ཞག་བདུན་པ་ཡང་ངོ༌། །ཞག་བདུན་པའི་སྨན་དུ་གཏོགས་པ་རྣམས་ཀྱང་གང་ཡང་རུང་སྔ་མ་རྙེད་བ་སྤངས་པར་གྱུར་ན་དེ་ཚུན་ཆད་རྙེད་པ་ཀུན་ཀྱང་སྤང་བར་འགྱུར་རོ། །རིགས་ཐ་དད་པ་ནི་མ་གཏོགས་སོ། །སྤང་བ་དེའི་ལྟུང་བ་ཡོད་བཞིན་དུ་ཡོ་བྱད་ཙམ་ཡང་བདག་གིར་བྱས་པའོ། །གོས་རྙེད་པ་སྣ་གཅིག་སྤང་བའི་ལྟུང་བར་གྱུར་ན་དེ་རྙེད་ཚུན་ཆད་གོས་གཞན་ཅི་རྙེད་པ་ཀུན་སྤང་དགོས་པ་ནི་སྔགས་མི་འཆགས་པ་ལྷན་པའམ་སྐུད་པ་ཙམ་ཡན་
ཆད་ཀྱང་སྤང་དགོས་སོ། །དེ་ལས་ཆུང་བའི་དུམ་བུ་ནི་མ་ཡིན་ནོ། །གོས་ཤིག་རྙེད་ན་སྔགས་གདབ་དགོས་པ་ནི་ཁྲུ་གང་འཁོར་བ་ཡན་ཆད་ཅིག་ལས་སྔགས་ཀྱིས་མ་བཏབ་ན་སྤང་བའི་ལྟུང་བར་འགྱུར། ཁྲུ་གང་མན་ཆད་ལ་ནི་སྔགས་ཀྱིས་གདབ་མི་དགོས། དགེ་འདུན་གྱི་ཡང་ངོ༌། །ཕྱོགས་བཅུའི་དགེ་འདུན་གྱི་དཀོར་ཡང་རུང་ངོ༌། །མཚམས་གཅིག་གི་དགེ་འདུན་གྱི་དཀོར་ཡང་རུང་བདག་གི་ཆོས་གོས་གསུམ་གྱི་གོར་བརྙས་ཏེ་སྔགས་ཀྱིས་བཏབ་པ་ལས་བྲལ་ནའང་ལྟུང་བར་འགྱུར་ཏེ་ཕྱོགས་བཅུའི་ནི་སྤང་དུ་མི་དབང༌། མཚམས་གཅིག་གི་སྤང་དགོས། མི་བདོག་པ་དེ་ནི་འདིར་གཙོ་བོའོ། །གོས་ཤིག་རྙེད་དེ་སྤང་བའི་ལྟུང་བར་གྱུར་པ་ལས་གོས་དེ་རྐུན་པོས་ཁྱེར་རམ་ཆུས་ཁྱེར་རམ་མེད་པར་གྱུར་ན་སྤང་ནི་མི་དགོས་ལྟུང་བ་ནི་མཐོལ་དགོས་སོ། །བྲུབས་པ་བཏིང་བ་ན་འདི་གསུམ་ནི་མ་ཡིན་ནོ། །ཚུལ་ནས་བྱུང་སྟེ་བྲུབས་པ་བཏིང་ན་འཆང་བ་དང་བྲལ་བ་དང་འཇོག་པ་གསུམ་གྱི་ལྟུང་བ་མེད་དེ་གནང་ངོ༌། །འདི་ཡན་ཆད་ནི་འཆང་བ་དང་འབྲལ་བ་འཇོག་པ་གསུམ་གྱི་རྩིས་མགོ་འདྲ་སྟེ་འདི་ཡན་ཆད་སྤྱིར་འཆད་དོ། །བདག་གི་ཡོད་བཞིན་དུ་ཞག་བཅུ་འདས་ནའོ། །བདག་གིས་གོས་ཤིག་རྙེད་དེ་ལྷག་པར་འཆང་ན་སྔགས་ཀྱིས་མ་བཏབ་པར་ཞག་བཅུ་ཚུན་ཆད་དབང་ངོ༌། བཅུ་ལས་འདས་ན་སྤང་བའི་ལྟུང་བར་འགྱུར་རོ། །ཕ་རོལ་གྱི་ཐོག་མའོ། །ཞག་བཅུ་འདས་ན་སྤང་བའི་ལྟུང་བར་འགྱུར་པ་ནི་ཞག་བཅུ་གཅིག་གི་སྐྱ་རེངས་དང་པོ་འདས་ནས་སྤང་བའི་ལྟུང་བར་འགྱུར་རོ། །གོས་ལའོ། །འཆང་བའི་སྤང་བ་ནི་ལྷག་མའི་གོས་ཀྱང་ཡིན་པ་དང༌། ཚད་ཀྱི་མཐའ་ནི་འཁོར་གསུམ་ཡོག་པའོ། །གོས་དེ་ཁྲུ་གང་འཁོར་བ་ཡོད་ཀྱང་རུང་འཁོར་གསུམ་ཡོག་པ་ཡང་རུང༌། དེ་ཡན་ཆད་དང་འཁོར་གསུམ་ཡོག་པའི་ལྟེ་བ་མན་ཆད་པུས་མོ་ཡན་ཆད་མདུན་དང་རྒྱབ་ཡོག་པ་ལ་བྱ་སྟེ་འདི་ནི་ཆོས་གོས་སྨད་གསུམ་དུ་བསྔོར་རུང་བའི་ཚད། བསྔོ་བས་མ་བཏབ་ནའོ། །གོས་ལྷག་མ་དེ་སྔགས་ཀྱིས་ཀྱང་མ་ཐེབས་པ་དང་ཡན་ལག་འདི་ལྔ་དང་ལྡན་ན་སྤང་བའི་ལྟུང་བར་འགྱུར། བཏབ་ཀྱང་འདས་པ་དང་བཅས་ནའོ། །རྙེད་པའི་གོས་ཤིག་སྔགས་ཀྱིས་མ་ཐེབས་ཏེ་སྤང་བའི་ལྟུང་བ་ཡོད་བཞིན་དུ་ལྟུང་བར་
གྱུར་པ་དེ་ཚུན་ཆད་གོས་རྙེད་དོ་ཅོག་སྔགས་ཀྱིས་བཏབ་ཀྱང་སྔགས་མ་ཆགས་པ་ཡིན་ཏེ་སྤང་དགོས་སོ། །གཞན་ཡོད་ན་མ་བསྔོས་པར་བདག་གིར་བྱས་ན་འདིར་རོ། །ལྟུང་བ་ཡོད་བཞིན་དུ་གོས་ཕྱིས་མ་རྙེད་པ་ཞག་མ་འདས་ཀྱང་སྔགས་མི་འཆགས་ཤིང་སྤང་བར་འགྱུར་བ་ནི་སྔ་མའི་ཁྲིན་གྱི་ཆད་པས་སྤང་དགོས་སོ། །འཆང་བའི་སྤང་བའོ། །འཆང་བ་སྤང་བའི་ལྟུང་བ་སྟེ། འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འབྲལ་བའི་སྤང་བ་ལ་འཆད་དེ། ཉེས་མེད་པ་གདིང་བ་དང་བྲལ་བ་ནའོ། །ཆོས་གོས་གསུམ་བདག་གིར་བསྔོས་པ་ལས་བྲལ་ན་ལྟུང་བར་འགྱུར་རོ་ཞེས་འབྱུང་བས་གདིང་བ་ཡང་བདག་གིར་བསྔོས་པ་ཡིན་ཏེ་བྲལ་ན་ལྟུང་བར་འགྱུར་བར་ཐེ་ཚོམ་ཟ་བའི་ཕྱིར་བཤད་པ་དེ་གདིང་བ་དང་བྲལ་བ་ནི་ལྟུང་བར་ཡང་མི་འགྱུར་ཉེས་མེད་པ་ཡང་མེད་དོ། །གདིང་བ་བཞག་སྟེ་མི་འགྲོའོ། །མདོ་ལྟག་མ་ལྟར་གདིང་བ་དང་བྲལ་ན་ཉེས་མེད་ཅེས་ཏེ་ཞག་ཏུ་ཐོགས་པའི་གནས་ཤིག་ཏུ་འགྲོ་ན་གདིང་བ་བཞག་སྟེ་མི་འགྲོའོ། །བཞག་ན་ཉེས་བྱས། དེ་སྟེ་དེ་རིང་ཕྱིར་འཁོར་སྙམ་པ་མེད་ན་ཡང་ངོ༌། །གཞིག་ཏུ་འགྲོས་ཏེ་ཞག་ཏུ་མི་ཐོགས་པར་སླར་འཁོར་བའི་གདེང་ཡོད་པ་ནི་གདིང་བ་བཞག་སྟེ་སོང་ཡང་ཉེས་མེད་དོ། །སླར་འཁོར་བའི་གདེང་མེད་པ་ལས་གདིང་བ་བཞག་ན་ཉེས་བྱས་སུ་འགྱུར་རོ། །དེ་ལྟར་སོང་བ་ལས་དུས་མ་ཡིན་པ་གྲུབ་ན་དེར་དེ་བརྙས་ཏེ་གནོས་ཤིག །མདོ་ལྟག་མ་ལྟར་སླར་འཁོར་བའི་གདེང་ཡོད་དེ་གདིང་བ་བཞག་སྟེ་སོང་བ་ལས་ཆུ་བྲུག་གམ་དགྲས་ཆོད་དེ་རྐྱེན་ཅིག་བྱུང་ནས་སླར་མ་འཁོར་ན། དགེ་འདུན་དང་གྲོགས་པོ་དང་ཁྱིམ་པའི་མལ་སྟན་གག་ལ་ཉལ་ཡང་རུང་གདིང་བ་མེད་དུ་མི་རུང་སྟེ་གཞན་ཅིག་ལས་བརྙོས་ལ་ཉོལ་ཅིག །དགེ་འདུན་དང་ཁྱིམ་པའི་མལ་སྟན་ལ་གདིང་བ་མེད་པར་ཉལ་ན་ཉེས་བྱས་ལྕི་བ། གྲོགས་པོའི་མལ་སྟེན་ལ་གདིང་བ་མེད་པར་ཉལ་ན་ཉེས་བྱས་ཡང་བའོ། །མ་གྲུབ་ན་སྟེང་ནས་དགབ་པ་བཞིན་བལྟ་བ་ལ་རིང་དུ་མ་ལོགས་ཤིག །མདོ་ལྟག་མ་ལྟར་སླར་འཁོར་བའི་གདེང་ཡོད་དེ་སོང་སོང་བ་ལས་རྐྱེན་ཅིག་བྱུང་སྟེ་སླར་མ་འཁོར་བ་ལས་གདིང་བ་བརྙར་ཡང་མ་རྙེད་ན་ཆོས་གོས་སྣམ་བདུན་ལ་ཞེང་དུ་བཞིར་བལྟ་བས་
ཏེ་བཏིང་ལ་སྲོད་དང་ཐོ་རངས་ནམ་གྱི་སུམ་གཉིས་ཀྱི་བར་དུ་བཅག་པའམ་ཙོག་པུར་འདུག་ལ་མི་ཉལ་བར་ཁ་དོན་བྱ། ནམ་གྱི་གུང་གསུམ་ཆ་ལའང་མལ་སྟན་ལ་མཐང་གིས་མ་རེག་པ་དང་ཆོས་གོས་ལ་མི་གཟན་པའི་ཚུལ་དུ་བསྐུམ་སྟེ་ཉལ། སྦྱར་མ་གཞག་པའི་མི་རེག་པའི་གནས་སུ་དབྱར་གྱི་རས་ཆེན་མི་གཞག་ཆོས་གོས་སྦྱར་མ་གང་དུ་བསྐུར་དགོས་པར་དབྱར་གྱི་རས་ཆེན་ཡང་མི་གཞག་པར་བསྐུར། ཆོས་གོས་གསུམ་གང་དུ་གཞག་པར་རིགས་པའི་སར་རས་ཆེན་བཞག་ཀྱང་ཉེས་མེད་དེ་གང་དུ་བཞག་པ་དང་གང་དུ་བསྐུར་བའི་རིགས་པ་འོག་ནས་འཆད་པ་ཡིན་ཏེ་མི་སྟོར་བའི་ཚུལ་དུ་གཞག་པ་ལ་བྱ། ཆར་པ་ལ་ཡང་མ་ཡིན། ཆར་པ་འབབ་བམ་ཆར་པ་འབབ་ཏུ་དོགས་ཏེ། ག་ཞིག་ཏུ་འགྲོ་ན་རས་ཆེན་མི་གཞག་པར་བསྐུར། མ་ཁྱེར་ན་ཉེས་བྱས། ཆུ་རྒལ་ཏེ་འགྲོ་ན་ཡང་མ་ཡིན། ག་ཞིག་ཏུ་འགྲོ་སྟེ་ཆུ་ཞིག་རྒལ་ན་ཡང་ཆོས་གོས་ཆུས་མི་གཤེར་བར་བྱ་བའི་ཕྱིར་དང་སླར་འོང་ན་ཆུ་བྲུག་སྟེ་མི་ཐར་བའི་བར་དུ་ཆར་པས་ནོན་དུ་འོང་བའི་ཕྱིར་རས་ཆེན་བསྐུར་དགོས་སོ། །འདི་དག་ལ་དོགས་ན་མ་ཡིན། ག་ཞིག་ཏུ་འགྲོ་སྟེ་ཆར་པ་འབབ་ཏུ་དགོས་སམ་ཆུ་བྲུག་གམ་ཆུ་རྒལ་དགོས་པར་དོགས་ནའང་རས་ཆེན་མི་གཞག་པར་བསྐུར། དགེ་སློང་དང་བཅས། དགེ་སློང་ཡང་ཡོད་ལ། སྒོ་དང་བཅས། ཁང་པའི་སྒོ་དང་སྒོ་ལྕགས་ཀྱང་ཡོད་པ། གནས་དང་བཅས་པ། ཁང་པ་ཡིན་པ་དང་འདི་གསུམ་དུ་ལྡན་པར་ནི་ཆོས་གོས་གཏམས་ཏེ་བཞག་ཀྱང་ཉེས་མེད། གསུམ་ལ་གཅིག་མ་ཚང་བར་བཞག་ན་ཉེས་བྱས་ཡང་གསུམ་ཆར་ཡང་མེད་པར་གཞག་ན་ཉེས་བྱས་ལྕི་བ། ཆར་པ་འབབ་བམ། ག་ཞིག་ཏུ་འགྲོ་སྟེ་ཆར་པ་འབབ་བམ་འབབ་ཏུ་དོགས་པའམ། ཆུ་རྒལ་ཏེ་འགྲོ་བ་དང༌། ཆུ་རྒལ་ཏེ་འགྲོ་དགོས་སམ། དེ་ལྟ་བུ་མེད་པ་དང༌། དགྲ་འམ་གཅན་གཟན་ལྟ་བུས་གཙེ་བ་དང་མེད་པ་དང༌། གནང་བ་མེད་པ་དང༌། ནད་པ་དང་རྒན་པོ་ལྟ་བུ་ཆོས་གོས་དང་འབྲལ་བར་གནང་བ་དགེ་འདུན་གྱིས་མ་བྱིན་པ་དང༌། བཏིང་བ་མ་བྲུབས་ཏེ་ཟླ་བ་ལྔའི་བར་དུ་ཆོས་གོས་དང་འབྲལ་བར་གནང་བ་མེད་པ་དང༌། སྦྱར་མ་མེད་པར་གར་ཡང་མི་འགྲོའོ། །
མིང་གིས་སྨོས་པ་འདི་ལྟ་བུའི་རྐྱེན་མེད་པར་ཆོས་གོས་སྨད་གསུམ་བཞག་སྟེ་གར་ཡང་མི་འགྲོ། །འདི་རྣམས་ཀྱི་རྐྱེན་ཡོད་ན་ནི་ཆོས་གོས་བཞག་སྟེ་སོང་ན་ཉེས་མེད་དོ། །ཆོས་གོས་ཀྱི་གནས་ཐོབ་པར་མི་འགྱུར་ན་སྤང་སྟེ་གཞན་ལ་བསྔོ་བའི་ཆོ་གའོ། །ག་ཞིག་ཏུ་འགྲོ་སྟེ་ཞག་མི་ལོན་པར་སླར་འཁོར་བའི་གདེང་ཡོད་དེ་ཆོས་གོས་བཞག་སྟེ་སོང་སོང་བ་ལས་དགྲས་ཆོད་དམ་ཟམ་པ་ཆད་དམ་ཆུ་བྲུགས་ཏེ་སླར་མ་འཁོར་ན་བདག་གི་ཆོས་གོས་སུ་བསྔོས་པས་ལུས་པ་དེ་ལག་ན་འདུག་པ་ཙམ་དུ་བསམས་ཏེ་གྲོགས་པོ་གཅིག་གི་གན་དུ་དབྱུང་བའི་སྔགས་བྱས་ལ་ཆོས་གོས་སྨད་གསུམ་གཞན་ལ་བརྙས་ཏེ་སྔགས་གདབ། ཆོས་གོས་ཉིད་མ་རྙེད་ནའང༌། དགེ་སློང་གི་གོས་སུ་མིང་གིས་བཏགས་པ་ལས་ཁྱིམ་པའི་རྫས་སམ་སྣམ་བུ་དཀར་པོའམ། རས་ཁ་ཚར་མ་བཅད་པ་ཅི་འདྲ་བ་ཡང་རུང་སྟེ་སྔགས་འཆགས་སོ། །བྱིན་ཅིག །མི་འབྲལ་བར་གནང་བ་ནི་སྦྱར་མ་ལྕི་བ་ནད་པ་དང་རྒན་པོ་དག་ལའོ། །དགེ་སློང་ནད་པ་དང་རྒན་པོ་ཆོས་གོས་དང་འབྲལ་བ་དགེ་འདུན་ལ་གསོལ་ཞིང་འོང་ན་དགེ་འདུན་གྱིས་སྔར་སྤྱད་བྲིམ་སྟེ་སྤྱོད་ལ་ཆོས་གོས་མི་ཐེག་ཡང་དག་ན་ནད་པ་ཡང་རུང་རྒན་པོ་ཡང་རུང་ཆོས་གོས་དང་འབྲལ་བ་མེད་པར་གནང་བ་བྱིན་ཅིག །དགེ་འདུན་གྱིས་གནང་བ་མ་བྱིན་ན་ཉེས་བྱས་སུ་འགྱུར་རོ། །བསྔོས་པ་ལས་གནང་བ་མ་ཐོབ་ན་བྱེད་དོ། །འབྲལ་བའི་སྤང་བར་འགྱུར་བ་ནི་ཡན་ལག་འདི་རྣམས་དང་ལྡན་ན་འགྱུར་ཏེ། བདག་གི་ཆོས་གོས་སུ་བསྔོ་བའི་སྔགས་ཀྱིས་ཀྱང་ཐེབས་པ་དང་ནད་པ་དང་རྒན་པོ་ལ་ཆོས་གོས་དང་འབྲལ་བ་མེད་པར་དགེ་འདུན་གྱིས་ཀྱང་གནང་བ་མེད་པ་དང༌། གདིང་བ་བྲུབས་པའི་ཟླ་བ་དང་ལྡན་པ་འབྲལ་བར་གནང་བའི་ཡང་གནང་བ་ནང་དུ་གཏོགས་སོ། །ཕྱིར་དང་བཅས་པའི་གནས་ལས་གཞན་དུ་གནས་ན་སྐྱ་རེངས་བྱུང་ནའོ། །བདག་འདུག་པའི་གནས་ཀྱི་མཚམས་ཀྱི་ཕྱི་རོལ་དུ་འང་བྲལ་བ་དང་མཚམས་ཀྱི་ཕྱི་རོལ་དུ་བྲལ་ནས་སྐྱ་རེངས་ཡང་བྱུང་བ་དང་ཡན་ལག་འདི་བཞི་དང་ལྡན་ན་ཆོས་གོས་དང་བྲལ་བའི་སྤང་བའི་ལྟུང་བར་འགྱུར་རོ། །བདག་གནས་པའི་མཚམས་ནི་འོག་ནས་འཆད་པ་རྣམས་ཡིན་ནོ། །མཚམས་བྱས་པ་ནི་གནས་ཀྱི་མཐའ་
མཚམས་ནི་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་མཚམས་བཅད་པ་དང་ར་བས་བསྐོར་བ་དང་འོབས་དང་ཡུར་བས་བསྐོར་བ་ལ་སོགས་པ་ནི་མཚམས་སུ་གཏོགས་ཏེ། མཚམས་ཀྱི་ཚད་ཅི་ཙམ་གྱིས་ན་ནང་དང་ཕྱི་རོལ་དུ་འགྱུར་བ་ནི་འོག་ནས་འཆད། བདག་པོ་གཅིག་ན་ནང་གི་མཚམས་ནི་ཐ་དད་པ་མ་ཡིན་ནོ། །ཁང་པ་ཁྱེར་ཀྱང་གཅིག་བདག་པོ་ཡང་གཅིག་ན་ཁང་པ་མིག་གཅིག་གི་ནང་དུ་བདག་འདུག་གམ་ཆོས་གོས་གཞག་པ་ཁང་པ་མིག་གཅིག་གི་ནང་དུ་ཁྱིམ་པ་དང་ཆོས་གོས་སམ་བདག་འདུག་ཀྱང་འབྲལ་བར་མི་འགྱུར། ནོར་དང་ལྟ་བ་མ་བྱེ་བ་དག་ཀྱང་ངོ༌། །བདག་པོ་གཅིག་ཅེས་བྱ་བ་ནི་མི་སྤུན་དུ་ཡོད་ཀྱང་ནོར་ཡང་མ་བགོས་ཞིང་རྨོ་བ་དང་ཕྱུགས་འཚོ་བ་ལ་སོགས་པའི་ལས་ཀྱང་མཐུན། སངས་རྒྱས་ཀྱི་ཆོས་སམ་དེར་ཏིག་གི་ཆོས་གང་ཡང་རུང་ལྟ་བ་ཡང་མཐུན་པ་ནི་ཁང་པ་བྱིན་གཅིག་གི་མིག་གཅིག་གི་ནང་དུ་སྤུན་གཅིག་དང་བདག་ཉལ་ལ། མིག་གཅིག་གི་ནང་དུ་ཆོས་གོས་དང་སྤུན་གཅིག་གབ་ཀྱང་རུང་གཅིག་དང་འདུག་ན་མི་འབྲལ། ནོར་རམ་ལྟ་བ་གཅིག་བྱེ་ལ་གཅིག་མ་བྱེ་ན་འབྲལ་བར་འགྱུར་རོ། །ཡལ་ག་དང་ཉེ་བའི་ཡལ་ག་མ་འདྲེས་ན་གནས་ཐ་དད་དོ། །ཤིང་དྲུང་གཅིག་ལ་ཡལ་ག་གཅིག་གི་འོག་གི་ཐད་ཀའི་ས་ལ་བདག་ཉལ་ལ་ཡལ་ག་གཅིག་གི་འོག་གིས་ལ་ཆོས་གོས་གཞག་སྟེ་བར་འདོམ་གང་ལས་རིང་བ་ཕན་ནི་འབྲལ་བར་འགྱུར། འདོམ་གང་ཚུན་ཆད་ནི་མི་འགྱུར་ཏེ་ཤིང་གི་ཡལ་ག་དང་ལོ་མ་མ་འདྲེས་པ་ལ་བྱའོ། །ཤིང་གི་ལོ་མ་དང་ཡལ་ག་མ་འདྲེས་པ་ལ་ཡལ་ག་གཅིག་གི་སྟེང་དུ་ཆོས་གོས་བཞག་ལ་ཡལ་ག་གཅིག་གི་སྟེང་དུ་བདག་ཉལ་ཏེ་བར་ནམ་མཁའ་འདོམ་གང་ཕན་ཆད་ནི་འབྲལ་བར་འགྱུར་རོ་ཞེས་བྱི་ཤུ་ཏས་བཤད། དྲུང་ན་སྤྱིའིའོ། །ཤིང་དྲུང་གཅིག་གི་ཡལ་ག་དང་མདོར་ཆོས་གོས་བཞག་ལ་ཤིང་གི་རྩ་བ་ལ་བདག་གི་ལུས་ཀྱིས་རེག་པར་ཉལ་ན་སྤང་བའི་ལྟུང་བར་མི་འགྱུར་རོ། །རྩ་བའི་རྩ་བ་ལ་སོགས་པ་ཡང་ངོ༌། །ཤིང་དྲུང་གཅིག་གི་ཡལ་གའི་ཡང་ཡལ་ག་ལ་ཆོས་གོས་བཀལ་ལ་ཤིང་གི་དྲུང་དུ་བདག་གི་ལུས་རེག་པར་ཉལ་ནའང་འབྲལ་བར་མི་འགྱུར་རོ་ཞེས་བྱི་ཙ་ཡ་བར་མས་བཤད།
ཤིང་གི་རྩ་བའི་ཡན་ལག་སོ་སོའི་སྟེང་དུ་སྣང་བ་ལ་རྩ་བའི་སྟེང་དུ་ཆོས་གོས་སམ་བདག་ཉལ་ལ་ཤིང་ཀར་གཅིག་འདུག་ན་འབྲལ་བར་མི་འགྱུར་ཞེས་བྱི་ཤུ་ཏས་བཤད། ཤིང་གི་ཡལ་ག་དང་འདབ་མ་འདྲེས་པ་ནི་གནས་གཅིག་པའོ། །ཤིང་དྲུང་མང་ཞིང་ལོ་མ་ཀུན་འདྲེས་པར་འདབ་ཆགས་སུ་འདུག་པ་ནི་བར་དུ་རྩིག་པའམ་ཆུས་མ་ཆོད་ན་ཤིང་གི་ལོ་མ་མ་འདྲེས་ཤིང་བར་ཆད་གང་ན་ཡོད་པ་ཚུན་ཆད་མཚམས་གཅིག །བླ་གབ་ལྟ་བུ་དེའི་འོག་ཏུ་ཞུགས་པ་ན་ཡང་ངོ༌། །ཤིང་དྲུང་གཅིག་ལ་ཡལ་ག་བར་ཆད་པ་མེད་པར་གཅིག་ལ་གཅིག་འདྲེས་པས་ཁེབས་པར་འདུག་ན་ཡལ་གའི་ཐོག་མའི་མཐའ་ཁ་དྲང་དུ་ལོ་མ་ལས་ཐིགས་པ་ལྟུང་ཚུན་ཆད་ཁོ་ར་ཁོར་ཡུག་ཏུ་མཚམས་གཅིག་ཏུ་བརྩིའོ། །ཤིང་རྟ་དང་གྲུ་ཡང་ངོ༌། །གྲུ་དང་ཤིང་རྟའི་འོག་གི་ངོས་ལ་ཆོས་གོས་བཞག་ལ་འོག་གི་ས་ལ་བདག་ཉལ་ན་མི་འབྲལ། ཤིང་རྟ་དང་གྲུའི་སྟེང་དུ་གུར་རམ། ཁང་པར་ཕུབ་པའི་ནང་ནི་མཚམས་གཅིག་ཏུ་བརྩི། ཐོག་མ་ཕུབ་པ་ནི་མགོར་ཆོས་གོས་བཞག་ལ་འཇུག་ཏུ་བདག་ཉལ་ན་འབྲལ་བར་འགྱུར་རོ། །མཚམས་མེད་པ་ནི་ཡན་ལག་གིས་ཡོག་པའི་མཐའོ། །དགོན་པ་ཞིག་ལ་གནས་ཏེ་ཐང་བུ་ཞིག་ལ་ཉལ་ན་བདག་གི་ལུས་འཕྲེས་པའི་ཡན་ལག་གི་འོག་ཏུ་ཆུད་པ་ནི་མཚམས་གཅིག་ཏུ་བརྩི་སྟེ་མཚམས་ཀྱི་ཚད་གང་ཚུན་ཆད་འབྲལ་བར་མི་འགྱུར་བ་ནི་འོག་ནས་འཆད། ཕྱིར་ལ་འདོམ་གང་འཁོར་བའོ། །མདོ་ལྟག་མ་ལྟར་དགོན་པའི་ཐང་བུ་ལ་ཉལ་བ་ནི་བདག་གི་ལུས་འཕྲེས་པའི་ཡན་ལག་གིས་ཡོག་པའི་མཚམས་ནས་འདོམ་གང་ཁོར་ཁོར་ཡུག་ཚུན་ཆད་མཚམས་གཅིག་ཏུ་བརྩི་སྟེ་འབྲལ་བར་མི་འགྱུར་རོ། །གྲོང་རྩིག་པས་བསྐོར་བ་ནས་ཅི་ཙམ་དེར་འོད་མའི་ཤིང་རྟ་བ་ལང་དྲུག་དང་ལྡན་པས་ཡོག་པའི་ལམ་མམ་བྱ་གག་འབབ་པའི་གནས་སོ། །ཁྱིམ་པའི་གྲོང་ཁྱེར་ཞིག་ན་གནས་ན་ཕྱི་རས་བསྐོར་བའི་མཚམས་ནས་ཤིང་རྟ་སྦྲེལ་བའི་སྲོག་ཤིང་འོད་མས་བྱས་པ་བ་ལང་དྲུག་གིས་དྲངས་པ་ཆུའི་སྲིད་ཀྱི་ཚད་ཁོ་ར་ཁོར་ཡུག་ཚུན་ཆད་དུ་ཆོས་གོས་སམ་བདག་འདུག་ལ་གྲོང་གི་ནང་ནོར་དང་ལྟ་བ་བྱེ་ཡང་རུང་སྟེ་ཁྱིམ་གཅིག་གི་ནང་ན་ཆོས་གོས་དང་བདག་འདུག་ཀྱང་འབྲལ་བར་མི་འགྱུར་རོ། །ཕྱི་རའི་
ར་བའི་ཁ་ནས་བྱ་གག་འཕུར་ཏེ་གང་དུ་བབ་པའི་ཚད་ཚུན་ཆད་ཀྱང་རུང་སྟེ་ཚད་འདི་གཉིས་གང་ཡང་རུང་ངོ༌། །སབ་མས་བསྐོར་ན་ར་ལུག་གི་རྡུལ་ཏམ་རང་བཞིན་གྱིས་འཛེམ་པའི་མི་བཤང་བའི་སའི་ལམ་མོ། །སབ་མས་བསྐོར་བའི་གནས་ཤིག་ན་འཁོད་ནས་བ་མ་ནས་ར་ལུག་འདོང་བའི་རྡུལ་གང་དུ་བབ་པ་ཚུན་ཆད་དམ་མི་ངོ་ཚ་ཤེས་པའི་ཕྱི་རོལ་ཆེ་ཆུང་འདོར་བའི་བཤང་ས་ཆུན་ཆད་གང་ཡང་རུང་མཚམས་སུ་ཆུད་དེ་འབྲལ་བར་མི་འགྱུར་རོ། །འོབས་ཀྱིས་བསྐོར་བ་ནི་སྐས་ཐེམ་པ་བཅུ་གཉིས་པའམ་ཕྱག་དར་བོར་བའི་བོང་རྡོ་སྦོམ་པོའི་ལམ་མོ། །འོབས་ཀྱིས་བསྐོར་བའི་གནས་ཤིག་ན་འཁོད་ན་འོབས་ཀྱི་ནང་དུ་ཆོས་གོས་ལས་ལ་འོབས་ནས་སྐས་ཐེམ་པ་བཅུ་གཉིས་པ་ཅིག་ཐད་ཀར་བསྙལ་ལ་གང་དུ་ཕྱིན་པ་ཚུན་ཆད་དང་འོབས་ཀྱི་ཁ་ནས་ཕྱག་དར་གྱི་བོང་རྡོ་སྦོམ་པོ་བོར་ཏེ་འདྲིལ་བ་གར་འདྲིལ་བ་ཚུན་ཆད་དུ་བདག་ཉལ་ནའང༌། མཚམས་ཀྱི་ནང་དུ་གཏོགས་ཏེ་འབྲལ་བར་མི་འགྱུར་རོ། །གནས་དེའི་ཁྱིམ་པའི་གྲོང་ཁྱེར་ཞིག་ན་གནས་ན་མཚམས་མིང་གིས་སྨོས་པ་འདི་རྣམས་གང་ཡང་རུང་ཚུན་ཆད་འབྲལ་བར་མི་འགྱུར་ཏེ། ཕྲན་ཚེགས་བྱེད་པ་དང༌། ཁྱིམ་པའི་ཕྱག་དར་ཁུང་དང་ནས་འཕྱར་བའི་ཕུབ་མ་གར་ཕྱིན་པ་ཚུན་ཆད་དང་འཆགས་པ་དང༌། ཁྱིམ་པ་ཕོ་མོས་བུ་ཁུར་དུ་ཐོགས་ཏེ་འཆགས་པའི་གར་ཕྱིན་པ་ཚུན་ཆད་དང༌། འདུག་པའི་རྡུལ་བྱུང་བས་ཇི་ཙམ་དུ་ཡོག་པའོ། །ར་བ་འམ་ཁང་པའི་དྲུང་དུ་མི་འདུག་པའི་རྡུལ་བྱུང་བ་གར་འདུག་པ་ཚུན་ཆད་མཚམས་ཀྱི་ནང་དུ་གཏོགས་ཏེ་འབྲལ་བར་མི་འགྱུར་རོ།། མཚམས་མེད་པའི་ལམ་དུ་མི་དག་དང་མི་བྲལ་བར་འགྲོ་ན་འདོམ་ལྔ་བཅུར་གཅིག་མེད་པའོ། །ལམ་དུ་ཞུགས་ཏེ་འགྲོ་བ་ནི་ཆོས་གོས་སྔར་སོང་ངམ་ཕྱི་ན་ལུས་ཏེ་བར་དུ་ཆུ་དང་གྲོག་པོས་མ་ཆོད་དེ། ཐང་བུ་མཉམ་པར་འདུག་ན་བར་དུ་འདོམ་བཞི་བཅུ་རྩ་དགུ་ཚུན་ཆད་ནི་མཚམས་གཅིག་ཏུ་བརྩིས་ཏེ་འབྲལ་བར་མི་འགྱུར་རོ། །མཚམས་གཞན་དུ་མ་ཡིན། ལྟག་ཏུ་མཚམས་སྨོས་སོ་ཅོག་ཐམས་ཅད་བར་དུ་ཆུ་དང་རྩིག་པ་ལ་སོགས་པས་མ་ཆོད་ན་མཚམས་མིང་གིས་སྨོས་པ་མི་བརྩན་ཏེ་ཆུ་དང་རྩིག་པ་བརྩན་པར་བྱའོ། །དབུང་ནས་རྒྱང་གྲགས་ཀྱི་མཐའ་ཕན་ཆད་
ནི་ཐ་དད་དོ། །ཚལ་བུ་ལྟ་བུ་འང་འདབ་ཆགས་སུ་ལོ་མ་དང་ཡལ་ག་འཛིངས་པར་ས་ཁྱོན་ཆེན་པོ་གཅིག་གི་ནང་གནས་ཏེ་བར་དུ་ཆུ་དང་རྩིག་པས་མ་ཆོད་ན་རྒྱང་གྲགས་གཅིག་ཁོ་ར་ཁོར་ཡུག་ཚུན་ཆད་རང་མཚམས་སུ་གཏོགས་ཏེ་འབྲལ་བར་མི་འགྱུར་རོ། །འབྲལ་བའི་སྤང་བ་སྟེ་རྣམ་པར་འབྱེད་པའི་འོ། །འབྲལ་བའི་སྤང་བ་ལྟུང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།དུམ་བུ་དུམ་བུར་ཀྱང་བསྔོས་པ་མེད་པར་མ་སོང་ངོ༌། །བདག་གི་ཆོས་གོས་གསུམ་གང་ཡང་རུང་སྔགས་ཅན་དུ་བསྔོས་པ་ལས་རྙིངས་ཏེ་རལ་ཞིང་དུམ་བུར་གྱུར་ཀྱང་སྔགས་འདབ་པར་མ་སོང་སྟེ། དེ་དང་བྲལ་ནའང་སྤང་བར་འགྱུར། ཆོས་གོས་གཞན་ལ་བསྔོ་ན་ཡང་དབྱུང་དགོས་སོ། །སྤང་བ་མི་སྐྱེ་བ་མ་ཡིན་ནོ། །བདག་གི་ཆོས་གོས་ཤིག་སྤངས་པར་གྱུར་ཏེ་སྤངས་ཟིན་པ་ལས་སླར་འོངས་ཏེ་སྔགས་འདེབས་ཀྱང་རུང་གཞན་གྱིས་ཆོས་གོས་སྤང་བའི་ལྟུང་བར་གྱུར་པ་ཞིག་བདག་གི་ཆོས་གོས་སུ་སྔགས་འདེབས་ཀྱང་རུང་སྔགས་འཆགས་སོ། །དགེ་འདུན་གྱི་ཡང་ངོ༌། །མཚམས་གཅིག་པའི་དགེ་འདུན་གྱི་དཀོར་ལས་བདག་གི་ཆོས་གོས་གསུམ་གང་ཡང་རུང་ཆོས་གོས་ཀྱི་གོར་བརྙས་ན་སྔགས་ཀྱང་འཆགས། དེ་འབྲལ་བར་འགྱུར་རོ། །མདོ་ལྟག་མ་ལྟར་དགེ་འདུན་ལས་བརྙས་པའི་ཆོས་གོས་སྔགས་འཆགས་པས་ན་དེ་དང་འབྲལ་ནའང་སྤང་བའི་ལྟུང་བར་འགྱུར་རོ། །གཞན་གནས་ན་གནས་གཞན་དུ་མི་ཉམས་སོ། །དགེ་འདུན་གྱི་གནས་སུ་མུར་འདུག་གམ་ཁྱིམ་པ་ཞིག་གིས་དགེ་འདུན་ལ་གསོལ་ཏེ་ཁང་པ་བརྙས་ནས་ཁང་བུ་མིག་གཅིག་གི་ནང་དུ་མུར་འདུག་འདུག་གམ་ཁྱིམ་པ་འདུག་ཅིང་ཆོས་གོས་ཀྱང་དེར་ལུས་ཏེ་མིག་གཅིག་གི་ནང་ན་བདག་ཉལ་ཡང་འབྲལ་བར་མི་འགྱུར་རོ། །དེ་བཞིན་དུ་མུར་འདུག་གམ་ཁྱིམ་པའི་གནས་ལས། དགེ་སློང་གིས་བརྙས་ཏེ་མིག་གཅིག་གི་ནང་དུ་ཁྱིམ་པ་དང༌། ཆོས་གོས་འདུག་ལ་མིག་གཅིག་ཏུ་བདག་ཉལ་ཡང་འབྲལ་བར་མི་འགྱུར་རོ། །གཞན་དང་འདིའི་ཆོས་དང་ལྟ་བ་ཡང་མ་ཆུད་པ་མ་ཡིན་ནོ། །སྦྱིན་བདག་གིས་ཁང་བུ་ཁྱེར་ཅིག་བརྩིགས་ཏེ་ཕྱེད་མུར་འདུག་ལ་ཕུལ་ཕྱེད་དགེ་སློང་ངམ་དགེ་འདུན་ལ་ཕུལ་བ་ལྟ་བུ་ལ་
མུར་འདུག་དབང་བར་ཆོས་གོས་ལུས་ལ་དགེ་འདུན་དབང་བར་བདག་འདུག་ནའང་འབྲལ་བར་འགྱུར། སྤྱིའི་ཕྱི་སྒོ་ཡང་མ་ཡིན་པ་མ་ཡིན་ནོ། །ཁྱིམ་པའི་གྲོང་ཁྱེར་གྱི་དབུས་ན་ཆོས་གོས་སམ་བདག་འདུག་ལ་སྤྱིའི་ཕྱི་སྒོར་ཆོས་གོས་སམ། བདག་གཅིག་འདུག་ན་འབྲལ་བར་མི་འགྱུར། ནོར་ཞེས་པ་ནི་ཕ་དང༌། ནོར་དང་ལྟ་བ་བྱེ་ན་མི་སྤང་གཉིས་ཤིག་ཁང་པ་ཁྱེར་ཅིག་ཀྱང་བུ་འདུག་པའི་ཁང་བུར་ཆོས་གོས་ལུས་ལ་བདག་པའི་ཁང་བུར་འདུག་ན་སྤང་བར་འགྱུར། བུའི་ཡང་མ་ཡིན་ནོ། །ནོར་ཡང་གཅིག་ལྟ་བ་ཡང་མ་བྱེད་ན་ཡང་སྤུན་ནམ་ཕུ་ནུར་མི་འོང་ཡང་འབྲལ་བར་མི་འགྱུར་རོ། །སྤང་བ་ཡང་དེར་རོ། །དགེ་བསྙེན་དགེ་འདུན་ལ་ཁ་ངན་ཟེར་བ་ལས་ཁ་ཟས་མི་བསླང་བ་ཆད་པས་བཅད་པའི་སྤད་སྤུན་གཞན་ལ་བསླངས་ཀྱང་ཉེས་མེད་དོ། །སྨྱེ་གནས་ཀྱང་ངོ༌། །སྨྱེ་གནས་སུ་འདུག་པ་དང་གབ་པ་གཉིས་ཀྱང་སྤད་སྤུན་ནོར་དང་ལྟ་བ་བྱེ་བ་ཞིག་ཅིག་ཅར་དུ་སྤུན་དུ་མ་སྨྱེ་བ་བྱེད་པ་ཞིག་ལ་བལྟས་ཀྱང་ལྟུང་བ་གཅིག་ནོར་དང་ལྟ་བ་བྱེད་དུ་སྤྱོད་པ་བཞིན་དུ་ལྟུང་བ་རེ་རེ་གྲོང་གི་ར་བ་ནི་གཙུག་ལག་ཁང་གིར་མི་འགྱུར་རོ། །གཙུག་ལག་ཁང་གི་ར་བའི་མཚམས་གཅད་པ་ནི་ཁྱིམ་མའི་ས་ལ་ཁ་བརྔམ་དུ་གཅོད་དུ་མི་གནང་སྟེ་བར་ཆེ་ན་ཡང་མཚམས་སྔར་སྨོས་པ་ལས་མི་གཅད། བར་དོག་ན་ཁྱིམ་པ་དང་ཕར་ཕྱེད་ཚུར་ཕྱེད་དུ་གཅད་པར་མེད་དེ་ར་པའི་རྩིག་སྒལ་གཅིག་གིས་ཆོད་ན་རྩིག་སྒལ་གྱིས་གཅོད་མཚམས་དེ་ལས་འདས་པར་ཆོས་གོས་དང་བྲལ་ན་སྤང་བའི་ལྟུང་བར་འགྱུར། འབྲལ་བའི་སྤང་བའི་སྟེ་དྲིས་པའིའོ། །འབྲལ་བའི་སྤང་བའི་ལྟུང་བ་སྟེ་འདུལ་བ་དྲིས་པའི་ནང་ནས་འབྱུང་བའི་མདོ། །འབྲལ་བའི་སྤང་བའོ། །འབྲལ་བའི་སྤང་བ་འདུལ་བ་སོ་སོའི་ནང་ནས་འབྱུང་བའི་མདོ།། །།འཇོག་པའི་སྤང་བའི་ལྟུང་བ་ལ་འཆད་དེ། མ་ལངས་པ་ཡང་ལངས་པ་བཞིན་ཏེ་ལངས་སུ་རེ་བ་ཡོད་ན་སྟེ། ཁྲུ་གང་འཁོར་བའོ། །དགེ་སློང་ལ་ཆོས་གོས་གསུམ་གང་ཡང་རུང་བ་ཅིག་མེད་ལ་ཆོས་གོས་ཀྱི་རྒྱུ་ཞིག་རྙེད་ན་དྲུབས་ཏེ་བསྔོས་ལ་ཆོང་ཤིག །ཆོས་གོས་སུ་མ་ལངས་ལ་གཞན་ལས་ཀྱང་ཆོས་གོས་ཀྱི་རྒྱུ་འམ་བསྣན་པ་ཞིག་འོང་བ་ཡོད་པ་ན་སྔགས་
ཀྱིས་མ་ཐེབས་པར་ཟླ་བ་གཅིག་ཚུན་ཆད་དུ་བཅངས་ཀྱང་ཉེས་མེད། །གུད་ནས་བསྣན་པ་འོང་བ་མེད་ན་ནམ་རྙེད་རྙེད་དུ་ཁ་སོགས་སུ་མི་དབང་སྟེ་སྔགས་ཀྱིས་མ་ཐེབས་ཏེ་ཞག་བཅུ་འདས་ན་སྤང་བའི་ལྟུང་བར་འགྱུར། བསྔོས་པ་ཡོད་ནའོ། །ཆོས་གོས་གསུམ་ཚད་བཞིན་དུ་ཆོས་གོས་སུ་མི་ལངས་པའི་གོས་ཤིག་རྙེད་ན་མདོ་ལྟག་མ་ལྟར་ཁ་སོགས་སུ་མི་དབང་སྟེ་སྤང་བའི་ལྟུང་བར་འགྱུར་གྱི་ཞག་བཅུ་མ་འདས་པར་སྔགས་ཀྱིས་གདབ། གཞན་དུ་ན་དེ་ཞག་སུམ་ཅུ་འདས་ནའོ། །ཆོས་གོས་གསུམ་གང་ཀྱང་རུང་མ་ཚང་ལ་གོས་རྙེད་པས་མ་ལངས་ཏེ་རེ་བ་ཡོད་པའི་ཕྱིར་ཁ་སོགས་པ་ཡང་ཟླ་བ་གཅིག་འདས་ཀྱི་བར་དུ་གུད་ནས་འོང་ཞིང་རྙེད་དུ་རེ་བ་ཡང་མ་ཐོབ་ལ་ཁ་སོགས་བདག་ལ་ཡོད་པ་ཡང་སྔགས་ཀྱིས་མ་ཐེབས་ན་སྤང་བའི་ལྟུང་བར་འགྱུར། ཁ་དོག་ལ་སོགས་པ་མི་འདྲ་བ་ནི་མ་ལངས་པའོ། །གོས་སྣོན་པ་གུད་ནས་འོང་བའི་རེ་བ་ཡོད་པ་དེ་བདག་ལ་ཁ་མ་ལངས་པ་འཆང་བ་དང་ཁ་དོག་མི་མཐུན་པ་དང༌། རིགས་ཐ་དད་པ་ཞིག་སྟེ་བདག་གི་ཁ་མ་ལངས་པ་རས་ཡིན་ལ་གུད་ནས་འོང་བ་སྣམ་བུ་ཡིན་བ་དང་བདག་གི་ཁ་མ་ལངས་པ་སྔོན་པོ་ཡིན་ལ་གུད་ནས་འོང་བ་སེར་པོ་ཡིན་པ་ལྟ་བུ་ནི་ཁ་སོགས་སུ་མི་དབང་སྟེ་ཞག་བཅུ་འདས་ཏེ་སྔགས་ཀྱིས་མ་ཐེབས་ན་སྤང་བའི་ལྟུང་བར་འགྱུར་རོ། །དཀར་པོ་ནི་ཁ་དོག་ཐམས་ཅད་དུའོ། །བདག་ལ་གོས་ཁ་མ་ལངས་པ་འཆང་བ་དེ་དང་རྙེད་དུ་རེ་བ་ནི་རིགས་གཅིག་སྟེ་བདག་ལ་ཡོད་པ་ཡང་རས་ཡིན། གུད་ནས་འོང་བ་ཡང་རས་ཡིན་པ་གཅིག་ཁ་དོག་དཀར་པོ་ཡིན་ན་གཅིག་ཁ་དོག་ཅི་འདྲ་བ་ཡང་ཟླ་བ་གཅིག་གི་བར་དུ་སོགས་སུ་རུང་སྟེ་སྤང་བར་འགྱུར་རོ། །དེ་ཞག་བཅུ་ལ་སོགས་པར་འབྲལ་བར་འབྱོར་ནའོ། །ཆོས་གོས་ཀྱི་རྒྱུ་མ་ལངས་པ་སྣོན་པ་རྙེད་དུ་རེ་བ་ཡོད་ན་ཁ་སོགས་སུ་ཟླ་བ་གཅིག་ཏུ་གཞག་ཏུ་གནང་བ་ལས་རྙེད་དུ་རེ་བ་དེ་ཞག་བཅུ་ཚུན་ཆད་དུ་འོངས་ན་སྔ་མ་རྙེད་པ་ནས་ཞག་བཅུ་ཚུན་ཆད་དུ་སྔགས་ཐོབས་ཤིག །ཞག་བཅུ་འདས་ཏེ་མ་ཐེབས་ན་སྤང་བའོ། །དེ་བཞིན་དུ་ཞག་ཉི་ཤུ་ཚུན་ཆད་དུ་རྙེད་དུ་རེ་པ་འོངས་ཏེ་སྔགས་ཀྱིས་མ་ཐེབས་པར་ཞག་ཉི་ཤུ་འདས་ནའང་སྤང་བར་འགྱུར་ཞག་སུམ་ཅུ་ཚུན་ཆད་དུ་རྙེད་དུ་རེ་པ་འོངས་ལ་སྔགས་ཀྱིས་མ་ཐེབས་པར་ཞག་སུམ་
ཅུ་འདས་ན་སྤང་བའི་ལྟུང་བར་འགྱུར་རོ། །སྦྱར་མ་དེངས་པའི་མཐའ་ནི་ཉིས་རིམ་དུའོ། །ཆོས་གོས་ཆེན་པོ་སར་པར་བྱེད་ན་ཉིས་རིམ་དུ་སྦྱར་དུ་གནང་ངོ༌། །གདིང་བ་ཡང་ངོ༌། །གདིང་བ་སར་པ་བྱེད་ན་ཡང་ཉིས་རིམ་དུ་སྦྱར་དུ་གནང་ངོ༌། །སྟེང་ནས་དག་བ་པ་དང་འོག་ཏུ་གནས་པ་ནི་གཅིག་རིམ་མོ། །ཆོས་གོས་སྣམ་བུ་བདུན་པ་དང་ལྔ་པ་གཉིས་ནི་སར་པ་བྱེད་ནི་གཅིག་རིམ་ལས་མི་གནང་ངོ༌། །དུས་སུ་དེངས་ན་ཉིས་རིམ་དུའོ། །ཆོས་གོས་ཆེན་པོ་དང་གདིང་བ་རྙིངས་པ་ནི་བཞི་རིམ་དུ་སྦྱར་དུ་གནང་ངོ༌། །ཚལ་བུ་ལྔ་པ་དང་བདུན་པ་གཉིས་ནི་རྙིངས་ན་ཉིས་རིམ་དུ་སྦྱར་དུ་གནང་ངོ༌། །རྙིངས་པའི་ཚད་ནི་དགུན་ནམ་དཔྱིད་ཀྱི་དུས་གཅིག་བསྒོས་པ་ཙམ་གྱིས་རྙིངས་པར་ཆུད་དོ། །ཕྱག་དར་ཁྲོད་ཀྱི་ཆད་པ་མེད་དོ། །ཚེམ་བུ་པ་ཕྱག་དར་ཁྲོད་ནས་བསྡུས་ཤིང་གློན་པ་ནི་རིམ་པའི་གྲངས་ཆད་པ་མེད་དེ་དུས་བློན་དུའང་དབང་ངོ༌། །དེངས་པ་དང་སྲབ་པ་ནི་ལྷག་མར་སྦྱིན་པ་དགོས་པ་ཙམ་དུའོ། །ཆོས་གོས་ཟད་ཅིང་དེངས་ཏེ་བུག་གམ་རྡོལ་ཏམ་རལ་བ་ནི་ཇི་ཙམ་རྡོལ་ཅིང་རལ་བའི་ལྷན་པ་ཅི་དགོས་པ་ཙམ་རན་པར་གླན་ནོ། །མི་དགོས་པར་ལྷག་པར་ཆེར་མི་གླན། ལྷག་པར་མི་སྦྱིན། ཆོས་གོས་གསུམ་དང་གདིང་བ་དང་བཞི་གསར་དུ་བྱེད་པ་དང་རྙིངས་པ་སྦྱོར་དུ་གནང་བར་ལྷག་ཏུ་གྲངས་བཅད་པ་ལས་ལྷག་པར་མི་གླན། ལྷག་པར་གློན་པའི་ཚེ་ཉེས་བྱས། སྤང་བར་ཡང་བྱེད་དོ། །མདོ་ལྟག་མ་ལྟར་གྲངས་བཅད་པ་ལས་ལྷག་པར་སྦྱོར་དུ་མི་གནང་བ་ལས་སྦྱར་ཏེ་ཞག་བཅུ་འདས་ན་སྤང་བའི་ལྟུང་བར་འགྱུར། སྔགས་ཀྱང་མི་འཆགས། འོས་པ་ལས་མི་དབྲལ། ཆོས་གོས་དང་གདིང་བ་གསར་དུ་བྱེད་པ་དང་རྙིངས་པ་སྦྱོར་དུ་གནང་བར་གྲངས་བཅད་པ་བཞིན་དུ་སྦྱར་བ་ལས་ཕྱིས་སོ་སོར་བྲལ་ན་ཉེས་བྱས་སོ། །དེ་བཞིན་དུ་ལས་བྱས་ནས་སྦྱར་སྙམ་དུ་སེམས་མ་བསྐྱེད་པས་སོ། །ཆོས་གོས་དང་གདིང་བ་སྦྱོར་དུ་གནང་བ་གྲངས་བཅད་བ་བཞིན་དུ་སྦྱར་བ་དེ་བཙོ་བ་དང་བཀྲུ་བ་ལ་སོགས་པའི་ལམ་བྱ་བའི་ཕྱིར་ཕྲལ་ཏེ་ལས་ཟིན་ན་སླར་སྦྱར་རོ་སྙམ་དུ་བསམས་ཏེ་ཕྲལ་བ་ནི་ཉེས་མེད་དོ། །བབ་བབ་ཏུ་ཕྲལ་ནས་སྦྱར་བ་ཚུན་ཆད་བཅུ་འདས་ན་སྤང་བའོ། །མདོ་ལྟག་མ་གཉིས་ལྟར་ཆོས་གོས་དང་གདིང་བ་སྦྱར་དུ་གནང་བ་ལས་
ཕྲལ་བ་ཞག་བཅུ་ཚུན་ཆད་སླར་མ་སྦྱར་ཏམ་ཕྲལ་བ་དེ་སོ་སོར་སྔགས་ཀྱིས་མ་ཐེབས་ན་སྤང་བའི་ལྟུང་བར་ཡང་འགྱུར་རོ། །སྦྱར་མའི་དུམ་བུ་ནི་དགུ་ནས་ཉི་ཤུ་རྩ་ལྔར་ཏེ་ཟུང་མ་གཏོགས་སོ། །ཆོས་གོས་ཆེན་པོ་གསར་དུ་བྱེད་ན་ཚལ་བུ་དགུ་ཡན་ཆད་ཉི་ཤུ་རྩ་ལྔ་མན་ཆད་དུ་བྱེད་དུ་གནང་སྟེ་གྲངས་འཆུགས་པར་མི་བྱ་བར་ཁང་འཁྱེར་དུ་བྱས་ཏེ་ཚལ་བུ་བཅུ་གསུམ་དང་བཅོ་ལྔ་དང་བཅུ་དགུ་དང་ཉི་ཤུ་རྩ་གཅིག་དང༌། ཉི་ཤུ་རྩ་གསུམ་དང་ཉི་ཤུ་རྩ་ལྔ་གྲངས་འདི་རྣམས་གང་དུ་བྱས་ཀྱང་རུང་ངོ༌། །དེ་ཕན་ཆད་ནི་ཚེམ་བུའོ། །ཚལ་བུ་ཉི་ཤུ་ཆ་ལྔ་ནས་མང་བ་ནི་ཚོམ་བུ་ཞེས་བྱ་སྟེ་ཆོས་གོས་ཆེན་པོའི་སྔགས་མི་འཆགས་སོ། །ཚེམ་བུ་པའི་ཆོས་གོས་ཀྱི་སྔགས་ནི་འཆགས་སོ། །གསུམ་པ་དང་པོ་ནི་ལེབ་ལེབ་པོ་ཕྱེད་དང་གསུམ་མོ། །ཆོས་གོས་ཚལ་བུ་དགུ་པ་དང་བཅུ་གཅིག་པ་དང་བཅུ་གསུམ་པ་གསུམ་ནི་ཞེང་དུ་འགྲོ་བའི་ཚལ་བུ་ཀུན་ཚལ་བུ་རིང་པོ་མཉམ་པ་གཉིས། རིང་པོའི་ཕྱེད་ཚད་གཅིག་དང༌། ཕྱེད་དང་གསུམ་དུ་སྤེལ་ཅིང་གཏང་ངོ༌། །གཉིས་པ་ནི་ལེབ་ལེབ་པོ་ཕྱེད་དང་བཞིའོ། །ཆོས་གོས་ཚལ་བུ་བཅོ་ལྔ་པ་དང༌། བཅུ་བདུན། བཅུ་དགུ་པ་གསུམ་ནི་ཞེང་དུ་འགྲོ་བའི་ཚལ་བུ་མཉམ་པ་རིང་པོ་གསུམ། རིང་པོའི་ཕྱེད་ཚད་གཅིག་སྟེ་ཕྱེད་དང་བཞི་མགོ་མཇུག་ཏུ་སྤེལ་ཅིང་གཏང༌། གསུམ་པ་ནི་ལེབ་ལེབ་པོ་ཕྱེད་དང་ལྔའོ། །ཆོས་གོས་ཚལ་བུ་ཉི་ཤུ་གཅིག་པ་དང༌། ཉི་ཤུ་གསུམ་པ་དང་ཉི་ཤུ་ལྔ་པ་གསུམ་ནི་ཞེང་དུ་འགོར་བའི་ཚལ་བུ་རིང་པོ་བཞི་རིང་པོའི་ཕྱེད་ཚད་གཅིག་སྟེ། ཚལ་བུ་ཕྱེད་དང་ལྔ་ཞེང་དུ་འགོར་བའི་མཇུག་ཏུ་བསྣོར་ཅིང་སྤེལ་ཏེ་གཏང༌། བདག་གི་ཁྲུ་གསུམ་དང་ལྔ་ནི་ཐུ་བོར་བསྔོའོ། །ཆོས་གོས་གསུམ་ལ་ཆེར་བྱེད་དུ་གནང་བའི་ཚད་ནི་བདག་ཉིད་ཀྱི་ཁྲུ་ཞེང་དུ་ནི་གསུམ། ཆུར་ནི་ལྔར་བྱེད་དུ་གནང་ངོ༌། །ཆུད་དུ་ནི་ཁྲུ་ཕྱེད་ཕྱེད་མ་གཏོགས་སོ། །ཆོས་གོས་གསུམ་ཆུང་དུབ་བྱེད་ན་གནང་བའི་ཚད་ནི་བདག་ཉིད་ཀྱི་ཁྲུ་ཞེང་དུ་ཕྱེད་དང་གསུམ། ཆུར་ཕྱེད་དང་ལྔ་བྱེད་དུ་གནང་ངོ༌། །བར་མ་ནི་དབུ་མའི་ཚད་ལའོ། །ཆོས་གོས་གསུམ་འབྲིང་བྱེད་ན་གནང་བའི་ཚད་ནི་བདག་གི་ཁྲུ་ཞེང་དུ་གསུམ་མན་ཆད་ཁྲུ་ཕྱེད་དང་གསུམ་ཡན་ཆད་ཆུར་ཁྲུ་ཕྱེད་
དང་ལྔ་ཡན་ཆད་ཁྲུ་ལྔ་མན་ཆད་གག་ཏུ་ཡང་བྱར་རུང་ངོ༌། །འོག་ཏུ་གནས་པ་ནི་གཉིས་དང་ལྔ་འམ་གཉིས་དང་བཞིའོ། །ཆོས་གོས་སྣམ་བུ་ལྔ་པ་ནི་བོངས་ཏེ་མེད་ན་ཞེང་ཁྲུ་དོ་ལ་ཆུར་ཁྲུ་ལྔ་ཡང་རུང༌། ཞེང་དུ་ཁྲུ་དོ་ལ་ཆུར་ཁྲུ་བཞིར་བྱར་ཡང་རུང་ངོ༌། །འཁོར་གསུམ་ཡོག་པ་ཡང་ངོ༌། །མདོ་ལྟག་མ་ཙམ་དུ་སྦྱར་ཡང་མེད་དེ་ཕོངས་ན་ཆོས་གོས་ཚལ་བུ་ལྔ་པ། འཁོར་གསུམ་ཡོག་ལ་བྱས་ཀྱང་ཉེས་མེད་དེ་སྔགས་ཀྱང་འཆགས་སོ། །ལུས་ཀྱི་བདུན་ཆ་ལས་གཉིས་ནི་ཁྲུའི་དོན་ཏོ། །མིའི་ལུས་དང་ལག་པ་རིང་ཐུང་ཞུགས་ཏེ་ཁྲུས་བཅལ་དུ་མི་མངོན་ན་ལུས་ལ་ཅི་ཡོད་པ་ལས་བདུན་ཆར་བཅལ་ཏེ་བདུན་ཆ་གཉིས་ལ་ཁྲུ་གང་དུ་བརྩི་སྟེ། ཁྲུ་དེ་ཆོས་གོས་ཀྱི་ཞེང་དུ་ནི་གསུམ་ཆུར་ནི་ལྔའི་ཚད་དུ་བཅལ་ལོ། །མི་འདུས་ན་སྤྲད་པ་བྱའོ། །ཆོས་གོས་ལ་བདག་གི་ཁྲུ་ཚད་བཞིན་དུ་བྱས་ཀྱང་མི་ཚོ་ཞིང་སྦོམ་སྟེ། ཆོས་གོས་ཁ་མི་འདུས་ཤིང་མི་སོག་ན་སྣ་གཉིས་སྒྲོ་གུས་གདགས་ཤིང་སྤྲད་པའམ་བཙེམས་ཏེ་སྤྲད་པར་བྱའོ། །ཚད་ལས་ལྷག་པར་མི་བྱའོ། །ཟླ་བའི་སྤང་བ་སྟེ། རྣམ་པར་འབྱེད་པའོ། །འཇོག་པའི་སྤང་བའི་ལྟུང་བ་སྟེ། འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཉེས་བྱས་པ་ནི་འབྲིང་བ་སྟེ་ཆུང་ངོ༌། །ཁྲུ་གང་དུ་མཆོག་པའི་གོས་དང་འཁོར་གསུམ་མ་ཡོག་པ་ཡང་སྔགས་གདབ་དགོས་ཤིང་འཆགས་ཏེ་སྔགས་མ་ཐེབས་པར་ཞག་འདས་ན་སྤང་བའི་ལྟུང་བར་ནི་མི་འགྱུར་གྱི་ཉེས་བྱས་སུ་འགྱུར་རོ། །འཁོར་ཕྱེད་ཀྱང་མི་ཡོག་པ་ནི་རོ་མེད་པའོ། །གོས་ཁ་མ་ལངས་པ་ནི་རྙེད་དུ་རེ་བ་ཡོད་པའི་ཕྱིར་གཞོག་ཏུ་གནང་བ་རྙེད་དུ་རེ་བ་དེ་འཁོར་གསུམ་ཡོག་པའི་ཕྱེད་མན་ཆད་ཙམ་ཞིག་རྙེད་དུ་རེ་བ་ནི་ཁ་སོགས་སུ་གཞག་ཏུ་མི་གནང་སྟེ། ཞག་བཅུ་འདས་ན་སྤང་བར་འགྱུར་རོ། །མ་བརྟགས་པ་ཡང་ངོ༌། །ཁ་སོགས་སུ་གཞོག་པ་དེ་ལ་རྙེད་དུ་རེ་བ་དགེ་སློང་གིས་གོས་སུམ་བརྟགས་པ་རི་དགས་དང་རྔ་མ་ལྟ་བུ་ཞིག་ཡིན་ན་གཞོག་ཏུ་མི་གནང་སྟེ། ཞག་བཅུ་འདས་ན་སྤང་བར་འགྱུར་རོ། །མ་བསྔོས་པ། ཆོས་གོས་ཀྱི་རྒྱུར་མ་བསྔོས་ཤིང་མ་བརྟགས་པ་མིང་གིས་སྨོས་པ་འདི་རྣམས་གག་ཀྱང་རུང་སྔགས་ཀྱིས་མ་བཏབ་ན་ཉེས་བྱས་སུ་
འགྱུར་རོ། །གདོང་ཕྱིས་དང༌། གདོང་ཕྱི་བའི་རས་སམ་སྣམ་བུའི་རས་མ་དང༌། ཚགས་དང༌། ཆུ་ཚགས་དང་ཆུ་ཚགས་ཀྱི་རྒྱུ་དང༌། གདིང་བ་དང༌། འོག་ཏུ་གདིང་བའི་སྟན་དང་གོར་བུ་ཁྲུ་གང་དུ་མེད་པ་དང༌། དྲེའུ་རྡོག་ལ་སོགས་པ་ཡོ་བྱད་ཀྱི་གོས་རྣམས་ཀྱང་ངོ༌། །དྲེའུ་རྡོག་ལ་སོགས་པ་སྔགས་མ་བཏབ་ན་ཞག་བཅུ་འདས་ན་ཉེས་བྱས་སུ་འགྱུར་རོ། །འདི་རྣམས་ལྟ་བུ་ཞིག་རྙེད་དུ་རེ་བ་ཡོད་པའི་ཕྱི་ཕྱིར་ཁ་མ་ལངས་པ་ལ་སོགས་པའི་ཕྱིར་ཟླ་བ་གཅིག་ཏུ་གཞོག་ཏུའང་མི་དབང་ཡན་ལག་འདི་འཆང་བའི་ཡན་ལག་དང་འདྲ་སྟེ་དེའི་སྟེང་དུ་རྙེད་དུ་རེ་བ་ཡོད་པའི་ཕྱིར་ཞག་སུམ་ཅུ་འདས་པས་བསྣན། ཟླ་བའི་སྟེ་དྲིས་པའི་འོ། །འཇོག་པའི་སྤང་བའི་ལྟུང་བ་འདུལ་བ་དྲིས་པ་ཞེས་བྱས་པའི་ནང་ནས་འབྱུང་བའི་མདོ། །ཟླ་བའི་སྟེ་སྤང་བའོ། །འཇོག་པའི་སྤང་བ་ལྟུང་བ་འདུལ་བ་སོ་སོ་ནས་འབྱུང་བའི་མདོ།། །།འཁྲུ་བའི་སྤང་བ་ལ་འཆད་དོ།། སྦྲུམ་མ་གནས་དབེན་བར་རོ། །མཉན་དུ་ཡོད་པ་ན་དགེ་སློང་ཨུ་དའི་ཁུ་བ་སྟོར་བའི་ཤམ་ཐབས་ཆུང་མ་དགེ་སློང་མ་འགུམ་ཏ་ལ་འཁྲུར་བཅུག་ནས་ཤམ་ཐབས་ལ་ཁུ་བ་ཆགས་པ་འགུམ་ཏས་མོ་མཚན་དུ་བཅུག་སྟེ་བུར་ཆགས་ཏེ་བུ་ཀུ་མཱ་ར་ཀཱ་ཤྱ་པ་ཞེས་བྱ་བ་དགྲ་བཅོམ་པ་ཞིག་ཏུ་གྱུར་པ་སྐྱེས་པ་ལས་བཅས་ཏེ་དགེ་སློང་མ་འདི་ལྟ་བུའི་ཚུལ་དུ་བུ་ལྟོར་ཞུགས་པ་དང་སྔོན་ལྟོ་ན་བུ་ཡོད་པ་ལས་བྱག་ཤུར་ཞུགས་ཏེ་སྦྲུམ་མ་ནི་གཞན་གྱིས་འཕྱས་སུ་མི་བྱ་ཞིང་མ་མཐོང་བར་དབེན་པར་གཞག་སྟེ་གསོའོ། །དགེ་སློང་མ་འདི་ལ་ཡལ་བར་མི་བྱ། དགེ་སློང་མ་སྦྲུམ་མ་དབེན་པར་གཞག་པ་ལ་དགེ་སློང་མ་གྲོགས་ཀྱིས་ཡལ་བར་མི་དོར་གྱི་རིམ་གྲོ་དང་ཞལ་ཏ་བྱའོ། །དེ་ལ་ཟས་སྦྱིན། དགེ་སློང་མ་སྦྲུམ་མ་དབེན་པར་གཞག་པ་དེ་ལ་དགེ་སློང་མ་གྲོགས་ཀྱིས་ཟས་དང་གོས་ཀྱང་སྦྱིན་ནོ། །གཉེན་ནི་ཕ་དང་མ་དག་གི་བདུན་རྒྱུད་ཚུན་ཆད་དོ། །གོས་འཁྲུར་བཅུག་པ་ནི་དགེ་སློང་མ་གཉེན་མ་ཡིན་པ་ལ་འཁྲུར་བཅོལ་ན་ལྟུང་སྟེ་གཉེན་ནི་བདུན་མེས་དང་ཕྱི་ཚུན་ཆད་ཀྱི་རྒྱུད་འཕེལ་བ་ཀུན་གཉེན་དུ་ཆུད་དོ། །དེ་ཕན་ཆད་ནི་གཉེན་མ་ཡིན་པའོ། །འདུ་ཤེས་ནི་གཙོ་བོར་བྱེད་དོ། །སྤང་བའི་ལྟུང་བར་བྱེད་པ་ནི་འདུ་ཤེས་ལས་གྱུར་ཏེ་གཙོ་བོར་ཞེས་བྱ་
བའོ། །དེ་ནི་འབྲིད་དོ། །དགེ་སློང་མ་གཉེན་མ་ཡིན་པར་ཤེས་བཞིན་དུ་བཀྲུས་པ་ལས་ལྟུང་སྟེ། དགེ་སློང་མ་ལ་མི་གཉེན་པར་ན་ཡང་ངོ༌། །དགེ་སློང་མ་གཉེན་མ་ཡིན་པ་ལ་བཅོལ་ན་ལྟུང་སྟེ་ཡན་ལག་གཅིག །དེ་མ་ཐེག་ཡང་ངོ༌། །དེ་སློང་མ་ལས་གོས་ལེན་པ་ཡང་གཉེན་མ་ཡིན་པ་ལས་ལྟུང་བར་བྱེད་པར་འགྱུར་རོ། །བདག་གི་ཆོས་གོས་བསྔོས་པ་རྙིང་པ་བཀྲུ་བའི་རིགས་པའམ། གདིང་བ་དག་ལ་ལ་ལ་བཀྲུ་བ་དང་བཙོ་བ་དང་འཆག་པར་གསོལ་བའོ། །བདག་གི་ཆོས་གོས་གསུམ་པ་དང་གདིང་བ་ཡང་ཡིན་པ་དང༌། བཞི་ག་ཡང་རུང་བ་དང་རྙིང་པ་ཡང་ཡིན་པ་དང་འཁྲུར་ཡང་བཅུག་པ་དང་བདག་གི་ཡང་ཡིན་པ་དང་བསྔོས་པ་ཡང་ཡིན་པ་ཤེས་ཀྱང་བཞིན་པ་དང་བྱས་ནས་ཀྱང་ཟིན་པ་དང་ཡན་ལག་འདི་བཅུ་དང་ལྡན་ན་སྤང་བའི་ལྟུང་བར་འགྱུར་རོ། །ཡན་ལག་འདི་རྣམས་དང་ལྡན་པར་འཁྲུར་བཅུག་ཀྱང་རུང་འཆག་ཏུ་བཅུག་ཀྱང་རུང་འཚེད་དུ་བཅུག་ཀྱང་རུང་ལྟུང་བར་འགྱུར་ཕྱོགས་བྱས་ཀྱང་ལས་བྱས་པའོ། །གོས་རྙིང་པ་འཁྲུ་བ་དང་འཆག་པ་དང་འཚེད་དུ་བཅོལ་ཏེ་ཕ་རོལ་གྱིས་ཇི་ཙམ་ལས་བྱས་ན་ལྟུང་བར་འགྱུར་ཞེ་ན། གོས་ཀྱི་མཐའ་མ་ཅུང་ཟད་ཙམ་བཙོས་སམ་བཅག་པ་ཡར་རིལ་གྱིས་བྱས་པ་དང་འདྲ་སྟེ་སྤང་བར་འགྱུར་རོ། །བྱས་ན་དེར་བྱེད་དོ། །འཁྲུ་བའི་སྤང་བར་གྱུར་པ་ནི་བཙོ་བ་དང་འཁྲུ་བ་དང་འཆག་པ་གསུམ་ལས་བྱ་སྟེ་ཟིན་ན་སྤང་བར་འགྱུར་རོ། །འབྲས་བུའི་མཐར་གཅིག་གོ །བདག་གིས་གོས་རྙིང་པ་བཙོར་བཅོལ་བ་ལས་དགེ་སློང་མས་བཙོ་བའི་ཕྱིར་བཀྲུས་པ་དང་བཙོས་ཟིན་ནས་བཅག་སྟེ་བྱིན་ན་བཙོས་པ་དང་བཀྲུས་པ་དང་བཅག་པ་གསུམ་ལ་ཉེས་པའི་དམིགས་སོ་སོར་མི་འགྱུར་གྱི་སྤྱིར་ལྟུང་བ་གཅིག་གོ །ཚིག་རྣམས་ཀྱིས་འབྲས་བུ་གཅིག་གོ །གོས་རྙིང་པ་འཁྲུར་བཅོལ་བའི་ཚེ་འདི་ཁྲུས་ཤིག་བཙོས་ཟིན་ནས་ཚོགས་ཤིག་ཅེས་ཚིག་གི་རིམ་པ་སོ་སོར་བྱས་ཏེ་སྨྲས་ལ། ལས་ཀྱང་དེ་བཞིན་དུ་ཟིན་པར་བྱས་ན་ཡང་སྤང་བའི་ལྟུང་བ་གཅིག་ཏུ་ཟད་དེ་ཉེས་པའི་དམིགས་སོ་སོར་མི་འོང་ངོ༌། །འདུ་ཤེས་གཅེས་པས་ཇི་ལྟ་བུའི་དོན་ལ་རྩ་བའོ། །འདུ་ཤེས་ཀྱིས་གཉེན་ཀྱང་མ་ཡིན་ལ། དགེ་སློང་མ་ཁྲིམས་ཉམས་པ་ཡང་མ་ཡིན་
པར་ཤེས་བཞིན་དུ་འཁྲུར་བཅོལ་ན་སྤང་བའི་ལྟུང་བའོ། །གཉེན་མ་ཡིན་པ་ལ་ཡིན་པར་བསམས་ཏེ་འཁྲུར་བཅོལ་བ་ཡང་ལྟུང་བའོ། །རྩ་བར་ཉེ་བ་ནི་ཅི་ལྟ་བུའི་དོན་མ་ཡིན་ནོ། །གཉེན་ཡིན་པ་ལ་མ་ཡིན་པར་བསམས་ཏེ་བཅོལ་བ་ནི་ཉེས་བྱས་ཏེ་ལྟུང་བར་མི་འགྱུར། འདུ་ཤེས་བཞིན་དུ་ཐེ་ཚོམ་མོ། །གཉེན་མ་ཡིན་པ་ལ་ཡིན་ནམ་མ་ཡིན་གཏོལ་མེད་དེ་འཁྲུར་བཅུག་པ་ནི་ལྟུང་བའོ། །གཉེན་ཡིན་པ་ལ་ཡིན་ནམ་མ་ཡིན་གཏོལ་མེད་དེ་འཁྲུར་བཅུག་པ་ནི་ཉེས་བྱས་སོ། །དགེ་འདུན་གྱི་འོག་ཁྲིམས་ཀྱི་རྗེས་སུ་བསྲུང༌། དགེ་འདུན་གྱི་འོག་ཁྲིམས་ཀྱི་ཡ་ཀ་ར་ཞིག་བཅད་ན་དེ་བཞིན་དུ་དགེ་སློང་ཀུན་གྱིས་བསྲུང་ངོ༌། །མ་བསྲུངས་ན་ཉེས་བྱས། འདི་མན་ཆད་སྐབས་མ་ཡིན་པར་གློ་ཏོར་དུ་འཆད་པ་ནི་ལྟག་ཏུ་ཤེས་བཞིན་བཤད་པའི་ཟླ་བ་འདི་ཡང་ཤེས་བཞིན་དུ་བྱ་བ་ཡིན་ཏེ། གསེབ་ཚགས་སུ་ཁ་བདེར་བཤད་དོ། །དེ་ལ་འོངས་པས་ཀྱང་ངོ༌། །སྔ་ན་དགེ་འདུན་གྱིས་ཀྲི་ཡ་ཀ་ར་བཅས་ཤིང་འདུག་པ་ལ་དགེ་སློང་གུད་ནས་ཕྱིས་འོངས་པས་ཀྱང་སྔ་མས་བཅས་པ་བཞིན་དུ་བསྲུང་ངོ༌། །ཡོད་དམ་མེད་པ་ཤེས་པའི་ཕྱིར་དེས་དེ་དྲིས་ཤིག །མདོ་ལྟག་མ་ལྟར་གུད་ནས་འོངས་པའི་དགེ་སློང་གིས་བསྲང་དགོས་པའི་ཕྱིར་གནས་གག་ཏུ་འོངས་ཀྱང་རུང་ཀྲི་ཡ་ཀ་ར་ཅི་ཡོད་ཅེས་དྲི། བདག་གུད་དུ་སོང་སྟེ་གཞན་གྱི་གནས་སུ་ཞག་ལོན་ན་དགེ་འདུན་ཕྱི་མས་གསལ་དུ་ཀྲི་ཡ་ཀ་ར་བཅས་ཀྱང་སྲིད་པའི་ཕྱིར་བདག་གིས་གཙུག་ལག་ཁང་དུ་སླར་འོངས་ནས་ཀྲི་ཡ་ཀ་ར་ཅི་ཡོད་ཅེས་དྲི། རིང་པོ་མ་ཐོགས་པར་རོ། །གཙུག་ལག་ཁང་དུ་འོངས་ཏེ་ཀྲི་ཡ་ཀ་ར་ཅི་ཡོད་ཅེས་དྲི་བ་ནི་འོངས་མ་ཐག་ཏུ་དྲིའོ། །ལེ་ལོ་བྱས་ཏེ་ཕྱིས་དྲི་བར་བསམས་ཏེ་དྲི་བར་མི་བྱའོ། །སངས་རྒྱས་ཀྱིས་གསུངས་པ་ནི་དགེ་འདུན་གྱི་ལས་མི་འགལ་ལོ། །དགེ་འདུན་གྱིས་འོག་ཁྲིམས་བཅས་པ་ལས་སངས་རྒྱས་ཀྱིས་དགེ་སློང་འགའ་ཞིག་ལ་གནང་བ་ནི་ཉེས་མེད་དེ་མཉན་དུ་ཡོད་བ་ན་དབྱར་ཚུལ་དུ་ཞུགས་ཏེ་སངས་རྒྱས་ཀྱི་གན་དུ་ཨཱ་ནན་ད་གསོ་སྦྱིན་ཞུ་བའི་དགེ་སློང་གཅིག་ཅིག་ལས་འགྲོར་མི་གནང་བར་འོག་ཁྲིམས་བཅས་པ་ལས་དགེ་སློང་དགོན་པ་པ་ཨུ་པ་སེ་ན་ཞེས་བྱ་བ་དགེ་འདུན་གྱི་འོག་ཁྲིམས་བཅས་པར་མི་ཤེས་ཏེ་སངས་རྒྱས་ཀྱི་གན་དུ་ཕྱག་འཚལ་དུ་
འོངས་པ་དང་སངས་རྒྱས་ཀྱིས་ཁྱོད་འོག་ཁྲིམས་མ་དྲལ་ཏམ་ཞེས་སྨྲས་ནས་འོག་ཁྲིམས་བཅས་པ་མ་ཐོས་ཏེ་ཐུགས་རྗེ་ཅིར་གཟིགས་ཞེས་གསོལ་ནས་ཉེས་མེད་པར་གནང་བ་ལས་བཅས། ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལྷག་མ་གཏོང་བ་ན་དགེ་འདུན་གྱིར་གཞག་པའི་ཕྱིར་ལོང་ཤིག །དགེ་འདུན་གྱི་སྤྱིར་དགེ་སློང་དག་གིས་ལྷུང་བཟེད་དང་ཆོས་གོས་དང་དྲ་བ་དང་ཕོར་བུ་དང་སྐ་རགས་ལ་སོགས་པ་བདག་ཅག་ལ་ལྷག་སྟེ་མི་དགོས་པའི་ཕྱིར་དགེ་སློང་ཡོ་བྱད་མེད་ཅིང་ཕོངས་པ་ཅི་བདེར་ཁྱེར་ཅིག་ཅེས་ཕུལ་བ་ནི་དགེ་འདུན་གྱིས་ཅི་བདེར་ལེན་དུ་དབང་སྟེ་བླངས་ཀྱང་ཉེས་མེད་དོ། །ཤཱཀྱའི་རིགས་ལྔ་བརྒྱ་ཐར་པར་ཞུགས་པ་གཉེན་ཕྱུག་པོ་ཕལ་མོ་ཆེས་སོ་སོ་ནས་བྱིན་པས་ཡོ་བྱད་མང་ཞིང་ཕྱུག་པར་གྱུར་ཏེ་དེ་ལ་སངས་རྒྱས་ཀྱིས་ཤཱཀྱའི་རིགས་འདི་རྣམས་ཁྱིམ་གཅིག་ཅིག་ནས་བྱུང་སྟེ་ཁྱིམ་གཅིག་ཏུ་ཞུགས་པར་གྱུར་ན་ཡོ་བྱད་དབྲི་བར་ཐབས་མཛད་ནས་ཤཱཀྱའི་དགེ་སློང་གིས་ཡོ་བྱད་ལྷག་པ་ཀུན་དགེ་འདུན་ལ་དབུལ་བར་ཨ་ནན་ཏན་ལ་བྱིན་བ་དང་ཨ་ནན་ཏ་མ་བཏུབ་སྟེ་ཡོ་བྱད་ཀུན་དགེ་འདུན་གྱི་ཁྲོད་དུ་ཕུང་པོར་སྤུངས་ཏེ་བོར་བ་ལ་སངས་རྒྱས་ཀྱིས་གཟིགས་ནས་ཕོངས་པ་ཅི་བདེར་ལོང་ཤིག་ཅེས་བཅས་ཏེ་དེ་ལྟ་བུར་དབུལ་བ་ཞིག་ཡོད་ན་དགེ་འདུན་གྱིས་ཀྱང་ལོང་ཤིག །དེ་ལྟར་བཞག་པ་ལ་ཕོངས་པ་ཅི་བདེར་ལོང་ཤིག །མདོ་ལྟག་མ་ལྟར་དགེ་སློང་དག་གིས་ཡོ་བྱད་ལྷག་པ་ཕོངས་པ་ཅི་བདེར་ཁྱེར་ཅིག་ཅེས་དགེ་འདུན་སྤྱིར་སྤུངས་ཏེ་བཞག་པའི་ཕུང་པོ་ལ་དགེ་སློང་ཡོ་བྱད་མི་བདོག་པ་རྣམས་དགེ་འདུན་ནམ་ཡོན་བདག་ལ་དྲི་ཞིང་གསོལ་མི་དགོས་ཏེ་ཅི་བདེར་བླངས་ཀྱང་ཉེས་མེད་དོ། །བདག་ཅག་ལ་ཡོད་ན་ལྷག་པར་ཉི་རིམ་དུ་ནི་ལེན་དུ་མི་གནང་ངོ༌། །བཀྲུ་བའི་སྤང་བ་སྟེ་རྣམས་པར་འབྱེད་པའི་མདོ། །འཁྲུ་བའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བཤང་གཅི་དང་གཟག་པ་དང་འཇིམ་པ་ལ་སོགས་པས་མ་རུང་བར་གྱུར་པ་ལས་བརྐུས་པའང་མི་དབྲིའོ། །བདག་གི་གོས་རྙིང་པའི་ཕྱི་རོལ་ཆེ་ཆུང་དང་བཀྲུ་བཤལ་གྱི་སྟོར་ཁུང་གི་ཆུ་དང་འཇིམ་པ་ལ་སོགས་པ་ཅིས་རེག་ཀྱང་རུང་གཉེན་མ་
ཡིན་པའི་དགེ་སློང་མ་ལ་བཅོལ་ན་ཡང་སྤང་བར་འགྱུར། ཉེས་བྱས་པ་ནི། མིང་གིས་སྨོས་པ་འདི་རྣམས་གག་ཀྱང་རུང་སྟེ་གཉེན་མ་ཡིན་པའི་དགེ་སློང་མ་ལ་བཅོལ་ན་ཉེས་བྱས། དྲེའུ་རྡོག་དང༌། སྟེན་དྲེའུ་རྡོག་དང་ཕྲུག་སྟན་དང་ན་ནམ་དང་སུག་པར་དད་པར་ཐང་དག་ལ་བྱ། ཁྱིམ་པའི་གོས་དང༌། གོས་ཁ་དོག་མ་བསྒྱུར་བ་དང༌། ཁ་ཚར་མ་བཅད་པ་དང༌། སྤུ་བུ་ཅན་ལ་སོགས་པ་ཁྱིམ་པའི་གོས་ལ་བྱ། སྔས་དང་སྔས་ཁབ་དང་ཁྲེས་ཤིང་བལ་ཅན་ལ་སོགས་པ་ལ་བྱ། བརྟགས་པ་གོས་ལྷག་གི་སྔགས་ཀྱིས་བརྟགས་པ་དང༌། གཞན་སྦྱིན་པར་བརྟགས་པའི་གོས་ལ་བྱ། བཏང་བདག་གི་གོས་སྤངས་པར་གྱུར་ཏེ་སྤངས་ཟིན་པ་དང་གཞན་གྱི་གོས་སྤངས་པར་གྱུར་པ་དང༌། དགེ་འདུན་གྱིའོ། །དགེ་འདུན་གྱི་དཀོར་དང་མིང་གིས་སྨོས་པ་འདི་རྣམས་གག་ཀྱང་རུང་སྟེ་འཁྲུར་བཅུག་ན་ཉེས་བྱས། བཀྲུ་བའི་སྤང་བ་སྟེ་དྲི་བའི་འོ། །བཀྲུ་བའི་སྤང་བའི་ལྟུང་བ་འདུལ་བ་དྲིས་པ་ཞེས་བྱ་བའི་མདོའོ། །བཀྲུ་བའི་སྤངས་པའོ། །བཀྲུ་བའི་སྤངས་བ་འདུལ་བ་སོ་སོ་ནས་འབྱུང་བའི་མདོ།། །།ལེན་པའི་སྤང་བའི་ལྟུང་བ་ལ་འཆད་དེ། དགེ་སློང་མ་ལས་གོས་རིན་པོ་ཆེ་བརྗེ་བའི་ཕྱིར་བླང༌། དགེ་སློང་མ་ལ་ཡོན་བདག་གིས་རིན་པོ་ཆེ་ཆེན་པོ་ཞིག་ཕུལ་ན་དགེ་སློང་ཕ་ལ་གོས་ངན་པ་དང་བརྗེ་བའི་ཕྱིར་དགེ་སློང་མས་གོས་བཟང་པོ་ལོང་ཤིག །དགེ་བསྙེན་རབ་ཏུ་བཟང་པོ་སྦྱིན་པ་ཞེས་བྱ་བས་མཉན་དུ་ཡོད་པར་དགེ་སློང་ཕོ་མོ་སྡེ་གཉིས་ལ་མཆོད་སྟོན་བྱས་ཏེ་ཡོན་ཕུལ་ནས་དགེ་སློང་མས་གོས་རིན་པོ་ཆེ་ཆེན་པོ་ལེན་དུ་མི་དབང་གིས་གོས་ངན་པ་བྱིན་ཅེས་བྱས་པ་དང་ངན་པ་བྱིན་ན་ང་མིང་སྟོར་རོ་ཞེས་ཟེར་ཏེ་ངན་པ་ཡང་མ་ཡིན་དགེ་སློང་མས་ཀྱང་བཟང་པོ་མ་བླངས་ཏེ་རབ་ཏུ་བོར་བ་ལས་དགེ་སློང་ཕ་དང་བརྗེ་བའི་ཕྱིར་དགེ་སློང་མས་ཀྱང་བླང་དུ་དབང་དགེ་སློང་གིས་ཀྱང་ལོང་ཤིག་པར་བཅས། །དགེ་སློང་མ་དང་ལྷན་ཅིག་ཏུ་བརྗེ་བར་བྱ། དགེ་སློང་མས་མདོ་ལྟག་མ་ལྟར་གོས་རིན་པོ་ཆེ་ཆེན་པོ་བླངས་པ་ལེན་དུ་གནང་བའི་ཕྱིར་བདག་ལ་མི་གཞག་གི་དགེ་སློང་ཕའི་གོས་ངན་པ་དང་རྗེས་ཤིག །དགེ་སློང་ཕ་ཡང་དགེ་སློང་མ་གོས་བཟང་པོ་ཁྱེར་ཏེ་ངན་པ་དང་བརྗེ་བར་འོང་ན་བརྗེ་བར་གྱིས་ཤིག །མཉམ་པ་འམ། དེ་དགའ་བར་བྱས་ཏེའོ། །
མདོ་ལྟག་མ་ལྟར་གོས་བཟང་ངན་བརྗེ་བ་ལ་དགེ་སློང་ཕས་ཁ་བརྔམ་ཏུ་བདག་རྒྱལ་བར་མཐུས་མི་བྱའི་གོས་བཟང་པོ་ཅི་རི་བ་བཞིན་དུ་ངན་པ་གྲངས་མང་སྟེ་རིན་མཉམ་པ་དང་དགེ་སློང་མ་མ་དད་ཅིང་མི་དགའ་བ་མེད་པར་མགུ་བར་བྱས་ཏེ་བརྗེའོ། །བླངས་ན་གཉེན་ཡང་མ་ཡིན་ལ་དགེ་སློང་མ་ཡང་ཡིན་པ་དང་གོས་ཀྱང་བླངས་པ་དང་ཡན་ལག་གསུམ། གསོལ་དགེ་སློང་མ་ལ་གོས་བླངས་པ་དང་གཉེན་མ་ཡིན་པར་ཤེས་བཞིན་པ་དང་ཡན་ལག་ལྔ། གོས་བླངས་པ་དེ་གོས་ཀྱང་ཡིན་པ་དང་ལག་ཏུ་འང་ཐོབ་པ་དང་ཡན་ལག་འདི་དགུ་དང་ལྡན་ན་སྤང་བར་འགྱུར། ལྟུང་བ་མེད་པ་ནི་དགེ་འདུན་གྱི་ཕྱིར་གོས་བྱིན་པའོ། །དགེ་སློང་མས་དགེ་འདུན་ཕོ་ལ་གོས་ཤིག་ཡོན་དུ་ཕུལ་པ་ནི་བླངས་ཀྱང་ཉེས་མེད་དོ། །ལེགས་པར་བཤད་པའི་ཕྱིར་བཤད་ཅེས། ཚུལ་ནས་འབྱུང་བ་དང་འཇུག་པའི་ཚེ་དགེ་སློང་པས་ཆོས་བསྙད་པ་དང་དགེ་སློང་མ་ལ་དགེ་སློང་ཕས་ཆོས་བཤད་པ་ལ་ཡིད་ཆེས་ཤིང་དགའ་སྟེ་དེ་ལྟ་བུ་ཆོས་བཟང་པོ་བཤད་པ་ལ་ཡོན་ཕུལ་ལོ་ཞེས་ཕུལ་ན་བླངས་ཀྱང་ཉེས་མེད། རབ་ཏུ་རྫོགས་པའི་ཚེ་དང་རླག་ནའོ། །དགེ་སྦྱོང་ཕོ་ཞིག་བསྙེན་པར་རྫོགས་པའི་ཚེ་དེ་ཡོ་བྱད་དུ་དགེ་སློང་མས་གོས་བྱིན་པ་དང་གོས་སྟོར་ཏམ་གོས་ཆུས་ཁྱེར་རམ་མེས་ཚིག་གམ་ཕྲོགས་ཏེ་མེད་པ་ལ་སོགས་པ་ལ་དགེ་སློང་མས་གོས་བྱིན་ན་བླངས་ཀྱང་ཉེས་མེད་དོ། །དད་པས་ནོར་བདུན་དུ་བཞག་ནས་སྨྲས་ཏེ་མི་ལྟོས་པས་སོང་ན་ཡང་ངོ༌། །དགེ་སློང་མས་དགེ་སློང་ལ་ནོར་སྦྱིན་པར་དད་དེ་མདུན་དུ་བཞག་ནས་མི་འདོད་ཅེས་བྱས་ཀྱང་མ་བཏུབ་སྟེ་ནོར་བོར་ནས་ནོར་ལ་མི་ལྟོས་པར་སོང་ན་ནོར་དེ་བླངས་ཀྱང་ཉེས་མེད་དོ། །གོས་མ་ཡིན་པ་ཁ་ཟས་ལྟ་བུ་གཞན་ཞིག་དགེ་སློང་ཕས་བླངས་པ་ནི་ཉེས་བྱས་སོ། །ལེན་པའི་སྤང་བ་སྟེ་རྣམ་པར་འབྱེད་པའི་འོ། །ལེན་པའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ལག་པར་ཐོབ་པར་གྱུར་ན། དགེ་སློང་མ་ལས་གོས་བླངས་པ་ནི་བདག་གི་ལག་ཏུ་ཐོབ་ན་སྤང་བར་འགྱུར། ལྟ་བའི་སྤྱོད་ཡུལ་དུ་གྱུར་པ་དེ་ནི་སྔ་མའོ། །དགེ་སློང་མ་ལ་གོས་བླངས་པ་བདག་གི་ལག་ཏུ་ནི་མ་བླངས་ཀྱི་ཁྱེར་ཏེ་འོངས་པ་ལ་བདག་གི་མིག་གིས་མཐོང་བར་བཞག་སྟེ་བླངས་པ་ཡང་ལག་
ཏུ་བླངས་པ་དང་འདྲ་བར་ལྟུང་བར་འགྱུར། དགེ་སློང་མ་ལ་གོས་བླངས་པ་དེ་བདག་གི་ལག་ཉིད་དུ་ནི་མ་འོངས་ཀྱི་ཕས་འོང་བ་ལ་མིག་གིས་མཐོང་བའི་ཚེ་ནི་ཉེས་བྱས་སོ་ཞེས་མཁན་པོ་སྔ་མས་བཤད། སྦྱོར་བ་ནི་མི་ཉེ་བ་ལ་ཁས་བླངས་པའོ། །དགེ་སློང་མ་ལ་དགེ་སློང་ཕས་གོས་བླངས་པ་དང་གོས་མི་དེ་ལ་ཡོད་ཀྱིས་ཁྱེར་ཅིག་ཅེས་ཟེར་རམ་ཡུལ་འདི་ན་ཡོད་ཀྱི་བླངས་ཏེ་སྦྱིན་ནོ་ཞེས་ཟེར་ན་དེའི་ཚེ་ཉེས་བྱས། མི་འཇིགས་པ་ལ་འདུས་པའི་དབང་གིས་མ་ཡིན་པའི་གོས་སྦྱིན་པ་ལ་སོགས་གཙོ་བོའོ། །དགེ་སློང་མས་གོས་སྦྱིན་ན་མོའི་སེམས་ལ་མི་སྦྱིན་པའམ་འགྱོད་པ་ཡོད་དེ་སེམས་འཇུག་ཅིང་འཇིགས་པ་དང་ཁེ་དང་ལེན་འདོད་པ་ལྟ་བུར་སེམས་འདུས་པའི་དབང་ཡིན་པར་ཤེས་པ་ནི་གོས་བླངས་ན་ཉེས་པར་འགྱུར་ཏེ་དེ་ལྟ་བུ་མེད་པས་གོས་བྱིན་པ་བླངས་པ་ན་ཉེས་མེད་དོ། །ཁྱིམ་པའམ་གཞན་ཞིག་ལ་འདི་ལྟ་བུའི་སེམས་ཡོད་དེ་བླངས་ན་འང་བུ་ལོན་དུ་འགྱུར་ཏེ་མི་གཙང་བ་ཞེས་བྱ་བའོ། །ལྟུང་བ་མེད་པ་ནི་རེ་ཞིག་གི་དུས་སུ་སེམས་ཀྱིས་སོ། །བདག་ལ་གོས་མེད་དེ་རེ་ཞིག་དགེ་སློང་མ་ལས་བརྙས་ཏེ་གྱོན་པ་ནི་ཉེས་མེད་དོ། །བརྗེད་དེ་རིན་མ་བྱིན་པའོ། །དགེ་སློང་མ་ལས་གོས་བཟང་ངན་བརྗེས་ཏེ་ངན་པའི་མཁན་མ་ཕྱིས་སྦྱིན་པར་བྱས་པ་ལས་བརྗེད་དེ་མ་བྱིན་པ་ནི་ཉེས་མེད་དོ། །ནམ་དྲན་པ་ན་སྦྱིན་ནོ། །ཁྱིམ་མི་འམ་གཞན་གྱི་བུ་ལོན་ཆགས་པ་བརྗེད་ན་འང་ཉེས་མེད་དོ། །ལེན་པའི་སྤང་བ་སྟེ་འདུལ་བ་དྲིས་པ་ཞེས་བྱ་བའི་ནང་ནས་འབྱུང་བའི་མདོ།། །།ལེན་པའི་སྤང་བ་པའོ། །ལེན་པའི་སྤང་བའི་ལྟུང་བ་སྟེ་འདུལ་བ་སོ་སོའི་ནང་ནས་འབྱུང་བའི་མདོ།། །།སློང་བའི་སྤང་བའི་ལྟུང་བ་ལ་འཆད་དེ་མིའི་རྒྱུད་དུ་གཏོགས་པ། ལམ་རྒྱུད་བཞི་མ་གཏོགས་པར་མིའི་རྒྱུད་གཏོགས་པ་དང༌། ཁྱིམ་པར་གྱུར་པ། ཁྱིམ་པའང་ཡིན་པ་དང༌། སྲོག་ཆགས་ཁྱིམ་པ་ཡིན་པ་དེ་འཚོ་ཞིང་སྲོག་དང་ལྡན་པ་དང་གཉེན་མ་ཡིན་པ་ཁྱིམ་པ་དེ་གཉེན་ཡང་མ་ཡིན་པ་དང༌། ལྟུང་བྱེད་ཡན་ལག་ནི་ལྔ་དང་ལྡན་ན་སྤང་བར་འགྱུར་རོ། །དེ་མ་ཐག་པའི་གསུམ་པོའོ། །ལྷག་མ་དང་རིན་ཐང་སོ་སོ་བ་གསུམ་ཡང་མདོ་ལྟག་མ་ལས་འབྱུང་བ་ཡན་ལག་བཞི་དང་ལྡན་ན་སྤང་བར་འགྱུར་རོ། །བརྐུས་པ་དང་གོས་རྐུན་པོས་
ཁྱེར་བ་དང༌། རླག་པ་དང་གོས་རླག་སྟེ་འཁྱམ་པ་དང༌། ཚིག་པ་དང༌། གོས་མེས་ཚིག་པ་དང༌། ཕྲོགས་པ་དང་གོས་རླུང་གིས་ཕྲོགས་པ་སྟེ་ཁྱེར་བ་དང༌། ཆུས་ཁྱེར་བ་མ་ཡིན་པའི་གོས་སོ། །གོས་ཆུས་ཁྱེར་བ་དང་རྐྱེན་མིང་གིས་སྨོས་པ་འདི་རྣམས་གང་བྱུང་ཡང་རུང་སྟེ་གཅིག་བྱུང་ན་གོས་སློང་དུ་དབང་ངོ༌། །རྐྱེན་འདི་ལྔ་གག་ཀྱང་རུང་མེད་ན་ལྟུང་བར་འགྱུར་ཏེ། འདི་ལ་ཡན་ལག་གཅིག་ཏུ་བརྩིས་ལ་ལྟག་ཏུ་ཡན་ལག་བཞིའི་སྟེང་དུ་འདིས་བསྣན། སློང་བ་ནི་ཉེས་བྱས་པའོ། །གཉེན་མ་ཡིན་པའི་དགེ་སློང་མ་ལ་སློང་བའི་ཚེ་ཉེས་བྱས། ཐོབ་ན་རྩ་བའོ། །གཉེན་མ་ཡིན་པའི་དགེ་སློང་མ་ལ་གོས་བསླངས་ཏེ་ཐོབ་ན་ལྟུང་བ་ཡིན་ཏེ་ཡན་ལག་གཅིག་གོས་སོ། །གཉེན་མ་ཡིན་པའི་དགེ་སློང་མ་ལ་བསླངས་ཏེ་ཐོབ་པ་དེ་གོས་ཡིན་ན་དང་ཡན་ལག་གཉིས། མ་བྲི་ནའོ། །གཉེན་མ་ཡིན་པའི་དགེ་སློང་མ་ལ་གོས་བསླངས་ཏེ་ཐོབ་པ་དེ་ཁྲུ་གང་ཡན་ཆད་ཀྱང་ཡིན་པ་དང༌། ཡན་ལག་འདི་གསུམ་གྱིས་གོང་མ་ལྔའི་ཐོག་ཏུ་བསྣན་ཏེ་ཚད་ན་སྤང༌། རྣམ་པ་གང་མིང་གིས་སྨོས་པ་འདི་རྣམས་བཞིན་དུ་བསླངས་ཏེ་ཐོབ་ན་སྤང་བའི་ལྟུང་བར་འགྱུར། རིན་དང་འདི་ཙམ་རི་བ་ཞིག་བསླངས་ཞེས་བྱས་ཏེ་དེ་བཞིན་ཐོབ་པ་དང༌། ཁ་དོག་དང་ཁ་དོག་སེར་པོའམ་དམར་པོ་ཞིག་བསངས་ཞེས་བྱས་ཏེ་དེ་བཞིན་ཐོབ་པ་དང༌། ཁྲུ་བསླངས་ནའོ། །ཁྲུ་ཚད་མཐོ་ཚད་འདི་ཙམ་ཞིག་བསླངས་ཞེས་བྱས་ཏེ་དེ་བཞིན་ཐོབ་ན་སྤང་བའི་ལྟུང་བར་འགྱུར། ལྟུང་བ་མེད་པ་ནི་གཞན་ནོ། །མདོ་ལྟག་མ་ལྟར་ཚད་དང་ཁ་དོག་མིང་གིས་བསྔོས་ཏེ་བསླངས་པ་ལས་དེ་བས་ལྷག་པའམ་ཆུང་བ་ཞིག་བྱིན་ན་ལྟུང་བར་མི་འགྱུར་ཏེ་ཉེས་བྱས་སོ། །བསྔོས་ཏེ་བསླངས་པ་ལས་ནོར་གཞན་ཞིག་བྱིན་པ་ནི་ཉེས་མེད་དོ། །ལྷན་པ་དང་སྐུད་པ་བསླངས་པ་ཡང་ངོ༌། །ལྷན་པ་དང་སྐུད་པ་ཙམ་གཉེན་མ་ཡིན་པའི་ཁྱིམ་བདག་ལ་བསླངས་ཀྱང་ཉེས་མེད་དོ། །འབྲི་བའི་ནི་རྒྱུ་དང་སྤུན་ནོ། །གོས་ཀྱི་རྒྱུ་རས་ཀྱི་སྐུད་པ་དང་སྤུན་ལ་སོགས་པ་བསླངས་པ་ནི་ལྟུང་བར་མི་འགྱུར་ཏེ་ཉེས་བྱས། དེའི་རྒྱུ་ཡང་དེ་བཞིན་ནོ། །མདོ་ལྟག་མ་ལྟར་རྒྱུ་དང་སྤུན་རྒྱུ་བལ་དང་ཀ་བ་སེ་བསླངས་ན་ཉེས་བྱས། སློང་བའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་
མདོ་སྟེ་སྤང་པའི་ལྟུང་བ་དྲུག་འདས་སོ། །ལྷག་པའི་སྤང་བའི་ལྟུང་བ་ལ་འཆད་དེ། བསྔོ་བ་ཐམས་ཅད་མེད་ན་བསླང་བའི་རིགས་སོ། །དགེ་སློང་གི་ཡོ་བྱད་བཅུ་གསུམ་དུ་བསྔོས་པ་ཐམས་ཅད་མེད་ཅིང་གོས་ཕྲོགས་པ་ལ་སོགས་པའི་རྐྱེན་བྱུང་ན་གཉེན་མ་ཡིན་པའི་ཁྱིམ་པ་ལ་གོས་སློང་བའི་ཡོ་བྱད་བཅུ་གསུམ་ནི་ཆོས་གོས་གསུམ་ཤམ་ཐབས་སྨད་དཀྲིས་རྡུལ་གཟན་གཡན་པ་དགབ་པ་རས་ཆེན་སྨན་ཟོང་གི་རས་བཏིང་བ་ལུས་ཕྱི་བ་སྐྲ་བཟེད་པ་ཁྲུས་རས་རྔུལ་གཟན་གྱི་འཐེབ་དང་བཅུ་བཞི་ལ་གཡན་པ་དགབ་པ་དང་རས་ཆེན་ནི་སྐབས་སྐབས་སུ་དོགས་པའི་ཕྱིར་གཅིག་ཏུ་བརྩིའོ། །སྤང་བའི་ལྟུང་བའོ། །ཡོ་བྱད་བཅུ་གསུམ་ཡོད་ལ་གཉེན་མ་ཡིན་པའི་ཁྱིམ་པ་ལ་གོས་བསླངས་ན་སྤང་བའི་ལྟུང་བར་འགྱུར་ཏེ་མིང་དང་ཁྱིམ་པ་དང་གཉེན་མ་ཡིན་པ་དང་འཚེ་བ་དང་ཡན་ལག་བཞིའི་ཐོག་ཏུ་འདིས་བསྣན་ཏེ་ལྔར་ལྡན་ན་སྤང་བའི་ལྟུང་བར་འགྱུར། ཁྱིམ་པའི་གོས་དམ་པ་ཁྲུ་བཅུ་གཉིས་བླའི་དང་གི་བདུན་དང་གཉིས་པའི་རས། གོས་རྐྱེན་བྱུང་སྟེ་མེད་ན་གཉེན་མ་ཡིན་པའི་ཁྱིམ་པ་ལ་སློང་དུ་གནང་བ་ཡང་ཁྱིམ་པ་གོས་བཟང་པོར་ཆ་བའི་ཚད་དུ་སློང་དུ་དབང་སྟེ་བཟང་པོ་ཆའི་ཚད་ནི་སྟེང་དུ་གྱོན་པ་ཞེང་དུ་ཁྲུ་གསུམ་ཆུར་ཁྲུ་བཅུ་གཉིས་འོག་ཏུ་གྱོན་པ་ཞེང་དུ་ཁྲུ་དོ་ཆུར་ཁྲུ་བདུན་ཏེ་དེའི་ཚད་དུ་བསླངས་ན་ཉེས་མེད་དོ། །དགེ་སློང་གི་དམ་པ་ནི་ཇི་ལྟར་བཤད་པ་སྦྱར་མའི་རིམ་པ་དར་ཤམ་ཐབས་སོ། །གོས་རྐྱེན་བྱུང་སྟེ་སློང་དུ་དབང་བ་དགེ་སློང་གི་གོས་བཟང་པོའི་ཚད་དུ་བསླངས་ཀྱང་ཉེས་མེད། དགེ་སློང་གི་གོས་དམ་པའི་ཚད་ནི་ཆོས་གོས་ཆེན་པོ་གསར་དུ་བྱེད་ན་ཉི་རིམ་དུ་སྣང་ངོ་ཞེས་འབྱུང་བ་བཞིན་དུ་ཆོས་གོས་ཆེན་པོ་ཉི་རིམ་དུ་སྦྱར་བའི་ཚད་ཞིང་དུ་ཁྲུ་གསུམ་ཆུར་ཁྲུ་ལྔ་པ་གཅིག་དང་ཤམ་ཐབས་ཞེང་དུ་ཁྲུ་དོ་ཆུར་ཁྲུ་ལྔ་པ་གཉིས་སློང་དུ་དབང་སྟེ་ཉེས་མེད་དོ། །ཟུང་ལས་སློང་བ་གང་གི་ཡང་རུང་ངོ༌། །མདོ་ལྟག་མ་གཉིས་ལྟར་ཁྱིམ་པ་དང་དགེ་སློང་གི་ཚད་རྣམས་གཉིས་སུ་བཤད་པ་གང་ཡང་རུང་སྟེ་བདག་གིར་དགའ་ཞིང་དད་པ་ཅིག་གི་ཚད་དུ་སློང་དུ་དབང་ངོ༌། །ཚད་འདི་ལས་ལྷག་པ་ནི་མི་བསླང་ངོ༌། །ལྷག་ཏུ་ཁྱིམ་པ་དང་དགེ་སློང་གི་གེས་ལ་སློང་ན་གནང་བར་ཚང་བཙུགས་པ་ལས་ལྷག་པར་
བསླངས་ཏེ་ཐོབ་པ་སྤང་བར་འགྱུར་རོ། །སྔ་མའི་ཐོབ་ནས་ལྟག་མར་ཡང་ངོ༌། །བྱིན་པའི་གོས་ཚད་དུ་བསླངས་པ་ལ་དགེ་སློང་གི་ཆོས་གོས་ཚད་དང་སྦྱར་ན་དེའི་ཚད་པས་ཆུང་སྟེ་དགེ་སློང་གི་ཚད་དུ་སྣོན་ཏེ་བྱིན་ཅིག་ཅེས་བསླངས་ཏེ་བླངས་ན་སྤང་བའི་ལྟུང་བར་འགྱུར་རོ། །ཆོས་གོས་དང་ཤམ་ཐབས་མི་ལངས་ན་ཆོས་གོས་ཁྲུ་ཕྱེད་དང་ལྔ་དང་ཤམ་ཐབས་འཁོར་གསུམ་ཡོག་པར་སྣོན་ཏེ་བྱིན་ཅིག་ཅེས་བྱས་པ་ནི་ཉེས་མེད་དོ། །དམ་པ་ཐོབ་ན་ལྷག་པ་སྦྱིན། །དེ་སློང་གི་གོས་ཚད་དུ་ལངས་པ་ལས་ཚད་ལས་ལྷག་པར་བྱིན་ན་ཚད་ལས་ཅི་ལྷག་པ་ཆོད་སླར་བྱིན་ཅིག་མ་བྱིན་པར་ཁྱེར་ན་སྤང་བའི་ལྟུང་བའོ། །མི་བསླང་བ་ལ་བསླངས་ན་ཉེས་བྱས་པའོ། །གཙོས་ལ་སོགས་པ་མ་བརྟགས་པ་བསླངས་པའི་མི་རིགས་པ་ལས་བསླངས་ན་ཉེས་བྱས། ཡོ་བྱད་བཅུ་གསུམ་ཡོད་བཞིན་དུ་ལྷག་པར་སློང་བ་ནི་ཉེས་བྱས། ཐོབ་ན་རྩ་བའོ། །མདོ་ལྷག་མ་ལྟར་བསླངས་པ་དེ་ཐོབ་ན། གཙོས་ལ་སོགས་པ་མ་བརྟགས་པ་ཐོབ་པ་ནི་ཉེས་བྱས་ལྕི་བ། ཡོད་བཞིན་དུ་ལྷག་པར་བསླངས་པ་དང༌། ཚད་ལས་འདས་པར་བསླངས་པ་ནི་ལྟུང་བའོ། །སྦྱིན་པ་ལས་མ་བྱིན་ན་ཡང་ངོ༌། །གོས་ཚད་བཞིན་དུ་བསླངས་པ་ལས་ཚད་ལས་ལྷག་པར་བྱིན་པ་སླར་བཅད་དེ་སྦྱིན་པའི་རིགས་པ་ལས་མ་བྱིན་ན་སྤང་བའི་ལྟུང་བའོ། །བསླངས་པའི་རིགས་པ་སྤང་བའོ།། །།ལྷག་པའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རིན་གྱི་སྤང་བ་ལ་འཆད་དེ། བརྟགས་ཏེ་དགེ་སློང་ལ་གཉེན་མ་ཡིན་པའི་ཁྱིམ་བདག་ཕོ་འམ་ཁྱིམ་བདག་མོ་གང་ཡང་རུང་གཅིག་གིས་གོས་ཀྱི་རིན་སྦྱིན་པར་བརྟགས་ཏེ་བཞག་ནས། མ་སྦྲན་པ་ལས་དགེ་སློང་ལ་ནི་གོས་སྦྱིན་པའི་རིན་སྤགས་ཏེ་བཞག་གོ་ཞེས་མ་སྦྲན་པར། ཤེས་ནས་ནི་གཞན་སུ་ཡང་རུང་སྟེ་གཅིག་ལས་བདག་གི་ཕྱིར་གོས་ཀྱི་རིན་སྤགས་ཏེ་བཞག་པར་ཐོས་ནས། །མ་བརྟགས་པ་དང་མཐུན་ནའོ། །ཁྱིམ་པ་དེའི་གན་དུ་སོང་སྟེ་གོས་ཀྱི་རིན་སྤགས་པ་དགེ་བ་ཡིན་གྱིས་ང་བྱིན་ཅིག་ཅེས་བླངས་ནའང་གོས་ཀྱི་རྐྱེན་མེད་པར་གཉེན་མ་ཡིན་པའི་ཁྱིམ་པ་ལ་བསླངས་པ་དང་འདྲ་སྟེ་ལྟུང་བའོ། །ཡན་ལག་འདི་གསུམ་གྱི་སྟེང་དུ་སློང་བའི་ཡན་ལག་བཞིས་
བསྣན་ཏེ་བདུན་དང་ལྡན་ན་ལྟུང་བ། གཞན་ཡང་དེ་བཞིན་ནོ། །མདོ་ལྟག་མ་ལྟར་གཉེན་མ་ཡིན་པའི་ཁྱིམ་བདག་ཕོའམ་ཁྱིམ་བདག་མོ་གང་ཡང་རུང་གཅིག་གིས་བསྔོས་ཏེ་བཞག་པ་ལས་གཞག་པར་བདག་གིས་ཀྱང་མི་ཤེས་ལས་ཀྱང་མ་ཐོས་པར་བསླངས་ཏེ་ཐོས་ན་ལྟུང་བའོ། །བརྟགས་པའི་སློང་བའི་སྤང་བའོ། །རིན་གྱི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སོ་སོའི་སྤང་བ་ལ་འཆད་དེ། མི་འཇིགས་པར་སྦྱིན་པ། །རིན་གྱི་སྤང་བ་ནི་ཁྱིམ་ཐབ་བམ་ཆུང་མ་གཅིག་གི་སྤངས་པས་གཅིག་ལ་བག་ཚ་ཞིང་འཛེམ་པ་ཡོད་ཀྱི་སོ་སོའི་སྤང་བ་ཉིད་ནི་གཉིས་ཀས་སྤགས་པས་གཅིག་ལ་གཅིག་བག་ཚ་ཞིང་འཛེམ་པ་མེད་པ་དེ་གཉིས་ཀས་སྦྱིན་པར་དད་པ་ལ་བསྐུལ་ཏེ་བསླངས་ན་ཡང་ལྟུང་ངོ༌། །སྦྱོར་བ་གཅིག་གིས་ཐོབ་པ་ནི་གཅིག་གོ །ཁྱིམ་ཐབ་དང་ཆུང་མ་གཉིས་ཀས་སོ་སོ་ནས་གཉིས་ཀས་རིན་ཕྱུང་སྟེ་བསྡུས་ནས་དགེ་སློང་གི་ཕྱིར་གོས་ཀྱི་རིན་དུ་སྤགས་ཏེ་བཞག་པ་ལས་ཐོབ་ནའང་སྤང་བར་འགྱུར་ཏེ་ཡན་ལག་མདོ་འདི་གཉིས་ཀྱིས་ལྟག་མ་རིན་གྱི་སྤང་བའི་ཡན་ལག་རྣམས་ཀྱིས་བསྣན་ཏེ་ཚང་ན་སྤང་བར་འགྱུར། གཞན་བཤད་པ་དང་ཡན་ལག་ཐམས་ཅད་ལྟག་མ་རིན་གྱི་སྤང་བ་བཤད་པ་དང་འདྲའོ། །སོ་སོའི་སྤང་བའོ། །སོ་སོའི་སྤང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བསྐུར་པའི་སྤང་བ་ལ་འཆད་དེ། མ་བརྟགས་པའོ། །དགེ་སློང་ལ་མ་བརྟགས་པ་གསེར་དངུལ་ཞིག་གོས་ཀྱི་རིན་བསྐུར་བ་རྒྱལ་པོ་འམ་ཞང་བློན་ནམ་བྲམ་ཟེ་ཞིག་གིས་དགེ་སློང་གི་ཕྱིར་གོས་ཀྱི་རིན་དུ་བསྐུར་ཏེ་འོངས་ན། དགག་པ་གོས་ཁྱེར་པའི་མི་དེ་ལ་དགེ་སློང་ནི་གོས་ཀྱི་རིན་མ་བརྟགས་པ་ལེན་དུ་མི་དབང་སྟེ་གོས་ཤིག་བྱིན་ན་ནི་ལེན་གྱི་རིན་མ་བརྟགས་པ་མི་ལེན་ཏོ་ཞེས་དགག་པ་དང༌། སྔར་འདྲི་བ་བསྟན་ཏེ་རིན་ཁྱེར་ཁྱེར་བའི་མི་དེ་ན་རེ་གོས་ཀྱི་རིན་མ་བརྟགས་པ་ལེན་དུ་མི་རུང་ན་གཡོག་གམ་དོན་སྒྲུབ་ཏུ་ཡོད་ཅེས་འདྲི་ན་དགེ་སློང་གིས་དོན་བསྒྲུབ་པ་འདི་ཡིན་ནོ་ཞེས་བསྟན་ཏེ། དོན་བསྒྲུབ་པ་ལ་བསྒོ་ནས་གོས་ཀྱི་རིན་ཁྱེར་ཁྱེར་བའི་མི་དེས་དགེ་སློང་གིས་བསྟན་པའི་དོན་བསྒྲུབ་པའི་མི་དེ་ལ་གོས་ཀྱི་རིན་མ་བརྟགས་པ་འདིས་གོས་ཤིག་ཉོས་ལ་དགེ་སློང་དེ་ལ་བྱིན་ཅིག་ཅེས་
བསྒོ་ནས། ཕོ་ཉས་སྨྲས་པར་གྱུར་པའི་ཕྱིར། གོས་ཀྱི་རིན་ཁྱེར་ཁྱེར་བའི་ཕོ་ཉ་དེས་སླར་དགེ་སློང་གི་གན་དུ་ཁྱེད་ཀྱིས་དོན་བསྒྲུབ་པ་བསྟན་པའི་མི་དེ་གོས་ཀྱི་རིན་བཞག་སྟེ་རིན་དེས་གོས་སུ་ཉོས་ལ་ཁྱོད་ལ་ཕུལ་ཅིག་ཅེས་བྱས་ཀྱིས་གོས་དེར་ལོངས་ཤིག་ཅེས་སྨྲས་ནས་བཞག་པ་ལ། སྔར་སྨྲས་ནས་བསྐུལ་བ། དགེ་སློང་གིས་དོན་བསྒྲུབ་པའི་མི་དེ་ལ་གོས་ཀྱིས་བྲེལ་ཏོ་ཞེས་བསྐུལ་བའི་ཚིག་ལན་དྲུག་ལས་ལྷག་པ་དང་ཡན་ལག་མིང་གིས་སྨོས་པ་འདི་རྣམས་དང་ལྡན་ན་སྤང་བའི་ལྟུང་བར་འགྱུར་རོ། །རྟོག་མི་ནུས་པ་ལ་ནི་མ་བསྐུལ་བའོ། །དོན་བསྒྲུབ་པའི་མི་དེ་དགེ་སློང་གིས་བསྐུལ་བ་གོས་ཀྱིས་བྲེལ་ཏོ་ཞེས་བྱས་ཀྱང་ཁོར་རོ་འམ་གཉིད་ཀྱིས་ལོག་གམ་ཡེངས་ཏེ་མ་གོ་ན་བསྐུལ་བར་མི་ཆུད་དེ་ལན་དྲུག་བསྐུར་བའི་གྲངས་སུ་མི་བརྩིའོ། །མ་གྲུབ་ན་གཉིས་སུ་ཡང་ངོ༌། །དོན་བསྒྲུབ་པའི་མི་དེ་ལ་དགེ་སློང་གིས་དགོས་ཀྱིས་བྲེལ་ཏོ་ཞེས་ཚོར་ཞིང་གོ་བར་ལེན་གཅིག་བསྐུལ་ནས་མ་བྱིན་ན་ང་གོས་ཀྱིས་བྲེལ་ཏོ་ཞེས་ལེན་གཉིས་ཀྱི་བར་ཏུ་གོ་ཞིང་ཚོར་བར་བསྐུལ་ལོ། །གསུམ་དུ་ཡང་ངོ༌། །མདོ་ལྟག་མ་ལྟར་དོན་བསྒྲུབ་པའི་མི་ལ་ལན་གཉིས་སུ་བསྐུལ་ཀྱང་གོས་མ་བྱིན་ན་ང་གོས་ཀྱིས་བྲེལ་ཏོ་ཞེས་ལན་གསུམ་གྱི་བར་དུ་གོ་ཞིང་ཚོར་བར་བསྐུལ་ལོ། །གསུམ་ཕན་ཆད་ནི་ཁ་རོག་སྟེ་འདུག་གོ །མདོ་ལྟག་མ་རྣམས་ལྟར་ལན་གསུམ་དུ་ཚིག་ཏུ་སྨྲས་ཏེ་བསྐུལ་ཀྱང་གོས་མ་བྱིན་ལ་ལན་བཞིའི་ཚེ་ཅང་མི་སྨྲ་བར་ཁོའི་གན་དུ་འགྲོའོ། །ཅི་ལ་བྱོན་ཅེས་འདྲི་ན་ང་དེའི་ཕྱིར་རོ་ཞེས་བྱ། ལན་བཞིར་མི་སྨྲ་བར་བསྐུལ་ཀྱང་གོས་མ་བྱིན་ན་མི་སྨྲ་བར་ལན་ལྔ་དྲུག་ཏུ་འགྲོའོ། །དྲུག་ལས་ལྷག་པར་བསྐུལ་ཏེ་ཐོབ་ན་སྤང་བའོ། །མ་གྲུབ་ན་སྦྱིན་བདག་ལ་སྦྲན་ནོ། །མདོ་ལྟག་མ་ལྟར་གོས་ཀྱིས་བྲེལ་ཏོ་ཞེས་ཚིག་གིས་ལན་གསུམ་བསྐུལ། ཅང་མི་སྨྲ་བར་ལན་གསུམ་སྟེ་དྲུག་ཏུ་བསྐུལ་ནས་གོས་མ་བྱིན་ན་དགེ་སློང་དེས་རྒྱལ་པོའམ་ཞང་བློན་གག་གིས་གོས་ཀྱི་རིན་བསྐུར་བ་དེའི་གན་དུ་ཁྱོད་ཀྱིས་གོས་ཀྱི་རིན་བསྐུར་བ་དེ་རའི་ལག་ཏུ་མ་ཐོབ་ཀྱིས་ཤེས་པར་བྱོས་ཤིག་ཅེས་ཕོ་ཉ་བརྟགས་པའམ་བདག་ཉིད་ཀྱིས་སྦྲན་མ་སྦྲན་ན་ཉེས་བྱས། གོས་ཀྱི་རིན་ཁྱེར་ཁྱེར་བའི་མི་དེས་ཁྱོད་ཀྱི་དོན་བསྒྲུབ་པ་གང་
ཡིན་ཞེས་མ་དྲིས་པར་བསྟན་ནའང་ཉེས་བྱས། རིན་ཁྱེར་ཁྱེར་བ་ལ་གོས་གྱི་རིན་མ་བརྟགས་པ་ལེན་དུ་མི་དབང་ངོ་ཞེས་མ་བཀག་ནའང་ཉེས་བྱས་སོ། །འདི་ལྟ་བུར་གྱུར་ཏེ་བཏང་ནས་འབུལ་ན་གཏང་ངོ་ཞེས་སྨྲས་པ་དང༌། བདག་གིས་སེམས་གཟུང་བར་ནན་ཏན་བྱའོ་ཞེས་ཁས་བླངས་ན་ལོངས་ཤིག །མདོ་ལྟག་མ་ལྟར་ལན་དྲུག་ཏུ་བསྐུལ་ཏེ་གོས་མ་བྱིན་ནས་རྒྱལ་པོའམ་ཞང་བློན་ཐོག་མ་ནོར་བསྐུར་བསྐུར་བ་དེ་ལ་དགེ་སློང་གིས་སླར་སྦྲན་པའི་འོག་ཏུ་དོན་བསྒྲུབ་པའི་མི་དེ་གོས་བཞེས་སུ་གསོལ་ཞེས་འབུལ་དུ་འོངས་ན་ངས་ནོར་བདག་ལ་སླར་སྦྲན་ཟིན་ཏོ་ཞེས་གྱིས་ལ་མ་ལེན་ཅིག་བླངས་ན་སྤང་བར་འགྱུར། ནོར་བདག་ལ་སྦྲན་ཟིན་གྱིས་མི་ལེན་ཏོ་ཞེས་བྱས་ཀྱང་དོན་བསྒྲུབ་པ་ན་རེངས་ནོར་བདག་གི་སེམས་བཟུང་ཞིང་མི་དགའ་བ་མེད་པ་དང་དད་ཅིང་རུང་བར་བྱའོ་ཞེས་ཟེར་ན་གོས་བླངས་ཀྱང་ཉེས་མེད་དོ། །ལྷག་པར་བསྐུལ་ཏམ་གནས་ནས་ཁས་མ་བླངས་ནའོ། །དགེ་སློང་གིས་དོན་བསྒྲུབ་པ་ལ་ལན་དྲུག་ལས་ལྷག་པར་བསྐུལ་ཏེ་གོས་ཐོབ་བམ་སླར་ནོར་བདག་ལ་སྦྲན་པའི་འོག་ཏུ་དོན་བསྒྲུབ་པ་ན་རེ་ནོར་བདག་གི་སེམས་གཟུང་ངོ་ཞེས་མི་ཟེར་བར་གོས་བླངས་ན་སྤང་བའི་ལྟུང་བར་འགྱུར་ཏེ་ཡན་ལག་གཉིས་བླངས་ནའོ། །ལྷག་པར་བསྐུལ་ཏེ་གོས་བླངས་ནས་ལག་ཏུ་ཐོབ་པ་དང་ཡན་ལག་གསུམ་གསུམ་ཆར་ཡང་མི་ཁྱིམ་པ་ནའོ། །ནོར་བདག་དང་ཕོ་ཉ་དང་དོན་བསྒྲུབ་པ་གསུམ་ཆར་ཡང་མིའི་རྒྱུད་ཀྱང་ཡིན་པ་དང་ཁྱིམ་པ་ཡང་ཡིན་པ་དང་ཡན་ལག་གཉིས་སུ་བརྩི་སྟེ་ཡན་ལག་འདི་གཉིས་ཀྱི་སྟེང་དུ་ལྟག་ཏུ་སྨོས་པ་གསུམ་གྱིས་བསྣན་ཏེ་ལྔར་ཚང་ན་སྤང་བའི་ལྟུང་བར་འགྱུར། མ་སྨྲས་ན་ཉེས་པའོ། །གོས་ཀྱི་རིན་ཁྱེར་ཁྱེར་བའི་ཕོ་ཉས་དོན་བསྒྲུབ་པ་ལ་ནི་རིན་འདིས་གོས་འདི་ཉོས་ལ་མིང་འདི་ཞེས་བྱ་བའི་དགེ་སློང་འདིར་འོངས་དང་བྱིན་ཅིག་ཅེས་ནི་བསྒོའི་སླར་དགེ་སློང་ལམ་སྦྲན་པར་སོང་བ་ལ་དགེ་སློང་གིས་དོན་བསྒྲུབ་པ་ལ་བསྐུལ་ན་ཉེས་བྱས་མ་འགགས་ནའོ། །གོས་ཀྱི་རིན་ཅིག་ཕོ་ཉས་ཁྱེར་ཏེ་འོངས་ཏེ་དགེ་སློང་ལ་ཕུལ་ན་དགེ་སློང་གིས་གོས་ཀྱི་རིན་མ་བརྟགས་པ་མི་ལེན་ཏོ་ཞེས་གོགས་ཤིག །མ་འགགས་ན་ཉེས་བྱས། མ་དྲིས་པར་སྟོན་ནའོ། །གོས་ཀྱི་རིན་
ཁྱེར་ཁྱེར་བའི་ཕོ་ཉ་དེས་ཁྱོད་ཀྱི་དོན་བསྒྲུབ་པ་གང་ཡིན་ཞེས་མ་དྲིས་པར་དགེ་སློང་གིས་ངའི་དོན་བསྒྲུབ་པ་དེ་ཡིན་ནོ་ཞེས་པ་བསྟན་ན་ཉེས་བྱས་རེ་བ་མེད་ནས་མ་སྦྲན་ནའོ། །དོན་བསྒྲུབ་པ་ལ་ལན་དྲུག་ཏུ་བསྐུལ་བ་སྟེ་གོས་མ་ཐོབ་ན་སླར་ནོར་བདག་ལ་མ་སྦྲན་ནའང་ཉེས་བྱས། བསྐུར་བའི་སྤང་བའོ། །བསྐུར་བའི་སྤང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོའོ། །སྤང་བའི་ལྟུང་བ་བཅུ་ཕུང་གཅིག་རྫོགས་སོ།། །།སྲིན་བུའི་སྤོང་བ་ལ་འཆད་དེ། ཆོངས་ཤིག་གདིང་བ་དང༌། སྟན་ཕྱིང་པར་བཅགས་པའམ་ཤིང་བལ་གྱི་བར་ཚངས་ཅན་དུ་བྱས་པ་བཅངས་ཀྱང་ཉེས་མེད་དེ་ཆེར་བྱེད་ན་ཞེང་དུ་ཁྲུ་དོ་དང་སོར་དྲུག་ཆུར་ཁྲུ་ཕྱེད་དང་ལྔ། ཅོག་པུ་པའི་སྟན་ཆུང་དུ་བྱེད་ན་ཆུར་ཁྲུ་ཕྱེད་དང་གསུམ་ཞེང་དུ་ཁྲུ་དོ་དང་སོར་དྲུག་ཏུ་བྱའོ། །སྲིན་བུའི་བྱེད་དུ་བཅུག་གམ་བྱས་ནའོ། །སྲིན་བལ་ལ་སྟན་སར་པ་བདག་གིས་བྱས་སམ་གཞན་བྱེད་དུ་བཅུག་ན་ཡང་སྤང་བའི་ལྟུང་བར་འགྱུར་ཏེ། གཉེན་མ་ཡིན་པ་དང་ཁྱིམ་པ་ཡིན་བ་དང༌། གསར་དུ་བྱས་ཏེ་ཟིན་པས་སྤང་བར་འགྱུར་ཏེ་བྱས་ཟིན་པའི་ནི་སྲིན་བུའི་བྱས་པ་དང་ཡན་ལག་འདི་བཞི་དང་ལྡན་ན་སྤང་བའི་ལྟུང་བར་འགྱུར། ཡན་ལག་འདི་བཞི་ནི་འབའ་ཞིག་དང་ཆའི་སྤང་བའི་ཡན་ལག་ཏུའང་གཏོགས་སོ། །ཐོག་མ་བཏིང་པ་ནི་བྱས་ཟིན་པའི་མཐའ་འོ། །སྲིན་བུའི་སྟན་བྱས་ཏེ་ཟིན་པ་ལས་སྤང་བར་གྱུར་ཏེ་བྱས་ཟིན་པའི་ཚད་ནི་སྲིན་བུ་ཁོད་བསྙམས་ཏེ་བཏིང་བས་ཟིན་པར་གྱུར་ཏོ་ཞེས་ཊཱི་ཀ་ལས་འཆད། འདུལ་བ་འཛིན་པ་ཁ་ཅིག་ན་རེ་ཀུན་ཟིན་ཏེ་འོག་ཏུ་བཏིང་ན་ཟིན་པའི་ཚད་དོ་ཞེས་ཀྱང་འཆད་དོ། །འོག་ནས་འབའ་ཞིག་དང་ཆ་གཉིས་བྱུང་བ་ཡང་ཟིན་པའི་ཚད་ནི་འདི་དང་འདྲའོ། །སྲིན་བུའི་ལྟུང་བ་མེད་པ་ནི་བྱས་ཏེ་ཐོབ་པ་དང་སྤྱད་པ་དང་བཅོས་པ་ལའོ། །ལྟུང་བར་མི་འགྱུར་བ་ནི་གཞན་གྱིས་སྲིན་བུའི་སྟན་བྱས་ཏེ་བྱིན་པ་ལ་བླངས་པ་དང་བླངས་པ་དེ་སྤྱད་པ་དང་རྙིང་པ་ལས་བཅོས་པ་ནི་ཉེས་མེད་དོ། །སྲིན་བུའི་སྤང་བ་སྟེ་རྣམ་པར་འབྱེད་པའོ། །སྲིན་བུའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།དབྲི་བ་ནི་ཉུང་དུས་བསྲེས་པའོ། །སྲིན་བལ་གྱི་སྟན་གསར་དུ་བྱེད་པ་ལ་ཕྱེད་ཡན་ཆད་གཅིག་བལ་དང་ཀ་བསེས་
བསྲེས་ན་ཉེས་བྱས་པའོ། །ཕྱེད་མན་ཆད་ཅིག་བལ་དང་ཀ་བ་སེས་བསྲེས་ཏེ་སྲིན་བལ་མང་ན་ལྟུང༌། རྫས་མ་རུང་བར་གྱུར་ནའོ། །སྲིན་བལ་རུལ་བའམ་རྙིང་པ་ལ་སྟན་བྱས་ནས་ཉེས་བྱས་ཏེ་འོག་ནས་འབའ་ཞིག་དང་ཆ་གཉིས་འབྱུང་བ་ཡང་རུལ་བ་དང་རྙིངས་པ་ལས་བྱས་ན་ཉེས་བྱས་པའོ། །དྲིས་པའོ། །སྲིན་བུའི་སྤང་བ་འདུལ་བ་དྲིས་པའི་ནང་ནས་འབྱུང་བའི་མདོ།། །།སྲིན་བུའི་སྤང་བའོ། །སྲིན་བུའི་སྤང་བ་སྟེ་འདུལ་བ་སོ་སོའི་ནང་ནས་འབྱུང་བའི་མདོ། །འབའ་ཞིག་པའི་སྤང་བ་ལ་འཆད་དེ་ལུག་བལ་ནག་པོ་འབའ་ཞིག །དགེ་སློང་གིས་ལུག་གི་བལ་ནག་པོ་འབའ་ཞིག་པས་སྟན་སར་པ་བྱས་ན་སྤང་བའི་ལྟུང་བ་སྟེ་ཡན་ལག་དང་ཚད་ནི་ལྟག་ཏུ་སྲིན་བུའི་བཤད་པ་དང་འདྲའོ། །རིགས་ཀྱིས་པའོ། །ལུག་གི་བལ་དཀར་པོའམ་གྲོ་བོ་ལས་ས་ནག་ཏུ་བཙོས་པ་ནི་མ་ཡིན་གྱི་རིགས་ཀྱིས་ནག་པོར་འདུག་པ་ལ་བྱས་ནས་ལྟུང༌། དེ་བཞིན་དུ་སྔོན་པོ་དང་སྔོ་ནག་དང་སྨུག་པོ་དག་ཀྱང་ངོ༌། །ལུག་གི་བལ་རིགས་ཀྱིས་ནག་པོར་འདུག་པ་ལ་སྟན་སར་པ་བྱས་ན་སྤང་བའི་ལྟུང་བར་འགྱུར་བ་བཞིན་དུ་མིང་གིས་སྨོས་པ་འདི་རྣམས་རིགས་ཀྱིས་དེ་ལྟར་འདུག་པ་ལ་སྟན་སར་པ་བྱས་ནས་འང་ལྟུང་བའོ། །ཡུལ་ལ་ལ་ཞིག་ན་དཀར་པོ་དཀོན་ན་ཡང་བལ་དཀར་བོ་འབའ་ཞིག་ལ་སྟན་སར་པ་བྱས་ནའང་སྤང་བའི་ལྟུང་བར་འགྱུར་རོ། །ཡན་ལག་དང་བཤད་པ་ཀུན་སྲིན་བུ་དང་འདྲའོ། །ནག་པོ་འབའ་ཞིག་གི་སྤང་བའོ། །འབའ་ཞིག་པའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཆའི་སྤང་བ་ལ་འཆད་དེ། དེ་དག་ཕྱེད་ལས་ལྷག་ནའོ། །དགེ་སློང་ལུག་བལ་ལ་སྟན་སར་བ་བྱེད་ན་ཕྱེད་ལུག་བལ་ནག་པོ་ལས་གཞུག །བཞི་ཆ་གཅིག་དཀར་པོ་ལས་གཞུག །བཞི་ཆ་གཅིག་ཤོག་བལ་ལས་གཞུག་སྟེ་དེ་ལས་ནག་པོ་དང་དཀར་པོ་ལྷག་ན་སྤང་བར་འགྱུར། ཤོག་བལ་ལྷག་པར་བཅུག་པ་ནི་ཉེས་མེད་དོ། །འདི་དཀར་པོ་དང་ཤོག་བལ་དུ་ཆ་མཉམ་པར་བསྲེའོ། །ལུག་གི་བལ་སྟན་སར་པ་བྱེད་ན་ཕྱེད་ནག་པོ་ལས་གཞུག །ཕྱེད་དཀར་པོ་དང་ཤོག་བལ་ལས་གཞུག་སྟེ་ནག་པོ་ལ་བཞི་ཆ་གཉིས་དཀར་པོ་ལ་བཞི་ཆ་གཅིག །ཤོག་བལ་ཡང་བཞི་ཆ་གཅིག་གིས་ཐང་དུ་བཅུག་
སྟེ་བྱའོ། །ལོགས་དང་རྒྱབ་དང་གཉའ་བ་ནས་སྐྱེས་པ་ནི་སྔ་མའི་འོ། །ལུག་གི་རྩིབ་ལོགས་དང་རྒྱབ་དང༌། གཉའ་བ་ནས་བལ་བ་ནི་འཇམ་བལ་ཡིན་ཏེ་དཀར་པོ་ཞེས་བྱའོ། །མགོ་དང་རྐང་པ་དང་ལྟོ་བའི་ནི་ཕྱི་མའི་འོ། །ལུག་གི་མགོ་དང་རྐང་པ་དང་ལྟོ་བ་ནས་བལ་བ་ནི་ཤོག་བལ་ཞེས་བྱ་སྟེ། འདི་རྣམས་ལ་གོང་དུ་བཤད་པའི་ཚུལ་བཞིན་དུ་བསྲེའོ། །ཡན་ལག་དང་བཤད་པ་ནི་ཀུན་རྟག་ཏུ་སྲིན་བུ་དང་འབའ་ཞིག་བ་འཆད་པ་དང་འདྲའོ། །ཆ་གཉིས་ཀྱི་སྤང་བའོ། །ཆ་འདི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །། དྲུག་གི་སྤང་བ་ལ་འཆད་དེ། ཆུ་དང་ཞེང་དང་ལྷག་པ་བཅད་དོ། །དགེ་སློང་གིས་གདིང་བ་ལོ་དྲུག་ཏུ་ལོན་པ་ཞིག་རྙིངས་ཏེ་སྤྱད་དུ་མི་རུང་ནས་དགེ་འདུན་ལ་སྤྱད་བྲིམ་དུ་འོངས་ནས་སར་བ་བྱེད་དུ་གསོལ་ན་དགེ་འདུན་གྱིས་ལྟོས་ལ་རྙིང་པ་སྤྱད་དུ་མི་རུང་ན་སར་པ་བྱེད་དུ་ཆུག་ཤིག །སར་པ་དེ་ཆུ་ཞེང་དུ་ལྷག་ན་ཚད་བཞིན་ལས་ལྷག་པ་ཆོད་དུ་ཆུག་ཅིག །ཐུང་ངམ་ཆུང་ན་སྐྱེད་དོ། །གདིང་བ་དེ་ཆུང་ངམ་ཐུང་ན་ལྟག་ཏུ་སྲིན་བུའི་ནང་དུ་ཚད་ཆེ་ཆུང་རྣམ་གཉིས་བཤད་པ་གང་ཡང་རུང་གག་གི་ཚད་དུ་དགའ་བར་སྐྱེད་ཅིག་ཆད་ན་སྦྱར་རོ། །གདིང་བ་རྙིང་པ་ཆད་པ་ཞིག་སྟེ་སླར་སྦྱར་ན་སྤྱད་དུ་རུང་ན་སར་པ་བྱེད་པར་གནང་བ་མི་སྦྱིན་པར་ཆད་པ་འདི་ལྟར་སྦྱོར་ཏེ་ཚེམས་ལ་སྤྱོད་ཅིག་ཅེས་བསྒོ་ཤིག་གྱེས་སམ་སྲབ་ན་ཁ་བསྐང་ངོ༌། །གདིང་བ་རྙིང་པ་དེ་གྱེས་སམ་སྲབ་མོར་སོང་སྟེ་གླན་ནམ་སྤྱད་དུ་རུང་བ་ཙམ་གྱི་ཚོད་ནའང་སར་པ་བྱེད་པར་གནང་བ་མི་སྦྱིན་པར་རྙིང་པ་ལྷན་པས་གློན་ལ་སླར་སྦྱོར་དུ་ཆུག་ཤིག །དཀའ་བར་བྱེད་ན་སྦྱིན་ནོ། །གདིང་བ་རྙིང་པ་དེ་རྙིངས་ཆེས་ཏེ་གླན་ཀྱང་སྤྱད་དུ་མི་རུང་ན་སྟན་སར་པ་བྱེད་པར་དགེ་འདུན་གྱིས་གནང་བ་བྱིན་ཅིག །གནང་བ་མ་ཐོབ་ལ། དགེ་སློང་གིས་སྟན་ལོ་དྲུག་པ་སར་པ་ཞིག་བྱས་ན་དགེ་འདུན་ལམ་གསོལ་ཏམ་གསོལ་ཀྱང་གནང་བ་མ་ཐོབ་པ་དང༌། གཞན་ཡོད་དམ། སྟན་ལོ་དྲུག་པ་སྔ་མ་ཡོད་བཞིན་དུ་ཕྱི་མ་གསར་དུ་བྱས་པ་དང༌། བདག་གིས་འདོད་དེ་བཏང་ངམ་བདག་སྟན་སར་པ་འདོད་པའི་ཕྱིར་རྙིང་པ་གུད་དུ་བཏང་སྟེ་སར་པ་བྱས་པ་དང༌། ལོ་དྲུག་གི་རྒྱུད་མ་འདས་པར། གདིང་བ་
རྙིང་པ་ལོ་དྲུག་མ་ལོན་པར་སར་པ་བྱས་པ་དང༌། གདིང་བ་བྱེད་ནའོ། །ཡན་ལག་འདི་རྣམས་དང་ལྡན་པར་གདིང་བ་སར་པ་བྱས་ཏེ་ཟིན་ན་སྤང་བའི་ལྟུང་བར་འགྱུར་བའོ། །ཡོད་བཞིན་དུ་བརྩམས་ཤིང་བཤམས་ན་ཡང་ངོ༌། །སྟན་སར་པ་གཅིག་བྱ་བར་བརྩམས་ཤིང་བཤམས་ཏེ་མགོ་བཙུགས་པ་ལ་ཟིན་པར་ཕྱི་མ་གཅིག་ཀྱང་བྱ་བར་མགོ་བཙུགས་ཏེ་བཤམས་ན་ཉེས་སོ། །བཤམས་ཏེ་མཐར་བྱིན་ན་སྦྱོར་བ་མ་ལུས་ལྟུང་བ་ཡིན་ནོ། །མདོ་ལྟག་མ་ལྟར་སྟན་རྣམ་གཉིས་བྱ་བར་མགོ་བཙུགས་པ་ལས་སྔ་མ་ནི་མ་ཟིན་གྱི་ཕྱི་མ་ཟིན་ན་ཉེས་བྱས་སོ། །སྔ་མ་དང་གཉིས་ཟིན་ན་ལྟུང་བའོ། །སྤང་བ་ནི་ཕྱིས་མགོ་བཙུགས་ཤིང་བཤམས་པ་ལས་སྔར་ཟིན་པ་དེ་སྤང་ངོ༌། །རབ་ཏུ་འབྱུང་བ་གཞན་གྱིས་ཐ་དད་དོ། །སྔོན་དགེ་སློང་བྱེད་བྱེད་པ་ལས་སླར་ཁྲིམས་ཕུལ་བ་ལས་ཡང་སླར་ཁྲིམས་ནོས་ཏེ་གདིང་བ་སར་པ་བྱས་པ་ནི་སྔོན་དགེ་སློང་བྱེད་པའི་ཚེ་གདིང་བ་བྱས་སུ་ཟིན་ཀྱང་གདིང་བ་གཉིས་བྱས་པར་མི་བརྩིའོ། །ལོ་དྲུག་གི་སྤང་བའོ། །དྲུག་གི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།མཐོ་གང་གི་སྤང་བ་ལ་འཆད་དེ་གདིང་བ་རྙིང་པས་སར་པའི་གདིང་བ་ལ་བདེ་བར་གཤེགས་པའི་མཐོ་གང་མ་གླན་པར་སྤྱད་ནའོ། །བདག་གི་གདིང་བ་བསྔོས་པ་རྙིངས་ཏེ་སར་པ་བྱེད་ན་རྙིང་པ་དབུས་ནི་ཟད་ཅིང་རྟོལ་གྱིས་མཐའ་མཁོ་ར་ཁོར་ཡུག་ཏུ་མ་རྟོལ་བ་ལས་བདེ་བར་གཤེགས་པའི་མཐོ་གང་འཁོར་བར་དྲ་སྟེ་གྲུ་བཞིར་སྦྱར་ལ་སར་པ་སྲ་བར་བྱ་བའི་ཕྱིར་སར་པའི་དབུས་སུ་གློན་ཅིག །རྙིང་པ་ཡོད་བཞིན་དུ་སར་པ་བྱས་ཏེ་རྙིང་པའི་མཐའ་ལས་བདེ་བར་གཤེགས་པའི་མཐོ་གང་གིས་མ་གླན་པར་བྱས་ཏེ་སྤྱད་ན་སྤང་བའི་ལྟུང་བའོ། །དེ་སྟེ་ཡོད་ནའོ། །གདིང་བ་རྙིང་པ་ཡོད་ན་སར་པའི་དབུས་སུ་གླན་གྱི་རྙིང་པ་མེད་ན་མ་གླན་པ་སར་པ་བྱས་ཀྱང་ཉེས་མེད་དོ། །དེ་ཙམ་ན་ཡང་ངོ༌། །གདིང་བ་རྙིང་པ་ཡོད་ནི་ཡོད་དེ་མཐའ་ལས་བདེ་བར་གཤེགས་པའི་མཐོ་གང་དུ་མི་འབྱུང་ན་ཡང་ཅི་ཡོད་པ་དེས་གླན་ནོ། །བཅོས་ནུས་ན་ཡང་ངོ༌། །གདིང་བ་རྙིང་པ་རྙིངས་ཏེ་བཏང་ནས་བསྡུས་ཤིང་བཙེམས་ལ་བདེ་བར་གཤེགས་པའི་མཐོ་གང་འབྱུང་ན་འང་བསྡུས་ཤིང་བཙེམས་ལ་བདེ་བར་གཤེགས་
པའི་མཐོ་གང་དུ་ཁ་བསྐང་ལ། གདིང་བ་སར་པའི་དབུས་སུ་གླན། དུམ་བུ་བསྡུས་ཏེ་ཡང་ངོ༌། །གདིང་བ་རྙིང་པ་དུམ་བུར་སོ་སོར་བྲལ་བ་ཞིག་ན་ཡང་དུམ་བུ་ཀུན་མི་དོར་བསྡུས་པ་གཅིག་ལ་གཅིག་བཙེམས་ཏེ་སར་པའི་དབུས་སུ་གླན། མཐོ་གང་གི་སྤང་བའོ། །མཐོ་གང་གི་སྤང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ལམ་གྱི་སྤང་བ་ལ་འཆད་དེ། །ཁུར་ཙ་ཡོད་དམ་མེད་ཀྱང་དཔག་ཚད་གསུམ་ལས་འདས་པར་ལུག་བལ་ཁྱེར་ནའོ། །དགེ་སློང་གིས་བལ་ཞིག་རྙེད་དེ་ཁུར་ཙ་ཡོད་བཞིན་དུ་བདག་གིས་བླངས་ཏེ་ཁྱེར་ན་ཐོག་མ་ཁྱེར་བའི་ཚེ་ཉེས་བྱས། དཔག་ཚད་གསུམ་དང་རྒྱང་གྲགས་ཕྱེད་དུ་ཕྱིན་ནའང་ཉེས་བྱས་གཅིག །དཔག་ཚད་གསུམ་དང་རྒྱང་གྲགས་གཅིག་འདས་ན་སྤང་བའི་ལྟུང་བའོ། །ལམ་དུ་ཞུགས་ནས་རྒྱང་གྲགས་ཉིད་ཀྱིས་སོ། །ཁུར་ཙ་ཡོད་བཞིན་དུ་བལ་ཁྱེར་ན་དཔག་ཚད་གསུམ་དང་རྒྱང་གྲགས་གཅིག་འདས་པས་སྤང་བར་འགྱུར་རོ། །བུད་མེད་དང༌། དགེ་སློང་མ་དང་ལམ་དུ་འགྲོགས་པ་ཡང་རྒྱང་གྲགས་གཅིག་འདས་ན་ལྟུང་བའོ། །ཡང་ཡང་གིས་ལམ་དུས་ཀྱང་རྒྱང་གྲགས་གཅིག་འདས་ན་བཟར་དབང་ངོ། །ཕྱེད་ནི་སྦྱོར་བའི་འོ། །ཁུར་ཙ་ཡོད་བཞིན་དུ་བལ་དག་ཁྱེར་ཏེ་དཔག་ཚད་དང་རྒྱང་གྲགས་ཕྱེད་འདས་ན་ཉེས་བྱས་སོ། །བུད་མེད་དང་དགེ་སློང་མ་དང་ལམ་དུ་འགྲོགས་པ་ཡང་རྒྱང་གྲགས་ཕྱེད་དུ་འདས་ན་ཉེས་བྱས། ཉེས་བྱས་པ་ནི་རྫུ་འཕྲུལ་ལས་གཞན་གྱི་ཐབས་ཀྱིས་ནམ་མཁའ་ལས་བླངས་པའོ། །དགྲ་བཅོམ་པའི་འཕྲུལ་གྱིས་བལ་ཁྱེར་པ་ནི་མ་གཏོགས་ཏེ་འཇིག་རྟེན་གྱི་རྫུ་འཕྲུལ་གྱིས་བལ་ཁྱེར་བ་དང་སྒྱོགས་ལ་སོགས་པ་ལྟ་བུས་ནམ་མཁའ་ལ་འཕངས་ཏེ་བལ་ཁྱེར་བ་ནི་དཔག་ཚད་གསུམ་དང་རྒྱང་གྲགས་གཅིག་འདས་ན་ཉེས་བྱས་གཅིག །དེ་ཕན་ཆད་རྒྱང་གྲགས་རེ་རེ་འདས་ཤིང་ཉེས་བྱས་རེ་རེའོ། །སྤྲུལ་བས་ཀྱང་ངོ༌། །ཕྱུགས་དང་མི་ལ་སོགས་པ་ཞིག་གུད་དུ་སྤྲུལ་ཏེ་བལ་བསྐུར་བ་ནི་མདོ་ལྟག་མ་བཞིན་དུ་དཔག་ཚད་གསུམ་དང་རྒྱང་གྲགས་གཅིག་འདས་ན་ཉེས་བྱས། ཉེས་མེད་པ་ནི་ཞྭ་དང་ལྷམ་དང་རྡུ་ལ་གཟན་པར་ཚངས་ཅན་དང་
རྒྱ་ཅང་ལྕག་པོད་སྦུ་གུ་ཅན་ལ་སོགས་པ་དེ་ཙམ་དག་གོ །མིང་གིས་སྨོས་པ་འདི་རྣམས་ཀྱི་རྒྱུ་བལ་ཁྱེར་བ་ནི་ཉེས་མེད་དོ། །ཡང་རྡུལ་དང་རྡུལ་ཕྲན་དང་ཆུའི་དང་མེ་ལོང་གི་དང་རི་བོང་གི་དང་རའི་དང་བའི་དང་བུ་གུའི་དང་ཉི་ཟེར་གྱི་རྡུལ་དང་སྲོ་མ་དང་ཤིག་དང་ནས་དང་སོར་དག་སྟེ་སྔ་མ་དྲུག་ཅིང་ཕྱི་མའོ། །དཔག་ཚད་དང་རྒྱང་གྲགས་བརྩི་བའི་ཐབས་ནི་མིང་གིས་སྨོས་པ་འདི་རྣམས་ལས་བརྩིས་ཏེ་འདི་གོ་རིམས་བཞིན་དུ་སྔ་མ་དྲུག་ལ་ཕྱི་མ་གཅིག་ཏུ་བརྩིའོ། །སོར་བཞི་ཕྲག་དྲུག་ལ་ཁྲུའོ། །ནས་དྲུག་ལ་སོར་གཅིག་སོར་ཉི་ཤུ་རྩ་བཞི་ལ་ཁྲུ་གང་དུ་བརྩིའོ། །ཕྱེད་དང་བཞི་ལ་མིའོ། །ཁྲུ་དེ་ཕྱེད་དང་བཞི་ལ་མི་གང་དུ་བརྩིའོ། །ཁྲུ་བཞི་ལ་གཞུའོ། །ཁྲུ་དེ་བཞི་ལ་གཞུ་གང་གི་ཚད་དུ་བརྩིའོ། །དེ་ལྔ་བརྒྱ་ལ་རྒྱང་གྲགས་སོ། །གཞུ་དེ་ལྔ་བརྒྱ་ལ་རྒྱང་གྲགས་གཅིག་གི་ཚད་དུ་བརྩིའོ། །རྒྱང་གྲགས་བརྒྱད་ལ་དཔག་ཚད་གཅིག་ཏུ་བརྩིའོ། །དེའི་མཐའ་ཕན་ཆད་ནི་དགོན་པའོ། །དགོན་པར་བརྩི་བའི་ཚད་ནི་གཙུག་ལག་ཁང་ནས་རྒྱང་གྲགས་གཅིག་ཕན་ཆད་དོ། །ལུས་ཀྱིས་ཁུར་མི་བསྐུར། དགེ་སློང་གིས་སྲང་ཁུར་དང་རྒྱབ་ཁུར་ལ་སོགས་པ་ལུས་ཀྱིས་ཁུར་མི་བསྐུར། ལོགས་དང་རྒྱབ་དང་སྟ་ཟུར་དང་མགོ་ལས་ཀྱང་མ་ཡིན་ནོ། །ལུས་ཀྱི་ཡན་ལག་མིང་གིས་སྨོས་པ་འདི་རྣམས་གང་གིས་ཀྱང་ཁུར་མི་བསྐུར་རོ། །འདི་སྤྱིའི་མ་ཡིན་པར་མ་དོགས་ཤིག །དགེ་སློང་མས་ཀྱང་ཁུར་མི་བསྐུར་བ་འདི་བཞིན་དུ་བསྲུང་ངོ༌། །དགེ་སློང་མས་བསྲུང་ངོ་ཞེས་གློ་ཏོལ་དུ་བཤད་པ་ནི་མདོ་ཐམས་ཅད་སྤྱིའི་སེམས་ཡིན་མོད་ཀྱི་དགེ་སློང་བལ་ཁྱེར་བ་མེད་དེ་མ་གཏོགས་པས་བལ་གྱི་མཇུག་མ་ཁུར་མི་བསྐུར་ཞེས་འབྱུང་བ་ཡང་དགེ་སློང་མའི་ཁྲིམས་སུ་མ་གཏོགས་ཞེས་འཛིན་གྱིས་དོགས་པའི་ཕྱིར་སྨོས་སོ། །ཁུར་ཕྱེད་ལས་ལྷག་པར་མི་འདེགས། དགེ་སློང་ཁུར་ཞིག་ཁུར་དགོས་ན་བདག་གིས་ཅི་ཐེག་པ་ལས་ཕྱེད་མན་ཆད་ཁུར་ཁྱེར་དུ་དབང་ངོ༌། །ཁུར་ཕྱེད་ལ་སོགས་པ་སྟེ། ཁུར་གཅིག་ཏུ་མི་ཆུད་པའི་ཕྱིར་དབང་ངོ༌། །བལ་ཁྱེར་བའི་སྤང་པའོ། །བལ་གྱི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འཁྲུ་བ་ལ་འཆད་དེ།
གོས་རྙིང་པའི་གནས་སུ་ལུག་བལ་ལོ། །གཉེན་མ་ཡིན་པའི་དགེ་སློང་མ་ལ་གོས་རྙིང་པ་འཁྲུར་བཅོལ་ན་སྤང་བར་འགྱུར་བའི་ཡན་ལག་དང་བཤད་པ་བཞིན་དུ་ལུག་བལ་འཁྲུར་བཅོལ་བའང་དེ་དང་འདྲའོ། །འཆག་པ་རྨེལ་བའོ། །ལུག་བལ་རྨེལ་བ་དང་འཆག་པ་དང་འཁྲུ་བ་དང་འཚེད་པ་དང་འཁལ་བ་འདི་རྣམས་གང་ཡང་རུང་སྟེ་གཉེན་མ་ཡིན་པའི་ཁྱིམ་པ་ལ་བཅོལ་ན་ལྟུང་བ་སྟེ་གོས་རྙིང་པའི་ཡན་ལག་དང་བཤད་པའི་སྟེང་དུ་འདི་བསྣན་ཏེ་ཚང་ན་སྤང་བར་འགྱུར། བལ་གྱི་ལས་ཀྱི་སྤང་བའོ། །འཁྲུ་བའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།གསེར་གྱི་སྤང་བལ་འཆད་དེ། རིན་པོ་ཆེ་བདག་གིར་བྱས་པའོ། །གསེར་དངུལ་བདག་གི་ཡིན་པར་ཤེས་ཤིང་སེམས་པ་ལས་སྤང་བའི་ལྟུང་བར་འགྱུར་ཏེ་ཡན་ལག་གཅིག །མངོན་སུམ་དུ་དེར་རྫོགས་པའོ། །གསེར་དངུལ་བདག་གི་ཡིན་པར་ཤེས་ཏེ་མིག་སྔར་ཡང་མཐོང་བ་དང་ཡན་ལག་གཉིས། གསེར་དངུལ་མཐོང་སྟེ་བདག་གི་ཡིན་པར་བསམ་པའི་ཚེ་ན་ཉེས་བྱས་སོ། །བདག་གི་ནམ་བརྟགས་པའི་འོ། །གསེར་དངུལ་ཡོན་བདག་གི་ཕྱིར་བརྟགས་པ་འམ་བདག་བཅང་བར་སྔགས་ཀྱིས་མ་ཐེབས་པ་དང་ཡན་ལག་གསུམ། རེག་གམ་བདག་གི་ལག་གིས་བཟུང་ངམ། རེག་ཏུ་བཅུག་ནའོ། །གཞན་ལེན་དུ་བཅུག་ན་སྤང་བར་འགྱུར་ཏེ་ཡན་ལག་འདི་ལྔ་དང་ལྡན་ན་སྤང་བའི་ལྟུང་བར་འགྱུར་རོ། །ཇི་ལྟ་ཇི་ལྟ་བུ་ཡང་ངོ༌། །གསེར་དངུལ་ལ་བདག་གིས་སྣོད་ནས་བཟུང་ངམ་ཤིང་གིས་བླངས་སམ་ཐབས་ཇི་ལྟ་བུར་རེག་ཀྱང་ལྟུང༌། གཞན་ལ་ལོང་ཞེས་བྱས་སམ་བཅོལ་ཞེས་བྱས་སམ་ཁྱེར་ཞེས་བྱས་སམ་ཞོག་ཅིག་ཅེས་བྱས་སམ་ཐབས་ཅི་ལྟ་བུར་རེག་ཏུ་བཅུག་ཀྱང་ལྟུང་བར་འགྱུར་རོ། །ཟོང་གི་ཟངས་ལ་བྱས་ནས་ཉེས་བྱས་པའོ། །དོང་ཚེ་དང་པ་ནེ་ལྟ་བུ་ཟོང་དུ་སྤྱོད་པ་ལ་བདག་གིས་རེག་གམ་རེག་ཏུ་བཅུག་ན་འང་ཉེས་བྱས། དངུལ་ལམ་གསེར་དང་བསྲེས་པའི་ཟོང་སྟེ་གེ་དར་ལྟ་བུ་ལ་རེག་ན་ལྟུང་བའོ། །ལྟུང་བ་མེད་པ་ནི་གཞན་ལའོ། །ཟངས་ལ་པ་ནེ་ལྟ་བུར་ཟོང་དུ་མ་བྱས་པ་ཟངས་གཞན་ལ་རེག་པ་ནི་ཉེས་མེད་དོ། །རོ་ཉེས་དང་ཁར་བ་དང་ཚོན་
མོ་སྟེང་དང་ལྕགས་རྣམས་ཀྱང་ངོ༌། །མིང་གིས་སྨོས་པ་འདི་རྣམས་ལ་རེག་ནའང་ཉེས་མེད་དོ། །དགེ་ཚུལ་དག་གིས་ཀྱང་ངོ༌། །དགེ་སྦྱོང་ཕོ་མོས་ཀྱང་བདག་གི་གསེར་དངུལ་ལ་རེག་ཏུ་མི་དབང༌། སྦྱིན་བདག་བདག་པོར་བསྔོས་པ་དང་དོན་བསྒྲུབ་པ་བདག་པོར་ཁས་བླངས་པ་དང་བསྔོས་པ་ནི་བརྟགས་པའོ། །སྦྱིན་བདག་བདག་པོར་བསྔོས་པ་དང་ཞེས་པ་ནི་ཡོན་བདག་རྒྱལ་པོའམ་ཞང་བློན་ལྟ་བུའི་ཕྱིར་ཁོའི་ཡིན་པར་བསམས་ཏེ་ཁོའི་ཕྱིར་བསོད་ནམས་བསྐྱེད་པ་ལ་སོགས་པར་སྤྱད་པའི་ཕྱིར་བཅངས་པ་དང་རེག་པ་ནི་ཉེས་མེད་དོ། །བསྒྲུབ་པ་ནས་དང་ཞེས་པ་ཡིན་པར་དུ་ནི་ཁྱིམ་པ་ལ་བདག་གིས་ཡོན་བདག་ཆུང་དུར་བསྔོ་བའི་མི་ཞིག་ཡོད་ན་ཡང་དེའི་ཕྱིར་བསོད་ནམས་སྤེལ་བ་ལ་སོགས་པར་ཁོའི་ཡིན་པར་བསམས་ཤིང་རེག་པ་དང་བཅས་པ་ནི་ཉེས་མེད་དོ། །བསྔོས་པ་ནི་བརྟགས་པའོ་ཞེས་པ་ནི་བདག་གི་ཡོ་བྱད་བཅུ་གསུམ་ལྟ་བུ་མ་ཚང་བ་ཉོ་བའི་ཕྱིར་སྔགས་ཀྱིས་བཏབ་པ་ཡང་བཅངས་ཤིང་རེག་པ་ཉེས་མེད་དོ། །ཆོས་ཀྱི་དོན་གྱི་ཕྱིར་མེད་པ་ལས་གཞན་དུ་མི་སྐྱེ། བདག་གི་ཡོ་བྱད་བཅུ་གསུམ་ཡོད་བཞིན་དུ་ཡོ་བྱད་ཉོ་བའི་རིན་དུ་སྔགས་ཀྱིས་བཏབ་ཏེ་བཞག་པ་ནི་སྔགས་མི་འཆགས་ཏེ་སྤང་བའི་ལྟུང་བྱེད་འགྱུར་རོ། །དཀོན་མཆོག་གསུམ་གྱི་ཕྱིར་སྤྱད་པར་བརྟགས་ཏེ་བཞག་པ་ནི་ཉེས་མེད། བདག་པོ་རིམ་ཡང་ཞིག་པ་མ་ཡིན་ནོ། །སྦྱིན་བདག་ཆེ་ཆུང་དུ་བསྔོས་པ་ལམ་རིང་པོ་ཞིག་ན་འདུག་ན་ཡང་དེའི་ཕྱིར་སྤྱད་པར་བསམས་ཏེ་གསེར་དངུལ་ལ་རེག་པའང་ལམ་རིང་པོའི་ཕྱིར་སྦྱིན་བདག་ཏུ་མི་ཆུད་པ་མ་ཡིན་ཏེ་ཉེས་མེད་དོ། །བརྟགས་པ་ནི་བདག་གི་དོན་གྱི་ཕྱིར་བའི་ཟས་སོ། །བདག་ཁ་ཟས་དང་བརྒྱགས་ཀྱི་ཟོང་དུ་གསེར་དངུལ་ལ་སྔགས་ཀྱིས་བཏབ་སྟེ་བཅངས་པའང་ཉེས་མེད་དོ། །གཞན་ལ་ཟས་ཀྱི་ཕྱིར་ཚོང་བྱེད་དུ་བཅུག་གམ་རེག་ཏུ་བཅུག་ཀྱང་ཉེས་མེད་དོ། །དེ་བྱ་བར་བཅོལ་བའི་ཕྱིར་ཀཱར་ཥཱ་པ་ཎ་འཆང་བ་ཡང་ངོ༌། །བདག་གི་ཟས་དང་བརྒྱགས་ཟོང་དུ་གཞན་ལ་བསྒྱུར་བར་བཅོལ་བའི་ཕྱིར་ཀཱར་ཥཱ་པ་ཎ་བཅངས་པའང་ཉེས་མེད་དོ། །དགེ་འདུན་དང་གྲོགས་པོ་ལ་བཤོས་གསོལ་བའི་ཕྱིར་པ་ཎ་བཅངས་ཤིང་རེག་པ་དང་ཡོན་བདག་གི་བདག་གིས་ཟན་རིན་དུ་པ་ཎ་ཕོགས་པ་
བླངས་ཏེ་བཅངས་ཀྱང་ཉེས་མེད་དོ། །ལམ་ཟོང་དུ་ན་རིན་པོ་ཆེ་ཚུན་ཆད་བདག་གུད་དུ་ལམ་རིང་པོར་འགྲོ་སྟེ་བརྒྱགས་སུ་བསྐུར་མི་ཐེག་ན་བརྒྱགས་ཟོང་གསེར་དངུལ་དང་རིན་པོ་ཆེ་ཚུན་ཆད་ཁྱེར་ཞིང་རེག་ཀྱང་ཉེས་མེད་དོ། །མེའི་ཕྱིར་ཤེལ་སྒོང་ཆོངས་ཤིག ། དགེ་སློང་དགོན་པ་པ་མེད་དབྱུང་བའི་ཕྱིར་མེའི་ཤེལ་སྒོང་བཅངས་ཀྱང་ཉེས་མེད་དོ། །ཆག་མ་དང་མེ་ལོང་བཅངས་ཀྱང་ཉེས་མེད་དོ། །མེ་མི་ཕྱིན་པའི་ཤེལ་སྒོང་བཅངས་པ་ནི་ལྟུང་བར་འགྱུར། འདི་མི་དབེན་པར་མ་བཞག་ཅིག །མེའི་ཤེལ་སྒོང་མི་གཏོར་བར་བྱ་བའི་ཕྱིར་དབེན་པར་བཞག་ཅིང་གཞན་གྱིས་མ་མཐོང་བར་བྱ། མ་བྱིན་བར་ལེན་བ་ལ་མི་བསྟན། མེའི་ཤེལ་སྒོང་རྐུན་པོ་དང་མི་རྒོད་ལྟ་བུ་ལ་མི་བསྟན། འདི་ལས་འབྲས་བུ་འབྱུང་བ་ནི་སྦྱིན། མི་རྒོད་དམ་རྐུན་པོ་མེ་སློང་ན་ཤེལ་སྒོང་མ་མཐོང་བར་ལྐོག་ཏུ་ཕྱུང་ལ་མེ་སྦྱིན་ནོ། །ཆུའི་ཕྱིར་ནོར་བུ་ཙན་དྲ་ཀན་ཏའོ། །ཆུ་འབྱུང་ཞིང་སྤྱད་པའི་ཕྱིར་ཆུའི་ཤེལ་སྒོང་བཅངས་ཀྱང་ཉེས་མེད་དོ། །བསྲུང་བའི་ཆོ་ག་མཚུངས། ཆུའི་ཤེལ་སྦ་ཞིང་བསྲུང་བ་དང་ཆུ་དབྱུང་བ་གཞན་སློང་བ་སྦྱིན་པ་ནི་མེའི་ཤེལ་ལ་བཤད་པ་དང་འདྲའོ། །རིན་པོ་ཆེའི་ནང་དུ་མ་ཆུད་པ་ཡོ་བྱད་གནང་བའི་རྣམས་ཀྱང་ངོ༌། །དགེ་སློང་གིས་ཡོ་བྱད་དུ་འཆང་དུ་གནང་བའི་རྣམས་གསེར་དངུལ་དང་རིན་པོ་ཆེ་ལས་བྱས་ཏེ་མི་བཅང༌། གསེར་དངུལ་དང་རིན་པོ་ཆེ་མ་ཡིན་པའི་སྣོད་སྤྱད་ནི་བཅངས་ཀྱང་ཉེས་མེད་དོ། །འོག་ནས་འཆད་དོ། །ར་གན་དང་ཟངས་དང་ཁར་བ་དང་ཤིང་གི་ལྷུང་བཟེད་བདག་གིར་མི་བྱ། མིང་གིས་སྨོས་པ་འདི་རྣམས་ལས་སྣོད་སྤྱད་བྱས་ཏེ་བཅང་དུ་མི་གནང་ངོ༌། །བདག་གིར་བྱས་པ་འདི་འམ་གཞན་དག་ཀྱང་འོང་སྟེ་སྤྱད་ན་སྨན་དང་སྣོད་སྙམ་དུ་སྤྱད་དོ། །མདོ་ལྟག་མའི་ནང་ནས་མིང་གིས་སྨོས་པ་འདི་རྣམས་དང་སྣོད་སྤྱད་གཞན་ལས་བྱས་པ་ཞིག་མི་བཅང་དུ་འཕངས་སྟེ་མི་བདོག་ནའང་ཁ་ཟས་ནི་སྨན་ཡིན་སྣོད་སྤྱད་དེ་ནི་སྨན་གྱི་སྣོད་སྙམ་དུ་བསམས་ཏེ་བཅངས་ཀྱང་ཉེས་མེད། བསྔོས་པའི་གཉིས་ཏེ་ལྕགས་དང་སའིའོ། །དགེ་སློང་གིས་ཁ་ཕྱིས་སུ་བཅང་དུ་གནང་ཞིང་བརྟགས་པ་ནི་ལྕགས་དང་ཁམ་ས་གཉིས་ལྷུང་བཟེད་དུ་བྱས་ཏེ།
ཁ་དོག་བསྒྱུར་བའོ། །ནོར་བུ་དང༌། ནོར་བུར་བརྩི་འོ་ཅོག་ལ་བྱ། མུ་ཏིག་དང་བཻཌཱུཪྻ་དང༌། མཆིང་བུ་ལ་བྱ། མན་ཤེལ་དང་བྱུ་རུ་ཆེན་པོ་དང་དངུལ་དང་གསེར་དང་ཨསྨ་གར་བྷ་དང་མུ་ས་ལ་གར་བྷ་དང་ལོ་ཧི་ཏི་ཀ་དང་གཡས་ཕྱོགས་སུ་འཁྱིལ་པའི་རིན་པོ་ཆེ་ལ་སོགས་པའོ། །མིང་གིས་སྨོས་པའི་ནོར་བུ་དང་རིན་པོ་ཆེ་འདི་རྣམས་ལས་བདག་གིར་བྱས་ཤིང་རེག་གམ་རེག་ཏུ་བཅུག་ན་སྤང་བའི་ལྟུང་བར་འགྱུར་རོ། །འབྲི་བ་ནི་ཟོང་དུ་མ་ཡིན་པ་དག་ཀྱང་ངོ༌། །མདོ་ལྟག་མ་ལྟར་རིན་པོ་ཆེ་མིང་གིས་སྨོས་པ་ལ་མ་གཏོགས་པ་རིན་པོ་ཆེ་འམ་ནོར་བུའི་གཟུགས་སུ་ནི་འདུག་གི་ཟོང་དུ་ནི་མི་སྤྱོད་ཅིང་མི་བསྒྱུར་བ་ལ་རེག་ན་ཉེས་བྱས། དེ་མ་ཐག་པ་ཡང་ངོ༌། །དངུལ་དང་ཉོ་ཚང་གཉིས་ཀྱང་རིན་པོ་ཆེ་མིང་གིས་སྨོས་པ་འདི་རྣམས་ལས་ལྟུང་བར་འགྱུར་རོ། །ཆད་པ་དང་འབྲལ་བ་དང་དུམ་བུ་དང་ཚིག་པ་དང༌། ནོར་བུ་དང་རིན་པོ་ཆེ་ལས་མིང་གིས་སྨོས་པ་འདི་རྣམས་ལྟར་གྱུར་ཏེ་སྤྱད་དུ་མི་རུང་བ་ཞིག་ལ་རེག་ན་ཉེས་བྱས། སྔོན་མི་སྤྱོད་པ་དང་མཚན་མ་མ་བཏབ་པ་དང་ནོར་བུ་དང་རིན་པོ་ཆེ་དང་སྔོན་ཟོང་དུ་སྤྱོད་སྤྱོད་པ་ལས་ད་མི་སྤྱོད་པ་ཞིག་ལ་རེག་ན་ཉེས་བྱས། གཟུགས་བརྙན་ཡང་དེ་བཞིན་ནོ། །ཟོང་གི་པ་ནེའི་གཟུགས་འདྲ་བར་འདུག་པ་དང་ས་འམ་ཤིང་ལ་ཁ་དོག་གཞན་གྱིས་བསྒྱུར་ཏེ་གསེར་དངུལ་ལྟ་བུར་འདུག་པའི་ནོར་བུ་ལ་བྱ། གསེར་དང་དངུལ་གྱི་སྤང་བའོ། །གསེར་གྱི་སྤང་བའི་ལྟུང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།དངུལ་གྱི་སྤང་པ་ལ་འཆད་དེ། ལྟུང་བ་ནི་རྙེད་པར་འདོད་པའོ། །གསེར་དངུལ་དང་གོས་ཟས་ལ་སོགས་པ་ཁེ་སྦོགས་དང་བུན་དུ་གཏོང་ཞིང་ལྷག་འདོད་པའི་ཕྱིར་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག །ཕ་རོལ་གཉེན་མ་ཡིན་པའི་ཁྱིམ་པ་ན་རྩ་བའོ། །ཕ་རོལ་པོ་གཉེན་མ་ཡིན་པ་ལ་ཁྱིམ་པ་ཡང་ཡིན་པ་ལ་སོགས་བྱས་ན་ལྟུང་བར་འགྱུར་ཏེ་ཡན་ལག་གསུམ། སྤོགས་ཕྱིན་པ་ཡང་ངོ༌། །ཁེ་འདོད་དེ་གཉེན་མ་ཡིན་པའི་ཁྱིམ་པ་ལས་སྤོགས་ཀྱང་ཕྱིན་པ་དང༌། ཡན་ལག་བཞི་དང་ལྡན་ན་སྤང་བའི་ལྟུང་བར་འགྱུར། དེ་མ་ཐག་པ་ཡང་ངོ༌། །འོག་ནས་ཉོ་ཚོང་གི་སྤང་བའི་ལྟུང་
བ་འབྱུང་བ་ཡང་ཡན་ལག་འདི་བཞི་དང་ལྡན་ན་ལྟུང་བར་འགྱུར་རོ། །དོང་ཙེའམ་རིན་པོ་ཆེས་ཚོང་བྱས་ནའོ། །དོང་ཙེའམ་ནོར་རིན་པོ་ཆེ་ལ་སོགས་པ་ཅིའང་རུང་སྟེ་སྤོགས་བྱས་ནས་ཁེ་ཕྱིན་ན་སྤང་བའི་ལྟུང་བར་འགྱུར་རོ། །སྦྱོར་བ་ནི་གཅིག་གོ །སྤོགས་བྱེད་པར་སྦྱོར་ཞིང་རྩོམ་པ་ནི་ནོར་ལག་ཏུ་མ་ཐོབ་ཚུན་ཆད་ཉེས་བྱས་ཏེ་གཅིག་ཏུ་ཟད་དོ། །དཀོན་མཆོག་གི་ཕྱིར་བཤམས་པ་ནི་ཡོད་ན་ཀུན་དགའ་བའམ་དགེ་བསྙེན་ལས་ཡོད་ན་བཅོལ་ཏོ། །དཀོན་མཆོག་གི་ཕྱིར་བྱེད་ཅིང་སྤྱོད་ན་སྤོགས་ཕྱིན་ཀྱང་ཉེས་མེད་དེ། དགེ་བསྙེན་ཏམ་ཞལ་ཏ་པའམ་རྩེ་རྒོད་ཡིད་བརྟན་པ་ལ་བཅོལ་ཏེ་ཚོང་དང་སྤོགས་བྱེད་དུ་གཞུག་གོ །གཏའ་ཉི་རིམ་བླངས་ཏེའོ། དཀོན་མཆོག་གི་ཕྱིར་ནོར་རྫས་སྤོགས་ཀྱི་ཕྱིར་བཏང་བ་དེ་ཅི་རི་བ་གཏའ་ཉི་རིམ་བླངས་ལ་སྦྱིན་ནོ། །དཔང་དང་མདོ་ལྟག་མ་ལྟར་སྤོགས་སུ་བཏང་བ་དེ་དཔང་བཙུགས་ལ། ལོ་དང་ལོ་ཚིགས་སྨོས་ཏེ། ཟླ་བ་དང་ཟླ་བའི་དུས་བཟུང་ལ། །ཞག་དང་ཆེས་གྲངས་བརྩི་སྟེ། །དགེ་འདུན་གྱི་གནས་བརྟན་དང་གཙུག་ལག་ཁང་གང་ཡིན་པ་མིང་གིས་སྨོས་ནས་གཙུག་ལག་ཁང་འདི་གནས་བརྟན་མིང་འདིའོ་ཞེས་བྱ་བ་དང༌། གཙུག་ལག་ཁང་སྐྱོང་དང་དགེ་འདུན་གྱི་གཙུག་ལག་ཁང་སྐྱོང་གང་ཡིན་པའི་མིང་ཡང་སྨོས་ཏེ། ལེན་པ་དང༌། མི་སུ་ལ་སྦོགས་སུ་གཏང་བའི་སྡེ་ཆ་དང་མིང་རུས་བཟུང་ལ། ནོར་དང་ནོར་སྤྱི་དང་ཅི་ཁྱེར་བའི་གྲངས་དང་སྤུ་རྟགས་སྨོས་ཏེ། སྤོགས་རྣམས་སླར་སྤོགས་ཇི་ཙམ་དབུལ་བའི་གཏན་ཚིགས་བཟུང་ལ། ལེབ་མ་ལ་བསླན། ཤོག་ཤོག་ལ་བྲིས་ཏེ་ཆགས་རྒྱ་དང་དཔང་ཡིག་བཟུང་སྟེ་བཞག །འདི་དག་ལ་ཆུད་པར་བྱོས་ཤིག །མདོ་ལྟག་མ་ལྟར་དགེ་འདུན་སྔ་མ་རྣམས་ཀྱིས་ནོར་སྤོགས་སུ་བཏང་བ་ལས་དགེ་འདུན་སྔ་མ་བཞིན་དུ་འདོད་ན་ཕྱི་མ་རྒྱུས་མ་ཤེས་པ་རྣམས་ལ་མི་འདི་ལ་ནོར་འདི་སྙེད་ཅིག་སྤོགས་སུ་བཏང་སྟེ་ཆགས་རྒྱ་འདི་ཡིན་གྱིས་ངོས་ཤིག་ཅེས་བསྟན། དངུལ་འཚོང་བའི་སྤང་བའོ། །དངུལ་འཚོང་བའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འདི་ནི་གཞི་གཅིག་ན་འདུག་ཅིང་བུན་དང་བདེ་དང་སྐྱེད་དུ་གཏང་བ་ལ་བྱའོ། །ཉོ་
འཚོང་ལ་འཆད་དེ་གཞན་གྱི་གསེར་དངུལ་འབའ་ཞིག་ཏུ་མ་ཟད་ཀྱི་ནོར་ཟས་དང་ཕྱུགས་ཟན་དང་མི་ལ་སོགས་པ་ཡུལ་གཞན་དུ་ལམ་རིང་པོར་ཚོང་སྤོགས་བྱེད་ན་སྤང་བར་འགྱུར། དགེ་འདུན་གྱི་ཟས་ཀྱི་ཕྱིར་རིན་གྱིས་ཉོན་དགེ་འདུན་གྱིས་ལམ་སྦྱིན། ཁྱིམ་པའམ་དགེ་བསྙེན་ཞིག་གིས་དགེ་འདུན་བཤོས་གསོལ་བའི་ཕྱིར་རིན་དུ་ཕུལ་ཏེ་ཟན་གྱི་རྒྱུ་སྦྱར་དུ་གསོལ་ཞེས་ཟེར་ན་བདག་ཅག་གིས་གཙུག་ལག་ཁང་གི་དགེ་འདུན་ཡང་རུང་དགེ་འདུན་གཞན་གྱི་ཕྱིར་ཡང་རུང་རིན་བླངས་ལ་ཟན་གྱི་རྒྱུ་སྦྱར་རོ། །འོན་ཏེ་དེ་ཉིད་དུ་ན་བྱེ་བྲག་ཡོད་པར་རོ། །མདོ་ལྟག་མ་ལྟར་དགེ་འདུན་གཞན་ཞིག་གི་ཕྱིར་ཟན་སྦྱིན་པར་རིན་ཕུལ་བ་ནི་ཅི་རི་བ་ཙམ་གྱི་རྒྱུ་སྦྱིན་ནོ། །བདག་ཅག་གིས་དགེ་འདུན་ཟན་སྦྱིན་པར་རྒྱུ་ཕུལ་བ་ནི་བྱེ་བྲག་ཡོད་པར་རིན་ལས་ལྷག་པར་ཟས་ཀྱི་རྒྱུ་ཕྱུང་སྟེ་མཆོད་སྟོན་རྒྱས་པར་བྱའོ། །ཉོའོ་ཟད་ན་དགེ་འདུན་གྱིས་སོ། །དགེ་འདུན་གྱི་བཤོས་ནར་མའི་རྒྱུ་ཟད་དམ་ཆད་པར་གྱུར་པའི་ཚེ་དགེ་འདུན་གྱི་དཀོར་གསེར་དངུལ་ལམ་ཡོན་བདག་གཅིག་གིས་ཡོན་དུ་འཕུལ་བ་ཞིག་ཡོད་ན་ལས་པའི་དགེ་སློང་གིས་བཙོངས་ཤིང་སྤྱད་ཀྱང་ཉེས་མེད་དོ། །སར་པ་ཡང་ངོ༌། །མདོ་ལྟག་མ་ལྟར་དགེ་འདུན་གྱི་བཤོས་ཀྱི་རྒྱུ་ཉོ་བ་ནི་སྟོན་ཉོས་ན་རིན་ཆུང་བ་དང་སྲོག་ཆགས་མེད་པའི་ཕྱིར་རོ། །འོན་ཏེ་རྙིང་པ་སྲོག་ཆགས་མེད་ན་བཙོང༌། དགེ་འདུན་གྱི་ནས་འབྲས་གསང་གསར་ཚོགས་ཆེ་ཞིང་བཤོས་ཐུབ་པར་གྱུར་ན་སྙིང་ནད་དུ་འགྱུར་ཞིང་སྲོག་ཆགས་འཇུག་པ་དང་རུལ་བར་འགྱུར་པའི་ཕྱིར་བཙོངས་ཀྱང་ཉེས་མེད་དོ། །རིན་མི་གདབ། དགེ་སློང་གི་ཕ་རོལ་ཚོང་བྱེད་པའི་གཟུ་པོ་དང་རིན་ཐང་མི་བཅད། དེ་ལྟར་བྱས་ན་ཉེས་བྱས། ཁྱིམ་པ་སྤྱོད་པའི་ནང་དུ་ལག་པ་མི་གཞུག །དགེ་སློང་གིས་ཁྱིམ་པའི་སོ་ནམ་དང་སྤྱོད་དོ་ཅོག་གི་ནང་དུ་གཏོགས་འདོད་མི་བྱ་བ་དང་ཕ་རོལ་ཚོང་བྱེད་པ་ལ་ད་ཉོས་ཚུར་ཁྱེར་ཤིག་ཅེས་ཁ་བརྔམ་མི་བྱ་བྱས་ན་ཉེས་བྱས། ཁྱིམ་པ་ལས་ཉོར་གཞུག །དགེ་སློང་གིས་ཆོས་ཀྱི་དོན་དུ་བྱ་བའི་ཕྱིར་ཡོ་བྱད་ཅིག་ཉོས་ན་དགེ་བསྙེན་དད་པའམ་ཁྱིམ་པ་བརྟན་པོ་ལ་བཅོལ་ཀྱང་ཉེས་མེད་དོ། །མ་གྲུབ་ན་དགེ་བསྙེན་ཏམ་ཁྱིམ་པ་ཚོང་བྱེད་པ་མེད་དམ་མ་ནུས་ན།
ལན་གསུམ་གྱི་བར་དུ་ཚིག་བརྗོད། ནོར་བདག་གིས་ནོར་མི་རི་བ་ལ་རིན་ཆེར་བཏབ་ན་དགེ་སློང་གིས་ཅི་རི་བ་བཤོར་ཏེ་ལན་གསུམ་དུ་དད་པ་དྲིས་ཏེ་ཕ་རོལ་དད་ན་ཚོང་བྱས་ཀྱང་ཉེས་མེད་དཀོན་མཆོག་གསུམ་མ་གཏོགས་པར། དགེ་སློང་གིས་དཀོན་མཆོག་གསུམ་གྱི་ཡོ་བྱད་དུ་བྱ་བའི་ཕྱིར་ཚོང་དང་ཁེ་སྤོགས་ཕྱུང་བ་ནི་ཉེས་མེད། གཞན་ཞིག་དཀོན་མཆོག་གསུམ་གྱི་ཡོ་བྱད་དུ་ཚོང་བྱེད་པ་ལ་བདག་གིས་མགོན་བྱས་ཏེ་ཟེར་གྱིས་མཐོང་བའམ་རྒྱལ་བར་བྱས་ཀྱང་ཉེས་མེད། ཕ་རོལ་གྱི་ཕྱིར་དག་ཀྱང་སྐྱེད་བྲི་མི་བྱ། དཀོན་མཆོག་གསུམ་ནི་མ་གཏོགས་བདག་དང་གཞན་གྱི་ཕྱིར་ཚོང་བྱེད་ན་བདག་རྒྱལ་བའམ་ཕ་རོལ་ཕམ་པར་མི་བྱ་སྟེ་མཉམ་པར་བྱ། སྐུགས་མི་གཟུགས། དགེ་སློང་གིས་གདེང་མེད་པར་རྒྱལ་འགྱེད་ཅིང་སྐུགས་བཙུགས་ཏེ་ནོར་ཐོབ་ཀྱང་ཉེས་བྱས་ཤེས་བཞིན་དུ་སྐུགས་བཙུགས་ཏེ་ནོར་ཐོབ་ན་ཕམ་པའི་སྦོམ་པའོ། དགེ་འདུན་གྱིས་དེའི་ཕྱིར་དགེ་འདུན་གྱི་ལས་བྱེད་པས་སྦྱིན། དགེ་འདུན་གྱི་དཀོར་གསེར་དངུལ་ལམ་ནས་འབྲས་ལྟ་བུ་ཞིག་ལས་སྤོགས་བྱེད་ན་པར་ཆད་དུ་འགྱུར་བའི་ཕྱིར་དགེ་འདུན་ཀུན་འདུ་མི་དགོས་ཀྱིས་གསོལ་བ་དང་ཞུ་བའི་ལས་ཀྱིས་བསྒོས་པའི་དཀོར་བས་གར་རིགས་པར་ཚོང་བྱས་ཀྱང་ཉེས་མེད། རྒན་པོ་རྒན་པོ་ལམ་དྲིས་པར་དགེ་འདུན་གྱི་ཕྱིར་བ་མི་བཙལ། མདོ་ལྟག་མ་ལྟར་ཚོང་སྤོགས་བྱ་བ་དགེ་འདུན་གྱི་ལས་ཅི་ཡང་རུང་ཏེ་ལས་བྱས་པའི་དགེ་སློང་གིས་གནས་བརྟན་གསུམ་བཞི་ཡན་ཆད་ལམ་དྲིས་པར་ལས་མི་བྱ། ལེབ་མ་ལ་བྲིས་ཏེ་འགྲུབ་པར་དེ་ལ་ནན་ཏན་བྱ། དགེ་འདུན་གྱི་དཀོར་ལས་དཀོར་བས་ཁེ་སྦོགས་སུ་བཏང་བའི་རྣམས་ཁུངས་སུབས་པར་མི་འགྱུར་བ་དང༌། བདག་དཀོར་པ་ལས་འབྱུང་བའི་ཚེ་བདག་ལ་སྐྱོན་མེད་ཅིང་གཙང་མར་བྱ་བ་དང་སྣོད་གང་བརྩིར་རུང་བའི་ཕྱིར་ཤོག་ཤོག་ལ་བྲིས་ཏེ་གཞག །ཉོ་ཚོང་གི་སྤང་བའོ།། ཉོ་ཚོང་གི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྤང་བའི་ལྟུང་བ་བཅུ་ཕུང་གཉིས་རྫོགས་སོ།། །།ལྷུང་བཟེད་ལ་འཆད་དེ། ལྷུང་བཟེད་ལས་སོ། །དངོས་པོ་ལྷུང་བཟེད་ཀྱང་ཡིན་ལ་ཞག་བཅུ་ལས་འདས་ན་སྤང་བའི་ལྷུང་བར་འགྱུར་བ་དང༌། མ་
བསྔོས་པ་ལས་སོ། །ལྷུང་བཟེད་བསྔོ་བའི་སྔགས་ཀྱིས་མ་ཐེབས་པ་དང་ཞག་བཅུ་འདས་པ་ལས་སྤང་བའི་ལྟུང་བར་འགྱུར་ཏེ་སྐྱ་རེངས་དང་རྩིས་མགོ་ནི་གོང་དུ་གོས་ཞག་བཅུ་འདས་ནས་སྤང་བའི་ལྟུང་བར་འགྱུར་བ་དང་འདྲ། སྤང་སྟེ་རབ་ཏུ་འབྱུང་བར་འདོད་པ་ལ་ཐོབ་པར་བྱ། དགེ་བསྙེན་ཏམ་རབ་ཏུ་འབྱུང་བར་འོང་བ་ལ་སྦྱིན་ནོ་ཞེས་བསྔོས་པའི་ལྷུང་བཟེད་ནི་ཞག་བཅུ་ལས་འདས་པར་བཅངས་ཀྱང་ཉེས་མེད་དོ། །དེ་ལྟར་སྦྱིན་པར་བསྔོས་པ་ལས་ཕྱིས་མི་སྦྱིན་དུ་མི་རུང་ངོ༌། །མ་བརྟགས་པ་ནི། ལྷུང་བཟེད་བསྔོར་མི་རུང་ཞིང་སྔགས་མི་འཆགས་པ་ནི་མིང་གིས་སྨོས་པ་འདི་རྣམས་ཏེ། སྲེ་བོ་དང་ཚོན་ར་རིར་འདུག་པ་དང༌། དཀར་པོ་དང་དཀར་པོ་ཉིད་དུ་འདུག་པ་དང༌། ལྷག་པ་ལྷུང་བཟེད་ཆེན་པོའི་ཚད་ལས་འདས་པ་དང༌། རྣམས་ཀྱང་ངོ༌། །འདི་རྣམས་ལྟ་བུ་ཅིག་ཞག་བཅུ་འདས་པར་བཅངས་ནའང་སྤང་བའི་ལྟུང་བར་མི་འགྱུར་ཏེ་ཉེས་བྱས། འབྲི་བ་ནི་རྗེན་པ་ཡང་ངོ༌། །ལྷུང་བཟེད་སར་བརྩིས་མ་བསྐུས་པ་བསྐུས་ཀྱང་ལྷུང་བཟེད་ཆུང་དུའི་ཚད་དུའང་མ་ཐུབ་པ་ནི་སྔགས་མི་འཆགས་ཏེ། ཞག་བཅུ་འདས་ན་ཉེས་བྱས། ཉེས་མེད་པ་ནི་ལྷུང་བཟེད་ཆུང་དུ་གཅིག་གོ །ཀུ་པ་ཏྲ་ལྟ་བུ་ཆུང་དུ་ཞིག་བསོས་པའི་ལྷུང་བཟེད་ལས་ལྷག་པར་བཅངས་ཀྱང་ཉེས་མེད། ལྷུང་བཟེད་འཆང་བའི་སྤང་བའོ། །ལྷུང་བཟེད་འཆང་བའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འདི་མན་ཆད་ལྷུང་བཟེད་འོག་མ་ལ་འཆད་དེ། རབ་ཏུ་འདོད་པར་མི་བྱ། དགེ་སློང་གིས་གཞན་གྱི་ནོར་རྫས་བཟང་པོ་ལ་འདོད་ཅིང་ཆགས་པར་མི་བསམ། ཡོ་བྱད་ལ་ཆགས་པར་མི་བྱ། བདག་གི་ཡོ་བྱད་མིང་གིས་སྨོས་པ་བཅུ་གསུམ་ལྟ་བུ་ལ་སོགས་པ་ལ་ཆགས་པར་མི་བྱ། གང་ལ་ཞེན་པ་དེ་མི་བཅང་སྔོན་དགེ་སློང་ཅིག་བདག་གི་ལྷུང་བཟེད་ལ་ཆགས་ཏེ་ཤི་ནས་ལྷུང་བཟེད་ཀྱི་ནང་གི་སྦྲུལ་གདུག་པར་སྐྱེས་པ་ལས་བཅས་ཏེ་བདག་གི་ཡོ་བྱད་གཅིག་ལ་ཆགས་ན་གང་ལ་ཆགས་པའི་དངོས་པོ་དེ་གཞན་ལ་གཏན་སྤང༌། ལྷུང་བཟེད་ཀྱང་མེད་ན་བསླང༌། མདོ་ལྟག་མ་ལྟར་བདག་ལ་ཡོ་བྱད་བཅུ་གསུམ་མེད་ན་སློང་དུ་དབང་བ་བཞིན་དུ་ལྷུང་བཟེད་
ཀྱང་མེད་ན་བསླངས་ཀྱང་ཉེས་མེད། དེ་ཡོད་པ་ལའོ། །ལྷུང་བཟེད་བསྔོས་པ་བདག་ལ་ཡོད་བཞིན་དུ་གཞན་བསླངས་ཏེ་རྙེད་ན་སྤང་བར་འགྱུར་ཏེ་ཡན་ལག་གཅིག །ལྷན་པ་བཞི་ཚུན་ཆད་དེར་གདབ་པའི། ལྷུང་བཟེད་སྔ་མ་བསྔོས་ཤིང་ཡོད་པ་ལྷན་པ་བཞི་ཚུན་ཆད་བཏབ་སྟེ་སྤྱད་དུ་བཟོད་པ་ལས་ལྷུང་བཟེད་གཞན་ཞིག་བདག་གིས་བཙལ་ཏེ་རྙེད་ན་སྤང་བར་འགྱུར། རིགས་སྤྱད་དུ་བཟོད་ནའོ། །གོང་མ་ལྟར་སྤྱད་དུ་བཟོད་པ་ཞིག་ན་ལྷན་པ་བཞི་ཚུན་ཆད་པ་ཡོད་བཞིན་དུ་གཞན་བཙལ་ན་སྤང་བར་འགྱུར། ལྷན་པ་གཅིག་ཡོད་ལ་སྤྱད་དུ་མི་བཟོད་ན་གཞན་བཙལ་ཀྱང་ཉེས་མེད་དེ་ཡན་ལག་གཉིས། ཁྱིམ་པ་ཁྱིམ་པའང་ཡིན་པ་དང་ཡན་ལག་གསུམ་གཉེན་ཀྱང་མ་ཡིན་པ་དང་ཡན་ལག་བཞི་ཚོལ་ཞིང་སློང་ནའོ། །མིང་གིས་སྨོས་པའི་ཡན་ལག་འདི་བཞི་དང་ལྡན་པར་ཕ་རོལ་ལས་བཙལ་ཞིང་བསླངས་ཏེ་ལག་ཏུ་ཐོབ་ན་སྤང་བའི་ལྟུང་བར་འགྱུར་རོ། །འོག་མ་དེ་གཉིས་ཀྱང་དེ་བཞིན་ནོ། །འོག་ནས་འཐག་པའི་སྤང་བ་འབྱུང་བ་གཉིས་ཀྱི་རྩིས་མགོ་ཡང་གཉེན་མ་ཡིན་པའི་ཁྱིམ་པ་ལ་བསླངས་ན་སྤང་བའི་ལྟུང་བར་འགྱུར་ཏེ་ལྷུང་བཟེད་ཀྱི་རྩིས་མགོ་དང་འདྲའོ། །འཐག་པ་དང་སྦྱིན་བདག་དང་གཞན་ནོ། །ཐགས་འཐག་པའི་ཐག་མའང་ཁྱིམ་པ་སྦྱིན་བདག་རྒྱུ་སྦྱོར་བའང་ཁྱིམ་པ་སྟེ་དེ་གཉིས་ཀའང་གཉེན་མ་ཡིན་པ་ལས་བསླངས་ཤིང་ཐོབ་ན་སྤང་བའི་ལྟུང་བར་འགྱུར། གཅིག་གཉེན་ཡིན་ན་ཉེས་བྱས་སུ་འགྱུར། ཉེས་མེད་པ་ནི་གཉེན་མ་ཡིན་པ་ལས་ཕ་གཉེན་ལས་ན་ཁེ་དང་ལྷུང་བཟེད་མ་གཏོགས་ཏེའོ། །དགེ་སློང་གིས་གཉེན་ཡིན་པ་ལ་བསླད་དུ་རུང་བ་གཞན་ནི་གཉེན་ལས་བསླངས་ཀྱང་ཉེས་མེད། བདག་ལ་ལྷུང་བཟེད་བསྔོས་པ་བདོག་བཞིན་དུ་སློང་བ་དང་གཉེན་ལ་ལྟག་ཏུ་ཉོ་ཚོང་རྣམ་པ་གཉིས་བཤད་པ་ཁེ་འདོད་པའི་ཕྱིར་ཚོང་བྱས་ན་ཉེས་བྱས་སུ་འགྱུར། ཉེས་བྱས་བས་བདག་ལྷུང་བཟེད་བསྔོས་པ་ཡོད་བཞིན་དུ་གཞན་ལ་སློང་ཞིང་ཚོལ་བའི་ཚེ་ཉེས་བྱས། དེ་ལས་གྲུབ་ན་རྩ་བའོ། །བསྔོས་པའི་ལྷུང་བཟེད་ཡོད་བཞིན་དུ་བསླངས་པ་ལག་ཏུ་ཐོབ་ན་སྤང་བར་འགྱུར། ཡོད་པར་སེམས་ལ་མེད་ན་འབྲི་བའོ། །ལྷུང་བཟེད་བསྔོས་པ་ཡོད་དེ་ལྷག་
བར་གཅིག་བསླངས་པ་ལས་ལྷུང་བཟེད་སྔ་མ་བྲང་ནས་རྐུན་པོས་ཁྱེར་ན་ཕྱི་མ་ལག་ཏུ་ཐོབ་པའི་ཚེ་ཉེས་བྱས། བདག་ལ་ལྷུང་བཟེད་བསྔོས་པ་མེད་པར་ཡོད་དོ་སྙམ་དུ་བསམས་ཏེ་གཞན་ལས་བསླངས་ཏེ་ལག་ཏུ་ཐོབ་ནའང་ཉེས་བྱས། བདག་གི་ཡོ་བྱད་དུའོ། །བདག་གི་ལྷུང་བཟེད་དངོས་པོ་ཡོད་བཞིན་དུ་བདག་ནི་ནོར་རྫས་ཀྱིས་ལྷུང་བཟེད་ལྷག་པ་གཅིག་ཉོས་ནའང་མ་བསྔོས་པར་ཞག་བཅུ་འདས་ན་ཉེས་བྱས། དེ་དག་ཡོད་བཞིན་ནོ། །བདག་ལ་ལྷུང་བཟེད་ཉོ་བའི་ཟོང་ཡོད་བཞིན་དུ་གཉེན་མ་ཡིན་པ་ལས་བསླངས་ཏེ་ལྷུང་བཟེད་ལག་ཏུ་ཐོབ་ན་ཉེས་བྱས། རྣམ་པ་གཅིག་ཏུ་བདག་གི་ལྷུང་བཟེད་ཡོད་བཞིན་དུ་གཉེན་མ་ཡིན་པ་ལས་བསླངས་ཏེ་བདག་གི་ལག་ཏུ་མ་བླངས་བར་ཕ་རོལ་ལ་བཞག་ན་ཉེས་བྱས་བཟང་པོ་འདོད་བར་བརྗེ་ནའོ། །བདག་གི་ལྷུང་བཟེད་དང་ཡོ་བྱད་ཕ་རོལ་གྱི་བཟང་པོ་ལ་དད་དེ་བརྗེ་ན་ཉེས་བྱས། དགེ་འདུན་ལ་སྤང་ངོ༌། །ལྟག་ཏུ་གོས་ལ་སོགས་པའི་སྤང་བ་ནི་ཞག་གཅིག་གིས་འཆད་དེ་དགེ་སློང་གཅིག་ལ་སྤང་སྟེ་སླར་འོང་བ་ལྟ་བུ་མ་ཡིན་གྱི་ལྷུང་བཟེད་སྤང་བར་འགྱུར་བ་ནི་དགེ་འདུན་ལ་སྤངས་ཏེ་ཐབས་ནི་འོག་ནས་འཆད། དུ་མ་ན་གཅིག་ལ་བསམ་པ་དེའོ། །བདག་གི་ལྷུང་བཟེད་བསྔོས་པ་ཡོད་བཞིན་དུ་ལྷུང་བཟེད་དྲུག་བདུན་ཙམ་ལྷག་པར་བསླངས་ན་དེའི་ནང་ནས་གང་བཟང་བ་གཅིག་དགེ་འདུན་ལ་སྤང་ངོ༌། །གཞན་ཡང་སྤང་ངོ༌། །ལྷུང་བཟེད་བཟང་པོ་གཅིག་གོང་མ་ལྟར་དགེ་འདུན་ལ་སྤངས་པས་མི་ཆོག་གི་བསྔོས་པ་གཅིག་བཞག་ལ་གཞན་དུ་ཡོད་པ་གྲོགས་ལྷུང་བཟེད་མེད་པ་ལ་བྱིན་ཏེ་གཏན་སྤང་ངོ༌། །འདི་རབ་ཏུ་འབྱུང་བ་ལའོ། །མདོ་ལྟག་མ་ལྟར་ལྷུང་བཟེད་སྤང་བ་ནི་མུར་འདུག་གི་ཚུལ་དུ་རབ་ཏུ་བྱུང་བ་ལ་སྤང་བ་མ་ཡིན་གྱི་སངས་རྒྱས་ཀྱི་ཚུལ་དུ་རབ་ཏུ་འབྱུང་བ་ལ་ལྷུང་བཟེད་གཞན་སྤང་ངོ༌། ངན་པ་འདི་ལ་སྦྱིན་ནོ། །དགེ་འདུན་གྱི་ནང་ན་ཐ་མར་གྱུར་པའི་ལྷུང་བཟེད་དེ་སྤང་པར་འགྱུར་བའི་དགེ་སློང་ལ་སྦྱིན། བྲིམས་ཏེ་བླང༌། ལྷུང་བཟེད་ལྟུང་བར་གྱུར་པ་དེ་བསྐོས་པའི་དགེ་སློང་གིས་གནས་བརྟན་མན་ཆད་ལ་སུ་བཞེད་པ་བཞེས་ཤིག་ཅེས་བྲིམས་ཏེ་བྲིམ་པའི་ཐབས་འོག་ནས་འཆད། བསྐོས་པས་སོ། །ལྷུང་བཟེད་འདྲིམ་པའི་
དགེ་སློང་ཞག་གཅིག་གི་སྔོན་ལོགས་སུ་དགེ་འདུན་གྱི་གསོལ་བ་དང་ཞུ་བའི་ལས་ཀྱིས་བསྐོའོ། །སང་དགེ་འདུན་འདུས་ཤིང་བྱ་ན་དེས་འདི་བརྗོད་དོ། །དགེ་འདུན་གྱིས་ལས་སུ་བསྐོས་བའི་དགེ་སློང་དེས་དགེ་འདུན་རྣམས་ལ་སང་བདག་གིས་ལྷུང་བཟེད་འདྲིམ་གྱིས་དགེ་འདུན་ཐམས་ཅད་འདུས་ཤིག་ཅེས་མདོ་འོག་ནས་འབྱུང་བ་སྐད་དུ་བསྒོ་ཞིང་བསྙད། སང་བདག་གིས་ཚེ་དང་ལྡན་པ་ལྷུང་བཟེད་པ་མེད་པ་བྲིམ་གྱིས་ཁྱེད་རྣམས་བདག་བདག་གི་ལྷུང་བཟེད་ཐོགས་ཏེ་དགེ་འདུན་གྱི་ནང་དུ་ཤིག་ཅེས་སོ། །ལས་སུ་བསྐོས་པའི་དགེ་སློང་གིས་ཞག་གཅིག་གི་སྔོན་ལོགས་སུ་དགེ་འདུན་རྣམས་འདུས་ཤིག་བར་ཚིག་འདི་རྣམས་གུས་པར་བྱས་ཏེ་བརྗོད། འཁོད་པའི་ཕྱིར་ནན་ཏན་བྱ། ལྷུང་བཟེད་འདྲིམ་པའི་དགེ་འདུན་འདུ་བའི་སར་ལས་པའི་དགེ་སློང་གིས་བསྟན་གདིང་བ་དང་མཎྜལ་དང་བྱི་དོར་ལ་སོགས་པ་བྱ་ཞིང་གཎྜཱི་བརྡུང་ངོ༌།། འདོད་པ་བསྐྱེད་པར་བརྩམས་ནས་འབུལ། ལས་པའི་དགེ་སློང་དེས་སྤང་བའི་ལྟུང་བ་བྱུང་བ་དགེ་འདུན་གྱི་འདབ་ཏུ་ཐལ་མོ་སྦྱར་ཏེ་བཞག་ལ་ལྷུང་བཟེད་འདི་སུ་བཞེད་ཅེས་མདོ་འོག་ནས་འབྱུང་བའི་ཚིག་སྐད་དུ་དགེ་འདུན་ལ་དད་པར་བྱ་ཞིང་བསྟན་ཏོ། །ཀྱེ་གནས་བརྟན་ལྷུང་བཟེད་འདི་ལས་པའི་དགེ་སློང་གིས་ལྷུང་བཟེད་འདྲིམ་པའི་ཚེ་གནས་བརྟན་ནས་མགོ་བཟུང་སྟེ་འཇུག་ཏུ་ཕྱིན་གྱི་བར་དུ་བཙུན་པ་ཚེ་དང་ལྡན་པའམ་སོ་སོའི་མཚན་ནས་བརྗོད་དེ་ཚིག་འོག་ནས་འབྱུང་སྐད་བྱ། གསལ་བ། ཚོན་གསལ་ཞིང་གདོང་པ་ལྟར་སྣང་བ་ལྟ་བུ་ལ་བྱ། ཚད་མ་ཆེ་ཆུང་དུ་མ་གྱུར་ཅིང་བསྔོར་རུང་བ་དང་བཟང་པོ་ལ་བྱ། སྤྱད་དུ་བཟོད་ཀྱིས་མ་རྡོལ་ལམ་གས་པའི་ལྷུང་བཟེད་བཟང་པོ་སྤྱད་དུ་བཟོད་པ་ལ་བྱ། འོན་ཏེ་བཞེད་ན་བཞེས་ཤིག་ཅེས་སོ། །གོང་མ་ལྟར་བརྗོད་དེ་གནས་བརྟན་མན་ཆད་སུ་བཞེད་པ་བཞེས་ཤིག་ཅེས་ལས་པའི་དགེ་སློང་གིས་དགེ་འདུན་ལ་གསོལ། །ཅི་བཞིན་པའི་ཡོན་ཏན་གྱིས་སོ། །སྟེང་མ་ལྟར་བརྗོད་པ་ནི་ལྷུང་བཟེད་ལ་ཡོན་ཏན་མེད་པ་ལ་བཟང་ངོ་ཞེས་བརྗོད་པ་ནི་མ་ཡིན་གྱི་ལྷུང་བཟེད་ཉིད་ཀྱི་ཡོན་ཏན་ཅི་བཞིན་དྲང་པོར་བརྗོད་པ་ལ་བྱ། འདོད་པས་བླང༌། སྤང་བའི་ལྷུང་བཟེད་གནས་བརྟན་མན་ཆད་ཀྱིས་བདག་གི་ལྷུང་
བཟེད་དང་བརྗེ་བར་དད་ན་ནི་བརྗེ་བདག་གི་ལྷུང་བཟེད་བཟང་སྟེ་བརྗེ་བར་མ་དད་དམ་ཆོག་ཤེས་པ་ཞིག་སྟེ་ལྷུང་བཟེད་མ་བརྗེས་ཀྱང་ཉེས་མེད། བླངས་པ་དང་བར་དུ་ཆོད་པ་ལ་མི་བསླང༌། ལྷུང་བཟེད་སྦང་བ་དེ་སྔར་གནས་བརྟན་གྱིས་མི་འདོད་ཅེས་བྱས་ཏེ་བཏང་ལ་མི་གཉིས་གསུམ་འདས་ཏེ་དང་འདོད་ཀྱིས་བྱིན་ཅིག་ཅེས་སྨྲས་ན་གནས་བརྟན་ལ་ཉེས་བྱས་ཏེ་བྱི་ཤུ་ཏས་བཤད། གནས་བརྟན་གྱིས་བདག་གི་ལྷུང་བཟེད་པས་ངན་ཏམ་མི་འདོན་ཅེས་བྱས་ཏེ་བཏང་བ་ལས་བདག་གི་འོག་ན་འཇུག་པས་བླངས་ན་ད་ང་འདོད་ཀྱིས་སླར་འོན་ཅིག་ཅེས་བླངས་ནའང་ཉེས་བྱས་སློང་བའི་ཚེའང་ཉེས་བྱས་ཞེས་བྱི་ཙ་ཡ་བར་མས་བཤད། ཚིག་ལན་གཉིས་ལ་མི་སྦྱིན་འདས་ན་མ་ཡིན་ནོ། །མདོ་གོང་མ་ལྟར་གནས་བརྟན་གྱིས་མི་འདོད་ཅེས་བྱས་ཏེ་བཏང་བ་ལས་ང་འདོད་ཀྱིས་སླར་འོན་ཅིག་ཅེས་སློང་ན་ལན་གཉིས་ཀྱི་བར་དུ་མི་སྦྱིན་ལན་གསུམ་དུ་སློང་བའི་ཚེ་སྦྱིན་ནོ། །མ་བྱིན་དང་ཉེས་ནི་མེད་དེ་གནས་བརྟན་དབང་ཆེ་བས་མ་བྱིན་ན་གནས་བརྟན་དང་དགེ་འདུན་འཁྲུག་པའི་ཕྱིར་སྦྱིན་ནོ། །མ་བཏང་མ་བསྔོས་ཤིག་ཅེས་འབྱུང་བ་ལ་བསྒོས། དགེ་འདུན་གྱི་ལྷུང་བཟེད་ངན་པ་དགེ་སློང་སྤང་བ་འབྱུང་བ་དེ་ལ་སྦྱིན་པ་སྦྱིན་དུ་འང་མི་གནང་བདག་གིས་བསྔོ་བའི་སྔགས་ཀྱིས་འདེབས་སུ་འང་མི་གནང་ངོ་ཞེས་དགེ་འདུན་གྱིས་བསྒོ་སྟེ་བཅིངས་པའི་ལྷུང་བཟེད་ཅེས་བྱ། སྤྱོད་ན་མ་ཆག་གི་བར་དུ་དལ་གྱིས་དལ་གྱིས་སོ། །དགེ་འདུན་གྱི་ལྷུང་བཟེད་ངན་པ་དགེ་སློང་སྦང་བ་བྱུང་བ་ལ་བྱིན་པ་དགེ་སློང་དེས་མིག་བཞིན་དུ་བསྲུང་སྟེ་ནམ་སྤྱད་དུ་རུང་གི་བར་དུ་སྤྱད། ཇི་ལྟར་སྤྱད་པ་ནི་འོག་ནས་འཆད། འདིས་གཉིས་ཀྱང་སྤྱད། དགེ་འདུན་གྱིས་བྱིན་པའི་ལྷུང་བཟེད་ངན་པ་དེ་དང་བདག་གིས་བསྔོས་པའི་ལྷུང་བཟེད་གཉིས་བསོད་སྙོམས་སུ་འགྲོ་བ་ལ་སོགས་ཏེ་སྤྱད་ཅིང་བྱའོ་ཅོག་ཏུ་གཉིས་ཀ་སྤྱད། འདི་རབ་ཏུ་དགེ་བའི་ཡོ་བྱད་དུ་གཞུག །དགེ་འདུན་གྱི་ལྷུང་བཟེད་ངན་པ་སྣོད་ཀྱང་བཟང་པོར་གཞུག་གནས་ཀྱང་བརྟན་པ་ལ་གཞག་དབྱུང་བའམ་གཞུག་པའི་ཚེའང་ནན་ཏན་དུ་མི་སྣང་བར་བྱ། དེ་ལ་བྱ་བ་རབ་ཏུ་ཆུང་པར་རོ། །བསོད་སྙོམས་བླང་པའི་ཚེ་དགེ་འདུན་གྱི་ལྷུང་བཟེད་ངན་
པར་འོ་མ་དང་ཕྱེ་ལ་སོགས་བ་ལྷུང་བཟེད་ལ་མི་གནོད་བའི་རྣམས་གཞུག །བཀྲུ་བའི་ཚེའང་དགེ་འདུན་གྱི་ལྷུང་བཟེད་སྔར་འཇམ་པོས་བཀྲུ་ཞིང་ཕྱི། སྐྱུར་པོ་ལ་སོགས་པ་ལྷུང་བཟེད་ལ་གནོད་བ་དག་ནི་བདག་གིས་བསྔོས་པར་གཞུག །དེར་བཟའ་བ་མི་བྱ། དགེ་འདུན་གྱི་ལྷུང་བཟེད་ངན་པར་ཁ་ཟས་མི་བཟའ་བར་ཁ་ཟས་བཟང་པོ་རྣམས་གཞག་ལ་བདག་གི་ལྷུང་བཟེད་ངན་པའི་ནང་ནས་བླངས་ཏེ་བཟའ། རྣམ་པ་འདི་རྣམས་ལྟར་བྱ་བ་ནི་དགེ་འདུན་གྱི་ལྷུང་བཟེད་ངན་པ་མི་དེངས་པ་དང༌། ཡུན་རིང་དུ་ཐུབ་པར་བྱ་བའི་ཕྱིར་རོ། །ལྷུང་བཟེད་འཚོལ་བའི་སྤང་པའོ། །ལྷུང་བཟེད་འཚོལ་བའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འདི་མན་འཆད་འཐག་པའི་སྤང་བ་ལ་འཆད་དོ། །རིན་མེད་པར་སློང་བ་གཞན་ལས་འཐག་པ་ཡང་ངོ༌། །བདག་གིས་གོས་ཀྱི་རྒྱུ་དྲུ་བུ་ལྟ་བུ་བླངས་ཏེ་བདག་ཉིད་ཀྱིས་བཅོལ་ཀྱང་རུང་གཞན་ལ་སྤྲིང་སྟེ་འཐག་ཏུ་བཅོལ་ཀྱང་རུང་ཡན་ལག་འདི་བཞི་དང་ལྡན་ན་སྤང་བའི་ལྟུང་བར་འགྱུར་ཏེ་གཉེན་མ་ཡིན་བ་དང་ཁྱིམ་པ་མ་ཡིན་པ་དང་ཐ་ག་པ་ཡིན་པ་དང་རིན་མེད་པར་བཅོལ་བ་སྟེ་འདི་བཞི་དང་ལྡན་ན་སྤང་བར་འགྱུར། བདག་གིས་གླ་བྱིན་ཏེ་འཐག་ཏུ་བཅུག་བ་ནི་ཉེས་མེད། ཡན་ལག་འདི་བཞི་གཅིག་དང་མི་ལྡན་ན་ཉེས་བྱས། གཞན་དང་ལྷན་ཅིག་ཏུ་ན་མི་བྱེད་པ་མ་ཡིན། དགེ་སློང་གིས་གཉེན་མ་ཡིན་པ་གོས་འཐག་ཏུ་བཅོལ་བ་ལས་བདག་གི་གཉེན་གྱིས་གྲོགས་བྱས་ཏེ་ཟིན་ཀྱང་སྤང་བའི་ལྟུང་བར་འགྱུར། འཐག་པའི་ལྟུང་བའོ། །འཐག་པའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འཐག་པའི་སྤང་བ་འོག་མ་ལ་འཆད་དེ། དེའི་ཕྱིར་འཐག་པ་ལས་སོ། །དགེ་སྦྱོང་དང་དགེ་སྦྱོང་མའི་ཕྱིར་འཐག་ཏུ་བཅུག་བ་ལས་སྤང་བའི་ལྟུང་བར་འགྱུར་བ་ནི་མ་ཡིན་གྱི་དགེ་སློང་དང་དགེ་སློང་མའི་ཕྱིར་འཐག་ཏུ་བཅུག་པ་ལས་སྤང་བའི་ལྟུང་བར་འགྱུར། བསྐྱེད་ཅིང་འཐག་ཏུ་གཞུག་པར་རམ་བཟང་པོར་ནའོ། །དགེ་སློང་གི་ཕྱིར་གཉེན་མ་ཡིན་པའི་ཁྱིམ་བདག་པོས་ཐ་ག་མ་ལ་གོས་འཐག་ཏུ་བཅོལ་བ་ལས་བྲན་མོས་ཨུ་
པ་ནན་ཏ་ལ་ཁྱོད་ཀྱི་ཕྱིར་ངའི་ཇོ་བོས་གོས་འཐག་ཏུ་བཅོལ་ལོ་ཞེས་བསྒོ་བ་དང་དགེ་སློང་གིས་ཐ་ག་མ་ལ་གོས་འདི་ངའི་ཕྱིར་གྱིས་གོས་སྲིད་རིང་པ་དང་ཞེང་ཆེ་བ་དང༌། སྡུག་ཅིང་བཟང་པོར་གྱིས་ཤིག་དང་བཟའ་བ་འམ་བརྒྱགས་ཟོང་ཞིག་སྦྱིན་ནོ་ཞེས་བྱས་ཏེ་བསྐྱེད་པ་ལས་བཅས་ཏེ་ཡན་ལག་གཅིག །ཡོན་བདག་ཀྱང་གཉེན་མ་ཡིན་ཐ་ག་པ་ཡང་གཉེན་མ་ཡིན་ན་སྤང་བར་འགྱུར། གཉིས་ཀ་གཉེན་ཡིན་ན་ཉེས་མེད། གཅིག་གཉེན་ཡིན་གཅིག་གཉེན་མ་ཡིན་ན་ཉེས་བྱས། འོན་ཏེ་སྤྱིན་བདག་གི་ཟད་ན། ཡོན་བདག་གིས་དགེ་སློང་གི་ཕྱིར་ཐ་ག་མ་ལ་གོས་འཐག་ཏུ་བཅོལ་བ་ལས་དགེ་སློང་གིས་ཆུ་དང་ཞེང་བསྐྱེད་ཅིང་འཐག་ཏུ་བཅུག་པ་དང་རྒྱུ་མ་ཆོག་སྟེ་ཡོན་བདག་ལས་ལན་གཉིས་ལན་གསུམ་དུ་ཐ་ག་མས་བླངས་ཏེ་ཆུ་དང་ཞེང་ཆེར་བྱས་པ་དང་ཡན་ལག་གཉིས། རིན་མི་སྟེར་བ་ཡང་ངོ༌། །མདོ་ལྟག་མ་ལྟར་ཐ་ག་མས་ཆུ་ཞེང་ཆེར་བྱས་ཏེ་དགེ་སློང་དང་གྲེ་སྦྱར་ཏེ་དགེ་སློང་གིས་ཁྱེར་བ་དང་བདག་མོ་དག་སེམས་འཁྲུག་ཏེ་ཐ་ག་མ་གླ་མ་བྱིན་པ་དང་ཡན་ལག་གསུམ་སྦྱིན་བདག་གིས་མ་གནང་བ་དེའི་ཕྱིར་བྱེད་དོ། །སྦྱིན་བདག་གིས་དགེ་སློང་ལ་ཁྱོད་ཀྱི་ཕྱིར་ཐ་ག་མ་ཆེ་གེ་མོ་ཞིག་ལ་གོས་བཅོལ་གྱིས་ཅི་དགའ་པར་ཁ་ཆོས་གྱིས་ཤིག་ཅེས་བསྒོ་བ་ལས་ཆེ་ཞིང་བཟང་བར་བྱེད་དུ་བཅུག་པ་ནི་ཉེས་མེད་དེ་དེ་ལྟར་མ་བསྒོས་པར་བདག་རང་གིས་འོག་སྦྱར་ཏེ་ཆེ་ཞིང་བཟང་པོར་བྱས་པ་ལས་སྤང་བར་འགྱུར་ཏེ། ཡན་ལག་བཞི་གྲུབ་ན་རྩ་བའོ། །མདོ་གོང་མ་བཞི་ལྟར་བྱས་ཏེ་གོས་ཟིན་ནས་ལག་ཏུ་ཐོབ་ན་སྤང་བའི་ལྟུང་བར་འགྱུར་ཏེ་ཡན་ལག་ལྔའོ། །སྔར་དེའི་ཕྱིར་ནན་ཏན་བྱེད་བ་ནི་སོ་སོར་ཉེས་བྱས་པའོ། །དགེ་སློང་གིས་ཐ་ག་མ་ལ་གོས་ཆེ་ཞིང་བཟང་དུ་གྱིས་ཤིག་པར་བསྒོ་བ་ལན་རེ་ལ་ཉེས་བྱས་རེ་རེར་འགྱུར་རོ། །དེ་བཞིན་དུ་མ་སྦྲན་པར་དེར་སོང་ནའོ། །དགེ་སློང་གིས་ཐ་ག་མ་ལ་བཟང་དུ་གྱིས་ཤིག་ཅེས་ཁར་ནི་མ་སྨྲས་ཀྱི་མྱུར་དུ་ཟིན་ཅིང་བཟང་བར་བྱ་བར་རེ་བའི་ཕྱིར་ལུས་ཀྱིས་སྟོན་པ་རེ་རེ་ལ་ཉེས་བྱས། བྱི་ཤུ་ཏས་ནི་ཐ་ག་མའི་གན་དུ་སོང་སྟེ། གོས་ཆེ་ཆུང་དང་ཅི་རི་བ་ཙམ་དང་བཟང་ངན་ཅི་འདྲ་བ་ལྟ་བའི་ཕྱིར་
གཟུང་བའི་ཚེ་ཉེས་བྱས་ཞེས་བཤད། འཐག་པ་བསྐྱེད་པའི་ལྟུང་བའོ། །གོས་འཐག་པ་བསྐྱེད་པའི་སྡང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བྱིན་ཕྲོག་གི་སྤང་བ་ལ་འཆང་དེ། དགེ་སློང་དང་ཕྲལ་ན། དགེ་སྦྱོང་ལྟ་བུ་གོས་དང་ཕྲལ་བ་ནི་མ་གཏོགས་ཀྱི་དགེ་སློང་ཕོ་མོ་གོས་དང་ཕྲལ་བ་ལས་སྤང་བར་གྱུར་ཏེ་ཡན་ལག་གཅིག །བདག་གི་མ་ཡིན་པ་ཕྲོགས་ན། དགེ་སློང་ཨུ་པ་ནན་ཏས་སློབ་མ་ལ་གཡོག་ཏུ་བཀྲི་བར་བྱ་བའི་ཕྱིར་ཆོས་གོས་བྱིན་ཏེ་ཕྱིས་ཕྲོགས་བ་ལས་བཅས། བདག་གི་མ་ཡིན་བ་ཞེས་བྱ་བ་ནི་འདུལ་བའི་སྡེ་དག་ལས་བདག་གིས་ཆོས་གོས་བྱིན་པ་མ་ཡིན་པ་ཕྲོགས་ནའང་སྤང་བའི་ཡན་ལག་ཏུ་གྱུར་ན་བདག་གིས་བྱིན་པ་ལྟ་ཅི་སྨོས། མཁན་པོ་ཁ་ཅིག་ན་རེ་བདག་གིས་བྱིན་པ་ཉིད་ཕྲོགས་ན་སྤང་བ་ཞེས་བཤད་དེ་ཡན་ལག་གཉིས། དེ་གོས་ནའོ། །སླར་ཕྲོགས་པ་དེ་ཉིད་གོས་ཡིན་པ་དང་ཡན་ལག་གསུམ། འདུས་པའམ། དགེ་སློང་གིས་ལུས་དང་ངག་གཉིས་ཀས་སླར་ཕྲོགས་པ་དང༌། ཐ་དད་པའི་ལུས་དང་ངག་གིས་འཕྲོག་པའི་ཕྱིར་བྱས་པའི་བསྐོས་པ་ལ་བྱེད་དོ། །ཁས་མ་སྨྲས་པར་ལུས་ཀྱིས་ཕྲོགས་ཀྱང་རུང་ལུས་ཀྱིས་མ་བྱས་བར་ཚིག་ནན་ཏུར་གྱིས་ཕྲོགས་ཀྱང་རུང་སློབ་མའམ་གཞན་ལ་འཕྲོག་ཏུ་བཅུག་ཀྱང་རུང་སྟེ་འདི་རྣམས་གང་ཡང་རུང་གཅིག་དང་ལྡན་ན་སྤང་བའི་ལྟུང་བར་འགྱུར་ཏེ་ཡན་ལག་བཞི། མཐའ་ནི་ལུས་དང་ཐ་དད་དུ་གྱུར་ཟིན་ནའོ། །དགེ་སློང་གིས་གོས་བྱིན་པ་དེ་སླར་ཕྲོགས་ནས་ལུས་དང་བྲལ་ན་སྤང་བའི་ཡན་ལག་ཏུ་གྱུར་ཏེ་འདི་ལྔ་དང་ལྡན་ན་སྤང་བའི་ལྟུང་བར་འགྱུར་རོ། །སྦྱོར་བ་ནི་ཉེས་བྱས་པའོ། །དགེ་སློང་གིས་གོས་འཕྲོག་པར་ཤོམ་ཞིང་བཟུང་བའམ་འདྲེན་པའི་ཚེ་ལན་རེ་ཞིང་ཉེས་བྱས་རེ་རེ། འདི་ནི་ཕྱིར་སྦྱིན་པས་སོ། །དགེ་སློང་གིས་དགེ་སློང་ལ་གོས་བྱིན་ཏེ་སླར་ཕྲོགས་པ་སྤང་བར་གྱུར་པ་དེ་གོས་གཞན་སྤང་བ་དང་མི་འདྲའི་གོས་དེ་སུ་ལས་ཕྲོགས་པ་དེ་ཉིད་ལ་སླར་གཏན་སྤང་ངོ༌། །དེ་ལྟར་མ་སྤངས་ན་སྤངས་པར་མི་ཆུད་དོ། །འདི་བདག་གི་ཕྱིར་ན་ཡན་ལག་མ་ཡིན་ནོ། །དགེ་སློང་གིས་དགེ་སློང་ལ་གོས་བྱིན་པ་དགེ་སློང་གྲོགས་ཤིག་འཕྲོག་ཏུ་བཅུག་ན་འཕྲོག་ཏུ་འཇུག་པའི་དགེ་སློང་སྤང་བའི་ལྟུང་བར་འགྱུར། འཕྲོགས་པའི་དགེ་སློང་ལྟུང་བར་འགྱུར། དགེ་སྦྱོང་ཞིག་འཕྲོག་ཏུ་བཅུག་ན་ཉེས་བྱས་ཁྱིམ་པ་ཞིག་འཕྲོག་ཏུ་བཅུག་ན་ཁྱིམ་པ་ལ་སྡིག་ཏུ་འགྱུར། འདི་གསུམ་གང་གིས་ཕྲོགས་ཀྱང་རུང་དགེ་སློང་འཕྲོག་ཏུ་བཅུག་པ་ནི་སྤང་
བའི་ལྟུང་བར་འགྱུར། རབ་ཏུ་མ་རྫོགས་པ་ལ་ནི་བསྐྲད་པ་བཞིན་ནོ། །དགེ་སློང་གིས་དགེ་སྦྱོང་ལ་གོས་ཤིག་བྱིན་པ་ལས་ཕྲོགས་ན་ཉེས་བྱས་ཏེ་གོས་ན་དགེ་སྦྱོང་ལ་གཏན་སྤང་ངོ༌། །དགེ་སློང་གིས་གཙུག་ལག་ཁང་ནས་དགེ་སློང་བསྐྲད་ན་ལྟུང་བར་འགྱུར། དགེ་སྦྱོང་བསྐྲད་ན་ཉེས་བྱས། དགེ་སྦྱོང་གིས་དགེ་སྦྱོང་བསྐྲད་ན་ཉེས་བྱས། དགེ་སྦྱོང་གིས་དགེ་སློང་ལ་གོས་བྱིན་པ་ལས་ཕྲོགས་ནའང་ཉེས་བྱས། འཕྲོག་པ་རྣམ་གསུམ་མོ། །གཏར་བཟུང་བ་དང་རྩེད་མོ་དང་གཏན་དུ་ཕྲོགས་བ་གསུམ་སྟེ་འོག་ནས་འཆད། བདག་གིས་ཞེས་པ་གསལ་བའི་འཕྲོག་པ་འདིར་འདུས་སོ། །དགེ་སློང་གིས་དགེ་སློང་ལ་གོས་བྱིན་ཏེ་གཡོག་ཏུ་བྱ་བའམ་ལས་བཅོལ་བའམ་གྲོགས་སུ་བཀྲི་བ་ལས་མ་བཏུབ་སྟེ་གོས་སླར་ཕྲོགས་པ་ལྟ་བུ་ནི་སྤང་བར་འགྱུར། ངས་སེམས་བྱེད་བ་ནི་དེའི་སྤགས་པའོ། །དགེ་སློང་གིས་གོས་བྱིན་པ་ལས་གཏན་དབྲོག་པ་ནི་མ་ཡིན་གྱི་སྐད་ཅིག་མི་དགའ་བར་བྱ་བའི་ཕྱིར་ཕྲོགས་པ་ནི་ཉེས་བྱས་སོ། །གནོད་པ་དང༌། དགེ་སློང་ཞིག་ཡུལ་རྒྱུར་འགྲོ་བལྟ་བུ་ལ་ལམ་ན་མི་རྒོད་དམ་གཅན་གཟན་གྱིས་གནོད་པར་འགྱུར་བ་ཙམ་ལས་མ་བཏང་བ་དང༌། དོན་མེད་པར་འཇུག་པ་ལ། དགེ་སློང་ཡུལ་རྒྱུར་འགྲོ་བ་རྟེན་ངན་པ་དང་འགྲོགས་ཏེ་ཆོས་ལོག་པ་ལ་ལྟ་བ་འམ་དགེ་སློང་གི་ཚུལ་སྟོར་བར་འགྱུར་བ་ཙམ་གྱི་ཚོད་ལས་མ་བཏང་པ་དང༌། བགེགས་བྱས་པའི་ཕྱིར་ལྟུང་བ་མེད། བདག་གི་སློབ་མའམ་དགེ་སློང་གྲོགས་པོ་གོང་མ་རྣམས་གཉིས་ལྟ་བུའི་རྐྱེན་ཡོད་པ་ལྟ་བུ་མི་གཏོང་བའི་ཕྱིར་གོས་ལ་སོགས་པ་ཕྲོགས་ཏེ་གཏར་བཟུང་བ་ནི་ཉེས་མེད་དབྲོག་བའི་སྤང་བའོ། །དབྲོག་བའི་སྤང་པ་སྟེ་འདུལ་བ་རྣམ་པར་འབྱེད་བའི་ནང་ནས་འབྱུང་བའི་མདོ།། །འདི་མན་ཆད་ཞག་དྲུག་གི་སྤང་བ་ལ་འཆད་དེ། བདག་གི་གནས་དང་འདྲ་བའི་གོང་དུ་འཇིགས་པ་ཡོད་ན་དགོན་པ་པས་ཆོས་གོས་གཅིག་དང༌། དགེ་སློང་དགོན་པ་ལ་གནས་པ་མི་རྒོད་ལ་སོགས་པ་ལ་འཇིགས་པའི་རྐྱེན་ཡོད་ན་ཆོས་གོས་གསུམ་གྱི་ནང་ནས་བཟང་པོ་གཅིག་ཁྱིམ་པ་བརྟན་པོའི་ཁྱིམ་དུ་གཞོག་ཏུ་གནང་ངོ༌། །བདག་གི་གནས་དང་འདྲ་ཞེས་བྱ་བའི་གྲོང་ན་
རྣམ་པ་གཅིག་ཏུ་ན་མི་སྟོར་བའི་ཁྱིམ་པ་བརྟན་པོ་ལ་བྱ། གཅིག་ཏུ་སངས་རྒྱས་ཀྱིས་ཕན་པར་གསུངས་པས་རྐྱེན་བྱུང་ན་ཁྱིམ་པའི་གནས་དང་དགོན་པ་གཉིས་འདྲའོ་ཞེས་གནང་བ་ལ་བྱ། འགྲོ་བ་དེས་དེ་ཁྱིམ་གྱི་ནང་དུ་བཞག་སྟེ་དགོས་པའི་ཕྱིར་ཞག་དྲུག་ཏུའོ། །དགེ་སློང་དགོན་པ་ལ་འདུག་པས་མི་རྒོད་ཀྱི་རྐྱེན་ཡོད་ན་ཆོས་གོས་གཅིག་ཁྱིམ་པའི་ཁྱིམ་དུ་བཞག་པ་ཞག་དྲུག་གི་བར་དུ་བདག་དང་བྲལ་ཀྱང་ཉེས་མེད་རྐྱེན་མེད་ན་ཞག་བདུན་གྱི་སྐྱ་རེངས་བྱུང་ན་སྤང་བའི་ལྟུང་བར་འགྱུར། རྟག་ཏུ་རྐྱེན་ཡོད་ན་ཚུལ་ནས་བྱུང་བྱུང་གི་བར་དུ་བྲལ་ཀྱང་ཉེས་མེད། དགེ་སློང་དགོན་པ་ལས་གུད་དུ་དོན་གཉེར་དུ་འགྲོ་སྟེ་ལམ་ན་མི་རྒོད་ཡོད་དེ་ཕྲོགས་ཀྱིས་དོགས་ན་ཆོས་གོས་གཅིག་ཁྱིམ་པའི་ཁྱིམ་དུ་བཞག་སྟེ་ཞག་དྲུག་གི་བར་དུ་འགྲོར་དབང་ངོ༌། །ལམ་ན་མི་རྒོད་གཅིག་གིས་ཆོད་དེ་རྐྱེན་བྱུང་ན་ཞག་དྲུག་འདས་ཀྱང་ཉེས་མེད། འདས་པར་ནི་མི་དབང་ངོ༌། །མདོ་ལྟག་མ་ལྟར་ཞག་དྲུག་ཏུ་སོང་བ་ལས་རྐྱེན་མ་བྱུང་ན་ཞག་དྲུག་ལས་འདས་ན་སྤང་བའི་ལྟུང་བར་འགྱུར། ཉེས་མེད་པ་ནི་བར་ཆད་ཀྱི་དབང་གིས་མ་འོངས་ནའོ། །གོང་མ་ལྟར་ཞག་དྲུག་ཏུ་སོང་བ་ལས་བར་ཆད་ཀྱི་རྐྱེན་མི་རྒོད་དམ་ཟམ་པ་ཆད་པའམ་དགྲས་ཆོད་བ་ལྟ་བུའི་རྐྱེན་བྱུང་ན་ཞག་དྲུག་འདས་ཀྱང་ཉེས་མེད་དོ། །འདི་ལས་ཕྱི་རོལ་དུ་ཞག་དྲུག་ལས་བརྟགས་ཏེ་འདས་ན་ཡན་ལག་མ་ཡིན་ནོ། །དགེ་སློང་ཚུལ་དུ་ཞུགས་པ་ལས་དོན་གཉེར་དུ་འགྲོ་བ་ནི་ཞག་བདུན་པའི་སྔགས་ཀྱིས་བཏབ་སྟེ་སོང་བ་ལས་ཞག་གཅིག་གཉིས་ཀྱིས་དོན་བསྒྲུབ་བར་གྱུར་ཀྱང་ཞག་བདུན་དུ་གནང་ཞེས་ཟེར་ཞིང་འཕྱན་དུ་མི་གནང་གིས་དོན་གྲུབ་མ་ཐག་ཏུ་སླར་མ་འོངས་ན་ཚུལ་ཞིག་པར་འགྱུར་ན། དགེ་སློང་དགོན་པ་ལ་ནི་ཆོས་གོས་བཞག་སྟེ་ཞག་དྲུག་གི་བར་དུ་དོན་གཉེར་དུ་འགྲོ་བ་ནི་ཞག་གཅིག་གིས་དོན་གྲུབ་ཀྱང་ཞག་དྲུག་ཏུ་མ་འོངས་ཀྱང་ཉེས་མེད་དོ། །ཚུལ་ནི་ཚེ་འང་དོན་གྱི་ཕྱིར་འགྲོ་བ་དང་ལམ་ན་འཇིགས་པའི་དབང་དང་ཡན་ལག་འདི་གསུམ་དང་ལྡན་ན་ཞག་དྲུག་ཏུ་ཆོས་གོས་དང་བྲལ་ཀྱང་ཉེས་མེད་དོ། །ཞག་དྲུག་འབྲལ་བའི་སྤང་བའོ། །ཞག་དྲུག་འབྲལ་བའི་སྤང་བ་སྟེ་འདུལ་བའི་དྲིས་པ་ཞེས་བྱ་བའི་ནང་ནས་
འབྱུང་བའི་མདོ།། །།རས་ཆེན་གྱི་སྤང་བ་ལ་འཆད་དེ། བདག་ཚུལ་དུ་འཇུག་པའི་ཉིན་མོ་ནས་ཟླ་བ་སྔ་མའི་དང་པོ་ཚུན་ཆད་དབྱར་གྱི་རས་ཆེན་བཙལ་ཚུལ་སྔ་ཕྱིར་གང་དུ་འཇུག་ཀྱང་རུང་སྟེ་ཚུལ་དུ་འཇུག་པའི་ཉིན་མོ་ནས་ཟླ་པ་གཅིག་ཚུན་ཆད་དབྱར་གྱི་རས་ཆེན་བཙལ་ཀྱང་ཉེས་མེད། བདག་གིས་དབྱར་འདས་ནས་ཟླ་བ་ཕྱེད་ཀྱི་བར་དུ་བཅང༌། ཚུལ་སྔ་ཕྱི་གང་དུ་ཞུགས་ཀྱང་རུང་སྟེ་ཚུལ་ནས་བྱུང་ནས་ཞག་བཅོ་ལྔའི་བར་དུ་དབྱར་གྱི་རས་ཆེན་བཅངས་ཀྱང་ཉེས་མེད། དེ་ལས་སྔ་མ་དང་ཕྱི་མའི་དུས་སུ་ན་བྱེད་དོ། །ཚུལ་དུ་འཇུག་པའི་ཉིན་མོ་ནས་ཟླ་བ་གཅིག་གི་སྔ་རོལ་དུ་དབྱར་གྱི་རས་ཆེན་འཚལ་ཏམ་ཚུལ་ནས་བྱུང་ནས་ཟླ་བ་ཕྱེད་ལས་འདས་པར་བཅངས་ན་སྤང་བའི་ལྟུང་བའོ་ཞེས་བྱི་ཤུ་ཏས་བཤད། ཚུལ་དུ་འཇུག་པའི་ཉིན་མོ་ནས་ཟླ་བ་གཅིག་གི་སྔ་རོལ་དུ་རས་ཆེན་བཙལ་ན་ཉེས་བྱས། །ཚུལ་ནས་བྱུང་ནས་ཟླ་བ་ཕྱེད་ལས་འདས་པར་བཅངས་ན་སྤང་བའི་ལྟུང་བའོ་ཞེས་བྱི་ཛ་ཡ་བར་མས་བཤད། གཞན་དུ་ན་བཅས་པའོ། །དབྱར་གྱི་རས་ཆེན་ཚུལ་ནས་བྱུང་སྟེ་ཟླ་བ་ཕྱེད་ཀྱི་བར་བཅང་དུ་གནང་ངོ༌། །དེ་ལས་ཞག་གཅིག་འདས་ན་འང་སྤང་བའི་ལྟུང་བར་འགྱུར། སྔར་བཙལ་ན་ཉེས་པའོ། །ཚུལ་དུ་ཞུགས་པའི་ཉིན་མོ་ནས་ཟླ་བ་གཅིག་གི་སྔོན་ལོགས་སུ་རས་ཆེན་བཙལ་ན་བཙལ་བའི་ཚེ་ཉེས་བྱས། ཡང་བ་དང་ལྕི་བ་ཐ་དད་དུ་མཁན་པོ་གཉིས་བཤད། གྲུབ་ན་ཐ་མའི་འོ། །མདོ་ལྟག་མ་ལྟར་བཙལ་ཏེ་ལག་ཏུ་ཐོབ་ན་ཉེས་བྱས་ལྕི་བར་འགྱུར་བ་དང༌། ལྟུང་བར་འགྱུར་བ་སོ་སོར་བཤད། འབྲི་བ་ནི་ཟད་ནའོ། །ཟླ་བ་གཅིག་གི་སྔོན་ལོགས་སུ་དབྱར་གྱི་རས་ཆེན་བཙལ་ཏེ་རྙིང་པ་ངན་པ་ཞིག་རྙེད་ན་ཉེས་བྱས་ཡང་བའོ། །ཇི་ལྟར་ཚུལ་དུ་ཞུགས་པ་དེའི་རྗེས་སུ་འགྲོའོ། །དགེ་སློང་ཚུལ་རྣམ་གཉིས་གག་ཏུ་ཞུགས་ཀྱང་རུང་སྟེ་ཆོ་ག་གཞན་ནི་འདྲ་ཆོས་གོས་འདྲུབ་ཅིང་ཡོན་ཏན་བཅུ་ནི་ཚུལ་སྔ་མར་ཞུགས་པས་འཐོབ་བོ། །དབྱར་གྱི་རས་ཆེན་གྱི་སྤང་བའོ། །དབྱར་གྱི་རས་ཆེན་གྱི་སྤང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།རིང་པའི་སྤང་བ་ལ་འཆད་དེ། དབྱར་གྱི་ཕྱིར་རྙེད་པ་ནི་བྱེད་དོ། །དགེ་
སློང་དབྱར་ཚུལ་ན་འདུག་པའི་ཚེ་ཡོན་བདག་ཡོན་ནར་མར་འབུལ་བ་ལས་སྤང་བའི་ལྟུང་བར་འགྱུར་ཏེ་ཇི་ལྟར་འགྱུར་བ་ནི་འགོ་ནས་འཆད་དེ། ཚུལ་གྱི་ཚེ་ལས་ཉེས་པར་འགྱུར་རོ། །དབྱར་གྱི་བར་དུ་བདག་གིར་བྱས་པའོ། །དགེ་སློང་དབྱར་ཚུལ་དུ་ཞུགས་པའི་ཚེ་ཡོན་བདག་གིས་ཡོན་ནར་མར་འབུལ་བ་བླངས་པ་ལས་སྤང་བར་འགྱུར་ཏེ། རིང་བའི་དབང་གིས་ནི་ཐ་མའི་ཞག་བཅུ་ན་རྙེད་པ་མ་གཏོགས་སོ། །དགེ་སློང་དབྱར་ཚུལ་ན་འདུག་པའི་ཚེ་ཡོན་བདག་གིས་ཡོན་ནར་མར་འབུལ་བ་ལེན་དུ་མི་དབང་བ་ལམ་མིང་གིས་སྨོས་པའི་རྐྱེན་རྣམས་གང་ཡོད་ཀྱང་རུང་སྟེ་བླངས་ཀྱང་ཉེས་མེད་དེ་ནད་པ་བདག་གིས་ཕུལ་བ་དང་ཤི་ལ་ཐུག་པ་ཞིག་རང་གི་ལག་ནས་འབུལ་བ་ཤི་བའི་འོག་ཏུ་གཉེན་གྱིས་ཕུལ་བ་དང་དམག་གམ་ལམ་རིང་པོར་འགྲོ་བས་ཕུལ་ནའོ། །དེ་འགོད་པ་ལས་ཀྱང་ངོ༌། །མདོ་སྟེང་མ་ལྟར་ཡོན་ཕུལ་བ་ལས་ཚུལ་ནས་མ་བྱུང་བར་སོ་སོར་བགོས་ན་སྤང་བའི་ལྟུང་བར་འགྱུར། མ་བགོས་པ་ལས་ཀྱང་ངོ༌། །མདོ་ལྟག་མ་ཡང་ལྟག་མ་ལྟར་ཡོན་ཕུལ་བ་ལས་ཚུལ་ནས་བྱུང་བའི་ཉིན་མོ་མ་བགོས་པར་ཕྱི་དེ་ཉིན་སྐྱ་རེངས་བྱུང་ན་སྤང་བར་འགྱུར། མེད་པར་སྦྱིན་བདག་གིས་སྨྲས་པའི་དབང་ནའོ། །མདོ་ལྟག་མ་ལྟར་ཚུལ་ནས་བྱུང་མ་ཐག་ཏུ་བགོ་བའི་རིགས་པ་ལས་ཡོན་བདག་ཡོན་འབུལ་བ་ན་རེ་ཁོ་བོ་གང་ཞིག་ཏུ་དོན་གཉེར་དུ་འགྲོ་སྟེ་མ་འོངས་ཀྱི་བར་དུ་མ་བགོ་ཤིག་ཅེས་ཟེར་ན་ཡོན་བདག་གི་ཚེག་བཞིན་དུ་མ་བགོས་ཀྱང་ཉེས་མེད། བྱུང་ནས་དེ་མ་ཐག་གི་ནུབ་མོ་རུབ་མ་པ་མ་བསྔོས་ན་ཡང་ངོ༌། །དགེ་འདུན་ཚུལ་ནས་བྱུང་ནས་གོང་མ་ལྟར་ཡོན་ཕུལ་བ་བགོ་བའི་རིགས་པ་ལས་ཡོན་བདག་གི་ཚིག་བཞིན་དུ་བཞག་པ་ལ་རུབ་མ་པ་གཅིག་མ་བསྐོས་པར་བཞག་ན་སྤང་བའི་ལྟུང་བར་འགྱུར། འདི་མི་བསྐོ་བ་མ་ཡིན། ཡོན་བདག་གིས་གོང་མ་ལྟར་ནོར་ཕུལ་བའི་རུབ་མ་པ་དགེ་འདུན་གྱིས་ཀྱང་མ་བསྐོས་ན་དགེ་འདུན་ཀུན་ཉེས་བྱས། རིང་པའི་སྤང་བའོ། །རིང་པའི་སྤང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བསྔོས་པའི་སྤང་བ་ལ་འཆད་དེ། དགེ་འདུན་ནམ་གང་ཟག་གཞན་གྱིས་བརྟགས་པའི་གོས་ཤེས་པ་ལས་བདག་
གིས་བསྔོས་ཏེ་ཐོབ་ནའོ། །ཡོན་བདག་གཅིག་གིས་དགེ་འདུན་ནམ་གང་ཟག་ལ་གོས་ཤིག་སྦྱིན་པར་བརྟགས་ཏེ་འབུལ་དུ་འོངས་པ་ལ་དགེ་སློང་གཅིག་གིས་བདག་གི་ཡོན་ཏན་བསྔགས་ཏེ་ཁྱེར་ན་སྤང་བའི་ལྟུང་བར་འགྱུར་ཏེ་ཡན་ལག་ལྔ་སྟེ་དགེ་འདུན་ནམ་གང་ཟག་དག་དེ་ལ་སྦྱིན་བར་བརྟགས་པ་དང་དེ་ལ་སྦྱིན་བར་བདག་གིས་ཤེས་པ་དང་དངོས་པོ་གང་ཡིན་པ་དང་བདག་གིས་བསྔོས་ཏེ་ཐོབ་པ་དང་ཡན་ལག་འདི་ལྔ་དང་ལྡན་པར་བྱས་ན་སྤང་བའི་ལྟུང་བར་འགྱུར་རོ། །བསྔོས་པ་ནི་ཉེས་བྱས་པའོ། །ཡོན་བདག་གིས་དགེ་འདུན་ནམ་གང་ཟག་ལ་སྦྱིན་པར་བསྔོས་པར་ཤེས་བཞིན་དུ་བདག་གིར་བསྔར་བའི་ཚེ་ཉེས་བྱས་གཞན་ཡང་འདིར་རོ། །ཡོན་བདག་གིས་དགེ་འདུན་ནམ་གང་ཟག་ལ་བསྔོས་བའི་གོས་དགེ་སློང་གཅིག་གིས་དེ་ལ་མ་སྦྱིན་པར་དགེ་འདུན་ནམ་གང་ཟག་འདི་ལ་བྱིན་ཅིག་ཅེས་བསྒོ་བའི་ཚེ་ཉེས་བྱས་ཡང་བ། དེའི་འབྲས་བུ་ཡང་ངོ༌། །མདོ་ལྟག་མ་ལྟར་གཞན་ལ་བྱིན་ཅིག་ཅེས་བསྒོ་བ་དེའི་ལག་ཏུ་གོས་ཐོབ་ན་ཉེས་བྱས་ལྕི་བའོ། །གཞན་ཡང་ངོ༌། །ཡོན་བདག་གིས་དགེ་འདུན་ནམ་གང་ཟག་ལ་ཁ་ཟས་ཞིག་འབུལ་བར་བསྔོས་པ་ལས་གཞན་གྱི་དགེ་འདུན་ནམ་གང་ཟག་ལ་བྱིན་ཅེས་བསྒོ་ན་ཉེས་བྱས་མི་མ་ཡིན་གྱི་ཁང་པ་ཉིད་ལ་བསྔོས་པའི་རྫས་ལ་བྱ། སེམས་ཅན་དུ་མི་བགྲང་བ་ཡང་ངོ༌། །ཁང་བུ་གཅིག་གི་རྐྱེན་གཅིག་ཏུ་བཅུག་པ་ལ་བྱ། ཕྲལ་ཞིང་སྤྲད་པས་སོ། །ཡོན་བདག་གིས་ཁང་བུ་བརྩིགས་ཏེ་ཀང་བུ་སོ་སོའི་ནང་དུ་རྐྱེན་མལ་སྟན་ལ་སོགས་པ་བཤམས་ཏེ་བསྔོས་པ་ལས་ཁང་བུ་གཞན་གྱི་རྐྱེན་དུ་བསྣོར་ན་ཚུས་འབྱིན་ཚེ་ཉེས་བྱས་གཅིག །ཕ་རོལ་ཏུ་བཅུག་པའི་ཚེའང་ཉེས་བྱས་གཅིག་གོ །ཕྱོགས་གཅིག་གི་ཡང་ངོ༌། །ཡོན་བདག་གཅིག་གིས་གཙུག་ལག་ཁང་ངམ་མཆོད་རྟེན་གྱི་ངོས་གཅིག་ལ་ཚོན་གྱིས་བྱུགས་པའམ་བཅོས་པའི་རྒྱུ་ཞིག་ཏུ་རྫས་བསྔོས་པ་ཕྱོགས་བསྣོར་ན་ཚུས་པོའི་ཚེ་ཉེས་བྱས། ཕ་རོལ་ཏུ་སྤྱོད་པའི་ཚེའང་ཉེས་བྱས་སོ། །ལྟུང་བ་མེད་པ་ནི་བཙལ་ནས་མ་རྙེད་ན་ལྷག་མ་ཟ་བ་ཕྱུགས་ལ་སོགས་པའི་འོ། །དགེ་སློང་ཁ་ཟས་བཟའ་བའི་ཚེ་སྒོ་ན་མི་འམ་ཕྱུགས་ལ་སྦྱིན་པར་བསྔོས་པ་ལས་མ་བཙལ་བར་
གཞན་ལ་བྱིན་ན་ཉེས་བྱས་བཙལ་ཏེ་མ་རྙེད་ན་གཞན་ལ་སྦྱིན་པ་ནི་ཉེས་མེད་དོ། །བརྟགས་པ་ནི་བདེ་བར་གཤེགས་པའི་གཟུགས་བརྙན་དག་བསླངས་ནས་བྱིན་པའོ། །སངས་རྒྱས་ཀྱི་སྐུ་གཟུགས་གཅིག་ལ་རྒྱན་མང་དུ་མངའ་བ་ལས། གཙུག་ལག་ཁང་དེའམ་གཞན་གྱིས་སངས་རྒྱས་ཀྱི་སྐུ་གཟུགས་ལ་ཡ་ཏེ་བྱེད་པའི་ཚེ་བརྒྱན་བ་བརྙར་བྱིན་པ་ལ་ཉེས་མེད། ཉེས་བྱས་པ་ནི་བསྔོས་ནས་མ་བྱིན་པའོ། །གསེར་དངུལ་དང་གོས་ལྟ་བུ་གཞན་སྦྱིན་བར་བསྔོས་བ་ལས་ཕྱིས་མ་བྱིན་ན་ཉེས་བྱས། ཕྱིའི་མཚམས་སུ་སོང་སྟེ་དགེ་འདུན་ཕྱིར་བསྔོས་པ་ལའོ། །དགེ་འདུན་གྱི་སྤྱིར་དབང་བའི་ནོར་ལྟ་བུ་ལས་དགེ་སློང་བཞི་ཡན་ཆད་ཀྱིས་ཁ་བརྔམ་བྱ་སྟེ་མཚམས་ཀྱི་ཕྱི་རོལ་དུ་ངེད་ཀྱང་དགེ་འདུན་གྱིས་བགོས་ཀྱང་ཉེས་པར་མི་འགྱུར་ཞེས་བགོས་ན་ཉེས་བྱས། སོ་སོར་ལག་ཏུ་ཐོབ་ན་སྤང་བའི་ལྟུང་བར་འགྱུར་ཞེས་བྱི་ཤུ་ཏས་བཤད། དགེ་སློང་ཤི་བའི་ནོར་རྫས་ཞིག་དགེ་འདུན་དབང་བ་ལས་སྔགས་ཀྱིས་མ་བཏབ་པར་བགོས་ན་ཉེས་བྱས། མཚམས་ཀྱི་ཕྱི་རོལ་ཏུ་སྔགས་ཀྱིས་བཏབ་ནའང་ཉེས་བྱས། ཕྱི་རོལ་དུ་བགོས་པ་རེ་རེ་ཉེས་བྱས་རེ་རེ། དགེ་འདུན་གྱིས་གང་ཟག་མཚམས་ཀྱི་ཕྱི་རོལ་དུ་བགོར་བཏང་ན་དགེ་འདུན་ཐམས་ཅད་ཉེས་བྱས་ཞེས་བྱི་ཛ་ཡ་བར་མས་བཤད། བྲེལ་བས་འགོད་པ་ཡང་ངོ༌། །ཡོན་བདག་གཅིག་གིས་དགེ་འདུན་སྤྱིར་ཡོན་ཕུལ་བ་ལ་དེའི་ནང་ནས་དགེ་སློང་གྱིས་གསུམ་ཞིག་གུད་དུ་དོན་གཉེར་དུ་སོང་སྟེ་དེའི་འོག་ཏུ་བགོས་ན་ཉེས་བྱས་གུད་དུ་སོང་བའི་དགེ་སློང་ན་རེ་ཅི་བདེར་གོས་ལ་ངའི་སྐལ་བ་བྱིན་ཅེས་བསོག་སྟེ་བགོས་པ་ན་ཉེས་མེད། མ་བསྔོས་པ་ཡང་ངོ༌། །དགེ་སློང་ཤི་བའི་ནོར་འགོད་པའི་ཚེ་སྔར་སྔགས་ཀྱིས་མ་བཏབ་པར་བགོས་ན་ཉེས་བྱས་ཞེས་བྱི་ཛ་ཡ་བར་མས་བཤད། ཤི་བའི་ནོར་འགོད་པའི་ཚེ་གནས་བརྟན་དང་ཚེ་ལུ་ཐ་མ་ལ་ནོར་སྣ་རེ་ཞིག་མ་བྱིན་པར་བགོས་ན་ཉེས་བྱས་ཞེས་བྱི་ཤུ་ཏས་བཤད། དགེ་འདུན་ལས་གཅིག་གམ་གཉིས་སམ་གསུམ་འཐོབ་པ་ཐོབ་ནས་བླངས་པའོ། །གཙུག་ལག་ཁང་གཅིག་ཏུ་ཡོན་བདག་གིས་དགེ་འདུན་ལ་ཡོན་ཕུལ་བ་གཙུག་ལག་ཁང་དེ་ན་དགེ་
སློང་གཉིས་སམ་གསུམ་ཞིག་འདུག་སྟེ་དགེ་འདུན་དུ་མ་ཚང་ན་ཡོན་དེ་གང་ཟག་དེ་རྣམས་དབང་སྟེ་སྔར་མ་བསྔོས་པར་ནོར་རྫས་དེ་བགོས་ན་ཉེས་བྱས། རྣམ་པ་གཅིག་ཏུ་ན་དགེ་འདུན་ཉི་ཤུ་ཙམ་ཞིག་འདུག་པ་ལས་གཞན་ཡན་མན་དུ་དོན་གཉེར་དུ་སོང་བའི་འོག་ཏུ་ཡོན་བདག་གིས་སྤྱིར་ཕུལ་བ་གང་ཟག་གཉིས་སམ་གསུམ་འདུག་པས་བགོས་ན་ཉེས་བྱས། དེ་ཕམ་པར་མི་འགྱུར་བ་ནི་ཡོན་བདག་གི་སེམས་ཀྱིས་ཀྱང་བཏང་དགེ་སློང་གྲོགས་ཀྱིས་ཀྱང་མི་ཤེས་པའི་ཕྱིར་རོ། །འདི་ལས་གཞན་ཡང་སྐལ་པ་མི་གཅོད་དོ། །མདོ་ལྟག་མ་ལྟར་དགེ་འདུན་གྱིས་སྤྱིར་ཕུལ་བས་དགེ་འདུན་ཡན་མན་དུ་སོང་བས་སྐལ་བ་དབང་ངོ་ཞེས་བྱི་ཛ་ཡ་བར་མས་བཤད། ཤི་བའི་ནོར་སྔགས་ཀྱིས་མ་བཏབ་ན་ཕྱོགས་བཅུའི་དགེ་འདུན་དབང༌། སྔགས་ཀྱིས་བཏབ་ན་མཚམས་གཅིག་གི་དགེ་འདུན་དབང་སྟེ་མཚམས་གཅིག་གི་དགེ་སློང་ནི་ཡང་སྐལ་བ་མི་གཅོད་དོ་ཞེས་བྱི་ཤུ་ཏས་བཤད། རྐུ་སེམས་ཀྱིས་ན་བརྐུས་པ་བཞིན་ནོ། །མདོ་ལྟག་མ་ལྟར་དགེ་འདུན་ལ་ཡོན་ཕུལ་བ་གང་ཟག་ལ་འགོད་པའི་ཚེ་དགེ་འདུན་གྲོགས་འོང་བར་དོགས་པའི་ཕྱིར། རྐུ་སེམས་ཀྱིས་བགོས་ན་རིན་ཐང་ལས་ཕམ་པར་འགྱུར། རྐུ་སེམས་ཀྱིས་འགོད་པའི་ཚེ་ནོར་འོངས་བར་དགེ་སློང་ཕ་རོལ་པོས་མི་ཤེས་ན་སྦོམ་པོ། །བྱུང་བྱུང་དུ་དགྲ་འམ་གནོན་པ་སྲོག་ལ་དམན་པའམ་བྱི་ཤུའི་ཚུལ་སྟོར་བ་མ་བྱུང་གི་བར་དུ་གཙུག་ལག་ཁང་མི་དོར། གཙུག་ལག་ཁང་མི་གནས་པར་མི་བྱ། རྒྱལ་པོའམ་མི་རྒོད་ལྟ་བུས་ཆུང་ཟད་གཙེས་པའི་ཕྱིར། གཙུག་ལག་ཁང་བོར་ཏེ་སོང་ན་ཉེས་བྱས། དེ་ལ་འདོད་པ་དང་བཅས་པ་སྦྱིན་པ་ན་བཅོལ། གཙུག་ལག་ཁང་གཅིག་ན་དགེ་འདུན་མང་ཞིག་ཡོན་བདག་གི་འཚོ་བ་སྦྱར་བ་ལས་ཡོན་བདག་སྤྱུགས་སམ་ལམ་རིང་པོར་སོང་སྟེ་དགེ་འདུན་གྱི་འཚོ་བ་མེད་ན་གང་ཟག་གང་དད་པ་གཅིག་གམ་གཉིས་ལ་གཙུག་ལག་ཁང་གི་ཡོ་བྱད་གཏད་དེ་གཞག །མ་འོངས་ན་ལོ་བཅུར་གནས། མདོ་ལྟག་མ་ལྟར་གཙུག་ལག་ཁང་སྲུང་བའི་དགེ་སློང་ཡོན་བདག་མ་འོངས་ན་ལོ་བཅུར་གནས་ཤིང་འདུག་ཤིག །སྔར་ནི་བསོད་སྙོམས་བླངས་སོ། །མདོ་ལྟར་མ་ལྟར་ལོ་བཅུར་
གཙུག་ལག་ཁང་དུ་བཞག་པའི་དགེ་སློང་དེ་འཚོ་བ་མེད་ན་ལོ་ལྔར་ནི་བསོད་སྙོམས་བསླང་ངོ༌། །དེའི་དུས་ན་སྦྱིན་བདག་མ་བྱུང་ན་གཞན་གཙུག་ལག་ཁང་གི་འཁོར་དང་ལྷན་ཅིག་ཏུའོ། །ལོ་ལྔར་བསྡད་དེ་ཡོན་བདག་མ་འོངས་ནས་འཚོ་བས་མི་སྤྱོར་ན་གཙུག་ལག་ཁང་གང་དང་ཉེ་བའི་དགེ་འདུན་དང་ཡོན་ཐུན་མོང་དུ་བྱ་སྟེ་ལོ་ལྔའི་བར་དུ་དེ་ལས་འཚོ་བར་བྱའོ། །རྙེད་པ་གཅིག་ལ་གསོ་སྤྱིན་ཐ་དད་པའི་ལས་བྱའོ། །ལོ་བཅུར་གནས་པའི་དགེ་སློང་ལོ་ལྔར་དགེ་འདུན་གཞན་གྱི་གཙུག་ལག་ཁང་དང་འཚོ་བ་ཐུན་མོང་དུ་སྦྱོར་བའི་ཚེ་འཚོ་བ་ནི་དགེ་འདུན་དང་ཐུན་མོང་དུ་བྱ། མཆོད་པ་དང་གསོ་སྦྱིན་ནི་བདག་གི་གཙུག་ལག་ཁང་དུ་བྱས་ཏེ་རས་ཀྱིས་འཚོ་བ་དང་ཆོས་ཀྱིས་འཚོ་བ་སྟེ་ཆོས་ཀྱིས་འཚོ་བ་ནི་གསོ་སྦྱིན་བྱེད་པའོ། །གཏོང་ན་གཙུག་ལག་ཁང་གི་འཁོར་དུ་དངོས་པོ་རྣམས་ཞོག་ཤིག །མདོ་ལྟག་མ་ལྟར་དགེ་སློང་ལོ་བཅུར་གནས་ཏེ་ཡོན་བདག་མ་འོངས་ཏེ་གུད་དུ་འགྲོ་ན་གཙུག་ལག་ཁང་དང་ཉེ་བའི་དགེ་འདུན་ལ་སྐུ་གཟུགས་དང་ཡོ་བྱད་ཐམས་ཅད་བརྩིས་ཏེ་གནས་ན་བྱིན་ཅིག །མདོ་ལྟག་མ་ལྟར་གཙུག་ལག་ཁང་བོར་བ་ལས་དགེ་འདུན་སླར་འདུས་ན་ཡོ་བྱད་གཏམས་པའི་རྣམས་དགེ་འདུན་གྱི་ཡོ་བྱད་ཚང་བར་སླར་བྱིན་ཅིག །གནས་དག་གི་ནོར་གནས་དག་ཏུ་མ་བྱིན་ཅིག །གཙུག་ལག་ཁང་གཅིག་གི་རྐྱེན་ཡུལ་གྲུ་འམ་ནོར་རྫས་གཙུག་ལག་ཁང་དེའི་རྐྱེན་དུ་བསྔོས་པ་གཙུག་ལག་ཁང་གཞན་གྱི་རྐྱེན་དུ་མི་བསྔོའོ་ཞེས་བྱི་ཛ་ཡ་བར་མ་བཤད། གཙུག་ལག་ཁང་སྟོང་བའི་རྫས་ཉེ་འཁོར་གྱི་གཙུག་ལག་ཁང་དུ་གཏམས་པ་དགེ་སློང་སླར་འདུས་ན་སྔོན་ཅི་གཏམས་པ་དེ་ཉིད་སླར་སྦྱིན་གྱི་བསྣོར་ཅིང་མི་སྦྱིན་ནོ་ཞེས་བྱི་ཤུ་ཏས་བཤད། དེ་མ་རྙེད་ན་བྱིན་དུ་ཆུགས་ཤིག །ཡོན་བདག་དང་དགེ་འདུན་སླར་འདུས་ཏེ་གཙུག་ལག་ཁང་གི་ཡོ་བྱད་གཏམས་པ་སླར་མ་བསྐྱལ་ན་ཐོག་མར་གདམས་པའི་དགེ་སློང་གིས་སློང་ལ་སླར་ཕུལ་ཅིག །ཁྱིམ་བདག་གིས་བསྒོས་པ་དེ་ལས་མི་འགལ། ཡོན་བདག་གིས་གཙུག་ལག་ཁང་སོ་སོར་རྐྱེན་ཕུལ་བ་ལས་ནང་མི་བསྣོར་སྟོན་མོས་འདྲེས་པ་ཙམ་ནི་མ་གཏོགས་སོ། །བསྣོར་ན་ཉེས་བྱས། མ་བྱིན་
ན་མཐུས་བླང་གཙུག་ལག་ཁང་གཞན་དུ་ནོར་གཏམས་པ་ལྟག་མ་ལྟར་བསླངས་ཏེ་མ་སྟེར་ན་མ་ཐུས་ཕྲོགས་ཏེ་བླངས་ཀྱང་ཉེས་མེད། རྙེད་ན་སྦྱིན་གཙུག་ལག་ཁང་ནང་མལ་སྟན་ནམ་སྣོད་སྤྱད་ལྟ་བུ་གཅིག་ལ་གཅིག་བརྟེན་པ་ལ་བྱིན་ན་ཉེས་མེད། ཉེས་མེད་པ་ནི་མཆོད་རྟེན་དག་གིར་བསྔོས་བ་མ་གྲུབ་ནས་བསྔོས་པ་འོ། །བདག་གིས་གདུགས་སམ་འཕན་ལྟ་བུ་མཆོད་རྟེན་འདི་ལ་འབུལ་ལོ་ཞེས་བསྔོས་པ་ལས་རྐྱེན་ཅིག་འབྱུང་སྟེ་ཉེ་འཁོར་གྱི་མཆོད་རྟེན་གཞན་ལ་ཕུལ་ཀྱང་ཉེས་མེད། བྱང་ཆུབ་ཆེན་པོ་དང་ཆོས་ཀྱི་འཁོར་ལོ་དང་ཆོ་འཕྲུལ་ཆེན་པོ་དང་ལྷ་ལས་བབ་བ་མ་གཏོགས་ཏེ་གཞན་ནོ། །མཆོད་རྟེན་འདི་བཞི་ལ་ཡོན་འབུལ་བར་བསྔོས་པ་ཞིག་ལས་མཆོད་རྟེན་གཞན་ལ་ཕུལ་ན་ཉེས་བྱས། མཆོད་རྟེན་བཞི་ནང་བསྣོར་ཏེ་ཕུལ་བ་ནི་ཉེས་མེད། བསྔོས་པའི་སྤོང་བའོ། །བསྔོས་པའི་སྤོང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འཇོག་བའི་སྤང་བ་ལ་འཆད་དེ། ཞག་བདུན་དུ་བསྔོས་པ་ལས་འདས་ན་དགེ་སློང་ལ་བསྒོ་ཤིག །སྨན་ཞག་བདུན་དུ་བཏགས་ཏེ་བཟའ་བའི་ཚེ་ཞག་རེ་རེ་ལོན་ཞིང་དགེ་སློང་གྲོགས་པོ་ལ་དབང་གཟུགས། མ་བཙུགས་ན་ཉེས་བྱས་ཏེ་ཞག་བདུན་པའི་སྔགས་ཀྱིས་བཏབ་པས་ཡན་ལག་གཅིག །བཟའ་བའི་ཕྱིར་བཅངས་ནའོ། །སྔགས་བཏབ་སྟེ་བདག་གིས་བཟའ་བའི་ཕྱིར་བཅངས་པ་དང་ཡན་ལག་གཉིས། འདིའོ། །དངོས་པོ་ཁ་ཟས་རྣམ་བཞི་གང་ཡང་རུང་ཡིན་པ་དང་ཡན་ལག་གསུམ། བརྒྱད་ཀྱི་སྐྱ་རེངས་བྱུང་ནའོ། །ཁ་ཟས་རྣམ་བཞི་དེ་ཞག་བརྒྱད་ཀྱི་སྐྱ་རེངས་བྱུང་བ་དང་ཡན་ལག་བཞི་སྟེ། ཡན་ལག་འདི་བཞི་དང་ལྡན་ན་སྤང་བའི་ལྟུང་བར་འགྱུར། ཞག་འདས་པའི་ཟས་མ་བརྟགས་པ་ཟོས་པ་བཞིན་དུ་འདིར་འདི་དག་ཀྱང་གདགས་སོ། །སྤགས་པའི་ཁ་ཟས་མ་བརྟགས་པ་ཟོས་ན་ལྟུང་བར་འགྱུར་བ་བཞིན་དུ་སྨན་ཞག་བདུན་པ་ཡང་ཞག་འདས་ན་ཡང་སྤང་བར་འགྱུར། གང་དུ་འདིའི་ཕྱིར་བརྟགས་པ་དེ་ལ་ལྟུང་བ་མེད་དོ། །མར་དང་ཤིང་མར་དང་སྤྲང་རྩི་དང་ཁཎྜ་བརྟགས་པ་ལས། ཞག་བདུན་འདས་ན་སྤང་བའི་ལྟུང་བར་འགྱུར་བ་ལ་སྦྲང་རྩི་དང་ཁཎྜ་ནི་ཞག་འདས་ན་
སྤང་ངོ༌། །མར་དང་ཤིང་མར་གཉིས་ནི་རྐ་ལག་བསྐུ་བའི་ཕྱིར་བསྔོས་ཏེ་བཞག་ན་སྤང་མི་དགོས་ཏེ་ལྟུང་བ་མཐོལ་བས་ཚངས་སོ། །བརྟགས་པ་ནི་སྣའི་དང་བསྐུ་བ་བསྔོས་པའོ། །ཡོན་བདག་གཅིག་གིས་མར་དང་ཤིང་མར་ཞིག་ཅི་བདེར་སྤྱོད་ཅིག་ཅེས་དགེ་སློང་ལ་ཡོན་དུ་ཕུལ་བ་ལས་སྣར་བླུགས་པ་དང་རྐང་ལག་བསྐུ་བའི་ཕྱིར་བརྟགས་ཏེ་བཞག་པ་ཞག་འདས་པའམ་ལྷན་ཅིག་འགྲོགས་ཀྱང་ཉེས་མེད་དེ། ཞག་བདུན་གྱི་སྤང་བའོ། །ཞག་བདུན་བའི་སྤང་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །། སྤང་བ་རྫོགས་སོ། །འདི་ཡན་ཆད་སུམ་ཅུ་སྤང་བའི་ལྟུང་བ་རྫོགས་སོ།། །།འདི་མན་ཆད་དགུ་བཅུ་ལྟུང་བ་ལ་འཆད་དེ། ཆོས་དང་སངས་རྒྱས་ཀྱི་ཆོས་ལ་བྱ། ཆོས་མ་ཡིན་པར་སངས་རྒྱས་ཀྱི་ཆོས་མ་ཡིན་པ་རྣམས་ལ་བྱ། ཤེས་ཀྱང་དགེ་འདུན་དང་མངོན་སུམ་དུ་ཆོས་མ་ཡིན་པར་བརྗོད་ན་སྦོམ་པོའི་ཉེས་པའོ། །དགེ་སློང་གིས་ཆོས་ཡིན་པ་དང་ཆོས་མ་ཡིན་པར་ཤེས་བཞིན་དུ་དགེ་འདུན་གྱི་ནང་དུ་མ་ཡིན་པ་ལ་ཡིན་ནོ་ཞེས་སྨྲས་པ་དང་ཡིན་པ་ལ་མ་ཡིན་ཞེས་སྨྲས་ན་དགེ་འདུན་གྱི་ལྷག་མའི་དབྱེན་གྱི་སྦོམ་པོར་འགྱུར། བརྫུན་ལ་རྣམ་པ་ལྔ་སྟེ། ཕས་ཕམ་པའི་བརྫུན་དང་དགེ་འདུན་གྱི་ལྷག་མའི་བརྫུན་དང་སྦོམ་པོའི་བརྫུན་དང་བཏུང་བའི་བརྫུན་དང་ཉེས་བྱས་ཀྱི་བརྫུན་ཏེ། སྦོམ་པོའི་བརྫུན་ནི་མདོ་འདི་ཉིད་ཡིན་ནོ། །གཞན་ནི་འོག་ནས་འཆད། གསོ་སྦྱིན་གྱི་ཚེ་མི་ཁྱོད་འདི་ན་ཀུན་གཙང་ངམ་ཞེས་ལན་གསུམ་གྱི་བར་དུ་དྲིས་ན་མི་གཙང་དུ་འདུ་ཤེས་ཀྱང་མི་སྨྲ་བར་འདས་ན་ཉེས་བྱས་པའོ། །གསོ་སྦྱིན་གྱི་ཚེ་སོ་སོར་ཐར་པ་ཀློག་པས་གུད་དུ་ལྟུང་པ་མེད་དམ་ཞེས་ལན་གསུམ་དུ་དྲིས་ན་ལྷག་མ་མན་ཆད་ཉེས་བྱས་ཡན་ཆད་ཀྱི་ལྟུང་བ་ཡོད་བཞིན་དུ་མ་མཐོལ་བར་བཅབས་ཏེ་སོ་སོར་ཐར་པ་བཀླགས་ན་ཉེས་བྱས། འདི་དག་ཀྱང་མདོ་གོང་མ་གཉིས་ལ་བྱ། ཕས་ཕམ་པའི་ཕས་ཕམ་པའི་བརྫུན་ལ་བྱ། དགེ་འདུན་གྱི་ལྷག་མ་དགེ་འདུན་གྱི་ལྷག་མ་ཤ་བ་དང་སྐུར་བའི་བརྫུན་ལ་བྱ། ལས་གཞན་པ་བརྫུན་གྱི་རྣམས་ནིའོ། །བརྫུན་གོང་མ་བཞི་མ་གཏོགས་པར་གཞན་ཤེས་བཞིན་དུ་བརྫུན་བྱས་སོ་ཅོག་གང་
བྱས་ཀྱང་ལྟུང་བར་འགྱུར། སྨྲ་བཞིན་ན་ཡང་འདུ་ཤེས་རྙེད་ན་ལྡང་ངོ༌། །བརྫུན་བྱ་བར་བསམས་ཏེ་དངོས་པོ་མ་ཡིན་པ་ལ་ཡིན་པར་ཚིག་མགོ་བརྩམས་པ་ལས་རྐེད་བཅད་དུ་བོར་ཏེ་མ་སྨྲས་ཀྱང་ལྟུང་བར་འགྱུར་ཏེ་དཔེར་ན་ཀུན་འདི་ལ་གསེར་གྱི་ཞེས་བྱ་བ་ལྟ་བུ། མནའ་མི་དོར། དགེ་སློང་གིས་མནའ་བོར་པ་འབའ་ཞིག་གི་ཚིག་ནི་བདེན་གྱི་གཞན་སྨྲས་པ་ལ་ཡིད་མི་ཆེས་པའི་ཕྱིར་ཉེས་བྱས། བརྫུན་སྨྲ་བའི་ལྟུང་བའོ། །བརྫུན་སྨྲ་བའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྐྱོན་དུ་སྨྲ་བའི་ལྟུང་བ་ལ་འཆད་དེ། དགེ་སློང་ངོ༌། །དགེ་སློང་ལ་སོགས་པ་ནི་མ་ཡིན་གྱི་དགེ་སློང་ལ་སྐྱོན་ནས་བོས་ན་ལྟུང་བ་སྟེ་ཡན་ལག་གཅིག །དེ་མ་ཐེག་པའི་ཡང་ངོ༌། །འོག་ནས་འབྱུང་བ་ཕྲ་མ་ཡང་དགེ་སློང་ལ་བྱས་པས་ལྟུང་བར་འགྱུར་ཏེ་དགེ་སྦྱོང་དང་སྐྱེ་བོས་སྨྲས་པ་ནི་མི་ལྟུང་ངོ༌། །སྐྱོན་ནས་སྐྱོན་ཀྱང་ཡིན་པ་དང་ཡན་ལག་གཉིས། འབོད་པར་འདོད་པ། སྐྱོན་ནས་ཀྱང་པོས་པ་དང་ཡན་ལག་གསུམ་སྟེ་འདི་གསུམ་དང་ལྡན་པར་དགེ་སློང་ལ་སྨྲས་ཤིང་བོས་ན་ལྟུང༌། འཇམ་པའམ། ཚིག་འཇམ་པོས་ཉོན་མོངས་སྐྱོན་འདི་ལྟ་བུ་ཡོད་ཅེས་སྨྲས་ནའང་ལྟུང༌། རྩུབ་པོ་གཤེ་བའི་ཚིག་ཏུ་དྲག་པོར་སྐྱོན་ནས་བོས་ནའང་ལྟུང༌། གང་ཅི་ལ་ཡང་དམ་པ་མ་ཡིན་པར་བསམས་ཤིང་སྨྲ་ན། དགེ་སློང་གིས་ཕ་རོལ་ལ་ལུས་ཀྱི་སྐྱོན་ཞར་བའམ་མཛེ་ཅན་ལ་སོགས་པའམ་ཡིད་ཀྱི་སྐྱོན་མེའམ་སྦྲུལ་གདུག་དང་འདྲ་ཞེས་བྱས་པ་དང་རིགས་ཀྱི་སྐྱོན་ཕྱག་དར་བ་ལ་སོགས་པ་འདི་ལྟ་བུ་ཡིན་ནོ་ཞེས་སྨྲས་ན་ལྟུང༌། མིང་མ་ཡིན་པ་དང་མིང་སྐྱོན་དུ་འགྱུར་བ་ལས་བོས་ན་ལྟུང༌། མི་དགའ་བ་མ་སྐྱེས་ཀྱང་ངོ༌། །དགེ་སློང་གི་དགེ་འདུན་ལ་མདོ་ལྟག་མ་ལྟར་སྐྱོན་ནས་བོས་ན་ཁྲོས་ཀྱང་རུང་ལྟུང་བར་འགྱུར། གཞན་དགེ་སློང་དང་ཁྱིམ་པ་ལ་སྐྱོན་ལྟག་པའི་ལྟར་སྨྲས་ན་ཉེས་བྱས། རྒྱལ་རིགས་དང་བྲམ་ཟེ་ལ་སོགས་པ་ན་ཉེས་བྱས་པའོ། །དགེ་སློང་ལ་རྒྱལ་རིགས་ལྟ་བུ་རིགས་བཙུན་པ་མ་ཡིན་པ་ལ་གནེང་གཙོང་གི་ཚུལ་དུ་ཡིན་ནོ་ཞེས་སྨྲས་ན་ཉེས་བྱས་ཞེས་བྱི་ཤུ་ཏས་བཤད། ཁྱོད་རྒྱལ་རིགས་ལ་སོགས་པ་བཙུན་པའི་ཚུལ་བོར་ཏེ་ཅིའི་ཕྱིར་ན་ཐར་པར་ཞུགས་ཞེས་
སྨྲས་ན་ཉེས་བྱས་ཞེས་བྱི་ཛ་ཡ་བར་མས་བཤད་སྐྱོན་ནས་འབོད་པའོ། །སྐྱོན་ནས་འབོད་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཕྲ་མའི་ལྟུང་བ་ལ་འཆད་དེ། ཕྲ་མ་འདོད་པས་ཆེ་གེ་མོ་ཞིག་སྨྲའོ་ཞེས་སྨྲ་ནའོ། །ཕ་རོལ་དགེ་སློང་གཉིས་འཐབ་པ་འམ་དབྱེ་བར་བྱ་བའི་ཕྱིར་ཁྱོད་ལ་འདི་སྐད་ཟེར་རོ་ཞེས་ཟེར་ཞིང་ཕན་ཚུན་དུ་ཚིག་བསྐྱལ་ན་ལྟུང་བར་འགྱུར་ཏེ་དངོས་ཕྲ་མ་ཡིན་པ་དང་ཕ་རོལ་ལ་སྨྲས་པ་དང་ཡན་ལག་གཉིས་དགེ་སྦྱོང་དང་ཁྱིམ་པ་གཉིས་ལ་ཕྲ་མ་བྱས་ན་ཉེས་བྱས། འོན་ཏེ་མིང་ནས་ན་ཡང་ངོ༌། །དགེ་སྦྱོང་དང་ཁྱིམ་པའི་མིང་ནི་མ་ཡིན་གྱི་དགེ་སློང་འདི་ཁྱོད་ལ་འདི་སྐད་ཟེར་རོ་ཞེས་སྨྲས་ན་ལྟུང་བར་འགྱུར་ཏེ་ཡན་ལག་གསུམ། དེ་དགེ་སློང་ནའོ། །ཕ་རོལ་དུ་གནས་པའི་དགེ་སློང་དེ་ཉིད་ཚུལ་ཁྲིམས་མ་ཉམས་པ་ལ་སྨྲས་ཏེ་ཡན་ལག་འདི་བཞི་དང་ལྡན་ན་ལྟུང༌། ཚུལ་དང་མི་ལྡན་པ་ལ་ལྡན་པར་བསམས་ཏེ་སྨྲས་ནའང་ལྟུང་གཞན་ལ་ན་ཉེས་བྱས་པའོ། །ཡན་ལག་འདི་བཞི་དང་མི་ལྡན་པར་སྨྲས་ན་ཉེས་བྱས་ཞེས་བྱི་ཛ་ཡ་བར་མས་བཤད། དགེ་སློང་འདི་འདི་སྐད་ཟེར་རོ་ཞེས་མིང་ནས་མ་ཕྱུང་པར་སྨྲས་ན་ཉེས་བྱས་ཞེས་བྱི་ཤུ་ཏས་བཤད། ཕྲ་མའོ། །ཕྲ་མའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།སྤྱོས་པ་ལ་འཆད་དེ། འྦྷིད། ཤེས་བཞིན་དུ་བྱས་ན་ལྟུང་བར་འགྱུར་ཏེ་ཡན་ལག་གཅིག །དགེ་འདུན་གྱི་ཡང་དག་པར་ཞི་བའོ། །དགེ་སློང་གཉིས་ཤིག་འཐབ་པ་ལས་དགེ་འདུན་གྱིས་ཞི་བར་བྱས་པ་ལས་དགེ་སློང་གཅིག་གིས་སླར་འཐབ་པའི་རིགས་སོ་ཞེས་འཐབ་ཏུ་བཅུག་པ་ལས་བརྒྱ་རྩ་གཅིག་གང་ཡང་རུང་སྟེ་དགེ་འདུན་གྱིས་ལས་བྱས་ཏེ་ཞི་བ་ལས་ཉེས་པར་འགྱུར་ཏེ་ཡན་ལག་གཉིས། དགེ་སློང་དག་གིས་གླེངས་པའོ། །དགེ་སློང་གཉིས་ཆོས་ཀྱི་ཕྱིར་རྩོད་པ་ལས་བདག་གིས་གླེངས་པ་ལས་འགྱུར་ཏེ་ཡན་ལག་གསུམ། སྤྱོས་ནའོ། །མདོ་ལྟག་མའི་ལྟག་མ་ལྟར་དགེ་འདུན་གྱིས་ཞི་པར་བྱས་པ་ལས་ཞི་བའི་མི་རིགས་ཀྱིས་ད་རུང་རྩོད་པའི་རིགས་སོ་ཞེས་དགེ་འདུན་གྱི་ལས་སྤྱོས་ཏེ་ཡན་ལག་འདི་བཞི་དང་ལྡན་ན་ལྟུང་བའོ། །འཁོད་པས་དགེ་འདུན་
ལས་བྱེད་པའི་ནང་ན་བདག་འདུག་ཏེ་རྒྱུས་ཤེས་པ་དང༌། ལས་བྱས་པ་དང་བདག་གིས་གསོལ་བ་དང་ཞུ་བའི་ལས་བྱེད་བྱེད་དེ་རྒྱུས་ཤེས་པ་དང༌། དད་པ་བྱིན་པ་ལ་རྩ་བའོ། །བདག་གིས་དད་པ་བྱིན་པ་དང་རྩིས་མགོ་འདི་རྣམས་དང་ལྡན་པར་གང་བྱས་ཀྱང་རུང་སྟེ་ལྟུང་བར་འགྱུར། ཉེས་བྱས་པ་ནི་འོངས་པ་དང༌། དགེ་འདུན་གྱིས་ལས་བྱས་པ་ལ་དགེ་སློང་ཞིག་ཕྱིས་འོངས་ཏེ་ལས་འདི་བྱས་པ་མ་ལེགས་སོ་ཞེས་སྨྲས་ན་ཉེས་བྱས། ལྟ་བ་ལ་བརྗོད་པ་ཡང་ངོ༌། །དགེ་སློང་གྲལ་ན་འདུག་པས་དགེ་འདུན་གྱི་ལས་བྱས་པ་ལ་མི་རུང་པ་སྐད་དུ་ཚིག་འཇོང་རྙོལ་དུ་སྨྲས་ནའང་ཉེས་བྱས། དེ་བཞིན་དུ་གླེང་བར་འདུ་ཤེས་ན་གླེང་བ་དག་ཀྱང་ངོ༌། །དགེ་སློང་གཉིས་ཤིག་རྩོད་དེ་ལྟག་ཏུ་དགེ་འདུན་གྱིས་ཞི་བར་བྱས་པ་ལས་ཞི་བར་བྱས་པའི་གླེང་དེ་ནི་མ་བསླང་གི་གླེང་གཞན་ཞིག་གིས་འཐབ་པར་འགྱུར་བའི་གཅུགས་ཤིག་ལས་གླེང་བསླང་སྟེ་རྩོད་དུ་བཅུག་པའང་ལྟུང༌། དགེ་འདུན་གྱིས་ལས་བརྒྱ་རྩ་གཅིག་ལྟ་བུ་གང་ཡང་རུང་བཞི་པའམ་ཆད་པར་བྱས་པ་ལས་དེ་ཉིད་སྤྱོས་ཀྱང་རུང་གཞན་དུ་སྤྱོས་ཏེ་བསྣོར་ཀྱང་རུང་ལྟུང་ངོ༌། །ལས་ཀྱི་འབྲས་བུར་གྱུར་པ་ལ་དེ་མ་ཡིན་ཞེས་བརྗོད་ན་ཕྱེད་དོ། །དགེ་འདུན་གྱིས་དགེ་སློང་ལྷག་མར་གྱུར་པ་ཞིག་ཆད་པར་བྱེད་དུ་བཅུག་པ་ཞག་བཅུ་ཙམ་བྱས་པ་ལ་དགེ་སློང་ཅིག་ན་རེ་ཆད་པ་བྱེད་པ་དེ་ལ་ཁྱོད་ཀྱིས་ཆད་པའི་ལས་བྱས་པ་འདི་མ་ཡིན་གྱིས་གཞན་བྱེད་དུ་བཅུག་གོ་ཞེས་སྤྱོས་པའི་ཚེ་ཉེས་བྱས། ལས་བརྒྱ་རྩ་གཅིག་ཀུན་དེ་དང་འདྲ། སྤྱོས་པའོ། །སྤྱོས་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།བུད་མེད་ལ་ཆོས་འཆད་བའི་ལྟུང་བ་ལ་འཆད་དེ། ཆོས་འཆད་པའོ། །བུད་མེད་བརྡ་ཕྲད་པ་ལ་ཆོས་བཤད་པ་ལས་ལྟུང་བར་འགྱུར་ཏེ་ཡན་ལག་གཅིག །ཚིག་དྲུག་ལས་ལྷག་པར་རོ། །སྒོ་དྲུག་ལས་ལྷག་པར་བཤད་ན་ལྟུང་བར་འགྱུར་ཏེ་ཡན་ལག་གཉིས། ལྷག་པར་ཤེས་ནའོ། །བདག་གི་ཚིག་ལྔའམ་དྲུག་ལས་ལྷག་པར་སྨྲས་པར་ཤེས་ན་ལྟུང་བར་འགྱུར་ཏེ་ཡན་ལག་གསུམ་དང་ལྡན་ན་ལྟུང་བའོ། །ལྔ་པོ་ཚིག་ལྔ་ལས་བརྩམས་པའོ། །ཕུང་པོ་ལྔ་བཤད་པ་ལས་དྲུག་ཏུ་རྩོམ་པའི་ཚེ་ཉེས་བྱས། དྲུག་ཏུ་
སྨྲས་ན་ལྟུང༌། སྒོ་དྲུག་མི་རྟག་གོ་ཞེས་བཤད་པ་ལས་ཚིག་བདུན་དུ་རྩོམ་པའི་ཚེ་ཉེས་བྱས་ཚིག་བདུན་དུ་སྨྲས་ན་ལྟུང་བའོ། །མཁས་པས་མ་བྱས་པ་ནི་ལན་ཀུན་དྲིས་པ་དང༌། མདོ་ལྟག་མ་ལྟར་ཕུང་པོ་དང་སྐྱེ་མཆེད་བཤད་པ་ལས་བུད་མེད་མཁས་པས་འདི་ཡན་ལག་ཐབས་ཇི་ལྟ་བུ་ཡིན་ཞེས་དེས་བྱེ་བྲག་ཏུ་དྲིས་པ་ལས་ཡན་ལག་ཞིབ་ཏུ་བཤད་ཀྱང་ཉེས་མེད་ཁ་དོན་དང་བུད་མེད་ཁ་དོན་འབུལ་བ་ལ་ཁ་དོན་མནོད་པ་དང་དབོག་བའི་ཚིག་དྲུག་ལས་ལྷག་པར་སྨྲས་ཀྱང་ཉེས་མེད། ཀུན་དྲི་བ་དང༌། སྔོན་ཆད་ཆོས་བཤད་དེ་བུད་མེད་ཀྱིས་བརྗེད་པ་སླར་འདྲི་ན་ཚིག་དྲུག་ལས་ལྷག་པར་སྨྲས་ཏེ་བསྟན་པའང་ཉེས་མེད། ཉེ་བར་གནས་པ་བྱིན་པ་དང༌། དཀོན་མཆོག་གསུམ་ལ་སྐྱབས་སུ་འགྲོ་བ་དང་ཁྲིམས་པའང་ཚིག་དྲུག་ལས་ལྷག་པར་སྨྲས་ཀྱང་ཉེས་མེད། ཀུན་དྲི་བ་དང་བྱིན་པའི་ཆགས་པའོ། །ཡོན་བདག་གི་དགེ་སློང་བཤོས་གསོལ་བའི་ཚེ་ཚིག་དྲུག་ལས་ལྷག་པར་ཚིགས་བཅད་སྨྲས་ཀྱང་ཉེས་མེད། གནས་སྤངས་ནས་སྔ་མའི་མ་ཡིན་ནོ། །བུད་མེད་ལ་ཆོས་འཆད་པ་ཚིག་བཞིའམ་ལྔ་ཙམ་མན་ཆད་སྨྲས་ཏེ་ས་སྤོས་ཤིང་བཤད་པ་ནི་ཉེས་མེད། ཚིག་གྲངས་ལས་འདས་པར་སྨྲས་ཏེ་ས་སྤོས་པ་ནི་ལྟུང་བར་འགྱུར། འཆད་པའོ། །འཆད་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་པའི་མདོ།། །།ཀློག་པའི་ལྟུང་བ་ལ་འཆད་དེ། རབ་ཏུ་མ་རྫོགས་པ་དང་མཉམ་པའམ། འབྲང་བར་འཐོབ་པར་འགྱུར་བའི་སྟེ། སྨྲས་པ་ཆོས་སམ་ཡི་གེ་ནའོ། །དགེ་སློང་གཉིས་མགྲིན་པ་བསྒྲིལ་ཞིང་སྨྲས་པ་ནི་མ་གཏོགས་ཏེ་དགེ་སྦྱོང་ངམ་ཁྱིམ་པ་ལྟ་བུ་ཞིག་དང་རྣམ་པ་འདི་རྣམས་གང་དང་ཡང་རུང་སྟེ་ཤ་ལོ་ཀ་གཅིག་ཡན་ཆད་མིད་པ་བསྒྲིལ་ཞིང་སྨྲ་ན་ལྟུང་བར་འགྱུར། མི་འདོད་པར་འགྲུབ་པ་མ་གཏོགས་སོ། །ཁ་ཐོན་ཞུ་བ་ལ་སོགས་པ་དགེ་སློང་གིས་སྨྲས་པའི་རྗེས་བཞིན་དགེ་སྦྱོང་ངམ་ཁྱིམ་པ་ཞིག་ལྕེ་བདེ་ཞིང་ཚིག་མྱུར་བས་བདག་སྨྲས་པའི་ཚིག་ནོན་ཏེ་བསྒྲིལ་ཞིང་སྨྲས་ཀྱང་ལྷན་ཅིག་སྨྲ་བར་མ་དད་ན་ཉེས་མེད། མཉན་དུ་ཡོད་པ་ན་ཨུ་དའི་ཡི་གེ་ཕལ་མོ་ཆེ་དང་ལྷན་ཅིག་ཏུ་ཀླག་ཅོར་ཆེར་ཟེར་ཞིང་མིད་པ་བསྒྲིལ་བ་ལས་བཅས། ལྷོགས་ཤིག་པ་
ཡང་བསྟན་ཏེའོ། །མདོ་ལྟག་མ་ལྟར་དགེ་སྦྱོང་ངམ་ཁྱིམ་པའི་ཚིག་མྱུར་བར་སྨྲ་བ་ལ་ངའི་ཚིག་སྨྲ་བ་མ་ཟིན་པར་མ་སྨྲ་ཤིག་ཅེས་ལན་གཉིས་གསུམ་དུ་བསྟན་ཅིང་བསྒོ་འང་རང་བཞིན་དུ་གྱུར་ཏེ་ཚིག་མྱུར་ནས་མཉམ་དུ་སྨྲས་པའང་ཉེས་མེད། ཁ་དོན་དང་ཁ་དོན་སློས་པའི་སྐབས་སྐབས་སུ་ཚིག་བསྒྲིལ་ཞིང་སྨྲས་པའང་ཉེས་མེད། སློས་པ་དང་ཁ་དོན་འབུལ་བའི་ཚེ་བརྗེད་དམ་ནོར་ཏེ་བསྟན་པར་སློས་བ་ལ་བསྒྲིལ་ཏེ་སྨྲས་པ་ཉེས་མེད། ཀུན་འདྲི་བའོ། །དགེ་སྦྱོང་གིས་དྲིས་པ་ལ་ལེའུ་དང་དོན་འདི་ལྟ་བུ་ཡིན་ནོ་ཞེས་བསྒོ་བ་ལ་མཉམ་དུ་སློས་ཤིང་སྨྲ་བ་ནི་ཉེས་མེད། ཀློག་པའོ། །ཀློག་པའི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།ཉེས་སྨོས་ལ་འཆད་དེ་བསྐོའོ། །སྡིག་པའི་དགེ་སློང་ཕ་དང་དགེ་སློང་མ་རིགས་སུ་བསྐོའོ། །མཉན་དུ་ཡོད་པ་ན་དགེ་སློང་ཨ་རི་ཤྟ་དང་དགེ་སློང་མ་སར་ལ་གཉིས་ཤུག་ཏུ་འདུས་ནས་རིགས་སུན་པ་སྤྱོད་པ་ལ་ཡུལ་དེའི་གྲོང་མི་ན་རེ་ཤ་ར་མ་ན་དེའི་སློབ་མ་འདི་ལྟར་རིགས་སུན་ཅིང་མི་ཚངས་པར་སྤྱོད་པ་ལ་ངེད་དང་མི་འདྲ་བ་མེད་ཀྱིས་འདི་དག་ལ་བསྟི་སྟང་དང་བསོད་སྙོམས་ལ་སོགས་པའང་མི་སྦྱིན་ནོ་ཞེས་དམ་བཅས་ཏེ། དགེ་སློང་ཡོན་ཏན་དང་ལྡན་པ་ཁ་ཅིག་སློང་པ་ལའང་བསོད་སྙོམས་མ་སྟེར་བ་གཏམ་རིམ་པ་ནས་སངས་རྒྱས་ཀྱིས་གསན་ཏེ་དགེ་སློང་གཅིག་གསོལ་བ་དང་ཞུ་བའི་ལས་གཉིས་ཀྱིས་དགེ་སློང་ཕ་དང་དགེ་སློང་མ་འདི་གཉིས་དང་དགེ་འདུན་ཕལ་ཆེར་ཕྱོགས་མི་སྟེ་འདྲའོ་ཞེས་རིགས་སུ་བསྒོ་ཤིག་པར་བསྒོ་བ་ལ་བྱ། ཉོན་ཅིག་ཚེ་དང་ལྡན་པ། བསྐོས་པའི་དགེ་སློང་གིས་ཁྱིམ་པ་ཕོ་སྨོས་ལ་རིགས་སུན་པའི་མིང་ནས་སྨོས་ཏེ་འོག་མའི་ཚིག་བསྒོ་བ་ལ་བྱ། འགྱུར་བ་ནི་རིགས་སུ་རིགས་སུན་པ་དང་རབ་འབྱུང་གནས་སུ་རབ་འབྱུང་གནས་སུན་པ་འདི་ལྟ་སྟེ་འགྲུབ་པའི་འབྲས་ཀྱི་ཞིང་དུ་སེར་བ་དྲག་པོའི་འཁོར་ལོ་བབ་པ་དེའི་ཕྱིར་འབྲས་དེ་ཁ་བཏགས་པའི་ཕྱིར་མ་རུང་པར་བྱ་བའི་ཕྱིར་མི་རིགས་པར་ཆུད་གཟན་པ་དང་འགྲུབ་པའི་བུ་རམ་ཤིང་གི་ཞིང་བཙོད་འདྲ་པ་ཞེས་བྱ་བའི་ནད་ཀྱི་རིགས་བྱུང་ནས་དེའི་ཕྱིར་བུ་རམ་ཤིང་དེ་ཉིད་ཁ་གདགས་པའི་ཕྱིར་མ་རུང་པར་བྱ་བའི་ཕྱིར་མི་རིགས་པར་ཆུད་གཟན་པའི་ཕྱིར་ཚེ་དང་ལྡན་པ་
ཁྱེད་དགེ་སློང་འདི་ངད་དགེ་སློང་མ་འདིས་བསྟན་པ་མ་གཞལ་ཅིག །དགེ་སློང་ཕ་འདི་དང་དགེ་སློང་མ་འདི་དག་ནི་འབྲུ་ཚིག་པ་བཞིན་མི་སྐྱེ་བ་ནི་ཆོས་ཏེ་འདིའི་འདུལ་བའོ། །ལྟོ་ཤིག་བཅོམ་ལྡན་འདས་དང་གནས་བརྟན་གནས་བརྟན་རྣམས་ཀྱིས་དགེ་སློང་ལའོ་ཞེས་རིགས་སུ་རིགས་ལ་བསྒོ་བ་སྨོས་ཤིག །མི་མོས་ན་ཞུ་བ་བྱོས་ཤིག །དགེ་སློང་བསྐོས་པ་གོང་དུ་བསྐོར་སོང་སོང་བ་ལ་དགེ་སློང་ཨ་རི་ཤྟས་ཁྱོད་སྒོར་འགྲོ་ན་གསད་དོ་ཞེས་བསྡིགས་པ་དང་གྲོང་དུ་འགྲོ་མ་ནུས་ནས་བདག་གིས་རྡོ་མི་ཐོགས་སོ་ཞེས་དད་པ་སླར་ཕུལ་བ་དང་སངས་རྒྱས་ཀྱིས་དགེ་འདུན་སྟེ་ལྔ་ལ་ཞུ་བ་བྱས་ཏེ་ཁྱེད་རྣམས་ཐམས་ཅད་ཀྱིས་དགེ་སློང་ཨ་རི་ཤྟས་ཕོ་མོ་འདི་གཉིས་དང་གཞན་དང་ཐ་དད་པར་ལྟོས་ཤིག་པར་བསྒོ་བལ་བྱ་འྦྷིད་ཤེས་བཞིན་པ་ལ་བྱ། མི་ཤེས་པའི་བསྙེན་པར་མ་རྫོགས་པ་ཉན་ནའོ། །དགེ་སློང་གིས་དགེ་སྦྱོང་དང་ཁྱིམ་པ་གཏམ་མཐོས་ཤིང་མི་ཤེས་པ་ལས། དགེ་སློང་འདིས་ཕམ་པའམ་དགེ་འདུན་གྱི་ལྷག་མས་བྱས་སོ་ཞེས་བྱས་ན་ལྟུང་བ་སྟེ་དགེ་སྦྱོང་ངམ་ཁྱིམ་པ་དེ་ཕས་ཕམ་བ་བྱུང་བར་མི་ཤེས་པར་སྨྲས་པས་ཡན་ལག་གཅིག་བསྙེན་པར་མ་རྫོགས་པ་དང་ཡན་ལག་གཉིས་མཉན་ཏེ་ཐོས་པ་དང་ཡན་ལག་གསུམ། བསྒོ་ནའོ། །ཉེས་པ་ཉིད་ཕ་རོལ་ལ་བསྟན་པ་དང་ཡན་ལག་བཞི། ཕས་ཕམ་བ་དང་དགེ་འདུན་གྱི་ལྷག་མའོ། །མདོ་ལྟག་ཏུ་བསྒོ་ཞེས་བྱ་བ་ནི་ཕས་ཕམ་པ་དང་དགེ་འདུན་གྱི་ལྷག་མ་བསྒོ་བ་ལ་བྱ་སྟེ་ཡན་ལག་འདི་ལྔ་དང་ལྡན་ན་ལྟུང་བར་འགྱུར། བསྐོ་བ་མ་བྱས་པའོ། །དགེ་འདུན་གྱིས་གྲོང་དུ་ཉེས་པ་སྦོམ་པོ་སྨོས་ཤིག་པར་བསྒོས་པ་ནི་མ་གཏོགས་ཏེ་བདག་གིས་ཉེས་པ་སྦོམ་པོ་གཞན་ལ་སྨྲས་ན་ལྟུང༌། དགེ་འདུན་ལམ་གསོལ་ནའོ། །དགེ་འདུན་སྡེ་ལྔ་ལ་གསོལ་བ་དང་ཞུ་བའི་ལས་ཀྱིས་གྲོང་དུ་བསྒོ་ཤིག་པར་བསྐོས་པ་ནི་ཉེས་མེད། དེ་ལྟར་མ་བསྒོ་བར་སྨྲས་པ་ནི་ལྟུང་བར་འགྱུར། སྡུག་བསྔལ་སྦྱིན་པར་སྨྲ་བའོ། །ཉེས་སྨོས་ཀྱི་ལྟུང་བ་སྟེ་འདུལ་བ་བདུན་གྱི་གཙུག་ལག་ཁང་ངམ་སངས་རྒྱས་ཀྱི་དྲི་གཙང་ཁང་ངམ་ཙེ་ཏི་ཞིག་བརྩིག་ན་གང་གིས་བརྩིག་ཅིང་ལས་བྱེད་པའི་དགེ་སློང་དེས་ཤིང་གཅོད་ཅིང་རྔ་བའི་ཞལ་ཏ་བྱེད་ཅིང་གཅོད་དུ་གཞུག་བར་
གནང་ངོ༌། །ཇི་ལྟ་བྱ་བའི་ཐབས་འོག་ནས་འཆད་པ་ཡིན་ནོ། །ཞག་བདུན་བརྒྱད་ཀྱི་སྔོན་ལོགས་སུ་འོག་ཏུ་དཀྱིལ་འཁོར་དང་དྲི་བསུང་དང་མེ་ཏོག་དང་པོག་དང་མེ་མར་དང་གཏོར་མ་བྱིན་ལ་ གསུམ་བརྒྱུད ་བླངས་ནས་སྦྱིན་བའི་བཤགས་པ་བྱ་སྟེ་གང་ལྷ་ཤིང་འདི་ལ་གནས་པ་དེ་གནས་གཞན་དུ་ཚོལ་ཅིག་ཤིང་འདི་མཆོད་རྟེན་གྱི་འམ་དགེ་འདུན་གྱི་བྱ་བར་འགྱུར་རོ་ཞེས་ཤིག་པའི་ཚིག་གིས་སོ། །ཤིང་གང་ནས་རྔ་བའི་ས་དེར་ཞག་བདུན་ནམ་བརྒྱད་ཀྱི་སྔོན་ལོགས་ནས་ཤིང་དྲུང་དུ་དཀྱིལ་འཁོར་དང་དྲི་བསུང་དང་མེ་ཏོག་དང་མེ་མར་དང་པོག་སྤོས་དང་མཆོད་པ་མེ་མར་དང་གཏོར་མ་ལ་སོགས་པས་མཆོད་ཅིང་སྦྱིན་ནོ། །དེ་ནས་དཀོན་མཆོག་གསུམ་ལ་བསྟོད་པའི་སྟོ་ཏྟྲ་དང་ཞལ་ནས་གསུངས་པའི་ཚིགས་སུ་བཅད་པ་དང་ཞི་བར་བྱ་བའི་སྨོན་ལམ་དང་ གསུམ་བརྒྱུད ་མར་བཀླག་གོ །དེ་ནས་ཤིང་དེ་ལ་གནས་པའི་ལྷ་དེ་ལ་ཤིང་བྱིན་ཅིག་ཅེས་པའི་ཕྱིར་སྦྱིན་པའི་ཚིགས་སུ་བཅད་པ་ཡང་བྱ་སྟེ་ལྷ་ལ་ཁྱོད་གནས་གུད་དུ་སོང་ཤིག་ཤིང་འདི་ནི་དགེ་འདུན་གྱི་མཆོད་རྟེན་ནམ་གཙུག་ལག་ཁང་གི་ཤིང་དུ་བྱ་དགོས་སོ་ཞེས་བསྒོ་ལ་ཤིང་གཅོད་པའི་ལས་མི་ལ་ཤིང་འདི་རྣམས་ཆོད་ཅིག་ཅེས་མི་བསྒོ་བར་ལྷ་ཁང་གི་ཤིང་དུ་དགོས་པ་ན་འདི་ཡིན་ནོ་ཞེས་རིག་པ་ཙམ་དུ་བྱ། ཤིང་འཁོར་གཅིག་ནས་མང་དུ་རྔན་མཆོད་པ་སྤྱིར་ཁ་གསུམ་ཙམ་དུ་བྱ་སོ་སོར་ཐོར་བུར་རྔན་མཆོད་པ་དེ་བཞིན་དུ་ཁ་རེ་རེར་བྱ། སྔོན་ཤིང་མཁན་བྱེད་བྱེད་པ་ལས་རབ་ཏུ་བྱུང་བ་ལ་གན་ད་ཞེས་བྱ་བས་ཤིང་བཅད་པ་དང་ཤིང་ལ་གནས་པའི་ལྷས་དགེ་སློང་གིས་ངའི་གནས་ཕྲོགས་སོ་ཞེས་སངས་རྒྱས་ལ་གསོལ་ནས་སངས་རྒྱས་ཀྱི་འཕྲུལ་གྱིས་ཤིང་གི་ལྷ་གཞན་ཞིག་བཀུག་སྟེ་ལྷ་འདི་གནས་མ་རྙེད་ཀྱི་བར་དུ་ཁྱོད་དང་ལྷན་ཅིག་ཏུ་འདུག་ཤིག་ཅེས་བསྒོ་སྟེ། དེ་ནས་དགེ་སློང་རྣམས་བསྡུས་ཏེ། ད་ཕྱིན་ཆད་གཙུག་ལག་ཁང་ངམ་མཆོད་རྟེན་གྱི་ཤིང་གཅོད་ན་གོང་མ་ལྟར་མ་བྱས་པར་མ་གཅོད་ཅིག་ཅེས་བཅས། དེ་སྟེ་འགྱུར་བ་མེ་འབྱུང་ངམ་ཁྲག་ཟག་གམ་ཡན་ལག་འགུལ་ལམ་ལོ་མ་ལྷགས་པ་ལ་སོགས་པ་མཐོང་ན་ཞིང་དང་བཅས་པའི་སྦྱིན་པ་དང་སེར་སྣའི་མི་བསྔགས་བ་དང་བསྔགས་པ་བཅས་པ་བྱ། ཤིང་བཅད་པའི་ཕྱིར་མདོ་ལྟག་མ་ལྟར་ཆོ་
ག་བྱ་བའི་འོག་ཏུ་བཅད་པར་བརྩལ་བ་དང་ཤིང་དེ་ལ་མེ་འབྱུང་ངམ་ཁྲག་ཟག་གམ་ཡལ་ག་འགུལ་ལམ་སྒྲ་འབྱུང་བ་ལ་སོགས་པ་མཚན་མ་ཞིག་ཏུ་གྱུར་ན་ཤིང་དེ་ལ་གནས་པའི་ལྷ་གུད་དུ་མ་སོང་བ་ཡིན་གྱིས་ཤིང་འདི་དགེ་འདུན་གྱི་འམ་གཙུག་ལག་ཁང་ངམ་མཆོད་རྟེན་གྱི་རྒྱུར་ཕུལ་ན་བསོད་ནམས་གྱི་ཞིང་ཡིན་ཏེ་ཡོན་ཆེའོ་ཞེས་ཆོས་ཤོད་ཅིག །སྦྱིན་གཏོང་མ་བྱས་ཏེ་སེར་སྣ་བྱས་ན་སྡིག་ཆེ་བའང་བཤད། སྦྱིན་གཏོང་བྱས་ན་བསོད་ནམས་ཆེ་བའི་ཆོས་ཀྱང་བཤད་དེ་ཤིང་བཅད་དམ། མ་ཞི་མི་གཏོང་ན་མི་བཅད། མདོ་ལྟག་མ་ལྟར་ཆོས་བཤད་པ་ལ་སོགས་པ་བྱས་ཏེ་བཅད་ན་མེ་འབྱུང་བ་ལ་སོགས་པ་འབྱུང་ཞིང་མ་ཞི་ན་ཅི་མི་གཅོད་དོ། །འབྲིང་སེམས་ཅན་གྱི་གྲོང་དང་ས་བོན་རྣམ་ལྔ་མ་རུང་བར་མ་གྱུར་པར་ཀྱང་ཤེས་བཞིན་པ་ལས་ལྟུང་བར་འགྱུར་ཏེ་ཡན་ལག་གཅིག །མ་རུང་བར་མ་གྱུར་ན་ས་བོན་རྣམ་ལྔ་སྟེ་ས་བོན་དང་སྡོང་བུའི་ས་བོན་དང་ཚིགས་པའི་ས་བོན་དང་མེ་ཏོག་གི་ས་བོན་དང་འབྲས་བུའི་ས་བོན་དང་རྣམ་ལྔ་ལ་གག་ཀྱང་རུང་སྟེ་རུལ་ཞིང་སྣད་པ་མ་ཡིན་པ་དང་མེ་དང་མཚོན་ལ་སོགས་པས་མ་བརྟགས་པ་ལ་མ་རུང་བ་བྱས་ན་ལྟུང་བར་འགྱུར། བརྟགས་པ་མ་བྱས་པའི་ས་བོན་དང་སྐྱེ་བ་ཐ་དད་པ། མ་བརྟགས་པའི་ས་བོན་དང་རྩི་ཤིང་ཐ་དད་ནས་སྐྱེ་བ་ཞིག་ལས་བཅད་དམ་བཤིག་ན་ལྟུང་བར་འགྱུར་རོ། །རྩ་བྲན་མ་རུང་བར་ན་ཡང་ངོ༌། །ཤིང་གི་རྩ་བའི་ཡལ་ག་ཕྲེའུ་དང་ལོ་མའི་ཡལ་ག་ཕྲེའུ་བཅད་ན་ཡང་ལྟུང་བར་འགྱུར་རོ། །ཅི་ལྟ་ཅི་ལྟ་བུར་རྩི་ཤིང་དང་ས་བོན་ཅི་ལྟ་བུའི་ཐབས་ཀྱིས་བཅད་ཅིང་མ་རུང་བར་བྱས་ན་ལྟུང་བར་འགྱུར། བསྒུལ་པས་ཀྱང་ངོ༌། །ཤིང་དྲུང་པ་བསྒུལ་ཅིང་འབྲས་བུ་ལྷགས་ནའང་ལྟུང་བ་རི་རེ་ཞིང་ལྟུང་བ་རེ་རེའོ། །མནན་པ་རྩྭ་དང་འཇིབ་དང་ཉལ་ཉིལ་ལ་སོགས་པས་ཀྱང་ངོ༌། །ས་བོན་དང་རྩི་ཤིང་ལ་སོགས་པ་མ་རུང་བར་བྱ་བའི་ཕྱིར་རྡོ་ཤིང་གིས་མནན་ཏས་འཇི་བ་དང་ཉལ་ཉིལ་ལ་སོགས་པས་མནན་ཅིང་མ་རུང་བར་བྱས་ན་ལྟུང་བར་འགྱུར་རོ། །རྣམ་པར་འབྱེད་པའི་ནང་ནས་འབྱུང་བའི་མདོ།། །།བླ་མ་མིའི་ཆོས་ཀྱི་ལྟུང་བ་འཆད་དེ། བདེན་པའོ། །མིའི་བླ་མའི་ཆོས་བདག་དང་ལྡན་དུ་ཟིན་ཀྱང་གཞན་ལ་སྨྲས་ན་ལྟུང་བར་འགྱུར་
ཏེ་ཡན་ལག་གཅིག །བདེན་པ་མ་མཐོང་བའི་བསྙེན་པར་མ་རྫོགས་པའོ། །བསྙེན་པར་མ་རྫོགས་པའི་གང་ཟག་ཀྱང་ཡིན་ལ་མིའི་བླ་མའི་ཆོས་མི་ཤེས་ཤིང་མ་མཐོང་བ་ལ་སྨྲས་ཏེ་ཡན་ལག་འདི་བཞི་དང་ལྡན་ན་ལྟུང་བར་འགྱུར་རོ། །ཁྱིམ་པའི་མདུན་དུ་རྫུ་འཕྲུལ་མི་བསྟན། ནོར་རྫས་ལ་སོགས་པ་ཕྲན་ཚེགས་འདོད་པའི་ཕྱིར་རྫུ་འཕྲུལ་དང་ལྡན་ན་ཡང་ཁྱིམ་པའི་མདུན་དུ་རྫུ་འཕྲུལ་མི་བསྟན། ཁྱིམ་པ་གཅིག་གིས་ལྷུང་བཟེད་ཤིང་མཐོན་པའི་ཁར་བཏགས་ཏེ་མུར་འདུག་དང་སངས་རྒྱས་ཀྱི་ཆོས་ལ་ལྟ་བ་དག་གིས་རྫུ་འཕྲུལ་གྱིས་ལྷུང་བཟེད་ལན་ནུས་པ་ལྷུང་བཟེད་ཐལ་བྱུང་སྦྱིན་ནོ་ཞེས་བྱས་པ་དང་མུར་འདུག་གིས་ལེན་མ་ནུས་ཏེ། དགེ་སློང་སླིན་ད་བད་ཙ་ཞེས་བྱ་བས་རྫུ་འཕྲུལ་གྱིས་ལྷུང་བཟེད་བླངས་ཏེ་ཁེ་ནས་ཁེ་འདོད་པ་དང་ཁེའི་ཕྱིར་རྫུ་འཕྲུལ་མི་བྱ་བར་བཅས་ཏེ་བྱས་ན་ཉེས་བྱས། སེམས་ཅན་ཡིད་གཡོ་བ་དང་རྐུན་པོ་ནོར་མི་ཐོབ་པར་བྱ་བའི་ཕྱིར་རྫུ་འཕྲུལ་བྱས་པ་ཉེས་མེད། དགེ་སློང་མས་སྟོན་པ་ལ་མ་ཡིན། དགེ་སློང་མ་དགྲ་བཅོམ་ཞིང་རྫུ་འཕྲུལ་དང་ལྡན་དུ་ཟིན་ཀྱང༌། སངས་རྒྱས་ཀྱི་སྤྱན་སྔར་རྫུ་འཕྲུལ་མི་བྱ། སངས་རྒྱས་ལྷ་ལས་བབས་ཏེ་གཤེགས་པའི་ཚེ་དགེ་སློང་མ་ཨུཏྤ་ལ་བར་སྣང་ལ་རྫུ་འཕྲུལ་གྱིས་ཕྱག་བྱ་བར་བསམས་ནས་འཁོར་ལོའི་རྒྱལ་པོ་འཁོར་དང་བཅས་པར་སྤྲུལ་པ་དང་འཁོར་ཐམས་ཅད་རྫུ་འཕྲུལ་དེ་སུ་ཞིག་ཡིན་སྙམ་ཐེ་ཚོམ་ཟོས་པ་དང་སངས་རྒྱས་ཀྱི་སྤྱན་སྔར་དགེ་སློང་མ་ཐུགས་ཐུབ་བྱེད་བྱེད་པས་ཉེས་པ་ལས་བཅས། བླ་མ་མིའི་ཆོས་སྨྲ་བའོ། །བླ་མ་མིའི་ཆོས་ཀྱི་ལྟུང་བ་རྫོགས་སོ།། །།བརྫུན་གྱི་བླ་མའི་ཆོས་སུ་སྨྲ་བའི་ཡན་ལག་ཐམས་ཅད་འདིར་འདུས་ཏེ་འདིར་གཏོགས་སོ།། །།མཛའ་བའི་ལྟུང་བ་ལ་འཆད་དེ། དེ་སྟེ་བསྟན་ན་དོན་གྱི་ཞུ་བ་སྔ་མའི་དོན་དུ་བྱ། དགེ་འདུན་ནོར་ཞིག་འགོད་དམ་གུད་དུ་གཏོང་ན་སྔར་གསོལ་བ་དང་ཞུ་བའི་ལས་བྱས་ལ་བགོ །དགེ་འདུན་གྱི་ལས་ཤིག་བྱེད་ནའང་སྔར་གསོལ་བ་དང་ཞུ་བའི་ལས་བྱས་ཏེ་བྱའོ། །གསོལ་བ་དང་ཞུ་བ་སྔར་བྱ་དགོས་པ་ནི་ཕྱིས་མི་ལྡོག་ཅིང་མི་འགྱུར་བར་བརྟན་པར་བྱ་བའི་ཕྱིར་སྔར་བྱའོ། །དད་པ་བྱིན་པའོ། །གོས་བགོ་འམ་ཕར་སྦྱིན་པའམ་སྔར་དད་པ་བྱིན་ལ་ཕྱིས་དགེ་འདུན་
དབང་བ་གང་ཟག་ལ་བསྔོས་སོ་ཞེས་ཟེར་ན་ལྟུང་སྟེ་ཡན་ལག་གཅིག །དགེ་སློང་གི་དགེ་འདུན་གྱི་གང་ཟག་ལ་ཟས་མ་བྱིན་པ་རྙེད་ན་ལོག་པར་བསྔོ་བར་དགེ་སློང་གཞན་གྱི་མིང་ནས་མ་ཕྱུང་ཡང་ངོ༌། །དགེ་སློང་གི་དགེ་འདུན་གྱི་དཀོར་ཡང་ཡིན་པ་དང་ཁ་ཟས་ཀྱང་མ་ཡིན་པ་དང་དགེ་འདུན་དབང་བ་མཛའ་བའི་ཕྱིར་གང་ཟག་ལ་བསྔོས་སོ་ཞེས་དགེ་འདུན་ལ་བརྫུན་གྱིས་སྐུར་པ་དང་ཡན་ལག་འདི་བཞི་དང་ལྡན་ན་ལྟུང་བར་འགྱུར་ཏེ། གོས་གང་གིས་ཁྱེར་བའི་གང་ཟག་གི་མིང་ནས་ཕྱུང་ཡང་རུང་མ་ཕྱུང་ཡང་རུང་ལྟུང་བའོ། །མི་བདེན་བའི་དོན། མཛའ་བའི་ཕྱིར་དགེ་འདུན་གྱི་དབང་བ་གང་ཟག་ལ་བྱིན་ནོ་ཞེས་བརྫུན་དུ་སྐུར་ན་ལྟུང་ངོ༌། །སྐུར་བའི་ལྟུང་བའོ། །མཛའ་བའི་ཕྱིར་གོས་བྱིན་ནོ་ཞེས་སྐུར་བའི་ལྟུང་བ་སྟེ་རྫོགས་སོ།། །།བགེགས་ཀྱི་ལྟུང་བ་ལ་འཆད་དེ། འདུལ་བ་དང་ལྡན་པར་སྨྲ་བ་ལ་འཕྱ་ཞིང་རྣམ་པར་སྨྲ་བའོ། །སོ་སོར་ཐར་པའི་མདོ་འཆད་པ་ལ་ཕས་ཕམ་པ་དང་དགེ་འདུན་གྱི་ལྷག་མ་མ་གཏོགས་པར་ལྟུང་བ་མན་ཆད་ལ་འདི་ལྟ་བུའི་ཚིག་ཆུང་དུ་རྟག་ཏུ་བསླས་ཅི་དགོས་ཞེས་ཟེར་ན་ལྟུང་སྟེ་བཅོ་ལྔའི་གསོ་སྦྱིན་གྱི་ཚེ་ཡིན་པ་དང་འདུལ་བ་རྣམ་པར་འབྱེད་པ་དང་ཕྲ་མོ་དང་དྲིས་པ་དང་བྱེ་བྲག་ཏུ་གདོན་མི་ཟ་བ་དང་སྡེ་བཞིའི་ནང་ནས་འབྱུང་བའི་ཚིག་ཡན་པ་དང་འདི་ལྟ་བུའི་ཚིག་ཆུང་ངུ་ཅི་དགོས་ཞེས་ཚིག་ཏུའང་སྨྲས་པ་དང་ཡན་ལག་འདི་གསུམ་དང་ལྡན་ན་ལྟུང་བར་འགྱུར། མདོ་སྡེའི་ན་ཉེས་བྱས་པའོ། །མདོ་སྡེའི་ཚིག་དང་མདོ་སྡེའི་ནང་ནས་འདུལ་བའི་ཚིག་བྱང་བ་ལ་འདི་ལྟ་བུའི་ཚིག་ཆུང་དུ་ཅི་དགོས་ཞེས་སྨྲས་པ་ནི་ཉེས་བྱས་བགེགས་སོ། །བགེགས་ཀྱི་ལྟུང་བ་རྫོགས་ཏེ། དགུ་བཅུའི་ལྟུང་བ་ལས་བཅུ་ཕུང་གཅིག་རྫོགས་སོ།། །།ས་བོན་གྱི་ལྟུང་བ་ལ་འཆད་དེ། དགེ་འདུན་དང་མཆོད་རྟེན་གྱི་ཕྱིར་ན་ལས་སར་པ་པས་ཤིང་ཆོད་ཅིག་དགེ་དོར་བ་ལ་སོགས་པས་ཀྱང་ངོ༌། །ས་བོན་མ་རུང་པར་བྱ་བའི་ཕྱིར་ས་བོན་དང་རྩི་ཤིང་གི་ཐོག་ཏུ་རྡོ་ལ་སོགས་པ་བོར་བ་དང་ས་བོན་ཉིད་གུད་དུ་པོར་ཏེ་མ་རུང་བར་གྱུར་ན་ལྟུང་བར་འགྱུར། རླུང་དང་ཚ་བ་ལ་བཞག་པས་ཀྱང་ངོ༌། །ས་བོན་མ་རུང་བར་བྱ་བའི་ཕྱིར་རླུང་དང་ཚ་བ་དང་ཉི་མ་དང་མེ་ལ་སོགས་པར་བཞག་ཅིང་མ་རུང་
པར་འགྱུར་ན་འང་ལྟུང་བར་འགྱུར། སྐམ་པའི་གནས་སུ་བཞག་པ་ཡང་ངོ༌། །ས་བོན་མ་རུང་བར་བྱ་བའི་ཕྱིར་གཤེར་བའི་ས་བོན་སྐམ་པོ་ལ་བཞག་ན་ལྟུང་བར་འགྱུར་རོ། །དེར་འདོན་ནའོ། །ས་བོན་མ་རུང་བར་བྱ་བར་འདོད་པ་ལས་ལྟུང་བར་འགྱུར་ཏེ་ཡན་ལག་གཉིས་བདག་གམ་གཞན་གྱིས་ཀྱང་ངོ༌། །བདག་གིས་ས་བོན་མ་རུང་བར་བྱས་ཀྱང་རུང་གཞན་བྱེད་དུ་བཅུག་ཀྱང་རུང་ལྟུང་བར་འགྱུར་ཏེ་ཡན་ལག་གསུམ། མ་རུང་ན་རྩ་བ་དག་ཏུའོ། །ས་བོན་མ་རུང་བར་མ་གྱུར་པ་ཞིག་ལས་མ་རུང་བར་བྱས་ན་ལྟུང་བར་འགྱུར་ཏེ་དེ་ཡན་ལག་འདི་བཞི་དང་ལྡན་ན་ལྟུང་བར་འགྱུར་རོ། །མ་རུང་བའི་ཚད་ལས་སོ། །ས་བོན་དང་རྩི་ཤིང་མ་རུང་བར་བྱ་བའི་ཕྱིར་བརྡས་སམ་བསྲེགས་ན་དུ་མ་རུང་བ་བཞིན་དུ་ལྟུང་བ་རེ་རེའོ། །སྡོང་པོ་ཡང་ངོ༌། །ཤིང་སྡོང་པོ་གཅིག་རྩ་བར་བཅད་ན་ཡན་ལག་རེ་རེ་ལྟུང་བ་རེ་རེར་མི་འགྱུར་གྱི་རྩ་བ་ནས་བཅད་པས་ལྟུང་བ་གཅིག་ཏུ་ཟད་དོ། །ཉེས་བྱས་པ་ནི་སྦྱོར་བ་དག་ལའོ། །རྩ་ཤིང་མང་པོ་ཞིག་རལ་གྲི་འམ་ཟོར་བ་ཐབས་གཅིག་གིས་བཅད་ཅིང་བརྔས་ནའང་དུ་བཅད་པ་བཞིན་དུ་ཉེས་བྱས་རེ་རེ་དང་ལྟུང་བ་རེ་རེའོ། །དུ་ཆད་པ་བཞིན་དུ་ལྟུང་བ་ནི་རེ་རེར་འགྱུར་ཉེས་བྱས་ནི་སྤྱིར་ཐབས་གཅིག་བྱས་པས་ཉེས་བྱས་གཅིག་ལས་མེད་པར་བྱི་ཤུ་ཏས་བཤད། འདི་ལས་འདིས་བསྣུན་ན་སོ་སོར་ཐ་དད་དེ་དངོས་པོ་མ་ཡིན་ནོ། །ཤིང་སྡོང་པོ་གཅིག་བཅད་པར་བྱས་ན་སྟ་རེ་ཐབས་རེ་རེ་ལ་ལྟུང་བ་རེ་རེར་མི་འགྱུར་གྱི་ཉེས་བྱས་རེ་རེར་འགྱུར་ཏེ་ཆོད་ཟིན་ན་ལྟུང་བ་གཅིག་ཏུ་ཟད་དོ། །ཕྱུང་ན་མ་ཐར་ཏེ་བསྐྱེད་ཀྱང་ངོ། །རྩི་ཤིང་ལ་སོགས་པ་གཞོན་ནུ་ཕྱུང་སྟེ་གུང་དུ་བསྐྱེད་ཀྱང་ལྟུང་བའོ། །ཉ་ལྕིབས་དང་ཆུ་ལྡུམ་ཆུ་ལས་ཕྱུང་ན་དེར་རོ། །ཆུའི་ནང་ན་ཉ་ལྕིབས་འདུག་པ་དང་ཆུ་ལྡུམ་རྩ་བ་མ་ཟུག་པ་ཐང་ལ་བྱུང་ཡང་རུང་ཆུ་གཅིག་ཏུ་སྤོས་ཀྱང་རུང་ལྟུང་བར་འགྱུར་རོ། །ཕྱེད་ནི་འབྲས་བུ་མ་བཅེམ་པར་མིད་པའོ། །འབྲས་བུ་མ་བཅེམ་པར་རིལ་མེད་དུ་ལྟར་བཏང་ན་ལྟུང་བ་ཕྱེད་དེ་ཉེས་བྱས་སོ། །དེ་སྟེ་འདི་བཅད་ན་དགེའོ་ཞེས་སྨྲའོ། །བསྐོས་ནའོ། །ཤིང་འདི་བཅད་ན་དགེའོ་ཞེས་ཟུར་དུ་སྨྲས་ཏེ་གཅོད་དུ་བཅུག་ཀྱང་རུང་ཤིང་འདི་བཅད་ན་ཁང་ཤིང་དུ་རེ་བཟང་ཞེས་ཁ་འཕྱན་དུ་
བསམས་ཤིང་སྨྲས་ན་འང་ཉེས་བྱས། རྫུ་འཕྲུལ་གྱིས་ན་མ་བྱས་པའོ། །ཤིང་ཞིག་གཟུགས་བརྙན་དུ་སྤྲུལ་ཏེ་བཅད་ན་ནི་ཉེས་མེད་དོ། །དེ་བཞིན་དུ་ས་བོན་ཐ་དད་པ་ལ་ས་བོན་དུ་འདུ་ཤེས་ནའོ། །ནས་ཞིག་མ་རུང་བར་བྱ་བར་བསམས་ལ་འབྲས་ཞིག་མ་རུང་པར་བྱས་ནའང་ལྟུང་བར་འགྱུར་རོ། །དེ་བཞིན་དུ་རྩི་ཤིང་དང་ས་བོན་གག་ཀྱང་རུང་གཅིག་ཅིག་མ་རུང་བར་བྱས་པར་བསམས་ལ་གཞན་ཞིག་མ་རུང་བར་བྱས་ན་འང་ལྟུང་བར་འགྱུར་རོ། །ཤུན་ཕྲགས་དང༌། ཤིང་གི་ཤུན་ཕྲགས་ཤིང་ལས་ནི་འཕགས་ཀྱི་རྩ་བ་ཅུང་ཟད་ཤིང་ལ་ཐོགས་པ་བཀོགས་པ་དང༌། གསོབ་དང༌། ཤིང་རུལ་པ་ཤིང་མ་མོ་ལ་ཆགས་པའམ་ཤིང་སྤགས་ཤིང་ལ་ཡོག་ཅིང་འདུག་པ་བཀོགས་པ་དང༌། ལོ་མ་སྐྱ་བོ་དང་ཤིང་གི་ལོ་མ་སྐྱ་བོར་གྱུར་པ་བཏོགས་པ་དང༌། རྒྱས་པའི་མེ་ཏོག་དང༌། མེ་ཏོག་རྒྱས་ཟིན་ཏེ་ལྷགས་ལ་ཐུག་པ་བཏོགས་པ་དང༌། སྨིན་པའི་འབྲས་བུ་ནི། ཤིང་ཐོག་སྨིན་ཟིན་ཏེ་བྲུལ་ལ་ཐུགས་པ་བཏོགས་པ་དང༌། ཕྱེད་ཤི་བ་ཞེས་བཅད་དོ། །མིང་གིས་སྨོས་པ་འདི་རྣམས་བཏོགས་པ་བྱེད་ཤི་བ་ཞེས་བྱ་སྟེ་ཉེས་བྱས་སོ། །དེ་དག་གི་རྩ་བར་གྱུར་པ་རང་བཞིན་ལས་མ་གྱུར་ན་མ་ཡིན། མདོ་ལྟག་མའི་ནང་ནས་མིང་གིས་སྨོས་ཏེ་བཤད་པ་ལྟ་བུ་མ་ཡིན་པར་མེ་ཏོག་དང་འབྲས་བུ་མ་རྒྱས་པ་དང་ལོ་མ་སྐྱ་བོར་མ་གྱུར་པ་དང་ཤིང་ལས་མ་འཕགས་པ་དང་འབྲས་བུ་དང་མེ་ཏོག་གི་རྩ་བ་དང་ཤིང་ཏོག་དང་འབྲས་བུ་ལ་མི་ཉེ་བར་ཤིང་མ་མོ་ལ་ཉེ་བར་སྤྱད་པ་ལ་སོགས་པ་ནི་ལྟུང་བ། ཤིང་ཏོག་ཤིང་གི་མཚམས་སུ་བཅད་པ་ནི་ཉེས་བྱས། ཕྱེད་ནི་བཏབ་པའི་ས་བོན་གྱི་ཁམ་རྩ་བ་མ་སྐྱེས་པ། ནས་འབྲས་ཀྱི་ས་བོན་བཏབ་ཏེ་མྱུ་གུར་ནི་མ་གྱུར་ས་བོན་ལས་ཀྱང་ཉམས་ཏེ་རྩ་ལྷོགས་ཙམ་དུ་འདུག་པ་ལ་མ་རུང་བར་བྱས་ནའང་ཉེས་བྱས། རྡེའུ་ཤ་དང་ཤ་མོ་དང་ས་བལ་དང་རྫ་མ་དང་གོས་ཀྱི་རླབས་ཕྱེད་སྐྱེ་བའི་བྱེ་བྲག་གོ །མིང་གིས་སྨོས་པ་འདི་རྣམས་ལས་གག་ཀྱང་རུང་སྟེ་མ་རུང་བར་བྱས་ན་ཉེས་བྱས། ཁུ་བ་ཚན་མོལ་སོགས་པ་ཕོ་བ་དང་འཆག་པ་དང་ཡལ་ག་ལ་སོགས་པ་དྲངས་པ་དང་དཀྱིལ་འཁོར་དུ་བྱུག་པ་དེའི་སེམས་ཀྱིས་ན་ལྟུང་བ་མེད་དོ། །ཁུ་བ་ལ་སོགས་པ་ཕོ་
བ་དང་ཡན་མན་དུ་འགྲོ་བའི་རྡོག་ལམ་དུ་སོང་བ་དང་རྡོ་ཤིང་ལ་སོགས་པ་དྲངས་པའི་འོག་ཏུ་སོང་བ་དང་དཀྱིལ་འཁོར་བྱས་པའི་འོག་ཏུ་ས་བོན་མ་རུང་བ་ལ་སོགས་པ་ས་བོན་མ་རུང་བ་བྱ་བའི་སེམས་ནི་མེད་ཀྱི་ལས་གཞན་བྱེད་པའི་ཞར་ལ་ས་བོན་མ་རུང་བར་གྱུར་པ་ནི་ཉེས་མེད་དོ། །གཅད་དོ་འཇག་མ་ལ་སོགས་པ་དོག་པར་གྱུར་ཏེ་བཅིངས་པ་ལ་དེ་མ་ཡིན་པས་ཐར་བར་མི་འགྱུར་ནའོ། །དགེ་སློང་དག་གཅིག་མི་རྒོད་ཀྱིས་བཅིངས་ནས་གསད་པར་བྱས་པ་དང་མི་རྒོད་ཀྱི་ནང་ན་དགེ་སློང་གི་ཚུལ་ཤེས་པ་གཅིག་ཡོད་དེ་དགེ་སློང་གསད་པ་མི་རིགས་ཀྱི་རྩྭས་བཅིངས་ཏེ་བཞག་པ་དང་ཁོའི་ཁྲིམས་ཀྱིས་རྩྭ་གཅད་དུ་མི་རུང་སྟེ་བཅིངས་པ་བཞིན་དུ་འདུག་པའི་རིགས་སོ་ཞེས་ཟེར་ནས་འཇག་མ་ལ་བཅིངས་ཏེ་བཞག་པ་དང་རྒྱལ་པོ་གཅིག་ཅིག་རི་དགས་བཤོར་དུ་སོང་སོང་ནས་མཐོང་བས་རྨོངས་པ་དེ་དགེ་སློང་སྟེ་མི་རྒོད་ཀྱིས་རྩྭ་ལ་བཅིངས་ཏེ་ཁྲིམས་ཀྱིས་རྩྭ་གཅད་དུ་མི་རུང་བས་སྡོད་མོད་ཅེས་སྨྲས་པ་དང་རྒྱལ་པོ་ཡང་དད་པ་སྐྱེས་ནས་རྒྱལ་པོ་ཉིད་ཀྱི་ལག་གིས་བཀྲོལ་ཏེ་གོས་ལ་སོགས་པས་བརྫངས་ཏེ་བཏང་བ་ལས་བཅས་ཏེ་དེ་ལྟ་བུ་རྩྭས་བཅིངས་ཤིང་སྲོག་ལ་དམན་པ་ཞིག་བྱུང་ན་རྩྭ་བཅད་ཀྱང་ཉེས་མེད་དོ་ཞེས་གནང་ངོ༌། །དེ་གཅིག་མ་ཡིན་པ་གཅིག་གིས་སོ། །མདོ་ལྟག་མ་ལྟར་དགེ་སློང་མང་པོ་ཞིག་བཅིངས་ན་ཟད་པར་གྱིས་རྩྭ་གཅད་ཅིང་ལྟུང་བར་བྱ་བའི་མི་རིགས་ཀྱི་དགེ་སློང་གཅིག་གིས་རྩྭ་ཆོད་དེ་བདག་ཁྲོལ་ལ་གཞན་ཀུན་ཀྱང་བདག་གིས་རྩྭ་མ་ཆད་པར་གྲོལ་ལོ། །ས་བོན་གྱི་ཆོས་མ་ཡིན་པ་ཉེས་པ་མི་བྱེད་དོ། །ས་བོན་དུ་མི་རུང་བ་རྣམས་ནི་མ་རུང་བར་བྱས་ཀྱང་ལྟུང་བར་མི་འགྱུར་རོ། །མེས་རེག་པ་དང་བཙུགས་པ་མཚོན་དང་སེན་མོ་དང་ནེ་ཙོ་དང་རྙིངས་པ་དང་ཕྱུང་བ་དང་བཀྲུམས་པ་དང་གཤེགས་པ་དང་གཏུབས་པའོ་ཞེས་བརྟགས་པའོ། །ས་བོན་རྣམ་པ་ལྔ་ལ་མིང་གིས་སྨོས་པ་འདི་རྣམས་ཀྱིས་རེག་ཅིང་བརྟགས་པ་ནི་སྤྱད་དུ་རུང་སྟེ་ལྟུང་བ་དང་ཉེས་པར་མི་འགྱུར་རོ། །ས་བོན་མ་ཡིན་པར་གྱུར་གྱི་བར་དུ་བཏགས་པ་མི་བསྡང༌། མདོ་གོང་མའི་ནང་ནས་སྨོས་པ་བཞིན་དུ་སྔར་བཏགས་ཟིན་པ་དང་སྣད་ཅིང་རྨ་བྱུང་བ་ལ་སོགས་པ་ས་བོན་དུ་མི་རུང་བ་རྣམས་ཀྱིས་བཏགས་ཟིན་པ་ཡིན་ཏེ་གདོད་བཏགས་མི་དགོས་སོ། །རླངས་པ་མེ་མ་
ཡིན་ནོ། །ས་བོན་ལ་སོགས་པ་རླངས་པ་ཚ་བ་ལ་གདུངས་ཤིང་རེག་པ་ཡང་མེས་བརྟགས་པའི་ནང་དུ་ཆུད་དེ་ཕྱིས་བརྟགས་མི་དགོས་སོ། །ཡང་དག་པར་རྟོགས་པ་ན་མེས་འབྲས་བུའི་སྤྱིའི་གཟུགས་སུ་བརྟགས་པ་གཙོ་བོར་བྱས་པའོ། །ནས་དང་ཤིང་ཏོག་ལ་སོགས་པ་ལྟ་བུ་མང་ཞིག་ཕུང་པོར་འདུག་པ་ལ་བརྟགས་པ་ནི་འབྲུ་རེ་རེ་ནས་བརྟགས་མི་དགོས་ཀྱི་ཕུང་པོའི་སྤྱིར་མེས་རེག་པར་བྱུགས་པས་ཆོག་གོ །དེའི་ཕྱོགས་གཅིག་ཏུ་ན་འདུས་པའི་མི་འགྱུར་མི་ལྡང་ངོ༌། །མདོ་ལྟག་མ་ལྟར་སྤྱིར་ངོས་གཅིག་ཙམ་མེས་རེག་པར་བྱས་པས་མི་ཆོག་གི་ཕྱི་རོལ་གྱི་ངོས་ཐམས་ཅད་དུ་མེས་རེག་རེག་ཙམ་བྱས་པས་བརྟགས་པར་ཆུད་དོ། །དགེ་སློང་གིས་བྱས་པ་ཡང་བརྟགས་པ་བྱས་པའོ། །ལྟག་ཏུ་ས་བོན་ལ་བརྟགས་པ་རྣམ་བ་ལྔ་བདུན་སྨོས་པ་ལས་མེས་བརྟགས་པ་མ་གཏོགས་པར་གཞན་དགེ་སློང་གིས་བརྟགས་པའང་བརྟགས་པར་ཆུད་དེ་ཟོས་ཀྱང་ཉེས་མེད་དོ། །རྟོག་རྟོག་པའི་དགེ་སློང་ནི་ཆད་པ་རྩིས་མགོ་བཞིན་དུ་ཡོད་དོ། །དགེ་སློང་གིས་མེས་བརྟགས་པའི་ཟས་ཟོས་པ་ནི་བརྟགས་པར་མི་ཆུད་དེ་ཉེས་བྱས་སོ། །ས་མ་བརྟགས་པར་ཡང་ངོ༌། །མཚམས་ཀྱི་ནང་དུ་ཚད་མང་བྱས་པ་འམ་སྔགས་ཀྱིས་མ་བཏབ་པའི་ཚད་མང་སམ་བརྟགས་པ་ཡིན་ཏེ་དེར་མེས་བརྟགས་པ་མ་གཏོགས་པར་གཞན་བརྟགས་པའང་ཉེས་མེད་དོ། །མེས་བརྟགས་པ་ནི་དགེ་སློང་གི་གནས་སུ་གཡོས་སོས་པ་དང་འདྲའོ། །ཆུ་གྲང་མོས་མ་བཏབ་པར་ཞག་བདུན་པ་དང་ནམ་འཚོའི་བར་དུ་མི་བཟའ། ཞག་བདུན་པའི་སྨན་བུ་རམ་དང་སྦྲང་རྩི་དང་མར་དང་ཤིང་མར་ལ་སོགས་པ་དང་ཚེ་གཅིག་གི་སྨན་ལ་སོགས་པ་ཡང་བཟའ་བའི་ཚེ་མི་གཞན་ལ་ཆུ་གྲང་མོས་རྟོག་ཏུ་གཞུག་གོ །མ་བརྟགས་པར་ཟོས་སམ་བདག་གིས་བརྟགས་ན་ཉེས་བྱས། མ་བསླད་པ་ཐུན་གྱི་བར་དུ་མི་བཟའ། རྩབ་མོ་དང་རྒུན་ཆུ་དང་བུ་རམ་ཆུ་ལ་སོགས་པ་ཕྱི་དྲོ་བཏུང་དུ་རུང་བའི་རྣམས་ཀྱང་ཆུས་བླུགས་ཏེ་མ་བརྟགས་པར་མི་བཏུང་འཐུངས་ན་ཉེས་བྱས། ས་བོན་སྐྱེ་བ་མ་རུང་བའོ། །ས་བོན་གྱི་ལྟུང་བ་སྟེ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ།། །།འཁྱལ་བའི་ལྟུང་བ་ལ་འཆད་དེ། གང་ཟག་བཅུ་གཉིས་དག་ལ་བྱེད་དེ། དགེ་
འདུན་གྱིས་ལས་སུ་བསྐོས་པའི་གང་ཟག་བཅུ་གཉིས་ཀྱི་ལས་གག་ཀྱང་རུང་མ་སྙོམས་ཤིང་བདག་ལ་མནར་ཏོ་ཞེས་བརྫུན་གྱིས་སྐུར་ཅིང་ཕྱར་ཀ་བཏང་བ་ལས་ལྟུང་བར་འགྱུར་ཏེ་ཡན་ལག་གཅིག །མ་བསྐོས་པ་ལ་ཡང་ངོ༌། །དགེ་འདུན་གྱིས་གང་ཟག་བཅུ་གཉིས་ཀྱི་ལས་སུ་གསོལ་བ་དང་ཞུ་བའི་ལས་ཀྱིས་ནི་མ་བསྐོས་ཀྱི་ཁས་བསྐོས་ཤིང་གང་ཟག་བཅུ་གཉིས་ཀྱི་ལས་གང་ཡང་རུང་བྱེད་པ་ལ་འཕྱ་ན་ཡང་ལྟུང་བའོ། །སྤྱོད་པ་འགགས་པ་ཡང་ངོ༌། །གང་ཟག་བཅུ་གཉིས་ཀྱི་ལས་གང་ཡང་རུང་བྱེད་བྱེད་པ་ལས་བྱུང་བ་ལ་སྔོན་ལས་བྱེད་པའི་ཚེ་བདག་ལ་མནར་ཅིང་མ་སྙོམས་ཏེ་མནར་ཏོ་ཞེས་འཕྱ་ན་ཡང་ལྟུང་བའོ། །འཁྱལ་བའམ་བདག་གི་ཕྱིར་དེ་ཐོས་པར་འཕྱར་ཞིང་གཞན་ལ་བསྟན་ནའོ། །འཁྱལ་ཞིང་འཕྱར་བ་ནི་བདག་ལ་མ་སྙོམས་ཤིང་མནར་ཏོ་ཞེས་བྱས་པ་དང་བདག་གིས་སྨྲས་པ་དེ་གང་ཟག་བཅུ་གཉིས་གང་ལ་འཕྱར་བ་དེས་སླར་ཡང་ཐོས་པ་དང་ཁོས་མ་ཉམས་པ་ལ་བརྫུན་དུ་འང་སྨྲས་པ་དང་ཡན་ལག་བཞི། རྩ་བའི་ནི་བགྲང་བར་རོ། །ལྟུང་བར་འགྱུར་བའི་ཚད་ནི་དགེ་འདུན་གྱིས་དེ་སྐད་མ་ཟེར་ཅིག་ཅེས་བསྒོ་བལ་མ་བཏང་སྟེ་དགེ་འདུན་གྱིས་ཁྱེད་ཚུལ་ཁྲིམས་དང་མི་ལྡན་ཞིང་ལོག་པར་སྤྱོད་པ་ཡིན་ཏེ་ཚུལ་ཁྲིམས་དང་མི་ལྡན་པའི་ནང་དུ་གཏོགས་སོ་ཞེས་བསྒོས་ཏེ་མ་བཏང་ན་ལྟུང་བར་འགྱུར་རོ། །ཡན་ལག་འདི་ལྔ་དང་ལྡན་ན་ལྟུང་བའོ། །གཞན་དུ་ན་ཉེས་བྱས་པའོ། །མདོ་ལྟག་མ་ལྟར་དགེ་འདུན་གྱིས་མི་བསྒོ་ཞིང་མ་བགྲངས་ཀྱི་བར་དུ་ཕྱར་ཅིང་སྨྲས་པ་དང་འཕྱར་པར་མ་བསམས་པར་འཕྱར་བའི་ཚིག་ཏུ་ཁ་ནས་བྱུང་བ་ཉེས་བྱས། ཆུང་ཟད་དུ་དགོངས་པ་ཡང་མི་ནུས་པ་མི་མདག །གང་ཟག་བཅུ་གཉིས་ལ་འཁྱལ་ཞིང་འཕྱར་བའི་མི་དེ་བཅོས་སུ་མི་བཟོད་ཅིང་ཁྲོ་གཏུམ་ཅན་ཞིག་སྟེ་སླར་འཐབ་མོ་རྒལ་ཞིང་འཁོན་དུ་འཛིན་པ་ཙམ་གྱི་ཚོད་ན་དེ་སྐད་མ་སྨྲ་ཤིག་ཅེས་བསྒོ་བ་དང་ཉེས་བའི་ནང་དུ་གཏོགས་པར་བགྲང་བར་མི་བྱ་བར་བཞག་པ་ལའང་བྱ། འཕྱར་བ་དེ་ལ་མ་སྨྲ་ཤིག་ཅེས་བསྒོར་བཏང་བའི་དགེ་སློང་ཡང་གཉེན་པོ་ཐབས་མཁས་པ་ངོ་ཟློག་ཕོད་པ་ལས་མངག །བདག་གིས་དེ་ཉིད་དང་འཁོན་ན་བདག་གིས་ལས་སུ་མི་བསྒོ། །གང་ཟག་བཅུ་གཉིས་ཀྱིས་ལས་སུ་བསྐོས་པ་གང་ཡང་རུང་སྟེ། དགེ་སློང་གཞན་
ལས་ཤིག་བསྐོ་ན་དགེ་སློང་འཁོན་ཡོད་པ་ལ་བདག་གིས་ལས་སུ་མི་བསྐོ། །ལས་སུ་བསྐོ་དགོས་ན་ཡང་དགེ་སློང་འཁོན་མེད་པ་ལས་བསྐོར་གཞུག་གོ །འཕྱར་བའོ། འཁྱལ་ཞིང་འཕྱར་བའི་ལྟུང་བ་རྫོགས་སོ།། །།སྨྲ་བའི་ལྟུང་བ་ལ་འཆད་དེ། མི་བགྲང་བ་མ་ཡིན་པ་ནི། ལྟག་མ་ཕྱར་བ་དང་འདྲ་བར་བསྒོ་བའི་ལན་ལོག་པར་ལྡོན་པ་ཡང་མི་བགྲང་བ་མ་ཡིན་ཏེ་ལོག་པར་སྨྲ་བ་ལ་དེ་སྐད་མ་ཟེར་ཞེས་ལན་གཅིག་བསྒོ། །དེ་ནས་མ་བཏང་ན་ཁྱེད་ཚུལ་ཁྲིམས་དང་མི་ལྡན་པ་འདི་རྣམས་ཀྱི་ནང་དུ་གཏོགས་པར་བགྲང་ཞེས་བྱ་སྟེ་མ་བཏང་ན་ལྟུང་སྟེ་ཡན་ལག་གཅིག་བསྐུལ་བར་ཞུགས་པའི་བཀའ་དང་མི་སྨྲ་བའི་ལོག་པ་ཅན་དང་སྨྲས་པའི་གང་ཟག་མངོན་སུམ་དུ་འཁྱལ་བ་གཞན་ལ་སྟོན་ཅིང་འཕྱར་བའོ། །དགེ་སློང་གྲོགས་ཀྱིས་ཉེས་པར་བྱེད་ཅིང་ལོག་པར་མ་བྱེད་ཅེས་གཞུང་བཞིན་དུ་བསྒོ་ན་སླར་ལོག་པར་སྨྲ་ཡང་རུང་ཅང་མི་སྨྲ་བར་ཐེན་ཏེ་འདུག་ཀྱང་རུང་ཚུལ་བཞིན་དུ་བྱད་པ་སྟོན་པ་དགེ་སློང་ལ་མངོན་སུམ་དུ་ལན་ལོག་པར་ལྡོན་ཅིང་སྨྲ་ན་ལྟུང་བའོ། །ཞུ་བས་སོ། །དགེ་འདུན་གྱིས་མ་བྱེད་ཅིག་ཅེས་ལན་གཅིག་སྔར་བསྒོ་བ་དང་ཉེས་པར་གཏོགས་སོ་ཞེས་བགྲང་བ་ནི་གསོལ་བ་དང་ཞུ་བའི་ལས་ཀྱིས་བྱ། དགེ་སློང་གིས་བཀའ་བཟློག་ནའོ། །ཉེས་པར་སྤྱོད་པ་ལ་དགེ་སློང་ཚུལ་བཞིན་དུ་སྤྱོད་པས་ཚུལ་བཞིན་དུ་བསྒོ་པ་ལ་སླར་ལན་ལོག་པར་སྨྲ་བའམ་ཅང་མི་སྨྲ་བར་ཐེན་ཏེ་འདུག་སྟེ་ངག་མ་མཉན་ཅིང་བཟློག་ན་ལྟུང་སྟེ་ཡན་ལག་གཅིག །དེར་འདོད་པས་སོ། །ལོག་པར་སྤྱོད་པ་ལ་དེ་ལྟར་མ་བྱེད་ཅེས་སྟོན་ཅིང་འོང་བ་ལ་ལན་ལོག་པར་སླར་བཟློག་པར་འདོད་དེ་སྨྲས་ཤིང་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག །གཞན་དུ་སྨྲ་བས་སོ། །བསྒོ་བའི་ལན་བཞིན་དུ་མི་སྨྲ་བའི་ཁ་རོག་ཏུ་འདུག་གམ་ལན་ལོག་པར་སྨྲས་པ་ལ་ཡན་ལག་གཅིག་སྟེ་ཡན་ལག་བཞི་དང་ལྡན་པར་བྱས་ན་ལྟུང་བར་འགྱུར་ཉེས་བྱས་ནི་ཁ་རོག་ནའོ། །དྲིས་པ་དང་བསྒོ་བ་ལ་སོགས་པ་ཅི་ཡང་རུང་སྟེ་ལན་ལོག་པར་གླན་པར་བྱ་བའི་ཕྱིར་མི་སྨྲ་བར་འདུག་ན་ཉེས་བྱས། མི་དྲན་ནོ་ཞེས་ཀྱང་ངོ༌། །གཏམ་དྲི་བ་ལ་ལན་ལོག་པར་གླན་པར་བྱ་བའི་ཕྱིར་དྲན་པ་མི་དྲན་ནོ་ཞེས་བྱས་ན་ཉེས་བྱས། དེ་སྡུག་བསྔལ་བར་སྨྲས་པ་མ་ཡིན་ནའོ། །གཉེན་
བཤེས་ལྟ་བུ་ཤི་ན་དྲང་པོར་སྨྲ་ན་མྱ་ངན་དུ་འགྱུར་བའི་ཕྱིར་མ་སྨྲས་ཤིང་ལན་མ་གླན་ནམ་གཏམ་གཞན་དུ་བཟློག་སྟེ་སྨྲས་ན་ཉེས་མེད་དོ། །དེ་བས་ན་གསད་པ་མཐོང་སྟེ་ཀུན་འདྲི་ན་སྐད་ཅིག་སྲོས་སྐད་ཅིག་ཆུ་འཐུང་སྐད་ཅིག་ངལ་སོས་གནམ་མམ་སེན་མོ་མཐོང་ངོ་ཡང་དག་པར་ན་སེམས་ཅན་ནམ་གསད་པ་མ་མཐོང་ངོ་ཞེས་སྨྲས་ན་ལྟུང་བ་མེད་དོ། །མི་བསད་པ་ཞིག་བྲོས་ཏེ་སོང་ལ་སྙེགས་པའི་མི་འོངས་ཏེ་འདྲི་ན་མདོ་འདི་ལས་འབྱུང་བ་བཞིན་དུ་རིང་དུ་ཐོགས་པར་བྱ་བའི་ཕྱིར་ཚིག་ལོག་པར་སྨྲས་ཤིང་གྱ་གྱུ་བྱས་ཀྱང་ཉེས་མེད་དོ། །དེ་ལྟར་བྱས་ཀྱང་འདྲི་ན་སེམས་ཅན་ལ་དངོས་པོ་མེད་པར་བསམས་ཏེ་ཡང་དག་པར་ན་སེམས་ཅན་གསད་པའི་མི་མ་མཐོང་ངོ་ཞེས་ཀྱང་ཉེས་མེད་དེ། གང་དུ་དཔང་པོར་འགྱུར་བ་དེར་གནས་པར་མི་བྱ་ཁ་མཆུ་ལ་སོགས་པ་རྩོད་ཅིང་དཔང་དང་ཆེ་བཞིར་བཅོལ་ཞིང་འཛིན་པར་འགྱུར་བར་མི་འདུག་པར་བྱོལ་ཏེ་འགྲོ། །གནོད་པ་བྱེད་ན་སྒོ་མ་བཅད་པར་དཔང་དུ་མི་སྦྱིན། མདོ་ལྟག་མ་ལྟར་བྱོལ་ཡང་མ་ཐར་ཏེ་དཔང་དང་ཆེ་བཞིར་བཟུང་ན་ཕྱིས་གནོད་པ་མི་བྱ་བར་དམ་བཅས་ལ་དཔང་བྱ། ཕྱིས་གནོད་པ་མི་བྱ་བར་མི་བཏུབ་ན་ཁ་བཙུམས་ཏེ་འདུག་གོ །བཀའ་བཟློག་པའོ། །སྨྲ་བའི་ལྟུང་བ་སྟེ་རྫོགས་སོ།། །།ཁྲི་སྟན་གྱི་ལྟུང་བ་ལ་འཆད་དེ། ཁྲི་དང་ཁྲིའུ་དང་སྔས་དང་ལ་བ་དང་སྔས་ཁབ་དང་གྲུ་བཞི་ཞེས་པ་ནི་མལ་སྟན་ནོ། །དགེ་འདུན་གྱི་ཁྲི་དང་ཁྲིའུ་དང་སྔས་ལ་སོགས་པ་མིང་གིས་སྨོས་པ་འདི་རྣམས་བླ་བྲེ་མེད་པའི་ནམ་མཁའ་ལ་བོར་བ་ལས་ལྟུང་བར་འགྱུར་ཏེ་མལ་སྟན་དངོས་དང་བླ་རེ་མེད་པ་སྟེ་ཡན་ལག་གཉིས། འདོམ་བཞི་བཅུ་རྩ་དགུ་དེའི་མཚམས་སོ། །ཁྲི་སྟན་བླ་རེ་མེད་པའི་ནམ་མཁའ་ལ་ལུས་ཏེ་མ་བརྟུལ་བར་སོང་ན་ཁྲི་སྟན་འདུག་པ་ནས་འདོམ་བཞི་བཅུ་རྩ་དགུ་ལས་འདས་པར་སོང་ན་ལྟུང་བར་འགྱུར་ཏེ་ཡན་ལག་གཅིག །བསྐོར་བ་ནི་སྒོ་གང་ནས་སོ། །འདོམ་བཞི་བཅུ་རྩ་དགུར་བཅལ་བ་ནི་གཙུག་ལག་ཁང་ཕྱི་རས་བསྐོར་ན་གཙུག་ལག་ཁང་གི་ཕྱི་རའི་སྒོ་གང་ནས་བཅལ་ལོ། །ཕྱིར་མེད་ན་སྟན་ག་ལ་འདུག་པའི་གནས་ནས་འདོམ་བཞི་བཅུ་རྩ་དགུ་ལ་བཅལ་ལོ། །དེ་ལས་འདས་པའི་ཕྱིར་བརྗོད་དེ། འགྲོའམ་ནང་དུ་ཡང་ཉལ་ལམ། བསམ་གཏན་དུ་ཞུགས་པ་ལ་སོགས་པས་
ལྐོག་ཏུ་གྱུར་པའོ། །བླ་རེ་མེད་པའི་ནམ་མཁའ་ལ་དགེ་འདུན་གྱི་ཁྲི་སྟན་ལུས་ལ་འདོམ་བཞི་བཅུ་རྩ་དགུ་འདས་ཏེ་སོང་ན་བརྗེད་དེ་གུད་དུ་སོང་ཡང་རུང་བསམ་གཏན་བྱེད་དུ་སོང་ཡང་རུང་ཁྱིམ་གྱི་ནང་དུ་ཉལ་དུ་སོང་ཡང་རུང་བསམ་གཏན་བྱེད་དུ་སོང་ཡང་རུང་སྟེ་རྩིས་མགོ་དང་ལྡན་པར་གྱུར་ན་ལྟུང་བར་འགྱུར་རོ། །ཐ་དད་པ་ལས་སྔར་ན་སྦྱོར་བའོ། །འདོམ་བཞི་བཅུ་རྩ་དགུ་ལས་མ་འདས་པ་དང་ཆར་གྱིས་མ་ཕོག་གམ་རླུང་གིས་མ་བཟློག་གམ་སྲིན་བུས་མ་ཟོས་པར་བླ་གབ་མེད་པ་ལ་ལུས་པ་ནི་ཉེས་བྱས་ཏེ་སྐབས་འདིར་མིང་སྨོས་ཏེ་ཉེས་བྱས་ཉིད་འོག་ནས་འཆད། འདས་སམ་སྲིན་བུ་དང་རླུང་དང་ཆར་གྱིས་མ་ཕོག་ཀྱང་བླ་རེ་མེད་པ་ལ་ལུས་ན་འདོམ་བཞི་བཅུ་རྩ་དགུ་འདས་ན་ལྟུང༌། གྱུར་ན་ཐ་མའོ། །འདོམ་བཞི་བཅུ་རྩ་དགུ་འདས་ཀྱང་ཆར་དང་རླུང་དང་སྲིན་བུ་གང་གིས་ཀྱང་རུང་སྟེ་ཟོས་ཤིང་བཟློག་ན་ལྟུང་བར་འགྱུར་ཏེ་ཡན་ལག་གཅིག་བརྟུལ་བ་བྱས་སམ་བྱེད་དུ་བཅུག་ན་དེ་མ་ཡིན་ནོ། །དགེ་འདུན་གྱི་ཁྲི་སྟན་བདག་གིས་བརྟུལ་ཏམ་གཞན་ལ་བཅོལ་བ་ནི་ལྟུང་བར་མི་འགྱུར། མ་བརྟུལ་ཏེ་མ་བཅོལ་ན་ལྟུང་བར་འགྱུར་ཏེ་ཡན་ལག་གཅིག་སྟེ། ཡན་ལག་རེ་རེ་ནས་མིང་གིས་སྨོས་པ་ཀུན་དང་ལྡན་ན་ལྟུང་བར་འགྱུར་དགེ་སློང་ཕ་ལ་མ་བཅོལ་ནའོ། །བརྟུལ་དུ་བཅོལ་བ་ནི་དགེ་སློང་མ་ཡིན་པ་དགེ་སྦྱོང་ངམ་ཁྱིམ་པ་ལ་བཅོལ་བར་མི་ཆུད་དེ་ལྟུང་བར་འགྱུར་གྱི་དགེ་སློང་ལ་བཅོལ་བ་ནི་བཅོལ་བར་ཆུད་དེ། །དོག་པ་མ་རྙེད་ན། ཆུ་འམ་མེ་འམ། རྐུན་པོ་ལ་སོགས་པ་འཇིགས་པའི་རྐྱེན་བྱུང་སྟེ་མ་བརྟུལ་བར་སོང་བ་ནི་ཉེས་མེད། འཇིགས་པའི་རྐྱེན་མེད་པ་ལས་ལྟུང་བར་འགྱུར་ཏེ་ཡན་ལག་གཅིག །བྱེད་པ་བཞིན་སྤྱོད་སྤྱོད་པའོ། །དགེ་འདུན་གྱི་ཁྲི་སྟན་ལ་བདག་སྤྱོད་སྤྱོད་དེ་བརྟུལ་ཏེ་འགྲོ་བ་ལས་གྲོགས་ཤིག་འོངས་ན་དེ་ལ་སྤྱོད་ཅིང་འདུག་ཤིག་ཅེས་བསྒོ་སྟེ་འགྲོ་བས་མ་བསྒོ་ན་ཉེས་བྱས་ཕྱིས་ན་སྤྱོད་པའི་དགེ་སློང་གིས་མ་བརྟུལ་ན་ཡན་ལག་དང་ལྡན་ན་ལྟུང༌། དགེ་འདུན་གྱི་ཁྲི་སྟན་ལ་ཁྱིམ་པ་ཞིག་སྤྱོད་ཅིང་འདུག་སྟེ། ཆར་རླུང་དང་སྲིན་བུས་ཟོས་སམ་ནམ་མཁའ་ལ་བོར་བ་ལ་དེ་ལྟར་མ་བྱེད་ཅེས་མ་བསྒོའམ། མ་བརྟུལ་ན་ཉེས་བྱས་ཞེས་བྱི་ཤུ་ཏས་བཤད། གཉིས་གཅིག་
ཏུ་འཁོད་ན་ཕྱིས་ལངས་པས་བྱའོ། །སྟན་གཅིག་ལ་དགེ་སློང་གཉིས་སྤྱོད་སྤྱོད་པ་ལས་གཅིག་ཕྱི་ན་འདུག་པ་གཅིག་སྔར་འགྲོ་ན་སྔ་མས་བརྟུལ་ཅིག་ཅེས་མ་བསྒོ་ཡང་ཕྱི་མས་མ་བརྟུལ་ན་ལྟུང་བའོ་སྔར་སོང་བ་ལ་ནི་ཉེས་མེད་དོ། །དེ་སྟེ་མཉམ་པས་ན་གསར་བུས་སོ། །སྟན་གཅིག་ལ་མི་གཉིས་ལྷན་ཅིག་སྤྱོད་སྤྱོད་པ་ལས་ལྷན་ཅིག་འདོང་ན་དགེ་སློང་ཁྲིམས་ན་གང་གཞོན་པས་བརྟུལ་ལ། མ་བརྟུལ་ན་རྒན་པོ་ལ་ཉེས་བྱས་གཞོན་ནུ་ལ་ལྟུང་བའོ། །མཚུངས་པས་ན་ཉེས་བྱས་གཉིས་ཀས་སོ། །མདོ་ལྟག་མ་ལྟར་ལྷན་ཅིག་སྤྱོད་སྤྱོད་པ་གཉིས་ཀ་སྤྱིས་བསྡུའོ། །མ་བསྡུས་ན་གཉིས་ཀ་ལྟུང་ངོ༌། །ངོ་ཚ་མེད་པས་ཕས་ཕམ་པ་བྱུང་བའམ་ཚུལ་ཁྲིམས་ལ་གཡེལ་བ་དང་ཐམ་ཐོམ་སྨྱོན་ཐབས་ཅན་དང༌། འཁོན་པ་སྔན་ཆད་འཐབས་ཤིང་འཁོན་ཡོད་པ་དང༌། རྒས་པ་རྒན་བོ་མལ་སྟན་བརྟུལ་མི་ནུས་པར་རྒན་པ་དང༌། ནད་པ་མལ་སྟན་བརྟུལ་མི་ནུས་པ་དང༌། རབ་ཏུ་མ་རྫོགས་པ་དགེ་སྦྱོང་དང་ཁྱིམ་པ་དང་དེར་ན་མ་བཅོལ་བའོ། །མིང་གིས་སྨོས་པ་འདི་རྣམས་ལ་མལ་སྟན་བརྟུལ་དུ་བཅོལ་ཀྱང༌། བཅོལ་བར་མི་ཆུད་དེ་ཡན་ལག་དང་ལྡན་ན་ལྟུང་བའོ། །གཙུག་ལག་ཁང་འདི་མལ་སྟན་ལྟ་འམ་ལོང་ཤིག །བདག་གུད་དུ་འགྲོ་ན་དགེ་སློང་གྲོགས་ལ་མལ་སྟན་འདི་ལྟོས་ཤིག་ཅེས་སམ་ལྡེ་མིག་འདི་ན་ཡོད་དེ་ལོང་ཤིག་ཅེས་བསྒོ་སྟེ་འགྲོའོ། །སྒོ་ལྕགས་མ་བཅུག་གོ་ཞེས་བཅོལ། གཙུག་ལག་ཁང་དམ་སྒོ་མ་བཅད་པར་འགྲོ་ནའང་སྒོ་མ་བཅད་དོ་ཞེས་བསྒོ་སྟེ་འགྲོའོ། །ཐ་དད་པ་གསུམ་སྟེ་རླུང་གིས་བཟློག་པ་དང་ཆར་པས་རིམ་པར་ཐལ་བ་དང༌། སྲིན་བུས་ཟོས་པ་དང་ཆར་པས་གཤེར་བ་དང་རླུང་གིས་བཟློག་པའི་ཚད་ནི་ཆར་པས་སྟེང་ནས་འོག་ཏུ་ཐལ་བ་དང་སྲིན་བུས་བླ་ནས་འོག་ཏུ་ཐལ་བ་དང་རླུང་གིས་ཐ་མ་བཟློག་པ་ཙམ་གྱིས་ལྟུང་བར་འགྱུར་རོ། །མལ་སྟན་མལ་སྟན་ཡང་ཡིན་ལ་དགེ་འདུན་གྱི་དེ་ལ་དགེ་འདུན་གྱི་མལ་སྟན་ཡང་ཡིན་ལ། བདག་བསྐོས་གཞན་གྱིས་བདག་ལ་གདིང་དུ་བཅུག་གམ། བདག་གིས་གཞག་གམ། བདག་ཉིད་ཀྱིས་བཏིང་ངམ། གཞོག་ཏུ་བཅུག་སྟེ་བདག་གིས་གཞན་གདིང་དུ་བཅུག་སྟེ། བླ་གབ་མེད་དེ་ཞེ་ན་བྱེད་དོ། །བླ་གབ་མེད་པའི་ནམ་མཁའ་ལ་ལུས་ཏེ་མ་
བརྟུལ་ན་ལྟུང་བར་འགྱུར་རོ། །རྩ་བ་ནི་མཇུག་ཏུ་ནའོ། །ཡན་ལག་རྣམས་དང་ལྡན་ཞིང་འདོམ་བཞི་བཅུ་རྩ་དགུ་འདས་སམ་ཆར་དག་གིས་གཤེར་བར་གྱུར་ན་ལྟུང་ངོ༌། །སྦྱོར་བ་ནི་ཉེས་བྱས་པའོ། །ཡན་ལག་མ་ཚང་ངམ་འདོམ་བཞི་བཅུ་རྩ་དགུ་མ་འདས་པ་ཙམ་དུ་སོང་བ་ནི་ཉེས་བྱས་སོ། །རེ་རེ་ཞིག་གཞན་གྱིས་ནོན་ནའོ། །དགེ་འདུན་གྱི་མལ་སྟན་ལ་སྤྱོད་སྤྱོད་པ་ལས་གྲོགས་གཅིག་འོངས་ཏེ་ཕྱིན་ན་སྤྱོད་དེ་བདག་སྔར་འགྲོ་ན་ཕྱི་མ་ལ་མལ་སྟན་བརྟུལ་ཅིག་ཅེས་བསྒོ་ལ་འགྲོའོ་མ་བསྒོ་བར་སོང་ན་ཉེས་བྱས། གང་ཟག་གིས་ཀྱང་ངོ༌། །གང་ཟག་གིས་མལ་སྟན་སྤྱོད་སྤྱོད་པ་ལས་མ་བརྟུལ་ཏམ་བརྟུལ་དུ་མ་བཅོལ་བར་སོང་ན་ཉེས་བྱས་སོ། །འོག་མ་བཞི་ཡང་ངོ༌། །ཁྲི་སྟན་གྱི་འོག་ན་གདིང་བ་དང་བསྐྲད་པ་དང་ཕྱིས་གནོན་པ་དང་གཟེར་མེད་པ་བཞི་ཡང་དགེ་འདུན་གྱི་གཙུག་ལག་ཁང་དུ་བྱས་ན་ལྟུང་གི་གང་ཟག་གི་གནས་ལ་བྱས་ན་ཉེས་བྱས། མ་རེག་པ་ནི་མ་ཡིན་ནོ། །དགེ་འདུན་གྱི་ཁྲི་གསེར་དངུལ་དང་རིན་པོ་ཆེ་ལ་སོགས་པས་བྱས་པ་ཞིག་སྐམ་སྲད་ལ་ཕྱུང་ཞིང་འདུག་སྟེ་ཆར་བབ་ན་རེག་ཏུ་མི་རུང་བའི་ཕྱིར་མ་བརྟུལ་ན་ཉེས་མེད་དོ། །རྐུན་པོའི་རྐྱེན་ལྟ་བུ་བྱུང་ན་བརྟུལ་བའི་ཕྱིར་རེག་ཀྱང་བླ་སྟེ་བརྟུལ་དགོས་སོ། །དེ་སྟེ་བསོད་སྙོམས་ཀྱི་ཕྱིར་བཀྲམ་སྟེ་ཞུགས་ནས་རླུང་དང་ཆར་པ་འོང་ན་གཙུག་ལག་ཁང་ན་གནས་པས་ཆུག་ཤིག །དགེ་འདུན་གྱི་མལ་སྟན་བསོད་སྙོམས་པ་ཞིག་སྤྱོད་ཅིང་གདིང་བ་ལས་མ་བརྟུལ་བར་བདག་བསོད་སྙོམས་ལ་སོང་སྟེ་ཆར་པའམ་རླུང་ལ་སོགས་པ་བྱུང་ན་དགེ་སློང་སུ་ཕྱིན་འདུག་ཅིང་མ་མཐོང་བས་སྡུས་ཤིག་མ་བསྡུས་ན་ཉེས་བྱས་སོ། །ཞུགས་པས་ཀྱང་ནན་ཏན་དུ་ཤོག་ཤིག །སཱུ་ཏྲ་ལྟག་མ་ལྟར་དགེ་སློང་བསོད་སྙོམས་ལ་སོང་བས་ཀྱང་རླུང་དང་ཆར་པ་འོང་པར་མཐོང་ན་མལ་སྟན་བརྟུལ་བའི་ཕྱིར་མྱུར་དུ་འོང་ངོ༌། །མྱུར་དུ་མ་འོངས་ན་སྔོན་གྱི་ལྟུང་བ་དང་ཉེས་བྱས་ཀྱི་སྟེང་དུ་ཡང་ཉེས་བྱས་མཆིས། དེའི་ཕྱིར་མ་ཉེས་པ་དང་འབྲི་བ་མེད་དོ། །བསོད་སྙོམས་པ་མལ་སྟན་མ་བརྟུལ་བར་བསོད་སྙོམས་ལ་སོང་བ་བསོད་སྙོམས་ཀྱི་ཕྱིར་སོང་ཞེས་ཏེ་ཉེས་པ་མེད་པའམ། ལྟུང་བ་འབྲི་བ་མ་ཡིན་གྱི་ཡན་ལག་
དང་ལྡན་ན་ལྟུང་བར་འགྱུར་རོ། །དེ་སྟེ་བརྗེད་ནས་ལན་མང་དུ་འདས་སམ་ཕྱིན་ཏེ་དྲན་པ་རྙེད་ན་ཕྱིས་འདི་ལྟར་མི་བྱའོ་ཞེས་སེམས་བསྐྱེད་ཅིང་ཁར་སྨྲོས་ཤིག །དགེ་སློང་མལ་སྟན་སྤྱོད་སྤྱོད་དམ་བཀྲམ་པ་ལས་མ་བརྟུལ་ཏམ་བརྗེད་དེ་གུད་དུ་སོང་ནས་ལམ་རིང་མོ་ཞིག་ཏུ་ཕྱིན་ཏེ་གདོད་དེ་དྲན་ན་དེ་ལྟར་བརྗེད་པ་ཉེས་སོ་ཞེས་ཡིད་ལ་བསམས་ཤིང་ཁར་ཡང་བརྗོད། ཕྱིན་ཆད་འདི་ལྟར་མི་བྱ་བའི་སེམས་ཀྱང་བསྐྱེད་དོ། །དེ་ལྟར་སེམས་མ་བསྐྱེད་ན་སྔ་མ་ལྟུང་བའི་སྟེང་དུ་ཉེས་བྱས་ཀྱང་ཡོད། ལམ་མི་རིང་བར་དྲན་ན་སླར་ལོག་སྟེ་བརྟུལ་ལོ། །དེ་སྟེ་དགེ་སློང་དང་ལམ་དུ་ཕྲད་ན་བསྡུ་བར་གསོལ་ཅིག །སཱུ་ཏྲ་ལྟག་མ་ལྟར་དགེ་སློང་གིས་མལ་སྟན་མ་བསྡུས་པར་གུད་དུ་སོང་སྟེ་ལམ་རིང་མོ་ཞིག་ཏུ་ཕྱིན་ཏེ་དྲན་པ་དང་དགེ་སློང་གཞན་ཞིག་དང་ཕྲད་ན་བདག་གིས་གསོལ་བ་བཏབ་སྟེ་མལ་སྟན་མ་བརྟུལ་བར་ལུས་ཀྱི་ཕར་བྱིར་ཕྱིན་པ་དང་བརྟུལ་བར་གསོལ་ལོ་ཞེས་གསོལ་བ་གདབ། ཁས་བླངས་ནས་དེར་ཕྱིན་ན་བྱ། སཱུ་ཏྲ་ལྟག་མ་ལྟར་གསོལ་བ་བཏབ་པའི་དགེ་སློང་དེས་ཁས་བླངས་ན་ཕྱིན་མ་ཐག་ཏུ་བརྟུལ། ཕྱིན་མ་ཐག་ཏུ་མ་བརྟུལ་ཏེ་ཡན་ལག་དང་ལྡན་པར་གྱུར་ན་ཁས་བླངས་པའི་དགེ་སློང་དེ་ལྟུང་བར་འགྱུར་རོ། །དོགས་པ་མ་རྙེད་དེ་གནས་ནས་འགྲོ་ན་མལ་སྟན་བརྟུལ། མི་རྒོད་དང་རྐུན་པོ་ལ་སོགས་པ་འཇིགས་པའི་རྐྱེན་མ་བྱུང་བར་གནས་གུད་དུ་འགྲོ་ན་དགེ་འདུན་གྱི་མལ་སྟན་བདག་སྤྱོད་སྤྱོད་ཀྱང་རུང་སྐམ་བསྲད་ལ་བཏིང་ཡང་རུང་བ་བསྡུས་ཤིང་བྲུབས་ལ་འགྲོ། །མ་བྲུབས་པར་སོང་ན་ཉེས་བྱས། འདི་ནི་བླ་གབ་མེད་པ་མ་ཡིན་གྱི་གཙུག་ལག་ཁང་གི་ནང་ན་འདུག་པ་ལ་བྱ། དེ་སྟེ་རྡུལ་གོས་ན་སྤྲུག །དགེ་འདུན་གྱི་མལ་སྟན་ལ་རྡུལ་ལ་སོགས་པ་ཆགས་ན་རུབ་མ་པ་ཡང་རུང་སུ་སྤྱོད་སྤྱོད་པ་ཡང་རུང་སྟེ་སྤྲུག་བརྡབ་སྟེ་བྱི་བདར་བྱ། དེ་ཉིད་ལ་གཏད། སཱུ་ཏྲ་ལྟག་མ་ལྟར་བྱི་བདར་བྱས་པའི་མལ་སྟན་དེ་མལ་སྟན་གྱི་རུབ་མ་པ་གསར་དུ་བྱེད་པ་སུ་ཡིན་པ་ལ་རྙིང་གུད་དུ་འགྲོ་ན་གཏད་དེ་འགྲོ། །དགེ་སློང་དག་ལ་བཅོལ་བར་ཡང་བྱ། མལ་སྟན་གྱི་རུབ་མ་པ་རྙིང་ཡང་རུང་མལ་སྟན་སྤྱོད་སྤྱོད་པའི་དགེ་སློང་སུ་ཡང་རུང་སྟེ་གནས་གཞན་ཞིག་ཏུ་ཐལ་བྱུང་འགྲོ་ལ་མལ་སྟན་གྱི་རུབ་མ་པ་གཞི་འཛིན་མེད་ན་
དགེ་སློང་དག་ཀྱང་རུང་བས་སྔས་ཤིག་པར་བཅོལ་ཏེ་འགྲོ་མེད་ན་དགེ་ཚུལ་ལ། སཱུ་ཏྲ་ལྟག་མ་ལྟར་རིང་བར་འགྲོ་ལ་དགེ་སློང་མེད་ན་དགེ་སྦྱོང་ལ་སྡུས་ཤིག་པའམ་ཕུལ་ཅིག་པར་བཅོལ་ཀྱང་ཉེས་པ་མེད་དོ། །དེ་ཡང་ན་ཁྱིམ་པ་དག་ལའོ། །བདག་གྲོགས་ཀྱི་རྗེས་མི་སླེབས་ཤིང་རིང་བར་འགྲོ་ལ། དགེ་སྦྱོང་ཡང་མེད་ན་ཁྱམ་པ་དང་དག་བསྙེན་ཡིད་བརྟན་པ་ལ་བཅོལ་ཀྱང་ཉེས་མེད་དོ། །ཐམས་ཅད་མེད་ན་ཕྱོགས་བཞིར་བ་ལྟས་ལ་ལྡེ་མིག་སྦོས་ལ་སོང་ཤིག །མལ་སྟན་རྫིའམ་དགེ་སློང་གང་ཡང་རུང་བ་བདག་གུད་དུ་གནས་འཕོས་ཏེ་འགྲོ་ལ་ཕྱིན་མི་གཅིག་ཀྱང་མེད་ན་མལ་སྟན་དང་རྫས་ཀུན་བྲུབས་ཏེ་སྒོ་བཅད་ལ་ལྡེ་མིག་དགེ་སློང་དག་གིས་རྙེད་པ་ཙམ་དུ་སྦས་ལ་དགེ་སློང་དག་འོང་ངམ་མི་འོང་ཕྱོགས་བཞིར་བལྟས་ལ་འགྲོ། །དེ་སྟེ་ལམ་གྱི་བར་དུ་དགེ་སློང་མཐོང་ན་ཕྱོགས་དེ་ནའོ་ཞེས་དེ་ལ་སྨྲོས་ཤིག །སཱུ་ཏྲ་ལྟག་མ་ལྟར་ལྡེ་མིག་སྦས་ཏེ་སོང་བ་ལས་ལམ་དུ་དགེ་སློང་དག་དང་ཕྲད་ན་ལྡེ་མིག་ས་ཚོད་འདིར་སྦས་ཀྱིས་ཚོལ་ལ་སྤྱོད་ཅིག་ཅེས་བསྒོ་སྟེ་འགྲོ། །དེ་སྟེ་ཁྱིམ་པར་མགྲོན་དུ་བོས་པ་ལས་སྒོ་བཅད་དེ་དོང་ན་རྩིག་པའམ་ཤིང་དུ་སྟན་སྦོས་ལ་ཞུགས་ཤིག །དགེ་སློང་བསོད་སྙོམས་པ་ཞིག་དགེ་འདུན་གྱི་ཁྲི་སྟན་ལྐོག་དབེན་པར་ཁྱེར་ཏེ་སྤྱོད་སྤྱོད་པ་ལས་དྲོ་ཁར་ཁྲི་སྟན་སླར་སྐྱེལ་དུ་སོང་བ་ལས་དགེ་འདུན་ཕལ་ཀུན་མགྲོན་དུ་འདོང་སྟེ་སྒོ་བཅད་ཅིང་འདུག་ན་ཁྲི་སྟན་དེ་གཞན་གྱིས་མི་མཐོང་བར་རྩིག་པའམ་ཤིང་དྲུང་དུ་སྦས་ལ་བདག་ཀྱང་དགེ་འདུན་གཞན་གྱི་ཕྱི་བཞིན་མཆོད་སྟོན་ལ་འགྲོའོ། །དེར་སྟན་བྱིན་ཅིག །གཙུག་ལག་ཁང་གཞན་གྱི་དགེ་འདུན་ཞིག་མཆོད་སྟོན་བྱེད་པའི་ཕྱིར་ཁྲི་སྟན་རྙེད་ན་སྦྱིན། སཱུ་ཏྲ་ལྟག་མ་ལྟར་དགེ་འདུན་གྱི་རྗེས་མ་སླེབས་ཏེ་སྟན་སྦས་ཏེ་ཕྱིས་འོངས་པའི་དགེ་སློང་དེ་ལ་དགེ་འདུན་སྔ་མ་གྲལ་ཞོག་ལ་སྟན་བྱིན་ཅིག་ཅེས་ཀྱང་བཤད་དོ། །བདག་གིས་ཁྱེར་ཏེ་མ་འོངས་ཤིག །སཱུ་ཏྲ་ལྟག་མ་ལྟར་དགེ་འདུན་གཞན་ཞིག་ལ་ཁྲི་སྟན་བརྙར་སྦྱིན་པ་སླར་བདག་ཉིད་ཀྱིས་མི་བསྐུར་མགྲོན་དུ་འགྲོ་ན་བདག་གིས་སྟན་རང་ཆས་སུ་ཁྱེར་ཏེ་མི་འགྲོ་ཞེས་བྱི་ཤུ་ཏས་བཤད་ཁྱིམ་པ་དང་དགེ་ཚུལ་དེ་དག་གིས་སོ། །གུད་དུ་བརྙར་བྱིན་པའི་སྟན་བདག་ཅག་
སླར་ལོག་ན་གཡོག་ཁྱིམ་པའམ་དགེ་སྦྱོང་དག་ལ་བསྐུར་རོ། །མེད་ན་ཁྱིམ་པ་ལ་བསྐྱལ་བའི་ཕྱིར་བཅོལ་ཏེ་འདོང༌། དགེ་སྦྱོང་དང་ཁྱིམ་པ་ལ་འཕྲལ་དུ་བསྐུར་དུ་མེད་ན་ཁྱིམ་པ་དག་ལ་བཅོལ་ཏེ་སྐྱོལ་ཅིག་པར་བསྐོས་ཏེ་འདོང་ངོ༌། །བདག་གིས་ཁྱེར་ཏེ་འོང་ངོ་ཞེས་ཟེར་ན་བཞག །སཱུ་ཏྲ་ལྟག་མ་ལྟར་ཁྱིམ་པ་ལ་སྐྱོལ་ཅིག་པར་བཅོལ་ནས་བསྐྱལ་ལོ་ཞེས་ཁས་བླངས་ན་སྟན་བཞག །དེས་མི་སྐྱེལ་ན་གནས་བྱས་པས་བསྐུར། ཁྱིམ་པ་ལ་སྐྱེལ་བར་བཅོལ་ཏེ་མ་བཏུབ་ན་དགེ་སློང་གཞོན་ནུ་རྣམས་ཀྱིས་བསྐུར། མེད་ན་རང་གིས་སོ། །སྐྱེལ་བ་ཁྱིམ་པ་ལ་སོགས་པ་སྐྱེལ་དུ་མ་བཏུབ་ན་བདག་གིས་བསྐུར། ཐམས་ཅད་ཀྱིས་ན་གཎྜཱི་བརྡུངས་ཏེའོ། །སྟན་བརྙས་པ་དེ་དགེ་སློང་ཀུན་གྱིས་བསྐུར་དགོས་ནའང་གཎྜཱི་བརྡུངས་ལ་བསྡུས་ཏེ་བསྐུར་རམ། ལེན་དུ་འདོང་ངོ༌། །ཁྱིམ་པ་ཞིག་གིས་མཆོད་སྟོན་གྱི་ཕྱིར་ཁྲི་སྟན་བརྙས་ན་ཐབས་དེ་བཞིན་གཙུག་ལག་ཁང་དུ་མགྲོན་བྱས་པ་བདག་གི་ཕྱིར་སྟན་རྙེད་ན་སྦྱིན། ཁྱིམ་པས་དགེ་འདུན་མཆོད་སྟོན་གསོལ་བར་རྒྱུ་ཕུལ་བ་ལས་དེའི་རྗེས་ལ་ཁྱིམ་པ་དེ་ཉིད་ཀྱི་གཉེན་བཤེས་ཟན་སྦྱིན་སྦྱིན་ན་སྟན་བརྙ་ཞེས་ཟེར་ན་དགེ་འདུན་གྱི་རྗེས་མ་སླེབས་ཏེ་སྟན་བྱིན་ཅིག །དེ་དག་བསྲུང་བ་དགེ་སློང་བཞག །སཱུ་ཏྲ་ལྟག་མ་ལྟར་ཁྱིམ་པའི་གཉེན་བཤེས་ཟན་སྦྱིན་པར་སྟན་བརྙར་ཕྱིན་པ་ལ་དགེ་སྦྱོང་སྤྱན་སྲུང་མ་གཅིག་བཞག །དེ་ཕྱོགས་གཅིག་དུ་འདུག །སྲུང་མ་དེ་ཁྱིམ་པ་དག་ཟན་ཟའི་ནང་དུ་མི་འགྲོ་བར་མིག་རྒྱང་གིས་སྣང་བ་ཙམ་དུ་འདུག་ལ་བགས་ཀྱིས་བསྲུང༌། བདག་གིས་ལས་ཀྱང་བྱ་ཞིང་བཙའ། དགེ་སློང་སྲུང་མར་བསྐོས་པ་དེ་སྟན་སྲུང་བའི་ཟླ་ལ་བདག་གིས་ལས་ཁ་ཐོན་ལ་སོགས་པའང་བྱ། དོང་ལ་གཞུག །ཁྱིམ་པ་ཟན་ཟོས་ཟིན་ཏེ་སྟན་མ་བརྟུལ་བར་དོང་ན་དགེ་སློང་སྲུང་མས་སྟན་རྣམས་བརྟུལ་ཏེ་སྦ། མ་རུང་ན་བཀྲུ། ཁྱིམ་པ་དེ་དག་གི་སྟན་ཤ་ཆང་གིས་རེག་སྟེ་མ་རུང་བར་གྱུར་པ་དགེ་སློང་དེས་ཕྱི་ཞིང་བཀྲུའོ། །ཆང་གི་སྙིགས་མས་རེག་ན་ཆུས་སོ། །སྟན་ལ་ཆང་ངམ་སྦང་མ་ལྟ་བུས་རེག་ན་ཆུས་བཀྲུའོ། །སྣུམ་གྱིས་ན་སུག་པ་དག་གིས་སོ། །སྟན་ལ་སྣུམ་ལ་སོགས་པས་རེག་ན་སུག་པས་བཀྲུའོ། །མི་གཙང་བས་ན་སའམ་གོ་འདུན་ནམ་ལྕི་སྐམ་གྱིས་སོ། །
སྐྱུགས་པ་དང་ངན་སྐྱུགས་ལ་སོགས་པས་སྟན་ལ་རེག་ན་ལྕི་སྐམ་དང་སུག་པ་ལ་སོགས་གོ་འདུན་གྱིས་དག་པར་བཀྲུ། མི་འདག་ན་ལན་བུ་དག་གཅོད་ཅིག །ཁྱིའུ་དྲ་བ་དང་ལན་བུའི་གསེབ་ཏུ་ངན་སྐྱུགས་རེག་པ་འདག་ཏུ་མི་བཏུབ་ན་ལན་བུ་དག་གཅོད་ཅིག །ཁྱིམ་པ་འདུག་པས་མ་བཅུག་ན་གང་གིས་མཐོང་བས་ཆུག་ཤིག །ཁྱིམ་པ་དྲ་མ་གཙུག་ལག་ཁང་དུ་འོངས་པ་ལ་བསྟི་སྟང་དུ་སྟན་བཏིང་བ་ཁྱིམ་པས་སྟན་མ་བརྟུལ་བར་སླར་སོང་ན་དགེ་སློང་གང་གིས་སྟན་མཐོང་བ་གཞུག །ཁྱིམ་པས་སྟན་བརྙས་པའམ་སྲུང་མ་མེད་ན་གང་གིས་མཐོང་བས་བརྟུལ། དེ་སྟེ་རྒན་པོ་འམ་ན་བས་ན་གཙུག་ལག་ཁང་སྐྱོང་ལའོ། །ཁྱིམ་པ་འདུག་འདུག་པའི་སྟན་མ་བརྟུལ་ཏམ་མ་བསྐྱལ་བ་དགེ་སློང་རྒན་པོ་དང་ནད་པས་མཐོང་སྟེ་སྡུད་མི་ནུས་ན་གཙུག་ལག་ཁང་སྐྱོང་ལ་བོས་ཏེ་སྡུད་དུ་གཞུག །དེ་ལ་སྒོ་ནད་པ་ལ་ཐམས་ཅད་ཀྱིས་བལྟ། དགེ་སློང་ནད་པ་ལ་དགེ་སློང་ཐམས་ཅད་ཀྱིས་ཉིན་རེ་བཞིན་ལན་རེ་བལྟའོ་མ་བལྟས་ན་ཉེས་བྱས། འདུག་སྟེའོ། །ནད་འདིར་བའི་ཚེ་འདུག་ལ་འདྲིའོ། །དེ་ལྟར་མ་བྱས་ན་ཉེས་བྱས། །དེར་སྟན་ཐོགས་ཏེ་མི་འགྲོ། ནད་འདྲིར་འགྲོ་བའི་ཚེ་བདག་གིས་སྟན་ཁྱེར་ཏེ་མི་འགྲོ་ནད་གཡོག་གིས་དེར་སྟན་གཞག། ནད་འདྲི་བའི་དགེ་སློང་འོང་བའི་ཕྱིར་ནད་གཡོག་གིས་སྟན་གདིང༌། མཁན་པོའམ་སློབ་དཔོན་དགེ་བའི་སྐྱབས་ཀྱི་ཕྱིར་འགྲོ་ན་དེ་སྟེ་གཞན་དུ་དགེ་བའི་སྐྱབས་མི་འཕེལ་ན་ཕྱི་བཞིན་དུ་འགྲོ། །མཁན་པོ་དང་སློབ་དཔོན་གཙུག་ལག་ཁང་ན་དགེ་བ་སྤྱོད་དུ་མི་ལྡོབ་སྟེ་ཤིང་དྲུང་ངམ་ཆུ་འགྲམ་ལ་སོགས་པར་ཆོས་སློབ་ཅིང་འགྲོ་ན་སློབ་མ་བདག་ཀྱང་ཆོས་སློབ་པའི་ལུང་ནོད་པའི་ཕྱིར་མཁན་པོའི་ཕྱི་བཞིན་དུ་འགྲོའོ། །བདག་གིས་དེའི་སྟན་བསྐུར། མཁན་པོ་དང་སློབ་དཔོན་དབེན་པར་ཆོས་སློབ་དུ་འགྲོ་བའི་སྟན་སློབ་མས་བསྐུར་རོ། །མ་དྲིས་པར་མི་འགྲོ། །མཁན་པོ་དང་སློབ་དཔོན་གྱི་ཕྱི་བཞིན་སློབ་མ་འགྲོ་བ་ཡང་བདག་ཀྱང་ཕྱི་བཞིན་འགྲོའོ་ཞེས་དྲིས་ལ་འགྲོ། །བདག་ཉིད་ཀྱིས་ཁྱེར་ཏེ་འོངས། མཁན་པོ་དང་སློབ་དཔོན་དབེན་པར་ཆོས་སློབ་པ་སླར་འོངས་ཏེ་སློབ་མ་དྲུང་ན་མི་འདུག་ན་སྟན་བདག་ཉིད་ཀྱིས་བསྐུར། བླ་གབ་མེད་པ་ལ་ཆོས་ཉན་པ་ལ་རླུང་ངམ་
ཆར་གྱིས་ན་མལ་སྟན་དག་གཞུག །གསོ་སྦྱིན་བྱེད་པའམ་ཆོས་འཆད་པ་ལ་སོགས་པ་བླ་གབ་མེད་པ་ལ་འཁོད་འཁོད་པ་ལས་ཆར་པ་འཕྲལ་ལ་བབ་ན་དགེ་སློང་ཀུན་གྱིས་སྟན་བསྡུ་ཞིང་གནས་སུ་བསྐུར་པ་དང་སྦ། རང་གིས་ལྕི་སྟེ་མི་ནུས་ན་རྒན་རབས་དང་གསར་བུར་ལྷན་ཅིག་ཏུ་བརྗེ། སཱུ་ཏྲ་ལྟག་མ་ལྟར་སྟན་བསྡུ་བ་ལ་རྒན་པ་རྣམས་ཀྱིས་སྟན་ཆེན་པོ་ལྕི་བ་མི་ཐེག་ན་གཞོན་ནུའི་སྟན་ཡང་བ་རྒན་པོ་ལ་བསྐུར་ལ་རྒན་པོའི་སྟན་ལྕི་བ་གཞོན་ནུ་རྣམས་ཀྱིས་བསྐུར། འདྲ་བ་འདྲ་བར་གཞག །མལ་སྟན་གྱི་རྣམས་བྲུབ་པའང་བསྲེས་ལ་མི་གཞག་གི་ཁྲིའུ་ཡང་ལོགས་ཤིག་སྟན་ཡང་ལོགས་ཤིག་སོ་སོར་བཅེར་རོ། །གཙུག་ལག་ཁང་གཞན་དུ་མལ་སྟན་དང་གོས་བརྙན་བྱིན་ཅིག །གཙུག་ལག་ཁང་གཞན་དུ་མཆོད་སྟོན་བྱས་སམ་དགེ་འདུན་མང་ཞིག་ལྷགས་ཏེ་མལ་སྟན་གྱིས་མི་ཆོག་སྟེ་བརྙན་བརྙར་སྦྱིན་ནོ། །དེ་སྟེ་ཆར་པའམ་རླུང་འབབ་པར་མི་དོགས་ནའོ།། བརྙར་བྱིན་པ་ཡང་ཆར་པ་དང་རླུང་ལངས་སམ་འབབ་དུ་དོགས་ན་གཤེར་ཅིང་མ་རུང་བའི་ཕྱིར་མི་སྦྱིན། དེ་སྟེ་ལམ་གྱི་བར་དུ་རླུང་ངམ་ཆར་པ་ནི་ཤིང་ངམ་རྩིག་པའི་དྲུང་དུ་སྤུང་པར་བྱ། མལ་སྟན་བརྙས་པ་ལས་སྐྱེལ་ཀྱང་རུང་ལེན་ཀྱང་རུང་ལམ་དུ་ཆར་པ་བབ་ན་ཤིང་དྲུང་ངམ་རྩིག་དྲུང་དུ་བཅེར་ཏེ་གཞག །གོས་ཀྱི་ནང་ན་ངན་པ་གཅིག་གིས་གཡོགས། སཱུ་ཏྲ་ལྟག་མ་ལྟར་གོས་སྤུངས་ཏེ་བཞག་པའི་སྟེང་དུ་ནང་ན་ངན་པ་གཅིག་གིས་གཡོགས། གཙུག་ལག་ཁང་དུ་ཁྱེར་ཏེ་གོས་དག་བསྐམ། མལ་སྟན་ལམ་དུ་གཤེར་བ་དེ་གཙུག་ལག་ཁང་དུ་ཕྱིན་ནས་བསྐམ། ཚིག་གམ་ཁྱེར་ན་དགེ་འདུན་གྱི་ཡང་དབྱུང་ངོ༌། །དགེ་འདུན་གྱི་མལ་སྟན་ལ་སོགས་པའི་ཁྲོད་དུ་མེའམ་ཆུ་ཞིག་བྱུང་ན་ཀུན་གྱིས་དབྱུང་ཞིང་བསྐྱ། བདག་གི་ལྷུང་བཟེད་དང་ཆོས་གོས་དབྱུང་པ་གྲུབ་པས་སོ། །དགེ་འདུན་གྱི་མལ་སྟན་ཆུའམ་མེ་འབྱུང་བའི་ནང་ན་བདག་གི་ལྷུང་བཟེད་དང་ཆོས་གོས་ཤིག་ཡོད་ན་བདག་གི་སྔར་དབྱུང་ངོ༌། །དགེ་འདུན་ནི་ཕྱུག་གི་གང་ཟག་ནི་ཕོངས་ཤིང་མ་བདོག་པའི་ཕྱིར་རོ། །ཕྱུང་ནས་དགེ་སློང་མི་ནུས་པ་ཅིག་སྲུང་མར་ཞོག་ཤིག །ཆུ་དང་མེའི་ནང་ནས་རྫས་སྔ་མ་ཕྱུང་བའི་དྲུང་དུ་དགེ་སློང་རྒན་པོ་འམ་ཉམ་རྩལ་ཆུང་དུ་ཞིག་སྲུང་མར་བཞག་
སྟེ་མི་སྟོར་བར་བྱ་བའི་ཕྱིར་རོ། །མི་བཟོད་ན་མ་འཇུག་ཤིག །ཆུ་དང་མེའི་ནང་ནས་དབྱུང་མི་ནུས་ཤིང་སྲོག་ལ་དམའ་བར་གྱུར་ན་དེའི་ནང་དུ་མི་འདུག །མལ་སྟན་གྱི་ལྟུང་བའོ། །ཁྲི་སྟན་གྱི་ལྟུང་བ་སྟེ་རྫོགས་སོ།། །།བཏིང་པ་ལ་འཆད་དེ། གྲོང་བར་དུ་གདིང་བ་བྱས་ན་ཁྱིམ་པ་ལ་བྱ་ཞིང་དོར། ཁྱིམ་པའི་གྲོང་བར་དུ་རྩྭ་བཏིང་ངམ་ལོ་མ་བཏིང་སྟེ་གནས་གནས་པ་ལས་གུད་དུ་འགྲོ་ན་རྩྭ་འདིར་དོར་རམ་ཇི་ལྟར་བྱ་ཞེས་ཁྱིམ་བདག་ལ་དྲིས་ལ་དོར། དགོན་པར་ན་དཀྲུགས་ཏེའོ། །དགོན་པའམ་ལམ་གྱི་ཞག་ལོན་པའི་སར་རྩྭའམ་ལོ་མ་བཏིང་ན་འགྲོ་ཀར་སྲིན་བུ་མི་འཇུག་པར་བྱ་བའི་ཕྱིར་དཀྲུགས་ཤིང་ཀློངས་ཏེ་འགྲོ། །མ་དཀྲུགས་ན་ཉེས་བྱས། དེར་སྔས་སམ་འཕོངས་སུ་བྱས་ན་བྱས་པའོ། །སཱུ་ཏྲ་ལྟག་མ་ལྟར་རྩྭ་བཏིང་བ་དཀྲུགས་པ་ནི་བདག་རིང་ན་འཕོངས་སམ་སྔས་གཅིག་དཀྲུགས་པས་དཀྲུགས་པར་ཆུད་དོ། །གོས་བསྐམ་པའི་ཕྱིར་རྩྭ་བཏིང་བའམ་དོར་བའོ། །གོས་ལ་སོགས་པ་བཀྲུས་པའམ་བསྐམ་པའི་འོག་ཏུ་རྩྭའམ་ལོ་མ་བཏིང་ནའང་ཟིན་ནས་བསྡུས་ཏེ་དོར། སློང་ཞིང་དོར་བར་ཁས་ལེན་ན་སྦྱིན། རྩྭ་བཏིང་བ་བསྡུས་ཏེ་དོར་བ་ལས་སློབ་མ་ལྟ་བུ་ན་རེ་ངས་བསྡུས་ཏེ་དོར་རོ་ཞེས་ཟེར་ན་འདོར་དུ་གཞུག །རྩྭ་བསླང་ཞེས་ཟེར་ཞིང་ཕྱིས་དོར་རོ་ཞེས་ཟེར་ནའང་སྦྱིན། འཆག་སར་མཆིལ་ལྷམ་འདྲུད་པའི་ཕྱིར་རྩྭ་གདིང༌། འཆག་ཅིང་འགྲོ་བའི་ས་རྩུབ་པོ་རྐང་པ་ལ་གནོད་པ་ཡོད་ན་རྩྭ་དང་ལོ་མ་རྐང་པ་ལ་འཇམ་པའི་ཕྱིར་བཏིང་ཡང་ཉེས་མེད་དོ། །དེ་དག་ཀྱང་དོར་རོ། །སཱུ་ཏྲ་ལྟག་མ་ལྟར་འཆག་སར་རྩྭ་བཏིང་པ་ཡང་བསྡུས་ལ་དོར་རོ། །དགོན་པར་བཏིང་བ་ལས་མ་བརྟུལ་ན་ཉེས་བྱས་སོ། །མདོར་ན་དོར་བ་དག་དོར་ཏེ་བྱར་མི་རུང་བར་མ་གྱུར་པ་དག་གོ །རྩྭ་བསྡུ་ཞིང་དོར་དོགས་པ་ནི་མ་རུལ་ཅིང་མ་གྲུགས་པ་བསྡུར་རུང་ཞིང་དོར་དུ་ཡོད་པ་ནི་བསྡུ་ཞིང་དོར་རོ། །རུལ་ཞིང་བསྡུར་མི་རུང་བ་ནི་མ་བསྡུས་ཀྱང་ཉེས་མེད་དོ། །གཞན་དུ་ན་དུས་དུས་སུ་བརྟག །རྩྭ་དང་ལོ་མ་ལ་སོགས་པ་བཏིང་ཞིང་སྤྱོད་པ་མ་རུལ་ཞིང་སྤྱད་དུ་རུང་བ་ནི་སྲིན་བུ་ཞུགས་སམ་མ་ཞུགས་དུས་དུས་སུ་བརྟག་ཅིང་བལྟའོ། །བརྗེ་བའི་ཡང་ངོ༌། །སཱུ་ཏྲ་ལྟག་མ་ལྟར་རྩྭ་བཏིང་བ་
བརྟགས་ན་སྲིན་བུ་འཇུག་ཏུ་བྱེད་དམ་རྙིངས་ནས་རབ་དང་བརྗེ། འཇམ་པོ་སྣུམ་པོའི་ས་ན་ཉིན་རེའོ། །ས་ཚན་ཡོད་ཅིང་གཤེར་བ་དང་འཇམ་པོ་དུལ་དུལ་པོར་འཇུག་པ་ནི་སྲིན་བུ་མྱུར་དུ་འཇུག་པའི་ཕྱིར་ཉིན་རེ་ཞིང་ལན་རེ་བལྟའོ། །གཞན་དུ་ན་ཟླ་བ་ཕྱེད་ཅིང་ངོ༌། །གསེག་མའམ་བྱེ་མའམ་ས་མཁྲང་བོ་མྱུར་དུ་སྲིན་བུ་མི་ལྡང་བ་ནི་རྩའམ་ལོ་མ་བཏིང་ན་ཟླ་བ་ཕྱེད་ཅིང་བལྟའོ། །འཆག་ན་ཐག་པས་བཅིངས་པའི་རྩྭའི་བམ་པོ་ཤིང་ལ་འཕྱང་ཞིང་བཞག །དགོན་པའི་འཆག་སར་རྩྭ་བཏིང་ངམ་གདིང་དགོས་ན་མི་འཆག་པའི་ཚེ་རྩྭ་བསྡུས་ཏེ་བཅིངས་ལ་བཏགས་ཏེ་བཞག་རྩྭ་བམ་གྱི་སྟན་གྲོགས་པོ་དག་འོང་བའི་ཕྱིར་གདིང་དགོས་པས་ཤིང་ལ་བཏགས་ཏེ་བཞག །དེ་ལྟར་ཤིང་ལ་བཏགས་པ་ནི་མི་འདྲུལ་བ་དང་སྲིན་བུ་མི་འཇུག་པའི་ཕྱིར་རོ། །གྱོ་མོར་ལྕི་བ་བཞག །བ་ལང་གི་ལྕི་བ་སྲིན་བུ་མི་འཇུག་པར་བྱ་བའི་ཕྱིར་གྱོ་མོ་དང་ཤིང་ལེབ་དང་རྡོ་ལེབ་ཀྱི་སྟེང་དུ་བཞག་སྔར་འདས་པ་སོང་ཤིག་ཅེས་པ་ཕན་ཆད་དོ། །རྟག་ཏུ་ཁྲི་སྟན་གྱི་བཤད་པ་མགོ་མན་ཆད་ཁས་བླངས་ནས་དེར་ཕྱིན་ན་བྱ་ཞེས་ཟེར་བ་ཡན་ཆད་ལག་བཤད་པ་ཀུན་རྩྭ་བཏིང་ངམ་ལོ་མ་བཏིང་བ་མ་བརྟུལ་བར་སོང་ན་ལྟུང་བར་འགྱུར་བའི་ཡན་ལག་བཤད་པ་དང་འདྲའོ། །མཉམ་པར་སྤྱད་ན་མཚུངས་པར་རོ། །དགེ་སློང་གཉིས་ཤིག་རྩྭ་བཏིང་བ་ལ་ལྷན་ཅིག་སྤྱོད་སྤྱོད་ན་གཉིས་ཀས་བསྡུས་ཏེ་དོར། དགེ་འདུན་གྱི་མ་ཡིན་ན་བདག་པོ་ལ་ཞུས་ཏེའོ། །དགེ་འདུན་གྱི་གནས་མ་ཡིན་པ་ཁྱིམ་པ་ལ་སོགས་པའི་ཁྱིམ་དུ་རྩྭ་བཏིང་སྟེ་སྤྱོད་སྤྱོད་པ་ལས་དོར་དུ་མི་ཁོམ་པར་གུད་དུ་རིང་བར་འགྲོ་ན་ཁྱིམ་པ་ཉིད་ལ་རྩྭ་བོར་ཅིག་ཅེས་བཅོལ་ཏེ་དོར་རོ་ཞེས་ཁས་བླངས་ན་མ་བོར་བར་སོང་ཡང་ཉེས་མེད། དགེ་འདུན་གྱི་གཙུག་ལག་ཁང་ནི་རྩ་བཏིང་བའི་ལྟུང་བར་གྱུར་པ་ནི་དགེ་འདུན་གྱི་གཙུག་ལག་ཁང་ཡང་ཡིན། ས་རྡོ་དང་བྱེ་མ་ལ་སོགས་པ་རྩྭ་བཏིང་བའི་གཞི་གསེག་མ་དང་ཁམ་བྲག་དང་བྱེ་མ་ལ་སོགས་པ་མ་ཡིན་པ། མེད་པར་ཉེས་པར་གྱུར་པར་རུང་བའི་ས་འཇམ་པོའམ་སྣུམ་པ་སྲིན་བུ་ལྡང་བར་འགྱུར་བ་ལ་བདག་གིས་སམ། རྩྭ་དང་ལོ་མ་བདག་གིས་བཏིང་ངམ་བསྐོས་ཏེ་བྱས་པའི་གདིང་བ་ནི་བྱེད་དོ། །གཞན་གདིང་དུ་བཅུག་པ་ལས་མ་བརྟུལ་ན་ལྟུང་བར་འགྱུར་རོ། །གདིང་བའི་
ལྟུང་བའོ། །རྩྭ་དང་ལོ་མ་བཏིང་པའི་ལྟུང་བ་རྫོགས་སོ།། །།སྐྲོད་པ་ལ་འཆད་དེ། དགེ་སློང་དང་དགེ་འདུན་གྱི་གཙུག་ལག་ཁང་ལས་བྱེད་དོ། །དགེ་སློང་གི་དགེ་འདུན་གྱི་གཙུག་ལག་ཁང་ན་དགེ་སློང་གནས་གནས་པ་ལས་བསྐྲད་དམ་སྐྲོད་དུ་བཅུག་ན་ཁྲོ་བའི་སེམས་ཀྱིས་ཁོན་གྱི་ཕྱིར་མ་བྱས་ཀྱང་ལྷུང་བའོ། །དེ་སྟེ་དེ་ན་གནོད་པའམ། ཁང་པ་རྡིབ་ཏུ་འོང་བ་དང་ཆུ་དང་མེ་ལ་སོགས་པ་དབྱུང་བའི་ཕྱིར་གནས་སྤོས་པ་དང༌། དགེ་འདུན་འཁྲུག་པ་འབྱུང་སྟེ། དགེ་སློང་གནས་དེ་ནས་མ་ཕྱུང་ན་དགེ་འདུན་ལ་གནོད་པའམ་འཁྲུག་པ་འབྱུང་སྟེ་ཕྱུང་བ་དང༌། མི་ཞིའམ། མ་ཕྱུང་ན་དགེ་འདུན་འཁྲུག་པ་མི་ཞི་བའི་ཕྱིར་ཕྱུང་བ་དང༌། བྱེད་པར་འདོད་ན་མ་ཡིན་ནོ། །སྨན་དཔྱད་ལ་སོགས་པ་བྱ་བའི་ཕྱིར་གནས་སྤོས་པ་དང་འདི་རྣམས་ཀྱི་རྐྱེན་མ་ཡིན་པར་དགེ་སློང་བསྐྲད་ན་ལྟུང་བར་འགྱུར་ཏེ་ཡན་ལག་གཅིག །འབྱུང་བའོ། །གཙུག་ལག་ཁང་ནས་ཀྱང་དགེ་སློང་ཕྱུང་ན་ལྟུང་བར་འགྱུར་ཏེ་ཡན་ལག་གཅིག །གཞན་གྱིས་ཀྱང་ངོ༌། །གཞན་ལ་དགེ་སློང་སྐྲོད་དུ་བཅུག་ན་འང་ལྟུང་བར་འགྱུར། །ཕ་རོལ་གྱི་ཕྱིར་ཡང་ངོ༌། །གཞན་གྱིས་བདག་སྐྲོད་དུ་བཅུག་གམ་བདག་ཉིད་ཀྱིས་བསྐྲད་ཀྱང་རུང་ལྟུང་སྟེ་སཱུ་ཏྲ་འདི་གཉིས་ལ་ཡན་ལག་གཅིག ། གཙུག་ལག་ཁང་ཡིན་པ་དང་ཡན་ལག་འདི་ལྔ་དང་ལྡན་ན་ལྟུང་བར་འགྱུར་རོ། །དགེ་སློང་མ་དང་དགེ་ཚུལ་ཕ་དང་དགེ་ཚུལ་མ་དག་གིས་ནི་ཉེས་བྱས་པའོ། །དགེ་སློབ་མ་དང༌། དགེ་སྦྱོང་མ་དང་དགེ་སྦྱོང་ལ་དགེ་སློང་སྐྲོད་དུ་བཅུག་ན་དགེ་སློང་སྐྲོད་དུ་བཅུག་པ་ནི་ལྟུང་བ་དགེ་སྦྱོང་དག་ལ་ནི་ཉེས་བྱས་སོ། །འདི་དག་ཀྱང་ངོ༌། །དགེ་སློབ་མ་དང་དགེ་སྦྱོང་མ་དང་དགེ་སྦྱོང་བསྐྲད་ན་ཉེས་བྱས་སོ། །རྩེད་མོ་ན་ཡང་ངོ༌། །སྙིང་ནས་བསྐྲད་པ་ནི་མ་ཡིན་གྱི་རྩེད་མོའི་ཕྱིར་བསྐྲད་པ་ནི་ཉེས་བྱས་སོ། །ཁྱིམ་མི་ན་བསོད་ནམས་མ་ཡིན་པ་མང་ངོ༌། །ཁྱིམ་མི་ལ་དགེ་སློང་སྐྲོད་དུ་བཅོལ་ན་དགེ་སློང་ནི་ལྟུང་བ་ཁྱིམ་པ་ལ་ནི་ལྟུང་བའི་རིམ་པ་མེད་དེ་སྡིག་ཆེའོ། །བསྐྲད་པའོ། །བསྐྲད་པའི་ལྟུང་བ་སྟེ་རྫོགས་སོ།། །།ཕྱིས་གནོན་གྱི་ལྟུང་བ་ལ་འཆད་དེ། འྦྷིད། དགེ་འདུན་གྱི་གཙུག་ལག་ཁང་ན་དགེ་སློང་སྔ་ན་འདུག་པར་ཡང་ཤེས་བཞིན་པ་དང་ཡན་ལག་གཅིག །གནས་པ་གཙུག་
ལག་ཁང་ན་སྔ་ན་གནས་ཤིང་འདུག་པ་ལས་བསྐྲད་པར་མནན་ན་ལྟུང་བར་འགྱུར་ཏེ་ཡན་ལག་གཅིག །དགེ་སློང་གིས་དགེ་འདུན་གྱི་གཙུག་ལག་ཁང་ནང་གི་གནས་ནའོ། །བདག་གིས་ཕ་རོལ་དགེ་སློང་ཡང་ཡིན་པ་མནན་ཅིང་བསྐྲད་ན་ལྟུང་བར་འགྱུར་ཏེ་ཡན་ལག་གཅིག །དགེ་འདུན་གྱི་གཙུག་ལག་ཁང་ཡང་ཡིན་པ་ལས་མནན་ན་ལྟུང་བར་འགྱུར་ཏེ་ཡན་ལག་གཅིག །ནན་གྱིས་པ་སྟེ་བསྐྲད་ཅིང་དབྱུང་བའི་ཕྱིར་ནན་གྱིས་མནན་ན་ལྟུང་བར་འགྱུར་ཏེ། ཡན་ལག་གཅིག །ནད་དང་འཇིགས་པའི་དབང་གིས་ནོན་པ་བཏང་སྟེའོ། །ནད་དང་འཇིགས་པའི་རྐྱེན་ལ་སོགས་པ་མེད་པར་ནན་གྱིས་མནན་ཅིང་བསྐྲད་ན་ལྟུང་སྟེ། ཡན་ལག་གཅིག་སྟེ། ཡན་ལག་འདི་རྣམས་དང་ལྡན་ན་ཕྱིས་གནོན་གྱི་ལྟུང་བར་འགྱུར། དཔེ་འདི་བཞིན་ཏེ་བཟློག་པར་འདོད་པས་དགེ་སློང་ལ་བཟློག་པའོ། །བསྒོ་བ་ལ་ལན་ལོག་པར་སྨྲས་ན་ལྟུང་བར་འགྱུར་བ་བཞིན་དུ་དགེ་སློང་ལ་ལོག་པར་གནོད་པ་བྱས་ན་ལྟུང་བར་འགྱུར་ཏེ་ཨུ་ད་ཡིས་བདག་གི་སློབ་མ་ལ་ཀླན་ཀ་བཙལ་ནས་ཁྱེད་ཁང་པའི་ནང་ན་འཁོད་པའི་མི་རིགས་ཀྱི་མཁྲིས་པའི་ནད་རྒྱས་ཀྱི་ཕྱི་རོལ་ན་འཁོད་ཅིག་ཅེས་ལྷགས་པ་ལ་བཞག་སྟེ་གནོད་པར་བྱས་པ་དང་བད་ཀན་གྱི་ནད་རྒྱས་ཏེ་ཚ་བ་ལ་འཁོད་ཅིག་ཅེས་གནོད་པ་བྱས་པ་དང་དགེ་འདུན་རྐུན་པོས་འཇིགས་ཏེ་ཕྱི་རོལ་དུ་ཟར་དུ་མི་རུང་བའི་ཕྱིར་ནང་དུ་གྱོ་མོ་བཞག་སྟེ་བཤང་བ་ལས་གཙུག་ལག་ཁང་བརྩིག་གོ་ཞེས་ཨུ་ད་ཡིས་གྱོ་མོ་དེ་བོར་ཏེ་ཕྱི་རོལ་ཆེ་ཆུང་ནང་དུ་སྟོར་སྟེ་གནོད་པ་བྱས་པ་ལ་སོགས་པ་ལྟ་བུ་དགེ་སློང་ལ་གནོད་པར་བྱེད་པའི་ཕྱིར་ལོག་པའི་ཐབས་ཀྱིས་བྱས་ན་གག་ཀྱང་རུང་སྟེ་ལྟུང་བའོ། །ནན་གྱིས་མནན་པའོ། །ཕྱིས་གནོན་པའི་ལྟུང་བ་སྟེ་རྫོགས་སོ།། །།གཟེར་མེད་ཀྱི་ལྟུང་བ་ལ་འཆད་དེ། དགེ་འདུན་གྱི་གཙུག་ལག་ཁང་གི་སྟེང་དུ་ན་བྱེད་དོ། །དགེ་འདུན་གྱི་གཙུག་ལག་ཁང་ཡང་ཡིན་པ་ལས་ལྟུང་བར་གྱུར་ཏེ་ཡན་ལག་གཅིག །བླ་རྫང་ཁང་ཐོག་ཏུ་ཉལ་བ་ལས་ལྟུང་བར་འགྱུར་ཏེ་ཡན་ལག་གཅིག །འོན་ཏེ་གུར་ཁང་ན་མ་ཡིན་ནོ། །ཤིང་མེད་པའི་ས་ཁང་དུ་གུར་འདྲ་བར་ཕུབ་པ་ཁྲིའི་རྩ་བས་མི་རྟོལ་བའི་ཁང་པ་ལ་ཉལ་བ་ནི་ལྟུང་བ་མེད། དེའི་སྟེང་རྣམ་པར་གཡོགས་པ་ན་ཡང་ངོ༌། །ཁང་པ་གཞན་གྲལ་བུ་དང་འཇི་བ་
ལ་སོགས་པས་གཡོགས་ཤིང་ཁྲི་རྩ་བས་མི་ཕུག་པ་ཡང་ལྟུང་བར་མི་འགྱུར། ཁྲིའི་རྐང་པ་གཟེར་བུ་ཅན་ན་ཡང་ངོ༌། །ཁྲིའི་རྐང་པ་གཟེར་བུ་དང་ཁྲིའུ་ལ་སོགས་པས་བཏབ་ཅིང་མི་ལྟུང་བ་ལ་ཁང་ཐོག་ཏུ་ཉལ་བའང་ལྟུང་བར་མི་འགྱུར་རོ། །གན་རྒྱལ་བཏང་སྟེ་འོ། །ཁྲི་གཟེར་བུ་མེད་ཀྱང་གན་རྐྱལ་དུ་བཞག་སྟེ་སྟེང་དུ་ཉལ་ཡང་ལྟུང་བར་མི་འགྱུར། རྐང་པའི་སོ་སོར་བཞག་ན་ཡང་ངོ༌། །ཁྲིའི་གཟེར་བུ་མེད་ཀྱང་ཁྲིའི་རྐང་པ་བཞིའི་འོག་ཏུ་སོ་ཕག་གམ་ཤིང་ལེབ་ལ་སོགས་པ་བཞག་སྟེ་རྩ་བ་མི་ལྟུང་བ་ལ་ཉལ་བ་འང་ཉེས་མེད་དོ། །སཱུ་ཏྲ་འདི་རྣམས་ལྟ་བུ་མ་ཡིན་པ་ལ་ཉལ་བ་ནི་ལྟུང་བར་འགྱུར་ཏེ་ཡན་ལག་གཅིག །མནན་པའོ། །འོག་ན་ཉལ་བ་ལ་གནོད་པར་བྱ་བའི་ཕྱིར། ཁྲི་ལ་དྲག་ཏུ་མནན་པ་ལས་ལྟུང་བར་འགྱུར་ཏེ། ཡན་ལག་གཅིག །འྦྷིད་དོ། །དགེ་འདུན་གྱི་གཙུག་ལག་ཁང་ཡིན་པར་ཤེས་ཏེ། འོག་ན་མི་ཡོད་པ་ལས་ལྟུང་བར་འགྱུར་ཏེ། ཡན་ལག་གཅིག །ཡན་ལག་འདི་རྣམས་དང་ལྡན་ན་གཟེར་མེད་ཀྱི་ལྟུང་བའོ། །རྐང་པ་གཟེར་བུ་ཅན་ལ་འཛེག་པའོ། །གཟེར་མེད་པའི་ལྟུང་བ་སྟེ་རྫོགས་སོ།། །།འདེབས་པའི་ལྟུང་བ་ལ་འཆད་དེ། བདག་སྤྱོད་པའི་ཕྱིར་ས་ལས་གཞན་པའོ། །བདག་གིས་ལུས་ཀྱི་ཕྱིར་སྤྱོད་པའི་ཆུ་ལས་གཞན་པ་ཆག་ཆག་པ་དང་མཎྜལ་དང་འཇི་བ་བྱེད་པ་ལ་སོགས་པའི་ཆུ་སྲིན་བུ་ཡོད་པར་ཤེས་བཞིན་དུ་སྤྱད་ན་ལྟུང་བར་འགྱུར་ཏེ་སེམས་ཅན་མེད་ལ་ཡོད་པར་བསམས་ཏེ་སྤྱད་ན་ཉེས་བྱས་པའོ། །སེམས་ཅན་ཡོད་པ་ལ་ཡོད་པར་ཤེས་བཞིན་དུ་སྤྱད་ན་ལྟུང་བའོ། །སེམས་ཅན་ཡོད་ལ་ཡོད་དམ་མེད་ཐེ་ཚོམ་ཟ་བཞིན་དུ་སྤྱད་ན་ལྟུང་བའོ། །སེམས་ཅན་མེད་ལ་མེད་པར་ཤེས་བཞིན་དུ་སྤྱད་ན་ཉེས་མེད་དོ། །སྲོག་ཆགས་དང་བཅས་པའི་དགོས་པའོ། །སེམས་ཅན་དང་བཅས་པར་སྤྱོད་པ་རྫོགས་སོ།། །།རིམ་གཉིས་འདོད་པའི་ལྟུང་བ་ལ་འཆད་དེ། སྒོའི་རེ་བཞི་བྱས་ཏེ་བསྒྲུབ། དགེ་སློང་གིས་དགེ་འདུན་གྱི་ཕྱིར་གཙུག་ལག་ཁང་བརྩིགས་ཀྱང་རུང་གང་ཟག་གི་ཕྱིར་བརྩིགས་ཀྱང་རུང་སྒོའི་རེ་བཞི་བཅའ་ཞིང་གཞུག །གཏན་པ་ཡང་ངོ༌། །སྒོའི་སྤྱིས་དང་གཏན་པ་ལ་སོགས་པའི་གནས་བཅས། སྐར་ཁུང་གདོད། ཁང་པའི་སྐར་ཁུང་ཡང་གདོད། གཙུག་
ལག་ཁང་ལས་བྱེད་དོ། །གཙུག་ལག་ཁང་བརྩིགས་པ་ལས་ལྟུང་བར་འགྱུར་ཏེ་ཡན་ལག་གཅིག །སྤྱོད་ལམ་བཞིའི་སྣོད་དང་སྤྱོད་ལམ་བཞི་པོ་ཤོང་བ་མན་ཆད་ནི་ཉེས་མེད་སྤྱོད་ལམ་བཞི་ལས་ལྷག་པར་བརྩིགས་པ་ལས་ལྟུང་བར་འགྱུར་ཏེ་ཡན་ལག་གཅིག །དེ་སྟེ་ཐམས་ཅད་རྡོས་སམ་སོ་ཕག་གིས་སམ་ཤིང་གིས་ན་མ་ཡིན་ནོ། །རྡོ་འབའ་ཞིག་གིས་སམ་ཤིང་འབའ་ཞིག་གིས་སམ་སོ་ཕག་འབའ་ཞིག་གིས་བརྩིགས་པ་ནི་ཉིན་གཅིག་ལ་ཇི་ཙམ་བརྩིགས་ཀྱང་ལྟུང་བར་མི་འགྱུར་ཏེ་འཇི་བ་དང་ཕ་གུ་གྲངས་ལས་ལྷག་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག ། ཆར་ཁབ་བམ་གཡོགས་མས་སོ། །ཆར་ཁབ་བམ་གཡོགས་མ་ཡོད་ན་ནི་ཉེས་མེད་དེ། ཆར་ཁབ་མེད་པར་ཕ་གུ་དང་འཇི་བ་ལས་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །བྱས་སམ་ཟིན་པར་མཐོང་སྟེ་སྦྱིན་པའི་བདག་པོ་ལ་མ་སྨྲས་ནའོ། །ཁང་པ་རྩིག་པའི་ཡོན་བདག་གུད་དུ་འགྲོ་སྟེ་ང་སླར་འོངས་པའི་ཁར་ཟིན་པར་བྱོས་ཤིག་ཅེའམ་འགྲོ་ཁར་མཐོང་བར་དགོས་ཀྱིས་རིང་དུ་ཟིན་པར་རྩིག་ཏུ་བཅུག་པ་ནི་ཆུ་ཁུང་དང་སྐུར་ཁུང་ལ་སོགས་པ་མ་བཏོད་པར་རིམ་གསུམ་ལས་འདས་པར་བརྩིགས་པ་ནི་ལྟུང་བར་མི་འགྱུར་ཏེ་རིང་པར་རྩིགས་ཤིག་པར་མ་བསྒོས་པར་རིམ་གསུམ་ལས་འདས་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །ཕ་གུ་རིམ་གསུམ་འཁོར་བ་ལས་འདས་པར་བསྒྲུབས་ནའོ། །ཉིན་གཅིག་ལ་ཕ་གུ་རིམ་གསུམ་ལས་ལྷག་པར་བརྩིགས་ན་ལྟུང་བར་འགྱུར་ཏེ་ཡན་ལག་གཅིག །གཞན་གྱིས་ཀྱང་ངོ༌། །གཞན་ཞིག་ལ་བརྩིགས་ཏུ་བཅུག་སྟེ་རིམ་གསུམ་ལས་ལྷག་པར་བརྩིགས་ན་ལྟུང་བར་འགྱུར་རོ། །དེའི་ཉི་མ་ལའོ། །ཕ་གུ་རིམ་གསུམ་ལས་ལྷག་པར་འདོར་བ་ཡང་ཉི་མ་གཅིག་ལ་གསུམ་ལས་ལྷག་པར་བོར་ན་ལྟུང་བར་འགྱུར་ཏེ་ཡན་ལག་གཅིག །གཞན་དུ་ཡང་འཇིམ་པ་མེད་པར་ནའོ། །སོ་ཕག་མ་ཡིན་པ་ཕ་གུ་ཐ་མལ་པ་འབའ་ཞིག་འཇི་བ་མེད་པར་བརྩིགས་ནའང་ལྟུང་བར་འགྱུར་ཏེ་རིམ་གསུམ་ལས་འདས་པར་བརྩིགས་པ་ལས་ལྟུང་བར་འགྱུར་རོ། །སྟོར་ཁུང་མ་བཏོད་ན་ཡང་ངོ༌། །ཆུ་འགྲོ་བའི་སྟོར་ཁུང་མ་བཏོད་པར་བརྩིགས་པ་ནི་ཉིན་གཅིག་ལ་ཕ་གུ་རིམ་གསུམ་ལས་ལྷག་པར་བརྩིགས་ན་ལྟུང༌།
སྟོར་ཁུང་བཏོད་ན་ནི་རིམ་བཞིན་དུ་བརྩིགས་ཀྱང་ཉེས་མེད། རྨང་སམ་བརྐོས་པར་བཏིང་ན་ཡང་ངོ༌། །རྨང་གིས་མ་བརྐོས་པར་རྨང་བཏིང་བ་རིམ་གསུམ་འདས་ན་ལྟུང་སྟེ་རྨང་བརྐོས་ལ་སྟོར་ཁུང་མན་ཆད་རྨང་ལ་ཕ་གུ་རིམ་དུ་བོར་ཡང་ཉེས་མེད། སྒོའི་ཁ་ཁྱེར་སྟེང་མ་ཡང་ངོ༌། །སྒོའི་ཁ་ཁྱེར་མ་བཅུག་པར་ཁ་ཁྱེར་གྱི་ས་ནས་ཕ་གུ་རིམ་གསུམ་ལས་འདས་པར་བརྩིགས་ན་ལྟུང༌། ཁ་ཁྱེར་བཅུག་ན་རིམ་དུ་བརྩིགས་ཀྱང་ཉེས་མེད་དོ། །ཉེས་མེད་པ་ནི་སྔ་མའི་ཐོག་མའོ། །ཆུ་ཁུང་མ་བཏོད་དམ་ཁ་ཁྱེར་མ་བཅུག་པར་རིམ་གསུམ་ལས་འདས་ཏེ་རིམ་བཞི་བོར་ན་ནི་ལྟུང་བ། རིམ་གསུམ་བོར་བ་ཕན་ཆད་བོར་བ་ནི་ཉེས་མེད། རིམ་བཞིན་འདོར་བའི་ཚེ་ཉེས་བྱས་སོ། །བཙུག་ལག་ཁང་གི་ལྟུང་བའོ། །རིམ་གཉིས་འདོར་བའི་ལྟུང་བ་སྟེ་རྫོགས་སོ།། །།མ་བསྐོས་པའི་ལྟུང་བ་ལ་འཆད་དེ། ཕས་ཕམ་མདོ་སྡེ་དང་འདུལ་བ་དང་མ་མོ་ལྟ་བུ་འཛིན་པ་ལོ་ཉི་ཤུ་ལས་མི་ཉུང་བ་གྲོང་ཁྱེར་གྱི་སྨྲ་བ་དགེ་སློང་མ་དང་ལུས་ཕྲད་པ་བཤགས་པ་བྱས་པ་དགེ་སློང་མ་ལ་སྟོན་པར་བསྐོས་པའོ། །དགེ་སློང་མའི་དགེ་འདུན་ལ་བཅུ་བཞི་དང་བཅོ་ལྔའི་གོས་སྦྱིན་གྱི་ཚེ་རྟག་ཏུ་ཆོས་འཆད་པར་དགེ་སློང་ལས་བསྐོ་དགོས་ཏེ་དགེ་སློང་བཀོ་བའི་ཕས་ཕམ་པ་མ་བྱུང་བ་མདོ་སྡེ་དང་འདུལ་བ་དང་མ་མོ་ལྟ་བུ་མཁས་ཤིང་འཛིན་པ་ཁྲིམས་ཚང་ནས་ལོ་ཉི་ཤུ་ལོན་པ་ཡུལ་གྱི་དབུས་ཀྱི་སྐད་དང་ལྡན་ཞིང་དོར་བ་དང་ལྡིབ་པ་ལ་སོགས་པ་མེད་པ་དང་དགེ་སློང་མ་དང་སྔོན་ཆད་ལུས་མ་རེག་པ་དང་ལུས་རེག་ཀྱང་བཤགས་པ་བྱས་ཟིན་པ་མིང་གིས་སྨོས་པ་འདི་རྣམས་དང་ལྡན་ན་དགེ་སློང་མ་ལ་བཅུ་བཞི་འམ་བཅོ་ལྔའི་ཚེ་ལ་ཆོས་འཆད་པར་དགེ་འདུན་གྱིས་བསྐོས་ཀྱང་རུང་ངོ༌། །འདི་རྣམས་དང་ལྡན་པའི་དགེ་སློང་དེས་ཆོས་འཆད་ཀྱང་ཉེས་མེད་དོ། །དགེ་འདུན་གྱིས་དགེ་སློང་མ་ལ་ཆོས་བཤད་པར་བསྐོས་ཀྱང་བཅུ་བཞི་འམ་བཅོ་ལྔའི་གསོ་སྦྱིན་གྱི་ཚེའི་དུས་སུ་རྟག་ཏུ་འཆད་ལ་དབང་གི་དུས་སུ་དེ་མ་ཡིན་པར་རྟག་ཏུ་འཆད་དུ་མི་དབང་ངོ༌། །གསོ་སྦྱིན་བཅོ་ལྔ་པའི་མཚམས་ཀྱི་ནང་དགེ་སློང་མ་ལ་ཆོས་འཆད་པའི་དགེ་སློང་མས་གང་བསྐོ་བ་ཡང་བཅུ་བཞི་འམ་བཅོ་ལྔའི་གསོ་སྦྱིན་གྱི་ཚེ་དགེ་སློང་མས་གསོལ་བ་བཏབ་ན་མཚམས་ཀྱི་ནང་དུ་དགེ་འདུན་གྱིས་གསོལ་བ་དང་
ཞུ་བའི་ལས་ཀྱིས་འཆད་པར་བསྐོའོ། །མཚམས་ཀྱི་ཕྱི་རོལ་ལམ་བཅུ་བཞི་དང་བཅོ་ལྔའི་ཚེ་མ་བསྐོས་ན་བསྐོས་པར་མི་ཆུད་དོ། །མདོ་སྡེ་ལ་སོགས་པ་དང་འཛིན་པ་མེད་ན་སོ་སོར་ཐར་པ་ཐོན་པའོ། །དགེ་སློང་གི་ནང་ན་སཱུ་ཏྲ་ལྟག་མའི་ལྟག་མ་ལྟར་བཤད་པ་དང་ལྡན་པ་མེད་ན་ལོ་ཉི་ཤུ་ལོན་པ་ཕས་ཕམ་པ་མ་བྱུང་དགེ་སློང་མ་དང་མ་རེག་སྐད་མི་དོར་བ་བཞི་དང་ལྡན་ན་དགེ་སློང་ཕ་དང་དགེ་སློང་མའི་སོ་སོར་ཐར་པ་ཁ་ཏོན་དུའང་ཤེས་ཤིང་འཆང་ནུས་ན་བསྐོར་རུང་ངོ༌། །དེ་ཡང་ན་ཕས་ཕམ་པ་བཤད་སཱུ་ཏྲ་ལྟག་མ་ལྟར་ནུས་པ་མེད་ན་ཡང་ལོ་ཉི་ཤུ་ལོན་པ་ཕས་ཕམ་པ་མེད་སྐད་མི་དོར་དགེ་སློང་མ་དང་རེག་པ་མ་ཡིན་ན་དགེ་སྤྱོང་མའི་ཕས་ཕམ་པ་བརྒྱད་འཆང་ནུས་པ་ཡང་བསྐོར་རུང་ངོ༌། །ཆོས་ལྕི་བ་ཡང་ངོ༌། །སཱུ་ཏྲ་ལྟག་མ་ལྟར་ཕས་ཕམ་པ་འཆད་ནུས་པའང་མེད་ན་ལོ་ཉི་ཤུ་ལོན་ཞིང་ཕས་ཕམ་པ་མེད་པ་དགེ་སློང་མ་དང་མ་རེག་པ་དང་སྐད་མ་དོར་བའང་དགེ་སློང་མའི་ལྕི་བ་བརྒྱད་འཆད་ནུས་པའང་བསྐོར་རུང་ངོ༌། །ཕྱི་མའི་ནི་ཅི་སྲིང་མོ། །དགེ་སློང་མ་ལ་ཆོས་འཆད་པར་བསྐོ་བ་རྟག་ཏུ་བཤད་པ་དག་དང་ལྡན་པ་མེད་ན་སཱུ་ཏྲ་འདི་ལས་འབྱུང་བ་རྣམས་དང་ལྡན་ན་བསྐོར་རུང་ངོ༌། །ཁྱེད་དགེ་སློང་མའི་དགེ་འདུན་འདུས་སམ། དགེ་སློང་མའི་དགེ་འདུན་ཀུན་འདུས་སམ་ཞེས་ཟེར་ནུས་པ་དང༌། ཀུན་གཙང་ངམ། ཁྱེད་ལ་ཕས་ཕམ་པ་དང་དགེ་འདུན་གྱི་ལྷག་མ་ལ་སོགས་པ་མེད་དམ་ཀུན་གཙང་ངམ་ཞེས་སྨྲ་ནུས་པ་དང་མཐུན་ནམ། ཁྱེད་རྣམས་ལས་བརྒྱ་རྩ་གཅིག་ལ་སོགས་པ་གཅིག་ཏུ་སྤྱོད་ཅིང་འདུའམ་ཞེས་ཟེར་ནུས་པ་དང༌། ཁ་ན་མ་ཐོ་པ་མེད་དམ་ཁྱེད་ལ་ཉེས་བྱས་ལ་སོགས་པ་ཁ་ན་མ་ཐོ་བ་མེད་དམ་ཞེས་ཟེར་ནུས་པ་དང༌། ཁྱེད་ལ་ལ་ལ་དགེ་འདུན་གྱིས་མ་བསྐོས་པའི་གང་ཟག་མི་འཆད་དམ། ཁྱེད་ལ་དགེ་འདུན་གྱིས་གསོལ་བ་དང་ཞུ་བས་བསྐོས་པ་མ་ཡིན་པའི་དགེ་འདུན་ཆོས་འཆང་དུ་མི་འོང་ངམ་ཞེས་ཟེར་ནུས་པ་དང༌། ཁྱེད་དགེ་འདུན་ལས་གང་ཟག་འཆད་པ་མི་འོང་ངམ། །དགེ་འདུན་གྱིས་ཆོས་འཆད་པར་མ་བསྐོས་པའི་དགེ་སློང་མི་འོང་ངམ་ཞེས་ཟེར་ནུས་པ་དང༌། །ཁྱེད་ལ་འཆད་པ་ནི་དགེ་སློང་སུའང་མི་སྤྲོ་སྟེ། །ཁྱེད་ལ་དགེ་འདུན་གྱིས་བསྐོས་པའི་དགེ་སློང་འཆད་དུ་མི་སྤྲོ་སྟེ་མི་བཏུབ་པ་མེད་
དམ་ཞེས་འདྲི་ནུས་པ་ལ་འང་བྱ། ཁྱེད་ནི་མ་རབས་རིགས་དམའ་བ་ཡིན་པས་ན་ཁྱེད་ལ་ཆོས་འཆད་པ་ནི་དགེ་སློང་སུའང་འཆད་དུ་མི་སྤྲོའོ་ཞེས་ཟེར་ནུས་པ་ལའང་བྱ་སྟེ་འདི་རྣམ་གཉིས་ལྟར་སྨྲ་ནུས་པ་དང༌། དགེ་འདུན་ལས་ཁྱེད་བཤད་ཅིང་བསྟན་པ་སྟེ། ཁྱེད་དགེ་འདུན་གྱིས་ཆོས་བཤད་ཅིང་བསྟན་པ་ཡིན་ན་ཁྱེད་ལ་དགེ་འདུན་གྱི་ལས་ཆོས་འཆད་ཅིང་སྟོན་པ་མི་འོང་བའམ་ཞེས་ཟེར་ནུས་པ་འང་བྱ། དགེ་འདུན་གྱིས་ཁྱེད་ལ་ཆོས་བཤད་པའང་ཐོས་པར་དཀའ་སྟེ་རེས་འགའ་འཆད་པ་ཡིན་གྱིས་ཤེས་པར་སྨྲ་ནུས་པ་དང༌། སྲིང་མོ་དག་བག་ཡོད་པར་སྒྲུབས་ཤིག་ཅེས་སོ། །ཁྱེད་ཀྱིས་མཉན་བ་དང་འཆད་པ་ལ་གཟུངས་སུ་འཛིན་ཅིང་གོ་བ་དང་བཤད་པ་བཞིན་དུ་བག་ཡོད་པར་ནན་ཏན་དུ་སྒྲུབས་ཤིག་ཅེས་བསྒོ་ནུས་བ་དང་མིང་གིས་སྨོས་པའི་ཚིག་འདི་རྣམས་དང་ལྡན་ཞིང་ལོ་ཉི་ཤུ་ཚང་ལ་ཕས་ཕམ་པ་མེད་ཅིང་དགེ་སློང་མ་དང་མ་རེག་ལ་སྐད་མི་དོར་ན་བསྐོར་རུང་ངོ༌། །བླ་མའི་ཆོས་དང་ནུས་པ་མ་གཏོགས་སོ། །དགྲ་བཅོམ་པའི་ཆོས་ཐོབ་ཅིང་དྲུག་མངོན་པར་ཤེས་པ་དང་ལྡན་པ་ནི་དགེ་འདུན་གྱིས་མ་བསྐོས་པར་བཤད་ཀྱང་ཉེས་མེད་དེ་བླ་མའི་ཆོས་དང་མི་ལྡན་པས་དགེ་འདུན་གྱིས་མ་བསྐོས་པར་དགེ་སློང་མ་ལ་འཆད་ན་ལྟུང་བར་གྱུར་ཏེ་ཡན་ལག་གཅིག། གཅིག་ཀྱང་མེད་པར་དགེ་སློང་མ་ལ་དེ་བསྐོས་པ་དང་མ་བསྐོས་ཀྱང་ངོ༌། །རྟག་ཏུ་བཤད་པ་གང་དང་ཡང་མི་ལྡན་པར་དགེ་འདུན་གྱིས་བསྐོས་ཏེ་བཤད་ཀྱང་ལྟུང༌། མ་བསྐོས་པར་བཤད་ཀྱང་ལྟུང་བར་འགྱུར་རོ། །སྔོན་བསྐོས་པ་ནི་མ་བསྐོས་པ་མ་ཡིན་ནོ། །བཅུ་བཞི་འམ་བཅོ་ལྔའི་གསོ་སྦྱིན་གྱི་ཚེ་གསོལ་བ་དང་ཞུ་བའི་ལས་ཀྱིས་དགེ་སློང་མ་ལ་ཆོས་འཆད་པར་བསྐོས་པ་ནི་ཕྱིས་འཆད་པའི་ཚེའང་སྔར་དགེ་འདུན་གྱིས་བསྐོས་ཟིན་པས་ད་བསྐོ་མི་དགོས་སོ། །ཉེས་མེད་པ་ནི་དགེ་འདུན་དུ་མ་ཚང་བ་ལས་རིགས་པ་ལས་གསོལ་ནའོ། །དགེ་འདུན་དུ་མཚང་བ་ཞིག་ལས་དགེ་འདུན་མས་ཆོས་འཆད་པ་བསྐོར་ཅི་གནང་ཞེས་གསོལ་ན་དགེ་འདུན་དུ་མ་ཚང་བས་གོང་མའི་ཡོན་ཏན་རྣམས་དང་ལྡན་ནམ་བསྐོས་ཀྱང་ཉེས་མེད་དོ། །དེ་ཡང་ངོ༌། །དགེ་སློང་ཕའི་དགེ་འདུན་མ་ཚང་བ་ལས་དགེ་འདུན་མས་ཆོས་བཤད་པར་ཅི་གནང་ཞེས་གསོལ་ཀྱང་ཉེས་མེད་དོ། །མ་བསྐོས་པར་
འཆད་པའོ། །དགེ་སློང་མའི་དགེ་འདུན་ལ་དགེ་སློང་གིས་མ་བསྐོས་པར་ཆོས་འཆད་པའི་ལྟུང་བ་རྫོགས་སོ།། །།ནུབ་ཀྱི་བར་དུ་འཆད་པའི་ལྟུང་བ་ལ་འཆད་དེ། འྦྷིད་ཉི་མ་ནུབ་པར་ཤེས་བཞིན་དུ་འཆད་ན་ལྟུང་བའོ། །ཉི་མ་ནུབ་ནུབ་ཏུའོ། །དགེ་འདུན་གྱིས་དགེ་སློང་མ་ལ་ཆོས་འཆད་པར་བསྐོས་པའི་དགེ་སློང་ཉི་མ་ནུབ་ཀྱི་བར་དུ་བསྒྲུབ་ནུས་པར་ཤེས་ཏེ་བཤད་ན་ལྟུང་བའོ། །ནུབ་པར་མ་ཤེས་ཏེ་བཤད་ན་ནི་ཉེས་མེད་ནུབ་བམ་མ་ནུབ་ཐེ་ཚོམ་ཟ་ཞིང་བཤད་པ་ནི་ལྟུང་བའོ། །ནུབ་མོ་ཐོག་ཐག་ཏུ་ཆོས་ཉན་ཅིང་དགེ་སློང་མ་ལ་ཆོས་འཆད་པ་ནི་མ་གཏོགས་སོ། །དགེ་སློང་མའི་གཙུག་ལག་ཁང་དུ་དུས་ཀྱིས་མི་མང་པོ་འདུས་ཤིང་ནུབ་མོ་ཐོག་ཐག་ཏུ་ཆོས་འཆད་ཅིང་ཉན་པ་ནི་ཉི་མ་ནུབ་ཅིང་ཞག་ལོན་ཀྱང་ལྟུང་བར་མི་འགྱུར་རོ། །དེས་ཏེ་དེའི་རྣམ་པའི་ཚེ་གཙུག་ལག་ཁང་སྒོ་ཕྱེ་བའི་མདུན་ན་དབྱར་མོ་ཐང་མ་ཡིན་ནའོ། །སཱུ་ཏྲ་གོང་མ་ལྟར་ནུབ་མོ་ཐོག་ཐག་ཏུ་ཆོས་འཆད་པ་ལྟུང་བ་མེད་པར་བཤད་པ་འང་དགེ་སློང་ཕའི་གཙུག་ལག་ཁང་དང་ཉེ་ལ་སྒོ་ཐད་ཀར་འདུག་ཅིང་མི་ཕལ་མོ་ཆེ་ཕན་ཚུན་དུ་རྒྱུ་བ་ནི་ལྟུང་བར་མི་འགྱུར་ཏེ་དེ་ལྟ་བུ་མ་ཡིན་པར་ཉི་མ་ནུབ་ནུབ་ཏུ་བཤད་པ་ནི་ལྟུང་བར་འགྱུར་རོ། །ནུབ་ཏུ་འཆད་པའོ། །ནུབ་ཀྱི་བར་དུ་འཆད་པའི་ལྟུང་བ་རྫོགས་སོ།། །།ཟས་ཀྱི་ཕྱིར་ལྟུང་བ་ལ་འཆད་དེ། མི་འཇིགས་པའི་ཕྱིར་དགེ་སློང་ལ་ཆོས་འདྲི་ན་ཟང་ཟིང་དགེ་སློང་མས་དབུལ་བར་བྱའོ། །དགེ་སློང་མ་ཆོས་འདྲི་བ་ལ་མི་འཇིགས་ཤིང་བག་མི་ཚ་བ་དང་འདྲི་བ་སྤོབས་པར་བྱ་བའི་ཕྱིར་ཆོས་འཆད་པའི་དགེ་སློང་ལ་དགེ་སློང་ལ་དགེ་སློང་མས་སྤྱན་གཟིགས་དང་ཡོ་བྱད་ཕྲན་ཚེགས་དབུལ་ལོ། །དགེ་སློང་ནན་ཏ་ཀ་དགྲ་བཅོམ་པ་རྟག་ཏུ་དགེ་སློང་མ་ལ་ཆོས་འཆད་དེ་དགེ་སློང་མས་ཡོན་ཕྲན་ཚེགས་ཕུལ་ཡང་མི་ལེན་བཙུན་ཞིང་དགྲ་བཅོམ་པ་ཡིན་པས་དགེ་སློང་མ་ཆོས་མགོ་བར་སླར་འདྲི་ཡང་འཇིགས་ཤིང་མི་སྤོབས་པ་ལ་མི་འཇིགས་པར་བྱ་ཞིང་འདྲི་བ་སྤོབས་པར་བྱ་བའི་ཕྱིར་དགེ་སློང་མས་ཀྱང་ཁ་ཟས་དང་ཡོ་བྱད་ཕྲན་ཚེགས་ཕུལ་ཅིག་ཅེས་བཅས། རྒྱ་ཅང་དང་ལན་བུ་དང་ལྕགས་པོད་དང་དྲ་བ་དག་གོ །དགེ་སློང་མས་དགེ་སློང་ཕ་ཆོས་འཆད་པ་ལ་དབུལ་བ་ནི་མིང་གིས་སྨོས་པ་འདི་རྣམས་ལྟ་བུ་དག་དབུལ་ལོ། །དགེ་སློང་གིས་དེ་ལོངས་ཤིག །དགེ་སློང་མས་
སྤྱན་གཟིགས་དང་ཡོ་བྱད་ཕྲན་ཚེགས་དག་དབུལ་ཞིང་འོང་ན་དགེ་སློང་ཕས་ལོངས་ཤིག་ཅི་བླངས་ཀྱང་ཉེས་མེད་དོ། །དགེ་སློང་གིས་ཡང་དག་པ་མ་ཡིན་པར་ཟང་ཟིང་ཆུང་ཟད་ཀྱི་ཕྱིར་དགེ་སློང་མ་ལ་ཆོས་འཆད་དོ་ཞེས་སྨྲ་ནའོ། །དགེ་སློང་གིས་སྤྱན་གཟིགས་དང་ཡོ་བྱད་ཕྲན་ཚེགས་དགེ་སློང་མ་ལས་བླངས་པ་ལ་སྙིང་རྗེ་བའི་ཕྱིར་ཆོས་བཤད་པ་ནི་མ་ཡིན་གྱི་ཡོ་བྱད་དང་ཁ་ཟས་ཙམ་གྱི་ཕྱིར་ཆོས་འཆད་དོ་ཞེས་སྐུར་པའི་ཕྱིར་སྨྲས་ན་ལྟུང་བའོ། །ཁ་ཟས་དང་ཡོ་བྱད་ཀྱི་ཕྱིར་ཆོས་འཆད་པ་ཡིན་ལ། དེའི་ཕྱིར་ཆོས་འཆད་དོ་ཞེས་བདེན་པར་སྨྲས་པ་ནི་ཉེས་མེད་དོ། ཁྲང་ཟིང་ཆུང་ཟད་ལ་སྨྲ་བའོ། །ཟས་ཀྱི་ཕྱིར་ཆོས་འཆད་དོ་ཞེས་སྨྲ་བའི་ལྟུང་བ་སྟེ་རྫོགས་སོ།། །།གོས་འཚེམ་པའི་ལྟུང་བ་ལ་འཆད་དེ། འྦྷིད། གཉེན་མ་ཡིན་པར་ཤེས་བཞིན་དུ་བཙེམས་ན་ལྟུང་བར་འགྱུར་རོ། །གཉེན་མ་ཡིན་པའི་དགེ་སློང་མས། དགེ་སློང་མ་གཉེན་མ་ཡིན་པར་ཤེས་བཞིན་དུ་དེའི་གོས་བཙེམས་ན་ལྟུང་བར་འགྱུར་རོ། །གཉེན་ཡིན་པ་ལ་མ་ཡིན་པར་བསམས་ནས་བཙེམས་ན་ཉེས་བྱས། གཉེན་མ་ཡིན་པ་ལ་ཐེ་ཚོམ་དུ་བཙེམས་ན་ལྟུང་བ། གཉེན་མ་ཡིན་པར་ཤེས་ཏེ་བཙེམས་ན་ཉེས་བྱས། གོས་བཙེམ་པ། གཉེན་མ་ཡིན་པའི་དགེ་སློང་མའི་གོས་བདག་གིས་བཙེམས་ཏེ་ཟིན་པར་བྱས་ན་ལྟུང་བའོ། །གོས་བྱེད་པའོ། །གཉེན་མ་ཡིན་པའི་དགེ་སློང་མའི་གོས་བཙེམས་པའི་ལྟུང་བ་རྫོགས་སོ།། །།གོས་བྱིན་པའི་ལྟུང་བ་འཆད་དེ། འྦྷིད། གཉེན་མ་ཡིན་པར་ཤེས་བཞིན་ལ་བྱ། བྱིན་པའོ། །གཉེན་མ་ཡིན་པའི་དགེ་སློང་མར་ཤེས་བཞིན་དུ་དགེ་སློང་གིས་གོས་བྱིན་ན་ལྟུང་བའོ། །གོས་མ་ཡིན་པ་བྱིན་པ། དགེ་སློང་མའི་དགེ་འདུན་མ་ཡིན་པ་གཉེན་མ་ཡིན་པའི་དགེ་སློང་མའི་གང་ཟག་ལ་གོས་བྱིན་ན་ལྟུང་བར་འགྱུར་ཏེ་དགེ་འདུན་མ་ལ་གོས་དང་ཟས་ཕུལ་བ་ནི་ཉེས་མེད་དོ། །དེ་སྟེ་ཕྲོགས་པ་དང༌། དགེ་སློང་མ་གོས་ཕྲོགས་སམ་སྟོར་པའི་རྐྱེན་བྱུང་བ་ལ་གོས་བྱིན་པ་དང༌། བཟང་པོར་བཤད་པ་དང༌། དགེ་སློང་མས་ཆོས་བཟང་པོ་ལེགས་པར་བཤད་པའི་ཕྱིར་དགེ་སློང་གིས་ཡོན་ཕུལ་བ་དང༌། རབ་ཏུ་རྫོགས་པར་བྱེད་པའམ། དགེ་སྦྱོང་མ་ཞིག་རབ་ཏུ་རྫོགས་པར་བྱེད་པའི་ཚེ་གོས་
མེད་པ་ལ་གོས་བྱིན་པ་དང༌། བརྗེ་བ་མ་ཡིན་ནའོ། །དགེ་སློང་མ་དང་གོས་བཟང་པོ་བརྗེ་བའི་ཕྱིར་བཟང་པོ་བརྗེས་ཏེ་ངན་པ་བྱིན་པ་དང་འདི་རྣམས་མ་གཏོགས་པ་གོས་བྱིན་ན་ལྟུང་བའོ། །གོས་སྦྱིན་པའོ། །གཉེན་མ་ཡིན་བའི་དགེ་སློང་མ་ལ་གོས་སྦྱིན་པའི་ལྟུང་བ་རྫོགས་སོ།། །།གྲོགས་ཀྱི་ལྟུང་བ་ལ་འཆད་དེ། འགྲོ་བའི་དགོས་པའི་བརྟག་པ་བྱེད་པ་དང་དགེ་ཚུལ་ཕ་དང་དགེ་ཚུལ་མ་རྣམས་སོ། །དགེ་སློང་ཕ་དང་དགེ་སློང་མ་གང་ཞིག་ཏུ་འགྲོ་བར་འགྲོགས་ཏེ་ལམ་དུ་ཞུགས་ནས་ཁ་ཟས་བསྐུར་བ་དང་བརྟག་པ་བྱ་བ་དང་བྱིན་ལེན་བྱ་བའི་ཕྱིར་དགེ་སློང་ཕས་དགེ་སྦྱོང་ཕ་དང་གཡོག་སྐྱེས་པ་ལ་སོགས་པ་ཁྲིད་དེ་ཁ་ཟས་བསྐུར་ལ་བརྟག་པ་བྱེད་དུ་གཞུག །དགེ་སློང་མས་ཀྱང་དགེ་སྦྱོང་མ་དང་བུད་མེད་ལ་སོགས་པ་ཁྲིད་ལ་ཟས་བསྐུར་ཞིང་བརྟག་པ་ལ་སོགས་པ་བྱེད་དུ་གཞུག །དགེ་སློང་ཕ་དང་དགེ་སློང་མ་དག་ལམ་ཕན་ཚུན་རིགས་པར་རོ། །དགེ་སློང་ཕ་དང་དགེ་སློང་མ་ལམ་དུ་ཞུགས་པ་ལས་འཇིགས་པའི་རྐྱེན་བྱུང་སྟེ་གྲོགས་ཀྱང་རུང་གཡོག་མེད་པ་གང་ཞིག་ཏུ་འདོད་ན་མི་འགྲོགས་པར་རྒྱང་གྲགས་ཙམ་གྱིས་བཅད་དེ་དགེ་སློང་ཕོའི་རྒྱགས་ནི་མོ་ལ་བསྐུར་རོ་མོའི་རྒྱགས་ནི་ཕོས་བསྐུར་རོ། །དེ་ལྟར་བརྗེས་ཏེ་ཁྱེར་ན་སྤངས་པ་བཏེག་པ་ལ་སོགས་པར་མི་འགྱུར་ཏེ་ཉེས་མེད་དོ། །ཕན་ཚུན་དུ་བྱིན་ལེན་ཀྱང་ངོ༌། །གཡོག་གམ་དགེ་སྦྱོང་མེད་ན་དགེ་སློང་ཕའི་བྱིན་ལེན་དང་དགེ་སློང་མའི་བྱིན་ལེན་གཅིག་ལ་གཅིག་བྱིན་ལེན་དུ་འགྱུར་རོ། །ནད་པ་ཚངས་པ་མཚུངས་བར་སྤྱོད་པ་ལམ་དུ་མི་དོར། དགེ་སློང་ལམ་དུ་འགྲོགས་འགྲོགས་པ་ལས་གྲོགས་ལ་ལ་ཞིག་ནད་ཀྱིས་བཏབ་ན་སྨན་དཔྱད་དང་གྲོགས་ལ་སོགས་པ་མི་བྱ་བར་མི་དོར་རོ། །དེ་བསྐུར། གྲོགས་ལམ་དུ་ནད་ཀྱིས་བཏབ་པ་དེ་བདག་ཅག་གནས་གང་དུ་འདོང་བར་བསྐུར་རོ། །དེ་བཞིན་དུ་དགེ་སློང་མ་ཡང་ངོ༌། །ལམ་དུ་ཞུགས་པ་ལས་དགེ་སློང་མ་ཞིག་ནད་ཀྱིས་བཏབ་ན་ཡང་དགེ་སློང་གྲོགས་ཀྱིས་སྨན་དཔྱད་དང་ཞལ་ཏ་ལ་སོགས་པ་བྱ་ཞིང་བསྐུར་རོ། །དེར་ཕན་ཚུན་དུ་གྲོགས་བྱ། དགེ་སློང་མ་ཞིག་ལམ་དུ་ནད་ཀྱིས་བཏབ་སྟེ་དགེ་སློང་མ་གྲོགས་མོས་བསྐུར་ཞིང་གྲོགས་བྱས་ཀྱང་མི་ཐེག་ན་དགེ་སློང་ཕས་ཀྱང་གྲོགས་བྱ་ཞིང་བསྐུར་རོ། །དེ་བཞིན་དུ་ཕོ་ན་སྟེ་མི་ནུས་ན་དགེ་སློང་མས་ཀྱང་གྲོགས་བྱ།
མགོ་དང་མཇུག་ནས་བཟུང༌། སཱུ་ཏྲ་ལྟག་མ་ལྟར་གྲོགས་བྱ་བ་དགེ་སློང་མོ་ན་ན་ཕོས་ནི་མགོ་ནས་བཏེག་གྲོགས་མོས་ནི་མཇུག་ནས་བཏེག་གོ །དེ་བཞིན་དུ་ཕོ་ན་བའི་གྲོགས་བྱ་ནའང་མོས་ནི་མགོ་ནས་བཏེག་ཕོས་ནི་མཇུག་ནས་བཏེག་གོ །ཉེས་མེད་པ་ནི་གྲོང་དུ་ཕྱིན་ནས་སོང་ནའོ། །དགེ་སློང་ནད་ཀྱིས་བཏབ་པ་དེ་ལམ་དུ་གྲོང་ཞིག་ཏུ་བཞག་པ་ནི་ཉེས་མེད་དོ། །ན་བའི་སྨན་དང་ཟས་བསོགས། སཱུ་ཏྲ་ལྟག་མ་ལྟར་ནད་པ་གྲོང་དུ་བཞག་པའི་སྨན་དང་ཟས་ལ་སོགས་པ་ཡང་ཅི་དགོས་པ་བསོགས་ཏེ་བཞག །མཚུངས་པའི་གཟུགས་གཅིག་བཞག །སཱུ་ཏྲ་ལྟག་མ་ལྟར་ནད་པ་གྲོང་དུ་བཞག་པ་དེ་ལ་ནད་གཡོག་གཅིག་ཀྱང་བཞག་སྟེ་དགེ་སློང་ཕ་ཡིན་ན་ནི་དགེ་སློང་ཕ་ལས་གཅིག་བཞག །མོ་ཡིན་ན་ནི་དགེ་སློང་མ་ལས་གཅིག་བཞག །འཇིགས་པའི་ཕྱིར་ལམ་གྲོགས་སུ་འདུས་པ་ནི་མ་གཏོགས་ཏེ་ལམ་དགོངས་ཐ་མི་དད་ན་དགེ་སློང་མ་གཅིག་ཀྱང་ལམ་དུ་ཁྱེར་ནའོ། །མི་རྒོད་དམ་རྐུན་པོའམ་འཇིགས་པའི་རྐྱེན་གཅིག་བྱུང་སྟེ་འཕྲལ་ལ་ལམ་དུ་འགྲོགས་ཏེ་འདུས་པ་ནི་མ་གཏོགས་ལམ་དུ་འགྲོགས་པར་སྔ་ནས་དུས་བྱས་ཏེ་དགེ་སློང་ཕ་དང་དགེ་སློང་མ་ལྷན་ཅིག་དོང་བ་ནི་ལྟུང་བའོ། །རྒྱང་གྲགས་ཤིང་སོ་སོར་རོ། །དགེ་སློང་ཕ་དང་དགེ་སློང་མ་དུས་བྱས་ཏེ་ལམ་དུ་འགྲོགས་པ་ནི་རྒྱང་གྲགས་རེ་རེ་ཕྱིན་ཅིང་ལྟུང་བ་རེ་རེར་འགྱུར་རོ། །དེ་ཕྱེད་ཅིང་སོ་སོར་ཉེས་བྱས་སོ། །རྒྱང་གྲགས་ཕྱེད་ཅིང་ཉེས་བྱས་རེ་རེར་འགྱུར་རོ། །དགེ་སློང་མ་དང་ལམ་དུ་འགྲོགས་པའི་ལྟུང་བའོ། །དགེ་སློང་མ་དང་ལམ་དུ་འགྲོགས་པའི་ལྟུང་བ་རྫོགས་སོ།། །།གྲུའི་ལྟུང་བ་ལ་འཆད་དེ། འགྲམ་གཉིས་ཀར་བར་ཆད་དང་བཅས་ཏེ་གྲོགས་མ་བྱས་པ་མ་གཏོགས་ཏེ་ཟུང་དུ་གྲུའི་ནང་དུའོ། །དགེ་སློང་ཕ་དང་དགེ་སློང་མ་གཉིས་གྲུའི་ནང་དུ་འགྲོགས་ན་འགྲམ་ཕ་རོལ་ནའང་འཇིགས་ཚུ་རོལ་གྱི་འགྲམ་ནའང་འཇིགས་པའི་རྐྱེན་ཡོད་དེ་ཆུ་འགྲམ་དུ་འགྲོགས་ཏེ་དོང་བ་འགྲོགས་པར་དུས་མ་བྱས་པ་ནི་མ་གཏོགས་ཏེ་འགྲོགས་པར་དུས་བྱས་ལ་འགྲམ་གཉིས་ཀ་ན་འཇིགས་པའི་རྐྱེན་མེད་བཞིན་དུ་དགེ་སློང་ཕ་དང་དགེ་སློང་མ་གཉིས་གྲུ་གཅིག་གི་ནང་དུ་ཞུགས་ཏེ་དོང་བ་ནི་ལྟུང་བའོ། །ཐད་ཀར་ཕ་རོལ་དུ་རྒལ་བ་ལས་གཞན་པའོ། །ཆུ་ལ་རབ་ཐད་ཀར་
བརྒལ་བའི་ཕྱིར་གྲུ་གཅིག་གི་ནང་དུ་འགྲོགས་པ་ནི་ཉེས་མེད། ཡོན་པོ་དང་རབ་ཁ་བཞོ་བོར་འདུག་པ་དང༌། ངམ་པ་དང་ཆུ་འགྲམ་ངམ་པས་ཆོད་དེ་ངམ་བ་བསྐོར་བའི་ཕྱིར་འགྱུས་པ་དང༌། སློང་སྤང་བའམ། ཆུ་ལ་ཀློང་ཡོད་པའི་ཕྱིར་སྐོར་བ་དང༌། རུ་སྐྱ་དང་སྐྱ་བ་ཆག་སྟེ་གྲུ་འབྱམ་པ་དང༌། གདོས་ཆག་གམ་གདོས་ཆག་སྟེ་གྲུ་འབྱམ་པ་དང༌། དངོར་འཛིན་གྱི་དབང་གིས་དེའི་ཕྱིར་ཞུགས་པ་ལས་གནས་གཞན་དུ་ནའོ། །མཉན་པ་ཁྱིམ་ལམ་ཉེ་བའི་ཕྱིར་ཐད་ཀར་སྟོང་དུ་མ་བཏུབ་པ་དང་རྐྱེན་འདི་རྣམས་མ་གཏོགས་པར་དགེ་སློང་མ་དང་ཆུ་འགྲམ་དུ་གྲུ་གཅིག་གི་ནང་དུ་འགྲོགས་ན་ལྟུང་བའོ།། རྩིས་མགོ་ཡན་ལག་དང་བཤད་པ་གཞན་ནི་དགེ་སློང་མ་དང་ལམ་དུ་འགྲོགས་པ་ལྟག་ཏུ་བཤད་པ་དང་འདྲའོ། །དགེ་སློང་མ་དང་ལྷན་ཅིག་ཏུ་ཆུ་རྒལ་བའོ། །དགེ་སློང་མ་དང་གྲུའི་ནང་དུ་འགྲོགས་པའི་ལྟུང་བ་རྫོགས་སོ།། །།དབེན་གྱི་བུད་མེད་དང་འདུག་པ་ལ་འཆད་དེ། བུད་མེད་གཅིག་པུ་ལ་དབེན་ཞིང་འགྲོ་བ་རྒྱུ་བར་མི་འཇུག་པའི་ཕྱོགས་གཡོགས་པ་དང་བཅས་པ་བར་འདོམ་གང་ན་དེ་དག་བྱེད་དོ། །དགེ་སློང་དང་བུད་མེད་གཉིས་པོ་འགྲོ་བའི་ལམ་ཀ་མ་ཡིན་པ་དབེན་པའི་ཕྱོགས་ར་བས་བསྐོར་བའམ། ས་པ་མོའམ་ཤིང་ཐགས་ཀྱིས་བསྐོར་བའམ་ཤིང་ཁྲོད་དམ་རྩིག་པས་ཆོད་པའམ་ས་སྲོས་བ་རྣམས་ནི་དབེན་ཞིང་གཡོགས་པ་ཞེས་བྱ་སྟེ། འདི་རྣམས་གང་ཡང་རུང་བར་འདོམ་གང་ཚུན་ཆད་དུ་ས་ལ་འདུག་ན་ལྟུང་བར་འགྱུར་རོ། །འདུག་ནའོ། །སཱུ་ཏྲ་ལྟག་མ་ལྟར་ལྟུང་བར་འགྱུར་བ་ནི་དགེ་སློང་ཕ་དང་བུད་མེད་གཉིས་ཀ་འདུག་པ་ལས་ལྟུང་བར་འགྱུར། འདུག་པ་བཞག་མ་ཐག་ཏུ་དེའོ། །འདུག་པ་ལས་ལྟུང་བ་ནི་རྐུབ་ས་ལ་འདུག་མ་ཐག་ཏུ་ལྟུང་བར་གྱུར་ཏོ། །གཅིག་པུ་འདུག་པའོ། །དགེ་སློང་ཕ་དང་བུད་མེད་གཉིས་འདུག་པ་ལས་ལྟུང་བར་འགྱུར་བ་རྫོགས་སོ།། །།བུད་མེད་དང་འགྲེང་ན་ལྟུང་བར་འགྱུར་བ་ལ་འཆད་དེ། དགེ་སློང་མའོ། །དགེ་སློང་ཕ་དང་དགེ་སློང་མ་གཉིས་ས་དབེན་པར་གཉིས་སུ་འགྲེང་ན་ལྟུང་བར་འགྱུར་ཏེ། ཡན་ལག་དང་བཤད་པ་རྟག་ཏུ་བུད་མེད་དང་འདུག་བའི་ལྟུང་བ་དང་འདྲའོ། །འགྲེང་བའོ། །དགེ་སློང་མ་དང་ས་དབེན་པར་འགྲེང་བ་ལས་ལྟུང་བར་འགྱུར་ཏེ་འགྲེང་མ་ཐག་ཏུ་ལྟུང་ངོ༌། །གཅིག་པུ་འགྲེང་པའོ། །
དགེ་སློང་མ་དང་ས་དབེན་པར་འགྲེང་བའི་ལྟུང་བ་རྫོགས་སོ།། །།བཤམས་པའི་ལྟུང་བ་ལ་འཆད་དོ། འྦྷྲིད། སྔར་ཁྱིམ་བདག་གིས་མ་བོས་ལ་དགེ་སློང་མས་བཤམས་པར་ཤེས་བཞིན་དུ་ཟོས་པ་ལས་ལྟུང་ཏེ་ཡན་ལག་གཅིག །དགེ་སློང་མས་བཤམས་པའོ།། ཁྱིམ་པ་ཞིག་ལ་དགེ་སློང་མས་དགེ་སློང་འདི་ཡོན་ཏན་དང་ལྡན་པ་ཡིན་ཏེ་ཟས་བྱིན་པའི་རིགས་སོ་ཞེས་བཤམས་ཏེ་སྔར་ཁྱིམ་བདག་གིས་སྤྱན་དྲང་བར་མ་བསྒོ་བར་ཟོས་པ་ལས་ལྟུང་སྟེ་ཡན་ལག་གཅིག །མི་བདེན་པའི་ཡོན་ཏན་གྱིས་སོ། །དགེ་སློང་ཡོན་ཏན་དང་ལྡན་པ་ཞིག་ལ་བཤོས་གསོལ་ཅིག་ཅེས་བྱས་པ་ནི་མི་ལྟུང་གིས་ཡོན་ཏན་མེད་པ་ལས་ཡོན་ཏན་དང་ལྡན་པ་ཡིན་ནོ་ཞེས་བརྫུན་དུ་བསྟོད་པ་ལས་ལྟུང་སྟེ་ཡན་ལག་གཅིག །སྤྱན་དྲངས་པ་མ་བྱས་པའོ། །སྔར་ཁྱིམ་བདག་གིས་སྤྱན་དྲངས་ཤིང་མ་བསྒོ་བར་དགེ་སློང་མས་བཤམས་པའི་ངོར་ཁྱིམ་བདག་གི་ཁྱིམ་དུ་ཟན་ཟོས་པ་ལས་ལྟུང་སྟེ་ཡན་ལག་གཅིག །བྱས་ཀྱང་ལྷག་པར་རོ། །ཁྱིམ་བདག་གིས་སྔར་སྤྱན་དྲངས་སུ་ཟིན་ཡང་འཕྲལ་ལ་དགེ་སློང་མས་བཤམས་ཏེ་ཡོན་ཏན་དང་ལྡན་པ་འདི་ལ་ཤ་ཁ་ར་ལ་སོགས་པ་ལྷག་པར་གསོལ་ཅིག་ཅེས་བྱ་སྟེ་ཟོས་ན་ལྟུང་སྟེ་ཡན་ལག་གཅིག །བཟའ་བའོ། །དགེ་སློང་མས་བཤམས་པའང་གོས་ལ་སོགས་པ་ནི་མ་ཡིན་གྱི་ཟས་བཤམས་པ་ལས་ལྟུང་སྟེ་ཡན་ལག་གཅིག །ནན་ཏན་དང་གྲུབ་པས་སོ། །མི་བདེན་པའི་ཡོན་ཏན་ནི་དགྲ་བཅོམ་པའི་རིམ་པ་བརྒྱད་མེད་པར་བརྒྱད་པོའི་ནང་ནས་གང་རུང་བས་བསྟོད་ན་ལྟུང་བར་འགྱུར་རོ། །དེ་ཐོས་པས་ཀྱང་ངོ༌། །སྡེ་སྣོད་གསུམ་ལ་སོགས་པ་དང་མང་དུ་ཐོས་པ་ཡིན་ནོ་ཞེས་བརྫུན་དུ་བསྟོད་ནའང་ལྟུང་བར་འགྱུར་རོ། །ཟོས་ནའོ། །དགེ་སློང་མས་བཤམས་པའི་ཟས་ཟོས་པ་ལས་ལྟུང་བར་འགྱུར་ཏེ་ཡན་ལག་གཅིག །དེ་ནི་མགྲིན་པར་ནའོ། །ཟོས་པའི་ཚད་ནི་ཁ་ནས་སླར་བྱུང་བའམ་ལུས་དང་རྣ་བ་ལ་སོགས་པ་བསྐུས་ཤིང་བླུགས་པ་ལ་མི་བྱའི་ཟས་མགྲིན་པར་སོང་ནས་ལྟུང་བར་འགྱུར། གཞན་གྱི་ཕྱིར་བ་ལས་ན་འབྲི་བར་བྱེད་དོ། །དགེ་སློང་མས་བཤམས་པའི་ཟས་ཤེས་བཞིན་དུ་བདག་གིས་བླངས་ཏེ་གཞན་ལ་བྱིན་ན་ཉེས་བྱས་སོ། །བྱིན་ཅིག་ཅེས་སྨྲས་ནས་
ཟས་ཀྱི་ཕྱིར་ཞུགས་ནའོ། །དགེ་སློང་ཕ་གྲོང་ན་སློང་མོ་བྱེད་པ་ལ་དགེ་སློང་མས་འཕྲལ་ལ་ཁྱིམ་པ་བསྐོས་ཏེ་ཡོན་ཏན་དང་ལྡན་པ་འདི་ལ་གསོལ་ཅིག་ཅེས་བྱས་པ་དེ་བླངས་ན་ཉེས་བྱས། སྤྱོད་པ་བཤམས་པའོ། །དགེ་སློང་མས་བཤམས་པའི་ཟས་ཟོས་པའི་ལྟུང་བ་སྟེ་རྫོགས་སོ། །དགུ་བཅུའི་ལྟུང་པའི་བཅུ་ཕུང་གཅིག་རྫོགས་སོ།། །།ཡང་ཡང་གི་ལྟུང་བ་ལ་འཆད་དེ། ཟས་ལ་སྤྱན་དྲངས་པ་ལས་གྲོང་བར་དུའང་བདག་གིར་གྱིས་ཤིག །ཁྱིམ་པ་ལ་སོགས་པས་གྲོང་དུ་མཆོད་སྟོན་ལ་སྤྱན་དྲངས་ན་འགྲོ་ཞིང་ཟར་དབང་སྟེ་ཉེས་པར་མི་འགྱུར་རོ། །མ་སོང་ནའང་ཉེས་མེད་དོ། །དུས་ཤེས་པར་བྱས་ལ་འཇུག་སྟེ་དུས་སྔར་ནི་མ་ཡིན། སཱུ་ཏྲ་ལྟག་མ་ལྟར་གྲོང་བར་དུ་སྤྱན་དྲངས་ན་གདུགས་ཚོད་ཀྱི་ཁར་འདོང་པའི་དུས་རན་པར་བྱ་བའི་དུས་ལས་སྔར་བདག་ཅག་མི་འདོང་ངོ༌། །གཎྜཱི་བརྡུངས་ཏེའོ། །གདུགས་ཚོད་ཀྱི་ཁར་མཆོད་སྟོན་ལ་འདོང་བ་ཡང་སྔ་ཕྱིར་མི་འདོང་བའི་གཎྜཱི་བརྡུངས་ཏེ་བསྡུས་ལ་ཅིག་ཅར་འདུས་ཏེ་ལྷན་ཅིག་འདོང་ངོ༌། །བདག་གི་འཁོར་དེར་བྱུལ། གྲོང་བར་དུ་དགེ་འདུན་མཆོད་སྟོན་ལ་འདོང་བ་ལས་མཁན་པོ་དང་སློབ་དཔོན་དང་གནས་བརྟན་དང་མི་མཐུན་པའི་སྡེ་རྣམས་སོ་སོར་འཁོར་ཚུལ་དང་ལྡན་ནམ་མི་ལྡན་པ་བལྟ་ཞིང་བྱུལ་ལ་མི་མཛེས་པ་ཡོད་ན་མཛེས་པར་བཅོལ། འོངས་པ་ནི་གནས་བརྟན་གྱིས་སོ། །གུད་ནས་གསར་དུ་དགེ་སློང་འོངས་པ་དག་ཅིག་ཡོད་ནའང་གནས་བརྟན་གྱིས་ཡོན་བདག་ལ་ཟན་སྦྱོར་དུ་གཞུག་པའི་ཞལ་ཏ་དང་བདག་གི་འཁོར་གྱི་སློབ་མ་དང་འདྲ་བར་རིམ་གྲོ་དང་ཞལ་ཏ་བྱའོ། །གཏོལ་མེད་བར་ཟན་གཅད་པར་མི་བྱ། སྨན་དཔྱད་བྱ་བའི་ཕྱིར་ཟན་བཅད་པ་མ་གཏོགས་ཏེ་གདེང་མེད་པ་དང་ཕན་མེད་པར་ཟན་མི་བཅད་བཅད་ན་ཉེས་བྱས། སྐོམ་གྱི་ཕྱིར་གསོལ་ན་འདུག་ཤིག །གྲོང་བར་དུ་མཆོད་སྟོན་ལ་སྤྱན་དྲངས་པ་ལས་ཟན་ཟོས་ཟིན་ན་དོན་མེད་པར་རིང་དུ་མི་འཁོད་དེ་སྦྱིན་བདག་ན་རེ་ཕྱི་ཕྲེད་རྒུན་ཆབ་ལ་སོགས་པ་གསོལ་ཏེ་གཤེགས་ཞེས་ཟེར་བ་ལས་བསྡད་པ་དང་བཏུང་པ་ལ་ཉེས་མེད། མཉམ་དུ་འམ་ཕྱི་ནས་གོས་ཀྱི་རྙེད་པ་དང་མི་ལྡན་བར་གཉིས་པོའི་སྤྱན་འདྲེན་པ་ཐོབ་ནའོ། །ཡོན་བདག་གཉིས་ཤིག་གིས་མཆོད་སྟོན་ལ་སོ་སོར་ལྷན་ཅིག་ཏུ་སྤྱན་དྲངས་ན་གཉིས་
ཀ་ལ་འོང་ངོ་ཞེས་ཁས་བླངས་ན་ཉེས་བྱས། ཉིན་གཅིག་ལ་ལྔ་ཕྱིར་སྤྱན་དྲངས་པ་ལས་གཉིས་ཀ་ལ་ཁས་བླངས་ན་ཉེས་བྱས། སྤྱན་འདྲེན་པ་ད་གཉིས་ཀ་ན་རེ་གོས་ཤིག་ཡོན་དུ་དབུལ་ལོ་ཞེས་ཟེར་བ་ལས་གཉིས་ཀ་ལ་ཁས་བླངས་ན་ཟོས་ན་ཉེས་པ་མེད། སྤྱན་འདྲེན་པ་སྔ་མ་ལ་གོས་ཡོད་ལ་སྤྱན་འདྲེན་པ་ཕྱི་མ་ལ་གོས་མེད་པར་ཕྱི་མའི་ཟན་ཟོས་པ་ནི་ལྟུང་བའོ། །སྤྱན་འདྲེན་པ་སྔ་མ་ལ་གོས་མེད་ལ་ཕྱི་མ་ལ་གོས་ཡོད་དེ་ཁས་བླངས་ནས་ཟོས་པ་ནི་ཉེས་མེད་དོ། །བཟའ་བས་སོ། །ཡང་ཡང་བཅའ་བས་ནི་བཟའ་བ་ལས་ལྟུང་བར་མི་འགྱུར་རོ། །བཅའ་བ་ནི་རྩ་བ་དང་སྡོང་པོ་དང་ཚིགས་པ་དང་མེ་ཏོག་དང་འབྲས་བུ་ལྔའི་ནང་དུ་གཏོགས་པའོ། །བཅའ་བ་འདི་རྣམས་ལས་ལན་གཉིས་ཟོས་ཀྱང་ལྟུང་བ་མེད་དོ། །ལྔའི་ནང་དུ་གཏོགས་པའོ། །བཟའ་བ་ནི་རྣམ་པ་ལྔ་སྟེ་འབྲས་དང་ཁུར་བ་དང་སྲན་མ་དང་ཕྱེ་དང་ཤ་དང་འདི་རྣམས་ལྔའི་ནང་དུ་གཏོགས་པ་ལས་ལན་གཉིས་སུ་ཟོས་ན་ལྟུང་བར་འགྱུར་རོ། །བཟའ་བ་ལན་གཅིག་བཅའ་བ་ལན་གཅིག་སྔ་ཕྱིར་ལན་གཉིས་ཟོས་ཀྱང་ལྟུང་བར་མི་འགྱུར་རོ། །དེ་སྟེ་གཞན་དུའང་འདི་ནའོ། །བཟའ་བ་རྣམ་ལྔ་ལས་སྔར་ལན་གཅིག་ཟོས་ཟིན་ལ་ཕྱིས་གཞན་ཞིག་གིས་སྤྱན་དྲངས་ཏེ་བཟའ་བ་རྣམ་ལྔ་ལས་ཟོས་ན་ལྟུང༌། ཡོན་བདག་གིས་བཅའ་བ་སྦྱིན་པའི་ཕྱིར་སྤྱན་དྲངས་ལ་བཅའ་བའང་ཟོས་བཟའ་བའང་ཟོས་ན་ཉེས་བྱས་སོ། །བཟའ་བ་ལ་སྤྱན་དྲངས་ཏེ་བཟའ་བ་དང་བཅའ་བ་གཉིས་སྔ་ཕྱིར་ཟོས་པ་ཉེས་མེད་དོ་བར་འགྱུར། མི་ན་ལས་མ་བྱས་ལམ་དུ་མ་ཞུགས་པའོ། །ན་བ་དང་ལས་བྱས་པ་དང་ལམ་དུ་ཞུགས་པའི་རྐྱེན་མེད་པར་ཟན་ལན་གཉིས་ཟོས་ན་ལྟུང་བར་འགྱུར་རོ། །འདི་རྣམས་ཀྱི་རྐྱེན་བྱུང་སྟེ་ཟོས་པ་ནི་ལྟུང་བ་མེད་དོ། །དགོངས་པས་ནི་ཉེས་བྱས་པའོ། །སྔར་ཟན་ཟོས་ཟིན་པའི་འོག་ཏུ་སྤྱན་འདྲེན་པ་ཅིག་འོངས་པ་དང་མ་ཟོས་པའི་མདུན་དུ་སྔར་སྤྱན་དྲངས་པ་གཅིག་ལ་ཁས་བླངས་པ་ལས་ཕྱིས་གོས་མེད་པ་ལས་འགྲོ་བར་བསམས་ཤིང་ཁས་བླངས་ན་དེའི་ཚེ་ཉེས་བྱས་ཟོས་ན་ལྟུང་བའོ། །སཱུ་ཏྲ་ལྟག་མ་ལྟར་སྤྱན་དྲངས་ལས་རྣམ་གཉིས་སུ་ཟོས་ན་ལྟུང་བའོ། །གོས་དེ་ཁྲུ་གང་ཁོར་ཡུག་གི་མཐར་གྱུར་ནའོ། །གོས་དང་བཅས་ཏེ་ཟོས་ན་ལན་གཉིས་སུ་
ཟོས་ཀྱང་མི་ལྟུང་ངོ་ཞེས་བཤད་པའི་གོས་ཀྱི་ཚད་ནི་ཁྲུ་གང་འཁོར་བ་ཡན་ཆད་ཅིག་སྦྱིན་པའི་ཕྱིར་ཟན་ལན་གཉིས་ཟོས་པ་ནི་ལྟུང་བར་མི་འགྱུར་དེ་ལས་ཆུང་བ་ནི་ལྟུང་བར་འགྱུར་རོ། །ལམ་ནི་དཔག་ཚད་ཕྱེད་དོ། །ལམ་དུ་ཞུགས་ན་ལན་གཉིས་སུ་ཟོས་ཀྱང་ལྟུང་བར་མི་འགྱུར་བ་ནི་དཔག་ཚད་ཕྱེད་དེ་རྒྱང་གྲགས་བཞིར་འགྲོ་བའམ་ཕྱིན་ན་ཟར་དབང་ངོ༌། །གཞན་དུ་ཡང་ངོ༌། །སོ་སོར་ཟ་བའི་ལམ་ལ་སོགས་པ་དུས་ཀྱང་དཔག་ཚད་ཕྱེད་དུ་འགྲོ་ན་སོ་སོར་བཟར་དབང་སྟེ་དུས་སུ་ཆུད་དེ། འདི་ལམ་གྲུར་འགྲོ་བ་ཡང་ངོ༌། །ལམ་དཔག་ཚད་ཕྱེད་དུ་འགྲོ་བ་དུས་སུ་ཆུད་པ་ནི། རྐང་པས་འགྲོ་བ་དང༌། གྲུར་ཞུགས་པ་གཉིས་ནི་བཟར་དབང་གི་རྟ་དང་ཤིང་རྟ་ལ་སོགས་པ་ལ་ཞོན་པ་ནི་དཔག་ཚད་ཕྱེད་དུ་ཕྱིན་ཀྱང་དུས་སུ་མི་ཆུད་དེ་བཟར་མི་དབང་ངོ༌། །ཕྱག་དར་རེ་ལྡེ་ཙམ་མམ་བྱུག་པ་བ་ཀོ་ཙམ་ནི་ལས་སོ། །ལས་བྱས་ན་ཡང་ཡང་དབང་བ་ནི་རེ་ལྡེ་ཙམ་གྱིས་ཕྱགས་པ་དང་མཎྜལ་བའི་ཀོ་བཙམ་མམ་བ་ཉལ་བ་ཙམ་གྱི་ས་ཕྱགས་པ་ནི་དུས་སུ་ཆུད་དེ་ཟར་དབང་ངོ༌། །ཕྱག་དར་བྱ་བ་ནི་ཆག་ཆག་སྔར་བཏབ་ལ་ཕྱག་གོ །མཎྜལ་ནི་བ་ལང་གི་ལྕི་བའམ་འཇིམ་པ་འཇམ་པོས་བྱའོ། །དེ་མཆོད་རྟེན་ནམ་དགེ་འདུན་གྱི་ལའོ། །སཱུ་ཏྲ་ལྟག་མ་ལྟར་ས་ཕྱགས་པ་དང་མཎྜལ་བྱ་བ་ནི་དགེ་འདུན་གནས་འདུས་པའི་གཙུག་ལག་ཁང་ངམ་སངས་རྒྱས་བཞུགས་པའི་མཆོད་རྟེན་དྲི་གཙང་ཁང་དུ་བྱའོ། །གཞན་དུ་བྱས་པའི་ས་ནི་ལས་སུ་མི་ཆུད་དོ། །ན་བའི་ཚད་མི་ཕོད་ནའོ། །ན་ན་ཡང་ཡང་ཟར་དབང་བའི་ཚད་ནི་ན་སྟེ་ལས་བྱེད་མི་ཕོད་པར་ན་ན་ཡང་ཡང་ཟར་དབང་ངོ༌། །ནར་མ་ནི་སྤྱན་དྲངས་པ་ནི་མ་ཡིན་ནོ། །ཡོན་བདག་གིས་ལོ་དྲུག་གམ་ཚེ་གཅིག་ཏུ་ཟན་སྦྱར་བ་ནི་སྤྱན་དྲངས་པ་ཞེས་མི་བྱ་སྟེ་གཞན་ཞིག་གིས་གུད་དུ་སྤྱན་དྲངས་ཏེ་ཁས་བླངས་པ་ནི་ཉེས་མེད་དོ། །ཡོན་བདག་གིས་ཞལ་ཚུས་དང་གྲོ་གཉིས་ཀར་ནར་མར་སྦྱར་ཏེ་ཟ་ནའང་ལས་བྱ་དགོས་སོ། །མཐོང་བ་ཙམ་ཡང་ངོ། །གྲོགས་ཤིག་གཡར་སུས་ཟ་ཞིང་འདུག་པ་ལ་བདག་ཟས་ཟོས་ཟིན་ཏེ་སོང་བ་མཐོང་ནས་བདར་ཏེ་ཟོ་ཞེས་ཟེར་ཏེ་ཟོས་ནའང་རུང་བདག་ཟན་ཟོས་ཟིན་པ་ལས་དགེ་སློང་མ་ལ་སོགས་པའི་གནས་སུ་འོངས་ཏེ་གཡར་སུས་སམ་བཅའ་བ་མི་བཟར་མི་རུང་ཞེས་ཟེར་ཏེ་ཟོས་ནའང་ཉེས་མེད་དོ། །མེད་པར་
བསླུ་བ་བྱས་ན་ཡང་ངོ༌། །སྔར་རྩེད་མོའང་བརྫུན་དུ་ཟན་ལ་སྤྱན་དྲངས་པ་ལས་ཟན་མེད་པར་གྱུར་ཏེ་ཕྱིས་གཞན་ཞིག་གིས་བོས་ཏེ་ཟོས་ནའང་ཉེས་མེད་དོ། །དེའི་ཕྱིར་དགེ་འདུན་ཡང་ངོ༌། །དགེ་སློང་གཅིག་ཅིག་དགོས་ཤིང༌། གཅེས་པའི་ཕྱིར་དགེ་འདུན་དུ་ལངས་པར་སྤྱན་དྲངས་ན་དགེ་སློང་མིང་གིས་དགོས་པ་དེ་དག་གི་གནས་སུའང་གཡར་སུས་ཟོས་ལ་སྤྱན་དྲངས་པར་ཡང་ཟན་ཟོས་ན་ལྟུང་བའོ། །གཞན་ནི་བདག་གིས་གཡར་སུས་དང་ཉི་རིམ་དུ་ཟོས་ཀྱང་ཉེས་མེད་དེ་གཡམ་ལ་སོང་སོང་བ་ལས་གཞན་དུ་སྤྱན་དྲངས་ན་དེར་སོང་ཡང་ཉེས་མེད་དོ། །འདི་གཞན་ལྔ་པོ་ལ་བྱིན་ཅིག །ཁ་དུ་མ་ཞིག་ཏུ་སྤྱན་དྲངས་ན་ཀུན་དུ་འགྲོ་ཞིང་བཟར་མི་དབང་བའི་ཕྱིར་དགེ་སློང་ཕ་དང་དགེ་སློང་མ་དང་དགེ་སྦྱོང་ཕོ་མོ་དང་དགེ་སློབ་མ་གག་ཀྱང་རུང་བདག་གི་སྐྱིན་པར་བཏང་བ་ནི་ཉེས་མེད་དོ། །དེ་ནི་ཆོས་སོ། །སཱུ་ཏྲ་ལྟག་མ་ལྟར་སྐྱིན་པར་བཏང་བ་ཡང་ཉེས་མེད་པ་ནི་རབ་ཏུ་རིགས་པའི་ཆོས་ཡིན་པས་ཉེས་མེད་དོ། །གཞན་ཡང་ལོངས་ཤིག །བདག་ཟན་ནར་མར་ཡོན་བདག་གིས་ཟན་སྤྱར་བཞིན་དུ་གཞན་ཞིག་གིས་ཟན་བསྐྱལ་ཏེ་བྱིན་ནམ་རྒྱུ་བསྐྱལ་ཏེ་བྱིན་ན་དགེ་སློང་དང་དགེ་འདུན་ལ་སྦྱིན་པའི་ཕྱིར་བླངས་ཀྱང་ཉེས་མེད་དོ་ཞེས་བི་ཛ་ཡ་བར་མས་བཤད། སཱུ་ཏྲ་ལྟག་མ་ལྟར་སྐྱིན་པར་བཏང་བའི་དགེ་སློང་རྣམ་ལྔས་ཟན་བླངས་ཤིང་ཟོས་ཀྱང་ཉེས་མེད་དོ་ཞེས་བི་ཤུདྷས་བཤད། མུ་གེའི་ཚེ་ན་ཅི་ཙམ་སྤྱན་འདྲེན་པ་འགྲུབ་པར་བདག་གིར་བྱའོ། །ལོ་ཉེས་པ་དང་མུ་གེ་བྱུང་བའི་ཚེ་ནི་ཁ་དུ་མར་སྤྱན་དྲངས་ཤིང་ཟན་བྱིན་པའི་ཁས་བླངས་ཤིང་འགྲོའོ། །ཟོས་པ་ཡང་ངོ༌། །སཱུ་ཏྲ་ལྟག་མ་ལྟར་ཁ་དུ་མར་སྤྱན་དྲངས་ཤིང་སོང་བ་དེར་ཟན་ལན་དུ་མར་ཟོས་ཀྱང་ཉེས་མེད་དོ། །སྦྱིན་པ་ཡང་ངོ༌། །མུ་གེའི་ཚེ་ཁ་མང་པ་ཞིག་ཏུ་སྤྱན་དྲངས་ཏེ་བདག་གིས་མི་ཁྱབ་ན་དགེ་སློང་རྣམ་ལྔ་ལས་ཁ་དུ་མར་སྤྱན་དྲངས་ཤིང་སྐྱིན་པར་བཀྱེ་བ་དང་བདག་ལ་རྒྱུ་ལྷག་པ་བྱིན་པ་ནི་ཉེས་མེད་དོ། །འབུལ་བ་མི་དད་པར་གྱུར་ན་ཁམ་གཉིས་གསུམ་ཡན་ཆད་ཟོས་ལ་ཁྱིམ་བདག་དགེ་སློང་འདི་ཟས་ཀྱིས་ཕོངས་ཀྱི་རྗེས་སུ་ཡི་རངས་ཤིག་འདི་ལ་སྦྱིན་ནོ་ཞེས་དད་པ་སྐྱེད་ཅིག །མུ་གེའི་ཚེ་ཁ་དུ་མར་སྤྱན་དྲངས་ལ་བདག་གི་ལྟོར་མི་ཤོང་
མི་ཁྱབ་སྟེ་གྲོགས་རྣམ་ལྔར་སྐྱིན་པར་ཟར་བཅུག་པ་ལ་སྐྱིན་བདག་མི་དགའ་བར་གྱུར་ན་བདག་གིས་ཁམ་གཉིས་སམ་གསུམ་ཟོས་ལ་དགེ་སློང་འདི་ཟས་ཀྱིས་ཕོངས་པ་ཡིན་ཏེ་འདི་ལ་ཟས་སྦྱིན་པ་ནི་བསོད་ནམས་ཆེ་སྟེ་ཡོན་ཏན་དུ་འགྱུར་གྱིས་མི་དགའ་བར་མ་བྱེད་པར་རྗེས་སུ་ཡི་རངས་པར་བྱོས་ཤིག་ཅེས་བཤད་ལ་སྦྱིན་བདག་དགའ་བར་བྱ་སྟེ་བདག་གི་སྐྱིན་པར་དགེ་སློང་གཞན་ཟས་ཟར་བཅུག་ལ་བདག་གུད་དུ་འགྲོའོ། །ཡང་ཡང་ཟ་བའོ། །ཡང་ཡང་ཟ་བའི་ལྟུང་བ་རྫོགས་སོ།། །།འབའ་ཞིག་གི་ལྟུང་བ་ལ་འཆད་དེ། འདི་ཆོས་པའི་མ་ཡིན་པ། སངས་རྒྱས་ཀྱི་ཆོས་མ་ཡིན་པ་མུར་འདུག་གི་ཆོས་བྱེད་པ་འཁོད་པ་ལས་ལྟུང་བར་འགྱུར་ཏེ་ཡན་ལག་གཅིག །ཁྱིམ་པའི་བདག་པོ་དང་བཅས་པ། གནས་ཀྱི་སྦྱིན་བདག་ཁྱིམ་པ་ཡིན་ལ་སྦྱིན་བདག་དང་བཅས་པར་འདུག་པ་ལས་ལྟུང་བར་འགྱུར་ཏེ་ཡན་ལག་གཅིག །མུར་འདུག་ཐམས་ཅད་ཀྱི་མ་ཡིན་པའི་གནས་སུའོ། །མུར་འདུག་ཐམས་ཅད་ལམ་བསྡོམས་ཀྱི་མུར་འདུག་སྟེ་གཅིག་ལ་བསྔོས་པ་ལས་ལྟུང་བར་འགྱུར། མི་ནའམ། དགེ་སློང་ན་བའི་རྐྱེན་མ་བྱུང་བར་འདུག་པ་ལས་ལྟུང་ཏེ་ཡན་ལག་གཅིག །སྦྱིན་བདག་གིས་སྤྱན་དྲངས་ནའོ། །མུར་འདུག་གི་གནས་དེར་སྦྱིན་བདག་གིས་སྤྱན་དྲངས་པ་ནི་ལྟུང་བར་མི་འགྱུར་གྱི་སྤྱན་མ་དྲངས་པར་སོང་སྟེ་འདུག་པ་ལས་ལྟུང་སྟེ་ཡན་ལག་གཅིག །ཟོས་ནས་དེར་ཟོས་ན་རྩ་བའོ། །མུར་འདུག་གི་གནས་སུ་ཟན་ལན་གཅིག་ཟོས་པས་ནི་ལྟུང་བར་མི་འགྱུར་གྱི་ཟན་ལན་གཉིས་ཟོས་ན་ལྟུང་བར་འགྱུར་ཏེ། ཡན་ལག་འདི་དྲུག་དང་ལྡན་ན་ལྟུང་བའོ། །གནས་ནས་ཡང་གནས་ན་ཡང་ཉེས་བྱས་པའོ། །མུར་འདུག་གི་གནས་སུ་ཟན་མ་ཟོས་པར་ཡང་ཞག་གཅིག་འདུག་པ་ནི་ཉེས་མེད་དེ་ཟན་མ་ཟོས་པར་ཞག་གཉིས་འདུག་པ་ནི་ཉེས་བྱས་པའོ། །དེ་ལས་འདས་ན་ཞག་རེ་ཉེས་བྱས། བདག་པོ་མེད་ན་ཡང་ངོ༌། །མུར་འདུག་གི་གནས་དེའི་སྦྱིན་བདག་ཁྱིམ་པ་མེད་པ་ཞིག་ཏུ་ཟན་ལན་གཉིས་ཟོས་པ་ནི་ཉེས་བྱས་ལྕི་བ། ཟན་མ་ཟོས་ན་ཞག་གཉིས་ལོན་པ་ནི་ཉེས་བྱས་ཡང་བའོ། །འདི་རབ་ཏུ་བྱུང་བས་མུར་འདུག་བཞིན་ནོ། །དགེ་སློང་ཞིག་
གིས་ཡོན་བདག་བྱས་ཏེ་མུར་འདུག་གི་ཕྱིར་གནས་བྱས་པའི་སར་ཟན་ལན་གཉིས་ཟོས་ནའང་ཉེས་བྱས་ཟན་མ་ཟོས་པར་ཞག་གཉིས་ལོན་ནའང་ཉེས་བྱས་ཡང་བའོ། །གཉེན་གྱི་ཡང་ངོ༌། །གཉེན་ཁྱིམ་པ་ཞིག་གིས་མུར་འདུག་གི་གནས་བྱས་པའི་སར་གནས་ནའང་སཱུ་ཏྲ་ལྟག་མ་དང་འདྲ་བར་ཉེས་བྱས་སོ། །འབའ་ཞིག་པའི་སྤྱོད་པའོ། །འབའ་ཞིག་པའི་ལྟུང་བ་རྫོགས་སོ།། །།སྦྲུས་པའི་ལྟུང་བ་ལ་འཆད་དེ། སྤྱན་དྲངས་པའོ། །དགེ་སློང་བསོད་སྙོམས་ལ་སོང་སོང་པ་ལས་ཡོན་བདག་དད་པས་ཁ་ཟས་ཅི་བཞེད་པ་བཞེས་ཤིག་ཅེས་དུས་ཀྱིས་མ་བདར་བ་ལས་ལྟུང་སྟེ་ཡན་ལག་གཅིག་མ་བཅད། དུས་ཀྱིས་ནི་བདར་གྱི་འདི་ཙམ་ཞིག་ཁྱེར་ཅིག་ཅེས་ཐང་མ་བཅད་པ་ལས་བླངས་ན་ལྟུང་བར་འགྱུར་ཏེ་ཡན་ལག་གཅིག །ཅི་བདེ་ཞེས་མ་བྱས་པ། དུས་ཀྱིས་ནི་བདར་ན་ཅི་འདོད་པ་ཁྱེར་ཅིག་ཅེས་མ་བྱས་པ་ལས་ལྟུང་སྟེ་སཱུ་ཏྲ་ལྟག་མ་དང་གཉིས་ལ་ཡན་ལག་གཅིག་ཏུ་བརྩིའོ། །ཁྱིམ་བདག་གིའོ། །དུས་ཀྱིས་བདར་བ་དེ་ཁྱིམ་བདག་ཀྱང་ཡིན་པ་ལས་ལྟུང་བར་འགྱུར་ཏེ་ཡན་ལག་གཅིག །འབྲས་བཙོས་པ་ཡུལ་དབུས་སུ་གྱུར་འཆད་ཀྱི་སྲ་སྟ་ཕྱེད་དང་ལྔའི་ཚད་ཀྱི་སྲས་སྟ་ཚོད་མ་དང་སྔོར་དུ་བཅས་གྲོགས་པོ་དང་ལྷན་ཅིག་པ་ནི་སྐལ་བའི་བསོད་སྙོམས་སོ། །ཁྱིམ་བདག་གིས་ཟས་ཁྱེར་ཅིག་ཅེས་དུས་ཀྱིས་བསྟབས་ན་འབྲས་བཙོས་པ་ཚོད་མ་དང་སྔོར་མ་གཏོགས་པར་སྲ་སྟ་ཕྱེད་དང་ལྔ་གྲོགས་གཞན་ལ་ཡང་སྦྱིན་ཞིང་ལྷན་ཅིག་བཟའ་བའི་ཕྱིར་བླངས་ཀྱང་ཉེས་པ་མེད་དོ། །སྲ་སྟ་ཕྱེད་དང་ལྔ་ལས་ལྷག་པར་བླངས་ན་ལྟུང་བར་འགྱུར་ཏེ་ཡན་ལག་གཅིག །སྲ་སྟ་ཕྱེད་དང་ལྔ་ལས་སྲ་སྟ་དོ་ལ་ནི་ལྷུང་བཟེད་ཆེན་པོ་གང་སྲ་སྟ་ཕྱེད་དང་དོ་ལ་ལྷུང་བཟེད་འབྲིང་པོ་གང༌། སྲ་སྟ་གང་ལ་ལྷུང་བཟེད་ཆུང་དུ་གང་སྟེ་ལྷུང་བཟེད་ཆེ་ཆུང་གསུམ་གྱི་ཚད་དུ་ནི་ལེན་དུ་དབང་གི་དེ་ལས་ལྷག་པའི་ལྷུང་བཟེད་ཆེན་པོའི་ཚད་དུ་གསུམ་ལེན་དུ་མི་དབང་ངོ༌། །ཟོས་ནའོ། །དུས་ཀྱིས་བདར་ཏེ་ལྷག་པར་བླངས་པའི་ཁ་ཟས་དེ་ཟོས་པ་ལས་ལྟུང་སྟེ་ཡན་ལག་གཅིག །བྱུང་སྟེའོ། །དུས་ཀྱིས་བསྟབས་པའི་ཁ་ཟས་དེ་གནས་དེ་ནས་གུད་དུ་ཁྱེར་བ་ལས་ལྟུང་སྟེ་ཡན་ལག་གཅིག །ཡན་ལག་
འདི་རྣམས་དང་ལྡན་ན་ལྟུང་ངོ༌། །དེར་ཉེས་བྱས་པའོ། །དུས་ཀྱིས་བདར་བ་དེ་ལྷག་པར་བླངས་ནས་ཁྱེར་ཏེ་འགྲོ་བའི་ཚེ་ཉེས་བྱས། ཕ་རོལ་གྱིས་བྱས་ཀྱང་ངོ༌། །དུས་ཀྱིས་བདར་བའི་ཁ་ཟས་དེ་གཞན་ལེན་དུ་བཅུག་སྟེ་གནས་གཞན་དུ་འོངས་ནས་ཟོས་ན་ཉེས་བྱས། གཞན་དུ་ན་ཉེས་མེད་དོ། །དུས་ཀྱིས་བདར་ནས་གཞན་དུ་མ་ཁྱེར་བར་གནས་དེ་ཉིད་དུ་ཟོས་ན་ལྟུང་བཟེད་དུ་ཟོས་ཀྱང་ཉེས་མེད་དོ། །འདུས་མ་བྱས་ན་ཡང་ངོ༌། །ཁ་ཟས་མ་གཡོས་པ་རྒྱུར་བྱིན་པ་ནི་ཅི་ཙམ་བླངས་ཀྱང་ཉེས་མེད་དོ། །སྐབས་གཞན་དུ་ཉེས་ཡོད་དེ་གུད་ནས་འཆད་དོ། །དེ་སྟེ་བླངས་པ་མང་ན་དགེ་སློང་དང་བགོའོ། །སྲ་སྟ་ཕྱེད་དང་ལྔ་མན་ཆད་ཅིག་བླངས་པ་ལས་བདག་གཅིག་པུས་མི་ཟད་དེ་ལྷག་ན་དགེ་སློང་གཞན་དང་བགོ་ཞིང་བཟའོ། །ལྷུང་བཟེད་གཉིས་གསུམ་གང་བ་ལས་ལྷག་པར་ལེན་པའོ། །སྦྲུས་པ་ལྷུང་བཟེད་གཉིས་གསུམ་ལས་ལྷག་པར་བླངས་པའི་ལྟུང་བ་རྫོགས་སོ།། །།ཟ་བའི་ལྟུང་བ་ལ་འཆད་དེ། ནམ་ཆོག་གི་བར་དུ་བཟའ། ཟན་ཟ་བ་ལ་སྟན་ལས་མི་ལྡང་བར་ལྷན་ཅིག་ཅིག་ཅར་འགྲངས་ཤིང་ཆོག་པར་བཟའ། ཟས་བརྩམས་ནས་མ་ལྡང་ཤིག །ཟན་བཟའ་བའི་ཕྱིར་བླངས་ཏེ་བཟའ་བར་བརྩམས་པ་ལས་ཟན་ཁར་མ་ཟོས་ཀྱི་བར་དུའང་མི་ལྡང་ལངས་ནའང་ཉེས་བྱས། ཅི་ཙམ་དུ་གང་དེ་དག་གིས་ལན་ཚྭ་ཡན་ཆད་བཟའ་བར་བླངས་ན་དེའི་ཚུལ་ལོ། །ཟན་བཟའ་བར་བརྩམས་ཤིང་བླངས་པ་ནི་བཟའ་བ་དང་བཅའ་བ་ཅིའང་རུང་སྟེ་ལན་ཚྭ་ཙམ་ཡན་ཆད་བཟའ་བའི་ཕྱིར་བླངས་ཤིང་བརྩམས་ཀྱང་མི་ལྡང་ངོ༌། །ལངས་ན་ཉེས་བྱས། ཆུང་ཟད་ཟོས་ཏེ་སླར་འདུག་སྟེ་ཟོས་ན་ལྟུང་བའོ། །གནས་བཏང་ནས་ཟོས་ཟིན་པའོ། །ཟན་ཟ་བའི་འཕྲོ་ལས་ལངས་ཏེ་ཕྱིས་ཟ་བར་བསམས་ཡང་སླར་འདུག་སྟེ་ཟོས་ན་ཡང་ཡང་གི་ལྟུང་བའོ། །འགྲངས་སམ་མི་འདོད་པར་བསམས་ཏེ་ལངས་པ་ལས་ཕྱིས་ཀྱང་ཟོས་ན་ལྷག་མ་མ་བྱས་པའི་ལྟུང་བའོ། །བཅའ་བ་ཡང་དེ་བཞིན་དུ་ལྟུང་བར་འགྱུར་རོ། །འདུག་པ་ལས་སོ། །ལངས་པ་ནི་འགྲེང་བཞིན་དུ་སོང་བ་ལ་མི་བྱའི་ས་ལ་འདུག་པ་ལས་ལངས་ན་ལྟུང་བར་འགྱུར་རོ། །བཅའ་བ་དང་བཟའ་བ་ལ་སོགས་པའི་ཁ་ཟས་བརྩམས་པ་ལས་སོ། །བཟའ་བ་དང་
བཅའ་བ་ལྔ་ལ་སོགས་པ་ཁ་ཟས་ཅི་བཟའ་ཡང་རུང་ལངས་པའི་འོག་ཏུ་ལྷག་མ་མ་བྱས་པར་ཡང་ཟས་སླར་ཟོས་ན་ལྟུང་བར་འགྱུར་རོ། །འདི་ལྟར་ལྟུང་བར་འགྱུར་བ་ནི་ཡང་ལངས་ཤིང་འདུག་ནས་ཟ་བ་གཞན་གྱི་མིག་ཏུ་མི་མཛེས་པའི་ཕྱིར་ལྟུང་ངོ་ཞེས་བཅས། མི་འདོད་ཅེས་བྱས་པ་ནི་ཉེས་པའི་དམིགས་འོག་ནས་འཆད་རྩ་བ་རྩ་བའི་ནང་དུ་གཏོགས་སོ་ཅོག་དང༌། སྡོང་པོ་སྡོང་པོ་དང་ལྡུམ་བུའི་ནང་དུ་གཏོགས་སོ་ཅོག་དང༌། མེ་ཏོག་མེ་ཏོག་གི་ནང་དུ་གཏོགས་སོ་ཅོག་དང༌། ལོ་མ་ལོ་མའི་ནང་དུ་གཏོགས་སོ་ཅོག་དང༌། འབྲས་བུ་འབྲས་བུའི་ནང་དུ་གཏོགས་སོ་ཅོག་དང༌། བཅའ་བ་དང་རྟག་ཏུ་སྨོས་པ་འདི་རྣམས་ནི་བཅའ་བ་ཞེས་བྱ། གཞན་ཐུག་པ་དང་བཟའ་བ་དང་བཅའ་བ་ལས་གཞན་ཐུག་པ་དང་སྐྱོ་མ་དང༌། བརྟགས་པ་བཟའ་བ་རྣམ་ལྔ་དང་འོ་མ་དང་ཞོ་དང་མར་ལ་བྱ། མ་བརྟགས་པ་དང་རྟ་དང་བོང་བུའི་ཤ་དང་སྒོག་པ་དང་དགེ་སློང་གིས་བཙོས་པ་དང་སྤགས་པའི་ཟས་ལ་བྱ། མ་འདྲེས་པའི་བཟའ་བ། ཁ་ཟས་བརྟགས་པ་དང་མ་བརྟགས་པ་མ་འདྲེས་ཀྱང་རུང་འདྲེས་ཀྱང་རུང་བ་ལ་བྱ། བྱིན་ལེན་གྲུབ་པའི་ཕྱོགས་ན་གནས་པ་ལས་བཏང་བར་བྱས་ནའོ། །ཁ་ཟས་མིང་གིས་སྨོས་པ་འདི་རྣམས་ལས་གག་ཀྱང་རུང་སྟེ་ཁ་ཟས་ཟ་བ་ལས་མི་འདོད་ཅེས་བྱས་སམ། མི་འདོད་པར་བསམས་སམ། ལངས་པ་ལས་ཕྱིས་བཟའ་བ་དང་བཅའ་བ་གག་བྱས་ཀྱང་ཉེས་པར་འགྱུར་ཏེ། བཟའ་བ་ལས་གག་ཀྱང་རུང་སྟེ་མི་འདོད་ཅེས་བྱས་པའི་འོག་ཏུ་བཟའ་བ་གག་ཟོས་ཀྱང་ལྟུང༌། བཅའ་བ་ལས་སྣ་གཅིག་གཅིག་མི་འདོད་ཅེས་བྱས་ན་བཅའ་བ་མི་འདོད་པ་དེ་ཉིད་ཀྱི་འཕྲོ་ལས་སླར་ཟོས་ན་ཉེས་བྱས་ཀྱི་བཅའ་བ་གཞན་དང་བཟའ་བ་ལ་སོགས་པ་ནི་ཉེས་མེད་དོ་ཞེས་ཊཱི་ཀ་ལས་བཤད། འདུལ་བ་འཛིན་པ་ཁ་ཅིག་ན་རེ་གང་མི་འདོད་ཅེས་བྱས་པ་དེ་ཉིད་ཀྱི་འཕྲོ་ལས་ཟོས་པ་ནི་ལྟུང་བ་དང༌། ཉེས་པར་འགྱུར་གྱིས་གཅིག་མི་འདོད་ཅེས་བྱས་པའི་འོག་ཏུ་གཞན་ཟོས་པ་ནི་ཉེས་མེད་དོ་ཞེས་ཀྱང་འཆད། བྱིན་ཅིག་ཅེས་ཀྱང་དེའོ། །ཁ་ཟས་འདི་བྱིན་ཞེས་བླངས་ན་ལྟུང་བའོ། །ཊཱི་ཀ་ལས་ནི་སྣ་གཅིག་བླངས་ན་ཕྱི་ནས་བྲིམས་པ་ཀུན་ཀྱང་ལྟུང་ངོ༌། །བཅའ་བ་ནི་གང་བླངས་པ་དེ་ཟོས་ན་ཉེས་བྱས་
ཞེས་བཤད། འདུལ་བ་འཛིན་པ་ཁ་ཅིག་ན་རེ་གང་བླངས་པ་དེ་ཟོས་ན་ལྟུང་བ་དང་ཉེས་བྱས་ཀྱིས་བླངས་པ་མ་ཡིན་པ་གཞན་བྲིམས་པ་ནི་ཉེས་མེད་དོ་ཞེས་འཆད། སོང་ཤིག་ཅེས་ཀྱང་ངོ༌། །ཟན་འབྲིམ་པ་ལ་མི་འདོད་པར་བསམས་ཀྱང་རུང་མ་བསམས་ཀྱང་རུང་སོང་ཞེས་སྨྲས་ན་མི་འདོད་ཅེས་བྱ་བར་ཆུད་དེ་ཕྱིས་ཟོས་ན་བཟའ་བ་ནི་ལྟུང་བ་བཅའ་བ་ནི་ཉེས་བྱས་སོ། །ཟོས་སོ་ཞེས་ཀྱང་ངོ༌། །འབྲིམ་པ་ལས་ངས་ཟོས་སོ་ཞེས་བྱས་ན་མི་འདོད་པར་བསམས་ཀྱང་རུང་མི་འདོད་པར་སྨྲས་པའི་ནང་དུ་ཆུད་དེ་ཟོས་ན་བཟའ་བ་ནི་ལྟུང་བ་བཅའ་བ་ནི་ཉེས་བྱས་སྐད་ཅིག་ཅེས་པའི་སྒྲ་མ་བརྗོད་ནའོ། །སཱུ་ཏྲ་ལྟག་མ་གསུམ་ལྟར་མི་འདོད་ཅེས་སྨྲས་པར་མི་ཆུད་པ་ནི་རེ་ཞིག་སྡོད་ཅིག་ཅེས་བྱས་སམ་སྐད་ཅིག་ཇེ་རིམ་ཞེས་སྨྲས་ཏེ་ཟུར་ཡོད་པ་ནི་མི་འདོད་པའི་ཚིག་ཏུ་མི་ཆུད་དེ་ཟོས་ཀྱང་ལྟུང་བར་མི་འགྱུར་རོ། །ཟན་གཅིག་འདོད་དེ་སློང་ན་ཡང་རིམས་ཞེས་བྱས་པ་མི་སློང་བར་མི་ཆུད་ཟོས་ཀྱང་ཉེས་མེད་དོ། །ཆོག་གོ་ཞེས་ཀྱང་ངོ༌། །ཆོག་གོ་ཞེས་བྱས་སམ་འགྲངས་སོ་ཞེས་སྨྲས་པ་ལས་ཟོས་ནའང་བཟའ་བ་ནི་ལྟུང་བ་བཅའ་བ་ནི་ཉེས་བྱས། ཁ་གཟར་གྱེན་དུ་བསྒྲེང་བ་མི་འགྲུབ་ན་ཐུག་འཇམ་མོ། །ཐུག་པ་ནི་བཟའ་བའི་ནང་དུ་མི་གཏོགས་ཤིང་མི་ཆུད་དེ་ལན་གཉིས་སུ་ལངས་ཤིང་འཐུངས་སམ་མི་འདོད་ཅེས་བྱས་པ་ལས་འཐུངས་ན་ཉེས་བྱས་ཏེ་ཐུག་པའི་ཚད་ནི་ཁ་གཟར་བཅུག་སྟེ་ཐུབ་ན་བཟའ་བའི་ནང་དུ་གཏོགས་སོ། །སྐྱོ་མ་ནི་སོར་མོ་ལྔ་མི་མངོན་ནའོ། །སྐྱོ་མ་ཡང་བཟའ་བའི་ནང་དུ་མི་ཆུད་དེ་ལན་གཉིས་སུ་ལངས་སམ་འཐུངས་སམ་མི་འདོད་ཅེས་བྱ་བ་ལས་འཐུངས་ན་ཉེས་བྱས་སོ། །སྐྱོ་མར་ཆུད་པའི་ཚད་ནི་སོར་མོའི་རྗེས་སྣང་ན་བཟའ་བའི་ནང་དུ་གཏོགས་སོ། །མི་སྣང་ན་སྐྱོ་མའི་ནང་དུ་གཏོགས་སོ། །བསླུ་བ་ནི་བྱིན་ལེན་མ་ཡིན་ནོ། །མི་ལ་ལ་ཞིག་གིས་རྩེད་མོ་བྱ་བའི་ཕྱིར་ཁ་ནས་བྱིན་པ་ལྟར་བྱེད་པ་ལ་མི་བྱིན་པར་ཤེས་སྟེ་མི་འདོད་ཅེས་བྱས་པ་ནི་ཕྱིས་ཡང་དག་བར་བྱིན་པས་བླངས་ཏེ་ཟོས་པ་ནི་ཉེས་མེད་དོ། །མཚམས་ཀྱི་ཕྱི་ལོགས་དང༌། །ལྷག་མའི་སྔགས་བྱ་བ་ནི་བར་དུ་མིང་གིས་སྨོས་པ་འདི་རྣམས་ཀྱིས་ཆོད་ན་སྔགས་སུ་མི་རུང་སྟེ་ལྷག་མར་མི་ཆུད་པར་དུ་ཆུ་དང་ཡུར་བ་དང་གད་པ་ལ་སོགས་པས་ཆོད་པ་དང༌། མི་འགྲུབ་པའི་
ཕྱོགས་ནས་གཅིག་ས་ལ་འདུག་ལ་གཅིག་ནམ་མཁའ་ལ་འདུག་པ་དང་ཕ་ཟད་ཚུ་ཟད་དུ་འདུག་པ་རྒྱང་རིང་པོར་འདུག་སྟེ་བྱས་པ་དང༌། མདུན་དུ་མི་འདུག་ན་ལྷག་མ་བྱ་བ་མི་དབང་ངོ༌། །རྒྱབ་དང་གློར་འདུག་སྟེ་སྔགས་བྱས་པ་ནི་ལྷག་མ་བྱས་པར་མི་ཆུད་དོ། །མདུན་དུ་དྲང་པོར་འདུག་ལ་མཚམས་ཀྱིས་ཀྱང་མ་ཆོད་ན་སྔགས་བྱའོ། །བྱ་བ་ལག་ན་མི་འདུག་ན་ཡང་ངོ༌། །སྔགས་བྱ་བ་ནི་བདག་དང་སྔགས་བྱེད་པ་གཉིས་ཀ་ལག་པ་ཡ་རེས་འོག་ནས་བཏེག་ལ་ལག་པ་ཡ་རེས་སྟེང་ནས་བཀབ་སྟེ་སྔགས་མ་བྱས་ན་མི་འཆགས། མ་བརྟགས་པ་ལ་ནི་མི་བྱའོ། །ཁ་ཟས་མ་བརྟགས་པ་སྒོག་པ་དང་དགེ་སློང་གིས་བཙོས་པ་དང་སྤགས་པ་ལ་ནི་སྔགས་བཏབ་ཀྱང་མི་འཆགས་སོ། །གདབ་ཀྱང་མི་གདབ་པོ། །དེ་དང་འདྲེས་པ་ཡང་ངོ༌། །ཁ་ཟས་བརྟགས་པ་དང༌། མ་བརྟགས་པར་འདྲེས་པ་ལ་ཡང་སྔགས་མི་འཆགས་སོ། །གནས་མ་བཏང་བས་བྱ། སྔགས་གདབ་པའི་དགེ་སློང་ཡང་ཟས་ཟོས་ཟིན་ཏེ་ལངས་པ་ལ་མི་བྱའི་མ་ལངས་པ་ཟན་ཟ་ཞིང་འདུག་པའི་དགེ་སློང་ཅིག་ལ་བྱའོ། །མི་བཟའ་བར་བརྟགས་པས་ཀྱང་བྱས་པ་བཞིན་ནོ། །ལྷག་མ་བྱ་བའི་དགེ་སློང་ཟན་ཟོས་ཟིན་ནས་མི་བཟའ་བར་སེམས་ཐག་ནི་བཅད་ཟིན་གྱི་རྐུབ་ནི་མ་འཕགས་པར་འདུག་པ་ལ་ལྷག་མ་བྱ་བར་གསོལ་ཏེ་བྱས་ཀྱང་ཉེས་མེད་དོ། །གསོལ་ནས་སོ། །ལྷག་མ་བྱ་བའི་མི་དེས་ཀྱང་ལྷག་མ་བྱར་ཅི་གནང་ཞེས་གསོལ་ན་ལྷག་མ་བྱའི་མི་གསོལ་བར་ཚུལ་གྱིས་ཤིག་ཅེས་མི་བྱའོ། །སོང་ཁྱོད་ཀྱིར་གྱུར་ཏོ་ཞེས་ཚིག་བྱོས་ཤིག །ལྷག་མ་བྱེད་པའི་དགེ་སློང་གིས་སྔགས་བྱས་ཟིན་ནས་ཟས་འདི་ཁྱོད་ཀྱིར་གྱུར་གྱིས་ཁྱེར་ཅིག་ཅེས་བྱས་ཏེ་བྱིན། ཅི་བདེར་ཟོས་ཤིག་ཅེས་ཀྱང་ཁ་ཅིག་གོ །ལྷག་མ་བྱེད་པའི་དགེ་སློང་དེས་སྔགས་བྱས་ནས་ཅི་བདེ་ཞེས་བྱས་ཀྱང་རུང་ངོ་ཞེས་འདུལ་བ་འཛིན་པ་ཁ་ཅིག་གིས་བཤད་དེ། སཱུ་ཏྲ་ལྟག་མ་དང་གཉིས་གག་ཀྱང་རུང་ངོ༌། །ཁམ་གཉིས་སམ་གསུམ་ཟོས་ནས་སོ། །ལྷག་མ་བྱ་བ་ནི་ལྷག་མ་བྱེད་པའི་དགེ་སློང་གིས་ཁམ་གཉིས་སམ་གསུམ་ཟོས་ལ་སྔགས་བཏབ་སྟེ་སྦྱིན། །བཟློག་པར་བྱས་པ་ལས་མ་ཟ་ཤིག །ལྷག་མ་བྱེད་པའི་དགེ་སློང་མི་བཟའ་བར་ཡི་དམ་བཅས་ཏེ་མ་ལངས་པར་འདུག་པ་ལ་ལྷག་
མ་བྱེད་པར་གསོལ་དུ་འོངས་ན་བདག་གི་ཡི་དམ་བཅས་པས་བཟར་མི་རུང་བའི་ཕྱིར་ཟན་ལ་ལག་པས་མནན་ཏེ་སྔགས་ཀྱིས་བཏབ་སྟེ་བྱིན་ཡང་ལྷག་མར་ཆུད་དོ། །གཞན་གྱིས་ལྷག་མ་བྱས་པ་ཡང་ཟོ་ཤིག །དགེ་སློང་ཅིག་གིས་ལྷག་མ་བྱས་ཤིང་སྔགས་བཏབ་ཟིན་པའི་ཟས་ལ་དགེ་སློང་གཞན་ཟས་ཟོས་ཟིན་པས་ཀྱང་བཟར་རུང་ངོ༌། །འྦྷྲིད། ཟས་ཟོས་ལ་ལྷག་མ་མ་བྱས་པར་ཤེས་བཞིན་ལས་ལྟུང་སྟེ། ཟིན་ལ་ལྷག་མ་མ་བྱས་ནའོ། །ཟན་ཟོས་ཤིང་ལྷག་མ་མ་བྱས་པ་ལས་ལྟུང་སྟེ་ཡན་ལག་གཅིག །ཟོས་ནའོ། །ལྷག་མ་མ་བྱས་པའི་ཟན་ཟོས་པ་ལས་ལྟུང་བར་གྱུར་ཏེ་ཡན་ལག་གཅིག །ཁ་ཟས་ཙམ་གྱིས་སོ། །ཁ་ཟས་ཀྱང་ཡིན་པ་ལས་ལྟུང་སྟེ་ཡན་ལག་གཅིག་ཙམ་ཞེས་བྱ་བ་ནི་ཁམ་གཅིག་ཡན་ཆད་ཙམ་ཟོས་པ་ལས་ལྟུང་སྟེ་ཡན་ལག་འདི་རྣམས་དང་ལྡན་ན་ལྷག་མ་མ་བྱས་པའི་ལྟུང་བར་གྱུར་ཏོ། །སྟན་གཅིག་པའི་ཟས་སོ། །ལྷག་མ་མ་བྱས་པའི་ཟས་ཟོས་པའི་ལྟུང་བ་རྫོགས་སོ།། །།སྟོབས་པའི་ལྟུང་བ་ལ་འཆད་དེ། བསྒོ་བ། དགེ་སློང་ཟན་ཟོས་ཟིན་ཅིང་ལྷག་མ་མ་བྱས་པར་ཤེས་བཞིན་དུ་ཟས་འདི་ལྷག་མ་བྱས་ཟིན་པ་ཡིན་ཏེ་ཁྱོད་ཟོ་ཤིག་ཅེས་བསྒོ་བ་ལས་ལྟུང་སྟེ་ཤེས་བཞིན་དང་ཡན་ལག་གཉིས། དགེ་སློང་ལྷག་མ་མ་བྱས་པའི་ཟན་བྱིན་པ་དེ་དགེ་སློང་ཡང་ཡིན་པ་དང་ཡན་ལག་འདི་གསུམ་དང་ལྡན་ན་ལྟུང་བར་འགྱུར་རོ། །ཟིན་པ་ལ་བསྒོ། །ཟན་ཟོས་ཟིན་པ་ལ་ལྷག་མ་མ་བྱས་པར་དུས་ཀྱིས་སྟོབས་པའི་ལྟུང་བ་རྫོགས་སོ།། །།མང་པོའི་ལྟུང་བ་ལ་འཆད་དེ། འྦྷྲིད། དགེ་འདུན་འདུས་ཤིང་ཟ་བར་ཤེས་བཞིན་དུ་ལོགས་ཤིག་ཏུ་ཟ་བ་ལས་ལྟུང་སྟེ་ཡན་ལག་གཅིག །སོ་སོར་བསྔོས་པའི་ཟས་ཀྱི་གནས་ལས་གཞན་མཚམས་ཀྱི་ནང་ན་གནས་པའི་དགེ་སློང་དགེ་འདུན་དུ་གྱུར་པར་ལྷན་མི་གཅིག་པར་ཟན་ཟ་ནའོ། །ཡོན་བདག་གིས་དགེ་སློང་དགེ་འདུན་སོ་སོར་ཟ་བར་རྒྱུ་སྤྱར་བ་ནི་མ་གཏོགས་ཏེ་གཞན་ཏེ་མཚམས་གཅིག་གི་ནང་ན་དགེ་འདུན་ཀུན་གཅིག་ཏུ་འདུས་ཤིང་ཟན་གྱི་རྒྱུ་གཅིག་ཏུ་སྦྱར་ཅིང་ཟ་བ་ལས་བཞི་ཡན་ཆད་དགེ་འདུན་དུ་ལངས་པ་ཞིག་གིས་དགེ་འདུན་གྱི་ཟན་སྐལ་ལས་མི་བཟའ་བར་བྱས་ནས་ཡོན་བདག་གཞན་གྱིས་ཀྱང་གུད་དུ་སྤྱན་མ་དྲངས་པར་བདག་ཉིད་ཀྱིས་རྒྱུ་བཙལ་ཞིང་སྦྱར་ཏེ་མཚམས་
ཀྱི་ནང་དུ་ལོགས་ཤིག་ཏུ་ཟན་ཟོས་ན་ལྟུང་ངོ༌། །ལྷན་ཅིག་ཏུའོ། །ལོགས་ཤིག་ཏུ་ཟ་བ་དེ་དགེ་འདུན་དུའང་ཚང་བ་དང་ལྷན་ཅིག་ཏུ་འདུས་པ་ལས་ལྟུང་བར་འགྱུར་ཏེ་ཡན་ལག་གཅིག །ལྷན་གཅིག་ཏུ་ཟ་ནའོ། །དགེ་འདུན་དུ་ལངས་པར་ལྷན་ཅིག་ཏུ་འདུས་པ་དེས་ཟན་ཟོས་པ་ལས་ལྟུང་སྟེ་ཡན་ལག་གཅིག །གསུམ་ལ་སོགས་དང་ངོ༌། །ལྷན་ཅིག་ཏུ་ཟབ་དེ་རྣམས་གསུམ་མན་ཆད་ནི་གུད་དུ་ཟོས་ཀྱང་ཉེས་བྱས་ཀྱི་གསུམ་ལས་ལྷག་པར་བཞི་ཡན་ཆད་གཅིག་ཏུ་ཚང་ན་ལྟུང་བར་འགྱུར་ཏེ་ཡན་ལག་གཅིག །དགེ་སློང་དང་ངོ༌། །བཞིར་ཚང་བ་ཡང་དགེ་སྦྱོང་དང་ཁྱིམ་པ་མ་ཡིན་གྱི་ཀུན་དགེ་སློང་ཡིན་ན་ལྟུང་སྟེ་ཡན་ལག་གཅིག །གག་གི་ཚུལ་གོས་མེད་པའི་ཟས་གཉིས་པོ་རྙེད་པ་དང་གྲུ་ཡང་མ་བརྒལ་ནའོ། །གོས་དབུལ་བའི་ཕྱིར་ཁ་གཉིས་སུ་སྤྱན་དྲངས་པ་དང་ན་བ་དང་ལས་དང་ལམ་དང་གྲུར་ཞུགས་པ་དང་དུས་འདི་རྣམས་མ་གཏོགས་པར་ཟན་ཟོས་པ་ལས་ལྟུང་སྟེ་ཡན་ལག་གཅིག་སྟེ། ཡན་ལག་འདི་རྣམས་དང་ལྡན་པར་ལོགས་ཤིག་ཏུ་འདུས་ཏེ་ཟན་ཟོས་ན་ལྟུང་བའོ། །འདུས་པ་ཆེན་པོ་ལས་གཞན་ན་ཡང་ངོ༌། །དུས་ཀྱི་མཆོད་སྟོན་ཆེན་པོ་ལྟ་བུ་ཞིག་བྱེད་དེ་མི་ཕལ་མོ་ཆེ་འདུས་ནས་བཀངས་གཅིག་ཏུ་མི་ཤོང་སྟེ། ཁང་པ་སོ་སོར་ཆོད་ཅིང་ཟོས་པ་ནི་ཉེས་མེད་དོ། །གཞན་འདིའི་ཚུལ་མ་ཡིན་པ་རབ་ཏུ་འབྱུང་བའི་ཟན་ལས་སོ། །སངས་རྒྱས་ཀྱི་ཆོས་མ་ཡིན་ལ་ལྟ་བ་མ་ཡིན་པ་མུར་འདུག་གི་རབ་ཏུ་བྱུང་བའི་དགེ་སྦྱོང་གིས་ཟན་བྱིན་ཏེ་ལོགས་ཤིག་ཏུ་ཟོས་པ་ནི་ཉེས་མེད་དོ། །ཟོས་ནའོ། །ལོགས་ཤིག་ཏུ་འདུས་ཤིང་ཟ་བ་ཡང་ཟོས་ཟིན་ན་ལྟུང་བར་གྱུར་ཏེ་ཡན་ལག་གཅིག་སྟེ་ཡན་ལག་སྔ་མའི་ཐོག་ཏུ་འདིས་བསྣན་ཏོ། །མཚམས་ཀྱི་ནང་གི་དེར་གདོན་མི་ཟ་བར་འོང་པའི་གནས་སུ་འོངས་སམ་མ་དྲིས་པར་ཟོས་ན་འགལ་བ་བྱེད་དོ། །མཚམས་གཅིག་གི་ནང་དགེ་འདུན་ཀུན་འདུས་ཤིང་ཟན་ཟ་བ་ཁ་ཅིག་གྲལ་ལ་མ་ཤོང་སྟེ་ལྐོག་ཏུ་ཟ་བར་གྱུར་ན་ཡང་དགེ་འདུན་གྱི་སྤྱིས་དགེ་འདུན་ཚང་ངམ་མ་ཚང་ཟན་གག་ཏུ་ཟ་ཞེས་མ་བྱས་ན་ཀུན་ལ་ཉེས་བྱས་ཏེ་དྲི་བ་ནི་གྲལ་ཐོག་མ་ན་འདུག་པས་དྲིའོ། །གང་ཅི་ཡང་ཆུང་ཟད་ཅིག་བྲིམས་ན་ཟས་གཅིག་གོ །དགེ་འདུན་དུ་ལངས་ཀྱང་རུང་གང་ཟག་ཀྱང་རུང་གུད་དུ་ཟན་ཁ་ཟས་སྣ་འགའ་ཙམ་གྱིས་དགེ་འདུན་གྱ་ནང་དུ་ཕན་ཚུན་དུ་
བྲིམས་ན་ལྟུང་བ་དང་ཉེས་བྱས་ལས་བྲིས་ཏེ་ལྟུང་བ་ལས་ནི་ཉེས་བྱས་ཉེས་བྱས་ལས་ནི་ཉེས་བྱས་ཡང་བར་འགྱུར་རོ། །འགྲོ་བ་དང༌། ཟན་གྱི་དུས་ལས་སྔར་རིང་པར་འགྲོ་བ་དང༌། འོང་བ་དང༌། ལམ་རིང་པོ་ཞིག་ནས་འོངས་ཏེ་བཀྲེས་པ་དང༌། ནད་པ་དང་ནད་པ་ཟན་ལ་འོང་མི་ཕོད་པ་དང༌། ནད་གཡོག་དང་ནད་གཡོག་ཏུ་བསྐོས་པའི་དགེ་སློང་དང༌། དཀོར་པ་ལས་དགེ་འདུན་གྱིས་བསྐོར་བ་དང༌། ཐོ་དན་ལྟ་བུ་ལས་ལ་འབྲེལ་པ་དང༌། གཞན་ཚང་མང་དང་བསྐོས་སར་ཐམས་ཅད་ཀྱིས་མ་ཟོས་པར་བླངས་ཤིང་མི་བཟའ། མིང་གིས་སྨོས་པ་འདི་རྣམས་ནི་དགེ་འདུན་ལས་སྔར་ཟན་ཟོས་སམ་ལོགས་ཤིག་ཏུ་ཟོས་པ་ནི་ཉེས་མེད་དོ། །འདི་རྣམས་མ་གཏོགས་པར་དགེ་སློང་གག་ཀྱང་རུང་སྟེ་དགེ་འདུན་ལས་སྔར་ཟོས་སམ་ལོགས་ཤིག་ཏུ་མནོས་ཏེ་ཟོས་ནའང་ཉེས་བྱས་སོ། །སྡེ་ཟན་ནོ། །སྡེར་མང་པོ་འདུས་ཤིང་ལོགས་ཤིག་ཏུ་ཟ་བ་རྫོགས་སོ།། །།དུས་མ་ཡིན་པའི་ལྟུང་བ་ལ་འཆད་དེ། བདག་གི་ཉི་མ་ཕྱེད་ཕན་ཆད་སྐྱ་རེངས་ཤར་གྱི་བར་དུ་དུས་མ་ཡིན། བདག་ཤར་དང་ལྷོ་དང་ནུབ་དང་བྱང་གི་གླིང་གང་ན་གནས་པའི་གླིང་ཡུལ་དེའི་ཉི་མ་ཕྱེད་ཕན་ཆད་སྐྱ་རེངས་མ་ཤར་གྱི་བར་དུ་དུས་མ་ཡིན་པ་སྟེ་བཟའ་བ་རྣམ་ལྔ་དང་བཅའ་བ་རྣམ་ལྔ་ལ་སོགས་པ་གང་ཟོས་ཀྱང་ལྟུང་བར་འགྱུར་རོ། །སྐྱ་རེངས་ཤར་ནས་ཉི་མ་ཕྱེད་ཚུན་ཆད་ནི་དུས་ཏེ་ཟོས་ཀྱང་ཉེས་མེད་དོ། །ཤར་ཕྱོགས་ཀྱི་གླིང་དུ་དྲོའི་ཟན་ཟོས་ལ་ལྷོ་ཕྱོགས་སུ་སོང་སྟེ་ཟ་བ་ནི་ཤར་གྱི་ཉི་མ་ཕྱེད་ན་ལྷོའི་ཉི་མ་ཤར་བར་གྱུར་ཏེ་བཟར་རུང་ངོ༌། །དེ་བཞིན་དུ་ལྷོ་ནས་ནུབ། ནུབ་ནས་བྱང་བྱང་ནས་ཤར་ཀྱང་ངོ༌། །དེར་འྦྷྲིད། དུས་མ་ཡིན་ཞིང་དུས་ལས་འདས་པར་ཤེས་བཞིན་དུ་ཟོས་པ་ལ་ལྟུང་བར་འགྱུར་རོ། །བཟའ་བ་དང་བཅའ་བ་ཟ་བའོ། །དུས་མ་ཡིན་པར་བཟའ་བ་དང་བཅའ་བ་ཟོས་པ་ལ་ལྟུང་བར་འགྱུར་རོ། །དུས་མ་ཡིན་པའི་ཟས་སོ། །དུས་མ་ཡིན་པའི་ཟས་ཟོས་པའི་ལྟུང་བ་སྟེ་རྫོགས་སོ།། །།སྤགས་པའི་ལྟུང་བ་ལ་འཆད་དེ། ཟན་གྱི་སྔ་རོལ་བྱིན་ལེན་ལ་ཟན་གྱི་ཕྱི་རོལ་ཏམ་དེར་ཐུན་འདས་ན་སྤགས་པའོ། །བཟའ་བ་དང་བཅའ་བ་ལས་དྲོ་ཁ་ཚུན་ཆད་དུ་བཟའ་བར་བསམས་ཏེ་ནང་པར་བྱིན་ལེན་བྱས་པ་ལས་དྲོ་ཁ་ཚུན་ཆད་དུ་ཁྱིམ་པའམ་དགེ་སྦྱོང་ཞིག་གིས་ས་ལས་འཕགས་པར་བཏེག་པ་ནི་ཕྱིན་ཆད་ནམ་ཡང་
བཟར་རུང་ངོ༌། །ནང་པར་བྱིན་ལེན་བྱས་པའི་ཟན་དེ་དྲོ་ཁར་བཟའ་བར་བྱ་བ་ལས་དྲོ་འདས་པའི་འོག་ཏུ་ཁྱིམ་པ་དང་དགེ་སྦྱོང་གིས་བཏེག་པ་ནི་ཕྱིན་ཆད་བཟར་མི་རུང་སྟེ་ཟོས་ན་ལྟུང་བའོ། །ནང་པར་བྱིན་ལེན་བྱས་པའི་ཟས་དྲོ་ཁར་ཡང་མ་ཟོས་ཁྱིམ་པས་ཀྱང་མ་རེག་པ་དྲོ་འདས་པ་ནི་སྤགས་པ་སྟེ་བཟར་མི་རུང་སྟེ་ལྟུང་བ་དང་དྲོ་འདས་ན་ལྟུང་བ་བཞིན་དུ་དྲོའི་འོག་ཏུ་བྱིན་ལེན་བྱས་པ་ཕྱི་དྲོ་བཟའ་བར་བསམས་པ་ལས་ཉི་མ་ནུབ་སྟེ་དམར་ཐག་ཆད་པ་ལས་འདས་པ་ཡང་སྤགས་པའོ། །དེར་རོ། །ཁ་ཟས་བདག་གིས་བྱིན་ལེན་བྱས་ལ་དྲོ་དང་ཕྱི་དྲོ་ཐུན་འདས་པར་ཤེས་བཞིན་དུ་ཟོས་པ་ལས་ལྟུང་བར་འགྱུར་རོ། །བཏེག་པ་མི་མིད། སྔ་དྲོ་བྱིན་ལེན་བྱས་པ་དྲོ་ཁར་བཟའ་བར་བསམས་ལ་དེ་ཁྱིམ་པ་དང་དགེ་སྦྱོང་གིས་བཏེག་ཅིང་རེག་ན་ཡང་ཕྱི་དྲོ་ཟ་ཡང་རུང་སླར་བྱིན་ལེན་མ་བྱས་པར་ཟ་ན་ཉེས་བྱས་སོ། །མཚམས་ཀྱི་ནང་དུ་བཞག་པ་དང་བཙོས་པ་མ་ཡིན། །དགེ་སློང་གིས་མ་རེག་ཅིང་བྱིན་ལེན་མ་བྱས་པའི་ཟས་མཚམས་གཅིག་གི་ནང་དུ་ཞག་ལོན་པ་དང་མཚམས་ཀྱི་ནང་དུ་ཁྱིམ་པས་བཙོས་ཤིང་གཡོས་བྱས་པ་ཟོས་པ་ཡང་ཉེས་བྱས་པའོ། །མཚམས་ཀྱི་ནང་དུ་བཙོས་ཀྱང་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་བསྔོས་པ་ནི་ཉེས་མེད་དོ། །གསོལ་བས་བསྔོ་བ་ཡང་རྣམ་གསུམ་སྟེ་ཐོག་མ་རྨང་གདིང་བ་ན་ཚང་མང་དུ་བསྔོས་པ་དང་ཁང་པ་རྙིང་པ་དགེ་འདུན་ཐམས་ཅད་མཚམས་གཅིག་གི་ཕྱིར་རོལ་དུ་ཞག་གཅིག་གནས་ལ་དེ་ནས་གདོད་ཚང་མར་དུ་བསྔོར་རུང་སྟེ་འདི་གསུམ་གྱི་སྐབས་ལྟ་བུར་གསོལ་བ་བྱས་པ་ནི་བསྔོར་རུང་ངོ༌། །དགེ་སློང་གིས་བཙོས་པ་ཡང་ངོ༌། །མཚམས་ཀྱི་ཕྱི་རོལ་དུ་དགེ་སློང་གིས་བཙོས་པ་ཡང་ཉེས་བྱས། རྗེན་པ་ལས་ན་དེ་བཙོས་པའོ། །སཱུ་ཏྲ་ལྟག་མ་གཉིས་ཀྱིས་བཙོས་པ་ནི་བཙོས་ཟིན་པ་ལ་སླར་བསྲོས་པ་ལ་ཉེས་མེད་ཀྱིས་མ་བཅོས་ཤིང་རྗེན་པ་ལས་བཙོས་པ་ཡང་བཙོས་པ་ལས་ཟོས་ན་ཉེས་བྱས། སུམ་ཆ་བཅོས་ལ་མི་འཇམ་པ་ཚུན་ཆད་དེར་རོ། །བཙོས་པའི་ཚད་དུ་ཆུད་པ་ནི་ནས་དང་འབྲས་དང་སྲན་མ་ལ་སོགས་པ་སྲ་བ་གསུམ་གཉིས་ཚོས་ཤིང་འཇམ་བོ་མུལ་མུལ་མོར་གྱུར་པ་ནི་བཙོས་པའི་ཚད་དུ་ཆུད་དོ། །སུམ་ཆ་ཚོས་ཤིང་འཇམ་པོར་མ་གྱུར་པ་ནི་མ་བཙོས་པའོ། །ཁ་དོག་འགྱུར་ལ་འཇམ་
ནའོ། །ཚོད་མ་དང་ག་གོན་ལྟ་བུ་ནི་ཁ་དོག་འགྱུར་ཞིང་འཇམ་པོར་གྱུར་ན་བཙོས་པའོ། །ཁུ་བ་ན་ལྷག་གཉིས་ནའོ། །འོ་མ་ལྟ་བུ་འཚོད་པ་ནི་ལྷག་གཉིས་བཙོས་པས་བཙོས་པར་ཆུད་དོ། །མེས་བརྟགས་པ་བྱས་པ་འང་མ་བཙོས་པ་མ་ཡིན་ནོ། །བརྟག་པ་རྣམ་བདུན་བྱ་བ་ལ་མེས་བརྟགས་པ་ཡང་བཙོས་པར་ཆུད་དེ་དགེ་སློང་གིས་མེས་བརྟགས་ན་དགེ་སློང་དེ་ཉིད་ལ་སེམས་བཤིག་པའི་ལྟུང་བ་ཡང་ཡོད་དགེ་སློང་གིས་བརྟགས་པ་དེ་ཟོས་ན་དགེ་སློང་གིས་བཙོས་པ་ཟོས་པའི་ཉེས་བྱས་པར་ཡང་འགྱུར་གཞན་གྱིས་མེས་བརྟགས་པ་ཞིག་བཙོས་ན་ཡང་བཙོས་པའི་ཉེས་བྱས་པར་མི་འགྱུར་རོ། །ཚེས་བཟུང་བ་ལས་སྤྲུལ་པ་གནས་པའང་གནས་པའོ། །མཚམས་གཅིག་གི་ནང་ན་བཟའ་ཤིང་སྐྱེས་པའི་ཤིང་ཏོག་བླགས་ཏེ་ཟོས་ན་ཡང་མཚམས་གཅིག་གི་ནང་དུ་ཞག་ལོན་པའི་ཁ་ཟས་སུ་ཆུད་དེ་ཉེས་བྱས་སོ། །དེ་བཞིན་དུ་མཚམས་ཀྱི་ནང་དུ་ར་ལུག་དང་བ་བཏགས་པའི་ཞོ་འཐུངས་ནའང་ཉེས་བྱས་སུ་འགྱུར་རོ། །ཕྱོགས་སུ་སྣོད་གནས་ན་ཡང་དེ་སར་ཚོས་པའོ། །གཙུག་ལག་ཁང་གི་མཚམས་སུ་གཏོགས་པ་དང་མ་གཏོགས་པའི་ཚད་དུ་ལྕགས་སྒྱེད་དམ་སྒྱེད་པུ་ལྟ་བུ་བཙུགས་ཏེ་རྩ་བ་གཉིས་མཚམས་ཀྱི་ཕྱི་རོལ་དུ་ཟུག་ལ་རྩ་བ་གཅིག་མཚམས་ཀྱི་ནང་དུ་ཟུག་པ་ཡང་མཆིས་ཀྱི་ནང་དུ་བཙོས་པར་ཆུད་དོ། །བཙོས་པ་དེར་གྱུར་པ་མ་ཡིན་ནོ། །མཚམས་ཀྱི་ཕྱི་རོལ་ན་ཟན་འདུག་ལ་མཚམས་ཀྱི་ནང་ན་མི་འདུག་སྟེ་སྐྱ་བ་འམ་གཟར་བུས་དཀྲུགས་ཤིང་འཚེད་པ་ནི་མཚམས་སུ་བཙོས་པར་མི་ཆུད་དོ། །མདག་མ་ཡང་སྣོད་མ་ཡིན་པ་མ་ཡིན་ནོ། །མཚམས་ཀྱི་ནང་དུ་མདག་མ་བླངས་ཏེ་བསྲེགས་པ་དང་མེ་མཚམས་ཀྱི་ཕྱི་རོལ་དུ་འདུག་ལ་རླུང་གིས་བཏབ་པའི་མེ་ལྕེ་མཚམས་ཀྱི་ནང་དུ་འོངས་པ་ལ་བསྲེགས་པའང་མཚམས་ཀྱི་ནང་དུ་བསྲེགས་པར་ཆུད་དོ། །དེ་ལས་ཕྱུང་ངམ་མ་ཕྱུང་ན་དེར་མ་ཡིན་ནོ། །མཚམས་ཀྱི་ནང་གི་མེ་མདག་མ་ཕྱི་རོལ་དུ་འདྲིལ་བ་ལ་བསྲེགས་པ་དང༌། རླུང་གིས་བཏབ་པའི་མེ་ལྕེ་མཚམས་ཀྱི་ཕྱི་རོལ་དུ་ཕྱུང་བ་ལ་བསྲེགས་པས་ནི་བསྲེགས་པར་མི་ཆུད་དོ། །གནས་བཞིན་དུ་མཚམས་ཀྱང་ངོ༌། །གཙུག་ལག་ཁང་གི་ཕྱི་རའི་ཕྱི་རོལ་དུ་འགྲོན་བོར་བའི་ཚུན་ཆད་གཅིག་ཏུ་བཙོས་ན་ཡང་མཚམས་གཅིག་ཏུ་བཙོས་པར་གྱུར་ཏེ་འགྲོན་པོར་བའི་མཚམས་ཇི་
ཙམ་དུ་ཚུན་ཆད་མ་ཡིན་པ་ནི་འོག་ནས་འཆད། འདོམ་མོ། །གཙུག་ལག་ཁང་གི་ཕྱི་རའི་ནས་འདོམ་གང་ཚུན་ཆད་ཀྱི་མཚམས་ཀྱི་ནང་དུ་གཏོགས་སོ། །གྱེན་དུ་ནམ་མཁའ་ལ་འགྲུབ་པས་སོ། །མཚམས་ཀྱི་ནང་གི་ནམ་མཁའ་ལ་བཙོས་ཏེ་བར་ཅི་ཡང་མ་ཆོད་ནའང་མཚམས་ཀྱི་ནང་དུ་བཙོས་པར་ཆུད་དོ། །ནང་གི་ཡང་ངོ༌། །ཁང་པ་མཐོན་པོའི་ནང་ཐོག་བོར་བ་ཡང་ནང་གི་ནམ་མཁའ་ལ་བཙོས་ན་མི་གང་ལྷག་སྟེ་བར་ཅི་ཙམ་ཞུགས་ཀྱང་བཙོས་པར་འགྱུར་རོ། །སྟེང་གི་རིམ་པ་ཡང་དེ་བཞིན་ནོ། །ཁང་པ་རྩེག་མ་རིམ་དུ་ཡོད་ཀྱང་རུང་སྟེ་ཡང་ཏོག་ཏུ་བཙོས་ཀྱང་རུང་འོག་ཁང་ཏུ་བཙོས་ཀྱང་རུང་མཚམས་གཅིག་གི་ནང་དུ་བཙོས་པར་ཆུད་དོ། །གཞན་གྱིས་བསྔོས་པར་གཞན་གྱི་གནས་མ་ཡིན་ནོ། །དགེ་སློང་གི་གནས་ལ་གཞན་ཁ་དྲག་པོ་ཞིག་གིས་དབང་བྱས་ཏེ་དགེ་སློང་ཁང་བུ་མིག་གཅིག་ཏུ་གཞག་ནས་གཞན་དུ་ཁྱིམ་བདག་དེ་འདུག་ན་ཁྱིམ་བདག་འདུག་པར་བཙོས་པ་དང་ཁྱིམ་པས་བཙོས་པ་ནི་མཚམས་གཅིག་ཏུ་བཙོས་པར་མི་ཆུད་དོ། །ནམ་འཚོའི་བར་དུ་བ་ནི་བཏེག་པ་པ་དང་ནང་དུ་བཙོས་པ་དང་དགེ་སློང་གིས་བཙོས་པ་དེའི་བགས་པ་ལ་མ་གནས་ཏེ་དུས་སོ། །ཁ་ཟས་དགེ་སློང་བཏེག་པ་དང་མཚམས་ཀྱི་ནང་དུ་བཙོས་པ་དང༌། དགེ་སློང་གིས་བཅོས་པ་བཟར་མི་གནང་ཞེས་བཤད་པ་ལ་ཚེ་གཅིག་ཏུ་བཅང་བ་དང་ཞག་བདུན་པའི་སྨན་ནི་སྔགས་ཀྱིས་བཏབ་ན་བཏེག་པ་དང་བཙོས་པ་ལ་སོགས་པ་སྤྱད་ཅིང་བཟའ་བ་ལ་སོགས་པ་ཉེས་མེད་དོ། །བཙོ་བ་ནི་ན་བའི་ཕྱིར་བཙོས་ན་ནི་ཉེས་མེད་ཀྱི་མིན་བར་ནི་དགེ་སློང་གིས་བཙོས་པ་དང་མཚམས་གཅིག་ཏུ་བཙོས་པ་ནི་མི་གནང་ངོ༌། །འབགས་པ་ནི་ཟས་ཀྱི་ཕྱེད་དོ། །ལྷུང་བཟེད་དང་གཞོང་པ་དང་ལག་པ་ལ་སོགས་པ་ལ་ཁ་ཟས་ཆགས་བཞིན་དུ་ཟོས་ན་ཉེས་བྱས་སོ། །ཁའི་དྲི་མ་དང་བཟའ་བཏུང་བ་ཡང་ངོ༌། །ཁའི་དྲི་མ་དང་ཁ་ཟས་ཀྱི་ཚིགས་མཁའི་གསེབ་ཏུ་ཆགས་པ་ཡང་མ་དག་བཞིན་དུ་ཁ་ཟས་ཟོས་ཤིང་འཐུངས་ན་ཉེས་བྱས་ཏེ་ཐུན་འདས་ན་སྤགས་པར་འགྱུར་བའི་ཕྱིར་རོ། །འདིའི་ཕྱི་རོལ་ལྕི་བའམ་སས་ཕྱིས་ཏེ་ཆུས་བཤལ་ལ་བཀྲུའོ། །ཁ་དག་པར་བྱ་བའི་ཕྱིར་ཁའི་ཕྱི་རོལ་ལྕི་བའམ་སས་བསྐུས་ལ་ཆུས་དག་པར་བཤལ་ཞིང་བཀྲུའོ། །ནང་ཆུས་ལན་
གཉིས་སམ་གསུམ་གྱིས་ལ་མཁུར་ཆུ་དོར་རོ། །ཁའི་ནང་ནི་ནང་པར་དང་དྲོ་ཟོས་པའི་འོག་ཏུ་སོ་ཤིང་ཟོས་ལ་ལན་གསུམ་ཆུས་དག་པར་བཀྲུའོ། །ཕྱི་དྲོ་སྐོམ་འཐུངས་ནའང་ལན་གསུམ་དུ་ཆུས་དག་པར་བཀྲུའོ། །ལྷུང་བཟེད་ལན་གཉིས་གསུམ་བཟླས་ཏེ་གུས་པར་བཀྲུས་ན་སྒྲ་མ་བྱུང་ཡང་ངོ། །ཟན་ཟ་བའི་སྔོན་ལོགས་སུ་ལྷུང་བཟེད་བཀྲུ་བ་ཡང་སྔ་དེ་ཉིན་དག་པར་བཀྲུས་སུ་ཟིན་ཀྱང་ལྕི་བའམ་རྩ་བརྡུངས་པའི་ཁུ་བའམ་ས་འཇམ་པོ་སྤྲ་ཚིལ་འདྲ་བས་ལན་གསུམ་དུ་བཀྲུས་ཏེ་དག་པར་བྱས་ལ་ཀྲིག་ཀྲིག་ཟེར་བའི་སྒྲའམ་བརྡབས་པའི་སྒྲ་དང་ཞེས་ཟེར་བ་ནི་དག་པའི་ཚད་དུ་ཆུད་དོ། །ལན་གསུམ་དུ་བཟླས་ཏེ་བཀྲུས་ནས་སྒྲ་མི་ཟེར་ཡང་དེས་ཆོག་པར་བརྩིའོ། །ཉེས་མེད་པ་ནི་ལངས་པའོ། །སཱུ་ཏྲ་ལྟག་མ་ལྟར་ལན་གསུམ་དུ་བཟླས་ཏེ་དག་པར་བཀྲུས་པ་ལས་སྣུམ་དང་རྩི་ལ་སོགས་པ་ཁ་ཟས་ཀྱིས་ལངས་པར་ཡང་ཉེས་མེད་དོ། །མི་འབགས་པ་ལ་རེག་པ་ཡང་ངོ༌། །ཁ་ཕྱིས་དང་སྣོད་སྤྱད་ལ་སོགས་པ་ཁ་ཟས་ཆགས་ཤིང་མ་བཀྲུས་པ་ཞིག་ལ་རེག་ན་ཉེས་བྱས་སོ། །བུལ་ཏོག་དང་ལྕི་བ་དང་ས་གང་ཡང་རུང་བས་ལན་གསུམ་དུ་བཀྲུས་ན་སྣུམ་ཡང་ངོ༌། །གོས་དང་སྣོད་སྤྱད་དང་ལྷུང་བཟེད་ལ་སོགས་པ་བུལ་ཏོག་དང་ལྕི་བ་དང་ས་ལ་སོགས་པས་ལན་གསུམ་དུ་དག་པར་བཟླས་ཏེ་བཀྲུས་ན་མ་དག་ཅིང་སྣུམ་ཡང་ཉེས་མེད་དོ། །ལངས་པ་གསལ། ལྷུང་བཟེད་ལན་གསུམ་དུ་དག་པར་བཀྲུས་པ་ལས། ཁ་ཟས་ཚན་པོ་ཞིག་བླུགས་ཏེ་ལྷན་པའི་གསེབ་ནས་རྩིའམ་སྣུམ་ལངས་ཏེ་མངོན་པར་གྱུར་ན་དེ་ཉིད་བསལ་ཏེ་དོར་རོ། །འབགས་པ་དེའི་ཕྱོགས་སུ་བཀྲུ་།ལྷུང་བཟེད་དང་སྣོད་སྤྱད་ལ་སོགས་པ་སྣུམ་མམ་ཟས་ཀྱིས་རེག་ན་གར་རེག་པར་དག་པར་བཀྲུས་ལ་གོས་ནི་གཞན་མི་བཀྲུའོ། །སྣོད་སྤྱད་པ་ནི་གཞན་བཤལ་བས་ཆོག་གོ །མི་སྣུམ་པའི་ཕྱིར་སྣུམ་པའི་རྫ་མ་ལ་སོགས་པ་རྫིང་དུའི་ཆུ་ཟབ་མོར་གཞུག ། རྫ་མ་ལ་སོགས་སྣོད་སྤྱད་མར་གྱི་སྣོད་བྱེད་བྱེད་དེ་སྣུམ་མི་འདག་ན་རྫིང་བུའི་ནང་དུ་གཞུག །ཉ་དང་རུས་སྦལ་དང་སྦལ་པ་དང་སྦལ་པ་དཀར་པོ་དང་སྲིན་བུ་ཨུ་ལུག་ཀས་མ་བལྡག་ཀྱི་བར་དུ་བཞག །སཱུ་ཏྲ་ལྟག་མ་ལྟར་རྫིང་བུའི་ནང་དུ་གཞུག་པ་ནི་མིང་གིས་སྨོས་པའི་སྲིན་བུ་འདི་རྣམས་ཀྱིས་
བལྡགས་ན་སྣུམ་མེད་ཅིང་དག་པར་འགྱུར་ཏེ་ནམ་བལྡགས་ཤིང་དག་གི་བར་དུ་ཞག་གཉིས་གསུམ་དུ་གཞག་གོ །བསྲེགས་ཏེ་ཡང་སྣུམ་མེད་པར་གྲུབ་ནའོ། །རྫ་མ་སྣུམ་མེད་པར་བྱ་བའི་ཕྱིར་མེས་བསྲེགས་ན་ཡང་སྣུམ་མེད་ཅིང་དག་པར་འགྱུར་རོ། །སྣུམ་མེད་ནས་ཀྱང་དགེ་སློང་དེ་གོ་འདུན་ནམ་ལྕི་བས་དག་བར་བཀྲུ། །སཱུ་ཏྲ་ལྟག་མ་ལྟར་མེའམ་རྫིང་བུར་བཀྲུས་པའི་སྣོད་སྤྱད་དེ་ཕྱི་ནས་ཀྱང་གོ་འདུན་ནམ་ལྕི་བས་ཀྱང་ལན་གཅིག་དག་པར་བཀྲུའོ། །ལན་ཚྭ་དང་བ་ཚ་དང་རྙོག་མ་ཅན་གྱི་ཆུ་ལན་ཚྭ་ལ་སོགས་པ་ཕྱེད་དོ། །ལན་ཚྭ་ཅན་གྱི་ཆུ་དང་བ་ཚྭ་ཅན་གྱི་ཆུ་དང་རྙོག་མ་ཅན་གྱི་ཆུ་སྔ་དྲོ་བྱིན་ལེན་མ་བྱས་པར་འཐུངས་ན་ཉེས་བྱས་ཕྱི་དྲོ་ནི་བྱིན་ལེན་བྱས་ཏེ་འཐུངས་ཀྱང་ཉེས་བྱས་སོ། །བརྟགས་པ་སྟེ་དུས་མ་ཡིན་པ་དང་ཐམས་ཅད་དུའོ། །ལན་ཚྭ་ཅན་དང་བ་ཚ་ཅན་གྱི་ཆུ་ནི་བཙགས་པའམ་དངས་པར་བྱས་ཏེ་བརྟགས་ན་དུས་མ་ཡིན་པ་དང་བྱིན་ལེན་མ་བྱས་པར་བཏུད་དུ་རུང་སྟེ་ནད་པ་དང་དགེ་སློང་མིན་པ་ཐམས་ཅད་འཐུང་དུ་དབང་སྟེ་ཉེས་མེད་དོ། །བདག་གིས་དགོས་པར་བྱེད་པ་མི་བྱེད་པ་ལན་ཚྭ་དང་བ་ཚ་མེད་པའོ། །ལན་ཚྭའི་ཆུའི་ཚད་དུ་ཆུད་པ་ནི་ཆུ་དེ་ཉིད་ཀྱི་ནང་དུ་ཚོད་མ་འམ་ཐུག་པ་བཙོས་ཏེ་ལན་ཚྭ་གུད་ནས་གདབ་མི་དགོས་ན་ལན་ཚ་ཅན་གྱི་ཆུར་བརྩིའོ། །བ་ཚྭ་ཅན་གྱི་ཆུ་ནི་གོས་ཀྱི་སྣུམ་ལ་སོགས་པ་བཀྲུས་ན་དག་པར་ནུས་པ་ནི་པ་ཚ་ཅན་གྱི་ཆུར་བརྩི་སྟེ། ཚད་འདིར་མ་ཕྱིན་པ་ཕྱི་དྲོ་དང་སྔ་དྲོ་བྱིན་ལེན་མ་བྱས་པར་འཐུངས་ཀྱང་ཉེས་མེད་དོ། །གཟུགས་བརྙན་སྐྱེས་ན་ཕྱི་མའོ། །ཆུ་རྙོག་མ་ཅན་ནི་བཙགས་སམ་དངས་ཏེ་ནང་དུ་བཞིན་གྱི་གཟུགས་བརྙན་སྣང་ན་རྙོག་མ་ཅན་མ་ཡིན་པའི་ཚད་དུ་བརྩི་སྟེ་ཕྱི་དྲོ་བཏུང་དུ་རུང་ངོ༌། །ཤིང་ཏོག་ཀ་ཏ་ཀའི་འབྲས་བུས་ཆུ་དང་པར་འགྱུར་རོ། །ཆུ་རྙོག་མ་ཅན་གྱི་ནང་དུ་ཤིང་ཏོག་ཀ་ཏ་ཀ་ཞེས་བྱ་བའི་འབྲས་བུ་བཅུག་ན་རྙོག་མ་ཞབས་སུ་རྙིགས་ཏེ་དང་བར་འགྱུར་རོ། །བ་ཡང་གི་ཆུ་དང་པར་བ་བའི་ཕྱིར་ཤིང་ལོ་བཅུག་པ་ལྟ་བུ། ཐལ་བ་འམ་ཟན་བཅངས་པས་ཀྱང་ངོ༌། །ཆུ་རྙོག་མ་ཅན་གྱི་ནང་དུ་ཐལ་བ་བཏབ་བམ་ཟན་གྱི་ཆང་པ་བཅུག་ནའང་རྙོག་མ་དང་བར་འགྱུར་རོ། །མི་གྱེས་པའི་ཕྱིར་སྣུམ་མོ། །ཟན་གྱི་ཆང་བ་ཆུར་བཅུག་པ་དེ་མི་གྱེས་པར་བྱ་བའི་ཕྱིར་
སྣུམ་གྱི་ཕྱེ་མར་དུ་བྱའོ། །ཆུའི་འབྱུང་གནས་སུ་ཞུགས་ནས་མི་མངོན་ན་ཡོད་པའི་མི་གྲངས་སོ། །རྫིང་བུའམ་ཁྲོན་པའི་ནང་ན་ཁ་ཟས་ཡོད་ལ་ཆུ་ལ་ཁ་ཟས་ཀྱི་བག་ཆགས་ཡོད་པར་མི་མངོན་ན་ཆུ་དངས་བའི་ནང་དུ་བརྩི་སྟེ་ཉེས་མེད་དོ། །རེག་པའི་ཕྱོགས་དེ་ཉི་ཚེ་བསལ། སྣོད་ཀྱི་ནང་གི་སྣུམ་ལངས་ཏེ་ཁ་ཞག་གིས་ཆོད་དམ་རྫིང་བུའམ་ཁྲོན་པའི་ཆུ་ལ་ཁ་ཟས་དང་ཞག་གི་སྤྲིས་མས་ཡོག་ཅིང་འདུག་ན་ཉི་ཚེ་གུད་དུ་བསལ་ཏེ་བོར་རམ་ཕན་ཚུན་བཤུགས་ཏེ་དངས་པ་ལས་བཅུས་པ་ནི་ཉེས་མེད། བྱ་རོག་གི་མཆུས་རེག་ན་ཐན་ཁོར་ཀྱང་ངོ༌། །བདག་གི་ཟས་ལ་བྱ་རོག་གི་མཆུས་རེག་ན་གར་རེག་པ་ཉི་ཚེ་བཅད་དེ་དོར། བྱིན་ལེན་བྱས་ཟིན་པ་ཞིག་ནའང་གདོད་བྱིན་ལེན་བྱས་ཏེ་བཟའོ། །དེ་དང་ལྡན་པའི་རྒྱུན་གྱིས་རེག་པ་ནི་མ་རེག་པའོ། །ཀུན་དེའི་ནང་ནས་ཆུ་ཏོར་ར་འོང་བ་རྒྱུན་མ་ཆད་པས་ཁ་ཟས་དང་མི་གཙང་བ་ལ་རེག་པ་ནི་ཀུན་དེའི་ནང་ན་འདུག་པ་རེག་པ་མ་ཡིན་ཏེ་མི་གཙང་པ་མེད་པར་མི་བརྩིའོ། །ནོར་ཏམ་དྲན་པ་ཉམས་ཏེ་ན་མ་ཡིན། རྫས་གཞན་ཞིག་བཟུང་བའི་ཕྱིར་ནོར་ཏམ་བརྗེད་ཀྱང་རུང་སྟེ་ཁ་ཟས་ཡོད་པའི་སྣོད་ལ་བཟུང་ཞིང་རེག་པ་ནི་སྤགས་པར་མི་འགྱུར་ཏེ་ཉེས་མེད་དོ། །དེ་དག་གིས་བསྐྱོང་ནས་གཞག་པ་མ་ཡིན་ནོ། །སཱུ་ཏྲ་ལྟག་མ་ལྟར་ཁ་ཟས་ཀྱི་སྣོད་ལ་ནོར་ཏེ་བཟུང་བ་དེ་བཏེག་ཅིང་གུད་དུ་སྤོས་ཏེ་གནས་བསྐྱེད་ཀྱང་སྤགས་པ་མ་ཡིན་ཏེ་ཉེས་མེད་དོ། །རབ་ཏུ་ཆུང་དུའི་གནས་སུ་བསྐྱལ་བའོ། །སཱུ་ཏྲ་ལྟག་མ་ལྟར་ནོར་ཏམ་གནས་བསྣོར་ནས་ཁྱེར་ཁྱེར་བ་ལས་ལམ་དུ་ཚོར་ན་ཐལ་བྱུང་དོར་བ་མ་ཡིན་གྱི་གནས་གང་ཉེ་བ་ཅིག་ཏུ་སྐྱལ་ནའང་སྤགས་པ་མ་ཡིན་ཏེ་ཉེས་མེད་དོ། །ལྷོད་པས་བཏེག་པའམ་བྱིན་ལེན་བྱས་ཀྱང་མ་ཡིན་ནོ། །དགེ་སློང་ཕས་ཕམ་པ་མ་བྱུང་དུ་ཟིན་ཀྱང་དགེ་འདུན་གྱི་ལྷག་མ་དང་ལྟུང་བ་ལ་སོགས་པ་ལ་ལྷོང་ཅིང་མི་བསྲུང་བས་ནི་བྱིན་ལེན་བྱས་ཀྱང་བཟར་མི་རུང་ངོ༌། །བཏེག་པ་དང་བཙོས་པ་ཡང་མ་བརྟགས་པ་མ་ཡིན་ཏེ་བཟར་རུང་ངོ༌། །དེས་ཟས་བྱིན་པ་བླངས་ནའང་བྱིན་ལེན་དུ་ཆུད་དོ། །བྱིན་ལེན་དུ་རིགས་པའི་གཏོགས་པ་མེད་པར་མ་གྱུར་ན་བླངས་པ་མ་ཡིན་ནོ། །ཁ་ཟས་འདྲི་མ་ཞིང་འོངས་བ་ལ་བདག་གི་ལག་པས་ཚུས་བསུས་ཏེ་སྔར་བླངས་པ་ནི་བྱིན་ལེན་དུ་མི་ཆུད་དོ། །དགེ་སྦྱོང་དང་ཁྱིམ་པ་ཟས་ཀྱི་སྣོད་ལ་འཛིན་པ་བཞིན་དུ་དགེ་སློང་
གིས་རེག་པ་ནི་སྤགས་པར་མི་འགྱུར་རོ། །གཏོགས་པ་དེ་དག་ཐག་བུ་ལ་སོགས་པས་སྤྲེལ་བའོ། །ཟས་དང་ཚོད་མ་ལ་སོགས་པ་ཕྱི་དྲོ་རྟོག་ཅིང་སེལ་ན་ཁྱིམ་པའམ་དགེ་སྦྱོང་གིས་ཐག་བུའི་ཐོག་མ་ནས་བཟུང་ལ་དགེ་སློང་གིས་ཐོག་མ་གཅིག་ལས་བཟུང་སྟེ་ཁ་ཟས་ཐག་བུ་གཉིས་སོ་སོར་མ་བྲལ་ཞིང་རེག་བཞིན་དུ་བསལ་ཅིང་བརྟགས་པ་ནི་སྤགས་པར་མི་འགྱུར་ཏེ་ཉེས་མེད་དོ། །སྡོམ་པ་མཚུངས་ལྟ་བ་ཐ་མི་དད་ན་སྤགས་པ་དང་བླངས་པ་དང་བྱིན་ལེན་དུ་གཅིག་གོ །དགེ་སློང་དུ་མཚུངས་ཤིང་སངས་རྒྱས་ཀྱི་ཆོས་ལ་ལྟ་པ་འདྲ་ན་དགེ་སློང་གིས་སྤགས་ཀྱང་རུང་བཟར་མི་རུང༌། བྱིན་ལེན་མ་བྱས་པར་ཐུག་ཐུབ་ཏུ་བྱིན་ཏེ་བླངས་པ་དང་བྱིན་ལེན་དུ་མི་ཆུད་དེ་བཟར་མི་རུང༌། གཅིག་གིས་ཟན་ལ་བྱིན་ལེན་བྱས་ན་ཀུན་གྱིས་བཟར་རུང་ངོ༌། །དམ་པ་ཡིས་དམ་པ་མ་ཡིན་པའི་འོ། །སཱུ་ཏྲ་ལྟག་མའི་ནང་ནས་བཤད་པ་རྣམ་གསུམ་དགེ་སློང་མས་བྱས་པ་ནི་དགེ་སློང་མས་ཀྱང་བསྲུངས་ཏེ་སྤགས་པ་དང་བླངས་པའང་བཟར་མི་རུང་བྱིན་ལེན་བྱས་པ་ཡང་གདོད་བྱིན་ལེན་བྱ་མི་དགོས་ཏེ་བཟར་རུང་ངོ༌། །འདི་གསུམ་དགེ་སློབ་མས་བྱས་པ་ནི་དགེ་སློང་མས་མི་བསྲུང་ངོ༌། །ཁྱིམ་པ་བཞིན་དུ་བུད་མེད་དང་སྐྱེས་པ་ཕན་ཚུན་དུའོ། །སཱུ་ཏྲ་ལྟག་མའི་ནང་ནས་སྨོས་པའི་རྣམ་གསུམ་ལ་བཏག་པ་དང་བླངས་པ་དང་བྱིན་ལེན་དགེ་སློང་མས་དགེ་སློང་ཕ་ལ་བྱས་ན་བྱིན་ལེན་དུ་འགྱུར་རོ། །བླང་བ་དང་བཏེག་པ་དང་དགེ་སློང་པས་བཟར་རུང་ངོ༌། །དགེ་སློང་ཕས་བྱས་པའམ་དགེ་སློང་མ་ལ་རུང་ངོ༌། །དགེ་སྦྱོང་གི་སྦ་བ་ཚུན་ཆད་ལའང་རེག་པའང་དེ་བཞིན་དུ་ཉེས་བྱས་པའོ། །དགེ་སྦྱོང་གིས་དགེ་སྦྱོང་དང་དགེ་སློང་གི་ཟས་ལ་རེག་པ་ལ་ཉེས་མེད་པ་བཞིན་དུ་དགེ་སློང་གིས་དགེ་སྦྱོང་གི་ཟས་ལ་རེག་པའང་ཉེས་མེད་དོ། །དགེ་སློང་གིས་དགེ་སློང་ཉིད་ཀྱི་ཟས་ལ་རེག་པ་ནི་ཉེས་པར་འགྱུར་རོ། །རེ་བ་ཡོད་པས་བྱིན་པ་ནི་བཏང་བ་ཡིན་ནོ། །ཁྱིམ་པ་ཁ་ཟས་ལ་ཆགས་བཞིན་དུ་བྱིན་ཏེ་ཆགས་པར་ཤེས་བཞིན་དུ་ཟོས་ན་ལྟུང་བ་སྟེ་བི་ཛ་ཡ་བར་མས་བཤད། བདག་གིས་སྤགས་པའི་ཁ་ཟས་དེ་ལ་ཆགས་བཞིན་དུ་གཞན་ཞིག་བྱིན་ཏེ་སླར་བདག་བྱིན་ཏེ་ཟོས་ན་ལྟུང་བའོ། །མེ་རེ་བར་བཏང་ནས་རེ་བར་གྱུར་ན་ཕྱེད་དོ། །ཁྱིམ་པས་སྔར་ནི་ཆགས་པའི་
སེམས་མེད་ལ་ཕྱིས་ཆགས་པའི་སེམས་བྱུང་བའི་ཟན་ཅིག་བྱིན་ཏེ་དེ་ལྟར་ཤེས་བཞིན་དུ་ཟོས་ན་ཉེས་བྱས་ཞེས་བི་ཛ་ཡ་བར་མས་བཤད། བདག་གིས་སྤགས་པར་འགྱུར་བའི་ཁ་ཟས་ཆགས་པའི་སེམས་མེད་པར་གཞན་ཞིག་བྱིན་ལ་ཕྱིས་ཆགས་ཤིང་འདོད་དེ་ཐབས་ཅིག་གིས་སྦྱིན་དུ་བཅུག་ནས་ཟོས་ན་ཉེས་བྱས། དེ་བས་ན་དེ་ལ་མི་བསླང་ངོ༌། །ཁྱིམ་པ་ཟན་ལ་ཆགས་ཏེ་བྱིན་པར་ཤེས་བཞིན་དུ་ཟས་རིམས་ཤིག་ཞེས་བྱ་བ་ལ་སོགས་པས་མི་བསླང་ངོ་ཞེས་བི་ཛ་ཡ་བར་མས་བཤད། སཱུ་ཏྲ་ལྟག་མ་ལྟར་སྤགས་པའི་ཁ་ཟས་གཞན་བྱིན་བསླར་ཟོས་ན་ཉེས་བར་འགྱུར་པའི་ཕྱིར་མི་བསླང་ངོ། །ཤེས་ནས་མི་བླང༌། ཁྱིམ་པ་ཟན་ལ་ཆགས་བཞིན་དུ་བྱིན་པར་ཤེས་པ་ཟོས་ན་ལྟུང་བར་འགྱུར་བའི་ཕྱིར་མི་བླང་ངོ་ཞེས་བི་ཛ་ཡ་བར་མས་བཤད། བདག་གིས་སྤགས་པར་གྱུར་པའི་ཟས་གཞན་བྱིན་པ་སླར་བྱིན་ཏེ་ངོ་ཤེས་ན་མི་བླང་ངོ༌། །མ་བརྟགས་པ་མ་ཡིན་པའི་སྐལ་བ་བསྐུར་བར་རེག་པ་དང་ཁྱེར་བ་གཞུག་པ་དང་དེ་ལྟ་བུའི་རྐྱེན་ཅིག་ནའོ། །ཁ་ཟས་ལ་རེག་ཀྱང་ཉེས་མེད་པ་ནི་དགེ་འདུན་གྱི་ཞིང་ཤས་སུ་བཏང་བའི་སྐལ་བ་བསྐུར་བ་དང་ནས་ཀྱི་སྐལ་བ་ཤས་སུ་བཏང་བའི་མིས་བསྐྱལ་ཏེ་ནང་དུ་འཇུག་པའམ་སྣོད་དུ་ལྡུགས་སུམ་བཏུ་པ་སྟེ་སོང་བ་ནི་ཁྱིམ་པ་དང་དགེ་སྦྱོར་མེ་ལ་རེག་ཏུ་མི་རུང་བའི་རྐྱེན་བྱུང་ན་བསྐྱབ་དང་གཞུག་པའི་ཕྱིར་རེག་པ་ནི་ཉེས་མེད་དོ། །ཤིང་རྟ་འདྲེན་པའི་སྟན་མ་གཏོགས་ཏེའོ། །ཟས་ཤིག་ཤིང་རྟའི་ནང་དུ་བསྐྱེད་ན་རྐྱེན་ཅིག་གིས་ཤིང་རྟ་ལ་རག་དགོས་ནའང་ཤིང་རྟའི་ཁ་ལོ་སྒྱུར་བ་འདུག་པའི་ས་ལམ་རེག་ན་གཞན་ལ་རེག་པ་ནི་ཉེས་མེད་དོ། །གད་པ་ཡང་ངོ༌། །ཤིང་རྟའི་ནང་དུ་ཁ་ཟས་དགང་པའི་ཚེ་རྐྱེན་ཅིག་བྱུང་ན་ཁ་ལོ་བསྒྱུར་བ་འདུག་པའི་ས་ལ་མ་རེག་པར་བདག་གིས་བཀང་ཡང་ཉེས་མེད། སླར་དབྱུང་བའི་ཚེ་འང་དེ་བཞིན་བྱའོ་ཞེས་བི་ཛ་ཡ་བར་མས་བཤད། ཤིང་རྟ་ན་ཁ་ཟས་འདུག་པའི་ཚེ་གང་པ་ཉིད་དུ་མི་བྱའི་དགེ་སློང་མི་རེག་པར་འདུག་པའི་ས་ཙམ་བཞག་ལ་ཁ་ཟས་གཞུག་གོ །ནད་པ་ཞོན་པ་ཡང་ངོ༌། །ཁ་ཟས་བཅུག་པའི་ཤིང་རྟའི་ནང་དུ་དགེ་སློང་ནད་པ་ཞིག་འདུག་པ་ན་ཡང་ནད་པ་དེས་ཤིང་རྟའི་ཁ་ལོ་སྒྱུར་པ་འདུག་པའི་ས་ལ་མི་རེག་པར་བྱའོ་ཞེས་པི་ཛ་ཡ་བར་མས་བཤད། ཁ་ཟས་བཅུག་པའི་ཤིང་རྟ་ལ་ནད་པ་
ཞིག་བཞག་དགོས་ནའང་ནད་པས་ཁ་ཟས་ལ་མི་རེག་པ་ཙམ་གྱིས་བཞག །གྲུའི་དངོ་ནའོ། །གྲུའི་ནང་དུ་ཁ་ཟས་བཅུག་སྟེ་འགྲོ་ནའང་དངོར་འཛིན་འདུག་པའི་སར་རེག་ནའང་ལྟུང་བ་ཞེས་བི་ཇ་ཡ་བར་མས་བཤད། ནས་དང་ནད་པ་ལྟ་བུ་གྲུའི་ནང་དུ་བསྐྱེད་ནས་སྐམ་པའི་ཕྱིར་དངོར་བཞག་གོ །འཛིན་པའི་ཕྱིར་སྟན་ཡང་ངོ༌། །ནད་པའི་ནང་ནའང་དངོར་འཛིན་འདུག་པའི་ས་ལ་མ་རེག་པར་འདུག་གོ་ཞེས་བི་ཛ་ཡ་བར་མས་བཤད། ཁ་ཟས་དང་དགེ་སློང་ནད་པ་ལ་སོགས་པ་གྲུར་ཞུགས་ནའང་དངོར་འཛིན་དང་སྐྱ་བ་འདེབས་པའི་ས་བཞག །དགེ་འདུན་གྱི་དང་སྨན་ལྡུད་པ་གཡོགས་པ་དབོག་པ་དང་གཟར་བུའི་ལས་ཀུན་དང་དབྱུང་བ་ཡང་ངོ༌། །དགེ་འདུན་གྱི་ཁ་ཟས་དང་སྨན་འཆེད་ཅིང་གཡོས་བྱེད་པ་ལ་ཁྱིམ་པ་དང་དགེ་སྦྱོང་ལ་སོགས་པ་མེད་ན་ལུད་པ་ལ་དགེ་སློང་གི་གཟར་བུ་དང་སྐྱ་བས་དཀྲུགས་པ་དང༌། དབྱུང་ཞིང་དབོག་པའི་ཕྱིར་རེག་པ་ཉེས་པ་མེད་དོ།། དགེ་སློང་གང་ཟག་གིས་ཁ་ཟས་དང་སྨན་བཙོ་བ་ལ་ལུད་པ་ལ་སོགས་པའི་རྐྱེན་བྱུང་ན་དེ་བཞིན་ཀྱང་རུང་ངོ༌། །ཤིང་དབྱུང་མེ་བསད་པ་གོས་ཀྱི་གྲྭ་ལ་སོགས་པས་རླུང་བརླབ་པས་ཀྱང་ཐོག་མར་ནན་ཏན་བྱ། ཁ་ཟས་དང་སྨན་འཚེད་པ་ལུད་པ་ལ་ཐོག་མར་ཤིང་ཕྲི་ཤིང་དབྱུང་མེ་གསད་གོས་ཀྱི་གྲྭས་རླུང་བརླབ་ཆུས་དགབ་པ་ལ་སོགས་པ་སྡུད་པ་ཞི་བའི་ཐབས་འདི་རྣམས་ཀྱི་ཐབས་ཀྱིས་བྱ་སྟེ་མ་ནུས་ན་གདོད་སཱུ་ཏྲ་ལྟག་མ་ལྟར་བྱ། རྟག་པར་ཆོ་གེ་མི་འགྲུབ་ན་ཆུ་བོ་ལས་བསྒྲལ་བའི་ཕྱིར་ཁྱེར་བསླེབས་པའི་ཕྱིར་ཡང་ངོ༌། །ཆུ་བརྒལ་ཞིང་གྲུར་འཇུག་པ་ལ་ཁ་ཟས་གྲུར་སྐྱེལ་བའི་མི་མེད་དེ་གྲུ་སྤགས་ཏེ་སོང་དུ་ཉེ་སྟེ་མི་སླེབས་ན་ཁ་ཟས་བདག་གིས་གྲུའི་ནང་དུ་བསྐྱས་པའང་ཉེས་མེད་དོ་ཞེས་བི་ཛ་ཡ་བར་མས་བཤད། དགེ་སློང་གིས་རྒྱགས་ཁུར་ཙ་ཅིག་ལ་བསྐུར་ཏེ་ཆུ་རྒལ་བ་ལས་ཆུ་ཆེ་སྟེ་ཁུར་ཙས་མི་ནུས་ན་ཁུར་ཙ་དང་གཉིས་ཐག་བུས་སྦྲེལ་ལ་བདག་གིས་རྒྱགས་ཁྱེར་ཡང་ཉེས་མེད། ཐག་བུས་སྦྲེལ་མ་ནུས་ན་ཡང་ཆུ་བརྒལ་གྱི་བར་དུ་བདག་གིས་ཁྱེར་ཡང་ཉེས་མེད། ཆུ་བརྒལ་བ་ལ་ཁུར་ཙ་སྔོན་དུ་སོང་སྟེ་རྒྱགས་ཕྱི་ན་ལུས་ན་ཁུར་ཙ་ནམ་སླེབས་པའི་ཕྱིར་ཁྱེར་ཡང་ཉེས་མེད། གཞན་མེད་ན་བླངས་པའང་རྒྱགས་སུའོ། །སཱུ་ཏྲ་ལྟག་མའི་ལྟག་མ་ལྟར་རྒྱགས་བདག་གིས་ཁྱེར་
བའི་རྣམས་གཡོག་གམ་ཁྱིམ་པ་གཞན་ལ་ཡང་བསྐུར་དུ་མེད་ལ་རྒྱགས་གཞན་ཡང་མེད་ན་བདག་གིས་ཁྱེར་ཞིང་བྱེད་ན་ཡང་ཉེས་མེད། ཁུར་ཙ་བ་མེད་ན་སྦྱིན་བདག་ལ་དད་པ་བྱ། ལམ་དུ་ཞུགས་ཏེ་འགྲོ་བ་ལ་རྒྱགས་ཁྱེར་བའི་ཁུར་ཙ་མེད་ན་ལམ་འགྲོགས་པ་ལ་བདག་གི་ཁུར་ཙ་ཡང་མེད་ཟས་ལ་ཡང་རེག་ཏུ་མི་རུང་ན་ཁྱོད་ཀྱིས་བསྐུར་དུ་ཅི་གནང་ཞེས་གསོལ། མ་གྲུབ་ན་བདག་གིས་བསྐུར། ལྟག་མ་ལྟར་གསོལ་ཏེའང་མ་གནང་བདག་འགྲོ་བའི་དོན་སྡེ་སྣོད་གསུམ་ཐོས་པར་འགྱུར་བ་ལྟ་བུ་ཞིག་སྟེ་མི་འགྲོར་མི་རུང་ན་བདག་གི་རྒྱགས་བདག་ཉིད་ཀྱིས་ཁྱེར་ཡང་ཉེས་མེད་དོ། །དེ་ཉིད་བྱིན་ལ་བརྗེ་ཞིང་བླང་པར་བསྒྲུབ། བདག་ཉིད་ཁྱེར་བའི་ཟས་དེ་བཟར་མི་རུང་བའི་ཕྱིར་འགྲོན་པོ་གཞན་ལ་ཟས་ཉི་རིམ་གྱིས་ཀྱང་བརྗེས་ཏེ་བཟའ། དེ་མ་གྲུབ་ན་དེ་བཟའ། སཱུ་ཏྲ་ལྟག་མ་ལྟར་ཉི་རིམ་གྱིས་བརྗེས་ཀྱང་མ་གྲུབ་ན་བདག་ཉིད་ཀྱིས་ཁྱེར་བའི་ཟན་བཟའོ། །བྱིན་ལེན་བྱེད་པ་མེད་ན་བྱིན་ལེན་མ་བྱས་པར་གཞན་གྱིའམ་བདག་གིའོ། །སཱུ་ཏྲ་ལྟག་མ་ལྟར་བདག་ཉིད་ཀྱི་ཟན་ཟ་བ་ལ་བྱིན་ལེན་བྱེད་པའི་མི་མེད་ན་འདུ་ཤེས་བྱང་གི་སྒྲ་མི་སྙན་གྱི་བདག་པོ་མེད་པར་བསམས་ལ་བཟར་རུང་སྟེ་འོག་ནས་འཆད། ཟས་བཅད་པ་བྱས་ཏེའོ། །སཱུ་ཏྲ་ལྟག་མ་ལྟར་བཟར་རུང་པ་ཡང་ཟས་བརྗེ་བ་དང་བྱིན་ལེན་བྱེད་པའི་མི་མེད་ན་ཞག་གཅིག་གི་བར་དུ་ནི་ཟན་མི་བཟའོ། །ཐོག་མའི་ཉི་མ་སྟག་གི་སྤར་བའོ། །ཕྱི་དེ་ཉིད་ཀྱང་ཟན་བརྗེ་བ་དང་བྱིན་ལེན་བྱེད་པ་མེད་ན་སྟག་གི་སྤར་བ་སྟེ་བདག་གིས་ལག་གི་ཡ་བཙུམས་གང་བཟའོ། །གཉིས་ལ་གཉིས་སོ། །དེའི་ཕྱིར་དེ་ཉིན་པར་ཀྱང་ཟས་བརྗེ་བ་དང་བྱིན་ལེན་བྱེད་པ་མ་རྙེད་ན་སྟག་གི་སྤར་བ་དོ་བཟའོ། །གསུམ་ལ་ཅི་ཆོག་ཏུའོ། །ཉི་མ་གསུམ་ཕན་ཆད་ནི་ཅི་ཆོག་ཏུ་འགྲངས་འགྲངས་སུ་བཟར་དབང་ངོ༌། །འབྲས་བུ་དུས་མ་ཡིན་པར་བརྟག་པ་མ་བྱས་པ་དང་བྱིན་ལེན་མ་བྱས་པར་བླངས་པའང་བཟའོ། །བདག་གི་ཟས་ཟད་དམ་མེད་དམ་སྦྱིན་བདག་གིས་མ་སྦྱར་ལ་བསླབ་དུ་མ་སྙེད་ན་འབྲས་བུ་ལ་སོགས་པ་མ་བརྟགས་པ་དང་བྱིན་ལེན་མ་བྱས་པ་བཟར་རུང་ངོ༌། །ཕྱི་དྲོ་བཟར་ཡང་རུང་ངོ༌། །ཟས་མེད་པས་སོ། །སཱུ་ཏྲ་ལྟག་མ་ལྟར་བཟར་རུང་པ་ཡང་ཟས་མེད་ཅིང་ཕོངས་ན་བཟའོ། །བཀྲེས་ཏེ་མི་བཟོད་
ནའོ། །སཱུ་ཏྲ་ལྟག་མ་ལྟར་ཕོངས་ཏེ་བཟའ་བ་ཡང་མི་བཀྲེས་ཤིང་བཟོད་ན་མི་བཟའི་བཀྲེས་ཏེ་མི་བཟོད་ན་བཟའོ། །རྩ་བ་ཡང་ངོ༌། །བཀྲེས་ཏེ་མི་བཟོད་ན་གྲོ་མ་ལ་སོགས་པའི་རྩ་བ་བརྐོ་མི་དགོས་པར་འདུག་པ་ཡང་བཟར་རུང་ངོ༌། །བདག་གིས་ཕྲགས་ཤིང་ཕྱུང་ནས་བཙོས་ཏེའོ། །སཱུ་ཏྲ་ལྟག་མ་ལྟར་རྩ་བ་བརྐོ་མི་དགོས་པ་དང་ཤིང་ཏོག་བླངས་ཟིན་པ་མ་རྙེད་ན་ཤིང་ཏོག་བླགས་ཤིང་རྩ་བ་བརྐོས་ཏེ་བཟར་ཡང་དབང་ངོ༌། །བཙོར་ཡང་དབང་ངོ༌། །བྱང་གི་སྒྲ་མི་སྙན་གྱི་གྲགས་པ་ཐམས་ཅད་དུ་བྱིན་ལེན་མ་བྱས་པར་ཟ་བ་ལ་སོགས་པ་རྩམ་པར་འདོད་པ་ཡིད་ལ་བྱའོ། །སཱུ་ཏྲ་ལྟག་མ་རྣམས་ལྟར་བཟའ་བ་ཡང་བྱང་གི་སྒྲ་མི་སྙན་གྱི་ཁ་ཟས་བདག་པོ་མེད་པ་ཡིན་པར་བསམས་ལ་བྱིན་ལེན་བྱེད་པ་མེད་པའི་ཕྱིར་བ་དང་ཡུལ་ཆོས་ཀྱིས་བཙོག་པའི་ཕྱིར་གཅིག་ལ་གཅིག་རེག་ཏུ་མི་རུང་བས་བདག་ཉིད་ཀྱིས་བླངས་ཏེ་བཟའོ་སྙམ་དུ་བསམས་ལ་བཟའོ།། སྣོད་ཀྱི་ནང་ནས་ཁ་བླུགས་མི་བྱ། ཆུ་དང་སྐོམ་ལ་སོགས་པ་འཐུངས་པའི་ཚེ་ཁ་བླུགས་མི་བྱ། ཡོད་ན་ལག་པ་བཀྲུས་པའམ་ལོ་མར་རོ། །ཆུ་འམ་སྐོམ་འཐུངས་དགོས་ཏེ་སྣོད་གཞན་མེད་ན་ལག་པའམ་ལོ་མ་བཀྲུས་ལ་དེའི་ནང་དུ་བཏུང་ངོ༌། །མ་གྲུབ་ན་དབེན་པར་རོ། །ཆུ་དཀོན་ཏེ་ལོ་མའམ་ལག་པ་བཀྲུར་མི་ཆོག་ན་མི་གཞན་གྱིས་མ་མཐོང་བར་དབེན་པར་ཁ་བླུགས་མི་བྱའོ། །ཆུ་དང་བཅས་པ་འདི་ལ་དགབ་པ་མེད་པར་མི་སྤྱད། ཀུན་དེ་དང་ཆུ་སྣོད་ལ་སོགས་པ་ཁ་གབ་ཀྱིས་མ་བཀབ་པར་གཞག་པའམ་སྤྱད་པར་མི་བྱའོ། །དགབ་པ་ནི་རྣམ་པ་གསུམ་སྟེ་ཤིང་གི་དང་རྡོའི་དང་སའི་འོ། །སཱུ་ཏྲ་ལྟག་མ་ལྟར་སྣོད་ཀྱི་ཁ་དགབ་བྱ་བའི་རྒྱུ་ནི་ས་དང་རྡོ་དང་ཤིང་ལས་བྱའོ། །ལྕགས་དང་ཟངས་དང་ར་གན་དང་ཁར་བ་ལ་སོགས་པ་རང་ཆས་འདུག་པའང་ཉེས་མེད་དོ། །སྣོད་ཀྱི་གཞི་བཅངས་ཏེ་ཤིང་ལའམ་རྡོ་ལའོ། །སྣོད་ཀྱི་གཞི་ཤིང་དང་རྡོ་ལ་སོགས་པ་ལ་བཞག་ཀྱང་ཉེས་མེད་དོ། །མ་བཞག་ཀྱང་ཉེས་མེད་དོ། །ཉེས་མེད་པ་ནི་སྣོད་ཀྱི་དགོས་པར་ལོ་མ་མ་བྱིན་པར་བླངས་ཀྱང་ངོ༌། །སྣོད་སྤྱད་མེད་པའི་ཕྱིར་ཟན་ཟ་བའི་ཕྱིར་གཞིར་རྩི་ཤིང་གི་ལོ་མ་བྱིན་ལེན་མ་བྱས་པར་བླངས་ཏེ་བྱས་ཀྱང་ཉེས་མེད་དོ། །དེ་བཏང་བ་དང་མ་བཏང་བ་བྱེ་བྲག་མེད་དོ། །ཟན་
ཟ་བའི་གཞི་ལོ་མས་བྱ་བ་སྔ་ན་ཆད་ཅིང་བྲལ་ཟིན་པ་ལ་ཡང་རུང་རྩ་བ་ལས་མ་ཆད་ཅིང་ཆགས་བཞིན་པའི་ལོ་མའི་སྟེང་དུ་ཟོས་ཀྱང་རུང་ངོ༌། །དགོས་པར་གཞན་མེད་ན་མ་བཏང་བ་ལའོ། །སཱུ་ཏྲ་ལྟག་མ་ལྟར་རྩ་བ་ལས་མ་ཆད་པའི་ལོ་མའི་སྟེང་དུ་ཟན་ཟ་བ་ནི་རྩ་བ་དང་སོ་སོར་བྲལ་བའི་ལོ་མ་མེད་ན་གདོད་བཟའ་སྟེ་ལོ་མ་དེ་ལ་སྣོད་ཅིང་ཆུང་ཟད་རལ་བ་ནི་ཉེས་མེད་དོ། །སྤགས་པ་སྤངས་པའོ། །སྤགས་པའི་ཟས་ཟོས་པའི་ལྟུང་བ་སྟེ་རྫོགས་སོ།། །།ཁ་ནས་མིད་པའི་ལྟུང་བ་ལ་འཆད་དེ། སྦྱིན་བདག་གིས་སེམས་ཀྱིས་བཏང་བ་ལ་གཞན་དང་བྱིན་ལེན་བྱེད་པ་མེད་ན་བླངས་ཏེ་བཟའ། སྦྱིན་བདག་གིས་སྤྱན་དྲངས་ཤིང་ཁ་ཟས་བྱིན་ཏེ་མངོན་པར་འདུག་ལ་སྦྱིན་བདག་ཆུའམ་མེ་ལ་སོགས་པའི་རྐྱེན་བྱུང་སྟེ་མི་ཁོམ་ནས་ཁ་ཟས་འདྲི་མ་པའི་མི་མེད་ལ་གདུགས་ཚོད་ཀྱིས་ཀྱང་མི་ཐུབ་ན་ཁ་ཟས་མངོན་པར་བྱིན་པ་དེ་བྱིན་ལེན་མ་བྱས་པར་བྲིམས་ཏེ་ཟོས་ཀྱང་ཉེས་མེད་དོ། །མངོན་སུམ་དུ། དགེ་སློང་ཁ་ཟས་བྱིན་པའི་མི་ཐད་ཀར་མངོན་སུམ་དུ་འདུག་ལ་བྱིན་ལེན་བྱ་བ་དང༌། མཚམས་ཀྱི་ནང་དུ། བར་དུ་ཆུ་དང་རྩིག་པ་མཐོན་པོས་མ་ཆོད་པ་དང༌། མངོན་པར་འགྲུབ་པའི་ཕྱོགས་སུ་འདུག་སྟེ། རྒྱབ་བམ་ཟུར་ནས་མ་ཡིན་གྱི་མདུན་དུ་ཕན་ཚུན་དྲང་པོར་བྱས་ཏེ་ནམ་མཁའ་འམ་རྩིག་པའམ་ཤིང་གི་ཁ་ལྟ་བུ་ན་གཅིག་འདུག་པ་ལྟ་བུ་མ་ཡིན་པ་དང༌། གན་རྐྱལ་གྱི་ལག་པ་ལུས་ཀྱིས་སམ་བདག་གི་ལུས་ཀྱི་ལག་པ་ཁས་སྦུབ་ཏུ་མི་བྱ་བར་བཀན་ཏེ་བླང་བ་དང༌། དེ་ལ་གཏོགས་པ་དང༌། ལྷུང་བཟེད་དམ་གཞོང་པ་ལ་སོགས་པ་མན་ཅི་སྟེང་དུ་འདུག་པ་ལ་འོག་ནས་ལག་པས་བཀན་ཏེ་བཟུང་ལ་སྣོད་ཀྱི་ནང་དུ་ཁ་ཟས་བླུགས་པ་ཡང་རུང༌། ཐེག་ནུས་པ། འདྲིམ་པའི་མི་ནད་པ་དང་རྒན་པོ་དང་བྱིས་པ་ལྟ་བུ་ཁ་ཟས་མི་ཐེགས་པ་དང༌། སྦྱིན་མི་ནུས་པ་མ་ཡིན་པ་དང༌། རབ་ཏུ་མ་རྫོགས་པ། དགེ་སློང་ཁྲིམས་རྫོགས་པ་མ་ཡིན་པར་དགེ་སློང་མ་དང་དགེ་སློབ་མ་དང་དགེ་སྦྱོང་ཕོ་མོ་དང་ཁྱིམ་པ་ཡང་ཡིན་པས་བྲིམས་པ་དང༌། མི་མ་ཡིན་པས་ཀྱང་བལ་གླང་དང་རྟ་དང་སྤྲེའུ་ལ་སོགས་པ་ཞིག་གིས་སྦྱིན་པར་བསམས་ཏེ་བྱིན་པ་འང་རུང༌། ཡན་ལག་གིས་སམ། འདྲིམ་ཞིང་བྱིན་པའི་ལུས་ཀྱི་ཡན་ལག་ལག་པའམ་སྣའམ་སོས་བཟུང་སྟེ་བྱིན་པ་དང༌། དེ་ལ་གཏོགས་
པས། འདྲི་མ་པའི་ལག་པ་ན་གཟར་བུའམ་སྣོད་སྤྱད་ཀྱིས་བྲིམས་ཀྱང་རུང་ངོ༌། །འདོད་ཅིང་བཏང་ལ། འདྲིམ་པའི་མི་དེས་ཀྱང་བདག་ལ་བྱིན་པར་སེམས་ཤིང་བྱིན་པ་དང༌། བླངས་ན་བྱིན་ལེན་ནོ། །མིང་གིས་སྨོས་པ་འདི་རྣམ་ལྟར་བྱིན་ལེན་བྱས་པ་འདི་རྣམས་སུ་ཆུད་དོ། །བཟར་རུང་ངོ༌། །སྨོད་པའི་ཡུལ་ན་དཀྱིལ་འཁོར་ལ་ཞོག་ཤིག་ཅེས་བསྟན་པ་ཡང་ངོ༌། །ཡུལ་ལ་ལ་ཞིག་ན་ཡུལ་ཆོས་ཀྱིས་གཅིག་ལ་གཅིག་བཙོག་བར་འཛིན་ཅིང་རེག་ཏུ་མི་འདོད་དེ་བྱིན་ལེན་བྱེད་དུ་མི་བཏུབ་པ་ནི་འདྲིམ་པས་མཎྜལ་གྱི་སྟེང་དུ་སྤུངས་ཏེ་བཞག་པ་ལ་ཕྱིན་ལེན་ལྟག་མ་ལྟར་བྱས་པར་ཟོས་ཀྱང་ཉེས་མེད་དོ། །ལྷུང་བཟེད་དང་དེའི་གཞི་ཡང་གཅིག་གོ །ལྷུང་བཟེད་ཀྱི་གཞི་རྩི་ཤིང་གི་ལོ་མའམ་གཞོང་པ་ལྟ་བུས་བྱ་སྟེ། དེའི་འོག་ནས་ལག་པས་བཟུང་ན་ཁ་ཟས་ལྷུང་བཟེད་ཀྱི་ནང་དུ་བླུགས་ཀྱང་རུང་གཞིའི་སྟེང་དུ་བླུགས་ཀྱང་རུང་བྱིན་ལེན་རུང་ངོ༌། །ཡལ་ག་ནི་སྤྲེའུའི་ཡུལ་ཏེ་དེ་ལས་དེ་ནས་མི་འགྲུབ་པ་མ་ཡིན་ནོ། །སྤྲེའུས་ཤིང་ཏོག་ལྟ་བུ་བྱིན་ན་དྲུང་དུ་འོང་དུ་ནི་འཇིགས་ཀྱི་ཤིང་གི་ཁ་ནས་སྦྱིན་པའི་ཕྱིར་བོར་བ་ལ་བདག་གི་སྣོད་དམ་ལག་པ་བཟེད་དེ་བླངས་པའང་བྱིན་ལེན་དུ་ཆུད་དེ་རུང་ངོ༌། །འབྲས་བུ་ཁྲི་དང་ཁྲིའུ་དང་ཐུ་བ་དང་ལྷུང་བཟེད་ཀྱི་གཞིས་བྱིན་ལེན་བཟེད་ན་མི་རིགས་པ་མ་ཡིན་ནོ། །འབྲས་བུ་དང་ཚོད་མ་རྟོག་ཅིང་སེལ་བ་ལྟ་བུ་ལ་ཁྲིའུ་དང་ཁྲི་དང་ཐུ་བ་དང་ལྷུང་བཟེད་ཀྱི་གཞི་ཤིང་གི་ལོ་མ་འམ་གཞོང་བ་ལྟ་བུའི་འོག་ནས་བཟུང་སྟེ་བྱིན་ལེན་དུ་བྱས་པའང༌། བྱིན་ལེན་དུ་ཆུད་དེ་རུང་ངོ༌། །གནས་པས་དེ་ལ་བརྟག་པ་ན་མི་སྨྲ་བས་ནའོ། །གནས་བཅའ་བའི་དགེ་སློང་གཞོན་ནུ་རྣམས་ཀྱིས་ཁ་ཟས་དང་ཚོད་མ་རྟོག་ཅིང་སེལ་བའི་ཚེ་མཆིལ་མའི་ཟེར་མས་མི་རེག་པ་དང་སེམས་མི་འཕྱར་ཅིང་གཅིག་ཏུ་བསྡུ་བའི་ཕྱིར་གཏམ་ལ་སོགས་པ་མི་བྱ་བར་ལས་བྱའོ། །སྙོམས་པར་རིམས་ཤིག་ཅེས་འདྲིམ་པ་ལ་བསྒོ།། ཁ་ཟས་འདྲིམ་པའི་ཚེ་ཀུན་ལ་ཆེ་ཆུང་མ་ཁྱེར་ཞིང་མཉམ་པར་ཐོབ་བར་བྱ་བའི་ཕྱིར་གྲལ་དབོན་དང་ཐོ་ངན་གྱིས་འདྲིམ་པ་ལ་སྙོམས་བར་བྲིམས་ཤིག་ཅེས་བསྒོ། །དགེ་སློང་གིས་བྱིན་བླངས་ཏེ་བླིམས་ན་རིགས་སོ། །དགེ་སློང་གིས་ཟན་འདྲིམ་ན་ཡང་དགེ་སློང་འདྲི་མ་བ་དེ་ཉིད་ཀྱིས་ཚལ་བཞིན་
དུ་བྱིན་ལེན་བྱས་ཏེ་བྲིམས་ན་དགེ་སློང་ཀུན་གྱིས་བྱིན་ལེན་བྱ་མི་དགོས་ཀྱི་དེས་བྱིན་ལེན་བྱས་པས་ཆོག་སྟེ་བྲིམ་དུ་རུང་ངོ༌། །མར་དང་ཡུངས་མར་དང་སྦྲང་རྩི་དང་བུ་རམ་རྫ་མར་འདྲིམ་ན་རྩ་དང་འདབ་མ་ལ་སྩོགས་པས་གོས་བཅའ་བའི་ཕྱིར་གླན། མིང་གིས་སྨོས་པ་འདི་རྣམས་ལྟ་བུ་ཞིག་དགེ་སློང་གིས་བྱིན་ལེན་བྱས་ཏེ་བྲིམ་ན་ཁ་ཟས་ཀྱི་ཟེར་མ་དང་སྣོད་སྤྱད་གོས་ལ་མི་རེག་པར་བྱ་བའི་ཕྱིར་བདག་གི་གོས་ལ་ཕྱར་བའམ་ལོ་མ་ལ་སོགས་པས་གཟན་བྱ་བའམ་སྣོད་ཀྱི་ཞབས་ལ་ལོ་མས་གཟན་བྱ་སྟེ་བྲིམ་མོ། །འདྲིམ་ན་ཐུ་བོ་དང་ཐ་ཆུངས་སོ་སོར་བྱ་སྟེའོ། །ཤིང་ཏོག་ལ་སོགས་པ་ཞིམ་པ་དང་ཆེ་ཆུང་ཞིག་འདྲེས་པར་འདྲིམ་ན་སྙོམས་པར་བྱ་པའི་ཕྱིར་ཆེ་ཆུང་སོ་སོར་ཕྱེ་ལ་ཆེན་པོས་བཟང་པོ་ལས་ཀྱང་མཉམ་པར་བྲིམ་ཆུང་དུ་དང་ངན་པ་ལས་ཀྱང་མཉམ་པར་བྲིམ་མོ། །སྐྱུར་རྩི་ཞིམ་པོ་སོ་སོར་བྱས་ཏེ་བྲིམ། སྐྱུར་རྩི་ལྟ་བུ་ལ་ཞིམ་པོ་ཡོད་ན་སོ་སོར་ཕྱེ་སྟེ་ཞིམ་པོ་ལས་ཀྱང་མཉམ་པར་བྲིམ། མི་ཞིམ་པ་ལས་ཀྱང་མཉམ་པར་བྲིན། དེ་བཞིན་དུ་ཁ་ཟས་ཞིམ་པ་འདྲིམ་པའི་ཀུན་ལ་བྱའོ། །འདྲིམ་པའི་སློབ་དཔོན་དང་མཁན་པོས་ལོངས་ཤིག །དགེ་འདུན་ལ་ཁ་ཟས་འདྲི་མ་བའི་དགེ་སློང་དེའི་ཟན་སྐལ་མཁན་པོའམ་སློབ་དཔོན་གྱིས་བྱིན་ལེན་བྱས་ཏེ་མནོད་དོ། །མི་འཐོབ་པ་ཐོབ་པ་དེ་མ་ཐག་པའི་གནས་སོ། །སཱུ་ཏྲ་ལྟག་མ་ལྟར་མཁན་པོ་དང་སློབ་དཔོན་མེད་དམ་གྲལ་མཐོན་དམན་ཁྱེར་ཏེ་བླང་དུ་མི་བདེན་འདྲིམ་པའི་གྲལ་གར་བབ་པའི་ལྟག་འོག་ན་དགེ་སློང་སུ་འདུག་པས་བྱིན་ལེན་བྱས་ཏེ་ཟན་མནོད་དོ། །དུ་མའི་ཅི་ཙམ་སྟན་མ་བཏང་བར་ལེན་ནུས་པའོ། །བདག་གི་གྲལ་ལྟག་འོག་ནས་དགེ་སློང་མའི་ཞིག་ཟན་འདྲིམ་དུ་དོང་ངམ་མ་ཚང་སྟེ་ཟན་སྐལ་ནོད་ན་སྟན་ལས་ལྡང་མི་དགོས་ཤིང་ཅི་ཙམ་ནུས་པའི་ཟན་སྐལ་མནོད་དོ། །བདག་གིས་མནོད་པར་ལག་གིས་མི་ཁྱབ་པ་ནི་མ་མནོས་ཀྱང་ཉེས་མེད་དོ། །འདྲིལ་བ་གནས་མ་བཏང་བར་རང་གིས་བླང་ནུས་ན་བྱིན་ལེན་མི་ཞིག་གོ །ཁ་ཟས་ཤིག་བྲིམས་ཏེ། བདག་གི་ལག་ཏུ་འོངས་ཏེ་ཤོག་བའམ་སྣོད་ཀྱི་སྟེང་ནས་འདྲིལ་བ་ནི། བདག་སྟན་ལས་འཕགས་མི་དགོས་པར་ལག་གིས་སླེབས་ཚུན་ཆད་དུ་སོང་སྟེ་བླངས་ནས་ཟོས་པ་ནི་བྱིན་ལེན་མི་ཞིག་གོ །སྟན་ལས་འཕགས་ཏེ་བླངས་པ་ཞིག་ཟོས་ན་ཉེས་བྱས་སོ། །སྦྲང་མ་དང་གྲོག་སྦུར་
གྱིས་རེག་ན་ཡང་ངོ༌། །བདག་གི་ཁ་ཟས་བྱིན་ལེན་བྱས་ཟིན་པ་ལས་གྲོག་སྦུར་གྱིས་རེག་པའང་བྱིན་ལེན་ཞིག་པར་མི་འགྱུར་རོ། །དགེ་སློང་གིས་མ་བཏང་བར་གཞན་གྱིས་ཀྱང་ངོ༌། །བདག་གི་ཁ་ཟས་བྱིན་ལེན་བྱ་བ་ཟིན་ནས་ལག་པས་བཟུང་ཞིང་འདུག་པ་ལ་གཞན་གྱིས་རེག་ནའང་བྱིན་ལེན་ཞིག་པར་མི་འགྱུར་རོ། །བྱི་བས་ན་ཞིག་པར་བྱེད། བྱིན་ལེན་བྱས་ཟིན་པའི་ཟས་ལ་བདག་གིས་ཀྱང་མ་བཟུང་ལ། སེམས་ཅན་བྱི་བ་ཙམ་ཡན་ཆད་ཀྱིས་རེག་ན་བྱིན་ལེན་ཞིག་གོ །དེ་ལས་ཟོས་ན་ཉེས་བྱས། བྱིན་བླངས་ནས་བྱིན་བླངས་པའང་རིགས་པ་མ་ཡིན་ནོ། །བྱིན་ལེན་བྱས་ཟིན་པ་ལས་སྟན་ལས་འཕགས་སམ། གཞན་གྱིས་རེག་གམ། བྱིན་ལེན་བྱས་སམ་མ་བྱས་ཐེ་ཚོམ་ཟ་བ་སླར་གདོད་ཡང༌། བྱིན་ལེན་བྱས་ཏེ་ཟོས་པའང་བྱིན་ལེན་བྱེད་དུ་ཆུད་དོ། །འྦྷྲིད། ཟས་བྱིན་ལེན་མ་བྱས་པར་ཤེས་བཞིན་དུ་ཟོས་པ་ལས་ལྟུང་བར་འགྱུར་ཏེ་ཡན་ལག་གཅིག་མ་བླངས་པ་ལས་སོ། །ཟས་བྱིན་ལེན་མ་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག་ཆུ་དང་སོ་ཤིང་མ་གཏོགས་པ་ཏེ་བཟའ་བའོ། །ཆུ་དང་སོ་ཤིང་མ་གཏོགས་ཏེ་བཟའ་བ་རྣམ་ལྔ་དང༌། བཅའ་བ་རྣམ་ལྔ་ལ་སོགས་པ་ཁ་ཟས་ཅི་ཡང་རུང་ཟས་ལས་ལྟུང་བར་འགྱུར་ཏེ། ཡན་ལག་གཅིག་ཁར་བཟའ་བའོ། །ལུས་ལ་བྱུག་པ་དང་སྣར་བླུགས་པ་མ་ཡིན་གྱི། ཁར་བཟའ་བ་ལས་ལྟུང་སྟེ། ཡན་ལག་གཅིག་བྱང་གི་སྒྲ་མི་སྙན་གྱི་མ་ཡིན་ནོ། །པའོ། །བྱང་གི་སྒྲ་མི་སྙན་གྱི་ཟས་ནི་བདག་གི་དང་འདྲ་བས་བྱིན་ལན་བྱ་མི་དགོས་ཏེ། བྱང་གི་སྨྲ་མི་སྙན་གྱི་ཟས་ཀྱང་མ་ཡིན་པ་ལས་ལྟུང་སྟེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ལྟུང་བའོ། །ནད་པ་རབ་ཏུ་མ་རྫོགས་པས་བསྙོད་ན་ལོང་ཤིག །ནད་པ་བྱིན་ལེན་བྱེད་མི་བོད་པ་ནི་ཁྱིམ་པ་དང་དགེ་སྦྱོང་ལྟ་བུས་ཟན་བསྙོད་དེ། ཟོས་པ་ནི་ཉེས་པར་མི་འགྱུར་གྱིས། ཡོང་ཤིག་རབ་ཏུ་རྫོགས་པ་མེད་ནའོ། །སཱུ་ཏྲ་ལྟག་མ་ལྟར་ཁྱིམ་པ་དང་དགེ་སྦྱོང་གིས་བསྙོད་པ་ཉེས་མེད་པ་ནི་དགེ་སློང་མེད་པ་ན་བླངས་ཏེ་ཟོས་ཀྱང་ཉེས་པ་མེད་དོ། །རབ་ཏུ་མ་རྫོགས་པས་ཀྱང་བསྙོད་ཅིག །ནད་པ་ལ་ཟན་བསྙོད་པ་དགེ་སློང་མེད་ན་དགེ་སྦྱོང་གིས་ཀྱང་སྟོབས་ཤིག་བསྙོད་ཅིག་ཉེས་མེད་དོ། །བྱིན་པ་མ་བླངས་པ་
ཟོས་པའི་འོ། །བྱིན་ལེན་མ་བྱས་པར་ཟོས་པའི་ལྟུང་བ་རྫོགས་སོ།། །།བཟང་པོའི་ལྟུང་བ་ལ་འཆད་དེ། འོ་མ་ཞོ་མར་གསར་པ་ཉ་ཤ་ཤ་སྐམ་འདི་དག་ནི་ཟས་བསོད་པའོ། །འོ་མ་དང་ཞོ་དང་མར་སར་པ་དང༌། །ཉ་ལ་སོགས་པ་ཆུའི་ནང་ན་གནས་པ་བཟར་རུང་ངོ་ཅོག་དང་འདི་རྣམས་ནི་ཟས་སོ་ཅོག་གི་ནང་དུ་བསོད་ཅིང་བཟའ་བའི་མཆོག་ཡིན་ནོ་ཞེས་གསུངས་སོ། །དེ་ལས་བྱེད་དོ། །སཱུ་ཏྲ་ལྟག་མའི་ནང་ན་སྨོས་པའི་ཁ་ཟས་བཟང་པོ་དེ་རྣམས་ལས་གག་ཀྱང་རུང༌། བསླངས་པ་ལས་ལྟུང་སྟེ། ཡན་ལག་གཅིག་གཉེན་མ་ཡིན་པ་དང༌། །ཁྱིམ་པ་སྦྱིན་བདག་ནའོ། །སྦྱིན་བདག་གཉེན་མ་ཡིན་ན་ཁྱིམ་པ་ལས་ལྟུང་སྟེ། ཡན་ལག་གཅིག་བདག་གིས་བླངས་ཏེ་ཟོས་ནའོ། །བདག་གིས་བླངས་ཤིང་ཟོས་པ་ལས་ལྟུང་སྟེ། ཡན་ལག་གཅིག་གསོལ་བ་དང་བཅུག་པ་དེ་ནི་ཉེས་བྱས་པའོ། །ཁ་ཟས་བཟང་པོ་ལས་བདག་གིས་བླངས་ཏེ་ཟོས་པ་ནི་ལྟུང༌། གཞན་སློང་དུ་བཅུག་སྟེ་བྲོས་ན་ཉེས་བྱས། སློང་བའི་ཚེ་ནི་གཉིས་ཀའང་ཉེས་བྱས་སུ་འདྲའོ། །མིན་ནའོ། །ཁ་ཟས་བཟང་པོ་ན་བའི་ཕྱིར་བླངས་པ་ནི་མ་གཏོགས་ཀྱི་མིན་བར་བླངས་པ་ལས་ལྟུང་སྟེ། ཡན་ལག་གཅིག་ཅི་བདེར་སྤྱན་དྲངས་པ་མ་བྱས་ན། ཡོན་བདག་གིས་ཁྱེད་ཅི་འདོད་པ་ང་ལས་རྟག་པར་ལོང་ཤིག་ཅེས་ཟེར་བའང་རུང༌། ཟན་སློང་བ་ཁྱོད་ཅི་འདོད་ཟེར་ཡང་རུང་སྟེ་བཟང་པོའི་ནང་ནས་མིང་གིས་སྨོས་ཏེ་འདི་འདོད་དོ་ཞེས་བྱས་ཀྱང་མི་ལྟུང་གི་ཅི་འདོད་པ་ལོངས་ཤིག་གམ། ཅི་འདོད་པ་ཞེས་མི་འདྲི་བར་བླངས་པ་ལས་ལྟུང་བར་འགྱུར་ཏེ་ཡན་ལག་འདི་རྣམས་དང་ལྡན་ན་ལྟུང་བར་འགྱུར་རོ། །དེའི་ཕྱིར་ཐོབ་པའི་ཚེ་ཡང་དེ་སྟེ་གཞན་ངན་པའམ་བཟང་པོའམ་མཉམ་པའམ་རབ་ཏུ་བཟང་པོ་ཡང་བླངས་ནའོ། །ཟན་སློང་བའི་ཚེ་ཁ་ཟས་བསོད་པའི་ནང་ནས་བཟང་པོ་ཞིག་སྣ་གཅིག་ཅིག་བྱིན་པ་ལས་དེ་དང་འདྲ་ཞིང་མཉམ་པ་ཞིག་བྱིན་ཞེས་བླངས་ཏེ་ཐོབ་ན་ལྟུང༌། ངན་པ་བྱིན་པ་ལས་བཟང་པོ་བྱིན་ཞེས་བླངས་ཏེ། བྱིན་ན་ཡང་ལྟུང༌། བཟང་པོ་ཞིག་བྱིན་པ་ལ་འདིས་ཀྱང་བཟང་པོ་ཞིག་བྱིན་ཞེས་བྱས་ཏེ། ཐོབ་ན་ལྟུང༌། ཁ་ཟས་ངན་པ་ཞིག་བླངས་པ་ལས། བཟང་པོ་བྱིན་ཏེ། བླངས་ཏེ་ཟོས་ན་ལྟུང༌། དེ་དག་ལས་ངན་པ་ནི་ཕྱེད་དོ། །ཁ་ཟས་ངན་པ་ཞིག་བླངས་ཏེ་བཟང་པོ་ཞིག་ཐོབ་བམ་བཟང་པོ་
ཞིག་བླངས་པ་ལས་ངན་པ་ཞིག་བྱིན་ཏེ་ཟོས་ན་ཉེས་བྱས། ཅི་བདེར་སྤྱན་དྲངས་པ་བཞིན་དུ་སློང་བ་ཁྱེར་ཏེ་འོངས་ན་ཁ་རོག་ཅིང་འདུག་ལ་བཀྱིག་པ་ལས་ཁྱོད་ཅི་སློང་ཞེས་འདྲི་ནའོ། །ཅི་འདོད་ཅེས་ཟེར་ཏེ་འདི་འདོད་ཅེས་བྱས་ཀྱང་ཉེས་མེད་པ་བཞིན་དུ་ཟན་ཁྱེར་ཏེ་འོང་བ་ལ་དེ་མི་འདོད་ཅེས་བྱས་སམ། མི་འདོད་པའི་ཕྱིར་ལྷུང་བཟེད་ཁ་བཀབ་སྟེ་བསྡད་ཅིང་བཀྱིག་པ་ལས་ཅི་འདོད་ཅེས་ཟེར་བ་ལས་འདི་འདོད་ཅེས་བྱས་ཏེ་དེ་བཞིན་དུ་ཐོབ་པའང་ཉེས་མེད་དོ། །བསོད་པ་བསླངས་པའོ། །ཁ་ཟས་བཟང་པོ་བསླངས་པའི་ལྟུང་བ་རྫོགས་སོ།། །།སྲོག་ཆགས་དང་བཅས་པའི་ལྟུང་བ་ལ་འཆད་དེ། རང་སྤྱོད་པའི་ཕྱིར་ཞུགས་སམ་འཇུག་ནའོ། །བདག་གི་ལུས་ཀྱི་ཕྱིར་བྱ་བ་ལ་སེམས་ཅན་ཡོད་བཞིན་དུ་བདག་གིས་སྤྱད་དམ། གཞན་སྤྱོད་དུ་བཅུག་པ་ལས་ལྟུང་སྟེ་ཡན་ལག་གཅིག །འྦྷྲིད། སེམས་ཅན་ཡོད་པར་ཤེས་བཞིན་དུ་སྤྱད་པ་ལས་ལྟུང་བར་འགྱུར་ཏེ་ཡན་ལག་གཅིག །སྲོག་ཆགས་ཅན་ནའོ། །སེམས་ཅན་ཀྱང་ཡོད་པ་ལས་ལྟུང་སྟེ་ཡན་ལག་གཅིག །ཆུ་དང་མར་དང་ཉུངས་མར་དང་སྦྲང་རྩི་དང་བུ་རམ་དང་འོ་མ་དང་ཞོ་དང་མར་སར་དང་ཚྭ་དང་རྒུན་གྱི་ཚྭ་དང་ཞོ་ཁུ་དང་རྩབ་མོ་དང་འབྲས་བུ་དང་བཅའ་བ་ལ་སོགས་པ་དགོས་པ་ལའོ། །མིང་གིས་སྨོས་པ་འདི་རྣམས་གག་ཀྱང་རུང་བདག་གི་ལུས་ཀྱི་ཕྱིར་སྤྱོད་པ་ལས་ལྟུང་བར་འགྱུར་ཏེ་ཡན་ལག་གཅིག །མཐོང་བ་སེམས་ཅན་མཐོང་ཞིང་ལྟར་སྣང་བ་ལས་ལྟུང་སྟེ་ཡན་ལག་གཅིག །ཤི་ནའོ། །སྲོག་ཆགས་ཤི་བ་ལས་ལྟུང་སྟེ་ཡན་ལག་འདི་རྣམས་དང་ལྡན་ན་ལྟུང་བར་འགྱུར་རོ། །སྲོག་ཆགས་སོ་སོ་སེམས་ཅན་ཡོད་བཞིན་དུ་སྤྱད་དེ་ཤིན་ཏུ་ཤི་བ་བཞིན་དུ་ལྟུང་བར་འགྱུར་རོ། །ལུས་ལ་དགོས་པ་ནི་སྤྱད་པའོ། །བདག་གི་ལུས་ཀྱི་ཡོ་བྱད་དུ་དགོས་ཏེ་སྤྱད་པ་ལ་སེམས་ཅན་ཡོད་ནའང་ལྟུང་བར་འགྱུར་ཏེ་ལུས་ཀྱི་ཕྱིར་གང་གང་དགོས་པ་ནི་སཱུ་ཏྲ་འོག་མ་ལས་འཆད་པ་བཞིན་ནོ། །འདི་ལྟ་སྟེ་ཁྲུས་དང་སྐོམ་དང་སོ་ཤིང་བཅའ་བ་དང་རྐང་ལག་བཀྲུ་བའོ། །ལུས་ཀྱི་ཕྱིར་དགོས་པ་ནི་ཁྲུས་ཀྱི་ཡོ་བྱད་དང་སྐོམ་དུ་བཏུང་བ་དང་སོ་ཤིང་དང་རྐང་ལག་བཀྲུ་བའི་ཡོ་བྱད་ལ་སེམས་ཅན་ཡོད་བཞིན་དུ་སྤྱན་ན་ཡང་ལྟུང་བར་འགྱུར་རོ། །
དགོས་པ་ལ་དགོས་པའི་ཡོ་བྱད་དོ། །ལུས་ལ་དགོས་པའི་ཡོ་བྱད་གོས་དང་སྣོད་སྤྱད་ལ་སོགས་པ་ལས་བཀྲུ་ཞིང་སྤྱད་པར་དགོས་པ་ལ་སེམས་ཅན་ཡོད་ན་ལྟུང་བར་འགྱུར་ཏེ་གང་གང་ཡིན་པ་སཱུ་ཏྲ་འོག་མའི་ནང་ནས་འཆད་པ་ཡིན་ནོ། །བཟའ་བ་དང༌། ཟས་ཉིད་དང༌། ཟས་བཙོ་བའི་ཡོ་བྱད་ལ་སེམས་ཅན་ཡོད་པ་དང༌། ལྷུང་བཟེད་དང༌། ལྷུང་བཟེད་བཀྲུ་བའི་ཡོ་བྱད་ཆུ་དང་ལྕི་བ་ལ་སོགས་པ་ལ་སེམས་ཅན་ཡོད་པ་དང༌། གོས་དང་གོས་བཀྲུ་བ་དང་འཚོད་པའི་ཆུ་དང་ཚོན་ལ་སེམས་ཅན་ཡོད་པ་དང༌། གནས་དང་ཁང་པའི་སྐྱང་ནུལ་འཇི་བ་དང་ལྕི་བ་ལ་སེམས་ཅན་ཡོད་པ་དང༌། །སྦོ་བཀྲུ་བ་དང༌། བདག་གི་སྦོ་དང་སྦོ་ལས་གཟུགས་བྱས་པ་བརྐུ་བ་ལ་སེམས་ཅན་ཡོད་པ་དང༌། མེ་ལ་སོགས་པ་ལུས་ཀྱི་ཡོ་བྱད་རྣམས་སོ། །མེ་བུད་པའི་ཡོ་བྱད་ཤིང་ལ་སོགས་པ་ལ་སེམས་ཅན་ཡོད་བཞིན་དུ་སྤྱད་ནའང་ལྟུང་བར་འགྱུར་རོ། །དེ་དག་དང་ས་ལྕི་བ་དང་ཚོན་དང་རྩྭ་དང་ཤིང་ལ་སོགས་པའོ། །སཱུ་ཏྲ་ལྟག་མའི་ནང་ནས་མིང་གིས་སྨོས་པའི་ཡོ་བྱད་དུ་འགྲོ་བ་ནི། འདི་རྣམས་ལ་སེམས་ཅན་ཡོང་པར་སྤྱད་ནའང་ལྟུང་བར་འགྱུར་རོ། །དེ་དག་ཏུ་དགོས་པ་ནི་འདི་ལྟ་སྟེ་བཀྲུ་བ་དང་བཤལ་བ་དང་བཙོ་བ་དང་གདབ་བ་དང་ཕྱགས་པ་དང་བྱུག་པའོ། །སཱུ་ཏྲ་ལྟག་མའི་ཡང་ལྟག་མའི་ནང་ནས་མིང་གིས་སྨོས་པའི་ཡོ་བྱད་དུ་དགོས་པ་འདི་རྣམས་ལ་སེམས་ཅན་ཡོད་ཅིང་ཤི་ན་ཡང་ལྟུང་བར་འགྱུར་རོ། །བཅུད་དང་ཆན་ཁུ་དང་ཐུག་པ་དག་བྱེད་པའོ། །ནད་པའི་བཅུད་དང་ཆན་ཁུ་དང་ཐུག་པ་ལ་སོགས་བྱེད་པའི་རྒྱུ་ལས་སེམས་ཅན་ཡོད་ནའང་ལྟུང་བར་འགྱུར་རོ། །ཆུའི་ལམ་བཅད་དམ་བཏང་པའོ། །ཆུ་བཅད་དེ་ཆུ་བཅད་པའི་ལམ་ན་ཡོད་པའི་སེམས་ཅན་དུ་ཡོད་པ་ཤི་བ་བཞིན་དུ་ལྟུང་བར་འགྱུར་རོ། །ཆུ་གུད་དུ་བཏང་བའི་འདྲོགས་ལ་སྒམ་ལ་འདུག་པའི་སེམས་ཅན་དུ་ཤི་བ་བཞིན་དུ་ལྟུང་བར་འགྱུར་རོ། །ཤིང་དང་གཟིངས་བཅུག་པ་དང་དྲངས་བ་དང་ཕྱུང་བའོ། །ཆུའི་ནང་དུ་ཤིང་དང་གཟིངས་བཅུག་གམ་ཕྱུང་བ་སེམས་ཅན་ཡོད་ཅིང་ཤི་བར་ཤེས་བཞིན་དུ་བྱས་ནའང་ལྟུང་བར་འགྱུར་རོ། །རིམ་གཅིག་པ་ལས་གཞན་དུ་སྤུ་ཡོད་པ་ལ་སོགས་པས་ཁྲུས་བྱེད་ནའོ། །རྫིང་བུ་དང་མཚེའུའི་ནང་ན་སེམས་ཅན་ཡོད་བཞིན་དུ་
ཁྲུས་རས་ཉིས་རིམ་དང་བེའུ་རས་དང་ལྭ་བ་ལྟ་བུ་སྤུ་ཅན་གྱི་ཁྲུས་རས་ཀྱིས་ཁྲུས་མི་བྱ། ཁྲུས་བྱས་ཏེ་སེམས་ཅན་ཤིན་དུ་ཤི་བ་བཞིན་དུ་ལྟུང་བར་འགྱུར་རོ། །དེས་ཀྱང་སེམས་ཅན་ཐམས་ཅད་ལྷག་པའི་ཁམས་ཀྱི་ཆུ་དེ་དག་ཀྱང་སྦྱོར་བའོ། །མཚེའུ་དང་རྫིང་བུ་ལྟ་བུ་སེམས་ཅན་ཕྲ་མོ་རབ་ཏུ་མང་བར་ཡོད་ན་ཁྲུས་རྣམས་གཅིག་རིམ་གྱིས་ཀྱང་ཁྲུས་མི་བྱ། གཅིག་རིམ་གྱིས་ཁྲུས་བྱས་ཏེ་སེམས་ཅན་ཤི་བར་གྱུར་ན་ཡང་ལྟུང་བ། སྲོག་ཆགས་དང་བཅས་པའི་དགོས་པའོ། །སྲོག་ཆགས་དང་བཅས་པའི་ལྟུང་བ་འདུལ་བ་རྣམ་པར་འབྱེད་པའི་ནང་ནས་འབྱུང་བའི་མདོ་སྲོག་ཆགས་དང་བཅས་པའི་ཆུ་སྤྱོད་པའི་ལྟུང་བ་ལ་འཆད་དོ། །ཆོངས་ཤིག་ཤིང་སྤྱི་སྤྲོད་ཀྱི་ཚགས་ཆུ་བཙགས་པའི་ཚགས་ཤིང་སྤྱི་སྤྲོད་ལ་བྱས་ཀྱང་ཉེས་མེད། སྦྱིན་པ་ཟག་སྣོད་ཀྱི་སྟེང་ནམ་མཁའ་ལ་གནས་པ་བཙགས་པའི་ཆུ་གཏོར་བའི་སྣོད་ཚགས་སྦྱར་བའི་ཕྱིར་ལྟར་ལྟང་པོ་གསུམ་ལ་ལྕགས་ཀྱི་གཟེར་བུ་བདེ་ལྟར་གསུངས་སོ། །ཤིང་སྤྱི་སྤྲོད་ཀྱི་ཆགས་ནི་ཆུ་སྣོད་འོག་ཏུ་བཞག་ལ་དེའི་སྟེང་ནམ་མཁའ་ལ་ཆུ་ཚགས་དཔྱོངས་ཏེ་ཆུ་ཚགས་ཁ་ལས་སྲད་བུས་བཏགས་ཏེ་སྲད་བུའི་ཐོག་མ་ཤིང་ལྟང་ལྟང་པོ་གསུམ་གྱི་རྐེད་པ་ཙམ་དུ་ཡང་མིག་བྱས་ལ་ཡང་མིག་ལས་གདགས་ཤིང་ལྟང་ལྟང་པོ་གསུམ་སྤྱི་སྤྲོད་དུ་བྱས་ཏེ་ལྕགས་སྒྱེང་ལྟར་བཙུགས་ལ་ཆུ་བཙག་གོ །ཆུ་ཚགས་ལ་ཆུ་གནས་པའི་ཕྱིར་གདིང་བ་བྱ། ཆུ་ཚགས་ཀྱི་ཞབས་སུ་ཆུ་འཆགས་ཤིང་སེམས་ཅན་མི་འཆི་བར་བྱ་བའི་ཕྱིར་ནང་དུ་མིག་ཚགས་བླུགས། བྱེ་མའམ་ལྕི་བས་སོ། །ཆུ་ཚགས་ཀྱི་ནང་དུ་བླུགས་པ་ནི་བྱེ་མའམ་ལྕི་བ་ཕུར་ཏེ་བླུགས། འཛིན་པའི་ལྷུང་བཟེད་ཀྱིས་ཀྱང་ངོ༌། །སེམས་ཅན་མི་འཆི་བར་བྱ་བའི་ཕྱིར་ཆུ་ཚགས་ཀྱི་ཞབས་སུ་ཆུ་ཚགས་པར་བྱ་བའི་ཕྱིར་ཆུ་ཆགས་ཀྱི་ཞབས་སྣོད་གཅིག་གི་ནང་དུ་གཞུག་ཏུ་འང་རུང་ངོ༌། །ཁམ་པའམ་ཟངས་གག་ཀྱང་རུང་བས་སོ། །སྣོད་ནི་ཁམ་ལའམ་ཟངས་གག་ཀྱང་རུང་པས་སོ། །ལས་བྱས་ཏེ་ཆུ་ཚགས་ཀྱི་ཞབས་དེ་ནང་དུ་གཞུག་གོ །ལྟང་ལྟང་པོ་གསུམ་གྱི་ཡུལ་དེ་བཅིངས། ཆུ་ཚགས་ཀྱི་ཞབས་གཞུག་པའི་སྣོད་དེ་ཡང་ཤིང་སྤྱི་སྤྲོད་གསུམ་གྱི་རྐེད་པ་ལ་བཏགས་ཏེ་
ཆུ་ཚགས་ཀྱི་ཞབས་དེའི་ནང་དུ་བཅུག་ལ་འཆང་དུ་གཞུག །བུ་གུ་ལས་བཟུང༌། སྣོད་འཕྱང་དུ་གཞུག་པ་དེ་ཁ་ལ་བུ་གུ་ཕུག་སྟེ་བུ་གུ་ལས་གདགས་སོ། །སྔ་མ་ན་སྐུད་པས་སོ་།སྣོད་དེ་ཁམ་པ་ལས་བྱས་ན་བུ་གུ་ལས་གདགས་པ་ཐག་བུ་ལས་བྱ། ཕྱི་མ་ནས་ལྕགས་ཐག་ཕྲ་མོས་སོ། །སྣོད་དེ་ཟངས་ལ་བྱས་ན་བུ་གུ་ལས་གདགས་པ་ལྕགས་ཐག་ཕྲེའུས་བྱའོ། །དེ་བཅང༌། ཁམ་པ་དང་ཟངས་ལས་བྱས་པའི་སྣོད་དེ་བཅངས་ཀྱང་ཉེས་མེད་དེ། ཆུ་མི་སྟེར་ན་ལེབ་ལེབ་པོས་ཡང་ཡང་དུའོ། །ཆུ་ཚགས་ཐགས་བཟང་སྟེ་ཆུ་ཡོང་དུ་མི་བཏུབ་ན་ཤིང་ལེབ་ལེབ་པོས་ཆུ་མ་ཐོར་བ་ཙམ་དུ་མི་དྲག་པར་ངོས་ལ་བརྡབ། ཆུ་ཚགས་ལ་བརྡེག །གོང་མ་ལྟར་ཆུ་ཚགས་ཟག་ཏུ་མ་བཏུབ་ན་ཚགས་ཀྱི་ཁ་ལའང་བརྡེག་ཅིང་བསིག །གཅེ་ཚགས་ན་གྲོན་ཆུང་ངོ༌། །ཆུ་བཙགས་པའི་ཕྱིར་ཟངས་ཀྱི་ཞབས་བུ་གུ་སེང་སེང་པོར་འདུག་པ་བྱས་ཤིང་བཅངས་ན་ལས་ཆུང་ཞིང་གྲོན་ཆུང་སྟེ་སླའོ། །དེ་བཅང་ཆུ་བཙགས་པའི་ཚགས་ཟངས་གཅེ་ཚགས་བཅངས་ཀྱང་ཉེས་མེད། ཁམ་པའང་ཟངས་ལས་སོ། །གཅེ་ཚགས་ཞེས་བྱས་པ་ནི་ཁམ་པའམ་ཟངས་གག་ལས་བྱས་ཀྱང་རུང་ངོ༌། །དེ་རྫ་མ་འདྲ་བའི་ཞབས་སུ་སྡུ་བུ་ཅན་ནང་དུ་པད་མོ་འདྲ། བུ་གུ་ཅན་ནོ། །གཅེ་ཚགས་བྱ་བ་ནི་རྫ་མའམ་ཟངས་འདྲ་བར་བྱས་ལ་ཞབས་ཀྱི་ནང་དུ་འབུར་འབུར་པོ་པད་མོའི་སྙིང་པོ་འདྲ་བར་བྱས་ལ་དེའི་འོག་གི་ནང་ཁོང་སྟོང་སྤུ་བུ་ཅན་བྱ་སྟེ་དེ་ལ་སྦུ་བུ་སེང་སེང་པོར་བྱས་ལ་གདོད། རས་མས་དེ་དག་གོ །འབུར་འབུར་པོར་བུ་གུ་གདོད་པ་དེ་ལ་རས་མས་གཡོགས་ཏེ་འབུར་འབུར་པོའི་དྲུང་སྲ་མོར་ཐག་བུས་བཅིངས་ལ་སྣོད་དེའི་ནང་དུ་ཆུ་བླུགས་ལ་བཙགས་ན་སེམས་ཅན་མི་ཤོར། ཆུ་ཚགས་ཞོག་ཤིག །ལྟག་ཏུ་ཆུ་ཚགས་རྣམས་གཉིས་སྨོས་པ་མ་གཏོགས་པར་ཆུ་ཚགས་གཞན་བཅངས་ཀྱང་ཉེས་མེད་དེ་འོག་ནས་འཆད། ཚགས་སམ། ཆུ་ཆགས་ཐ་མལ་པ་དྲུག་པ་དང་ཆོས་ཀྱི་སྣོད་པའམ། ཀུན་དེ་དང་འདྲ་བ་ལ་ཁར་ཡང་བུ་གུ་གདོད་ཞབས་སུ་ཡང་ཆེར་གདོད་དེ་ཞབས་ཀྱི་བུ་གུ་ཆེན་པོར་ཆུ་ཚགས་ཀྱིས་གླན་པ་དང༌། གཏང་བའི་ལེབ་ལེབ་པོ། རས་ལེབ་ལེབ་པོ་ཆུའི་ནང་དུ་བཅུག་སྟེ་བཀྲམ་ལ་སླར་བསྡུས་ཏེ་
སྣོད་ཀྱི་ནང་དུ་བཙིར་ན་ཡང་སེམས་ཅན་མི་ཆགས་སྟེ་འདི་གསུམ་གང་བཅངས་ཀྱང་རུང༌། བརྟགས་པ་ཆུ་ཁྱེར་རམ་འགྲུབ་བམ་སྣོད་དང་སྤྱི་ལུགས་དེ་དག་ཏུའོ། །གུད་དུ་འགྲོ་སྟེ་ཆུ་ཚགས་མེད་ཀྱང་སླ་བ་ནི་ཆུ་བཙགས་ཤིང་བརྟགས་ཟིན་པ་རིལ་བའམ་སྣོད་དུ་བླུགས་ཏེ་ཁྱེར་བས་ལྕོགས་པ་ཙམ་གྱི་ཚོད་ན་ཉེས་མེད། དེ་དག་མེད་པར་ཡུལ་རྒྱུ་བར་མི་སྤྱད། ཆུ་ཚགས་དང་ཀུན་དེ་མེད་པར་ཡུལ་རྒྱུ་བར་མི་སྤྱད། འཁོན་པ་དང་ལྷན་ཅིག་ཏུ་མ་ཡིན། བདག་ལ་ཆུ་ཚགས་མེད་ལ་འཁོན་ཡོད་པ་ལ་ཆུ་ཚགས་ཡོད་ན་ལྷན་ཅིག་ཏུ་ཡུལ་རྒྱུ་བར་མི་སྤྱད་དེ་བརྙར་མི་སྟེར་བའི་ཕྱིར་རོ། །འོན་ཏེ་དེ་འདྲ་བའི་རྐྱེན་གཅིག་ན་བཟོད་ནས་སོ། །འཁོན་ཡོད་པ་དང་མི་འགྲོགས་སུ་མི་རུང་བའི་རྐྱེན་གཅིག་ཡོད་ན་བཟོད་པར་གསོལ་ཏེ་ཆུ་ཚགས་ལ་སོགས་པ་བརྙ་བར་སྔ་ནས་དམ་བཅས་ལ་འགྲོའོ། །བྱ་བར་ཡོད་ན་ཡོད་པའོ། །བདག་ལ་ཆུ་ཚགས་ཡོད་པ་ནི་གུད་ན་ཡོད་པ་ལ་མི་བྱའི་ལག་ན་སྤྱད་དུ་ཡོད་པ་དང་བདག་ཉིད་ཀྱི་ལག་ན་སྤྱད་དུ་མེད་ཀྱང་བརྙས་སམ། ཐུན་མོང་དུ་སྤྱད་དུ་ཡོད་ན་བདག་ལ་ཡོད་པ་དང་འདྲ་སྟེ་ཉེས་མེད། དེ་བས་ན་གཞན་གྱིས་སྦྱིན་པར་ཁས་བླངས་ན་དེ་བཞིན། གུད་དུ་འགྲོ་སྟེ་གྲོགས་ཆུ་ཆགས་ཡོད་པ་ལ་ལམ་ན་ཐུན་མོང་དུ་སྤྱད་ཅིང་བརྙ་བར་ཐམས་ཏེ་སྦྱིན་པར་ཁས་བླངས་ན་བདག་ལ་ཡོད་པ་དང་འདྲ་སྟེ་ཉེས་མེད། འབྲལ་ཏེ་སྦྱིན་པར་ཁས་མ་བླངས་ན་ཡུལ་རྒྱུར་སྤྱད་ཅིང་མི་བརྟེན། གུད་དུ་འགྲོ་བའི་གྲོགས་ཆུ་ཚགས་ཡོད་པ་དེ་ལམ་ནས་སོ་སོར་བྲལ་ལམ་བརྙར་མི་སྟེར་ན་ཆུ་ཚགས་མེད་པ་ཡིན་ཏེ་སོང་ན་ཉེས་བྱས་སོ། །མི་འཕགས་པར་བྱེད་ཅིང་རབ་ཏུ་སྤྱོད་པ་ནི་སྤྱོད་པའོ། །གུད་དུ་འགྲོ་སྟེ་ཕ་རོལ་གྱི་གནས་སུ་ཕྱིན་ཚུན་ཆད་ཆུ་སྤྱད་མི་དགོས་པར་འགྲོ་བའི་ལམ་དུ་སོང་བ་ནི་ཆུ་ཚགས་མེད་ཀྱང་ཉེས་མེད་དོ། །རྒྱང་གྲགས་ལྔར་ནི་དེ་བཞིན་ནོ། །རྒྱང་གྲགས་ལྔའི་བར་དུ་ཆུ་སྤྱད་མི་དགོས་ན་ཡང་ཆུ་ཚགས་མེད་པར་སོང་ཡང་ཉེས་མེད་དོ། །བཞག་སྟེ་གནས་སུ་སོང་པ་ལ་དེར་དེ་མེད་ན་རང་ཉམས་མ་ཡིན་པ་མ་ཡིན་ནོ། །གུད་དུ་འགྲོ་སྟེ་ཕ་རོལ་གྱི་གནས་སུ་ཆུ་ཚགས་རྙེད་པའི་གདེང་མེད་པར་བཞག་སྟེ་སོང་བ་ནི་ཉམས་རངས་དང་ལེ་ལོ་ཡིན་ཏེ་ཉེས་བྱས་སོ། །
གནས་དེར་ཆུ་ཚགས་བརྙར་རྙེད་དམ་ཡོན་ཏན་དང་ལྡན་པ་དག་གཅིག་སྟེ་ཆུ་བཙགས་ཤིང་རྟོག་པ་ཞིག་སྟེ་ཆུ་ཚགས་བསྐུར་མི་དགོས་པའི་གདེད་ཡོད་ན་མ་ཁྱེར་ཡང་ཉེས་མེད། གཅིག་ཅིག་གི་དུ་མ་ལ་དེ་བཞིན་དུ་འགྲུབ་སྟེ་དགེ་འདུན་གྱི་བར་དུའོ། །གུད་དུ་འདོང་སྟེ་གཅིག་ལ་ཆུ་ཚགས་ཡོད་དེ་བརྙར་རྙེད་ཅིང་ཀུན་གྱིས་སྤྱད་དུ་ཡོད་ན་ནི་དགེ་འདུན་ལངས་ཤིང་མི་དུ་ཡོད་ཀྱང་རུང་གཞན་མ་ཁྱེར་ཡང་ཉེས་མེད། རྒྱུན་མགྱོགས་པ་ནི་མི་འཕངས་པར་བྱེད་པ་མ་ཡིན་ནོ། །ཕུ་ཆུ་དྲག་པོར་འབབ་པ་ལ་སྲིན་བུ་མེད་ཅེས་ཏེ་ཆུ་ཚགས་བཞག་པའམ་མེད་པར་བྱ་བ་མ་ཡིན་གྱི་བསྐུར་དགོས་སོ། །བརྟགས་པ་དེ་དང་འབབ་རྒྱུན་དུ་ལྷག་ཅིག་ཏུ་འགྲོགས་ན་རྒྱང་གྲགས་ཀྱི་བར་དུ་འཇུག་པར་གྱིས་ཤིག །ཆུ་བང་བ་མགྱོགས་བུལ་བདག་དང་མཉམ་ན་གང་དུ་བཅུས་སྟེ་ཆུ་བརྟགས་པ་དེར་རྩི་ཤིང་ངམ་གཅིག་བོར་ཏེ་མཚན་མ་བཙུགས་ལ་རྒྱང་གྲགས་གཅིག་ཚུན་ཆད་དུ་མཚན་མ་དེའི་འཁོར་དུ་བཅུས་པ་ནི་བརྟགས་མི་དགོས་ཏེ་སྤྱད་དུ་རུང་ངོ༌། །ཆུ་དེའི་བར་དུ་འདྲེས་ན་དེ་ཚུན་ཆད་དོ། །སཱུ་ཏྲ་ལྟག་མ་ལྟར་མཚན་མ་བཙུགས་ཏེ་རྒྱང་གྲགས་གཅིག་ཚུན་ཆད་དུ་བརྟགས་མི་དགོས་པ་ཀུན་ནས་ཆུ་གཞན་ཞིག་བྱུང་སྟེ་འདྲེས་ན་རྒྱང་གྲགས་གཅིག་གི་ཚད་དུ་མི་བྱའི། གང་དུ་འདྲེས་པ་དེ་ཚུན་ཆད་བརྟགས་མི་དགོས་སོ། །འདོམ་གང་གི་འཁོར་བརྟགས་པ་བཞིན་ནོ། །ཁྲོན་པ་དང་མཚེའུ་ལ་གང་ནས་བཅུས་ཏེ་བརྟགས་པའི་འདོམ་གང་ཚུན་ཆོད་བརྟགས་མི་དགོས་སོ། །མིག་གིས་དག་ན་ཆུའང་དག་གོ །མིག་གིས་བལྟས་ཏེ་སེམས་ཅན་མ་མཐོང་ཞིང་མི་སྣང་ན་སེམས་ཅན་གཟུགས་ཕྲ་མོ་བལྟར་མི་སྣང་བ་མི་བརྩིའི་ཆུ་དེ་སེམས་ཅན་མེད་ཅིང་དག་པའི་ཚད་དུ་བརྩིའོ། །ཐ་མལ་པས་སོ། །མིག་དག་པ་ནི་འཕྲུལ་གྱི་མིག་ཅན་ལ་མི་བྱའི་ཐ་མལ་པ་ཤའི་མིག་ཅན་ནོ། །དག་པའི་ཚད་དུ་བརྩི་སྟེ་དགྲ་བཅོམ་པ་དང་འཕྲུལ་ཅན་གྱི་ཆུ་ཡང་ཤའི་མིག་གིས་བརྟགས་པའི་ཚད་དུ་བརྩི་སྟེ་སྤྱད་དོ། །མི་གཡོ་རྡུལ་མེད་པར་བརྟགས། །ཆུ་བལྟ་བ་ནི་རྡུལ་མེད་ཅིང་མི་གཡོ་བར་འདུག་པ་ལ་བལྟ། རྫ་མ་གང་བ་ཡང་ངོ༌། །རྫ་མ་གང་ཞིག་འདུག་པ་ལ་རིལ་གྱིས་བརྟགས་ཀྱང་རུང་སྣོད་ཆུང་ངུས་ལོགས་ཤིག་
ཏུ་བཅུས་ཏེ་བརྟགས་ལ་དེ་ནས་སེམས་ཅན་མེད་ན་ཀུན་བརྟགས་པར་ཆུད། འདས་པར་བྱ་བར་གཏོགས་པ་འདིར་སྤྱད་པར་མི་བྱ། ཆུ་བལྟ་བའི་ཚད་ནི་ཤིང་རྟ་བ་ལང་དྲུག་གིས་དྲངས་པ་གཅིག་འཇུག་མལ་གཅིག་ན་བཞག་སྟེ་མགོ་བསྐོར་ལ་ཐོག་མ་བསྐོར་བའི་སར་སླར་འཁོད་པ་ཙམ་གྱི་ཡུན་གྱི་སྲིད་དུ་བལྟ། སྲོག་ཆགས་འཕྲོ་བ་རྩྭས་བདེ་བར་བསྟན། ཆུའི་ནང་ན་སྲིན་བུ་ཡོད་པ་རྡུལ་དང་ངོ་མི་ཤེས་པའི་ཕྱིར་རྩྭ་མཆོག་གིས་བསྐུལ་ཞིང་བརྟག །གཞན་ལ་ཡང་རྩྭ་མཆོག་གིས་བསྟན། དེ་དག་མྱོས་པའི་ལམ་དུ་མི་དོར། ཆུའི་ནང་ན་སེམས་ཅན་ཡོད་དེ་སླར་བསྐྱལ་བའི་ཚེ་ཆུ་དྲག་ཏུ་དབོ་བ་ལ་སོགས་པས་སྡངས་པ་དང་སྣད་པ་དང་མྱོས་པར་མི་བྱ་བར་དལ་གྱིས་དོར། གཞན་ལ་ཡང་མ་ཡིན། ཤིག་དང་འཇི་བ་ལ་སོགས་པ་སེམས་ཅན་ཅི་དོར་ཡང་སྤངས་ཤིང་སྣད་པར་མི་བྱ་བར་དལ་གྱིས་དོར། དེ་སྟེ་མེ་མར་བྱེད་པའི་དེར་སྲོག་ཆགས་ལྟུང་ན་དེ་གཡོགས། མེ་མར་གྱི་ནང་དུ་སེམས་ཅན་མི་འཆི་བར་བྱ་བའི་ཕྱིར་གྱོ་མོ་ལ་སོགས་པ་ལེབ་ལེབ་པོ་དབུས་སུ་བུ་གུ་ཕུག་ལ་དེ་དགབ། སྨྱིག་མའི་ཚལ་བུའི་དྲ་བ་ལ་གེས་དཀར་པོའམ་ལྷང་ཚེར་གྱིས་དཀྲི་བར་དེ་ལྟར་གསུངས་སོ། །མེ་མར་དགབ་བ་སྨྱིག་མའི་ཚལ་བ་དྲ་བ་འདྲ་བར་བྲེས་ལ་རས་ཕྲན་ནམ་ཤོག་ཤོག་གམ་ལྷང་ཚེར་གྱིས་གཡོགས་པའི་ཁང་བུ་ཕུབ་ཀྱང་རུང༌། མིག་བརྒྱ་པ་ཡང་ངོ༌། །མེ་མར་གྱི་སྟེང་དུ་གཡོགས་པ་ཁམ་པ་ལ་མིག་མང་དུ་གཙགས་པའི་ཁང་བུ་ཕུབ་ཀྱང་རུང༌། ཐོག་མ་ནས་བྱས་པའམ་རྫ་མ་ལ་སོགས་པའི་གྱོ་མོ་བུ་གུ་ཅན་ནོ། །སཱུ་ཏྲ་ལྟག་མ་ལྟར་ཁམ་པའི་ཁང་བུ་བྱ་བ་ནི་ཐོག་མ་ནས་ཆེད་ཀར་བྱས་པའང་རུང་ཕྱིས་བུ་ལ་འཕྲལ་དུ་བྱས་པའང་རུང༌། སྐྲའི་ཞགས་པས་སྤྲུལ་མི་བཅིང༌། བདག་གིས་གནས་ན་སྤྲུལ་གདུག་པ་འདུག་ན་རྩྭ་དང་རྩིད་པའི་ཞགས་པས་བཅིངས་ཤིང་མི་དོར། སེ་གོལ་གྱི་སྒྲ་བྱས་ལ་བཟང་པོའི་བཞིན་མི་སྣང་བའི་ལམ་དུ་འདུག་ཤིག་ཅེས་བྱ། སྦྲུལ་གནས་སམ་ལམ་ཀ་ན་འདུག་ན་སེ་གོལ་བརྡབ་སྟེ་བཞིན་བཟང་མི་སྣང་བར་གུད་དུ་སོང་ཞེས་བྱ། མི་འདུག་ན་ར་རྐང་གི་དབྱིག་པས་དལ་གྱིས་བུམ་པའམ་རྫ་མའི་ནང་དུ་བཅུག་ལ་བུ་གུ་བྱས་ཏེ་ཁ་
བཅད་ལ་དབྱུང༌། སཱུ་ཏྲ་ལྟག་མ་ལྟར་བྱས་ཏེ་མ་བཏུབ་ན་དབྱུག་པའི་མགོ་ཁ་བྲག་ཏུ་འདུག་པས་གཉའ་བར་མ་སྣང་བར་མནན་ལ་རྫ་མའི་ནང་དུ་མི་སུབ་པར་བྱ་བའི་ཕྱིར་རྫ་མའི་ཁ་ཁབ་ལ་བུ་གུ་གཏོད་དེ་སྦྲུལ་ག་ལ་འདུག་པའི་གནས་སུ་བསྐྱལ། མི་འགྲུབ་ན་རྒྱ་ཅང་ངམ་ལྕག་བོད་དམ་དྲ་བའམ་ཐག་པའི་ཞགས་པར་དས་དཀྲིས་པས་མགྲིན་པར་བཅིང༌། དེ་དག་གིས་གཞུག་པར་བསྒོ། །སཱུ་ཏྲ་ལྟག་མ་ལྟར་རྫ་མར་གཞུག་མ་ནུས་ན་མིང་གིས་སྨོས་པ་འདི་རྣམས་ལ་ར་ད་འཇམ་པོས་དཀྲིས་ཏེ་བཏང་སླ་བར་བྱ་བའི་ཕྱིར་འགྲོལ་མིག་ཏུ་མགྲིན་པར་མ་སྣད་པར་བཏགས་ལ་སྤྲུལ་གྱི་གནས་སུ་བལ་གྱིས་དཀྲི་ཞིང་བཏང་ངོ༌། །མིང་གིས་སྨོས་པ་འདི་རྣམས་ཀྱི་མགྲིན་པར་བཅིངས་ལ་རྫ་མའི་ནང་དུ་གཞུག་ཅིང་བསྐྱལ་དུ་ཡང་རུང་ངོ༌། །སྤན་སྤུན་ནི་མི་དོར། སྦྲུལ་བསྐྱལ་བ་ཡང་གནས་མ་ཡིན་པ་དང་སྦན་སྦུན་སྤྲུལ་ལ་གནོད་པའི་སར་མི་གཞག །ཚང་དུ་ཞུགས་ཀྱི་བར་དུ་བསྡད། སྦྲུལ་ཚང་དུ་བསྐྱལ་ནས་ཀྱང་སེམས་ཅན་གཞན་ཞིག་གིས་མི་ཟོས་པར་བྱ་བའི་ཕྱིར་ཚང་དུ་སོང་གི་བར་དུ་བསྡད། ཤིག་ར་དའི་ནང་དུ་གཞུག །ཤིག་ཐང་ལ་བབ་ཅོལ་དུ་མི་དོར་བར་ར་དའི་ནང་དུ་གཞུག །དེའི་གསེབ་ཏུའོ། །ཤིག་བཅུག་པའི་ར་ད་ཡང་བབ་ཅོལ་དུ་མི་དོར་བར་རྩིག་པའི་གསེབ་ཏུ་གཞུག་སྲིན་བུ་མང་ཀུ་ལ་སྔོན་པོ་ལ་དོར། སྲིན་བུ་མང་ཀུ་ན་མི་ལ་ཟ་བ་ཞིག་ཡོད་དེ་དེ་ཡང་བབ་ཅོལ་དུ་མི་དོར་བར་རྩྭ་སྔོན་པོའི་ནང་དུ་དོར་རོ། །གྲང་མོ་ལ་ཡང་ངོ༌། །སྲིན་བུ་མང་ཀུན་ཚ་ཞིང་དྲོ་བའི་གནས་སུ་མི་གཞག་གི་གྲང་ཞིང་བསིལ་བ་དང་གྲིབ་མར་གཞག་གོ །བཏང་བའི་བུམ་བུ་སྔ་མ་རྣམས་དབབ་པའི་ཕྱིར་བཅང༌། ཆུ་བཙགས་པའི་སྲིན་བུ་སླར་ཆུའི་ནང་དུ་གཏང་བའི་ཕྱིར་བཏང་བའི་སྣོད་བཅངས་ཀྱང་ཉེས་མེད་དོ། །ཁ་ནས་ཀྱང་ཐག་བུས་གདགས་སུ་རུང༌། ཞབས་སུ་ཡང་ཐག་བུས་གདགས་སུ་རུང་བར་བྱས་ལ་ཐུར་དུ་བཏང་བའི་ཚེ་ཁའི་ཐག་བུ་ཐང་པར་བྱས་ལ་སླར་དབྱུང་བའི་ཚེ་ཞབས་ཀྱི་ཐག་བུ་ལ་གཟེང་སྟེ་དྲང་ངོ༌། །ཆུ་ཚགས་དེ་ཉིད་ཀྱིས་ཀྱང་དབབ། ཆུ་ཆགས་ཀྱིས་ཀྱང་སླར་སེམས་ཅན་བཏང་དུ་རུང་སྟེ་ཞབས་ནས་ཀྱང་ཐག་བུས་བཏགས་ཁ་ནས་ཀྱང་ཐག་
བུས་བཏགས། ས་ལ་བཏང་བའི་ཚེ་ཞབས་ཀྱི་ཐག་བུས་དྲངས་ཏེ་བཏང་ངོ༌། །ཚགས་བཤལ་བས་སྲོག་ཆགས་ཆགས་པ་དབོག་པའི་ཐབས། ཆུ་ཚགས་ལ་སྲིན་བུ་ཆགས་པ་བསལ་ཞིང་མེད་པར་བྱ་བའི་ཕྱིར་ཆུའི་ནང་དུ་མི་དྲག་པར་བཤལ་ཞིང་བཀྲུའོ། །དྲི་མ་བཀྲུ། སྐབས་སྐབས་སུ་ཆུ་ཚགས་ཀྱི་དྲི་མ་ཡང་དག་པར་བཀྲུ། རུལ་བ་མེད་པར་བསྐམ། ཆུ་ཚགས་མི་རུལ་བར་བྱ་བའི་ཕྱིར་བསྐམ། དེ་བཙིར་ན་གཉིས་ཀ་ལ་ཡང་ཕན་ནོ། །ཆུ་ཚགས་བཙིར་ན་དྲི་མ་དག་པ་དང་བསྐམ་པ་ལ་ཕན་ཏེ་གཅུ་ཞིང་ནི་མི་བཙིར། ཁ་ན་མཐོ་བའི་ཡིད་ཅེས་པ་རྙེད་པར་དགེ་འདུན་ནམ་གང་ཟག་གམ་ཆུ་ཚགས་དང་ཟད་པ་ཡིན་ཅེས་པ་ལ་ཞུགས་ན་ཡང་ངོ༌། །ཆུ་བདག་གིས་མ་བརྟགས་པར་སྤྱད་ཀྱང་ཉེས་མེད་པ་ནི་དགེ་འདུན་ནམ་གང་ཟག་གམ་ཚུལ་ཁྲིམས་དང་ལྡན་ཏེ་རྟག་ཏུ་ཆུ་འཚག་ཅིང་རྟོག་པ་དང་གང་ཟག་ཚུལ་ཁྲིམས་དང་ལྡན་པ་རྟག་ཏུ་ཆུ་འཚག་ཅིང་རྟོག་པ་དང་གསང་ཆུ་སའི་འོག་ནས་འོང་བ་སྔོན་ཆད་སྲིན་བུ་ཡོད་མེད་དེ་མ་བྱུང་སྟེ་སེམས་ཅན་མེད་པར་ཡིད་ཆེས་པ་དང་ཆུ་ཆགས་བཟང་པོ་སྲིན་བུ་ཡོད་མི་འཆོར་ཞིང་སྔོན་ཆད་ཀྱང་སྲིན་བུ་བྱུང་མ་མྱོང་བ་དང་འདི་རྣམས་ནི་རྐྱེན་ཅིག་བྱུང་ནས་མ་བརྟགས་ཤིང་མཚན་མོ་འཐུངས་ཤིང་སྤྱད་ཀྱང་ཉེས་མེད། ཉི་མ་ཤར་གྱི་བར་དུ་བླངས་པའི་དང་ཁྲོན་པ་བརྟགས་པ་བཞིན་དུ་ཞུགས་ཤིང༌། ཆུ་བཅུས་ནས་བརྟགས་ཏེ་སྣོད་ཀྱི་ནང་དུ་བཞག་པ་དང་ཁྲོན་པ་སྲིན་ཡོད་དམ་མེད་བརྟགས་ཏེ་བཞག་པ་ནི་དི་རིང་ཉི་མ་ཤར་ནས་སང་ཉི་མ་ཤར་གྱི་བར་དུ་ཉིན་ཞག་གཅིག་ཏུ་བརྟག་མི་དགོས་ཏེ་ཕན་ཆད་ནི་བརྟགས་སོ། །རྐང་པ་བཀྲུས་པ་ཕོས་ཏེ་སྟོང་པར་དགང༌། བཤང་གཅིའི་སར་རྐང་པ་དང་ཕྱི་རོལ་བཀྲུ་བའི་ཆུ་ཚགས་བྱས་ལ་སྲིན་བུ་མི་འཐུག་པའི་ཕྱིར་སྔ་མ་ཕོ་ཞིང་སྟོང་པར་མི་བཞག་པར་ཕྱི་མ་ཆུ་སར་པས་དགང༌། ཞོག་ཤིག་ཆུ་སྣོད་དང་གཞན་ཡང་ངོ༌། །ཆུ་སྣོད་གཞན་དང་སྣོད་སྤྱད་ལ་སོགས་པ་ཡང་ཁ་ཟས་དྲི་མས་འབགས་པ་ལ་སོགས་པ་བཀྲུ་བཤལ་བྱ་སྟེ་བཞག །ཆུ་སྣོད་ནི་ཆུས་དགང་ཞིང་བཞག་རུབ་མ་པ་ལ་དེར་གཏོགས་པ་དགེ་འདུན་གྱི་ན་དེ་ལ་གཏོགས། བཤང་སར་བཞག་པའི་ཆུ་སྣོད་དང་
སྣོད་སྤྱད་ལ་སོགས་པ་དགེ་འདུན་གྱི་རུབ་མ་པ་སུ་བྱེད་པའི་ལས་སུ་གཏོགས་ཏེ་རུབ་མ་པས་བསྲུངས་ཤིང་ཞལ་ཏ་བྱ། སྦྱིན་པ་དང་སྡུད་པའང་དེར་མི་གཏོགས་པ་མ་ཡིན་ནོ། །དགེ་འདུན་གྱི་སྣོད་སྤྱད་ལས་པ་བརྙན་པོར་བཏང་བ་དང་མི་དགོས་ཤིང་ལྷག་པ་སྡུད་ཅིང་སྦེད་པ་དང་བྱན་པོ་ལ་སྣོད་སྤྱད་དབོག་བ་ཡང་རུབ་མ་པའི་ལས་སུ་བྱའོ། །ཁྱིམ་པ་བརྙ་ན་སྦྱིན། དགེ་འདུན་གྱི་སྣོད་སྤྱད་ལ་ཁྱིམ་པ་བརྙ་ན་སྦྱིན། དེ་ཡོད་ན་སྤྱད་པ་ལས་སོ། །ཁྱིམ་པ་སྣོད་སྤྱད་བརྙར་སྦྱིན་པ་ནི་རྙིང་པ་ལས་སྦྱིན། རྙིང་བ་མེད་ན་སར་པ་ལས་ཀྱང་སྦྱིན། འདིར་སྦྱིན་བདག་གཙུག་ལག་ཁང་དུ་སྦྱིན་པའམ་སྨྲས་པ་མ་ཡིན་ནོ། །ཁྱིམ་པས་གཙུག་ལག་ཁང་དུ་མཆོད་སྟོན་བྱེད་ཅིང་དེའི་རྗེས་ལ་ཁྱིམ་པའི་གཉེན་བཤེས་ཀྱང་ཅིག་ཅར་གཙུག་ལག་ཁང་དུ་བསྡུས་ཏེ་མགྲོན་བྱེད་པའི་ཕྱིར་སྣོད་སྤྱད་བརྙ་ན་སྦྱིན། དགེ་སློང་ལ་སར་པ་ཐལ་བྱུང་སྦྱིན། དགེ་སློང་རྙིང་དང་གསར་དུ་ཞུགས་པ་ལ་སྣོད་སྤྱད་དང་ཁ་ཕྱིས་མེད་པ་ཞིག་ཡོད་ན་ཕྱོགས་བཅུའི་དགེ་འདུན་གྱི་དཀོར་ཡང་རུང་སྣོད་སྤྱད་ལས་ཅི་མི་བདོག་པ་ཐལ་བྱུང་སྦྱིན་ནོ། །སྣོད་ཀྱི་ཕྱིར་གནས་བསྐོ་རུབ་མ་པའི་སྣོད་སྤྱད་དང༌། དཀོར་ལ་སོགས་པ་འབྲུབ་པའི་མཛོད་ཁང་བསྔོས་ཤིང་སྦྱིན། ཟངས་དང་ཁམ་པའི་སྣོད་སོ་སོར་གཞུག །མཛོད་དུ་རུབ་མ་པས་སྦ་བརྟུལ་བྱ་བ་ནི་ཟངས་དང་ཁམ་པའི་སྣོད་སྤྱད་སྡེ་སྡེ་སོ་སོར་བཞག །ཆུ་ཞོག་ཤིག །དགེ་འདུན་གྱི་སྤྱིར་བཏུང་བ་དང་སྤྱད་པ་ལ་སོགས་པའི་ཆུ་བཞག །བབ་ཆོལ་དུ་མི་བཞག །ཆུ་དང་ཆུ་སྣོད་ལ་སོགས་པ་བབ་ཆོལ་དུ་མི་བཞག་ཁང་པ་དེའི་ཕྱིར་བྱ། ཆུ་བབ་ཆོལ་དུ་མི་གཞག་པའི་ཕྱིར་ཆུ་བཞག་བའི་གནས་ཀྱི་ཁང་པ་བྱའོ། །གཙུག་ལག་ཁང་གི་ལྷོ་ནུབ་ཀྱི་ངོས་ཀྱི་ནང་དུའོ། །ཆུ་བཞག་པའི་ཁང་པ་བྱ་བ་ནི་གཙུག་ལག་ཁང་གི་ནང་ལྷོ་ནུབ་ཀྱི་མཚམས་ཀྱི་གྲ་ནས་ཁང་པ་མིག་གཅིག་བསྔོ། སྐར་ཁུང་གདོད་ཕ་གུ་གདིང་ཆུ་ཁུང་གདོད་སྒོ་བྱ་སྒོ་ལེབ་དང་ཡང་མིག་གཞུག །ཆུ་བཞག་པའི་ཁང་པ་དེ་ཐོག་མ་བརྩིགས་པའི་ཚེ་ནས་སྐར་ཁུང་གདོད། འོག་ཏུ་སོ་ཕག་གདིང་ཆུ་ཁུང་གདོད་སྒོའི་རེ་བཞི་བྱ་སྒོ་ལེབ་གཞུག་སྒོ་ལེབ་ལ་ཡང་མིག་དང་ལག་གཟུངས་བཅའ། ཚགས་བཞག་པའི་ཕྱིར་
གདང་ཡང་ངོ༌། །ཆུ་བཞག་པའི་ཁང་པའི་ནང་དུ་ཚགས་བསྐམས་ཞིང་བཞག་པའི་གདང་བྱ། ཤིང་ཁྲི་གཞག །ཁང་བུའི་ནང་དུ་ཆུ་སྣོད་ཀྱི་གཞི་ཤིང་ཁྲི་གཞག་ཕག་བུའི་སྟེགས་བུ་ཡང་ངོ༌། །ཆུ་བཞག་བའི་གཞི་ཕག་བུ་ལ་སྟེགས་བུར་བྱས་ཀྱང་རུང་ངོ༌། །ཤོང་ཤོང་པོར་རོ། །སྟེགས་བུ་ལ་ཆུ་སྣོད་འཆགས་པར་བྱ་བའི་ཕྱིར་སོ་སོར་ཤོད་བུར་བྱ། སྤྱད་པའི་ཆུ་སྣོད་ཡན་ཆད་དག་པར་བྱ། ཆུས་སྣོད་དང་སྤྱད་པའི་སྣོད་སྤྱད་ལ་སོགས་པ་ཁ་ཟས་དང་དྲི་མས་འབགས་པ་དག་པར་བཀྲུ་ཞིང་བྱི་བ་དང་བྱ། གཙང་སྦྲར་རོ། །སྤྱད་པའི་སྣོད་སྤྱད་ཀུན་དྲི་མ་དང་ཁ་ཟས་དང་མི་གཙང་བ་ལ་སོགས་པས་མ་འབགས་པར་གཙང་སྦྲ་བྱ། བཏུང་བའི་ཆུ་ཡང་ངོ༌། །བཏུང་བའི་ཆུ་ཡང་རྡུལ་དང་དྲི་མ་དང༌། ཁ་ཟས་ཀྱིས་མ་འབགས་པར་གཙང་སྦྲ་བྱ། མ་བརྟགས་པའི་གོས་དང་ལག་པས་མི་བྲིམ། གོས་དང་ལག་པ་ཁ་ཟས་དང་དྲི་མས་འབགས་ཤིང་མ་བརྟགས་པས་ཁ་ཟས་དང་ཆུ་མི་བྲིམ། དུས་དུས་སུ་ཆུ་སྣོད་ཡང་བཀྲུ། ཆུ་སྣོད་དང་ཀུན་དེ་ལ་སོགས་པ་དུས་དུས་སུ་ནང་བཀྲུ། ཟབ་ན་རྩྭ་ཨུ་ཤི་རའམ་ཅུ་ཚེའི་སོག་མའམ་ཤིང་ཤུན་ནམ་ར་དས་ཤིང་བུའམ་ཤིང་ཤུན་ནམ་ར་དས་ཤིང་བུ་ལ་བཅིངས་ཏེའོ། །ཀུན་ཏེ་ལྟ་བུ་ཁ་ཆུང་ཞིང་མགྲིན་པ་རིང་བ་བཀྲུ་བ་དང་རྫ་མ་ཆེན་པོའི་ལག་གིས་ཕྱིས་མི་སླེབ་པ་ལ་མིང་གིས་སྨོས་པ་འདི་རྣམས་ཤིང་གིས་ཏོར་ཏོ་ལ་བཅིངས་ཏེ་བསྔོགས་ཤིང་བཀྲུའོ། །དེ་དེ་དག་ཏུ་ཁ་ཟས་ཀྱིས་རེག་པ་མི་བསྲུང་བར་མི་བྱ། ཆུ་སྣོད་དང་ཆུ་སྣོད་བཀྲུ་བའི་རྫས་དེ་རྣམས་ལ་ཐོག་མ་ནས་ཁ་ཟས་ཀྱིས་མ་རེག་པར་བསྲུང༌། བསྐམ་པ་ཡང་ངོ༌། །སྣོད་སྤྱད་དང་ཆུ་སྣོད་དུས་དུས་སུ་བཀྲུ་ཞིང་བསྐམ་མོ། །དེར་མི་འཕོངས་པའི་ཕྱིར་ལྷན་ཅིག་ཏུ་མ་ཡིན་ནོ། །སྣོད་སྤྱད་སྐེམ་པའི་ཚེ་བྲེལ་བར་མི་འགྱུར་བའི་ཕྱིར་ཁ་ཅིག་སྤྱད་དུ་ཡོད་བར་བྱས་ལ་ཁ་ཅིག་བསྐམ་མོ། །ཆུ་ཡིར་གཏོགས་པ་ནི་གནས་བྱེད་བ་ལ་གཏོགས་སོ། །ཆུའི་ལས་སུ་བྱ་དགོས་པ་འདི་རྣམས་གནས་བརྟན་དང་མཁན་པོས་མི་བྱའི་སློབ་མ་དང་གནས་འཆའ་བའི་དགེ་སློང་གཞོན་ནུས་བྱའོ། །སྲོག་ཆགས་དང་བཅས་པའི་ཕྲ་མོ་ལ་སོགས་པར་ཆུད་པའོ། །སྲོག་ཆགས་དང་བཅས་པའི་ཆུ་སྤྱོད་པའི་
ལྟུང་བ་འདུལ་བ་ཕྲ་མོའི་ནང་ནས་འབྱུང་བའི་མདོ།། །།སྨྱེན་གནས་ཀྱི་ལྟུང་བ་ལ་འཆད་དེ། འྦྷྲིད། ཤེས་བཞིན་པ་ལས་ལྟུང་སྟེ་ཡན་ལག་གཅིག །མངོན་སུམ་དུ། ཁྱོ་དང་ཆུང་མ་ལྷན་ཅིག་འཁོད་པའི་གན་དུ་སོང་བ་ལས་ལྟུང་སྟེ་ཡན་ལག་གཅིག །རྩོམ་འདོད་པའོ། །ཁྱོ་ཤུག་གཉིས་ཉལ་པོ་བྱེད་པར་ཆས་ཤིང་རྩོམ་པ་ལས་ལྟུང་སྟེ་ཡན་ལག་གཅིག །འདུས་པའོ། །ཁྱོ་ཤུག་གཉིས་ཉལ་པོ་བྱེད་པའི་ཕྱིར་འདུས་ཏེ་ལྷན་ཅིག་འཁོད་པ་ལས་ལྟུང་སྟེ་ཡན་ལག་གཅིག །ཕོ་དང་མོའོ། །ལྷན་ཅིག་ཏུ་འདུས་ཏེ་འཁོད་པ་ཕོ་གཉིས་འདུས་ཏེ། འཁོད་པ་ལ་ནི་མི་ལྟུང་གི་ཕོ་གཅིག་མོ་གཅིག་འཁོད་པ་ལས་ལྟུང་བྱེད་ཡན་ལག་གཅིག །ཁྱིམ་པ་ལའོ། །ཕོ་དང་མོ་ལྷན་ཅིག་འཁོད་པ་དེ་དགེ་སློང་དང་མུར་འདུག་གི་རབ་ཏུ་བྱུང་བ་མ་ཡིན་གྱི་ཁྱིམ་པ་ལས་ལྟུང་སྟེ་ཡན་ལག་གཅིག །གཞན་གྱི་གནས་ན། དགེ་སློང་གི་གནས་དང་གཙུག་ལག་ཁང་ལ་མི་བྱའི་ཁྱིམ་པའི་གནས་ན་མི་ཚངས་པར་སྤྱད་པ་བལྟས་པ་ལས་ལྟུང་སྟེ་ཡན་ལག་གཅིག །རུང་ཞིང༌། རྩིག་པའམ་སབ་མོས་ཆོད་དམ་ཁང་པའི་ནང་ངམ་ས་སྲོས་ཏེ་དབེན་ཞིང་སྤྱད་དུ་རུང་བ་དང༌། གཞན་མེད་དེ་སྦྱོར་བ་ནའོ། །ཁྱོ་ཤུག་གཉིས་སུ་འཁོད་ཅིང་མི་གཞན་མེད་པ་དང་གཞན་ཀྱང་ཡོད་ཀུན་མི་ཚངས་སྤྱོད་པ་དང་འདི་རྣམས་ལ་ཡན་ལག་གཅིག །མངོན་པར་བརྟག་པར་འདུག་ནའོ། །མི་མི་ཚངས་བར་སྤྱོད་པའི་གན་དུ་ཁོང་གིས་ཀྱང་མཐོང་བདག་གིས་ཀྱང་མཐོང་བར་མངོན་པར་སོང་ཞིང་བརྟག་པ་ལྟུང་བར་འགྱུར་ཏེ་ཡན་ལག་གཅིག་ཡན་ལག་འདི་རྣམས་དང་ལྡན་ན་སྨྱེན་གནས་ཀྱི་ལྟུང་བའོ། །སྨྱེན་གནས་སུ་འདུག་པའོ། །སྨྱེན་གནས་སུ་འདུག་པའི་ལྟུང་བ་རྫོགས་སོ།། །།གབ་པའི་ལྟུང་བ་ལ་འཆད་དེ། དབེན་པར་རྟོག་ཅིང་འདུག་པ། ཁྱོ་ཞིག་མི་ཚངས་པར་སྤྱོད་པ་ལ་འཇབ་ཅིང་འགྲེངས་ཏེ་ཉན་པ་ན་ལྟུང་སྟེ་ཡན་ལག་གཅིག །གཡོགས་པ་དང་བཅས་པ། རྩིག་པའམ་སབ་མོས་བསྐོར་བའམ་ཁང་པའམ་ས་སྲོས་པའི་ནང་ན་མི་ཚངས་པར་སྤྱོད་པ་ལས་དྲུང་ནས་མ་མཐོང་བར་བལྟ་ཞིང་ཉན་པ་ལས་ལྟུང་སྟེ་ཡན་ལག་གཅིག །འཇིག་པའི་དབང་
ཡང་མ་ཡིན། གཅན་གཟན་ནམ་ཆོམ་པོ་ལ་སོགས་པའི་རྐྱེན་བྱུང་སྟེ་མི་ཚངས་པར་སྤྱོད་པའི་གན་དུ་སོང་བ་མ་གཏོགས་ཀྱི་ཆེད་ཀར་ལྟར་སོང་བ་ལས་ལྟུང་སྟེ་ཡན་ལག་གཅིག །ལྟག་མ་སྨྱེན་གནས་ཀྱི་ཡན་ལག་ཀུན་ཀྱང་འདིར་གཏོགས་ཏ་ཡན་ལག་འདི་ཀུན་དང་ལྡན་ན་གབ་པའི་ལྟུང་བའོ། །མཐོང་བ་མ་མཐོང་ན་ཉེས་བྱས་པའོ། །ཉལ་པོ་བྱེད་པ་ལ་འཇབ་ཅིང་ལྟ་བ་མིག་གིས་ཀྱང་མ་མཐོང་སྒྲ་ཡང་མ་ཐོས་པར་ཉན་པ་ནི་ཉེས་བྱས་སུ་འགྱུར་རོ། །གནས་གཞན་ནས་རྟོག་ནའོ། །རྒྱང་རིང་པོ་ཞིག་ནས་བཞབས་ཏེ་ལྟ་ཞིང་ཉན་ནའང་ཉེས་བྱས་སུ་འགྱུར་ཏེ་འོག་ནས་འཆད། ལྟ་བའི་སྤྱོད་ཡུལ་ནི་གནས་ཀྱི་མཐའོ། །མི་ཚངས་པར་སྤྱོད་པ་དང་བར་དུ་རྩིག་པས་ཆོད་དམ་རྩིག་པས་མ་ཆོད་ཀྱང་བར་རྒྱང་རིང་པོ་ན་མི་ཚངས་པར་སྤྱོད་པ་མིག་གིས་མཐོང་བ་དང་སྒྲ་ཐོས་པ་ཙམ་ན་ཉན་ཅིང་བལྟ་ན་ཉེས་བྱས། མཛོད་ཀྱང་ནང་དུ་ཆུད་དོ། །མཛོད་ཀྱི་ནང་ན་མི་ཚངས་པར་སྤྱོད་པ་ལ་ཉལ་ཁང་ངམ་བཀད་ས་ནས་ཉན་ཅིང་བལྟས་ན་ཡང་ལྟུང་བའོ། །གྲོང་བར་ནི་ཐ་དད་པའོ། །ཁྱིམ་ཁྱེར་གཅིག་གི་ནང་ན་མི་མང་པོ་ཞིག་མི་ཚངས་པར་སྤྱོད་པ་ནོར་དང་ལྟ་བ་བྱེ་བ་ཞིག་ན་མི་ཚངས་པར་དུ་སྤྱོད་པ་བཞིན་དུ་ལྟུང་བ་རེ་རེར་འགྱུར་རོ། །སྨྱེན་གནས་སུ་འདུག་པའོ། །གབ་པའི་ལྟུང་བ་རྫོགས་སོ།། །།གཅེར་བུའི་ལྟུང་བ་ལ་འཆད་དེ། བུད་མེད་དམ་སྐྱེས་པ་ལས་སོ། །མུར་འདུག་གཅེར་བུ་ཕོ་ཡང་རུང་མོ་ཡང་རུང་ཟན་བྱིན་པ་ལས་ལྟུང་བར་འགྱུར་ཏེ་ཡན་ལག་གཅིག །མ་གཏོགས་པ་ན་གཉེན་དང་རབ་ཏུ་འབྱུང་བར་འདོད་པ་དང་ནད་པའོ། །བདག་གི་གཉེན་མུར་འདུག་གཅེར་བུར་འདུག་པ་དང་མུར་འདུག་གཅེར་བུ་ལས་ཁོའི་ཆས་བོར་ཏེ་རབ་ཏུ་འབྱུང་བར་འོངས་པ་དང་མུར་འདུག་གཅེར་བུ་ནད་པ་དང་འདི་རྣམས་ལ་ཟས་བྱིན་པ་ནི་མི་ལྟུང་གི་འདི་རྣམས་མ་ཡིན་པ་ལས་ལྟུང་སྟེ་ཡན་ལག་གཅིག །འདིའི་ཚུལ་དུ་མ་ཡིན་པ་རབ་ཏུ་འབྱུང་བ་གོས་མེད་པ་ལས་སོ། །སངས་རྒྱས་ཀྱི་ཆོས་ལ་རབ་ཏུ་འབྱུང་བ་མ་ཡིན་པ་མུར་འདུག་པའི་ཆོས་ལ་རབ་ཏུ་འབྱུང་བའི་གཅེར་བུ་གོས་མེད་པ་ལ་བྱིན་པ་ལས་ལྟུང་སྟེ་ཡན་ལག་གཅིག །ལུས་སམ་ལུས་
ཀྱིར་གཏོགས་པའོ། །བདག་གི་ལུས་ཀྱི་ཡན་ལག་ལག་པས་བྱིན་ཀྱང་རུང་ལུས་ལ་གཏོགས་པ་གཟར་བུའམ་སྣོད་སྤྱད་ཀྱིས་བྱིན་ཀྱང་རུང་པ་ལས་ལྟུང་སྟེ་ཡན་ལག་གཅིག །བཟའ་བ་དང་བཅའ་བ་ལས་སོ། །བཟའ་བ་དང་བཅའ་བ་བྱིན་པ་ལས་ལྟུང་བར་འགྱུར་ཏེ་ཡན་ལག་གཅིག །བརྟག་པ་ལས་སོ། །དགེ་སློང་གི་ཁ་ཟས་སུ་བརྟག་པ་སྒོག་པའམ་ཆང་ལ་སོགས་པ་མ་ཡིན་པ་བྱིན་པ་ལས་ལྟུང་སྟེ་ཡན་ལག་གཅིག །བདག་དང་དེ་ལ་ཡང་ངོ༌། །དགེ་སློང་ཡང་བཟར་རུང་བ་ལས་ལྟུང་སྟེ་མུར་འདུག་ཀྱང་བཟར་རུང་བ་ལས་ལྟུང་སྟེ་ཡན་ལག་གཅིག །གཅིག་བཟར་རུང་གཅིག་བཟར་མི་རུང་བ་བྱིན་པ་ཡང་ལྟུང༌། གཉིས་ཀ་བཟར་མི་རུང་བ་བྱིན་པ་ནི་ཉེས་བྱས་སོ། །སྡིག་པར་བལྟས་པ་བཟློག་པའི་ཕྱིར་བྱིན་པ་མ་གཏོགས། དེར་རིག་གིས་ཆོས་ལས་བཟློག་སྟེ་སངས་རྒྱས་ཀྱི་ཆོས་ལ་དབྱུང་བར་བྱ་བའི་ཕྱིར་ཟན་བྱིན་པ་ནི་ཉེས་མེད་དོ། །བདག་གིས་བྱིན་ནའོ། །བདག་ཉིད་ཀྱི་ལག་ནས་བྱིན་པ་ལས་ལྟུང་སྟེ་ཡན་ལག་གཅིག །མ་བརྟགས་པ་ནི་ཉེས་བྱས་པའོ། །མུར་འདུག་དང་དགེ་སློང་གཉིས་ཀ་བཟར་མི་རུང་བ་མ་བརྟགས་པའི་ཟས་ཤིག་བྱིན་པ་ནི་ཉེས་བྱས། སྦྱིན་དུ་བཅུག་ན་ཡང་ངོ༌།། གཞན་ཞིག་ལ་བསྐུར་ཏེ་མུར་འདུག་ལ་སྦྱིན་དུ་བཅུག་པའང་ཉེས་བྱས། བགོས་ན་ཡང་ངོ༌། །བདག་ཅག་ཟན་ཟ་བའི་དྲུང་ན་མུར་འདུག་ཟན་འདོད་པའི་ཕྱིར་འཁོད་དེ་ཁྲེལ་བལྟས་ཀྱི་ཕྱིར་བདག་གི་ཟན་ལ་བཅད་དེ་བྱིན་ནའང་ཉེས་བྱས། གོས་མེད་པ་ལ་སྦྱིན་པའོ། །གཅེར་བུ་ལ་ཟས་བྱིན་པའི་ལྟུང་བ་རྫོགས་སོ།། །།གཡུལ་གྱི་ལྟུང་བ་ལ་འཆད་དེ། དམག་འདོད་ཅིང༌། དམག་འདོད་པ་ལས་ལྟུང་བར་འགྱར་ཏེ་ཡན་ལག་གཅིག །གཡུལ་བལྟ་བའི་ཕྱིར་རོ། །དམག་འདོད་པའི་ཕྱིར་གཡུལ་བལྟར་འདོད་དེ་ལྟར་སོང་བ་ལས་ལྟུང་སྟེ་ཡན་ལག་གཅིག །མ་གཏོགས་པ་ནི་རྒྱལ་པོ་དང་རྒྱལ་མོ་དང་གཞོན་ནུ་དང་བློན་པོ་དང་ཞང་བློན་དང་སྟོབས་ཀྱི་མཆོག་དང་གྲོང་འདབ་དང་སྐྱེ་དགུས་སྨས་པ་དང་བར་ཆད་བྱུང་པའི་དབང་གིས་ནའོ། །ལྟུང་བར་མི་འགྱུར་བ་མིང་གིས་སྨོས་པ་འདི་རྣམས་ཀྱིས་མི་འགྲོར་མི་རུང་སྟེ་སང་
བ་ནི་ཉེས་མེད་དེ་འདི་རྣམས་ཀྱི་རྐྱེན་མེད་པར་ལྟར་སོང་བ་ལས་ལྟུང་བར་འགྱུར་ཏེ་ཡན་ལག་གཅིག །ཞུགས་པ་ལས་སོ། །གཡུལ་ལྟར་འགྲོ་བའི་ཕྱིར་ཆེད་དུ་སོང་བ་ལས་ལྟུང་སྟེ་ཡན་ལག་གཅིག །མཚམས་ཀྱི་མཐའ་འདས་ཏེ་མཐོང་ནའོ། །བལྟར་འགྲོ་བའི་ཕྱིར་བདག་གི་གནས་ལས་ཀྱང་འཕགས་གཡུལ་ཡང་མཐོང་བ་ལས་ལྟུང་སྟེ་ཡན་ལག་གཅིག །ཡན་ལག་འདི་རྣམས་དང་ལྡན་ན་གཡུལ་ལྟ་བའི་ལྟུང་བར་འགྱུར། གཡུལ་ལྟ་བའོ། །གཡུལ་ལྟ་བའི་ལྟུང་བ་རྫོགས་སོ།། །།ཞག་གཉིས་ཀྱི་ལྟུང་བ་ལ་འཆད་དེ། དེ་དག་མེད་པར་དེར་ཉིན་མཚན་གཉིས་རངས་པས་ལྷག་པར་གནས་པའོ། །རྐྱེན་གོང་ནས་སྨོས་པ་རྣམས་ལྟ་བུ་ཞིག་གིས་བཀུག་སྟེ་གཡུལ་གྱི་ཁྲོད་དུ་འོངས་ནས་རྐྱེན་དེ་རྣམས་ཀྱིས་མ་བཏང་བ་ནི་མ་གཏོགས་ཏེ་རྐྱེན་དེ་རྣམས་མ་གཏོགས་ཤིང་མེད་པར་གཡུལ་ལྟ་བའི་ཕྱིར་ཞག་གཉིས་ལས་རིང་དུ་འདུག་སྟེ་ཞག་གསུམ་གྱི་སྐྱ་རེངས་བྱུང་ན་ལྟུང་བའོ། །དེ་ཕྱིན་ཆད་ཞག་རེ་ལྟུང་བ་རེ་རེར་འགྱུར་རོ། །མཚན་མ་མེད་ན་སྔ་མ་ཡང་ངོ༌། །ལྟག་མ་གཡུལ་ལྟ་བའི་ལྟུང་བ་ཡང་རྐྱེན་མིང་གིས་སྨོས་པ་རྣམས་ཀྱིས་མ་བཀུག་བར་ཞག་ལོན་ན་ལྟུང་བར་འགྱུར་རོ། །གཡུལ་དུ་གནས་པའོ། །ཞག་གཉིས་ཀྱི་ལྟུང་བ་རྫོགས་སོ།། །།ཤོམ་པ་ལ་འཆད་དེ། །དམིག་ཡན་ལག་ལ་བྱེད་དོ། །རྟ་དང་མི་དང་བལ་གླང་དང་ཤིང་རྟའི་དམག་རྣམ་བཞི་ལས་ལྟུང་བར་འགྱུར་ཏེ་ཡན་ལག་གཅིག །བར་ཆད་ཀྱི་དབང་མ་ཡིན་བས་སོང་བའོ། །བདག་ལ་འཇིགས་པའི་རྐྱེན་མ་བྱུང་བ་དང་ལྟག་ནས་རྒྱལ་པོ་ལ་སོགས་པས་བོས་པའི་རྐྱེན་མེད་པར་སོང་བ་ལས་ལྟུང་བར་འགྱུར་ཏེ་ཡན་ལག་གཅིག །འདུས་པའམ་བྲལ་བ་ཡང་ངོ༌། །དམག་རྣམས་བཞི་ཀུན་འདུས་པའང་རུང་བཞི་ལས་གག་ཀྱང་རུང་སྣ་གཅིག་གིས་རྒོལ་བར་ཤོམ་པ་ལ་བལྟས་ནའང་ལྟུང་བར་འགྱུར་རོ། །བཤམས་པ་ལས་སོ། །དམག་རྒོལ་བར་གོ་ཆ་དང་རྒྱན་དང་མཚོན་ཆ་ལ་སོགས་པ་ཐོགས་ཏེ་བཤམས་པའི་ནད་དུ་ཞུགས་པ་ལས་ལྟུང་བར་འགྱུར་ཏེ་ཡན་ལག་གཅིག །རྩ་བས་ན་རྩ་བའོ། །
དམག་རྒོལ་བར་བཤམས་ཟིན་ནས་འཐབ་མོ་འགྱེད་པ་ལ་བལྟས་ན་ལྟུང༌། སྦྱོར་བ་ནི་ཉེས་བྱས་པའོ། །དམག་ལྟ་བར་འགྲོ་བར་སེམས་ཤིང་སྦྱོར་བ་ནི་ཉེས་བྱས་སོ། །མ་བཤམས་པ་དང་གཉིས་ཀ་ཡང་ཉེས་བྱས་པའོ། །དམག་རྒོལ་དུ་འདོང་བར་དམག་མི་གཞི་ནས་ཆས་ཏེ་འདོང་བ་ལ་བལྟས་ནའང་ཉེས་བྱས། གཞི་ནས་ནི་འཕགས་ཟིན་གྱི་ཁྲོམ་གྱི་གཞིར་ཚོགས་བྱེད་ཅིང་ཕོག་པ་ལ་བལྟས་ནའང་ཉེས་བྱས་རེག་བཤམས་ལྟ་བའི་ཕྱིར་ཞུགས་མཚམས་ཀྱི་མཐའ་འདས་མཐོང་ན་རྩ་བའོ། །དམག་རྒོལ་ཞིང་འཐབ་པ་ལས་མ་བལྟས་སུ་ཟིན་ཀྱང་དམག་མི་རྒལ་བར་བཤམས་ཤིང་ཆས་ཏེ་འདོད་པ་ལ་ཕྱུགས་ལ་ཀུ་རེ་བྱེད་ཅིང་ཀླན་ཀ་བཙལ་བའི་ཕྱིར་རེག་བས་ཀྱང་ལྟུང༌། གཡུལ་སྤྲད་དེ་འཐབ་པ་ལ་བདག་གི་གནས་ནས་མཐོང་བར་བལྟས་པས་ཀྱང་ལྟུང་ངོ༌། །མ་ཞུགས་པར་ན་འབྲི་བའོ། །དམག་མི་འཐབ་ཏུ་འདོང་སྟེ་གོ་ཆ་དང་མཚོན་ཆ་ལ་སོགས་པ་ཐོགས་ཤིང་མ་བཤམས་པ་ཞིག་མ་བལྟས་ན་ཉེས་བྱས། བལ་གླང་དང་རྟ་དང་བྱ་གག་དང་འུར་པ་དང་ཐིབ་དང་བུད་མེད་སྐྱེས་པ་འཐབ་པ་ལ་སོགས་པ་མི་བྱ་བ་བྱེད་དུ་མི་གཞུག་མི་བལྟ། མིང་གིས་སྨོས་པ་འདི་རྣམས་བདག་གིས་འཐབ་ཏུ་བཅུག་སྟེ་བལྟས་ཀྱང་རུང་གཞན་ལ་འཐབ་ཏུ་བཅུག་སྟེ་བལྟས་ཀྱང་རུང་སྟེ་ཉེས་བྱས། འདི་རྣམས་མ་གཏོགས་པར་གཞན་འཐབ་པ་ལ་བལྟས་ནའང་ཉེས་བྱས། དམག་གི་ཡན་ལག་མྱོང་བའོ། །དམག་ཤོམ་པ་ལ་བལྟས་པའི་ལྟུང་བ་རྫོགས་སོ།། །།འཚོག་པའི་ལྟུང་བ་ལ་འཆད་དེ། སེམས་འཁྲུགས་པས་སོ། །སེམས་འཁྲུགས་ཤིང་ཁྲོས་ནས་བརྡེགས་པ་ལས་ལྟུང་སྟེ་ཡན་ལག་གཅིག །ལུས་དང་ལུས་ཉིད་ཀྱིས་བརྡེགས་ཀྱང་ལྟུང༌། དེ་ལས་བཏང་བ་དང༌། ལུས་ཀྱིས་རྡོ་དབྱིག་ལ་སོགས་པ་འཕངས་ཏེ་བཏང་ནའང་ལྟུང༌། གཏོགས་པ་ལུས་ལ་ལག་ཆ་ཐོགས་པས་བརྡེགས་ཀྱང་ལྟུང༌། གང་སུ་ལ་ཡང་ཆུང་དུ་ན་རྐང་པའི་མཐེ་བོས་སམ། ལུས་ཉིད་ཀྱིས་བརྡེགས་པ་ནི་རྐང་བའི་མཐེ་བོའམ། མཛུབ་མོའི་བེམ་ཏོལ་ཙམ་ཡན་ཆད་ཀྱིས་བརྡེག་པ་ཡང་ལྟུང་ངོ༌། །ཡུངས་ཀར་རམ། ལུས་ཀྱིས་འཕངས་ཏེ་བཙོག་
པ་ནི་ཡུངས་ཀྱི་འབྲུམ་བུ་ཙམ་ཡན་ཆད་ཀྱིས་བརྡེག་པ་ཡང་ལྟུང་ངོ༌། །འཇག་མ་དག་གིས་བརྡེགས་པའོ། །ལུས་ལ་གཏོགས་པའི་ལག་ཆས་བརྡེགས་པ་ནི་རྩྭའམ་ཕྱགས་མས་བརྡེགས་པ་ཙམ་གྱིས་ཀྱང་ལྟུང་ངོ༌། །འདི་རྣམས་གང་གིས་བརྡེགས་ཀྱང་རུང་ལྟུང་བར་འགྱུར་ཏེ་ཡན་ལག་གཅིག །དགེ་སློང་ནའོ། །དགེ་སློང་བརྡེགས་པ་ལས་ལྟུང་བར་འགྱུར་ཏེ་ཡན་ལག་གཅིག །ཕ་རོལ་ལའོ། །དགེ་སློང་ཕ་རོལ་པོ་བརྡེགས་པ་པར་འགྱུར་ཏེ་ཡན་ལག་གཅིག །འོག་མ་གསུམ་ཡང་པོ། །གཟའ་དང་ཉེས་སྨོས་དང་བདེ་བའི་ལྟུང་བ་གསུམ་ཡང་ཕ་རོལ་དགེ་སློང་ཡིན་པ་ལས་ལྟུང་བར་འགྱུར་རོ། །རེག་ནའོ། །བརྡེགས་པ་ཕ་རོལ་ལ་ཕོག་ཅིང་རེག་བ་ལས་ལྟུང་བར་འགྱུར་ཏེ་ཡན་ལག་གཅིག་སྟེ་ཡན་ལག་འདི་རྣམས་དང་ལྡན་ན་ལྟུང་བའོ། །བསྣུན་པ་སོ་སོར་རོ། །བརྡེགས་པ་ནི་སོར་མོ་དང་འབྲུམ་བུ་དང་རྩ་ཉག་མ་རེ་རེ་ལ་ལྟུང་བ་རེ་རེར་འགྱུར་རོ། །ཁུ་ཚུར་གྱིས་བརྡེགས་པ་ནི་ལྟུང་བ་གཅིག །མ་ཕོག་ན་ཉེས་བྱས། བརྡེག་པའི་ཕྱིར་བསྣུན་ཅིང་འཕངས་པ་ལས་མ་ཕོག་པ་ནི་ཉེས་བྱས་ཏེ་འབྲུ་རེ་ཉེས་བྱས་རེ་རེ། གཞན་དུ་བསྣུན་ན་གཞན་དུ་མ་བསྣུན་ཀྱང་ངོ༌། །བདག་འདོད་ཆགས་ལངས་ཏེ་ཕོ་མཚན་བརྡུངས་སམ་བཅད་པ་ནི་ཉེས་བྱས། དགེ་སློང་ཅིག་འདོད་ཆགས་ལངས་ཏེ་ཕོ་མཚན་བརྡུངས་པ་ལས་འདོད་ཆགས་ཀྱི་སེམས་བརྡུངས་ཤིག་ཕོ་མཚན་བརྡུངས་ཀྱང་མི་ཕན་ནོ་ཞེས་སྤྱོས་ནས་ཕྱིན་ཆད་བརྡུངས་ན་ཉེས་བྱས་ཞེས་བཅས། །ཀ་བ་ལ་བསྣུན་པར་མི་སྦྱིན། ཀ་བ་ལ་ཐལ་མོས་བསྣུན་ན་སོར་མོ་རེ་རེ་ཉེས་བྱས་རེ་རེར་འགྱུར། དྲུག་སྡེས་ཀ་བ་ལ་ཐལ་མོ་བརྡབས་ཏེ་ཀ་བ་འགུལ་བ་ལས་བཅས། རྩིག་པ་དང་ས་དང་ཤིང་དང་གཞན་ལ་ཡང་མ་ཡིན་ནོ། །ཀ་བ་ལ་ཐལ་མོས་བསྣུན་ན་ཉེས་བྱས་སུ་འགྱུར་བ་བཞིན་དུ་རྡོ་ཤིང་ཅི་ལ་བསྣུན་ཀྱང་ཉེས་བྱས་སུ་འགྱུར་ཏེ་ཁྲོ་སེམས་དང་ཡོངས་པ་དང་རྩེད་མོའི་ཕྱིར་བསྣུན་པ་ནི་ཉེས་བྱས་དགོས་ཤིང་དོན་གྱི་ཕྱིར་བརྡབས་པ་ནི་ཉེས་མེད། བསྣུན་པའོ། །འཚོག་པའི་ལྟུང་བ་རྫོགས་སོ།། །།གཟས་པའི་ལྟུང་བ་ལ་འཆད། བསྣུན་
པ་གཟས་པ། བསྣུན་པ་ལྟར་བསྡིགས་པའི་ཕྱིར་བཙོག་པར་གཟས་པ་ནི་ལྟུང་བ་སྟེ་ཡན་ལག་དང་བཤད་པ་ཐམས་ཅད་ལྟག་མ་འཚོག་པའི་ལྟུང་བ་དང་འདྲའོ། །རྫས་སོ་སོར་རོ། །གཟས་ན་སོར་མོ་དང་འབྲུ་དང་རྩ་ཉག་མ་རེ་རེ་ལྟུང་བ་རེ་རེར་འགྱུར་རོ། །གཟས་པའོ།། གཟས་པའི་ལྟུང་བ་རྫོགས་སོ།། །།ཉེས་སྨོས་ལ་འཆད་དེ། ཕས་ཕམ་པ་དང་དགེ་འདུན་གྱི་ལྷག་མའོ། །ཕས་ཕམ་པ་དང་དགེ་འདུན་གྱི་ལྷག་མ་བཅབས་པ་ལས་ལྟུང་བར་འགྱུར་ཏེ་ཡན་ལག་གཅིག །མ་གཏོགས་པ་ནི་མི་བདེ་བ་དང་དགེ་སྦྱོང་དང་ཚངས་པར་སྤྱོད་པའི་བར་ཆད་དང་དགེ་འདུན་འཁྲུགས་པར་དོགས་པའི་དབང་དུ་གཏོགས་པའོ། །ལྟུང་བར་མི་འགྱུར་བ་ནི་ཕས་ཕམ་པ་དང༌། དགེ་འདུན་གྱི་ལྷག་མ་བྱུང་བ་མཐོལ་ན་བདག་ལ་མི་བདེ་ཞིང་གནོད་པར་འགྱུར་བ་དང༌། དགེ་སྦྱོང་དང་དགེ་སློང་གྲོགས་ལ་དགེ་བ་སྤྱོད་པའི་བར་ཆད་དུ་འགྱུར་ཞིང་མི་བདེ་བ་དང་དགེ་འདུན་འཁྲུགས་པར་འགྱུར་དུ་དོགས་པར་འདི་རྣམས་ཀྱི་རྐྱེན་ལྟ་བུ་ཞིག་གི་ཕྱིར་མ་མཐོལ་ཅིང་བཅབས་པ་ནི་ཉེས་མེད་དེ་རྐྱེན་འདི་རྣམས་མེད་པ་ལས་ལྟུང་སྟེ་ཡན་ལག་གཅིག །སྦས་པའོ། །ཉེས་པ་དེ་ཤེས་བཞིན་དུ་བཅབས་པ་ལས་ལྟུང་བར་འགྱུར་ཏེ་ཡན་ལག་གཅིག །ཞག་གི་མཐར་ནའོ། །ཞག་གཅིག་གི་སྐྱ་རེངས་བྱུང་བ་ལས་ལྟུང་བར་གྱུར་ཏེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ལྟུང་བར་འགྱུར་ཏེ། སྔར་ནི་ཉེས་བྱས་པའོ། །བཅབས་པར་བསམས་ན་སྐྱ་རེངས་མ་བྱུང་གི་བར་དུ་ཉེས་བྱས། ཉེས་པ་གཞན་ཡང་ངོ༌། ལྟུང་བ་དང་ཉེས་བྱས་ལ་སོགས་པ་གཞན་ལ་ཡོད་ཅིང་བྱུང་བ་ཤེས་ཏེ་བཅབས་ན་ཉེས་བྱས། །ཁ་ན་མཐོ་བ་སྦེད་པའོ། །དགེ་སློང་གི་ཉེས་པ་བཅབས་པའི་ལྟུང་བ་རྫོགས་སོ།། །།ལྟུང་བའི་བཅུ་སྟེ་གཅིག་འདས་སོ། །བདེ་བའི་ལྟུང་བ་ལ་འཆད་དེ། ནད་ཀྱི་གསོས་ཀྱི་ཕྱིར་ནི་མ་གཏོགས་ཏེ། དགེ་སློང་ན་བ་ལ་ཕན་པའི་ཕྱིར་ཟན་བཅད་པ་དང༌། སྨན་བྱ་བའི་ཕྱིར་ཟན་མ་བྱིན་པ་ནི་ཉེས་མེད་དོ། །བསམས་ནས་ཁྱིམ་པའི་སྦྱིན་བདག་གི་ཟས་གཅོད་པར་བྱེད་པའོ། །དགེ་སློང་ལ་ཆེད་ཀར་ཟན་གཅད་པར་བསམས་ནས་ཁྱིམ་པའི་
གནས་སུ་དགེ་སློང་ལ་ཟན་མ་བྱིན་ཞིང་བཅད་ན་ལྟུང་བའོ། །ནན་ད་དང་ཨུ་པ་ནན་དས་སློབ་མ་དར་མ་ལ་ཟས་བཅད་པ་ལས་བཅས། ཟས་གཅོད་པར་བྱེད་པའོ། །ཟན་གཅོད་པའི་ལྟུང་བ་རྫོགས་སོ།། །།མེའི་ལྟུང་བ་ལ་འཆད་དེ། སེང་གེ་ལ་མི་རེག ། སེང་གེ་ལ་རེག་པར་མི་བྱ། སེང་གེ་ལ་རེག་ན་ཁྲོས་ཏེ་རེག་ཏུ་མི་བཟོད་ཅིང༌། གནོད་པར་བྱེད་པ་དེ་བཞིན་དུ་མེ་ལ་རེག་ཏུ་མི་རུང་བའི་དཔེར་སྨོས་སོ། །སྟོན་པ་དང་ཆོས་དང་དགེ་འདུན་དང་ཚངས་པ་མཚུངས་པར་སྤྱོད་པ་མེ་ལ་རེག་ཀྱང་ཉེས་པར་མི་འགྱུར་བ་ནི་སངས་རྒྱས་དང་ཆོས་དང་དགེ་འདུན་དང་དགེ་སློང་གྲོགས་ཀྱི་ཕྱིར་མཆོད་ཅིང་བསྲོ་བར་བསམས་ཏེ་རེག་པ་དང་བུས་པ་ནི་ཉེས་མེད་དོ། །ཆོས་ཀྱི་བྱ་བའི་ཕྱིར་བྱ་བར་བརྟགས་ཏེ་ལྷུང་བཟེད་བཙོ་བའི་ལས་ལ་དུས་བསྔོ། །ཆོས་ཀྱི་ཕྱིར་བདག་གི་ལུས་ཀྱི་ཡོ་བྱད་དུ་ཆོས་གོས་དང་ལྷུང་བཟེད་ལ་སོགས་པ་བཙོ་བར་སམ་ཡམ་བསྔོས་ཏེ་མེ་ལ་རེག་པ་ནི་ཉེས་མེད་དོ། །རིང་དུ་བསྔོ། །ལྷུང་བཟེད་དང་ཆོས་གོས་བཙོ་བའི་བསམས་པས་སམ་ཡམ་གྱི་དུས་བསྔོ་བ་ནི་ཐོག་མ་རེག་པ་ན་ཟིན་གྱི་བར་དུ་གཟུང་ངོ་སྙམ་དུ་བསམ། རྩེད་མོ་མེ་ལ་རྩེ་བའི་ཕྱིར་བཟུང་ནའང་ལྟུང་བར་འགྱུར་ཏེ་འོག་ནས་འཆད། མགལ་བ་བསྐོར་བ་དང་ཟླ་བ་དང་ཉི་མ་ལྟར་མགལ་བའི་འཁོར་ལོ་ལ་སོགས་པ་བྱེད་དོ། །མིང་གིས་སྨོས་པ་འདི་རྣམས་ཀྱི་གཟུགས་འདྲ་བར་མགལ་བ་ལ་རྩེས་ཤིང་བསྐོར་ན་ལྟུང་བར་འགྱུར། འདི་རྣམས་ཀྱི་གཟུགས་མ་ཡིན་ཡང་མེ་ལ་གཞན་ཇི་ལྟར་རྩེས་ཀྱང་ལྟུང་བའོ། །མེས་སོ། །མེ་ལ་རེག་པ་ལས་ལྟུང་བར་འགྱུར་ཏ་ཡན་ལག་གཅིག །ས་མ་ཡམ་མ་བསྔོས་ནའོ། །མེ་ལ་བཟུང་བའི་ཚེ། ས་མ་ཡམ་མ་བསྔོས་པ་ལས་ལྟུང་བར་འགྱུར་ཏེ་ཡན་ལག་གཅིག །རྩེ་པ་དང་དོན་མེད་པའི་ཕྱིར་གཟུང་བ་ནི་སམ་ཡམ་བསྔོས་ཀྱང་མི་ཆུད་དོ། །མི་ན་བའི་དབང་གིས་མ་འདུག་པར་རེག་པའོ། །བདག་མི་ན་བར་མེ་ལ་རེག་པ་ལས་ལྟུང་བར་འགྱུར་ཏེ་ཡན་ལག་གཅིག་བདག་གིས་མ་བསྐོས་ནའོ། །བདག་གིས་བཟུང་ངམ་གཞན་འཛིན་དུ་བཅུག་པ་ལས་ལྟུང་བར་འགྱུར་ཏེ་ཡན་ལག་གཅིག །ཡན་ལག་
འདི་རྣམས་དང་ལྡན་པར་བྱས་ན་ལྟུང་བར་འགྱུར་རོ། །སྤར་བ་དང་མེ་ཆེར་བུད་པའི་ཕྱིར་རེག་པ་དང༌། གཞིལ་བ་དང་མེ་ཆུང་བར་བྱ་བའི་ཕྱིར་རེག་པ་དང༌། ཤིང་ལ་རེག་པ་དང༌། མགལ་བ་ལ་རེག་པ་དང༌། མ་རེག་པར་བུས་ཀྱང་རུང༌། མགལ་བ་མ་ཡིན་པའི་ཤིང་མེས་མ་རེག་པར་མེར་བཅུག་པ་དང༌། འཇུག་པ་དང་ཤིང་མེར་འཇུག་པ་དང༌། འབྱིན་པར་བསྐོ་བ། མགལ་བ་ཕྱིར་འབྱིན་པ་དང༌། མདག་མ་སྤྱུར་བ་དང་འབྲུ་བའོ། །མདག་མ་སྤྱུར་ཞིང་སྤུངས་བ་དང༌། མདག་མ་འབྲུ་བ་དང༌། འདི་རྣམས་གག་ཀྱང་རུང་བྱས་ན་ལྟུང་བར་འགྱུར། མེ་མ་མུར་ནི་ཕྱེད་དོ། །ཐལ་བ་མེ་མ་མུར་ཅན་ལ་རེག་པ་ནི་ཉེས་བྱས་སོ། །འབར་བ་ཡང་ངོ༌། །མེ་ལྕེ་ལ་རེག་པ་ཡང་ཉེས་བྱས། དེར་ཤིང་གིས་བཅུག་སྟེ་ཕྱུང་ན་མེ་གཞན་དུ་ཆུད་དོ། །མེ་ལྕེ་དང་མེ་མར་མུར་ཅན་ལ་ཤིང་བཅུ་ག་སྟེ་མེར་མཆེད་པ་ལ་རེག་ན་ནི་ལྟུང་བའོ་ཞེས་ཊཱི་ཀ་ལས་བཤད། མཁན་པོ་ཁ་ཅིག་ན་རེ་ཉེས་བྱས་ཞེས་བཤད། སྐྲ་དང་སྤུ་དང་རུས་པ་དང་སེན་མོ་དང་མཆིལ་མ་དང་སྣབས་དང་སྐྱུགས་པ་དང་ཚད་པ་དང་བལ་སྲན་དང་རྒྱ་སྲན་དང་ཤིང་མར་དང༌། ཡུངས་མར་དང་སྦྲང་རྩི་དང་མར་རྣམས་ནི་ཤིང་ཕྱེད་བཞིན་ནོ། །མང་གིས་སྨོས་བ་འདི་རྣམས་མེར་བསྲེགས་པ་ནི་ཉེས་བྱས་སོ། །གཞན་ལ་བྱེད་ཅིང་གཞན་བསྔོས་པ་བསྔོས་པ་ཕྱེད་དོ། །སངས་རྒྱས་གྲོགས་ཀྱི་ཕྱིར་བསྔོས་ཏེ་བུས་པ་ལས་གཞན་གྱི་ཕྱིར་སྤྱད་དམ་གྲོགས་ལྟ་བུའི་ཕྱིར་བུད་པ་ལ་ས་མ་ཡམ་གྱི་འདུ་ཤེས་གཞན་གྱི་ཕྱིར་བསྔོས་པ་ནི་ཉེས་བྱས། མེའི་ཁྲིམས་སོ། །མེ་ལ་རེག་པའི་ལྟུང་བ་རྫོགས་སོ།། །།དད་པའི་ལྟུང་བ་ལ་འཆད་དེ། དགེ་སློང་གི་ཕྱིར་ལས་འདས་པ་དད་པ་བྱིན་ཏེ་སླར་ལེན་པའི་ཕྱིར་དག་གིས་སོ། །དགེ་སློང་གི་དགེ་འདུན་གྱི་ལས་ཅི་བྱེད་ཀྱང་རུང་སྔར་དད་པ་ཕུལ་ལ་ཕྱིས་ནད་པ་མི་འབུལ་ལོ་ཞེས་སྨྲས་ཤིང་བཟློག་པ་ནི་ལྟུང་བའོ། །དད་པ་སླར་ལན་པའོ། །དད་པའི་ལྟུང་བ་རྫོགས་སོ།། །།རབ་ཏུ་མ་རྫོགས་པའི་ལྟུང་བ་ལ་འཆད་དེ། །ཉི་མ་དང་ཟླ་བ་མ་ཡིན་པའི་སྣང་བ་ཅན་གྱི་གནས་ཀྱི་ཕྱོགས་སུ་མི་ཉལ། ཉི་མ་དང་ཟླ་བའི་འོད་ལ་ཉལ་བ་ནི་ཉེས་མེད་དེ་མེ་དང་མེ་མར་
དང་རིན་པོ་ཆེ་དང་སྨན་གྱི་འོད་ལ་ཉལ་ན་ཉེས་བྱས། མ་གཏོགས་པ་ནི་ནད་པ་དང་ནད་པའི་གཡོག་གི་དབང་གིས་ནའོ། །ལྟུང་བར་མི་འགྱུར་བ་ནི་དགེ་སློང་ནད་པ་མེ་མར་གྱིས་བཙའ་དགོས་པ་དེ་དང་དེའི་ནད་གཡོག་མི་མར་གྱིས་བཙའ་དགོས་པ་དེ་དང༌། འོད་ལ་ཉལ་བ་ནི་ཉེས་མེད་དོ། །འདིར་འགའ་འགའ་ལྟུང་བའོ་ཞེས་སོ། །མེ་མར་གྱི་འོད་ལ་ཉལ་བ་འདུལ་བ་འཛིན་པ་ཁ་ཅིག་ན་རེ་ལྟུང་བའོ་ཞེས་ཀྱང་འཆད་དེ་ལྟུང་བ་དགུ་བཅུ་རྩ་གཅིག་ཏུ་མི་འབྱུང་བས་ལྟུང་བ་མ་ཡིན་གྱི་ཉེས་བྱས་སོ། །ཉལ་བ་མ་ཡིན་ན་ནི་ཕྱེད་དོ། །མེ་མར་གྱི་འོད་དང་དགེ་སྦྱོང་དང་ལྷན་ཅིག་ཁྱིམ་གཅིག་གི་ནང་ན་ཙོག་པུར་ཐུམ་ཕྲས་སུ་ཉལ་བ་ནི་ལྟུང་བ་དང་ཉེས་བྱས་ཀྱི་ཕྱེད་དུ་འགྱུར་རོ། །སོ་སོར་ཉིན་མོ་ལ་ཡང་ངོ༌། །ཉིན་པར་མེ་མར་གྱི་འོད་ལ་ཉལ་བ་དང་མཚན་མོ་འདྲ་སྟེ་ཉེས་བྱས་སོ། །མང་དུ་གཡོགས་པའི་བསྐོར་བ་པའི་ཁྱིམ་གྱི་མཐའོ། །ཁྱིམ་གཅིག་ཏུ་ཉལ་ན་ལྟུང་བའི་ཁྱིམ་ནི་ཐོག་ཀྱང་གསུམ་གཉིས་པོར་རྩིག་པའང་སུམ་གཉིས་བསྐོར་བའི་ནང་དུ་དགེ་སྦྱོང་དང་ཉལ་ན་ལྟུང་བར་འགྱུར། །དེར་ཆུད་པ་བཞིན་པ་ནི་གཏོགས་བའི་སྒོའི་ངོས་ཀྱི་མཚམས་ཀྱང་ཁྱིམ་དུ་གྱུར་པ་ནའོ། །ཁང་པ་གཅིག་གི་ནང་ན་ཉལ་བ་དང་འདྲ་བར་ཁང་བུ་གཅིག་ཕུག་ན་འདུག་ལ་སྒོ་ན་ཁང་པའམ་ཁྱམས་ཐོག་ཕོར་བ་ཞིག་ཡོད་ན་ཁང་བུ་ཕུག་མའི་ཕ་རོལ་ཚུ་རོལ་གྱི་རྩིག་པ་ཁ་དྲང་དུ་བཅད་ན་ཕུག་པ་ཙམ་གྱི་ས་ཁྱོན་ཚད་ཀྱི་ནང་ཙམ་དུ་བྱས་པའི་ཕྱི་རོལ་གྱི་ཁང་པར་དགེ་སྤྱོད་ཉལ་ན་ཕུག་མར་དགེ་སློང་ཉལ་ཡང་ལྟུང་བར་འགྱུར། རིབ་མ་ལྟག་མ་ཡང་སྒོ་དེའི་ནང་དུ་ཆུད་དོ། །ཁང་བུ་ཡང་ཐོག་ཅན་དུ་འདུག་ན་སྒོ་འོག་ཁང་གི་ནང་དུ་བྱུང་ལ་གཅིག་ཏུ་དགེ་སྦྱོང་ཉལ་ལ་གཅིག་ཏུ་དགེ་སློང་ཉལ་བ་ནི་ལྟུང་བར་འགྱུར། རིམ་པ་མང་པོ་གཅིག་གི་ནང་དུ་གཅིག་སྒོ་ཕྱུང་བ་ནི་མི་བརྩིའོ། །མཚམས་དང་བཅས་པའི་གནས་ཙམ་ཕན་ཆད་གནས་ན་དེར་སོ་སོར་འགྱུར་རོ། །ར་མོ་ཆེས་བསྐོར་བའི་ནང་ན་ཉལ་ན་འདོམ་གང་པན་ཆད་དུ་དགེ་སྦྱོང་བསྙལ་པ་ནི་ཉེས་བྱས་ཁང་མོ་ཆེ་ཞིག་ནས་བདག་ཉལ་བ་ནས་བདག་གི་གནས་ཁང་གཅིག་ཙམ་གྱི་སས་
བར་དུ་བཅད་དེ་དེ་ཕན་ཆད་དགེ་སྦྱོང་བསྙལ་བ་ནི་ཉེས་མེད། ཕྱེད་པ་ནི་ཤིང་གི་རྩ་བ་དང་རྩིག་པའི་སེར་ག་དང་ལྡུམ་རྩ་རྣམས་སོ། །དགེ་སྦྱོང་དང་ལྷན་ཅིག་ཏུ་ཤིང་གི་ལོ་མ་འདབ་ཆགས་སུ་འདྲེས་ཤིང་སྟེང་ཁེབས་པར་འདུག་པའི་འོག་ཏུ་ཉལ་ལམ་ཁང་པའི་རྩིག་པ་གློ་རྡོལ་དུ་སེང་སོང་པོར་འདུག་སྟེ་ཕན་ཚུན་མི་རྒྱུར་རུང་བ་དང་གད་པའི་སེར་ག་སེང་སོང་པོར་འདུག་པའི་ནང་དུ་ཉལ་ལམ་རྒུན་འབྲུའི་ཤིང་ལྟ་བུ་སྟེང་འཛིངས་པ་དང་ལྡུམ་ཕོང་ཕུང་གི་ཁྲོད་དུ་ཉལ་བ་ནི་ཉེས་བྱས། སྡུག་པོ་དང་བཅས་པར་བུད་མེད་དང་ལྷན་ཅིག་ཉལ་ནའོ། །ནགས་སམ་རྩྭའམ་ལྡམ་ལྡུམ་ཁྲོད་དུ་བུད་མེད་དང་ཉེ་བར་ཉལ་ན་ཉེས་བྱས་སུ་འགྱུར་ཏེ་ཅི་ཙམ་ཚུན་ཆད་པ་ནི་འོག་ནས་འཆད། དེའི་ལམ་ནི་བྱ་གག་འཕུར་ནས་བབ་པ་ནང་དུ་འགྱུར་རོ། །མདོ་ལྟག་མ་ལྟར་ཉེས་བྱས་སུ་འགྱུར་བའི་ཚེད་ནི་བྱ་གག་འཕུར་ཏེ་བབ་པའི་ལམ་ཚུན་ཆད་གཅིག་ཏུ་ཉལ་ན་ཉེས་བྱས་ཁང་མོ་ཞིག་དུ་ཉལ་ནའང་བྱ་གག་འཕུར་བའི་ལམ་ཚུན་ཆད་ལྟུང་བའོ། །ཐམས་ཅད་ཀྱི་བར་དུ་རྒྱུར་ཡོད་པ་ཁྱིམ་གཞན་མེད་པར་གཡོགས་ན་གཅིག་གོ །ཁང་པ་ཕྱི་རྒྱ་གཅིག་ལ་ནང་མིག་སོ་སོར་འདུག་སྟེ་དབུས་ཀྱི་ཁྱམས་དོག་པ་ཞིག་ན་སྒོ་མེད་དམ་སྒོ་མ་བཅད་པར་ཁང་བུ་ནང་དུ་དགེ་སྦྱོང་ཉལ་ལ་དབུས་སུ་དགེ་སློང་ཉལ་ན་ལྟུང་བའོ། །སོ་སོ་ནི་བདག་གི་སྐལ་བར་གཏོགས་པའི་སྒོ་བཅིང་པས་བཅིངས་ན་མཚམས་ཀྱང་ངོ༌། །ཁང་པའི་ཕྱི་རྒྱག་ཅིག་ལ་ནང་ཐ་དད་པར་འདུག་ན་གཅིག་ཏུ་དགེ་སློང་ཉལ་ཏེ་སྒོ་དམ་དུ་བཅད་ན་གཞན་དུ་དགེ་སྦྱོང་ཉལ་ཀྱང་མི་ལྟུང༌། །དེ་བཞིན་དུ་དགེ་སློང་གིས་ལྟུང་བ་ལ་བསྲུང་ནའོ། །བུད་མེད་ཀྱང་དགེ་སློང་གཅིག་གིས་རེས་ཀྱིས་བསྲུངས་ལ་གཅིག་ཉལ་ཀྱང་ལྟུང་བར་མི་འགྱུར་རོ། །བདག་པོས་བསྲུངས་པའི་བུད་མེད་ན་ཡང་ངོ༌། །བུད་མེད་ཁྱིམ་ཐབ་དང་བཅས་པར་འདུག་པ་ནི་ཁྱི་མ་གཅིག་ན་ཉལ་ཀྱང་ཞག་གཅིག་གིས་ལྟུང་བར་མི་འགྱུར་ཏེ་ཞག་གཉིས་ལས་འདས་ན་ནི་རབ་ཏུ་མ་རྫོགས་པ་དང་ཉལ་བ་ནི་ལྟུང་བར་བརྩི། རིམ་བླ་མར་ན་སྐས་ཕྱུང་ནའོ། །བདག་ཡང་ཐོག་ཏུ་ཉལ་ན་བུད་མེད་དམ་དགེ་སྦྱོང་འོག་ཁང་དུ་བསྙལ་ལ་སྐས་
སྟེང་དུ་དྲངས་ཏེ་ཉལ་ཀྱང་ཉེས་མེད་དོ། །འབྲི་བ་ནི་ཁྱིམ་མ་ཡིན་གཞན་དུ་གྱུར་ནའོ། །ཁང་པ་ཐོག་ཕྱེད་བོར་བ་དང་ཕྱེད་བསྐོར་བ་དང་ཁང་བུའི་སྒོའི་ཕྱི་རོལ་ཐོག་མེད་པ་ལ་འདོམ་གང་ཚུན་ཆད་ཐང་ངམ་དབྱེ་ལ་འདོམ་གང་ཚུན་ཆད་དུ་དགེ་སྦྱོང་ཉལ་ན་ཉེས་བྱས། རབ་ཏུ་མ་རྫོགས་པ་དང་ལྷན་ཅིག་ཏུ་གྲོང་ན་ནུབ་གསུམ་དུ་ཉལ་བའོ། །རབ་ཏུ་མ་རྫོགས་པ་དང་ཁྱིམ་གཅིག་ལ་ནུབ་གཉིས་ལས་འདས་པར་ནུབ་གསུམ་དུ་ཉལ་ན་ལྟུང་བའོ། །འཐས་ནའོ། །ནུབ་གསུམ་གྱི་མཐའ་སྐྱ་རེངས་བྱུང་ན་ལྟུང་བར་འགྱུར་རོ། །ཕན་ཆད་ནི་ཉེས་བྱས་པའོ། །ཞག་གཉིས་ནས་གསུམ་གྱི་སྐྱ་རེངས་མ་བྱུང་གི་བར་དུ་དགེ་སྦྱོང་དང་ཉལ་ན་ཉེས་བྱས། ཉེས་མེད་པ་ནི་ལམ་ནི་ངལ་ཏེ་མྱོས་པའོ། །ལམ་རིང་པོ་ནས་འོངས་ཏེ་ཆད་པ་ནི་ཞག་གསུམ་གྱི་སྐྱ་རེངས་མ་བྱུང་ཚུན་ཆད་ལྡང་བར་བསམས་ཏེ་ལངས་པ་ནི་ཉེས་མེད་དེ། དེ་ལྟ་བུའི་མཐར་ཡང་ངོ༌། །སཱུ་ཏྲ་ལྟག་མ་ལྟར་ཆད་པའི་དགེ་སློང་སྐྱ་རེངས་མ་བྱུང་ཚུན་ཆད་ལྡང་བར་བྱས་པ་ལས་ཐལ་བྱུང་གཉིད་ལོག་སྟེ་སྐྱ་རེངས་བྱུང་ཡང་ཉེས་མེད་དོ། །མ་བརྟགས་པའི་དགེ་སློང་གིས་བྱ་བ་དེ་སྒྲུབ་པ་དང་ནད་གཡོག་ལྷན་ཅིག་ཏུ་ཡང་ངོ༌། །དགེ་སློང་ནད་པ་ལ་སོགས་པ་རྟོག་ཅིང་བྱིན་ལེན་བྱ་བའི་ཕྱིར་དགེ་སྦྱོང་བཞག་སྟེ་གཞན་དུ་བསྙལ་ན་གནས་མེད་དམ་ནད་པ་ལ་མི་བདེ་ན་དྲུང་དུ་བསྙལ་ན་ཡང་ནད་པ་ལ་ཡང་ལྟུང་བར་མི་འགྱུར་ནད་གཡོག་དགེ་སློང་ལ་ཡང་ལྟུང་བར་མི་འགྱུར་རོ། །དགེ་སྦྱོང་དང་ཡང་ངོ༌། །གཞན་ཡང་དགེ་སྦྱོང་དང་ལྷན་ཅིག་ཉལ་ན་ཡང་ལྟུང་བར་མི་འགྱུར་བ་ཡོད་དེ་འོག་ནས་འཆད་དོ། །དེ་ཡོད་པས་སོ། །དགེ་སློང་སློབ་པའམ་ཉེ་གནས་དགེ་སྦྱོང་ཡོད་པ་ནི་དགེ་སྦྱོང་དེ་དང་ལྷན་ཅིག་ཉལ་ཡང་ལྟུང་བར་མི་འགྱུར་ཏེ་འོག་ནས་འཆད་དོ། །གནས་དེ་ན་སྡིག་པའི་དགེ་སློང་འདུག་ནའོ། །བདག་ཅག་གི་གནས་ན་དགེ་སྦྱོང་ཁ་འདྲེན་ཅིང་འཕྲོག་པ་དང་དགེ་སྦྱོང་གི་རྐུབ་ཏུ་མི་ཚངས་པར་སྤྱོད་པའི་དགེ་སློང་སྡིག་པ་སྤྱོད་པ་ཡོད་ན་བདག་གི་སློབ་མ་དགེ་སྦྱོང་དང་ནུབ་གཉིས་ལས་ལྷག་པར་ཉལ་ཀྱང་ཉེས་མེད། བསྐྲད་པར་ནན་ཏན་བྱས་སམ་བྱེད་པའོ། །
བདག་ཅག་གི་འཁོར་ན་སྡིག་བ་བྱས་པའི་དགེ་སྦྱོང་ཡོད་ན་བདག་ཅག་གིས་ཀྱང་བསྐྲད། བདག་གི་མ་ནུས་ན་རྒྱལ་པོའམ་ཞང་བློན་ལ་བྱས་ཏེ་འང་བསྐྲད་ཚུལ་ཕྱི་མའི་དུས་ན་ཐོག་མའི་ཟླ་བ་གཉིས་ཀྱི་ཚེ་ནའོ། །སྡིག་པ་བྱེད་པའི་དགེ་སློང་སྐྲོད་མ་ནུས་ན་ཚུལ་ཕྱི་མར་ཞུགས་ཀྱང་ཟླ་བ་གཉིས་ལོན་ནས་ཚུལ་དྲལ་ཏེ་བདག་གི་དགེ་སྦྱོང་སྔོན་དུ་བཅུག་ལ་བཀྲིའོ། །དེ་ལས་ལྷག་པར་མི་གནས། ཚུལ་ཕྱི་མར་ཞུགས་ནས་ཟླ་བ་གཉིས་ལོན་ན་དེ་ལས་རིང་དུ་མི་བསྡད་པར་མདོ་ལྟག་མ་ལྟར་འགྲོ། །མ་སོང་ན་ལྟུང་བར་འགྱུར་རོ། །སྔ་མའི་ཚུལ་ནི་མི་དགོས། སྡིག་པའི་དགེ་སློང་ཡོད་ན་ཚུལ་སྔ་མར་མི་བསྲུང་མི་འཇུག་པར་བདག་གི་དགེ་སྦྱོང་ཁྲིད་ལ་འགྲོ། ཕན་ཆད་པ་འང་མི་བསྲུང༌། ཚུལ་སྔ་མར་ཞུགས་ཀྱང་སྡིག་པའི་དགེ་སློང་ཡོད་ན་ཟླ་བ་གཉིས་ཀྱི་བར་དུ་བསྲུངས་ཤིང་བསྡད་མི་དགོས་ཀྱི་ཚུལ་ཕྱི་མ་ཡོད་པས་སྔ་མ་དྲལ་ཏེ་དགེ་སྦྱོང་ཁྲིད་ལ་སོང་ཤིག །དེ་ལྟ་ན་མི་གནས་པའི་དགེ་སློང་མི་གཞག །བདག་ཅག་གི་འཁོར་ན་སྡིག་པའི་དགེ་སློང་ཡོད་ན་གཞན་གྱི་དགེ་སྦྱོང་ཉེ་གནས་སུ་འང་མི་གཞག །དགེ་སྦྱོང་གསར་དུ་རབ་ཏུ་འབྱུང་བ་ཞིག་ཡོད་ན་འང་རབ་ཏུ་མི་དབྱུང་ངོ༌། །གཉིད་ལྟུང་སྟེ་མྱོས་ན་ལམ་དུ་དགེ་སྦྱོང་མཐུན་དུ་བྱས་ཏེ་འགྲོའོ། །དགེ་སྦྱོང་ཁྲིད་དེ་སོང་བ་ལས་དགེ་སྦྱོང་ཆད་ཅིང་གཉིད་ཀྱིས་མྱོས་ན་དགེ་སྦྱོང་ཕྱི་བཞིན་འབྲང་དུ་མི་གཞུག་གི་སྔོན་དུ་བཅུག་ལ་བཀྲིའོ། །དེ་སྟེ་བཀྲེས་ན་དེའི་ཚེ་ཚུལ་དུས་པས་སྔར་ཟས་སྦྱིན། དགེ་སྦྱོང་བཀྲེས་ཤིང་འགྲོ་མི་ཕོང་ན་གདུགས་ཚོད་ལ་མ་བབ་པར་ཟན་སྦྱིན་ནོ། །བཀྲེས་ཏེ་མི་བཟོད་ཅིང་ཟས་སློང་ན་ཕྱི་དྲོ་བྱིན་ཀྱང་ཉེས་མེད་དོ། །དེ་སྟེ་ཡང་དུས་ལ་ཡང་ངོ༌། །མདོ་ལྟག་མ་ལྟར་སྔར་ཟན་བྱིན་ཀྱང་གདུགས་ཚོད་ཀྱི་ཚེའང་ཟས་སྦྱིན་ནོ། །རབ་ཏུ་མ་རྫོགས་པ་དང་ལྷན་ཅིག་ཉལ་བའོ། །རབ་ཏུ་མ་རྫོགས་པ་དང་ལྷན་ཅིག་ཉལ་བའི་ལྟུང་བ་རྫོགས་སོ།། །།ཆོས་ལ་འཆད་དེ། འདི་ལྟར་བདག་གིས་བཅོམ་ལྡན་འདས་ཀྱིས་ཆོས་བཤད་པ་ཤེས་ཏེ་ཅི་ལྟར་གང་བར་དུ་གཅོད་པའི་ཆོས། བཅོམ་ལྡན་འདས་ཀྱིས་གསུངས་པ་དེ་བསྙེན་ཀྱང་བར་དུ་གཅོད་པར་མི་
འགྱུར་རོ་ཞེས་པ་ལ་སོགས་པ་དགེ་སློང་ཞིག་འདི་སྐད་ཅེས་སྨྲས་ཏེ་འདི་ལྟར་བདག་གིས་བཅོམ་ལྡན་འདས་ཀྱིས་ཆོས་བཤད་པ་ནི་ཤེས་ཏེ་ཅི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་གསུངས་པ་ནི་དེ་སྤྱད་ཀྱང་བར་དུ་གཅོད་པར་མི་འགྱུར་རོ་ཞེས་ཟེར་བའི་དགེ་སློང་དེ་ལ་དགེ་སློང་དག་གིས་འདི་སྐད་ཅེས་བསྒོ་ཤིག །ཚེ་དང་ལྡན་བ་ཁྱོད་འདི་སྐད་མ་ཟེར་ཅིག །བཅོམ་ལྡན་འདས་ཀྱིས་ཆོས་བཤད་པ་ནི་ཤེས་ཏེ། དེ་ཅི་ལྟར་བཅོམ་ལྡན་འདས་ཀྱིས་བར་དུ་གཅོད་པའི་ཆོས་སུ་གསུངས་བ་དེ་སྤྱད་ཀྱང་བར་དུ་གཅོད་པར་མི་འགྱུར་རོ་ཞེས་སོ། །བཅོམ་ལྡན་འདས་ལ་སྐུར་བ་མ་འདེབས་ཤིག །བཅོམ་ལྡན་འདས་ལ་སྐུར་པས་དགེ་བར་མི་འགྱུར་རོ། །བཅོམ་ལྡན་འདས་ནི་དེ་སྐད་མི་གསུང་སྟེ་དུ་མའི་གཞུང་ལས་ཀྱང་བར་དུ་གཅོད་པའི་ཆོས་ཀྱི་ནི་བར་གཅོད་དོ་ཞེས་གསུངས་ཏེ་དེ་སྤྱད་པས་བར་དུ་གཅོད་པར་འགྱུར་གྱིས་འདི་ལྟ་བུའི་སྡིག་པ་ལ་ལྟ་བ་ཐོང་ཤིག་ཅེས་བསྒོ་སྟེ་མ་མཉན་ན་ལྟུང་བར་འགྱུར་རོ། །ལན་གསུམ་བསྒོ་བའི་ཐབས་དང་བཤད་པ་ནི་དགེ་འདུན་གྱི་ལྷག་མ་བཅུ་གསུམ་ལ་འཇུག་གི་བཞི་བཤད་པ་དང་འདྲའོ། །ཚིག་ཙམ་ནས་མི་གཏོང་བའོ། །མདོ་ལྟག་མ་ལྟར་བར་དུ་གཅོད་པར་མི་འགྱུར་རོ་ཞེས་ཟེར་བ་ལས་དེ་སྐད་མ་ཟེར་བར་ཐོང་ཤིག་ཅེས་ལན་གསུམ་དུ་བསྒོ་བར་གསོལ་བ་དང་ཞུ་བའི་ལས་བྱས་ཏེ་མ་བཏང་ན་ལྟུང་བར་འགྱུར། འདི་སྨད་པའི་ཕྱིར་དེ་ལ་ཞུ་བ་བྱ། མདོ་ལྟག་མ་ལྟར་ལན་གསུམ་དུ་བསྒོ་སྟེ་མ་ཉན་པའི་དགེ་སློང་དེ་ཆོས་ལ་འགལ་ཞིས་ཉེས་པ་མི་གཏོང་བའི་ཕྱིར་དགེ་འདུན་སྨད་པའི་ལས་བྱས་ཏེ་བསྐྲད་དོ། །ལྟ་བར་ཞུགས་བ་མི་གཏོང་བའོ། །བཅོམ་ལྡན་འདས་ཀྱིས་གསུངས་པའི་ཆོས་ལ་བར་དུ་གཅོད་པར་མི་འགྱུར་རོ་ཞེས་ཟེར་བའི་ལྟུང་བ་རྫོགས་སོ།། །།སྨྲ་བའི་ལྟུང་བ་ལ་འཆད་དེ། འྦྷྲིད། ལྟག་ཏུ་བཤད་པ་ལྟར་དགེ་སློང་བསྐྲད་པ་ཤེས་བཞིན་དུ་འགྲོགས་པ་ལས་ལྟུང་བར་འགྱུར། དེ་སྐད་ཟེར་སྤངས་པ་སླར་མ་བྱས་པའི་དགེ་སློང་ལས་སོ། །སངས་རྒྱས་ཀྱིས་བར་དུ་གཅོད་པའི་ཆོས་གསུངས་པ་
ལས་བར་དུ་གཅོད་པར་མི་འགྱུར་རོ་ཞེས་ཟེར་བ་ལ་ལན་གསུམ་བསྒོ་སྟེ། མ་མཉན་ཅིང་སླར་མ་བཤགས་པའི་དགེ་སློང་དང་བཅར་ཞིང་འགྲོགས་པ་ལས་ལྟུང་བར་འགྱུར་རོ། །བསྟན་པ་བྱིན་པ་ཡང་ངོ༌། །དགེ་སློང་བསྐྲད་པ་ཀློག་པ་དང་ཁ་དོན་འབུལ་བ་ལ་བསྟན་ཅིང་བསླབས་ནའང་ལྟུང་བར་འགྱུར་རོ། །ཀུན་འདྲིལ་བ་དང༌། ཆོས་དང་ལས་བྱེད་པ་ལ་སོགས་པ་བསྐྲད་པའི་དགེ་སློང་འདྲི་ཞིང་འོང་བ་ལ་བསྟན་ན་འང་ལྟུང་བའོ། །གནས་བཅའ་བ་དང༌། བསྐྲད་པའི་དགེ་སློང་དེ་བདག་ལ་གནས་འཆར་བཅུག་ན་འང་ལྟུང་བའོ། །བསྟན་པ་དང་འཆད་པ་ཡང་ངོ༌། །ཆོས་དང་བསམ་གཏན་ལ་སོགས་པ་བསྟན་ཅིང་བཤད་ན་འང་ལྟུང་བའོ། །ལྟ་བ་འཆགས་པ་བསྐྲད་པའི་དགེ་སློང་དེ་ལ་ཁྱོད་ཉེས་པ་མེད་དེ་དགེ་འདུན་གྱིས་བསྐྲད་པ་མི་རིགས་ན་ཞེས་སྨྲས་ནའང་ལྟུང༌། ཟང་ཟིང་སྤྱོད་པའོ། །བསྐྲད་པའི་དགེ་སློང་དེ་བཅར་ཞིང་ཟས་དང་གོས་ལ་སོགས་པ་བྱིན་པའང་ལྟུང་བར་འགྱུར། གཡོག་བདག་གིར་བྱས་པ། བསྐྲད་པའི་དགེ་སློང་དེ་བདག་གི་གཡོག་ཏུ་ལས་དག་བྱེད་དུ་བཅུག་ནའང་ལྟུང་བའོ། །ཁྱིམ་དུ་ལྷན་ཅིག་ཉལ་བ། བསྐྲད་པའི་དགེ་སློང་དེ་དང་ཁྱིམ་གཅིག་གི་ནང་ན་ལྷན་ཅིག་ཉལ་ནའང་ལྟུང་བའོ། །འཐས་སོ། །ཁྱིམ་གཅིག་གི་ནང་ན་ཉལ་ཏེ་སྐྱ་རེངས་འབྱུང་ན་འང་ལྟུང་ངོ༌། །ནུབ་མོའོ། །སྐྱ་རེངས་འབྱུང་བའི་ནི་ཞག་གཅིག་ལོན་པའི་ནུབ་མོ་འདས་པའི་སྐྱ་རེངས་ས་འབྱུང་ན་ལྟུང་བའོ། །གཞན་ཡང་འདུ་བའོ། །བསྐྲད་པའི་དགེ་སློང་དེ་དང་ལྷན་ཅིག་འགྲོགས་ཀྱང་རུང་གཏམ་བྱས་ཀྱང་རུང་སྟེ་ཅི་སྤྱད་ཀྱང་ལྟུང་བར་འགྱུར་རོ། །མ་གཏོགས་པ་ནི་ནད་པ་དང་ལྟ་བ་དབྱེ་བ་བྱ་བའི་ཕྱིར་རོ། །ལྟུང་བར་མི་འགྱུར་བ་ནི་བསྐྲད་པའི་དགེ་སློང་ནད་ཀྱིས་བཏབ་སྟེ་གསོ་བ་དང་བར་དུ་གཅོད་པར་མི་འགྱུར་རོ་ཞེས་ཟེར་ཞིང་ལོག་པ་བལྟས་པ་དང་བྲལ་ཞིང་འཆགས་སུ་གཞུག་པའི་ཕྱིར་བསྙེན་ཅིང་བཅར་བ་ནི་ཉེས་མེད་དོ། །སྤངས་པ་དང་འདུག་པའོ། །དགེ་སློང་བར་དུ་གཅོད་པར་མི་འགྱུར་རོ་ཞེས་ཟེར་བའི་ཕྱིར་བསྐྲད་པ་དང་འགྲོགས་པའི་ལྟུང་བ་རྫོགས་སོ།། །།དགེ་སྦྱོང་གི་ལྟུང་བ་
ལ་འཆད་དེ། ཚིག་དེ་བརྩམས་ནས་མི་གཏོང་བའི་དགེ་སྦྱོང་མ་རུང་བར་བྱ། དགེ་སྦྱོང་ཞིག་འདི་སྐད་ཟེར་ཏེ་བཅོམ་ལྡན་འདས་ཀྱིས་འདོད་པ་ནི་བར་དུ་གཅོད་དོ་ཞེས་གསུངས་པ་བར་དུ་གཅོད་པར་མི་འགྱུར་རོ་ཞེས་ཟེར་བ་ལ་བར་དུ་གཅོད་པར་འགྱུར་གྱིས་དེ་སྐད་མ་ཟེར་ཅིག་ཅེས་དགེ་འདུན་གྱིས་བསྒོ་སྟེ་མ་མཉན་ཅིང་མ་བཏང་ན་དགེ་སྤྱོང་དེ་བསྐྲད་དོ། །ཨུ་པ་ནན་དའི་སློབ་མ་དགེ་སྦྱོང་དང་དགེ་སྦྱོང་གཞན་དུ་རྩེ་ཞིང་སྡིག་པ་སྤྱད་པ་དགྲ་བཅོམ་པ་དང་བསྐུར་པ་ལས་བཅས། སྔར་ཞུ་བ་བཞིའི་ལས་ཀྱིས་ཁྱོད་ཅེས་ནས་ཕྱིས་མ་རུང་བར་ཁྱོད་དོ་ཞེས་རིམ་གྱིས་ཞུ་བ་བྱེད་དེ་ཐོང་ཤིག་འདི་ལྟ་བུའི་གཟུགས་སྡིག་པ་ལ་ལྟ་བར་གྱུར་པ་ལས་དང་པོ་གླག་པ་བྱ་སྟེ་གཉིས་སོ་ཞེས་སོ་སོར་དེའི་མཐར་དགེ་སློང་གིས་བསྒོ། མདོ་ལྟག་མ་ལྟར་དགེ་སྦྱོང་བསྐྲད་པ་ནི་དགེ་འདུན་གསོལ་བ་དང་ཞུ་བའི་ལས་བྱེད་པ་མཐོང་བར་མི་དགུག་གི་ཕོ་ཉར་དགེ་སློང་ཅིག་བཏང་སྟེ་བར་དུ་གཅོད་པར་མི་འགྱུར་རོ་ཞེས་སྨྲ་བ་དེ་ཐོང་ཤིག་མ་བཏང་ན་ཁྱོད་དགེ་འདུན་གྱིས་སྐྲོད་པར་བྱེད་དེ་གསོལ་བ་དང་ཞུ་བའི་ལས་ལན་གཅིག་བྱས་ཟིན་ཏོ་ཞེས་བསྒོ། །དེ་བཞིན་དུ་མ་བཏང་ན་བསྐྲད་པའི་ལས་གསོལ་བ་དང་ཞུ་བའི་ལས་གཉིས་བྱས་ཟིན་གྱིས་ཐོང་ཤིག་ཅེས་བསྒོ། །ལན་གཉིས་བསྒོ་སྟེའང་མ་གཏང་ན་ལན་གསུམ་གྱི་བར་དུ་བསྒོ་སྟེ་མ་བཏང་ན་དགེ་སྦྱོང་དེ་བསྐྲད་དོ། །ལོག་ན་ལྷག་པ་མི་བྱ། མདོ་ལྟག་མ་ལྟར་ལན་ཅིག་ལན་གཉིས་ལན་གསུམ་ཚུན་ཆད་དུ་བསྒོ་སྟེ་བཏང་ན་བསྒོ་བ་ཕྱི་མ་ཡང་བྱ་མི་དགོས་བསྐྲད་པ་ཡང་མི་བྱའོ། །མ་རུང་བའི་ཕྱིར་དགེ་སྦྱོང་ལའོ། །ལྟག་ཏུ་བཤད་པ་ལྟར་ལན་གསུམ་དུ་བསྒོ་སྟེ་མ་བཏང་ནས་བསྐྲད་པའི་དགེ་སྦྱོང་དེ་དང་བཅར་ཞིང་འགྲོགས་པ་ལས་ལྟུང་བར་འགྱུར་རོ། །ལྟུང་བར་འགྱུར་བ་ནི་ལྟག་ཏུ་དགེ་སློང་བསྐྲད་པ་དང་འགྲོགས་ན་ལྟུང་བར་འགྱུར་བར་བཤད་པའི་ཚིག་ཀུན་འདིའི་ཡན་ལག་ཏུ་གཏོགས་ཏེ་དེ་དང་འདྲའོ། །མ་རུང་བར་བྱ་བའི་བསྡུས་པའོ། །དགེ་སྦྱོང་བསྐྲད་པ་དང་འགྲོགས་པའི་ལྟུང་བ་རྫོགས་སོ།། །།ཁ་དོག་བསྒྱུར་བའི་ལྟུང་བ་ལ་འཆད་དེ། སྔོན་པོ་དང༌།
རམས་གྱིས་བཙོས་པ་དང༌། བཙག་དང་ས་དམར་གྱིས་བཙོས་པ་ཡང་རུང་འདམ་ལ་བཙོས་པ་ཡང་རུང༌། ཤུན་པས་ཤིང་དང་ལྡུམ་གྱི་རྩ་བ་དང་ཤིང་ཤུན་དང་མེ་ཏོག་དང་ལོ་མས་བཙོས་པ། བདག་གིས་གོས་མ་བཙོས་པ་ལས་སོ། །འདི་རྣམས་ཀྱིས་ཁ་དོག་བསྒྱུར་ཅིང་བཙོས་པ་ནི་གྱོན་ཅིང་འཆང་དུ་དབང་གིས་ཁ་དོག་མ་བསྒྱུར་བ་གྱོན་ཅིང་འཆང་ན་ལྟུང་བའོ། །མཐར་ནི་ལྷུང་བཟེད་ཀྱི་ཁ་གཡོགས་པ་དང་གཏུར་བུ་དང་རྐང་པའི་གོས་དང་ལུས་བཅིང་པ་དང་བགོ་བ་ལ་སོགས་པ་ཀུན་སྤྱོད་པའོ། །གོས་གསར་དུ་བྱས་ཤིང་སར་པ་ཞིག་གསར་དུ་རྙེད་ཀྱང་རུང་རྙིང་པ་ཞིག་ཉོས་སམ་བྱིན་ཏེ་གསར་དུ་རྙེད་ཀྱང་རུང་ཆུང་དུ་ན་ལྷུང་བཟེད་ཀྱི་ཁ་བཅད་པ་དང་སྐ་རགས་ཡན་ཆད་མིང་གིས་སྨོས་པ་འདི་རྣམས་གང་ཡང་རུང་སྟེ་འཆང་ངམ་གྱོན་ན་ལྟུང་བའོ། །སྡེ་གཞན་གྱིས་ལས་ནའང་བརྟག་མི་དགོས། དགེ་སློང་ཕ་དང་དགེ་སློང་མ་དང་དགེ་སློབ་མ་དགེ་སྦྱོང་ཕོ་མོ་དང་ལྔ་གང་གིས་བཙོས་ཀྱང་རུང་ཁ་དོག་བསྒྱུར་ཟིན་པ་མི་གདོད་བཙོ་མི་དགོས་ཏེ་གཅིག་ལ་གཅིག་བརྟགས་པའོ། །ཁྱིམ་པས་ཕྲོགས་ན་ཡང་མ་ཡིན། དགེ་སློང་གིས་གོས་ཁ་དོག་བསྒྱུར་ཟིན་པ་ལས་རྐུན་པོས་ཁྱེར་རམ་ཁྱིམ་པ་ཞིག་གིས་ཁྱེར་བ་ལས་སླར་འོངས་ཏེ་ཁ་དོག་མ་ཡལ་ན་བཙོ་མི་དགོས་ཏེ་བརྟགས་པའོ། །ཚོན་ཆེན་པོ་ཅན་བགོ་བར་མི་བྱ། གོས་ཚོན་ཆེན་པོས་བཙོས་པ་ནི་གང་གྱོན་ཀྱང་རུང་སྟེ་ཉེས་བྱས་རེ་རེར་འགྱུར་རོ། །ཚོན་ཆེན་པོ་ནི་མཚལ་དང་ལི་ཀྲུ་དང་བཙོད་དང་རྒྱ་སྐྱེགས་དང་གུར་གུམ་དང་ལེ་བརྒན་རྩི་དང་ཐིང་ཤིང་དང་རྨ་ཤིང་དང་བརྒྱད་དོ། །ཁྱིམ་པའི་ཡང་མ་ཡིན་ཁྱིམ་པའི་གོས་འདྲ་བ་གྱོན་པ་ནི་ཅི་ལྟ་བུ་གྱོན་ཀྱང་ཉེས་བྱས། སྤྱད་པའི་ནི་གཙུག་ལག་ཁང་གི་ནང་ན་དུར་སྨྲིག་གིས་གཡོགས་ནའོ། །ཁྱིམ་པའི་གོས་གྱོན་ཀྱང་ཉེས་མེད་པ་ནི་མི་གཞན་གྱིས་མ་མཐོང་བར་གཙུག་ལག་ཁང་དུ་ནི་ཀ་ཤས་མི་སྣང་བར་གཡོགས་ཏེ་གྱོན་པ་ནི་ཉེས་མེད། ལམ་དུ་བརྙས་ཏེ་བགོ་བ་ནི་སྤྱིའི་འོ། །ལམ་དུ་ཞུགས་པ་ལས་དགེ་སློང་ལ་ལ་ཞིག་གིས་གོས་བརྙན་པོ་རྙེད་ན་གཅིག་པོ་གོ་ཚེར་མི་བགོ་
བར་ཀུན་གྱིས་སྤྱིར་སྤྱད་དོ། །གྲོགས་ནི་དགེ་སློང་དང་དགེ་སྦྱོང་གཅིག་ན་རྒན་པོ་ནས་གག་ཏུ་གྲུབ་པའི་སྟེང་དུ་སྦྱིན། ཀུན་གྱིས་སྤྱིར་བརྙས་པའི་གོས་སྦྱང་པ་ནི་དགེ་སློང་རྒན་རིམས་ནས་ཅི་ཐོབ་ཐོབ་ཏུ་གཡོགས་ཤིང་བསྐོན་ཏེ་དགེ་སྦྱོང་ཡན་ཆད་ཀུན་ཐོབ་ན་ལེགས་ཀུན་མི་ཐོབ་ན་མཇུག་མ་ནས་དུ་མ་ཐོབ་པ་ན་ཁ་རྗེ་ཆེ་ཆུང་དུ་ཟད་དེ་ཉེས་མེད་དོ། །མ་ཆད་ན་གྱོན་ཏེ་འཆག་ཏུ་མི་འགྲོ། །སྟེང་གོས་སྤྱིར་བརྙར་བྱིན་པ་ལས་བདག་གཅིག་པུ་གྱོན་ཏེ་འཆག་ཏུ་མི་འགྲོ། །སྟེང་དུ་བཅགས་པ་ནི་སྤྱན་དྲངས་ནས་བསོད་ནམས་འདོད་པས་སར་པ་ཁ་ཚར་མ་བཅད་པ་མི་རྟག་པ་ཡིད་ལ་བཟུང་པས་བཅོམ་སྟེའོ། །ཡོན་བདག་དད་པས་བསོད་ནམས་འདོད་པའི་ཕྱིར་སྟན་དང་ཡོ་བྱད་ལ་སོགས་པ་ནོར་རྫས་བཟང་པོ་དང་ཁ་ཚར་མ་བཅད་པ་ལ་སོགས་པས་བརྒྱན་ཅིང་བཏིང་སྟེ་སྤྱན་དྲངས་ནས་ནོར་རྫས་དེ་རྣམས་ལ་མི་རྟག་ཅིང་འཇིག་པ་ཡིན་ཏེ་མི་རྟག་པའི་རྫས་དེ་ལ་སྤྱད་པས་བསོད་ནམས་རྟག་པར་འགྱུར་བར་ཡིད་ལ་བསམས་ཏེ་སྤྱད་པ་ནི་ཉེས་མེད་དོ། །གོས་མ་བཙོས་པའི་སྦྱོར་བའོ། །གོས་ཁ་དོག་མ་བསྒྱུར་བ་གྱོན་པའི་ལྟུང་བ་རྫོགས་སོ།། །།རིན་པོ་ཆེའི་ལྟུང་བ་ལ་འཆད་དེ། རེག་པ་དང་རེག་ཏུ་བཅུག་ན་བདག་གི་མ་ཡིན་པའི་རིན་པོ་ཆེ་ཡང་བྱེད་དོ། །བདག་གི་མ་ཡིན་པ་ནོར་བུ་རིན་པོ་ཆེ་རྣམས་དང་གསེར་དངུལ་ལས་བྱེད་དུ་བྱས་པ་ལ་སོགས་པ་ལ་བདག་གིས་བཟུང་ངམ་གཞན་འཛིན་དུ་བཅུག་ནའང་ལྟུང་ངོ༌། །དེར་གཏོགས་པ་ཡང་ངོ༌། །རིན་པོ་ཆེར་གཏོགས་པ་བཟུང་ན་ལྟུང་བར་འགྱུར་ཏེ་རིན་པོ་ཆེར་གཏོགས་པ་གང་གང་ཡིན་པ་ནི་འོག་ནས་འཆད་པའི་སཱུ་ཏྲ་རྣམས་ཡིན་ནོ། །དེ་དག་ནི་མཚོན་ཆ་སྟེ་གཡུལ་དུ་སྤྱོད་པ་དང་རོལ་མོའི་ཡོ་བྱད་ཀྱིས་སྤྱད་ཀྱང་ངོ༌། །རིན་པོ་ཆེར་གཏོགས་པ་ནི་མཚོན་ཆ་གཡུལ་དུ་འཐབ་མོ་བྱེད་པའི་སྤྱད་དང་རོལ་མོའི་ལག་ཆ་ལ་སོགས་པ་ལ་བྱ་སྟེ་གང་ལ་རེག་ཀྱང་རུང་ལྟུང་བར་འགྱུར། དགོས་པའི་ཕྱིར་དགོས་པར་གྲུབ་ན་རྩ་བའོ། །སཱུ་ཏྲ་ལྟག་མའི་ནང་ནས་འབྱུང་བའི་མཚོན་ཆ་དང་རོལ་མོའི་ཆ་སྤྱད་ནི་མ་ཆད་ཅིང་མ་བྲལ་ཏེ་སོ་སོ་ལས་སུ་སྤྱད་དུ་རུང་བ་ལ་
བཟུང་ན་ལྟུང་བའོ། །མ་གྲུབ་ན་ཉེས་བྱས་པ། མཚོན་ཆ་དང་རོལ་མོའི་ཆ་སྤྱད་ཆག་གམ་གྲུགས་ཏེ་སྤྱད་དུ་མི་རུང་པ་ལ་རེག་ན་ཉེས་བྱས། མ་གཏོགས་པ་ནི་བདག་གི་བྱ་བར་མ་ཞུགས་པ་ནོར་ཆུད་མི་གཟན་པའི་སེམས་ཀྱིས་གཙུག་ལག་ཁང་དང་དེའི་མཚམས་སུ་གཏོགས་པ་ནའོ། །རིན་པོ་ཆེ་དང་རིན་པོ་ཆེ་ལ་གཏོགས་པ་བཟུང་ཡང་ཉེས་པ་མེད་པ་ནི་གཙུག་ལག་ཁང་གི་ཕྱིར་ཚུན་ཆད་ཀྱི་ནང་ངམ་ར་བའི་ཕྱི་རོལ་གཙུག་ལག་ཁང་གི་མཚམས་སུ་གཏོགས་པ་ཚུན་ཆད་གཅིག་ན་གཞན་གྱི་ནོར་འཁྱམ་པ་ཞིག་འདུག་ན་ནོར་བདག་སུའི་ཡིན་ན་སླར་སྦྱིན་པའི་ཕྱིར་མི་སྟོར་བར་བྱ་བར་བསམས་ཏེ་བདག་གིས་བླངས་སམ་གཞན་ལེན་དུ་བཅུག་ཀྱང་ཉེས་མེད། དེ་ལ་མི་གཡེལ་བར་རོ། །མདོ་ལྟག་མ་ལྟར་རྫས་བླངས་བ་དེ་ནོར་བདག་སླར་སྦྱིན་པའི་ཕྱིར་མ་སྟོར་བར་ནན་ཏན་ཏུ་བསྲུང༌། ཞག་བདུན་ནམ་བརྒྱད་དུ་དེའི་མཚམས་སུའོ། །སླར་སྦྱིན་པའི་ཕྱིར་བླངས་པའི་ནོར་དེ་ནོར་བདག་ལེན་དུ་མ་འོངས་སམ་ཁུངས་མ་ཕྱིན་ན་བདག་ཉིད་ཀྱི་ལག་ཏུ་ཞག་བདུན་ནམ་བརྒྱད་དུ་ཆོངས་ཤིག །འགྲོ་ན་ཉལ་ཉིལ་ལམ་ལོ་མ་བསྡུས་པས་གཡོགས། རྙེད་པའི་གཞི་དེ་ཉིད་དུ་སྦར་རུང་བ་ཞིག་གམ་བླངས་པ་ལས་བདག་གུད་དུ་འགྲོ་ན་སའམ་སྦུར་མ་ལ་སོགས་པས་གཡོགས་ཏེ་གཞན་གྱིས་མི་རྙེད་བར་སྦས་ལ་འགྲོ། རྟགས་ལམ་ཕབ་ན་ངའི་ཞེས་ཟེར་ཡང་མི་སྦྱིན། ནོར་རྙེད་པ་དེ་ལ་ནོར་བདག་ང་ཡིན་ཞེས་ཟེར་ཞིང་ལེན་པ་ཞིག་འོངས་ན་ནོར་མི་བསྟན་པར་སྤུ་རྟགས་དྲིས་ཏེ་མཐུན་ན་སྦྱིན་སྤུ་རྟགས་དང་མི་མཐུན་ན་མི་སྦྱིན། མ་འོངས་ཏེ་འདས་ན་དགེ་འདུན་གྱི་མཛོད་དུ་གཞུག །ནོར་རྙེད་པ་དེ་ཞག་བརྒྱད་ཀྱི་བར་དུ་བསྡད་དེ་ནོར་བདག་མ་འོངས་ཤིང་ཁུངས་མ་ཕྱིན་ན་བདག་གི་ལག་ན་མི་བཅང་བར་དགེ་འདུན་གྱི་མཛོད་དུ་གཞུག་གོ །ཟླ་བ་དྲུག་གི་མཐའི་བར་དུ་བཅད། སཱུ་ཏྲ་ལྟག་མ་ལྟར་དགེ་འདུན་གྱི་མཛོད་དུ་བཞག་པ་ལས་ནོར་བདག་མ་འོངས་ན་ཟླ་བ་དྲུག་གི་བར་དུ་མཛོད་དུ་བཞག་སྟེ་བཅད། འདས་ཏེ་མ་འོངས་ན་སངས་རྒྱས་སམ་དགེ་འདུན་གྱིས་གང་དུ་རྙེད་པ་
དེར་སྦྱར། ཟླ་བ་དྲུག་གི་བར་དུ་དགེ་འདུན་གྱི་མཛོད་དུ་བཞག་ཀྱང་ནོར་བདག་མ་འོངས་ན་སངས་རྒྱས་ཀྱི་མཆོད་རྟེན་དང་ཉེ་བ་ཞིག་ན་འདུག་པ་ལས་རྙེད་ན་ནི་སངས་རྒྱས་ཀྱི་དཀོར་དུ་བྱའོ། །དགེ་འདུན་དང་ཉེ་བ་ཞིག་ནས་རྙེད་དེ་བླངས་ན་དགེ་འདུན་གྱི་དཀོར་དུ་བྱའོ། །མི་མཁོ་ན་བཙོང་ལ་མཁོ་ཞིང་བརྟན་པར་རོ། །དགེ་འདུན་ནམ་སངས་རྒྱས་ལ་ཕུལ་བའི་ནོར་དེ་སྤྱད་དུ་མི་མཁོ་ན་ཕྱིས་ནོར་བདག་ལེན་དུ་འོངས་ན་གཏན་སྟོར་བར་མི་བྱ་བའི་ཕྱིར་ཟངས་ལྟ་བུ་བརྟན་པར་འདུག་པའི་རྫས་སུ་བཙོང༌། དེ་སྟེ་བདག་པོ་འོངས་ན་གནང་བ་བསླང་མི་འདོད་ན་སྦྱིན། །སཱུ་ཏྲ་ལྟག་མ་ལྟར་བཙོངས་པ་ལས་ནོར་བདག་འོངས་ནས་ཁྱོད་ཀྱི་བསོད་ནམས་སུ་རུང་བའི་ཕྱིར་དཀོན་མཆོག་ལ་ཕུལ་ཏེ་སྤུ་བསྒྱུར་བ་འདི་ཡིན་གྱིས་དད་པ་བསྐྱེད་ཅིག་ཅེས་དད་པ་བསྐྱེད་དུ་མི་བཏུབ་ཏུ་འདོད་ཅེས་ཟེར་ན་སླར་སྦྱིན། དེ་སྟེ་སྐྱེད་སློང་ན་འདི་ཉིད་ཀྱང་མང་བར་མི་སེམས་སམ་ཇི་སྲིད་དུ་བདག་ཅག་གིས་བསྲུངས་ཞེས་སྨྲོས་ཤིག །སཱུ་ཏྲ་ལྟག་མ་ལྟར་ནོར་སྤུ་བསྒྱུར་བ་སླར་བྱིན་པ་ལས་ནོར་གྱི་སྐྱེད་དང་སྤྱད་པའི་གླ་ལ་སོགས་པ་འདོད་ཅེས་ཟེར་ན་འདི་སྲིད་དུ་ངས་བསྲུངས་ཏེ་ནོར་དངོས་མ་སྟོར་བར་བྱིན་པ་འདི་ཉིད་ཆེ་ཞིང་མང་བར་མི་སེམས་སམ་ཞེས་ཤགས་གདབ། ནོར་བུ་ལ་སོགས་པ་བདར་ཕུག་ན་མཁོ་བའོ། །ནོར་བུ་བྱི་བདར་བྱས་ཤིང་ཕུག་པ་ལ་རེག་པ་ནི་ལྟུང་བ་མ་བདར་མ་ཕུག་པ་ལ་རེག་པ་ནི་ཉེས་བྱས་མགུལ་འཁོར་དང་གདུ་བུ་དང་དཔུང་རྒྱན་དང་ཕྲེང་བ་དང་ཕྲེང་ཕྱེད་པ་དང་གཞུག་པར་ནའོ། །གསེར་དངུལ་དང་ནོར་བུའི་མགུལ་འཁོར་དང་གདུ་བུ་དང་དཔུང་རྒྱན་དང་ཕྲེང་བ་དང་དོ་ཤལ་ལ་སོགས་པ་སྤྱད་ཅིང་གཞུག་ཏུ་རུང་བ་ལ་བཟུང་བ་ནི་ལྟུང་བ། ཆག་ཅིང་ཆད་ཏེ་སྤྱད་དུ་མི་རུང་བ་ལ་བཟུང་བ་ནི་ཉེས་བྱས། རོལ་མོ་བྱིན་ན་དང་བེ་ནུ་དང་བལ་ལ་རི་དང་མ་ཧ་ཏི་དང་མུ་གྷོ་ཥ་རྣམས་རྒྱུད་དང་བཅས་པ་དག་གོ །རོལ་མོ་སྤྱད་པ་མིང་གིས་སྨོས་པ་འདི་རྣམས་ནི་བྱི་བང་ཤ་དགས་ཏེ་རྒྱུད་དང་བཅས་པ་ལ་བཟུང་ན་ལྟུང་བའོ། །རྒྱུད་དང་སོ་སོར་བྲལ་བ་ནི་ཉེས་བྱས། ཟེར་བ་གླིང་བུ་དང༌། དུང་དང་བུད་
དུང་དང༌། རྔ་དང་རྔ་བོ་ཆེ་སྟེ་གཟིངས་དང༌། བི་དྷྲི་དང་རྔ་བེ་རི་དང༌། པ་ཊ་ཧ་དང་རྔ་ཆུང་དུ་ལག་པ་གཉིས་ཀྱིས་བརྡབ་པ་དང༌། མུ་ར་བ་རྣམས་སོ། །རྫམ་དང་ལས་བྱས་པའི་རྔ་དང་འདི་རྣམས་ལ་རེག་ནའང་ལྟུང་ངོ༌། །གཞུ་རྒྱུད་དང་བཅས་ནའོ། །གཞུ་རྒྱུད་དང་བཅས་པ་ལ་རེག་ནའང་ལྟུང་བར་འགྱུར་རོ། །དེ་བཞིན་དུ་རལ་གྲི་དང་ཟོར་རལ་དང་སོ་གཅིག་པ་དང་མདུང་དང་ལག་མདུང་དང་ཨེ་ཏ་དག་གོ །མིང་གིས་སྨོས་པ་འདི་རྣམས་སྤྱད་དུ་རུང་བ་ལ་རེག་ནའང་ལྟུང༌། སྤྱད་དུ་མི་རུང་ན་ཉེས་བྱས། མདའ་དང་ལྕགས་མདའ་དང་སྟག་མདའ་མེད་བུ་དང་བཅས་པའོ། །མདའི་མིང་གིས་སྨོས་པ་འདི་རྣམས་སྤྱད་དུ་རུང་ཞིང་མདེའུ་དང་བཅས་པ་ལ་རེག་ནའང་ལྟུང་བའོ། །རིང་བསྲེལ་དང་བཅས་པའི་སྐུ་གཟུགས་ལ་ཡང་ངོ༌། །ཤ་རི་རམ་ནང་ན་ཡོད་པའི་སྐུ་གཟུགས་ལ་རེག་ནའང་ལྟུང་བ། ཉེས་མེད་པ་ནི་དེར་སྟོན་པའི་འདུ་ཤེས་གཞན་ནོ། །ཤ་རི་རམ་ཡོད་པའི་གཟུགས་ཁྱིམ་པའམ་དགེ་སྦྱོང་མེད་ན་སྟོན་པ་ཡིན་པར་བསམས་ཤིང་མཆོད་པར་གཟུང་བ་ནི་ཉེས་མེད་དོ། །ནོར་བུ་དང་ཟན་དང་སོག་མའི་ཕྲེང་བ་དང་ཆུ་སྦྲང་དང་མ་ཏིལ་གྱི་སྦལ་སྐད་དང་བལ་གཞུ་དང་མདེའུ་གཞུ་ནི་ཕྱེད་དོ། །མིང་གིས་སྨོས་པ་འདི་རྣམས་ལ་རེག་ཅིང་བྱས་ནའང་ཉེས་བྱས་སོ། །གསེར་གྱི་ཐུ་ལུམ་མོ་མཁོ་བའོ། །གསེར་དང་དངུལ་གྱི་གར་བུ་དང་སྦྲམ་དང་གསེར་ཕྱེ་དང་དགོག་ལ་སོགས་པ་བྱད་དུ་མ་བྱས་པ་ལ་རེག་པ་ནི་ཉེས་བྱས། སྡངས་ན་གཟུང་ངམ་བདག་གི་ལ་མི་གནོད་ན་དགེ་འདུན་གྱིའམ་མཆོད་རྟེན་གྱི་གསེར་དངུལ་སྦོས་ཏེ་སོང་ཤིག་འཇིགས་པའི་རྐྱེན་ཅིག་བྱུང་སྟེ་དཀོན་མཆོག་གསུམ་གྱི་དཀོར་གསེར་དངུལ་ལམ་རིན་པོ་ཆེ་ལ་སོགས་པ་བཀྲམ་པའམ་མ་བྲུབས་པ་ལ་བདག་གིས་བྲུབ་ཅིང་གཞུག་ནུས་པ་ཙམ་གྱིས་ཆོད་ན་བྲུབས་ཏེ་སྡུས་ལ་སོང་ཤིག་རེག་ཀྱང་ཉེས་མེད་དོ། །དད་པའམ་དགེ་སྦྱོང་གིས་སོ། །ལྟག་མ་ལྟར་བྲུབ་པ་དགེ་སྦྱོང་དང་ཁྱིམ་པ་ཡོད་ན་བདག་གིས་མ་རེག་པར་ཁྱིམ་པ་དང་དགེ་སྦྱོང་བྱེད་དུ་གཞུག །མེད་ན་བདག་གིས་སོ། །དཀོན་མཆོག་གི་དཀོར་བྲུབ་པ་ཁྱིམ་པ་དང་
དགེ་སྦྱོང་དང་ཁྱིམ་པ་མེད་ན་བདག་གི་བྲུབས་པ་ཉེས་མེད་དོ། །དེ་བརྐོས་ཏེའོ། །ལྟག་ཏུ་བཤད་པ་ལྟར་དཀོན་མཆོག་གི་དཀོར་བྲུབ་པའི་གནས་མེད་པ་དགེ་སློང་དང་ཁྱིམ་པའང་མེད་ན་བདག་གིས་ས་བརྐོས་ཏེ་སྤྱད་ཀྱང་ཉེས་མེད། མེད་ན་སྦྱིན། ལྟག་མ་ལྟར་སྦས་པ་ལས་འཇིགས་པའི་རྐྱེན་རྐུན་པོ་མེད་ན་ཕྱུང་ལ་སོ་སོའི་རྐྱེན་དུ་གཞག །དབྱུང་བའང་དེ་བཞིན་ནོར་སྦས་པ་སླར་དབྱུང་བའི་ཚེ་དགེ་སྦྱོང་དང་ཁྱིམ་པ་མེད་ན་བདག་གིས་ཕྱུང་ཞིང་རེག་ཀྱང་ཉེས་མེད། ཉེས་མེད་པ་ནི་མི་མ་ཡིན་པའི་གནས་ན་བསོད་ནམས་ལས་སྐྱེས་པ་དེ་སྟེ་དེ་དག་ཏུ་རིན་པོ་ཆེའི་སའམ་སྟེགས་ལ་སོགས་པ་ཡང་ངོ༌། །ལྷ་བྲན་ལྟ་བུ་ཁོ་བདག་གི་བསོད་ནམས་ཀྱིས་ཁང་ཁྱིམ་དང་ས་གཞི་ཡན་ཆད་རིན་པོ་ཆེ་དང་གསེར་དངུལ་དུ་འདུག་པ་ཞིག་གིས་དགེ་སློང་སྤྱན་དྲངས་ཏེ་སྤྱད་ཅིང་རེག་པ་ནི་ཉེས་མེད་དོ། །བཟའ་བའི་སྣོད་གཞན་མེད་ན་ཡང་ངོ༌། །སཱུ་ཏྲ་ལྟག་མ་ལྟར་རེག་ཀྱང་ཉེས་མེད་པ་ནི་བཟའ་བའི་སྣོད་སྤྱད་དང༌། རྫས་གཞན་མེད་ན་རེག་ཀྱང་ཉེས་མེད། མལ་སྟན་དུ་འདུག་པ་ཡང་ངོ༌། །ལྟག་ཏུ་བཤད་པ་ལྟར་སྤྱན་དྲངས་བ་ལ་ཞག་དུ་གནས་ནའང་ཁྲི་སྟན་རིན་པོ་ཆེ་ལ་འདུག་ཅིང་ཉལ་བའང་ཉེས་མེད་དོ། །སོང་ཤིག་ཐེག་པས་སོ། །ལམ་རིང་པོར་འགྲོ་ན་རྟ་དང་ཤིང་རྟ་དང་བལ་གླང་དང་ཁྱོགས་ལ་བཞོན་དུའང་རུང་ངོ༌། །ཆོས་ཀྱི་དོན་གྱི་དབང་གིས་ཏེ། ཆོས་ཀྱི་དོན་གྱི་ཕྱིར་གཞན་གྱིས་བཀུག་གམ་བདག་ཆོས་སློབ་པའི་ཕྱིར་འགྲོ་བ་ནི་བཞོན་དུ་དབང་ངོ༌། །རྒྱན་ཅན་ལ་མ་ཡིན། རྟ་དང་ཤིང་རྟ་ལ་སོགས་པ་གསེར་དངུལ་དང་རིན་པོ་ཆེས་བརྒྱན་པ་ལ་མི་བཞོན། རྒན་པོ་དང་ནད་པ་མ་ཡིན་པ་གཞན་མ་ཡིན། ཆོས་ཀྱི་ཕྱིར་བཞོན་དུ་དབང་བ་ཡང་ནད་པ་དང་རྒན་པོ་འགྲོ་མི་ཕོད་པ་བཞོན་དུ་དབང་ངོ༌། །འདུག་ཅིང་ཆོས་ཉན་པའི་ཕྱིར་རིན་པོ་ཆེའི་སེང་གེའི་ཁྲི་ལ་མི་རྟག་པ་ཡིད་ལ་བྱ་སྟེ་བཅོམ་ནའོ། །ཆོས་བཤད་པ་དང་ཁ་སྟོན་བྱེད་པའི་ཕྱིར་རིན་པོ་ཆེ་ལ་སོགས་པའི་ཁྲིའི་སྟེང་དུ་འདུག་ནའང་མི་རྟག་ཅིང་འཇིག་པར་འགྱུར་རོ་སྙམ་བསམས་ཏེ་འདུག་ནའང་ཉེས་མེད་དོ། །འཇུག་ན་
ཁྱིམ་པའིའོ་ཞེས་བཅས་པ་དག་ལས་བརྟག །ཁྱིམ་པའི་ཁྲི་སྟན་རིན་པོ་ཆེ་ཞིག་ལ་གཞག་ནའང་ཁྱིམ་པའི་རྫས་དེ་མི་རྟག་ཅིང་འཇིག་པ་ཡིན་ཏེ་སྤྱད་པས་བསོད་ནམས་རྟག་པར་འགྱུར་རོ་བར་བསམས་ཏེ་འདུག་ནའང་ཉེས་མེད། གསེར་གྱིས་སྤྲས་དྲིལ་བུས་བསྐོར་བའི་གོས་ལ་ཡང་ངོ༌། །ཁྱིམ་པའི་ཁྲི་སྟན་ལ་གསེར་གྱིས་སྤྲས་པའི་དྲིལ་བུས་བརྒྱན་པ་ཞིག་ནའང་ལྟག་མ་ལྟར་བསམས་ཏེ་སྤྱད་དོ། །དེར་ནོར་བུས་སྤྲས་གསེར་དངུལ་གྱིས་བརྒྱན། ཁྱིམ་པའི་ཁྲི་སྟན་གསེར་དངུལ་གྱི་གྱིམ་ཕག་དང་ནོར་བུས་བརྒྱན་པ་ཞིག་ལ་སྤྱོད་ནའང་ལྟག་མ་ལྟར་བསམས་ཏེ་སྤྱད་དོ། །དེ་དག་ཀྱང་གཞུག །ཁྱིམ་པའི་ཁྲི་སྟན་རྒྱན་ཅན་ལ་སྤྱོད་སྤྱོད་དེ་ཆར་པ་བབ་སྟེ་དྲུང་ན་ཁྱིམ་པ་མེད་ན་བསྐྱལ་ཞིང་སྦ་བའི་ཕྱིར་རེག་ཀྱང་ཉེས་མེད་དོ། །མ་བརྟགས་པ་མ་ཡིན་པ་ནི་སྟོན་པར་འདུ་ཤེས་བཞག་སྟེ་ཁྱིམ་པ་དང་དགེ་སྦྱོང་མེད་ན་སངས་རྒྱས་ཀྱི་སྐུ་གཟུགས་ལ་ཆོས་ཀྱི་དོན་ཀྱི་ཕྱིར་རེག །དགེ་སྦྱོང་དང་ཁྱིམ་པ་མེད་པ་སངས་རྒྱས་ཀྱི་སྐུ་གཟུགས་གསེར་དངུལ་དང་རིན་པོ་ཆེ་ཞིག་ལས་བྱས་པ་སྦ་བརྟུལ་དང་བྱི་བདར་བྱེད་ན་སྟོན་པ་ཡིན་པས་མཆོད་པའི་དོན་གྱི་ཕྱིར་རེག་གོ་ཞེས་བསམས་ཏེ་རེག་ཀྱང་ཉེས་མེད་དོ། །དེའི་རྫས་ཀྱང་ངོ༌། །སངས་རྒྱས་དང་ཆོས་ཀྱི་རྒྱན་དང་དཀོར་ལ་སོགས་པ་ལ་ལྟག་མ་ལྟར་བསམས་ཏེ་བཟུང་ཞིང་སྤྱད་ཀྱང་ཉེས་མེད། རྣ་ཆ་བགོ་ཞིང་མི་སྤྱད། དགེ་སློང་གིས་ལུས་རྒྱན་རྣ་ཆ་ལ་སོགས་པ་མི་གདགས། རྒྱ་ཆོངས་ཤིག། རྒྱ་བཅངས་ཀྱང་ཉེས་མེད་དོ། །མི་བགོ་བའོ། །རིན་པོ་ཆེ་ལས་བྱས་པའི་རྒྱ་དང་རིན་པོ་ཆེ་ལུས་ཀྱི་རྒྱན་དུ་བྱས་པ་ལ་རྒྱ་བྲིས་པ་མི་བཅང་ངོ༌། །ཞ་ཉེ་ཟངས་ར་གན་ཁར་བ་རྒྱ་སྐྱེགས་ཤིང་རྡོ་ཁམ་བ་སོ་རྭ་ལས་སོ། །རྒྱའི་རྒྱུ་ནི་མིང་གིས་སྨོས་པ་འདི་རྣམས་ལ་བྱའོ། །འདི་རྣམས་ལ་ལུས་ཀྱི་རྒྱན་དུ་བྱས་པ་ལས་རྒྱ་འདྲིར་ཀྱང་མི་གནང་ངོ༌། །མཚན་མ་ནི་དགེ་འདུན་གྱི་ན་དབུས་སུ་འཁོར་ལོ་ངོས་སུ་རི་དགས་གཉིས་འོག་ཏུ་གཙུག་ལག་ཁང་གི་བདག་པོའི་མིང་ངོ༌། །དགེ་འདུན་གྱི་སྤྱིའི་རྒྱ་ནི་ཐབས་འདི་ལྟར་བྲིའོ། །གང་ཟག་གི་ན་ཀེང་
རུས་སམ་མགོ་ཐོད་དོ། །དགེ་སློང་གང་ཟག་གི་རྒྱ་ནི་མིང་རུས་མི་བྲི་བར་མིའི་ཀེང་རུས་དག་བྲིའོ། །སོ་མངས་ཀྱིས་སྐྲ་མི་བཤད་དགེ་སློང་གིས་མགོ་སོ་མངས་ཀྱིས་སྐྲ་མི་བཤད། དཔེར་ན་འདི་བཞིན་ནོ། །སོ་མངས་ཀྱིས་མི་བཤད་པ་བཞིན་དུ་རྩ་དང་ཐུར་མ་དང་ཕག་ཟེ་ལ་སོགས་པ་ཅིས་ཀྱང་མི་བཤད། མེ་ལོང་ལ་བཞིན་མི་བལྟ། དགེ་སློང་མེ་ལོང་ལ་བལྟར་མི་གནང་ངོ༌། །ཆུ་ཡང་ངོ༌། །ཆུའི་ནང་དུ་གདོང་གི་གཟུགས་འབྱུང་བའི་ཕྱིར་ཆུ་ལའང་བཞིན་མི་བལྟ། ལྟུང་བ་མེད་པ་ནི་ཆུ་བརྟག་པའི་ཕྱིར་དང་གཉེར་མ་དང་སྐྲ་སྐྱ་བ་བལྟ་བའོ། །ཆུ་དང་མེ་ལོང་ལ་བལྟས་ཀྱང་ཉེས་མེད་པ་ནི་ཆུ་བརྟག་པའི་ཕྱིར་ཆུའི་ནང་དུ་བཞིན་གྱི་གཟུགས་བརྙན་མཐོང་བ་དང་གཉེར་མ་དང་རྒས་པའི་ཚད་བལྟ་བའི་ཕྱིར་བལྟས་པ་ནི་ཉེས་མེད། སྔོན་དང་མཐའ་མའི་མཚན་མ་བཟུང་བ་ལའོ། །རྒན་པོ་དང་གཉེར་མ་མེ་ལོང་ལ་བལྟ་བ་ཉེས་མེད་པ་ནི་མི་རྟག་པར་ཚོར་ཞིང་དགེ་བ་ལ་འགྲུས་པར་འགྱུར་བའི་ཕྱིར་ཉེས་མེད་དོ། །སོར་རིས་གསུམ་མི་བྱ། ས་དཀར་རམ་ཙན་དན་གྱིས་ལུས་ལ་མུར་འདུག་བཞིན་དུ་མཛུབ་རིས་མི་བྱ། རོ་ཙ་ནས་མི་བྱུག །བསུང་ཞིམ་པོ་གླང་གི་ལྟོ་ནས་འོང་པས་ལུས་ལ་མི་བྱུག །བསུང་གི་མ་ཡིན། དྲི་བསུང་ངོ་ཅོག་གིས་ལུས་ལ་མི་བྱུག །བསོད་ནམས་ཀྱི་ཕྱིར་ན་བསུང་གི་ཕྱེ་མས་རྐང་པ་ལ་སྤྱད་བསུང་ཞིམ་པོ་ཞིག་ཡོན་བདག་གིས་བྱིན་ཏེ་ལུས་ལ་མི་བསྐུར་མི་རུང་ཞེས་ཟེར་ན་མིག་ལ་ཡང་ཕན་པའི་ཕྱིར་རྐང་པ་ལ་བསྐུ། དེའི་མདུན་དུ་མི་དཔྱིད། བསུང་གིས་རྐང་པ་ལ་བསྐུས་པ་ཡོན་བདག་གུད་དུ་མ་སོང་གི་བར་མི་དཔྱིད། དེས་བྱུགས་ནས་དགེ་འདུན་འདུས་པ་མ་ཡིན། དྲི་བསུང་གིས་བསྐུས་ཏེ་དགེ་འདུན་འདུས་པའི་ཁྲོད་དུ་མི་འགྲོ་།ཁྱིམ་པ་རྣམས་ལ་ཆོས་མི་བཤད། དྲི་བསུང་གིས་བསྐུས་ཏེ་ཁྱིམ་པ་ལ་ཆོས་མི་བཤད། རིགས་སུ་མི་འགྲོ་།དྲི་བསུང་གིས་བསྐུས་ཏེ་གྲོང་ལ་སོགས་པར་མི་འགྲོ་།མཐར་ནི་ཁྲུས་བྱ། ན་བའི་ཕྱིར་དྲི་གསུང་གིས་ལུས་ལ་བྱུགས་པ་དང༌། རྐང་པ་ལ་བྱུགས་པ་ན་ཡོན་བདག་སོང་ངམ་
མི་དོགས་ན་ཁྲུས་བྱས། དེ་བླང་གཞན་གྱིས་དྲི་བསུང་བྱིན་ཏེ་བླངས་ཀྱང་ཉེས་མེད་མེ་ཏོག་དང་ཕྲེང་བ་ཡང་ངོ༌། །མེ་ཏོག་གི་ཕྲེང་བ་ལ་སོགས་པ་ཞིག་བྱིན་ན་བླངས་ཀྱང་ཉེས་མེད། མཆོད་རྟེན་ལ་བསྐོ། མེ་ཏོག་དང་དྲི་བསུང་བླངས་པ་དེ་མཆོད་རྟེན་ལ་འབུལ་ལོ། །ཉན་ཐོས་པའི་ཡང་ངོ༌། །མེ་ཏོག་དང་དྲི་བསུང་བླངས་པ་དེ་ཉན་ཐོས་ཀྱི་མཆོད་རྟེན་ལ་ཕུལ་ཀྱང་ཉེས་མེད་དོ། །སྦྱིན་བདག་མི་དགའ་ན་སྔས་སམ་ཕོངས་སུའོ། །མེ་ཏོག་བླངས་པ་མྱུར་དུ་མཆོད་རྟེན་ལ་ཕུལ་བ་སྦྱིན་བདག་མིག་སྔ་ན་འདུག་སྟེ་དགའ་ན་སྐད་ཅིག་སྔས་སམ་ཕོངས་ལོགས་སུ་གཞག །སྒོ་མངོན་པར་མི་བྱ། མེ་ཏོག་བཞག་པ་དེ་གཞན་གྱིས་མི་མཐོང་བར་བྱ་བའི་ཕྱིར་སྒོའི་ཐད་ཀར་སྣང་བར་མི་བཞག །རྩིག་པ་མེ་ཏོག་གི་ཕྲེང་བ་སྒོའི་ཡ་རོལ་ལམ་མ་རོལ་གྱི་རྩིག་པ་ལ་གདགས་ཕྲེང་བ་སྤྱད་པ་ནི་ཁབ་ཀྱིས་སམ་ཚེར་མས་བཙུགས་ཏེའོ། །མེ་ཏོག་རྩིག་པ་ལ་གདགས་པ་ནི་ཁབ་བམ་ཚེར་མ་རྩིག་པ་ལ་གཙུགས་ཏེ་གདགས་སོ། །མིག་ལ་ཕན་པ་ནི་བསུང་རབ་སྟེ་དུས་དུས་སུ་བསྣམས། མེ་ཏོག་ལ་སོགས་པ་དྲི་བསུང་མིག་ལ་ཕན་པའི་ཕྱིར་སྣར་བསྣམས་ཀྱང་ཉེས་མེད། ཚངས་པའི་སྐུད་པ་ཐོགས་ཤིང་མི་སྤྱད། མུར་འདུག་དང་བྲམ་ཟེ་ལ་སོགས་པའི་ཆོས་སུ་སྐུད་པས་སེ་རལ་ཁར་མི་གདགས། སྐུད་པའི་མ་ཡིན། སངས་རྒྱས་ཀྱི་ཆོས་ཀྱི་སྔགས་ཀྱི་སྐུད་པའི་ཐག་བུ་མགུལ་པ་དང་ལག་བར་མི་གདགས། ཕྲག་པ་གཡོན་པའི་དྲུང་དུ་ཆོ་གའི་ཕྱིར་སྤྱད་པ་ཡང་ངོ༌། །སངས་རྒྱས་ཀྱི་ཆོས་ཀྱི་སྐུད་པའི་ཐག་གུ་གདགས་ནའང་མི་སྣང་བར་བྱ་བའི་ཕྱིར་ཕྲག་པ་གཡོན་པའི་དྲུང་དུ་གདགས། གར་བབ་བབ་ཏུ་མི་དོར། སཱུ་ཏྲ་ལྟག་མ་ལྟར་ཐག་གུ་བཅིངས་པ་མི་དགོས་ན་གཙང་སྦྲ་དང་བཙུན་པར་བྱ་བའི་ཕྱིར་བབ་ཅོལ་དུ་མི་དོར། ལྷག་མ་དང་བཅས་པ་གོས་ཀྱི་གྲྭའམ་སྐ་རགས་ཀྱི་ཐོག་མར་བཅིང༌། ཕྲག་པ་སྔགས་ཀྱི་ཐག་བུས་བཏགས་པ་ལས་ནད་ཐག་གི་སྟེ་མ་བྱང་གི་བར་དུ་ནི་ཕྲག་པ་ལས་བཀྲོལ་ལ་གོས་ཀྱི་གྲྭའམ་སྐ་རགས་ཀྱི་ཐོག་མ་ལ་གདགས། དེ་སྟེ་མ་ཡིན་ན་ཀ་བའམ་རྩིག་པའི་སེར་ཀར་གཞུག །ཕྲག་པ་ལ་
བཏགས་པའི་ཐག་བུ་ནད་སོས་ཏེ་མི་དགོས་ན་ཀ་བའམ་རྩིག་པའི་གསེབ་ཏུ་གཞུག །བྲོ་དང་གླུ་དང་རྔ་མི་སྤྱད། དགེ་སློང་གིས་བྲོ་དང་གླུ་དང་རྔའི་སྒྲ་ལ་སོགས་པ་མི་བྱ། དྲུག་སྡེས་རོལ་མོ་མཁན་གྱི་ཆས་སུ་ཞུགས་ཏེ་རོལ་མོ་བྱས་པ་ལས་བཅས། མི་བསླབ། རོལ་མོ་དང་རྫ་རྔ་ལ་སོགས་པ་བདག་གིས་གཞན་ལ་མི་བསླབ། མི་བསྙེན། གཞན་ལའང་རོལ་མོའི་ཆོ་ག་སློབ་ཏུ་མི་གཞུག །བལྟར་མི་འགྲོ་།རོལ་མོ་བྱེད་པ་ལ་བལྟར་མི་འགྲོ་།དགེ་སློང་མས་ཀུན་འཇོལ་མི་བྱ། དགེ་སློང་མས་བྲོ་མི་བརྡུང༌། བྱ་བ་ནི་སྟོན་པའི་ཡོན་ཏན་བརྗོད་པ་དང་སུམ་རྒྱུད་སྦྱིན་པ་དང་དབྱངས་བྲོ། དབྱངས་བྱས་ཀྱང་ཉེས་མེད་པ་ནི་བསྟོད་པ་དང་སུམ་རྒྱུད་ཀྱི་ཚིགས་སུ་བཅད་པ་ཀླག་པ་ལ་སོགས་པ་ལ་བྱས་ཀྱང་ཉེས་མེད། དེ་དག་བསླབ། སྟོཏྟྲ་དང་སུམ་རྒྱུད་དང་དབྱངས་དག་བསླབས་ཀྱང་ཉེས་མེད། དབེན་པའི་ཕྱོགས་སུའོ། །དབྱངས་བསླབ་པ་གཞན་གྱིས་མ་ཐོས་པར་དབེན་པར་བསླབ་བོ། །ངོམ་ཟུམ་དང་རྩེད་མོ་དང་ཅ་ཅོ་དང་དྲོག་དྲོག་པོ་དང་ལྟར་ལྟར་པོ་དང་ལུས་ཀྱིས་བསྙེགས་པ། མིང་གིས་སྨོས་པ་འདི་རྣམས་ལྟར་རྒྱགས་པའི་ཡན་ལག་མི་བྱ། དྲོག་དྲོག་པའི་བསམ་པས་ལུས་དང་ངག་གིས་མི་བྱ། འདོད་ཆགས་དང་རྩེད་མོའི་སེམས་ཀྱིས་ལུས་དང་ངག་གི་སྒོ་ནས་རྩེད་མོ་ལ་སོགས་པ་ཇིའང་མི་བྱ། ཆས་བགོ་ཞིང་དབྱེ། རྐང་པ་བཀྲུས་ནས་རྡུལ་གྱིས་མི་གོས་པར་བྱ་བའི་ཕྱིར་ལག་འགྲོས་བྱས་པ་ལྟ་བུ་ཁྲིམས་ཀྱང་བསྲུངས་ལ་རྩེད་མོ་ཡང་བྱས་པ་ལྟ་བུ་ལ་སོགས་པ་མི་བྱ། སྣོད་དུ་བྲིམ་ཞིང་བཏུང་བ་མི་བྱ། སྣོད་གཅིག་གི་ནང་དུ་ཧུབ་རེས་མི་བྱ། དེ་བཞིན་དུ་ཟན་ཟ་བའི་ཚེ་གཅིག་ལ་གཅིག་ཁ་ཟས་དང་སྣོད་སྤྱད་བདར་ཞིང་མི་བཤུགས། མེ་ཏོག་གི་རྒྱན་མི་བཅིང་མེ་ཏོག་སྣ་ཚོགས་སྤེལ་ཞིང་བརྒྱུ་བ་ལ་སོགས་པ་རྒྱན་དུ་བྱ་བའི་བཟོ་ལག་དར་ཏེ་མི་བྱ། མི་བགོ །མེ་ཏོག་གི་རྒྱན་ལ་སོགས་པ་ལུས་ལ་མི་བགོ །རོལ་མོ་པའི་བྱ་དགའ་མི་སྦྱིན། རོལ་མོ་མཁན་རོལ་མོ་བྱེད་བྱེད་པའི་ཕྱིར་བྱ་དགའ་མི་སྦྱིན། ཐ་མལ་པའི་ཚེ་མི་བརྒྱུག །རྐྱེན་མ་བྱུང་བར་
ཐ་མལ་པར་འགྲོ་བའི་ཚེ་དྲག་ཏུ་མི་བརྒྱུག །དྲག་ཤུལ་དང་མཆང་བ་མི་བྱ། ལུས་ཀྱི་དྲག་ཤུལ་དང་མཆངས་པ་ལ་སོགས་པ་མི་བྱ། བརླ་དང་དཔུང་པ་དང་ཉྭ་ཐབས་བཟློག་ཤིང་བརྗེ་བར་མི་བྱ། ཕྱི་ཚར་དང་སྔ་ཚར་ལ་སོགས་པ་ལུས་ཀྱིས་བསྒྱུར་བ་རྐང་པ་གཉའ་བའི་སྟེང་དུ་བཞག་པ་ལ་སོགས་པ་མི་བྱ། ཆུ་ལ་རྡོ་ཕྱར་མི་བྱ། ཆུའི་སྟེང་དུ་རྡོ་འཕངས་ཏེ་ཕྱར་རར་འགྲོ་བ་མི་བྱ། ལག་ཆངས་ཀྱི་ཆུས་མི་གཏོར། ཆུ་སྦས་སྐད་ཀྱི་སྒྲ་མི་བྱ། ལག་པའི་ཐལ་མོས་ཆུ་ལ་བརྡབས་ཏེ་སྒྲ་མི་དབྱུང༌། ཆུ་ལ་ཕྱིལ་མོ་མི་ཉུག་ཆབ་བྲོམ་དང་ས་འགྲེང་མོ་ལ་སོགས་པ་ལ་ཕྱིས་མོ་མི་བྱ། བལ་གླང་སྐད་དང་རྟ་སྐད་དང་གླང་པོའི་སྐད་དང་རྨ་བྱ་དང་ཀོ་ཀོ་ལའི་སྐད་དུ་མི་བྱ། མིང་གིས་སྨོས་པ་འདི་རྣམས་ཀྱི་སྐད་མི་སྨྲ་མི་དབྱུང༌། ཁའི་དུང་འབའ་འབའ་མི་བྱ། ཁ་ནས་དུང་འདྲ་བ་ཟེར་བ་དང་འབའ་འབུ་བླང༌། བླུག་ལ་སོགས་པ་མི་བྱ། ཏྲོག་ཏྲོག་པོའི་དངོས་པོར་གཏོགས་པའོ། །རིན་པོ་ཆེ་ལ་རེག་པའི་ལྟུང་བ་རྫོགས་སོ།། །།འཁྲུག་པའི་ལྟུང་བ་ལ་འཆད་དེ། དཔྱིད་ཀྱི་ལྷག་མ་ཕྱེད་དང་གཉིས་དང་དབྱར་གྱི་ཐོག་མའི་ཟླ་བའོ། །དབྱར་ཟླ་ར་བའི་ཚེས་ནས་དབྱར་ཟླ་ཐ་ཆུངས་ཉ་ཕན་ཆད་ཟླ་བ་ཕྱེད་དང་གསུམ་ནི་ཚ་བས་ན་དུས་ལ་བབ་ཏེ་ནམ་བཀྲུས་ཀྱང་ཉེས་མེད། གོས་མེད་པའི་གཉིས་པོ་རྙེད་པ་དེའི་ཚུལ་ལོ། །ཡང་ཟ་བའི་རྐྱེན་དུས་མ་གཏོགས་པར་ན་བ་དང་ལམ་དང་གྲུ་བཞུགས་པ་དང་ལས་དང་གཞིའི་རྐྱེན་གཅིག་བྱས་ནའང་འཁྲུར་དབང་སྟེ་ཉེས་མེད་དོ། །རླུང་གིས་མ་བརྟུལ་ནའོ། རླུང་གིས་གོས་མ་བཟློག་གམ་རྡུལ་གྱིས་ལུས་ལ་མ་ཕོག་པ་ལས་བཀྲུས་ན་ལྟུང་བར་འགྱུར་གྱི་རླུང་དང་རྡུལ་གྱིས་ཕོག་པ་ནི་བཀྲུས་ཀྱང་ཉེས་མེད། གོས་ཀྱི་གྲྭ་འགུལ་བ་དེའི་མཐས་སོ། །རླུང་གིས་ཕོག་པའི་ཚད་ནི་གོས་ཀྱི་གྲྭ་འགུལ་བ་ཡན་ཆད་ཀྱིས་འཁྲུར་དབང༌། ཆར་གྱིས་མ་བབ། ཆར་གྱིས་བབ་པ་ནི་འཁྲུར་དབང་སྟེ་བཀྲུས་ཀྱང་མི་ལྟུང་ངོ༌། །དེ་ཐིགས་གཉིས་ལྟུང་ནའོ། །ཆར་གྱིས་བབ་པའི་ཚད་ནི་ཐིགས་པ་གཉིས་སམ་གསུམ་ཕོག་ནས་འཁྲུར་དབང་ངོ༌། །ལུས་ལའོ། །ཆར་གྱིས་ཕོག་པ་ནི་གོས་ལ་ཕོག་པ་ལ་མི་བྱའི་ལུས་ལ་
ཕོག་པ་ལ་འཁྲུར་གནང་ངོ༌། །གཞན་ཡང་ཞག་བཅོ་ལྔ་ལས་ཁྲུས་ཀྱི་ཉི་མ་མ་ཡིན་ཏེ་ཚུན་ཆད་བཀྲུ་བ་མ་ཡིན། ཞག་བཅོ་ལྔ་མ་ལོན་པར་ཁྲུས་བྱས་ན་ལྟུང་བར་འགྱུར། བཅོ་ལྔ་ལ་ལན་ཅིག་ཁྲུས་བྱས་པ་ནི་ཉེས་མེད། བླུགས་པར་མ་ཞུག་པས་སོ། །ཁྲུས་བྱད་པ་ནི་ཆུའི་ནང་དུ་ཞུགས་ཀྱང་རུང་བཅུས་ཏེ་སྤྱི་བོ་ནས་བླུགས་ཀྱང་རུང་གང་ལྟར་བཀྲུས་ཀྱང་ལྟུང་ངོ༌། །དེ་ལྟེ་བར་ཕྱིན་ནའོ། །བཀྲུ་བའི་ཚད་ནི་སྤྱི་བོ་ནས་བླུགས་ཏེ་ཆུ་ལྟེ་བར་ཕྱིན་ཀྱང་རུང་ཆུའི་ནང་དུ་ཞུགས་ཏེ་ལྟེ་བར་ཕྱིན་ཀྱང་རུང་བཀྲུས་པར་ཆུད་དོ། །ཚུན་ཆད་ན་ཉེས་བྱས་པའོ། །ལྟེ་བར་མ་ཕྱིན་པར་བཀྲུས་པ་ནི་ཉེས་བྱས་སོ། །ཐམས་ཅད་དུ་དུས་སུ་བསྔོ་བ་མ་བསྔོས་ན་ཡང་ངོ༌། །ལས་ཅི་བྱེད་དོ་ཅོག་ལ་ཡང་བསམ་པའང་རུང་སྨྲ་བའང་རུང་ལུས་ཀྱིས་བྱེད་པའང་རུང་ས་མ་ཡམ་མ་བསྔོས་པར་བྱས་ན་ཅི་བྱས་སོ་ཅོག་ཉེས་བྱས་སོ། །དོན་གྱི་ཆུར་མྱོང་བ་ཁྲུས་མ་ཡིན། ཆུ་ཆེན་པོ་རྒལ་བ་ལ་འབོགས་ཀྱང་རུང་རྐྱལ་པའང་རུང༌། ལུས་ཐམས་ཅད་གཤེར་བ་ནི་ཁྲུས་བྱས་པར་མི་ཆུད་དོ་ཉེས་མེད་དོ། །དེ་བས་ན་རྒལ་བ་དང་མ་ཚོར་བར་ལྟུང་བ་དང་བརྒྱལ་བ་ལ་བཏབ་པ་ལ་ལྟུང་བ་མེད། ཆུ་རྒལ་བ་དང་ཆུའི་ནང་དུ་ལྷུང་བ་དང་བརྒྱལ་བའི་ཕྱིར་ཆུས་བཏབ་པ་ལ་སོགས་པ་ཡང་བཀྲུས་པར་མི་ཆུད་དེ་ཉེས་མེད་དོ། །ཡུལ་ཨསྨ་པ་རན་ད་ཀན་འདི་དག་མེད་པར་ཤེས་ཤིག །ཡུལ་ཨསྨ་པ་རན་ད་ཀ་ན་ཀོ་ལྤགས་འཆང་དུ་གནང་བའི་ཡུལ་ན་ནི་རྟག་པར་ཁྲུས་བྱས་ཀྱང་ལྟུང་བར་མི་འགྱུར་རོ་ཞེས་གནང་ངོ༌། །མཆོག་ཡོད་ན་ཆུང་ངུའི་བརྟག་པར་མི་བྱ། ཆར་གྱིས་ཕོག་ན་འཁྲུར་གནང་ངོ་ཞེས་བྱས་པའི་ཕྱིར་ཆེད་ཀར་གྱིས་ཕོག་པར་བྱས་ཏེ་ཁྲུས་མི་བྱ། ཡུལ་མཐའ་ཁོབ་ཏུ་ཨ་ཤི་ལྔས་ཁྲིམས་རྫོགས་སུ་གནང་བ་ལས་ལྔ་ཉི་ཚེས་ཆོག་ཅེས་ཏེ་དགེ་འདུན་ལྡས་རྫོགས་པར་མི་བྱ། དཔེ་བཤད་པ་འདི་གཉིས་དང་འདྲ་བར་ཅི་བྱའོ་ཅོག་ཐམས་ཅད་གནང་བའི་ཚིག་ལ་བརྟེན་ཏེ་སླ་ཆོས་སུ་སྒྱུ་མི་བྱ། ཁྲུས་ཀྱི་ལྟུང་བའོ། །ཁྲུས་བྱེད་པའི་ལྟུང་བ་རྫོགས་སོ། །དགུ་བཅུ་ལྟུང་བའི་བཅུ་སྡེ་རྫོགས་སོ།། །།བྱོལ་སོང་གསོད་པའི་ལྟུང་བ་ལ་འཆད་དེ། བསད་
པའི་སེམས་ཀྱིས་བྱོལ་སོང་ལ་བསད་པའི་སེམས་ཀྱིས་བསད་ན་ལྟུང་བར་འགྱུར་ཏེ་ཡན་ལག་གཅིག །ཕྱུགས་ལ་བསྣུན་ནའོ། །བྱོལ་སོང་བསད་པའི་ཕྱིར་བསྣུན་ཀྱང་བསྣུན་པ་ལས་ལྟུང་བར་འགྱུར་ཏེ་ཡན་ལག་གཅིག །དེར་རམ་གཞན་ཡང་དེའི་ཤི་ནའོ། །བདག་གིས་བསད་དེ་འཕྲལ་ལ་ཤི་ཡང་རུང་བསད་པར་བསྣུན་པ་ལས་འཕྲལ་དུ་མ་ཤིའི་ཕྱིས་ཤི་ཡང་རུང་སྟེ་ཤི་ན་ལྟུང་བར་འགྱུར་ཏེ་ཡན་ལག་གཅིག །ཡན་ལག་འདི་རྣམས་དང་ལྡན་པས་བྱོལ་སོང་བསད་ན་ལྟུང་བར་འགྱུར་རོ། །ཉེས་བྱས་པ་ནི་སེམས་ཅན་འདྲ་ལ་སེམས་ཅན་མ་ཡིན་པའོ། །སེམས་ཅན་གྱི་གཟུགས་སུ་བྱས་པའམ་སེམས་ཅན་གྱི་གཟུགས་སུ་རི་མོ་བྲིས་པ་བཤིག་ན་ཉེས་བྱས། བྱོལ་སོང་གསོད་པའོ། །བྱོལ་སོང་གསོད་པའི་ལྟུང་བ་རྫོགས་སོ།། །།ཐེ་ཚོམ་ལ་འཆད་དེ། ཁྱེད་རབ་ཏུ་མ་རྫོགས་ལ་ཕས་ཕམ་པ་བྱུང་ཞེས་པ་ལ་སོགས་པ་དགེ་སློང་མ་ཡིན་པའི་ཕྱིར་ཐེ་ཚོམ་སྐུར་ནའོ། །དགེ་སློང་ལ་ཡོ་བྱད་མ་ཚང་བ་ལ་སོགས་པ་ཁྲིམས་མི་འཆགས་པའི་ཚིག་གང་བྱས་ཀྱང་རུང་སྟེ་ཁྱོད་ཁྲིམས་མ་ཆགས་སོ་ཞེས་ཐེ་ཚོམ་སྐུར་པ་དང་ཕས་ཕམ་པར་མ་གྱུར་པ་ལ་ཕམ་པར་གྱུར་ཏོ་ཞེས་ཐེ་ཚོམ་སྐུར་པ་ལས་ལྟུང་བར་འགྱུར་ཏེ་ཡན་ལག་གཅིག ། དྲུག་སྡེས་བཅུ་བདུན་སྡེ་ལོ་མ་ཚང་པར་ཁྲིམས་རྫོགས་པ་དང་བུས་ཕ་ཕུལ་ཞིང་འགྲོ་བ་ལས་ཤི་བ་ལ་ཕམ་པ་དང་མཚམས་མེད་པ་ཡོད་དོ་ཞེས་ཐེ་ཚོམ་སྐུར་པ་ལས་བཅས། དགེ་སློང་ནའོ། །ཐེ་ཚོམ་སྐུར་པ་དེ་དགེ་སློང་ཡང་ཡིན་པ་ལས་ལྟུང་སྟེ་ཡན་ལག་འདི་གཉིས་དང་ལྡན་ན་ལྟུང་བར་འགྱུར། མི་བདེ་བ་བསྐྱེད་པའི་སེམས་ཀྱི་ན་རྩེད་མོས་ཀྱང་ཐེ་ཚོམ་མ་སྐྱེས་ཀྱང་ངོ༌། །ཕ་རོལ་པོ་དགེ་སློང་མི་བདེ་ཞིང་མི་དགའ་བར་བྱ་བའི་ཕྱིར་ཁྲིམས་མ་ཆགས་པ་ལ་སོགས་པ་ཡིན་ནོ་ཞེས་སྨྲས་ན་ལྟུང་བ་དགེ་སློང་མ་ཡིན་པ་དང་མི་དགའ་བར་བྱ་བའི་ཕྱིར་ནི་མ་ཡིན་གྱི་རྩེད་མོ་བྱས་པ་ནི་ཉེས་བྱས། གཞན་གྱིས་ན་ཉེས་བྱས་པའོ། །ལྷག་མ་དང་ལྟུང་བ་ཞིག་ཏུ་གྱུར་ཏོ་ཞེས་ཐེ་ཚོམ་སྐུར་ན་ཉེས་བྱས། ཐེ་ཚོམ་སྐུར་པའོ། །ཐེ་ཚོམ་སྐུར་པའི་ལྟུང་བ་རྫོགས་སོ།། །།མཛུབ་མོའི་ལྟུང་བ་ལ་འཆད་དེ། དགེ་སློང་ནའོ། །དགེ་སློང་ལ་ག་ག་
ཚིལ་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག་སོར་མོ་དང་ཁུ་ཚུར་དང་གྲུ་མོ་དང་ཕྲག་པ་དང་མགོ་དང་ལོགས་དང་རྒྱབ་དང་སྟ་ཟུར་དང་བྲང་དང་པུས་མོ་དང་བྱིན་པ་དང་རྐང་པའི་མཐེ་བོང་ལ་སོགས་པས་རེག་ཅིང་ག་ག་ཚིལ་བྱས་ནའོ། །མིང་གིས་སྨོས་པ་འདི་རྣམས་གག་ཀྱང་རུང་འདི་རྣམས་ཀྱིས་ག་ག་ཚིལ་བྱས་ན་ལྟུང་བར་འགྱུར་ཏེ་ཡན་ལག་གཅིག །སེང་སེང་པོའི་སེམས་ཀྱིས་སོ། །ག་ག་ཚིལ་བྱེད་པ་ལ་རྩེ་བའམ་འཕྱར་བའི་སེམས་སེང་སེང་པོ་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ག་ག་ཚིལ་གྱི་ལྟུང་བར་འགྱུར་རོ། །དེ་བས་ན་རྨ་དང་སྤྲང་མ་དང་མཛེར་པ་དང་སྨེ་བ་དང་སྤུ་འཁྱིལ་བ་བསྟན་པ་ནི་ལྟུང་བ་མེད་དོ། །མིང་གིས་སྨོས་པ་འདི་རྣམས་གང་ཡང་རུང་སྟེ་ལུས་ལ་ཡོད་པ་ལ་བསྟན་ཅིང་བལྟ་བའི་ཕྱིར་མཛུབ་མོས་བཙུགས་པོ་ནི་ཉེས་མེད་དོ། །ལྟུང་པ་དུ་མ་ཡང་གཅིག་གོ །ག་ག་ཚིལ་བྱས་པ་ནི་སོར་མོ་རེ་རེ་ལྟུང་བ་རེ་རེར་མི་འགྱུར་གྱི་ལྟུང་བ་གཅིག་ཏུ་ཟད་དོ། །ག་ག་ཚིལ་གྱི་ལྟུང་བའོ། །ག་ག་ཚིལ་བྱེད་པའི་ལྟུང་བ་རྫོགས་སོ།། །།དགའ་བའི་ལྟུང་བ་ལ་འཆད་དེ། ཆུའི་ཡུལ་དུ་བྱ་བ་ནན་ཏན་ནོ། །ཆུའི་ནང་དུ་དགའ་ཞིང་རྩེ་བ་ལས་ལྟུང་བར་འགྱུར་ཏེ། ཡན་ལག་གཅིག །ཞུགས་ནས་ཆུའི་ནང་དུ་ཞུགས་པ་དང༌། ནུབ་ཆུའི་ནང་དུ་ལུས་ནུབ་པ་དང༌། བྱང་ནུབ་པ་ལས་ཆུའི་སྟེང་དུ་བྱུང་བ་དང༌། མཐའ་ཕ་རོལ་དུ་འགྲོ་བ། ཆུ་ལ་ཕར་རྒལ་ཚུར་རྒལ་བྱེད་ཅིང་འགྲོ་བ་དང༌། གྱེན་ཐུར་གྱི་རྒྱུད་རུ་བབ་ཅིང༌། ཆུའི་རྒྱུད་བཞིན་དུ་འགྲོ་བ་དང༌། རྒྱུན་ལས་ལོག་སྟེ་འགྲོ་བ་དང༌། ཆུ་རྔ་དང་ཆུ་ལ་ལག་གིས་བརྡབས་ཏེ་སྒྲ་འབྱིན་པ་དང༌། སྦལ་པའི་ཟེར་བ་དང༌། ཆུའི་ནང་དུ་མཆུ་བཙུགས་ནས་བླག་བླུག་ཟེར་བ་དང༌། ཆུས་ཕྱར་བ་དང༌། ཆུ་ལ་རྡོ་འཕྱར་བྱེད་པའང་རུང་ཆུ་ལ་ལག་ཆངས་ཀྱིས་གཏོར་ཀྱང་རུང༌། བསྐོར་བ་དང་ཆུ་ལ་ལག་པས་བསྐོར་བ་དང༌། རྡོ་རྗེ་དང་ཆུ་ལ་རྡོ་རྗེ་ཐབས་སུ་འཕངས་ཀྱང་རུང་རྡོ་རྗེ་འདྲ་བ་བྲིས་ཀྱང་རུང༌། ཁྲོན་པ་དང་ཆུ་ལ་དྲག་ཏུ་བསྐོར་ན་དབུས་སུ་བུ་གུ་འདྲ་བ་འབྱུང་བ་དང༌། མཁྱིལ་བ་བྱེད་པ་དང༌། ཆུ་བསྐྱིལ་པ་
དང༌། འདྲི་བ་དྲངས་ན་རྩ་བའོ། །ཆུ་ལ་རི་མོ་བྲི་བ་དང་ཤུར་ཤུར་པོར་དྲངས་པ་དང་འདི་རྣམས་གག་བྱས་ཀྱང་ལྟུང་ངོ༌། །བལྟུབས་པ་བསྣུན་ན་ཉེས་བྱས། །ཆུ་ལ་བེམ་རྟོལ་བསྣུན་པ་ནི་ཉེས་བྱས། རྫ་མ་དང་ཕྲུ་བ་དང་རིལ་བ་དང་ཕོར་བུར་རོ། །འདི་རྣམས་ཀྱི་ནང་ན་ཆུ་འདུག་པ་ལ་གོང་མའི་རིམ་པ་ལྟར་རྩེས་ན་ཉེས་བྱས། བུ་རམ་ཁུ་བ་དང་ཚོད་མ་དང་ཐུག་པ་དང་ཆན་ཁུ་བསྲོས་པ་ཡོད་པ་ལ་ཡང་ངོ༌། །མིང་གིས་སྨོས་པ་འདི་རྣམས་ཀྱི་ཁུ་བ་ལ་རྟག་ཏུ་སྨོས་པ་ལྟར་རྩེས་ན་ཉེས་བྱས། ཆུ་མ་ཡིན་པ་ལ་དགའ་བ་ཡང་ངོ༌། །འོ་མ་ལ་སོགས་པ་ལ་རྩེས་ནའང་ཉེས་བྱས། དེ་བཞིན་དུ་བྱེད་དུ་བཅུག་པ་ཡང་འགྱུར་རོ། །ལྟག་ཏུ་སྨོས་པའི་རྩེད་མོ་རྣམས་གཞན་བྱེད་དུ་བཅུག་ནའང་ལྟུང་བར་འགྱུར་རོ། །ཏྲོག་ཏྲོག་པོའི་དགའ་བ་མྱོང་བར་འདོད་པས་སོ། །ཆུའི་ནང་དུ་རྩེ་བའི་ལྟུང་བ་ནི་རྩེད་མོ་འམ་དགའ་བའི་སེམས་ཏྲོག་ཏྲོག་པས་རྩེས་ན་ལྟུང་ངོ༌། །དེ་བས་ན་སིམ་པ་འདོད་པའི་ཕྱིར་ཞུགས་ན་ལྟུང་བ་མེད་དོ། །རྩེད་མོའི་སེམས་ཀྱིས་ཆུ་ལ་རྩེས་པས་ལྟུང་བས་ན་འདི་ནི་ཚ་ཞིང་མི་བདེ་བ་བསིལ་བར་བྱ་བའི་ཕྱིར་ཆུར་ཞུགས་ཤིང་བཀྲུས་པ་ནི་ཉེས་མེད། རྐྱལ་སློབ་པས་ཞེང་ངམ་ཆུར་འབད་ནའོ། །རྩེ་བའི་ཕྱིར་ནི་མ་ཡིན་གྱི་བདག་ལ་ཕན་པར་བྱ་བའི་ཕྱིར་ལྐོག་དབེན་པར་རྐྱལ་སློབ་པ་ནི་ཉེས་མེད། བསྒྲང་པའི་ཕྱིར་དྲོན་པོ་ལ་བྲིས་ན་གྲངས་ནའོ། །ཚ་བ་ལ་སོགས་པ་བསྒྲང་བའི་ཕྱིར་ཐུག་པ་ལ་སོགས་པ་ལ་གཟར་བུ་དང་ཁ་གཟར་དང་སྐྱབས་དཀྲུགས་པ་ནི་ཉེས་མེད། གཤེར་བ་ལ་དགའ་བའོ། །ཆུའི་ནང་ན་དགའ་ཞིང་བརྩེ་བའི་ལྟུང་བ་རྫོགས་སོ།། །།ལྷན་ཅིག་གི་ལྟུང་བ་ལ་འཆད་དེ། །བུད་མེད་དང་ལྷན་ཅིག་ཏུ་ཁྱིམ་གཅིག་ཏུ་གཉིད་ལོག་པའོ། །བུད་མེད་དང་ལྷན་ཅིག་ཏུ་ཁྱིམ་གཅིག་གི་ནང་དུ་ལྷན་ཅིག་ཉལ་བ་ལས་ལྟུང་བར་འགྱུར་ཏེ་ཡན་ལག་གཅིག ། ནུབ་མོ་མཐས་སོ། །བུད་མེད་དང་ལྷན་ཅིག །ཉལ་ཏེ་ཞག་གཅིག་གི་སྐྱ་རེངས་བྱུང་ནས་ལྟུང་པར་འགྱུར་ཏེ་ཡན་ལག་གཉིས་དང་ལྡན་ན་ལྟུང་བར་འགྱུར། སྔ་མ་ནི་ཉེས་བྱས་པའོ། །བུད་མེད་དང་དང་པོ་ལ་ཉལ་ནས་སྐྱ་རེངས་མ་བྱུང་གི་བར་དུ་ནི་ཉེས་བྱས། བྱ་གག་མོ་ཙམ་
ཡང་འདི་བྱེད་པ་མཐའོ། །བུད་མེད་མ་ཡིན་པ་གཞན་མོ་དང་ཉལ་ན་བྱ་གག་ཙམ་ཡན་ཆད་དང་ཁྱིམ་གཅིག་ཏུ་ཞག་ལོན་ན་ཉེས་བྱས་སོ། །མོ་དུ་ཡོད་པ་བཞིན་དུ་ཉེས་བྱས་རེ་རེར་འགྱུར་རོ། །བུད་མེད་དང་ལྷན་ཅིག་ཉལ་བའོ། །བུད་མེད་དང་ལྷན་ཅིག་ཉལ་བའི་ལྟུང་བ་རྫོགས་སོ།། །།སྡངས་བྱེད་པ་ལ་འཆད་དེ། རྩེད་མོར་བསམ་པ་འདོད་པས་ཀྱང་འཇིགས་སྐྲག་སྡངས་བསྙེན་ཏེ་ཟེར་བ་འཇིགས་པར་བྱེད་པ་ཆེ་གེ་མོ་ཞིག་གོ་ཞེས་དགེ་སློང་ནའོ། །ཆེད་ཀར་བསྡིགས་ཀྱང་རུང་རྩེད་མོར་བསྡིགས་ཀྱང་རུང་འཇིགས་ཤིང་བསྡང་བར་བྱ་བའི་ཕྱིར་འདྲེ་ལ་སོགས་པའི་དེ་འདྲ་བ་ཞིག་འོང་ཞེས་བྱས་ཀྱང་རུང་གཟུགས་ཉིད་འདྲེ་འདྲ་བར་བཅོས་ཏེ་བསྡིགས་ཀྱང་རུང་དགེ་སློང་ལ་སྔངས་ཤིང་སྐྲག་པར་བྱས་ན་ལྟུང་བར་འགྱུར་རོ། །གཞན་གྱིས་ཀྱང་ངོ༌། །དགེ་སློང་དེ་བསྡང་བར་བྱོས་ཤིག་ཅེས་གཞན་ལ་བྱེད་དུ་བཅུག་ཀྱང་ལྟུང་བར་འགྱུར། འཇིགས་པ་མ་སྐྱེས་ཀྱང་ངོ༌། །དགེ་སློང་ལ་འཇིགས་པར་བྱ་བའི་ཕྱིར་བསྡིགས་ནས་འཇིགས་ཤིང་སྔངས་པར་མ་གྱུར་ཀྱང་ལྟུང་ངོ༌། །རྩ་བ་ནི་ཡིད་ནི་མི་འོང་ནའོ། །ལྟུང་བར་འགྱུར་བ་ནི་འདྲེ་ལ་སོགས་པ་གཟུགས་མི་སྡུག་པ་དང་སྒྲ་མི་སྙེན་པ་དང་དྲི་མི་ཞིམ་ཞིང་ཡིད་དུ་མི་འོང་བས་བསྡིགས་ན་ལྟུང་བར་འགྱུར་ཏེ་གང་གང་ཡིན་པ་འོག་ནས་འཆད་དོ། །འདི་ལྟ་སྟེ་ཡི་དགས་དང་ཤ་ཟ་བ་དང་གྲུལ་བུམ་དང་ལུས་སྲུལ་པོའོ་ཞེས་སྨྲས་པ་དང་ནག་པོའི་ནག་པོ་སོལ་བའི་ཁ་དོག་དུམ་པ་ཚིག་པ་ལྟ་བུར་ནའོ། །ཡིད་དུ་མི་འོང་པ་ནི་འདི་རྣམས་ཡིན་ཏེ་འདི་རྣམས་གང་ཡང་རུང་བའི་གཟུགས་ཤིག་ཡོད་དེ་འོང་ངོ་ཞེས་སྨྲས་ནའང་ལྟུང་བར་འགྱུར་རོ། །སེང་གེ་དང་སྟག་དང་གཟིག་དང་ཀོ་ཀ་དང་སྤྱང་ཀི་དང་བྷྱ་སྟོ་རི་གའི་སྒྲ་དག་གིས་སོ། །མིང་གིས་སྨོས་པ་འདི་རྣམས་ལྟ་བུ་ཞིག་འོང་ངོ་ཞེས་བྱས་ཀྱང་རུང་རྣམས་ཀྱི་སྒྲ་ཕྱུང་སྟེ་པ་སྡིགས་ཀྱང་རུང་ལྟུང་བར་འགྱུར་རོ། །བཤང་གཅི་དང་ཐུག་པོའི་སྤུའི་དྲིས་སོ། །མིང་གིས་སྨོས་པ་འདི་རྣམས་ཀྱི་དྲི་འདི་འདྲ་བ་ཞིག་ཡོད་དེ་འོང་ངོ་ཞེས་བསྡིགས་ནའང་ལྟུང་བར་འགྱུར་རོ། །ར་གོང་དང་རེ་ལྡེ་དང་ར་ཕྱར་གྱིས་རེག་པ་
དག་གིས་སོ། །མིང་གིས་སྨོས་པ་འདི་རྣམས་དང་འདྲ་བར་རྩུབ་མོ་ཞིག་འང་ངོ་ཞེས་བསྡིགས་ཀྱང་ལྟུང་བའོ། །ཡིད་དུ་འོང་བ་ནི་ཉེས་བྱས་པའོ། །ལྷ་ལ་སོགས་པའི་གཟུགས་དང་སྒྲ་སྙན་པ་ཡིད་དུ་འོང་བས་བསྡིགས་པ་ནི་ཉེས་བྱས་ཏེ་འོག་ནས་འཆད། འདི་ལྟ་སྟེ་ལྷ་དང་ཀླུ་དང་གནོད་སྦྱིན་དང་མི་འམ་ཅི་དང་ལྟོ་འཕྱེ་ཆེན་པོ་སྨོས་ནའོ། །ཡིད་དུ་འོང་བ་ནི་འདི་རྣམས་ཀྱི་གཟུགས་འདྲ་བ་ཞིག་འང་ངོ་ཞེས་སྨྲས་ཀྱང་རུང་འདི་རྣམས་ཀྱི་གཟུགས་འདྲ་བར་བཅོས་ཏེ་སྨྲས་ཀྱང་རུང་ཉེས་བྱས། ནོར་བདག་ཚོང་དཔོན་དང་དེད་དཔོན་ལ་སོགས་པའི་གཟུགས་སོ། །ཚང་དཔོན་དང་ནོར་བདག་ཕྱུག་པོ་ལྟ་བུའི་མི་ཞིག་ཁྱོད་ལ་གནོད་པ་བྱེད་པར་འོང་ངོ་ཞེས་བསྡིགས་ན་ཉེས་བྱས། རོལ་མོ་བྷ་ན་ལ་སོགས་པའི་སྒྲ་དག་གིས་སོ། །མིང་གིས་སྨོས་པ་འདི་རྣམས་ཀྱི་སྒྲ་ཟེར་བ་ཞིག་འོང་ངོ་ཞེས་སྨྲས་ཀྱང་རུང་འདི་ཉིད་ཀྱི་སྒྲ་སྐད་དུ་བྱས་ཏེ་བསྡིགས་ཀྱང་རུང་ཉེས་བྱས། སྤོས་ཨ་ཀ་རུ་དང་ཙན་དན་དང་གུར་གུམ་དང་ཏ་མ་ལའི་ལོ་མའི་བསུང་དག་གིས་སོ། །མིང་གིས་སྨོས་པ་འདི་རྣམས་ཀྱི་དྲི་འདྲ་བ་ཞིག་འོང་ངོ་ཞེས་བྱས་ཀྱང་རུང་འདི་ཉིད་ཀྱི་དྲིས་བསྡིགས་ཀྱང་རུང་ཉེས་བྱས། དར་དང་སྣམ་བུ་དང་པགས་པ་དང་གོས་ཨབ་ཤུག་ཀ་དང་དུ་གུ་ལ་དང་ཀོ་དུ་འབའ་ཀ་རྣམས་དག་གིས་སོ། །མིང་གིས་སྨོས་པ་འདི་རྣམས་ལྟར་འཇམ་པ་ཞིག་འོང་ངོ་ཞེས་བྱས་ཀྱང་རུང་འཇམ་པོ་འདི་རྣམས་ཀྱིས་རེག་པར་བྱ་སྟེ་བསྡིགས་ཀྱང་རུང་ཉེས་བྱས། མ་གཏོགས་པ་ནི་སྐྱོ་བའི་ཕྱིར་བའོ། །མི་སྡུག་ཅིང་འཇིགས་པར་སྨྲས་ཀྱང་ལྟུང་བར་མི་འགྱུར་བ་ནི་ཆགས་པ་དང་དབྲལ་ཞིང་འཁོར་བ་ལས་སྐྱོ་བར་བྱ་བའི་ཕྱིར་མི་སྡུག་ཅིང་མི་སྙན་པའི་ཆོས་བཤད་ཀྱང་ཉེས་མེད་དོ། །དེ་བས་ན་སྐྱོ་བའི་ཕྱིར་སེམས་ཅན་དམྱལ་བ་དང་བྱོལ་སོང་དང་ཡི་དགས་དང་མིའི་གཏམ་ལ་སོགས་པ་ནི་ལྟུང་བ་མེད་དོ། །སྐྱོ་ཞིང་ཆགས་པ་དང་བྲལ་བའི་ཕྱིར་ལམ་རྒྱུད་ལྔའི་སེམས་ཅན་ན་རག་ལ་སོགས་པ་སྡུག་བསྔལ་བའོ། །འཇིགས་པའོ་གནོད་པའོ། །མི་གཙང་ངོ་ཞེས་བྱ་བ་ལ་སོགས་པའི་ཆོས་བཤད་ཅིང་སྨྲས་པ་ནི་ཉེས་མེད་དོ། །སྡངས་བྱེད་དོ། །སྔགས་པར་བྱེད་པའི་ལྟུང་བ་རྫོགས་སོ།། །།སྦེད་
པའི་ལྟུང་བ་ལ་འཆད་དེ། འདིའི་རབ་ཏུ་འབྱུང་བའི་ཡོད་པ་ལྷུང་བཟེད་དང་གོས་དང་སྣོད་དང་ཕོར་བུ་དང་ལུས་བཅིང་ལ་སོགས་པ་དགེ་སྦྱོང་གི་འཚོ་བའི་ཡོ་བྱད་སྦས་པའོ། །སངས་རྒྱས་ཀྱི་ཆོས་ལ་རབ་ཏུ་བྱུང་བ་དགེ་སློང་ཕོ་མོ་དང་དགེ་སྦྱོང་ཕོ་མོ་དང་དགེ་སློང་ཕ་མ་གང་ཡང་རུང་བ་སྟེ་དེའི་ཡོ་བྱད་མིང་གིས་སྨོས་པ་འདི་རྣམས་ལས་སྦས་ན་ལྟུང་བའོ། །མིང་གིས་སྨོས་པ་འདི་རྣམས་ལ་མ་གཏོགས་ཤིང་དགེ་སློང་གིས་གོས་སུ་བརྟགས་ཤིང་སྔགས་ཆགས་པའི་རྫས་ཤིག་ལས་སྦས་ནའང་ལྟུང་བ། དགེ་སློང་གིས་གྱོས་མ་བརྟགས་པ་ཞིག་སྦས་ན་ཉེས་བྱས། སྦེད་དུ་བཅུག་པ་ཡང་ངོ་དགེ་སློང་དང་དགེ་སྦྱོང་གིས་རྫས་ལ་གཞན་ཞིག་ལ་སྦེད་དུ་བཅུག་ནའང་ལྟུང་བར་འགྱུར་རོ། །མ་གཏོགས་པ་ནི་ཕན་པར་འདོད་པའི་ཕྱིར་རོ། །ཕན་པར་བྱ་བའི་ཕྱིར་ཡོ་བྱད་ལ་གཡེལ་ཞིང་ལེ་ལོ་བྱེད་པ་ལ་ཕྱིས་ལེ་ལོ་མི་བྱེད་པའི་ཕྱིར་སྐད་ཅིག་སྦས་ཏེ་བསྡིགས་པ་དང་མི་དགེ་བའི་གྲོགས་པོའི་གན་དུ་འགྲོ་བའམ་ཉོན་མོངས་པར་འགྱུར་བ་གནས་སུ་འགྲོ་བ་ལ་མི་བཏང་བའི་ཕྱིར་རྫས་གཏར་བཟུང་བ་ནི་ཉེས་མེད་དོ། །སྦེད་པའོ། །སྦེད་པའི་ལྟུང་བ་རྫོགས་སོ།། །།མ་ཕྱུང་བའི་ལྟུང་བ་ལ་འཆད་དེ། དགེ་སློང་གིས་གོས་ཐལ་བྱུང་བྱིན་པ་ལས་གནང་བ་མེད་པར་ཀུན་སྤྱོད་པའོ། །བདག་གིས་དགེ་སློང་གྲོགས་ལ་གོས་གཏན་བྱིན་པ་ལས་སླར་བརྙ་ཞེས་ཀྱང་མ་བྱས་ཁོ་ཅི་བདེར་སྤྱོད་ཅེས་ཀྱང་མི་ཟེར་བར་ཐུག་ཐུབ་ཏུ་གྱོན་ན་ལྟུང་བར་འགྱུར། དེ་སྟེ་དེའི་གཞིས་དེ་དགའ་བར་འགྱུར་ན་མ་ཡིན་ནོ། །བདག་གིས་གོས་སྦྱིན་པའི་དགེ་སློང་དེ་དང་བདག་གཉིས་སུ་ངོ་མཚར་དུ་སྒོར་མཛའ་སྟེ་ཁོའི་གོས་ལ་སོགས་པ་བདག་གིས་ཐུག་ཐུབ་ཏུ་གྱོན་ཅིང་སྤྱད་ན་ཁོ་དགའ་བར་འགྱུར་བ་ནི་སྤྱད་ཀྱང་ཉེས་མེད་དོ། །བྱིན་ཏེ་འཚོ་བའི། །བྱིན་ཏེ་འཚོ་བའི་ལྟུང་བ་རྫོགས་སོ།། །། སྐུར་བའི་ལྟུང་བ་ལ་འཆད་དེ། གཞིག་པར་འདོད་པ་སྟེ་དགེ་སློང་ནའོ། །བདག་གིས་དགེ་སློང་གྲོགས་ཤིག་ལ་ཚངས་པར་སྤྱོད་པའི་བར་ཆད་དང་སྨད་ཅིང་གཏམ་ངན་པར་བྱ་བའི་ཕྱིར་བརྫུན་གྱིས་སྐུར་ན་ལྟུང་བར་འགྱུར་ཏེ་དགེ་སྦྱོང་དང་ཁྱིམ་པ་ནི་མི་བྱའི་དགེ་སློང་
ལ་ཤེས་བཞིན་དུ་སྐུར་པ་ལས་ལྟུང་བའོ། །འདུ་ཤེས་སྦས་པ་དགེ་འདུན་གྱི་ལྷག་མའི་ལྟུང་བའོ། །བདག་གིས་བདེན་པའི་ཚིག་སྦས་ཏེ་བརྫུན་ལ་གནས་ནས་དགེ་སློང་གྲོགས་ལ་དགེ་འདུན་གྱི་ལྷག་མར་སྐུར་ན་ལྟུང་བར་འགྱུར། བསྒོའོ། །སྐུར་པ་ནི་བདག་གིས་དགེ་སློང་གཞན་ལ་སྨྲས་པ་ལས་ལྟུང་བར་འགྱུར་རོ། །བགས་ཀྱིས་ཀྱང་དགེ་སློང་འདྲ་བ་བྱ་མ་ལ་པུ་ཏྲ་ལ་ཨུཏྤ་ལ་བར་གནས་ཕྱག་འཚལ་བའི་ཚེ་གོས་ཀྱི་མཐའ་མས་དགེ་སློང་གི་མགོ་ལ་རེག་པ་དང་མི་དྲ་བུ་མི་ཀས་ལྷག་མའི་ཆོས་སྐུར་ཏེ་དེ་འདྲ་བའི་བགས་ལས་ལྷག་པར་སྐུར་ན་ལྟུང་བར་འགྱུར་རོ། །སྐུར་པའི་ལྟུང་བའོ། །སྐུར་བའི་ལྟུང་བ་རྫོགས་སོ།། །།སྐྱེས་པ་མེད་པར་ལམ་དུ་འགྲོ་བའི་ལྟུང་བ་ལ་འཆད་དེ། འདོད་པས་ལམ་དུ་ཞུགས་པའོ། །བུད་མེད་དང་ལམ་དུ་འགྲོགས་པ་ནི་འཇིགས་པའི་རྐྱེན་ཡོད་དེ་འཕྲལ་ལ་ལམ་དུ་ཕྲད་དེ་འགྲོགས་པ་ནི་མ་གཏོགས་ཏེ་འགྲོགས་འདོད་པའི་ཕྱིར་བུད་མེད་དང་དུས་བྱས་ཏེ་ལམ་དུ་འགྲོགས་པ་ནི་ལྟུང་བའོ། །རྒྱང་གྲགས་སོ་སོར་རོ། །བུད་མེད་དང་འགྲོགས་པ་ནི་རྒྱང་གྲགས་རེ་རེ་ཞིང་ལྟུང་བར་འགྱུར་རོ། །རེག་པའི་སྐྱེས་པ་མེད་པར་བུད་མེད་དང་འགྲོགས་པ་ལས་ལྟུང་ངོ༌། །དེ་སོ་སོར་ཕྱེད་ཅིང་ཡང་ཉེས་བྱས་སོ། །རྒྱང་གྲགས་ཕྱེད་ཅིང་ཉེས་བྱས་རེ་རེར་འགྱུར་རོ། །མ་གཏོགས་པ་ནི་བསེལ་བྱེད་པའོ། །བུད་མེད་དང་འགྲོགས་ཀྱང་ཉེས་པར་མི་འགྱུར་བ་ནི་འཇིགས་པའི་བསེལ་དུ་སྐྱེས་པ་མེད་དེ་བུད་མེད་འོངས་ནས་ངས་བསེལ་ནུས་ཞེས་ཟེར་བ་དང་དེང་ཡོད་དང་རྐུན་པོས་ཡུལ་མི་ངོ་ཤེས་པའི་ཕྱིར་རྐུན་པོ་མི་འོང་གིས་བསེལ་བྱའོ་ཞེས་ཟེར་བ་དང་འགྲོགས་པ་ནི་ཉེས་མེད། དེས་ལམ་སྟོར་བ་ལམ་དུ་ཞུགས་པའི་ཕྱིར་ན་ཡང་ངོ༌། །དགེ་སློང་ལམ་སྟོར་རམ་ལམ་མི་ཤེས་པ་ལ་བུད་མེད་ཀྱིས་ལམ་མཁན་བྱས་ཏེ་འགྲོགས་པ་ནི་ཉེས་མེད་དོ། །བུད་མེད་འཇིགས་པའི་རྐྱེན་དང་བུད་མེད་ལམ་མི་ཤེས་པ་ལ་ནི་དགེ་སློང་གིས་བསེལ་དང་ལམ་སྟོན་པར་འགྲོགས་སུ་མི་གནང་ངོ༌། །འགྲོ་མི་ནུས་པ་ཡང་ངོ༌། །དགེ་སློང་ནད་ཀྱིས་བཏབ་པ་མ་ཆད་དེ་འགྲོ་མི་ཕོད་པ་ལ་བུད་མེད་ཀྱིས་གྲོགས་བྱས་ཏེ་རྫས་དག་ཁྱེར་ནས་ལམ་དུ་འགྲོགས་པ་ནི་
ཉེས་མེད་བུད་མེད་དང་ལྷན་ཅིག་འགྲོགས་པའོ། །རིག་པའི་སྐྱེས་པ་མེད་པར་བུད་མེད་དང་ལམ་དུ་ལྷན་ཅིག་འགྲོགས་པའི་ལྟུང་བ་རྫོགས་སོ།། །།བཅུ་སྟེ་གཅིག་འདས། རྐུན་འགྲོགས་ཀྱི་ལྟུང་བ་འཆད་དེ། གྲོང་འཇོམས་པའི་རྐུན་པོ་དང་ཤོ་གམ་འཇོམས་པའི་རྐུན་པོ་དག་གོ །གྲོང་འཇོམས་ཤིང་ཆོམ་པོ་བྱེད་པའི་རྐུན་པོ་དང་ཤོག་གམ་པ་ནོར་ཅི་དབང་བ་མི་སྦྱིན་པའི་ཕྱིར་ཤོ་གམ་དྲལ་བ་དང་ཤོ་གམ་རྐུ་བའི་ཚོང་པ་དང་འགྲོགས་ན་ལྟུང་བར་འགྱུར། བྱ་མ་རྟ་དང་རྐུན་པོས་རབ་ཏུ་བྱུང་བ་དང་ན་ཉེས་པའོ། །བྱ་མ་རྟ་དང་མཁན་པོ་དང་ཨཱ་ཙཱཪྻ་མེད་པར་རབ་ཏུ་བྱུང་བ་དང་འགྲོགས་པ་ནི་རྒྱང་གྲགས་རེ་རེ་ཞིང་ཉེས་བྱས་རེ་རེར་འགྱུར་རོ། །རྐུན་པོ་དང་ལྷན་ཅིག་འགྲོགས་པའོ། །གྲོགས་པོ་རྐུན་མ་དང་ལྷན་ཅིག་འགྲོགས་པའི་ལྟུང་བ་རྫོགས་སོ།། །།ལོ་ཉི་ཤུ་མ་ལོན་པའི་ལྟུང་བ་ལ་འཆད་དེ། འྦྷྲིད། ལོ་ཉི་ཤུར་མ་ལོན་པར་ཤེས་བཞིན་དུ་རྫོགས་པར་བྱས་པ་ལས་ལྟུང་བར་འགྱུར། ལོ་ཉི་ཤུར་མ་ལོན་པ་བསྙེན་པར་རྫོགས་པའོ། །དགེ་སྦྱོང་ལོ་ཉི་ཤུར་མ་ལོན་པར་ཤེས་བཞིན་དུ་ཁྲིམས་རྫོགས་པར་འགྱུར་ན་ལྟུང་བར་འགྱུར་རོ། །མཁན་པོས་བསྙེན་པར་རྫོགས་པའོ། །ལོ་ཉི་ཤུ་མ་ལོན་པར་ཁྲིམས་རྫོགས་པར་བྱས་པ་ནི་མཁན་པོ་གང་ཡིན་པ་ལྟུང་བར་འགྱུར་རོ། །དེས་དེ་ལ་ཚང་ངམ་ཞེས་མི་འདྲི་བར་མི་བྱ། ཁྲིམས་རྫོགས་པར་བྱེད་པའི་དགེ་སློང་དེ་ལ་མཁན་པོ་གང་ཡིན་པས་ལོ་ཉི་ཤུ་ཚང་ངམ་ཞེས་འདྲིའོ། །ལོའང་མ་ཚང་ལ་མ་དྲིས་ན་མ་དྲིས་པའི་ཉེས་བྱས་དང༌། ལོ་མ་ཚང་པའི་ལྟུང་བ་དང་གཉིས་ཡོད་དོ། །གཞན་གྱིས་མ་ཡིན། རབ་ཏུ་རྫོགས་པར་འདོད་པ་ལ་དགེ་འདུན་གྱིས་ཀྱང་ལོ་ཚང་ངམ་ཞེས་འདྲིའོ། །ལོ་མ་ཚང་བ་ཞིག་མ་དྲིས་པ་རྫོགས་པར་བྱས་ན་མ་དྲིས་པའི་ཉེས་བྱས་རེ་རེ་དང་ལོ་མ་ཚང་པའི་ཉེས་བྱས་རེ་རེ་ཡོད་དོ། །བརྟགས་པ་མི་ཤེས་པ་བསྙེན་པར་རྫོགས་པར་མི་བྱ། བསྙེན་པར་རྫོགས་པར་འདོད་པ་དེ་ཁོ་བདག་གིས་ཀྱང་ལོ་གྲངས་མི་ཤེས་ལ་དགེ་འདུན་གྱིས་ཀྱང་མི་ཤེས་ན་བསྙེན་པར་རྫོགས་པར་མི་བྱ། ཐམས་ཅད་ཉི་ཤུར་ཚང་ན་
རབ་ཏུ་རྫོགས་པར་སྐྱེའོ། །ཁྲིམས་རྫོགས་པར་འདོད་པ་དེ་ལོ་ཉི་ཤུར་ནི་ཚང་གི་ཁོ་བདག་དང་མཁན་པོ་དང་དགེ་འདུན་གྱིས་ལོ་མ་ཚང་བར་ཤེས་ཏེ་ཁྲིམས་རྫོགས་པ་ནི་འདུ་ཤེས་མི་བཙན་གྱི་ཁྲིམས་འཚགས་སོ། །གཞན་དུ་ལོ་ཚང་བར་འདུ་ཤེས་ན་ཡང་ངོ༌། །ཁྲིམས་རྫོགས་པར་འདོད་པ་ན་དེ་ནི་ལོ་མ་ཚང་གི་ཁོ་བདག་དང་དགེ་དུན་གྱིས་ལོ་ཚང་བར་བསམས་ཤིང་ཁྲིམས་ཕོག་པ་ཡང་ཁྲིམས་འཆགས་ཤིང་འདུ་ཤེས་ཅན་ནོ། །མི་ཤེས་སམ་མི་དྲན་ནམ་ཡིད་གཉིས་ན་ཡང་ངོ༌། །ལོ་ཚང་ངམ་མ་ཚང་མི་ཤེས་སམ་མི་དྲན་ནམ་ཐེ་ཚོམ་ཟ་བཞིན་དུ་ཁྲིམས་ཕོགས་པ་ཡང་ལོ་མ་ཚང་ཡང་ཁྲིམས་འཆགས་སོ། །ཤེས་ན་དེ་ཞིག་གོ །སཱུ་ཏྲ་ལྟག་མ་གཉིས་ལྟར་ལོ་མ་ཚང་ལ་ཚང་བར་བསམས་པ་དང་ལོ་མ་ཚང་ལ་མི་ཤེས་སམ་ཡིད་གཉིས་སུ་ཁྲིམས་ཕོག་མ་ཕྱིས་ལོ་གྲངས་མ་ཚང་བར་ཤེས་ན་ཁྲིམས་མི་འཆགས་ཏེ་མེད་པར་སོང་ངོ༌། །དེ་སྟེ་འདི་ལྟར་ཚང་བ་ཐོབ་པ་མ་ཡིན་ནོ། །སཱུ་ཏྲ་ལྟག་མ་ལྟར་ལོ་མ་ཚང་པར་ནམ་ཤེས་ཤིང་ཚོར་བའི་ཚེ་ལོ་ཚང་ན་ཁྲིམས་རྫོགས་པའི་ཚེ་ལོ་མ་ཚང་ན་ཡང་ཁྲིམས་མེད་པར་མི་འགྱུར་ཏེ་འཆགས་སོ། །ལྷག་པ་དང་མངལ་གྱི་ཟླ་བ་དང་བཅས་པར་རོ། །ཁྲིམས་རྫོགས་པ་ལས་ཕྱིས་ལོ་མ་ཚང་བར་ཚོར་ན་ཁྲིམས་འཆགས་ཤིང་ལོ་ཚང་བྱ་བའི་ཐབས་འདི་ཡོད་དེ། ཐོག་མ་མངལ་ན་འདུག་པའི་ཟླ་བས་ཀྱང་བསྣན་སྐར་མཁན་གྱིས་ཆོས་སུ་ལོ་ཕྱེད་དང་གསུམ་ཞིང་ཟླ་བ་གཅིག་གི་ཁོང་ནས་ལྷག་པར་འབྱིན་ཅིང་བརྩིས་དེས་ཀྱང་བསྣན་ལ་ནམ་ཚོར་བའི་ཚེར་ཚང་ན་འཆགས། ཐོག་མ་ཁྲིམས་འབོགས་པའི་ཚེ་ནི་ཉི་ཤུར་མ་ཚང་བར་ཤེས་ན་མངལ་གྱི་ཟླ་བ་བསྣན་ཀྱང་ཁྲིམས་མི་འཆགས་སོ། །མ་ཚང་བ་བསྙེན་པར་རྫོགས་པའིའོ། །དགེ་སྦྱོང་ལོ་ཉི་ཤུར་མ་ཚང་བ་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།ས་རྐོ་བའི་ལྟུང་བ་ལ་འཆད་དེ། བརྐོས་སམ་རྐོར་བཅུག་ནའོ། །བདག་གིས་བརྐོས་ཀྱང་རུང་གཞན་གྱིས་རྐོར་བཅུག་ཀྱང་རུང་ལྟུང་བར་འགྱུར་རོ། །སའི་སའོ། །བྱེ་མ་དང་གསེག་མ་མ་ཡིན་པ་ས་བཟང་པོ་འཐས་པ་ལས་བརྐོས་ན་ལྟུང་བར་འགྱུར། མ་གཏོགས་པ་ནི་སོར་བཞི་ཙམ་གྱི་ཕུར་
བུས་བརྐོས་པ་སྟེ་ལས་སར་པ་པས་སྐར་མའི་ཆོ་ག་ལ་བརྟག་པར་བྱེད་པར་མེད་ནའོ། །ལྟུང་བར་མི་འགྱུར་བ་ནི་གཙུག་ལག་ཁང་རྩིག་པའི་ལས་མི་ལ་སོགས་པ་མ་ཚོགས་ལ་སྐར་མ་བཟང་པོའི་ཉི་མ་ལ་བབ་སྟེ་གཙུག་ལག་ཁང་གི་མཁར་ལེན་གྱི་མགོ་ཉི་མ་དེ་ལ་གཟུགས་དགོས་ཏེ་མི་གཞན་མེད་ན། སའི་རྔམས་སོར་བཞི་ཙམ་ཡན་ཆད་མཁར་ལེན་གྱི་རྨང་གཟུགས་པའི་མཚན་མར་དགེ་སློང་གིས་ཕུར་བུ་བཏབ་ཀྱང་ཉེས་མེད་དེ། བརྐོས་ཀྱང་ཉེས་མེད་དོ། །དེ་སྟེ་ས་རིགས་མ་ན་རྩ་བའོ། །ཐོག་མ་ནས་མ་བརྐོས་པར་འདུག་པའམ་བརྐོས་པ་ལས་སླར་འཐས་པ་ཞིག་ལས་བརྐོས་ན་ལྟུང་བ། དེ་སྟེ་མ་ཡིན་ན་ཉེས་བྱས་པའོ། །ས་བརྐོས་ཤིང་ཀློངས་པ་ལྷར་མ་འཐས་པ་ལས་བརྐོས་པ་ནི་ཉེས་བྱས་སོ། །ཟླ་བ་གསུམ་སྤུངས་ཏེ་གནས་ན་སྔ་མའོ། །བརྐོས་ཤིང་ཀློངས་པ་ལས་ཟླ་བ་གསུམ་ལོན་པ་ནི་བརྐོས་ན་ས་རིགས་མ་ལས་བརྐོས་པ་དང་འདྲ་སྟེ་ལྟུང་ངོ༌། །དེས་དེ་མི་འཆད་པར་ཆར་བབ་ནའོ། །མདོ་ལྟག་མ་ཟླ་བ་གསུམ་ལོན་པ་ནི་རྟག་ཏུ་ཆར་རྒྱུན་མི་འཆད་པར་བབ་ནས་རིགས་མར་གྱུར་ཏེ་བརྐོས་ན་ལྟུང་ངོ༌། །གཞན་དུ་ན་དྲུག་གིས་སོ། །ས་བརྐོས་ཤིང་ཀློངས་པ་ཆར་པ་ལྟག་ཏུ་མ་བབ་པ་ཞིག་ན་ཟླ་བ་དྲུག་ལོན་ན་རིགས་མར་འགྱུར་ཏེ་བརྐོས་ན་ལྟུང༌། རྩིག་པ་ནི་ས་མ་ཡིན་པ་རིགས་མ་ཡིན་ནོ། །རྩིག་པ་ཞིག་བརྐོས་ཤིང་དྲལ་ནའང་ལྟུང་བར་འགྱུར་འདུས་པའི་མཚན་མ་མང་པ་བཙན་ནོ། །ས་བྱེ་མའང་བཟང་པོ་འདྲེས་པ་གང་མང་བ་བཙན་ནོ། །དེ་བས་ན་ཐམས་ཅད་རྫས་ཉུང་དུ་དང་ལྷན་ཅིག་པའོ། །སཱུ་ཏྲ་ལྟག་མ་ལྟར་ས་བཟང་ངན་གང་མང་བ་བཙན་པས་བཟང་པོ་མང་བ་ལས་བརྐོས་ན་ལྟུང་བ། ངན་པ་བྱེ་མ་མང་བ་ལས་བརྐོས་ན་ཉེས་བྱས། ཚིག་པ་ནི་མ་རུང་པའོ། །ས་ཚིག་པ་ནི་མ་རུང་བ་སྟེ་ས་ངན་པའི་ནང་དུ་བརྩི་སྟེ་བཟང་པོར་མི་བརྩིའོ། །མ་རུང་བ་ནི་ཕྱེད་དོ། །ས་ཚིག་པ་ངན་པ་ལ་བརྐོས་པ་ནི་ཉེས་བྱས། འཕགས་པས་ཞག་དང་རྩིག་པའི་སྐྱང་ནུལ་དང་གད་པ་ཡང་ངོ༌། །ས་སྐྲངས་པ་ལྟ་བུར་འཕགས་པ་ལས་བཀོགས་པ་དང་ས་ཞག་འཕགས་པ་ལས་བཀོགས་པ་དང་སྐྱང་ནུལ་དང་གད་པ་
འཕགས་པ་ལས་བརྐོས་ཤིང་བཀོགས་པ་ནི་ཉེས་བྱས། ས་མ་རྡོ་དང་བྱེ་མ་ལ་སོགས་པ་མང་ན་ཡང་ངོ༌། །ས་མ་རྡོ་དང་བྱེ་མ་དང་ས་བཟང་པོ་དང་འདྲེས་པ་ལ་ས་མ་རྡོ་དང་བྱེ་མ་མང་བ་ལ་བརྐོས་ན་ཉེས་བྱས། བྱེད་པ་ཡང་ངོ༌། །བྱེད་པར་བྱས་ནའང་ཉེས་བྱས་སུ་འགྱུར་བ་ཡིན་ཏེ་འོག་ནས་འཆད་པ་ཡིན། ཕུར་པ་འབྱིན་པ་དང་འདྲི་བ་འདྲེན་པ་དང་ལྕི་བས་དང་བཅས་ཏེ་བཀོགས་པ་དང་འདམ་བསྐུལ་པ་དེར་ཆགས་པ་རྫ་མ་ལ་སོགས་པ་དྲངས་པ་དང་བ་ཚ་ཅན་བཞར་བ་དང་དེར་ཀློང་བར་བསམས་ན་ཡང་དེར་རོ། །བྱེད་པ་ནི་འདི་རྣམས་ཏེ་མིང་གིས་སྨོས་པ་འདི་རྣམས་ལས་གག་བྱས་ཀྱང་ཉེས་བྱས་སུ་འགྱུར་རོ། །དེ་བས་ན་འགྲོ་བ་དང་རྩི་བ་ལ་སོགས་པར་བསམས་པ་ནི་ལྟུང་བ་མེད་དོ། །ས་མ་རུང་བར་བྱ་བར་བསམས་པར་ཕན་ཚུན་འགྲོ་བའི་ལམ་དུ་སྣད་ཅིང་གོགས་པ་དང་རྩིས་བྱེད་པའི་ཕྱིར་རི་མོར་བྲིས་པ་ནི་ཉེས་མེད་དོ། །ས་མ་རུང་བར་བྱས་པའོ། །ས་རྐོ་བའི་ལྟུང་བ་རྫོགས་སོ།། །།མགྲོན་གྱི་ལྟུང་བ་ལ་འཆད་དེ། རབ་ཏུ་བསླང་བར་མི་བྱ། བདག་ཁ་ཟས་འདོད་པའི་ཕྱིར་འདི་བསླང་ཞེས་མི་བྱ། བསླངས་ན་ཉེས་བྱས་ཟོས་ན་ལྟུང་བ། རིགས་པ་ནི་དུས་མ་བསྒོ་བ་དེ་མི་འགྱུར་བར་ཁས་བླངས་པའི་མཆོད་སྟོན་ལ་གྲོང་དུ་འགྲོ་བའོ། །མཆོད་སྟོན་ལ་སྤྱན་དྲངས་ཏེ་ཤོག་ཤིག་པར་བསྒོ་ནས་སྤྱན་འདྲེན་པ་མེད་པར་སྤྱན་དྲངས་པའི་གནས་སུ་སོང་ཡང་ཉེས་མེད། དུས་འདས་ནས་འདྲེན་བར་བསྐུལ་བའོ། །མཆོད་སྟོན་ལ་སྤྱན་དྲངས་པ་ལས་གདུགས་ཚོད་འདས་སུ་ཉེ་ན་མྱུར་དུ་རིམས་ཤིག་ཅེས་བསྒོ་ན་ཡང་ཉེས་མེད་དོ། །འབྲུ་ལ་སོགས་པ་ལ་མི་བརྟེན་ཁྱིམ་པའི་ཁྱིམ་དུ་སྤྱན་དྲངས་པ་ལས་བདག་ཅག་གི་ཕྱིར་སྟན་བཏིང་ཞིང་འདུག་པ་ལ་ཁྱིམ་པ་རྒྱུས་མི་ཤེས་ཏེ་བཞུགས་ཞེས་མི་ཟེར་ཡང་འཁོད་ཀྱང་ཉེས་མེད། སོ་སོར་སྤྱན་དྲངས་པ་ཡང་བདག་གིར་བྱ། བདག་འབའ་ཞིག་གུད་དུ་ཟིན་གྱི་ཕྱིར་སྤྱན་དྲངས་ན་སོང་ཡང་ཉེས་མེད་དོ། །དགེ་འདུན་དང་ལྷན་ཅིག་ཏུ་སྤྱན་དྲངས་ན་ཡང་ངོ༌། །དགེ་འདུན་སྤྱི་སྤྱན་དྲངས་པའི་འོག་ཏུ་བདག་གུད་དུ་ཡང་སྤྱན་དྲངས་པ་ཡང་ཉེས་མེད་དོ། །བདག་ལ་ལན་གཉིས་སྤྱན་དྲངས་པ་ལ་
བྱའོ། །དུས་ཐམས་ཅད་དུ་ཡང་ངོ༌། །ཚེ་གཅིག་ཏུ་བདག་གིས་ཟན་སྦྱར་རོ་ཞེས་ཟེར་ཏེ་སྤྱན་དྲངས་པ་ལ་དེར་སོང་ཞིང་འདུག་ཀྱང་ཉེས་མེད། སྤྱན་དྲངས་པ་ཁྱད་པར་གཞག་པ་མེད་པར་སྤྱན་དྲངས་ཀྱི་འདི་སྲིད་ཅིག་འདུག་ཤིག་ཅེས་ཞག་གྲངས་བཅད་པ་མེད་པ་དང༌། གཞན་དུ་སྤྱན་དྲངས་པ། བདག་འབའ་ཞིག་གུད་དུ་ཟིན་གྱི་ཕྱིར་སྤྱན་དྲངས་པའང་མ་ཡིན་པ་དང༌། ཡང་ཡང་ངམ་སང་ཡང་འདིར་གསོལ་ཅིག་གནངས་ཀྱང་འདིར་གསོལ་ཅིག་ཅེས་ཟེར་བ་ལའང་བྱ། བདག་གུད་དུ་འགྲོ་བ་ལ་འདིར་འདུག་ཤིག་ཅེས་ལན་དུ་མར་ཟློས་ཤིང་ཟེར་བ་དང༌། ཤིན་ཏུ་ལྷག་པར་སྤྱན་དྲངས་པ་མ་བྱས་པར། ཚེ་གཅིག་ཏུ་ངས་སྤྱན་དྲངས་ཏེ་ཟས་རྟག་པར་སྤྱར་རོ་ཞེས་མ་བྱས་པར་འདུག་པ་དང༌། ཟླ་བ་བཞི་ཟིན་པ་ལས་ལྷག་པར་འཆང་བ་ཟོས་ནའོ། །མིང་གིས་སྨོས་པ་འདི་རྣམས་གག་ཀྱང་རུང་གཅིག་ཀྱང་མི་ཟེར་བར་ཟླ་བ་བཞི་ལས་ལྷག་པར་སྦྱིན་བདག་གི་ཁྱིམ་དུ་འདུག་ཅིང་ཟན་ཟོས་ན་ལྟུང་བའོ། །ཟླ་བ་བཞི་ལས་ལྷག་པར་ན་ཟན་དུ་ཟོས་པ་ལྟུང་བ་རེ་རེ། བསླངས་པ་ནི་ཉེས་བྱས་པའོ། །གཉེན་མ་ཡིན་པའི་ཁྱིམ་པ་ལ་ཟན་བསླངས་ན་སློང་པའི་ཚེ་ཉེས་བྱས། ཟོས་ན་ལྟུང་བ་འདྲིམ་ཞིང་བསླངས་ན་ཉེས་བྱས་ཟོས་ན་ལྟུང༌། ལྟུང་བ་མེད་པ་ནི་ནད་པའིའོ། །ནད་པ་ནི་ཁ་ཟས་ཅི་འདོད་པ་བཞིན་དུ་བསླངས་ཏེ་ཟོས་ཀྱང་ཉེས་མེད། གཉེན་ཀྱང་ངོ༌། །གཉེན་ལ་བསླངས་ཏེ་ཟོས་ཀྱང་ཉེས་མེད། རྣམ་པར་མྱོས་ན་སྔ་མ་དང་སོ་སོར་རོ། །དགེ་སློང་ཡོན་བདག་གིས་ཟླ་བ་བཞིར་དུས་བཅད་དེ་བཞག་པ་ལས་ཞག་གྲངས་མ་ཚང་པར་སླར་ཁྲིམས་ཕུལ་བའམ། མྱོས་པ་ལས་སླར་དྲན་ནམ་ཁྲིམས་ནོས་ཏེ་སྦྱིན་བདག་གིས་ཞག་གྲངས་བཅད་པ་ཅི་མ་ཚང་བ་སླར་ཟན་དུ་ཟོས་པ་ལྟུང་བ་རེ་རེར་འགྱུར་རོ། །དེས་སྤྱན་དྲངས་པའི་ཉེས་བྱས་པའོ། །སཱུ་ཏྲ་ལྟག་མ་ལྟར་ཞག་གྲངས་བཅད་དེ་སྔར་སྤྱན་དྲངས་པ་ལས་ཞག་མ་ཚང་པར་ཁྲིམས་ཕུལ་ལམ་མྱོས་ཏེ་སོང་བས་ཕྱིས་སྤྱན་དྲངས་པར་ཡོན་བདག་ལ་སློང་དུ་སོང་བའི་ཕྱིར་ལྟུང་བར་འགྱུར་རོ། །སྔོན་ལོགས་སུ་ཡང་གང་གིས་སྤྱན་མ་དྲངས་པས་ཀྱང་
ངོ། །སྦྱིན་བདག་ན་རེ་རྟག་ཏུ་བཟང་པོ་བཟར་ནི་མེད་ཀྱི་ངེད་ཅི་ཟ་བ་བཞིན་དུ་སྦྱིན་ནོ་ཞེས་ཟེར་ཏེ་གཞག་པ་ལས་འདི་འདོད་དོ་ཞེས་བཟང་པོ་ཞིག་བསླངས་ཏེ་ཟོས་ན་ལྟུང་བའོ། །སྤྱན་དྲངས་པའི་ཕྱིར་རབ་ཏུ་བསྙེན་པའོ། །སྤྱན་མ་དྲངས་པར་ཟླ་བ་བཞི་ལས་ལྷག་པར་འདུག་པའི་ལྟུང་བ་རྫོགས་སོ།། །།སློབ་པའི་ལྟུང་བ་ལ་འཆད་དེ། འྦྷྲིད། དགེ་སློང་མཁས་པས་བསྟན་པར་ཤེས་བཞིན་པ་ལས་ལྟུང་སྟེ་ཡན་ལག་གཅིག །མངོན་པར་ཤེས་ནའོ། །དགེ་སློང་སྟོན་པ་དེ་ཡང་མཁས་ཤིང་ཤེས་པ་ལ་མི་ཤེས་སོ། །སླར་སྨྲས་པ་ལས་ལྟུང་བར་འགྱུར་ཏེ་ཡན་ལག་གཅིག་སྟོན་ནའོ། །དགེ་སློང་མཁས་པས་བསྟན་ཅིང་བསླབས་པ་ལ་མི་སློབ་པོ་ཞེས་བྱ་བ་ལས་ལྟུང་སྟེ་ཡན་ལག་གཅིག་བསླབ་པ་ལའོ། །སློབ་པ་འདུལ་བའི་ཚིག་ཡིན་པ་བསྟན་པ་ལས་ལྟུང་སྟེ་ཡན་ལག་གཅིག་སྟེ་ཡན་ལག་འདི་རྣམས་དང་ལྡན་ན་སློབ་པ་ལ་སླར་ལོག་པའི་ལྟུང་བའོ། །ཁྱོད་ཀྱིས་འདི་སློབས་ཤིག་ཅེས་བསྟན་པའམ། ཉེ་བར་བསྟན་པ་ན་དགེ་སློང་གིས་མི་སློབ་པོ་ཞེས་མི་ཤེས་པར་བསྒོ་ཞིང་བསྒྲགས་པ་འདིའི་ཕྱིར་ངག་གིས་བརྗོད་ནའོ། །དགེ་སློང་སྡེ་སྣོད་གསུམ་ཤེས་པ་མཁས་པ་ཞིག་གིས་འདུལ་བའི་ཚིག་ལས་སློབས་ཤིག་ཅེས་བྱས་ཀྱང་རུང་སོ་སོར་དམིགས་ཀྱིས་ཕྱེ་སྟེ་འདི་སློབས་ཤིག་ཅེས་བསྟན་པ་ལས་ཁྱོད་ཀྱིས་བསྟན་པ་དེར་མི་སློབ་ཀྱི་གཞན་མཁས་པ་ལ་སློབ་པོ་ཞེས་ཟེར་ཞིང་དགེ་སློང་མཁས་པ་དེ་ལ་མི་ཤེས་པར་སྨད་པར་བྱ་བའི་ཕྱིར་ཁྱོད་ལྟ་བུའི་མི་ཤེས་པའི་ཚིག་ང་མི་ཉན་ཏོ་ཞེས་ཁས་སྨྲས་ན་ལྟུང་བར་འགྱུར། མདོ་སྡེའི་ན་ཉེས་བྱས་པའོ། །དགེ་སློང་མཁས་པས་མདོ་སྡེ་དང་མ་ལྟ་བུའི་ཚིག་གི་ནང་ན་ཁྲིམས་འདུག་པ་དང་མདོ་སྡེ་དང་མ་ལྟ་བུ་ཉིད་ལ་མི་སློབ་པོ་ཞེས་སླར་བཟློག་པ་ནི་ཉེས་བྱས། བསླབ་པས་སྟོབས་པ་སྤོང་བའོ། །དགེ་སློང་གིས་བསྟན་པ་ལ་མི་སློབ་པོ་ཞེས་ཟེར་བའི་ལྟུང་བ་རྫོགས་སོ།། །།འཐབ་བའི་ལྟུང་བ་ལ་འཆད་དེ། དགེ་སློང་གིས་རྩོད་པར་དགེ་སློང་དག་དང་གྲོས་བྱེད་པ་མཉན་པའི་ཕྱིར་ན་སྟེ་མ་གཏོགས་པ་ཞི་བར་འདོད་པས་མཉན་ནའོ། །དགེ་སློང་དག་འཐབ་ཅིང་འཁོད་ཀྱང་རུང་
འཐབ་པར་གྲོས་བྱེད་འཇབ་ཅིང་ཉན་ནས་ཁོང་དེ་སྐད་ཟེར་གྱིས་བདག་ཀྱང་ཐབས་འདི་ལྟར་སྦྱར་ཞིང་བྱའོ་ཞེས་བསམས་ཤིང་ཉན་ན་ལྟུང་བར་འགྱུར་རོ། །ལྟུང་བར་མི་འགྱུར་བ་ནི་འཇབ་ཅིང་མཉན་ན་དཀྲུག་པར་བྱ་བ་དང་ཐབས་ཤོམ་པའི་ཕྱིར་ནི་མ་ཡིན་གྱི་འདུམ་ཞིང་རྩོད་པ་ཞི་བར་བྱ་བའི་ཕྱིར་ནི་ཉེས་མེད་དོ། །སྒྲ་ཙམ་ཐོས་པ་ནི་ཉེས་བྱས་པའོ། །འཐབ་རྩོད་ཅིང་འཁོད་པ་ལ་ཚིག་གི་དོན་ནི་མ་ཐོས་ཀྱི་སྒྲ་ཙམ་ཐོས་པ་ཞིག་ཏུ་མཉན་ན་ཉེས་བྱས་སོ། །དོན་ན་རྩ་བའོ། །འཐབ་པའི་ཚིག་གི་དོན་ཐོས་པར་མཉན་ན་ལྟུང་བའོ། །དཀྲུག་པའི་ཕྱིར་ཞུགས་ན་ཡང་ངོ༌། །འཐབ་མོ་བྱེད་པ་ལ་དཀྲུག་པའི་ཕྱིར་ཆེད་ཀར་སོང་སྟེ་མཉན་ཏམ་དཀྲུགས་ན་ལྟུང་བར་འགྱུར། དོན་གྱི་ཕྱིར་གྱི་དབང་གིས་ཐུག་སྟེ། ཚོར་བའི་འོག་ཏུ་རྐང་པ་དང་སེ་གོལ་དང་ལུད་པའི་སྒྲ་ལ་སོགས་པས་ཚོར་བར་མ་བྱས་སམ་རྨོངས་པའམ་ཞི་བའི་ཕྱིར་མ་ཡིན་ན་ལྟུང་བའོ། །འཐབ་པ་ལ་ཆེད་ཀར་མཉན་པའི་ཕྱིར་ནི་མ་སོང་གི་དོན་གཞན་ཞིག་གི་ཕྱིར། སོང་སོང་བ་ལས་འཐབ་ཅིང་འཁོད་པ་ཞིག་གི་སྟེང་དུ་བབ་ན་ལུད་པའི་སྒྲའམ་རྐང་པའི་སྒྲ་དང་སེ་གོལ་གྱི་སྒྲ་ལ་སོགས་པ་ཕྱུང་སྟེ་ཚོར་བར་མ་བྱས་ཤིང་མཉན་ན་ལྟུང་བའོ། །སྨྱོས་སམ་མྱ་མྱོར་ཁྱེར་ཏེ་མི་དྲན་ཏེ་འཐབ་མོ་སྐྲོད་དུ་འོངས་པ་དང་འཐབ་མོ་ཞི་བར་བྱ་བའི་ཕྱིར་འཐབ་པའི་སྟེང་དུ་འོངས་པ་ནི་ཉེས་མེད་དེ་མ་གཏོགས་སོ། །འཐབ་མོ་མི་གླེང༌། དགེ་སློང་གིས་འཐབ་མོ་གླེང་བསླངས་ཏེ་འཐབ་ཏུ་མི་གཞུག་འཐབ་ཏུ་བཅུག་ན་ཉེས་བྱས། ཉེ་བར་ཡང་མི་མཉན། འཐབ་མོ་བྱེད་པའི་དྲུང་དུ་བསྙེན་ཅིང་གྲོགས་དང་ཤུག་མགོན་མི་བྱ་བྱས་ན་ཉེས་བྱས། འདི་དག་བྱེད་ན་བསྐོར་ཅིང་མི་འདུག །འཐབ་མོ་འགྱེད་པ་ལ་བདག་གན་ན་འདུག་ན་བདག་ལ་སྟོན་ཅིང་རྒོལ་ཕོད་པའི་ཕྱིར་ཆེད་ཀར་དྲུང་དུ་འདུག་ན་ཉེས་བྱས། ཞི་བའི་ཕྱིར་ནན་ཏན་དུ་མི་བྱ་བ་མ་ཡིན། དགེ་སློང་འཐབ་པ་ལ་བདག་གིས་བཅུག་ན་གདོན་མི་ཟ་བར་དག་མཉན་ཅིང་ཞི་བར་ནུས་པ་ཙམ་གྱི་ཚོད་ལ་མ་བཅུག་ན་ཉེས་བྱས། བདག་གིས་བཅུག་ཀྱང་མི་ཉན་ཅིང་སླར་བདག་ལ་གཤེ་བ་ཙམ་གྱི་
ཆོད་ན་མ་བཅུག་ཀྱང་ཉེས་མེད། ཉེ་བར་མཉན་པར་ཆུད་པའོ། །དགེ་སློང་འཐབ་པ་ལ་ཉན་པའི་ལྟུང་བ་རྫོགས་སོ།། །།མི་སྨྲ་བའི་ལྟུང་བ་ལ་འཆད་དེ། ཞུ་བ་ལ་སོགས་པ་ལས་དགེ་འདུན་དང་དགེ་སློང་ལ་མ་བྱས་པར་སོང་ནའོ། །དགེ་འདུན་འདུས་ཏེ་གསོལ་བ་དང་ཞུ་བའི་ལས་ཤིག་བྱེད་ན་ཅི་བྱེད་ཀྱང་རུང་སྟེ་དགེ་སློང་ལམ་གྲོགས་ལ་མ་ཞུས་པར་གུད་དུ་སོང་ན་ལྟུང་བར་འགྱུར་རོ། །མཚམས་ལས་འདས་ན་རྩ་བའོ། །དགེ་འདུན་ལས་བྱེད་པའི་སྒྲ་མི་ཐོས་པར་གྱུར་ན་མཚམས་ལས་འདས་པ་སྟེ་ལྟུང་བའོ། །སྔ་མ་ནི་ཉེས་བྱས་པའོ། །འདུས་པ་ལས་མ་ཞུས་པར་སོང་སྟེ་སྒྲ་མི་ཐོས་པར་མ་གྱུར་གྱི་བར་དུ་ནི་ཉེས་བྱས་སོ། །དོན་མེད་པ་དང་མི་རིགས་པར་སོང་ནའོ། །འདུས་ཤིང་ལས་བྱེད་པ་ལ་གཞན་དུ་དོན་མེད་པར་འགྲོའམ་ལྟད་མོ་ལ་སོགས་པ་མི་རིགས་པ་ཞིག་ཏུ་འགྲོ་ན་ཞུས་ཏེ་སོང་ཡང་ཉེས་བྱས་སོ། །ཞུ་བར་བྱས་ཀྱང་ངོ༌། །དགེ་འདུན་འདུས་ནས་ཞུ་བའི་ལས་ནི་བྱས་ཟིན་གྱི་གསོལ་པའི་ལས་མ་བྱས་པའི་བར་དུ་གུད་དུ་སོང་བའི་ཉེས་བྱས། ཆོས་མ་ཡིན་པའི་ལས་དགེ་འདུན་དོན་མེད་ཞིག་བྱེད་པར་འདུས་པའམ། ལོག་པའི་ཆོས་མི་དགེ་བ་ཞིག་བྱེད་པ་ལས་མ་ཞུས་པར་སོང་བ་ནི་ཉེས་བྱས་སོ། །མཉན་པའི་ཡུལ་ལས་འདའ་བར་མི་འདོད་པ་ནི་ལྟུང་བ་མེད་དོ། །དགེ་འདུན་འདུས་ཏེ་ལས་བྱེད་པ་ལ་མཆིལ་མ་དོར་བའམ་འཆག་པའི་ཕྱིར་ལས་བྱེད་པའི་སྒྲ་ཐོས་པ་ཚུན་ཆད་དུ་ཕན་ཚུན་སོང་བ་ནི་ཉེས་མེད་དོ། །འདུ་བ་ལས་འགལ་བའོ། །དགེ་འདུན་ལས་བྱེད་པར་འདུས་པ་ལས་མ་ཞུས་པར་སོང་བའི་ལྟུང་བ་རྫོགས་སོ།། །།མ་གུས་པའི་ལྟུང་བ་ལ་འཆད་དེ། འདུག་སོང་མལ་སྟན་དང་གཙུག་ལག་ཁང་ལོང་སྨྲོས་དེ་དག་བཟློག་པ་ལ་སོགས་པས་བསྙེན་པའི་ཕྱིར་མ་གུས་ཤིང་ཆོས་ཀྱི་ཞུ་བ་སྦྱིན་པ་མེད་པར་འདས་པའོ། །དགེ་འདུན་གྱིས་མིང་གིས་སྨོས་པ་འདི་རྣམས་སྐད་དུ་བསྒོ་བ་ལ་སླར་ལོག་པར་བྱེད་པ་དང་མིང་གིས་སྨོས་པ་འདི་རྣམས་ལས་བཟློག་སྟེ་བསྒོ་བ་ལའང་སླར་འདི་ལྟར་བྱེད་པ་དང་འདི་རྣམས་ལ་མ་གཏོགས་པར་གཞན་ཅི་ལའང་རུང་སྟེ་མ་གུས་པའི་ཕྱིར་བསྒོ་བ་བཞིན་དུ་མི་བྱེད་ཅིང་ལོག་པར་བྱས་ན་
ལྟུང་བའོ། །དགེ་སློང་གི་དགེ་འདུན་ན་རྩ་བའོ། །དགེ་སློང་གི་དགེ་འདུན་གྱིས་བསྒོ་སྟེ་མ་གུས་པའི་ཕྱིར་མ་མཉན་ཅིང་ལོག་པར་བྱས་ན་ལྟུང་བར་འགྱུར་རོ། །མཁན་པོ་དང་སློབ་དཔོན་ལ་ནི་ཉེས་བྱས་པའོ། །མཁན་པོ་དང་སློབ་དཔོན་གྱིས་བསྒོ་བ་ཞིག་ལ་མ་གུས་པའི་ཕྱིར་ལོག་པར་བྱས་ན་ཉེས་བྱས། ཆོས་མ་ཡིན་པས་གསོལ་བའོ། །དགེ་འདུན་གྱིས་མི་དགེ་བའི་ཆོས་ཤིག་གྱིས་ཤིག་ཅེས་བསྒོ་བ་ལས་མ་བྱས་ནའང་ཉེས་བྱས། མཁན་པོ་དང་སློབ་དཔོན་གྱིས་མི་དགེ་བའི་ཆོས་ཤིག་གྱིས་ཤིག་པར་བསྒོ་སྟེ་མ་མཉན་ན་ཉེས་བྱས་ཕྱེད། དེ་བཞིན་དུ་སྨྲ་བས་གནོན་པའོ། །དགེ་འདུན་འདུས་ཏེ་ལས་བྱ་བའི་གྲོས་བྱེད་པ་ལ་མ་གུས་ཤིང་གཏམ་གཞན་ཟེར་ན་ཉེས་བྱས། མཁན་པོ་དང་སློབ་དཔོན་གྱིས་བསྒོ་ཞིང་གཏམ་བྱེད་པ་ལ་གཏམ་གཞན་གློ་བུར་དུ་ཟེར་བའང་ཉེས་བྱས་སོ། །དགེ་འདུན་གྱི་སྣ་བོ་དེར་སྤྱོད་པ་ལ་ཡང་ངོ༌། །དགེ་འདུན་གྱིས་ལས་སུ་བསྐོས་པ་གང་ཟག་བཅུ་གཉིས་ལས་གང་ཡང་རུང་དེས་བསྒོ་བ་ལ་མ་གུས་པའི་ཕྱིར་དེ་བཞིན་དུ་མ་བྱས་སམ་ལོག་པར་བྱས་ནའང་ལྟུང་བ། །གང་ཟག་བཅུ་གཉིས་ཀྱིས་གཞན་ཞིག་ལ་སྤྲིང་བའི་ངག་བཅག་ནའང་ལྟུང་ངོ༌། །དགེ་འདུན་བཞིན་དུ་སངས་རྒྱས་ཀྱང་ངོ༌། །སངས་རྒྱས་ཀྱིས་བཀའ་སྩལ་པ་ལ་མ་གུས་པའི་ཕྱིར་མ་མཉན་ཏམ་མ་བྱས་ནའང་ལྟུང་བའོ། །སངས་རྒྱས་བཞུགས་པའི་ཚེ་ཞལ་གྱིས་བཀའ་སྩལ་པ་ལ་བྱ། རྒྱལ་པོ་དང་དགྲ་བཅོམ་པ་དང་དགེ་འདུན་གྱི་གནས་བརྟན་གྱི་བཀའ་མི་བཅག །རྒྱལ་པོ་དང་དགྲ་བཅོམ་པ་དང་དགེ་འདུན་གྱི་གནས་བརྟན་དང་ཞང་བློན་དབང་ཆེན་པོས་བསྐོ་བའི་ཚིག་ལ་མ་གུས་པའི་བཅག་ནའང་ཉེས་བྱས། མ་གུས་པར་ཆུད་པའོ། །མ་གུས་པའི་ལྟུང་བ་རྫོགས་སོ།། །།ཆང་འཐུང་བའི་ལྟུང་བ་ལ་འཆད་དེ། མྱོས་པར་འགྱུར་བའི་ལྟུང་བ་མྱོས་ཤིང་ར་རོ་བར་གྱུར་པ་ཆང་ལ་སོགས་པ་འཐུངས་ན་ལྟུང་བར་འགྱུར་རོ། །འདི་བསྐོལ་ན་འཕོས་སོ། །ཆང་དང་རྒུན་ཆང་བསྐོལ་ཏེ་ར་རོ་བར་ཡང་མི་འགྱུར་ཁ་དོག་ཀྱང་ཆང་མི་འདྲ་དྲི་འང་ཆང་མི་བྲོ་ན་འཐུངས་ཀྱང་ཉེས་མེད་དོ། །སྦང་
མ་དང་ཚིགས་མ་ཡོད་བཟོས་ན་དེར་ཆུད་དོ། །ཆང་གི་སྦང་མ་དང་མེ་ཏོག་ལ་སོགས་པ་ལས་ཆང་དུ་བྱས་པའི་ཚིགས་མ་ཟོས་ན་ལྟུང་བའོ། །ཕབས་ནི་འདུ་བྱེད་དོ། །ཕབས་ཟོས་ན་ཉེས་བྱས་སོ། །མྱོས་པར་བྱེད་པ་ནི་རྩ་བ་དང་སྡོང་པོ་དང་ལོ་མ་དང་མེ་ཏོག་དང་འབྲས་བུ་རྣམས་སོ། །མིང་གིས་སྨོས་པ་འདི་རྣམས་ལས་ཆང་དུ་བྱས་ཏེ་འཐུངས་པ་ནི་ལྟུང་བ། འདི་རྣམས་ལས་གག་ཀྱང་རུང་ཆང་དུ་ནི་མ་བྱས་ཀྱི་ཟོས་ན་སྨྱོས་པའམ་མི་དྲན་པར་འགྱུར་བ་ཞིག་ཟོས་ན་ཉེས་བྱས། ཆང་གི་དྲི་དང་རོ་མྱོས་པར་མི་བྱེད་པ་དང་བཏུང་བ་ཡང་ངོ༌། །ཁུ་བ་མྱོས་པར་མི་འགྱུར་ལ་ཁ་དོག་ཀྱང་ཆང་མི་འདྲ་ལ་རོ་ཆང་བྲོ་བ་ཞིག་འཐུངས་ན་ཉེས་བྱས། ཉེས་མེད་པ་ནི་ཁ་དོག་ཙམ་ཆང་འདྲ་བའོ། །མྱོས་པར་ཡང་མི་འགྱུར་ལ་རོ་ཡང་ཆང་མི་བྲོ་ན་ཁ་དོག་ཆང་འདྲ་བ་འཐུངས་ཀྱང་ཉེས་མེད་དོ། །སྦྱོར་བ་བཞིན་དུ་མྱང་བ་དང་ལུས་ལ་ཉུག་པའོ། །ཆང་གིས་ལུས་ལ་བྱུགས་པ་དང་ཁར་བླུགས་ཏེ་མྱངས་ནས་ལྟོར་མ་མིང་པར་སླར་བོར་བ་ནི་ཉེས་བྱས། ན་བ་ལ་ནི་ལྟུང་བ་མེད་དོ། །ནད་པ་ལ་ནི་ཕན་པའི་ཕྱིར་ཆང་གིས་ལུས་ལ་བྱུགས་སམ་ཁས་མྱངས་ཏེ་ལྟོར་མ་མིད་པ་ནི་ཉེས་མེད་དོ། །ཆང་འཐུངས་པའོ། །ཆང་འཐུང་བའི་ལྟུང་བ་རྫོགས་སོ།། །།དུས་མ་ཡིན་པར་ལྟུང་བ་ལ་འཆད་དེ། འྦྷྲིད། ཕྱི་དྲོ་དུས་མ་ཡིན་པར་ཤེས་བཞིན་ལས་ལྟུང་བར་འགྱུར་ཏེ་ཡན་ལག་གཅིག །དུས་མ་ཡིན་པ་དུས་མ་ཡིན་པར་ཕྱི་དྲོ་གྲོང་དུ་སོང་བ་ལས་ལྟུང་བར་འགྱུར་ཏེ་ཡན་ལག་གཅིག །དགེ་སློང་ཡོད་པ་ལ་མ་བྱས་ནའོ། །དགེ་སློང་ཡོད་པ་ལ་མ་ཞུས་པར་སོང་བ་ལས་ལྟུང་བར་འགྱུར་ཏེ་ཡན་ལག་གཅིག་གཞན། གྲོང་དུ་འཇུག་ནའོ། །དུས་མ་ཡིན་པར་གྲོང་དུ་ཡང་སོང་བ་ལས་ལྟུང་བར་འགྱུར་ཏེ་ཡན་ལག་གཅིག་གྲོང་དུ། དེ་སྟེ་ངེས་པར་དགོས་པར་འགྲོ་ན་མ་ཡིན་ནོ། །ཆོམ་པོའམ་འཇིགས་པའི་རྐྱེན་ཅིག་བྱུང་སྟེ་སོང་བ་ནི་ཉེས་པར་མི་འགྱུར་གྱི་འཇིགས་པའི་རྐྱེན་མེད་པར་སོང་པ་ལས་ལྟུང་བར་འགྱུར་ཏེ་ཡན་ལག་གཅིག །གཞན་དུ་འཕོ་ན་ཉེས་བྱས་པའོ། །གྲོང་འདིར་འགྲོའོ་ཞེས་བྱས་པ་ལས་དེ་ཉིད་དུ་སོང་ཡང་རུང་མ་སོང་ཡང་རུང་གྲོང་གཞན་དུ་སོང་ན་ཉེས་བྱས།
དེར་དགེ་སློང་མེད་ན་དགེ་སློང་མའང་དེ་བཞིན་ནོ། །ཕྱི་དྲོ་གྲོང་དུ་འགྲོ་སྟེ་དགེ་སློང་མེད་ན་དགེ་སློང་མ་ལ་དྲིས་ཏེ་སོང་ཡང་ཉེས་མེད་དོ། །དེ་ནའང་དགེ་སྦྱོང་ལའོ། །དྲིར་དགེ་སློང་མ་ཡང་མེད་ན་དགེ་སྦྱང་ལ་དྲིས་ཏེ་སོང་ཡང་ཉེས་མེད་དོ། །དེ་ནའང་དགེ་སློབ་མ་ལའོ། །དྲིར་དགེ་སྦྱོང་ཕའང་མེད་ན་དགེ་སློབ་མ་ལ་དྲིས་ཏེ་སོང་ཡང་ཉེས་མེད་དོ། །དེ་ནའང་དགེ་སྦྱོང་མ་ལའོ། །དགེ་སློབ་མ་ལ་དྲིས་ཏེ་སོང་ཡང་ཉེས་མེད་དོ། །དགེ་སྦྱོང་མ་ལ་དྲིས་ཏེ་སོང་ཡང་ཉེས་མེད་དོ། །དགེ་སྦྱོང་མ་ཡང་མེད་དེ་རྐྱེན་ཅིག་བྱུང་ནས་མི་འགྲོར་མི་རུང་ན་མ་དྲིས་པར་སོང་ཡང་ཉེས་མེད་དོ། །མི་ཆུད་ན་མེད་པ་བཞིན་ནོ། །བརྡ་མི་ཕྲད་པའམ་སྐད་མི་མཐུན་པ་ལ་དྲིས་པ་ནི་དྲིས་པར་མི་ཆུད་དེ། དགེ་སློང་དང་དགེ་སྦྱོང་མེད་ན་མ་དྲིས་པར་སོང་ཡང་ཉེས་མེད་དོ། །གཞན་ཡོད་ལ་བརྡ་མི་ཕྲད་པ་ལ་དྲིས་པ་ནི་ལྟུང་བར་འགྱུར་རོ། །མཚམས་གཞན་ན་འདུག་པ་དང་སྤང་བ་དང་སྐྱབས་གཞན་ན་ཡང་འདྲི་བའི་དགེ་སློང་དང་བར་དུ་ཆོད་པ་དང་ནམ་མཁའ་ལ་འདུག་པ་ལ་དྲིས་པ་དང་ཆད་པས་བཅད་དེ་སྤངས་པ་ལས་དྲིས་པ་དང་དེ་བཏྟ་ལྟ་བུ་ལོག་པ་ལ་ལྟ་བའི་དགེ་སློང་གཞན་ཡོད་ན་དྲིས་པར་མི་ཆུད་དེ་ལྟུང༌། གཞན་མེད་ན་འདི་རྣམས་ལྟ་བུ་ཞིག་ལ་མ་དྲིས་པར་སོང་ཡང་ཉེས་མེད། རྫུ་འཕྲུལ་གྱིས་ན་ལྟུང་བ་མེད་དོ། །དགེ་སློང་རྫུ་འཕྲུལ་ཡོད་པ་ཞིག་ན་རྫུ་འཕྲུལ་བྱས་ཏེ་སོང་བ་ན་ཉེས་མེད་དོ། །དུས་མ་ཡིན་པར་སྤྱོད་པའོ། །དགེ་སློང་དུས་མ་ཡིན་པར་གྲོང་དུ་སོང་པའི་ལྟུང་བ་རྫོགས་སོ། །བཅུ་སྡེ་གཅིག་རྫོགས་སོ།། །།ཟས་སྦྱར་གྱི་ལྟུང་བ་ལ་འཆད་དེ། དུས་མ་ཡིན་པར་བཞི་ལ་སོགས་པའི་རིགས་སུ་འགྲོ་བའོ། །ཕྱི་དྲོ་བཟར་རུང་བའི་ཁས་གཅིག་ལ་ཡོན་བདག་གིས་སྤྱན་དྲངས་པ་ལས་ང་མ་འོངས་ཀྱི་བར་དུ་མ་བྲིམ་པར་སྡོད་ཅིག་ཅེས་བྱས་ནས་བདག་གུད་དུ་སོང་ན་གྲོང་གསུམ་གྱི་བར་དུ་སོང་བ་ནི་ཉེས་མེད་གྲོང་བཞི་ལས་ལྷག་པར་སོང་བ་ནི་ལྟུང་བ་སྟེ། གྲོང་རེ་རེ་ལྟུང་བ་རེ་རེའོ། །སྔ་དྲོ་ཟན་ལ་སྤྱན་དྲངས་པ་ལས་སོང་བ་ནི་གྲོང་གསུམ་འདས་ན་ལྟུང་བར་འགྱུར་ཏེ་ཡན་ལག་གཅིག །དེའི་ངོར་དགེ་འདུན་སྤྱན་དྲངས་པ་ལས་ཁོ་བོ་མ་འོངས་པའི་
དབང་གིས་འདྲིམ་པ་ལས་མ་སྐལ་ཅིག་ཅེས་སྦྱིན་བདག་ལ་མ་བསྒོ་བར་གསུམ་ལ་སོགས་པའོ། །ཡོན་བདག་གིས་དགེ་སློང་གཅིག་གི་ཕྱིར་དགེ་འདུན་ཀུན་སྤྱན་དྲངས་པ་ལས་དགེ་སློང་དེ་གུད་དུ་འགྲོ་ན་ཡོན་བདག་དེ་ལ་ང་མ་འོངས་ཀྱང་བཤོས་རིམས་ཤིག་ཅེས་མ་བསྒོ་བར་གྲོང་གཞན་དུ་རྒྱུ་ཞིང་སོང་ན་གྲོང་གཉིས་ཀྱི་བར་དུ་ནི་ཉེས་མེད་དོ། །གྲོང་གསུམ་འདས་ནས་ལྟུང་བར་འགྱུར་རོ། །དེ་ཕན་ཆད་ནི་གྲོང་རེ་ར་འདས་ན་ལྟུང་བ་རེ་རེར་འགྱུར་རོ། །རིགས་སུ་སྤྱོད་པའོ། །ཟན་སྤྱར་བ་ལས་གྲོང་དུ་སོང་བའི་ལྟུང་བ་རྫོགས་སོ།། །།ནམ་ཚོད་ཀྱི་ལྟུང་བ་ལ་འཆད་དེ། འྦྷྲིད། ནམ་མ་ལངས་པར་ཤེས་བཞིན་དུ་རྒྱལ་པོའི་ཁྱིམ་དུ་སོང་བ་ལས་ལྟུང་སྟེ་ཡན་ལག་གཅིག །ནམ་ལངས་པར་རོ། །ནམ་ཡང་མ་ནངས་པར་སོང་བ་ལས་ལྟུང་སྟེ་ཡན་ལག་གཅིག །སྐྱ་རེངས་ཐ་མ་མ་བྱུང་བ་དེ་ནི་ནམ་མ་ནངས་པའོ། །ནམ་མ་ལངས་པའི་ཚད་ནི་སྐྱ་རེངས་ཐ་མ་མ་བྱུང་ཚུན་ཆད་དུ་བརྩི་སྟེ་སྐྱ་རེངས་ཐ་མ་མ་བྱུང་བར་སོང་ན་ལྟུང་བའོ། །སླས་གནང་བའི་གནས་ལ་གཏོགས་པའོ། །རྒྱལ་པོའི་ཆུང་མའི་ཁང་པའི་གནས་སུ་གཏོགས་པའི་སྒོ་འདས་ནས་ལྟུང་བར་འགྱུར་ཏེ་ཡན་ལག་གཅིག །དེ་མ་ཡིན་པར་འགྲོ་བ་ལ་ཡང་ངོ༌། །ནམ་མ་ནངས་པར་སོང་བ་མ་ཡིན་པར་ཉི་མ་དམར་ཐག་ཆད་ཕན་ཆད་དུ་ས་སྲོས་སམ་ནམ་ཕྱེད་ན་སོར་ཡང་རུང་ལྟུང་བར་འགྱུར་རོ། །ནུབ་མོ་སོ་སོར་རོ། །རྒྱལ་པོའི་ཆུང་མའི་དེར་ཞག་དུ་ལོན་པར་ལྟུང་བ་རེ་རེར་འགྱུར་རོ། །དེའི་བསྟན་པའི་མཚམས་དེ་དག་ལ་སོགས་པའོ། །རྒྱལ་པོའི་ཆུང་མའི་ཁྱིམ་གྱི་སྒོ་འདས་པའི་ཚད་ནི་སྒོའི་གཏན་པ་སླར་བཟློགས་ཏེ་གཏན་པའི་མགོ་གར་ཕྱིན་པའི་མཚམས་དེ་འདས་ནའང་ལྟུང་བར་འགྱུར་ཏེ་ཡན་ལག་གཅིག་སྟེ་ཡན་ལག་འདི་རྣམས་དང་ལྡན་ན་ལྟུང་བར་འགྱུར་རོ། །དེ་བཞིན་དུ་རྒྱལ་པོའི་རིགས་དང༌། རྒྱལ་པོའི་རིགས་ཞང་བློན་དབང་ཆེན་པོའི་ཁྱིམ་དུ་སོང་སྟེ་གཏན་པའི་གནས་འདས་ནའང་ལྟུང་བར་འགྱུར་རོ། །གྲོང་ཁྱེར་རོ། །ཕྱི་དྲོ་དུས་མ་ཡིན་པར་གྲོང་དུ་འགྲོ་བ་ཡང་གྲོང་གི་སྲང་ཡང་རོལ་མ་རོལ་སྒོ་བཅུག་པ་ཞིག་ན་སྒོའི་གཏན་པའི་གནས་འདས་ན་ལྟུང་བར་འགྱུར་རོ། །རྒྱལ་པོའི་རིགས་དང་གནས་སུ་ཡང་ངོ༌། །རྒྱལ་པོའི་ཁྱིམ་དུ་ནམ་མ་ནངས་པར་
སོང་སྟེ་གཏན་པའི་གནས་འདས་ན་ལྟུང་བར་འགྱུར་རོ། །གྲོང་ཁྱེར་དུ་ཉེས་བྱས་པའོ། །རྒྱལ་པོའི་ཁྱིམ་གྲོང་ཁྱེར་གྱི་དབུས་ན་འདུག་སྟེ་རྒྱལ་པོའི་ཁྱིམ་དུ་འགྲོ་བའི་ཕྱིར་གྲོང་དུ་འགྲོའོ་ཞེས་པ་སྟེ་སོང་ན་གྲོང་ཁྱེར་གྱི་སྒོའི་གཏན་པ་འདས་ན་ཉེས་བྱས། དེ་སྟེ་དེའི་ཕྱིར་ནའོ། །སཱུ་ཏྲ་ལྟག་མ་ལྟར་རྒྱལ་པོའི་ཁྱིམ་དུ་འགྲོ་བའི་ཕྱིར་གྲོང་དུ་འགྲོའོ་ཞེས་ཞུས་ཏེ་གྲོང་ཁྱེར་གྱི་སྒོའང་འདས་རྒྱལ་པོའི་ཁྱིམ་གྱི་སྒོའང་འདས་ན་ལྟུང་བ་དེ་སྟེ་ལན་གཉིས་སུ་དེར་ན་ཁ་ན་མ་ཐོ་བའོ། །གྲོགས་ལ་མ་ཞུས་པར་སཱུ་ཏྲ་ལྟག་མ་ལྟར་སོང་བ་ནི་དུས་མ་ཡིན་པར་གྲོང་དུ་སོང་པའི་ལྟུང་བ་གཅིག་དང་རྒྱལ་པོའི་ཁྱིམ་དུ་སོང་བའི་ལྟུང་བ་གཅིག་དང་གཉིས་ཡོད་དོ། །དེ་སྟེ་རྒྱལ་པོ་དང་རྒྱལ་མོ་དང་གཞོན་ནུ་དང་ཞང་བློན་དང༌། འདི་རྣམས་ཀྱི་རྐྱེན་གཅིག་གིས་བཀུག་པ་ནི་ནམ་སོང་ཡང་ཉེས་མེད་དོ། །བར་ཆད་དང༌། སྲོག་ལ་དམའ་བའི་འཇིགས་པའི་རྐྱེན་ཅིག་བྱུང་བ་དང་འདུལ་བའི་དབང་གིས་ན་མ་ཡིན་ནོ། །བདག་རྒྱལ་པོའམ་རྒྱལ་མོའི་གནས་སུ་ཞག་དུ་འདུག་ན་དགྲ་བཅོམ་པར་འགྱུར་བའི་གདེང་ཡོད་ན་ཆོས་བཤད་པའི་ཕྱིར་འདུག་པ་དང་འདི་རྣམས་ཉེས་མེད་དོ། །མ་བསྙད་པར་རྒྱལ་པོའི་རིགས་སུ་མི་འཇུག །དོན་ཞིག་ཡོད་ན་རྒྱལ་པོའི་ཕོ་བྲང་དུ་འགྲོ་ན་རྒྱལ་པོ་ལ་མ་ཞུས་པར་སོང་ན་ཉེས་བྱས་ཏེ་ཉིན་པར་ལ་བྱའོ། །རྒྱལ་པོའི་རིགས་སུ་ནུབ་མོ་སྤྱད་པའོ། །ནམ་མ་ནངས་པར་རྒྱལ་པོའི་རིགས་དང་རྒྱལ་པོ་དང་རྒྱལ་མོའི་ཁྱིམ་དུ་འཇུག་པ་རྫོགས་སོ།། །།འདི་ལྟ་བུའི་ལྟུང་བ་ལ་འཆད་དེ། སོ་སོར་ཐར་པ་ལ་འཆད་པར་འཇུག་པའི་ཚེ་དེ་ལན་གཉིས་སུ་མྱོང་ལ་མི་སྐྱོ་བའི་ཡིད་ཀྱིས་ང་བདག་གིས་ཤེས་སོ་བ་ལ་འདི་ཡང་ཡོད་དོ་ཞེས་སྨྲས་ནའོ། །སོ་སོར་ཐར་པ་འཆད་པའི་ཚེ་ཕས་ཕམ་པ་བཞི་ལ་སོགས་པ་ལ་འདི་ལྟ་བུའི་ཚིག་གཞུང་འདིའི་ནང་ནས་འབྱུང་བ་ལྟ་བུ་ཞིག་ད་གདོད་ཐོས་ཤིང་ཤེས་སོ་ཞེས་ཟེར་ན་སྔན་ཆད་གསོ་སྦྱིན་ལན་གཉིས་མྱོང་ན་ལྟུང་བར་འགྱུར་རོ། །མཚན་གཞན་གྱིས་འཆད་པ་ན་སྤྱིའི་སྟེ་སོ་སོར་ཉེས་བྱས་སོ། །དགེ་སློང་མའི་སོ་སོར་ཐར་པ་འཆད་པའི་ཚེ་ཕས་ཕམ་པ་ལ་སོགས་པ་དགེ་སློང་ཕ་དང་མཐུན་པའི་རྣམས་འབྱུང་བ་
ལ་མདོ་འདིའི་གཞུང་འདི་ལས་བྱུང་བ་ལྟ་ཞིག་ན་ད་གདོད་ཐོས་ཤིང་ཤེས་སོ་ཞེས་ཟེར་བ་ནི་ཉེས་བྱས་སོ། །མདོ་སྡེ་འཆད་པ་ན་ཡང་ངོ༌། །མདོ་སྡེ་དང་མ་ལྟ་བུ་ཞིག་གི་ནང་ནས་ཁྲིམས་ཀྱི་ཚིག་འབྱུང་བ་ལ་འདི་སྐད་ཟེར་བ་ད་གདོད་ཅིག་ཤེས་ཤིང་ཐོས་སོ་ཞེས་ཟེར་བ་ཡང་ཉེས་བྱས། ལྟུང་བ་མེད་པ་ནི་སྤྱིའི་མ་ཡིན་ནོ། །དགེ་སློང་མའི་སོ་སོར་ཐར་པའི་ནང་ནས་དགེ་སློང་ཕའི་དང་མི་མཐུན་པ་མེད་པ་ཉིད་ཀྱི་ཁྲིམས་ལྷག་པར་ཡོད་པའི་ནང་ནས་རྣམས་ལས་གདོད་ཤེས་ཤིང་ཐོས་སོ་ཞེས་ཟེར་བ་ནི་ཉེས་མེད་དོ། །སོ་སོར་ཐར་པ་ལས་འཆད་པ་ནན་ཏན་དུ་བྱ་སྟེ་མ་མཉན་ཏེ་བཟླས་ན་འགྱོད་དུ་གཞུག །ཐོག་མ་གསོ་སྦྱིན་ལན་གཉིས་བྱས་ཀྱི་བར་དུ་ཁྲིམས་མ་བསླབས་ཤིང་མ་མཉན་ཏེ་གསོ་སྦྱིན་ལན་གསུམ་ཚུན་ཆད་དུ་སོ་སོར་ཐར་པ་ཀློག་པ་ལ་འདི་ལྟ་བུའི་ཚིག་གདོད་ཐོས་ཤིང་ཤེས་སོ་ཞེས་སྨྲ་བའི་དགེ་སློང་དེ་ལྟུང་བར་འགྱུར་བ་ཡིན་གྱིས་དགེ་འདུན་དང་མཁན་པོ་དྲུང་ན་སུ་འདུག་པས་འགྱོད་ཅིང་མཐོལ་དུ་ཆུག་ཤིག་མཐོལ་དུ་མ་བཅུག་ན་དགེ་སློང་དེ་ཀུན་ལ་ཉེས་བྱས་ཏེ་རེ་ཡོད་དོ། །བསླབ་ཚིག་གི་རྫས་ཀུན་སྤྱོད་པའོ། །འདི་ལྟ་བུའི་ཆོས་གདོད་ཤེས་ཤིང་ཐོས་སོ་ཞེས་ཟེར་བའི་ལྟུང་བ་རྫོགས་སོ།། །།ཁབ་རལ་གྱི་ལྟུང་བ་ལ་འཆད་དེ། བ་སོ་དང་རུས་པ་དང་རྭའི་ཁབ་རལ་བྱས་སམ་བྱེད་དུ་བཅུག་ནའོ། །མིང་གིས་སྨོས་པ་འདི་རྣམས་ལས་ཁབ་རལ་བྱས་པ་ཞིག་བདག་གིས་བྱས་སམ་གཞན་ལ་བྱེད་དུ་བཅུག་ན་ལྟུང་བར་འགྱུར་རོ། །བྱས་པའི་རྙེད་པ་ཀུན་དུ་སྤྱོད་པ་ལྟུང་བ་མེད་པའོ། །གཞན་ཞིག་བྱས་ཟིན་པ་ཞིག་བྱིན་པ་ནི་བླངས་ཤིང་སྤྱད་ཀྱང་ཉེས་མེད། བཅག་གམ་ཞེས་མ་དྲིས་པར་མཐོལ་བ་མ་བཟུང་ཤིག །དགེ་སློང་རུས་པ་ལ་སོགས་པ་ལ་ཁབ་རལ་བྱས་པ་ཞིག་ལྟུང་བར་གྱུར་པ་ཞིག་མཐོལ་དུ་འོངས་ན་ཁབ་རལ་དེ་བཅག་གམ་ཞེས་དྲིས་ལ་བཅག་ན་མཐོལ་དུ་ཆུག་ཤིག་མ་བཅག་གམ་མ་དྲིས་པར་མཐོལ་དུ་བཅུག་ན་དགེ་སློང་མཐོལ་ཚངས་ཀྱི་སྤངས་པ་བྱེད་པ་དེ་ཉེས་བྱས་སོ། །དེ་སྟེ་མ་བཅུག་ན་མ་བཤགས་པ་བཞིན་ནོ། །སཱུ་ཏྲ་ལྟག་མ་ལྟར་ཁབ་རལ་མ་བཅག་གམ་མཐོལ་ཚངས་མ་བྱས་པ་དང་འདྲ་སྟེ་ལྟུང་བ་ཡོད་པ་ཚངས་པར་མི་འགྱུར་རོ། །འོག་
མ་ལྔ་པོ་དེ་ཡང་སྤྱད་ཅིང་སྦྱར་གཉིས་པོ་ནི་བཤུས་ནས་སོ། །རྐང་པ་དང་གཡོགས་པ་དང་གདིང་བ་དང་གཡན་པ་དང་རལ་ཆེན་ལྔ་ཡང་ལྟུང་བར་འགྱུར་ཏེ་མཐོལ་དུ་འོངས་ན་ལྷག་པ་བཅད་ཅིང་བཤུས་སམ་ཞེས་དྲིས། མ་དྲིས་སམ་མ་བཤུས་ན་མཐོལ་དུ་བཅུག་ན་མཐོལ་བའི་དབང་པོ་དགེ་སློང་ཉེས་བྱས་པའོ། །ལྟུང་བ་འབྱུང་བའི་དགེ་སློང་ཚངས་པར་མི་འགྱུར་རོ། །ཁབ་རལ་སྦྱོར་བའོ། །རྭ་ལས་ཁབ་རལ་བྱས་པའི་ལྟུང་བ་རྫོགས་སོ།། །།ཁྲིའི་རྐང་པའི་ལྟུང་བ་ལ་འཆད་དེ། རྐང་པ་ཐུང་ངུའི་ཁྲི་ལ་མི་ཉལ། ཁྲི་རྐང་པ་ཐུང་ངུ་ལ་མི་ཉལ་ཉལ་ན་ཉེས་བྱས། ཉལ་བའི་གནས་སུ་ཆུད་པའི་ཁྲིའི་དྲུང་གི་ཕྱོགས་སུ་རྐང་པ་མི་བཀྲུ་ལྷ་མ་ཡོད་ནའོ། །ཉལ་ཁྲིའི་གློར་ཆོལ་ཟངས་ལ་སོགས་པ་སྣོད་མེད་པར་ས་ལ་རྐང་པ་མི་བཀྲུ་བཀྲུས་ན་ཉེས་བྱས། ཉལ་ཁྲི་རྐང་པ་ཐུང་དུ་ཞིག་ལ་དགེ་སློང་ཅིག་གིས་གློར་རྐང་པ་བཀྲུས་ནས་ས་ལ་ཆུ་ལྟུང་བའི་ནང་དུ་སྦྲུལ་ཅིག་ཉལ་ནས་ཁྲི་ཐོག་ནས་དགེ་སློང་བསམ་གཏན་བྱེད་ཅིང་ཡུར་བ་ལས་སྦྲུལ་གྱིས་འཕྲལ་ལ་བཙུགས་ཏེ་ཤི་ནས་ཁྲི་རྐང་པ་ཐུང་དུ་མ་བྱེད་ཅིག་མལ་གྱི་གློར་རྐང་པ་མ་འཁྲུ་ཅིག་ཅེས་བཅས། ལྷམ་ཡོད་ན་ཕྱི་རོལ་ཏམ་གཞན་དུ་རྐང་པ་བཀྲུས་ལ་ལྷམ་གྱོན་ཏེ་མལ་དུ་འགྲོ། །མགོ་མཇུག་གི་མཐའ་མ་གཏོགས་ཏེ་གཞན་དུའོ། །ལྷམ་མེད་ན་མལ་ཁྲིའི་གློར་རྐང་པ་མི་བཀྲུ་བར་སྔས་སམ་འཕོངས་ཤིག་ཏུ་བཀྲུའོ། །མལ་སྟན་ཆེན་པོའམ་མཐོན་པོར་འདུག་པ་ལ་ཉལ་བར་མི་བྱ། རིན་པོ་ཆེ་དང་གསེར་དང་དངུལ་ལས་བྱས་པའི་ཁྲི་ཆེན་པོ་དང་ཁྲི་རྐང་པ་རིང་པོ་མཐོན་པོ་ལ་མི་འདུག་འདུག་ན་ཉེས་བྱས། མེད་ན་གྲོང་བར་དུ་སྔ་མ་བྱ། ཁྱིམ་པས་གྲོང་བར་དུ་རིན་པོ་ཆེ་ལ་སོགས་པའི་ཁྲི་སྟེང་དུ་བཞག་ན་ཁྲི་གཞན་མེད་དམ་ཞེས་དྲིས་ཏེ་མེད་ན་འདུག་ཀྱང་ཉེས་མེད་དེ་འཕྲེས་ཤིང་ཉལ་དུ་མི་གནང་ངོ༌། །བརྟགས་པ་ནི་རྐང་པ་བཞི་དང་བཅས་པ་ལ་ཉལ་བའོ། །ཁྲི་རྐང་པ་ཐུང་ངུ་ལ་རྐང་པའི་ཚད་དུ་བྱ་བའི་ཕྱིར་རྐང་པ་བཞིའི་འོག་ཏུ་རྟེན་པས་བཏོད་དེ་ཉལ་བ་ནི་ཉེས་མེད་དོ། །ཁྲིའི་སྟེང་གི་ཁྲིའུ་ལ་མི་འདུག །ཁྲི་གཅིག་གི་སྟེང་དུ་གཅིག་བཞག་པའི་སྟེང་དུ་མི་འདུག་འདུག་ན་ཉེས་བྱས། ཚད་ལས་འདས་པ་བྱས་
སམ་བྱེད་དུ་བཅུག་པའོ། །ཁྲི་རྐང་བ་ཐུང་ངུ་ལ་མ་ཉལ་ཅིག་ཅེས་ཁྲིམས་བཅས་པ་དང་དྲུག་སྡེས་ཁྲུ་བཅུ་གཉིས་ཀྱི་སྲིད་ཀྱི་རྐང་པ་ཡོད་པའི་ཁྲི་བྱས་པ་ལས་བཅས་ཏེ་རྐང་པ་ཚད་ལས་འདས་པར་བདག་གིས་བྱས་སམ་གཞན་བྱེད་དུ་བཅུག་པ་ལས་ལྟུང་བར་འགྱུར་ཏེ་ཡན་ལག་གཅིག་ཚུན་ཆད་པ་གཉིས་མ་ཡིན་པ་གསུམ་མོ། །ཁྲི་རྐང་པ་རིང་པོ་དང་ཁྲི་ཤིང་བལ་གྱིས་གཡོགས་པའི་ལྟུང་བ་གཉིས་མ་གཏོགས་པར་གདིང་བ་དང་གཡན་པ་དགབ་པ་དང་རས་ཆེན་གསུམ་ཡང་ཚད་ལས་འདས་པར་བྱས་ན་ལྟུང་བར་འགྱུར་རོ། །ཁྲི་དང་ཁྲིའུའོ། །ཁྲི་དང་ཁྲིའུ་རྐང་པ་རིང་དུ་བྱས་པ་ལས་ལྟུང་བར་འགྱུར་ཏེ་ཡན་ལག་གཅིག །དགེ་འདུན་གྱིའོ། །ཁྲི་དང་ཁྲིའུ་བྱས་པ་དགེ་འདུན་གྱི་ཡང་ཡིན་པ་ལས་ལྟུང་བར་འགྱུར་ཏེ་ཡན་ལག་གཅིག །མདོ་བཞིན་པ་ཡང་ངོ༌། །ཁྲིའུ་ལ་ཤིང་བལ་གྱིས་གཡོགས་པའི་ལྟུང་བ་ཡང་དགེ་འདུན་གྱི་ཡིན་པ་ལས་ལྟུང་བར་འགྱུར་རོ་རྐང་པ་དག་གོ །ཁྲིའུ་རྐང་པ་ཚད་ལས་འདས་པ་ལས་ལྟུང་བར་འགྱུར་ཏེ་ཡན་ལག་གཅིག །ཡན་ལག་ཐོར་བུ་སྨོས་པ་འདི་རྣམས་དང་ལྡན་པར་འགྱུར་ན་ལྟུང་བའོ། །འདི་དག་གི་ཁྲིའི་ཚད་དེ་མུའི་ཕྱོགས་མ་གཏོགས་ཏེའོ། །ཁྲིའི་རྐང་པའི་ཚད་ནི་གྲྭའི་མཐའ་མའི་གྲུ་བཞིར་འདུག་པའི་རྔམས་མ་གཏོགས་པར་རྐང་པ་ཉི་ཚེ་ལ་འཁྲུ་གང་བརྩི་ཞིང་གཅལ་ལོ། །དེ་ལས་འདས་པར་བྱས་ན་ལྟུང་བར་འགྱུར། བདེ་བར་གཤེགས་པའི་གསུམ་གྱིས་སོ། །ཁྲུ་གང་གི་ཚད་དུ་བརྩི་བ་ནི་མི་འབྲིང་པོའི་ཁྲུ་གསུམ་ལ་བདེ་བར་གཤེགས་པའི་ཁྲུ་གང་ཡོད་པར་བརྩིས་ལ་མི་འབྲིང་པོའི་ཁྲུ་གང་དུ་ཁྲིའི་རྐང་པ་བྱའོ། །དེ་མ་ཐག་པ་ཡང་ངོ༌། །གདིང་བ་དང་གཡན་པ་དང་རས་ཆེན་གསུམ་ཡང་ཁྲུ་ཚད་འདི་ལྟར་བརྩིས་པའི་ཐང་དུ་བཅལ་ཏེ་བྱའོ། །རྐང་པ་སྒྲུབ་པའོ། །ཁྲི་རྐང་པ་ཚད་ལས་འདས་པའི་ལྟུང་བ་རྫོགས་སོ།། །།གཡོགས་པའི་ལྟུང་བ་ལ་འཆད་དེ། ཤིང་བལ་གྱིས་གཡོགས་པའོ། །དགེ་འདུན་གྱི་ཁྲི་ཤིང་བལ་གྱི་བར་ཚངས་ཅན་དུ་འདུག་པ་ལས་བར་ནས་ཤིང་བལ་བྱུང་སྟེ་ཁྲིའི་སྟེང་དུ་གཡོགས་ཤིང་གཏོར་ན་ལྟུང་བར་འགྱུར་རོ། །བདག་གིས་སམ་བཅུག་ནའོ། །བདག་གིས་ཤིང་བལ་ཕྱུང་སྟེ་གཡོགས་སམ་གཞན་ལ་གཡོགས་སུ་
བཅུག་ཀྱང་རུང་སྟེ་ལྟུང་པར་འགྱུར། ཤིང་བལ་ལ་ལྔ་སྟེ་ཤལ་མལ་དང་ཨ་ཀ་དང་ཀ་ཤ་དང་བོ་ཀ་དང་མེ་ར་ཀ་ན་གྱིའོ། །ཤིང་བལ་ནི་མིང་གིས་སྨོས་པ་འདི་རྣམས་ལས་གང་གིས་གཡོགས་ཀྱང་རུང་སྟེ་ཕྱུང་ན་ལྟུང་བར་འགྱུར་རོ། །གཡོགས་པའོ། །དགེ་འདུན་གྱི་ཁྲི་ལ་ཤིང་བལ་གྱིས་གཡོགས་པའི་ལྟུང་བ་རྫོགས་སོ།། །།གདིང་བའི་ལྟུང་བ་ལ་འཆད་དེ། གདིང་བའོ། །གདིང་བ་བྱས་པ་ལས་ལྟུང་བར་འགྱུར། ཚད་འདི་ལྟ་སྟེ་སྲིད་དུ་ཁྲུ་གསུམ། གདིང་བའི་ཚད་ནི་ཆུར་མི་འབྲིང་པོའི་ཁྲུ་གསུམ་དུ་བྱའོ། །མི་བྱེད་ན་ཕྱེད་དང་དོ་བསྣན། གདིང་བ་ཁྲུ་གསུམ་དུ་བྱས་ཏེ་སྤྱད་པ་ལ་ཨུ་དའི་ལུས་རིང་སྟེ་གདིང་བ་མ་ཆོག་ནས་ཐ་མ་ལོ་མ་དག་གིས་མཐུད་པ་ལས་གནང་སྟེ་ཁྲུ་ཕྱེད་དང་དོས་བསྣན་ཏེ་ཁྲུ་ཕྱེད་དང་ལྡར་བྱས་ཀྱང་མ་ཉེས། ཁྲུ་གསུམ་དུ་བྱས་ཀྱང་ཉེས་མེད། དེའི་ཞེང་ནི་ཁྲུ་དོ་དང་སོར་དྲུག་གོ །གདིང་བའི་ཞིང་ནི་ཁྲུ་དོ་དང་སོར་དྲུག་གི་ཐད་དུ་བྱའོ། །ཞེང་དང་ཆུའི་ཚད་ནི་འདི་ལས་ལྷག་པར་བྱས་ན་ལྟུང་བའོ། །ཉེས་བྱས་པ་ནི་འདི་ནས་བྲི་བ་ལ་བསྔོས་ནའོ། །ལུས་རིང་པོ་ཁྲུ་ཕྱེད་དང་ལྔ་དགོས་པ་ལས་དེ་བས་ན་ཆུང་དུ་བྱས་སམ་ལུས་ཆུང་ངུ་ཁྲུ་གསུམ་དགོས་པ་ལས་དེ་ལས་ཆུང་དུ་བྱས་ཀྱང་ཉེས་བྱས་སོ། །མདོ་བཞིན་གཉིས་ཀྱང་ངོ༌། །གཡན་བ་དང་རས་ཆེན་གཉིས་ཀྱང་ཚད་ལས་ཆུང་ངུ་བྱས་ན་ཉེས་བྱས། གདིང་བར་ཆུད་པའོ། །གདིང་པ་ཚད་ལས་འདས་པའི་ལྟུང་བ་རྫོགས་སོ།། །།གཡན་པ་དགབ་པའི་ལྟུང་བ་ལ་འཆད་དེ། གཡན་པ་དགབ་པ་ཚད་ལས་འདས་པར་བྱས་ན་ལྟུང་བར་འགྱུར་རོ། །ཁྲུ་དྲུག་དང་གསུམ་མོ། །གཡན་པ་དགབ་པའི་ཚད་ནི་ཞེང་དུ་ཁྲུ་གསུམ་ཆུར་ཁྲུ་དྲུག་ཏུ་བྱའོ། །གཡན་བ་དགབ་པར་ཆུད་པའོ། །གཡན་པ་དགབ་པ་ཚད་ལས་འདས་པའི་ལྟུང་བ་རྫོགས་སོ།། །།རས་ཆེན་ཀྱི་ལྟུང་བ་ལ་འཆད་དེ། དབྱར་གྱི་རས་ཆེན། རས་ཆེན་ཚད་ལས་འདས་པར་བྱས་ན་ལྟུང་བར་འགྱུར། དགུ་དང་གསུམ་དང་སོར་བཅོ་བརྒྱད་དོ། །རས་ཆེན་གྱི་ཚད་ནི་ཞེང་དུ་ཁྲུ་གསུམ་དང་སོར་བཅོ་བརྒྱད་ཆུར་དགུ་སྟེ་དེ་ལས་ཚད་ལས་འདས་པར་བྱས་ན་ལྟུང་བར་འགྱུར་རོ། །དབྱར་གྱི་རས་ཆེན་དུ་ཆུད་པའོ། །རས་ཆེན་ཚད་ལས་འདས་པར་བྱས་པའི་ལྟུང་བ་རྫོགས་སོ།། །།བདེ་
བར་གཤེགས་པའི་ཆོས་གོས་ཀྱི་ལྟུང་བ་ལ་འཆད་དེ། ལྔ་དང་གསུམ་སྟེ་སྟོན་པ་བདག་གི་ཁྲུ་དང་ཆོས་གོས་སོ། །བདེ་བར་གཤེགས་པའི་ཆོས་གོས་ཀྱི་ཚད་ནི་བདེ་བར་གཤེགས་པ་ཉིད་ཀྱི་ཁྲུ་ཆུར་ལྔ་ཞེང་དུ་གསུམ་མོ། །དགེ་སློང་གིས་ཆོས་གོས་འདིའི་ཚད་དུ་བྱས་ན་ལྟུང་བར་འགྱུར་རོ།། དེ་ལྟ་བུ་མ་ཡིན་ན། །དགེ་སློང་ལ་ཞིག་ལུས་བདེ་བར་གཤེགས་པ་ཙམ་ཕོད་པ་ནི་བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་ཀྱང་ཉེས་མེད་དོ། །དེའི་ཚད་དམ་དེ་ལས་ལྷག་པའི་ཆོས་གོས་བྱས་སམ་བྱེད་དུ་བཅུག་ནའོ། །དགེ་སློང་གཞན་བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་སམ་དེ་ལས་ལྷག་པར་བྱས་ན་བདག་གིས་བྱས་ཀྱང་རུང༌། གཞན་བྱེད་དུ་བཅུག་ཀྱང་རུང་ལྟུང་བར་འགྱུར་རོ། །དེ་མི་བཅང༌། བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་པ་མི་བཅང་བཅངས་བཞིན་དུ་མཐོལ་ཚངས་བྱས་ཀྱང་ཚངས་པར་མི་འགྱུར་རོ། །བདེ་བར་གཤེགས་པའི་ཆོས་གོས་སུ་ཆུད་པའོ། །བདེ་བར་གཤེགས་པའི་ཆོས་གོས་ཀྱི་ཚད་དུ་བྱས་པའི་ལྟུང་བ་རྫོགས་སོ། །འབའ་ཞིག་པའི་ལྟུང་བ་རྫོགས་སོ། །དགུ་བཅུའི་ལྟུང་བ་གཙང་མ་རྫོགས་སོ།། །།གཙང་མ་ནི་སུམ་ཅུ་སྤང་བའི་ལྟུང་བ་ནི་རྫས་སྤང་དགོས་པས་བཙོག་པ་ཞེས་བྱས་བ་འདི་ནི་ལྟུང་བར་ཆད་པས་གཙང་མ་ཞེས་བྱའོ། །གྲོང་སོ་སོར་མཐོལ་པ་ལ་འཆད་དེ། འྦྷྲིད། གཉེན་མ་ཡིན་པའི་དགེ་སློང་མས་བཤམ་པར་ཤེས་བཞིན་པ་ལས་མཐོལ་བར་འགྱུར་རོ། །གཉེན་མ་ཡིན་པའི་དགེ་སློང་མ་ལས་སོ། །གཉེན་མ་ཡིན་པའི་དགེ་སློང་མ་གྲོང་བར་ན་ཟན་སློང་ཞིང་འདུག་པ་ལས་དགེ་སློང་གིས་ཟན་བླངས་ཏེ་ཟོས་ན་མཐོལ་བར་འགྱུར། །བདག་གིས་བྱིན་ཏེ་འདྲིས་པ་ལ་མ་ཡིན་བདག་ཀྱང་གྲོང་ན་འདུག་ལ་བཟའ་བ་དང་བཅའ་བ་བླངས་ཏེ་ཟོས་པ་ལས་སོ། །དགེ་སློང་མ་ཉིད་ཀྱིས་ལག་ནས་ཀྱང་བྱིན་དགེ་འདུན་ཕལ་མོ་ཆེ་མཆོད་སྟོན་གསོལ་པ་ལ་དགེ་སློང་མས་བྲིམས་པ་ཡང་མ་ཡིན་པར་དགེ་སློང་མ་གྲོང་བར་ན་སློང་ཞིང་འདུག་པ་ལས་བཟའ་བ་དང་བཅའ་བ་གང་ཡང་རུང་སྟེ་དགེ་སློང་མའི་ལག་ནས་བླངས་ཏེ་ཟོས་ན་མཐོལ་བར་འགྱུར་རོ། །དགེ་སློང་མས་དྲུང་ན་འདུག་པའི་མི་གཞན་ཞིག་གི་ལག་ཏུ་བྱིན་ཏེ་མི་དེས་དགེ་སློང་གི་ལག་ཏུ་བྱིན་ཡང་མཐོལ་བར་འགྱུར་
རོ། །དབྱར་མོ་ཐང་གི་གྲོང་མ་ཡིན་ནོ། །དགེ་སློང་མའི་གཙུག་ལག་ཁང་དུ་དགེ་སློང་ཕས་ཟས་ཟོས་སམ་ཟན་བླངས་པ་ནི་གྲོང་བར་དུ་མི་བརྩི་སྟེ་ཉེས་མེད་དོ། །དགེ་སློང་གི་གནས་ཀྱང་མ་ཡིན་ནོ། །དགེ་སློང་གིས་གཙུག་ལག་ཁང་ངམ་དགེ་སློང་གི་གནས་སུ་དགེ་སློང་མས་ཟན་བསྐྱལ་ཏེ་བྱིན་པ་ཡང་ཉེས་མེད་དོ། །ནམ་མཁའ་ནི་ཕྱེད་དོ། །ནམ་མཁའ་ལ་དགེ་སློང་མ་འདུག་སྟེ་དགེ་སློང་པས་ཟན་བླངས་པ་ནི་ཉེས་བྱས་སོ། །མི་ཉེ་བར་བཞག་པ་ལས་བླངས་ན་བཞག་པ་དེ་ལས་མ་ཡིན་ནོ། །དགེ་སློང་མས་དགེ་སློང་ཕ་ལ་སྦྱིན་པའི་ཕྱིར་ཁྱིམ་པའམ་མི་གཞན་ཞིག་ཁྱིམ་དུ་གཏམས་ཏེ་བཞག་ན་གཏམས་པའི་མི་དེས་དགེ་སློང་ལ་བྱིན་ཏེ་ཟོས་པ་ནི་ཉེས་མེད་དོ། །དགེ་སློང་མ་ལས་ཟས་བླངས་ཞེས་བྱ་བ་སོ་སོར་མཐོལ་བ་དང་པོའོ། །དགེ་སློང་མ་ལས་གྲོང་བར་དུ་ཟན་བླངས་ཏེ་ཟ་བའི་མཐོལ་བ་རྫོགས་སོ།། །།ཁྱིམ་གྱི་སོ་སོར་མཐོལ་བ་ལ་འཆད་དེ། དེ་ལ་བཅའ་བ་བྱིན་སྒོམ་དང་ཚོད་མ་དང་མཆོད་སྟོན་དང་ཡང་ངོ་ཞེས་བྱ་བ་ལ་སོགས་པ་དེས་སམ་དགེ་སློང་གཞན་གྱིས་བསྟན་པར་འཇུག་ཅིང་དགེ་སློང་མ་འདུག་པ་ལས་བྱེད་དོ། །སྦྱིན་བདག་ཁྱིམ་པས་རྒྱུ་སྦྱར་ཏེ་མཆོད་སྟོན་བྱས་པ་ལས་དགེ་སློང་མས་བཤམས་ཏེ་དགེ་སློང་གཅིག་ལ་ཡང་རུང་ཟད་པར་ཡང་རུང་འབྲས་དང་ཚོད་མ་ལ་སོགས་པ་གསོལ་ཞེས་ལྷག་པར་བདར་ན་དགེ་སློང་གག་ཀྱང་རུང་གཅིག་གིས་རེ་ཞིག་འདྲིམ་པར་མ་ཤོམ་པར་སྡོད་ཅིག་ཅེས་བསྒོ་ཤིག་དེ་ལྟར་མ་བསྒོ་ན་དགེ་སློང་གཅིག་ལ་བདར་ཅིང་བཤམས་ཀྱང་རུང་སྟེ་དགེ་འདུན་ཐམས་ཅད་མཐོལ་བར་འགྱུར་རོ། །སོ་སོར་མཐོལ་བ་ནི་གཙུག་ལག་ཁང་དུ་སོང་སྟེ་དགེ་འདུན་དུ་ཡོད་པ་ཀུན་ལ་རེ་རེ་ནས་མཐོལ་ལོ། །དེ་སྟེ་དེའི་ངོ་བོ་དང་གཉེན་ཡང་མ་ཡིན་པས་སྤྱན་དྲངས་ནའོ། །སྦྱིན་བདག་ཁྱིམ་པས་སྤྱན་དྲངས་པ་ལ་ཁྱིམ་པས་དགེ་སློང་མ་ཞལ་ཏ་དང་ཐོ་ངན་བྱེད་དུ་བཅུག་པ་དང་ཁྱིམ་པ་དེའི་གཉེན་དུ་འོངས་པའི་དགེ་སློང་མ་ཞིག་གིས་བཤམས་ཤིང་བདར་བ་ནི་མཐོལ་བར་མི་འགྱུར་ཏེ་ཉེས་མེད་དོ། །མ་གཏོགས་པ་ནི་རིམས་སྟོན་པ་དང་མ་ཐོབ་པ་ལ་སྦྱིན་པའོ། །ཟས་འདྲིམ་པ་ལ་གྲལ་མཐོན་དམན་ནོར་ཏེ་མི་ཤེས་པ་ལ་འདྲིམ་པའི་རིམས་སྟོན་པ་དང་དགེ་སློང་ཟན་མ་ཐོབ་པ་རྣམས་ལ་འདིར་གསོལ་ཅིག་ཅེས་བྱས་པ་ནི་
མཐོལ་བར་མི་འགྱུར་ཏེ་ཉེས་མེད་དོ། །རེ་ཞིག་སྡོད་ཅིག་སྲིད་མོ་ཁྱོད་དགེ་སློང་དག་ཟན་ཟོས་ཀྱི་བར་དུའོ་ཞེས་དགེ་སློང་ཕས་དེ་ལ་གང་སུས་ཀྱང་ལྷན་ཅིག་ཏུ་མ་ཟོས་པས་ཀྱང་བསྒོ་སྟེ་དགེ་སློང་གསུམ་ལ་སོགས་པ་སྤྱན་དྲངས་ཏེ་ཟོས་ནའོ། །སྦྱིན་བདག་ཁྱིམ་པས་དགེ་འདུན་མཆོད་སྟོན་ལ་སྤྱན་དྲངས་པ་ལ་དགེ་སློང་མ་ཤོམ་ཞིང་འདུག་ན་དགེ་འདུན་གྱི་དྲུང་ན་དགེ་སློང་ཟན་ཟོས་ཟིན་པ་དང་ད་རུང་མ་ཟོས་པར་ཟན་མི་ཟ་བར་འདུག་པ་རྣམས་ཀྱིས་ཀྱང་དགེ་འདུན་བཤོས་གསོལ་གྱི་བར་དུ་མ་ཤོམ་ཤིག་ཅེས་དགེ་སློང་གག་ཀྱང་རུང་ཅིག་གིས་བསྒོ་ཤིག །མ་བསྒོ་ན་དགེ་སློང་གསུམ་ཡན་ཆད་དགེ་འདུན་དུ་ལངས་པ་ནི་ཟོས་པ་དང་མ་ཟོས་པའི་དགེ་སློང་ཀུན་མཐོལ་བར་འགྱུར་རོ། །གསུམ་མན་ཆད་དགེ་འདུན་དུ་མ་ལངས་པ་ནི་ཉེས་བྱས་ཏེ་གང་ཟག་གཅིག་ལ་མཐོལ། རིགས་སུའོ། །སྦྱིན་བདག་གིས་ཟས་སྦྱར་བའི་གནས་ནི་དགེ་འདུན་གྱི་གཙུག་ལག་ཁང་དུ་ཟན་སྦྱར་བ་དང་དགོན་པའི་ཐང་ལ་སྦྱར་བ་དང་ཁྱིམ་བདག་ཉིད་ཀྱི་ཁྱིམ་དུ་སྤྱན་དྲངས་པ་དང་འདི་རྣམས་གསུམ་གང་ཡང་རུང་སྟེ་དགེ་སློང་མས་བཤམས་ན་མཐོལ་བར་འགྱུར། དེ་སྟེ་དེས་ཚིག་གི་མཚམས་རྙེད་ན་རྩ་བའོ། །ཟན་ཟ་བའི་ཚེ་དགེ་སློང་མས་བཤམས་ཏེ་འདི་གསོལ་ཞེས་ཟེར་བ་ལ་སོགས་པའི་ཚིག་ཐོས་ན་མཐོལ་བར་འགྱུར་རོ། །དེ་སྟེ་མ་ཡིན་ན་ཉེས་བྱས་པའོ། །ཟན་ཟ་བ་ལ་ཁང་དམིགས་སོ་སོ་ན་འཁོད་དེ་ཁང་པ་མིག་གཅིག་ན་འཁོད་པའི་རྣམས་ཤོམ་པའི་ཚིག་མ་ཐོས་པ་ནི་མཐོལ་བའི་ཉེས་བྱས་སོ། །འབྲིང་དེར་བསྒོ་བ་སྤྱད་ནའོ། །སྔ་ནས་དགེ་སློང་མ་ཤམ་ཤིང་འདུག་པ་ཐོས་ཏེ་ཤེས་བཞིན་དུ་ཟ་བའི་ཚེ་དགེ་སློང་མས་ཤོམ་པའི་ཚིག་ཟེར་བ་ལ་དགེ་སློང་གྲོགས་ཀྱིས་མ་ཤོམ་ཤིག་ཅེས་བསྒོ་བའི་ཚིག་མ་ཐོས་པ་ནི་མཐོལ་བར་འགྱུར་རོ། །དེ་བས་ན་འབྲི་བའི་ཕྱིར་ནན་ཏན་གྱིས་ཤིག །མདོ་ལྟག་མ་ལྟར་ཤོམ་པར་ཤེས་ཏེ་དགེ་སློང་གྲོགས་ཀྱིས་བསྒོ་བའི་ཚིག་མ་ཐོས་པའི་དགེ་སློང་དེས་ཟན་ཟོས་ཟིན་ན་གྲོགས་པོ་རྣམས་དགེ་སློང་མ་ཞིག་ཤོམ་ཞིང་འདུག་ཅེས་ཟེར་ན་ཁྱོད་ཀྱིས་སླར་བསྒོའམ་ཞེས་དྲིས་ཤིག་བསྒོའོ་ཞེས་ཟེར་བ་ཐོས་ན་མཐོལ་བར་མི་འགྱུར་ཏེ་ཉེས་མེད་དོ། །རྒན་པོས་དེར་མ་ཞུགས་ན་གསར་བུས་ཞུགས་ཤིག །ཟན་ཟ་བའི་ཚེ་དགེ་སློང་མ་ཤོམ་
ཞིང་འདུག་པ་ལ་མ་ཤོམ་ཤིག་ཅེས་སླར་བསྒོ་བ་ནི་གྲལ་ཐོག་མ་ན་འདུག་པས་བསྒོའོ། །ཐོག་མ་པས་བསྒོ་ན་འོག་ན་འཁོད་པས་རིམ་བཞིན་དུ་བསྒོའོ། །གྲལ་མི་མཉམ་པར་སྤྲས་པ་མ་བཟློག་བར་ཟོས་པ་སྟེ་སོ་སོར་མཐོལ་བ་གཉིས་སོ། །དགེ་སློང་མ་ཁྱིམ་པས་སྤྱན་དྲངས་པའི་ཟན་ལ་ཤོམ་པའི་ལྟུང་བ་རྫོགས་སོ།། །།སློབ་པའི་སོ་སོར་མཐོལ་བ་ལ་འཆད་དེ། དེ་སྟེ་དད་པ་ལ་སྦྱིན་པས་ཕོངས་ན་རིགས་སུ་སློབ་པའི་ཁྲིམས་ཆོས་ཤིག །དགེ་བསྙེན་དད་པ་ཆེ་སྟེ་དཀོན་མཆོག་དང་དགེ་འདུན་ལ་ཡོན་དབུལ་ཞིང་སྦྱིན་གཏོང་བྱེད་བྱེད་པས་དབུལ་ཕོངས་པར་འགྱུར་ན་ཡོན་བདག་དེའི་ཁྱིམ་དུ་སྤྱན་དྲངས་ཀྱང་རུང་དགེ་འདུན་མི་འདོང་ཞིང་ནོར་རྫས་མི་བླང་བར་འོག་ཁྲིམས་ཆོས་ཤིག །ཞུ་བས་སོ། །མདོ་ལྟག་མ་ལྟར་འོག་ཁྲིམས་བཅའ་བ་ནི་གསོལ་བ་དང་ཞུ་བའི་ལས་ཀྱིས་བཅའོ། །ཁ་ཕྱིར་དགྲོལ་བའོ། །འོག་ཁྲིམས་བཅས་པ་ལས་སླར་དགྲོལ་ན་ཡང་གསོལ་བ་དང་ཞུ་བའི་ལས་ཀྱིས་དགྲོལ་ལོ། །བྱིན་པ་དེའི་སེམས་ཤེས་པར་བྱ་སྟེ་ཁྱིམ་དུ་འགྲོ་བ་དང་སྟན་ལ་སྤྱད་པ་དང་ཆོས་བཤད་པ་བྱོས་ཤིག །དགེ་བསྙེན་དབུལ་པོར་གྱུར་པ་དེའི་ཁྱིམ་དུ་དགེ་འདུན་མི་འདོད་པར་བྱས་པ་དང་ནོར་ཟང་ན་དགེ་འདུན་འདི་གང་ཡང་འོང་དུའང་མི་བཏུབ་ན་ཟས་མེད་ཀྱང་ཆོས་བཤད་ཅིང་འོང་བའི་རིགས་ན་ཞེས་མི་དགའ་བའི་ཕྱིར་དགེ་བསྙེན་དེའི་ཁྱིམ་དུ་འགྲོ་ཞིང་སྟན་དག་ལ་ཡང་སྤྱད་ཆོས་བཤད་པ་ལ་སོགས་པ་བྱའོ། །ལྷུང་བཟེད་སྟོང་པས་གསོབ་ཏུ་མ་འཇུག་ཅིག །དགེ་བསྙེན་དེའི་ཁྱིམ་དུ་འགྲོ་བའི་ཚེ་སྔོན་ལྷུང་བཟེད་བཀང་ཞིང་སྦྱིན་སྦྱིན་ནང་ལྷུང་བཟེད་སྟོང་པར་སོང་ངོ་ཞེས་མྱ་ངན་ལྡང་པའི་ཕྱིར་ལྷུང་བཟེད་སྟོང་པར་མི་བསྐུར་བསྐུར་དགོས་ནའང་གཞན་ནས་བསླངས་ཏེ་བཀང་ལ་བསྐུར་རོ། །དེ་ལ་བྱིན་ཅིག །སློང་བའི་བྱིས་པ་དག་བསོད་སྙོམས་ལས་ཁུར་བ་རངས་བ་མ་ཡིན་ལ་སྦྱིན། ལྷུང་བཟེད་ཟན་གྱིས་བཀང་སྟེ་ཁྱེར་བ་ལ་དགེ་བསྙེན་དེའི་བྱིས་བ་དག་བསླངས་ནས་ཁུར་བ་ལ་སོགས་པ་ཕྲུལ་དེ་དུམ་བུ་དུམ་བུར་བྱས་ལ་སྦྱིན་ནོ། །རངས་པར་བྱིན་ན་བྱིས་པའི་ལག་པ་ན་ཁྱེར་ཏེ་གྲོང་དུ་འཕྱན་དུ་དོང་ནས་མུར་འདུག་ཁྱིམ་ཚེས་ན་རེ་སྔོན་ན་དགེ་བསྙེན་དེས་དགེ་སློང་ལ་ཟན་སྤྱིན་པ་ཡིན་ན་ད་ནི་འདི་ལྟར་དགེ་སློང་ལ་སློང་ཞིང་ཟའོ་ཞེས་འཕྱ་བའི་
ཕྱིར་ཁུར་བ་རངས་པར་མི་སྦྱིན། དགོས་ན་ཕྱིས་དགྲོལ། དགེ་བསྙེན་དབུལ་པོར་གྱུར་པ་དེ་སླར་ཕྱུག་པར་གྱུར་ཏེ་དགེ་འདུན་ལ་སྤྱན་འདྲེན་ཅིང་གསོལ་ན་མི་བསླང་བར་འོག་ཁྲིམས་བཅས་པ་སླར་དགྲོལ་ཞིང་བཤིག་སྟེ་འདོང་ངོ༌། །སློབ་པའི་ཁྲིམས་བཅས་པར་སླར་དགྲོལ་ཞིང་བཤིག་སྟེ་འདོད་ངོ༌། །སློབ་པའི་ཁྲིམས་བཅས་པའི་རིགས་སུ་སྔར་མ་ཐོས་པར་བཟའ་བ་དང་བཅའ་བ་བླངས་ན་མ་གཏོགས་པ་ནི་ག་གོན་དང་རྩ་བ་དང་སྔོན་པོ་མ་ཕོངས་པ་ལ་ཟོས་ནའོ། །དགེ་བསྙེན་དབུལ་པོའི་ཁྱིམ་དུ་མི་འདོད་པར་འོག་ཁྲིམས་བཅས་པ་ལས་དེར་དོང་ཞིང་ནོར་རྫས་བླངས་སམ་ཟོས་ན་སོ་སོར་མཐོལ་བའོ། །ཉེས་མེད་པ་ནི་འོག་ཁྲིམས་མ་བཅས་པའི་མདུན་དུ་སྤྱན་དྲངས་པ་ལ་འོག་ཁྲིམས་བཅས་པའི་འོག་ཏུ་ཟན་ཟར་འདོད་པ་དང་ག་གོན་དང་རྩ་བ་དང་ལོ་མ་དག་ཕོངས་ཤིང་གནོད་པར་མི་འགྱུར་བའི་ཟས་ཟོས་པ་ཉེས་མེད་དོ། །རིགས་སུ་བསླབ་པ་ལས་འགལ་བར་འཇུག་པ་སྟེ་སོ་སོར་མཐོལ་བ་གསུམ་མོ། །དགེ་བསྙེན་དབུལ་པོར་གྱུར་པ་ལ་དེའི་ཁྱིམ་དུ་མི་འདོད་པར་ཁྲིམས་བཅས་པ་ལས་སོང་སྟེ་ཟན་ཟོས་ན་སོ་སོར་མཐོལ་བ་སྟེ་རྫོགས་སོ།། །།དབྱེ་བའི་སོ་སོར་མཐོལ་པ་ལ་འཆད་དེ། ནགས་ཉུལ་བའི་དགེ་སློང་སྐོས་ཤིག །དགེ་སློང་ཕལ་མོ་ཆེ་དགོན་པ་ནི་གནས་ན་རྐུན་པོ་དང་མི་རྒོད་ལ་སོགས་པ་ཡོད་དམ་མེད་བརྟག་པའི་ཕྱིར་ཉུལ་ཞིང་བྱ་ར་བྱེད་པ་དགེ་སློང་ལ་བསྒོ་ཤིག །དཔག་ཚད་ཕྱེད་ཀྱི་ཁོ་ར་ཁོར་ཡུག་ཏུ་དེས་རྟོགས་ཤིག །ཉུལ་ཞིང་བྱ་ར་བྱེད་པར་བསྐོས་པའི་དགེ་སློང་དེས་གང་གིས་དཔག་ཚད་ཕྱེད་ཁོ་ར་ཁོར་ཡུག་ཏུ་ཉུལ་ཞིང་རྟོགས་ཤིག །འཇིགས་པ་དང་བཅས་ན་དུ་བ་གྱིས་ཤིག །ཉུལ་ནས་མི་རྒོད་དམ། རྐུན་པོ་ཡོད་ན་གྲོགས་པོ་དག་ལ་གོ་བར་བྱ་བའི་ཕྱིར་དུ་བརྡ་བྱ་མི་མང་དུ་ཡོད་པ་ལྟར་བྱ་ཞིང་བསྡིགས་བར་བྱ་བའི་ཕྱིར་ཤིང་གི་ཁ་རས་ཀྱི་བ་དན་བཏགས་ལ་བསྒྲེང་སྟེ་མཐོང་བར་བྱ། བ་དན་ཀྱང་སྒྲེངས་ཤིག ། གྲོགས་མི་འོང་བ། ལམ་མི་ཤེས་པའི་ཕྱིར་རྩྭའི་ལོ་མ་ལམ་དུ་བོར་བ་ལ་མཚོན་གྱིས་བརྔ་བྱ། མི་མང་དུ་ཉལ་ཉལ་བ་ལྟར་རྩྭ་མང་དུ་བཏིང་བ་ལའང་བྱ། ལོ་མི་ཕུང་པོ་དག་ལམ་དུ་ཁྲོམ་ཤིག །མདོ་འདིའི་ཏི་ཀ་ནི་གོང་མ་ལ་འདུག་པ་ཡིན་ནོ། །གོང་མའི་ཏི་ཀ་ནི་གོང་མའི་སྟེང་དུ་འདུག་པའི་མཇུག་ལས་
འཆད་པ་ཡིན་ནོ། །དེར་དགོས་པ་ཡོད་ན་སྔ་དྲོའི་ཟས་སྦྱིན། ནགས་ཉུལ་བའི་དགེ་སློང་དུ་བསྔོས་པའི་རྣམས་ལས་ཆེ་ཞིང་ཉོན་མོངས་པའི་ཕྱིར་གཡར་སུས་བྱིན་ལ་དགྱེ། གྲོགས་ཀྱང་ངོ༌། །ནགས་ཉུལ་བའི་དགེ་སློང་འཇིགས་ན་གྲོགས་ཀྱང་སྦྱིན་ཏེ་དེའང་གཡར་སུས་སྦྱིན། འྦྷྲིད། མི་རྒོད་དང་རྐུན་པོ་ཡོད་དེ་འཇིགས་པར་ཤེས་བཞིན་པ་ལས་མཐོལ་བར་འགྱུར་ཏེ་ཡན་ལག་གཅིག །ནགས་སུ་མ་ཉུལ་ནའོ། །ཉུལ་བར་བསྐོས་པའི་དགེ་སློང་གིས་འཇིགས་པར་ཤེས་བཞིན་དུ་མ་ཉུལ་ན་མཐོལ་བར་འགྱུར་ཏེ་ཡན་ལག་གཅིག །ནགས་སུ་ར་བའི་ཕྱི་རོལ་དུ་བཟའ་བ་དང་བཅའ་བ་བླངས་ཏེ་ཟོས་ནའོ། །ནགས་ཉུལ་བའི་དགེ་སློང་གིས་གནས་མ་ཉུལ་བའི་དགོན་པའི་མཚམས་གཅད་པའི་ཕྱི་རོལ་ཏུ་ཟན་བླངས་ཤིང་ཟོས་ན་མཐོལ་བར་འགྱུར་ཏེ་ཡན་ལག་འདི་གསུམ་དང་ལྡན་ན་སོ་སོར་མཐོལ་བའོ། །བསྲུངས་ཏེ་བསྲུབས་ན་ཕྱེད་དུ་བྱེད་དོ། །ནགས་ཉུལ་དུ་བསྐོས་པའི་དགེ་སློང་ཁ་ཅིག་ཟན་ཟ་ཞིང་འཁོད་པ་ལ་ཁ་ཅིག་ཉུལ་དུ་བཀྱེ་པར་འཇིགས་པར་ཤེས་བཞིན་དུ་གྲོགས་ཟན་ཟ་བ་ལ་བསྲུང་དུ་བཅུག་ན་མཐོལ་བའི་ཉེས་བྱས་སུ་འགྱུར་རོ། །འཇིགས་པའི་གནས་ལས་གཞན་དུ་ཞུགས་ན་ཡང་ངོ༌། །ནགས་ཉུལ་བའི་དགེ་སློང་དེ་དག་གིས་ཟན་ཁྱེར་ཏེ་མི་འཇིགས་པའི་ཕྱོགས་ཀྱིས་ལྐོག་དབེན་པ་གཞན་དུ་དོང་ནས་ཟོས་ན་ཉེས་བྱས། ནགས་བརྟག་པར་རྟོགས་པ་སྟེ་སོ་སོར་མཐོལ་བ་བཞིའོ། །ནགས་ཉུལ་དུ་བསྐོས་པ་ལས་ནགས་མ་ཉུལ་བར་ལམ་དུ་ཟན་ཟོས་པའི་མཐོལ་བ་རྫོགས་སོ། །སོ་སོར་མཐོལ་བ་རྫོགས་སོ།། །། འདི་མན་ཆད་མང་པོ་བསླབ་པ་ལ་འཆད་དེ། དེ་ལྟར་ཤམ་ཐབས་བགོ་བ་ཇི་ལྟ་བུར་ཟླུམ་པོའི་དབྱིབས་སུ་གྱུར་པའོ། །ཤམ་ཐབས་ཁ་ཐུར་དུ་བལྟ་བ་ཡ་ཡོ་དང་རིང་ཐུང་མ་ཁྱེར་བར་ཟླུམ་པོར་བགོའོ། །རབ་ཏུ་མི་མཐོ། །ཤམ་ཐབས་ཀྱི་མར་བལྟ་བ་པུས་མོ་ལས་མི་སྟོད། རབ་ཏུ་མི་དམའ། ཤམ་ཐབས་ཀྱི་ཁ་རྐང་པའི་ལོང་བུ་ལས་དམའ་བར་མི་བྱ། ཆ་སྣ་ལྟར་མི་དཔྱང༌། ཤམ་ཐབས་ཀྱི་མཐའ་ཆ་ག་ཡ་གཅིག་བལ་གླང་གི་སྣ་ལྟར་མི་དཔྱང༌། མི་སྟོད། ཤམ་ཐབས་ཀྱི་ཁ་ཡར་ལྟ་བ་ལྟེ་བ་ལས་མི་སྟོད། ལྷུག་ལྷུག་པོས་མི་བཟློགས། ཤམ་ཐབས་ཀྱི་ཡར་ཀྱི་ཁ་སྐ་རགས་ཀྱི་གསེབ་ནས་
རིང་དུ་བྱ་སྟེ་སླར་ལོག་ནས་ལྷུག་ལྷུག་པོར་མི་བྱ། བཀྲི་སྟེ་མི་གཞག །ཤམ་ཐབས་ཀྱི་མཐའ་ཡ་གཅིག་ཏུ་བསྙེན་ཅིང་བརྟུལ་ཏེ་མི་བགོ །དེ་བཞིན་དུ་ཆོས་གོས་བགོས་ཏེ་ཇི་ལྟར་འདི་སྔ་མ་གསུམ་དུ་འགྱུར་བ་ལྟར་རོ། །ཤམ་ཐབས་བགོ་བ་ཟླུམ་པོ་དང་མི་མཐོ་བ་དང༌། མི་དམའ་བར་བགོ་བ་བཞིན་དུ་ཆོས་གོས་ཀྱང་ཤམ་ཐབས་དེ་ལྟར་བགོའོ། །རབ་ཏུ་བསྡམས་ཏེ་གྲོང་ནང་དུ་འགྲོའོ། །ལུས་དང་ངག་དང་ཡིད་གསུམ་གྱི་སྒོ་བསྡམས་ཏེ་གྲོང་བར་དུ་འགྲོའོ། །ཤིན་ཏུ་དགབ། གྲོང་བར་འགྲོ་ན་མཐང་ལ་སོགས་པ་མི་སྣང་བར་ཆོས་གོས་ཀྱིས་གཡོགས། སྒྲ་བསྐྱུང༌། གྲོང་བར་དུ་ལུས་དང་ངག་ལ་སོགས་པའི་སྒྲ་བསྐྱུང༌། མིག་དབབ། མིག་ཡུལ་ལ་ཆགས་ཤིང་བྲོས་པའི་ཕྱིར་དབབ། གཉའ་ཤིང་ཙམ་དུ་བལྟའོ། །མིག་དབབ་པའི་ཚད་ནི་གཉའ་ཤིང་གང་ཙམ་དུ་བལྟའོ། །མགོ་གཡོགས་པ་མི་བྱ། གྲོང་བར་དུ་ཀ་ཤས་མགོ་གཡོགས་ཏེ་མི་འགྲོ། །མི་བརྫེ། གྲོང་དུ་གོས་མི་བརྫེ། མི་གཟར་ཆོས་གོས་ཀྱི་ཐ་མ་གཉིས་ཕྲག་པ་གཡས་གཡོན་དུ་གཟར་ཅིང་གྲོང་དུ་མི་འགྲོ། །མི་བརྟལ། ལག་པ་གཉིས་སྣེ་བསྣོལ་དུ་བཏང་སྟེ་ཕྲག་པ་གཉིས་ལས་མི་བཟུང༌། མི་བཟློགས། ལག་པ་གཉིས་ཀྱིས་བདག་ཉིད་ཀྱི་ལྟག་པ་ནས་མི་འཁྱུད། བསྟོད་དེ་མི་གཟུགས། རྐང་པ་གནམ་ནས་བསྟོད་ཅིང་གོམ་པ་མི་འདོར་རྩེ་མོས་བཙུགས་ཤིང་མི་འགྲོ་བ་ལ་བྱ། བྱིན་པ་མི་བསྣོལ། བྱིན་པ་བསྣོལ་ཏེ་མི་འགྲོ། །མི་འཕྱེ། འཕྱེ་ཞིང་མི་འགྲོ། །མི་མཆོང་མཆོང་ཞིང་མི་འགྲོ། །ཙོག་ཙོག་པོར་མི་འདུག་ཙོག་ཙོག་པོར་འདུག་ལ་མཆོང་ཞིང་མི་འགྲོ། །དཀུར་མི་བརྟེན་ལག་པས་དཀུར་མི་བརྟེན། ལུས་རབ་ཏུ་མི་བསྒྱུར། ལག་པ་དང་ལུས་བསྒྱུར་མི་བྱ། དཔུང་པ་རབ་ཏུ་མི་བསྒྱུར། དཔུང་པ་མི་འགྱོག །མགོ་རབ་ཏུ་མི་བསྒྱུར་མགོ་བསྒྱུར་དང་མཇིང་ཀྱོག་མི་བྱ། ཕྲག་པ་མི་སྤྲད་གྲོགས་དང་ཕྲག་པ་གཉིས་སྦྲེལ་ཅིང་ཕྲད་དེ་མི་འགྲོ། །ལག་པ་མི་སྦྲེལ་མི་གཞན་དང་ལག་པ་གཉིས་སྦྲེལ་ཅིང་མི་འགྲོ། །དེར་མ་གནང་བར་སྟན་ལ་མི་འདུག །ཁྱིམ་བདག་གིས་བདག་གི་ཕྱིར་མ་ཡིན་པར་སྟན་བཏིང་བ་ལ་འདུག་ཤིག་ཅེས་མ་བསྒོ་བར་མི་འདུག །བདག་གི་ཕྱིར་སྟན་བཏིང་བ་ནི་འདུག་ཤིག་ཅེས་མ་བསྒོ་བར་འདུག་ཀྱང་ཉེས་མེད། མ་བརྟགས་
བར་མ་ཡིན། སྟན་གྱི་འོག་ན་བུས་པ་དང་སེམས་ཅན་ཡོད་དམ་མེད་བརྟགས་ཏེ་འདུག །ལུས་ཐམས་ཅད་ཀྱིས་མི་དབབ། སྟན་དང་ཁྲི་ལ་ལུས་ཀྱི་ལྕིད་ཀྱིས་ཕབ་སྟེ་དྲག་ཏུ་མི་འདུག །རྐང་པ་ལ་རྐང་པས་མི་གཞག །རྐང་བ་གཅིག་གི་སྟེང་དུ་གཅིག་མི་གཞག །བརླ་ལ་བརླས་མ་ཡིན། བརླ་གཅིག་གི་སྟེང་དུ་གཅིག་བཀལ་ཏེ་མི་འདུག །ལོང་བུ་ལ་ལོང་བུས་མ་ཡིན། རྐང་པའི་ལོང་དུ་གཅིག་གི་སྟེང་དུ་གཅིག་བཞག་སྟེ་མི་འདུག་རྐང་པ་མིག་ཤིབས་མི་དབྲལ་ཁྲིའི་སྟེང་དུ་འདུག་སྟེ་ཁྲིའུའི་འོག་ཏུ་རྐང་པ་གཤིབས་ཏེ་མི་འདུག་པ་དང་གདངས་ཏེ་མི་འདུག །སྒྲེན་མོར་མ་ཡིན། ཤམ་ཐབས་བརྫེས་ཏེ་རྐུབ་ཕྱུང་ལ་མི་འདུག །ལག་པས་མཁུར་བ་ལ་མི་སྦྱིན། ཁྱིམ་པའི་གནས་ལ་སོགས་པ་མྱ་ངན་བྱེད་པ་བཞིན་ལག་པས་མཁུར་བ་ལ་མི་བརྟེན། རྟིང་བས་ཕྱིར་མི་ཕུལ། ཁྲིའུ་དང་སྟན་རྐང་པའི་རྟིང་པས་ཕུལ་ཞིང་ཕྱིར་མི་ནུར། ཐམས་ཅད་དུ་བསོད་སྙོམས་ནན་ཏན་དུ་བླང༌། ཟས་གག་ཏུ་ཟའང་རུང་སྟེ་གུས་ཤིང་ནན་ཏན་དུ་བླང་ངོ༌། །ཇི་ལྟར་བླངས་པའི་ཐབས་འོག་ནས་འཆད་པ་རྣམས་ཡིན། མུ་དང་མི་མཉམ། ཟས་ལེན་པའི་ཚེ་ལྟུང་བཟེད་གང་བར་མི་བྱ་ཚོད་མ་དང་མཉམ་པར་ཟན་ཅི་ཙམ་བླངས་པའི་རྐྱེན་ཚོད་མ་ཅི་ཆོག་པ་ཙམ་དུ་བླང༌། རིམ་བཞིན་དུ་ལྟག་འོག་གཞན་དུ་འདྲིམ་བ་ལང་ལ་རིམས་ཞེས་མི་བྱ། བཟའ་བ་དང་བཅའ་བ་མ་འོངས་པར་ལྷུང་བཟེད་མི་བཟེད། ཁ་ཟས་འདྲི་མ་ཞིང་སྦྱིན་པ་མ་འོངས་ཀྱི་བར་དུ་མདུན་ན་ལྷུང་བཟེད་བཟེད་ཅིང་མི་བསྡད། འདི་སྟེང་དུ་མི་གཞག །ཟས་ཀྱི་སྟེང་དུ་ལྷུང་བཟེད་མི་གཞག །ནན་ཏན་བྱས་ཏེ་བསོད་སྙོམས་བཟའ། ཟན་ཟ་བའི་ཚེ་ནན་ཏན་བྱ་སྟེ་བསོད་སྙོམས་ལེགས་པར་བཟའ། ལེགས་པར་ཇི་ལྟར་བཟའ་བ་ལོག་ནས་འཆད། ཁམ་རབ་ཏུ་ཆུང་ངུར་མ་ཡིན། ཁམ་རང་ཏུ་ཆུང་བར་བྱས་ཤིང་མི་བཟའ། རབ་ཏུ་ཆེན་པོར་མ་ཡིན། ཁམ་ཆེ་རབ་ཏུ་བྱས་ཤིང་མི་བཟའ་ཁམ་ར་ན་པར་བྱས་ཏེ་བཟའ། ཁམ་ཁའི་སྒོར་མ་འོངས་པར་མི་གདངས། ཟན་གྱི་ཁམ་ཁའི་སྒོར་མ་འོངས་པར་སྔ་ནས་ཁ་མི་གདངས། མང་དུ་འདོད་པའི་ཕྱིར་ཚོད་མས་འབྲས་སམ་འབྲས་ཀྱིས་ཚོད་མ་མི་དགབ། ཁ་ཟས་མང་དུ་འདོད་པའི་ཕྱིར་གཅིག་གིས་བཀབ་སྟེ་མི་སྣང་བར་མི་བྱ།
བལྕག་བལྕག་མི་བྱ། ཟས་ཟ་བ་ལ་སྐྱུར་བ་དང་མངར་བ་སྐད་དུ་རྐན་སྒྲ་མི་གཏོགས། ཐུ་ཐུ་མི་བྱ། ཟས་ལ་མཆིལ་མས་མི་འདེབས། ཧུ་ཧུ་མི་བྱ། ཟས་གྲང་བ་ལ་ཁ་རླངས་ཀྱིས་བསྲོ་བ་སྐད་དུ་ཧུ་ཧུ་མི་བྱ། ཕུ་ཕུ་མི་བྱ། ཁ་ཟས་གྲང་བ་ལ་ཚ་བ་སྐད་དུ་ཕུ་ཕུ་མི་བྱ། ཁམ་ཅན་གྱི་ཟས་ཚིག་མི་སྨྲ། ཁ་ཟས་ཀྱིས་བཀང་ལ་མི་སྨྲ། འབྲུམ་བུ་ནས་མི་བཏུ། ཁ་ཟས་འབྲུམ་བུ་ནས་བཏུ་ཞིང་མི་བཟའ། སྨད་བར་མི་བྱ། ཁ་ཟས་ལ་དན་པ་དང་མི་ཞིམ་པ་དང་ལན་ཚྭ་མི་བྲོ་བ་དང་སྟོན་མོ་དན་ཏོ་ཞེས་མི་སྨད། མཁུར་བ་མི་བཟློགས་ཁམ་ཆེན་པོ་མཁུར་བ་རློ་བོར་བྱས་ཏེ་མི་བལྡད། ཁམ་དུ་མི་བཅད། ཟས་ཁམ་འཕྲོར་བཅད་ཅིང་མི་བཟའ། རྐན་མ་གཏོགས། ཟན་ཟ་བའི་ཚེ་རྐན་སྒྲ་མི་གཏོགས། ལྕེ་མི་དབྱུང༌། ཟན་ཟ་བའི་ཚེ་ལྕེ་མི་དབྱུང༌། མཆོད་རྟེན་འདྲ་བ་བྱས་ཏེ་མི་གཞིག །ཟན་མཆོད་རྟེན་འདྲ་བར་བྱས་ཤིང་མི་གཞིག་མི་བཟའ། ལག་པ་དང་ལྷུང་བཟེད་མི་བལྡག །ལག་པ་དང་ལྷུང་བཟེད་ལ་མི་བལྡག །མི་སྤུག་ལག་པ་ལ་ཟས་ཆགས་པ་མི་སྤྲུག །མི་གཞལ། ཟས་ཀྱི་ལྕིད་ལག་ཚད་དུ་མི་བཅལ། ལྷུང་བཟེད་ལ་འདུ་ཤེས་ཏེའོ། །ཟན་ལེན་པའི་ཚེ་མིག་གུད་དུ་མི་བལྟ། འཕྱ་བར་རྟོག་ཅིང་གནན་པོའི་དགེ་སློང་གི་ལྷུང་བཟེད་ལ་མི་བལྟ། འཁོད་པའི་ཕྱིར་ལྟག་འོག་གི་གྲོགས་ཀྱི་ཟན་ལ་མི་ལྟ། ཟན་ཟས་ཅན་གྱི་ལག་པས་སྣོད་ལ་མི་གཟུང༌། ལག་པ་ལ་ཟན་འབགས་བཞིན་དུ་ཆུ་སྣོད་ལ་མི་གཟུང༌། ཟས་ཅན་གྱི་ཆུས་གཞན་པའི་དགེ་སློང་ལ་མི་གཏོར། །བ་ཟས་དང་འདྲེས་བའི་ཆུས་དགེ་སློང་གྲོགས་ལ་མི་གཏོར། གྲོང་དག་ཏུ་ཁྱིམ་བདག་ལ་མ་ཞུས་པར་མི་གཏོར། ཁྱིམ་བདག་ལ་མ་དྲིས་པར་ལྷུང་བཟེད་ཀྱི་ཆུ་མི་འབོ་སྟེ་ས་མ་རུང་ཞིང་ཁྱིམ་བ་མི་དགའ་བར་འགྱུར་བ་དང༌། ལྷུང་བཟེད་ཀྱི་ཆུ་དབོ། །ཁྱིམ་པས་ཕོ་ཤིག་པར་བསྒོ་བ་ཉེས་མེད་ལྷུང་བཟེད་ཀྱིས་བྲལ་བྲུལ་མི་གཏོར། ལྷུང་བཟེད་ཀྱི་ནང་དུ་ཁ་ཟས་ཀྱི་ཚིགས་མ་བཟར་མི་རུང་པ་བླུགས་ཤིང་མི་དོར། ལྷུང་བཟེད་ལན་གསུམ་དུ་བཀྲུས་ལ་ཞལ་ནས་གསུངས་པའི་ཚིགས་སུ་བཅད་པ་བསྔགས་ཏེ་ལྷུང་བཟེད་ཀྱི་ཆུ་སྦྱིན། ཡོན་འདོད་པའི་ཕྱིར་ལྷུང་བཟེད་བཀྲུས་པའི་ཆུ་སློང་ན་ལན་གསུམ་དུ་དག་པར་བཀྲུས་ལ་ཆུས་བཀང་སྟེ་ཞལ་ནས་གསུངས་པའི་ཚིགས་སུ་བཅད་པས་སྔགས་སུ་བཏབ་སྟེ་སྦྱིན། མ་བཏིང་
པའི་ཕྱོགས་སུ་ལྷུང་བཟེད་མི་བཞག་གཞི་མ་བཏིང་བར་ལྷུང་བཟེད་མི་གཞག །འགྲེངས་ཏེ་མི་བཀྲུ། ལྷུང་བཟེད་འགྲེངས་ཏེ་མི་བཀྲུ། གཟུགས་པོར་ཡང་དེ་གཉི་ག་མི་བྱ། ས་གཟུགས་པོར་ལྷུང་བཟེད་གཞག་པའམ་བཀྲུ་བར་མི་བྱ། གཡང་སར་མ་ཡིན་གད་ཁར་མ་ཡིན་ལམ་གྱི་བཞི་མདོར་མ་ཡིན། མིང་གིས་སྨོས་པ་འདི་རྣམས་སུ་ལྷུང་བཟེད་བཞག་པའམ་བཀྲུ་བར་མི་བྱ། ཆུའི་འབབ་རྒྱུན་འཕྲོག་ཅིང་འཕྲོག་པ་ལ་མི་བཟེད་ཆུ་དྲག་ཏུ་འབབ་པ་ལ་ལྷུང་བཟེད་ཁ་གྱེན་དུ་བསྟན་ཏེ་ཆུ་མི་བཅུ། བཤང་གཅི་ཚུན་ཆད་མིན་པའི་ཕྱིར་རོ། །མདོ་འདི་མན་ཆད་འོག་ནས་འགྲེངས་ཏེ་བཤང་གཅི་མི་བྱ་ཞེས་འབྱུང་བ་ཡན་ཆད་ན་བའི་རྐྱེན་བྱུང་ན་མ་གཏོགས་ཏེ་མི་ན་བར་བྱས་ན་ཉེས་བྱས་སོ། །དེར་མིན་ནའོ། །ན་བའི་རྐྱེན་མ་བྱུང་བས་བསྲུང་དགོས་སོ། །འགྲེངས་པས་འདུག་པ་ལ་ཆོས་མི་བཤད། འདུག་པ་ལ་འགྲེངས་ཏེ་ཆོས་མི་བཤད། འདུག་པས་ཉལ་བ་ལ་མ་ཡིན། ཉལ་བ་ལ་འདུག་པས་ཀྱང་ཆོས་མི་བཤད། སྟན་མཐོན་པོ་ལ་མི་འདུག་པ་ལ་དམའ་བ་ལ་འདུག་པས་མ་ཡིན་སྟན་མཐོན་པོ་ལ་འདུག་པ་ལ་སྟན་དམའ་བ་ལ་འདུག་པས་ཆོས་མི་བཤད། བཟང་པོ་དང་ངན་པ་ལ་ཡང་དེ་བཞིན་ནོ། །སྟན་བཟང་པོ་ལ་འདུག་པ་ལ་སྟན་ངན་པ་ལ་འདུག་པས་ཆོས་མི་བཤད། ཕྱི་ནས་འོངས་པས་སྔར་འགྲོ་བ་ལམ་ཡིན། སྔར་འགྲོ་བ་ལ་ཕྱི་ན་འདུག་པས་ཆོས་མི་བཤད། ལམ་མ་ཡིན་པས་ལམ་པ་ལ་མ་ཡིན། ལམ་བཞིན་དུ་སོང་བ་ལ་ལམ་གྱི་གཡས་གཡོན་ནས་འགྲོ་ཞིང་ཆོས་མི་བཤད། གཡོགས་པ་ལ་སོགས་པ་ལ་བྱས་པ་ལ་མ་ཡིན། མགོ་གཡོགས་པ་དང་དཀྲིས་པ་ལ་སོགས་པའི་མི་ལ་ཆོས་མི་བཤད། རྟ་དང་བལ་གླང་དང༌། བཞོན་པ་དང་ཁྱོགས་དང་ཁྲི་དང་ཤིང་ལྷམ་གྱོན་པ་ལ་མ་ཡིན། མིང་གིས་སྨོས་པ་འདི་རྣམས་ཞོན་ཞིང་གྱོན་པ་ལ་བདག་བཞོན་པ་མེད་པར་ཆོས་མི་བཤད། ལྷམ་དང་ཤིང་ལྷམ་གྱོན་པ་ལའང་མི་བཤད་དོ། །ཞྭ་དང་ཅོད་པན་དང་གཙུག་ཏོར་དང་དཀྲིས་པ་པ་དང་ཕྲེང་པ་ཅན་གྱི་མགོ་ལ་མ་ཡིན། མགོ་ལ་མིང་གིས་སྨོས་པ་འདི་རྣམས་ཀྱི་ས་བཅིངས་པ་ལ་ཆོས་མི་བཤད་དོ། །ལག་ན་གདུགས་དང་དབྱིག་པ་དང་རལ་གྲི་དང་ལག་ཆ་ཅན་ལ་མ་ཡིན། མིང་གིས་སྨོས་པ་འདི་རྣམས་ལག་ན་ཐོགས་
པའི་མི་ལ་ཆོས་མི་བཤད། གོ་ཆ་ཅན་ལ་མ་ཡིན། ཡ་ལད་དང་གོ་ཆ་གྱོན་པ་ལ་ཆོས་མི་བཤད། འགྲེངས་ཏེ་བཤང་གཅི་མི་བྱ། སྔོན་པོའི་ཕྱོགས་སུ་མ་ཡིན། རྩྭ་དང་ལྡམ་ལྡུམ་གྱི་སྟེང་དུ་བཤང་གཅི་མི་བྱ། མི་དོར། རྩྭ་དང་ལྡམ་ལྡུམ་གྱི་སྟེང་དུ་བཤང་གཅི་གོས་ལ་རེག་པའང་མི་དོར། མཆིལ་མ་དང་སྣབས་དང་སྐྱུགས་བ་དང་ཚད་པ་ཡང་ངོ༌། །རྩ་བ་དང་ལྡམ་ལྡུམ་སྔོན་པོའི་ཕྱོགས་སུ་མིང་གིས་སྨོས་པ་འདི་རྣམས་མི་དོར། ཆུར་མ་ཡིན། བཤང་གཅི་དང་མཆིལ་མལ་སོགས་པ་ཆུར་མི་དོར། ཤིང་མི་གང་ཙམ་ལས་ལྷག་པ་ལ་མི་འཛེགས་གློ་བུར་མ་གཏོགས་སོ། །འཇིགས་པའི་རྐྱེན་བྱུང༌། ཤིང་རིང་པོ་ལའང་འཛེགས་པ་མ་གཏོགས་ཏེ་ཤིང་མི་གང་ལས་རིང་པ་ཡན་ཆད་ལ་མི་འཛེགས། བསླབ་པའོ། །བསླབ་པ་མང་པོ་རྫོགས་སོ། །བསླབ་པ་རྫོགས་ཏེ་དགེ་སློང་གི་རྣམ་པར་འབྱེད་པའོ། །དགེ་སློང་ཕའི་སོ་སོར་ཐར་པ་འཆད་པ་འདུལ་བ་རྣམ་པར་འབྱེད་པས་གཞི་བཟུང་སྟེ་འགྲེལ་པའི་མདོ་རྫོགས་སོ།། །།འདི་མན་ཆད་དགེ་སློང་མའི་འདུལ་བ་བཅུ་གཉིས་སྟོང་གི་ནང་ནས་འབྱུང་བའི་མདོ་སྟེ་དགེ་སློང་མའི་ཁྲིམས་ལ་འཆད་དོ། །ལྟུང་བར་སྦྱོར་བའི་ཚིག་ཚུན་ཆད་དགེ་སློང་མའིའོ། །འོག་ནས་ལྟུང་བར་སྦྱོར་བ་ཞེས་འབྱུང་བའི་མདོ་ཡན་ཆད་འདི་མན་ཆད་ནི་དགེ་སློང་མའི་ཁྲིམས་སོ། །བཞི་པའིའོ། །དགེ་སློང་ཕའི་ཕས་ཕམ་པ་བཞི་དང་དགེ་སློང་མའི་ཕས་ཕམ་པར་གཏོགས་ཏེ་ལྟག་ཏུ་བཤད་ཟིན་པ་ཡིན་ནོ། །རེག་པའི་ཕས་ཕམ་པ་ལ་འཆད་དེ། བདག་གིར་བྱས་པའོ། །བདག་དགའ་བར་འདོད་པ་ལས་ཕས་ཕམ་པར་འགྱུར་ཏེ་ཡན་ལག་གཅིག །མིག་ནས་པུས་མོའི་བར་དུའོ། །དགེ་སློང་མའི་མིག་མན་ཆད་པུས་མོ་ཡན་ཆད་ཀྱིས་སྐྱེས་པ་ལ་རེག་ན་ཕས་ཕམ་པར་འགྱུར་ཏེ། ཡན་ལག་གཅིག་རེག་པའོ། །རེག་པ་ལས་ཕམ་པར་འགྱུར་ཏེ་ཡན་ལག་གཅིག །སྐྱེས་པའོ། །སྐྱེས་པ་སྤྱད་བཟོད་པ་ལས་ཕས་ཕམ་པར་འགྱུར་ཏེ་ཡན་ལག་གཅིག །རྒྱོ་འདོད་པས་སོ། །སྐྱེས་པའང་དགེ་སློང་མལ་རྒྱོ་བར་སེམས་པ་ལ་རེག་ན་ཕམ་པར་འགྱུར་ཏེ་ཡན་ལག་གཅིག །ཡན་ལག་གཞན་དུ་ན་སྦོམ་པོའོ། །དགེ་སློང་མའི་མིག་ཡན་ཆད་དང་པུས་མོ་མན་ཆད་ཀྱིས་སྐྱེས་པ་ལ་རེག་པ་ནི་སྦོམ་པོ་སྟེ་ཡན་ལག་གོང་དུ་སྨོས་པ་རྣམས་དང་ལྡན་ན་ཕམ་པར་འགྱུར་
འབྲི་བ་ནི་སེམས་གཞན་གྱིས་སོ། །དགེ་སློང་མ་འདོད་ཆགས་ཀྱི་སེམས་ནི་མེད་ཀྱི་སྐྱེས་པའི་མཐང་འཇམ་མམ་རྩུབ་སད་པའི་ཕྱིར་རེག་པ་ནི་སྦོམ་པོའོ། །དེ་སྟེ་སྐྱེས་པའང་དེའི་ཚེ་དེར་ཤེས་ནའང་འདི་བཞིན་ནོ། །རེག་པ་ནི་དགེ་སློང་མའང་འདོད་ཆགས་ཀྱི་སེམས་ཡོད་ལ་སྐྱེས་པའང་འདོད་ཆགས་ཀྱི་སེམས་ཡོད་དེ་སྐྱེས་པ་འདོད་ཆགས་པར་ཤེས་བཞིན་རེག་ན་ཕམ་པའོ། །འོངས་ཏེ་དེ་ལྟར་མ་ཡིན་ན་ཡང་ངོ༌། །དགེ་སློང་མ་དང་སྐྱེས་པ་གཉིས་ཀ་འདོད་ཆགས་ཀྱི་སེམས་མེད་པར་རེག་པ་ནི་ཉེས་བྱས་སོ། །བུད་མེད་དགེ་སློང་མ་འདོད་ཆགས་ཡོད་པས་རེག་ནའང་ཉེས་བྱས། ལྟུང་བ་མེད་པ་ནི་བདག་གིར་མ་བྱས་ནའོ། །དགེ་སློང་མ་འདོད་ཆགས་མེད་དེ་རེག་པར་མི་འདོད་བཞིན་དུ་སྐྱེས་པས་རེག་ཅིང་བཟུང་བ་ནི་ཉེས་མེད་དོ། །ཉེས་མེད་པ་ནི་བུ་ལ་རེག་པའོ། །དགེ་སློང་མས་བདག་གི་སྔོན་གྱི་བུ་ཁྱེའུ་ཆུང་དུ་ལ་རེག་པ་ནི་ཉེས་མེད་དོ། །བྱིས་པའང་རུང་གཞན་ལ་མི་རེག་གོ །བདག་གི་བུ་མ་ཡིན་ན་གཞན་གྱི་བྱིས་པ་ཆུང་དུ་དང་སྐྱེས་པ་ལ་མི་རེག་པར་བྱ། སྟེན་ཕོད་པའི་སྐྱེས་པ་དང༌། རེག་ནས་ཕམ་པར་འགྱུར་བའི་སྐྱེས་པ་ནི་ཕོ་མཚན་དང་ལྡན་ཞིང་མི་ཚངས་པར་སྤྱོད་ནུས་པ་དང༌། འདོད་པ་དང་ལྡན་པས། སྐྱེས་པ་དེ་འདོད་ཆགས་ཀྱི་སེམས་དང་ཡང་ལྡན་ཏེ་གཞན་ལ་འདོད་ཆགས་ཀྱི་སེམས་སྐྱེས་པ་ནི་མ་ཡིན་གྱི་དགེ་སློང་མ་དེ་ཉིད་ལ་འདོད་ཆགས་ཀྱི་སེམས་སྐྱེས་པ་ཡིན་ན་ཕམ་པར་འགྱུར་རོ། །དེ་བཅུད་པའི་ཕྱིར་ཚིག་ཤེས་ནས་ཀུན་རྫོགས་པར་ནུས་པའོ། །སྐྱེས་པ་ཚིག་ཟུར་གྱིས་ཤེས་ཤིང་བརྔ་ཕྲད་པ་ཡིན་པ་ལས་ཁྲིམས་རལ་བར་འགྱུར་ཏེ་ཁྲིམས་གཞན་གྱི་ཡན་ལག་ཏུ་དགོས་པའི་ཕྱིར་འདི་བཤད་དོ། །རེག་པའི་ཕས་ཕམ་པའོ། །རེག་པའི་ཕས་ཕམ་པ་རྫོགས་སོ།། །།སྐྱེས་པའི་མདུན་དུ་གནད་པའི་ཕམ་པ་ལ་འཆད་དེ། ལུས་ཀྱི་ཕས་ཕམ་པ་སྐྱེས་པའི་མདུན་དུ་ལུས་ཀྱིས་ཕབ་ཅིང་གནད་པ་ལས་ཕམ་པར་འགྱུར་ཏེ་ཡན་ལག་གཅིག །ཞེན་པས་སྐྱེས་པའི་མདུན་དུ་གནས་པ་ཡང་འདོད་ཆགས་ཀྱི་སེམས་ཡོད་པ་ལས་ཕམ་པར་འགྱུར་ཏེ་ཡན་ལག་གཅིག །མངོན་པར་འདུག་པ་ལ་བསྙེན་པར་ཞེན་ཅིང་དེ་ལ་སྐྱེས་པས་སོ། །སྐྱེས་པ་མིག་སྔ་ན་འདུག་ཅིང་འདོད་ཆགས་དང་ཡང་ལྡན་མི་ཚངས་པར་སྤྱོད་དུ་འོང་བའི་
མདུན་དུ་གནད་པ་ལས་ཕམ་སྟེ་ཡན་ལག་གཅིག །དེ་ཕྱིན་ནའོ། །སྐྱེས་པ་མི་ཚངས་པར་སྤྱོད་དུ་འོངས་ཏེ་ལག་གིས་སླེབས་ཚུན་ཆད་དུ་འོངས་པ་ལ་གནང་ན་ཕམ་སྟེ་ཡན་ལག་འདི་རྣམས་དང་ལྡན་ན་ཕམ་པའོ། །ཞེན་པ་དང་ཞེན་མ་ལྷན་ཅིག་ཏུ་ཏྲོག་ཏྲོག་པོར་བྱེད་ན་སྦོམ་པོ། །དགེ་སློང་མ་དང་སྐྱེས་པ་གཉིས་ཀ་འདོད་ཆགས་དང་ལྡན་ཞིང་སྟེགས་སྔགས་ལ་སོགས་པས་ཏྲོག་ཏྲོག་མོར་བྱས་ན་སྦོམ་པོའོ། །ལྟར་ལྟར་མོ། །འདོད་ཆགས་ཀྱི་སེམས་ཀྱིས་རྩེད་མོ་དང་ལུས་སྒྱུར་དང་མི་ཟུར་དང་སྣ་སྙེར་ལ་སོགས་པ་བྱས་ན་སྦོམ་པོའོ། །རྙིལ་རྙིལ་མོ། །སྐྱེས་པ་དང་སེད་སེད་པོར་རྩེ་རྩེ་བ་ལས་འདོད་ཆགས་ཀྱིས་མྱོས་ཏེ་རྙིལ་མོར་འགྱུར་པའང་སྦོམ་པོ། །དེར་བསྟན་པར་ཁས་བླངས་པ། སྐྱེས་པས་མི་ཚངས་པར་སྤྱད་པའི་ཕྱིར་ཤོག་ཤིག་ཅེས་བྱས་ཏེ་དེ་ལྟར་བྱའོ་ཞེས་ཁས་བླངས་ནའང་སྦོམ་པོའོ། །དུས་བོར་བ། དུས་མལ་འདིར་ཤོག་ཤིག་ཅེས་སྐྱེས་པས་སྨྲས་ཏེ་ཁས་བླངས་ན་སྦོམ་པོ། མཚན་མས་སོ། །གོས་འདི་ལྟ་བུ་ཞིག་གྱོན་ན་མི་ཚངས་པར་སྤྱད་ཀྱིས་ཤོག་ཤིག་ཅེས་བྱས་ཏེ་ཁས་བླངས་ནའང་སྦོམ་པོའོ། །འོང་བ་དང་འགྲོ་བར་འཇུག་པ་དེ་བདག་གིས་བྱས་པ། སྐྱེས་པ་ཕས་འོང་ངམ་མི་འོང་བ་དང་གུད་དུ་འགྲོ་བལ་མི་ཚངས་པར་སྤྱད་འདོད་པའི་ཕྱིར་བྱ་ར་བྱེད་ཅིང་ལྟ་ཞིང་རྟོག་ནའང་སྦོམ་པོའོ། །ལུས་ཀྱིས་ཕབ་པའི་ཕས་ཕམ་པའོ། །སྐྱེས་པའི་མདུན་དུ་གནད་པའི་ཕས་ཕམ་པ་རྫོགས་སོ།། །།གྲོགས་ཀྱི་ཕམ་པ་བཅབས་པའི་ཕས་ཕམ་པ་ལ་འཆད་དེ། དགེ་སློང་མའི་ཕས་ཕམ་པ་བཅབས་པའོ། །དགེ་སློང་མའི་ཕས་ཕམ་པ་བརྒྱད་ལ་གང་བྱས་རྐྱང་རུང་སྟེ་ཕམ་པ་བྱུང་བ་ཞིག་ཡོད་ན་ཤེས་བཞིན་དུ་བཅབས་ལ་ཞག་གཅིག་གི་སྐྱ་རེངས་བྱུང་ན་ཕམ་པར་གྱུར་ཏོ། །བཅབས་པའི་ཕས་ཕམ་པའོ། །ཕས་ཕམ་པ་བཅབས་པའི་ཕམ་པ་རྫོགས་སོ།། །།དགེ་སློང་ཆད་པས་བཅད་པ་བ་དྲངས་པའི་ཕམ་པ་ལ་འཆད་དེ། ཆགས་པས་གསོལ་བར་གདོན་མི་ཟ་བ་ལས་སྤངས་བའི་དགེ་སློང་ཕྱག་མི་བྱ་བར་རིག་པར་སྡོམ་པ་བྱས་པ་ཤེས་ནས་དེའི་ཕྱིར་བཟློག་ཅིང་མ་བཏང་ན་དབྱེན་དུ་འཇུག་པ་བཞིན་ནོ། །དགེ་སློང་མའི་གནས་སུ་རྟག་པར་འགྲོ་ཞིང་འདུག་པ་ལས་དགེ་འདུན་ཕོས་མ་འགྲོ་ཞིག་ཅེས་བསྒོ་བ་ལས་མ་བཏུབ་ནས་ཆད་པས་བཅད་དེ། བསྐྲད་པ་ལས་དགེ་འདུན་མོས་
ཀྱང་དགེ་སློང་དེ་ལ་ཆོས་བཞིན་དུ་ཕྱག་མི་བྱ་ཞིང་མི་བསྐོར་བར་བཞག་པ་ལས་དགེ་སློང་དེ་སླར་དགེ་འདུན་ལ་བཟོད་པར་གསོལ་བར་བསམས་ཤིང་ཆས་པ་ལས་དགེ་སློང་མ་གག་ཀྱང་རུང་གཅིག་གིས་དེ་ལྟར་ཤེས་བཞིན་དུ་ཁོང་གིས་བསྐྲད་དུ་ཟད་མོད་འཆགས་ཅི་དགོས་འཚོ་བ་ལ་སོགས་པ་ངས་སྦྱར་རོ་ཞེས་བྱས་ནས་ཁ་དྲངས་ཏེ་བཞག་ན་ཕམ་མོ། །བཟློག་པའི་ཕས་ཕམ་པའོ། །དགེ་འདུན་གྱིས་ཆད་པས་བཅད་པའི་དགེ་སློང་སླར་བཟོད་པར་གསོལ་བ་ལ་དགེ་སློང་མས་ཁ་དྲངས་པའི་ཕམ་པ་རྫོགས་སོ། །དགེ་སློང་མའི་ཕས་ཕམ་པའོ། །དགེ་སློང་མའི་ཕས་ཕམ་པ་བཞི་ཆར་རྫོགས་སོ།། །།འདི་མན་ཆད་དགེ་སློང་མའི་ལྷག་མ་ཉི་ཤུ་ལ་འཆད་དེ། སྨྱན་གྱི་ལྷག་མ་ལ་འཆད་དེ། སྨྱན་དགེ་སློང་མ་ལ་ཁྱིམ་མའི་བསྔགས་ན་སྦོམ་པོའོ། །དགེ་སློང་མས་སྐྱེས་པ་དང་བུད་མེད་གཉིས་སྤྲད་དེ་སྨྱན་བྱས་ན་ལྷག་མར་འགྱུར་བ་ནི་དགེ་སློང་ཕས་སྨྱན་བྱས་ཏེ་ལྷག་མར་འགྱུར་བ་དང་འདྲའོ། །དགེ་སློང་ཕའི་སྨྱན་བཤད་པའི་སྟེང་དུ་འདི་རྣམས་བླ་ཐབས་སུ་བསྣན་ཏེ། དགེ་སློང་མ་གྲོགས་ལ་དགེ་སློང་མལ་བྱུང་ཞིང་སླར་ཁྱིམ་དུ་འཇུག་ཅིང་འདོད་པ་ལྔ་སྤྱད་པའི་རིགས་སོ་ཞེས་གྲོས་བཏབ་ན་སྦོམ་པོའོ། །སྟུ་འཚོང་མ་གཞན་འཇུག་ན་ཡང་ངོ༌། །བུད་མེད་ལ་རྒྱན་ལ་སོགས་པ་འཕྱོ་བའི་ཡོ་བྱད་སྦྱར་ཏེ་སླར་འདོད་པའི་ཕྱིར་སཱུ་འཚོང་མ་བྱེད་དུ་བཅུག་ན་ཡང་སྦོམ་པོའོ། །རིན་གྱི་ཕྱིར་བཏང་ན་ཐ་དད་པར་མི་འགྱུར་རོ། །གཡོག་མོ་འམ་བྲན་མོ་ལ་སྟུ་གླ་བླང་བའི་ཕྱིར་བརྒྱན་ཏེ་རྒྱོར་བཏང་ནའང་སྦོམ་པོའོ། །དགེ་སློང་མའི་སྨྱན་ཏེ་དགེ་འདུན་གྱི་ལྷག་མའོ། །སྨྱན་གྱི་དགེ་འདུན་ལྷག་མ་རྫོགས་སོ།། །།རྩ་བ་མེད་པ་དང་བག་གི་དགེ་འདུན་གྱི་ལྷག་མ་ལ་འཆད་དེ། རྩ་བ་མེད་པ་དང་བག་དགེ་སློང་མས་ཕས་ཕམ་པས་སྐུར་ཏམ་ཕས་ཕམ་པའི་ཆས་སྐུར་ན་ལྷག་མར་འགྱུར་ཏེ་ཡན་ལག་དང་བཤད་པ་ནི་དགེ་སློང་ཕའི་འདྲའོ། །ཕོར་ནི་མོ་དེར་ནི་ཕོའོ།། དགེ་སློང་ཕས་དགེ་སློང་པོ་ལ་སྐུར་ན་རྩ་བ་མེད་པས་དང་བག་གི་ལྷག་མར་གྱུར་པ་བཞིན་དུ་དགེ་སློང་མས་ཀྱང་དགེ་སློང་མོ་གྲོགས་མོ་ལ་སྐུར་ན་བག་དང་རྩ་བ་མེད་པའི་ལྷག་པར་འགྱུར་རོ། །དགེ་སློང་ཕ་ལས་སྐུར་བའི་ཉེས་པའི་དམིགས་གུད་ནས་འཆད་དོ། །བག་དང་རྩ་བ་མེད་པའི་དགེ་
འདུན་གྱི་ལྷག་མ་རྫོགས་སོ།། །།ནོར་རྫས་ལེན་པའི་ལྷག་མ་ལ་འཆད་དེ། ཆུང་ཟད་བདག་གིར་བྱས་པ་ཡང་ངོ༌། །གཞན་ལས་ནོར་རྫས་བླངས་ཏེ་བདག་གིས་བྱས་པ་ལས་ལྷག་མར་འགྱུར་ཏེ། ཡན་ལག་གཅིག་ཞེན་པས་སོ། །འདོད་ཆགས་ཀྱི་སེམས་དང་བཅས་པས་ཟང་ཟིང་བླངས་པ་ལས་ལྷག་མར་འགྱུར་ཏེ་ཡན་ལག་གཅིག་སྐྱེས་པའོ། །འདོད་ཆགས་དང་བཅས་པས་སྐྱེས་པ་ལས་བླངས་ཕ་ལས་ལྷག་མར་འགྱུར་ཏེ་ཡན་ལག་གཅིག །ཡན་ལག་འདི་རྣམས་དང་ལྡན་ན་ལྷག་མར་འགྱུར་རོ། །ཞེན་པ་དང་མ་ཞེན་པ་ཡང་ངོ༌། །དགེ་སློང་མ་ལ་ཡང་འདོད་ཆགས་ཡོད་ལ་སྐྱེས་པ་ཡང་དགེ་སློང་མ་དེ་དང་མི་ཚངས་པར་སྤྱད་པར་འདོད་ཆགས་ཡོད་བཞིན་དུ་ནོར་རྫས་བླངས་ན་ལྷག་མར་འགྱུར་རོ། །དགེ་སློང་མ་དང་སྐྱེས་པ་གཉིས་ཀ་འདོད་ཆགས་མེད་པར་བླངས་པ་ནི་ཉེས་མེད་དོ། །མ་ཞེན་པ་ན་སྦོམ་པོའོ། དགེ་སློང་མ་ལ་ནི་འདོད་ཆགས་ཀྱི་སེམས་མེད་ཀྱི་སྐྱེས་པ་འདོད་ཆགས་ཀྱི་སེམས་ཡོད་པ་ལས་བླངས་ན་སྦོམ་པོའོ། །ཉེས་བྱས་པ་ནི་མ་ཞེན་པའོ། །དགེ་སློང་མ་ལ་འདོད་ཆགས་ཡོད་ན་སྐྱེས་པ་ལ་འདོད་ཆགས་མེད་པ་ལས་བླངས་པ་ནི་ཉེས་བྱས་སོ། །ཆུང་ཟད་འཛིན་པའོ། །འདོད་ཆགས་ཀྱི་སེམས་ཀྱིས་ནོར་རྫས་བླངས་པའི་ལྷག་མ་རྫོགས་སོ།། །།ནོར་རྫས་ལེན་དུ་བཅུག་པའི་ལྷག་མ་ལ་འཆད་དེ། ཞེན་པ་ལ་མ་ཞེན་པས་ཆུང་ཟད་བདག་གིར་བྱས་ན་མ་ཉེས་སོ་ཞེས་དགེ་སློང་མ་ལ་བསྒོ་ནའོ། །དགེ་སློང་མ་གཅིག་གིས་དགེ་སློང་མ་གཅིག་ལ་སྐྱེས་པ་ལས་ནོར་རྫས་ལོང་ཤིག་ཅེས་བསྒོ་ན་ནོར་ལེན་པའི་བུད་མེད་དང་སྐྱེས་པ་གཉིས་ཀ་ལ་འདོད་ཆགས་ཡོད་ན་ལེན་དུ་འཇུག་པའི་དགེ་སློང་མ་ལ་འདོད་ཆགས་མེད་ཀྱང་གཉིས་ཀ་ལྷག་མའོ། །སྐྱེས་པ་ལ་འདོད་ཆགས་ཡོད་ན་ལེན་པ་དང་ལེན་དུ་བཅུག་པ་གཉིས་ལ་འདོད་ཆགས་མེད་ཀྱང་གཉིས་ཀ་སྦོམ་པོར་འགྱུར་རོ། །སྐྱེས་པ་ལ་འདོད་ཆགས་མེད་ན་ནོར་ལེན་པའི་དགེ་སློང་མལ་འདོད་ཆགས་ཡོད་ཀྱང་དགེ་སྲོང་མ་གཉིས་ཀ་ཉེས་བྱས་སོ། །གསུམ་ཆར་ལ་འདོད་ཆགས་ཀྱི་སེམས་མེད་ན་ཉེས་མེད་དོ། །ཆུང་ཟད་འཛིན་པར་འདོམས་པའོ། །ནོར་ལེན་དུ་བཅུག་སྟེ་འདོད་ཆགས་ཡོད་པའི་ལྷག་མ་རྫོགས་སོ།། །།ནུབ་མོ་ཕྱི་རོལ་དུ་བྱུང་བའི་ལྷག་མ་ལ་འཆད་དེ། འོག་མ་བཞི་ནི་དགེ་སློང་མ་མེད་ནའོ། །
འོག་ནས་ནུབ་མོ་སྒོར་འགྲོ་བ་དང་ཉིན་པར་ལམ་དུ་འགྲོ་བ་དང་ཆུ་རྒལ་བ་དང་ཉིན་པར་མཚམས་ཀྱི་ཕྱི་རོལ་དུ་འགྲོ་བ་དང་བཞི་ནི་དགེ་སློང་མ་གྲོགས་མེད་ན་ལྷག་མར་འགྱུར་རོ། །སུམ་ཆ་མ་གཏོགས་སོ། །དགེ་སློང་མ་ཞིག་གྲོགས་སུ་ཁྲིད་དེ་ལྟག་ཏུ་སྨོས་པ་བཞི་ལས་གང་ཡང་རུང༌། །གྲོགས་སུ་ཁྲིད་ན་སུམ་ཆ་མ་ཚང་བའི་ཕྱིར་ཉེས་བྱས་སོ། །དགེ་སློབ་མའོ། །མདོ་ལྷག་མ་ལྟར་སུམ་ཆ་མ་ཚང་སྟེ་ཉེས་བྱས་སུ་འགྱུར་བ་ནི་དགེ་སློབ་མ་ངང་འགྲོགས་ཤིང་ཁྲིད་པ་ལས་འགྱུར་རོ། །སུམ་ཆ་ནི་དགེ་སྦྱོང་མའོ། །དག་སྦྱོང་མ་གྲོགས་སུ་ཁྲིད་པ་ནི་སུམ་གཉིས་མ་ཚང་བའི་ཕྱིར་སྦོམ་པོར་འགྱུར་རོ། །ཉེས་མེད་པ་ནི་མི་འདོད་དེ་བྲལ་བའོ། །དགེ་སློང་མ་གྲོགས་སུ་ཁྲིད་དེ་འགྲོ་བ་ལས་གྲོགས་མོ་དེ་བྲོས་སམ་ཤི་འམ་ཁྱིམ་པར་བབས་སམ་རྐུན་པོས་ཁྱེར་ན་བདག་གཅིག་པུ་ལུས་པ་ནི་ཉེས་མེད་དོ། །བར་ཆད་དུ་འགྲོ་བའི་དབང་གིས་ཀྱང་ངོ༌། །གྲོགས་སུ་ཁྲིད་ཁྲིད་པའི་དགེ་སློང་མ་དེ་ལ་ཞང་བློན་ནམ་ཡུལ་དཔོན་ལྟ་བུས་རྩེ་བའི་རྐྱེན་ཅིག་ཡོད་དེ་ཚངས་པར་སྤྱོད་པའི་བར་ཆད་དང་སྲོག་ལ་དམའ་བ་ཙམ་གྱི་ཚོང་ན་གྲོགས་མོ་སླར་སོང་སྟེ་དགེ་སློང་མ་གཅིག་པུ་ལུས་ཀྱང་ཉེས་མེད་དོ། །སྦྱོར་བ་བཞིན་དུ་ཐ་མའི་དུས་སུ་རྟོག་པ་ཚུན་ཆད་དུའོ། །ནུབ་མོ་ཕྱི་རོལ་དུ་སོང་སྟེ་ལྷག་མར་འགྱུར་བའི་ཚད་ནི་ནམ་སུམ་ཆ་ཟད་ཀྱི་བར་དུ་ནི་ཉེས་བྱས། སྐྱ་རེངས་མ་བྱུང་གི་བར་དུ་སྦོམ་པོ་སྐྱ་རེངས་དང་པོ་བྱུང་ན་ལྷག་མར་འགྱུར་རོ། །ནུབ་པའི་མཐའ་ནི་ཉི་མ་མཐའ། ཉིན་པར་མཚམས་ཀྱི་ཕྱི་རོལ་ན་འདུག་པ་ནི་ཉི་མ་ནུབ་སྟེ་དམར་ཐག་ཆད་ན་ལྷག་མར་འགྱུར་རོ། །ནུབ་མོ་དབྱར་མོ་ཐང་གི་ཕྱི་རོལ་ན་གནས་ནའོ། །ནུབ་མོ་མཚམས་ཀྱི་ཕྱི་རོལ་ན་གནས་ན་ལྷག་མར་འགྱུར་བ་ནི་བདག་གི་གནས་ཁང་ཉིད་ཀྱི་སྒོ་འདས་པ་ཕན་ཆད་ཕྱི་རོལ་དུ་བརྩི་སྟེ། སྒོ་ཕན་ཆད་དུ་སྐྱ་རེངས་བྱུང་ན་ལྷག་མར་འགྱུར་རོ། །ནུབ་མོ་འབྲལ་བའོ། །ནུབ་མོ་མཚམས་ཀྱི་ཕྱི་རོལ་དུ་གནས་པའི་ལྷག་མ་རྫོགས་སོ།། །།ཉིན་མོ་མཚམས་ཀྱི་ཕྱི་རོལ་ན་གནས་པའི་ལྷག་མ་ལ་འཆད་དེ། ཉིན་མོ་ཉིན་པར་མཚམས་ཀྱི་ཕྱི་རོལ་ན་འདུག་པ་ལས་ལྷག་མར་འགྱུར་རོ། །མུ་གེའི་ཚེ་གཅིག་པུ་གཉེན་གྱི་ཁྱིམ་དུ་ཟས་ཀྱི་ཕྱིར་སོང་ལ་གཉེན་དང་ལྷན་ཅིག་ཏུ་འབྲེལ་པར་ཉེ་བར་སོང་སྟེ་གནང་བ་ཐོབ་
ནའོ། །མུ་གེ་བྱུང་བའི་ཚེ་གཉེན་གྱི་ཁྱིམ་དུ་ཟན་གྱི་ཕྱིར་འགྲོ་བར་དགེ་འདུན་གྱིས་གནང་ལ་གྲོགས་མེད་པར་སོང་བ་ནི་ཉེས་མེད་དོ། །དགེ་འདུན་གྱིས་གནང་བའང་མེད་པར་གྲོགས་མེད་པར་སོང་ན་ལྷག་མར་འགྱུར་རོ། །དེ་སྦྱིན་མུ་གེའི་ཚེ་དགེ་སློང་མ་གཉེན་གྱི་དེར་ཟན་ཟར་འགྲོ་བར་གསོལ་ན་གྲོགས་མེད་ཀྱང་དགེ་འདུན་གྱིས་གནང་བ་སྦྱིན་ནོ། །ཉིན་མོའི་འབྲལ་བའོ། །ཉིན་མོའི་མཚམས་ཀྱི་ཕྱི་རོལ་དུ་གྲོགས་མེད་པར་གནས་པའི་ལྟུང་བ་རྫོགས་སོ།། །།ལམ་དུ་འགྲོ་བའི་ལྷག་མ་ལ་འཆད་དེ། ལམ་དུ་འགྲོ་བའོ། །དགེ་སློང་མ་གྲོགས་མེད་པར་ལམ་དུ་ཞུགས་ནས་རྒྱང་གྲགས་རེ་རེ་ཞིང་ལྷག་མ་རེ་རེར་འགྱུར། རྒྱང་གྲགས་ཕྱེད་ཅིང་སྦོམ་པོ་རེ་རེར་འགྱུར་རོ། །ལམ་དུ་འཇུག་པའོ། །གྲོགས་མེད་བར་ལམ་དུ་འགྲོ་བའི་ལྷག་མ་རྫོགས་སོ།། །།གྲོགས་མེད་པར་ཆུ་རྒལ་བའི་ལྷག་མ་ལ་འཆད་དེ། ཆུ་ཕ་རོལ་དུ་རྒལ་བའོ། །ཆུ་བརྒལ་ཏེ་ཕ་རོལ་ཏུ་ཕྱིན་ན་ལྷག་མར་འགྱུར། རྐྱལ་ཏེ་ཕ་རོལ་ཏུ་ཕྱིན་པའོ། །ཆུ་བརྒལ་ཏེ་ཕ་རོལ་ཏུ་ཕྱིན་པ་ནི་རྐྱལ་ཏེ་ཕ་རོལ་ཏུ་ཕྱིན་ན་ལྷག་མར་འགྱུར་རོ། །ཚུན་ཆད་ནི་སྦོམ་པོའོ། །ཕ་རོལ་མ་ཕྱིན་པར་སླར་ལོག་པ་ནི་སྦོམ་པོའོ། །ཉེས་བྱས་པ་ནི་ཡུར་བའི་ཕ་རོལ་ཏུ་ཕྱིན་པའོ། །ཆུ་རྐྱལ་དུ་མི་ཆོག་པ་དང་ཡུར་བ་ཙམ་ཡན་ཆད་རྒལ་བ་ནི་ཉེས་བྱས་སོ། །ཆུ་རྒལ་བའོ། །གྲོགས་མེད་པར་ཆུ་རྒལ་བའི་ལྷག་མ་རྫོགས་སོ།། །།རབ་ཏུ་འབྱུང་བའོ། །ཐུག་ཐུབ་ཏུ་བུད་མེད་རབ་ཏུ་ཕྱུང་ན་ལྷག་མར་འགྱུར་རོ། །མང་པོས་བསྐོས་བདག་པོས་བཏང་རྒྱལ་པོས་གནང་སྟེ་གསད་པའི་ཕྱིར་བ་ལས་ནའོ། །བུད་མེད་མི་ཤ་ཟ་བ་མ་རུངས་མ་ཡུལ་མིས་ཀྱང་གྲགས་པར་འགྱུར་ནས་རྒྱལ་པོ་ལ་ཕུལ་ཁྱིམ་ཐབ་ཀྱིས་ཀྱང་བཏང་རྒྱལ་པོས་ཀྱང་གསད་པར་ཆད་པ་ལས་དེ་ལྟ་བུའི་བུད་མེད་ཐུག་ཐུབ་ཏུ་རབ་ཏུ་བྱུང་ན་ལྷག་མར་འགྱུར། །མཁན་མོར་ནའོ། །བུད་མེད་ཐུག་ཐུབ་ཏུ་རབ་ཏུ་བྱུང་བདེ་མཁན་མོ་གང་ཡིན་པ་དེ་ལྷག་མར་འགྱུར་རོ། །དེར་ཤེས་ནའོ། །བུད་མེད་མ་རུངས་མ་རྒྱལ་པོ་ལ་གསོལ་ཏེ། གསད་པར་ཆད་པར་ཤེས་བཞིན་པ་ལས་རབ་ཏུ་ཕྱུང་ན་ལྷག་མར་འགྱུར་རོ། །རབ་ཏུ་བྱུང་བའོ། །ཐུག་ཐུབ་ཏུ་རབ་ཏུ་འབྱིན་པའི་ལྷག་མ་རྫོགས་སོ།། །།ཤི་བའི་ནོར་བླངས་པའོ། །ཁྱིམ་
བས་དགེ་སློང་མ་ལ་ནོར་སྦྱིན་པར་ཁས་བླངས་པ་ལས་ཁྱིམ་པ་དེ་ཤི་བ་དང་དེའི་སྒོ་བགགས་ནས་རོ་ཕྱིར་མ་བཏང་ཞིང་སྔོན་ནོར་སྦྱིན་པ་བདས་ན་ལྷག་མ། ལྟུང་བ་མེད་པ་ནི་དགེ་འདུན་གྱི་ནའོ། །ཁྱིམ་པས་དགེ་འདུན་ལ་ནོར་བྱིན་པ་ཁས་བླངས་པ་ལས་ཁྱིམ་པ་ཤི་སྟེ། སྔོན་ནོར་སྦྱིན་པ་དེ་བདས་ཏེ་སྔོན་ནོར་བྱིན་པ་དེ་དགེ་སློང་མ་ལ་བླངས་པ་ནི་ཉེས་མེད་དོ། །དེ་སྟེ་བྱ་བ་ཉུང་ནའོ། །མདོ་ལྟག་མ་ལྟར་ཉེས་པའང་སྒོ་བཅད་ཅིང་མཐུས་བུ་ལོན་དུ་མི་བདའ་བའི་སྔོན་དགེ་འདུན་ལ་ནོར་ཞིག་དབུལ་བར་ཁས་བླངས་ཏེ་ཤི་བའི་ཡང་བསོད་ནམས་ཏེ་དབུལ་བའི་རིགས་སོ་ཞེས་བྱ་བ་ནི་ཉེས་མེད་དོ། །བླངས་པའོ། །ཁྱིམ་བདག་ཤི་བ་ལས་ནོར་བླངས་པའི་ལྷག་མ་རྫོགས་སོ།། །།མཚམས་ཀྱི་ཕྱི་རོལ་ལ་ཆགས་པའོ། །དགེ་སློང་མའི་དགེ་འདུན་གྱིས་དགེ་སློང་ལ་ཆད་པས་བཅད་ཅིང་བསྐྲད་པ་ལ་དགེ་སློང་མ་ཁ་ཅིག་གིས་མཚམས་ཀྱི་ཕྱི་རོལ་དུ་དོང་སྟེ། ཐུག་ཐུབ་ཏུ་འཆགས་སུ་བཅུག་ཅིང་ཆད་པས་གནང་བར་བྱས་ན་ལྷག་མར་འགྱུར་རོ། །འཆགས་པའོ། །ཆད་པས་བཅད་པའི་དགེ་སློང་མ་ཐུག་ཐུབ་ཏུ་འཆགས་སུ་བཅུག་ཅིང་ཆད་པ་བྱུང་བའི་ལྷག་མ་རྫོགས་སོ།། །།དཀོན་མཆོག་བཤགས་པ་ནི་འདི་དག་དང་དགེ་སྦྱོང་གཞན་འདྲས་དེར་ཆངས་པའི་སྤྱོད་པ་སྤྱད་དོ་ཞེས་པའི་ཚིག་འདི་ལ་ཞུགས་པ་མ་བཏང་ནའོ། །དགེ་སློང་མས་སངས་རྒྱས་ཀྱི་ཆོས་དང་མུར་འདུག་གི་ཆོས་སྤྱོད་པ་མི་འདྲ་བ་མེད་དེ། སངས་རྒྱས་ཀྱི་ཆོས་ནི་བཏང་མུར་འདུག་གི་ཚངས་པར་སྤྱོད་པ་བྱའོ་ཞེས་སྨྲས་ན་ལྷག་མར་འགྱུར་རོ། །དགེ་འདུན་དབྱིན་དུ་འཇུག་པ་བཞིན་ནོ། །མདོ་ལྟག་མ་ལྟར་ལྷག་མར་འགྱུར་བ་ནི་དགེ་འདུན་གྱི་དབྱེན་དུ་ཞུགས་པ་ལ་དགེ་འདུན་གྱིས་ལན་གསུམ་དུ་བསྒོས་ཏེ་མ་བཏང་པ་ལས་ལྷག་མར་འགྱུར་བ་བཞིན་དུ་འདིའང་འདི་སྐད་མ་ཟེར་ཞེས་ལན་གསུམ་དུ་བསྒོ་སྟེ་མ་བཏུབ་ན་ལྷག་མར་འགྱུར་རོ། །འོག་མ་དག་ཀྱང་ངོ༌། །འོག་ནས་ལྷག་མ་འབྱུང་བ་རྣམས་ཀྱང་ལན་གསུམ་དུ་བསྒོ་སྟེ་མ་བཏང་ན་ལྷག་མར་འགྱུར་རོ། །ཕུལ་བའོ། །སངས་རྒྱས་ཀྱི་ཆོས་མི་བྱེད་མུར་འདུག་གི་ཆོས་སྤྱོད་དོ་ཞེས་ཟེར་བའི་ལྷག་མ་རྫོགས་སོ།། །།འདོད་པ་དང་ལྡན་པ་ལ་སོགས་པས་དགེ་སློང་མ་ལ་བསྒོ་བའོ། །མདོ་འོག་མ་སྐད་དུ་འཐབ་མོ་དང་
འཕྱ་བ་ལ་སོགས་པ་བྱེད་པ་ལ་དེ་ལྟར་མ་བྱེད་ཅེས་དགེ་སློང་མ་གཞན་གྱིས་བཅོས་ན་སླར་ཁྱོད་ནི་འདོད་ཆགས་དང་ལྡན་པ་ཞེ་སྡང་དང་ལྡན་པ་གཏི་མུག་དང་ལྡན་པའོ་ཞེས་ཟེར་བ་ལ་དེ་སྐད་མ་ཟེར་ཞེས་ལན་གསུམ་དུ་བསྒོ་སྟེ་མ་བཏང་ན་ལྷག་མའོ། །འཐབ་མོ་དང་འཕྱ་བ་དང་འཁོན་པ་དང་རྩོད་པ་དགེ་སློང་མ་དང་ལྷན་ཅིག་བཟློག་ནའོ། །འཐབ་མོ་བྱེད་པ་དང་འཕྱ་པ་དང་འཁོན་པ་དང་རྩོད་པ་བྱེད་ཅིང་སྨྲ་པ་ལ་དེ་ལྟར་མ་བྱེད་ཅིག་ཅེས་འདོམས་པའི་ཚེ་དགེ་སློང་མ་ལ་ཁྱོད་འདོད་ཆགས་དང་ལྡན་པ་ཞེ་སྡང་དང་ལྡན་པ་གཏི་མུག་དང་ལྡན་ནོ་ཞེས་བྱས་ཤིང་སླར་བཟློག་ན་ལྷག་མར་འགྱུར། འཐབ་མོ་ལ་འཇུག་ནའོ། །འཐབ་མོ་ལ་ཞུགས་ཏེ་གཏོང་དུ་མི་བཏུབ་པའི་ལྷག་མ་རྫོགས་སོ།། །།འགྲིལ་ཅིང་འཁོད་པའོ། །གྲོགས་མོ་དང་བསྟེན་ནས་འགྲིལ་ཅིང་འགྲོགས་ན་ལྷག་མར་འགྱུར་རོ། །དགེ་སློང་མ་ནའོ། །འགྲིལ་ཅིང་འགྲོགས་པ་དེ་དགེ་སློང་མ་ཡང་ཡིན་པ་ལས་ལྷག་མར་འགྱུར། ཏྲོག་ཏྲོག་མོ་དང་ལྟར་ལྟ་ར་མོ་དང་རྙིལ་རྙིལ་མོའི་སྐྱེན་དུ་གྱུར་པའོ། །འགྲོགས་པའི་དགེ་སློང་མ་དེ་རྩེད་མོ་དང་འཕྱར་བ་ལ་སོགས་པ་འདི་རྣམས་ལྟ་བུ་ཞིག་བྱེད་པ་དང་འགྲོགས་ན་ལྷག་མར་འགྱུར་རོ། །བདག་བུད་མེད་འདི་རྣམས་ལྟར་བྱེད་པ་ཞིག་དང་འགྲོགས་ནའང་ལྷག་མར་འགྱུར་རོ། །བུད་མེད་ཀྱི་འདུ་འཛིར་གཏོགས་པའོ། །བུད་མེད་ཏྲོག་ཏྲོག་མོར་བྱེད་པ་དང་འགྲོགས་པའི་ལྷག་མ་རྫོགས་སོ།། །།དེའི་འདུ་འཛིར་འདོམས་པའོ། །དགེ་སློང་མ་གྲོགས་ལ་ཏྲོག་ཏྲོག་མོ་དང་རྩེད་མོ་ལ་སོགས་པ་གྱིས་ཤིག་ཅེས་བསྒོ་ཞིང་བྱེད་དུ་བཅུག་ནའང་ལྷག་མར་འགྱུར་རོ། །འདོམས་པའོ། །རྩེད་མོ་གྱིས་ཤིག་ཅེས་འདོམས་པའི་ལྷག་མ་རྫོགས་སོ།། །།དགེ་འདུན་དབྱེན་པ་ལ་སོགས་པ་བཞི་དགེ་སློང་མ་ཡིར་གཏོགས་པའོ། །དབྱེན་དང་རྗེས་སུ་ཕྱོགས་པ་དང༌། རིགས་སུན་པ་དང་དག་དཀའ་བ་བཞི་ཡང་དགེ་སློང་པའི་བཤད་པ་བཞིན་དུ་དགེ་སློང་མས་བྱས་ནའང་ལྷག་མར་འགྱུར་རོ། །དགེ་འདུན་གྱི་ལྷག་མ་རྫོགས་སོ།། །།དགེ་འདུན་གྱི་ལྷག་མ་ཉི་ཤུ་རྫོགས་སོ།། །།འདི་མན་ཆད་སུམ་ཅུ་བཞིའི་སྤང་བའི་ལྟུང་བ་ལ་འཆད་དེ། བཅུ་པའོ། །འཆད་པ་དང་འདྲལ་བ་ལ་སོགས་པ་བཅུ་དང་ཕུང་པོ་གཅིག་རིལ་གྱིས་དགེ་
སློང་ཕའི་དང་འདྲའོ། །གསེར་དང་དངུལ་དང་དངུལ་གྱིས་པ་དང་ཉོ་ཚོང་དང་ལྷན་པ་མེད་པ་དང༌། འཐག་པ་གཉིས་དང་འཕྲོག་པ་དང་བསྔོས་པ་དང་བསྡུས་པར་ཆུད་པའོ། །གསེར་དང་དངུལ་དང་ཉོ་འཚོང་དང་ལྷུང་བཟེད་ལྷན་པ་མེད་པར་བཟང་པོ་ཚོལ་བ་དང་འཐག་པ་གཉིས་དང་བྱིན་འཕྲོག་དང་དགེ་འདུན་དབང་བ་གང་ཟག་ལ་བསྔོས་སོ་ཞེས་ཟེར་བ་དང་སྨན་ཞག་བདུན་པ་དང་ཞག་བཅུ་དགུ་ནི་དགེ་སློང་ཕའི་དང་འདྲ་སྟེ་དགེ་སློང་ཕས་བསྲུང་བར་བཤད་པ་བཞིན་དུ་དགེ་སློང་མས་ཀྱང་བསྲུང་ངོ༌། །དགེ་སློང་ཕའི་སྤང་བའི་ལྟུང་བ་བཅུ་དགུར་མིང་གིས་སྨོས་པ་འདི་ལ་མ་གཏོགས་པ་རྣམས་ནི་དགེ་སློང་མའི་སྤང་བའི་ལྟུང་བར་མི་འགྱུར་རོ། །དགེ་སློང་གི་འཁྲུ་བ་ལ་སོགས་པའོ། །དགེ་སློང་མས་དགེ་སློང་ཕའི་གོས་རྙིང་པ་བཀྲུས་ན་སྤང་བའི་ལྟུང་བར་འགྱུར་རོ་ཞེས་ཊཱི་ཀ་ལས་བཤད། དགེ་སློང་མས་གོས་རྙིང་པ་དགེ་སློང་ཕ་ལ་བཅོལ་ན་སྤང་བའི་ལྟུང་བར་འགྱུར་རོ་ཞེས་འདུལ་བ་འཛིན་པ་ཁ་ཅིག་དང་མོག་ཤ་ལ་འཆད། དེ་ལས་བླངས་པ་དང༌། དགེ་སློང་མས་གཉེན་མ་ཡིན་པའི་དགེ་སློང་ཕ་ལས་གོས་བླངས་ན་འང་སྤང་བའི་ལྟུང་བར་འགྱུར་རོ། །དགེ་སློང་མ་བྱིན་པའོ། །དགེ་སློང་མས་སྔར་གྲོགས་ལ། གོས་བྱིན་པ་ལས་ཕྱིས་གོས་སླར་ཕྲོགས་པ་ན་སྤོང་བའི་ལྟུང་བར་འགྱུར་རོ། །ལྷའི་དད་པ་མི་གཟུང༌། དགེ་སློང་མས་འཇིག་རྟེན་གྱི་ལྷའི་གཟུགས་བྲིས་སམ་བྱས་ཏེ་དེ་ལ་ཡུལ་མི་ཡོན་འབུལ་དུ་བཅུག་ནས་ཡོན་བླངས་ན་སྤང་བར་འགྱུར་རོ། །ལྷུང་བཟེད་ལྷག་པ་ཉིན་གཅིག་ལས་རིང་དུ་མི་བཅང་བའོ། །ལྷུང་བཟེད་ལྷག་པ་བཅངས་ན་སྔགས་ཀྱིས་མ་ཐེབས་སམ་གུད་དུ་མ་བཏང་བར་ཞག་གཉིས་ཀྱི་སྐྱ་རེངས་བྱུང་ན་སྤང་བའི་ལྟུང་བར་འགྱུར། ལྷུང་བཟེད་ཀྱི་འཆང་བའོ། །ལྷུང་བཟེད་ལྷག་བ་ཞག་གཅིག་ལས་འདས་ཏེ་སྔགས་མ་ཐེབས་པའི་སྤང་བའི་ལྟུང་བ་རྫོགས་སོ།། །།ཟླ་བ་ཕྱེད་ཕྱེད་པའི་ཉིན་མོ་ཐོག་མ་ལ་བསྔོ་བ་མ་བསྔོས་ནའོ། །ཆོས་གོས་ལྔ་དང་ཡོ་བྱད་བཅུ་གསུམ་བདག་གི་ཡིན་པར་བསྔོས་ན་ཟླ་བ་ཕྱེད་ཕྱེད་ཅིང་སྔགས་ཀྱིས་གདབ་དགོས་སོ། །གཞན་སྦྱིན་པར་བསྔོས་པ་དང་གོས་ལྷག་གིས་སྔགས་བཏབ་པ་ནི་མི་དགོས་སོ། །མ་བསྔོས་པའོ། །ཟླ་བ་ཕྱེད་
ཅིང་གོས་སྔགས་ཀྱིས་མ་ཐེབས་པའི་སྤང་བའི་ལྟུང་བ་རྫོགས་སོ།། །།དཔྱིད་ཟླ་ར་བའི་ཐ་མའི་ཉིན་མོ་ཚུན་ཆད་དུ་དྲུབས་པ་ཕྱུང་ནའོ། །དཔྱིད་ཟླ་ར་བ་ཉ་ལ་གདིང་བ་དྲུབས་པ་ལས་འབྱིན་པ་ལས་དེ་ལས་སྔར་གདིང་བ་དྲུབས་པ་ཕྱུང་ན་ཟླ་བ་ལྔའི་ཚེ་རྫས་རྙེད་དོ་ཅོག་སྤང་བའི་ལྟུང་བར་འགྱུར་རོ། །ལྟུང་བ་མེད་པ་ནི་རྐུན་པོས་ཁྱེར་བ་དགེ་སློང་མའི་ཕྱིར་ནའོ། །དཔྱིད་ཟླ་ར་བའི་ཉ་ལས་སྔར་གདིང་བ་དྲུབས་པ་ཕྱུང་ཡང་ཉེས་མེད་པ་ནི་དགེ་སློང་མང་མོ་ཞིག་ནོར་དང་གོས་རྐུན་པོས་ཁྱེར་དྲུབས་པ་ཕྱུང་ནས་ནོར་དགོས་པ་ནི་ཉེས་མེད་དོ། །དྲུབས་པ་ལས་འབྱིན་པའོ། །གདིང་བ་དྲུབས་པ་དུས་ལས་སྔར་ཕྱུང་བའི་སྤང་བའི་ལྟུང་བ་རྫོགས་སོ།། །།མ་བྱུང་པའོ། །གདིང་བ་དྲུབས་པ་ལ་དཔྱིད་ཟླ་ར་བའི་ཉ་ལ་འབྱིན་པའི་རིགས་པ་ལས་ཉ་ལས་འདས་ཏེ་དྲུབས་པ་ཕྱུང་ན་ཟླ་བ་ལྔའི་ཚེ་གོས་ཅི་རྙེད་པ་སྤང་བའི་ལྟུང་བར་འགྱུར་རོ། །དེར་རོ། །ཉ་འདས་ནས་ཞག་གཅིག་གི་སྐྱ་རེངས་བྱུང་ན་སྤང་བར་འགྱུར་རོ། །དྲུབས་པ་དབྱུང་བའོ། །གདིང་བ་དྲུབས་པ་དུས་ལས་འདས་ཏེ་ཕྱུང་བའི་སྤང་བའི་ལྟུང་བ་རྫོགས་སོ།། །།དབྱིག་དང་གསེར་སློང་བའོ། །དགེ་སློང་མས་ནོར་རིན་པོ་ཆེ་དང༌། དབྱིག་དང་གསེར་དངུལ་ལ་སོགས་པ་ཁྱིམ་པ་ལས་བླངས་ན་གཉེན་ཡིན་ཡང་རུང་མ་ཡིན་ཡང་རུང་སྤང་བའི་ལྟུང་བར་འགྱུར་རོ། །རིན་པོ་ཆེ་སློང་བའོ། །རིན་པོ་ཆེ་ཁྱིམ་པ་ལས་སློང་བའི་སྤང་བའི་ལྟུང་བ་རྫོགས་སོ།། །།གཞན་གྱི་ཕྱིར་གོས་རྙེད་པ་ཟས་སུ་བྱས་ཏེ་བཟའ་བའི་ཕྱིར་བསྔོས་པའོ། །གཞན་གྱིས་གོས་ཤིག་བྱིན་ཏེ་འདིས་ཁ་ཕྱིས་སམ་སྣོད་སྤྱད་དམ་གཞན་ཞིག་ཏུ་བསྒྱུར་ཏེ་སྤྱོད་ཅིག་ཅེས་བསྔོས་ཏེ་བྱིན་པ་ལས་གོས་དེ་ཟས་ཤིག་ཏུ་ཡང་བསྒྱུར་ན་ཟས་དེ་རྣམས་སྤང་བའི་ལྟུང་བའོ། །གོས་ཟ་བར་ཆུད་པའོ། །གོས་གཞན་ཞིག་ཏུ་བསྒྱུར་ཅིག་པར་བྱིན་པ་ལས་ཟས་སུ་བསྒྱུར་བའི་སྤང་བའི་ལྟུང་བ་རྫོགས་སོ།། །།གོས་དང་མལ་སྟན་དང་དབྱར་མོ་ཐང་གི་ཕྱིར་བ་གང་ཅིག་ལ་ཡང་ཡང་ངོ༌། །དགེ་འདུན་ལ་གོས་དང་མལ་སྟན་དང༌། གཙུག་ལག་ཁང་གི་ཡོ་བྱད་དུ་འདི་རྣམས་ལས་ཕུལ་བ་ལས་ཟས་སུ་བསྒྱུར་ན་སྤང་བའི་ལྟུང་བ། ལྟག་མའི་ལྟུང་བ་དང་འདི་གཉིས་ཀ་དགེ་འདུན་ལ་ཕུལ་བ་ལས་ཟས་སུ་བསྒྱུར་ཀྱང་རུང་གང་ཟག་ལ་
ཕུལ་བ་ལས་ཟས་སུ་བསྒྱུར་ཀྱང་རུང་སྤང་བའི་ལྟུང་བའོ། །འདི་རྣམས་ཀྱིས་བསྒྱུར་གྱིས་ཤིག་པར་རིན་བྱིན་པ་ལས་ཟས་སུ་བསྒྱུར་ན་གང་ཅི་ཡང་རུང་སྤང་བའོ། །གོས་ལ་སོགས་པ་བཟའ་བར་ཆུད་པའོ། །གོས་ཕུལ་བ་ལ་སོགས་ཟས་སུ་བསྒྱུར་བའི་སྤང་བའི་ལྟུང་བ་རྫོགས་སོ།། །།དགེ་སློང་མ་འགྲོ་བ་མང་པོའི་ཕྱིར་བསྐུལ་བ་ལས་དེ་བདག་ལ་བསྔོས་པའོ། །དགེ་སློང་མ་བཞི་ཡན་ཆད་མང་པོ་ཞིག་གུད་ནས་འོངས་ཏེ་ཟས་དང་ཡོ་བྱད་ཀྱིས་མི་ཆོག་གོ་ཞེས་བླངས་ལ་གུད་ནས་འོངས་པའི་ཟས་སུ་མ་བྱས་པར་བདག་གིར་བྱས་ཏེ་གཞན་ན་སྤང་བའི་ལྟུང་བར་འགྱུར། འགྲོ་བ་མང་པོའི་ཕྱིར་བསྔོས་པའོ། །གུད་ནས་འོངས་པའི་ཕྱིར་བླངས་ཏེ་བདག་གིར་བྱས་པའི་སྤང་བའི་ལྟུང་བ་རྫོགས་སོ།། །།དགེ་འདུན་གྱི་ཕྱིར་ན་ཡང་ངོ༌། །དགེ་འདུན་གྱི་གཞི་ལ་འཁོད་པའི་ཟས་དང་ཡོ་བྱད་མི་ཆོག་གོ་ཞེས་གུད་ནས་བླངས་ཏེ་དགེ་འདུན་གྱིར་མ་སྤྱད་པར་བདག་ཉིད་ཀྱིར་བྱས་ན་སྤང་བའི་ལྟུང་བའོ། །དགེ་འདུན་གྱི་ཕྱིར་བསྔོས་པའོ། །དགེ་འདུན་གྱི་ཕྱིར་བསླངས་པ་ལས་བདག་ཉིད་ཀྱིར་བྱས་པའི་སྤང་བའི་ལྟུང་བ་རྫོགས་སོ།། །།ཚིག་བདག་གིར་བྱ་བའི་ཕྱིར་བཅིང་བའི་དོན་དགྲོལ་བའོ། །དགེ་སློང་མས་སྐྱེས་པ་ལས་སྨན་བསླངས་ཀྱང་རུང་ཉོས་ཀྱང་རུང་སྟེ་འདོད་ཆགས་ལངས་ནས་རིང་དུ་འདུག་པའི་ཕྱིར་སྨན་ཡང་བཅིང་ཡང་བཀྲོལ་བྱེད་ཅིང་འདུག་ན་སྨན་སྤངས་པ་ལ་བདག་ལྟུང་ངོ༌། །འགྲེལ་པའོ། །སྨན་ཉོས་པའི་ཚེ་འདོད་ཆགས་ལངས་ཏེ་འཇིག་ཅིང་བཀྲོལ་བའི་སྤང་བའི་ལྟུང་བ་རྫོགས་སོ།། །།སྲང་བརྒྱ་ལ་སོགས་པ་ཏེ་ཀཱར་ཥཱ་པ་ཎ་ཉི་ཤུ་ལ་སོགས་པའི་རིན་གྱི་གོས་བདག་གིར་བྱ་བའོ། །དགེ་སློང་མའི་གོས་ལྷག་མ་ལྕིད་སྲང་བརྒྱ་མན་ཆད་རིན་ཀཱར་ཥཱ་པ་ཎ་ཉི་ཤུ་རིབ་མན་ཆད་ནི་བཅང་དུ་དབང་སྟེ་ལྕིད་དེ་དང་རིན་དེ་ལས་འདས་པ་ཞིག་དགེ་སློང་མས་བཅངས་ན་སྤང་བའི་ལྟུང་བར་འགྱུར་རོ། །གོས་ལྕི་བ་འཆང་བའོ། །གོས་ལྕི་བ་རིན་པོ་ཆེ་འཆང་བའི་སྤང་བའི་ལྟུང་བ་རྫོགས་སོ།། །།སྲང་ལྔའི་མཐའ་ཡང་ངོ༌། །དར་ལྟ་བུ་ཡང་བ་ཞིག་གི་གོས་འཆང་ན་ལྕིད་ནི་སྲང་ལྔ་རིན་ནི་ཀཱར་ཥཱ་པ་ཎ་ཉི་ཤུ་ཡན་ཆད་ལས་འདས་པ་རིན་སྤང་བར་འགྱུར། གོས་སྤང་བ་འཆང་བའོ། །གོས་རིན་པོ་
ཆེ་ཡང་འཆང་བའི་སྤང་བའི་ལྟུང་བ་རྫོགས་སོ། །སྤང་བ་ཟིན་ཏོ། །སྤང་བ་སུམ་ཅུ་རྩ་བཞིའི་བཤད་པ་ཀུན་རྫོགས་སོ།། །།འདི་མན་ཆང་ལྟུང་པ་བརྒྱ་བརྒྱད་ཅུ་ལ་འཆད་དེ། བདུན་ཅུ་རྩ་གཉིས། ལྟུང་བ་བདུན་ཅུ་རྩ་གཉིས་ནི་དགེ་སློང་ཕའི་འདྲ་སྟེ་བདུན་ཅུ་རྩ་གཉིས་ཀྱི་ནང་དུ་གང་མ་གཏོགས་པ་ནི་འོག་ནས་འཆད་དོ། །མ་བསྐོས་པ་ལ་སོགས་པ་བཅུ། སྐྲོད་པ་ཡང་ཡང་བསོད་པ་གནས་འདུག་པ་མ་ཕྱུང་བ་ཉུང་བ་རས་ཆེན་དུ་ཆུད་པ་མ་གཏོགས་སོ། །མ་བསྐོས་པ་ལ་སོགས་པའི་འབྱུང་བའི་བཅུ་སྡེ་གཅིག་རིལ་གྱིས་དགེ་སློང་མའི་ལྟུང་བ་མ་གཏོགས་སོ། །སྐྲོད་པ་དང་ཡང་ཡང་དང་ཁ་ཟས་བཟང་པོ་དང་བསྙེན་གནས་སུ་འདུག་པ་དང་བསྙེན་གནས་སུ་གབ་པ་དང་གོས་བྱིན་པ་སླར་མ་བརྙས་པར་གྱོན་པ་དང་སྐྱོན་ནས་འབོད་པ་དང་རས་ཆེན་དང་འདི་བརྒྱད་ཀྱང་དགེ་སློང་མའི་ལྟུང་བ་ལ་མ་གཏོགས་སོ། །བརྟགས་པ་ནི་དགེ་སློང་གི་སྟེ་རབ་ཏུ་འབྱུང་བ་ལ་ཟང་ཟིང་སྦྱིན་པའོ། །དགེ་སློང་ཕས་སྤྱན་གཟིགས་དང་ཟས་བྱིན་པ་ནི་བླངས་ཀྱང་ཉེས་མེད་དེ་བརྟགས་པའོ། །ཆུང་མར་སྤྱད་པ་ན་ཡང་ངོ༌། །སྔོན་ཁྱོ་བྱེད་བྱེད་པའི་དགེ་སློང་ཕས་སྤྱན་གཟིགས་དང་ཟས་བྱིན་པ་ཡང་བླངས་ཀྱང་ཉེས་མེད་དོ། །དེས་ཀྱང་བླང་ངོ༌། །ལྟག་མ་ལྟར་ཉེས་མེད་པས་ན་དགེ་སློང་ཕོ་མོས་གང་གིས་བླངས་ཀྱང་ཉེས་མེད་དོ། །ལྷན་ཅིག་ཏུ་ཉལ་བ་བུ་མི་ཆེ་བ་མ་གཏོགས་སོ། །དགེ་སློང་མས་སྔོན་གྱི་བུ་ཁྱེའུ་ཆུང་དུ་ནུ་མ་དང་མ་བྲལ་བ་དང་ལྷན་ཅིག་ཉལ་བ་ཉེས་མེད་དོ། །གནང་བ་ཐོབ་ནའོ། །ལྟག་མ་ལྟར་ཉེས་མེད་པ་ཡང་དགེ་འདུན་མོལ་གསོལ་ཏེ་གནང་བ་ཐེབ་ན་ཉེས་མེད་དོ། །དེ་ལ་སྦྱིན། དགེ་སློང་མ་བུ་ཆུང་སྟེ་ལྷན་ཅིག་ཏུ་ཉལ་བར་གསོལ་ན་དགེ་འདུན་གྱིས་ཀྱང་གནང་བ་སྦྱིན་ནོ། །བུ་ཡང་ཆུང་ལ་གནང་བ་མ་བྱིན་ན་དགེ་འདུན་ཉེས་བྱས་རེ་རེར་འགྱུར་རོ། །རབ་ཏུ་འབྱུང་བ་དང་བསྙེན་པར་རྫོགས་པ་ཡང་ངོ༌། །རབ་ཏུ་འབྱུང་བ་དང་བསྙེན་པར་རྫོགས་པར་བྱས་པ་ལས་མཁན་མོ་ལྟུང་པར་འགྱུར་རོ། །ལོ་བཅུ་གཉིས་མ་རྫོགས་ནའོ། །མཁན་མོ་ལོ་བཅུ་གཉིས་མ་ལོན་ལ་ཆོས་ལྔ་དང་མི་ལྡན་པས་རབ་ཏུ་ཕྱུང་ངམ་བསྙེན་པར་རྫོགས་པར་བྱས་ན་ལྟུང་བར་འགྱུར་རོ། །བདག་བསྙེན་པར་རྫོགས་སོ།། །།ལོ་
བཅུ་གཉིས་སུ་རྩི་བ་ནི་མཁན་མོ་བསྙེན་པར་རྫོགས་ནས་ལོ་བཅུ་གཉིས་མ་ལོན་ན་ལྟུང་བར་འགྱུར་རོ། །ཉུང་བ་འཇོག་པའོ། །བདག་ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།བྱིན་ཅིག་འཁོར་དང་ཚད་མེད་པའི་འཁོར་བཞག་པར་གནང་བའོ། །དགེ་སློང་མའི་དགེ་འདུན་གྱིས་དགེ་སློང་མ་ལ་སློབ་མ་དང་ཉེ་གནས་འཆང་ཞིང་རབ་ཏུ་འབྱིན་པ་དང་བསྙེན་པར་རྫོགས་པར་བྱེད་པ་གནང་བ་སྦྱིན་ནོ། །ནུས་ན་དེ་གཞག་གོ །མདོ་ལྟག་མ་ལྟར་གནང་བ་སྦྱིན་པ་ཡང་དགེ་སློང་མ་དེ་ཆོས་ལྔ་དང་ལྡན་ན་ཉེ་གནས་དང་སློབ་མ་འཆང་བ་གནང་བ་སྦྱིན། ལོ་བཅུ་གཉིས་ཚང་བ་བསྙེན་པར་རྫོགས་པའི་ལོ་ནས་སོ། །ལྟག་མ་ལྟར་ཆོས་ལྔ་དང་ལྡན་ཡང་ལོ་བཅུ་གཉིས་མ་ལོན་ན་གནང་བ་མི་སྦྱིན་གྱི་དགེ་སློང་མ་དེ་ཁྲིམས་རྫོགས་ནས་ལོ་བཅུ་གཉིས་ཀྱང་ལོན་ཆོས་ལྔ་དང་ཡང་ལྡན་ན་སློབ་མ་འཆང་བར་གནང་བ་སྦྱིན་ནོ། །གཞན་གྱིས་མི་གསོལ་ལོ། །སློབ་མ་འཆང་བར་འདོད་པ་དགེ་སློང་མ་དེ་ལོ་བཅུ་གཉིས་ཀྱང་ལོན་ལ་ཆོས་ལྔ་དང་ཡང་ལྡན་ན་སློབ་མ་འཆང་བར་དགེ་སློང་མ་དེ་ཉིད་ཀྱིས་གསོལ་ལོ། །སྔར་གནང་བ་མ་ཐོབ་པའོ། །དགེ་འདུན་ལ་གསོལ་ཏེ་གནང་བ་མ་ཐོབ་པར་སློབ་མ་དང་ཉི་གནས་བཅང་ཤིང་རབ་ཏུ་ཕྱུང་ན་ལོ་བཅུ་གཉིས་ལོན་ཞིང་ཆོས་ལྔ་དང་ལྡན་ཡང་ལྟུང་བར་འགྱུར་རོ། །འཁོར་ཉེ་བར་གཞག་པའོ། །གནང་བ་མ་ཐོབ་པར་ཉེ་བར་འཇོག་པའོ། །དགེ་འདུན་གྱིས་མ་གནང་བར་སློབ་མ་འཆང་བའི་ལྟུང་བ་རྫོགས་སོ།། །།ཚད་མེད་པའི་འཁོར་གཞན་གྱིས་པའོ། །དགེ་སློང་མའི་དགེ་འདུན་གྱིས་མ་གནང་བར་སློབ་མ་དང་ཉེ་གནས་མང་དུ་འཆང་ན་ལྟུང་བའོ། །གོང་མ་ནི་སློབ་མ་གཅིག་གཉིས་ཙམ་བྱའོ། །ཚད་མེད་པའི་ཉེ་བར་འཇོག་པའོ། །སློབ་མ་དང་ཉེ་གནས་འཁོར་མང་དུ་འཆང་བའི་ལྟུང་བ་རྫོགས་སོ།། །།བསྙེན་པར་རྫོགས་པ་ནི་ལོ་བཅུ་གཉིས་ཡན་ཆད་བག་མ་བྱས་ནའོ། །དགེ་སྦྱོང་མ་བག་མ་བྱས་པ་ཞིག་ན་ལོ་བཅུ་གཉིས་ལོན་ནོ། །བསྙེན་པར་རྫོགས་པར་རུང་ངོ༌། །བཅུ་གཉིས་མ་ལོན་པར་བསྙེན་པར་རྫོགས་པར་བྱས་ན་མཁན་མོ་གང་ཡིན་པ་ལྟུང་བར་འགྱུར་རོ། །ལོ་བཅུ་གཉིས་ལས་ཉུང་བ་བསྙེན་པར་
རྫོགས་པའོ། །ལོ་བཅུ་གཉིས་མ་ལོན་པར་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།གཞན་ནི་ལོ་ཉི་ཤུ་ལས་སོ། །བག་མ་བྱས་པ་ཞིག་ན་ལོ་ཉི་ཤུ་མ་ལོན་པ་ཞིག་བསྙེན་པར་རྫོགས་པར་བྱས་ན་མཁན་མོ་གང་ཡིན་པ་ལྟུང་བར་འགྱུར་རོ། །ལོ་ཉི་ཤུ་ལས་ཉུང་བ་བསྙེན་པར་རྫོགས་པའོ། །བུད་མེད་ལོ་ཉི་ཤུ་མ་ལོན་པར་བསྙེན་པར་རྫོགས་པ་བྱས་པའི་ལྟུང་བ་རྫོགས་སོ།། །།མཁན་མོས་བསླབ་པ་དག་མ་བྱིན་ནའོ། །མཁན་མོས་དགེ་སྦྱོང་མའི་ཁྲིམས་ཕོག་ལ་དེ་ནས་དགེ་སློབ་མའི་ཁྲིམས་ཕོག་སྟེ་བསྙེན་པར་རྫོགས་པར་བྱ་བའི་རིགས་ན་དེ་ལྟར་རིམ་པས་ཁྲིམས་མ་ཕོག་པར་བསྙེན་པར་རྫོགས་པར་བྱས་ན་ལྟུང་བར་འགྱུར་རོ། །ཚིག་ལས་རྒལ་བའོ། །དགེ་སློང་མ་དང་དགེ་སློབ་མ་རིམ་པར་མ་སྤར་བར་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།དེས་མ་སྤྱད་པའོ། །དགེ་སློབ་མའི་ཁྲིམས་ཕོག་སྟེ་དགེ་སློབ་མ་ལོ་གཉིས་མ་སྤྱད་པར་བསྙེན་པར་རྫོགས་པར་བྱས་ན་མཁན་མོ་གང་ཡིན་པ་ལྟུང་བར་འགྱུར་རོ། །བསླབ་པ་མ་བསླབ་པར་བསྙེན་པར་རྫོགས་པར་རོ། །དགེ་སློབ་མ་ལོ་གཉིས་མ་ཚང་བར་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།སྤྱད་དེ་མ་བྱས་ནའོ། །དགེ་སློབ་མ་གཉིས་སྤྱད་ལ་བསྙེན་པར་རྫོགས་པར་མ་བྱས་ན་མཁན་པོ་གང་ཡིན་པ་ལྟུང་བར་འགྱུར་རོ། །བསླབ་པ་སྤྱད་ནས་བསྙེན་པར་མ་རྫོགས་པའོ། །དགེ་སློབ་མ་ལོ་གཉིས་སྤྱད་ནས་བསྙེན་པར་རྫོགས་པར་མ་བྱས་པའི་ལྟུང་བ་རྫོགས་སོ།། །།དེ་སྟེང་ལ་གོས་བྱིན་ན་དེ་ནས་ཁྱོད་བསྙེན་པར་རྫོགས་པར་བྱའོ་ཞེས་བསྙེན་པར་རྫོགས་པར་འདོད་པ་ལ་སློང་བའོ། །སློབ་མ་བསྙེན་པར་རྫོགས་པར་བགྱིར་ཅི་གནང་ཞེས་གསོལ་བ་ལ་འཁྱིག་སྟེང་ལ་གོས་བྱིན་ན་བསྙེན་པར་རྫོགས་པར་བྱའོ་ཞེས་སྨྲས་ཏེ་གོས་ཐོབ་ན་ལྟུང་བའོ། །ཆོས་འཚོང་པའོ། །སློབ་མ་ལས་གོས་བླངས་ནས་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།རབ་ཏུ་འབྱུང་བར་མཐུན་པར་བསྟན་ཏེ་ཁྱིམ་གྱི་འབྱོར་པ་བསྡུས་ནས་རབ་ཏུ་ཕྱུང་བའོ། །བུད་མེད་རབ་ཏུ་འབྱུང་བར་འོངས་པ་ལ་ནོར་རྫས་ལ་སོགས་པ་སྦྱིན་གཏོང་གྱིས་ཤིག །སྦྱིན་གཏོང་བྱས་ཏེ་ནོར་ཟད་དང་རབ་ཏུ་དབྱུང་ངོ་ཞེས་བྱས་
ལ་ནོར་རྫས་སྦྱིན་གཏོང་བྱས་ཏེ་ཟད་པ་དང་རབ་ཏུ་མ་བྱུང་ན་མཁན་མོ་གང་ཡིན་པ་ལྟུང་བར་འགྱུར་རོ། །བསླུས་པའོ། །ནོར་སྦྱིན་གཏོང་བྱས་ཏེ་ཟད་པ་དང་རབ་ཏུ་མ་ཕྱུང་པའི་ལྟུང་བ་རྫོགས་སོ།། །།ལོ་དུས་སུ་རབ་ཏུ་འབྱིན་པའོ། །ལོ་གཉིས་ཀྱིས་བར་དུ་མ་བཅད་བར་སློབ་མ་རབ་ཏུ་ཕྱུང་ཡང་རུང་བསྙེན་པར་རྫོགས་པར་བྱས་ཀྱང་རུང་སྟེ་མཁན་མོ་ལ་ལྟུང་བར་འགྱུར་རོ། །རྒྱུད་མང་པོའོ། །ལོ་གཉིས་མ་ལོན་པར་རབ་ཏུ་ཕྱུང་བའི་ལྟུང་བ་རྫོགས་སོ།། །།བདག་པོས་མ་གནང་བའོ། །བུད་མེད་ཁྱིམ་ཐབ་མེད་པ་ཕ་མས་མ་གནང་བ་དང་ཁྱིམ་ཐབ་ཡོད་པ་ཁྱིམ་ཐབ་ཀྱིས་མ་གནང་བར་རབ་ཏུ་ཕྱུང་ན་ལྟུང་བའོ། །མ་གནང་བ་བསྡུས་པའོ། །བུད་མེད་བདག་པོས་མ་གནང་བར་རབ་ཏུ་ཕྱུང་བའི་ལྟུང་བ་རྫོགས་སོ།། །།ལོག་པར་སྤྱོད་དམ། བུད་མེད་མ་རུངས་མ་གཡོན་ཅན་མ་རབ་ཏུ་ཕྱུང་ན་ལྟུང་བའོ། །སྦྲུམ་མ་བུད་མེད་སྦྲུམ་མ་རབ་ཏུ་ཕྱུང་ན་ལྟུང་བའོ།། མྱ་ངན་གྱིས་མནར་བ། བུད་མེད་མྱ་ངན་མང་དུ་འབྱུང་པ་རབ་ཏུ་སེམས་འཁྲུགས་པ་ཕྱུང་ན་ལྟུང་བ། སྨྱོན་ཐབས་བྱེད་མ། བུད་མེད་སྨྱོན་ཐབས་དང་འཐབ་མོ་ཅན་རབ་ཏུ་ཕྱུང་ན་ལྟུང་བ་བསྙེན་པར་རྫོགས་པར་བྱས་ཀྱང་ངོ༌། །མདོ་ལྟག་མ་བཞི་ལྟ་བུའི་བུད་མེད་ལས་བསྙེན་པར་རྫོགས་པར་བྱས་ནའང་ལྟུང་བའོ། །ཉེས་པ་དང་བཅས་པ་ཉེ་བར་བསྡུས་པ་ཆུད་པའོ། །བུད་མེད་ཉེས་པ་ཡོད་པ་དང་སྐྱོན་ཅན་རབ་ཏུ་ཕྱུང་བ་དང་བསྙེན་པར་རྫོགས་པར་བྱས་པའི་ལྟུང་བ་རྫོགས་སོ།། །།རབ་ཏུ་ཕྱུང་བ་དང་བསྙེན་པར་རྫོགས་པར་བྱས་ནས་ཉེ་བར་མི་སྡུད་པ། སློབ་མ་རབ་ཏུ་ཕྱུང་ཡང་རུང་བསྙེན་པར་རྫོགས་པ་བྱས་ཀྱང་སྟེ་མཁན་མོས་འཚོ་བའི་ཡོ་བྱད་ཡོད་ཅིང་འབྱོར་བཞིན་དུ་འཚོ་བ་མ་སྦྱར་ཅིང་མ་བསྡུས་ན་ལྟུང་བའོ། །བར་ཆད་ཡོད་པར་མཐོང་བ་ལ་མ་སྤངས་པ། སློབ་མ་ལ་གནོད་པ་སྲོག་ལ་བབ་པའམ་ཚངས་པར་སྤྱོད་པའི་བར་ཆད་དུ་འགྱུར་བ་ཞིག་ཡོད་པར་ཤེས་ལ་གུད་དུ་མ་སྦས་ཤིང་སྐྱོབ་མ་བྱས་ན་ལྟུང་བའོ། །མ་བསླབས་པ། སློབ་མ་ལ་ཆོས་མ་བསྟན་ཅིང་མ་བསླབས་ན་མཁན་མོ་ལྟུང་བར་འགྱུར། ནད་གཡོག་མ་བྱས་པ། སློབ་མ་ན་བ་ལ་གཡོག་མ་བྱས་ནའང་ལྟུང་བ། གྲོགས་མོ་ན་བ་ལའང་གཡོག་བྱ། ཉེ་གནས་དག་ཀྱང་ངོ༌། །
མདོ་ལྟག་མ་རྣམས་ལྟར་ཉེ་གནས་ལ་མ་བྱས་ནའང་ལྟུང་བའོ། །གཡེལ་བར་ཆུད་པའོ། །སློབ་མ་ལ་མཁན་མོ་གཡེལ་བའི་ལྟུང་བ་རྫོགས་སོ།། །།བདག་གི་གཞུག་གནས་སུ་རྒྱ་སྐྱེགས་སྨྱང་སྨྱང་པོ་ནང་དུ་བཅངས་པའོ། །དགེ་སློང་མས་བདག་བདག་གིས་མོ་མཚན་དུ་རྒྱ་སྐྱེགས་སྨྱང་སྨྱང་པོར་བྱས་ཏེ་བཅུག་ན་ལྟུང་བའོ། །གཞན་གྱིས་བདག་གི་མོ་མཚན་དུ་རྒྱ་སྐྱེགས་སྨྱང་སྨྱང་པོར་བྱས་ཏེ་བཅུག་ན་སྦོམ་པོའོ། །རྒྱུན་ལ་གྱེན་དུ་མི་བཟེད། ཆུ་འབབ་པའི་ཁར་མོ་མཚན་བཟེད་ན་ཉེས་བྱས་སོ། །མངལ་གྱི་སྒོར་མི་བླུགས། སྐྱེས་པའི་ཁུ་བ་ཕྱུང་ཟིན་པ་བདག་གི་མོ་མཚན་དུ་མི་བླུགས། བླུགས་ན་ཉེས་བྱས། སྣམ་བུ་རིང་པོས་ངོས་བཅིང་བར་མི་བྱ། ཁྱིམ་མི་བུད་མེད་ཁྱིམ་ཐབ་དང་ཐལ་བ་དང་སྐྱེས་པའི་མིག་སྔར་སྡུག་པར་བྱ་བའི་ཕྱིར་རྐེད་པ་རས་ཀྱི་སྣམ་བུས་དཀྲིས་པ་ལྟ་བུར་དགེ་སློང་མས་བྱས་ན་ཉེས་བྱས། ནུ་གབ་ཀྱིས་ནུ་མ་ལ་མ་ཡིན། བུད་མེད་ཁྱིམ་མ་དང་སྐྱེས་པ་འདོད་ཆགས་སྐྱེ་བ་དང་སྡུག་པར་བྱ་བ་དང་རྒྱོ་བའི་ཚེ་བདེ་ཞིང་མཁྲང་བར་བྱ་བའི་ཕྱིར་ནུ་མ་འཕྱང་དུ་མི་གཏོང་བར་ནུ་གབ་ཀྱིས་དཀྲིས་ན་ཉེས་བྱས། བདེ་བར་བྱ་བའི་བར་ཆད་ཀྱིས་མ་ཡིན། རྒྱོ་ན་བདེ་བ་དང་མིག་སྔར་སྡུག་པར་བྱ་བའི་ཕྱིར་ནུ་མ་སོ་སོན་མཁྲང་བར་འདུག་ཅིང་ནང་མི་འཕྱར་བར་རས་ཀྱི་བར་དུ་བཅུག་སྟེ་ཁྱིམ་མི་སྒེག་མོ་ལྟར་མི་བྱ་བྱས་ན་ཉེས་བྱས་དཔེ་དེ་བཞིན་ཏེ། མདོ་ལྟག་མ་རྣམས་དང་འདྲ་བར་ཁྱིམ་མི་སྒེག་མོ་ཡོ་བྱད་དྲི་བསུང་གིས་བསྐུ་བ་དང་མིག་རྩིས་བསྐུ་བ་དང་རྒྱན་ལ་སོགས་པར་མི་བྱ་བྱས་ན་ཉེས་བྱས། ཡན་ལག་མ་ཡིན་པ་ལ་སྤྱོད་པའོ། །ཁྱིམ་མིའི་སྤྱོད་པ་ལྟར་བྱེད་པའི་ལྟུང་བ་དང་ཉེས་བྱས་རྫོགས་སོ།། །།སོར་མོ་ཚིགས་གཉིས་འདས་པར་མོ་མཚན་གྱི་ནང་བཀྲུས་ནའོ། །མོ་མཚན་བཀྲུ་པའི་ཚེ་སོར་མོ་ཚིགས་གཉིས་ལས་འདས་པར་ནང་དུ་བཅུག་ཅིང་བཀྲུས་ན་ལྟུང་བའོ། །ཡན་ལག་མེད་པ་ལས་བྱེད་པའོ།། མོ་མཚན་དུ་སོར་མོ་བཅུག་པའི་ལྟུང་བ་རྫོགས་སོ།། །།ལག་མཐིལ་གྱི་ཐལ་མོས་འདི་ལ་འབྱིན་པ་ཡང་ངོ༌། །འདོད་ཆགས་ཀྱི་ཕྱིར་མོ་མཚན་ཐལ་མོས་བརྡེབས་ན་ལྟུང་བའོ། །ཡན་ལག་མེད་པ་ལ་སྤྱོད་པའི་ཆོ་ག་མ་རུང་བར་བྱེད་པའི་ཚུལ། མོ་མཚན་ལ་ཐལ་མོས་བསྣུན་པའི་
ལྟུང་བ་རྫོགས་སོ།། །།སྤུ་འདྲེག་པར་བྱས་སམ་བྱེད་དུ་བཅུག་ནའོ། །མོ་མཚན་གྱི་སྤུ་བདག་གིས་བྲེགས་སམ་འབྲེག་ཏུ་བཅུག་པ་སྟེ་བྲེགས་ན་ལྟུང་བ། མཆན་ཁང་གི་སྤུ་བྲེགས་ན་ཉེས་བྱས། གཞུག་གནས་བརྟགས་ནའོ། །མོ་མཚན་གྱི་སྤུ་བྲེགས་པའི་ལྟུང་བ་རྫོགས་སོ།། །།ཁྱིམ་པ་དང་ལྷན་ཅིག་དབེན་པ་ན་འདུག་པའོ། །ཁྱིམ་པ་སྐྱེས་པ་དང་དབེན་པ་ན་འདོམ་གང་ཚུན་ཆད་དུ་ལྷན་ཅིག་འདུག་ན་ལྟུང་བ། འགྲེང་ནའང་ལྟུང་བའོ། །རྩིག་པ་དང་སབ་མོ་དང་གོས་དང་སྟུག་པོ་དང་མུན་པ་དེར་འགྲུབ་བོ། །དབེན་པ་ནི་རྩིག་པས་བསྐོར་བ་དང་སབ་མོས་བསྐོར་བ་དང༌། ཡོལ་བས་བཅད་པ་དང་ནགས་དང་མུན་པ་དང་འདི་རྣམས་གག་ཀྱང་རུང་སྟེ་དབེན་པ་ཡིན་ཏེ་འདུག་ཅིང་འགྲེང་ན་ལྟུང་བའོ། །དགེ་སློང་དང་ཡང་ངོ༌། །དབེན་པར་དགེ་སློང་དང་འདུག་ན་ལྟུང་བའོ། །བླ་གབ་མེད་པར་སྔ་མ་དང་ཡང་ངོ༌། །ཐང་ཡངས་པ་ན་ལམ་རིང་པོ་ནས་གཞན་གྱིས་བལྟར་སྣང་ཞིང་མཐོང་ཡང་ཁྱིམ་པ་དང་འདུག་གམ་འགྲེང་ན་ལྟུང་བའོ། །བླ་མ་དང་ངོ༌། །ཐང་ཡངས་པར་དགེ་སློང་དང་འདུག་གམ་འགྲེང་ན་ལྟུང་བའོ། །ལྟུང་བ་མེད་པ་ནི་དེ་གཉིས་དང་ལྷན་ཅིག་ནའོ། །དགེ་སློང་གཉིས་ཡོད་ན་བདག་གཅིག་པུ་དང་འགྲེང་ཡང་ཉེས་མེད་དོ། །དགེ་སློང་གཅིག་སྐྱ་བོ་གཅིག་དང་གཉིས་འཁོད་པའང་ཉེས་མེད་དོ། །ཁྱིམ་པ་གཉིས་དང་འདུག་ན་ལྟུང་བའོ། །དགེ་སློང་མ་དེའི་ཕྱི་བཞིན་ཞི་བ་སྤྱོད་པ་ན་ཡང་ངོ༌། །བདག་དང་གྲོགས་དགེ་སློབ་མ་གཅིག་དང་གཉིས་ཡོད་ན་སྐྱེས་པ་དང་དགེ་སློང་གང་དང་འདུག་ཀྱང་ཉེས་མེད་དོ། །ཁྱིམ་པ་ལ་རྣ་བ་ཉེ་བར་དག་བྱིན་ནའོ། །སྐྱེས་པ་ཁྱིམ་པ་ལ་དགེ་སློང་མས་རྣ་བར་གཤུབས་ཏེ་སྨྲས་ན་ལྟུང་བའོ། །དེ་བཞིན་ཉིད་ཀྱིས་འཛིན་ནའོ། །སྐྱེས་པས་གཤུབས་ཏེ་རྣ་པར་སྨྲས་ལ་དགེ་སློང་མས་མཉན་ན་ལྟུང་བའོ། །དགེ་སློང་མས་དགེ་སློང་ལ་གཤུབས་ཏེ་སྨྲས་ནའང་ལྟུང་བའོ། །དེ་ལས་ཀྱང་ངོ༌། །དགེ་སློང་ཕས་གཤུབས་ཏེ་སྨྲས་པ་ལ་དགེ་སློང་མས་མཉན་ནའང་ལྟུང་བའོ། །ཁྱིམ་པ་ལས་རིགས་བ་བླང་བའོ། །ཁྱིམ་པ་ལས་དགེ་སློང་མས་སྔགས་དང་ཡི་གེ་བསླབ་ནའང་ལྟུང་བའོ། །དེ་ལས་དེ་ཀློག་པ་ན་ཡང་ངོ༌། །དགེ་སློང་མ་ལ་ཁྱིམ་པས་
ཡི་གེ་དང་སྔགས་སློབ་ཏུ་བཅུག་ནའང་ལྟུང་བའོ། །ལྟུང་བ་མེད་པ་ནི་བསད་པ་ལ་སོགས་པའོ། །རྨ་བཅིངས་ཤིང་བཅིངས་སྒྱུས་བཀྲོལ་ནའོ། །དགེ་སློང་མའི་རྐང་ལག་ལ་རྨ་ཡོད་དེ་སྨན་པས་བཅིངས་ཤིང་བཅུག་ནས་འདོད་ཆགས་ལངས་ཏེ་རིང་དུ་ཐོགས་པར་བྱ་བའི་ཕྱིར་ན་ཞིང་མི་བདེ་སྟེ་དེ་ལྟར་མི་རུང་ཞེས་ལན་དུ་མར་བཅིང་ཞིང་བཀྲོལ་དུ་བཅུག་ནའང་ལྟུང་བའོ། །དེ་བས་ན་ལྟུང་བ་མེད་པ་ནི་བདེ་བའི་ཕྱིར་དངོས་པོ་ལ་ཡང་ངོ༌། །ཉེས་མེད་པ་ནི་སྨན་པས་སྨ་བཅིང་བ་ལ་དོད་ཆགས་ཀྱི་སེམས་མེད་ཅིང་རྙིང་ནས་རྨ་མི་བདེ་སྟེ་འཆིང་ཞིང་འགྲོལ་དུ་བཅུག་པ་ལ་ནི་ཉེས་མེད་དོ། །མི་རེག་པའི་འདུ་འཛིར་གཏོགས་པའོ། །རེག་པར་དགའ་བའི་ཕྱིར་རྨ་བཅིང་དུ་བཅུག་སྟེ་ལན་དུ་མར་བཅིང་ཞིང་འགྲོལ་བར་བཅུག་པའི་ལྟུང་བའོ། །རྒྱུད་འཆང་ནའོ། །བྱིས་པ་ནད་པ་ཕོ་གསོལ་ཞིང་ཕྱི་བདར་བྱས་ཏེ་འཆང་ན་ལྟུང་བའོ། །འཕེལ་ལ་སྲེད་པའོ། །བྱིས་པ་དང་འགྲོགས་ཤིང་རྩེ་དགའི་ལྟུང་བ་རྫོགས་སོ།། །།ཁྱིམ་གྱི་བདག་པོ་ལ་མ་ཞུས་པར་ནུབ་མོ་འདས་ནའོ། །ཁྱིམ་བདག་འདུག་པར་མ་གསོལ་ཅིང་མ་ཞུས་པར་ཁྱིམ་པའི་ཁྱིམ་དུ་ཞག་ལོན་ན་ལྟུང་བའོ། །ལྟུང་བ་མེད་པ་ནི་བདག་མོ་བུད་མེད་དེ་ལ་མ་དྲིས་ནའོ། །ལྟུང་བར་མི་འགྱུར་བ་ནི་ཁྱིམ་བདག་བུད་མེད་ཡིན་ནམ་ཁྱིམ་ཐབ་པས་ཁྱིམ་ཐབ་བུད་མེད་དབང་ཆེ་བ་ཞིག་ན་མ་དྲིས་པར་འདུག་ཀྱང་ཉེས་མེད་དོ། །ནུབ་མོ་མ་བརྟགས་པར་དབེན་པར་གནས་ནའོ། །དགེ་སློང་མའི་གནས་སུ་ནུབ་མོ་སྐྱེས་པ་ལ་སོགས་པ་ཡོད་དམ་མེད། མ་དྲུལ་ཏམ་མ་བལྟས་པར་འདུག་ན་ལྟུང་བའོ།། ཁང་བུར་དགེ་སློང་མ་གཞན་མེད་པར་ན་ཡང་ངོ༌། །དགེ་སློང་མ་གྲོགས་མོ་མེད་པར་ཁང་བུ་གཅིག་གི་ནང་ན་ཉལ་བའང་ལྟུང་བའོ། །ལྟུང་བ་མེད་པ་ནི་བསད་པ་ལ་སོགས་པའོ། །ཉེས་མེད་པ་ནི་ཁང་བུ་གཅིག་གི་ནང་ན་དགེ་སློང་མ་གྲོགས་གཅིག་དང་འདུག་འདུག་པ་ལས་གྲོགས་དེ་ཤིའམ་བྲོས་སམ་རྐུན་པོས་ཁྱེར་ཏེ་མེད་པར་གྱུར་ནས་འབའ་ཞིག་ལུས་པ་ནི་ཉེས་མེད་དོ། །གནོད་པ་འབྱུང་བའི་སྒོ་སྤང་བའོ། །གནོད་པ་དང་ཉེས་པ་འབྱུང་བའི་ལྟུང་བ་རྫོགས་སོ།། །།དགེ་སློང་མ་དང་ལྷན་ཅིག་ཏུ་ཁྲི་གཅིག་གི་སྟེང་ན་འདབ་ཆགས་སུ་ཉལ་བར་གཏོགས་
པའོ། །དགེ་སློང་མ་དང་ལྷན་ཅིག་རུམ་གཅིག་ཏུ་ཁྲིའམ་མལ་གཅིག་ཏུ་མཐང་ཕྲད་པར་ཉལ་བ་ནི་ལྟུང་བའོ། །ལྟུང་བ་མེད་པ་ནི་འདི་དག་དང་ལྷན་ཅིག་ན་སྟེ་དུ་མའང་བར་ཆད་ཚད་ཐུར་ལ་སོགས་པས་བྱས་ལ་དྲན་པ་ཉེ་བར་བཞག་སྟེ་ཡན་ལག་རེག་པར་མྱོང་བ་མེད་པར་ཁྲི་མི་གཡོ་བའམ་གདིང་བ་ཕལ་ལའོ། །ལྷན་ཅིག་ཏུ་ཉལ་ཡང་ཉེས་པ་མེད་པ་ནི་གོས་ཀྱིས་མི་ཆོག་ཅིང་མལ་མེད་ན་བར་དུ་རྩང་ཐུར་ལ་སོགས་པས་བཅད་དེ་མཐང་མི་ཕྲད་ཅིང་འདོད་ཆགས་མི་ལྡང་ཞིང་དྲན་པ་ཉེ་བར་བཞག་སྟེ་ཁྲི་མི་གཡོ་ཞིང་སྒྲ་མི་དབྱུང་བ་ལ་ཉལ་བ་ནི་ཉེས་མེད་དོ། །འབྱོར་ན་ཡང་ཉེས་བྱས་པའོ། །གོས་ཀྱིས་འབྱོར་ཅིང་མལ་ཡོད་བཞིན་དུ་མལ་གཅིག་ཏུ་ལྷན་ཅིག་ཉལ་བ་ནི་བར་ཆད་ཡོད་ཀྱང་ཉེས་བྱས། ལོངས་པས་གནང་བ་དགག་པའོ། །རུམ་གཅིག་ཏུ་ཉལ་བའི་ལྟུང་བ་རྫོགས་སོ།། །།བདག་གི་ཡན་ལག་ལ་དགེ་སློང་མ་འདྲི་ལ་དུ་བཅུག་ནའོ། །དགེ་སློང་མའི་ལུས་ལ་དགེ་སློང་མ་གྲོགས་ལྡེ་གུ་ལ་སོགས་པས་འདྲིལ་དུ་བཅུག་ན་ལྟུང་བའོ། །དགེ་སློང་མའི་ཡང་ངོ༌། །དགེ་སློང་མའི་ལུས་ལ་དགེ་སློང་མ་སྡེ་གུ་ལ་སོགས་པས་འདྲིལ་ཞིང་མཉེར་བཅུག་ན་ལྟུང་བའོ། །དགེ་སྦྱོང་མ་ཡང་ངོ༌། །དགེ་སྦྱོང་མའི་འདྲིལ་དུ་བཅུག་ཀྱང་ལྟུང་བའོ། །ཁྱིམ་མ་ཡང་ངོ༌། །ཁྱིམ་མས་འདྲིལ་ལ་ལྟུང་བ། མུར་འདུག་མས་ཀྱང་ངོ༌། །མུར་འདུག་མས་འདྲིལ་ནའང་ལྟུང་བ་འདྲིལ་དུ་བཅུག་ནའང་ཡང་ངོ༌། །མདོ་ལྟག་མ་རྣམས་ཀྱི་ནང་ནས་འབྱུང་བ་རྣམས་ཀྱིས་ལུས་ལ་མཉེད་དུ་བཅུག་ཀྱང་ལྟུང་བའོ།། སྤོས་ཀྱི་རྫས་ཀྱིས་བདག་གི་ཡན་ལག་དྲིལ་ན་ཡང་ངོ༌། །སྤོས་དང་དྲི་བསུང་ལ་སོགས་པས་བདག་གི་ལུས་ལ་གཞན་སྐུད་དུ་བཅུག་ཀྱང་རུང་བདག་ཉིད་ཀྱིས་བསྐུས་ཀྱང་རུང་ལྟུང་བ། ཚིགས་མས་ཀྱང་ངོ༌། །ཡུངས་མར་ཏིལ་གྱི་ཚིགས་མས་ལུས་ལ་བསྐུས་ནའང་ལྟུང་བ། ལས་ཀུན་ཆུད་པའོ། །ལུས་ལ་མཉེད་ཅིང་སྐུད་པའི་ལྟུང་བ་རྫོགས་སོ།། །།ལག་པ་སྦྲེལ་ཅིང་ཁྲུས་བྱེད་ན་ཡང་ངོ༌། །དགེ་སློང་མ་གྲོགས་དང་ལག་སྦྲེལ་ཅིང་ཆུའི་ནང་དུ་འཁྲུ་བ་ཡང་ལྟུང་བའོ། །ཆུ་ལ་སྤྱོད་པའོ། །ཆུའི་ནང་དུ་འཁྲུ་བའི་ལྟུང་བ་རྫོགས་སོ།། །།བཤད་པའི་ཕྱིར་
རྩྭ་ཨུ་ཤི་རས་བརྐོས་ན་ཡང་ངོ༌། །སྐྲ་ལ་རྩྭ་ཨུ་ཤི་རས་བཤད་ན་ཡང་ལྟུང་བའོ། །སོ་མངས་དང་རྩྭ་ཁུར་དང་གསུམ་དུ་གསུངས་པ་དང་སྐྲ་བརྙན་ཡང་ངོ༌། །སོ་མངས་དང་ཕག་གཟེ་དང་རྩྭས་བཤད་ནའང་ལྟུང་བའོ། །འདི་གསུམ་ཆར་བསྡུས་ཏེ་གཅིག་ཏུ་བཤད་ཀྱང་ལྟུང༌། སོ་སོར་བཤད་ཀྱང་ལྟུང༌། དགེ་སློང་མ་སྐྲ་བརྙན་ཐོགས་ནའང་ལྟུང་བའོ། །ཁྱིམ་པའི་རྒྱན་ཐོགས་ཀྱང་ངོ༌། །དགེ་སློང་མས་ཁྱིམ་པའི་རྒྱན་གསེར་དངུལ་དང་རིན་པོ་ཆེ་ལས་བྱས་པ་ཐོགས་ན་ལྟུང༌། ཟངས་དང་ལྕགས་ཀྱི་རྒྱན་དུ་བྱས་པ་ཐོགས་ནའང་ཉེས་བྱས། བྱི་བ་དར་དུ་ཆུད་པའོ། །ལུས་ལ་རྒྱན་ཐོགས་ཤིང་བྱི་དོར་བྱེད་པའི་ལྟུང་བ་རྫོགས་སོ།། །།བྲོ་བརྡུངས་ན་ཡང་ངོ༌། །དགེ་སློང་མས་བྲོ་བརྡུངས་ན་ཡང་ལྟུང་བའོ། །གང་ཅིའི་ཡན་ལག་གིས་ཀྱང་ངོ༌། །དགེ་སློང་མ་རྩེད་མོ་བྱེད་ན་ལུས་བསྒྱུར་ཏམ་ཁ་བསྙེར་ཏམ་མིག་བསྒྱུར་བ་ལ་སོགས་པ་ཅི་བྱས་ཀྱང་ལྟུང་བའོ། །གླུ་ལེན་ན་ཡང་ངོ། །དགེ་སློང་མས་གླུ་བླངས་ན་ལྟུང་བའོ། །གང་དུ་དེ་དག་ཏུ་དེའི་བསམ་པས་དབྱངས་ཀྱི་བསྒྱུར་བ་ཡང་ངོ༌། །ཡི་གེ་ཀློག་པའི་ཕྱིར་བསམས་ཏེ་གཏང་རག་དང་གྲེ་བསྒྱུར་དང་གླུའི་དབྱངས་རོ་འདྲ་བ་བྱས་ནའང་ལྟུང་བའོ། །སིལ་སྙན་བླངས་ན་ཡང་ངོ༌། །རྔ་དང་གླིང་བུ་ལ་སོགས་པ་རོལ་མོའི་ཡོ་བྱད་ལས་བླངས་ཤིང་བུས་ན་ལྟུང་བ། རེག་པའི་ཚེ་ནའང་ལྟུང་བ། ཏྲོག་ཏྲོག་པོར་ཆུད་པའོ། །རྩེ་ཞིང་ཏྲོག་ཏྲོག་པོར་བྱེད་པའི་ལྟུང་བ་རྫོགས་སོ།། །།གདུགས་ཀུན་དུ་སྤྱོད་པར་འགྱུར་བར་འཆང་ན་ཡང་ངོ༌། །དགེ་སློང་མས་གདུགས་ཐོགས་ཤིང་སྤྱོད་ན་འང་ལྟུང་བའོ། །ལྷམ་གོང་མེད་ཀྱང་ངོ༌། །དགེ་སློང་མས་ལྷམ་གག་ཀྱང་རུང་གྱོན་ན་ལྟུང་བའོ། །ལྟུང་བ་མེད་པ་ནི་དབྱར་མོ་ཐང་ན་མལ་སྟན་བསྲུང་བའི་ཕྱིར་ན་ཡང་ངོ༌། །ལྷམ་གྱོན་ཀྱང་ཉེས་མེད་པ་ནི་དབྱར་མོ་ཐང་བདག་གི་གནས་ན་རྐང་པ་བཀྲུས་ཏེ་ཉལ་བའི་ཚེ་མལ་སྟན་ལ་རྐང་པའི་རྡུལ་གྱིས་མི་ཕོག་པར་བྱ་བའི་ཕྱིར་ལྷན་གྱོན་ནི་ཉེས་མེད་དོ། །ཁྲིའི་སྟེང་དུ་ཀུན་དུ་སྤྱོད་པ་མྱོང་ན་ཡང་ངོ༌། །དགེ་སློང་མ་ཁྲིའི་ཐོག་ན་འདུག་ལ་ཁྲིའི་ཕ་རོལ་ཚུ་རོལ་ནས་སློབ་མ་ལ་སོགས་པ་གཞན་གྱིས་ཐེག་ཅིང་སྤོད་ན་ལྟུང་བའོ། །སྒེག་སྒེག་མོར་ཆུད་པའོ། །སྒེག་སྒེག་མོ་བྱེད་པའི་ལྟུང་བ་རྫོགས་སོ།། །།
གྲོང་པར་དུ་མ་བསྒོ་བར་འདུག་ན་ཡང་ངོ༌། །གྲོང་བར་ཁྱིམ་པའི་ཁྱིམ་དུ་སྟན་ལ་འདུག་ཅེས་མ་བསྒོ་བར་ཐུག་ཐུབ་ཏུ་སྟན་ལ་འདུག་ན་ལྟུང་བའོ། །ཕོ་བརྗིད་ཀྱིས་ཀྱང་ངོ༌། །ཕོ་བརྗིད་བྱེད་པའི་ལྟུང་བའོ། །ཆོས་བསྙད་པའི་ཕྱིར་གནས་ཤིང་སྤྱོད་པའི་ཁྱིམ་པའི་མལ་སྟན་ཁྱིམ་པ་ལ་མ་བསྙད་པར་བོར་ཏེ་སོང་ནའོ། །ཆོས་བཤད་པའི་ཕྱིར་ཁྱིམ་པས་ཁྲི་སྟན་བཏིང་བ་ལ་འདུག་འདུག་སྟེ་ཁྱིམ་པ་མེད་དེ་བདག་གིས་ཀྱང་མ་བརྟུལ་བར་བོར་ཏེ་སོང་ན་ལྟུང་བའོ། །དེའི་མཚམས་བཏང་ན་མཐའོ། །སྟན་མ་བརྟུལ་ཏེ་བོར་ཏེ་སོང་ནས་འདོམ་བཞི་བཅུ་རྩ་འདས་ན་ལྟུང་བའོ། །བླན་པའོ། །སྟན་མ་བརྟུལ་བའི་ལྟུང་བ་རྫོགས་སོ།། །།སྐུད་པ་འཁལ་ན་ཡང་ངོ༌། །གོས་རྒྱུའི་སྐུད་པ་བལ་འཁལ་ན་ལྟུང་བའོ། །ལྟུང་བ་མེད་པ་ནི་རྒྱ་ཅང་དང་ལྕག་ཕོད་ཀྱི་ཕྱིར་ཕྱོགས་དབེན་པར་རོ། །སྐུད་པ་བཀལ་ཀྱང་ཉེས་པ་མེད་པ་ནི་རྒྱ་ཅད་དང་ལྕག་པོད་དང་སྐུད་པ་ལས་པ་ཕྲན་ཚེགས་དབེན་པར་གཞན་གྱིས་མ་མཐོང་བར་བཀལ་བ་ཉེས་མེད་དོ། །དགེ་སློང་མའི་དགེ་འདུན་མའི་གོས་བདག་གིར་བྱས་ན་ཡང་ངོ༌། །དགེ་འདུན་ལ་དགོས་པའི་ཕྱིར་ཁྱིམ་པ་ལས་གོས་བསླངས་ཏེ་དགེ་སློང་གིར་མ་བྱས་པར་བདག་གིར་བྱས་ན་ལྟུང་བའོ། །ཟས་བཙོངས་པ་བྱས་ན་ཡང་ངོ༌། །ཁ་ཟས་དང་ཁ་ཟས་ཀྱི་རྒྱུ་འཚོང་བསྒྱུར་ན་ཡང་ལྟུང་བའོ། །ཁྱིམ་པ་ཡིར་གཏོགས་པ་ན་ཡང་ངོ༌། །ཁྱིམ་པའི་ལས་མ་གཏོགས་པ་ཅི་ཡང་རུང་བདག་གིས་གྲོགས་བྱས་ན་ལྟུང་བའོ། །ཆང་གི་ལས་མི་བྱ། ཆང་མ་རུང་བར་སོང་བ་ཞིམ་པོར་བྱེད་པ་ལ་སོགས་པ་ཅང་གི་གྲོགས་བྱེད་ན་ཡང་ཉེས་བྱས། ཆང་འཚོང་བར་མི་བྱ། ཆང་བཙོངས་ན་ཉེས་བྱས། རློན་པ་བཙོས་ན་ཡང་ངོ༌། །ཁ་ཟས་མ་ཚོས་པ་སླར་བསླས་ཏེ་བཙོས་པ་ནི་ལྟུང་བ། ལྟུང་བ་མེད་པ་ནི་དགེ་སློང་ཕའི་དགེ་འདུན་དང་སློབ་དཔོན་དང་ཚངས་པ་མཚུངས་པར་སྤྱོད་པའི་ཕྱིར་ན་ཕྱོགས་དབེན་པར་རོ། །ཁ་ཟས་བཙོས་ཀྱང་ཉེས་མེད་པ་ནི་དགེ་འདུན་ཕོ་དང་སློབ་དཔོན་དང་མཁན་པོ་དང་དགེ་སློང་ཚངས་པར་སྤྱོད་པ་གང་ཟག་གི་ཕྱིར་བྱས་པ་ནི་ཉེས་མེད་དོ། །ཁྱིམ་པའི་བཟོར་ཆུད་པའོ། །ཁྱིམ་མའི་ལས་སྤྱད་པའི་ལྟུང་བ་རྫོགས་སོ།། །།ཟོས་ནས་སྟན་ལས་འཕོས་ཏེ་ཟོས་ན་ཡང་ངོ༌། །ཟན་
ཟ་བ་ལས་ལན་མང་དུ་ཡང་ལངས་ཡང་འདུག་བྱེད་ཅིང་འཆག་ཅིང་ཟ་ན་ལྟུང་བའོ། །བཅུད་པའི་ཚུལ་ལོ། །ཟན་སྨོས་ཤིང་ཟ་བའི་ལྟུང་བའོ། །སྒོག་པ་ཡང་ངོ༌། །སྒོག་པ་ཟོས་ན་ལྟུང་བའོ། །འདུས་པར་མི་རིགས་པའོ། །སྒོག་པ་ཟོས་པའི་ལྟུང་བ་རྫོགས་སོ།། །།རྡུལ་གོས་མ་བཅངས་ནའོ།། མོ་མཚན་ལས་ཁྲག་ཟག་པའི་ཕྱིར་དགབ་པའི་རས་བཅངས་ཤིང༌། མ་གཡོགས་ན་ལྟུང་བའོ། །གནས་པར་ཐེ་གུས་ལུས་བཅིང་ངོ༌། །དགབ་པའི་རས་ལ་ཐེ་གུས་བཏགས་ཏེ་མི་ལྟུང་བའི་ཕྱིར་ལུས་ལ་བཅིང་ངོ༌། །དུས་དུས་སུ་དེ་བཀྲུ་ཞིང་བཙོ། །མོ་མཚན་དགབ་པའི་རས་ཁྲག་མི་འོང་པའི་སྐབས་སུ་བཀྲུ་ཞིང་བཙོ། །ཆུའི་རས་ཀྱང་ངོ༌། །ཁྲུས་རས་འཁོར་གསུམ་ཡོག་པ་གཅིག་དང་ལུས་ཐམས་ཅད་ཡོག་པ་གཅིག་དང་གཉིས་བཅང་ངོ༌། །ཁྲུས་རས་ཆུང་དུས་མ་གཡོགས་པར་བཀྲུས་ན་ལྟུང༌། ཆེན་པོས་མ་གཡོགས་པ་ནི་ཉེས་བྱས་སོ། །དེ་བཅང༌། ཁྲུས་རས་ཆེ་ཆུང་གཉིས་བཅང་ན་ཉེས་བྱས། འཁྲུ་བས་གོས་དེ་བརྐུས་ན་ཡང་ངོ༌། །ཁྲུས་མཁན་ལ་གོས་འཁྲུར་བཅུག་ན་རྙིང་པ་ནི་ལྟུང་བ་སར་པ་ནི་ཉེས་བྱས། དབེན་པ་ཞིག་པར་ཆུད་པའོ། །མོ་མཚན་མ་གཡོགས་པའི་ལྟུང་བའོ། །དགེ་སློང་མའི་གོས་ཁྱིམ་པ་བསྐོན་པའི་ཕྱིར་བྱིན་ན་ཡང་ངོ༌། །དགེ་སློང་མའི་ཆོས་གོས་ཁྱིམ་པ་བསྐོན་ཞིང་སྤྱོད་དུ་བཅུག་ན་ལྟུང་བའོ། །ཆོས་ཀྱི་རྒྱལ་མཚན་ལ་བསྟི་སྟང་མེད་པར་བཅུད་པའོ། །ཆོས་གོས་ཁྱིམ་པ་བསྐོན་པའི་ལྟུང་བ་རྫོགས་སོ།། །།དགེ་སློང་དང་ལྷན་ཅིག་ཏུ་སྦྱར་མ་བརྗེ་ན་ཡང་ངོ༌། །དགེ་སློང་མའི་ཆོས་གོས་ཆེན་པོ་དགེ་སློང་དང་བརྗེ་ན་ལྟུང་བ། ཆོས་གོས་བཞི་ལས་བརྗེས་པ་ནི་ཉེས་བྱས། རྒྱལ་མཚན་བརྗེས་པར་ཆུད་པའོ། །ཆོས་གོས་བརྗེ་བའི་ལྟུང་བའོ། །བསྔགས་པའི་སེར་སྣ་བྱེད་ན་ཡང་ངོ༌། །དགེ་སློང་མ་གཞན་ཆོས་མཁས་པ་ལ་སོགས་པའི་ཡོན་ཏན་མཁན་མོའི་མདུན་དུ་སློབ་མས་བསྔགས་ནས་མཁན་མོས་གནས་འཆར་མ་བཅུག་སྟེ་དེ་ལྟར་ཁྱོད་སུ་མཁས་པའི་གན་དུ་ཞུས་ཤིག་ཅེས་བྱས་ན་ལྟུང་ངོ༌། །རིགས་དང་གྲོང་ཕྱུག་པོ་འདི་རྣམས་ངའི་ས་རིས་ཀྱིས་མ་སློང་ཅིག་ཅེས་ཟེར་བ་དང༌། གནས་དང༌། བདག་གིས་གཙུག་ལག་ཁང་བརྩིགས་
པ་ལ་དགེ་སློང་མ་གཞན་གནས་སུ་འོངས་པ་ལ་མ་བཞག་པ་དང༌། རྙེད་པ་དང༌། སློབ་མ་བསོད་སྙོམས་ལས་འཁོར་ཏེ་ཟན་བསྟན་པས་ཁ་ཟས་བཟང་པོ་འདི་བྱིན་པའི་གྲོང་དུམ་ལོང་ཤིག་ཅེས་ཟེར་བ་དང༌། ཆོས་ལ་སེར་སྣ་བྱེད་བ་ཡང་ངོ༌། །ཆོས་སློང་ཅིང་ཁ་དོག་འབུལ་བ་ལ་ནམ་བྲེལ་ཏེ་ཞེས་མི་བསྟན་པར་བཀྱིགས་པ་དང༌། འདི་རྣམས་གང་བྱས་ཀྱང་ལྟུང་བའོ། །འཇུངས་བར་ཆུད་པའོ། །སེར་སྣ་བྱེད་པའི་ལྟུང་བའོ།། །།དགེ་སློང་མ་དབྱར་མོ་ཐང་ནས་བསྐྲད་པ་ཡང་ངོ༌། །དགེ་སློང་མ་གཙུག་ལག་ཁང་ཡང་རུང་གང་ཟག་གི་གནས་ཀྱང་རུང་ཁྱིམ་པའི་ཁྱིམ་ཡང་རུང་བསྐྲད་ན་ལྟུང་བའོ། །ཅི་ལྟར་དེ་ལྟར་དགེ་སློང་མ་ལའོ། །བདག་གིས་བསྐྲད་པ་བཞིན་དུ་གཞན་ལ་སྐྲོད་དུ་བཅོལ་ན་ཐབས་ཇི་ལྟར་བྱས་ཀྱང་རུང་བསྐྲད་ན་ལྟུང་བའོ། །གྲོང་བར་དུ་སྡར་འོངས་པ་ལ་ཡང་ངོ༌། །དགེ་སློང་མ་སྔ་ན་གྲོང་བར་ན་ཟན་སློང་ཞིང་འདུག་པ་ལ་ཕྱིས་འོངས་པས་གུད་དུ་སློངས་ཤིག་ཅེས་བསྒོ་ནའང་ལྟུང༌། ཕྱིས་འོངས་པ་ལས་མ་འོང་ཤིག་ཅེས་སྔ་ནས་བསྐྲད་ཀྱང་ལྟུང༌། བསྐྲད་པར་ཆུད་པའོ། །སྐྲོད་པའི་ལྟུང་བའོ།། །།ལྟ་བ་དན་པ་ལ་སོགས་པས་རྒོལ་ནའོ། །ལྟུང་བ་མན་ཆད་གཅིག་ལས་ཉེས་པ་ཞིག་བྱུང་ངོ་ཞེས་སྐུར་ན་ལྟུང་བའོ། །འཚེ་བར་ཆུད་པའོ། །སྐུར་ཅིང་འཚེ་བའི་ལྟུང་བའོ།། །།མནའ་འདོར་བ་ཡང་ངོ༌། །དགེ་སློང་མས་མནའ་བོར་ན་ལྟུང་བའོ། །བཟློག་པས་སྟོན་པར་ཆུད་པའོ། །མནའ་འདོར་བའི་ལྟུང་བའོ། །ཁྲོས་པར་བདག་ལ་བསྣུན་ནའོ། །བདག་ལ་བདག་ཁྲོས་ཤིང་བདག་ལ་བརྡེགས་སམ་ལུས་རྡེབས་ན་ལྟུང་བའོ། །མི་བརྟན་པར་སྒྱུར་བར་བྱེད་པའོ། །བདག་ལ་རྡེག་པའི་ལྟུང་བའོ།། །།དགེ་སློང་མའི་དགེ་འདུན་རྣམས་ལ་འཕྱ་བའོ། །དགེ་སློང་མའི་དགེ་འདུན་ལ་ཉེས་སོ་ཞེས་འཕྱས་བྱེད་ན་ལྟུང་བའོ། །རྒྱབ་ཡང་ངོ༌། །དགེ་འདུན་ལ་རྒྱ་གང་ཟེར་ཞིང་སྤྱོད་ནའང་ལྟུང་བའོ། །འཁོར་གྱི་ཐུ་བོ་ལ་ཆུ་འཐོར་བའོ། །དགེ་སློང་ཕ་ལ་ཆུས་གཏོར་ན་ལྟུང་བའོ། །ལྟུང་བ་མེད་པ་ནི་བརྒྱལ་ནའོ། །དགེ་སློང་ཕ་བརྒྱལ་བ་ལ་ཆུས་འཐོར་བ་ནི་ཉེས་མེད་དོ། །དགེ་སློང་ལ་མཆིལ་མས་མི་གདབ། དགེ་སློང་ཕ་ལ་
མཆིལ་མས་གཏོར་ན་ཉེས་བྱས། རྐོག་ཏུ་དགེ་སློང་པ་ལ་དམིགས་ཏེ་ཐུབ་འདི་ཅེས་བྱས་ན་ཉེས་བྱས་རབ་ཏུ་འབྱུང་བ་འདི་ལ་མི་བརྒྱད། དགེ་སློང་ཕོ་མོ་དང་དགེ་སློང་མ་ལ་སྤྱོ་ཞིང་བརྒྱད་ན་ཡང་ཉེས་བྱས། གཉིས་ཀྱང་དེ་བཞིན་ནོ། །དགེ་སློང་ཕོ་མོ་གཉིས་ལ་སྤྱོ་ཞིང་བརྒྱད་ན་ཡང་ཉེས་བྱས། དགེ་སློང་གི་མདུན་དུ་སྤྱོད་ཡུལ་མི་སྤྱད། དགེ་སློང་སློང་མོ་སྤྱོད་པ་ལ་དགེ་སློང་མས་དགེ་སློང་མ་མཐོང་བར་སྔོན་དུ་ཁྱིམ་པའི་ཁྱིམ་དུ་སོང་སྟེ་ཡིབས་ནས་དགེ་སློང་འོངས་པ་དང་ཟན་མ་བཙོས་སོ་ཞེས་ཁྱིམ་པ་ཡིན་པ་སྐད་དུ་སྨྲས་ཏེ་དགེ་སློང་སླར་བཟློག་ཅིང་གཡོ་བྱས་ན་ལྟུང་བ། ཟམ་པ་མི་བརྟེན་པ་ལ་དགེ་སློང་དང་ལྷན་ཅིག་ཏུ་མི་འགྲོ། །ཟམ་པ་ལྡེམ་པ་ལ་དགེ་སློང་སྔར་བཏང་ཞིང་དགེ་སློང་མས་ཕྱི་བཞིན་འགྲོ་སྟེ་ཟམ་པ་བསྒུལ་ན་ཉེས་བྱས། །དགེ་སློང་མཐོང་མ་ཐག་ཏུ་སྟན་ལས་འཕོ། །དགེ་སློང་ཕ་འོང་བ་མཐོང་ནས་དགེ་སློང་མ་མཁས་ཤིང་ན་རྒན་ཀྱང་སྟན་ལས་འཕག་གོ །འདུག་ནས་འགྲེང་བ་འདི་ལ་འདུག་ཅེས་བསྒོ། །དགེ་སློང་ལ་འདུག་ལ་དགེ་སློང་མ་འགྲེང་ཞིང་འཁོད་པ་ལ་འདུག་ཤིག་ཅེས་མ་སྨྲས་ན་དགེ་སློང་ཕ་ཉེས་བྱས། མ་བྱས་ན་གསོལ་ཏེ་འདུག་པར་བྱ། དགེ་སློང་ཕས་དགེ་སློང་མ་ལ་འདུག་མི་ཟེར་ན་འདུག་ན་ཉེས་སམ་མ་ཉེས་ཞེས་ཞུས་ལ་འཁོད་དོ། །ལྕི་བར་འགྱུར་བ་བཅད་བར་ཆུད་པའོ། །དགེ་འདུན་དང་དགེ་སློང་ལ་འཕྱ་ཞིང་འཆལ་བའི་ལྟུང་བའོ། །དགེ་སློང་མའི་འཐབ་མོ་ལ་ནུས་པ་ཡོད་ལ་ཞི་བར་མ་བྱས་ནའོ། །དགེ་སློང་མ་འཐབ་ཅིང་འཁོད་པ་ལ་བདག་གིས་ཐབ་མོ་ཞི་བར་ནུས་ལ་མ་བཅུག་ན་ལྟུང་བའོ། །འཁྲུག་པ་གཡེལ་བའོ། །འཐབ་པ་མ་བཅུག་པའི་ལྟུང་བའོ། །དད་པ་བྱིན་ནས་གནས་པའོ། །དགེ་འདུན་མའི་ལས་ཅི་བྱེད་ཀྱང་རུང་དད་པའི་འདྲི་པ་ལ་དད་པ་སྔར་བྱིན་པ་ཡིན་མོད་ཅེས་ཕྱི་མ་མི་སྟེར་ཅིང་ཁྱིག་ན་ལྟུང་བའོ། །ག་མ་སྤྲའི་རྩེད་མོར་ཆུད་པའོ།། དད་པ་མི་སྟེར་ཅིང་ག་མ་སྤྲ་བྱེད་པའི་ལྟུང་བའོ། །ཟླ་བ་ཕྱེད་ཕྱེད་ཅིང་དགེ་སློང་ལ་འཆད་པའི་སྟོན་པར་མྱོང་ནའོ། །ཟླ་བ་ཕྱེད་ཕྱེད་ཅིང་དབྱར་མོ་ཐང་དུ་དགེ་སློང་པ་ལས་ཆོས་འཆད་པ་སྤྱན་མ་དྲངས་ཤིང་མ་བཤད་དམ། ཕོའི་གཙུག་ལག་ཁང་དུ་ཆོས་ཉན་དུ་མ་སོང་ན་ལྟུང་བའོ། །དགེ་
སློང་མེད་པར་གསོ་སྦྱོང་བྱེད་པའོ། །གསོ་སྤྱོད་བྱེད་པའི་ཚེ་དགེ་སློང་ཕ་ཀུན་ལས་དད་པ་མ་དྲིས་ན་ལྟུང་བ། གསོལ་བའི་ལས་ཀྱིས་ཆོས་འཆད་པར་བསྐོས་པའི་དགེ་སློང་ཞིག་ཡོད་ན་དེ་ལ་དད་པ་དྲིས་པས་ཆོག་སྟེ་ཀུན་ལ་མ་དྲིས་ཀྱང་ཉེས་མེད་དོ། །དགེ་སློང་མེད་པའི་གནས་སུ་དབྱར་ཚུལ་དུ་ཞུགས་པའོ། །དགེ་སློང་གི་གཙུག་ལག་ཁང་ནས་བར་རྒྱང་གྲགས་ཕྱེད་ལས་རིང་པ་ཞིག་ཏུ་ཚུལ་དུ་ཞུགས་ན་ལྟུང་བའོ། །དབྱར་ཚུལ་དུ་ཞུགས་པ་ལས་དགེ་འདུན་གཉིས་ལ་གནས་གསུམ་གྱིས་མ་བྱུང་ནའོ། །དགེ་སློང་མ་ཚུལ་ནས་བྱུང་བའི་ཚེ་དགེ་འདུན་ཕོ་མོ་གཉིས་ལ་སོགས་པ་ལ་ལྟུང་བ་སྡེ་ལྔ་ལ་མཐོང་བ་དང་ཐོས་པ་དང་དོགས་པ་ཡོད་ན་རྒོལ་ཅིག་ཅེས་སྐབས་ཕྱེ་ལ་ཚུལ་ནས་འབྱུང་སྟེ་དེ་ལྟར་མ་བྱས་ན་ལྟུང་བར་ཡང་འགྱུར། ཚུལ་འབྱུང་བའི་ལས་སུ་ཡང་མི་རུང༌། ལྕི་བའི་ཆོས་ལས་འགལ་བར་ཆུད་པའོ། །ལྕི་བའི་ཆོས་ལས་རྒལ་བའི་ལྟུང་བའོ། །དབུལ་པོ་ལ་དྲུབས་པ་སློང་བའོ། །གདིང་བ་འདྲུབ་པའི་གོས་ཁྱིམ་བདག་དབུལ་པོ་ལ་བསླངས་ན་ལྟུང་བའོ། །དྲུབས་པ་དབྱུང་བའི་ཕྱིར་ཚོགས་པའི་དགྲོལ་བ་མ་བྱིན་ནའོ། །དྲུབས་པ་འབྱིན་པའི་ཚེ་བདག་དགེ་འདུན་ནང་དུ་མ་འདུས་སམ་དད་ཕས་མ་བྱིན་ན་ལྟུང་བའོ། །གོས་བགོ་བའི་ཕྱིར་ན་ཡང་ངོ༌། །དྲུབས་པ་ཕྱུང་ནས་དགེ་འདུན་ནོར་འགོད་པ་ལ་དད་པས་མ་བྱིན་ན་ལྟུང་བའོ། །དེས་ནོར་མི་འདོད་ན་མ་བྱས་པའོ། །དགེ་འདུན་ནོར་འགོད་པ་ལ་བདག་ནོར་སྐལ་མི་འདོད་དེ་མི་ལེན་ཏམ་མཚམས་ཀྱི་ཕྱི་རོལ་དུ་སོང་ན་ཉེས་མེད་དོ། །ཕ་རོལ་ལ་ཕོངས་པར་སྤྱོད་པར་ཆུད་པའོ། །ཕ་རོལ་པོ་ཕོངས་ཤིང་མི་བདེ་བར་འགྱུར་བའི་ལྟུང་བའོ། །དབྱར་མོ་ཐང་ལ་མ་བྱས་པར་སོང་བའོ། །གུད་དུ་འགྲོ་སྟེ་དགེ་སློང་མ་གཞན་མེད་ན་ལྷ་ཁང་གི་སྲུང་མ་མ་བཞག་གམ་གཞན་ལ་མ་བཅོལ་བར་སོང་ན་ལྟུང་བའོ། །མཚམས་གཏང་པའོ། །ལྟུང་བ་ནི་སོང་ནས་འདོམ་བཞི་བཅུ་རྩ་དགུ་འདས་ན་ལྟུང་བའོ། །དབྱར་མོ་ཐང་གི་གླ་མི་བླང༌། གཙུག་ལག་ཁང་གླར་བཏང་ཞིང་གླ་བླངས་ན་ཉེས་བྱས། ཁྱིམ་གྱི་དོན་དང་བདག་གི་དོན་ཀྱང་མ་ཡིན། ལྷ་རིས་ཀྱི་ཞིང་དང་ནོར་ལ་སོགས་པ་སྔར་ཐང་བཅད་དེ་ཁྱིམ་པ་
གང་ཡང་རུང་སྦྱོར་ཞིང་འདུག་པ་ལ་ཁེ་ཡོད་པའི་ཕྱིར་སྔ་མ་ལས་ཕྲོགས་ཏེ་གཞན་ལ་བྱེད་དུ་བཅུག་ན་ལྟུང་བ། དབྱར་མོ་ཐང་ལ་རྒྱས་པར་བྱེད་པར་ཆུད་པའོ། །གཙུག་ལག་ཁང་ལ་རྒྱས་པར་བྱེད་པའི་ལྟུང་བའོ།། །།དབྱར་གྱི་བར་དུ་ཡུལ་རྒྱུ་བ་སྤྱོད་པའོ། །དབྱར་ཚུལ་དུ་ཞུགས་ནས་དགེ་སློང་མ་གནས་གུད་དུ་ཞག་གཅིག་ཀྱང་མི་དབང་སྟེ་གུད་དུ་སོང་ཞིང་ཞག་ལོན་ན་ལྟུང་བའོ། །ལྟུང་བ་མེད་པ་ནི་བར་ཆད་མངོན་པར་འདུག་པའོ། །ཚུལ་ན་འདུག་པའི་ཚེ་སྲོག་ལ་དམའ་བ་དང་ཚངས་པར་སྤྱོད་པའི་བར་ཆད་དུ་འགྱུར་བའི་རྐྱེན་ཅིག་བྱུང་བ་ནི་གུད་དུ་སོང་ཡང་ཉེས་མེད་དོ། །དབྱར་གནས་ནས་མ་སྤྱད་པའོ། །དབྱར་གྱི་ཚུལ་ནས་བྱུང་ནས་ཚུལ་ན་འདུག་འདུག་པའི་གནས་དེ་ལས་གུད་དུ་འཕོས་ཏེ་མ་སོང་ན་ལྟུང་བའོ། །གནས་གུད་དུ་སོང་སྟེ་ཞག་གཅིག་ལོན་ན་ཚུལ་གྱི་ཚེ་གནས་གནས་པ་དེར་སླར་གནས་ན་ལྟུང་བར་མི་འགྱུར་རོ་ཞེས་ཊཱི་ཀ་ལས་འཆད། ཉིན་གཅིག་གུད་དུ་སོང་སྟེ་སླར་གནས་པ་ཙམ་གྱིས་ལྟུང་བར་མི་འགྱུར་རོ་ཞེས་འདུལ་བ་འཛིན་པ་ཁ་ཅིག་གིས་བཤད། དགོས་པ་ཡོད་ལ་འཁོར་དུ་སྤྱོད་པའི་ལམ་ན་རྐུན་པོ་དང་ཆོམ་པོ་དང་གཅན་གཟན་ལ་སོགས་པ་འཇིགས་པའི་རྐྱེན་ཡོད་བཞིན་དུ་དགེ་སློང་མ་ལམ་དུ་ཞུགས་ཏེ་སོང་ན་ལྟུང་བའོ། །འཁྲུགས་པར་ཡང་ངོ༌། །ཡུལ་འཁྲུགས་ཤིང་གཅིག་ལ་གཅིག་གནོད་པར་བྱེད་ཅིང་དམག་འགྱེད་པ་ལྟ་བུ་ཡོད་བཞིན་དུ་ཞུགས་ཏེ་སོང་ན་ལྟུང་བའོ། །སྤྱོད་པ་དང་མི་སྤྱོད་པར་ཆུད་པའོ། །གུད་དུ་སོང་བ་དང་མ་སོང་བའི་ལྟུང་བའོ། །ལྷའི་རིགས་ལ་སོགས་པ་དང༌། །མུར་འདུག་གི་གནས་སུ་སོང་སྟེ་རྒོལ་བར་བྱེད་པའོ། །མུར་འདུག་གི་ལྷའི་འཁོར་དང་མུར་འདུག་གི་གྲོང་དང་ཞང་བློན་དང་མི་དྲ་མ་ལ་སོགས་པའི་ཁྱིམ་དུ་སོང་ཞིང་ཆོས་བསྙེམས་ཤིང་གོལ་དུ་འགྲོ་ན་ལྟུང་བའོ། །འདྲི་ཞིང་རྨེད་པའི་སྐབས་མ་བྱས་པར་རོ། །དགེ་སློང་ཕ་ལ་ཆོས་ཉན་ན་སྔར་བཤད་དུ་ཅི་གནང་ཞེས་མ་གསོལ་བར་འདྲི་ཞིང་བཤད་པ་ལ་ཉན་ན་ལྟུང་བའོ། །སྟན་བྱིན་ཏེ་དགའ་བར་བྱོས་ལ་སྡེ་དྲིས་ཏེ་སྐབས་བྱོས་ཤིག །དགེ་སློང་ཕ་ལ་ཆོས་བཤད་པར་གསོལ་པ་ཡང་སྟན་བཏིང་སྟེ་བསྟི་སྟང་བྱས་ལ་འདུལ་བ་དང་མ་ལྟ་བུ་གང་འཛིན་པ་
དྲི་སྟེ་བདག་འདྲི་བ་དང་མཐུན་བ་ཞིག་འཛིན་ན་ཆོས་བཤད་པར་གསོལ་བ་གདབ་པོ། །སྨྲ་བར་ཆུད་པའོ། །སྨྲ་བ་ལས་ལྟུང་བར་འགྱུར་རོ། །ཕྱི་རོལ་གྱི་སར་གཅིག་པུ་འགྲོ་ནའོ། །མཚན་མོ་དགེ་སློང་མ་གཅིག་པུ་ཕྱི་རོལ་ཆེ་ཆུང་དུ་སོང་ན་ལྟུང་བའོ། །རྩྭ་སྔོན་པོ་ལ་བཤང་བ་འདོར་བའོ། །རྩྭ་ལ་སོགས་པ་སྔོན་པོ་སྐྱེ་བའི་ཐོག་ཏུ་བཤང་གཅི་བཏང་ཞིང་པོར་བའང་ལྟུང་བའོ། །ལྟུང་བ་མེད་པ་ནི་ན་ནའོ། །ནད་པ་ནི་བཤང་གཅི་རྩྭ་སྔོན་པོའི་གནས་སུ་འགྲོ་མི་ཕོད་པ་ནི་མ་གཏོགས་སོ། །རྩྭ་སྔོན་པོས་ཐམས་ཅད་དུ་ཡོག་ན་ཡང་ངོ༌། །རྩྭ་སྔོན་པོས་ཐམས་ཅད་དུ་གཡོགས་ཏེ་བཤང་གཅི་བྱ་བའི་ས་མེད་ན་བཤང་གཅི་བྱས་ཀྱང་ཉེས་མེད་དོ། །རྩིག་པའི་འགྲམ་དུ་མ་བརྟགས་པར་རོ། །བཤང་གཅི་སྣོད་ཀྱི་ནང་ནས་འདོར་ན་རྩིག་དྲུང་ལ་སོགས་པ་ན་ཅི་ཡོད་པ་བརྟགས་ཤིང་དོར་རོ། །ལྟུང་བ་མེད་པ་ནི་པུ་ཤུས་བསྐོར་བའི་རྩིག་པ་ནའོ། །ཁང་པ་པུ་ཤུ་ཅན་གྱི་སྟེང་ནས་བཤང་གཅི་འདོར་བ་ནི་བལྟ་ཞིང་བརྟག་ཏུ་མི་རུང་བས་མ་བརྟགས་པར་བོར་ཡང་ཉེས་མེད་དོ། །མི་གཙང་བར་བོར་བ་མི་དོར། བཤང་གཅི་དང་མི་གཙང་བ་འདམ་རྫབ་ཏུ་བོར་བ་དང་མི་དོར། བཤང་བར་ལྡན་པར་རོ། །བཤང་གཅི་བྱེད་པའི་ལྟུང་བའོ། །འབའ་ཞིག་པའི་ལྟུང་བ་རྫོགས་སོ། །དགེ་སློང་མའི་ལྟུང་བ་བརྒྱ་བརྒྱད་ཅུ་རྫོགས་སོ།། །།དགེ་སློང་མའི་སོ་སོར་མཐོལ་བ་བཅུ་གཅིག་ལ་འཆད་དེ། བདག་གི་ཕྱིར་རིགས་གཞན་དུ་འོ་མ་བླངས་ཏེ་འཐུངས་ན་མིན་ནའོ། །བདག་མིན་པར་གཉན་མ་ཡིན་པ་ལས་འོ་མ་བླངས་ན་སོ་སོར་མཐོལ་བའོ། །དེ་སློང་བ་ནི་ཉེས་བྱས་པའོ། །འོ་མ་ལག་ཏུ་མ་ཐོབ་ཅིང་མ་འཐུངས་ཀྱི་བར་དུ་སློང་བའི་ཚེ་ཉེས་བྱས། ཞོ་དང་མར་སར་དང་ཞུན་མར་དང་ཡུངས་མར་དང་སྦྲང་རྩི་དང་བུ་རམ་དང་ཤ་དང་ཉ་ཤ་དང་ཤ་སྐམ་རྣམས་སོ། །མིང་གིས་སྨོས་པ་འདི་རྣམས་དགུའང་མིན་བར་གཉེན་མ་ཡིན་པའི་ཁྱིམ་བདག་ལས་བསླངས་ཤིང་ཟོས་ན་ལྟུང་བའོ། །འདི་ཐོབ་སྟེ་གཞན་སློང་ན་འབྲི་བ་མ་ཡིན་ནོ། །འོ་མ་བསླངས་པ་ལས་ཞོ་ལ་སོགས་པ་གང་ཐོབ་ཀྱང་མཐོལ་བའོ། །ངན་པ་ཡང་ངོ༌། །ཁ་ཟས་ཚོད་མ་ལ་སོགས་པ་ངན་པ་ཞིག་བསླངས་པ་
ལས་བཟང་པོ་རྣམ་བཅུ་པོ་གང་ཐོབ་ཀྱང་མཐོལ་བ། འདི་ཐོབ་ནའང་དེར་ཆུད་དོ་ཞེས་བསླངས་པ་ལས་དར་བ་ཐོབ་པ་ལྟ་བུ་མཐོལ་བའོ། །ཞོ་བསླངས་པ་ལས་རྩབ་མོ་ལྟ་བུའང་མཐོལ་བའོ། །འདི་ཉེས་བྱེད་དོ། །དགེ་སློང་མ་ཚོད་མ་ལ་སོགས་པ་སློང་བའང་ཉེས་བྱས། སེང་གེ་ཡང་ངོ༌། །དགེ་སློང་གིས་སོ་སོར་མཐོལ་བ་བཞི་ལས་ཐ་མ་དགེ་བསྙེན་ཕྱུག་པོ་དབུལ་པོར་སང་བ་ལ་མི་བསླང་བར་དམ་བཅས་པ་ལ་བསླངས་པ་ནི་སོ་སོར་མཐོལ་བའོ། །སོ་སོར་མཐོལ་བའོ། །སོ་སོར་མཐོལ་བ་བཅུ་གཅིག་རྫོགས་སོ།། །།བསླབ་པ་མང་པོ་ལ་འཆད་དེ། བརླ་སྣང་བར་ཤམ་ཐབས་མི་བགོ །ཁྱིམ་མི་མོ་འདྲོན་པོ་ཡོ་ལང་གི་ཕྱིར་གོས་ཀྱི་འོག་ཏུ་རྐུབ་ཀྱི་རྦོད་བཅུག་སྟེ། རྐུབ་གློ་བོར་འདུག་པ་འདྲ་བ་དགེ་སློང་མས་མི་བྱ། ཆགས་པའི་གྲོང་བར་དུ་མི་འགྲོ། །དགེ་སློང་མ་འདོད་ཆགས་ཀྱི་སེམས་ཡོད་ན་གྲོང་བར་དུ་མི་འགྲོ། །གཞན་འདོད་ཆགས་ཡོད་པའི་གྲོར་དུའང་མི་འགྲོ། །དགེ་སློང་གི་ཡང་ངོ༌། །དགེ་སློང་པའི་བསླབ་པ་མང་པོ་ཐམས་ཅད་ཀྱང་དགེ་སློང་མས་བསྲུང་ངོ༌། །བསླབ་པའོ། །དགེ་སློང་མའི་བསླབ་པ་མང་པོ་རྫོགས་སོ། །དགེ་སློང་མའི་རྣམ་པར་འབྱེད་པ་རྫོགས་སོ། །དགེ་སློང་མའི་ཁྲིམས་འདུལ་བ་རྣམ་པར་འབྱེད་པའི་ནད་ནས་འབྱུང་བའི་མདོ་རྫོགས་སོ།། །།འདི་མན་ཆད་པ་རི་བ་ཤ་ལ་འཆད་དེ། ཉེས་བྱས་པ་ནི་ཞིག་པ་དང་མ་སྐྱེས་པས་ལྟུང་བར་སྦྱར་ནའོ། །དེ་ཞེས་འབྱུང་བའི་མདོ་མན་ཆད་ལ་འཆད་དེ། དགེ་སློང་ཕས་ཕམ་པ་ཕྱུང་སྟེ་ཁྲིམས་ཞིག་པ་དང་ཁྲིམས་རྫོགས་པར་བྱས་པ་ལས་མ་ཆགས་པ་རྣམ་གཉིས་ནི་ཕས་ཕམ་པ་མན་ཆད་ཉེས་བྱས་ཡན་ཆད་ལྟུང་བ་སྡེ་ལྔ་ལས་གང་བྱས་ཀྱང་རུང་ཐམས་ཅད་ཉེས་བྱས་སོ། །དགེ་སློང་ཕས་ཁྲིམས་ཕུལ་བ་དང༌། ཁྲིམས་མ་ཕོག་པར་ཐུག་ཐུབ་ཏུ་རང་བྱིག་ཤུར་ཞུགས་པ་གཉིས་ནི་ཕས་ཕམ་པ་མན་ཆད་གང་བྱས་ཀྱང་ཁྱིམ་པ་དང་འདྲ་བས་ཉེས་བྱས་ཡོད་པར་མི་བརྩིའོ། །བསྙེན་པར་རྫོགས་པའི་རབ་ཏུ་འབྱུང་བས་བླངས་པ་འགལ་ན་ཡང་ངོ༌། །དགེ་སྦྱོང་ཕོ་དང་དགེ་སྦྱོང་མོ་དང་དགེ་སློབ་མ་གསུམ་ནི་དགེ་སྦྱོང་ཉིད་ཀྱི་ཁྲིམས་བཅུ་དང་དགེ་སློབ་མ་ཉིད་ཀྱི་ཁྲིམས་ཉི་ཤུ་རྩ་གཉིས་ལས་གང་
བྱས་ཤིང་དྲལ་ཀྱང་རུང་སྟེ་ཉེས་བྱས་སོ། །ཉེས་བྱས་དེ་མཐོལ་བས་ཚངས་པས་ཕྱིས་ཁྲིམས་དབོག་ཏུ་རུང་ངོ༌། །དགེ་སྦྱོང་གིས་ཕས་ཕམ་པ་བཞི་སྤྱད་པ་དང་དགེ་སྦྱོང་གི་ཁྲིམས་མ་ཆགས་པས་དགེ་སྦྱོང་གི་ཁྲིམས་བཅུ་ལས་གང་དྲལ་ཀྱང་ཉེས་བྱས་ཏེ་མཐོལ་པས་ཚངས་སོ། །མཐོལ་བ་ནི་དགེ་སློང་གཅིག་གི་དྲུང་དུ་མཐོལ་ལོ། །དེའི་ཕྱོགས་ཡིད་ཀྱིས་ན་ཡང་ངོ༌། །དགེ་སྦྱོང་ཕོ་མོ་དང་དགེ་སློབ་མ་ཉིད་ཀྱི་ཁྲིམས་མ་གཏོགས་པར་དགེ་སློང་ཕ་དང་དགེ་སློང་མས་བསྲུང་ངོ་ཅོག་ལས་གང་ཡང་རུང་སྟེ་སྤྱད་ཅིང་དྲལ་ན་ཁྲིམས་བཅུ་ཉིད་མ་ཡིན་མོད་ཀྱི། ཁྲིམས་བཅུའི་ཆར་གཏོགས་ཤིང་འདྲ་བའི་བག་ཡིན་པས་ཉེས་བྱས་སུ་འགྱུར་ཏེ་ཁར་མཐོལ་མི་དགོས་ཀྱི་ཡིད་ལ་འགྱོད་པས་ཚངས་ཤིང་འབྱང་བར་འགྱུར་རོ། །དགེ་སློང་ཕོ་མོས་བསྲུང་བ་ལས་མིང་གིས་སྨོས་པ་འདི་བརྒྱད་ནི་དགེ་སློབ་མས་བསྲུང་བ་མ་ཡིན་ཏེ་དྲལ་ཀྱང་ཉེས་བྱས་མེད་པས་ཡིད་ཀྱིས་འགྱོད་ཀྱང་མི་དགོས་ཏེ་བརྒྱད་གང་ཞེ་ན་གོས་ལྷག་པ་དང་ལྷུང་བཟེད་དང་ཞག་འདས་པའི་ལྟུང་བ་དང་ཆོས་གོས་བྲལ་བའི་ལྟུང་བ་དང་མེ་ལ་རེག་པའི་ལྟུང་བ་དང་སྤགས་ནས་ཟ་བའི་ལྟུང་བ་དང༌། འབྲས་བུ་ས་བོན་གྱི་གྲོང་བཅོམ་པའི་ལྟུང་བ་དང་རྩྭ་སྔོན་པོའི་སྟེང་དུ་བཤང་གཅི་དོར་བ་དང་ཤིང་མི་གང་ཡན་ཆད་ལ་འཛེགས་པ་དང་འདི་བརྒྱད་ནི་དགེ་སློབ་མས་བ་སྲུང་མི་དགོས་ཏེ་ཉེས་མེད་དོ། །དགེ་སློབ་མས་བསྲུང་མི་དགོས་པ་བརྒྱད་ཀྱི་སྟེང་དུ་གཞན་རིན་པོ་ཆེ་ལ་འཛིན་པ་དང༌། ས་རྐོ་བ་དང་ཁ་ཟས་བྱིན་ལེན་མ་བྱས་པར་ཟ་བའི་ལྟུང་བ་དང་ཁ་ཟས་དང་ཞག་ལོན་ཏེ་སྤགས་པ་ཟ་བའི་ལྟུང་བ་དང་རྩི་ཤིང་གཅོད་པའི་ལྟུང་བ་དང་འདི་ལྔས་བསྣན་ཏེ་བཅུ་གསུམ་ནི་དགེ་སྦྱོང་གིས་མ་བསྲུངས་ཤིང་དྲལ་ཀྱང་ཉེས་མེད་དོ། །མིང་གིས་སྨོས་པ་འདི་རྣམས་མ་གཏོགས་པར་དགེ་སྦྱོང་དང་དགེ་སློབ་མས་ཁྲིམས་ནོས་ཤིང་བླངས་བ་བཅུ་དང་ཉི་ཤུ་གཉིས་ནི་གང་དྲལ་ཀྱང་ཉེས་བྱས་སོ། །དགེ་སྦྱོང་ཕོ་མོ་དང་དགེ་སློབ་མས་ཚུལ་དྲལ་བ་ཡང་ཉེས་བྱས་ཏེ་མཐོལ་དགོས་སོ། །གསོ་སྦྱོང་གི་དུས་སུ་མཐོལ་ཚངས་མ་བྱས་པ་དང་དགེ་སྦྱོང་མ་དང་དགེ་སློབ་མ་དགེ་འདུན་སྡེ་གཉིས་ལ་ཚུལ་
ནས་མ་བྱུང་བ་ཡང་ཉེས་བྱས་ཏེ་མཐོལ་དགོས། ཁྲིམས་བཅུའི་ཆར་གཏོགས་ཤིང་བག་འདྲ་བ་དྲལ་ན་ཉེས་བྱས་སུ་འགྱུར་ཞིང་ཡིད་ཀྱིས་འགྱོད་དེ་ཚངས་པ་ནི་ཁྲིམས་བཅུ་སོ་སོར་འདི་འདྲར་སྡུད་དེ་སོ་སོར་གཏོགས་ཤིང་བསྡུས་པ་གང་ཞེ་ན། ཐོག་མ་བྱིག་ཤུའི་ཚུལ་མནོས་ཤིང་བླངས་པས་ན་ཁྱིམ་པའི་རྒྱན་དང་ཁྱིམ་པའི་སྤྱོད་དོ་ཅོག་ལྟར་བྱེད་ན་ཡིད་ལ་འགྱོད་དེ་ཚངས་པའི་ཉེས་བྱས་ཏེ་བྱིག་ཤུའི་ཚུལ་མནོས་ཤིང་བླངས་པའི་ནང་དུ་བསྡུ་བའོ། །མ་བྱིན་པར་བླངས་ན་ཉེས་བྱས་ཏེ་མཐོལ་དགོས་པ་ཡིན་ན་བདག་གིར་དགོས་པའི་ཕྱིར་སློང་ཞིང་ཚོལ་བ་ལ་སོགས་པ་རྐུ་བའི་ཆར་གཏོགས་ཤིང་བག་འདྲ་བའི་ཕྱིར་ཡིད་ལ་འགྱོད་པས་ཚངས་པའི་ཉེས་བྱས་ཏེ་མ་བྱིན་པར་ལེན་པའི་ནང་དུ་བསྡུའོ། །གསེར་ལ་རེག་པ་ནི་ཉེས་བྱས་པ་སྟེ་མཐོལ་བ་ཡིན་ན་གསེར་དངུལ་བྱས་སོ་ཅོག་དང་རིན་པོ་ཆེ་དང་རིན་པོ་ཆེ་ལ་གཏོགས་སོ་ཅོག་ལ་བཟུང་བ་ནི་གསེར་དངུལ་གྱི་ཆར་གཏོགས་པས་ཉེས་བྱས་ཏེ་ཡིད་ཀྱིས་འགྱོད་པ་ཚངས་པར་གྱུར་ཏེ་གསེར་དངུལ་ལ་མི་རེག་པའི་ནང་དུ་བསྡུའོ། །ཕྱི་དྲོ་ཟན་ཟོས་པ་ནི་མཐོལ་དགོས་པའི་ཉེས་བྱས་ཡིན་ཏེ་ཁ་ཟས་མ་བརྟགས་པ་སྒོག་པ་ལ་སོགས་པ་ཟོས་པ་ནི་ཡིད་ལ་འགྱོད་དེ་ཚངས་པའི་ཉེས་བྱས་ཏེ་ཕྱི་དྲོ་ཟན་མི་ཟ་བའི་ནང་དུ་བསྡུའོ། །རོལ་མོ་གླུ་གར་བྱས་ན་མཐོལ་དགོས་པའི་ཉེས་བྱས་ཡིན་ཏེ་ཆུའི་ནང་དུ་རྩེ་བ་ལ་སོགས་པ་རྩེའོ་ཅོག་རོལ་མོ་གླུ་གར་གྱི་ཆར་གཏོགས་ཤིང་བག་འདྲ་བའི་ཕྱིར་ཡིད་ལ་འགྱོད་ཅིང་ཚངས་པའི་ཉེས་བྱས་ཏེ། རོལ་མོ་གླུ་གར་གྱི་ནང་དུ་བསྡུའོ། །མི་ཚངས་པར་སྤྱོད་ནའང་མཐོལ་དགོས་པའི་ཉེས་བྱས་ཡིན་ཏེ་འདོད་ཆགས་ཀྱི་སེམས་ཀྱིས་ཕོ་མཚན་ལ་འཛིན་པ་དང་ཁུ་བ་འབྱིན་པ་དང་གཅིག་གི་སྟེང་དུ་གཅིག་ཞོན་པ་ལ་སོགས་པ་བྱེད་དོ་ཅོག་ཡིད་ལ་འགྱོད་དེ་ཚངས་པའི་ཉེས་བྱས་ཏེ་མི་ཚངས་པར་སྤྱོད་པའི་ནང་དུ་བསྡུའོ། །སྲོག་གཅོད་ན་མཐོལ་དགོས་པའི་ཉེས་བྱས་ཡིན་ཏེ་བརྡེག་པ་དང་འཇུ་བ་དང་ནན་ལ་འདོར་བ་ལ་སོགས་པ་གནོད་པར་བྱེད་དོ་ཅོག་ཡིད་ལ་འགྱོད་དེ་ཚངས་པའི་ཉེས་བྱས་ཏེ་སྲོག་གཅོད་པའི་ནང་དུ་བསྡུའོ། །ཆོས་དང་དགེ་འདུན་ལ་སྐྱབས་སུ་འགྲོ་ཞེས་ཐོག་མ་ཁས་
བླངས་པས་དགེ་སློང་དང་དགེ་འདུན་དང་ཆོས་དང་མི་འགྲོགས་པར་ཁྱིམ་པ་དང་ཤན་པ་དང་རོལ་མོ་མཁན་དང་ཆང་འཚོང་བ་དང་མུར་འདུག་པ་ལ་སོགས་པ་དང་འགྲོགས་ཤིང་བསྟེན་པ་ཡང་ཡིད་ལ་འགྱོད་པས་ཚངས་པའི་ཉེས་བྱས་ཏེ་ཆོས་དང་དགེ་འདུན་ལ་སྐྱབས་སུ་སོང་བའི་ནང་དུ་བསྡུའོ། །ཐོག་མ་སངས་རྒྱས་ལ་སྐྱབས་སུ་འགྲོའོ་ཞེས་ཁས་བླངས་པས་ན་སངས་རྒྱས་ལ་བསྟེན་ཅིང་གུས་པར་བྱ་བ་ཡིན་ཏེ་ཚུལ་ཁྲིམས་བསྲུང་བ་ལ་གཡེལ་བ་དང་དཀོན་མཆོག་གསུམ་ལ་མ་གུས་ཤིང་རིམ་གྲོ་ཆུང་བ་ལ་སོགས་པ་ཐམས་ཅད་སངས་རྒྱས་ལ་སྐྱབས་སུ་སོང་བའི་ཕྱིར་གཏོགས་ཤིང་བག་འདྲ་བས་ཡིད་ལ་འགྱོད་པས་ཚངས་པའི་ཉེས་བྱས་ཏེ་སངས་རྒྱས་ལ་སྐྱབས་སུ་སོང་བའི་ནང་དུ་བསྡུས་ཏེ་སངས་རྒྱས་ལ་མ་གུས་པ་ནི་མཐོལ་དགོས་པའི་ཉེས་བྱས་སོ། །ཐོག་མ་ཤཱཀྱའི་རྗེས་སུ་འབྱུང་ངོ་ཞེས་བྱ་བས་ན་ཤཱཀྱའི་རྗེས་སུ་སློབ་ཅིང་ཉེས་མེད་པར་དག་པར་བྱ་བ་ཡིན་ཏེ་མཐོལ་ཚངས་མ་བྱས་ཤིང་ཉེས་པ་མ་མཐོལ་ཏོ་ཅོག་ཤཱཀྱའི་རྗེས་སུ་འབྱུང་བའི་ནང་དུ་བསྡུའོ། །ཕྱི་དྲོ་ཁ་ཟས་ཟོས་ན་མཐོལ་དགོས་པའི་ཉེས་བྱས་ཡིན་ཏེ་ཁ་ཟས་མ་བརྟགས་པ་སྒོག་པ་ལ་སོགས་པ་ཟོས་པ་ནི་ཡིད་ལ་འགྱོད་པས་ཚངས་པའི་ཉེས་བྱས་ཏེ་ཕྱི་དྲོ་ཁ་ཟས་མི་ཟ་བའི་ནང་དུ་བསྡུའོ། །སློབ་པ་བྱིན་པ་ནི་མཚུངས་སོ། །སློབ་པ་བྱིན་པའི་དགེ་སློང་གིས་ཀྱང་དགེ་སློང་གི་ཁྲིམས་ཉིས་བརྒྱ་ལྔ་བ་ཅུ་ཅི་ལྟར་བསྲུང་བ་བཞིན་བྱ་ཞིང་བསྲུང་ངོ༌། །སློབ་པ་བྱིན་པ་ལ་དགེ་སློང་ལ་ལ་ཞིག་གིས་བསྐྲད་དམ། བརྡེགས་སམ། གོས་བྱིན་ཏེ་སླར་འཕྲོགས་པ་ན་དགེ་སློང་ལ་བྱས་པ་བཞིན་དུ་ལྟུང་བར་འགྱུར་རོ། །དགེ་སློང་ནན་དི་ཀ་ཞེས་བྱ་བ་ཐོག་མ་ནས་མཐོལ་བར་བ་སེམས་ནས་མི་ཚངས་པར་སྤྱད་ནས་དེ་མ་ཐག་ཏུ་སངས་རྒྱས་ལ་མཐོལ་དུ་སོང་སྟེ་ཚེ་གཅིག་གི་བར་དུ་སློབ་པ་བྱིན་པ་ལ་གནས་ཤིང་ཆད་པ་བྱེད་ཕོད་དམ་ཞེས་སྨྲས་ནས་ཕོད་དོ་ཞེས་ཁས་བླངས་པའི་ཕྱིར་སློབ་པ་བྱིན་ཏེ་གཞག་པ་ལས་བཅས། རབ་ཏུ་མ་རྫོགས་པ་དང་དེ་བཞིན་ནོ། །སློབ་པ་བྱིན་པ་ཉིད་ཀྱིས་ནི་དགེ་སློང་བཞིན་དུ་བསྲུང་དགོས་པ་ཡིན་ན་དགེ་སློང་རྣམས་ཀྱིས་ནི་སློབ་པ་བྱིན་བདེ་ལ་དགེ་སྦྱོང་དང་འདྲ་
བར་ལྟའོ། །དགེ་སྦྱོང་དང་འདྲ་བས་བྱིན་ལེན་བྱ་བ་དང་མི་བླ་མའི་ཆོས་སྨྲ་བ་དང་དེས་ཟན་ཟོས་པ་དང་ལྷན་ཅིག་ཏུ་ཉལ་བ་ལ་སོགས་པ་ཡང་དག་སྦྱོང་ལ་ཉེས་པར་འགྱུར་བ་དང་མི་འགྱུར་བ་བཞིན་དུ་སློབ་པ་བྱིན་པ་ཡང་དེ་དང་འདྲ་བར་འགྱུར་རོ། །དེར་མ་ཡིན། སློབ་པ་བྱིན་པ་མང་ཞིག་ཡོད་ན་ནང་གཅིག་ལ་གཅིག་དགེ་སློང་ཡོན་ཏན་དང་ལྡན་པ་ནང་གཅིག་ལ་གཅིག་རུང་བ་དང་མི་རུང་བ་བཞིན་དུ་སློབ་བ་བྱིན་པ་ནང་ཡང་དེ་བཞིན་ཏེ་གཅིག་གིས་བྱིན་ལེན་བྱས་ན་དེར་བཟར་རུང་གཅིག་གིས་བཙོས་སམ་སྤགས་པ་བྱས་ན་གཞན་གྱིས་བཟར་མི་རུང་བ་ལ་སོགས་པ་ཀུན་འདྲ་བར་བསྲུང་ངོ༌། །དགེ་སློབ་མ་ཡང་ངོ༌། །སློབ་པ་བྱིན་པ་དང་དགེ་སློབ་མ་གཉིས་སུ་ཡང་མི་འདྲ་སྟེ། དགེ་སློབ་མ་ཡང་དགེ་སྦྱོང་དང་འདྲ་བར་ལྟ་སྟེ་དགེ་སློབ་མས་བྱིན་ལེན་བྱས་པ་དང་སྤགས་པ་དང་བཙོས་པ་ལ་སོགས་པ་སློབ་པ་བྱིན་པས་བཟར་རུང་ངོ༌། །སློབ་པ་བྱིན་པས་སྤགས་པ་ལ་སོགས་པ་དགེ་སློབ་མ་ལ་མི་རུང་ངོ༌། །རྒྱུད་གཞན་ལྟ་བུས་སྤྱད་པ་ན་དགེ་སློང་དུ་འདུ་ཤེས་པ་ཐོབ་ན་ཡང་ངོ༌། །དགེ་སློང་རྫུ་འཕྲུལ་ཤེས་པའམ་སྨན་གྱི་ཆོ་ག་ཞིག་གིས་ཕྱུགས་སམ་གཞན་ཞིག་ཏུ་འཕྲུལ་ཏེ་མི་ཚངས་པར་སྤྱོད་ན་སྤྱོད་པའི་ཚེ་དགེ་སློང་ལས་བསྲུང་བ་འཕྲུལ་བར་ཤེས་བཞིན་དུ་མི་ཚངས་པར་སྤྱད་ན་ཕམ་པར་འགྱུར་རོ། །མ་ཐོབ་ན་འབྲིའོ། །དགེ་སློང་ལས་ཕྱུགས་སམ་གཞན་དུ་འཕྲུལ་ཏེ་མི་ཚངས་པར་སྤྱོད་པའི་ཚེ་དགེ་སློང་ལས་འཕྲུལ་པ་འཕྲུལ་པར་མི་ཤེས་ན་སྦོམ་པོ། །སྔོན་གྱི་རིམ་གྱིས་སྦྱར་ན་ཡང་ངོ༌། །ཁྱིམ་པའི་ཚིག་གཞན་ཞིག་ལ་བཅོལ་ཏེ་རྐུར་བཅུག་ནས་དེས་ནོར་བླངས་བ་དང་རབ་ཏུ་འབྱུང་བ་དང་དུས་མཉམ་པ་ཞིག་ཏུ་གྱུར་ན་དེ་ཚུན་ཆད་ནི་ཉེས་བྱས་ཡང་བར་འགྱུར་རོ། །ནོར་བླངས་པ་དེས་ཁྱེར་ཏེ་འོངས་ནས་དགེ་སྦྱོང་རབ་ཏུ་བྱུང་བ་དེས་བླངས་ན་ཉེས་བྱས་ལྕི་བ། དགེ་སྦྱོང་གི་ཚེ་ནོར་ཞིག་རྐུར་བཏང་སྟེ་རྐུན་པོ་དེས་ནོར་བླངས་པ་དང་དགེ་སྦྱོང་དེས་བསྙེན་པར་རྫོགས་པའི་ཚེ་དུས་མཉམ་པ་ཞིག་ཏུ་གྱུར་ན་དེ་ཚུན་ཆད་ནི་སྦོམ་པོའོ། །ནོར་རྐུར་བཅུག་པ་དེས་ནོར་ཁྱེར་ཏེ་འོངས་ཏེ་བསྙེན་པར་རྫོགས་པ་དེས་ནོར་དེ་བླངས་ན་ཕམ་པའོ། །དེ་བཞིན་དུ་ཕ་རོལ་
ལའོ། །དགེ་སློང་ཞིག་གིས་མི་གཞན་ཞིག་ནོར་རྐུར་བཅུག་པ་ལས་དགེ་སྦྱོང་སླར་ཁྱིམ་པར་བབས་པ་ན། དགེ་སྦྱོང་བྱེད་པའི་ཚེ་རྐུར་བཏང་བས་ནི་ཉེས་བྱས་ཡང་བ་གཅིག་ཡོད་ཀྱི་ཕྱིས་ཁྱིམ་པར་བབས་པའི་ཚེ་ཉེས་བྱས་ཡོད་པར་མི་བརྩི། དགེ་སློང་ཞིག་གིས་ནོར་རྐུར་བཏང་བ་ལས་དགེ་སློང་དེ་དགེ་སྦྱོང་དུ་བབས་ན་རྐུར་བཏང་བའི་ཚེ་ནི་སྦོམ་པོ། དགེ་སྦྱོང་དུ་བབས་པའི་ཚེ་ནོར་བླངས་ཀྱང་ཉེས་བྱས། དགེ་སྦྱོང་ཡང་མ་བྱས་པར་ཁྱིམ་བར་བབས་པ་ནི་ཉེས་བྱས་ཀྱང་མེད་དོ། །རྫས་ཀྱང་བཅད་པའོ། །སྲིན་བུ་འབའ་ཞིག་ལ་སྟན་སར་པ་བྱས་ན་ལྟུང་བར་འགྱུར་བ་བཞིན་དུ་དར་རམ་མེན་ཏྲི་འབའ་ཞིག་ལས་བྱས་པའི་སྟན་ཀྱང་ལྟུང་བར་འགྱུར། བལ་ནག་པོ་འབའ་ཞིག་ལས་སྟན་བྱེད་པའི་འང་ཕྱེད་སྲིན་བལ་བཟང་པོ་ལྟ་བུ་དང་བསྲེས་ཏེ་བྱས་ནའང་ལྟུང་བའོ། །མཚུངས་པ་ཡང་ངོ༌། །སྲིན་བལ་དང་དར་བཞིན་དུ་དེ་དང་འདྲ་བ་ཁ་ཆེ་དར་དང་དུ་གུ་ལ་དང་སེ་བོ་དར་གྱི་རྒྱུ་ལ་སོགས་པ་སྲིན་བལ་དང་འདྲ་བ་ཀུན་གང་ལས་བྱས་ཀྱང་ལྟུང་བར་འགྱུར་རོ། །མཚན་འཕོས་ན་ཡང་གང་གི་ཞིང་གིས་སོ། །དགེ་སློང་གི་ཕས་ཕམ་པ་བཞི་ལ་གང་ཡང་རུང་བྱེད་བའི་ཚེ་མཚན་གྱུར་ཀྱང་ཕམ་པར་འགྱུར་རོ། །དགེ་སློང་མས་ཀྱང་མཐུན་པའི་ཕས་ཕམ་པ་བཞི་ལས་གང་སྤྱད་ཀྱང་རུང་སྤྱོད་པའི་ཚེ་མཚན་འཕོས་ན་ཕམ་པར་འགྱུར་རོ། །མོའི་གནད་པའི་ཕས་ཕམ་པ་ནི་དགེ་སློང་མ་གནད་པའི་ཚེ་མཚན་གྱུར་ན་ཕམ་པ་ཡིན་ཏེ་སྦོམ་པོའོ། །དགེ་སློང་ཁུ་བ་འབྱིན་པའི་འཕྲོ་ལས་མོ་མཚན་དུ་གྱུར་པ་ནི་ཕོའི་ལྷག་མ་ཡིན་ཏེ་མོའི་ལྟུང་བར་བརྩིའོ། །འབྲི་བའི་ཕྱིར་ན་དེའི་སྦྱོར་བས་སོ། །དགེ་སློང་ཕ་གཉིས་མཐང་སྤྲད་དེ་ཉལ་ན་ཉེས་བྱས་ཡིན་ན་མཐང་སྤྲད་པ་ཅི་ཉལ་བའི་ཚེ་གཉིས་ཀ་མོར་གྱུར་ན་ཉེས་བྱས་སོ། །དགེ་སློང་མ་གཉིས་མཐང་སྤྲད་དེ་ཉལ་ན་ལྟུང་བ་ཡིན་ཏེ་མཚན་གྱུར་ཀྱང་ལྟུང་བའོ། །ལྟུང་བ་དང་ཉེས་བྱས། བྱས་པ་ནི་དེ་བཞིན་ནོ། །མདོ་ལྟག་མའི་ལྟག་མ་ལ་འཆད་དེ། དགེ་སློང་ཁུ་བ་འབྱིན་པ་ལ་ཆུང་ཞིག་གིས་མོ་མཚན་དུ་མ་གྱུར་གྱི་བར་དུ་མོར་གྱུར་པའི་ཕྱིར་ཕོའི་ལྷག་མ་མི་བརྩིའོ། །མོའི་ལྟུང་བར་བརྩིའོ། །དགེ་སློང་མ་གློས་ཕབ་
སྟེ་ཉལ་བའང་ཆུང་ཞིག་གིས་ཕོ་མཚན་དུ་མ་གྱུར་ཀྱང་ཕོར་གྱུར་པའི་ཕྱིར་མོའི་ཕམ་པར་མི་བརྩིའི་ཕོའི་སྦོམ་པོའོ་ཞེས་ཊཱི་ཀ་ལས་འཆད་དེ། འདུལ་བ་འཛིན་པ་ཁ་ཅིག་ན་རེ་གནང་བའི་ཚེ་ཉིད་ཕམ་པ་ཡིན་པས་ཕྱིས་ཕོར་གྱུར་པ་བས་ལྷར་འགྱུར་ཀྱང་མི་ཕན་ཏེ་སྦོམ་པོ་མ་ཡིན་ཏེ་ཕམ་པའོ། །ཁུ་བ་འབྱིན་པ་ཡང་འཕགས་པའི་ཚེ་ལྷག་མར་གྱུར་པ་ཡིན་པས་ཕྱིས་མོར་འགྱུར་བ་མི་བརྩན་ཏེ་ལྟུང་བ་མ་ཡིན་ཏེ་ལྷག་མའོ། །འབྲི་ཡང་བདག་གིའོ། །དགེ་སློང་མས་མོ་མཚན་དུ་རྒྱ་སྐྱེགས་བཅུག་པ་དང་ཁུ་བ་ཕྱུང་བ་ལ་སོགས་པའི་ཚེ་ཕོ་མཚན་དུ་གྱུར་པ་ནི་མཚན་གྱུར་ཏེ་ཕོ་མཚན་ནས་ཁུ་བ་ཕྱུང་བ་ཡང་མཚན་གྱུར་པ་མི་བརྩན་ཏེ་ལྟུང་བར་ཟད་དོ། །ཞག་བཅུ་ལས་ཉུང་བ་ཡང་ཆའིའོ། །དགེ་སློང་ཕའི་ལྷུང་བཟེད་ཞག་བཅུ་འདས་ཏེ་སྔགས་ཀྱིས་མ་ཐེབས་ན་ལྟུང་བ་ཡིན་པ་ལས་ཞག་བརྒྱད་དགུ་ཞིག་ལོན་ཏེ་སྔགས་ཀྱིས་མ་ཐེབས་པར་མོ་མཚན་དུ་གྱུར་ན་སྔར་ཞག་དགུ་འདས་པ་མི་བརྩིའོ། །ནམ་མཚན་གྱུར་པ་ནས་ཞག་གཉིས་འདས་ན་མོའི་ལྟུང་བར་འགྱུར་བར་བརྩི། དགེ་སློང་མའང་མཚན་གྱུར་ནས་ཞག་གཉིས་མི་བརྩིའི། མཚན་གྱུར་པ་ཚུན་ཆད་ཕོའི་ཐང་དུ་ཞག་བཅུར་བརྩིའོ། །ཞིང་མ་ཡིན་པར་འཇིག་གོ །དགེ་སློང་མ་ཕོ་མཚན་དུ་གྱུར་ན་དགེ་སློང་གི་ཁྲིམས་ཉིས་བརྒྱ་ལྔ་བཅུ་རྩ་གསུམ་ནི་བསྲུང་གི་ཉིས་བརྒྱ་ལྔ་བཅུ་རྩ་གསུམ་ལས་མ་གཏོགས་པ་དགེ་སློང་མའི་ཁྲིམས་བླ་ཐབས་སུ་ཡོད་པ་བརླ་སྣང་བར་ཤམ་ཐབས་མི་བགོ་བ་དང༌། འདོད་ཆགས་དང་བཅས་ཏེ་གྲོང་དུ་མི་འགྲོ་བ་ལ་སོགས་པ་ནི་མ་བསྲུངས་ཀྱང་ཉེས་མེད་དོ། །བཅབས་པའི་ཉེས་ནི་དེར་མ་ཡིན་པ་མ་ཡིན་ནོ། །དགེ་སློང་མ་དགེ་འདུན་ལྷག་མ་བྱུང་སྟེ་བཅབས་པ་ཡོད་བཞིན་དུ་ཕོ་མཚན་དུ་གྱུར་པ་ནི་བཅབས་པའི་ཆད་པ་བྱ་མི་དགོས་ཀྱི་ཕོའི་ཐང་དུ་ཞག་དྲུག་མགུ་བ་བྱས་པས་ཆོག་གོ །དགེ་སློང་ཕོ་ལྷག་མ་བྱུང་སྟེ་བཅབས་པ་ཡོད་བཞིན་དུ་མོ་མཚན་དུ་གྱུར་ན་བཅབས་པའི་ཆད་པ་དགོས་ཀྱི་མོའི་ཐང་དུ་ཟླ་བ་ཕྱེད་མགུ་བ་བྱས་པས་ཆོག་གོ །ཆད་པ་བཅད་པ་ཡང་འབྲས་བུ་མེད་དོ། །དགེ་སློང་ཕོ་ཞིག་ལྷག་མ་བྱུང་ནས་མགུ་བ་བྱེད་དེ་ཞག་གཅིག་མ་འཁོར་བར་མཚན་གྱུར་ན་སྔར་མགུ་
བ་བྱས་པ་མི་བརྩན་ཏེ། དགེ་སློང་མའི་ཐད་དུ་མགུ་བ་ཞག་བཅོ་ལྔ་མགོ་ནས་བཟུང་སྟེ་བྱ་དགོས་སོ། །དགེ་སློང་མོ་ཞིག་ལྷག་མ་བྱུང་སྟེ་མགུ་བ་ཞག་བཅོ་ལྔ་ལ་ཞག་གཅིག་མ་འཁོར་བར་ཕོ་མཚན་དུ་གྱུར་ན་སྔ་མ་བྱས་པ་མི་བརྩན་ཏེ་དགེ་སློང་ཕོའི་ཐད་དུ་མགུ་པ་ཞག་དྲུག་མགོ་ནས་བཟུང་སྟེ་བྱའོ། །དེར་ཚུལ་ཡང་འཕོས་སོ། །མཚན་གྱུར་བའི་ཚེ་ལྟུང་བ་དང་མི་ལྟུང་བ་ལ་སོགས་པ་ནི་ལྟག་ཏུ་བཤད་པ་རྣམས་ཡིན་མཚན་གྱུར་ཟིན་ནས་ནི་ཕོར་གྱུར་ནའང་ཕོའི་ཁྲིམས་ཉིས་བརྒྱ་ལྔ་བཅུ་རྩ་གསུམ་བསྲུང་ངོ༌། །མོར་གྱུར་ན་མོའི་ཁྲིམས་སུམ་བརྒྱ་དྲུག་ཅུ་རྩ་བཞི་བསྲུང་ངོ༌། །དེའི་ཚེ་བདག་གིས་བྱེད་དོ། །དགེ་སློང་བསམ་གཏན་དུ་ཞུགས་ཏེ་དེའི་ཆེ་ན་དགྲ་བཅོམ་པར་འགྱུར་བ་ཞིག་བསད་ནའང་ཕས་ཕམ་པ་དང་མཚམས་མེད་པ་གཉིས་ཡོད་དོ། །དེའི་ཚེ་ཉིད་ནི་དགྲ་བཅོམ་པར་མ་གྱུར་གྱི་ཕྱིས་རིང་པོ་མི་ཐོགས་པར་དགྲ་བཅོམ་པར་འགྱུར་བ་ཞིག་ལ་གསད་པའི་ཕྱིར་མཚོན་གྱིས་བཏབ་ན་འཕྲལ་དུ་ནི་མ་ཤིའི་ཕྱིས་དགྲ་བཅོམ་པར་གྱུར་ཏེ་ཤི་ཡང་བས་ཕམ་པར་ཟད་དེ་མཚམས་མེད་པར་མི་འགྱུར་རོ། །གཞན་ལས་སྐྱེས་པའང་བདག་གི་རྒྱུད་མ་ཡིན་པ་མ་ཡིན་ནོ། །རྒྱལ་པོ་ཨ་ཤྭ་ཀ་ལ་ཚང་པ་ཞིག་གིས་ས་མུ་དྲའི་ཕ་རོལ་གྱི་བྲག་གི་དྲུང་ན་སྒོ་ང་ཆེ་བ་ལ་བཟང་བ་གཉིས་ཤིག་རྙེད་དེ་ཕུལ་ནས་སྒོ་ང་དེ་ཚོང་བྱས་ཏེ་བཞག་པ་ལས་སྒོ་དའི་ནད་ནས་མི་གཉིས་ཤིག་བྱུང་སྟེ་དེ་གཉིས་བསྙེན་པར་རྫོགས་པར་གྱུར་ཏེ་དེ་ལྟ་བུ་ཕ་མ་མི་མ་ཡིན་པ་བྱོལ་སོང་ལས་སྐྱེས་པ་བསད་ནའང་ཕས་ཕམ་པར་འགྱུར་རོ། །རྒྱུད་གཞན་ལྟ་བུ་སྤྱོད་པ་བསད་ན་ཡང་ངོ༌། །དགེ་སློང་ལས་ར་ལུག་གམ་གཞན་གྱི་གཟུགས་སུ་སྔགས་སམ་སྨན་གཅིག་གིས་སྤྲུལ་ཅིང་འདུག་པ་ལ་མིར་མི་ཤེས་བཞིན་དུ་བསད་ཀྱང་གསོད་པའི་ཚེ་ཉེས་བྱས། ཤ་ནི་ཕམ་པར་འགྱུར། མིར་ཤེས་ཏེ་བསད་ན་ཉེས་བྱས་དང་སྦོམ་པོ་དང་ཕམ་པ་གསུམ་ཆར་ཡོད་དོ། །གནས་གཞན་དུ་གྲུབ་ན་གཞན་མ་ཡིན་ནོ། །དགེ་སློང་ཕོ་མོ་དང་དགེ་སྦྱོང་མ་ཡིན་ཕོ་མོ་དང་དགེ་སློབ་མ་དང་ཁྱིམ་པ་ལ་སོགས་པ་གང་བསད་ཀྱང་ཕམ། བྱིས་པ་དང་རྒན་པོ་དང་མདའ་ན་འདུག་པ་དང་གཞོན་ནུ་
དང་འདི་རྣམས་ལས་གང་བསད་ཀྱང་ཕམ་པར་འགྱུར་རོ། །དེའི་ཉེས་པ་མེད་པར་ཞུགས་ནས་བཅད་པའོ། །ལྷག་མར་འགྱུར་བའི་ཁང་པ་ཞིག་བརྩིག་བརྩིག་པ་ལས་དགེ་སློང་དེ་ཁྱིམ་པར་ཞུགས་ནས་བརྩམས་པའི་ཉེས་པ་ཅི་ཡོད་དུ་ཟད་དེ་ཉེས་པ་གཞན་ཡོད་པར་མི་བརྩི་སྟེ་སླར་དགེ་སློང་དུ་ཞུགས་ཏེ་ཁང་པ་དེ་བརྩིགས་ན་ཡང་ཐོག་མ་བརྩམས་པ་ཚུན་ཆད་ཀྱི་ཉེས་བྱས་བརྩིས་ཏེ་བསྡུས་ནས་ལྷག་མར་མི་འགྱུར་གྱི་ཕྱིར་ནམ་ཞུགས་ནས་འཕྲོ་ལས་བརྩིགས་བའི་ཉེས་པ་ཅི་ཡོད་པ་ལ་ལོགས་ཤིག་ཏུ་བརྩིའོ། །གདིང་བ་ཞིག་བྱ་བར་བརྩམས་པ་ལས་སླར་ཁྲིམས་ཕུལ་བ་ཡང་དེ་དང་འདྲའོ། །བཏང་ཡང་ངོ༌། །ཁང་པ་དང་གདིང་བ་བྱེད་བྱེད་པ་ལས་འཕྲོ་བོར་ཏེ་བཏང་ན་ཡང་སྔ་མ་ཅི་ཙམ་ཟིན་པ་ཕན་ཆད་ཀྱི་ཉེས་བྱས་ནི་ཡོད་དོ། །བཏང་བ་ཚུན་ཆད་ཀྱི་ཉེས་བྱས་ནི་མི་བརྩིའོ། །དུ་མ་དངོས་པོ་གཅིག་ལས་བཅས་པ་ཇི་སྙེད་པར་བྱས་པའོ། །རིགས་ངན་ཀོ་ལོང་འདི་ཞེས་སྨྲས་ན་སྐྱོན་གྱི་ལྟུང་བ་ཡང་གཉིས་ཡོད། བརྫུན་གྱི་ལྟུང་བ་ཡང་གཉིས་ཡོད་པ་དང་ཡང་གཅིག་ཏུ་ན་ཕྱི་དྲོ་ཟན་ཟ་ཞིང་འདུག་པ་ལ་ཅི་བྱེད་ཅེས་འདྲ་ནི་ཅང་མི་བྱེད་ཅེས་སྨྲ་བ་ལ་ཕྱི་དྲོ་ཟན་ཟོས་པའི་ལྟུང་བ་གཅིག །བརྫུན་གྱི་ལྟུང་བ་གཅིག་དང་གཉིས་ཡོད། མེ་མར་གྱི་འོད་ལ་རབ་ཏུ་མ་རྫོགས་པའི་བུད་མེད་དང་ཉལ་བ་ལ་མེ་མར་གྱི་འོད་ལ་ཉལ་བའི་ཉེས་བྱས་གཅིག་དང་བུད་མེད་དང་ཉལ་བའི་ལྟུང་བ་གཅིག་དང་རབ་ཏུ་མ་རྫོགས་པ་དང་ཉལ་བའི་ལྟུང་བ་གཅིག་ཡོད་པ་བཞིན་དུ་ཉེས་བྱས་གཅིག །བྱུང་བ་ལས་ལྟུང་བ་དང་ཉེས་བྱས་མང་དུ་ཡོད་པར་རིག་པར་བྱའོ། །དེ་ཆད་པ་དེར་ཆུད་དོ། །ཕས་ཕམ་པ་བཞི་ནི་དཔེར་རྒྱལ་པོ་དང་འདྲ་སྟེ་རྒྱལ་པོའི་ས་རིས་སུ་གཏོགས་པའི་འབངས་ཐམས་ཅད་རྒྱལ་པོའི་འཁོར་དུ་ཆུད་རིས་སུ་གཏོགས་ཏེ། དེ་བཞིན་དུ་ཕས་ཕམ་པ་ཡང་སོ་སོའི་འཁོར་དུ་ལྷག་མ་དང་ལྟུང་བ་དང་ཉེས་བྱས་ཡན་ཆད་ཆ་འདྲ་བ་རྣམས་གཏོགས་ཤིང་ཆུད་དེ་ཐམས་ཅད་ཕས་ཕམ་པའི་སྡེར་འདྲ་འདྲར་བསྡུའོ། །མི་ཚངས་པར་སྤྱོད་པའི་ནང་དུ་བུད་མེད་དང་ཞག་ཏུ་ཉལ་བ་དང་དགེ་སློང་མ་ལ་མ་བསྒོས་པར་ཉི་མ་ནུབ་ཏུ་ཆོས་འཆད་པ་དང་དབེན་པ་ན་འགྲེང་
པ་དང་འདུག་པ་དང་བུད་མེད་ལ་འཆད་པ་དང་བུད་མེད་ལམ་གྲོགས་སུ་ཁྲིད་པ་ལ་སོགས་པ་ལྟུང་བ་དང༌། ཉེས་བྱས་ཀྱི་ནང་ནས་བུད་མེད་ལས་ཉེས་པར་འགྱུར་ཞིང་མི་ཚངས་པའི་ཆར་གཏོགས་པ་ཐམས་ཅད་མི་ཚངས་པའི་ཕས་ཕམ་པའི་ནང་དུ་བསྡུའོ།། བྱིན་ལེན་མ་བྱས་པ་དང་གཉེན་མ་ཡིན་པ་ལ་ཟས་དང་གོས་སློང་བ་དང༌། མ་བོས་པར་ཆོས་སྟོན་ལ་སོང་བ་ལ་སོགས་པ་རྐུ་བ་དང་ཆ་འདྲ་ཞིང་ཐུག་ཐུབ་ཏུ་བྱེད་དོ་ཅོག་མ་བྱིན་པར་ལེན་པའི་ཕས་ཕམ་པའི་ནང་དུ་བསྡུའོ། །དགེ་སློང་ལ་བརྡེག་པ་དང་གཟས་པ་དང་གནོད་པར་བྱེད་དོ་ཅོག་ལྟུང་བ་སྡེ་བཞིའི་ནང་ནས་གསོད་པའི་ཆར་གཏོགས་ཤིང་འདྲ་བ་འབྱུང་ངོ་ཅོག་སྲོག་གཅོད་པའི་ནང་དུ་བསྡུའོ། །སྐྱོན་ནས་འབོད་པ་དང་ཤེས་བཞིན་གྱི་ལྟུང་བ་ལ་སོགས་པ་སྨྲས་པའི་ཚིག་ལ་ཉེས་པར་འགྱུར་རོ་ཅོག་བརྫུན་གྱི་ཆར་གཏོགས་ཤིང་འདྲ་བ་ཀུན་བླ་མ་མིའི་ཆོས་སུ་སྨྲ་བའི་ནང་དུ་བསྡུའོ། །ཐམས་ཅད་དུ་ཕྱུང་བ་ནི་མཐའ་མ་མ་ཡིན་ན་དགེ་འདུན་གྱི་ལྷག་མའོ། །སྐྱེས་པའི་སྒོ་གཉིས་དང་བུད་མེད་ཀྱི་སྒོ་གསུམ་དུ་མི་ཚངས་པར་སྤྱད་དེ་ཁུ་བ་མ་ཕྱུང་ཡང་ཕམ་པའོ། །བུད་མེད་ཆུང་དུ་མི་ཚངས་པར་སྤྱད་དུ་མི་བཟོད་པ་ལ་མི་ཚངས་པར་སྤྱད་དེ་ཁུ་བ་བྱུང་ཡང་སྦོམ་པོའོ། །དེ་བཞིན་དུ་ཁ་དང་རྐུབ་ཀྱི་སྒོར་བྱས་ཏེ་གྲུབ་ཀྱང་སྦོམ་པོའོ། །སྟེང་ཆུང་ཞིང་བྱིས་པ་ཡིན་པས་དགའ་བའི་ཤས་ཆུང་བའི་ཕྱིར་རོ། །མགོ་བཅད་པའི་ཁ་དང་སྒོ་གསུམ་ཉམས་པ་དང་ཕག་བཅོས་པ་མི་ཚངས་པར་སྤྱད་པ་ནི་སྦོམ་པོའོ། །སྒོ་གསུམ་ཉམས་པ་ལ་བྱས་པ་ལ་སོགས་པ་ནི་ཕམ་པའོ། །སྒོ་གསུམ་ཉམས་པར་བྱས་ཏེ་ཁུ་བ་ཕྱུང་བ་ནི་ལྷག་མ་གཅིག་དང་ལྷག་མའི་སྔོམ་པོ་གཅིག་དང་ཉེས་བྱས་ཀྱང་ཡོད་དོ། །བྱས་པ་དུ་མའི་འབྲས་བུ་ལྟུང་བར་མི་གཞག་གོ །གསེར་ཕྱེ་འམ་པ་ནེའམ་དོང་ཙེའམ་འགྲོན་བུའམ་ནས་འབྲས་ལ་སོགས་པ་ཕུང་པོར་འདུག་པ་ལ་སྔ་ཕྱིར་ཚག་བུར་བླངས་ཤིང་རྐུ་ན་ཅི་ཙམ་ཐོབ་ཀྱང་རུང་ཕུང་བོ་མ་ཟད་ཀྱི་བར་དུ་རིན་ཐང་མ་ཚང་ན་ཕམ་པར་མི་འགྱུར་རོ། །དགེ་སློང་ལམ་དུ་ཞུགས་ཏེ་བལ་རྙེད་པའི་ལྟུང་བ་ཡང་ཞྭ་དང་ལྕག་ཕོད་ལ་སོགས་པའི་
རྒྱུ་ཙམ་སྔ་ཕྱིར་ལན་མང་དུ་བསྐྱས། དེ་ཁྱེར་བ་ནི་བསྐྱས་བ་རྫོགས་ནས་བལ་ཅི་ཙམ་ཐོབ་ཀྱང་སྔ་ཕྱིར་བསྐྱས་པས་ལྟུང་བར་མི་འགྱུར་རོ། །ཁྱིམ་པ་དད་པས་ཟན་བྱིན་ཏེ། ལྷུང་བཟེད་གསུམ་ལས་ལྷག་ན་ལྟུང་བ་ཡང་སྔ་ཕྱིར་ལྷུང་བཟེད་རེ་རེ་ནས་བསྐྱས་ན་ལྷུང་བཟེད་དུ་ཐོབ་ཀྱང་ལྟུང་བར་མི་འགྱུར་རོ། །ཕྱེད་བྱས་ན་ཕྱེད་བྱེད་པའོ། །གདིང་བ་གསར་དུ་བྱས་རྐྱེད་ཆད་དུ་བཏང་ན་ལྟུང་བ་ཕྱེད་དེ་ཉེས་བྱས་སོ། །གོས་བྱིན་ཏེ་སླར་ཕྲོགས་པ་ཡང་ལག་པས་བཟུང་སྟེ་ཕྲོགས་པ་ལས་སླར་བཏང་ན་ཉེས་བྱས། དེ་བཞིན་དུ་གཉེན་མ་ཡིན་པ་ལ་གོས་འཁྲུ་བ་དང་བརྫུན་དུ་སྨྲ་བ་དང་གོས་འཐག་ཏུ་བཅོལ་བ་ལ་སོགས་པ་ཀུན་རངས་པར་མ་བྱས་ཀྱི་ཕྱེད་ཙམ་ནས་རྐྱེད་ཆད་དུ་བཏང་བ་ནི་ཉེས་བྱས། ཁ་ན་མ་ཐོ་བ་འབྲི་བའི་ཆ་ལས་ན་འབྲིའོ། །ལྟག་ཏུ་ཕས་ཕམ་པ་དང་དགེ་འདུན་གྱི་ལྷག་མ་ལ་སྐུར་ནས་ལྷག་མ་དང་ལྟུང་བའོ་ཞེས་དམིགས་བསྟན་པ་ཡིན་ན་ལྟུང་བར་འགྱུར་བ་ཞིག་ལས་སྐུར་ན་ཉེས་བྱས། ཉེས་བྱས་ལས་སྐུར་ན་ཉེས་བྱས་ཡང་བའོ། །ཐམས་ཅད་དུ་ཐེ་ཚོམ་དུ་ཞུགས་ན་བསམས་པའོ། །བདག་གི་དགྲ་ཞིག་གསད་པར་སོང་སོང་བ་ལས་བདག་གི་པ་དང་གཉིས་གོས་འདྲ་བའི་ཕྱིར་ཐེ་ཚོམ་ཟོས་ནས་གང་ཡིན་གཏོལ་མེད་པར་བསད་ན་ཕ་ཡིན་པར་གྱུར་ན་ནི་མ་ཚམས་མེད་པ་དང་ཕམ་པ་གཉིས་ཀ་ཡོད་དོ། །དགྲ་བོ་ཡིན་ན་ཕམ་པར་ཟད་དོ། །མི་གསོད་དུ་སོང་སོང་བ་ལས་མུན་པའི་ཁྲོད་ལྟ་བུ་ན་ཕྱུགས་སམ་མི་ཡིན་དུ་གཏོལ་མེད་དེ་ཐེ་ཚོམ་ཟ་བཞིན་དུ་བསད་ན་མི་ཡིན་ན་ནི་གསོད་པར་སྦྱོར་བའི་ཚེ་ཉེས་བྱས། བསད་ན་ཕམ་པའོ། །ཕྱུགས་ཡིན་ན་ནི་གསོད་པར་སྦྱོར་བའི་ཚེ་ཉེས་བྱས་སྦོམ་པོ་གསོད་པས་ན་ལྟུང་བའོ། །འདུ་ཤེས་ཀྱིས་ན་སྦྱོར་བའི་ཡན་ལག་གོ །ཕྱུགས་ཡིན་པར་ཤེས་ཏེ་བསད་པ་ལས་མི་ཡིན་པར་གྱུར་ན་སྦྱོར་བའི་ཚེ་ལྟུང་བའི་ཉེས་བྱས། བསད་པས་ནི་ཕམ་པའོ། །མི་ཡིན་པར་བསམས་ཏེ་བསད་པ་ལས་ཕྱུགས་ཡིན་པར་གྱུར་ན་གསོད་པར་སྦྱོར་བའི་ཚེ་ཕམ་པའི་ཉེས་བྱས་དང་སྦོམ་པོ་ཡོད་དོ། །བྱོལ་སོང་ཡིན་པས་བསད་པ་ནི་ལྟུང་བའོ། །བསམ་པ་དེ་ལས་སོ། །ཕྱུགས་ལ་བསད་པའི་ཕྱིར་མདའ་འཕངས་པ་ལས་དི་ལ་མ་ཕོག་སྟེ་
མི་ཞིག་ལ་ཕོག་སྟེ་ཤི་བ་ནི་བྱོལ་སོང་བསད་པར་སྦྱར་བས་ཉེས་བྱས། མི་ཤི་བ་ནི་ཉེས་མེད་དོ། །དགེ་སློང་གཞོན་ནུ་ཞིག་གིས་ཕ་རྒན་པོ་འགྲོ་མི་ཕོད་པ་ལ་གསོད་སེམས་མེད་ཀྱི་མྱུར་དུ་ཕྱིན་པར་བྱ་བའི་ཕྱིར་ལེགས་པར་བསམས་ཏེ་ཕུལ་ཞིང་ཁྲིད་པ་ལས་བུབ་སྟེ་ཤི་བ་ནི་ཕའི་གླད་པ་ལ་སྦྲང་མ་ཟ་བ་ལ་བུས་སྐྲོད་པ་དང་སྦྲང་མ་འགྲོར་མ་རུང་སྟེ་ཚིག་པ་ཟོས་ནས་སྦྲང་མ་ལ་བརྡེག་པའི་ཕྱིར་བེར་ག་གཅིག་བསྣུན་པ་དང་ཕ་གླད་པ་གས་ཏེ་ཤི་བའི་ཚེ་སྔ་མའི་ལན་དུ་ལྟག་མ་ལྟར་ཕ་ཤི་བའི་འབྲས་བུར་སྨིན་པ་ཡིན་ཏེ་གསོད་སེམས་མེད་པས་ཕས་ཕམ་པའི་ཉེས་པ་མེད་དོ། །མི་ཚངས་པར་སྤྱོད་པ་དང་ཁུ་བ་ཕྱུང་བ་ཡང་མ་ཡིན་ནོ། །མི་ཚངས་པར་སྤྱད་པའི་ཕྱིར་བུད་མེད་དང་དུས་བྱས་ནས་མི་ཚངས་པར་སྤྱད་པའི་ཕྱིར་ཟིན་པ་དང་བུད་མེད་དུས་བྱས་པ་མ་ཡིན་ཏེ་གཞན་ཞིག་ན་ཐོག་མ་དམིགས་པའི་བུད་མེད་མ་ཡིན་ཕས་ཕམ་པར་མི་འགྱུར་བ་མ་ཡིན་ཏེ་ཕས་ཕམ་པའོ། །མུན་པ་ཁྲོད་ན་རྟ་དང་མི་ཚངས་པར་སྤྱོད་པར་བསམས་ཏེ་སྤྱད་པ་ལས་དྲེའུ་ཞིག་ལ་མི་ཚངས་པར་སྤྱད་པར་གྱུར་ནའང་འདུ་ཤེས་མི་བརྩོན་ཏེ་ཕས་ཕམ་པའོ། །མཆན་ཁུང་དུ་ཁུ་བ་དབྱུང་བར་བསམས་ཏེ་བྱས་པ་ལས་ཟིན་པའི་འོག་ཏུ་བརླ་ལ་སོགས་པ་གཞན་ཞིག་ཏུ་ཕྱུང་བར་གྱུར་ན་འདུ་ཤེས་མི་བརྩན་ཏེ་ལྷག་མར་འགྱུར། མི་བདེན་པ་ཉན་པ་ཡང་ངོ༌། །བླ་མ་མིའི་ཆོས་མི་དེ་ལ་སྨྲའོ་ཞེས་བསྔོས་ཏེ་སྨྲས་པ་ལས་མི་གཞན་ཞིག་ལ་སྨྲས་ན་ཡང་ཕམ་པར་འགྱུར་རོ། །ཁྲིམས་དབུལ་བ་ཡང་མི་འདི་ལ་ཁྲིམས་དབུལ་ལོ་ཞེས་བསྔོས་ཏེ་སྨྲ་བར་བསམས་པ་ལས་གཞན་ཞིག་ལས་ཁྲིམས་དབུལ་ལོ་ཞེས་བྱས་ན་སྔར་དམིགས་པ་མི་བརྩན་ཏེ་ཕུལ་བར་འགྱུར་རོ། །ཡན་ལག་ཐམས་ཅད་དུ་བཟུང་བར་འགྲོར་རུང་ན་བསྙེན་ནུས་པའོ། །དགེ་སློང་གིས་མི་ཚངས་པར་སྤྱད་པ་ལས་ཕ་རོལ་པོ་དང་འཕགས་བར་ཆེ་ཆུང་ཁྱེར་ཏེ་ལུས་དང་མཚན་ཚུན་ཆད་དུ་མི་མཐུན་ཞིང་མི་འབྱོར་པ་ཞིག་ཡིན་ན་ཕམ་པར་མི་འགྱུར་རོ། །འབྲི་བ་ནི་ཚུན་ཆད་པ་གཞན་ནོ། །འོག་ནས་འབྱུང་བའི་འདི་མན་ཆད་ནི་ཉེས་པ་འབྲི་བར་འགྱུར་ཏེ་བུད་མེད་རྔོན་ཅན་ན་མ་ཤུ་བ་ཅན་ནམ་ངན་སྐྱུགས་ཀྱིས་
བསྐུས་པ་ལ་བཟུང་ན་སྦོམ་པོར་འབྲི་བ་ལྟ་བུ་ལ་བྱའོ། །དེ་ལས་ཀྱང་དུ་མར་བྲལ་ནའོ། །བུད་མེད་ཤུ་བ་ཅན་ལ་བདག་གི་ལག་ཀྱང་ཤུ་བའམ་རྔོ་ཅན་གྱིས་བཟུང་ན་ཉེས་སོ། །མིར་ཕྱུགས་ཀྱང་ངོ༌། །ཕྱུགས་ལ་བཟུང་བ་ཡང་མཆུའམ་མོ་མཚན་ནམ་སྙིལ་ལ་སོགས་པ་སྤུ་མེད་པ་ལ་བཟུང་བ་ནི་སྦོམ་པོའོ། །སྤུ་དང་བལ་བཟུང་བ་ནི་ཉེས་བྱས་བདག་གི་ལག་པ་ཤུ་བ་ཅན་གྱིས་ཕྱུགས་ཀྱི་ཤ་ལས་བཟུང་ཡང་ཉེས་བྱས། རྫུ་འཕྲུལ་མ་ཡིན་པའི་ཆོས་རེག་པ་ལ་མ་གཏོགས་ཏེ་ཡན་ལག་གོ །འཕྲུལ་པའི་བུད་མེད་ནམ་མཁའ་ལ་འདུག་པ་ལ་སྨྱེན་ཚིག་དང་ཀུན་སྤྱོད་སྨྲས་པ་ནི་ལྷག་མར་མི་འགྱུར་ཏེ་སྦོམ་པོའོ། །བདག་ཉིད་འཕྲུལ་ཏེ་ནམ་མཁའ་ལ་འདུག་ནས་བུད་མེད་ལ་སྨྱེན་ཚིག་དང་ཀུན་སྨྲ་བ་ནི་བདག་གི་དབང་འགྱུར་བས་ལྷག་མར་འགྱུར་རོ། །ཟེད་ཟེད་པོ་མེད་པར་རེག་ན་ཡང་ངོ༌། །ལྷག་མ་རྣམས་སྦོམ་པོ་དང་ཉེས་བྱས་འབྲི་བ་ནི་ཤ་རུལ་ཅིང་ཤུ་བ་ཅན་དུ་གྱུར་པས་དགའ་བའི་ཤས་ཆུང་བའི་ཕྱིར་འབྲིའོ། །ག་ག་ཚིལ་ཡང་ངོ༌། །ག་ག་ཚིལ་བྱེད་བ་ཡང་ཕ་རོལ་གྱི་ཤ་ཤུ་བ་དང་རྔོ་ལ་སོགས་པས་བཏབ་པ་ལས་བྱས་ན་ནི་ལྟུང་བ་ལས་བྲིས་ཏེ་ཉེས་བྱས་བདག་གི་ལག་པ་རྔོ་ཅན་གྱིས་ཕ་རོལ་རྔོན་ཅན་ལ་བྱས་པ་ནི་ཉེས་བྱས་ཡང་བ། གཞན་བཞིན་དུ་སེན་མོ་དང་སོ་དང་ཤ་མེད་པའི་རུས་པ་དང་སྤུའོ། །བུད་མེད་ཀྱི་སོ་དང་སེན་མོ་དང་ཤ་ནི་མེད་ཀྱི་རུས་པ་སྣང་བ་ལ་བཟུང་བ་ནི་སྦོམ་པོའོ། །བུད་མེད་ཀྱི་སེན་མོ་དང་སོ་དང་རུས་པ་ལ་དགེ་སློང་གིའང་དེ་རྣམས་ཀྱིས་རེག་ནའང་ཉེས་བྱས་སོ། །བུད་མེད་ཀྱི་ལུས་ཀྱི་སྤུ་ལ་བཟུང་ན་སྦོམ་པོའོ། །བུད་མེད་ཀྱི་ལུས་ཀྱི་སྤུ་ལ་དགེ་སློང་གི་ལུས་ཀྱི་སྤུས་རེག་པ་ནི་ཉེས་བྱས། མི་རྒྱུད་ལ་སྤྱོད་པའོ། །ག་ག་ཚིལ་བྱེད་པ་དང་གོས་སློང་བ་དང་སྨྱེན་བྱེད་པ་དང་སྨྱེན་ཚིག་ཏུ་སྨྲ་བ་ལ་སོགས་བྱོལ་སོང་དང་འདྲེ་ལས་ལྟུང་བར་འགྱུར་གྱི་མིའི་རྒྱུད་ལས་ལྷག་མ་དང་ལྟུང་བར་འགྱུར་རོ། །རང་བཞིན་མ་སྟོར་བའོ། །སྨྱེན་ཚིག་དང་ཀུན་སྤྱོད་དང་ག་ག་ཚིལ་ལ་སོགས་པ་དང་གོས་དང་ཟས་སློང་བ་ལ་སོགས་པ་རྣམས་ནི་སྨྱོས་ཤིང་རང་བཞིན་སྟོར་པ་ལས་བྱས་པ་ནི་ཉེས་པ་འབྲི་བར་འགྱུར་རོ། །མི་ཚངས་པར་སྤྱོད་པ་དང་རྐུ་བ་དང་
ཁུ་བ་ཕྱུང་བ་འབྲི་བར་མི་འགྱུར་ཏེ་ལྷག་མ་དང་ཕམ་པར་འགྱུར་རོ། །དེ་བཞིན་དུ་མ་ནིང་དང་མཚན་གཉིས་པའོ། །མ་ནིང་དང་མཚན་གཉིས་པ་ལ་གོས་བསླངས་པ་དང་གོས་བཙོས་པ་དང་ཡན་ལག་ལས་བཟུང་བ་ལ་སོགས་པ་ཡང་འབྲི་སྟེ་སྦོམ་པོ་དང་ཉེས་བྱས་སུ་འགྱུར་རོ། །སྤྱོད་པ་བཞིན་དུ་རེག་པའོ། །བུད་མེད་ཆུས་ཁྱེར་བ་བཟུང་བ་དང༌། །བུ་མོ་འཕང་དུ་འདུག་པ་དང་སྒོར་འདོམས་ཏེ་ཕྲད་ནས་རེག་པ་ནི་སྔོན་ཁྱིམ་མི་སྤྱོད་པ་ནི་རེག་པ་བཞིན་དུ་ཉེས་མེད་དོ། །ཕྱེད་བཞིན་དུ་ཕྱི་རོལ་གྱི་རབ་ཏུ་བྱུང་བ་དང༌། མུར་འདུག་ཐལ་བ་ཅན་དང་མི་ཐོད་ཅན་ལ་སོགས་པ་ཁོ་བོ་བདག་གི་ཆོས་ལ་རབ་ཏུ་བྱུང་བ་ལ་གོས་དང་ལྷུང་བཟེད་བསླངས་སམ་གོས་འཐག་ཏུ་བཅུག་གམ་གོས་ཀྱི་རིན་བྱིན་བའི་ཕྱིར་སྤགས་ཏེ་བཞག་པ་ལ་བསྐུལ་བ་ལ་སོགས་པ་བྱས་པ་ནི་འབྲི་སྟེ་ཉེས་བྱས། ཁྱིམ་མི་བཞིན་ཏེ་མ་སྐྱེས་པ་དང་ཞིག་བའི་ཡང་ངོ༌། །ཡོ་བྱད་མ་ཚངས་པ་ལ་སོགས་པ་ཁྲིམས་མ་ཆགས་པ་དང་ཕས་ཕམ་པར་འགྱུར་ཏེ་ཁྲིམས་ཞིག་པ་ལ་ནི་ལྷུང་བཟེད་དང་གོས་བསླངས་པ་དང་འཐག་ཏུ་བཅོལ་བ་ལ་སོགས་པ་ནི་ཁྱིམ་པ་ལ་བྱས་པ་དང་འདྲ་བར་ལྟུང་བར་འགྱུར་རོ། །བསྙེན་པར་རྫོགས་པ་མ་ཞིག་པ་ནི་དགེ་སློང་ཕ་དགེ་སློང་མའོ། །དགེ་སློང་མ་ལམ་དུ་ཞུགས་པ་དང་མཚན་མོ་ཕྱི་རོལ་དུ་གྲོགས་མེད་པར་སོང་ན་ཁྲིམས་ཞིག་པར་འགྱུར་བ་ཡང་གྲོགས་ཁྲིམས་ཆགས་ཤིང་མཉམས་པར་གྲོགས་སུ་ནུས་ཀྱི་ཁྲིམས་མ་ཆགས་པའམ་ཞིག་པ་ནི་གྲོགས་སུ་མི་ཆུད་དེ་ཞིག་བར་འགྱུར་རོ། །དགེ་སློང་བས་བརྡེགས་པ་དང་གཟས་པ་དང་བསྐྲད་པ་དར་ཟན་བཅད་པ་ལ་སོགས་པ་དང་ཕ་རོལ་དགེ་སློང་ཁྲིམས་ཆགས་ཤིང་མ་ཞིག་བ་ལས་ལྟུང་བར་འགྱུར་རོ། །བདག་གི་ཕྱོགས་སུ་གཏོགས་པ་ནི་མཚན་དང་ཉེ་བར་འགྲོ་བས་སོ། །དགེ་སློང་དགེ་བ་ལ་ལྟ་ཞིང་ཕྱོགས་པའི་རྣམས་ཀྱིས་མི་དགེ་བ་ལ་ལྟ་ཞིང་ཕྱོགས་པའི་རྣམས་བསྐྲད་ཅིང་བརྟགས་པ་ནི་ལྟུང་བར་མི་འགྱུར་གྱི། དགེ་བ་ནང་བསྐྲད་ཅིང་བརྡེགས་པ་དང་མི་དགེ་བ་ནང་བསྐྲད་ཅིང་བརྡེགས་པ་ལས་ལྟུང༌། དགེ་སློང་མའང་དེ་བཞིན་དགེ་བ་རྣམས་ནང་བསྐྲད་བ་ལས་ལྟུང་བར་འགྱུར་རོ། །མཚན་མ་པ་ནི་དེར་ཆུད་དེ་ཁྱིམ་པ་ནི་མི་འབྲིའོ། །
བདག་རང་གིས་ཐུག་ཐུབ་ཏུ་བྱིག་ཤུའི་ཚུལ་དུ་མགོ་བྲེགས་ཏེ་ཞུགས་ནས་མཁན་པོ་དང་སློབ་དཔོན་མེད་པས་ཁྱིམ་པ་དང་འདྲ་བར་བལྟ་སྟེ་ཁྱིམ་པ་ལས་མི་རུང་བའི་རྣམས་ཀྱང་ཐུག་ཐུབ་ཏུ་ཞུགས་པ་ལ་བྱས་ན་ལྟུང་བ་དང་ཉེས་བྱས་ལ་སོགས་པ་སོ་སོར་དེ་བཞིན་དུ་འགྱུར་རོ། །ཁྱིམ་པར་བྱར་རུང་བའི་རྣམས་ཀྱང་དེ་བཞིན་དུ་ཐུག་ཐུབ་ཏུ་ཞུགས་པས་བྱར་རུང་ངོ༌། །འདུལ་བ་འཛིན་པ་ཁ་ཅིག་ན་རེ་ཁྱིམ་པ་དང་མི་འདྲ་སྟེ་མུར་འདུག་རབ་ཏུ་བྱུང་བ་དང་འདྲ་བར་ཉེས་བྱས་སུ་འགྱུར་རོ་ཞེས་བཤད། རབ་ཏུ་བྱུང་བའི་རྫས་བརྟགས་པར་ཚང་བཞིན་པ་ལ་སོགས་པ་ཡང་ངོ༌།། གོས་སྔགས་ཀྱིས་མ་ཐེབས་ཏེ་ཞག་འདས་ན་ལྟུང་བར་འགྱུར་བ་ནི་དགེ་སློང་གིས་གོས་སུ་བརྟགས་པ་རས་ལ་སོགས་པ་རྣམ་པ་བདུན་ལས་སྔགས་ཀྱིས་མ་ཐེབས་ན་སྤང་བའི་ལྟུང་བར་འགྱུར་རོ། །གོས་མ་བརྟགས་པ་རེའུ་དང་རྡ་མོ་ལ་སོགས་བསྔགས་ཀྱིས་མ་ཐེབས་ཏེ་ཞག་འདས་པ་ནི་སྤང་བར་མི་འགྱུར་ཏེ་ཉེས་བྱས་སོ། །གཉེན་མ་ཡིན་པའི་ཁྱིམ་པ་ལ་གོས་བླངས་པ་ཡང་བརྟགས་བ་བསླངས་པ་ལས་སྤང་བའི་ལྟུང་བར་འགྱུར་རོ། །མ་བརྟགས་པར་བསླངས་པ་ནི་ཉེས་བྱས་སོ། །ལྷུང་བཟེད་སྔགས་ཀྱིས་མ་ཐེབས་ཏེ་ཞག་འདས་པ་ན་སྤང་བའི་ལྟུང་བར་འགྱུར་བ་ཡང་ཁ་དོག་བཙོས་ཤིང་ཚད་དུ་ཕྱིན་པ་སྔགས་མ་ཐེབས་ན་སྤང་བའི་ལྟུང་བར་འགྱུར་རོ། །གཉེན་མ་ཡིན་པའི་ཁྱིམ་པ་ལས་ལྷུང་བཟེད་བཟང་པོ་ལྷག་པ་བསླངས་ན་སྤང་བར་འགྱུར་བ་ཡང་ཚད་མ་ཁ་དོག་བསྒྱུར་བ་ཐོབ་ན་སྤང་བར་འགྱུར་རོ། །བདག་གི་དོན་དེ་ལ་གཙོ་བོར་བ་ཡང་ངོ༌། །གཉེན་མ་ཡིན་པ་ལས་ལྷུང་བཟེད་དང་གོས་དང་ཟས་བསླངས་པ་ལྟུང་བར་འགྱུར་བ་ཡང་བདག་གི་ཕྱིར་བསླངས་པ་ལས་སྤང་བར་འགྱུར་རོ། །གཞན་གྱི་ཕྱིར་བསླངས་ན་ཉེས་བྱས་སུ་འགྱུར་རོ། །གསོལ་བ་ནི་དོན་ཆུད་པས་ནའོ། །གཉེན་མ་ཡིན་པ་གོས་དང་ཟས་དང་ལྷུང་བཟེད་སློང་བ་དང་ཤེས་བཞིན་གྱིས་བརྫུན་སྨྲ་བ་ལ་སོགས་པ་སྐད་མཐུན་ཞིང་བརྡ་ཕྲད་དེ་དོན་ཆུད་པའི་མི་ལ་བྱས་ན་ལྟུང་བར་འགྱུར་རོ། །བརྡ་མི་ཕྲད་པ་ལ་བྱས་པ་ནི་བརྡས་དོན་གོ་ཡང་ཉེས་བྱས་སོ། །སྨྲ་ཞིང་ཆུད་པ་སྟེ་གསོད་པ་དང་བདག་གི་ཕྱིར་བརྐུས་པ་ནི་མ་ཡིན། སྲོག་
གཅོད་པ་དང་མ་བྱིན་པར་ལེན་པ་ནི་མདོ་ལྟག་མ་ལྟར་སྐད་མི་མཐུན་ཞིང་བརྡ་མི་ཕྲད་པ་ལ་ཉེས་པར་མི་འགྱུར་བ་མ་ཡིན་གྱི་བརྡ་མི་ཕྲད་པ་ལ་བྱས་ཀྱང་ཕམ་པར་འགྱུར་རོ། །བརྡས་བསྟན་ཏེ་གོ་ནས་བྱེད་དུ་བཅུག་ན་ཕམ་པར་འགྱུར་རོ། །ཡི་དམ་བཅས་པ་ནི་དེར་མ་ཡིན། ལྐུགས་པ་དང་འོན་པ་ཁར་མ་སྨྲས་པ་སེམས་ལ་ཡི་དམ་བཅས་པ་ཡང་ཡི་དམ་དུ་འགྱུར་ཏེ་སྡིག་བྱས་པ་ཡིད་ཀྱིས་མཐོལ་ན་ཡང་ཚངས་པར་འགྱུར། སངས་རྒྱས་ལ་ཕྱག་འཚལ་བ་དང་སྐྱབས་སུ་འགྲོ་བ་དང་ཁར་སྨྲ་མ་ནུས་ཀྱང་བསོད་ནམས་སུ་འགྱུར་རོ། །འོན་པ་དང་གླེན་པ་དང་ལྐུགས་པ་གསུམ་ཆར་འདུས་པའི་མི་ནི་ཡི་དམ་བཅས་པར་མི་ཆུད་དོ། །སྣོད་དེའོ། །ཆོས་གོས་དང་ལྷུང་བཟེད་ལ་སོགས་པ་སློང་བ་དང་བརྫུན་དུ་སྨྲ་བ་ནི་ཕ་རོལ་གྱི་མི་དེ་བདག་དང་བརྡའང་ཕྲད་པ་ལ་དེས་གཞན་ལའང་སློང་ནུས་པ་ཞིག་ལ་བྱས་པ་ནི་ལྟུང་བར་འགྱུར་རོ། །གཞན་ལ་སློང་མི་ནུས་པ་ཞིག་ལ་སྨྲས་པ་ནི་ལྟུང་བར་མི་འགྱུར་ཏེ་འབྲིའོ། །ངག་གིས་སོ། །བརྫུན་དང་སྨྱེན་ཚིག་ལ་སོགས་པ་ནི་བདག་གི་ཁ་ནས་ཚིག་ཏུ་སྨྲས་པ་ལས་ལྟུང་གི་བརྡ་དང་མཚན་མས་བྱས་པ་ནི་འབྲི་སྟེ་ཉེས་བྱས་སོ། །ཁར་ཚིག་ཏུ་མ་སྨྲས་ཀྱང་ཉེས་པར་འགྱུར་བ་ཡོད་དེ། སྨྱེན་ལྟ་བུ་བརྡ་གོ་བར་ལྷག་མར་འགྱུར། ཀུན་སྤྱོད་དང་སྨྱེན་ཚིག་དང་སློང་བ་ཡང་ཁར་ཚིག་ཏུ་སྨྲས་པ་ལས་ལྷག་མ་དང་ལྟུང་བར་འགྱུར་རོ། །རང་གིས་སོ། །ཟས་དང་གོས་ལ་སོགས་པ་ནི་སློང་བ་ལ་སོགས་པ་ནི་བདག་ཉིད་ཀྱིས་བསླངས་པ་ལས་ལྟུང་བར་འགྱུར་གྱི་འཕྲིན་དང་ཡི་གེ་ལ་སོགས་པས་བྱས་པ་ནི་འབྲི་སྟེ་ཉེས་བྱས། མ་བྱིན་པར་ལེན་པ་དང་སྲོག་གཅོད་པ་ལ་སོགས་པ་ནི་བདག་ཉིད་ཀྱིས་མ་བྱས་ཀྱང་གཞན་ལ་བྱེད་དུ་བཅུག་ནའང་ཕམ་པར་འགྱུར་རོ། །བདག་གིས་བརྗོད། སྨྱེན་ཚིག་དང་ཀུན་སྤྱོད་དང་གཉེན་མ་ཡིན་པ་ལ་གོས་དང་ཟན་སློང་བ་ལ་སོགས་པ་ནི་བདག་ཉིད་ཀྱི་ཕྱིར་སྨྲས་ཤིང་བརྗོད་པ་ལས་ལྷག་མ་དང་ལྟུང་བར་འགྱུར་གྱི་གཞན་གྱི་ཕྱིར་བསླངས་ཤིང་བརྗོད་པ་ནི་འབྲི་སྟེ་ཉེས་བྱས་སོ། །བདག་གིས་བསྔོས་ན་བྱེད་པའོ། །ས་བོན་དང་རྩི་ཤིང་འཇོམས་པ་དང་མེ་འབུད་ལ་སོགས་པ་བདག་གིས་མངོན་སུམ་དུ་བྱེད་དུ་བཅུག་ན་ལྟུང༌། མངོན་
སུམ་པ་ཡིན་པར་བྱོས་ཤིག་ཅེས་བསྒོ་སྟེ་བྱེད་དུ་བཅུག་པ་ནི་ཉེས་བྱས་སོ། །རྣམ་པར་འབྱེད་པར་གཏོགས་པ་ཀུན་དུ་བཤད་པ་རྫོགས་སོ།། །།པ་རི་བ་ཤ་འདི་ལ་འདུལ་བ་དྲིས་པ་དང་དངོས་པོ་དང་ཕྲན་ཚེགས་དང་བྱེ་བྲག་ཏུ་གདོན་མི་ཟ་བ་བཞིའི་མདོ་ལས་ཀྱང་འཆད་ཅིང་ཡོད་མོད་ཀྱི་འདུལ་བ་རྣམ་པར་འབྱེད་པའི་ནང་ནས་འབྱུང་བ་མང་སྟེ། འདུལ་བ་རྣམས་པར་འབྱེད་པའི་ནང་དུ་གཏོགས་པར་བཤད་དེ་པ་རི་བ་ཤ་རྫོགས་སོ།། །།དངོས་པོ་བཅོ་བརྒྱད་ཡོད་པ་ལ་མགོར་རབ་ཏུ་འབྱུང་བ་དང་བསྙེན་པར་རྫོགས་པའི་ཆོ་ག་དང་གནས་བཅའ་བ་གསུམ་ལ་དངོས་པོ་རེ་རེར་བརྩིའོ། །དེ་ལ་གནས་པ་ནི་རབ་ཏུ་འབྱུང་བ་དང་བསྙེན་པར་རྫོགས་པ་གཉིས་ཀའི་སྤྱིར་གཏོགས་སོ། །རབ་ཏུ་བྱུང་བ་དང་བསྙེན་པར་རྫོགས་པའི་ཆོ་ག་གཉིས་ནི་འདུལ་བ་རྣམ་པར་འབྱེད་པ་ལ་སོགས་པ་གཞིའི་ནང་ནས་ཀྱང་འབྱུང་མོད་ཀྱི་འདུལ་བ་དངོས་པོའི་ནང་ནས་ཕལ་ཆེར་འབྱུང་བས་ན་གཞི་དངོས་པོའི་ནང་དུ་གཏོགས་པར་བཤད་དོ། །བསྙེན་པར་རྫོགས་པའི་ཆོ་ག་མན་ཆད་པ་རི་བ་ཤ་འདི་ཡན་ཆད་ནི་འདུལ་བ་རྣམ་པར་འབྱེད་པའི་ནང་དུ་གཏོགས་སོ། །གསོ་སྦྱོང་གི་དངོས་པོ་འདི་མན་ཆད་མཇུག་ཡན་ཆད་ནི་འདུལ་བ་དངོས་པོའི་ནང་དུ་གཏོགས་སོ། །གཞི་དེས་འཛིན་ནོ། །གསོ་སྦྱོང་གི་དངོས་པོ་ལ་འདི་མན་ཆད་འཆད་དེ། རྒྱུ་བར་ཞུགས་ན་ཐུབ་པ་མི་བསྒོམ། དགོན་པའང་མི་རུང་གྲོང་དུའང་རུང་རྒྱུ་ཞིང་འགྲོ་བའི་ཚེ་བསམ་གཏན་མི་བྱ། འདུ་བར་མ་ཡིན། ལམ་ཀ་དང་མི་མང་པོ་འདུ་བའི་ཁྲོད་དུ་བསམ་གཏན་མི་བྱ། འཁྲུག་པ་དང་གཅན་གཟན་དང་སྨྱོན་ཐབས་ཅན་སྤང་བའི་ལྟུང་བ་རིགས་སོ། །ཕལ་མོ་ཆེ་འཁྲུག་ཅིང་ཀླག་ཅོར་ཟེར་བ་དང་གཅན་གཟན་གྱིས་གཙེ་ཞིང་གནོད་པར་བྱེད་པ་དང༌། སྨྱོན་པ་དང་སྨྱོན་ཐབས་སུ་ཀུ་རེ་བྱེད་པ་ལ་སོགས་པའི་དྲུང་དུ་བསམ་གཏན་མི་བྱ། སྤང་བའི་གནས་བྱ། དགེ་འདུན་གྲོས་བྱས་ཏེ་བསམ་གཏན་གྱི་ཁང་པ་དབེན་ཞིང་ཡངས་པར་བརྩིག་པར་གསོལ་བ་དང་ཞུ་བའི་ལས་ཀྱིས་བྱ། ཁང་བུ་གཉིས་ཀྱི་བར་གྱི་ཁྱམས་སུའོ། །བསམ་གཏན་གྱི་ཁང་པ་བྱ་བ་ནི་ཕ་རོལ་ཚུལ་རོལ་ཁང་ཕྲན་དུ་བྱས་ལ་དབུས་སུ་བཀད་ས་ཁྱམས་སུ་བྱ། ལྔ་འམ་
དྲུག་གོ །ཁང་ཕྲན་བྱ་བ་ནི་མི་མང་ཉུང་ལས་ཁང་པ་མིག་ལྔ་དྲུག་ཡན་ཆད་དུ་བྱས་ཀྱང་རུང་ངོ༌། །སྒོ་དང་སྒོ་ལེབ་སྒྲ་མི་ཟེར་བ་དང་དྲང་པའི་ཐབས་ཀྱང་ངོ༌། །ཁང་ཕྲན་དང་དབུས་ཀྱི་བཀད་ས་སྒོ་གདོད་སྒོ་ལེབ་ཀྱང་གཞུག་སྒོ་ལྕིས་སྒྲ་མི་ཟེར་བར་ཐབས་ཅི་ཡོད་པས་བྱ། སྒོ་གཅད་ཅིང་དབྱེ་བའི་ལག་ཟུངས་ཀྱང་བཅའ། སྐར་ཁུང་ནི་བླར་སུམ་ཆ་བོར་ནས་ཕྱི་རུབ་ལ་ནང་ཡངས་ན་དགེའོ། །ཁང་པ་སྐར་ཁུང་གདོད་པའི་ཐབས་ནི་འདི་འདྲ་བར་བྱས་ནང་དུ་སྣང་ཡེལ་ཆེ་སྟེ་དེ་ལྟར་བྱའོ། །ཤར་བུ་དང་དབུས་ཀྱི་བཀད་ས་སྒོ་གདོད་སྒོ་འཕར་དང་རྐེད་གཏན་དང་གཟེར་གཏན་དང་ཟུངས་དང་ར་རྐང་ཅན་གྱི་དབྱིག་པ་ཡང་ངོ༌། །སྐར་ཁུང་གི་རྐྱེན་འདི་རྣམས་ཀྱང་བྱས་ན་རྐུན་པོ་དང་བྱ་ལ་སོགས་པ་མི་ཤོར་བར་བྱའོ། །བཀད་སར་མི་ཤོང་ན་སྟེང་གི་ཡང་ཏོག་ཏུ་ཡང་ངོ༌། །བསམ་གཏན་བྱེད་པའི་མི་མང་སྟེ་དབུས་ཀྱི་བཀད་ས་དང་ཁང་ཕྲན་དུ་མི་ཤོང་ན་ཁང་པའི་ཡང་ཏོག་ཏུ་ཡང་ཁང་པའི་ཡང་ཏོག་བྱས་ལ་དེར་ཡང་བསམ་གཏན་བྱ། བཟེག་པའི་ཕྱིར་སྐས་བྱ། ཡང་ཏོག་ཏུ་བཟེག་པའི་ཕྱིར་བཀད་སའི་གྲྭ་གཅིག་ཏུ་སྐས་བྱ། མི་ལྟུང་བའི་ཕྱིར་རྟེན་ཀྱང་བསྐོར། སྐས་ལས་ཕན་ཚུན་དུ་མི་ལྟུང་བར་བྱ་བའི་ཕྱིར་ཕ་རོལ་ཚུལ་རོལ་དུ་ཤིང་ཐགས་ཀྱིས་བརྟན་པར་བྱ། དེ་ལ་མི་གཡོ་བའི་ཕྱིར་ལྕགས་ཀྱི་གཟེར་བུ་གདབ། སྐས་ཀྱི་ཤིང་ཐགས་ཀྱི་རྟེན་ལ་མི་འགུལ་ཞིང་བརྟན་པར་བྱ་བའི་ཕྱིར་ལྕགས་ཀྱི་གཟེར་གྱིས་གདབ། ཕྱི་རོལ་དུ་སྤང་བའི་བཀད་ས་ཁང་བུའི་ཕྲེང་བ་ཡང་ངོ༌། །མི་མང་སྟེ་བསམ་གཏན་གྱི་སར་མི་ཤོང་ན་ཁང་པའི་ཕྱི་རོལ་ཁོ་ར་ཁོར་ཡུག་ཏུ་ཁང་ཕྲན་གྱིས་དངར་ལ་སྒོ་ནང་དུ་བལྟ་བར་བྱ། །སྒོའི་མངོན་སུམ་དུ་སྒོ་མི་བྱ། །ཁང་ཕྲན་གྱི་སྒོ་གདོད་པ་གཅིག་གི་ཐད་ཀར་གཅིག་མི་བྱའི་སྣོལ་དུ་བྱ་ཞིང་གདོད་དོ། །སྒོ་གང་བྱ། ཕྱི་སྒོ་ལ་སོགས་པ་སྒོ་གང་བྱ། ཕུག་ཀྱང་བྱའོ། །བསམ་གཏན་གྱི་ས་བྲག་ཕུག་དང་སའི་ཕུག་བྱས་ཏེ་དེར་བསམ་གཏན་བྱས་ཀྱང་ཉེས་མེད་དོ། །འདུག་པའི་ཕྱིར་སའི་སྟེགས་བུ་ཡང་ངོ༌། །བསམ་གཏན་དུ་འདུག་པའི་འོག་ཏུ་སའི་སྟེགས་བུ་བྱས་ཀྱང་ཉེས་མེད། ཁྲིའུ་ཡང་ངོ༌། །ཁྲིའུའི་སྟེང་དུ་བསམ་གཏན་
བྱས་ཀྱང་ཉེས་མེད། དེའི་ཁོ་ར་ཁོར་ཡུག་ཏུ་ཁྲུ་བཞིས་འཁོར་ན་དགེའོ། །བསམ་གཏན་བྱ་བའི་ཁྲིའུ་གྲྭ་བཞི་ངོས་གཅིག་ལ་ཁྲུ་གང་ཡོད་པར་བྱས་ན་དགེ་ཞིང་རན་པར་འགྱུར་རོ། །དེ་ལས་ཆེར་བྱས་ཀྱང་ཉེས་མེད། བརྟགས་པ་རྣམ་ལྔའོ། །ཁྲིའུའི་དྲ་བ་ལ་སོགས་པ་རྣམ་པ་ལྔས་བརྟག་ཏུ་རུང་ངོ༌། །གྲེས་མ་དང་གསོ་མ་དང་བ་ལ་རྫ་དང་ལྷས་མ་དང་སྤའི་ཤུན་ཕྲགས་ཞེས་སོ། །ཁྲིའུའི་ཐག་པ་རྣམ་ལྔར་རུང་པ་ནི་མིང་གིས་སྨོས་པ་འདི་རྣམས་སོ། །དེ་ལ་ཤིང་བལ་ཅན་གྱི་གདིང༌། ཁྲིའུའི་སྟེང་དུ་ཤིང་བལ་ཅན་བར་ཚངས་ཅན་གྱི་སྟན་གདིང༌། དེ་ལ་ཀུན་དུ་མཐོས་ལྷག་ན་དགེའོ། །སྟན་ཁྲིའུ་ལས་མཐོ་གང་འཁོར་བས་ལྷག་པར་བྱས་ན་དགེའོ། །ཨར་ཀ་དང་ཀ་ཤ་དང་ཀེ་ར་ཀ་དང་བུ་ཀ་དང་ཤལ་མ་ལི་དག་གི་ཤིང་བལ་གྱིས་གཡོགས། སྟན་གྱི་བར་ཚངས་སུ་གཞུག་པའི་ཤིང་བལ་ནི་མིང་གིས་སྨོས་པ་འདི་རྣམས་གང་ཡང་རུང་ངོ། །བལ་དང་གསོ་མ་དང་ཤིང་བལ་དང་རས་མ་དང་ལོ་མའི་ཚོགས་དག་གིས་ཀྱང་ངོ༌། །སྟན་གྱི་བར་ཚངས་སུ་གཞུག་པའི་ཤིང་བལ་མ་གཏོགས་པར་མིང་གིས་སྨོས་པ་འདི་རྣམས་ལས་བྱས་ཀྱང་རུང་ངོ༌། །གནས་པའི་ཕྱིར་དོན་གྱི་བར་དུ་སྐབས་སུ་སྐབས་སུ་བྱ་རོག་གི་རྐང་པ་སྦྱིན། སྟན་གྱི་བར་དུ་ཤིང་བལ་ལ་སོགས་པ་བཅུག་ན་ཕན་ཚུན་དུ་མི་འཆུགས་པར་བྱ་བའི་ཕྱིར་སྐུད་པའི་ནན་དུ་བྱ་རོག་གི་རྗེས་འདྲ་བས་མནན། གཉིད་འོང་ན་བུམ་བུ་བཅང༌། བསམ་གཏན་བྱེད་པའི་དུས་ན་མི་ཡུར་བར་བྱ་བའི་ཕྱིར་བུམ་བུ་བཅངས་ཀྱང་ཉེས་མེད་དོ། །ཐ་གུས་རྣ་བ་ལ་གདགས་བུམ་བུ་ཆུས་བཀང་ལ་ཐ་གུས་རྣ་བ་ལ་གདགས། དབྱིག་པས་དལ་གྱིས་གཟུགས། བསམ་གཏན་པ་ཡུར་བ་བསླང་བའི་ཕྱིར་གཅིག་ལས་གཅིག་དབྱུག་པས་དལ་གྱིས་བཙུགས་ལ་བསླང༌། མི་སྣད་པའི་ཕྱིར་བྲི་བཞིན་དུ་བཅད་དམ་རུས་མས་དཀྲི། བསླང་བའི་ཕྱིར་གཟུགས་པའི་དབྱུག་པ་མི་སྣང་བར་བྱ་བའི་ཕྱིར་ཤིང་ཁ་དྲང་པོར་བཅད་ར་དས་ཀྱང་དཀྲི་ཕོ་ལོང་འཕང༌། བསམ་གཏན་པ་ཡུར་བ་ལ་ཕོ་ལོང་འཕངས་ཏེ་བསླངས་ཀྱང་ཉེས་མེད། ཐ་གུས་བརྟགས་ཏེ་སླར་དྲང༌། ཕོ་ལོང་འཕངས་ནས་སླར་བླངས་ཏེ་བླང་མི་དགོས་པའི་
ཕྱིར་ཐ་གུས་གདགས། དེའི་མདུན་དུ་མེ་མར་གཞག །བསམ་གཏན་བྱེད་པའི་མདུན་དུ་མེ་མར་བུད་དེ་གཞག་ན་མི་ཡུར་བ་ལ་ཕན། རྐང་པ་བརྐྱང༌། ཡུར་ན་རྐང་པ་ཡ་གཅིག་བརྐྱང་གཞན་ཡང་ངོ༌། །རྐང་པ་ཡ་གཅིག་བརྐྱང་སྟེ་མ་ཕན་ན་རྐང་པ་གཉིས་ཀ་བརྐྱང༌། བཅག །རྐང་པ་གཉིས་ཀ་བརྐྱང་སྟེ་མ་ཕན་ན་ལངས་ཏེ་བཅག་གོ །མི་འཁྲུལ་པའི་ཕྱིར་ཐ་གུ་བྲེས་ཏེ་སྤུ་བུར་བཅུག་ལ་ཐ་གུས་བཏགས་ཏེའོ། །མཚན་མོ་བཅག་ན་མི་འཁྲུལ་པར་བྱ་བའི་ཕྱིར་འཆག་སར་ནམ་མཁའ་ལ་ཐག་བུས་བྲེས་ཏེ། ཐག་བུ་ལ་ཡང་མིག་གམ་ཤིང་སྤུ་གུ་ཅན་བཅུག་ལ་དེ་ལ་ཡང་ཐག་བུ་ལས་ལག་པས་བཟུང་ལ་བཅག་གོ །ལྷམ་དང་བཅས་ཏེ་མ་བཅག །འཆག་པའི་ཚེ་བསམ་གཏན་ལ་གཞན་མི་འདོགས་པར་བྱ་བའི་ཕྱིར་ལྷམ་མི་བགོ །བར་བུར་གྱིས་མི་བཅག་པར་དྲེའུ་རྡོག་གདིང༌། འཆག་པའི་གཞིར་རྡུལ་མི་ལྡང་བ་དང་རྐང་པ་ལ་མི་ཟུག་པའི་ཕྱིར་དྲེའུ་རྡོག་བཏིང་ཡང་ཉེས་མེད་དོ། །ཉི་མ་གསུམ་ཞིང་སྤང་བའི་རྐང་བསྐུ། བསམ་གཏན་བྱེད་པའི་ཉི་མ་གསུམ་ཞིང་ནད་དང་མིག་ལ་ཕན་པའི་ཕྱིར་རྐང་པ་ལ་སྣུམ་དང་བསུང་གིས་བསྐུ། མ་ཕོད་ན་དེར་ཉལ། བསམ་གཏན་པ་ཡུར་བ་ཐབས་ལྟག་མ་རྣམས་ལྟར་བྱེད་དེ་ཡུར་བ་ལ་མ་ཕན་ན་ཉལ་ལོ། །སྒོ་བཅད། ཉལ་བའི་ཚེ་ཁང་བུའི་སྒོ་བཅད་དོ། །གློས་ཀྱང་ཕབ་སྟེའོ། །ཉལ་བའི་ཚེ་གློས་ཀྱང་ཕབ་སྟེ་ཉལ་ཀྱང་ཉེས་མེད་དོ། །བསྒོའོ། །སྤོང་བའི་མེ་ལ་རྩེ་བ་ཡང་ངོ༌། །བསམ་གཏན་བྱེད་པ་རྣམས་ཀྱིས་ཞལ་ཏ་བྱེད་པ་དང་གྲོང་འཛིན་པ་གཅིག་དགེ་སློང་སུ་དད་པ་ལ་བསྒོ། །དེའི་ཚུལ་ལངས་ནས་ཆག་ཆག་དང་ཕྱག་དར་དང་རབ་ཏུ་གཞོན་ནུའི་ལྕི་བས་སྐྱང་ནུལ་སྦྱིན། ནང་པར་སྔར་ལངས་ཏེ་བསམ་གཏན་གྱི་སར་མིང་གིས་སྨོས་པ་འདི་རྣམས་ལས་སུ་བསྐོས་པའི་དགེ་སློང་དེས་བྱ། སྟན་གདིང༌། ལས་སུ་བསྐོས་པ་དེས་བསམ་གཏན་པ་རྣམས་སྟན་གདིང༌། མི་གཙང་བའི་གནས་བཀྲུ། ཁང་པའི་ནང་ན་བཤང་ས་ཡོད་ན་ཁ་ལ་ངན་སྐྱུགས་ཆགས་པ་ཡོད་ན་ལས་བྱེད་པས་བཀྲུ། ཆག་ཆག་ལ་སོགས་པའོ། །
བཤང་ས་དེར་ཆག་ཆག་དང་མཎྜལ་དག་བྱ། ཕྱི་བ་དང་ས་དང་ཆུ་ཡང་གཞག །རྐུ་བ་ཕྱིའི་འཇི་བ་རིལ་བུ་དང༌། རྡོ་དང་ཆུ་ལ་སོགས་པ་བཤང་སར་ལས་སུ་བསྐོས་པས་དེར་གཞག །འོང་བའི་ཕྱིར་གཎྜཱི་སྦྱིན། དུས་གསུམ་མཆོད་པ་ལ་སོགས་པ་དགེ་འདུན་གར་འདུའང་རུང་སྟེ་གཎྜཱི་བརྡུང་ངོ༌། །བརྡུང་པའི་ཐབས་འོག་ནས་འཆད། གཡོགས་པའི་སྟེང་དེར་བཞག་གཎྜཱི་ཁང་ཐོག་ཏུ་བརྡུང་བའི་སར་ཆར་པ་ལ་སོགས་པས་མི་གཤེར་པའི་ཕྱིར་ཐོག་བོར་བའི་འོག་ཏུ་གཞག །དགེ་འདུན་འདུ་བའི་ཕྱིར་ན་རྒྱུན་གསུམ་དང་དེ་ཙམ་གྱིས་བསྣུན་པར་རོ། །དགེ་འདུན་ནང་ནུབ་དུས་སུ་འདུ་ན་ནི་ཆེ་ཆུང་སྦྲེངས་པ་ལས་ལན་གསུམ་བརྡབ་པ་ལ་མཇུག་ཏུ་དྲག་པོ་ལན་གསུམ་དུ་གཏོགས། ལས་བསླངས་པའི་ཕྱིར་ན་ཡང་སྟེ། རྒྱུན་དང་གཅིག་གོ །འཕྲལ་ལ་ལས་ཞིག་བྱེད་པའི་ཕྱིར་དགེ་འདུན་བསྡུ་བ་ནི་ཆེ་ཆུང་དུ་སྦྲེངས་པ་རྒྱུན་གཅིག་དང་མཇུག་ཏུ་དྲག་པོ་གཅིག་བརྡབ་པོ། །རྒྱུན་གསུམ་བཟླས་པ་ལ་བརྒྱབ་པ་གཉིས་ཞེས་གཞན་དག་གིའོ། །ལས་ལ་འདུ་བ་ལ་ཆེ་ཆུང་དུ་སྦྲེངས་པ་རྒྱུད་གསུམ་དང་མཇུག་ཏུ་དྲག་པོ་གཅིག་བརྡབ་པོ། །གཉིས་བརྡབ་ཀྱང་རུང་མདོ་ལྟག་མ་དང་གང་དགའ་བ་བྱའོ། །ཤི་བ་གདེག་པའི་ཕྱིར་ན་དུམ་དུམ་པོར་རོ། །དགེ་སློང་ཤི་བའི་ཕྱིར་བསྡུ་བ་ནི་ཐབས་དྲག་དལ་དང་རྒྱུན་གྱི་གྲངས་མེད་དེ་དུམ་བུ་དུམ་བུར་བྱ། རྒྱུད་གཅིག་དང་བརྒྱབ་སྟེ་ཞེས་གཞན་དག་གིའོ། །ཤི་བ་ལས་བསྡུ་བའི་ཕྱིར་ཆེ་ཆུང་དུ་སྦྲེངས་པ་རྒྱུད་གཅིག་དང་མཇུག་ཏུ་དྲག་པོ་གཅིག་བརྡབ་ཀྱང་རུང་སྟེ་མདོ་ལྟག་མ་དང་འདི་གཉིས་གང་བྱས་ཀྱང་རུང་ངོ༌། །སྤང་བའི་ཕྱིར་ན་ཁར་གསིལ་གྱིས་སོ། །བསམ་གཏན་ལ་འདུ་བ་ནི་སེག་ཆད་དང་དྲིལ་བུ་གང་གིས་བརྡ་བྱས་ཀྱང་རུང་ངོ༌། །ཀ་ཏི་ཞེས་གཞན་དག་གིས་སོ། །བསམ་གཏན་ལ་འདུ་བ་ལ་གཎྜཱི་ཆུང་ངུ་ཀ་ཏི་ཞེས་བྱ་བ་བརྡུངས་ཀྱང་རུང་ངོ༌། །གློ་བུར་དུ་གཅིག་ན་ནམ་ཆོག་ཏུའོ། །ཆུ་དང་མེ་ལ་སོགས་པ་གློ་བུར་གཅིག་བྱུང་ན་གློ་བུར་ནམ་ཞི་བའི་བར་དུ་འདོད་འདོད་བརྡུང་ངོ༌། །གློ་བུར་ཞི་བ་ལ་ཕན་ནོ། །བཟའ་བར་འདུ་བའི་ཕྱིར་ན་གཉིས་ཀ་སྟེ། གཎྜཱི་ཀ་ཏི་དང་གཎྜཱི་སྦྱིན་ནོ། །དྲོ་ཀར་གདུགས་
ཚོད་ལ་འདུ་བ་ལ་ནི་གཎྜཱི་ཆེ་ཆུང་གཉིས་ཀ་བརྡུང་ངོ༌། །སྐབས་སུ་བསྡད་དེའོ། །གཎྜཱི་ཆུང་དུ་དྲོ་ཀར་སྔར་བརྡུངས་ནས་སྐུ་བླའི་གཟུགས་བཀྲུ། ཁ་ཟས་བརྟག་པའི་ཞལ་ཏ་བྱས་ཟིན་ནས་གདོད་གཎྜཱི་ཆེན་པོ་བརྡུང་ངོ༌། །ཚོགས་ཆེ་སྟེ་གཎྜཱི་བྱིན་པས་མ་གྲུབ་ཅིང་མ་གོ་ན་དུང་འབུད་དོ། །དགེ་འདུན་མང་སྟེ་གཎྜཱི་བརྡུངས་པས་མི་ཐོས་ཤིང་མི་འདུས་ན་མི་གཉིས་ཀྱིས་དུང་གཉིས་ཐབས་ཅིག་དུ་འབུད་དོ། །རྔ་བརྡུང༌། དུང་སྦྲེལ་མ་བུས་ཀྱང་མི་འདུས་ན་རྔ་བོ་ཆེ་བརྡུང་ངོ༌། །གཎྜཱི་ས་ན་མི་འགྲོ་བར་མི་བྱ། གཎྜཱི་དང་རྔ་བརྡུངས་མ་ཐག་ཏུ་འདུ་བ་མི་བཅད་པར་དགེ་འདུན་གྱི་ནང་དུ་འགྲོའོ། །མ་སོང་ན་ཉེས་བྱས། མི་མྱུར་བར་མ་ཡིན། དགེ་འདུན་གྱི་ནང་དུ་འགྲོ་བ་ཡང་ལེ་ལོར་བྱས་ཏེ་མ་འདུག་པར་གཎྜཱི་བརྡུངས་མ་ཐག་ཏུ་འགྲོའོ། །དགོས་པ་འབྱོར་པའི་དུས་ཀྱི་ལས་ན་ཅི་བདེར་བྱའོ། །བསམ་གཏན་དུ་ཞུགས་པའི་རྣམས་ཀྱིས་དུས་མི་རིགས་པའི་ཕྱིར་གདུགས་ཚོད་བབ་པ་དང་ཐོ་རངས་སྔར་བསླང་པ་དང་ནམ་གྱི་གུང་ལ་ཉལ་དུ་བཟུང་བའི་ཚོད་ལ་སོགས་པ་ལས་སུ་བསྐོས་པའི་བྱ་ཞིང་སྦྲན་ནོ་ཞེས་བྱི་ཛ་ཡ་བར་མས་བཤད། གཎྜཱི་བརྡུང་བའི་ཚེ་བདག་དགེ་བ་གཞན་ཞིག་རྒྱུན་དུ་སྤྱོད་དེ་བར་ཆད་དུ་མི་རུང་ན་མ་སོང་ཡང་ཉེས་མེད་དོ་ཞེས་བྱི་ཤུ་ཏས་བཤད། སུམ་རྒྱུད་བྱིན་ཏེའོ། །བསམ་གཏན་པ་རྣམས་ལངས་ཏེ་འདོང་པའི་ཚེ་སུམ་རྒྱུད་བཀླག །འདི་ནི་རན་པར་སྦྱིན། སུམ་རྒྱུད་བཀླག་པ་མི་རིང་བར་རན་པར་བྱ། སྦྱིན་པ་ལས་འཆགས་པ་བྱ། ཟས་ཐོས་པའི་འོག་ཏུ་སྦྱིན་བདག་ལ་སོགས་པའི་ཕྱིར་སྦྱིན་པའི་ཚིགས་སུ་བཅད་པ་ཀླག །རན་པར་རོ། །སྦྱིན་པའི་ཚིགས་སུ་བཅད་པ་རན་པ་མི་རིང་བར་བྱ། མེལ་ཙེ་བ་ནི་ཐ་མ་ནས་འགྲོ། །བསམ་གཏན་ལས་འགྱེས་པའི་ཚེ་ལས་སུ་བསྐོས་པའི་དགེ་སློང་དེས་ལས་དང་ཞལ་ཏ་དག་བྱས་ནས་ཕྱི་བཞིན་དུ་འགྲོའོ། །འོང་བ་ན་སྔོན་དུའོ། བསམ་གཏན་ལ་འདུ་བའི་ཚེ་ཐ་མ་ན་མི་འདུག་པར་སྔོན་དུ་སོང་སྟེ་ལས་དང་ཞལ་ཏ་བྱའོ། །འོན་ཏེ་དེ་ལྟ་བུའི་རྐྱེན་ཅིག་གིས་ལྡེ་མིག་སྦ་བ་བྱས་ན་བསྟན་ཏོ། །ལས་སུ་བསྐོས་པ་དགེ་སློང་དེ་རྐྱེན་ཅིག་གིས་གུད་དུ་འགྲོ་ན་
ལྡེ་མིག་འདི་ན་ཡོད་དོ་ཞེས་གྲོགས་ལ་བསྟན་ཏེ་འགྲོའོ། །གསོ་སྦྱོང་གི་དངོས་པོ་སྟེ་ཞི་གནས་ཀྱི་གསོ་སྦྱོང་དུ་ཆུད་པའོ། །བསམ་གཏན་གྱི་ཞི་གནས་ཀྱི་གསོ་སྦྱོང་རྫོགས་སོ།། །།བཅོ་ལྔའི་གསོ་སྦྱོང་བྱེད་པ་ལ་འཆད་དེ། གསོ་སྦྱོང་མངོན་པར་བསྐོ། །དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་གསོ་སྦྱོང་བྱ་བའི་ས་ཐམས་ཅད། བྱས་པ་དང་སྐྱེས་པ་ཟིན་པའི་དངོས་པོར་རོ། །དེའི་ཕྱི་རོལ་གྱི་མཚམས་ནི་འདོམ་དང་བཅས། གསོ་སྦྱོང་གི་ཁང་པ་རྩིག་པ་ཆུ་དང་གད་པ་ལ་སོགས་པ་ཡོད་ན་བར་འདོམ་གང་གིས་བཅད་ལ་གཙང་བ་དང་ཡངས་པ་དང་མི་རྩེད་པར་བརྩིག་གོ །དགེ་འདུན་དད་པར་རོ། །གསོ་སྦྱོང་གི་ཁང་པ་བརྩིག་པ་དགེ་འདུན་ཀུན་ལ་དད་པ་དྲིས་ཏེ་གར་དད་པར་བྱ། ལས་དག་ཀྱང་དེའི་གནས་སོ། །གསོ་སྦྱོང་གི་ཁང་པ་དེར་ཚུལ་ནས་འབྱུང་བ་དང་ཚུལ་དུ་འཇུག་པ་དང་བསྙེན་པར་རྫོགས་པར་བྱེད་པ་ལ་སོགས་པའི་ལས་ཀྱང་དེར་བྱའོ། །མཚམས་བཅད། དགེ་འདུན་གནས་པ་ལ་སྤྱོད་པ་བདེ་བའི་ཕྱིར་མཚམས་བཅད་དོ། །དཔག་ཚད་ཕྱེད་དང་གསུམ་གྱི་མཐར་རོ། །མཚམས་བཅད་པ་ནི་བར་དུ་ཆུ་ལ་སོགས་པ་མཚམས་གཞན་གྱིས་མཆོད་ན་དཔག་ཚད་ཕྱེད་དང་གསུམ་ཚུན་ཆད་དུ་བཅད་དུ་རུང་ངོ༌། །རྡོ་དང་རྩིག་པ་དང་ཀ་བ་དང་ཤིང་རློན་པ་དང་ར་བ་དང་གད་པ་དང་ཁྲེ་ལམ་དང་ཆུ་འཐུང་བ་ལ་སོགས་པ་ཕྱོགས་སོ་སོར་དམིགས་པར་ཤེས་པའི་དགེ་སློང་གིས་དགེ་འདུན་གྱི་དྲུང་དུ་ཀུན་བསྒྲགས་པ་ནི་བསྟན་པའི་མཚན་ཏེ་ལས་བྱ། མཚམས་བཅད་པའི་མཚན་མ་ནི་མིང་གིས་སྨོས་པ་འདི་རྣམས་ལས་མཚམས་བཙུགས་ཏེ་དགེ་འདུན་ཐམས་ཅད་འདུས་ནས་ཀུན་ཤེས་པར་བྱས་ཏེ་གསོལ་བ་དང་ཞུ་བའི་ལས་ཀྱིས་བཅད་མཚན་མ་ནི་ཕྱོགས་བཞི་རེ་རེ་བཙུགས་པས་ཆོག །གནང་བ་བྱས་ན་དེར་ཆོས་གོས་དང་མི་འབྲལ་མཚམས་བཅད་ན་རྒན་པོ་དང་ནད་པ་ཆོས་གས་མི་ཐེག་པ་དགེ་འདུན་གྱིས་ཆོས་གོས་དང་མི་འབྲལ་བར་གནང་བ་བྱིན་ན་ཆོས་གོས་དང་འབྲལ་བར་མི་འགྱུར་རོ། །འདི་བྱ་རྒན་པོ་དང་ནད་པ་ཆོས་གོས་དང་འབྲལ་བའི་གསོལ་བ་གདབ་སྟེ་མི་ཐེག །བདེན་ན་དགེ་འདུན་གྱིས་གནང་བ་སྦྱིན་ནོ། །ཐམས་ཅད་ཀྱི་
ཕྱིར་དཀྱིལ་འཁོར་བྱ་བར་བསྐོ། །སྔ་མ་མ་བཏང་ན་ནང་དུ་བཅད་པ་མི་སྐྱེ། མཚམས་སྔ་མ་བཅད་པ་མ་བཀྲོལ་བར་ཕྱི་མ་བཅད་ཀྱང་མཚམས་བཅད་པར་མི་འགྱུར་རོ། །མཚམས་བཏང་ངོ༌། །མཚམས་གཉིས་ཚིག་གཅིག་གིས་བཅད་པའམ་བཏང་དུ་རུང་ངོ། །མཚམས་གཉིས་སོ་སོར་གཅོད་དེ་བར་ཉེ་ན་བར་དུ་ཐག་པ་བྲེས་ཏེ་མཚམས་གཉིས་ཀ་ཐག་པས་ནོན་པར་བྱས་ལ། ཕ་རོལ་ཚུ་རོལ་གཉིས་ཀར་དགེ་འདུན་དུ་ལངས་པར་འཁོད་པ་ལ་བར་དུ་དགེ་སློང་གཅིག་འདུག་སྟེ་གསོལ་བ་དང་ཞུ་བ་བྱས་ན་ཚིག་གཅིག་གིས་མཚམས་གཉིས་བཅད་པར་འགྱུར་རོ། །དགྲོལ་བའང་དེ་བཞིན་དུ་བྱར་རུང༌། ལས་ཀྱིས་མཚམས་མ་བཅད་པའི་གནས་ཀྱི་མཚམས་རྩིག་པའོ། །གསོལ་བ་དང་ཞུ་བས་མཚམས་མ་བཅད་ན་གཙུག་ལག་ཁང་གི་ཕྱིར་ཚུན་ཆད་མཚམས་སུ་གཏོགས་པའོ། །ཝའི་ཆུ་བབ་པ་གང་དུ་ལྟུང་བ་ཡང་ངོ༌། །གཙུག་ལག་ཁང་གི་ཕྱིར་མེད་པ་ཞིག་ན་ཁང་པའི་ཝའི་ཆུ་ཕྱི་རོལ་དུ་ལྟུང་བའི་རྗེས་ཚུན་ཆད་མཚམས་སུ་གཏོགས་སོ། །གྲོང་གི་ན་མཚམས་ཀྱི་མཐའོ། །གྲོང་ཁྱེར་ཞིག་ན་གནས་ན་ར་བ་དང་སབ་མ་དང་འོབས་གསུམ་གང་ཡང་རུང་བར་བྱ་གང་བབ་པ་ལ་སོགས་པ་གོང་དུ་བཤད་པ་ཡིན་ནོ། །དགོན་པར་ན་ཕྱོགས་སོ་སོར་རྒྱང་གྲགས་ཀྱི་མཐའོ། །དགོན་པ་ན་གནས་ཏེ་བར་མཚམས་གཞན་གྱིས་མ་ཆོད་ན་རྒྱང་གྲགས་གཅིག་ཚུན་ཆད་རང་མཚམས་སུ་ཆུད་དོ། །གསོ་སྦྱོང་གི་དངོས་པོ་སྟེ་གནས་སུ་ཆུད་པའོ། །གསོ་སྦྱོང་ལ་འདུ་བའི་མཚམས་གཅིག་ན་གནས་པ་ཀུན་དུ་དགོས་པ་དང་མཚམས་བཅད་པའོ། །དད་པ་བྱིན་ན་དེ་དག་གིས་འདུ་བ་འགྲུབ་པོ། །གསོ་སྦྱོང་ལ་འདུ་བ་ནད་པ་དང་རྒན་པོར་འདུ་བར་འོང་མི་ནུས་ཏེ་དད་པ་ཕུལ་ནས་འདུས་པ་དང་འདྲ་སྟེ་གསོ་སྦྱོང་དུ་རུང་ངོ༌། །མཚམས་གཅོད་པ་ལ་མ་ཡིན། མཚམས་གཅོད་པའི་ཚེ་ནི་ནད་པ་དང་རྒན་པོ་ཡང་དད་པ་དབུལ་དུ་མི་རུང་སྟེ་ཁྱོགས་ལ་བླང་ངམ་དགེ་འདུན་ནད་པའི་གན་དུ་དོང་སྟེ་མཚམས་བཅད་དགོས་སོ། །སློབ་པ་བྱིན་པ་ལས་དེས་བསླང་བའམ་བརྟག་པའོ། །མཚམས་གཅོད་པ་ལ་སློབ་པ་བྱིན་པ་ལས་ཐ་དད་པ་བླང་
ན་ལས་སུའང་རུང་དད་པ་ཕུལ་བར་ཀྱང་ཆུད་དོ། །དེ་ལ་དགེ་སློང་དུ་འདུ་ཤེས་གཞག་ནའོ། །སློབ་པ་བྱིན་པ་ལས་དད་པ་བླང་བ་ནི་ཐོག་མ་སློབ་པ་བྱིན་པ་ལ་དགེ་སློང་དུ་འདུ་ཤེས་གཞག་པ་ནི་དད་པ་བླང་དགོས་ཀྱི་འདུ་ཤེས་མ་བཞག་པ་ནི་དད་པ་བླང་མི་དགོས་སོ་ཞེས་ཀྱང་བཤད། དད་པ་ལེན་པའི་ཚེ་ན་དགེ་སློང་མ་ཡིན་སྙམ་དུ་བསམས་ན་དད་པ་བླང་པར་མི་ཆུད་དེ་ལས་སུ་མི་རུང་ངོ་ཞེས་ཀྱང་བཤད། མི་སྦྱིན་ནོ། །སློབ་པ་བྱིན་པ་ཞིག་དད་པ་ལེན་དུ་འོངས་ན་དད་པ་མི་སྦྱིན་ནོ། །སྨྱོན་པར་གནང་བ་མི་བྲེལ་བ་ཡིན་ནོ། །དགེ་སྦྱོང་སྨྱོན་པ་ཐམ་ཐོམ་ཅན་ལས་བྱེད་པའི་ཚེ་གློ་བུར་དུ་འགྲོ་བ་ཞིག་ཡོད་ན་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་མི་འདུ་བ་དང་དད་པ་མི་བླང་པར་གནང་བྱིན་ན་དད་པ་མ་བླངས་ཀྱང་ལས་སུ་རུང་ངོ༌། །ཀུན་གཙང་བ་བྱིན་པ་ནི་གཅིག་ཏུའོ། །དད་པ་ལེན་པ་འོང་ན་དབུལ་བའི་ཚིག་ནི་བདག་བར་ཆད་ཀྱི་ཆོས་ཀྱང་གཙང༌། དགེ་འདུན་ལས་བྱེད་པ་ལའང་དད་དོ་ཞེས་བྱ། བདག་གཙང་ངོ་ཞེས་མ་བྱས་ན་ཉེས་པ་ཡོད་པས་འཕྲིག་ཅིང་དོགས་པར་འགྱུར་རོ། །གཙང་ངོ་ཞེས་མི་ཟེར་ན་བར་ཆད་ཡོད་དམ་ཞེས་དྲིས་ལ་ཡོད་ན་མཐོལ་དུ་གཞུག །གསོ་སྦྱོང་དུའོ། །མདོ་ལྟག་མ་ལྟར་ཀུན་གཙང་ངོ་ཞེས་བྱ་བའི་ཚིག་ནི་གསོ་སྦྱོང་གི་ཚེ་དད་པ་དབུལ་བ་ལ་དགོས་སོ། །འབྱུང་བ་ན་ཡང་ངོ༌། །ཚུལ་ནས་འབྱུང་བའི་ཚེའང་དད་པ་ཕུལ་ན་ལས་སུ་རུང་ངོ༌། །དེ་བྱིན་པས་སོ། །ཚུལ་ནས་འབྱུང་བའི་ཚེ་དད་པ་ཕུལ་བ་གཅིག་པུས་མི་ཆོག་གི་བདག་ལ་ཁྲིམས་ཉམས་པར་མཐོང་བ་དང་ཐོས་པ་དང་དོགས་པ་ཡོད་ན་རྒོལ་ཅིག་ཅེས་སྐབས་དབྱེ་བ་དང་བཅས་ཏེ་དད་པ་དབུལ་ལོ། །འདི་ལྟར་དེ་དག་བྱའོ། །གསོ་སྦྱོང་ལ་ཀུན་གཙང་ངོ་ཞེས་དད་པ་དབུལ་ལོ། །འདི་ལྟར་དེ་དག་བྱའོ། །གསོ་སྦྱོང་ལ་ཀུན་གཙང་ངོ་ཞེས་དད་པ་འབུལ་བ་དང་ཚུལ་གྱི་ཚེ་ཉེས་པ་ཡོད་ན་རྒོལ་ཅིག་ཅེས་བྱས་ནས་དད་པ་འབུལ་བའི་ཚིག་དད་པ་ལེན་པ་ལ་བྱའོ། །ཚུལ་འདི་དག་མནོད། །མདོ་ལྟག་མ་ལྟར་དད་པ་འབུལ་ན་དད་པ་ལེན་པས་ཀྱང་དེ་ལྟར་མི་གནང་གིས་འདོང་ཞེས་མི་བྱའི་ཟེར་བ་བཞིན་དུ་དད་པ་བླང་ངོ༌། །སྡེ་སྡེར་དད་པ་ལ་སོགས་པ་བསྐུལ་ཏེ་ལས་བྱེད་ན་མི་རིགས་པ་མ་ཡིན་ནོ། །མཚམས་གཅིག་གི་ནང་དུ་
གསོ་སྦྱོང་ལ་སོགས་པ་དགེ་འདུན་སོ་སོར་བྱེད་ན་གཅིག་ལ་གཅིག་དད་པ་བྱིན་ཏེ་བསྐུལ་ན་སོ་སོར་བྱས་ཀྱང་ལས་སུ་རུང་ངོ༌། །ཚིག་མཚུངས་པ་བརྩམས་ན་བྲལ་བ་མ་ཡིན་ནོ། །དད་པ་ལེན་པས་རབ་ཏུ་འབྱུང་བ་དང་གསོ་སྦྱོང་དང་ཚུལ་ནས་འབྱུང་བ་ལ་སོགས་པ་ལས་མང་པོ་ཞིག་དད་པ་གཅིག་ཅར་བླང་དུ་རུང་ངོ༌། །གཅིག་གི་དུ་མ་ལ་བླངས་པ་མ་ཡིན་ནོ། །མདོ་ལྟག་མའི་ནང་ནས་འབྱུང་བ་བཞིན་དུ་མི་མང་མོ་ཞིག་ལས་དད་པ་བླངས་ཀྱང་རུང་ངོ༌། །ཆད་པ་ནི་འདི་བརྗོད་ནུས་ནའོ། །མདོ་ལྟག་མ་གཉིས་ལྟར་མང་དུ་བླང་དུ་རུང་བ་ནི་བདག་གིས་མི་བརྗོད་ཅིང་ཟློས་ནུས་པ་ཚུན་ཆད་དད་པ་བླང་དད་པ་ལེན་པའི་མི་ཉིད་ཀྱང་ཚིག་གསལ་ཞིང་སྨྲ་མཁས་པས་དད་པ་བླང་ངོ༌། །ཅི་ལྟ་ཅི་ལྟ་བུས་ཀྱང་འདིའི་སྦྱིན་པ་ལ་མི་ནུས་པས་ཀྱང་གྲུབ་བོ། །ནད་པ་ཚབས་པོ་ཆེ་ཞིག་ལས་དད་པ་ལེན་ཏེ་དྲིས་པའི་ལན་སྨྲ་མི་ནུས་ན་ཡི་གེ་དང་མཚན་མ་དང་ཚིག་ཟུར་ལ་སོགས་པ་ཅི་ལྟ་བུས་ཀྱང་དད་པ་བྱིན་པར་བླང་ངོ༌། །ཆུད་དོ། །ལུས་ཀྱིས་ཀྱང་ངོ༌། །ནད་པ་དེས་སྨྲ་མི་ནུས་ཤིང་དད་པའི་བརྡ་ལུས་ཀྱི་ཡན་ལག་གིས་བྱེད་ནའང་དད་པ་བླངས་པར་ཆུད་དོ། །ཅི་ལྟར་མི་ཕོད་ནའང་དགེ་འདུན་དེར་འདོང་ངམ་དེ་ཁྱོགས་ལས་བསླང༌། གསོ་སྦྱོང་ལ་སོགས་པའི་ལས་བྱེད་པ་ལ་ནད་པ་ལ་དད་པ་བླང་དུ་ནད་པ་དེ་དབུགས་ནི་མ་ཆད་ཀྱི་ལུས་དང་ངག་གི་བརྡ་དང་མཚན་མ་བྱེད་མི་ནུས་ཀྱང་རུང་དད་པ་དབུལ་ནུས་ཀྱང་མཚམས་བཅད་པའི་ཚེ་དད་པ་ཕུ་ལ་བས་ལས་སུ་མི་རུང་བའི་ཕྱིར་དགེ་འདུན་གྱི་ནང་དུ་དད་པ་ཁྱོགས་ལས་བླངས་ཏེ་ལས་བྱའོ། །ཡང་ན་ནད་པའི་དྲུང་དུ་དགེ་འདུན་སོང་སྟེ་ལས་བྱའོ། །དེ་བླངས་ཏེ་མི་བརྒྱུག །དད་པ་ལེན་པས་དད་པ་བླངས་ཏེ་དྲག་ཏུ་མི་བརྒྱུག །མི་དྲང༌། མི་མཆོང་དང་པ་བླངས་ནས་དྲག་ཏུ་འང་མི་འགྲོ་མཆོང་ཞིང་ཡང་མི་འགྲོ། །ཕྱི་རོལ་དུ་མི་རྒལ། དད་པས་བླངས་ནས་ཡུར་བ་དང་མཚམས་ལ་སོགས་པའི་ཕྱི་རོལ་དུ་མི་འགྲོ། །ཕྱིར་ལས་མ་ཡིན། དད་པ་བླངས་ནས་ཕྱི་སྒོ་འདས་ཤིང་ཡང་མི་འགྲོ། །ར་བའི་ཕྱི་རོལ་ནས་བོས་ཤིང་ཡང་དད་པ་མི་བླང༌། ནམ་མཁའ་ལ་མི་འདུག །དད་པ་ལེན་པའི་ཚེ་གཅིག་ནམ་མཁའ་ལ་མི་འདུག་པ་ལའང་བྱ། དད་པ་བླངས་ནས་ནམ་མཁའ་
ལ་མི་འདུག་པ་ལའང་བྱ། ཕྱི་རོལ་དུ་མ་ཡིན། དད་པ་བླངས་ནས་མཚམས་ཀྱི་ཕྱི་རོལ་དུ་མི་འགྲོ། །ཁོལ་བོར་ཏེ་རྐང་རྟེན་གཞན་ལ་མི་འགྲོ། །གྲུ་སྐས་དང་ས་སྐས་ལྟ་བུ་ལ་རིམ་པ་གཅིག་བོར་ཏེ་མི་འགྲོ་བ་ནི་དད་པ་ལེན་པའི་མིའོ། །གཞན་ཡང་དེ་བཞིན་ཁོལ་བོར་ཏ་མི་འགྲོ། །སྐས་ཀའི་རྐང་རྟེན་ལས་ཡང་ངོ༌། །ས་སྐས་དང་གྲུ་སྐས་མ་ཡིན་པ་སྐས་ཐ་མལ་པ་ཐང་མ་སྐས་ལའང་བར་དུ་གཅིག་བོར་ཏེ་མི་འགྲོ། །དད་པ་བླངས་ནས་འདི་ལྟར་མི་འགྲོ། །ལྐོག་མ་ཙམ་གྱི་ཆུ་ལ་མི་འཇུག །དད་པ་བླངས་ནས་ལྐོག་མ་ཙམ་ནུབ་པའི་ཆུ་ལ་མི་འབོག །ཉལ་བ་དང་མཉམ་པར་འཇུག་པར་མི་བྱ། །དད་པ་བླངས་ནས་ཉལ་བའམ་བསམ་གཏན་དུ་འཇུག་པར་མི་བྱ། རིམ་གྲོ་མེད་པའང་མི་སྨད་པ་མ་ཡིན་ནོ། །མདོ་ལྟག་མ་རྣམས་ལྟར་དད་པ་བླངས་ནས་ལེ་ལོ་བྱས་ན་དགེ་འདུན་གྱིས་སྤྱོ་ཞིང་བརྒྱད་དོ། །དགེ་སློང་ལ་སྨྲ། དད་པ་བླངས་ནས་སླར་འབུལ་བ་ནི་དགེ་སློང་གང་ལ་ཡང་རུང་གཅིག་ལ་དད་པ་ཕུལ་བས་ཆོག་གོ་ཞེས་འདུལ་བ་འཛིན་པ་ཁ་ཅིག་གིས་བཤད། དགེ་འདུན་ལའོ། །གཞན་དག་ཀྱང་ངོ༌། །དགེ་འདུན་སྤྱིར་དད་པ་མ་ཕུལ་ན་མི་རུང་ངོ་ཞེས་ཀྱང་འདུལ་བ་འཛིན་པ་ཁ་ཅིག་གིས་བཤད་དོ། །དགོངས་ཤིག་བཙུན་པ་ཞེས་རིམ་དུའོ། །དད་པ་བླངས་ནས་འབུལ་བའི་ཚེ་ན་དགོངས་ཤིག་བཙུན་པ་ཞེས་སྨྲས་ཏེ་གཙང་བ་དང་དད་པ་ལ་སོགས་པའི་ཚིག་མ་ནོར་བར་རིམ་བཞིན་དུ་སྨྲའོ། །དགེ་འདུན་གྱི་དབུས་སུ་མ་ཕྱིན་པར་དུས་འདས་སམ་ཁྱིམ་མིར་ཤེས་པར་བྱས་ན་བླངས་པ་མ་ཡིན་ནོ། །དད་པ་ལེན་དུ་བཏང་བས་དེས་དད་པ་བླངས་ནས་དགེ་འདུན་གྱི་ནང་དུ་མ་ཕྱིན་པར་ལམ་དུ་ཤིའམ་ཁྲིམས་ཕུལ་ཏེ་ཁྱིམ་པར་བབས་ན་དད་པ་བླངས་པ་མི་ཆུད་དོ། །ཕྱིན་ན་ནི་བླངས་པའོ། །དད་པས་ལེན་ལེན་པའི་མི་དེ་དགེ་འདུན་ནང་དུ་ཕྱིན་ནས། དད་པ་འབུལ་བའི་ཚིག་མ་སྨྲས་པར་ཁྲིམས་ཕུལ་ལམ་ཤི་བ་ནི་དད་པ་བླངས་པར་ཆུད་དོ། །གཞན་གྱི་ཚེས་བཅོ་ལྔ་དགེ་སློང་བཟུང་ནས་དགེ་སློང་དེ་ཐང་ཤིག །དགེ་སློང་གྲོགས་ཤིག་གཞན་གྱིས་བཙོན་དུ་བཟུང་སྟེ་མཚམས་གཅིག་གི་ནང་ན་འདུག་སྐྱང་རུང་གུད་ན་འདུག་ཀྱང་རུང་གསོ་སྦྱོང་གི་ཚེ་ཡུས་བདག་ལ་ཐོང་ཤིག་ཅེས་བྱ། དེད་ཀྱིས་
ཚངས་པ་མཚུངས་པར་སྤྱོད་པའོ་ཞེས་དེ་ལ་སྨྲོས་ཤིག །ལྟག་མ་ལྟར་ཐོང་ཤིག་ཅེས་བྱ་བའི་ཚིག་ནི་དེད་ཅག་ཚངས་པ་མཚུངས་པར་སྤྱོད་པ་སྟེ་ཚུལ་གྱིས་གསོ་སྦྱོང་བྱ་དགོས་ཏེ་མི་བཏང་ན་ཁྱོད་ལ་སྡིག་ཏུ་འགྱུར་རོ་ཞེས་བྱ་བ་ལ་སོགས་པ་སྨྲས་ཏེ་ཐོང་ཤིག་ཅེས་བྱ། མ་བཏང་ན་འདི་དང་ཁོ་བོ་ཅག་ལྷན་ཅིག་ཏུ་ཆུང་ཟད་ཀྱི་བྱ་བ་ཞིག་ཡོད་དོ་ཞེས་སྔ་མ་དང་བཅས་ཏེའོ། །མདོ་ལྟག་མ་ལྟར་བྱས་ཀྱང་མ་བཏང་ན་ལྟག་མའི་ཚིག་ཀྱང་སྨྲས་ལ་དགེ་སློང་འདི་དང་ངེད་ཅག་འཐམ་ཞིང་བྱ་བ་ཞིག་ཡོད་ཀྱི་མི་བཏང་དུ་མི་རུང་ངོ་ཞེས་བྱ། དེ་སྟེ་ཡང་ན་དཀྱིལ་འཁོར་བྱ། མདོ་ལྟག་མ་རྣམས་ལྟར་བྱ་སྟེ་མ་བཏང་ན་རྐྱེན་བྱུང་བའི་ཕྱིར། མཚམས་ཆེན་པོ་མ་བཀྲོལ་ཀྱང་བླ་སྟེ་མཚམས་བུ་ཆུང་མིག་རས་གྱིས་བཅད་ལ་གསོལ་བ་དང་ཞུ་བའི་ལས་བྱ་མི་དགོས་དེའི་ནང་དུ་གསོ་སྦྱོང་བྱར་རུང་ངོ༌། །ཕྱིས་ཀྱང་དེ་འཐར་བའི་ཕྱིར་ནན་ཏན་མི་བྱ་བར་མི་བྱ། གསོ་སྦྱོང་གི་དུས་ལ་བབ་པའི་ཚེའང་དགེ་སློང་བཙོན་དུ་བཟུང་བ་དེ་ལ་ཅིའི་ཐབས་ཀྱིས་ཀྱང་བཙོན་ལས་ཐར་བར་ནན་ཏན་བྱའོ། །དོགས་པར་གྱུར་ན་བྲེལ་ཏོ། །གསོ་སྦྱོང་བྱེད་པའི་ཚེ་དགེ་སློང་འདྲ་བ་ཞིག་གུད་ནས་འོང་བར་མཐོང་བཞིན་དུ་ཡང་རུང་དུས་ཀྱིས་གུད་ནས་གསོ་སྦྱོང་བྱེད་བའི་ཕྱིར་འོང་བར་ཤེས་ཏེ་དོགས་བཞིན་དུ་གསོ་སྦྱོང་བྱས་ན་བྲེལ་ཅིང་མི་བདེ་བར་འགྱུར་བའི་ཕྱིར་གསོ་སྦྱོང་མི་བྱ་བར་བསྡད་དོ། །སོ་སོར་འགྱུར་བ་འདོད་པའི་ཡིད་ཀྱིས་ལས་བྱས་ན་སྦོམ་པོར་འགལ། མཚམས་གཅིག་གི་ནང་ན་དགེ་འདུན་གཞན་ལ་དད་པ་མ་དྲིས་པར་བཞི་ལྔ་ཞིག་གི་མ་བསྡུས་ཤིང་དད་པ་མ་དྲིས་ཀྱང་བླ་མོད་ཅེས་བྱ་སྟེ་གསོ་སྦྱོང་བྱས་ན་ལས་སུ་ཡང་མི་རུང་ལ་དབྱེན་གྱི་སྦོམ་པོར་འགལ་ལོ། །ཐེ་ཚོམ་མམ་ཆད་པར་བརྟགས་ན་ཉེས་པ་མི་ལྡང་བར་མི་བྱེད་དོ། །མདོ་ལྟག་མ་ལྟར་དད་པ་མ་བླངས་ཀྱང་བླ་མོད་ཅེས་ཏེ་གསོ་སྦྱོང་བྱས་ན་སྦོམ་པོར་འགྱུར་བ་ནི་དད་པ་མ་དྲིས་ན་རུང་ངམ་མི་རུང་གཏོལ་མེད་དེ་ཐེ་ཚོམ་ཟ་བཞིན་དུ་བྱས་པའང་བླ། དད་པ་མ་བླངས་ཀྱང་རུང་ཞེས་འཆད་པར་བསམས་ཏེ་གསོ་སྦྱོང་བྱས་ཀྱང་རུང་སྤོམ་པོར་འགྱུར་རོ། །སྙིང་ནས་བཙལ་ན་གཙང་མར་བྱེད་དོ། །གསོ་སྦྱོང་བྱེད་པའི་ཚེ་མཚམས་ཀྱི་ནང་ན་དགེ་སློང་ལུས་པ་ཡོད་དམ་མེད་སྙིང་
ནས་བཙལ་ཅིང་བོས་པས་མ་རྙེད་དེ་མེད་པར་རྟོགས་ན་གསོ་སྦྱོང་བྱས་ཀྱང་ལུས་སུ་རུང་སྟེ་ཕྱིས་དགེ་སློང་ཡོད་པར་གྱུར་ཀྱང་བླའོ། །བརྟག་པ་ཙམ་མ་ཡིན། སྙིང་ནས་མ་བཙལ་གྱི་ལེ་ལོ་བྱས་ཏེ་འོལ་ཕྱི་ཙམ་དུ་བཙལ་བ་ན་དགེ་སློང་ཡོད་པར་གྱུར་ན་ལས་སུ་མི་རུང་ངོ༌། །ཚོལ་བ་དང་དགྲ་དང་མཐོན་པོར་འདུག་སྟེ་ཕྱོགས་སུ་ལྟ་བ་ནི་དེའོ། །དགེ་སློང་ཡོད་དམ་མེད་བཙལ་བ་ནི་སྒྲས་ཀྱང་བོས། །ས་མཐོན་པོ་ནས་ཀྱང་ལྟ། ཞིབ་ཏུའང་བཙལ་ཏེ་མ་རྙེད་ན་བཙལ་བར་ཆུད་དེ་ཉེས་མེད་དོ། །གསོ་སྦྱོང་གི་དངོས་པོ་སྟེ་འདུ་བར་ཆུད་པའོ། །གསོ་སྦྱོང་ལ་འདུ་བའི་ཆོ་ག་འཆང་བའོ། །གསོ་སྦྱོང་བྱ་སྟེ་བཅོ་ལྔའི་ཟླ་བ་ཕྱེད་ཕྱེད་ཅིང་སོ་སོར་ཐར་པའི་མདོ་བཤད་པས་སོ། །གསོ་སྦྱོང་བྱ་བ་ནི་ཚེས་བཅོ་ལྔ་ཞིང་ཟླ་བ་ཕྱེད་ན་འདུག་སྟེ་སོ་སོར་ཐར་པ་ཁ་ཏོན་དུ་འདུལ་བ་འཛིན་པ་གཅིག་གིས་ཀླག་གོ །ཚུལ་ནས་བྱུང་ནས་ནི་འདི་མ་གྲུབ་པ་མ་ཡིན་ནོ། །ཚུལ་ནས་འབྱུང་བའི་ཚེ་ནི་ཚུལ་ནས་འབྱུང་བ་ཉིད་སོ་སོར་ཐར་པ་ཡིན་པས་སོ་སོར་ཐར་པ་བཀག་མི་དགོས་སོ། །གསོལ་བ་དང་གཙུག་ལག་སྔར་བརྗེད་དེ་དེ་ནས་བཤད་པའོ། །སོ་སོར་ཐར་པ་བཀག་པ་ནི་ཐོག་མ་སྟོཏྟྲ་བཀག་ལ་དེ་ནས་གསོལ་བ་དང་ཞུ་བའི་སྔགས་གསོན་ཅིག་བཙུན་པའི་དགེ་འདུན་གྱི་གསོ་སྦྱོང་བཅུ་བཞིའམ་བཅོ་ལྔ་སྟེ་ཞེས་ཟེར་བའི་ལེའུ་བཀག །དེའི་གཞི་བཤད་པར་རྒྱས་པར་བརྗོད་དེ་བསྒྲུབ་སོ་སོར་ཐར་པའི་གཞི་བཤད་ཟིན་ནས་ཕས་ཕམ་པའི་མགོ་ལ་མ་རེག་པར་གཞན་མདོའི་མིང་སྨོས་ལ་སྨད་ཏྲ་ཀླག་ནའང་རུང་ངོ་ཞུ་བ་ཡང་ངོ༌། །སོ་སོར་ཐར་པ་བཞི་འཆད་པའི་ལྟག་ན་གསོལ་བ་དང་ཞུ་བའི་སྔགས་འབྱུང་བ་རྫོགས་ནས་གཞན་མདོར་བཀླགས་ཏེ་སྨད་ཏྲ་ཀླག་ཏུ་ནི་མི་རུང་ངོ༌། །ལྷག་མ་ནི་ཐོས་པའོ་ཞེས་བསྙད་ནའོ། །ཕས་ཕམ་པ་བཞིའི་མཇུག་རྫོགས་ན་འདི་མན་ཆད་ནི་སྔོན་ཆད་ཐོས་པ་ཡིན་ནོ་ཞེས་བྱས་ཏེ་གཞན་མདོར་བཀླག་པ་སྨད་ཏྲ་བཀླགས་ཀྱང་རུང་དགེ་འདུན་གྱི་ལྷག་མ་མཇུག་རྫོགས་པར་བཀླགས་ཏེ་མན་ཆད་མདོ་སྨོས་ལ་འདི་མན་ཆད་སྔོན་ཆད་ཐོས་པ་ཡིན་ནོ་ཞེས་བྱས་ལ་སྨད་ཏྲ་ཀླག་ཀྱང་རུང་གཉིས་མི་མངོན་པ་ཡན་ཆད་བཀླགས་ལ་འདི་མན་ཆད་སྔོན་ཆད་ཐོས་པ་ཡིན་ནོ་ཞེས་བྱ་སྟེ་སྨད་ཏྲ་ཀླག་ཀྱང་རུང་ངོ༌། །སྡེ་བརྩམས་པ་རྫོགས་པར་རོ། །
མདོ་ལྟག་མ་རྣམས་ལྟར་སོ་སོར་ཐར་པ་ཀློག་པ་ལ་ཚིགས་སུའང་བཅད་ཅིང་སྨད་ཏྲ་ཀླག་ཏུ་རུང་བ་རྣམ་བཞི་ལ་གང་ཡང་རུང་སྟེ་ཚིག་གཅིག་མ་རྫོགས་པར་རྐང་ཆད་དུ་བྱ་སྟེ་སྔོན་ཆད་ཐོས་པ་ཡིན་ནོ་ཞེས་མདོར་བཀླགས་ཏེ་སྨད་ཏྲ་ཀླག་ཏུ་མི་རུང་དོ། །ཚིག་བཞིར་བཅད་པ་གང་ཡང་རུང་སྟེ་གཅིག་རྫོགས་ནས་མན་ཆད་མདོར་བཀླགས་ཏེ་སྨད་ཏྲ་བཀླག་གོ །བཞི་ལ་རེག་ན་ཐམས་ཅད་དོ། །སོ་སོར་ཐར་པ་བཀླག་པ་མདོ་ལྟག་མ་རྣམས་ལྟར་རྣམ་བཞིར་ཚིགས་སུ་བཅད་པ་འདས་ནས་སུམ་ཅུ་སྤང་བའི་ལྟུང་བའི་མགོ་ལ་རེག་སྟེ་ཆུང་ཟད་སྨོས་ནས་ནི་རྐེད་དུ་བཅད་དེ་སྔན་ཆད་ཐོས་པའོ་ཞེས་མདོར་ཀླག་ཏུ་མི་རུང་གི་མཇུག་ཏུ་ཐལ་བར་བཀླག་དགོས་སོ། །ཟླ་བ་ཕྱེད་འདས་པ་དེའི་ཀུན་བརྟག་ཞག་བཅོ་ལྔ་འདས་ནས་ཟླ་བ་ཕྱེད་ཀྱི་ཚེ་སོ་སོར་ཐར་པ་ཀླག་པའི་དུས་ན་བདག་ལ་ལྟུང་བ་སྡེ་ལྔ་ལས་ཉེས་པར་གྱུར་པ་ཅི་ཡོད་དྲན་པར་བསམ། འདུ་བར་འགྱུར་བའི་ཚེའོ། །མདོ་ལྟག་མ་ལྟར་བསམས་པའི་དུས་ནི་སོ་སོར་ཐར་པ་ཀླག་པའི་མདུན་དུ་བསམ་ཞིང་དྲན་པར་བྱ། ཚོར་བ་སོ་སོར་བྱ་སྟེ་ཐམས་ཅད་དུ་འདུག་གོ །མདོ་ལྟག་མ་གཉིས་བསམས་ནས་ཕས་ཕམ་པ་ཡོད་ན་ནི་དགེ་འདུན་གྱི་ནང་དུ་མི་འཇུག་པར་གུད་དུ་འབྱུང་ངོ༌། །ལྷག་མ་ཡོད་དམ་སོ་སོར་མཐོལ་བ་ཞིག་ཡོད་ན་གྲོགས་གཅིག་ལ་དཔང་གཙུགས་ནས་བརྟགས་ཏེ་གཞག །སོ་སོར་མཐོལ་བ་དགེ་འདུན་གྱི་གྲངས་ཚངས་སྟེ་མཐོལ་དུ་རུང་བ་དང་ལྟུང་བ་དང་ཉེས་བྱས་ལས་པ་མཐོལ་ཚངས་བྱའོ། །འདུས་ནས་དྲན་པའམ་ཡིད་གཉིས་སུ་ན་དྲུང་ན་མོ་ལ་བསྔོ། །དགེ་འདུན་འདུས་ཟིན་ཏེ་སོ་སོར་ཐར་བ་བཀླགས་པས་བསྐུལ་བས་ཉེས་པ་དྲན་ན་དྲུང་ན་འདུག་པའི་དགེ་སློང་གཅིག་ལ་མཐོལ་ཚངས་བྱའོ། །ལས་བྱེད་པ་ནི་སེམས་ལའོ། །སོ་སོར་ཐར་པ་ཁ་ཏོན་ཀློག་པ་ཉིད་ཀློག་པའི་ཚེ་ཉེས་པ་བྱས་པར་དྲན་ན་ལངས་ཏེ་གཞན་ལ་མཐོལ་བའི་མི་རིགས་སྟེ་བདག་ཉིད་ཀྱིས་ཡིད་ལ་མཐོལ་བས་ཆོག་གོ །དེ་སྟེ་བདག་ལ་མེད་ལ་བཅོ་ལྔ་ལ་ཤེས་ན་མཛའ་བ་ལ་མཐུན་བར་ནན་ཏན་བྱ། དགེ་སློང་གཞན་ཀུན་ཁྲིམས་རལ་ཅིང་ཉེས་པ་ཡོད་དེ་དགེ་སློང་གཅིག་གཅིག་གཙང་སྟེ་མཐོལ་ཚངས་བྱེད་དུ་མི་བཏུབ་ན་དགེ་སློང་གཙང་མ་དེས་ཐམས་ཅད་མཐོལ་དུ་གཞུག་པར་
ཐབས་བྱ་བའི་ཕྱིར་བདག་དང་གང་མཛའ་བའི་གྲོགས་པོ་བདག་ལ་མཐོལ་ཚངས་བྱེད་དུ་ཇེ་གཞུག་གོ །མཐོལ་ཚངས་བྱེད་དུ་ཇི་ལྟར་གཞུག་པའི་ཐབས་ནི་འོག་ནས་བཤད་པ་ཡིན། ཚེ་དང་ལྡན་པ་གང་གིས་འདི་ལྟ་བུ་བྱས་ན་དེ་ཅིར་འགྱུར་ལྟུང་བ་ལྟ་བུ་དང་བཅས་པའོ། །འོ་ན་ཚེ་དང་ལྡན་པས་དེ་འདི་ལྟ་བུ་དག་མ་བྱས་སམ་བྱས་སྟེ་དེ་ལྟར་ཡོད་ན་ནི་ཚེ་དང་ལྡན་པ་ལྟུང་བ་དང་བཅས་པའོ། །ཚེ་དང་ལྡན་པ་ང་གཅིག་པུ་མ་ཡིན་ཏེ་དགེ་འདུན་ཐམས་ཅད་ཀྱང་དོན་འདི་ལའོ། །ཚེ་དང་ལྡན་པ་ཚུར་ཤོག་བདག་གི་ལྟུང་བ་ཆོས་ཇི་བཞིན་དུ་བྱས་སོ། །དགེ་འདུན་ཐམས་ཅད་ཀྱིས་ཅི་བྱ་ཞེས་རིམ་གྱིས་མཐོང་བའི་ལམ་དུ་སྟེ་ལྷག་མ་རྣམས་ཀྱིས་འདོང་ན་གཤེགས་སུ་གཞུག་གོ །དགེ་སློང་ཉེས་པ་མེད་པ་གཙང་མ་དེས་མཛའ་བོ་ཉེས་པ་ཡོད་པ་དེ་ལ་དེ་ཉིད་ཀྱི་ཉེས་པ་དམིགས་ནས་ཕྱུང་སྟེ་འདི་ལྟ་བུ་ཞིག་བྱས་ན་ལྟུང་བར་འགྱུར་རམ་དྲིའོ། །དེ་ལྟར་དྲིས་པ་དང་ཉེས་པའི་དམིགས་འདིར་འགྱུར་རོ་ཞེས་ཟེར་ན་ཁྱོད་ལའང་དེ་ལྟ་བུ་ཡོད་ན་མཐོལ་ཅིག་ཅེས་བྱ། །དེ་སྐད་བྱས་པ་དང་མཛའ་བོ་ན་རེ་དགེ་སློང་གཞན་ཡང་དེ་ལྟ་བུ་སྤྱོད་དེ་མཐོལ་ཅི་དགོས་ཞེས་ཟེར་ན་དགེ་སློང་གཞན་ཉེས་པ་བྱེད་པ་སྨོས་ཅི་དགོས་ཁྱོད་བདག་གི་ཉེས་པ་མཐོལ་ཅིག་ཅེས་བྱས་ཏེ་མཐོལ་དུ་གཞུག །མཐོལ་དུ་གཞུག་པ་ནི་དགེ་སློང་གཞན་ཀུན་གྱིས་ཀྱང་མཐོང་བར་ལམ་ཀར་ས་མཐོན་བོར་ཙོག་ཙོག་པོར་གཞག་ལ་མཐོལ་དུ་བཅུག་དང་ཉེས་པ་ཡོད་པ་གཞན་འཕྲིག་ཅིང་འཛེམ་པའི་ཕྱིར་ཁྱོད་ང་ཁོ་གཉིས་ཅི་བྱེད་ཅེས་འདྲིར་འོངས་ཏེ་དེ་དྲིས་པ་དང་མཛའ་བོ་དེས་དྲང་པོར་སྨྲས་དང་གཞན་ཀུན་ཟླ་བལྟ་སྟེ། །གཅིག་ལ་གཅིག་མཐོལ་བར་འགྱུར་རོ། །ཐབས་དེ་ལྟར་གཉིས་གཙང་པར་གྱུར་པ་དང་དེ་ལ་ཐམས་ཅད་མཐོལ་བར་བྱའོ། །མི་འདོད་ན་དེ་ལ་དེས་མི་བསྐུལ་ལོ། །ཐབས་ལྟག་ཏུ་སྨོས་པ་ལྟར་བྱ་སྟེ་མི་དགའ་བར་འགྱུར་ཞིང་མཐོལ་ཚངས་བྱེད་དུ་མི་བཏུབ་ན་མཐོལ་ཚངས་བྱོས་ཞེས་དྲག་ཏུ་མི་བསྐུལ་ལོ། །འོན་ཏེ་བཅོ་ལྔའི་ཚེ་དེ་ལྟུང་བ་མཚུངས་པར་དྲན་ནམ་ཡིད་གཉིས་ཀྱིས་ན་བདག་གིས་བཤགས་པའི་གནས་དག་ཏུ་གང་དུ་ཡང་བཏང་སྟེ་འཛིན་པ་འབྱོར་པའི་ཕྱིར་རོ། །དགེ་འདུན་ཐམས་ཅད་ལ་ལྟུང་བ་འདྲ་བར་ཡོད་ན་གཅིག་ལ་གཅིག་
མཐོལ་ན་ཚངས་པར་མི་འགྱུར་ཏེ་ལྟུང་བ་མཚུངས་པར་ཡོད་དོ། །ཤེས་སམ་ལྟུང་བ་ཡོད་པར་འདྲའམ། མི་འདྲ་གཏོལ་མེད་དེ། ཐེ་ཚོམ་ཡོད་ན། དགེ་སློང་གཙང་མ་ལོགས་ཤིག་ཏུ་མཐོལ་དགོས་ཏེ། དགེ་འདུན་རིལ་གྱིས་གུད་དུ་མཐོལ་དུ་འདོང་དུ་མི་རིགས་ཀྱི། །དགེ་སློང་གཅིག་གམ་གཉིས་ཤིག་དགེ་སློང་གཙང་མ་ག་ལ་ཡོད་པར་མཐོལ་ཚངས་བྱེད་དུ་དགྱེའོ། །དགེ་སློང་མཐོལ་དུ་བཀྱེ་བ་དེ་སླར་འཁོར་ན་དགེ་སློང་ཐམས་ཅད་ཀུན་དེ་ལ་མཐོལ་ན་ཚངས་པར་འགྱུར་རོ། །མི་འབྱོར་ན་བསྔོ་བ་གསོལ་བར་འདོད་པར་རོ། །མདོ་ལྟག་མ་ལྟར་གུད་དུ་དགེ་སློང་གཙང་མ་ལ་མཐོལ་དུ་དགྱེར་གུད་ན་དགེ་སློང་གཙང་མ་མེད་ན་ལྟུང་བ་སྤྱིའི་སྔགས་བྱས་ཏེ་སོ་སོར་ཐར་པ་ཀླག་ནའང་ཚངས་པར་འགྱུར་རོ། །བཞི་མན་ཆད་ཀྱིས་ཀྱང་གཙུག་ལག་ཁང་གི་བྱ་བ་བརྟན་པར་རོ། །དགེ་འདུན་དུ་མ་ཚང་བར་ཏེ་དགེ་སློང་བཞི་མན་ཆད་ཅིག་འཁོད་ནའང་དགེ་འདུན་མང་དུ་འཁོད་པའི་ཚུལ་བཞིན་དུ་གསོ་སྦྱོང་བྱ་ལ་རེག་པར་བཤམས་ཏེ་ཞལ་ཏ་བྱའོ། །ཞལ་ཏ་དང་ལས་བྱ་བའི་ཐབས་ནི་འོག་ནས་འཆད། སྟན་དིང་བ་ཡང་མི་ཉམས་པར་རོ། །དགེ་འདུན་དུ་མ་ཚང་ཡང་དགེ་འདུན་མང་དུ་འཁོད་པ་བཞིན་དུ་སྟན་ལ་སོགས་པ་གདིང་སྟེ་ཞིབ་ཏུ་འོག་ནས་འཆད་ཆག་ཆག་དང་ཕྱག་དར་དང་རབ་ཏུ་གཞོན་ནུའི་ལྕི་བའི་སྐྱང་ནུལ་བྱུག །སེང་གེའི་ཁྲི་དང་སྟན་གདིང༌། མེ་མར་དང་ཆོས་བསྙད་པའི་སྦྱིན་པ་བྱ། ཕྱོགས་མཐོན་པོར་འདུག་ལ་ཕྱོགས་བཞིར་བལྟ། དགེ་འདུན་མ་ཚངས་ཡང་མིང་གིས་སྨོས་བ་འདི་རྣམས་ཚུལ་བཞིན་དུ་བྱ་སྟེ་དགེ་སློང་གུད་ནས་འོང་ངམ་མི་འོང་ཕྱོགས་བཞིར་བལྟ་ཞིང་བྱར་བྱས་ལ་བསྡད་དོ། །དགེ་སློང་དག་མཐོང་ན་འདི་ལྟར་ཚེ་དང་ལྡན་པ་རིངས་པར་རིངས་ཐབས་སུ་སྦྱིན། ལྟག་མ་ལྟར་བསྡད་པ་ལས་དགེ་སློང་ཞིག་གུད་ནས་འོང་བ་མཐོང་ན་ཚེ་དང་ལྡན་པ་ལ་གོར་རིངས་སྦྱིན་ནོ་ཞེས་བྱ། དེ་རིང་དགེ་འདུན་གྱི་གསོ་སྦྱོང་ནམ་འབྱུང་བ་བཅོ་ལྔའོ་ཞེས་པའི་ཚིག་གིས་སོ། །རིངས་པར་ཤོག་ཤིག་པའི་ཚིག་ནི་རིངས་པར་ཤོག་ཤིག་པའི་དགེ་འདུན་གྱི་གསོ་སྦྱོང་ལ་བབ་པའམ་ཚུལ་ནས་བྱུང་བའི་དུས་ལ་བབ་ཀྱིས་རིངས་སུ་ཤོག་ཤིག་ཅེས་བྱ། བཞིར་མ་ཚང་བས་ཀྱང་བསྔོ་བའོ། །དགེ་སློང་བཞིར་མ་ཚང་སྟེ་
གསུམ་མན་ཆད་ཅིག་འདུག་ནའང་གཅིག་ལ་གཅིག་ཉེས་པ་ཅི་ཡོད་པ་བརྟགས་ཏེ་དཔང་བཙུགས་ཏེ་གཞག་གོ །ནམ་དུས་ཀྱི་བར་བསྡད། དགེ་སློང་བཞིར་མ་ཚང་སྟེ་བརྟགས་ཏེ་གཞག་པ་དགེ་སློང་གུད་ནས་འོངས་པ་སྐྱ་རེངས་ཤར་གྱི་བར་དུ་བསྡད་དོ། །མ་འོངས་ན་གདོད་བརྟག་གོ །འབའ་ཞིག་ན་འདུག་སྟེའོ། །གསོ་སྦྱོང་གི་ཚེ་དགེ་སློང་གཞན་མེད་དེ་བདག་གཅིག་པུར་ཟད་ན་ཡིད་ལ་དགྲ་བཅོམ་པ་བཞུགས་པར་བསམ་སྟེ་ཉེས་པ་ཅི་ཡོད་པ་དེ་བརྟགས་ཏེ་གཞག་གོ །གཞན་དང་ལྷན་ཅིག་ན་ལྷག་མ་དང་ཉེ་བར་རོ། །གསོ་སྦྱོང་གི་ཚེ་གྲོགས་ལ་བསྡད་དེ་འོངས་ནས་བསྣན་ཏེ་དེས་ཀྱང་བཞིར་མ་ཚང་ན་གཅིག་ལ་གཅིག་བརྟགས་ཏེ་གཞག་པ་ལའང་བྱ། དགེ་སློང་མང་དུ་མེད་དེ་གཉིས་སུ་འདུག་ན་ཉེ་བར་ཙོག་ཙོག་པོར་ཕས་འདུག་ཚུས་འདུག་སྟེ་གཅིག་ལ་གཅིག་བརྟག་གོ །གསུམ་ན་འཁོད་དེའོ། །དགེ་སློང་བཞིར་མ་ཚང་སྟེ་གསུམ་ཞིག་ཡོད་ལ་སྐྱ་རེངས་བར་དུ་བསྡད་དེ་མ་འོངས་ན་གསུམ་ཆར་ཁྲིའུའི་སྟེང་དུ་འཁོད་དེ་འདུག་ལ་བརྟགས་ཏེ་གཞག །དེ་བཞིན་དུ་བཞི་པ་འབྱུང་བ་ཡང་ངོ༌། །གསོ་སྦྱོང་གི་ཚེ་ན་དགེ་སློང་བཞི་ཡོད་ན་གསོ་སྦྱོང་དུ་རུང་སྟེ་སོ་སོར་ཐར་བ་བཀླག །ཚུལ་ནས་འབྱུང་བའི་ཚེ་ནི་དགེ་སློང་ལྔར་མ་ཚང་ན་ཚུལ་ནས་འབྱུང་བའི་ལས་སུ་མི་རུང་སྟེ་གཅིག་ལ་གཅིག་བརྟག་པ་ནི་སང་ཕོད་ཀྱི་ཚུལ་ནས་འབྱུང་བའི་ཚེ་གྲངས་ཚང་བར་བྱའོ་ཞེས་བསམ། སོ་སོར་ཐར་པའི་མདོ་འཆད་པ་དེའི་ཚེ་གནས་ན་མེད་པར་ཤེས་ན་གསོ་སྦྱོང་ལ་མི་བསྡད་དོ། །སོ་སོར་ཐར་པ་ཀློག་ཅིང་ཆོ་ག་ཤེས་པ་མེད་ན་གསོ་སྦྱོང་གི་དུས་ཀྱི་བར་དུ་མི་བསྡད་པར་སོ་སོར་ཐར་པ་ཁ་ཏོན་ཤེས་པ་གང་ལ་འདུག་པའི་གན་དུ་འགྲོ་བའམ་བཙལ་ཏེ་འཇུག་པར་བྱའོ། །གང་ན་འདི་ལས་རྒལ་བ་དེར་ཚུལ་དུ་མི་འཇུག་གོ །སོ་སོར་ཐར་པ་ཁ་ཏོན་དང་ཆོ་ག་ཤེས་པ་མེད་ན་ཚུལ་དུ་ཞུགས་ཀྱང་འདྲལ་དགོས་པའི་ཕྱིར་ཚུལ་དུ་མི་འཇུག་པར་ཚོལ་དུ་འགྲོའོ། །སྔོན་གྱི་ཚུལ་དུ་ཞུགས་པ་མི་བསྲུང་ངོ༌། །ཚུལ་སྔ་མར་ཚུལ་དུ་ཞུགས་པ་ལས་སོ་སོར་ཐར་པའི་ཁ་ཏོན་དང་ཆོ་ག་ཤེས་པ་ཤིའམ་གུད་དུ་སོང་ངམ། ཁྱིམ་པར་བབས་ན་ཚུལ་མི་བསྲུང་བར་ཤེས་པ་ཚོལ་དུ་འགྲོའོ། །ཕྱི་མ་ཟླ་བ་གཉིས་ལས་འདས་པར་རོ། །ཚུལ་ཕྱི་མར་ཞུགས་པ་ལས་སོ་སོར་ཐར་པ་
ཤེས་པ་ཤིའམ་མེད་པར་གྱུར་ན་ཟླ་བ་གཉིས་ཀྱི་བར་དུ་ཚུལ་ཁྲིམས་བསྲུངས་ལ་དེ་ནས་དྲལ་ཏེ་ཚུལ་དང་ཆོ་ག་ཤེས་པ་ཚོལ་དུ་འགྲོའོ། །དངོས་པོ་དང་ལས་དང་འཐོབ་པ་དང་གཡོག་འཁོར་སྤང་བ་འཆད་པ་བཙལ་ལོ། །སོ་སོར་ཐར་པ་ཤེས་པ་མེད་དེ་སྤྱན་འདྲེན་ན་ཁང་བུ་བཟང་པོར་བསྡམས་ཏེ་སྦྱིན་པ་དང་དགེ་འདུན་གྱི་ལས་སུ་མི་གཞུག་པ་དང་དགེ་འདུན་གྱི་ཟས་དང་ཡོན་ལ་སོགས་པ་སྐལ་བ་གཞན་གྱི་བཞིན་དུ་སྦྱིན་པ་དང༌། དགེ་སློང་དང་ཁྱིམ་པ་ལས་གཡོག་སྦྱིན་པར་ཁང་བླངས་ཏེ་སྤྱན་དྲང་ངོ༌། །མདོ་སྡེ་འཛིན་པའི་འོག་ནས་གདུགས་དང་རྒྱལ་མཚན་དང་བ་དན་དག་གིས་བསུ། མདོ་སྡེ་འཛིན་པ་མཁས་པ་ཞིག་སྤྱན་མ་དྲངས་ཀྱང་གུད་ནས་འོང་བར་ཐོས་ན་མིང་གིས་སྨོས་པ་འདི་རྣམས་ཀྱིས་བཀུར་སྟི་བྱ་སྟེ་མཆོད་ཅིང་བསུའོ། །འདུལ་བ་དང་མ་ལྟ་བུ་དག་ལ་ཡང་ངོ༌། །གུད་ནས་སྤྱན་མ་དྲངས་པར་འདུལ་བ་དང་མ་ལྟ་བུ་འཛིན་པ་ཞིག་འོང་བར་ཐོས་ནའང་མདོ་སྡེ་འཛིན་པ་བཞིན་དུ་བསུ་བར་བྱའོ། །དཔག་ཚད་ཕྱེད་དང་གསུམ་དུའོ། །བསུ་བའི་ཚད་ནི་དཔག་ཚད་ཕྱེད་དང་གསུམ་དུ་བསུའོ། །མ་ནུས་ན་རྒྱང་གྲགས་ལྔར་རོ། །དཔག་ཚད་ཕྱེད་དང་གསུམ་དུ་བསུ་མ་ནུས་ན་རྒྱང་གྲགས་ལྔ་ཙམ་དུ་བསུའོ། །གསུམ་མམ་དཔག་ཚད་ཕྱེད་དམ་རྒྱང་གྲགས་སམ་རྒྱང་གྲགས་ཕྱེད་དམ་ར་བའམ་ཚིག་འཇམ་པོས་བསུ་སྟེ་ལྷུང་བཟེད་དང་ཆོས་གོས་བླང་ངོ༌། །ལྟག་མ་ལྟར་བསུ་བ་མ་ནུས་ན་དཔག་ཚད་ཕྱེད་དེ་རྒྱང་གྲགས་བཞིར་བསུ་དེར་ཀྱང་བསུ་མ་ནུས་ན་རྒྱང་གྲགས་ཕྱེད་དམར་བའི་ཕྱི་རོལ་ཙམ་དུ་འང་བསུའོ། །བསུ་བའི་ཚེ་འཛུམ་ཞིང་མདངས་ཅན་དུ་བྱས་ལ་བདེ་བར་བྱོན་ཏམ་ཞེས་བྱས་ལ་དེ་ལྟར་སྨྲ་ཞིང་ལྷུང་བཟེད་དང་ཆོས་གོས་ལ་སོགས་པ་བླང་ཞིང་བསུ། ཁྲུས་བྱ། གུད་ནས་འོངས་ཏེ་བསུ་བ་དེ་བྲུས་བྱ་ལུས་དག་མཉེ། དགེ་འདུན་གྱིས་ཀྱང་སྣུམ་ཐོབ་པར་རོ། །གུད་ནས་འོངས་ཏེ་བསུ་བ་དེ་དགེ་འདུན་གྱིས་ཀྱང་ཁ་ཟས་བཟང་པོས་མགྲོན་བྱ་ཞིང་ལུས་བསྐུ་བའི་སྣུམ་ལ་སོགས་པ་སྦྱིན། དངོས་པོ་ལ་སོགས་པ་སྤང་བ་སྦྱིན། མདོ་སྡེ་དང་འདུལ་བ་དང་མ་ལྟ་བུ་འཛིན་པ་སྤྱན་དྲངས་ཀྱང་རུང་རང་འོངས་ཀྱང་རུང་ཁོང་བུ་དང་གཡོག་ལ་སོགས་བ་སྦྱིན་ཏེ་སོ་སོར་
ཐར་པ་ཤེས་པ་སྤྱན་དྲངས་པ་བཞིན་དུ་བྱའོ། །ཆོས་མཉན་པ་ཡང་ངོ༌། །མཁན་པོ་མཁས་པ་གུད་ནས་འོངས་ན་བསྟི་སྟང་དང་མགུ་བར་བྱ་ཞིང་རྟག་པར་འདུག་པར་བྱ་བའི་ཕྱིར་ཡི་གེ་གྲ་བཙུགས་པ་དང་ཁ་དོན་མཚན་རངས་བྱ། བསྟན་པ་འཛིན་པ་ལ་འདི་ལྟར་དགེ་སློང་ཕྲག་དོག་ན་ཆུད་པར་རོ། །དགེ་སློང་མཁས་པ་ལ་གུད་ནས་འོངས་པ་ལ་བསུ་ཞིང་བསྟི་སྟང་བྱས་པ་དང་མཁས་པ་གཞན་ཕྲག་དོག་ལངས་ན་ཕྲག་དོག་བྱའི་མི་རིགས་ཀྱི་གཅིག་ཏུ་ན་རིམ་གྲོ་གྱིས་ཤིག་པར་སངས་རྒྱས་ཀྱི་བཀའི་གཞུང་ལས་འབྱུང༌། གཅིག་ཏུ་ན་སངས་རྒྱས་ཀྱིས་བསྟན་པའི་ཚིག་ཁོ་ལ་ཡོད་པས་རིམ་གྲོ་བྱ་བའི་རིགས་ཏེ་དེ་ལ་ཕྲག་དོག་སྐྱེས་ན་སྡིག་ཏུ་འགྱུར་གྱི་མ་བྱེད་ཅིག་ཅེས་གྲོས་གདབ། གསོ་སྦྱོང་ནམ་འབྱུང་བ་མ་བྱས་པར་དེའི་ཉིན་མོ་ཡོད་ན་བདག་གི་གནས་ནས་མི་འགྲོ། །གསོ་སྦྱོང་ལ་བབ་པའི་ཉིན་པར་དང༌། ཚུལ་ནས་འབྱུང་བའི་ཚེ་གསོ་སྦྱོང་དང་ཚུལ་གྱི་ལས་མ་བྱས་པར་གུད་དུ་མི་འགྲོ་སོང་ན་ཉེས་བྱས། དེ་སྟེ་དེ་ཉིད་ན་རྣམ་པར་ཐོས་པ་ནི་མ་ཡིན་ནོ། །རྐྱེན་གཅིག་གིས་མི་འགྲོར་མི་རུང་བ་ལ་ཕ་རོལ་དུ་འགྲོ་བའི་གནས་དེ་ན་གསོ་སྦྱོང་དང་ཚུལ་ནས་འབྱུང་བའི་ཆོ་ག་དང་ཁ་ཏོན་ཤེས་པ་ཡོད་ན་མ་བྱས་པར་སོང་ཡང་ཉེས་མེད་དོ། །འཐབ་མོ་བྱེད་པ་དག་ལ་མཐར་ཞིང་དམ་པའི་ཚུལ་ཅན་དང་ཕྲད་དོ་ཞེས་བསམས་ན་ཡང་ངོ༌། །བདག་ཅག་འཁོད་པ་ན་དགེ་སློང་འཐབ་མོ་པ་ཡོད་དེ་རྟག་ཏུ་འཁྲུག་ཅིང་མི་འདུམ་ན། ཚུལ་དང་ལྡན་ཞིང་མི་འཁྲུག་པའི་དགེ་འདུན་གྱི་གན་དུ་འགྲོ་བར་བསམས་ན་གསོ་སྦྱོང་མ་བྱས་པར་སོང་ཡང་ཉེས་མེད་དོ། །དམ་པའི་ཚུལ་ཅན་གྱི་དགེ་སློང་ལས་འཐབ་མོ་བྱེད་པའི་དགེ་སློང་གན་དུ་མི་འགྲོ། །དགེ་སློང་ཚུལ་དང་ལྡན་ཞིང་མི་འཁྲུག་ལ་འཚོ་བའི་ཡོ་བྱད་མི་བཟད་པ་ཞིག་ན་ཡང་དགེ་སློང་འཁྲུག་ཅིང་འཐབ་རྩོད་པ་འཚོ་བའི་ཡོ་བྱད་བཟང་ཞིང་འབྱོར་དུ་ཟིན་ཀྱང་ཚུལ་ཅན་བོར་ཏེ་འཐབ་མོ་ཅན་འཁོད་པའི་གནས་སུ་མི་འགྲོ་བར་ཚུལ་ཅན་གན་ན་གནས་སོ། །དགེ་སློང་དང་བཅས་པ་ནས་དགེ་སློང་མེད་པར་མ་ཡིན་ཏེ། དགེ་སློང་ཚུལ་དང་ལྡན་པ་དང་གནས་པ་ལས་ཚུལ་དང་མི་ལྡན་པའི་གནས་སུ་དགེ་སྦྱོང་མེད་པ་དང་འདྲ་སྟེ་མི་འགྲོ། །གཅིག་ཏུ་ན་གཙུག་ལག་ཁང་དགེ་
སློང་ཡོད་པའི་གནས་ནས་དགེ་སློང་མེད་པའི་གནས་གཙུག་ལག་ཁང་སྟོང་བར་མི་འགྲོ་བ་ལའང་བྱ། མ་ལུས་པར་རམ་གཞན་རྐྱེན་གཅིག་གམ་ལུས་དང་སེམས་བདེ་བའི་དབང་གིས་ན་མ་ཡིན་ནོ། །ལྟག་མ་རྣམས་ལྟར་འགྲོར་མི་རུང་བ་ལ་དགེ་འདུན་ཐམས་ཅད་རིལ་གྱིས་འདོང་བ་དང་སྲོག་ལ་དམན་ཞིང་དགེ་སྦྱོང་གི་ཚུལ་སྟོར་བར་འགྱུར་བ་དང་སེམས་འཁྲུགས་ཤིང་མྱ་ངན་དུ་གྱུར་པ་དང༌། ཡུལ་གྲོང་ཁྱེར་ཏེ་ལུས་ལ་ནད་དུ་གྱུར་ཏེ་རྐྱེན་འདི་རྣམས་ལྟ་བུ་ཞིག་བྱུང་ནས་དགེ་སློང་འཐབ་མོ་པ་དང་གཙུག་ལག་ཁང་སྟོང་པར་སོང་ཡང་ཉེས་མེད་དོ། །གསོ་སྦྱོང་དང་འབྱུང་བ་མ་བྱས་པ་གནས་པ་འགྲོ་བར་མི་བཏང༌། སློབ་མ་དང་འཁོར་ལས་གསོ་སྦྱོང་དང་ཚུལ་ནས་འབྱུང་བའི་ལས་མ་བྱས་པར་གུད་དུ་འགྲོ་ཞེས་ཟེར་ན་གནས་བརྟན་གང་བྱེད་པས་མ་དགྱེ་ཤིག །བཀྱེ་ན་ཉེས་བྱས། དེ་ལྟ་བུའི་གཟུགས་ཀྱི་རྐྱེན་དམ་པའི་ཚུལ་ཅན་སྟོན་པ་དང་ལྡན་པ་ཞིག་ན་གནས་ཆེ་གེ་མོ་བ་དེར་འཕོས་ཤིག་ཅེས་བསྒོའོ། །སློབ་མ་དང་འཁོར་ལས་གུད་དུ་མི་གཏོང་བར་གཞག་ཏུ་ལུས་དང་སྲོག་ལ་དམའ་ཞིང་དགེ་སྦྱོང་གི་ཚུལ་སྟོར་བ་ཙམ་གྱི་རྐྱེན་ཅིག་བྱུང་ན་ཕ་རོལ་གྱི་གནས་དེ་ན་དགེ་སློང་ཚུལ་དང་ལྡན་པ་དང་མི་ལྡན་པ་དང༌། གསོ་སྦྱོང་བྱེད་པ་དང་མི་བྱེད་འདྲེན་མར་འཁོད་ན་དགེ་སློང་ཚུལ་དང་ལྡན་ཞིང་གསོ་སྦྱོང་བྱེད་པ་དང་འགྲོགས་ལ་གསོ་སྦྱོང་བྱོས་ཤིག །ཚུལ་ནས་བྱུང་སྟེ་སོང་ཤིག་ཅེས་བསྒོ་ནས་བཏང་ཡང་ཉེས་མེད་དོ། །བསྒོ་བ་འདི་ལས་མི་རྒལ་མདོ་ལྟག་མ་ལྟར་མཁས་པོས་བསྒོ་སྟེ་བཏང་བ་ལ་མཁན་པོས་བསྒོ་བ་བཞིན་དུ་སློབ་མས་ཀྱང་མཉན་ཅིང་བྱའོ། །བརྟགས་པ་ནི་ཕྱིས་འོང་བའི་ཕྱིར་ཡང་འདི་དག་བྱ་བར་རོ། །གསོ་སྦྱོང་གི་ཚེ་སྔ་ན་གཞི་ན་འཁོད་པའི་དགེ་སློང་གིས་གསོ་སྦྱོང་དང་ཚུལ་ནས་བྱུང་བའི་ལས་བྱས་ཟིན་པའི་འོག་ཏུ་གུད་ནས་དགེ་སློང་དག་ཅིག་འོངས་ཏེ་ངེད་ལས་འདིར་བྱ་བར་རོ་སྟེ་འོངས་པ་ཡིན་ན་སླར་ལས་བསླ་སྟེ་བྱར་ཅིག་ནང་ཞེས་ཟེར་ན་སླར་བསླ་སྟེ་བྱ་བའི་རིགས་སོ། །ཡང་དག་པར་བྱས་པ་དེར་འདུག་པར་འདོད་ནའོ། །མདོ་ལྟག་མ་ལྟར་སླར་བསླ་སྟེ་བྱ་བའི་ལས་སུ་མ་རུང་ངམ་མཐོལ་བ་མ་ཚངས་པའི་ཐེ་ཚོམ་ཡོད་ན་སླར་བསླ་སྟེ་བྱ་བའི་རིགས་ཐེ་ཚོམ་མེད་ཀྱང་གསོལ་
ན་བསླ་སྟེ་བྱ་བའི་རིགས་སླར་འདུས་ཏེ་མ་བྱས་ཀྱང་ཉེས་མེད་དོ། །མཐུན་པའི་སྤྱོད་པ་ན་ཡང་ངོ༌། །གཙུག་ལག་ཁང་གི་རྐྱེན་དུ་གཏོགས་པའི་དགེ་སློང་ལས་ཁ་ཅིག་གུད་དུ་དོང་བའི་འོག་ཏུ་གཞི་བས་གསོ་སྦྱོང་བྱས་ཟིན་ནས་གུད་དུ་འདོང་བ་འཁོར་ཏེ་གསོ་སྦྱོང་བསླས་པར་གསོལ་ནའང་བཟླས་པའི་རིགས་དགེ་སློང་འདྲོན་པོ་སྔ་ཕྱིར་ཆད་པ་ལས་སྔ་མས་བྱས་ཟིན་ཏེ་ཕྱི་མ་མ་བྱས་ན་སླར་བཟླས་ཏེ་བྱ་བའི་རིགས་སོ། །འདུ་བ་ཡང་དེ་དག་བསླང་མདོ་ལྟག་མ་རྣམས་ལྟར་སླར་བསླས་པར་གསོལ་ཏེ་མ་བཏུབ་ན་དང་པ་དྲིས་ཏེ་ཕྱིས་འོངས་པའི་རྣམས་ནང་གསོ་སྦྱོང་བྱའོ། །མ་ཐོབ་ན་མཚམས་ཀྱི་ཕྱི་རོལ་དུ་བྱ། མདོ་ལྟག་མ་ལྟར་དད་པ་མ་སྟེར་ན་མཚམས་ཀྱི་ཕྱི་རོལ་དུ་དོང་སྟེ་གསོ་སྦྱོང་བྱའོ། །འགྲུབ་པ་ནི་བྱེད་པའི་ཚེ་འོངས་ཏེ་ལྷག་མ་མྱོང་ནའོ། །དགེ་སློང་བཞི་ལ་འཁོད་པས་གསོ་སྦྱོང་བྱེད་དེ། སོ་སོར་ཐར་པ་ཀློག་པ་མཇུག་ཏུ་མ་ཕྱིན་ཚུན་ཆད་དུ་སླེབས་ན་ཕྱིས་འོངས་པ་དེ་རྣམས་ཀྱང་གསོ་སྦྱོང་བྱས་པར་ཆུད་དོ། །ཕྱིས་འོངས་པ་རྣམས་གཅིག་ལ་གཅིག་མཐོལ་བ་ནི་ཚུལ་གྱི་མཚམས་ཀྱི་ཕྱི་རོལ་དུ་མཐོལ་ཞིང་བརྟགས་ལ་ནད་དུ་འགྲོ་བ་ཡིན་ནོ། །གང་ཡང་གནས་ནས་མ་སོང་ན་གདོན་མི་ཟ་བར་རོ། །དགེ་སློང་གཞི་བས་གསོ་སྦྱོང་བྱས་ཟིན་ཏེ་གྱེས་ལ་དགེ་སློང་ཕྱིས་ལྷགས་པས་གསོ་སྦྱོང་བྱེད་པའི་གནས་སུ་དགེ་སློང་འགའ་ཙམ་ཞིག་སླེབས་ན་དགེ་སློང་སྔ་མ་གྱེས་པ་ཀུན་སླར་བསྡུས་ཏེ་གསོ་སྦྱོང་གྱིས་ཤིག །འོངས་པ་མང་ན་ཡང་ངོ༌། །མདོ་ལྟག་མ་ལྟར་སླར་འདུ་བ་ཡང་དགེ་སློང་ཕྱིས་ལྷགས་པ་མང་ན་འདུ་དགོས་སོ། །གཞི་བ་མང་ན་མ་འདུས་ཀྱང་ཉེས་མེད་དོ། །དུས་ཀྱང་མང་པོའི་ཕྱིར་གཞུག་གོ །དགེ་སློང་གཞི་བ་དང་གུད་ནས་འོངས་པ་ཚེས་གྲངས་བཅུ་བཞི་དང་བཅོ་ལྔའི་དུས་མི་མཐུན་ན་མི་གྲངས་གང་མང་པའི་ཁར་དོར་རོ། །མཉམ་ན་གནས་པས་སོ། །ཚེས་གྲངས་མི་མཐུན་ལ་མི་གྲངས་མཉམ་ན་གཞི་ལ་ཡོད་པའི་དགེ་སློང་བཞིན་དུ་བྱའོ། །གཞི་བས་གསོ་སྦྱོང་བྱས་ཏེ་ཕྱིས་དགེ་སློང་ལགས་ན་སླར་འདུ་བ་ཡང་གྲངས་མཉན་ན་གཞི་བ་བརྩན་ཏེ་མ་འདུས་ཀྱང་ཉེས་མེད་དོ། །དེ་ཡང་ངོ༌། །སླར་འདུ་དགོས་པ་ནི་དགེ་སློང་ཕྱིས་འོངས་པ་གྲངས་མང་ན་སྔ་མས་ལས་ཟིན་ཀྱང་མི་ཕན་ཏེ་འདུ་དགོས་སོ། །གསོ་སྦྱོང་གི་ཚུལ་དུ་ཆུད་
པའོ། །གསོ་སྦྱོང་དུ་ཆུད་དམ་མི་ཆུད་པའི་ཆོ་ག་བཤད་པའོ། །བསམ་གཏན་ལས་མི་བསླང༌། དགེ་སློང་བསམ་གཏན་དུ་བཞུགས་པ་ལ་སྡང་བའམ་བསླང་བར་མི་བྱ་བསླང་ན་ཉེས་བྱས། སྟོན་པ་མེད་པར་བསམ་གཏན་མི་བྱ། བསམ་གཏན་གྱི་ལུང་སྟོན་པའི་མཁན་པོ་མེད་པར་ཐུག་ཐུབ་ཏུ་བསམ་གཏན་མི་བྱ། བུམ་བུ་དང་ཕོ་ལོང་གི་སྦྱར་བ་ཡང་རིགས་སོ། །བསམ་གཏན་བྱེད་པ་དང་གསོ་སྦྱོང་བྱེད་པའི་ཚེ་ཡུར་ན་བུམ་བུ་རྣ་བ་ལ་བཏགས་པ་དང་ཕོ་ལོང་གིས་བརྡེག་པ་འང་ཉེས་མེད་དེ་རིགས་སོ། །བརྩོན་འགྲུས་མི་གློད། དགེ་བ་ཅི་སྤྱོད་ཀྱང་རུང་ལུས་དང་སེམས་ཀྱིས་རྒྱུན་མི་འཆད་པར་བྱ། ལུས་ནའམ་རྐྱེན་བྱུང་ཡང་སེམས་རྒྱུན་མི་འཆད་པར་བྱ། མདོ་བཞིན་དུ་འདི་ཡང་ངོ༌། །མདོ་སྡེའི་ནང་ནས་བརྩོན་འགྲུས་བྱ་བ་བཞིན་དུ་བརྩོན་འགྲུས་ཆེར་བསྐྱེད་དགོས་ཏེ་ཟན་གྱིས་འགྲངས་ཏེ་སྙོམ་ནའང་ཡོན་བདག་གི་བསོད་ནམས་སྐྱེད་པའི་ཕྱིར་བརྩོན་འགྲུས་བསྐྱེད་དགོས་སོ། །མ་འགྲངས་སུ་ཟིན་ཀྱང་བརྩོན་འགྲུས་བསྐྱེད་དགོས་ཏེ་ཤ་ཟད་པགས་པ་བསྙིལ་གྱི་བར་དུ་བསྒྲིམ་པ་ལ་བྱ། མདོ་སྡེ་ལས་བསམ་པའི་རྒྱུད་བྱུང་བ་བཞིན་དུ་འོག་ནས་འབྱུང་བ་དང་ཉལ་ཁར་བསམ་པ་ལའང་བྱ། ཡན་ལག་དང༌། ལུས་རང་ཉམ་དུ་མི་བྱ་བར་སེང་གེ་ཐབས་སུ་ནེ་བན་ལྟར་ཉལ་བ་ལ་བྱ། སེམས་དང་གོས་ཀྱང་མི་གཡེལ་བར་ཉལ་བརྟག །སྔོན་ཁྱིམ་པ་དང་མི་དགེ་བའི་ལས་སྤྱད་པ་དྲན་བར་མི་བྱའི་དགེ་བ་ལ་རྒྱུན་མི་འཆད་ཅིང་ནང་པར་སྔར་ལྡང་བར་བསམས། ཆོས་གོས་དང་ཤམ་ཐབས་དང་སྐེ་རགས་ལ་སོགས་བ་འཐོར་བར་མི་གཞག་གི་མི་སྤྲུག་ཅིང་ལྟབ་ལ་གནས་གཅིག་ཏུ་གཞག་པ་ལ་བྱ། མི་ན་བར་ཉིན་པར་མི་ཉལ། མི་ན་པར་ཉིན་པར་ཉལ་ན་ཉེས་བྱས། རྐེད་པ་ན་བས་པུས་འཁྱུད་ཀྱི་སྣམ་བུ་བཅང༌། རྐེད་པ་ན་བས་པུས་འཁྱུད་བཅངས་ཀྱང་ཉེས་མེད། དབང་པོ་ནང་དུ་ཆུད་ཡིད་ཕྱིར་མ་སོང་པར་བཅག་སྟེ་མི་ནུར་གསལ་པོ་དྲང་པོར་རོ། །འཆག་པའི་ཚེ་དབང་པོ་དྲུག་ནང་དུ་བསྡུས་ཏེ་སེམས་ཡུལ་ལ་མ་བྲོས་པར་འགྲོས་དལ་བར་ཡང་མི་བྱ། དྲག་ཏུ་ཡང་མི་འགྲོ། །ལུས་ལྷོད་ལྷོད་པོ་དང་རྙོལ་རྙོལ་པོར་མི་བྱ་བར་གསལ་པོར་བྱས་ལ་དྲང་པོར་བཅག་གོ །མི་ནུས་ན་ཐག་བུ་དྲང༌། འཆག་པའི་
ལམ་དྲང་པོར་འགྲོར་མི་ནུས་ན་ཐག་བུ་དྲངས་ལ་དེའི་འགྲམ་ཆུ་དག་བཅག་གོ །ཁ་ཏོན་བྱེད་པའི་འཆག་སའི་ཚད་ནི་ཁྲུ་བཅུ་གཉིས། ཁ་ཏོན་བྱེད་པའི་འཆག་སའི་ཚད་ནི་ཁྲུ་བཅུ་གཉིས་ཚུན་ཆད་དུ་བྱའོ། །སྤོང་བའི་ནི་བཅོ་བརྒྱད་དོ། །བསམ་གཏན་བྱེད་པའི་འཆགས་ཁྲུ་ཚད་མ་བཅོ་བརྒྱད་ཚུན་ཆད་དུ་བཅག་གོ །དེར་ཐག་བུ་དྲངས་ཏེ་བྱ། འཆགས་བྱེད་པའི་ཚེ་ཐག་བུ་ལ་ཁྲུས་གཅལ། དེ་ཚད་བཞིན་དུ་སྦྱར་ལ་ཐག་བུས་བྲེས་ཏེ་དྲང་པོར་བྱ། དགེ་སློང་གིས་འདུག་ནས་ཆོས་བཤད། སངས་རྒྱས་ཞལ་བཞུགས་སུ་ཟིན་ཀྱང་དགེ་སློང་གིས་ཆོས་བཤད་དུ་རུང་སྟེ་ས་ལ་འདུག་ལ་བཤད་དོ། །དུ་མ་ན་གཅིག་གིས་སོ། །མི་མང་དུ་འཁོད་ཀྱང་ཆོས་འཆད་པ་གཉིས་སུ་མི་བྱའི་གཅིག་གིས་བཤད་དོ། །གང་སུས་ཀྱང་ངོ༌། །ཆོས་འཆད་པ་ནི་གང་མཁས་པ་གཅིག་གིས་བཤད་དོ། །མ་བསྐོས་པར་ཡང་མ་ཡིན་ཏེ། ཆོས་བཤད་དུ་མི་གསོལ་བར་བདག་གིས་མདོར་ཏོ།། ཆོས་བཤད་པར་མི་བྱ། དེ་སྟེ་དེའི་དངོས་འོངས་ན་ནི་མ་ཡིན། ཆོས་བཤད་དུ་གསོལ་བ་དང་ཆོས་སྟོན་བྱས་ནས་དེའི་རྗེས་ལ་ཡོན་བདག་ལ་ཆོས་བཤད་པ་ནི་ཉེས་མེད་དོ། །འཁོར་དུ་མ་ཡིན། མི་ཕལ་མོ་ཆེ་འཁོད་པ་ལ་གྲངས་མང་དུ་བཅད་དེ་ཕུང་བུ་ཕུང་བུར་བྱ་སྟེ་གཅིག་གི་སྒྲ་གཅིག་གིས་ཐོས་པར་མི་བཤད། འཁོར་ཕྱེད་དུ་མ་ཡིན། མི་ཕལ་མོ་ཆེ་འཁོང་པ་ལ་གཅིག་གིས་མགོ་ནས་བཤད། གཅིག་གིས་མཇུག་ནས་བཤད་དེ་གཅིག་གི་སྒྲ་གཅིག་གིས་ཐོས་པར་མི་བྱ་སྟེ་མི་ཐོས་པར་བཤད། དེ་གཉིས་ཀྱི་གཅིག་ཏུ་མ་ཡིན། ཁྲི་བཤམས་ཏེ་ཆོས་བཤད་པ་གཉིས་ཀྱིས་ཅིག་ཅར་ལྷན་ཅིག་ཏུ་སྨྲ་ཞིང་བཤད་པར་མི་བྱ། རྒན་རབས་ཀྱིས་སོ། །ཆོས་བཤད་པ་ནི། རྒན་རབ་ཞིང་ཆོས་མཁས་པ་བཙུན་པ་རྣམས་ཀྱིས་བཤད། དེ་སྟེ་མང་ན་སྟན་གཉིས་གསུམ་བཞག་སྟེའོ། །ན་རྒན་པ་མང་ལ་ཆོས་འཆད་མཁས་པ་མེད་ཀྱི་གྲལ་དམའ་བའི་ནང་ནས་ཆོས་བཤད་མཁས་པ་ཡོད་ན་གྲལ་སྤར་ཏེ་གོང་དུ་གཉིས་གསུམ་ཙམ་གྱི་གྲལ་གཞག་ལ་དེའི་འོག་ཏུ་འཆད་པ་གཞག །དེ་སྟེ་སྟན་མེད་ན་མ་ཡིན་ནོ། །ཆོས་འཆད་མཁས་པ་དེ་རྒན་པོ་གཉིས་གསུམ་གྱི་འོག་ན་འདུག་ན་སྟན་སྤར་མི་དགོས་པ་ལའང་བྱ། སེང་གེའི་ཁྲི་ཡང་ངོ༌། །ཆོས་འཆད་མཁས་པ་དེ་
སེང་གེའི་ཁྲི་བཤམས་ཏེ་དེའི་སྟེང་དུ་འཆད་དུ་བཅུག་ནའང་འདུག་སྟེ་བཤད་ནའང་ཉེས་མེད། མཆིལ་མའི་ཆོལ་ཟངས་ཞོག་ཤིག །ཆོས་འཆད་པའི་དྲུང་དུ་ཆོལ་ཟངས་མཆིལ་མའི་སྣོད་བཞག་ཀྱང་ཉེས་མེད་དོ། །དེར་གདིང་བ་སྦྱིན། མཆིལ་མའི་སྣོད་ཆོལ་ཟངས་ཀྱི་ནང་དུ་འོག་མ་དག་གཞག །བྱེ་མའམ་ཐལ་བས་སོ། །ཆོལ་ཟངས་སུ་བྱེ་མའམ་སའམ་ཐ་ལྦ་བླུགས་ཏེ་གཞག །དུས་དུས་སུ་བཀྲུ། མཆིལ་མ་རིང་དུ་བཞག་ན་སེམས་ཅན་དུ་གྱུར་པས་དུས་དུས་སུ་བཀྲུ། ནུབ་མོ་ཆོས་བསྙད་པར་བྱ། ནུབ་མོ་ཐོག་ཐག་ཏུ་ཁ་ཏོན་བྱ་ཞིང་ཡི་གེ་ཀླག་དགོས་ཏེ་དུས་མ་ཡིན་པ་ནི་འོག་ནས་འཆད། དེ་ལྟར་ཀླག་དགོས་པ་ནི་ངོས་བཞི་མགོན་པོ་དང་རིམ་པའི་ལྷ་གཙུག་ལག་ཁང་གི་འཁོར་དུ་དུས་དེར་འོང་བའི་ཕྱིར་དད་པ་དང་དགའ་བ་བསྐྱེད་པར་བཀླག་གོ །ཚེས་བརྒྱད་དང་ཉི་ཤུ་གསུམ་ལ་མགོན་པོ་དང་ལྷ་བྲན་གྱི་གཡོག་འོང་བའི་ཕྱིར་ཡི་གེ་བཀླག །བཅུ་བཞི་དང༌། ཚེས་བཅུ་བཞི་དང་ཉི་ཤུ་དགུ་ལ་མགོན་པོ་ལ་སོགས་པའི་བུ་འོང་བའི་ཕྱིར་ཡི་གེ་བཀླག །བཅོ་ལྔ་དང་སུམ་ཅུ་ལ་མགོན་པོ་དང་ལྷ་ཉིད་འོང་བའི་ཕྱིར་ཡི་གེ་བཀླག་གོ །ནད་པ་ནི་འདི་མ་བྱས་ཀྱང་ཉེས་མེད་དོ། །དུས་དྲུག་གི་ནུབ་མོ་ཆོས་དང་ཁ་དོན་ཀློག་པ་ལ་ནད་པ་ནི་མ་འོངས་ཀྱང་ཉེས་མེད། མ་བཀླག་ཀྱང་ཉེས་མེད་དོ། །བཤད་པའི་ཕྱིར་བསྒོ་བའི་ཚེ་ཁས་མི་བླང་བར་བྱ། ནུབ་མོ་ཆོས་ཁ་དོན་ཀློག་པའི་རེས་སུ་བསྐོས་ན་སུས་བསྐོས་ཀྱང་རུང་ངག་མཉན་ནོ། །མི་ནུས་པ་ལ་སོགས་པ་བསྒོ་བ་ལ་གསོལ། ཁ་ཏོན་དང་ཀློག་མི་ནུས་པ་ཞིག་ཡིན་ཏེ་བསྐོས་ན་སུ་བསྐོ་བདེ་ལ་བདག་གིས་ནི་མི་ནུས་ན་སྐྱིན་པ་གཅིག་བཙལ་ཏེ་བཏང་ངོ་ཞེས་གསོལ། འཆད་པ་མེད་ན་རིམ་གྱིས་འདོན་ཅིང་བཤད། ཁ་དོན་མང་དུ་ཤེས་པ་མེད་དམ་མང་དུ་མི་ཐོན་ན་ཆུང་ཟད་ཤེས་པ་ཀུན་རིམ་དུ་བརྗེ་ཞིང་ཡང་བཀླག་གོ །མཐར་ན་ཚིགས་སུ་བཅད་པ་གཅིག་ཀྱང་ངོ༌། །ཁ་དོན་ཉུང་དུ་ཡང་མི་ཤེས་ན་རེས་ཀྱིས་ཚིགས་སུ་བཅད་པ་རེ་རེ་ཙམ་ཡང་བཀླག་སྟེ། ནུབ་མོ་རིང་དུ་ཐུབ་ཅིང་མཚན་ཟད་པར་བྱ་བའི་ཕྱིར་ཚིགས་སུ་བཅད་པ་དེ་ལན་མང་དུ་བཟླས་སོ། །མེ་མར་དེར་བྱ། ནུབ་མོ་ཆོས་ཁ་དོན་ཀློག་པའི་ཕྱིར་མེ་མར་བུད་པ་ལའང་བྱ། མགོན་
པོ་སྣང་ཡེལ་ཆེ་བར་མེ་མར་ཁ་མང་དུ་བཀྲམ་སྟེ་བུད་པ་ལའང་བྱ། ཟླ་བ་ཕྱེད་འདྲ་བའམ་རྫིང་བུ་འདྲ་བའི་ཆོས་བསྙད་པའི་གཏམ་བྱ་སྟེ་མཐངས་སུའོ། །ཆོས་བཤད་པའི་དྲལ་ཐབས་ནི་ཟླ་བ་ཁམ་པ་འདྲ་བའམ། རྫིང་བུ་འདྲ་བར་དང་རང་ལ་མ་ཡིན་མན་དུ་འགྲོ་བའི་ཕྱིར་གྲལ་གྱི་སྐབས་བོར་ཏེ་མཐངས་གདོད། བླ་གབ་མེད་པར་ཆོས་བསྙད་ན་བླ་རེ་གདགས་ཐང་བླ་གབ་མེད་པ་ལ་ཆོས་འཆད་ན་རས་ལ་སོགས་པའི་བླ་རེ་གདགས་སོ། །རླུང་ངམ་ཆར་པ་ན་གཞུག །ཐང་ལ་ཆོས་འཆད་པར་བླ་རེ་གདགས་པ་ལས་རླུང་དང་ཆར་པ་བབ་ན་བསྡུ། དེའི་ཕྱིར་ཆོས་བསྙད་པར་མི་གཏོང༌། བླ་རེ་བསྡུས་ཀྱང་ཆོས་འཆད་པ་གཏོང་དུ་མི་རུང་སྟེ་ཁང་པ་ཡོད་ནའང་དེར་འཕོས་ལ་ཆོས་ཤོད་ཅིག །གནས་བརྟན་སྔར་སོང་ནས་ཁ་རོག་སྟེ་སྐད་ཅིག་འདུག་ན་འདིར་ཆོས་འཆད་དམ་གཞན་བསྐོ་ཏེ་དགེ་སློང་ཆོས་སྨྲོས་ཤིག་ཅེས་སོ། །ཆོས་འཆད་པའི་ཚེ་གནས་བརྟན་ཐོག་མར་སོང་ལ་ཁྲིའི་སྟེང་དུ་སྐད་ཅིག་མི་སྨྲ་བར་འདུག་ལ་དེ་ནས་ཆོས་བཤད་དོ། །ཡང་ན་དགེ་སློང་ཆོས་ཤེས་པ་ལ་ཤོད་ཅིག་ཅེས་བསྐོ་ཞིང་སྨྲའོ། །འཆད་པའི་ཚེ་ཉན་ཏེ་དེ་སྟེ་ཆོས་ན་སྤྲོ་བར་བྱ། ཆོས་འཆད་པའི་ཚེ་གཞུང་བཞིན་དུ་མ་ནོར་བར་བཟང་ཞིང་གསལ་བར་འཆད་ན་དེ་ལ་ཡི་རང་བར་བྱ་སྟེ་བསྟོད་ལ་སྤྲོ་བར་བྱའོ། །འོན་ཏེ་མ་ཡིན་ན་བཟློག །ཆོས་འཆད་པ་དེས་འཁྲུལ་ཅིང་ལོག་པར་བཤད་དམ་ཆོས་མ་ཡིན་པ་ཞིག་སྨྲ་ན་དགག་ཅིང་བཟློག་གོ །ཁྱིམ་པ་དེར་འོངས་ན་ཆོས་ཀྱི་གཏམ་བྱ། དུས་དྲུག་གི་ནུབ་མོ་ཆོས་བསྙད་པའི་ཚེ་ཁྱིམ་པ་ལ་སོགས་པ་ཉན་ཅིང་བལྟར་འོངས་ན་ཆོས་བསྙད་ཅིང་བསྟན་ཏོ། །མུར་འདུག་བར་དུ་གཅོད་ན་ཆད་པས་རབ་ཏུ་བཅད་དེ་ཁྲོས་པ་དང་འཁྲུགས་པས་ནི་མི་བསྟན། ཆོས་འཆད་པའི་ཚེ་མུར་འདུག་པ་ལ་སོགས་པ་ཀླན་ཀ་ཚོལ་ཞིང་རྒོལ་ན་འཐབ་མོ་དང་བརྡེག་བཙོག་མི་བྱ་བའི་འགབ་ཟུངས་དང་ལྟག་ཆོད་དང་ཤིང་ལོག་གམ་ཚིག་ཐུབ་པར་ངག་གི་ཆད་པས་བཅད་དེ་ཚིག་གིས་ཐུབ་ནས་སེམས་གྲོལ་བར་བྱའི་འཁྲུགས་ཤིང་ཁྲོས་པར་མི་བྱའོ། །འཁོར་ཁྲིད་དེ་ཆད་པར་མི་འགྲོ། ཆོས་འཆད་པའི་འཕྲོ་ལས་གནས་བརྟན་གྱིས་བདག་གི་སློབ་མ་ཁྲིད་དེ་གུད་དུ་མི་འགྲོ་བ་ལའང་བྱ། ཆོས་འཆད་པའི་ཚེ་མཉན་ཅིང་འཁོད་པ་ལས་ཁ་དྲངས་ཏེ་གུད་
དུ་ཁུད་པར་གྲྭ་བཙུགས་ཤང་མི་བཤད་པ་ལའང་བྱ། དེ་ཉིད་འདོད་ན་ཆོས་ཀྱི་སྒོར་གཞུག །གནས་བརྟན་དོན་ཡོད་དེ་གུད་དུ་སོང་བ་ལས་སློབ་མ་ཆོས་ཉན་ཅིང་འཁོད་པ་བདག་གི་ཕྱི་བཞིན་འོངས་ན་མ་འོང་བར་ཁྱེད་ཅིག་ཅེས་ཆོས་ཉན་དུ་གཟུད་པ་ལའང་བྱ། ཁོ་ཆོས་མི་འདོད་པ་ལ་ནན་གྱིས་མི་བཤད། ཆོས་མི་བཙུན་པར་འགྱུར་བའི་ཕྱིར་བཤད་དུ་གསོལ་ན་བཤད་པར་བྱའོ། །བསྟི་སྟང་དང་བཅས་བདག་པོ་དང་བཅས་དམའ་བའི་སེམས་ཀྱིས་འཇུག །ཆོས་འཆད་པའི་མཁན་པོ་དེས་ཀྱང་ང་རྒྱལ་མི་བྱ་བའི་བདག་གི་བླ་ན། སངས་རྒྱས་དང་དགྲ་བཅོམ་པའི་ཆོས་ཀྱི་བདག་པོ་བཞུགས་ཏེ་དེ་ནི་མཆོད་ཅིང་བ་སྟི་སྟང་བྱ་བའི་གནས་ཡིན་གྱི་བདག་ནི་སེམས་ཅན་ཐམས་ཅད་ཀྱི་བྲན་ཡིན་པ་སྙམ་དུ་བསམས་ཏེ་ང་བཅག་པ་ལའང་བྱ། ཆོས་ཉན་པ་རྣམས་ཀྱིས་ཀྱང་ཆོས་འཆད་པ་ལ་ཆོས་ཀྱི་བདག་པོ་སྟོན་པ་ཡིན་པའི་ཕྱིར་བསྟི་སྟང་དང་རིམ་གྲོར་བྱས་ཏེ་གུས་པར་བྱ། ནན་ཏན་དུ་བཤད། ཆོས་འཆད་པས་བཤད་པའི་ཚེ་ལེ་ལོ་མི་བྱའི་གཞུང་བཞིན་དུ་མ་འཁྲུལ་བར་ནན་ཏན་དུ་སེམས་རྩེ་གཅིག་ཏུ་བསྡུས་ཏེ་ཆོས་བཤད་དོ། །ཆོས་ལ་བསྟི་སྟང་དང་བཅས་ཏེ་བསྟན་པར་རོ། །ཆོས་འཆད་པའང་དེས་ཆོས་བཙུན་ཞིང་ལྕི་བར་བསྟི་སྟང་སྐྱེད་ཅིང་ཚིག་དྲག་དལ་མ་ཁྱེར་བར་བསྟན་པར་བཤད་དོ། །ཡིད་མི་གཡེང༌། ཆོས་འཆད་པ་དེས་འཆད་པའི་ཚེ་ན་ཤ་ཆང་དང་གསེར་དངུལ་དང་ནོར་རྫས་དང་སྔོན་ཁྱིམ་པའི་སྤྱོད་པ་ལ་སེམས་མ་བྲོས་པར་བསྡུས་ཏེ་བཤད་དོ། །རིགས་ལ་གྲོལ་བའི་ཚིག་གིས་སོ། །ཆོས་འཆད་པའི་ཚེ་ཚིག་མགོ་མཇུག་མེད་པར་འདྲེས་པར་རྐྱང་བར་མི་བཤད་ཀྱི་ཚིགས་སུ་ཆོད་ཅིང་བྱེ་བྲག་ཕྱེད་པར་གསལ་པོར་བཤད་དོ། །ཐོད་རྒལ་དུ་མ་ཡིན་ཆོས་འཆད་པས་གཞུང་གཅིག་མ་རྫོགས་པར་རྐེད་ནས་བཅད་དེ་གཞུང་གཞན་གྱི་མགོ་ནས་བཟུང་སྟེ་མི་བཤད། རྒྱུད་འབྱོར་བ། ཐོག་མ་བསོད་ནམས་བཤད་དེ་དེ་ནས་ན་རག་དང་མི་དགེ་བ་བསྟན། དེ་ནས་ལས་ཀྱི་འབྲས་བུ་དང་མྱ་ངན་ལས་འདས་པའི་འབྲས་བུ་རིམ་བཞིན་བཤད་དོ། །བྱམས་པ་སྙིང་རྗེ་བ། ཆོས་འཆད་པའི་ཚེ་ཞེ་སྡང་མེད་པར་སྙིང་རྗེར་བྱས་ལ་ཁྲོ་སེམས་མི་བསྐྱེད་ཀྱི། བྱམས་པ་དང་སྙིང་རྗེ་བའི་ཕྱིར་བླ་ན་མེད་པར་གདོན་པར་བསམས་ཏེ་བཤད་དོ། །
ཟང་ཟིང་མེད་པའི་སེམས་ཀྱིས་སོ། །ཆོས་བཤད་པའང་བཀུར་སྟི་དང་ཁེ་དང་ནོར་རྫས་ལ་སོགས་པ་འདོད་པའི་ཕྱིར་ཟང་ཟིང་ཡོད་པའི་སེམས་ཀྱིས་ཆོས་མི་བཤད་པ་ལའང་བྱ། དགའ་སྲེད་མགུ་བར་བྱ། ཆོས་མཉན་པས་ཀྱང་ཆོས་འཆད་པ་ལ་སེམས་དང་ཞིང་དགའ་བར་བྱ་བ་དང་བཤད་པ་འདིས་མི་ཆོག་གི་མང་དུ་མཉན་ཅིང་བསླབ་པའི་ཕྱིར་སྲེད་པར་བྱ་བ་དང་བཤད་པའི་ཆོས་ལ་རྗེས་སུ་ཡི་རངས་ཤིང་མགུ་བར་བྱའོ། །མ་ཟིན་ཀྱང་དོན་གྱི་དབང་གིས་ན་མི་བསྡད། ཆོས་འཆད་པའི་ཚེ་ན་ཚིག་བརྗེད་དམ་གློའམ་ལུད་པ་ལྟ་བུ་ལངས་ནས་བསམས་ཤིང་བལྟས་ཏེ་བསྡད་ལ་བཤད་པ་ལ་བྱ། ཆོས་འཆད་པའི་རྒྱུད་མ་རྫོགས་པར་རྗེས་མ་འོངས་ན་འཇུག་རྫོགས་ཀྱི་བར་དུ་རྗེས་མ་སྡོད་དུ་གཞུག་པ་ལ་བྱ། དབྱངས་ཀྱིས་ཆོས་བཤད། ཆོས་བཤད་པ་ལ་སེམས་སྐྱེ་ཞིང་དགའ་བར་གྱུར་ན་དབྱངས་སྙན་པས་ཆོས་བཤད་ཀྱང་ཉེས་མེད། ལངས་ནས་བྱེ་བྲག་ཏུ་བྱ། ཆོས་འཆད་འཆད་པ་ལས་ཟིན་ཏེ་འགྲོ་ཁར་ཆོས་འདྲི་བ་ཞིག་འོངས་ནས་འགྲེང་བཞིན་དུ་ཆོས་བཤད་ཀྱང་ཉེས་མེད་པ་ལའང་བྱ། དྲངས་ཏེ་དོན་གཏམ་དུའོ། །གཞུང་བསྡུས་ཏེ་འཆད་ནའང་ཚིག་འབྱོར་པར་བཤད་པ་ལའང་བྱ། །དབྱངས་དང་ཚིག་ལ་དོན་ཅི་ལྟ་བུ་ཞེས་འདྲི་ན་དེའི་དོན་བཤད་པ་ལའང་བྱ། དབྱེ་ཞིང་སྦྱར། ཆོས་བཤད་པ་དེས་གཞུང་འདི་ལྟར་དྲངས་ན་འདི་དང་མཐུན་ནོ། །འདི་དང་མི་མཐུན་ནོ་ཞེས་བཤད་པ་ལའང་བྱ། གཞུང་གི་ནང་དུ་ལ་ལས་རང་བཟོ་བཅུག་པ་ཞིག་ཡོད་ན་འདི་ཚིག་དེ་ཕྱུང་སྟེ་གཞུང་བཞིན་བཤད་ཅིང་བསྟན་པ་ལའང་བྱའོ། །དགེ་འདུན་གྱི་གནས་བརྟན་གྱིས་ཉི་མ་བགྲང༌། དགེ་འདུན་གྱི་གནས་བརྟན་གྱིས་ཞག་དང་ཉི་མ་བགྲངས་ཏེ་ཚེས་གྲངས་བཟུང༌། སྐུད་པས་བརྒྱུས་པའི་ཤིང་བྲན་གྱིས་སྤོ་ཞིང་ངོ༌། །ཚེས་གྲངས་གཟུང་བའི་ཐབས་ནི་སྐུད་པ་ལས་ཤིང་བུ་བཅོ་ལྔ་བརྒྱུས་ལ་ཚེས་གྲངས་ཀྱི་མིང་སོ་སོར་བྲིས་ཏེ་ཤིང་སྤུ་གུ་ཅན་གཅིག་གིས་བར་གཅད་བྱས་ལ་ཞག་གཅིག་ལོན་ཞིང་སྤུ་གུ་ཅན་གྱི་ནང་ནས་ཤིང་བུ་གཅིག་དྲང༌། གཙུག་ལག་ཁང་སྐྱོང་གིས་དེར་འོངས་ཤིང་དགེ་འདུན་ལ་ཞུ། གཙུག་ལག་ཁང་སྐྱོང་གིས་དགེ་འདུན་གྱི་གནས་བརྟན་ལ་ཚེས་གྲངས་དྲིས་ལ་དགེ་བརྟགས་ཀྱི་ཚེས་གྲངས་འདི་འདས་སོ་ཞེས་དགེ་འདུན་
ལ་སྨྲ། བྱེ་བྲག་གིས་སོ། །གནས་བརྟན་གྱིས་ཚེས་གྲངས་མ་འཁྲུལ་བར་བྱ་ཞིང་ཚེས་གྲངས་ཀྱི་མིང་དང་ཟླ་བ་གྱེན་ཐུར་བྱེ་བྲག་ཕྱེད་པར་བྱ། ཟླ་བ་ཕྱེད་ཐ་དད་དུའོ། །ཚེས་གྲངས་སྨོས་པའི་ཚེ་ཟླ་བ་ཡར་གྱི་ཞག་འདི་འདས་སོ་ཞེས་བྱ་བ་དང༌། ཟླ་བ་མར་གྱི་ཞག་འདི་འདས་སོ་ཞེས་བྱ་བ་མ་འཁྲུལ་བར་བྱ། གཙུག་ལག་ཁང་གི་བདག་པོ་དང་ལྷའི་ཕྱིར་ཚིགས་སུ་བཅད་པ་ལྷོགས་ཤིག་ཅེས་དགེ་སློང་ལ་བསྒོ་བའི་ཚིག་གོ །དགེ་བརྟགས་ཀློག་པའི་ཚེ་གཙུག་ལག་ཁང་གི་བདག་པོ་དང་ལྷའི་ཕྱིར་ཚིགས་སུ་བཅད་པ་ལྷོགས་ཤིག་ཅེས་ཀྱང་སྨྲ་སྟེ་སྨྲ་བའི་ཚིག་ཉིད་འོག་ནས་ཞིབ་ཏུ་འཆད། དེ་མ་ཐག་ཏུའོ། །དགེ་བརྟགས་ཀློག་པས་མདོ་ལྟག་མ་སྐད་དུ་སྨྲས་པ་དང༌། དགེ་འདུན་རྣམས་ཀྱིས་ཀྱང་ཚིགས་སུ་བཅད་པ་གཉིས་བཀླག་གོ །དེར་ཡང་ཟླ་བ་ཕྱེད་ཀྱི་ཚེས་གཅིག་སྟེ་གཙུག་ལག་ཁང་གི་བདག་པོ་དང་གཙུག་ལག་ཁང་གི་ལྷ་རྣམས་ཀྱི་ཕྱིར་ཚིགས་སུ་བཅད་པ་ལྷོགས་ཤིག་ཅེས་སོ། །ཚིགས་སུ་བཅད་པ་ལྷོགས་ཤིག་པའི་ཚིག་ནི་ཚེས་གཅིག་གམ་གཉིས་ཀྱང་རུང་འདས་པ་ཡིན་ཏེ་གཙུག་ལག་ཁང་གི་བདག་པོ་དང་ལྷའི་ཕྱིར་ཚིགས་སུ་བཅད་པ་ཚིག་འདི་གོ་རིམས་བཞིན་དུ་བྱའོ། །གཙུག་ལག་ཁང་གི་བདག་པོ་སྤྱན་འདྲེན་པའི་ཚིག་ཀྱང་སྟེ་འདི་ཞེས་བྱ་བའི་སྦྱིན་བདག་གིས་དགེ་སློང་གི་དགེ་འདུན་མཆོད་པར་སྤྱན་འདྲེན་གྱི་དེ་ལ་བཙུན་པ་རྣམས་ཀྱིས་དགེ་བའི་ཡིད་ཀྱིས་ཐུགས་རྗེས་གཟིགས་ཤིག་ཅེས་སོ། །མདོ་ལྟག་མ་ལྟར་སྨྲས་པའི་རྗེས་བཞིན་དུ་ཡོན་བདག་སུ་ཡིན་པས་སང་བཤོས་ལ་སྤྱན་འདྲེན་གྱི་དགེ་འདུན་གྱིས་ཐུགས་རྗེས་དགོས་ཤིག་ཅེས་མདོ་འདིའི་ཚིག་བཞིན་དུ་སྨྲས་ཞག་ཉུང་བ་ཡང་གཞུག །གསོ་སྦྱོང་བྱ་བ་ནི་ཟླ་བ་ཞག་མ་ཚང་བའི་རྣམས་ལ་ཚེས་བཅུ་བཞི་ཞིང་བྱའོ། །ཚེས་བཅུ་བཞི་ཞིང་བྱ་བའི་ཟླ་བ་ནི་དཔྱིད་ཟླ་འབྲིང་པོ་དང་དབྱར་ཟླ་ར་བ་དང་དབྱར་ཟླ་ཐ་ཆུངས་དང་སྟོན་ཟླ་འབྲིང་པོ་དང་དགུན་ཟླ་ར་བ་དང་དགུན་ཟླ་ཐ་ཆུངས་དྲུག་ཤི་བའི་ཚེས་བཅུ་བཞིའི་གསོ་སྦྱོང་དུ་བྱའོ། །ཟླ་བ་ཕྱེད་ལས་འདས་པའི་དུས་ལ་ཞག་བཅོ་ལྔར་མི་ཐུབ་སྟེ་བཅུ་བཞི་ལ་གསོ་སྦྱོང་བྱ་བ་ནི་ཟླ་བ་དྲུག་གོང་དུ་སྨོས་པ་ཡིན་གྱི་གཞན་ཐམས་ཅད་ནི་བཅོ་ལྔའི་གསོ་སྦྱོང་དུ་བྱའོ། །ཟླ་བ་ལྷག་པའང་བྱ་སྟེ་རྒྱལ་པོའི་
རྗེས་སུ་འཇུག །རྒྱལ་པོས་ཟླ་བ་ཤོལ་འདུམས་ཤིག་ཏུ་བསྒྱུར་བ་བརྩིས་ནའང་དགེ་སློང་གིས་ཞག་གྲངས་བརྩིས་པ་མི་བརྩན་གྱི་རྒྱལ་པོས་བརྩིས་པ་བཞིན་དུ་གསོ་སྦྱོང་བྱ། སྐར་མཁན་གྱི་ཕྱིར་འཇུག་ཅིང་སྐར་མའི་རྒྱུད་ཀྱི་རྗེས་སུ་ཡང་ངོ༌། །སྐར་མཁན་གྱིས་བརྩིས་ཏེ་ཤོལ་འདུམས་ཡོད་པ་ཞིག་ཏུ་གྱུར་ན་སྐར་མཁན་གྱིས་བརྩིས་བཞིན་དུ་ཚེས་གྲངས་བརྩི་ཞིང་གསོ་སྦྱོང་བྱའོ། །ཚེས་གྲངས་བརྩི་བའི་ཕྱིར་དགེ་སློང་གིས་སྐར་མའི་རྒྱུད་བསླབས་ཀྱང་ཉེས་མེད་པའང་བྱའོ། །མ་བརྟགས་གསོ་སྦྱོང་གི་བར་དུ་མ་བསྡད་པར་སྟོང་པ་ཞེས་མཚམས་མི་བཅིང༌། ལྷ་ཁང་སྟོང་པ་དགེ་སློང་གནས་སམ་མི་གནས་གཏོལ་མེད་པར་བདག་ཅག་གནས་པར་བྱ་བའི་ཕྱིར་མཚམས་མི་བཅད་གཙུག་ལག་ཁང་སྟོང་པ་དེར་དགེ་སློང་གནས་སམ་མི་གནས་བརྟགས་པ་ནི་གསོ་སྦྱོང་གི་ཞག་དུས་ཀྱི་བར་དུ་བསྡད་དེ་མ་འོངས་ན་མཚམས་བཅད་ཀྱང་ཉེས་མེད། གསོ་སྦྱོང་བར་དུ་མ་བསྡད་པར་མཚམས་བཅད་ན་ཉེས་བྱས། ཡན་ལག་མ་ཡིན་པ་ནི་མ་སྐྱེས་པར་ཤེས་པའི་བཅད་པའོ། །གཙུག་ལག་ཁང་གི་མཚམས་སྔར་བཅད་ཟིན་ལ་མཚམས་བཅད་དམ་མ་བཅད་གཏོལ་མེད་དེ་མི་ཤེས་ཀྱང་རུང་བཅད་པར་ཤེས་བཞིན་དུ་ཡང་རུང་སྟེ་མཚམས་སྔགས་ཀྱིས་མ་བཀྲོལ་ལམ་ཞིག་པ་མ་ཡིན་ན་ཕྱིས་བཅད་ཀྱང་མཚམས་བཅད་པར་མི་འགྱུར་བའི་སྟེང་དུ་ཉེས་བྱས་ཀྱང་ཡོད་དོ། །དེ་མེད་ན་ཡང་བཏང་བའོ། །མཚམས་སྔགས་ཀྱིས་བཀྲོལ་བ་དང༌། དགེ་སློང་ཀུན་གུད་དུ་དོང་སྟེ་ཞག་ལོན་པ་དང་དགེ་སློང་ཕ་ཀུན་མོ་མཚན་དུ་གྱུར་བ་དང༌། དགེ་སློང་ཀུན་ཤི་སྟེ་ལྷ་ཁང་སྟོང་པར་གྱུར་པ་དང༌། དགེ་སློང་ཀུན་ཁྲིམས་ཕུལ་བ་དང༌། དགེ་སློང་ཀུན་མཚམས་མེད་པ་དང༌། ཕས་ཕམ་པར་གྱུར་པ་དང༌། །དགེ་སློང་ཀུན་མུར་འདུག་ཏུ་ཞུགས་པ་དང༌། རྣམ་པ་འདི་བདུན་ལྟ་བུ་ཞིག་ཏུ་གྱུར་ན་མཚམས་ཞིག་པ་ཡིན་ནོ། །བརྟགས་པའི་གནས་ཀྱང་ངོ༌། །ཚང་མང་དུ་བསྔོས་ཏེ་གསོལ་བ་དང་ཞུ་བའི་ལས་བྱས་པའང་གོང་མའི་རྣམ་པ་བདུན་དུ་སྨོས་བ་གང་ཡང་རུང༌། གཅིག་ལྟར་གྱུར་ན་གསོལ་བ་དང་ཞུ་བའི་ལས་ཞིག་པ་ཡིན་ཏེ་ཕྱིས་བྱ་དགོས་སོ། །མ་བརྟགས་པ་ནི་མཚམས་ལ་མཚམས་བསྐོར་བའོ། །མཚམས་སྔར་བཅད་ཟིན་པ་ལ་ཕྱིས་མཚམས་
བཅད་ཀྱང་མཚམས་མི་ཆགས་སོ། །བརྟགས་པ་ནི་འཁོར་དང་དགེ་སློང་མའི་དབྱར་མོ་ཐང་དང་ཁྲོན་པ་ཡང་ངོ༌། །མཚམས་ཀྱི་ཕྱི་རོལ་ཀྱང་རུང་མཚམས་སྔ་མ་བཅད་པའང་རུང་སྟེ། འཕྲལ་ལ་སོགས་པ་དང་ཞུ་བའི་ལས་ཀྱིས་མཚམས་བུ་ཆུང་དུ་བཅད་ལ་གསོ་སྦྱོང་བྱས་ནའང་རུང་མཚམས་བུ་ཆུང་མ་བྱས་ཀྱང་རུང༌། དགེ་སློང་མའི་གཙུག་ལག་ཁང་དུ་འདོང་སྟེ་དད་པ་དྲིས་ལ་གསོ་སྦྱོང་བྱས་ཀྱང་རུང༌། ཤིང་གཅིག་འདུག་པའི་མཚམས་ཀྱིས་དུ་མ་བཞིའི་མཚམས་སོ། །མཚམས་གཉིས་གསུམ་ཞིག་སོ་སོར་གཅོད་དེ་ཀུན་གྱི་བར་ན་ཤིང་ངམ་རྡོ་ཞིག་ཡོད་ན་མཚམས་དེ་ཀུན་གྱི་མཚམས་ཤིང་ངམ་རྡོ་དེ་གཅིག་པུ་ལ་གཟུགས་སུ་རུང་ངོ༌། །བརྟན་པ་དེ་མཚན་མའོ། །མཚམས་ཀྱི་མཚན་མ་གཟུགས་པ་ནི་བྲག་གམ་ཕ་བོང་ངམ་ཞིང་ལྟ་བུ་བརྟན་པ་ལས་གཟུགས་སོ། །འདི་ལྟར་གྱུར་པ་མ་ཡིན་པ་ནི་འཕྲུལ་དང་སྒྱུ་མས་བྱས་པའོ། །མཚམས་ཀྱི་མཚན་མ་མི་བརྟན་པ་སྤྲིན་ནམ། ན་བུན་ནམ། སྒྱུ་མར་སྤྲུལ་ཅིང་འདུག་པ་ལྟ་བུ་ལ་མཚན་མར་མི་གཟུགས། མི་བརྟན་པའི་ཟླ་བ་དང་ཉི་མའི་འོད་ལ་སོགས་པའི་རླབས་སོ། །མཚམས་ཀྱི་མཚན་མ་ཟླ་བ་དང་ཉི་མའི་འོད་ཟེར་དང་གྲིབ་མ་ལྟ་བུ་དང་ཆུའི་རླབས་སྐྱེད་འབྲིར་འགྱུར་བ་ལ་མཚན་མ་མི་གཟུགས། མཚམས་ཀྱི་ཆུ་ནི་མཚམས་གཞན་དང་འདྲའོ། །རྫ་མ་དང་ཟངས་ཀྱི་ནང་དུ་ཆུ་བླུགས་ལ་དེའི་ནང་དུ་ཆོས་གོས་བཅུག་ལ་ཆོས་གོས་དེ་སྣོད་ལ་མ་རེག་པར་སྐྱ་རེངས་བྱུང་ནའང་བྲལ་བའི་ལྟུང་བ་ལའང་བྱ། མཚམས་བཅད་པའི་ནང་དུ་ཆུ་འབབ་ཅིང་སྐམ་པ་ཞིག་ཡོད་ནའང་འབབ་པའི་ཚེ་ནི་ཆུ་ཕན་ཆད་མཚམས་གཅིག་ཏུ་མི་རུང་སྐམ་པའི་ཚེ་ནི་མཚམས་སུ་རུང་ངོ༌། །བར་ཆད་ན་གཅིག་ཏུ་མེད་དོ། །མཚམས་བཅད་ནས་མཚམས་ཀྱི་ནད་དུ་ཆུ་འབབ་ན་མཚམས་བཅད་པས་བརྩིར་མི་རུང་སྟེ་ཆུས་མཚམས་སུ་བཟུང་ངོ༌། །དེ་སྟེ་ཟམ་པ་བརྟན་ན་ནི་ཡུལ་བཞིན་ནོ། །ཆུ་དེ་ལ་ཟམ་པ་བཟང་པོ་ཞིག་ཡོད་ན་ནི་ཆུས་ཆོད་ཀྱང་མཚམས་གཅིག་པ་དང་འདྲའོ། །ཞིག་པ་ལས་སླར་བྱས་ན་རྗེས་སུ་འཇུག་པའོ། །ཆུ་ལ་ཟམ་པ་ཡོད་པ་དེ་ཞིག་སྟེ་སླར་བཅོས་པར་བསམས་ན་ཟམ་པ་མ་ཐོགས་ཀྱི་བར་དུ་ཞག་གིས་ཆོད་ཀྱང་ཞིག་པར་མི་འགྱུར་ཏེ་ཆོས་གོས་དང་
བྲལ་བར་ཡང་མི་འགྱུར། སྦྱོར་བམ་བཏང་ན་ཡང་ངོ༌། །ཟམ་པ་བཅོས་པར་བསམས་ན་ཞག་གིས་ཆོད་ཀྱང་རུང་བ་ནི་ཟམ་པ་ཞིག་ནས་མཁར་ལན་མགོ་ཟུགས་ཏེ་རྩོམ་བཞིན་ན་རུང་གི་མཁར་ལན་མ་ཟུགས་ལ་ཕྱིས་བཅོས་བར་སེམས་པ་ནི་མི་རུང་ངོ༌། །ཞག་བདུན་ལས་འདས་ན་མ་ཡིན་ནོ། །བཅོས་པར་བསམས་ན་རུང་བ་ནི་ཞག་བདུན་ཚུན་ཆད་རུང་གི་ཞག་བདུན་ལས་འདས་ན་བཅོས་པར་བསམས་ཤིང་མཁར་ལན་མགོ་ཟུགས་གཅིག་གིས་རྒྱུན་མ་ཆད་པར་བྱས་ཀྱང་མི་རུང་ངོ༌། །ནམ་མཁའི་ན་བར་ཆད་དུ་འགྱུར་རོ། །མཚམས་ཀྱི་མཚན་མ་ནམ་མཁའ་ལ་མི་རུང་སྟེ་ནམ་མཁའ་ལ་མཚམས་ཀྱི་མཚན་མ་བཙུགས་ཀྱང་མི་ཆུད་དོ། །འདི་ཡོད་ཀྱང་མི་སྤྱོད་པ་མ་ཆོད་པ་ལྟ་ག་ལ་ཞིག །ནམ་མཁའ་ཡོད་དུ་ཟིན་ཀྱང་གཟུང་ཞིང་བསྔོར་མེད་ན་མཚམས་ཀྱི་མཚན་མ་ཅི་ལས་གཟུང་སྟེ་ག་ལ་རུང༌། དབུས་ནས་དཔག་ཚད་ཕྱེད་དང་གསུམ་གྱི་མཐའི་མཚམས་ལས་ལྷག་པར་གཅོད་དུ་མི་སྐྱེའོ། །མཚམས་བཅད་པའི་ཚད་དཔག་ཚད་ཕྱེད་དང་གསུམ་ཚུན་ཆད་ནི་བཅད་དུ་རུང་གི་དཔག་ཚད་ཕྱེད་དང་གསུམ་ལས་རིང་པ་ཕན་ཆད་ནི་གསོལ་བ་དང་ཞུ་བའི་སྔགས་ཀྱིས་མཚམས་བཅད་ཀྱང་མཚམས་མ་བཅད་པ་དང་འདྲ་སྟེ་སྔགས་ཀྱང་མི་འཆགས་མཚམས་ཀྱང་མེད་དོ། །དེ་བཞིན་དུ་བླ་དང་འོག་དང་སྲ་བ་ལ་བད་པའང་ཐང་བཞིན་ནོ། །ལུང་པ་ལ་སུལ་གཅོད་རོང་ཞིག་ཏུ་མཚམས་གཅོད་རི་གཅིག་ནས་གཅིག་གི་བར་ནམ་མཁའ་ལ་ཁ་དྲང་དུ་མི་བཅད་ཀྱི་སའི་གཞི་གྱེན་ཐུར་ཅི་ལྟར་འདུག་པ་བཞིན་དུ་འདོམ་གྲངས་ཀྱིས་བཅལ་ཏེ་དཔག་ཚད་ཕྱེད་དང་གསུམ་དུ་བཅད་དོ། །མི་སྐྱེ་བ་ནི་མི་འབྲལ་བར་གནང་བ་ལས་མཚམས་མ་བཅད་ནའོ། །གསོལ་བ་དང་ཞུ་བའི་ལས་ཀྱིས་མཚམས་བཅད་ན་རྒན་པོ་དང་ནད་པ་ལས་ཆོས་གོས་དང་མི་འབྲལ་བའི་གནང་བ་བྱིན་ཀྱང་འབྲལ་བར་འགྱུར་རོ། །བཅད་པ་མེད་ན་མེད་དོ། །མཚམས་བཅད་དེ་ཆོས་གསོ་དང་མི་འབྲལ་བར་གནང་བ་བྱིན་པ་ལས་མཚམས་ཞིག་པ་རྣམས་བ་བདུན་གང་ཡང་རུང༌། གཅིག་བྱུང་ན་ཆོས་གོས་དང་མི་འབྲལ་བར་གནང་བ་བྱིན་པ་ཞིག་སྟེ་བྲལ་བར་འགྱུར་རོ། །དེས་ན་མ་ཡིན་ནོ། །དགེ་སློང་རྒན་པོ་དང་ནད་པ་ཆོས་གོས་དང་འབྲལ་བར་གནང་
བ་དེ་ཤིའམ་ཁྲིམས་ཕུལ་ལམ་གནང་བ་སླར་ཕྲོགས་ཀྱང་མཚམས་ནི་ཞིག་པར་མི་འགྱུར་རོ། །མཆོད་རྟེན་དང་དྲི་གཙང་ཁང་གི་བར་དང་གསོ་སྦྱོང་གི་དངོས་པོར་གསོ་སྦྱོང་གི་ཚེ་ཕྱགས། གསོ་སྦྱོང་བྱེད་པའི་དུས་སུ་མཆོད་རྟེན་དང་དྲི་གཙང་ཁང་དང་གསོ་སྦྱོང་བྱེད་པའི་སར་ཕྱག་དར་དང་མཎྜལ་དང༌། ཆག་ཆག་ལ་སོགས་པ་བྱས་ཏེ་མེ་ཏོག་གིས་བརྒྱན་ཏོ། །དད་པ་བྱིན་པ་པ་ནི་དགེ་འདུན་ལ་བྱིན་པའོ། །གསོ་སྦྱོང་ལ་འདུ་བའི་ཚེ་བྲེལ་ཏམ། ནན་དེ་འདུན་ལ་དད་པ་ཕུལ་ནས་འདུས་པ་དང་འདྲ་སྟེ་ལས་སུ་རུང་ངོ༌། །གང་སུས་ཀྱང་དེའི་ཕྱིར་དེ་ཞུ་བར་གྱིས་ཤིག །དེ་མཚམས་ཀྱི་ཕྱི་རོལ་ན་གནས་ན་མི་སྦྱིན་སྦྱིན་དུ་མི་འཇུག །དད་པ་ལེན་པ་ལས་བར་དུ་ཆུའམ་ར་བས་ཆོད་ན་དད་པ་བླངས་པར་མི་ཆུད་པའི་ཕྱིར་བདག་གིས་ཀྱང་དད་པ་མི་འབུལ་ཏ་དད་པ་ལེན་པས་ཀྱང་འབུལ་དུ་མི་གཞུག་ཅིང་དད་པ་མི་བླང༌། ཕུལ་ཀྱང་དད་པ་ཕུལ་བར་མི་ཆུད། སྦྱིན་དུ་མི་གཞུག །མཚམས་ཀྱི་ཕྱི་རོལ་ནས་བདག་གིས་ཀྱང་མི་ལེན་ཁོ་བོ་སྦྱིན་དུ་ཡང་མི་གཞུག །གཅིག་ནས་གཅིག་ཏུ་མ་ཡིན་དད་པ་ལེན་དུ་བསྐོས་པའི་མི་དེས་གཞན་ལ་བཅོལ་ཏེ་དད་པ་ལེན་དུ་མི་བཏང༌། དེ་ལྟར་བྱས་ན་དད་པ་འབུལ་བ་དང་དད་པ་ལེན་པར་བསྐོས་པའི་དགེ་སློང་གཉིས་ཉེས་བྱས་སོ། །ཉེས་བྱས་པ་ནི་ན་བ་དང་དབང་མེད་པ་དང་གསོག་དང་ཚངས་པར་སྤྱོད་པའི་བར་ཆད་ཀྱིས་འཇིགས་པ་ལས་བྱིན་ནའོ། །དད་པ་ལེན་པར་བསྐོས་པ་དེས་དད་བ་བླངས་ནས་དགེ་འདུན་ལ་དད་པ་དབུལ་བ་བདག་ཉིད་ཀྱིས་མ་ཕུལ་བར་མི་གཞན་ལ་བཅོལ་ཏེ་དབུལ་དུ་བཅུག་ན་ཉེས་བྱས་སོ། །དད་པ་གཞན་ལ་དབུལ་དུ་བཅུག་ཀྱང་ཉེས་མེད་པ་ནི་སྲོག་ལ་དམའ་བ་དང་ཚངས་པར་སྤྱོད་པའི་བར་ཆད་དུ་འགྱུར་བ་དང༌། བདག་ལ་དབང་མེད་པ་མེད་པའི་རྐྱེན་ཅིག་བྱུང་སྟེ་གུར་དུ་འགྲོ་བར་འགྱུར་ཏེ་རིངས་ན་གྲོགས་གཅིག་ལ་དད་པ་དབུལ་དུ་བཅོལ་ཀྱང་ཉེས་མེད་དོ། །མ་གུས་པས་མ་ཞུས་ནའོ། །དད་པ་བླངས་ན་བླངས་ཀྱི་མ་གུས་པའི་ཕྱིར་མ་ཕུལ་ཡང་བླ་ཞེས་བསམས་ཏེ་འདུག་པ་ནི་དགེ་འདུན་གསོ་སྦྱོང་གི་ལས་ནི་རུང་གི་དགེ་སློང་དེ་ཉེས་བྱས་སོ། །ཉེས་མེད་པ་ནི་འདིས་འཇིགས་ཏེ་ཕྱིའི་མཚམས་ནས་བླངས་པའོ།།
དད་པས་བླངས་ནས་འབུལ་དུ་འགྲོ་བའི་ལམ་ན་དགྲ་འམ་གནོད་པར་བྱེད་པ་ཞིག་ཡོད་ན་མཚམས་ཀྱི་ཕྱི་རོ་ལ་ནས་བསྐོས་ཏེ་དགེ་འདུན་ལ་དད་པ་ཕུལ་ཡང་ཉེས་མེད་དོ། །གཙུག་ལག་ཁང་སྐྱོང་གིས་གསོ་སྦྱོང་གི་ཚུལ་ཤིང་འདྲིམ་པ་ནས་དགེ་སློང་དགོངས་ཤིག །དགེ་སློང་གྲངས་མང་སྟེ་ངོས་མི་ཚོལ་ན་གཙུག་ལག་ཁང་སྐྱོང་གིས་གསོ་སྦྱོང་གི་ཚེ་ཚུལ་ཤིང་བྲིམ་ལ་ཤིང་བསྡུས་ཏེ་ཚང་ངམ་མ་ཚང་ཤིང་མི་བགྲང་ངོ༌། །རབ་ཏུ་ཐོན་པའི་ཚིག་ཕྱེད་ཀྱང་མི་འཁྲུལ་བར་ཤོད་ཅིག །གསོ་སྦྱོང་བྱེད་པའི་ཚེ་སོ་སོར་ཐར་པ་ཁ་དོན་དུ་ཀློག་པ་ནི་ཚིག་ཅུང་ཟད་ཀྱང་མི་འཁྲུལ་བར་ཀློག་ནུས་པ་གཅིག་གིས་བཀླག་གོ །དགེ་འདུན་གྱི་གནས་བརྟན་གྱིས་སོ། །སོ་སོར་ཐར་པ་ཁ་དོན་ཀློག་པ་བསྐོས་པ་ནི་ལས་བྱེད་པ་དགེ་སློང་གིས་གནས་བརྟན་གྲལ་མཐོན་པོ་ན་འདུག་པ་མེ་ཏོག་བྲིམས་ཏེ་བྱེད་དུ་གཞུག་གོ །མི་ནུས་ན་གཉིས་པོས་ཀྱང་ངོ༌། །གྲལ་ཐོག་མ་པས་ཁ་ཏོན་ཀློག་མི་ནུས་ན་དེའི་འོག་ནས་འདུག་པ་ལ་མེ་ཏོག་བྱིན་ཏེ་བྱེད་དུ་གཞུག་གོ །གསུམ་པོས་ཀྱང་ངོ༌། །དེས་ཀྱང་མ་ནུས་ན་གཉིས་ཀྱི་འོག་ནས་དགེ་སློང་སུ་འདུག་པ་ལ་མེ་ཏོག་བྱིན་ཏེ་ཀློག་ཏུ་གཞུག་གོ །དེས་ཀྱང་ན་རེ་མོར་རོ། །དེས་ཀྱང་མ་ནུས་ན་དེ་གསུམ་ཁ་ངོན་ཅི་ཤེས་པ་ལས་གཅིག་གི་མཇུག་གཅིག་གིས་མཐུད་དེ་ཁ་དོན་ཟེར་དུ་གཞུག་གོ །མི་ནུས་ན་གཞན་ལ་བསྐོ། །དེ་གསུམ་གཅིག་གིས་གཅིག་མཐུད་དེ་བྱར་ཡང་མི་ནུས་ན་འོག་ན་ཁ་ཐོན་ཤེས་པ་སུ་ཡོད་པ་ལ་མེ་ཏོག་བྱིན་ཏེ་བྱེད་དུ་གཞུག་གོ །མི་བཏུབ་ན་དགེ་འདུན་གྱིས་སོ། །ཁ་ཐོན་ཤེས་པ་དེ་བྱེད་དུ་མི་བཏུབ་ན་དགེ་འདུན་ཀུན་གྱིས་བསྐོས་ཏེ་བྱེད་དུ་གཞུག་གོ །བརྟག་པ་ཡང་ངོ༌། །སོ་སོར་ཐར་པ་ཁ་ཐོན་ཤེས་ཤིང་ཚིག་མི་འཁྲུལ་བར་མཁས་པ་ཞིག་ཡོད་ན་རྟག་ཏུ་དེ་སོ་སོར་ཐར་པ་ཁ་ཐོན་བྱེད་དུ་གཞུག་གོ །ལུས་ན་ལྷག་མ་གཞན་གྱིས་སོ། །སོ་སོར་ཐར་པ་མི་གཅིག་གིས་ཁ་ཐོན་མཇུག་ཏུ་མ་ཕྱིན་ཏེ་ལྷག་མ་ལུས་ན་སུ་ཤེས་པ་གཅིག་གིས་བརྗེས་ཏེ་འཕྲོ་ནས་བཟུང་སྟེ་བྱའོ། །དུམ་བུ་དུམ་བུར་བཟུང་སྟེ་ནམ་འབྱོར་གྱི་བར་དུའོ། །མདོ་ལྟག་མ་ལྟར་གཅིག་གིས་མཐུད་དེ་མ་ནུས་ན་མི་དུ་མས་གཅིག་གི་མཇུག་གཅིག་གིས་མཐུད་དེ་མཇུག་ཏུ་ཕྱིན་ཕྱིན་དུ་
བྱའོ། །མི་རིགས་པ་ནི་འཇིགས་པ་དང་བཅས་པའི་གནས་མཛེས་པར་འདོད་དེ་གྲོང་དང་མི་ཉེ་བར་གསོ་སྦྱོང་བྱེད་པའོ། །འཇིགས་ས་ཞིག་ཏུ་མེ་ཏོག་དང་གཟིང་མ་བཟང་པོའི་ཕྱིར་གཙུག་ལག་ཁང་ནས་བྱུང་སྟེ་དེར་གསོ་སྦྱོང་བྱས་ན་ཉེས་བྱས། མི་འདུག་པར་འགྲོགས་ཏེ་དོང་བ་ན་ཡང་བྱ། ལམ་དུ་ཞུགས་པ་ལ་གསོ་སྦྱོང་བྱར་ལམ་གྲོགས་དང་བྲལ་ན་འགྲོ་ཞིང་ལམ་གྲོགས་ཁྱིམ་པ་དང་འགྲོགས་བཞིན་དུ་སོ་སོར་ཐར་པ་བཀླག་གོ །སྒྲ་མི་འདོད་ན་མདོས་སོ། །ལྟག་མ་ལྟར་ཀླག་ཏུ་འཇིགས་པའི་ཕྱིར་ལམ་གྲོགས་གཤེན་སྒྲ་བསྐྱུངས་ཏེ་མདོ་ཙམ་བཀླག་གོ །དེ་ལྟར་ཡང་ན་བསྔོ། །ལྟག་མ་ལྟར་ཤུབ་བུར་བཀླག་ཏུ་ལམ་གྲོགས་གཤེ་ན་ཉེས་པ་ཅི་ཡོད་པ་གྲོགས་ལ་དབང་བཙུགས་ཏེ་བརྟགས་ལ་གཞག །ཁ་ན་མ་ཐོབ་མེད་པ་ནི་དད་པ་ལ་གཙོ་བོ་སྟེ་དགའ་བར་འགྱུར་ན་བསྙད། དགེ་བསྙེན་ཁྲིམས་ཐོས་ཀྱང་ཕྱིར་མི་ནུར་ཞིང་མི་འགྱུར་བ་དང་མི་དགའ་བར་མི་འགྱུར་བ་དགེ་འདུན་གྱི་རག་ལུས་ཤིང་ཞལ་ཏ་བྱེད་པའི་དགེ་བསྙེན་དད་པ་ཆེན་པོ་ཞིག་ན་གསོ་སྦྱོང་གི་ཆོ་ག་དང་ཁྲིམས་ལ་སོགས་པ་བསྟན་ཀྱང་ཉེས་མེད་དོ། །འདུག་ན་གསོ་སྦྱོང་བྱ། ཁྱིམ་པ་ཞིག་གསོ་སྦྱོང་གི་ཆོ་ག་ལ་ལྟ་འདོད་དེ་མི་བལྟར་མི་རུང་ཞེས་ཟེར་ཏེ་འདུག་ན་དྲུང་ན་འདུག་བཞིན་དུ་གསོ་སྦྱོང་བྱས་ཀྱང་ཉེས་མེད་དོ། །རིང་བ་ཞིག་ན་ཁྱིམ་པ་འདུག་ཀྱང་བཤད་དེ། བདག་ན་ཚབས་ཆེ་སྟེ་ཤི་ལ་ཐུག་པ་དང་མི་རྒོད་ལ་སོགས་པས་གསད་པར་བཤམས་ཏེ་འཆི་བར་འགྱུར་ཞིང་དགེ་སློང་གྲོགས་ལ་མཐོལ་དུ་མི་སླེབས་ན་ཁྱིམ་པ་ལ་བདག་གི་ཉེས་པ་ཅི་ཡོད་པ་ཚངས་སུ་བྱ། དེ་ལ་ཆོ་ག་བསྙད། མི་རྒོད་ལ་སོགས་པ་མི་སྲུན་པ་ཞིག་གིས་ཁྲིམས་ལ་མ་བསྟན་ན་གསད་དོ་རྡེག་གོ་ཞེས་ཟེར་ན་ཁྲིམས་བསྟན་ཀྱང་ཉེས་མེད། རྒྱལ་པོ་ལ་ཡང་བསྙད། རྒྱལ་པོ་ཁྲིམས་འདྲི་ན་བསྟན་ཀྱང་ཉེས་མེད། མཐའ་ལ་ཕན་ཆད་མི་སྐྱེ་བ་མ་ཡིན་སོ་སོར་ཐར་པའི་གཞི་བཀླགས་ཟིན་ཏེ་རྐྱེན་ཅིག་བྱུང་སྟེ་རྐེད་ཆད་དུ་བཞག་སྟེ་མན་ཆད་མཇུག་ཏུ་ཕྱིན་པར་མ་བཀླག་ཀྱང་གསོ་སྦྱོང་དུ་ཆུད་དོ། །བཤད་པ་དང་དེ་ཙམ་པ་དང་དུས་དང་ཆད་པ་བདག་དེ་བཞིན་དུ་མ་བླངས་ན་འདིར་ཆོས་མ་ཡིན་ནོ། །རྣ་ལམ་ནས་འདས་ན་སོང་བའོ། །ལྟག་ནས་སྔ་མ་གསོ་སྦྱོང་
ཟིན་ཏེ་གྱེས་པ་ལས་ཕྱི་མས་མཇུག་སླེབས་ན་སླར་འདུས་ཤིང་དེས་བྱུང་བའི་ཚད་ནི་ཕྱི་མ་འོངས་ནས་སྔ་མ་གཞན་ནི་གྱེས་ཀྱི་དགེ་སློང་གཞན་ཅིག་འགའ་ཞིག་གཏམ་ཐ་མལ་པར་སྨྲས་པའི་སྒྲ་ཐོས་ཚུན་ཆད་ཅིག་ན་འདུག་སྟེ་སླེབས་ན་གསོ་སྦྱོང་བྱེད་པའི་ས་ཉིད་ལས་འཕགས་ཏེ་གྱེས་ཀྱང་སླར་འདུ་དགོས་སོ། །རྣམ་པར་འབྱེད་པ་ལ་སོགས་པར་ཆུད་བའོ། །གསོ་སྦྱོང་གི་ཆོ་ག་འདུལ་བ་རྣམ་པར་འབྱེད་པའི་ནང་ནས་འབྱུང་བའི་དངོས་པོའོ། །གསོ་སྦྱོང་གི་དངོས་པོ་རྫོགས་སོ། །གསོ་སྦྱོང་གི་བཤད་པའི་དངོས་པོ་རྫོགས་སོ།། །།དབྱར་ཚུལ་དུ་འཇུག །དབྱར་ཟླ་འབྲིང་པོ་ནས་སྟོན་ཟླ་འབྲིང་པོ་ཉའི་བར་དུ་ཡང་རུང༌། དབྱར་ཟླ་ཐ་ཆུངས་ཉ་ནས་སྟོན་ཟླ་ཐ་ཆུངས་ཉའི་བར་དུ་ཡང་རུང༌། སྔ་ཕྱི་གང་ཡང་རུང་ལ་ངལ་བསོ་བའི་ཕྱིར་ཚུལ་དུ་འཇུག་གོ །ཟླ་བ་གསུམ་དབྱར་ཚུལ་དུ་འཇུག་པའི་ཟླ་བ་གསུམ་གྱི་བར་དུ་བསྲུང་ངོ༌། །ཚེས་ཞག་གཅིག་དབྱར་ཟླ་འབྲིང་པོ་ལ་ཚུལ་དུ་འཇུག་སྟེ་དེ་ནི་ཚུལ་སྔ་མའོ། །དབྱར་ཟླ་འབྲིང་པོ་དེ་མ་ཐག་པ། དབྱར་ཟླ་འབྲིང་པོའི་ཚེས་བཅུ་དྲུག་ཅེས་བྱ་བ་ནི་དབྱར་ཟླ་འབྲིང་པོ་ཉ་བྲི་བ་ཞག་གཅིག་ལ་བྱའོ། །དབྱར་ཟླ་ཐ་ཆུངས་ལ་ཡང་ངོ༌། །ཚུལ་ཕྱི་མ་ནི་དབྱར་ཟླ་ཐ་ཆུངས་ཚེས་བཅུ་དྲུག་ལ་འཇུག་གོ །གཙུག་ལག་ཁང་བརྒྱན། ཚུལ་དུ་འཇུག་པའི་ཚེ་གཙུག་ལག་ཁང་གི་རལ་ཚེམས་དང་རི་མོ་གསོ་བ་དང་རྒྱན་ལ་སོགས་པ་གདགས་ཤིང་ཕྱི་བདར་བྱ། །ཞག་བཅུའམ་ཟླ་བ་ཕྱེད་ན་འགྱུར་བ་ནའོ། །མདོ་ལྟར་མ་ལྟར་གཙུག་ལག་ཁང་བརྒྱན་པ་ནི་གཙུག་ལག་ཁང་ཆེ་ན་ཟླ་བ་ཕྱེད་ནས་བརྒྱན། གཙུག་ལག་ཁང་ཆུང་ན་ཞག་བདུན་ཙམ་ནས་བརྒྱན། ཞག་བདུན་ནམ་བརྒྱད་དུ་ཡང་གཞན་ལས་སོ། །ཚུལ་དུ་འཇུག་པའི་ཚེ་གཙུག་ལག་ཁང་བརྒྱན་པ་ནི་གཞུང་ཁང་ཅིག་ལས་གཙུག་ལག་ཁང་ཆེན་ཞག་བརྒྱད། ཆུང་ན་ཞག་བདུན་མན་ཆད་བརྒྱན་ཏོ་ཞེས་ཀྱང་འབྱུང་སྟེ་ལྟག་མ་དང་གཉིས་གར་དགའ་བར་བྱའོ། །སྔ་དེ་ཉིན་མལ་སྟན་བསོག །སང་ཚུལ་དུ་འཇུག་པའི་དུས་ལ་བབ་ན་དེ་རིང་དགེ་འདུན་གྱི་མལ་སྟན་ལས་སོ་སོར་བརྙས་པ་དང་འཐོར་བ་ཀུན་ཁྲི་ཡན་ཆད་བསྡུ་ཞིང་བསོག །རྐང་པའི་ཆོལ་ཟངས་ཡན་ཆད་དོ། །ཚུལ་དུ་འཇུག་པའི་ཞག་གཅིག་གི་སྔ་ནས་མལ་སྟན་བསྡུ་བ་
ནི་ཆོལ་ཟངས་ཡན་ཆད་བསྡུས་ཏེ་གཞག་གོ །དེ་ལེན་པས་བསྒོ། །ཚུལ་དུ་ཞུགས་པའི་སྔ་དེ་ཉི་མ་ལ་བསྟན་པ་ཉིད་འབྱུང་སྟེ་གསར་གྱིས་བརྗེ་དགོས་ཏེ་གསར་དགེ་འདུན་གྱིས་གཏི་མུག་དང་རང་དབང་དང་ཞེ་སྡང་འཇིགས་པ་དང་མཐོ་བ་སེམས་ཅན་དང་འདི་རྣམས་ལྟ་བུ་དང་མི་ལྡན་ཞིང་མེད་པ་ལས་བསྐོ། །མི་ནུས་ན་དུ་མས་སོ། །མལ་སྟན་རྫི་བསྐོ་བ་གཅིག་གིས་མི་ཆོག་ཅིང་ལག་གིས་མི་ཁྱབ་ན་གཉིས་གསུམ་ཡན་ཆད་དུས་ཆོ་ག་བར་བསྐོ། །དུས་བྱུག་པ་བསུང་གིས་ཏེ་སློབ་མར་གྱུར་པ་ལ་གོས་དཀར་པོས་གཡོགས་ལ་བཞག་པ་ཚུལ་ཤིང་སྟེ་རྒན་རིམས་སུ་བཞག་ལ་འདི་དང་འདིའི་གནས་འོག་ཁྲིམས་ཏེ་གང་ཁྱོད་ཀྱི་ནང་ནས་ངང་བ་འོག་ཁྲིམས་འདིས་གནས་འདི་རང་དབྱར་ཚུལ་དུ་ཞུགས་ན་དེས་ཚུལ་ཤིང་ལོང་ཤིག །ཚུལ་དུ་འཇུག་པའི་ཉིན་པར་ཚུལ་ཤིང་སྦོས་དང་གུར་ཀུམ་ལ་སོགས་པ་བསུང་གིས་བསྐུས་ལ་སློ་མར་བཅུག་ལ་རས་དཀར་པོས་གཡོགས། །དེའི་ཚེ་འོག་ཁྲིམས་བསྒོ་སྟེ་འོག་ཁྲིམས་ནི་འདུག་པའི་འཐབ་མོ་མི་གླེང་བ་དང་ལྟུང་བ་སྡེ་ལྔ་ལ་ནོངས་པའི་དམིགས་ཤིག་ཡོད་ནའང་མི་བརྒལ་བར་བྱ་བ་དང་བརྒལ་བ་ཞིག་ཡོད་ནའང་ཚུལ་དུ་འཇུག་པའི་ཚེ་རྒོལ་ཅིག་ཅེས་བྱ་བ་དང་ཚུལ་འདིར་འཇུག་འདོད་ན་ཚུལ་ཤིང་ལོང་ཤིག་ཅི་མི་འདོད་ན་མ་ལེན་ཅིག་ཅེས་བྱ་བ་དང་ཉེས་པ་སྤྱོད་པ་ཞིག་ཡོད་ནའང་ཆད་པས་མི་བཅད་པར་དམ་བཅའ་བ་ལ་སོགས་པའི་འོག་ཁྲིམས་བསྒོ། །དེའི་འོག་ཏུ་ཚུལ་ཤིང་འདྲིམ་པའི་དགེ་སློང་མ་ཡིན་པ་གཞན་གཅིག་གིས་དགེ་འདུན་ཚུལ་དུ་འཇུག་སྟེ་ཚུལ་དུ་འཇུག་པར་འཚལ་ལོ་ཞེས་གསོལ་ཞེས་གསོལ་བའི་སྔགས་བྱའོ། །དེའི་འོག་ཏུ་ཚུལ་ཤིང་འདྲི་མ་པའི་དགེ་སློང་གིས་ཚུལ་ཤིང་འདྲིམ་མོ། །ཚུལ་ཤིང་འདྲིམ་པ་ནི་རྒན་རིམས་ནས་བྲིམ་མོ། །ཚུལ་དུ་འཇུག་པའི་ཚེ་ལས་གོ་རིམས་འདི་བཞིན་དུ་བྱ་སྟེ་ཁ་ཅིག་ནི་མདོ་དམིགས་ཀྱིས་འོག་ནས་འཆང་པ་རྣམས་ཡིན། ཁྱེད་ཀྱི་ནང་ན་འགས་དབྱར་གྱི་ནང་དུ་དགེ་འདུན་གྱི་དབུས་སུ་འཐབ་མོ་མ་སྐྱེད་གཅིག །ཚུལ་དུ་འཇུག་པའི་ཚེ་འོག་ཁྲི་མས་སུ་བཅའ་བའི་ཚིག་འདི་ཡང་བསྒོ་དགོས་ཏེ་ཚུལ་ན་འཁོད་པ་ཟླ་བ་གསུམ་གྱི་
ཚེ་དགེ་འདུན་གྱི་ནང་དུ་འཐབ་མོ་དང་འཁྲུག་ལང་མ་བྱེད་ཅིག་ཅེས་ཁྲིམས་སུ་བཅའ། གང་ཁྱེད་ཅུང་ཟད་ཤེས་ན་དེས་ན་སྨྲོས་ཤིག །མདོ་ལྟག་མ་ལྟར་ཚུལ་གྱི་ཚེ་འཐབ་མོ་རྒོལ་ཞིང་མ་གླེངས་པར་ཚུལ་ཁྲིམས་ཀྱི་ཕྱི་ནས་གླེང་བ་ཞིག་ཡོད་དམ་ཉེས་པ་བརྒལ་བ་ཞིག་ཡོད་ན་ད་གྱིས་ཤིག་ཅེས་ཀྱང་བསྒོ། །གང་གིས་དབྱར་གྱི་དབུས་སུ་དགེ་འདུན་ལ་འཐབ་མོ་སྐྱེད་པར་གྱུར་ན་དེ་ལ་དགེ་འདུན་གྱིས་ཕྱིས་བརྟགས་པར་དགོངས་ཤིག་ཅེས་དགེ་འདུན་ལ་བསྒོ། །ཚུལ་དུ་ཞུགས་ཟིན་ནས་དགེ་སློང་ལ་ལ་ཞིག་གིས་ཉེས་པ་ཞིག་བྱས་སམ་འཐབ་མོ་བསྐྱེད་ནའང་ཆད་པས་འཕྲལ་དུ་མི་བཅད་པར་ཚུལ་ནས་བྱུང་ནས་སྤངས་ཤིང་ཆད་པས་བཅད་ཅིང་སྦྱར་བར་བརྟགས་ཏེ་གཞག་གོ་ཞེས་ཀྱང་དགེ་སློང་ཀུན་ལ་བསྒོ་ཞིང་འོག་ཁྲིམས་སུ་བཅའ། ལེན་པ་དང་འཇུག་པའི་ཕྱིར་དགེ་འདུན་གྱིས་ཞུ། ཚུལ་ཤིང་མ་བྲིམ་པའི་མདུན་དུ་ཚུལ་ཞིང་འདྲིམ་པར་བསྐོས་པའི་དགེ་སློང་མ་ཡིན་པ་དགེ་སློང་ལས་པ་གཅིག་གིས་དགེ་འདུན་ཚུལ་དུ་འཇུག་ཅིང་ཚུལ་ཤིང་བྲིམ་མོ་ཞེས་གསོལ་བའི་སྔགས་བྱ། ཚུལ་ཤིང་བྲིམ། མདོ་ལྟག་མ་ལྟར་སྔགས་བྱས་ཟིན་ནས་བྲིམས་ནས་སྔ་དེ་ཉིད་ཚུལ་ཤིང་འདྲིམ་པར་བསྐོས་པའི་དགེ་སློང་གིས་ཚུལ་ཤིང་བྲིམ་མོ། །ཐོག་མར་སྟོན་པའི་བླང༌། ཚུལ་ཤིང་བྲིམ་པ་ནི་ཐོག་མར་སངས་རྒྱས་ཀྱི་ཚུལ་ཤིང་གཅིག་གཞག །དགྲ་བཅོམ་པའི་ཚུལ་ཤིང་སྐལ་པ་གཅིག་གཞག །གཞན་གྱིས་སྟན་ཕྱེད་བོར་ཏེའོ། །ཚུལ་ཤིང་འདྲིམ་པ་ལ་ལེན་པའི་ཚེ་ན་སྟན་ལས་འཕགས་ཏེ་གུས་པར་བླང་ངོ༌། །སློབ་དཔོན་མཁན་པོས་དགེ་སྦྱོང་གིའོ། །དགེ་སྦྱོང་གི་ཚུལ་ཤིང་ནི་མཁན་པོ་དང་སློབ་དཔོན་གྱིས་བླང་ངོ༌། །འཁོད་པ་ཡང་འདི་བཞིན་ཏེ་མཐའ་ནས་སོ། །དགེ་འདུན་ཐམས་ཅད་ལ་ཚུལ་ཤིང་བྲིམས་ཟིན་པའི་འཇུག་ཏུ་གཙུག་ལག་ཁང་གི་སྲུང་མའི་ལྷ་ལ་ཚུལ་ཤིང་གཅིག་བསྔོས་ཏེ་གཞག་གོ ། དལ་གྱིས་གཞག །ཚུལ་ཤིང་བླངས་ནས་སླར་གཞག་པའི་ཚེ་མ་ཁྲོལ་བར་དལ་གྱིས་གཞག །བགྲངས་ཏེ་གནས་འདི་ན་དགེ་སློང་འདི་སྙེད་ཀྱི་ཚུལ་ཤིང་བླངས་སོ་ཞེས་སྦྲན། ཚུལ་ཤིང་བྲིམས་ཏེ་བསྡུས་ནས་ཚུལ་ཤིང་བགྲངས་ལ་མི་འདི་སྙེད་ཀྱིས་ཚུལ་ཤིང་བླངས་ཏེ་ཚུལ་དུ་
ཞུགས་སོ་ཞེས་དགེ་འདུན་ལ་བསྙད་ཅིང་སྨྲ། །གནས་ཀྱི་དངོས་པོ་ལེན་དུ་འཇུག །ཚུལ་དུ་ཞུགས་པའི་འོག་ཏུ་ཁང་བུ་སོ་སོའི་རྐྱེན་ལ་སོགས་པ་དགེ་སློང་རྣམས་སོ་སོར་ཁང་བུ་སྦྱིན་ཞིང་བགོ །ཐ་མར་ས་དང་ཟུང་ད་བླངས་ཏེ་མདུན་དུ་འདུག་ལ། དད་པ་ཐོག་མར་བསྐྱེད་དེ་གནས་བརྟན་གྱི་གཙུག་ལག་ཁང་ཆེ་གེ་མོ་ཞིག་སྟེ་རྙེད་པ་དང་བཅས་གོས་དང་བཅས་ཀྱིས་བཞེས་ཤིག་ཅེས་ཡོན་ཏན་ཅི་བཞིན་པར་རོ། །ཁང་བུ་བགོ་བ་ནི་ཁང་བུ་སོ་སོའི་སྒོ་ལྕགས་དང་ཟུང་ང་བསྡུས་ཏེ་དག་འདུན་གྱི་མདུན་དུ་བསོགས་པ་ལ་སྒོ་ལྕགས་འདི་ནི་ཁང་བུ་འདིའི་ཡིན་ཏེ་རྐྱེན་མང་ཉུང་འདི་ཙམ་ཡོད་དོ་ཞེས་མིག་རེ་རེ་ནས་ཀུན་གྱི་རྐྱེན་ཅི་ཡོད་པ་བཤད་ལ། དགེ་སློང་རྒན་ཞིང་ཡོན་ཏན་དང་ལྡན་མི་ལྡན་རིམ་བཞིན་དུ་དབུལ་ཞིང་བསྒོའོ། །ལྷུང་བཟེད་བཞིན་དུ་བླངས་བ་ལ་སོགས་པའོ། །ལྷུང་བཟེད་སྤང་བ་ལྟུང་བར་འགྱུར་ཏེ་དགེ་འདུན་ལ་བྲིམས་པ་ལས་གྲལ་ཐོག་མ་པས་མི་འདོད་ཅེས་བྱས་ནས་ཐུར་དུ་ཐལ་བ་ལས་ལན་གསུམ་གྱི་བར་དུ་སླར་སློང་ན་སླར་བྱིན་པ་བཞིན་ཁང་བུ་མི་འདོད་ཅེས་བྱས་པ་ལས་སླར་བླངས་ན་ལན་དུ་བསླངས་པ་བཞིན་དུ་ཉེས་བྱས་རེ་རེ་སྟེ་ལན་གསུམ་དུ་བསླངས་པའི་ཐ་མ་ལ་སྦྱིན། མ་བྱིན་ན་དགེ་འདུན་འཁྲུག་པར་འགྱུར་བའི་ཕྱིར་རོ།། བགོ་བར་ཤེས་པ་ལ་མཆོད་རྟེན་དང་དགེ་འདུན་གྱི་དོན་མ་ཡིན་པར་སོང་ན་གྲལ་རིམ་དུ་བགོའོ། །ཚུལ་དུ་འཇུག་ཅིང་ཁང་བུ་འགོད་པར་ཤེས་བཞིན་དུ་རང་དོན་ལ་གུད་དུ་སོང་ན་དགེ་འདུན་གྱིས་ཀྱང་ཁོའི་སྐལ་བའི་ཁང་བུ་རིམ་བཞིན་དུ་མ་བཞག་པར་བགོས་ཀྱང་ཉེས་མེད་དོ། །ཁང་བུ་ལྷག་ན་ནི་སུ་མི་འདོད་པའི་ཁང་བུ་ནང་པ་ལ་སྐལ་བ་བཞག་གོ །དཀོན་མཆོག་གི་ཕྱིར་དགེ་འདུན་གྱིས་བསྐོས་ཏེ་བཏང་བ་ནི་ཁང་དུ་རིམ་བཞིན་དུ་སྐལ་བ་སྦྱིན་ནོ། །ཤིང་དྲུང་དང་སྔོན་པོ་དང་གསིང་མ་དང་སྒང་ལ་ཡང་ཇི་ལྟར་རྒན་པའི་རིམས་སུ་བགོ །དགེ་སློང་ལམ་དུ་ཞུགས་ཏེ་འདོད་པ་ཞིག་ན་ནས་རྒན་པའི་རྣམས་ལ་གྲང་ན་ནི་དྲོ་བའི་ས་སྦྱིན། ཚ་བ་ཞིག་ན་གྲིབ་མ་དང་བསིལ་བའི་སར་གཞག་གོ །ཁང་བུས་མི་ཆོག་ན་གཉིས་ལ་སོགས་པ་སྟེ་མཐར་ན་གདིང་བ་ཙམ་གྱིས་སོ། །ཁང་བུ་བགོས་ཏེ་གྲངས་ཀྱིས་མི་ཆོག་སྟེ་མི་མང་ན་ཁང་བུ་མིག་གཅིག་ལ་མིག་གཉིས་གསུམ་ཡན་ཆད་དུ་
ཤོང་ཤོང་དུ་གཞག་གོ །དེ་ལྟར་བྱས་ཀྱང་མི་མང་སྟེ་མི་ཤོང་ན་ཁང་བུའི་ནང་དུ་གདིང་བ་བཀྲམ་སྟེ་གདིང་བ་དུ་ཤོང་བ་བཞིན་དུ་མི་ཡང་དེ་སྙེད་དུ་འཁོད་དུ་གཞུག་གོ །ལྷུང་བཟེད་དང་རིལ་བ་སྤྱི་བླུགས་དང་གོ་འདུན་དང་སོ་ཤིང་གི་གནས་སྤགས་ཏེའོ། །མདོ་ལྟག་མ་ལྟར་མི་མང་སྟེ་མི་ཤོང་བ་གདིང་བའི་ཚད་ཀྱི་གྲངས་ཀྱིས་བགོས་པ་ལ་མི་དེ་རྣམས་ཀྱི་རིལ་བ་དང་ལྷུང་བཟེད་ལ་སོགས་པ་ཡོ་བྱད་གཞག་པའི་སར་གདིང་བ་གཅིག་གིས་མི་གྲངས་ལ་མ་གཏོགས་པར་ལྷག་པར་གཞག །སྒོ་ཁང་དང་སྐས་ཁང་དང་ཁྱམས་དང་འཁོད་པའི་དང་ཁྲུས་ཁང་དག་ནི་མི་བགོའོ། །མིང་གིས་སྨོས་པ་འདི་རྣམས་ནི་དགེ་འདུན་གྱི་སྤྱིའི་སྤྱོད་པ་ཡིན་པས་མི་ཅི་ལྟར་མང་ཡང་མི་བགོ་བར་བཞག་གོ །མལ་སྟན་ལ་མཚན་མོ་མ་ཡིན། མལ་སྟན་བགོ་བ་ནི་ཉིན་པར་འགོད་ཀྱི་མཚན་མོ་མི་འགོད་དོ། །ནད་པ་གནས་པའི་ཁང་བུ་གཞན་ལ་མ་ཡིན། ཁང་བུ་བགོ་བའི་ཚེ་ནད་པ་འདུག་ན་ནི་རིམ་དུ་བགོ་ཞིང་སྐྱོ་བར་མི་བྱ་བར་ནད་པ་གཞི་ལ་གཞག་སྟེ་གཞན་རིམ་པར་བགོའོ། །དེ་ཐོབ་པར་མི་འགྱུར་ན་མི་སྦྱིན་པར་མི་བྱ། ནད་པ་འདུག་པའི་ཁང་བུ་དེ་དགེ་སློང་ཡོན་ཏན་དང་ལྡན་པའི་རྐྱེན་ཡིན་གྱི་ནད་པས་མི་མཐོལ་བ་ཞིག་ཡིན་ཀྱང་ན་བ་བརྩན་པས་མི་སྤོ་བར་གཞག་གོ །དེ་དང་གཡོག་ཏུ་ལས་བྱེད་དུ་མི་གཞུག །དགེ་འདུན་གྱི་ལས་ཀྱང་དགེ་སློང་ནད་པ་དང་ནད་གཡོག་སུ་བྱེད་པ་མི་བསྐོ་བར་གཞག་གོ །མཛེ་ཅན་དགེ་འདུན་གྱི་མལ་སྟན་ལ་མི་སྤྱད། དགེ་སློང་མཛེ་བྱུང་བ་དགེ་འདུན་གྱི་མལ་སྟན་དང་ཁང་བུ་ལ་སོགས་པ་ལ་སྤྱོད་དུ་མི་གཞུག་སྟེ་ཁོ་ཉིད་ལ་གཉེར་དུ་འགྱུར་བའི་ཕྱིར་རོ། །མཐའ་འཁོབ་ཀྱི་གཙུག་ལག་ཁང་སྦྱིན། དགེ་སློང་མཛེ་ཅན་གཞག་པའི་གནས་ནི་གཙུག་ལག་ཁང་གི་མཐའ་དབེན་པ་གར་བ་གཅིག་ཏུ་དགེ་སློང་གཞན་དང་མི་འདྲེ་བར་གཞག་གོ །གནས་པ་དང་བཅས་པ་དང་གཞན་དགེ་འདུན་གྱི་ཁྱམས་དང་བཀད་ས་དང༌། སྒོ་གང་དང་ཕྱི་ཁྱམས་དང་འཆགས་དང་གྲིབ་ཤིང་གི་བར་དུ་མ་ཡིན། དགེ་སློང་མཛེ་ཅན་དེ་དགེ་སློང་གཞན་གནས་ཤིང་སྤྱོད་པའི་ཁང་བུ་དང༌། སྤྱོད་པའི་ཁྱམས་ལ་སོགས་པ་མིང་གིས་སྨོས་པ་འདི་རྣམས་གང་ཡང་རུང་སྟེ་གནས་ཤིང་སྤྱོད་དུ་མི་
གཞུག་གོ །བཤང་གཅིའི་གནས་སུ་མི་གཞུག །མཛེ་ཅན་དེ་དགེ་འདུན་གྱི་བཤང་གཅིའི་སར་ཡང་མི་འཇུག །འདི་ལ་སྙིང་རྗེར་གཡོག་སྦྱིན། དགེ་སློང་མཛེ་ཅན་དེ་ལ་སྙིང་རྗེ་བའི་ཕྱིར་དགེ་འདུན་གྱིས་ཡོན་དང་ཟས་ཀྱི་སྐལ་བ་དང་གོས་དང་ཁྱིམ་པ་ལས་གཡོག་གཅིག་ཀྱང་སྦྱིན། དགོན་པ་པ་རྣམས་ཀྱི་ལྷུང་བཟེད་དང་ཆོས་གོས་གཞག་པའི་ཕྱིར་རྟག་ཏུ་གནས་བསྐོ། །དགེ་སློང་དགོན་པ་ལ་འཇིགས་པའི་རྐྱེན་ཡོད་དེ་གཙུག་ལག་ཁང་དུ་རྟེན་བཅའ་བའི་ཕྱིར་ལྷུང་བཟེད་དང་ཆོས་གོས་ལ་སོགས་པ་གཞག་པའི་ས་ཀུན་གྱི་སྤྱིར་ཁང་བུ་མིག་གཅིག་བསྔོ་སྟེ་གཞག་གོ །དབྱར་ཚུལ་དུ་འཇུག་ཁར་འབའ་ཞིག་འོང་བར་འགྱུར་ན་དངོས་པོ་དང་མལ་སྟན་གཞག །ཚུལ་དུ་འཇུག་པའི་ཚེ་གུད་ནས་དགེ་སློང་གཞན་གནས་དེར་ཚུལ་དུ་འཇུག་ཏུ་འོང་བའི་ཕྱིར་ཁང་བུ་ཡོད་ན་རྐྱེན་དང་བཅས་པར་སྟ་གོན་བྱས་ལ་གཞག །ཚུལ་གཅིག་པུའང་མ་ཡིན་ཏེ། ཁང་བུ་ཡོད་ན་དགེ་སློང་གཞན་འོང་བའི་ཕྱིར་རྟག་པར་གཞག་གོ །ཚུལ་དུ་ཞུགས་པ་བས་མང་དུ་ལྷགས་ན་སླར་བགོ །ཚུལ་དུ་ཞུགས་ཏེ་ཁང་བུ་དང་མལ་སྟན་བགོས་ཟིན་པ་ལས་ཕྱིས་དགེ་སློང་མང་ཞིག་ལྷགས་ན་ཚུལ་དུ་ཞུགས་པ་ནི་མི་གཅིག་གི་མལ་སྟན་དང་ཁང་བུ་ནི་སླར་བསྡུས་ལ་བགོ །ཚུལ་འོག་མར་ཞུགས་ན་མ་ཡིན་ནོ། །ཚུལ་ཕྱི་མར་ཞུགས་ནས་མལ་སྟན་དང་ཁང་བུ་བགོས་ཟིན་པ་ལས་ཕྱིས་དགེ་སློང་དག་གཅིག་གུད་ནས་ལྷགས་ན་དུ་ལྷགས་ཀྱང་རུང་སྟེ་སླར་མི་བགོའོ། །ཆོག་ན་གཉིས་ལ་སོགས་པའོ། །མལ་སྟན་དང་ཁང་བུ་མང་ལ་དགེ་སློང་ཉུང་ན་ཁང་བུ་དང་མལ་སྟན་ཕྲུགས་དུ་ཡང་རུང་སྟེ་ཅི་ཐོབ་ཐོབ་ཏུ་མང་དུ་སྦྱིན་ནོ། །གཅིག་གི་ཕྱིར་མལ་སྟན་མི་བླང༌། དགེ་འདུན་འང་རུང་སྟེ་གནས་དེར་ཞག་གཅིག་ལས་མི་ཐོགས་པ་ཞིག་ན་ཞག་གཅིག་གི་ཕྱིར་མལ་སྟན་ཁང་བུ་མི་མནོད་དོ། །ལ་ལ་ན་ནོད་པ་ཡོད་ཀྱང་དགེ་འདུན་གྱིས་མ་བྱིན་ཡང་ཉེས་མེད། རྙེད་པ་འདོད་པར་གཙུག་ལག་ཁང་མ་ཡིན་ནོ། །ཡོན་བདག་གིས་ཁང་པ་སྦྱར་བ་ལ་ཁང་བུ་ལ་ལ་ནི་རྐྱེན་དང་ཡོ་བྱད་མང་བར་སྦྱར། ལ་ལ་ཉུང་དུ་སྦྱར་ཏེ་རྐྱེན་མང་ཉུང་དང་བཟང་ངན་ཡོད་པ་ཞིག་འགོད་པ་ན་གནས་བརྟན་ནམ་གྲལ་མཐོ་བས་འདམས་ཏེ་ཁྱེར་ན་ཉེས་བྱས་སོ། །
དགེ་འདུན་གྱིས་གང་འདོད་པ་ངོམས་ཤིག་ཅེས་བསྒོ་བ་ནི་ཉེས་མེད། ཐམས་ཅད་སྤྱད་མི་ཉུང་ལ་ཁང་བུ་མང་སྟེ་སྐལ་བ་མང་དུ་ཐོབ་ན་ལྷག་པར་མི་གཞག་གི་ཐབས་འོག་ནས་འབྱུང་བ་ལྟར་སྤྱད་དོ། །ལ་ལ་ལ་སྔ་དྲོའི་ཀློག་པ་དང་ཁ་ཏོན་གྱི་གནས་དང་འཆག་པ་ལས་འགའ་བྱ། མི་གཅིག་ལ་ཁང་བུ་ཐོབ་ན་ལ་ལར་ཡི་གེ་ཀློག་ཅིང་ཁ་ཐོན་བྱ། ལ་ལར་འཆག་པ་སྟེ་ཁང་བུ་དང་མིག་རེ་ལས་སྣ་རེ་བྱའོ། །ལ་ལར་གུང་གི་དང་མཚན་མོའོ། །ཁང་བུ་མང་དུ་ཐོབ་ན་ཁ་ཅིག་གི་ནང་དུ་ཉི་མ་གུང་གི་ཚེ་ལས་སྤྱད། ལ་ལར་མཚན་མོའི་སྤྱོད་པ་བྱ། གཞན་ལྷུང་བཟེད་དང་ཆོས་གོས་གཞག་པའི་གནས་མཚན་མོ་གཞན་ཡང་འདི་ལྟར་དེ་ལ་རིགས་སོ། །ཁང་བུ་མང་དུ་ཐོབ་ན་ཁང་ཅིག་གི་ནང་དུ་ལྷུང་བཟེད་ཆོས་གོས་གཞག །ཁ་ཅིག་གི་ནང་དུ་ཉལ་མལ་བྱ་བ་ལ་སོགས་པ་མིག་རེ་ནས་སྣ་རེ་སྤྱད་དོ། །དེ་ལྟར་ལས་སྣ་རེ་སྤྱད་པ་ནི་ཡོན་ཏན་རྣམ་གཉིས་ཡོད་དེ་གཅིག་ཏུ་ན་བདག་ལ་ཡང་ཡངས་ཤིང་བདེ། །གཅིག་ཏུ་ན་ཡོན་བདག་གིས་ཡོན་བསྐྱེད་ཅིང་བསོད་ནམས་སུ་འགྱུར་བའི་ཕྱིར་རོ། །ཚུལ་དུ་ཞུགས་པས་གནས་ཀྱི་དངོས་པོ་གས་པ་དང་གོགས་པ་སླར་བཅོས་སོ། །ཚུལ་དུ་ཞུགས་ནས་ཁང་བུ་དགོས་པས་མི་ཆོག་གི་ཁང་བུའི་ཞིག་རལ་དང་གས་ཤིང་གོགས་པ་ལ་སོགས་པ་བཅོས་ཤང་གླན་ཏོ། །ཚུལ་དུ་མ་ཞུགས་པའི་ཚེ་ཡང་འདི་བཞིན་བྱའོ། །དབྱར་མོ་ཐང་ལ་ཡང་དབྱར་ཚུལ་དུ་ཞུགས་པའི་དགེ་སློང་མ་དག་གི་བཅོས། དགེ་སློང་མ་རྣམས་ཀྱང་ཚུལ་དུ་ཞུགས་པའི་ཚེ་དབྱར་མོ་ཐང་ཞིག་རལ་པ་དང་གས་ཤིང་གོགས་པར་གྱུར་ན་དགེ་སློང་ཕ་གི་དང་འདྲ་བར་བདག་བདག་གིས་གནས་ལ་སྒོ་ཚེ་མི་བྱ་བར་སྤྱིས་བཅོས་སོ། །འཐབ་མོ་པ་འཇུག་པར་མི་འགྲུབ་པའི་ཕྱིར་དགུན་དང་དཔྱིད་དུ་མལ་སྟན་བླང་བར་བྱ། དགུན་དང་དཔྱིད་དང་དབྱར་དུས་གསུམ་མལ་སྟན་དང་ཁང་བུ་སླར་བསྡུས་ཤིང་ཁོང་མཉམ་པར་བགོ །དེ་ལྟར་བྱ་བ་ནི་ཁོ་ན་མཉམ་པའི་ཕྱིར་རོ། །ཡང་གཅིག་ཏུ་གུད་ནས་དགེ་སློང་འཐབ་མོ་ཞིག་འོང་ན་འཐབ་མོ་པ་དེ་བདག་གཅིག་གི་ནང་དུ་མི་གཞག་པའི་ཕྱིར་མལ་སྟན་དང་ཁང་པ་ལྷག་པར་མི་གཞག་པར་བགོ །ཐམས་ཅད་བགོ །ལྟག་ཏུ་སྒོ་ཁང་ལ་སོགས་པ་མི་བགོ་ཞེས་བྱུང་བ་ཡང་མ་བགོས་ན་འཐབ་
མོ་པ་འདུག་ཅིང་ཐེན་དུ་འོང་གིས་སྒོ་གང་དང་ཁྱམས་ལ་སོགས་པ་ཀུན་བགོ་འཐབ་འོག་ནས་འཆད། འདི་ལྟ་སྟེ་གཙུག་ལག་ཁང་གི་འཁོར་ཡངས་ཀྱང་ངོ༌། །ལྷག་མ་ཐམས་ཅད་བགོས་ཤིང་བྱ་བ་ནི་སྒོ་གང་དང་སྣམ་ཕྱིས་ལ་སོགས་པ་ཀུན་སོ་སོར་བགོས་ཏེ་འཐབ་མོ་པ་འདུག་པའི་གནས་མེད་པར་བྱ། ཁྱམས་ཀྱང་དེ་བཞིན་ནོ། །དགེ་འདུན་འདུ་བའི་ཁྱམས་ཀྱང་དགེ་འདུན་འདུ་བས་ཞེས་པ་ཡིན་ཏེ་མི་བགོ་འདྲ་མོད་ཀྱི་འཐབ་མོ་པ་འོངས་པར་ཐོས་ན་དེ་ཡང་བགོ །དེ་སོང་ཕྱིན་ཆད་དེ་ལྟར་མི་འཇུག །འཐབ་པ་འོངས་པའི་ཕྱིར་རྟག་ཏུ་སྨོས་པ་ལྟར་བགོས་པ་ལས་འཐབ་མོ་བ་སླར་སོང་སྟེ་མི་འོང་ན་སྤྱི་ལ་འདུག་པའི་ཁང་བུ་ཁྱམས་ལ་སོགས་པ་རྣམས་ཐལ་བྱུང་དུ་བགོས་ཏེ་བཞག་པ་མ་ཡིན་གྱི་སླར་བཀྲོལ་ཏེ་སྤྱིལ་གཞག །རང་བཞིན་དུ་འཇུག་པའི་ཕྱིར་དགག་པར་མི་བྱ། །དགེ་སློང་ཡོན་ཏན་དང་ལྡན་པ་ཞིག་འོངས་ནས་འཐབ་མོ་པ་ལྟར་ཁང་བུ་མི་སྦྱིན་པ་མ་ཡིན་གྱི་ཚུལ་བཞིན་དུ་ཁང་བུའི་སྐལ་བ་གཞག་གོ །འགྱུར་བའི་ཕྱིར་ན་མ་ཡིན་པ་འགོད་པའི་ཚེ་བདག་གི་གནས་སུ་བྱའང་རུང་གྲོགས་པའི་གནས་སུ་བྱའང་རུང་སྟེ་སོང་ཕོད་ནས་འདུག་པའི་ཕྱིར་ད་ནས་སྐལ་བ་ནོད་ཅིང་སྒོ་ལྕགས་བཅུག་ནས་མཐུས་མནན་པ་ལྟ་བུར་མི་བྱ། འདི་དུས་ཆེ་གེ་མོ་ཞིག་ནས་བདག་ཞག་གཅིག་གམ་དེའི་ཆར་མཆིས་སོ། །ཁང་བུ་འགོད་པའི་སྐལ་བ་གར་བབ་པ་ནམ་འདུག་གི་བར་དུ་ཐལ་བྱུང་མནོད་ཀྱི་དབྱར་ནི་བསེལ་བ་འདིར་འདུག་གོ །དགུན་ནི་དྲོ་བ་འདིར་འདུག་གོ །ཞག་ལྔ་ཞིག་འདིར་འདུག་ཞག་དྲུག་ཅིག་འདིར་འདུག་གོ་ཞེས་ཟེར་ཞིང་གནས་གཅིག་ཏུ་མ་བཅད་པར་མནོད་པར་མི་བྱའོ། །འདིར་སློབ་དཔོན་ཆེ་གེ་མོ་ཞིག་གིར་འགྱུར་མཁན་པོ་ཡིར་འགྱུར་ལྷན་ཅིག་ཏུ་སྤྱོད་པ་ཡིན་འདི་ཉེ་གནས་ཀྱིར་འདིར་གཏམ་ཟླ་པོ་ལ་སོགས་པ་ཡིར་ཞེས་གཙུག་ལག་ཁང་ལ་མི་བགོ །ཁང་བུ་འགོད་པའི་ཚེ་སློབ་དཔོན་མཁན་པོ་དང་སློབ་མ་དང་ཉེ་གནས་དང་མཛའ་བོ་དང་གྲོགས་པོ་ལ་སོགས་པ་གང་ཡང་རུང་སྟེ་འགའ་ཞིག་ན་འདུག་སྟེ་ཕྱིར་འོང་བར་གྱུར་ཏེ་དེའི་ཕྱིར་བདག་གིས་ཁང་བུའི་སྐལ་བ་སྔ་ནས་མནོས་ཏེ་མི་གཞག་གོ །དེ་ལྟར་མནོས་ན་ཉེས་བྱས། མི་མནོད། མདོ་ལྟག་མ་ལྟར་
བདག་གི་སྐལ་བའི་ཁང་བུ་རོག་གཅིག་གིས་མནོས་ཏེ་བཞག་ཅིང་འདུག་ན་མནོད་དུ་མི་དབང་བ་ལས་མནོས་ཏེ་མ་བརྟགས་པ་ཡིན་པས་བདག་ཀྱང་འདིར་མི་འདུག་གོ །ཁར་བའི་རུབ་མ་པ་བྱ་ཚང་ལ་ཐབས་ཀྱི་ཕྱིར་བསྒོ། །དགེ་སློང་གཅིག་གསོལ་བ་དང་ཞུ་བའི་ལས་བྱས་ལ་ཁར་བ་བསྐུར་ཏེ་བྱ་ཚང་འཇིག་ཏུ་གཞུག་བྱ་ཚང་ཅི་ལྟ་བུར་གཞིག་པ་ནི་ཐབས་འོག་ནས་འཆད་སྒོ་ང་མེད་ན་གཞིག །བྱ་ཚང་གཞིག་པ་ནི་སྒོ་ང་མེད་ན་གཞིག་གོ །དགེ་འདུན་གྱིས་མ་བསྒོས་བར་བྱ་ཆང་བཤིག་པ་ནི་ཉེས་བྱས་པ་གོང་ནས་འཆད་པ་ཡིན། ཕྲ་མོ་རྣམས་ལ་མི་འཕེལ་བར་སྐུད་པས་དཀྲི་བུང་བ་དང་ཁ་བརྒྱད་ཀྱི་ཚང་ཞིག་གཙུག་ལག་ཁང་ན་འདུག་ན་མང་དུ་མི་འཕེལ་བར་བྱ་བའི་ཕྱིར་སྐུད་པས་ཚང་དཀྲིས་ཏེ་གཞག་ན་ཆེར་མི་འཕེལ་ཞིང་གུད་དུ་འཕོ་བར་འགྱུར་རོ། །མལ་སྟན་ལ་སོགས་པ་སྦྱིན། མལ་བགོ་པ་ནི་དགེ་སྦྱོང་ཡན་ཆད་མཉམ་པར་བགོ །ཡོད་ན་དུ་མར་ཡང་ངོ༌། །མལ་སྟན་གྲངས་དུ་མ་ཡོད་ན་ཕྲུགས་དུ་མ་ཅི་ཐོབ་ཐོབ་ཏུ་བགོ །ཁྲི་ཆེན་པོ་ཡང་བགོ །འདུག་པའི་ཁྲི་ཆེན་པོ་རྒྱབ་རྟེན་ཅན་དང་ཁྲི་ཆུང་དུ་ཡང་བགོའོ། །གདིང་བ་ཡང་ངོ༌། །ཡོན་བདག་གིས་རེ་ལྡེ་དང་སྟན་ལ་སོགས་པ་སྦྱར་བ་ཞིག་ནའང་ཅི་ཐོབ་པ་ཙམ་དུ་བགོ །དགེ་འདུན་གྱི་གཡོགས་པའི་མལ་སྟན་མི་གཙང་བ་དང་ཟག་པས་ཆུད་གཟོན་པའི་དགེ་སྦྱོང་སུ་ལ་ཡང་མི་སྦྱིན། དགེ་འདུན་གྱི་མལ་སྟན་གདིང་བ་ཤིང་བལ་དང་སྲིན་བལ་དང་བལ་ལ་སོགས་པའི་བར་ཚངས་ཅན་དགེ་སློང་འོག་རྫིང་ཅན་མི་སྦྱིན་ནོ། །སྟན་ཐ་མལ་པ་རྐྱང་པ་ནི་བཀྲུར་རུང་བའི་ཕྱིར་སྦྱིན་ནོ།། དགེ་སློང་མ་ལ་ཡང་མ་ཡིན། མདོ་ལྟག་མ་ལྟར་དང་འདྲ་བར་གདིང་བ་བར་ཚངས་ཅན་དང་དགེ་སློང་མའི་ཡང་དགེ་སྦྱོང་ཟ་གུ་ལ་མི་སྦྱིན། དེ་དེར་གནས་པར་གྱུར་ན་གཙུག་ལག་ཁང་གི་མཐའ་འཁོབ་ཏུ་སྦྱིན། དགེ་སློང་ཕོ་མོ་དང་དགེ་སློང་ཕོ་མོ་ལས་ཟ་གུ་འོག་རྫིང་ཅན་ཞིག་ཡོད་ན་གཙུག་ལག་ཁང་གི་མཐའ་འཁོབ་ཁང་བུ་ངན་པ་ཞིག་ཏུ་གཞག་གོ །མལ་སྟན་ན་ལྷག་མ་ངན་པ་ལས་སོ། །དགེ་སློང་ཕོ་མོ་དང་དགེ་སྦྱོང་ཕོ་མོ་འོག་རྫིང་ཅན་ལ་མལ་སྟན་ཡང་ངན་པ་ལས་སྦྱིན། ཁྱེད་སུ་ལའང་དགེ་འདུན་གྱི་མལ་སྟན་ལ་གདིང་བ་མེད་བར་མ་སྤྱོད་ཅིག །མལ་སྟན་
གྱི་རུབ་མ་པས་ཟླ་བ་ཕྱེད་ཕྱེད་ཅིང་དགེ་སློང་རྣམས་ལ་གདིང་བ་མེད་པ་དང་ཚས་ངན་པར་མ་བྱ་ཤིག་པར་བསྒོ་ཤིག །བརྟགས་པའི་གདིང་བ་ཅན་མ་ཡིན། མལ་སྟན་གྱི་རུ་བ་མ་བས་གདིང་བ་མེད་པར་མ་བྱ་ཤིག་ཅེས་བསྒོ་བ་ལ་གདིང་བའི་མཚན་མ་ཙམ་དུ་འོག་སྐ་ལ་སོགས་པ་ཆུང་དུས་གདིང་བའི་སྐྱིན་པར་བཏིང་སྟེ་ཉལ་བར་མི་བྱ། དྲི་མ་ཅན་གྱི་གདིང་བ་མ་ཡིན་ནོ་ཞེས་བསྒོ་ཤིག །གདིང་བ་དྲི་མ་ཅན་གྱི་དགེ་འདུན་གྱི་མལ་སྟན་ལ་གདིང་ཞིང་མི་ཉལ། ཟླ་བ་ཕྱེད་ཕྱེད་ཅིང་བརྟག །མལ་སྟན་གྱི་རུབ་མ་པས་གདིང་བ་མེད་པ་མ་བྱ་ཤིག་ཅེས་བསྒོ་བ་བཞིན་དུ་མཉན་ཏམ་མ་མཉན་པར་བརྟག་པའི་ཕྱིར་ཟླ་བ་ཕྱེད་ཕྱེད་ཅིང་སྒྲོན་མ་ཐོགས་ཏེ་ཉལ་ཁར་བལྟ། དུས་ལས་འགལ་པར་སྤྱོད་ན་ཕྲོགས་ལ་ཞུས་ཏེ་གནས་པ་ན་གནས་པའོ། །མལ་སྟན་རྫིས་གདིང་བ་མེད་པ་དང་དྲི་མ་ཅན་དང་བརྟག་པ་ཙམ་བྱེད་ཅིག་ཅེས་བསྒོ་བ་ལས་ཟླ་བ་ཕྱེད་ཅིང་བྱུལ་བའི་ཚེ་བསྒོ་བ་བཞིན་དུ་མ་བྱས་ན་དགེ་སློང་ངམ་དགེ་སྦྱོང་དེའི་སློབ་དཔོན་ལ་དེ་ལྟར་བྱེད་དུ་མ་གཞུག་ཤིག་མལ་སྟན་རྫིས་བསྒོ། །དེ་ལྟར་བསྒོ་བ་ནས་སློབ་དཔོན་ན་རེ་ངའི་ངག་མི་ཉན་གྱི་ཅི་བདེར་བྱོས་ཤིག་ཅེས་ཟེར་ན་མལ་སྟན་ཕྲོགས་ལ་དྲུབས་ཏེ་གཞག་གཞན་ན་དགེ་འདུན་ལའོ། །དགེ་སློང་རྒན་པོ་གནས་བརྟན་དུ་ཆུད་པ་ཡན་ཆད་གཅིག་གིས་མལ་སྟན་བསྒོ་བ་བཞིན་དུ་ཚད་མ་བྱས་ན་མལ་སྟན་ཚས་ངན་ཏེ་ཞེས་བསྒོ་སྟེ། ཉན་དུ་མ་བཏུབ་ན་དགེ་འདུན་ལ་ཞུས་ཏེ་སླར་དབྲོག །སྦྱིན་བདག་ཆེ་གེ་མོ་ཞིག་དོན་བསྒྲུབ་པ་ཆེ་གེ་མོ་ཞིག་ཡུལ་གྱི་གྲོང་ཆེ་གེ་མོ་ཞིག་ཏུ་སོང་དགེ་འདུན་རྣམས་ཚུལ་དུ་འཇུག་གོ་ཞེས་ཞུ། ཚུལ་དུ་འཇུག་པའི་ཚེ་མིང་གིས་སྨོས་པ་འདི་རྣམས་སྨོས་ཏེ་འཇུག་གོ །ཚུལ་དུ་ཞུགས་པའི་ཚེ་སྦྱིན་བདག་གི་མིང་འདི་ཞེས་བྱ་བ་དང་དོན་སྒྲུབ་ཅིང་ཞལ་ཏ་བྱེད་པ་མིང་འདི་ཞེས་བྱ་བ་དང་ཡུལ་གཙུག་ལག་ཁང་མིང་འདི་ཞེས་བྱ་བའི་གནས་སུ་དགེ་འདུན་འདི་རྣམས་ཚུལ་དུ་འཇུག་གོ་ཞེས་ཞག་གཅིག་གི་སྔོན་ལོགས་སུ་སྨོས་ཏེ་ཁོང་དུ་ཆུད་པར་བྱས་ལ་ཚུལ་དུ་འཇུག །མ་བྱུང་བ་དང༌། ཉེས་པ་དང་ལྟར་ནི་མ་བྱུང་ན་ཕྱིས་འབྱུང་ངམ་མི་འབྱུང་ངམ་མི་འབྱུང་གཏོལ་མེད་པར་མི་བྱའི་བརྟགས་ཏེ་མི་འབྱུང་བ་
རྟོགས་ན་ཚུལ་དུ་འཇུག་པ་ལ་བྱ། གསོལ་བ་ནི་ཐེ་ཚོམ་དང༌། བདག་གི་ཚུལ་ཁྲིམས་ལས་ཉེས་པ་ཞིག་བྱུང་ན་ཐེ་ཚོམ་ཟོས་པ་དང་གཞན་ཞིག་གིས་བརྒལ་ཏེ་ཐེ་ཚོམ་སེལ་བའི་མི་ཡོད་ན་ཚུལ་དུ་འཇུག་པ་ལ་བྱ། གཞན་ཡང་སྡུག་བསྔལ་དང༌། ལུས་ཀྱི་སྡུག་བསྔལ་ཁ་ཟས་དང་སྡིག་སྦུར་དང་སེམས་ཅན་གྱི་གནོད་པར་བྱེད་པ་ཡོད་དམ་མེད་བརྟགས་ཏེ་དེ་ལྟ་མི་བདེ་ཡང་ཕྱིས་བདེ་བར་གྱུར་ན་ཚུལ་དུ་འཇུག་པ་ལ་བྱ། ཡིད་མི་བདེ་བ་དང༌། སེམས་འཁྲུགས་ཤིང་མི་བདེ་བར་གྱུར་ནའང་ཚུལ་དུ་མི་འཇུག་སྟེ་ལྟག་མ་དང་འདྲ། བསྲུང་བ་དང༌། བདག་གི་ལུས་ལ་གནོད་ཅིང་གཙེ་བ་ཞིག་བྱུང་ན་ཕ་སྐྱབས་དང་ར་མདའ་བྱེད་པ་ཡོད་དམ་མེད་བརྟགས་ཏེ་མེད་ན་མི་འཇུག་པ་ལ་བྱ། ནད་གཡོག་ཏུ་ཚངས་པ་མཚུངས་པར་སྤྱོད་པ་ལས་འགྱུར་བར་རེ་བ་དང༌། ཚུལ་དུ་ཞུགས་ན་བདག་གི་གྲོགས་ཚངས་པ་མཚུངས་པར་སྤྱོད་པ་ནད་གཡོག་བྱེད་དུ་བཏུབ་པ་དང༌། ནད་གཡོག་ཡོད་དམ་མེད་བརྟགས་ཏེ་མེད་ན་ཚུལ་དུ་མི་འཇུག་ཡོད་ན་ཚུལ་དུ་འཇུག་པ་ལ་བྱ། གནས་དང༌། བདག་ཚུལ་དུ་ཞུགས་ན་གནས་ཁང་ཡོད་དམ་མེད་པ་དང༌། ཡོད་ཀྱང་ངན་ཏེ་ཉོན་མོངས་པར་འགྱུར་ན་ཚུལ་དུ་མི་འཇུག །ཡུལ་དང༌། ཡུལ་འཁྲུག་ཅིང་དགྲ་དང་ཆོམ་པོ་ལ་སོགས་པ་ཡོད་དམ་མེད་བརྟགས་ཏེ་ཡོད་ན་མི་འཇུག །ཟས་དང༌། གནས་དེ་ན་དགེ་འདུན་གྱི་ཟས་སྦྱིན་ནམ་སྦྱིན་པ་དང༌། བསླང་དུ་རྙེད་པ་བརྟགས་ཏེ་མི་རྙེད་ན་ཚུལ་དུ་མི་འཇུག །སྨན་དང༌། གནས་དེ་ན་སྨན་ཡོད་དམ་མེད་བརྟགས་ཏེ་སྨན་མེད་ན་མི་འཇུག །སྦྱིན་པ་བརྟགས་ཏེ་ཚུལ་དུ་འཇུག་གོ ། མིང་གིས་སྨོས་པ་འདི་རྣམས་སྦྱིན་ཞིང་སྦྱོར་བ་ཡོད་དམ་མེད་བརྟགས་ཏེ་ཡོད་ན་ཚུལ་དུ་འཇུག་མེད་ན་མི་འཇུག །གཡོགས་པར་དགེ་སློང་གི་མདུན་དུའོ། །ཚུལ་དུ་འཇུག་པ་ནི་ཁང་པ་ཐོག་མེད་པར་ཚུལ་དུ་མི་འཇུག་སྔགས་བྱེད་པའི་ཚེ་དགེ་སྦྱོང་ངམ་དགེ་སློང་མ་ལ་སྔགས་མི་བྱ། བདག་གཅིག་པུ་ཡང་སྔགས་མི་བྱ། དགེ་སློང་གི་གན་དུ་སྔགས་བྱས་ཏེ་ཁང་པ་ཐོག་ཡོད་པར་འདུག །གཙུག་ལག་ཁང་དུ་མར་མ་ཡིན། གཙུག་ལག་ཁང་བཞི་ལྔ་ཙམ་ཞིག་མ་ཚམས་འདབ་ཆགས་སུ་སྦྲེལ་དུ་རུང་ན་མཚམས་ཀྱི་མདོར་རེ་ལྡེ་བཏིང་ལ་དེའི་སྟེང་དུ་ཚུལ་གྱིས་སྔགས་བྱས་སྟེ་
ཁང་པ་ཀུན་དུ་གནས་པར་བྱས་ན་ཚུལ་དུ་འཇུག་པར་ནི་འགྱུར་ཁང་པ་དེ་དུ་ཡོད་པ་བཞིན་དུ་ཉེས་བྱས་རེ་རེར་འགྱུར་རོ། །གང་ན་དགེ་སློང་དང་སྒོར་མ་བཅས་པ་མ་ཡིན་ཚུལ་དུ་འཇུག་པ་ན་ཁང་པ་སྒོ་དང་བཅས་པ་ལ་དགེ་སློང་རོགས་ཀྱང་ཡོད་ན་ཚུལ་དུ་འཇུག་གོ །འདི་གཉིས་གང་མེད་ཀྱང་རུང་གཅིག་མེད་པར་ཚུལ་དུ་ཞུགས་ན་ཉེས་བྱས་སོ། །སྦྱིན་བདག་དང་དོན་སྒྲུབ་པ་དང་ཡུལ་གྲོང་དང་གཡོག་ཡོད་ན་བརྗོད། །ལྟག་ཏུ་སྦྱིན་བདག་དང་དོན་སྒྲུབ་པ་དང༌། ཡུལ་དང་གཙུག་ལག་ཁང་གི་མིང་བརྗོད། མ་བསྐོས་པར་མཚམས་ཀྱི་ཕྱི་རོལ་དུ་སྐྱ་རེངས་ཤར་བར་མི་བྱ། ཚུལ་དུ་ཞུགས་ནས་ཟླ་བ་གསུམ་གྱི་ཚེ་གནས་གཞན་གར་ཡང་མི་འགྲོ། །འགྲོ་བ་ཞིག་ཏུ་གྱུར་ནའང་སྔགས་ཀྱིས་མ་བཏབ་པར་སོང་སྟེ་སྐྱ་རེངས་བྱུང་ན་ཚུལ་ཞིག་པར་འགྱུར་རོ། །སྔགས་ཀྱིས་བཏབ་ན་ཞག་བདུན་ཚུན་ཆད་འགྲོར་རུང་ངོ༌། །ཆོས་ཀྱི་དོན་ཞག་བདུན་དུ་བསྔོ། །ཞག་བདུན་དུ་འགྲོར་གནང་བ་ཡང་ཆོས་ཀྱི་དོན་འོག་ནས་འབྱུང་བ་རྣམས་ལྟ་བུ་ཞིག་གི་ཕྱིར་འགྲོ་བ་ནི་ཞག་བདུན་པའི་སྔགས་རུང་ངོ༌། །ཆོས་ཀྱི་དོན་མ་ཡིན་པ་ཁ་ཟས་དང་རང་ཉམས་ཀྱི་ཕྱིར་འགྲོ་བ་ནི་སྔགས་བཏབ་ཀྱང་ཚུལ་ཞིག་གོ །འདི་ལྟ་སྟེ་ཀུན་དགའ་ར་བ་དབུལ་བ་དང༌། ཡོན་བདག་དད་པ་ཞིག་གིས་ཞིང་དང་ནོར་རྫས་དང་གྲོང་ཁྱིམ་ཞིག་དབུལ་ཏེ་སྤྱན་འདྲེན་ན་ཞག་བདུན་པའི་སྔགས་ཀྱིས་བཏབ་ན་ཚུལ་གྱི་ཚེ་འགྲོར་དབང༌། གཙུག་ལག་ཁང་སློང་པ་དང༌། གཙུག་ལག་ཁང་གསར་ཞིག་བསླངས་ཏེ་ཞལ་བསྲོ་བའི་ཚེ་སྤྱན་འདྲེན་ན་ཚུལ་གྱི་ཚེ་སྔགས་ཀྱིས་བཏབ་སྟེ་འགྲོར་དབང་ངོ༌། །མལ་སྟན་སྦྱིན་པ་དང༌། ཡོན་བདག་དང་པ་ཞིག་གིས་མལ་སྟན་དང་ནོར་རྫས་ཤིག་སྦྱིན་པའི་ཕྱིར་སྤྱན་འདྲེན་ན་ཚུལ་གྱི་ཚེ་སྔགས་བཏབ་ན་འགྲོར་རུང་ངོ༌། །རྟག་པའི་བཤམས་པ་དང༌། དགེ་འདུན་ནམ་གཙུག་ལག་ཁང་དུ་རྟག་པར་ཟན་སྤྱོར་པའི་ཕྱིར་སྤྱན་འདྲེན་ཅིང་འབོད་ནའང་འགྲོར་རུང་ངོ༌། །མཆོད་རྟེན་སློང་བ་དང༌། ཙེ་ཏི་དང་སྐུ་གཟུགས་ལ་སོགས་པ་ཞིག་བྱས་ཏེ་ཞལ་བསྲོ་ཞིང་སྤྱན་དབྱེ་བའི་ཕྱིར་སྤྱན་དྲོང་ན་འགྲོར་རུང༌། སྲོག་ཤིང་ཙེ་ཏིའི་སྲོག་ཤིང་གཟུགས་པར་འདོད་པ་དང༌། རྒྱལ་མཚན་གཟུགས་པ་དང༌། ཆོས་
ཀྱི་རྒྱལ་མཚན་ནམ་བ་དན་ཤིང་ཞིག་བཙུགས་པའི་ཕྱིར་མཆོད་རྟེན་ལ་འདོད་པ་དང༌། མཆོད་པ་བྱ་བ་དང༌། དཀོན་མཆོག་ལ་ཡོན་དབུལ་ཞིང་མཆོད་པའི་ཕྱིར་འདོད་པ་ནི་ཚུལ་གྱི་ཚེ་འགྲོར་རུང་སྟེ་མཆོད་པ་ནི་འོག་ནས་འབྱུང་བ་རྣམས་ཡིན་ནོ། །ཡུང་བ་དང་གུར་གུམ་དང་ཙན་དན་གྱིས་ཆག་ཆག་འདེབས་པ་དང༌། མིང་གིས་སྨོས་པ་འདི་རྣམས་ལྟ་བུས་མཆོད་པའི་ལས་བྱེད་པ་ལས་བོས་པ་དང༌། ཀླག་པ་དང༌། ཡི་གེ་ཁ་དོན་དང་ཀློག་པ་ཟུར་མི་ཕྱིན་ཅིང་མི་ཤེས་པའི་ཕྱིར་འབོད་པ་དང་བདག་མི་ཤེས་ཏེ་ཀློག་སློབ་ཏུ་འགྲོ་བ་དང༌། ཐེ་ཚོམ་བསལ་བ་དང༌། ཁྲིམས་ལྕི་ཡང་དང་ཞིག་མ་ཞིག་པ་ལ་སོགས་པ་ལ་ཐེ་ཚོམ་ཁྱེར་བའི་འབོད་པའང་རུང་བ་དག་ཐེ་ཚོམ་ཁྱེར་ཏེ་མཁན་པོ་མཁས་པའི་གན་དུ་འདྲིར་འགྲོ་བ་དང༌། །ལྟ་བར་ཞུགས་པ་སྤོང་བ་དང༌། དགེ་སློང་གཅིག་གིས་གཅིག་སྡིག་པ་ལ་ལྟ་བར་གྱུར་ཏེ་དེའི་ཕྱིར་སྡིག་པ་ལ་ལྟ་བ་དེ་དང་དབྲལ་བར་བྱ་བའི་བོས་ཀྱང་རུང་བདག་རང་འགྲོ་ཡང་རུང་སྟེ་སོང་བ་དང༌། རོགས་གསོལ་ཞིང་འཆགས་པ་དང༌། དགེ་སློང་གཅིག་ན་རེ་ངའི་སློབ་མ་ཉེས་པར་སྤྱོད་ཅིང་ལོག་པར་ལྟ་བ་སྟེ་ངའི་ངག་ནི་མི་ཉན་ན་ཁྱོད་ཀྱིས་བསྒོ་ཞིང་མི་གདམས་སུ་མི་རུང་གིས་ཤོལ་ཅེས་བོས་ཏེ་འགྲོ་བ་དང༌། ཆད་པ་ལ་སོགས་པ་བཞི་སྦྱིན་པ་དང༌། ཆད་པ་དང་རྩ་པའི་ཆད་པ་དང་མགུ་བ་དང་རྩ་བའི་མགུ་བ་བཞི་ལས་གང་ཡང་རུང་བ་བྱེད་པ་ཞིག་དགེ་འདུན་གྲངས་མ་ཚང་བའི་ཕྱིར་འབོད་པ་དང༌། འབྱུང་བ་དང༌། དགེ་འདུན་ལྷག་མ་བྱུང་བ་ཞིག་དབྱུང་བའི་ལས་བྱེད་དེ་དགེ་འདུན་ཉི་ཤུར་མཚང་བའི་ཕྱིར་འབོད་པ་དང༌། ནད་པའི་ཡིད་བརྟན་པ་དགེ་སློང་ལའོ། །དགེ་སློང་ནད་པ་ཞིག་སེམས་འཁྲུགས་ཤིང་མི་དགའ་སྟེ་ཚིག་པ་ལ་མཛའ་པའི་ཕྱིར་ཕྲད་ན་དགའ་ཞིང་ཡི་རང་བར་འགྱུར་ལ་ངག་ཉན་པའི་ཕྱིར་བཀུག་སྟེ་འགྲོ་བ་དང་མིང་གིས་སྨོས་པ་འདི་རྣམས་ཀྱི་ཕྱིར་སྔགས་ཀྱིས་བཏབ་སྟེ་སོང་ན་ཚུལ་ཞིག་པར་མི་འགྱུར་རོ། །དགེ་སློང་མ་ལྕི་བའི་ཆོས་ཀྱིས་མགུ་བར་བྱེད་པ་སྦྱིན་པ་ཡང་ངོ༌། །དགེ་སློང་མ་ལྕི་པའི་ཆོས་ཤིག་ཤིག་པར་འགྱུར་ཏེ་མགུ་བར་བྱེད་པའི་དགེ་འདུན་གྲངས་མི་ཆོག་པའི་ཕྱིར་འབོད་ན་ཚུལ་གྱི་ཚེ་སྔགས་བཏབ་སྟེ་དགེ་སློང་ཕ་དང་དགེ་སློང་མ་གང་སོང་ཡང་ཉེས་མེད་དོ། །དགེ་སློང་མ་ལ་
ཚངས་པར་སྤྱོད་པ་སྐྱེད་པའི་སྔོམ་པའི་ཕྱིར་རོ། །དགེ་སློབ་མ་ཚངས་པར་སྤྱོད་པའི་གནས་སྡོམ་པ་ནོད་པའི་ཕྱིར་ཚུལ་གྱི་ཚེ་དགེ་སློབ་མ་སྔགས་བཏབ་སྟེ་སོང་ཡང་ཉེས་མེད་དོ། །བསྙེན་པར་རྫོགས་པ་ཡང་ངོ༌། །དགེ་སྦྱོང་ལས་ཁྲིམས་རྫོགས་པར་བྱེད་དེ་དགེ་འདུན་གྲངས་མ་ཚང་བའི་ཕྱིར་འབོད་པའང་སྔགས་ཀྱིས་བཏབ་སྟེ་སོང་ན་ཉེས་མེད་དོ། །དེར་དགེ་སྦྱོང་ཡང་ངོ༌། །ཁྱིམ་པ་ཞིག་དགེ་སྦྱོང་དུ་རབ་ཏུ་འབྱུང་བའི་ཕྱིར་འབོད་ན་ཚུལ་གྱི་ཚེ་སྔགས་བཏབ་སྟེ་སོང་ཡང་ཉེས་མེད་དོ། །དགེ་སྦྱོང་མ་སློབ་པའི་སྡོམ་པ་སྦྱིན་པ་དང༌། དགེ་སྦྱོང་མ་ཞིག་དགེ་སློང་མའི་ཁྲིམས་ནོད་པའི་ཕྱིར་དགེ་སློང་མ་ལས་འབོད་ན་ཚུལ་གྱི་སྔགས་ཀྱིས་བཏབ་སྟེ་སོང་ཡང་ཉེས་མེད་དོ། །མགོ་དཀྲི་བ་དང༌། མི་གཞོན་ནུ་ཞིག་ཐོད་བཅིང་བའི་དུས་ལ་བབ་སྟེ་མི་མང་པོ་ཞིག་བསྡུས་ཏེ་བཀྲ་ཤིས་བྱེད་པའི་ཕྱིར་ཚུལ་གྱི་ཚེ་འབོད་ནའང་སྔགས་ཀྱིས་བཏབ་སྟེ་སོང་ཡང་ཉེས་མེད། རྡུལ་བཀྲུ་བ་དང༌། བུད་མེད་བུ་བྱུང་བའི་འོག་ཏུ་ཁྲུས་བྱས་ཏེ་བཀྲ་ཤིས་པའི་ཕྱིར་འབོད་པ་དང༌། ཕུང་པོ་འཇོག་པ་དང༌། བུས་སྐྲ་འདྲེག་འདྲེག་པ་ལས་ཕུད་བུ་འཇོག་པའི་ཚེ་བཀྲ་ཤིས་པའི་ཕྱིར་འབོད་པ་དང༌། རལ་བུ་འབོད་པ་དང༌། བྱིས་པའི་སྐྲ་རལ་བུར་འདུག་འདུག་པ་ལས་འདྲེག་པའི་ཚེ་བཀྲ་ཤིས་ཀྱི་ཕྱིར་འབོད་པ་དང༌། །རྣ་ཆའི་སྐྱེད་པའི་ཁྱིམ་པ་དང་ཁྱིམ་མ་ལའོ། །རྣ་ཆ་གཅིག་གསར་དུ་ཐོགས་ཏེ་བཀྲ་ཤིས་པའི་ཕྱིར་འབོད་དེ་སོང་བ་དང་མིང་གིས་སྨོས་པ་འདི་རྣམས་གང་ཡང་རུང་སྟེ་ཁྱིམ་བདག་པོའམ་མོ་ཞིག་དགེ་སློང་ཕོ་མོ་གང་ཡང་རུང་ཚུལ་གྱི་ཚེ་སྔགས་ཀྱིས་བཏབ་སྟེ་སོང་ན་ཚུལ་མི་འཇིག་ལ་ཉེས་མེད་དོ། །དགེ་འདུན་གྱི་ལྷག་མ་མ་གཏོགས་པར་བསྙེན་པར་མ་རྫོགས་པ་ལ་སྔ་མ་ཡང་ངོ༌། །དགེ་འདུན་གྱི་ལྷག་མ་བྱུང་སྟེ་ཆད་པ་དང་རྩ་བའི་ཆད་པ་དང༌། མགུ་བ་དང་རྩ་བའི་མགུ་བ་འདི་བཞི་དང༌། དགེ་འདུན་གྱི་ལྷག་མ་འབྱིན་བ་དང་སྔ་མ་མ་གཏོགས་པར་ལྷག་ནས་ཆོས་ཀྱི་དོན་གྱི་ཕྱིར་འགྲོར་རུང་ངོ་ཞེས་བྱ་པ་མན་ཆད་ཚུལ་གྱི་ཚེ་སྔགས་ཀྱིས་བཏབ་སྟེ་སོང་ཡང་ཉེས་མེད་དོ་ཞེས་འབྱུང་བ་ཐམས་ཅད་གང་ཡང་རུང་སྟེ་ཁྱིམ་པ་ཞིག་གིས་སྤྱན་འདྲེན་ཞིང་འབོད་ནའང་ཚུལ་གྱི་ཚེ་སྔགས་ཀྱིས་བཏབ་སྟེ་སོང་
ན་ཉེས་མེད་དེ་ཚུལ་མི་ཞིག་གོ །ཁྱིམ་པ་ལ་བཤད་པར་བཟོད་པའོ། །དགེ་སློང་ལ་ཁྱིམ་པས་ཉེས་པའི་དམིགས་པར་སྐུར་པ་བཏབ་ན། དགེ་འདུན་གྱིས་ལྷུང་བཟེད་ཁ་ཕུབ་པ་ལས་ཕྱིས་ཁྱིམ་པས་བཟོད་པར་གསོལ་ཞིང་སྤྱན་འདྲེན་ནའང་ཚུལ་གྱི་ཚེ་སྔགས་བཏབ་སྟེ་སོང་ཡང་ཉེས་མེད་དོ། །ཟས་དང་སྨན་དང་གཡོག་དེ་དག་མེད་ལ་མེད་པས་འཚོ་མི་ནུས་ན་རྒལ་ཚུལ་དུ་ཞུགས་པ་ལས་ཁ་ཟས་དང་སྨན་དང་གཡོག་ལ་སོགས་པ་འཚོ་བའི་ཡོ་བྱད་མེད་དེ་གུད་དུ་འགྲོ་དགོས་པའི་རྐྱེན་ཅིག་བྱུང་ན་འཚོ་བ་ག་ལ་ཡོད་པར་སོང་ཡང་ཚུལ་ནི་ཞིག་པར་འགྱུར་ཉེས་བྱས་ནི་མེད་དོ། །དགེ་སྦྱོང་དང་འཚོ་བ་དང་ཚངས་པའི་བར་ཆད་དུ་འགྱུར་ན་ཡང་ངོ༌། །དགེ་སློང་གྲོགས་ཐམས་ཅད་ཚུལ་ཁྲིམས་ལ་གཡེལ་ཏེ་སྲིན་བུ་མི་རྟོག་ཅིང་ཆུ་མི་འཚག་པ་དང་སྤགས་པའི་ཁ་ཟས་ལ་སོགས་པ་ཟ་བ་དང་བཏུང་བའི་སྡིག་པ་སྤྱོད་དེ་བདག་གཅིག་པུས་ནི་དགེ་འདུན་གྱི་ལས་ཀུན་མི་ནུས་ཀྱི་བདག་གི་དོན་དགེ་སྦྱོང་གི་འབྲས་བུ་དགྲ་བཅོམ་པའི་རིམ་པ་བཞི་ལ་བར་དུ་གཅོད་ཅིང་སྡིག་པར་འགྱུར་བ་དང་བདག་འཚོ་བའི་སྲོག་ལ་བབས་པ་དང༌། ཚངས་པར་སྤྱོད་པའི་བར་ཆད་དུ་འགྱུར་བ་དང་རྐྱེན་འདི་རྣམས་ལྟ་བུ་ཞིག་བྱུང་ན་ཚུལ་གྱི་ཚེ་གུད་དུ་སོང་ན་ཚུལ་ནི་ཞིག་ཉེས་བྱས་ནི་མེད་དོ། །མི་མཐུན་པར་སེམས་བསྐྱེད་པ་དང༌། ཡུལ་གྱི་རྣམས་ཀྱིས་བདག་གི་སེམས་མི་བདེ་ཞིང་སྡིག་པ་སྤོང་བར་འགྱུར་བ་ཞིག་ན་ཡུལ་གཞན་རྣམས་ལས་སེམས་བདེ་ཞིང་དགེ་བར་སེམས་བདེ་བར་འགྱུར་བ་ཞིག་ཡོད་དེ་ཚུལ་གྱི་ཚེ་སོང་ཡང་ཚུལ་ནི་ཞིག་ཉེས་བྱས་ནི་མེད་དོ། །སྡིག་པ་ངག་གིས་བརྗོད་ཅིང་དགེ་འདུན་གྱི་དབྱེན་དུ་འཇུག་ན་ཡང་ངོ༌། །ཡུལ་གྱི་རྣམས་ལས་སེམས་འགྱུར་བ་བཞིན་དུ་ཁ་ནས་སྡིག་པ་སྨྲ་ཞིང་སྡིག་པའི་གྲོགས་བྱེད་པར་འགྱུར་ན་ཡུལ་བདེ་བ་གཞན་དུ་འཕོས་ཀྱང་ཉེས་མེད་དོ། །དེ་དག་ཞི་བར་གྱུར་ན་མི་འགྲོ་བར་མི་བྱ། དགེ་སློང་ཞིག་དབྱེན་ལ་ཞུགས་ཏེ་བདག་གིས་གྲོས་བཏབ་ན་དབྱེན་ལ་མི་འཇུག་པར་ནུས་པ་དང་དབྱེན་ལ་ཞུགས་ཟིན་པ་ལས་སླར་ཟློག་ནུས་པ་ཙམ་གྱི་ཚོད་ནི་ཚུལ་དྲལ་ཏེ་སོང་ན་ཞིག་ཉེས་བྱས་ནི་མེད་དོ། །མ་སོང་ན་ཉེས་བྱས་སོ། །སོང་ན་མི་རྒལ་བར་མི་བྱ། མདོ་གོང་མ་ལྟར་འགྲོ་བ་ལ་ཞག་བདུན་གྱིས་སླར་འཁོར་བ་ཞིག་སྟེ་ཞག་བདུན་པའི་སྔགས་
བཏབ་པ་ལས་ཞག་བདུན་གྱི་བར་དུ་སླར་མ་བཟློག་ཤིག་དབྱེན་མ་བཏང་ན་ཞག་བདུན་ལས་འདས་པར་འདུག་ཀྱང་ཚུལ་ནི་ཞིག་ཉེས་བྱས་ནི་མེད། དབྱར་གྱི་གནས་སུ་གནས་པར་དམ་བཅས་པ་མི་བཅའ་བར་མི་བྱ། ཡོན་བདག་གཅིག་གིས་ཚུལ་གྱི་ཚེ་འཚོ་བ་སྦྱར་ཏེ་འདུག་པར་འཐམས་པའང་རུང་ཆོས་སྡེ་སྣོད་གསུམ་བཤད་པའི་ཕྱིར་གསོལ་ཏེ་འཚོ་བ་སྦྱར་ནས་ཚུལ་གྱི་ཚེ་བཞག་པའང་རུང་འདུག་པར་ཁས་བླངས་པ་ལས་གུད་དུ་སོང་ན་ཉེས་བྱས་སོ། །གསོ་སྦྱོང་གཅིག་པའི་གནས་སུ་འདི་ལྡང་བ་མེད་དོ། །དགེ་འདུན་ཚུལ་ཐ་དད་དུ་མཚམས་སོ་སོར་ཞུགས་ལ་གསོ་སྦྱོང་གཅིག་ཏུ་འདུས་ཤིང་བྱེད་ན་གཙུག་ལག་ཁང་དེ་གཉིས་སྔགས་ཀྱིས་མ་ཐེབས་པར་ཞག་ཏུ་གནས་ཀྱང་ཚུལ་ཞིག་པར་མི་འགྱུར་ཏེ་ཉེས་མེད་དོ། །ཡོད་ན་ནི་རྙེད་པ་གཅིག་པའོ། །གཙུག་ལག་ཁང་སོ་སོར་ཐ་དད་དུ་ཞུགས་ལ་གསོ་སྦྱོང་ནི་གཅིག་ཏུ་མི་བྱེད་ཀྱི་ཁ་ཟས་ལྷག་པར་སྤྱིར་བསྲེས་ཤིང་ཟ་བ་ནི་གཙུག་ལག་ཁང་དེ་གཉིས་ལྷག་མ་ལྟར་གནས་སུ་མི་རུང་སྟེ་སྔགས་མ་ཐེབས་ན་ཚུལ་ཞིག་གོ །དབྱར་གྱི་དངོས་པོའོ། །དབྱར་ཚུལ་དུ་འཇུག་པའི་ཆོ་ག་བཤད་པའོ།། །།སྡེ་ལྔ་ཆར་ཡང་ཚུལ་དུ་འཇུག་པར་བྱེད་པའོ། །དགེ་སློང་ཕོ་མོ་དང་དགེ་སྦྱོང་ཕོ་མོ་དང་དགེ་སློབ་མའང་ཚུལ་དུ་འཇུག་དགོས་སོ། །དགེ་སྦྱོང་འབའ་ཞིག་མ་ཡིན་ནོ། །དགེ་སློང་དང་མཁན་པོ་ལ་སོགས་པ་མེད་ན་དགེ་སྦྱོང་འབའ་ཞིག་ཉི་ཚེ་ཚུལ་དུ་འཇུག་ཏུ་མི་རུང་ངོ༌། །ཚུལ་དུ་ཞུགས་ན་ཚུལ་དུ་ཞུགས་པར་མི་འགྱུར་ན་ཉེས་བྱས་གྲངས་མེད་དོ། །ལོར་མ་ལོན་པ་ཡང་ངོ༌། །མཁན་པོ་དང་གནས་བརྟན་མེད་པར་དགེ་སློང་ལོ་གཅིག་ཏུ་མ་ལོན་པ་ཉི་ཚེ་ཚུལ་དུ་འཇུག་པར་མི་བྱའོ། །དེ་དག་ལ་ཚུལ་དུ་ཞུགས་པ་མི་འཆགས་པ་མ་ཡིན་ནོ། །མདོ་གོང་མ་གཉིས་ལྟར་བཤད་པ་དགེ་སྦྱོང་དང་ལོ་མ་ལོན་པ་ཚུལ་དུ་ཞུགས་ཀྱང་ཚུལ་དུ་ནི་མི་རུང་ངོ༌། །མལ་སྟན་མི་བླང་མི་བྱ། དགེ་སློང་དང་ལོ་མ་ལོན་པ་ཚུལ་དུ་ཞུགས་པས་གནས་བརྟན་མེད་པའི་ཕྱིར་མལ་སྟན་མི་བགོ་བ་མ་ཡིན་ཏེ་བགོས་ཀྱང་ཉེས་མེད་དོ། །སྡུད་པ་མེད་ཀྱང་མ་ཡིན་ནོ། །དགེ་འདུན་གྱི་མལ་སྟན་གྱི་རྫིའམ་སྡུད་པ་དང་འགོད་པའི་མི་མེད་པར་མལ་སྟན་ཡོད་ན་བདག་ཅག་གིས་བགོས་ཀྱང་ཉེས་མེད་དོ། །
མ་བགོས་པར་བསྡུ་བ་མ་ཡིན་ནོ། །དགེ་འདུན་གྱིས་མལ་སྟན་རྫིར་མ་བསྐོས་པར་མལ་སྟན་ཐུག་ཐུབ་ཏུ་ཕྱུང་སྟེ་བརྙེན་པོར་མི་བཏང༌། མ་བྱུང་བ་ལ་སོགས་པར་སྡེ་སྣོད་འཆང་བ་དང་འཐབ་མོ་བྱེད་པ་ཡོད་དམ་མེད་པ་ཡང་དེར་མ་ཆུད་པ་མ་ཡིན་ནོ། །ལྟག་ཏུ་ཉོན་མོངས་པར་འགྱུར་བ་དང་ཐེ་ཚོམ་སྐྱེ་བར་འགྱུར་པ་དང་འཐབ་ཅིང་འཁྲུག་པ་ཡོད་ན་ཚུལ་དུ་མི་འཇུག་གོ་ཞེས་འབྱུང་བ་ལ་སྡེ་སྣོད་གསུམ་ཤེས་པའི་མཁན་པོ་ཡོད་ན་མྱ་ངན་དང་ཐེ་ཚོམ་སེལ་ཅིང་འཁྲུག་པ་ཞི་བར་འགྱུར་བའི་ཕྱིར་ཚུལ་དུ་ཞུགས་ཀྱང་ཉེས་མེད་དོ། །སྡེ་སྣོད་གསུམ་ཤེས་པ་མེད་ན་མྱ་ངན་དང་ཐེ་ཚོམ་སྐྱེ་ཞིང་འཁྲུལ་བར་འགྱུར་བའི་ཕྱིར་འཕྲལ་དུ་བདེ་པའང་ཚུལ་དུ་མི་འཇུག་གོ །ཚུལ་དུ་མ་ཞུགས་ཀྱང་གནས་མ་བཏང་ན་གནས་པའོ། །ཚུལ་དུ་འཇུག་པའི་སྔགས་ཀྱིས་མ་བཏབ་ཅིང་ཚུལ་དུ་མ་ཞུགས་ཀྱང་ཚུལ་ཟླ་བ་གསུམ་གནས་གཅིག་ན་འདུག་ཅིང་གུད་དུ་མ་སོང་སྟེ་ཞག་མ་ལོན་ན་ཚུལ་དུ་ཞུགས་པ་དང་འདྲ་སྟེ་ཡོན་ཏན་བཅུ་ཡང་འཐོབ་པར་འགྱུར་ཏེ་འོག་ནས་འཆད། ནམ་མཁའ་ལ་ཚུལ་དུ་ཞུགས་པ་ནི་མི་སྐྱེའོ། །རྫུ་འཕྲུལ་ཅན་ཞིག་གིས་ནམ་མཁའ་ལ་ཚུལ་དུ་ཞུགས་ཏེ། ཟླ་བ་གསུམ་དུ་གནས་པ་ནི་ཚུལ་དུ་ཞུགས་པར་མི་འགྱུར་རོ། །གྲུར་མ་ཡིན་ཏེ་མ་གཏོགས་པ་ནི་ས་ལ་བརྟེན་པའམ་བཅིངས་སམ་ས་ལ་རྟེན་པ་བརྟེན་པར་བར་ཆད་འབྱུང་བར་མི་ཤེས་ནའོ། །གྲུའི་ནང་དུ་ཚུལ་དུ་ཞུགས་པའང་ཚུལ་དུ་ཞུགས་པར་མི་འགྱུར་རོ། །གྲུས་ལ་བརྟེན་ཅིང་ཆུས་འཕགས་པར་མི་འགྱུར་བ་དང་ཉག་ཐག་ཤིང་ལ་བཏགས་ཏེ་མི་འཕགས་པ་དང་ཉིན་པར་ཉག་ཐག་བཀྲོལ་ནས་ཡན་མན་དུ་དྲངས་ཏེ་ནང་པར་སྐྱ་རེངས་མ་བྱུང་བར་ཉག་ཐག་སླར་བརྟགས་པ་ནི་ཚུལ་དུ་ཞུགས་ཀྱང་ཚུལ་ཞིག་པར་མི་འགྱུར་རོ། །འཇིག་པ་ནི་དའི་ལྟ་བ་ལ་གནས་ཏེ་ཆོས་མ་ཡིན་པའི་སྐྱབས་སུ་སོང་ནས་སྐྱ་རེངས་ཤར་ནའོ། །དགེ་སློང་སེམས་མུར་འདུག་གམ་ལོག་པར་ལྟས་པར་འགྱུར་ཏེ་ལུས་ནི་དགེ་སློང་གི་ཚུལ་དུ་འདུག་ལ་སེམས་ལོག་པ་ལ་དད་པའི་ཕྱིར་ལོག་པ་ལ་ལྟ་བ་གཞན་མཚམས་ཀྱི་ནང་དུ་འཇུག་ཀྱང་དེ་དང་ལྷན་ཅིག་ཏུ་དེའི་གནས་སུ་ཞག་ལོན་ཏེ་སྐྱ་རེངས་བྱུང་ན་ཚུལ་ཞིག་པར་འགྱུར། ཐེ་ཚོམ་གྱིས་ནི་མ་ཡིན་ནོ། །ཚུལ་དུ་ཞུགས་
ལ་ཚུལ་དུ་ཞུགས་སམ་མ་ཞུགས་ཐེ་ཚོམ་ཟ་བར་གྱུར་ན་ཡང་ཚུལ་ཞིག་བར་མི་འགྱུར་ཏེ་ཚུལ་དུ་ཞུགས་པར་མི་འགྱུར་རོ། །མཐའ་གཞན་དྲུག་ཏུ་བསྔོས་པ་ནི་མི་ལྡང་ངོ༌། །ཚུལ་གྱི་ཞག་བདུན་གྱི་སྔགས་གྱིས་བཏབ་སྟེ་འགྲོར་རུང་བ་ཡིན་ན་ཞག་དྲུག་ན་ཚུལ་ནས་འབྱུང་བའི་མདུན་དུ་ཞག་བདུན་པའི་སྔགས་ཀྱིས་བཏབ་སྟེ་ཆོས་ཀྱི་དོན་དང་སྲོག་ལ་བབ་པའི་ཕྱིར་གུད་དུ་སོང་ཡང་ཞག་གཅིག་གི་སྐྱ་རེངས་བྱུང་བ་ན་ཚུལ་ཞིག་བར་འགྱུར་རོ། །ཞིག་པ་ནི་ཚུལ་དུ་ཞུགས་ནས་དགོས་པ་མེད་པར་དེ་ལས་མ་ལོག་གམ་གནས་ནའོ། །ལྟག་ཏུ་ཆོས་ཀྱི་དོན་ལ་སོགས་པའི་ཕྱིར་འགྲོ་ན་ཞག་བདུན་གྱི་སྔགས་ཀྱིས་བཏབ་སྟེ་འགྲོར་དབང་ངོ་ཞེས་མིང་གིས་སྨོས་ཏེ་བཤད་པ་འདི་རྣམས་ལ་ཆོས་ཀྱི་དོན་ལ་སོགས་པ་ཕ་རོལ་གྱི་ལས་ཟིན་པར་འགྱུར་ན་ལས་ཟིན་བར་ཐོས་བཞིན་དུ་གཞི་ནས་སོང་ཡང་རུང་ལམ་དུ་ཐོས་ཏེ་སླར་མ་ལོག་ཀྱང་ཞག་ལོན་ཏེ་སྐྱ་རེངས་བྱུང་ན་ཚུལ་ཞིག་པའོ། །ཆོས་ཀྱི་དོན་གྱི་ཕྱིར་ཞག་བདུན་པའི་སྔགས་ཀྱིས་བཏབ་སྟེ་སོང་བ་ལས་སྔར་ཟིན་ན་ཞག་བདུན་མ་ལོན་གྱི་བར་དུ་མི་འགྲོའོ་ཞེས་ཟེར་ཞིང་འདུག་པ་ནི་ཚུལ་ཞིག་པའོ། །དེའི་མཐའ་ནི་ཞག་བདུན་ཚུན་ཆད་དོ། །ཆོས་ཀྱི་དོན་གྱི་ཕྱིར་འགྲོར་དབང་ངོ་ཞེས་གོང་དུ་མིང་གིས་སྨོས་པ་རྣམས་ཀྱང་ཞག་བདུན་པའི་སྔགས་ཀྱིས་བཏབ་ན་རུང་གི་དེ་ལས་ཞག་མང་བའམ་སྔགས་ཀྱིས་བཏབ་ཀྱང་མི་ཕན་ཏེ་ཚུལ་ཞིག་པའོ། །གནང་བ་མ་ཐོབ་པ་དེ་ནི་མཐའོ། །གུད་དུ་འགྲོ་བར་དགེ་འདུན་ལས་གནང་བ་ཐོབ་པ་ནི་ཆོས་ཀྱི་དོན་གྱི་ཕྱིར་ན་ཞག་བཞི་བཅུར་འགྲོར་གནང་སྟེ་དེ་ནི་མ་གཏོགས་པར་ཞག་བདུན་འདས་ཏེ་བརྒྱད་ཀྱི་སྐྱ་རེངས་བྱུང་ན་ཚུལ་ཞིག་པར་འགྱུར་རོ། །གཞན་ཡང་ནུབ་བཞི་བཅུའོ། །ངོ་མཚར་གྱི་རྐྱེན་ཅིག་བྱུང་ན་དགེ་འདུན་གྱིས་ཞག་བཞི་བཅུའི་བར་དུ་འགྲོར་དབང་བར་གནང་བ་སྦྱིན་ནོ། །དེ་ལྟར་བྱིན་ནས་ཕྱི་མ་གནས་པའི་ཚེ་ཞག་མང་པོ་ཡང་ཚུལ་ཞིག་པར་མི་འགྱུར་རོ། །དེ་སྦྱིན་རྐྱེན་བྱུང་ཏེ་ཞག་བཞི་བཅུར་འགྲོར་གནང་བ་རིགས་ན་དགེ་འདུན་གྱིས་གནང་བ་སྦྱིན་ནོ། །མ་བྱིན་ན་ཉེས་བྱས་སོ། །དེ་ལས་ལྷག་པར་ཕྱི་ལོགས་སུ་མི་གནས་སྡེ་ལྔ་ཆར་ཡང་འདི་བཞིན་ནོ། །ཞག་བཞི་བཅུར་དགེ་འདུན་གྱིས་གནང་སྟེ་
སོང་ལས་ཞག་བཞི་བཅུ་འདས་ཀྱང་རུང་དོན་ནི་སྔར་གྲུབ་ཀྱི་ཞག་བཞི་བཅུ་མ་ལོན་གྱི་བར་དུ་མི་འགྲོ་ཞེས་འཁྱམ་ཞིང་འདུག་བ་ནི་ཞིག་པར་འགྱུར་རོ། །དགེ་སློང་ཕོ་མོ་དང་དགེ་སྦྱོང་ཕོ་མོ་དགེ་སློབ་མ་ལྔ་ཆར་ཀྱང་ཞག་བཞི་བཅུར་འགྲོ་བ་ཆོ་ག་མཚུངས་སོ། །འདི་མཚམས་ཀྱི་ནང་དུ་སྐྱེའོ། །ཞག་བཞི་བཅུའི་སྔགས་མནོད་པ་ཡང་ཚུལ་དུ་ཞུགས་པའི་གནས་ཉིད་ནས་ནོད་ཀྱི། གནས་གཞན་ནས་ནོད་ན་སྔགས་བྱས་པར་མི་ཆུད་དོ། །དགེ་སློང་གི་མདུན་དུའོ། །ཞག་བཞི་བཅུའི་སྔགས་མནོད་པ་ནི་བདག་གཅིག་པུ་མ་ཡིན་གྱི་དགེ་སློང་གཅིག་ལས་མནོད་དོ། །དགེ་སྦྱོང་དགེ་སློང་ལས་མནོད་དོ། །མ་དོགས་ཤིག་མ་ཆུད་པ་མ་ཡིན་པ་ནི། མིང་གིས་སྨོས་པ་འདི་རྣམས་ཀྱང་ཞག་བདུན་གྱི་སྔགས་ཀྱིས་བཏབ་སྟེ་སོང་ཡང་ཞིག་པར་མི་འགྱུར་ཏེ་ཞིག་པར་འགྱུར་བ་མ་དོགས་ཤིག །མུར་འདུག་ཏུ་ལྟ་བ་དབྱེ་བའི་ཕྱིར་དང༌། མུར་འདུག་གཅིག་ལ་སངས་རྒྱས་ཀྱི་ཆོས་བཤད་པ་ན་མུར་འདུག་གི་ཆོས་འདོར་ཞིང་སངས་རྒྱས་ཀྱི་ཆོས་ལ་ཕྱོགས་པར་འགྱུར་བ་ཙམ་གྱི་ཚོད་ན་ཚུལ་གྱི་ཚེ་སྔགས་བཏབ་སྟེ་སོང་ཡང་ཉེས་མེད། གཉེན་ལ་བྱ་བ་དང༌། གཉེན་ལ་ཆོས་བཤད་པའི་ཕྱིར་དང་ན་བའི་ཕྱིར་དང་སེམས་དགའ་བའི་ཕྱིར་ངོ་ཕྲད་དུ་འགྲོ་བ་དང༌། ཆུད་པ་དང༌། བདག་ཁ་ཐོན་དང་ཀློག་པ་ལ་སོགས་པ་དོན་མ་ཆུད་ཅིང་མ་གོ་བ་གོ་བར་བྱ་བའི་ཕྱིར་འགྲོ་བ་དང༌། ལྷག་པར་ཆུང་བ། དགྲ་བཅོམ་པའི་རིམ་པ་ལྟ་བུ་གདོན་མི་ཟ་བ་དང་ཐོབ་པར་འགྱུར་བའི་གདེང་ཡོད་པའི་ཕྱིར་མཁན་པོ་དང་སློབ་དཔོན་ལ་ཉན་དུ་འགྲོ་བ་དང༌། བདག་འདོད་པ་བསལ་བའི་དོན་དུ་འགྲོ་བའི་ཕྱིར་དེ་བྱས་ནའོ། །ལྟུང་བ་སྡེ་ལྔ་ལས་ཐེ་ཚོམ་དུ་གྱུར་པ་ཞིག་ན་ཐེ་ཚོམ་བསལ་བའི་ཕྱིར་མཁན་པོ་མཁས་པའི་གན་དུ་འགྲོ་བ་དང་འདི་རྣམས་ཀྱི་ཕྱིར་འགྲོ་བ་ཡང་ཞག་བདུན་གྱི་སྔགས་ཀྱིས་བཏབ་སྟེ་སོང་ན་ཉེས་མེད་དོ། །ཚུལ་དུ་ཞུགས་ཏེ་འདུག་བ་སྤང་བ་མི་བྱ་ཚུལ་དུ་ཞུགས་བ་ཟླ་བ་གསུམ་གྱི་ཚེ་དགེ་སློང་སྡེ་ལྔ་ལས་སངས་རྒྱས་ཀྱིས་གསུངས་པ་བར་དུ་གཅོད་པར་མི་འགྱུར་རོ་ཞེས་ཟེར་བ་བསྐྲད་པའི་རིགས་པ་ཡང་མི་བསྐྲད་པར་ཆད་བས་མི་བཅོད་པར་བརྟགས་ཏེ་གཞག་གོ །དེ་བཞིན་དུ་ཆད་བ་ཕྲེའུ་དང་སྤྲོ་བ་ཡང་མི་
བླང་ངོ༌། །ཕས་ཕམ་པ་ནི་བསྐྲད་དོ། །བཞི་ལ་སོགས་པར་ཆུད་དོ། །ཚུལ་གྱི་ཚེ་ཟན་སྦྱར་གྱིས་འདུག་ཤིག་ཅེས་ཁས་བླངས་ཏེ་སོང་ན་ཉེས་བྱས་པར་འགྱུར་བ་བཞིན་དུ་ལྷུང་བཟེད་སྦྱིན་ནོ་ཞེས་བྱ་བ་ལས་མ་བྱིན་པ་དང་ཆོས་གོས་སྦྱིན་ནོ་ཞེས་བྱས་པ་ལས་སོང་བ་དང་ཆོས་བཤད་དོ་ཞེས་ཁས་བླང་པ་ལས་མ་སོང་ཡང་ཉེས་བྱས་སོ། །དབྱར་གྱི་དངོས་པོ་རྫོགས་སོ།། །།ཁ་རོག་པའི་ཡི་དམ་མི་བཅའ། མུར་འདུག་གི་དཀའ་ཐུབ་ཁ་རོག་པར་འདུག་ན་མྱ་ངན་ལས་འདའ་བར་འགྱུར་ཞེས་ཟེར་བ་ལྟ་བུ་ཁ་རོག་པར་འདུག་པའི་ཡི་དམ་མི་བཅའ། །འདི་ལ་ཞུགས་ན་གྲོལ་བ་གཙང་མ་བར་ན་སྦོམ་པོའི་ཉེས་བྱས་པའོ། །མདོ་གོང་མ་ལྟར་མི་སྨྲ་བ་ཡང་མུར་འདུག་གི་དཀའ་ཐུབ་ཀྱི་མི་སྨྲ་བར་བྱས་པ་ལྟ་བུ་ནི་དབྱེན་གྱི་སྦོམ་པོར་འགྱུར་རོ། །གྱི་ན་མི་སྨྲ་བར་འདུག་པར་བསམས་པ་ནི་ཉེས་བྱས་སོ། །མཐོང་བ་དང་ཐོས་པ་དང་དོགས་པས་ཚུལ་དུ་ཞུགས་པ་ལས་དགེ་འདུན་གྱིས་དབྱུང༌། ཚུལ་ནས་འབྱུང་བའི་ཚེ་དགེ་འདུན་ཀུན་ལ་ཁྱེད་ཀྱིས་བདག་ལ་ལྟུང་བ་སྡེ་ལྔ་ལས་གང་ཡང་རུང་ཉེས་པར་མཐོང་བ་དང་ཐོས་པ་དང་དོགས་པ་ཞིག་ཡོད་ན་རྒོལ་ཅིག་ཅེས་སྐབས་ཕྱེ་བའི་སྔགས་འདི་བྱས་ཏེ་དབྱུང་ངོ༌། །དབྱར་གྱི་མཐའ་ཉིན་མོའོ། །ཚུལ་ནས་གནས་པ་ནི་ཚུལ་སྔ་མ་དབྱར་ཟླ་འབྲིང་པོ་ཉ་ལ་ཞུགས་པ་ནི་སྟོན་ཟླ་འབྲིང་པོ་ཚེས་བཅོ་ལྔ་འབྱུང་ངོ༌། །ཚུལ་ཕྱི་མ་དབྱར་ཟླ་ཐ་ཆུངས་ཚེས་བཅུ་དྲུག་ལ་ཞུགས་པ་ནི་སྟོན་ཟླ་ཐ་ཆུངས་ཚེས་བཅོ་ལྔ་ལ་འབྱུང་ངོ༌། །ཡུལ་ཞུ་སྟེ་ཕྱགས་པ་ཚུན་ཆད་ཞག་འདི་ཙམ་ན་དགེ་འདུན་འབྱུང་བར་འགྱུར་གྱིས་ཁྱེད་ཞུགས་ཤིག །ཚུལ་ནས་འབྱུང་བའི་ཞག་བཅུ་གཅིག་ཙམ་གྱི་སྔོན་ལོགས་སུ་ཉེ་འཁོར་གྱི་ཡུལ་མི་དང་ལྷ་འཕངས་ལ་སོགས་པ་ལ་འདི་ཙམ་ན་དགེ་འདུན་ཚུལ་ནས་འབྱུང་གི་གཙུག་ལག་ཁང་དུ་འདུ་ཤིག་ཅེས་བྱ། གཙུག་ལག་ཁང་བརྒྱན། ཚུལ་ནས་འབྱུང་བའི་ཚེ་གཙུག་ལག་ཁང་བརྒྱན། ཁང་བུ་རྩེག་མ་གླན། ཡུལ་བསྐོར་བའི་གཟུགས་ཀྱི་ཁང་བུ་སྦྱར་ཅིང་བཅོས། དྲི་གཙང་ཁང་བྲི། དྲི་གཙང་ཁང་ལ་སོགས་པའི་རི་མོ་བྲི་མཆོད་རྟེན་དག་ཕྱི་ཞིང་བསང༌། སྐུ་གཟུགས་དང་མཆོད་རྟེན་ལ་སོགས་པ་ལྕེ་ཏི་བཀྲུ་བཤལ་དང་ཕྱག་བདར་
བྱ། སེང་གེའི་སྟན་བརྒྱན། ཁ་དོན་ཀློག་པའི་སེང་གེའི་སྟན་བརྒྱན། དེ་རིང་ནུབ་མོ་ཐམས་ཅད་དུ་ཆོས་བསྟན་པར་འགྱུར་གྱིས་དེར་ཁྱེར་བ་བྱིན་ཅིག་ཅེས་ནས་ཡུལ་ཞུ། མདོ་ལྟག་མ་རྣམས་ནི་ཞག་ལྔ་དྲུག་གམ་བདུན་ནས་བྱ་བའི་ཆོ་ག་འདི་རྣམས་ནི་ཚུལ་ནས་འབྱུང་བའི་སྔ་དེ་ཉིན་ནས་སྦྱར་ཞིང་བྱའོ། །དོ་མོད་མཚན་རངས་ཁ་ཐོན་ཀློག་ཅིང་ཆོས་མཉན་གྱི་དགེ་འདུན་ཀུན་འདུས་ཤིག་ཅེས་བགོས་ཏེ་རེས་ཀྱིས་ཁ་ཐོན་བྱེད་དུ་གཞུག་གོ །ཡུལ་མི་ལ་སོགས་པ་བསྡུས་ཏེ་ཆོས་ཉན་དུ་གཞུག །མདོ་སྡེ་དང་འདུལ་བ་དང་མ་མོ་འཛིན་པ་ལ་བསྐོས་ཏེ་ཚེས་བཅུ་བཞིའི་ནུབ་མོ་ཐམས་ཅད་དུ་ཆོས་བསྟན་པ་སྦྱིན་དུ་གཞུག །ཁ་ཐོན་ཀློག་ཏུ་གཞུག་པ་ནི་མདོ་སྡེ་དང་འདུལ་བ་དང་མ་ལྟ་བུ་འཛིན་པ་ལ་སོགས་པ་ལས་ལས་རེས་ཀྱིས་ནུབ་མོ་ཐོག་ཐག་ཏུ་ཁ་ཐོན་ཏུ་གཞུག་གོ །གཞན་དུ་ཡང་དེ་དག་ལས་ཀྱི་ཚུན་ཆད་དུ་ཆོས་གདོན་མི་ཟ་བའི་གཏམ་གྱིས་ནུབ་མོ་བཟླའོ། །ཚུལ་ནས་འབྱུང་བའི་ཚེས་བཅུ་བཞིའི་ནུབ་མོ་ནི་དགེ་སྐོས་འབའ་ཞིག་མི་ཉལ་གྱི་དགེ་སློང་གཞན་རེས་ཁ་དོན་ཀློག་ཅིང་ཆོས་བསྙད་པ་ཙམ་གྱིས་ཆོག་གི་གཞན་ནི་གཉིས་ཀྱིས་མི་ཐུབ་ན་ཉལ་ཀྱང་ཉེས་མེད། ཚེས་བཅུ་ལྔའི་ནུབ་མོ་ནི་ཐམས་ཅད་ཉལ་དུ་མི་གནང་སྟེ་ཆོས་བསྙད་ཅིང་འཆད་པའི་རྗེས་ལ་ཚུལ་ནས་འབྱུང་ངོ༌། །སྐྱ་རེངས་བྱུང་བས་མཆོད་པ་ཚུན་ཆད་འབྱུང་བ་ལས་སོ། །ཚེས་བཅོ་ལྔའི་ནུབ་མོ་བཅུ་དྲུག་གི་སྐྱ་རེངས་མ་བྱུང་ཚུན་ཆད་དུ་ཚུལ་ནས་འབྱུང་བར་བྱའོ། །སྐྱ་རེངས་བྱུང་ན་ལས་སུ་མི་རུང་ངོ༌། །འབྱིན་པའི་དགེ་སློང་བསྐོ། ཚུལ་ནས་འབྱིན་པའི་དགེ་སློང་སྔགས་འདེབས་པ་སུ་དད་པ་ལས་བསྒོ། །གཅིག་གིས་མི་ནུས་ན་དུ་མས་ཀྱང་ངོ༌། །སྔགས་འདེབས་པའི་དགེ་སློང་གཅིག་གིས་མི་ཆོག་ན་དུ་ཆོག་པར་བསྐོ། །ཕྲེང་ལས་ཆ་ཆར་བགོས་པ་ཡང་རིགས་སོ། །སྔགས་འདེབས་པའི་དགེ་སློང་མང་དུ་བསྐོས་ནས་ཕྲེང་བ་པོས་རེ་རེ་ཚན་ཚན་དུ་བསྐོས་པ་ལ་སྔགས་གདབ་པོ་ཞེས་སྐལ་སྐལ་དུ་བསྒོ། །དེ་འཇག་མའང་བྲིམ་མོ། །སྔགས་འདེབས་པའི་དགེ་སློང་གིས་སྔར་དགེ་འདུན་ལ་རྩྭ་འཇག་མ་བྲིམ་མོ། །ཚུལ་ནས་འབྱུང་བའི་ཕྱིར་གཞན་གྱིས་དགེ་འདུན་ལ་ཞུ།
ཚུལ་ནས་འབྱུང་བའི་ཚེ་རྩྭ་འཇག་མ་རིམས་ཟིན་ནས་དགེ་སློང་སུའང་རུང་ལས་པ་གཅིག་གིས་དགེ་འདུན་ཚུལ་ནས་འབྱུང་བར་བྱའོ་ཞེས་ཞུ་བའི་སྔགས་བྱ། དགེ་སློང་སོ་སོར་ཚུལ་ནས་འབྱུང་བའི་བར་དུ་མདུན་དུ་འདུག་གོ །མདོ་ལྟག་མ་ལྟར་སྔགས་བྱས་པའི་འོག་ཏུ་དགེ་སློང་སྔགས་འདེབས་པ་སོ་སོ་མདུན་མདུན་དུ་འདུག་ལ་རྩྭའི་ཏོར་ཏོ་ལས་བཟུང་སྟེ་སྔགས་བྱའོ། །སོ་སོར་སྔགས་ཤེས་ན་རང་རང་གིས་བྱ་སྟེ་སྔགས་པ་དབང་དུ་གཞག་གོ །དེ་ལས་འབྱུང་བས་སྨྲ་བ་ལན་གསུམ་དུའོ། །ཚུལ་ནས་འབྱུང་བའི་སྔགས་བྱ་བ་ནི་ལན་གསུམ་དུ་བཟླས་སོ། །གཉིས་ནི་དེ་ཙམ་དུ། མིང་གིས་སྨོས་པ་འདི་རྣམས་གང་ཡང་རུང་སྟེ་རྐྱེན་ཅིག་བྱུང་ན་སྔགས་ལན་གཉིས་བཏབ་པས་ཀྱང་ཚུལ་ནས་འབྱུང་པར་གྱུར་ཏོ། །ནད་པ་ནད་གློ་བུར་ཅིག་བྱུང་བ་དང༌། མྱོས་པ་དང་སེམས་སྟོར་ཏེ་མི་དྲན་པར་གྱུར་པ་དང༌། མལ་སྟན་གྱུར་པ། མལ་སྟན་ཞིག་བླ་གབ་མེད་པ་ལ་ལུས་ཏེ་ཆར་གྱིས་མ་རུང་བར་གྱུར་པའམ། དུས་འདའ་བའམ། སྐྱ་རེངས་བྱུང་དུ་ཉེ་སྟེ་སྔགས་རྫོགས་པར་བྱར་མི་ཁོམ་པ་དང༌། གློ་བུར་དུ་བྱུང་བར་གྱུར་ནའོ། །ཆུ་དང་མེ་ལ་སོགས་པ་འཕྲལ་དུ་གློ་བུར་དུ་རྐྱེན་ཅིག་བྱུང་བ་དང་འདི་རྣམས་གང་བྱུང་ཡང་རུང་སྟེ་སྔགས་ལན་གཉིས་བཏབ་ཀྱང་རུང༌། དེ་ཙམ་གྱིས་གཅིག་གོ །སྔགས་འདེབས་པའི་ཚེ་རྐྱེན་ཅིག་བྱུང་སྟེ་ལན་གཉིས་སུ་ཟློས་སུ་ཡང་མ་ཁོམ་ན་ལན་གཅིག་གིས་ཀྱང་ཚུལ་ནས་བྱུང་བར་འགྱུར་རོ། །ཕྲེང་ཟད་ནས་དེ་དག་ཕན་ཚུན་དུའོ། །དགེ་འདུན་ཀུན་ལ་སྔགས་ཀྱིས་བཏབ་ཟིན་ནས་མཇུག་ཏུ་སྔགས་འདེབས་པ་ན་ནང་གཅིག་གི་མདུན་དུ་གཅིག་འདུག་སྟེ་སྔགས་བྱའོ། །མེད་ན་གཞན་ལས་ཡང་རུང༌། སྔགས་འདེབས་པ་གཅིག་ཏུ་ཟད་དེ་འདེབས་བའི་གྲོགས་མེད་ན་དགེ་སློང་སུ་ཡང་རུང་གཅིག་གི་དྲུང་དུ་འདུག་སྟེ་འབྱུང་བའི་སྔགས་བྱའོ། །དགེ་འདུན་ཐམས་ཅད་བྱུང་ངོ་ཞེས་དེ་སྐད་དུ་དགེ་འདུན་ལ་བྱའོ། །ཀུན་སྔགས་བཏབ་ཟིན་ནས་ལས་བྱེད་པའི་དགེ་སློང་གཅིག་གིས་དགེ་འདུན་ཐམས་ཅད་ཚུལ་ནས་བྱུང་བར་གྱུར་ཏོ་ཞེས་དགེ་འདུན་གྱི་ནང་དུ་སྨྲའོ། །དགེ་བར་བྱུང་ངོ༌། །ཤིན་ཏུ་བྱུང་ངོ་ཞེས་ཐམས་ཅད་ཀྱིས་བརྗོད། །མདོ་ལྟག་མ་ལྟར་
དགེ་སློང་གཅིག་གིས་བརྗོད་མ་ཐག་ཏུ་དགེ་འདུན་ཐམས་ཅད་ཀྱིས་དགེ་བར་བྱུང་ངོ་ཞེས་བརྗོད་དོ། །གང་ཅི་ཡང་ཁབ་ཡན་ཆད་བདག་གི་དངོས་པོ་འབྱུང་བར་གང་གིས་བརྩམས་ཏེ་དེ་བཟུང་ནས་དགེ་འདུན་ལས་དེ་ཐོབ་བོ། །བཙུན་པ་དག་གིས་འདི་ལྟ་བུ་གཟུགས་ཀྱི་དངོས་པོས་དབྱར་གནས་པའི་དགེ་སློང་གི་དགེ་འདུན་འབྱུང་ངོ་ཞེས་སོ། །དགེ་འདུན་ཚུལ་ནས་བྱུང་ཟིན་ནས་དགེ་འདུན་ལ་ཡོན་འབུལ་བའི་འོས་ཅི་ཡོད་ཀྱང་རུང་སྟེ་དགེ་འདུན་ལ་དངོས་པོ་འདི་འབུལ་ན་འོས་སམ་རིགས་སམ་ཞེས་སྨྲས་ཏེ་ཁ་ཐོན་དུ་བྱེད་བྱེད་པ་དེས་འབུལ་ལོ། །དགེ་སློང་གཞན་གྱིས་ཀྱང་ཡོན་གྱི་འོས་ཡོད་ན་ཐམས་ཅད་ཀྱིས་དབུལ་ལོ། །ཡོན་ཕུལ་ཞིང་དངོས་པོ་འདི་བཞེས་པའི་རིགས་སམ་འོས་སམ་ཞེས་སྨྲས་ཏེ་དགེ་འདུན་ཀུན་ཁ་རོག་འཁོད་ན་བཞེས་པར་གནང་བ་ཡིན་ཏེ་ཕུལ་ཅིག །དེ་ནས་དགེ་སྦྱོང་དབྱུང་ངོ༌། །དགེ་སློང་རྣམས་ཚུལ་ནས་བྱུང་ཟིན་པའི་འོག་ཏུ་དགེ་སྦྱོང་རྣམས་ལ་དབྱུང་བའི་སྔགས་བྱའོ། །དེ་ནས་དགེ་སློང་མའོ། །དགེ་སྦྱོང་ཚུལ་ནས་བྱུང་ཟིན་ནས་དགེ་སྦྱོང་མ་རྣམས་སྔགས་བྱས་ཏེ་ཚུལ་ནས་དབྱུང་ངོ༌། །བྱུང་བ་བཞིན་དུ་བསྔོས་ཏེ་སོང་བ་ཚུན་ཆད་དེ་དག་དབྱུང་བ་དང་ལྷན་ཅིག་བྱས་ནའོ། །ཚུལ་ནས་བྱུང་བའི་ཁར་སླེབས་སུ་རེ་སྟེ་ཞག་བདུན་པའི་སྔགས་ཀྱིས་བཏབ་སྟེ་གུད་དུ་སོང་སོང་བ་ལས་ཞག་གྲངས་འཁྲུལ་ཏེ་སོང་སོང་བའི་གནས་དེ་ན་དགེ་འདུན་ཚུལ་ནས་འབྱུང་ཞིང་འཁོད་ན་ཐལ་བྱུང་ཚུལ་ནས་འབྱུང་བ་དེ་ནི་ནང་དུ་ཞུགས་ཏེ་བྱུང་ཡང་ཚུལ་ནས་བྱུང་བར་ཆུད་དོ། །དེ་ལྟར་ཚུལ་ནས་བྱུང་སྟེ་སླར་སོང་སོང་བ་ལས་བདག་ཉིད་ཀྱི་དགེ་འདུན་ཚུལ་ནས་བྱུང་བ་ཡང་སླེབས་ན་དེའི་ནང་དུ་ན་བདག་ཚུལ་ནས་འབྱུང་མི་དགོས་སོ། །བུད་མེད་དང་གྱུར་པ་ནི་མ་ཡིན། དགེ་སློང་བུད་མེད་ཀྱི་མདུན་དུ་ཚུལ་ནས་འབྱུང་བ་དང་དགེ་སློང་མའི་མདུན་དུ་ཚུལ་ནས་འབྱུང་བའི་བྱུང་བར་མི་ཆུད་དོ། །དགེ་སློང་མའང་དགེ་སློང་མ་གྲོགས་ཀྱི་མདུན་དུ་ཚུལ་ནས་བྱུང་བར་མི་ཆུད་ཀྱི་དགེ་སློང་གི་མདུན་དུ་གཉིས་ཀས་རྩ་ལས་བཟུང་སྟེ་སྔགས་བྱའོ། །གནས་པར་མི་ནུས་ན་གང་བསྐྲད་པའི་དགེ་སློང་ལ་བྱ་སྟེ་འདུས་ནས་དབྱུང་བའོ། །དགེ་སློང་མ་དགེ་སློང་ཕའི་མདུན་དུ་ཚུལ་ནས་འབྱུང་བའི་སྔགས་བྱེད་བྱེད་པ་
ལས་དགེ་སློང་དེ་མོ་མཚན་དུ་གྱུར་ན་ཚུལ་ནས་འབྱུང་བར་མི་ཆུད་དེ་གཞན་གཅིག་གི་མདུན་དུ་སྔགས་བྱའོ། །དབྱར་གྱི་བར་བྱ་བར་འགྲོ་ན་ཕྱུང་སྟེའོ། །དགེ་སློང་ལ་རྐྱེན་ཅིག་བྱུང་སྟེ་ཚུལ་ནས་འབྱུང་བའི་ཞག་དུས་སུ་སྡོད་དུ་མི་ཁོམ་ན་དགེ་འདུན་ལ་གསོལ་ཏེ་ཚུལ་ནས་འབྱུང་བའི་སྔགས་བྱས་ཏེ་སོང་ན་བྱུང་བར་ཆུད་དོ། །དངོས་པོ་དང་གང་ཟག་དང་གཉིས་ཀ་གཞག་སྟེ་ན་ཡང་ངོ༌། །དགེ་འདུན་གྱི་ལྷག་མ་ཞིག་བྱུང་བ་དང་སྤང་བ་ལྟུང་བ་འཕྲལ་ལ་མཐོལ་དུ་མི་བདེ་བ་ནི་བརྟགས་ཏེ་བཞག་པ་ཡིན་པས་སྐབས་དབྱེ་བ་ལ་མ་གཏོགས་ཏེ་གཞན་ཉེས་པར་མཐོང་བ་དང་དོགས་པ་དང་ཐོས་པ་ཅི་ཡོད་པ་རྒོལ་ཅིག་ཅེས་བྱ་སྟེ་སྐབས་དབྱེའོ། །འདི་ལ་ཁས་བླང་ངོ༌། །མདོ་ལྟག་མ་ལྟར་གསོལ་བ་ལ་དགེ་འདུན་གྱིས་ཁོའི་སེམས་བསྲུང་ཞིང་དགའ་བར་བྱ་བའི་ཕྱིར་དེ་ལྟར་རུང་ངོ་ཞེས་བྱའོ། །བཞག་པ་ཡང་ཐ་མ་མ་ཡིན་པ་ལས་བསྐོས་ཏེའོ།། ཚུལ་ནས་འབྱུང་བའི་ཚེ་ཕས་ཕམ་པ་ནི་མ་གཏོགས་ཏེ་གཞན་ལྟུང་བ་སྡེ་ལྔ་ལས་སྐབས་ཕྱེ་བ་ཡིན་གྱིས་རྒོལ་ཅིག་ཅེས་ཟེར་ན་ཕས་ཕམ་པ་བརྟགས་ཅིང་གཞག་ཏུ་མི་གནང་སྟེ་བསྐྲད་དོ། །ཚེ་དང་ལྡན་པ་བདག་ཅག་འདིའི་ཕྱིར་ནི་འདུས་ཤིང་ཚོགས་པ་ཡིན་ཏེ་དེ་ལྟ་མོད་ཀྱི་ཚེ་དང་ལྡན་པའི་དངོས་པོ་དང་གང་ཟག་ཀྱང་གཞག་པར་རོ། །ལྟག་ནས་འབྱུང་བ་དགེ་འདུན་གྱི་ལྷག་མ་དང་སྤང་བའི་ལྟུང་བ་འཕྲལ་དུ་མཐོལ་དུ་མི་བདེ་སྟེ་བརྟགས་ཏེ་གཞག་པ་མ་གཏོགས་པར་གཞན་ལྟུང་བ་སྡེ་ལྔ་ལས་རྒོལ་ཅིག་པར་སྐབས་འབྱེད་ཅིང་འོང་ཞིང་གསོལ་དུ་འོང་སྟེ་ལྟུང་བ་དང་ལྷག་མ་བརྟག་ཅིང་དབང་འཇུག་པ་ལགས་ན་དགེ་འདུན་གྱིས་མཁྱེན་པར་བགྱིར་ཅི་གནང་ཞེས་ཟེར་ན་དགེ་འདུན་གྱིས་ཀྱང་དེང་འདུས་པ་ཁྱོད་ཀྱི་དོན་དང་དབང་དུ་བྱ་བའི་ཕྱིར་འདུས་པ་མ་ཡིན་མོད་ཀྱི་ཁྱེད་ཉེས་པ་གཞན་ལ་སྐབས་ཕྱེ་ཞིང་དམིགས་ཀྱིས་ཕྱེ་བ་འཕྲལ་དུ་མཐོལ་དུ་མི་བདེ་སྟེ་དཔང་དུ་མཁྱེན་པར་བྱ་བར་གསོལ། དགེ་འདུན་གྱིས་མཁྱེན་པར་བྱ་ཞིང་གང་ཟག་དེ་ཚུལ་ནས་དབྱུང་ངོ༌། །དེ་ལྟར་ཚུལ་ཁྲིམས་རྣམ་པར་དག་པར་བྱ་བའི་ཕྱིར་ནི་གསོ་སྦྱོང་ཆོས་རྣམ་པར་དག་པར་བྱའི་ཕྱིར་ནི་དབྱུང་བའོ་ཞེས་བཅོམ་ལྡན་འདས་གསུངས་ཀྱིས་འོན་ཏེ་འདོད་ན་དབྱུང་ངོ་
ཞེས་སོ། །མདོ་ལྟག་མ་ལྟར་ལྷག་མ་དང་ལྟུང་བ་བརྟགས་ཏེ་དགེ་འདུན་གྱིས་མཁྱེན་པར་བྱས་ནས་ཚུལ་ནས་དབྱུང་བ་ནི་རྣམ་པ་གཅིག་ཏུ་ན་ཉེས་པ་ཡོད་པའི་མི་དེ་ཉིད་ལྟུང་བ་སྡེ་ལྔ་ལས་ཉེས་པ་ཚངས་ཤིང་བྱང་བར་འགྱུར་བའི་ཕྱིར་ཚུལ་ཁྲིམས་རྣམ་བར་དག་པ་ཞེས་བྱ་སྟེ། གང་ཟག་དེ་ཉིད་དོན་དུ་འགྱུར་བ་དང་ཉེས་པ་བརྟགས་ཏེ་གཞག་ན་དགེ་འདུན་ཚུལ་ནས་འབྱུང་བའི་ལས་སུ་རུང་བའི་ཕྱིར་ཆོས་རྣམ་པར་དག་པ་ཞེས་བྱ་སྟེ། དགེ་འདུན་གྱི་དོན་ཡང་ཡིན་པས་དོན་འདི་རྣམ་པ་གཉིས་ཀྱི་ཕྱིར་དགེ་འདུན་གྱིས་ཤེས་པར་གྱིས་ལ་བརྟག་པ་རྟོགས་ཏེ་ཚུལ་བྱུང་ཅིག་ཅེས་ཞལ་ནས་གསུངས་སོ། །གང་ཟག་གཞག་པ་དང་དོན་གྱིར་མ་ཡིན་ནོ་ཞེས་སོ། །དོན་གཞག་པ་དང་གང་ཟག་ཀྱང་ངོ༌། །གཞག་པར་རམ་མི་གཞག་པའི་ཕྱིར་ཁས་བླངས་པ་ལས་བསྙོན་ན་ཁས་བླངས་པ་ཞིག་མ་ཡིན་ནོ། །ཚུལ་ནས་འབྱུང་བའི་ཚེ་དགེ་སློང་ལྷག་མ་དང་ལྟུང་བ་ཡོད་དེ་འཕྲལ་དུ་མཐོལ་དུ་མི་བདེ་བར་དགེ་འདུན་ལ་མཁྱེན་པར་བྱ་སྟེ་བརྟགས་ཏེ་བཞག་པའི་འོག་ཏུ་ཕྱིས་བསྙོན་ཏེ་མཐོལ་ཚངས་དང་ཆད་པ་བྱེད་དུ་མི་བཏུབ་ན་ཁོ་བསྙོན་ཏེ་མེད་ཅིང་མ་མཐོང་མི་ཤེས་ཟེར་བ་མི་བརྩན་གྱི་ཐོག་མ་དགེ་འདུན་ཐམས་ཅད་མཁྱེན་པར་བྱས་པ་བརྩན་གྱིས་དགེ་འདུན་ཐམས་ཅད་ཀྱིས་མཐོལ་དུ་གཞུག་ཅིང་མཐོལ་ཚངས་དང་ཆད་པ་བྱེད་དུ་གཞུག་གོ །ཅི་ལྟར་བྱེད་དུ་གཞུག་པའི་ཐབས་འོག་ནས་འཆད། འདི་སྐད་ཀྱི་ཚུལ་དུ་ཅུང་ཟད་ཀྱང་མེད་ཅིང་སྨྲ་བ་ནི་འདི་འམ་སྔོན་གྱི་བརྫུན་ནོ། །མདོ་ལྟག་མ་ལྟར་དགེ་འདུན་གྱིས་ལྷག་མ་དང་སྤང་བའི་ལྟུང་བ་ཡོད་དེ་དགེ་འདུན་ལ་བརྟགས་ཏེ་གཞག་ལ། བསྙོན་པ་འདི་དགེ་སློང་དེ་སྔར་དགེ་འདུན་ལ་བརྟགས་ཏེ་གཞག་ལ་ཕྱིས་བསྙོན་པའི་བརྫུན་གྱིས་ལྟུང་བ་གཅིག་དང་འཕྲལ་དུ་བྲིས་པ་ན་བསྙོན་པའི་ལྟུང་བ་གཅིག་དང་གཉིས་ཡོད་དེ་ཐོག་མ་རྟོགས་པའི་ཚེ་དགེ་སློང་སུ་སུ་འདུག་འདུག་པ་ཀུན་བསྡུས་ཏེ་མངོན་སུམ་དུ་རྨས་ལ་ཤགས་ཀྱིས་ཐུབ་པར་བྱས་ལ་ཆད་པས་བཅད་དོ། །ཆད་པ་བྱེད་དུ་མ་བཏུབ་ན་བསྐྲད་དོ། །དེ་སྟེ་ཐབ་མོ་པའི་དགེ་སློང་དག་འོང་བར་ཚུལ་དུ་ཞུགས་པ་ཐོས་ནས་གསོ་སྦྱོང་གཉིས་སམ་གསུམ་འདས་ན་དབྱུང་ངོ༌། །དགེ་འདུན་ཚུལ་ནས་འབྱུང་བའི་དགེ་སློང་ཕ་མ་རུངས་པ་
དག་ཅིག་གྲོགས་གཅིག་སྟེ་ཚུལ་ནས་འབྱུང་བའི་ཚེ་ལྟུང་བ་སྡེ་ལྔ་ལས་རྒོལ་ཅིག་ཕར་སྐབས་འབྱེད་པའི་རིགས་ཀྱི་དེའི་ཁར་སྐུར་བ་བཏབ་ལ་བསྐུར་ཏེ་དཀྲུག་གོ་ཞེས་ཟེར་བ་གཅིག་ཐོས་ན་འབྱུང་བའི་ཞག་དུས་ལས་ཟླ་བ་གཅིག་གཅིག་སྔར་བསྡུམས་ཏེ་འབྱུང་ངོ༌། །དེ་ལྟར་བསྡུམས་ཀྱང་ཐབ་མོ་པ་དེ་འོང་ཞིང་སླེབས་པར་འགྱུར་ན་ཟླ་བ་ཕྱེད་དང་གཉིས་ཀྱིས་ཀྱང་སྔར་བསྡུམས་ཏེ་འབྱུང་ངོ༌། །དེ་ལྟར་བྱས་ཀྱང་མྱུར་དུ་འོང་ན་ཚུལ་ཟླ་བ་གཅིག་བསྲུངས་བས་ཆོག་གི་ཟླ་བ་གཅིག་གིས་བསྡུམས་ཏེ་བྱུང་ཡང་ཚུལ་དུ་ཆུད་དེ་དེ་ལྟར་སྔར་བྱུང་ཡང་བསྲུང་བ་ནི་ཟླ་བ་གསུམ་ཐང་བཞིན་དུ་བསྲུང་ངོ། །ཡོན་ཏན་ཡང་འཐོབ་བོ། །དེ་ལྟར་བྱས་ན་ཕྱིས་འཐབ་མོ་བ་འོངས་སུ་ཟིན་ཀྱང་སྐབས་མི་འབྱེད་པས་ཀླན་ཀ་མི་རྙེད་དོ། །མི་གྲུབ་ན་དཀྱིལ་འཁོར་ལྔའམ་དྲུག་བསྔོ། །མདོ་ལྟག་མ་ལྟར་བསླབས་བསྡུམས་སུ་ཞག་དུས་མེད་དེ་ཚུལ་ནས་འབྱུང་ཀར་འཐབ་མོ་བའི་དགེ་སློང་འོང་བར་ཐོས་ན་དགེ་འདུན་མྱུར་དུ་འདུས་ལ། མཚམས་ཆེན་པོ་ཁྲོལ་ལ་མཚམས་བུ་ཆུང་ལྔའམ་དྲུག་འཕྲལ་ལ་བཅད་དོ། །མཚམས་བུ་ཆུང་ཅི་བྱ་བ་ན་འོག་ནས་འཆད། ཚིག་འཇམ་པོ་དང་བསུ་ནས་ལྷུང་བཟེད་དང་ཆོས་གོས་དང་བསྟི་སྟང་དང་ཁང་བུ་དང་ལྔ་ཁང་དང་ཁང་བུ་བརྩེག་མ་བསྔོ། ལྟག་མ་ལྟར་མཚམས་བུ་ཆུང་བཅད་ཟིན་ནས་འཐབ་མོ་པ་འོང་བ་ལ་བསུ་ཞིང་ཚིག་འཛམ་པོ་ལ་གཏམ་བྱ་ཞིང་ལྷུང་བཟེད་དང་ཆོས་གོས་ལ་སོགས་པ་ཚུལ་བཞིན་དུ་བླངས་པ་གནས་ཁང་ཁྱམས་ལ་སོགས་པ་ཡང་བསྔོ་ཞིང་སྦྱིན་ནོ། །ཁྲུས་དང་སྣུམ་ཐོབ་པར་བྱ། འཐབ་མོ་པ་འོངས་པ་ལ་ཁྲུས་བྱ་ཞིང་ལུས་མཉེད་པ་ལ་སོགས་པ་བྱ། ལུས་བསྐུ་བའི་སྣུམ་དང་ཁ་ཟས་ཀྱང་སྦྱིན། ཆོས་སྙན་པ་སྦྱིན་པ་བདག་གི་བསུ་བར་བྱ། འཐབ་མོ་བ་འོངས་པ་དེ་དང་ཆོས་བསྙད་ཅིང་གཏམ་ལ་སོགས་པ་བྱ་སྟེ། དུམ་ཞིང་མགུ་བའི་ཚུལ་དུ་བྱ། མ་གྲུབ་ན་བདག་ཅག་གི་གསོ་སྦྱོང་དཀྱིལ་འཁོར་དུ་བྱ། མདོ་ལྟག་མ་རྣམས་ལྟར་བྱས་ཏེ་བཞག་པ་ལས་གུད་དུ་འདོང་དུམ་བཏུབ་ན་མདོ་གསུམ་གྱི་ལྟག་ནས་མཚམས་བུ་ཆུང་བཅད་དེ་གཞག་པར་བཤད་པའི་མཚམས་བུ་ཆུང་བཅད་དེ་སོ་སོར་དགེ་སློང་ལྔ་ལྔའམ་དྲུག་དྲུག་ཏུ་ཡོད་པ་དོང་སྟེ་འཐབ་མོ་པ་ལས་དད་པའང་བླངས་ཏེ་གསོ་སྦྱོང་བྱའོ། །ཁྱེད་དེ་
རིང་དབྱུང་བ་མ་ཡིན་ནམ་ཞེས་ཟེར་ན་ཚེ་དང་ལྡན་པ་སྡོད་ཅིག་ཁྱོད་ནི་འོང་བ་སྟེ་དོན་འདི་ནི་གནས་པའོ་ཞེས་སྒོ་ཤིག །མདོ་ལྟག་མ་ལྟར་གསོ་སྦྱོང་བྱེད་པ་འཐབ་མོ་པ་ན་རེ་དུས་ཀྱིས་ཚུལ་ནས་དབྱུང་བ་ཡིན་ན་ཅིའི་ཕྱིར་གསོ་སྦྱོང་བྱེད་ཅེས་འདྲི་ན་ཁྱེད་ཅིག་གསར་དུ་འོངས་པ་ཡིན་ཏེ་རྒྱུས་མི་ཤེས་ཀྱི། ལས་ཇི་ལྟར་བྱ་བ་དགེ་སྦྱོང་གཞི་ལ་འཁོད་པ་ཤེས་ཏེ་དྲི་མི་དགོས་ཀྱི། ཟས་དང་ཁང་བུ་ལ་སོགས་པ་ཅི་འདོད་པ་ངེད་ལ་ནོས་ལ་རྩི་དགོས་པ་ལ་སོགས་པ་ལོང་ལ་འདུག་ཤིག་ཅེས་བསྒོ། འདས་ན་དབྱུང་ངོ༌། །ཐབས་གོང་མ་རྣམས་ལྟར་བྱས་ནས་སླར་འདོང་ནས་སླར་མི་ལྡོག་པ་ཙམ་གྱི་ཚོད་ན་འདུས་ཏེ་ཚུལ་ནས་འབྱུང་ངོ༌། །ཐབ་མོ་པ་དོང་ནས་ཚུལ་མི་འབྱུང་སྟེ་ཚུལ་ཡང་ཞིག་པ་ཡིན་ནོ། །འབྱུང་བའི་དངོས་པོ་འཁོན་པ་བཤགས་པ་མ་བྱས་པར་མི་དབྱུང་ངོ༌། །ཚུལ་ནས་འབྱུང་བ་ནི་གཅིག་ལ་གཅིག་སྐབས་ཕྱེ་སྟེ་རྒོལ་དུ་བཅུག་ལ་འཁོན་བཤགས་ཏེ་ཚུལ་ནས་འབྱུང་ངོ༌། །དེའི་དུས་ནི་ཉི་མ་བཅུའམ་ཟླ་བ་ཕྱེད་ན་འབྱུང་བ་ནའོ། །འཁོན་བཤགས་ཤིང་བཟོད་པ་གསོལ་བ་ནི་ཞག་བཅུ་ཙམ་གྱི་མདུན་ནས་གཅིག་ལ་གཅིག་བཟོད་པར་གསོལ་ཞིང་མགུ་བར་བྱའོ། །བདུན་ནམ་བརྒྱད་དོ་ཞེས་གཞན་དག་ལས་སོ། །འདུལ་བ་འཛིན་པ་ཁ་ཅིག་ན་རེ་ཞག་བདུན་ནམ་བརྒྱད་ཀྱི་སྔ་ལོགས་སུ་འཁོན་བཤགས་ཀྱང་ཉེས་མེད། འདུས་པར་མ་ཡིན་ནོ། །དགེ་སློང་བདག་དང་འཁོན་ཡོད་པ་ཞིག་ན་མི་མང་པོའི་ཁྲོད་དུ་མི་བྱའི་ལྐོག་ཏུ་ཁོ་གཅིག་པུ་ལ་བཟོད་པར་གསོལ་ལོ། །འདུས་པའི་སྤྱིར་ཡང་སྤྱིའི་བཟོད་པ་གསོལ། དེས་ཀྱང་མ་བཟོད་པར་མ་ཡིན་ནོ། །འཁོན་ཡོད་པ་ལ་མདོ་ལྟག་མ་ལྟར་བཟོད་པ་གསོལ་ཞིང་འོག་ནས་དགེ་སློང་དེས་ཀྱང་བཟོད་པར་བྱའོ། །མགུ་བ་མ་བྱས་ཀྱི་བར་དུ་ཚོགས་པ་ཐམས་ཅད་ཀྱིས་ཀྱང་དེའི་ཚེ་མི་བྱའོ། །ཚུལ་ནས་འབྱུང་བའི་ཞག་བཅུའི་མདུན་ནས་གཅིག་ལ་གཅིག་འཁོན་བཤགས་ཤིང་བཟོད་པ་མ་གསོལ་ན་ཚུལ་ནས་འབྱུང་བར་མི་འགྱུར་རོ། །བཟོད་པ་གསོལ་བ་ནི་གཞོན་རིམས་ཀྱིས་རྒན་རིམས་ལ་གསོལ་གཞོན་ནུ་ལ་ཡུས་ཡོད་ན་རྒན་པོས་ཀྱང་གཞོན་ནུ་ལ་གསོལ། ཁྲོས་པས་ཡང་མ་བཟོད་པར་མ་ཡིན། དགེ་སློང་གཞན་གྱིས་བདག་ལ་ཉེས་པ་ལ་སོགས་པ་བྱས་ཏེ་ཕྱིས་མཐོལ་ཚང་བྱེད་ཅིང་བཟོད་པ་ལ་
གསོལ་དུ་འོངས་ན་བཟོད་པ་བྱིན་ཅིག །ལྟག་ཏུ་མདོ་འདི་འདྲ་བ་ཅིག་བྱུང་བ་ནི་ཚུལ་གྱི་ཚེའོ། །འདི་ནི་ནམ་ཡང་རུང་སྟེ་འདྲ་བར་བྱ་བ་ལ་བྱའོ། །དགེ་སློང་དང་དགེ་སློང་མ་གནས་ཀྱི་ཕྱི་རོལ་དུ་མ་ཡིན། དགེ་སློང་མས་དགེ་སློང་ཕ་ལ་བཟོད་པ་གསོལ་བ་ནི་གར་བབ་བབ་ཏུ་ལམ་ཁ་ལ་སོགས་པར་བཟོད་པ་གསོལ་བ་མ་ཡིན་དབྱར་མོ་ཐང་དུ་བཀུག་སྟེ་བཟོད་པ་གསོལ་བ་མ་ཡིན་གྱི། དགེ་སློང་ཕའི་གཙུག་ལག་ཁང་དུ་སོང་ལ་བཟོད་བར་གསོལ་ལོ། །རྐང་པ་ལ་ཡང་མི་གཏུགས། དགེ་སློང་མས་དགེ་སློང་ཕ་ལ་བཟོད་པ་གསོལ་བ་ནི་རྐང་པ་ནས་བཟུང་ལ་བཟོད་པ་མི་གསོལ་གྱི། འདོམ་གང་ཙམ་དུ་འདུག་ལ་དགུས་ཏེ་བཟོད་པ་བགྱིར་ཅི་གནང་ཞེས་གསོལ་ལོ། །བཟོད་པ་བགྱི་འཚལ་ཏེ་འགྲོ། །མདོ་ལྟག་མ་ལྟར་གསོལ་ཏེ་བཟོད་པར་གནང་ན་གདོང་དཔྲལ་བ་གཏུགས་ཏེ་ཕྱག་བྱ། འདི་འཆགས་ན་བསྟི་སྟར་མེད་པར་མི་འགྲོ། །མདོ་ལྟག་མ་གཉིས་ལྟར་དགེ་སློང་མ་བཟོད་པ་གསོལ་དུ་འོངས་ན་དགེ་སློང་གིས་ཀྱང་བཟོད་པ་གསོལ་དུ་མི་གཞུག་པའམ་བདག་བྱོལ་ཏེ་འགྲོ་བར་མི་བྱའོ། །མི་བསྒོམ་གསོལ་ཏེ་གཤེགས་པ་ལ་སྔོན་དུ་ཤེས་པས་སོ། །དགེ་སློང་གྲོགས་ལ་བཟོད་པ་གསོལ་དུ་སོང་སོང་བ་ལས། མ་བཏུབ་ན་དེ་དང་སུ་མཐའ་བའི་གན་དུ་སོང་ལ། བཟོད་པར་བྱོས་ཤིག་ཅེས་གྲོས་འདེབས་སུ་བཅུག་ལ་དེ་ནས་བཟོད་པ་གསོལ། མ་དད་ན་ཐབས་བཙལ་མི་བསྒྲུབ་པར་མི་བྱ། མདོ་ལྟག་མ་ལྟར་ཐབས་བྱ་སྟེ། ཡང་བཟོད་པར་མ་བཏུབ་ན། སྔོན་ཁོ་ལ་གནོད་པ་དང་ཉེས་པ་བྱས་པ་ཅི་ཡོད་པ་བརྟགས་ཏེ། ཉེས་པ་ཞིག་ཡོད་ན་དེ་ཡང་དམིགས་ནས་བཤགས་ངེས་བཟོད་པར་གསོལ་ལོ། །རིང་པོར་མ་ཐོགས་པའོ། །ཉེས་པ་བྱས་ཤིང་འཁོན་པ་ཞིག་ཡོད་ན་ལོའམ་ཟླ་བར་གཞག་པ་མ་ཡིན་གྱི། མྱུར་དུ་མཐོལ་ཞིང་བཟོད་པར་གསོལ་ལོ། །ཁྲོས་མ་ཐག་ཏུ་མ་ཡིན་ཏེ་བསྡད། མྱུར་དུ་བཟོད་པ་གསོལ་བ་ཡང་འཕྲལ་དུ་འཁྲུག་པ་མ་ཞིབ་ལ་མི་གསོལ་གྱི་ཞི་ནས་གསོལ་ལོ། །འཆགས་པའི་ཚེ་མི་བཟོད་པར་མི་བྱ། གཅིག་ལ་གཅིག་འཆགས་ཤིང་བཟོད་པ་གསོལ་བའི་ཚེ། སེམས་ལས་འཁོན་མ་བཏང་ཞིང༌། ཁས་བཟོད་ཅིང་འཇམ་པོར་བྱ་བ་མ་ཡིན་གྱི། སེམས་ཀྱིས་ཀྱང་
བཟོད་པར་བྱས་ཏེ་གསོལ་ལོ། །ཕྲན་ཚེགས་སུ་ཆུད་པའོ། །དབྱུང་བའི་དངོས་པོ་རྫོགས་སོ།། །།དྲུབ་པ་གདིང༌། ཚུལ་ནས་བྱུང་བ་དྲུབ་གདིང་སྟེ། ཆོས་གོས་སྨད་གསུམ་སློབ་པའི་ནང་དུ་བཏིང་ལ་གཞག་པ་ལ་བྱའོ། །ཅི་ལྟར་གསུམ་ལ་དེ་བཞིན་དྲུབས་པ་བཏིང་ན་ཡང་ཡང་བཟའ་ཡང་ཉེས་མེད་དེ་སྡེ་སྡེར་ཟ་བ་དང་མ་གཏོགས་པར་གྲོང་དུ་འཇུག་པ་དང༌། གོས་སློང་བ་དང་ལྷག་མ་དང་རྙེད་པ་ཡང་སྤྱིའོ། །དྲུབས་པ་བཏིང་བའི་ཚེ་ཟླ་བ་ལྔའི་བར་དུ་འཆད་པ་དང་འབྲལ་བ་དང་འཇོག་པ་དང་ཡང་ཡང་དང་ཟས་བཟང་པོ་དང་སྡེ་ཟན་དང་གོས་གཉེན་མ་ཡིན་པར་སློང་བ་དང་དུས་མ་ཡིན་པར་གྲོང་དུ་འགྲོ་བ་དང༌། འདི་བརྒྱད་ནི་ཚུལ་དུ་ཞུགས་པའི་ཡོན་ཏན་ཡིན་ཏེ་བསྲུང་མི་དགོས་སོ། །ལྷག་མ་དང་རྙེད་པ་དང་སྤྱིའོ་ཞེས་འབྱུང་བ་ནི་མདོ་འོག་མ་རྣམ་ལྟར་གྱུར་ན་ཡོན་ཏན་ནི་མི་ཐོབ་ཀྱི་ཚུལ་དུ་ཞུགས་པ་རྣམས་སྤྱིའོ། །ནོར་རྫས་དང་ཡོན་སྐལ་ལས་འཐོབ་པ་ལ་བྱ་སྟེ། དམིགས་དམིགས་ནས་འོག་ནས་ཞིབ་ཏུ་འཆད་པ་ཡིན་ནོ། །འདི་མི་སྐྱེ་བ་ནི། མིང་གིས་སྨོས་པ་འདི་རྣམས་ཡོན་ཏན་དང་རྙེད་པའི་སྐལ་བ་ཐོབ་པའང་ཡོད། མི་འཐོབ་པའང་ཡོད་དོ། །ལོན་མ་ལོན་པ་དང༌། ཚུལ་དུ་མ་ཞུགས་ཀྱི་ཟླ་བ་གསུམ་གྱི་བར་དུ་བསྲུངས་པ་དང༌། དབྱར་ཆད་པ་དང༌། ཚུལ་དུ་ཞུགས་པ་ལས་ཚུལ་དྲལ་ཏེ་སོང་བ་ལས་སོ། །དབྱར་ཕྱི་མ་དང༌། ཚུལ་ཕྱི་མར་ཞུགས་པ་དང༌། གནས་གཞན་དུ་གནས་པའོ། །གཙུག་ལག་ཁང་གཞན་ན་ཚུལ་སྲུང་སྲུང་བ་དང་འདི་རྣམས་ནི་རྙེད་པའི་ཡོན་སྐལ་ལས་མི་དབང་བ་ཡང་ཡོད། གང་ཐོབ་གང་མི་ཐོབ་བ་ནི་འོག་ནས་འཆད། གནས་གཞན་དུ་འཕོས་པ་ལ་ཡང་ངོ༌། །སངས་རྒྱས་ཀྱིས་གསུངས་པ་བར་དུ་གཅོད་དོ་ཞེས་ཟེར་བ་ལ་ཆད་པས་བཅད་པ་ལ་སོགས་པ་ཆད་པ་རྣམ་བདུན་གྱིས་བཅད་པ་དང༌། སློབ་པ་བྱིན་པ་དང་དགེ་འདུན་གྱི་ལྷག་མ་བྱུང་སྟེ་ཆད་པ་ཡོད་པ་དང་འདི་རྣམས་ནི་ཚུལ་དུ་ཞུགས་ཏེ་གདིང་བ་དྲུབས་ཀྱང་ཡོན་ཏན་བཅུ་མི་ཐོབ་པ་དང་ཡོན་ཏན་དེ་གང་མི་ཐོབ་པ་འོག་ནས་འཆད། དེ་ཐོབ་ནས་ནི་ལོག་གོ །སྔ་ནས་ཆད་པས་བཅད་ཅིང་སྤངས་པ་ནི་མ་ཡིན་གྱི་གདིང་བ་དྲུབས་ཟིན་ནས་ཉེས་པ་མེད་ཅིང་ཆད་པ་རྣམ་བདུན་ལ་སོགས་
པས་བཅད་པ་ནི་དེ་ཉི་ཚེ་ནས་ཡོན་ཏན་བཅུ་མི་ཐོབ་སྟེ་མེད་པར་གྱུར་ཏོ། །ཐ་མ་མ་ཡིན་པ་དགེ་སྦྱོང་དང་གནས་གཞན་དུ་གནས་པས་ཀྱང་གནས་པའི་སྐལ་བ་འཐོབ་པོ། །མདོ་གཉིས་ཀྱི་ལྟག་ནས་ལོ་མ་ལོན་བ་དང་དབྱར་ཆད་པ་དང་དབྱར་ཕྱི་མ་དང་གནས་གཞན་གནས་པ་བཞི་ལ། ཐ་མ་གནས་གཞན་དུ་གནས་པ་མ་གཏོགས་པར་གསུམ་གྱི་སྟེང་དུ་མདོ་འདི་གཅིག་གི་ལྟག་མའི་ནང་ནས་སློབ་པ་བྱིན་པ་དང༌། དགེ་འདུན་གྱི་ལྷག་མ་འབྱུང་བའི་ཆད་པ་ཡོད་པ་དང་གསུམ་གྱིས་ཀྱང་བསྣན་ཏེ་དགེ་སྦྱོང་དང་འདི་རྣམས་ནི་ཚུལ་གྱི་ཡོན་ཏན་ནི་མི་ཐོབ་ཀྱི་རྙེད་པའི་སྐལ་བ་ཐོབ་བོ། །གནས་གཞན་དུ་གནས་པ་མ་གཏོགས་ཞེས་བྱ་བ་ནི་ཚུལ་གྱི་ཡོན་ཏན་དང་རྙེད་པའི་ཡོན་སྐལ་གཉིས་ཀ་མི་འཐོབ་བོ། །སྤང་བ་མ་ཡིན་ནོ། །མདོ་གཉིས་ཀྱི་ལྟག་ནས་སློབ་པ་བྱིན་པ་དང་དགེ་འདུན་གྱི་ལྟག་མ་ཡོད་པ་གཉིས་ནི་བཤད་ཟིན་ཏེ་མ་གཏོགས་ཀྱི་ཆད་པ་རྣམ་བདུན་གྱིས་བཅད་ཅིང་བསྐྲད་པ་ཞེས་འབྱུང་བ་ཡང་ཚུལ་གྱི་ཡོན་ཏན་དང་རྙེད་པའི་ཡོན་སྐལ་གཉིས་ཀ་མི་ཐོབ་བོ། །དེར་འགྱུར་བ་བཞིན་དུ་ཆོས་མ་ཡིན་པའི་ཕྱོགས་སུ་ལྟུང་ཞིང་བྱའོ། །དབྱར་ཚུལ་དུ་ཞུགས་པ་ལས་དགེ་སློང་ཁ་ཅིག་ཆོས་ལོག་པ་ལ་བལྟས་ཤིང་མི་དགེ་བ་ལ་ཕྱོགས་ནི་ཚུལ་གྱི་ཡོན་ཏན་དང་རྙེད་པའི་ཡོན་སྐལ་གཉིས་ཀ་ལས་མི་དབང་ངོ༌། །དེ་བཞིན་དུ་དགེ་སློང་འགའ་ཞིག་གིས་ཚུལ་གྱི་ཚེ་སེམས་ལོག་པ་ལ་ཕྱོགས་ཤིང་ཕྱི་རོལ་གྱི་ཚུལ་དགེ་སློང་ལྟར་བསྲུངས་ནས་ལོག་པར་ལྟ་བའི་གྲོགས་ཀྱི་གན་དུ་ཞག་ལོན་པ་ཡང་ཚུལ་གྱི་ཡོན་ཏན་དང་རྙེད་པའི་ཡོན་སྐལ་གཉིས་ཀ་མི་དབང་ངོ༌། །རྩ་བའི་དུས་དང༌། ཚུལ་ཐོག་མར་དང་པོ་ཞུགས་ཚུན་ཆད་ནས། དབྱུང་བའི་མཐའ་དང༌། ཚུལ་ནས་བྱུང་སྟེ་གདིང་བ་དྲུབས་པ་ཡན་ཆད་ཀྱི་བར་དུ། དབྱར་གྱི་ཕྱིར་བ་དང༌། དབྱར་ཟླ་བ་གསུམ་གྱི་ཚེ་ཡོན་དང་ཆོས་གོས་རྙེད་པ་ལས་གདིང་བའི་ཆོས་གོས་སུ་བྱས་ཀྱང་རུང༌། གདིང་བའི་ཉིན་པར་གྱི་མཐར་གཏོགས་པ་གོས་ཀྱི་རྙེད་པར་གཏོགས་པའི་ཆོས་གོས་གསུམ་མོ། །གདིང་བ་འདྲུབ་པའི་ཉིན་པར་སུའང་རུང་སྟེ་ཡོན་བདག་གཅིག་གིས་གདིང་བའི་ཆོས་གོས་ཕུལ་ན་དེ་དེ་ལས་གདིང་བའི་
ཆོས་བྱས་ཀྱང་རུང་སྟེ་རྙེད་པ་འདི་རྣམས་གཉིས་ལས་གང་ཡང་རུང་སྟེ་ཆོས་གོས་ཆེ་ཆུང་གསུམ་སྦྱར་ལ་གདིང་བ་དྲུབ་པར་བྱའོ། །དགེ་འདུན་གྱིའོ། །གདིང་བའི་ཆོས་གོས་མདོ་ལྟག་མ་ལྟར་རྙེད་པ་མེད་ན་དགེ་འདུན་གྱི་སྤྱིའི་དཀོར་ལས་ཕྱུང་སྟེ་ཆོས་གོས་གསུམ་བྱའོ། །མ་བསུབས་བ་དང། ཆོས་གོས་སྤུ་ཅན་དང་བསྲུབས་ཤིང་ཕུར་པ་ལྟ་བུ་དང༌། ཁམ་ཁུམ་མེད་པ་དང༌། རས་སང་སེང་དུ་འདུག་ཅིང་ཐགས་བཟང་ངན་དུ་འདུག་པ་དང༌། མ་མུག་པ་དང༌། རུལ་ཅིང་མུག་པའི་རས་སྙི་བ་དང༌། སྲབ་མོ་མ་ཡིན་པ་དང༌། སེང་རས་སྲབ་མོ་དང་མིང་གིས་སྨོས་པ་འདི་རྣམས་ལས་ཆོས་གོས་གསུམ་མི་བྱའོ། །ཁ་དོག་ཅན་མ་ཡིན་པ་མ་ཡིན་ནོ། །གདིང་བའི་ཆོས་གོས་ཁ་དོག་མ་བསྒྱུར་བ་དང༌། ཚོན་མ་བརྟགས་པ་ལས་མི་བྱ། མ་སྤྱད་པ་སྲ་བ། རས་སྔོན་སྤྱོད་སྤྱོད་པ་རྙིང་པ་མ་ཡིན་པ་སྲ་བ་ལ་གདིང་བའི་ཆོས་སུ་བྱའོ། །གསར་ཡང་སྣོན་རྙིང་ཅན་སྙི་བ་ལས་མི་བྱ། གོ་འདུན་དང༌། རྒྱུ་སྤུན་རིགས་ཐ་དད་དེ་གོ་འདུན་དུ་བྱས་པ་དང་རས་མ་སྣ་ཚོགས་སུ་བསྡུས་ཏེ་བྱས་པ་དང༌། ལྷན་པ་ཅན་དང༌། མཚོན་གྱིས་ཁྲ་བོར་བཏགས་པ་ཕུར་མ་ཅན་དང༌། ཤིང་ལོ་དང་སེམས་ཅན་གྱི་གཟུགས་སུ་བཏགས་པ་དང༌། བསུལ་བ་དང༌། རས་ཀྱི་སྤུན་ཕྲ་སྦོམ་དུ་བྱས་ཏེ་བཏགས་པ་དང༌། བསྐོར་བ་ལས་མ་ཡིན་ནོ། །རས་ཀྱི་མཐའ་མ་རིགས་གཞན་གྱིས་བྱས་ཏེ་བསྐོར་ཅིང་བཏགས་པ་དང་འདི་རྣམས་ལྟ་བུའི་རྒྱུ་ལས་གདིང་བའི་ཆོས་གོས་གསུམ་དུ་མི་བྱ། སྤང་བར་དང༌། སྔོན་སྤང་བར་འགྱུར། བའི་ཆོས་གོས་དང༌། མ་བཏགས་པ་དང༌། སྤང་བ་ལྟུང་བ་ཡོད་པའི་ཁྲིམས་ཀྱི་རྫས་ཕྱིས་འོངས་པའང་སྤང་དགོས་པར་འགྱུར་བའི་རིས་སོང་སྟེ་སླར་འོངས་པ་མ་ཡིན་པ་ལས་སོ། །སྔོན་རོ་ལ་བསྔོས་ཤིང་གཡོགས་པའི་རས་འདི་རྣམས་ལས་གདིང་བའི་ཆོས་གོས་སུ་མི་བྱ། དྲས་དྲུབས་པ་ལྟག་ཏུ་སྨོས་པ་ལྟ་བུ་ནི་མ་ཡིན་གྱི་རས་བཟང་པོ་གཙང་མ་ཚུལ་བཞིན་དུ་དྲས་ཤིང་དྲུབས་པ་ལས་གདིང་པའི་ཆོས་གོས་བྱའོ། །ཟིན་པ། རས་བརྟགས་ཤིང་བཀྲུས་ལ་བཙོས་ཏེ་དྲས་ཤིང་དྲུབས་ཟིན་པ་ལ་བྱའོ། །ལྔ་པ། ཆུར་ཁྲུ་ལྔ་ཞེང་དུ་ཁྲུ་གསུམ་ཡོད་པ་ལས་བྱའོ། །ལྷག་མ་ཡང་ངོ༌། །ཁྲུ་གསུམ་དང་ལྔ་ལས་
ལྷག་ཀྱང་གདིང་བའི་ཆོས་གོས་སུ་རུང་ངོ༌། །སྔོན་མ་བཏིང་བ། སྔོན་དྲུབས་ཤིང་བཏིང་བའི་ཆོས་གོས་མ་ཡིན་པ་ལས་བྱ། བཏིང་སྟེའོ། །ཆོས་གོས་དྲུབས་པ་ནི་སློབ་མའི་ནང་དུ་བཏབ་སྟེ་བཏིང་ལ་གཞག་གོ །དུ་མ་ཡང་ངོ༌། །ཡོན་བདག་སོ་སོ་ནས་ཕྲུགས་མང་པོ་ཞིག་ཕུལ་ན་དུ་ཕུལ་བ་བཞིན་དུ་བླངས་ཏེ་ཟད་པར་བླངས་ཏེ་གདིང་ངོ༌། །དེ་ཅི་ཙམ་པར་གདིང་ངོ༌། །ཆོས་གོས་སུམ་ཕྲུགས་མང་པོ་ཞིག་བཏིང་ན་ཕྲུགས་རེར་དགེ་སློང་རེ་རེ་སྲུང་མར་གཞག་གོ །ཆོས་གོས་གཞན་བསྔོ་བའང་འདི་བཞིན་ཏེ་དེ་བས་ན་ཕྱུང་སྟེ་བསྔོ། གདིང་བ་དྲུབ་པའི་ཚེ་དགེ་སློང་སོ་སོའི་ཆོས་གོས་རྙིང་པའི་སྔགས་ཕྱུང་ལ་གདིང་པ་དྲུབ་པའི་ཆོས་གོས་དྲུབས་ཏེ་དེ་ལ་སྔགས་གདབ་པ་ནི་མི་དགོས་སོ། །འདུས་པ་ལ་མ་གནས་པས་དད་པར་བྱ། གདིང་པ་དྲུབ་པའི་ཆོས་གོས་དགེ་སློང་གང་ཤོམ་ཤིང་ཞལ་ཏ་བྱེད་པ་དེས་རྙེད་ཅིང་ཟིན་མ་ཐག་ཏུ་བདག་གི་ལག་ན་ཞག་ལོན་པར་མི་གཞག་གི་དགེ་འདུན་ལ་འདི་རུང་ངམ་མི་རུང་ཞེས་སྤྱད་བྲིམ་ཞིང་བསྟན་པར་བྱའོ། །མཚམས་ཀྱི་ནང་དུ་བསྐོ། །ཆོས་གོས་དྲུབ་པར་གདིང་བ་ནི་མཚམས་ཀྱི་ཕྱི་རོལ་དུ་མི་བྱའི། མཚམས་ཀྱི་ནང་དུ་གདིང་བའི་ལས་བྱ་ཞིང་དྲུབ་པོ། །གདིང་བ་ཡང་ངོ༌། །ཆོས་གོས་དྲུབ་པར་གདིང་བའི་དགེ་སློང་སྲུང་མ་གཅིག་སུ་དད་པ་ལས་གསོལ་བ་དང་ཞུ་བའི་ལས་ཀྱིས་བསྐོ། །གང་ལ་དེ་ལ་གསོལ་བས་དེ་ལྟར་སྦྱིན་གདིང་བ་དྲུབས་པའི་སྲུང་མའི་དགེ་སློང་བསྐོ་བ་ནི་གོས་ལྔ་དང་ལྡན་ཞིང་ཞེ་སྡང་དང་གཏི་མུག་དང་འཇིགས་པ་དང་ལྡན་པ་མ་ཡིན་པ་མཁས་ཤིང་ཚུལ་དང་ལྡན་ལ་ཚུལ་དུ་ཡང་ཞུགས་ཤིང་སྲུང་མའི་ཡོན་ཏན་བཅུ་དང་རྙེད་པའི་སྐལ་བ་ཡང་ཐོབ་པ་ལས་བསྐོ། །གདིང་བ་མི་དྲུབ་པའི་སྔོན་ལོགས་ནས་བསྐོ། །བཀྲུ་བ་དང་དྲུབ་པ་དང་བཙོ་བ་དེས་སྔོན་དུ་བྱ། གདིང་བ་དྲུབ་པའི་སྲུང་མར་བསྐོས་པའི་དགེ་སློང་དེས་ལས་སུ་བྱ་པ་ནི་དྲུབ་པའི་ཆོས་གོས་རྒྱུ་ཞིག་ཡོད་ན་དགེ་འདུན་བསྡུས་ལ་བཀྲུ་བཙོ་བཙེམ་པའི་ཞལ་ཏ་བྱ་སྟེ་གདིང་བ་འདྲུབ་པའི་ཚེ་ཟིན་པར་བྱ། གཉིས་སམ་གསུམ་དུ་ནན་ཏན་དུ་བྱ། གདིང་བ་དྲུབ་པའི་ཆོས་གོས་བཀྲུ་བ་དང་བཙོ་བ་དང་བཙེམ་པ་ལ་སོགས་པ་ལེ་ལོ་མི་བྱ་བར་ནན་ཏན་བྱ། ཟིན་པ་ཞིག་དྲུབ་ན་བདག་གིས་ཁབ་ཁམ་
གཉིས་གསུམ་དྲུབ། གདིང་བ་དྲུབ་པའི་ཆོས་གོས་བཙོས་ཤིང་དྲུབས་ཟིན་པ་ཞིག་ཉོས་ཀྱང་རུང་གཞན་གྱིས་ཡོན་དུ་ཕུལ་ཀྱང་རུང་སྟེ་རྙེད་ན་དྲུབས་པའི་སྲུང་མར་བསྐོས་པའི་དགེ་སློང་དེས་སྐུང་པ་ཁམ་གཉིས་སམ་གསུམ་དྲུབ་ཅིང་བཙེམ་དགོས་སོ། །བླངས་པ་དང་བདག་གིས་བྱས་པ། གདིང་བའི་ཆོས་གོས་ཐོག་མ་རྙེད་དེ་ལེན་པའི་ཚེ་ན་སྲུང་བའི་དགེ་སློང་དུ་བསྐོས་པ་དེས་དགེ་འདུན་གྱི་དྲུབ་པར་བྱའོ་སྙམ་དུ་བསམས་ཏེ་བླང༌། ཟིན་པ་དང་གདིང་བ་དང༌། ཆོས་གོས་བཙོས་ཤིང་དྲུབས་ཟིན་ནས་གདིང་པའི་ཚེའང་དགེ་འདུན་གྱིར་བྱའོ་སྙམ་དུ་བསམས། གདིང་བ་དང་བཏིང་བའི་རིམ་བཞིན་དུ་སེམས་བསྐྱེད། གདིང་བའི་ཆོས་གོས་བཏིང་ཟིན་ཀྱང་སྲུང་བའི་དགེ་སློང་གིས་དགེ་འདུན་གྱི་གདིང་བ་བཏིང་ཟིན་ཏོ་སྙམ་དུ་བསམ། ཐོག་མ་དྲི་བ་ཡང་མ་སྐྱེས་པ་མ་ཡིན་ནོ། །མདོ་ལྟག་མ་ལས་གདིང་བ་བྱ་བ་ལ་བསམ་པའི་རྒྱུད་གསུམ་ཡོད་པ་དང་པོ་གཉིས་མ་བསམས་ན་གང་ཟག་དེ་ལ་ཉེས་བྱས་ཏེ་གདིང་བར་ནི་ཆུད་དོ། །ཐ་མ་དགེ་འདུན་གྱི་གདིང་བ་བཏིང་ཟིན་ཏོ་སྙམ་མ་བསམས་ན་གདིང་བ་དྲུབས་པར་མི་ཆུད་དོ། །ཚེ་དང་ལྡན་པ་སང་ཁོ་བོ་དྲུབས་པ་གདིང་གི་ཚེ་དང་ལྡན་པ་དག་བདག་བདག་གི་ཆོས་གོས་སྔགས་བྱུང་ཤིག་ཅེས་འདུས་པ་ལ་ཞུ། གདིང་བ་དྲུབ་པའི་ཞག་གཅིག་གིས་སྔ་ལོགས་སུ་ཆོས་གོས་སྲུང་པའི་དགེ་སློང་དེས་དགེ་འདུན་ཐམས་ཅད་ལ་ངས་དྲུབས་པ་གདིང་གི་སོ་སོའི་ཆོས་གོས་སྔགས་ཕྱུང་ཤིག་ཅེས་བསྒོ། །འདུ་བར་ཆུད་ན་ནན་ཏན་བྱ། གདིང་བ་དྲུབ་པའི་ནང་པར་པོག་སྤོས་ལ་སོགས་པ་མཆོད་པའི་ཡོ་བྱད་དང་གཙུག་ལག་ཁང་བརྒྱན་ཅིང་ཕྱི་བདར་བྱ། སྤོས་དང་མེ་ཏོག་གི་མཆོད་པ་དང་རབ་ཏུ་ཞིམ་པོའི་བདུག་པས་བདུགས་ཏེ་གཞོར་པ་ཞབས་ཅན་གྱི་སྟེང་དུ་བཞག་ལ་གཅིག་གི་སྟེང་དུ་དུ་མ་བླངས་ཏེ་བླ་མ་འགྲེངས་ལ་གདིང་བ་སྒྲུབ་པོ། །གདིང་བར་དྲུབ་པའི་ཆོས་གོས་ལ་མེ་ཏོག་དང་པོག་སྤོས་ལ་སོགས་པ་དྲི་ཞིམ་པོས་བདུག་ཅིང་མཆོད་དེ་སློ་མའམ་གཞོང་པ་ཞབས་ཅན་གྱི་ནང་དུ་ཆོས་གོས་སུམ་ཕྲུགས་སུ་གདིང་བ་ཀུན་བཏིང་སྟེ་གཅིག་གི་ཐོག་ཏུ་གཅིག་བཞག་ལ་གདིང་བ་སྲུང་བའི་དགེ་སློང་གི་ལག་ཏུ་ཁྱེར་ཏེ་འགྲེངས་ལ་དགེ་འདུན་ཀུན་ལ་མཐར་གྱིས་བསྟན་
ཏེ་གདིང་བར་རུང་ངམ་མི་རུང་མཉེས་སམ་མ་མཉེས་ཞེས་བྱ། ཞག་གཅིག་ལའོ། །གདིང་བ་དྲུབ་པ་ནི་ཉིན་ཞག་གཅིག་ཚུན་ཆད་དུ་དྲུབ་པ་ལས་བྱའོ། །སྟོན་ཟླ་ཐ་ཆུངས་ཀྱིའོ། །ཉིན་ཞག་གཅིག་ཚུན་ཆད་གདིང་བ་སྟོན་ཟླ་ཐ་ཆུང་ཚེས་བཅུ་དྲུག་གི་ཉིན་ཞག་གཅིག་ཚུན་ཆད་ལ་བྱ། ཚིག་གསུམ་མོ། །གདིང་བའི་སྔགས་བྱ་བ་ནི་ཚིག་ལན་གསུམ་དུ་བཟླས་སོ། །ཚིག་གསུམ་དུ་བཟླས་དགོས་པ་ནི་མདོ་འོག་མ་གཉིས་ཀའི་སྔགས་ལ་བྱ། གདིང་ངོ་ཞེས་སོ། །དགེ་འདུན་གྱི་སྤྱིར་ཆོས་གོས་སྲུང་པའི་དགེ་སློང་གིས་བཙོས་ཀྱི་ལག་ན་ཁྱེར་ཏེ་བདག་གིས་དགེ་འདུན་གྱི་ཆོས་གོས་དྲུབ་པར་བགྱིའོ་ཞེས་ལན་གསུམ་བརྗོད་དོ། །དགེ་སློང་སོ་སོའི་མདུན་དུ་འདུག་སྟེ་གདིང་ངོ་ཞེས་བྱའོ། །དེ་ནས་དགེ་སློང་ཆོས་གོས་འདྲུབ་པའི་དགེ་སློང་གིས་ཆོས་གོས་ལག་ན་ཁྱེར་ཏེ་དགེ་སློང་སོ་སོའི་མདུན་དུ་འདུག་ལ་གསོལ་ཅིག །ཚེ་དང་ལྡན་པ་དག་གིས་གདིང་བ་བྱའོ་ཞེས་པ་ལ་སོགས་པའི་སྔགས་ལན་གསུམ་དུ་བཟླས་ཏེ་བྱའོ། །དགེ་བར་བཏིང་ངོ་ཤིན་ཏུ་བཏིང་ངོ༌། །སོ་སོའི་མདུན་དུ་སྔགས་བྱེད་པའི་ཚེ་རིམ་གྱིས་དགེ་སློང་གྲལ་ན་འདུག་པ་དེས་དགེ་བར་བཏིང་ངོ་ཤིན་ཏུ་བཏིང་ངོ་ཞེས་བྱ། གང་འདི་རྙེད་པའི་ཡོན་ཏན་དེ་དག་གིའོ་ཞེས་བྱའོ། །མི་གཅིག་གིས་སྔགས་ཟིན་ཅིང་རྗེས་ལ་རྙེད་པའི་ཡོན་ཏན་བདག་ཅག་གིའོ་ཞེས་སྨྲ། ཡོན་ཏན་ནི་རྣམ་པ་བཅུ་ཐོབ་པ་ལ་བྱ། རྙེད་པ་ནི་གདིང་པ་དྲུབ་པའི་ཟླ་བ་ལྔའི་ཚེ་ཡོན་དུ་རྙེད་དོ་ཅོག་དགེ་འདུན་དེ་རྣམས་ཀྱི་སྤྱིར་བསྡུ་བ་ལ་བྱ། མྱོང་བ་བཞིན་དུ་དེའི་རྗེས་སུ་ཡི་རང་བའོ། །གདིང་བ་དྲུབ་པའི་ཚེ་དགེ་སློང་ལ་ལ་ཞིག་གཉིད་ལོག་ནས་དགེ་འདུན་གྱིས་བསླངས་ཏེ་ཉལ་ཉལ་བ་དེས་རྗེས་སུ་ཡི་རང་ཞིང་དང་ངོ་ཞེས་སྨྲས་ན་དགེ་འདུན་གྱི་ལས་སུའང་རུང་བ་ཁོ་ཉིད་ཀྱི་སྐལ་པའི་སྔགས་ཀྱང་ལན་གསུམ་དུ་བྱའོ། །མངོན་པར་གྱུར་པས་སོ། །མདོ་ལྟག་མ་ལྟར་གཉིད་ལོག་པ་ཡང་དགེ་འདུན་གྱི་གྲལ་ན་ལོག་པ་ལ་བྱའི་ལྐོག་ན་བདག་གི་ལྐོག་ན་གཉིད་ལོག་པ་མ་ཡིན་ནོ། །དུས་དུས་སུ་བསྐམ། དུ་བ་དང་རྡུལ་གྱི་ཁྱིམ་དུ་མི་གཞག །གདིང་བ་དྲུབས་ཟིན་ནས་སྲུང་བའི་མི་དེས་དུས་དུས་སུ་ཆོས་གོས་བླ་རེ་ཡོད་པའི་འོག་ཏུ་སེར་བུ་ལ་བར་བར་བསྐམ་བསྲད་ཉི་མས་མ་ཕོག་པར་ཆོས་གོས་
བཀྲམ་ལ་སེར་བུ་ལ་བརྐྱང་སྟེ་བསྐམ་པ་ལ་བྱ། སྤྲུག་གདིང་པའི་ཆོས་གོས་དེ་སྤྲུག་ཅིང་ཕྱི་བདར་བྱ། དུ་བ་དང་རྡུལ་ཅན་གྱི་ཁྱིམ་དུ་དྲུབས་པའི་ཆོས་གོས་མི་གཞག །རྒྱལ་པོ་ཡིར་མ་ཡིན། རྒྱལ་པོའི་ཁྱིམ་དུ་ཆོས་གོས་དྲུབས་པ་དེ་མི་གཞག་མི་བསྐུར་དེ་ལས་མི་འབྲལ། གོས་དྲུབས་པ་མཚམས་ཀྱི་ནང་དུ་བཞག་ལ་སྲུང་བའི་དགེ་སློང་མཚམས་ཀྱི་ཕྱི་རོལ་དུ་ཞག་ཏུ་སོང་ལ་བྲལ་བར་མི་བྱ། བྱས་ན་ཉེས་བྱས། བླངས་ཏེ་གཞན་དུ་མི་འགྲོ། །གདིང་བ་དྲུབས་པའི་ཆོས་གོས་དེ་མཚམས་ཀྱི་ཕྱི་རོལ་དུ་ཁྱེར་ལ་མི་འགྲོ་སོང་སྟེ་མཚམས་འདས་ན་དྲུབས་པ་ཞིག་པར་འགྱུར་རོ། །མི་གཙང་བའི་གནས་སུ་མི་འཇུག །གདིང་བ་དྲུབས་པའི་ཆོས་གོས་ཁྱེར་ཏེ་བཤང་ས་དང་མི་གཙང་བར་མི་བྱ། བླ་གབ་མེད་པར་མི་འཇུག །གདིང་བ་དྲུབས་པའི་ཆོས་གོས་ཁྱེར་ལ་བླ་གབ་མེད་པའི་སར་མི་འཇུག །དབྱུང་བ་རྣམ་གཉིས་ཏེ། གདིང་བ་དྲུབས་ནས་དབྱུང་བ་རྣམས་གཉིས་ཏེ་བདག་གིས་ཕྱུང་བ་དང་གཞན་གྱིས་ཕྱུང་བའོ། །ཅི་ལྟ་བུ་ཡིན་པ་འོག་ནས་འཆད། བདག་དང་བཅོལ་བས་འཇུག་པའོ། །བདག་གིས་ཕྱུང་བ་ནི་གདིང་བ་དྲུབས་པ་ལས་གུད་དུ་སོང་སྟེ་ཕྱུང་བའོ། །གཞན་ལ་བཅོལ་ཏེ་ཕྱུང་བ་ནི་དགེ་འདུན་གྱིས་དྲུབས་པ་ཚུལ་བཞིན་དུ་ཕྱུང་བ་སྟེ་འོག་ནས་འཆད། བདག་གིས་འཇུག་པ་ནི་དྲུབ་པ་དང་མཚམས་གཞན་དུ་ཕྱིན་ནའོ། །དྲུབས་པ་བདག་གིས་བྱུང་ཞེས་བྱ་བ་ནི་གདིང་བ་དྲུབས་ཏེ་གཞག་པའི་མཚམས་དེ་ལས་ཕྱི་རོལ་དུ་དྲུབས་པའི་ཆོས་གོས་དང་བཅས་ཏེ་ཕྱུང་ན་ཞག་མ་ལོན་ཀྱང་དྲུབས་པས་ཞིག་གོ །དྲུབས་པ་ཞིག་ཀྱང་འབྲལ་བའི་སྤང་བའི་ལྟུང་བར་ནི་མི་འགྱུར་གྱི་ཞག་བཅུ་འདས་ཏེ་སྔགས་ཀྱིས་མ་ཐེབས་ན་འཆད་བའི་སྤང་བའི་ལྟུང་བར་འགྱུར་རོ། །བསྔོས་པ་མེད་པའི་མཚམས་སུ་སྐྱ་རེངས་ཤར་ནའོ། །མཚམས་ཀྱི་ནང་ན་ཚུལ་དུ་ཞུགས་ཤིང་དྲུབས་པ་བཏིང་བའི་དགེ་སློང་གཅིག་ཀྱང་མེད་པར་ཟད་པར་མཚམས་ཀྱི་ཕྱི་རོལ་དུ་བྱུང་ལ་ཆོས་གོས་ནང་དུ་ལུས་ན་དྲུབས་པ་བཏིང་བའི་དགེ་སློང་དུ་ཡོད་ཀྱང་དྲུབས་བ་ཞིག་པར་འགྱུར་རོ། །དྲུབས་པ་བཏིང་བའི་དགེ་སློང་ལས་གཅིག་ཡོད་ན་ནི་ཞིག་པར་མི་འགྱུར་རོ། །དེ་འགོར་གྱི་ནང་དུ་བཅད་ནའོ། །གདིང་བ་དྲུབས་པ་ལས་
གཞིག་ཏུ་འགྲོ་བར་བསམས་ཏེ་སོང་ན་གདིང་བ་དྲུབས་པ་ཞིག་པ་ཡིན་ཏེ་ཡོན་ཏན་རྣམ་པ་བཅུ་མི་དབང་ངོ༌། །དེ་ལྟར་སོང་བ་དྲུབས་པ་འཇིག་པ་རྣམ་པ་དྲུག་ཡོད་དེ་འོག་ནས་འཆད་དོ། །དེ་ལ་འདིའོ། །མདོ་ལྟག་མ་ལྟར་སོང་བའི་དགེ་སློང་དེ་ཉིད་འཇིག་གི་དགེ་སློང་གཞན་མི་འཇིག་གོ །མཚམས་འདས་ནས་འདི་མི་འགྲུབ་བོ། །ཡོན་ཏན་ལྟ་ཞིག་མ་ཐོབ་ཀྱང་རུང་གི་དྲུབས་པ་ལ་འབྱིན་པའི་ཚེ་སླར་མི་འཁོར་ཏེ་ཐལ་བྱུང་འགྲོ་བར་བསམས་པ་ནི་སོང་སྟེ་གཙུག་ལག་ཁང་གི་མཚམས་འདས་ན་དྲུབས་པ་ཞིག་པར་གྱུར་ཏོ། །མི་ལྡོག་པའི་སེམས་ཀྱིས་འགྲོ་བར་ནའོ། །མདོ་ལྟག་མ་ལྟར་སོང་སྟེ་དྲུབས་པ་འཇིག་པ་ཡང་སླར་མི་ལྡོག་པར་བསམས་ཏེ་སོང་ན་དྲུབས་པ་ཞིག་པར་གྱུར་ཏེ་དྲུག་ཡོད་པའི་གཅིག་འདི་ཡིན་ནོ། །འདི་ཕྱི་རོལ་དུ་མཚམས་སྐྱེས་ན་ཡང་ངོ༌། །མཚམས་ཀྱི་ཕྱི་རོལ་ན་འདུག་འདུག་པ་ལས་འབྲལ་བ་ལ་ཐལ་བྱུང་འགྲོ་བའི་སེམས་ཤིག་སྐྱེས་ཏེ་སོང་ན་ཞིག་པར་འགྱུར་རོ། །དྲུག་ཏུ་བརྩི་བ་ལ་གཉིས། གོས་བྱའོ་ཞེས་པའི་བསམ་པའི་རྒྱུད་ཀྱང་མེད་ན་དེ་བཞིན་ནོ། །མདོ་ལྟག་མ་གཉིས་ལྟར་སོང་བ་ཆོས་གོས་སམ་ཆོས་གོས་ཀྱི་རྒྱུ་ཞིག་བྱིན་ཀྱང་རུང་ཉོས་ཀྱང་རུང་སྟེ། ལེན་དུ་འགྲོ་བར་བསམས་པ་ནི་དྲུབས་པ་བསྲུང་བར་བསམ་ཀྱང་རུང་དྲལ་བར་བསམས་ཀྱང་རུང་དྲུབས་པ་ཞིག་པར་མི་འགྱུར་རོ། །བྱ་བར་ཡོད་པར་ལས་ཆད་ན་ཡང་ངོ༌། །མདོ་ལྟག་མ་ལྟར་ཆོས་གོས་ཀྱི་ཕྱིར་སོང་སོང་བ་ལས་མཚམས་ཀྱི་ཕྱི་རོལ་ནས་ཆོས་གོས་མི་དགོས་པར་བསམས་ཏེ་གཞན་གྱི་ཕྱི་རོལ་སོང་བ་ནི་དེ་མ་ཐག་ཏུ་དྲུ་བས་པ་ཞིག་གོ །སླར་ལྡོག་ཀྱང་ངོ༌། །ཆོས་གོས་ཀྱི་ཕྱིར་སོང་སོང་སྟེ་དྲུབས་པ་དྲལ་བར་བསམས་པ་ལས་ལམ་ནས་སླར་ལོག་པ་ནི་སླར་མཚམས་སུ་ཕྱིན་ན་ཞིག །གསུམ་དུ་བྱེད་ན་འང་གནས་འདི་བཞིན་བསམ་པ་ཆད་པ་བརྩམས་པ་སྟོང་ཟིན་ནའོ། །དྲུབས་པ་བཏིང་བའི་ཚེ་ཆོས་གོས་ཀྱི་ཕྱིར་སོང་སོང་བ་ལས་ཆོས་གོས་མ་ཟིན་པར་རྒྱུར་ཐོབ་སྟེ་བདག་གི་ལག་ནས་སྟོར་ན་དྲུབས་པ་ཞིག་སྟེ་གཅིག །ཆོས་གོས་མ་བྱིན་ནམ་མེད་དེ་དོན་མ་གྲུབ་ནའང་ཞིག་སྟེ་རྣམ་པ་གཉིས། ཆོས་གོས་ཞིག་ཏུ་རྙེད་དེ་ཐོབ་ནས་ལུས་ལ་གྱོན་ནའང་དྲུབས་
པ་ཞིག་སྟེ་གསུམ། འདི་གསུམ་དེ་མ་ཐག་ཏུ་དྲུབས་པ་ཞིག་པར་འགྱུར་རོ། །དྲུག་ཏུ་བརྩི་བ་ལ་གོང་མ་གཉིས་ཀྱི་སྟེང་དུ་འདི་གསུམ་གྱིས་བསྣན་ཏེ་ལྔ། དབྱུང་བ་ལ་ཡིད་གཉིས་ཀྱང་བཅད་པ་བཞིན་ནོ། །དྲུབས་པ་བཏིང་བའི་ཚེ་གུད་དུ་སོང་སྟེ་དྲུབས་པ་དྲལ་ལམ་མི་དྲལ་བ་དང་ཆོས་གོས་ཀྱི་ཕྱིར་འགྲོ་འམ་མི་འགྲོ་ཐེ་ཚོམ་ཟ་བཞིན་དུ་སོང་བ་ནི་མཚམས་འདས་མ་ཐག་ཏུ་དྲུབས་པ་ཞིག་པར་འགྱུར་རོ། །དྲུབས་བ་བདག་གིས་ཕྱུང་བ་ནི་འདི་དང་དྲུག །ལས་གཞན་གྱི་བྱ་བ་མི་བྱའོ། །དགེ་འདུན་དྲུབས་པ་འབྱིན་པ་ནི་དགེ་འདུན་དང་ཆོས་གོས་སུ་བཅས་པར་མཚམས་ཀྱི་ཕྱི་རོལ་དུ་དོང་བ་དང་ཆོས་གོས་བཞག་སྟེ་དགེ་འདུན་ཟད་པར་མཚམས་ཀྱི་ཕྱི་རོལ་དུ་དོང་བ་དང་རྣམ་གཉིས་ནི་དྲུབས་པ་ཕྱུང་བར་ནི་འགྱུར་མོད་ཀྱི། དགེ་འདུན་ལ་ཉེས་བྱས་སུ་འགྱུར་བས་དེ་ལྟར་མི་བྱའི་མཚམས་ཀྱི་ནང་དུ་གསོལ་བ་དང་ཞུ་བས་དྲུབས་པར་དབྱུང་ངོ༌།། འདི་ནི་གཞན་ལ་བཅོལ་ཏེ་དྲུབས་པ་སྒྱུ་མ་ཕྱུང་བ་ཞེས་བྱའོ། །དཔྱིད་ཟླ་ར་བའི་དུས་ལའོ། །གདིང་བ་དྲུབས་པའི་དབྱུང་བ་ནི་དཔྱིད་ཟླ་ར་བའི་ཉ་ལ་བྱའོ། །མདོ་བཞིན་པའོ། །དཔྱིད་ཟླར་བའི་ཉ་ནི་ལོ་སྔ་མ་འམ་ཕྱི་མ་ལ་མི་བྱའི་ཚུལ་ནས་བྱུང་བའི་དྲུབས་པ་ཟླ་བ་ལྔར་བསྲུངས་བའི་རྗེས་བཞིན་པའི་དཔྱིད་ཟླ་ར་བའི་ཉ་ལ་བྱའོ། །བཅོམ་པའི་ཕྱིར་ན་ཚུན་ཆད་དུ་ཡང་ངོ༌། །དྲུབས་པ་བཏིང་བའི་ཚེ་དགེ་སློང་ཁ་ཅིག་རྐུན་པོའམ་ཆོམ་པོ་ཕྱུང་སྟེ་གོས་མེད་པའི་རྐྱེན་བྱུང་སྟེ་དྲུབས་པ་དུས་ལས་སྔར་ཕྱུང་སྟེ་གོས་དགོས་པ་ན་ཉེས་མེད་དོ། །འདིར་མ་མྱོང་པ་ནི་ཐོས་ཀྱི་བར་དུ་ཡོན་ཏན་རྗེས་སུ་འཇུག་གོ །མདོ་ལྟག་མ་ལྟར་དགེ་སློང་ཁ་ཅིག་གིས་གདིང་བ་དྲུབས་པ་ཕྱུང་ལ་དགེ་སློང་གུད་དུ་དོང་བ་ཁ་ཅིག་གིས་དྲུབས་པ་ཕྱུང་བར་མ་ཚོར་ཞིང་མ་ཐོས་ན་གོས་སྔགས་ཀྱིས་མ་ཐེབས་པ་ལ་སོགས་པ་ཡོད་ན་ཡོན་ཏན་བཅུའི་ཉེས་པ་ཐོབ་ཀྱི་བར་དུ་མེད་དོ། །རྒྱུན་མེད་ནའོ། །དྲུབས་པ་ཕྱུང་བར་ཐོས་ཀྱང་བདག་གི་ཆོས་གོས་མ་ཟིན་ཏེ་འཚེམ་པ་ལ་སོགས་པ་ལས་རྒྱུན་མ་ཆད་པར་བྱེད་པ་ནི་ཟིན་གྱི་བར་དུ་སྔགས་མ་ཐེབས་ཀྱང་ཉེས་མེད་དོ། །རྒྱུན་ཆད་ཀྱི་བར་དུ། དྲུབས་པ་ཕྱུང་བར་ཐོས་ནས་ཆོས་གོས་ཀྱི་རྒྱུ་ཞིག་ལག་ཏུ་ཐོབ་སྟེ་སྟོར་བ་རྙེད་དུ་རེ་བ་
ལས་བྱེ་བྲག་ཕྱེ་སྟེ་མ་རྙེད་པ་དང་ཆོས་གོས་རྙེད་ནས་སྔགས་ཀྱིས་མ་བཏབ་པ་ནི་ཉེས་བྱས་པར་འགྱུར་རོ། །མ་ཕྱུང་གི་བར་དུ་ཐམས་ཅད་ཀྱིས་དེའི་དུས་ཀྱི་བར་དུ་མི་བགོ །ཚུམ་པོ་རྐུན་པོ་ལ་སོགས་པའི་རྐྱེན་བྱུང་སྟེ་གོས་མེད་ཕར་མ་གྱུར་གྱི་པར་དུ་གདིང་བ་འབྱིན་པའི་དུས་ལས་སྔར་གདིང་བ་ཕྱུང་ཞིང་རྙེད་པའི་ཡོན་ལ་སོགས་པ་བགོ་བར་མི་བྱའོ། །དྲུབས་པའི་དངོས་པོའོ། །ཅི་ལྟར་བྱུང་ནས་གདིང༌། དྲུབས་པ་གདིང་བའི་དུས་ནི་རྒྱལ་པོ་དང་སྐར་མཁན་ཀྱིས་ཤོལ་བོར་བྱས་ཀྱང་དེ་བརྩན་པར་མི་བྱའི་ཟླ་གྲངས་དང་ཞག་གྲངས་རིམ་བཞིན་དུ་བརྩིས་ཏེ་དྲུབ་པོ། །ཚུལ་དུ་འཇུག་པ་ནི་སྐར་མཁན་གྱིས་ཤོལ་བོར་བ་བཞིན་དུ་བྱའོ། །གསོ་སྦྱོང་དང་མི་ཉེ་བ་མ་ཡིན། གདིང་བ་དྲུབས་པ་ནི་ཚུལ་ནས་བྱུང་བ་ཉིད་གསོ་སྦྱོང་བྱས་པ་ཡིན་པས་ཚུལ་ནས་བྱུང་ནས་ཞག་གཅིག་ལོན་ཏེ་གདིང་བ་དྲུབ་པོ། །དགེ་སློང་འཐབ་མོ་པ་འོང་པར་ཐོས་ནས་ཞག་དུས་ལས་སྔར་ཚུལ་ནས་བྱུང་བ་ནི་གདིང་བ་དེའི་རྗེས་ལ་མི་དྲུབས་ཀྱི་དུས་བཞིན་དུ་སྟོན་ཟླ་འབྲིང་པོ་ཚེ་བཅོ་ལྔ་ལ་གསོ་སྦྱོང་ཡང་བྱས་ལ་བཅུ་དྲུག་ལ་གདིང་བ་དྲུབ་པར་བྱའོ། །དབྱུང་བ་ན་ཡང་ངོ༌། །གདིང་བ་དབྱུང་བ་ཡང་གསོ་སྦྱོང་བྱས་པའི་འོག་ཏུ་གདིང་བ་དབྱུང་ངོ༌། །དེ་ཉིད་ཀྱི་ཉི་མ་ལའོ། །གསོ་སྦྱོང་བྱས་ནས་གདིང་བ་དབྱུང་བ་ནི་དཔྱིད་ཟླ་ར་བའི་ཚེས་བཅོ་ལྔ་ལ་སྔ་དྲོ་གསོ་སྦྱོང་བྱས་ལ་ཕྱི་དྲོ་གདིང་བ་དབྱུང་ངོ༌། །ཡང་གསོ་སྦྱོང་བྱས་ན་ཕྱུང་བ་བཞིན། ཚུལ་ནས་འབྱུང་བའི་ཚེ་ན་གསོ་སྦྱོང་མི་དགོས་ཏེ་ཚུལ་ནས་བྱུང་བ་ཉིད་གསོ་སྦྱོང་བྱས་པ་ཡིན་ནོ། །དེ་ལ་ཚུལ་ནས་བྱུང་བ་དང་དྲུབས་པ་གདིང་བའི་ལས་བྱས་ཟིན་པའི་འོག་ཏུ་གུད་ནས་དགེ་སློང་དག་གཅིག་འོངས་ཏེ་ཞག་གྲངས་འཁྲུལ་གྱི་གདོད་བྱ་དགོས་སོ་ཞེས་ཟེར་ན་དགེ་སློང་ཕྱིས་འོངས་པ་གྲངས་མང་ན་དེ་བརྩན་པར་བྱ་དགོས་ཏེ་ཚུལ་ནས་འབྱུང་བ་དང་དྲུབས་པ་གདིང་བ་གདོད་བླས་ཏེ་བྱ་དགོས་སོ། །བཏིང་ནས་ཕྱེད་ན་དེ་ཐ་དད་དུ་གྲུབ་པོ། །བཏིང་བ་དྲུབས་ཟིན་པའི་འོག་ཏུ་དགེ་སློང་ཁ་ཅིག་ལོག་པ་ལ་བསྟས་ན་ཡོན་ཏན་བཅུ་དང་རྙེད་པའི་ཡོན་སྐལ་ནི་དབང་སྟེ་འོག་ནས་ཀྱང་འཆད། དྲུབས་པ་དབྱུང་བ་ནི་དགེ་བ་ལ་ཕྱོགས་པའི་དགེ་སློང་གོས་སྔར་
ཕྱུང་ལ་དེའི་འོག་ཏུ་མི་དགེ་བ་ལ་བལྟས་པ་དབྱུང་ངོ༌། །གཅིག་གིས་ཕྱུང་གཅིག་གིས་མ་ཕྱུང་ན་ཕྱུང་བར་མི་ཆུད་དོ། །ཆོས་སུ་སྨྲ་བ་དེ་དག་གིས་གདིང་ངོ༌། །གདིང་བ་མ་དྲུབས་པའི་མདུན་དུ་དགེ་སློང་ཁ་ཅིག་ལོག་པ་ལ་བལྟས་ནས་དགེ་བ་ལ་ཕྱོགས་པའི་དགེ་སློང་ཉི་ཚེས་གདིང་བ་དྲུབ་པོ། ཡོན་ཏན་དང་རྙེད་པའི་ཡོན་སྐལ་མི་དགེ་བ་ལ་ཕྱོགས་པས་མི་ཐོབ་བོ། དེ་བྱེད་ནའང་གནས་དེ་དག་གིས་རྙེད་པ་ནི་དེ་དག་གིས་རིམས་སོ། །མདོ་ལྟག་མའི་ལྟག་མ་ལ་འཆད་དོ། །དགེ་བར་ལྟ་བ་མཐུན་ཞིང་གདིང་བ་དྲུབ་པ་ལས་དེའི་འོག་ཏུ་ཁ་ཅིག་མི་དགེ་བ་ལ་ཕྱོགས་པ་ཞིག་ཡོད་ན་གདིང་བ་གཅིག་ཏུ་དྲུབས་པའི་ཕྱིར་ཡོན་ཏན་བཅུ་དང་རྙེད་པའི་ཡོན་སྐལ་མི་དགེ་བ་ལ་ཕྱོགས་པའང་དབང་ངོ༌། །གཙུག་ལག་ཁང་དང་དགེ་འདུན་གྱི་རྐྱེན་གཏན་དུ་ཕུལ་ཞིང་རྒྱུན་དུ་སྦྱོང་བ་ལས་མི་དབང་ངོ༌། །སྤངས་པ་རང་བཞིན་པའི་གནས་སུ་སྐྱེ་བ་མ་ཡིན་ནོ། །དགེ་སློང་མའི་གནས་སུ་ཐོན་ཏེ་ཆད་པས་བཅད་པ་དང་སངས་རྒྱས་ཀྱིས་གསུངས་པ་ལ་བར་དུ་གཅོད་པར་མི་འགྱུར་རོ་ཞེས་ཟེར་བ་ལ་སོགས་པ་ནི་ཐལ་བྱུང་བསྐྲད་པ་ནི་མ་ཡིན་གྱི་མཚམས་ཀྱི་ནང་མཐའ་འཁོབ་གཅིག་ཏུ་འཁོད་པ་ལས་ཆད་པ་མེད་པ་དང་ཆད་པས་བཅད་པ་དེ་གཉིས་ཀ་དགེ་འདུན་དུ་ལོངས་པ་ཞིག་སྟེ་གདིང་བ་སོ་སོ་དྲུབས་པའང་ཆད་པ་ཡོད་པ་རྣམས་ཀྱིས་ཡོན་ཏན་བཅུ་དང་རྙེད་པ་མི་འཐོབ་བོ། །བསམ་པ་བཞག་ནས་གདིང་བའོ། །གདིང་བ་དྲུབ་པའི་ཚེ་གདིང་བ་དྲུབ་པར་ཡང་འདོད་ལ་ཡོན་ཏན་བཅུའང་འདོད་དེ་དད་ཕར་བྱས་ནས་གདིང་བ་དྲུབས་པ་ནི་གདིང་བ་དྲུབས་པ་ཐོབ་པར་འགྱུར་རོ། །དད་པ་བྱིན་པའི་དབང་གིས་ལྷན་ཅིག་བྱ་བ་ལྟག་མ་ནས་བྱས་པར་འགྱུར་རོ། །གདིང་བ་འདྲུབ་པའི་ཚེ་དད་པ་ཕུལ་ན་འདུས་པ་དང་འདྲ་སྟེ་ལས་སུ་ཡང་རུང་ཡོན་ཏན་བཅུ་དང་རྙེད་པའི་སྐལ་བའང་དབང་ངོ༌། །དེ་ལས་འཕྲལ་ན་ཕྱུང་བའོ། །གདིང་བ་དྲུབ་པའི་ཚེ་ན་ཡོན་ཏན་བཅུའང་ཅི་རུང་གིས་མི་དགོས། །གདིང་བ་དྲུབ་པའང་མི་དགོས་སྙམ་དུ་སེམས་ཤིང་གདོད་དྲུབ་པ་ནི་གང་ཟག་དེ་ཉིད་དྲུབས་པར་མི་ཆུད་དེ་དྲུབས་པ་ཕྱུང་བར་འགྱུར་རོ། །དེ་བས་ན་དད་པ་མ་བྱིན་པ་ཉལ་ལམ་བསམ་གཏན་དུ་ཞུགས་ཤིང་འདུག་ན་གདིང་བའམ་དབྱུང་བ་
མི་སྐྱེ་སྟེ་བརྙན་ཚུན་ཆད་དུའོ། །གདིང་བ་འདྲུབ་པ་ལ་དད་པ་མ་བྱིན་པར་བསམ་གཏན་དུ་ཞུགས་སམ་གཉིད་ལོག་པ་ལས་སྔགས་བྱེད་པའི་གོ་རིམས་སུ་བབས་ཏེ་བསླང་བ་དང་གདིང་བ་དྲུབ་པ་ལ་དད་པ་ནི་གདིང་བ་དྲུབས་པ་ཐོབ་བོ། །གདིང་བ་དྲུབ་པ་དང་ཡོན་ཏན་ཅི་དགོས་ཞེས་མ་དད་པའི་སེམས་སྐྱེས་ནས་དྲུབས་པ་བདག་གིས་བྱུང་བ་ཞེས་བྱ་སྟེ། དྲུབས་པར་མི་ཆུད་དོ། །གནས་པ་བཞིན་དུ་མཚམས་གཅིག་ཏུ་གདིང་སྟེ་གནས་གཞན་དུ་གནས་ནའོ། །མཚམས་ཆེན་པོ་དཔག་ཚད་ཕྱེད་དང་གསུམ་ཚུན་ཆད་ཀྱིས་བསྐོར་བའི་ནང་གཙུག་ལག་ཁང་སོ་སོར་འདུག་པ་མང་མོ་ཞིག་ཡོད་དེ་གདིང་བ་འདྲུབ་བའི་ཚེ་གཙུག་ལག་ཁང་དེ་ཀུན་གྱི་གདིང་བ་གཙུག་ལག་ཁང་གཅིག་ཏུ་དྲུབས་ན་དྲུབས་པར་ཆུད་དེ་ཉེས་མེད་དོ། །གདིང་བའི་ཚེ་གནས་དེ་བཞིན་ནོ། །གཙུག་ལག་ཁང་མང་མོ་ཞིག་སོ་སོན་འདུག་ལ་སོ་སོའི་མཚམས་བཅད་པ་མེད་ཀྱང་རུང་ཡོད་ཀྱང་རུང་གདིང་བ་འདྲུབ་པའི་ཚེ་མཚམས་བཀྲོལ་ཏེ་སྤྱིའི་མཚམས་གཅིག་ཏུ་བཅད་ལ་དྲུབས་པའང་ཉེས་མེད་དོ། །གང་དུ་བཏིང་ནས་མཚམས་བྱས་ཀྱང་གནས་སོ། །མཚམས་གཅིག་གི་ནང་ནས་གཙུག་ལག་ཁང་སོ་སོར་འདུག་པ་ཞིག་གདིང་བ་གཅིག་ཏུ་དྲུབས་པའི་འོག་ཏུ་སྤྱིའི་མཚམས་ཆེན་པོ་བཀྲོལ་ཏེ་མཚམས་བུ་ཆུང་སོ་སོར་བཅད་ན་འང་ཡོན་ཏན་བཅུ་དང་རྙེད་པའི་ཡོན་སྐལ་མེད་པར་མ་གྱུར་ཏེ་ཀུན་གྱིས་ཐོབ་བོ། །མཚམས་སོ་སོར་དེ་བཞིན་དུ་དབྱུང་བ་ནི་སོས་སོ། །མདོ་ལྟག་མ་ལྟར་གདིང་བ་སོ་སོར་དྲུབས་པའི་འོག་ཏུ་མཚམས་བུ་ཆུང་སོ་སོར་བཅད་པ་དྲུབས་འབྱིན་པ་ནི་འདུལ་བ་འཛིན་པ་ཁ་ཅིག་ན་རེ་དྲུབས་པའི་ཆོས་གོས་དེ་མཚམས་བུ་ཆུང་སོ་སོའི་སྟེང་དུ་ཁྱེར་ལ་དྲུབས་དབྱུང་ངོ་ཞེས་ཟེར་བ་ཁ་ཅིག་ནི་ཀུན་འདུས་ཏེ་གང་དུ་དྲུབས་པའི་གནས་དེར་གདིང་ངོ་ཞེས་ཟེར་རོ། །བྱེད་ན་ཕྱོགས་སོ་སོར་རོ། །ཚུལ་ཡང་གཅིག་ཏུ་ཞུགས་དྲུབས་པ་ཡང་གཅིག་ཏུ་བཏིང་བ་ལས་གཅིག་ལོག་པར་བལྟས་ཏེ་དགེ་བ་ལ་ཕྱོགས་པ་དང་སོ་སོར་གྱུར་ནའང་ཡོན་ཏན་བཅུ་དང་རྙེད་པའི་ཡོན་སྐལ་ཡོད་དོ། །མ་བཏིང་བས་བཏིང་བ་ཕྱུང་ན་ཡང་མ་ཕྱུང་བ་མ་ཡིན་ནོ། །དྲུབས་པ་བྱིན་པའི་ཁར་དགེ་
སློང་གཞི་ལ་འཁོད་བ་གུད་དུ་དོང་བའི་འོག་ཏུ་དྲུག་པ་བཏིང་བའི་དགེ་སློང་ལ་མ་གཏོགས་པའི་དགེ་སློང་དག་ཅིག་གུད་ནས་འོངས་ཏེ་དྲུབས་པ་ཕྱུང་ནའང་ལས་སུ་རུང་སྟེ་དགེ་སློང་བཞི་པ་ཀུན་ཀྱང་དྲུབས་པ་བྱུང་བར་འགྱུར་རོ། །མི་སྐྱེ་བ་དག་གིས་ནི་ཁམས་བསྐང་བ་མ་ཡིན་ནོ། །མ་བཏིང་བས་ཕྱུང་ནའང་མ་ཡིན་ནོ། །དྲུབ་པ་གདིང་བའི་ཚེ་ན་དགེ་འདུན་དུ་ལོངས་པས་འདྲུབ་ལ་དྲུབས་པ་འབྱིན་པའི་ཚེ་ན་དགེ་སློང་ཁ་ཅིག་ཤིའམ་ཁྲིམས་ཕུལ་ལམ་གུད་དུ་དོང་སྟེ་དགེ་འདུན་དུ་མ་ལོངས་ན་དགེ་སློང་གུད་ནས་བཀུག་ལ་དགེ་འདུན་དུ་ལོངས་པར་བྱས་ལ་དྲུབ་པར་དབྱུང་ངོ། །ཉེས་མེད་པ་ནི་བཏིང་བ་དྲུབས་ནས་སྦྱར་མ་མེད་པར་གྲོང་དུ་འཇུག་པ་ལ་སོགས་ཏེ་མངོན་སུམ་དུ་འདུག་པས་ཡང་ངོ༌། །དྲུབས་པ་བཏིང་བའི་ཚེ་ཡོན་ཏན་བཅུ་ཐོབ་པ་ལ་ལྟག་ཡ་གིར་བརྒྱད་སྨོས་ཟིན་ཏེ། གྲོང་དུ་ཆོས་གོས་ཆེན་པོ་མེད་པར་འགྲོ་བ་དང༌། ཁྱིམ་པའི་དྲུང་དུ་ཆོས་གོས་ཆེན་པོ་མེད་པར་འགྲོ་བ་དང་འདི་གཉིས་ཀྱིས་བསྣན་ཏེ་བཅུར་བརྩིའོ། །དྲུབས་པའི་དངོས་པོ་སྟེ་དྲིས་པར་ཆུད་པའོ། །དྲུབས་པའི་དངོས་པོ་རྫོགས་སོ།། །།མཚོན་གྱིས་མ་བཏབ་པར་གོས་མི་སྤྱད་ཆོས་གོས་གསུམ་དང་ཡོ་བྱད་བཅུ་གསུམ་དང་གོས་ལྷག་མ་ལ་སོགས་བ་ནི་གོས་ཞེས་བྱ་སྟེ་ཁབ་དང་གྲི་ལ་སོགས་པའི་མཚོན་གྱིས་མ་བཅད་ཅིང་མ་དྲས་པར་མི་བགོ་མི་སྤྱད་དོ། །དྲས་ཤིང་བཙེམས་པའི་ཆོས་གོས་བསྔོ། ཆོས་གོས་ཆེན་པོ་དང་གདིང་བ་ནི་མཚོན་གྱིས་མ་བཅད་ན་བསྔོ་བ་མི་འཆགས་ཏེ་ཇི་ལྟར་དྲ་ཞིང་བཙེམ་པ་འོག་ནས་འཆད་དོ། །དུམ་བུར་དྲས་པ་ལྷག་མ་དང་མཉམ་པར་སྟེ་དབུ་མ་ལས་གཞན་པ་དེ་དང་དེར་གཏགས་པའི་འདབ་མའི་ངོས་དང་མཐའ་སྐོར་ཡང་ངོ༌། །ཆོས་གོས་དྲས་ཤིང་བཙེམ་པའི་ཐབས་ནི་འདི་ལྟར་བྱ་སྟེ། མདོར་ན་ཆོས་གོས་ཉིད་ལ་བལྟས་ན་བརྡ་ཕྲད་པར་འགྱུར་རོ། །ནང་དུ་གནས་པ་དང་བླ་གབ་དང་སྦྱར་མ་ཡང་ངོ༌། །ཆོས་གོས་སྣམ་བུ་ལྔ་པ་དང་བདུན་པ་གཉིས་ནི་མཚོན་གྱིས་མ་བཅད་ཀྱང་རུང་ཆོས་གོས་ཆེན་པོ་ནི་མ་བཅད་ན་མི་རུང་སྟེ་སྔགས་མི་འཆགས་སོ། །གཉིས་ནི་སྔགས་ནི་འཆགས་ཏེ་ཉེས་བྱས་སོ། །བར་ཚངས་ཅན་དང་རྡུལ་གཟན་ཡང་ངོ༌། །མདོ་ལྟག་མའི་ནང་
ནས་ཆོས་གོས་གསུམ་བཤད་བ་ནི་དགེ་སློང་དབང་བ་ཡིན་དེའི་སྟེང་དུ་རྡུལ་གཟན་དང་བར་ཚངས་ཅན་གཉིས་ཀྱིས་བསྣན་ཏེ་ལྔ་ནི་དགེ་སློང་མའི་ཆོས་གོས་སུ་དབང་ངོ༌། །གང་དེའི་རྣམ་པས་དགེ་སློང་མའིའོ། །དགེ་སློང་ཕའི་ཆོས་གོས་གསུམ་བཤད་པ་བཞིན་དུ་དགེ་སློང་མས་ཀྱང་དྲ་ཞིང་བཙེམ་མོ། །བར་ཚངས་ཅན་དང་རྡུལ་གཟན་ནི་མ་དྲས་ཀྱང་རུང༌། བརྙས་པ་བྱུང་བ་ཡོད་ན་ཡང་ངོ༌། །ཆོས་གོས་མེད་དམ་རྐུན་པོས་ཁྱེར་བར་གྱུར་ན་གཞན་ལས་བརྙས་ཏེ་བདག་གིས་སྔགས་ཀྱིས་བཏབ་ནའང་རུང་ངོ༌། །སྐྱ་རེངས་འབྱུང་བར་འདི་དག་དང་བྲལ་བར་མི་བྱའོ། །ཆོས་གོས་རྐུན་པོས་ཁྱེར་རམ་མེས་ཚིག་ན་སྐྱ་རེངས་མ་བྱུང་ཚུན་ཆད་དུ་གཞན་ལ་བརྙས་ཏེ་སྔགས་ཀྱིས་ཐོབས་ཤིག །སྔགས་ཀྱང་མ་ཐེབས་ཏེ་སྐྱ་རེངས་བྱུང་ན་ཉེས་བྱས་རེ་རེར་འགྱུར་རོ། །གཞན་མ་འབྱོར་ན་མ་བཅོས་པ་ལ་བསྔོས་ཀྱང་སྐྱེའོ། །ཆོས་གོས་རྐུན་པོས་ཁྱེར་རམ་མེས་ཚིག་པའི་རྐྱེན་བྱུང་སྟེ་ཆོས་གོས་མེད་ཅིང་མ་རྙེད་ན་མ་དྲས་ཤིང་མ་དྲུབས་པ་ལ་སྔགས་བཏབ་ཀྱང་འཆགས་སོ། །མ་དྲས་ཀྱང་ངོ༌། །རྐྱེན་བྱུང་སྟེ་ཆོས་གོས་མ་རྙེད་ན་གསུམ་ཆར་སྣམ་བུར་བྱས་ཤིང་མ་དྲས་པ་ལ་སྔགས་བཏབ་ཀྱང་འཆགས་སོ། །འོན་ཏེ་འགྲུབ་ན་བྲེས་པ་འདི་སྦྱིན། ཆོས་གོས་རྐྱེན་བྱུང་སྟེ་མ་རྙེད་ན་ཚུལ་བུ་གུད་ནས་སྟེང་དུ་གླན་པའང་སྔགས་འཆགས་སོ། །ཁྱིམ་པའི་རྣམ་པ་ཡང་ངོ༌། །ཆོས་གོས་རྐྱེན་བྱུང་ནས་མི་རྙེད་པར་གྱུར་ཏེ་མི་རྙེད་ན་ཁྱིམ་པའི་གོས་ཤིག་ལ་སྔགས་བཏབ་ན་འཆགས་སོ། །ཕྱིང་པ་དང་ལ་བ་དང་བེའུ་རས་དང་སྣམ་བུ་སྦོམ་པོ་དང་སྲབ་མོ་མ་དྲས་པར་བྲེ་བ་བྱིན་ཏེ་བཙེམས་ན་ཡང་ངོ༌། །ཆོས་གོས་རྐུན་པོས་ཁྱེར་རམ་མེས་ཚིག་པའི་རྐྱེན་ཅིག་བྱུང་སྟེ་མ་རྙེད་ན་མིང་གིས་སྨོས་པ་འདི་རྣམས་ལ་སྣམ་བུ་གུད་ནས་བྱོས་ཏེ་བཙེམས་ཏེ་སྔགས་བཏབ་ནའང་འཆགས་སོ། །མལ་སྟན་མི་གཙང་པས་རེག་བར་གྱུར་ན་དེ་མ་ཐག་ཏུ་བཀྲུའོ། །མལ་སྟན་དགེ་འདུན་གྱིའམ་རུང་གང་ཟག་གི་ཡང་རུང་བཤང་གཅི་ལ་སོགས་པ་མི་གཙང་བས་རེག་ན་མོད་ལ་བཀྲུ་མ་བཀྲུས་ན་ཉེས་བྱས། གཡོགས་མའི་ཡིན་པའི་ཁྲི་དང་ཁྲིའུ་ལ་དེའི་མ་ཡིན་པའི་གདིང་བ་དང་འདུག་པའི་བར་དུ་བགོ་བའི་ནང་དུ་མ་
ཡིན་པར་དགེ་འདུན་གྱི་དེ་དག་མི་སྤྱད། དགེ་འདུན་གྱི་ཁྲི་དང་ཁྲིའུ་ཤལ་རྩུབ་པ་རྩུབ་ཅིང་ཚ་བའི་ཕྱིར་མ་སྨོས་ཀྱང་གདིང་བ་བྱེད་པར་འགྱུར་བས་དེ་ནི་མ་གཏེགས་ཀྱི་དགེ་འདུན་གྱི་མལ་སྟན་ལ་གདིང་བའམ་འདབ་མས་མ་གཡོགས་པར་མཐང་གིས་རེག་པ་བཏིང་ཞིང་སྤྱད་ན་ཉེས་བྱས། བྲིས་པ་རབ་ཏུ་མ་ཞིག་པ་ཐམས་ཅད་ལ་ཡང་ངོ༌། །སྟན་དང་གོས་རི་མོ་ཅན་ཁྲ་བོར་འདུག་བ་ལ་རི་མོ་མེད་པར་མ་གྱུར་ཏམ་གཞན་གྱིས་མ་གཡོགས་པར་སྤྱད་ན་ཉེས་བྱས། བརྟགས་པར་གྱུར་པའམ་དྲི་མ་ཅན་གྱིས་མ་ཡིན། གདིང་བ་མཚན་མ་ཙམ་དུ་ཆུང་དུས་བྱས་པ་དང་དྲི་མ་དང་སྣུམ་ཅན་ལ་སོགས་པས་གདིང་བ་བྱས་ན་ཉེས་བྱས། གདིང་བ་བཅང༌། གདིང་བ་བཅང་ཀྱང་ཉེས་མེད། སྟུག་ན་རིམ་གཅིག་ཀྱང་རིགས་སོ། །གདིང་བ་སྟུག་པོ་ལ་བྱས་ན་གཅིག་རིམ་དུ་བྱས་ཀྱང་རུང་ངོ༌། །སྲབ་ན་ཉིས་རིམ་དུ་བྱའོ། །གདིང་བསྲབ་མོ་ཞིག་ན་ཉིས་རིམ་དུ་བྱོས་ཤིག་རི་མོ་དང་ཉེ་བའི་རི་མོ་མ་བརྟགས་པའོ། །ཟ་བུ་དང་ཕྲུག་སྟན་དང་རི་མོ་ཅན་ལ་གདིང་བ་བྱས་ན་ཉེས་བྱས། གདིང་བ་ལ་འདབ་མའི་ངོས་བྱ། གདིང་བ་ལ་ཚལ་བུ་བྱས་ན་གདིང་བར་མི་ཆུད་དེ་ཉེས་བྱས། འོག་ཏུ་སུམ་ཆའི་སྟེང་དུའོ། །ཚལ་བུ་བྱ་བ་ནི་ཆུར་གསུམ་ཆ་སུམ་གཉིས་སུ་བཅད་དེ་སྲུབས་གདོད། དུམ་བུ་གཅིག་པ་ལ་མི་བསྔོ། །གདིང་བ་སྲུབས་མ་བཏོད་པར་ཐང་པ་ལ་བྱས་ན་སྔགས་མི་འཆགས། གཡན་པ་དགབ་དེ་ཡོད་པས་བཅངས། གཡན་པ་ཡོད་པས་གཡན་པ་དགབ་པ་བཅངས་ཀྱང་ཉེས་མེད། ཉི་མ་ལྔ་དྲུག་ཅིང་འདི་བཀྲུའོ། །གཡན་པ་དགབ་པའི་རས་ཉི་མ་ལྔ་དྲུག་ཅིང་བཀྲུའོ། །བརྟགས་པ་ནི་སྲིན་བལ་གྱི་དང་ཤན་ཀ་དང་གཤོ་མ་ཀའི་ཡང་ངོ༌། །མིང་གིས་སྨོས་པ་འདི་རྣམས་ནི་དགེ་སློང་གིས་གོས་སུ་བརྟགས་ཀྱང་ཉེས་མེད། རྒྱུ་སྤུན་མེད་པ་དང་གསོ་མའི་མ་ཡིན། གསོ་མའི་རས་དང་མཐོ་རིས་ཀྱི་གོས་ནི་མ་བརྟགས་པ་སྟེ་མི་སྤྱད་དོ། །སྐྲའི་དང་སྒྲེན་མོ་འམ་འུག་པའི་སྒྲོ་ཞེས་ཡི་དམ་བཅས་པ་ཡང་ངོ༌། །སྐྲའི་གོས་གྱོན་པ་དང་སྒྲེན་མོར་འདུག་པ་དང་སྒྲོ་ལས་གོས་བྱས་པ་དང་འདི་རྣམས་གྱོན་ཅིང་བྱེད་ན་ཉེས་བྱས་སོ། །འདི་སྦོམ་པའོ། །ལྷག་མ་གསུམ་ལྟར་བྱེད་ཅིང་མུར་འདུག་གི་དཀའ་
ཐུབ་སྤྱོད་ན་སྦོམ། འདི་ལས་གཞན་སྤྱོད་པ་ཡང་ངོ༌། །སྐྲའི་གོས་གྱོན་པ་དང་གཅེར་བུར་འདུག་པ་དང་བྱ་སྒྲོའི་གོས་བྱས་པ་ལ་མུར་འདུག་གི་དཀའ་ཐུབ་སྤྱོད་པ་ལ་ནི་མི་སེམས་ཀྱི་འདའ་སྐད་ཅིག་ཙམ་བྱས་པ་ནི་ཉེས་བྱས། སྐྲ་བཏོག་པ་དང༌། བདག་གི་སྐྲ་ལག་གིས་འབལ་བ་དང༌། འདབ་མའི་སྣམ་བུ་དང༌། ཤིང་ལོའི་འདབ་མ་ལས་གོས་བྱས་པ་དང༌། རི་དྭགས་ཀྱི་པགས་པ་དང༌། པགས་པའོ་ཅོག་ལས་གོས་བྱས་ཏེ་གྱོན་པ་དང༌། བླ་དང་འོག་ཏུ་བཅས་པ། གོས་འོག་ཏུ་གཅིག་གྱོན་སྟེང་དུ་གཅིག་གྱོན་པ་ཆོག་བར་སེམས་པ་དང༌། དི་རི་ཏ་དང༌། ཐོད་ཀར་དང་འགྲོ་བའི་གོས་གྱོན་པ་དང༌། ཡན་ལག་སྤུ་ཅན་དང༌། ལག་འབྲག་དང་ཞུ་ལྤུག་གེ་ལྟ་བུ་སྦུའུ་ཅན་དང༌། ཐམས་ཅད་སྔོན་པོས་བགོ་བ་དང༌། གོས་ཐམས་ཅད་སྔོན་པོར་གྱོན་པ་དང་དེ་བཞིན་སེར་པོའམ་དམར་པོ་འབའ་ཞིག་ལ་བྱས་ན་ཉེས་བྱས་སོ། །ཁ་ཚར་རིང་པོ་དང་ཁ་ཚར་བླས་པ་དང་རལ་ག་དང་གཙུག་ཏོར་དང་མགོ་དཀྲིས་པ་དང་རྔ་མོའི་གོས་དང་ཕྱར་བ་དང་མུར་འདུག་གི་རྒྱལ་མཚན་དང་ཡང་ངོ༌། །མིང་གིས་སྨོས་པ་འདི་རྣམས་མུར་འདུག་དཀའ་ཐུབ་བྱ་བའི་སེམས་ཡོད་ནའང་སྦོམ་པོའོ། །དཀའ་ཐུབ་བྱ་བའི་སེམས་མེད་པར་བགོས་ན་ཉེས་བྱས། སུ་ལ་སའི་འདབ་མར་ཅོག་པ་དང་མེ་མར་གྱི་རས་ཙམ་ཡང་མཉམ་པར་བགོའོ། །ཡོན་བདག་གིས་ཡོན་ཕུལ་ན་ཟར་མའི་འདབ་མ་ཙམ་མམ་མེ་མར་གྱི་རས་ཙམ་ཡིན་ན་དེ་མཉམ་པར་བགོ །ལ་བ་དང་དེ་ལྟ་ན་ནི་བཙོངས་ཏེའོ། །ལ་བ་ལ་སོགས་པ་ཞིག་ཕུལ་བ་ནི་བཙོངས་ཏེ་རིན་བགོའོ། །དྲས་ཏེ་མ་ཡིན་ནོ། །ལ་བ་དྲས་ན་རྫས་སུ་མི་རུང་བའི་ཕྱིར་བཙོངས་ཏེ་བགོ །རྙེད་པ་བགོ་བར་བྱ་བ་རྣམ་ལྔ་སྟེ། ཡོན་ཞིག་རྙེད་ན་བགོ་བ་ལ་ཐབས་རྣམ་ལྔ་ཡོད་དེ་འོག་ནས་འཆད། དེ་རིང་རྙེད་པ་བགོས་དེ་ལ་ཁྱེད་འདུ་བར་གྱིས་ཤིག་ཅེས་དགེ་འདུན་ལ་བརྗོད། གཙུག་ལག་ཁང་སྦྱོང་གིས་དེ་རིང་སྤྱིའི་ཡོན་བགོས་གཤེགས་ཤིག་ཅེས་བགོས། རྣམ་པ་གཅིག་གཎྜཱི་བརྡུངས་པ་དང་གཎྜཱི་བརྡུངས་པ་ལ་བགོ་བ་དང༌། ཚུལ་ཤིང་བྲིམ་པ་དང༌། ཟད་པར་ཚུལ་ཤིང་བྲིམས་ཏེ་ཚུལ་ཤིང་ལ་བགྲངས་པ་དང༌། བགྲང་བ་ཡང་ངོ༌། །གྲངས་ཉིད་དུ་ཁས་བགྲངས་ཏེ་
བགོ་བ་དང༌། སོ་སོའི་སྐལ་བ་བྲིམ་པ་ཡང་ངོ༌། །གོང་དུ་མིང་གིས་སྨོས་པ་ལྟར་བགྲངས་ནས་བགྲང་དུ་ཡོད་པ་དང་ནོར་དུ་སྦྱར་ཏེ་སྐལ་བ་སོ་སོར་མཉམ་པར་བགོ །བྱེད་པའི་ཚེ་མཐའ་ཚུན་ཆད་འོངས་ནའང་དབང་ངོ༌། །ཡོན་ལྷག་མ་རྣམ་ལྔ་ལྟར་འགོད་པའི་ཚེ་དགེ་སློང་ཞིག་གུད་ནས་འོངས་ན་སྐལ་བ་དབང་ངོ༌། །དགེ་སློང་སུམ་གཉིས་ཙམ་ནོར་ལག་ཏུ་ཐོབ་ལྷག་མ་འགོད་ཅིང་འཁོད་པ་ལ་དགེ་སློང་གཅིག་གུད་ནས་འོངས་ན་ཐམས་ཅད་སླར་བསྡུས་ཏེ་བགོ་ཟིན་ནས་མ་ཡིན་ནོ། །ནོར་བགོས་ཟིན་པའི་འོག་ཏུ་འོངས་པའི་སྐལ་བ་མི་འཐོབ་བོ། །རྙེད་བ་ཆུང་ཡང་འདི་བཞིན་ནོ། །ཡོན་ཆུང་དུ་ཞིག་རྙེད་ཀྱང་དགེ་སློང་ཕྱིས་འོངས་པ་དབང་ངོ༌། །ཐོབ་པ་བྱེད་པར་གཏོགས་པ་སོང་ཡང་མིའི་རིགས་པ་མ་ཡིན་ནོ། །ཡོན་བདག་གིས་རྟག་ཏུ་དགེ་སློང་སོ་སོར་ཐང་བཅད་དེ་འབུལ་བ་ལས་དགེ་སློང་ཚུལ་བསྲུངས་པ་ཞིག་གུད་དུ་སོང་བར་གྱུར་ནའང་དེའི་སྐལ་བ་ཐང་བཞིན་དུ་དབང་ངོ༌། །དེ་བས་ན་འགྲོ་ན་ལོངས་ཤིག་ཅེས་བསྒོའོ། །མདོ་ལྟག་མ་ལྟར་སྐལ་བ་དབང་བ་ལས་གུད་དུ་འགྲོ་ནའང་བདག་མི་འདོད་དེ་དགེ་འདུན་ལ་ཕུལ་ཀྱང་ཉེས་མེད། འདོད་ནའང་མཁན་པོ་དང་གྲོགས་པོ་ལ་ལེན་པར་བཅོལ་ཏེ་ཞོག་ཤིག །དམ་བཅས་པ་ལས་མ་བླངས་ནའང་སྦྱིན་དུ་གཞུག །མདོ་ལྟག་མ་ལྟར་ནོར་ལེན་དུ་བཅོལ་བ་ལས་ཁས་བླངས་པ་ལས་ཕྱིས་མ་བླངས་ན་སྐལ་བ་ཅི་དབང་བའམ་སྐྱིན་པ་དེ་ལ་དབབ་བོ། །དོང་ཙེ་ལྔ་ཡན་ཆད་ཐོབ་པ་ཆུང་དུ་ལས་སོ། །མདོ་ལྟག་མ་ལྟར་སྐྱིན་པ་བླང་པ་ནི་པ་ན་ལྔ་ཡན་ཆད་ཀྱི་རིན་ནི་བླང་གི་ལྔ་ལས་ཉུང་བ་མན་ཆད་ཀྱི་རིན་ནི་མི་ཅོག་གོ །མ་སྨྲས་པར་མི་བླང༌། དགེ་སློང་གྲོགས་ཀྱིས་ལོང་ཤིག་མ་སྨྲས་པར་མི་བླང་མཁན་པོ་དང་སློབ་དཔོན་གྱིས་བླང༌། མཁན་པོ་དང་སློབ་དཔོན་གྱིས་ནི་སློབ་མའི་ཡོན་སྐལ་ལོང་ཤིག་ཅེས་མ་བསྒོའང་བླང༌། སྙིང་གཅུགས་པའི་གནས་ཀྱི་ཕྱིར་ཀྱང་ངོ༌། །གྲོགས་པོ་མཛའ་བོ་དང་མཁན་པོ་དང་སློབ་དཔོན་གྱི་ནི་སྐལ་པ་ལོང་ཤིག་པར་མ་བསྒོ་བར་བླངས་ཀྱང་ཉེས་མེད་དོ། །བདག་གི་ཕྱོགས་མ་ཡིན་པའི་ཕྱིར་མ་ཡིན་ནོ། །མཁན་པོའང་རུང་སློབ་མའང་རུང་མི་དགེ་བ་དང་ལོག་པ་ལ་བལྟས་
པའི་སྐལ་བ་མི་མནོད་དོ། །མལ་སྟན་ཀྱང་དེ་བཞིན་དུའོ། །མཁན་པོ་སློབ་དཔོན་གྱི་མལ་སྟན་མ་བསྒོ་བར་བླངས་ཀྱང་ཉེས་མེད། སློབ་དཔོན་དང་མཛའ་བོའང་དེ་བཞིན་ནོ། །ཟས་ཀྱང་ངོ༌། །མཁན་པོ་དང་སློབ་དཔོན་དང་མཛའ་བོའི་ཟན་སྐལ་མནོད་ཀྱང་ཉེས་མེད་དོ། །གཞན་གྱི་ཕྱིར་ལེན་ན་ཕ་རོལ་པོ་ཆུད་པར་བྱའོ། །མཁན་པོ་དང་སློབ་དཔོན་དང་མཛའ་བོའི་ཡོན་སྐལ་དང་མལ་ཆ་དང་ཟས་ནོད་པའི་ཚེ་གཞན་ལ་ཤེས་པར་དཔང་བཙུགས་ཏེ་མནོད་དོ། །མི་འཐོབ་པ་ལས་གཏོགས་ཞེས་མ་ཡིན་ནོ། །དགེ་འདུན་གྱི་ནང་དུ་མ་གཏོགས་ཤིང་ཟན་སྐལ་མི་ཐོབ་པར་འཐོབ་པོ་ཞེས་ཟེར་ཞིང་མནོད་ན་ཉེས་བྱས། ཟ་བའི་ཚེ་སྦོམ་པོ། དྲིས་པ་རིན་ཐང་ཚང་ལ་རྐུ་སེམས་དང་ལྡན་ན་ཕམ་མོ། །རིགས་པ་ནི་གཅིག་པ་ལ་འཐོབ་པ་རབ་ཏུ་མང་ཡང་མ་བཙུད་པའི་ཕྱིར་མ་ཡིན་ནོ། །གཙུག་ལག་ཁང་གཅིག་ན་དགེ་སློང་གཅིག་པུ་འདུག་པ་ལས་ཡོན་བདག་དད་པས་ཡོན་མང་ཞིག་ཕུལ་ན་དགེ་སློང་གཅིག་པུ་དེས་ཁྱེར་ཡང་ཉེས་མེད། མི་རིགས་པ་ནི་ཆོས་མ་ཡིན་པའི་སྐྱབས་སུ་ལྟུང་སྟེ་བྱེ་བ་དགེ་འདུན་གྱིས་འཐོབ་པ་ལས་སོ། །དགེ་སློང་སེམས་ལོག་པ་ལ་བལྟས་ཤིང་ཕྱོགས་ཏེ། ཚུལ་དགེ་བ་འདྲ་བར་བསྲུང་ཞིང་འདུག་པ་ནི་དགེ་འདུན་གྱི་ཡོན་ལས་མི་འཐོབ་པོ། །རིང་དུ་གནས་ན་དེའི་ཚེ་གནས་ཐོབ་ལའོ། །དགེ་སློང་ཚུལ་དུ་ཞུགས་པ་ནི་ཚུལ་དྲལ་ཀྱང་ཞག་བཞི་བཅུ་རྩ་ལྔ་ཕན་ཆད་ཅིག་ལོན་ན་ཡོན་སྐལ་འཐོབ་པོ། །དྲིའམ་ལོག་གམ་ཤི་ཡང་ངོ༌། །ཚུལ་དུ་ཞུགས་པ་ལ་ཁྲིམས་ཕུལ་ཡང་རུང་ཁྲིམས་ཕུལ་པ་ལས་སླར་བྱིག་གཤུར་ཞུགས་ཀྱང་རུང་ཤི་སྟེ་ནོར་སྐལ་བྱིན་ཅིག་ཅེས་ཁས་ཆེམས་བཞག་ཀྱང་རུང་སྟེ་ཚུལ་ཞག་བཞི་བཅུ་ལྔ་བསྲུངས་ན་སྐལ་བ་འཐོབ་བོ། །འཐབ་པ་ཇི་ལྟར་བསྔོས་པའི་ཚུལ་བཞིན་དུའོ། །ཡོན་བདག་གིས་གཙུག་ལག་ཁང་དང་དགེ་འདུན་ལ་སོགས་པ་མིང་གིས་སོ་སོར་བསྔོས་ཏེ་ཕུལ་ན་བསྔོས་པ་བཞིན་དུ་གཞི་གཞན་དུ་མི་སྤྱོད་དོ། །འཐོབ་པ་ཡང་ངོ༌། །དགེ་འདུན་གྲངས་ལས་མ་གཏོགས་པར་གུད་ནས་འོངས་པ་ཞིག་ཡོད་ན་གསོལ་ཐང་དང་ཟན་ཐང་བཅད་དེ་ཕུལ་བ་ལས་ཁོང་ཐོག་ཏུ་དད་པ་བྱིན་ནའང་ཉེས་མེད། སློང་བའི་གྲོང་བསྒོས་
ཀྱང་ཉེས་མེད་དོ། །རྒྱས་པར་འགྲུབ་པ་ཡང་ངོ༌། །མཚམས་གཅིག་གི་ནང་ན་དགེ་འདུན་མང་ཞིང་གནས་པ་ལས་ཁ་ཅིག་ཆོས་ལོག་པ་ལ་ཕྱོགས་པས་གོང་སྡེ་གཉིས་སུ་བཅད་དེ་སོ་སོར་བསོད་སྙོམས་དང་ཡོན་ལེན་པར་བསྔོས་པ་ལས་ཆོས་མ་ཡིན་པ་ལ་ཕྱོགས་པའི་གྲོང་ནས་སྤྱིར་ཡོན་འབུལ་དུ་འོངས་ནས་ཆོས་མ་ཡིན་པ་ལ་ཕྱོགས་དབང་ཆོས་ལ་ཕྱོགས་པའང་དེ་དང་འདྲ། དགེ་འདུན་གྱི་ཕྱིར་ཆད་པ་ལས་ཀྱི་མཚམས་ཀྱིས་གཅོད་དོ། །དེ་བཞིན་དུ་འདིར་གཅིག་པ་ལ་སོགས་པའོ། །གཙུག་ལག་ཁང་གཅིག་གི་ནང་ན་དགེ་སློང་མང་ཞིག་གནས་གནས་བ་ལས་གཞན་ཐམས་ཅད་གཙུག་ལག་ཁང་བཏང་སྟེ་ཡན་མན་དུ་འདོང་པའི་འོག་ཏུ་གཙུག་ལག་ཁང་དེར་དགེ་འདུན་སྤྱིར་ཡོན་ཞིག་ཕུལ་ན་གཙུག་ལག་ཁང་དེ་ན་གནས་པའི་དགེ་སློང་དེ་སུ་ཡོད་པ་དབང་ངོ༌། །ཆོས་ཀྱི་རྙེད་པ་དེའི་སྨྲ་བ་དག་གི་སྐལ་བ་ཡང་ངོ༌། །དྷརྨ་ལ་ཡོན་ཞིག་ཕུལ་ན་དྷརྨ་ཀློག་ཀློག་པའི་དགེ་སློང་དབང་ངོ༌། །འདིའི་མཐའ་ནི་ཞལ་ནས་གསུངས་པའི་ཚིགས་སུ་བཅད་པ་གཅིག་འཛིན་པའོ། །ལྟག་མ་ལྟར་དྷརྨ་ཀློག་ཀློག་པའི་ཡོན་དབང་བའི་དགེ་སློང་ནི་ཞལ་ནས་གསུངས་པའི་ཚིགས་སུ་བཅད་པ་གཅིག་གི་ཁ་ཐོན་དུ་ཀློག་ཅིང་འཛིན་ནུས་པས་ཀྱང་དྷརྨ་ལ་ཕུལ་བའི་ཡོན་བླངས་ཀྱང་ཉེས་མེད་དོ། །ཤི་བའི་ཡོ་བྱད་ལ་མི་རིགས་པ་ནི་མཚན་ཐ་དད་པ་དང་གཞན་འགོད་པའོ། །མཚམས་གཅིག་གི་ནང་གི་དགེ་འདུན་ལས་དགེ་སློང་གཅིག་ཤི་ན་དེའི་ཡོ་བྱད་དང་ནོར་མཚམས་ཐ་དད་པའི་དགེ་སློང་མ་དང་དེ་བ་དཏྟཱི་སྡེ་ལྟ་བུ་དང་དེ་རྣམས་ནི་མི་དབང་གི་མཚམས་གཅིག་གི་དགེ་འདུན་ཉི་ཚེ་དབང་ངོ༌། །སྤངས་པ་ཡང་དེ་བཞིན་ནོ། །ལྟག་མའི་ལྟར་དགེ་སློང་ཤི་བའི་ནོར་ལས་མཚམས་གཅིག་གི་ནང་ནས་དགེ་སློང་འགའ་ཞིག་བསྐྲད་ན་དེས་ཀྱང་ཤི་བའི་ནོར་ལ་མི་དབང་ངོ༌། །མི་འཁོར་ཀྱང་ངོ༌། །མཚན་མ་ལས་སེམས་མ་ལོག་ཀྱང་ངོ༌། །མཚམས་གཅིག་གི་ནང་ན་དགེ་སློང་གཉིས་སམ་གསུམ་ཞིག་འཁོད་འཁོད་པ་ལས་ཀུན་ཤི་སྟེ་མེད་ན་དགེ་སློང་གཅིག་ཅིག་ལུས་ཤིང་བསྣམས་ཀུན་གྱི་ནོར་མ་ཤི་དགེ་སློང་མ་ཤི་བ་གཅིག་པུ་དེ་དབང་ངོ༌། །ཟད་པར་ཤིན་གཙུག་ལག་ཁང་དེའི་ཉེ་འཁོར་ན་དགེ་
སློང་སྤངས་པ་འབའ་ཞིག་འདུག་པ་དེའི་ཡིད་ལ་སྔ་མའི་མཚན་མ་བཏང་ན་དབང་ངོ༌། །མཚན་མ་མ་བཏང་ན་དེའི་ཉེ་འཁོར་ནའང་དགེ་སློང་མ་སུ་ཡོད་པ་དབང་ངོ༌། །དེའི་བླང་བ་ཡོད་པ་ལ་ནི་ཐ་དད་པ་མ་ཡིན་ནོ། །སྤངས་པའི་དགེ་སློང་ཞིག་ཤི་ན་དེའི་ཡོ་བྱད་དང་ནོར་ནི་དགེ་འདུན་དབང་ངོ༌། །དགེ་འདུན་དེའི་ནང་ན་ཆད་པ་གཞན་ཞིག་ཡོད་ན་དེས་ནི་མི་འཐོབ་བོ། །བྱེ་བ་དང་ནི་ཐ་དད་དོ། །དགེ་འདུན་ཞིག་ལ་དགེ་མི་དགེ་སྡེ་གཉིས་སུ་བཅད་དེའི་ནང་ནས་འགའ་ཞིག་དགེ་བ་ལ་ཕྱོགས་པ་ལས་ཤིན་དགེ་བའི་དགེ་འདུན་དབང་ངོ༌། །མི་དགེ་བ་ཤི་ན་མི་དགེ་བའི་དགེ་འདུན་དབང་ངོ༌། །རབ་ཏུ་བྱུང་བ་ཚངས་པ་མཚུངས་པར་སྤྱོད་པ་ལས་གཞན་མི་དབང་ངོ༌། །དགེ་སློང་གི་རབ་ཏུ་བྱུང་བའི་ནང་ནས་འགའ་ཞིག་ཤི་ན་དེའི་ནོར་དང་ཡོ་བྱད་མུར་འདུག་དང་རྒྱལ་པོ་མ་གཏོགས་ཏེ་དགེ་སློང་གི་དགེ་འདུན་དབང་ངོ༌། །གསོལ་བས་བསྔོས་ཏེ་ཐོབ་པ་ལ་མ་ཡིན་ནོ། །དགེ་སློང་ཤི་བའི་ནོར་ལ་དགེ་འདུན་གྱི་གསོལ་བ་དང་ཞུ་བའི་ལས་ཀྱི་སྔགས་ཀྱིས་རྟོག་པ་ལས་དགེ་སློང་འགའ་ཞིག་མཚམས་ཀྱི་ཕྱི་རོལ་དུ་སོང་ན་མི་དབང་ངོ༌། །དགེ་འདུན་གྱི་ལས་ཤིག་ལ་སོང་ན་བརྟག་པ་མ་སླེབས་ཀྱང་དབང་ངོ༌། །གསོལ་བ་དང་ཞུ་བའི་ལས་དགེ་སློང་འགྲོན་པོས་ཀྱང་དབང་ངོ༌། །ཐོག་མ་དང་ཐ་མ་ཡང་ངོ༌། །ཐོག་མ་དང་ཐ་མ་ཞེས་བྱ་བ་ནི་མདོ་འོག་ནས་འཆད་པ་ཡིན་ནོ། །དེ་ལས་འགའ་ཙམ་དགེ་འདུན་ལས་རྒན་པོ་དང་གསར་བུ་བྱིན་ནའོ་ཞེས་དེར་གསུངས་སོ། །དགེ་སློང་ཤི་བའི་ནོར་ལས་གནས་བརྟན་གཅིག་དང་ཙེ་ལུ་ཐ་མ་ན་འདུག་པ་གཅིག་དང་གཉིས་ལ་སྨན་ཏམ་ནོར་ཆུང་ཤས་ཡན་ཆད་ཅིའང་རུང་སྟེ་སྣ་རེ་ཞིག་བྱིན་ན་མཚམས་དེས་ཆོད་པས་ན་ཕྱི་ནས་འོང་བ་མི་དབང་ངོ༌། །གང་ནས་བསྔོ་བ་ཡོད་པ་དེའི་མཚམས་ཀྱི་ནང་དུ་བསྔོས་པའོ། །དགེ་སློང་གཅིག་ཅིག་གི་ནོར་གཙུག་ལག་ཁང་གཞན་ཞིག་ན་གཏམས་ཏེ་བཞག་པ་ལས་དགེ་སློང་དེ་ཤི་བར་གྱུར་ན་དགེ་སློང་དེ་གནས་གནས་པའི་དགེ་སློང་མི་དབང་གི་ནོར་གང་ན་གཞག་གཞག་པའི་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་བརྟགས་ན་གོས་འདུག་འདུག་པའི་དགེ་འདུན་དེ་རྣམས་དབང་ངོ༌། །འདི་ཤི་བའི་
གནས་སུ་ཞེས་པའི་ཕྱིར་མ་ཡིན་ནོ། །ལྟག་མ་ལྟར་དགེ་སློང་ཤི་བའི་ནོར་དགེ་འདུན་གྲོགས་པོ་ན་རེ་ནོར་བཞག་པའི་མཚམས་མི་བརྩན་གྱི་དགེ་སློང་ཉིད་ངེད་ཀྱི་མཚམས་སུ་ཤི་བ་ཡིན་གྱིས་ནོར་ངེད་དབང་གིས་བྱིན་ཅིག་ཅེས་ཟེར་ཞིང་ལེན་དུ་མི་དབང་ངོ༌། །མཚམས་ཀྱི་བར་ན་འདུག་པ་ལུས་ལ་ཆགས་པའམ་གཞན་ཡང་ཇི་སྙེད་དུ་ཆུད་པ་དེ་གཏོགས་སོ། །གཙུག་ལག་ཁང་དུ་མ་ཞིག་གི་བར་ན་དགེ་སློང་གཅིག་ཤིན་གཙུག་ལག་ཁང་དང་ཉེ་བའི་དགེ་འདུན་དགེ་སློང་ཤི་བ་དེའི་ནོར་དབང་ངོ༌། །ཉེ་རིང་མེད་ན་ལུས་གང་ནི་མགོ་གང་ལོགས་སུ་ལྟ་བའི་དགེ་འདུན་དབང་ངོ༌། །ལུས་དང་བྲལ་བར་འདུག་པའི་ནོར་ནི་རོ་ནས་གཙུག་ལག་ཁང་གི་ཕྱོགས་ན་འདུག་པའི་དགེ་འདུན་དེ་དབང་ངོ༌། །གཏམས་པ་ལ་ན་དེའི་ཡོ་བྱད་གང་ནའང་རུང་སྟེ་དེར་ཆུད་དོ། །དགེ་སློང་ཤི་བའི་ནོར་ཁྱིམ་པ་ལ་གཏམས་པ་ཞིག་ཡོད་ན་ཁྱིམ་པ་དེ་དང་གང་གི་དགེ་འདུན་དང་ཕྲད་ཅིང་ཟིན་པ་དེའི་དགེ་སློང་དབང་བ་ལའང་བྱ། ཁྱིམ་པ་དེ་དང་དགེ་འདུན་དུ་ཉེ་བའི་དགེ་འདུན་དབང་པ་ལའང་བྱ། གཏམས་པས་དངོས་པོ་གཞན་དུ་གཞག་པ་བསྔོའོ། །དགེ་སློང་ཤི་བའི་རྫས་ཁྱིམ་པ་ལ་གཏམས་པ་ལས་ཁྱིམ་པ་དེ་ལྷ་ཁང་དུ་འོངས་ཀྱང་རུང་བཀུག་ཀྱང་རུང་སྟེ་མངོན་སུམ་དུ་འཕྲད་དེ་བསྒོམ་ན་ནོར་བགོ་བའི་སྔག་བྱས་པ་ཡིན་ཏེ་དགེ་འདུན་གཞན་མི་དབང་ངོ༌། །བསྐུར་བ་ལས་བྱིན་པས་མ་སྤངས་ན་དེའི་ཡིན་ནོ། །དགེ་སློང་གཅིག་ལ་ནོར་ཞིག་བསྐུར་བ་ལས་ནོར་འོངས་ཏེ་མི་འདོད་ཅེས་མ་བྱས་པར་དགེ་སློང་དེ་ཤི་ན་ནོར་དེ་ཤི་བའི་ཕྱོགས་ཀྱི་དགེ་འདུན་དབང་ངོ༌། །སྤངས་ན་བསྐུར་བའིའོ། །མདོ་ལྟག་མ་ལྟར་ནོར་བསྐུར་ཏེ་འོངས་པ་ལས་མི་འདོད་ཅེས་བྱ་བའི་འོག་ཏུ་ཤི་ན་ཐོག་མ་བསྐུར་བསྐུར་བའི་དགེ་སློང་དེ་དབང་ངོ༌། །དེས་སྤངས་ཀྱང་ངོ༌། །མདོ་ལྟག་མ་ལྟར་མི་འདོད་ཅེས་བྱས་ཏེ་སླར་བསྐུར་བ་ལས་ཐོག་མ་བསྐུར་བསྐུར་བའི་དགེ་སློང་དེའང་མི་འདོད་ཅེས་ཟེར་ན་དེ་བརྩན་ཏེ་དགེ་སློང་དེ་དབང་ངོ༌། །ཕྱི་རོལ་ལ་མཚམས་ཀྱི་ནང་དུ་འདུ་ཤེས་ཏེ་གཅིག་པོས་བསྔོས་ཏེ་མི་སྐྱེའོ། །དགེ་སློང་ཤི་བའི་ནོར་ལ་འགོད་པ་ལ་མཚམས་ཀྱི་ནང་དེ་དགེ་སློང་ཀུན་ལ་དད་པ་མ་དྲིས་ཤིང་མ་བསྡུས་པར་དགེ་སློང་ཁ་ཅིག་གིས་ཁྱད་པར་བགོ་བའི་སྔགས་བྱས་པ་
དང་མཚམས་ཀྱི་ཕྱི་རོལ་ཏུ་བགོ་བའི་སྔགས་བྱས་པར་མི་ཆུད་དེ་མི་རུང་ངོ༌། །དབྱུང་བ་དང་ནན་ཏན་དང་ཆོས་གོས་བསྟན་པ་དང་སྦྱིན་པའི་གཤེགས་པ་མ་བྱས་པར་མི་བསྔོའོ། །དགེ་སློང་ཤི་བའི་རོ་སྒོར་མ་ཕྱུང་ངམ་མ་བསྲེགས་སམ་མ་སྦས་སམ་ཆུར་མ་བསྐུར་བའི་ཤི་བའི་ནོར་མི་བགོ །ཤི་བའི་རོ་སྦས་ཟིན་ནས་བགོ་བའི་སྔགས་བྱས་ཏེ་གདོད་ཤི་བའི་ནོར་བགོའོ། །ལྷུང་བཟེད་དང་ཆོས་གོས་ཁྱིམ་གནས་ཀྱི་ཁྱིམ་དུ་ན་ཁྱིམ་བདག་གང་གིས་བྱིན་པ་དབང་ངོ༌། །ལྷུང་བཟེད་དང་ཆོས་གོས་ཁྱིམ་པ་ལ་གཏམས་པ་ལས་དགེ་སློང་ཤི་སྟེ་ཁྱིམ་པ་དེས་ཁྱེར་ཏེ་འོངས་ན་དགེ་སློང་སུ་དང་འཕྲད་པ་བླངས་ཏེ་ཁྱེར་ཡང་ཉེས་མེད་དོ། །གཏམས་ཤིང་འདུག་པ་ཐོས་ན་བདག་གིས་བླངས་ཏེ་ཁྱེར་ཡང་ཉེས་མེད་དོ། །དེ་སྟེ་རིགས་ནའོ། །མདོ་ལྟག་མ་ལྟར་ཁྱེར་ཀྱང་ཉེས་མེད་པ་ནི་དགེ་སློང་མ་དང་ཆད་པ་ཡོད་པའི་དགེ་སློང་ནི་མི་དབང་སྟེ་བླང་བར་མི་རིགས་སོ། །ཕོངས་ཏེ་དེས་སོ། །མདོ་ལྟག་མ་ལྟར་བླངས་ཀྱང་ཉེས་མེད་པ་ནི་དགེ་སློང་ཕོངས་ཤིང་མི་བདོག་པས་བླངས་ཤིང་ཁྱེར་ཡང་ཉེས་མེད་དོ། །མི་སྟེར་བ་ལ་བླངས་པས་སོ། །དགེ་སློང་ཤི་བའི་ནོར་ཁྱིམ་པ་ལ་གཏམས་ཤིང་འདུག་པ་ལས་དགེ་སློང་ཕོངས་པས་བླངས་ཏེ་བྱིན་ན་ནི་ཉེས་མེད་དོ། །མི་སྟེར་བཞིན་དུ་མཐུས་བླངས་ན་ཉེས་བྱས། རིམ་གྱིས་ན་ཐོག་མའིའོ། །ཤི་བའི་ནོར་གཏམས་ཤིང་འདུག་པ་ལེན་དུ་དབང་བ་དགེ་སློང་མ་ཞིག་ལེན་དུ་འོངས་ཏེ་ཁ་འདོམ་ན་ཁ་གང་སྔ་བ་དབང་ངོ༌། །མེད་དམ་མ་བསྔོས་པར་བོར་ན་སོང་བའིའོ། །དགེ་སློང་ཤི་བའི་ནོར་ཁྱིམ་པ་ལ་གཏམས་ཤིང་འདུག་པ་ཁྱིམ་པས་བོར་ཞིང་འདུག་པ་ལ་དགེ་སློང་གིས་མཐོང་ན་བདག་ཕོངས་ན་བདག་གིས་ཁྱེར་ཅིག་མ་ཕོངས་ན་མ་ལེན་ཅིག །དགེ་འདུན་སྤྱིར་དབུལ་བར་བསམས་ཏེ་བླངས་པ་ནི་ཉེས་མེད་དོ། །དེ་བཞིན་རིམས་སུའོ། །མདོ་ལྟག་མ་ལྟར་དགེ་སློང་ཤི་བའི་ནོར་ལ་དགེ་སློང་ཕོངས་པ་མང་ཞིང་འདོད་དེ་ལེན་ན་གང་མགྱོགས་པ་དབང་ངོ༌། །ནོར་ཆགས་པར་གྱུར་ན་དེ་ལ་བཏང་བ་ཤི་བའི་ཡོ་བྱད་ལས་དེའི་ཚད་དུ་སྦྱིན། དགེ་སློང་ཤི་བ་དེ་ལ་གཞན་གྱི་བུ་ལོན་ཆགས་པ་ཞིག་ཡོད་ན་ཤི་བའི་ནོར་ལས་ཅི་ཆགས་པ་བྱིན་
ལ་ལྷག་མ་ལས་བགོ །བགོས་ཀྱང་ངོ༌། །ཤི་བའི་ནོར་བགོས་ཟིན་པའི་འོག་ཏུ་ཤི་བ་ལ་བུ་ལོན་ཆགས་ཏེ་དེད་དུ་འོངས་ན་ཡང་བགོས་པ་ཀུན་སླར་བསྡུས་ཏེ་ཅི་ཆགས་པ་སྦྱིན་ནོ། །གང་དེ་དང་ལྷན་ཅིག་ཏུ་འཐམས་པ་དེ་ལ་སྦྱིན་ན་མ་བླང༌། དགེ་སློང་ཤི་བ་དེ་དང་ཁྱིམ་པ་ཞིག་ཏུ་འཐམས་ཏེ་ཁྱིམ་པའི་ནོར་ནི་སྔར་བླངས་ཀྱི་རིན་མ་བྱིན་པ་ཞིག་ཡོད་ནའང་འཐམས་པའི་ཚིག་བཞིན་དུ་རིན་བཅལ་ཞིང་སྦྱིན་ནོ། །རིན་བཅལ་དུ་མེད་ནའང་ཁོའི་ནོར་དངོས་སླར་སྦྱིན་ནོ། །དེས་ནི་མ་ཡིན་ནོ། །དགེ་སློང་ཤི་བ་ད་ལས་ཤིག་བྱེད་དུ་བཅུག་སྟེ་སླས་སྦྱིན་པར་བྱས་པ་ཞིག་ཡོད་ནའང་ཤི་བ་དང་འཐམས་པ་བཞིན་དུ་གླ་སྦྱིན་ནོར་དངོས་ཀྱང་བླང་ངོ༌། །འདི་ཚངས་པ་མཚུངས་པར་སྤྱོད་པ་ལ་ཆགས་པར་མི་འགྱུར། དགེ་སློང་ཤི་བ་ལ་གཞན་གྱི་བུ་ལོན་ཞིག་ཆགས་ཏེ་ཤི་བའི་ནོར་ཀུན་བཅལ་ཀྱང་མ་འཁོར་བ་ནི་མ་འཁོར་དུ་ཟད་ཚངས་པར་བྱིན་ཀྱང་ཉེས་མེད་དོ། །དཀོན་མཆོག་གི་བླངས་ཏེ་ཡོད་ན་དེ་ཇི་རྙེད་པ་དེ་རྙེད་ལས་སར་པ་ལས་བསྙམས་ཏེ་བགོ །དགེ་སློང་ཤི་བ་དེ་ལ་གཞན་ཞིག་གིས་ཟོང་ཕོག་སྟེ་ལས་བྱེད་དུ་བཅུག་པ་ལས་མ་བྱས་སམ་རྐྱེན་ཆད་དུ་ལུས་ན་ཡང་ཤི་བའི་ནོར་ལས་ཅི་ཆོག་པ་སྤངས་ཏེ་གཞག་པ་ལ་ལྷག་མ་བགོ །ནད་པའི་གཡོག་དང་བཅས་ན་དེ་འཐོབ་པའི་ཡོ་བྱད་དྲུག་ལ་མི་བསྔོ། །དགེ་སློང་ཤི་བའི་ནད་གཡོག་བྱེད་བྱེད་པ་ནི་ཤི་བའི་ནོར་བགོ་བའི་སྐལ་བ་ལ་མ་གཏོགས་པར་ཆོས་གོས་གསུམ་དང་ལྷུང་བཟེད་དང་ཆུ་ཚགས་དང་གདིང་པ་དྲུག་དབང་ངོ༌། །རབ་དང་འབྲིང་དང་མཐའ་མར་བཅས་པའོ། །དགེ་སློང་ཤི་བ་དེ་ལ་ཆོས་གོས་དང་ལྷུང་བཟེད་དང་གདིང་བ་མང་པོ་ཞིག་ཡོད་ན་ཐམས་ཅད་བཟང་པོ་ལས་མི་དབང་སྟེ་བཟང་ངན་སྤེལ་ལ་ཕམ་རྒྱལ་མེད་པར་དྲུག་སྦྱིན་ནོ། །དུ་མ་ན་དེའི་སྤྱིའོ། །ནད་གཡོག་མང་པོ་ཞིག་ཡོད་ནའང་གྲངས་མང་དུ་ལྷག་པར་མི་དབང་གི་དྲུག་ལས་སྤྱིར་བགོའོ། །ནད་པ་ཤི་ནས་དེའི་ཕྱིར་སོང་ན་སྦྱིན། ནད་པ་ཤི་བའི་ཚེ་ནད་གཡོག་རང་དོན་ལ་མཚམས་ཀྱི་ཕྱི་རོལ་དུ་འཕྱན་དུ་སོང་ན་ཡོ་བྱད་དྲུག་དང་ཤི་བའི་ནོར་སྐལ་ལ་མི་དབང་ངོ༌། །ནད་པའི་དོན་ལ་སོང་བ་ནི་དབང་ངོ༌། །འདི་ལ་ཤི་བའི་ནོར་མི་རིགས་སོ། །དེ་ནད་གཡོག་དགེ་སློང་མ་དང་དགེ་
སློང་ཆད་པ་བཅད་པ་ཞིག་བྱེད་བྱེད་པ་ནི་ཡོ་བྱད་དྲུག་ལས་མི་དབང་ངོ༌། །གཞན་ཚུལ་དུ་ཞུགས་པ་ལ་མ་ཡིན་ནོ། །དགེ་སློང་གཙུག་ལག་ཁང་གཞན་དུ་ཚུལ་དུ་ཞུགས་པ་ཞིག་གིས་ནད་གཡོག་བྱས་ནའང་ཡོ་བྱད་དྲུག་དང་ཤི་བའི་ནོར་སྐལ་དབང་ངོ༌། །འདི་བསྙེན་པར་རྫོགས་པ་ཐམས་ཅད་ལའང་རིགས་སོ། །ནད་གཡོག་དགེ་སློང་ཞིག་བྱེད་བྱེད་ནའང་ཤི་བའི་ནོར་སྐལ་ལ་ཐང་དགེ་སློང་གི་ཐང་བཞིན་དུ་དབང༌། ཡོ་བྱད་དྲུག་ཀྱང་དབང་ངོ༌། །ནད་པས་བྱིན་ཅིག་ཅེས་སྨྲས་པ་ལ་ཕྲིན་ཇི་ལྟར་སྨྲས་པ་ལྟར་བྱའོ། །དགེ་སློང་ཤི་བ་དེས་ཁ་ཆེམས་བཞག་སྟེ་ནོར་བྱིན་ཅིག་ཅེས་སྨྲས་པ་ཞིག་ཡོད་པ་ལས་ནད་གཡོག་ལ་སོགས་པས་མ་བྱིན་ན་ནོར་འགོད་པའི་ཚེ་སྨྲས་ལ་ཁ་ཆེམས་བཞིན་དུ་སོ་སོར་སྦྱིན་ནོ། །དབང་མེད་པ་ནི་ཤི་བ་ན་འདི་ལ་ཤི་བ་དག་གི་ནོར་སྒྲུབས་ཤིག་ཅེ་ནའོ། །ནད་པའི་ཁ་ཆེམས་ལ་ང་ཤི་ན་མི་འདི་ནོར་འདི་ཙམ་ཞིག་བྱིན་ཅིག་ཅེས་ཟེར་བ་ནི་ཁ་ཆེམས་མི་བཙན་ཏེ་སྤྱིར་བགོའོ། །ཁ་ཆེམས་ལྟག་ནས་བྱུང་བ་ནི་མ་ཤིའང་སྦྱིན་བར་ཆད་པ་ལ་བྱ། འདི་ནི་ཤི་ན་གདོད་བྱིན་གྱི་མ་ཤི་ན་མི་སྦྱིན་པར་བྱས་པ་ལ་བྱ། དབང་བ་ནི་ཁྱིམ་པའིའོ། །ཁྱིམ་པ་ཞིག་ཤི་བའི་ནོར་དགེ་འདུན་དང་དགེ་སློང་ལ་ཕུལ་ཅིག་ཅེས་ཁ་ཆེམས་གཞག་པ་ནི་བླངས་ཀྱང་ཉེས་མེད་དོ། །ཕུལ་ནས་ཁྱིམ་པ་ཤི་ན་ཁྱེའུ་དང་ཆུང་མ་ནི་ཅི་བདེར་བྱ། ཁྱིམ་པས་ནད་པའི་ཁ་ཆེམས་ཀྱིས་སྐྱེས་པ་དང་བུད་མེད་ལ་སོགས་པ་མི་ཕུལ་བ་ནི་བཀོལ་དུ་བཏང་ངོ༌། །བ་ལང་དང་རྟ་དང་རྔ་མོ་དང་བོང་བུ་དང་དྲེའུ་དང་གོ་ཆ་དག་རྒྱལ་པོ་ལ་ཕུལ། མིང་གིས་སྨོས་པ་འདི་རྣམས་ཡོན་དུ་ཞུལ་བ་ནི་རྒྱལ་པོ་ལ་སྦྱིན་ནོ། །མཚོན་ཆ་ནི་མི་སྦྱིན་ནོ། །གསུམ་ལ་དབྱིག་དང་གསེར་དང་གཞན་དང་བྱས་པ་དང་མ་བྱས་པའོ། །རིན་པོ་ཆེ་དག་ཀྱང་ངོ༌། །དབྱིག་དང་གསེར་དང་དངུལ་ལ་སོགས་པ་རིན་པོ་ཆེ་ཕུལ་བ་ནི་སུམ་ཆ་གཅིག་སངས་རྒྱས་ལ་དབུལ། སུམ་ཆ་གཅིག་ཆོས་ལ་དབུལ། སུམ་ཆ་གཅིག་དགེ་འདུན་ལ་དབུལ་ལོ། །རྒྱལ་པོ་མ་བྱིན་ན་ཕམ་པར་ཡང་འགྱུར་རོ། །འོན་ཏེ་གཞན་ཡོད་དམ་དེའི་ཆ་ལས་ལྷག་ཀྱང་ངམ་དེ་སྟེ་མ་ཡིན་ཀྱང་དེ་བཞིན་དུ་སངས་རྒྱས་ལ་ནི་མུ་ཏིག་དག་གོ།།
ཁྱིམ་པས་ནོར་ཕུལ་བ་དེ་ལ་ནོར་གཞན་དང་མུ་ཏིག་འདྲེས་སམ་མུ་ཏིག་འབའ་ཞིག་ཡོད་ཀྱང་རུང་སྟེ་རིན་ཐང་བརྩིས་ཏེ་མུ་ཏིག་རྣམས་ནི་སངས་རྒྱས་ལ་དབུལ་ལོ། །མ་ཕུལ་ན་སྦོམ་པོར་ཀྱང་འགྱུར་རོ། །ཚོན་ཆེན་པོ་ཡང་ངོ༌། །ཚོན་ཆེན་པོ་བརྒྱད་དུ་གཏོགས་པ་ཞིག་ཕུལ་ནའང་དགེ་སློང་གིས་སྤྱད་དུ་མི་རུང་བའི་ཕྱིར་སངས་རྒྱས་ལ་དབུལ་ལོ། །བཏགས་ཏེ་དྲི་གཙང་ཁང་སྐྱང་ནུལ་བྱུག །སངས་རྒྱས་ལ་མུ་ཏིག་དང་ཚོན་ཆེན་པོ་ཕུལ་ན་བསྲེས་ཏེ་བཏགས་ལ་སངས་རྒྱས་ཀྱི་དྲི་གཙང་ཁང་གི་རི་མོ་དང་སྐྱང་ནུལ་དུ་བྱུག །དེ་ལས་གཞན་སངས་རྒྱས་ཀྱི་ནི་གཟུགས་དང་དྲི་གཙང་ཁང་དང་མཆོད་རྟེན་གྱི་ཡོ་བྱད་དུ་བསྒོ། །ནོར་བུ་རིན་པོ་ཆེ་ལ་སོགས་པ་ནི་སངས་རྒྱས་ཀྱི་སྐུ་གཟུགས་ཀྱི་རྒྱན་ནམ་བཙོངས་ལ་གཟུགས་དང་མཆོད་རྟེན་དུ་བརྩིག །ཆོས་ཀྱི་ནི་སངས་རྒྱས་ཀྱི་ཚིག་བྲི་བ་དང་སེང་གེའི་ཁྲིའོ། །ཆོས་ཀྱི་སྐལ་བར་ཕུལ་བ་རྣམས་ནི་ཆོས་ཀྱི་ཡི་གེ་བྲི་བ་དང་ཡི་གེ་ཀླག་པའི་ཁྲི་ལ་སོགས་པ་བྱ། ཐེག་པ་ནི་གཟུགས་ལའོ། །ཁྱོགས་དང་ཤིང་རྟ་ལ་སོགས་པ་ཕུལ་བའི་ཡུལ་བསྐོར་བའི་གཟུགས་བཞག་པའི་ཕྱིར་སྐུ་གཟུགས་ལ་དབུལ་ལོ། །རྒྱལ་མཚན་ལ་དེའི་འོད་མ་དང་ཡུ་བ་དག་དེ་ལ་རིགས་པའོ། །ཤིང་རིང་བོ་དང་འོད་མ་ཕུལ་བ་ནི་འཕེན་ཤིང་དང་རྒྱལ་མཚན་གྱི་ཡུ་བ་བྱའོ། །གཞན་དང་ལག་ཆ་དག་ནི་དགེ་འདུན་ལའོ། །ཤིང་ཐུང་དུ་དང་ལག་ཆ་ལ་སོགས་པ་ནི་དགེ་འདུན་ལ་དབུལ་ཏེ་སྤྱི་ལྟར་སྤྱད་པའི་ཐབས་ནི་འོག་ནས་འཆད། འཁར་གསིལ་དང་ཁབ་དང་མཚོན་དུ་བྱས་ཏེ་དེ་དག་བྲིམ་ལྕགས་སམ། མཚོན་ཆ་ནི་ཁབ་དང་འཁར་གསིལ་དང་གྲི་ལ་སོགས་པ་བྱ་སྟེ་དགེ་འདུན་ལ་བྲིམ། གཞན་དགེ་འདུན་གྱི་ནི་གཞག་པ་དང་མཆོད་རྟེན་དང་བགོ་བ་ཅི་རིགས་པའོ། །དགེ་འདུན་ལ་ཕུལ་བའི་ནོར་ལ་ཁ་ཅིག་ནི་གཞག་ཁ་ཅིག་ནི་སོ་སོར་བགོ །ཁ་ཅིག་ནི་མཆོད་རྟེན་དང་འདི་རྣམས་གསུམ་དུ་སྦྱར་ཏེ། གང་བཞག་ཅིང་བགོ་བ་ནི་འོག་ནས་འཆད། ཞིང་དང་ཁྱིམ་དང་ཚོང་དུས་དང༌། མལ་སྟན་དང་མགར་པའི་དང་ལྕགས་ཀྱི་དང་སྐྲ་འདྲེག་གི་དང༌། རྫ་མཁན་གྱི་དང༌། ཤིང་མཁན་གྱི་དང༌། རེ་ལྡེ་མཁན་དག་གི་ཡོ་བྱད་དང་བྲན་མོ་དང་
ལས་བྱེད་པ་དང༌། མི་ལྷག་མ་དང༌། བ་ལང་དང༌། མ་ཧེ་དང༌། ར་ལུག་དང༌། སྨན་དང༌། སངས་རྒྱས་ཀྱིས་བསྟན་པའི་གླེགས་བམ་དང༌། མིང་གིས་སྨོས་པ་འདི་རྣམས་ནི་དགེ་འདུན་གྱི་སྤྱིར་སྤྱད་ཅིང་བཀོལ་བ་ཡིན་པས་མི་བགོ་བར་གཞག་གོ ། མྱུར་དུ་བྲིམ་པར་མ་བསྒྲུབ་པ་ནི་སྔ་མར་རིགས་སོ། །ཁྱིམ་པ་དེ་གུད་དུ་བུ་ལོན་ཆགས་ཏེ་དཔང་རྒྱ་ཕུལ་ནས་དཔང་རྒྱ་འདི་དོས་ཤིག་ཅེས་ཟེར་ནའང་བླངས་ཏེ་བཞག་པ་ལ་བྱ། རས་ཡུག་ཆེན་དང་རེའུ་རས་དང་ལྷམ་བོལ་མེད་དང༌། ལྷམ་སྒྲོ་གུ་ཅན་དང༌། ཡུངས་མར་གྱི་འབྲག་དང༌། བུམ་བུ་དང་རིལ་བ་སྤྱི་ལུགས་དང༌། མིང་གིས་སྨོས་པ་འདི་རྣམས་ནི་འཕྲལ་དུ་དགོས་ཏེ་སྤྱད་པ་ལ་བྱ། གཞན་གྱི་གླེགས་བམ་དང༌། མུར་འདུག་གི་ཡི་གེ་ཏར་ཀ་དང་བྱཱ་ཀ་ར་ཎ་ལ་བྱ། ཡི་གེ་དང༌། སྨན་དཔྱད་ཀྱི་ཡི་གེ་ལའང་བྱ་བུ་ལོན་འཕྲལ་དུ་ཁུགས་པའི་དབང་རྒྱུའང་བྱ། ཁ་དོག་དག་ནི་གོས་བཙོས་པའི་ཚོན་རྩི་ལ་བྱ། གཉིས་སུའོ། །གསུམ་གྱིར་ནི་འབྲས་དང་ནས་དང༌། ཏིལ་དང་བལ་སྲན་དང་དམ་པ་མ་ཡིན་པ་འབྲས་དག་ནི་ཟས་དང་སྐོམ་དུའོ། །མིང་གིས་སྨོས་པ་འདི་རྣམས་ནི་མཆོད་སྟོན་དུ་བྱ་ཞིང་སྤྱད་དོ། །གོས་ཀྱི་དངོས་པོའོ།། །། ལེབ་ལེབ་པོ་དང་ལེབ་ལེབ་པོའི་ཕྱེད་དུ་མཉམ་པར་བྱ། ཆོས་གོས་ཀྱི་ཚལ་བུ་རིང་ཐུང་དུ་འདུག་པ་ལ་རིང་པོའི་ཕྱེད་ཀྱི་ཚད་དུ་ཐུང་དུ་བྱའོ། །བཅལ་བའི་ཕྱིར་ཆག་ཤིང་བཅང༌། ཀ་ཤ་དྲུབ་པའི་ཚལ་བུ་བཅལ་བའི་ཕྱིར་ཆག་ཤིང་བཅངས་ཀྱང་ཉེས་མེད་དོ། །འདབ་མའི་དངོས་པོ་ཡང་ངོ༌། །ཚལ་བུ་སྣོལ་མ་ཆུར་འགྲོ་བ་དང་ཞེང་དུ་འགྲོ་བ་དང་ཐ་མ་བསྐོར་བ་ཞེང་ཚད་ཆེ་ཆུང་མ་ཁྱེར་བར་མཉམ་པར་བྱ། དེ་ཙམ་དུ་ཆག་ཤིང་བཅང༌། ཚལ་བུའི་ཞེང་ཚད་ཀྱི་ཆག་ཤིང་ཡང་བཅང༌། འདིའི་མཐའ་ནི་རབ་ཏུ་ཆེན་སོར་བཞིའོ། །ཚལ་བུའི་སྣེ་སྣོལ་དུ་འགྲོ་བ་དང་མཐའ་བསྐོར་བའི་ཞེང་ཚད་ནི་སོར་བཞིར་བྱའོ། །བྱ་རོག་གི་མཐོ་ཡང་ངོ༌། །ཚལ་བུའི་ཞེང་ཚད་བྱ་རོག་གི་རྐང་པའི་ཚད་དུ་བྱས་ཀྱང་རུང༌། ཆུང་ངུ་ནི་ཕྱེད་དང་གསུམ་པའམ་མཐེ་བོའི་ངོས་སོ། །ཚལ་བུ་ཆུང་དུ་ཕྱེད་དང་གསུམ་དང་ཚོན་གང་དུ་བྱས་ཀྱང་
ཉེས་མེད་དེ་ཞེང་ཚད། ས་ལ་གོས་མི་གདིང༌། ཆོས་གོས་འཚེམ་བའི་ཚེ་གཞི་མེད་པར་མི་གདིང༌། གདིང་བ་དེའི་ཕྱིར་བྱ། ཆོས་གོས་ས་ལ་མི་གཞག་པའི་ཕྱིར་གདིང་བ་བྱ། ཤིང་གིའམ་སྨྱིག་མའི་ལས་གྲུ་བཞིར་རོ། །གདིང་བ་བྱ་བ་ནི་ཤིང་ངམ་སྨྱིག་མ་ལས་གསེག་བྱ། རེ་ལྡེ་དང་སྤར་ལས་བྱས་ཀྱང་རུང༌། བྱས་པ་བཅིངས་པའི་ཕྱིར་སྲད་བུའི་སྐབས་ཀྱི་ཕྱིར་དེ་བུ་གུ་ཞེས་སོ། །ཆོས་ཀྱི་འོག་ཏུ་གདིང་བ་གྲུ་བཞི་ལ་ཐ་མ་གྲུ་བཞིར་བུ་གུ་ཕུག་སྟེ་བརྒྱངས་ལ་བཙེམས་ཀྱང་ཉེས་མེད་དོ། །ཆོས་གོས་ཅི་ཙམ་པར་རོ། །ཆོས་གོས་ཀྱི་འོག་ཏུ་གདིང་བ་བྱ་བའི་ཚད་ནི་ཆོས་གོས་ཇི་ཙམ་པ་དང་མཉམ་པར་བྱ། མཚོན་གྱིས་དྲ། ཆོས་གོས་དྲ་བ་ནི་མཚོན་གྱིས་དྲས་ཀྱང་ཉེས་མེད་དེ་བཅང༌། གྲི་བཅངས་ཀྱང་ཉེས་མེད། བྱ་རོག་གི་མཆུ་ལྟ་བུའམ་བྱ་གག་གི་སྒྲོ་ལྟ་བུར་རོ། །གྲིའི་གཟུགས་ནི་འདི་ལྟ་བུ་ལ་བྱ། ལྕགས་ལས་གཞན་མ་ཡིན། གྲིའི་རྒྱུ་ནི་ལྕགས་ལས་བྱ། ཡུ་བ་ཚོན་གྱིས་བྱུགས་པ་རི་མོ་དང་ཉེ་བའི་རི་མོ་ཅན་མ་ཡིན། གྲི་ཡུ་བ་རི་མོ་ཅན་དུ་མི་བྱ། སོར་དྲུག་གི་ཚད་ལས་ལྷག་པ་མ་ཡིན། གྲིའི་ལྕགས་ཉི་ཚེ་བ་ལ་སོར་དྲུག་ལས་རིང་བར་མི་བྱ། བརྒྱད་ཕན་ཆད་ལས་མ་ཡིན་ནོ། །འདུལ་བ་འཛིན་པ་ཁ་ཅིག་ན་རེ་གྲིའི་ལྕགས་ལས་སོར་བརྒྱད་ཙམ་དུ་བྱའོ་ཞེས་ཟེར་ཏེ་གང་ལྟར་བྱས་ཀྱང་ཉེས་མེད། སོར་བཞི་དང་ཆུང་ན་དགོས་པ་ཡང་མེད། གྲིའི་ལྕགས་སོར་བཞི་མན་ཆད་དུ་བྱས་ན་སྤྱད་དུ་མི་མཁོ་བའི་ཕྱིར་མི་བྱ། བ་ལང་གི་ལྕི་བས་བྱུགས་པར་བཙེམ། ཆོས་གོས་འཚེམ་པའི་ཚེ་སའི་གཞི་བ་ལང་གི་ལྕི་བས་བྱུགས་པའི་སྟེང་དུ་བྱ། ལྕི་བ་མེད་ན་བཏབ་བྱུགས་ཏེའོ། །ས་སྔ་ནས་བསྐུས་པ་མེད་ན་འཕྲལ་ལ་བྱུགས་ཏེ་བཙེམ། དེ་བཙེམ། ཆོས་གོས་དགེ་སློང་གིས་བཙེམས་ཀྱང་ཉེས་མེད། ཁབ་ཀྱིས་ཀྱང་ངོ༌། །ཆོས་གོས་བཙེམ་པ་ནི་ཁབ་ཀྱིས་བྱའོ། །དེ་བཅང༌། ཁབ་བཅངས་ཀྱང་ཉེས་མེད། ར་གན་དང་ཟངས་དང་ཁར་བ་དང་ལྕགས་ཀྱིས་ཏེ་གཞན་མ་ཡིན་ནོ། །ཁབ་བྱ་བའི་རྒྱུ་ནི་འདི་རྣམས་ལས་བྱའོ། །ཟངས་སམ་ལྕགས་རྣོན་པོ་ཞེས་གཞན་ལའོ། །འདུལ་བ་འཛིན་པ་ཁ་ཅིག་ན་རེ་ཟངས་དང་ལྕགས་གཉིས་ལས་ཁབ་བྱ་ཞེས་ཟེར་
ཏེ་གང་ལས་བྱས་ཀྱང་ཉེས་མེད། དེའི་སྣོད་སྦུ་བུའམ་ཆང་བ་བཅང་བ། ཁབ་རལ་ནི་ཕྱིང་བུ་དང་རས་མ་དང་སྨྱིག་མ་ལས་བྱ། འདི་གཡེལ་བ་དང་དགེ་སྦྱོང་ལ་དབང་དུ་མི་བྱ། ཁབ་རལ་དང་དགེ་སྦྱོང་དང་དགེ་སློང་ཁྲིམས་ལ་གཡེལ་བ་ལ་ཆུད་ཟ་བར་གྱུར་པའི་ཕྱིར་མི་གཞག །སྦྲང་རྩིའི་ཚིགས་མས་བྱུགས་ཏེ་ཁབ་ཀྱི་ལྕགས་བཙས་མི་ཁྱེར་བའི་ཕྱིར་རས་མ་བཞག་དབྱར་ར་ད་ལ་སྤྲ་ཚིལ་གྱིས་བསྐུས་ལ་དེའི་ནང་དུ་ཁབ་དྲིལ་ན་མི་སྟོར་ཅིང་བཙའ་མི་འཇུག་གོ །མི་སྙིལ་བའི་ཕྱིར་ཆོས་གོས་ལ་སྒྲོ་གུ་གདགས། ཆོས་གོས་མི་སྙིལ་བའི་ཕྱིར་སྒྲོ་གུ། སྒྲོག་མཁར་བཏགས་ཏེའོ། །ཆོས་གོས་སྒྲོག་མཁར་གདབ། མདུད་པ་ཡང་ངོ༌། །སྒྲོ་གུ་མདུད་པ་ཅན་དུ་བྱ། བཙོ་བླག་པས་བཙོས་ཀྱང་རུང་མ་བཙོས་ཀྱང་རུང་མི་བཀྲུ། ཆོས་གོས་ཁ་དོག་བསྒྱུར་ཀྱང་རུང་མ་བསྒྱུར་ཀྱང་རུང་དྲག་ཏུ་འདྲུབ་པའི་ཕྱིར་བཙོ་བླག་མཁན་མི་བཅོལ། དེ་བཞིན་དུ་བདག་གིས་ཀྱང་མ་ཡིན་ནོ། །ཆོས་གོས་བདག་གིས་ཀྱང་མི་བརྡུང༌། དེའི་གདིང་བར་མ་ཡིན། །བཙོ་བླག་མཁན་གྱི་རས་བརྡུང་བའི་སྤྱད་ཀྱི་སྟེང་དུ་མི་གཞག །ཤིང་ལེབ་ལ་མ་ཡིན། ཤིང་ལེབ་ཀྱི་སྟེང་དུ་ཡང་ཆོས་གོས་བཀྲུ་ཞིང་མི་བརྡུང་ཚོན་མཁན་གྱི་ཤིང་ལེབ་ལ་བྱ། རྫ་འཇམ་པོར་བཀྲུས་ཏེ་ཆུ་འདེབས་དལ་གྱིས་སོ། །ཆོས་གོས་བཀྲུ་བ་ནི་ཆུ་འཇམ་ཙམ་གྱི་ནང་དུ་དལ་གྱིས་དགེ་སློང་ཉིད་ཀྱིས་བཀྲུ་ལག་པ་དག་གིས་བཟློག །འཁྲུ་བའི་ཚེ་ལག་པས་དལ་གྱིས་བཀྲུ། མི་ནུས་ན་རྐང་པས་སོ། །ལག་པས་བཀྲུ་མི་ནུས་ན་རྐང་པས་བཀྲུས་ཀྱང་ཉེས་མེད། དེ་ལྟར་བཀྲུ་ན་ཁྱིམ་བདག་གིས་ཀྱང་བཏགས་སོ། །ལག་པས་བཀྲུས་ན་ཆོས་གོས་ཁྱིམ་པ་འཁྲུར་བཅུག་ཀྱང་ཉེས་མེད། གཞན་དུ་སྤྱོད་ན་དེ་བསྲུང༌། ཁྱིམ་པ་ཆོས་གོས་འཁྲུར་གཞུག་པ་ནི་བདག་གིས་སྤྱན་བྱས་ལ་མངོན་སུམ་དུ་འཁྲུར་གཞུག་གི་ལྐོག་ཏུ་འཁྲུར་མ་བཏང༌། རབ་ཏུ་དག་རབ་ཏུ་བཙེམས་རབ་ཏུ་བཙོས་པའི་ཕྱག་དར་ཀུད་པ་བླང༌། ཚེམ་བུ་ཕྱག་དར་ཀུད་པ་ལས་སྡུད་ཅིང་གོས་སུ་བྱེད་ན་རབ་ཏུ་བཀྲུས་ཤིང་བཙོས་ལ་བཙེམས་ལ་གོས་བྱ། མི་གཙང་བས་རེག་པའི་གོས་མ་ཡིན། ཚེམ་བུ་བསྡུ་བ་ནི་སྟུ་ཁྲག་དང་གཅིན་རྐྱག་ལ་སོགས་
པས་རེག་པའི་རྫས་བླངས་ཤིང་མི་སྤྱད། སྐབ་པ་མཛེས་པའི་ཕྱིར་བསྐུས་ཏེ་ཁ་དོག་ཉི་གྲིབ་ལའོ། །ཆོས་གོས་འཚེད་པ་ནི་ཚོན་གྱིས་བཙོས་ལ་བར་འགའ་ཉི་མ་ལ་གཞག །བར་འགའ་གྲིབ་མ་ལ་བཞག་ན་ཁ་དོག་བཟང་པོར་འགྱུར་རོ། །མ་བྱས་ཀྱང་ཉེས་མེད། གོས་མེད་པར་བཙོ། །ཚོན་རྩི་སྔར་བཙོས་ལ་དེ་ནས་གོས་བཙོ། །གསུམ་གྱི་བར་དུ་ནི་མཆོག་ཏུའོ། །ཚོན་རྩི་བཙོ་བ་ནི་ལན་གསུམ་གྱི་བར་དུ་བལྡབས་ཏེ་བཙོས་པའི་ཁུ་བ་ནི་མཆོག་གོ །དེ་བས་ན་མང་པའི་ཕྱིར་ན་གསུམ་བླང༌། ལྟག་ཏུ་ལན་གསུམ་དུ་བཙོ་བ་ནི་ཁུ་བ་མང་དུ་བྱ་བའི་ཕྱིར་ཏེ་བཟང་ངན་རབ་གསུམ་དུ་དབྱུང་ངོ༌། །ཕྱིར་ཞིང་འབྲི། ལན་གསུམ་དུ་བཙོས་པ་དང་པོ་ནི་བཟང་པོ་བར་མ་ནི་འབྲིང་པོ་ཐ་མ་ནི་ངན་ཏོ། །དེ་བས་ན་སོ་སོར་གཞག་གོ །ཚོན་བཟང་ངན་ནི་རྣམ་གསུམ་མི་བསྲེ་བར་སོ་སོར་གཞག་གོ །དེ་ནི་སྔ་མའོ་ལ་སོགས་པར་བྲི། ཚོན་བཟང་ངན་རྣམ་གསུམ་ནོར་ཅིང་འཁྲུལ་ཏེ་མི་བདེ་བའི་ཕྱིར་སྣོད་ལ་ཁ་བྱང་བྲི། སྔ་མ་ནི་ཐོག་མར་བསྐོ། །འཚེད་པའི་ཚེ་ན་ཚོན་དང་པོར་ཕྱུང་བའི་ཁུ་བ་ནི་བཟང་པོས་ཐོག་མར་བཙོ། །ཆོས་གོས་དང་བཅག་ཚོན་གྱི་ནང་དུ་ཆོས་གོས་བཅུག་པའི་ཚེ་ར་རི་མ་ཁྱེར་བར་ལེགས་པར་བཅག །དེ་བས་ན་བླངས་ཏེ་ལེབ་ལེབ་པོ་ལ་དེ་ཙམ་གྱི་ཐང་གིས་སྦྱིན། རས་ཅི་ཙམ་ཡོད་པ་ལས་ཚོན་གྱི་ཁུ་བ་རན་པར་བྱའི་མང་ཉུང་དུ་མི་བྱའོ། །གཤེར་བ་གཟག་གོ །ཚོན་གྱི་ཁུ་བ་མང་ན་ཟག་པར་འགྱུར། རབ་ཏུ་བསྐམས་ན་འབྲིའོ། །ཚོན་གྱི་ཁུ་བ་ཉུང་ན་ཁ་དོག་མི་འགྱུར་ཞིང་སྐམ་པོར་འགྱུར་རོ། །དེ་བས་ན་རན་པར་བྱའོ། །མདོ་ལྟག་མ་རྣམས་ལྟར་ཆེས་ན་མི་དགེ་བའི་ཕྱིར་རན་པར་བྱ། དགོན་པའི་ལ་བསྐམས་ན་དགེ་བྲེས་པ་ལའོ། །ཆོས་གོས་བསྐམ་པ་ནི་ཐག་བུ་བྲེས་ལ་བསྐམ་མོ། །མཐའ་བཏགས་ཏེ་གཟུགས་སོ། །ཆོས་གོས་ཐག་བུ་ལ་བརྒྱངས་པ་ནི་ཤིང་བུ་ཁ་བྲག་འཛིན་དུ་གཞུག་གོ །མི་ཐུབ་ན་རྩྭ་བཏིང་སྟེའོ། །ཤིང་བུ་ཁ་བྲག་གིས་མི་ཐུབ་ཅིང་འཆོར་ན་རྩྭ་དང་ལོ་མ་བཀྲམ་ལ་དེའི་སྟེང་དུ་སྐམ་དུ་མའི་ཕྱོགས་སུ་ཚོན་འགྲོ་བའི་ཕྱིར་ཡང་ཡང་དུ་བཟློག །ཐག་བུ་བརྒྱངས་ཏེ་སྐམ་པ་དེ་ཚོན་རྩི་ཕྱོགས་
གཅིག་ཏུ་འགྲོ་བའི་ཕྱིར་ཡང་ཐོག་མ་དང་མ་ཐོག་བསྣོར། གསར་པ་ལ་ཚོན་གསར་པས་དེ་བཞིན་དུ་ན་དགེའོ། །ཆོས་གོས་གསར་པ་ཞིག་འཚེད་ན་ཚོན་རྩིས་གསར་དུ་བལྡབས་པས་བཙོས་ན་དགེ །རྙིང་པ་ལ་རྙིང་པས་སོ། །ཆོས་གོས་རྙིང་པ་ན་ཚོན་རྩི་རྙིང་པས་བཙོ། །གསར་པ་ནི་ཉི་མ་ལ་བསྐམ། གོས་གསར་པ་ཞིག་བཙོས་ན་ཉི་མ་ལ་བསྐམ། རྙིང་པ་ནི་གྲིབ་མ་ལའོ། །ཆོས་གོས་རྙིང་པ་ནི་གྲིབ་མ་ལ་བསྐམ། ཆུ་ཐང་གིས་མི་འབྲི་བའི་ཕྱིར་སྦྱིན། ཆོས་གོས་ཚོན་གྱི་ནང་དུ་ལན་དུ་བཙོས་པ་བཞིན་དུ་ཆུར་བཀྲུ་།གཞན་གྱི་ཉིན་མོ་ལའོ། །བཙོས་ནས་ཆུར་གཞུག་པ་ནི་བར་ཞག་གིས་བཅད་ལ་བཀྲུ། ཕྱིའི་ཁྱམས་སམ་འཆག་སར་བཙོ་བའི་ལས་མི་བྱ། དགེ་འདུན་གྱི་འཆགས་དང་ཁྱམས་ལ་སོགས་པར་ཆོས་གོས་བཙོ་བའི་ལས་མི་བྱ། གཙུག་ལག་ཁང་དུ་མ་ཡིན། གཙུག་ལག་ཁང་གི་ནང་དུ་གོས་བཙོ་བའི་ལས་མི་བྱ། དེའི་སྟེང་དུ་བྱ། གོས་འཚེད་པ་གཙུག་ལག་ཁང་གི་ཡང་ཐོག་ཏུ་ཆོས་གོས་བཙོ་བའི་ལས་བྱས་ཀྱང་རུང༌། བཤང་ཁང་གི་འཁོར་དུ་མ་ཡིན། བཤང་གཅིའི་སར་ཆོས་གོས་ཀྱི་ལས་མི་བྱ། དེའི་ཕྱོགས་སུ་བྱུག་པ་སྦྱིན། ཆོས་གོས་འཚེད་པའི་ལས་གར་བྱེད་པའི་སར་རྡུལ་མི་འགོ་བའི་ཕྱིར་འཇི་བ་དང་ལྕི་བས་བསྐུ་ཞིང་བྱུག །དེ་སྟེ་རྡོ་རྗེས་བྱུགས་པ་ན་བཀྲུ་།འོག་གཞི་སྐྱང་ནུལ་བཟང་པོ་འཚེར་བ་ཞིག་ན་ཆུས་བཀྲུ་བས་ཆོག་གོ །དེ་སྟེ་བརྩམས་པ་ལས་རླུང་ངམ་ཆར་བབ་པ་འོང་ན་ཁྱམས་སུ་བྱ། ཆོས་གོས་བཙོ་བར་བསམས་ཤིང་མགོ་བཙུགས་པ་ལས་རླུང་དང་ཆར་པ་ལ་སོགས་པ་བྱུང་ན་ཁྱམས་སུ་བཙོ་བླག་བྱས་ཀྱང་རུང་བྱས་ནས་དེའི་ཕྱོགས་སུ་བྱུག་པ་བྱ། ཁྱམས་སུ་བཙོ་བླགས་བྱས་ཟིན་པའི་འོག་ཏུ་མཎྜལ་བྱ། ལྕི་བའམ་སས་སོ། །མཎྜལ་བྱ་བ་ནི་ལྕི་བའམ་སས་བྱུག་ཅིང་བསྐུ། བརྟག་པ་མ་བྱས་པར་བཅག་པ་དང་བཟླས་པའི་ཆོས་གོས་སྤྱད་པར་མི་བྱ། ཆོས་གོས་བརྡུངས་ཤིང་གནིགས་པ་ཁ་དོག་འཚེར་བ་ནི་མ་བཏགས་པ་ཡིན་ཏེ་སྤྱད་ཅིང་བགོ་བར་མི་བྱ། བྱུག་པ་གོགས་ན་དེ་བཏགས་པའོ། །ཆོས་གོས་ཁ་དོག་འཚེར་
བ་བྱེད་ཅིང་མེད་པར་བྱས་ན་བཏགས་པ་ཡིན་ཏེ་བགོས་ཀྱང་ཉེས་མེད་དོ། །ཆུས་བརླན་ནའོ། །ཁ་དོག་འཚེར་བར་བྱས་ན་ཆུས་བརླན་པར་བྱས་ན་ཉེས་པར་འགྱུར་རོ། །བ་མོ་ལ་སྤགས་པ་སླ་བའི་ས་ལག་པས་མཉེས་ཏེ་གོགས་ནའོ། །ཁ་དོག་འཚེར་བ་བ་མོའམ་ཟིལ་བ་ལ་གོར་ལ་བསྲུབས་ན་མེད་པར་འགྱུར་རོ། །ཤམ་ཐབས་བགོས་ནས་སྟེང་དུ་ལུས་བཅིང༌། ལུས་ལ་ཤམ་ཐབས་བགོ་བ་ལ་སྟེང་དུ་སྐ་རགས་ཀྱིས་བཅིང༌། ཤུར་བུའམ་རྒྱ་ཅང་ངམ་ལྕག་པོད་དམ་དྲ་བས་བཅིང༌། ཤམ་ཐབས་ཀྱི་སྐ་རགས་ཀྱི་རྒྱུ་ནི་འདི་རྣམས་སོ། །མི་བརྒྱན་པ་མ་ཡིན་པ་ནི་པོ་སུམ་པ་དང་ནང་དུ་རུབ་པ་དང་ཟུར་གསུམ་དང་གསེར་གྱི་སྲད་བུའོ། །མིང་གིས་སྨོས་པ་འདི་རྣམས་ཀྱི་སྐ་རགས་མི་བཅིང༌། རི་མོ་ཡང་དེ་བཞིན་ནོ། །སྐ་རགས་རི་མོ་ཅན་གྱིས་མི་བཅིང་མི་བཏིང་པའི་ས་ལ་མི་གཞག །ཆོས་གོས་གྱོན་ལ་སྟན་མེད་པར་ས་ལ་མི་འདུག །གདིང་བ་མེད་པར་གཞག་པར་ཡང་མི་བྱ། མི་གཙང་བའི་ཕྱོགས་སུ་མ་ཡིན། ས་མི་གཙང་བར་ཆོས་གོས་གཞག་པར་མི་བྱ་སྟན་མི་གཙང་བ་ལའང་མི་གཞག་མི་འདུག །ཐབས་ཡོད་ན་ཁུར་ལྕིབ་མི་བསྐྱ་ཆོས་གོས་གཟན་དུ་བོར་ཞིང་མི་བསྐྱ། གཞན་སྤྱད་པར་མི་སྤྱད། ཆོས་གོས་དང་ཤམ་ཐབས་ལ་སོགས་པ་གོ་བསྣོར་ཅིང་མི་བགོ །བཤང་གཅི་བྱ་བ་དང་མི་གཙང་བ་ཕྱག་པའི་ལས་སུ་བླ་གོས་བགོས་ཏེ་མི་བྱ། བཤང་གཅི་བྱེད་པ་དང་ས་ཕྱག་པ་ལ་སོགས་པའི་ལས་བྱེད་པར་ཆོས་གོས་སྣམ་བདུན་པ་གྱོན་ཏེ་མི་སྤྱད། འདི་ལ་མི་ཉལ། ཆོས་གོས་སྣམ་བདུན་པའི་འོག་ཏུ་ཡང་མི་གདིང་གྱོན་བཞིན་དུ་ཡང་མི་ཉལ། བསོད་སྙོམས་ལེན་པ་སྤྱོད་པ་དང་མཆོད་རྟེན་ལ་ཕྱག་འཚལ་བ་དང་དགེ་འདུན་ལ་འདུ་བ་དང་ཆོས་མཉན་པའི་ཆ་མནོད་པ་མྱོང་བ་ལས་གཞན་བྱེད་པ་ལ་སྦྱར་མས་མ་ཡིན། མིང་གིས་སྨོས་པ་འདི་རྣམས་བྱེད་པར་ཆོས་གོས་ཆེན་པོ་བགོ་བའི་ལས་གཞན་བྱེད་པར་མི་བགོ །འདི་རྣམས་ལ་གྲོང་བར་དུ་མ་གྱོན་ན་ཉེས་མེད་དོ། །འདིའི་སྟེང་དུ་འདུག་གམ་འདུག་ཏུ་མི་གཞུག་ཆོས་གོས་ཆེན་པོ་འདིའི་སྟེང་དུ་བདག་ཀྱང་མི་འདུག་གཞན་ཀྱང་མི་གཞག །འདི་
ལ་མི་གནད། ཆོས་གོས་ཆེན་པོ་བལྟ་བ་སྟེ་ལུས་སམ་ལག་པས་མནན་པར་མི་བྱ། བཅུག་སྟེ་སུ་ལ་ཡང་མི་བསྐོ། །ཆོས་གོས་ཆེན་པོའི་ནང་དུ་ལན་ཚྭ་དང་མེ་ཏོག་ལ་སོགས་པ་ཅིའང་རུང་སྟེ་བདག་གིས་ཀྱང་མི་བླུགས་གཞན་བླུགས་སུ་ཡང་མི་གཞུག ། ལུས་ཀྱི་རེག་པར་ཡང་མི་སྤྱད་ལག་པ་མ་གཏོགས་པར་ལུས་ཀྱིས་རེག་པར་མི་བྱ། མཆན་ཁུང་གཡས་པའི་དུགས་ཀྱིས་འདི་མ་རུང་བར་འགྱུར་རོ། །ཆོས་གོས་ལག་པ་གཡས་པའི་མཆན་ཁུང་དང་དུགས་དང་རྡུལ་གྱིས་མ་རུང་བར་བྱེད་དེ་ཐབས་འོག་ནས་འཆད། དེ་མི་འགྱུར་བར་དེའི་ཕྱོགས་སུ་དེ་ལ་གོས་སྦྱིན། མཆན་ཁུང་གཡས་པའི་ཐད་ཀར་དུགས་ཀྱིས་མ་རུང་བར་འགྱུར་བའི་ཕྱིར་དུགས་གཟན་གུད་ནས་གླན། ཁྲུ་ཕྱེད་དང་དོ་དང་མཐོ་གང་ངོ༌། །རྡུལ་གཟན་གུད་ནས་གླན་པའི་ཚད་ནི་ཞེང་དུ་མཐོ་གང་ཆུར་ཁྲུ་ཕྱེད་དང་ངོ༌། །ངོས་གཉིས་སུ་ནན་བུས་མནན། རྡུལ་གཟན་གླན་པའི་དུས་སུ་ནན་བུས་མནན། དུས་དུས་སུ་འདི་བཀྲུ། རྡུལ་གཟན་གླན་པ་དེ་དུས་དུས་སུ་བཀྲུ། བཙོ་བ་ཡང་ངོ༌། །རྡུལ་གཟན་དེ་བཀྲུས་ནས་བཙོ། །གླང་བཙག་གིས་དེ་དེ་བཞིན་དུའོ། །བཙོ་བ་ནི་གླང་བཙག་གིས་བཙོས་ཀྱང་རུང་ངོ༌། །གདོང་ཕྱིས་བཅང༌། གདོང་ཕྱིས་བཅངས་ཀྱང་ཉེས་མེད། ལུས་ཟག་ན་ལུས་ལ་ཕྱི་བ་ཡང་ངོ༌། །དགེ་སློང་སྡིག་པོ་ཆེ་དུགས་དང་རྡུལ་ཆེ་བ་ལུས་ཀྱི་ཕྱི་བ་བཅངས་ཀྱང་ཉེས་མེད། ཆོས་གོས་དེའི་ནང་དུ་དེ་བགོའོ། །རྡུལ་ཆེ་བ་དང་ཤུ་བ་དང་རང་ཁྲག་ཡོད་ན་ཆོས་གོས་ཀྱི་འོག་ཏུ་རྣག་གཟན་བགོ །ཆགས་ན་གྲོའི་ཆུའམ་ཚིག་པ་ཆུ་དང་བསྲེས་ཏེ་བྱུགས་ལ་དལ་བུ་དལ་བུས་དགོག །རྣག་གཟན་དང་ལུས་སུ་འབྱར་ན་ནས་ཀྱི་ཕྱེ་དང་སོ་ཕག་བཏགས་པའི་ཕྱེ་ཆུ་དང་སྦྱར་ཏེ་བཀྲུས་ལ་དལ་བུས་དགོག་གོ །རྣག་དང་ཁྲག་ལ་རྣག་གཟན་འབྱར་ན་དགོག་པའི་ཐབས་གོང་མ་ལྟར་བྱ། དུས་དུས་སུ་གདིང་བཀྲུ་བསྐམ་བཙོ། དེ་གླང་བཙག་གིས་ན་དགེ །རྣག་གཟན་བཅོ་བ་ན་ཤུ་བ་ལ་ཕན་པའི་ཕྱིར་གླང་བཙག་གིས་བསྐུས་ན་དགེ །གར་བབ་བབ་ཏུ་གོས་མི་གཞག །གོས་ལྷག་མ་ལ་སོགས་
པ་གར་བབ་བབ་ཏུ་མི་གཞག་གི་བལྟབ་ཅིང་ནན་ཏན་བྱ། དེའི་ཕྱིར་གདང་བཅའ། གོས་དགལ་བའི་ཕྱིར་གདང་བཅའ། ལུང་བུ་ཡང་དེའི་ཕྱིར་རོ། །གདང་ཤིང་གཞུག་པའི་གནས་རྩིག་པ་ལ་བུ་གུ་གཏོད་དེ་ཤིང་སྦུ་བུ་ཅན་གཞུག །གཙུག་ལག་ཁང་བྱེད་པ་ནའོ། །གདང་ཤིང་བུ་གུ་གདོད་པ་ཐོག་མ་གཙུག་ལག་ཁང་བརྩིག་པ་ནས་བྱ། བུ་གུ་མི་བྱ། གདང་ཤིང་གིས་འཕྲལ་བུ་གུ་མི་གདོད། གཙུག་ལག་ཁང་ནི་དཔེ་སྟེ་ཁང་བུ་ཡང་དེ་བཞིན་ནོ། །གདང་ཤིང་གི་བྱ་བ་དང་བུ་གུ་མི་བརྐོ་གཙུག་ལག་ཁང་བཞིན་དུ་གང་ཟག་གི་ཁྱིམ་བུ་ཡང་མི་བརྐོ་ཞིང་ཐོག་མ་ནས་གདོད། ལྕུག་མ་དང་ཐག་བུས་འདི་འགྲུབ་བོ། །གདང་ཤིང་གི་སྐྱིན་པར་ལྕུག་མའམ་ཐག་བུ་བཏགས་ཀྱང་རུང་ངོ༌། །ཚང་ཐུར་གྱིས་གོས་བླངས་ན་དགེའོ། །ཆོས་གོས་ཀྱི་སྣོད་ཚང་ཐུར་གྱི་ནང་དུ་བཅུག་ན་དགེ །འདི་བྱ། ཚང་ཐུར་བྱས་ཀྱང་ཉེས་མེད། གསུམ་མདང་ཕྱེད་དང་དོར་སྦྱར་ཏེ་བཙེམ། ཚང་ཐུར་གྱི་ཚད་ནི་ཆུར་ཁྲུ་གསུམ་ཞེང་ཁྲུ་ཕྱེད་དང་དོ་བྱ། ཁ་དབུས་སུ་གདོད། སྒྲོག་བུ་སྦྱིན། ཚང་ཐུར་གྱི་ཁ་མི་བྱ་བའི་ཕྱིར་སྒྲོག་བུ་བྱ་སྲད་བུས་སོ། །སྒྲོག་པའི་རྒྱུ་སྲད་བུ་ལས་བྱ། གཞན་གྱིས་བཅིང༌། ཚང་ཐུར་གྱི་ཁ་གཅད་པའི་ཕྱིར་སྒྲོ་གུ་གཅིག་གི་མིག་ཏུ་གཅིག་བཅུག་སྟེ་ལུ་གུ་རྒྱུད་དུ་བཙེམ། བཅད་པ་ནི་སྟེང་དུ་བཅའ། ཆོས་གོས་རྟག་ཏུ་དབྱུང༌། དགོས་ན་ཚང་ཐུར་གྱི་ཁ་ལོགས་སུ་གཞུག །སང་འགྲོ་ན་བླ་མ་ལ་གསོལ་ཏེ་གནང་ན་འགྲོ། །དགེ་སློང་གནས་བཅའ་བ་ཞིག་གུད་དུ་འགྲོ་ན་གནས་བརྟན་ལ་སང་འགྲོའོ་ཞེས་ཞུ། གནས་མི་བཅའ་བ་ཞིག་ནའང་གྲོགས་ལ་འགྲོའོ་ཞེས་ཤེས་པར་བྱ། བདག་གི་གནས་སུ་ཆག་ཆག་ལ་སོགས་པ་བྱས་ཏེ་འོ། །དགེ་སློང་གུད་དུ་འགྲོ་ན་བདག་འདུག་འདུག་པའི་གནས་ཕྱག་དར་དང་ཆག་ཆག་ལ་སོགས་པ་བྱས་ཏེ་འགྲོ། ལམ་དུ་འགྲོ་བས་ཆོས་ཀྱི་གཏམ་མམ་བསྲིངས་པའི་མི་སྨྲ་བས་སོ། །ལམ་དུ་ཞུགས་ནས་འགྲོ་བའི་ཚེ་གཏམ་ཅལ་ཅོལ་མི་སྨྲ་བའི་ཆོས་ཀྱི་གཏམ་མམ་ཆོས་ཀྱི་དོན་ལ་བསམ། ངལ་བསོ་བའི་གནས་ནས་ཞལ་ནས་གསུངས་པའི་ཚིགས་སུ་བཅད་པ་
བཀླགས་ཏེའོ། །ལམ་ན་ངལ་བསོ་བ་ལས་ལངས་པའི་ཚེ་ཞལ་ནས་གསུངས་པའི་ཚིགས་སུ་བཅད་པ་བཀླགས་ཏེ་འགྲོ། །ཆུ་བཅུ་བ་ན་ཡང་ངོ༌། །ཆུ་བཅུ་བའི་ཚེ་འང་ཞལ་ནས་གསུངས་པའི་ཚིགས་སུ་བཅད་པ་བཤད། དེའི་ཆུ་གང་གི་བ་དེའི་ཕྱིར་རོ། །ཆུ་བཅུ་བའི་ཚེ་ཚིགས་སུ་བཅད་པ་བཀླགས་པ་ནི་ཁྲོན་པའམ་ཡུར་བ་འདྲེན་འདྲེན་པའི་མི་དེ་ཉིད་ཀྱི་ཕྱིར་བསྔོ། །འབབ་ཆུའི་རྒྱལ་པོ་ལ་བསྔོ། །གཞན་ལྷ་ལ་ཡང་ངོ༌། །ཆུའི་ལྷ་ལ་ཚིགས་སུ་བཅད་པ་གཅིག་བཀླགས། གནས་སུ་གསུམ་རྒྱུད་དོ། །ལམ་དུ་ཞག་ལོན་ན་ནང་པར་གསུམ་རྒྱུད་བཀླགས་ཏེ་འགྲོ། དགོན་པ་པའི་བཅང༌། དགོན་པ་བས་ཆུ་བཅུ་བའི་སྲད་བུ་བཅངས་ཀྱང་ཉེས་མེད། དེའི་ཚད་ནི་ཁྲུ་བརྒྱ་ལྔ་བཅུ་ནས་བརྒྱ་ཡན་ཆད་དོ། །ཆུ་བཅུ་བའི་ཐག་བུའི་ཚད་ནི་ཁྲུ་བརྒྱ་ལྔ་བཅུ་མན་ཆད་བརྒྱ་ཡན་ཆད་དུ་བྱའོ། །ཡུལ་གྱི་རྣམས་ལས་སོ་ཞེས་གཞན་ལས་སོ། །འདུལ་བ་འཛིན་པ་ཁ་ཅིག་ན་རེ་ཆུ་བཅུ་བའི་ཐག་བུ་ཁྲོན་པ་རིང་ཐུང་ཚད་བཞིན་དུ་བཅངས་པས་ཆོག་གོ་ཞེས་ཀྱང་བཤད། ཁྲོན་པ་མ་ཡིན་པའི་ཆུ་དཀོན་ན་འདི་མེད་པར་ཡུལ་རྒྱུ་བ་མི་སྤྱད། འབབ་ཆུ་མེད་དེ་ཁྲོན་པ་འབའ་ཞིག་ཡོད་ན་ཐག་བུ་བཅད་དགོས་ཀྱི་ཁྲོན་པ་མེད་ཀྱི་འབབ་ཆུ་ཡོད་པའི་ཡུལ་དུ་ནི་ཐག་བུ་བཅངས་ཀྱང་ཉེས་མེད། ལམ་པས་ཆོས་གོས་སྤྲུགས་ལ་ཁྲུས་བྱས་པའམ་རྐང་ལག་བཀྲུ་བ་དང་ཆུ་བླངས་ནས། ལམ་དུ་ཞུགས་ཏེ་སོང་སོང་བ་ལས་གཙུག་ལག་ཁང་ཞིག་ཏུ་འགྲོ་ན་ཆོས་གོས་ལ་སོགས་པ་སྤྲུགས་ལུས་ཀྱི་དྲི་མ་ཡོད་ན་ཁྲུས་བྱས་ལ་ཁྲུས་མ་ནུས་ནའང་ཡན་ལག་ལྔ་བཀྲུས་ཏེ་མཎྜལ་བྱ་བའི་ཆུ་དག་བླངས་ཏེ་བཏགས་ལ་ལྷམ་ཕྱི་སྟེ་ལྷམ་ལ་རྡུལ་མེད་པར་ཆུས་ཕྱིས་ཏེ། ཆོས་གོས་གསུམ་བགོ་སྟེ། གཙུག་ལག་ཁང་དུ་འགྲོ་བའི་ཚེ་ཆོས་གོས་གསུམ་བགོ་སྟེ། ཞི་བའི་སྤྱོད་ཡུལ་གྱིས་གཙུག་ལག་ཁང་དུ་འཇུག །མགོ་སྒྱུར་དང་ལག་བརྒྱངས་མི་བྱ་བར་གཙུག་ལག་ཁང་དུ་འགྲོ། རྒན་པོ་བཞི་ལ་ཕྱག་འཚལ་ཏེ་འགྲེང༌། གཙུག་ལག་ཁང་དུ་འོངས་ནས་ལོ་གྲངས་མ་དྲིས་ཀྱི་བར་དུ་དགེ་སློང་པའི་དགེ་འདུན་དུ་ལངས་པ་ལ་ཕྱག་བྱས་ཏེ་འགྲེང་ལ་བསྡད། གསང་བའི་ཕྱོགས་སུ་སྒྲ་བསྐྱུངས་ཏེ་མཛེས་ཤིང་
རབ་ཏུ་བསྡམ་པའི་སྤྱོད་པས་སོ། །འགྲེངས་ཏེ་འདུག་པ་ནི་ཀུན་གྱིས་མཐོང་ཞིང་གསལ་བའི་ཕྱོགས་སུ་སྒྲ་བསྐྱུངས་ལ་མཛེས་ཤིང་ཚུལ་བསྡམས་ཏེ་གཏོགས་འདོད་དང་ཤེས་འདོད་མི་བྱ་བར་འདུག་གོ །རྒྱུས་དང་བཅས་པས་ངལ་བསོ། །མི་ཤེས་པར་ངལ་མི་བསོ། གུད་ནས་དགེ་སློང་ཞིག་འོངས་ན་འདུག་པས་མཁན་པོ་དང་སློབ་དཔོན་ལ་སོགས་པའི་རྒྱུས་ཤེས་ཤིང་ངོ་ཤེས་ན་ངལ་སོར་གཞུག །རྒྱུས་དང་ངོ་མི་ཤེས་ན་ངལ་སོར་མི་གཞུག །མུ་གཅིག་པ་ཡང་ངོ༌། །མུར་འདུག་ངོ་ཤེས་ཤིང་གཡོ་མི་བྱེད་པ་ཞིག་འོངས་ནའང་ངལ་སོར་གཞུག །སྒོ་གཅད། སློང་ན་མི་སྦྱིན། དགེ་སློང་ངོ་མི་ཤེས་པ་ཞིག་གུད་ནས་འོངས་པ་ཞིག་ཡོད་ན་ཐུག་ཐུབ་བྱེད་པའི་ཕྱི་སྒོ་ཆོད་ཅིག་ཅེས་གདམས། གུད་ནས་འོངས་པ་ཁ་སུའང་སྲིད་ཀྱིས་ད་ན་རེ་བྱིན་ཅིག་ཅེས་ཟེར་ཞིང་འོངས་ནའང་མ་སྦྱིན་ཅིག་ཅེས་བསྒོ། །བླངས་ནས་ཟོ་ཅིག་ཅེས་བསྒོ་ནས། གུད་ནས་འོངས་པའི་དགེ་སློང་དེ་རྫས་དག་ལས་ཐུག་ཐུབ་ཏུ་སྤྱོད་ན་མ་སྤྱོད་པར་ཞོག་ཤིག་ཅེས་བསྒོ། །ཁས་བླངས་ཏེ་ཡལ་བར་བཏང་ནས་སྟོར་ན། གྲོགས་ལ་སྒོ་ཆོད་ཅིག་རྫས་དག་སློང་ན་མ་སྦྱིན་ཅིག་ཅེས་གཏམས་ཏེ་བཞག་ནས་ཁས་བླངས་པ་ལས་སྟོར་བར་གྱུར་ན་དགེ་སློང་ཁས་ལེན་པ་ལ་སྐྱིན་པ་དབབ་པོ། །ཡིད་བརྟན་པའི་གནས་བརྟན་འདི་དག་གི་གྲོགས་པོ་ཞེས་པ་ལ་སོགས་པ་བསྟན་ནས་སྦྱིན་དུ་གཞུག །ཚིག་ལྷག་མ་སྐད་དུ་གྲོགས་ལ་གཏམས་ཏེ་གུད་ནས་འོངས་པ་ཐུག་ཐུབ་བྱེད་ཅིང་རྐུ་ཡང་སྲིད་ཀྱིས་སྒོ་ཆོད་ཅིག །རྫས་དག་ལེན་དུ་མ་གཞུག་ཅིག་ཅེས་བསྒོ་བ་ལས་གྲོགས་དེ་ན་རེ་མི་འདིའི་རྒྱུས་པས་ཤེས་ཏེ་ཐུག་ཐུབ་ལ་སོགས་པ་མི་བྱེད་ཀྱི་ཡིད་རྟོན་ཅིག་ཅེས་ཟེར་ཏེ། བདག་གུད་དུ་སོང་བའི་འོག་ཏུ་རྫས་ཤིག་སྟོར་ན་དགེ་སློང་གྲོགས་དེ་ལ་སྐྱིན་པ་དབབ་པོ། །མངོན་རྟགས་ཀྱི་གནས་གཞན་གྱིས་མི་རིག་པའི་བྱེ་བྲག་གི་ཐབས་ཀྱིས་སོ། །དགེ་སློང་གུད་ནས་འོངས་ཤིང་རྒྱུས་མི་ཤེས་པ་བདག་གི་གྲོགས་པོས་ནོར་འདི་བྱིན་གྱིས་ལོང་ཞིག་ཅེས་ཟེར་ཞིང་དན་རྟགས་ཀྱི་ཚིག་ཁྱེར་ཞིང་ལེན་དུ་འོངས་ན་བདག་དང་གཉིས་སུ་འཁོད་པའི་དན་རྟགས་ཤིག་ཁྱེར་ཏེ་འོངས་ན་ནི་བྱིན་ཀྱང་ཉེས་མེད། གཞན་ཞིག་དང་གསུམ་
འཁོད་པའི་དན་རྟགས་ཤིག་ཁྱེར་ཏེ་འོངས་པ་ནི་མི་སྦྱིན་ནོ། །བྱིན་པ་ལས་ལྷུང་ན་ཡང་ངོ༌། །རྫས་ཤིག་ཕར་བྱིན་པ་ལས་ཟིན་ཏམ་ཞེས་མ་དྲིས་པར་བར་དུ་ལྷུང་སྟེ་ཆག་ན་སྐྱིན་པ་བདག་ལ་འབབ་པོ། །དེ་སྟེ་མ་བཟུང་བར་གཏམས་ནའོ། །རྫས་ཕར་བྱིན་ཏེ་ཟིན་ཏམ་ཞེས་དྲིས་པ་ལས་ཟིན་ཏོ་ཞེས་ཟེར་བའི་འོག་ཏུ་ཤོར་ཏེ་ཆག་ན་སྐྱིན་པ་ཕ་རོལ་པོ་ལ་འབབ་པོ། །འདི་ལ་བག་མེད་པར་མ་གྱུར་ཏམ་ཞེས་འདྲི་བ་ལ་བྱ། སྣོད་སྤྱད་དམ་རྫས་མི་གཞན་གྱི་ལག་ཏུ་སྤྱིན་ན་ཟིན་ཏམ་མ་ཟིན་ཅེས་དྲིས་ལ་སྦྱིན་མ་དྲིས་པར་བྱིན་ཏེ་བཏང་ན་ཉེས་བྱས། བརྙས་པ་ལ་སོགས་པ་དག་གིས་མ་རུང་བར་གྱུར་ན་བཀྲུ་བ་ལ་སོགས་པས་སེམས་མི་རངས་ན་རིན་སྦྱིན། ནོར་ཞིག་བརྙས་ཏེ་སྤྱོད་སྤྱོད་པ་ལས་སླར་བྱིན་ན་ངན་སྐྱུགས་ཀྱིས་རེག་གམ་ཁ་དོག་ལ་སོགས་པ་ཉམས་ཏེ། མ་འདོད་ན་བཅོས་ཤིང་བྱི་དོར་བྱས་ལ་སྦྱིན་ནོ། །བཅོས་ཏེ་བྱིན་ཀྱང་མ་འདོད་ན་ནོར་དེ་ཅི་རི་བ་རིན་དུ་བྱས་ཏེ་སྦྱིན་ནོ། །ལྷུང་བཟེད་དང་ཆོས་གོས་བླངས། དགེ་སློང་ངོ་ཤེས་པ་ཡོན་ཏན་དང་ལྡན་པ་ཞིག་འོངས་ན་བསུ་ཞིང་ལྷུང་བཟེད་དང་ཆོས་གོས་བདག་གིས་བླང༌། སྟན་གདིང༌། བསུ་ནས་སྟན་བཏིང་སྟེ་གཞག །རྐང་པ་བཀྲུ་བར་སྤྱན་དྲངས། གུད་ནས་འོངས་པའི་དགེ་སློང་རྐང་བ་བཀྲུ་ཞིང་མདོངས་གསོལ་བྱ། ཆུས་སོ། །མི་སྐོམ་མམ་ཞེས་དྲིས་ལ་ཆུ་བླུགས། ཕྱག་བྱ། ལོ་གྲངས་དྲིས་ཏེ་རྒན་ན་ཕྱག་བྱ། བདེ་བར་སྤྱད་དམ་ཞེས་དྲི། ལམ་ན་ཉོན་མོངས་པ་མེད་དམ་ཞེས་ནད་དྲི་ཅི་ནུས་པར་མགུ་བར་བྱ། གུད་ནས་འོངས་པ་ལ་ལུས་མཉེ་བ་དད་མར་གྱིས་བསྐུ་བ་ལ་སོགས་པས་མགུ་བར་བྱ། མལ་སྟན་ཚུལ་བཞིན་དུ་བྱིན། གུད་ནས་འོངས་པ་རིམ་པ་ཇི་ཙམ་དུ་ཆུད་པ་བཞིན་མལ་སྟན་ཡང་སྦྱིན། དགེ་འདུན་གྱི་གནས་བརྟན་གྱི་གན་དུ་འགྲོ། གུད་ནས་འོངས་པའི་དགེ་སློང་དེ་གནས་བརྟན་གྱི་གན་དུ་སོང་ལ་ཕྱག་བྱའོ། །དེས་དེ་ལ་གནས་ལོང་ཤིག་ཅེས་བསྒོ། གནས་བརྟན་གྱིས་ཀྱང་ཕ་རོལ་པོ་འོངས་པ་གནས་བཙལ་དགོས་པ་ཞིག་ན་གནས་བརྟན་གྱིས་ཡོན་ཏན་ལྡན་པ་འདི་ལ་གནས་ཆོས་ཤིག་ཅེས་བསྒོ། དེ་སྟེ་རྒན་ན་མལ་སྟན་འདི་ལ་བྱིན་གཅིག་ཅེས་བསྒོ། གུད་ནས་འོངས་པ་གནས་བཅའ་མི་དགོས་པ་ཞིག་
ནའང་མལ་སྟན་ཚུལ་བཞིན་བྱིན་ཅིག་ཅེས་བསྒོ། །མ་བརྟགས་པར་མལ་སྟན་མི་བརྙ་གུད་ནས་འོངས་པའི་དགེ་སློང་གིས་ཀྱང་གཞི་ལ་མལ་སྟན་ཡོད་དམ་མེད་དམ་མ་བརྟགས་པར་མལ་སྟན་མི་བརྙ་ཡོད་ན་གདོད་བརྙ། ཆོས་གོས་ཀྱི་ཐ་མ་མ་རུང་བར་གྱུར་ན་མཐའ་བསྐོར་བའི་ཐབས། ཆོས་གོས་ཀྱི་ཐ་མ་ཟེགས་སམ་མ་རུང་བར་གྱུར་ན་མཐའ་བསྐོར་གྱིས་གླན། དེ་སྨྱུང་ཁམ་གྱིས་སྦྱར། མཐའ་བསྐོར་གྱིས་སྦྱར་བ་ནི་བཙོ་ཞིང་བཀྲུ་བ་ལ་བདེ་བའི་ཕྱིར་སྐབས་སུ་གཟུངས་གདབ་པ་ཙམ་དུ་བཙེམ། རོའི་གོས་འཆད་ན་བླག་བ་མེད་པ་དང་ཤིང་གི་སྟེང་དུ་ཞག་བདུན་བརྒྱད་དམ་ལྔ་དྲུག་ཏུའང་གཞན་ལས་དེ་བཀྲུས་ནས་ཀུན་དགེ་སློང་དུར་ཁྲོད་པའི་རོའི་རྫས་ཀྱི་བདག་པོ་ཡོད་དམ་མེད་བརྟགས་ལ་མེད་ན་བླངས་ཏེ་ཤིང་ངམ་རྩིག་པའི་ཁར་ཞག་བདུན་ནམ་བརྒྱད་དུ་གཞག་ལ་རོའི་དྲི་མི་ཞིམ་པ་མེད་པར་གྱུར་ན་བཀྲུས་ཏེ་གོས་སུ་བྱའོ། །དུར་ཁྲོད་པ་མ་ཡིན་པར་རོའི་རྫས་བླངས་པ་ནི་ལེན་དུ་མི་དབང་སྟེ་བླངས་ན་ཉེས་བྱས་སོ། །གཙུག་ལག་ཁང་དང་གྲོང་དུ་འཇུག་པར་སྤྱན་དྲངས་པ་ལས་བདག་དུར་ཁྲོད་པའོ་ཞེས་སྨྲ་བ་ནི་མ་བཏང་བར་སྤྱོད་ཅིག་ཅེ་ན་བདག་དུར་ཁྲོད་པའོ་ཞེས་ནས་སྤྱད། དགེ་སློང་དུར་ཁྲོད་པ་གཙུག་ལག་ཁང་དང་ཁྱིམ་དུ་མི་འགྲོའོ། །འགྲོ་ནའང་སྒོ་ན་བསྡད་དོ། །བསྡད་པ་ལས་སྤྱན་འདྲེན་ཅིང་འབོད་པ་ནའང་དུར་ཁྲོད་པ་ཡིན་ནོ་ཞེས་སྨྲོས་ཤིག །དེ་སྐད་སྨྲས་པ་དང་ཡོན་ཏན་དང་ལྡན་པ་བཙུན་པ་ཁྲོད་བཙོག་པ་མེད་ནང་དུ་བཞུད་སྟན་ལ་བཞུགས་ཞེས་ཟེར་ན་ནང་དུ་སོང་ཞིང་སྟན་ལ་འདུག་ཀྱང་ཉེས་མེད་དོ། །དེ་སྐད་མི་ཟེར་བར་ནང་དུ་འགྲོ་ཞིང་སྟན་ལ་འདུག་པར་མི་བྱ། དགེ་འདུན་གྱི་མལ་སྟན་ལ་མི་སྤྱད། དུར་ཁྲོད་པའི་དགེ་འདུན་གྱི་སྟན་ལ་གཞག་ཅིང་སྤྱོད་དུ་བཅུག་ནའང་མི་སྤྱད། མཆོད་རྟེན་ལས་འདོམ་གྱིས་མཐའ་སྤང༌། དགེ་སློང་དུར་ཁྲོད་པས་མཆོད་རྟེན་ལ་མ་རེག་ཅིང་འདོམ་གང་ཙམ་ནས་བསྐོར། སྦྲང་ཡབ་བཅང༌། སྦྲང་མ་ཟ་ན་དགེ་སློང་གིས་སྦྲང་ཡབ་བཅངས་ཀྱང་ཉེས་པ་མེད་དོ། །བལ་དང་ཤན་དང་ཤིང་བལ་དང་རས་མ་དང་ལོ་མ་ལྷབ་ལྷུབ་པའོ། །སྦྲང་ཡབ་བཙང་བའི་རྒྱུ་བལ་ལས་སྐུད་པར་བཀལ་བ་
དང་ཤིང་གི་ལོ་མ་གཡག་རྔ་འདྲ་བ་དང་ཤིང་བལ་ལས་སྐུད་པར་བཀལ་བ་དང་རས་དང་སྣམ་བུའི་རས་མ་དང་ཤིང་གི་ལོ་མ་ཤད་ཤད་པོར་འདུག་པ་དང༌། འདི་རྣམས་ཀྱིས་བྱའོ། །བ་ལང་དང་རྟ་དང་བ་ལང་གི་སྤུའི་མ་ཡིན། སྦྲང་ཡབ་རྟ་དང་གཡག་རྔ་ལ་སོགས་པ་སྤུ་བྱས་པའི་སྦྲང་ཡབ་མི་བྱ། གང་ཟག་གིས་ཡུ་བ་ཐམས་ཅད་ཚོན་རྩིས་མ་ཡིན། སྦྲང་ཡབ་དང་སེག་ཅང་གི་ཡུ་བ་རི་མོ་ཅན་མི་བྱ། རི་མོ་མེད་ཀྱང་ཁ་དོག་འཚེར་བ་ལའང་མི་བྱ། རི་མོ་དང་རི་མོ་ཉེས་པས་མ་ཡིན། ཅིའང་རུང་སྟེ་རི་མོ་ཅན་གྱི་རྫས་མི་སྤྱད། སྦྲང་བུའི་ཁང་བུ་ཡང་ངོ༌། །སྦྲང་མ་ཟན་རས་ཀྱི་ཁང་བུ་དབུབ། སྟེང་བུ་རས་བཏིང་སྟེའོ། །ཁང་བུའི་སྟེང་དུ་རས་གདིང༌། རྒྱུག་པ་ལ་བཅིངས་ཏེའོ། །ཁང་བུའི་རས་རྒྱུག་པ་ལ་བཅིང༌། ཁྲུ་བཞི་དང་གཉིས་སོ། །རས་ཁང་གི་ཚད་ནི་ཞེང་ཁྲུ་བཞིར་བྱ། མཐའ་སྣམ་བུས་བསྐོར། རས་ཀྱི་ཁང་པའི་གློའང་རས་ཀྱིས་བསྐོར་ཅིང་གཡོགས་སོ། །ཁྲུ་བཅུ་གཉིས་ཀྱིས་སོ། །ཁང་བུའི་གློ་རས་ཀྱིས་བསྐོར་བ་ནི་ཆུར་ཁྲུ་བཅུ་གཉིས་སུ་བྱའོ། །མནན་པ་དང་བཅས་སོ། །དེ་མལ་སྟན་གྱི་འོག་ཏུ་མནན། ཁང་བུ་གློར་བསྐོར་བའི་རས་ཀྱི་མཐའ་མ་མལ་འོག་ཏུ་ཆུད་པར་མནན། སྒོའི་སྒོ་ཡོལ་བྱ། རས་ཁང་གི་སྒོ་བཅད་པའི་ཕྱིར་རས་སྣེ་སྣོལ་དུ་གཏང་བར་བྱ། ཚ་ན་རྡུལ་ཡབ་ཀྱིས་ཐབས་སོ། །ཡུལ་ཚ་ན་བསིལ་ཡབ་ཀྱིས་གཡབས་ཀྱང་ཉེས་མེད། རྡུལ་ཡབ་བཅང༌། བསིལ་ཡབ་བཅངས་ཀྱང་ཉེས་མེད། རེ་ལྡེ་མཁན་གྱིས་བྱས་པ་ལའང་ཏ་ལའི་འདབ་མ་ལྟ་བུའོ། །བསིལ་ཡབ་ནི་ཏ་ལའི་འདབ་མའམ་སྨྱུག་མ་ལ་གདགས་པར་བྱ། རི་མོ་དང་རི་མོ་ཉེས་པས་མ་ཡིན། བསིལ་ཡབ་རི་མོ་ཅན་མི་བྱ། དགེ་འདུན་གྱིས་ན་གཞན་ཡང་ངོ༌། །དགེ་འདུན་གྱིས་ནི་རི་མོ་ཅན་སྤྱད་ཅིང་བཅངས་ན་ཉེས་མེད་དོ། །རྩིང་པའི་རྡུལ་ཡབ་ནོར་བུ་ཅན་བྱུང་ན་མཆོད་རྟེན་ལ་དབུལ། རྩིད་པའི་རྡུལ་ཡབ་ནོར་བུ་དང་གསེར་དངུལ་གྱིས་བརྒྱན་པ་ཞིག་རྙེད་ན་མཆོད་རྟེན་ལ་དབུལ་ལོ། །ཉན་ཐོས་ཀྱི་ཡང་ངོ༌། །སྦྲང་ཡབ་རྒྱན་ཅན་ཉན་ཐོས་ཀྱི་མཆོད་རྟེན་ལ་ཕུལ་ནའང་ཉེས་མེད། ཆོངས་ཤིག །བེའུ་རས་
དང་སྔས་གྲུ་བཞི་ཡང་ངོ༌། །བེའུ་རས་དང་སྔས་བར་ཚངས་ཅན་གང་ཟག་གིས་བཅངས་ཀྱང་ཉེས་མེད་དོ། །བུ་དང་ཆུང་མ་རྙེད་ན་སྦྱིན་བདག་གི་དབང་གིས་ནན་ཏན་བྱ། ཡོན་བདག་བསོད་ནམས་འདོད་པའི་ཕྱིར་བུ་དང་ཆུང་མ་དགེ་འདུན་ལ་ཡོན་དུ་ཕུལ་ན་ཁོས་ཅི་ལྟར་བསྡོས་ཏེ་ཕུལ་བ་བཞིན་དུ་ནན་ཏན་དུ་སྤྱད། དེ་སྟེ་སླུ་བར་གྱུར་ན་དེ་ཅི་ཅམ་དུ་འདོད་པའི་རིན་གྱིས་སོ། །མདོ་ལྟག་མ་ལྟར་བུ་དང་ཆུང་མ་ཕུལ་བ་ལས་སླར་སླུ་ཞེས་ཟེར་ན་དགེ་འདུན་གྱིས་རིན་ཐང་མི་བཅད་ཀྱི་ཁོ་བོ་ཁ་ཐབས་བཞིན་དུ་སླུ་སྦྱིན། ཡང་ཕུལ་ཡང་བརྟགས་པའོ། །ཡོན་དུ་ཕུལ་ཟིན་པ་ལས་བསོད་ནམས་སུ་འགྱུར་བའི་ཕྱིར་སླར་མ་བསླུས་ཀྱང་ལན་དུ་མར་བསླུས་ཤིང་འབུལ་ལོ་ཞེས་ཟེར་ཞིང་འབུལ་ནའང་མི་རུང་བ་མེད་དོ། །དེ་སྟེ་ཤིང་ཕུལ་བའི་རྒྱན་དུས་མཆོད་ཀྱི་ཚེ་བརྒྱན་པའི་ཕྱིར་གཞག །བཟའ་ཤིང་དང་གྲིབ་ཤིང་ལ་དགེ་འདུན་འདུ་ཞིང་སྤྱོད་པའི་ཕྱིར་བརྒྱན་པ་རྒྱན་དུ་ཕུལ་ནའང་ཕྱིས་འདུ་བའི་ཚེ་བརྒྱན་པའི་ཕྱིར་གཞན་དུ་མི་སྤྱད་དོ། །དེ་སྟེང་ཁང་བུ་བརྩིག་པ་ལ་ནི་འབྲི་བའི་ཕྱིར་རོ། །ཁང་བུའི་རྒྱན་དང་རྩིག་པའི་རི་མོ་བྲི་བའི་ཕྱིར་བསྔོས་ཏེ་ཕུལ་ནའང་གཞན་དུ་མི་སྤྱད་པ་དེ་ཉིད་དུ་སྤྱད་དོ། །དེ་སྟེ་མ་ཡིན་ཏེ་ཀ་བ་ན་ལས་སར་བར་རོ། །ཀ་བ་ལ་བསྔོས་ཏེ་ཕུལ་ནའང་ཀ་བའི་རི་མོ་དང་རྙིང་པ་བརྗེ་བའི་ཕྱིར་སྤྱད་དོ། །ས་ལ་འོ། །ས་ལ་བསྔོས་ཏེ་ཕུལ་ནའང་གཞན་དུ་མི་སྤྱད་དེ་འོག་ནས་འཆད་དོ། །མེའི་གནས་སུ་ན་འབུད་པ་བྱ། མེ་བུད་པའི་ཕྱིར་ཕུལ་ན་ཤིང་དང་མེ་མར་ལ་སོགས་པར་སྤྱད་དོ། །སྣུམ་འཐོབ་པ་ཡང་ངོ༌། །མེ་བུད་པའི་ཕྱིར་ཕུལ་བ་ལས་མི་དགོས་སམ་ལྷག་ན་ཁུར་བ་ལ་སོགས་པར་ཡང་བྱའོ། །ལུས་བསྐུ་བར་ཡང་བྱ། ནད་པའི་གནས་སུ་བརྟགས་པར་སྨན་དང་ཡོ་བྱད་དོ། །ནད་པ་རྣམས་ལ་བསྔོས་ཏེ་ཕུལ་ནའང་རྩི་སྨན་དུ་སྦྱར་ཏེ་སྦྱིན་ནོ། །ཟས་ཀྱི་གནས་སུ་ཟས་བྱའོ། །ཚང་མང་གི་གནས་སུ་ཕུལ་བའི་རྣམས་ནི་ཟས་སུ་བྱ་ཞིང་སྤྱད་དོ། །སྐོམ་གྱིར་སྐོམ་གྱི་གནས་སུའོ། །གྲུང་ཚད་དུ་ཕུལ་བའི་རྣམས་ནི་སྐོམ་དུ་བཏུང་ཞིང་སྤྱད་དོ། །བསྲོ་གང་གི་གནས་སུ་བསྲོ་གང་ངོ༌། །བསྲོ་གང་དུ་ཕུལ་བའི་རྣམས་ནི་བསྲོ་གང་མེ་བུད་པ་ལ་སོགས་པ་སྨན་དཔྱད་དུ་སྤྱད་
དོ། །སྣུམ་འཐོབ་པ་ཡང་ངོ༌། །གོང་མ་ལྟར་བསྲོ་གང་ལ་ཡོན་ཕུལ་བ་མེ་འབུད་པར་མི་དགོས་ན་དགེ་འདུན་གྱི་སྣུམ་དང་ཁ་ཟས་བསོད་པའི་རྒྱུར་བྱ། སྣུམ་འཐོབ་པའི་གནས་སུ་ཟླུམ་པོར་ཡོ་བྱད་ཀྱི་གནས་སོ། །དགུན་མེ་འབུད་པའི་ཁྱིམ་ཁང་ཟླུམ་དུ་ཡོན་ཕུལ་བ་ནི་ཤིང་དང་ལུས་དང་རྐང་པ་བསྐུ་བའི་སྣུམ་དུ་བྱ། དབྱར་ཡོན་དུ་ཕུལ་ཏེ་མེ་འབུད་མི་དགོས་ན་ལུས་ལ་བྱུག་པ་དང་བཤོས་ཀྱི་རྒྱུར་བྱ། སྐྱེས་པའི་རབས་བྲི་བ་ཡང་ངོ༌། །དགེ་འདུན་གྱི་བཀད་སར་ཡོན་ཕུལ་ཏེ་བཀད་པའི་ཡོ་བྱད་དུ་སྤྱད་ཅིང་དགོས་པ་སྤྱད་ཀྱང་ལྷག་ཡོད་ན་སངས་རྒྱས་འཇིག་རྟེན་དུ་བྱུང་བ་དང་བདུད་བཏུལ་བ་ལ་སོགས་པའི་གཏམ་རྒྱུད་བྲི། ཕྱི་ཁྱམས་དང་འཆགས་དང་སྒོ་ཕུགས་དང་ཁྱམས་སུ་བགོ །ཕྱི་རོལ་གྱི་ཁྱམས་དང་སྒོ་ཕུགས་དང་འཆགས་ས་ལ་སོགས་པ་ལ་བསྔོས་ཏེ་ཕུལ་བ་ནི་དགེ་འདུན་སྤྱིའི་བགོ། དབུས་ཀྱང་ངོ༌། །གཙུག་ལག་ཁང་གི་དབུས་ཀྱི་མཐོངས་སུ་ཕུལ་བ་ཡང་སྤྱིར་བགོ །ཕྱོགས་བཞིའི་དགེ་འདུན་གྱིར་འདི་གཞག་གོ་ཞེས་ཀྱང་གཞན་ལས་སོ། །སྒོ་ཕུགས་དང་དབུས་ཀྱི་མཐོངས་སུ་ཕུལ་བ་ལ་སོགས་པ་འདུལ་བ་འཛིན་པ་ཁ་ཅིག་ན་རེ་ཕྱོགས་བཞིའི་དགེ་འདུན་ལ་བསྔོས་ཏེ་ཞོག་ཤིག་ཅེས་ཀྱང་བཤད་དོ། །དཀོན་མཆོག་གི་ཕྱིར་སློང་བ་ནི་བརྟགས་པའོ། །སངས་རྒྱས་དང་ཆོས་དང་དགེ་འདུན་གྱི་ཕྱིར་སློང་བ་ནི་ཉེས་མེད་དོ། །བརྗོད་པ་ཡང་ངོ༌། །དཀོན་མཆོག་གསུམ་པོ་ལ་ཡོན་བདག་ཡོན་འབུལ་བའི་ཚེ། ཡོན་བདག་སེམས་བསྐྱེད་པའི་ཕྱི་སྟོད་ཏྲ་བསྐྱེད་ཀྱང་ཉེས་མེད། བླངས་ཏེའོ། །སྟོང་ཏྲ་བྱ་བ་ནི་སྔར་མི་བྱའི་ལེན་པའི་ཚེ་བྱ། མཐོང་བའི་ཕྱིར་འཁོར་ལོ་བྱ། སྟོད་ཏྲ་བྱ་བ་ནི་དགའ་བར་བྱ་བའི་ཕྱིར་ཀུན་གྱིས་མཐོང་བར་ས་མཐོན་པོར་འདུག་སྟེ་བྱའོ། །ཚའམ་རླུང་ངམ་ཆར་པའི་གནོད་པས་མི་རེག་པའི་ཕྱིར་ཁང་བུ་བརྩེགས་པ་སྒོ་བཞི་པ་བྱ། སྟོད་ཏྲ་ཀློག་པས་མཐོན་པོར་བྱ་བ་ནི་ཤིང་རྟའི་སྟེང་དུ་ཁང་བུ་ཤིང་ཁང་ཕུབ་ལ་སྒོ་བཞིར་བཏོད་དེ་དེའི་ནང་ནས་བཀླག །མཆོད་པ་ཟིན་ནས་འཁོར་ལོ་དབྱུང༌། སྟོད་ཏྲའི་ཁ་དོན་ལ་སོགས་པ་ཟིན་ནས་ཁང་བུ་སོ་སོར་བཤིག་སྟེ་སྦས་ལ་གཞག །སྣོད་དུ་
སྦེད་པས་འཐོབ་པ་སྦ། སྟོད་ཏྲ་ཀློག་པས་ཁང་བུ་ནས་བྱེད་པའི་ཚེ་ཡོན་ཕལ་ཆེར་ཕུལ་ན་དེ་རྣམས་བསྡུ་ཞིང་བརྟུལ་བ་སྡུད་པའི་དགེ་སློང་ནི་གཞན་གཅིག་བསྐོ། །སྟོན་པ་མཆོད་པ་ནི་གཉིས་སུ་མ་དགོས་པར་སྦྱིན་པར་དགེ་སློང་མའི་དགེ་འདུན་མ་གཏོགས་སོ། །ལྟག་མ་ལྟར་སྟོད་ཏྲ་བྱེད་ཅིང་མཆོད་པའི་ཚེ་ན་ཡོན་བདག་གིས་དགེ་སློང་ཕོ་མོའི་སྤྱིར་ཕུལ་བ་ནི་བགོ །དགེ་སློང་འབའ་ཞིག་ལ་བསྔོས་ཏེ་ཕུལ་བ་ནི་དགེ་སློང་མ་མི་དབང་ངོ༌། །འདིར་གཅིག་པ་ལས་འཁོར་ལོ་སོ་སོར་བཙུགས་པ་ན་སྦོམ་པོར་ཉེས་པའོ། །ལྟག་མ་ལྟར་དགེ་སློང་གིས་འཁོར་ལོའི་གནོད་པ་དང་བརྗེད་པར་བྱ་བ་དང་ཡོན་བདག་གིས་ཡོན་མང་དུ་ཕུལ་ཏེ་དགེ་སློང་མས་ཡོན་སྐལ་བླངས་ཏེ་མ་སྟེར་བ་དང་བསྡུ་ལ་ནན་དས་དེའི་ཉིན་མོ་དགེ་སློང་གིས་མཆོད་པ་འདྲ་བ་ཅིག་ཕྱུང་སྟེ་ཡོན་ཏན་ཐོབ་པ་ལས་དགེ་སློང་ལ་སྙོམས་པ་ལྟར་གྱུར་ཏེ་དེ་ལྟར་བྱེད་ན་དགེ་སློང་མ་དབྱེན་གྱི་སྦོམ་པོར་འགྱུར། སྣོད་འགྱེད་པས་བགོ །སྟོད་ཏྲ་བྱས་པའི་ཕྱིར་ཡོན་ཕུལ་བའི་རྣམས་སོ་སོར་བགོ་བ་ནི་ཡོན་ཕུལ་བ་སྡུད་པར་བསྐོས་པའི་དགེ་སློང་དེས་བྱའོ། །འདི་བསྐོའོ། །སྟོད་ཏྲ་ཀློག་པའི་ཚེ་ཡོན་འབུལ་བ་སྡུད་པ་དང་སོ་སོར་འགོད་པའི་དགེ་སློང་གཅིག་བསྐོ། །བཙོང་བའི་རིགས་པ་བཙོང་གཡུ་དང་རྟ་ལྟ་བུ་ཞིག་ཕུལ་ཏེ་བགོར་མི་བདེ་བ་ནི་བཙོངས་ཏེ་རིན་བགོ །དགེ་འདུན་གནས་པར་རོ། །བཙོང་བ་ནི་དགེ་འདུན་གྱི་ནང་དུ་རིན་ཐང་དྲིས་ཏེ་གང་གིས་རིན་ཆེར་བཏབ་པ་དེ་ལ་བཙོང་བསྐྱེད། དགེ་འདུན་ལ་མཐར་གྱིས་དྲིས་ཏེ་གང་གིས་ཆེར་བཏབ་པ་ལ་བཙོང༌། དེས་འདི་ལ་གདུག་པར་གཏོགས་པའི་ནན་ཏན་བྱ། ནོར་འགོད་པར་བསྐོས་པའི་དགེ་སློང་དེས་ནོར་འགོད་ཅིང་དགེ་འདུན་འདུ་བའི་སར་ཆག་ཕྱག་དར་ལ་སོགས་པ་བྱ། དགེ་འདུན་གྱི་གནས་བརྟན་གྱིས་རིན་བྱ། ནོར་རིན་གཅོད་པའི་ཕྱིར་དགེ་འདུན་ལ་སྟོན་པའི་ཚེ་ཐོག་མར་གནས་བརྟན་གྱིས་རིན་ཐང་གཅད་དོ། །རན་པར་རོ། །གནས་བརྟན་གྱིས་ནོར་རིན་ཐང་བཅད་པ་ན་སྲང་གཅིག་རི་བ་ཞོ་དྲུག་རི་བ་ཙམ་དུ་གདབ་པོ། །དེའི་ཕྱིར་དེ་ལ་མི་བསྟབས་གནས་བརྟན་གྱིས་རིན་བཅད་པ་ལས་ཆེར་
འབེབས་པ་གཞན་མ་བྱུང་ན་གནས་བརྟན་མི་ཉོར་མི་གནོད་བར་ནི་མི་བྱའོ། །ཆད་པར་བྱ་སྟེ་སླར་འཕེལ་བར་མི་འགྱུར་ན་དབྱུང་ནོར་བཙོང་བ་ནི་རིན་འདེབས་པའི་ཕྱིར་བརྟན་པ་ལས་རིན་གང་གིས་ཆེར་བཏབ་པ་དེ་ལས་བཟླས་ཏེ་དྲིས་ཀྱང་གཞན་ཆེར་འདེབས་པ་མེད་ན་དེ་ཉིད་ལ་ཉོར་གཞུག་གོ །མི་བཙོང་མི་སྤེལ། བདག་ཉོར་མི་འདོད་པ་ལས་རིན་བསྐྱེད་པའི་ཕྱིར་རིན་ཐང་ཆེར་མི་གདབ། བུད་མེད་ལ་མ་ཡིན། བུད་མེད་ནི་སྤྱད་བྲིམ་ཞིང་རིན་ཐང་མི་གཅད། རིན་མ་བླངས་པར་མི་སྤྱད། དགེ་འདུན་ལས་ནོར་ཉོ་བར་བླངས་པ་ལས་རིན་མ་ཕུལ་གྱི་བར་དུ་སྤྱད་པར་མི་བྱ། བཅོས་པར་ཡང་ངོ༌། །དགེ་འདུན་ལ་ནོར་ཉོ་བའི་ཕྱིར་བླངས་པ་ལས་རིན་མ་ཕུལ་གྱི་བར་དུ་མི་སྤྱད། ཁ་དོག་བསྒྱུར་བའམ་བཅོས་ལེགས་མི་བྱ། ལེན་པ་མང་ན་དུ་ལ་སོགས་པའི་སྡེར་བགོ །ཡོན་བདག་གིས་ཡོན་མང་མོ་ཞིག་ཕུལ་ཏེ་འགོད་ན་བགོ་སླ་བའི་ཕྱིར་དགེ་སློང་ཡོད་པ་ལས་བཅུ་ཕུང་དུ་བཅད་དེ་སོ་སོར་བཅུ་སྡེར་བྱིན་ལ་འགོད་དུ་གཞུག་སྡེར་བྱིན་པ་ལས་མ་བགོས་པར་འགའ་ཞིག་ཤི་ན་དེའི་ཚེ་ཆ་སྡེར་གཏོགས་སོ། །མདོ་ལྟག་མ་ལྟར་བཅུ་ཞིག་བགོ་གཅིག་ཏུ་ནོར་སྐལ་བྱིན་པ་ལ་བཅུ་སྡེ་དེའི་ནང་ནས་འགའ་ཞིག་ཤི་ན་དེའི་སྐལ་བ་བཅུ་སྡེ་དེར་གཏོགས་པའི་རྣམས་ཀྱིས་བགོས་ཀྱང་ཉེས་མེད། རིགས་པ་ནི་མྱ་ངན་ལས་འདའ་བའི་བསམ་པས་རབ་ཏུ་བྱུང་བ་ཚུལ་ཁྲིམས་དང་ལྡན་པ་ལ་གོས་སྟོང་ཕྲག་བརྒྱ་དང་ཁང་ཕ་བརྩེགས་མ་ལྔ་བརྒྱའོ། །མྱ་ངན་ལས་འདའ་བའི་ཕྱིར་དད་ཅིང་མོས་ཏེ་རབ་ཏུ་བྱུང་བའི་དགེ་སློང་ཡོན་ཏན་དང་ཚུལ་ཁྲིམས་དང་ལྡན་པས་ནི་གོས་བཟང་པོ་སྣ་གྲངས་སྟོང་ཕྲག་བརྒྱ་དང་ཟས་ཞིམ་བཟང་པ་རོ་སྣ་བརྒྱ་དང་ཁང་བ་བརྩེགས་མ་ལྔ་བརྒྱ་ལ་སོགས་པ་བཟང་པོ་དང་མང་པོ་ཅི་སྤྱད་ཀྱང་རུང་སྟེ་ཡོན་ཏན་དང་ལྡན་པས་ཞུ་བར་འགྱུར་བས་སྤྱོད་དུ་དབང་སྟེ་བརྟགས་པའོ། །དགེ་འདུན་གྱི་ནོར་ཀྱང་རོ། །མདོ་ལྟག་མ་ལྟར་ཡོན་ཏན་དང་ལྡན་པས་ནི་དགེ་འདུན་གྱི་ནོར་དང་ཟས་ལ་སྤྱད་ཀྱང་བརྟགས་པའོ། །མི་སློབ་པའི་བར་དུའོ། །མྱ་ངན་ལས་འདས་པར་སེམས་བསྐྱེད་ཅིང་ཚུལ་ཁྲིམས་དང་ལྡན་པས་ནི་དགྲ་བཅོམ་པ་མན་ཆད་གང་
ཟག་རིམ་པ་བདུན་གྱིས་ནོར་ལས་སྤྱད་ཀྱང་བརྟགས་པའོ། །མ་རབས་ཀྱང་ངོ༌། །མདོ་ལྟག་མ་ལྟར་སྤྱད་ཀྱང་བརྟགས་པ་ནི་གང་ཟག་མ་རབས་ཡིན་ཀྱང་ཚུལ་ཁྲིམས་དང་ལྡན་ཞིང་མྱ་ངན་ལས་འདའ་བར་སེམས་བསྐྱེད་པ་ནི་སྤྱོད་པར་བརྟགས་པའོ། །ཚུལ་ཁྲིམས་ལོག་པ་ལས་ནི་མ་ཡིན་ནོ། །དགེ་འདུན་གྱི་ཟས་དང་གོས་ཀྱི་ཤས་ཀྱི་སྐལ་བ་ལ་ཕས་ཕམ་པ་བཞི་བྱུང་བ་ནི་མི་དབང་ངོ༌། །ཕས་ཕམ་པ་བཞིའི་ཚུལ་ཁྲིམས་ཕྲ་མོ་ཉམས་ཀྱང་ཤས་ཀྱི་སྐལ་བ་ནི་དབང་ངོ༌། །ཕས་ཕམ་པ་དང་ཁྱིམ་པ་དགེ་འདུན་ལ་འཁོར་ཞིང་ཡོན་ཕུལ་བ་ནི་དགེ་འདུན་གྱིས་ཟ་ཞིང་སྤྱོད་དུ་བཅུག་པ་ནི་དབང་ངོ༌། །བུ་ལོན་དུ་འགྱུར་བ་ནི་ལེ་ལོ་ཅན་གྱི་བླངས་ཏེ་བཙོ་བའོ། །ཚུལ་ཁྲིམས་མ་ཉམས་སུ་ཟིན་ཀྱང་ལེ་ལོ་ཆེ་ཞིང་དགེ་བ་སྤྱོད་པའི་ཤས་ཆུང་ན་ཡོན་བདག་གི་ནོར་རྫས་ལ་སྤྱད་པ་མི་ཞུ་སྟེ་བུ་ལོན་དུ་འགྱུར་རོ། །དགེ་འདུན་གྱི་རྙེད་པ་ལས་རིགས་པ་ནི་མཚམས་གཅིག་པའི་གང་ཟག་གི་གཙུག་ལག་ཁང་ན་སྡེ་པ་དེའི་རྙེད་པ་ལ་སྤྱོད་པ་ཡང་ངོ༌། །ཚུལ་ཁྲིམས་དང་ལྡན་པས་ནི་དགེ་འདུན་གྱི་ཟན་སྐལ་ཡང་ཟོས་ལ་ཡོན་བདག་གཞན་ཞིག་གིས་ཟན་ཁྱེར་ཏེ་འོངས་ཏེ་བྱིན་ན་ཡང་ཟོས་ཀྱང་ཉེས་མེད་དོ། །གཅིག་ཟོས་ན་གཅིག་བསགས་སུ་ནི་མི་དབང་ངོ༌། །ཁང་བུ་བསྔོས་པ་ཡང་ངོ༌། །ཡོན་བདག་གིས་ཁང་བུའི་རྐྱེན་དུ་ཁང་བུ་དེ་ན་སུ་འདུག་པ་ལོ་གཅིག་ཅིང་རྟག་ཏུ་གསེར་ལྟ་བུ་འབུལ་བ་ཞིག་ཡོད་ནའང་དེའང་བླངས་ལ་དགེ་འདུན་སྤྱིའི་ཡོན་སྐལ་བླངས་ཀྱང་ཉེས་མེད་དོ། །འདི་ལ་རེས་ཀྱིས་བསྒོ། །ཁང་བུའི་རྐྱེན་རྟག་ཏུ་སྲང་གྲངས་འབུལ་བ་ཞིག་ཡོད་ན་ཁང་བུ་དེ་རྟག་ཏུ་དགེ་སློང་གཅིག་ཡུ་མི་གཞག་གི་རེས་ཀྱིས་དགེ་འདུན་ཀུན་འཁོད་དོ། །དགེ་སློང་གཅིག་གིས་མངན་རྣོགས་སུ་ཐེག་སྟེ་རྐུ་སེམས་དང་ལྡན་ན་ཕམ། ལྷུང་བཟེད་དང༌། ལྷུང་བཟེད་ཆུང་དུ་དང་ཕུར་བུ་དང་བུམ་པ་དང་ཀྱོ་བ་ཏང་དང་གྲི་དང་ཁབ་དང་སེན་རེག་དང་གཟར་བ་དང་སོལ་བ་བསྡུ་བ་དང་སྟ་རེ་དང་སླ་ང་དང་ཁ་ཕྱིས་དང༌། ལྕགས་ཀྱི་སྣོད་བགོ །ཡོན་བདག་གིས་མིང་གིས་སྨོས་པ་འདི་རྣམས་དགེ་འདུན་ལ་ཕུལ་ན་དགེ་འདུན་སོ་སོར་བགོ །སའི་སྣོད་དག་ཏུ་ལྷུང་བཟེད་ཆུང་
ངུ་དང་བུམ་བུ་དང་བླུགས་མ་དང་ཆབ་སྟོང་དང་རིལ་བ་སྤྱི་བླུགས་དང་ཆུ་སྣོད་དག་ཀྱང་ངོ༌། །མིང་གིས་སྨོས་པ་འདི་རྣམས་ལྟ་བུ་ཞིག་ཡོན་བདག་གིས་ཕུལ་ནའང་དགེ་འདུན་སོ་སོར་བགོ །རིན་པོ་ཆེའི་ཁྲི་ལ་སོགས་པ་མཐར་ལྕགས་ཀྱང་ངོ༌། །རིན་པོ་ཆེའི་ཁྲི་མན་ཆད་ལྕགས་ཀྱི་ཁྲི་ཡན་ཆད་གཅིག་ཕུལ་ན་བཙོངས་ལ་རིན་ལ་བགོ །བརྗེ། མདོ་ལྟག་མ་ལྟར་ཁྲི་ཡོན་དུ་ཕུལ་བ་རིན་དུ་བརྗེས་ལ་བགོ །ཤིང་གི་ནི་མ་ཡིན་ནོ། །ཤིང་གི་ཁྲི་ཆེ་སྲ་ཤིག་ཕུལ་ན་མི་བགོ་བར་སྤྱི་ལ་གཞག །ཚོན་སྣ་ལྔ་ལས་གཞན་དག་ཀྱང་ངོ༌། །ཚོན་ཆེན་པོ་སྣ་བདུན་ཕུལ་ན་མཚལ་དང་ལི་གྲུ་དང་ནུ་མེད་གསུམ་ནི་བགོའི་གཞན་སྣ་ལྔའི་རི་མོ་བྲི་བའི་ཕྱིར་བཞག་གོ །མ་བཅོས་པ་ཡང་ངོ༌། །ཚོན་ཆེན་པོ་སྣ་བདུན་ལས་བཙོས་པ་ཞིག་ན་མི་བགོ །མ་བཅོས་པ་ནི་བགོ །བཅོས་པ་བཙོར་རུང་བ་ནི་བགོ །བཙོས་པའི་ཁུ་བ་དགེ་འདུན་གྱི་གོས་བཙོར་རུང་བ་ཡོད་ན་ཕྱིར་གཞག་གོ །གཞན་དགེ་འདུན་གྱིའོ། །ལྟག་མ་ལྟར་སྤྱིའི་བཙོ་བར་བཞག་པ་ནི་དགེ་འདུན་གྱི་སྤྱིའི་ཕྱིར་བཞག་གོ །མི་བཙོ། །མིང་གིས་སྨོས་པ་འདི་རྣམས་ལྟ་བུ་ཞིག་ཡོན་ཕུལ་བ་ནི་བགོ་ཞིང་བཙོ་བར་མི་བྱ། ཀུན་དགའ་དང༌། སྐྱེད་ཤིང་དང་ལྡུམ་ར་ཕུལ་བ་དང༌། གཙུག་ལག་ཁང་དང༌། གཙུག་ལག་ཁང་གི་ཁང་པ་ཕུལ་བ་དང༌། དེའི་དངོས་པོ་དང༌། གཙུག་ལག་ཁང་གི་འཁོར་གྱི་ས་དང༌། མལ་སྟན་དག་གོ །ཁྲི་དང་ཁྲིའུ་དང་མལ་སྟན་དང་འདི་རྣམས་བགོ་བར་མི་བྱ། དབང་དུ་མི་བྱ། མདོ་ལྟག་མ་ལྟར་མིང་གིས་སྨོས་པ་འདི་རྣམས་སྤྱིར་བཞག་པ་ལས་བུ་ལོན་ཆགས་པ་ལ་སོགས་པའི་གཏའ་འོག་ཏུ་མི་བཞག །མི་བསྔོ་བ་ཡང་ངོ༌། །གཙུག་ལག་ཁང་ལ་སོགས་པ་སྤྱིར་བཞག་པ་ལས་དགེ་སློང་གང་ཟག་བདག་གི་ནོར་དུ་མི་བསྔོ་མི་བསྐུར་བ་དག་ལ་ཟས་དང་གོས་བསྟན་པར་བྱ། མ་དག་ལ་གོས་དང་ཟས་ལས་སྦྱིན། དེ་སྟེ་གོས་དང་ལྷུང་བཟེད་ལྷག་བ་མེད་ན་བསླང༌། ཕ་མ་ལ་སྦྱིན་དུ་ཆོས་གོས་དང་ལྷུང་བཟེད་ཙམ་ལས་མི་བདོག་ན་གཞན་ལས་བསླངས་ཏེ་བྱིན་ཀྱང་ཉེས་མེད། མ་གྲུབ་ན་ཟས་ཐོབ་པ་དེ་ལས་ཕྱེད་སྦྱིན་ཕམ་ལ་སྦྱིན་པར་བསླང་དུའང་མ་རྙེད་ན་བདག་གི་ཟས་དང་གོས་ཀྱི་
སྐལ་བ་ཅི་ཐོབ་པ་ལས་ཕྱེད་ཕ་མ་ལ་སྦྱིན་པར་བྱ། ཕྲ་མོ་ལ་སོགས་པར་ཆུད་པ་སྟེ་གོས་ཀྱི་དངོས་པོའོ།། །།བྱེ་བྲག་དབྱེ་བར་ཤེས་པའི་ཕྱིར་གོས་ལ་གདབ་གོས་ལ་མཚན་མ་མངོན་པར་གདབ། སངས་རྒྱས་དང་ནན་ད་འདྲ་ཞིང་བོང་མཉམ་སྟེ་ངོ་མི་ཤེས་པར་གྱུར་ཏེ་སངས་རྒྱས་སུ་འཛིན་པའི་ཕྱིར་བཅས། དེ་ལ་གདབ་པ་སྦྱིན་སྣག་ཚའི་ཐིག་ལེ་ཞེས་སོ། །གོས་ངོ་མི་ཤེས་ཤིང་ནོར་གྱིས་དོགས་པའི་ཕྱིར་སྣག་ཚའི་ཐིག་ལེ་ཆོས་གོས་ཀྱི་གྲྭར་སྣག་ཚའི་ཐིག་ལེ་གདབ། སྤྱད་པ་ཡང་ངོ༌། །ཆོས་གོས་སྐམ་ལ་ལྕི་སྟེ་ཐག་བུ་ལ་མི་འཆགས་ཏེ་ཐག་བུས་མཐའ་ལ་བརྒྱུས་ཏེ་སྲད་བུ་ལ་གདགས། ཚར་ཚར་གྱི་ཁ་ཆག་བྱ། རས་ཁ་ཚར་བཅད་ལ་ཆག་བྱ་སྟེ་བགོ་ཞིང་སྤྱད་དོ། །སྦྱར་མ་མ་ཡིན་པ་དག་ཞིག་གཅད་པར་མ་ཆད་དོ། །ཆོས་གོས་ཆེན་པོ་མ་གཏོགས་པར་སྣམ་བུ་བདུན་པ་དང་ལྔ་པ་གཉིས་ནི་སྣམ་བུར་མ་དྲས་ཤིང་མ་བཙེམས་པ་ལ་བསྔོས་ཀྱང་འཆགས་སོ། །དེ་ལྟ་བུའི་རྐྱེན་མེད་ན་མ་བཅད་པར་གྲོང་དང་ཁྱིམ་དུ་འཇུག་པ་དང་འདུག་པ་མ་ཡིན། ཆར་པ་ལ་སོགས་པ་བབ་པའི་རྐྱེན་མ་བྱུང་བར་གྲོང་ཁྱེར་དུ་ཆོས་གོས་ཆེན་པོ་མེད་པར་འདུག་པར་མི་བྱ། དེ་བཞིན་དུ་མུར་འདུག་གི་གནས་སུའོ། །ཆོས་གོས་ཆེན་པོ་མེད་པར་མུར་འདུག་གི་གནས་སུ་མི་འགྲོ། །ཡོད་ན་འདུག་པར་མ་ཡིན། རྐྱེན་བྱུང་ཡང་ཆོས་གོས་ཆེན་པོ་མེད་པར་མུར་འདུག་དང་བཅས་པའི་གནས་སུ་འགྲོ་བའམ་འདུག་པར་མི་བྱ། སྤུ་ཅན་ཆོས་གོས་གསུམ་དུ་མི་བསྔོ། ལ་བ་དང་བེའུ་རས་ལ་སོགས་པ་སྤུ་ཅན་ལ་ཆོས་གོས་གསུམ་གྱི་རྒྱུས་མི་བསྔོ། །དེ་བགོས་ཏེ་མཆོད་སྟོན་དུ་མི་སྤྱད། ཟན་ཟ་བ་དང་མཆོད་སྟོན་བྱེད་པའི་ཚེ་ལ་བ་དང་པགས་པ་ལ་སོགས་པ་སྤུ་ཅན་མི་བགོ །སྲབ་མོ་ནི་བདག་གིར་བྱ། སྡེ་རས་སམ་རས་སྲབ་མོ་ནི་ཆོས་གོས་སུ་བསྔོར་མི་རུང་གི་གོས་ལྷག་པར་སྤྱད་ཅིང་བགོས་ཀྱང་ཉེས་མེད་སྲབ་མོ་ནི་རྒྱུ་འོག་ནས་འབྱུང༌། འདི་ནི་རྣམ་པ་བཞི་སྟེ་བལ་གྱི་དང་ཟར་མའི་དང་དུ་གུ་ལའི་དང་ཤིང་བལ་གྱིའོ། །མིང་གིས་སྨོས་པ་འདི་རྣམས་གོས་ལྷག་ཏུ་བསྔོས་ཤིང་སྤྱད་ཀྱང་ཉེས་མེད་དེ་སེང་རས་དང་སྲབ་མོར་བྱས་པ་ལ་བྱ། གཞན་ཡང་སྣམ་བུའི་
རྣམ་པ་ཡང་བ་སྤུ་ཐུང་བ་ལ་སོགས་པ་དག་གོ །གཞན་སྣམ་བུ་ལ་སྤུ་ཐུང་དུར་བྱས་པའི་རྣམས་ནི་ཆོས་གོས་སུ་མི་རུང་གི་གོས་ལྷག་གི་སྔགས་ཀྱིས་བཏབ་པ་ལ་སྤྱད་དོ། །བ་ལ་ཡང་ངོ༌། །ལ་བ་ཡང་གོས་ལྷག་གི་སྔགས་ཀྱིས་བཏབ་སྟེ་སྤྱད་ཀྱང་རུང་ངོ༌། །འཚོ་ལས་གཞན་དུ་ན་དེའི་ཕྱིར་ལོག་ཏུ་བགོ་བར་མི་སྤྱད། ཕྲུག་དང་བེའུ་རས་ལ་སོགས་པ་ལུས་ལ་རྩུབ་ཅིང་གཡའ་དང་ཤིག་ཟ་ན་བཟློག་སྟེ་བགོས་ཀྱང་ཉེས་མེད་དེ། དེ་བགོས་ཏེ་མི་བཅག །མདོ་ལྟག་མ་ལྟར་ཤིག་ཟ་བ་ལ་སོགས་པའི་རྐྱེན་བྱུང་ཡང་བཅག་པའི་ཚེ་བཟློག་ཏེ་མི་བགོ །བསྲིངས་པའི་ལ་བ་དང་མེ་ཏོག་ཅན་གྱི་སྣམ་བུ་དང་དྲེའུ་རྔོག་ཁྲ་ཁྲ་བོ་གང་ཟག་གིས་བདག་གིར་བྱས་ཏེ་མི་སྤྱད། མིང་གིས་སྨོས་པ་འདི་རྣམས་དགེ་སློང་གང་ཟག་གིས་སྤྱད་ཅིང་བཅང་བར་མི་བྱ། འཆགས་སར་དྲེའུ་རྔོག་བཏིང་ན་ཁས་བླངས། ཁྱིམ་པ་བསོད་ནམས་འདོད་པས་འཆགས་སར་དྲིའུ་རྔོག་བཏིང་ན་དེའི་སྟེང་དུ་བཅག་ཀྱང་ཉེས་མེད། རྟག་ཏུ་རྒྱུན་གཅིག་ཏུ་མི་བཅག །དྲེའུ་རྔོག་དེའི་སྟེང་དུ་འཆགས་པའི་རྒྱུན་གཅིག་ཏུ་མི་བཅག །ནུས་ན་བཅོས། དྲེའུ་རྔོག་དེ་རྡོལ་ལམ་རལ་ན་བཅོས། བཙེམ་པ་གཞུང་བུ་གླན་པ་སྦྱིན། དྲེའུ་རྔོག་རལ་ན་གཞུང་བུ་གཞུག་ཅིང་གླན། མི་ནུས་ན་བ་ལང་གི་ལྕི་བ་དང་འཇི་བས་སྦྱར་ཏེ་འཆག་པར་བྱུག །དྲེའུ་རྔོག་རྙིངས་ཏེ་འདྲུབ་ཅིང་བཙེམ་དུ་མི་རུང་ན་འཇི་བ་དང་ལྕི་བ་བསྲེས་ཏེ་འཆག་སའི་སྐྱང་ནུལ་དུ་བྱས་ཀྱང་རུང་འཆག་སར་དྲེའུ་རྔོག་བཏིང་ལ་དེའི་སྟེང་དུ་འཇི་བས་གཡོགས་ལ་བཅགས་ན་ཡོན་བདག་ལ་བསོད་ནམས་སུ་འགྱུར་བའི་ཕྱིར་སྤྱད་དུ་རུང༌། དེ་བཞིན་དུ་བཅངས་ཏེ་སྦྱིན་བདག་ལ་བརྟེན་ཏེའོ། །དགེ་སློང་གི་གོས་སུ་མ་བཏགས་པ་དྲེའུ་རྔོག་དང་ཁྲ་བོ་ལ་སོགས་པ་ནི་སྦྱིན་བདག་ཁྱིམ་པ་ལ་བསྔོས་ཏེ་བཅངས་ཀྱང་ཉེས་མེད་དོ། །ཤམ་ཐབས་ནང་ལོགས་མ་དང་རྡུལ་ཟན་དང་འཐེབ་བཅང༌། མིང་གིས་སྨོས་པ་འདི་རྣམས་ཀྱིས་འཐེབ་རེ་རེ་བཅངས་ཀྱང་ཉེས་མེད། ཡོ་བྱད་ཀྱིས་ཀྱང་ངོ༌། །སྨན་ཟོང་དུ་ཟས་སམ་གོས་བཅངས་ཀྱང་ཉེས་མེད། འདི་ནི་དཀར་པོའམ་ཁ་ཚར་དང་བཅས་ཀྱང་མ་ཉེས་སོ། །སྨན་ཟོང་གི་རྫས་
བཅང་བ་ནི་རས་དཀར་པོ་དང་ཁ་ཚར་མ་བཅད་ཀྱང་ཉེས་མེད། རིན་གྱི་ཚད་ནི་སྲང་འགའ་ཙམ་ཅི་རིན་པར་བཅང༌། དགེ་འདུན་གྱི་ཡང་མ་ཡིན། དགེ་འདུན་སྤྱིའི་གོས་ལྷག་ན་ཁ་ཚར་མ་བཅད་དམ་ཁ་དོག་མ་བསྒྱུར་བར་བཅངས་ཀྱང་ཉེས་མེད་དོ། །གནད་བའི་གོས་དེར་བསྔོས་ཏེ་བཅངས། ཡོ་བྱད་བཅུ་གསུམ་འཆང་དུ་གནང་བ་ནི་བདག་འཆང་བའི་སྔགས་ཀྱིས་བསྔོས་ལ་བཅང༌། གཞན་བརྟགས་ཏེ་དུ་མའང་བཅང༌། ཡོ་བྱད་བཅུ་གསུམ་ལ་མ་གཏོགས་པར་གོས་ལྷག་ཅིང་འཆང་ན་ལྷག་པའི་སྔགས་ཀྱིས་བརྟགས་ཏེ་བཅངས་ཀྱང་ཉེས་མེད། སེམས་མི་བརྟན་པ་ལ་མི་བརྟག །གོས་ལྷག་མ་བརྟག་པ་ནི་མཁན་པོ་དང་སློབ་དཔོན་ཀླ་ཀློ་ཅན་ཚུལ་ཁྲིམས་ལ་དམ་ཞིང་ཀླ་ཀློ་མེད་ཅིང་བརྟན་པ་ལ་བརྟག །རབ་ཏུ་མ་རྫོགས་པ་ལ་མ་ཡིན། གོས་བརྟག་པའི་སྔགས་བྱ་བ་ནི་ཁྱིམ་པ་དང་དགེ་སློང་ལ་མི་བརྟག་གོ །མངོན་སུམ་དུ་མ་ཡིན། མཁན་པོ་དང་སློབ་དཔོན་ལ་གོས་བརྟག་པ་ཡང་མཐོང་ཞིང་ཤེས་པ་དང་ཐོས་པར་མི་བྱའི་ལྐོག་ཏུ་གྲོགས་གཅིག་གི་གམ་དུ་བརྟག །མཐོང་བ་དང་ཐོས་པར་སྔགས་བཏབ་ན་ཉེས་བྱས། ཡུལ་གཞན་དུ་འདུག་པ་ལ་བརྟགས་ན་མི་འཇིག །མཁན་པོའམ་སློབ་དཔོན་ནམ་གོས་སུ་བརྟགས་པའི་མི་དེ་གུད་ན་འདུག་གམ་ཡུལ་གཞན་དུ་སོང་ནའང་ཞིག་པར་མི་འགྱུར། ཞིག་པ་ནི་འཕོས་ནའོ། །གོས་བརྟགས་པའི་མི་དེ་ཤིའམ་ཁྲིམས་ཕུལ་ན་བརྟགས་པའི་སྔགས་མེད་པར་འགྱུར་རོ། །ཤེས་ནའོ། །ཁྲིམ་ཕུལ་ལམ་ཤི་བར་མ་ཤེས་ཀྱི་བར་དུ་སྔགས་འཆགས་སོ། །འདིའི་བདག་པོ་ནི་བརྟགས་པའོ། །གོས་སྔགས་ཀྱིས་འདེབས་པའི་ཚེ་ཕ་རོལ་གྱི་ཡིན་པར་བསམས་ཤིང་བརྟགས་མོད་ཀྱི་བདག་སྤྱོད་ཅིང་འཆང་དུ་དབང་ངོ༌། །བཏང་བ་བདག་གིར་མི་བྱ། གོས་སྤང་བ་ལྷུག་པ་བྱིན་པ་ལས་ཕ་རོལ་པོས་ཐལ་བྱུང་མི་བསྐུར། དགེ་སློང་ལ་གཏད། གོས་སྤང་ལ་ལྟུང་བ་བྱུང་བ་དགེ་སློང་ཚུལ་ཤེས་པ་གཅིག་ལ་སྦྱིན། དགེ་འདུན་གྱི་ལ་མ་ཡིན། གོས་སྤངས་པ་ནི་དགེ་འདུན་ལ་མི་སྦྱིན་གྱི་དགེ་སློང་གང་ཟག་གཅིག་ལ་སྦྱིན། བླུན་པོ་ལ་མ་ཡིན། དགེ་སློང་གང་ལ་སྤང་བའང་བླུན་
ཞིང་ཚུལ་མི་ཤེས་པ་མི་སྦྱིན་གྱི་ཟིན་པོ་ཚུལ་ཤེས་པ་ལ་སྤང༌། མི་སྟེར་བསླང༌། གོས་སྤངས་པ་ལས་ཕ་རོལ་པོ་དེས་མ་བྱིན་ན་མཐོལ་བ་ག་སོས་ཀྱི་འོག་ཏུ་བདག་གོས་ཀྱིས་བྲེལ་ཏོ་ཞེས་བསླང༌། མཐུ་ཡིས་བླང༌། གོས་སྤངས་པ་བདག་གིས་བསླངས་ཀྱང་མ་སྟེར་ན་གྲོགས་པོ་བཟློག་ལ་དབྲོག་གོ །གོས་ལ་བསུང་གིས་རེག་ན་བཀྲུས་ཏེ་སྤྱད། བདག་གི་གོས་ལ་སོགས་པ་བསུང་གིས་རེག་ན་མ་བརྟགས་པའི་ཕྱིར་སྤུ་བཀྲུ། ཕྱེ་མ་ན་སྤྲུག །བསུང་གི་ཕྱེ་མས་རེག་ན་སྤྲུག །སྣུམ་གྱིས་ན་དག་པར་རོ། །གོས་ལ་སྣུམ་གྱིས་རེག་ན་བཀྲུ་། ཆར་པ་བབ་ན་བླ་གབ་མེད་པ་ལ་དགེ་འདུན་གྱི་མ་ཡིན། ཆར་པ་བབ་པའི་ཁྲོད་དུ་དགེ་འདུན་གྱི་གོས་གྱོན་ཏེ་མི་འགྲོ། བཀྲུ་བ་དང་འཚེད་པ་དང་ལྷུང་བཟེད་ཀྱི་ལས་དང་ཤིང་གཤགས་པ་ལ་སོགས་པའི་བྱེད་པར་མ་ཡིན། མིང་གིས་སྨོས་པ་འདི་རྣམས་ལས་བྱེད་པའི་ཚེ་དགེ་འདུན་གྱི་གོས་གྱོན་ཏེ་མི་བྱ། བཞག་པ་ལས་ལྷན་ཅིག་ནའོ་ཞེས་མ་སྨྲས་ན་གཞན་མེད་ཀྱང་སྦྱིན་ཏེ་ཡང་དག་པར་བགྲང༌། མི་གསུམ་གྱིས་བདག་ལ་རྫས་ཞིག་གཏམས་ཏེ་དེད་གསུམ་མ་ཚོགས་ཀྱི་བར་དུ་མ་སྦྱིན་ཅིག་ཅེས་ཟེར་བ་ལས་གཅིག་གམ་གཉིས་ལེན་དུ་འོངས་ནའང་མི་སྦྱིན་ནོ། །ངེད་གསུམ་མ་ཚོགས་ཀྱི་བར་དུ་མ་སྦྱིན་ཅིག་ཅེས་མི་ཟེར་བར་གཏམས་པ་ནི་གཅིག་གམ་གཉིས་ལེན་དུ་འོངས་ཏེ་སྦྱིན་ཀྱང་ཉེས་མེད། གཞོག་པ་དང་མ་འགྲོགས་པར་མ་ཡིན། ནོར་གཞོག་པའི་ཚེ་ནོར་བདག་དང་འགྲོགས་པ་མ་ཡིན་པ་ཞིག་ལེན་དུ་འོངས་ཏེ་དན་རྟགས་ཡོད་ཀྱང་མི་སྦྱིན། གཉེན་དང་བདག་གི་ཁྱིམ་མ་ཡིན་པ་སྨྱོན་པ་ལས་མི་བླང༌། མི་སྨྱོན་པ་ཞིག་གིས་ཁོ་བདག་གི་ཁྱིམ་དང་ཕ་མའི་ཁྱིམ་ནས་བླངས་ཏེ་བདག་ལ་བྱིན་ན་བླངས་ཀྱང་ཉེས་མེད། བུ་བསྐྲད་པ་ལས་བླངས། ཕ་མས་བུ་བསྐྲད་པ་ལས་བུ་དེས་ཕ་མའི་ཁྱིམ་ནས་ནོར་ཞིག་བླངས་ཏེ་བྱིན་ན་འང་བླངས་ཀྱང་ཉེས་མེད། དུར་ཁྲོད་ནས་སླར་བཟློག་པ་ལས་ཡང་ངོ༌། །དུར་ཁྲོད་ཀྱི་རོའི་རྫས་ཞིག་བླངས་ཏེ་བདག་ལ་བྱིན་ན་བླངས་ཀྱང་ཉེས་མེད། དེ་སླར་སློང་ན་སྦྱིན། མདོ་ལྟག་མ་ལྟར་རོའི་རྫས་བྱིན་པ་སླར་འདོད་ཅེས་ཟེར་ན་འང་བྱིན་ཅིག །སླར་འཐོམ་ན་འང་
བླངས། མདོ་ལྟག་མ་ལྟར་སླར་སློང་སྟེ་བྱིན་པ་ལས་ཡང་སླར་འབུལ་ན་མ་ཁྲོ་བར་ལོང་ཞིག །མཆོད་རྟེན་གྱི་དཀོར། མཆོད་རྟེན་ལ་ཕུལ་བའི་དཀོར་རྣམས་ནི་དགེ་འདུན་གྱིས་བགོ་ཞིང་སྤྱད་པར་མི་བྱའོ། །རྩྭ་དང་བུ་རམ་ཤིང་དག་ལས། རྩྭ་བ་དང་འབྲས་བུ་ལ་སོགས་པ་བཅད་པ་ཞིག་དགེ་འདུན་ལ་ཕུལ་ན་བགོས་ཤིང་སོ་སོར་སྦྱིན་ནོ། །གཞན་ཟས་ཀྱི་ཕྱིར་བསྔོས་པ། བཅའ་བ་ལ་མ་གཏོགས་པ་མར་དང་བག་ཕྱེ་ལ་སོགས་པ་ཕུལ་བ་ནི་མི་བགོ་བར་གཡོས་སུ་བྱས་ཏེ་སྤྱིར་བྲིམ་མོ། །ཉེ་བར་འཚོ་བ་དང་ནད་པ་ལ་བརྟགས་པ་བདག་གིར་བྱ་བའི་ཕྱིར་བགོ ། མལ་ཆ་དང་ཁྲི་སྟན་ལ་སོགས་པ་དང་སྨན་ལ་སོགས་པ་ཕུལ་བ་ནི་སྤྱིས་སྤྱད་དགོས་པའི་ཕྱིར་མི་བགོ་བར་གཞག་གོ །དབྱར་གྱི་མཚམས་རྙེད་ན་འཇུག །དབྱར་ཚུལ་དུ་ཞུགས་པས་ནི་ཚུལ་གྱི་ཡོན་སྐལ་གྱི་ནང་དུ་འཇུག་ཅིང་བླང༌། མ་ཞུགས་ན་མི་བླང༌། དབྱར་ཆད་པ་ལ་ཡང་མི་རིགས་པ་མ་ཡིན། དབྱར་ཚུལ་དྲལ་བ་ནི་ཞག་བཞི་བཅུ་རྩ་དགུའི་བར་དུ་ཚུལ་བསྲུངས་པ་ནི་ཡོན་སྐལ་དབང་ངོ༌། །བཞི་བཅུ་རྩ་ལྔ་བསྲུངས་པ་ནི་ཕྱེད་དབང་ངོ༌། །བཞི་བཅུ་རྩ་བཞི་བསྲུངས་པ་ནི་མི་དབང་ངོ༌། །བསྐྲད་པ་ནི་མ་ཡིན། །དགེ་སློང་ཆད་པས་བཅད་དེ་བསྐྲད་པ་ནི་ཚུལ་གྱིས་ཡོན་སྐལ་མི་དབང་ངོ༌། །རྫས་ཀྱིས་ནོན་པར་དབྱར་གནས་པ་ལ་ཆ་གཅིག་གོ །གཙུག་ལག་ཁང་མང་པོ་ཞིག་ཀུན་གྱི་མཚམས་སུ་རེ་ལྡེ་ལྟ་བུས་མནན་ཏེ་ཚུལ་དུ་ཞུགས་པ་ནི་གཙུག་ལག་ཁང་ཀུན་གྱི་ཡོན་སྐལ་མི་དབང་གི་གཙུག་ལག་ཁང་རེ་རེ་ནས་ཀྱང་ཆ་རེ་རེ་དབང་སྟེ་ཅི་ལྟར་དབང་བ་འོག་ནས་འཆད་དེར་བདག་གིས་བགྲངས་ཏེ་མ་ནོན་པའི་སྐལ་བའོ། །གཙུག་ལག་ཁང་གཅིག་ནས་ཆ་རེ་རེ་དབང་བ་ནི་གཙུག་ལག་ཁང་དུ་ཡོད་པའི་གྲངས་ལས་གཙུག་ལག་ཁང་དེ་གཅིག་གི་དགེ་སློང་མི་གཅིག་གི་སྐལ་བ་ཅི་ཐོབ་པ་ལས་ལྷ་ཁང་ལྔ་ཡོད་ན་ནི་མི་གཅིག་གི་སྐལ་བའི་ལྔ་ཆ་གཅིག་སྦྱིན་ནོ། །དྲུག་ཡོད་ནའང་དྲུག་ཆ་རེ་རེ་སྦྱིན་ནོ། །གཞན་དུ་དུ་མར་ཚུལ་དུ་ཞུགས་ན་རིང་དུ་གནས་པ་དེར་ཆོས་སོ། །ལྟག་མ་ལྟར་གཙུག་ལག་ཁང་དུ་མ་ཞིག་གི་མཚམས་སུ་མནན་ཏེ་ཚུལ་དུ་ཞུགས་པ་ལས་གཙུག་ལག་ཁང་དུ་ཟན་ཟ་བ་གཅིག་ཏུ་ཟན་གྱི་
ཕྱིར་ཡང་འདུག་རྙེད་པའི་ཡོན་ཆེ་བ་གཅིག་ཏུ་ཡང་ཡོན་འདོད་པའི་ཕྱིར་གནས་པ་ན་གང་དུ་རིང་དུ་གནས་པའི་གཙུག་ལག་ཁང་དེའི་ཡོན་སྐལ་ལ་དབང་ངོ༌། །དགེ་སྦྱོང་ཕ་དང་དགེ་སྤྱོང་མའི་རྙེད་པ་ནི་སུམ་ཆ་མ་གཏོགས་པ་ལས་སོ། །གཙུག་ལག་ཁང་དུ་རྟག་པར་ནར་མར་ཡོན་འབུལ་བ་ཞིག་ལས་འགོད་པ་ནི་དགེ་སློང་ཕ་དང་དགེ་སློང་མས་གསུམ་ཐོབ་ན་དགེ་སྦྱོང་ཕ་དང་དགེ་སྦྱོང་མ་གཉིས་སྦྱིན་ནོ། །ཡོན་བདག་གིས་འཕྲལ་དུ་ཕུལ་བ་ནི་དགེ་སློང་དང་མཉམ་པར་སྦྱིན་ནོ། །ཟས་ནི་མཉམ་མོ། །དགེ་འདུན་སྦྱིན་སྤྱིར་ཟས་ལྟ་བུ་ཞིག་ཡོན་དུ་ཕུལ་བ་ལས་འགོད་པ་ནི་དགེ་སློང་དང་དགེ་སྦྱོང་མཉམ་པར་བགོ །བསྙེན་པར་རྫོགས་པར་འདོད་པ་དང་དགེ་སློང་མ་ཡང་ངོ༌། །དགེ་སྦྱོང་ལོ་ཉི་ཤུ་ཚང་བ་དང་དགེ་སློང་ལོ་གཉིས་སྤྱད་ཟིན་ཏེ། བསྙེན་པར་རྫོགས་པ་རུང་བ་ཞིག་ན་ཡོན་ལ་སོགས་པ་བགོའོ། །ཅོག་མཉམ་པར་བྱ། དགེ་སློང་དང་དགེ་སློང་མར་ན་ཆ་བླང་བ་ནི་དགེ་འདུན་གྱིས་མ་ཡིན་ཏེ་གང་ཟག་ཏུའོ། །དགེ་སློང་མའི་དགེ་འདུན་སྤྱིར་ཡོན་ཞིག་ཕུལ་བ་ལས་འགོད་པ་ནི་དགེ་འདུན་སྡེ་མཉམ་པར་མི་བགོའི་གྲངས་སུ་བགོ །མ་བསྔོས་པར་མཆོད་སྟོན་གྱི་རྗེས་སུ་རྙེད་པ་ལ་དགེ་སློང་མས་ཀྱང་ཟོས་ན་མ་གཏོགས་པ་མ་ཡིན་ནོ། །དགེ་འདུན་སྤྱན་དྲངས་ཏེ་དགེ་སློང་བཤོས་གསོལ་ཟིན་པའི་རྗེས་ལ་དགེ་སློང་མས་སླེབས་ན་དགེ་སློང་ཕྱིས་ཤོས་མི་དབང་བ་མ་ཡིན་ཏེ་དགེ་སློང་དང་མཉམ་པར་དབང་ངོ༌། །སྟན་དང་ཆུ་དང་བསོད་སྙོམས་ལ་དགེ་སློང་དགེ་སློང་མ་བས་ཐུ་བོ་མ་ཡིན་པ་མ་ཡིན་ནོ། །དགེ་སློང་གསར་དུ་ཁྲིམས་རྫོགས་ན་དགེ་སློང་མ་རྫོགས་ནས་ལོ་ཉི་ཤུ་ལོན་ཀྱང་སྟན་དང་ལག་ཆུ་འདྲིམ་པ་དགེ་སློང་ལས་སྔར་བྲིམ་མོ། །དགེ་སློང་མ་འཁོད་ན་རྒན་རིམས་ནས་སྟན་དོར། །དགེ་སློང་མ་འབའ་ཞིག་སྤྱན་དྲངས་ཏེ་ལ་ཤས་གསོལ་བའི་ཚེ་ཕྱིས་དགེ་སློང་ཕ་འོང་གིས་དོགས་པའི་ཕྱིར་དགེ་སློང་ཕའི་སྟན་གོང་དུ་གཉིས་གསུམ་ཙམ་གཞག་དགེ་སློང་པ་དེ་དག་གིས་སྦྱིན་པ་ལས་འཆགས་པ་བྱེད་མི་ནུས་ན་དགེ་སློང་མ་དག་གིས་སོ། །གཙུག་ལག་ཁང་དུ་ཡོན་བདག་གིས་དགེ་སློང་པ་དང་དགེ་སློང་མ་བཤོས་གསོལ་བའི་འོག་ཏུ་
ཚིགས་བཅད་དགེ་སློང་ཕས་ཀློག་མི་ནུས་ན་དགེ་སློང་མ་མཁས་པས་ཀྱང་རུང༌། ཟས་འདྲིམ་པ་མངོན་པར་འདུག་ན་ཟས་སྙོམས་པར་བྲིམས་ཤིག་ཅེས་དགེ་འདུན་གྱི་གནས་བརྟན་གྱིས་ཐོག་མར་བསྒོ། །དགེ་འདུན་བཤོས་གསོལ་བའི་ཚེ་ཕྱག་ཚང་དང་ཐོང་ངན་གྱིས་འབྱོར་ཚོགས་ཞེས་སྨྲས་ན་གནས་བརྟན་གྱིས་སྙོམས་པར་བྲིམས་ཤིག་ཅེས་བསྒོ། །འཁོར་དུ་བལྟས་ཏེ་མང་ལ་ཟས་ཉུང་ན་ཅི་འབྱོར་དུའོ་ཞེས་ཐོག་མར་རོ། །གཙུག་ལག་ཁང་ངམ་ཡོན་བདག་གི་གནས་སུ་དགེ་འདུན་བཤོས་གསོལ་བའི་ཚེ་གནས་བརྟན་གྱིས་དགེ་སློང་གྲངས་ལས་ལྷག་པར་འོངས་ན་ཡོན་བདག་ལ་སྦྲན་ནས་དགེ་སློང་བཤོས་བཤུགས་ཏེ་ཐམས་ཅད་ཐོབ་པར་བྱ་བའི་ཕྱིར་བྲིམས་ཤིག་ཅེས་བསྒོ། །གཞན་དུ་ན་ཅི་ནུས་པས་སོ། །དགེ་སློང་གྲངས་བཅད་དེ་བཤོས་སྦྱར་བ་ལས་དེའི་ནང་ནས་ཁ་ཅིག་གུད་དུ་སྤྱན་དྲངས་ཏེ་དོང་ནས་ཟས་ལྷག་པར་གྱུར་ན་དགེ་འདུན་ཁོང་རྟག་ཏུ་བཅིང་བ་དེར་བྲིམས་ཞེས་གནས་བརྟན་གྱིས་བསྒོ། །སམ་པྲ་ཏ་ཞེས་རྒན་རིམས་ལ་མ་བརྗོད་པའི་སྔོན་རོལ་དུ་མི་བླང༌། བཤོས་འདྲིམ་པའི་ཚེ་ཐོང་ངན་གྱི་འབྱོར་ཚོགས་ཞེས་མ་སྨྲས་པར་བཤོས་བླངས་ན་གནས་བརྟན་ལ་འབྱོར་ཉེས་བྱས་པའི་ཕྱིར་གནས་བརྟན་གྱིས་ཐོད་ངན་ལས་འབྱོར་ཚོགས་ཞེས་སྨྲོས་ཤིག་ཅེས་བསྒོ། །ཟས་སྟ་གོན་བྱས་ཏེ་སྤྱན་དྲངས་པ་ལས་གཞན་འོངས་ཏེ་དེ་ལ་སྦྲན། ཡོན་བདག་གཅིག་གིས་གྲངས་བཅད་དེ་སྤྱན་དྲངས་པ་ལས་ཡན་མན་ནས་དགེ་སློང་ལྷག་མ་ཞིག་འོངས་ན། ཡོན་བདག་ལ་དགེ་སློང་འདི་སྙེད་ཅིག་འོངས་སོ་ཞེས་གནས་བརྟན་གྱིས་བསྒོ། ཆོས་གོས་གསུམ་བྱིན་ཅིག་ཅེས་དགེ་སློང་ལ་མི་བསྐྱུར། དགེ་སློང་ན་བ་ལ་དགེ་སློང་གྲོགས་ཀྱིས་ཆོས་གོས་གསུམ་བསྔོས་པ་ཁྱོད་སང་ངམ་ནམ་ཤི་ཏོལ་མེད་ན་ཆོས་གོས་དགེ་འདུན་ལ་དབུལ་བའི་རིགས་སོ་ཞེས་མི་བསྒོ། བདག་མ་ཤི་ན་ཞག་རེ་ཉེས་བྱས་རེ་རེར་འགྱུར་བའི་ཕྱིར་རོ། །དགེ་འདུན་གྱིས་བླངས་ན་འདི་སོས་ན་སླར་སྦྱིན་ནོ་ཞེས་ཡིད་དེ་དག་ལས་གཞན་དུ་མ་ཡིན། མདོ་ལྟག་མ་ལྟར་དགེ་སློང་ནད་པས་ཆོས་གོས་བསྔོས་པ་དགེ་འདུན་ལ་ཡོན་དུ་ཕུལ་བ་དགེ་འདུན་གྱིས་
ཀྱང་ཁོ་སོས་ན་གོས་འདི་སླར་སྦྱིན་ནོ་སྙམ་དུ་བསམས་ཏེ་བླངས་ན་གོས་སླར་སྦྱིན། ཤི་ནས་བླ་འོག་ཏུ་བཅའ་བར་རོ། །དགེ་སློང་ཤིན་འོག་ཏུ་གདིང་བའི་རས་ཡུག་གཅིག་དང་སྟེང་དུ་གཡོགས་པའི་རས་ཡུག་གཅིག་གིས་གཡོགས་ལ་དོར། འབྲིང་པོ་ལྟག་མ་ལྟར་རོ་ལ་གཡོགས་པའི་གོས་ནི་བཟང་པོ་ཡང་མ་ཡིན་ཏེ་འབྲིང་པོ་གཡོག །ལྟག་མ་ནི་མ་ཡིན་ནོ། །དགེ་སློང་ཕྱུག་པོ་ཤི་ན་དགེ་སློང་གྲོགས་ཀྱིས་གོས་བཟང་པོ་མང་པོ་ཞིག་གིས་གཡོགས་ཏེ་དོར་ཞེས་ཟེར་ནའང་ཅི་རན་པར་དཀྲིས་ཏེ་དོར་རོ། །དྲི་བ་དང་བཅས་པ་ཕྲན་ཚེགས་ལ་སོགས་པར་ཆུད་པ་སྟེ་གོས་ཀྱི་དངོས་པོའོ། །དྲིས་པ་དང་ཕྲན་ཚེགས་ལ་སོགས་པའི་ནང་ནས་འབྱུང་བ་སྟེ་གོས་ཀྱི་དངོས་པོ་རྫོགས་སོ།། །།གོས་ཀྱི་དངོས་པོའོ། །འདི་མན་ཆད་པགས་པའི་དངོས་པོ་ལ་འཆད་དེ། ཡུལ་དབུས་མའི་མཚམས་ནི། ཡུལ་གྱི་དབུས་ནི་སངས་རྒྱས་སྔ་རབས་ཀྱང་གནས་དེ་ནས་འདས་ཕྱིས་འདའ་བར་འགྱུར་བའང་མ་ཧཱ་བོ་དེ་ནས་འདས་པས་ན་རྡོ་རྗེའི་གདན་བཞུགས་ཏེ་ཡུལ་གྱི་དབུས་བྱ་སྟེ། གང་ཚུན་ཆད་དབུས་སུ་བརྩི་བ་འོག་ནས་འཆད། ཤར་ཕྱོགས་ཀྱི་མཚམས་ནས་ཕུན་ཏྲ་བརྟ་ནའི་མདུན་གྱི་ཚལ་བུ་འདའ་ཀ་ཞེས་བྱའོ། །པུན་ཏྲ་བརྟན་ཞེས་བྱ་བའི་མཚམས་ཚུན་ཆད་དབུས་སུ་བརྩི། པུན་ཏྲ་བརྟ་ན་ཞེས་བྱ་བ་ཉིད་ནི་མཐའ་འཁོབ་ཏུ་བརྩི། དེའི་མདུན་ན་ཚལ་བུ་འདའ་ཀ་ཞེས་བྱ་བ་ཚུན་ཆད་ཡུལ་གྱི་དབུས་སུ་བརྩི་སྟེ། ལྷོ་ཕྱོགས་ཀྱི་ནི་ཤ་ར་བ་ཏི་ཞེས་བྱ་བའི་ཆུ་བོ་དེའོ། །ལྷོ་ཕྱོགས་ཀྱི་མཚམས་ནི་ཤ་ར་བ་ཏི་གཙང་པོ་ཆེན་པོ་ཚུན་ཆད་ཡུལ་གྱི་དབུས་སུ་བརྩི། ནུབ་ཕྱོགས་ཀྱི་ནི་བྲམ་ཟེའི་གྲོང་ཏུ་ན་དང་ཨུ་པ་ཏུ་ནའོ། །ནུབ་ཕྱོགས་ཀྱི་བྲམ་ཟེ་སྤུན་གཉིས་ཏུ་ན་དང་ཨུ་པ་ཏུ་ན་དང་གཉིས་ཀྱི་གྲོང་ཁྱེར་ཚུན་ཆད་ཡུལ་གྱི་དབུས་སུ་བརྩི། བྱང་ཕྱོགས་ཀྱི་ནི་ཨུ་ཤི་རའི་རིའོ། །བྱང་ཕྱོགས་ཀྱི་ནི་ཨུ་ཤིར་ཞེས་བྱ་བའི་ཡུལ་དེ་ན་རྩ་མན་མ་ཞིམ་པོ་ཞིག་སྐྱེ་བའི་ཡུལ་དེ་ཚུན་ཆད་དབུས་སུ་བརྩི། མཐའ་འཁོབ་ཏུ་ལྷམ་བོལ་མེད་བཅང༌། ལྷག་མའི་ཕྱོགས་བཞིའི་མཚམས་ཕན་ཆད་ནི་ལྷམ་བོལ་མེད་གྱོན་དུ་དབང༌། མལ་སྟན་སྦ་པའི་ཕྱིར་ཡང་ངོ༌། །ཡུལ་གྱི་དབུས་ན་མལ་སྟན་ལ་རྡུལ་
མི་གོས་པར་བྱ་བའི་ཕྱིར་ལྷམ་བོལ་མེད་བཅངས་ཀྱང་ཉེས་མེད། ཚིག་རིམ་མོ། །ལྟག་མ་ལྟར་དབུས་སུ་ལྷམ་གྱོན་དུ་དབང་བ་ནི་ཆིག་རིམ་དུ་བྱ། ལྷན་པ་སྦྱིན་པས་བཅོས་ལྷམ་རྡོལ་ན་ལྷན་པ་གླན། རིམ་པ་གཞན་དུ་མི་བྱ། རྟིང་པ་འམ་བྲང་བ་གང་དུ་རྡོལ་བར་གླན་གྱི་ཆེར་ནི་མི་གླན་ནོ། ཁྱིམ་པས་གོམ་པ་བདུན་ཙམ་དུ་སྤྱོད་སྤྱོད་ན་རིམ་མང་པོ་ཡང་ངོ༌། །ལྷམ་མཐིལ་རིམ་པ་བདུན་ཙམ་དུ་སྟུག་པོའང་ཁྱིམ་པས་གོམ་པ་དྲུག་བདུན་ཙམ་བགོས་པས་རྙིངས་པར་ཆུད་དེ་གྱོན་དུ་དབང༌། བརྟགས་པ་ཙམ་གྱི་ཕྱིར་དེའི་དབང་གིས་སྦྱར་བར་བླངས་ནི་མ་བརྟགས་པར་བླངས་པ་མ་ཡིན་ནོ། །བདག་ལ་ལྷམ་སར་པ་ཀོ་བ་རིམ་པ་མང་པོ་ཅན་ཡོད་ན་རིམ་པ་གཅིག་གཏོགས་པས་བརྟགས་པར་ཆུད་ཡང་གཅིག་ཏུ་ན་ཁྱིམ་པ་ལ་གོམ་པ་དྲུག་བདུན་ཙམ་གྱོན་དུ་འང་བརྟགས་པར་ཆུད་དེ་གྱོན་དུ་དབང༌། རི་མོ་དང་ཉེ་བའི་རི་མོ་མ་ཡིན་པ། ལྷམ་མདའ་ཚོན་ཀྱིས་བྲིས་པའི་རི་མོ་ཅན་གྱོན་དུ་མི་དབང༌། ལུག་རུ་ལྟ་བུར་མ་ཡིན། ལྷམ་གྱི་བོལ་ལ་སྟེ་འཛོམ་གྱི་གོང་རས་འདྲ་བས་བརྒྱན་པའི་ལྷམ་མི་དབང༌། ཤུ་བ་ཏ་དང་ཀ་རི་བྱའི་ལོ་མ་ལྟ་བུ་མ་ཡིན། ལྷམ་གྱི་བོལ་ལ་ཤིད་བོ་དེའི་ལོ་མ་དང་འདྲ་བ་དང་གོང་ནན་ཏན་གྱི་རི་མོ་འདྲ་བརྟ་བག་ཏུ་འདུག་པས་བརྒྱན་པའི་ལྷམ་མི་བགོ །གསེར་དངུལ་གྱིས་སྤྲས་པ་མ་ཡིན། གསེར་དངུལ་དང་རིན་པོ་ཆེས་བརྒྱན་པའི་ལྷམ་མི་བགོ །ཙི་གི་ཙི་ཀི་མ་ཡིན། འདི་སྐད་ཅེས་ཟེར་བའི་ལྷམ་མི་བགོ །ཀི་ནི་ཀི་ནིར་མ་ཡིན། འདི་སྐད་སྒྲ་འབྱུང་བའི་ལྷམ་མི་བགོ །ཁི་ནི་ཁི་ནིར་མ་ཡིན། འདི་སྐད་དུ་ཟེར་བའི་ལྷམ་མི་བགོ །ཛི་ནི་ཛི་ནིར་མ་ཡིན། དེ་སྐད་ཟེར་བ་ལ་སོགས་པའི་ལྷམ་གྱོན་ན་ཉེས་བྱས། གཞན་ཡང་ཏྲོག་ཏྲོག་པོར་སྐྱེ་བ་མ་ཡིན། ལྷམ་སྒྲོག་པོར་འགྱུར་བའི་ལྷམ་མི་བགོ །ཞིང་དུ་བྲེས་པ་མ་བརྟགས་པ་མ་ཡིན། ལྷམ་གྱི་བོལ་འབྲིང་བུས་ཆུ་ཞེང་དུ་བྲེས་པ་བགོ་དབང་དེ་མདུན་དང་རྟིང་བར་རིམ་པ་ཅན་བཅང༌། ལྷམ་སོར་མོའི་སྟེང་གཡོགས་པ་དང་རྟིང་པ་ཀོ་བ་འཁྱུད་པ་ནི་བྱ་རྒོད་ཀྱི་ཕུང་པོ་ལ་འཛེག་པའི་ཚེ་གྱེན་བུ་ལ་འགྲོ་བའི་ཚེ་མི་འབྱིན་པ་དང་ཐུར་བུ་ལ་མི་སྣད་པའི་ཕྱིར་བཅངས་ཀྱང་ཉེས་མེད།
ལ་ལའི་ཆུ་ལས་སྐྱེས་པའི་ཡང་ངོ༌། །སྦྲུལ་ཡན་མན་དུ་སོང་བའི་མཆིལ་མ་དང་ཁ་ཆུས་སམ་རྩྭ་ལ་རེག་པ་ལ་རྐང་པ་ལ་རེག་ན་གདུག་པར་འགྱུར་བའི་ཕྱིར་བོལ་ཅན་གྱི་ལྷམ་བཅངས་ཀྱང་ཉེས་མེད་དོ། །ལྷམ་ཡུ་རྡུམ་ཡང་ངོ༌། །ལྷམ་ཡུ་རྡུམ་གྱོན་དུ་དབང་ངོ། །ཆབ་བྲོམ་དུ་འགྱུར་བའི་ཡུལ་དུ་ཞྭ་དང་ཡུ་རིངས་ཀྱང་ངོ༌། ཡུལ་ལྷག་པ་ཆེ་སྟེ་ཆབ་བྲོམ་ཡོད་པའི་ཡུལ་དུ་ཞྭ་དང་ལྷམ་ཡུ་རིངས་བགོར་གནང་ངོ༌། །དགེ་སློང་མ་ཡུལ་གྱི་དབུས་སུ་ན་ན་ཞྭ་དང་ལྷམ་དབང་ངོ༌། །མཐའ་འཁོབ་ཆབ་བྲོམ་ཡོད་པའི་ཡུལ་དུ་ནི་ཞྭ་དང་ལྷམ་གྱོན་དུ་དབང༌། མཆོད་པའི་དྲུང་དུ་ལྷམ་བགོས་ཏེ་མི་སྤྱད། དཀོན་མཆོག་གསུམ་དང་མཁན་པོ་དང་སློབ་དཔོན་ལྔ་ལ་ཕྱག་འཚལ་ཞིང་མཆོད་པའི་ཚེ་གན་དུ་ལྷམ་གྱོན་ཏེ་མི་འགྲོ། །སེང་གེ་དང་སྟག་དང་གཟིག་དང་བ་གླང་ཅང་ཤེས་ཀྱི་ཡན་ལག་ལས་ཅུང་ཟད་ཀྱང་ལུས་ལ་མི་ཐོགས། མིང་གིས་སྨོས་པ་འདི་རྣམས་ཀྱི་པགས་པ་དང་སོ་དང་རུས་པ་དང་སྡེར་མོ་ལ་སོགས་པ་ལུས་ལ་བགོ་བའམ་ལྷམ་ལ་བརྒྱན་པར་མི་བྱ། བ་གླང་ཕལ་དང་རྟ་མ་རུང་བ་དང་དེ་ལས་གཞན་རི་དགས་ཁྲ་བོ་དག་ཀྱང་ཆུད་དོ། །མིང་གིས་སྨོས་པ་འདི་རྣམས་ཀྱང་མདོ་སྟེང་མ་དང་འདྲ་བར་བགོ་བ་དང་སྤྱད་ཅིང་གདགས་པར་མི་བྱ། ལྷམ་མི་སྤྲུག །ལྷམ་རྡུལ་ཅན་ལ་ལ་བརྡབས་པའམ་ནང་མི་དྲུད་མི་བརྡབ། རས་མ་ལ་ཆུས་བརླན་ཏེ་འདི་ལ་རྡུལ་དབྱུང་བའི་ཕྱིར་བཅངས་ལྟག་མ་ལྟར་རྡུལ་ཅན་མི་བརྡེབ་པར་རས་མ་ལ་ཆུས་བརླན་ཏེ་ལྷམ་ཕྱི་ཞིང་འདར་བའི་ཕྱིར་རས་མ་དེས་ཕྱིས་ཀྱང་དགོས་པའི་ཕྱིར་སྦས་ཏེ་གཞག །དེ་བཙེམ། ལྷམ་རལ་ན་བཙེམ་སྟེ་ཐབས་འོག་ནས་འཆད། མི་མཛེས་པའི་དངོས་པོ་བྱེད་ན་ཕྱོགས་དབེན་པར་རོ། །ལྷམ་བཙེམ་པ་མི་མང་པོས་མི་མཐོང་བའི་ཕྱིར་ལྐོག་དབེན་པར་རོ། །དེའི་ཕྱིར་བསྙུང་བུ་དང་གླ་རྒྱུན་བཅངས་ཡན་མན་ཡུལ་རྒྱུ་བའམ་གནས་ན་འདུག་པ་འང་རུང་ལྷམ་རལ་ན་བཙེམ་པའི་ཕྱིར་གླ་རྒྱུན་དང་བསྙུང་བུ་བཅང་བཟོ་གྲི་མ་ཡིན། བཟོ་གྲི་ལྟག་དགྱེ་དགེ་སློང་གིས་མི་བཅང༌། ཤིང་ལྷམ་མི་གོན། དགེ་སློང་ཤིང་ལྷམ་གྱོན་དུ་མི་གནང་སྟེ་གནང་བའི་སྐབས་འོག་ནས་འཆད། གྲོང་མི་གཙང་བའི་
གནས་ལས་གཞན་དུའོ། །གྲོང་བར་དུ་འདམ་ཡོད་པར་གྲོང་དུ་ཞག་ལོན་པ་ལ་ཁྱིམ་པས་མལ་སྟན་བསྲུང་བའི་ཕྱིར་ལྷམ་གྱོན་ཅིག་ཅེས་བགོ་བ་དང༌། བཤང་ས་ཆེ་ཆུང་དུ་འགྲོ་བའི་ཚེ་གྱོན་དུ་དབང༌། སྨྱིག་མའི་ལོ་མ་དང་མུན་ཛ་དང་སི་རི་དང་འདར་བ་ལས་མ་ཡིན། མིང་གིས་སྨོས་པ་འདི་རྣམས་ཀྱི་རྒྱུ་ལས་ལྷམ་བྱས་ཏེ་མི་བགོ །སྐུད་པའི་ཡང་ངོ༌། །རྩྭ་ལས་སྐུད་པར་བཀལ་བའི་ལྟམ་མི་བགོ །ཏྲག་ཡོད་ན་མ་ཡིན་ནོ། །ཏྲག་ཅན་གྱིས་གོང་མ་མིང་གིས་སྨོས་པ་རྣམས་ཀྱིས་རྩྭ་ལས་ལྷམ་བྱས་ཏེ་གྱོན་དུ་གནང་བ་ནི་ཏྲག་ཅན་གྱི་ཆོ་ག་བྱ་བའི་ཕྱིར་དྲོ་བར་རྐང་པ་དང་བཅས་ཏེ་གཞུག་པའི་ཕྱིར་གནང་ངོ༌། །གྲོང་དུ་གཞན་མེད་ན་པགས་པ་ལ་འདུག །གྲོང་དུ་སྤྱན་དྲངས་ཏེ་པགས་པ་སྟན་དུ་བཏིང་ན་སྟན་གཞན་མེད་དམ་ཞེས་སྨྲོས་ཏེ་སྟན་གཞན་མེད་ཅེས་ཟེར་ན་པགས་སྟན་ལ་འདུག་ཀྱང་ཉེས་མེད་དོ། །དེར་ཡང་དེ་ལ་འདི་ལྟ་བུའི་རྐྱེན་ཡང་མི་འདུག་གཙུག་ལག་ཁང་ན་ནི་རྐྱེན་ཡོད་ཀྱང་པགས་སྟན་ལ་འདུག་པའམ་ཉལ་དུ་དབང༌། མིག་གི་ཕྱིར་དོམ་ལྤགས་བཅང༌། མིག་ལ་ཕན་པའི་ཕྱིར་དོམ་ལྤགས་བཅངས་ཀྱང་ཉེས་མེད། རྐང་པའི་གནས་སུ་གདིང༌། ལྟག་མ་ལྟར་བཅང་བ་ནི་སྟན་དང་རྐང་པ་ཕྱི་བར་བྱ། སངས་རྒྱས་ཀྱི་ནི་དྲི་གཙང་ཁང་གི་སྒོར་རོ། །སངས་རྒྱས་ལ་དོམ་ལྤགས་ཡོན་དུ་ཕུལ་ན་དྲི་གཙང་ཁང་གི་སྒོར་བཞག་སྟེ་ཡན་མན་དུ་དོང་བའི་མིག་ལ་ཕན་པའི་རྐང་པ་ཕྱིས་ཏེ་འགྲོ་།ལྷམ་བོལ་མེད་བགོ །དོམ་ལྤགས་ཀྱི་ལྷམ་མིག་ལ་ཕན་པའི་ཕྱིར་བགོས་ཀྱང་ཉེས་མེད། རླུང་གིས་ནི་འདུག་ཅིང་ཉལ། རླུང་ནང་ཅན་དོམ་ལྤགས་ཀྱི་སྟེང་ཉལ་ལམ་འདུག་ཀྱང་ཕན་པའི་ཕྱིར་དབང་ངོ༌། །མཁྱེན་པས་བརྟགས་པ་ཐམས་ཅད་ལ་འདི་མཁོ། དོམ་ལྤགས་ཀྱི་སྟེང་ན་འདུག་ན་མཁྱེན་པས་བརྟགས་པ་བད་ཀན་བྱུང་བར་ཕན་པའི་ཕྱིར་བཅང༌། སྤུས་རེག་ན་ཕན་པར་ཤེས་པར་བྱ། ལྟག་མ་ལྟར་དོམ་ལྤགས་བཅངས་པ་ནི་ཤ་ལ་རེག་པ་ནི་མ་ཡིན་གྱི་སྤུ་ལ་རེག་པ་ནི་ཕན། ལྷམ་བོལ་མེད་རིམ་པ་མང་པོ་ན་ཡང་ངོ༌། །ལྷམ་བོལ་མེད་ཀོ་བ་རིམ་པ་མང་དུ་བྱས་ཀྱང་རྐང་པ་འབྱར་བའི་རིམ་གཅིག །དོམ་ལྤགས་སྤུ་ཡང་བསྟན་ཏེ་བྱས་ན་རིམ་པ་མང་ཡང་ཉེས་མེད། མདོ་འོག་མའི་ཏི་ཀའོ། །དུ་མའི་སྟེང་དུ་གཅིག་བཞག་
ན་ཡང་ངོ༌། །དོམ་ལྤགས་འབའ་ཞིག་ལས་ལྷམ་རིམ་པ་མང་པོ་ཞིག་བྱས་ཏེ་གྱོན་ཀྱང་ཉེས་མེད་དོ། །མདོ་སྟེང་མའི་ཏི་ཀའོ། །ཨ་སྨ་བ་རནད་ཀ་ལས་གཞན་དུ་མི་བཅང༌། ཡུལ་ཨ་སྨ་བ་རནད་ཀ་ཞེས་བྱ་བ་ནི་སྟག་གཟིག་ལ་སོགས་པ་མ་གཏོགས་པར་གཞན་ཐམས་ཅད་པགས་པ་བཅང་དུ་དབང་ངོ༌། །སེང་གེ་ལ་སོགས་པའི་ཡང་མ་ཡིན། ཡུལ་ཨ་སྨ་པ་རནད་ཀ་ན་སེང་གེ་དང་སྟག་དང་གཟིག་གི་པགས་པ་གྱོན་དུ་མི་དབང༌། རྒྱུས་པ་དང་རུས་པ་དང་སོ་དང་ཤ་དང་ཚིལ་དག་ཀྱང་གང་གི་པགས་པ་མ་བརྟགས་པ་དེའི་འོ། །ལྟག་མ་ལྟར་པགས་པ་བཅད་དུ་མི་གནང་བ་རྣམས་ཀྱི་མིང་གིས་སྨོས་པ་འདི་རྣམས་མི་བཅང༌། རྐྱལ་པ་བཅང༌། རྒྱལ་པ་བཅངས་ཀྱང་ཉེས་མེད། ངུར་སྨྲིག་གམ་སྔོན་པོར་ཡང་ངོ༌། །རྐྱལ་པའི་ཁ་དོག་འདི་འདྲ་བར་བྱ། རི་མོ་དང་རི་མོར་ཉེ་བ་མ་ཡིན། རྐྱལ་པ་རི་མོ་ཅན་མི་བཅང༌། རྒྱལ་མི་ཤེས་པ་ཐམས་ཅད་མ་སྦྱངས་པར་ཆུ་ཟབ་མོར་མི་འཇུག །བདག་རྐྱལ་མི་ཤེས་པར་གྲུའམ་གཟིངས་སམ་ཤིང་ལེབ་ལྟ་བུའི་ཐབས་མ་སྦྱར་བར་ཆུ་ཆེན་པོར་མི་འཇུག །དབེན་པའི་ཕྱོགས་སུ་རྐྱལ་བསླབ། དགེ་སློང་དབེན་པར་རྐྱལ་སློབས་ཤིག །གཏིང་ཟབ་ལ་གླང་པོ་མ་གཏོགས་ཏེ་བ་ལས་མི་འཇུག་ཆུ་ཆེན་པོ་ལ་བ་འ་མ་གླང་བུ་མ་གཏོགས་པར་གླང་པོ་ཆེན་པོའི་མཇུག་མ་ལ་འཇུས་ཏེ་འགྲོ་པའི་མཇུག་མ་ལ་འཇུས་ན་ཉེས་བྱས། གླང་བུ་ལ་འཇུས་ན་སྟོབས་ཆུང་བའི་ཕྱིར། འཇུ་བ་ནི་བ་གླང་དང་རྟ་དང་མ་ཧེ་དང་གཡག་ལས་སོ། །མིང་གིས་སྨོས་པ་འདི་རྣམས་མ་ཡིན་པའི་མཇུག་མ་ལ་མི་འཇུ། པགས་པའི་དངོས་པོའོ།། །།འདི་མན་ཆད་སྨན་དཔྱད་ལ་འཆད་དེ། སྨན་སྤྱད། དགེ་སློང་ནད་པས་སྨན་བཟའ་བར་སྤྱད་པ་དང་དགེ་བའི་བར་ཆད་དུ་མི་འགྱུར་བའི་ཕྱིར་སྤྱད་དོ། །འདི་ལ་རྣམ་པ་བཞི་སྟེ། ཟས་ཀྱི་སྨན་རྣམ་པ་བཞི་ལ་སྐད་ཅིག་པ་དང་ཕྱི་དྲོ་བ་དང་ཞག་བདུན་པ་དང་ཚེ་གཅིག་པའོ། །སྐད་ཅིག་པ་ནི་སྐྱ་རེངས་བྱུང་ནས་དྲོའི་བར་དུའོ། །ཐུན་གྱི་སྐྱ་རེངས་བྱུང་ནས་ཉི་མ་ནུབ་ཀྱི་བར་དུ་འོ། །ཞག་བདུན་པ་དང་ཚེ་གཅིག་པ་ནི་དངོས་སུ་ཟད་དོ། །ནད་པ་ལ་དང་པོ་མ་ཡིན་པའོ། །སྐད་ཅིག་པའི་ཟས་ནི་ན་བ་དང་མི་ན་བ་དང་
མི་ན་བ་འདྲ་སྟེ་བཟར་རུང་སྟེ་ནད་པས་ཟས་ཞག་ཏུ་བཞག་ནི་མི་དབང༌། གཞན་གསུམ་ནི་ནད་པས་བཅངས་ཀྱང་ཉེས་མེད། ཚོ་ཙ་དང་མོ་ཙ་ཏ་ཀོ་ལ་དང་ཀ་ཤུད་ཏའི་དང་ཨུ་དུམ་བའི་ར་དང་པ་རུ་ཤ་ཀ་དང་རྒུན་འབྲུམ་དང་ཁ་ཟུ་རའི་ཆུ་ནི་ཐམས་ཅད་ལའོ། །མིང་གིས་སྨོས་པ་འདི་རྣམས་ཀྱི་འབྲས་བུའི་ཁུ་བ་པ་བཙགས་ཏེ་ན་བའང་རུང་མི་ནའང་རུང་བཙགས་ཏེ་འཐུང་དུ་དབང་ངོ༌། །སྔ་དྲོའང་འཐུང་དུ་དབང་ངོ༌། །དེ་བཞིན་དུ་འབྲས་བུའི་ཚ་དང༌། ཚྭ་དང་ཞོ་ཁུ་དང་ཚུར་ཁུ་དང་རྩྭ་བ་མོ་དག་གོ །མིང་གིས་སྨོས་པ་འདི་རྣམས་བཙགས་ཏེ་ནའང་རུང་མིན་འང་རུང་ཕྱི་དྲོའང་འཐུང་དུ་དབང་ངོ༌། །འདི་རྣམས་ཆུས་བརྟགས་དགོས་སོ། །ཆུ་དབྱེ་སྣམ་བུར་བཙགས་ཏེ་དང་བ་བཞིན་སྣང་བ་ཤར་བ་དེའི་ཁ་དོག་ལྟ་བུའོ། །མདོ་ལྟག་མའི་བཏུང་བ་རྣམས་ཚགས་སུ་བཙགས་ཏེ་དང་པར་བྱས་ལ་བཞིན་སྣང་ལ་ཆུས་བརྟགས་ལ་བཏུང་དུ་དབང་ངོ༌། །དེའི་ཕྱིར་སྔོན་དུ་བསྙེན་པར་རྫོགས་པར་རེག་པ་མི་རིགས་ཏེ་མཚན་མཚུངས་པས་ནའོ། །མདོ་ལྷག་མ་ལྟར་བཏུང་བ་རྣམ་པ་བཅུ་གསུམ་སྔ་དྲོ་དགེ་སློང་བདག་གིས་བཙིར་ཞིང་བཙགས་ན་བཏུང་དུ་རུང༌། ཕྱི་དྲོ་ནི་བྱིན་ལེན་བྱས་ཀྱང་དགེ་སློང་གིས་བཙིར་ཞིང་བཙགས་ཀྱང་འཐུང་དུ་མི་དབང་གི །དགེ་སྦྱོང་ངམ་ཁྱིམ་པ་ཞིག་གིས་བཙིར་བཙགས་ལ་ཆུས་བརྟགས་ཏེ་བྱིན་ལེན་བྱས་ནས་འཐུངས་པ་ནི་ཉེས་མེད། ཨ་རུ་ར་ལ་སོགས་པ་ལྔ་ཡང་ངོ༌། །ཨ་རུ་ར་དང་རེའུ་ར་དང་ཨ་མ་ལི་དང༌། པི་པི་ལིང་དང་ན་ལེ་ཤམ་དང་ལྔ་ནི་དགེ་སློང་ནའང་རུང་སྔ་དྲོ་འང་རུང་ཟར་དབང་ངོ༌། །བུ་རམ་ཡང་ངོ༌། །བུ་རམ་དང་ཁ་ར་ཕྱི་དྲོའང་བཟར་རུང༌། བུ་རམ་དང་ཁ་ར་ཆུས་བྱས་ཏེ་བཏུང་དུ་འང་དབང༌། འདི་བསྔོས་པ་ལས་བཟའ་བ་ནད་པ་བཞིན་པ་ནི་ལམ་པ་དང་རྫས་འཚོ་དང་ལས་སར་པ་པ་ཡང་ངོ༌། །སྨན་ཞག་བདུན་དུ་བསྔོས་ཏེ་བཞག་པ་ནད་པ་བདག་ཀྱང་བཟའ་གྲོགས་པོ་གཞན་ཡང་བཟར་རུང་བ་བཞིན་དུ་ལམ་རིང་པོ་ནས་ངལ་ཆད་དེ་འོངས་པ་དང༌། དགེ་འདུན་གྱི་མལ་སྟན་རྫི་ལ་སོགས་པ་དང་གཙུག་ལག་ཁང་གསར་དུ་བརྩིག་པར་བསྐོ་བའི་དགེ་སློང་དང་འདི་རྣམས་བཟར་དབང་ངོ༌། །ཟན་བཅད་པས་དུས་མ་ཡིན་བའི་འདི་
བཟའ། དགེ་སློང་དྲོ་ཡོལ་ཏེ་ཟན་མ་ཟོས་པའང༌། སྨན་ཞག་བདུན་པ་བཟར་རུང༌། སྐོམ་ནི་ཐུན་དུའོ། །ཕྱི་དྲོ་བཏུང་དུ་དབང་བ་རྣམས་ནང་པར་ནས་ཉི་མ་ནུབ་ཀྱི་བར་དུ་བཏུང་དུ་རུང་བ་ལས་བྱ། དང་པོའོ། །ཐུན་བཏུང་བའི་སྐོམ་དེ་རྙོག་མ་ཅན་མ་ཡིན་པ་དང་བ་ལ་བྱ། དེར་མ་རེག་པའི་རྫས་ཏེ་འོན་ཏེ་དུས་ཀྱི་ནི་བསྙེན་པར་མ་རྫོགས་པས་མཉེ་ཞིང་སྣམ་བུར་བཙག །ལྟག་ཏུ་ཕྱི་དྲོ་བཏུང་བ་རྣམ་པ་བརྒྱད་སྔ་དྲོ་དགེ་སློང་གིས་བྱིན་ལེན་བླངས་ཏེ་སྔ་དྲོ་བདག་གིས་མཉེས་ཏེ་བཏུང་དུ་རུང་བ་དང་ཕྱི་དྲོ་དགེ་སློང་གིས་མཉེ་ཞིང་བཙག་ཏུ་མི་རུང་ཞིང་དགེ་སློང་གིས་བཙགས་ཤིང་བྱིན་ལེན་བྱ་བ་དེ་བཞིན་དུ་རྣམ་པ་བརྒྱད་པོ་འདི་ལ་མ་གཏོགས་པར་ཤོ་གམ་ལ་སོགས་པ་གཞན་ཡང་བརྩི། འོག་འདི་དང་འདྲ། བལ་པོ་སེའུ་དང་པི་ཟང་སུ་ར་ག་ལ་སོགས་པའི་རྫས་གཞན་ཡང་འདིར་རོ། །འདི་རྣམས་ཀྱང་ལྟག་ཏུ་བརྒྱད་མིང་གིས་སྨོས་པའི་བརྩི་འོག་དང་འདྲ་སྟེ། ཕྱི་དྲོ་དགེ་སློང་གིས་བཙག་ཅིང་ལས་བྱར་མི་རུང་སྟེ་དགེ་སྦྱོང་གིས་བྱ། དུས་ཀྱིར་ན་ཐུན་གྱི་མཐར་རོ། །ལག་ཏུ་རྣམ་བརྒྱད་དང་བལ་པོ་སེའུ་ལ་སོགས་པ་དྲོ་ཟོས་ནས་དམར་ཐག་མ་ཆད་ཚུན་ཆད་དུ་དགེ་སྦྱོང་གིས་མཉེས་བཙགས་ཏེ་ངོ་སྣང་ན་དགེ་སློང་འཐུང་དུ་དབང་ངོ༌། །དམར་ཐག་གི་མཚམས་འདས་ཏེ་འཐུང་དུ་མི་དབང་ངོ༌། །གཞན་ཡང་དེའོ། །ཞག་བདུན་པ་དང་ཚེ་གཅིག་གི་སྔགས་ཀྱིས་བརྟགས་པ་ལས་སྐོམ་དུ་བྱས་ནའང་དམར་ཐག་མ་ཆད་ཚུན་ཆད་འཐུང་དུ་རུང༌། དེ་མ་གྱུར་ན་སྟེང་གར་དུ་གྱུར་ནའང་དེར་རོ་ཞེས་འགའ་ལས་སོ། །སྐོམ་དུ་བཏུང་བ་ཉུག་པོར་སྦྱར་བ་ལས་སྐྱུར་པོར་གྱུར་པ་དང༌། དང་བར་བྱས་པ་ལས་རྙོག་མ་ཅན་དུ་འགྱུར་བ་ཐུན་མ་འདས་ཀྱང་བཏུང་དུ་རུང་ངོ་ཞེས་འོག་ནས་འཆད། འདུལ་བ་འཛིན་པ་ཁ་ཅིག་ན་རེ་སྐོམ་བཏུང་བའི་རྣམས་ལ་ད་ལྟར་ར་མི་རོ་འང་དེའུ་རེ་ར་རོ་བར་འགྱུར་བ་དང་ད་ལྟར་དང་ཡང་དེའུ་རེ་རྙོག་མ་ཅན་དུ་འགྱུར་བ་དང༌། ད་ལྟར་མངར་ཀྱང་དེ་འུ་རེ་སྐྱུར་པོར་འགྱུར་བས་བཏུང་དུ་མི་རུང་ཞེས་བཤད། དེ་མི་བཟང་སྟེ་དུས་ལས་འདས་པར་གནས་ན་ནི་མི་སྐྱེ་བ་ཐོབ་དེ་ཡང་འོང་བ་ན་ཕལ་གྱིས་མི་ཆུད་པའི་ཕྱིར་མི་བསྔོས་པར་འཐོབ་
པས་སོ། །ལྟག་ཏུ་མངར་པོ་ལས་སྐྱུར་པོར་གྱུར་པ་དངས་བ་ལས་རྙོག་པོར་འགྱུར་བ་དང་ར་མི་རོ་བ་ལས་ར་རོ་བར་གྱུར་ན་ཐུན་པ་འདས་ཀྱང་བཏུད་དུ་མི་རུང་ངོ་ཞེས་འབྱུང་བ་དེའི་གཞུང་བཙན་པར་བྱས་ཏེ་གཟུང་གི་ལྟག་ཏུ་མཁན་པོའི་ཚིག་ཕྱིས་འགྱུར་ཞེས་ཟེར་བ་མི་བཙན་ཏེ་དེའི་ཚིག་མི་གཟུང་ངོ༌། །འདིར་རོ་ཞུགས་པའི་ཕྱིར་ཕྱེ་བའི་སྐོམ་བུ་རམ་ཤིང་དང་རྒུན་འབྲུམ་ལ་སོགས་པ་ཆུ་མ་བླུགས་ཀྱང་ཁུ་བ་རང་འབྱུང་བས་ཐུན་མ་འདས་ཚུན་ཆད་བཙགས་ཏེ་འཐུང་དུ་རུང་ཕྱེ་མའི་སྐོམ་ཡང་བཏུང་དུ་རུང་སྟེ་གང་ཡིན་པ་ནི་སྒ་དང་པི་པི་ལིང་ལ་སོགས་པ་བུར་མར་བྱས་ཏེ་གླུམ་གྱི་རླངས་པ་ལ་བདུགས་ཏེ་རོ་ཡོད་པ་དང་ཆུ་དང་བསྲེས་ཏེ་ཐུན་གྱི་བར་དུ་བཏུང་དུ་དབང༌། སོ་བི་རའི་ཡང་དང་ངོ༌། །སོ་བི་ར་གང་ཡིན་པ་ནི་འོག་ནས་འཆད་དེ། སོ་བི་རས་བརླ་ན་པའི་ཁུ་བ་འང་བཏུང་དུ་རུང༌། འདི་ནི་འབྲས་བུ་ལ་སོགས་པའི་སྨན་བརྙན་ནས་སྐྱུར་ནའོ། །སོ་བི་ར་ཞེས་བྱ་བ་ནི་ཆུ་བ་ཏི་ད་མ་ཏི་ལ་སོགས་པ་འབྲས་བུ་དང་མེ་ཏོག་ལས་སྐྱུར་བ་གང་ཡང་རུང་སྟེ་ཆུ་བར་སྦྱར་ན་ཐུན་གྱི་བར་དུ་བཏུང་དུ་རུང་ངོ༌། །འདི་མན་ཆད་ནི་སྐད་ཅིག་མ་དང་ཐུན་གྱི་བར་དུ་ཆུ་ལས་བཤད། མར་དང་ཡུངས་མར་དང་སྦྲང་རྩི་དང་བུ་རམ་ནི་ཞག་བདུན་པའི། མིང་གིས་སྨོས་པ་འདི་རྣམས་ནི་ཞག་བདུན་པའི་སྨན་ནོ། །ཁཎྜ་དང་བུ་རམ་དང་ཤ་ཁ་ར་ལ་སོགས་ཐམས་ཅད་ཀྱང་བུ་རམ་དུ་ཆུད་དོ། །འདི་རྣམས་ཀྱང་སྨན་བུ་རམ་ཞེས་བྱ་བའི་ནང་དུ་གཏོགས་ཏེ་ཞག་བདུན་དུ་འཆང་དུ་དབང་ངོ༌། །མདོ་ཡང་མར་དུ་ཆུད་དོ། །མཐོ་རིས་ཀྱི་ཁམས་ན་འདུག་པ་ཞིག་སྟེ་འདི་ཡང་མར་དུ་གཏོགས་ཏེ་ཞག་བདུན་པའོ། །ཡུངས་མར་དུ་ཚིལ་ལས་བཞུས་ཏེ་བཙགས་པའང་ཆུད་དོ། །ཚིལ་དང་ཆུ་གཉིས་བསྲེས་ཏེ་བསྐོལ་ནས་ཆུ་ནི་སྐམས་ཚིལ་གྱི་ཁུ་བ་ལུས་པ་ཆོགས་ཀྱིས་བཙགས་ནས་ཞག་བདུན་པའི་མར་གྱི་གོར་བཅད་དུ་རུང༌། ཉ་དང་སྦལ་པ་དང་དོམ་དང་ཕག་པའིའོ། །འདི་རྣམས་ཀྱི་ཚིལ་བཙགས་པའང་མར་གྱི་གོར་ཞག་བདུན་པར་བཅང༌། འདི་རྣམས་ནི་ནད་པ་མང་པོ་ལ་མཁོ་བས་སོ། །མདོ་ལྟག་མའི་ཚིལ་རྣམས་ནད་པ་ལ་དགོས་པའི་ཕྱིར་བཅངས་ཀྱང་ཉེས་མེད། སོས་ནས་ནད་པའི་ཕྱིར་འདི་
རྣམས་ལས་སློང་ན་སྦྱིན་ནོ། །ཚིལ་འདི་རྣམས་ནད་པའི་ཡོ་བྱད་དུ་བྱས་ཏེ་གསོས་ནས་ལྷག་ན་ནད་པ་གཞན་ལ་སྦྱིན་ཀྱང་ཉེས་མེད། མེད་ན་ནད་ཀྱི་གསོས་པ་ལའོ། །བདག་ནད་སོས་ནས་ཚིལ་གྱི་སྨན་དགེ་སློང་ནད་པ་མེད་ན། དགེ་འདུན་གྱི་སྨན་ཁང་དུ་རུབ་པ་ལ་གཏད་དོ། །གདུས་པ་དང་བསྐུལ་བ་ཡང་ངོ༌། །འབྲས་བུ་དང་མེ་ཏོག་ལ་སོགས་པ་ལྟ་བུ་ལྕགས་ཀྱི་གཞོང༌། ཀུན་དུ་ནད་ཀྱི་ཆོ་ག་བྱ་བ་དང༌། མིག་ནག་པོར་བསྐུ་བའི་རྩིའང་ནད་སོས་ནས་དགེ་སློང་ནད་པ་ལ་བྱིན། གྲོགས་ནད་པ་མེད་ན་སྨན་ཁང་དུ་དབུལ། འདི་ཡན་ཆད་ཞག་བདུན་པའི་སྨན་བཤད་པ། ནམ་འཚོ་བར་དུ་བ་ནི་རྩ་བ་དང་སྡོང་བུ་དང་ལོ་མ་དང་མེ་ཏོག་དང་འབྲས་བུའོ། །མིང་གིས་སྨོས་པ་འདི་ལྔ་ཚེ་གཅིག་གི་བར་དུ་བཅང་དུ་དུང་བའི་སྨན་ཡིན་ཏེ་ནད་པས་བརྟགས་ཏེ་བཅང་དུ་རུང་གནང་སྟེ་འོག་ནས་མིང་གིས་སྨོས་པ་རྣམས་ཡིན་ཟས་ཀྱི་དོན་དུ་མི་ཆོག་པ་ལས་སོ། །མདོ་ལྟག་མ་ལྟ་བུར་རྣམ་པ་ལྔ་ཟས་ཀྱི་གོར་མི་ཆོག་པ་ནི་ཚེ་གཅིག་གི་བར་དུ་བཅང་དུ་གནང་ངོ༌། །འདི་ལྟ་སྟེ་མུ་སྟ་དང་ཧ་རི་བྲ་དང་ཤུ་བ་དག་དང་སྒེའུ་གཤེར་དད་བོང་ངའོ། །མིང་གིས་སྨོས་པ་འདི་རྣམས་ནི་རྩ་བའི་སྨན་ཡིན་ནོ། །ཙན་དན་དང་རྩི་བྱི་ཀ་དང་ཐང་ཤིང་དང་སྐྱེར་པ་འདི་རྣམས་ནི་སྡོང་བུའི་སྨན་ཏེ་ཚེ་གཅིག་ཏུ་བཅང་དུ་རུང་ངོ༌། །བ་ཤ་ཀ་དང་ཀོ་ཤ་ཏ་གི་དང་པ་ཏོ་ལ་དང་ནི་མ་པ་དང་འདབ་མ་བདུན་པའི་ལོ་མའོ། །མིང་གིས་སྨོས་པ་འདི་རྣམས་ནི་ལོ་མའི་སྨན་ཡིན་ཏེ་ནད་པས་ཚེ་གཅིག་ཏུ་བཅངས་ཀྱང་ཉེས་མེད། མེ་ཏོག་ནི་པ་ཤ་ཀའི་དང་ནིམ་པའི་དང་འདའ་ཀའི་དང་ན་གའི་པད་ཏ་མོའི་སྙིང་པོ་དང་ངོ༌། །མིང་གིས་སྨོས་པ་འདི་རྣམས་ནི་མེ་ཏོག་གི་སྨན་ཡིན་ཏེ་ནད་པས་ཚེ་གཅིག་ཏུ་བཅང་ངོ༌། །ཨ་རུ་རའི་དང་ཨམ་ལའི་དང་བྱི་བྱི་ཏ་ཀའི་དང་ན་ལེ་ཤམ་དང་པི་པི་ལིང་ངོ༌། །མིང་གིས་སྨོས་པ་འདི་རྣམས་ནི་འབྲས་བུའི་སྨན་ཡིན་ཏེ་ནད་པས་ཚེ་གཅིག་ཏུ་བཅང་དུ་རུང་ངོ༌། །ཛ་ཏུ་ཛ་ཏུ་ཞེས་བྱ་བ་ནི་སྨན་སྤྱིའི་མིང་ཡིན་ཏེ་འོག་ནས་འབྱུང་བའི་རྣམས་སོ། །འདི་ལྟ་སྟེ་ཤིང་ཀུན་དང་སར་བྲ་རས་དང་རྒྱ་སྐྱེགས་དང་པྲ་ཚིལ་དང་སྟ་པ་ཀ་རའོ། །མིང་གིས་སྨོས་པ་འདི་རྣམས་ཀྱི་སྨན་ཀྱང་
ཚེ་གཅིག་ཏུ་བཅང་དུ་དབང་ངོ༌། །ཛ་ཏུ་ནི་འདི་ཡན་ཆད་དོ། །ཐལ་བའོ། །འདི་ཡང་འོག་ནས་འབྱུང་བ་རྣམས་ཀྱི་སྤྱིའི་མིང་སྟེ་འོག་ནས་འཆད། འདི་ལྟ་སྟེ་ཏིལ་དང་པ་ལ་ཤ་དང་ས་རྫི་ཀ་དང་ནས་དང་གྲ་མ་དང་བ་ཤ་ཀ་དང་ཐལ་བའི་ཐལ་བའོ། །མིང་གིས་སྨོས་པ་འདི་རྣམས་ཀྱི་ཐལ་བའང་སྨན་དུ་འགྱུར་ཏེ་ཚེ་གཅིག་ཏུ་འཆང་དུ་གནང་ཐལ་བའི་སྨན་འདི་ཡན་ཆད་དོ། །ལན་ཚྭའོ། །འདི་འང་འོག་ནས་འབྱུང་བའི་སྤྱིའི་མིང་ངོ༌། །འདི་ལྟ་སྟེ་སེན་ཏ་པ་དང་ལན་ཚྭ་ནག་པོ་དང་བྱི་ལྡ་དང༌། རྒྱ་མཚོ་མཆིང་རྣམས་ཀྱི་དང་རོ་མ་ཁའིའོ། །མིང་གིས་སྨོས་པ་འདི་རྣམས་ཀྱང་ཚེ་གཅིག་གི་སྨན་དུ་བཅང་ངོ༌། །འདུས་པའོ། །འདི་འང་འོག་ནས་འབྱུང་བ་རྣམས་ཀྱི་སྤྱིའི་མིང༌། འདི་ལྟ་སྟེ་ཨ་པྲ་དང་ནིམ་པ་དང་ཀོ་ཤམ་པ་དང་ཤི་རི་ཤ་དང་འཛམ་བུ་དག་གོ །མིང་གིས་སྨོས་པ་འདི་རྣམས་ཀྱི་ལོ་མའང་སྨན་དུ་རུང་སྟེ་ཚེ་གཅིག་ཏུ་བཅང་དུ་གནང་ངོ། །མཆོག་གི་བར་དུ་སྦྱིན། སྨན་སྟེང་མ་རྣམས་ཀྱི་ལོ་མ་གདུས་པའི་ཁུ་བ་ནམ་སྲོས་ཀྱི་བར་དུ་ལན་དུས་བཀྲུས་ཀྱང་རུང་ངོ༌། །བཀྲུས་ཏེ་ཡང་ངོ༌། །ལྟག་མའི་སྨན་གྱིས་བཀྲུས་པའི་འོག་ཏུ་ཡང་ཆུ་ཐ་མལ་པས་ཀྱང་བཀྲུ། མ་རེག་པར་བཀྲུ་བ་གཅིག་གོ །ལྟག་མ་ལྟར་འདུས། པའི་སྨན་གྱིས་བཀྲུ་བ་ནད་ཁ་ཅིག་ལ་བསྲུབ་ཅིང་མཉེ་སྟེ་སྨན་གྱི་ཆུས་བཀྲུས་ནའང་ཕན། གཅིག་ཏུ་ནད་པ་ཁ་ཅིག་ལ་མ་མཉེས་པར་སྤྱི་བོ་ནས་བླུགས་ནའང་ཕན། འདི་ལྟར་འདུས་པ་སྦྱིན། ལྟག་མ་ལྟ་བུ་སྨན་གདུས་པས་རྔོ་དང་གཡན་པ་ལ་སོགས་པ་ལ་ཕན་པའི་ཕྱིར་རྟག་པར་བཀྲུ། ཟས་ཐལ་བ་དང་བླངས་ན་མ་བླངས་པ་མ་ཡིན་ནོ། །ཟས་ངན་པའི་སྨན་ཆེས་བྱ་བ་ཡང་འོག་ནས་འཆད་པ་རྣམས་ཡིན་ནོ། །འདི་དག་ནམ་འཚོ་བའི་བར་དུའོ། །འོག་ནས་འབྱུང་བའི་སྨན་དེའང་ཚེ་གཅིག་ཏུ་བཅང་དུ་གནང་ངོ༌། །དེར་གསུངས་པ་ནི་ཡང་བཤད་པ་དང་བཅིངས་པ་དང་བཤངས་ཏེ་ནུ་མས་འཚོ་བའིའོ། །སྨན་དུ་བསྲུངས་པ་ནི་བེའུ་ནུ་མ་འཐུང་བའི་གཅིན་དང་ལྕི་བ་ནི་དུག་ལ་ཕན་པའི་ཕྱིར་བཅང་དུ་གནང་ངོ༌། །འདི་ནི་དུག་ལ་ཕན་ནོ། །ལྟག་མའི་བེའུའི་ལྕི་བ་དང་གཅིན་དུག་འཐུངས་མ་ཐག་ཏུ་དེ་འཐུངས་ན་སླར་སྐྱུག་པའི་ཕྱིར་བཅང་ངོ༌། །
ཐལ་བ་དང་ཤིང་ཀན་ཙན་དང་ཀ་བྱི་ཏ་ལ་དང༌། ཨ་ཤྭ་ཏ་དང་ཨུ་དུམ་བཱ་ར་དང་ནྱ་གྲོ་དྷ་དག་ཀྱང་ངོ༌། །མིང་གིས་སྨོས་པ་འདི་རྣམས་ཀྱི་ཐལ་བ་དག་ཀྱང་དུག་ལ་ཕན་པའི་ཕྱིར་ཚེ་གཅིག་ཏུ་བཅངས་ཀྱང་ཉེས་མེད། དེ་ལའོ། །ལྟག་མའི་ཐལ་བ་རྣམས་དུག་འཐུངས་མ་ཐག་ཏུ་འཐུང་ན་འཚོ་བའི་ཕྱིར་བཅང་ངོ༌། །ས་སོར་བཞིའི་འོག་གི་ས་ལ་དགེའོ། །བཤང་གཅི་ལ་སོགས་པས་མ་འབབས་པའི་ས་གཙང་མ་ཟབ་ཏུ་སོར་བཞི་བརྐོས་པའི་འོག་མན་ཆད་ཀྱིས་དུག་ལ་ཕན་པའི་ཕྱིར་བཅངས་ཀྱང་ཉེས་མེད། འདི་དད་པའི་དགེ་བསྙེན་ལས་བླངས། མདོ་ལྟག་མའི་བེའུའི་བཤང་གཅི་དང་སའི་སྨན་ནི་དད་པའི་དགེ་བསྙེན་ཕྱིར་མི་ནུར་བ་ལས་བླང༌། ལེན་དུ་གཞུག །བྱིན་ལེན་བྱ། ལྟག་མའི་སྨན་དད་པའི་དགེ་བསྙེན་ལས་བྱིན་ལེན་བྱས་ཏེ་བླང༌། ཤ་རློན་པའི་སྨན་ཀྱང་ངོ༌། །དགེ་སློང་ན་ན་སྨན་དུ་དད་པའི་དགེ་བསྙེན་གྱིས་འབུལ་ན་ལེན་དུ་དབང་ངོ། །དད་པའི་དགེ་བསྙེན་མེད་ན་དགེ་སློང་ན་བ་ཤས་མི་གསོར་མི་རུང་ན་མ་དད་པ་ལས་ཀྱང་བླང༌། ཤ་འཚོང་དག་ཀྱང་ཐམས་ཅད་བླང༌། དགེ་སློང་ནད་པ་ཤའི་སྨན་གྱིས་མི་གསོར་མི་རུང་པར་གྱུར་ན་དགེ་བསྙེན་དད་པ་ཤ་འཚོང་ལ་ཉོར་བཏང་སྟེ་ཉོས་ལ་ཟོས་ཀྱང་ཉེས་མེད། འདི་དགོས་སོ། །བདག་ན་བའི་སྨན་དུ་ཤ་དགོས་ན་ལྟག་མ་ལྟར་ཉོ་བའང་མི་རིགས་པ་མ་ཡིན་ཏེ་རིགས་སོ། །དེ་སྟེ་དུས་མ་ཡིན་པར་མཁོ་ན་བ་ལང་རྒན་པའི་བཤང་བ་ལས་ནས་ཀྱིས་བྱ་བའི་སྨན་དེའི་ཕྱིར་བྱ་སྟེ་གཞན་མི་བཟའ། གླང་རྒན་ནས་ཟར་བཅུག་སྟེ་མ་ཆོམས་པ་ལྕི་བའི་ནང་ནས་བཏུས་ཏེ་ཕྱིར་བཏབ་ལ་ནད་པ་ཕྱི་དྲོ་ཟན་ནམ་ཐུག་མ་བྱས་ཏེ་བཟའ་ཞིང་བཏུང་དུ་གནང་ངོ༌། །འདི་ལྟ་བུའི་སྨན་ནད་པས་བཟའ་མི་ནུས་ན་ཟན་དང་ཐུག་པ་གཞན་འཐུང་དུ་འང་དབང་ངོ༌། །དེ་ཟ་ནུས་ན་གཞན་མི་བཟའ། དེ་སྟེ་སྐྱོན་སྣམ་བུར་བཙགས་ཏེ་གཞན་དུ་མ་ཡིན། བ་གླང་གི་ལྟོ་ནས་བྱུང་བའི་ནས་དེ་བརྔོས་དེ་བཏགས་ལ་སྐྱོ་མར་བྱས་ནས་སྣམ་བུས་བཙགས་པའི་ཁུ་བ་ནད་པ་ལ་བླུད། དེས་མ་ངོམས་སམ་མ་འདྲངས་ན་སྐྱོ་མ་ཉིད་ཀྱང་བླུད། དེ་སྟེ་ཤའི་སྨན་ཀོ་ཀས་བཤངས་པའི་གཞན་དུ་མ་ཡིན། ནད་པའི་སྨན་དུ་སྨན་པས་ཤ་བཙོས་པའི་ཁུ་བ་འཐུངས་ན་ཕན་པར་
བསྒོ་ན་ཕྱི་དྲོ་ཤ་ཁུ་འཐུངས་ཀྱང་ཉེས་མེད། ཤ་ཁུས་སྙིང་མ་ཚིམ་ན་ཤ་གཞན་ཟོས་ཀྱང་ཉེས་མེད། དྲེད་མོའམ་འཕར་བས་ཕྱུགས་ཀྱི་ཤ་ཟོས་པ་དེ་བཞིན་ཐལ་བྱུང་བྱུང་བ་བཟར་རུང་ངོ་ཞེས་སྨན་པས་ཕན་པར་བསྒོ་ན་ཟོས་ཀྱང་ཉེས་མེད། དེ་མ་སོས་ན་སྨན་གཞན་ཀྱང་བྱ། དེ་སྟེ་ཁུ་བ་ནི་གོས་ཀྱིས་བཙགས་པའི་གཞན་དུ་མ་ཡིན། ནད་པ་ལ་ཕན་པའི་ཕྱིར་ཤ་ཁུ་སྣམ་བུར་བཙགས་ཏེ་འཐུངས་ཀྱང་ཉེས་མེད། ཤ་ཁུས་མ་སོས་ན་སྨན་གཞན་གྱིས་གསོ་བའི་ཕྱིར་སྦྱིན། གཞན་དང་བཅས་ན་ཆོས་ཡོད་པའོ། །ཞག་བདུན་པའི་སྨན་དང་ཐུན་གྱི་སྨན་འདྲེས་ན་གཉིས་ཀ་དོར་རམ་གཅིག་དོར་བ་བྱེ་བྲག་འོག་ནས་འཆད། དེ་བས་ན་སྔོན་དུ་བརྟགས་པ་དང་ལྷན་ཅིག་ཏུ་འཇུག་གོ །སྐད་ཅིག་མ་དང་ཐུན་གྱི་སྨན་འདྲེས་ན་སྐད་ཅིག་མའི་དབང་དུ་བྱ། ཐུན་གྱི་སྨན་དང་ཞག་བདུན་པ་འདྲེས་ན་ཐུན་གྱི་དབང་དུ་བྱ། ཞག་བདུན་པ་དང་ཚེ་གཅིག་པ་འདྲེས་ན་ཞག་བདུན་པ་བཙན་ནོ། །གཟུགས་མ་གྱུར་ན་སྔ་མའི་གཟུགས་མ་ཡིན་ནོ། །མདོ་ལྟག་མ་ལྟར་འདྲེས་ན་དབྱེར་རུང་ན་སྔ་མ་ལྟར་མི་བཙན་གྱི་ཕྱེ་ཤིག །དེ་སྟེའང་འདྲེས་ཏེ་དབྱེར་ཡང་མ་རུང་ན་སྔ་མ་དང་འདྲ་བར་བྱ། དེ་བས་ན་གཞན་ལ་སོ་སོར་བྱས་པ་དེ་ལ་བདག་གིར་བརྟགས་པས་བརྟགས་ན་མི་འགྲུབ་པར་མི་འགྱུར་རོ། །མདོ་ལྟག་མ་ལྟར་སྨན་འདྲེས་པ་བདག་གི་སོ་སོར་དབྱེ་ནུས་ནས་ཕྱེ་ལ་ཐུན་དང་ཞག་བདུན་པ་དང་ཚེ་གཅིག་པའི་སྔགས་ཀྱིས་སོ་སོར་བཏབ་སྟེ་རིམ་པར་བཅང་ཞིང་བཟའ། ཕྱེ་དང་འབྲས་བུ་བུ་རྣམ་ཟླུམ་པོ་གཞག་པ་བདག་ཙམ་གྱིས་བཀྲུས་ན་གྲངས་སུའོ། །འབྲས་སམ་ཕྱེའི་ནང་དུ་བུ་རམ་གཞག་པ་དབྱར་བུ་རམ་ཞུས་ཏེ་ཁ་ཟས་དང་འདྲེས་ན་འབྲས་སམ་ཕྱེ་བསལ་ཏེ་ལྷག་མ་བུ་རམ་གྱི་ནང་ཕྱེ་དང་འབྲས་ཅུང་ཟད་ཅིག་མ་མཐོང་སྟེ་ཁོང་དུ་ལས་པའང་ཕྱི་དྲོ་ཐུན་གྱི་བར་དུ་བཟར་རུང་ངོ། །བུ་རམ་དུ་གཏོགས་པའང་བུ་རམ་དུ་ཆུད་དོ། །བུ་རམ་བཙིར་ཏེ་བུ་རམ་དུ་གྱུར་པ་ལས་དབྱར་ཞུས་ཏེ་སླར་བུ་རམ་ལིང་དུ་བྱར་མི་རུང་པ་ལས་ཕྱེ་ཅུང་ཟད་ཅིག་གིས་བསྲེས་ཏེ་བསྐོལ་ནས་སླར་བུ་རམ་ལིང་དུ་ཕྱེས་གཟུངས་བྱས་པ་དང༌། དེ་ལྟ་བུ་ཡང་ཕྱི་དྲོ་ཐུན་གྱི་བར་དུ།
བཟར་རུང་ངོ༌། །བསྔོས་པ་ལ་སོགས་པ་མི་སྐྱེའོ། །ཞག་བདུན་པ་དང་ཚེ་གཅིག་པ་དང་ཐུན་ལྟ་བུའི་སྨན་ནི་སོ་སོའི་བརྟགས་པས་བརྟགས་ན་ཐུན་གྱི་ལྟུང་བར་མི་འགྱུར་རོ། །ནད་པའི་ཕྱིར་བཟའ་ཕྱིར་བསྔོས་ཤིག་མདོ་ལྟག་མ་ལྟར་ཞག་བདུན་པ་དང་ཚེ་གཅིག་ཏུ་གནང་བ་ནི་ནད་པ་དབང་ངོ༌། །བདག་གི་དུས་ཀྱི་མཐའ་པའི་བར་དུའོ། །ཐུན་གྱིར་བསྔོས་པ་ཞག་བདུན་པར་བསྔོར་མི་རུང་ཞག་བདུན་པའི་ཚེ་གཅིག་པར་མི་བསྔོ། །ནད་པར་མི་བཟའ། ཐུན་དང་ཞག་བདུན་པ་དང་ཚེ་གཅིག་གི་སྨན་བརྟགས་པ་ནི་སྔ་དྲོ་བརྟགས་ཏེ་གཞག་གོ །བྱིན་བླངས་པའོ། །བརྟགས་པ་རྣམས་བྱིན་ལེན་མ་བྱས་པར་མི་བརྟག་གོ །བྱིན་ལེན་མ་བླངས་པ་དང་འདྲེས་པ་བསྲུང༌། བྱིན་ལེན་བླངས་པ་ནི་བྱིན་ལེན་བྱས་པ་དང་མ་བྱས་པ་མི་བསྲེའི་བྱིན་ལེན་བྱས་ལ་སྔགས་གདབ་པོ། །དེ་བས་ན་ལག་བསྙལ། བྱིན་ལེན་བྱ་བ་ལག་པ་དྲི་མ་ཅན་གྱིས་མི་བླང་བླངས་པ་དང་བདག་གི་ལག་ཏུ་བྱིན་ལེན་མ་བྱས་པར་ས་ལ་བཞག་ཏེ་སྔགས་ཀྱིས་བཏབ་པ་དང༌། སྤོགས་པ་དང༌། སྤགས་པ་དང༌། བྱིན་ལེན་མ་བྱས་པ་དང༌། བྱིན་ལེན་མ་བྱས་པར་བདག་ཉིད་གྱིས་བླངས་སྔགས་བཏབ་པ་དང༌། ནང་དུ་བསྲུབས་ཤིང། མཚམས་ཀྱི་ནང་དུ་དགེ་སློང་དང་ཞག་ལོན་པའི་ཟས་དང༌། བཙོས་པ་དང༌། མཚམས་ཀྱི་ནང་ནས་བཙོས་པའི་ཁ་ཟས་དང༌། བསྔོས་པ་མི་སྐྱེའོ། །མིང་གིས་སྨོས་པ་འདི་རྣམས་ཐུན་དང་ཞག་བདུན་པ་དང་ཚེ་གཅིག་པའི་སྔགས་ཀྱིས་གདབ་ཏུ་མི་རུང༌། བཙོག་པ་ནི་བྲོ་དང་བ་ལས་ལོག་ནའོ། །སྤགས་པ་སྟེ་ཐུན་གྱི་བཏུང་བར་སྤྱར་ལ་ཉུག་པོ་ལས་སྒྱུར་པོར་གྱུར་པ་དང༌། དང་བ་ལས་རྙོག་མ་ཅན་ཀྱང་ཐུན་མ་འདས་ཀྱང་ཟོས་ན་སྤགས་པར་འགྱུར། བསྔོས་པ་འོག་མ་དང་ལྷན་ཅིག་ཏུ་མི་སྤྱད་ཐུན་དུ་བསྔོས་པ་དང་ཞག་བདུན་པ་དང་ལྷན་ཅིག་བསྲེས་ཏེ་མི་སྤྱད་ཀྱིས་སྨན་གྱི་རིམ་པའི་དཔེར་རོ། །ཐུན་དང་ཞག་བདུན་པ་དང་ཚེ་གཅིག་པར་བསྔོས་པ་མ་གཏོགས་པར་མིག་གི་སྨན་དང་རྣ་བ་དང་སྣར་ལྡུགས་པ་ནི་སྔ་དྲོའང་རུང་ཕྱི་དྲོའམ་ནམ་ཡང་བསྐུར་རུང་ངོ༌། །བྱུག་པ་བྱའོ། །ལྷག་མ་ལྟ་བུའི་སྨན་མིག་ན་
ན་སྨན་བྱུག་གོ །སྨན་གྱི་ཕྱིར་མ་ཡིན་ན་མ་ཡིན། ལྟག་མ་ལྟར་སྨན་གྱིས་བསྐུ་བ་མིག་ན་ན་བསྐུའི་མིན་བར་མི་བསྐུའོ། །འདིའི་སྣོད་དུ་ཐུབ་པའོ། །ལྟག་མའི་མིག་སྨན་ཟངས་དང་ཁར་བའི་ནང་དུ་བླུགས་ན་གཡའ་འོང་བའི་ཕྱིར་རྭ་དང་གཡའ་མེད་པར་བླུག་གོ །ཁུ་བ་བྱུག་ན་གབ་ཚེའིའོ། །མིག་ལ་སོགས་པའི་སྨན་ཁུ་བ་རྣམས་ནི་སྦའི་གབ་ཚེ་ནང་དུ་བླུགས་རྡོ་གུ་བྱུག་ནི་སྒྱེའུའོ། །སྨན་རྡོ་གུ་རྣམས་ནི་སྣོད་སྒྱེའུ་ནང་དུ་བླུགས། མེ་ཏོག་དང༌། མེ་མར་གྱི་དུ་བ་མིག་ལ་ཕན་པ་དང༌། བཙོས་པ་དང༌། སྨན་སྣ་ཚོགས་ལས་བཙོས་ཏེ་མིག་སྨན་དུ་འགྱུར་བ་དང༌། ཕྱེ་མའི་བྱུག་པར་ནི་བུ་གུའི་སྨན་ཕྱེ་མ་དང་རྣམ་པ་འདི་གསུམ་གྱི་སྣོད་ནི་སྨྱིག་མའི་དུམ་བུར་བླུགས་ཏེ་གཞག །ཐུར་མ་བཅང༌། སྨན་མིག་ལ་བྱུག་པའི་རྣམས་ལག་པས་བྱུགས་ནའོ། །མི་གཟེ་བའི་ཕྱིར་ལྕགས་ཀྱི་ཐུར་མ་མདེའུ་རྡལ་མ་འདྲ་བས་བྱུག །ལྕགས་དང་ཟངས་དང་མིང་བུ་མི་ལས་དགེ །ཐུར་མའི་རྒྱུ་ནི་ལྕགས་དང་ཟངས་ལ་དགེ་སྟེ་མིང་བུ་མི་ཞེས་བྱ་བ་བལ་ཡུལ་གྱི་ཟངས་སྦྲང་བུ་དང་ལྕགས་མཉེན་པོ་ལ་བྱས་ན་བཟང་ངོ༌། །བཅང་བ་ནད་པས་སྨན་གཞན་པའི་ཕྱིར་སྣོད་ཁ་མངས་སོ། །དགེ་སློང་ནད་པས་སྨན་སྣ་ཚོགས་གཞག་པའི་ཕྱིར་རས་གཉིས་སྦྱར་ལ་ཐད་ཀར་སྐུད་པས་བཙེམས་ཏེ་ཁ་མང་པོར་འདུག་པའི་ནང་དུ་སྨན་སོ་སོར་གཞག །དེར་མི་གྲུབ་ན་བཅེར་བའམ་ཐུམ་པོར་གཞག་སྨན་མང་སྟེ་ལྟག་མ་ལྟར་སྣོད་དུ་གཞུག་ཏུ་མི་རུང་ན་ཕྱི་མ་རྣམས་ནི་སོ་སོར་ཕུར་མར་བྱ། རྡོག་རྡོག་པོ་དང་ཆེན་པོའི་རྣམས་སོ་སོར་གཞག་པ་ཕུར་མར་བྱས་ལ་གནམ་ལ་གདགས་བའམ་བཅེར་ཏེ་བཞག །མི་རུལ་བའི་ཕྱིར་དུས་དུས་སུ་བསྐམ་ཞིང་བཞག །སྨན་མི་རུལ་པ་དང་རླན་པར་མི་འགྱུར་བའི་ཕྱིར་དུས་དུས་སུ་བསྐམ། ཉི་གྲིབ་ལའོ། །སྨན་བསྐམ་པ་བར་བར་ཉི་མ་ལ་བསྐམ་ཞིང་གྲིབ་མ་ལ་བསྲད། ཉི་མ་འབའ་ཞིག་ལ་བསྐམས་ན་མཐུ་འབྲི་བའི་ཕྱིར། བསྐམས་ན་མཐུ་འབྲིའོ། །ཉི་མ་འབའ་ཞིག་ལ་བསྐམ་ནའང་ནད་ལ་མི་ཕན་པའི་ཕྱིར། གྲིབ་མ་འབའ་ཞིག་ལ་བསྐམས་ནའང་ནད་ལ་མི་ཕན་པའི་ཕྱིར་སྔ་མ་ལྟར་བསྐམ་པར་བྱ། མ་རུང་བར་འགྱུར་བའི་ཕྱིར་འབབ་ན་
བདག་གིས་བརྟུལ། སྨན་སྐམ་དུ་བཅུག་པ་ལས་མེས་ཚིག་གམ་ཤ་བྱུང་བ་ལ་སོགས་པ་རྐྱེན་གཅིག་བྱུང་ངམ་ཆར་པ་བབ་ན་དགེ་སློང་བདག་གིས་བརྟུལ་ཀྱང་སྤགས་པའི་ཁ་ཟས་སུ་མི་འགྱུར་རོ། །བསྙེན་པར་རྫོགས་པ་མེད་ནའོ། །ལྟག་མ་ལྟར་བརྟུལ་བའང་དགེ་སྦྱོང་དང་ཁྱིམ་པ་མེད་ན་གདོད་བདག་གིས་བརྟུལ་ལོ། །སྨན་གྱི་ཕོར་བུ་བཅང༌། དགེ་སློང་ལྷུང་བཟེད་གཅིག་ལས་བཅང་དུ་མི་གནང་ན་སངས་རྒྱས་ཀྱིས་ཕན་པར་གསུངས་ཏེ་སྨན་བཏུང་བའི་ཕོར་བུ་ཟངས་དང་ཁར་བ་ལས་བྱས་པ་བཅང༌། སྨན་གྱི་གཟར་བུ་ཡང་ངོ༌། །སྨན་དཀྲུག་ཅིང་བསྔོ་བ་དང་བཅུ་བ་ལག་པ་ཚ་བར་མི་འགྱུར་བར་བྱ་བའི་ཕྱིར་ལྕགས་སམ་ཟངས་ལས་གཟར་བུ་བྱས་ཏེ་བཅང༌། བརྣངས་པས་ཕྱི་བཞིན་ཕོར་བུ་བཅང༌། །ཟན་བཟའ་བའི་ཚེ་བརྣངས་པར་གྱུར་ན་ཆུས་འཕུལ་བར་བྱ་བའི་ཕྱིར་ཕོར་བུའི་ནང་ཆུས་བཀང་སྟེ་གམ་དུ་གཞག ། ནད་པ་ལན་ཚྭའོ། །ནད་པའི་བད་ཀན་ལ་ཕན་པའི་ཕྱིར་ཚ་རྡོག་ཟླུམ་པོར་བདར་ཏེ་མིད། བད་ཀན་གྱི་སྟེང་དུ་འཕོག་ན་བད་ཀན་སླར་བྱུང་བར་ཕན་ཏེ་རྒྱ་མཚོའི་ལན་ཚྭ་མ་རྙེད་ན་ཐ་མལ་བ་བཅང༌། འདི་གཞག་པའི་སྦུ་བུ་དགེའོ། །ལན་ཚྭའི་སྨན་གཞག་པའི་སྣོད་ལས་བྱས་ཏེ་དེར་གཞུག །གཅི་བས་བཙོས་པའོ། །ལྟག་མའི་སྨན་གྱི་སྣོད་ལས་བྱས་པ་ཁྲག་དང་མི་གཙང་བས་རེག་པ་བཀྲུ་བའི་ཕྱིར་ཟངས་ཀྱི་ནང་དུ་བ་ལང་གི་གཅི་བ་དང་བསྲེས་ཏེ་བཙོས་ན་འདག་པར་འགྱུར་རོ། །མེད་ན་ཉེས་མི་འབྱུང་བའི་ཕྱིར་ཁ་གབ་བྱ། ལྟག་མའི་སྨན་གྱི་སྣོད་ལ་རྡུལ་མི་འོང་བའི་ཕྱིར་ཁ་གབ་བྱ། འདི་ལྟ་བུ་ལས་སོ། །ཁ་གབ་ཀྱི་རྒྱུ་ནི་རྭ་ལས་བྱ་སྟེ་བཀྲུ་བ་ནི་སྔ་མ་དང་འདྲ་སྟེ་བསུང་གིས་ཀུན་དུ་སྤགས་པའི་སའོ། །བཤང་བ་དང་ཁ་ལག་བཀྲུ་བ་ས་རང་ལས་བསུང་བྱུང་བ་དེ་ལྟ་བུས་བཀྲུས་ཀྱང་མི་རིགས་པ་མ་ཡིན་ཏེ་བཀྲུས་ཀྱང་གནང་འཆད་དུའང་གནང༌། ཆུ་བསྲོ་བའི་ཕྱིར་ལྕགས་ཀྱི་ཐུ་ལུམ་མོ། ལྕགས་ཀྱི་ཐུ་ལུམ་བསྲེགས་ཏེ་ཆུར་བཅུག་ན་ཆུ་དྲོན་བོར་འགྱུར་བའི་ཕྱིར་བཅངས་ཀྱང་ཉེས་མེད་དོ། །ཐམས་ཅད་ལ་མཁོ། ལྕགས་ཀྱི་ཐུ་ལུམ་ནི་ནད་པ་དང་མི་ན་བ་གཉི་ག་ལ་བཅང་རུ་གནང་ངོ༌། །དེ་བྱུང་བའི་དེ་ལ་ལྕགས་ཐག་གིས་
གདགས། ལྕགས་ཀྱི་ཐུ་ལུམ་མེར་བསྲེགས་ཏེ་དེ་ལ་སླར་དབྱུང་དུ་ལག་པ་མི་ཚ་བའི་ཕྱིར་ལྕགས་ཐག་ཕྲེའུས་བཏགས་ལ་དབྱུང་སྲེག་པའི་ཚེ་འཇི་བ་གཤེར་བས་གནན། ཐུ་ལུམ་བསྲེགས་པའི་ལྕགས་འཇི་བས་གཡོགས་ལ་ཐུ་ལུམ་བསྲེག །ཟས་ཀྱིས་རེག་པ་སྲེག་ན་གནས་མེད་དོ། །ལྕགས་ཀྱི་ཐུ་ལུམ་ཟས་ཀྱིས་རེག་པ་དགེ་སློང་ནད་པ་ཞིག་ཆུ་དྲོན་པོར་བཏུང་དགོས་པར་གྱུར་ན་ཟས་ཀྱིས་འབགས་པའི་ཆུ་བསྲེས་ཏེ་འཐུངས་ཀྱང་ཉེས་མེད་པ་ནི་ཆུ་བསྲེས་པའི་ཚེ་སྤགས་པ་ཡང་བར་འགྱུར་རོ། །བརྟགས་པ་ནི་སྔར་བསྲོ། །བརྟགས་པའི་ཆུ་དང་ཕྱི་རོལ་ཆེ་ཆུང་གི་ཆུ་བསྲོ་ན། ལྕགས་ཀྱི་ཐུ་ལུམ་བསྲེགས་པས་བརྟགས་པའི་ཆུ་འཐུང་བ་སྔར་བསྲོ། །ཕྱིས་སྤྱད་པའིའོ། །ཕྱི་རོལ་ཆེ་ཆུང་གི་ཆུ་ཕྱིས་བསྲོ། །སྔར་བསྲོ་ན་ལྕགས་ཀྱི་ཐུ་ལུམ་མི་བཅང་བའི་ཕྱིར་རོ། །མས་གསོ་བའི་འཆང་ནད་པ་ལ་སྨན་པས་ཕན་པར་རྐུབ་ནས་གྱེན་དུ་གཅེའུ་གཙུགས་པོའི་ནང་དུ་མར་བླུགས་ཏེ་གློ་བརྫད་བ་བཞིན་དུ་དེ་ལྟར་བྱས་ཀྱང་རུང་ངོ༌། །གཞན་གྱིས་བསླང་ནུས་པ་ལས་འདི་བྱས་ན་སྦོམ་པོའོ། །མདོ་ལྟག་མ་ལྟར་སྨན་བྱ་བ་ཡང་གཞན་ཅིས་ཀྱང་གསོ་མ་ནུས་ན་གདོད་ལྟག་མའི་སྨན་ཐབས་སུ་བྱ། དེ་ལ་མི་ཚངས་པར་བྱ་བའམ་དགའ་བར་འདོད་པའི་ཕྱིར་གཅེའུ་བཅུག་ཅིང་བྱེད་ན་ཕས་ཕམ་པའི་སྦོམ་པོའོ། །ཟངས་སམ་ཁར་བའི་སྦུ་གུ་ནི་དགེ་བའི་ལྕགས་ན་ཡིན་ནོ། །སྟེང་མའི་རྐུབ་ཏུ་གཞུག་པའི་སྤུ་གུའི་རྒྱུ་ནི་ཟངས་སམ། ལྕགས་མཉེན་པོ་ལས་བྱས་ཏེ་སྲིད་སོར་བཞི་བཅུ་ལ་རྐུབ་ཀྱི་ནང་དུ་སོར་བཞི་བཅུ་ལ་ཕྱི་རོལ་དུ་སོར་བརྒྱད་བཞག་སྟེ། སྲང་དུ་འགྲོ་བ་དང་ཕྱི་རོལ་ན་འདུག་པའི་མཚམས་སུ་ཀུན་དེའི་མགོ་འདྲ་བར་བྱ། དེ་བཞིན་དུ་མཚོན་གྱིས་གསོ་བའོ། །ནད་པའི་སྨན་ནི་བྱས་ཀྱང་མ་སོས་ན་གཏར་ག་བྱ། སྨན་གྱིས་གསོར་རུང་བ་ལ་གཏར་ག་བྱས་ན་ཕས་ཕམ་པའི་སྦོམ་པོར་འགྱུར་རོ། །འདི་ནི་གཏར་ག་གདབ་པ་ལས་གདོད་ལ་གཞན་མི་བྱ། གཏར་ག་གདོད་ལ་བྱ་ན་རྩ་ག་ལ་འདུག་པའི་སྟེང་དུ་བྱས་པ་ནི་ཉེས་མེད་དོ། །རྩ་མེད་པར་བྱས་ན་ཕས་ཕམ་པའི་སྦོམ་པོའོ། །ལུས་ལ་ནི་ཡོད་པ་དང་མེད་པ་གཉིས་ཀ་སྨན་པས་བསྒོ་བ་བཞིན་དུ་བྱས་ཀྱང་ཉེས་མེད་དོ། །མཁྲེན་
བ་ལས་བཅད་པར་མི་བྱ། དགེ་སློང་མཁྲེན་པས་བཏགས་ཏེ་གཞན་བྱུང་བ་སྨན་པ་ན་རེ་བཅད་ན་ཕན་ནོ་ཞེས་ཟེར་ཀྱང་སྨན་པའི་ངག་མི་ཉན་ཏེ་མི་བཅད་དོ། །མཚོན་གཞན་གང་གིས་ཀྱང་ངོ༌། །ལྟག་མ་ལྟར་མཚོན་གྱིས་མི་བཅད་པ་བཞིན་དུ་མཚོན་མ་ཡིན་པ་རྒྱུས་པ་དང་རྟ་རྔ་དང་སོ་ལ་སོགས་པས་མི་གཅད་དོ། །སྨན་དང་སྔགས་ཀྱིས་གསོ། །སྨན་དང་སྔགས་ཀྱི་ཆོ་ག་བྱ་ཞིང་གསོ། །གཏུམ་པོས། གཞན་འབྱུང་བ་ལ་སོགས་ཏེ་ནད་ཐམས་ཅད་བདག་དང་འཁོན་ཡོད་པའི་སྨན་པ་གསོར་མི་གཞུག །གསོ་བའི་ཕྱིར་ནུབ་མོ་ཟ་བ་མི་རིགས་པ་མ་ཡིན། དགེ་སློང་ནད་པ་ལ་སྨན་པས་ཕན་པར་བསྒོ་ན་ཕྱི་དྲོ་བཟའ་བ་དང་བཅའ་བ་ཟོས་ཀྱང་ཉེས་མེད། འདི་ལ་བྱིན་ལེན་མ་བྱས་པས་རྩེག་པ་མ་བརྟགས་པར་མ་དོགས་ཤིག །དགེ་སློང་ནད་པ་ནི་ན་པའི་རྐྱེན་གྱིས་བྱིན་ལེན་མ་བྱས་པ་དང་སྤགས་པའང་ཟོས་ཀྱང་ཉེས་མེད་དོ། །གསོ་བའི་ཕྱིར་དྲིལ་བའི་དུ་བ་བཏུང༌། དགེ་སློང་གློ་དང་ཆམ་པ་ན་བ་ལ་གྱོ་མོའི་ནང་དུ་བ་མར་དང་ཕྱེ་གཉིས་བསྲེས་ཏེ་དེའི་དུ་བ་བཏང་ངོ༌། །སྤུ་བུས་འདི་སྦྱར་རོ། །དུ་བ་བཏུང་བ་ནི་དུ་བ་འབྱུང་བར་གྱོ་མོ་བརྟོལ་བའི་ནང་དུ་སྤུ་བུ་བཅུག་ལ་སྤུ་བུ་དེའི་ཁར་བཅུག་ལ་དུ་བ་བཏུང་ནོ། །ལྕགས་ཀྱིས་བྱ། ལྟག་མ་ལྟར་བཏུང་བའི་སྤུ་བུ་ནི་ལྕགས་ལས་བྱས་ཏེ་ལྕགས་མེད་ན་སྨྱིག་མ་ལས་བྱས་ཀྱང་ཉེས་མེད་དོ། །སོར་བཅུ་གཉིས་ན་དགེ་སྟེ་མི་རྣོ་མི་རྩུབ་པར་རོ། །ལྟག་མ་ལྟར་དུ་བ་རྔུབ་པའི་སྤུ་བུ་སོར་བཅུ་གཉིས་མན་ཆད་བརྒྱད་ཡན་ཆད་གང་བྱས་ཀྱང་རུང་སྟེ་རྩེ་མོ་མི་རྣོ་བ་དང་ཐག་ཐུག་མེད་པར་བྱ། སྣོད་མར་རམ་ཡུངས་མར་གྱིས་བསྐུས་ཤིང་གཞག །དུ་བ་རྔུབ་པའི་ལྕགས་ཀྱི་སྤུ་བུ་བཙས་མི་འཁྱེར་བའི་ཕྱིར་མར་གྱིས་བསྐུས་ལ་ཕྱིས་བདག་ནའམ་དགེ་སློང་གྲོགས་ན་བའི་ཕྱིར་མི་དོར་བར་སྦ། བ་ལང་གི་སོའམ་གོས་ཀྱི་གདང་དེ་ལ་གཞག །དུ་བ་རྔུབ་པའི་སྤུ་བུ་སྒྱེའུར་བཅུག་ལ་བ་ལང་སོའི་གོས་ཀྱི་གདང་ངམ་གོས་ཀྱི་གདང་གང་ཡང་རུང་བ་ལ་གདགས། བཀྲུ་བའི་ཕྱིར་མེར་གཞུག །དུ་བ་རྔུབ་པའི་ལྕགས་ཀྱི་སྦུ་བུ་ཆུས་མི་འདག་གི་མེར་བསྲེགས་ན་འདག་གོ །སྣའི་ལས་བྱ། མཚུལ་པ་སུབས་པ་དང་ཀླད་པ་ན་བའི་ཕྱིར་
སྨན་པ་ན་རེ་ཆུ་ནས་སྨན་འཐུང་ཞིག་ཅེས་ཟེར་ན་འཐུངས་ཀྱང་ཉེས་མེད། འདི་ནི་སྣའི་བྱ་བར་འགྱུར་རོ། །སྣའི་ནང་དུ་སྨན་བླུགས་པ་ནི་ལྕགས་ལས་བྱེའུ་འདྲ་བར་བྱས་ལ། ཆུ་ལ་གཅེའུ་གཉིས་འཛག་པར་བྱས་ལ། སྣ་བུ་ག་གཉིས་ཀྱི་ནང་དུ་སྨན་བླུགས། བཅུ་གཉིས་པ་མི་རྣོ་བ་དགེའོ། །ལྟག་མ་ལྟར་སྣར་བླུགས་པའི་གཅེའུ་གཉིས་མི་རྣོ་བ་བྱ། འདི་བྱ། གོང་མ་ལྟར་སྣར་བླུགས་པའི་གཅེའུ་གཉིས་ལྕགས་སམ་ཟངས་ལས་བྱ། ཤ་རྗེན་པ་སྨན་གྱི་ཕྱིར་ཤ་རྗེན་བཟའ། དགེ་སློང་ནད་པ་སྨན་གཞན་གྱིས་མི་འཚོ་སྟེ་སྨན་པ་ན་རེ་ཤ་རྗེན་ཟོ་ཞེས་བསྒོ་ན་ཟོས་ཀྱང་ཉེས་མེད། དེ་ཟ་མི་ཕོད་ན་ཐབས་སོ། །ནད་པ་ཤ་རྗེན་ཟ་མི་ནུས་ན་ཐབས་འོག་མ་ནས་འབྱུང་བ་ལྟར་བྱ། མིག་སྣམ་བུས་དགབ། ཤ་རྗེན་མིག་གིས་མི་མཐོང་བར་བྱ་བའི་ཕྱིར་ཤ་མ་འོངས་པའི་མདུན་དུ་མིག་སྣམ་བུས་གཡོགས་མི་ལྡང་བའི་ཕྱིར་བསུང་ཞིམ་པོ་དང་བསྲེས་ཏེའོ། །ཤ་རྗེན་ཟོས་པ་སླར་སྐྱུགས་པར་དོགས་པའི་ཕྱིར་སྤོད་བསུང་ཞིམ་པོ་དང་བསྲེས་ཏེ་བཟའོ། །འབགས་པ་ཕྱུང་སྟེ་ཡིད་དུ་འོང་བའི་བཟའ་བ་དང་བཅའ་བ་མདུན་དུ་བཞག་སྟེ་དགོགས། ལྟག་མ་ལྟར་ཤ་རྗེན་ཟོས་ཟིན་ནས་ཕྱིས་མི་སྐྱུགས་པ་དང༌། མི་དགའ་བར་མི་འགྱུར་བའི་ཕྱིར་མིག་གཡོགས་པ་མ་ཤུས་པའི་མདུན་དུ་ཁ་ར་དང་ལ་དུ་བསུང་ཞིམ་པོ་བཀྲམ་ལ་མིག་གཡོགས་པ་སྣམ་བུ་བཤུ། འདི་ལས་གཞན་པའི་ཕྱིར་འདི་ནི་སྦོམ་པོའོ། །བདག་དང་མིན་སྨན་པས་ཀྱང་ཕན་པར་མ་བསྒོ་བར་ཤ་རྗེན་ཟོས་ན་དབྱེན་གྱི་སྦོམ་པོའོ། །མིའི་ཤ་ནི་ཐམས་ཅད་དུའོ། །མིའི་ཤ་ནི་དགེ་སློང་ནའང་རུང་མི་ན་ནའང་རུང་སྨན་པས་བསྒོ་འང་རུང་ཟར་མི་གནང་ངོ༌། །ཟོས་ན་དབྱེན་གྱི་སྦོམ་པོའོ། །ཕྱིར་བྱས་པས་ཤེས་ན་མི་བཟའ། བདག་གི་ཕྱིར་ཕ་རོལ་གྱི་ཕྱུགས་ཞིག་བསད་དེ་ཤ་བྱིན་ཏེ་ཤེས་བཞིན་དུ་ཟོས་ན་ནའང་རུང་མིན་ནའང་རུང་ཉེས་མེད། སྟག་གི་གོད་ལ་མ་ཡིན། སེང་གེ་མ་གཏོགས་པ་སྟག་ལ་སོགས་པས་ཕྱུགས་སམ་གཅན་གཟན་གྱིས་ཟོས་པའི་ལྷག་མ་ཡང་བཟའ་བར་རེ་བའི་སེམས་ཡོད་པ་བདག་གིས་བླངས་ན་ཉེས་བྱས་བ་ལང་དང་རྟ་དང་ཀླུ་དག་མ་ཡིན། འདི་རྣམས་མིང་གིས་སྨོས་པའི་ཤ་ཟོས་ན་ཉེས་བྱས། རྨིག་པ་གཅིག་པའི་དང༌། ཝ་དང་སྤྲེའུ་
དང༌། ཤིང་རྟ་དང་བྱ་རོག་དང་སོ་བྱ་དང་ཁྱུང་དང་འོལ་བ་དང་འུག་པ་དང་དེ་ལས་གཞན་ཡང་རོལ་ཟ་བའི་བྱ་བ་ཀ་དང་ཛ་ཏུ་ཀ་དང༌། སྦལ་པ་དང་སྲིན་བུ་འགའ་འདུས་པ་ཀ་དག་གོ །མིང་གིས་སྨོས་པ་འདི་རྣམས་ཀྱི་ཤ་ཟོས་ན་ཉེས་བྱས། འདི་བཅད་པའི་ཤ་མ་ཡིན་ནམ་ཞེས་བྱིན་ལེན་བྲིམ་པ་ལ་དྲི། ཤ་ཞིག་གཞན་གྱིས་བྱིན་ནམ་ཉོའམ་འདྲི་མ་ན་ལྟག་མ་མིང་གིས་སྨོས་པ་འདི་རྣམས་ཀྱི་ཤ་མ་ཡིན་ནམ་ཞེས་དྲིས་ཏེ་ཡིན་ན་མི་བཟའ་བ་དང༌། ལུག་དང་རའི་ཤ་ནི་བཟར་མི་རུང༌། དུ་མ་ན་དང་པོ་བས་དེ་དྲི། ལྟག་མ་ལྟར་འདྲིམ་ན་འདྲི་བ་ནི་གནས་བརྟན་གྱིས་བྱ། ཕྲི་ན་དྲུང་ན་པས་སོ། །གནས་བརྟན་གྱིས་བརྗེད་ན་དྲུང་ན་སུ་འདུག་པས་ཀྱང་དྲི། བ་གླང་དང་མིའི་འོ་མ་མི་བཏུང༌། མིང་གིས་སྨོས་པ་འདི་རྣམས་ཀྱིའོ་མ་དགེ་སློང་མིན་བས་མི་བཏུང༌། ནད་པ་ནི་སྨན་པས་ཕན་པར་བསྒོ་ན་འཐུང་དུ་དབང་ངོ༌། །མ་སྨད་པ་ནི་པགས་པའི་རྨ་ལ་གླན་པས་ན་བླུགས་པ་ནེ་མིག་བྱུག་པ་སྟེ་མི་བཟའ་རྣམས་ཀྱིས་སོ། །ལྟག་ཏུ་ཤ་བཟར་མི་རུང་བའི་རྣམས་དང་འོ་མ་རྣམ་གཉིས་ཟོས་ན་ཉེས་བྱས་སུ་འགྱུར་གྱི་མི་བཟའ་བར་འབྲས་སམ་སྣ་ལ་ཕན་པའི་ཕྱིར་གླན་པ་དང་སྲབ་ཅིང་འདུག་པ་ལ་སོགས་པ་ལུས་ཀྱི་ཕྱིར་ལོགས་སུ་སྤྱད་པ་ནི་ཉེས་མེད་དོ། །ནད་པས་ཆང་ངམ་ཡུངས་མར་རམ་མར་དང་བསྲེས་པ་བཏུང༌། དགེ་སློང་ནད་པ་ལ་ཕན་པར་བྱ་བའི་ཕྱིར་མར་རམ་ཡུངས་མར་གྱི་ནང་དུ་ཆང་ཉུང་ཟད་ཅིག་བླུགས་ཏེ་འཐུངས་ཀྱང་ཉེས་མེད། ཉེས་མེད་པ་ནི་ཆང་མ་ཡིན་པ་ནའོ། །ལྟག་མ་ལྟར་མར་དང་བསྲེས་པའི་ཆང་ཡང་ཁ་དོག་ཀྱང་ཆང་མི་འདྲ་རོ་དང་བསུང་ཡང་ཆང་མི་འདྲ་ན་བཏུང་དུ་རུང་ངོ༌། །བསྐོལ་བས་འབྱོར་ཏོ། །ཆང་ཟངས་གང་ཙམ་བསྐོལ་ནས་ཕྱེད་ཙམ་དུ་གདུབས་བསུང་མི་བྲོ་རོ་དང་ཁ་དོག་ཀྱང་ཆང་མི་འདྲ་ན་འཐུང་དུ་རུང༌། འདི་སར་བཅུག་པ་ལ་ནས་བརྔོས་པས་བླུགས་ཏེ་ཚར་གྱུར་ནའོ། །ཆང་བུ་མ་གང་ཙམ་སའི་འོག་ཏུ་བཅུག་ལ་ཡོས་ཚིག་པར་བརྔོས་ཏེ་ཆང་གི་ནང་དུ་བླུགས་ཏེ་བྱིབས་ཏེ་བཞག་ན་ཚར་འགྱུར་ཏེ་ཁ་དོག་ཀྱང་ཆང་མི་འདྲ་རོའང་ཆང་མི་བྲོ་ན་ཉེས་མེད། རྒུན་ཆང་བསྐོལ་ན་ར་རོ་བར་མི་འགྱུར། རྒུན་ཆང་བསྐོལ་ཏེ་འཐུངས་
བས་རའང་མི་རོ་ལ་བསུང་ཆང་མི་བྲོ་ན་འཐུངས་ཀྱང་ཉེས་མེད། སོ་སོར་མ་བྱས་ན་ཡོད་པ་མ་ཡིན་ནོ། །རྒུན་འབྲུ་དང་བུ་རམ་ཤིང་དང་ཏིལ་ལྟ་བུ་དགེ་སློང་གྲོགས་ཀྱིས་རེག་པ་བྱིན་ལེན་མ་བྱས་པ་ཟོས་ན་ལྟུང་བར་འགྱུར་ནས་དེ་རྣམས་ཀྱི་ཁུ་བ་བཙིར་བ་དགེ་སློང་གྲོགས་ཀྱིས་བྱིན་ལེན་མ་བྱས་པར་རེག་པ་འཐུངས་པ་ནི་ཉེས་བྱས་སོ། །བག་ཆགས་པར་གྱུར་ན་ཡོད་པའོ། །སྨོད་དམ་ཆུ་ཁ་ཟས་ཀྱིས་འབགས་པ་ཞིག་ལས་ཟས་བཙོས་ཏེ་ཟོས་པ་རྣམས་ཀྱིས་ཉེས་བྱས་སུ་འགྱུར། གཞན་གྱིས་འབགས་པར་མི་ཤེས་ན་གཞན་ལ་ནི་ཉེས་བྱས་མེད་ཀྱི་སུས་ཤེས་བཞིན་དུ་བྱིན་པ་དེ་ལ་ཀུན་གྱི་ཉེས་བྱས། ཆང་ལ་བསྲེས་པ་འབྲལ་བའི་ཕྱིར་ཆང་གི་བསུང་གིས་སྤགས་པའི་རྩ་བ་དང་སྡོང་པོ་དང་ལོ་མ་དང་མེ་ཏོག་དང་འབྲས་བུ་དང་སྨན་སྐམ་པོའི་ཕྱེ་མའི་ཆུས་སོ། །དགེ་སློང་ཆང་དད་ཆེ་བ་ལ་ཆང་དང་འབྲལ་བའི་ཕྱིར་མིང་གིས་སྨོས་པ་འདི་རྣམས་སྨོད་དུ་བཅུག་སྟེ་གླུམ་གྱི་རླངས་པ་ལས་གཏུགས་ཏེ་དེ་ཆུ་དང་བསྲེས་ཏེ་རོ་སྐྱུར་ཙམ་ཅུང་ཟད་ཆང་བྲོ་བ་འཐུངས་ཀྱང་ཉེས་མེད་དོ། །ཆང་གི་སྣོད་ལ་སྤྱད་པའི་གནས་ལ་སྤགས། གོང་མའི་ཕྱེ་མ་རྣམས་རས་དཀར་པོའི་ཐུམ་པོར་བྱས་ལ་ཆང་རླངས་པ་ལ་སྦྱང༌། མ་རེག་པར་བསྲུངས་ཏེ་དེ་བས་ན་བྲི་བ་བརྒྱལ་བ་ཞི་ནས་སོ། །གོང་མ་ལྟར་ཆང་ལ་སྦྱངས་པ་ནི་ཆང་ལམ་རེག་པར་ཆང་གི་སྤང་མ་ཁ་ནས་ཕྲིས་ཏེ་བྱས་ཀྱང་རུང་ཆང་གཞོན་ནུ་ནམ་མས་ཡར་རྒལ་བ་ཞིག་མེད་ན་གདོད་སྦྱང༌། དེ་བཞིན་དུ་རོ་དང་འབྲལ་བར་བྱེད་པ་དང་དུས་མ་ཡིན་པའི་སྐོམ་ལ་ཟས་ཀྱང་ངོ༌། །མེ་ཏོག་དང་འབྲས་བུ་ལ་ལ་ལྟག་མ་ལྟར་ཕྱེ་མ་བྱ་བ་ནི་རོ་ཁ་བ་དང་མངར་བ་ལས་མི་བྱའི་ཉུག་པ་དང་སྐྱུར་པ་ལས་བྱ། འདི་འདྲ་བར་བཏུང་བ་ཚེ་གཅིག་པ་དང་ཞག་བདུན་པ་ལ་བྱའི་འཕྲལ་དུ་བཏུང་བ་མི་ལ་བྱ་སྟེ་ཁ་ཟས་ཀྱིས་འབགས་ན་ལྟུང་བའི་ཕྱིར་མ་འབགས་པར་བྱ། མཛེས་པར་ན་དགེ །ཁ་བ་དང་མངར་བའང་རོ་མི་ཞིམ་པས་མི་མཛེས་པ་མ་ཡིན་རྣམ་པ་ཅིག་ཏུ་རྙོག་མ་དང་སྐྱོ་མ་ལྟ་བུ་ཡོད་ན་མཛེས་པའི་ཕྱིར་རས་ཀྱིས་བཙགས་ལ་གཙང་མར་བྱས་ཏེ་བཏུང༌། དེ་བས་ན་རས་མ་དཀར་པོས་ཐུམ་པོ་བྱ། ལྟག་མ་ལྟར་གཙང་སྦྲ་དང་དང་བར་བྱ་བ་ནི་
རས་དཀར་པོའི་ནང་དུ་ལྟག་མའི་སྡོང་པོ་དང་མེ་ཏོག་དང་ལོ་མ་བཅུག་ལ་བཙིར་ན་དང་པ་དང་གཙང་སྦྲར་འགྱུར་བའི་ཕྱིར་དེ་ལྟར་བྱའོ། །ནད་པས་ཀྱང་ཆང་རྩྭའི་ཏོར་ཏོ་འང་མི་བཏུང་ངོ༌། །ནད་པ་དང་མིན་བས་ཀྱང་རུང་ཏེ་ཆང་ཉིད་ནི་ཆུང་དུ་དང་རྩྭ་མཆོག་ཙམ་ཡང་འཐུང་དུ་མི་གནང་ངོ༌། །དགེ་བསྙེན་དང་ཐམས་ཅད་ཀྱང་སྦྱིན། དགེ་སློང་རྣམ་བཞི་དང་དགེ་བསྙེན་མན་ཆད་ཁྱིམ་པ་སུ་ལ་ཡང་རུང་ཆང་བླུད་ན་ཉེས་བྱས། དགེ་སློང་རྣམ་བཞིས་ཀྱང་གཞན་ལ་ཆང་བླུད་ན་ཉེས་བྱས། དགེ་བསྙེན་མན་ཆད་ཀྱིས་གཞན་ལ་ཆང་བླུད་ན་བསོད་ནམས་མ་ཡིན་པ་སྡིག་པ་སྐྱེའོ། །གསོ་བའི་ཕྱིར་མ་གཏོགས་པ་ནི་རང་བཞིན་གྱི་ཁན་མཐོ་བ་དང་བཅས་པ་སྟེ་ལྷག་མ་ཐམས་ཅད་དོ། །ཕས་ཕམ་པ་བཞི་དང་ཆང་ལྟ་བུ་ནི་སྲོག་ལ་བབ་ཀྱང་མི་བཏུང་ཞིང་མི་དྲལ་ལོ། །ལྟག་ཏུ་རྨེ་བ་ཅན་གྱི་ཤ་མི་བཟའ་བ་དང་མི་དང་རྟའི་འོ་མ་མི་འཐུང་བ་དང་ཆང་མར་དང་བསྲེས་པ་དང་བསྐོལ་བ་ལ་སོགས་པ་ནི་གཞན་གྱིས་མི་འཚོ་ན་དབེན་པར་འཐུངས་ཀྱང་ཉེས་མེད་དོ། །བཙང་དང་སྒོག་སྐྱ་དང་རྒྱ་སྒོག་ཀྱང་མི་བཟའ། མིང་གིས་སྨོས་པ་འདི་རྣམས་མི་བཟའ་ཟོས་ན་ཉེས་བྱས་སོ། །ནད་པས་ནི་དབེན་པར་རོ། །ལྟག་མ་ལྟ་བུའི་སྒོག་པ་རྣམས་ནད་པས་ནི་ཆོག་ལ་ཕན་པའི་ཕྱིར་མཚམས་ཀྱི་ཕྱི་རོལ་དུ་དབེན་པར་བཟའ། ཟ་བ་དང་དེའི་འོག་ཏུ་བཙང་ནི་ཞག་བདུན་དགེ་སློང་གིས་སྒོག་པ་བཙང་ཟོས་ནས་ཞག་བདུན་པ་སོང་སྟེ་གཙུག་ལག་ཁང་དུ་འཇུག །སྒོག་སྐྱ་ནི་ཞག་གསུམ། སྒོག་སྐྱ་ཞག་ཏུ་ཟོས་ན་རུང་ཟོས་ནས་ཞག་གསུམ་ཟོས་ཏེ་གཙུག་ལག་ཁང་དང་དགེ་འདུན་གྱི་ནང་དུ་འཇུག་གོ །རྒྱ་སྒོག་ནི་ཞག་གཅིག་ལས་གཙུག་ལག་ཁང་དུ་མི་སྤྱད། དགེ་སློང་གིས་དབེན་པར་རྒྱ་སྒོག་ནི་ལྟག་མ་བས་རོ་ཆུང་བའི་ཕྱིར་ཞག་གཅིག་བསངས་ཏེ་གཙུག་ལག་ཁང་དུ་འགྲོ་།མལ་སྟན་ལ་མི་སྤྱད། ལྟག་ཏུ་སྒོག་པ་རིམ་པ་གསུམ་ལ་ཞག་ཏུ་བསངས་པ་བཞིན་དུ་དགེ་འདུན་གྱི་མལ་སྟན་ལ་ཞག་གཅིག་གི་རིམ་པ་བཞིན་མི་སྤྱད། བཤང་སར་མི་འཇུག །ལྟག་མའི་ཞག་གྲངས་རིམ་པ་བཞིན་དུ་དགེ་འདུན་གྱི་བཤངས་ར་མི་འཇུག །གཟགས་པར་མ་ཡིན། ལྟག་མའི་
ཞག་རིམ་པ་བཞིན་གཅིན་གཅི་བའི་སར་ཀྱང་མི་འཇུག །དགེ་འདུན་གྱི་ནང་དུ་མི་འཇུག །ལྟག་མའི་སྒོག་པ་རྣམས་ཟོས་ཏེ་ཞག་གྲངས་མ་ཚང་བར་དགེ་འདུན་གྱི་ནང་དུ་མི་འགྲོ་།མཆོད་རྟེན་གྱི་མཚམས་སུ་མ་ཡིན། སྒོག་པ་ཟོས་ཏེ་ཞག་གྲངས་མ་ཚངས་པར་མཆོད་རྟེན་ལ་ཕྱག་འཚལ་དུ་མི་འགྲོ་།དེའི་ཚད་ནི་འདོམ་མོ། །བདག་དང་པའི་ཤས་ཆེ་སྟེ་མཆོད་རྟེན་ལ་ཕྱག་མི་འཚལ་དུ་མི་རུང་ན་མཆོད་རྟེན་དང་བར་འདོམ་གང་ཙམ་གྱིས་བཅད་ལ་བསྐོར། ཁྱིམ་པ་ལ་ཆོས་མི་བཤད། སྒོག་པ་ཟོས་པའི་ཞག་གྲངས་མ་ཚང་པར་ཁྱིམ་པ་ལ་ཆོས་མི་བཤད། དད་པའི་དགེ་བསྙེན་ཕྱིར་མི་ནུར་བ་ལ་བཤད་ཀྱང་ཉེས་མེད། གྲོང་དུ་མི་འགྲོ་།སྒོག་པ་ཟོས་པའི་ཞག་གྲངས་མ་ཚང་བར་གྲོང་དང་ཁྱིམ་དང་ཁྱིམ་དུ་མི་འགྲོ་།འགྲོ་བ་མང་པོའི་ཕྱོགས་སུ་མ་ཡིན་སྒོག་པ་ཟོས་ཏེ་ཞག་མ་ཚང་བར་དགེ་འདུན་འདུ་བའི་སའམ་མི་མང་པོ་འདུ་བའི་སར་མི་འགྲོ་།མཐར་ཁྲུས་སོ། །སྒོག་པ་ཟོས་ཏེ་ཞག་གྲངས་ཚང་ན་ཁྲུས་བྱ། གོས་ལ་བསྲུང་བ་བསལ། བདག་སྒོག་པ་ཟ་བའི་ཚེ་གོས་ལ་རེག་པ་རྣམས་མེད་པར་བྱས་ཏེ་ཐབས་འོག་ནས་འཆད། བཀྲུ་བ་དང་བདུགས་སོ། །གོང་མ་ལྟར་གོས་སྒོག་པས་རེག་པ་ནི་བཀྲུས་ལ་སྒོག་པའི་རོ་མེད་པར་བྱ་བའི་ཕྱིར་པོག་གམ་སྤོས་ཀྱིས་བདུག །རྫིང་བུ་ཚུན་ཆད་ལ་ལོ་ཉེས་པའོ། །འོག་ནས་མདོ་རྫིང་བུ་ཞེས་བྱུང་བ་ཡན་ཚད་ལོ་ཉེས་པའི་ཚེ་དབང་བ་ལ་འཆད་དེ། ཕྱི་རོལ་བཞིན་དུ་བཙོ་གནས་པ་ལ་ཡང་བསྔོས་ཏེ་བརྟགས་ནའོ། །ལོ་ཉེས་ཀྱི་ཚེ་མཚམས་ཀྱི་ནང་དུ་བཙོས་པ་དང༌། མཚམས་ཀྱི་ནང་དུ་ཞག་གཅིག་ལོན་པའི་ཟས་དང་དགེ་སློང་གིས་བཙོས་པ་དང་བྱིན་ལེན་མ་བྱས་པ་དང༌། དགེ་སློང་གིས་ཚང་མང་ནས་བླངས་ཏེ་གུད་དུ་ཟ་བ་དང་ཕྱི་དྲོ་འབྲས་བུ་རྒུན་འབྲུ་ལ་སོགས་པ་དང༌། ཤིང་ཏོག་པུ་ཀ་རེ་ལ་སོགས་པ་ཕྱི་དྲོ་ཡང་ཡང་ཟ་བ་དང༌། བདག་གིས་བཙོས་པ་དང་ཕྱི་དྲོ་རྒུན་དང་འབྲས་བུ་པ་ཀ་རེ་ལ་སོགས་པ་འདི་བརྒྱད་ཀྱང་ཕྱི་དྲོ་ལོ་ཉེས་པའི་ཚེ་བཟར་དབང་ངོ༌། །བསྔོའོ། །ལོ་ཉེས་པའི་ཚེ་མཚམས་ཀྱི་ནང་དུ་ཚང་མང་དང་སྲིས་འཚོད་བསྔོར་རུང་ངོ༌། །ལོ་ཉེས་མ་བྱུང་བའི་ཚེ་བསྔོར་མི་དབང་ངོ་ཞེས་ཏི་ཀ་ལས་འཆད་
དོ། །ལོ་ཉེས་པ་མ་བྱུང་ཡང་སྔགས་ཀྱིས་གདབ་ཅིང་བསྔོར་རུང་ངོ་ཞེས་འདུལ་བ་འཛིན་པས་བཤད་དོ། །ཤིང་དྲུང་དང་བ་ལང་གི་གནས་དང་མུར་འདུག་གི་གནས་དང་རྒྱལ་པོའི་གྲོང་གི་དངོས་པོ་དང་དགེ་སློང་མའི་དབྱར་མོ་ཐང་གཙུག་ལག་ཁང་གི་ཕྱི་རོལ་གྱི་ཁྱིམ་ས་དང་སྒོ་ཕུབས་དང་ཁྱམས་དང་བསྲོ་གང་གི་གནས་སུ་ཡང་མ་ཡིན་ནོ། །མི་དགེ་སློང་གི་ཚང་མང་དང་སྲིས་མཛོད་མིང་གིས་སྨོས་པ་འདི་རྣམས་ཀྱི་གནས་སུ་ལོ་ཉེས་པ་དང་མ་ཉེས་པ་འདྲ་སྟེ་བསྔོར་མི་དབང༌། བླ་གབ་མེད་པ་དང་མིའི་གནས་དང་མཆོད་རྟེན་གྱི་གནས་དང༌། ཁྱིམ་གྱི་གནས་སུ་ཡང་ངོ་ཞེས་གཞན་ལས་སོ། །མིང་གིས་སྨོས་པ་འདི་རྣམས་ཀྱི་གནས་སུ་ཚང་མང་དང་སྲིས་མཛོད་བྱར་མི་རུང་ངོ་ཞེས་འདུལ་བ་འཛིན་པ་ཁ་ཅིག་གིས་བཤད། བསྒྲུབ་པ་དང་བཙོ་བ་དེར་མི་བྱ། ལྟག་ཏུ་ཤིང་དྲུང་དང་ཞེས་བྱ་བ་མན་ཆད་གཞན་ལས་སོ་ཞེས་བྱ་བ་ཡན་ཆད་མི་གནས་སུ་ཚང་མང་དང་སྲིས་མཛོད་བསྔོ་བ་མ་གཏོགས་ཀྱི་སྣོད་སྤྱད་གཞག་པ་དང་ཁ་ཟས་བཙོ་བའང་གནས་དེར་མི་བྱའོ། །བཙོ་བ་བཟླས་པ་མི་བྱ་བ་ཡང་ངོ༌། །ལྟག་ཏུ་མིང་གིས་སྨོས་པ་འདི་རྣམས་ཀྱི་གནས་སུ་ཁ་ཟས་བཙོས་ཟིན་པ་ཞིག་སླར་བཙོ་བའམ་མ་ཚོས་པ་བཙོ་བའི་གནས་ཀྱང་དེར་མི་བྱ། དེ་ལ་དུས་བཞི་སྟེ། ཚང་མང་དང་སྲིས་མཛོད་བརྟགས་ན་རུང་བའི་གནས་བཞི་ཡོད་དེ་འོག་ནས་འཆད་པ་ཡིན་ནོ། །ཐོག་མའི་ཕ་གུ་འཇོག་པ་ནའོ། །ཐོག་མ་གཙུག་ལག་ཁང་རྩིག་ཅིང་རྨང་འདིང་བ་ན་ཚང་མང་དང་སྲིས་མཛོད་དུ་བསྔོས་ནའང་རུང༌། སྟེང་དུ་ལས་སར་པ་དང་བཅས་པ་ནའོ། །ཁང་པ་བརྩིགས་ཏེ་གཞག་ཀུན་ཟིན་ལ་སྐྱང་ནུལ་ལམ་རི་མོ་ཙམ་མ་ཟིན་པར་བསྔོས་ནའང་རུང་ངོ༌། །གཞན་གྱི་དུས་དགེ་སློང་གི་གནས་མ་བྲལ་བའོ། །གཙུག་ལག་ཁང་ཟིན་ཏེ་དགེ་སློང་ནང་དུ་ལྷགས་ནས་ཟླ་བ་དང་ཞག་དུ་ལོན་ཀྱང་རུང་སྟེ། གཙུག་ལག་ཁང་དད་དགེ་སློང་གཅིག་ཀྱང་ཞག་ཏུ་མ་བྲལ་ན་བསྔོས་ན་རུང་ངོ༌། །གནས་སུ་མ་གྱུར་པ་ནི་འདི་དག་མེད་པ་ལས་དགེ་སློང་དག་བྱིན་ནའོ། །དགེ་སློང་གིས་གཙུག་ལག་ཁང་ཡོང་མ་བཏང་སྟེ་སྟོང་པར་འགྱུར་བ་ལས་དགེ་སློང་ཁ་ཅིག་གུད་ནས་ལྷགས་ཏེ་ཞག་མ་ལོན་པར་ཚང་
མང་དང་སྲིས་མཛོད་བསྔོས་ཀྱང་རུང་རྣམ་པ་གཅིག་ཏུ་གཙུག་ལག་ཁང་གི་ནང་གི་དགེ་སློང་ཐམས་ཅད་མཚམས་ཀྱི་ཕྱི་རོལ་དུ་དང་སྟེ་སྐྱ་རེངས་བྱུང་ནས་སླར་གཙུག་ལག་ཁང་དེའི་ནང་དུ་ཞག་མ་ལོན་པར་གསོལ་བ་དང་ཞུ་བའི་ལས་ཀྱིས་བསྔོས་ན་ཚང་མང་དང་སྲིས་མཛོད་དུ་རུང་ངོ༌། །བྱ་བ་གཞན་བརྩམས་པ་དང་ཞི་བ་དག་ལ་དེའོ། །གཙུག་ལག་ཁང་སྟོང་པར་བོར་ལ་དགེ་སློང་གུད་ནས་ལྷགས་པས་ཁང་བུ་འགོད་པ་དང་ཆུ་ལྟ་བ་ལ་སོགས་པའི་ལས་ཅིའང་མི་བྱ་བར་ཐོག་མར་ཚང་མང་དང་སྲིས་མཛོད་བསྔོའོ། །ཐམས་ཅད་དགེ་འདུན་ཀྱི་ལས་སོ། །ལྟག་ཏུ་གནས་བཞིར་བསྔོར་གནང་བ་གང་ཟག་གི་འོག་ནས་འཆད་དེ། འདི་ནི་དགེ་སློང་གི་དགེ་འདུན་གྱིས་གསོལ་བ་དང་ཞུ་བ་གཉིས་ཀྱི་ལས་ཀྱིས་བསྔོ། ཐོག་མ་ནི་གང་ཟག་གི་ལས་ཀྱང་ངོ༌། །བསྔོ་བ་རྣམ་བཞི་ལྟག་ཏུ་བཤད་པ་ལ་རྨང་བཙུགས་པ་དང་ཅུང་ཟད་མ་ཟིན་པའི་ཚེ་དང་གཉིས་ནི་གང་ཟག་གཅིག་གིས་བསྔོས་ཀྱང་རུང་ངོ༌། །ལས་སར་པས་སོ། །ལྟག་ཏུ་གང་ཟག་གིས་བསྔོའོ་ཞེས་བྱ་བ་ནི་གཙུག་ལག་ཁང་སློང་བའི་ལས་བྱེད་པའི་དགེ་སློང་གིས་བསྔོ་བ་ལ་བྱའོ། །ཐོག་མ་འབའ་ཞིག་གིས་སོ། །ལྟག་ཏུ་ལས་སར་པ་པས་བྱ་ཞེས་བྱ་བ་ནི་དགེ་སློང་དེ་ཉིད་ཀྱིས་བྱ་བ་ལ་བྱའི་གཞན་གྱིས་བསྔོར་མི་རུང་ངོ༌། །ལྟག་མའི་གང་ཟག་གིས་བསྔོ་བ་ནི་དགེ་འདུན་གྱི་སྤྱིར་བསྔོའོ་ཞེས་ཁར་བརྗོད་དོ། །གཉིས་པོ་ལ་དགེ་སློང་མང་པོ་དགོངས་ཏེའོ། །ལྟག་ཏུ་གང་ཟག་གཅིག་གིས་ཐོག་མའི་གནས་གཉིས་བསྔོ་བའི་ཚེ་གན་ན་དགེ་སློང་མན་ཆད་ཡོད་ན་བཙན་པ་དགོངས་ཤིག་གནས་འདི་ནི་དགེ་འདུན་གྱི་ཚང་མང་དུ་འགྱུར་རོ་ཞེས་སྨྲས་པས་ཀྱང་བསྔོས་པར་ཆུད་དོ། །གང་ན་དགེ་འདུན་དུ་ཚང་པ་ནི་གསོལ་བ་དང་ཞུ་བས་བསྔོའོ། །མཚམས་གཅིག་ནི་གཙུག་ལག་ཁང་ཟིན་ནས་ནང་དགེ་སློང་ལྷགས་པ་ཞག་དང་ཟླ་བ་དུ་ལོན་ཀྱང་རུང་སྟེ་དགེ་སློང་གཅིག་དང་ཡང་མ་བྲལ་ན་དགེ་འདུན་འདུས་ནས་གསོལ་བ་དང་ཞུ་བའི་ལས་ཀྱིས་ཚང་མང་སྲིས་མཛོད་བསྔོར་རུང༌། ཅི་ཙམ་ན་འོངས་ཏེ་གནས་པ་དེ་ཙམ་དང་མཉམ་པར་བརྟགས་པ་བཞི་པའི་གནས་ཞེས་ཚིག་གིས་བརྗོད་ཅིང་སྨྲ། གཙུག་ལག་
ཁང་སྟོང་པར་པོར་བ་ལ་དགེ་སློང་གུད་ནས་ལྷགས་པས་ཚང་མང་དང་སྲིས་མཛོད་བསྔོ་བ་དང་མཚམས་གཅིག་གི་དགེ་སློང་ཐམས་ཅད་ར་བའི་ཕྱི་རོལ་དུ་སྐྱ་རེངས་བྱུང་བ་ལ་གཙུག་ལག་ཁང་དུ་ལྷགས་ཏེ་བསྔོ་བ་དང་དེ་གཉིས་ནི་གསོལ་བ་དང་ཞུ་བ་གཉིས་ཀྱི་ལས་བརྗོད་ལ། དགེ་སློང་ཐམས་ཅད་ཀྱིས་གནས་འདིར་བྱའོ་ཞེས་བརྗོད་དོ། །འདི་དུ་མ་ལ་གཅིག་པུས་གཙུག་ལག་ཁང་གི་བྱ་བ་བྱས་ཀྱང་མི་མཛེས་པ་མ་ཡིན་ནོ། །མཚམས་ཆེན་པོ་གཅིག་གི་ནང་ནས་གཙུག་ལག་ཁང་མང་ཞིག་གི་དགེ་འདུན་གནས་གཅིག་ཏུ་འདུས་ཏེ་གཙུག་ལག་ཁང་གཅིག་གི་ཚང་མང་དང་སྲིས་མཛོད་གསོལ་བ་དང་ཞུ་བའི་ལས་ཀྱིས་བསྔོས་ན་གཙུག་ལག་ཁང་གཞན་ཐམས་ཅད་ཀྱི་ཚང་མང་སྲིས་མཛོད་ཀྱང་བརྟགས་པར་འགྱུར་རོ། །ཐ་དད་དུ་གྱུར་པ་ལ་འདིས་བདུག་པར་བཤད། མཚམས་ཆེན་པོ་གཅིག་གི་ནང་ན་གཙུག་ལག་ཁང་མང་ཞིག་འདུག་པའི་དགེ་སློང་གཅིག་ཏུ་འདུས་ཏེ། ལྟག་མ་ལྟར་ཚང་མང་བསྔོས་ན་ཁ་ཟས་མཚམས་ཀྱི་ནང་དུ་ཞག་ལོན་པ་དང་བཙོས་པ་གཉིས་ཀྱང་མཚམས་ཆེན་པོ་གཅིག་གི་ནང་གི་གཙུག་ལག་ཁང་ཐམས་ཅད་ཀྱིའང་དབང་ངོ༌། །འདི་གཉིས་ནི་མུ་གེའི་ཚེམ་ཡིན་ཀྱང་དབང་ངོ༌། །འདི་མན་ཆད་ནས་འབྱུང་བ་ཁ་གཅིག་ནི་མུ་གེའི་ཚེའང་དབང་ངོ༌། །དགེ་སློང་གིས་བཙོས་པ་དང༌། ལོ་ཉེས་ནས་མུ་གེའི་ཚེ་ཚང་མང་བརྟགས་ཀྱང་རུང་མ་བརྟགས་ཀྱང་རུང་བདག་གིས་བཙོས་ཀྱང་རུང་གྲོགས་ཀྱིས་བཙོས་ཀྱང་རུང་བཟང་དབང་ངོ༌། །བླང་བའི་བྱིན་ལེན་སྤྱད། དགེ་སློང་གིས་སྔར་ཁ་ཟས་རེག་པ་ཕྱིས་བྱིན་ལེན་བྱས་ཏེ་ཟོས་ན་ཉེས་མེད་དོ། །ནང་པར་གྱི་ཟས་ཀྱང་ངོ༌། །མུ་གེའི་ཚེ་ཡང་ཡང་ཟོས་ཀྱང་ཉེས་མེད་དོ། །ཐུག་པ་ནི་ཐམས་ཅད་དུའོ། །ཐུག་པ་ནི་ཉེས་ཀྱང་རུང་མ་ཉེས་ཀྱང་རུང་ཡང་ཡང་མི་ཆུད་དེ་འཐུང་དུ་དབང་ངོ༌། །བྱིན་བླངས་ནས་སྤངས་དང་བླངས་པ་ཡང་ངོ༌། །བསོད་སྙོམས་བླངས་ཏེ་བདག་གིས་ཅི་ཆོག་ཙམ་ཞིག་ལོང་ཤིག་སྤངས་ཏེ་ལྷག་མ་མི་ཟ་བར་བསམ་པ་དེ་སླར་བླངས་ཏེ་ཟོས་ཀྱང་ཉེས་མེད་ཟ་བའི་ཚེ་ལངས་ཏེ་ཡང་འདུག་ནས་ཟོས་ཀྱང་ཉེས་མེད་དོ། །དེ་ལྷག་མ་བླངས་པར་ལྡང་བ་ཡང་ངོ༌། །
ཟན་བཟའ་བར་ས་ལ་འདུག་སྟེ་ཟོས་ན་དེ་ཆོག་གོ་ཞེས་བྱས་ཏེ་སླར་གཏོང་བ་ལས་ཡང་སླར་འོན་ཅིག་ཅེས་བྱས་ཏེ་ཟོས་ཀྱང་རུང་ལངས་ཏེ་ཡང་སླར་འདུག་ན་ཟོས་ཀྱང་ཉེས་མེད་དོ། །མུ་གེའི་ཚེ་མགྲོན་དུ་སོང་བའི་ལྷག་མ་ཟོས་ཀྱང་དབང་སྟེ་ཉེས་མེད་དོ། །འདི་བསག་གོ །ལོ་ཉེས་པའི་ཚེ་བདག་ལ་ཡོན་བདག་གིས་ཟས་མང་ཞིག་མདུན་དུ་བཞག་སྟེ་བྱིན་ན་ཅི་ཡོག་ཙམ་ཟོས་ཀྱང༌། ལྷག་མ་ཡང་ཁྱིའུ་དབང་ངོ༌། །ཤིང་གི་དུས་པ་དེར་གསུངས་པ་ནི་འདི་ལྟ་སྟེ་རྒུན་འབྲུ་དང་བལ་པོ་སེའུ་དང་།ཁ་རྫུར་དང་སྟར་ག་དང་འབའ་སྟ་མ་དང་བེའུ་འབྲུ་དང་ཐང་ཤིད་དང་འབའ་འབྲུ་དང་སིན་ཙི་ཏི་ཀ་དག་གོ །མིང་གིས་སྨོས་པ་འདི་རྣམས་ལོ་ཉེས་པའི་ཚེ་སྔ་དྲོ་ཡང་ཡང་ཟར་རུང་ངོ་ཞེས་བྱི་ཛ་ཡ་བར་མས་བཤད། ཕྱི་དྲོ་ཡང་བཟར་རུང་ངོ་ཞེས་བྱི་ཤུ་ཏས་བཤད། རྫིང་བུ་ཡང་ངོ༌། །ལྟག་ཏུ་རྫིང་བུ་ཡན་ཆད་ལོ་ཉེས་ཀྱི་ཚེ་བཟར་རུང་ངོ་ཞེས་ཟེར་བ་ནི་འདི་ཡན་ཆད་དོ། །དེར་གསུངས་པ་ནི་འདི་ལྟ་སྟེ་པདྨོའི་རྩ་བ་དང་འཛེར་བུ་དང་འབེ་ཏ་དང་ཨུཏྤ་ལའི་རྩ་བ་དང་པདྨོའི་ས་བོན་ནོ། །ལོ་ཉེས་ཀྱི་ཚེ་རྫིང་བུའི་ནང་ནས་སྐྱེས་པ་འདི་རྣམས་ཀྱང་བཟང་རུང་ངོ༌། །སྨན་གྱི་དངོས་པོའོ། །ཕྲན་ཚེགས་ལ་སོགས་པའི་མདོ་རྫོགས་སོ།། །།རྒྱལ་པོའམ་རྒྱལ་པོའི་ཆེད་དུ་ཁས་མི་བླང༌། རྒྱལ་པོ་ཤིའམ་མེད་དེ་འབངས་ཕལ་ན་རེ་དགེ་སློང་ཁྱོད་ཀྱིས་རྒྱལ་པོའམ་རྒྱལ་ཚབ་བམ་བློན་པོ་ཆེན་པོ་གྱིས་ཤིག་ཅེས་ཟེར་ནའང་ཁས་མི་བླང༌། དགེ་འདུན་གྱི་ཕྱིར་གྲོང་བླང༌། དགེ་འདུན་ལ་གྲོང་ཁྱེར་དང་ཁོར་ཡུག་དང་ཁང་ཁྱིམ་འབུལ་ན་བླང༌། ཞིང་ཡང་ངོ༌། །དགེ་འདུན་ལ་ཞིང་ཕུལ་ནའང་བླང་ངོ༌། །དེ་ཡལ་བར་མི་དོར། ལྟག་ཏུ་གྲོང་དང་ཞིང་བྱིན་པ་ལྟ་བུ་རྨོ་བརྐོ་དང་ཞལ་ཏ་བྱ། འདིའི་ཆ་སྦྱིན། བདག་གིས་ཞིང་རྨོ་མི་ནུས་ན་ཐུན་ཤས་སུ་བཏང༌། ཆ་བླང་ཤིང་ཐུན་ཤས་སུ་བཏང་བ་སླར་མི་སྟེར་ན་བླང༌། བྱེད་པས་གཙུག་ལག་ཁང་དུ་བསྐུར། ཁྱིམ་པ་ལ་ཐུན་ཤས་སུ་བཏང་བ་དགེ་སློང་ཉིད་ཀྱི་ཁུར་དུ་མི་བསྐུར་གྱི་ཁྱིམ་པ་སྐྱེད་དུ་བཞུག །བདག་གི་ཐོག་མར་རོ། །དགེ་སློང་དང་ཁྱིམ་པ་གཉིས་ཐུན་ཤས་བགོས་ན་དགེ་འདུན་དབང་བ་སྔར་ཁྱིམ་པ་སྐྱེད་དུ་གཞུག་གོ །ཕྱིས་བྱས་ན་ཆང་པ་འོང་གིས་དོགས་པའི་ཕྱིར་རོ། །
བསྲུང་བའི་ཕྱིར་དགེ་སློང་བསྐོ་ཞིང་གི་ཤས་དང་གྲོང་གི་དཔྱ་བླང་བའི་ཚེ་དགེ་སློང་དཔྱ་བ་གཅིག་གཞུག །སྐྱེ་བ་དང་འགོད་པ་དང་གཉིས་ཀ་དང་གང་ཡང་རུང་བར་མི་མངོན་ན་མི་བསླང༌། ཀླུས་དགོན་པར་གཙུག་ལག་ཁང་སྤྲུལ་པ་དྲུག་སྡེས་ཀླན་ཀ་བཙལ་བ་ལས་བཅས། གཞན་དུ་ན་དྲན་པ་ཤེས་བཞིན་མདུན་དུ་བྱས་ཏེ་དེར་འཇུག་གོ །ལྟག་མ་ལྟ་བུ་མ་ཡིན་རྒྱུག་ལས་འོངས་པའང་ཤེས་ལས་ཟད་པར་འགྱུར་བའང་ཤེས་ན་རྒྱུ་ལྷག་ཆད་ཅི་ཡོད་པ་བརྩིས་ཀྱང་ཉེས་མེད། དགེ་འདུན་གྱི་ཕྱིར་གཡོག་བླང༌། ཡོན་བདག་དད་པས་དགེ་འདུན་ལ་ཡོན་དུ་གཡོག་ཕུལ་ན་བླངས་ཀྱང་ཉེས་མེད། གང་ནས་སྒྲས་གཙུག་ལག་ཁང་དུ་ཡོང་བ་དེར་ཁང་པ་བརྩིག་པར་བྱ། གཙུག་ལག་ཁང་གི་རྐྱེན་དུ་ཡོན་བདག་དད་པས་གྲོང་ཕུལ་བའམ་རྩེ་རྒོད་ལྟ་བུ་གཙུག་ལག་ཁང་གི་འདབ་རྩ་ཅོ་དང་སྒྲ་མི་ཐོས་པ་ཙམ་གྱི་ཚོང་དུ་གནས་ཁང་བྱས་ལ་གཞག །དེ་སྟེ་ལས་བྱེད་ན་ཟས་བྱིན་པ་བྱ། རྩེ་རྒོད་དང་ལྷ་བྲན་དགེ་འདུན་གྱི་ལས་བྱེད་ན་ཟས་དང་གོས་དགེ་འདུན་གྱིས་སྦྱིན། བ་ལང་དང་མ་ཧེ་དང་ར་ལུག་དང་བལ་གླང་དང་རྟ་དང་རྔ་མོ་དང་བོང་བུ་དང་འབྲུ་རྗེན་པ་དང་སྣོད་དག་ཀྱང་ངོ༌། །མིང་གིས་སྨོས་པ་འདི་རྣམས་དགེ་འདུན་ལ་ཕུལ་ན་བླངས་ཀྱང་ཉེས་མེད། འདི་མཆོད་རྟེན་ལ་མ་བརྟགས་པ་མ་ཡིན། གྲོང་དང་ཞིང་དང་རྫས་ལ་སོགས་པ་མཆོད་རྟེན་ལ་ཡོན་དུ་ཕུལ་ན་བླངས་ཀྱང་ཉེས་མེད། ཁ་གཟར་བཅང༌། ཟས་བཟའ་བའི་ཚེ་ཁ་གཟར་བཅངས་ཀྱང་ཉེས་མེད། ཚྭ་ཁུག་ཀྱང་ངོ༌། །ཚྭ་ཁུག་བཅངས་ཀྱང་ཉེས་མེད་འདི་དག་དང་ཕྱི་བཞིན་དུ་བཏུང་བའི་ཕོར་བུ་ལས་གཞན་པའི་ཁར་བའི་སྣོད་གང་ཟག་གིས་མི་བཅང༌། གང་ཟག་གིས་ཁར་བའི་ཁ་གཟར་དང་ཁར་བའི་ཚྭ་ཁུག་དང་ཆུ་ལྟ་བ་དང་རྣངས་པའི་བཞིན་དུ་ཆུས་འཕུལ་བའི་སྣོད་འདི་རྣམས་བཞི་ལས་གཞན་གང་ཟག་གིས་མི་བཅང༌། ཀུན་དགའ་བ་བཅང༌། གཙུག་ལག་ཁང་གིར་བའི་ལས་བྱེད་པའི་གཡོག་རྙེད་ན་བཅང༌། མ་རྙེད་ན་གླ་བྱ་བ་ཡིན། མཚུངས་པའི་བྱིས་པ་བསྲུང་བའི་ཕྱིར་འབུལ་ན་བླང་ཁྱིམ་བརྟག་པར་བུ་ཤི་བས་ཕྱིས་བུ་གཅིག་བདོག་སྟེ་ཤི་ནས་དགེ་སློང་
གི་གཡོག་ཏུ་ཕུལ་ན་དགེ་སློང་གིས་བླངས་ལ་གཙུག་ལག་ཁང་དུ་གཞག །བུ་མོ་ན་དགེ་སློང་མའི་གཙུག་ལག་ཁང་དུ་གཞག །དེའི་མཚན་མ་མགུལ་བར་གོས་གདགས་པ་ཡིན་ནོ། །འདྲེག་གིས་མི་ཁྱེར་བར་བྱ་བའི་ཕྱིར་དགེ་སློང་གིས་ཆོས་གོས་ཀྱི་ཚལ་བུ་མགུལ་དུ་གདགས། རྐེད་པར་ཡང་ངོ༌། །ཆོས་གོས་ཀྱི་ཚལ་བུ་རྐེད་པར་བཏགས་ཀྱང་རུང་ངོ༌། །སྙིང་རྗེའི་སེམས་ཀྱིས་བསྲུང༌། བྱིས་པ་བདག་གི་གན་དུ་བཞག་པ་དེ་ཕྱིས་གཡོག་ཏུ་བྱ་བའམ་འདི་བཅངས་ཀྱང་བྱ་དགའ་མང་ཞིག་བྱིན་དུ་རེ་བའི་ཕྱིར་ནི་མི་བསྲུང་གི་ཕོངས་ཏེ་སྐྱབས་ཚོལ་བའི་ཕྱིར་སྙིང་རྗེས་བརྩི་བར་བྱའོ། །དེའི་གཉེན་གྱིས་ཕུལ་ན་བླང༌། བྱིས་པ་བཞག་པ་དེའི་ཕ་མའམ་གཉེན་གྱིས་སྤྱན་གཟིགས་སམ་གོས་ཤིག་དགེ་སློང་དེ་ལ་བུལ་ན་བླངས་ཀྱང་ཉེས་མེད། མཐར་རྔན་པ་ཡང་ངོ༌། །ལྟག་མ་ལྟར་བྱིས་པ་བཞག་པ་ཕྱིས་མ་ཤི་སྟེ་སོས་ནས་དེའི་ཕྱིར་ཕ་མས་དད་དེ་ནོར་དང་རྫས་བྱིན་ན་ལེན་དུ་གནང་ངོ༌། །ངེས་དྲིན་ཤེས་པར་ཡང་ངོ༌། །ལྟག་མ་ལྟར་བྱིས་པ་གསོས་པ་དེ་ཉིད་ཀྱིས་ཁྱོད་ཀྱི་ཡིན་ནོ་ཞེས་ཟེར་ཞིང་ནོར་འབུལ་ན་ལེན་དུ་དབང་ངོ༌། །རྔན་པ་མི་བླང༌། དགེ་སློང་གིས་བྱིས་པ་གསོས་ཏེ་མ་ཤི་བ་རྔན་པ་བྱིན་ཞེས་མི་བྱ། འབྲས་བུ་ལ་སོགས་པ་བདག་གིར་བྱ། ཡོན་བདག་གིས་ཤིང་ཏོག་ལ་སོགས་པ་དགེ་འདུན་དང་གང་ཟག་ལ་འབུལ་ན་སུས་ཕུལ་ཀྱང་ལེན་དུ་དབང༌། མར་དང་ཏིལ་དང་སྦྲང་རྩི་དང་བུ་རམ་གྱི་རྫ་མ་ཡང་ངོ༌། །མིང་གིས་སྨོས་པ་འདི་རྣམས་རྫ་མ་བཀང་སྟེ་དགེ་འདུན་དང་གང་ཟག་གང་ལ་འཕུལ་ཀྱང་ལེན་དུ་དབང་ངོ༌། །དེའི་སྣོད་ཀྱང་ངོ༌། །ལྟག་མ་རྣམས་ཀྱི་སྣོད་རྫ་མལ་སོགས་པ་ཕུལ་ཀྱང་ལེན་དུ་དབང་ངོ༌། །དེའི་གཞི་བཞག །རྫ་མའི་ཞབས་སུ་ལྕུག་སྐོར་གྱི་གཞི་གཞག་བཤད་གཅི་དང་ཆང་གི་སྣོད་དག་མི་སྤྱད། རྫ་མ་ལ་སོགས་པའི་སྣོད་བཤང་གཅིས་རེག་པའམ་ཆང་གིས་རེག་པ་ཡོན་དུ་ཕུལ་ཀྱང་མི་བླང༌། བདག་ཅག་ཡོད་ནའང་སྤང༌། བཙོ་བ་དང་བསྲེག་པ་དགེ་འདུན་གྱི་ཕྱིར་བསྲུང་བ་བྱ། ཁ་ཟས་བཙོ་བ་དང་ཁུར་བ་ལ་སོགས་པ་བསྲེག་ཅིང་བཙོ་བ་ཡང་དགེ་འདུན་གྱི་ཕྱིར་དགེ་སློང་གིས་འདི་བསྲེག་འདི་ཆོས་ཞེས་བྱས་ཀྱང་བཙོས་པར་མི་ཆུད། མཁན་པོ་བྱི་ཤུ་ཏས་ནི་ཁ་ཟས་འཚེད་
པའི་ཚེ་དགེ་སློང་ཐོ་ངན་གཅིག་སྤྱན་དུ་གཞག་ཅེས་བཤད། ཟས་འོངས་ཀྱི་བར་དུ་ཐེལ་གྱིས་མ་བཞག་པར་འཇུག་ཅིང་མི་སྤྱོད། བསོད་སྙོམས་བླང་བའི་ཚེ་ཟས་མི་འོངས་པར་ལྷུང་བཟེད་ལག་པའི་མཐིལ་དུ་བཞག་ཅིང་མི་བསླང་ཟས་གཡོགས་པ་བཅང༌། ལྷུང་བཟེད་ཁ་བཅད་པའི་རས་བཅངས་ཀྱང་ཉེས་མེད། ཁར་བའི་སྣོད་དང་གཞི་འདི་དག་སྤྱིའི་མ་ཡིན་པར་མ་དོགས་ཤིག །ལག་ཏུ་ཁར་བའི་སྣོད་རྣམ་བཞི་ལས་གང་ཟག་སྤྱོད་དུ་མི་གནང་བ་བཞིན་དུ་དགེ་སློང་མའང་འཆང་དུ་མི་གནད། ནད་པ་མོ་ཞྭ་བཅད་བ་མ་བརྟགས་པར་མ་ཡིན་ནོ། །དགེ་སློང་མན་བའི་ཚེ་ཞྭ་ཇི་ལྟ་བུ་རུང་བཅང་དུ་གནང༌། འཁར་གསིལ་གྱི་སྒྲ་མ་བྱུང་བར་ཟས་ཀྱི་ཕྱིར་གྲོང་དུ་མི་འཇུག་གྲོང་དུ་བསོད་སྙོམས་ལེན་པའི་ཚེ་འཁར་གསིལ་གྱི་སྒྲ་མ་ཕྱུང་བར་ཟན་མི་བླང༌། དེ་བཅང༌། མཁར་གསིལ་བཅང༌། རིགས་སུ་འཇུག་པ་ཤེས་པར་ནན་ཏན་བྱ། གྲོང་དུ་སློང་བའི་ཚེ་ལམ་སྲང་གྱ་གྱུ་མང་དུ་འདུག་ན་ཐོག་མའི་ལམ་སྲང་མི་ནོར་བར་བསམ་ཞིང༌། ཕྱི་ཤུ་ཏས་ནི་གྲོང་མང་དུ་ཡོད་ན་རིམ་གྱིས་བསོད་སྙོམས་བསླང་ཞེས་བཤད་མངོན་མཚན་བྱ་བའི་ཕྱིར་ཟས་དོར་བ་ལ་སོགས་པས་སོ། །གྲོང་དུ་འཇུག་པའི་ཚེ་དགེ་སློང་དེས་རྒྱུས་མི་ཤེས་ཏེ་ལམ་ནོར་གྱིས་དོགས་ན་སུའི་གཙུག་ལག་ཁང་ག་ལས་གར་འདུག་པ་ཡིད་ལ་མཚན་མར་བཟུང་བ་དང་ཕྱེ་ལ་སོགས་པར་མདོ་མདོར་ག་ལས་འོངས་པར་གཏོར། བྱི་ཤུ་ཏས་ནི་གྲོང་སྟུག་པོ་ལ་ཟས་ལན་གཉིས་པ་བླངས་ཀྱིས་དོགས་པའི་ཕྱིར་མཚན་མ་གདབ་པ་ལ་བཤད། ཆོས་ཀྱི་ཚོང་པས་འཚོ་བར་མི་བརྟག་ཆོས་བཤད་པའི་གླ་མི་བླང་བ་དང་མི་འདི་ལ་ཆོས་བཤད་ན་ཟས་དང་སྨན་དང་གོས་ལ་སོགས་པ་བྱིན་པར་རེ་བའི་ཕྱིར། དེའི་ཕྱིར་ཆོས་མི་བཤད་ཆུ་མ་གྲུ་བ་ན་ཞོ་ཁུ་དག་གིས་རྐང་པ་བཀྲུ། ཆུ་དཀོན་པའི་སར་ཆུ་མེད་དེ་ཁྱིམ་པས་ཆུར་ཁུ་ཞིག་བྱིན་ན་དེ་འང་བརྟགས་ཏེ་རྐང་པ་བཀྲུ་འོ། །རྩྭའི་ཐུམ་པོ་ལ་འདུག་ཀྱང་རུང་དགེ་སློང་སྟན་མེད་ན་རྩྭའི་ཐུམ་པོ་ལ་འདུག་ཀྱང་ཉེས་མེད་དོ། །དབེན་པར་བླ་གབ་མེད་པས་བཞག །ལྷག་མ་ལྟར་རྩྭ་སྟན་ལ་ནུབ་མོ་ཉལ་བ་ནང་བར་ལངས་ནས་རྩྭ་སྟན་དེ་བསྡུས་ཏེ་དབེན་པར་བཞག །སྤུངས་ཏེ་ཡང་ངོ༌། །
དགེ་སློང་མང་ན་རྩྭ་སྟན་མང་དུ་སྤུང༌། རྣམ་གཅིག་ཏུ་ལྟག་མ་ལྟར་ཉལ་བ་ལས་ལངས་ན་སྤུངས་ཏེ་བཞག་ཀྱང་ཉེས་མེད། ཟིན་ནས་དོར། ནུབ་མོ་ཞག་ལོན་ནས་རྩྭ་སྟན་དེ་བསྐུར་བ་མ་ཡིན་གྱི་དོར་རོ། །ཕལ་ཆེ་ན་དུ་མར་བྱའོ། །དགེ་སློང་ཕལ་ཆེར་འདུས་ན་གྲལ་རིམ་དུ་མར་བྱས་ཀྱང་རུང་སྟེ་འོག་ནས་འཆད་དོ། །ལྔ་བརྒྱ་བར་ཡང་ངོ༌། །ལྟག་མ་ལྟར་ཉིས་སྟོང་སུམ་སྟོང་ཞིག་ཡོད་ན་ལྔ་བརྒྱ་ལྔ་བརྒྱར་ཕྲེང་བ་བྱ། རྒན་རིམས་སོ་སོ་ནས་བསོག །དགེ་སློང་མང་པོས་འདུས་ན་རྒན་པོ་རྣམས་གྲལ་ལོགས་ཤིག་ཏུ་བྱ། གཞོན་ནུའང་ལོགས་ཤིག་ཏུ་གྲལ་བྱས་ལ་རྒན་གཞོན་གྱི་ཟས་ཀྱང་སོ་སོར་གཞག །འདྲིམ་པ་ནི་མི་བཞོད་པར་ཞལ་ཏ་བསྐོ། དགེ་སློང་གཅིག་འདྲིམ་པ་བཞོད་དམ་མི་བཞོད་པའི་སྤྱན་དུ་བཞག །ཐོག་མར་ཟས་ལ་གཏོགས་པས་བཟའ་ཐོ་ངན་དང་སྤྱན་ཕྱིས་ལས་འབྲེལ་པའི་ཕྱིར་ཟན་དགེ་འདུན་པས་སྔར་ཟོས་ཀྱང་ཉེས་མེད། རྒན་རིམས་སུ་འཁོད་པའི་ཕྱིར་སྦྱིན་པའི་ཕྱིར་དུ་བ་མང་ན་དགེ་སློང་དག་བསྐོ། དགེ་སློང་རྒན་པོ་དང་གཞོན་ནུ་དང་དགེ་སློང་ཞིག་འདུག་ན་འདྲིམ་པ་ལ་མཉམ་པའི་ཕྱིར་སོ་སོར་བཀང་དུ་བཅུག་ལ་ཞལ་ཏ་བ་མང་དུ་བསྐོས། སོ་སོར་འདྲིམ་གཉིས་སམ་གསུམ་བོར་ནས་འདིར་དགེ་སློང་མ་ཅི་བདེར་འཁོད་དོ། །དགེ་སློང་མ་ཚར་གཅིག་ཏུ་བཀང་ན་ལྟག་ཏུ་སྟན་རིམ་པ་གཉིས་གསུམ་བོར་ལ་འདུག་པར་བྱའོ། །བཟའ་བའི་གནས་སུ་སྒྲ་བསྐྱུངས་ཏེ་འདེང་ངོ༌། །ཟས་བཟའ་བའི་ཚེ་གྲོང་དང་གཙུག་ལག་ཁང་འདྲ་སྟེ་ཅ་ཅོ་མེད་པར་སྒྲ་བསྐྱུངས་ཏེ་འདུག །རབ་ཏུ་བསྡམས་པའི་ཚུལ་གྱིས་སོ། །ཟན་ཟ་བའི་ཚེ་ལུས་དང་ངག་དང་ཡིད་བསྡམས་ཏེ་བཟའ། མཛེས་པར་རོ། །ཟས་ཟ་བའི་སྤྱོད་ལམ་བཞིར་མཛེས་པར་བྱ། དེ་བཞིན་དུ་འཁོད་དོ། །སྟན་ལ་འདུག་པའི་ཚེ་གོང་མ་རྣམས་བཞུགས་ལ་འདུག་གོ །བཟའ་བ་རྐང་པས་མི་བརྫི། ཁ་ཟས་གྱི་བག་ལ་རྐང་པས་མི་བརྫི། ལྷུང་བཟེད་ཀྱི་གཞི་རྐང་པས་མི་བརྫི་ལྷུང་བཟེད་ཀྱི་གཞི་ཤོ་མའམ་གཞོང་པ་ལ་སོགས་པ་ཡང་རྐང་པས་མི་བརྫི། སེམས་མི་གཡེང་བར་དྲན་པ་མངོན་པར་བཞག་སྟེ་བསོད་སྙོམས་བླང༌། ཟས་བྱིན་ལེན་བྱེད་པའི་ཚེ་སེམས་ཡན་མན་དུ་མི་གཏོང་བར་བསམ་པའི་རྒྱུད་བཞིན་དུ་བླང་མི་འཐོར་
བར་ལུས་ཀྱི་ཚད་དུའོ། །ཁ་ཟས་བླང་བའི་ཚེ་སྣོད་ལས་ཡན་མན་དུ་མི་འཐོར་བར་བྱ་བ་དང་བདག་འགྲངས་པ་ཙམ་དུ་བླང་ངོ༌། །འདི་དག་ནི་མི་བསྲེ། ཟན་ཟ་བའི་ཚེ་ཕྱེ་དང་འབྲས་བུ་མི་བསྲེ་རྣམ་པ་གཅིག་ཏུ་གྲོགས་ཀྱི་ཟན་སྐལ་དང་མི་བསྲེ་བར་བླང༌། མི་དཀྲུག ། བསོད་སྙོམས་ལེན་པའི་ཚེ་འོ་མ་དང་ཆོད་མ་དཀྲུགས་ཤིང་མི་སྡུག་པར་མི་བྱ། ཟན་ཟ་བའི་ཚེ་ཡད་མི་སྡུག་པར་མི་བྱ། རབ་ཏུ་དགབ། བདག་ཟན་ཟ་བའི་ཚེ་དབེན་པར་བཟའ། རྣམ་པ་གཅིག་ཏུ་གྲོགས་ཀྱི་ཟན་ལེན་པ་གཡོག་བྱས་ཏེ་བསྐུར། དུས་ལས་འདས་པར་མི་དཀྲི། གྲོགས་ཀྱིས་ཟས་ལེན་དུ་བཅོལ་བ་དུས་མ་འདས་པར་བླང་ཞེས་བྱི་ཤུ་ཏས་བཤད། ནད་པ་དང་ནང་གཡོག་དང་དཀོར་བ་དང་པས་འོངས་པ་དང་ཚུས་འོངས་པ་འདི་རྣམས་ནི་ཚང་མང་ནས་དུས་ལས་སྔར་ལེན་ཅིང་བཟར་ཡང་དབང་ངོ༌། །གང་ལས་སྤྱན་དྲངས་པ་ལས་དེ་ལས་གཞན་རྙེད་དེ་བདག་གིར་བྱ་བ་མི་རིགས་པ་མེད་དོ། །ཡོན་བདག་གིས་སྔར་ཐུག་པའམ་ཚོད་མ་ལ་སྤྱན་དྲངས་པ་ལ་ཕྱིས་ལ་དུའམ་ཞིམ་དགུ་ཞིག་སྦྱར་ཏེ་གསོལ་ཀྱང་བཟར་དབང་ངོ༌། །ཉེས་མེད་པ་ནི་བདག་གིས་ཟས་ཟ་བ་ལས་གཞན་ལས་བླངས་ནའོ། །བདག་གིས་ཟས་ནར་མ་ཞིག་ཟ་ཞིང་འདུག་པ་ལ་ཡོན་བདག་གམ། གྲོགས་པོའམ་དགེ་སློང་ངམ་ཞིག་གིས་སྤྱན་གཟིགས་སམ་ཟས་ཤིག་བྱིན་ན་དེ་དང་བཅས་ཏེ་ཟོས་ན་ཉེས་མེད་དོ། །དེར་ཆུད་པ་བཞིན་དུ་གཞན་གྱིས་སྤྱན་དྲངས་ཏེ་འདུག་པ་ལས་དེས་གནང་ནས་གཞན་གྱིས་བྱིན་ནའོ། །ཡོན་བདག་གཅིག་གིས་དགེ་འདུན་སྤྱིར་སྤྱན་དྲངས་པ་ལས་ཡོན་བདག་དེའི་གནས་ན་ཟན་བཟའ་བའི་ཚེ་སྦྱིན་བདག་གཞན་ཞིག་གིས་སྤྱན་གཟིགས་སྣ་འགའ་ཞིག་དགེ་འདུན་ལ་འདྲིམ་ཞེས་ཟེར་ན་སྔར་སྤྱན་དྲངས་པའི་ཡོན་བདག་གིས་བྲིམས་ཤིག་ཅེས་ཟེར་ན་བྲིམ་ཀྱང་ཉེས་མེད། འདྲིམ་དུ་མི་རུང་ངོ་ཞེས་ཟེར་ན་མི་བྲིམ། སྒྲའི་སྦྱོར་བར་བསམས་པའི་དོན་གྱིས་ཚུལ་ཏེ་གྲགས་པའི་མ་ཡིན་ནོ། །ཡོན་བདག་དད་པ་ལ་ལ་ཞིག་གིས་དགེ་སློང་ལ་སངས་རྒྱས་ཁྱོད་ལ་ཡོན་འབུལ་ལོ་ཞེས་ཟེར་བའི་ཚེ་ཡིད་ལ་བདག་དགའ་བ་དང་འཚེ་བར་མ་བསམས་ན་ཡོན་བླངས་ཀྱང་ཉེས་མེད། བླངས་ཏེ་མི་བཏང༌། ཡོན་ལ་སོགས་
པ་བྱིན་ནོ་ཅོག་ལ་དགོངས་སམ་མི་དགོངས་པ་སྔར་བརྟགས་ཏེ་བླངས་གིས་བླངས་ཟིན་ནས་སླར་མི་སྦྱིན་ནོ། །ལྟ་བ་དང༌། དགེ་སློང་གིས་དགེ་བར་ལྟ་བ་ལས་ཡོན་བླངས་ཏེ་ལོག་པ་ལ་ལྟ་བ་ལ་བྱིན་ན་བདག་ལ་གཉེར་དུ་འགྱུར་བའི་ཕྱིར་ཉེས་བྱས། ཚུལ་ཁྲིམས་དང་ལྡན་པ་ལས་བླངས་ཏེ། དགེ་སློང་གིས་ཚུལ་ཁྲིམས་དང་ལྡན་པ་ལས་ཡོན་བླངས་ཏེ་ཕས་ཕམ་པ་ལ་སོགས་ཏེ་ཚུལ་ཁྲིམས་དང་མི་ལྡན་པ་ལ་བྱིན་ན་བུ་ལོན་དུ་འགྱུར་བའི་སྟེང་དུ་ཉེས་བྱས། གཞན་རིམ་བཞིན་དུ་བྱིན་པ་དང༌། མདོ་ལྟག་མའི་རིམ་པ་ལྟར་ཚུལ་ཁྲིམས་དང་ལྡན་པ་དང་དགེ་སློང་དགེ་བར་ལྟ་བ་ལས་ཡོན་བླངས་ཏེ་ཚུལ་ཁྲིམས་དང་མི་ལྡན་པ་དང་ལོག་པར་ལྟ་བ་ལ་བྱིན་ན་དད་པའི་ཡོན་བདག་གི་བསོད་ནམས་སུ་མི་འགྱུར་བས་དགེ་སློང་ལ་བུ་ལོན་དུ་འགྱུར་བའི་སྟེང་དུ་ཉེས་བྱས་ཞེས་བཤད་དོ། །ཁམ་ལ་སོགས་པ་ཆུང་དུ་བྱ་བ་ལས་ལྷག་པར་བླངས་ཏེ་ཟོས་ན་དད་པས་བྱིན་པ་ཆུད་གསན་པའོ། །ཡོན་བདག་དད་པ་ལ་ལ་ཞིག་གིས་དགེ་སློང་མགྲོན་དུ་བོས་ཏེ་ཁ་ཟས་ལ་སོགས་པ་སྣ་མི་ཉུང་བ་ཞིག་འདྲིམ་ན་བདག་འགྲངས་པ་ཙམ་གྱི་ཚོང་བླང་གི་མ་འོངས་པར་བླངས་ནས་ལྷག་རོལ་ལ་སོགས་པར་བྱས་ན་ཡོན་བདག་གི་ཟས་ཆུད་ཟོས་པའི་ཉེས་བྱས་ཞེས་བཤད། བརྒྱ་ལ་ཆོག་པ་ཙམ་དུ་སྤགས་ཏེ་བླངས་པ་ལས་མ་འགྲངས་ན་ཕྱིས་བསྣན་ཏེ་ཟོས་པ་ནི་ཉེས་མེད་དོ། །ཕ་དང་མ་དང་ནད་པ་དང་རབ་ཏུ་བྱུང་བར་འདོད་པ་དང༌། སྦྲུམ་པ་དང༌། འདུལ་བར་འདོད་པ་དང༌། ཟས་ལ་རེག་པ་དང༌། ཁྱིམ་པ་ཡང་འོངས་ན་དེ་ལས་བགོ་བར་བྱ། དགེ་སློང་གིས་དད་པའི་ཡོན་བདག་ལས་བསོད་སྙོམས་སུ་བླངས་ཏེ་མ་དད་པ་དང་ཚུལ་ཁྲིམས་ལོག་པར་ལྟ་བ་ལ་ཟན་བྱིན་ན་བུ་ལོན་དུ་གྱུར་པའི་སྟེང་དུ་ཉེས་བྱས་པ་ཡིན་ན་བདག་གིས་བསོད་སྙོམས་རན་པར་བླངས་པ་ལས་མིང་གིས་སྨོས་པ་འདི་རྣམས་ལ་བགོས་ཏེ་བྱིན་པ་ནི་ཉེས་མེད་དོ། །ཁམ་གྱི་ཆངས་པ་བཞག །དགེ་སློང་ཟན་ཟ་བའི་ཚེ་ཟན་གྱི་ཆངས་པ་གཅིག་སྔར་བཅད་ལ་གཞག །བཟའ་བ་ནི་མི་བསྔོ། །མདོ་ལྟག་མ་ལྟར་ཟན་གྱི་ཆངས་པ་བཞག་པ་དེ་འདི་སྦྱིན་ནོ་ཞེས་གཅིག་ལ་མི་བསྔོ་ཕྱུགས་ཀྱང་སྦྱིན་མདོ་ལྟག་མ་ལྟར་ཟན་གྱི་ཆངས་པ་བཞག་པ་དེ་མདུན་དུ་མི་དང་
ཕྱུགས་སུ་ཕྲད་པ་ལ་སྦྱིན། བཟའ་བ་མ་ཟིན་པའི་ཕྱིར་གཞག་པ་ལས་མི་སྦྱིན། དགེ་སློང་གཞན་ལ་ཟན་ཞིག་སྦྱིན་ན་ཟན་ཁར་མ་བཅུག་པའམ་འགྲངས་པའི་འོག་ཏུ་སྦྱིན་གྱི་བདག་ཟ་བཞིན་དུ་གཞན་ལ་མི་སྦྱིན། སྤྱན་དྲངས་ཏེ་དད་པས་བྱིན་པ་མ་ཡིན། ཡོན་བདག་དད་པ་ལ་ལ་ཞིག་གིས་སྤྱན་གཟིགས་དང་ཟས་ལ་སོགས་པ་དགེ་སློང་ཁྱོད་འབའ་ཞིག་ཟོ་ཤིག་ཅེས་ཟེར་བའི་ཚེ་བདག་འབའ་ཞིག་གིས་བཟའ་བར་ཁས་བླངས་པ་ལའང་གྲོགས་པོ་ལ་སོགས་པ་གཞན་ལ་མི་སྦྱིན། ལྷུང་བཟེད་ཀྱི་གནས་ཀྱི་ཟས་ཀྱི་ལྷག་མ་དག་ལ་ཅི་བདེ་ཞེས་བྱའོ། །བདག་ཟས་ཟོས་པའི་ལྷག་མ་ལ་ཅི་བདེར་ཟོ་ཤིག་ཅེས་བྱས་ཏེ་འགྲོ་།གནས་པ་དག་གཏོར་མ་སྦྱིན་བདག་ཟས་ཟ་བའི་ཚེ་ལྷ་ཁང་བསྲུང་བའི་ལྷ་སྲིན་ལ་སོགས་པ་ལ་གཏོར་མ་བྱིན། དེའི་རྟོག་པའི་རྗེས་སུ་སྔ་དྲོ་ལ་སོགས་པའོ། །མདོ་ལྟག་མ་ལྟར་གཙུག་ལག་ཁང་གི་འཁོར་དུ་གཏོར་མ་གཏང་བའི་ནི་ཁ་ཅིག་སྔ་དྲོ་ཁ་ཅིག་ཕྱི་དྲོ་སྦྱིན་པ་ཡོད་པས་སྔ་དྲོ་དང་ཕྱི་དྲོ་མི་ནོར་པར་དུས་དུས་སུ་སྦྱིན། རྟོག་པ་ཐ་དད་ཐ་དད་དུའོ། །གཙུག་ལག་ཁང་གི་སྲུང་མའི་ལྷ་ལ་ཁྱིམ་པས་མཆོད་པ་ཡོད་དེ་ཁྱིམ་པས་སྔ་དྲོ་དང་ཕྱི་དྲོ་མཆོད་པ་ཡོད་པའི་དུས་བཞིན་དུ་མཆོད་ཅིང་གཏོར་མ་སྦྱིན། གཅིག་ཆུར་མ་གྱུར་པའི་གནས་ཀྱི་ཨ་མྲ་མི་བཟའ། ཤིང་ཏོག་ཨ་མྲ་མ་སྨིན་པར་མི་བཟའ་དེ་བཞིན་དུ་ཀུ་ཤུ་དང༌། ཁམ་བུ་དང་རྒུན་འབྲུ་ལ་སོགས་པའང་མ་སྨིན་པར་མི་བཟའ། རྩ་བ་དང་སྡོང་པོ་དང་ལོ་མ་དང་མེ་ཏོག་དང་འབྲས་བུ་དང་བཅའ་བ་འབྲས་ཆན་དང་སྣ་ཚོགས་དང་ཕྱེ་དང་ཤ་དང་ཁུ་བ་དང་འོ་མ་དང་ཞོ་དང་མར་སར་དང་ཉ་ཤ་དང་ཤ་སྐམ་དག་ལ་བརྟགས་པ་མ་ཡིན། མིང་གིས་སྨོས་པ་འདི་རྣམས་ནི་བརྟགས་པ་ཡིན་ཏེ་ཟོས་ཤིང་འཐུངས་ཀྱང་ཉེས་མེད་དེ་རྣམ་པ་འདི་བཅོ་ལྔ་ལ་ཐོག་མ་ལྔ་ནི་བཅའ་བའོ། །བར་མ་ལྔ་ནི་བཟའ་བའོ། །ཐ་མ་རྣམས་ནི་བཏུང་བ་ཡིན། སོ་མ་དང་ཡུངས་ཀར་གྱི་རྩ་བ་དང་སྡོང་པོ་དང་ལོ་མ་དང་མེ་ཏོག་དང་འབྲས་བུ་ལ་སོགས་པའི་ཐུག་པ་མི་འཐུང་བར་མ་དོགས་ཤིག །མིང་གིས་སྨོས་པ་འདི་རྣམས་ལས་ཐུག་པར་བྱས་པ་ཞིག་དགེ་སློང་གིས་འཐུངས་ཀྱང་བརྟགས་
པ་སྟེ་ཉེས་མེད། རྟའི་ཕྱིར་ཁུ་བས་སོ། །བདག་གི་ལུས་གསོ་བ་དང་བརྟས་པར་བྱ་བའི་ཕྱིར་འོ་མ་དང་ཤ་ཁུ་ལྟ་བུ་འཐུངས་ཀྱང་ཉེས་མེད། ཆུས་ཀྱང་ངོ༌། །བདག་གི་ཉམས་བརྟས་བར་བྱ་བའི་ཕྱིར་ཁུ་བ་དང་འོ་མ་ལ་སོགས་པ་མེད་ན་ཕྱེ་དང་ཆུར་སྦྱར་བའི་ཟན་དང་ཐུག་པ་བཏུང་རྐྱལ་པར་བཅུག་པ་མ་བརྟགས་པ་མ་ཡིན། རྐྱལ་པའི་ནང་དུ་ཁ་ཟས་ལ་སོགས་པ་བཅུག་པ་ཞིག་དགེ་སློང་གིས་ཟོས་ཀྱང་མ་བརྟགས་པ་མ་ཡིན་ཏེ་ཉེས་མེད། སྣོད་དུ་ཟས་བཟའ་བ་དང་བརྟག་པའོ། །ཟངས་དང་ཁར་བ་ལ་སོགས་པའི་སྣོད་སྤྱད་ཀྱི་ནང་དུ་ཟས་ཟ་བའི་ཚེ་སྨན་སྣོད་སྙམ་དུ་བསམས་ཏེ་ཟོས་ཀྱང་ཉེས་མེད། ཤིང་གི་ཡང་ངོ༌། །ཤིང་རྡོ་ལྟ་བུ་ཞིག་ལས་ཕོར་དེབ་ཏུ་བྱས་པ་བསྲེ། རྡོ་ཡང་ངོ༌། །བསྲེ་བསྐུས་པ་དང་མ་བསྐུས་པ་འདྲ་སྟེ་དགེ་སློང་གིས་སྤྱད་ཅིང་བཅངས་ཀྱང་ཉེས་མེད། ཟས་སྤྱད་པ་ཡང་ངོ༌། །རྡོ་ལ་སོགས་པའི་ཕོར་དེབ་ཀྱི་ནང་དུ་ཟན་ཟོས་ལ་ཟོས་པའི་འོག་ཏུ་དག་པར་བཀྲུས་ན་ཕྱིས་ཀྱང་དེའི་ནང་དུ་བཟར་རུང༌། བཀྲུ་བ་ནི་གནས་པའི་གཏོགས་པའོ། །མདོ་ལྟག་མ་ལྟར་རྡོ་དང་ཤིང་ལས་བྱས་པའི་སྣོད་སྤྱད་དུ་གཏོགས་པ་རྣམས་མཁན་པོ་ཉིད་ཀྱིས་མི་བཀྲུ་བའི་མཁན་པོ་ཟན་ཟ་བའི་སྔ་རོལ་དུ་གནས་འཆའ་བ་དང༌། དགེ་སྦྱོང་ལ་སོགས་པས་དག་པར་བཀྲུས་ཏེ་མདུན་དུ་གཞག །ཟོས་ནས་ཀྱང་ངོ༌། །མཁན་པོ་ཟས་ཟོས་པའི་འོག་ཏུ་གནས་འཆའ་བ་ལ་སོགས་པས་དག་པར་བཀྲུས་ཏེ་གནས་སུ་གཞག །ཕ་རོལ་པོ་དང་ལྷན་ཅིག་ཏུ་སྣོད་གཅིག་ཏུ་མི་བཟའ། ཁྱིམ་པ་ལ་སོགས་པ་མང་ཞིང་མི་དབེན་པའི་སར་དགེ་སློང་གྲོགས་དང་གཞོང་པ་གཅིག་གི་ནང་དུ་ཟན་མི་བཟའ། ལམ་དུ་སྣོད་མེད་ན་བཟའ། ལམ་དུ་ཞུགས་ཏེ་སྣོད་ཀྱིས་ཕོངས་ན་གཞོང་པ་གཅིག་གི་ནང་དུ་མི་གཉིས་བཟར་རུང༌། དགེ་སློང་དང་ངོ༌། །མདོ་ལྟག་མ་ལྟར་གཉིས་སྣོད་གཅིག་གི་ནང་དུ་བཟར་རུང་བའང་དགེ་སློང་དང་བཟར་རུང་གི་དགེ་སྦྱོང་དང་བཟར་མི་རུང་ངོ༌། །གཞན་གྱི་ལག་བཏེག་ནས་བདག་གིས་གཞུག །མདོ་ལྟག་མ་ལྟར་སྣོད་གཅིག་གི་ནང་དུ་ཟ་བའི་ཚེ་ལག་པ་འདོམ་པར་འགྱུར་བའི་ཕྱིར་ཕ་རོལ་གྱི་ལག་པ་གཏེག་ནས་བདག་གིས་གཞུག །དགེ་སྦྱོང་དང་ལྷན་ཅིག་ཏུའང་གཞན་བཞིན་དུ་མི་རུང༌།
སྣོད་མེད་ཀྱང་དགེ་སྦྱོང་དང་ལྷན་ཅིག་མི་བཟའི་སྤགས་ཏེ་སྦྱིན། ཟན་གུད་དུ་མི་གྲུབ་ན་བྱིན་ལེན་མ་ཞིག་པར་བྱས་ཏེ་ལྷན་ཅིག་ཟོས་ཀྱང་ཉེས་མེད། བརྟག་པ་བསྒོངས་ཏེ་སྦྱིན། ལམ་དུ་ཞུགས་པའི་ཚེ་མི་ཐོགས་པར་བྱ་བའི་ཕྱིར་གཡོག་ལ་སོགས་པ་ལ་ཟན་ཟོས་ཤིག་པར་བསྒོའོ་ཞེས་བྱི་ཛ་ཡ་བར་མས་བཤད། དགེ་སྦྱོང་ཟས་གུད་དུ་སྦྱིན་ན་མི་འབྲུལ་བར་སྦྱིན་ཞེས་བྱི་ཤུ་ཏས་བཤད། གཉེན་བསམ་པས་གསོལ་ན། ཐམས་ཅད་དུའང་དབེན་པའི་ས་ཕྱོགས་སུའོ། །གཉེན་ཞིག་གིས་ད་དང་ལྷན་ཅིག་མི་བཟའ་མི་རུང་ཞེས་དུས་ཀྱིས་བཙུས་ཏེ་གསོལ་ན་སུས་ཀྱང་མི་མཐོང་བར་དབེན་པའི་ཕྱོགས་སུ་བཟའ། བྱིན་ལེན་མ་ཞིག་པ་དང་ཡང་བྱིན་ལེན་མ་བླངས་པ་དང་མ་འདྲེས་པར་བསྲུང༌། མདོ་ལྟག་མ་ལྟར་ཁྱིམ་པ་ལ་གཉེན་ནམ་དགེ་སྦྱོང་དང་ལྷན་ཅིག་ཏུ་སྣོད་གཅིག་ཏུ་བཟའ་བའི་ཚེ་བདག་གི་ལག་པ་གཡོན་པས་སླེའུའམ་གཞོང་པའི་མཐེ་མ་མ་ཤོར་བར་གཟུང་ལ་ལག་པ་གཡས་བྱིན་ལེན་བྱས་ཏེ་བཟའ། ལྷམ་དང་བཅས་ཏེ་མི་བཟའ། ཟན་ཟ་བའི་ཚེ་ལྷམ་མི་བགོའོ། །ནད་པས་མནན། ནད་པས་ནི་ལྷམ་ཕུད་ལ་ཟན་ཟ་བའི་ཚེ་ས་གྲང་མོ་ལ་སོགས་པས་གནོད་པར་འགྱུར་བའི་ཕྱིར་ལྷམ་རྐང་པའི་འོག་ཏུ་མནན་ཏེ་བཟའ། སྒྲེན་མོའམ་གོས་གཅིག་པར་མ་ཡིན་སྒྲེན་མོའམ་ཁྱེད་རེངས་སུ་བྱས་ཏེ་ཟན་མི་བཟའ། ནད་པ་ལ་ནི་ལྟུང་བ་མེད་དོ། །ནད་པ་ནི་ཁྱེད་རེངས་མ་དང་སྒྲེན་མོར་ཟོས་ཀྱང་ཉེས་མེད་དོ། །གཡོག་གིས་འདི་དབེན་པར་བྱ། མདོ་ལྟག་མ་ལྟར་ནད་པ་སྒྲེན་མོ་ཟ་བའི་ཚེ་ནད་གཡོག་གིས་སྦྲའམ་གུར་ལྟ་བུ་ཕུབ་སྟེ་སུས་ཀྱང་མི་མཐོང་བར་བྱ། ནུས་ན་རྡུལ་གཟན་ལ་གནས། ནད་པ་མི་ནུས་ན་རྡུལ་གཟན་ཙམ་གྱོན་ཏེ་ཟས་ཟོས་ཀྱང་ཉེས་མེད། ཕྱོགས་དབེན་པར་རོ། །མདོ་ལྟག་མ་ལྟར་རྡུལ་གཟན་ཙམ་གྱོན་ཀྱང་མི་ནུས་ན་ནད་གཡོག་གིས་དབེན་པར་བཞག་སྟེ་ཟན་སྦྱིན། ཟ་བའི་ཕྱིར་འདུག་པ་ལ་འདི་དང་འོན་བྱིན་ལེན་ཞེས་འདྲིམ་པ་ལ་མི་བསྒོ། མི་ན་བར་ཟན་ཟ་བའི་ཚེ་ཟས་འདི་དང་འདི་འདོད་ཅེས་འདྲིམ་པ་ལ་བསྒོ་ཞིང་མི་བསླང༌། ལྟུང་བ་མེད་ན་ནད་པ་དང་འབྱོར་པ་སྟེ། ནད་པས་ནི་ཟས་གང་འདོད་པ་བསླངས་ཀྱང་ཉེས་མེད་དོ། །འདི་ལྟ་སྟེ་མི་གཞན་པ་ལ་བཅོས་པ་དང༌།
ནད་པ་རླུང་ནད་ཆེ་བ་དང་གྲང་པའི་ནད་ལ་ཁ་ཟས་དྲོད་བག་སློང་བའང་ཉེས་མེད། མེ་དྲག་པ་ལ་གཟེན་པ་པོའོ། །ཚ་བའི་ནད་ཀྱིས་བཏབ་པ་ལ་ཁ་ཟས་གྲང་བག་བསླངས་པའང་ཉེས་མེད། ནད་པའི་འདུ་ཤེས་སུ་བདག་ནད་པ་དང༌། ཟས་བཟའ་པ་སྨན་དུ་འདུ་ཤེས་པར་གཞག །ཟས་ཟ་བའི་ཚེ་བདག་ནི་ནད་པ་ཡིན་ཟན་ནི་སྨན་ཡིན་པར་བསམས་ཏེ་བཟའ། དྲན་པ་ཡང་ངོ༌། །ཟས་ཟ་བའི་ཚེ་བསམས་པའི་རྒྱུད་མ་བརྗེད་པར་བྱས་ཏེ་ཟ་བ་དང་ཐུ་ཐུ་ཧུ་ཧུ་ལ་སོགས་པ་བྱས་སམ་མ་བྱས་དྲན་པར་བྱ་སྐྱེས་པ་དང་འདྲ་བ་དང༌། ཟས་བཟའ་བའི་ཚེ་མི་གཙང་བ་ལས་སྐྱེས་པར་བསམས་ཏེ་མི་ཆགས་པར་བཟའ། འབྲས་དང་ཁ་ཟས་ལ་སོགས་པ་སྲིན་བུ་དང་སྐྲ་དང་མི་ལྤགས་འདྲ་བར་བསམས་ཏེ་མི་ཆགས་པར་བསམ། གྱུར་པ་དང༌། ཁ་ཟས་ཟོས་ནས་སྨེ་བ་དང་མི་གཙང་བར་གྱུར་པར་བསམས་ཏེ་མི་ཆགས་པར་བཟའ། དགྲ་དང༌། ཟས་ཀྱི་ཕྱིར་གཅིག་ལ་གཅིག་གསོད་པ་དང་གནོད་པར་བྱེད་པས་དགྲ་དང་འདྲ་བར་བསམ། ཟག་པ་དང༌། ཟས་འདི་ཟོས་ནས་སླད་རོལ་ཆེ་ཆུང་ལྟ་བུར་ཟག་སྟེ་འགྲོ་བས་མི་རྟག་པ་དང་བཙོག་པར་བསམས་ཏེ་བཟའ། རྐྱེན་དག་གིས་ཆོ་ག་དང༌། ཁ་ཟས་འདི་ནི་མི་དང་ཕྱུགས་ལ་སོགས་པས་ཉོན་མོངས་པར་བརྩལ་ཞིང་རྨོས་པ་ལས་སྐྱེས་པ་ཡིན་པས་མི་ཆགས་པ་དང་མི་གཙང་བར་བསམས་ཏེ་བཟའ། བརྩལ་བ་དང༌། ལས་དང་ཉོན་མོངས་པ་སྤྱད་དེ་ཟས་རྙེད་པ་ཡིན་པས་དཀའ་བ་ལྟ་བུར་བསམས་ཏེ་བཟའ། དབང་གཞན་ལ་ལུས་པ་དང༌། ཟས་ཟ་བའི་ཚེ་ཡོན་བདག་རྒྱལ་པོ་ལྟ་བུ་ཞིང་གིས་བྱེད་ནའང་ཡོན་བདག་དགའ་ན་ནི་སྟེར། མི་དགའ་ན་ནི་མི་སྟེར། བྲམ་ཟེ་དང་ཁྱིམ་པ་ལྟ་བུ་ཞིག་ལ་སློང་བའི་ཚེའང་དགའ་ན་ནི་སྟེར། མི་དགའ་ན་ནི་མི་སྟེར་བས་དབང་གཞན་ལ་ལུས་པར་བསམས་ཏེ་བཟའ། ནད་པའི་དང་བཅས་པ་དང༌། ཟས་ཟ་བའི་ཚེ་ཁ་ཟས་སྨན་དུ་འགྱུར་བ་དང༌། སྨན་དུ་མི་འགྱུར་བ་གཉིས་བསྲེས་ཏེ་ཟོས་ནའང་ནད་དུ་འགྱུར་ཁ་ཟས་སྔ་མ་མ་ཞུ་པར་ཕྱི་མ་ཟོས་ནའང་ནད་དུ་འགྱུར། ཕྱི་དྲོ་ཟས་ཟོས་ནའང་ནད་དུ་འགྱུར་བ་ཡིན་ཏེ་ཟས་འདི་ཟོས་ནས་ནད་དུ་འགྱུར་བ་ཡིན་ནོ་སྙམ་དུ་བསམས་ཏེ་བཟའ། སོ་སོར་འགྲོ་བ་རྣམས་ལ་མངོན་པར་གཞག་པ་མི་མཐུན་པར་རོ། །ཟས་ཟོས་
པའི་ལས་བཞི་ཆ་གཅིག་ནི་བདག་གི་ཁོང་ན་སྲིན་བུ་འདུག་པས་ཟོས་བཞི་ཆ་གཅིག་ནི་ཁོང་གི་མེས་གདུངས་བཞི་ཆ་གཅིག་ནི་ངན་སྐྱུག་ཏུ་བྱུང༌། བཞི་ཆ་གཅིག་ནི་བཙག་ཏུ་གྱུར་ཏེ་ཟས་ཟ་བའི་ཚེ་འདི་ལྟར་རྣམ་བཞིར་གྱུར་པ་སོ་སོར་བསམས་ཏེ་མ་ཟོས་ན་ཉེས་བྱས། དྲན་པ་ཉེ་བར་གཞག་པ་སྟེའོ། །བྱིན་ལེན་བྱེད་པའི་ཚེའང་གྲོང་དུ་སྨོས་པ་རྣམས་མི་གཙང་བ་དང་མི་རྟག་པར་བསམས་ཏེ་བླང༌། མ་འཁྲུགས་པའི་སེམས་ཀྱིས་སོ། །ཟན་ཟ་བའི་ཚེ་སེམས་མ་འཁྲུགས་པ་དང་མི་གཡེངས་པར་བྱ་སྟེ་བཟའ། ཤེས་བཞིན་པ་དང༌། ཟས་ཟ་བའི་ཚེ་མང་པོ་བསླབ་པའི་ནང་ནས་འབྱུང་བ་ལས་འགལ་ལམ་མ་འགལ་དྲན་པར་བྱ་བ་དང་འགྲངས་པ་ལས་ལྷག་པར་མི་བླང༌། སྒྲ་བསྐྱུངས་ཏེའོ། །ཟན་ཟ་བའི་ཀླག་ཆོར་དང་གད་མོ་མི་བྱ་བར་བཟའ། འདི་མི་བྱ། རྐང་ལག་དང་ཕོར་སྣོད་ལ་སོགས་པ་ཟས་ཟ་བའི་ཚེ་མི་བརྡབ། ཐུག་པ་སྒྲ་མི་བསླང༌། ཐུག་པ་འཐུང་པའི་ཚེ་ཧུབ་སྒྲ་མི་བྱ། བཀྲུམ་བཀྲུམ་སྟེ་མ་ཡིན། ཟན་ཟ་བའི་ཚེ་ཁ་ཟས་སྐམ་པོ་ཞིག་འོངས་ན་སྒྲ་བཀྲུམ་བཀྲུམ་མི་ཟེར་བར་བཟའ། སྒྲ་བྱེད་པ་ཆུ་ལ་སོགས་པས་སྤངས་ཏེའོ། །སཱུ་ཏྲ་ལྟག་མ་ལྟར་ཁ་ཟས་སྐམ་པོ་ཞིག་འོངས་ན་སྒྲར་མི་འགྱུར་བར་སྤངས་ཏེ་བཟའ། བཟའ་བའི་ཕྱིར་བསིལ་ན་མ་ཡིན་ནོ། །རོལ་མོ་ལ་སོགས་པ་བྱེད་བཞིན་དུ་ཟས་མི་ཟ་སྟེ་སྡོད་ཅིག་ཅེས་བྱ། བཤད་པ་བྱེད་པ་ན་མ་ཡིན། དགེ་འདུན་མང་པོ་བཟས་ཟོས་ཟིན་པའི་འོག་ཏུ་གནས་བརྟན་གྱིས་སྦྱིན་པའི་བཤགས་པ་བྱེད་པའི་ཚེ་ཟན་མི་བཟའ། དེ་ཐོས་ནའོ། །སཱུ་ཏྲ་ལྟག་མ་ལྟར་གནས་བརྟན་གྱིས་སྦྱིན་བའི་འཆགས་པ་བྱེད་པ་ཐོས་བཞིན་དུ་ཟན་མི་བཟའ། མ་ཐོས་པར་ཟོས་པ་ནི་ཉེས་མེད་དོ། །དུས་འདས་ན་ཚིགས་སུ་བཅད་པ་གཉིས་གསུམ་དུའོ། །སཱུ་ཏྲ་ལྟག་མ་ལྟར་གནས་བརྟན་ཚིགས་བཅད་ཀློག་པའི་ཚེ་ཚིགས་བཅད་ཟིན་ཟིན་དུ་བསྡང་ན་གདུགས་ཚོད་མི་ཐུབ་པ་ཙམ་གྱི་ཚོད་ན་ཤློ་ཀ་གཉིས་གསུམ་ཙམ་བཀླག་པའི་འོག་ཏུ་ཟན་ཟོས་པ་ཉེས་མེད། ཟོས་ན་ཞལ་ནས་གསུངས་པ་བརྗོད་དོ། །དགེ་སློང་སུའང་རུང་སྟེ་ཟན་ཟོས་ཟིན་ནས་ཚིགས་བཅད་གཅིག་བྱ། སྤྱན་དྲངས་ཏེ་ཟོས་ན་སྦྱིན་པའི་བཤགས་པ་དང་ཆོས་བཤད་པ་
དག་བྱ། གུད་དུ་མགྲོན་དུ་བོས་ཏེ་ཟན་ཟོས་ཟིན་པའི་འོག་ཏུ་སྦྱིན་བདག་མདུན་དུ་བཞག་སྟེ་ཚིགས་བཅད་དང་ཆོས་བཤད་དག་བྱ། ཐམས་ཅད་ཟོས་པར་ཤེས་ནས་སོ། །སཱུ་ཏྲ་ལྟག་མ་ལྟར་གནས་བརྟན་གྱི་ཚིགས་བཅད་དང་ཆོས་བཤད་པ་ནི་ཟས་ཟོས་ཟིན་ནས་བྱ། བལྟ་སྟེའོ། །སཱུ་ཏྲ་ལྟག་མ་ལྟར་གནས་བརྟན་གྱིས་སྦྱིན་པའི་བཤགས་པ་བྱ་བའི་ཚེ་ཐམས་ཅད་ཟན་ཟོས་ཟིན་ནམ་མ་ཟིན་བརྟགས་ལ་ཟིན་ན་བྱ། དུ་མའི་དང་པོས་སོ། །དགེ་སློང་མང་ཞིག་འཁོད་ཀྱང་ཚིགས་བཅད་དང་ཆོས་བཤད་པ་ནི་གྲལ་དཔོན་གྱིས་བྱ། མི་ནུས་ན་གཞན་ནུས་པ་ལ་བཅོལ། སཱུ་ཏྲ་ལྟག་མ་ལྟར་ཚིགས་བཅད་དང་ཆོས་བཤད་ལ་སོགས་པ་གྲལ་དཔོན་གྱིས་མི་ནུས་ན་འོག་མ་ལ་བཅོལ་ཀྱང་ཉེས་མེད། དེ་སྟེ་མ་བྱས་པར་འགྲོའམ་རྐྱེན་གཅིག་གིས་ནི་དགེ་སློང་ལས་གཡོག་སྦྱིན། དགེ་འདུན་མགྲོན་དུ་བོས་པ་ལས་ཟན་ཟོས་ཀྱི་འོག་ཏུ་ཚིགས་བཅད་དབྱར་མི་སླེབས་པར་རྐྱེན་གཅིག་གིས་འདོད་ན་གྲལ་དཔོན་ཚིགས་བཅད་བྱེད་པའི་གཡོག་བཅང༌། བཅུ་ཙམ་བསྐོས་ཏེ་འདོད་ཅེས་བྱི་ཛ་ཡ་བར་མས་བཤད། གྲལ་དཔོན་གྱིས་ཚིག་སྦྱར་དུ་མི་རིངས་ཏེ། ཆོས་འཆད་པ་དང་ཚིགས་བཅད་བྱེད་པ་བསྒོ་ཏེ་འགྲོ་ཞེས་བྱི་ཤུ་ཏས་བཤད། མཐར་ན་བཞིའོ། །སཱུ་ཏྲ་ལྟག་མ་ལྟར་གྲལ་དཔོན་གྱིས་སྦྱིན་པའི་བཤགས་པ་བྱེད་པའི་གཡོག་དགེ་སློང་བཅའ་བཅུ་ཙམ་བཞག་ཏུ་མེད་ན་དགེ་སློང་བཞི་མན་ཆད་བཞག་བྱིན་པས་ཀྱང་རྐྱེན་གཅིག་གིས་ན་ཞུས་ཏེའོ། །སཱུ་ཏྲ་ལྟག་མ་ལྟར་གནས་བརྟན་ཚིགས་བཅད་བྱེད་པ་གཡོག་ཏུ་བསྐོས་པ་རྣམས་ཀྱང་རྐྱེན་གཅིག་བྱུང་སྟེ་རིངས་ན་དགེ་འདུན་གཞེས་ཤིག་ཅེས་ཞུས་ཏེ་རྐྱེན་སར་ཚིགས་བཅད་བྱས་ཏེ་འདོང༌། སྦྱིན་པའི་བཤགས་པར་དགའ་བོ་དང་བསྙེན་དགའ་བོའི་མིང་དབྱུང༌། སྦྱིན་པའི་བཤགས་པ་བྱེད་པའི་སྦྱིན་བདག་ལ་སྨོན་ལམ་བཏབ་པའི་འོག་ཏུ་དགའ་བོ་དང་བསྙེན་དགའ་བོའི་མིང་ནས་ཕྱུང་སྟེ་ཚེ་རིང་བ་དང་བདེ་བར་ཤོག་ཤིག་ཅེས་དགེ་འདུན་གྱིས་སྨོན་ལམ་གདབ། མིད་པ་གཉིས་ཏེ་དུས་མ་ཡིན་པར་བྱུང་ན་ཐོག་མའི་གཉིས་གསུམ་པོར་ལ་ཁ་བཀྲུས་ཏེ་མིད་དོ། །ཕྱུགས་ལ་མིད་པ་གཉིས་ཡོད་དེ་ཟས་དང་ཆུ་ལ་སོགས་པ་མིད་པའང་ཐ་
དད་པར་ཟས་ལ་སོགས་བ་སྔར་ཟོས་ནས་མཚན་མོ་སླར་ལྡང་ངོ༌། །དགེ་སློང་ལ་ལ་ཞིག་ཕྱུགས་བཞིན་དུ་ཁ་ཟས་ཟོས་པའི་འོག་ཏུ་སྐྱུག་ཅིང་སླར་ལྡང་ན་ལན་གཉིས་གསུམ་ཕྱིར་བོར་ཏེ་ཁ་བཀྲུའོ། །དེ་ཕྱིན་ཆད་མི་དོར་སླར་མིད་དོ། །འདི་ཁ་ཟས་མ་ཡིན་པ་ནི་མ་ཡིན་ནོ། །སྐྱུག་བུ་ལྟ་བུའི་འདྲོག་ལ་ཁ་ཟས་བྱུང་ན་སླར་མིད་ཀྱི་ཕྱིར་དོར་ཏེ་ཁ་བཀྲུ། ལྟར་མིད་ན་ཉེས་བྱས། དེ་བས་ན་དུས་མ་ཡིན་པར་སྐྱུགས་པ་དང་ལངས་ནས་ནི་གཞན་གྱིས་ཀྱང་བཀྲུའོ། །སཱུ་ཏྲ་གོད་མ་ལྟར་སྐྱུག་བུའི་འདྲོག་ལ་ཁ་ཟས་འབྱུང་བ་དང་རེས་འགའ་ན་བའི་ཕྱིར་སྐྱུགས་པ་བྱུང་བའི་འོག་ཏུ་སླར་མིད་ན་དུས་མ་ཡིན་པའི་ཟས་སུ་འགྱུར་བས་ཐམས་ཅད་ཕྱིར་བོར་ལ་ཁ་བཀྲུ། མ་བཅས་པའི་ཕྱོགས་སུ་མཆིལ་མ་མི་དོར། མཆིལ་མ་དོར་བའི་གནས་སུ་བྱས་པ་མ་ཡིན་པ་གཙུག་ལག་ཁང་ལ་སོགས་པས་བཟང་ངོ་ཅོག་ཏུ་མཆིལ་མ་མི་དོར། གཏར་གཏར་པོ་མ་ཡིན། ས་ཐང་བུ་བཟང་པོ་གཏར་གཏར་བོར་ཕྱགས་པར་ལུད་པ་མི་དོར། དེའི་སྒྲ་ཡང་གནས་བརྟན་གྱི་མདུན་དུ་མི་བྱ། ལུད་པའི་སྒྲ་ལ་སོགས་པ་གནས་བརྟན་དང་བླ་མའི་མདུན་དུ་མི་བྱ། བཟའ་བ་མ་ཡིན། ཟན་ཟ་བའི་ཚེ་གྲོགས་པོ་ལ་སོགས་པ་སྐྱུག་བྲོ་བའི་ཕྱིར་ལུད་པའི་སྒྲ་མི་བྱ། ཡང་ཡང་དུ་ནི་ལྷག་མ་ལའང་མ་ཡིན། གནས་བརྟན་གྱི་འོག་མའི་མདུན་དུ་ལན་འགའ་ནི་མ་གཏོགས་ཏེ་ལན་མང་དུ་ལུད་པའི་སྒྲ་མི་བྱ་ཞེས་བྱི་ཤུ་ཏས་བཤད། དགེ་སློང་གྲོགས་པོའི་མདུན་དུ་ཟས་མི་ཟ་བའི་ཚེའང་ལུད་པའི་སྒྲ་ལ་སོགས་པ་འདོད་འདོད་དུ་མི་བྱ་ཞེས་བྱི་ཛ་ཡ་བར་མས་བཤད། མི་ནུས་ན་གཞན་དུ་འགྲོའོ། །ལུད་པ་དང་མཆིལ་མ་ལ་སོགས་པ་འདོད་འདོད་འོངས་ཏེ་དེ་དགག་ཏུ་མི་བཏུབ་ན་གནས་དབེན་པར་སོང་སྟེ་ས་མི་གཙང་བར་མཆིལ་མ་དོར། གཞན་ལ་མི་བདེ་བར་མི་བྱ། ལུད་པ་འདོར་བ་ནི་གཞན་ལ་ཆགས་བ་དང་གཞན་ལ་མི་མཛེས་པར་མི་དོར། སྡུར་ཅིང་མི་ཉལ། གྲོགས་བསམ་གཏན་བྱེད་པ་ལ་གནོད་པའི་ཕྱིར་སྡུར་བཞིན་དུ་མི་ཉལ། བཅག་གམ་གཞན་དུ་འགྲོ་།ལྟག་མ་ལྟར་སྡུར་པ་འབྱུང་བ་ནི་གན་རྐྱལ་དུ་ཉལ་ན་སྡུར་པ་འབྱུང་སྟེ་གློས་ཉལ་ན་སྡུར་བ་མི་འབྱུང་སྟེ་དེ་ལྟར་སྡུར་བ་བྱུང་ན་གྲོགས་ལ་
མི་གནོད་པའི་ཕྱིར་འཆག་ཏུ་འགྲོ། །དེའི་སྣོད་འོག་བ་ལང་གི་རྨིག་པ་ལྟ་བུའམ་གཞི་དང་བཅས་པའོ། །ནད་པ་གུད་དུ་འགྲོ་མི་ནུས་ན་མཆིལ་མ་དོར་བའི་གཞི་བ་ལང་གི་རྨིག་པ་ལྟ་བུའི་ཆོལ་ཟངས་བཅང༌། འདི་ཉེ་བར་གཞག །ཆོལ་ཟངས་ནད་པའི་གམ་དུ་གཞག །འདིར་གདིང་བ་སྦྱིན་ཏེ་ས་ཚིག་པའམ་བྱེ་མའམ་ཐལ་བས་སོ། ཆོལ་ཟངས་ཀྱི་ནང་དུ་བྱེ་མའམ་ཐལ་བ་བཏིང་སྟེ་བཞག་པའི་སྟིང་དུ་མཆིལ་མ་དོར། སྦྲང་མ་དག་སྤངས་པར་ཐབས་ཀྱིས་སོ། ཆོལ་ཟངས་ཀྱི་ནང་དུ་སྦྲང་མ་མི་འདུ་བར་བྱ་བའི་ཕྱིར་སྦྲང་ཡབ་བཅངས་ལ་བསྐྲད། དྲིང་བ་མེད་པའི་ཕྱིར་དང་སྲོག་ཆགས་སུ་མི་འགྱུར་བར་བྱ་བའི་ཕྱིར་དུས་དུས་སུ་བཀྲུ་བསྐམ། ལྟག་མ་ལྟ་བུ་ཆོལ་ཟངས་མཆིལ་མའི་དྲི་མི་ཞིམ་པ་དང་སྲིན་བུར་འགྱུར་བའི་དུས་དུས་སུ་བཀྲུ་ཞིང་བསྐམ། དེའི་དུས་ཀྱི་ཕྱིར་གཞན་གཞག །ལྟག་མ་ལྟར་བཀྲུ་ཞིང་སྐམ་པའི་ཚེ་འཐེབ་གཞན་གཅིག་བྱས་ཏེ་གཞག །མི་བྲེལ་བའི་ཕྱིར་གཙུག་ལག་ཁང་གི་གྲྭ་བཞིར་ཀ་བའི་དྲུང་དུ་མཆིལ་མའི་སྣོད་གཞག །གཙུག་ལག་ཁང་ན་དག་འདུན་གྱི་སྤྱིར་གྲྭ་བཞིར་མཆིལ་མའི་སྣོད་རེ་རེ་གཞག་ན་དགེ་སྦྱོང་ཡན་ཆད་གནས་བརྟན་མན་ཆད་མཆིལ་མ་དོར་བར་བྱ། ཆོལ་ཟངས་ཀྱི་གཞིའང་གཞག་བྱེ་མས་གདིང་བའང་ལྟག་མ་དང་འདྲ། སྒྲ་དང་བཅས་པའི་རླུང་གི་ལས་མི་བྱ། མི་མང་པོ་འདུས་པའི་ནང་དུ་ཕྱེན་སྒྲ་ཆེན་པོ་མི་གཏོང༌། ཤིང་དྲུང་དུ་བཤང་བ་དང་གཅི་བ་མ་ཡིན། ཤིང་གང་ཡང་རུང་ཤིང་དྲུང་དུ་བཤང་གཅི་མི་བྱ། ཐང་ལ་དེས་མཚམས་མེད་པ་ནི་མ་གཏོགས། ཐང་རྩྭ་དང་ཤིང་ལེབ་ཤེ་དག་གིས་ཡོག་པ་ཞིག་ཡིན་ན་དབེན་པར་བཤངས་ཀྱང་ཉེས་མེད། ཚེར་མ་ཅན་ཡང་ངོ༌། །ཤིང་ཚེར་མ་ཅན་གྱི་དྲུང་མི་སུའང་མི་གནས་པས་དེར་བཤངས་ཀྱང་ཉེས་མེད། ཕྱི་ས་ཀུང་བ་བྱ། གཙུག་ལག་ཁང་གི་འཁོར་དུ་བཤང་གཅི་བྱ། དེ་སྟེ་གཙུག་ལག་ཁང་གི་ནི་ནུབ་བྱང་གི་ངོས་སུའོ། །ལྟག་མ་ལྟར་ཕྱི་ས་ཀུང་གིས་བྱ་བ་ནི་གཙུག་ལག་ཁང་གི་སྒོ་ཤར་ཕྱོགས་སུ་ལྟ་ན་ནུབ་དང་བྱང་གི་བར་དུ་བྱ། འཁྱིལ་པའམ་གཟར་བར་རོ། །བཤང་བ་ཉིད་གཞི་བཟང་པོ་ལ་བྱས་ལ་ཕྱིར་ཕྱུང་བ་ཝ་གཉིས་ཀྱི་ཁ་སྦྱར་སྦུ་བུ་ཡོད་པར་བྱས་པ་ནས་མ་དོར་རོ། །འོག་ཏུ་ཚེར་
མ་ཅན་གྱི་ཤིང་བསྐྱེད། བཤང་གཅི་བོར་བའི་འཁོར་དུ་སེམས་ཅན་མི་འོང་བའི་ཕྱིར་ཚེར་མ་ཅན་གྱི་ཤིང་བསྐྱེད། བུ་གུ་དང་ཉེ་བའི་སྟེང་དུ་ཤིང་ལྷམ་གཞག །བཤང་བའི་བུ་གུའི་ཁར་འདུག་པའི་ཚེ་རྐང་པ་ལ་མི་འབགས་པའི་ཕྱིར་ཤིང་ལྷམ་རེ་རེ་གཞག །རིལ་བ་སྤྱི་བླུགས་ཀྱི་གནས་བྱ། ཕྱིས་ཀུང་གི་འཁོར་དུ་བཀྲུ་བའི་ཕྱིར་རོལ་པོ་གཞག་པའི་ས་བྱ། སྒོའི་མདའ་ཡབ་བྱ། བཤང་བའི་སྒོ་ཕྱེ་ནས་ཕས་མི་སྣང་བར་བྱ་བའི་མདའ་ཡབ་བྱ། སྒོའི་རེ་བཞི་སྦྱིན། ཕྱིས་ཁུང་གི་ཁང་བུ་ལ་སྒོའི་རེ་བཞི་བྱ། སྒོ་ལེབ་དང་ཡང་མིག་ཀྱང་ངོ༌། །ཕྱིས་ཁུང་གི་སྒོར་སྒོ་ལེབ་གཞུག་ཅིང་ཡང་མིག་གདགས། འཇུག་པར་འདོད་ན་སྒྲས་སོ། །འོངས་པར་མི་འཇུག །ཐོས་ན་དེར་ཞུགས་པས་ཀྱང་ངོ༌། །ཕྱི་ལོགས་ནས་འོངས་པས་སྐྲ་བྱས་ན་ནང་ན་འདུག་པས་ཡོད་པར་གོ་བར་བྱ་བའི་ཕྱིར་སྒྲ་ཡང་བྱ། གོས་རབ་ཏུ་བཟུང་སྟེ་ཤེས་བཞིན་དུ་འཇུག །བཤང་གཅི་གོས་ལ་མི་རེག་པ་དང་སེ་གོལ་གྱི་སྒྲ་བྱ་བར་དྲན་པ་མངོན་པར་གཞག །དབྱུང་དུ་འཇུག །ཕྱི་ས་བྱེད་པའི་ཚེ་ཕ་རོལ་གྱི་ཁར་མ་རེག་པར་དབུས་སུ་དོར། དལ་གྱིས་བཤང་སའི་ལྷམ་ལ་མ་རེག་པར་བྱ། བཤང་སའི་ཁ་ན་ཤིང་ལྷམ་འདུག་པ་ལ་མི་རེག་པར་བྱ། མ་འོངས་པ་མི་བསྡད། བཤང་གཅི་མི་བྲོ་བར་ནན་གྱིས་བཙིར་བ་མི་བྱ་བ་དང་མི་བྲོ་བར་བཤང་གཅི་སར་མི་འཇུག །བཤང་གཅི་སར་མི་འཇུག་པར་འདོང་སྒྲ་བྱ། འོངས་པར་མི་འཇུག །འོངས་པར་མི་དགག །བཤང་གཅི་འོངས་པ་ལ་མི་དགག་པར་བྱ། དེ་དང་འབྲེལ་པའི་དགོས་པ་ལས་གཞན་པ་དེ་དང་ཉེ་བར་མི་གཞག། བཤང་གཅི་བྱ་བའི་སར་བཤང་བ་མི་བྱེད་པར་འགྲེངས་ཏེ་མི་འདུག་པ་དང་བཤང་གཅི་བཀྲུ་བ་ལས་གཞན་དེར་བཀྲུ་བཤལ་མི་བྱ། ཉིན་གཅིག་བཞིན་དུ་གཙུག་ལག་ཁང་སྐྱོང་གིས་བཀྲུ། བཤང་གཅི་སའི་ཁ་དང་འཁོར་གཙུག་ལག་ཁང་སྐྱོང་གིས་རྟག་པར་བཀྲུ། ས་དང་ལོ་མ་གཞག་པ་ཡང་ངོ༌། །རྐུབ་ཕྱི་བ་དང་བཀྲུ་བའི་ས་དང་ལོ་མ་ཡང་གཙུག་ལག་ཁང་སྐྱོང་གིས་རྟག་པར་གཞག་གོ །ཕྱོགས་མ་ཡིན་པར་གཅི་བར་མི་བྱ། བཤང་གཅིའི་སར་བྱས་པ་མ་གཏོགས་པར་བབ་བབ་ཏུ་མི་བྱ། དུ་མར་མ་ཡིན། བཤང་གཅི་གྲངས་མང་དུ་མི་བྱ། ལྟུང་བས་
དོང་བརྐོ། བཤང་གཅི་དོར་བའི་སར་དོང་བརྐོ། གཟག་པའི་ཁང་བུ་བྱ། གཅིན་གཅི་བའི་གནས་ཀྱི་ས་ལོགས་ཤིག་ཏུ་བྱས་ཀྱང་རུང༌། འདི་ངོས་ལའོ། །ལྟག་མའི་ས་བྱ་བ་ནི་བཤང་བའི་ངོས་ལ་བྱ། གཟུགས་པོར་རོ། །ལྟག་མ་ལྟར་ཆབ་ཁུང་དུ་བྱ་བ་ཡང་གཟུགས་པོར་བྱ། ཝ་སྦྱིན། ལྟག་མ་ལྟར་གཟུགས་པོར་བྱ་བ་ནི་ཝ་གཟུགས། གཞན་དང་མཉམ་པར་རོ། །ལྷག་མ་ལྟར་ཕྱིས་ཁུང་ཆེན་པོར་འགྲོ་བར་ལ་གོས་ལ་མི་རེག་པར་སྒོ་དང་ཡང་མིག་ལ་མི་རེག་པར་བཞིན་གཅི་བའི་ཁུང་བུ་ལ་ཡང་དེ་བཞིན་དུ་བྱ། ཚད་པའི་ནད་ཀྱིས་ནི་ཁྲིའུ་བུ་གུ་ཅན་བྱའོ། །དགེ་སློང་ནད་པ་ཡིན་ནམ་འགྲོ་མི་ནུས་ན་ཁྲིའུའི་དབུས་སུ་བུ་གུ་བཏོད་ལ་ཚད་པ་གཟག་པར་བྱ། ཁྲི་ཐག་བསྡུ། ལྟག་མ་ལྟར་གཟག་པའི་ཁྲི་ཐག་དབུས་བརྟགས་པ་ཡིན་ན་མི་རེག་པར་བྱ་བའི་ཕྱིར་ཐག་བུ་བསྡུ། མི་གྲུབ་ན་བཅད། ཁྲི་ལྟ་བུ་ཡིན་ན་དབུས་གང་དུ་དགོས་པར་ཁོ་ར་ཁོར་ཡུག་ཏུ་དྲངས་ཏེ་གདོད། དེ་སྟེ་ན་འཁོར་དུ་ལོ་མའི་ཕུང་པོ་སྦྱིན། ཁྲིའུ་བུ་གུ་ཅན་གྱི་སྟེང་དུ་ནད་པ་ཉལ་བ་རྐུ་བ་ན་ན་བལ་བུའམ་ཤིང་ལོ་འཇམ་པོ་ཕ་ལོགས་ཚུ་ལོགས་སུ་གཞག །ས་མ་རུང་བར་གྱུར་པ་བསྲུང༌། ཁྲིའུ་དབུས་ནས་བཤང་གཅི་བའི་འོག་གི་གཞི་མི་རུང་བར་མི་བྱ་བའི་ཕྱིར་ཐབས་འོག་ནས་འཆད། དེ་བས་ན་འོག་ཏུ་གྱོ་མོས་སོ། །ལྟག་མ་ལྟར་ས་མི་རུང་བར་འགྱུར་བའི་ཕྱིར་ཁྲིའུའི་བུ་གུའི་ཁར་གྱོ་མོ་བཞག་སྟེ་བཤང་གཅི་དེར་བཏང༌། བར་དུ་མཐོ་ན་མི་དགེ །འོག་ཏུ་གྱོ་མོ་བཞག་པ་ཁྲི་པ་དང་མི་རིག་པར་གཞག །དུས་དུས་སུ་དྲི་མི་ང་བ་ཕྱིར་བཀྲུ་བསྐམ་ཡུངས་མར་ཚ་བས་བྱུག །གྱོ་མོ་དྲི་མི་ཞིམ་པར་འགྱུར་བའི་ཕྱིར་བཀྲུ་ཞིང་སྐམ་པ་དང་ཡུངས་མར་གྱིས་བྱུག །དེའི་དུས་ཀྱི་ཕྱིར་གཞན་གཞག །ལྟག་མ་བཀྲུ་ཞིང་བསྐམ་པའི་འཐེབ་ཅིག་གཞག །མ་གྲུབ་ན་གཞི་ལེབ་མ་གཞག །ལྟག་མ་ལྟར་གྱོ་མོ་བམ་རྙེད་ན་ཤིང་ལོ་མི་ཟག་པ་བཟང་པོ་གཞག །བཤངས་ནས་དེའི་ཕྱིར་ཕྱི། ནའང་རུང་མི་ནའང་རུང་བཤངས་ནས་རྐུབ་ཕྱི། རྣོན་པོའམ་རྩ་ཐུམ་གྱིས་མ་ཡིན་ལྟག་མ་ལྟར་རྐུབ་ཕྱི་བ་རྡོའམ་ཤིང་རྣོན་པོའམ་རྩ་རྩུབ་པོས་མི་ཕྱི། རས་མ་དང་ལེབ་མ་དང་ལོ་མའི་ཕུང་བོ་དང་ཤིང་དག་གིས་དེར་དགེ།
མིང་གིས་སྨོས་པ་འདི་རྣམས་ཀྱིས་ན་འཇམ་ཞིང་དགེའོ། །གཉིས་སུ་སུ་དག་གིས་བཀྲུ། ལྟག་མ་ལྟར་རྐུབ་ཕྱིས་པའི་འོག་ཏུ་ས་ལན་གཉིས་དང་ཆུ་ལན་གཉིས་ཀྱིས་བཀྲུ། སྔར་སོ་སོར་གཞག་པའི་ས་དེས་ཕྱིས་བཀྲུ་བཤང་བར་འགྲོ་བ་ནས་ཕུད་སྔར་བྱས་ལ་བཤངས་པའི་འོག་ཏུ་ལག་པ་དག་པར་བཀྲུ་བའི་ས་སྤུངས་ཏེ་གཞག །དལ་གྱིས་བག་ཀྱིས་བག་ཀྱིས་ཟེར་མས་ཤིང་ལྷམ་མ་རུང་བར་མི་འགྱུར་བའི་ཕྱིར་སར་རོ། །རྐུབ་འཁྲུ་བའི་ཚེ་ཤིང་ལྷམ་ལ་མ་རེག་མ་འབགས་པར་དལ་གྱིས་བཀྲུ། གཡོན་པ་ལ་བདུན་གྱིས་སོ། །ལག་པ་གཡོན་པ་གཡས་པས་ས་ལན་བདུན་བླུགས་ཤིང་བཀྲུ། གཉིས་ཀ་ལ་ཡང་བདུན་གྱིས་སོ། །ལག་པ་གཉིས་ཀ་ལ་ཡང་ས་ཕུང་བདུན་གྱིས་བཀྲུ། ལག་ངར་བཀྲུ། ལྟག་མ་ལྟར་ལག་པ་གཉིས་ཀར་བཀྲུས་ནས་ཆུང་ཟད་ཅིག་གིས་ལག་ངར་མན་ཆད་དག་པར་བཀྲུ། ཡང་སས་ལག་པ་གཉིས་པའོ། །དྲུང་མོ་བཀྲུས་ནས་ཡང་ས་ཕུང་གཅིག་གིས་ལག་པ་གཉིས་ཀ་བཀྲུ། གཞན་གྱིས་རིལ་བ་སྤྱི་བླུགས་ལའོ། །དེ་ནས་ས་ཕུང་གཅིག་གིས་རིལ་བ་སྤྱི་བླུགས་དག་པར་བཀྲུ། རྐང་པ་བཀྲུ། བཤང་གཅི་བྱས་ནས་ལག་པ་བཀྲུས་པའི་འོག་ཏུ་རྐང་པ་ཡང་བཀྲུ། ཉེས་མེད་པ་ནི་ཟ་གུ་སྟེ་ཐ་མར་ཕྱིས་མཚམས་ཏེ་འདུག་ཀྱང་ངོ༌། །སྨན་རྒོད་འཐུངས་པའམ་རྟག་པར་ཚད་པ་ཟག་པ་ལ་ལན་ཅིག་ཕྱིས་ལ་ཕྱིས་སྨན་གྱི་རྗེས་ཆད་ནས་ཆུ་དྲོན་གྱིས་ཚུལ་བཞིན་དག་པར་བཀྲུ། དེ་ལས་གཞན་གྱི་ཆུ་ཡོད་ན་མ་བཀྲུས་པར་མི་འདུག །ནད་པ་མ་གཏོགས་པ་མི་ན་བར་བཤངས་པའི་འོག་ཏུ་མ་བཀྲུས་པར་སྟན་ལ་མི་འདུག་པ་དང་བཤངས་ཏེ་ཆུ་མེད་པའི་ཡུལ་དུ་མ་བཀྲུས་ཀྱང་ཉེས་མེད། ཆུ་དང་ཕྲད་ན་ཁྲུས་ཤིག །སྨན་གྱི་དངོས་པོ་སྟེ་ཕྲན་ཚེགས་ལ་སོགས་པར་ཆུད་པའོ། །སྨན་གྱི་དངོས་པོ་རྫོགས་སོ།། །།འདི་མན་ཆད་ནི་ལས་ཀྱི་དངོས་པོ་ལ་འཆད་དེ། ཆོ་ག་ལས་འགལ་བའི་ལས་མི་སྐྱེའོ། །དགེ་སློང་གི་ལས་བརྒྱ་རྩ་གཅིག་ལས་ཁ་ཅིག་ནི་གསོལ་བ་དང་ཞུ་བའི་ལས་གཅིག་གིས་བྱ། ཁ་ཅིག་ནི་གཉིས་ཀྱིས་བྱ། ཁ་ཅིག་ནི་གསུམ་གྱིས་བྱ་ཁ་ཅིག་ནི་བཞིས་བྱ་སྟེ་འདུལ་བ་ལས་བྱུང་བ་བཞིན་དུ་མ་བྱས་ན་ལས་སུ་མི་རུང༌། མི་སྙན་པ་ཐོས་ན་མ་ཡིན་ཚུལ་
ནས་བྱུང་བ་དང༌། ཚུལ་དུ་འཇུག་པ་དང་བསྙེན་པར་རྫོགས་པ་ལ་སོགས་པ་བྱ་བའི་ཚེ་ཁྱིམ་པ་དང་དགེ་སྦྱོང་གིས་ཐོས་ནས་ལས་སུ་རུང་སྟེ་དགེ་འདུན་ཐམས་ཅད་ཉེས་བྱས་སོ། །མི་ཆགས་པར་མི་བྱ། ལས་བརྒྱ་རྩ་གཅིག་གི་ལས་གང་བྱ་བའང་རུང་མཁན་པོ་ཤེས་པ་ལ་མ་དྲིས་པར་ལས་བྱས་ན་ལས་སུ་ཡང་མི་རུང་ལ་དགེ་འདུན་ཡང་ཉེས་བྱས་སོ། །གསོལ་བ་དང༌། ལས་བརྒྱ་རྩ་གཅིག་ལས་གསོལ་བའི་ལས་གཅིག་དང་གཉིས་དང་གསུམ་གྱིས་ལས་བྱ་བ་དང༌། ཀློག་པ་དང༌། ཞུ་བ་ལན་གཅིག་གམ་ལན་གཉིས་སམ་ལན་གསུམ་དང༌། སོ་སོར་ཐར་པ་འཆད་པ་དང༌། ཟླ་བ་ཕྱེད་ཅིང་སོ་སོར་ཐར་པ་འཆད་པའི་ཚེ་སེང་གེའི་ཁྲི་ལ་འདུག་སྟེ་འཆད་པ་དང༌། དབྱུང་བ་དེའོ། །ཚུལ་ནས་བྱུང་བ་ལ་སོགས་པ་དེ་ལྟག་ཏུ་ཆོ་ག་བཞིན་དུ་མ་བྱས་ན་ལས་མི་སྐྱེ་ཞེས་བྱ་བ་ནི་འདི་རྣམས་སོ། །ཆོས་མ་ཡིན་པར་མི་བྱ། གཙུག་ལག་ཁང་ནས་བསྐྲད་པ་དང་ཚར་བཅད་ཅིང་བརྒྱད་པ་ལ་སོགས་ཏེ་ལས་གང་བྱའང་རུང་ཐོག་ཏུ་མ་བབ་པར་བྱས་ན་ལས་སུ་ཡང་མི་རུང་ལ་དགེ་འདུན་ཡང་ཉེས་བྱས་སོ། །ཐ་དད་དུ་མ་ཡིན། མཚམས་གཅིག་གི་ནང་ན་ལས་སུ་བྱའོ་ཅོག་དགེ་སློང་ནའང་རུང་དད་པ་མ་བླངས་པར་ལས་སུ་བྱས་ན་ལས་སུའང་མི་རུང་ལ་དགེ་འདུན་ཀྱང་ཉེས་བྱས་སོ། །མང་པོ་མ་ཡིན། དགེ་སྦྱོང་ཡང་རུང་དགེ་སློང་ཡང་རུང་སྟེ་གསུམ་མན་ཆད་ལྷན་ཅིག་འབྱུང་དུ་རུང་གི་བཞི་ཡན་ཆད་རབ་ཏུ་བྱུང་བ་དང་བསྙེན་པར་རྫོགས་པར་མི་རུང་བ་བསྐྲད་པ་དང་བརྒྱད་པ་ཡང་བཞི་ཡན་ཆད་ལ་མི་བྱ། དགེ་འདུན་དུ་མ་གྱུར་པས་མ་ཡིན། དགེ་འདུན་བཞི་ཡན་ཆད་དུ་མ་ཚང་བས་ལས་བརྒྱ་རྩ་གཅིག་ལས་གང་བྱས་ཀྱང་ལས་སུ་མི་རུང༌། དགེ་འདུན་གྱི་ལས་བྱ་ཞེས་བྱ་བ་མ་གཏོགས་པ་ནི་གང་ཟག་གིས་བྱས་ཀྱང་རུང༌། དབྱུང་བ་ནི་ཉི་ཤུ་ལ་སོགས་པ་དགེ་འདུན་གྱིས་སོ། །དགེ་འདུན་གྱི་ལྷག་མ་བྱུང་བ་ནི་དགེ་སློང་ཉི་ཤུ་ཡན་ཆད་མ་འདུས་ན་བྱུང་བར་མི་ཆུད་དོ། །བསྙེན་པར་རྫོགས་པར་ནི་བཅུ་ལ་སོགས་པའོ། །བསྙེན་པར་རྫོགས་པ་ནི་དགེ་སློང་བཅུ་ཡན་ཆད་འདུས་ཏེ་བྱའོ། །མཐའ་འཁོབ་ཏུ་མི་འགྲུབ་ན་ལྔ་པ་འདུལ་བ་འཛིན་པ་ལ་སོགས་པའོ། །ལྟག་ཏུ་ཡུལ་གྱི་དབུས་སུ་ཞེས་བསྔོས་
པ་དེ་ཕན་ཆད་ནི་མཐའ་འཁོབ་ཏུ་བརྩིས་ཏེ་མཐའ་འཁོབ་དེར་དགེ་སློང་འདུལ་བ་འཛིན་པ་གཅིག་དང་ལྔ་ཡན་ཆད་ཀྱིས་བྱར་རུང་སྟེ་དེ་ཡང་གཞན་མེད་ནའོ། །ལྟག་མ་ནི་བཞི་ལ་སོགས་པའོ། །ལྟག་མའི་ལས་གཉིས་མ་གཏོགས་པ་ནི་གཞན་དགེ་སློང་བཞི་ཡན་ཆད་འདུས་པས་བྱར་རུང་ངོ༌། །དགེ་སློང་མའི་ལས་དང་ནི་ཐ་དད་དོ། །དགེ་སློང་མའི་ལས་བྱ་བ་ནི་དགེ་སློང་དང་མི་མཐུན་ཏེ་འོག་ནས་འཆད། འབྱུང་བ་ནའང་དགེ་སློང་གི་དགེ་འདུན་གྱིས་སོ། །དགེ་སློང་མ་ཚུལ་ནས་འབྱུང་བའི་ཚེ་དགེ་འདུན་སྡེ་གཉིས་འཚོགས་ཏེ་བྱུང་ངོ༌། །གསོ་སྦྱོང་ལ་འདུ་བ་འབྱོར་ནས་དེས་སོ། །དགེ་སློང་མའི་གསོ་སྦྱོང་དགེ་སློང་གིས་གནང་ལ་དགེ་སློང་མའང་དགེ་འདུན་དུ་ཚང་ན་གསོ་སྦྱོང་བྱར་རུང་ངོ༌། །དད་པ་དང༌། གསོ་སྦྱིན་རྙེག་པར་དེ་དང་བསྒྲུབ། གནས་བརྟན་མན་ཆད་ལ་བདག་ཅག་གསོ་སྦྱོང་བགྱི་ཞེས་གསོལ་ནས་དགེ་འདུན་གྱིས་དད་པ་བྱིན་ན་གསོ་སྦྱོང་བྱར་རུང༌། མ་བྱིན་ན་མི་རུང༌། དེ་ལ་གཏོགས་པ་གཉིས་ཏེ། ལྟག་མ་ལྟར་དགེ་འདུན་ལ་དགེ་སློང་མ་དད་པ་ལེན་པ་ནི་དགེ་སློང་གཉིས་འདུས་ཏེ་བླངས་ཀྱང་རུང་ངོ༌། །འདི་ནུས་པ་དག་གིས་སོ། །ལྟག་མ་ལྟར་དད་པ་ལེན་པའི་དགེ་སློང་མ་ཆོས་ཤེས་པ་དང་ཚིག་གསལ་བ་དག་གིས་བླང་ངོ༌། །མེད་ན་གཅིག་གིས་ཀྱང་ངོ༌། །ལྟག་མ་ལྟ་བུའི་དགེ་སློང་མ་མཁས་པ་གཉིས་མེད་ན་མཁས་པ་གཅིག་དང་མི་མཁས་པ་གཅིག་དང་གཉིས་ཀྱིས་བླང་དུ་རུང་ངོ༌། །དགེ་འདུན་གྱི་དགེ་སློང་ལ་བསྒོ། གསོ་སྦྱོང་གི་ཚེ་དགེ་སློང་མ་དགེ་འདུན་ལ་དད་པ་གསོལ་དུ་འོངས་པ་དད་པ་སྦྱིན་པའི་ཕྱིར་དགེ་འདུན་གྱིས་དགེ་སློང་གཅིག་ལས་སུ་བསྐོས་ཏེ་གནས་བརྟན་མན་ཆད་ལས་དད་པ་བླངས་ལ་སྒོར་བསྡད། སྒོ་ཕུགས་སུ་དེ་གནས། ལྟག་མ་ལྟར་དད་པ་བླངས་ནས་དགེ་སློང་མའང་དེ་ལེན་དུ་འོང་པའི་ཕྱིར་འཆག་ཅིང་བསྡད་དེ་དགེ་སློང་མ་འོངས་ན་དད་པ་བྱིན་གྱི་སོང་ཤིག་ཅེས་བསྒོ། དད་པ་སྦྱིན་པའི་དགེ་སློང་དང་སྒོ་གང་ན་གནས་པ་འབྲོས་ན་དགེ་སློང་མས་མ་འབྲོས་པར་བཙུན་པ་ཚུར་སྤྱོན་ཞེས་བྱ། དེས་ཀྱང་འདི་ལའོ། །དགེ་སློང་མ་ལྟག་མ་ལྟར་འབྲོས་པ་ཚུར་ཤོག་ཅེས་བྱའོ། །མི་འབྲོས། ལྟག་མ་ལྟར་དགེ་སློང་ཕ་དང་དགེ་སློང་མ་གཉིས་ཀ་མི་འབྲོས། གང་བྲོས་
པར་ཉེས་བྱས། མི་ཤེས་ན་དད་པ་མིང་རུས་དྲི། དད་པ་སྦྱིན་པའི་དགེ་སློང་དང་དད་པ་ལེན་པའི་དགེ་སློང་མ་གཉིས་གཅིག་ལ་གཅིག་ངོ་མི་ཤེས་ན་སུའི་སློབ་མ་དང་མིང་དྲི། གཅིག་ཏུ་ན་དགེ་སློང་དད་པ་བྱིན་པའི་དགེ་སློང་གང་ཡིན་པ་གཞན་ལ་དྲི། མགུ་བར་བྱ་བ་དང་དབྱུང་བ་ལ་གཉིས་འདུས་ཏེའོ། །དགེ་སློང་མ་དགེ་འདུན་གྱི་ལྷག་མ་བྱུང་བ་ཟླ་བ་ཕྱེད་མགུ་བ་བྱ་བ་དང་དབྱུང་བ་དགེ་འདུན་སྡེ་གཉིས་ལས་འབྱུང་ངོ༌། །བསྙེན་པར་རྫོགས་པར་བྱ་བ་ཡང་ངོ༌། །དགེ་སློང་མ་བསྙེན་པར་རྫོགས་པར་བྱ་བ་ཡང་དགེ་འདུན་སྡེ་གཉིས་ལས་རྫོགས་པར་བྱ། འདིར་དེ་དག་བཅུ་གཉིས་ཏེའོ། །ཡུལ་གྱི་དབུས་སུ་དགེ་སློང་མ་བཅུ་གཉིས་ཡན་ཆད་དགེ་འདུན་དུ་བརྩིས་ཏེ་དེས་དགེ་འདུན་གྱི་ལས་བྱའོ། །སྔོམ་པ་གཉིས་དང་སྔོན་དུ་བཅས་པ་དང༌། དགེ་སློང་མ་ཚངས་པ་སྦྱིན་པ་དང་དགེ་སློང་མའི་སྔོམ་པ་སྦྱིན་པ་གཉིས་ཀྱང་ཡུལ་གྱི་དབུས་སུ་དགེ་སློང་མ་བཅུ་གཉིས་ལས་ཉུང་བས་མི་སྦྱིན་ནོ། །ཚད་མེད་པའི་འཁོར་གྱི་གནས་དང༌། དགེ་སློང་མའི་གནས་བརྟན་ལ་གནས་འཆའ་བ་དང་རབ་ཏུ་འབྱུང་བ་ཡང་དགེ་འདུན་གྱིས་མ་གནང་བར་མི་རུང་བ་ཡིན་ཏེ་དགེ་འདུན་གྱི་གྲངས་ནི་དགེ་སློང་མ་བཅུ་གཉིས་ཡན་ཆད་ལ་བྱའོ། །སྡོམ་པ་སྦྱིན་པ་དགེ་འདུན་གྱི་མཐའོ། །དགེ་སློང་མའི་གནས་བརྟན་ལོ་གཉིས་ཀྱི་བར་དུ་བཅད་དེ་སློབ་མ་དབྱུང་དུ་གནང་བའང་དགེ་སློང་མའི་དགེ་འདུན་བཅུ་གཉིས་ཡན་ཆད་ཀྱིས་གནང་ན་གདོད་དབྱུང་བར་བྱའོ། །བརྟག་པ་ནི་ལས་བྱེད་པས་མ་ནུས་ལ། དགེ་སློང་གིས་ཚིག་བྱས་པ་དེ་ཐོས་ནའོ། །ལྟག་མ་དགེ་སློང་མས་ལས་བྱས་པའི་རྣམས་དགེ་སློང་མ་ཆོ་ག་མཁས་པ་མེད་དེ། ལས་བྱེད་མི་ནུས་ན་དགེ་སློང་མཁས་པ་གཅིག་ལ་གསོལ་ཏེ་དགེ་སློང་གིས་ལས་བྱས་ཀྱང་རུང་ངོ༌། །ཁ་རོག་ཏུ་འདུག་ཅེས་པ་ཡན་ཆད་དོ། །ལྟག་ཏུ་དགེ་སློང་མའི་ལས་བྱ་བ་དགེ་སློང་གིས་ལས་བྱས་ཟིན་པའི་འོག་ཏུ་དགེ་སློང་མ་གཅིག་གིས་བཟོད་ན་མ་སྨྲ་བར་འདུག་ཤིག་ཅེས་བྱས་པ་ཙམ་གྱིས་ཀྱང་ལས་སུ་ཆུད་དེ་རུང་ངོ༌། །འཁོར་དུ་མ་འདུག་ན་མ་རྫོགས་པའོ། །བསྙེན་པར་རྫོགས་པ་ལྟ་བུ་ལས་བྱེད་པའི་ཚེ་དགེ་སློང་གཅིག་གིས་དད་པ་སྦྱིན་ཏེ་བཞིས་ལས་བྱས་ན་ནི་ལས་སུ་མི་
རུང་ངོ། །གང་བྱེད་པ་ནི་མ་ཡིན་ནོ། །དགེ་འདུན་གྱི་ལས་བྱ་བ་གསུམ་བཀོད་ལ་གཅིག་གིས་བྱས་ནའང་མི་རུང་ངོ༌། །གཅིག་ཏུ་དགེ་འདུན་གྱི་ལྷག་མ་ཉི་ཤུས་དབྱུང་དགོས་པ་ལ་དགེ་སློང་བཅུ་དགུ་དང་ལྷག་མ་བྱུང་བ་དང་ཉི་ཤུ་ཡོད་ཀྱང་ལས་སུ་མི་རུང་ངོ༌། །དེ་བས་ན་དད་པ་ཀུན་གཙང་བའི་ཆོ་ག་རྫོགས་པ་མེད་དོ། །དགེ་སློང་བཞིས་ལས་བྱེད་པའི་རིགས་པ་ལ་དགེ་སློང་གཅིག་གིས་དད་པ་བྱིན་ཏེ་ཁྱེད་གསུམ་གྱིས་གྱིས་ཤིག་ཅེས་བསྒོ་བའང་མི་རུང་ལ། ལྷག་མ་ཉི་ཤུ་དབྱུང་བ་ལ་གཅིག་གིས་དད་པ་བྱིན་ལ་བཅུ་དགུ་ལས་གྱིས་ཤིག་ཅེས་བྱས་ཀྱང་ལས་སུ་མི་རུང་ངོ༌། །འདི་མི་བླང༌། དགེ་སློང་ལྷག་མ་བྱུང་བ་ཉི་ཤུར་ཚང་སྟེ་དགེ་སློང་གུད་ན་གཉིས་གསུམ་ཞིག་ཡོད་ན་དེའི་དད་པ་ལེན་པ་ཉི་ཤུའི་ནང་མི་གཏོང༌། ཉི་ཤུ་ལས་ལྷག་ན་གཅིག་གར་ལས་དབྱུང་བར་མི་བསྒོ། ཚུལ་ནས་བྱུང་བའི་དགེ་སློང་བཞི་ཡོད་ན་གཅིག་ལས་བྱེད་པར་མི་བསྒོ། དགེ་འདུན་དུ་མ་ཚང་ན་ལས་སུ་མི་རུང་ངོ༌། །བསྙེན་པར་མ་རྫོགས་པ་དང་ཞིག་པ་དང་མཚམས་མེད་པ་བྱས་པ་དང༌། སྡིག་པ་ལྟ་བ་དང༌། ས་གཞན་དུ་གནས་པ་དང༌། སོ་སོར་གནས་པ་དག་གིས་མ་ཡིན་ནོ། །ལྟག་མ་ལྟར་དགེ་འདུན་གྱི་གྲངས་སུ་མ་ཚང་པ་ལ་མིང་གིས་སྨོས་པ་འདི་རྣམས་ཀྱི་དགེ་འདུན་གྱི་གྲངས་སུ་མི་བསྣན་ཏོ། །འཁྲུལ་པ་དང་བཅས་པ་ཡང་ངོ༌། །ཚུལ་ཁྲིམས་དང་མི་ལྡན་པས་དགེ་འདུན་གྱི་གྲངས་མ་ཚང་བར་བསྣན་ཀྱང་དགེ་འདུན་གྱི་གྲངས་སུ་མི་ཆུད་དེ་སཱུ་ཏྲ་འོག་མ་ལས་འཆད་དོ། །སྡོམ་པར་བྱེད་པས་ཀྱང་པོ། །ལྟག་མ་མན་ཆད་ཉེས་བྱས་ཡན་ཆད་གཅིག་ཡོད་ན་དགེ་འདུན་གྱི་གྲངས་སུ་བསྣན་དུ་མི་རུང་ཡིད་ལ་ཉེས་པ་ཞིག་བྱས་པའང་རུང༌། བསྔོས་པས་ན་ཚང་བར་འགྱུར་རོ། །ལྟག་མ་ལྟར་ཉེས་པ་བྱུང་བ་ཅི་ཉེས་པ་དམིགས་ནས་གྲོགས་ལ་མཐོལ་ཏེ་དཔང་བཙུགས་ན་དགེ་འདུན་གྱི་གྲངས་སུ་ཆུད་དོ། །གཅིག་ཏུ་ལྟུང་བ་སྤྱིར་བསྔོ་ནའང་རུང༌། ནུས་ན་མ་ཡིན། ལྟག་མ་མན་ཆད་ཡིད་ཀྱི་ཉེས་བྱས་ཡན་ཆད་ལ་ལྷག་མ་དང་སྤངས་པ་གཉིས་ནི་བཏགས་པ་བྱས་པས་ཆོག །ལྟུང་བ་མན་ཆད་ནི་འཕྲལ་དུ་མཐོལ་ཏེ་གདོད་དགེ་འདུན་གྲལ་དུ་འཇུག་གོ །དེའི་ཚེ་ནུབ་པ་འབའ་ཞིག་གི་ལྟུང་བ་
དང་སོ་སོར་མཐོལ་བ་དང་ཉེས་བྱས་པ་དང༌། འཕྲལ་དུ་མཐོལ་དུ་རུང་བ་ནི་དགུ་བཅུ་ལྟུང་བ་དང༌། སོ་སོར་མཐོལ་བ་དང་ཉེས་བྱས་པ་དང་མིང་གིས་སྨོས་པ་འདི་རྣམས་འཕྲལ་དུ་མཐོལ་དུ་རུང་ངོ༌། །སླར་བྱ་བ་བླངས་ཡོད་ན་བཤགས་པ་ཙམ་གྱི་ཕྱིར་རོ། །ཉེས་བྱས་ཡན་ཆད་མཐོལ་བ་ནི་བདག་གི་ཉེས་བྱས་འབྱུང་བ་དང་མི་མཐུན་པའི་དགེ་སློང་མཐོལ་ཚངས་བྱས་ཏེ་གཙང་མར་གྱུར་པའི་དགེ་སློང་ལ་མཐོལ་དུ་རུང་ངོ༌། །ཅི་ལྟར་འདུ་ཤེས་པའི་བྱུང་བའི་ནན་ཏན་བྱའོ། །དགེ་སློང་གཅིག་ལ་ལས་བྱ་བའི་ཚེ་ཕམ་པ་འབྱུང་བར་ཤེས་སམ་དོགས་ན་ཕྱིར་ཕྱུང་སྟེ་བཏང༌། ལྷག་མ་ཞིག་བྱུང་ན་མཐོལ་ལམ་མ་མཐོལ་དྲིས་ཏེ་མ་མཐོལ་ན་མཐོལ་དུ་བཅུག་སྟེ་དགེ་འདུན་ནང་དུ་གཞུག །རིག་པ་ནི་བྱ་བ་དུ་མ་གཅིག་པུས་མ་རུང་བར་འགྱུར་བ་དང་མ་རུང་བར་མི་འགྱུར་བ་དང༌། ལྟག་མ་ལྟར་དགེ་འདུན་གྱིས་མཐོང་བ་དང་ཐོས་པ་དང་དོགས་པ་ལས་ཕམ་པ་བྱུང་ནའང་བསྐྲད་པའི་རིགས་སོ། །ལྷག་མ་ཞིག་བྱུང་ནའང་མཐོལ་དུ་བཅུག་ཏེ་དགེ་འདུན་ནང་དུ་གཞུག་པའི་རིགས་སོ། །ལྟུང་བ་མན་ཆད་ཀྱི་མཐོལ་ཚངས་བྱེད་དུ་བཅུག །དེ་དག་གིས་མི་བྱ། དགེ་སློང་དང་ཁྱིམ་པ་དང་ཆད་པ་བཅད་པ་དགེ་འདུན་གྱི་གྲངས་སུ་མི་གཞུག་ལྷག་མ་བྱེད་པའི་ཚེའང་བཤད། དགེ་འདུན་གྱི་ལྷག་མའི་ཆད་པ་དང་མགུ་བ་བྱེད་པའི་ཚེ་སོ་སོར་ཐར་པ་འཆད་པའི་ཚེ་དགེ་སློང་གཞན་ཁ་ཐོན་མི་ཤེས་ན་འཆད་པ་དེ་ཁ་ཐོན་བྱེད་དུ་བཅུག་ཀྱང་ཉེས་མེད། འདི་ལས་གཞན་དུ་འདི་ཐོས་པར་བྱ། ལས་བརྒྱ་རྩ་གཅིག་ལས་སོ་སོར་ཐར་པ་འཆད་པ་དང་འབྱུང་བ་གཉིས་ནི་ཕམ་པ་བྱུང་བ་དང་ཆད་པས་བཅད་པ་དང་སོ་སོར་གནས་པ་དང་བསྐྲད་པ་དང་འདི་བཞིས་མཉན་དུ་རུང་ངོ༌། །མ་སྤངས་པ་དང༌། རིགས་སུན་པ་དང་དགེ་འདུན་ལ་ཐལ་མོ་རྒོལ་བ་དང་དགེ་འདུན་ལྷག་མ་ལྟག་ཏུ་བྱེད་ཅིང་ཆད་པ་བྱེད་དུ་མི་བཏུབ་པ་ཁྱིམ་པ་དག་ཆོས་སློབ་པ་ལ་ཐལ་མོ་རྒོལ་ཅིང་བསོད་ནམས་མེད་ཅེས་ཟེར་དང་འདི་བཞིན་ཕྱིན་ཆད་མི་བྱེད་ཅེས་ཟེར་ན་ལས་བརྒྱ་རྩ་གཅིག་ཉན་རུང་ངོ༌། །མ་ལོག་པ་མ་གཏོགས་ཏེའོ། །ལྟག་མ་ལྟར་ཆད་པས་བཅད་པ་ཆད་པ་བྱེད་དུ་མ་བཏུབ་སྟེ་སོང་པ་ནི་མ་གཏོགས། སྤངས་ཀྱང་བདག་གིས་ལས་ལའོ། །ལྟག་མ་ལྟར་
སྤངས་པ་རྣམ་བཞི་བཟོད་པ་གསོལ། ཕྱིན་ཆད་མི་བགྱིད་ཅེས་ཁས་བླངས་ནས་དེ་རྣམས་དགྲོལ་ཞིང་བླངས་པའི་ལས་བྱ་བའི་ནང་དུ་ཆུད་པའི་ཉིད་ཀྱང་ནང་དུ་གཞུག་གོ །ནང་དུ་དྲི་བའི་ཕྱིར་གསོལ་བ་ལ་སོགས་པ་སྟེ་བསྙེན་པར་རྫོགས་པར་བྱ་བ་ན་ཡང་ངོ༌། །དགེ་སློང་བདག་བསྙེན་པར་རྫོགས་པའི་ཚེ་ནི་ལས་དེའི་ནང་དུ་འཇུག་ཏུ་རུང་ངོ༌། །མངོན་སུམ་དུ་བ་ནི་མིག་ལམ་དུ་བཞག་ལ་བསྙེན་པ་ཆུད་པར་བྱ་བ་དེ་བྱ་བས་སྒྲུབ། དགེ་སྦྱོང་ཞིག་ཉེས་པ་བྱས་ཀྱང་བར་དུ་མི་གཅོད་དོ་ཞེས་ཟེར་བ་དེ་དགེ་འདུན་མཐོང་ཙམ་དུ་མིག་རྒྱང་དུ་བཞག་སྟེ་ལས་པའི་དགེ་སློང་གཅིག་གིས་ཁྱོད་མཚན་མ་བཏང་ངམ་མ་བཏང་ལན་གསུམ་དུ་བསྐོས་ཏེ་མཚན་མ་བཏང་ན་ནི་ལེགས། དེ་སྟེ་ཡང་མཚན་མ་མ་བཏང་ན་གདོད་བསྐྲད་དོ། །མངོན་སུམ་དུ་མི་འགྱུར་བ་ནི་གཙུག་ལག་ཁང་དང༌། དགེ་སློང་དང་དགེ་སྦྱོང་ཆོས་ལོག་པ་ལ་བལྟས་ན་དེའི་ཁྱིམ་དུ་དགེ་འདུན་འོག་ཁྲིམས་བཅས་ཏེ་མི་འདོང་བ་ནི་མི་དེ་མདུན་དུ་གཞག་སྟེ་མི་བྱའི་ལྐོག་ཏུ་བྱའོ། །དགེ་སློང་སྨྱོན་པ་དགེ་འདུན་གྱི་དད་པ་བྱིན་ན་ལས་བྱ་བའི་ཚེ་དད་པ་མ་བླངས་ཀྱང་རུང༌། དད་པ་ནི་སྨྱོན་པས་མ་ཐོས་པར་བྱ། ཕྱག་མི་བྱ་བ་དང་དགེ་སློང་དགེ་སློང་མའི་ཁྱིམ་དུ་རྟག་ཏུ་འགྲོ་བ་མ་སོང་ཤིག་པར་ལན་གསུམ་དུ་བསྒོས་ཏེ་མ་བཏུབ་ན་བསྐྲད་པ་ལ་དགེ་སློང་མས་ཕྱག་མི་བྱ་བར་བྱ་བ་ཡང་མ་ཐོས་པར་བྱ། གཏམ་མི་བྱ་བ་དང༌། དགེ་སློང་དང་དགེ་སྦྱོང་དགེ་འདུན་ལ་འཐབ་མོ་རྒོལ་བ་དེ་དང་གཏམ་མི་བྱ་བར་དམ་བཅའ་བ་ཡང་དེ་མ་ཐོས་པར་ལྐོག་ཏུ་བྱ། མི་སྤྱད་པའི་སྡོམ་པའོ། །ལྟག་མ་ལྟ་བུའི་དགེ་སློང་དང་མི་སྨྲ་བ་ནི་ཟས་དང་ཆོས་གཉིས་མི་སྤྱད་དེ་ཟས་མི་སྤྱད་པ་ནི་གྲལ་གཅིག་ལ་མི་འདུག །ཆོས་མི་སྤྱད་པ་ནི་ཚུལ་དུ་འཇུག་པ་དང་གསོ་སྦྱིན་དང་སོ་སོར་ཐར་པ་འཆད་པ་ནང་དུ་མི་གཞུག ། དེའི་ཕྱིར་མ་གསོལ་བར་ཀློག་པར་མི་བྱ། གསོལ་བ་དང་ཞུ་བའི་ལས་བྱ་བ་གསོལ་བ་དང་ཞུ་བ་གཅིག་བྱས་ལ་གཅིག་མ་བྱས་ན་ལས་སུ་མི་རུང་སྟེ་གཉིས་ཀ་བྱ་དགོས་སོ། །དེའི་མཚམས་སུ་ཆུད་ལ་ཁ་བསྐང་བ་རིགས་ན་ལུས་སམ་དད་པས་འཁོད་པར་
མ་ཞུགས་ནའོ། །གསོལ་བ་དང་ཞུ་བའི་ལས་གཉིས་སམ་གསུམ་གྱིས་ལས་བྱ་བ་གང་ཡང་རུང་སྟེ་ལྟག་ཏུ་སྨོས་པའི་ཚུལ་ཁྲིམས་དང་མི་ལྡན་པ་རྣམས་ནི་མ་གཏོགས་ཏེ་ཚུལ་ཁྲིམས་དང་ལྡན་པའི་དགེ་སློང་མཚམས་ཀྱི་ནང་ན་འདུག་ལ་དད་པ་མ་བླངས་དགེ་འདུན་ནང་དུའང་མི་འདུས། མཚམས་ཀྱི་ཕྱི་རོལ་དུ་ཡང་མ་སོང་བར་དགེ་འདུན་གྱི་ལས་བྱས་ན་ལས་སུ་མི་རུང་ངོ༌། །ལོག་པར་བརྗོད་ན་ཡང་ངོ༌། །དགེ་སློང་གིས་བསྐྲད་པ་རྣམས་བདུན་གང་ཡང་རུང་སྟེ་བསྐྲད་པའི་ཚེ་ཡོན་ཏན་དང་མི་ལྡན་པའི་དགེ་སློང་དང་དགེ་སྦྱོང་ཞིག་ན་རེ་བསྐྲད་པའི་མི་རིགས་ཞེས་ཟེར་ན་མི་བཙན་གྱི་ཡོན་ཏན་དང་ལྡན་པས་བསྐྲད་པའི་མི་རིགས་ཞེས་ཟེར་ན་ལས་སུ་མི་རུང་ངོ༌། །གང་གིས་ལས་པ་དེ་ལས་གཞན་དུ་ནའོ། །ལྟག་མ་ལྟར་བསྐྲད་པའི་ལས་བྱེད་པའི་ཚེ་བསྐྲད་དེ་བཏང་བའི་དགེ་སློང་དེ་ཉིད་ན་རེ་ང་བསྐྲད་པ་མི་རིགས་ཞེས་ཟེར་བ་ནི་མི་བཙན་གྱི་ཡོན་ཏན་དང་ལྡན་པ་ནི་བསྐྲད་དུ་མི་རུང་ཞེས་ཟེར་བའི་ཚིག་བཙན་ཏེ་མི་བསྐྲད་དོ། །དེ་སྟེ་ལོག་པ་དང༌། དབྱར་ཚ་བའི་ཚེ་མེ་བུས་པ་ནི་ལོག་པའོ། །དགུན་གྲང་བའི་ཚེ་མེ་བུས་པ་ནི་མ་ལོག་པའོ། །དེ་བཞིན་དུ་འོག་མའི་རྣམས་ཀྱང་རིགས་མི་རིགས་སུ་བྱའོ། །ཆོས་དང༌། བསྐྲད་པར་མི་རིགས་པ་ནི་མི་བསྐྲད། སྤྱོད་ལམ་མ་འཁྲུལ་བ་ནི། དགེ་འདུན་ལས་བྱེད་པའི་ནང་ནས་དགེ་སློང་གཅིག་ལུས་མི་གཡོ་བར་ཁས་བསྐྲད་པར་མི་རིགས་སོ་ཞེས་ཟེར་ན་དེའི་ཚིག་ལྟར་བྱའམ་མི་བྱ་བ་ནི་འོག་ནས་འཆད་དོ། །རང་བཞིན་དུ་གནས་མ། ལྟག་མའི་སྐད་དུ་སྨྲ་བའི་དགེ་སློང་དེའི་རང་གིས་དུལ་ཞིང་ཞི་བའི་ལས་སྨྲས་ན་དེའི་ཚིག་ལྟར་བྱ། ཚིག་ལ་རུབ་པ་སྟེ། ལྟག་མའི་སྐད་དུ་སྨྲ་པའི་དགེ་སློང་དེ་ཚིག་ཀྱལ་བ་ཅན་ནམ་ཕྲ་མ་ཅན་ཉན་པ་མ་ཡིན་གྱི་སྔོན་ཆད་སྨྲས་པའང་ཚིག་ལས་མི་འགལ་བ་ཡིན་ན་དེའི་ཚིག་ལྟར་བྱ། མངོན་པར་མི་ཤེས་པ་དང༌། དགེ་སློང་ལྟག་མ་སྐད་དུ་ཟེར་བ་དེ་ཅིའང་མི་ཤེས་པ་ཞིག་ཟེར་ན་དེའི་ཚིག་ལྟར་མི་བྱའི་སྡེ་སྣོད་གསུམ་ཤེས་པའི་ཚིག་ལྟར་བྱའོ། །ཁོན་ཆེན་མ་གཏོགས་ཏེ་ཐ་དད་པའོ། །བསྙེན་པར་རྫོགས་པར་བསྐྲད་
པའི་ལས་གང་བྱའང་རུང་སྟེ་དགེ་སློང་གཅིག་ན་རེ་ལས་འདི་ལྟར་བྱར་མི་རུང་ངོ་ཞེས་ཟེར་ན་དེའི་ཚིག་ལྟར་བྱས་ཏེ་ལས་སུ་མི་རུང་ངོ༌། །བརྫུན་དུ་སྨྲ་བས་བཤམས་པའི་ཚིག་བཤམས་པ་མི་རུང་བའི་ཚིག་གོ །སཱུ་ཏྲ་ལྟག་མ་ལྟར་ཚིག་ལ་རུབ་པ་ནི་དེའི་ཚིག་ལྟར་མཉན། བརྫུན་དང་ལྟག་ཆོད་དང་ཕྲ་མ་ཟེར་བ་ལྟ་བུ་ནི་ཚིག་ལ་མི་རུབ་པའོ། །ཕྲ་མ་དང་ཚིག་ཀྱལ་པ་དང་ངག་རྩུབ་པོ་ཡང་ངོ༌། །དེ་སྐད་ཟེར་བ་རྣམ་ཀྱང་ཚིག་ལ་མི་རུབ་སྟེ། འདི་སྐད་ཟེར་བའི་མི་དེའི་ཚིག་ནི་མི་མཉན་དེ་ལས་སུ་རུང་ངོ༌། །རང་བཞིན་དུ་མི་གནས་པ་ནི་འདི་དང་གཞན་དུ་མི་བྱ་བ་བྱེད་པ་མ་བྱས་པའོ། །དགེ་འདུན་གྱི་ལྷག་མ་མན་ཆད་ཉེས་བྱས་ཡན་ཆད་ལ་མི་སྲུང་ཞིང་ཡལ་བར་གཏོང་བ་ཞིག་ན་རེ་ལས་འདི་བྱར་མི་རུང་ཞེས་ཟེར་བའང་ལས་སུ་རུང་སྟེ་དེའི་ཚིག་མི་བཙན་ནོ། །སྤྱོད་ལམ་ལས་འཁྲུལ་བ་ནི་འགྲོ་བའི་སེམས་བརྟན་ཏེ་དེ་བཏང་ནའོ། །དགེ་འདུན་འདུས་ཏེ་བསྐྲད་པ་ལ་སོགས་པའི་ལས་ཤིག་བྱེད་ན་དགེ་སློང་གཅིག་ལྟག་མ་ལྟར་ས་ལ་འདུག་སྟེ་བསྐྲད་པའི་རིགས་སོ་ཞེས་ཟེར་བ་ནི་བཙན་གྱི། ཁྲོས་ཏེ་ལངས་ནས་བསྐྲད་པའི་མི་རིགས་སོ་ཞེས་ཟེར་བ་ནི་དགེ་སློང་དེ་ཚུལ་ཁྲིམས་དང་ལྡན་དུ་ཟིན་ཀྱང་དེའི་ཚིག་མི་བཙན་གྱི་བསྐྲད་པའི་ལས་སུ་རུང་ངོ༌། །འགྲེངས་སྟེ་དེའི་ལུས་མ་གཡོས་པར་ཟེར་ན་དེའི་ཚིག་བཙན་ནོ། །ལྟ་བ་དགེ་འདུན་ལ་བཤགས། གསོ་སྦྱོང་དང་ཚུལ་ནས་འཇུག་ལ་སོགས་པ་དགེ་སློང་གཅིག་ན་རེ་ལས་འདི་བྱེད་པ་ལ་ཁོ་བོ་མ་རུངས་སོ་ཞེས་ཟེར་ན་ལས་ཆོ་ག་བཞིན་དུ་བྱས་བ་ལ་ཟེར་ན་ཉེས་མེད་བྱི་ཤུ་ཏས་ནི་ཆོས་ལོག་པ་ལྟ་ནས་སླར་ཡང་དགེ་འདུན་ལ་བཤགས་ཞེས་བཤད། གཞན་ལ་མ་ཡིན་ལྟག་མ་ལྟར་ལས་བྱེད་པའི་སྤྱིར་ནི་མི་ཟེར་གྱི་གང་ཟག་གཅིག་ལ་ཟེར་ན་ཉེས་བྱས། བྱི་ཤུ་ཏས་ནི་ལོག་པ་ལ་བལྟས་གང་ཟག་ལ་བཤགས་པ་མ་ཡིན་ཞེས་བཤད། བསྙེན་པར་མ་རྫོགས་པ་ལ་མ་ཡིན། ལྟག་མ་ལྟར་དགེ་འདུན་གྱི་ལས་བྱེད་པ་ལ་མ་རངས་ཞེས་ཟེར་བ་དགེ་སྦྱོང་དང་ཁྱིམ་པ་ལ་བྱས་ན་ཉེས་བྱས། བསྐྲད་པར་མི་རིགས་པ་ལ་མ་ཡིན། ལྟག་ཏུ་དགེ་འདུན་གྱི་ལས་
བྱ་བའི་ཚེ་དགེ་འདུན་གྱི་གྲངས་སུ་མི་ཆུད་པའི་རྣམས་ལ་ལྟག་མ་སྐད་དུ་དགེ་འདུན་གྱི་ལས་བྱེད་པ་ལ་མ་རངས་སོ་ཞེས་སྨྲ་ནའང་ཉེས་བྱས། ལྷག་མ་མེད་པ་མ་ཡིན། ཕས་ཕམ་པ་བྱུང་བ་ལ་ལྟག་མ་སྐད་དུ་བརྗོད་ནའང་ཉེས་བྱས། བསྐོས་པ་ཕྱུང་སྟེ་རབ་ཏུ་དགེ་བ་དང་རབ་ཏུ་མང་བ་བྱེད་པ་བསྐོ། གང་ཟག་བཅུ་གཉིས་ཀྱི་ལས་སུ་བསྐོས་པ་གང་ཡང་རུང་སྟེ་ལས་བྱེད་པར་མ་གུས་སམ་ལས་བྱེད་མི་ནུས་ན་ནུས་པ་མཁས་པ་ལས་སྔ་མ་ཕྱུང་སྟེ་དེ་བསྐོ། དུས་དང་ཡང་དང་ཡང་ངམ་གཞན་གཅད་པར་མི་བྱ། ལྷག་མ་ལྟར་གཙུག་ལག་ཁང་སྐྱོང་གི་ལྟ་བུ་ནུས་པ་ཞིག་ན་ལོ་གཉིས་གསུམ་ཙམ་ཞིག་ཏུ་གྱིས་ཤིག་པར་མི་བསྐོའི་ཅི་ནུས་པར་གྱིས་ཤིག་ཅེས་བྱ། ལས་ནུས་པ་ཞིག་ན་ཁྱོད་ཀྱིས་ཡང་བྱར་མི་རུང་ངོ་ཞེས་དུས་བསྣུར་ཞིང་ནན་གྱིས་མི་གནན། གཞན་དུ་ནམ་དགོས་པ་ན་སྤངས་པ་སྦྱིན། གཙུག་ལག་ཁང་སྐྱོང་ལྟ་བུ་ཞིག་ལས་ནུས་པ་ཡོད་ན་དེ་ན་རེ་ཁོ་བོ་གཞན་ལས་ཅིའང་མི་བསྒོ་ཞིང་གཡོག་དང་ཁང་བུ་སྦྱིན་ན་ལས་རྟག་ཏུ་བྱའོ་ཞེས་ཟེར་ན་གཡོག་དང་ཁང་བུ་སྦྱིན་ནོ། །བསྐོས་པ་མེད་ན་ཚུལ་ཤིང་བཟུང་ཞིང་བསྐོ། །དགེ་སློང་ཡོན་བདག་གིས་ཡོན་བྱིན་ཏེ་ནོར་འགོད་པའི་ཚེ་རྟག་པར་འགོད་པའི་ལས་པ་དེ་མེད་ན་ནོར་སོ་སོར་མཉམ་དུ་བགོ་སྟེ་དགེ་སློང་དུ་ཡོད་པའི་མིང་བྲིས་ལ་མདུང་བྱས་ཏེ་སོ་སོར་བགོ །གང་བསྐང་དུ་མི་རིགས་པ་ཚུལ་ཤིང་འབྲིམ་པ་ལ་ཡང་ངོ༌། །ལྟག་ཏུ་མདུང་སྦྱིན་པ་དགེ་སྦྱོང་དང་ཚུལ་ཁྲིམས་ལས་འགལ་བའི་རྣམས་ལས་མ་གཏོགས་པར་དགེ་སློང་ཚུལ་ཁྲིམས་དང་ལྡན་པ་གཅིག་གིས་གཡོག་སྦྱིན་ནོ། །མི་རིགས་པས་ཚུལ་ཤིང་འབྲིམ་པ་དབྱེན་དུ་མི་སྐྱེ། དགེ་འདུན་སྡེ་གཅིག་ལས་ཁ་ཅིག་ཆོས་ལོག་པ་ལ་བལྟས་ན། དགེ་སློང་གཅིག་གིས་ཚུལ་ཤིང་ཁྱེར་ཏེ་ཁྱེད་སུ་ལོག་པ་ལ་ཕྱོགས་པ་ནི་ཚུལ་ཤིང་འདི་ལོང་ཤིག་ཅེས་བསྒོ་ན་ཚུལ་ཁྲིམས་དང་མི་ལྡན་པས་ཚུལ་ཤིང་བླངས་ཀྱང་མི་ཆུད་ཚུལ་དང་ལྡན་པས་ཚུལ་ཤིང་བླངས་ན་དབྱེན་དུ་འགྱུར་རོ། །ལས་ཀྱི་དངོས་པོའོ། །ལས་བསྐང་གི་དངོས་པོ་སྟེ་རྫོགས་སོ།། །།
ལྷག་པར་བླགས་པ་མ་བྱས་པ་མ་ཡིན་ནོ། །གསོལ་བ་དང་ཞུ་བའི་ལས་དུས་བྱ་དགོས་པ་ལས་གྲངས་ལས་ལྷག་པར་བརྗོད་པ་ནི་ཉེས་མེད་དོ། །བྲིན་མ་བྱས་པའོ། །གསོལ་བ་དང་ཞུ་བའི་ལས་གྲངས་དུས་བྱ་བའི་རིག་པ་ནས་གྲངས་དེར་མ་ཚང་བར་ལས་བྱས་ན་ལས་སུ་མི་རུང་ངོ༌། །བྱེད་པ་ནི་སོང་ན་མ་རྫོགས་པའི་ལེའུ་དཀྲུགས་པའོ། །གསོལ་བ་དང་ཞུ་བའི་ལས་བྱ་བའི་ཕྱིར་རིགས་པ་ལས་གསོལ་བ་གཉིས་པ་དང་ཞུ་བ་གཅིག་ལས་བྱས་ཏེ། གསོལ་བ་གཅིག་བྱེད་པའི་ཚེ་གྲལ་ནས་དགེ་འདུན་ཁ་ཅིག་ལངས་ནས་དོང་ན་ལས་སུ་མི་རུང་ངོ༌། །རྫོགས་ཀྱང་དེའི་ལས་ཀྱི་དགེ་འདུན་གྱི་ཚད་དུ་འདུག་པ་མ་ལུས་ནའོ། །དགེ་འདུན་གྱི་ལྷག་མ་དབྱུང་བ་དང་བསྙེན་པར་རྫོགས་པའི་ལས་བྱེད་པ་སྔར་དགེ་འདུན་གྲངས་ཆང་ཞིང་འདུག་པ་ལས་གསོལ་བ་དང་ཞུ་བ་གཉིས་བྱས་ཏེ། ལས་མཇུག་མ་རྫོགས་པར་གྲལ་ནས་ཁ་ཅིག་དད་པ་བྱིན་ཏེ། སོང་ན་ཕྱི་མ་དགེ་འདུན་དུ་མ་ཚང་ན་ལས་སུ་མི་རུང་ངོ༌། །ལུས་ན་མ་ཡིན། དགེ་འདུན་གྱི་ལྷག་མ་དབྱུང་བ་ལྟར་དགེ་འདུན་ཉི་ཤུ་རྩ་ཞིག་འདུས་ཏེ། འདུག་པ་ལས་ལས་ཀྱི་མགོ་བརྩམས་ཏེ་མ་ཟིན་པར་གྲལ་ན་ཉི་ཤུ་ནི་ལུས་དོང་བ་རྣམས་ཀྱིས་དད་པ་མ་སྦྱིན་ནའང་ལས་སུ་མི་རུང༌། ཆུར་བསྣན་ནས་དེ་སྟེ་ཡང་བྱ་བར་འདོད་ན་དགེ་འདུན་ལ་ཚིག་གིས་ཞུ་བ་ནི་ཡང་བཙུན་པ་དག་བསྟན་དང་གསོལ་བ་བགྱིའོ་ཞེས་སོ། །ལྟག་མ་ལྟར་དགེ་འདུན་གྱི་ལྷག་མ་བྱུང་བ་ལ་དགེ་འདུན་ཉི་ཤུ་འདུས་ནས་ལས་ཀྱི་མགོ་བརྩམས་ཏེ། དགེ་སློང་གཉིས་སམ་གསུམ་ལངས་ཏེ། དོང་ནས་ཕྱི་མས་ལས་བྱས་ན་ལས་སུ་མི་རུང་སྟེ། སྒོར་སོང་བའི་དགེ་སློང་གཉིས་སླར་འོངས་ན་གཅིག་འདི་སྐད་དུ་བརྗོད་དེ་ལས་སླར་བྱའོ། །བཙུན་པའི་རྣམས་བདག་ཅག་གིས་ལས་བྱ་བ་ནི་ལས་སུ་མ་རུང་སྟེང་གདོད་སླར་བགྱིའོ་ཞེས་བྱོས་ཤིག །སྤངས་པའི་ཕྱིར་བསྒོ་བ་མ་རུང་པར་བྱ་བ་དང༌། དགེ་འདུན་གྱི་དབྱེན་དང་དེའི་རྗེས་སུ་ཕྱོགས་པ་དང་རིགས་སུན་པ་དང་ངག་དཀའ་བ་དང༌། བར་དུ་གཅོད་པ་ལ་བར་དུ་མི་གཅོད་ཅེས་ཟེར་པའི་དགེ་སློང་དང་དགེ་སྦྱོང་གཉིས་དང་དགེ་འདུན་གྱིས་བསྐྲད་པའི་དགེ་སློང་སུ་ལ་ནན་དས་བསྡུས་པ་ལ་དེ་ལྟར་མ་བྱེད་ཅེས་བསྒོ་བ་དང༌། དགེ་སློང་མ་ཆོས་དང་འདུལ་བ་ལ་སོགས་པ་འབུལ་ལོ་ཞེས་
ལྐོག་ནས་འཁྱལ་བའང་དགེ་སློང་མའི་དགེ་འདུན་གྱིས་དེ་སྐད་མ་ཟེར་ཞེས་བསྒོ་བ་དང༌། དེའི་རང་བཞིན་ཚོལ་བ་དང༌། དགེ་སློང་ལ་ལ་ཞིག་ལྟུང་བ་བྱུང་སྟེ་ལྔ་ལས་གང་བྱུང་གཏོལ་མེད་དེ། ཐེ་ཚོམ་ཟ་ན་གང་བྱུང་རྟོག་ཏུ་གཞུག་པའི་ཕྱིར་ཟླ་བ་འགའ་བཞག་པ་དང༌། སློབ་པ་དང༌། དགེ་སློང་ངམ་དགེ་སློང་མའི་སྔོམ་པ་སྦྱིན་པ་དང༌། དགེ་སློང་གིས་མི་ཚངས་པར་སྤྱོད་པ་ལས་དགའ་བར་མ་ཚོར་ཏེ་མདོ་བཞིན་དགེ་འདུན་གྱི་གམ་དུ་མཐོལ་ཏེ་སློབ་པ་སྦྱིན་པ་དང༌། འདུ་བ་དང༌། དགེ་འདུན་དགེ་མི་དགེ་སྡེ་གཉིས་སུ་གྱུར་པ་ལས་སླར་སྡུམ་པ་དང༌། དེའི་གསོ་སྦྱོང་དང༌། གསོ་སྦྱོང་གི་ཚེ་སེང་གེའི་ཁྲི་དང་ཆག་ཆག་དང་ཕྱག་དར་བྱེད་པའི་དགེ་སློང་བསྒོ་བ་དང༌། མུར་འདུག་བཅངས་པ་དང༌། མུར་འདུག་རབ་ཏུ་བཅངས་པ་དང་འབྱུང་བར་འོངས་པའི་ཚེ། མུར་འདུག་གི་ཆོས་སྨད་ནས་མ་དད་པར་གྱུར་པ་ཟླ་བ་འགའ་དགེ་འདུན་གྱི་འཁོར་དུ་བཞག་ཅིང་བརྟག་པ་དང༌། དེ་ལས་གཞན་པ་དང་མགུ་བར་བྱེད་པ་དང༌། དགེ་འདུན་གྱི་ལྷག་མ་བྱས་ནས་ཞག་དྲུག་ཏུ་མགུ་བ་བྱེད་དུ་གཞུག་པ་དང་མགུ་བར་བྱེད་པའི་ཚེ། དགེ་འདུན་གྱི་ལྷག་མ་བྱུང་ནས་ཆད་པ་དང་མགུ་བ་བྱེད་དུ་གཞུག་པ་དང༌། རྩ་བ་ནས་བརྩམས་པ་དང༌། ལྷག་མ་བཅབས་པའི་ཆད་པ་བྱེད་དུ་གཞུག་པ་དང་བཅབས་པའི་ཆད་པ་བྱེད་པའི་ཚེ། ཁུ་བ་བྱུང་ནས་རྩ་བའི་ཆད་པ་བྱེད་དུ་གཞུག་པ་དང༌། རྩ་བའི་ཆད་པ་བྱེད་པའི་ཚེ་ཁུ་བ་ཕྱུང་ནས་ཡང་རྩ་བའི་ཆད་པ་བྱེད་དུ་གཞུག་པ་དང༌། དྲན་པ་དང༌། དྲབ་བྱ་མ་ལྱ་པུད་ཏྲ་ལ་མ་ཏྲི་བུ་མི་ནས་བསྐུར་བའི་ཚེ་དྲབ་བྱ་མ་ལྱ་པུད་ཏྲས་མི་དྲན་ནོ་ཞེས་གསོལ་པ་ལ་ཚངས་པ་སྦྱིན་པ་དང༌། མི་གླེན་པ་ལས་འདུལ་བ་སྦྱིན་པ་དང༌། དགེ་སློང་སྨྱོན་པར་གྱུར་པ་ལ་ཕྱིས་སྨྱོ་བ་བྱང་སྟེ། དགེ་འདུན་གྱི་ནང་དུ་གཞུག་པ་དང༌། བསྙེན་པར་རྫོགས་པར་བྱེད་པ་དང༌། བསྙེན་པར་རྫོགས་པར་བྱེད་པའི་ཚེ་དང༌། མཚམས་དགྲོལ་བ་དང༌། མཚམས་ལ་སོགས་པ་དགྲོལ་བ་དང༌། སྨད་པའི་ལས་དང༌། དགེ་སློང་ལས་བསྐྲད་པ་རྣམ་བདུན་པོ་ལྟ་བུ་ཞིག་བྱུང་སྟེ་བསྐྲད་པ་ལས་མཚམས་མ་བཏང་བར་གྱུར་པ་དང་སྨན་པ་དང༌། དབྱུང་བ་ལས་ཚིག་གསུམ་མོ། །དགེ་འདུན་གྱི་ལྷག་མ་དགེ་སློང་ཉི་ཤུས་དབྱུང་བ་དང༌།
སྤངས་པའི་ཕྱིར་ཞེས་ཟེར་བ་ནས་ཚིག་གསུམ་པོ་ཞེས་པའི་བར་དུ་སྤྱིར་འཆད་པ་དགེ་འདུན་གྱིས་ལས་འདི་རྣམས་ལྟ་བུ་གང་བྱའང་རུང་སྟེ་སྔར་ཞུ་བ་གསུམ་གསོལ་བ་གཅིག་དང་བཞིས་བྱས་པའི་འོག་ཏུ་བྱའོ། །བཏང་བ་མ་གཏོགས་ཏེ་བདག་གི་ཕྱིར་སྔགས་བྱ་བ་རྣམས་ཀྱང་ངོ༌། །དགེ་སློང་གི་ཆོས་གོས་གསུམ་དང་དགེ་སློང་མའི་ཆོས་གོས་ལྔ་དང་གོས་ལྷག་དང་ཚུལ་གྱི་ཚེ་ཞག་བདུན་པའི་སྔགས་དང་ཚུལ་ནས་འབྱུང་འཇུག་ལ་སོགས་པ་སྟེ་བདག་གི་ཕྱིར་བསྔོ་བ་ཐམས་ཅད་སྔགས་ལན་གསུམ་བཟླས་ཏེ་གདབ་པོ། །བདག་ཟན་ཟོས་ཟིན་ནས་སེམས་ཀྱིས་བཏང་བ་ལ་ཕྱིས་སྤྱན་གཟིགས་ལྟ་བུ་ཞིག་འོངས་ཏེ་བཟའ་དགོས་ན་ལྷག་མ་བྱས་ཏེ་བཟའ་བ་ནི་སྔགས་ལན་ཅིག་བཏབ་བས་འཚལ་ཏོ། །གང་ཟག་ཕ་རོལ་པོའི་ཕྱིར་བ་ཡང་ངོ༌། །གསོ་སྦྱིན་བྱ་བ་དང་ཚུལ་ནས་འབྱུང་འཇུག་དགེ་འདུན་མང་མ་འདུས་པ་དད་པ་བླངས་ནས་སླར་འབུལ་བ་ནི་ཚིག་ལན་ཅིག་གིས་འཚལ། གང་ཟག་ལ་འབུལ་བ་ནི་ཚིག་ལན་གསུམ་བཟླས་ཏེ་སྨྲ་མདུན་དུ་ཙོག་ཙོག་པོར་འདུག་པ་ལས་ཏེ་བཏང་བ་ཡང་ངོ༌། །ལྟག་མ་ལྟར་དད་པ་འབུལ་བ་དགེ་འདུན་ལ་ན་འགྲེངས་ཏེ་འབུལ་གང་ཟག་ལ་འབུལ་ན་གཉིས་ཀ་ཙོག་ཙོག་པོར་འདུག་སྟེ། ཚིག་ལན་གསུམ་བཟླས་ཏེ་དབུལ། ཞུ་བ་ཡང་ངོ༌། །ཁྱིམ་པ་ཞིག་རབ་ཏུ་བྱུང་བའི་ཚེ། གསོལ་བ་བྱེད་ཅིང་ལས་པའི་དགེ་སློང་དང་རབ་ཏུ་བྱུང་པ་གཉིས་ཀ་ཙོག་ཙོག་པོར་འདུག་པ་ལ་གསོལ་བ་དང་ཞུ་བ་དང་བར་ཆད་དྲི་བ་བྱ། བསྙེན་པར་རྫོགས་པ་ན་གསང་སྟེ་སྟོན་པའི་མ་གཏོགས་པར་ཕག་གུའི་སྟེང་དུ་རྟིང་པས་སོ། །དགེ་སློང་བསྙེན་པར་རྫོགས་པའི་ཚེ་ཕག་གུའི་སྟེང་དུ་རྐང་པ་གཉིས་ཀྱི་རྟིང་པས་མནན་ལ་ཁྲིམས་དབོག་གོ །དགེ་འདུན་གྱི་སྤྱན་སྔར་བར་ཆད་དྲི་བ་ནི་ཕག་གུའི་སྟེང་དུ་རྟིང་པ་མ་བཞག་ཀྱང་ཉེས་མེད་དོ། །བུད་མེད་ཀྱི་ན་བར་ཚངས་ཅན་ལ་སོགས་པའོ། །དགེ་སློང་མ་བསྙེན་པར་རྫོགས་པའི་ཚེ་དང་ཚངས་པའི་སྡོམ་པ་ནོད་པའི་ཚེ་ཕག་གུའི་སྟེང་དུ་མི་འདུག་པར་ཤིང་བལ་ཅན་གྱི་སྟན་སྟུག་པོ་བྱས་ཏེ་འདུག་ལ་ཁྲིམས་དབོག་གོ །རང་དབང་དང་དགེ་འདུན་གྱི་རྒན་པོས་སོ། །ཆད་པ་དང་རྩ་བའི་ཆད་པ་དང་མགུ་བ་དང་འབྱིན་པའི་ཚེ་གནས་བརྟན་གཅིག་གི་མདུན་
དུ་ཙོག་ཙོག་པོར་འདུག་ལ་གསོལ་བ་བྱ། གཞན་གྱི་ཕྱིར་ན་འགྲེངས་ཏེ་བཏུད་ལའོ། །ལྟག་མ་ལྟར་གསོལ་བ་བྱེད་པ་དང༌། བདག་ཉིད་ཀྱིས་ཁ་ཐོན་མི་ཤེས་ན་དགེ་སློང་ཤེས་པ་གཅིག་གིས་ཁ་ཏོན་སྨྲས་ཏེ་བདག་འགྲེངས་ཏེ་སྤྱི་བོ་བཏུད་ནས་གསོལ་བ་བྱའོ། །གསང་སྟེ་སྟོན་པས་ལམ་གྱི་མདུན་དུ་གཅིག་གོ །བསྙེན་པར་རྫོགས་པའི་ཚེ་ལྐོག་ཏུ་བར་ཆད་དགེ་སློང་གཅིག་གིས་དྲིས་ནས་དགེ་འདུན་ནང་དུ་འདུག་ལ་གཙང་ན་ཅི་ཞིག་མཆི་ཞེས་བྱ་བ་ནི་དགེ་འདུན་ནང་དུ་འདུག་ལ་སྨྲ་བ་མ་ཡིན་གྱི་དགེ་འདུན་གྱི་འདབ་ཏུ་འགྲེངས་ཏེ་བར་ཆད་གཙང་ཞེས་སྨྲའོ། །རྫས་བསྔོ་བ་ཡང་ངོ༌། །ལྷུང་བཟེད་ལ་སོགས་པ་ཡོ་བྱད་བཅུ་གསུམ་དང་གསེར་དངུལ་ལ་སོགས་པ་དང་སྨན་དང་འདི་ཐམས་ཅད་ཀྱང་འགྲེངས་ཏེ་སྔགས་གདབ་བོ། །དེ་བཞིན་དུ་རྟོག་པའོ། །གོས་ལྷག་ཐམས་ཅད་ཀྱང་འགྲེངས་ཏེ་སྔགས་གདབ་བོ། །དེ་བླངས་ཏེ་དེ་ལྟར་རོ། །ལྷག་མའི་བསྔོ་བ་དང་བརྟག་པ་གཉིས་ཀ་ཡང་དགེ་སློང་གཉི་ཀས་ཐ་མ་ཡ་རེ་ནས་བཟུང་སྟེ་གདབ། ལྷུང་བཟེད་དང་སྨན་ལག་པ་གཡོན་པར་བཞག་ལ་ལག་པ་གཡས་པས་བཀབ་སྟེའོ། །ལྷུང་བཟེད་དང་སྨན་ཞག་བདུན་པ་དང་ཚེ་གཅིག་པ་ཐུན་པ་ལག་པ་གཡོན་པའི་སྟེང་དུ་བཞག་ལ་གཡས་པས་བཀབ་སྟེ། དགེ་སློང་ཕ་ལོག་པོས་ཀྱང་དེ་ལྟར་བྱས་ཏེ་ལག་པ་གཉིས་རིམ་དུ་སྦྱར་ཏེ་སྔགས་གདབ་པོ། །མི་གཟུང་བ་ནི་མདུན་དུ་གཞག་སྟེ། རིན་པོ་ཆེ་གསེར་དངུལ་ལ་སོགས་པ་རེག་ཏུ་མི་རུང་བའི་རྣམས་དགེ་སློང་གཉིས་འགྲེངས་པའི་བར་དུ་གཞག་སྟེ་ལག་པ་གཉིས་ཐུར་དུ་བརྐྱང་སྟེ་སྔགས་གདབ་པོ། །ལས་ནི་འདུག་སྟེའོ། །ལས་བརྒྱ་རྩ་གཅིག་དགེ་འདུན་གྱིས་བྱའང་རུང་གང་ཟག་གིས་བྱའང་རུང་འདུག་སྟེའོ། །དེ་ལྟར་མ་བྱས་ན་ལས་སུ་མི་རུང་ངོ༌། །དགེ་འདུན་དང་གཅིག་ལ་ཡང་མ་གནས་ན་དགེ་སློང་གང་ཟག་ལ་བསྐོ། །ལས་བརྒྱ་རྩ་གཅིག་ཏུ་མ་གཏོགས་པར་ལས་གཞན་བྱོས་ཤིག་པར་བཀའ་སྩལ་པ་དགེ་འདུན་ནམ་གང་ཟག་འདིས་གྱིས་ཤིག་པར་གསང་བར་མ་བྱུང་བའི་རྣམས་ནི་གང་ཟག་གི་ལས་བྱའོ། །སྐྱེ་བ་ནི་མི་ཉེ་ཡང་གོས་ཡིད་བརྟག་པ་དང་བཏང་བ་དང་བསྔོས་པ་ཡང་ངོ༌། །དགེ་སློང་གཅིག་དགོན་པའམ་དབེན་པ་ན་འདུག་སྟེ། གྲོགས་མེད་ན་བསྔོ་བ་དང་བརྟགས་
པ་དད་ཆོས་གོས་སྔགས་དབྱུང་བ་བདག་གཅིག་པུས་རུང་ངོ༌། །ཆོས་གོས་གུད་ན་འདུག་པ་ཞིག་སྔགས་དབྱུང་བ་ཡང་བདག་གཅིག་པུས་རུང་ངོ༌། །བསྔོ་བ་དང་བརྟག་པ་གཉིས་གུད་ན་བཞག་ལ་བདག་འདི་ན་འདུག་པས་སྔགས་གདབ་ཏུ་མི་རུང་ངོ༌། །སྔ་མ་མ་བཏང་བ་མ་ཡིན། ཆོས་གོས་གསུམ་དང་གདིང་བ་སྔ་མ་མ་ཕྱུང་བར་ཕྱི་མ་གདབ་ཏུ་མི་རུང་སྟེ་སྔ་མ་ཕྱུང་ལ་ཕྱི་མ་སྔགས་གདབ་པོ། །གཅིག་པུ་བསྔོ་ན་ངག་གིས་སྨྲས། དགེ་སློང་གཅིག་པུ་དགོན་པའམ་དབེན་པ་ན་འདུག་སྟེ། ཆོས་གོས་སྔགས་ཀྱིས་གདབ་པ་སྔར་ཡིད་ལ་བདག་གཅིག་པོ་གྲོགས་མེད་པར་དབེན་པ་ན་འདུག་གོ་སྙམ་བསམས་ཏེ་དེའི་འོག་ཏུ་སྔགས་གདབ་པའི་ཚིག་ཁང་བརྗོད་དོ། །དེ་ཐོག་མར་བསམ་པ་བསྐྱེད། སྔགས་གདབ་པའི་ཚེ་བདག་པས་རྒན་ཀྱང་རུང་གཞོན་ཀྱང་རུང་དེ་ལ་བསྟི་སྟང་གི་ཚུལ་དུ་བདག་གི་ཆོས་གོས་ཀྱི་ཚགས་བཅོས་ཏེ་གུས་པར་བྱས་ལ་གདབ་པོ། །དགེ་སློང་དང་འགྲོགས་ན་བླ་གབ་ཕྲག་པ་ཡ་གཅིག་ཏུ་བྱས་ཏེའོ། །ཚུལ་ནས་འབྱུང་འཇུག་དང་བརྟག་པ་དང་བསྔོ་བ་ལ་སོགས་པའི་སྔགས་འགྲོགས་གཅིག་དང་གཉིས་འདུག་ལ་སྔགས་གདབ་པའི་ཚེ་བདག་པས་ན་རྒན་པ་ཞིག་ཡིན་ན་ཕྲག་པ་གཡས་པ་ཕྱུང་ལ་གུས་པའི་ཚུལ་དུ་ལས་བྱའོ། །དེར་རིགས་པ་ལ་ཕྱག་འཚལ་ཏེ་བདག་གི་དོན་སྔགས་ནི་ཚིག་གསུམ་ནའོ། །ལྟག་མ་ལྟར་བསྟི་སྟང་བྱ་བ་ནི་གུས་པར་ཕྱག་འཚལ་ལ་བདག་གིས་བསྔོ་བ་དང་བརྟག་པ་ལ་སོགས་པ་ཚིག་ལན་གསུམ་དུ་བཟླས་ཏེ་བྱའོ། །གསང་སྟེ་སྟོན་པ་ན་ཡང་ངོ༌། །བསྙེན་པར་རྫོགས་པའི་ཚེ་ལྐོག་ཏུ་བར་ཆད་དྲི་བ་ནི་ཐོག་མར་ཕྱག་འཚལ་དུ་བཅུག་ལ་དེ་ནས་བར་ཆད་དྲི་བ་དང་བར་ཆད་དྲིས་ནས་དགེ་འདུན་ལ་ཕྱག་འཚལ་ལ་བར་ཆད་གཙང་ངོ་ཞེས་བརྗོད། བསྙེན་པར་རྫོགས་པའི་ཕྱིར་འཁོད་པ་དག་ལ་སྦྱར་མ་དང་བཅས་ཀྱང་ངོ༌། །བསྙེན་པར་རྫོགས་པའི་ཚེ་མཁན་པོར་གསོལ་བའི་འོག་ཏུ་ཆོས་གོས་གསུམ་བསྐོན་ལ་དགེ་འདུན་ལ་ཕྱག་འཚལ་དུ་གཞུག་གོ །ཐོག་མར་གསུམ། བསྙེན་པར་རྫོགས་པའི་ཚེ་བསྙེན་པར་རྫོགས་པར་འདོད་པ་དེ་དགེ་འདུན་ཐམས་ཅད་ཕྱག་ལན་གསུམ་འཚལ་དུ་གཞུག་གོ །དེའི་ཕྱིར་ཐལ་མོ་སྦྱར་ཏེ་ཞག་ཞུ་བ་ཡང༌། ཚུལ་ནས་
འབྱུང་འཇུག་དང་གསོ་སྦྱིན་བྱས་པའི་ཚེ། གསོ་སྦྱིན་བྱ་ཚུར་ཤོག་ཅེས་ཚིག་དྲག་ཏུ་མི་བྱ་བར་བདག་པས་རྒན་ན་ཚིག་དལ་བ་དང་འཇམ་པས་བགྱིས། སྤྱོན་ཞེས་བྱ། དེ་སྟེ་གང་ཟག་དག་གི་ཕྱིར་གསོལ་བའི་ཚིག་ན་མཐར་ཐབས་དེ་ལྟ་བུ་ཤེས་སོ། །བདག་གིས་སྔོན་སྔགས་བཏབ་ཟིན་ནས་དྲུང་ན་འདུག་པའི་དགེ་སློང་གིས་ཨཽ་པ་ཡི་ཀ་ཞེས་ལན་གསུམ་དུ་བྱའོ། །དེའི་རྗེས་སུ་དྲུང་ན་པོས་དགེའོ་ཞེས་སོ། །དགེ་སློང་གོས་བདག་པོས་ནི་དྲུང་ན་འདུག་པས་ཨཽ་པ་ཡི་ཀ་ཞེས་སྨྲས་པའི་རྗེས་ལས་དུ་ཞེས་ལན་གསུམ་དུ་བརྗོད་དོ། །རང་དབང་ཅན་ཞེ་སྡང་དང་གཏི་མུག་དང་འཇིགས་པས་འགྲོ་བ་མེད་པར་བྱས་པ་དྲན་བར་ནུས་ལ་བསྒོ་སྟེ་སྤྲོ་བས་སོ། །མིང་གིས་སྨོས་པ་འདི་རྣམས་དང་མི་ལྡན་པ་ལས་གང་ཟག་བཅུ་གཉིས་ཀྱི་ལས་བསྐོ། ལས་སུ་བསྐོས་པའི་ཚེ་མི་དེ་ལ་སྔར་དད་དམ་མ་དད་དྲིས་ཏེ་བསྒོ། །བྱས་ཟིན་ནས་བརྗོད། དགེ་འདུན་གྱི་ལས་གསོལ་བ་དང་ཞུ་བ་ལས་བྱའོ། །ཙོག་བྱས་ཟིན་པའི་རྗེས་ལ་དགེ་སློང་ལས་པས་ལས་དེ་ལྟར་བགྱིས་ནས་དགེ་འདུན་སོ་སོ་ནས་ཙང་མི་གསུང་ན་བདག་གིས་ལས་དད་པར་འཛིན་ཏོ་ཞེས་སྨྲ། མཚམས་བཅད་པ་བཞིན་དུ་མཆོད་པར་ནན་ཏན་དུ་བྱ། མཚམས་བཅད་པ་གང་ཚུན་ཆད་བཅད་པའི་ཕྱི་རོལ་དུ་འདུག་སྟེ། མཚམས་བཅད་པའི་ལས་བྱས་ན་མི་རུང་སྟེ། མཚམས་ཀྱི་ནང་དུ་འདུག་ལ་བྱའོ། །དེ་བཞིན་དུ་གང་ཟག་བཅུ་གཉིས་ཀྱི་ལས་སུ་བསྐོས་པ་ཡང་མཚམས་ཀྱི་ནང་དུ་འདུག་ལ་བྱའོ། །འདུག་པར་བྱེད་པས་འདུག་པར་བསྒོ་སྟེ་གཎྜཱི་བརྡུངས་པ་དང་དྲིས་སྨྲོས་ཤིག་བསྒོ། །ཚུལ་ནས་འབྱུང་འཇུག་དང་གསོ་སྦྱིན་པའི་ཚེ་ཆག་ཆག་དང་དཀྱིལ་འཁོར་དང་སྟན་གདིང་བའི་དགེ་སློང་གཅིག་བསྐོ། འདུ་བའི་ཕྱིར་གཎྜཱི་བརྡུངས་ན་དགེ་སློང་གཅིག་ཅིག་ན་རེ་གཎྜཱི་བརྡུངས་པ་ཅི་བྱ་ཞེས་དྲིས་ན་ལས་ཅི་བྱེད་པ་དེ་ལ་བསྟན། དེའི་ཕྱིར་དེས་སྟན་གདིང༌། དགེ་འདུན་གྱིས་ལས་སུ་བསྐོས་པའི་དགེ་སློང་དེས་དགེ་འདུན་གར་འདུ་བར་སྟན་གདིང་ངོ༌། །བསྐོས་པ་དེ་དགོས་པའི་ཕྱིར་འདིའོ། །གང་ཟག་བཅུ་གཉིས་ཀྱི་ལས་སུ་བསྐོས་པ་རྣམས་ཅི་ནས་སུ་དགེ་འདུན་མགུ་བར་བྱ། ཐམས་ཅད་དུ་རྒན་རིམས་སོ། །བཤོས་གསོལ་བ་དང་ཡོན་འགོད་པ་དང་གྲལ་དུ་བཀོད་པ་དང་ཕྱག་འཚལ་བ་ལ་སོགས་
སྟེ་ཅིའང་རུང་སྟེ་གནས་བརྟན་གྱི་རིམ་པ་བཞིན་དུ་བྱ། བླང་པ་དད་པས་བླང༌། ལྟག་མ་ལྟར་རྒན་རིམས་སུ་གནས་དང་རྒན་པོ་ཁ་ཅིག་ན་རེ་རྒན་པོ་མི་འདོད་དེ་འདིས་ཆོག་ཅེས་ཟེར་ན་ཅི་དགར་བྱའོ། །ལས་གདོན་མི་ཟ་བའི་སྦ་བའོ། །བསྒོ་བ་མ་བྱས་པར་ལས་མང་བ་མི་བྱ། དགེ་འདུན་གྱི་དབྱེན་དང་རྗེས་སུ་ཕྱོགས་པ་དང་རིགས་སུན་པ་དང་ངག་དཀའ་བ་དང་ཡང་དག་པར་གཤེགས་པ་ལ་སྐུར་པ་བཏབ་པ་ནི་ཆད་པ་འདི་དང་གསོལ་བ་མ་བྱས་པར་དགེ་འདུན་གྱི་ལས་བྱ་བའི་ནང་དུ་འགྲོར་མི་དབང་ངོ༌། །གསོ་སྦྱོང་དང་དབྱུང་བ་མ་གཏོགས་སོ། །ལྟག་མ་ལྟ་བུ་དགེ་སློང་ལས་གཞན་ལ་ནི་མཚམས་མ་བཏང་ན་མི་རུང་གི་གསོ་སྦྱོང་དང་ཚུལ་ནས་འབྱུང་བ་གཉིས་ནི་བརྟགས་ཏེ་དགེ་འདུན་གྱི་ནང་དུ་འཇུག་ཏུ་རུང་ངོ༌། །མཚམས་གཞན་དུ་འདུག་པ་ནི་གང་དུ་ཡང་ཡན་ལག་མ་ཡིན་ནོ། །དགེ་འདུན་གྱིས་ལས་བྱ་བའི་ཚེ་ལངས་ཏེ་ནམ་མཁའ་ལ་འཕགས་སམ་མཚམས་ཀྱི་ཕྱི་རོལ་དུ་སོང་ངམ་བར་ཡུར་བས་ཆོད་ན་ཕྱི་ན་འདུག་པའི་དགེ་སློང་དགེ་འདུན་གྲངས་སུ་ཚང་ན་ལས་སུ་རུང་དགེ་འདུན་དུ་མ་ཚང་ན་ལས་སུ་མི་རུང༌། ཞན་པ་ནི་དེར་འགྲོ་ཞིང་བཅས་ཏེ་སོང་ནའོ། །ལྷག་མ་འབྱུང་བའི་དགེ་སློང་ཉི་ཤུས་དབྱུང་དགོས་པ་ལས་དགེ་སློང་གཅིག་གམ་གཉིས་ནམ་མཁའ་ལ་འཕགས་སམ་ཡུར་བའི་ཕ་རོལ་དུ་བརྒལ་ནས་ཕྱི་ན་གྲངས་མི་ཚང་ན་ལས་སུ་མི་རུང༌། གཉིས་སུ་འདུག་པ་ནི་ཚུ་ལོགས་སུ་རྐང་པ་གཅིག་ཕ་ལོགས་སུ་རྐང་པ་གཅིག་ནའོ། །ཡུར་བ་གཅིག་གི་ཕ་རོལ་ཚུ་རོལ་ན་དགེ་འདུན་སྡེ་གཉིས་ལས་བྱེད་དེ། དགེ་སློང་གྲངས་སུ་གཅིག་གིས་མ་ཚང་ན་དགེ་སློང་གཅིག་རྐང་པ་ཡུར་བའི་ཕ་རོལ་དུ་བཞག་ནས་རྐང་པ་ཡ་གཅིག་མཚམས་ཀྱི་ནང་དུ་ཕྱིན་ན་དགེ་འདུན་གྲངས་སུ་ཆུད་དོ། །ཐམས་ཅད་དུ་མནན་ན་ཀུན་དུ་ནན་པའོ། །མཚམས་བཞིའི་ནང་དུ་བསྙེན་པར་རྫོགས་པའི་ལས་བྱེད་པ་ལ་བཞི་ཀའི་ནང་དུ་དགེ་འདུན་གྲངས་སུ་གཅིག་མ་ཚང་ན་མཚམས་དེ་བཞི་མདོར་ཁྲིའམ་ཤིང་ལེབ་ཀྱིས་མནན་པའི་སྟེང་དུ་དགེ་སློང་གཅིག་འདུག་ན་བཞི་ཀའི་གྲངས་ཚང་པར་འགྱུར་རོ། །དེ་ལྟར་དུ་མར་ཚུལ་དུ་ཞུགས་ཏེའོ། །ལྟག་མ་ལྟར་བཞི་མདོར་དགེ་སློང་གཅིག་འདུག་ཏེ་ཚུལ་དུ་ཞུགས་པའི་གསོལ་བ་དང་ཞུ་བའི་ལས་
བྱས་ན་གཙུག་ལག་ཁང་དེ་བཞི་ཀའི་དགེ་འདུན་ཚུལ་དུ་ཞུགས་པར་ཆུད་དོ། །མལ་སྟན་དུ་མ་བླངས་པའི་རིགས། །ལྟག་མ་ལྟ་བུ་གསོལ་བ་དང༌། །ཞུ་བའི་ལས་བྱས་པའི་དགེ་སློང་དེ་ནི་གཙུག་ལག་ཁང་བཞིའི་ཁང་པ་དང་མལ་སྟན་གྱི་ཤས་ཀྱང་དབང་ངོ༌། །དེ་གང་དུ་དགའ་བར་གནས། ལྟག་མ་ལྟར་ཁང་པ་དང་མལ་སྟན་མང་དུ་བདོག་སྟེ། ཀུན་སྤྱད་མི་ནུས་ན་བདག་གར་དགའ་བར་འདུག་ལ་སྤྱོད་ཅིག །རྒྱལ་བའི་འགྲེལ་བར་མི་བྱེད་དོ། །སངས་རྒྱས་མཚམས་ཀྱི་ནང་ན་བཞུགས་ཏེ། དགེ་འདུན་གྱིས་བྱེད་པའི་ཚེ། སངས་རྒྱས་ལ་དད་བ་མ་བླངས་ཀྱང་ལས་སུ་རུང་ངོ༌། །མི་བསྐོང་ངོ། །དགེ་འདུན་གྱི་ལྷག་མ་དབྱུང་བ་ལྟ་བུ་དགེ་སློང་ཉི་ཤུ་དགོས་པ་བཅུ་དགུ་ཡོད་དེ་གཅིག་གི་གྲངས་སངས་རྒྱས་སྤྱན་དྲངས་ཀྱང་དགེ་འདུན་གྱི་གྲངས་སུ་མ་གཏོགས་པ་ལས་སུ་མི་རུང་ངོ༌། །ལས་བྱ་བ་ལ་ལས་མ་ཡིན་པས་མི་སྐྱེའོ། །ལས་བརྒྱ་རྩ་གཅིག་ལྟ་བུ་བྱ་བ་གསོལ་བ་དང་ཞུ་བའི་རིམ་པ་བཞིན་དུ་མ་བྱས་ན་གཅིག་ཀྱང་ལས་སུ་མི་རུང་ངོ༌། །ཁ་ཅིག་གིས་སྐབས་སུ་ནི་རུང་གི་དགེ་འདུན་དང་མཁན་པོ་ལ་ཉེས་བྱས་ཞེས་ཟེར་བ་ཡང་དེ་བཞིན་གཟུང་ངོ༌། །གང་གིས་མང་དུ་བྱས་པ་ནི་བྱས་པ་བཞིན་ནོ། །གསོལ་བ་གཅིག་དང་ཞུ་བ་གཅིག་ལས་བྱ་བའི་ཚེ། གསོལ་བ་ཟིན་ཞུ་བའི་ཚིག་གསུམ་གཉིས་བརྗོད་དེ་སུམ་ཆ་མ་རྫོགས་ཀྱང་ལས་སུ་མི་རུང་ངོ༌། །ལྟག་ན་མེད་པའོ། །གསོལ་བ་གཅིག་དང་ཞུ་བ་གསུམ་གྱི་ལས་བྱ་བའི་ཚེ། གསོལ་བ་དང་ཞུ་བའི་ལས་གཉིས་ནི་འདས་གཅིག་གི་སུམ་གཉིས་ནི་འདས་སུམ་ཆ་མ་འདས་ཀྱང་ལས་སུ་རུང་ངོ༌། །མཚན་མས་བརྗོད་ན་ཆད་པ་མ་ཡིན། དགེ་འདུན་གྱི་མཚམས་བཅད་པ་རྡོ་འདི་ལས་ཐུག་ཅེས་སྔར་མ་བརྗོད་པར་གསོལ་བ་དང་ཞུ་བའི་ལས་བྱས་ཀྱང་བྱས་པར་མི་ཆུད་དོ། །ཆད་པ་ལས་ཚངས་པར་སྤྱོད་པའི་གནས་སོ། །དགེ་སློང་ལྷག་མ་ཞིག་བྱུང་སྟེ། ལྟག་མའི་ལས་བྱེད་པའི་ཚེ། དགེ་འདུན་ཚུལ་ནས་འབྱུང་འཇུག་དང་གསོ་སྦྱོང་བྱ་བའི་ཚེ་ལས་བྱེད་མི་ནུས་ན་ཆད་པ་པ་དེ་ལས་བྱས་ཀྱང་ལས་སུ་ཆུད་དོ། །དགེ་སློང་མ་ལྷག་མ་བྱུང་བ་ཡང་ལས་གཞན་ཀུན་ནི་བྱང་རུང་གིས་ཚངས་པའི་སྡོམ་པའི་ལས་བྱར་མི་རུང་ངོ༌། །སྨྱོན་པ་བཤད་ན་ཡང་ངོ༌། །གསོ་སྦྱིན་བྱ་བའི་ཚེ་དགེ་འདུན་གྱི་ནང་ན་སོ་སོར་ཐར་པ་ཁ་
ཐོན་དུ་སུས་ཀྱང་མི་ཐོན་ན་དགེ་སློང་སྨྱོན་པ་ཁ་ཐོན་དུ་ཤེས་པས་བཀླགས་ཀྱང་ཉེས་མེད། གསོལ་བ་དང་ཞིབ་ཏུ་བྱེད་པའི་ནན་ཏན་ནོ། །ཆད་པ་དང་སྤངས་པ་དང་ལྷག་མ་བྱས་པ་ལ་སོགས་པ་ལྟག་ཏུ་དགེ་འདུན་གྱི་ཁ་བསྐང་དུ་མི་ཆུད་པའི་རྣམས་ཀྱི་དགེ་འདུན་གྱི་དབྱེན་བྱེད་པའི་དགེ་འདུན་མ་ལངས་པའི་ཁར་བསྐང་ཀྱང་དབྱེན་བྱས་པར་མི་འགྱུར་རོ། །ཡན་ལག་མ་ཡིན་པ་ནི་མཚན་མ་ཐ་དང་ནའོ། །དགེ་སློང་གི་དགེ་འདུན་གྱིས་ལས་བྱ་བའི་དགེ་འདུན་གྱི་གྲངས་མ་ཚང་བ་དགེ་སློང་མས་ཁ་བསྐང་དུ་མི་རུང་ངོ༌། །དགེ་སློང་མའང་དེ་བཞིན་དུ་དགེ་སློང་གི་དགེ་འདུན་གྱི་དབྱེན་བྱེད་པ་ལ་གྲངས་མ་ཚང་བའོ། །སྣོད་དགེ་སློང་མས་བྱས་ན་གྲོགས་སུ་མི་ཆུད་དོ། །ཏྲོག་ཏྲོག་པོས་ན་གང་ཡང་མ་ཡིན། ཀུ་རེ་དང་རྩོད་མོས་དགེ་འདུན་གྱི་དབྱེན་བྱས་ན་དབྱེན་དུ་མི་ཆུད་པ་ནི་བདག་གིས་དབྱེན་བྱས་ཀྱང་མི་བྱེད་པར་ཤེས་བཞིན་དུ་བྱས་པ་ལས་སྦོམ་པོ་སྟེ་འོག་ནས་ཀྱང་འཆད། མི་སྐྱེ་བའི་བསམ་པས་འབྱེད་བ་དར་སྤངས་ན་སྦོམ་པོའོ། །ལྟག་མ་ལྟར་རྩེད་མོ་དང་ཀུ་རེས་དབྱེན་བྱས་ན་དབྱེན་གྱི་སྦོམ་པོའོ། །དགེ་འདུན་འདུས་ཏེ་གང་ཟག་གཅིག་ཆོས་བཞིན་དུ་ཉེས་བ་བྱུང་སྟེ། །སྤངས་པའི་རིགས་པའི་ལས་གང་ཟག་གིས་བསྐྲད་ན་སྦོམ་པོར་འགྱུར་རོ། །ཉེས་བྱས་པ་ནི་དགེ་འདུན་དུ་མ་བྱུང་ནའོ། །དགེ་འདུན་གྱི་དབྱེན་བྱེད་པ་དགེ་སློང་བརྒྱད་ལས་བཞིར་ཕྱེ་བ་ནི་དབྱེན་དུ་འགྱུར་རོ། །དགེ་སློང་བདུན་བདག་དང་བརྒྱད་འདུག་པ་ལ་ཕྱེ་བ་ནི་གཉིས་ཀར་དགེ་འདུན་དུ་མཚང་བས་ཕྱེ་ཡང་ཉེས་བྱས་སུ་འགྱུར་རོ། །སོ་སོར་གནས་བ་ལས་གཞན་དག་གྲངས་སུ་བསྐང་པར་མི་རིགས་པས་གྲངས་བསྐང་ན་གསོལ་བའི་བརྗོད་པ་མ་ཡིན་ནོ། །དགེ་སློང་དེ་བ་དཏྟའི་སྡེ་ལྟ་བུ་ལོག་པ་ལ་ཕྱོགས་པས་ལས་བརྒྱ་རྩ་གཅིག་ལྟ་བུ་བསྙེན་པར་རྫོགས་པ་དང་ལྷག་མ་དབྱུང་བ་ལ་སོགས་པ་དགེ་འདུན་གྱི་གྲངས་སུ་མ་ཚང་བ་ལས་ཕམ་པར་འགྱུར་བའམ། མཚམས་མེད་བྱས་པའམ་སོ་སོར་གནས་པའམ་ཆད་པས་བཅད་པ་ལྟ་བུ་ཉམས་པས་ཁ་མ་བསྐངས་ཀྱང་ལས་སུ་མི་རུང་ངོ༌། །རིག་པ་ཡང་བདག་གི་དགེ་འདུན་གྱིས་མྱོང་བ་མ་གྲུབ་པར་ན་ཡང་ངོ༌། །དགེ་འདུན་གྱི་ལྷག་མ་དབྱུང་བ་ལྟ་བུ་དགེ་སློང་ཉི་ཤུས་དབྱུང་བའི་རིགས་པ་ལས་ཉི་ཤུས་ཆང་ཡང་ལས་བྱེད་པའི་ཚེ་
གྲལ་ན་ཡུར་ཏེ་གསོལ་བ་དང་ཞུ་བའི་ལས་མ་ཐོས་ན་དགེ་འདུན་གྱི་གྲངས་མ་ཚང་བ་དང་འདྲ་སྟེ་ལས་སུ་མི་རུང་ངོ༌། །གྲུབ་པ་ནི་གསོལ་བ་ཐོས་ནའོ། །ལྷག་མ་དབྱུང་བ་ལ་གཉིད་ལོག་པས་གསོལ་བ་ནི་ཐོས་ཞུ་བ་བྱ་བའི་ཚེ་མ་ཐོས་ཀྱང་གྲངས་སུ་ཆུད་དེ་ལས་སུ་རུང་ངོ༌། །སྐལ་བ་ཡོད་པ་གཟུགས་བརྙན་གྱི་ཕོ་ཉས་རབ་ཏུ་ཕྱུང་བ་ཡང་ཆོ་ག་མ་ཡིན་པ་མ་ཡིན་ནོ། །བུད་མེད་ནི་མ་ན་ཞེས་བྱ་བ་སྔ་མའི་བསོད་ནམས་ཀྱིས་ངག་བཅོམ་པར་འགྱུར་བ་ཞིག་ཁྱིམ་བའི་གནས་ན་འདུག་སྟེ། མཁན་པོ་ལས་ལུང་མནོས་ཏེ་ཕོ་ཉས་ཁྲིམས་ཕོག་ཀྱང་རབ་ཏུ་བྱུང་བར་གྱུར་ཏོ། །དེ་བཞིན་དུ་ཡོན་ཏན་ཡོད་ན་དེང་སང་ཡང་ཕོ་ཉས་དབོག་ཏུ་རུང་ངོ༌། །ཕྱིས་བསྙེན་པར་རྫོགས་པའི་བར་དུ་ཡང་ངོ༌། །ལྟག་མ་ལྟ་བུར་རྒྱུན་དུ་འཇུག་པ་འམ་དགྲ་བཅོམ་པར་འཕྲལ་དུ་འགྱུར་བ་དེ་ལྟ་བུ་ཡོན་ཏན་དང་ལྡན་པ་ཕོ་ཉས་བསྙེན་པར་རྫོགས་པའི་ཁྲིམས་ཕོག་ཀྱང་འཆགས་སོ། །ཁས་མ་བླངས་ན་བྱིན་པ་མ་ཡིན་ནོ། །རབ་ཏུ་བྱུང་བའི་ཚེ་བདག་རབ་ཏུ་འབྱུང་བར་ཅི་གནང་ཞེས་གསོལ་ནས་རབ་ཏུ་འབྱུང་བར་བརྩམས་པ་ལས་ང་རབ་ཏུ་འབྱུང་དུས་འདོད་དེ་ཞེས་ཟེར་ན་ཁྲིམས་མི་འཆགས་ཀྱིས་སྐྲོད་དེ་ཐོང་ཤིག །འདིས་གསོལ་བ་དང་ཞིག་གོ །ལྟག་མ་ལྟར་ཁྲིམས་ནོད་དུ་མ་བཏུབ་སྟེ་སོང་པ་ཕྱིས་སླར་རབ་ཏུ་མི་འབྱུང་དུ་མི་རུང་ཞེས་གསོལ་དུ་འོངས་ན་སྔ་མའི་ལས་ནི་ཞིག་གི་ད་གདོད་ལས་བྱས་ཏེ་དབོག་ཏུ་རུང་ངོ༌། །བསྐོ་བས་བསྒོ་བ་ཐོག་མར་ནི་ཆོ་གའོ། །དགེ་འདུན་གྱི་དབྱེན་དང་རྗེས་སུ་ཕྱོགས་པ་དང་རིགས་སུན་པ་དང་ངག་དཀའ་བ་ལྟ་བུ་ཁྱོད་ཀྱིས་མཚན་མ་དེ་ཐོང་ཤིག་ཅེས་སྔར་མ་བསྒོ་བར་ལྷག་མ་བྱས་པ་ཉེས་ཀྱིས་བསྐྲད་དོ་ཞེས་གསོལ་བ་དང་ཞུ་བའི་ལས་བྱས་པ་ནི་ལས་སུ་མི་ཆུད་དོ། །སྤངས་པ་འམ་འདི་བཞིན་དུའོ། །ཡང་དག་པར་གཤེགས་པས་གསུངས་པ་པར་དུ་མི་གཅོད་དོ་ཞེས་ཟེར་བ་ལ་སོགས་པ་དང་ལྷག་མ་ལྟར་མ་ཟེར་ཞེས་ལན་གསུམ་དུ་མ་བསྒོ་བར་བསྐྲད་པའི་ལས་སུ་མི་ཆུད་དོ། །དགོངས་གཅིག་པ་ལ་སོགས་པའི་ཚིག་གཞན་གྱིས་ན་དགོངས་པ་ལས་གཙོ་བོར་རོ། །གོས་དང་གསེར་དངུལ་དང་ཚུལ་ནས་འབྱུང་འཇུག་དང་གསོ་སྦྱིན་ལ་སོགས་པ་ཆུང་དུ་ན་མཁན་པོ་ལ་ཞུ་བ་ཡན་ཆད་ཀྱང་ངོ༌། །དགོངས་ཤིག་བཙུན་པ་འམ་ཚེ་དང་ལྡན་པ་ཞེས་སྨྲ་བའི་ཚེ།
དགེ་སློང་དེ་སེམས་ལོགས་ཤིག་ཏུ་བསམས་ན་སྔགས་གདབ་པ་ལ་སོགས་པ་ཅི་བྱས་ཀྱང་ལས་སུ་མི་རུང་ངོ༌། །དོན་གྱི་ལེའུ་རིགས་པ་ལ་བཟློག་ཀྱང་མི་སྐྱེ་བ་མ་ཡིན་ནོ། །དགེ་སློང་དུ་བསྙེན་པར་མ་རྫོགས་པའི་ཚེ། དགེ་འདུན་ལ་དགོངས་ཤིག་བཙུན་པའི་དགེ་འདུན་མཁན་པོ་འདི་ལས་དགེ་སྦྱོང་མིང་འདི་བསྙེན་པར་རྫོགས་པར་གསོལ་ལོ་ཞེས་བྱ་བའི་རིགས་པ་ལས་ལྟག་མའི་ཚིག་མགོ་མཇུག་བཟློག་སྟེ་སྔ་ཕྱིར་སྨྲས་ཀྱང་ལས་སུ་ནི་རུང་ངོ༌། །འཁྲུལ་བར་མི་བྱ། ལྟག་མ་ལྟར་ཚིག་མགོ་མཇུག་བསྣོར་ན་ཉེས་བྱས་སུ་འགྱུར་རོ། །མཚན་གཞན་ལ་གནས་ཏེ་ཡང་ན་ཡིན་ནོ། །དགེ་སློང་མ་བསྙེན་པར་རྫོགས་པའི་ཚེ་ལས་པའི་དགེ་སློང་དགོངས་ཤིག་བཙུན་པའི་དགེ་འདུན་མཁན་པོ་འདི་ལ་དགེ་སློང་མ་འདི་བསྙེན་པར་རྫོགས་སོ་ཞེས་བྱ་བའི་རིགས་པ་ལས་མཁན་པོ་འདི་ལ་རབ་ཏུ་རྫོགས་ཞེས་བྱས་ཏེ་མིང་ནོར་ཀྱང་ལས་སུ་རུང་ངོ༌། །དགེ་སློང་དང་དགེ་སློང་མ་ལས་ལས་གཞན་དུ་བྱས་ཀྱང་མ་ཡིན། དགེ་སློང་བསྙེན་པར་རྫོགས་པའི་ཚེ། དགེ་སློང་གི་མིང་ལས་དྲངས་ཏེ་གདག་པའི་རིགས་པ་ལས་དགེ་སློང་མའི་མིང་ལས་དྲངས་ཏེ་བཏགས་ཀྱང་ལས་སུ་རུང་ངོ༌། །དགེ་སློང་མ་ལའང་དགེ་སློང་གི་མིང་ལས་དྲངས་ཏེ་བཏགས་ཀྱང་རུང་ངོ། །ལས་ཀྱི་དངོས་པོ་སྟེ་དྲིས་པ་ལ་སོགས་པར་ཆུད་དོ། །ལས་ཀྱི་དངོས་པོ་རྫོགས་སོ།། །འདི་མན་ཆད་ཆད་པས་བཅད་པའི་ལས་ཀྱི་དངོས་པོ་ལ་འཆད་དེ། མ་ཞི་བའི་མཚན་མ་ཤེས་ནས་བསྐུལ་བས་དམ་བཅར་བཅུག་ནས་མངོན་སུམ་དུ་སྨད་ལས་བྱ་བ་སྦྱིན། དགེ་སློང་ཞིག་རྟག་པར་ལྷག་མ་མན་ཆད་ཉེས་བྱས་ཡན་ཆད་གཅིག་རྟག་ཏུ་བྱེད་ཅིང་མི་མཐོལ་བར་འདུག་པ་དང་རྟག་བར་ཐབ་མོ་རྒོལ་བ་གཏོང་དུ་མ་བཏུབ་ན་མི་དེ་དགེ་འདུན་གྱི་མདུན་དུ་བཀུག་ལ་དགེ་སློང་གཅིག་རྒོལ་དུ་བཅུག་སྟེ་ཁྱེད་འདི་ཉེས་སོ་ཞེས་བརྒལ་ནས་ཉེས་པའི་དམིགས་ཅི་ལ་བཏུབ་པ་བཞིན་དུ་ཆད་པས་བཅད་དོ། །ཤེས་པ་ཙམ་གྱིས་འདུ་བ་མ་ཡིན་པར་རོ། །ལྟག་མ་ལྟར་བདག་གིས་ཉེས་པ་བྱས་ཏེ་དགེ་འདུན་གྱིས་ཚུར་ཤོག་ཤིག་བར་བསྒོ་ནས་ཉེས་པས་གནོད་དེ་འོང་དུ་མ་བཏུབ་ན་ཅི་ལྟར་ཉེས་པ་ཞིག་བཞིན་དུ་མངོན་སུམ་དུ་མ་འོངས་ཀྱང་ཆད་པས་བཅད་དོ། །ཡན་ལག་མ་ཡིན་པ་ནི་གནོད་པ་ནི་མེད་
པར་དམ་བཅས་པའོ། །དགེ་སློང་གཅིག་གི་ལ་ཉེས་པ་ཡོད་པར་དགེ་འདུན་གྱིས་ཤེས་ཏེ་ཁྱེད་འདི་ཉེས་སོ་ཞེས་བསྒོ་བ་ཅིའང་མི་སྨྲ་བར་ཁ་བཙུམས་ཏེ་འདུག་པ་མི་བརྩན་གྱིས་ཅི་ཉེས་པ་དགེ་འདུན་མཁྱེན་པ་བཞིན་དུ་ཆད་པས་བཅད་དོ། །སྐབས་མ་བྱས་པ་ཡང་སྟེ། མི་རིགས་པས་ལྟག་མ་ལྟར་དགེ་སློང་གིས་ལྷག་མ་མན་ཆད་ཉེས་བྱས་ཡན་ཆད་ཅིག་བྱས་ཏེ་དགེ་འདུན་གྱི་ནང་དུ་བཀུག་ནས་དགེ་སློང་གཅིག་རྒོལ་དུ་བཅུག་སྟེ་ཁྱེད་ལ་སྐབས་དབྱེ་བ་ཞིག་བྱས་ན་དབྱེར་མ་བཏུབ་ན་ཆད་པ་དགེ་འདུན་མཁྱེན་པ་བཞིན་གཅོད་དོ། །བསྐུལ་བ་བདག་མ་ལངས་པ་ན་བསྒོ་ཞིང་བསླང༌། ལྟག་མ་ལྟར་དགེ་འདུན་གྱིས་ནང་དུ་དགེ་སློང་ཉེས་པ་ལ་རྒོལ་ཏེ་བཅུག་པའི་དགེ་སློང་ནི་འཁོན་མེད་པ་དང་ཞེ་སྡང་དང་གཏི་མུག་མེད་པ་དང་ཁོ་ཉིད་དད་ན་གདོད་བསྐོས་ཏེ་རྒོལ་དུ་གཞུག །འདི་མན་ཆད་ཆད་པ་རྣམས་བདུན་གྱིས་བཅད་པ་ལས་སླར་ཆགས་པའི་ཆོ་ག་ལ་འཆད་རྙོག་པ་དང་དགེ་འདུན་ལ་ཚིག་ངན་པ་ཟེར་ཞིང་རྙོག་པ་བཏང་བ་དང༌། གཤེ་བ་དང༌། ཁྲོས་ནས་ཚིག་ངན་པ་ཟེར་བ་བཏང་བ་དང༌། དམ་བཅས་དག་དང༌། ང་ལ་སུས་བསྐྲད་པ་གཅིག་ཅིང་བརྡེག་གོ་ཞེས་སེམས་པ་བཏུང་བ་དང༌། རྙོག་པ་དང་ཞེས་པ་ནས་དམ་བཅའ་བ་དག་དང་ཞེས་པའི་བར་དུ་སྤྱིར་སྤངས་བ་རྣམས་བདུན་གང་ཡང་རུང་སྟེ། མཚན་མ་འདི་རྣམས་ལྟ་བུ་ཡང་མི་བྱ་བར་སེམས་ཀྱིས་བཏབ་ནས་སླར་འཆག་ཏུ་སོང་ན་འཆག་ཏུ་གཞུག་གོ །དགེ་འདུན་གྱི་དད་དགེ་འདུན་གྱི་རྙེད་པ་དང༌། དགེ་འདུན་གྱི་སྤྱིར་ཡོན་བདག་གིས་ཡོན་ཕུལ་བ་དང་གཙུག་ལག་ཁང་ཉིད་ཀྱི་རྐྱེན་ལས་ལོ་དུས་རྟག་པར་ནོར་རྫས་འབུལ་བ་ལ་དགེ་འདུན་གྱིས་མི་ཐོས་ཤིང་ཡོད་མེད་པར་གྱུར་ཅིག་པར་སེམས་པ་དང༌། གནས་མེད་པར་སེམས་པ་དགེ་སློང་གི་གནས་དང་གཙུག་ལག་ཁང་ཡང་ཞིག་སྟེ་མེད་བར་དགའ་བ་དང་དགེ་འདུན་གྱི་དང་ཞེས་བ་ནས་སེམས་པའི་བར་དུ་སྤྱིར་རྣམ་པ་བདུན་གང་གིས་སྤངས་ཀྱང་རུང་འདི་ལྟར་སེམས་པའི་སེམས་བཏང་ནས་འཆགས་སུ་འོང་ན་བཟོད་པར་བྱའོ། །སེམས་དེ་ལྟ་བུར་མ་བཏང་ན་མཐོལ་ཞིང་འཆགས་སུ་འོངས་ཀྱང་མི་གནང་ངོ༌། །རྒྱལ་པོའི་གྲོང་དང༌། རྒྱལ་པོའི་ཕྱག་རྒྱ་ཁྱེར་ཏེ་ནན་ཐུར་གྱིས་སླར་ཤོག་ཤིག་ཅེས་ཟེར་བ་དང༌། ཡུལ་དཔོན་དང༌། ཞང་བློན་དབང་
ཆེན་པོ་ལ་མཐུ་བཙལ་བ། གཉེན་དང༌། གཉེན་རིགས་པ་བཟློག་སྟེ་མཐུར་བྱས་པ་དང༌། གང་ཟག་ལ་བརྟེན་པ་གནས་བརྟན་ནམ་དགེ་སློང་མཐུ་ཆེ་བ་ལ་མཐུ་བཙལ་བ་དང་རྒྱལ་པོའི་ཕྱག་རྒྱ་ཞེས་ཟེར་བ་ནས་བརྟེན་པ་ཞེས་བྱ་བའི་བར་དུ་སྤྱིར་མིང་གིས་སྨོས་པ་འདི་རྣམས་ཀྱི་མཐུས་གཙུག་ལག་ཁང་དུ་མི་གཞག་ཏུ་མི་རུང་ཞེས་ཟེར་ཞིང་མཐུ་དང་བཅས་ཏེ་འོངས་ཀྱང་ཆོས་བཞིན་དུ་མཚན་མ་མ་བཏང་ན་གཙུག་ལག་ཁང་དུ་མི་གཞག །དགེ་འདུན་ལ་མི་བརྟེན་བ་བཏང་བ་དང༌། ལྟག་མ་ལྟར་སྤངས་ཏེ་བཏང་བ་ལྐོག་ན་ནི་དགེ་འདུན་འདིར་མ་ཟད་ཀྱིས་ཕྱོགས་བཅུའི་དགེ་འདུན་གར་དགའ་བར་འགྲོའོ་ཞེས་ཟེར་ཞིང་དགེ་འདུན་གྱི་ནང་དུ་ནི་བདག་བཟོད་པ་གསོལ་ན་ཐུགས་རྗེ་ཅིར་གཟིགས་ཤེ་ན་མི་གནང་ངོ༌། །ཡན་ལག་གཅིག་མི་བྱེད་པ་ན་ཁྱིམ་པ་དང༌། ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་ལྐོག་ན་ཁྱིམ་པའི་ཚུལ་དུ་གོས་དཀར་བོ་གྱོན་ཞིང་ཆོས་གོས་འདོར་ལ་དགེ་འདུན་གྱི་ནང་དུ་སྔ་མའི་ནོངས་པ་བཟོད་པར་གསོལ་ཏེ་བདག་དབྱུང་དུ་ཅི་གནང་ཞེས་ཟེར་ཀྱང་བཟོད་པར་མི་བྱ་སྟེ་ཡན་ལག་གཅིག །མུར་འདུག་གི་རྒྱལ་མཚན་འཆད་པ་དང༌། ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་ལྐོག་ན་མུར་འདུག་གི་ཚུལ་དུ་ལུས་ལ་ཐལ་བས་བྱུགས་པ་དང་རལ་པ་ཐོགས་པ་ལ་སོགས་པ་བྱེད་ཅིང་དགེ་འདུན་གྱི་དྲུང་དུ་བདག་སྔ་མའི་ཉེས་པ་བཟོད་བར་གསོལ་ན་ཐུགས་རྗེས་ཅིར་གཟིགས་ཞེས་ཟེར་ཀྱང་མི་གནང་ངོ༌། །ཡན་ལག་གཅིག །མུར་འདུག་དང་བསྟེན་པ་དང༌། ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་ལྐོག་ན་མུར་འདུག་དང་ལྷན་ཅིག་ཏུ་འཁོད་ཅིང་མུར་འདུག་གི་ཆོས་ལ་བལྟས་པ་ལས་དགེ་འདུན་གྱི་དྲུང་དུ་བདག་གི་སྔ་མའི་ནོངས་པ་བཟོད་པར་གསོལ་ཞེས་ཟེར་ཀྱང་མི་གནང༌། ཆོས་མ་ཡིན་པ་སྤྱོད་པ་དང༌། གོང་མ་ལྟར་སངས་རྒྱས་ཀྱི་ཆོས་བོར་ལ་མུར་འདུག་གི་ཆོས་སྤྱོད་པས་ན་ཆོས་མ་ཡིན་པ་སྤྱོད་ཅེས་བྱ་སྟེ། མུར་འདུག་དང་བསྟེན་པ་འདི་གཉིས་ལ་ཡན་ལག་གཅིག །དགེ་སློང་གི་བསླབ་པ་ལ་མི་སློབ་པ་དང༌། ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་སྤང་བའི་གནས་ན་དུས་གསུམ་དགེ་བ་མི་སྤྱོད་པ་དང༌། ཆུ་བརྟག་པ་ལ་སོགས་ཚུལ་ཁྲིམས་ཕྲ་མོ་ལ་ནན་ཏན་མི་བསྲུང་ཞིང་དགེ་འདུན་གྱི་དྲུང་དུ་བདག་གི་ནོངས་པ་
བཟོད་པར་གསོལ་ཅིང་གནང་ཞེས་གསོལ་ཀྱང་མི་གནང་སྟེ་ཡན་ལག་གཅིག །རྙིང་ཞིང་ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་སྤངས་བའི་འོག་ཏུ་སྔ་མའི་ཉེས་པ་གནོང་བསྐུར་ནས་ལུས་ལ་བ་སྤུ་འགྲེང་ཞིང་རྡུལ་བྱུང་བ་ཙམ་གྱི་ཚོང་དུ་དགེ་འདུན་ལ་གསོལ་བ་དང་སྐྱོ་བ་དང༌། ལྟག་མ་ལྟ་བུ་དགེ་སློང་སྤངས་པའི་འོག་ཏུ་རབ་ཏུ་འགྱོད་ཅིང་མི་དགའ་ནས་གྲོགས་པོ་མཛའ་བ་ལ་ཕེ་འུར་ཡང་བཅོལ། དགེ་འདུན་ཐམས་ཅད་ཀྱི་ཞབས་ལས་བཟུང་སྟེ་གུས་རབ་ཏུ་གསོལ་བ་དང༌། དགེ་འདུན་ལ་ངན་པར་བསྟེན་པ་དང༌། ལྟག་མ་ལྟར་སྤངས་པའི་དགེ་སློང་དགེ་འདུན་གྱིས་སྤངས་པའི་འོག་ཏུ་རབ་ཏུ་མི་དགའ་ཞིང་འགྱོད་དེ་དགེ་འདུན་ཐམས་ཅད་ཀྱི་དྲུང་དུ་འགྲེ་ལྡོག་ཅིང་སེམས་ཐག་པ་ནས་གསོལ་བ་དང༌། འབྱུང་བར་འཇུག་པ་དང༌། ལྟག་མ་ལྟར་སྤངས་པའི་དགེ་སློང་རྗེ་མོའམ་དབང་ཆེན་པོས་མགོ་ལ་སློ་ཙ་གཞག་པ་ཙམ་དུ་མི་དགའ་ཞིང་འདོར་འདོད་པ་བཞིན་དུ་མཚན་མ་གང་བྱས་པའང་དེ་བཞིན་དུ་འདོར་འདོད་ཅིང་གསོལ་བ་དང༌། མཉམ་པར་སྟོན་པ་དང༌། ལྟག་མ་ལྟར་དགེ་འདུན་གྱིས་སྤངས་པའི་དགེ་སློང་སྔ་མའི་ཉེས་པ་བཏང་ལ་ཕྱིན་ཆད་ཡོན་ཏན་དང་ལྡན་པའི་ཅི་ལྟར་བྱེད་པ་བཞིན་དུ་བགྱིད་དོ་ཞེས་ཡི་དམ་བཅས་ཤིང་ཁར་ཡང་བརྗོད་ཅིང་གསོལ་བ་དང༌། མཚན་མ་བཏང་སྟེ་གསོལ་བ་ནས་བཟོད་པར་བྱའོ། །སྤང་བ་རྣམ་བདུན་སཱུ་ཏྲ་རྙོག་མ་ཞེས་པ་མན་ཆད་སློབ་ཅེས་བྱ་བ་ཡན་ཆད་མཚན་མ་རྣམ་པ་བརྒྱད་བཏང་ལ་བཟོད་པ་ཞེས་བྱའོ་ཞེས་བྱ་བ་ཡན་ཆད་རྙིང་ཞིང་སྐྱོ་བ་མན་ཆད་རྣམས་ལྟར་བཟོད་པ་གསོལ་ན་སྤངས་པ་ལས་སླར་བཟོད་པར་གསོལ་བ་གནང་བར་བྱའོ། །སྤང་པ་རྣམ་བདུན་ནི་འོག་ནས་འཆད། ལས་སྦྱིན་པ་དང༌། དབྱུང་བ་དང༌། བསྙེན་པར་རྫོགས་པར་བྱ་བ་དང༌། གཏང་བ་དང་གནང་བ་ཡང་ངོ༌། །མིང་གིས་སྨོས་པ་འདི་རྣམས་བདག་འདི་ལྟར་བགྱིད་ན་དགེ་འདུན་གྱིས་གནང་བར་ཐུགས་རྗེ་ཅིར་གཟིགས་ཞེས་གསོལ་དུ་འོང་བ་ནི་གདོད་གནང་བར་བྱའི་དགེ་འདུན་གྱིས་འདི་ལྟར་བྱར་མི་དུང་ཞེས་བྱ་སྟེ་བྱེད་དུ་མི་གཞུག་གོ །ཐབ་མོ་བྱེད་པ་ལས་ཀྱིས་སྤྱོད། །དགེ་སློང་གཅིག་གམ་གཉིས་ཀྱང་རུང་སྟེ། དགེ་སློང་རྣམས་ལ་རྟག་པར་ཐབ་མོ་རྒོལ་བ་དེ་ཐོང་ཤིག་ཅེས་ལན་གཉིས་ལན་གསུམ་དུ་ཐབ་མོ་ཐོང་ཤིག་ཅེས་བསྒོ་སྟེ་མ་
བཏུབ་ན་དགེ་འདུན་རྣམས་ཀྱིས་ཚིག་གིས་སྤྱོད་སྟེ། གསོལ་བ་དང་ཞུབ་དང་བཞིའི་ལས་ཀྱིས་བསྐྲད་དོ། །སྤངས་པ་གཅིག་དགེ་འདུན་གྱིས་ལྟག་མའི་ལྟུང་བའི་ཕྱིར་ཕྱིར་ལ་མ་མཐོལ་ན་སྨད། དགེ་འདུན་གྱིས་ལྷག་མ་སྔ་མ་འབྱུང་ལ་མཐོལ་ཏེ་ཡང་བྱེད་ཅིང་མཐོལ་བ་ལྟ་བུ་ནི་མི་སྨད་ཀྱི་ལྷག་མ་མང་དུ་བྱས་ཀྱང་མི་མཐོལ་བར་འདུག་ལ་མཐོལ་ཅིག་ཅེས་བསྒོ་ནའང་མི་མཐོལ་བ་ནི་སཱུ་ཏྲ་ལྟག་མ་ལྟར་སྤྱོད་དེ་དབེན་པར་གསོལ་བ་དང་ཞུབ་བཞིའི་ལས་ཀྱིས་བསྐྲད་དོ། །སྤང་བ་གཅིག་རིགས་སུམ་བ་བསྐྲད་ཀ་ཤྭ་ཀ་དང་སུ་ག་ར་ས་ལྟ་བུ་དགེ་འདུན་གྱི་རིགས་སུན་པར་བྱེད་པའང་གསོལ་བ་དང་ཞུ་བ་བཞིའི་ལས་ཀྱིས་བསྐྲད་དོ། །དེའི་ཕྱིར་དུ་བ་དང་སྐབས་མི་སྟེར་ཅིང་མི་བྱེད་ན་ཡང་ངོ༌། །ལྟག་མ་ལྟར་རིགས་སུན་པར་བྱས་ཏེ་ཁྱེད་ཉེས་སོ་ཞེས་རྒོལ་བའི་ཚེ་སྐབས་དབྱེར་ཀྱང་མི་བཏུབ། དགེ་འདུན་ནང་འདུར་ཀྱང་མ་བཏུབ་ན་གསོལ་བ་དང་ཞུ་བ་བཞིའི་ལས་ཀྱིས་འདུག་བའི་གནས་ནས་བསྐྲད་དེ་བཏང་ངོ༌། །དེ་མ་མཐོང་ངོ་ཞེས་བསྙོན་ཀྱང་ངོ༌། །ལྟག་མ་ལྟར་རིགས་སུན་པར་བྱས་པ་དགེ་སློང་དང་ཁྱིམ་པས་ཀྱང་ཤེས་བཞིན་དུ་རིགས་སུན་པ་མཐོལ་ཅིག་ཅེས་བསྒོ་ན་ངན་རིགས་སུན་པ་མ་བྱས་ཞེས་བསྙོན་ཅིང་འཆགས་སུ་མི་བཏུབ་ན་བསྐྲད་དེ་བཏང་ངོ༌། །རིགས་སུན་པ་མཐོལ་ཅིག་སྤང་ཞེས་བྱ་བ་མན་ཆད་འདི་ཡན་ཆད་གསུམ་སྤང་བ་གཅིག་ཁྱིམ་པ་ལ་ཟུག་ཟེར་ན་བརྟུལ་ནའོ། །ཁྱིམ་པ་ལ་ཐབ་མོ་རྒོལ་བ་དང་ཚིག་ངན་པ་སྤྱོད། དེ་ལྟ་བུ་མ་སྨྲ་ཤིག་ཅེས་བསྒོ་སྟེ་མ་ཉན་ན་ཟས་ཙམ་བྱིན་ལ་གཙུག་ལག་ཁང་གི་འཁོར་དུ་མཚན་མ་མ་བཏང་གི་བར་དུ་གཞག་གོ །དེ་བཟོད་པར་བྱ་བ་འདིའི་ལས་ཀྱི་གནས་སུ་བཟོད་པར་བྱའོ། །ལྟག་མ་ལྟར་གཙུག་ལག་ཁང་གི་འཁོར་དུ་སྤངས་ཏེ་གཞག་བ་དང་སླན་ཆད་མི་བགྱིད་དོ་ཞེས་གསོལ་ན་ལྟག་མ་སཱུ་ཏྲ་རིང་པོའི་རྩིས་མགོ་བཞིན་དུ་མཚན་མ་བཏང་ལ་གསོལ་བ་བཏབ་པའི་སྟེང་དུ་ཁྱིམ་པ་སུ་ལ་ཁ་ངན་བྱས་པ་དེ་ལ་བཟོད་པར་གསོལ་ནས་གདོད་གནང་བར་བྱའོ། །ཁྱིམ་པ་ལ་བཟོད་པར་བྱ་ཞེས་ཟེར་བའི་སཱུ་ཏྲ་ལྟག་མ་དང་འདི་གཉིས་ལས་སྤང་བ་གཅིག །ལྟུང་བ་ཤེས་པ་དང༌། དགེ་འདུན་གྱིས་ཤེས་ཀྱང་མི་མཐོལ་བར་འདུག་པ་དང༌། མ་བཤགས་པ་དང༌། ལྟག་མ་མན་ཆད་ཉེས་བྱས་འཆགས་སུ་མི་བཏུབ་པ་
དང་སྡོམ་པའི་བཤགས་པ་མ་ཡིན་པ་དང༌། ལྷག་མ་མན་ཆད་སོ་སོར་མཐོལ་བ་ཡན་ཆད་ཉེས་བྱས་ཤིག་ལུས་ངག་གིས་བྱས་པ་ནི་ལྷག་མ་དང་འདྲ་བར་བྱའི་འདི་ནི་ཉེས་བྱས་ཙམ་ཡན་ཆད་གཅིག་སེམས་ཀྱིས་ལོག་པར་བསམས་བ་ནི་ལྟག་མ་ལྟར་ཆད་བ་མི་བཅད་དོ། །མ་མཐོང་ངོ་ཞེས་བསྙོན་པ་དང་ལྟག་མ་ལྟར་ལྷག་མ་དང་ཉེས་བྱས་ཡན་ཆད་བྱས་པ་དགེ་འདུན་གྱིས་ཤེས་ཏེ་མཐོལ་ཅིག་ཅེས་བསྒོ་ན་ཉེས་བྱས་པར་ཡང་མ་མཐོང་ཡིད་ལའང་མི་དྲན་ཞེས་ཟེར་ཞིང་བསྙོན་ན་དེའང་སྤང་བར་བྱའོ། །ལྟུང་བ་ཤེས་པ་མན་ཆད་འདི་ཡན་ཆད་ལ་སྤང་བ་གཅིག །བཤགས་པ་ལ་ནན་ཏན་བྱ་བར་མི་འདོད་པ་དང༌། དགེ་འདུན་གྱི་ལྷག་མ་མན་ཆད་ཉེས་བྱས་ཡན་ཆད་གཅིག་བྱས་པ་བཞིན་དུ་མཐོལ་ཚངས་བྱེད་དུ་མི་བཏུབ་ཅིང་ཐན་ཅིང་འདུག་པ་ཡང་སྤང་བར་བྱའོ། །འདི་ལ་སྤང་བ་གཅིག །སྡིག་པ་ལ་བལྟས་པའམ་བཏང་བ་ཡང་སྤང༌། ཡང་དག་པར་གཤེགས་པ་ལ་སྐུར་བ་འདེབས་ཤིང་ཉེས་པ་བྱས་ཀྱང་བར་ཆད་དུ་མི་འགྱུར་རོ་ཞེས་ཟེར་བ་དངོས་ནི་ལྟུང་བ་ཡིན་ན་ལྟུང་བས་མི་ཆོག་གི་མཚན་མ་བཏང་ན་དེ་ཡང་སྤང་བར་བྱའོ། །ལྟག་ཏུ་སཱུ་ཏྲ་ཐབ་མོ་བྱེད་པ་ལ་ལས་ཀྱིས་སྤྱོ་ཞེས་བྱ་བ་མན་ཆད་སཱུ་ཏྲ་འདི་ཡན་ཆད་སྤང་བ་བདུན་ཡོད་དེ་འདི་རྣམས་ནི་སྤང་བ་སྟེ་གཙུག་ལག་ཁང་གི་འཁོར་དུ་གཞག་གོ །འདི་ལའང་སྤང་བ་གཅིག །འདི་ཉིད་ལྟུང་བ་ཤོགས་ཤིག་པའོ། །ལྟག་མ་ལྟར་སྤང་བ་རྣམ་བདུན་གང་སྤང་ཡང་རུང་སྟེ། ཐོག་མ་སྤང་བའི་ཚེ་དགེ་འདུན་གྱིས་ཁྱོད་ནམ་དུལ་བར་གྱུར་ན་འདིར་མཐོལ་དུ་ཤོགས་ཤོག་ཅེས་བསྒོ་སྟེ་བཏང་ངོ༌། །དགེ་འདུན་འདི་དག་གིས་ཁྱོད་ཀྱི་སེལ་ནུས་སོ་བརྗོད་དོ། །ལྟག་མ་ལྟར་སྤངས་ཏེ་བཏང་བ་སླར་མཐོལ་བའི་ཚེ་དང་པོ་དགེ་འདུན་གང་ཟག་གི་གནས་ན་འདུག་པའི་ཚེ་ཉེས་པ་བྱས་བ་སླར་མཐོལ་བའང་དགེ་འདུན་དེ་ཉིད་ལ་མཐོལ་ཞིང་བཟོད་པར་གསོལ་ལྟུང་བ་མི་བཅང་ལྟུང་པ་སྡེ་ལྔ་ལས་གང་ཡང་རུང་སྟེ་བྱུང་ན་མི་བཅབ་པར་མཐོལ་ལོ།། ཆུང་དུ་ན་མིང་ནས་ཀྱང་བརྗོད་དོ། །ལྷག་མ་བཅུ་གསུམ་ལས་གང་བྱས་ཀྱང་རུང་སྟེ་མིང་ནས་མ་ཕྱུང་བས་ཡང་ང་ལྷག་མ་ཞིག་ཡོད་དེ་ཞེས་བརྗོད་ནའང་དཔང་བཙུགས་པའི་ཚུལ་དེ་བསྔོས་པར་ཆུད་དོ། །ཅི་ལྟར་ལྕི་བ་བཞིན་དུ་ཉེས་བྱས་པ་དག་གོ །ཉེས་བྱས་ཡན་ཆད་ལྟུང་བ་ཞིག་བྱུང་ན་ཡང་འདི་
ཉེས་སོ་ཞེས་མིང་ནས་མ་སྨོས་ཀྱང་ཉེས་བྱས་དང་ལྟུང་བ་སྤྱིའི་མིང་ནས་སྨོས་ཏེ་ཕ་ལོགས་ལ་བརྗོད་ནའང་བསྔོས་པར་ཆུད་དོ། །རང་བཞིན་དུ་གནས་པ་ལའོ། །ལྟག་མ་ལྟར་བསྔོ་བ་ནི་དགེ་སློང་ཕས་ཕམ་པ་མ་བྱུང་བ་གཅིག་ལ་བསྔོའོ། །གཞན་དུ་ནི་མི་ལྟ་བ་ལའོ། །དགེ་སློང་ལོག་པར་བལྟས་པ་དང་ཡང་དག་པར་བལྟས་པ་གཉིས་སོ་སོའི་སྡེ་ལ་དཔང་བཙུགས་ཤིང་བསྔོ། །བསྙེན་པར་རྫོགས་པ་དང་བཅས་པའོ། །ལྟག་མ་ལྟར་དཔང་གཟུགས་པ་ནི་ཁྱིམ་པ་དང་དགེ་སྦྱོང་ལ་མ་ཡིན་གྱི་དགེ་སློང་གཅིག་ལ་བསྔོ་ཞིང་དཔང་གཟུགས་སོ། །མཚན་མཚུངས་པ་ལའོ། །དགེ་སློང་ཕོའང་ཕོ་ལ་བསྔོ། །མོའང་མོ་ལ་བསྔོ། །འདི་ཉིད་དུ་འདི་བཞིན་དུ་ཕྱི་མ་དང་བཅས་པ་ལའོ། །དགེ་སྦྱོང་ནི་དགེ་སློང་ལ་མཐོལ་ལོ། །དགེ་སློབ་མ་དང་དགེ་སྦྱོང་མ་ནི་དགེ་སློང་མ་ལ་མཐོལ་ལོ། །ལྟག་མ་ལྟ་བུ་རང་བཞིན་ཐ་དད་མ་ཡིན་པ་དང༌། བསྙེན་པར་རྫོགས་པ་དང་མཚན་མཚུངས་པ་ལ་མཐོལ་ལོ། །འདི་ཡི་ཆོས་པ་ལན་འདི་བྱས་པའོ། །དགེ་སློང་གྲོགས་མེད་ན་དགེ་སློང་མ་ལ་བསྔོ། །དགེ་སློང་མ་ལ་གྲོགས་མེད་ན་ཕོ་ལ་བསྔོ། །དགེ་སྦྱོང་དང་དགེ་སྦྱོང་མ་དང་འདི་རྣམས་ལ་བསྔོར་ནི་རུང་སྟེ་ཉེས་བྱས་རེ་རེ་ཡོད་དོ། །མཚམས་གཞན་དུ་འདུག་པ་ལ་ཡང་ངོ༌། །དགེ་སློང་གྲོགས་ལ་བསྔོ་བ་གྲོགས་ནམ་མཁའ་ལ་འདུག་གམ་མཚམས་ཀྱི་ཕྱི་རོལ་ན་འདུག་པ་ལ་བདག་མཚམས་ཀྱི་ནང་ངམ་སལ་འདུག་པས་བསྔོ་ན་བསྔོས་པར་ནི་ཆུད་ཀྱི་ཉེས་བྱས་སོ། །བསྒོ་བ་ལས་སྐྱེས་པ་དགེ་འདུན་ཐམས་ཅད་ལའོ། །རིགས་སུན་པ་དང་དགེ་འདུན་དབྱེན་ལ་སོགས་པ་བཞི་ལན་གཉིས་ལན་གསུམ་དུ་བསྒོ་སྟེ་མ་བཏུབ་ནས་ལྷག་མར་འགྱུར་བ་ནི་ཉི་ཤུ་ལ་མཐོལ་བ་ཡིན། ལན་ཅིག་གམ་ལན་གཉིས་བསྒོ་ཏེ་ལྷག་མར་གྱུར་པ་ནི་དགེ་འདུན་ལ་མཐོལ་ཏེ་གྲངས་ནི་འོག་ནས་འཆད། སྨྲེ་སྔགས་འདོན་པའི་ན་ཚོགས་པ་དེའི་གནས་སུའོ། །བཞི་སོ་སོར་མཐོལ་བ་གང་བྱུང་ཡང་རུང་སྟེ། མཚམས་གཅིག་གི་དགེ་སློང་གུད་དུ་སོང་པ་ནི་མ་གཏོགས་ཀྱི་མཚམས་གཅིག་གི་དགེ་འདུན་ཐམས་ཅད་ལ་མཐོལ། ཚེ་དང་ལྡན་པ་ཁོ་བོ་སྨད་པའི་དངོས་པོ་བྱུང་བར་མི་མཐུན་པ་སྟེ། སྨྲེ་སྔགས་འདོན་པ་མཁྱེན་པ་བགྱིའོ་ཞེས་སོ། །ལྟག་མ་ལྟར་མཐོལ་
བ་ནི་ཚིག་འདི་སྐད་ཅེས་བྱས་ཏེ་མཐོལ་ལོ། །དགེ་འདུན་རེ་རེའི་མདུན་དུ་ཅོག་ཙོག་པོར་འདུག་ལ་བདག་གི་ཉེས་པ་བྱས་པའི་དངོས་པོ་ཅི་ཡིན་པ་མིང་ནས་ཕྱུང་སྟེ་འདི་ཡིན་ནོ་ཞེས་མི་དགའ་ཞིང་འགྱོད་པའི་ཚུལ་ལྟ་བུས་མཐོལ་ལོ། །འདི་སྔགས་ལྟ་བུར་མ་ཡིན་ནོ། །སྔགས་ནི་ལན་གསུམ་དུ་གདབ་པ་ཡིན་ན། འདི་ཡང་སྔགས་གདབ་པ་ནི་མ་ཡིན་གྱི་ལྟག་མ་ལྟར་བརྗོད་པའི་ཚིག་དགེ་སློང་གཅིག་གི་དྲུང་དུ་ཐལ་མོ་སྦྱར་ཏེ་གུས་པར་ཙོག་ཙོག་པོར་འདུག་སྟེ་ལན་གསུམ་མཐོལ་བས་ཚངས་སོ། །ཡིད་ཀྱི་བ་ལང་དེ་བསྡམ་པར་བྱའོ། །ཡིད་ཀྱིས་རྐུ་བ་དང་མི་ཚངས་པ་ལ་སོགས་པ་ཉེས་བ་ཞིག་བྱ་བར་བསམས་པའི་འོག་ཏུ་ཡིད་ཀྱིས་འགྱོད་དེ་ཕྱིན་ཆད་མི་བྱ་བར་བསམས་ན་གཞན་ལ་མཐོལ་མི་དགོས་ཏེ་བྱང་བར་འགྱུར། གཞན་ནི་འདི་དང་བཅས་ཏེ་བཤགས། ལུས་ཀྱིས་ཉེས་བྱས་པ་ནི་ཡིད་ཀྱིས་མཐོལ་བས་མི་བྱང་གི་དགེ་སློང་ཕ་རོལ་པོའི་གཅིག་ལ་མཐོལ་དགོས་སོ། །གཅིག་ལའོ། །ལྟག་མ་ལྟར་མཐོལ་བ་ནི་དགེ་སློང་གཅིག་ལ་མཐོལ་བས་ཚངས་སོ། །གཞན་ལ་མི་ལྟ་བ་དེ་ལའོ། །དགེ་སློང་ཆོས་དང་ཆོས་མ་ཡིན་པ་ལ་བལྟས་པ་ནི་སོ་སོའི་སྡེ་ལ་མཐོལ་ལོ། །ཁ་ན་མ་ཐོ་བ་ཅན་མེད་པའོ། །མཐོལ་བའི་རྣམས་དགེ་སློང་གཙང་མ་ལ་མཐོལ་ལོ། །སྡེ་ཡང་ངོ༌། །ལྷག་མ་མན་ཆད་ཉེས་བྱས་ཡན་ཆད་ཉེས་པ་ཅི་བྱུང་བ་སྡེ་སྣོལ་དུ་མཐོལ་ལོ། །མེད་ན་ལྟུང་བས་སོ། །དགེ་འདུན་ཁྱེར་ཅིག་ཐམས་ཅད་ལ་ལྟུང་བ་ཡོད་པ་ལྟ་བུ་ལས་བསྐོས་པའི་ལྟུང་བ་ཡོད་པ་ལྟ་བུ་སྡེ་གཅིག་ཀྱང་མཐོལ་དུ་རུང་ངོ༌། །སྔོན་དུ་སྤངས་ཤིང་བྲལ་ན་སྤངས་པའི་འོ། །ཆོས་གོས་གསུམ་སྤངས་བའི་ལྟུང་བ་བྱུང་ན་གསུམ་ཀ་སྤངས་ཏེ་ཞག་གཅིག་ཆོས་གོས་ཡང་མེད་པར་འདུག་ལ་ཕྱི་དེ་ཉིད་གདོད་མཐོལ་ཚངས་བྱས་ཏེ་བསྔོའོ། །གོས་ལྷག་སྤངས་པར་གྱུར་པ་ཞག་གཅིག་སྤངས་ཏེ་ཕྱི་དེ་ཉིད་མཐོལ་ཚངས་བྱས་ནས་གདོད་སླར་བླང་ངོ༌། །ལྷག་མའི་སྦོམ་པོ་ལྕི་བ་ནི་དགེ་འདུན་ཐམས་ཅད་ལས་ཏེ་ལྔ་པ་ལ་སོགས་པའོ། །དགེ་འདུན་གྱི་ལྷག་མའི་སྦོམ་པོ་ལྕི་བ་ཞིག་བྱུང་ན་དགེ་འདུན་ལྔ་ཡན་ཆད་ལ་མཐོལ་བ་ནི། མཚམས་ཀྱི་ཕྱི་རོལ་དུ་དགེ་འདུན་སྤྱན་དྲངས་ཏེ་དེ་ལ་མཐོལ་ལོ། །མ་ལུས་པ་བྱུང་ན་མང་པོ་ལ་སྟེ་མ་ཆད་པའོ། །ཕས་ཕམ་པའི་སྦོམ་པོ་ནི་མཚམས་གཅིག་གི་ནང་ནས་དགེ་སློང་མང་པོ་
ཞིག་འདུག་ན་དགེ་འདུན་ཐམས་ཅད་ལ་མཐོལ་ལོ། །གཙུག་ལག་ཁང་དེ་ན་དགེ་སློང་ཉུང་སྟེ་དྲུག་ཏུ་མ་ཚང་ན་དྲུག་ལས་ཉུང་བ་ལ་མཐོལ་དུ་མི་གནང་གི་གུད་དུ་སྤྱན་དྲངས་ལ་མཚམས་ཀྱི་ནང་དུ་མཐོལ་ཅིག །འདི་ཡང་བ་ན་བཞི་ལ་སོགས་པའོ། །ལྷག་མའི་སྦོམ་པོ་ཡང་བ་དགེ་སློང་བཞི་ཡན་ཆད་ལ་མཐོལ། ཕམ་པའི་སྦོམ་པོའི་ཡང་བ་དགེ་སློང་ལྔ་ཡན་ཆད་ལ་མཐོལ་ལོ། །བྱས་པ་བཞིན་དུ་འདི་ལས་རྩོལ་བ་ལས་རྐྱེན་གྱིས་མ་གྲུབ་ཀྱང་ལས་སོ། །དགེ་སློང་གཅིག་གིས་དགེ་འདུན་གྱི་ལྷག་མའི་ཁུ་བ་བྱས་ནས་འཁོར་དེར་མཐོལ་དུ་ནི་བདག་ངོ་ཚ་སྟེ་བདག་དང་མཛའ་བ་གཅིག་ལ་བསྔོས་ཏེ་ཡུལ་གཞན་དུ་དགེ་སློང་ཉི་ཤུ་ལས་མཐོལ་དུ་སོང་སོང་བ་ལས་མ་མཐོལ་བར་ལམ་དུ་ཤིའང་མཐོལ་བའི་སེམས་དང་ཆས་ཏེ་སོང་སོང་བས་ལྷག་མའི་སྡིག་བྱང་བར་འགྱུར་རོ། །ཉེས་བྱས་པ་བཞིན་དུ་ནི་གླེན་པས་བྱས་པ་དང་ཤེས་པའི་ལྟུང་བ་དང་དྲན་པ་དེས་ནའོ། །དགེ་སློང་སྨྱོན་པ་གཅིག་གིས་ཕས་ཕམ་པ་དང་ལྷག་མ་ལ་སོགས་པ་ཞིག་བྱས་ནས་དེའི་འོག་ཏུ་སྨྱོན་པ་སངས་ནས་སྔ་མ་ཉེས་བྱས་པ་དྲན་ཀྱང་མི་དྲན་པའི་ཚེ་བྱས་པས་ཕམ་པ་ལ་སོགས་པར་མི་འགྱུར་གྱི་ཉེས་བྱས་ཀྱི་མཐོལ་བས་ཚངས་སོ། །མིང་དང་རུས་ལྟུང་བར་ལྡན་པས་བརྗོད། ལྷག་མའམ་ལྟུང་བ་ཞིག་ཉེས་བྱས་ནས་མཐོལ་བའི་ཚེ། ལྟག་མ་ཞིག་ཉེས་ནའང་ལྷག་མ་ཞིག་ཉེས་བྱས་སོ་ཞེས་བྱས་ལ་ལྷག་མའི་ནང་ནས་གང་ཉེས་པའང་མིང་ནས་དབྱུང་ངོ༌། །ལྟུང་བ་ཡང་དེ་དང་འདྲ་བར་བྱ། འདི་སྲིད་དུ་བཅབས་པ་དང་མ་བཅབས་པ་དང་དགེ་འདུན་གྱི་ལྷག་མ་དང་ངོ༌། །བདག་གིས་དགེ་འདུན་གྱི་ལྷག་མ་བྱས་ཏེ་མཐོལ་བའི་ཚེ། ལྟག་མ་ལྟར་གང་ཉེས་པའི་མིང་དང་རུས་དང་འདི་སྲིད་དུ་བཅབས་སོ་ཞེས་མཐོལ། དབྱུང་བས་འདི་ལས་སློང་བར་བྱེད་དོ། །དགེ་འདུན་གྱི་ལྷག་མ་ཞིག་བྱས་ན་དགེ་སློང་ཉི་ཤུས་ཕྱུང་ན་ཚངས་པར་འགྱུར་རོ། །མགུ་བར་བྱ་བ་ཉི་མ་དྲུག་ཏུ་དཔྱད་དེ་དགེ་འདུན་ལས་བླང་ནའོ། །ལྟག་མ་ལྟར་ལྷག་མ་བྱས་པ་བཅབས་པའི་ཆད་པའང་བྱས་ནས་ཉི་མ་དྲུག་ཏུ་དགེ་འདུན་ལ་བདག་མགུ་བ་བགྱིད་ཅིང་མཆིས་སོ་ཞེས་གསོལ་ཏེ་ཞག་དྲུག་མགུ་བར་བྱས་ནས་གསོལ་ཏེ་དབྱུང་བར་བྱའོ། །དགེ་སློང་མའི་ཟླ་བ་ཕྱེད་དོ། །དགེ་སློང་མས་ལྷག་མ་བྱས་པའི་མགུ་བ་
དགེ་འདུན་སྡེ་གཉིས་ཟླ་བ་ཕྱེད་ཀྱི་བར་དུ་བྱའོ། །ལྕི་བའི་ཆོས་ལས་འདས་ན་འདི་སྤྱོད་པར་བྱའོ། །དགེ་སློང་མས་ལྕི་བའི་ཆོས་བརྒྱད་ལས་གང་ཡང་རུང་སྟེ་ཉེས་པར་གྱུར་ན་དགེ་འདུན་སྡེ་གཉིས་ལ་ཟླ་བ་ཕྱེད་ཀྱི་བར་དུ་ཆད་པ་བྱའོ། །ཉེས་པ་བཅབས་པ་མེད་ན་དེ་སྐྱེའོ། །དགེ་འདུན་གྱི་ལྷག་མ་བྱས་ཏེ་ཅི་སྲིད་དུ་བཅབས་པ་ཆད་པ་མ་བྱས་ན་ཞག་དྲུག་མགུ་བ་བྱས་ཀྱང་དབྱུང་བ་མི་རུང་ངོ༌། །ཆད་པས་དེ་མེད་པར་མི་འགྱུར་རོ། །ལྟག་མ་ལྟར་བཅབས་པའི་ཆད་པ་ཕྱས་ན་གདོད་དབྱུང་བར་རུང་ངོ༌། །དུས་དེ་སྙེད་དུ་དགེ་འདུན་ལས་བླངས་ཏེའོ། །ལྷག་མ་བྱས་ཏེ་ཅི་སྲིད་དུ་བཅབས་བའི་ཞག་འདི་སྙེད་ཅིག་བཅབས་སོ་ཞེས་དགེ་འདུན་ལ་གསོལ་ཏེ། དགེ་འདུན་གྱིས་བཅད་པར་གྱིས་ཤིག་པར་བཀའ་སྩལ་ནས་གདོད་ཅི་སྲིད་དུ་བཅབས་པའི་ཆད་པ་བྱའོ། །དེ་བྱེད་པ་ལས་དེ་ལྟ་བུ་དགེ་འདུན་གྱི་ལྷག་མ་བྱུང་ན་བླངས་ཤིང་བྱས་པ་ལས་ཞིག་སྟེ་དེ་བས་ན་རྩ་བ་ནས་བརྩམས་ཏེ་སྦྱིན། དགེ་འདུན་གྱི་ལྷག་མ་ཞིག་བྱས་ནས་ཆད་པ་དང་མགུ་བ་གང་ཡང་རུང༌། དགེ་འདུན་ལས་ལུང་མནོས་ཏེ་ཆད་པ་བྱེད་པའི་ཚེ་ཡང་ལྷག་མ་ཞིག་བྱས་ན་ལས་སྔ་མ་བྱས་པ་ཡང་ཞིག་དགེ་འདུན་ལས་ལུང་མནོས་པ་ཡང་མི་བརྩན་གྱི་ད་གདོད་ལུང་ཡང་གདོད་གནོད་པ་ཆད་པ་ཡང་གདོད་མགོ་བརྩམས་ཏེ་བྱའོ། །འཇུག་པ་བཞིན་དུ་བརྩམས་པའོ། །ལྟག་མ་ལྟར་ཆད་པ་དང་མགུ་བར་བྱེད་པ་དད་པའི་སེམས་ཀྱིས་མགུ་བར་བྱེད་པ་བཞིན་དུ་ཆད་པ་སླར་མགོ་བརྩམས་པ་ལེ་ལོ་མ་བྱས་པ་མ་ཡིན་གྱི་སྔ་མ་དང་འདྲ་བས་དད་པ་བྱའོ། །དེ་བས་ན་མ་སྐྱེས་པ་དེ་དེ་ན་ཐོག་མ་སོ་སོར་བསླང་པ་ཡང་ངོ༌། །དགེ་འདུན་གྱི་ལྷག་མ་ཞིག་བྱས་ཏེ་མཐོལ་ནས་ཆད་པ་དང་མགུ་བ་བྱས་ནས་བྱུང་བའི་འོག་ཏུ་ཕྱིས་འདུལ་བ་ལས་ཐོས་ནས་སྔ་མའི་ཆད་པ་དང་མགུ་བ་དང༌། ཕྱུང་བ་ཚུལ་བཞིན་དུ་མ་བྱས་པར་ཚོར་ན་སྔ་མའི་ལས་མི་རུང་གི་ད་གདོང་བྱ་དགོས་སོ། །དེ་ལས་གཞན་པ་ཡང་བྱའོ། །ལྟག་མའི་ཆད་པ་བྱ་བ་སྔོན་ལན་ཅིག་ཀྱང་བྱས་ཟིན་པས་ད་ཡག་ཡུག་ཙམ་བྱས་པས་ཆོག་པ་ཙམ་དུ་བསམས་ཏེ་བྱར་མི་རུང་གི་སྔོན་ཇི་ལྟར་བྱས་པ་བཞིན་དུ་ནན་ཏན་བྱའོ། །དེ་བས་ན་དེའི་ཕྱིར་ཡང་གནས་པའོ། །དགེ་འདུན་གྱིས་ལྷག་མ་ཞིག་བྱས་ཏེ་ཆད་པ་དང་མགུ་བ་བྱེད་པ་ལས་ལས་མ་ཟིན་པར་ཡང་
ལྷག་མ་གཉིས་གསུམ་ཞིག་རིམ་པར་བྱས་ན་ནང་གི་ཐ་མ་ནས་བྱས་པ་དེ་ནས་མགོ་བཟུང་སྟེ་ལས་ཀུན་གདོད་བྱའོ། །དེ་བཅབས་པ་ལྷག་མ་དེའི་དུས་ཆུད་པར་བྱ། ལྷག་མ་ཞིག་བྱས་ནས་ཆད་པ་བྱེད་པའི་ཚེ་ཡང་ལྷག་མ་ཞིག་བྱས་ནས་ཞག་བཅུ་ཙམ་བཅབས་ཏེ་བཞག་ནས་ཡང་ལྷག་མ་ཞིག་བྱས་ནས་མཐོལ་ན་བར་དུ་ཞག་བཅུ་ཙམ་བཅབས་པས་བསྣན་ཏེ་ཆད་པ་དེ་བཞིན་དུ་བྱའོ། །འདི་དག་ལས་ཀྱིས་སྦྱིན་ཆད་པ་དང་རྩ་བའི་ཆད་པ་དང་མགུ་བ་དང་རྩ་བའི་མགུ་བ་དང་ཡང་རྩ་བའི་མགུ་བ་དགེ་འདུན་གྱིས་གྱིས་ཤིག་པར་ཁས་བསྒོ་བ་ཙམ་གྱིས་མི་ཆོག་གི་གསོལ་བ་དང་ཞུ་བ་བཞིས་བྱེད་དུ་གཞུག་གོ །དབྱུང་བ་ཡང་ངོ༌། །དགེ་སློང་ཉི་ཤུས་ཆད་པ་དང་མགུ་པ་བྱས་ཏེ་དབྱུང་བའི་ཚེའང་གསོལ་བ་དང་ཞུ་བ་བཞིས་བྱའོ། །འདིར་སྤྱོད་པ་ཡང་ངོ༌། །དགེ་འདུན་གྱིས་ལྷག་མའི་ཁུ་བ་ཞིག་དབྱུང་བ་དང་འཛིན་པ་ལ་སོགས་ཏེ་ལྷག་མ་གང་བྱས་ཀྱང་རུང་ཡོན་བདག་དད་པའི་ཡོན་བླངས་ཤིང་ལས་འདི་ལྟར་བྱེད་པ་ཉེས་སོ་ཞེས་སྤྱོ། །གསོལ་བ་དང་ཀློག་པ་དང་པོའི་བར་དུའོ། །ལྟག་མ་ལྟར་སྤྱོ་བ་ནི་ལས་པའི་དགེ་སློང་གཅིག་གིས་གསོལ་བ་གཅིག་བྱས་ལ་དེའི་འོག་ཏུ་སྤྱོ་བར་བྱའོ། །རྩྭ་བཏིང་བ་བཞིན་དུ་བསྙིལ། དགེ་སློང་ལྷག་མ་བྱས་པ་དེ་དགེ་འདུན་གྱི་སྤྱན་སྔར་ཁ་བུབ་དུ་བསྙིལ་ལ་སྤྱོ་བ་དང་དབྱུང་བ་གཉིས་ཀ་ལས་པའི་དགེ་སློང་གིས་བྱའོ། །དེ་ལྟར་ལས་པས་བསྒོ་ནས་དགེ་འདུན་ལ་བཟོད་དམ་མི་བཟོད་ཞུས་ཏེ་དགེ་འདུན་གིས་བཟོད་ན་བདག་གིས་ཀྱང་དེ་བཞིན་འཛིན་ཏོ་ཞེས་བྱ། བསྔགས་པ་ཡང་ངོ༌། །ལྟག་མ་ལྟར་བསྙལ་བ་ལས་བསླངས་ནས་ཁྱོད་ཀྱིས་མཐོལ་བ་དང་ཆད་པ་བྱས་པ་མ་བཅབས་པར་མཐོལ་བ་ཤིན་ཏུ་དགེ་ད་ཁྱོད་གཙང་མར་གྱུར་ཏོ་ཞེས་ཞིབ་ཏུ་བསྔགས། བརྗོད་པ་བྱས་མ་ཐག་ཏུའོ། །ལྟག་མ་ལྟར་ཡོན་ཏན་བསྔགས་པ་གོང་དུ་སྤྱོ་བ་རྣམས་ཟིན་ནས་དེ་མ་ཐག་ཏུ་བསླངས་ལ་བསྔགས་སོ། །ཕྱིར་བྱ་བའི་དངོས་པོའོ། །ཚུལ་ཁྲིམས་ལོག་མ་ནི་དབྱུང༌། །དགེ་སློང་མ་ཕས་ཕམ་པ་བྱུང་ན་གཙུག་ལག་ཁང་ནས་བསྐྲད་དོ། །དེ་དགེ་འདུན་དབང་ངོ༌། །ལྟག་མ་ལྟར་ཕམ་པ་བསྐྲད་པ་ནི་གང་ཟག་གིས་བསྐྲད་པར་མི་གནང་གི་དགེ་འདུན་གྱིས་བསྐྲད་དོ། །དེ་དག་གིས་དེ་ལ་མི་གཡེལ་བར་བྱ།
དགེ་སློང་ཕས་ཕམ་པ་བྱུང་བར་ཤེས་བཞིན་དུ་དགེ་འདུན་གྱིས་མ་བསྐྲད་ན་དགེ་འདུན་ཐམས་ཅད་ཉེས་བྱས་སུ་འགྱུར་ཏེ་གཞན་ཡང་གུད་ནས་ཉེས་བྱས་ཡན་ཆད་ཡོད་དོ། །མ་རུང་བར་གྱུར་པ་བཟོད་པར་རོ། །དགེ་སློང་དང་དགེ་སྦྱོང་ཞིག་ཉེས་པ་བྱས་ཀྱང་སངས་རྒྱས་ཀྱིས་བཤད་པ་ལ་བར་དུ་གཅོད་པར་མི་འགྱུར་རོ་ཞེས་ཟེར་བ་དེ་བསྐྲད་དེ་བཏང་ནས་ཕྱིས་ངོ་མཚར་འགྱོད་དེ་ལུས་ཀྱི་སྤུ་ལངས་པར་མི་དགའ་སྟེ་ཕྱེ་འཁྲུད་དེ་གསོལ་དུ་འོངས་ན་བཟོད་པར་བྱའོ། །སྨད་པ་མ་བསྒོས་ན་སྨད་པ་བཟོད་པ་མི་སྐྱེ་ལྟག་ཏུ་བཤད་པ་སྨད་པ་མི་བསྐོས་ན་སྨད་པ་བཟོད་པ་མི་སྐྱེ། ལྟག་ཏུ་བཤད་པ་སྨད་པ་རྣམ་བདུན་གྱིས་བསྐྲད་པ་སླར་མཚན་མ་བཏང་སྟེ་ལུས་སྤུ་ལངས་པ་ཙམ་དུ་དད་དེ་གསོལ་དུ་འོང་བ་དགེ་འདུན་ཐམས་ཅད་ཀྱིས་བཟོད་དེ། དགེ་སློང་གཅིག་གིས་མི་བཟོད་ཅེས་བྱས་ན་གཞན་གྱིས་བཟོད་ཀྱང་བཟོད་པར་མི་ཆུད་དོ། །སུན་པ་དེའི་གནས་སུ་མི་གཞག་པར་བྱ། དགེ་སློང་རིགས་སུན་པ་བྱས་ནས་གང་དུ་བྱས་པའི་ཡུལ་ནས་བསྐྲད་དེ་བཏང་ངོ༌། །སྤང་བ་ཐམས་ཅད་དང་མི་གནས་མི་བཟའ་སྤངས་པ་རྣམ་པ་བདུན་ལ་སོགས་པའི་དགེ་སློང་གང་ཡང་རུང་སྟེ་དེ་དང་ལྷན་ཅིག་གསོ་སྦྱིན་ལ་སོགས་པའི་ལས་དང་ཟས་ལ་སོགས་པ་ལྷན་ཅིག་མི་སྤྱད་དོ། །དེ་འདུ་ཤེས་པ་ལས་བཅབས་སོ། །ལྟག་མ་ལྟར་སྤངས་པར་ཤེས་བཞིན་དུ་དེ་དང་ལྷན་ཅིག་ཏུ་ལས་དང་བཟའ་བ་བྱས་ན་ཉེས་བྱས་ཏེ་མི་ཤེས་པ་ནི་ཉེས་མེད་དོ། །དེ་དག་ཆོས་མ་ཡིན་པའི་སྐྱབས་ཕྱེ་བའི་དེ་དག་དང་ངོ༌། །དགེ་སློང་སྡེ་གཉིས་སུ་ཆད་དེ་ཆོས་ལ་ལྟ་བའི་དགེ་སློང་ཆོས་མ་ཡིན་པ་ལ་ལྟ་བ་དང་ལས་ལྷན་ཅིག་བྱས་སམ་བཟའ་བ་ལ་སོགས་པ་ཐབས་ཅིག་ཏུ་བྱས་ན་ཉེས་བྱས་སོ། །གཞན་དུ་མ་ཡིན། ཆོས་མ་ཡིན་པ་ལ་ལྟ་བའི་དགེ་སློང་ཆོས་མ་ཡིན་པ་ལ་ལྟ་བ་དང་ལས་ལྷན་ཅིག་བྱས་སམ་བཟའ་བ་ལ་སོགས་པ་ཐབས་ཅིག་ཏུ་བྱས་ན་ཉེས་བྱས་སོ། །གཞན་དུ་མ་ཡིན། ཆོས་མ་ཡིན་པ་ལ་ལྟ་བའི་དགེ་སློང་ཆོས་ལ་ལྟ་བའི་གན་དུ་འོངས་ཏེ་ལས་བྱས་པ་དང་བཟའ་བ་ལྷན་ཅིག་བྱས་ཀྱང་ཉེས་མེད་དོ། །སྨད་པ་གཞན་འདི་ལ་མ་ཡིན། སྤངས་པ་རྣམ་པ་བདུན་སྤངས་པ་ལ་འཐབ་མོ་བྱེད་པ་དང་ལྷག་མ་མི་མཐོལ་བ་དང་རིགས་སུན་པ་དང་ཁྱིམ་པ་ལ་ཟུག་ཟེར་ཞིང་སྤྱོ་བ་བཞི་ནི་དགེ་འདུན་ནམ་དགེ་སློང་དང་བཟའ་ཞིང་
སྤྱོད་དུ་རུང་ངོ༌། །བསྙོན་པ་དང་བཤགས་སུ་མི་བཏུབ་པ་དང་སྡིག་བལ་ལྟ་བ་གསུམ་དང་ནི་འགྲོགས་ཤིང་བཟར་མི་རུང་ངོ༌། །འདི་མཛའ་བ་ལ་གནས་པར་བྱ། སྤངས་པ་བདུན་ལས་དགེ་འདུན་ལས་གྲོགས་སུ་རུང་བ་བཞི་ཕྱི་རོལ་དུ་མི་བསྐྲད་པར་མཁན་པོ་འམ་མཛའ་བོ་གཅིག་དང་གཅིག་དང་གནས་འཆར་གཞུག་གོ །མཉམ་པ་མེད་པ་སྨད་པ་བྱེད་པ་དང་ཞིག་སྟེ་བསྐྲད་པའི་སྣོད་དག་སྤང་ཞིང་དོར། ཕས་ཕམ་པ་དང་སྤང་བ་བདུན་གང་གང་རུང་སྟེ། གཙུག་ལག་ཁང་ནས་བསྐྲད་པའི་ཚེ་འགྲོར་མི་བཏུབ་ན་གོས་དང་ཡོ་བྱད་ཐམས་ཅད་ར་བའི་ཕྱི་རོལ་ཏུ་ཕྱུང་སྟེ་དོར། ནན་གྱིས་བསྐྲད། བསྐྲད་དེ་འགྲོར་མི་བཏུབ་ན་དགེ་འདུན་གྱིས་རྐང་ལག་བཞི་ནས་གཡངས་ཏེ་ཡང་སྒོར་གཞུག །འདུག་ན་བཅང༌། བསྐྲད་བའི་ཚེ་ཀ་བ་ལ་འཇུས་ན་ཀ་བ་ཡང་བཅད་དེ་བསྐྲད་དོ། །རང་བཞིན་མི་ལྟུང་བ་དེ་ནས་དབྱུང༌། སྒོའི་རེ་བཞི་ལྟ་བུའམ་གཅད་དུ་མི་རུང་བ་ལྟ་བུ་ཞིག་ལ་འཇུས་ན། ས་ལ་ཕྱུང་སྟེ་བསྐྲད་དེ་བཏང༌། དགེ་འདུན་གྱིས་དེ་བཅོས་ལྟག་མ་ལྟར་བསྐྲད་པས་འཇུས་ཏེ་སྒོ་དང་ཀ་བ་ལ་སོགས་པ་ཕྱུང་བ་ཡང་སླར་བ་ཙིག་ཅིང་བཅོས་བྱེད་དུ་གཞུག་ལྟག་མ་ལྟར་བཅོས་པ་དགེ་འདུན་གྱིས་མི་ནུས་ན་ཡོན་བདག་གཅིག་ཡོད་ན་བཅོས་སུ་གཞུག །མ་གྲུབ་ན་གཙུག་ལག་ཁང་གི་ཡིས་སོ། །ལྟག་མ་ལྟར་ཡོན་བདག་གིས་ཀྱང་ཆོས་མ་ནུས་དཀོན་མཆོག་གསུམ་གྱི་དཀོར་ལས་ཕྱུང་སྟེ་བཅོས། འཐབ་མོ་བྱེད་པ་བསྐྲད་པ་མི་གཟུང༌། དགེ་སློང་དང་དགེ་སྦྱོང་རྟག་ཏུ་འཐབ་མོ་བྱེད་དེ་བསྐྲད་པར་ཆད་པ་ལ་དགེ་སློང་འགས་མི་བསྐྲད་དུ་ཅི་གནང་ཞེས་མི་གསོལ་བར་བསྐྲད་དོ། །ཐབ་མོ་ལས་མ་ལོག་ཅིང་མ་ཞི་ན་ནན་ཏན་ལ་སྤང༌། དགེ་སློང་ཞིག་འཐབ་མོ་ཞིག་རྒོལ་ཏེ་མ་བྱེད་ཅེས་བྱས་ན་བཀའ་བཞིན་དུ་འཚལ་ཞེས་ཁས་བླངས་ལ་ཕྱིས་ཀྱང་རྟག་པར་བྱེད་ན་བསྐྲད་དེ་གཏོང་ངོ༌། །ཆད་པར་བྱེད་ན་ཞི་བར་བྱ་བས་སོ། །དགེ་སློང་གཉིས་ཤིག་ཆོས་ལ་རྟག་པར་ལྟ་བའི་མུ་ལྟ་བུ་ལ་རྩོད་དེ་དབུལ་ན་ཞལ་ཅེ་བས་བཅད་ཀྱང་ཉན་དུ་མི་བཏུབ་ཅིང་རྩོད་བ་གཉིས་ཀ་བསྐྲད་དོ། །གནས་པ་ལ་གནས་ཀྱིས་ནན་ཏན་དུའོ། །ཉེ་གནས་ཀྱིས་ཉེས་བ་ཞིག་བྱུང་སྟེ། དགེ་འདུན་གྱིས་ཆད་པས་གཅད་ན་མཁན་པོས་ཆད་པ་མྱུར་དུ་གྱིས་ལ་མཐོལ་ཚངས་གྱིས་ཤིག་ཅེས་བསྒོ།
འཐབ་མོའི་མཚན་མ་འབུལ་བའང་སྤང་ངོ༌། །དགེ་སློང་གཉིས་ཤིག་འཐབ་པ་ལ་དགེ་སློང་མངོན་པར་ནོན་ནི་མི་བྱེད་བགས་ཀྱིས་འཐབ་ཏུ་འཛུད་ན་འཛུད་པའི་དགེ་སློང་དེའང་བསྐྲད་དོ། །དགེ་སློང་མ་དང་འཁྲི་ཤིང་གནས་པ་ཡང་སྤང་ངོ༌། །དགེ་སློང་ཞིག་དགེ་སློང་མའི་ཁྱིམ་དུ་རྟག་པར་འགྲོ་ཞིང་གནས་པ་དེ་ལྟར་མ་བྱེད་ཅེས་ལན་གཉིས་ལན་གསུམ་དུ་བསྒོ་སྟེ་མ་བཏང་ན་བསྐྲད་དོ། །བསྐྲད་པ་དེ་ལ་ཕྱག་བྱ་བར་ནི་མི་རིགས་པར་དགེ་སློང་མས་བྱ། ལྟག་མ་ལྟར་དགེ་སློང་མའི་གནས་སུ་རྟག་པར་འགྲོ་བའི་དགེ་སློང་བསྐྲད་པ་དེ་ལ་དགེ་སློང་མས་ཕྱག་མི་བྱ། སྨད་པའི་མཚན་མ་གཞན་ལ་དེའི་ཕྱིར་བས་བསམ་ན་གཞན་བྱས་ཀྱང་སྐྱེའོ། །སྨད་པ་རྣམ་པ་བདུན་ལ་ལྟག་མའི་སྨད་པའི་གཞི་ཁ་ཅིག་སྨད་པའི་ལས་བྱ་བའི་ཚེ་ལས་པའི་དགེ་སློང་གིས་སྨད་པ་དང་བསྐྲད་དོ་ཞེས་ཟེར་བའི་མིང་ནོར་ཀྱང་ལས་སུ་རུང་ངོ༌། །གཞན་དུ་ནི་མི་སྐྱེའོ། །ལྟག་མ་ལྟར་མིང་ནོར་མི་ཤེས་ན་ནི་རུང་གི་ཤེས་བཞིན་དུ་ལས་བྱས་ན་མི་རུང་ངོ༌། །གཞན་དུ་ནི་མི་སྐྱེའོ། །ལྟག་མ་ལྟར་མིང་ནོར་མི་ཤེས་ན་ཞིག་གོ །སྤངས་པ་རྣམ་བདུན་ལས་སྤང་བ་རྣམ་བཞི་གང་ཡང་རུང་སྟེ། དེ་གཅིག་གིས་འཐབ་མོ་ཞིག་བྱས་ཏེ་ཆད་པས་བཅད་པས་ལས་དེའི་ཚེ་རིགས་སུན་པ་ཞིག་བྱས་ན་སྔ་མའི་ལས་བཏང༌། ལས་ཕྱི་མའི་ལས་བྱས། གདོད་མགོ་ནས་བྱེད་དུ་གཞུག་གོ །སྤངས་པ་ལ་མི་སྐྱེ། སྤངས་པ་རྣམས་བདུན་ལས་བསྐྲད་པ་རྣམ་གསུམ་གྱིས་བཅད་དེ་ཆད་པ་བྱེད་པའི་ཚེ་ཕྱི་མ་སྤངས་པ་གཅིག་ཡང་བྱས་ན་ལྟག་མའི་ཆད་པ་ལྟར་འབྱུང་བ་མ་ཡིན་གྱི་ཆད་པ་གཉིས་ཀ་བྱེད་དུ་གཞུག་གོ །སྦོམ་པོར་ནི་གྲགས་པ་དང༌། བསོད་ནམས་ཆེན་པོ་དང་མདོ་སྡེ་དང་འདུལ་བ་དང་མ་ལྟ་བུ་འཛིན་པ་དང༌། ཐོས་པ་དང་སྐྱབས་དང་འཁོར་མང་བའོ། །མིང་གིས་སྨོས་པ་འདི་རྣམས་ལྟ་བུ་དང་ལྡན་པ་དགེ་འདུན་གྱི་གཙུག་ལག་ཁང་ནས་བསྐྲད་ན་དགེ་འདུན་གྱི་དབྱེན་དུ་འགྱུར་རོ། །ཁྱིམ་པ་ནི་དཔེ་སྟེ་དགེ་སློང་ལ་སོགས་པ་ལྔ་ལ་བཟུང་ཡང་སྤང་ངོ༌། །ལྟག་ཏུ་ཁྱིམ་པ་ལ་ཟེར་ན་བསྐྲད་དོ་ཞེས་འབྱུང་བ་བཞིན་དུ་དགེ་སློང་རྣམ་ལྔ་ལ་ཟུར་ཟེར་ཞིང་འཐབ་མོ་རྒོལ་བའང་ལན་གཉིས་ལན་གསུམ་དུ་བསྒོ་སྟེ་མ་བཏུབ་ན་བསྐྲད་དོ། །སྨད་པ་ཅན་གྱིས་མི་སྤང་བ་མ་ཡིན། སྨོད་པ་སྣ་ཚོགས་ཀྱི་
དགེ་སློང་རྣམས་ལ་སྨོད་ན་ཡང་བསྐྲད་དོ། །སྨད་པའི་ལས་ལ་སྤྱིའི་མ་ཡིན་པར་མ་དོགས་ཤིག་དགེ་སློང་གིས་སྨད་པ་དང་བསྐྲད་པ་བཞིན་དུ་དགེ་སློང་མས་ཀྱང་དགེ་སློང་ལ་དེ་བཞིན་དུ་བྱའོ། །རབ་ཏུ་བྱུང་སྟེ་བསྙེན་པར་མ་རྫོགས་པ་དེ་དག་ལའང་འདི་དག་བྱའོ། །ལྟག་ཏུ་དགེ་སློང་དང་དགེ་སློང་མ་ཉེས་ན་སྤང་བ་རྣམ་པ་བདུན་གྱིས་སྤངས་པ་བཞིན་དུ་དགེ་སྦྱོང་དང་དགེ་སློང་མ་དང་དགེ་སྦྱོང་མ་ཉེས་ནའང་སྤང་བ་རྣམ་བདུན་བཞིན་དུ་བསྐྲད་དོ། །ཁྱིམ་པ་ལ་མ་ཡིན། སྤང་བ་རྣམ་བདུན་ལྟ་བ་རྩེ་རྒོད་དང་གཡོག་ལ་ནི་མི་བསྐྲད་དོ། །དགེ་སློང་ཕ་ལ་ཕས་ཕམ་པ་བྱུང་བར་སྐུར་ཅིང་སྨོད་དང་སྡིག་པ་ལ་ལྷུང་བཟེད་དབུབ། ཁྱིམ་པ་དགེ་སློང་མ་ཉེས་པ་ལ་ཕས་ཕམ་པར་སྐུར་བ་དང་དམོད་མོ་ཟེར་བ་དང་ཕྱར་ཀ་འདེབས་པ་ལ་སོགས་པ་ཞིག་ཟེར་ན་མི་དེའི་ཁྱིམ་དུ་ཟན་མི་བསླང་ངོ༌། །ཆོས་སུ་བྱ་བས་སོ། །ལྟག་མ་ལྟར་ལྷུང་བཟེད་ཁ་དབུབ་པ་ནི་ལྷུང་བཟེད་ཉིད་ཁས་དབུབ་པ་ལ་ནི་མ་ཡིན་གྱི་ཟན་མི་བསླང་པ་ལ་བྱའོ། །གསོལ་བས་སོ། །ལྷུང་བཟེད་ཕུལ་བའི་ཁྱིམ་དུ་ཟན་མི་བསླང་བ་ནི་གསོལ་བ་གཅིག་གིས་བྱའོ། །ལྷུང་བཟེད་ཁས་ཕུབ་པའི་ཁྱིམ་དུ་མི་འགྲོ་བའོ། །ལྷུང་བཟེད་ཁས་ཕུབ་པའི་ཁྱིམ་དུ་དམ་བཅས་པ་རྣམས་མི་འགྲོ་སྟན་ལ་མི་སྤྱད། ལྷུང་བཟེད་ཁས་ཕུབ་པའི་ཁྱིམ་དུ་ནོར་ཏེ་ཕྱིན་ནས་སྟན་ལ་འདུག་ཅེས་ཟེར་ཀྱང་མི་འདུག །ཡོན་བཅས་པ་ལ་མ་ཡིན། ལྷུང་བཟེད་ཁས་ཕུབ་པའི་ཁྱིམ་པ་དེས་སྔོན་གཙུག་ལག་ཁང་དུ་ཁྱིམ་དང་མལ་སྟན་དང་ར་བ་དང་སྐྱེད་ཤིང་ལྟ་བུ་ཞིག་ཡོན་དུ་ཕུལ་ནའང་མི་བཟའོ། །བསོད་སྙོམས་མི་བླང། ལྷུང་བཟེད་ཕུལ་པའི་བསོད་སྙོམས་ཤིག་གང་བར་གཙུག་ལག་ཁང་དུ་ཁྱེར་ཏེ་འོངས་ཀྱང་མི་བླང༌། ཆོས་མི་བཤད། ལྷུང་བཟེད་ཁས་ཕུབ་པ་ལ་ཆོས་མི་བཤད། གང་གི་ཕྱིར་ལས་བྱ་བ་དེར་གཏོགས་པར་ཕུབ་པའོ། །ལྷུང་བཟེད་ཁས་ཕུབ་པ་ནི་དགེ་འདུན་གང་འདུས་པ་དེས་མི་བླང་གི་དགེ་སློང་གཞན་ནི་མ་གཏོགས་སོ། །འདི་དག་གི་ཕྱོགས་མ་ཡིན་པའི་གྲོང་དང་སྤངས་པ་ཚུན་ཆད་ལ་མི་སྐྱེའོ། །དགེ་འདུན་ཆོས་དང་ཆོས་མ་ཡིན་པ་ལ་ཕྱོགས་པ་ལས་ཆོས་ལ་ལྟ་བས་ལྷུང་བཟེད་ཁས་ཕུབ་ན་ཆོས་མ་ཡིན་པ་ལ་ལྟ་བ་མཚམས་གཅིག་ན་འདུག་ཀྱང་བསླང་དུ་
རུང་ངོ༌། །འདི་ལ་འགས་བསྒོ། ལྟག་མ་ལྟར་ལྷུང་བཟེད་ཁས་ཕུབ་པའི་དགེ་བསྙེན་ལ་དགེ་འདུན་གྱི་ནང་ནས་ཁོ་དང་མཛའ་བ་གཅིག་དགེ་འདུན་ཚིག་སྐད་དུ་མི་བྱ་བར་བཟོད་པ་གསོལ་ཅིག་ཅེས་གདམས་ཀྱང་ཉེས་མེད། བཟོད་པར་བྱས་ནས་གསོལ་བས་དག་ན། ལྷུང་བཟེད་ཁས་ཕུབ་པའི་དགེ་བསྙེན་དེས་ནོས་སོ་ཞེས་ཁས་ལེན་ཅིང་ཆད་པས་ཆད་པ་ལ་འཚལ་ལོ། །བཟོད་པ་གསོལ་ན་དགེ་འདུན་འདུས་ཏེ་གསོལ་བའི་ལས་བྱས་ནས་ཕྱིན་ཆད་དེའི་ཁྱིམ་དུ་བསླང་བར་བྱའོ། །བཅབས་པའི་སེམས་མ་བསྐྱེད་ན་ཐ་མའི་ཚུན་ཆད་ལྡང་ངོ༌། །དགེ་སློང་གཅིག་གིས་ཕམ་པ་བྱས་ཏེ་མི་ཚངས་པའི་ཕམ་པ་བྱས་མ་ཐག་ཏུ་འགྱོད་པའི་སེམས་ཀྱིས་མཐོལ་དུ་འོངས་པ་དེ་ལ་ཚུལ་ཁྲིམས་འཆགས་སོ། །དེ་ལྟར་འཆགས་པ་ནི་རབ་ཏུ་ངོ་ཚ་ཞིང་འགྱོད་པའི་ཤས་ཆེ་བའི་ཕྱིར་རོ། །བསླབ་པ་སྤྱད་པས་སོ། །ལྟག་མ་ལྟར་ཚུལ་ཁྲིམས་འཆགས་པ་དེ་བསླབ་པ་དགེ་འདུན་གྱིས་བྱིན་ནས་བསླབ་པ་བཞིན་དུ་ནི་སྦྱངས་ན་ཚུལ་ཁྲིམས་སྐྱེའོ། །དེ་འཐོབ་པའི་དགེ་འདུན་ལས་སོ། །ལྟག་མ་ལྟར་བསླབ་པ་ཐོབ་པ་ནི་དགེ་འདུན་གྱིས་བྱིན་ནས་གདོད་འཐོབ་པོ། །ལས་ཀྱིས་སྦྱིན། ལྟག་མ་ལྟར་དགེ་འདུན་གྱིས་སྦྱིན་པའང་གསོལ་བ་དང་ཞུ་བ་བཞིའི་ལས་ཀྱིས་སྦྱིན་ནོ། །ནམ་འཚོའི་བར་དུ། ལྟག་མ་ལྟར་སློབ་མ་སྦྱིན་ཞེས་བྱ་བ་ནི་ལོ་གཅིག་གཉིས་ཤིག་སྦྱིན་པ་མ་ཡིན་གྱི་ཚེ་གཅིག་ཏུ་སྦྱིན་པ་ལ་བྱའོ། །དགེ་འདུན་གྱི་ལྷག་མ་བས་ངོ་ཚ་བ་དང་ལྡན་པ་གཅིག་གི་མདུན་ན་འདུག་གོ །མདོ་སྡེ་དང་འདུལ་བ་དང་མ་ལྟ་བུ་དང་འཛིན་པ་དང་གྲངས་པ་ལ་ཡང་ངོ༌། །དགེ་སློང་སྡེ་སྣོད་གསུམ་གང་ཡང་རུང་ཤེས་པ་གཅིག་གིས་དགེ་འདུན་གྱིས་ལྷག་མ་བྱས་ཏེ་རབ་ཏུ་ངོ་ཚ་བའི་སེམས་ཀྱིས་ཕྱིན་ཆད་མི་བྱ་བར་ཡི་དམ་བཅས་ན་གང་ཟག་གཅིག་ལ་མཐོལ་བས་ཚངས་སོ། །བསམ་པས་ལྟུང་བ་དང་ལྡང་གི་ཚད་པས་མ་ཡིན་ནོ། །དགེ་འདུན་གྱིས་ལྷག་མ་བྱས་ནས་ཞག་དྲུག་མགུ་བ་བྱས་པའི་ཚེ་རབ་ཏུ་ངོ་ཚ་བ་དང་ལྡན་ཞིང་གནོང་བ་བཞིན་དུ་མཐོལ་ན་ཚངས་པར་འགྱུར་རོ། །འདིར་ལྟུང་བའི་སྡེའི་མིང་དང་བྱུང་བའི་དུས་སོ། །སཱུ་ཏྲ་ལྟག་མ་ལྟར་མདོ་སྡེའམ་འདུལ་བ་འཛིན་པས་ལྷག་མ་བྱས་ནས་གང་ཟག་གཅིག་ལ་མཐོལ་
བའི་ཚེ་ལྷག་མ་གང་ཉེས་པའི་མིང་ནས་དབྱུང་ངོ༌། །ཕྱིར་བྱ་བའི་དངོས་པོ་གཏོགས་སོ། །འདི་མན་ཆད་དུས་དང་དུས་མ་ཡིན་པ་དང་བསྡུས་པའི་དངོས་པོ་ལ་འཆད་དོ། །དགེ་འདུན་གྱི་ལྷག་མ་ཞེས་མི་ཤེས་ལ། བརྗེད་ནས་བཅབས་པའི་སེམས་མ་བཞག་ཅིང༌། བྱས་སམ་མ་ཡིན་ནམ། ཅི་ལྟར་རམ་ཅི་འདྲ་བར་དྲན་པར་མ་ནུས་པ་དང༌། དགེ་སློང་འགའ་ཞིག་གིས་དགེ་འདུན་གྱིས་ལྷག་མ་བྱས་པ་ལས་བཅབ་པར་ནི་མ་བསམས་ཀྱི་དངོས་པོ་བརྗོད་དམ་ནོར་ཏེ་ལུས་པ་ལས་ཕྱིས་མཐོལ་ན་བཅབས་པའི་ཆད་པར་ནི་མི་འགྱུར་གྱི། མགུ་བའི་ཆད་པ་ཞག་དྲུག་བྱ་བར་ཟད། བསྙེན་པར་མ་རྫོགས་པར་རམ་སྤང་བར་གྱུར་ན་བཅབས་པ་མི་ལྡང་ངོ༌། །དགེ་སྦྱོང་དང་སྤངས་པ་ལྟ་བ་ཞིག་གིས་དགེ་འདུན་གྱིས་ལྷག་མ་བྱས་ནས་བཅབས་པ་ལས་ཕྱིས་མཐོལ་ན་བཅབས་པའི་ཆད་པ་ནི་གཉིས་ཀ་ལའང་ཉེས་མེད་དེ་སྤངས་པས་ནི་ཞག་དྲུག་མགུ་བ་བྱ། དགེ་སྦྱོང་ནི་ཉེས་བྱས་སུ་ཟད། སྨྱོས་པའི་འདུ་ཤེས་ཉམས་ན་ལྟུང་བ་ཡང་སྟེ་ཕས་ཕམ་པའི་ཡན་ཆད་ཀྱང་ངོ༌། །དགེ་སློང་རང་བཞིན་ཉམས་ཏེ་སྨོས་པའི་ཚེ། ཕས་ཕམ་པ་ལ་སོགས་པ་ལྟུང་བ་སྡེ་ལྔ་གང་བྱས་ཀྱང་ཉེས་མེད། མ་བཅབས་ན་ཡང་ངོ༌། །སྔོན་སངས་རྒྱས་ཀྱིས་ཁྲིམས་མ་བཅས་པའི་ཚེ་ལྟུང་བ་སྡེ་གང་བྱས་ཀྱང་ཉེས་མེད། མི་ཤེས་པ་ནི་མ་ཡིན་ནོ། །དགེ་སྦྱོང་འགའ་ཞིག་ཁྲིམས་མི་ཤེས་ཀྱི་ཉེས་པ་བྱས་ཀྱང་བླ་གྲང་སྙམ་ཏེ་བྱས་པ་ནི་མི་བརྩན་ཀྱི་གང་བྱས་དངོས་པོ་བཞིན་དུ་སྦྱར་ཞིང་མཐོལ་ལོ། །མངོན་པར་མ་དད་པ་ཡང་ངོ༌། །སོ་སོར་ཐར་པའི་ནང་ནས་ལྟུང་བ་སྡེ་ལྔ་བྱུང་བ་ལས་དང་དེ་ཤ་ཆང་ལ་སོགས་པ་ཟོས་ཀྱང་ཉེས་མེད་ཅེས་ཟེར་བ་དེ་མི་བརྩན་ཏེ་ལྟུང་བ་གང་བྱས་པ་མཐོལ་དུ་གཞུག་གོ །མངོན་པ་མི་ཤེས་པར་འདུ་ཤེས་ན་ཡང་ངོ༌། །དགེ་སློང་གྲོགས་ཀྱིས་ལྟུང་བ་སྟེ་ལྔ་ལྟ་བུ་མ་བྱེད་ཅིག་ཅེས་བསྟན་ན་ཁྱོད་བདག་ཀྱང་མི་སྲུང་ན་ཕལ་བསྟན་ཅི་དགོས་ཞེས་ཟེར་ན་དེ་སྐད་ཟེར་བ་མི་བརྩན་ཏེ་ལྟུང་བ་གང་བྱས་བ་བཞིན་དུ་མཐོལ་དུ་གཞུག་གོ །ས་གཞན་དུ་གནས་པ་ནི་ཚུན་ཆད་ཀྱང་ངོ༌། །སྤངས་པ་རྣམ་བདུན་གྱི་ནང་ནས་དང་པོ་བཞི་དང་ལྷག་མའི་ཆད་པ་དང་མགུ་བར་བྱེད་པ་དང་རྩ་བའི་མགུ་བར་བྱེད་པ་དང༌། ཚེ་གཅིག་གི་བར་དུ་སློབ་པ་བྱིན་པ་རྣམས་ན་རེ་
ངེད་ས་གཞན་ན་གནས་ཀྱིས་དགེ་འདུན་གྱིས་ལྷག་མ་བྱས་པ་བཅབས་ཀྱང་ཉེས་མེད་ཅེས་ཟེར་བ་མི་བརྩན་གྱི་བཅབས་པའི་ཆད་པ་དང་མགུ་བ་ཚུལ་བཞིན་དུ་བྱེད་དུ་གཞུག་གོ །དགེ་འདུན་གྱིས་ལྷག་མ་ཡིད་གཉིས་ཀྱིས་བཅབས་ན་ཤེས་པ་བཞིན་ནོ། །འགའ་ཞིག་གིས་དགེ་འདུན་གྱིས་ལྷག་མ་བྱས་པའི་འོག་ཏུ་ལྷག་མ་འམ་སྦོམ་པོ་གང་ཡིན་མི་ཤེས་ཏེ་ཐེ་ཚོམ་ཟ་ནའང་ཐེ་ཚོམ་ཟ་བ་མི་བརྩན་ཏེ་གང་ཉེས་པའི་དངོས་པོ་མཐོལ་དུ་གཞུག །གང་གིས་སྔར་བཅབས་པའི་མི་ལྡང་བར་སྤྱོད་པ་ཡང་མེད་དོ། །ལྟག་མའི་མདོ་རིང་པོ་ལས་དགེ་འདུན་གྱིས་ལྷག་མ་བྱས་པར་མི་ཤེས་པ་དང་སྤངས་པ་དང༌། དགེ་སྦྱོང་གསུམ་ལ་བཅབས་པའི་ཆད་པ་མེད་པ་ནི་མིང་སྨོས་སུ་ཟད་པ་དེ་བཅབས་པའི་ཆད་པ་མེད་བཞིན་དུ་བཅབས་པའི་ཆད་པ་བྱེད་དུའང་མ་གཞུག་ཅིག །ཉེས་བྱས་པ་ནི་སྤྱོད་པ་ལ་ནན་ཏན་བྱེད་ཅིང་སྤངས་ནའོ། །དགེ་འདུན་གྱིས་ལྷག་མའི་ཆད་པས་བཅད་དེ་ཆད་པ་སྤྱོད་པའི་ཚེ། རྒྱལ་པོ་འམ་བློན་པོའི་དབང་གིས་ཆད་པ་བྱེད་པའི་བར་ཆད་དུ་གྱུར་བ་ནི་མ་གཏོགས་ཀྱི་ཆད་པ་ཞག་བཞི་ལྔ་བྱས་པའི་འོག་ཏུ་ཞག་གཅིག་གཉིས་བསྣན་ཏེ་མི་བྱའོ་ཞེས་ཟེར་བའི་ཚེ་ཉེས་བྱས་གཅིག །དེའི་སྡེ་ལས་སྤྱོད་ནའང་དེར་རོ། །དགེ་འདུན་གྱིས་ལྷག་མ་བྱ་བར་སམས་པའི་ཚེ་ཉེས་བྱས་གཅིག །འགྲུབ་པ་ལས་མ་བྱས་ནའོ། །ལྷག་མ་བྱས་ནས་ཕ་རོལ་ལ་མཐོལ་ནས་ཆད་པ་གོར་མི་བྱེད་པར་ཕྱིས་བྱའོ་ཞེས་ཟེར་བའི་ཉེས་བྱས་གཅིག །སྤྱོད་པ་མེད་པའི་གནས་ལས་ཕྱིར་འོངས་ན་དེའི་གནས་སོ། །དགེ་འདུན་གྱིས་ལྷག་མའི་ཆད་པས་བཅད་དེ་ཞག་མ་འཁོར་བར་ཁྱིམ་པར་བབས་པ་ལས་ཕྱིས་དགེ་སློང་དུ་ཞུགས་ན་འང་སྔ་མའི་ཆད་པའི་ཆད་པ་བྱ། དངོས་པོ་སྦྱང་བའི་ལྷག་མ་བསྒྲུབ། མདོ་གོང་མ་ལྟར་དགེ་འདུན་གྱིས་ལྷག་མའི་ཆད་པས་བཅད་པ་ལས་ཁྱིམ་པར་བབས་པ་ལས་ཕྱིས་དགེ་སློང་དུ་ཞུགས་ན་ལྷག་མའི་ཆད་པ་དང་མགུ་བ་དང་དབྱུང་བ་རྣམས་ལ་ནན་ཏན་དུ་བསྒྲུབ་ཅིང་བྱ། བཅབས་པའི་དུས་ཆད་པར་མི་ཤེས་ན་ཉུང་དུ་མི་འགྱུར་བ་ལ་གནས་སོ། །དགེ་འདུན་གྱིས་ལྷག་མ་བྱས་ནས་ཞག་དུ་བཅབས་པ་མི་ཤེས་ན་ཞག་བཅོ་ལྔ་ཙམ་གླེངས་ཏེ་བྱ། སྤྱད་པར་བྱ་བ་གཙང་མའི་འོག་ཀྱང་ངོ༌། །མདོ་གོང་མ་ལྟར་དགེ་
འདུན་གྱིས་ལྷག་མ་བྱས་ནས་ཞག་གྲངས་ཤེས་ན་ཞག་དུ་བཅབས་པ་བཞིན་དུ་ཆད་པ་བྱ། མི་ཤེས་ན་ལྷག་མ་བྱས་པའི་སྔ་རོལ་ནས་མགོ་བཟུང་སྟེ་གྲངས་ལ་ཀླག་སྟེ་བྱ། ཟླ་བ་བཞིས་གཙང་མའི་མཐར་རོ་ཞེས་སོ། །དགེ་འདུན་གྱིས་ལྷག་མ་ཞིག་བྱས་ནས་བཅབས་པ་སྟེ་བཅབས་པ་ཉིད་ཟླ་བ་གཉིས་གསུམ་དུ་ལོན་གཏོལ་མེད་ན་ཟླ་བ་ཕྱེད་དང་བཞི་ཙམ་བྱས་ཏེ་བཀླག །བཅབས་པ་ཚད་མེད་བའོ་ཞེས་སོ། །དགེ་འདུན་གྱིས་ལྷག་མ་བྱས་ནས་བཅབས་པའི་ཞག་གྲངས་དང་འདི་མན་ཆད་བཅབས་སོ་ཞེས་པའི་ཚད་ཡོད་ན་དེ་བཞིན་བྱ་ཞག་གྲངས་དང་བཅབས་པའི་ཚད་མེད་ན་སྟེང་མ་ལྟར་བཀླགས་ཏེ་བྱ། བསམས་ཏེ་ཁུ་བ་ཕྱུང་བ་བླངས་ལ་ཚད་མེད་པ་ཞེས་སོ། །ཁུ་བའི་དགེ་འདུན་གྱི་ལྷག་མ་བྱུང་ངམ་མ་བྱུང་གཏོལ་མེད་དེ་ཡིད་གཉིས་དང་ཐེ་ཚོམ་དུ་གྱུར་ཏེ་མ་མཐོལ་བ་ལས་བཅབས་པའི་ཞག་གྲངས་ནོར་བར་བཀླགས་ཏེ་བྱ་བ་བཞིན་དུ་ངག་དཀའ་བའི་དགེ་འདུན་གྱི་ལྷག་མ་ཡན་ཆད་ཀྱང་ཐབས་འདི་དང་འདྲ་བར་བྱའོ། །ཅི་སྲིད་དུ་བསམས་པ་དེ་སྲིད་དུ་སོང་པ་འདིར་ནན་ཏན་དུ་བྱའོ། །མི་གཅིག་གིས་དགེ་འདུན་གྱི་ལྷག་མ་གསུམ་ཅིག་ཅར་བྱས་ན་ཆད་པ་དང་མགུ་བ་བྱ་བ་སོ་སོར་བྱར་ཀྱང་རུང་ཅིག་ཅར་བྱར་ཀྱང་སྟེ། ཅི་ལྟར་ཅིག་ཅར་བྱ་བ་ནི་འོག་ནས་འཆད། ཆད་པར་མི་ཤེས་ན་ཚད་མེད་པ་ཞེས་བྱ་བ་ལ་གནས་ཏེའོ། །དགེ་འདུན་གྱིས་ལྷག་མ་ལྟ་བུ་གཅིག་བྱས་པའི་འོག་ཏུ་གཅིག་བྱུང་སྟེ་དུ་བྱས་པའི་གྲངས་དང་ཚད་གཏོལ་མེད་ན་ཆད་པ་མགུ་བར་ཅིག་ཅར་བྱ། ཚད་ཡོད་ལ་མང་ན་མང་པོ་ཞེས་སོ། །དགེ་འདུན་གྱིས་ལྷག་མ་ལྟ་བུ་མང་ཞིག་ཅིག་ཅར་བྱ་སྟེ་ལྷག་མ་གང་བྱས་པ་དང་ཞག་གྲངས་ཤེས་ན་བདག་གིས་ལྷག་མ་འདི་སྙེད་ཅིག་བྱས་སོ་ཞེས་མཐོལ་ཏེ་མགུ་བ་དང་ཆད་པ་བྱས་ཏེ་འོག་ནས་འཆད་དོ། །དུས་ལྷག་པའི་འོ། །མདོ་གོང་མ་ལྟར་དགེ་འདུན་གྱིས་ལྷག་མ་མང་ཞིག་ཅིག་ཅར་བྱས་པ་ལས་བཅབས་པའི་ཞག་གྲངས་དང་གང་གང་བྱུང་བ་དྲན་ན་གང་སྔར་བྱུང་བའི་ཚངས་པ་དང་མགུ་བ་བྱས་ན་གཞན་གྱི་ཆད་པ་དང་མགུ་བ་བྱས་ན་ཚངས། མིང་ལ་སོགས་པས་སོ། །དགེ་འདུན་གྱིས་ལྷག་མ་མང་ཞིག་ཅིག་ཅར་བྱས་པ་ལས་དགེ་འདུན་གྱི་དྲུང་དུ་མཐོལ་བའི་ཚེ་བྱས་ནས་ཅི་སྲིད་ལོན་པ་དང་གང་གང་བྱས་པ་བརྗོད།
ལྕི་བ་དང་མི་བཟད་པའི་བསམ་པས་བྱས་པ་ལ་སོགས་པས་སོ། །མདོ་གོང་མ་ལྟར་དགེ་འདུན་གྱི་དྲུང་དུ་མཐོལ་བ་ནི་ཐམས་ཅད་མཐོལ་བ་མི་དགོས་ཀྱི་ལྷག་མའི་ནང་ན་ལྕི་ཞིང་སྡིག་ཆེ་བ་བཞི་གཅིག་མཐོལ་བས་ཆོག །སྤྱོད་པ་ན་སྔོན་བཞིན་བྱུང་བ་དང་ཕྱིར་བྱ་བ་འདོད་པ་སྐྱེས་ན་སོ་སོར་སྦྱིན་གཅིག་ཏུ་སྤྱད། དགེ་སློང་གཅིག་གིས་དགེ་འདུན་གྱི་ལྷག་མ་བྱས་ནས་བཅབས་པའི་ཆད་པ་ཟླ་བ་གཅིག་བྱེད་པའི་ཚེ་ཟླ་བ་ཕྱེད་འཁོང་བའི་འོག་ཏུ་ཡང་དགེ་འདུན་གྱིས་ལྷག་མ་ཞིག་བྱས་ན་སྔ་མའི་ཆད་པ་དང་ལྷན་ཅིག་བྱར་མི་རུང་གི་སྔ་མའི་ཞག་སྤངས་ལ་ཕུབ་ལ་གདོད་མགོ་ནས་གསོལ་བ་དང་ཞུ་བའི་ལས་ཀྱིས་ཆད་པ་བྱེད་དུ་གཞུག་གོ །འདི་དང་བཅབས་པའི་མགུ་བར་བྱ་བ་འགྲུབ་པ་མེད་དོ། །དགེ་སློང་གཅིག་ཅིག་གིས་དགེ་འདུན་གྱི་ལྷག་མ་བྱས་ནས་ཞག་དྲུག་མགུ་བ་བྱེད་པའི་ཚེ་ཡང་ཡང་ལྷག་མ་ཞིག་བྱས་ནས་ཞག་གཉིས་གསུམ་བཅབས་ན་བཅབས་པའི་ཆད་པ་གུད་དུ་བྱ་མི་དགོས་ཀྱི་མགུ་བའི་ཆད་པ་སྔ་མ་སྤངས་ལ་ཕུབ་ལ་གདོད་བྱའོ། །དུས་དང་དུས་མ་ཡིན་པ་དང་བསྡུ་བའི་དངོས་པོའོ། །འདི་མན་ཆད་དུས་དང་དུས་མ་ཡིན་པའི་ཀུན་དུ་ལྟུང་པའི་ཕྲན་ཚགས་སུ་གཏོགས་པ་ལ་བཤད། ཉིན་གཅིག་གིས་མཐའ་མ་ཡིན་པའི་ཆད་ན་བཅབས་པ་མི་སྐྱེའོ། །ལྷག་མ་བྱས་ནས་ཞག་གཅིག་གི་སྐྱ་རེངས་ཚུན་ཆད་ནི་བཅབས་པར་མི་ཆུད་ཀྱི་ཞག་གཅིག་གིས་འདས་ནས་མ་མཐོལ་བར་བཅབས་པར་འགྱུར་རོ། །སྨྲར་ཡན་ལག་མེད་ལ་དེའི་སེམས་མེད་ན་བཅབས་པའོ། །ལྷག་མ་བྱས་ནས་མཐོལ་དུ་དགེ་སློང་གྲོགས་མེད་ཅིང་བདག་གི་སེམས་ལ་བཅབས་པར་མ་བསམས་ན་མ་མཐོལ་ཀྱང་བཅབས་པར་མི་འགྱུར་རོ། །མེད་པ་བཞིན་དུ་མི་འགྲོ་བ་དང་སོང་བའི་དབང་གིས་ནའོ། །ལྷག་མ་བྱས་ནས་བདག་འཁོར་དུ་མཐོལ་དུ་དགེ་སློང་གྲོགས་མེད་དེ་རྒྱང་གྲགས་གཅིག་གཉིས་ཕན་ཆད་གཅིག་ན་དགེ་སློང་འདུག་ལ་གཅིག་ལ་མཐོལ་དུ་འགྲོར་ལམ་དུ་ཆུས་ཆོད་དེ། འབྲུག་གམ་མི་རྒོད་དམ་སྟག་གཟིག་ལྟ་བུའི་རྐྱེན་གྱིས་མ་ཐར་ལ། བདག་གི་སེམས་ལ་བཅབས་པའི་སེམས་མེད་ན་མ་མཐོལ་ཀྱང་ཉེས་མེད་དོ། །དེའི་དོན་གྱི་དབང་གིས་བྱས་ན་ཡང་ངོ༌། །ལྷག་མར་གྱུར་པའི་འོག་ན་ཉེ་འཁོར་དུ་མཐོལ་དུ་ནི་དགེ་སློང་མེད་རྒྱང་
གྲགས་གཉིས་གསུམ་ཙམ་གྱི་དགེ་སློང་འདུག་པ་ལ་ནམ་ཕྲད་པ་ན་མཐོལ་བར་བསམས་ཏེ་སེམས་ལ་བཅབས་པའི་སེམས་མེད་ན་ལེ་ལོ་བྱས་ཏེ་མྱུར་དུ་མ་མཐོལ་ཀྱང་བཅབས་པར་མི་འགྱུར། དོན་མེད་པར་ཉེས་བྱས་པའོ། །མདོ་གོང་མ་ལྟར་ལྷག་མ་བྱས་པ་ལས་གུད་ན་དགེ་སློང་ཡང་ཡོད་ལམ་ན་འཇིགས་པའི་རྐྱེན་ཡང་མེད་བཞིན་དུ་ལེ་ལོ་བྱས་ཏེ་མྱུར་དུ་མ་མཐོལ་ན་ཉེས་བྱས། མཐའ་ཚུན་ཆད་ན་ཡང་ངོ༌། །ལྷག་མ་བྱས་ནས་བཅབས་པའི་སེམས་མེད་དེ་ཞག་གཅིག་གི་སྐྱ་རེངས་མ་བྱུང་ཚུན་ཆད་དུ་མ་མཐོལ་བའི་ཚེའང་ཉེས་བྱས་སོ། །བཅབས་པའི་སེམས་མ་བཏང་ན་དེའི་སེམས་སོ། །ལྷག་མར་གྱུར་པ་ལ་བཅབས་པར་བསམས་ཏེ་དགེ་སློང་ཡོད་བཞིན་དུ་མ་མཐོལ་ན་ཞག་གཅིག་གི་སྐྱ་རེངས་བྱུང་ནས་བཅབས་པའི་སེམས་ཀྱང་དྲུང་ན་དགེ་སློང་འཁོད་པ་ལ་མ་མཐོལ་ན་སྐྱ་རེངས་བྱུང་ན་བཅབས་པར་འགྱུར། ཉེས་མེད་པ་ནི་ཕས་ཕམ་པའི་ལྟུང་པའི་ཕྱིར་མ་བྱས་ནའོ། །ཕས་ཕམ་པ་ལྟ་བུས་ཕྱིས་ཕམ་པ་དང་ལྟུང་བ་ལ་སོགས་པ་སྡེ་ལྔ་གང་བྱས་ཀྱང་ལྷག་མ་དང་ལྟུང་བ་སོ་སོའི་ཆད་པ་དང་མཐོལ་བ་བྱ་མི་དགོས་ཀྱི་ཉེས་བྱས་མཐོལ་བས་ཆོག །དཔེར་ན་ཏ་ལའི་མགོ་བཅད་ན་ལོ་མ་མེད་མོད་ཀྱང་སྦོམ་པོ་ཡོད་བཞིན་དུ་ཕས་ཕམ་པ་ཡང་ཁྱིམ་པ་དང་མི་འདྲ་བར་ལྟུང་བ་སྡེ་ལྔ་གང་བྱས་ཀྱང་ཉེས་བྱས་ཞེས་བཤད་དོ། །དུས་དང་དུས་མ་ཡིན་པ་དང་བསྡུས་པའི་དངོས་པོ་སྟེ་དྲིས་པའི་འོ།། །།འདི་མན་ཆད་དུས་དང་དུས་མ་ཡིན་པའི་གནས་ཐ་དད་པའི་དངོས་པོ་ལ་འཆད་དེ། ཆད་པ་དང་མགུ་བར་བྱེད་པ་སྤྱོད་པ་དག་གིས། དགེ་འདུན་གྱི་ལྷག་མའི་ཆད་པ་དང་མགུ་བར་བྱེད་པའི་དགེ་སློང་བཙུན་པ་ཞིག་ལ་དགེ་སློང་ཆད་པ་བྱེད་པ་འོག་མ་ཞིག་གིས་མདོ་འདི་ལས་མིང་གིས་སྨོས་པ་ལྟར་བདག་ལ་བྱེད་ན་དགའ་བར་ཡང་མི་བསམས་ལ་བྱེད་དུའང་མི་གཞུག །རྗེས་དང་ཕྱག་དང་ཕྱིར་ལྡང་བ་དང་ཐལ་མོ་སྦྱོར་བ་དང་བསུ་བའི་ལས་རྣམས་རང་བཞིན་དུ་གནས་པའི་དགེ་སློང་ལས་བདག་གིར་མི་བྱ། འདི་དག་གིས་མི་བྱ་བ་ལ་གཞན་གྱིས་ཀྱང་དེ་ལ་དེར་གཏོགས་སོ། །མདོ་གོང་མ་ལྟར་ཆད་པ་དང་མགུ་བ་བྱེད་པ་ལ་ཆད་པ་མེད་པའི་དགེ་སློང་གིས་ཀྱང་ཕྱག་དང་བཀུར་སྟི་ལ་སོགས་པ་མི་བྱ་ཞིག །གོམ་པ་
དབེན་པ་ལས་གཞན་དུ་འདི་དང་ལྷན་ཅིག་ཏུ་མི་བཅག་ཆད་པ་དང་ལྷན་ཅིག་ཏུ་མཉམ་པར་འགྲོགས་ཏེ་བཅག་པ་འམ་ཆད་པ་པ་སྔར་བཏང་སྟེ་མི་བཅག །སྟན་དམའ་བ་ལ་མི་འདུག །ཆད་པ་བ་སྟན་མཐོན་པོ་ལ་བཞག་སྟེ་ཆད་པ་མེད་པ་སྟན་དམའ་བ་ལ་མི་འདུག །གྲོང་ན་འགྲོ་ན་དགེ་སྦྱོང་ཕྱི་མའི་རང་བཞིན་ལས་ཀྱང་ངོ༌། །ཆད་པ་པ་གནས་བརྟན་ཀྱང་རུང་སྟེ་གྲོང་དུ་འགྲོ་བའི་ཚེ་ཆད་པ་མེད་པ་གྲལ་དམའ་བའང་སྔར་འགྲོ། །གཡོགས་པ་གཅིག་ཏུ་ཉལ་བ་མི་བརྟག །དགེ་སྦྱོང་དང་ལྷན་ཅིག་ཏུ་ཞག་གཉིས་ཉལ་དུ་མི་དབང་བ་བཞིན་དུ་ཆད་པ་པ་དང་ནུབ་གཅིག་ཁྱིམ་དུ་ཉལ་ན་ཉེས་བྱས། རབ་ཏུ་དབྱུང་བ་དང་རབ་ཏུ་རྫོགས་པར་བྱ་བ་དང་གནས་སྦྱིན་པ་དང༌། དགེ་སྦྱོང་གི་ཕྱིར་གཞག་པ་མི་བྱ། ཆད་པ་དང་མགུ་བར་བྱེད་པའི་དགེ་སློང་གིས་ལས་འདི་རྣམས་མི་འདུག་ཅིང་མི་བྱའོ། །གསོལ་བ་དང་ཀློག་པ་ལའང་ཁས་མི་བླང༌། ཆད་པ་དང་མགུ་བར་བྱེད་པས་གསོལ་བ་དང་ཞུ་བའི་ལས་མི་བྱ། དགེ་འདུན་གྱིས་ཀྱང་མི་བསྒོ། །ལས་བྱ་བ་དང་དགེ་སློང་མ་ལ་བཤད་པ་དང་དགེ་འདུན་གྱི་ཡིད་བརྟན་པར་བསྒོས་ན་ཡང་ངོ༌། །ཆད་པ་པ་དང་མགུ་བར་བྱེད་པས་ལས་འདི་རྣམས་མི་བྱ། སྔོན་བསྒོས་པའི་ལས་ཀྱང་མི་བྱ། ཆད་པ་པ་དང་མགུ་བ་བྱེད་པའི་དགེ་སློང་སྔོན་གང་ཟག་བཅུ་གཉིས་ཀྱི་ལས་སུ་བསྐོས་པའང་མི་བྱ། དགེ་སློང་མ་ལ་མི་བཤད་པ་ཡང་ངོ༌། །ཆད་པ་པའི་དགེ་སློང་གིས་སྔོན་ལྔ་ཕྲུགས་དང་ལྡན་ཏེ་དགེ་སློང་མ་ལ་འཆད་པར་བསྐོས་པའང་མི་བཤད། གསོ་སྦྱོང་གི་སོ་སོར་ཐར་པ་འཆད་པ་བཞིན་ཡོད་ནའང་བཤད་པ་མི་བྱ། སོ་སོར་ཐར་པ་འཆད་ཅིང་གསོ་སྦྱོང་བྱེད་པའི་ཚེ། གཞན་ཤེས་པ་ཡོད་ན་ཆད་པ་པས་སོ་སོར་ཐར་པ་མི་ཀླག །དགེ་སློང་གི་འཁྲུག་པ་མི་གླེང༌། དགེ་སློང་གྲོགས་ལ་ལྷག་མ་མན་ཆད་ཀྱི་ཉེས་བྱས་ཤིག་ཡོད་ནའང་སྔར་སྐབས་དབྱེ་བར་མ་གསོལ་བར་མི་བཅོས་མི་བརྒལ། ཆད་པ་པའི་དགེ་སློང་གིས་དགེ་སློང་གཙང་མའི་ཉེས་པ་མི་བཅོས་ཞེས་བྱི་ཤུ་ཏས་བཤད། དགེ་འདུན་གྱིས་མ་སྤངས་པ་ལའོ། །སྤངས་པ་རྣམ་བདུན་གྱི་ཆད་པས་བཅད་པ་ལྟ་བུ་ལ་ཆད་པ་པས་ཉེས་པ་བཅོས་པ་ནི་ཉེས་མེད། ཚིག་དང་བཅས་པ་ཕུར་པ་དང་བཅས་པ་དག་མི་བྱ། ཆད་པ་པའི་
དགེ་སློང་གིས་དགེ་སློང་གཙང་མ་ལ་མིང་གིས་སྨོས་པ་འདི་རྣམས་སྐད་དུ་མི་བྱ། བསྟན་པར་གསོ་སྦྱོང་དང་དབྱུང་བ་དང་ཞུ་བ་ཀློག་པའི་མི་གཞག །ཆད་པ་པའི་དགེ་སློང་གིས་དགེ་སློང་གཙང་མ་ལ་མིང་གིས་སྨོས་པ་འདི་རྣམས་སྐད་དུ་མི་བྱ། འདིས་འདུ་བར་མི་བྱ། ཆད་པའི་དགེ་སློང་དང་སྤངས་པ་རྣམས་བདུན་གྱི་དགེ་སློང་གཉིས་ལྷན་ཅིག་ཏུ་མི་འདུ། གང་བྱས་པའི་ཕྱིར་ཆད་པ་སྤང༌། ཆད་པ་པའི་དགེ་སློང་གིས་སྔ་མའི་ཉེས་པ་འགྱོད་དེ་ཕྱིན་ཆད་མི་བྱ་བར་ཡི་དམ་བཅའ། གཞན་ཉེས་པ་དག་ཀྱང་ངོ༌། །ལྷག་མའི་ཆད་པ་བྱེད་པའི་ཚེ་ཕྱིན་ཆད་ཉེས་བྱས་དང་ལྟུང་བ་ཡན་ཆད་ཀྱང་མི་བྱའོ་ཞེས་ཡི་དམ་བཅའ་ཞིང་ནན་ཏན་དུ་བསྲུང༌། ཚངས་པ་མཚུངས་པར་སྤྱོད་པ་ལ་ཉེས་པ་མི་བྱ། ཆད་པ་པའི་དགེ་སློང་གིས་དགེ་སློང་གཙང་མ་ལ་ཉེས་པ་མི་བྱ་ཞིང་ཡིད་ལ་འང་ངན་སེམས་མི་བསྐྱེད། དཀའ་བའི་དོན་མེད་པར་མ་གྱུར་ཅིག་ཅེས་ཡིད་ལ་བྱ། ལྷག་མའི་ཆད་པ་བྱེད་པའི་ཚེ་ཆད་པ་འདི་ནམ་བྱུང་བ་དང་ཐབས་ཅི་ལྟར་བྱས་ན་དགེ་འདུན་འབྱུང་སྙམ་དུ་རྟག་པར་ཡིད་ལ་བསམ་ཞིང་ནན་ཏན་བྱ། ནང་པར་ལངས་ནས་སྒོ་དབྱེ། ཆད་པ་པའི་དགེ་སློང་གིས་ནང་པར་ལངས་ནས་སྒོ་ལ་སོགས་པ་དབྱེ། མེ་མར་སྣོད་དབྱུང༌། ཆད་པ་པའི་དགེ་སློང་གིས་ནུབ་མོ་གཙུག་ལག་ཁང་དུ་མེ་མར་བུས་ལ་དགེ་འདུན་སླད་རོལ་ཆེ་ཆུང་དུ་གཤེགས་པའི་ལམ་དུའང་བུད། གཙུག་ལག་ཁང་གི་ཆག་ཆག་དང༌། །ཕྱག་དར་དང་རབ་ཏུ་གཞོན་ནུའི་ལྕི་བའི་བྱུག་པ་སྦྱིན། ཆད་པ་པའི་དགེ་སློང་གིས་གཙུག་ལག་ཁང་གི་ནང་དུ་མིང་གིས་སྨོས་པ་འདི་རྣམས་བྱ། བཤང་གཅིའི་གནས་བཀྲུ་།ཆད་པ་པས་བྱ་དུས་དང་འབྱོར་པའི་ཕྱི་བ་དང་ས་དང་ཆུ་གཞག །ཆད་པ་པའི་དགེ་སློང་གིས་བཤང་གཅིའི་སར་དུས་དུས་སུ་བཀྲུ་བའི་ཆུ་དང་ཕྱི་བའི་ས་ལ་སོགས་པ་གཞག །དགུན་གྲང་བའི་ཚེ་ཆུ་དྲོན་གཞག་དབྱར་ཚ་བའི་ཚེ་ཆུ་གྲང་གཞག་ཝ་བཀྲུ། ཆད་པ་པའི་དགེ་སློང་གིས་ཝ་ལ་བཤང་གཅིས་འབགས་པ་ཐམས་ཅད་བཀྲུ་།སྟན་གདིང༌། ཆད་པ་པའི་དགེ་སློང་གིས་སྟན་གདིང་བ་ནི་དགེ་འདུན་བཤོས་གསོལ་བ་དང་ཆོས་གསན་པའི་གདན་དུས་སུ་གདིང༌། དུས་ཤེས་པར་བྱ་སྟེ་ཕོག་དང་དེའི་སྣོད་གཞག་ཆད་པ་པའི་དགེ་སློང་གིས་དུས་
དུས་སུ་དགེ་འདུན་གཙུག་ལག་ཁང་དུ་ཕྱག་བཞེས་པའི་ཕྱིར་མེ་ཏོག་དང་པོག་སྤོས་ལ་སོགས་པ་བསོག །དེ་སྟེ་ནུས་ན་སྟོན་པའི་ཡོན་ཏན་བརྗོད་ན་ཡང་ངོ༌། །ཆད་པ་པའི་དགེ་སློང་གིས་དགེ་འདུན་གཙུག་ལག་ཁང་དུ་ཕྱག་བཞེས་ནས་བསྐོར་བའི་ཚེ་བོག་ཐོགས་ཏེ་དང་པོར་སོང་ལ་སངས་རྒྱས་ལ་སྟོཏྟྲ་བཀླག །དེ་སྟེ་མ་ཡིན་ན་ཆད་པ་ལ་བསྐོ། །ཆད་པ་པ་སྟོཏྟྲ་མི་ཤེས་ན་རོགས་པོ་མཛའ་བོ་ལ་གསོལ་བ་བཏབ་སྟེ་སྟོཏྟྲ་ཀླག་ཏུ་གཞུག་ཆོགས་ནས་གཎྜཱི་བརྡུང༌། ཆད་པ་པའི་དགེ་སློང་གིས་བཤོས་ལ་སོགས་པ་ཚོགས་ནས་གཎྜཱི་བརྡུང༌། དེ་སྟེ་ཚེ་ཆ་ན་དགེ་སློང་ལ་བསླབ། ཆད་པ་པའི་དགེ་སློང་གིས་ཉི་མ་ཚ་བའི་ཚེ་དགེ་འདུན་བཤོས་གསོལ་བ་ལ་བསིལ་ཡབ་ཀྱིས་གཡབ་པོ། ཐམས་ཅད་རབ་ཏུ་རྫོགས་པའི་ཐ་མར་དེའོ། །ཆད་པ་པའི་གྲལ་ནི་ཁྲིམས་རྫོགས་པ་ཐམས་ཅད་ཀྱི་མཇུག་ཚེ་ལུས་ཐམས་ཅད་ཀྱི་སྟེང་དུ་འདུག་གོ །བཟའ་བ་བྱས་ནས་མལ་སྟན་གཡོགས་པར་སྤ། ཆད་པ་པའི་དགེ་སློང་གིས་དགེ་འདུན་བཤོས་གསོལ་ཟིན་ནས་དགེ་འདུན་གྱི་གདན་ལ་སོགས་པ་སྤྲུགས་ཏེ་བལྟབ་ལ་མལ་སྟན་གྱི་ཁང་བུའམ། གནས་དབེན་པར་གཞག །ལྷུང་བཟེད་ཀྱི་གཞི་དོར། ཆད་པ་པའི་དགེ་སློང་གིས་གདན་བརྟུལ་ནས་ལྷུང་བཟེད་ཀྱི་གཞི་རྩྭ་དང་ས་ལ་བྲལ་བྲུལ་ལུས་པ་ཐམས་ཅད་ཕྱགས་ཏེ་དོར། དུས་ཤེས་པར་བྱས་ཏེ་མཆོད་རྟེན་ཕྱགས། ཆད་པ་པའི་དགེ་སློང་གིས་དུས་དུས་སུ་མཆོད་རྟེན་ཐམས་ཅད་ཕྱགས་ཤིང་ཕྱི་བདར་བྱ། རབ་ཏུ་གཞོན་ནུའི་ལྕི་བའི་བྱུག་པ་སྦྱིན། ཆད་པ་པའི་དགེ་སློང་གིས་དགེ་འདུན་འདུ་བའི་སར་གཙུག་ལག་ཁང་དུ་བ་ལང་གི་ལྕི་བས་བྱུག །འདུ་བའི་དུས་སུ་གདིང་བ་ནས་ཡོན་ཏན་གྱི་བར་དུ་ཆུད་པའོ། །ཆད་པ་པའི་དགེ་སློང་གིས་ནུབ་མོ་དགེ་འདུན་འདུ་བའི་སར་གདན་བཏིང་ལ་དགེ་བརྟག་བྱ། དེ་སྟེ་ནུས་ན་ཞག་བརྗོད། ཆད་པ་པའི་དགེ་སློང་གིས་དགེ་བརྟག་བྱས་པའི་འོག་ཏུ་ཞག་གྲངས་འདི་སྙེད་འདས་སོ་ཞེས་དགེ་འདུན་ལ་བརྗོད། མི་ནུས་ན་དགེ་སློང་གཞན་བསྐོ། །ཆད་པ་པའི་དགེ་སློང་གིས་དགེ་བརྟག་བྱ། མི་ནུས་ན་གཞན་སུ་ནུས་པ་ལ་བཅོལ་ཏེ་གསོལ། ཆད་པ་པའི་དགེ་སློང་དག་གིས་རྐང་པ་ནུབ་མོ་བཀྲུ། །ཆད་པ་པའི་དགེ་སློང་གིས་དགུན་དང་དབྱར་ལ་སོགས་པའི་
དུས་བཞིན་དུ་ཆུ་གྲང་དྲོར་སྦྱར་ཏེ་དགེ་འདུན་གྱི་རྐང་པ་བཀྲུ། དུས་དང་འབྱོར་པའི་ཆུས་སོ། །བསྐུ་བ་ཡང་ངོ༌། །ཆད་པ་པའི་དགེ་སློང་གིས་དགེ་སློང་དག་གི་རྐང་པ་བཀྲུས་ནས་སྣུན་གྱིས་བསྐུ། མི་འདོད་ན་སྣུམ་དབུལ། ཆད་པ་པའི་དགེ་སློང་གིས་ལྟག་མ་ལྟར་ཆད་པ་པའི་དགེ་སློང་གི་རྐང་པ་བཀྲུ་ཞིང་སྣུམ་གྱིས་བསྐུས། བཏུབ་ན་ཕྱི་དེ་ཉིན་ཟས་བཟང་པོ་དང་ཁུར་བ་དབུལ་གཙུག་ལག་ཁང་གི་མཐའ་འཁོབ་ཏུ་འོས། ཆད་པ་པའི་དགེ་སློང་གིས་ཆད་པ་བྱེད་པའི་ཚེ། གཙུག་ལག་ཁང་གི་ནང་ནས་གནས་ཁང་ངན་པ་གཅིག་ཏུ་གཞག །རིགས་པ་ནི་རྙེད་པ་ཐམས་ཅད་ལའོ། །དད་པའི་བྲམ་ཟེའམ་ཡོན་བདག་གཅིག་གིས་དགེ་འདུན་གྱི་སྤྱིར་ཡོན་ཕུལ་བ་ལ་ཆད་པ་པའི་དགེ་སློང་ཡང་ཕལ་དང་འདྲ་བའི་ཡོན་སྐལ་སྦྱིན། དགེ་བའི་ཕྱོགས་བྱ། དགེ་སློང་ཆད་པ་པས་ཆད་པ་བྱེད་པའི་ཚེ་དུས་གསུམ་དུ་བདག་གི་དགེ་བ་རྒྱུན་མི་ཆད་པར་བྱ། དེ་བཞིན་དུ་འདིར་དེའི་རང་བཞིན་ཚོལ་བ་དང་སློབ་བ་སྦྱིན་པའོ། །མི་ཚངས་པར་སྤྱོད་ན་ཚེ་གཅིག་ཏུ་སློབ་པ་བྱིན་པའི་དགེ་སློང་དང་ལྟུང་བ་སྡེ་ལྔ་ལས་གང་བྱུང་གཏོལ་མེད་དེ་ཐེ་ཚོམ་ཟོས་ནས་རང་བཞིན་ཚོལ་དུ་བཅུག་པའི་དགེ་སློང་གཉིས་ཀྱི་སྟེང་དུ་སྨོས་པའི་ཆད་པ་པས་བྱའོ་ཞེས་བྱ་བ་ཐམས་ཅད་བྱའོ། །བཤད་པ་ནི་མ་ཡིན་ནོ། །ཚེ་གཅིག་ཏུ་སློབ་པ་བྱིན་པ་དང་རང་བཞིན་ཚོལ་དུ་བཅུག་པའི་དགེ་སློང་གཉིས་ཀྱིས་སོ་སོར་ཐར་པ་འཆད་པའི་ཚེ་དགེ་སློང་གཙང་མ་ལ་ཁ་ཐོན་ཤེས་པ་མེད་ཀྱང་སོ་སོར་ཐར་པ་མི་བཤད། སྔ་མ་ནི་བཤགས་པས་རང་བཞིན་དུ་ཆུད་དོ། །ལྟུང་བ་སྡེ་ལྔ་ལས་གང་བྱས་གཏོལ་མེད་དེ་ཐེ་ཚོམ་ཟོས་ནས་རང་བཞིན་ཚོལ་དུ་བཅུག་པའི་དགེ་སློང་ནི་ནམ་དྲན་ནས་དགེ་སློང་ལ་མཐོལ་ན་གཙང་མར་འགྱུར་རོ། །ཕྱི་མ་ནི་དགྲ་བཅོམ་པར་ནའོ། །དགེ་སློང་གི་ཚངས་པར་སྤྱད་ནས་ཚེ་གཅིག་ཏུ་སློབ་པ་བྱིན་པ་ནི་ནམ་དགྲ་བཅོམ་པར་གྱུར་ན་གཙང་མར་ཆུད། སྒོ་དབྱེ་ཚུན་ཆད་གཙུག་ལག་ཁང་པ་ལ་སོགས་པར་ཡང་བྱས་པ་བཞིན་དུ་སྤྱད་པའོ། །ལྷག་མའི་ཆད་པ་དང་མགུ་བ་བྱེད་པའི་ཞག་གྲངས་ཁོ་ནར་དབྱུང་དུ་དགེ་འདུན་ཉི་ཤུར་མ་ཚང་ངམ་ཚང་ཡང་ཡན་ལག་དང་མ་ལྡན་ན་དགེ་འདུན་ཉི་ཤུར་ཚང་གི་བར་དུ་བསྡད། དེ་ལྟར་སྡོད་པའི་ཚེ་དགེ་འདུན་ཚང་ཚང་གི་བར་དུ་ཆད་པ་དང་
མགུ་བ་རྒྱུན་མི་ཆད་པར་བྱ་བའང་མ་ཡིན་བར་དུ་བཅད་དེ་ཡོད་བཏང་བའང་མ་ཡིན་གྱི་དགེ་འདུན་ཉི་ཤུར་ཚང་ཚང་གི་བར་དུ་ལས་འདི་རྣམས་བྱའོ། །བསྡུས་པའི་དངོས་འདྲིས་པའི་འོག་གི་མདོ་ཆད་པ་དང་ཞེས་ཟེར་བ་མན་ཆད་འོག་མའི་མདོ་དཀའ་བའི་དོན་མེད་པར་མ་གྱུར་ཅིག་ཅེས་བྱས་ཏེའོ་ཞེས་འབྱུང་བ་ཡན་ཆད་ཀྱི་ཆད་པའི་ལས་ཐམས་ཅད་བྱ་དེ་མན་ཆད་ཀྱི་ཆད་པའི་ལས་ནི་བྱ་མི་དགོས། དེ་ལྟར་ཆད་པ་བྱེད་པའི་ཚེ། གཙུག་ལག་ཁང་གི་ནང་ན་གང་ངན་པ་གཅིག་ཏུ་བཞུགས་ཏེ་དགེ་འདུན་སྤྱིར་ཡོན་ཕུལ་བའི་སྐལ་ཡང་སྦྱིན་ནོ། །དེ་བཞིན་དུ་སྤྱོད་པ་དང་སྨད་པ་དང་བསྐྲད་པ་དང་བརྟལ་བ་དང་སྤངས་པ་དག་ཀྱང་ངོ༌། །དགེ་འདུན་གྱི་སྤང་བ་རྣམ་བདུན་གྱིས་ཆད་པའི་དགེ་སློང་སྤངས་པའི་གནས་ནས་འདུག་པའི་ཚེ་ཆད་པ་དང་ལས་བྱ་བའམ་མི་བྱ་བའི་སྐབས་དང་གནས་ནི་མདོ་ལྟག་མ་བཞིན་དུ་བྱས་ཏེ་དགེ་འདུན་ཡོན་ཕུལ་བའི་ཡོན་སྐལ་ལ་ནི་མི་དབང་སྔོན་སྤངས་པའི་ཆད་པ་མ་བྱུང་བའི་ཚེ་སྤྱིར་ཡོན་ཕུལ་བ་ལས་སྤང་བའི་འོག་ཏུ་དགོས་པའི་སྐལ་བ་ནི་དབང་སྟེ་བླངས་ཀྱང་ཉེས་མེད་ལ་དགེ་འདུན་གྱིས་སྦྱིན། བཤད་པ་ནི་མ་ཡིན་ནོ། །སོ་སོར་ཐར་པའི་ཚེ་དགེ་སློང་གཙང་མ་ལ་ཁ་ཐོན་ཤེས་པ་མེད་ཀྱང་མདོ་གོང་མ་ལྟར་སྤང་བ་རྣམ་བདུན་གྱིས་ཆད་པས་བཅད་པའི་དགེ་སློང་གིས་མི་ཀླག ། སྤངས་པ་འདི་དག་གིས་སྤངས། སྤང་བ་རྣམ་བདུན་གྱིས་ཆད་པས་བཅད་པའི་དགེ་སློང་གཙང་མ་དང་ལྷན་ཅིག་མི་འཁོད་ཅིང་གཏམ་མི་བྱ་བ་དང་ཁ་ཟས་མི་སྤྱད། མི་རིགས་པ་ནི་དེའི་ཕྱིར་རྙེད་པ་ལའོ། །སྤང་བ་རྣམས་བདུན་གྱི་ཆད་པས་བཅད་པའི་དགེ་སློང་མཚན་མ་བཏང་གི་བར་དུ་དགེ་འདུན་སྤྱིར་ཡོན་ཕུལ་བས་ཤས་མི་སྦྱིན་མ་སྤངས་པའི་སྔ་རོལ་གྱི་ཡོན་ནི་དབང་ངོ༌། །བྱེ་བ་བཞིན་དུའོ། །དགེ་སློང་དགེ་བ་དང་མི་དགེ་བ་སྡེ་གཉིས་སུ་གྱུར་པ་ལ་ཕན་ཚུན་གཏམ་དང་ཁ་ཟས་མི་སྤྱད་པ་བཞིན་དུ་སྡང་བ་རྣམ་བདུན་གྱིས་ཆད་པས་བཅད་ལ་འང་ཁ་ཟས་ལ་སོགས་པ་མི་སྤྱད་པ་དང་མི་དགེ་བ་བཞིན་དུ་བལྟ། དེ་བཞིན་དུ་བྱེ་བ་ལ་ཆོས་མ་ཡིན་པའི་སྐྱབས་སོ། །དགེ་སློང་དགེ་མི་དགེ་རྣམ་པ་གཉིས་སུ་གྱུར་པའི་ཚེ། དགེ་སློང་གཅིག་ཅིག་ལུས་དགེ་བའི་ནང་ན་འདུག་ལ་སེམས་མི་དགེ་བའི་ནང་དུ་ཕྱོགས་པར་དགེ་འདུན་གྱིས་ཤེས་ན་དགེ་འདུན་གྱིས་སྟེང་དུ་མགུ་བ་བྱས་ལ་དབྱུང་དུ་དགེ་
འདུན་མ་ཚང་ན་དགེ་འདུན་དུ་ཚང་གི་བར་དུ་ཆད་པ་བྱ་བ་དང་མི་བྱ་བའི་སྐབས་བྱ་བ་བཞིན་དུ་འདིར་ཀྱང་དེ་བཞིན་བྱ། མི་སྐྱེ་བ་ནི་རང་བཞིན་དུ་མི་གནས་པ་ལ་སྟེ་ཆད་པ་དང་མགུ་བར་བྱ་བ་དང་བསླབ་བ་སྤྱོད་པའོ། །དགེ་འདུན་གྱིས་ལྷག་མའི་ཆད་པ་དང་མགུ་བ་བྱེད་པ་དང་ཚེ་གཅིག་ཏུ་སློབ་མ་བྱིན་པ་གསུམ་གྱིས་གཙང་མའི་དགེ་སློང་གཉིས་གསུམ་ཞིག་ལ་ཆད་པ་དང་མགུ་བ་བྱས་པར་མི་ཆུད། དགེ་འདུན་ནམ་ཡིན་པ་ལ་ཡང་ངོ༌། །མདོ་གོང་མ་ལྟར་ཆད་པས་བཅད་པའི་དགེ་སློང་གིས་གཙང་མའི་དགེ་འདུན་དུ་མ་ཚང་པ་ལ་ཆད་པ་དང་མགུ་བ་བྱས་ཀྱང་ཚངས་པར་མི་ཆུད་དོ། །དེའི་གནས་སུ་ཞུགས་པ་ལས་ཆད་ན་ཡང་ངོ༌། །མཆམས་གཅིག་གི་དགེ་འདུན་ཉི་ཤུ་ཞིག་འཁོད་པ་ལས་གྲངས་བཅད་དེ་སོ་སོར་བསྔོས་ནས་འདི་ལ་བྱ་འདི་ལ་མི་བྱ་ཞེས་བྱས་ཏེ་ཆད་པ་བྱས་ན་ཆད་པ་བྱས་པར་མི་ཆུད་དོ། །མངས་ཞེས་མི་སྤང་ཆད་པ་བའི་དགེ་སློང་གིས་ཐོག་མ་ཆད་པ་བྱུང་བའི་གནས་ན་དགེ་འདུན་དུ་ལོངས་པ་ཡོད་བཞིན་དུ་འདི་ལ་མི་བྱའི་གུང་དུ་དགེ་འདུན་ཉུང་དུ་ལ་ཆད་པ་བྱའོ་ཞེས་ཟེར་ཏེ་སོང་ནས་ཆད་པ་བྱས་པ་ནི་ལས་སུ་མི་རུང་ལ་ཉེས་བྱས། གནས་བརྟན་དང་སོ་སོར་ཐར་པ་དང་བཅས་པར་ནན་ཏན་བྱ། ཆད་པ་པའི་དགེ་སློང་གིས་ཐོག་མ་ཆད་པ་བྱུང་པའི་གནས་ན་དགེ་འདུན་ཡོན་ཏན་དང་མི་ལྡན་ཞིང་གནས་བརྟན་དང་སོ་སོར་ཐར་བ་འཆད་བ་མེད་ན་གཙུག་ལག་ཁང་གཞན་གྱི་དགེ་འདུན་ལ་ཆད་པ་བྱས་ཀྱང་ཉེས་མེད། གང་དུ་དེར་གསུམ་ལ་སོགས་པ་ཐམས་ཅད་དུ་གཏོགས་པ་སྤྱོད་པས་དེར་སྤྱད། ཆད་པ་དང་མགུ་བར་བྱེད་པ་དང་ཚེ་གཅིག་ཏུ་སློབ་པ་བྱིན་པ་གསུམ་གྱིས་དགེ་འདུན་ལ་ཆད་པ་བྱར་མི་རུང་གི་ཆད་པ་བ་ཉིད་དགེ་འདུན་དུ་ལངས་པས་ཆད་པ་བྱས་ན་བྱས་པར་མི་ཆུད་དོ། །ཐོག་མ་ལས་གཞན་དུ་སྐྱ་རེངས་འབྱུང་བར་མི་བྱ། ཆད་པ་བྱེད་པའི་ཚེ་རྐྱེན་བྱུང་བལ་སྔགས་ཀྱིས་བསྔོས་ཏེ་འགྲོ་བ་ནི་མ་གཏོགས་ཆད་པའི་ཞག་གྲངས་མ་འཁོར་གྱི་བར་དུ་མཚམས་ཀྱི་ཕྱི་རོལ་དུ་ཞག་གཅིག་སྐྱ་རེང་ས་འབྱུང་བར་མི་གནས། བྱ་བ་འདས་པ་དགེ་འདུན་འཁོར་བ་ལ་བརྗོད། ཆད་པ་དང་མགུ་བ་བྱེད་པའི་ཚེ་ནུབ་མོ་དགེ་འདུན་འདུས་པ་ལ་བདག་གི་ཞག་གྲངས་སྔ་མ་འདི་སྙེད་ཅིག་ནི་འདས་འདི་སྙེད་ཅིག་ནི་ཕྱི་ན་ལུས་ཞེས་གསོལ་ཞིང་བརྗོད། ཉིན་རེ་ཞིང་བྱ་བ་ནི་དེ་སྟེང་རིང་
དུ་མི་སྤྱད་པ་ཡང་མ་ཡིན་ནོ། །ཆད་པ་དང་མགུ་བར་བྱེད་པའི་ཚེ་ཞག་གྲངས་ཉུང་ན་སྔ་མ་ལྟར་ཉིན་རེ་བཞིན་བརྗོད་པ་ཡིན་ན་ཆད་པ་ཟླ་བ་གཉིས་གསུམ་གྱིས་བཅད་ན་ཉི་མ་གསུམ་ཞིང་དགེ་འདུན་ལ་ཞག་འདི་ཉིད་ཅིག་འདས་སོ་ཞེས་གསོལ་ཞིང་བརྗོད། འདིར་གསུམ་མམ་བཞིའོ། །ཆད་པ་པ་ལ་གསུམ་བཞི་ཞིག་བྱེད་པའི་ཚེའང་ཉི་མ་གསུམ་ཞིང་དགེ་འདུན་ལ་ཞག་འདི་སྙེད་ཅིག་འདས་སོ་ཞེས་གསོལ་ཞིང་བརྗོད། དགེ་སྦྱོང་དང་ཁྱིམ་པ་འཁོད་ན་མི་གསོལ། དོན་འདི་བྱེད་པ་དེས་ཟུར་མི་བྱ། ཆད་པ་བྱེད་པའི་ཚེ་དགེ་སློང་གཙང་མ་པས་ངོ་ཚ་བ་དང་སྨད་པར་བྱ། དེ་སྟེ་འཐབ་མོ་བྱེད་པར་འོངས་པར་ཐོས་ཏེ་འཇིགས་ན་དགེ་འདུན་ནམ་གང་ཟག་གི་གནས་སུ་བཏང༌། ཆད་པ་པའི་དགེ་སློང་ཆད་པ་བྱེད་པའི་ཚེ་གུད་ནས་དགེ་སློང་འཐབ་མོ་པ་ཞིག་འོང་བར་ཐོས་ན་དགེ་འདུན་ནམ་གང་ཟག་གི་དྲུང་དུ་འཐབ་མོ་པ་སླར་མཆིས་ཀྱི་བར་དུ་བདག་གི་ཆད་པ་བཏང་ངོ་ཞེས་གསོལ་ཏེ་སྔོན་གྱི་གྲལ་གར་བབ་པར་འདུག་ལ། ཕྱིས་འཐབ་མོ་པ་སོང་ནས་སྔོན་ཞག་ཇི་སྙད་བྱས་པའི་མཇུག་ནས་བཟུང་སྟེ་བྱ་བདག་གིས་དགེ་འདུན་ལ་ནི་ལན་གསུམ་དུ་བཟླས། འཇིགས་པ་དང་བྲལ་ནས་དེ་ཉིད་དུ་བླངས། མདོ་གོང་མ་ལྟར་འཐབ་མོ་པ་སོང་ནས་ཆད་པ་པའི་མཇུག་ནས་བཟུང་སྟེ་བྱ། བདག་གིས་དགེ་འདུན་ལ་ནི་ལན་གསུམ་དུ་བཟླས། འཇིགས་པ་དང་བྲལ་ནས་དེ་ཉིད་དུ་བླངས། མདོ་གོང་མ་ལྟར་འཐབ་མོ་པ་སོང་ནས་ཆད་པ་པའི་མཇུག་སྔོན་གྱི་ཞག་གྲངས་ནས་བཟུང་སྟེ་བྱ་བའང་དགེ་འདུན་ལ་བདག་གིས་ལྷན་ཅིག་གསོལ་ཏེ་བྱིན། ཆད་པ་པ་མ་སོང་གི་བར་དུ་མི་བྱ། གཞན་ལ་གནས་པའི་དངོས་པོའོ། །འདི་མན་ཆད་གནས་པ་ཐ་དད་པའི་དྲིས་པའི་དངོས་པོ་ལ་འཆད་དེ། དེའི་ཉིན་ཞག་གི་ཆད་པ་ནི་རང་བཞིན་དུ་གནས་པ་དང་ལྷན་ཅིག་ཏུ་གཡོགས་པ་གཅིག་ཏུ་ཆད་པ་དང་མགུ་བར་བྱེད་བ་སྤྱོད་པ་དང་ལྷན་ཅིག་ཏུ་ཉལ་ནའོ། །ཆད་པ་དང་མགུ་བར་བྱེད་པའི་ཚེ་དགེ་སློང་གཙང་མ་དང་ལྷན་ཅིག་ཏུ་ཉལ་ན་ཞག་ཏུ་ཉལ་བ་ཆད་པ་དང་མགུ་བར་བྱེད་པའི་ཞག་གྲངས་ལ་མ་གཏོགས་ཏེ་འབྱུང་ངོ༌། །མཚམས་ཀྱི་ཕྱི་རོལ་དུ་ཡང་ངོ༌། །ཆད་པ་པ་ཆད་པ་བྱེད་པའི་ཚེ་མཚམས་ཀྱི་ཕྱི་རོལ་དུ་སོང་བ་ཉིད་ཀྱང་ཞག་གྲངས་སུ་མི་ཆུད་པའི་སྟེང་དུ་ཆད་པ་སྔ་མ་བྱས་པའི་ཞག་
གྲངས་ལའང་ཕྱི་རོལ་དུ་སོང་བ་དབྲིའོ། །མ་བརྗོད་ན་ཡང་ངོ༌། །ཆད་པ་ཟླ་བ་གཅིག་གིས་བཅད་དེ་བྱེད་པའི་ཚེ་ཞག་གསུམ་ཞིང་དགེ་འདུན་ལ་ཞག་འདི་སྙེད་ཅིག་བརྗོད་པ་ལས་དེ་ཞག་བཞི་ཉིན་པར་བརྗོད་པ་ནི་ཉེས་མེད་དེ་བཞི་ལས་འདས་ན་ཆད་པ་སྔ་མ་བྱས་པའི་ཞག་གྲངས་ལས་ཞག་བཞི་དབྲིའོ། །བསྙེན་པ་པ་དེའི་མཚམས་ནི་མི་ཉེ་ན་མི་སྐྱེ། མདོ་གོང་མ་ལྟར་དགེ་འདུན་ལ་བརྗོད་པ་ནི་མཚམས་ཀྱི་ཕྱི་རོལ་དུ་བརྗོད་ན་ཞག་གསུམ་ཞིང་བརྗོད་ཀྱང་ཆད་པ་སྔ་མ་བྱས་པའི་ཞག་གྲངས་ལས་ཞག་གསུམ་དབྲིའོ། །ཉེས་མེད་པ་ནི་དེའི་ཉིན་པར་ལྡོག་ན་མཚམས་གཞན་དུ་སོང་ན་ཡང་ངོ༌། །ཆད་པས་བཅད་པ་དེ་ཆད་པ་བྱེད་པའི་ཚེ་མཚམས་ཀྱི་ཕྱི་རོལ་དུ་སོང་སྟེ་ཞག་མ་ལོན་པར་སླར་འོངས་པ་ནི་ཉེས་མེད། ཆད་པ་དང་ལྷན་ཅིག་ཏུ་གཡོགས་མ་གཅིག་ཏུ་ཆད་པ་པ་མི་ཉལ། ཆད་པ་པ་མང་ཞིག་འཁོད་དེ་ལྷན་ཅིག་ཉལ་ན་ཉེས་བྱས་སུ་འགྱུར་བས་གནས་ཐ་དད་དུ་འཁོད། མུར་འདུག་གི་ཆད་པ་ལ་གནས་པ་དང་དེར་ལྷན་ཅིག་ཏུ་ན་འདིར་ཉེས་མེད་དོ། །མུར་འདུག་རབ་ཏུ་འབྱུང་བའི་ཚེ་སེམས་བརྟགས་པའི་ཕྱིར་ཟླ་བ་གཅིག་དགེ་འདུན་གྱི་འཁོར་དུ་གཞག་པ་དང༌། ལྷན་ཅིག་ཉལ་བ་ཉེས་མེད་དོ་ཞེས་བྱི་ཤུ་ཏས་བཤད། མུར་འདུག་སེམས་བརྟག་པའི་ཕྱིར་ཟབ་གཅིག་ཏུ་གཞག་པའང་ལྷན་ཅིག་ཏུ་ཉལ་ན་ཉེས་མེད་དོ་ཞེས་བྱི་ཛ་ཡས་བཤད། ས་གཞན་དུ་གནས་པ་སྤྱད་པ་དངོས་ཏེ་དྲིས་པའོ། །འདི་མན་ཆད་འདུལ་བའི་དངོས་པོ་ལ་འཆད་དེ། མ་གྲགས་པ་ནི་རྩ་བ་མ་ཡིན་ནོ། །དགེ་སློང་ཞིག་གིས་ལྟུང་བ་སྡེ་ལྔ་ལས་གང་ཡང་རུང་སྟེ་བྱུང་ན་དོགས་པ་ནི་མི་བཙན་གྱི། མཐོང་བ་དང་ཐོས་པས་བརྒལ་བ་དང་གླེང་བ་ནི་ཉེས་མེད། མི་སྐྱེ་བ་ནི་དབྱུང་བའི་སྨྲ་བ་ཟིན་ནས་དབྱུང་བ་བཞག་པའོ། །དགེ་སློང་ཚུལ་ནས་དབྱུང་བའི་ཚེ་ཚུལ་ནས་མ་བྱུང་བར་དགེ་སློང་ཡོན་ཏན་དང་ལྡན་པ་ཞིག་ན་རེ་ཁྱོར་ཚུལ་ནས་མ་འབྱུང་ཤིག་ཅེས་ཟེར་ན་མི་འབྱུང་བྱུང་ཟིན་པའི་འོག་ཏུ་དེ་སྐད་ཟེར་བ་མི་བརྩན། དེ་བཞིན་དུ་ནད་པ་ལ་བྱེད་ན་ཡང་ངོ༌། །དགེ་སློང་ཚུལ་ནས་བྱུང་བའི་ཚེ་ནད་པ་ཞིག་ན་རེ་ཁྱོད་དང་བཅད་པ་ཡོད་ཀྱིས་རེ་ཞིག་ཚུལ་ནས་མ་འབྱུང་ཤིག་ཅེས་ཟེར་བ་ལས་བྱུང་བ་ནི་ཉེས་མེད་དོ། །ཕོ་ཉས་ཀྱང་ངོ༌། །ནད་པའི་བང་ཆེན་གྱིས་
མ་འབྱུང་ཤིག་ཅེས་ཟེར་བའང་མི་བརྩན་ཏེ་འབྱུང༌། ནད་པ་ལ་ཡང་ངོ༌། །ནད་པ་ཚུལ་ནས་འབྱུང་བའི་ཚེ་མི་ན་བ་ཞིག་གིས་ཁྱོད་སྐད་ཅིག་ཚུལ་ནས་མ་བྱུང་ཤིག་ཅེས་ཟེར་ན་མི་བསྡད་པར་བྱུང་ཡང་ཉེས་མེད། ཁས་མི་བླང༌། མདོ་གོང་མ་ལྟར་ཚུལ་ནས་འབྱིན་པའི་ཆེ་ནད་བ་དང་ཕོ་ཉ་ལྟ་བུ་ཞིག་ན་རེ་ཚུལ་ནས་མ་བྱུང་བར་སྡོད་ཅིག་ཅེས་ཟེར་བའི་ཚེ་ཁས་མི་བླང་བར་འབྱུང་ངོ་ཞེས་བྱ། ཚེ་དང་ལྡན་པ་ཁྱོད་སྡོད་ཅིག་ཁྱོད་ནད་པ་སྟེ་སྦྱོར་བ་མི་བཟོད་ཀྱིས་ཞེས་སོ། །དགེ་སློང་ཚུལ་ནས་འབྱུང་བའི་ཚེ་ནད་པ་ཞིག་ན་རེ་ཚུལ་ནས་མ་བྱུང་བར་སྡོང་ཅིག་ཅེས་ཟེར་ཞིང་རྒོལ་ཞིང་འོད་བ་ལ་ཚེ་དང་ལྡན་པ་ཁྱོད་ནད་པ་ཡིན་ཏེ་དབང་པོ་ཉམས་ཤིང་རྒོལ་ནི་མི་ནུས་ཀྱིས་རེ་ཞིག་སྡོང་ཅིག་ཅེས་བསྒོ་སྟེ་དགེ་འདུན་གྱིས་དགེ་སློང་ཚུལ་ནས་དབྱུང་ངོ༌། །ཚེ་དང་ལྡན་པ་ནད་པའི་ཕོ་ཉ་འདི་རྒོལ་མི་རུང་ངོ་ཞེས་སླར་བསྒོ། །དགེ་སློང་ཚུལ་ནས་འབྱུང་བའི་ཚེ་ནད་བའི་ཕོ་ཉ་ཞིག་འོངས་ཏེ་རེ་ཞིག་མ་འབྱུང་ཤིག་ཅེས་པ་ལ་དགེ་འདུན་གྱིས་འདི་སྐད་དུ་བསྒོ། ནད་པ་ཉིད་དབང་པོ་ཉམས་པས་རྒོལ་བ་ལ་སོགས་པའི་ཚིག་མི་བརྩན་གྱི་སྡོད་ཅིག་ཅེས་དེ་ལ་བསྒོ་སྟེ་དགེ་སློང་ཚུལ་ནས་དབྱུང་ངོ༌། །བྱས་པའམ་བྱེད་པའི་རང་བཞིན་མ་ཆུད་བར་གླེང་པ་ཡང་ངོ༌། །ཚུལ་ཁྲིམས་མི་ཤེས་པའི་དགེ་སློང་ཞིག་གིས་དགེ་སློང་གཙང་མ་ལ་ཕས་ཕམ་པ་བཞིས་སྐུར་བ་ལྟ་བུ་ནི་མི་བརྩན་གྱི་སྐུར་བ་ནི་གང་སྐུར་པའི་ཉེས་པ་དང་སྦྱར། ལྷག་མ་ཡང་དུས་མ་ཡིན་པར་མི་འཇུག །ལྟུང་བ་སྡེ་ལྔ་ལྟ་བུ་ཞིག་གིས་ཕ་རོལ་ལ་རྒོལ་བའི་ཚེའང་ལས་བྱེད་པ་དང་འབྲེལ་པའི་སྐབས་སུ་མི་བརྒལ་གྱི་དལ་བའི་སྐབས་སུ་བརྒལ། དྲན་པ་དང་ཤེས་བཞིན་པ་གཞག་པར་མ་ཡིན། ཚུལ་ནས་འབྱུང་བ་དང་ཐོས་བ་དང་མཐོང་བ་ལྟ་བུས་རྒོལ་བའི་ཚེ་བརྒལ་ན་ཉེས་སམ་མ་ཉེས་པ་དང༌། བདག་གིས་མཐོང་བ་ལས་ལྷག་པར་བསྐུར་ཏམ་མ་བསྐུར་བར་བསམས་ཏེ་བརྒལ། གཅིག་ཏུ་མ་ཆད་པར་མ་ཡིན། སྟེང་མ་ལྟར་རྒོལ་བའི་ཚེའང་དགེ་སྤྱོད་དང་ཁྱིམ་པའི་དྲུང་དུ་མི་བརྒལ་གྱི་དབེན་བར་བརྒལ། སྐབས་མ་ཕྱེ་བར་མ་ཡིན། མདོ་གོང་མ་ལྟར་རྒོལ་བའི་ཚེ་སྐབས་མ་ཕྱེ་བར་མི་བརྒལ། བྱུང་ན་དེར་རོ། །ཚུལ་ནས་འབྱུང་བའི་ཚེ་ན་དགེ་སློང་སོ་སོ་ནས་ཐམས་ཅད་ཀྱིས་སྐབས་ཕྱེ་ཟིན་ནས་སྐབས་མ་ཕྱེ་བར་བརྒལ་
ཀྱང་ཉེས་མེད་མི་དྲན་ན་དྲན་པར་བྱ། ལྟག་མ་ལྟར་སྐབས་ཕྱེ་བའི་འོག་ཏུ་དགེ་སློང་ལ་བརྒལ་ཏེ་ཕ་རོལ་གྱི་ཉེས་པ་མི་དྲན་ན་དན་རྟགས་ཀྱིས་བརྒལ། འདི་མི་བྱེད་ལ་ཚིག་དང་བཅས་པ་འདིར་བྱ། ཕ་རོལ་ལ་རྒོལ་བའི་ཚེ་སྐབས་དབྱེར་གསོལ་ཏེ་སྐབས་འབྱེད་དུ་མི་བཏུབ་ན་ཚིག་དང་བཅས་པ་བྱས་ཏེ་འོག་ནས་འཆད། ཚེ་དང་ལྡན་པ་ཚིག་དང་བཅས་པ་བྱའོ། །སྟེང་མ་ལྟར་སྐབས་དབྱེར་རུང་མ་བཏུབ་ན་ཁོ་བོ་ཅག་གཉིས་མི་བརྩན་གྱི་སྟེང་དུ་གུད་དུ་འགྲོར་མི་རུང་གིས་གནས་འདི་ན་ཁྱེད་སྐད་ཅིག་འདུག་ཅེས་བྱ། ཁྱོད་གནས་ནས་ང་ལ་མ་དྲིས་པར་འགྲོ་བར་མ་བྱེད་ཅིག ། ལྟག་མ་ལྟར་སྐབས་འབྱེད་དུ་མ་བཏུབ་ན་ངས་ཁྱོད་ལ་རྒོལ་བ་ཡོད་ཀྱིས་ང་ལ་མ་དྲིས་ཀྱི་བར་དུ་ཁྱོད་གུད་དུ་མ་འགྲོ་ཤིག་ཅེས་བསྒོ། །ཚེ་དང་ལྡན་པ་བརྟགས་པའི་ཚིག་ཡོད་དེ་ཞེས་སོ། །ལྟག་མ་ལྟར་སྐབས་འབྱེད་དུ་མ་བཏུབ་ན་བརྟགས་པའི་ཚིག་ཁྱོད་ལ་རྒོལ་བ་ཡོད་ཀྱི་ང་ལ་མ་དྲིས་ཀྱི་བར་དུ་གུད་དུ་མ་འགྲོ་ཤིག་ཅེས་བསྒོ། །དེ་ལྟར་ཡང་དུལ་བར་མ་གྱུར་ན་མི་བཤད། གོང་མ་ལྟར་བྱས་ཀྱང་མ་དུལ་ཏེ་སྐབས་འབྱེད་དུ་མ་བཏུབ་ན་ཆོས་ལ་སོགས་པ་བདག་ལ་དྲི་བའི་རྣམས་ཀྱང་མི་བཤད། སྨྲ་བ་ལ་སོགས་པས་ཀྱང་འདི་ལ་ཟློག །སྐབས་འབྱེད་དུ་མ་བཏུབ་པའི་དགེ་སློང་དེ་དག་ལ་གཏམ་ཟེར་ན་ལན་མི་བླན། ལམ་སྲང་ངམ་གྲོང་བར་ན་འདུག་ན་བྱོལ་ཏེ་འགྲོ། །འོན་ཀྱང་ན་གསོ་སྦྱོང་གཞག་ཐབས་ལྟག་མ་ལྟར་བྱས་ཏེ་འང་མ་དུལ་ཞིང་སྐབས་མི་འབྱེད་ན་དེ་དང་ལྷན་ཅིག་ཏུ་གསོ་སྦྱོང་མ་བྱེད་ཅིག་ཅེས་དགེ་འདུན་ཐམས་ཅད་ལ་བསྒོ། །འོན་ཀྱང་ན་དབྱུང་བ་ལའོ། །ཐབས་ལྟག་མ་ལྟར་བྱས་ཏེ་མགུ་ཞིང་སྐབས་འབྱེད་ན་དེ་དང་ལྷན་ཅིག་ཏུ་ཚུལ་ནས་མ་འབྱུང་ཞིག་ཅེས་དགེ་འདུན་ཐམས་ཅད་ལ་བསྒོ་ཞིང་ཚུལ་ནས་ཀྱང་མི་དབྱུང༌། །འཇོག་པ་གཞག་པས་དེ་དང་ལྷན་ཅིག་ཏུ་བྱས་ན་འང་བཤགས་པའོ། །ལྟག་མ་ལྟར་རྒོལ་བ་དང་སྐབས་འབྱེད་དུ་མ་བཏུབ་པ་གཉིས་ནང་འདུས་སྟེ། གསོ་སྦྱོང་དང་ཚུལ་ནས་འབྱུང་བ་གཉིས་ལྷན་ཅིག་གཅིག་ཏུ་བྱས་ནས་དགེ་འདུན་ལ་མ་གསོལ་ཀྱང་བཟོད་པ་འང་བྱ། ཚུལ་ནས་འབྱུང་བ་དང་གསོ་སྦྱོང་ཀྱང་ལྷན་ཅིག་བྱར་རུང༌། དེ་སྟེ་སྐབས་ཕྱེ་ནས་མི་འཇམ་ན་ཕུར་པ་དང་བཅས་པ་བྱ། ལྟག་མ་ལྟར་ཉེས་བྱུང་པ་ལ་རྒོལ་བས་
སྐབས་འབྱེད་པར་གསོལ་ཏེ། སྐབས་དབྱེ་བའི་འོག་ཏུ་ཚིག་མི་འཇམ་ཞིང་སླར་གཤེ་ན་ཕུར་པ་དང་བཅས་པའི་ཚིག་བྱས་ཏེ་ཕུར་བས་བཅས་པའི་ཚིག་ནི་འོག་ནས་འཆད། འདིར་རབ་གནས་ཆེ་གེ་མོ་ཞིག་ཏུ་འམ་དངོས་པོ་ཞིག་ཁོ་བོ་གང་དུ་འདོད་པར་སྨྲའོ་ཞེས་ནས་ལྟུང་བ་བརྗོད་དེ་ཉེས་པ་བསྟན་པས་སྤངས་པའོ། །མདོ་གོང་མ་ལྟར་སྐབས་ཕྱེ་བའི་འོག་ཏུ་ཚིག་མི་འཇམ་པར་ཟེར་ན་གནས་དང་དུས་འདི་འམ་གཞན་གྱི་གནས་དང་གཙུག་ལག་ཁང་དུ་འོངས་པའི་ཚེའམ་ཤིང་དྲུང་དང་ཁྱིམ་དྲུང་དུ་ཕྲད་པའི་ཚེ་ལྟུང་བའམ་ཉེས་པ་བྱས་བའི་མིང་ནས་བྱུང་སྟེ་བརྗོད་པ་འདིས་བརྒལ་ལོ། །ལས་བྱས་ཏེ་ཁོའི་དྲུང་ནས་སྤངས་ཏེ་འགྲོའོ། །ཚུལ་ཁྲིམས་དང་ལྟ་བ་དང་སྤྱོད་པ་དང་འཚོ་བ་བཞིན་པ་ནི་དེ་དག་ཐམས་ཅད་ལ་གླེང་བ་ལ་སོགས་པ་བྱ་བ་རྩ་བ་དང་བཅས་པ་ལ་སྐྱེའོ། །ཕ་རོལ་རྣམ་པ་འདི་རྣམས་འདི་ལྟ་བུ་ཞིག་སྤྱོད་ཅིང་བྱེད་པ་ལ་བརྒལ་བ་ནི་ཉེས་མེད་དེ་རྒོལ་དུ་དབང༌། རྩ་བ་ངན་པས་མི་བྱ། ཕ་རོལ་ལ་རྒོལ་བའི་ཚེ་འོལ་ཕྱིར་མཐོང་བ་དོགས་པས་མི་བརྒལ་གྱི་ཡིད་ཆེས་པར་མཐོང་བ་དང་ཐོས་པ་དང་དོགས་པའི་གཏན་ཚིགས་ཡོད་ན་བརྒལ། འདིར་དངོས་བདེན་ཡང་རྐྱེན་མ་ཡིན་ནོ། །ཕ་རོལ་ལ་ཉེས་པ་ཡོད་བདེན་དུ་ཟིན་ཀྱང༌། བདག་གིས་ལེགས་པར་མ་མཐོང་ན་མི་བརྒལ། བརྒལ་ཀྱང་མི་བརྩན་ཏེ་ལྟུང་བ་སྡེ་ལྔ་གང་ལ་བརྒལ་བའི་ཉེས་པར་གྱུར་ཏེ་མཐོང་བ་ལ་འཆད། ཕ་རོལ་གྱི་ཉེས་པ་ཡང་དག་ཀྱང་བདག་གིས་མང་པོ་སྙམ་དུ་བསམ་ཞིང་མི་དོགས་པར་དང་ཕ་རོལ་གྱི་ཉེས་པ་ཡང་དག་སྟེ་མི་ཚིག་སློབ་པའི་ཚིག་ལ་བདག་གིས་ཡིད་མ་ཆེས་བཞིན་དུ་རྒོལ་བ་མི་བརྩན་ཏེ་རྒོལ་བའི་མི་དེ་ལྟུང་བ་གང་ལ་བརྒལ་བའི་ཉེས་པ་དང་སྦྱར། བདག་གིས་མངོན་དུ་མཐོང་བ་དང་དགེ་བསྙེན་དད་པས་མགྲིན་པར་རལ་ཀྱུ་འོས་ཀྱང་ཆོས་མི་གཏོང་བ་ལྟ་བུ་དང༌། ཕ་རོལ་སྔོན་ངན་པ་གསུམ་ལྟ་བུ་ལས་བརྒལ་བ་ནི་དངོས་པོ་མ་ཉེས་ཀྱང་རྒོལ་བ་བརྩན་ཏེ་གང་གིས་བརྒལ་བ་བཞིན་དུ་སྦྱར། བྱེད་པའི་མཚན་མ་དང་གཞན་གྱི་ཚིག་དང་བདག་གིས་ཐོས་པ་རྣམ་གསུམ་གྱིས་འདི་ལྟར་ཐོས་ན་འོ། །ཕ་རོལ་མི་ཚངས་པར་སྤྱོད་པར་མདོ་འདི་ལྟར་བརྟགས་པར་བདག་གིས་ཐོས་ཏེ་བརྒལ་བ་ནི་ཉེས་མེད་དེ་རྒོལ་བ་བཞིན་དུ་སྦྱར། ཡིད་མ་ཆེས་པ་ནི་
རྩ་བ་མ་ཡིན་ནོ། །ཕ་རོལ་དངོས་པོ་ཉེས་པ་བདེན་ཀྱང་བདག་གིས་ཡིད་མ་ཆེས་ན་མི་བརྒལ། འདུལ་བའི་དངོས་པོའོ།། །།དུ་མས་ཤེས་ན་གླེངས་པ་ལ་སོགས་པར་འདོད་པས་སོ། །དགེ་སློང་ཕོ་མོ་གང་ཡང་རུང་སྟེ། དགེ་འདུན་གྱི་ལྷག་མ་མན་ཆད་ཉེས་བྱས་ཡན་ཆད་གཅིག་བྱུང་ན་ཚུལ་ནས་འབྱུང་བ་དང་གསོ་སྦྱོང་གི་ཚེའང་དགེ་སློང་དང་དགེ་སློང་མ་བཞི་ལྔ་མན་ཆད་གཅིག་གིས་ཁྱོད་ལ་བརྒལ་བ་ཞིག་གིས་ཚུལ་ནས་ཀྱང་མ་འབྱུང་ཞིག་ཅེས་གསོ་སྦྱོང་ཀྱང་མ་བྱེད་ཅིག་ཅེས་བསྒོ་ན་རྒོལ་དུ་གནང་ངོ༌། །ཚུལ་གྱི་སྔ་ལོགས་སམ་ཚུལ་གྱི་ཕྱི་ལོགས་སུ་བརྒལ་བ་ནི་མི་གནང་ངོ། །མི་དབྱུང་བ་དེ་མི་གཞག །མདོ་གོང་མ་ལྟར་བརྒལ་བདེ་ཚུལ་ནས་དབྱུང་བའི་ཉིན་པར་ཁོ་ན་ལ་བརྒལ་ཏོ། །གསོ་སྤྱོང་མ་ཡིན་པར་དེ་མ་ཡིན། གསོ་སྦྱོང་གི་ཚེ་འང་གསོ་སྦྱོང་གི་ཉིན་པར་བརྒལ་ཏོ། །བྱེད་པ་ན་འམ་བྱས་ནས་འཇོག་པ་བུད་མེད་དུ་གྱུར་ཏམ་གཞན་སྐྱེས་པ་ལ་བཞག་ན་ཡང་གཞག་པ་མ་ཡིན་ནོ། །ལྟག་མ་ལྟར་བརྒལ་པ་ནི་དགེ་སློང་ཕས་ནི་དགེ་སློང་མ་ལ་བརྒལ་ཞིང་ཚུལ་དང་གསོ་སྦྱོང་ནས་མི་དབྱུང་བར་རུང༌། དགེ་སློང་མས་རྒོལ་དུ་མི་གནང༌། རྒལ་བའི་དགེ་སློང་ཉིད་མཚན་གྱུར་ཏེ་བུད་མེད་ཀྱི་མཚན་ཐོབ་ན་རྒོལ་དུ་མི་གནང༌། རང་བཞིན་སྟོར་བས་མ་ཡིན། དགེ་སློང་རང་བཞིན་སྟོར་ཏེ་སྨྱོས་སམ་མི་དྲན་པ་ཞིག་ཕ་རོལ་ལ་རྒོལ་ཞིང་ཚུལ་ནས་དབྱུང་བ་དང་གསོ་སྤྱོང་གི་ཚེ་རྒོལ་ཞིང་ཁྱེད་ཚུལ་དང་གསོ་སྦྱོང་བྱེད་དུ་མི་གནང་གི་འདུག་ཤིག་ཅེས་ཟེར་དུ་མི་གནང༌། ཚུལ་ཁྲིམས་མེད་པ་དང༌། དགེ་སློང་གི་ཁྲིམས་རྩ་བ་བཞི་ལས་གང་ཡང་རུང་གི་ཆགས་པས་ཡོན་ཏན་དང་ལྡན་པ་དང་ཚུལ་དང་གསོ་སྦྱོང་གི་ཚེ་བརྒལ་ཀྱང་མི་བརྩན་ཏེ་ཚུལ་དང་གསོ་སྦྱོང་བྱ་ཞིང་དབྱུང་བར་བྱ། གཅིག་པུས་མ་ཡིན་ལོག་པ་ལ་ལྟ་བའི་དགེ་སློང་གིས་ཡོན་ཏན་དང་ལྡན་པའི་དགེ་སློང་ལ་བརྒལ་ན་འང་མི་བརྩན་ཏེ་ལྟུང་བ་བཞིན་འདི་དག་ལ་མ་ཡིན། དགེ་སློང་སྨྱོན་པའམ་མི་དྲན་པ་ཞིག་ལ་གཙང་མའི་དགེ་སློང་གིས་ཚུལ་དང་གསོ་སྦྱོང་གི་ཚེ་མི་དབྱུང་བར་བརྒལ་ཀྱང་མི་བརྩན་ཏེ་ཚུལ་དང་གསོ་སྦྱོང་ནས་དབྱུང༌། གདུལ་བའི་དངོས་པོ་སྟེ་དྲིས་པའི་འོ།། །།དགེ་འདུན་འབྱེད་པ་ཐ་དད་པར་བྱེད་ནུས་པ་ལ་མི་འདོད་བཞིན་དུ་མི་གླེང༌། དགེ་སློང་ཚུལ་ཁྲིམས་དང་མི་
ལྡན་པ་ཞིག་སྡེ་སྣོད་གསུམ་ཤེས་ཤིང་འཁོར་དང་རགས་པ་ཞིག་ལ་ཉེས་པའི་དམིགས་ཡོད་དེ་བདག་གིས་བརྒལ་ཀྱང་ཁོ་མི་དགའ་བ་ལ་ཕྱེས་ཤ་ཁོན་དུ་འགྱུར་བ་ཙམ་གྱིས་ཆོད་ན་མ་བརྒལ་ཀྱང་ཉེས་མེད། གླེངས་པ་ལ་མཐར་མི་བྱ། དགེ་སློང་ཁ་དམན་པ་ཞིག་ལ་ཉེས་པའི་དམིགས་ཡོད་དེ་ཕ་རོལ་འཁོར་དང་རགས་པ་ཞིག་གིས་བརྒལ་ན་གནོད་བཀུར་ཞིང་ཁས་བླངས་ཏེ་བཟོད་པར་གསོལ་མ་ཉེས་ནའང་ཚིག་དྲག་པོས་མི་བྱ་བར་འདི་ལྟར་བདག་གིས་མ་ཉེས་སོ་ཞེས་དལ་གྱིས་བཤགས། གང་དུ་མི་འཕྲོད་པ་ད་དང་ལྷན་ཅིག་ཏུ་མནན་པར་མི་གནས། དགེ་སློང་འཁོན་ཡོད་པ་ཞིག་དང་གནས་གཅིག་ནའང་ལྷན་ཅིག་མི་འཁོད། ལམ་དུ་འང་མི་འགྲོགས། གནས་གནས་ས་གཅིག་ནའང་མི་གནས། ཁོ་གནས་གནས་པའི་ས་དེར་ཡང་མི་འགྲོ། །གཞན་དུ་ན་སྟན་གཉིས་གསུམ་སྤངས་ཏེའོ། །མདོ་གོང་མ་ལྟར་འཁོན་ཡོད་པའི་དགེ་སློང་དེ་དང་མཆོད་སྟོན་ནམ་གྲལ་གཅིག་ཏུ་གནས་པར་གྱུར་ན་བར་དུ་སྟན་གཉིས་གསུམ་ཙམ་སྤོགས་ཏེ་ཁྱེད་ཅིག །གཞན་གྱིས་ཀྱང་དེ་བཞིན་ནོ། །འཁོན་བྱུང་བའི་དགེ་སློང་ཕ་རོལ་མི་སྲུན་པའི་དགེ་སློང་ནི་ན་རྒན་ཡོན་ཏན་ཅན་གྱི་དགེ་སློང་ནི་གཞོན་ན་གཞོན་ནུས་ཀྱང་སྟན་གཉིས་གསུམ་སྤོགས་ཏེ་ཞོག་ཤིག །དེས་གཙུག་ལག་ཁང་བཀོལ་ཏེ་སྦྱིན། ལྟག་མའི་དགེ་སློང་འཁོན་ཡོད་པ་གཉིས་གཙུག་ལག་ཁད་འགོད་པའི་ཚེ། དགེ་འདུན་གྱིས་ཀྱང་ཁང་བུ་འདབ་ཆགས་སུ་མི་སྦྱིན་པར་ལྷོ་བྱང་ཤར་ནུབ་གནས་སོ་སོར་སྤགས་ཏེ་གཞག །བླངས་པ་ཡང་ངོ༌། །ལྟག་མ་ལྟར་དགེ་འདུན་གྱིས་ཁང་བུ་ལྷན་ཅིག་བྱིན་ནའང་བདག་ཅག་གཉིས་ཀྱིས་ལྷན་ཅིག་ཏུ་མི་འཁོད། ཆོས་དང་འདུལ་བ་འདི་དག་ལས་ཏེ་ཆོས་མ་ཡིན་པ་ལ་ཆགས་པར་ཤེས་ནས་དགེ་འདུན་འདུ་བ་མེད་དོ། །དགེ་སློང་གཉིས་ཤིག་ལྟ་བ་སོ་སོར་དམིགས་ཏེ་གཅིག་ནི་སངས་རྒྱས་ཀྱི་ཆོས་དང་ཚུལ་ལ་དམིགས། གཅིག་ནི་ལོག་པ་ལ་དམིགས་ཏེ་དེ་གཉིས་རྩོད་པ་ལས་གཞན་ཞིག་གིས་བསྡུམས་ཏེ་མི་དགེ་བ་ལ་ཕྱོགས་པ་སླར་སངས་རྒྱས་ཀྱི་ཆོས་ལ་ཕྱོགས་ཏེ་གཉིས་དུམ་ན་ནི་ཉེས་མེད། དེ་སྟེ་མ་དུམ་བར་དེ་གཉིས་ཀའང་སོ་སོ་ནས་དགེ་སློང་བཞི་བཞི་ལྔ་ལྔར་སོ་སོར་ནོས་བྱས་ཏེ་བཞི་ལ་དགེ་སློང་གཅིག་ཀྱང་མེད་ན་དགེ་འདུན་གྱི་དབྱེན་བྱས་པར་
ཆུད་དེ་ལྷག་མར་ནི་མི་འགྱུར་རོ། །དེ་བས་ན་དེ་དང་གཞན་དུ་སྟེ་ལས་སྤྱད་པ་མི་སྐྱེ་ཕན་ཚུན་དུ་མི་བྲེལ་ཏོ། །ལྟག་མ་ལྟར་དགེ་འདུན་གྱི་དབྱེན་དུ་གྱུར་པ་ཕྱི་མཚམས་གཅིག་གི་ནང་ན་འཁོད་ན་ཕན་ཚུན་དུ་གཅིག་ལ་གཅིག་དད་པས་མ་དྲིས་ཀྱང་དགེ་མི་དགེ་སོ་སོར་བལྟས་ཤིང་ཚུལ་ནས་འབྱུང་བ་དང་གསོ་སྤྱོང་གི་ཚེ་ལས་བྱས་པ་འང་གཙང་སྦྲར་ཆུད་དེ་ལས་འགྲུབ་བོ། །འཐབ་མོ་ལ་གནས་པ་དེ་དང་དེའི་རྐྱེན་པོར་འདིའི་ཆོས་པས་ཕྱག་མི་བྱ། ལྟག་མའི་དགེ་མི་དགེའི་དགེ་སློང་སྡེ་གཉིས་སུ་ཆད་པ་དེ་ལ་མི་དགེ་བའི་དགེ་སློང་དེ་ལ་དགེ་བ་ལ་ཕྱོགས་པའི་དགེ་སློང་སྡེ་ལྔས་ཕྱག་མི་བྱ། མི་ལྡང༌། སྟན་ལ་སྤྱན་མི་དྲོང༌། གཏམ་དང༌། གཏམ་ཀུན་དང༌། མགུ་བར་བྱེད་པ་དང༌། རྟོག་པ་དང་ལྟ་བ་དང་འདི་དག་མི་བྱ་ལོག་པ་ལ་བལྟས་བའི་དགེ་སློང་ལ་སངས་རྒྱས་ཀྱི་ཆོས་ལ་ལྟ་པའི་དགེ་སློང་སྡེ་ལྔས་མིང་གིས་སྨོས་པ་འདི་རྣམས་མི་བྱ། མལ་སྟན་ངན་པ་བྱིན་ཏེ་ལག་བརྡ་བྱ། ལོག་པ་ལ་བལྟས་པའི་དགེ་སློང་དེ་ཡོན་ཏན་དང་ལྡན་པའི་གཙུག་ལག་ཁང་དུ་འོངས་ནས་ནུབ་མོ་མལ་སྟན་མི་སྦྱིན་པ་མ་ཡིན་ཏེ་རྡོལ་བའམ་ངན་པ་ཚིག་གིས་མི་སྦྱིན་པར་ལག་བརྡས་སྦྱིན། ཚིག་གིས་གཞན་ཐོས་པར་རོ་ཞེས་གཞན་དག་གོ །ལྟག་མ་ལྟར་ལོག་པ་ལ་བལྟས་པའི་དགེ་སློང་སྟན་མི་སྨྲ་བར་ལག་བརྡས་སྦྱིན་ནོ་ཞེས་འདུལ་བའི་གཞུང་ལས་འཆད་དེ་ལྟག་མ་ཡིན། འདི་ནི་འདུལ་བ་འཛིན་པའི་ཚིག་སྟེ་སྟན་སྦྱིན་པ་མི་དགེ་བའི་དགེ་སློང་ཐོས་པར་བྱས་ཏེ་སྦྱིན་ཞེས་བཤད། གཙུག་ལག་ཁང་མཐའ་འཁོབ་ལས་སོ། །ལོག་པ་ལ་བལྟས་པའི་དགེ་སློང་ནུབ་མོ་གཙུག་ལག་ཁང་དུ་འོངས་ན་སྤངས་པའི་དགེ་སློང་བཞིན་དུ་ཁང་པ་མཐའ་འཁོབ་ངན་པ་སྦྱིན། བདག་ཀྱང་རྒན་པོའོ་ཞེས་སྨྲས་ན་ཁྱོད་ཀྱང་དགེ་སྦྱོང་ཤཱཀྱའི་བུ་ནའོ་ཞེས་བདག་ལ་འཆའ་འམ། ཅི་ལྟར་ཁྱོད་ཀྱིས་འདི་ལྟ་བུར་གྱུར་པའི་འདི་ལྟ་བུའི་གཏམ་སྟེ། ཁྱོད་ཀྱི་སྟོན་པ་སྙིང་རྗེ་ཅན་གྱིས་འདི་གནང་གི་འདི་ཡང་མི་དབང་ངོ་ཞེས་གཞན་ལ་སྨྲའོ། །ལོག་པར་བལྟས་ཤིང་དགེ་འདུན་དབྱེན་དུ་འཇུག་པའི་དགེ་སློང་ཞིག་འོངས་ན་གཙང་མའི་དགེ་སློང་གིས་བཀུར་སྟི་ལ་སོགས་པ་མི་བྱ་ཞིང་ཕྱག་མི་འཚལ་བ་དང་མལ་སྟན་ངན་པ་སྦྱིན། བརྒྱ་ལ་ལོག་པར་བལྟས་པའི་དགེ་སློང་རྒན་པ་ཞིག་སྟེ་
ང་ལ་ཅིའི་ཕྱིར་བཀུར་སྟི་མི་བྱ་བ་དང་མལ་སྟན་ངན་པ་སྤྱིན་ཞེས་ཟེར་ན་དགེ་སློང་གཙང་མ་པས་མདོ་འདི་ལ་མིང་གིས་སྨོས་པ་སྐད་དུ་དགེ་སློང་རོགས་པོ་གཅིག་ལ་བརྒྱད་པ་སྐད་དུ་སྨྲ་སྟེ་ཟུར་གྱིས་ལོག་པར་བལྟས་པ་བརྒྱད་དོ། །དགེ་སློང་མས་སྟན་དོར་བ་མི་དབྲི། ལོག་པའི་དགེ་སློང་ཞིག་འོངས་ན་དགེ་སློང་མས་ཕྱག་མི་བྱ་བར་སྟན་ལས་ལྡང༌། དགེ་སློང་གིས་བསོད་སྙོམས་སྦྱིན་ལོག་པའི་དགེ་སློང་ལ་དགེ་བསྙེན་རྣམས་ཀྱིས་མཆོད་སྟོན་བྱ་ཞིང་སྤྱན་དྲངས་བསོད་སྙོམས་ལ་འོངས་ན་ཟན་སྤྱིན། བཤགས་པ་བྱས་པ་དེའང་འདུས་པའི་རྙེད་པ་མེད་པར་འདུ་བའི་མི་ལྡང༌། ལོག་པར་བལྟས་པའི་དགེ་སློང་སླར་སངས་རྒྱས་ཀྱི་ཆོས་ལ་ལྟ་ཞིང་ཡོན་ཏན་ཅན་གྱི་དགེ་སློང་ལ་བཤགས་སོ་ཞེས་ཟེར་ན་ཁ་ཟེར་བ་ཙམ་གྱིས་གནང་བ་མི་བྱའི་གསོལ་བ་དང་ཞུ་བའི་ལས་ཀྱི་ཐབས་འོག་ནས་འབྱུང་བ་ལྟར་བྱ། གསོ་སྦྱོང་མ་ཡིན་པར་རང་བཞིན་དུ་གནས་པ་མི་འཐོབ། ལོག་པ་ལ་བལྟས་པའི་དགེ་སློང་སྔོན་གྱི་མཚན་མ་བོར་ནས་གསོལ་བ་དང་ཞུ་པའི་ལས་བྱས་དེ་འཁོན་འཆགས་ཤིང་གསོལ་ན་གསོ་སྦྱོང་ལན་ཅིག་བྱས་ནས་གདོད་ཡིད་ཆེས་ཏེ་གནང་བར་བྱའོ། །བྱིན་ན་དེ་བྱ། ལོག་པ་ལ་བལྟས་པའི་དགེ་སློང་འཆགས་ཤིང་གསོལ་ན་དགེ་འདུན་གྱིས་ཀྱང་གསོ་སྤྱོད་ལན་ཅིག་བྱ། དེ་ལས་ཀྱིས་སོ། །གསོ་སྦྱོང་བྱིན་པའི་ཚེ་ན་གསོལ་བ་གསུམ་ཞུ་བ་དང་བཞིའི་ལས་ཀྱིས་ལོག་པ་ལ་བལྟས་པའི་དགེ་སློང་གནང་བ་སྦྱིན་ནོ། །སྔ་མ་ཡང་ངོ༌། །ཐོག་མ་དགེ་འདུན་འདུ་བའི་ཚེ་ནའང་གསོལ་བ་དང་ཞུ་བའི་ལས་ཀྱིས་འདུས་ཏེ་གདོད་ལོག་པ་ལ་བལྟས་པའི་དགེ་སློང་དགུག །བརྟགས་པ་ནི་འདུ་བ་དང༌། བཀྲ་ཤིས་པའི་ཕྱིར་དང་གནོད་པའི་གསོ་སྦྱོང་ངོ༌། །མིང་གིས་སྨོས་པ་འདི་རྣམས་ནི་དུས་ལ་མ་བབ་ཀྱང་གསོ་སྦྱོང་བྱ། དེའི་སྟེང་དུ་བཅུ་བཞི་དང་བཅོ་ལྔའི་གསོ་སྦྱོང་གིས་བསྣན་ཏེ་སྤྱིར་ལྔ་བྱའོ། །དེར་དེའི་མཚན་མ་ཉིད་དུས་སོ། །ལྟག་མའི་གསོ་སྦྱོང་གི་རྣམ་པ་དེ་ཉིད་ཀྱིས་དུས་ལ་བབ་པར་དམིགས། དམིགས་སུ་ཕེབས་པར་བྱ་བའི་དེ་རྣམས་ལྟག་འོག་བསྣོར་ཅིང་མི་བྱ། ལས་ཐ་དད་པའི་དངོས་པོའོ།། །།ཆོས་མ་ཡིན་པ་སྨྲ་བ་དང་མཚམས་ཀྱི་ནང་དུ་སོ་སོར་ནི་ཐ་དད་པ་སྟེ་དབྱེ་བའི་སེམས་ཀྱིས་ལས་བྱས་ནའོ། །མཚམས་གཅིག་གི་ནང་ན་འཁོད་པའི་དགེ་འདུན་
ལས་བཞི་ཡན་ཆད་དགེ་འདུན་དུ་ལངས་པ་ཞིག་གིས་ལོག་པ་ལ་བལྟས་ཏེ་ལས་བརྒྱ་རྩ་གཅིག་པོ་སོ་སོར་ཐ་དད་དུ་བྱ་སྟེ་གཅིག །གཅིག་དད་པ་མ་དྲིས་ན་ཚིག་གིས་མ་འཐབ་ཀྱང་དབྱེན་དུ་ཆུད་དེ་ལྷག་མར་མི་འགྱུར། དེར་བདག་གིར་ལས་ཀྱིས་ན་སྐྱེའོ། །མདོ་གོང་མ་ལྟར་དག་འདུན་དགེ་མི་དགེ་སྡེ་གཉིས་སུ་ཆད་པ་གཅིག་ལ་གཅིག་དད་པ་མ་དྲིས་ཀྱང་དགེ་འདུན་གྱི་ལས་སུ་རུང་ངོ༌། །བདག་གི་ཕྱོགས་སུ་མ་ཡིན་པར་ན་མ་ཡིན་ནོ། །དགེ་མི་དགེ་མཚམས་གཅིག་གི་ནང་ན་དགེ་འདུན་དགེ་མི་དགེ་སྡེ་གཉིས་སུ་ཆད་པ་ལས་མི་དགེ་བ་བསྐྲད་ཀྱང་རུང་དགེ་བས་མི་དགེ་བ་བསྐྲད་ཀྱང་རུང་བསྐྲད་པར་ནི་མི་འགྱུར་གྱི་སྐྲོད་སྐྲོད་པ་ཉེས་མེད། དགེ་འདུན་གྱི་ཆོས་སུ་སྨྲ་བས་བྱས་ན་བྱས་པའོ། །དགེ་བ་དང་མི་དགེ་བའི་དགེ་འདུན་མཚམས་གཅིག་གི་ནང་ན་འཁོད་པ་ལས་དགེ་བའི་དགེ་འདུན་གྱིས་མཚམས་བཅིང་བ་དང་བཀྲོལ་བ་ནི་མི་དགེ་བའི་དགེ་སློང་ལ་འང་བཅིང་བ་དང་བཀྲོལ་བར་ཆུད་དོ། །མི་དགེ་བའི་དགེ་སློང་གིས་མཚམས་བཅིང་བ་དྲང་བཀྲོལ་བ་ནི་ཁོ་བདག་གི་ལས་སུ་རུང་གི་དགེ་བའི་དགེ་སློང་གིས་མཚམས་བཅིང་བ་དང་བཀྲོལ་བར་མི་ཆུད་དེ་ལས་སུ་མི་རུང་ངོ༌། །དེ་སྟེ་དེ་ན་བར་མ་ཡོད་ན་དགེ་སློང་མ་ལ་བཤད། དགེ་འདུན་དགེ་མི་དགེ་སྡེ་གཉིས་སུ་གྱུར་པ་ལ་དགེ་སློང་མ་ལ་ཆོས་འཆད་པར་བསྐོས་པ་དེ་དག་དགེ་མི་དགེ་གང་དུའང་མ་བ་ལྟས་ནད་བསྐོ་མི་དགོས་ཀྱི་སྔོན་བཞིན་དུ་ཤོད་ཅིག་ཡིད་ཀྱིས་མི་དགེ་བ་ལ་བལྟས་ལ་སྔོན་བསྐོས་པ་མི་བརྩན་ཏེ་འཆད་དུ་མི་དབང་ངོ༌། །ཆོས་ཀྱི་འདི་སྐྱབས་བཏང་ན་བྲེལ་པའོ། །དགེ་མི་དགེ་བའི་དགེ་སློང་གཉིས་སུ་ཆད་པ་ལས་དགེ་སློང་གཅིག་ཅིག་གང་དུ་འང་མ་བལྟས་ལ་དགེ་འདུན་གྱི་ལས་བྱེད་པའི་ཚེ། དགེ་བ་ལ་བལྟས་པའི་དགེ་སློང་གིས་དགེ་སློང་དེ་ལས་མ་དྲིས་ན་ལས་སུ་མི་རུང༌། མི་དགེ་བའི་དགེ་སློང་གིས་མ་དྲིས་ཀྱང་ཉེས་མེད། འཇུག་པས་ན་དེ་བཞིན་དུ་ཞིག་པའོ། །ལྟག་མའི་དགེ་སློང་དགེ་མི་དགེ་གང་དུའང་མ་བལྟས་པ་དེ་ཕྱིས་དགེ་མི་དགེ་གཅིག་ལ་བལྟས་ན་བར་མ་ཞེས་མིང་དེ་ཞིག་སྟེ་མེད་དོ། །དེ་མི་བྱ། བར་མའི་དགེ་སློང་དེ་དགེ་མི་དགེ་རྣམ་གཉིས་བསྡུ་བར་དགོས་པའི་ཕྱིར་སངས་རྒྱས་ཀྱིས་བསྟོད་པ་ཡིན་ཏེ། དགེ་སློང་དེ་གང་ལའང་མི་འཇུག །
དགེ་སློང་མའི་དགེ་འདུན་ཕྱོགས་དང་གཞན་གྱི་ཕྱོགས་སུ་གནས་ན་གཞག །དགེ་སློང་མའི་དགེ་འདུན་མོ་ཞིག་འཐབ་སྟེ་དབྱེན་དུ་འགྱུར་བ་ཙམ་གྱིས་ཆོད་ན་ཡང་དེ་གཉིས་ཀས་གསོ་སྦྱོང་དད་ལས་སོ་སོར་མི་བྱ་བར་གཅིག་ཏུ་བྱའོ། །ཟླ་བ་ཕྱེད་ཕྱེད་ཅིང་དགེ་སློང་པའི་དགེ་འདུན་ལས་དད་པ་དྲིས་ཤིང་སོ་སོར་ཐར་པ་འཆད་པའི་དགེ་སློང་དང༌། གསོལ་བའང་དེ་གཉིས་ཀ་སྤྱིས་བྱའོ། །གཅིག་ལ་གཅིག་དད་པ་མ་དྲིས་ན་ལས་སུ་མི་རུང་ངོ༌། །དེ་ལྟར་བྱེད་ནས་མ་ཡིན། ལྟག་མའི་དགེ་སློང་མའི་དགེ་འདུན་སོ་སོར་བྱ་བེར་གྱུར་ན་བསྡུམ་ཞིང་གདུལ་བའི་ཕྱིར་དགེ་སློང་པའི་དགེ་འདུན་གྱིས་ཀྱང་གཉིས་ཀ་ལ་དད་པ་མ་བྱིན། གསོལ་ན་འདུ་བར་བསྒོ། །ལྟག་མའི་དགེ་སློང་མ་བྱེ་བ་དགེ་འདུན་ལ་དད་པ་གསོལ་དུ་འོངས་ན་དགེ་འདུན་གྱིས་དད་པ་མ་བྱིན་པར་སྔོན་དུ་སྲིད་མོད་ཀྱང་གཉིས་མ་འཐབ་པར་མཚན་མ་འོར་ལ་ཆུ་དང་འོ་མ་འདྲེས་པ་བཞིན་དུ་འགྱུར་ན་གདོད་སྦྱིན་ནོ་ཞེས་གྱིས་ཤིག ། དབྱར་གྱི་ཆོས་སྨྲ་བའི་སྒྱུར་རོ། །གཙུག་ལག་ཁང་གི་གྲོང་རྐྱེན་གྱི་ནོར་དབྱར་ཚུལ་ན་འཁོད་བའི་ཚེ། དགེ་སློང་དགེ་མི་དགེ་རྣམ་གཉིས་སུ་བལྟས་པ་ལས་རྐྱེན་གྱི་ནོར་དེ་རྣམས་ནི་དགེ་བ་ལ་ཕྱོགས་པ་དབང་ངོ༌། །གཉིས་ཀ་འདུས་པའི་དགེ་འདུན་ལ་བགོ་བར་རིགས་པ་མ་ཕྱེ་བར་བྱིན་ན་ཡང་ངོ༌། །ཡོན་བདག་དད་པ་ཞིག་གིས་དགེ་མི་དགེ་དགེ་འདུན་གཉིས་ཀྱི་སྤྱིར་ཡོན་ཞིག་ཕུལ་ནས་དགེ་བ་ལ་ལྟ་བའི་དགེ་འདུན་དབང་གི་མི་དགེ་བ་མི་དབང་ངོ༌། །དེ་སྟེ་དགེ་འདུན་གྱི་ཚད་དུ་ནི་དེ་དག་ལའོ། །དགེ་མི་དགེའི་དགེ་འདུན་ཡོན་བདག་ཞིག་གིས་གུད་དུ་སྤྱན་དྲངས་ཏེ་ཡོན་ཞིག་ཕུལ་ན་མི་དགེ་བ་ལ་བལྟས་པའི་དགེ་སློང་གྲངས་མང་སྟེ་དག་བ་ལ་བལྟས་པའི་དགེ་འདུན་གྲངས་ཉུང་ཡང་ཡོན་དབང་ངོ༌། །དེ་སྟེ་ཉུང་ལ་དེ་དག་དོར་ན་གང་གི་ཐུ་བར་བྱིན་པའོ། །མདོ་གོང་མ་ལྟར་གྲངས་མང་ཉུང་དུ་འཁོད་པ་ལས་ཡོན་བདག་གིས་ཡོན་སྤར་སྤར་དུ་བགོས་ཏེ་བྱིན་ན་དེ་བཞིན་དུ་སོ་སོར་དབང་ངོ༌། །གཉིས་ཀྱི་སྤྱིར་བྱིན་ན་མི་དགེ་བའི་དགེ་འདུན་དུ་ལངས་ལ་དགེ་བའི་དགེ་འདུན་དུ་མ་ལངས་ན་ཕྱེད་མར་བགོ །དེ་སྟེ་གཉིས་ཀར་ན་གཉིས་ཀས་སོ། །ཡོན་བདག་གིས་དགེ་མི་དགེའི་དགེ་འདུན་གྱི་མདུན་དུ་ནོར་རམ་ཡོན་སྤུངས་ན་དགེ་བའི་དབང༌། མི་དགེ་བའི་དགེ་འདུན་གྱི་མདུན་དུ་སྤུངས་
ན་མི་དགེ་བ་དབང༌། གང་ཟག་གི་ཆར་ཏེ་དགེ་འདུན་གྱི་མ་ཡིན་ནོ། །དགེ་བའི་དགེ་སློང་ནི་དགེ་འདུན་དུ་མ་ལངས་མི་དགེ་བའི་དགེ་སློང་ནི་དགེ་འདུན་དུ་ལངས་པ་ཞིག་ལ་དེ་གཉིས་སྤྱི་ལ་ཡོན་བདག་གིས་ཡོན་ཞིག་ཕུལ་ན་ཐམས་ཅད་ཅི་ཐོབ་པ་གང་ཟག་རེ་རེའི་ཐད་དུ་སོ་སོར་གོས་ཤིག །ལས་བྱས་པའི་དངོས་པོ་སྟེ། དྲིས་པ་དང་མན་བཀང་ཆུད་པའོ།། །།འདི་མན་ཆད་འཁོར་ལོའི་དབྱེན་ལ་འཆད་དེ། ཆོས་ལས་ཐ་དད་དུ་འགྱུར་བ་ནི་གསོལ་བའམ་ཚུལ་ཤིང་ལེན་པ་སྟེ། དེའི་ཕྱིར་གྱིས་ན་དགེ་འདུན་གྱི་དབྱེན་ནོ། །དགེ་འདུན་གྱི་དབྱེན་དུ་གྱུར་པ་ནི་རྗེས་སུ་ཕྱོགས་པ་བཞི་བདག་དང་ལྔ་ཕ་རོལ་ཀྱང་དགེ་འདུན་དུ་ལངས་པ་ལས་འགྱུར་ཏེ་དབྱེན་གྱི་དགེ་སློང་དེས་སངས་རྒྱས་ཀྱི་ཚུལ་ཁྲིམས་ལས་ཚུལ་ཁྲིམས་ལྡས་ང་ལ་ལྷག་སྟེ་ཁྱེད་སུ་དག་གི་རྗེས་སུ་ཕྱོགས་པ་ཚུལ་ཤིང་འདི་ལོང་ཤིག་ཅེས་ཏེ། ཚུལ་ཤིང་བླངས་དང་ལོག་པ་ལ་བལྟས་པ་དེས་གསོལ་བ་དང་ཞུ་བའི་ལས་ཀྱིས་རྗེས་སུ་ཕྱོགས་པ་རྣམས་བསྡུས། དེ་ལོག་པ་ལ་བལྟས་པ་ལ་དང་དགེ་བ་ལ་ཕྱོགས་པའི་དགེ་འདུན་གྱིས་ཀྱང་ཁྱེད་དེ་ལྟར་དབྱེན་མ་བྱེད་ཅིག་ཅེས་གསོལ་བ་གསུམ་དང་ཞུ་བ་དང་བཞིའི་ལས་ཀྱིས་བསྒོ་སྟེ་མ་བཏུབ་ན་དེ་དགེ་འདུན་གྱི་ལྷག་མ་དང་དབྱེན་དུ་འགྱུར་རོ། །འདི་མི་སྐྱེ་བ་ནི་དགེ་འདུན་གྱི་ཚད་དུ་ཆ་མེད་པ་དང་དབྱེ་བར་བྱེད་པ་ན་གཞན་དང་མཚམས་ཀྱི་ནང་གི་དགེ་འདུན་གྱི་ཚད་དུ་མེད་ནའོ། །མཚམས་གཅིག་གི་དགེ་འདུན་ལས་དགེ་བ་ལ་བལྟས་པའི་དགེ་འདུན་བཞི་མི་དགེ་བ་བལྟས་པ་ཡང་རྗེས་སུ་ཕྱོགས་པ་བཞི་བདག་དང་ལྔ་སྟེ། དགེ་འདུན་འཁོད་འཁོད་པ་ལས་གཅིག་ཏུ་སྔར་བལྟས་པ་ལས་དབྱེན་དུ་འགྱུར་རོ། །མི་དགེ་བའི་དགེ་སློང་ཡང་གྲོགས་པོ་གསུམ་བདག་དང་བཞི་ནི་དབྱེན་དུ་མི་འགྱུར། དགེ་བ་བལྟས་པ་དགེ་འདུན་དུ་མ་ཚང་ནའང་དབྱེན་དུ་མི་འགྱུར། བྱེད་པ་ནི་བྱེ་བར་མ་ཡིན་ནོ། །དགེ་མི་དགེ་སོ་སོར་བལྟས་པ་ལས་དགེ་བའང་བཞི་མི་དགེ་བའང་བཞི་དེའི་སྟེང་དུ་མི་དགེ་བ་ལས་བལྟས་པ་བདག་གིས་བསྣན་ཏེ་དགུ་ཚང་ན་དབྱེན་དུ་འགྱུར་རོ། །ཆོས་དང་ཆོས་མ་ཡིན་པ་དེའི་རང་བཞིན་གྱིས་གདོན་མི་ཟ་བར་ན་མཚམས་མེད་པའོ། །དགེ་སློང་སུའང་རུང་སྔོན་དེ་བ་དཏྟས་དབྱེན་བྱས་པའི་ཚེ།
དེ་བ་དཏྟས་དགེ་འདུན་གྱི་དབྱེན་བྱེད་ནུས་སམ་མི་ནུས་ཞེས་དགེ་སློང་ཁ་ཅིག་གིས་གསོལ་ན་བཀའ་སྩལ་པ་སྔོན་ངས་ཀྱང་དེ་བ་དཏྟས་དབྱེན་བྱས་ཏེ་ལག་པོད་ཆགས་པའི་སྟེང་དུ་གྲོགས་ཀྱང་དགེ་འདུན་དུ་ལངས་པས་དབྱེན་བྱ་ནུས་སུ་ཞེས་བྱུང་བ་དང་དེ་བ་དཏྟས་ན་རེ་སངས་རྒྱས་དེ་སྐད་གསུངས་པ་ལ་བལྟས་ན་ངས་དབྱེན་ནུས་ཀྱི་ཚུལ་ཁྲིམས་ལྷག་པ་ལྔ་བཟུང་ངོ་ཞེས་བྱ་བ་ལས་བཅས་ཏེ་དེ་ལྟར་བྱས་ན་མཚམས་མེད་པར་འགྱུར། ཆོས་སུ་འདུ་ཤེས་ནའང་འབྱེད་པར་རོ། །དེ་བ་དཏྟ་སྐད་དུ་ཐམས་ཅད་སྟོང་པར་མྱ་ངན་ལས་བཟླས་ཏེ་བཏང་བ་སྐྱིད་པ་གཅིག་ཡོད་དེ་ཕས་གཉིས་ན་ཁ་མས་གསུམ་གྱི་ཆོས་བྱེད་པ་སྐྱིད་ཀྱིས་ང་ལོགས་སུ་ཁམས་གསུམ་གྱི་ཆོས་ལ་ཕྱོགས་ཤིག་ཅེས་དབྱེན་བྱས་ན་དབྱེན་དུ་འགྱུར་རོ། །འཁོར་ལོ་བྱེ་བའི་དངོས་པོའོ།། །།འདི་མན་ཆད་རྩོད་པའི་དངོས་པོ་ལ་འཆད་དེ། བཞི་འཁྲུག་པའི་ཕྱིར་དགེ་འདུན་ནི་དོན་རྣམ་པ་བཞིའི་ཕྱིར་འཁྲུག་སྟེ་འོག་ནས་འཆད། དོན་ལ་དེ་ལྟར་བཟློག་པ་དང་སྤངས་པ་ལྟུང་བ་དང་བཅས་པ་ལས་ལ་འདུ་བ་མི་སྦྱིན་པའོ། །མིང་གིས་སྨོས་པ་འདི་རྣམས་ལྟ་བུར་གཅིག་གི་ནོན་གཅིག་གིས་བྱས་ཏེ་དགེ་སློང་བཞི་བཞི་ལྔ་ལྔར་སོ་སོར་འཆད་དེ་དེ་ལས་རྩོད་པ་བྱུང་བ་དང༌། ཐོག་མའི་མཚན་མ་གཅིག་ཏུ་ཆད་པར་བྱེད་པ་ཞི་པར་བྱ། རྩོད་པ་རྣམ་པ་བཞི་ལ་གདུལ་བ་རྣམ་པ་བདུན་གྱིས་གདུལ་ཏེ་ཐོག་མའི་དོན་ལས་བཟློག་ཅེས་ཟེར་བ་ལ་མངོན་པས་གདུལ་བར་ལོབས་པ་ལ་མངོན་པར་སྦྱིན་ཞེས་ཟེར་བ་དེ་འབུལ་ཏེ་སྡེ་སྣོད་གང་མང་དུ་ཐོས་པ་དང་ཡོན་ཏན་དང་ལྡན་ཞིང་གང་ཆོས་འཆད་པ་དེའི་ཡུས་སུ་བྱའོ། །གཞན་ནི་འོག་ནས་འཆད། མཚན་མ་གཉིས་པ་ནི་འདི་དང་དག་པ་སྦྱིན་པའོ། །དང་འོག་གི་སྤངས་པ་ནི་མངོན་པ་དང་དྲན་པ་དང་མི་བླུན་པ་གསུམ་གྱིས་གདུལ་བར་བྱེད་དེ་ཞི་བ་ཏུ་འོག་ནས་འཆད། མཚན་མ་གསུམ་ནི་ཕྱིར་བྱ་བས་དབྱུང་བར་བསྐོ་བ་བྱིན་པས་སོ། །ལྟུང་བ་དང་བཅས་པ་ལ་ཞེས་ཟེར་པ་ལ་འཆད་དེ་མང་དང་ངོ་པོ་ཉིད་ཀྱིས་འདུལ་བར་བྱེད་དེ་ཞིབ་ཏུ་འོག་ནས་འཆད། མཐའ་ནི་སྦྱིན་དུ་གཞུག་པས་སོ། །ལས་ལ་འདུ་བ་ནི་སྦྱིན་ཞེས་ཟེར་བ་ལ་འཆད་དེ། རྩྭ་གདིང་བ་དམ་བཅའ་བའི་འདུལ་བ་དང༌། ཁོ་བདག་དགེ་འདུན་གྱི་མདུན་དུ་བཤགས་ཤིང་འདུལ་བར་བྱེད་དེ་ཞིབ་ཏུ་འོག་ནས་འཆད། སྨྲ་བ་བདག་གིས་མ་ནུས་ན་དགེ་བ་དཀར་
གཅག །ཐོག་མའི་དོན་ལ་རྩོད་པ་ནི་དོན་གང་ཡིན་གང་མ་ཡིན་པ་མཁས་པ་གཅིག་གིས་གཟུ་བོ་བྱས་དཀར་གཅག །དགེ་སློང་གིས་སོ། །ལྟག་མ་ལྟར་གཟུ་པོ་དང་དཀར་གཅོག་པ་ནི་དགེ་སྦྱོང་དང་ཁྱིམ་པས་མི་བྱའི་དགེ་སློང་མཁས་པས་གཟུ་བོ་བྱ་ཞིང་དཀར་གཅག ། དེ་མངོན་པར་འདོད་པ་ལའོ། །ལྟག་མའི་དགེ་སློང་གཟུ་པོ་བྱེད་དེ་རྩོད་པའི་དགེ་སློང་གཉིས་གཅིག་དགེ་སློང་གཟུ་བོ་དེ་ལ་དད་པ་གཅིག་མ་དད་པ་མ་ཡིན་གྱི་གཉིས་ཀ་དང་ན་གཟུ་བོ་དང་དཀར་གཅོག་པ་བྱ། དེ་དག་གོ །ཁོ་གཉིས་ཀ་གཟུ་བོ་ལ་དད་ན་གཟུ་བོར་བྱ། གཅིག་ཡན་ཆད་ལའོ། །གཟུ་བོ་ནི་ཁོ་དག་གཉིས་ཀ་དད་ན་གཅིག་ཡན་ཆད་གཅིག་གིས་ཀྱང་ཚིག་དེ་སྟེ་མང་ན་ཉི་ཤུ་ཙམ་གྱིས་བྱར་ཡང་རུང་ངོ༌། །བར་མས་སྤྲོ་བར་བྱ། ལྟག་མའི་གཟུ་བོས་ཀྱང་དེ་གཉིས་བསྡུམ་པར་མ་ནུས་ན་དགེ་འདུན་གྱིས་དགེ་སློང་གཅིག་ལ་དད་པ་དྲིས་ལ་གཟུ་བོར་བསྐོས་ཏེ་དེའང་གསོལ་བ་དང་ཞུ་བའི་ལས་ཀྱིས་བྱ། དགེ་འདུན་གྱིས་དེ་རྟག་ཏུ་བསྒོ། །ལྟག་མའི་གཟུ་བོ་དེ་དགེ་འདུན་གྱིས་གསོལ་བ་དང་ཞུ་བའི་ལས་ཀྱིས་དགེ་སློང་དེ་ལ་དད་པ་དྲིས་ཏེ་ནམ་འཐབ་མོ་ཞི་བའི་བར་དུ་གཟུ་བོར་བསྒོ། །གསོལ་བ་དང་ཞུ་བ་གཉིས་ཀྱིས་བསྒོ། །འཐབ་མོར་མི་འཇུག་པ་ལས་བསྒོ། །ལྟག་མ་ལྟར་གཟུ་བོར་གཞུག་པའི་དགེ་སློང་དེ་ཁོ་བདག་ཉིད་འཐབ་རྩོད་ཅན་ནམ་ཕ་རོལ་འཐབ་པ་ལ་དགའ་ཞིང་འཆུག་པ་དེ་ལ་ནི་མི་བསྒོའི་དགེ་འདུན་ཐམས་ཅད་ཀྱང་མདུན་དུ་དགའ་བའི་དགེ་སློང་དེ་ལ་བསྒོའོ། །ངོ་ཚབ་དང་སློབ་པ་འདོད་པ་དེ་ལས་སོ། །ལྟག་མ་གཟུ་བོའི་དགེ་སློང་དེ་ཚུལ་ཁྲིམས་ལ་གནས་ཤིང་གཞན་གྱིས་ཀྱང་ཁྲེལ་གྱིས་དོགས་ཁོ་བདག་ཀྱང་ངོ་ཚ་ཞེས་དེ་ལྟ་བུ་ལས་བསྒོ་སྟེ་ཞིབ་ཏུ་འོག་ནས་འཆད། འདུལ་བ་གདོན་མི་ཟ་བ་དང༌། མཁས་པ་དང༌། འདས་པའི་སྤྱོད་པ་ལ་སྦྱོང་བ་ཡང་ངོ༌། །མིང་གིས་སྨོས་པ་འདི་རྣམས་ལྟ་བུ་དང་ལྡན་ན་རྩོད་པའི་དགེ་སློང་གི་གཟུ་བོ་དང་དཀར་གཅོག་པར་དགེ་འདུན་གྱིས་བསྐོ་མི་བཟློགས་པ་ལས་སོ། །ལྟག་མའི་གཟུ་བོར་ནོར་ངོ་དང་གཉེན་དོར་བྱེད་ཅིང་ངོ་བཟློག་མི་ཕོད་པ་ལས་ནི་བསྒོའི། བརྟན་ཅིང་མི་འགྱུར་ཏེ་རྡོ་རྗེ་དང་འདྲ་བ་ལས་བསྒོ། བརྟན་ཅིང་བརྩམས་བ་མི་འཁྲུག་པ་ལས་སོ། །བརྟན་ཅིང་ཁོང་རྩོད་པའི་ཚེ་ནའང་སེམས་འཁྲུགས་པ་ཕྱིས་ཀྱང་ཤ་འཁོན་
གྱིས་མི་འཇིགས་ཤིང་ངོ་བཟློག་ཕོད་པ་ལས་བསྒོ། འཐབ་མོར་མི་འཇུག་པ་ལས་བསྒོའོ་ཞེས་བྱ་བའི་མདོ་མན་ཆད་ཀྱི་སོད་དེའི་ནང་ནས་མིང་གིས་སྨོས་པ་འདི་རྣམས་དང་ལྡན་པ་ལས་གཟུ་བོར་དགེ་འདུན་གྱིས་བསྒོ། སྙོམས་པ་ལས་སོ། །སྙོམས་ཤིང་འདོད་ཆགས་ཞེ་སྡང་གཏི་མུག་གསུམ་དང་མི་ལྡན་པ་ལས་བསྒོ། བསྒོ་བ་ལས་སོ། །ཁོང་གཉིས་ཀྱི་ཚིག་ལན་ཚིག་གིས་ཁོང་དུ་ཆུད་པ་ལས་བསྒོ། ཕྱིར་བསྒོ་ནུས་པ་ལས་སོ། །འཐབ་པའི་དགེ་སློང་དེ་གཉིས་ལན་ཐེབས་པར་བསྒོ་ནུས་པ་ལས་བསྒོ། མཛངས་པ་ལས་སོ། །འཐབ་པ་ལ་གཉིས་ལ་བསྒོ་བའི་ཚེ་ཚིག་འབྲུ་ཐམས་ཅད་བསམ་མི་དགོས་པར་སྨྲ་ནུས་པས་བསྒོ། དེས་ཞི་བར་མ་ནུས་ན་དགེ་འདུན་ལ་དོར། ལྟག་མ་ལྟར་གཟུ་པོར་བསྒོ་བའི་དགེ་སློང་དེས་འཐབ་མོ་པ་ཞི་བར་མ་ནུས་ན་དགེ་འདུན་གྱི་ཐད་དུ་སོང་སྟེ་དགོངས་ཤིག་འཕགས་པའི་དགེ་འདུན་བདག་གིས་ནི་རྔོ་མ་ཐོགས་ཀྱི་མཛད་དུ་གསོལ་ཅེས་བྱ་བ་དགེ་འདུན་ལ་ཕུལ་ཅིག །དེ་དག་གིས་མ་ནུས་པ་བསྒོ། ལྟག་མ་ལྟར་དགེ་འདུན་ལ་སླར་ཕུལ་ཏེ་ལོ་གཅིག་གཉིས་ཀྱི་བར་དུ་དགེ་འདུན་གྱིས་འདུལ་བའི་ཐབས་ཀྱིས་ཞི་བར་གྱིས་ཤིག་དེས་ཀྱང་མ་ནུས་ན་ཡང་གཟུ་བོ་ལ་བསྒོ་སྟེ་ཞིབ་ཏུ་འོག་ནས་འཆད། དགེ་འདུན་གྱིས་ཚད་ལས་མི་ཉུང་བའོ། །དགེ་འདུན་གྱིས་གདུལ་བར་མ་ནུས་ན་ལྟག་ཏུ་བཤད་བའི་དགེ་སློང་དེས་ཀྱང་ཡོན་ཏན་དང་མཐུ་ཆེ་བ་བཞི་ཡན་ཆད་དགེ་འདུན་དུ་ལངས་པ་ལས་གཟུ་བོར་བསྒོ། བདག་གིས་ཏེ་བསྐོས་ཏེ་མི་ནུས་ན་ནུས་པ་ལའོ། །ལྟག་མའི་དགེ་སློང་བཞི་པོས་ཀྱང་གདུལ་བར་མ་ནུས་ན་དེ་བས་ཀྱང་མཁས་ཤིང་མཐུ་ཆེ་བའི་དགེ་སློང་དེ་བཞི་ལ་དབུལ། བླ་མ་མ་བྱས་མི་ནུས་ན་གང་ནས་བླངས་པ་དེར་གཞག །ད་གཟོད་ཀྱི་བཞི་པོ་དེས་ཀྱང་གདུལ་བར་མ་ནུས་ན་སྔ་མའི་དགེ་སློང་བཞི་པོ་ལ་སླར་གཏོད་ཅིང༌། དེས་ཀྱང་མ་ནུས་ན་ཐོག་མའི་དགེ་འདུན་ལ་རིམ་པས་ཕྱིར་གཏད། དགེ་འདུན་གྱིས་ཀྱང་མ་ནུས་ན་དང་པོ་དགེ་སློང་གཟུ་བོར་བསྐོས་པ་དེ་ལ་གཏད། དེས་ཀྱང་མ་ནུས་ན་ཐོག་མ་བསྐོ་བའི་དགེ་འདུན་ལ་ཕྱིར་དབུལ། ཕྱིར་འོངས་ན་རྩ་བའི་དགེ་འདུན་གྱིས་ཕྱིར་སྦྱོང་བར་སྤོ་བར་བསྐོ། ཐབས་ལྟག་མ་ལྟར་རིམ་པས་བཏུལ་ཏེ་མ་ཐུལ་ན་དགེ་འདུན་གྱིས་དགེ་སློང་གི་ནང་
ནས་གསུམ་བཞི་ཞིག་བསྐོས་ཏེ་དེ་དང་སྦྲོགས་ལ་མཚམས་ཐ་དད་པའི་གཞན་གྱི་གཙུག་ལག་ཁང་དུ་གདུལ་བར་ཆོལ་ཅིག །དེ་གནས་བརྟན་དང་བཅས་པ་སོ་སོར་ཐར་པ་དང་བཅས་པའི་དགེ་འདུན་གཞན་དུ་གཞུག །མཚམ་ཐ་དད་པའི་གཙུག་ལག་ཁང་གཞན་དུ་བཅོལ་བ་ཡང་གཙུག་ལག་ཁང་དེ་ན་གནས་བརྟན་ཡོན་ཏན་དང་ལྡན་པ་དང་ཟླ་བ་ཕྱེད་ཕྱེད་ཅིང་སོ་སོར་ཐར་བརྟག་ཏུ་ཀློག་པའི་དགེ་འདུན་དེ་ལྟ་བུའི་གཙུག་ལག་ཁང་དུ་གཏད་ཅིང་བཅོལ། གྱུར་པ་ཐོག་མར་བསྒོས་ཏེ་ཟླ་བ་གསུམ་གྱི་དུས་སུ་སྦྱིན། གཙུག་ལག་ཁང་གཞན་དུ་བཅོལ་བའི་ཚེ། ཚུལ་སྐྱེལ་བའི་དགེ་སློང་རྣམས་ཀྱིས་དགེ་འདུན་བཞི་པ་ལ་ཐོག་མ་ནས་ཇི་ལྟར་རྩོད་ཅིང་དགེ་སློང་དང་དགེ་འདུན་གྱི་རིམ་པར་ལྟག་ཏུ་སྨོས་པ་བཞིན་དུ་མཐར་ཆགས་ཀྱིས་བཏུལ་ཀྱང་མ་ཐུལ་ཏོ་ཞེས་གཏམ་རྒྱུས་ཀྱིས་ཐོག་མར་སྨོས་པ་ལ་དའང་ཁྱེད་ཀྱིས་ཟླ་བ་གཉིས་གསུམ་གྱི་བར་དུ་ཐུལ་ལ་བརྒྱ་ལ་མ་ཐུལ་ན་སླར་ཡི་གེ་སྤྲིང་ཤིག་ཅེས་བསྒོ། །དེས་འདིའོ། །ཕ་ལོགས་སོ། །གཙུག་ལག་ཁང་དུ་དགེ་འདུན་དེས་ཀྱང་མ་ཐུལ་ན་དང་པོ་སྐྱེལ་དུ་འོངས་པའི་དགེ་སློང་དེ་རྣམས་ལ་སླར་ཡི་གེ་སྤྲིང་ཤིག་སླར་ཕུལ་ན་དེ་མདོ་སྡེ་འཛིན་པ་དང་འདུལ་བ་འཛིན་པ་དང་མ་ལྟ་བུ་འཛིན་པ་ལའོ། །དེ་ལྟར་ཡི་གེ་བཏང་ནས་ཐོག་མ་སྐྱེལ་སྐྱེལ་བའི་དགེ་སློང་དེ་དག་ལ་ཕྱིར་གཏད་ན་སླར་དགེ་འདུན་གང་དུ་ཁྲིད་དེ་མ་འོང་བར་གཙུག་ལག་ཁང་གང་ན་མདོ་སྡེ་དང་འདུལ་བ་དང་མ་ལྟ་བུའི་དགེ་སློང་གང་ན་ཡོད་པ་དེར་ཁྲིད་དེ་ཐོག་མའི་གཏམ་རྒྱུས་ནས་ཤོད་དེ་ཡང་དེར་ཆོས་ཤིག །ཟླ་བ་དྲུག་ཏུའོ། །ལྟག་མ་ལྟར་བཅོལ་བ་ཟླ་བ་དྲུག་གི་བར་དུ་ཁྱོད་ཀྱིས་ཐུལ་ལ་མ་ཐུལ་ན་སླར་ཡང་ཡི་གེ་ཐོང་ཤིག་བསྒོ་ཤིག །ངེས་གནས་བརྟན་གྲགས་པ་ལའོ། །ལྷག་མ་ཟླ་བ་དྲུག་ཏུ་བཏུལ་ཏེ་མ་ཐུལ་ན་སླར་བསྐྱལ་བ་ལས་དགེ་སློང་བང་ཆེན་བ་དེ་རྣམས་ཀྱིས་ཀྱང་གང་ན་གནས་བརྟན་མཆོག་ཏུ་གྲགས་པ་དེ་ལྟ་བུ་ལ་ཐོག་མའི་གཏམ་རྒྱུས་ནས་ཤོད་དེ་བཅོལ་ཅིག །མཐའ་མེད་པར་རོ། །ལྟག་མའི་གནས་བརྟན་དེ་ནི་དུས་འདི་ཙམ་གྱི་བར་དུ་གདུལ་ཞེས་བྱ་བ་ནི་མ་ཡིན་གྱི་ནམ་གདུལ་བའི་ཚད་ཀྱིས་བཟུང་ངོ༌། །དེས་འདིའི་གང་ཡང་བདག་གིར་བྱ་བ་ཡང་སྤང་གནས་བརྟན་གྲགས་པ་དེས་འཐབ་མོ་པ་གཉིས་
གདུལ་བའི་ཚེ་འཐབ་མོ་པའི་དགེ་སློང་གིས་ཡོན་ནམ་སྤྱན་གཟིགས་ཕུལ་ན་གནས་བརྟན་དེས་མི་བླང༌། གོ་འདུན་དང་སོ་ཤིང་ཡན་ཆད་དོ། །ལྟག་མ་ལྟར་སྤྱན་གཟིགས་མི་བླང་བར་མ་ཟད་ཀྱི་མིང་གིས་སྨོས་པ་འདི་རྣམས་ཀྱང་མི་བླང༌། སྟན་གཅིག་ལ་འདུག་པ་དང་འཆགས་གཅིག་ཏུ་འཆག་པ་དང་གཏམ་དང་གཏམ་ཀུན་ཀྱང་ངོ༌། །གནས་བརྟན་དེས་འཐོབ་པའི་དགེ་སློང་དང་གྲལ་དང་སྟན་གཅིག་པ་དང་འཆག་པའི་ས་དང་གཏམ་དང་གཏམ་རྒྱུད་དང་བཅས་པ་ལ་སོགས་པ་འདི་རྣམས་ལྟ་བུ་མི་བྱ། བསྙེན་ན་འདི་སྐད་སྨྲའོ། །ལྟག་མ་ལྟར་ཡོན་དང་སྤྱན་གཟིགས་མ་བསླངས་པ་དང་འཐབ་པའི་དགེ་སློང་ན་རེ་ཅི་ཉེས་ཏེ་སྤྱན་གཟིགས་ཀྱང་མི་ལེན་གཏམ་ཡང་མི་ཟེར་ཞེས་སྨྲ་ན་གནས་བརྟན་གྱིས་འོག་ནས་འབྱུང་བ་སྐད་དུ་བྱ། ཚེ་དང་ལྡན་པ་ཁྱོད་མི་རྙེད་ཅིང་མ་རྙེད་ལ་ངན་པ་རྙེད་དེ་བཟང་པོ་མ་རྙེད་དོ། །གང་ཁྱོད་རབ་ཏུ་བཤད་པ་ཆོས་འདུལ་བ་ལ་རབ་ཏུ་འབྱུང་ན་འཐབ་མོ་སྐྱེ་བ་དང་སྨྱོན་ཐབས་སྐྱེ་བ་ལ་སྤྱོད་དམ་དགྲ་བྱེད་རྩོད་པར་གྱུར་ཏོ། །ཚེ་དང་ལྡན་པ་འཐབ་མོ་མ་བྱེད། སྨྱོན་ཐབས་མ་བྱེད། དགྲར་མ་བྱེད་མ་རྩོད་འཐབ་པ་ལ་གཉིས་ཀ་རྒྱལ་བ་མེད་དོ། །གཅིག་རྒྱལ་གཅིག་ཕས་ཕམ་མོ། །བརྒྱུགས་པ་ལས་གཉིས་ཀ་མི་རྒྱལ་ཏེ་གཅིག་རྒྱལ་གཅིག་ཕས་ཕམ་མོ་ཞེས་སོ། །གནས་བརྟན་གྱིས་འཐབ་མོ་པ་སྡེ་གཉིས་ལ་འཐབ་ཅིང་རྩོད་པ་ཉེས་པའི་ཚུལ་དུ་གཅིག་རྒྱལ་གཅིག་ཕམ་མོ་ཞེས་ཟེར་བའི་མདོ་ཡན་ཆད་ཀྱི་ཚིག་གིས་བསྒོ་བ་ལ་བྱ། མང་པོའི་བློ་ལྟར་བཅའོ་ཞེས་བསྒྲུབ་པའི་རྣམ་པ་གཞན་ནོ། །ལྟག་མ་ལྟར་གནས་བརྟན་གྱིས་ལོ་མང་ཞིག་གི་བར་དུ་སྦྱངས་ཀྱང་ཞལ་ཆེ་མ་ཅོད་ན་དང་པོའི་དགེ་འདུན་ལ་ཕུལ། དགེ་འདུན་གྱིས་འཐབ་མོ་པ་ལ་བསྒོ་བ་ཁྱེད་ཀྱིས་ཞལ་ཅེ་དགེ་འདུན་གྲངས་མང་བ་རྒྱལ་བར་གཅོད་དོ་ཞེས་བསྒོ་སྟེ་འོག་ནས་འཆད། ཆོས་གདོན་མི་ཟ་བར་འགྱུར་གྱི་ཚུལ་གདོན་མི་ཟ་བར་མ་ཡིན་ནོ། །དགེ་འདུན་གྱིས་འཐབ་མོ་བ་ལ་འདི་སྐད་ཀྱང་བསྒོ། །སྐབས་འདིར་ཚུལ་ཁྲིམས་དང་མི་ལྡན་ན་མི་བརྩིའི་ཆོས་ཀྱི་གཞུང་ལས་བྱུང་བ་བཞིན་ཞལ་ཅེ་གཅད་དོ་ཞེས་བསྒོ། །བརྒལ་བ་དང་རྒོལ་བ་ཆུད་པའི་ཕྱིར་ཏེ་དེར་ཆུད་པས་གདོན་མི་ཟ་བའོ། །འཐབ་མོ་པ་གཉིས་ཚུས་ཕར་བརྒལ་བ་དང་ཚུས་ཕར་རྒོལ་བ་དང་གཉིས་ལ་དགེ་འདུན་
གྱིས་ཞལ་ཅེ་གདོན་མི་ཟ་བར་བཅད་དེ་གཏོད་པར་བྱའོ། །རྒོལ་བ་དང་ཕྱིར་རྒོལ་བས་དྲག་པོར་གཟུང་ཞིང་རབ་ཏུ་ཞེན་ལ་དེ་དག་ནུས་པས་དགེ་འདུན་གྱི་དབྱེན་དུ་དོགས་ན་འདི་ལ་གནས་པར་བྱ་འཐབ་མོ་རྒོལ་བ་གཉིས་ཕས་རྒོལ་བ་དང་ཚུར་རྒོལ་བ་གཉིས་སེམས་ལ་རབ་ཏུ་བཟུང་སྟེ་མི་གཏོང་བར་ནན་ཏན་བྱེད་ན་དགེ་འདུན་གྱིས་ཞལ་ཅེ་མྱུར་དུ་མ་བཅད་ན་དགེ་འདུན་ཕལ་མོ་ཆེ་སྡེ་གཉིས་སོ་སོར་ཆད་པས་ཡུན་རིང་ན་དབྱེན་དུ་འགྱུར་གྱིས་དོགས་པའི་ཕྱིར་ཞལ་ཅེ་མྱུར་དུ་བཅད་པ་དང་བསྡུམ་བར་བྱ། སྡོམ་པ་བྱེད་པའི་ཕྱིར་མ་ཡིན་ནོ། །སེམས་ལ་ཉེས་པར་བསམ་པ་ནི་ཡིད་ལ་འགྱོད་པས་ཚངས་ཀྱི་ལུས་དང་དག་གི་ཉེས་བྱས་པ་ནི་མཐོལ་དགོས་སོ། །གནས་བརྟན་གྱིས་མཐར་ཀུན་དུ་ཉོན་མོངས་ནའོ། །དགེ་འདུན་གང་མང་བ་བརྩན་བར་ཞལ་ཅེས་གཅད་པ་ནི་ཐོག་མར་དཀར་གཅག་ཅེས་བྱ་བ་མན་ཆད་གནས་བརྟན་ཆེན་པོས་ཡུན་རིང་དུ་སྦྱངས་ཞེས་བྱ་བའི་བར་དུ་ཉོན་མོངས་ཤིང་མ་བཏུལ་བར་དགེ་འདུན་མང་བ་རྒྱལ་ལོ་བར་ཞལ་ཅེ་མི་གཅད་དོ། །རྩ་བའི་དགེ་འདུན་ལའོ། །ལྟག་མ་ལྟར་དགེ་འདུན་མང་པ་རྒྱལ་ལོ་བར་ཞལ་ཅེ་གཅད་པ་ནི་དང་པོ་ཉིད་དུལ་བར་བསྒོ་བའི་དགེ་འདུན་ཞེས་ཞལ་ཅེ་གཅད་དོ། །ཚུལ་ཤིང་འཛིན་པས་འདི་བསམ་པ་གཟུང་བར་བྱ། ལྟག་མ་ལྟར་དགེ་འདུན་མང་ཉུང་དུ་གྲངས་གཟུང་བའི་ཕྱིར་ཚུལ་ཤིང་རྣམ་པ་གཉིས་བཤམས་པ་ལ་དགེ་བའི་ཚུལ་ཤིང་བླངས་པ་མང་ན་དགེ་བ་ལ་ཕྱོགས་པ་རྒྱལ་བར་བྱ། ཆོས་མ་ཡིན་པའི་ཚུལ་ཤིང་མང་དུ་བླངས་ན་དེ་རྒྱལ་བར་བྱའོ་ཞེས་དགེ་འདུན་གྱིས་དེ་ལྟར་བཤམས་ནས་བརྩིས་མགོ་འོག་མ་ལྟར་བྱའོ། །ཚུལ་ཤིང་འདྲིམ་པ་བསྒོ། །དགེ་འདུན་གྱིས་གསོལ་བ་དང་ཞུ་བ་གཉིས་ཀྱི་ལས་ཀྱིས་དགེ་འདུན་གྱི་ནང་ནས་དགེ་སློང་ལས་ཚུལ་ཤིང་འདྲིམ་པ་ཅིག་བསྐོ། །ཚུལ་ཤིང་དེས་གཞག་པ་རྣམ་པ་གཉིས་སུའོ། །ཚུལ་ཤིང་འདྲིམ་པ་དེས་ཚུལ་ཤིང་རྣམ་གཉིས་འོག་ནས་འབྱུང་བ་བཞིན་དུ་སྟ་གོན་བྱས་ཏེ་གཞག །མི་འཁྱོར་བ་དང་མི་སྒུར་པ་དང་ཁ་དོག་བཟང་པོ་བསུང་ཞིམ་པོ་ཤིན་དུ་འཇམ་པ་ཆོས་ཀྱི་ཚུལ་ཤིང་ངོ༌། །མིང་གིས་སྨོས་པ་འདི་རྣམས་མཐུན་པ་ནི་དགེ་བ་ལ་ཕྱོགས་པ་ནི་ཚུལ་ཤིང་ངོ༌། །གཞན་ལ་བཟློག་ལའོ། །ཚུལ་ཤིང་སྒྲུབ་འཁྱོར་བ་ཁ་དོག་མི་བཟད་
པ་བསུང་མི་ཞིམ་པ་རྩུབ་པ་ལ་སོགས་པ་ནི་མི་དགེ་བ་ལ་ཕྱོགས་པའི་ཚུལ་ཤིང་ངོ༌། །འདུ་བའི་ཕྱིར་དགེ་འདུན་ལ་ཞུ། ཚུལ་ཤིང་འདྲིམ་པའི་དགེ་སློང་གིས་སང་ཚུལ་ཤིང་འདྲིམ་པའི་ཕྱིར་དགེ་འདུན་ཐམས་ཅད་འདུ་བར་མཛོད་ཅིག་ཅེས་ཞུ་བའི་ལས་བྱ། ཐམས་ཅད་འདུ་བར་མཛོད་ཅིག །བདག་གིས་ཚུལ་ཤིང་བྲིམ་མོ་ཞེས་སོ། །དགེ་མི་དགེ་ལ་ཕྱོགས་པའི་དགེ་འདུན་ཐམས་ཅད་སང་ནང་པར་སྔར་གཤེགས་ཞེས་བདག་གིས་ཚུལ་ཤིང་བྲིམ་མོ་ཞེས་བསྒོ་ཤིག །དེ་སྟེ་དེ་ལྟར་ཆོས་མ་ཡིན་པའི་ཚུལ་ཤིང་ལྷག་པར་འགྲུབ་པར་ཤེས་ན་དང་པ་བྱིན་ཡང་འདུས་པར་མི་བྲིམ། ཕྱི་དེ་ནང་པར་ཚུལ་ཤིང་འདྲིམ་པའི་དགེ་བ་ལ་ཕྱོགས་པའི་དགེ་སློང་ནི་དད་པ་འམ་ཚིག་བྱིན་ལེན་དེ་འདུས་པ་ནི་ཉུང་མི་དགེ་བ་ལ་ཕྱོགས་པའི་དགེ་སློང་ནི་མང་ན་ཐབས་བྱ་སྟེ། དགེ་བའི་དགེ་འདུན་མང་དུ་ནམ་ཚོགས་ཀྱི་བར་དུ་ཕྱིར་བཤོལ། ཚུལ་ཤིང་འདྲིམ་པའི་ཚེ་ཆོས་ཀྱི་ཚུལ་ཤིང་ལག་པ་གཡས་སུ་བླངས་ལ་གཞན་གཡོན་དུ་བླངས་ཏེ་བྲིམ་ཚུལ་ཤིང་བྲིམ་པའི་ཚེ་བྲིམ་པའི་དགེ་སློང་དེས་ཆོས་ལ་ལྟ་བའི་ཚུལ་ཤིང་བཟང་བོ་ནི་ལག་པ་གཡས་ཀྱིས་བླངས་ལ་མི་དགེ་བ་ལ་ཕྱོགས་པའི་ཚུལ་ཤིང་ངན་པ་ལག་པ་གཡོན་པར་གཞག་སྟེ་དགེ་འདུན་ལ་བྲིམ། སྦས་ལ་སྔོན་དུ་བསྟན་ཏེ་ཉེ་བར་ཞུས་ཏེ་གནས་བརྟན་འདི་ནི་ཆོས་ཀྱི་ཚུལ་ཤིང་སྟེ། མི་སྒུ་མི་འཁྱོག་མི་སྒུར་ཁ་དོག་བཟང་པོ་བསུང་ཞིམ་པར་ཤིན་ཏུ་འཇམ་གྱིས་ལང་ཤིང་ཅེས་སོ། །ཚུལ་ཤིང་འདྲིམ་པའི་ཚེ་ཚུལ་ཤིང་ངན་པ་ནི་ནད་པ་ནི་སྣོད་ཀྱི་ནང་དུ་བཅུག་སྟེ་ཁ་གཡོགས་ལ་ཚུལ་ཤིང་བཟང་པོ་སྔར་བྱུང་ལ་གནས་བརྟན་དག་ལ་ཉེ་བར་བསྟན་ཏེ་མིང་གིས་སྨོས་པ་འདི་སྐད་དུ་ཚུལ་ཤིང་གི་ཡོན་ཏན་བསྔགས་ཏེ་བྲིམ་པར་བྱའོ། །གཞན་སློང་ན་ཚིག་གཉིས་ཀྱི་བར་དུ་མི་སྦྱིན། ཚུལ་ཤིང་བྲིམ་པའི་ཚེ་གནས་བརྟན་ཏེ་ཚུལ་ཤིང་ངན་པ་སློང་ན་འདྲིམ་པའི་དགེ་སློང་གིས་གནས་བརྟན་དེ་ལ་ཁྱོད་ལྟ་བུའི་གནས་བརྟན་སྡེ་སྣོད་གསུམ་ཐུལ་ཅིང་ཡོན་ཏན་དང་ལྡན་བ་ཚུལ་ཤིང་འདི་བླངས་པ་རིགས་མོད་ཅེས་དེ་སྐད་ལན་གསུམ་གྱི་བར་དུ་བསྒོ་སྟེ། དེ་སྟེ་འང་མ་བཏུབ་ན་ཚུལ་ཤིང་ངན་པ་སྦྱིན། ཇི་ལྟར་ཆོས་འབྱུང་བར་དེ་བཞིན་དུ་ཤེས་ཏེ། བྲིམ་པ་བཅུམས་ཏེའམ་བསྟེན་ཏེའོ། །ཚུལ་ཤིང་འདྲིམ་པའི་ཚེ་ཚུལ་ཤིང་བྲིམ་པའི་དགེ་སློང་གིས་ཅི་ནས་ཀྱང་ཚུལ་ཤིང་བཟང་པོ་
ནི་བླངས་ཤིང་ཚུལ་ཤིང་ངན་བ་ནི་མི་འདོད་པ་ན་ཐབས་ཅི་ཡོད་པ་སྦྱར་ཏེ་ཚུལ་ཤིང་སྦས་ན་ལེགས་སམ་མ་བྱུང་ལེགས་པའི་ཐབས་ཀྱང་འཕྲལ་ལ་བལྟས་ཤིང་ཅི་ནས་ཚུལ་ཤིང་བཟང་པོ་ལེན་པར་གྱིས་ཤིག །ཚེ་དང་ལྡན་པ་ཁྱོད་ཀྱི་མཁན་པོས་ཆོས་ཀྱི་ཚུལ་ཤིང་བླངས་སློབ་དཔོན་དང་མཁན་པོ་གཅིག་པ་དང་འཐམས་པ་དང་བརྟན་བ་དང་བཤེས་དྲན་པ་དང་ཡིད་དུ་འོང་བས་ཀྱང་ན་ཁྱོད་ཀྱིས་ཀྱང་ཆོས་ཀྱི་ཚུལ་ཤིང་ལོང་ཤིག །གནས་བརྟན་ལ་བྲིམ་པའི་འོག་ཏུ་འོག་མ་གཞོན་ནུ་རྣམས་ལ་ཚུལ་ཤིང་འདྲིམ་པའི་ཚེ་མོད་ལ་མིང་གིས་སྨོས་པ་འདི་སྐད་ཀྱི་ཚིག་དགེ་སློང་གཞོན་ནུ་དེའི་རྣ་དྲུང་དུ་ཚུལ་ཤིང་འདྲིམ་པས་བཤུབས་ཏེ་ཐམས་ཅད་ཀྱིས་ཀྱང་བླངས་པའི་རིགས་སོ་ཞེས་གྱིས་ལ་ལེན་དུ་ཆུག་ཤིག །ཁྱོད་ཀྱིས་དེ་དག་མི་དགའ་བར་མ་གྱུར་བར་ཞེས་ངག་གིས་རྣ་དྲུང་དུ་བཟླས་ཏེའོ། །ལྟག་མ་ལྟར་ཁྱོད་ཀྱི་མཁན་པོ་དང་སློབ་དཔོན་མཛའ་བོ་ལ་སོགས་པ་ཐམས་ཅད་ཀྱིས་ཚུལ་ཤིང་བླངས་ཟིན་ན་ད་ཁྱོད་ཀྱིས་མ་བླངས་པ་དང་མི་དེ་རྣམས་དང་ཡང་ཁྱོད་ཆོས་ཀྱི་བྱ་བར་འོང་སྟེ་མ་ལེགས་ཀྱིས་ཚུལ་ཤིང་ལོང་ཤིག་ཅེས་རྣ་དྲུང་དུ་བཤུབས་ལ་གྱིས་ཤིག །ཆོས་མ་ཡིན་པའི་ཚུལ་ཤིང་མི་བླང༌། ཚུལ་ཤིང་བྲིམ་པའི་ཚེ་ཚུལ་ཤིང་ལེན་པས་ཀྱང་ཚུལ་ཤིང་ངན་པ་བླངས་ན་ཉེས་བྱས་ཏེ་དེ་ནི་སྤྱིའི་ཁྲིམས་སོ། །མདོ་སྡེ་འཛིན་པ་དང་འདུལ་བ་འཛིན་པ་དང་མ་ལྟ་བུ་འཛིན་པ་ལ་མ་དྲིས་པར་མ་ཡིན། ཚུལ་ཤིང་ལེན་པའི་ཚེ་མིང་གིས་སྨོས་པ་འདི་ལྟ་བུ་དང་ལྡན་པའི་དགེ་སློང་ལ་མ་དྲིས་ཀྱི་བར་དུ་དགེ་སློང་གཞན་གྱིས་ཀྱང་ཚུལ་ཤིང་མི་བླང་མ་བརྟགས་པར་བླངས་ན་ཉེས་བྱས། བྱེ་བར་འདོད་པས་མ་ཡིན། ཚུལ་ཤིང་བླང་བའི་ཚེ་ཆོས་མ་ཡིན་པའི་ཚུལ་ཤིང་ངན་པ་བླངས་ཏེ་ཡིད་ལ་དགེ་འདུན་དབྱེན་བྱའོ་སྙམ་བསམས་ཏེ་བླངས་ན་ཉེས་བྱས་ཏེ་དེ་བས་ན་མི་བླང༌། ཆོས་མ་ཡིན་པས་རྒྱལ་བ་མ་ཡིན། ཚུལ་ཤིང་ལེན་པའི་ཚེ་ཆོས་མ་ཡིན་པ་ལ་ཕྱོགས་པ་དེ་རྒྱལ་བར་བྱ་སྙམ་སྟེ་ཡིད་ལ་བསམས་ཏེ་བླངས་ན་ཉེས་བྱས། འདིར་འགྱུར་བར་ཤེས་ན་མ་ཡིན་ཚུལ་ཤིང་ལེན་པའི་ཚེ་ཆོས་མ་ཡིན་པ་ལ་ཕྱོགས་པ་རྒྱལ་བར་ཤེས་ན་ཚུལ་ཤིང་ངན་པ་མི་བླང༌། མཉམ་ན་ཉན་ཐོས་ཆེན་པོའི་ཕྱིར་ཚུལ་ཤིང་གཞག །ཚུལ་ཤིང་བྲིམས་ཏེ་དགེ་མི་དགེ་གཉིས་ཚུལ་ཤིང་མཉམ་ན་ཉན་ཐོས་ཀྱི་
གནས་བརྟན་ཆེན་པོར་བྲིམ་ནའོ། །ལག་ཀ་ཞེས་བྱ་བའི་སྐལ་བར་བཞག་སྟེ་དགེ་བའི་ཕྱོགས་པའི་ཚུལ་ཤིང་དུ་བརྩིས་ཏེ་དགེ་བ་ལ་ཕྱོགས་བ་ལ་རྒྱལ་བར་བྱ། ཆོས་མ་ཡིན་པར་འདི་ལྟ་བུ་ཞི་བར་གྱུར་ན་མི་སྐྱེའོ། །ལྟག་མ་ལྟར་གནས་བརྟན་གྱི་ཚུལ་ཤིང་གིས་བསྣན་ཀྱང་མི་དགེ་བ་ལ་ཕྱོགས་བའི་ཚུལ་ཤིང་མང་ན་དེ་ལས་སླར་མི་སྐྱོ་བར་བཟོད་པར་གསོལ་ཏེ་ཉེས་པར་ཁས་བླངས་ན་དེས་ནི་དུམ་བར་འགྱུར་རོ། །ཐོག་མར་གཟུ་བོར་བསྐོས་པ་མན་ཆད་འདི་ཡན་ཆད་ནི་མངོན་པར་གདུལ་བར་འོས་པ་ལྟ་བུ་ལས་མངོན་པར་གདུལ་བ་སྦྱིན་ཞེས་ཟེར་བ་ལ་འཆད་དེ་རྩོད་པ་བཞིའི་དང་པོའོ། །ཁ་ན་མ་ཐོ་བ་མེད་པ་ལས་བརྒལ་ན་གཙང་མ་སྦྱིན། དགེ་སློང་ཕས་ཕམ་པ་མེད་པ་ལ་བརྒལ་ན་མ་ཉེས་པའི་ཡུས་གཙང་མ་སྦྱིན་ཏེ་དཔེར་དྲབ་བྱམ་ལྱ་བུད་ཏྲ་བུ་མི་ཀ་སྤུན་གཉིས་ཀྱིས་བརྒལ་བ་ལྟ་བུ་སྟེ་ཞིབ་ཏུ་འོ་གནས་འཆང༌། དེའི་བརྒལ་བ་བཞི་སྟེ་དངོས་པོ་མེད་པ་དང༌། ནན་ཏན་གཞན་གྱི་དབང་གིས་དང། མཐོལ་བ་ལ་མ་བལྟས་པ་དང༌། སྨྱོན་པས་བྱས། རྣམ་པ་འདི་བཞི་ལ་སོ་སོར་ཐར་པའི་ནང་ནས་དྲན་པའི་འདུལ་བས་སྦྱིན་བ་དང༌། མི་བླུན་པའི་འདུལ་བས་སྤྱིན་པ་གཉིས་འཆད་པ་དེ་འོག་ནས་འབྱུང༌། དང་པོ་གསུམ་ལ་དྲ་ན་པའི་འདུལ་བ་སྦྱིན། མདོ་ལྟག་མའི་མིང་གིས་སྨོས་པ་བཞི་ལ་དང་པོ་གསུམ་ལ་དྲན་པའི་འདུལ་བས་འདུལ། ཐ་མ་ལ་མི་སླེན་བས་སོ། །ལྟག་མ་སྨྱོས་བས་བྱའོ་ཞེས་བྱ་བ་ལ་མི་གླེན་པའི་འདུལ་བས་སྦྱིན་ཏེ་སྔོན་སྨྱོས་ཏེ་མི་དྲན་པའི་ཚེ་ཉེས་བྱས་པ་ངན་བར་གྱུར་ན་མི་དྲན་ན་ཕྱིན་ཆད་དགེ་བ་སྡོམ་དུ་གཞུག །ལྟུང་བ་དང་བཅས་པ་ལས་འཁྲུག་པ་གསུམ་བྱུང་སྟེ། གྱུར་པ་མེད་པ་དང་གྱུར་བ་དང༌། དེ་ལ་རྣམ་པ་གཉིས་ཏེ། ཕྱོགས་པ་དང་དགེ་འདུན་ཐམས་ཅད་པའོ། །ཕྱོགས་པ་དང་ཕ་རོལ་གྱི་ཕྱོགས་འཆོས་པས་སོ། །ཐོག་མ་ལ་ཕྱིར་འཆོས་པ་ཁས་ལེན་བར་བྱེད་པས་སོ། །གཉིས་ལ་ནི་མངོན་སུམ་གྱིས་འདུལ་བས་སོ། །གསུམ་པ་ལ་རྩྭ་བཏིང་བས་སོ། །འདིར་མང་པོའི་ཕྱིར་དགེ་འདུན་ལ་གཤེགས་པ་མ་ཡིན་པ་གཅིག་གིས་བཅོས་སོ། །ལྟག་མ་ལྟར་སེམས་འདུལ་ཞིང་ཞི་ཟིན་ནས་ལྷག་མའི་ཉེས་པ་ཞིག་ཡིན་ན་ལྷག་པའི་ཆོས་བཞིན་དུ་མཐོལ། སྤང་བའི་ལྟུང་བ་ཉེས་པ་བྱུང་ན་དེའི་ཚོ་ག་བཞིན་མཐོལ། ལྟུང་བ་དང་ཉེས་པ་
དང་སོ་སོར་མཐོལ་བ་ཞིག་ཉེས་པར་གྱུར་ན་བྱིག་གཤུད་དུ་ཡོད་པའི་མིང་ནས་ཕྱུང་ལ་མིང་འདིས་འདི་ལྟ་བུ་ཞིག་ཉེས་སོ་ཞེས་དགེ་སློང་གཅིག་གིས་ཐམས་ཅད་ཀྱི་ཉེས་པ་དང་མིང་ནས་ཕྱུང་ལ་མཐོལ་ན་ཐམས་ཅད་ཚངས་བར་འགྱུར་རོ། །དུ་མ་ལྷན་ཅིག་ན་ཡང་ངོ༌། །ལྟག་མ་ལྟར་དགེ་སློང་གཅིག་གིས་སྤྱིར་མཐོལ་ཀྱང་རུང་སོ་སོར་ཐམས་ཅད་ཀྱི་མིང་དང་ལྟུང་བའི་མིང་དང་ཞིབ་ཏུ་བཤད་དེ། དགེ་སློང་གཅིག་གིས་མཐོལ་བས་གཙང་མར་གྱུར་པ་ནི་རྩྭ་བཏིང་བས་འདུལ་བའི་སྐབས་འདི་འདྲ་བས་མཐོལ་དུ་རུང་ངོ༌། །གང་གིས་འདི་ལྟར་བརྗོད་དེ་ཤེས་པ་སྣང་བས་སོ། །ལྟག་མ་ལྟར་རྩྭ་བཏིང་བའི་ཉེས་པ་མཐོལ་བ་ཉེས་པ་ཁས་བླངས་པའི་ཕྱོགས་ཀྱི་དགེ་འདུན་ཙོག་ཙོག་པོར་འདུག་ལ་མཉེས་པའི་དགེ་འདུན་རྣམས་བདེ་བར་འདུག་པའི་མདུན་དུ་ཉེས་པའི་ནང་གི་དགེ་སློང་གིས་ཐམས་ཅད་ཀྱི་ཉེས་པ་ལུང་མ་ནོས་ཏེ་གཙང་མའི་དགེ་སློང་ལ་མཐོལ་བའི་ཚེ། ཐོག་མ་བདག་ཉིད་ཀྱི་ལྟུང་བ་སྡེ་བཞི་ཅི་ཉེས་པ་མཐོལ་ལ་དེའི་འོག་ཏུ་དགེ་འདུན་ཕལ་གྱི་ཅི་དང་ཅི་ཉེས་པ་མཐོལ་བར་དགེ་སློང་དེ་སྨྲའོ། །ཕྱོགས་གཞན་དང་མཉམ་དུ་ནའོ། །ལྟག་མ་ལྟར་མཐོལ་བ་ཆོས་དང་ཆོས་མ་ཡིན་པ་གཉིས་ཀ་ཕ་ཟད་ཚུ་ཟད་དུ་གྲལ་མཉམ་པར་འདུག་ལ། ལྟག་མ་ལྟར་ལས་བྱ་བ་ནི་ལས་བརྒྱ་རྩ་གཅིག་ལས་གང་ཡིན་པ་དེས་བྱའོ། །དམ་མ་བཅས་པ་དང་བརྫུན་དུ་ན་མཐོལ་བར་མི་སྐྱེའོ། །ལྟུང་བ་སྡེ་བཞིའི་སྤྱིའི་མཐོལ་བ་སྟེ་གང་ཡང་རུང་མཐོལ་བའི་ཚེ། ལྟུང་བའི་མིང་དང་དངོས་པོ་གང་ཉེས་པ་འདིས་ཉེས་སོ་ཞེས་མཐོལ། གང་ཉེས་བྱས་པ་ཐམས་ཅད་མི་དྲན་ན་ཁོ་བོ་ནོངས་པ་མཆིས་སོ་ཞེས་སྤྱིར་མི་དྲིལ་བར་ཕས་ཕམ་པའི་ཡན་ལག་ལས་ཅི་ཉེས་པ་དང་ཉེས་བྱས་ཡན་ཆད་ཡན་ལག་དང་ཡན་མཛེར་ཅི་མཆིས་པ་མཐོལ་ལོ་ཞེས་བརྗོད་དོ། །བརྒལ་བ་བཅས་པར་ན་ཡང་བརྟགས་པའོ། །ལྟུང་བ་སྡེ་ལྔ་ལས་གང་ཡང་རུང་དགེ་སློང་གིས་དགེ་སློང་གཅིག་ཡན་ཆད་དགེ་འདུན་ཐམས་ཅད་ལའང་ཉེས་ན་རྒོལ་དུ་གནང་ངོ༌། །དེ་བཞིན་དུ་དེ་ལྟར་བརྒལ་བ་ཡང་ངོ༌། །ལྟག་མའི་ཚིག་བཟློག་སྟེ་གང་ཟག་གཅིག་ལ་དགེ་སློང་གཅིག་ཡན་ཆད་དགེ་འདུན་གྱིས་བརྒལ་ནའང་ཉེས་མེད་དེ་རུང་ངོ༌། །འདིར་གྲངས་ཀྱི་བྱེ་བྲག་ནི་མ་ཆད་དོ། །མདོ་ལྟག་མ་གཉིས་ཉེས་པ་ལ་ཕན་
ཚུན་དུ་རྒོལ་བའི་དགེ་སློང་གྲངས་སུ་ཆད་པ་མེད་དེ་ཉེས་ན་དུས་བརྒལ་ཀྱང་རུང་ངོ༌། །ལུས་དང་ངག་བསྡམས་པ་དང༌། སྡེ་སྣོད་ཤེས་པ་དང་ཕྱིན་ཅི་ལོག་ཏུ་མི་སྟོན་པ་དང༌། ཆོས་ཀྱིས་འདུལ་བ་དང༌། དེ་དག་གིས་བཟློག་པ་དགེ་འདུན་གྱི་དབུས་སུ་བསམ་པ་དང་གསུམ་དུ་ལྡན་ན་རྒོལ་བ་ལ་བཀུར་སྟི་བྱ། དགེ་སློང་གཅིག་གིས་ལྟུང་བ་སྡེ་ལྔ་ལ་བདག་སྡོལ་ན་སྐབས་དབྱེར་གསོལ་ཞེས་བྱ་སྟེ། ཕ་རོལ་གྱིས་སྐབས་ཕྱེ་ན་མིང་གིས་སྨོས་པ་འདི་རྣམས་དང་ལྡན་པའི་དགེ་སློང་གིས་བརྒལ་ན་དེའི་ཚིག་བརྩན་པར་བྱའོ། །ཚུལ་ཁྲིམས་ལོག་པ་དང་ཕྱི་ན་ཅི་ལོག་ཏུ་སྨྲ་ན་མཐར་བྱ། ཕས་ཕམ་པ་བྱུང་བ་དང་ཆོས་ལོག་པ་ལ་བལྟས་ཏེ་ཡང་དག་པའི་ཆོས་ནི་མ་ཡིན་ཞིང་ངན་གྱི་འཇིག་རྟེན་གྱི་ཆོས་རྐུ་བ་དང་ཕྱོགས་ལ་སོགས་པ་ལ་དགའ་སྐྱིད་དོ་ཞེས་ཟེར་བ་གཉིས་ཤིག་ལྟུང་བ་སྡེ་ལྔ་ལས་སྐབས་ཕྱེ་ཤིག་བརྒལ་ལོ་ཞེས་ཟེར་ན་དེ་ལ་སྐབས་མི་དབྱེ་བར་ཚིག་གིས་སྤྱོས་ལ་བསྐྲད་དེ་བཏང་ངོ༌། །དེ་ནི་བདག་ཅག་དང་སྡེ་མི་མཐུན་པའི་ཕྱིར་རོ། །བསྒོ་བ་མ་ཆུད་ཅིང་སྡེ་སྣོད་འཛིན་པ་འདི་ལྟ་བུའི་ཚུལ་མ་ཡིན་ནོ། །ལྟག་མ་ལྟར་སྡེ་སྣོད་གསུམ་ཚིག་ཤེས་ཏེ་དོན་མ་ཆུང་ན་ལུས་དང་ངག་གིས་ཚུལ་ཁྲིམས་དང་ལྡན་པ་དང་ཕྱིན་ཅི་ལོག་ཏུ་མི་སྟོན་ཀྱང་སྟེ་ཕ་ལོག་ལ་བརྒལ་ཀྱང་དགེ་སློང་དེའི་ཚིག་མི་བརྩན་ནོ། །བསམས་པ་རིགས་པའི་ཕྱིར་དེ་ལ་བསྐོ། །ལྟག་མ་སྡེ་སྣོད་གསུམ་ཚིག་ཤེས་ཏེ་དོན་མི་ཤེས་ཤིང་ལྟག་མ་ལུས་དང་ངག་གི་ཁྲིམས་དང་ལྡན་ཞིང་ཕྱིན་ཅི་ལོག་ཏུ་མི་སྟོན་བ་དེ་ལྟ་བུ་ཞིག་རྒོལ་དུ་འོངས་ན་སྐབས་ཀྱང་མི་དབྱེ། བསྐྲད་དེ་མི་བཏང་བར་ཚིག་གཞན་གྱིས་བརྗོད་དེ་ལན་མི་སྦྱིན་པར་གཞག་གོ ། གནས་དང་རྟག་ཏུ་ལུས་དང་ངག་ཕྱི་ན་ཅི་ལོག་མ་ཡིན་པ་དང༌། སྡེ་སྣོད་གསུམ་དང་ལྡན་པ་ལ་བྱ། མི་གནས་པའོ། །ལྟག་མ་བཞིན་མི་གནས་པ་སྟེ་གནས་པ་དང་མི་གནས་བ་ཉིད་ནི་འོག་ནས་གཉེར་གསོད་དོ། །གནས་ནི་དུས་དང་ཡུལ་དང་སྤྱོད་ལམ་དང་ནན་ཏན་ནོ། །རྒོལ་བའི་དགེ་སློང་ལྟག་མའི་ཡོན་ཏན་དང་ལྡན་པས་དགེ་སློང་ཉེས་པ་ལ་བརྒལ་ནས་བདེན་ན་མ་བརྫུན་པ་དགེ་སློང་རྒོལ་བ་དཀར་གཅག་པའི་ཕྱིར་དགེ་འདུན་གྱིས་དགེ་སློང་གཉིས་སྔ་ཕྱིར་བཏང་སྟེ་མིང་གིས་སྨོས་པ་འདི་རྣམས་ལྟར་དང་རྟགས་དང་མཐུན་ན་རྒོལ་བ་དེའི་ཚིག་བརྩན་པར་བྱའོ། །རྒོལ་བ་པ་མི་སྐྱེ་བ་ནི་
གནས་དག་གུད་དུ་བསྐྱོད་པ་དང་རྟོག་པ་དང་རྟོགས་པ་བྱུང་བའོ། །མི་གནས་པ་ཞེས་བྱ་བ་ནི་རྟག་ཏུ་དུས་དང་ཡུལ་དང་སྤྱོད་ལམ་དང་ནན་ཏན་བཞི་ལྟར་དགེ་འདུན་གྱིས་ལྐོག་ཏུ་ལན་ཅིག་གམ་གཉིས་དྲིས་ཏེ་དགེ་སློང་ཡོན་ཏན་དང་ལྡན་པས་བརྒལ་བའི་ཚིག་དང་གལ་ཏེ་ཡུལ་དང་དུས་ལ་སོགས་པ་མི་མཐུན་པར་གྱུར་ན་ཡོན་ཏན་ལྡན་པས་བརྒལ་ཀྱང་དེའི་ཚིག་མི་བརྩན་ནོ། །ཞེ་སྡང་གི་ཕྱིར་བརྒལ་ན་ནི་ལྟག་མ་ཀུན་དང་ལྡན་ཀྱང་རྒོལ་དུ་མི་གནང་ངོ༌། །ཁས་བླངས་རྒོལ་བ་ཟད་པའོ། །ལྟག་མ་ལྟར་ཡོན་ཏན་དང་ལྡན་པའི་དགེ་སློང་གིས་ཉེས་སོ་ཞེས་ཁས་བླངས་ན་ཅི་ཉེས་པའི་དངོས་པོ་མཐོལ་ན་ཚངས་པར་འགྱུར་རོ། །བདེན་པ་མཐོང་བ་དང་ཡོན་ཏན་གྱིས་རབ་ཏུ་མཆོག་སྟེ་གཞན་སྨྲ་ན་བརྟག་པར་བྱས་ཏེ་ཁྱིམ་མི་ན་ཡང་ངོ༌། །དགེ་སློང་གཅིག་ལ་ཁྱིམ་པ་གཅིག་དང༌། དགེ་སློང་གཅིག་དང་གཉིས་ཀྱིས་བརྒལ་ཏེ་ཁྱིམ་བ་ནི་རྒྱུན་དུ་ཞུགས་པ་འམ་ལན་ཅིག་ཕྱིར་འོང་བའི་འབྲས་བུ་ཐོབ་པ་ཞིག་ཡིན། དགེ་སློང་ནི་ཐ་མལ་བ་ཞིག་ཡིན་ན་ཁྱིམ་པ་དེས་བརྒལ་བའི་ཚིག་བརྩན་པར་བྱའོ། །དགེ་སློང་གཉིས་ཤིག་རྒོལ་ན་གང་ཡོན་ཏན་དང་ལྡན་པ་དང་གང་འབྲས་བུ་ཐོབ་པ་བརྩན་པར་བྱའོ། །གཞན་དང་ལྷན་ཅིག་ཏུ་གཏུག །དགེ་སློང་གཅིག་གིས་གཅིག་ལ་བརྒལ་ན་མི་དེས་ཉེས་པའི་གན་ན་གཞན་སུ་ཡོད་ཅེས་ཟེར་ན་དགེ་འདུན་གྱིས་གན་ན་འདུག་པའི་མི་དེ་ལ་ལྐོག་དུ་ཕོ་ཉ་གཅིག་གིས་དྲེས་ཏེ་རྒོལ་བ་གཉིས་མཐུན་ན་དེ་བཞིན་དུ་གཅད་དོ། །ཐེ་ཚོམ་བྱུང་ན་ཤེས་པ་མ་ཡིན་ནོ། །རྒུན་ཆུ་འཐུངས་པ་ལ་གཅིག་གིས་ཀུན་ཆང་འཐུངས་སོ་ཞེས་བརྒལ་ན་དངོས་པོ་རྒུན་ཆུ་ཡིན་པས་བརྒལ་བ་མི་བརྩན་གྱིས་འཐུངས་པའི་ཚིག་བརྩན་ནོ། །ཁས་བླངས་པ་བཞིན་དུ་འདི་གདོན་མི་ཟ་བར་རོ། །དགེ་སློང་ཞིག་ཉེས་པར་གྱུར་ཏེ་ཉེས་པར་བདག་གིས་ཤེས་ནས་མཐོལ་ནས་ཚངས་སོ། །མ་རྟོགས་པ་ནི་མ་ཆུད་པའོ། །དགེ་སློང་ཞིག་གིས་ལྟུང་བ་སྡེ་ལྔ་ལས་གང་རུང་བ་ཉེས་པ་གཅིག་བྱས་ཏེ་མཐོལ་ཅིག་ཅེས་བསྒོ་ན་ངས་མ་བྱས་ཞེས་ཟེར་ཞིང་མཐོལ་དུ་མི་བཏུབ་པ་དང་གཅིག་ཏུ་ཉེས་པ་བྱས་སམ་ཞེས་དྲིས་ན་བྱས་ཞེས་ནི་ཁས་བླངས་ལ་གང་བྱས་ཞེས་དྲིས་ན་མ་ཤེས་ཞེས་ཟེར་ན་སྤང་བར་བྱའོ། །དགེ་འདུན་ལ་ཁས་བླངས་ནས་མི་ཤེས་ན་བཙལ་བ་བསྒོ་ཞིང་བཟུང༌། དགེ་སློང་ཞིག་གིས་
ཉེས་པ་བྱས་ཏེ་ཉེས་པར་ནི་དྲན་ཏེ་ཁས་བླངས། དངོས་པོ་གང་བྱས་པ་མི་དྲན་ན་དགེ་འདུན་གྱིས་གསོལ་བ་དང་ཞུ་བ་བཞིའི་ལས་ཀྱིས་ནམ་དྲན་གྱི་བར་དུ་སེམས་སུ་གཞུག །དེའི་རང་བཞིན་ཚོལ་བ་དེ་ལ་ཕན་པས་ན་དེའི་རང་བཞིན་ཚོལ་བའོ། །མདོ་གོང་མ་ལྟར་གསོལ་བ་དང་ཞུ་བའི་ལས་ཀྱིས་དྲན་བར་སེམས་སུ་བཅུག་ལ་དེའི་རང་བཞིན་ཚོལ་ཞེས་བྱ་བ་ནི་ལྟག་མ་མི་དྲན། ནམ་དྲན་གྱི་བར་དུ་ཚོལ་དུ་གཞུག་པ་ལ་བྱའོ། །སྨད་པའི་ལས་ཀྱི་གཟུགས་ལ་འདི་ལས་གླགས་ཅེས་བྱའོ། །ལྟག་མ་ལྟར་ཉེས་པ་བྱས་པ་དྲན་གྱི་བར་དུ་འདུལ་བ་འཛིན་པ་ཁ་ཅིག་ན་རེ་གསོལ་བ་དང་ཞུ་བའི་ལས་ཀྱིས་ནམ་དྲན་གྱི་བར་དུ་ཆད་པས་བཅད་དེ་སྤངས་པ་བདུན་དང་འདི་དང་བརྒྱད་དུ་བྱའོ་ཞེས་བཤད་དོ། །དེ་མདོ་སྡེ་དང་འགལ་བས་མི་བཟང་བའི་ཕྱིར་རོ། །ལྷག་མའི་མཁན་པོ་ཚིག་ནི་མི་བཟང་ངོ༌། །ཇི་ལྟར་མི་བཟང་ཞེ་ན་མདོའི་མདོ་ལས་འབྱུང་བ་སྤང་བ་རྣམ་པ་བདུན་ལས་མེད་པས་ན་བསྐྲད་ཀྱང་མི་བསྐྲད། ཆད་པས་ཀྱང་མི་བཅད་དོ་ཞེས་སངས་རྒྱས་ཀྱིས་གསུངས་པའི་མདོ་ལས་འབྱུང་བས་ན་འདུལ་བ་འཛིན་པའི་ཚིག་མི་བཟང་ངོ༌། །ཞི་བ་བས་ན་དགར་བའོ་ཞེས་མི་འདོད་དོ། །ཞི་བ་ཞེས་བྱ་བ་རྟག་ཏུ་རང་བཞིན་ཚོལ་བ་ལ་འཆད་དེ་བདུན་ཤིན་ཏུ་ཞི་བའི་ནང་དུ་བགྲང་གི་སྤང་བ་བདུན་གྱི་ནང་དུ་འདི་དང་བརྒྱད་དུ་མི་བརྩིའོ། །འདི་སྤང་བར་བརྩིས་ན་བདུན་ཤིན་ཏུ་ཞིབ་བ་དྲུག་ཏུ་འགྱུར་བའི་ཕྱིར་འདུལ་བ་འཛིན་པའི་ཚིག་མི་བརྩན་གྱི་མདོའི་གཞུང་བརྩན་ནོ། །སྤྱོ་བ་ལ་སོགས་པ་ཡང་འདི་ལྟ་སྟེ་མ་བཅས་པས་སོ། །སྤྱོ་བ་ཞེས་བྱ་བ་ནི་སྤང་བ་རྣམ་བདུན་ཏེ། སྤང་བ་རྣམ་བདུན་ལས་བརྒྱད་མེད་ཀྱིས་བརྒྱད་དུ་ཡང་མི་བྱ། དྲུག་ཏུ་ཡང་མི་དབྲི་བར་བདུན་སོ་ན་གཞག་གོ །འདི་ཤེས་བཞིན་དུ་མི་ཤེས་སོ་ཞེས་པར་ཆུད་ན་མ་མཐོང་བ་གྲགས་པ་སྐྱེས་པར་འགྱུར་རོ། །ཞི་བར་བྱ་བའི་ཕྱིར་མི་བསྒྲིམས་པར་མི་བྱ། རྟག་ཏུ་རྩོད་པ་རྣམ་བཞི་ལ་ཞི་བ་རྣམ་བདུན་གྱིས་ཚུལ་བཞིན་དུ་ཞི་བར་མ་བྱས་ན་དགེ་འདུན་ཐམས་ཅད་དབྱེན་གྱི་སྦོམ་པོར་འགྱུར་རོ། །འཐབ་མོའི་དངོས་པོའོ། །འདི་ཡན་ཆད་འཐབ་མོའི་དངོས་པོའོ།། །།འདི་མན་ཆད་འཐབ་མོའི་དངོས་པོ་དྲིས་པ་ལ་འཆད། བྱས་པའི་འཐབ་མོ་ནི་ཞི་བ་ཐམས་ཅད་ལ་འཇུག་གོ །སྤང་བ་སྤང་བ་རྣམ་བཞིའི་མཇུག་ལས་ལ་འདུ་བ་མི་སྦྱིན་ཞེས་བྱ་བ་དེ་ལ་ཤིན་ཏུ་ཞི་བར་བདུན་ཀས་འདུལ་
ལོ། །བསྐང་བར་མི་རིགས་པ་དགེ་འདུན་གྱིས་སྤྱོད་པ་ལ་འཁོར་བ་མ་ཡིན་ནོ། །རྟག་ཏུ་ལས་བརྒྱ་རྩ་གཅིག་ནང་དུ་མི་ཆུད་པ་ལས་ཕས་ཕམ་པ་བྱུང་བ་དང་བསྐྲད་པ་དང་དགེ་སྦྱོང་ཁྱིམ་པ་ལ་སོགས་པ་མི་ཆུད་པ་བཞིན་དུ་དགེ་འདུན་འཐབ་པའི་གཟུ་བོའང་དེ་རྣམས་ཀྱིས་ཀྱང་མི་རུང་ངོ༌། །རབ་ཏུ་རྟོགས་པས་གཞན་གྱི་ལ་གཏོགས་སོ། །དགེ་སྦྱོང་མ་དང་དགེ་སློང་མ་ཞིག་འཐབ་མོ་བྱུང་ན་དགེ་སློང་མས་གདུལ་ལོ། །དགེ་སྦྱོང་ཕ་འཐབ་མོ་བྱུང་བ་ནི་དགེ་སློང་གིས་ཞི་བར་བྱའོ། །རིགས་པ་ནི་སྐྱེས་པས་བུད་མེད་ཀྱི་ལའོ། །དགེ་སློང་མ་ནང་རྩོད་པར་གྱུར་པ་ལ་དགེ་སློང་གིས་ཞི་བར་བྱས་པ་ནི་ཉེས་པ་མེད་དོ། །དགེ་སློང་འཁྲུགས་པ་ལ་དགེ་སློང་མས་ཞི་བར་བྱེད་དུ་མི་དབང་ངོ༌། །ཞི་བ་ནི་འཚོ་བའམ་རབ་ཏུ་རྫོགས་པ་ལས་འཕོས་ནའོ། །དགེ་སློང་སྡེ་གཉིས་སུ་རྩོད་པ་ཀུན་ཞི་བར་གྱུར་ཏམ། ཁྱིམ་པར་བབས་ན་ཀུན་ཞི་བར་གྱུར་ཏོ། །ཕྱོགས་གཞན་དུ་སྤང་བ་རྙེད་པའོ། །དགེ་སློང་གིས་གཞན་ལ་བརྒལ་བ་ལས་ཆོས་མ་ཡིན་པ་ལ་ཕྱོགས་ཏེ་སོང་ན་དེས་ཀྱང་ཞི་བར་འགྱུར། ཕས་ཕམ་པའམ་ཁྱིམ་པ་ཞིག་ཏུ་བབས་ནའང་ཞི་བར་གྱུར་ཏོ། །གཞན་དུ་སོང་བ་དང་ནང་ཡུན་རིང་པོས་བཏབ་ན་ཡང་ངོ༌། །ལྟག་མ་ལྟར་རྒོལ་བའི་དགེ་སློང་ཡུལ་ལས་རིང་པོ་ཞིག་དུ་སོང་ནའང་འཐབ་མོ་ཞི་བར་འགྱུར། ནད་ཡུན་རིང་པོ་ཞིག་གིས་བཏབ་ནའང་ཞི་བར་འགྱུར། རྒོལ་པ་དང་ཕྱིར་རྒོལ་བ་ལས་སོ། །དགེ་སློང་གཉིས་ཤིག་རྩོད་ཅིང་འདུག་འདུག་པ་ལས་རྩོད་པའི་འཕྲོ་ལས་ཤིའམ་ཁྱིམ་པར་བབས་ཏེ་ལམ་རིང་པོར་བབས་ན་ཞི་བར་འགྱུར་རོ། །འཐབ་མེའི་དངོས་པོ་སྟེ་དྲིས་པའི་འོ། །འཐབ་མོའི་དངོས་པོ་རྫོགས་སོ།། །།འདི་མན་ཆད་མལ་སྟན་གྱི་དངོས་པོ་ལ་འཆད་དེ། སོ་སོར་ཐར་པའི་སྡོམ་པའི་མཆོག་ལས་རབ་ཏུ་བྱུང་བས་ཕྱག་བྱ། དགེ་སློང་རྣམ་ལྔ་དང་དགེ་བསྙེན་ཕ་དང་དགེ་བསྙེན་མ་དང་དུས་ཁྲིམས་པ་དང་བརྒྱང་རིམ་པ་བཞིན་དུ་གོང་མ་ལ་ཕྱག་བྱ། མཉམ་ན་རྒན་པ་ལ་བྱའོ། །དགེ་སློང་སྡེ་ལྔ་ནང་གང་རྒན་པ་ལ་ཕྱག་བྱ། མཚན་གཞན་ལ་མ་ཡིན། དགེ་སློང་གིས་དགེ་སློང་མ་ལ་ཕྱག་མི་བྱ། དགེ་སྦྱོང་གིས་ཀྱང་མི་བྱ། སྐྱེས་པ་མི་དམའ་བ་ལ་བུད་མེད་ཀྱིས་ཕྱག་བྱ། དགེ་སློང་ཁྲིམས་རྫོགས་པ་ལ་དགེ་སློང་མ་
དགྲ་བཅོམ་ཞིང་ལོ་བརྒྱ་ལོན་ཀྱང་ཕྱག་བྱ། ས་གཞན་ལ་གནས་པ་དང་ཞིག་པ་དང་དགེ་སློང་མ་སུན་ཕྱུང་པ་དང༌། ཆོས་མ་ཡིན་པའི་སྐྱབས་སོ་སོར་གནས་པ་དང༌། མཚམས་མེད་པ་བྱས་པ་དང༌། ཉལ་བ་དང་ཏིང་ངེ་འཛིན་མ་རྙེད་པ་དང༌། བྲེལ་བ་དང༌། གཞན་ལ་སེམས་པ་དང༌། རྒྱབ་ཀྱིས་ཕྱོགས་པ་དང༌། གཞན་གྱི་གྲོང་ན་འདུག་པ་དང༌། ཟན་ལ་འདུག་པ་མ་གཏོགས་སོ། །མིང་གིས་སྨོས་པ་འདི་རྣམས་ལ་དགེ་སློང་ཕ་དང་དགེ་སློང་མས་ཕྱག་མི་བྱ། དགེ་སློང་གིས་ཀྱང་འདི་རྣམས་ཁྲིམས་ཉམས་པ་ལ་ཕྱག་མི་བྱ། ཁྱིམ་པས་རབ་ཏུ་བྱུང་བ་ལའོ། །དགེ་སློང་སྡེ་ལྔ་ལ་ཁྱིམ་པས་ཕྱག་བྱ། སངས་རྒྱས་ལ་ཐམས་ཅད་ཀྱིས་སོ། །སངས་རྒྱས་ལ་བྱང་ཆུབ་སེམས་པ་མན་ཆད་ལྷ་མ་སྲིན་དང་སེམས་ཅན་ཐམས་ཅད་ཀྱིས་ཕྱག་བྱ། གཙུག་ལག་ཁང་བྱ། གང་ཟག་དང་དགེ་འདུན་གྱི་ཕྱིར་གཙུག་ལག་ཁང་རབ་ཏུ་བརྩིགས་ཀྱང་ཉེས་མེད་དེ་ཐབས་འོག་ནས་འཆད། ངོས་གཅིག་གི་དབུས་སུ་དྲི་གཙང་ཁང་བྱ། གཙུག་ལག་ཁང་གྲུ་བཞིར་བྱས་པའི་དབུས་ཀྱི་ངོས་ལ་དྲིས་གཙང་ཁང་བྱ། དེ་དང་མངོན་སུམ་དུ་སྒོ་ཕུབས་སོ། །གཙུག་ལག་ཁང་གར་ལྟ་བར་ཕྱི་སྒོ་དེར་གདོད་དོ། །གྲུ་བཞིར་ན་དགེ །གཙུག་ལག་ཁང་གྲུ་བཞིར་བརྩིགས་ན་དགེ་བས་རིགས་སོ། །ངོས་གསུམ་པ་ཡང་ངོ༌། །རྐུན་པོ་མེད་ཅིང་མི་འཇིགས་པའི་གནས་སུ་གཙུག་ལག་ཁང་ངོས་གསུམ་དུ་བརྩིགས་ལ་ངོས་གཅིག་མ་བརྩིགས་ཀྱང་རུང་བླང༌། གཙུག་ལག་ཁང་ལྷག་མ་གཉིས་ཡོན་དུ་ཕུལ་ན་བླང༌། གཙུག་ལག་ཁང་དུ་གནས། དགོན་པར་གནས་པ་ནི་སངས་རྒྱས་ཀྱིས་ཀྱང་བདེ་བར་བསྔགས་ན་དེ་ན་གནས་པ་ལ་ཐེ་ཚོམ་ཟ་བ་ཡོད་དེ་གནས་ཀྱང་ཉེས་མེད་དོ། །གཞན་དགེ་འདུན་གྱི་དངོས་པོ་ལ་དགེ་འདུན་གྱི་ཕྱིར་རམ་གང་ཟག་དགེ་སློང་གི་ཕྱིར་ན་དངོས་པོ་གནས་པར་བྱ། དགེ་འདུན་གྱི་གཙུག་ལག་ཁང་གི་འཁོར་ནའང་གཙུག་ལག་ཁང་བརྩིག་པའི་ས་ཡངས་པ་ཞིག་ཡོད་དེ་དགེ་སློང་ཞིག་དགེ་འདུན་གྱི་ཕྱིར་གཙུག་ལག་ཁང་བརྩིག་ཅེས་ཟེར་ཀྱང་རུང་གང་ཟག་བདག་འདུག་ན་ཅི་གནང་ཞེས་གསོལ་ན་སྦྱིན་ནོ། །དེས་ཏེ་སྦྱིན་བདག་ཡོད་ན་དེས་གནང་ནའོ། །ལྟག་མ་ལྟར་ས་སྦྱིན་པ་ཡོན་བདག་ཡོད་ན་ཡོན་བདག་ལ་དྲིས་ཏེ་སྦྱིན། ཡོན་བདག་མེད་ན་དགེ་འདུན་གྱིས་
སྦྱིན། གྲོང་ཁྱེར་གྱི་ནང་ངམ་ཕྱི་རོལ་དུ་ངལ་བསོ་བའི་གནས་བརྟགས་པའོ། །གྲོང་གི་འདབ་དང་ལམ་གྱི་མདོ་དང་གཙུག་ལག་ཁང་གི་འདབ་ཏུ་དགེ་སློང་གིས་མི་ཕལ་མོ་ཆེ་ཡན་མན་དུ་འགྲོ་བ་ལ་ཕན་པའི་ཕྱིར་བསིལ་ཁང་བརྩིགས་ཀྱང་ཉེས་མེད་དོ། །བདག་གི་ཁྲོན་པ་འདོད་ཆགས་ཀྱི་རྐྱེན་སྤང་བའི་ཕྱིར་བསྒྲིབས་པའི་རྩིག་པ་བྱ། གཙུག་ལག་ཁང་གི་འདབ་ན་ཁྲོན་པ་ཡོད་དེ་དགེ་སློང་དང་ཁྱིམ་པ་གཉིས་ཀ་ཆུ་དེར་ཆུ་ན་འདོད་ཆགས་སྤང་བར་བྱ་བའི་ཕྱིར་ཁྲོན་པ་སྐྱེད་དུ་སོ་ཕག་གིས་བརྩིགས་ཏེ་དགེ་སློང་དང་ཁྱིམ་པ་ཆུ་ཆུ་ཆ་གཅིག་ལ་གཅིག་མི་མཐོང་བར་བྱ། བུད་མེད་ཆུ་སློང་ན་སྙིམ་པ་བཀང་ཞིང་བླངས་ཏེ་དེའི་རྒྱུན་ཆད་མེད་པར་མ་ཡིན། བུད་མེད་ཆུ་སློང་ན་བུམ་པས་ཁ་ལུགས་སུ་མི་བླུད་པར་སྙིམ་པ་བཀང་སྟེ་འཐུང་དུ་གཞུག་གོ །ཐོག་མ་དགེ་སློང་བཟང་པོ་ཞིག་གིས་བུད་མེད་ལ་ཆུ་ཁ་ལུགས་སུ་བླུད་དེ་བུད་མེད་ལྟོ་ཆུས་གང་སྟེ་ཤི་བ་ལས་བཅས། དབྱར་གྱི་ནང་གི་རྙེད་པའི་ཚེ་འོངས་པ་ལ་རིགས་གཙུག་ལག་ཁང་གཅིག་ན་རྐྱེན་གྲོང་དང་ཞིང་མང་ཞིག་ཡོད་དེ་དགེ་སློང་སུ་འོངས་པ་གཙུག་ལག་ཁང་དེའི་རྐྱེན་གྱི་ཤས་དབང་བ་ལས་དགེ་འདུན་ཐམས་ཅད་དབྱར་ཚུལ་དུ་ཞུགས་པའི་ཚེ། དགེ་སློང་ཞིག་གུད་ནས་འོངས་ཏེ་ཞག་བཞི་བཅུ་རྩ་ལྔ་ཚུན་ཆད་སླེབས་ན་དབྱར་ཚུལ་གྱི་ཤས་ཀྱང་དབང་ངོ༌། །རྙེད་པ་མ་སྤྱད་པ་ལས་སུ་མ་ཡིན། གཙུག་ལག་ཁང་ན་གསོལ་ཆང་ལ་སོགས་པ་འགོད་པ་ལ་ཤས་མི་འདོད་པའི་དགེ་སློང་ཞིག་ཡོད་ན་རབ་ཏུ་དགེ་བ་ཡིན་གྱི་གང་ཟག་བཅུ་གཉིས་ཀྱིས་ལས་སུ་འང་མི་བསྐོ། །ཐོག་མ་མི་རྙེད་པ་ལ་ཟས་སྦྱིན། དགེ་སློང་ཞིག་གུད་ནས་འོངས་ཏེ་ཚུལ་གྱི་ཚེ་ཞག་བཞི་བཅུ་རྩ་ལྔ་ཚུན་ཆད་མ་སླེབས་ན་ཚུལ་གྱི་ཡོན་སྐལ་ནི་སྦྱིན་ཟས་ནི་མི་སྦྱིན་གཞན་ཐོབ་ལ་མི་འཇུག །ལྟག་མ་ལྟར་གུད་ནས་འོངས་པའི་དགེ་སློང་གིས་ཚུལ་དུ་ཞུགས་པ་ལ་བཞི་བཅུ་རྩ་ལྔ་མ་སླེབས་ན་ཡོན་དབང་ངོ་ཞེས་འོངས་པའི་དགེ་སློང་གིས་མི་མནོད་དོ། །ཉེས་མེད་པ་ནི་དེའི་ཕྱིར་མ་སོང་བར་གཙུག་ལག་ཁང་གཞན་དུ་གདུགས་ཚོད་བབ་སྟེ་ཟོས་ནའོ། །གཙུག་ལག་ཁང་གཅིག་ཏུ་འགྲོ་བའི་ཚེ་ཁྱིམ་ཟན་ཟ་བས་འགྲོའོ་ཞེས་བསམས་ཏེ་སོང་ན་ཉེས་བྱས། ལས་ཀྱི་ཕྱིར་སོང་སོང་བ་ལས་འཕྲལ་ལ་གཡར་དྲངས་ཏེ་སོང་བ་ནི་ཉེས་མེད། མུ་གེའི་ཚེ་བདག་གིས་མ་བླངས་པར་ན་ཡང་
ངོ། །མུ་གེ་བྱུང་བའི་ཚེ་བདག་གི་ཟན་ནར་མ་ངན་གྱི་གཞན་གྱི་མཆོད་སྟོན་བྱེད་ན་བདག་གིས་མ་བླངས་པར་མཆོད་སྟོན་ལ་སོང་བ་ནི་ཉེས་མེད་དོ། །དགེ་སློང་གི་ཚོད་ལས་ལྷག་མ་བླངས་ན་ཡང་ངོ༌། །མུ་གེའི་མགྲོན་དུ་བོས་ན་ཕྱིན་ཆད་ཟས་མི་རྙེད་པའི་ཕྱིར་བདག་ཕུལ་གང་ཞིག་རྟག་པར་ཟ་བ་ཡིན་ན་དེའི་ཚེ་ན་ནི་ཕུལ་བཞི་ལྔ་ཅི་ཆུད་དུ་ཟོས་ཀྱང་ཉེས་མེད་དོ། །གཙུག་ལག་ཁང་ཡལ་བར་མི་བྱ། དགེ་སློང་ཕོ་སྨོས་ཀྱིས་གཙུག་ལག་ཁང་ཞིག་རལ་ཞིག་བྱུང་ན་བཅོས་པར་བྱ། སྦྱིན་བདག་ལས་བཅོས་པའི་ཕྱིར་སྤྲོ་བར་བྱ། ལྟག་མ་ལྟར་གཙུག་ལག་ཁང་བཅོས་པའི་རྒྱུ་ཡོན་བདག་དད་པ་ལ་ཆོས་བཤད་དེ་བསླང༌། མ་གྲུབ་ན་དགེ་འདུན་གྱིས་ལས་ཅི་ནུས་སུ་བསྐོ། །ཡོན་བདག་ལ་བསླངས་ཏེ་མ་རྙེད་ན་དགེ་འདུན་གྱི་དཀོར་ལས་ཕྱུང་སྟེ་བཅོས། བདག་གིས་བཅོས་ན་ཡང་ངོ༌། །གཙུག་ལག་ཁང་བཅོས་པ་ལྷ་བྲན་དང་རྩེ་རྒོད་མེད་ན་དགེ་སློང་ཉིད་ཀྱིས་བཅོས། རྙེད་པ་ལེན་པས་གཙུག་ལག་ཁང་བྱུག །ཚུལ་ནས་བྱུང་སྟེ་ཡོན་འགོད་པ་ལ་སོགས་པ་འདོད་ཆེ་ཆུང་སྟེ་མ་བླངས་པ་ནི་མ་བཅོས་ཀྱང་ཉེས་མེད་དེ་བས་ཡོན་ཤས་བླངས་པ་རྣམས་ཀྱིས་ནི་གཙུག་ལག་ཁང་རལ་ན་བཅོས། དད་པའི་རྙེད་པ་གཙུག་ལག་ཁང་གིར་མ་ཡིན། གཙུག་ལག་ཁང་གི་རྐྱེན་ནི་མ་ཡིན་གྱི་ཡོན་བདག་དད་པ་ཞིག་གིས་བདག་ལ་ནོར་རྫས་བྱིན་པ་ལས་དགེ་སློང་ཁ་ཅིག་ན་རེ་ཁྱོད་ཀྱང་ཡོན་བླངས་པ་ཡིན་གྱི་ཆོས་ཤིག་ཅེས་ཟེར་ན་མི་དེས་ནི་དགེ་འདུན་ནང་ན་ཡོན་བླངས་པ་མ་ཡིན་པས་མ་བཅོས་ཀྱང་ཉེས་མེད་དོ། །སྒོ་བཅད་དེ་གཙུག་ལག་ཁང་ནས་འགྲོ། །དགེ་སློང་ཡན་མན་དུ་འགྲོན་གནས་ཁང་གི་སྒོ་ལྕགས་བཅུག་ལ་དམ་གཞག་བྱས་ཏེ་འགྲོ། །གནས་ཁང་ཉིད་ཀྱི་སྒོ་ལྕགས་མེད་ན་ཕྱི་སྒོ་ལྕགས་གཞུག །སྲུང་མ་བཞག་སྟེའོ། །དགེ་སློང་ཐམས་ཅད་མཆོད་སྟོན་ལ་སྤྱན་དྲངས་པ་ལྟ་བུར་འདོད་ན་དགེ་སློང་གཅིག་སྲུང་མར་གཞག །མེད་ན་ཟན་སྦྱིན། སྲུང་མའི་དགེ་སློང་དགེ་འདུན་གྱིས་ཟས་གཞག ། གཙུག་ལག་ཁང་ན་ཟས་ཀྱི་རྒྱུ་མེད་ན་བུས་པ་གཅིག་སྔར་ཁྲིད་དེ་ཟན་མནོས་ལ་བསྐུར། བསྐུར་བའི་དབང་མེད་དམ་བར་མ་ཆད་པར་མི་དབྱེ། ཡུལ་ན་ཆོམ་པོ་བ་མང་ཞིང་ཁྱིམ་རྟག་བར་བཅོམ་པར་གྱུར་ན་དེའི་ཚེ། མཚན་མོ་སྒོ་ཕྱེ་ཞེས་ཟེར་ཞིང་འོང་ཡང་མ་བརྟགས་པར་སྒོ་མི་དབྱེའོ། །སྟེང་
དུ་འཛེགས་ཏེ་ལྟ་འམ་ཁྱེད་རིམས་ཀྱིས་མ་བཏང་ངམ་ཞེས་པའི་མིང་གིས་སྨྲར་གཞུག་གོ་ཞེས་འདི་ནི་ཐབས་སོ། །མཚན་མོ་དགེ་སློང་གི་སྐད་དུ་ཟེར་ཞིང་སྒོ་ཕྱེ་ཞེས་ཟེར་ན་ཁང་པ་སྟེང་དུ་འཛེགས་ཏེ། ཁྱེད་སུ་ཡིན་གང་ནས་འོངས་ཞེས་སྨྲས་ཏེ་ང་དགེ་སློང་ཡིན་ནོ་ཞེས་ཟེར་ན་ཁྱོད་རིམས་ནད་ཆེས་བྱ་བ་ནི་སྔོན་རྐུན་པོ་ཞིག་གིས་དགེ་སློང་ནན་ལ་བོར་ནས་སྒོ་འབྱེད་དུ་བཅུག་པ་ལས་བཅས་ཏེ་དེ་ཕྱིན་ཆད་དགེ་སློང་འོག་ཁྲིམས་བཅས་པ་ཕྱིན་ཆད་རྐུན་པོ་ཞིག་གིས་ནན་ལ་བོར་ཏེ་སྒོ་འབྱེད་དུ་བཅུག་ན་ང་རིམས་ནའོ་ཞེས་མན་ངག་གི་ཚིག་བྱ། གནས་དང་མིང་དང་ཕ་དང་མ་ལ་སོགས་བ་མངོན་པར་ཤེས་ཏེའོ། །ཁྱིམ་པ་ཞིག་སྒོ་ཕྱེ་ཞེས་འབོད་དུ་འོངས་ན་རྐུན་པོ་ཡིན་ནམ་མ་ཡིན་པ་ཤེས་པར་བྱ་བའི་ཕྱིར་ཡུལ་དང་མིང་དང་ཕ་མ་ལ་སོགས་པའི་དན་རྟགས་དྲིས་ཏེ་ཐོག་ཏུ་ཕེབས་ན་སྒོ་དབྱེ། མངོན་པར་མ་ཤེས་ཏེ་འཇིགས་ན་མི་དབྱེ། ལྟག་མ་སྐད་དུ་མངོན་རྟགས་དྲིས་ཏེ་རྟགས་ལ་མ་བབ་འཇིགས་ན་སྒོ་མི་དབྱེ། དགོན་པ་བས་ཁྱི་བཅང་དགོན་པ་པས་འཇིགས་པའི་ཕྱིར་ཁྱི་བཅང་ཡང་ཉེས་མེད། དེས་ནང་པར་ལངས་ནས་གཙུག་ལག་ཁང་དང་མཆོད་རྟེན་གྱི་བར་བལྟ། དགོན་པ་ལ་གནས་པའི་དགེ་སློང་གིས་ནང་པར་ལངས་ནས་གཙུག་ལག་ཁང་དག་གི་བང་ན་ཁྱིའི་གཅིན་རྟུག་ཡོད་དམ་མེད་བལྟ་དེ་སྟེ་བཤང་བ་བྱས་ན་དོར། ལྟག་མ་ལྟར་བལྟས་ཏེ་བཤང་གཅི་བྱས་ན་དོར། གཅིས་ན་དྲུད་དེ་སྡེར་མོས་དྲུད་ན་བསྙམས་ཁྱིས་གཅིས་ན་སས་དྲུད་དེ་བསྙམས། དེ་དག་གི་གནས་སུ་དཀྱིལ་འཁོར་བྱ། ལྟག་མ་ལྟར་ཁྱིས་གཅིས་པ་དང་བཤང་བ་གཉིས་ལ་བ་ལང་གི་རྙི་བས་དཀྱིལ་འཁོར་བྱ། ལྷུང་བཟེད་ཀྱི་ལྷག་མ་འདི་སྦྱིན། དགེ་སློང་ཟས་ཟོས་པའི་ལྷག་མ་ཁྱི་ལ་སྦྱིན། མཆོད་རྟེན་དང་གཙུག་ལག་ཁང་གི་མཚམས་ཀྱི་ཕྱི་རོལ་དུའོ། །ལྟག་མ་ལྟར་ཁྱི་ལ་ཟས་སྦྱིན་པ་ནི་གཙུག་ལག་ཁང་གི་མཚམས་ཀྱི་ཕྱི་རོལ་ཏུ་སྦྱིན། སྤྱོད་ལམ་ཅི་འདོད་པར་བསྟན་པ་སྦྱིན། སློབ་མས་མཁན་པོ་ལ་ཁ་ཏོན་ལྟ་བུ་ནོས་ནས་སླར་འབུལ་ཞིང་ནོད་པ་ནི་སྤྱོད་ལམ་བཞི་གང་སྤྱོད་ཀྱང་རུང་སྟེ་མནོད་དུ་རུང་ངོ༌། །ཁམས་མཉམ་པ་འམ་ཞེས་འདྲི་ཞིང་ཐོག་མར་ཕྱག་འཚལ་ཏེ་གསར་བུས་བླངས་པའི་ཕྱིར་སྤྱོད་ལམ་བྱ། ལྟག་མ་ལྟར་མཁན་པོ་ལ་ཁ་ཏོན་འཕུལ་ཞིང་ནོད་པའི་སློབ་མས་ཕྱག་
བྱས་ལ་བསྙུན་གསོལ་ནས་གུས་པའི་ཚུལ་དུ་བསྟི་སྟང་བྱས་ཏེ་ན་ཞེས་ཟེར་ན་ཅི་ན་བའི་ཆོ་ག་བྱ། མི་ན་ན་ཁ་ཏོན་འབུལ་ཞིང་མནོད། ཐལ་མོ་སྦྱར་ཏེའོ། །ཁ་དོན་ནོད་པའི་ཚེ་ཐལ་མོ་སྦྱར་ཏེ་གུས་པའི་ཚུལ་དུ་མནོད། །ལུས་དང་སེམས་བཏུད་དེའོ། །ཁ་ཏོན་ནོད་ཅིང་འབུལ་བའི་ཚེ་ལུས་བཏུད་དེ་གུས་པར་མནོད། དྲང་པོས་སོ། །ཁ་ཏོན་ནོད་པའི་ཚེ་མདུན་ནས་དྲང་པོར་མནོད། འཆག་ན་གོམ་པ་བོར་ཏེ་བཅག་ཅིང་ངོ༌། །མཁན་པོ་འཆག་ན་འགྲོ་བཞིན་ཁ་ཏོན་ནོད་ཅིང་དབུལ་ལོ། །ལངས་ན་འགྲེངས་ཏེའོ། །མཁན་པོ་འགྲེངས་ཏེ་འདུག་ན་བདག་ཀྱང་འགྲེངས་ཏེ་མནོད། འདུག་གམ་འཕྲེས་ན་འདུག་སྟེའོ། །མཁན་པོ་འདུག་གམ་འཕྲེས་ན་བདག་གིས་ཀྱང་འདུག་སྟ་མནོད་ཅིང་དབུལ། སྟན་དམའ་བ་ལས་སོ། །མཁན་པོ་ལས་ཁ་ཏོན་ནོད་པའི་ཚེ་བདག་སྟན་དམའ་བ་ལ་འདུག་སྟེ་མནོད། གཞོན་ནུ་ན་སྨྲས་སོ། །སློབ་མ་གཞོན་ནུ་ཞིག་ཐུག་ཐུབ་ཏུ་སྟན་ལ་འདུག་ཏུ་མི་དབང་གི་འདུག་ཤིག་ཅེས་བསྒོ་ན་འདུག །མ་སྨྲས་ན་ཙོག་ཙོག་པོར་རོ། །མཁན་པོས་སྟན་ལ་འདུག་ཤིག་པར་མ་བསྒོ་ན་ས་ལ་ཙོག་ཙོག་པོར་འདུག་གོ །མང་དུ་ལེན་ན་དྲིས་ཏེའོ། །སློབ་མ་ཁ་ཏོན་གྲངས་མང་མོ་ཞིག་ནོད་དེ་རིང་དུ་ཙོག་ཙོག་པོར་འདུག་མི་ནུས་ན་མཁན་པོ་ལ་སྟན་ལ་འདུག་གོ་ཞེས་དྲིས་ཏེ་འདུག །ཐོས་པའི་སྤྱོད་ཡུལ་སྤངས་ཏེ་ཁ་ཏོན་ནོ། །ཁ་ཏོན་སློབ་པ་མཁན་པོས་མི་ཐོས་པའི་ལམ་ཙམ་ན་འདུག་སྟེ་བསླབ། མིག་ལམ་དུ་གནས་ཏེའོ། །ཁ་ཏོན་སློབ་པ་མཁན་པོ་རྣ་བ་མི་ན་པ་ཙམ་དུ་མིག་ལམ་དུ་སྣང་བར་བྱས་ཏེ་འདུག །ཆ་མནོས་ནས་ཕྱོགས་ཅིག་ཏུ་སོང་སྟེ་བསྒྲུབ། མཁན་པོ་ལས་ཆ་མ་ནོད་དེ་ལང་ལོང་མེད་པའི་སར་འདུག་སྟེ་བསམ་གཏན་བྱ། རབ་ཏུ་བཏོན་རབ་ཏུ་མཚན་མར་བྱས་ཏེ་ཐེ་ཚོམ་མེད་པར་བྱས་ཏེ་ཆ་མནོས་པས་ཡང་ངོ༌། །ཁ་དོན་ནི་སློབ་པ་ཐགས་ཐོགས་མེད་པར་ཤེས་པར་བྱ་བ་དང་ལེའུ་གང་ལས་གར་ཐུག་པ་ཡིད་ལ་མཚན་མར་བཟུང་བ་དང་ཕྱིས་ཀྱང་མི་བརྗེད་པར་བྱས་ལ་ཕྱི་མའང་ཁ་ཏོན་མནོད། གཙུག་ལག་ཁང་དང་ཟས་སྐོམ་དང་ཐུག་པ་དང་བཅའ་བ་དང་འབྲས་བུ་འགོད་པ་བསྐོ། །མིང་གིས་སྨོས་པ་འདི་རྣམས་འགོད་པའི་དགེ་སློང་གསོལ་བ་དང་ཞུ་བ་གཉིས་ཀྱི་ལས་ཀྱིས་བསྐོ་དམ་པ་མ་ཡིན་པ་ཙམ་ཡང་ངོ༌། །ཁ་ཟས་ལ་སོགས་པ་མི་ཟ་བ་ཞིག་འགོད་ནའང་ལྟག་མ་ལྟར་
བྱས་ཏེ་དགེ་སློང་བསྐོ་ལྷག་མ་ཉི་མ་གཞན་ལ་བྲིམ་ཞེས་སོ། །ཡོན་བདག་གིས་དགེ་འདུན་ལ་མཆོད་སྟོན་བྱས་ཏེ་ཁ་ཟས་ལྷག་མ་ཞིག་འབུལ་ན་ཡང་བཟའ་བའི་ཕྱིར་སྡུད་པའི་དགེ་སློང་གཅིག་བསྐོ། སྣོད་སྤེད་པ་ཡང་ངོ༌། །དགེ་འདུན་གྱི་སྣོད་སྤྱད་བརྙར་སྦྱིན་པ་དང་སྡུད་བའི་དགེ་སློང་གཅིག་བསྐོ། དབྱར་གྱི་རས་ཆེན་གྱི་ཡང་ངོ༌། །དགེ་འདུན་སྤྱིར་དབྱར་གྱི་རས་ཆེན་མང་ཞིག་ཡོད་ན་ལོ་ཕྱི་མ་ལ་དགོས་པའི་ཕྱིར་དགེ་སློང་གཅིག་ལས་སུ་བསྐོ། དྲུབ་པའི་ཡང་ངོ༌། །དྲུབ་པ་གདིང་བ་པའི་སྲུང་མ་གཅིག་བསྐོ། གོས་ཀྱི་ཡང་ངོ༌། །ཡོན་བདག་དང་པས་དགེ་འདུན་ཡོན་མང་ཞིག་ཕུལ་ན་སྲུང་མ་གཅིག་བསྐོ། འགྱེད་པའི་ཡང་ངོ༌། །དགེ་འདུན་གྱི་གོས་འགྱེད་པའི་དགེ་སློང་གཅིག་བསྐོ། །རྫས་སྲུང་བའི་མངག་གཞུག་པ་ཡང་ངོ༌། །མངག་གཞུག་པ་ལ་སོགས་པ་བསྐོ་བའི་སར་བུ་རྒན་པོ་གཅིག་དང་གཙུག་ལག་ཁང་སྐྱོར་གཅིག་བསྐོ། སྣོད་སྲུང་བ་ཡང་ངོ༌། །དགེ་འདུན་གྱི་སྣོད་སྲུང་བའི་དགེ་སློང་གཅིག་བསྐོ། །འདིའི་ལས་ནི་འདྲི་མ་ཞིང་ཟོས་ན་སྦེད་པའོ། །ལྟག་མའི་སྣོད་སྲུང་བའི་དགེ་སློང་གིས་ཁར་གཞོང་གཡོག་ས་ཕོག་ལ་ཟས་ཟོས་ཟིན་ནས་བཀྲུས་ཏེ་སླར་དྲུབ། ཆུ་སྲུང་ཡང་ངོ༌། །ཆུ་འཆགས་པའི་སྤྱད་དང་གྲང་བ་དང་དྲོ་བ་ལ་སོགས་པའི་ཞལ་ཏ་བ་གཅིག་བསྐོ། མཛེས་པ་སྲུང་བ་ཡང་ངོ༌། །མཛེས་པ་བསྲུང་པའི་དགེ་སློང་གཅིག་བསྐོས་ཏེ་འོག་ནས་འཆད། དེས་བརྟག་ཅིང་ཐོག་མར་སེ་གོལ་གྱི་སྒྲ་བྱ་བ་དང་རབ་ཏུ་བྱུང་བ་དབྱིབས་ངན་པ་དང་སྟོན་པ་ལ་དབྱིབས་སུ་བསྐོ་བའོ། །མཛེས་པ་སྲུང་བ་ཡང་འདི་ཡིན་ཏེ། དགེ་སློང་གསར་བུ་དང་དགེ་སྦྱོང་ལ་སོགས་པ་སྤྱོད་ལམ་བཞི་ངན་ཅིང་གོས་ཀྱི་ཚགས་མ་ལེགས་པ་ལ་འདི་ལྟར་ལེགས་པར་གྱིས་ཤིག་ཅེས་བསྒོ། འདི་ལྟ་སྟེ། ཟས་ཀྱི་ཚེ་སྒྲ་བསྐྱངས་པ་དང་རབ་ཏུ་བསྡམ་པ་དང་རབ་ཏུ་གཡོགས་པ་དང་སྒྲ་བསྐྱུངས་ཏེ་མཆོད་རྟེན་ལ་ཕྱག་བྱ་བ་དང་ཅི་ལྟར་རྒན་རིམས་སུ་བྱའོ། །མཛེས་པ་སྲུང་བས་ཟས་ཟ་བའི་ཚེ་སྒྲ་བསྐྱུངས་ཤིག་པར་བསྒོ་བ་དང༌། ལུས་མགོ་བསྒྱུར་བ་དང༌། ལག་བརྐྱང་མི་བྱ་བ་དང་ཤམ་ཐབས་པུས་མོ་མི་འདའ་བ་དང་གོས་རྙིལ་བར་མི་བསྒོ་བ་དང་ཁ་ཟས་ཟ་བའི་ཚེ་ཡང་བྱིན་དང་མ་བྱིན་འོན་ཅིག་ཅེས་མི་བྱ་བ་དང་དུས་གསུམ་དུ་མཆོད་རྟེན་ལ་ཕྱག་འཚལ་བའི་ཚེ་སྒྲ་བསྐྱུངས་ལ་གྲལ་རིམས་
བཞིན་དུ་བསྒོ། ཁྱམས་སྲུང་པ་ཡང་ངོ༌། །ཁྱམས་སྲུང་བའི་དགེ་སློང་གཅིག་བསྐོ་སྟེ་འོག་ནས་འཆད། དེས་ཐོག་མར་ཟས་ལ་སྨྱག་མ་བླངས་ཏེ་བྱ་རོག་དང་བྱེའུ་དང་ཕུག་རོན་ལ་སོགས་པ་ཟ་བའི་ཚེ་བསྐྲད་ལྟག་མའི་ཁྱམས་སྲུང་ཞེས་བྱ་བ་དགེ་འདུན་ལས་སྔར་ཟན་ཟོས་ལ་དགེ་འདུན་བཤོས་གསོལ་བའི་ཚེ་བྱ་ལ་སོགས་པ་གན་དུ་མི་འོང་པར་བསྐྲད་ཅིང་བསྲུང༌། མལ་སྟན་སྲུང་བ་ཡང་ངོ༌། །དགེ་འདུན་གྱི་མལ་སྟན་བགོ་བ་བསྲུང་བ་དང༌། ཟླ་བ་ཕྱེད་ཕྱེད་ཙམ་ཞིང་རེས་ཀྱིས་བསྒོ་ཞིང་བསྲུང་བའི་དགེ་སློང་གཅིག་བསྐོ། །བྱི་བོའི་མལ་སྟན་སྲུང་བའོ། །དགེ་སློང་ལམ་དུ་ཞུགས་ན་ཤིང་དྲུང་ལྟ་བུར་གནས་བརྟན་དང་གསར་བུ་རྒན་པོ་གཞག་པར་བསྐོས་པའི་དགེ་སློང་གཅིག་བསྐོ། བརྟགས་པའི་མཆོད་རྟེན་དུ་འཇིག་རྟེན་འཇུག་པ་སྲུང་བ་ཡང་ངོ༌། །དགེ་སློང་འདུས་ཏེ་ཉ་དང་ཤ་ལ་སོགས་པ་བཟའ་བའི་ཚེ་ཁྱིམ་པས་མཐོང་ན་ཁ་ན་མ་ཐོ་བ་ཟེར་བའི་ཕྱིར་དགེ་སློང་གཅིག་སྒོ་སྲུང་དུ་གཞུག །མལ་སྟན་གྱི་དངོས་པོའོ། །འདི་ཡན་ཆད་མལ་སྟན་གྱི་དངོས་པོ་ལ་འཆད།། །།འདི་མན་ཆད་མལ་སྟན་གྱི་དངོས་པོ་ཕྲན་ཚེགས་པ་འཆད། མུན་པར་ཕྱག་འཚལ་བའི་གནས་སུ་ཕྱག་དང་བཅས་པའི་ཚིག་དབྱུང༌། མཚན་མོ་དགེ་འདུན་གྱི་གན་དུ་ཕྱིན་ན་མུན་པར་ཕྱག་བྱས་ན་ཉེས་བྱས་སུ་འགྱུར་བའི་ཐལ་མོ་སྦྱར་ཏེ་བཏུད་ལ་ཕྱག་འཚལ་ཞེས་ཚིག་བརྗོད། གཞན་དུ་སོང་སྟེ་མཚམས་སུ་ཕྱིན་ན་ཕྱག་མི་བྱ། དགེ་སློང་ཞིག་བདག་གི་གཙུག་ལག་ཁང་ནས་གུད་དུ་སོང་སྟེ་སླར་གནས་སུ་འོངས་ན་བདག་པས་རྒན་པ་ཐམས་ཅད་ལ་ཕྱག་བྱས་པ་བཞིན་པ་ནི་ཚངས་པའི་ཕྱག་གིས་སོ། །ལྟག་མ་ལྟར་དགེ་སློང་མང་སྟེ་རེ་རེ་ནས་ཕྱག་འཚལ་མི་ནུས་ན་གུས་པའི་ཚུལ་དུ་སྤྱིར་ཕྱག་བྱ། འཁོན་བྱུང་བ་ལ་ཕྱག་མི་བྱ། བདག་དང་འཁོན་ཡོད་པའི་དགེ་སློང་ལ་ཕྱག་མི་བྱ། ཕྱག་བྱས་ན་ཨ་རོག་གྱ་མི་བྱ་བར་མི་བྱ། བདག་དང་གཞོན་པ་དང་ཁྱིམ་པ་ཕྱག་འཚལ་ན་ཨ་རོག་གྱ་བྱ། ཕྱག་བྱས་བ་འདས་པ་ལའང་ཕྱག་མི་བྱ་བང་མི་བྱ། ཤཱ་རིའི་བུ་དང་མཽད་གལ་གྱི་བུ་ལ་སོགས་པ་མྱ་ངན་ལས་འདས་པའི་མཆོད་རྟེན་ནམ་བདག་གི་མཁན་པོ་ཚེ་འདས་པ་ལའང་མིང་ནས་བརྗོད་དེ་ཕྱག་བྱ། འབགས་པ་ལ་ཕྱག་མི་བྱ་སྟེ་འོག་ནས་འཆད། འབགས་པས་མ་ཡིན་ནོ། །གཅིག་འབགས་པ་ལ་གཅིག་མ་འབགས་
པས་ཕྱག་མི་བྱ། འདི་ཡིས་བདག་གིས་མི་བྱ། བདག་པས་ན་རྒན་པ་འབགས་པ་ལ་གཞོན་ནུ་མ་འབགས་པས་ཕྱག་མི་བྱ་སྟེ། བྱས་ཀྱང་རྒན་པོས་དགའ་བར་མི་བསམ་འབགས་པ་ལས་ཀྱང་ངོ༌། །གནས་བརྟན་ལྟ་བུ་མ་འབགས་པ་ཞིག་གིས་ཕྱག་འཚལ་ནའང་དགའ་བར་མི་བསམ་འབགས་པ་རྣམ་གཉིས་ཏེ་ཟ་བའི་ནི་སོ་ཤིང་ཡན་ཆད་དོ། །འབགས་པ་ཞེས་བྱ་བ་ནི་རྣམ་གཉིས་ཏེ་བདག་ཐོག་མར་ཟས་ཟོས་ནས་སོ་ཤིང་ཟོས་ཀྱི་བར་དུ་བདག་ཀྱང་པར་ཕྱག་མི་བྱ། ཕས་ཀྱང་ཕྱག་འཚལ་དུ་མི་གཞུག །མི་གཙང་བ་ནི་དེའི་ས་འཆོས་པ་ཡན་ཆད་དོ། །འབགས་པ་གཅིག་ནི་བཤང་གཅི་ཆེ་ཆུང་རྣམས་གཉིས་ཀྱི་བཀྲུ་བཤལ་མ་བྱས་ཀྱི་བར་དུ་ཕར་ཀྱང་ཕྱག་མི་བྱ། ཚུར་ཀྱང་ཕྱག་འཚལ་དུ་མི་གཞུག །འབགས་པ་དང་འདྲ་བ་ནི་འདིར་སྒྲེན་མོ་དང་གོས་གཅིག་པའོ། །འབགས་པ་དང་འདྲ་བ་ནི་ཁྱེད་རེངས་ལྟ་བུར་འདུག་པ་ལ་ཕར་ཀྱང་ཕྱག་མི་འཚལ། དེ་ལྟ་བུ་ཚུར་ཀྱང་ཕྱག་འཚལ་དུ་མི་གཞུག །ཕྱག་ནི་རྣམ་གཉིས་ཏེ་འཁོར་ལྔས་དང༌། བྱིན་པ་མནན་པ་དང་ཡང་ངོ༌། །ཕྱག་ལ་རྣམ་པ་གཉིས་ཏེ་གཅིག་ནི་ལུས་ས་ལ་གཏུགས་ཕྱག་འཚལ་བ་གཅིག་ནི་ཕ་རོལ་གྱི་རྐང་པ་ནས་བཟུང་སྟེ་ཕྱག་བྱ་བ་སྟེ། འདི་གཉིས་ནི་ཕྱག་ཏུ་གཏོགས། སྦྲིད་བ་བྱུང་ན་སོས་ཞེས་མི་བྱ་ཚེའི་མཐའ་བ་དང་ཁྱིམ་པ་མ་གཏོགས་ཏེའོ། །ཁྱིམ་པ་སྤྲིད་པ་བྱུང་བ་དང་དགེ་སློང་རྒན་པོ་ནད་པ་ལ་སོས་ཞེས་བྱས་ཀྱང་ཉེས་མེད། གསར་བུ་ལ་ཨ་རོག་གྱ་བྱ། བདག་པས་གཞོན་པའི་དགེ་སློང་དང་དགེ་སྦྱོང་སྦྲིད་པ་བྱུང་ན་ཨ་རོག་གྱ་བྱ། རྒན་པ་ལ་ཕྱག་བྱ། བདག་པས་རྒན་པ་སྦྲིད་པ་བྱུང་ན་ཕྱག་བྱ། སྦྲིད་པ་བྱུང་ནའོ། །གཞོན་ནུ་སྤྲིད་པ་བྱུང་ན་རྒན་པོ་ལ་ཕྱག་བྱ། ཡང་དག་པར་གཤེགས་པ་ལ་མིང་དང་རུས་དང་ཚེ་དང་ལྡན་པ་ཞེས་མི་བོད། ཡང་དག་པར་གཤེགས་པ་ལ་མིང་གིས་སྨོས་པ་འདི་རྣམས་སྐད་དུ་མི་བྱ། ཉེ་བའི་ཚིག་མེད་པར་མིང་དང་རུས་ནས་མི་བོད། །སངས་རྒྱས་ལ་སངས་རྒྱས་ཞེས་ཟེར་བའི་ཚིག་འབའ་ཞིག་མི་བྱའི་སངས་རྒྱས་བཅོམ་ལྡན་འདས་ཞེས་ཟེར་བ་ལྟ་བུའི་ཚིག་གཉིས་བྱ། རྒན་རབས་ལའང་མ་ཡིན། བདག་པས་རྒན་པ་ལ་བན་དེ་ཞེས་བྱ་བ་དང་དེའི་མིང་དང་གཉིས་ཐབས་ཅིག་ཏུ་བརྗོད། མཐུན་པ་ནི་གནས་
བརྟན་དང་ཚེ་དང་ལྡན་པ་ནི་ཉེ་བའི་ཚིག་གོ །གནས་བརྟན་ལ་བཙུན་པ་ཞེས་བྱ་སྟེ་འོག་མིན་ནས་བོད། འོག་མ་ལ་ཚེ་དང་ལྡན་པ་ཞེས་བྱ་སྟེ་མིང་ནས་བོད། དེ་ལྟར་མ་བྱས་ན་ཉེས་བྱས། སྔ་མ་ལས་མ་ཡིན། སངས་རྒྱས་འདས་པ་ལ་ཚེ་དང་ལྡན་པ་དང་བཙུན་པའི་སངས་རྒྱས་ཞེས་མི་བོད། འོང་པ་དང་འགྲོ་བ་འགྲུབ་པའི་དངོས་པོ་ལས་སར་པ་པ་གཙུག་ལག་ཁང་དུ་གཞག །དགེ་སློང་གིས་དགེ་འདུན་གྱི་ཕྱིར་གཙུག་ལག་ཁང་བརྩིག་ན་དགོན་པ་དང་དབེན་པར་མི་བརྩིག་གི་མི་མང་པོ་འདུ་ཞིང་ཕྱག་འཚལ་བའི་གནས་སུ་བརྩིག །ཚལ་དང་རྩིང་བུ་དང་བཅག་པ་ཡང་ངོ༌། །ལྟག་མ་ལྟར་གཙུག་ལག་ཁང་བརྩིག་པ་ནི་ཚལ་ཆུ་བཟང་པོ་དང༌། མེ་ཏོག་བཟང་པོ་དང་འཆག་པ་སྤང་བར་བྱ། ཉེ་མཚམས་ཀྱང་ངོ༌། །གཙུག་ལག་ཁང་གཅོང་རོང་དང་གད་ཁར་མི་བརྩིག་པར་བདེ་བར་བརྩིག །ལང་ལོང་དང་སྒྲ་དང་སྐད་དང་དབྱངས་ཉུང་བར་རོ། །མི་མང་པོ་འདུ་བའི་སར་གཙུག་ལག་ཁང་བརྩིག་པ་དང༌། སྤངས་ཤིང་དབེན་པ་གླུ་གར་དང་ཅ་ཅོ་ཉུང་བའི་སར་བརྩིག །སྦྱིན་བདག་གིས་གནང་ན་གཙུག་ལག་ཁང་བྱ་བའི་ཕྱིར་གྱི་དངོས་པོས་དེ་བྱ་བའི་དེའི་སྣོད་དུ་བྱ། གཙུག་ལག་ཁང་བརྩིག་པའི་སྟ་ཟོར་དང་གཞོར་སྤྱད་ཉོན་ཉེས་སམ་མ་ཉེས་ཞེས་དྲིས་ཏེ་མ་ཉེས་ཞེས་ཟེར་ནའོ། །དེ་གཞག་པའི་ཕྱིར་ཁུང་བུ་སྦྱིན། ལྟག་མའི་གཞོར་སྤྱད་མི་འཁྱམས་པའི་ཕྱིར་ཁང་བུ་གཉིས་བརྩིགས་ཏེ་སྤྱད་དེར་བྲུབ། དེར་མཁོ་བ་ཡུངས་མར་ལ་སོགས་པ་རན་པར་ཉོ། །ལས་མི་རྣམས་ཀྱི་རྐང་ལག་བསྐུ་བ་དང་འབྲེང་བ་དང་ཤིང་རྟའི་མིག་བསྐུ་བའི་མར་ཉོས་ཏེ་གཞག །ཅི་ལྟར་ཐོ་ངན་པ་དེ་ལྟར་ལས་སར་པའི་ཟས་སོ། །གཙུག་ལག་ཁང་བརྩིག་པའི་ཞལ་ཏ་བའི་དགེ་སློང་དགེ་འདུན་དང་ཟན་ཐང་མཉམ་པར་ཐོ་ངན་གྱིས་བསྙམས་ཤིང་སྦྱིན། གཙུག་ལག་ཁང་མེད་ན་དེའི་གནས་འཁོར་གྱི་གཙུག་ལག་ཁང་དུའོ། །གཙུག་ལག་ཁང་བརྩིག་པའི་དགེ་སློང་ལས་ཀྱིས་བྲེལ་ཏེ་དགེ་འདུན་ནང་དུ་མ་འོངས་ན་དགེ་འདུན་གྱིས་ཟན་ཐང་བཞིན་དུ་ག་ལ་འདུག་པར་བསྐྱལ་ཏེ་སྦྱིན། ཐོབ་ན་བླངས། ལས་པའི་དགེ་སློང་ལས་ཆེ་བའི་ཕྱིར་དགེ་འདུན་དང་ཡོན་བདག་གིས་ཕ་ལ་ཟན་བླངས་ཏེ་བྱིན་ཀྱང་བརྟགས་པའོ། །གཙུག་ལག་ཁང་གི་མཐའ་ནི་རིམ་ལྔའོ། །དགེ་སློང་གིས་གཙུག་ལག་ཁང་རྩིག་ན་སྙི་
བའི་ཕྱིར་རིམ་པ་ལྔ་རྩིག་ལས་མི་བརྩིག་གོ །དགེ་སློང་མའི་ནི་རིམ་གསུམ་མོ། །དགེ་སློང་མའི་གཙུག་ལག་ཁང་རིམ་གསུམ་ལས་མི་བརྩིག །དྲི་གཙང་ཁང་དང་སྒོ་ཕུབས་མི་གཉིས་ཀྱིས་ལྷག་པར་རོ། །དྲི་གཙང་ཁང་དང་སྒོ་ཕུབས་ནི་བསིལ་བའི་ཕྱིར་བདུན་བརྩེགས་སུ་འང་བརྩིག་ཏུ་རུང་ངོ༌། །ལྕི་སྟོ་མི་ཐུབ་ན་གཞག་པ་ནི་ཉེས་མེད་དོ། །གཙུག་ལག་ཁང་རིམ་ཞིག་བརྩིགས་ཏེ་ཀ་བ་དག་གིས་མི་ཐུབ་ན་བརྩག་མ་དང་པོ་གཞིག་ཀྱང་ཉེས་མེད་དོ། །བརྩམས་ལ་ཆེ་བར་རམ་ཆུང་བར་བཅགས་པ་ཡང་ངོ༌། །ཡོན་བདག་གིས་གཙུག་ལག་ཁང་ཞིག་དང་པོ་ཆུང་ངུར་བརྩིགས་པ་ལས་ཕྱིས་དད་པ་སྐྱེས་ཏེ་དེ་བཤིགས་ཏེ་ཆེར་བྱས་ཀྱང་རུང་ངོ༌། །ཆེན་པོ་ཞིག་བརྩམས་པ་ལས་རྒྱུ་ཟད་དེ་ཕྱིས་བསྐྱུངས་ཏེ་བརྩིགས་ཀྱང་ཉེས་མེད་དོ། །ཆེ་བའི་ཕྱིར་ན་མཆོད་རྟེན་དང་གཟུགས་ཀྱང་ངོ༌། །ལྕེ་ཏེའམ་སྐུ་བའི་གཟུགས་ཐོག་མ་ཆུང་དུར་བརྩིག་པར་བརྩམས་པ་ལས་དེ་ལས་ཆེར་བསྐྱེད་པའི་ཕྱིར་བཤིགས་ཏེ་ཆེར་བརྩིགས་ཀྱང་ཉེས་མེད་དོ། །ཞིག་སྟེ་འདྲང་བའི་ཕྱིར་ན་ཟིན་ཀྱང་ངོ༌། །མཆོད་རྟེན་རྙིང་པ་ཞིག་དེ་ཙམ་གྱི་ཚོད་ནམ་དེ་བས་ཆེ་བར་བྱ་བའི་ཕྱིར་བཤིགས་ཏེ་བྱས་ཀྱང་ཉེས་མེད། ཕྱོགས་བཅོས་པའི་ཕྱིར་ཀྱང་ངོ༌། །མཆོད་རྟེན་ནམ་གཟུགས་ཕྱོགས་གཅིག་རལ་ལམ་ཞིག་པ་དེ་ཉི་ཚེ་བཤིགས་ལ་སླར་བཅོས་ཀྱང་ཉེས་མེད། གདུགས་ལ་སོགས་པ་དབབ་པ་ཡང་ངོ༌། །ལྕེ་ཏིའི་འཕང་ལོ་རྙིང་པ་སླར་ཕབ་ལ་སར་པ་བཙུགས་ཀྱང་ཉེས་མེད་དོ། །བཤིགས་པའི་སྡིག་ཀྱང་ཉེས་མེད། གཞན་གཟུགས་པའི་ཕྱིར་ན་ཡང་ངོ༌། །ལྕེ་ཏིའི་གདུགས་དང་སྲོག་ཤིང་དང་འཕང་ལོ་མ་ལེགས་པ་སླར་ཕབ་ལ་ལེགས་པ་བཙུགས་ཀྱང་ཉེས་མེད་དོ། །དེའི་ཕྱིར་བ་ཉེ་བར་མ་བཞག་པར་མི་དབབ། ལྟག་མ་ལྟར་མཆོད་རྟེན་ནམ་གཟུགས་བཤིགས་པ་ནི་ཡོ་བྱད་ཐམས་ཅད་སོགས་ལ་གཞིག་གིས་མ་སོགས་པར་བཤིགས་ཏེ་ཕྱེད་རལ་དུ་མི་བསྡུ་བར་མི་དོར། སྐྱིས་པའི་རབས་ལ་སོགས་པ་བྲིས་པ་དང་སངས་རྒྱས་ཀྱི་ཚིག་བྲིས་པ་ཡང་ངོ༌། །མཛངས་བླུན་གྱི་རྒྱུད་བྲིས་པ་དང་ཞལ་ནས་གསུངས་པའི་ཚིག་རྩིག་པའི་ངོས་ལ་བྲིས་པ་དང་སླར་དེ་བཞིན་དུ་བརྩིག་ཅིང་བཅོས། རི་གང་བཅག་པ་འབོགས་པར་བྱ་བའི་ཕྱིར་ཀྱང་ངོ༌། །རི་མོ་དང་སྐྱོང་ནུལ་གོས་པ་ཞིག་ཡོད་ན་གང་དུ་བགོས་
པ་དེར་རི་མོ་དང་སྐྱོང་ནུལ་བཟང་དུ་བྱ། བྱ་བ་བརྩམས་ཏེ་མ་བྱས་པ་ལྷག་མ་གཞན་གྱིས་སོ། །དགེ་སློང་མ་ཡོན་བདག་གིས་གཙུག་ལག་ཁང་ཕྱེད་ཙམ་བརྩིགས་ནས་མ་ཟིན་པར་བོར་བ་ལ་དགེ་སློང་གིས་ཟིན་པར་བརྩིགས་ཀྱང་ཉེས་མེད། དེ་སྟེ་དགེ་འདུན་གྱི་ཕྱིར་ན་ཕྱེད་ལངས་པ་ལས་བསླབ་པ་སྦྱིན། དགེ་འདུན་གྱི་ཕྱིར་ཡོན་བདག་གིས་གཙུག་ལག་ཁང་ཕྱེད་ཙམ་ཞིག་བརྩིགས་པ་ལས་དགེ་སློང་གིས་གྲོགས་བྱས་ཏེ་ཟིན་པར་བརྩིགས་ཀྱང་ཉེས་མེད་དོ། །དེ་སྦྱིན་པའི་དུས་ནི་དེ་སྟེ་དགུན་ན་ཕྱི་དྲོའོ། །ལྟག་མ་ལྟར་ཡོན་བདག་གིས་གཙུག་ལག་ཁང་བརྩིགས་པ་དགེ་སློང་གིས་བཏང་བ་ནི་དགུན་གྲང་ན་ཕྱི་དྲོ་གཏང༌། དཔྱིད་ཚ་ན་སྔ་དྲོའོ། །དཔྱིད་ཚ་ན་སྔ་དྲོ་གཏང་ངོ༌། །ཟས་ཀྱི་བྱ་བའི་དུས་མ་ལུས་པར་རོ། །གཙུག་ལག་ཁང་སློང་བའི་དགེ་སློང་བསོད་སྙོམས་པ་ཡིན་པ་ཞིག་དུས་ལས་སྔར་བསོད་སྙོམས་ལ་འགྲོ། །གཙུག་ལག་ཁང་ཞིག་ན་དུས་པས་སྔར་བཟའ། སྟ་གོན་མ་བྱས་པར་བསོད་སྙོམས་ལ་མི་འཇུག །གཙུག་ལག་ཁང་བརྩིགས་པའི་དགེ་སློང་བསོད་སྙོམས་ལ་འཇུག་པའི་ཚེ། རྡུལ་དང་འཇི་བ་མེད་པར་བྱས་ཏེ་འགྲོ། །རྐང་པ་དང་ལག་པ་བཀྲུས་པ་ནི་དེའི་མཐའོ། །ལྟག་མ་ལྟར་བཀྲུ་བ་ལུས་ཀུན་བཀྲུ་མ་ནུས་ན་རྐང་ལག་བཞི་བཀྲུ། ནང་བར་ཟས་སར་པས་བསྐུལ། གཙུག་ལག་ཁང་བརྩིགས་པའི་དགེ་སློང་གིས་ཡོན་བདག་ལ་དགེ་སློང་གསར་བུས་ལས་བྱེད་པ་རྣམས་བཀྲེས་ཀྱིས་ནང་པར་གཡར་སུས་སྦྱིན་ནོ་ཞེས་བསྒོ། །ཕྱི་དྲོ་རྐང་ལག་གི་བསྐུ་བ་དང་སྐོམ་ཀྱང་ངོ༌། །ཡོན་བདག་ལ་ལས་བྱེད་པའི་དགེ་སློང་རྣམས་ལ་རྐང་ལག་ལམ་རལ་སོགས་པས་བསྐུ་བའི་རིགས་སོ་ཞེས་བྱ། ཁང་བུ་དག་གི་སྒོ་བྱ། གཙུག་ལག་ཁང་བརྩིགས་ན་ཁང་བུར་སྒོ་བྱ། སྒོ་ལེབ་སྦྱིན། སྒོ་ལ་སྒོ་ལེབ་སྦྱིན་ལག་གཟུངས་མང་མིག་དང་པགས་པའི་དུམ་བུའོ། །སྒོ་ལེབ་ལ་ནང་ནས་དྲང་པ་དང་ཕྱིར་གཅད་པའི་ལག་གཟུངས་དང་ཡང་མིག་དང་སྒོ་དབྱེ་བ་ཀྲིག་ཀྲིག་མི་ཟེ་བར་ཀོ་བས་དཀྲི། སྐར་ཁུང་གདོད། ཁང་བུ་ལ་སྐར་ཁུང་གདོད་དེ། དབུས་སུའོ། །སྐར་ཁུང་རྩིག་པའི་དབུས་སུ་གདོད། །ཕྱི་རུབ་ཅིང་ནང་ཡངས་པ་རྒྱ་མཚོ་མཆིང་རྣམས་ལྟ་བུར་རོ། །སྐར་ཁུང་གི་ཐབས་འདི་འདྲ་བར་བྱས་ན་སྣང་ཡེལ་ཆེ། ཤར་བུ་སྦྱིན། སྐར་ཁུང་ལ་ཤར་བུ་སྦྱིན།
སྒོ་ལེབ་དང་ཟུང་ང་དང་རྒྱབ་གཏན་དང་སྐེད་གཏན་དངར་རྐང་གི་དབྱུག་པ་བཅང༌། སྒོ་ལ་སྒོ་ལེབ་དང་སྒོ་མི་གྱེས་པའི་ལྕགས་ཀྱི་ཟུང་ང་དང་སྒོ་ལ་རྒྱབ་གཏན་ལ་སོགས་པ་མིང་གིས་སྨོས་པ་འདི་རྣམས་སྦྱིན། བཙེམ་པའི་གསོར་ཀྱང་ངོ༌། །སྐར་ཁུང་ཆར་བུ་ཅན་དུ་བྱས་ལ་ནང་དུ་མི་ཤོར་བར་བྱ་བའི་ཕྱིར་སྲད་བུའི་དྲ་བ་བྲེ། ཁང་བུའི་མདུན་དུ་ཁྱམས་བྱ། ཁང་བུ་བརྩིགས་པ་ནི་མདུན་དུ་ཁྱམས་སུ་བྱ། ཕ་གུ་བདུན་ནམ་བརྒྱད་གདིང་བ་སྦྱིན། སྒོ་སྐྱེས་མཐོ་སྟེ་ཁང་བུ་དང་ཁྱམས་དམའ་བ་མཉམ་པར་བྱ་བའི་ཕྱིར་གཞི་ཕ་གུ་གདིང༌། དེའི་སྟེང་ཤིང་ལེབ་ཀ་གཏན་དུ་གདིང༌། གཙུག་ལག་ཁང་གི་ཀ་བའི་གཞི་ཐོག་ཐག་ཏུ་གཞི་ཤིང་བཟང་པོ་གཅིག་བཞག་ལ་དེའི་སྟེང་དུ་ཀ་བ་གཟུགས། དེའི་ཀ་བ་ཕྲེང་དུའོ། །ལྟག་མའི་ཀ་པའི་ཕྲེང་དུ་གཟུགས། དེ་དག་ལ་ཀ་ཞུའོ། །ཀ་བ་དེ་རྣམས་ལ་ཀ་ཞུ་སྦྱིན། དེ་དག་ལ་གདུང་བྲེ། ཀ་བ་དང་ཀ་ཞུ་བཙུགས་པ་ལ་གདུང་བྲེ། དེ་དག་ལ་ཕྱམ་མོ། །དེའི་འོག་ཏུ་ཕྱམ་བྲེ། དེ་དག་ལ་སྤང་ལེབ་པོ། །ཕྱམ་གྱི་སྟེང་སྤང་ལེབ་གཞིབ། དེ་ལྟར་ཕ་གུ་གདིང༌། སྤང་ལེབ་ཀྱི་སྟེང་དུ་ཕ་གུ་གདིང༌། དེ་དག་ལ་སོ་ཕག་གི་ཕྱེ་མའོ། །ཕ་གུའི་སྟེང་དུ་སོ་ཕག་བཀྲུམ་པ་བདལ། མི་ལྟུང་བའི་ཕྱིར་བེ་ཏི་ཀ་བྱ། མི་ལྟུང་བར་བྱ་བའི་ཕྱིར་སྒོ་དང་ཁྱམས་ཀྱི་མདུན་དུ་མདའ་ཡབ་བྱ། དེ་མི་གཡོ་བའི་ཕྱིར་དེ་ལ་འབྲེལ་བ་བྱ། ལྟག་མའི་མདའ་ཡབ་མི་གཡོ་བར་ཤིང་གསེ་སྦྲེལ། ལྕགས་ཀྱི་གཟེར་བུས་དེ་དག་ལ་སྦྲེལ། དེའི་མདོར་མི་འཁྲུལ་པར་ལྕགས་གཟེར་གྱིས་གདབ། འཛེག་པའི་ཕྱིར་ཐང་མ་སྐས་བྱ། རིམ་ཀང་སྟེང་མ་ལ་འཛེག་པའི་ཕྱིར་ཐང་མ་སྐས་བྱ་འོག་མ་ནི་རྡོ་ལས་འོག་མའི་སྐས་ནི་རྡོ་ལས་བྱ། བར་མ་ནི་ཁམ་པ་ལས། བར་མའི་སྐས་ནི་ཁམ་པ་ལས་བྱ། སྟེང་མ་ཤིང་ལས་རིགས་གསུམ་གྱི་དང་པོའི་སྐས་ནི་ཤིང་ལས་བྱ། སྐས་ལ་འཛེག །ལྟག་མ་ལྟ་བུའི་སྐས་མེད་ན་ཤིང་ལ་ཟག་བས་བྲེས་པའི་སྐས་ལ་འཛེག །ཤིང་དང་སྨྱིག་མ་དང་ཐག་པའི་ཡང་ངོ༌། །ལྷག་མའི་སྐས་ཀྱི་རྒྱུ་ནི་མིང་གིས་སྨོས་པ་འདི་རྣམས་ལ་བྱ། རྫབ་ཏུ་མི་འགྱུར་བའི་ཕྱིར་མཐངས་ཀྱི་གཞི་དང་སྒོ་ཁང་དུ་ཕ་གུ་གདིང༌། སྒོ་ཁང་དང་ཁྱམས་ལ་སོགས་བ་རྫབ་ཏུ་མི་འགྱུར་བའི་ཕྱིར་གཞི་སོ་ཕག་གིས་གདིང༌། དེའི་སྟེང་དུ་
སོ་ཕག་གི་ཕྱེ་མས་གདིང༌། ལྟག་མའི་སོ་ཕག་གི་སྲུབས་སུ་སོ་ཕག་བཀྲུམ་པའི་ཕྱེས་བདལ། དེ་ལ་མདོ་ཡང་ངོ༌། །སྟེང་མའི་སོ་ཕག་གི་སྟེང་དུ་རྡོ་ཐལ་གྱིས་སྐྱོང་ནུལ་ཐོགས། མེད་ན་རྐང་པའི་སྐྱབས་ཀྱི་ཕྱིར་ཤིང་ལེབ་ཀྱང་ངོ༌། །ལྟག་མ་ལྟར་འདམ་རྫབ་ཀྱི་སར་སོ་ཕག་གིས་མ་བཏིང་ན་ག་ལས་གར་འགྲོ་བའི་སར་ཤིང་ལེབ་གདིང༌། བར་བར་དུ་ཕ་གུ་ཡང་ངོ༌། །ཤིང་ལེབ་གདིང་དུ་མེད་ན་སོ་ཕག་གིས་གོམ་པ་རེ་རེར་གཞག །མཆོད་རྟེན་ཀྱང་དེ་བཞིན་ནོ། །མཆོད་རྟེན་བསྐོར་བ་ན་འདམ་རྫབ་ཡོད་ན་ལྟག་མའི་རིམ་པ་ལྟར་གང་འབྱོར་པ་གདིང་ངོ༌། །དེར་འདོམ་ཙམ་བྱས་ན་བྱས་པའོ། །མཆོད་རྟེན་གྱི་དྲུང་དུ་ཤིང་དང་སོ་ཕག་གཞག་པ་འདོམ་གང་ཙམ་ནས་མི་ཉེ་བར་གཞག །སེང་གེའི་སྟན་གྲུ་བཞི་པོ་བྱ། བཅུ་བཞི་དང་བཅོ་ལྔའི་ཚེ་ཆོས་འཆད་པའི་ཁྲི་འོག་ཏུ་སེང་གེ་འདུག་ཏུ་རུང་བར་སྟེང་གྲུ་བཞི་པོར་བྱ། རྐང་པ་སེང་གེ་གདོང་དུ་བྱ། ལྟག་མའི་ཁྲི་འདུག་པའི་གཞི་རྐང་པ་སེང་གེ་བཞིའི་གཟུགས་བྱའོ། །སྤྲོ་བའི་ཚེ་གཟུང་བའི་ཕྱིར་གཞི་ཆར་བུ་ཡང་ལྕགས་ཀྱི་ཡང་མིག་གདགས། སེང་གེའི་ཁྲི་ཡན་མན་སྤོ་བའི་ཕྱིར་གྲྭ་བཞིར་ལྕགས་ཀྱི་ཡང་མིག་བཏགས་ཏེ་བསྐུར་དུ་རུང་བར་བྱ། གཤུར་བུ་གདགས། ཁྲིའི་སྟེང་གི་གཞི་སྣམ་བུ་སོར་བཞི་ཙམ་གྱིས་དྲ་བར་བྲེ། བར་ཚངས་ཅན་གདིང༌། དེའི་སྟེང་དུ་ཤིང་བལ་ཅན་གྱི་སྟན་གདིང༌། སྟེང་དུ་གནམ་ཡོལ། ཁྲི་སྟེང་ན་ཆོས་འཆད་པ་ལ་སྟེང་དུ་གནམ་ཡོལ་བྱ། སྦྱར་བ་ཡང་ངོ༌། །གྲྭ་བཞིར་འཕན་གདགས། ཐང་མ་སྐས་བྱས་ཏེ་མི་བསྐྱོད་ན་ཐག་བུ་ལས་སོ། །སེང་གེའི་ཁྲི་མི་བསྐྱོད་པར་གནས་གཅིག་ན་གཞན་སོ་ཕག་ལས་ཐང་མ་སྐས་བྱ། སྤོས་ཤིང་ལས་སོ། །ཡན་མན་སྤོང་དགོས་ན་ཤིང་སྐམ་འདོམ་གང་ཙམ་པ་བྱ། མི་འགྲུབ་སྐས་ཀྱང་ངོ༌། །སྐས་ཐང་མ་སྐས་མ་འབྱོར་ན་ཤིང་ལ་བྲེས་པའི་སྐས་བྱ། རྐང་པའི་ཁྲེའུ་ཡང་ངོ༌། །སེང་གེའི་ཁྲི་ལ་འདུག་པའི་ཚེ་རྐང་པ་གཞག་པའི་ཁྲིའུ་གཅིག་གཞག །མཆོད། སེང་གེའི་ཁྲི་ལ་འདུག་པའི་མདུན་དུ་མེ་ཏོག་དང༌། པོག་སྤོས་དགྲམ། ལོ་མའི་ཕུང་པོ་སྟེང་དུ་གདིང༌། ལྟག་མ་ལྟར་མེ་ཏོག་ལ་སོགས་པ་མཆོད་པ་མེད་ན་ཤིང་ལོ་སྔོན་པོ་དགྲམ། རྩྭ་ཐུམ་ཀྱང་ངོ༌། །རྐང་པ་གཞག་པའི་ཁྲིའུ་མེད་ན་ཁྲིའུ་སྐྱིན་པ་རྩྭ་ཐུམ་གཞག །རྐང་པ་འཕྱང་པའི་ཕྱིར་རོ། །
ལྟག་མ་ལྟར་རྩྭ་ཐུམ་མ་བཞག་ན་རྐང་པ་འཕྱང་སྟེ་ནང་དུ་འགྱུར་རོ། །དེར་རྡོས་ཀྱང་འགྲུབ་པོ། རྩྭ་ཐུམ་མེད་ན་སོ་ཕག་གམ་རྡོས་ཀྱང་ངོ༌། །བྱ་རོག་དང་བྱེའུ་དང་ཕུག་རོན་དག་ཟན་ཟ་བ་ལ་མི་འཚེ་བའི་ཕྱིར་དྲ་བ་སྦྱིན། ཁྱམས་ན་དགེ་འདུན་བཤོས་གསོལ་བ་ལ་མིང་གིས་སྨོས་པའི་བྱ་རྣམས་མི་འོང་བར་བྱ་བའི་ཕྱིར་དྲ་བས་བྲེ། དེ་རྣམ་པ་བཞི་སྟེ། དྲ་བའི་གཞི་རྣམ་བཞི་སྟེ་འོག་ནས་འཆད། མོ་ལ་ཛོ་དང་བལ་བ་ཟ་དང་ཤ་ན་ཤིང་བལ་གྱིས་ཞེས་སོ། །མིང་གིས་སྨོས་པ་འདི་རྣམས་ལས་དྲ་བའི་རྒྱུ་བྱ། གྲུ་བཞིར་ཡང་མིག་གདགས། ཁྱམས་ཀྱི་གྲྭ་དྲ་བ་གདགས་པའི་ཡང་མིག་བྱ། དེ་ལ་བཅིང༌། དྲ་བ་ཡང་མིག་ལ་གདགས། ཤིང་གི་ནི་རྒས་ཤིང་འདྲུལ་བས་དེའི་ཕྱིར་ལྕགས་ཀྱིའོ། །དྲ་བ་གདགས་པའི་མིག་ཤིང་ལས་བྱས་ན་སྙི་བའི་ཕྱིར་ལྕགས་ལས་བྱ། དེའི་ཕྱོགས་གཅིག་ཏུ་བུ་གུ་བྱ། དྲ་བའི་ཕྱོགས་གཅིག་ཏུ་སྒོ་གདོད། ཟོས་ནས་འཇུག་པའི་ཕྱིར་རོ། །དགེ་འདུན་བཤོས་གསོལ་ནས་ཟན་བྲུལ་ལ་པུག་རོན་ལ་སོགས་པ་ཐུར་གཞུག་པའི་ཕྱིར་སྒོ་དབྱེ། གདུག་ཚོད་ཀྱི་ཚེ་དེ་དགག །བཤོས་གསོལ་བའི་ཚེ་བྱ་མི་འོང་བའི་ཕྱིར་དྲ་བའི་སྒོ་གཅད། ཁྱམས་སུ་ཆར་པ་མི་འབབ་པར་ལེབ་ཁེང་པོས་དགབ་ཀ་བའི་བར་དུ་བྱའོ། །ཁྱམས་སུ་དགེ་འདུན་བཤོས་གསོལ་བའི་ཚེ་རྫི་ཆར་མི་འོང་བར་བྱ་བའི་ཕྱིར་ཕྱམ་དང་ཀ་བའི་བར་ནས་སྤང་ལེབ་ཀྱིས་གཡོགས། སྣང་བའི་ཕྱིར་ཕྱོགས་སུ་བཏང༌། ལྟག་མ་ལྟར་གཡོགས་པ་མུན་པ་གནག་ན་མདོ་མདོར་བུ་ག་གདོད། དེ་མེད་ན་ཀི་ཏ་ཀའམ་རེ་ལྡེས་སོ། །སྤང་ལེབ་ཀྱིས་གཡོག་ཏུ་མེད་ན་དཔར་རམ་རེ་ལྡེས་གཡོགས། དབྱར་གྱི་ཟླ་བ་བཞིའི་ཐ་མར་དབྱུང༌། དབྱར་ཟླ་བ་བཞི་འདས་ནས་དཔར་དང་རེ་ལྡེ་སླར་དབོག །བཀད་ས་ཟླུམ་པོ་བྱ། དགེ་འདུན་གྱི་བཀད་ས་ཟླུམ་པོར་བྱ། གནས་གྲང་བའི་ཕྱི་ལོགས་རྩིག་པ་སྦྱིན། བཀད་ས་གྲང་བའི་ཕྱིར་རྒྱབ་ཐོག་ཐག་ཏུ་རྩིག་པས་བསྐོར་ཀ་བ་ཕྲེང་དུའོ། །མདུན་ཐོག་ཐག་ཏུ་ཀ་བ་ཕྲེང་བར་གཟུགས་སྐར་ཁུང་གདོད། དགེ་སློང་གཉིས་གསུམ་ཙམ་འདུག་པའི་མདོ་མདོར་སྐར་ཁུང་གདོད། སྟན་གྱི་ཡང་ཐོག་དང་དེའི་འོག་ཏུ་མུ་མཉམ་པར་བྱ། ལྟག་མར་སྐར་ཁུང་གདོད་པ་ཧ་ཅང་མི་མཐོ་བར་སྟན་གོར་ཆད་ཙམ་ནས་ཡན་ཆད་དུ་གཟུགས། དྲ་བ་ཅན་དང་
སྒོ་ལེབ་གཞུག །སྐར་ཁུད་དེ་ལ་སྒོ་ལེབ་དང་དྲ་བས་བྲེ། བཟའ་བའི་དང་མེའི་དང་འདུ་བའི་དང་འཆག་པའི་གནས་བྱ། མིང་གིས་སྨོས་པ་འདི་རྣམས་ཀྱི་གནས་ཁང་བྱ། གློ་ཕྱོགས་ཞར་བར་གཡོགས་པ་བྱ། དགེ་སློང་གཙུག་ལག་ཁང་མ་ཟིན་གྱི་བར་དུ་རྩིག་པ་ལ་བཅར་ལ་སྟེང་རྩས་གཡོགས་པའི་ཁྱིམ་བྱས་ལ་དེར་གནས། ས་ཕུག་ཀྱང་བརྟགས་པའོ། །ཕུག་ན་གནས་ཀྱང་ཉེས་མེད། བ་གམ་ཀྱང་ངོ༌། །རྩིག་པའི་གློ་ལ་བ་གམ་འདྲ་བར་བྱས་ཏེ་སྟེང་གཡོགས་པའི་ཁུང་བུར་གནས་ཀྱང་ཉེས་མེད། ཁྱམས་བཞིན་དུ་དེང་བེ་རི་ཀའང་ཆུད་དོ། །རྩིག་པའི་བུ་གུར་ཤིང་བཅུག་ལ་ཤིང་གི་སྟེང་དུ་ཤིང་ལེབ་ཀྱིས་བྲེས་ཏེ་ཤིང་ལེབ་ཀྱི་མདོ་དང་ཀ་བ་གཉིས་སུ་མི་ལྟུང་བའི་ཕྱིར་ལྕགས་ཀྱི་གཟེར་བུས་གདབ། ར་བས་བསྐོར་བ་རབ་ཏུ་བྱུང་བའི་ཀུན་དགའ་ཡང་ངོ༌། །གཙུག་ལག་ཁང་གི་ཁོར་ཡུག་ཏུ་ར་བ་བརྩིགས་ནའང་ཉེས་མེད། རྩིག་པ་ལ་སྟོར་ཁུང་གདོད་པ་ཡང་ངོ༌། །ར་བ་ལ་ཆུ་འགྲོ་ཞིང་མི་འཁྱིལ་པའི་ཕྱིར་མདོ་མདོར་སྟོར་ཁུང་གདོད་དོ། །སབ་མོ་དང་འབོས་ཀྱིས་ཀྱང་ངོ༌། །ར་བས་གཙུག་ལག་ཁང་བསྐོར་བ་བཞིན་དུ་སབ་མོ་དང་འོབས་ཀྱིས་བསྐོར་ཀྱང་རུང་ངོ༌། །གང་ཟག་ལ་གཙུག་ལག་ཁང་འཁོར་དང་བཅས་པའོ། །ལྟག་ཏུ་གཙུག་ལག་ཁང་བརྩིག་པའི་རྣམས་ལྟ་བུར་ཡོན་བདག་གཅིག་གིས་ཐམས་ཅད་བརྩིགས་ཏེ་དགེ་སློང་གཅིག་ལ་ཡོན་དུ་ཕུལ་བའང་ལེན་དུ་དབང་ངོ༌། །ཐམས་ཅད་སྔོན་པོ་ལ་སོགས་པའི་མཚན་མ་མངོན་སུམ་པའི་ཕྱིར་མལ་ཁང་གི་རྩིག་པ་སྔོན་པོ་ལ་སོགས་པ་སྣ་བཞིར་བྱ། དགེ་སློང་བསམ་གཏན་བྱེད་པ་ལ་ལ་སེར་པོ་ལ་དམིགས་ལ་ལ་དཀར་པོ་ལ་དམིགས་ལ་ལ་དམར་པོ་ལ་དམིགས་ལ་ལ་སྔོན་པོ་ལ་དམིགས་པས་བདག་གིས་ཉལ་ཁང་ངོས་བཞིར་ཚོན་སྣ་བཞིས་བསྐུས་ལ་དགེ་སློང་མཚན་མ་གང་ལ་དམིགས་པ་དེ་ལ་བསམ་གཏན་བྱེད་ཅིང་བསྒོམ། རབ་ཏུ་བྱུང་བའི་ཀུན་དགའ་བྲིས་པའང་བརྟགས་པའོ། །ར་བ་དང་ཁྱམས་ལ་སོགས་པའང་རི་མོ་འདྲིར་གནང་བའོ། །སྒོར་གནོད་སྦྱིན་བྲིས་ཏེ་ལག་ན་རྡོ་རྗེ་ལ་སོགས་པ་ཐོགས་པའོ། །དགེ་སློང་སོ་སོའི་ཁྱིམ་བུའི་སྒོ་གཡས་གཡོན་དུ་གནོད་སྦྱིན་གྱི་གཟུགས་བྲིས་ལ་ལག་ན་རྡོ་རྗེའམ་མཚོན་ཆ་ཐོགས་པ་བྲིས། སྒོ་ཁང་དུ་འཁོར་བའི་འཁོར་ལོ་རྒྱུད་ལྔ་བྱ། གཙུག་ལག་ཁང་
སྒོའི་ཁང་དུ་ལམ་རྒྱུད་ལྔར་འཁོར་བའི་འཁོར་ལོ་བྲིས། ལྟག་ཏུ་ལྷ་དང་མིའོ། །ལམ་རྒྱུད་ལྔ་ལ་སྟེང་དུ་ལྷ་དང་མི་བྲི། འོག་ཏུ་ངན་སོང་གསུམ་བྲི། གླིང་བཞི་ཡང་ངོ༌། །ལྟག་ཏུ་མིའི་ཁམས་བྲི་བར་གླིང་བཞིའང་དེར་བྲི། རྫུས་ཤིང་སྐྱེ་བའི་སེམས་ཅན་འཁོར་ལོ་ཆུ་ཆུན་བཞིན་དུ་འཁོར་ཞིང་སྐྱེ་བ་ཡང་ངོ༌། །འཁོར་ལོ་རྒྱུད་ལྔ་བྲིས་པའི་འཁོར་ཡུག་ཏུ་རྒྱུ་རྐྱེན་བཅུ་གཉིས་སྐྱེ་ཞིང་འཁོར་བའི་རྒྱུད་བྲི། འདོད་ཆགས་དང་ཞེ་སྡང་དང་གཏི་མུག་དབུས་སུ་ཕུག་རོན་དང་སྤྲུལ་དང་ཕག་ལྟ་བུར་རོ། །འཁོར་ལོ་དབུས་སུ་འདི་གསུམ་གྱི་གཟུགས་བྲིས་ཏེ་ཕུག་རོན་ནི་འདོད་ཆགས། སྦྲུལ་ནི་ཞེ་སྡང་ཕག་ནི་གཏི་མུག་གོ །གླེན་པས་སྔ་མ་དག་མིད་པ་ལྟ་བུར་རོ། །ལྟག་མ་ལྟར་བྲིས་པ་ལ་ཕག་གིས་ཕུག་རོན་དང་སྦྲུལ་གཉིས་མེད་པ་ལྟར་བྱས་ཁ་གཞག །རྐྱེན་དུ་འཚོགས་ཏེ་བྱུང་བའི་ཡན་ལག་ཁོ་ར་ཁོར་ཡུག་ཏུའོ། །མ་རིག་པ་ནས་རྒ་ཤིའི་བར་དུ་འཁོར་བའི་རྒྱུད་ཡི་གེར་བྲིས། དེ་དག་ཐམས་ཅད་མི་རྟག་པས་མིད་པ་ལྟ་བུའོ། །གནོད་སྦྱིན་ལྟ་བུའི་གཟུགས་ཤིག་བྲིས་ལ་དེ་ཁམས་གསུམ་དང་ལམ་རྒྱུད་དྲུག་ཐམས་ཅད་མིད་པ་ལྟ་བུར་བྱ། ཡ་རོལ་དུ་སངས་རྒྱས་མྱ་ངན་ལས་འདས་པའི་དཀྱིལ་འཁོར་དཀར་པོ་མངོན་པར་སྟོན་པར་རོ། །འཁོར་ལོའི་ལྟག་ཏུ་སངས་རྒྱས་ཀྱི་གཟུགས་ཤིག་བྲིས་ལ་དེའི་གཡས་ཕྱོགས་སུ་དཀྱིལ་འཁོར་ལ་སྟོན་པ་དང་འདྲ་བ་བྲིས་ཏེ་སུ་འཁོར་བ་ལས་འདའ་བར་འདོད་ན་འཕགས་པའི་ལམ་བརྒྱད་སྦྱངས་ན་མྱ་ངན་ལས་འདའ་བའི་ལམ་འདིར་འགྲོའོ་ཞེས་བསྟན་པ་འདྲ་བར་བྲི། ཚིགས་སུ་བཅད་པ་ཚོལ་ཅིག་ཅེས་པ་དང་གཉིས་འོག་ཏུའོ། །སངས་རྒྱས་བཞུགས་པའི་དྲུང་ན་མར་སོ་སོར་ཐར་པའི་སྨད་དྲ་ལ། རྩ་ཁྱིམ་པ་ལ་གླང་གིས་ས། །ཞེས་བྱ་བའི་ལོགས་གཉིས་བྲིས་ཏེ་གཞག་དེར་འཆད་པ་གཞག །དེ་རྣམས་འཆད་པའི་དགེ་སློང་གཅིག་བསྐོས་ཏེ་རྟག་པར་གཞག །དེའི་འཁོར་དུ་རྫུ་འཕྲུལ་ཆེན་པོ་དང་བདུད་བཏུལ་བ་དག་གོ །འཁོར་ལོའི་འཁོར་དུ་སངས་རྒྱས་དུ་ཤི་ཏ་ནས་བབས་ནས་རྫུ་འཕྲུལ་ཆེན་པོ་བྱུང་སྟེ་བདུད་བཏུལ་བ་བྲིའོ། །ཁྱམས་སུ་སྐྱེ་བའི་རྒྱུད་དོ། །ཁྱམས་ཀྱི་ངོས་ལ་མཛངས་བླུན་གྱི་རྒྱུད་ཞིབ་ཏུ་བྲི། དྲི་གཙང་ཁང་གི་སྒོ་ཁར་གནོད་སྦྱིན་ཕྲང་བ་ཐོགས་
པའོ། །དྲི་གཙང་ཁང་གི་སྒོ་གཡས་གཡོན་དུ་གནོད་སྦྱིན་ལག་ན་མེ་ཏོག་གི་ཕྲེང་བ་ཐོགས་ཏེ་མཆོད་པ་འདྲ་བར་བྲི། འདུ་བ་གནས་བརྟན་ཕྲེང་དུའོ། །དགེ་འདུན་བཤོས་གསོལ་བའི་བཀད་སར་གནས་བརྟན་ཀཽཎྜི་ནྱ་དང་ཤཱ་རིའི་བུ་ལ་སོགས་པ་ཕྲེང་བར་བྲིས་ཏེ་གཞག །མཛོད་ཀྱི་སྒོར་ལག་ན་དབྱུ་གུ་ཐོགས་པའི་གནོད་སྦྱིན་ནོ། །མཛོད་ཀྱི་སྒོ་གཡས་གཡོན་དུ་གནོད་སྦྱིན་གྱི་ལག་ན་རིན་པོ་ཆེ་སྔོན་པོ་འབར་བ་འདྲ་བ་ཐོགས་པ་བྲི། མཆོད་རྟེན་གྱི་བཀད་སར་ལག་ན་ཟས་ཐོགས་པའོ། །རྟག་པར་མཆོད་སྟོན་བྱ་བའི་སྒོ་གཡས་གཡོན་དུ་ལག་ན་ཁ་ཟས་སྣ་ཚོགས་ཐོགས་ཤིང་འདྲིམ་པ་འདྲ་བ་བྲི། ཁྲུས་ཁང་དུ་མྱུ་གུ་དང་བུམ་པ་དང༌། མེ་བུད་པའི་གྲུལ་བུམ་བྲི། ཁྲུས་ཁང་གི་སྒོ་གཡས་གཡོན་དུ་རིན་པོ་ཆེའི་མྱུ་གུ་ཐོགས་པ་དང་ཆུ་བུམ་པ་དང་ཆུ་བསྲོས་པ་འདྲ་བ་བྱས་ལ་གྲུལ་བུམ་མེ་འབུད་པ་འདྲ་བ་བྱ། མེ་ཁང་དུ་འབྱིན་པ་ལ་སོགས་པ་བྱེད་པ་དང་མེ་འབུད་པའི་གྲུལ་བུམ་གྱི་བུ་དང་སྦྱིན་བདག་མེ་མར་ཐོགས་པ་དང་ལྷའི་ཕོ་ཉ་ཡང་ངོ༌། །བསྲོ་གང་གི་གཡས་གཡོན་དུ་གཙུབ་མ་ལས་མེ་འབྱིན་པ་དང་འདྲ་བར་མིང་གིས་སྨོས་པ་འདི་རྣམས་འདྲ་བ་བྲི་བ་དང་ལྷའི་ཕོ་ཉ་ཞེས་བྱ་བ་ནི་མི་གཅིག་བཙོན་དུ་བཟུང་ལ་གཤིན་རྗེའི་མདུན་དུ་ཞལ་ཅེ་གཅོད་པ་འདྲ་བ་བྲི། རྒྱན་སྣ་ཚོགས་ཀྱིས་བརྒྱན་བུམ་པ་ལག་ན་ཐོགས་པའི་ཀླུ་དང་ཀླུའི་བུ་མོ་ཆུ་འདྲིམ་པ་དྲུང་ཚང་དུའོ། །དྲུང་ཚང་གི་སྒོ་གཡས་གཡོན་དུ་ཆུ་འདྲིམ་པ་དང་ཆུ་སྐྱེད་པ་ལྟ་བུ་བྲི། ནད་པ་ལ་བརྟགས་པའི་ཁང་པ་ཡང་དག་པར་གཤེགས་པ་ནད་གཡོག་མཛད་པར་རོ། །སྨན་ཁང་གི་སྒོར་ནད་པ་ཁྲི་ལ་ཉལ་བ་འདྲ་བར་བྲིས་ལ་སངས་རྒྱས་ཀྱིས་ནད་གཡོག་བྱེད་པ་འདྲ་བར་བྲི། བཤར་གཅིའི་ཁང་བུར་དུར་ཁྲོད་དང་མི་ཐོད་དོ། །བཤང་གཅིའི་ཁུང་བུའི་ནང་གི་ངོས་ལ་དུར་ཁྲོད་ན་མི་ཕལ་མོ་ཆེ་ཤིང་ཞིག་ཀེང་རུས་ཁྲོད་པར་བྲིས་ལ་བཤང་གཅིའི་ཚེའང་དེ་བལྟས་ན་མི་གཙང་བར་བསྒོམ། བླ་གབ་མེད་པ་མ་ཡིན་པའི་གཙུག་ལག་ཁང་དུ་མེ་དུ་བ་ཅན་མི་བྱ་བ་མི་གཙང་བ་ཡང་ངོ༌། །གཙུག་ལག་ཁང་སྟེང་གཡོགས་པར་མེ་མི་བུད་བུས་ན་ཉེས་བྱས། སྟེང་མ་གཡོགས་པར་བུས་པ་ནི་ཉེས་མེད། གཏར་བཏང་བ་ལ་ཐམས་ཅད་དོ། །མེ་འབུད་པའི་གཞི་ངོ་མཚར་ལྟ་བུར་བཟང་པོ་ཞིག་ཡིན་ནས་མ་རུང་བར་འགྱུར་བའི་ཕྱིར་བླ་གབ་མེད་ཀྱང་མེ་འབུད་
དུ་མི་གནང་ངོ༌། །དེའི་ཕྱིར་ཞུགས་ཐབ་བཅའ། ལྟག་མ་ལྟར་ས་བཟང་པོ་ལ་གྲང་བའི་རྐྱེན་གྱིས་མ་མི་འབུད་དུ་མི་རུང་ན་ལྕགས་ཀྱི་ཞུགས་ལིང་གི་སྟེང་དུ་མེ་བུད། བསྡུ་པའི་ཕྱིར་ལྕགས་ཀྱི་ལ་ཡུ་བ་ཅན་བྱའོ། །མེ་བསྡུ་བའི་ཕྱིར་ལྕགས་ཀྱི་ཐལ་ཕྱགས་ཡུ་བ་ཅན་བཅང༌། ནུས་པའམ་ཤིང་གིས་ཀྱང་དེའི་དོན་དུ་འགྲུབ་པོ། །ལྕགས་ཀྱི་ཐལ་ཕྱགས་མེད་ན་ཤིང་ལེབ་དང་རུས་པས་མེ་བསྡུར་རུང་ངོ༌། །གཙུག་ལག་ཁང་སྐྱོང་གིས་གཙུག་ལག་ཁང་ཉིན་རེ་བཞིན་ཕྱགས། གཙུག་ལག་ཁང་སྐྱོང་གིས་ཉིན་རེ་བཞིན་གཙུག་ལག་ཁང་ཕྱགས་པ་དང་ཆག་ཆག་དང་དཀྱིལ་འཁོར་བྱ། མི་ནུས་སྤྱད་པའི་ཚེའི་ཕྱོགས་སུའོ། །གཙུག་ལག་ཁང་སྐྱོང་གིས་ལྟག་མ་ལྟར་ཐམས་ཅད་བྱི་དོར་བྱེད་མི་ནུས་ན་ཆོས་འཆད་པ་དང་འདུ་བ་དང་བཤོས་གསོལ་བའི་ས་ཉི་ཚེ་བྱ། ལྷག་མ་ནི་བརྒྱད་དམ་བཅུ་བཞི་དང་བཅོ་ལྔའི་ཚེ་དགེ་འདུན་ཐམས་ཅད་གཎྜཱི་བརྡུངས་པ་ལ་ཆོས་ཀྱི་གཏམ་མམ་བསྲིངས་པ་མི་སྨྲ་བས་སོ། །གཙུག་ལག་ཁང་སྐྱོང་གིས་ལྟག་མ་ལྟར་ཉི་ཚེ་བྱས་ཏེ་ཐམས་ཅད་བྱེད་མ་ནུས་ན་བཅུ་བཞི་དང་བཅོ་ལྔའི་ཚེ་དགེ་འདུན་ཐམས་ཅད་འདུས་ནས་ཕྱག་དང་ཆག་ཆག་དང་དཀྱིལ་འཁོར་བྱ། དེ་ལྟར་བྱ་བའི་ཚེ་གཏམ་འཁྱལ་པ་དང་འཇིག་རྟེན་གྱི་གཏམ་སྣ་ཚོགས་མི་བྱ་བར་དོན་ལ་དམིགས་ཤིང་ལས་བྱ། ཆོས་འཕེལ་བའི་ཚེ་ཆག་ཆག་དང་ཤིན་ཏུ་འཇམ་པོའི་བ་ལང་གི་ལྕི་བའི་སྐྱོང་ནུལ་བྱ་ཡོན་བདག་གཙུག་ལག་ཁང་དུ་མཆོད་སྟོན་བྱེད་པའམ་མང་པོ་འདུས་ཤིང་ཆོས་འཆད་པའམ། དཔྱིད་ཟླ་འབྲིང་པོའི་ཚེས་བདུན་ལ་སངས་རྒྱས་ཡུམ་གྱི་ལྷུམས་ནས་བལྟམས་ཏེ་མངོན་པར་བྱང་ཆུབ་པ་དང་དུས་འདི་རྣམས་ཀྱི་ཚེ་གཙུག་ལག་ཁང་བྱི་དོར་བྱ། མཇུག་ཏུ་བཀྲུ་འམ། ལྟག་མ་ལྟར་ལས་བྱས་ནས་ལུས་ལ་རྡུལ་ཆགས་པ་བཀྲུ། རྐང་ལག་བཀྲུ། ལུས་བཀྲུ་མ་ནུས་ན་རྐང་ལག་བཀྲུས་པས་ཆོག །ལུས་ཆུས་བརླན་ཏེ་ཕྱི་ལུས་དང་གདོང་ལ་ཆུས་བཏབ་སྟེ་ཐལ་མོའམ་རས་མས་ཕྱི་སྣུམ་འཐོབ་པར་བྱ། ལྟག་མ་ལྟར་ཆག་ཆག་དང་ལས་བྱེད་པའི་ཚེ་དགེ་འདུན་ཐམས་ཅད་བཤོས་བཟང་པོར་བྱ། དཀོན་མཆོག་གི་ཕྱིར་ཕྱུང་ཞིང་ཕྱགས་པ་དང༌། དྲི་གཙང་ཁང་དང་གཟུགས་དང་མཆོད་རྟེན་གྱི་སྲོག་གི་གྲིབ་མ་ལ་ཞལ་ནས་གསུངས་པའི་ཚིགས་སུ་བཅད་པ་བཀླགས་ཏེ་རྒལ། དཀོན་
མཆོག་གསུམ་གྱི་ཕྱིར་ཆག་ཆག་དང་མཎྜལ་ལ་སོགས་པ་བྱེད་པའི་ཚེ་མིང་གིས་སྨོས་པ་འདི་རྣམས་གྲིབ་མ་ལ་འགོང་སྟེ་མི་འགྲོར་མི་རུང་ན་ཞལ་ནས་གསུངས་པའི་ཚིགས་བཅད་ཀླགས་ཏེ་འགྲོ། །མལ་སྟན་ཡང་དེ་དག་གི་ཉིན་མོ་བརྟགས་ཤིང་གནས་པས་བཅོས། ལྟག་མའི་མཆོད་སྟོན་བྱ་བ་དང་སངས་རྒྱས་བལྟམས་པའི་ཉི་མ་ལ་མལ་སྟན་བསྐམ་པ་དང་སྤྲུག་པ་དང་རལ་ཞིང་ཆད་པ་ལ་སོགས་པ་བཅོས། གདབ་ཅིང་བྱུག་པ་དང་ཤིན་ཏུ་འཇམ་པའི་བ་ལང་གི་ལྕི་བའི་སྐྱོང་ནུལ་གནས་པའི་དངོས་པོར་བྱ། བཅུ་བཞི་དང་བཅོ་ལྔའི་ཚེ་དགེ་སློང་གང་ཟག་གིས་གནས་ཁང་ཡང་མིང་གིས་སྨོས་པ་འདི་རྣམས་དང་ཕྱག་དར་དང་ཆག་ཆག་བྱ། མལ་སྟན་བརྟུལ་པ་སྤྲུག །དགེ་སློང་གང་ཟག་གི་མལ་སྟན་ལ་རྡུལ་ཆགས་ན་སྤྲུག །དེ་སྟེ་ཤིན་ཏུ་ན་བཀྲུ། ལྟག་མ་ལྟར་སྤྲུགས་ཏེ་ཡང་རྡུལ་མ་སོང་ཞིང་དྲི་མ་ཡོད་ན་བཀྲུ། ཆག་ཆག་བཏབ་པའི་སྟེང་དུ་ཕྱགས་ཏེ་དེ་དག་གདིང༌། ས་ཕྱགས་ཏེ་ཆག་ཆག་བྱས་ཏེ་སྟན་བཏིང་ལ་དེར་ཉལ་བར་བྱ། གཞི་མ་སྤྲུགས་པ་རྡུལ་ཅན་ལ་མ་ཡིན། རེ་ལྡེ་ལྟ་བུ་ལ་རྡུལ་ཡོད་པ་ན་རེ་ལྡེའི་སྟེང་ན་རྡུལ་ཡོད་ན་རྡུལ་མ་སྤྲུགས་པར་སྟན་མི་གདིང༌། གདིང་བ་ལ་སོགས་གཅིག་སྤྲུག་པར་བསྐོ། །བདག་གི་མལ་སྟན་ལ་རྡུལ་ཡོད་ན་རས་ཡུག་གཅིག་གིས་རྡུལ་སྤྲུག ། ངན་པས་སོ། །ལྟག་མ་ལྟར་རྡུལ་སྤྲུག་པ་ནི་རས་ངན་པ་ལས་བྱ། དེ་བཅོས། རས་ངན་པ་དེར་རལ་ན་བཙེམ། མི་ནུས་ན་བཤད་དེ་ཤིང་བུ་ལ་བཅིངས་ཏེ་སྤྲུག་བཙེམས་ཏེ་ཡང་སྤྱད་དུ་མ་བཏུབ་ན་ཤད་ཤད་པོར་དྲས་ཏེ་ཤིང་ལ་བཅིངས་ཏེ་སྤྲུག །དེ་ལྟ་བུར་ཡང་མི་རུང་ན་ལྕི་བ་དང་འཇིབ་བསྲེས་ཏེ་ཀ་བའམ་རྩིག་པགས་པར་བྱུགས། ལྟག་མ་ལྟར་བྱས་ཏེ་རྙིངས་ཏེ་སྤྱད་དུ་མི་རུང་ན་ཡོན་བདག་དད་པས་བྱིན་པ་ཡོན་བདག་བསྐྱེད་པའི་ཕྱིར་འཇི་བ་དང་བསྲེས་ཏེ་གཙུག་ལག་ཁང་རྡོལ་བར་གླན། བྱིན་པའི་བསོད་ནམས་རིང་དུ་སྤེལ་བའི་ཕྱིར་རོ། །ལྟག་མ་ལྟར་འཇི་བ་དང་བསྲེས་ཏེ་སྐྱོང་ནུལ་བྱ་བ་སེར་སྣའི་ཕྱིར་བྱ་བ་མ་ཡིན་གྱི་ཡོན་བདག་གི་ཡོན་རིང་དུ་སྤེལ་པའི་ཕྱིར་བྱ། སྒོ་ཁང་དུའམ་ཁྱམས་སུ་མལ་བཅའ་བར་མི་བྱ། སྒོ་གང་དུ་དགེ་སློང་ལངས་པའི་ཕྱིར་ཉལ་བའམ། མལ་སྟན་དེར་མི་གཞག་སྒྲ་ངན་པ་ཟེར་བའི་རྐྱེན་དུ་བརྒྱད་དང་བཅུ་བཞི་ལ་ཁྱམས་སུའོ། །དགེ་སློང་གིས་མལ་སྟན་ཀུན་བཙོངས་ཏེ་
ཟོས་སོ་ཞེས་འཕྱ་བའི་ཕྱིར་བཅུ་བཞི་དང་བཅོ་ལྔའི་ཉིན་པར་ཁྱམས་སུ་ཕྱུང་སྟེ་བསྐམ་པ་དང་སྤྲུག་པ་དང་ཐབས་ཀྱིས་ཁྱིམ་པ་ལ་བསྟན། དགེ་སློང་ཁྲི་དང་ཁྲིའུ་བཅང༌། དགེ་འདུན་དང་གང་ཟག་གིས་ཁྲི་དང་ཁྲིའུ་བཅངས་ཀྱང་ཉེས་མེད། ཏར་ཏར་བ་མ་རུང་བར་མི་བྱ་བའི་ཕྱིར་རྐང་པའི་འོག་ཏུ་ཟླུམ་པོར་གཅད་པར་བྱ་བའམ། ཕུབ་མའི་ཐུག་བུའི་སྟེང་དུ་གཞག་གམ་དར་དཀྲི། གཙུག་ལག་ཁང་གི་ས་གཞི་བཟང་པོ་ལ་འགོག་པའི་མི་སྡུག་པར་འགྱུར་བའི་ཕྱིར་ཁྲིའུ་དང་རྐང་བཞི་ལ་སོགས་པ་རྩིབས་མི་རྣོ་བ་དང་ཕུབ་མའི་སྟེང་དུ་གཞག་གམ་ཞབས་ར་དས་དཀྲིས་ལ་ས་མི་སྣད་པར་བྱ། དགེ་འདུན་མ་ཡིན་པས་ཁྲིའུ་རྐང་པ་བྲིས་པ་བདག་གིར་བྱ་ཞིང་མི་སྤྱད། དགེ་སློང་གསུམ་གསུམ་མན་ཆད་གང་ཟག་ལ་ཡོན་བདག་གིས་ཁྲི་དང་ཁྲིའུ་རྐང་པ་མདའ་ཚོན་གྱིས་བྲིས་པ་ཡོན་དུ་ཕུལ་ན་ལེན་དུ་མི་གནང་ངོ༌། །དགེ་འདུན་ནི་དབང་ངོ༌། །དགེ་འདུན་ཁྲི་བཟང་པོ་དང་རྒྱབ་རྟེན་དང་བཅས་པའང་མ་ཡིན་ཁྲི་མཐོན་པོ་དང་ཁྲི་རྒྱབ་རྟེན་རང་འཁྲུགས་སུ་འདུག་པ་བཟང་པོ་གང་ཟག་ལ་ཡོན་བདག་གིས་བྱིན་ན་ལེན་དུ་མི་དབང་ངོ༌། །འཆང་ཤ་མེ་མར་གྱི་ཤིང་ཡང་མ་ཡིན་གང་ཟག་གིས་ཁྲི་དང་མེ་མར་གྱི་ཤིང་དང་ལྕགས་ཀ་མང་པོ་མི་བཅང༌། ཡལ་ཀ་དུ་མ་པོ་ཞེས་གཞན་ལས་སོ། །གང་ཟག་གིས་མེ་མར་གྱི་སྣོད་ཡང་འཆང་དུ་མི་གནང་བ་ནི་མ་ཡིན་གྱི་ཁ་ཅིག་པ་བཅང་དུ་དབང་ངོ༌། ཆོངས་ཤིག་པར། བར་ཚངས་ཅན་དང་སྔགས་ཁབ་གྲུ་བཞི། དགེ་འདུན་ནམ་གང་ཟག་གི་མལ་སྟན་གྱི་གཞི་དང་སྟན་གོང་བུའི་བར་ཤིང་བལ་གྱིས་བཙངས་པ་བཅངས་ཀྱང་ཉེས་མེད། བཞི་དང་གཉིས་པ་རིམ་གཉིས་སུ་བྱས་ཏེ་བསྟེན། ལྟག་མའི་སྟན་གྲུ་བཞི་ཞེང་དུ་ཁྲུ་དོར་བྱས་ལ་སྲིད་གཉིས་སུ་བལྟ་བ་གྲུ་བཞིར་འགྱུར་གྱིས་དེ་ལྟར་བྱ། ཤིང་བལ་གྱིས་དགང༌། སྟན་གྲུ་བཞིའི་ནང་ཤིང་བལ་གང་ཡང་རུང་བས་དགང༌། མལ་སྟན་མ་བརྟགས་པར་ཉལ་བ་མ་ཡིན། ནུབ་མོ་ཉལ་ཀར་མལ་བྱ་བའི་གཞི་སེམས་ཅན་ཡོད་དམ་མེད་བརྟགས་པ་དང་ཕྱི་རོལ་ཆེ་ཆུང་ལྟ་བུར་ཟར་བ་ལས་ཕྱིར་ལོག་ན་སྟན་གྱི་སྟེང་ཅི་ཡོད་བརྟགས་ལ་ཉལ། དྲན་པ་ཉེ་བར་མ་བཞག་པར་ཡང་མ་ཡིན་ནུབ་མོ་ཉལ་བའི་ཚེ་སེང་གེ་ཉལ་སྟབས་བཞིན་དུ་བྱས་ལ་སང་ཡང་སྔར་ལྡང་ངོ་སྙམ་དུ་བསམས་ཏེ་ཉལ། གཞན་
དང་ལྷན་ཅིག་ཏུ་ཁྲིའམ་བཏིང་བ་གཅིག་གམ་གཞན་ལ་ཡང་མ་ཡིན་ནོ། །དགེ་སློང་ནང་ཁྲི་དང་སྟན་ལ་སོགས་པའི་སྟེང་དུ་མཐང་སྦྱར་ཏེ་མི་ཉལ་བརྟགས་པ་ནི་མེད་ལ་ཁྲེལ་ཅན་ན་གདིང་བ་སོ་སོར་བཏིང་ན་བར་དུ་གཏུར་བུ་དང༌། ལྷུང་བཟེད་ཀྱི་སྣོད་བཞག་ལ་དྲན་པ་ཉེ་བར་གཞག་སྟེའོ། །དགེ་སློང་ཡན་མན་དུ་ཡུལ་རྒྱུ་བ་ལ་སོགས་ཀྱིས་བྲེལ་པར་གྱུར་ན་ལྷན་ཅིག་ཏུ་ཉལ་དུ་རུང་སྟེ། གཅིག་ལ་གཅིག་མི་རེག་ཅིང་ཁྲེལ་བའི་ཚུལ་དུ་བྱས་ལ་གདིང་བ་སོ་སོར་བཏིང་སྟེ་ལུས་གཉིས་མི་ཕྲད་པར་བྱ་བའི་ཕྱིར་བར་དུ་གཏུར་བུའམ་ལྷུང་བཟེད་ཀྱི་སྣོད་ལྟ་བུས་འཆད་དེ་གཉིད་རིང་དུ་མི་ལོག་པ་དང་མི་རེག་པའི་ཚུལ་དུ་སེམས་དྲན་པ་ཉེ་བར་གཞག་སྟེ་ཉལ། གསུམ་ཡན་ཆད་འདུ་ཞིང་ཁྲི་ལ་འཛེག་པར་སྤྱད་པ་མ་ཡིན། ཁྲི་ལ་དགེ་སློང་གསུམ་ལས་མང་དུ་ལྷན་ཅིག་མི་འདུག་འཆག་པའི་ཕྱིར་རོ། །ཁྲིའུ་རིང་པོ་ལ་གཉིས་ལས་མ་ཡིན། ཁྲིའུ་ཕྲ་མོ་རིང་པོ་ལ་མི་གཉིས་ལས་མང་དུ་མི་འདུག །ཐ་མལ་པ་ལ་དུ་མ་མ་ཡིན། ཁྲིའུ་ཆུང་དུ་གྲུ་བཞི་ལ་མི་གཅིག་ལས་ལྷག་པར་མི་འདུག་པར་ལོ་གསུམ་པ་དང་དེ་དང་ལྷན་ཅིག་ཏུ་སྟན་ལ་མ་ཡིན། དགེ་སློང་ནང་ལོ་མ་ལོན་པ་དང་ལོ་གསུམ་ལོན་པ་མན་ཆད་ནི་སྟན་གཅིག་ལ་འདུག་ཏུ་རུང་ངོ༌། །བར་དུ་ལོ་གསུམ་གྱིས་ཆོད་ན་གནས་བརྟན་མན་ཆད་གང་ཡང་སྟན་གཅིག་ལ་འདུག་ཏུ་རུང་ངོ༌། །ལོ་བཞི་ལོན་ན་ལྷན་ཅིག་ཏུ་འདུག་ཏུ་མི་རུང་ངོ༌། །གྲོང་བར་དུ་མཁན་པོ་དང་ཡང་སྟན་མེད་ན་དྲན་པ་བཞག་སྟེ་སྤྱད། དགེ་སློང་རྒན་གཞོན་འདྲེས་པར་གྲོང་དུ་སོང་པ་ལ་ཡོན་བདག་སྟན་གཅིག་ལས་མ་བཏིང་ན་མཁན་པོ་མན་ཆད་གང་ཡང་རུང་སྟེ་སྟན་ལ་འདུག་ཏུ་རུང་ངོ༌། །ཁང་བུའང་ཁྱིམ་པ་དང་མ་ཡིན། གཙུག་ལག་ཁང་ཡང་རུང་གྲོང་ཡང་རུང་ཁྱིམ་པ་དང་སྟན་གཅིག་ཏུ་མི་འདུག །རབ་ཏུ་མ་རྫོགས་པ་དང་མ་ཡིན་ནོ། །དགེ་སློང་དང་སྟན་གཅིག་ཏུ་མི་འདུག །མ་ནིང་དང་ཟ་མ་དང་མ་བསད་པ་ལ་སོགས་པ་དང་མུར་འདུག་དང་མུར་འདུག་ཏུ་འཇུག་པ་དང༌། རྐུན་གནས་དང་སོ་སོར་གནས་པ་དང༌། མི་གནས་པ་དང་མ་ཡིན། མིང་གིས་སྨོས་པ་འདི་རྣམས་དང་སྟན་གཅིག་ལ་མི་འདུག །སློབ་པ་མི་བྱིན་པ་དང་མ་ཡིན། ཚེ་གཅིག་གི་བར་དུ་སློབ་པ་བྱིན་པ་ནའང་སྟན་གཅིག་ལ་མི་འདུག་དྲིའུ་རྔོག་ཐམས་ཅད་དང་རབ་ཏུ་རྫོགས་པ་དང་དགེ་འདུན་འདུས་པ་ལས་གཞན་དུ་
ན་སྟན་ནོ། །དགེ་འདུན་མང་དུ་འདུས་པའི་ཚེ་དྲིའུ་རྔོག་ལྟ་བུ་སྟན། འདྲ་བ་མང་ཞིག་བཏིང་ན་དེའི་ཚེ་ནི་གནས་བརྟན་ལོ་བརྒྱ་མན་ཆད་དེ་རིང་ཁྲིམས་རྫོགས་ཡན་ཆད་སྟན་གཅིག་ལ་འདུག་ཀྱང་ཉེས་མེད་དགེ་སློང་དང་ནི་མི་དབང༌། སྟེགས་བུ་ནི་མ་ཡིན་ནོ། །ས་སྟེགས་སམ་ཤིང་ལེབ་བམ་རྡོའི་སྟེང་ན་ནི་ཁྱིམ་པ་དང་ལྷན་ཅིག་ཏུ་རུང་ངོ༌། །དོག་ཅིང་གློ་བུར་བྱུང་ན་ལྷུང་བ་མེད། བཅུ་བཞིའམ་བཅོ་ལྔའི་ཚེའམ་སྟན་མེད་དེ་གཅིག་གི་སྟེང་དུ་གཅིག་འདུག་པ་ཙམ་དུ་དོག་ན་དེའི་ཚེ་དགེ་སྦྱོང་དང་ལྷན་ཅིག་ཏུ་འདུག་ཏུའང་རུང༌། མལ་སྟན་སྤེད་ན་གཉིས་ལས་གཅིག་ལས་ཁྲིའམ་ཁྲིའུ་འོ། །མལ་སྟན་ཞིག་གནས་གཅིག་ནས་གནག་ཏུ་ཁྲི་དང་བཅས་ཏེ་སྤོས་ན་ཁྲི་ཡང་སྟེ་མི་བསྐུར་བར་གཅིག་གིས་གོས་བསྡུས་ལ་གཅིག་གིས་ཁྲིའུ་བསྐུར་རོ། །གཞན་གྱིས་བར་ཚངས་ཅན་ལ་སོགས་པའོ། །འདི་དགེ་འདུན་གྱི་ན་སྙིང་མི་བར་མི་དྲང་མི་བརྩེ་བར་མི་དྲང་མི་བཤལ། ལྟག་མ་འདྲ་བར་དགེ་འདུན་གྱི་མལ་སྟན་བསྐྱ་ན་སྒོ་ལ་མི་ཤོང་དུ་མི་གནང་བར་དྲག་ཤུལ་མི་བྱ་བར་བག་ཡོད་པར་དལ་གྱིས་མ་རལ་བར་བྱ་ཞིང་བསྐྱ། ཇི་ལྟར་དེ་དུ་བ་དང་དྲི་མ་དང་རྡུལ་གྱིས་རེག་པར་འགྱུར་བ་དེ་ལྟར་མ་ཡིན། དགེ་འདུན་གྱི་མལ་སྟན་དུ་བ་དང་དྲི་མ་དང་རྡུལ་ལ་སོགས་པས་མ་རེག་པར་ནན་བྱ། འདི་མི་གཙང་བའི་ཁང་བུ་དང་ཉེ་བར་སྤྱད་པར་མི་བྱ། དགེ་འདུན་མལ་སྟན་བཤང་གཅིས་ལྟ་བུར་མི་བསྐུར་མི་སྤྱད་དེར་མི་གཞག །མ་རུང་བར་བྱས་ཏེ་དོར་བར་མི་བྱ། དགེ་འདུན་གྱི་མལ་སྟན་ཞིག་སྟེ་མེད་ཀྱང་རུང་དོར་རོ་སྙམ་མི་བསམ། བསྲད་སྐམ་སྤྲུག་རྡོལ་བར་ལྷན་པར་སྦྱིན། དགེ་འདུན་གྱི་མལ་སྟན་མིང་གིས་སྨོས་པ་འདི་རྣམས་ལྟར་ནན་ཏན་བྱེད་ཅིང་རིམ་གྲོ་བྱ་བ། གས་ན་ཤུར་བུས་སོ། །མལ་སྟན་གས་ན་སླར་བཙེམ་སྟེ་ཐད་ཀ་ཐད་ཀར་སྲ་བར་སྣམ་བུས་གཟུངས་བྱ། དབུས་ཟད་མཐའ་དབུས་སུ་བྱ། སྟན་སྤྱད་སྤྱད་དེ་དབུས་རྡོལ་ན་སྐྱེད་དུ་འཆད་དེ་དབུས་གཉིས་ཐ་མར་བཏང་ལ་ཐ་མ་གཉིས་དབུས་སུ་བཏང་ན་སྲ་པར་འགྱུར། རིགས་ན་བཙོ། །གོས་དྲི་མ་ཁྱེར་རམ་ཁ་དོག་ཡལ་ན་སླར་བཀྲུས་ཏེ་བཙོ། །སླར་བཙོས་པར་མི་ནུས་ན་མེ་མར་གྱི་སྙིང་པོར་བསྐོས་ཏེ། དཀོན་མཆོག་གི་སྦྱོར་བའམ་གང་ཟག་གི་སྦྱིན་པ་དག་ལ་ཡང་ངོ༌། །དགེ་འདུན་ལ་དད་པའི་ཡོན་བདག་གིས་མལ་སྟན་སྦྱིན་
པ་སྤྱད་སྤྱད་དེ་རྙིངས་ནས་སྤྱད་དུ་མི་རུང་བར་གྱུར་ན་སྟེ། དཀོན་མཆོག་གསུམ་གྱི་སྤྱན་སྔར་མེ་མར་དུ་བུད་གང་ཟག་ཆོས་ཀླད་པའི་མེར་མར་དུ་བྱས་ཀྱང་ཉེས་མེད། དེར་ཡང་མི་མཁོ་ན་འཇི་བ་དང་རྩིག་པ་འམ་ཀ་བའམ་སྒོའམ་དཀོན་མཆོག་གི་ལ་བསྐུས་ཏེ་འདི་དེ་ལྟ་བུའི་ནན་ཏན་གྱིས་སོ། །ལྟག་མ་ལྟར་མེ་མར་གྱི་རྒྱུར་ཀྱང་མི་རུང་ན་བ་ལང་གི་ལྕི་བ་དང་བསྲེས་ཏེ་རྩིག་པ་དང༌། སྒོ་ལ་སོགས་པ་རལ་ཞིང་བུ་ག་ཡོད་པར་གླན། དགོས་ནས་བཅངས་པས་སོ། །ལྟག་མ་ལྟར་དགེ་འདུན་གྱིས་མལ་སྟན་བཙོ་ཞིང་བཅོས་པ་ལ་སོགས་པ་དང་ཐ་མ་རྩིག་པ་ལ་གླན་པའི་བར་དུ་བྱ་བ་ནི་མལ་སྟན་སུ་སྤྱོད་སྤྱོད་པའི་གང་ཟག་གིས་བྱ། ལྟག་མ་དགེ་འདུན་གཎྜཱི་བརྡུངས་ལ་འདུས་ཏེའོ། །ལྟག་མ་ལྟར་མ་དགོས་ཤིང་སྤྱི་ལ་འདུག་པ་ལས་རུལ་ཏམ་མ་རུལ་བར་གྱུར་ན་དགེ་འདུན་ཐམས་ཅད་འདུས་ཏེ་བ་ལང་གི་ལྕི་བ་དང་སྦྱར་ལ་ལྟག་མ་ལྟར་བྱ། དགེ་འདུན་གྱིས་བརྐུས་པ་མཐོང་སྟེ་མི་ཟློགས་པར་མི་བྱ། དགེ་འདུན་གྱི་ནོར་རྫས་ཅིའང་རུང་སྟེ་རྐུན་པོས་ཁྱེར་རམ་ཕྱུགས་ཞིག་ཞིང་ལས་བཟའ་བར་གྱུར་ན་དགེ་སློང་གིས་མཐོང་བས་སྐོད་ཅིག །བསྔགས་ན་དགེ་འདུན་གྱི་ལ་གཡེལ་བར་མི་བྱ། དགེ་འདུན་གྱི་ནོར་རྫས་ལ་རྐུན་པོ་ཞིག་འོངས་ཏེ་ནོར་རྐུན་བདག་དང་དགེ་འདུན་གྱི་འདྲ་མི་སྟོར་བར་ནན་ཏན་བྱ། གནས་སུ་མ་ཕྱིན་པར་ཁྱེར་བས་སྤྱད་པར་བྱ། ལྟག་མ་ལྟར་དགེ་འདུན་གྱི་མལ་སྟན་དང་རྫས་རྐུན་པོས་ཁྱེར་བ་ལས་བདག་གིས་མ་བཏང་སྟེ། བདག་གིས་གཙུག་ལག་ཁང་གཞན་དུ་ཁྱེར་བའི་ཚེ་ལམ་ན་སྤྱད་པ་ལས་ཉེས་མེད་དོ། །བདག་གི་གནས་སུ་བསྐུར་བར་མི་འགྲུབ་ཀྱི་བར་དུ་གནས་གཞན་དུ་སྤྱད་པར་སྤྱོད་ཅིག །ལྟག་མ་ལྟར་མལ་སྟན་ལ་སོགས་པ་གཙུག་ལག་ཁང་གཞན་དུ་ཁྱེར་བ་བདག་གཅིག་གཙུག་ལག་ཁང་རྐུན་པོས་མ་ཞི་བའི་བར་དུ་མལ་སྟན་དེ་ལ་སྤྱད་ཀྱང་ཉེས་མེད། གནས་གཞན་གྱི་ཟས་དང་ཡོ་བྱད་དང་རྙེད་པ་གནས་གཞན་དུ་སྤྱད་པར་མི་བྱ། བདག་གཙུག་ལག་ཁང་གཅིག་གི་རྐྱེན་ལ་གཏོགས་པ་དེ་ནས་ཟས་དང༌། གོས་དང་མལ་སྟན་བླངས་ལ་གནས་གཞན་དུ་ཁྱེར་ཏེ་མི་སྤྱད་དོ། །དེ་ལ་དེ་ལྟར་མི་སྦྱིན། ལྟག་མ་ལྟར་གཙུག་ལག་ཁང་གཞན་དུ་ཁྱེར་བ་ལས་དགེ་འདུན་གྱིས་མི་རྐུ། ཁྱེར་ན་འབུལ་དུ་གཞུག །ལྟག་མ་ལྟར་དགེ་འདུན་
གྱིས་བསྒོ་སྟེའང་མ་བཏུབ་སྟེ་ཁྱེར་ན་ཇི་ཙམ་ཁྱེར་བ་སྐྱིན་པ་དགུག །མེད་ན་སྦྱིན་པས་སོ། །ལྟག་མ་ལྟར་སླར་འབུལ་དུ་གཞུག་པ་ཁོ་ན་ལ་ནོར་ཡོད་མེད་དབུལ་དུ་མི་བདོག་ན་མཐོང་ངམ་ནས་དགེ་འདུན་ཐོག་མ་སུས་ཟས་བྱིན་པ་ལའང་འབུལ་དུ་གཞུག །ཁ་ན་མོ་ཐོ་བ་མེད་བ་ན་བདག་གི་གཙུག་ལག་ཁང་གི་དགེ་འདུན་གྱི་སྐལ་པ་མི་དགོས་པ་རྩྭའམ་ཤིང་སྤྱད་ཀྱང་ངོ༌། །དགེ་སློང་གཅིག་གམ་གཉིས་སམ་གང་ཡང་རུང་བས་བདག་འཚོ་བ་ཐམས་ཅད་དགེ་འདུན་དང་ལྷན་ཅིག་དབང་བ་ལས་དགེ་འདུན་ལ་མི་དགོས་པའི་རྩྭ་དང་ཤིང་ཙམ་གང་གིས་སྤྱད་པ་ནི་ཉེས་མེད་དོ། །གཞན་ཐུག་ཐུབ་ཅིའང་བྱར་མི་རུང་ངོ༌། །ཇི་ལྟར་རྒྱུད་དུ་མ་བསྐོས་བར་འཁོར་ཞིང་སྤྱོད་པ་ཇི་ལྟར་རྒན་རིམས་ཀྱིས་མ་ཡིན་ནོ། །དགེ་འདུན་སྤྱིའི་ཟངས་དང་རྫ་མ་དང་སྟ་རེ་དང་སྟེའུ་ལ་སོགས་པ་ཡོ་བྱད་ཅིའང་རུང་སྟེ། དགེ་སློང་གཅིག་སྤྱོད་ཅིང་འདུག་པ་ལ་ང་རྒན་གྱིས་ཚུར་འོང་གཅིག་ཅེས་མི་བྱ། ལྷན་ཅིག་ཏུ་བསླང་ན་ནི་དེ་ལྟར་རོ། །དགེ་འདུན་ལ་སྨན་བརྡུངས་པའམ་ཟངས་ལ་ཚོན་བཙོ་བ་ལ་གཉིས་ཀ་ཚོན་བཙོ་བ་ཡིན་ནའང་ལས་ལྷན་ཅིག་བྱ། གཉིས་ཀ་སྨན་གྱི་ལས་བྱེད་ནའང་ཐབས་ཤིག་བདུན་ལས་སོ་སོར་བྱེད་ན་རྒན་རིམས་སུའོ། །དེས་བརྩམས་པ་ལ་འབྲལ་བར་མི་བྱ། ཟངས་སམ་གཏུན་ལྟ་བུ་དགེ་སློང་གཅིག་སྤྱོད་པར་རྩོམ་ཞིང་འདུག་པ་ལ་ཁྱོད་ཀྱི་རྫས་འོར་ལ་སྤྱད་པ་ལ་འོན་ཅིག་ཅེས་མི་བྱ། རྐང་པ་ཆུས་བརླན་ཏེ་འཁྲུ་བ་དེར་རོ། ཆོལ་ཟངས་སུ་རྐང་པ་འཁྲུ་བའི་ཚེ་གནས་བརྟན་ཞིག་ན་རེ་ཆོལ་ཟངས་འོན་ཅིག་ཅེས་ཟེང་ན་རྐང་པ་ཆུས་མ་གཤེར་ན་སྦྱིན། གཤེར་ན་རྐང་པ་བཀྲུས་ཏེ་སྦྱིན། ཁང་བུར་ནི་ཞུགས་ན་དེར་རོ། །ཕྱི་རོལ་གྱི་ཁང་བུ་དང་དགེ་སློང་གཞོན་ནུ་སྔར་འགྲོ་བར་བརྩམས་པ་ལ་རྒད་པོ་ཕྱིས་འོངས་ཏེ་ང་འགྲོ་སྟོད་ཅེས་མི་བྱ། ཆོག་བུ་པ་ནི་འདུག་པ་ལས་མི་བསླང༌། ཁང་བུའི་ནང་ན་དགེ་སློང་བསམ་གཏན་བྱེད་ཅིང་འདུག་པ་ལ་ཁྱོད་ལངས་ཏེ་ཕྱིར་སོང་ཞེས་མི་བྱ། འདིར་ཅི་ལྟར་རྒན་རིམས་སུ་མ་ཡིན། བསམ་གཏན་བྱེད་པའི་གནས་སུ་རྒན་གཞོན་གང་ཡང་རུང་གང་སྔ་སྔ་བབ་བབ་ཏུ་འདུག་ཀྱང་ཉེས་མེད་དོ། །ཟས་དང་ལས་བརྩམ་པ་ལ་དགེ་སློང་གིས་མ་ཡིན། དགེ་སློང་གཞོན་ནུ་སྟན་མཐོན་པོ་ལ་འདུག་སྟེ་ཟས་བཟའ་བར་བརྩམས་པ་ལས་དགེ་
སློང་རྒན་པོ་ཕྱིས་བརྩམས་ཏེ་ཁྱོད་ལངས་ང་འདུག་ཅེས་མི་བྱ། གྲལ་མ་ཡིན་པར་མི་འདུག །གྲལ་ཐབས་ལས་གོང་དུའང་མི་འདུག་འོག་ཏུའང་མི་འདུག་པར་བདག་བདག་གི་གྲལ་དུ་འདུག་གོ །བྱ་བ་བྱས་ལ་འདོད་པ་ཡོད་ན་འཁོར་ཞིང་སྤྱད་པ་བཅང་བར་མི་བྱ། དགེ་སློང་གིས་ཟངས་ལ་སོགས་པའི་སྣོད་གཅིག་དགེ་འདུན་སྤྱིའི་ལ་བདག་གིས་གོས་ལྟ་བུ་བཅོས་ཟིན་ན་རྟག་པར་མི་གཞག་གིས་སུ་དགོས་པ་ལ་སྦྱིན་ནོ། །སྐབས་ཀྱི་མཚན་གྱི་དོན་དུ་དེའི་སྟན་བཏིང་བ་ལ་བྱས་པ་མ་བྱས་པའོ། །དགེ་སློང་གིས་གོས་ཤིག་ལན་ཅིག་ཚོན་དུ་བཅུག་སྟེ། བསྐམ་དུ་བཅུག་ལ་ཕྱིས་ཡང་ཚོན་དུ་གཞུག་དགོས་ན་ཕྱི་མ་མ་ཟིན་གྱི་བར་དུ་ཤིང་གཞོང་ལྟ་བུའི་གཞི་གཞན་གྱིས་མི་བསྐུར། དེའི་ཚེ་གོས་སམ་རྐེད་ཆིངས་ཀྱིས་དེ་བསྔོ་བར་བྱ། ལྟག་མ་ལྟར་ལྷན་ཅིག་ཚོན་དུ་བཅུག་ནས་བདག་དོན་ཅིག་ལ་སྐད་ཅིག་གུད་དུ་འགྲོ་ན་གཞན་གྱིས་མི་ཁྱེར་བའི་སྐ་རགས་སམ་གོས་ཤིག་གཞོང་ཀུང་དུ་གཞག །དགོས་པ་ཡོན་ལ་ཐབས་གཞན་ཡོད་ན་དགེ་འདུན་གྱི་དཔག་ཅིང་མི་སྤྱད། ལྟག་མ་ལྟར་གོས་ལ་སོགས་པ་འཚེད་པ་བདག་ལའང་ཟངས་ཤིག་བདོག་ན་དགེ་འདུན་སྤྱིའི་ཟངས་གཞན་མི་སྤྱོད་དོ། །དལ་ན་བདག་གི་དོན་བསྲེས་ཏེ་དགེ་འདུན་གྱི་སྤྱད་ཀྱང་ཉེས་མེད། ཁ་ན་མ་ཐོ་བ་མེད་པའི་ནི་དེ་ལྟ་བུའི་ཚུལ་ལས་དོན་ཡོད་དེ་ཕྲོགས་ནའོ། །དགེ་སློང་ཞིག་ལ་བདག་ལའང་ཟངས་ཤིག་བདོག་ལ་དགེ་འདུན་གྱི་ཟངས་དང་གཉིས་ཀ་སྤྱད་དེ་ལས་ཟིན་ནས་སླར་མི་སྟེར་ན་དགེ་སློང་གིས་ཕྲོགས་ཏེ་སྤྱད་ཀྱང་ཉེས་མེད། དགེ་འདུན་གྱིས་གཏུན་བུ་དང་བཅས་ཏེ་བཅང༌། དགེ་འདུན་གྱིས་སྨན་བཏགས་པའི་གཏུན་པུ་བཅངས་ཀྱང་ཉེས་མེད། སྐྲ་འབྲེག་པའི་ལག་ཆ་ཡང་ངོ༌། །དགེ་འདུན་གྱིས་སྐྲ་དང་སེན་མོ་འབྲེག་པའི་སྤྱད་བཅངས་ཀྱང་ཉེས་མེད། ཁུག་མར་བཅུག་ལ་རྩིག་པར་གཞག །ལྟག་མའི་སྤུ་གྲི་རྣམས་ཁུག་མ་ལྟ་བུར་བཅུག་སྟེ་རྩིག་བའི་གསེབ་ལྟ་བུ་མི་སྟོར་བར་གཞག །སྟེའུ་དང་སྟ་རེ་དང་གསོར་བུ་ལ་སོགས་པའི་ལག་ཆ་ཡང་ངོ༌། །མིང་གིས་སྨོས་པ་འདི་རྣམས་དགེ་འདུན་གྱིས་བཅངས་ཀྱང་ཉེས་མེད། དགེ་སློང་གིས་རྙེད་ན་ཁམ་པའི་ལས་ལ་སོགས་པ་དེ་དག་སྦྱིན། དགེ་འདུན་ལ་གང་ཟག་ཁང་པའི་སྣོད་རྙེད་ན་གང་རྙེད་པ་གཏན་སྦྱིན། དགེ་སློང་མས་མཆིང་བུའི་སྣོད་མི་བཅང༌། དགེ་སློང་མས་འདི་བཅང་དུ་མི་གནང༌།
ཐམས་ཅད་ཀྱིས་ཏིལ་གྱི་སྣོད་བཅང༌། དགེ་སློང་སྡེ་ལྔས་ཏིལ་གྱི་སྣོད་བཅངས་ཀྱང་རུང༌། སྲང་བརྒྱད་ནས་བཞིའོ། །ཏིལ་གྱི་སྣོད་ལྕིད་སྲང་བརྒྱད་མན་ཆད་བཞི་ཡན་ཆད་ལས་བྱ། ལྕགས་ཀྱི་སྣོད་ཀྱང་ངོ༌། །ལྕགས་ཀྱི་སྣོད་སྤྱད་ཀྱི་ནང་དུ་ཆུ་བསྲོ་བ་དང་ཚོད་མ་བཙོ་བ་ལ་སོགས་པ་བྱར་རུང༌། དེའི་ལྕགས་སྒྱེད་ཀྱང་ངོ༌། །དགེ་སློང་དང་དགེ་སློང་མས་ལྕགས་སྒྱེད་བཅངས་ཀྱང་ཉེས་མེད། ཁམ་པའི་རྒྱ་ཐབས་ཀྱང་ངོ༌། །ལྟག་མ་ལྟར་ཆུ་བསྲོ་བ་དང་ཁ་ཟས་བཙོ་བའི་གང་ཟག་གིས་རྒྱ་ཐབ་ཀྱང་རུང༌། གནང་བ་ཐོབ་ན་ཁར་བའོ། །དགེ་སློང་བེར་ཀ་ཁྱེར་དུ་མི་གནང་ངོ༌། །དྲ་བའང་ཁ་དོག་གཅིག་པའོ། །ལྷུང་བཟེད་ཀྱི་སྣོད་ཀྱི་དྲ་བ་ཁ་དོག་གཅིག་པ་ལས་བྱ། དེ་དག་སྦྱིན། བེར་ཀ་དང་དྲ་བ་དང་དགེ་འདུན་གྱིས་དད་པ་སྦྱིན། རྒས་པ་དང་ན་བ་ལའོ། །ལྟག་མ་ལྟར་སྦྱིན་པ་ནི་རྒན་པ་དང་ནད་པ་ལས་སྦྱིན་ནོ། །འགྲུབ་ན་འདི་དག་ཚིག་གཅིག་གིས་སྦྱིན། ལྟག་མ་ལྟར་དགེ་འདུན་གྱི་དད་པ་སྦྱིན་པ་ན་གསོལ་བ་དང་ཞུ་བ་གཅིག་གིས་སྦྱིན་ནོ། །དགེ་སློང་གཉིས་སོ་སོར་སྦྱིན་ན་གསོལ་བ་དང་ཞུ་བ་གཅིག་གིས་བྱར་རུང་ངོ༌། །འཁར་བ་སྒྲ་ཅན་བཅངས་ཏེ་སྦྲུལ་ལ་སོགས་པ་བསྐྲད་པའི་ཕྱིར་རོ། །དགེ་སློང་མཚན་མོ་ཕྱི་ནང་དུ་འཇུག་པ་ལ་སྤྲུལ་ལ་སོགས་པས་རྐང་པ་ལ་ཟིན་པར་དོགས་པའི་ཕྱིར་སྨྱུག་མའམ་ལྕགས་ལྟ་བུ་སྒྲ་ཅན་གྱིས་གསིལ་ཞིང་འགྲོ། ཁར་པའི་རྩ་བ་གས་ན་ཕོར་ཀ་གདབ། བེར་ཀའི་ཞབས་གས་ན་ལྕགས་ཀྱི་ཕོར་ཀ་གདབ། ཡ་རོལ་དུ་ན་གཅེ་འུས་དཀྲིའི། ཁར་བའི་མགོ་མ་གས་ཀྱང་རུང་ལྕགས་སམ་ཟངས་ཀྱིས་དཀྲི། གདུགས་བཅང་སྟེ་རེ་ལྡེ་མཁན་གྱི་ལའམ་ལོ་མའི་ལའོ། །རེ་ལྡེའམ་ལོ་མ་གདུགས་བྱས་ཏེ་བཅངས་ཀྱང་ཉེས་མེད། ལུས་ཀྱི་ཚད་དུ་ཡུ་བའོ། །གདུགས་ཀྱི་ཡུ་བ་ལུས་ཀྱི་ཚད་དུ་བྱས་ཀྱང་རུང་གདུགས་ཉིད་ཀྱི་ཞིང་ཚད་དུ་བྱ། འདི་དང་གྲོང་གི་དབུས་སུ་མི་འགྲོ། གདུགས་གྱོན་བཞིན་དུ་གྲོང་དབུས་སུ་མི་འགྲོ། ལམ་གྱི་དབང་གིས་ནི་གློ་ལ་ཕབ་སྟེའོ། །གྲོང་གི་བར་དུ་ལམ་བྱུང་སྟེ་མི་འགྲོར་མི་རུང་ན་མགོ་ལ་མི་གཡོགས་པར་ཕབ་སྟེ་འགྲོ། །བསོད་སྙོམས་སྤྱོད་པའི་ཚེ་ཆར་བ་བབ་ནའོ། །བསོད་སྙོམས་བྱེད་པའི་ཚེ་ཆར་པ་བབ་ན་གདུགས་ཐོགས་ཏེ་སོང་ཡང་ཉེས་མེད། ཡུ་བ་ལ་ཆགས་པ་ནི་མ་བརྟགས་པ་མ་ཡིན་
པའོ། །བེར་ཀ་དང་གདུགས་ཀྱི་ཡུ་བ་ལ་ཟས་ཆགས་ན་མ་བརྟགས་ཀྱིས་བཀྲུས་ཤིག་ཆད་ན་ཁྱིམ་དུ་གཞག །བསོད་སྙོམས་བྱེད་པའི་ཚེ་ཆར་པ་ཆད་ན་གདུགས་ཁྱིམ་པ་ལ་བཅོལ་ཏེ་འགྲོ། །ལྡོག་ན་བསྐུར། བསོད་སྙོམས་བསླངས་ཏེ་ཕྱིར་ལོག་ན་བླངས་ཏེ་འགོ་ཇ་མཁན་དང་སྟུ་འཚོང་མ་དང་ཆང་འཚོང་པ་དང་རྒྱལ་པོའི་རིགས་དང༌། ཕྱག་དར་བའི་ཁྱིམ་དུ་མི་སྤྱད། མིང་གིས་སྨོས་པ་འདི་རྣམས་ཀྱི་ཁྱིམ་དུ་མི་བསླང༌། མི་གཙང་བའི་ཁང་བུ་དང་ཉེ་བར་མི་གནས། བཤང་གཅིའི་སར་བཤང་གཅི་མི་བྲོ་བར་མི་འཇུག །རིན་པོ་ཆེར་གྱུར་པའི་གོས་དང་དགོན་པར་མི་གནས། དགོན་པ་ལ་དགེ་སློང་གནས་ན་གོས་ཟ་འུག་དང་བཙོས་བཙོས་དང་དར་ལ་སོགས་པ་བཟང་པོ་མི་བགོ །རྐུན་པོས་གསོད་དུ་འོང་ངོ༌། །ན་མེ་རུའི་ཕྱེ་མས་ལ་བ་ལ་བཏབ་ན་སྲོག་ཆགས་མི་སྐྱེའོ། །ན་མེ་རུའི་ཕྱེ་མ་ཞེས་བྱ་བའི་ཤིང་ཏོག་བཏགས་པའི་ཕྱེས་གོས་ལ་བཏབ་ན་སྲིན་མི་ཟ། ཤིང་ཀུན་ཀྱང་ངོ༌། །ཤིང་ཀུན་གོས་ལ་བཏབ་ན་སྲིན་མི་ཟ་ནི་མ་བ་དང་བ་ཤ་ཀའི་ལོ་མ་ཡང་ངོ༌། །མིང་གིས་སྨོས་པ་འདི་རྣམས་ཀྱི་ཕྱེ་མས་གོས་ལ་བཏབ་ནའང་སྲིན་མི་ཟ། དེའི་ངོས་སུ་དེ་རབ་ཏུ་བབ་ནའོ། །ལྟག་ལ་ནི་མ་པ་ལ་སོགས་པའི་ཕྱེ་མས་གོས་ཀྱི་རིམ་པར་བཏབ་སྟེ་གཞག་ན་སྲིན་མི་ཟ། དེའི་ཕྱིར་བསྐམ་པ་ཡང་ངོ༌། །སྲིན་མི་ཟ་བའི་ཕྱིར་སྐབས་སུ་བསྐམ་ཞིང་སྤྲུག །ཕྱོགས་དང་ལམ་དང་རེས་དང་ཉི་མ་དང་སྐར་མ་དགོན་པ་པས་མཁས་པར་བྱ། མིང་གིས་སྨོས་པ་འདི་རྣམས་དགེ་སློང་དགོན་པ་པས་ཤེས་པར་བྱའོ། །ཅིའི་ཕྱིར་ཞེ་ན། རྐུན་པོ་ཚར་བཅད་དེ་དྲིར་འོངས་ན་བསྟན་དགོས་པའི་ཕྱིར་རོ། །རྟག་ཆུ་དང་མེ་བསག །དགེ་སློང་དགོན་པ་པས་འགྲོན་པོ་དང་རྐུན་པོའི་ཕྱིར་མེ་དང་ཆུ་རྟག་པར་གཞག །ཕྱེ་དང་རས་མ་དང་སྦྲང་རྩི་དང་མར་ཅི་ནུས་ཀྱིས་བཅང༌། མིང་གིས་སྨོས་པ་འདི་རྣམས་དགེ་སློང་དགོན་པ་པས་རྐུན་པོ་གཙེར་འོང་བའི་ཕྱིར་སྟ་གོན་བྱས་ཏེ་གཞག་པ་ནི་མི་གཙེ་བའི་ཕྱིར་རོ། །ཟས་ཀྱི་ལྷག་མ་འབྱུང་ན་ཡང་ངོ༌། །ཟས་ཀྱི་ལྷག་མ་ཡོད་ན་ནི་ལྟག་མ་ལྟར་གཞན་མེད་ན་དེར་ཟད། དགེ་སློང་མ་དགོན་པར་མི་གནས། དགེ་སློང་མ་འཇིགས་པའི་ཕྱིར་དགོན་པར་མི་གནས། དབྱར་མོ་ཐང་གི་གྲོང་དབུས་སུ་བྱ། དགེ་སློང་མའི་གཙུག་ལག་ཁང་དགོན་པའམ་དབྱེན་པར་མི་བྱ་བར་གྲོང་དབུས་སུ་བྱ། དེ་དག་སྒོ་ཆེན་པོར་མི་འདུག།
དགེ་སློང་མའི་གཙུག་ལག་ཁང་སྒོ་ཆེ་ཆུང་གཉིས་འདུག་ན་སྒོ་ཆུང་དུ་ནས་ཡར་བྱུང་མར་བྱུང་མི་བྱ། སྣང་བར་མ་ཡིན། དགེ་སློང་མས་སྐར་ཁུང་ནས་མི་བལྟ། ལམ་གྱི་བཞི་མདོར་མ་ཡིན། ལམ་གྱི་མངོན་སུམ་དུ་དགེ་སློང་མས་འགྲེང་ཞིང་མི་འདུག །མ་གྱོན་པ་ཅན་དུ་མ་ཡིན། དགེ་སློང་མ་བདག་གི་ཁྱིམ་ན་གོས་ཐམས་ཅད་ཕུད་དེ་གཅེར་བུར་མི་འདུག །དེར་རྡུལ་གཟན་ཡང་གྱོན། ཡུལ་ཚན་ཁང་པའི་ནང་ན་སྨད་གཡོགས་དང་ནུ་གབ་གཅིག་གྱོན་དུ་གནང་ངོ༌། །ཁྱིམ་པའི་དྲུང་དུ་ཕྲག་པ་མ་གཡོགས་པར་མ་ཡིན། ཁྱིམ་པ་དང་དགེ་བསྙེན་གྱི་དྲུང་དུ་དགེ་སློང་མས་ཕྲག་པ་ཕྱུང་སྟེ་མི་སྤྱད། སྐྱིལ་མོ་ཀྲུང་གི་གནས་སུ་དེ་དག་གི་སྐྱིལ་མོ་ཀྲུང་ཕྱེད་དོ། །དགེ་སློང་མ་བསམ་གཏན་བྱེད་ན་སྐྱིལ་མོ་ཀྲུང་ཕྱེད་དུ་བྱ། འཛག་བྱེད་ཀྱི་སྒོར་སྲིན་བུ་མི་ཞུགས་པར་གོས་ལ་སོགས་པ་སྦྱིན། དགེ་སློང་མ་བསམ་གཏན་བྱེད་ན་མོ་མཚན་དུ་རས་མས་གཡོགས་ལ་རྐང་པ་གཅིག་གི་རྟིང་པས་གླན་རྐང་པ་གཅིག་བརྐྱངས་ཏེ་བྱ། དགེ་སློང་གིས་དགེ་སློང་མ་གཙུག་ལག་ཁང་དུ་མི་འཇུག་པར་མི་བཟློགས། དགེ་སློང་མ་ཞིག་དགེ་སློང་ལ་ཁ་ཟེར་ཞིང་འོངས་ན་དགེ་སློང་མ་ཞིག་གཙུག་ལག་ཁང་དུ་གནང་ངོ༌། །མི་སྨྲ་བ་དང་མི་བཤད་པ་དང་གསོ་སྦྱོང་དང་འབྱུང་བ་གཞག་པས་དེ་དག་འདུལ། ལྟག་མ་ལྟར་དགེ་སློང་མ་མ་དུལ་ཞིང་ཁ་ཟེར་གཙུག་ལག་ཁང་དུ་འོངས་པ་ལ་མིང་གིས་སྨོས་པ་འདི་རྣམས་འདྲ་བར་ཚར་གཅད་པར་བྱ། མ་གནང་བར་དེ་དག་གིས་དགེ་སློང་གི་གཙུག་ལག་ཁང་དུ་མི་འཇུག །དགེ་སློང་མ་ཞིག་དགེ་འདུན་གྱི་གཙུག་ལག་ཁང་དུ་འོངས་ན་སྒོ་བརྡབ་པའམ་གཙུག་ལག་ཁང་དུ་མཆིས་ན་ནོངས་སམ་མ་ནོངས་ཞེས་མ་དྲིས་པར་གཙུག་ལག་ཁང་དུ་མི་འཇུག །དེ་སྟེ་ཁོ་ན་བ་ཞིག་ནའོ་ཞེས་གནང་བར་བྱ། ལྟག་མ་ལྟར་གཙུག་ལག་ཁང་དུ་འཇུག་པ་ལ་དགེ་སློང་ཁྱོད་དགེ་སློང་མ་འཁོན་མེད་དམ་ཞེས་དྲིས་ཏེ་འཁོན་མེད་ཅེས་ཟེར་ན་ནང་དུ་འོང་དུ་གནང་ངོ༌། །དྲི་བས་མ་འཁོན་པར་ཆད་པར་ཤེས་ནས་སོ། །དགེ་སློང་འཁོན་མེད་པར་ཤེས་ན་དྲི་མི་དགོས་པར་གཏང་ངོ༌། །རྒྱབ་གཏན་དང་གཏན་བུ་དང་ཟུང་ང་དང་ལྡེ་མིག་ཅན་དང་གཟེར་གཏན་གྱིས་གཙུག་ལག་ཁང་བསྡམ་པར་བསྒོ། །དགེ་སློང་ཕོ་མོའི་གཙུག་ལག་ཁང་གི་སྒོ་ཆེན་པོའི་མིང་གིས་སྨོས་པ་འདི་རྣམས་ཀྱི་གཏན་པས་བསྡམ། ཕྱེ་མ་རེད་
གཙུག་ལག་ཁང་སྐྱོང་གིས་བརྟགས་ཏེ་སྒོ་གཅད། ཉི་མ་ནུབ་ན་སྒོ་བཅད་ལ་གྲ་གྲར་རྐུན་པོ་ཡོད་པར་དོགས་པའི་ས་ཀུན་བཙལ། འཇིགས་པ་དང་བཅས་ན་མེལ་ཚེ་པས་མེལ་ཚེ་བྱ། གཙུག་ལག་ཁང་ན་དགེ་སློང་འཇིགས་པར་གྱུར་ན་མེལ་ཚེ་བྱ། དེར་གྱུར་ནས་ཉལ་ཞིང་ཏིང་ངེ་འཛིན་དང་བཅས་པ་མི་བྱ། ལྟག་མ་ལྟར་མེལ་ཚེ་བསྐོས་པའི་དགེ་སློང་མེལ་ཚེ་བྱེད་པའི་བསམ་གཏན་དང་ཉལ་དུ་མི་དབང༌། ཆོ་ག་འདི་དག་བྱས་ནས་གཙུག་ལག་ཁང་སྐྱོང་ལ་དགེ་འདུན་གྱི་གནས་བརྟན་གྱིས་དྲི། གཙུག་ལག་ཁང་གི་གནས་བརྟན་གྱིས་གཙུག་ལག་ཁང་སྐྱོང་ལ་ལྷག་མའི་ལས་རྣམས་ལྟར་བྱས་སམ་མ་བྱས་དྲི། གཙུག་ལག་ཁང་ནས་འོན་ཏེ་མ་བཅིངས་པར་སྟོར་ན་གཙུག་ལག་ཁང་སྐྱོང་གིས་དུ་ཉེས་པ་དེ་སྙེད་ཀྱི་ཆ་སྦྱིན། གཙུག་ལག་ཁང་ཕྱི་སྒོ་གཙུག་ལག་ཁང་སྐྱོང་གིས་གཏན་པ་རྣམ་ལྔས་བསྡམས་པ་ལས་ནང་ནས་ནོར་ཞིག་སྟོར་ན་གཙུག་ལག་ཁང་སྐྱོང་ལ་སྐྱིན་པ་མི་འབབ། གཏན་པ་གསུམ་བཅུག་ན་སྐྱིན་པ་ལྔ་གཉིས་བབ་སྟེ། དེ་བཞིན་དུ་རིམ་བཞིན་དུ་བྱའོ། །ལྕགས་ཀྱུ་དང་ཐ་རམ་བཅང༌། གང་ཟག་གི་གནས་ཁང་ལ་ཐ་རམ་དང་ལྕགས་ཀྱུ་ནི་རྫས་མི་སྟོར་བའི་ཕྱིར་བཅང༌། སྒོ་བཅིང་བ་ཡོད་པའམ་བཅིངས་ཀྱི་བར་དུ་མི་འགྲོ། །གཙུག་ལག་ཁང་སྐྱོང་གིས་སྒོ་ལྕགས་དང་གཏན་པ་མ་བཅུག་པར་འཕྱན་དུ་མི་འགྲོ། །གནས་སྟོང་པར་ཞུགས་ན་འདིར་ཆག་ཆག་ལ་སོགས་པ་བྱ། དགེ་སློང་ཞིག་གུད་ནས་འོངས་ཏེ་གཙུག་ལག་ཁང་བུར་འདུག་ན་ཁང་བུ་ཕྱག་དར་དང་ཆག་ཆག་བྱས་པ་གནས་སོ། །སྣོད་དག་སོ་སོའི་གནས་སོ། །ཁང་བུ་དེ་ན་དགེ་འདུན་གྱི་སྤྱད་སྔོན་ཡོད་ན་མ་སྣད་པར་གཞག །དེ་བྱུག་པར་རིགས་ན་ཡང་ངོ༌། །ལྷག་མ་དགེ་འདུན་གྱི་སྤྱད་རྣམས་བཀྲུ་བ་དང་དུས་དུས་སུ་བསྐམ་པར་བྱ། དེ་སྟེ་རྟོག་པ་བྱེད་པ་ཡོད་ན་རྩྭ་སྔོན་པོ་ལ་བྱེའུ་གཞུག །དགེ་སྦྱོང་ངམ་ཁྱིམ་པ་ཡོད་ན་གཙུག་ལག་ཁང་མཆོད་རྟེན་གྱི་འཁོར་ན་རྩྭ་སྔོན་པོ་ཡོད་པ་ཐོག་ཏུ་གཞུག །དེ་སྟེ་འདི་ཁྱིམ་གྱི་འོངས་ན་འདི་ལ་ཆོས་ཀྱི་གཏམ་དང་གཞན་ཕོད་པའི་ཆོས་བྱ། དགེ་སློང་གུང་ནས་གཙུག་ལག་ཁང་དུ་ཕྱིན་ཏེ་ཁྱིམ་པ་འཕྲད་དུ་དགའ་སྟེ་གན་དུ་འོངས་
ན་ཆོས་བཤད་པ་དང་ཁ་ཟས་ཅི་བདོག་པས་མགུ་བར་བྱ། ཤིང་བསྐྱེད་པ་མ་བརྟགས་པ་མ་བརྟགས་པ་མ་ཡིན་ནོ། །གཙུག་ལག་ཁང་གི་འཁོར་དུ་དགེ་སློང་གིས་སྐྱེད་ཤིང་སྐྱེད་དུ་གནང་ངོ༌། །འདི་བསྐྱེད་ནས་མི་བསྲུང་བར་མི་བྱ། ལྟག་མ་ལྟར་ཤིང་བསྐྱེད་ནས་ཡལ་བར་མི་དོར་བར་བསྲུང༌། མ་བསྲུངས་ན་ཉེས་བྱས། ནམ་མེ་ཏོག་གི་བར་དུ་ཤིང་ལའོ། །མེ་ཏོག་གི་ཤིང་ཞིག་ཡིན་ནམ་མེ་ཏོག་ཆགས་པའི་བར་དུ་བསྲུང༌། གཞན་ན་འབྲས་བུའི་བར་དུའོ། །ཤིང་དེ་འབྲས་བུ་སྐྱེ་བ་ཡིན་ན་འབྲས་བུ་ཆགས་ཀྱི་བར་དུ་བསྲུང༌། རིང་ན་ལོ་ལྔར་རོ། །ལྟག་མའི་ཤིང་གཉིས་གྲིབ་མ་ལ་བསྐྱེད་དེ་འབྲས་བུ་དང༌། མེ་ཏོག་མ་བྱུང་ན་ལོ་ལྔ་ཚུན་ཆད་དུ་བསྲུང༌། བདག་བཞིན་པ་ནི་དགེ་སློང་གཞན་ལ་བཅོལ་ནའོ། །བདག་གུད་དུ་འགྲོ་བར་འགྱུར་ན་གྲོགས་དགེ་སློང་ཞིག་ན་རེ་ངས་བསྲུང་ངོ་ཞེས་ཟེར་ན་བཅོལ་ཏེ་སོང་ཡང་ཉེས་མེད། རྐང་པ་བཀྲུ་བ་དང་སོ་ཤིང་བཟའ་བ་དང་ལྷུང་བཟེད་བཀྲུ་བ་དང༌། ཁྲུས་དག་གི་གླུད། སྐྱེད་ཤིང་དེ་དག་ལ་སོ་ཤིང་བཟའ་བ་དང་རྐང་པ་བཀྲུ་བ་དང་ལྷུང་བཟེད་བཀྲུ་བ་སྐྱེ་ཤིང་གི་རྩ་བའི་དྲུང་དུ་བཀྲུས་ན་ཤིང་སྐྱེ་བ་ལ་ཕན་ནོ། །དེ་ལ་སྙིང་པོས་ཁྱིམ་གྲང་བ་དགག་པའི་ཕྱིར་བྱ། སྐྱེ་ཤིང་དེ་གྲང་བར་གྱུར་ན་ཁོ་ར་ཁོར་ཡུག་ཏུ་རྩིག་པས་བརྩིགས་ཏེ་དྲོ་བར་བྱ། འདི་སྲུང་བའི་ཕྱིར་སྐར་ཁུང་གདོད། ལྟག་མ་ལྟར་རྩིག་པས་བསྐོར་བ་མདོ་མདོར་བུ་གུ་གདོད། གཡོགས་མ་སྦྱིན་ཤིང་དེ་གྲང་བའི་དུས་ན་སྟེང་ནས་སབ་མོས་གཡོགས། དཔྱིད་བསིལ་བའི་ཕྱིར་བཤུ། ལྟག་མ་ལྟར་གཡོགས་པ་དཔྱིད་དྲོ་བའི་ཚེ་སླར་བཤུ། སྔོན་གྱི་དབྱར་གྱི་མི་རུལ་བའི་ཕྱིར་བ་ཡང་ངོ༌། །རྟག་ཏུ་སྐྱེད་ཤིང་ལ་རྩིག་པས་བསྐོར་བའི་དུས་ལ་སླར་གཞི། ཆུ་ཁུང་གདོད། ལྟག་མའི་ཁང་བུ་མ་བཤིག་པའི་ཚེ་ཆུ་འཛག་པའི་ཆུ་ཁུང་གདོད། རྩ་བའི་རྒྱུད་ལ་གཡེལ་བར་མི་བྱ། སྐྱེད་ཤིང་གི་རྩ་བ་དང་གཤེར་དང་ལ་ཕུག་ལ་སོགས་པའི་མི་གུ་ལ་མི་གཡེལ་བར་བསྲུང༌། འཁོར་སོ་སོར་བགོས་ཏེ་བཅོས། ཤིང་སྐྱེད་ཤིང་མང་དུ་བསྐྱེད་དེ་དགེ་སློང་གཅིག་
གི་ལག་གིས་མི་ཁྱབ་ན་དགེ་སློང་མ་མང་ཉུང་ལ་བསྐོས་ཏེ་བསྐྱེད་དུ་གཞུག །ལ་ལ་སོ་ཤིང་ཟ་བ་དང་ལ་ལ་ཁ་འཁྲུ་བ་དང་ལ་ལ་རྐང་པ་དེ་ལ་སོགས་པ་སྟེ་རྒྱུན་དུ་མ་ཡིན། ལྟག་མ་ལྟར་ཤིང་བསྐྱེད་ན་བདག་གི་དགེ་བ་བཏང་ལ་ཤིང་འབའ་ཞིག་བསྐྱེད་པ་མ་ཡིན་གྱི་ཤིང་དྲུང་ལ་ལར་སོ་ཤིང་བཟའ་ཞིང་རྐང་ལག་བཀྲུ་བའི་ཆུ་བླུགས། ལ་ལས་ལྷུང་བཟེད་བཀྲུ་བའི་ཆུ་བླུགས། མེ་ཏོག་དང་འབྲས་བུ་བསྲུང་བའི་ཕྱིར་དགེ་སློང་ལ་བསྒོ། ལྟག་མ་ལྟར་སྐྱེད་ཤིང་བསྐྱེད་དེ་དཔྱིད་མེ་ཏོག་སྐྱེས་པ་དང་སྟོན་འབྲས་བུ་ཆགས་པར་གྱུར་ན་དགེ་འདུན་གྱིས་དགེ་སློང་གཅིག་སྲུང་མར་བསྐོ། ཟས་ཀྱི་དུས་ཀྱི་ཕྱིར་གཞན་གྱིས་སོ། །ལྟག་མ་ལྟར་བསྲུངས་པའི་དགེ་སློང་ཟན་ཟ་བའི་ཚེ་དགེ་འདུན་གྱིས་དགེ་སློང་གཞན་ཅིག་བསྐོས་ཏེ་བརྗེ། ཐོག་མ་ཉིད་དུ་ཟོས་ཏེ་དེར་འགྲོ། རྗེད་མའི་དགེ་འདུན་ཕལ་པས་ཀྱང་སྔར་ཟན་བཟའ། སྲུང་མའི་དགེ་སློང་ནི་དགེ་སློང་ཕལ་དང་ཐབས་ཤིག་ཏུ་བཟའ། ཀློག་ཏུ་འཇུག་པ་གཡོགས་མང་དུ་བྱེད་པ་དང་མི་ཕོད་པ་ལ་སྙིང་རྗེ་བར་བྱ། མཁན་པོ་ལ་སློབ་མ་མང་དུ་བདོག་ན་མཁན་པོ་ལ་གང་བསྟི་སྟང་ཆེ་བའི་དགེ་སློང་དང་མྱུར་དུ་མི་ལྡོག་ཅིང་ཤེས་རབ་ཆུང་བ་ལ་མཁན་པོས་སྙིང་ནས་བསླབ་པོ། །དགེ་སློང་མ་དེའི་འདུལ་བ་འཛིན་པ་དང་དེ་ཆ་ནོད་པ་ལ་ཀློག་ལས་སྙིང་རྗེ་བྱ། དགེ་སློང་མ་དགེ་སློང་ཕ་བས་ཤེས་རབ་ཆུང་བས་སོ་སོར་ཐར་པ་ལ་སོགས་པ་ཁ་དོན་དང་མང་དུ་སློབ་མི་ནུས། གྱི་ན་མི་གཏོང་བར་སྙིང་རྗེའི་ཕྱིར་ཡུན་རིང་དུ་བསླབ་པོ། །སྤྲིང་ཡིག་བྲི། དྷརྨ་དང་སྤྲིང་ཡིག་བྲིར་གནང༌། དྲན་པར་མི་ནུས་ན་གཟུང་བའི་ཕྱིར་འདུལ་བ་ཡང་ངོ༌། །ཆོས་འཆད་པ་ཉན་པ་ལས་ཁོང་དུ་མི་ཆུད་ན་རྗེད་བྱང་ལ་བྲིས་ཏེ་བསླབས་ཀྱང་ཉེས་མེད། འབྲི་མི་འབྲིའོ། །སངས་རྒྱས་ཀྱི་ཆོས་གང་ཡང་གང་ཟག་གིས་འདྲིར་ནི་མི་གནང་གི་ཁ་ཐོན་དུ་སློབ་ཤིག །དགེ་འདུན་གྱིས་ནི་འདྲིར་གནང་ངོ༌། །དེ་བཞིན་དུ་འདིས་སོ་སོར་ཐར་པ་ཡང་ངོ༌། །སོ་སོར་ཐར་པ་ཡང་གང་ཟག་གིས་ཡི་གེ་ལ་མི་བྲི་བར་ཁ་དོན་དུ་མི་བསླབ་པོ། །དེ་དང་འདྲ་བ་ཡང་ངོ༌། །ཕི་བང་ཀ་ལ་སོགས་པ་གཞན་ཀྱང་མི་བྲི་བར་ཁ་
ཐོན་བྱ། གང་ཟག་དག་ཀྱང་ངོ༌། །གང་ཟག་གི་གོས་ཀྱི་མཐའ་དང་རྒྱ་ལ་མིང་རུས་མི་བྲི། མཚན་མར་བྱེད་པ་ནི་ཉེས་མེད་དོ། །གོས་ཀྱི་མཐའ་མ་ལ་སྣག་ཙའི་ཏིག་ཏི་དང་མཚན་མ་བཏབ་པ་ཉེས་མེད། དགེ་འདུན་གྱི་མལ་སྟན་ལ་མི་བྲི། དགེ་འདུན་གྱི་མལ་སྟན་ལ་དགེ་འདུན་གྱི་མལ་སྟན་ནོ་ཞེས་ཡི་གེར་མི་བྲི། ཆེ་གེ་མོ་ཞིག་གི་གཙུག་ལག་ཁང་སྟེང་བསོད་ནམས་སུའོ་ཞེས་སོ། །ཡོན་བདག་སུས་བརྩིགས་པའི་གཙུག་ལག་ཁང་ལ་གཡམ་པོ་ལ་སོགས་པ་མལ་སྟན་ཡོན་དུ་ཕུལ་ན་དེའི་མཐའ་མར་གཙུག་ལག་ཁང་འདིའི་ཡོན་བདག་མིང་འདི་ཞེས་བྱ་བས་ཕུལ་བའོ་ཞེས་བྱ་བ། གོས་ལ་ཡང་ངོ༌། །དགེ་འདུན་གྱི་ན་བཟའ་ལའང་ལྟག་མ་སྐད་དུ་མིང་བྲི། གཞན་ཡང་འདི་ལྟ་བུའི་ཚུལ་ལའོ། །གཙུག་ལག་ཁང་དུ་གྲོང་དང་ཞིང་དང་གནག་རྟ་ལ་སོགས་པ་ཡོན་དུ་ཕུལ་བ་དབང་རྒྱ་བྲིས་ཏེ་བཞག །སངས་རྒྱས་ཀྱི་ཚིག་སྲིད་པའི་ལེའུ་དང་རིམས་དང་དེར་གྱུར་ཅིག་པར་མི་ཀློག །སངས་རྒྱས་ཀྱི་ཆོས་ཀློག་པའི་ཚེ་མུར་འདུག་གི་ཆོས་ཀློག་པ་འདྲ་བ་སྐད་རིང་དུ་ངར་ངར་མི་བྱ། སངས་རྒྱས་ཀྱི་ཚིག་ལ་བརྩོན་པར་གཞན་ལ་སྟོན་ནུས་ན་ཕྱི་རོལ་གྱི་གཙུག་ལག་བླང༌། བདག་སངས་རྒྱས་ཀྱི་ཆོས་མཁས་པར་ཤེས་ལ་ཕ་རོལ་པོ་ལའང་ཐེ་ཚོམ་མེད་པར་སློབ་ནུས་ན་མུར་འདུག་གི་སུན་དབྱུང་བའི་ཕྱིར་གཏར་ག་དང༌། བྱཱ་ཀ་ར་ཎ་བསླབས་ཀྱང་ཉེས་མེད་དོ། །ཇི་ཙམ་ན་སློབ་པ་འོག་ན་འཆད། དེའི་དུས་ན་ཉི་མའི་གསུམ་པའི་ཆ་སྟེ་མི་བདེ་བ་ནའོ། གཏར་ག་དང་བྱཱ་ཀ་ར་ན་ལ་སོགས་པ་སློབ་པའི་དུས་ནི་ཉིན་གཅིག་ལ་གསུམ་དུ་བགོས་པའི་ཉི་མའི་གུང་ལ་བསླབ་པོ། །ནུབ་མོ་ཡང་ངོ༌། །ནུབ་མོ་བདེ་ན་མཚན་རངས་སངས་རྒྱས་ཆོས་བྱ། ན་ཞིང་མི་བདེ་བ་མཚན་མོའི་གུ་གཏར་ཀ་ལ་སོགས་པ་སློབ། ཕན་པའི་སྔགས་ན་གཟུང་ངོ༌། །ལྟག་མ་ལྟར་ཉིན་གཅིག་མཚན་གཅིག་ལ་དུས་ལྔར་བགོས་ཏེ་དུས་གསུམ་ནི་མདོ་སྡེ་ཀློག་པ་དང་བསམ་གཏན་བྱ། དུས་གཉིས་ལ་སྔགས་ཀློག །བསྐོ་བ་ཡང་ངོ༌། །མི་གཅིག་ཅིག་ན་ན་སྙིང་རྗེ་ཞིང་ཕན་པར་བྱ་བའི་ཕྱིར་སྔགས་གདབ་པ་གནོད་པ་མ་ཡིན་ནོ། །སྔགས་གདབ་པ་ནི་གཞན་ལའང་མི་གནོད་ནད་པ་ལ་
ཕན་ན་སྔགས་བྱ། འདི་ལ་དཀོན་མཆོག་གསུམ་ལ་ཕྱག་བྱ་བའི་གནས་སུ་བརྗོད། སྔགས་བྱ་བའི་ཚེ་དཀོན་མཆོག་གསུམ་ལ་ཕྱག་འཚལ་ལ་བདག་གི་ལྷར་གཟུང༌། དེའི་མཚན་ནས་ཕྱུང་སྟེ་ཕྱག་བྱ། ལྷ་གཞན་ལ་ཕྱག་མི་བྱ། དཀོན་མཆོག་གསུམ་མ་གཏོགས་པར་མུར་འདུག་གི་ལྷ་ལ་ཕྱག་མི་བྱ། མི་མཆོད་དེ་བཀུར་སྟི་མི་བྱ་བ་མ་ཡིན་ནོ། །མུར་འདུག་གི་ལྷ་ལ་མེ་ཏོག་ལ་སོགས་པས་ཀྱང་མི་མཆོད། དེ་ལ་ངན་དུའང་མི་བརྗོད། ཞལ་ནས་གསུངས་པའི་ཚིགས་སུ་བཅད་པ་ཀློག་པ་ན་མངོན་སུམ་དུ་འདུག་ལ་སེ་གོལ་གྱི་སྒྲས་ཆད་པར་བྱ་བ་དང། དེའི་གནས་སུ་ཕྱིན་ན་སྙིང་རྗེ་བྱ། མུར་འདུག་གི་ལྷའི་དྲུང་དུ་ཕྱིན་ན་སྙིང་རྗེ་ཞིང་ཕན་པར་བྱ་བའི་ཕྱིར་ཞལ་ནས་གསུངས་པའི་ཚིགས་སུ་བཅད་པ་བཀླག །བཟོ་ལ་ནན་ཏན་མི་བྱ་སྟེ་བསླབ་བམ་དེའི་སྣོད་གཞག་པ་ཡང་སྟེ། མིང་གིས་སྨོས་པ་འདི་རྣམས་མི་བསླབ་མི་བཅང་ཕ་རོལ་པོའང་མི་བསླབ། མ་གཏོགས་པ་ནི་བཏང་སྤྱད་ཀྱི་སྣོད་དང་ཁབ་རལ་དང་རས་ཕྱིས་སོ། །མིང་གིས་སྨོས་པ་འདི་རྣམས་བཅངས་ཀྱང་ཉེས་མེད་དོ། །དགེ་བས་གསོལ་བ་དང་མཐའ་གཅིག་ཅིང་བསོད་ནམས་ཀྱི་སེམས་ཀྱིས་བྱ་སྟེ་རྔན་པའི་མ་ཡིན་ནོ། །ནད་པ་ལ་གཏར་གའམ་སྨན་དཔྱད་ཀྱིས་གསོ་ན་སྙིང་རྗེའི་ཕྱིར་ཕན་པར་བྱ་བའི་ཁ་ཟས་དང་གླའི་ཕྱིར་མི་གསོ། བཀྲུ་སྨན་བྱིན་ཏེ་གཞན་དུ་མི་འགྲོ། སྨན་རྒོད་ནད་པ་ལ་བླུད་དེ། ལྡུད་པ་ལྡུད་པ་གུད་དུ་མི་འགྲོ། །དེ་ལྟ་བུའི་རྐྱེན་གཅིག་གིས་འགྲོ་ན་ཤིན་ཏུ་འཁྲུ་ཞིང་གནོད་པ་ལ་སོགས་པའི་ཆོ་ག་བསྟན་ཏེའོ། །ལྟག་མ་ལྟར་སྨན་བླུད་ན་སྨན་བླུད་པའི་དགེ་སློང་གུད་དུ་མི་འགྲོར་མི་རུང་ན་སྨན་གྱི་ཆོ་ག་ཅི་ལྟར་བྱ་བ་ཞིབ་ཏུ་བསྟན་ཏེ་གུད་དུ་འགྲོ། འདྲེག་མཁན་གྱི་བྱ་བ་བྱས་ཏེ་མཚན་མཚུངས་པ་དང་ཚངས་པ་མཚུངས་བར་སྤྱོད་པ་དང་རབ་ཏུ་དབེན་པའི་ཕྱོགས་སུའོ། །སྐྲ་འདྲེག་ན་དགེ་སློང་དང་དགེ་སྦྱོང་ཡང་ན་བྲེག་དགེ་སློང་མ་དང་དགེ་སྦྱོང་མའང་བྲེག་གོ །ལྟག་མ་ལྟར་བྲེག་པ་ནི་དབེན་པའི་ཕྱོགས་སུ་བྲེག་གོ །ཁྲིའི་ཡན་ལག་ཆག་ན་བཅོས། ཁྲིའི་རྐང་པ་ཆག་ན་དགེ་སློང་ཤིང་མཁན་ཤེས་ན་ལྐོག་དབེན་པར་བཅོས། དཀོན་མཆོག་གི་ཕྱིར་
ཕྲེང་བ་སྦྲེལ། དཀོན་མཆོག་གསུམ་ལ་མཆོད་པའི་ཕྱིར་མེ་ཏོག་ཕྲེང་བ་ལྐོག་དབེན་པར་བརྒྱུས་ཀྱང་ཉེས་མེད་རི་མོ་ཡང་དཀོན་མཆོག་མཆོད་པའི་ཚེ་སེམས་ཅན་འདྲ་བ་མ་ཡིན་པ་བྲི། མཎྜལ་ལྟ་བུ་དཀོན་མཆོག་ལ་མཆོད་པའི་ཕྱིར་བྲིན་སེམས་ཅན་གྱི་གཟུགས་མི་བྲི། བྲིས་ན་ཉེས་བྱས། དེ་བཞིན་པ་ནི་དེའི་ཕྱིར་འདྲི་བའོ། །ལྟག་མ་ལྟར་སེམས་ཅན་གྱི་གཟུགས་བྲིས་པ་ལྟ་མི་སྨོས་ཀྱི་སེམས་ཅན་གྱི་གཟུགས་བྲི་བར་བསམས་ཏེ་རི་མོ་ཞིག་ཤུར་ཞེས་བྲིས་པ་ལའང་ཉེས་བྱས་ཚངས་པ་མཚུངས་པར་སྤྱོད་པ་ཤི་ན་ལུས་ལ་མཆོད་པ་བྱ། དགེ་སློང་ཞིག་ཤི་ན་གྲོགས་ཀྱིས་བཀྲུས་ལ་ཅན་དན་དང་གུར་ཀུམ་ལ་སོགས་པས་མཆོད་པ་བྱ། དགེ་སློང་མའང་དེ་བཞིན་ནོ། །འོན་ཏེ་མ་ན་སྲོག་ཆགས་མེད་ན་བསྲེག །ལྟག་མ་ལྟར་ཤི་བའི་རོ་ལ་རྨ་ལ་སོགས་པའི་རོ་ལ་སྲིན་བུ་མེད་ན་རོ་བསྲེག །གདོན་མི་ཟ་བར་བརྟག་པས་སོ། །ལྟག་མ་ལྟར་བསྲེག་པ་ཡང་དག་པར་སྲིན་བུ་མེད་པར་རྟོགས་ན་གདོང་བསྲེག །བརྐོས་ཏེའམ་ཆུ་བོར་བསྐུར། ལྟག་མ་ལྟར་སྲིན་བུ་ཡོད་དམ་རླུང་དང་ཆར་པའི་རྐྱེན་ཀྱིས་བསྲེག་མ་ནུས་ན་སའི་འོག་གམ་གཙང་པོར་དོར། མི་རིགས་ན་སབ་སུབ་ཏུ་བཞག །ས་འོག་ཏུ་གཞུག་གམ་ཆུར་བསྐྱུར་མ་ནུས་ན་ལུང་ཁུང་དུ་དོར། མགོ་བྱང་ཕྱོགས་སུ་སྟེ་གློ་གཡས་པས་བསྙལ། རོ་དོར་བའི་ཚེ་ཐབས་འདི་ལྟར་གཞག །རྩ་བའི་ཐུམ་པོ་སྔས་སུ་གཞུག །སྔས་སུ་རྩྭ་ཐུམ་གཞུག །རྩྭའམ་ལོ་མས་གཡོགས། སྟེང་ནས་རྩྭའམ་ལོ་མས་གཡོགས། ཆོས་མཉན་པ་དང་སྦྱིན་པའི་ཚིགས་སུ་བཅད་པ་བྱ། རོ་བསྐྱལ་ནས་མི་རྟག་པའི་ཆོས་དང་ཞལ་ནས་གསུངས་པའི་ཚིག་བཞིའི་ལེའུ་གཅིག་བཀླག །རེག་པའི་གོས་དང་བཅས་ཏེ་བཀྲུ། རོ་འཛིན་པའི་གོས་དང་ལུས་ཐམས་ཅད་བཀྲུ། གཞན་ལག་པ་དང་རྐང་པ་བཀྲུ། རོ་ལ་མ་རེག་པ་རྣམས་རྐང་ལག་བཞི་དང་གདོང་བཀྲུ། མཆོད་རྟེན་ལ་ཕྱག་བྱས་ཏེ་འཇུག །རོ་བསྐྱལ་ཏེ་སླར་ལོག་ནས་མཆོད་རྟེན་ལ་ཕྱག་འཚལ་ཏེ་བདག་གི་གནས་ཁང་དུ་འཇུག །མཆོད་རྟེན་རྣམ་གཉིས་ཏེ་འཁོར་དང་བཅས་པ་དང་དཀའ་ཐུབ་ལྟ་བུའོ། །མཆོད་རྟེན་རྣམ་གཉིས་ལ་གཅིག་ནི་ཅི་སྟེ་སྲོག་ཤིང་འཕང་ལོ་མེད་པའོ། །གཅིག་ནི་ཅི་སྟེ་ངོས་བཞིར་ཁང་བུ་བཞི་བྱས་ཏེ་སངས་རྒྱས་ཀྱི་གཟུགས་གཞུག་པར་བྱ། རིགས་པ་ནི་འདི་རབ་ཏུ་འབྱུང་
བའོ། །དགེ་སློང་དགེ་སྦྱོང་ཤི་བའི་རུས་བུ་མཆོད་རྟེན་གྱི་ནང་དུ་གཞུག་ཏུ་རིགས་སོ། །དེ་སྟེ་དགེ་ནའོ། །ལྟག་མ་ལྟར་མཆོད་རྟེན་དུ་གཞུག་པ་ཚུལ་ཁྲིམས་དང་ཡོན་ཏན་དང་ལྡན་པ་ལ་བྱའོ། །སངས་རྒྱས་ཀྱི་ཐམས་ཅད་ལྟ་བུར་རོ། །སངས་རྒྱས་ཀྱི་མཆོད་རྟེན་ནི་སྒར་སྒུར་དང་འབར་འབུར་མེད་པར་བྱ། བང་རིམ་བཞི་དང་རྟ་བབས་དང་སྒོ་ང་དང་སྤྱི་སྤུབས་དང་སྲོག་ཤིང་དང་གདུགས་བཅུ་གསུམ་དང་ཆར་པ་དྲེད་བདེ་ནི་འདྲ་བའོ། །སངས་རྒྱས་ཀྱི་མཆོད་རྟེན་ཐམས་ཅད་འདི་ལྟར་བརྩིགས་ཏེ་ས་ལས་བང་རིམ་བཞི་བརྩིག །དེའི་སྟེང་དུ་རྟ་བབས་བྱ། དེའི་སྟེང་དུ་བུམ་པ་བྱ་དེའི་སྟེང་དུ་ཤིང་གྲུ་བཞི་པ་བྱ། དེའི་སྟེང་དུ་སྲོག་ཤིང་གཟུགས། སྲོག་ཤིང་ལ་འཕང་ལོ་བཅུ་གསུམ་གདགས། དེའི་སྟེང་དུ་གདུགས་གདགས། རང་སངས་རྒྱས་ཀྱི་ནི་ཆར་དྲེད་པ་མ་གཏོགས་སོ། །རང་སངས་རྒྱས་ཀྱི་མཆོད་རྟེན་ཀྱང་གཞན་ནི་སྔ་མ་འདྲ་བ་གདུགས་འབའ་ཞིག་མི་ཐོབ་བོ། །ཉན་ཐོས་ཀྱི་ནི་འབྲས་བུའི་སྙེད་པ་དུ་སྟེ་གཅིག་པར་རོ། །ཉན་ཐོས་ཀྱི་དགེ་སློང་རྒྱུན་དུ་ཞུགས་པ་ཞིག་ཤི་ནའང་བང་རིམ་ནི་ལྟག་མ་དང་འདྲ་བ་འཕང་ལོ་ནི་གཉིས་བྱ། ལན་ཅིག་ཕྱིར་འོང་བའི་ནི་འཕང་ལོ་གསུམ་བྱ། ཕྱིར་མི་འོང་བའི་ནི་བཞི་བྱ། དགྲ་བཅོམ་པའི་ནི་ལྔ་བྱ། ཡང་དག་པར་གཤེགས་པའི་དྲུང་དུ་དེའི་ཡུལ་ན་དེ་སྟེ་འདས་པའི་དེའི་ཕྱོགས་སུ་གང་དུ་དེའི་དེས་གཡོག་བྱས་པ་ལྟར་གནས་གྱུར་ཏོ།། ཡང་དག་པར་གཤེགས་པའི་མཆོད་རྟེན་གྱི་དྲུང་དུ་ཉན་ཐོས་ཀྱི་མཆོད་རྟེན་བརྩིག་ན་མདུན་དུ་མཽད་གལ་དང་ཤཱ་རིའི་བུའི་བརྩིག །ཨ་ནན་རྒྱབ་ཏུ་བརྩིག །ཀཱ་ཤྱ་དྲུང་དུ་བརྩིག་གློ་གཡས་གཡོས་སུ་དགྲ་བཅོམ་ཕལ་གྱི་མཆོད་རྟེན་བརྩིག །འདིར་ཇི་ལྟར་རྒན་རིམས་སུ་མི་བྱ་བར་མ་ཡིན། ལྟག་མ་ལྟར་མཆོད་རྟེན་བརྩིག་པ་སངས་རྒྱས་ཀྱི་འོག་ཏུ་དགྲ་བཅོམ་པ་གང་རྒན་པའི་རིམ་པ་བཞིན་བྱ། མ་རབས་ཀྱི་ནི་བྱི་བྱི་བོར་རོ། །དགེ་སློང་རྣམ་ལྔའི་མཆོད་རྟེན་ནི་སྲོག་ཤིང་འཕང་ལོ་མེད་པར་ཟླུམ་པོར་བྱ། དགེ་འདུན་གྱི་ཀུན་དགའི་ཕྱི་རོལ་དུ་བྱ། ལྟག་མ་ལྟར་དགེ་སློང་གི་མཆོད་རྟེན་ཕྱི་རོལ་དུ་བྱ། བསྲིངས་པའི་མཆོད་རྟེན་ལ་མཆོད་པའི་རིགས་དགེ་སློང་གིས་སངས་རྒྱས་ཀྱི་མཆོད་རྟེན་ཞིག་བརྩིགས་ན་ཉ་དུས་སུ་རྟག་ཏུ་མཆོད་ཅིང་བྱི་དོར་དང་སྐབས་སྐབས་སུ་མཆོད་སྟོན་བྱ། ཉན་ཐོས་པའི་མཆོད་རྟེན་ལ་ཕུལ་བའི་ཤས་ཚངས་པ་མཚུངས་པར་སྤྱོད་པ་ལའོ། །ཉན་ཐོས་ཀྱི་མཆོད་རྟེན་ལ་མཆོད་པའི་ཡོན་བདག་དད་
པས་ནོར་ཞིག་ཡོན་དུ་ཕུལ་ན་འཁོར་ཉེ་བའི་དགེ་སློང་གིས་བགོས་ཀྱང་ཉེས་མེད། མུ་ཏིག་གསུངས་པར་བྱ། ཉན་ཐོས་ཀྱི་དགེ་སློང་གི་མཆོད་རྟེན་ལ་མུ་ཏིག་ཡོན་དུ་ཕུལ་ན་ཞིབ་ཏུ་བཏགས་ལ་རྡོ་ཐལ་དང་བསྲེས་ཏེ་བསྐུ། སིལ་སྙན་དང་དུང་ནི་སངས་རྒྱས་ལ་དབུལ། ཉན་ཐོས་ཀྱི་མཆོད་རྟེན་ལ་མིང་གིས་སྨོས་པ་འདི་ཡོན་དུ་ཕུལ་ལ་སངས་རྒྱས་ཀྱི་མཆོད་རྟེན་ལ་ཕུལ་ཏེ་རྟག་ཏུ་མཆོད། ཞིག་རལ་བ་བཅོས་པའི་ཕྱིར་འདི་གཞག་པར་བྱ། ཉན་ཐོས་ཀྱི་མཆོད་རྟེན་ལ་ནོར་རྫས་ཡོན་དུ་ཕུལ་བ་ལས་དགེ་སློང་གཅིག་གི་ཤས་མཆོད་རྟེན་བཅོས་པའི་ཕྱིར་གཞག །མཆོད་པར་པ་ཅོས་པ་ཡང་ངོ༌། །གདུགས་དང་འཕན་ཞིག་ཡོན་དུ་ཕུལ་ན་མི་བགོ་བར་ཆོས་པའི་ཕྱིར་སྤྱི་ལ་གཞག །སངས་རྒྱས་ཀྱི་མཆོད་རྟེན་ལྕགས་ལས་བྱས་པའང་ཆོས་སོ། །མཆོད་རྟེན་འདི་ལྟར་བྱས་ཀྱང་ཉེས་མེད། གསེར་དང༌། དངུལ་དང༌། བཻ་ཌཱུཪྻ་དང༌། ཤེལ་གྱི་གདང་བུ་དར་སེན་མོའི་མཆོད་རྟེན་ན་ཡང་ངོ༌། །མིང་གིས་སྨོས་པ་འདི་རྣམས་ཀྱི་རྒྱུ་ལས་མཆོད་རྟེན་བྱས་ཀྱང་ཉེས་མེད། དབུ་དང་སེན་མོ་བཞུགས་པའི་མཆོད་རྟེན་བྱས་ཀྱང་ཉེས་མེད། འདིའི་འཁོར་བྱ། སངས་རྒྱས་ཀྱི་སྐུ་གཟུགས་དང་མཆོད་རྟེན་བྱན་འཁོར་དང་བཅས་པར་བྱ་སྟེ་འོག་ནས་འཆད། གནས་བདེན་གྱི་གནས་ན་གནས་པ་ལ་སོགས་པ་དང་མྱ་ངན་ལས་འདས་པའི་མཐར་ཕྱིན་པར་ཞེས་སོ། །ལྟག་མ་ལྟར་འཁོར་བྲི་བ་ནི་སངས་རྒྱས་གནས་བདེན་ནས་བབས་ནས་མཐའ་མྱ་ངན་ལས་འདས་ཀྱི་བར་དུ་འཁོར་དང་ཞབས་འབྲིང་དང་འཇམ་དཔལ་དང་བྱམས་པ་ལ་སོགས་པ་སྐུ་གཟུགས་ཀྱི་གཡས་གཡོན་དང་དྲི་གཙང་ཁང་གི་ངོས་ལ་རི་མོར་ཞིབ་ཏུ་བྲི། སྐྱང་ནུལ་སྦྱིན་མཆོད་རྟེན་དང་གཙུག་ལག་ཁང་ལ་སྐྱང་ནུལ་བྱ། དཀར་པོར་རོ། །སྐྱང་ནུལ་ནི་དཀར་པོར་བྱ། མེ་མར་འཛིན་པར་བྱ། མཆོད་རྟེན་གྱི་མདུན་དུ་མེ་མར་མི་ཤི་བའི་སྐྱབས་ཁ་ཡེད་གཅིག་བྱས་ཏེ་མེ་མར་དེར་བསྲེག །ཤིང་ཐགས་ཀྱིས་བསྐོར་བ་ཡང་ངོ༌། །མཆོད་རྟེན་ཁོ་ར་ཁོར་ཡུག་ཏུ་ཤིང་ཐགས་ཀྱིས་བསྐོར། སྒོ་སྐྱེས་བསྒྲེང༌། གཙུག་ལག་ཁང་གི་སྒོར་རྡོ་རིངས་བསྒྲེང༌། རྒྱལ་མཚན་སྦྱིན། མཆོད་རྟེན་ལ་རྒྱལ་མཚན་གཟུགས་ཏེ་རྒྱལ་མཚན་འོག་མ་རྣམས་སོ། །འདི་རྣམས་བཞི་སྟེ་སེང་གེའི་རྒྱལ་མཚན་དང་ཆུ་སྲིན་གྱི་རྒྱལ་མཚན་དང་ཀླུའི་རྒྱལ་མཚན་དང་གླང་པོའི་རྒྱལ་
མཚན་ཞེས་སོ། །རྒྱལ་མཚན་ལ་རྣམ་བཞི་སྟེ། མཆོད་རྟེན་གྱི་གྲ་བཞིར་ཤིང་བཞི་བསྒྲེང་ལ་གཅིག་གི་སྟེང་དུ་སེང་གེ་གཞག །གཅིག་གི་སྟེང་དུ་ཆུ་སྲིན་གཞག །གཅིག་གི་སྟེང་དུ་ཀླུ་གཞག །གཅིག་གི་སྟེང་དུ་བ་ལང་གཞག །དྲི་གཙང་ཕྲེང་བ་བྱ། མཆོད་རྟེན་གྱི་ངོས་ཁོར་ཡུག་ཏུ་ཁར་བུ་བྱས་ལ་ཁང་བུའི་ནང་དུ་སྐུ་གཟུགས་བཞག །སྒོ་སྐྱེས་བསྒྲེང༌། ཁུང་བུ་དེ་རྣམས་ལ་ཕྲེང་བ་བྱ། ཕྱི་ར་བྱ། མཆོད་རྟེན་དང་གཙུག་ལག་ཁང་བྱས་ནས་ཕྱི་རས་བསྐོར། ཤིང་ཐགས་ཀྱིས་འདི་བསྐོར། རྩིག་པ་མ་འབྱོར་ན་ཤིང་ཐགས་ཀྱིས་བསྐོར། ཀ་བ་བཙག་གིས་བྱུག །གཙུག་ལག་ཁང་གི་ཀ་བ་བཙག་གིས་བྱུག་རྩིག་པ་རྒྱ་སྐྱེགས་ཀྱིས་བྲི། གཙུག་ལག་ཁང་རྩིག་པའི་ངོས་རྒྱ་སྐྱེགས་ཀྱིས་བྲི། སྤོས་ཀྱིས་དབང་བསྐུར་བ་སྦྱིན། གཙུག་ལག་ཁང་དང་མཆོད་རྟེན་ལ་སྤོས་སྣ་ཚོགས་པ་བསྲེགས་པ་གཏོར། ཡུངས་མར་དང་ཡུངས་དང་ཙན་དན་དང་གུར་ཀུམ་གྱི་ཆག་ཆག་ཀྱང་ངོ༌། །ཙེ་ཏི་ལ་ཡུངས་མར་གྱིས་བྱུགས་ལ་དེའི་སྟེང་དུ་ཡུངས་གིས་སེར་པོར་བསྐུ། མིང་གིས་སྨོས་པ་འདི་རྣམས་ཀྱིས་བསྐུ་ཞིང་ཆག་ཆག་བྱ། ཚེར་མི་གཟུགས། མཆོད་རྟེན་ལ་ཚེར་མའམ་ཐུར་མ་དང་གཟེར་མི་གདབ། བ་གླང་གི་སོ་ཕྲེང་བ་གདགས་པའི་ཕྱིར་སྦྱིན། ཙེ་ཏི་ལ་མེ་ཏོག་གི་ཕྲེང་བ་གདགས་པའི་ཕུར་བུ་བྱ། བསླང་བའི་ཚེ་ན་སྟེང་དབུག་པར་མ་ཡིན། ལྟག་མ་ལྟར་ཕུར་པ་གཟུགས་པ་ནི་མཆོད་རྟེན་བསླང་བའི་ཚེ་ཕུར་བུ་གདབ་པའི་བུ་གུ་གདོད། སྟེང་དུ་མེ་མར་མི་སྦྱིན། ཙེ་ཏི་བུམ་པའི་སྟིང་དུ་མེ་མར་མི་གཞག་པར་ངོས་ཀྱི་ཁང་བུར་གཞག །ཁྱིམ་པས་མཆོད་པའི་ཕྱིར་གཟེག །ཁྱིམ་པས་གདུགས་དང་མེ་ཏོག་གིས་མཆོད་དུ་འོངས་ཏེ་བརྒྱན་ཀྱང་ཉེས་མེད། མེད་ན་དགེ་སྦྱོང་ལས་རྐང་པ་སྤོས་ཆུས་བཀྲུས་ཏེའོ། །ཁྱིམ་པ་མེད་དགེ་སློང་གིས་མིང་གིས་སྨོས་པ་འདི་རྣམས་ལྟར་བྱ། དེ་སྟེའང་འདི་མེད་ན་སྤོས་ཀྱིས་དྲིལ་པའམ་གོས་ཀྱིས་དཀྲིས་ཏེ་སྟོན་པའི་འདུ་ཤེས་མངོན་པར་བྱས་ཏེ་དོན་མངོན་པར་དྲན་པར་བསམས་ཏེའོ། །ལྟག་མ་ལྟར་དགེ་སྦྱོང་གིས་རྐང་པ་བཀྲུར་ཆུ་མེད་ན་སྤོས་ཀྱིས་རྐང་པ་དྲིལ་བའམ་རྐང་པ་གོས་ཀྱིས་དཀྲིས་ཏེ་བདག་གི་མཁན་པོ་ཡིན་ནོ་བར་འདུ་ཤེས་གཞག་སྟེ། སྟེང་ནས་སླར་བབས་ཀྱི་བར་དུ་བླ་མ་ལ་མཆོད་པའོ་སྙམ་དུ་བསམ་པ་རྒྱུན་དུ་གཞག །དེ་དག་ཀྱང་ན་དགེ་སློང་གིས་དེ་ལྟར་དེ་བཞིན་དུའོ། །
ལྟག་མ་ལྟར་ཁྱིམ་པ་དང་དགེ་སྦྱོང་གིས་ལྟག་མ་ལྟར་བྱ། དེའི་ཕྱིར་ཐག་བུ་བྲེ། མཆོད་རྟེན་ལ་འཛེག་པའི་ཆེ་འཕང་ལོའི་དྲུང་དུ་ཐག་པས་གདགས་ཏེ་འཛེག་པའི་ལག་པས་འཇུས་ཏེ་འཛེགས་པ་དང་གདུགས་གསོལ་བའི་ཚེའང་ཐག་པ་བརྒྱངས་ཏེ་གདགས། རིན་པོ་ཆེའི་ཕྲེང་བ་སྦྱིན། མཆོད་རྟེན་ལ་རིན་པོ་སྣ་བདུན་གསོལ་ན་རིགས་སོ། །སྙིང་པོ་གཡོགས་པ་མ་རུང་བར་འགྱུར་བ་དགག་པའི་ཕྱིར་གཡོགས། མཆོད་རྟེན་ལ་ཁུང་བུ་སྒོ་བཞིར་བཏོད་ལ་སྟེང་གཡོགས་པར་བྱས་ཀྱང་ཉེས་མེད། མུན་པ་མི་གནག་པའི་ཕྱིར་སྒོ་གཏོད། མཆོད་རྟེན་གྱི་ཁང་བུ་མུན་པ་མི་གནག་པར་བྱ་བའི་ཕྱིར་ངོས་བཞིར་སྒོ་བྱ། སངས་རྒྱས་ཀྱི་གཟུགས་བྱ། སྐུ་གཟུགས་དང་མཆོད་རྟེན་རིན་པོ་ཆེ་སྣ་བདུན་ནམ་གདུགས་ལ་བྲིས་པའམ་སྐུད་རིས་ཀྱིས་བྲིས་པ་གང་ཡང་རུང༌། འདི་མཆོད་པ་གཞག །མཆོད་རྟེན་ལ་ལོ་དུས་སུ་རྟག་པར་མཆོད་པར་བྱ་སྟེ་འོག་མ་རྣམས། སྐྱེས་པ་དང༌། ཅོད་པན་དང་གཙུག་ཏོར་དང་བྱང་ཆུབ་པའི་གཙུག་ཏོར་དང་བྱང་ཆུབ་པའི་མཆོད་སྟོན་བདག་གིས་མིང་གིས་སྨོས་པ་འདི་རྣམས་ཀྱི་དུས་གསུམ་རྟག་པར་མཆོད་རྟེན་དང་སྐུ་གཟུགས་མཆོད་པར་བྱ། གྲོང་ཁྱེར་འཇུག་པར་འདིར་བྱ་བ་ཡོང་ངོ༌། །ཁང་བུ་རྩེག་མའི་གན་དུ་མཆོད་རྟེན་གཞག་ལ་ཡུལ་བསྐོར་བར་བྱ། དགེ་སློང་གིས་བསྐུར་བ་བརྟགས་པའོ། །ལྟག་མ་ལྟར་ཡུལ་བསྐོར་བ་དགེ་སློང་བཞིས་མེ་ཁང་ཡང་ཉེས་མེད། འདིའི་ཚེ་གསར་བུས་སོ། །ལྟག་མ་ལྟར་བསྐུར་བ་དགེ་སློང་གཞོན་ནུས་བསྐུར་རོ། །སྡེ་ལྔས་འཁོར་སྦྱིན། ཡུལ་བསྐོར་བའི་ཚེ་དགེ་སློང་སྡེ་ལྔས་མཆོད་ཅིང་འཁོར་བྱའོ། །ཡོན་རྒན་རིམས་ཀྱིས་བླང་ངོ༌། །ལྟག་མ་ལྟར་ཡུལ་བསྐོར་བའི་ཚེ་མཆོད་རྟེན་ལ་ཡོན་ཕུལ་ན་མི་ཁྱམས་པར་བྱ་བའི་ཕྱིར་དགེ་སློང་རྒན་པོས་བླང༌། གསིལ་དཀྲོལ་བ་དང་གཞན་ཡང་དགེ་བའི་བཀུར་སྟི་ཆེན་པོས་སོ། །ཁུང་བུ་རྩེག་མས་ཡུལ་བསྐོར་བའི་ཚེ་དང་གླིང་དང་སིལ་དཀྲོལ་བ་སྣ་ཚང་བར་དཀྲོལ་ཞིང་མཆོད། ཁ་ན་མ་ཐོ་བ་མེད་པ་ནི་དཀྲོལ་བའི་ཕྱིར་ཀྱཻ་སྐྱེས་བུ་སྟོན་པ་ལ་མཆོད་པ་གྱིས་ཤིག་ཅེས་བརྗོད་པའོ། །ཁང་བུ་རྩེག་མ་དང་ཡུལ་བསྐོར་བའི་ཚེ་དུད་པ་ལ་སོགས་པ་ལ་རྡ་རྡུང་ཞིང་མཆོད་ཅིག་ཅེས་བསྒོའང་འདིའི་ཚེ་ནི་ཉེས་པར་མི་འགྱུར་རོ། །གྲོང་དང་ཚོང་དུས་དང་བཞིའི་
དང་མངོན་སུམ་དག་ཏུ་སང་ངམ་གནངས་སངས་རྒྱས་གཤེགས་པ་འབྱུང་ངོ་ཞེས་འགྲོ་བ་ལ་བྲིས་པ་ལ་བ་ལང་གི་སྟེང་དུ་བཞོན་ཏེ་རྒྱལ་མཚན་དང་གདུགས་ཀྱིས་བསྐོར་བ་བསླབས་སོ། །ཡུལ་བསྐོར་བའི་ཞག་གཉིས་གསུམ་གྱི་མདུན་དུ་གྲོང་མི་ཐམས་ཅད་ལ་གྲོང་བར་ཕྱག་དར་དང་ཆག་ཆག་དང་མཆོད་པ་གྱིས་ཤིག་ཅེས་དགེ་སློང་ངམ་ཁྱིམ་པས་བ་ལང་ལ་བཞོན་པ་ཐམས་ཅད་དུ་རྒྱས་བར་བསྒོ། བྱང་ཆུབ་སེམས་དཔའི་གཟུགས་བྱ་བ་ཆོས་སོ། །བྱང་ཆུབ་སེམས་དཔའ་གཟུགས་རིན་པོ་ཆེ་སྣ་བདུན་ལ་སོགས་པ་ལས་བྱས་ཀྱང་ཉེས་མེད། འདི་ལ་རྒྱལ་མཚན་གྱི་འཁོར་དང་ཤིང་ཐགས་ཀྱིས་བསྐོར་བ་དང་ལྕགས་ཀྱི་ཀ་བ་ཡང་ངོ༌། །བྱང་ཆུབ་སེམས་དཔའི་གཟུགས་ལ་མིང་གིས་སྨོས་པ་འདི་རྣམས་བྱ། དེ་ལ་བ་དན་བཅིང༌། ལྟག་མ་ལྟ་བུའི་ལྕགས་ཀྱི་ཀ་བ་ཁོ་ར་ཡུག་ཏུ་བསྐོར་བ་ལ་བ་དན་གདགས། འཁོར་བྱ། བྱང་ཆུབ་ཀྱི་གཟུགས་ཀྱིས་ཡུལ་བསྐོར་བ་ཡང་ལྟག་མ་སངས་རྒྱས་ཀྱི་གཟུགས་བསྐོར་བ་ལྟར་བྱ། ལྷབ་ལྷུབ་ཀྱིས་བརྒྱན་ཏེ་མ་གཏོགས་པ་ནི་ཞབས་ཀྱི་རྒྱན་དང་སྙན་ཆའོ། །བྱང་ཆུབ་ཀྱི་གཟུགས་ལ་ཟ་འོག་ལ་སོགས་པའི་ན་བཟའ་དང་རྒྱན་སྣ་ཚོགས་ཀྱིས་བརྒྱན་ཏེ་བསྐོར། ཞབས་ལ་གདུ་བུ་གདགས་པ་དང་སྙན་ཆ་དང་གཉིས་ཀྱིས་ནི་མི་བརྒྱན། སྤོས་ཀྱི་ཡན་ལག་སྦྱིན་པ་སྦྱིན། བྱང་ཆུབ་ཀྱི་གཟུགས་ལ་ཙན་དན་དང་གུར་ཀུམ་དང་སྤོས་ཞིམ་པོས་བསྐུ། ཁྱོགས་དང་ཤིང་རྟས་དྲང༌། བྱང་ཆུབ་ཀྱི་གཟུགས་ཁྱོགས་སམ་ཤིང་རྟ་གང་གིས་དྲངས་ཀྱང་རུང༌། གདུགས་དང་རྒྱལ་མཚན་དང་བ་དན་དེར་བསྒྲེང༌། བྱང་ཆུབ་ཀྱི་ཡུལ་བསྐོར་བའི་ཚེ་བུས་པ་གཞོན་ནུའི་ལག་ན་མིང་གིས་སྨོས་པ་འདི་བསྐུར་ལ་བསྐོར། མེ་ཏོག་གིས་གོང་བུ་ལ་གསོལ། དབུ་ལ་མེ་ཏོག་གི་ཕྲེང་བས་བརྒྱན། ཡོན་ལྷུང་བ་ཡང་ངོ༌། །མེ་ཏོག་དང་པོག་སྤོས་ལྟ་བུ་གཟུགས་ཀྱི་སྟེང་དུ་གཏོར་ཀྱང་ཉེས་མེད། གནས་བརྟན་གྱིས་བསྲུང༌། ཤིང་རྟ་ལ་ཕྲེང་པའི་སྒྲོམ་བྱ། ཤིང་རྟའི་མདུན་དུ་བྲེ་འདྲ་བར་གྲུ་བཞིར་བྱས་ལ་དེའི་ནང་དུ་མེ་ཏོག་སྣ་ཚོགས་གཞག་ལ་གཏོར། བསུང་གི་སྒོམ་ཡང་གཞག །ཤིང་རྟའི་མདུན་གྱི་སྟེང་དུ་བག་ཕྱེ་ཞིམ་པོའི་བསུང་གིས་བཀང་ལ་གཞག །ཕྲེང་བ་གསོལ། ཁྱིམ་པས་ཕྲེང་བ་འབུལ་
ན་སྐུ་གཟུགས་ལ་གདགས་འདིའི་མཆོད་པ་བཞིན་ཏེ་སིལ་དཀྲོལ་ཞི་ལ་འགྲོ་བ་འདོང་ནས་བརྒྱན་གསིལ་ཡུལ་བསྐོར་པ་ཟིན་ནས་རྔ་ལ་སོགས་པ་དང་རྒྱན་ཐམས་ཅད་གཅོད། ནུབ་མོའོ། །ལྟག་མ་ལྟར་རྒྱན་དཔོག་པ་ནི་ནུབ་མོ་དབོག །རབ་ཏུ་བྱུང་བའི་གནས་སུ་མཆོད་པ་བཅས་པ་ཆོས་སོ། །གཙུག་ལག་ཁང་དུ་ཁྱིམ་པ་དགེ་སློང་ཞིག་གིས་ཞིང་ངམ་གྲོང་ཞིག་ཕུལ་ཏེ་དུས་དུས་སུ་རྟག་པར་ཡུལ་བསྐོར་བ་གྱིས་ཤིག་ཅེས་གཞག་པ་དེ་བཞིན་མི་ཆད་པར་ཡུལ་བསྐོར་བའི་རྒྱུ་དང་ཡོན་ཟན་དུ་བྱའོ། །མ་བརྟགས་པ་དང་རྟེན་ཅིང་བརྟགས་པ་སྤོང་ན་མ་བརྟགས་པའི་བཅུ་བསྡུས་པའོ། །བྱི་ན་ཡའི་མགོ་ནས་འདིའི་བར་དུ་ཐམས་ཅད་ཀྱང་ཞལ་ནས་གསུངས་པ་སྟེ་རུང་ངམ་མི་རུང་བ་དང་གནང་མི་གནང་པར་བཤད་པའོ། །ལྟག་ཏུ་བཤད་པ་དང༌། འོག་ནས་འབྱུང་བ་རིགས་པ་ནི་བྱ། མི་རིགས་པ་ནི་ཐམས་ཅད་བཏང་སྟེ། འདིར་མ་བྲིས་མོད་ཀྱང་ཉལ་ཏེ་གཅིན་མི་གཅི་བ་ལ་སོགས་པ་མ་བརྟགས་པ་ཡིན་པས་མི་བྱའོ། །མ་བརྟགས་པ་སྤྱད་པས་འབྲས་བུ་དགེ་བར་འགྱུར་ན་བྱའོ། །དགེ་སློང་ཞིག་ཚེ་རབས་སྟོང་གི་བར་དུ་མཐོ་རིས་ན་འདུག་འདུག་པ་ལས་བྱིག་གཤུར་ཞུགས་པ་ལས་ཁང་པ་བཟང་པོ་ལ་སོགས་པ་སྤྱར་ནས་དེའི་ནང་དུ་བསམ་གཏན་བྱས་ནས་དེའི་དགྲ་བཅོམ་པར་གྱུར་པ་ལྟ་བུ་སྟེ་མི་དགེ་བ་སྤྱད་པ་ལས་དགེ་བར་འགྱུར་ན་བྱའོ། །ཕྱི་མ་དང་སྙེན་ཅིང་སྔ་མ་སྤོང་ན་བརྟགས་པའོ། །སངས་རྒྱས་ཀྱིས་གསུངས་པ་ཉེས་བྱས་ཙམ་གྱི་ཚོད་ཀྱང་མི་གནང་ཞེས་འབྱུང༌། ཡུལ་གྱི་རྣམ་པ་སྦྱར་ཏེ། སེམས་ཅན་གྱི་མིག་འགག་པར་འགྱུར་ན་ཉེས་བྱས་ཙམ་བཏང་ལ་སེམས་ཅན་གྱི་ཡིད་བཞིན་དུ་བདེ་བར་བྱས་ཀྱང་ཉེས་པ་མེད་དོ། །མལ་སྟན་གྱི་དངོས་པོ་སྟེ། ཕྲན་ཚེགས་སུ་གཏོགས་པའོ། །རྫོགས་སོ།། །།འདུལ་བའི་མདོའི་རྩ་བའི་འགྲེལ་པ་ཆུང་བ་སློབ་དཔོན་མང་དུ་ཐོས་ཤིང་ཡོན་ཏན་དང་ལྡན་པ་ཡོན་ཏན་གྱི་འོད་ཐམས་ཅད་ཡོད་པར་སྨྲ་བ་པས་བྱས་པའོ།། །།