འདུལ་བ་ཚིག་ལེའུར་བྱས་པ།
ས་གའི་ལྷ།
རྒྱ་གར་སྐད་དུ། བི་ན་ཡ་ཀཱ་རི་ཀཱ། བོད་སྐད་དུ། འདུལ་བ་ཚིག་ལེའུར་བྱས་པ། བམ་པོ་དང་པོ། ཐམས་ཅད་མཁྱེན་པ་ལ་ཕྱག་འཚལ་ལོ། །འཕགས་པ་ཉན་ཐོས་དང་རང་སངས་རྒྱས་ཐམས་ཅད་ལ་ཕྱག་འཚལ་ལོ། །གང་གིས་ཉིད་ཀྱི་དབུ་ཡང་རིན་ཆེན་འོད་འཕྲོ་ལྟ་བུ་དང༌། །རབ་རྒྱས་པདྨ་གསེར་མདོག་དང་འདྲའི་བཙུན་མོ་རྣམས་ཀྱང་བྱིན། །མ་ལུས་དོན་གཉེར་རབ་དགར་མཛད་ནས་བྱང་ཆུབ་མཆོག་བརྙེས་པ། །ཆོས་འདུལ་ཞི་བའི་དོན་དུ་སྟོན་མཛད་དེ་ལ་ཕྱག་འཚལ་ལོ། །གང་ཐོབ་ངན་འགྲོའི་འཇིགས་པ་རྣམས་ལས་ངེས་པར་སྒྲོལ་འགྱུར་ཞིང༌། །སྲིད་པའི་འཆིང་བ་མཐའ་དག་བཅད་ནས་མྱ་ངན་འདས་གྱུར་པ། །འཁོར་བའི་རྒྱ་མཚོ་གཏིང་མཐའ་མེད་པ་ཀུན་ལས་སྒྲོལ་བ་ཡི། །གཟིངས་གྱུར་གཅིག་པུ་བདེ་གཤེགས་ཀྱིས་བསྟན་ཆོས་དེ་ལ་ཡང་འདུད། །གང་ཡང་ཡོན་ཏན་ཀུན་ལྡན་ཡོན་གནས་དམ་པར་གང་གྱུར་པས། །ཅུང་ཟད་ཕུལ་ཡང་འབྲས་བུ་རྒྱ་ཆེན་ཤིན་ཏུ་འཕེལ་འགྱུར་བ། །བདག་ཉིད་ཀུན་གྱིས་ཕྱག་
འོས་བདེ་བར་གཤེགས་པས་རབ་ཏུ་བསྔགས། །གང་ཟག་བརྒྱད་མཆོག་ལེགས་སྤྱོད་ཀྱིས་བརྒྱན་འཕགས་ཚོགས་རྣམས་ལའང་འདུད། །གང་གིས་འདུལ་བ་བསྟན་པ་དང༌། །གང་གི་གང་ཞིག་འདུལ་བ་ཐོབ། །མ་དུལ་སྤངས་ནས་འདུལ་དབང་གྱུར། །འདུལ་བ་ལ་ནི་ཡང་དག་གནས། །ཆོས་དང་འཕགས་པའི་ཚོགས་བཅས་ཀྱི། །སྟོན་པ་དེ་ལ་ཕྱག་འཚལ་ནས། །གདུལ་བྱ་རྣམས་ནི་གདུལ་བའི་ཕྱིར། །འདུལ་བ་ལས་བརྩམས་ཅུང་ཟད་བརྗོད། །ལེ་ལོ་ཅན་དང་བློ་དམན་དག །གཞུང་མངས་རྣམས་ཀྱིས་འཇིགས་པ་ནི། །ལེགས་གསུངས་འདུལ་བའི་རྒྱ་མཚོ་ལ། །ཡོན་ཏན་ལྡན་ཡང་འདོད་མི་བྱེད། །དེ་ཕྱིར་དེ་དག་གཞུག་དོན་དུ། །སྐྱོ་མེད་འགྲོ་བའི་ཆེ་བ་ཡི། །ཚིག་ལེར་བྱས་པའི་ཐེམ་སྐས་ཀྱིས། །རྟག་ཏུ་མུ་སྟེགས་སྟོན་བྱེད་བཞིན། །རབ་བསྔགས་ནོར་གྱིས་ཕུན་ཚོགས་ཤིང༌། །ལྷ་ཡི་ཁང་བཟངས་དམ་པར་སྐྱེ། །ཏིང་ངེ་འཛིན་དང་ངེས་འབྱུང་འཐོབ། །ཚུལ་ཁྲིམས་འདི་ནི་འབྲས་བུ་ཆེ། །དེ་ལ་འདིར་ནི་རྣམ་ཀུན་དུ། །འདུལ་བ་མིན་པས་དག་པ་མེད། །ཇི་ལྟར་ཆུ་མེད་འདག་ཆལ་གྱིས། །མཉེས་ཀྱང་དྲི་མ་མི་འདག་བཞིན། །ཇི་ལྟར་ཟླ་བ་མེད་པ་ཡི། །
མཚན་མོ་དག་ནི་མཛེས་མ་ཡིན། །དེ་བཞིན་ཚུལ་ཁྲིམས་མི་གནས་པའི། །རབ་བྱུང་རྒྱལ་བའི་བསྟན་མི་མཛེས། །དེ་ཕྱིར་སྙོམ་ལས་སྤངས་ནས་ནི། །བྱ་དང་བྱ་མིན་ཤེས་ནུས་ཕྱིར། །ཚུལ་ཁྲིམས་ཀྱིས་ནི་བརྒྱན་འདོད་པས། །འདུལ་ལ་འབད་པས་གནས་པར་བྱ། །གང་ཕྱིར་འདུལ་བ་ཤེས་གྱུར་ཅིང༌། །གུས་པར་བྱེད་པའི་དགེ་སློང་ནི། །རང་ཉིད་ཡིད་ཆེས་གནས་གྱུར་པས། །གདམས་ངག་རྗེས་བསྟན་སྟོན་པ་ཡིན། །དེ་ཡང་འཁོར་རྣམ་བཞི་པོ་ཡིས། །ཤིན་ཏུ་གུས་བཅས་མདུན་བདར་ཞིང༌། །འདས་དང་མ་བྱོན་ད་ལྟར་གྱི། །སངས་རྒྱས་རྣམས་ཀྱི་གཅེས་མཛོད་འཛིན། །སྐྱེས་ཆེན་རྣམས་ལ་ཕན་ཕྱིར་ཡང༌། །དམ་པའི་ཆོས་ལ་ལེགས་གནས་བརྩོན། །འདི་ཡི་རང་གི་ཚུལ་ཁྲིམས་ཀྱི། །ཕུང་པོ་ལེགས་བསྲུངས་ཉམས་པ་མེད། །གཞན་གང་འགྱོད་པ་དང་བཅས་པ། །ཐམས་ཅད་དེ་ཡི་རྗེས་སུ་འབྲང༌། །དོན་རྣམས་རྣམ་པར་ངེས་པ་ཡང༌། །ཕུལ་ཕྱིན་མཁས་པ་ཐོབ་པ་ཡིན། །ཆོས་རིག་ཆོས་དང་བཅས་པ་ཡིས། །ཕ་རོལ་རྒོལ་བ་ཕམ་པར་བྱེད། །གཙུག་ལག་ཁང་དུའང་གཞན་མི་འགྲན། །དགེ་འདུན་དབུས་ན་འཇིགས་པ་མེད། །དེ་ཕྱིར་ཕྱོགས་ཀྱི་སྒྲོན་མ་སྟེ། །འོད་གསལ་རབ་ཏུ་སྣང་བར་བྱེད། །གང་དུ་འདུལ་བ་མཁས་གནས་པ། །དེ་རུ་ང་ནི་སྙིང་ལས་ཆུང༌། །དེ་ལྟར་དཔག་མེད་རྣམ་པ་ཡིས། །ཐུབ་པས་འདུལ་བའི་ཕན་ཡོན་གསུངས། །དེ་བས་གུས་པ་དང་བཅས་པས། །ཆོས་འདུལ་གཟུང་ཕྱིར་བརྩོན་པར་བྱ། །ལོ་བཅུ་ཡང་དག་རྫོགས་པ་ཡི། །དགེ་སློང་ཀུན་སྡོམ་བདག་ཉིད་ཅན། །གསལ་ཞིང་ཀུན་སྤྱོད་རིག་པ་ཡིས། །རབ་བྱུང་དང་ནི་བསྙེན་རྫོགས་བྱ། །སོ་སོར་ཐར་དང་རྣམ་འབྱེད་དོན། །མཁས་ཤིང་དགེ་བས་སྦྱིན་བྱ་སྟེ། །གཞན་ལ་རྗེས་སུ་སྟོན་པ་ཡི། །མཐུ་ལྡན་ཞུ་གནས་བཅའ་བའི་འོས། །སྟོན་པའི་གསུང་ནི་མ་འཁྲུགས་པའི། །བྱིས་པས་མདོ་ཙམ་བཀླགས་པ་ཡིས། །གསལ་བར་ཤེས་པ་མ་ཡིན་པས། །རྣམ་པར་ཕྱེ་སྟེ་རྟོགས་པར་བྱ། །སོ་སོར་ཐར་དང་རྣམ་འབྱེད་ནི། །གང་འདིར་ཤིན་ཏུ་མི་མཁས་ལོ། །དྲུག་ཅུ་ལོན་ཡང་བྱིས་པ་སྟེ། །དེ་ནི་གཞན་ལ་བརྟེན་པས་གནས། །སློབ་དཔོན་དེ་ལས་རྒན་ཡང་ནི། །གཞོན་
ནུས་ཇི་བཞིན་ངེས་བརྟེན་ཏེ། །གསར་བུ་ཡིན་ཕྱིར་ཕྱག་མི་བྱ། །གཞན་ནི་ཐམས་ཅད་བྱིས་པས་བཞིན། །ཕམ་པ་བྱུང་དང་བུ་ལོན་ཆགས། །ནད་པ་རབ་ཏུ་དབྱུང་མི་བྱ། །བྲན་དང་རྒྱལ་པོས་བཀྲབས་པར་གྲགས། །ཆོམ་རྐུན་རྒྱལ་མཚན་འཆང་བ་མིན། །སྨད་པའི་རིགས་དང་ཡན་ལག་མེད། །སྦུལ་གྱོལ་ལག་སོར་སྦྲུལ་འདྲ་དང༌། །སྨད་འཁྱལ་ལག་རྡུམ་འཐེང་པོ་དང༌། །སྣ་ལེ་བ་དང་ནི་སྣ་རིངས་མིན། །གཞོན་ཆེས་པ་དང་རྒན་ཆེས་དང༌། །ཧ་ཅང་བོང་རིང་ཧ་ཅང་ཐུང༌། །ཡན་ལག་མི་མིན་རྣམ་པ་ཅན། །ཧ་ཅང་མགུལ་རིངས་མཇིང་ནུབ་མིན། །བུད་མེད་ལམ་དང་ཁུར་གྱིས་དུབ། །མགོ་རིང་མགོ་ཐུང་མགོ་ཆུང་དང༌། །སོ་ནི་ཤིན་ཏུ་ཕྱིར་གྱེད་དང༌། །མིག་ཡོན་དང་ནི་ལྟ་སྟངས་འཇིགས། །དམར་དང་སེར་དང་སྔོ་ཆེས་དང༌། །ཆུ་བུར་རྣམ་པ་ལྟ་བུའི་མིག །རབ་ཏུ་བྱུང་བ་བཀག་པ་སྟེ། །སྤྲུལ་པ་ལ་སོགས་དེ་བཞིན་ནོ། །སྤང་བར་བྱ་བ་མདོར་བསྡུ་ན། །མདོག་དང་དབྱིབས་ལ་སྐྱོན་ཆགས་དང༌། །མ་རུངས་རིགས་ཏེ་རྣམ་པ་གསུམ། །འཁོར་གྱུར་ཀུན་ནས་སྨོད་པའོ། །མདོག་སྐྱོན་དམར་སྐྱ་ལ་སོགས་ཏེ། །དབྱིབས་སྐྱོན་བཞིན་ངན་ལ་སོགས་ཡིན། །བོང་བུ་ལ་སོགས་རྣ་དང་མགོ །སྐྲ་དང་རྣ་བ་མེད་ཉིད་སྤང༌། །གླང་པོ་རྟ་དང་སྤྲི་སྣ་འདྲ། །སྣ་མེད་པ་དང་མིག་གཅིག་དང༌། །མིག་མེད་བ་ལང་ལ་སོགས་ཀྱི། །སོ་འདྲ་གང་ཡང་སོ་མེད་པའོ། །རིགས་ནི་གཤེད་མ་སྨྱིག་མ་མཁན། །གཡུང་པོ་ལ་སོགས་རྣམ་པར་སྤང༌། །ཤིང་རྟ་མཁན་ལ་སོགས་པ་དང༌། །བསྟན་བཅོས་ལས་ནི་གང་བཀག་པ། །དེ་བཞིན་གསལ་ཤིང་མཁན་སོགས་དང༌། །ཆང་འཚོང་ལ་སོགས་གང་ཡིན་པ། །རང་བཞིན་དམན་གྱུར་དེ་དག་ལ། །རྣམ་པ་ཀུན་དུ་བསླབ་མི་སྦྱིན། །དེ་དག་དགེ་རྒྱུན་མེད་མིན་ཞིང༌། །ཐར་པའང་མི་འདོད་མ་ཡིན་མོད། །གཅིག་ཏུ་བསྟན་ལ་སྐྱེ་བོ་ཡིས། །ཐོས་ན་སྐྱོན་དུ་ལྟ་ཕྱིར་བཀག །བསམ་དང་རྗེས་ཀྱི་བསམ་ཤེས་ཤིང༌། །མངོན་ཤེས་ཏིང་འཛིན་ཐོབ་པ་ནི། །མཐུ་ཡིས་འཇིག་རྟེན་ཚིམ་བྱེད་ཕྱིར། །རབ་ཏུ་འབྱིན་ན་ཉེས་པ་མེད། །ཇི་སྐད་བསྟན་སྐྱོན་རྣམས་བྲལ་ཞིང༌། །དགེ་བ་དོན་དུ་གཉེར་རྣམས་ལ། །བར་ཆད་མཐའ་དག་དྲིས་ནས་ནི། །མགོ་ནས་རྐང་པའི་བར་དུ་བརྟག །ཞག་
བརྒྱད་ལ་སོགས་བཟུང་ནས་ཀྱང༌། །ཇི་སྲིད་བར་དུ་ལེགས་པར་བརྟག །གང་ཞིག་སྔོན་དུ་ཡོངས་བརྟགས་ནས། །ཉི་མ་གཅིག་ཀྱང་གཞག་མི་བྱ། །ཐོག་མར་སྐྱབས་གསུམ་བྱིན་ནས་ནི། །བསླབ་གཞི་ལྔ་པོ་དག་ཀྱང་ངོ༌། །དཀར་པོའི་གོས་ནི་འཛིན་བཞིན་ལ། །ཚོགས་ཀྱི་ནང་དུ་མཁྱེན་པར་གསོལ། །དགེ་འདུན་རྩེ་གཅིག་རྗེས་གནང་ཚེ། །རབ་བྱུང་ཆོ་ག་སྔོན་འགྲོ་བས། །སློབ་དཔོན་རྣམ་པར་མཁས་པ་ཡིས། །ཡན་ལག་བཅུ་ཡི་སྡོམ་འཛིན་གཞུག །དེ་ལྟར་དགེ་ཚུལ་བྱས་མ་ཐག །འདི་ནི་ཁྱིམ་པ་ཐམས་ཅད་ཀྱིས། །ཕྱག་བྱེད་སྨོན་པར་འགྱུར་བ་སྟེ། །གང་ཕྱིར་ཁྱིམ་གྱི་འཆིང་གྲོལ་ཕྱིར། །ཚུལ་ངན་རབ་རིབ་མུན་བསལ་ཏེ། །ངུར་སྨྲིག་གོས་ནི་འཛིན་པ་ཡིས། །ཉི་མ་ཤར་ལྟར་ལྷང་ངེར་ནི། །ཕུལ་ཕྱིན་དེ་ནི་ཤིན་ཏུ་མཛེས། །སུམ་ཅུ་རྩ་གསུམ་ཡོངས་འདུའི་ཤིང༌། །ས་བརྟོལ་ལོ་འདབ་རྙིང་པ་བཞིན། །སྡིག་པ་ཀུན་ལས་ལྡོག་དོན་དུ། །འདི་ཡི་བསྙེན་རྫོགས་དེ་བཞིན་ནོ། །ཡུལ་དབུས་སུ་ནི་དགེ་སློང་རྣམས། །བཅུ་ལས་ཉུང་དུ་མི་རུང་སྟེ། །མཐའ་འཁོབ་ཏུ་ནི་བསྙེན་རྫོགས་ཕྱིར། །ལྔ་ལ་སོགས་པས་འདོད་པ་ཡིན། །ལི་ཁར་ན་ཚང་ཚིང་ནགས། །ལི་ཁར་ཤིང་འཕེལ་ཤར་ཕྱོགས་ཉིད། །ཨུ་ཤིར་ཞེས་བརྗོད་པ་ཡི། །རི་བོ་མུན་པ་ཅན་ནི་བྱང༌། །ཀ་བ་ཉེ་བའི་ཀ་བ་ཡི། །གྲོང་ཁྱེར་ནུབ་ན་གནས་པ་ཡིན། །གྲོང་ཁྱེར་འདམ་བུ་ཅན་གྱི་གྲོང༌། །ཆུ་ཀླུང་འདམ་བུ་ཅན་ནི་ལྷོ། །འདི་དག་གི་ནི་བར་རྣམས་ལ། །ཡུལ་དབུས་སུ་ནི་ཤེས་བྱ་སྟེ། །ཕྱི་རོལ་མཐའ་འཁོབ་ཅེས་བྱར་ནི། །མཐའ་ཡས་མཁྱེན་པས་གསུངས་པ་ཡིན། །ཚུལ་ཁྲིམས་ཕུན་སུམ་ཚོགས་པ་ཡི། །དགེ་སློང་གིས་བསྙེན་རྫོགས་གསུངས་ཀྱི། །དུང་གི་སྒྲ་དང་ཁོང་རུལ་དང༌། །འབྲས་ཀྱི་ནང་གི་སྲིན་བུས་མིན། །གལ་ཏེ་བཞི་ནི་ལས་བརྗོད་མཁས། །ཚུལ་ཁྲིམས་ལྡན་པར་གྱུར་ན་ནི། །བསྙེན་རྫོགས་མ་སྨད་གྱུར་པ་སྟེ། །ལྷ་ཡིས་ཀྱང་ནི་ཕྱག་བྱར་འོས། །དགེ་འདུན་ཚད་དང་མཚམས་ཕྱིར་མིན། །ལས་མཁན་ཚུལ་ཁྲིམས་ལྡན་པ་དང༌། །ལས་རག་པ་དང་བར་ཆད་མེད། །བསྙེན་པར་རྫོགས་པའི་རྒྱུ་ཡིན་ནོ། །གང་ཕྱིར་བསྙེན་པར་རྫོགས་པ་ནི། །གཞན་ཡང་བྱེ་བྲག་སྨྲ་བས་བརྗོད། །ཇི་ལྟར་གནས་པ་མཁྱེན་པས་ན། །འདྲེན་པ་རང་རྒྱལ་བྱུང་གིའོ། །
འཕགས་པ་ཀཽཎྜི་ནྱ་སོགས། །ལྔ་སྡེ་རྣམས་ནི་ངེས་པ་ལས། །གང་ཞིག་སློབ་མ་བཟང་སྡེ་རྣམས། །ཐམས་ཅད་སྐྱབས་སུ་འགྲོ་བས་ཐོབ། །ཕོ་ཉ་ཡིས་ནི་མཆོད་སྦྱིན་མ། །ཚུར་ཤོག་དགེ་སློང་ཞེས་བྱས་ཀྱང༌། །སྟོན་པར་ཁས་བླངས་པ་ལས་ནི། །དགེ་སློང་འོད་སྲུངས་བདག་ཉིད་ཆེ། །དྲི་བས་མཉེས་པ་ཉིད་ཀྱིས་ནི། །སློབ་མ་ལེགས་སྦྱིན་དེ་བཞིན་ནོ། །དབུས་དང་མཐའ་འཁོབ་པ་དག་ལ། །བསྙེན་རྫོགས་ཡང་དག་བསྟན་པ་ནི། །བཅུ་དང་ལྔ་ཡི་ཚོགས་ཀྱིས་སམ། །དེ་བས་ལྷག་པས་ཀྱང་ནི་རུང༌། །དེ་བཞིན་འཁོར་ཚོགས་བཅས་པ་ཡི། །གཽ་ཏ་མ་ལྕི་ཆོས་ཀྱིས། །དེ་ལས་གཞན་ནི་ཅི་རིགས་པར། །ལས་ནི་སྔོན་འགྲོ་བྱ་བ་སྟེ། །བསྙེན་པར་རྫོགས་ལ་སྔར་གྱི་ནི། །ཉེས་པར་གྲགས་པ་མེད་པ་ཡིན། །དགུན་དུས་དང་ནི་སོ་ག་ཉིད། །དབྱར་དང་ཐུང་དུ་དེ་བཞིན་དུ། །རིང་པོའི་མིང་ཅན་དུ་ཡང་ཤེས། །འདི་དག་དུས་ནི་རྣམ་པ་ལྔ། །ལྷུང་བཟེད་སྣམ་སྦྱར་གྲིབ་ཚོད་དང༌། །དེ་བཞིན་དབྱར་ནི་ཚུལ་འཇུག་དག །རྟག་ཏུ་བདག་གི་དྲན་བྱས་ཏེ། །གཞན་དུ་དེ་ལ་ཉེས་བྱས་འགྱུར། །དགེ་སློང་རྣམས་ལས་འདི་བསྙེན་རྫོགས། །དེ་ལ་ཟླ་ཕྱེད་གདམས་ངག་གསོལ། །དགེ་སློང་བཅས་གནས་དབྱར་གནས་ནས། །ཚོགས་གཉིས་དང་ནི་དགག་དབྱེ་བྱ། །ཚུལ་འཆལ་དགེ་སློང་མིན་པར་ནི། །མི་གླེང་ཁྲོ་བ་ཉིད་ཀྱང་ངོ༌། །ལྕི་བའི་ཆོས་ལས་འདས་པ་ནི། །ཟླ་ཕྱེད་ཚོགས་གཉིས་མགུ་བྱས་ཏེ། །བསྙེན་པར་རྫོགས་པ་གསར་བུ་ལས། །དགེ་སློང་མ་ཡི་ཕྱག་བྱའོ། །ལྕི་བའི་ཆོས་བརྒྱད་འདི་དག་ནི། །དགེ་སློང་མ་ལ་གསུངས་པ་ཡིན། །བུད་མེད་སྐྱེས་པའི་རྣམ་པ་དང༌། །སྐྱེས་པ་བུད་མེད་རྣམ་པ་དང༌། །མཁན་པོ་གཏན་མེད་ཉིད་དང་ནི། །མཁན་པོ་ཁྱིམ་པའི་རྟགས་སོགས་ཉིད། །གང་ཡང་སྐལ་ལྡན་རྐུན་པོ་དང༌། །ཡན་ལག་བཅད་སོགས་ཁོང་ཆུད་དང༌། །དེ་ཡང་བསྙེན་པར་རྫོགས་འགྱུར་མོད། །དགེ་སློང་འགལ་ཚབས་ཅན་དུ་འགྱུར། །མི་འདོད་བསྙེན་པར་རྫོགས་མི་བྱ། །གང་གི་ལོ་ནི་མི་ཤེས་ན། །དེ་ཡི་མཚན་ནི་བརྟག་བྱ་སྟེ། །དེས་ནི་ན་ཚོད་མངོན་གསལ་འགྱུར། །གང་འདི་ཉི་ཤུ་མ་རྫོགས་པའི། །ལོ་ཡིས་དགེ་སློང་བྱས་ན་ནི། །ཟླ་ཤོལ་མངལ་གྱི་ཟླ་རྣམས་ཀྱིས། །མཁས་པ་
ཡིན་དི་གང་བར་བྱ། །གལ་ཏེ་དེ་ལྟ་ན་ཡང་འདི། །ལོ་ནི་ཉི་ཤུ་མ་ཚང་ན། །དགེ་ཚུལ་ཉིད་དུ་གནས་འགྱུར་ཏེ། །དེ་ནི་བསྙེན་པར་རྫོགས་མིན་ཉིད། །ལོ་ནི་གཅིག་གམ་གཉིས་དག་ན། །གལ་ཏེ་དྲན་པ་རྙེད་གྱུར་ན། །འདི་ཡི་ལོ་ནི་ཚང་བ་ཡིས། །བསྙེན་པར་རྫོགས་པ་ཉིད་ཡིན་ནོ། །འོན་པས་ཀྱང་ནི་གོ་གྱུར་ན། །ལས་བརྗོད་པ་ནི་མཐོས་ཀྱང༌། །འདི་ལ་བསྙེན་རྫོགས་ཡོད་པ་སྟེ། །ཚུལ་ཁྲིམས་ལྡན་ལ་ཉེས་པ་མེད། །བསྙེན་པར་རྫོགས་པར་བྱས་ནས་དེ། །གལ་ཏེ་མཚན་ནི་གྱུར་པ་ན། །འདི་ནི་བསྙེན་རྫོགས་ཁོ་ན་སྟེ། །དགེ་སློང་མ་ཡི་འཁོར་ནང་བཞག །མཁན་པོ་མཚན་ནི་གྱུར་པ་ན། །གལ་ཏེ་གསོལ་བ་ཐོས་ན་ནི། །བསྙེན་པར་རྫོགས་པ་ཁོ་ན་སྟེ། །ལས་བྱེད་པ་ལའང་ཉེས་པ་མེད། །ལས་བྱེད་པ་ནི་མཚན་གྱུར་ན། །གལ་ཏེ་ལས་བརྗོད་ཐོས་ན་འདིར། །མཁན་པོ་ལ་ནི་ཉེས་བྱས་ཏེ། །ལས་བྱེད་རྣམས་ལ་སྐྱོན་ཡོད་མིན། །ལས་བྱེད་ནམ་མཁའ་ལ་གནས་ཏེ། །ས་ལ་འདུག་ལ་བྱེད་གྱུར་ན། །བསྙེན་པར་རྫོགས་པ་རྒྱང་རིང་སྟེ། །ཚུལ་ཁྲིམས་འཆལ་བས་མཐོ་རིས་བཞིན། །ཇི་ལྟར་མི་ཡི་བདག་པོ་ཡི་།གཞོན་ནུ་རིགས་རྒྱུད་འཕེལ་ཕྱིར་བསྲུང༌། །དེ་བཞིན་སྟོན་པའི་བསྟན་པ་དག །འཕེལ་ཕྱིར་དགེ་ཚུལ་རྣམས་ཀྱང་བསྲུང༌། །ཤིང་སྡོང་མཐོ་ལ་དགེ་ཚུལ་ནི། །བླ་མའི་བཀའ་ཡིས་འཛེགས་པ་ལས། །ཤིང་ཆག་ནས་ནི་ལྷུང་བའི་ཚེ། །དེ་ལ་འདི་དག་གསུངས་པ་ཡིན། །གང་ཕྱིར་འདི་ནི་རབ་བྱུང་བ། །བསྟན་ལ་ཐུགས་རྗེའི་བདག་ཉིད་ཀྱིས། །བྱ་རོག་སྐྲོད་ནུས་གྱུར་ལྟ་ན། །ལོ་བདུན་པ་ཡང་རྗེས་སུ་གནང༌། །རབ་བྱུང་དང་ནི་བསྙེན་རྫོགས་ལ། །ལྷུང་བཟེད་ཅན་མིན་མི་དྲང་སྟེ། །བསོད་སྙོམས་རྒྱུ་བ་རྣམས་ལ་ནི། །དེ་ཚེ་སྣོད་དོན་གཉེར་བས་འཐོབ། །གནས་བརྟན་ཉེ་དགས་གང་གི་ཚེ། །དགེ་ཚུལ་བྲུ་བས་ཉེན་པ་ན། །ལྷུང་བཟེད་མེད་པར་ལྷུང་བཟེད་དོན། །གཞན་སོང་སྟོན་མོའི་བར་དུ་ཐོབ། །བླངས་ནས་ཀྱང་ནི་ལྷུང་བཟེད་སོགས། །བློ་བཟངས་ཀྱིས་ནི་སྦྱིན་པར་བྱ། །རབ་བྱུང་བསྙེན་རྫོགས་དག་ཀྱང་རུང༌། །བྲམ་ཟེ་བཞིན་དུ་སླར་མི་འགྲོ། །བསྙེན་པར་མ་རྫོགས་གོང་དུ་ནི། །ངེས་པར་གནས་རྣམས་མི་བརྗོད་དེ། །ཐོས་ནས་འདི་ནི་བྱ་དཀའ་ཞེས། །བྲམ་ཟེ་སླར་ཡང་ཁྱིམ་དུ་སོང༌། །དགེ་སློང་རྣམས་ཀྱི་ལས་གཅིག་གིས། །བཞི་ནི་བསྙེན་པར་རྫོགས་མི་བྱ། །ཚོགས་དག་ལ་ནི་ཚོགས་གཉིས་ཀྱིས། །ལས་ནི་གང་དུའང་ཅུང་ཟད་མེད། །གཉིས་སམ་
གསུམ་པོ་དག་ཀྱང་རུང༌། །དུས་གཅིག་ལ་ནི་བསྙེན་རྫོགས་ན། །ན་ཚོད་བྱེ་བྲག་ཡོང་གྱུར་ཀྱང༌། །རྒན་པོ་མེད་ཅིང་གསར་བུ་མེད། །ཕན་ཚུན་ཕྱག་ཀྱང་ཡོད་མིན་ཏེ། །རྙེད་པ་གྲལ་རིམས་བཞིན་དུའོ། །སྐུལ་བྱེད་དབང་གིས་དེ་དག་ལ། །ལས་བཅོལ་བ་ནི་རིམ་པས་སོ། །མཚམས་མེད་ལྔ་ནི་བྱས་པ་དང༌། །རྐུ་ཐབས་གནས་དང་སྤྲུལ་པ་དང༌། མུ་སྟེགས་ཅན་ཞུགས་འོན་དང་ལྐུགས། །འཁྲུགས་དང་དེ་བཞིན་ཕས་ཕམ་བྱུང༌། །དགེ་སློང་མ་ནི་སུན་ཕྱུང་དང༌། །མ་ནིང་ལ་སོགས་གནས་མི་བྱ། །ཚྭ་སྒོའི་ཞིང་ལྟར་དེ་དག་ལ། །ཚུལ་ཁྲིམས་ས་བོན་སྐྱེ་བ་མེད། །དེ་བཞིན་གཞན་ཡང་བག་མེད་ལོང༌། །བསྡིགས་པ་ལ་སོགས་ལས་རྣམས་ཀྱིས། །སྨད་དོ་བླང་བར་བྱ་བ་ནི། །སེམས་ནི་དུལ་བར་གྱུར་ན་ཡིན། །མདོ་སྡེ་འདུལ་བ་མངོན་པ་རྣམས། །མཁས་ཤིང་གྲགས་དང་ལྡན་པ་དང༌། །བསོད་ནམས་ཆེན་པོ་ལ་སོགས་ནི། །བསྐྲད་ཅིང་བཀར་བར་འོས་པ་མིན། །གང་ཕྱིར་འདི་དག་མུ་སྟེགས་ཀྱི། །རི་དགས་སྐྲག་བྱེད་སེང་གེའི་བུ། །འདི་དག་ཁྱིམ་པར་གྱུར་ན་ཡང༌། །སྟོན་པའི་བློ་ཡིས་རབ་དད་བསྐྱེད། །འདི་དག་རྣམས་ཀྱིས་གཙུག་ལག་ཁང༌། །མཛེས་བྱེད་ཁྱུ་མཆོག་སྒྲ་སྒྲོགས་ཤིང༌། །དེ་བས་འདི་དག་སྨད་ན་ནི། །རང་གི་བསྟན་པ་སྨད་པ་ཡིན། །ཀུན་ནས་ཉོན་མོངས་སྐྱེས་ན་དེ། །མ་རུངས་གདོན་གྱིས་རྣམ་རྨོངས་པས། །བྱ་མིན་བྱེད་པ་ཁོ་ན་སྟེ། །འཇིག་རྟེན་པས་ནི་སྨོད་པར་འགྱུར། །འཐབ་ཀྲོལ་ཅན་དང་ཁྱིམ་སུན་འབྱིན། །གསུམ་པ་ཚུལ་ཁྲིམས་འཆལ་བ་སྟེ། །ལས་ནི་བྱེད་པ་ན་ཡང་འདི། །གལ་ཏེ་འགྱུར་པ་རྟེན་བྱེད་ན། །འབད་པས་གཎྜི་བརྡུང་བྱས་ནས། །དགེ་འདུན་གྱིས་ནི་བསྐྲད་པར་བྱ། །ཀ་བ་ལ་ནི་འཇུས་ཀྱང་བཅད། །སྒོ་སྐྱེས་ལ་འཇུས་དེ་བཞིན་ནོ། །ཡང་ན་དགེ་འདུན་ཐམས་ཅད་ཀྱིས། །སླར་ཡང་གསོ་བའི་འདུ་བྱེད་བྱ། །གང་ཡང་དགེ་འདུན་དེ་དག་ལས། །དཔུང་བྱེད་ཡན་ལག་འབྱིན་བྱ་སྟེ། །མིན་ན་དེ་འདྲའི་དགེ་སློང་གི །རྟགས་སུན་འབྱིན་པ་བཞག་མི་རུང༌། །ནན་ཏན་གྱིས་ནི་བསྐྲད་བྱ་སྟེ། །འཐབ་དང་རྩོད་པ་མེད་པར་བྱ། །དེ་ཡི་གནས་པ་ཅིར་འགྱུར་ན། །རོ་དང་འདྲ་བ་ཁོ་ནར་གསུངས། །དགེ་སློང་ཤེས་སྐྱོན་དྲི་མ་ཅན། །དགེ་སློང་ཚོགས་ཀྱིས་
ཆད་བྱིན་ལ། །དགེ་སློང་མས་ནི་གུས་བསྟན་ཕྱིར། །སྔོན་དུ་ལྡང་གི་ཕྱག་མི་བྱ། །དགེ་བསྙེན་གསོང་པོར་སྨྲ་མི་བྱ། །ཁྱིམ་པས་བསོད་སྙོམས་སྦྱིན་བྱ་སྟེ། །འཕགས་པའི་ཚོགས་ནི་མཉེས་པ་ན། །བྱ་བ་ཐམས་ཅད་སྔོན་བཞིན་ནོ། །འཁྱུད་ཆགས་ཕྲག་དོག་ནད་དང་སྐྱེས། །ཟླ་ཕྱེད་ཅེས་བྱ་མ་ནིང་ལྔ། །འདི་དག་རེ་རེའི་མཚན་ཉིད་ནི། །རྟོགས་པའི་དོན་དུ་བརྗོད་པར་བྱ། །གང་ལ་གཞན་གྱིས་མནན་པ་ན། །འཁྲིག་ཕྱིར་སེམས་ལ་འདོད་ཆགས་ནི། །རྣམ་རྒྱས་དེ་ནི་བློ་ལྡན་གྱིས། །འཁྱུད་དང་མ་ནིང་ཤེས་པར་བྱ། །གཞན་གྱི་མཚན་ནི་མཐོང་བ་ལས། །རང་ལ་འདོད་སྐྱེ་ཕྲག་དོག་གྲགས། །མཚོན་ནམ་ནད་ཀྱིས་རྟགས་ཉམས་པ། །དེ་ནི་ནད་ཀྱི་མ་ནིང་བརྗོད། །གང་སྐྱེས་ཉིད་ནས་མཚན་མ་ནི། །གཉིས་ཀ་མེད་པ་སྐྱེས་ནས་ཡིན། །ཟླ་ཕྱེད་བུད་མེད་ཟླ་ཕྱེད་ནི། །སྐྱེས་གྱུར་ཟླ་ཕྱེད་མ་ནིང་བརྗོད། །འདིར་ནི་སོགས་ཀྱི་སྒྲ་མེད་ཀྱང༌། །ཟླ་སོགས་མ་ནིང་གྲུབ་པ་ཡིན། །གང་ཞིག་གློང་གི་ཆོས་དག་གི །ནུས་མེད་དེ་ནི་ཟ་མ་སྟེ། །མཚན་མ་གཉིས་ཀ་དོད་པ་ནི། །མཚན་གཉིས་པར་ནི་འདོད་པ་ཡིན། །མུ་སྟེགས་ལོག་ལྟས་བསྒོས་པ་ཡི། །ཡིད་ཅན་དེ་ནི་མུ་སྟེགས་འདོད། །མུ་སྟེགས་ཆོས་ཀྱི་ལོངས་སྤྱོད་གང༌། །དེ་ནི་མུ་སྟེགས་ཅན་ཞུགས་པའོ། །དགེ་ཚུལ་གང་ཡང་བརྫུན་པ་ཡིས། །རང་གི་རྟགས་ནི་བཟུང་ནས་ཀྱང༌། །དགེ་སློང་ཉིད་དུ་རབ་ཤེས་བྱེད། །དེ་ནི་རྐུ་ཐབས་གནས་པར་འདོད། །ཕྱོགས་ལས་གཞན་གྱི་ཕྱོགས་དག་ནི། །ཐ་དད་ཚོགས་ལ་ཡང་དག་བརྟེན། །གང་ཞིག་ཚོགས་ཀྱིས་ཆད་པ་བྱིན། །དེ་ནི་ཐ་དད་གནས་པར་འདོད། །ཕས་ཕམ་དག་ལ་ལོག་པར་ལྟ། །དགེ་སློང་མ་སོགས་སུན་འབྱིན་དང༌། །བདེན་དང་དཀོན་མཆོག་གསུམ་གྱི་ནི། །སྔགས་མིན་སྒྲོགས་པའི་དགེ་ཚུལ་ཉིད། །སྐྱོན་ཅན་བཅུ་པོ་འདི་དག་ནི། །ཆད་པའི་ལས་ཀྱིས་བཀར་བར་བྱ། །ཕྱུང་ནས་སླར་ཡང་མི་གཞུག་སྟེ། །ཇི་བཞིན་བཤགས་ན་སྐལ་བ་བཞིན། །དགེ་སློང་ཕམ་པ་མ་བྱུང་ན། །ཆོ་ག་བཞིན་དུ་བསླབ་ཕུལ་ནས། །སོང་ནའང་སྐལ་ལྡན་སླར་ཡང་ནི། །བསྙེན་རྫོགས་དགའ་སྟོན་ཆེན་པོ་བྱ། །སྡོམ་གཏོང་རང་བཞིན་གནས་པ་ཡི། །བརྡ་ཕྲད་མི་ཡི་དུང་དག་ཏུ། །བདག་གིས་གང་བཟུང་བསླབ་པ་ནི།
གཏོང་ངོ་ཞེས་སོགས་ཚིག་རྣམས་འབུལ། །བསྙེན་པར་རྫོགས་པའི་རྗེས་ཐོགས་ལ། །ཕས་ཕམ་རྣམས་ནི་བརྗོད་པར་བྱ། །རྟོགས་ལྡན་བློ་ནི་དེ་དག་ལས། །འདའ་བར་བྱེད་པ་མ་ཡིན་ནོ། །མི་འཆབ་པ་ཡི་སེམས་ཀྱིས་ནི། །གལ་ཏེ་བྱུང་ན་གཅིག་ལའང་མཐོལ། །ཆུང་ངུ་ལའང་འཇིག་པའི་ཕྱིར། །དེ་ལ་ཕས་ཕམ་མི་འབྱུང་ངོ༌། །བརྟུལ་ཞུགས་ཅན་གྱིས་བླ་མས་པས། །སྔར་ཉིད་མལ་ནས་ལངས་ནས་ནི། །སོ་ཤིང་བཅས་ནས་དེ་འོག་ཏུ། །སྟོན་པ་ལ་ནི་ཕྱག་བྱའོ། །དེ་ནས་རབ་གུས་བསྐྱེད་པ་ཡིས། །བླ་མ་ལ་ནི་ཕྱག་བྱ་སྟེ། །དེ་ནི་དེ་ལ་གདམས་ངག་སོགས། །ཆོ་ག་བཞིན་དུ་ཕན་འདོགས་ཡིན། །དེ་ལ་ཁམས་བདེ་སོགས་དྲིས་ནས། །རབ་ཏུ་འབད་པས་དེ་ཡི་ནི། །གནས་ཁང་ཆག་ཆག་ཡང་དག་གདབ། །ཉེར་སྤྱོད་ས་ཡང་སྦྱང་བར་བྱ། །སྟོན་པ་ལ་ནི་མཎྜལ་དང༌། །མཆོད་རྟེན་ལ་ཡང་བསྐོར་བ་བྱ། །བརྟུལ་ཞུགས་རྒན་ལ་ཕྱག་བྱས་ནས། །དེ་ཡི་ནུས་པ་ཇི་བཞིན་དུ། །བསམ་གཏན་ཀློག་པའི་ལས་དག་གིས། །ལུས་ལ་སྙིང་པོ་བླང་བར་བྱ། །ངུར་སྨྲིག་གྱོན་ཙམ་གྱིས་ཆོག་པའི། །བསམ་པ་ནམ་ཡང་མི་བྱའོ། །སོ་ཤིང་དུས་དང་མཐུན་པའི་ཆུ། །འདུག་སྟན་ལ་སོགས་བསྟབས་པར་བྱ། །སྨན་དང་རྙེད་དཀའ་ཞིམ་པའི་ཟས། །འབྲས་བུ་སོགས་ཀྱང་དེ་བཞིན་ནོ། །ལྷུང་བཟེད་ལ་སོགས་བཀྲུ་བ་ཡིས། །གུས་པས་བླ་མའི་ཉེ་གནས་བྱ། །བླ་མ་རྣམ་པར་མཛངས་པས་ཀྱང༌། །ཐམས་ཅད་དུ་ནི་ཚོད་རིག་བྱ། །ཚུལ་ཁྲིམས་འཆལ་ལ་ཞེ་སྡང་དང༌། །ཕྱག་ཀྱང་ནམ་ཡང་མི་བྱ་སྟེ། །དེ་དང་ལོངས་སྤྱོད་ཀྱང་མ་ཡིན། །འདི་ནི་རོ་བསྲེགས་མགལ་དུ་མ་བཞིན། །ཁྱིམ་པ་སྡོམ་ལ་གནས་ཀྱང་ནི། །དགེ་ཚུལ་གྱི་ནི་ཕྱག་མི་བྱ། །འདོད་ཅན་ཁྱིམ་གྱི་ཆོས་རྣམས་ལ། །དགེ་སློང་གིས་ལྟ་སྨོས་ཅི་དགོས། །དེ་བཞིན་ཁྱིམ་པ་སྡོམ་ལྡན་ཡང༌། །སྡོམ་བརྩོན་ཀུན་གྱིས་ཕྱག་མི་རུང༌། །ཀུན་ནས་མ་བསྡམས་དེ་དག་ལ། །ཕྱག་ལེན་དབང་ནི་ཡོད་མ་ཡིན། །སྲིད་པ་ཐ་མ་པ་ལ་ནི། །རིགས་པས་རྣམ་དཔྱད་མི་འཐད་དེ། །མི་བརྟན་འཁོར་བར་འཁོར་བཞིན་པའི། །སེམས་ཅན་རྣམས་ལ་སྔ་མ་བཞིན། །གཞན་ཡང་ཕྱག་བྱ་མིན་མང་སྟེ། །
སྤོ་དང་བསྐྲད་པ་ལ་སོགས་པའོ། །དགེ་སློང་གིས་རྟགས་ཕྱག་བྱ་བ། །སངས་རྒྱས་དང་ནི་སྡོམ་པས་རྒན། །མི་སློབ་པ་ནི་བདག་པོར་སྤྱོད། །སློབ་པ་བྱིན་པ་སྤྱོད་པ་སྟེ། །བསམ་གཏན་ཀློག་དང་ལྡན་པ་ནི། །རྗེས་གནང་སྤྱོད་པས་ཉེས་པ་མེད། །ལྷག་མ་ལེ་ལོས་བརྩོན་པ་ཡི། །བདག་ཉིད་རྣམས་ནི་བུ་ལོན་སྤྱོད། །ཁྲིམས་འཆལ་རྣམས་ནི་ནང་དུ་ཡང༌། །གཙུག་ལག་ཁང་སོགས་ཉེར་སྤྱོད་བཀག །བཤང་ཁང་དང་ནི་ཉེ་བ་རུ། །སྣ་ཚོགས་གཏམ་ནི་མི་བྱ་སྟེ། །ཀློག་དང་ཁ་ཏོན་ལ་སོགས་དང༌། །ཚོན་གྱི་ལས་ཀྱང་ཁྱད་པར་དུའོ། །བཤང་ཁང་དང་ནི་གཅི་བའི་གནས། །ཐ་དད་དུ་ནི་བྱ་བར་གསུངས། །ཆུ་འདོར་ཚེ་ན་གཅིག་ཁང་དུ། །སྒྲ་བརྡ་བྱས་ནས་འཇུག་པར་བྱ། །དེ་ཡི་ཁང་པར་གྲོས་སོགས་མིན། །དལ་བུ་དལ་བུས་སྒྲ་མེད་པར། །རླུང་དང་བཤང་བ་གཅི་བ་རྣམས། །དོར་བྱས་ནན་གྱིས་མི་བསྡམ་མོ། །སྔོན་དུ་འཇམ་པོ་གང་རུང་གིས། །འོག་གི་སྒོ་ནི་ཕྱིས་ནས་ཀྱང༌། །དེ་ནས་ལན་གཉིས་ལན་གསུམ་དུ། །ས་ཡིས་དག་པར་བཀྲུ་བར་བྱ། །ལག་པ་གཡོན་པར་འཇམ་པ་ཡི། །ས་ཡི་ཕུང་པོ་བདུན་བྱ་སྟེ། །གཉིས་ཀར་ཡང་ནི་བདུན་པོ་ཉིད། །སོ་སོར་ཐ་དད་དུ་ནི་བཞག །ཐོག་མར་ཤཱ་རིའི་བུ་ལ་འདི། །བསླབ་བཅས་གཞན་དུ་ཉེས་བྱས་འགྱུར། །དེ་ནས་ལག་པའང་འབད་པ་ཡིས། །ཆུ་མང་པོས་ནི་རབ་ཏུ་བཀྲུ། །ལག་ངར་བྱིན་པ་ཕྱིས་ནས་ནི། །སླར་ཡང་ལག་པ་དག་ནི་བཀྲུ། །ལག་གདོང་རྐང་པ་དག་དང་ནི། །ཕྱི་རོལ་དག་བྱར་གསུངས་པ་ཡིན། །དྲི་ཡི་བྱུག་པ་སྤངས་པ་ཡི། །གཙང་སྦྲ་སེམས་ནི་སྦྱང་པ་ཡིན། །འདི་འདྲའི་བྱུག་མཆོག་ཡོད་པ་ལ། །སྟོང་ཕྲག་ས་ཡིས་ཅི་ཞིག་བྱ། །རྫོགས་སངས་རྒྱས་ཀྱིས་ནང་གི་ནི། །གཙང་སྦྲ་དོན་དམ་དག་པ་ཉིད། །ལུས་དང་ངག་དང་ཡིད་དག་གིས། །སྡིག་པ་སྤོང་བར་གསུངས་པ་ཡིན། །སོ་ཤིང་བྱེད་དང་བཤང་པ་དང༌། །གཅི་བ་འདོར་དང་ཆུ་འཐུང་དང༌། །མཚམས་ནང་རྟེན་ལ་ཕྱག་འཚལ་བ། །བླ་མ་དག་ལ་ཞུ་མི་དགོས། །གང་དུ་སྐབས་དང་མཐུན་པ་ཡི། །ར་བརྩིག་པ་རྟ་བབས་ནས། །འདོམ་ནི་བཞི་བཅུ་རྩ་དགུའི་བར། །ནང་གི་མཚམས་སུ་ཤེས་པར་བྱ། །སྡོམ་པ་ལྷག་མ་མེད་གཅོད་དང༌། །དགེ་འདུན་ལྷག་
མས་དེ་ལྡང་དང༌། །དེ་བཞིན་གང་ཟག་ལྷག་མ་ཅན། །ལྟུང་བ་རྣམ་པ་གསུམ་དུ་གྲགས། །དང་པོར་ཕས་ཕམ་གསུངས་པ་ནི། །བཞི་ཡིན་ཤིན་ཏུ་ལྕི་བའི་ཕྱིར། །འདི་དག་གང་རུང་བྱུང་ན་ནི། །དགེ་སློང་རྣམ་པར་ཉམས་པ་ཡིན། །སྟོན་ཀའི་ཆུ་བཞིན་དྲི་མེད་པར། །སྟོན་པའི་བསྟན་པ་བཅུ་གཉིས་ལོར། །ལྟུང་བ་མེད་པར་ལེགས་གནས་ཏེ། །ཉོན་མོངས་སྤོང་བར་བྱེད་པ་ཡིན། །དེ་ནས་བཟང་སྦྱིན་བུ་ཡི་ཕྱིར། །ཆུང་མ་ལ་ནི་འཁྲིག་པ་སྤྱད། །དགེ་སློང་དགོན་པ་པ་ཡིས་ཀྱང༌། །སྦྲ་མོ་ལ་ཞུགས་ཀུན་མཁྱེན་གྱིས། །འདི་སྐད་སྨད་པ་མཛད་དེ་ཁྱེད། །འདོད་ཆགས་ལ་སོགས་ཞི་བྱའི་ཕྱིར། །ང་ཡིས་ཆོས་རྣམས་བསྟན་པ་ལ། །འདི་ལྟར་སྡིག་པའི་ལས་ལ་ཆགས། །དེ་ནས་ཕན་ཡོན་བཅུ་གཟིགས་ཤིང༌། །སློབ་མ་རྣམས་ལ་ཕན་བཞེད་པས། །བསླབ་པའི་གཞི་ནི་བཅའ་བ་དག །ཐུགས་རྗེའི་བདག་ཉིད་ཅན་གྱིས་མཛད། །མཆིལ་མ་གཅི་དང་བཤང་པ་ཡི། །ལམ་དུ་ཆགས་ཅན་ཞུགས་ན་ནི། །གསོ་བྱར་མི་རུང་བདུག་པ་ཡི། །ཕས་ཕམ་སྤྲུལ་གྱིས་དགེ་སློང་ཟིན། །ཁ་ཤུན་སོ་དང་པགས་པ་ལས། །ནོར་བུ་འདས་ན་ཕས་ཕམ་སྟེ། །ཕྱི་རོལ་ཆར་ནི་ཅི་རིགས་པར། །སྦོམ་པོའམ་དགེ་འདུན་ལྷག་མའོ། །གང་ཕྱིར་སྟོབས་ཀྱིས་མནན་ནས་ཀྱང༌། །བརྟུལ་ཞུགས་ཅན་གྱིས་གྲོང་ཆོས་ཀྱི། །བདེ་བསྟེན་དེ་ཡང་ཕས་ཕམ་གསུངས། །ཉམས་པར་དང་ནི་རྨ་ཡི་སྒོར། །རབ་ཞུགས་སྦོམ་པོར་ཤེས་པར་བྱ། །མི་ཤེས་བྱིས་པ་ཆུང་ངུ་གང༌། །བསྟེན་མི་བཟོད་ལ་སྤྱད་པ་ཡང༌། །ཅུང་ཟད་ཟིན་དང་ཤས་ཆེར་ཟིན། །སྐྲངས་དང་རུལ་ཏེ་ཉམས་པའོ། །གང་ཞིག་གཉི་ག་རྣལ་དུ་གནས། །སྐྱོན་མེད་དེ་ནི་མ་ཉམས་པའོ། །ཐམས་ཅད་དུ་ནི་རྨ་ཡི་སྒོ། །གསུམ་པོ་ཉམས་པ་ལ་ཡང་ནི། །གང་ཞིག་དེ་ལ་ཞུགས་པ་ན། །སྦོམ་པོ་ཡིན་ནོ་མཐར་ཐུག་མིན། །ནང་དུ་མ་ཆུད་པ་དང་ནི། །ལས་སུ་མི་རུང་བས་ཀྱང་ནི། །འཁྲིག་པ་སྤྱོད་པར་བྱེད་པ་ལ། །སྦོམ་པོ་ཉིད་དུ་གྲགས་པ་ཡིན། །མོ་མཚན་མཚམས་དང་མ་འབྱོར་དང༌། །འཇིགས་པས་བུད་མེད་འདོར་བཞིན་དང༌། །ཡང་ན་ངོ་ཚ་ཡིས་ཀྱང་འདོར། །མི་འདོར་གྱུར་ཀྱང་ཉམས་པ་དང༌། །གང་ཡང་བྱིས་པ་འདོད་པ་ཡི། །ལོངས་སྤྱོད་མི་ཤེས་མི་རུང་
ལ། །དེ་ལྟར་བསྟན་ན་ཐམས་ཅད་དུ། །སྦོམ་པོའི་ཁ་ན་མ་ཐོ་བཅས། །ཆུང་ངུ་འབྲིང་སོགས་དབྱེ་བ་ཡིས། །འདུས་བྱས་ཐམས་ཅད་ཐ་དད་དེ། །དེ་ཡི་ལྟུང་བ་ངེས་པ་ཡི། །དབྱེ་བ་གྲུབ་པར་ཐེ་ཚོམ་མེད། །བུ་ག་གཞན་དང་ལུས་ཀྱི་ནི། །བུ་ག་བྲལ་ནས་དེ་དག་ཏུ། །ལུས་སྐྱེས་འཇུག་པར་བྱེད་ན་ཡང༌། །སྡོམ་བརྩོན་ལ་ནི་སྦོམ་པོར་བརྗོད། །བྱིས་པ་ཆུང་ལ་ཞུགས་པ་ཡི། །དགེ་སློང་ཕམ་པར་ཡོང་མི་བརྟག །ནུ་མ་མཆུ་དང་ཤ་མཚམས་བཞིན། །ཉེས་སྤྱོད་རྒྱས་པར་མི་འགྱུར་དམན། །མཆེ་བ་རྣོ་མངས་གདུག་པ་ཡི། །སྤྲུལ་གྱི་ཁར་ནི་ཆུད་པ་བླ། །ལུས་བདེ་བསྟན་པའི་རྨ་ལ་ནི། །ལུས་སྐྱེས་འཇུག་པ་ཇི་ལྟར་རུང༌། །སྦྲུལ་གདུག་གིས་ནི་རེག་གྱུར་ཀྱང༌། །སྐྱེ་བ་གཅིག་ཉིད་འཆི་འགྱུར་གྱི། །ཁྲིམས་འཆལ་སྐྱེ་བ་བརྒྱུད་ན་ནི། །སྟོང་ཕྲག་སྡུག་བསྔལ་མི་བཟད་འཐོབ། །ལྕི་དང་ཤིན་ཏུ་ལྕི་བ་ཉིད། །ཡང་དང་ཤིན་ཏུ་ཡང་བ་སྟེ། །ཕས་ཕམ་པས་ནི་བསླང་བ་ཡི། །སྦོམ་པོ་རྣམ་པ་བཞི་ཡིན་ནོ། །སྐྲག་པར་མི་བྱེད་ལྕི་བ་སྟེ། །གཞན་གྱིས་དེ་ལ་འབད་པ་ཡིས། །བཟློག་ཀྱང་མི་ཉན་རབ་ལྕིར་ཤེས། །གཞན་ལ་ཁྲེལ་ཡོད་ཡང་བ་སྟེ། །རང་ཉིད་ངོ་ཚས་ཤིན་ཏུ་ཡང༌། །བསམ་པའི་དབྱེ་བས་འགྱུར་བ་ཡིན། །དེ་བཞིན་དགེ་འདུན་ལྷག་མ་ཡིས། །ཀུན་བསླང་སྦོམ་པོ་རྣམ་པ་བཞི། །དགེ་སློང་ཉིད་དང་དེ་མ་ཉམས། །མ་ཉམས་པ་ཡི་ལམ་དག་ཏུ། །བཅུག་རེག་རོ་ནི་མྱོང་བ་དང༌། །གང་ཕྱིར་སེམས་ནི་རང་བཞིན་གནས། །རང་གི་ཁང་པ་བརྩིག་པའི་ཕྱིར། །རྒྱལ་པོ་མ་སྐྱེས་དགྲ་ཡི་ཤིང༌། །དགེ་སློང་ནོར་ཅན་གྱིས་བརྐུས་ཏེ། །དེ་བརྟེན་འདི་དག་ཀུན་བསླང་བཅས། །མ་འཁྲུལ་གནས་ནས་སྦོ་བྱེད་ཅིང༌། །གཞན་ནོར་བརྐུ་སེམས་མཐུ་ཡིས་སམ། །འཇབ་བུ་ཡིས་ཀྱང་དེ་ལ་མཐར། །མི་ལས་མ་ཤ་ལྔ་ཚང་བརྐུས། །མ་ཤ་མ་ག་དྷཱ་པ་སྟེ། །དེ་ལས་ལྷག་པ་མཁས་པས་ཤེས། །དངོས་པོ་བསྐྱོད་པས་སྦོམ་པོ་སྟེ། །སྦྱོར་བ་ལ་ནི་ཉེས་བྱས་སོ། །ས་གཞི་འཇམ་ཞིང་མཉམ་པ་ལ། །བསྐྱོད་ཀྱང་མཐར་ནི་མི་འགྱུར་ཏེ། །ས་ཕྱོགས་གྲུམ་གས་ལ་སོགས་པ། །མཐོན་དམན་ཅན་ལ་རབ་ཏུ་བསྐྱེད། །ཞེ་སྡང་གི་ནི་རྒྱ་ལ་སོགས། །ཆུད་སོན་བྱེད་པ་སྦོམ་པོ་ཡིན། །སེམས་ཅན་རྣམས་ནི་དགྲོལ་
དོན་དུ། །བསོད་ནམས་འདོད་པས་བཤགས་བྱའོ། །གང་གི་ཡུལ་ནི་དེ་ཡི་དུས། །གང་གི་ཚད་ཀྱི་འགྲོན་བུ་ནི། །དེ་ཡི་བཞི་ཆ་བརྐུས་པ་གང༌། །དགེ་སློང་ལ་ནི་ཕམ་པར་འགྱུར། །ས་གཞི་རྩོད་བཅས་རྣམ་པ་གཉིས། །རིགས་དང་རྒྱལ་པོའི་རིགས་ཀྱིས་ཏེ། །གཉི་ག་ལ་ཡང་དགེ་སློང་ནི། །རྒྱལ་ན་ལྟུང་བ་སྦོམ་པོར་བརྗོད། །ཁྱིམ་པས་གལ་ཏེ་སྦྱོར་བཏང་ན། །གཉིས་ཀར་ཡང་ནི་ཕས་ཕམ་ཉིད། །ཕས་ཕམ་མེ་ཡིས་བསྲེགས་པ་ཡི། །ཤིང་ཚིག་ལྟ་བུར་སྡོམ་བརྩོན་འགྱུར། །ནོར་བུ་མུ་ཏིག་ལ་སོགས་ནོར། །སྔགས་ཀྱིས་བཀུག་ནས་རྐུ་བ་ན། །མཐོང་བ་ཙམ་གྱིས་དེ་ལས་འདིར། །ལྟུང་བའི་མཐར་ནི་འགྱུར་བ་ཡིན། །བདག་གི་ལོ་ཏོག་ཕུན་ཚོགས་བྱ། །གཞན་ལ་མིན་ཞེས་སྲེད་པ་ཡིས། །རང་སར་ཆུ་ནི་འདྲེན་བྱེད་ཅིང༌། །ཚན་གྱིས་འཇིག་པར་བྱེད་ཀྱང་རུང༌། །རང་གི་ལོ་ཏོག་ཕུན་ཚོགས་ཤིང༌། །གཞན་གྱི་ལོ་ཏོག་ཉམས་པ་ན། །ལོ་ཏོག་རིན་ནི་ཤེས་བྱས་ནས། །སྦོམ་པོ་འམ་ཕས་ཕམ་ཅི་རིགས་བརྟག །སྡིག་པ་ཀུན་ལས་ལྡོག་ཕྱིར་དང༌། །སེམས་ཅན་རྣམས་ལ་ཕན་གདགས་ཕྱིར། །ནམ་ཡང་གཞན་གྱི་འཚོ་བ་ནི། །དགེ་སློང་གིས་ནི་དབྲོག་མི་བྱ། །རྐུན་པོས་སློབ་མ་ཕྲོགས་པའམ། །གསེར་སོགས་སྟོབས་ཀྱིས་མི་བསླང་སྟེ། །གཞུང་ལུགས་ཇི་བཞིན་མ་བསྒྲུབས་ན། །མ་རུངས་ལྟུང་བ་དག་དང་བཅས། །ཚེས་བཤད་པ་འམ་ཕྱེད་རིན་ནམ། །རིན་ནི་ཚང་བ་ཡིས་ཀྱང་རུང༌། །བླང་བྱ་རྐུན་མ་རྒྱལ་པོ་ལ། །ཕུལ་ན་ལྟུང་བ་སྦོམ་པོར་འགྱུར། །སློབ་མ་ཉིད་ཕྱིར་མཐུན་བཙལ་ནས། །དགེ་ཚུལ་དགེ་སློང་གིས་ཕྲོགས་ན། །འཁོར་དབྱེ་བ་ཡི་ཀུན་བསླང་ཕྱིར། །སྦོམ་པོའི་གློ་ཅན་སྦོམ་པོས་རེག །དགེ་སློང་གིས་ནི་ཤོ་གམ་སོགས། །རང་ངམ་གཞན་གྱི་ལག་གིས་ཕྲོགས། །དངོས་པོ་བརྟག་པར་བྱ་བ་སྟེ། །ལྟུང་བ་ངེས་པར་བསྟེན་པར་འགྱུར། །རྒྱལ་པོ་ལ་སོགས་དབང་བ་ཡི། །ཆུ་འགྲམ་གྲུབ་ཙས་ལས་བྱུང་བ། །མ་བྱིན་ལམ་གང་ནས་སོང་ན། །རང་ངམ་གཞན་གྱི་ལག་ཉིད་ཀྱིས། །དེ་ནི་དེ་ཡི་ཕྲོགས་འདྲ་སྟེ། །ལྟུང་བ་རྣམ་པར་དཔྱད་པ་ན། །མ་ཤ་ལྔ་ཡི་རིན་གྱིས་ནི། །མཐར་འགྱུར་གཞན་དུ་མ་ཡིན་ནོ། །སངས་རྒྱས་ཆོས་དང་འཕགས་ཚོགས་སམ། །ཕ་ཕྱིར་གང་ཞིག་བསམས་པ་ཡི། །བསྔགས་
པ་དེ་ལ་བརྗོད་པས་སམ། །ཕྱི་ནས་བརྟུལ་ཞུགས་ཅན་གྱིས་བགྱིར། །མང་པོ་རི་བའི་དངོས་པོ་གཅིག །རུང་བའི་ཆོས་གོས་ཁྱེར་བ་བཞིན། །དེས་ནི་སྦ་བར་མི་བྱ་སྟེ། །ངེས་པར་ལྟུང་བ་མེད་པར་འདོད། །གཞན་ཡང་ཤོ་གམ་ལ་འདའ་བར། །ཁ་ཚར་བཅད་པ་ལ་སོགས་སམ། །ཆུ་ཡིས་བསྙུགས་ནས་ཀྱང་ནི་རུང༌། །ཐུགས་རྗེའི་བདག་ཉིད་ཅན་གྱིས་གནང༌། །གང་གིས་ཆོས་གོས་ལ་སོགས་པ། །འདོད་པས་དང་དུ་ལེན་པ་ནི། །འགྱོད་པས་བཏང་ཡང་དེ་ལ་ནི། །ལྟུང་བ་སྦོམ་པོར་ཤེས་པར་བྱ། །རི་ལ་འཛེག་གམ་གྲུ་བརྒལ་ཚེ། །ཕན་ཚུན་སོ་སོར་གོ་བྱས་ནས། །ལྷུང་བཟེད་ལ་སོགས་སྣོད་བསྐུར་ཏེ། །བག་ཡོད་རྟག་ཏུ་དྲན་པ་ཡིས། །འདི་ནི་བཟུང་ངམ་བཏང་ངོ་ཞེས། །སྨྲས་ཐོས་གལ་ཏེ་བརླག་གྱུར་ན། །དེ་རིན་ངེས་པར་སྦྱིན་པ་ལ། །འདིར་ནི་རྣམ་དཔྱད་མི་དགོས་སོ། །ཅི་ཏེ་མ་བོས་ཟན་ཟ་ན། །དགེ་སློང་ལ་ནི་ཉེས་བྱས་ཏེ། །འདི་ནི་སྡེ་ལྡན་ལྷག་མ་ལའང༌། །ཉེས་བྱས་ཉིད་དུ་རབ་ཏུ་གྲགས། །རྒྱལ་པོས་བྱིན་དང་རྐུན་པོས་བྱིན། །ལས་བྱེད་དག་གིས་མ་དྲིས་བྱིན། །གཞན་དང་འབྲེལ་པར་འདུ་ཤེས་ན། །སྦྱིན་པོ་དེ་ལས་མི་བླང་ངོ༌། །གཞན་དང་འབྲེལ་པ་ཕམ་པ་ཡིན། །སྟེར་བར་རྣམ་པར་ཤེས་ན་ནི། །འདོད་པ་མི་མཐུན་མི་བླང་སྟེ། །མི་ཤེས་ན་ནི་ངེས་པ་མེད། །སྦྱིན་བདག་ངེས་པར་རྣམ་དཔྱད་ནས། །དེ་ཕྱིར་གཙོ་བོ་མ་ཡིན་ན། །དེ་ལས་བླང་བར་མི་རིགས་ཏེ། །དེ་ནི་སྦྱིན་པོར་མི་འདོད་དོ། །གལ་ཏེ་དགེ་འདུན་སོགས་ཀྱི་ནོར། །རང་གི་གཉེན་ནམ་གཞན་གྱིས་ཀྱང༌། །སྟེར་ན་ནོར་མེད་ནད་པ་ཡིས། །སླར་ཡང་བསབ་པར་འདོད་པས་བླང༌། །གལ་ཏེ་ཤིན་ཉེས་མེད་དེ། །གསོན་ན་གང་ཡང་རུང་བ་ནི། །བླངས་ནས་ཀྱང་ནི་ཅི་ནུས་ཀྱིས། །དེ་ཡི་དཀོར་ནི་བསབ་པར་བྱ། །བ་ལང་ལ་སོགས་ལོངས་སྤྱོད་མཆོག །གྲོང་ལ་སོགས་པར་ལོངས་སྤྱོད་པ། །འདི་དག་དགེ་འདུན་ལ་ནི་གནང༌། །གང་ཟག་ལ་ནི་བཀག་པ་ཡིན། །ལོངས་སྤྱོད་ཞིང་དང་གྲང་དང་རྟ། །བ་ལང་མ་ཧེ་ར་ལུག་རྣམས། །འདུལ་བར་ལོངས་སྤྱོད་མཆོག་ཉིད་དུ། །དེ་ཉིད་རིག་པས་གསུངས་པ་ཡིན། །དངོས་པོ་རྣམ་པ་ལྔ་པོ་ནི། །ཤེས་རབ་ཅན་གྱིས་མི་བཅང་ཞིང༌། །མི་གཙང་མི་བགོ་
ཐམས་ཅད་དུ། །དེ་བཞིན་ཁས་ཀྱང་མི་བླང་ངོ༌། །སྐྱེད་མོས་ཚལ་དང་གཙུག་ལག་ཁང༌། །དེ་ཡི་དངོས་དང་མལ་སྟན་རྣམས། །ཚུལ་ལྡན་རྣམས་ཀྱིས་སྦྱིན་བདག་གི །བསོད་ནམས་སྤེལ་ཕྱིར་བསྲུང་བར་བྱ། །ལྷ་ཁང་སྐྱེད་ཚལ་ཀུན་དགའ་ར། །གཙུག་ལག་ཁང་ནི་གཅིག་ཏུ་འདོད། །དེ་དག་དངོས་པོ་གནས་ཁང་ཡིན། །མལ་སྟན་དག་ནི་གྲགས་པར་ཟད། །གཙུག་ལག་ཁང་སྟེང་གནས་པ་ཡི། །བསྒོ་བ་གང་དུ་གསལ་བར་ཐོས། །བཀའ་བསྒོ་བ་ནི་བྱེད་པ་ཡིས། །དེ་ལ་ངེས་པར་འཇུག་པར་བྱ། །ལས་ཀྱི་བྱ་བ་བྱེད་པའི་ཚེ། །ཟས་དང་གོས་ཀྱི་རྗེས་སུ་བཟུང༌། །ནད་པ་ལ་ནི་རྗེས་སུ་གནང༌། །ལས་ནི་མི་ནུས་པ་ལ་ཡང༌། །བརྡེག་དང་འཚོག་དང་སྐྱོ་བ་དག །འཕགས་པའི་ཆོས་དང་འགལ་བ་ཡིན། །བསད་དང་བཅིང་དང་ཉོན་མོངས་བྱེད། །འཕགས་པས་དེ་ཕྱིར་རྣམ་པར་སྤང༌། །ཅི་རིགས་མཆོག་གིས་གསུངས་པ་དང༌། །རིགས་ཀྱི་ཆོས་ལྡན་གྱིས་བསྟན་པའི། །ཡུལ་ཆོས་ལྡན་པའི་ཆད་པ་ནི། །དགེ་འདུན་གྱིས་ནི་དང་དུ་བླང༌། །རྒྱལ་པོ་ལ་སོགས་ཡོང་ས་བཏང་བའི། །རང་སྐལ་བསོད་ནམས་གྱིས་རྙེད་ན། །ཡོངས་སུ་ལོངས་སྤྱོད་ཉེས་མེད་དེ། །དེ་དག་སྔར་བསྟན་བཞིན་དུ་གནས། །འདྲེན་པས་དངོས་པོ་ཐམས་ཅད་ཀྱིས། །ཐ་སྙད་རང་གིས་མ་གསུངས་ཏེ། །དགེ་སློང་མ་འམ་དགེ་ཚུལ་དག །ངེས་པའི་ཞལ་ཏ་བ་ཡིས་བལྟ། །སྟོན་པའི་ཆོས་ལས་འདས་ནས་ནི། །སྲིད་ལྡན་གང་ཞིག་ཆད་པས་གཅོད། །དེ་ནི་བསླབ་པ་ཉམས་པ་སྟེ། །མ་རིག་སྒྲིབ་གཡོགས་གྱིས་བསྐྱེད་པའོ། །ཡང་དག་ལྟ་དང་གཞན་ཐོབ་ཀྱི། །ལོག་ལྟ་ཅན་དང་ཚུལ་ཁྲིམས་མེད། །དེ་ལ་རབ་ཏུ་བྱིན་ན་ནི། །དད་པས་བྱིན་པའི་འབྲས་བུ་མེད། །གང་ཡང་འཚོ་བའི་ཚད་ཙམ་ཞིག །ཁེངས་ལས་ལྷག་དང་བརྟུལ་ཞུགས་ཅན། །སྟོན་མོ་དག་ལས་ལེན་བྱེད་ན། །དེས་ནི་རྣམ་པར་ཉམས་པར་བྱས། །ཇི་ཙམ་གང་གིས་ཆོག་གྱུར་པ། །དེ་ཙམ་སྟོན་མོ་ལས་ནི་བླང༌། །ལྷག་མ་ཁམ་གཅིག་ལེན་བྱེད་ཀྱང༌། །བསམས་བཞིན་ཡིན་ན་ཉམས་པ་ཉིད། །ཕ་མའམ་ནད་པ་ལ་སོགས་ལ། །སྦྱིན་པར་བྱེད་པ་བཀག་པ་མེད། །སྦྱིན་བདག་དག་གིས་མ་སྤགས་པར། །ནམ་ཡང་གཞན་ལ་སྦྱིན་
མི་བྱ། །གང་དུ་འཆག་བ་ལ་སོགས་ཚེ། །གྲི་ཁབ་ལ་སོགས་རྙེད་གྱུར་ན། །གཙུག་ལག་ཁང་སྐྱོང་དག་ལ་གཏད། །ལུང་བཞིན་དེ་ཡིས་གོ་བར་བྱ། །དགེ་འདུན་དབུས་སུ་ཞག་གསུམ་བར། །དེ་ཡིས་དེ་དག་བསྟེན་པར་བྱ། །སུ་ཡང་ངོ་ལེན་མེད་ན་ནི། །ཅི་བདེ་བར་ནི་ཚོགས་ལ་དབུལ། །དགོས་པའི་ཚེ་ན་ལས་རྣམས་བྱ། །བསོད་ནམས་བསགས་པས་ལས་བྱ་ཡི། །རྙེད་པའི་དོན་དུ་དགེ་སློང་གིས། །ལས་ནི་ནམ་ཡང་མི་བྱའོ། །ཡིད་ཆེས་གྱུར་ལ་རང་གི་བློས། །ཇི་སྲིད་དུ་ནི་ངེས་པ་ཡིས། །འཇོག་པ་ལ་ནི་ཉེས་མེད་དེ། །དབང་པོ་གཞན་ནི་བཞག་ནས་སོ། །གང་ཕྱིར་དམན་དང་འབྲིང་དང་མཆོག །གྲོགས་པོ་གསུམ་ནི་རྣམ་དཔྱད་ནས། །ཡིད་ཆེས་བརྟན་པོ་ཉིད་ལ་བཅའི། །ངེས་པར་སེམས་མི་བརྟན་ལ་མིན། །ཤིན་ཏུ་མཆོག་ལ་མཆོག་ཉིད་དེ། །འབྲིང་ལ་འབྲིང་པོ་ཐ་མལ། །ཐ་མ་ཉིད་དེ་དམན་ལ་ཆུང༌། །ཡིད་ཆེས་རྣམ་པ་གསུམ་དུ་འདོད། །ནད་པ་ལ་ནི་དྲིས་ནས་སྨན། །ཕན་པའི་ཆེད་དུ་སྦྱིན་བྱ་སྟེ། །རང་གི་ཡིད་ཆེས་ཀྱིས་ཀྱང་རུང༌། །ཏིལ་སྣོད་དགེ་སློང་མ་བཞིན་མིན། །མི་དང་གཞན་ནོར་རྐུ་སེམས་ཀྱིས། །སྦྱོར་བ་གཅིག་ལ་ཚང་ན་ནི། །མདོར་ན་བསླབ་པ་ཉམས་པ་སྟེ། །ཕས་ཕམ་པ་ཡི་རྒྱུ་ཡིན་ནོ། །དགེ་སློང་མི་གཙང་ཡིད་བྱུང་གང༌། །རི་དགས་དབྱུག་ཐོགས་ཞེས་པས་བསད། །བསོད་ནམས་ཐོ་བ་དང་ལྷུང་བཟེད་སོགས། །འདོད་པ་དེ་བསྟེན་བཀག་པ་ཡིན། །ཡང་དག་བསམ་པ་མ་འཁྲུལ་པས། །རང་ངམ་གཞན་གྱིས་ཕ་རོལ་བསད། །མི་ལ་འཆི་བའི་བསྔགས་པ་དག །བརྗོད་གྲུབ་ངེས་ཀྱང་མཐར་འགྱུར་རོ། །དེ་འཆིའི་ཐབས་ནི་ཚིག་གིས་སམ། །སྦྱོར་བ་རྣམས་ཀྱིས་མངོན་བསྔགས་ཤིང༌། །སེམས་ནི་རྗེས་སུ་ཡི་རང་ན། །སྦོམ་པོའོ་མེ་ཡིས་ནགས་བསྲེག་དང༌། །མི་ཡི་ཡན་ལག་གཅོད་པ་དང༌། །དེ་ཡི་ཤ་ནི་ཟ་ཡང་ངོ༌། །ནད་པ་ལ་ནི་ནད་གཡོག་དག །ཕན་ཕྱིར་བྱིས་པ་ལེགས་པར་བསྒོ། །མཁས་པའམ་གནས་བརྟན་དག་ལ་ཡང༌། །སྨན་ནི་ཡོངས་སུ་དྲིས་ནས་སུ། །ནད་པ་དག་ལ་ཕན་བློས་སྦྱིན། །གཞན་དུ་འགལ་ཚབས་ཅན་དུ་འགྱུར། །གང་གི་ནད་ལ་ཅི་འདྲ་བའི། །ཡོ་བྱད་ནད་པ་དག་ལ་གཞག །བརྟགས་པ་ཟ་བ་ལ་སོགས་ཀྱང༌། །རྗེས་སུ་བརྩེ་བས་ཉེས་པ་
མེད། །དགེ་འདུན་ཀུན་གྱི་ནད་པ་ནི། །བལྟ་ཕྱིར་བརྩོན་བྱར་བཀའ་སྩལ་ཏེ། །ཐམས་ཅད་དུ་རིམ་པ་བཞིན། །འདུག་ནས་ཀྱང་ནི་བལྟ་བྱ་སྟེ། །ནད་པའི་གཡོག་དག་གིས་ཀྱང༌། །འབད་པས་འདུག་པའི་དོན་དུ་ནི། །གུས་པས་རྟག་ཏུ་སྟན་རྣམས་ནི། །ངེས་པར་ཉེ་བར་བསྟབ་པར་བྱ། །གལ་ཏེ་ནད་པ་ནུས་མེད་པས། །སྐྱོ་བར་གྱུར་པ་དེ་ལྟ་ན། །དེ་ལ་འདིར་ནི་རོ་མོས་ཀྱིས། །ཡང་དག་བསྒོ་བར་བསྒོ་བར་བརྟག་པ་ཉིད། །ནད་པའི་མདུན་དུ་གང་ཞིག་གིས། །ཐོས་སམ་ཚོར་བར་དེ་ཡི་སེམས། །འཆི་བའི་འདུན་པ་སྐྱེ་འགྱུར་བ། །དེ་འདྲའི་ཆོས་བཤད་མི་བྱའོ། །ཀྱེ་མ་ཁྱོད་ཀྱིས་སྦྱིན་པ་བྱིན། །ཚུལ་ཁྲིམས་ཀྱང་ནི་མ་ཉམས་བསྲུངས། །དཀོན་མཆོག་གསུམ་ལ་གུས་བྱས་ཏེ། །མྱ་ངན་འདས་པ་མདུན་ན་གནས། །ཁྱོད་ནི་ལུས་དང་བྲལ་མ་ཐག །ལྷ་ཡི་ཁང་བཟངས་ཐག་མི་རིང༌། །སྲོག་དང་བྲལ་ན་མྱུར་དུ་ནི། །མྱ་ངན་འདས་པ་ལག་ན་གནས། །དེ་སྐད་གང་སྨྲའི་དགེ་སློང་ནི། །མི་ཟད་ལྟུང་བ་དག་དང་བཅས། །དེ་བས་ཁྱོད་ནི་ནང་བྲལ་ནས། །ཡུན་རིང་ཆོས་སྤྱོད་འཚོ་བར་ཤོག །ཆོས་སྤྱོད་ཇི་སྲིད་གསོན་ན་ནི། །དེ་སྲིད་བསོད་ནམས་ཚོགས་ཆེན་པོ། །རྫོགས་པར་འགྱུར་ཞེས་བརྗོད་པར་བྱ། །ནད་ཀྱིས་གདུངས་ལ་སྨན་དག་དང༌། །མཁས་པས་གདམས་ངག་སྦྱིན་བྱ་ཞེས། །གནས་དང་གནས་དང་གནས་མིན་མཁྱེན་པས་གསུངས། །སྐྲ་ཅན་འཚོང་ན་སྦོམ་པོ་ཡིན། །ལྷུང་བཟེད་སོགས་ཆགས་གཞན་དག་ལ། །གདོལ་པ་བཞིན་དུ་བརྩེ་མེད་པར། །གང་ཞིག་འདོད་སེམས་སྐྱེད་བྱེད་པ། །དེ་ལ་ཉེས་བྱས་ཉིད་དུ་རིག །བཞད་གད་རྒོད་བག་ཆེད་དུ་ཡང༌། །ག་ག་ཚིལ་ནི་མི་བྱ་སྟེ། །སྔོན་ནི་གཞོན་ནུ་བཅུ་བདུན་སྡེས། །དགེ་སློང་གཡའ་བསྒགས་ཤི་བས་བཅས། །མཆོད་རྟེན་ལ་སོགས་ལས་བྱེད་པས། །ཁྱིམ་པ་མེད་ཚེ་ལྕི་བའི་ཁུར། །མི་ཁྱེར་མི་གཞུག་ཤིང་མཁན་ནི། །ཤིང་བཏེག་ཤི་བ་ལ་རྟེན་བཀག །སོ་ཕག་གས་པོ་ལ་སོགས་པ། །བརྡ་མ་སྤྲད་པར་སྦྱིན་མི་བྱ། །ཉི་མ་ཟད་པར་དགེ་སློང་གིས། །གླ་མེ་བཞིན་དུ་ལས་མི་བྱ། །ལས་ཀྱི་ཞལ་ཏ་བློ་ལྡན་གྱིས། །དེ་དག་ལ་ནི་གོ་བྱས་ནས། །དེ་རྣམས་ལས་དུ་བ་སྤང་བའི་ཕྱིར། །ཁྱེ་སུས་བཟའ་བཏུང་གིས་ཚེམ་བྱ། །
གཙུག་ལག་ཁང་ནི་བསྲུང་བའི་ཕྱིར། །བརྩོན་པར་ཡང་ནི་རྗེས་སུ་གནང༌། །སེམས་ཅན་དག་ལ་ལྟོས་མེད་པར། །མ་བསམས་དབྱུག་སོགས་མི་འཕང་ངོ༌། །ཁྲུ་བཅུའི་ནང་རོལ་སྤྱོད་ཡུལ་དུ། །རྡོ་བ་ལ་སོགས་དོར་བར་རུང༌། །བསླབ་པ་རྗེས་དྲན་པ་སྐྱེད་པ་ཡིས། །ནང་གི་བདག་ཉིད་ཉམས་མི་འགྱུར། །གཙུག་ལག་ཁང་གི་ལས་བྱེད་ལ། །མཚན་མོ་ཆོས་སྒྲོགས་གནས་དག་ཏུ། །སྒོ་སོགས་བསྡམས་པར་བྱས་སམ་ཞེས། །གནས་བརྟན་གྱིས་ནི་དྲི་བར་བྱ། །གཙུག་ལག་ཁང་འཇོམས་བཟློག་པའི་ཕྱིར། །གང་ལ་བཅིང་བ་བརྟག་བྱ་བར། །བཅིང་བ་སྔར་ནི་བརྗོད་པ་ཡིས། །གཙུག་ལག་ཁང་ནི་བསྲུང་བར་བྱ། །འཁྲུལ་གཏན་སྟེང་གཟེར་འོག་འཇུག་དང༌། །སྒོ་ལྕགས་ལྡེ་མིག་ཀྱོག་པོ་དང༌། །གཙུག་ལག་ཁང་གནས་དེ་དག་ལ། །ཞལ་ཏ་བ་ཡིས་ཅི་རིགས་སྦྱིན། །གཅིག་དང་གཉིས་དང་གསུམ་སོགས་ཀྱིས། །ཐ་དད་བཅིང་བ་གཞུག་བྱས་ཏེ། །ཐམས་ཅད་གཞུག་པར་འོས་ན་ཡང༌། །རྟོག་པ་པོ་ཡིས་ཐམས་ཅད་གཞུག །སྟོན་པའི་བསྟན་ལ་གུས་པ་ཡི། །དགེ་སློང་ལུས་དུབ་ཐང་ཆད་དག །ལམ་དུ་དགེ་སློང་རྣམས་ཀྱིས་ནི། །ཕ་བཞིན་བསྒྲུབ་པར་མི་བྱའོ། །སྔོན་བྱུང་ཕ་རྒན་དལ་འགྲོལ། །དུས་ཡོལ་གྱུར་པའི་འཇིགས་པ་ཡིས།། བུ་ཡིས་ཕུལ་བས་ལམ་དུ་དེ། །དུབ་ནས་འཆི་བའི་དུས་བྱས་སོ། །མུ་གེའི་དུས་ཤིག་དགེ་སློང་རྣམས། །མི་སྲིད་བླ་མའི་ཡོན་ཏན་རྣམས། །ཕན་ཚུན་བསྒྲགས་ཏེ་གོ་བྱས་རྒྱུས། །འཚོ་བ་བྱས་ཚེ་བཀག་པ་མཛད། །ཁྱད་པར་གྱུར་པའི་རྟོགས་པ་རྣམས། །མ་ཐོབ་པར་ནི་ཐོབ་པོ་ཞེས། །མངོན་པའི་ང་རྒྱལ་མེད་སྨྲ་ན། །སྡོམ་བརྩོན་མཐའ་ཡི་ལྟུང་བ་འཐོབ། །མི་ཆོས་བླ་མའི་ཡོན་ཏན་འདིར། །བསམ་གཏན་རྣམས་དང་གཟུགས་མེད་སོགས། །མཐོང་ཟད་ཕུལ་ཕྱིན་མྱ་ངན་འདས། །འཕགས་པའི་ལམ་གྱི་ཐོབ་སྨྲའ། །མཁས་པས་ཁྱད་པར་རྟོགས་པའི་དོན། །གང་གསུངས་འབྲས་བུ་བཞི་པོ་དང༌། །སྡུག་བསྔལ་ལ་སོགས་ཡུལ་ཤེས་པ། །བདེན་པ་བཞི་པོ་མཐོང་ཞེས་དང༌། །བསམ་གཏན་ཞེས་བརྗོད་བཞི་པོ་ཡི། །དེ་ལ་རེག་པས་གནས་པ་དང༌། །སྡུག་བསྔལ་ལ་སོགས་བདག་གིས་ཤེས། །ལྷ་ལ་སོགས་པ་བདག་གིས་མཐོང༌། །ལྷ་ཀླུ་
གནོད་སྦྱིན་དྲི་ཟ་སོགས། །མཐོང་ངོ་བདག་གིས་གཏམ་ཡང་བྱས། །དེ་དག་ཀྱང་ནི་བདག་ལ་སྨྲ། །ཞེས་སྨྲ་དགེ་སློང་མཐར་འགྱུར་རོ། །ལྷ་ཡི་སྐད་ནི་བདག་གིས་ཐོས། །དེ་ནི་མཚན་མོ་བདག་དྲུང་འོངས། །དེ་བཞིན་གནོད་སྦྱིན་སོགས་ཀྱང་སྟེ། །རང་བཞིན་གྱིས་ནི་ཕམ་པར་འདོད། །དེ་དག་ཀུན་ལ་ཤེས་བྱ་བ། །སྦོམ་པོ་ཤ་ཟ་མཐོང་སོགས་ཏེ། །འདི་ན་གང་ཞིག་ལྷ་སོགས་དག །མཐོང་བ་ཡོད་ཅེས་སྨྲ་ན་ཡང༌། །རྣམ་རྣགས་མི་རྟག་འདུ་ཤེས་སོགས། །འབྲས་བུ་མངོན་ཤེས་རབ་སྟོན་ན། །མི་འདོད་ན་ཡང་མཐའ་ཡི་ནི། །མཚོན་ཆས་མགོ་བཅད་ཐོབ་པར་འགྱུར། །གང་ཞིག་འདི་ན་དགེ་སློང་གང༌། །རྡུལ་ཁྲོད་ཤ་ཟ་མཐོང་བ་ཡོད། །བདག་ཅེས་སྨྲ་བར་མི་བྱེད་ཀྱང༌། །དེ་སྐད་བརྗོད་ན་ཉེས་བྱས་སོ། །ལྟུང་བ་འཆབ་དང་རེག་པ་དང༌། །ལུས་བཀན་བག་མེད་ཕྱོགས་བྱེད་ཉིད། །དེ་བཞིན་དགེ་སློང་ཕས་ཕམ་བཞིས། །དགེ་སློང་མ་ཡི་རྩ་བ་འཇིག །རྒྱལ་དང་ཕམ་དང་དེ་བཞིན་དུ། །ཆར་འབབ་མཚན་ནི་འགྱུར་བ་སོགས། །དགོངས་སུ་གསོལ་ཞེས་བརྗོད་བྱ་སྟེ། །གཞན་དུ་འགལ་ཚབས་ཅན་དུ་འགྱུར། །དགེ་སློང་སེར་སྐྱས་འོད་སྲུངས་ཀྱི། །བསྟན་ལ་ངག་རྩུབ་བརྫུན་སྨྲས་པས། །ཆུ་སྲིན་བཅོ་བརྒྱད་གདོང་སྐྱེས་བཅས། །ཉོན་མོངས་དགྲ་ཕམ་ཁས་བླངས་ནས། །ཉོན་མོངས་དག་གིས་ཕམ་བྱས་ན། །དེ་ཕྱིར་ཕས་ཕམ་གྱུར་པ་སྟེ། །ཁྲིམས་དྲལ་ཞེས་ནི་ངེས་པར་བརྗོད། །ཕས་ཕམ་པ་ཡི་ཆོས་དག་ཏུ། །གང་གསུངས་མ་ལུས་བརྗོད་ནས་ནི། །རིམ་པ་ཇི་བཞིན་དགེ་འདུན་གྱི། །ལྷག་མ་རྣམས་ནི་བརྗོད་པར་བྱ། །རྨ་སྒོ་གསུམ་ནི་མ་གཏོགས་པར། །ཤེས་ལུས་རང་བཞིན་ཡན་ལག་གིས། །བསམས་བཞིན་ཁུ་བ་འབྱིན་པ་ནི། །དགེ་འདུན་གྱི་ནི་ལྷག་མས་རེག །སླ་དང་སྐ་བ་ཉིད་དང་དམར། །སེར་པོ་དང་ནི་སྔོན་པོ་སྟེ། །ཁུ་བ་རྣམ་པ་ལྔར་བསྟན་པ། ཕྱི་མ་འཁོར་ལོས་སྒྱུར་རྒྱལ་གྱིས། །དེ་ཡི་བུ་ནི་སྔོན་པོ་སྟེ། །དེ་ཡི་འོག་ཏུ་སེར་པོ་ཡིན། །དམར་པོ་དེ་ཡི་བློན་པོ་སྟེ། །སྐ་བ་དབང་པོ་སྨིན་པ་ཉིད། །བུད་མེད་ཀྱིས་དུབ་དབང་པོ་དག །མ་སྨིན་པ་ཡི་སླ་བར་ཤེས། །ཐམས་ཅད་དུ་ཡང་དགེ་འདུན་གྱིས། །དག་བྱ་ལྷག་མའི་
ལྟུང་བ་ཉིད། །ཤེས་བཞིན་རྩིག་ཁུང་བུམ་པ་ཡི། །སྦུབས་སོགས་དུ་བ་འབྱིན་བ་ནི། །སྦོམ་པོ་ཡིས་ནི་བཅོམ་པ་སྟེ། །ཕ་བོད་སྦོམ་པོས་སྣད་པ་བཞིན། །བརྩམས་ཏེ་ཁུ་བ་མ་ཕྱིན་ནམ། །ཆགས་པས་དབང་པོ་འཇལ་བྱེད་དམ། །གར་བསྒྱུར་མཁའ་ལ་བསྐྱེད་པས་སམ། །མཉེ་བཤུད་ཀྱིས་ནི་ཕྱུང་ན་ཡང༌། །རྫི་ལྡོག་ཆུ་རྒྱུན་བཟློག་ཕྱོགས་སུ། །གཏོད་པ་ལ་ཡང་དེ་བཞིན་འདོད། །རྫི་ཕྱོགས་རྒྱུན་ཕྱོགས་མཐུན་གཏོད་པས། །ཉེས་བྱས་འགྱུར་བར་གསུངས་པ་ཡིན། །ཆུ་བསྟི་བ་ནི་མཐོང་སོགས་ལ། །ཆགས་པའི་སེམས་དང་ལྡན་ཡང་ངོ༌། །ཆགས་པས་དོན་ཉམས་རྩ་བ་སྟེ། །དེ་བས་རྟག་ཏུ་སྤང་བར་བྱ། །ཛེ་ཏའི་ཤིང་སོགས་རེག་པས་སམ། །བརླ་སོགས་དག་ལ་བཤུད་པ་ལ། །དེར་ནི་ཁུ་བ་བྱུང་ཡང་སྟེ། །རྨི་ལམ་ན་ནི་ཉེས་མེད་ཆའོ། །དགེ་སློང་ཆོགས་ལ་ཆོས་ལྷག་པར། །རྒྱས་པར་ཡང་དག་བཤད་པ་རྣམས། །དགེ་ཚུལ་ལ་ནི་ཐམས་ཅད་དུ། །ཉེས་བྱས་ངེས་པར་ཤེས་པར་བྱ། །མཐའ་ལས་བྱུང་བའི་ཉོན་མོངས་ངན། །ཀུན་སློང་ངེས་པར་བཤགས་བྱ་སྟེ། །སྦོམ་པོ་ལྕི་བ་ཚོགས་པ་ལ། །ཡང་བའི་མིང་ཅན་བཞིར་བརྗོད་དོ། །དགེ་འདུན་ལྷག་མ་ལས་བྱུང་བའི། །ལྕི་བ་ལྔ་ལ་ཡང་བ་བཞིས། །དགེ་འདུན་ལྷག་མ་ཚོགས་ལ་སྟེ། །ལྷག་མ་གང་ཟག་གཅིག་ལའང་རུང༌། །སྔར་ནི་ལྟུང་བ་བྱུང་བ་ཡིས། །ལྟུང་བ་མཐུན་སྣང་ལ་མི་འདོད། །དྲི་མས་དྲི་མ་རྣམ་དག་པ། །གང་དུ་ཡང་ནི་རུང་མ་ཡིན། །གང་ལ་དགེ་འདུན་ལྷག་མས་གོས། །ཇི་སྲིད་ངེས་པར་འཆབ་བྱེད་པ། །དེ་སྲིད་དེ་ནི་དག་བྱའི་ཕྱིར། །སྤོ་བ་དག་ལ་ངེས་པར་བཞག །དགེ་འདུན་ལྷག་མ་གང་བྱུང་བ། །ཇི་སྲིད་དེ་ནི་རྗེས་བཟུང་མིན། །དེ་སྲིད་དེ་ལ་སྤོ་བ་ཡི། །ཆོ་ག་ཡོངས་སུ་དག་ཕྱིར་བྱ། །མཚན་མོ་དང་ནི་སེམས་སྦྱོར་ལས། །འཆབ་པ་ཡང་ནི་རྣམ་པ་གཉིས། །ཤིན་ཏུ་མི་རུང་འདིར་སེམས་པས། །སེམས་ཀྱི་མིང་དུ་ཤེས་པར་བྱ། །འདིར་ནི་སྤོ་བ་ལ་གནས་ཏེ། །གལ་ཏེ་ཉོན་མོངས་ཀྱིས་ཕམ་པས། །རྨོངས་པས་སླར་ཡང་ལྟུང་སྤྱོད་ན། །སླར་ཡང་དངོས་གཞིའི་སྤོ་བ་ནི། །གཞན་དག་ཀྱང་ནི་སྦྱིན་བྱ་སྟེ། །འདུལ་བ་ལེགས་ཤེས་གང་དག་གིས། །ལན་གསུམ་བར་དུ་དེ་ལ་སྦྱིན། །སྙིང་རྗེའི་ཞིང་ནི་དེ་འབྲལ།
ཉོན་མོངས་དབང་གིས་འཇུག་ཤེས་པས། །ངོ་ཚའི་ཁུར་ནི་ཆེན་པོ་ཡིས། །བརྒྱ་ལམ་ཞིག་ན་འདུད་པར་འགྱུར། །དེ་ལྟ་ན་ཡང་མི་དགེ་ལས། །གལ་ཏེ་མི་ལྡོག་པ་ཉིད་ན། །དེ་ནི་མདོ་བཞིན་དོར་བྱ་སྟེ། །ཇི་སྲིད་སྐྱོ་བར་གྱུར་གྱི་བར། །ཡིད་ནི་ཡང་དག་སྐྱོ་གྱུར་ཅིང༌། །ཕྱིར་བཅོས་དོན་དུ་གཉེར་བ་ན། །ཚོགས་ཀྱིས་དབྱུང་བར་འདོད་པ་ཡིས། །མགུ་བ་སྤྱོད་པ་དེ་ལ་སྦྱིན། །མགུ་བའི་ཆུ་ཡིས་རྣམ་བཀྲུས་ནས། །དྲི་མ་ལྷག་མ་དག་བྱའི་ཕྱིར། །གང་དུ་དགེ་སློང་ཉི་ཤུ་ཡིས། །དེ་ནི་ངེས་པར་དབྱུང་བར་བྱ། །དེ་ལ་དགེ་འདུན་གཙོ་བོ་སྟེ། །བསམ་པ་མཁྱེན་པའི་དགེ་འདུན་ཡིན། །དགེ་འདུན་གྱིས་ནི་རྗེས་གནང་ན། །ལས་ཀྱི་བྱ་བ་བྱེད་པར་རུང༌། །དགེ་འདུན་ནང་དུ་དེ་ཡི་ལས། །བྱ་ཕྱིར་དེ་ཡི་རིགས་པ་ཡིས། །ཚོགས་ལས་ལྡང་ངོ་དེ་ཡི་ཕྱིར། །དགེ་འདུན་ལྷག་མ་ཞེས་བྱར་བརྗོད། །གལ་ཏེ་བྱིན་རླབས་མགུ་བས་ཀྱང༌། །གནས་པའི་ཚེ་ན་ཤི་གྱུར་ན། དབྱུང་བ་མ་བྱས་ན་ཡང་ནི། །ངེས་པར་མཐོ་རིས་དག་ཏུ་སྐྱེ། །རང་གི་ལས་ཀྱིས་ཅོ་དྲིས་པས། །ངན་འགྲོ་དག་ཏུ་མི་སྐྱེ་མོད། །འོན་ཀྱང་སྙིང་རྗེའི་བདག་ཅན་གྱིས། །བཏང་སྙོམས་མི་བྱ་རྗེས་སུ་བཟུང༌། །གང་ཞིག་མིང་ནི་གྲགས་ཆེན་དང༌། །མདོ་སྡེ་ལ་སོགས་མང་དུ་ཐོས། །དེ་དག་གཅིག་གི་མདུན་དུ་ཡང༌། །བཤགས་པས་དག་པར་ངེས་པར་རུང༌། །བསམ་པ་ཡང་ནི་ཆེ་བ་དང༌། །དེ་བཞིན་ངོ་ཚས་བཅབས་པ་ཡང༌། །དེ་ཡི་སྤོ་བར་ཡོངས་བརྟགས་བྱེད། །དེ་ཡི་སྒོ་ནས་ཆོ་ག་བཞིན། །དེ་ནི་མཐོལ་བ་ལན་གསུམ་ཡིན། །ནད་ཀྱིས་ཆད་པ་ཉིད་དང་ནི། །གོས་ཀྱིས་དཀྲིས་དང་ཉམས་པའི་སྒོར། །བྱེད་ན་ལྟུང་བ་ཆེ་སྤངས་ནས། །སྦོམ་པོའི་ལྟུང་བས་འཇོམས་པར་འགྱུར། །རྐང་པ་ནས་ནི་སྤྱི་བོའི་བར། །ཆགས་བཅས་བུད་མེད་ཡན་ལག་ལ། །གོས་ཀྱིས་མ་ཆོད་རེག་ན་ལྟུང༌། །ཆོད་པ་ལ་རེག་སྦོམ་པོ་ཉིད། །ཤིང་རྟ་གྲུ་སོགས་ལ་འཇུག་དང༌། །འཕུལ་བ་དང་ནི་འཐེན་པ་དང༌། །བར་བཅས་བར་མེད་པ་ལ་ནི། །རེག་པ་བདག་བྱེད་སྔར་བཞིན་དེས། །བུད་མེད་ཀྱིས་ཚུར་དགེ་སློང་ལ། །རེག་ཅིང་ཆགས་སེམས་བདག་བྱེད་ན། །འདིར་ཡང་སྔར་བཞིན་ཐམས་ཅད་དུ། །འདྲེན་པ་ལ་སོགས་བྱེད་ཀྱང་ངོ༌། །འཁྲིག་པའི་བསམ་པས་
འདི་དག་ལ། །གཉེན་པོ་སྟོབས་ཆུང་བྱེད་ན་ནི། །དེ་ལ་ཕས་ཕམ་ཀྱིས་བསླང་བའི། །སྦོམ་པོ་ཡི་ནི་ལྟུང་བར་འགྱུར། །འདི་དག་བུད་མེད་བསྟེན་བཟོད་དེ། །གཞན་དུ་སྦོམ་པོའི་མིང་ཅན་ཡིན། །སྐྱེས་པའམ་མ་ནིང་ལ་སོགས་སམ། །དུད་འགྲོ་མོ་ལ་ཉེས་བྱས་ཡིན། །དགེ་སློང་གང་ཞིག་བུད་མེད་ལ། །རྩེ་ཕྱིར་ཡང་ནི་སྨད་ཚིག་སྨྲ། །དགེ་སློང་གཟུགས་བརྙན་ཉིད་ཡིན་ཏེ། །དེ་ཡང་དགེ་འདུན་ལྷག་མ་ཡིན། །འགའ་ཞིག་རྨ་ཡི་སྒོ་གསུམ་པོ། །ལེགས་པར་འདོད་ལ་ཤིན་ཏུ་འཇམ། །ཡང་ན་དེ་དག་ལེགས་པར་ནི། །མ་དོད་དགའ་བ་མི་སྐྱེད་གནས། །འདི་དང་འདི་ནི་ཁྱོད་ལ་སྦྱིན། །གང་ཁྱོད་ཁྱོ་ནི་ནོར་ལྡན་ཏེ། །གང་འདིར་ཁྱོད་དང་ལྷན་ཅིག་ཏུ། །བདེ་མྱོང་དེ་ནི་རྙེད་པ་ཆེ། །དེ་ལ་སོགས་པའི་འཁྲིག་ཚིག་དག །གང་བརྗོད་དག་འདུན་ལྷག་མའོ། །འཁྲིག་དངོས་སྒྲ་ནི་མི་བརྗོད་ན། །སྦོམ་པོ་ཡི་ནི་ལྟུང་བར་གསུངས། །བུད་མེད་ངོ་ཚ་ལས་འདས་ཚིག །ཚུལ་སྨྲའང་དེ་ལ་ཅི་རིགས་ཉིད། །གང་ཞིག་འཁྲིག་པའི་ཚིག་གྱུར་པ། །དེ་ནི་སྨྲ་བར་མི་བྱའོ། །སྨྱོས་པ་དང་ནི་སེམས་འཁྲུགས་དང༌། །སྨྲ་མི་ཤེས་དང་ལས་དང་པོ། །ཚོར་བས་གཟིར་ལ་བརྗོད་ངན་གྱི། །ལྟུང་བ་དག་ནི་མི་འབྱུང་ངོ༌།། །།བམ་པོ་གཉིས་པ། རང་ཉིད་བསྔགས་པའི་བྱེ་བྲག་དག །འཁྲིག་པ་དོན་གཉེར་བུད་མེད་ཀྱི། །མདུན་དུ་རང་ཉིད་ཀྱིས་བསྔགས་ན། །ལྷག་མའོ་དགེ་འདུན་གྱི་ཟད་བྱེད། །ལོངས་སྤྱོད་འདི་ཡིས་ཉེར་གནས་ན། །མཆོག་དང་ཕུལ་སོགས་ངེས་བསྟན་པ། །སྲིང་མོ་བསྙེན་བཀུར་མཆོག་ཚིག་སྨྲ། །གསོལ་བ་ལ་སོགས་ལས་ཀྱིས་ནི། །ཚུལ་ཁྲིམས་ལྡན་པར་གང་བཤད་པ། །ཚུལ་ཁྲིམས་ཕུང་པོར་ཡང་དག་ལྡན། །དགེ་བའི་ཆོས་ཅན་ཉིད་ཀྱིས་ན། །ཏིང་འཛིན་ཕུང་པོར་ཡང་དག་ལྡན། །ཚངས་པར་སྤྱོད་པ་ངེས་བརྗོད་པས། །ཤེས་རབ་ཕུང་པོར་ཡང་དག་ལྡན། །འཁྲིག་པའི་ཚིག་ཅེས་བྱ་བ་འདིར། །གཉིས་ཀྱིས་གཉིས་སྤྲད་སྦྱོར་བ་ཡིན། །འདི་དག་ནང་ནས་ཚིག་གཅིག་ཀྱང༌། །སྡོམ་བརྩོན་ཆགས་པའི་སེམས་ཀྱིས་ནི། །བརྡ་སྤྲད་བུད་མེད་ལ་སྨྲ་ན། །ལྟུང་བ་ཡིན་ལ་དཔྱད་མི་དགོས། །འཁྲིག་པ་གསལ་བར་བྱེད་པའི་ཚིག །གལ་ཏེ་བུད་མེད་ཀྱང་ནི་སྨྲ།
གང་འདིར་ཚངས་པར་སྤྱོད་རྣམས་ལ། །འཁྲིག་པ་ལོངས་སྤྱོད་མཆོག་ཅེས་དང༌། །ཁྱེད་ལྟའི་ཚུལ་ཁྲིམས་ལྡན་པ་ནི། །རྟག་ཏུ་དགེ་བའི་ཆོས་ཅན་དེ། །ཡོན་གནས་ཁྱད་པར་འཕགས་པ་དག །རྩོད་པའི་དུས་ན་རྙེད་པར་དཀའ། །དེ་ལ་སོགས་བརྗོད་དགེ་སློང་གང། །དགའ་བས་དང་དུ་ལེན་བྱེད་ཅིང༌། །ལེན་གྱི་ཚིག་ཀྱང་སྨྲ་བྱེད་ན། །དགེ་འདུན་ལྷག་མར་གསུངས་པ་ཡིན། །ད་ལྟ་བུ་དང་འཁྲིག་སྤྱད་ན། །བུད་མེད་རྣམས་ཀྱང་འབྲས་བུ་ཆེ། །འཁྲིག་པས་དངོས་ནི་མི་བརྗོད་ཀྱང༌། །གང་དེ་སྦོམ་པོའི་མིང་ཅན་ནོ། །དེ་བཞིན་འཁྲིག་པའི་ཆོས་ཀྱིས་ནི། །དག་སློང་ཞེས་སོགས་སྔ་མ་བཞིན། །ད་ལྟ་བུ་ཞེས་མི་བརྗོད་ན། །འདི་ཡང་སྦོམ་པོ་ཉིད་དུ་གསུངས། །བུད་མེད་ཀྱིས་ཀྱང་དེ་བཞིན་དུ། །འཁྲིག་པའི་ཚིག་དངོས་དོར་གནས་ཀྱང༌། །ཁྱེད་ལྟ་བུ་ཞེས་མི་བརྗོད་ན། །དེ་བཞིན་གཉི་ག་སྦོམ་པོ་ཡིན། །བསྟེན་མི་ཤེས་ལ་འཁྲིག་ཚིག་དངོས། །བརྗོད་ན་སྦོམ་པོ་ལས་ནི་དམན། །དེ་ལྟ་བུ་ཞེས་བྱ་བའི་སྒྲ། །མེད་པ་ལ་ཡང་ཉེས་བྱས་འདོད། །ཐམས་ཅད་དུ་ཡང་སྡོམ་བརྩོན་ནི། །ཆགས་ཅན་ལ་ནི་ལྟུང་བར་འགྱུར། །འདིར་ནི་ཆགས་ཅན་ཞེས་གསུངས་གང༌། །སེམས་ནི་ཆགས་པ་དང་འབྲེལ་ཉིད། །གང་བསྟེན་བཟོད་ལ་ལྟུང་བ་སྟེ། །བསྟེན་མི་བཟོད་ལ་སྦོམ་པོ་ཡིན། །སྐྱེས་པ་མ་ནིང་ལ་སོགས་དང༌། །དུད་འགྲོ་མོ་ལ་ཉེས་བྱས་ཉིད། །རང་ངམ་གཞན་བྱེད་འཇུག་ཀྱང་རུང༌། །བུད་མེད་སྐྱེས་པ་ཕྲད་ན་ནི། །དགེ་འདུན་ལྷག་མའི་རལ་གྲི་ཡིས། །རང་གི་མགོ་ནི་གཅོད་པར་བྱེད། །ཆུ་ཚིགས་བྱིན་སོགས་མདོར་བསྡུ་ན། །ཆུང་མ་རྣམ་པ་བདུན་དུ་བརྗོད། །མཛའ་ན་མོ་བཅུ་དེ་དག་གི །མཚན་ཉིད་ཡང་དག་བཤད་པར་བྱ། །ཆུ་ཡིས་རབ་ཏུ་བྱིན་པ་ཡི། །དོན་ལ་དེ་མིང་རབ་ཏུ་བཏགས། །བུད་མེད་གང་ཞིག་ནོར་གྱིས་ཉོས། །རིན་ཆས་ཉོས་ཞེས་དེ་ལ་རིག །རྒྱལ་པོའི་རྒྱལ་མཚན་དང་ནི་མགོས། །ཕྲོགས་པ་བཙན་ཕྲོགས་ཞེས་སུ་བརྗོད། །ངས་ཁྱོད་ཉེ་གནས་བྱའོ་ཞེས། །ཟེར་བ་དང་སམ་འདུས་པ་ཡིན། །ཟས་དང་གོས་ཀྱི་རྒྱུ་མཚན་གྱིས། །ཞུགས་པ་གོས་ཟས་ཀྱིས་འཚོ་ཡིན། །གང་ཁྱོད་ནོར་དང་ང་ཡི་ནོར། །དེ་ཡི་མཉམ་སྲོག་འཚོ་བྱ་ཞེས། །དེ་སྐད་བརྗོད་ནས་ཞུགས་པ་གང༌།།
འདུམ་པ་ཞེས་བྱ་བའོ། །སྐད་ཅིག་ཙམ་ཞིག་རྟག་ཏུ་མིན། །དེ་ལ་ཐང་འགའ་འཕྲད་ཅེས་བྱ། །རྣམ་པ་བདུན་པོ་འདི་དག་ནི། །སླར་ཡང་སོ་སོའི་དབྱེ་བར་འདོད། །འཐབས་པའི་མདོ་དང་འཐབས་པའི་འོག །དུམ་པ་བཅད་པ་རྣམ་པ་གསུམ། །རྡེ་འུ་གསུམ་ནི་གཏོར་བ་དང༌། །ཆུང་མ་མ་ཡིན་པར་ནི་བསྒྲགས། །ཆོ་ག་རབ་ཏུ་གཏང་བ་དང༌། །དེ་བཞིན་དྲིལ་བུ་བསྒྲགས་པའོ། །དང་པོ་རྣམ་པ་གསུམ་པོ་ལ། །བྱེ་བ་ཉེ་བར་སྡུམ་བྱེད་ན། །གཅིག་གཉིས་གསུམ་ལ་རིམ་པ་བཞིན། །ཉེས་བྱས་སོགས་པར་འགྱུར་བ་ཡིན། །བཞི་པ་དང་ནི་ལྔ་པ་གཉིས། །དྲུག་སྟེ་གསུམ་ལ་སྦོམ་པོ་ཡིན། །བདུན་པ་བསྡུམས་བྱས་བརྟུལ་ཞུགས་ཅན། །དགེ་འདུན་གྱི་ནི་ལྷག་མ་ཐོབ། །འདི་རུ་མཛའ་མོར་འདོད་པ་ནི། །ཁྱོ་ནི་ཤིའམ་གཞན་སོང་ཚེ། །མ་ཡི་འབད་པས་བསྲུངས་པ་ནི། །མ་ཡིས་བསྲུངས་ཞེས་བརྗོད་པ་ཡིན། །དེ་བཞིན་ཕ་དང་གྱོས་སྒྱུག་དང༌། །ཕ་དང་མ་ཡི་རང་རིག་སྐྱེས། །དེས་བསྲུངས་དེ་ནི་སླར་ཡང་ནི། །ཉེ་དུས་བསྲུངས་ཞེས་བརྗོད་པ་ཡིན། །ཕ་དང་ཁྱོ་ནི་མེད་པ་ན། །མིང་པོས་ཡོངས་སུ་བསྲུངས་པའམ། །ཕུ་མོ་ནུ་མོ་ཡིས་ཀྱང་བསྲུངས། །སྤུན་ཟླས་བསྲུངས་ཞེས་བརྗོད་པ་ཡིན། །བྲམ་ཟེ་མོ་འམ་རྗེ་རིགས་མོས། །བསྲུངས་བ་རིགས་ཀྱིས་བསྲུངས་པ་ཡིན། །བད་ས་ལའམ་ཀོ་ས་ལའི། །རྒྱུད་ཀྱིས་བསྲུངས་པ་རུས་ཆགས་བསྲུངས། །ཆོས་སྤྱོད་བརྟུལ་ཞུགས་ཅན་དག་གི །འཁྲུག་མེད་མར་ནི་ཤེས་བྱ་སྟེ། །རྣམ་པ་བཅུ་པོ་འདི་དག་ནི། །མཛའ་ན་མོ་ཞེས་ཤེས་པར་བྱ། །གང་འདིར་མཛའ་ན་མོར་གསུངས་དང༌། །བཞི་པ་ལ་སོགས་ཆུང་མ་རྣམས། །ཐམས་ཅད་དུ་ནི་སྡུམ་བྱེད་པ། །དགེ་འདུན་ལྷག་མར་ངེས་པར་བསྟན། །ཁྱེའུ་འམ་ནི་བུ་མོ་འདི། །ཅི་ཡི་ཕྱིར་ན་ཁྱིམ་མི་བྱེད། །དེ་སྐད་ལ་སོགས་སྨྲ་བ་ཡི། །དགེ་སློང་གིས་ནི་ཉེས་བྱས་འཐོབ། །རང་གི་དོན་དུ་ཁང་པ་ནི། །གསོལ་བ་ལ་སོགས་ལས་ཀྱི་ནི། །ཆེད་སོགས་ཡོན་ཏན་ལྡན་པར་བྱ། །གཞན་དུ་དགེ་འདུན་ལྷག་མར་འགྱུར། །གང་དུ་ཉམ་ང་མེད་སྤྱོད་པ། །སྤྱོད་ལམ་རྣམ་བཞི་རུང་བ་ནི། །འདུག་དང་འཆག་དང་ཉལ་བར་གྲགས། །བཞི་པ་ལངས་པ་ཉིད་ཡིན་ནོ། །ཆུར་ནི་བདེ་བར་གཤེགས་པ་ཡི། །མཐོ་ནི་བཅུ་དང་གཉིས་ཡིན་ནོ། །ཞིང་དུ་དེ་ཉིད་བདུན་ཡིན་ཏེ། །དེ་དག་དེ་ཡི་ཚད་
དུ་གསུངས། །བདེ་བར་གཤེགས་པའི་མཐོ་ཡི་ཚད། །གང་གསུངས་མཁས་པས་ཤེས་པར་བྱ། །འབྲིང་ཚད་མི་ཡི་ཁྲུ་དག་ནི། །ཕྱེད་དང་གཉིས་ནི་ཡོད་པ་ཡིན། །འབྲིང་ཚད་སྐྱེས་བུ་ཡི་ནི་ཁྲུ། །བཅོ་བརྒྱད་ཆུར་ནི་ཡོད་པ་ཡིན། །ཞིང་དུ་ཕྱེད་དང་བཅུ་གཅིག་ནི། །ཁང་པའི་ཚད་དུ་གསུངས་པ་ཡིན། །སྤྲུལ་དང་སྡིག་པ་ཏྲེ་བུ་ཀ །ཏྲེ་ལ་ཏ་སོགས་ཀྱིས་མི་རུང༌། །རྩོད་བཅས་ལམ་དང་ཤིང་དྲུང་དང༌། །ལྷ་རྟེན་རྒྱལ་པོའི་ཕོ་བྲང་མཐའ། །ཆུ་དང་གཡང་ས་ཁྲོན་པའི་དྲུང༌། །བརྩམ་དུ་རུང་བ་མ་ཡིན་ནོ། །སྐྱོན་ནི་འདི་དག་མེད་པ་རུ། །རིགས་པ་ཡི་ནི་ཁང་པ་བྱ། །བཀའ་ཡིས་མ་གནང་བ་དག་དང༌། །གཞི་མི་རུང་དང་བརྩམ་མི་རུང༌། །མ་བརྟན་རྩོད་པ་དང་བཅས་སུ། །བྱེད་ན་དགེ་སློང་སྦོམ་ལྟུང་ཐོབ། །སྐྱོན་ཀུན་གྱིས་ནི་རབ་སྨད་པར། །དགེ་འདུན་ལྷག་མར་གྱུར་པ་སྟེ། །སྐྱོན་རྣམས་ཀུན་དང་བྲལ་བ་ཡི། །ས་གཞིར་རྗེས་སུ་བསྔགས་པ་ཉིད། །ལས་དང་པོ་དང་དེ་བཞིན་སྨྱོས། །འཁྲུགས་དང་ནད་ཀྱིས་གདུངས་པ་ཡིས། །བྱེད་ཀྱང་འདི་ལས་འབྱུང་བ་ཡི། །ལྟུང་བ་ཡོད་པ་མ་ཡིན་ནོ། །གཙུག་ལག་ཁང་ནི་བདག་བཅས་ལའང༌། །ཚད་དང་ཆོ་ག་འདི་ཉིད་དེ། །ཆེན་པོ་ཉིད་ཀྱི་ཚད་དུ་ནི། །ནོར་གྱིས་འདིར་ནི་ཤེས་པར་བྱ། །གཞི་མེད་པའམ་བག་ཙམ་གྱིས། །སྡོམ་བརྩོན་ཉམས་པར་འདོད་ཕྱིར་ནི། །ཕས་ཕམ་པ་ཡིས་སྨད་ན་ནི། །གཉིས་ཀ་དགེ་འདུན་ལྷག་མར་ཤེས། །གང་ཞིག་ཅུང་ཟད་བདེན་པར་སྨྲ། །འདི་ནི་བག་ཙམ་ཡང་དག་གྲགས། །རྒྱུ་མཚན་མེད་པ་གཞི་མེད་ཡིན། །བག་ཙམ་ཉིད་རབ་བསྟན་པ་ནི། །རབ་དང་བློ་ལྡན་དགེ་སློང་མ། །ཨུཏྤལ་མདོག་ཅན་ཞེས་བྱ་བྱུང༌། །རྫིང་བུ་རབ་ཞི་ཞེས་པའི་འགྲམ། །གྱང་ནོར་ཅན་ཡོང་ཉེ་བར་འོངས། །དེ་དང་ཧ་ཅང་མི་རིང་བར། །ས་ལས་སྐྱེས་དང་མཛའ་བོ་གནས། །དེར་ནི་ཆུ་འཐུངས་འོངས་པ་ཡི། །རི་དགས་རི་དགས་མོ་སྤྱོད་མཐོང༌། །དེ་མཐོང་ས་ལས་སྐྱེས་ཀྱིས་ནི། །མཛའ་བོས་མཛའ་བཤེས་ལ་དྲིས་པ། །མི་ཚངས་སྤྱོད་དང་དགེ་སློང་དང༌། །དགེ་སློང་མ་ཡང་མཐོང་ངམ་ཅི། །དེ་ཡིས་མཐོང་ངོ་ཞེས་སྨྲས་ཏེ། །བག་ཙམ་འདི་ཙམ་ལས་བྱུང་བས། །གྱད་ནོར་བདག་གིས་བརླག་བྱ་ཞེས། །དེ་ཡིས་ཁྲོས་ནས་སྨྲས་
པར་ཟད། །དེ་ལ་སོགས་པས་ཀུན་བསླང་བའི། །བག་ཙམ་གྱིས་ནི་བྱེ་བྲག་དག །ཡིད་གཅུགས་དམན་པ་དག་གིས་ནི། །དྲན་པར་བྱ་ཕྱིར་གསུངས་པ་ཡིན། །བཞམས་ཏེ་བསྒོ་སོགས་ཆོ་ག་ཡིས། །ལན་གསུམ་བར་དུ་བཟློག་ན་ཡང༌། །མི་ཉན་དགེ་འདུན་མཐུན་འབྱེད་ན། །དགེ་འདུན་གྱི་ནི་ལྷག་མ་ཐོབ། །གསོལ་བ་མ་གཏོགས་བཟློག་པའི་ཚིག །བཞམས་ཏེ་བསྒོ་བ་ཞེས་བྱ་སྟེ། །ཚེ་ལྡན་ཁྱོད་འདིར་མཆོག་གཅིག་ལ། །འདི་མ་བྱེད་ཅེས་རྒྱས་པར་ནི། །གཞམས་ཏེ་བསྒོ་བས་མི་གཏོང་ན། །ལས་ཀྱིས་དེ་ལ་བཀའ་བསྒོ་བྱ། །དེ་ནས་གསོལ་དང་བཞི་ལས་ཏེ། །བྱིས་གང་དེ་ཡི་གྲོགས་བྱེད་པ། །མཆོག་གཅིག་བསམ་པ་གཅིག་པ་ལས། །དབྱེ་བ་རྣམ་པ་གཉིས་སུ་གནས། །ཐ་དད་དབྱེ་བ་ཡང་ནི་འདིར། །རྣམ་པ་བཅུ་བཞི་དག་ཏུ་བཞེད། །ཆོས་ལ་ཆོས་མ་ཡིན་བརྗོད་དང༌། །ཆོས་མིན་ལ་ཡང་ཆོས་སུ་བརྗོད། །འདུལ་བ་དང་ནི་འདུལ་མིན་ཉིད། །བཞི་པོ་དེ་ལ་སོགས་པ་བརྗོད། །འདི་ལ་དབང་བྱེད་མཁས་པ་ཡིས། །འགྱེད་པ་དང་ནི་མི་གདམས་དང༌། །ལྟུང་བ་དང་ནི་བྱ་བ་སྟེ། །རྣམ་པ་བཞིར་ནི་ཤེས་པར་བྱ། །སྣ་ཚོགས་རྩོད་དང་ཚོགས་པ་མེད། །དགེ་འདུན་བསམ་པ་ཐ་དད་པའི། །རྐྱེན་ལ་སོགས་པས་འབྱུང་བ་སྟེ། །རྩོད་པ་ཡི་ནི་དབང་བྱས་བརྗོད། །ཀུན་ནས་ཉོན་མོངས་པས་ལྟུང་བ། །ཕན་ཚུན་དུ་ནི་མི་གདམས་པ། །དེ་ནི་རྩོད་པ་ལས་བྱུང་བ། །མི་གདམས་པ་ཞེས་བྱ་བར་གྲགས། །ལུས་དང་ངག་ཡིད་ཀྱིས་ཕྱེ་བ། །དེ་ལྟར་ཐ་དད་གཅིག་དང་ནི། །རྣམ་པ་གཉིས་དང་རྣམ་པ་གསུམ། །ལྟུང་བ་ཕྱོགས་ཙམ་བརྗོད་པ་ཡིན། །ཁྱིམ་གཅིག་དགེ་སློང་བུད་མེད་དང༌། །གལ་ཏེ་མི་ཤེས་ལྷན་ཅིག་ཉལ། །ནུབ་གསུམ་བསྙེན་པར་མ་རྫོགས་དང༌། །གནས་གཅིག་འདི་ནི་ལུས་ཀྱིའོ། །བུད་མེད་དག་ལ་རྐང་པ་ནི། །ལྔའམ་དྲུག་གིས་ཆོས་སྟོན་ན། །མ་བསམས་པར་ནི་ལྷག་པའི་ཚིག །སྨྲས་པ་ལ་ནི་ངག་གིར་བརྗོད། །གསོ་སྤྱོད་དུས་ཚེ་དྲིས་ན་ཡང༌། །སྐྱོན་ཡོང་སྨྲ་བར་མི་བྱེད་ན། །དེ་ལ་ཡིད་ཀྱི་ལྟུང་བ་ནི། །ཉེས་བྱས་ཉིད་དུ་མཁས་པས་རྟོགས། །ལུས་དང་ཡིད་གཉིས་འབྲེལ་པ་ནི། །ཡང་དག་བསམས་ནས་སྲོག་གཅོད་དང༌། །མ་བྱིན་ལེན་དང་ཆང་འཐུང་སོགས། །བརྟེན་པ་ཉིད་ལའང་འདོད་
པ་ཡིན། །ཡང་དག་བསམས་ནས་ལྔ་དང་ནི། །དྲུག་ཙམ་སྨྲས་པ་ལྷག་པར་བརྗོད། །ངག་དང་ཡིད་ལས་གྱུར་པ་དེ། །བརྫུན་སྨྲ་སོགས་ལའང་འདོད་པ་ཡིན། །བརྡེག་ཅེས་ཀུན་ནས་བསམས་ནས་ནི། །བརྗོད་དེ་ལུས་ཅན་ལ་བརྡེག་ན། །འདི་ནི་ལུས་དང་ངག་ཡིད་ཀྱི། །བྱ་བ་རྣམ་པ་གསུམ་པ་ཅན། །དགེ་སློང་ལ་ནི་མི་དགེ་བས། །ལྟུང་བར་འགྱུར་གྱི་སེམས་དག་ན། །མཆོད་རྟེན་སྐུ་ལ་སྐྱེས་པ་ཡི། །རྩྭ་སྔོན་གཅོད་པར་བྱེད་བཞིན་དུ། །ཇི་ལྟར་དགེ་བའི་སེམས་ཀྱིས་ནི། །སྟོན་པ་ལ་ནི་མཆོད་འདོད་པས། །མེ་ཏོག་ཕྲེང་བ་སྤེལ་བའི་ཕྱིར། །འཐོག་པ་དེ་ལ་དེ་ཙམ་མིན། །མ་བསམས་ཐུབ་པའི་བསླབ་པའམ། །དགེ་འདུན་ནང་ཁྲིམས་དྲལ་གྱུར་ན། །ལུང་མ་བསྟན་པར་གསུངས་པ་སྟེ། །ལྟུང་མེད་དགེ་བ་ནམ་ཡང་མིན། །ཡང་དག་བསམས་ནས་འདས་ན་ནི། །མི་དགེ་བ་ཉིད་ཁོ་ནར་འགྱུར། །འདི་ནི་རྗེས་སུ་མ་གནང་ཡང། །སྐབས་འོངས་ཞར་ལ་བརྗོད་པ་ཡིན། །དེ་ལྟར་རྣམ་པ་དུ་མ་ཡི། །ལྟུང་བ་སོ་སོའི་སྒོ་ནས་འདིར། །རྩོད་པའི་དབང་དུ་བྱས་པ་ཡི། །ལྟུང་བ་འདི་ནི་མཁས་པས་གསུངས། །གསོལ་བ་ལ་སོགས་ལས་འདི་དག །རུང་བ་མིན་ཞེས་སྨྲ་བ་རྣམས། །རྩོད་པ་དང་ནི་འཐབ་མོ་ཡང༌། །བྱ་བའི་ཡང་ནི་རྒྱུ་རུ་འདོད། །དགེ་འདུན་འབྱེད་པར་གང་བརྩོན་པའི། །བློ་ཆུང་གིས་ནི་ཉེས་བྱས་ཐོབ། །བཞམས་ཏེ་བསྒོས་ཀྱང་མི་གཏོད་ན། །ཉེས་བྱས་ཉིད་དུ་རྣམ་པར་གཞག །དང་པོ་ཉིད་དུ་གསོལ་བའི་ལས། །བརྗོད་ཚེ་མི་གཏོང་སྦོམ་པོ་ཉིད། །བརྗོད་པ་གཉིས་ལའང་དེ་ཡིན་ཏེ། །མཐར་ནི་དགེ་འདུན་ལྷག་མ་ཉིད། །སྔ་མའི་བརྗོད་པ་གཉིས་ལ་ནི། །སྦོམ་པོའོ་དེ་རྗེས་དེ་ལ་ནི། །གསུམ་པ་དགེ་འདུན་ལྷག་མ་སྟེ། །དེ་ལྟར་འདི་ནི་ལེགས་པར་བརྟག །གང་ཡང་དེ་རྗེས་འབྲང་བ་ཡི། །དགེ་སློང་སྡིག་ཏོ་ཅན་རྣམས་ཀྱང༌། །བཞམས་ཏེ་བསྒོ་སོགས་ཆོ་ག་ཡི། །སྔར་བཞིན་འདི་དག་ཀུན་ལའང་འགྱུར། །ཁྱིམ་སུན་འབྱིན་པ་ཡིས་ནི་གཞན། །སུན་འབྱིན་པ་ནི་རྣམ་གཉིས་གསུངས། །གཅིག་ནི་འགྲོགས་པས་ཡིན་ཏེ་གཞན། །གཉིས་པ་ཡང་ནི་ལོངས་སྤྱོད་ཀྱིས། །འགྲོགས་པ་བུད་མེད་ལྷན་ཅིག་ཏུ། །རྩེ་འཇོ་འཕྱར་གཡེང་ལ་སོགས་བསྟེན། །ལོངས་སྤྱོད་མེ་ཏོག་
འབྲས་བུ་དང༌། །བཟའ་བཏུང་ལ་སོགས་ལྷན་ཅིག་བྱེད། །མིག་རྣ་ཡིད་སོགས་ཤེས་པ་ཡི། །མཐོང་བ་ལ་སོགས་རྣམ་གསུམ་འདོད། །བཞམས་བསྒོ་ལ་སོགས་རིམ་བྱས་ཀྱང༌། །མི་གཏོང་སྔར་བཞིན་ཉེས་སོགས་ལྟ། །བཀའ་བློ་མི་བདེ་བས་ཀྱང་ནི། །དགེ་འདུན་ལྷག་མའི་ལྟུང་བར་བསྟན། །བཀའ་བློ་མི་བདེ་ཕན་རྣམས་ལ། །བརྗོད་རུང་མ་ཡིན་ཚིག་སྨྲའོ། །ཕས་ཕམ་ལ་སོགས་གང་ཞིག་བསླབ། །དེ་ནི་བསླབ་པའི་གཞི་ཞེས་བྱ། །ཉར་བསྟན་འདུལ་བར་གང་གསུངས་པ། །འདི་ལ་ཆོས་ལྡན་དགེ་སློང་རྣམས། །གང་ཞིག་སྟོན་པའི་བཀའ་ལ་གཏོགས། །ཆོས་མཐུན་རྣམས་ཀྱིས་ངེས་པར་བསྒོ། །བཞམས་ཏེ་བསྒོ་བ་ལ་སོགས་ལ། །མི་གཏོང་སྔར་བཞིན་ཉེས་བྱ་སོགས། །བཅུ་གསུམ་འདི་དག་དགེ་འདུན་ལས། །ལྡང་ཕྱིར་དགེ་འདུན་ལྷག་མའོ། །ཕྱི་མ་བཞི་ནི་གསུམ་གྱིས་ཏེ། །སྔ་མ་དགུ་ནི་ཅིག་ཅར་དུ། །མཚོན་པ་ཙམ་དུ་སྦྱར་བ་ཡིས། །དགེ་འདུན་ལྷག་མར་ངེས་པར་བསྟན། །མ་ངེས་པ་ཡི་ཆོས་གཉིས་ནི། །འདུལ་བ་ལས་གསུངས་རབ་ཏུ་བརྗོད། །དགེ་སློང་འཆར་ཀས་སྦེད་མ་དང༌། །ལྷན་ཅིག་ཉེར་གནས་རེག་པ་ལས། །མགོན་པོས་དགེ་འདུན་ཚོགས་དབུས་སུ། །མ་ངེས་དང་པོའི་ཆོས་བཅས་མཛད། །དབེན་གནས་དགེ་སློང་གཅིག་པུ་ཞིག །བུད་མེད་གཅིག་དང་འདུག་བྱེད་ན། །འདོད་བསྟེན་རུང་ངམ་མི་རུང་ཡང༌། །མ་ངེས་གཉིས་པོའི་ཆོས་སུ་བརྗོད། །གང་དུ་གཞན་མེད་འདི་དབེན་ཏེ། །སྐྱབས་ཡོད་ཀྱིས་ཀྱང་རྣམ་པ་ནི། །རྩིག་པ་རིབ་མ་མུན་པ་དང༌། །ཡོལ་བ་ཐིབས་པོ་ཞེས་བྱ་ལྔ། །གནས་སུ་འགྲོ་དང་འདུག་པའམ། །ཉལ་བ་ལ་སོགས་གང་བྱས་ཀྱང༌། །དད་པ་ཅན་གྱིས་ཚིག་གིས་ནི། །དགེ་སློང་དེ་ནི་ལྡང་བར་འོས། །ཡང་ན་དེ་དག་འགྲོ་ལ་སོགས། །ཅུང་ཟད་ཙམ་ཡང་མ་གཏོགས་ན། །དེ་ཡི་ངོ་བོ་ཤེས་བྱའི་ཕྱིར། །གསོལ་བའི་ཆོ་ག་སྔོན་འགྲོས་བྱིན། །རབ་ཏུ་བྱུང་དང་བསྙེན་རྫོགས་དང༌། །དེ་ཡིས་གཞན་ལ་ནམ་ཡང་ནི། །གནས་བཅའ་བ་ཡང་མི་སྦྱིན་ཏེ། །གཞན་དང་ལྷན་ཅིག་འཆག་པའང་མིན། །འདུག་སྟན་ལ་སོགས་གཅིག་མི་བྱ། །དེ་ལ་ཆང་འདི་མ་ཤིའི་བར། །བཏུང་བ་ཡོངས་སུ་མ་ཆོད་ཕྱིར། །འདི་དག་མ་ངེས་ཆོས་ཞེས་བརྗོད། །དེ་
ལྟར་མ་ངེས་ཆོས་གསུངས་ནས། །དེ་ལས་ཇི་ལྟར་ལྡང་བ་དང༌། །གང་ཟག་ལྷག་མ་མང་པོ་ཡི། །མདུན་དུ་རབ་གནས་མཆོག་གིས་སོ། །ཞག་བཅུ་འདས་པར་དགེ་སློང་གིས། །ཆོས་གོས་མ་བརྟགས་འཆང་ན་ནི། །སྤང་བའི་ལྟུང་བྱེད་ས་རྡུལ་གྱིས། །མགོ་བོ་གཡོགས་པར་བྱེད་པ་ཡིན། །ཆོས་གོས་དྲུབས་དང་ཚོན་བསྒྱུར་བ། །ཆོས་གོས་ཟིན་པར་གྱུར་པ་ན། །ཆོས་གོས་འཛིན་པར་ཁས་ལེན་པ། །འདིར་ནི་བློ་ཡིས་ཁས་བླང་ངོ༌། །མུ་བཞི་ཅན་ལ་འདིར་བརྟག་པ། །སྲ་བརྐྱང་དབྱུང་བ་བྱས་ནས་ནི། །ཆོས་གོས་མ་ཟིན་པར་ནི་མིན། །དེ་ལ་སོགས་པས་རྣམ་པར་གཞག །བལ་གོས་ཤན་ཉི་འོག་དང༌། །རས་གོས་དང་ནི་ཟར་མ་དང༌། །ཀོ་ཏམ་པ་དང་དུ་གུ་ལ། །ཆོས་གོས་རྒྱུ་ནི་རྣམ་པ་བདུན། །སྤང་བར་འོས་པ་མི་སྤོང་དང༌། །ལྟུང་བ་བཤགས་པར་མི་བྱེད་ན། །གལ་ཏེ་ཕྲན་ཚེགས་དེ་འདྲ་ཡང༌། །ནུབ་གཅིག་བྲལ་བར་མི་བྱེད་པ། །རིགས་ཚིགས་གསུམ་པོ་འདི་ལས་ནི། །གཅིག་མ་ཚང་བར་མ་ཡིན་ཏེ། །འདི་དག་མ་ལུས་བྱས་ན་ནི། །ལྟུང་བ་མེད་པར་གསུངས་པ་ཡིན། །གང་ཡང་ལྟུང་བཟེད་དྲ་བ་སོགས། །ཉེ་བར་བསགས་ནས་དེར་ཡང་ནི། །དེ་ཚེ་གཞན་སྐྱེལ་བཤགས་མི་བྱེད། །སྤང་བྱའི་ལྟུང་བ་ཉིད་དུ་འགྱུར། །གང་འདིར་ཟད་བྱེད་ལྟུང་བ་ནི། །ངེས་པར་སྤངས་ནས་བཤགས་བྱ་སྟེ། །གང་ཕྱིར་གང་གིས་ངན་སོང་དུ། །ལྟུང་ཕྱིར་ལྟུང་བའི་མིང་དུ་བཏགས། །ཆོས་གོས་གསུམ་གྱི་གནས་བྱ་སྟེ། །ཕྱི་རོལ་འདི་དག་མེད་པར་མིན། །གཞན་དུ་དགེ་སློང་ཉེས་བྱས་འགྱུར། །དགེ་འདུན་གྱིས་གནས་མ་གཏོགས་སོ། །གནས་གཅིག་གཉིས་དང་མང་པོ་ཡིས། །གྲོང་ནི་འོབས་ཀྱིས་བསྐོར་བ་དང༌། །རྩིག་པ་རིབ་མའི་ཁོངས་སུ་ཆུད། །ཉེར་སྤྱོད་གཅིག་དང་ཐ་དད་པའོ། །ཉེར་སྤྱོད་སྤོང་བ་སྐྱེད་མོས་ཚལ། །ལྷ་ཡི་གནས་ལ་སོགས་པའོ། །འདི་ལ་ཐུན་མོང་གཅིག་ཉིད་དེ། །ཐ་དད་སྣ་ཚོགས་ཉེར་སྤྱོད་ཉིད། །རྒྱུན་སྲང་གཅིག་ནི་བཏོད་པ་དག །གནས་གཅིག་པ་ཞེས་བརྗོད་བྱ་སྟེ། །གདོལ་པ་རི་ཁྲོད་པ་ལ་སོགས། །རིགས་གཅིག་པ་ཡི་གནས་བཞིན་ནོ། །རིགས་གཉིས་གང་དུ་བྲམ་ཟེ་དང༌། །གདོལ་བ་གནས་པ་གནས་གཉིས་བརྗོད། །སྣ་ཚོགས་རྒྱུན་སྲང་བཏོད་པ་
ལ། །མང་པོ་བར་ནི་རབ་ཏུ་གྲགས། །ཉེར་སྤྱོད་ནང་གི་མ་ལུས་དང༌། །དེ་ཡི་ཕྱི་རོལ་འདོམ་གང་ཡིན། །ཁྱིམ་བྱ་འཕུར་ཆགས་ཙམ་དག་གམ། །གང་དུ་འཐག་འཚེད་ལ་སོགས་ཚད། །རིགས་དང་ཚོང་ཁང་ཚོང་འདུས་དང༌། །ཁང་ཐོག་གཡུལ་ས་མུ་སྟེགས་གནས། །གྲུ་དང་ཤིང་ལྗོན་ཤིང་རྟ་དང༌། །ཀུན་དགའ་ར་གཅིག་སྣ་ཚོགས་སྤྱོད། །སྤུན་རྣམས་མ་ཕྱེ་བ་དང་ནི། །སྐྱེས་བུ་གཅིག་གི་ཡང་ནི་རུང༌། །ཇི་ལྟར་རིགས་པར་གསུངས་ཉིད་ཀྱིས། །དེ་ཡི་ཉེར་སྤྱོད་གཅིག་པ་ཡིན། །འདི་ཡི་ཉེར་སྤྱོད་སྔ་མ་ལྟར། །ཉེར་སྤྱོད་སྣ་ཚོགས་པ་ཡང་ནི། །གང་དུ་འདི་དག་གི་ནི་སྒོ། །ཐ་དད་པའམ་ཐུན་མོང་བརྗོད། །མང་པོ་ཡང་ནི་རིགས་བཞིན་དུ། །ཚོང་ཁང་ལ་སོགས་འདོད་པ་ཡིན། །ཉེར་སྤྱོད་ཚུལ་ནི་མ་ལུས་པ། །གཅིག་དང་སྣ་ཚོགས་དག་ཏུ་དབྱེ། །ཉེར་སྤྱོད་གཅིག་དང་སྣ་ཚོགས་སུ། །མུ་སྟེགས་ལྟ་བས་ཕྱེ་བ་སྟེ། །གང་དུ་ཕྱི་རོལ་སྤྱོད་པ་ཡིས། །གནས་པ་གཡང་གཞི་ཅན་ལ་སོགས། །འཁོར་ལོས་སྤྱོད་པ་ལ་སོགས་ཁྱིམ། །ཐུན་མོང་སྔགས་ཀྱི་ཁྱིམ་ཀུན་ཏེ། །གང་དུ་ཕྱི་རོལ་རྔ་ཟླུམ་དང༌། །གླིང་བུ་ལ་སོགས་འགྲེམས་པའོ། །ཕན་ཚུན་ཡལ་ག་མ་བྲལ་ན། །ཤིང་སྡོང་ཀུན་སྤྱོད་གཅིག་ཡིན་ཏེ། །ཕྱི་རོལ་ཉེ་འཁོར་ཕྱེད་གྲིབ་བམ། །གང་དུ་ཐིགས་པས་སླེབས་པའོ། །གང་དུ་ཉེར་སྤྱོད་གཅིག་པ་དེར། །ཆོས་གོས་གསུམ་ནི་ཉེར་བཞག་ནས། །གཞན་དུ་དགེ་སློང་ཉལ་གྱུར་ཀྱང༌། །ལྟུང་བ་བསྐྱེད་པར་འགྱུར་མ་ཡིན། །ལྷ་རྟེན་དག་ལ་སོགས་པ་ཡི། །ཐུན་མོང་སྒོ་དྲུག་དག་ཏུ་གོས། །སྦས་ནས་གཞན་དུ་འདུག་ན་ཡང༌།། ཟད་བྱེད་ལྟུང་བར་ལྡན་མ་ཡིན། །འདོམ་ནི་བཞི་བཅུ་རྩ་དགུའི་བར། །ཆོས་གོས་གསུམ་དང་བཞི་གཅིག་ཏུ། །ཉེར་སྤྱོད་དག་ཏུ་སོང་བ་ན། །འདུག་འགྲེང་འབྲལ་བ་མ་ཡིན་ནོ། །ཆོས་གོས་ཡང་དག་ཡོད་ན་ཡང༌། །གཞན་དག་བསྒྲུབ་པར་འདོད་པ་ཡིས། །བྱིན་གྱིས་མ་བརླབས་མ་བརྟགས་པར། །ཟླ་བ་ལས་ལྷག་གཞན་མི་བྱ། །སྨིན་དྲུག་ནས་ནི་ཁྲ་ཡི་བར། །དུས་ཀྱི་གོས་ནི་རྣམ་པར་སྤྱད། །དེ་ལས་གང་ལྷག་དུས་མིན་ཏེ། །ཉེ་དུ་སོགས་ལ་ཡིད་བརྟན་བྱ། །དུར་ཁྲོད་པ་དང་མི་ཤེས་དང༌། །ཤེས་པ་ཉིད་ཀྱིས་ཆོས་གོས་དང༌། །སོང་དང་སོང་བ་མ་ཡིན་དང༌། །
ཕྱག་དར་ཁྲོད་ནི་ལྔ་པ་ཡིན། །དུར་ཁྲོད་པ་ནི་དུར་ཁྲོད་སྤྱོད། །སྦྱིན་པོ་མི་ཤེས་ཤེས་པ་ཉིད། །སོང་བ་རོ་ཡི་གོས་ལ་སོགས། །ཕྱག་དར་ཁྲོད་ནི་བོར་བའོ། །རྡུལ་གྱིས་སྦགས་དང་དགོན་པ་དང༌། །སྲང་བོར་མི་ཡིས་ཚིག་པ་དང༌། །མི་གཙང་གིས་གོས་ཕྱག་དར་ཁྲོད། །རྣམ་པ་ལྔར་ནི་ཤེས་པར་བྱ། །མི་ཡིས་ཚིག་དང་ཆུ་ལ་བོར། །དེ་བཞིན་ཕ་མས་བྱིན་པ་ཉིད། །བྱི་བའི་སོ་ཡིས་འཆོས་པ་དང༌། །དེ་བཞིན་བེའུས་ཟོས་བའོ། །གསར་བ་དང་ནི་ལོངས་སྤྱོད་བཟོད། །ཆོས་གོས་རྣམ་པ་གཉིས་སུ་འདོད། །དེ་ཡི་ཆོ་ག་ཇི་སྐད་བཤད། །དེ་བཞིན་འདིར་ནི་མངོན་པར་བརྗོད། །གསར་པའི་གོས་ལ་འདི་བྱ་སྟེ། །ཐོག་མར་སྣམ་སྦྱར་ཉིས་རིམ་དྲུབ། །དེ་བཞིན་དུ་ནི་གདིང་བ་སྟེ། །ཆོས་གོས་གཞན་ལ་ནམ་ཡང་མིན། །ཟླ་བ་བཞི་སོགས་ལོངས་སྤྱད་པའི། །གོས་དེ་སྡོམ་བརྩོན་གྱིས་རྟོགས་ན། །སྣམ་སྦྱར་ལ་ནི་བཞི་རིམ་སྟེ། གཞན་དག་ལ་ནི་ཉིས་རིམ་བྱ། །དེ་ལས་ལྷག་པ་མི་སྦྱར་ཏེ། །རིམ་པ་དེ་ལ་སྦྱར་བྱ་ཡང༌། །བཟོ་འཕྲོར་གྱུར་ཏེ་བཞག་པ་ནི། །ཞག་བཅུའི་བར་དུ་རུང་བ་ཡིན། །སྣམ་སྦྱར་རྣམས་ཀྱི་ཚལ་བུ་ནི། །སྣྲལ་ཞི་བྱའོ་དགུ་ཚོགས་དགུ། །སྣམ་ཕྲན་ཉི་ཤུ་རྩ་ལྔའི་བར། །དེ་དག་དབྱེ་བ་ངེས་པར་བསྟན། །གླེགས་བུ་ཕྱེད་དང་གསུམ་པ་གསུམ། །གསུམ་ནི་གླེགས་བུ་ཕྱེད་དང་བཞི། །ཐ་མ་གསུམ་གསུམ་གླེགས་བུ་ནི། །ཕྱེད་དང་ལྔ་པར་བྱ་བ་ཡིན། །སྡེ་ཚན་གསུམ་པོ་འདི་དག་གིས། །སྣམ་སྦྱར་ཞེས་བྱར་གསུངས་པ་སྟེ། །དེ་དག་ཚད་ནི་ངེས་བསྟན་པ། །དང་པོ་ཁྲུ་ནི་ལྔ་དང་གསུམ། །ཐ་མ་ཕྱེད་དང་གསུམ་དང་ལྔ། །དེ་གཉིས་བར་ནི་བར་མ་ཡིན། །དེ་བཞིན་བླ་གོས་ཉིད་ང་སྟེ། །ལྔ་དང་གསུམ་པར་གསུངས་པ་ཡིན། །གཉིས་ལྔ་གཉིས་ནི་བཞི་པ་དང༌། །ལྔ་པ་ཡང་ནི་མཐང་གོས་ཡིན། །གལ་ཏེ་དེ་དག་མ་འབྱོར་ན། །རྗེས་བཟུང་དོན་དུ་འཁོར་གསུམ་ཁེབས། །སྤྱིར་ན་རང་བཞིན་ཚད་རྣམས་ལ། །ཁྲུ་ཡི་ཚད་དུ་གཞག་པ་ཡིན། །ཤིན་ཏུ་རིང་དང་ཐུང་བ་ལ། །ལུས་ཀྱི་ཚད་དུ་འདོད་པ་ཡིན། །དང་པོ་ཐ་མ་དག་དང་དབུས། །ཚལ་བུའི་སྒོ་ནི་གསུམ་དུ་བརྗོད། །དེ་ཡི་སོར་ནི་བཞི་དང་གཉིས། །དེ་ཡི་བར་མ་རིམ་པ་བཞིན། །ཁྲུ་ཡི་ཚད་
ལས་ཆུང་བ་ལ། །བྱིན་རླབས་ཡིད་བརྟན་མི་དགོས་སོ། །སྤུ་ཅན་ལ་ཡང་དེ་བཞིན་ཏེ། །དེ་གྱོན་གྲོང་དུ་འཇུག་མི་བྱ། །དགེ་འདུན་ལྷན་ཅིག་ཟན་མི་ཟ། །མཆོད་རྟེན་ལ་ཡང་ཕྱག་མི་བྱ། །འདི་ནི་སྦྱིན་བདག་གིའོ་ཞེས། །ཡོངས་སུ་བརྟགས་ནས་བཅད་པར་བྱ། །མ་དྲས་ཆོས་གོས་གྱོན་ནས་ནི། །གྲོང་དུ་འཇུག་པར་མི་བྱ་སྟེ། །འཇུག་ན་ངེས་པར་དགེ་སློང་དག །ཉེས་བྱས་འགྱུར་ཏེ་མེད་མ་གཏོགས། །མི་མཐུན་བྱེད་དང་འཁྲུག་ལོང་ཅན། །མུ་ཅོར་སྨྲ་དང་གཏུམ་པོ་དང༌། །འགྲོ་བར་འདོད་དང་འགྲོ་བ་ལ། །མཁས་པས་ཡིད་བརྟན་ཕྱིར་མི་གཞག །གལ་ཏེ་ཡིད་ཆེས་དགེ་སློང་ཞིག །ཆུ་ཡི་ཕ་རོལ་གནས་ན་ཡང༌། །དེ་ཕྱིར་དེ་ལ་ཆོས་གོས་ཀྱི། །ཡིད་བརྟན་བྱ་བར་གསུངས་པ་ཡིན། །གཞན་དེར་གནས་པའི་དགེ་སློང་དག །ཤི་བར་ཤེས་ན་ཆོས་གོས་ནི། །སླར་ཡང་དགེ་སློང་གཞན་ཞིག་གི །མིང་གི་ཡིད་བརྟན་བྱ་བ་ཡིན། །ཆོས་གོས་ཡིད་བརྟན་བྱ་བ་འདིར། །མི་རྟག་ལ་མིན་མངོན་སུམ་མིན། །དེ་བཞིན་དགེ་ཚུལ་རྣམས་ལ་ཡང༌། །ཆོས་གོས་ཡིད་བརྟན་བྱ་བ་མིན། །གང་དག་གཞན་གྱིས་གཏད་ནས་ནི། །ཆོས་གོས་བྱིན་གྱིས་བརླབ་པ་ན། །ད་ཤི་ན་ཡང་དགེ་སློང་ངེས། །དགེ་འདུན་ལ་ནི་དབུལ་བར་བྱ། །ཆོས་གོས་གང་བརྟགས་དེ་ཡི་མཐར། །སྣག་ཚ་ལ་སོགས་ཐིག་ལེ་བྱ། །བྱེ་བྲག་བདག་གི་མཚན་མ་ཡང༌། །ཁྱད་པར་རྟོགས་པར་བྱ་བ་ཉིད། །བར་མ་ལས་ནི་ཡོ་བྱད་དྲུག །དེ་ཉིད་ནད་གཡོག་ལ་བྱིན་ནས། །ཤི་བའི་ཡོ་བྱད་ལྷག་མ་ནི། །དགེ་འདུན་བསོད་ནམས་འགྲུབ་ཕྱིར་བགོ །ཆོས་གོས་དྲས་པ་གསུམ་དང་ནི། །རྡུལ་གཟན་ཤམ་ཐབས་གཉིས་གཉིས་ཏེ། །གཡན་པ་དགབ་དང་གདིང་བ་དང༌། །རས་ཆེན་དང་ནི་སྐ་བཟེད་དང༌། །གདོང་དང་ལག་པ་ཕྱི་བ་སྟེ། །འདི་དག་བཅུ་གསུམ་དབྱེ་བར་འདོད། །ཆོས་གོས་ལྷག་སོགས་ཡོ་བྱད་རྣམས། །འཚོ་བའི་ཡོ་བྱད་བཅུ་གསུམ་པོ། །དགེ་སློང་ཆོས་གོས་རྣམས་ལ་ནི། །འཆང་བའི་ཚུལ་ནི་འདི་ཡིན་ཏེ། །ངེས་པར་བྱིན་གྱིས་བརླབ་བ་དང༌། །དེ་ལས་གཞན་པ་ཡིད་བརྟན་བྱ། །རྡུལ་གཟན་མཐང་གོས་མེད་པར་ནི། །ཆོས་གོས་ཆེན་པོ་ལོངས་མི་སྤྱོད། །གང་ཕྱིར་ལོངས་སྤྱོད་ཤེས་པ་ཡིས། །ཕལ་བ་ཡང་ནི་བགོ་བར་བྱ། །ཁ་བསྒྱུར་འོས་པ་ཁ་
བསྒྱུར་ཞིང༌། །དྲུབ་པར་འོས་པ་དྲུབ་པ་དང༌། །བྱིན་རླབས་འོས་པ་བྱིན་གྱིས་བརླབ། །བརྟག་པར་འོས་པ་ཡིད་བརྟན་བྱ། །སྔོན་པོ་བཙག་དང་ངུར་སྨྲིག་རྩི། །འདི་དག་རུང་བའི་ཚོན་གསུམ་སྟེ། །ཚོན་ཆེན་དག་གི་ཆོས་གོས་ནི། །ཁ་བསྒྱུར་བྱེད་པ་བཀག་པ་ཡིན། །རྒྱ་སྐྱེགས་ལེ་བརྒན་རྩི་དང་བཙོད། །རྨ་ཤིང་རྩི་དང་མཐིང་ཤིང་མཚལ། །སིནྡུ་ར་དང་གུར་གུམ་སྟེ། །འདི་དག་ཚོན་ཆེན་བརྒྱད་དུ་འདོད། །སེང་བ་ཕྲུག་དང་ཕྱིང་བ་དང༌། །ལ་བ་ཤིན་ཏུ་མཐུག་པོ་དག །འདི་དག་ཆོས་གོས་འདོད་པ་ཡིས། །དྲ་བར་བྱ་བ་མ་ཡིན་ནོ། །སྤུ་ཅན་རྣམ་པར་སྤངས་ནས་ནི། །བརྟུལ་ཞུགས་ཅན་གྱི་ནང་ཤུན་བྱ། །གདིང་བ་ལ་ནི་དྲ་མི་དགོས། །རྟག་ཏུ་འབྲལ་བ་ཡང་ནི་མེད། །སྣམ་སྦྱར་ངེས་པར་དྲས་ཏེ་བཅང༌། །གཞན་དག་མ་ངེས་གང་གི་ཕྱིར། །འདོད་ཆུང་རང་གི་ཆོས་གོས་ཀྱི། །ལས་ཀྱིས་སྐྱོ་བ་སྐྱེད་ཕྱིར་རོ། །ལྔ་པ་ཤམ་ཐབས་གྱོན་ནས་ནི། །བྱ་བ་མཐའ་དག་བྱེད་པར་རུང༌། །བླ་གོས་ས་ཕྱོགས་གཙང་མར་ནི། །ལས་ཡོངས་བྱེད་ན་བཀག་པ་མེད། །སྣམ་སྦྱར་དགེ་སློང་འདུས་པ་དང༌། །ཟས་དང་མཆོད་རྟེན་ཕྱག་བྱེད་དང༌། །གྲོང་སོགས་འཇུག་ལ་བགོ་བྱ་ཡི། །གཞན་དག་ཏུ་ནི་བཀག་པ་ཡིན། །ལ་བ་ཕྲུག་དང་ཕྱིད་བ་དང༌། །རྔ་མོའི་ལ་བདག་དང་ནི། །ཆོས་གོས་ཉིས་རིམ་གྱོན་པ་ནི། །མི་གཙང་ཕྱོགས་སུ་བཀག་པ་ཡིན། །མ་གཡོགས་གནས་མལ་མི་རུང་ཕྱིར། །གཞན་མེད་བླ་གོས་བཞི་བལྟབ་ཏུ། །བྱས་ཏེ་བཏིང་ནས་དྲན་ལྡན་པས། །ལྡང་བ་ཡང་ཞིང་ཉལ་བར་བྱ། །གཞན་དུ་ཆོས་གོས་མ་ཁྱེར་བར། །གནས་ན་གཞན་གྱི་དཀར་པོའམ། །དྲས་པ་མ་ཡིན་ན་ཡང་རུང༌། །བྱིན་གྱིས་བརླབ་པར་བྱ་བ་ཉིད། །ཟས་ལ་ནད་པ་མ་གཏོགས་པར། །གོས་གཅིག་པ་ནི་བཀག་པ་ཡིན། །སྡོམ་བརྩོན་བགོ་བ་མེད་པར་ནི། །ཁྲུས་བྱེད་བཀག་གོ་མེད་ན་རུང༌། །མང་པོས་བླངས་ན་ལ་བ་སོགས། །གཅིག་རྙེད་པ་ནི་ཀུན་གྱིས་སྤྱད། །རྗེས་སུ་གནང་བ་མ་གཏོགས་པར། །གཅིག་པུས་བདག་གིར་མི་བྱའོ། །ཁ་མ་བསྒྱུར་བར་ཉིན་མོ་ནི། །ཕྱི་རོལ་ངུར་སྨྲིག་ངེས་པར་གཡོགས། །དགེ་འདུན་གོས་ནི་དྲན་བཞིན་དུ། །གཉིས་ཀ་ནས་གཡོགས་སྤྱད་པར་བྱ། །ལ་བའི་སྤུ་ནི་ཕྱིར་བསྟན་ནས། །གྱོན་ཏེ་བཅག་པར་མི་
བྱའོ། །སྲིན་སོགས་འཇིགས་པས་འདུག་པ་དང༌། །ཉལ་བ་རྗེས་སུ་གནང་བ་ཉིད། །དགེ་འདུན་རྣམས་ལ་བེའུ་ཕྲུག་རེ། །རྗེས་སུ་གནང་ངོ་གང་ཟག་ལའང༌། །བར་སིག་ལ་བ་དགེ་འདུན་ལ། །ལ་བ་གཞན་ནི་གང་ཟག་ལའང༌། །རྗེས་གནང་ཀུན་ཀྱང་ལ་བ་སྟེ། །འོན་ཀྱང་པར་སིག་ཡུལ་ནས་བྱུང། །དེ་ནི་པར་སིག་ལ་བའོ། །སྨད་གཡོགས་བསྡམས་པའི་དོན་དུ་ནི། །སྐ་རགས་ཀྱང་ནི་རུང་བ་ཡིན། །ལྟེབ་མ་དང་ནི་ཤུར་བུ་ཉིད། །གསུམ་པ་ཤུར་བུ་ཕྲེའུ་ཉིད། །རང་གི་བཟང་པོ་གང་གྱུར་པ། །ཐམས་ཅད་དགེ་འདུན་ཉིད་ཕྱིར་སྤྱད། །གདིང་གཡོགས་དག་ནི་མེད་པར་ཡང༌། །ནམ་ཡང་མལ་སྟན་ལོངས་མི་སྤྱད། །དག་པར་བྱ་ཕྱིར་ཤམ་ཐབས་ནི། །བཙོ་བླག་མཁན་ལ་འཁྲུར་མི་གཞུག །བརྩེ་ལྡན་རང་ངམ་གཞན་གྱིས་ཀྱང༌། །སྣོད་ཀྱི་ནང་དུ་དལ་བུས་བཀྲུ། །བཙོ་བླག་མཁན་གྱིས་བརྩེ་མེད་པར། །གོས་དག་དྲག་ཏུ་སྤྲུགས་བརྡབས་ན། །ཚགས་སྲན་ཟད་པར་བྱེད་པའི་ཕྱིར། །བསྟན་བཅོས་ལས་ནི་རབ་ཏུ་བཀག །ཚུལ་ལྡན་ཇི་སྲིད་ལེགས་པར་ནི། །ཆོས་གོས་ལ་སོགས་ལོངས་སྤྱོད་པ། །དེ་སྲིད་རྒྱུན་མི་འཆད་པར་ནི། །སྦྱིན་བདག་རྣམས་ཀྱི་བསོད་ནམས་འཕེལ། །བསྲུང་བའི་དོན་དུ་སྐྲ་བཟེད་ནི། །ཞེང་དུ་ཁྲུ་ནི་ཕྱེད་དང་གཉིས། །སྲིད་དུ་ཁྲུ་ནི་གསུམ་ཡིན་ཏེ། །ལྷག་པ་བརྟག་པར་མི་བྱའོ། །གལ་ཏེ་ཆོས་གོས་འཚེར་བག་ཅན། །གཞན་ལས་དགེ་སློང་གིས་རྙེད་ན། །འཚེར་བག་ཆུ་ཡིས་ཉམས་བྱས་ནས། །ཡོངས་སུ་སྤྱད་དོ་གཞན་དུ་མིན། །འཚེར་བག་དང་བཅས་འཇམ་པོ་ཡི། །ཆོས་གོས་བཅང་པར་མི་བྱ་སྟེ། །འཆད་པར་བྱེད་ན་དེ་དག་ལ། །ངེས་པར་འགལ་ཚབས་ཅན་དུ་འགྱུར། །མཛེས་མས་ཆོས་གོས་འཚེར་བག་ཅན། །མཛེས་དགའ་ལ་ནི་ནན་གྱིས་བྱིན། །དེ་ལ་ཀུན་ནས་ཆགས་སྐྱེས་པས། །དེ་ཕྱིར་བསྟན་བཅོས་ཆེ་ལས་བཀག །གང་དེས་ཡོངས་སུ་ལོངས་སྤྱད་པར། །བཟོད་པའི་གོས་གཞན་ཡོད་མིན་ན། །རྡུལ་གྱིས་འཇིགས་པས་སྣམ་སྦྱར་ལ། །རྡུལ་གཟན་བལྟབས་ནས་བཅང་བྱ་སྟེ། །ཞེང་དུ་མཐོ་གང་སྲིད་དུ་ཁྲུ། །ཕྱེད་དང་དོ་ལས་ལྷག་མི་བྱ། །སྣམ་སྦྱར་ཡོངས་སུ་སྲུང་བྱེད་པ། །བཙག་ཡུག་རྣམས་ཀྱིས་ཁ་བསྒྱུར་བྱ། །ཁྱད་པར་དུ་ཡང་བློ་གོས་ཀྱི། །ཐ་མ་ཡོངས་སུ་ཟེགས་པ་ན། །
སྨྱུང་ཚེམས་ལ་སོགས་ཡང་དག་སྒྲུབ། །ཁབ་ཀྱི་ལས་ཀྱང་རྗེས་སུ་གནང༌། །ཕྱག་དར་ཁྲོད་ལ་དགའ་ཆེས་པས། །བསམས་ནས་དྲལ་བར་མི་བྱ་སྟེ། །ནམ་ཡང་ཆོས་གོས་དོན་དུ་ཡང༌། །རྨ་མེད་རོ་ལས་མི་བླང་ངོ༌། །སྲིན་བུ་སོགས་ཀྱིས་རྨ་གཏོད་ཀྱང༌། །རང་གནས་ཞག་བདུན་བཞག་ནས་ནི། །དུར་ཁྲོད་པ་ཡི་དགེ་སློང་གིས། །བཀྲུས་ཏེ་ཁ་བསྒྱུར་བཅང་བར་བྱ། །དགེ་འདུན་གྱི་ནི་མལ་ཆ་དང༌། །སྟན་ནི་དེ་ལ་བཀག་པ་ཡིན། །དགེ་སློང་ཁྱིམ་དུ་མི་འཇུག་སྟེ། །སྒོ་དྲུང་བསོད་སྙོམས་བླང་བར་བྱ། །སྟན་སོགས་འདུག་བར་འབོད་པ་ན། །དུར་ཁྲོད་པ་ཞེས་གོ་བྱས་ནས། །གནང་ཕྱིར་ཁྱིམ་དུ་ཞུགས་ནས་ནི། །སྟན་ལ་འདུག་པ་ལ་སོགས་བྱ། །མཆོད་རྟེན་དག་ལ་ཕྱག་བྱེད་ཚེ། །འདོམ་གང་ནང་དུ་དོར་བྱས་ཏེ། །ཉ་དང་ཤ་སོགས་མི་བཟའ་ཞིང༌། །དེར་ནི་གནས་ཁང་བརྩིག་མི་བྱ། །ཁ་མ་བསྒྱུར་དང་ཁ་ཚར་ཅན། །བེའུ་རས་སོགས་དགེ་འདུན་རུང༌། །ཚོན་ཅན་རྒྱལ་བྱེད་ཚལ་ཕུལ་བས། །དེས་ན་བེའུ་རས་སོགས་བཀག །སྤང་བར་བྱ་བའི་དངོས་གང་རུང༌། །དེ་ནི་དགེ་འདུན་ལ་མིན་ཏེ། །གང་གཞན་ཕྱིས་ནི་སྟེར་བ་ཡི། །གཞུང་ལུགས་ཤེས་པ་དག་ལ་སྤང༌། །མི་ཤེས་བཞིན་དུ་ཆགས་བཅས་གང༌། །སྤངས་ནས་ཟློག་པར་མི་བྱེད་ཅིང༌། །ལེགས་བསྒོ་བྱས་ཀྱང་མི་སྟེར་ན། །དེ་ལ་སྟོབས་ཀྱིས་དཔོག་པར་བྱ། །འཆང་ཀའི་ཁུ་བའི་ཐིགས་པ་གང༌། །གོས་ལ་བབས་མཐོང་སྦེད་མ་ཡི། །ཆགས་ཁྱེར་བུ་ཡི་རྒྱུར་གྱུར་པས། །དེ་ཡིས་ཀུན་བསླང་འདི་རབ་བཅས། །དགེ་སློང་གང་ཞིག་ཉེ་དུ་མིན། །དགེ་སློང་མ་ལ་གོས་འཁྲུ་དང༌། །འཚེད་དང་འཆག་པར་བྱེད་པ་ནི། །ངེས་པར་ལྟུང་བ་དང་ནི་ལྡན། །འཁྲུ་བ་ལ་སོགས་བྱེད་འཇུག་ན། །གཅིག་ཤིས་ཀྱང་ནི་ཉེ་བར་འཇོམས། །ཐེ་ཚོམ་ཟ་ན་ཉེ་དུ་ལའང༌། །ཉེས་བྱས་དྲི་མར་ཡོངས་སུ་བསྒྲགས། །ཕ་དང་མ་དང་མ་ཡི་ཕ། །ཉེ་བར་བཟུང་སྟེ་བདེན་བརྒྱུད་ནི། །མཁྱེན་ཆེན་གྱིས་ནི་ཉེ་དུར་གསུངས། །དེ་ལས་གཞན་ནི་གཉེན་མི་ཉིད། །ཚོས་ཁུ་དངས་མ་ལ་སོགས་པ། །རེ་རེ་ལ་ཡང་འོག་གཞི་གདིང༌། །བསླབ་པའི་གཞི་ནི་ཉམས་བྱེད་པས། །དགེ་སློང་ལ་ནི་ལྟུང་བར་འགྱུར། །དགེ་སློང་གང་ཞིག་ཉེ་དུ་མིན། །དགེ་སློང་མ་
ལས་བསམས་བཞིན་དུ། །ཆོས་གོས་གང་རུང་ལེན་བྱེད་ན། །དེ་ཡི་བསླབ་གཞི་ཉམས་པར་བྱས། །འདི་ལ་སླར་སྦྱིན་དབྲོག་མི་བྱ། །བརྗེ་བ་ལ་ནི་ཉེས་པ་མེད། །ཇི་སྟེ་བརྗེ་ན་མཉམ་པོས་སམ། །དགེ་སློང་མ་ཡི་འདོད་པ་བཞིན། །རྒྱ་ཆེན་ནོར་ལྡན་དགེ་སློང་མས། །གལ་ཏེ་འབུལ་ན་ཉེས་པ་མེད། །དེ་བཞིན་ལེགས་གསུངས་བསྙེན་རྫོགས་བྱེད། །བོར་རླག་གྱུར་དང་དབུས་ཡང་ངོ༌། །དགེ་སློང་ཆོས་གོས་གསུམ་ཡོད་པས། །ཉེ་དུ་མ་ཡིན་ཁྱིམ་བདག་དང༌། །དེ་ཡི་བདག་མོ་ལས་ཀྱང་རུང༌། །ཆོས་གོས་ནམ་ཡང་མི་བླང་ངོ༌། །ཀུན་དུ་སྐྱེས་པ་ཁྱིམ་བདག་སྟེ། །དེ་ཡི་བདག་མོར་བུད་མེད་བརྗོད། །བོར་རླག་བྱུང་སོགས་སློང་བ་ནི། །འདི་ལ་ཉེས་པ་མེད་པར་བརྗོད། །དབུལ་པོ་ལ་ནི་བསླངས་པ་ཡིས། །ཁ་ཚར་ལ་སོགས་ཐོབ་པ་དང༌། །གར་མཁན་ལ་སོགས་པ་ཡི་གོས། །བཟང་པོ་ལ་ཡང་ཉེས་པ་མེད། །ཆོས་གོས་ཕྲོགས་པ་ལ་སོགས་ཀྱིས། །མང་པོ་རྙེད་པར་གྱུར་ན་ཡང༌། །དྲན་པས་སྟོད་གཡོགས་སྨད་གཡོགས་ལས། །ལྷག་པར་བླང་བར་མི་བྱའོ། །ཁྲུ་ནི་བཅུ་གཉིས་སྟོད་གཡོགས་གོས། །སྨད་གཡོགས་ཡང་ནི་བདུན་དང་གཉིས། རེ་ཞིག་འདི་ནི་འཇིག་རྟེན་པའི། །སྟོད་གཡོགས་སྨད་གཡོགས་ཞེས་སུ་གསུངས། །ཁྲུ་ནི་ལྔ་གསུམ་སྣམ་སྦྱར་ཏེ། །ཉིས་རིམ་སྟོང་གཡོགས་དག་ཀྱང་ངོ༌། །ཁྲུ་ནི་ལྔ་དང་གཉིས་པོ་དག །རེ་ཞིག་བསྟན་པའི་སྨད་གཡོགས་སོ། །བསླངས་ནས་དངོས་པོ་ལྷག་པ་དག །གལ་ཏེ་ག་ཤེད་ནས་ནི་རྙེད། །དེ་ནི་གོ་བྱས་བཟློག་བྱས་ཏེ། །རྗེས་སུ་གནང་ན་བླང་བར་བྱ། །ཁྱིམ་བདག་མོ་འམ་ཁྱིམ་བདག་གིས། །གོས་ཀྱི་རིན་ནི་སྤགས་ན་དེར། །དགེ་སློང་རྣམ་པར་རྟོག་བཞིན་དུ། །སློང་ན་དེ་ནི་ལྟུང་དང་བཅས། །སྔར་བཞིན་ཉེ་དུ་མིན་ཞེས་བྱ། །ཆོས་གོས་རྣམ་པ་བདུན་པོ་དག །ཡོངས་སུ་སྤྱད་པར་བཟོད་པ་ཡིས། །གོས་དེ་རུང་བ་ཞེས་བྱའོ། །རིན་སྤགས་པ་ཞེས་བྱ་བ་ནི། །གསེར་ལ་སོགས་པ་མ་སྨོས་ཤིང༌། །མགྲོན་དུ་མ་བོས་ཞེས་པ་སྟེ། །བརྟག་བཏུང་དྲན་པར་བརྗོད་པའོ། །ལྔ་དང་བཅུ་པའི་རིན་དག་གིས། །ཉོས་ལ་བྱིན་ཞེས་རྗོད་བྱེད་ཅིང༌།
སྔོན་པོ་སོགས་ཀྱི་ཁ་དོག་སྟེ། །ཁྲུ་ཡི་ཚད་ཀྱིས་ཁྲུ་ཉིད་དོ། །རིན་ལ་སོགས་པ་གསུམ་དག་གིས། །སློང་བའི་ཚེ་ན་ཉེས་བྱས་ཏེ། །ཐོབ་ན་སྤང་བའི་ལྟུང་བར་འགྱུར། །མ་བསླངས་ན་ནི་མ་ཡིན་ནོ། །ཆོས་གོས་ཕྲོགས་པ་ལ་སོགས་པས། །གང་ཡང་རུང་བ་བླང་བྱ་སྟེ། །དགེ་སློང་རྟགས་ཀྱིས་ལུས་ལ་འདིར། །མ་གཡོགས་ནམ་ཡང་མཛེས་མ་ཡིན། །སོ་སོར་དཔག་པ་ལ་ཡང་ནི། །ཐམས་ཅད་སྔར་བཞིན་ཁོ་ན་སྟེ། །ཇི་ལྟར་བྱས་པས་ལྟུང་བ་དང༌། །ལྟུང་བ་མེད་པ་ཡང་ནི་གྲགས། །བདག་ཅག་མི་རུང་གནས་བརྗོད་ནས། །ཕོ་ཉ་ལས་ནི་རིན་མི་བླང༌། །ལེགས་སྦྱིན་ཆོས་གོས་བདག་ཅག་རུང༌། །ཞལ་ཏ་ཕོ་ཉ་དེ་ལ་བརྗོད། །དེ་ཡིས་གང་ཚེ་ཆོས་གོས་རིན། །ཞལ་ཏ་བྱེད་ལ་གཏད་པ་ན། །དགེ་སློང་ཆོས་གོས་དོན་གཉེར་དེས། །ལན་དྲུག་བར་དུ་དྲན་པར་བྱ། །དེར་ནི་མངོན་པར་གྲུབ་ན་ནི། །དེར་ནི་བླང་བར་རུང་བ་ཉིད། །དེ་ལས་ལྷག་པར་བརྩོན་བྱེད་ན། །ལྟུང་བའི་ཚང་ཚིང་ནང་དུ་ལྟུང༌། །འདི་ལ་ལན་དྲུག་བསྐུལ་ནས་ནི། །རང་ཉིད་འོངས་ནས་སྟེར་བྱེད་ན། །དགེ་སློང་གིས་ནི་འདི་སྐད་བརྗོད། །བདག་གིས་འདི་སྤངས་དགོས་པ་མེད། །དེ་ལྟ་ན་ཡང་གལ་ཏེ་དེ། །ཤིན་ཏུ་ཕྱག་སོགས་སྔོན་འགྲོ་བས། །སྟེར་ན་དགེ་སློང་ལེན་པ་ལ། །ལྟུང་བ་མེད་པར་གསུངས་པ་ཡིན། །བུད་མེད་དང་ནི་རྒྱལ་སྲིད་ལ། །དབང་བསྐུར་གྱུར་ཏམ་བྲམ་ཟེའམ། །རྒྱལ་པོའི་གནང་ཆེན་པ་ལ་གཏོགས། །བློན་པོའམ་དམག་དཔོན་ལ་སོགས་འདོད། །འདུག་ས་ཚོང་ཁང་ཆུ་གནས་དང༌། །འབོད་གནས་དང་ནི་ཁྱིམ་གནས་སོ། །ཚོང་ཁང་གང་དུ་ཉོ་ཚོང་བྱེད། །ཆུ་གནས་ཆུ་སྣོད་སྦེད་པའི་ས། །འབོད་གནས་འབྲེག་མཁན་དག་དང་ནི། །རྫ་མཁན་ལ་སོགས་མིང་ཅན་གྱིའོ། །ཁྱིམ་གནས་ཁྱིམ་དུ་རབ་བརྗོད་པ། །འདི་དག་འབོད་གནས་བཞིར་གསུངས་སོ། །ཚུར་སྤྱོན་ལེགས་པར་བྱོན་ནམ་ཁྱོད། །གདན་འདི་ལ་ཡང་བཞུགས་ནས་ནི། །ཕྱག་ཞབས་ལེགས་པར་བཀྲབ་དང༌། །བཟའ་དང་བཏུང་བ་དགྱེས་བཞིན་གསོལ། །ལན་དྲུག་བསྐུལ་བའི་སྒོ་དེར་ཡང༌། །མ་ཐོགས་བར་ནི་རྗོད་བྱེད་ན། །ལྟུང་མེད་ཐོགས་ནས་རྗོད་བྱེད་པ། །ལྟུང་བར་འགྱུར་བ་ཁོ་ནའོ། །གལ་ཏེ་ཕོ་ཉ་མི་མ་ཡིན། །སྦྱིན་བདག་དང་
ནི་གཉིས་པའང༌། །སྡོམ་བརྩོན་ཉེར་བྱས་གསུམ་གྱི་ནི། །དབྱུག་པ་རྣམས་ཀྱིས་མགོ་བོ་འཇོམས། །སྦྱིན་བདག་མི་ཡིན་ཕོ་ཉ་དང༌། །ཞལ་ཏ་བ་ནི་མི་མིན་ན། །ཉེས་བྱས་གཉིས་སོ་ཞལ་ཏ་ཙམ། །མི་མ་ཡིན་ན་ཉེས་བྱས་གཅིག །གང་དུ་སྦྱིན་བདག་ཕོ་ཉ་དང༌། །ཞལ་ཏ་པ་ཡང་མི་ཡིན་ན། །དེ་ནི་ངེས་པར་ལྟུང་བྱེད་བསྐྱེད། །ཁྲིམས་ལྡན་ངན་སོང་གསུམ་དུ་འཕེན། །དགེ་སློང་གང་ཞིག་ཕན་བྱེད་པས། །དགེ་སློང་གང་ལ་ཆོས་གོས་བསྐུར། །དེ་ཉིད་ལ་ནི་ཡིད་བརྟན་པས། །ཡོངས་སུ་སྤྱོད་པ་ཉེས་པ་མེད། །གང་དེར་ཤི་ན་ཆོས་གོས་ནི། །གསལ་པོར་དེ་ཡི་འགྱུར་བ་ཡིན། །མ་ཐོབ་པ་ལས་སྤང་བ་དག །གཉིས་ཀ་ལ་ཡང་མེད་པ་སྟེ། །སྔ་མས་ཡོངས་སུ་བཏང་བ་དང༌། །གཞན་གྱིས་བདག་གིར་དེ་མ་བྱས། །དེ་ལ་ཞག་བཅུ་འདས་ན་ཡང༌། །གཉི་ག་ལ་ཡང་ལྟུང་བ་མེད། །གང་ཡང་དགེ་སློང་སྲིན་བལ་གྱིས། །གསར་པའི་སྟན་དག་བྱེད་ན་ནི། །དེ་ལ་ལྟུང་བའོ་དེ་ཡང་གཉིས། །གཡོགས་པ་དང་ནི་བླིངས་པའོ། །བྱིན་པར་གྱུར་དང་དེ་བཞིན་དུ། །ལོངས་སྤྱད་པ་ལ་ཉེས་མེད་དོ། །སྦྱིན་བདག་བསོད་ནམས་འདོད་པའི་ཕྱིར། །དགེ་སློང་གིས་ནི་བླང་བར་བྱ། །ལུག་བལ་ནག་པོ་འབའ་ཞིག་གིས། །གསར་པའི་སྟན་ནི་མི་བྱ་སྟེ། །དེ་ཚོལ་བ་ཡི་སྡུག་བསྔལ་གྱིས། །ཀློག་དང་ཁ་དོན་ཉམས་པར་བྱེད། །དཀར་ནག་དང་ནི་འཁོབ་བལ་གྱི། །ཆ་གཉིས་ཆ་གཅིག་བསྲེས་ནས་ནི། །བླིངས་པ་ངེས་པར་བྱེད་ན་ནི། །སྟན་དེས་ལྟུང་བ་མེད་པ་ཡིན། །ནག་པོ་རང་བཞིན་གྱིས་གནག་ཉིད། །མགྲིན་པ་རྒྱབ་དང་གློ་གཉིས་དཀར། །སྤྱི་བོ་ལྟོ་དང་ཚེའུ་འགབ། །འཁོབ་བལ་དཀར་ནག་ཞེས་སུ་བརྗོད། །དཀར་ནག་འཁོབ་པ་ལ་དཀར་པོ་ནི། །སྲང་ཕྱེད་ཙམ་གྱིས་ཉུང་བ་ཞིག །བྱས་ནས་གསར་པ་རྩོམ་བྱེད་ན། །དེ་ལ་ལྟུང་བར་ཐེ་ཚོམ་མེད། །དེ་ལས་གཞན་པ་མ་རྙེད་ན། །ནག་པོས་ཀྱང་ནི་བྱ་བ་ཡིན། །གཞན་ལས་རབ་ཏུ་ཐོབ་པ་ནི། །ཅི་བདེ་བར་ཡང་ཡོངས་སུ་སྤྱོད། །ལོ་དྲུག་བར་དུ་ནན་ཏན་གྱིས། །བྱས་པའི་སྟན་དེ་བཅང་པར་བྱ། །ལོ་དྲུག་ཚུ་རོལ་དེ་བྱས་ལྟུང༌། །ཉེས་མེད་ཚོགས་ཀྱིས་གནང་བ་ཡིན། །ལོ་གཅིག་ལ་ཡང་གཉིས་པ་དག །གལ་ཏེ་དགེ་སློང་རྩོམ་བྱེད་ན། །རྩོམ་ལ་ཉེས་བྱས་གཅིག་ཡིན་ཏེ། །
ཡོངས་སུ་རྫོགས་ལ་དངོས་གཞིར་གཞག །དེ་བཞིན་གཉིས་གསུམ་བཞི་དང་ལྔར། །བརྩམས་པ་ལ་ཡང་ཉེས་བྱས་འཐོབ། །ལོ་དྲུག་བར་དུ་ཞུགས་གྱུར་ནས། །རྩོམ་པ་ལ་ནི་ཉེས་པ་མེད། །གདིང་བ་གསར་པ་བྱེད་པ་ན། །རྙིང་པ་ལ་ཡང་ངེས་པར་མཐའ། །ཁ་དོག་ངན་པར་བྱེད་འདོད་པས། །བདེ་བར་གཤེགས་པའི་མཐོ་གང་གླན། །གལ་ཏེ་མཐོ་གང་ཚད་དེ་ལས། །བསམས་བཞིན་ཅུང་ཟད་ཙམ་སྤྱོད་ཀྱང༌། །དེ་སྐབས་ལྟུང་བའི་དབྱུག་པ་ཡིས། །མགོ་བོ་གཅོག་པར་བྱེད་པ་ཡིན། །གལ་ཏེ་ཤིན་ཏུ་ཟེགས་པའམ། །སྤྱད་མི་བཟོད་ཅིང་དེངས་པ་ན། །དེ་ཙམ་ཉིད་དམ་ཆུང་བ་གང༌། །གློན་པ་ལ་ནི་ཉེས་པ་མེད། །སྡོམ་བརྩོན་རང་གིས་བལ་དག་ནི། །དཔག་ཚད་གསུམ་ལས་ལྷག་མི་འཁུར། །ཉུང་དུ་ཞྭ་ལ་སོགས་པའི་ཕྱིར། །མངོན་པར་ཁྱེར་ཡང་ཉེས་པ་མེད། །གྲོང་ལས་རྒྱང་གྲགས་ཕྱེད་དུ་ཡང༌། །སྡོམ་བརྩོན་ཁུར་ན་ཉེས་བྱས་ཏེ། །གྲོང་ཁྱེར་ནས་ནི་གྲོང་ཁྱེར་དུ། །རྒྱང་གྲགས་གཅིག་ཁུར་ལྟུང་བ་ཡིན། །དགེ་སློང་གང་ཞིག་དགེ་སློང་མ། །ཉེ་དུ་མིན་ལ་བལ་དག་ནི། །རྨེལ་བ་ལ་སོགས་བྱེད་འཇུག་ན། །དེ་ཡང་བསླབ་ལས་ཉམས་ལྡན་འགྱུར། །རྨེལ་བ་ལ་སོགས་རེ་རེས་ཀྱང༌། །མཐའ་དག་གིས་ཀྱང་ཀུན་ནས་བསྐྱེད། །སྡོམ་བརྩོན་ལྟུང་བ་དང་བཅས་ན། །ཉེས་བྱེད་བཞིན་དུ་འོག་ཏུ་འགྲོ། །བཅོམ་ལྡན་བརྩེ་བས་དགེ་སློང་དག །ས་ལེ་སྦྲམ་ལེན་བཀག་པ་ཡིན། །ཆོས་གོས་ལམ་རྒྱགས་ནད་པ་ཡི། །སྨན་གྱི་རྒྱུར་ནི་མ་གཏོགས་སེ། །གསེར་དངུལ་མུ་ཏིག་ནོར་བུ་དང༌། །མུ་སལ་གར་བྷ་གཡས་སུ་འཁྱིལ། །དམར་དང་ཤང་ཀ་ཤེལ་དང༌། །བྱི་རུ་ལ་སོགས་རེག་ན་ལྟུང༌། །ཐུབ་པའི་དགེ་སློང་དོན་ཉུང་དང༌། །བྱ་བ་ཉུང་བ་མཛེས་པ་སྟེ། །མང་པོས་དབེན་པ་དང་ནི་དགའ། །ཉུང་དུ་ཙམ་ཞིག་བཅད་བར་བྱ། །སྡོམ་བརྩོན་གང་ཞིག་ནོར་ལྡན་པས། །སྐྱེད་ཀྱི་དོན་དུ་གཏོང་བྱེད་ན། །སྐྱེད་ཐོབ་ལྟུང་བའི་རྡོ་རྗེ་ཡིས། །བདག་ཉིད་འཇོམས་པར་བྱེད་པ་ཡིན། །སྦྱོར་བ་དང་ནི་རབ་སྦྱོར་དང༌། །བསྒྲུབ་དང་བརྗེ་བ་དེ་བཞིན་དེ། །བྱེད་པ་མི་བྱེད་ཞེས་བྱ་དང༌། །མངོན་མཚན་ཅན་གྱི་རྣམ་པ་བཞི། །ཤིང་རྟ་ལ་སོགས་སྣོད་འགྲེམས་ཤིང༌། །ཡུལ་ཕྱོགས་ཟོང་ནི་འདྲི་
བྱེད་པ། །གྲགས་པོ་དག་ནི་འཚོལ་བྱེད་པ། །འདི་དག་སྦྱོར་བར་འདོད་པ་ཡིན། །རབ་སྦྱོར་བདུན་སྡེ་ལ་སོགས་པའི། །སྐྱེད་ཕྱིར་ནོར་ནི་གཏོང་བྱེད་པས། །དབང་པོ་གྲོ་ག་སྣག་ཚ་དང༌། །སྨྱུ་གུ་ཚོལ་བ་དག་ལ་འདོད། །འདོད་པས་རྙེད་ལ་ཆགས་པ་ཡི། །ཉིས་འགྱུར་ལ་སོགས་སྤེལ་བའི་ཕྱིར།། གྲོ་ག་ལ་སོགས་སྒྲུབ་བྱེད་པ། །དེ་ནི་བསྒྲུབ་པར་གསུངས་པ་ཡིན། །ནོར་བུ་མུ་ཏིག་བྱ་རུ་སོགས། །རྫས་རྣམས་ཡོངས་སུ་བརྗེ་བ་ན། །སྣག་ཚ་གྲོ་ག་ལ་སོགས་ཚོལ། །དེ་ནི་བརྗེ་བར་ཡོངས་སུ་གྲགས། །སྐྱེད་མ་ཐོབ་ཀྱི་བར་དུ་འདིར། །ཉེས་བྱས་དྲི་མར་ཡོངས་སུ་གྲགས། །གང་ཚེ་སྐྱེད་ཐོབ་དེ་ཉིད་ཚེ། །གསལ་པོར་ལྟུང་བ་ཉིད་དུ་གྲགས། །བྱེད་པ་མངོན་མཚན་ཅན་ལ་སོགས། །གཏོང་བར་བརྗོད་དོ་མི་བྱེད་པ། །སླར་ཡང་གསེར་སོགས་མི་གཏོང་བའོ། །ཆོ་ག་འདི་ཡང་སྔར་བཞིན་ཏེ། །དཀོན་མཆོག་གསུམ་གྱི་ཆེད་དུ་ནི། །རྙེད་པ་འདོད་པས་སྦྱོར་བ་དག །འཇིག་རྟེན་སྤྱོད་པས་གཞན་མིན་བརྟག །རིགས་ལྡན་ཞལ་ཏ་ལ་རུང་སྟེ། །རྒྱལ་པོ་དང་ནི་རྒྱལ་པོའི་འཁོར། །སྦྱིན་བདག་རྣམས་ཀྱི་དྲུང་དུ་ནི། །ནམ་ཡང་སྦྱོར་བ་མི་བྱའོ། །འདི་དག་རྣམས་ལས་རྙེད་མེད་དམ། །འོན་ཏེ་དཀའ་བས་རྙེད་ཀྱང་རུང༌། །ཁྱེར་ནས་མི་སྟེར་གཏའ་མི་བླང༌། །ཁྱེར་ཡང་སྟེར་ནུས་དེ་ལྟ་མིན། །ཉོ་བྱེད་ཤེས་རབ་ཅན་མེད་ན། །གང་ཉོ་འདོད་པའི་དགེ་སློང་གིས། །རྫས་རྣམས་རྗེས་སུ་བརྟགས་ནས་ནི། །ངེས་པར་ལན་གསུམ་བར་དུ་བརྗོད། །རྙེད་པའི་དོན་དུ་མི་བཙོང་ཞིང༌། །ནམ་ཡང་ཉོ་ན་ལྟུང་བ་ཉིད། །དགོས་པ་རྗེས་འབྲེལ་དོར་བྱས་པས། །ཉོ་ཚོང་ལ་ནི་ཉས་མེད་དེ། །སངས་རྒྱས་ཆོས་དང་དགེ་འདུན་ཕྱིར། །འཇིག་རྟེན་ཆོས་ལུགས་རྗེས་འབྲང་བའི། །ཞལ་ཏ་པ་ཡིས་ཉོ་ཚོང་བྱ། །གཞན་དུ་གཞན་གྱི་མ་ཡིན་ནོ། །མཆོད་ཕྱིར་གུས་པས་རྟག་ཏུ་ནི། །གཙུག་ལག་ཁང་དུ་ཚོང་བྱེད་ན། །དེ་ལ་སྐྱེད་དང་བཅས་སྦྱིན་ཏེ། །སྦྱིན་བདག་དད་པ་སྐྱེད་ཕྱིར་རོ། །སོ་བ་ཏིལ་དང་མུད་ག་སོགས། །སྲོག་ཆགས་དང་བཅས་མ་བརྟགས་པ། །བསིལ་གྲིབ་ཀྱི་ནི་ས་ཕྱོགས་སུ། །དེ་ནི་རབ་ཏུ་བཀྲམ་སྟེ་བཞག །དེ་ལྟ་ན་ཡང་དེ་ནས་དེ། །གལ་ཏེ་བྲལ་བར་མ་གྱུར་ན། །དེ་ཚེ་སླར་ཡང་གནས་ཁང་དུ། །བཞག་ནས་སྒོ་
ནི་རྟག་ཏུ་བསྡམས། །ཞག་བཅུ་ལས་འདས་ལྷུང་བཟེད་ནི། །བརྟུལ་ཞུགས་ཅན་གྱིས་བཅད་མི་བྱ། །ལྕགས་དང་ས་ལས་བྱས་རང་བཞིན། །ལྷུང་བཟེད་རྣམ་པ་གཉིས་སུ་བརྗོད། །ཚད་ལྡན་ཆུང་ངམ་ཆེན་པོ་ནི། །བསྙེན་པར་རྫོགས་པའི་དོན་ཕྱིར་ཡང༌། །མང་པོ་ཡིན་ན་ཡང་ནི་རུང༌། །འཆང་བ་ལ་ནི་སྨད་པ་མེད། །ལྷན་པ་གཅིག་གཉིས་གསུམ་དང་བཞིས། །ལྷུང་བཟེད་གཞན་དག་བསླང་མི་རུང༌། །དགེ་བའི་སེམས་ཀྱིས་བག་ཡོད་པར། །རིན་གྱིས་ཉོས་ལ་ཉེས་པ་མེད། །སྡོམ་བརྩོན་མི་བརྟན་ལྡན་པས་ནི། །ལྷུང་བཟེད་བུག་རྡོལ་གླན་མི་བྱ། །རྒྱ་སྐྱེགས་ཚིག་མཚོན་མོ་སྟེང༌། །སྦྲ་ཚིལ་བུ་རམ་སས་མ་ཡིན། །བརྟན་པོ་ལྷན་རིངས་གང་བརྗོད་དང༌། །ཕྱེ་མ་ཡང་ན་ལྷན་པ་ཉིད། །ཐམ་ཕྲན་དང་ནི་ལྷན་ཐབས་ཉིད། །དེ་བཞིན་ཆུ་སྲིན་སོ་ཡང་ངོ༌། །ཆོས་ཀྱིས་ཡོངས་སུ་བརྗེ་བ་ལ། །ཉེས་པ་མེད་དོ་གཞན་དུ་སླར། །སློང་བའི་ཚེ་ན་ཉེས་བྱས་ཏེ། །ཐོབ་པ་ན་ནི་སྤང་བར་འགྱུར། །གྲུབ་ན་དགེ་བས་ལྷུང་བཟེད་དེ། །དགེ་འདུན་ལ་ནི་བྲིམ་པར་བྱ། །དེ་ཡང་ལྷུང་བཟེད་ཐ་མ་ནི། །དེ་ཡི་ལུང་བཞིན་དུ་ནི་བཅོང༌། །བྲེ་ཆུང་དོ་ཟན་ཚོད་མར་བཅས། །བླུགས་ནས་བཞག་པ་དེ་ལ་ནི། །ལག་པས་བཀན་ཚེ་མི་རེག་པ། །དེ་ནི་ཆེན་པོའི་ཚད་དུ་བརྗོད། །བྲེ་ཆུང་གང་ཟན་ཚོད་མར་བཅས། །ཤོང་བ་ཆུང་ངུར་རབ་ཏུ་གྲགས། །འདི་དག་གཉིས་ཀྱི་བར་དག་ནི། །འབྲིང་པོར་བརྗོད་དེ་ལྷུང་བཟེད་གསུམ། །གང་ཞིག་ལྷུང་བཟེད་གས་ངང་རྡོལ། །དེ་ནི་གུས་པས་གླན་པར་བྱ། །དེ་བྱེད་པ་ཡང་ཚོག་ཆས་ཀྱང༌། །དགེ་འདུན་གནས་ཁང་གཞག་པར་བྱ། །འགྲོ་ན་ལྷུང་བཟེད་བཅས་ཡིན་ཏེ། །གལ་ཏེ་ལྷུང་བཟེད་མེད་ཉིད་དམ། །གཞན་དུ་རྐུན་པོས་འཇིགས་པའམ། །སླར་ལོག་འདོད་པ་ཡིན་ན་རུང༌། །ཐགས་མཁན་ཉེ་དུ་མ་ཡིན་ལ། །གླ་རྔན་མེད་པར་འཐག་འཇུག་ན།། ལྟུང་བཅས་ལྟུང་བ་མེད་པ་ནི། །ཉེ་དུ་ཡིན་ནམ་གླ་བྱིན་ནའོ། །ངེས་པར་དགེ་སློང་ཆེད་དུ་ནི། །ཁྱིམ་བདག་ཆོས་གོས་འཐག་འཇུག་ན། །དེ་ཡིས་དེར་སོང་ཐགས་མཁན་ལ། །སྙན་ཚིག་བསྔགས་ཏེ་གྲུབ་ན་ལྟུང༌། །ཞེང་ཆེ་ཐར་ཚགས་བཟང་སོགས་དོན། །བསོད་སྙོམས་ཀྱིས་ནི་འདོད་མི་
བསྐྱེད། །དེ་ལྟར་བྱེད་ན་སྡོམ་བརྩོན་ལ། །ཐོབ་པའི་ཚེ་ན་སྤང་བར་འགྱུར། །ཞེང་ཆེ་བ་ནི་ཚད་ཆེན་ཏེ། །མཉེན་འགྱུར་འཇམ་པོ་ཞེས་བྱའོ། །ཐར་གྱིས་ཞག་པ་འཇུར་མདུད་མེད། །ཚགས་ཐར་བཟང་བ་དམ་པ་ཡིན། །བསོད་སྙོམས་ཀྱང་ནི་འདིར་ཤེས་བྱ། །བཟའ་སོགས་ལྷ་ཡི་རིགས་ལས་བྱུང༌། །སྟོན་མོ་ལྷ་ཡི་རིགས་དག་ནི། །དེ་ཡི་རྒྱགས་སུ་རྣམ་པར་ཤེས། །ཆོས་གོས་དགེ་སློང་ལ་བྱིན་ནས། །གཞན་དུ་ཁྲོ་དང་ཆགས་པ་ཡིས། །དེ་ཕྲོགས་ན་ནི་ཉེས་བྱས་ཏེ། །ཕན་པར་འདོད་པས་ཉེས་མེད་དོ། །ལུས་ཀྱི་རབ་གཡོ་ལུས་ཀྱིས་ནི། །བྱེད་པའོ་ངག་གི་གཡོ་བ་ཡང༌། །བརྗོད་པ་ཡིས་ནི་འཕྲོག་བྱེད་ན། །གཉིས་སམ་གཅིག་གིས་ཀྱང་ནི་རུང༌། །ཇི་སྲིད་ཆོས་གོས་གྲ་ཡང་ནི། །ལུས་དང་བྲལ་བར་མ་གྱུར་པ། །དེ་སྲིད་ཉེས་བྱས་ཙམ་ཡིན་ཏེ། །བྲལ་ན་སྤང་བའི་ལྟུང་བ་ཡིན། །དབྱར་ནི་དབྱར་གྱི་རྙེད་པ་ཉིད། །རབ་ཏུ་འགྱེད་པར་བྱེད་ན་ནི། །ཉེས་བྱས་འདི་ནི་འདས་ནས་སམ། །དེ་མ་ཡིན་ལ་མ་ཡིན་ནོ། །དབྱར་གང་བདག་གིར་བྱེད་མི་འདོད། །ཆོས་གོས་སྦེད་པ་མེད་པར་ནི། །ཆོས་གོས་གཏད་པ་ལས་བྱུང་བའམ། །དབྱིག་ལ་སོགས་པ་རུང་བ་ཡིན། །འཆི་ཕྱིར་དང་ནི་འཆི་བས་གཏད། །ནད་པས་ནད་པ་ཉིད་ཕྱིར་རོ། །འགྲོ་བར་ཆས་པས་གང་བྱིན་པ། །འདི་དག་གཏད་པ་ལས་བྱུང་ལྔ། །མཐའ་ཡི་ཞག་བཅུའི་ནང་དུ་ནི། །བགོས་ཀྱང་རུང་བ་ཉིད་ཡིན་ཏེ། །སྦྱིན་པའི་དུས་ལས་འདས་པར་ནི། །ནམ་ཡང་བཅངས་ན་དངོས་གཞིའོ། །ཆོས་གོས་བྱིན་པའི་དུས་གང་ནི། །མཁས་པས་ཡང་དག་བསྟན་པ་འདིར། །དགག་དབྱེ་བྱ་བའི་ནང་རོལ་དུ། །ཞག་བཅུའོ་དེ་ལས་ལྷག་པ་མིན། །འདིར་བདག་རང་གི་ལག་ཉིད་ཀྱིས། །རབ་ཏུ་དབུལ་ཞེས་སྦྱིན་བདག་ལ། །གལ་ཏེ་འཇོག་པར་བྱེད་ན་ནི། །ནམ་ཡང་དགེ་སློང་སྐྱོན་ཡོད་མིན། །དགག་དབྱེའི་དུས་ཀྱི་རྙེད་པ་གང༌། །ཐམས་ཅད་དབྱར་གནས་གང་དེ་དབང༌། །གང་ཞིག་དབྱར་གནས་མ་བཅས་པའམ། །གང་དང་ལྷན་ཅིག་དགག་དབྱེ་བྱས། །འཇིགས་བཅས་དགོན་པར་གནས་པ་ཡིས། །ཆོས་གོས་གསུམ་པོ་དག་ལས་ནི། །གཅིག་ནི་ཁྱིམ་དུ་བཞག་བྱ་སྟེ། །བག་ཡོད་དགེ་བ་འདོད་པས་སོ། །དགོས་པའི་ཆེད་དུ་གཞན་དུ་ནི། །ཞག་དྲུག་འདས་ཀྱང་
ཉེས་མེད་དེ། །དེར་ཡང་མཚམས་གཅིག་ཆོས་གོས་ཀྱིས། །བདུན་པའི་སྐྱ་རེངས་ཤར་ན་ལྟུང༌། །དབྱར་གྱི་ནང་དུ་ཟླ་ཤོལ་ཐོབ། །དབྱར་གནས་ཕྱི་མར་རབ་ཏུ་གྲགས། །འཇིགས་བཅས་ཞེས་བརྗོད་གང་དུ་འདིར། །ངེས་པར་རྐུན་པོའི་འཇིགས་བཅས་འདོད། །སེང་གེ་སྟག་སོགས་འཇིགས་པ་ནི། །དོགས་བཅས་འདོད་པར་ཤེས་པར་བྱ། །ཤ་སྦྲང་ལ་སོགས་འཇིགས་པ་དག །འཇིགས་པ་ཐ་དད་ཡིན་པར་གསུངས། །སོ་གའི་ཟླ་བ་ལྷག་མ་ལ། །ཁྲུས་དོན་ལུས་རབ་སྦ་བའི་ཕྱིར། །དབྱར་གོས་རས་ཆེན་མིང་ཅན་གྱི། །ཆོས་གོས་བརྟུལ་ཞུགས་ཅན་གྱིས་བཙལ། །འདི་ནི་དབྱར་ཟླ་གསུམ་དག་ལས། །ཟླ་ཕྱེད་བར་དུ་བཅང་བྱ་སྟེ། །སྔ་བར་ཚོལ་ལམ་ལྷག་པར་ནི། །འཆང་བ་ལ་ཡང་ལྟུང་བར་འདོད། །དགག་དབྱེའི་དུས་ཀྱི་གོས་བཟང་བ། །སྲ་བརྐྱང་གདིང་བའི་དོན་དུ་ནི། །ཚོགས་ལ་གསོལ་བ་སྔོན་འགྲོ་བས། །ལས་བྱེད་པ་ལ་ཡང་དག་བསྒོ། །ཚོགས་ཀྱིས་ཡང་དག་གནང་ནས་ནི། །འཕགས་པའི་ཚོགས་ཀྱིས་གུས་བྱེད་ལ། །གསོལ་བ་རྐྱང་པ་ཉིད་ཀྱིས་གཏང༌། །དེ་ཡིས་ཇི་ལྟར་རིགས་པར་ནི། །ཁ་བསྒྱུར་ལ་སོགས་བྱས་ནས་ནི། །སོང་ནས་ཚོགས་ཀྱི་དབུས་སུ་ཞུ། །དེ་ནས་ཆོ་ག་བཞིན་དུ་འདིར། །གདིང་བྱ་སྲ་བརྐྱང་བཏིང་བ་ཡི། །དགེ་སློང་རྣམས་ལ་ཕན་ཡོན་མང༌། །ཕན་བཞེད་སྟོན་པས་ཡང་དག་གསུངས། །ཞག་བཅུ་ཟླ་བ་ངེས་པ་དང༌། །མ་བརྟགས་པར་ནི་འཆང་བ་དང༌། །སྣམ་སྦྱར་མེད་པར་གྲོང་སོགས་འཇུག །ཡང་ཡང་ཟ་བ་ཉིད་དང་ནི། །འདུས་ཤིང་ཟ་བ་ཉེས་པ་མེད།། བསྒོ་བ་མ་བྱས་པར་ཡང་འགྲོ། །སྨིན་དྲུག་དང་ནི་ཁྲ་ཡི་བར། །སྲ་བརྐྱང་གདིང་བ་དུས་སུ་གསུངས། །མགུ་བ་སྤྱད་དང་མགུ་བ་བྱས། །སྤོ་བ་དང་ནི་དེ་ལས་ལངས། །དབྱར་མ་རྫོགས་དང་དབྱར་བྲལ་དང༌། །དབྱར་ནི་ཕྱི་མར་གནས་དེ་བཞིན། །ལྐོག་ཏུ་གྱུར་པའི་དགེ་ཚུལ་དང༌། །བསླབ་པ་སྤྱོད་པར་བྱེད་པ་སྟེ། །འདི་དག་ལ་ནི་ཕན་ཡོན་མེད། །རྙེད་པ་ཁོ་ན་མ་བཀག་གོ །ལྟ་དང་ཚུལ་ཁྲིམས་དྲི་མ་ཅན། །གང་ཞིག་དགེ་འདུན་གྱིས་རབ་སྤངས། །ཆོས་མ་ཡིན་པའི་ཕྱོགས་ལྷུང་དང༌། །དེ་བཞིན་གཞན་དུ་དབྱར་གནས་ཏེ། །ལྔ་པོ་འདི་ལ་རྙེད་པ་དང༌། །ཕན་ཡོན་
ཡང་ནི་མེད་པར་གསུངས། །འདིར་ནི་བཟང་དང་མཁས་ཀུན་ལ། །ཡོན་ཏན་དང་ནི་རྙེད་པ་ཡོད། །དགེ་འདུན་ལ་བསྡོས་རྙེད་པ་གང༌། །བརྟུལ་ཞུགས་ཅན་དག་དབང་བྱེད་ན། །སྤོང་བའི་ལྟུང་བྱེད་ལྕགས་ཚན་གྱིས། །སྡུག་བསྔལ་ཉམས་སུ་མྱོང་བར་འགྱུར། །རྙེད་པ་གོས་དང་དབྱིག་ལ་སོགས། །བཟའ་བ་ལ་སོགས་ཟང་ཟིང་ཡང༌། །གཉིས་ཀའང་བསྡོས་པར་བསྒྱུར་བ་ནི། །རབ་ཏུ་བཀག་པ་གསུངས་པ་ཡིན། །ཚོགས་ཀྱི་གཞན་ལ་གཞན་གྱི་དེར། །རྙེད་པ་ཕན་ཚུན་སྒྱུར་བྱེད་ན། །ཉེས་བྱས་དང་ནི་ཡང་དག་ལྡན། །དངོས་གཞི་རུ་ནི་མི་བརྟག་གོ །དགེ་འདུན་མཐུན་པ་ཉིད་ཀྱི་ནི། །དགེ་འདུན་གཞན་ལ་བསྡོས་པ་ཡི། །རྙེད་པ་བདག་གིར་སློང་བྱེད་ན། །ཐོབ་པའི་ཚེ་ན་སྤོང་བར་འགྱུར། །གང་ཟག་སྐུ་གཟུགས་མཆོད་རྟེན་དང༌། །དུད་འགྲོ་རྩྭ་དང་ནམ་མཁའ་ལ། །བཞག་སོགས་ས་ལ་ཀ་བ་སྟེ། །ཁང་བཟངས་སོགས་ལ་ཉེས་བྱས་ཡིན།། །། བམ་པོ་གསུམ་པ། དང་པོར་བྱིན་ལེན་བྱས་ནས་ནི། །མར་སོགས་དགེ་སློང་བྱིན་གྱིས་བརླབས། །རང་གིས་བླངས་ནས་སྤྱད་བྱ་སྟེ། །ཞག་བདུན་དེ་ལས་ལྷག་པར་མིན། །སྡོམ་བརྩོན་དེ་དོན་ལ་མཁས་པ། །སྤང་བར་འོས་པ་སྤངས་ནས་ནི། །དེ་ནས་ལྟུང་དེ་ལས་ལྡང་ཕྱིར། །ནུབ་ཀྱིས་ཆོད་ནས་བཤགས་པ་བྱ། །མཁས་པས་བསྐུལ་བ་བྱས་ནས་ནི། །གཉིས་པ་ལ་ནི་བླང་བར་བྱ། །ཇི་ལྟར་གསུངས་པའི་བརྟག་པ་དག །མི་བྱེད་པ་ལས་ལྟུང་བར་འགྱུར། །ལྟུང་བ་བཅོས་པའི་དོན་དུ་ནི། །བདག་གི་དོན་དུ་ཆོས་གོས་སོགས། །ཅུང་ཟད་ཙམ་ཡང་དེ་དག་གིས། །གཞན་ལས་བླང་བར་མི་བྱའོ། །ལྟུང་འདི་སྤང་བར་མ་བྱས་ན། །གཞན་དུ་གྲོལ་བར་འགྱུར་བ་མིན། །སྤང་བར་ཡང་ནི་ཤེས་བྱ་ལ། །ཆོས་གོས་ལ་སོགས་སྤང་བར་བརྗོད། །སྤང་བའི་ལྟུང་བྱེད་སུམ་ཅུ་པོ། །བསླབ་བྱ་དང་བཅས་བཤད་ནས་ནི། །དེ་རྗེས་ལྟུང་བྱེད་འབའ་ཞིག་པ། །དགུ་བཅུ་རབ་ཏུ་གསལ་བར་བྱ། །རྒྱལ་པོའི་ཁབ་ཏུ་བཅོམ་ལྡན་འདས། །བལྟ་འདོད་ཁྱིམ་པ་མང་རྣམས་ཀྱིས། །བཅོམ་ལྡན་འདས་ཉིད་གང་ན་ཞེས། །སྒྲ་གཅན་འཛིན་ལ་དྲིས་པ་དང༌། །གཞན་ན་བཅོམ་ལྡན་བཞུགས་བཞིན་དུ། །གཞན་དུ་ཉེ་བར་བསྟན་ལས་བཅས། །དེ་ཕྱིར་མདོ་ལས་གསུངས་པ་གང༌། །སྟོན་པས་ཚིགས་བཅད་
གཉིས་འདི་གསུངས། །ཆོས་གཅིག་ལས་འདས་གང་ཡིན་པ། །ལུས་ཅན་བརྫུན་དུ་སྨྲ་བ་སྟེ། །འཇིག་རྟེན་ཕ་རོལ་སྤངས་པ་ཡིན། །འདི་ཡིས་སྡིག་པ་མི་བྱ་མེད། །ལྕགས་གོང་མེ་ལྕེ་འབར་བ་དག །ཟོས་པར་གྱུར་པ་མཆོག་ཡིན་གྱི། །ཚུལ་འཆལ་ཡང་དག་མི་སྡོམ་པས། །ཡུལ་འཁོར་བསོད་སྙོམས་ཟ་བ་མིན། །བསླབ་པའི་གཞི་ནི་བསྒྲུབ་པའི་ཕྱིར། །ངེས་པར་བརྫུན་ཚིག་བཀག་པ་སྟེ། །ལག་བརྒྱུད་སྨྲ་བའི་ཁྱུ་མཆོག་ནས། །བརྩམས་ཏེ་བརྫུན་དུ་སྨྲ་རྣམས་ལ། །ཤེས་བཞིན་དུ་ནི་བརྫུན་སྨྲ་བའི། །དགེ་སློང་ལ་ནི་ལྟུང་བྱེད་བརྗོད། །བརྫུན་ཚིག་རྣམ་པ་དགུ་ཡིན་ཏེ། །རྣམ་པ་གཉིས་ཀྱི་བར་དུ་བརྗོད། །སྡོམ་བརྩོན་དག་ལ་དྲུངས་འབྱིན་ཆོས། །ཕས་ཕམ་ལ་སོགས་རྣམ་པ་ལྔ། །ཚུལ་ཁྲིམས་ལྟ་བ་ཆོ་ག་དང༌། །འཚོ་བ་ཡི་ནི་སྨྲ་བ་དགུ། །མཐོང་སོགས་རྣམ་པ་གསུམ་ཡིན་ཏེ། །དེ་དག་གིས་ནི་སྨྲ་བ་ལ། །བརྫུན་ཚིག་རྣམ་པ་བརྒྱད་ཅེས་འདོད། །ཚུལ་ཁྲིམས་ལྟ་སྤྱོད་ཆོ་ག་འཚོ། །མཐོང་དང་ཐོས་དང་དོགས་པ་ཡིས། །སྡོམ་བརྩོན་བརྫུན་དུ་སྨྲ་བ་ལ། །གང་ཡང་རྣམ་པ་བདུན་ཉིད་བརྗོད། །སྨྲ་འགྱུར་དེ་བཞིན་སྨྲ་བ་དང༌། །སྨྲས་པ་ཞེས་བྱ་ཚིག་གསུམ་དང༌། །མཐོང་བ་ལ་སོགས་ཚིག་གསུམ་སྟེ། །བརྫུན་དུ་སྨྲ་བ་དྲུག་ཏུ་བརྗོད། །དེ་ལྟར་རེ་རེ་དོར་བ་ཡིས། །ཚིག་གིས་འདིར་ནི་ཤེས་བྱ་བ། །བརྫུན་ཚིག་རབ་ཏུ་ཤེས་པ་ལ། །བརྗོད་ནས་གོ་བ་རྣམ་པ་གཉིས། །སླར་ཡང་ཕས་ཕམ་ལ་སོགས་ལྔས། །ཕས་ཕམ་འགྱུར་བར་ཤེས་བྱ་སྟེ། །ཕས་ཕམ་གནས་སུ་གང་བརྗོད་པའི། །སྔར་སྨྲས་མཐའ་ནི་ཕས་ཕམ་ཉིད། །གཞན་ལ་ནམ་ཡང་མི་བཞེད་དོ། །དགེ་འདུན་ལྷག་མར་འགྱུར་བ་ནི། །བག་ཙམ་གྱིས་སམ་རྩ་བས་སྐུར། །ཆོས་ལ་ཆོས་མིན་ལ་སོགས་ངེས། །གང་ཞིག་དགེ་འདུན་དབུས་སྨྲ་ན། །དེ་ལ་སྦོམ་པོར་འགྱུར་བ་ཡི། །བརྫུན་ཚིག་ཅེས་ནི་རྣམ་པར་གཞག །གསོ་སྦྱོང་དུས་ཀྱི་ལས་དག་ལ། །འདི་ལ་དག་གམ་ཞེས་བརྗོད་ཚེ། །ཁ་རོག་ཉེས་པ་སྤེད་བྱེད་ན། །ཉེས་བྱས་དྲི་མར་འགྱུར་བར་བརྗོད། །དེ་ལྟར་དེ་དག་གང་བསྟན་པ། །བརྫུན་གྱི་ཚིག་ནི་རྣམ་པ་བཞིས། །དེ་ལས་གཞན་པ་ལྟུང་བྱེད་དུ། །འགྱུར་བའི་བརྫུན་ཚིག་ཅེས་བྱར་བསྟན། །མ་མཐོང་སོགས་
ལ་མཐོང་སོགས་དང༌། །མཐོང་སོགས་ལའང་དེ་ལས་བཟློག །ཤེས་བཞིན་དུ་ནི་སྨྲ་བྱེད་ན། །དོན་རིག་པ་ན་ལྟུང་བྱེད་འདོད། །དུད་འགྲོ་ལ་ཡང་རྭ་ཆག་སོགས། །སྐྱོན་ནས་ཚིག་ཏུ་སྨྲས་པ་ན། །སེམས་ཞུམ་ལས་བྱེད་མི་བརྩོན་ན། །ཤེས་ལྡན་མི་རྣམས་སྨོས་ཅི་དགོས། །དེ་ཕྱིར་སེམས་ཅན་ཐམས་ཅད་ལ། །ཕན་བཞེད་བཅོམ་ལྡན་འདས་ཀྱིས་བཀག །མི་རྣམས་ལ་ནི་སྐྱོན་བརྗོད་པས། །དགེ་སློང་ལ་ནི་ལྟུང་བྱེད་ཡིན། །སྐྱོན་བརྗོད་བསམ་པའི་དགེ་སློང་གིས། །ཁྱོད་ནི་བྲམ་ཟེ་རབ་བྱུང་ཞེས། །བྲམ་ཟེ་ལ་ནི་རིགས་དྲིས་ན། །དེ་ལ་ཉེས་བྱས་ལྟུང་བར་འགྱུར། །དེ་འདྲའི་སེམས་ཀྱིས་རྒྱལ་རིགས་ལ་འང༌། །སྨྲ་བྱེད་ཉེས་བྱས་ཁོ་ན་སྟེ། །དེ་བཞིན་རྗེ་རིགས་དམངས་དག་ལ། །སྨྲ་བྱེད་སྡོམ་བརྩོན་ལྟུང་བྱེད་ཡིན། །ཐགས་མཁན་ལྷ་རྟེན་ལྷ་མཁན་དང༌། །ཤིང་མཁན་ཚེམ་བུ་སྨྱིག་མ་མཁན། །དེ་ལ་སོགས་པའི་རིགས་རྣམས་ཀྱིས། །ཡོངས་སུ་སྨྲ་ན་ལྟུང་བྱེད་བརྗོད། །རྫ་མཁན་དང་ནི་མགར་བ་དང༌། །བྲན་དང་ཀོ་ལྤགས་མཁན་དང་ནི། །བྱ་ཤོར་ཉ་བ་རྔོན་པ་དང༌། །གཏུམ་པོ་སོགས་བརྗོད་ཉམས་པར་འགྱུར། །ཁྱོད་ནི་བྲམ་ཟེད་ཡིན་ཏེ་དེའི། །རིགས་ཀྱི་བྱ་བ་གཙང་སྦྲ་སོགས། །བསླབ་བྱ་ཁྱོད་ལ་དགེ་སློང་གིས། །ཅི་བྱ་ཞེ་ནའང་ཉེས་བྱས་ཉིད། །ཁྱོད་ནི་རྒྱལ་རིགས་ཁྱོད་ཀྱི་ལས། །མཚོན་ཆའི་རིགས་པ་མདུང་དང་ནི། །མདའ་སོགས་སློབས་ཤིག་ཅེས་སྨྲ་ན། །གང་ཡིན་དེ་ལ་ཉེས་བྱས་སོ། །དེ་བཞིན་རྗེ་རིགས་དམངས་རིགས་ཀྱི། །ལས་ལ་ངེས་པར་སྦྱར་ཡང་ངོ༌། །ཐགས་མཁན་སྨྱིག་མ་མཁན་སོགས་ལ། །ལྟུང་བྱེད་ཀྱི་ནི་ལྟུང་བར་བརྗོད།། མཆོད་སྦྱིན་དང་ནི་གདོལ་བ་སོགས། །ཁྱོད་ཀྱིས་རང་ལས་བྱོས་ཤིག་ཅེས། །སྨྲ་ཡང་མི་མཁས་དེ་དག་ལ། །སྔ་མ་བཞིན་དུ་ཉེས་བྱས་ཡན། །འཐང་པོ་ཞར་བ་ལག་རྡུམ་དང༌། །སྒུར་པོ་མི་ཐུང་ལོང་དང་འོན། །ཞེས་སྨྲ་ན་ཡང་ལྟུང་བྱེད་ཀྱི། །མེ་ཡི་ནང་དུ་སྲེག་པ་འཐོབ། །ཁྱོད་ནི་མཛེ་ཅན་ཁྲག་ནད་སྐྱུག །ཉམ་ཆུང་གཡན་པ་འོག་གྲོལ་དང༌། །དེ་ལ་སོགས་བརྗོད་ངན་ཚིག་རྣམས། །སྡོམ་བརྩོན་ལ་ནི་ལྟུང་བྱེད་འདོད། །ཁྱོད་ནི་མ་དག་ལྷུང་བས་བཅོམ། །གདུག་པ་དང་བཅས་འགྱོད་པ་ཅན། །ཁྱོད་ནི་ཁྲོ་བས་སེམས་བསྲེགས་པ། །ཞེས་སྨྲས་སོགས་ལའང་དེ་ཉིད་དོ། །
དགེ་སློང་སྐྱོན་བརྗོད་བསམ་པ་ཡིས། །བོང་བུ་སོགས་ཀྱིས་གཤེ་བྱེད་ཅིང༌། །རྒྱ་གད་ལ་སོགས་ཀུན་ལྡང་བས། །སྤྱོ་ན་ལྟུང་བྱེད་ཀྱིས་རེག་འགྱུར། །དེ་ལྟར་རིགས་དང་བཟོ་དང་ནི། །ལས་རྣམས་དང་ནི་རྟགས་དང་ནད། །ལྟུང་དང་ཁྲོ་བ་ལ་སོགས་པའི། །ཚིག་གིས་སྨྲ་བར་མི་བྱའོ། །ཐེ་ཚོམ་བསལ་བའི་དོན་དུ་ནི། །སངས་རྒྱས་གདུང་ནི་གང་ཡིན་པ། །རྒྱལ་རིགས་ལས་གང་རབ་བྱུང་བ། །ཞེས་སོགས་སྨྲ་ལ་ཉེས་པ་མེད། །དགེ་སློང་ཕྲ་མ་སྨྲ་ན་ཡང༌། །ལྟུང་བ་འདི་ཉིད་ཡང་དག་ལྡན། །ཕྲ་མ་ཕ་རོལ་དབྱེ་བའི་ཕྱིར། །ཉོན་མོངས་ཅན་གྱི་ཚིག་ཡིན་ཏེ། །དཔེར་ན་འབྲེག་མཁན་གྱོལ་པོ་ཁྱོད། །དེ་སྐད་སུ་ཞིག་སྨྲ་ཞེ་ན། །སྨྲས་པ་དགའ་བྱེད་ཀྱིས་སྨྲ་ཞེས། །འདི་ནི་ཕྱོགས་ཙམ་བསྟན་པ་སྟེ། །འདིར་ཡང་ཐམས་ཅད་སྔ་མ་བཞིན། །རིགས་དང་བཟོ་སོགས་སྨྲས་པ་ལས། །ཉེས་བྱས་ལ་སོགས་ཤེས་བྱ་སྟེ། །བློ་ལྡན་གྱིས་ནི་སྤང་བར་བྱ། །དགེ་འདུན་མཆོག་གཅིག་པ་ཡིས་ནི། །གང་ཞིག་མཐུན་པར་གྱུར་པ་ན། །ལས་ལ་སྐྱོ་སྔོགས་བྱེད་པ་དེས། །ཟད་བྱེད་ལྟུང་བ་ཐོབ་པར་འགྱུར། །མཆོག་གཅིག་བསམ་པ་གཅིག་པ་ཡིས། །ཆོས་བཞིན་ཆོ་ག་བཞིན་དུ་ནི། །འགྱེད་པ་ལ་སོགས་རྣམ་བཞི་ཡི། །དབང་བྱས་བསྟན་པ་དེ་དག་གི །ལས་ལ་སྐྱོ་སྔོགས་ཞེས་བྱ་བ། །འདི་ལ་ལེགས་ཞེས་བརྗོད་པ་ཡི། །རྫོགས་ན་ཐེ་ཚོམ་གྱིས་ཀྱང་ནི། །སྐྱོ་སྔོགས་བྱེད་ན་ལྟུང་བར་བཅས། །བྱས་སམ་འོན་ཏེ་མ་བྱས་ཞེས། །ཐེ་ཚོམ་གྱིས་ཀྱང་སྐྱོ་སྔོགས་ན། །ཉེས་བྱས་འགྱུར་ཏེ་དེ་ལ་ནི། །ཅིག་ཤོས་མིན་ཞེས་མཁས་པས་གསུངས། །གཞན་དག་གི་ནི་དབང་བྱས་ལ། །གཞན་གྱི་དབང་བྱས་འདུ་ཤེས་སམ། །རྫོགས་ལ་མ་རྫོགས་ཞེས་པ་ལ། །ལྟུང་བའི་ཚུལ་ནི་སྔར་བཞིན་ནོ། །གཉུག་མར་གནས་དང་ལས་བྱེད་དང༌། །འདུན་པ་ཕུལ་དང་ལྟ་བ་སྨྲ། །གློ་བུར་བ་སྟེ་འདི་དག་ནི། །གང་ཟག་ལྔ་ཞེས་ཡོངས་སུ་གྲགས། །ཐོག་མཐའ་དབུས་སུ་གང་རིག་དེ། །གཉུག་མར་གནས་པ་ཞེས་བྱའོ། །ལས་ཀྱི་དབང་དུ་བྱས་པ་ལས། །གང་ཞིག་དེ་བྱེད་དེ་ལས་བྱེད། །དེར་ནི་གང་ཞིག་འདུན་པ་ཕུལ། །དེ་ནི་འདུན་པ་ཕུལ་བའོ། །ལྟ་བ་སྨྲ་བ་ཞེས་བྱ་གང༌། །གང་དག་དགེ་འདུན་དབུས་སུ་ནི། །ཞུ་ཚེ་
བདག་གིས་འདི་ལྟར་མཐོང༌། །འདི་ལྟར་མིན་ཞེས་སྨྲ་བའོ། །ཐོག་མཐའ་དབུས་སུ་མི་ཤེས་པ། །དེ་ནི་གློ་བུར་འོངས་པར་འདོད། །དང་པོ་རྣམ་པ་གསུམ་པོ་ཡིས། །ལས་ལ་རྩོད་ན་ལྟུང་བྱེད་དེ། །དམ་པའི་ལས་ལ་རྩོད་པ་ལ། །ཐ་མ་གཉིས་ཀྱིས་ཉེས་བྱས་སོ། །ཚིག་ལྔའམ་དྲུག་ལས་ཕར་ལྷག་པར། །རིག་པའི་སྐྱེས་པ་མེད་པར་ནི། །བུད་མེད་དག་ལ་ཆོས་སྟོན་ན། །ལྟུང་བྱེད་སྐྱོན་དུ་འགྱུར་བ་ཡིན། །མཐའ་དག་གཟུགས་ནི་མི་རྟག་ཅིང༌། །དེ་བཞིན་ཚོར་དང་འདུ་ཤེས་དང༌། །འདུ་བྱེད་དང་ནི་རྣམ་པར་ཤེས། །མཁས་པས་ཚིག་ལྔར་ངེས་རྟོགས་བྱ། །མིག་དང་རྣ་བ་སྣ་དང་ལྕེ། །ལུས་དང་ཡིད་ཀྱང་མི་རྟག་ཅེས། །ཚིག་དྲུག་བརྗོད་པ་འདི་ཡིན་པར། །མཁས་པ་རྣམས་ཀྱིས་གསུངས་པ་ཡིན། །ཚིག་ལྔ་བསྟན་པར་བྱའོ་ཞེས། །ཤེས་བཞིན་ཚིག་དྲུག་རྗོད་བྱེད་ན། །ལྟུང་བའོ་དེ་བཞིན་དྲུག་པ་ཡང༌། །བདུན་པ་རྗེས་སུ་སྟོན་ནའོ། །འབྲེལ་མེད་སྨྲ་བ་ཉེས་མེད་དེ། །ཤིན་ཏུ་སྨྲ་བ་མྱུར་ཡང་ངོ༌། །དྲིས་ལན་མཁན་གྱི་བུད་མེད་ནི། །རིགས་ལྡན་ལ་སྟོན་ཉེས་པ་མེད། །བསྙེན་པར་མ་རྫོགས་པ་དང་ཚིག །མཉམ་པོར་ཆོས་བརྗོད་པ་ལས་ལྟུང༌། །རྗེས་སུ་འབྲང་ལ་ཉེས་མེད་དེ། །འདོན་དང་ཁ་ཏོན་སྦྱོང་བ་ལའང༌། །གནས་ངན་ལེན་དང་ལྡན་པའི་ཚིག །ཚོགས་ཀྱིས་གནད་མེད་བརྗོད་མི་བྱ། །དེ་ཡང་ཕས་ཕམ་པ་དང་ནི། །དགེ་འདུན་ལྷག་མའི་གནས་ངན་ལེན། །ཡང་དག་བླ་མར་འགྱུར་པའི་ཆོས། །བསྙེན་པར་མ་རྫོགས་གང་ཟག་ལ། །སྡོམ་བརྩོན་གང་ཞིག་སྨྲ་བྱེད་ན། །འདི་ལ་ཡང་ནི་ལྟུང་བྱེད་འགྱུར། །འདིར་ནི་སྒྲིབ་པ་རྣམ་པ་ལྔ། །མི་རྣམས་ཀྱི་ནི་ཆོས་སུ་ཐོས། །དེ་ཟད་བླ་མའི་ཆོས་སུ་འདོད། །བསམ་གཏན་རྣམས་ནི་བླ་མའོ། །མ་གནང་བར་ནི་དགེ་འདུན་གྱི། །གང་ཟག་དག་ལ་སྟེར་བྱེད་ཅེས། །བྱིན་ནས་རྩོད་པ་རྩོམ་ན་ནི། །སྡོམ་བརྩོན་དེ་ཡང་ཟད་ལྟུང་འགྱུར། །ཟླ་བ་ཕྱེད་ཕྱེད་གསོ་སྦྱོང་དུས། །སོ་སོར་ཐར་པ་འདོན་པའི་ཚེ། །གང་ཞིག་ཁྱད་གསོད་དེ་ལ་ཡང༌། །ཟད་བྱེད་ལྟུང་བར་འདོད་པ་ཡིན། །ཕྲ་ཞིང་ཕྲ་བ་འདི་དག་འདིར། །ཉེར་བསྟན་དགོས་པ་ཅི་ཞིག་ཡོད། །གང་དག་ཉོན་མོངས་དབང་གིས་ནི། །བསླབ་པ་ཁྱད་གསོད་འདི་སྐད་སྨྲ། །རྩིས་ཀྱི་ཕྱིར་དང་ཁྱད་གསོད་ཕྱིར། །བསྲེག་ཕྱིར་ཡོངས་
སུ་གདུང་བའི་ཕྱིར། །དེ་བཞིན་རྨ་འགེགས་དོན་དུ་ཞེས། །ཚིག་འདིར་རེ་རེས་ཟད་པ་སྟེ། །ཕྲན་ཚེགས་ལུང་སོགས་ལས་གསུངས་པ། །ཇི་སྲིད་འདུལ་བ་དང་འབྲེལ་བས། །དེར་ནི་དགེ་སློང་ཁྱད་གསོད་ན། །དེ་ཉིད་ལྟུང་བ་དང་བཅས་འགྱུར། །དགེ་སློང་རང་ངམ་གཞན་གྱིས་ཀྱང༌། །ས་བོན་ཚོགས་ནི་མ་ལུས་དང༌། །འབྱུང་པོའི་གནས་ནི་འཇིག་བྱེད་ན། །གསལ་པོར་ལྟུང་བྱེད་དུ་ནི་འདོད། །གང་ཞིག་རྩ་བའི་ངོ་བོར་སྐྱེ། །དེ་ནི་རྩ་བའི་ས་བོན་ཏེ། །ཡུངས་དང་སྒེའུ་གཤེར་གླ་སྒང་སོགས། །སྡོང་བུའི་ས་བོན་དེ་ཡང་ནི། །ས་གང་ལ་ནི་ལེགས་བཙུགས་པས། །སླར་ཡང་སྡོང་བུ་སྐྱེ་བ་སྟེ། །ཉ་གྲོ་དྷ་དང་ཨུ་དུམ་བཱར། །ཨ་ཤོད་ཀ་ར་བཱི་ར་སོགས། །གང་ཞིག་བཅད་པའི་རྩེ་མོ་ཡང༌། །འཕེལ་ཞིང་སྐྱེ་བར་འགྱུར་བ་གང༌། །ཀ་ཤི་བུར་ཤིང་འདམ་བུ་སྨྱིག །དེ་དག་ཐོག་དགུའི་མིང་ཅན་ཡིན། །བཀས་པས་སྐྱེ་བ་བཀས་པ་ཡིན། །ས་བོན་ཇི་ལྟ་བུ་ཞེ་ན། །ཨ་ཛ་ཀ་དང་སམ་བུ་དང༌། །ཛམ་བྷ་རི་དང་ཡན་ཛི་ཀ །ས་བོན་ས་བོན་ཏིལ་མུད་ག །གང་གཞན་དེ་འདྲའི་ས་བོན་ཡང༌། །འབྱུང་པོའི་སྒྲ་གཅན་སེམས་ཅན་གྱི། །རིགས་ཀུན་ལ་ནི་ངེས་པར་བརྗོད། །འབུ་སྲིན་ཕྱེ་མ་ལེབ་ལ་སོགས། །དེ་ཡི་གནས་ནི་ཤིང་སོགས་གྲགས། །དེ་ལ་དེར་འདུ་ཤེས་པས་སམ། །ཐེ་ཚོམ་གྱིས་ཀྱང་གཅོད་ནའོ། །དེ་ལྟར་ས་བོན་རྩྭ་སྔོན་དག །དེ་འཇོམས་ན་ནི་ལྟུང་བར་འདོད། །ས་བོན་གཞན་ལ་གཞན་འདུ་ཤེས། །ཐེ་ཚོམ་གྱིས་ཀྱང་ལྟུང་བཤད་དོ། །གཏུན་དུ་ས་བོན་རྣམ་པ་ལྔ། །བླུགས་ནས་ཉམས་པར་བྱའོ་ཞེས། །དགེ་སློང་ལྷུར་ལེན་ཉམས་ན་ནི། །ལྟུང་བྱེད་ལྔ་ཉིད་འདོད་པ་ཡིན། །མ་ཉམས་ན་ནི་དེ་དག་ལ། །ཉེས་བྱས་ཀྱང་ནི་རྣམ་པ་ལྔ། །མེར་འཇུག་ན་ཡང་ཚུལ་དེ་ཉིད། །ཁུ་ཚན་ལ་སོགས་པར་ཡང་རུང༌། །སེམས་དེ་ལྟ་བུས་རྩྭ་སྔོན་ལ། །འཆག་པར་བྱེད་པ་དག་ཀྱང་ངོ༌། །ཉམས་ན་དགེ་སློང་ལྟུང་བྱེད་དེ། །མ་ཉམས་ན་ནི་ཉེས་བྱས་སོ། །ཤིང་དང་རེ་ལྡེ་ལ་སོགས་པ། །སྔོ་སར་ལ་ནི་འདྲུད་པ་དང༌། །ཁུ་ཚན་ཐུག་པ་ལ་སོགས་པ། །འབོད་པ་ལ་ཡང་འདོད་པ་ཡིན། །སྦྱོར་བ་གཅིག་ཉིད་ཀྱིས་ཀྱང་འདིར། །ཤིང་གཅིག་གཅོད་པར་བྱེད་པ་ན། །དེ་ལ་ཉེས་
བྱས་གཅིག་དང་ནི། །ཟད་བྱེད་ལྟུང་བྱེད་གཅིག་ཡིན་ནོ། །སྦྱོར་བ་ཡང་ནི་གཉིས་དག་གིས། །སྡོམ་བརྩོན་ཤིང་སོགས་གཅིག་གཅོད་ན། །ཉས་བྱས་གཉིས་དང་ལྟུང་བྱེད་གཅིག །དེ་ལྟར་སྦྱོར་བ་ཇི་སྙེད་པ། །དེ་སྙེད་དུ་ནི་ཉེས་བྱས་འདོད། །རྫས་ཀྱི་ཚད་ཀྱི་དབྱེ་བ་ཡིས། །ཟད་བྱེད་ལྟུང་བྱེད་ཐ་དད་འདོད། །འདབ་སྔོན་མེ་ཏོག་འབྲས་བུ་དང༌། །ཁ་འབུས་པ་དང་རྩ་བ་ཉིད། །སྡོང་བུ་དང་ནི་ཆུ་བ་གཅོད། །ཉ་ལྕིབས་འདོན་ཡང་ལྟུང་བྱེད་ཉིད། །ཤུན་པ་དང་ནི་འདབ་སྐྱ་དང༌། །མཚོ་སྐྱེས་དག་ནི་རྒྱས་པ་ཉིད། །གཅོད་པ་ལ་ནི་ཉེས་བྱས་གསུངས། །འདི་དག་མདོར་བསྡུས་ཚུལ་ཡིན་ནོ། །སོ་ཤིང་རྩ་བ་ཤུན་པ་དང༌། །འདབ་མ་མེ་ཏོག་སོགས་འདོད་ན། །བསླང་བྱ་རི་ལས་ཆོད་དང་ཤོགས། །ཞེས་སོགས་ཚིག་ནི་སྤངས་ནས་སོ། །སྦྲང་ཚད་དང་ནི་ཤ་བལ་ཉིད། །ཤ་མོ་འབུ་སྲིན་ཚང་དེ་བཞིན། །བྱ་ཚང་དང་ནི་སྦེད་ཤ་དང༌། །པ་རྒྱ་ཡང་ནི་དབྱུང་མི་བྱ། །རུང་བས་གཅོད་དང་འདོན་པ་ལ། །ཐམས་ཅད་དུ་ཡང་ཉེས་སྤྱོད་མིན། །འདི་དག་ཤེས་པར་གྱིས་ཤིག་ཅེས། །བརྗོད་ན་འདི་ནི་རུང་བ་ཡིན། །གསར་པའི་ལས་ལ་ལས་བྱེད་ཀྱིས། །ཤིང་གི་ལྷ་ལ་གསོལ་བཏབ་ཅིང༌། །གཏོར་མ་མེ་ཏོག་ལ་སོགས་པས། །ཆོ་ག་བཞིན་དུ་མཆོད་ནས་བྱ། །རྒྱུད་ཆགས་གསུམ་པ་འདོན་བྱས་ནས། །དམ་ཆོས་ཉན་པ་སྦྱིན་བྱས་སྟེ། །དེ་ལ་ལས་ལམ་བཅུ་པོ་ནི། །དགེ་དང་མི་དགེ་བརྗོད་པར་བྱ། །དགེ་བས་འབྲས་བུ་བདེ་སྟེར་ཏེ། །ཅིག་ཤོས་ཀྱིས་ནི་ངན་སོང་ཡིན། །སེར་སྣའི་སྐྱོན་དང་བཅས་དག་ལ། །སྦྱིན་པའི་ཡོན་ཏན་ལེགས་བརྗོད་བྱ། །གང་ཞིག་དགའ་ཚལ་ལ་སོགས་སུ། །ལྷ་མོའི་ཚོགས་དང་ལྷ་རྣམས་ཀྱིས། །རྩེད་འཇོ་ཡུན་རིངས་བདེ་མྱོང་བ། །དེ་ནི་སྦྱིན་པའི་འབྲས་བུར་གསུངས། །བཀྲེས་དང་སྐོམ་སོགས་མེ་དག་གིས། །ལུས་རིང་ལྕེ་མགྲིན་སྐམས་པ་ཡི། །སྐལ་ངན་འཁོར་བྱེད་ཡི་དགས་གང༌། །མི་ཡི་གཟུགས་འདྲ་སྡུག་བསྔལ་ཅན། །དེ་ནི་ཐོག་མེད་སྲིད་པ་ཡི། །བག་ཆགས་ཀུན་ཁྱབ་མཐུ་ལྡན་པས། །མཆོག་ཏུ་དོན་མེད་འགྱུར་བ་སྟེ། །སེར་སྣའི་འཚེ་བ་ཡིན་པར་འདོད། །ཁྲག་འཇག་པ་ལ་སོགས་པ་ཡིས། །ཞག་བདུན་རྣམ་འགྱུར་མི་སྟོན་ན།།
ཚུལ་འདི་ལེགས་པར་རིག་ནས་ནི། །ཤིང་ཆེན་གཅོད་པ་ལ་སོགས་བྱ། །དགེ་སློང་ལ་ནི་འཕྱ་བ་དང༌། །གཞོགས་འཕྱས་ཀྱང་ནི་རྣམ་པ་མང༌། །བྱེད་ནའང་ལྟུང་བ་སྔར་ཇི་བཞིན། །འདིར་ཡང་ལྟུང་བ་ཁོ་ནར་བརྗོད། །འདི་དག་འཕྱ་བ་ཉིད་དབང་བྱས། །དགེ་སློང་གཞོགས་འཕྱས་མཁན་ཡང་འདིར། །གསོལ་བའི་ལས་ནི་སྔོན་འགྲོ་བས། །དགེ་འདུན་གྱིས་གང་བསྐོས་པ་ཡི། །གུས་པས་ལས་ནི་ངེས་ལྡན་པ། །དེ་ལ་དགེ་སློང་གང་ཞིག་འཕྱ། །ཁྲོ་སེམས་ལྡན་ན་ལྟུང་བྱེད་དོ། །ཅིག་ཤོས་ཉིད་ནི་ཉེས་བྱས་ཉིད། །གཙུག་ལག་ཁང་གཏོང་ཟས་དང་ནི། །འོ་ཐུག་འབྲས་བུ་འགྱེད་པ་དང༌། །ཕྱི་དེ་ཉིན་པར་ཡང་ནི་རུང༌། །ཕྲན་ཚེགས་དག་ནི་འདྲིམ་པ་དང༌། །སྣོད་སྤྱད་འདྲུབ་དང་སྲ་བརྐྱང་གི །ཆོས་གོས་དག་ནི་སྦེད་པ་དང༌། །ཆོས་གོས་རྣམས་ནི་འགྱེད་པ་དང༌། །དབྱར་གྱི་རས་ཆེན་སྦེད་པ་དང༌། །ཁང་སྐྱོང་དེ་ཡི་མངག་གཞུག་དང༌། །དེ་བཞིན་སྡེར་སྤྱད་ཞལ་ཏ་བ། །རྩོད་པ་འགེགས་དང་ཆུ་འདྲིམ་དང༌། །བྱ་རོག་ལ་སོགས་སྐྲོད་པ་དང༌། །མལ་སྟན་འདུག་སྟན་སྟོབས་པ་དང༌། །ཟས་འདུན་འཇིག་རྟེན་བཟློག་པ་དང༌། །གསོལ་དང་གཉིས་ཀྱི་ལས་གང་ཡིན། །འདི་དག་དགེ་འདུན་གྱིས་ནི་བསྐོ། །གང་ཕྱིར་དང་པོ་བཅུ་གཉིས་ལ། །འཕྱ་དང་གཞོགས་འཕྱས་གྱིས་ལྟུང་འགྱུར། །གཞོགས་འཕྱས་བརྩེ་བ་མེད་པའི་ཚིག །འཕྱ་བ་ཕ་རོལ་ལ་སྨོད་པའོ། །བསྒོ་བ་རྣ་གཟོན་ལྟུང་བའོ། །བསྒོ་བ་ཞེས་བྱ་དྲི་བར་བརྗོད། །རྣ་ལ་གཟོན་པ་ངན་སོང་ཀྱིས། །ངེས་པས་ལན་གཞན་སྨྲ་བའོ། །གཞན་དྲིས་པ་ན་གཞན་དུ་ནི། །གཞན་གདུང་བྱ་ཕྱིར་སྨྲ་ཡང་ཡིན། །གཞན་དུ་གསང་བྱའི་གང་ཟག་ནི། །དགྲ་བོས་དྲིས་ཚེ་འདི་སྐད་དུ། །ནམ་མཁའ་འམ་སོར་མོ་བདག་མཐོང་གི །དམ་པའི་དོན་དུ་སེམས་ཅན་མིན། །ཞེས་ནི་ཁ་ནས་བསླུ་ཚིག་དག །བརྗོད་པ་ལ་ནི་བཀག་པ་མེད། །རྣ་ལ་གཟོན་པའི་བསམ་པ་ཡིས། །དྲིས་ཚེ་སྡོམ་བརྩོན་མི་སྨྲ་འདུག །ཉེས་བྱས་ཀྱིས་ནི་ངན་སོང་དུ། །སྡུག་བསྔལ་མཐར་ནི་སྨྲ་བར་འདོད། །དགེ་འདུན་མལ་སྟན་ཁྲིའུ་སོགས། །བླ་གབ་མེད་པར་བོར་ནས་ཀྱང༌། །གཞན་ལ་མ་བཅོལ་བར་ཡང་ནི། །འགྲོ་ན་ཟད་བྱེད་ལྟུང་བ་འཐོབ། །བརྟུལ་
ཞུགས་ཅན་ནི་འགྲོ་བ་ན། །ཇི་སྲིད་ཁྲིའུ་ལ་སོགས་པའི། །ཕྱི་ཡི་མཚམས་ནི་མ་འདས་པ། །དེ་སྲིད་དུ་ནི་ཉེས་བྱས་སོ། །སླར་ལོག་ཚེ་ན་མ་ཉམས་ན། །ཉེས་བྱས་དང་ནི་ལྡན་འགྱུར་ཏེ། །ཇི་སྟེ་ཕན་ཚུན་གྱུར་ན་ནི། །དེ་ལ་ཟད་བྱེད་ལྟུང་བྱེད་དོ། །མེ་དང་རླུང་དང་ཆར་བ་ཡི། །དབྱེ་བས་ཕན་ཚུན་གསུམ་དུ་གསུངས། །རིམ་པ་གཉིས་པར་ཚིག་ན་ནི། །མེ་ཡི་ཕན་ཚུན་ཞེས་བྱའོ། །རིམ་པ་གཉིས་དག་བཟློག་ན་ནི། །རླུང་གི་ཕན་ཕུན་ཉིད་ཅེས་བྱ། །ཆར་པ་ཞེས་བྱ་ཆར་ཆུ་ཡིས། །རིམ་པ་གཉིས་པར་ཕིགས་ན་ཡིན། །གཙུག་ལག་ཁང་དུ་ཞུགས་པ་ན། །མེ་ལ་སོགས་པའི་ཕན་ཕུན་ལ། །ཉེས་བྱས་ལ་སོགས་རྣམ་གཞན་དག །སྔ་མ་བཞིན་དུ་ཡང་དག་བཤད། །ལམ་དུ་རབ་ཞུགས་དེ་ལྟའི་གཞི། །གལ་ཏེ་དྲན་པར་གྱུར་ན་དེའི། །མོད་ལ་བྱིས་པའི་རང་བཞིན་ཞེས། །བདག་ཉིད་ལ་ནི་ཡང་དག་སྨད། །དེ་ཡིས་ཇི་སྲིད་དགེ་སློང་གཞན། །མཐོང་ནས་ཉེ་བར་སོང་ནས་ནི། །གནས་མལ་མལ་སྟན་སྦ་བའི་ཕྱིར། །གུས་པ་སྔོན་འགྲོས་གསོལ་བ་གདབ། །གལ་ཏེ་དེ་ཡིས་ཐོས་ནས་ཀྱང༌། །དེ་དག་སྦ་བཏུལ་མི་བྱེད་ན། །དེ་ཡང་ལྟུང་བྱེད་མདའ་ཡིས་ནི། །ཕོག་པའི་སྡུག་བསྔལ་ཉམས་མྱོང་འགྱུར། །ཁྱིམ་པས་མགྲོན་དུ་བོས་པའི་ཚེ། །འདུག་སྟན་ལ་སོགས་གཡར་བ་ན། །དེ་ཚུལ་དག་གམ་ཁྱིམ་པ་ཡིས། །བཀུར་བར་བྱ་ཡིས་རང་གིས་མིན། །གཙུག་ལག་ཁང་དུ་ཁྱིམ་པ་དག །ཟན་ཟའི་ཚེ་ན་རྫོགས་ཀྱི་བར། །འདུག་སྟན་སྦྱིན་བྱ་དེ་དག་ལ། །རང་དོན་མ་ཉམས་པ་ཡིས་བསྲུང༌། །ནད་པ་དང་ནི་ནད་གཡོགས་དག །རྒན་པོར་གྱུར་དང་ཚུལ་ཁྲིམས་འཆལ། །ནད་བཅས་བསྙེན་པར་མ་རྫོགས་ལ། །ནམ་ཡང་ཡིད་བརྟན་མི་བྱའོ། །སྟན་གཅིག་ལ་ནི་འདུག་པ་ན། །གསར་བུས་དེ་དག་བརྟུལ་བྱ་ཞིང༌། །གཉི་ག་གསར་བུ་ཡིན་ན་ནི། །སྟན་གང་ཕྱི་ནས་དོང་པས་ཡིན། །དམ་པའི་ཆོས་ཉན་ལ་སོགས་དུས། །གནས་བརྟན་མཁྲང་མི་ཚུགས་པ་ཡིས། །གང་དུ་འདུག་དེར་འདུག་སྟན་ནི། །གཞག་བྱ་འགྱེལ་བ་ཉིད་ཕྱིར་ཡང༌། །དེ་ཕྱིར་མཁྱེན་མཆོག་བཅོམ་ལྡན་གྱི། །བསྙེན་བཀུར་ཆོ་ག་ཐམས་ཅད་ནི། །གཉི་ག་ལ་ཡང་ཕན་འདོད་པས། །
བླ་མ་ལ་བརྟེན་བྱ་བར་གསུངས། །རིངས་པའི་རྐྱེན་ནི་བྱུང་བ་ན། །རྩིག་པའི་དྲུང་ངམ་ཤིང་དྲུང་དུ། །བཞག་པ་ལ་ནི་ཉེས་མེད་དེ། །གློ་བུར་ཟས་ནི་གཅད་མི་བྱ། །གང་དུ་སོང་ནས་མི་ལྟ་བའི། །ཇི་སྲིད་ཆོས་གོས་ཉེ་འཁོར་ནི། །སྔར་གསུངས་དེ་སྲིད་མལ་སྟན་གྱིའང༌། །ཤིན་ཏུ་བདེ་བསྒྲུབ་བྱེད་པའི། །རིན་ཆེན་ཆོས་ནི་སྟོན་པ་ན། །སྟོན་པའི་བཀའ་ནི་མཆོད་བྱས་པས། །སྟན་མཐོ་མཛེས་ལ་འདུག་པར་བྱ། །གྲུ་བཞི་རབ་མཉམ་བདེ་བའི་སྟན། །རྒྱབ་རྟེན་རྐང་རྟེན་སྐས་དང་བཅས། །ཆུན་འཕྱང་བླ་རེས་ལེགས་བཀོད་པའི། །སེང་གེའི་ཁྲི་ཡང་བཅང་བར་བྱ། །ནོར་ཡོད་དེ་ཚེ་རྗེས་གནང་ཕྱིར། །འདུས་བྱས་མི་རྟག་ཡིད་ཆེས་པས། །རིན་ཆེན་ཀུན་གྱིས་མཛེས་པར་ནི། །ལེགས་བྱས་དེ་ལ་འདུག་བྱ་ཉིད། །དེ་ལྟར་ཡིད་ལ་བྱེད་པ་དང༌། །སྦྱིན་བདག་ལ་ཡང་ཕན་པའི་ཕྱིར། །སྡོམ་བརྩོན་རིན་ཆེན་སྣ་ཚོགས་ཀྱིས། །མཛེས་པའི་ཁྲི་ལ་འདུག་པར་བྱ། །གནོད་སྦྱིན་གནས་དང་ཀླུ་ཡི་ཡུལ། །ལྷ་མིན་ལྷ་ཡུལ་སྐྱོན་མེད་དེ། །གང་འདི་དེ་དག་བསོད་ནམས་ལས། །ལེགས་གྲུབ་ཕྱིར་ཞེས་ཐུབ་པས་གསུངས། །དགེ་འདུན་གཙུག་ལག་ཁང་དག་ཏུ། །སྡོམ་བརྩོན་རྩྭ་སོགས་བཏིང་ནས་ནི། །མ་བསྡུས་མ་བཅོལ་གྱི་ནང་ཡང༌། །རྐྱེན་མེད་འགྲོ་བར་བྱེད་ན་ལྟུང༌། །མལ་སྟན་གྱི་ནི་རིགས་པ་ཡིས། །རྗེས་ལ་བསྟན་པ་འདི་ལ་ཡང༌། །འདུལ་བའི་ཆོ་ག་ལ་མཁས་པས། །ངེས་པར་ལྟུང་བ་ཉིད་དུ་བཤད། །གཙུག་ལག་ཁང་དུ་ཐོབ་པ་ཡང༌། །ཆུ་ཡི་ནང་དུ་དོར་ནས་སམ། །ཁྱིམ་གཞན་དུ་ཡང་མི་བརྟུལ་ལམ། །ཅི་གར་མ་བརྟུལ་ཉེས་བྱས་སོ། །བསམ་གཏན་པ་ཡི་འཆག་པའི་ས། །ཁྲུ་ནི་བཅོ་བརྒྱད་དག་ཏུ་བྱ། །ཁ་ཏོན་པ་ཡི་ཁྲུ་བཅུ་གཉིས། །རྩུབ་ན་པར་ཐང་ལ་སོགས་གདིང༌། །གཞན་དུ་ནད་བསྐྱེད་འགྱུར་བ་སྟེ། །ས་གཞི་དག་ཏུ་གདིང་བར་བྱ། །བག་ཡོད་ཤེས་བཞིན་དང་བཅས་བཅག །ཟླ་བ་ཕྱེད་ཅིང་སྐྱང་ནུལ་བྱ། །དགེ་འདུན་གཙུག་ལག་ཁང་ནས་ནི། །སྡང་བས་དགེ་སློང་ཕྱིར་སྐྲོད་ན། །དགེ་སློང་ལ་ནི་ལྟུང་བྱེད་གསུངས། །དེ་འདྲའི་རྐྱེན་ཅན་མ་གཏོགས་སོ། །གལ་ཏེ་རང་མིན་དགེ་སློང་གཞན། །སྡང་བཅས་སྐྲོད་དུ་འཇུག་ན་ཡང༌། །དེ་དག་
གཉི་ག་ལ་ཡང་ནི། །ལྟུང་བྱེད་ཁོ་ནར་གསུངས་པ་ཡིན། །དགེ་ཚུལ་ལ་སོགས་རྣམས་ཀྱིས་ཀྱང༌། །སྡོམ་བརྩོན་སྐྲོད་དུ་འཇུག་བྱེད་ན། །དགེ་སློང་ལ་ནི་ལྟུང་བྱེད་དེ། །དེ་དག་ལ་ནི་འགལ་ཚབས་ཅན། །ཁ་ཟས་ངན་དང་བཟང་པོས་སམ། །གྲང་དང་དྲོ་སོགས་ཀྱིས་ཀྱང་རུང༌། །དགེ་སློང་ལ་ནི་ཐོ་འཚམས་ན། །ལྟུང་བྱེད་ཁོ་ནར་འགྱུར་བ་ཡིན། །བསྙེན་བཀུར་བ་དང་ཁྲུས་ཁང་དང༌། །ཁང་པའི་སྒོ་མོ་ཉིད་དང་ནི། །གནས་ཁང་མཛོད་དང་ཁང་བཟངས་སུ། །དགེ་སློང་ཉིད་ལ་གཏད་ནས་ནི། །འདུག་སྟན་གནས་དང་གནས་མལ་ལ། །དགེ་སློང་སྔ་ནས་གནས་པ་ལ། །འཚེ་བ་ཕྱིས་གནོན་ལྟུང་བྱེད་ཡིན། །གཙུག་ལག་ཁང་སྟེང་གནས་སུ་ནི། །སྤང་ལེབ་སོགས་ཀྱིས་ཕུབ་པ་ལ། །འདུག་པར་བྱ་སྟེ་ཁྲི་ཁང་དག །འབྱུང་བ་ལ་ནི་ལྟུང་བྱེད་འདོད། །དེ་བཞིན་ལེགས་པར་གནས་བཅས་དང༌། །རྩ་བ་འབྱུང་བ་ཞེས་བྱ་གང༌། །གཙུག་ལག་ཁང་གི་སྟེང་གི་ཐོག །ཤིན་ཏུ་མཁྲང་པ་མ་ཡིན་ལ། །མནན་པས་རྩ་བ་ཕྱིར་འབྱུང་བའོ། །རྐང་རྟེན་བྱས་པ་ཉིད་དང་ནི། །བཀན་ཏེ་བཞག་ནས་འདུག་པ་ལ། །འདིར་ནི་བཀག་པ་ཡོད་མིན་ཏེ། །ཉལ་བ་ལ་ཡང་ཚུལ་འདི་ཉིད། །ལྕགས་ཀྱི་གཟེར་བུས་བསྡམས་པ་དང༌། །རྩ་བ་བརྟན་པོ་དག་ལ་ཡང༌། །བལ་བ་ཛ་སོགས་བཅིངས་ཀྱང་རུང༌། །ཕུར་བུ་ལྟ་བུ་བཀག་པ་ཡིན། །སྲོག་ཆགས་བཅས་པའི་ཆུ་ཡིས་ནི། །རྩྭ་ཤིང་སོགས་ལ་འདེབས་བྱེད་དམ། །འདེབས་སུ་འཇུག་པ་ཉིད་ཀྱང་རུང༌། །སྡོམ་བརྩོན་ལ་ནི་ལྟུང་བྱེད་ཡིན། །སྲོག་ཆགས་བཅས་ལ་དེར་འདུ་ཤེས། །ཐེ་ཚོམ་གྱིས་ཀྱང་སྡོམ་ཅན་ལྟུང༌། །མེད་པར་འདུ་ཤེས་ཉེས་མེད་དེ། །ཐེ་ཚོམ་གྱིས་ཀྱང་ཉེས་བྱས་ཉིད། །བུམ་པ་དབྱར་ཐག་བཅས་པར་ནི། །སློང་ལ་སྟེར་བྱེད་ཉེས་པ་མེད། །རྙོག་པ་ཀ་ཏ་ཀ་སོགས་ཀྱིས། །དངས་པར་བྱས་ཏེ་བརྟག་པར་བྱ། །རྙོག་པ་ཉིད་དངས་བྱད་བཞིན་གྱི། །གཟུགས་བརྙན་གང་དུ་ལྟར་ཡོད་ཚང༌། །དེ་ནི་འབད་པས་བཙགས་ནས་ནི། །ཤིན་ཏུ་དག་པས་ཆུ་བཏུང་ངོ༌། །ཁྲོན་པ་བཀོད་མས་རྣམ་དག་དང༌། །ཞབས་ཚགས་ཅན་སོགས་དམ་པོ་དང༌། །དགེ་འདུན་དགེ་སློང་གིས་དག་པ། །རུང་བའི་ཆུ་ལྔ་ཡང་དག་གཟུང༌། །རིལ་ཚགས་ཞེས་བྱའི་
རྣམ་པ་དང༌། །དེ་བཞིན་གྲོལ་བར་བྱེད་པའི་རས། །གྲུ་གསུམ་པ་དང་ཞབས་ཚགས་ཏེ། །བུམ་ཚགས་གཅིའུ་ཅན་དང་ལྔ། །ཇི་སྲིད་དག་པར་ངེས་པའི་བར། །རྩེ་གཅིག་པ་ཡི་རྒྱུན་དུ་ནི། །འབད་པས་ཆུ་རྣམས་ཡོངས་བརྟག་སྟེ། །འོན་ཀྱང་བླ་འོག་ཡང་ཡང་མིན། །མ་ག་དྷཱ་པའི་སྨྱུག་མས་གང༌། །བ་ལང་དྲུག་པའི་ཤིང་རྟ་ནི། །ཡོངས་སུ་འཁོར་བའི་དུས་གང་གི །ཚད་དེར་ཆུ་དེ་ཡོངས་སུ་བརྟག །སྣོད་ཀྱི་སྐྱོན་ལ་སོགས་པ་ཡིས། །གལ་ཏེ་ཐེ་ཚོམ་འགྱོད་སྐྱེས་ན། །དེ་ནི་སླར་ཡང་བརྟག་བྱ་སྟེ། །ཐེ་ཚོམ་མེད་པར་ཡོངས་སུ་སྤྱད། །རྒྱང་གྲགས་ལྔ་ཡི་བར་དག་ཏུ། །སོང་ནས་ཕྱིན་པ་དེ་ན་ནི། །གྲོལ་བྱེད་རས་ལ་སོགས་པ་ཡི། །ཆུ་ཚགས་ཡོད་པ་ཡིན་ན་འགྲོ། །སླར་ལོག་པ་ཡི་བསམ་པ་ཡིས། །དཔག་ཚད་ཕྱེད་འགྲོ་ཉེས་མེད་དེ། །དོན་མཐུན་ལ་ནི་ཡིད་བརྟན་པས། །ཤིན་ཏུ་རྒྱང་རིང་སོང་ཡང་ངོ༌། །ཆུ་བོའི་རྒྱུན་བཞིན་འགྲོ་བ་ལ། །བརྟགས་པའི་ཆུ་འཐུང་ཉེས་པ་མེད། །ཆུ་གཞན་དང་ནི་མ་འདྲེས་ན། །རྒྱང་གྲགས་རེ་རེར་བརྟག་པར་བྱ། །རྒྱུན་ལས་བཟློག་ཕྱོགས་འགྲོ་བ་ཡིས། །འཇུག་དོགས་རེ་རེར་བརྟག་པར་བྱ། །ཆུ་གཞན་དང་ནི་འདྲེས་པ་ལའང༌། །སྔར་བསྟན་ཚུལ་འདི་ཉིད་ཤེས་བྱ། །ཁྲོན་པ་ལ་སོགས་ཆུ་བླངས་ནས། །ཆུ་དེ་གང་གི་ཡིན་པ་དང༌། །དེ་ཡི་ལྷག་པའི་ལྷ་ཡི་ཕྱིར། །བདེ་གཤེགས་ཀྱིས་གསུངས་ཚིགས་བཅད་འདོན། །བུམ་པའི་ཁ་ནི་བཟློག་པ་ཡིས། །ནམ་ཡང་ཆུ་བཏུང་མི་བྱ་སྟེ། །ལོ་མལ་སོགས་མ་རྙེད་ན། །དབེན་པར་འཐུང་ལ་ཉེས་པ་མེད། །རིལ་ཚགས་ལ་སོགས་ཁ་དག་ནི། །འདབ་མ་སོགས་ཀྱིས་ངེས་པར་དག་བ། །ཆུ་འཐུངས་དེ་རྗེས་བུམ་པ་སོགས། །མ་བཀབ་ཡལ་དོར་ཉེས་བྱས་ཡིན། །བུམ་པ་ལ་སོགས་དྲི་མ་ནི། །རབ་ཏུ་འབད་པས་བཀྲུ་བར་བྱ། །བསྐམ་འོས་དུས་ན་ཇི་སྲིད་དུ། །རུང་བའི་དོན་དུ་ཉེ་བར་བསྐམ། །ཁྱིམ་པས་ཁྱིམ་པ་ཉིད་ལ་སྟེ། །དགེ་ཚུལ་གྱིས་ནི་མི་རུང་ངོ༌། །དགེ་སློང་གིས་ནི་ཁྱིམ་པ་དང༌། །དགེ་ཚུལ་གཞན་ལ་རུང་བ་ཡིན། །དགེ་སློང་དེ་ཡིས་རྣམ་བརྟགས་པ། །གང་ཕྱིར་ཁྱིམ་པ་ལ་ཡང་རུང༌། །དགེ་སློང་ཡང་དག་གནས་པས་བརྟག །གཞན་དུ་བསླབ་ལ་གཡེལ་
བས་མིན། །ཁྲོན་པ་རྫིང་བུ་ལ་སོགས་པའི། །ཆུ་རྣམས་ཟས་སོགས་དྲི་མ་ཅན། །ཐེ་ཚོམ་མེད་པར་བཙགས་ནས་ནི། །དེ་ཡིས་རྟོག་པ་དེ་མེད་བྱ། །ཁྱིམ་པ་རྣམས་ཀྱིས་ཁྲོན་པ་སོགས། །ཡོངས་སུ་བརྟགས་པས་དག་པ་ཡིན། །དེ་ཡི་གནས་སྐབས་ཤེས་ནས་ནི། །དུས་མ་ཡིན་པར་ཡང་ནི་རུང༌། །བ་ལང་ལྷས་ལ་སོགས་པར་ནི། །དགེ་སློང་སོང་ཚེ་ཆུ་མེད་དམ། །ཉུང་ན་ཞོ་ག་ཆུའམ་ནི། །འོ་མ་སོགས་ཀྱིས་རྐང་བཀྲུར་རུང༌། །བཤད་པ་ཆང་དང་གཅི་བ་ཡི། །སྣོད་དག་རྣམ་པར་སྤང་བར་བྱ། །མར་ཁུ་ལ་སོགས་པ་ཡི་སྣོད། །མེ་དང་ཆུ་ཡིས་ཡོངས་སུ་སྤྱད། །ཉ་དང་རུས་སྦལ་གྱིས་བལྡགས་པའི། །གཤེར་གྱི་དྲི་མ་སྤང་བའི་ཕྱིར། །རུང་བའི་ཆུ་ནི་སྐོམ་པ་ལ། །དུས་མ་ཡིན་པར་ཡང་ནི་སྤྱད། །བུད་མེད་དག་ལ་དགེ་སློང་གིས། །ཆུ་སོགས་བླུད་པར་འདོད་པ་ན། །རྒྱུན་གྱིས་སྦྱིན་པར་མི་བྱ་སྟེ། །ཀུན་ནས་ཆགས་སེམས་ཀྱིས་ཀྱང་མིན། །སྒོ་ལེབ་ངོས་ཁུང་དག་དང་ནི། །སྨད་དུ་ཆུ་ཁུང་བཏོད་པ་དང༌། །སྐར་ཁུང་འབབ་སྟེགས་བཅས་པ་ཡི། །གཙུག་ལག་ཁང་ཆེན་བྱ་བ་ཡིན། །ཆར་དང་རླུང་ནི་བཟློག་པའི་ཕྱིར། །སྟེང་ནས་མནན་པར་བྱ་བ་ནི། །རྩྭ་བཅས་འཇིམ་པའི་གོང་བུ་དག །གཉིས་སམ་གསུམ་གྱི་བར་དུའོ། །དེ་ལས་ལྷག་པར་གང་འཇོག་པ། །ངེས་པར་ལྟུང་བྱེད་འགྱུར་བ་ཡིན། །སོ་ཕག་རྡོ་བ་དག་གིས་སམ། །ཐམས་ཅད་ཤིང་བྱེད་ཉེས་པ་མེད། །ཚུལ་ཁྲིམས་ལྡན་དང་ཐོས་པ་འཛིན། །གནས་བརྟན་རྒྱལ་ཚབས་ལྟ་བུ་དང༌། །ཕུན་ཚོགས་ཚིག་ལྡན་ལུས་ཀྱིས་ནི། །དགེ་སློང་མ་ནི་སུན་མ་ཕྱུང༌། །ཆོས་ལྔ་འདི་དང་ལྡན་པ་ལ། །དགེ་འདུན་གྱིས་ནི་བསྐོས་པ་དག །དགེ་སློང་མ་ལ་འདོམས་པ་སྟེ། །གཞན་དུ་ལྟུང་བ་ཉིད་ཡིན་ནོ། །མདོ་སྡེ་འདུལ་བ་ཆོས་མངོན་དང༌། །འབྲེལ་བའི་དོན་ནི་རབ་སྟོན་པ། །གདམས་པ་ཡིན་པར་འདྲེན་པ་ཡིས། །རྩོད་པ་མེད་པར་གསུངས་པ་ཡིན།། གནས་བརྟན་གྱིས་ནི་བསྟན་པའི་ཚིག །འཕགས་པའི་ཚོགས་ཀྱིས་བཞེད་པ་ནི། །སླར་ཡང་གདམས་པ་གཞན་འདི་ནི། །གཉིས་པར་ཡང་ནི་གསུངས་པ་ཡིན། །དགེ་སློང་མ་ཡི་དགེ་འདུན་ཁྱེད། །ཐམས་ཅད་ཡོངས་སུ་དག་གམ་དྲི། །ཁྱེད་ལ་རྗེས་སུ་སྟོན་པ་ནི། །དགེ་སློང་
སུ་ཡང་སྤྲོ་བ་མེད། །ངན་སོང་གསུམ་འགྲོ་འཇིགས་བྱེད་པས། །ཇི་ལྟར་བསླབས་པ་མི་འཁྲུགས་པ། །ཐུབ་པའི་བསྟན་ལ་རྟག་ཏུ་ནི། བག་ཡོད་སྒྲུབས་ཤིག་སྲིང་མོ་རྣམས། །གདུལ་བྱའི་འགྲོ་ལ་རྗེས་བརྩེ་བས། །འདུལ་བ་གང་དེ་རྒྱལ་སྲིད་བརྗོད། །དེ་ལྟར་འདི་ནི་ལེགས་པ་སྟེ། །དགེ་སློང་རྒྱལ་པོ་ཞེས་བྱའོ། །རེ་ཤིག་གདམས་པར་འདོད་པ་ནི། །ཚུལ་ལྡན་རྣམས་ཀྱིས་བསྐོས་པ་ཡང༌། །ཉི་མ་འཇིག་རྟེན་པ་ཡི་མིག །ཇི་སྲིད་མ་ནུབ་བར་དུའོ། །ནུབ་ལ་དེ་ནི་འདུ་ཤེས་སམ། །ཐེ་ཚོམ་གྱིས་ཀྱང་གདམས་ངག་དང༌། །རྗེས་སུ་སྟོན་ན་ཟད་པ་ཡིས། །ལྟུང་བྱེད་དང་ནི་ཡང་དག་ལྡན། །མ་ནུབ་ནུབ་པར་འདུ་ཤེས་སམ། །ཐེ་ཚོམ་གྱིས་ཀྱང་ངེས་པར་ནི། །ཉེས་བྱས་མངའ་ཡིས་ཕོག་པ་ཡི། །སྡུག་བསྔལ་ཆེན་པོ་མྱོང་བར་འགྱུར། །སྒོ་འམ་སྒོ་དང་ཉེ་བར་ཡང༌། །གལ་ཏེ་ཆར་ནི་འབབ་གྱུར་ན། །ཤིན་ཏུ་ཡུན་རིངས་འདོམས་པ་ལ། །ནུབ་ནས་ཀྱང་ནི་ལྟུང་བ་མེད། །དགེ་སློང་མ་ཡི་མཁས་རྣམས་ཀྱི། །བླ་མ་ཅི་ནུས་བསྙེན་བཀུར་བྱ། །དེ་ཡི་སྤྲོ་དང་བསོད་ནམས་དག །སྤེལ་ཕྱིར་བླ་མ་ཡིས་ཀྱང་སྤྱད། །ཕྲག་དོག་དྲི་མས་བསྒོས་སེམས་ཀྱིས། །དེ་ལ་སྨོད་བྱེད་དགེ་སློང་ནི། །ལྟུང་བས་ཀུན་ནས་བསླང་བ་ཡིས། །དམྱལ་མེ་སྦོར་བར་བྱེད་པ་ཡིན། །ཡང་ན་ཟང་ཟིང་འདོད་པ་ཡི། །སྲེད་པ་ཁོ་ནའི་དབང་གྱུར་པས། །གདམས་པ་བྱེད་ན་བདེན་པར་ནི། །སྨྲ་བྱེད་ཉེས་པ་ཡོད་མ་ཡིན། །ཉེ་དུ་མ་ཡིན་དགེ་སློང་མའི། །ཆོས་གོས་བྱེད་ན་ལྟུང་བྱེད་དོ། །འདི་ལ་སྟེར་ནའང་ལྟུང་བྱེད་དུ། །རྗེས་སུ་བསྟན་པ་ཁོ་ནའོ། །དགེ་སློང་འགྲོན་ལམ་འགྲོ་བ་ན། །དགེ་སློང་མ་ཡི་གྲོགས་བྱེད་བཀག །ཆོམ་རྐུན་ལ་སོགས་འཇིགས་བཅས་པའི། །ལམ་དུ་ལྟུང་བར་མི་འདོད་དོ། །དགེ་སློང་རྣམས་ཀྱིས་དགེ་སློང་མ་འམ། །དགེ་སློང་ཡང་ནི་དགེ་སློང་མས། །ལམ་དུ་ནན་བསྐུར་བྱ་སྟེ། །ཁུར་བྱེད་ཡེ་མེད་གྱུར་ནའོ། །དགེ་སློང་མ་ཡིས་འོངས་པ་ཡི། །ལམ་རྒྱགས་དགེ་སློང་ལ་ནི་རུང༌། །དགེ་སློང་གིས་འོང་དེ་ལ་ཡང༌། །རྣམ་པ་ཀུན་ཏུ་བཀག་པ་མེད། །དགེ་སློང་དགེ་སློང་མ་དང་ནི། །ལྷན་ཅིག་རྒྱུན་དང་བཟློག་ཕྱོགས་སུ། །གྲུང་འཇུག་པ་ནི་བཀག་པ་ཡིན། །
འཇིགས་བཅས་ཐད་འགྲོ་ཉེས་པ་མེད། །དབེན་པར་བུད་མེད་གཅིག་དང་ནི། །དགེ་སློང་གཅིག་པུ་ལྷན་ཅིག་ཏུ། །འདུག་པས་གནས་པར་མི་བྱ་སྟེ། །ཁྱད་པར་དགེ་སློང་མ་དང་འགྲེང༌། །དགེ་སློང་གི་ནི་ཟང་ཟིང་ཟས། །དགེ་སློང་མ་ཡི་སྦྱོར་བཅུག་པ། །སྔར་ནི་མགྲོན་དུ་གཉེར་བ་ཡིས། །ཡོངས་སུ་སྤྱོད་ལ་ཉེས་པ་མེད། །སྒྲུབ་པ་དང་ནི་ཐོས་པ་ཡིས། །སྦྱོར་བཅུག་པ་ནི་རྣམ་པ་གཉིས། །སྒྲུབ་པ་རྒྱུན་དུ་ཞུགས་པ་ནས། །ཇི་སྲིད་དགྲ་བཅོམ་གྱུར་གྱི་བར། །ཐོས་པ་མདོ་སྡེ་འདུལ་བ་དང༌། །མ་མོ་འཛིན་པ་ཉིད་ཀྱང་སྟེ། །དེ་ཉིད་བདེན་པ་ཡིན་ན་ནི། །ཡོངས་སུ་སྤྱད་ཀྱང་ཉེས་པ་མེད། །མི་བདེན་ཡོན་ཏན་སྨྲ་བ་ཡིས། །རྙེད་པ་སྦྱོར་བཅུག་ཟོས་ན་ལྟུང༌། །ནད་དང་ཆོས་གོས་ལས་དང་ལམ། །དུས་མ་གཏོགས་པར་སྡོམ་བརྩོན་ནི། །ཟས་ནི་གཞན་དུ་འདོད་པ་ཡིས། །ཡང་ཡང་ཟ་ན་ལྟུང་བྱེད་ཡིན། །ལན་ཅིག་ཟོས་པས་མི་འཚོ་བ། །དེ་ནི་ནད་པ་ཞེས་བྱའོ། །ཡུལ་བཞིར་གྲུ་གང་ཙམ་གྱིས་ཀྱང༌། །ཆོས་གོས་ཀྱི་ནི་དུས་སུ་འདོད། །གཙུག་ལག་ཁང་ངམ་མཆོད་རྟེན་ལ། །ཐ་ན་རེ་ལྡེ་ཙམ་ཡང་རུང༌། །བྱུག་གམ་ཀུན་ནས་སྙོམས་བྱེད་ན། །ལས་བྱེད་དུས་སུ་བརྗོད་པ་ཡིན། །དཔག་ཚད་ཕྱེད་དུ་སོང་ནས་ནི། །སྡོམ་བརྩོན་སླར་ཡང་ལོག་པ་ན། །དེ་ནི་ལམ་དུས་ཤེས་བྱ་སྟེ། །ཡང་ཡང་ཟ་ལ་ཉེས་པ་མེད། །ཆོས་གོས་བཅས་པར་རྗེས་གནང་བས། །ཆོས་གོས་མེད་པར་ཁས་མི་བླང༌། །ཕྱི་མའི་ཟ་བ་འབའ་ཞིག་ལ། །དང་དུ་བླངས་ན་ཉེས་བྱས་ཡིན། །དང་པོར་གོས་ནི་མེད་པ་དང༌། །ཕྱི་མའང་གོས་བཅས་ཡིན་གྲང་ན། །གང་ཕྱིར་སྟོན་མོ་གཉི་གཡང༌། །ཟ་བ་ལ་ནི་བཀག་པ་མེད། །དང་པོ་ཡང་ནི་གོས་བཅས་ལ། །ཕྱི་མའང་གོས་ཅན་ཡིན་ན་ནི། །གཉི་ག་ལ་ཡང་ཅི་འདོད་དུ། །ཟ་བ་བཀག་པ་ཡོད་མ་ཡིན། །ཆོས་གོས་བོར་ནས་མེད་གྱུར་ཏེ། །གོས་བཅས་དང་དུ་ལེན་པ་ལ། །ཀུན་ཏུ་གོས་ནི་མི་རྙེད་ཕྱིར། །ཀུན་མཁྱེན་ཐུགས་རྗེ་ཅན་གྱིས་གནང༌། །གྲོང་དུ་འགྲོན་དུ་གཉེར་བ་ན། །དགེ་འདུན་མཐའ་དག་གོ་བྱས་ནས། །རྒན་པོ་གཙུག་ལག་ཁང་སྐྱོང་གིས། །དུས་སུ་གཎྜཱི་བརྡུངས་བྱས་ན། །དགེ་སློང་རང་གི་སྡེ་བ་དང༌། །གློ་བུར་ལྷག་པ་མཐོང་
བ་ལ། །འགྲོ་བའི་ཆེད་དུ་བསྐུལ་བྱ་སྟེ། །གཞན་དུ་འགལ་ཚབས་ཅན་དུ་འགྱུར། །དགེ་སློང་མུ་སྟེགས་འདུག་གནས་སུ། །འདུག་ནས་དེར་ནི་གཡོས་པའི་ཟས། །ཞག་གཅིག་ལས་ལྷག་ཟོས་ན་ནི། །ནད་པ་ལས་གཞན་ལྟུང་བར་འགྱུར། །ནད་པ་མིན་པས་ཉིན་ཞག་ནི། །གཉིས་པར་གནས་ན་ཉེས་བྱས་ཡིན། །བཟའ་བ་ཟོས་ན་ལྟུང་བྱེད་དེ། །གཞན་ནས་དེར་ཟ་ན་ཡང་ངོ༌། །སྤྱིར་ན་རྗེ་བོས་གསུངས་པ་ནི། །ཉེ་དུ་འབྲེལ་པ་ཁོ་ན་ལ། །ལན་བརྒྱ་བཟའ་བ་ཟོས་ཀྱང་ནི། །ལྟུང་བའི་དྲི་མ་ཡོད་མ་ཡིན། །ཅི་བདེར་སྟོབས་པ་མ་ཡིན་པར། །དགེ་སློང་ཕྱེ་དང་ཁུར་བ་ཡིས། །གང་བའི་ལྷུང་བཟེད་གཉིས་གསུམ་ལས། །ལྷག་པའི་ལེན་ན་ལྟུང་བྱེད་ཡིན། །ལྷུང་བཟེད་ཆེན་པོ་གཉིས་དང་ནི། །ཆུང་དུ་གཉིས་དང་ཆེན་པོ་ཕྱེད། །ལྷུང་བཟེད་ཆུང་དུ་གསུམ་དང་ནི། །འབྲིང་པོ་གཉིས་སུ་གང་བསྟན་པ། །འབྲིང་པོ་གཉིས་དང་ཆུང་དུ་གཅིག ། ཆེན་པོ་གཅིག་དང་ཆུང་དུ་གཅིག །ལེན་ལ་ལྟུང་བ་ཡོད་མིན་ཏེ། །འབྲིང་པོ་གསུམ་དུ་ལེན་པ་ལ། །ཉེས་བྱས་ངེས་པར་ཐོབ་པ་ཡིན། །བསྟན་བཞིན་ལྷུང་བཟེད་གང་བ་ལས། །གཞན་ལེན་དགེ་སློང་ལྟུང་བྱེད་ཡིན། །གཞན་དུ་ལྷུང་བཟེད་གང་བར་ནི། །ལེན་པར་བྱེད་ལ་ཉེས་པ་མེད། །ཕན་སེམས་ཉེ་དུའི་ཁྱིམ་ལས་གང༌། །ལེན་ལ་ཉེས་པ་ཡོད་མིན་ཏེ། །དེ་བླངས་ལྷན་ཅིག་གནས་པ་ཡི། །དགེ་སློང་རྣམས་ལ་བགོ་བཤའ་བྱ། །བཟའ་བ་སྤངས་ནས་གང་ཟ་བ། །དགེ་སློང་རྣམས་ལ་མ་བརྟགས་ཡིན། །ལྷག་པོར་ལེགས་པར་མ་བྱས་པ། །དེ་ལ་ངེས་པར་ལྟུང་བྱེད་འདོད། །བཟའ་བར་བྱ་བ་སྤངས་ནས་འདིར། །ནམ་ཡང་རྗེས་སུ་མ་གནང་སྟེ། །བཟའ་བ་སྤངས་ནས་སླར་ཡང་འདིར། །བཅའ་བ་འཆའ་བ་ཉིད་ཀྱང་ངོ༌། །སྣ་ཚོགས་ཆན་དང་ཟན་དང་ཤ །ཕྱེ་དང་ཁུར་བ་བཟའ་བ་སྟེ། །རྩ་བ་སྡོང་བུ་མེ་ཏོག་འབྲས། །ལོ་མ་ཡང་ནི་བཅའ་བ་ལྔ། །གང་དུ་ཟང་ཟིང་ཞེས་བྱར་བརྗོད། །བཟའ་བ་རྣམས་སུ་ཤེས་བྱ་སྟེ། །དེ་སྟེར་དེ་ཡི་རྣམ་འགྱུར་དང༌། །སྤངས་དང་སྟན་ནི་བོར་བ་སྟེ། །གནས་ནི་ལྔ་པོ་འདི་དག་ལ། །དགེ་སློང་སྤངས་པ་ཞེས་བྱར་བརྗོད། །གཞན་དུ་འདི་དག་མིན་པ་ལ། །སྤངས་པ་ཡོད་པ་མ་ཡིན་ནོ། །རེ་ཞིག་ཚིག་དང་ལྡན་པ་ཡིས། །
ཚིམ་པར་གྱུར་པའི་མཐར་ཕྱིན་ཏེ། །དེ་བཞིན་སོང་ཤིག་བརྗོད་པ་ཡིས། །སྤང་བར་གྱུར་ལ་ཉེས་པ་མེད། །གློ་ནས་མ་ཡིན་རྒྱབ་ནས་མིན། །པང་དུ་མ་ཡིན་ནམ་མཁར་མིན། །དཀྱིལ་འཁོར་དག་གི་སྟེང་དུ་ཡང༌། །ནམ་ཡང་ལྷག་པོར་མི་བྱའོ། །འབད་པས་ལག་པ་རབ་བཀྲུས་ནས། །ཁ་ཟས་དེ་ནི་ཡོངས་སུ་བླང༌། །འདུག་ས་མང་པོར་དགེ་སློང་གིས། །གང་ཟོས་དེ་ནི་ལྷག་པོར་མིན། །གུས་པས་དེ་ཡི་མདུན་དུ་ནི། །ཙོག་པུར་འདུག་ནས་འདི་སྐད་བརྗོད། །བཙུན་ པ་དགོངས 
་ཤིག་བཟའ་བ་དག །ལྷག་པོར་བྱས་པ་བཟའ་བར་འཚལ། །འདི་ནི་བདག་གིས་ཕུན་ཚོགས་པའི། །བཟའ་བ་ལ་སོགས་རུང་བ་སྟེ། །ལྷག་པོར་མཛད་ནས་གསོལ་ཅིག་ཅེས། །གུས་དང་བཅས་པས་བརྗོད་པར་བྱ། །དེས་ཀྱང་དེ་ལ་ཁམ་གཉིས་སམ། །ཁམ་གསུམ་ཟོས་ནས་དེ་ལ་ཁྱོད། །སོང་ཤིག་ཇི་ལྟར་བདེ་བར་ནི། །འདི་དག་རྣམས་ནི་བཟའ་བར་གྱིས། །དེ་ནི་ཟོས་ནས་སྤངས་པ་དང༌། །གནས་ལས་མ་ལངས་པ་ཡིས་ནི། །ཡོན་ཏན་ཅན་གྱི་མདུན་འདུག་ནས། །ཆོ་ག་སྔ་མ་བཞིན་དུ་བྱ། །དེ་ཡིས་མ་ཟོས་པ་ན་ཡང༌། །དེ་ལ་དེ་ནི་བྱ་བ་སྟེ། །སོང་ལ་འདི་ནི་ཅི་བདེར་ཟོ། །ཚུལ་འདི་ལྷག་པོར་ཆོ་གར་བརྗོད། །སྡོམ་བརྩོན་མགུལ་བར་བཏུང་བྱ་བ། །འོ་མ་ཞོ་ལ་སོགས་པ་ལ། །ཚུལ་འདི་ངེས་པར་བརྟག་མི་དགོས། །ནས་ལ་སོགས་པའི་ཐུག་པ་ནི། །ཐུག་པ་སོར་རྗེས་ཡོད་པ་དང༌། །གང་དུ་སྟེང་ནི་སླ་བར་གནས། །གཏིང་ན་སྐ་བར་གནས་མཐོང་ནས། །སྐ་དེ་མཛུབ་མོས་ལྡག་བྱེད་ལ། །སྤངས་པ་ཡོད་པ་ཁོ་ན་སྟེ། །སྤངས་པ་དེར་ནི་འདུ་ཤེས་པས། །ཐོས་སམ་ཐེ་ཚོམ་གྱིས་ཀྱང་རུང༌། །ལྟུང་བྱེད་དམྱལ་བའི་ལམ་རྣམས་སྤྱོད། །གང་དུ་མ་སྤངས་པར་ཡང་ནི། །གང་ཕྱིར་སྤངས་པར་འདུ་ཤེས་སམ། །ཐེ་ཚོམ་ཁོ་ན་ཡིས་ཀྱང་རུང༌། །ཉེས་བྱས་སྡུག་བསྔལ་སྟེར་བྱེད་ཡིན། །དགེ་སློང་གང་ཞིག་རབ་སྤངས་ནས། །ལྷག་པོར་མ་བྱས་དགེ་སློང་གིས། །གང་ཕྱིར་ངན་སེམས་བསམས་པ་ཡི། །བཟའ་བ་སྟོབས་པ་ལྟུང་བྱེད་དོ། །ལྷུང་བཟེད་རྐང་པ་གཉིས་དག་གིས། །མནན་ནས་ནམ་ཡང་བཟའ་མི་བྱ། །བདེར་གནས་ཡིན་ན་ལྟུང་འགྱུར་ཏེ། །ནད་ཅན་དག་ལ་ཉེས་པ་མེད། །མཆིལ་ལྷམ་གྱོན་ནས་བཟའ་བདག །མི་རུང་
དགེ་སློང་ནད་མ་གཏོགས། །དེས་ཀྱང་མཆིལ་ལྷམ་སྟེང་དུ་ནི། །རྐང་པ་བཞག་གི་གཞན་དུ་མིན། །འདྲེན་བྱེད་རྒྱབ་དང་རྒྱང་རིང་དང༌། །གློ་དང་ཆོ་ག་མི་ཤེས་དང༌། །དགེ་སློང་གིས་བསྐྱོང་བླང་མི་བྱ། །ལག་པ་མ་བཀན་པས་ཀྱང་མིན། །འདྲེན་པ་ཉེ་བར་གནས་པ་དང༌། །མདུན་དུ་འདུག་དང་ཆོ་ག་ཤེས། །ལག་པ་དག་ནི་བཀན་པ་ཡིས། །དགེ་སློང་གིས་ནི་ལེགས་པར་བླང༌། །ལྷུང་བཟེད་བྱིན་གྱིས་བརླབས་པར་ནི། །བཟའ་བ་གང་ཞིག་ལྷུང་གྱུར་པ། །ཐེ་ཚོམ་མེད་པའི་སེམས་ཀྱིས་ནི། །བྱིན་ལེན་བྱས་ཡིན་བཟའ་བར་རུང༌། །རྡུལ་ནི་མེ་ཏོག་འབྲས་བུ་ཟན། །ལྟུང་བ་དང་ནི་གོས་ཀྱང་རུང༌། །གང་ཞིག་སོག་འཇོག་དེ་ལས་གཞན། །རུང་བ་དང་ནི་མི་རུང་གང༌། །བརྟགས་པ་འདི་དག་དགུ་པོ་སྟེ། །བཅུ་པོ་རྡུལ་གྱི་རྡུལ་ཡིན་ནོ། །གཟུགས་ནི་གསལ་པོ་མ་ཡིན་པ། །དེ་དག་ལ་ནི་ཉེས་པ་མེད། །སོག་འཇོག་བྱས་པ་དེ་དང་གང༌། །བྱིན་ལེན་མ་བྱས་པ་ཡི་ཟས། །དེ་ཡིས་གོས་སོགས་འབགས་གྱུར་ན། །བཀྲུའོ་གཞན་དུ་ཉེས་བྱས་ཡིན། །ལན་ཚྭ་ལ་སོགས་བྲིམས་ནས་ནི། །གསར་དུས་བླང་བར་མི་བྱ་སྟེ། །ཟས་ལ་མི་མཐུན་མེད་པར་ནི། །ཇི་བཞིན་དུས་སུ་ངེས་པར་བསྟན། །གང་ཞིག་རྒན་པོའི་གོང་དུ་ཟ། །ངེས་པ་འམ་ཐེ་ཚོམ་གྱིས་ཀྱང་ནི། །དེ་ལ་ཉིན་ཞག་རེ་རེ་ལ། །ཉེས་བྱས་ངེས་པར་འཕེལ་བ་ཡིན། །བརྟགས་པས་ངེས་པར་གཞན་ཕྱིར་བྱིན། །དེ་ནི་སྲེད་པས་ཅུང་ཟད་ཅིག །བྱིན་ལེན་བྱས་ཀྱང་དེ་ལ་དེ། །དེ་ཚེ་སྤྱད་པར་རུང་མ་ཡིན། །སྦྱིན་པ་པོ་ཡིས་ལྟོས་མེད་པར། །གང་གཏད་ལེན་པས་ཐོབ་པ་ནི། །དེ་ནི་བྱིན་ལེན་དག་པ་སྟེ། །ཟོས་པ་ན་ཡང་ཉེས་པ་མེད། །ང་ལ་འདི་ལས་འདི་བྱིན་ཞེས། །འདྲེན་པ་པོ་ལ་སྨྲ་མི་རུང༌། །རིགས་པས་ཐོབ་པར་བཟའ་བྱ་ཡིས། །གཞན་མིན་ནད་པས་ཉེས་པ་མེད། །སྡོམ་བརྩོན་ཟོས་ནས་ལྷག་མ་ཡི། །ཆང་བུ་ཡང་ནི་ཅི་བདེར་གཞག་བྱ་རོག་སོགས་ལ་དམིགས་པ་ཡི། །ཀུན་སློང་ཁྱད་པར་མི་བྱའོ། །གློ་བུར་ལྷགས་དང་འགྲོ་འདོད་དང༌། །དགེ་སྐོས་དང་ནི་ནད་པ་དང༌། །དེ་ཡི་ནད་གཡོག་ཉིད་ལ་ཡང༌། །བཟའ་བ་སྔར་ནི་སྦྱིན་པར་བྱ། །གྲོ་བཞིན་སྐྱེས་ཀྱི་དབང་བྱས་ནས། །བཏུང་བ་དགེ་འདུན་ལ་ཡང་གནང༌། །དེ་ཡི་ཕྱིར་ན་
ཞིང་དག་ནི། །གཟུགས་ཅན་སྙིང་པོས་ཕུལ་བར་བཤད། །འབྲས་ཆན་ཐུག་པ་ཟན་དྲོན་དང༌། །ཉ་དང་ཤ་ནི་རུང་བ་སྟེ། །འཚོ་བ་སྲུང་ཕྱིར་འདི་དག་ནི། །བཟའ་བར་བྱ་བའི་སྨན་དུ་གསུངས། །རྒུན་འབྲུམ་ཨ་ཤྭད་འབྲ་གོ་དང༌། །ཀུ་ཤུ་ཆུ་ཤིང་རྩུབ་འགྱུར་དང༌། །ཨུ་དུམ་ཝཱ་ར་རྒྱ་ཤུག་དག །བཏུང་བར་རྗེས་སུ་བསྔགས་པ་ཡིན། །ཁྱིམ་པ་དང་ནི་དགེ་ཚུལ་གྱིས། །ལེགས་པར་མཉེ་ཞིང་ཡོངས་སུ་བཙགས། །འདི་དག་བཏུང་བ་ཐུན་ཚོད་པ། །སྐྱུར་པོ་ཞོ་ག་ཆུ་དེ་བཞིན། །འབྲུ་མར་བུ་རམ་སྦྲང་རྩི་དང༌། །མར་དག་ཞག་བདུན་པར་ནི་གསུངས། །ཤ་ཁར་བྱེ་མ་ཀ་ར་དག ། འདི་དག་ཆུ་ལ་གདུས་པ་སྟེ། །གཞན་ཡང་ཇི་སྲིད་འཚོ་བའི་སྨན། །རྩ་བ་སྡོང་བུ་སོགས་སྦྱར་བ། །ཚུལ་བཞིན་དུ་ནི་བྱིན་བརླབས་ཏེ། །ཡོངས་སུ་སྤྱད་པར་རུང་བ་ཡིན། །རྩ་བ་གླ་སྒང་སྒེའུ་གཤེར་སོགས། །སྡོང་བུར་ཡོངས་སུ་གྲགས་པ་ནི། །ཙནྡན་ཐང་ཤིང་སླེ་ཏྲེས་དང༌། །སྤུར་དང་པདྨ་དཀར་ལ་སོགས། །འདབ་བདུན་པ་ཏོ་ལ་སོགས་ནི། །ལོ་མའོ་དེ་དག་མེ་ཏོག་ཀྱང༌། །འབྲས་བུ་ན་ལེ་ཤམ་དང་ནི། །སྐྱུ་རུ་ཨ་རུ་བ་རུ་སོགས། །ཤིང་ཀུན་སྤྲ་ཚིལ་རྒྱ་སྐྱེགས་དང༌། །དེ་བཞིན་ཐང་ཆུ་དག་ཀྱང་སྟེ། །ཏིལ་ཚིགས་ལ་སོགས་འགྱུར་བྱེད་ལྔ། །དེ་བཞིན་དུ་ཡང་ཚ་ལྔའོ། །ཨ་མྲ་ཨ་མྲའི་ནང་ཤུན་དང༌། །འདབ་བདུན་པ་དང་ཤི་རི་ཤའི། །ཤུན་པ་དག་གི་སྨན་རྣམས་ནི། །ཇི་སྲིད་འཚོ་བ་ཞེས་བྱའོ། །གང་གཞན་དེ་འདྲའི་རིགས་དག་ནི། །བཟའ་བའི་དོན་དུ་བཅང་མིན་པ། །ཟོས་ཀྱང་བཀྲེས་པ་མི་སེལ་ཕྱིར། །འདི་དག་ཇི་སྲིད་འཚོ་བའི་སྨན། །རྒུན་འདྲུ་མ་བལ་སེའུ་འབྲ་གོ་དང༌། །ཨ་མྲ་ལ་སོགས་འབྲས་བུ་སྟེ། །ཨུཏྤལ་ལ་སོགས་རྩ་བ་དག །མཁས་པས་དུས་སུ་རུང་བར་གསུངས། །དུས་སུ་རུང་སོགས་འདི་དག་ནི། །ཕན་ཚུན་འདྲེས་པར་གྱུར་པ་ན། །སྔ་མ་སྔ་མའི་དབང་བྱས་ནས། །ཡོངས་སུ་སྤྱད་ལ་ཉེས་པ་མེད། །ཉ་དང་རུས་སྦལ་ཕག་པ་དང༌། །ཉ་སྒོང་ཆུ་སྲིན་བྱིས་པ་གསོད། །དོམ་དང་རི་བོང་ཕག་རྒོད་དྲེད། །ཚིལ་ཞག་བྱིན་ལེན་བྱས་སྤྱོད་རུང༌། །ཤ་རྗེན་ཟ་བ་དག་ལ་འདིར། །དྲི་ཞིམ་རྫས་ཀྱི་ཕྱེ་མར་བཅས། །སྨན་པའི་ངག་གིས་ནད་སོས་གནང༌། །དེ་ལས་ཕར་ནི་མ་ཡིན་
ནོ། ཤ་ནི་བཟའ་བར་མ་ཡིན་པ། །མི་དང་ལྟོ་འཕྱེ་གླང་པོ་སོགས། །འདྲི་མ་ན་དགེ་སློང་མཁས་རྣམས་ཀྱིས། །འདི་ནི་གང་གི་ཤ་ཞེས་དྲི། །མཆོད་རྟེན་ཉེ་འཁོར་བླ་གབ་མེད། །སྒོ་དང་བང་རིམ་ཆུ་ཡི་གནས། །ཁྱམས་དང་གནས་ཁང་དག་ཏུ་ནི། །བཟའ་སོགས་འཚེད་པ་རྣམ་པར་སྤངས། །སེམས་བསྡུས་ལ་སོགས་ཆོ་ག་ཡིས། །རུང་བའི་གནས་ནི་རྣམ་པ་ལྔ། །འདྲེན་པས་གཙུག་ལག་ཁང་དུ་ནི། །ཟས་གནས་དགེ་འདུན་དོན་དུ་གསུངས། །གཙུག་ལག་ཁང་གི་ཐིག་བརྐྱང་ནས། །སོ་ཕག་ཉེ་བར་འཇོག་པ་ན། །ལག་གི་གླ་ནི་མཁས་པ་ཡིས། །ཕན་འདོད་སེམས་བསྐྱེད་བྱ་བ་ཉིད། །ཚོགས་ཀྱི་རུང་བའི་གནས་སུ་ནི། །ས་ཕྱོགས་འདི་ནི་བྱིན་གྱིས་བརླབས། །ངག་ཏུ་ཡང་ནི་ལན་གསུམ་བརྗོད། །དེ་ལྟར་སེམས་བསྐྱེད་སྔོན་འགྲོ་བས། །གཙུག་ལག་ཁང་ཕྱེད་ཟིན་པ་ལ། །ལག་བླས་དགེ་འདུན་མདུན་འདུག་ནས། །འདི་ལ་སེམས་རབ་སྡུས་ཤིག་ཅེས། །ལན་གསུམ་བར་དུ་བརྗོད་པར་བྱ། །འདི་ཉིད་ཟས་ཀྱི་གནས་ཉིད་དུ། །མཛེས་པའི་དངོས་པོར་བྱིན་གྱིས་བརླབས། །དེ་ལྟར་བྱེད་ལ་སེམས་བསྡུས་པའི། །མཐའ་ལས་བྱུང་བར་མཁས་པས་གསུངས། །གཙུག་ལག་ཁང་ཆེན་མང་པོ་དག ། སྣ་ཚོགས་སྒོ་ནི་ཐ་དད་ན། །གཅིག་ཏུ་ལེགས་པར་བྱ་བ་སྟེ། །ཀུན་ནས་བ་ལང་ལྷས་བཞིན་ནོ། །གཙུག་ལག་ཁང་རྙིང་ཉམས་གྱུར་ཅིང༌། །དགེ་སློང་རྣམས་ཀྱིས་བོར་བ་ན། །འཕྲལ་བྱུང་གྱུར་ལ་ཚིག་གི་མཐར། །གང་དེ་བྱིན་གྱིས་བརླབ་པར་བརྗོད། །གཞན་ཡང་འདོད་དོན་གཅིག་པ་དང། །ལས་བརྗོད་པ་ནི་སྔོན་འགྲོ་བས། །དགེ་འདུན་མཐུན་པས་ལས་དག་གི །ཆོ་ག་ཞེས་བྱ་རྫོགས་ལའོ། །དེ་ལྟར་ཟས་ཀྱི་གནས་གང་དག །སྡོམ་བརྩོན་གྱིས་ནི་མ་བྱས་ན། །གང་ཞིག་བཙོས་པའི་ཟས་དང་ནི། །ཞག་ལོན་པ་ཡང་རུང་མ་ཡིན། །སེན་མོ་ནེ་ཙོ་མེ་མཚོན་སོགས། །རྙིངས་དང་དབུག་དང་བརྟོལ་བ་དང༌། །བཅད་དང་གཤེགས་པའི་མིང་ཅན་གྱི། །ས་བོན་བཅས་པའང་རུང་བ་ཡིན། །རྒན་པོའི་མདུན་དུ་འདྲེན་པ་ཡི། །སམ་པྲས་ཏ་ཞེས་བརྗོད་བྱ་སྟེ། །དེ་སྒྲ་བཟའ་དང་བཏུང་བ་རྣམས། །ཤིན་ཏུ་དག་པར་བྱ་ཕྱིར་ཡིན། །གནས་བརྟན་ཀྱང་བ་བདེན་
པར་ནི། །སྙོམས་པར་བྲིམས་ཞེས་བརྗོད་པར་བྱ། །ཤེས་བཞིན་ལྡན་པས་བཟའ་བྱ་ཞིང༌། །ཟོས་ནས་ཀྱང་ནི་ཡོན་བཤད་བྱ། །ཡོན་བཤད་ལ་ནི་འདུག་པ་ན། །དགེ་སློང་གང་གིས་བཟར་མི་རུང༌། །དེ་མ་ཐོས་ལ་ཉེས་མེད་དེ། །གཞན་དེར་ཅི་བདེར་བཟའ་བར་བྱ། །ཚིགས་བཅད་དང་པོ་བརྗོད་པ་ན། །ཉེ་བར་གཏད་དེ་བསྡད་ནས་ཀྱང༌། །ཚིགས་བཅད་མཐར་ཡང་ཉེན་བྱེད་ན། །དེ་ཟ་བ་ལ་བཀག་པ་མེད། །དགེ་འདུན་གྱི་ནི་རྒན་པོའམ། །ནུས་ལྡན་གཞན་གྱིས་ཀྱང་ནི་བརྗོད། །སྦྱིན་བདག་རྣམས་ཀྱི་འདོད་པ་དང༌། །བསམ་པ་ཇི་བཞིན་ཆོས་བསྟན་ཏོ། །ཆོས་ནི་འཆད་པ་པོ་ལ་ཡང༌། །ཉེ་གནས་གཡོག་འཁོར་དོན་དུ་ནི། །དགེ་སློང་རྣམས་ནི་སྦྱིན་བྱ་སྟེ། །གཅིག་པུ་གྲོང་དུ་མཛེས་མ་ཡིན། །དགའ་སྟོན་དུས་ཚེ་སྐུ་གཟུགས་ནི། །རྒན་པོའི་གོང་དུ་རྟག་ཏུ་བཞག །སྟོན་པ་དང་ནི་དགེ་འདུན་བཅས། །འཇིག་རྟེན་གསུམ་སྣང་ཁྱབ་བདག་ཡིན། །མཚན་མོ་སྒྲོན་མེ་མེད་པར་ནི། །ཆོས་ཉན་པ་དང་བཤད་མི་བྱ། །དབྱར་གྱི་དུས་སུ་རྟག་ཏུ་ནི། །འོད་ཁང་མིག་བརྒྱ་པ་ཡིས་དགབ། །ཁྱིམ་ནས་ཁྱིམ་དུ་དགེ་སློང་རྣམས། །དགོས་པས་མགྲོན་དུ་བོས་པ་ན། །ཁང་བཟངས་གཞན་དུ་ནམ་ཡང་ནི། །དེ་ནས་དེ་དག་འགྲོ་མི་བྱ། །འཕགས་པའི་དགེ་འདུན་ཚུལ་བཞིན་དུ། །ཅི་བདེར་བཟའ་བ་ཟོས་ནས་ནི། །སྦྱིན་བདག་གིས་ནི་གནང་བ་དང༌། །འགྲོ་བར་བྱེད་ལ་ཉེས་པ་མེད། །ཤ་དང་ཉ་སོགས་འཇིག་རྟེན་ན། །དམ་པའི་སྐྱེ་བོས་མ་སྨད་གང༌། །ལྷུང་བཟེད་འོངས་པ་དེ་བཟའ་སྟེ། །དེ་འདྲས་ལྟུང་བར་མི་འགྱུར་རོ། །གང་ཞིག་ཆེད་དུ་བྱས་པའི་ཤ ། མཐོང་ངམ་ཐོས་སམ་དོགས་པ་ནི། །ནམ་ཡང་བཟའ་བར་བྱ་མིན་པར། །འགྲོ་ཀུན་ཕན་པར་བཞེད་པས་གསུངས། །རོ་ལ་བརྐམ་པས་གསོད་བྱེད་པ། །སྙིང་རྗེ་མེད་པའི་བསམ་པ་སྤང༌། །གང་ཞིག་སྲོག་གནས་ཆེད་དུ་ནི། །ཤ་ཟ་བ་ལ་ཉེས་པ་མེད། །སྟག་གིས་མཆེ་བས་བཟུང་བ་ནི།། མཐོང་ངམ་ཐོས་པ་ཉིད་ན་ཡང༌། །དེ་ནི་བཟའ་བར་མི་བྱ་སྟེ། །དེ་ཡིས་ནམ་ཡང་མི་གཏོང་ཕྱིར། །སྒོག་སྐྱ་ལ་སོགས་སྨན་རྣམས་ནི། །ནད་པ་དག་ལ་རྗེས་གནང་སྟེ། །གང་ཕྱིར་ཚེ་སྲོག་དགེ་བ་ཡི། །ཆོས་རྣམས་ཀྱི་ནི་སྣོད་ཡིན་ཕྱིར། །གང་དུ་དགེ་སློང་རྣམས་ཀྱི་དྲི། །མ་དད་པ་ཡིས་མི་
སྣོམ་ན། །དེ་ལ་ཉེས་སྦྱོར་རྣམས་ཀྱིས་ཀྱང༌། །གནས་ཀྱི་བྱ་བའི་རྒྱུར་ཤེས་བྱ། །བྱ་བ་རྫོགས་པའི་མཐར་ཡང་ནི། །ལུས་ནི་རྣམ་པར་དག་བྱ་སྟེ། །དྲི་མ་ལྷག་མ་མེད་པ་ན། །སླར་ཡང་གཙུག་ལག་ཁང་འཇུག་བྱ། །ནུབ་མོ་བདུན་དང་ནུབ་མོ་གསུམ། །དེ་བཞིན་ནུབ་གཅིག་རིམ་བཞིན་དུ། །སྒོག་སྐྱ་དང་ནི་བྲེག་ཙོང་དང༌། །ཀེའུ་ཡང་ནི་དག་པར་གསུངས། །བསོད་སྙོམས་དག་ལ་འཇུག་པ་ན། །ཁང་བཟངས་སྒོ་མང་རྒྱུ་བྱ་སྟེ། །ཟས་ལ་སོགས་པའི་མཚན་མ་ནི། །སྒོར་ཡང་ཕྱིར་ལྡོག་འདོད་པས་བཞག །སྒྲ་ལྡན་ཁར་གསིལ་ཁྱེར་བྱ་སྟེ། །དེ་ཡིས་སྦྱིན་བདག་གོ་བར་བྱ། །ཁྱི་དང་བ་ལང་ལ་སོགས་བསྡིགས། །རྣམ་ཡང་བརྡེག་པར་མི་བྱའོ། །རྩ་བ་འབྲས་བུ་བཟའ་བྱ་དག །དལ་གྱིས་དལ་གྱིས་དུམ་བུར་བྱ། །མཉེས་སམ་དུམ་བུར་བསིལ་ནས་ནི། །གྲོང་དུ་དགེ་སློང་དུལ་བས་བཟའ། །མགྲོན་དུ་བོས་ཚེ་གོས་མེད་པར།། འཆོལ་བའི་གྲལ་གྱིས་ཟས་མི་བཟའ། །དུས་མ་ཡིན་པའི་ཟན་དག་ཀྱང༌། །སྨན་པ་ལ་དྲིས་གནང་ན་རུང༌། །མུ་གེའི་དུས་ན་མགྲོན་གཉེར་བ། །ཤིན་ཏུ་མང་ཡང་དང་དུ་བླང༌། །སྦྱིན་བདག་གིས་ནི་གནང་བ་ན། །བགོ་བཤའ་ཡིས་ནི་ཡོངས་སུ་སྤྱད། །གཙོ་བོར་མགྲོན་དུ་པོས་པ་ཡིས།། ཕྱེད་ཟོས་ཀྱང་ནི་སྦྱིན་བྱ་སྟེ། །ཚངས་པར་སྤྱོད་ལ་རབ་མཁས་དེས། །ཉམ་ང་བ་དག་ཡོངས་སུ་བསྐྱང༌། །ཐུབ་པའི་བསྟན་པ་དང་ཕྲད་སྲོག །ཉི་མ་གཅིག་ཀྱང་རྙེད་དཀའ་བས། །ཡུན་རིངས་འཚོ་བར་འདོད་པ་གང༌། །དེ་དག་གིས་ཀྱང་ཡོངས་སུ་སྤྱད། །གལ་ཏེ་ལྷུང་བཟེད་འཕན་ཅན་དུ། །ཁུ་ཚིགས་དག་ནི་མཐོང་བ་ན། །དངོས་པོ་གང་གིས་དེ་བསལ་ནས། །ལན་གསུམ་བར་དུ་བཀྲུས་ཏེ་སྤྱད། །ཟོས་ནས་ཁ་ཡི་དྲི་མ་ནི། །ས་དང་ལྕི་བ་སོགས་ཀྱིས་སྦྱང༌། །ཆུ་ཁྱོར་གསུམ་མམ་ལྷག་པས་ཀྱང༌། །བཀྲུ་བཤལ་ཡོངས་སུ་དག་པར་བྱ། །དགེ་སློང་མིན་པས་རེག་གམ་ཞེས། །བལྟ་བྱ་ཐེ་ཚོམ་མེད་ན་བཟའ། །གཞན་དུ་རེག་པར་གྱུར་ལྟ་ན། །སླར་ཡང་བྱིན་ལེན་ལྟོས་པ་ཡིན། །ལམ་དུ་སོང་ཚེ་ལམ་རྒྱགས་དག །ཁུར་ཁྱེར་སུ་ཡང་མེད་པ་ན། །བརྫེ་བ་ཡི་ནི་འདུ་ཤེས་ཀྱིས། །རང་ཉིད་ཀྱིས་ནི་ཁུར་བར་བྱ། །བརྫེ་བ་གཞན་དག་མེད་པ་ན། །ཉི་མ་དང་པོ་
ཟན་བཅད་བྱ། །གཉིས་པ་ལ་ནི་སྤར་གང་ཙམ། །བཟའ་ཡི་དེ་ལས་ལྷག་པ་མིན། །ཉི་མ་གསུམ་པར་སྤར་བ་གཉིས། །དེ་ལས་ཕར་ནི་ཅི་བདེར་བྱ། །རང་ཉིད་འབད་པས་བསྒྲུབས་ནས་ཀྱང༌། །སྲོག་བསྲུང་འདོད་པས་བཟའ་བར་བྱ། །ས་བརྐོས་ནས་ནི་རྩ་བ་འམ། །ཤིང་ལ་འཛེགས་ནས་འབྲས་བུ་བླང༌། །དགེ་སློང་འཆི་ལ་ཐུག་པ་ཡིས། །བཀྲེས་པ་བསལ་བའི་དོན་ཕྱིར་སྤྱད། །བཅས་པའི་ཁ་ན་མ་ཐོ་འདིར། །གནས་སྐབས་རྐྱེན་དབང་གིས་རྗེས་གནང༌། །རང་བཞིན་ཁ་ན་མ་ཐོ་འདིར། །ཚུལ་ལྡན་སྲོག་ལ་ཐུག་ཀྱང་མིན། །འདོད་ན་ཉེ་དུ་དང་ལྷན་ཅིག །ལེགས་བློས་བཟར་རུང་ཁོ་ན་སྟེ། །གལ་ཏེ་ལམ་འཇིགས་སྣོད་མེད་ན། །དགེ་ཚུལ་དང་ཡང་རུང་བ་ཉིད། །དགེ་སྦྱོང་ཟ་བའི་དུས་ཀྱི་ཚེ། །ལྷུང་བཟེད་ལག་པ་གཡོན་པས་བཟུང༌། །ཁམ་གཅོད་ལ་སོགས་བྱེད་པའི་དུས། །ལག་ནི་རྟག་ཏུ་དྲན་པས་བསྲུང༌། །གང་དུ་བག་མེད་ཁྭ་དག་གིས། །ཟས་ལ་རིག་པར་གྱུར་པ་ན། །མཆུ་རེག་ཉེ་འཁོར་དོར་ནས་ནི། །བཟའ་བ་དེ་ལ་བརྟག་མི་དགོས། །མར་དང་འབྲུ་མར་བུ་རམ་སོགས། །གཞན་ཡང་དགེ་འདུན་གྱི་ནི་རྫས། །ཁྱེར་ནས་དྲན་པ་བརྗེད་པ་ཡིས། །གང་ལུས་དེ་ནི་དོར་མི་རུང༌། །ཚོགས་སམ་གང་ཟག་གིས་ཀྱང་རུང༌། །རུང་བ་དེ་ནི་ཡོངས་སུ་བླང༌། །ལས་ཀྱི་དུས་ལ་བབ་པ་ན། །ལེགས་པར་ཟོས་ནས་ལས་འཇུག་བྱ། །བུ་རན་འབྲས་ཕྱེ་འདྲེས་གྱུར་ན། །གཙང་མའི་ཆུ་ཡིས་ཡོངས་སྦྱངས་ནས། །དུས་མིན་པར་ཡང་སྤྱོད་པ་ལ། །ཟས་ཀྱི་ཉེས་པ་ཡོད་མ་ཡིན། །ཐུན་ཚོད་རུང་བ་ལ་སོགས་སྨན། །དུས་སུ་རུང་དང་འདྲེས་པ་ན། །དུས་མ་ཡིན་པར་མི་སྤྱད་ཅིང༌། །རེག་ནས་བྱིན་ལེན་མ་བྱས་མིན། །ཐུན་ཚོད་རུང་བ་འང་དེ་ལས་གཞན། །ཞག་བདུན་པ་དང་འདྲེས་ན་ནི། །ཐུན་ཚོད་ལས་གཞན་སྡོམ་བརྩོན་གྱིས། །སྤྱད་མིན་བྱིན་ལེན་མ་བྱས་མིན། །ཞག་བདུན་པ་ཡང་ཇི་སྲིད་དུ། །འཚོ་བར་དམིགས་དང་འདྲེས་ན་ཡང༌། །ཞག་བདུན་པར་ནི་སྤྱད་བྱ་སྟེ། །ལྷག་པར་མ་ཡིན་བྱིན་ལེན་བྱ།། །།བམ་པོ་བཞི་པ། དགེ་སློང་གཅིག་གིས་བུ་རམ་གང༌། །རང་གིས་སྤྱོད་ཕྱིར་བྱིན་བརླབས་ཏེ། །ཕན་ཚུན་ཡིད་གཅུགས་གྱུར་པ་ཡི། །
ལྔ་པོ་རྣམས་ལ་རྗེས་སུ་གནང༌། །ནད་པ་ཉིད་དང་ཟན་ཆང་དང༌། །དགེ་སྐོས་དང་ནི་ལག་གི་བླ། །ལམ་དུ་ཞུགས་པ་འདི་ལྔ་ལས། །གཞན་དག་ལ་ནི་རུང་མ་ཡིན། །ཟང་ཟིང་ཕྲ་མོ་འདྲེས་པ་ཡིས། །བུ་རམ་ཆུ་ཤིང་མཉེས་ནས་ནི། །བཙགས་ནས་སྡོམ་བརྩོན་བཏུང་བ་ནི། །དུས་མིན་པར་ཡང་རུང་བའོ། །རྙེད་དཀའི་འབྲས་བུ་མེ་ཏོག་སོགས། །ཡིད་འཕྲོག་བཟའ་བར་བྱ་བ་གང༌། །རྙེད་ན་སྤང་བར་བྱས་ཀྱང་ནི། །འདོད་ན་བཟའ་བར་གནང་བ་ཡིན། །བསོད་སྙོམས་ཡང་དག་ཐོབ་པའི་ཚེ། །བསོད་སྙོམས་པ་ཡི་སྤྱོད་ཡུལ་དུ། །ཁྱིམ་གཞན་གནས་ཏེ་ཟ་བ་ནི། །སྦྱིན་བདག་བསོད་ནམས་སྤེལ་ཕྱིར་རུང༌། །སླར་ཡང་ཟ་བར་འདོད་ལྟ་ན། །སྤྱོད་ཡུལ་དག་ནས་འོངས་ནས་ནི། །བཟའ་བྱ་མུ་གེའི་དུས་དག་ཏུ། །སྔར་བླངས་བསམ་པས་རུང་བ་ཡིན། །ཁྱིམ་དུ་ཟོས་པའི་ལྷག་མ་དག །གལ་ཏེ་སྦྱིན་བདག་གིས་བཀུར་ན། །སྔར་བླངས་པ་ཡི་བསམ་པ་ཡིས། །ཉམ་ང་བ་ན་དེ་ཡང་ངོ༌། །གཙུག་ལག་ཁང་གནས་ཀུན་ཏུ་ཡང༌། །དུས་གསུམ་ཀུན་ཏུ་གཏོར་མ་སྦྱིན། །དུས་དང་དུས་མིན་ཟ་བ་ཉིད། །གནོད་སྦྱིན་ཟས་ཕྱིར་འདོད་རྣམས་སྦྱིན། །བུ་དང་བཅས་པའི་འཕྲོག་མ་ལའང༌། །གཙུག་ལག་ཁང་ནི་བསྲུང་ཕྱིར་དང༌། །བསྟན་པ་ཡང་ནི་ཕུན་ཚོགས་ཕྱིར། །བདེ་གཤེགས་ཀྱིས་ནི་གཏོར་མ་གསུངས། །ན་སོགས་དུས་ནི་མ་གཏོགས་པར། །འདུས་ཤིང་ཟ་ན་ལྟུང་བྱེད་དོ། །དགེ་འདུན་ལ་ནི་གང་ཅུང་ཟད། །བྱིན་བླངས་དེ་ལ་ལྟུང་བ་མེད། །གློ་བུར་གཉུག་མའི་བཟའ་བ་གང༌། །དེ་ཡང་འདུས་ཤིང་བཟའ་བར་འདོད། །ན་དང་ལས་དང་ལམ་གྱི་དུས། །སྔར་ནི་རབ་ཏུ་བསྙེན་པ་ཉིད། །གྲུ་དང་གྲུ་ཆེན་ཞུགས་ལ་སོགས། །དཔག་ཚད་ཕྱེད་ལམ་སོང་ནས་ནི། །ལོག་ནས་གལ་ཏེ་ཟ་བྱེད་ན། །དགེ་སློང་ལྟུང་བ་ཡོད་མ་ཡིན། །གལ་ཏེ་སྦྱིན་བདག་མང་པོ་ཡིས། །དགེ་སློང་རྣམས་ལ་སོ་སོར་གནང༌། །སྦྱིན་བདག་དག་ནི་ནུས་པའི་ངོར། །སྦྱིན་པའི་དུས་ནི་ལྔ་པོའོ། །མུ་སྟེགས་དགེ་སྦྱོང་གིས་ཞུས་ནས། །སྦྱིན་བདག་དེ་ཡིས་གལ་ཏེ་འདྲེན། །དེ་དག་དད་པ་ཁྱད་པར་དུ། །སྤེལ་ཕྱིར་བཟའ་བར་བྱ་བ་ཉིད། །མཚམས་ནང་དེར་འདུ་
ཤེས་པ་འམ། །ཐེ་ཚོམ་གྱིས་ཀྱང་ལྟུང་བྱེད་ཡིན། །གསུམ་པོ་ལ་ནི་ཉེས་མེད་དོ། །སོ་སོར་མ་འདུས་འདུག་ལ་སོགས། །སོ་སོར་ངེས་པས་ཐོབ་པ་དང༌། །གཙུག་ལག་ཁང་དུ་ཐ་དད་ཟ། །སྦྱིན་བདག་རྣམས་ཀྱིས་འདོད་པའི་ངོར། །བཀག་པ་ཡོད་པ་མ་ཡིན་ནོ། །ཉི་མ་ཕྱེད་ཀྱི་དུས་ནས་ཕར། །ཕྱི་མའི་སྐྱ་རེངས་མ་ཤར་བར། །དགེ་སློང་བཟའ་བ་ཟ་བྱེད་ན། །ལྟུང་བྱེད་འཁོར་ལོས་རྣམ་པར་འཇོམས། །བཟའ་བ་ལ་སོགས་དགེ་སློང་གིས། །སོག་འཇོག་བྱས་པ་ཟོས་ན་ལྟུང༌། །སྔ་ཕྱི་གཉིས་སུ་སྤྱོད་པ་ཡིས། །དེ་ནི་རྣམ་པ་གཉིས་སུ་གསུངས། །སྔར་སྤྱོད་བྱིན་ལེན་བྱས་པ་ནི། །ཕྱི་དྲོ་སྤྱོད་པ་བཀག་པ་ཡིན། །ཕྱི་དྲོ་བྱིན་ལེན་བྱས་པ་ནི། །ཐུན་ཚོད་འདས་པ་རུང་མ་ཡིན། །ཆོས་གོས་ལྡེ་མིག་ཀྱོག་པོ་དང༌། །ལྷུང་བཟེད་ལྷུང་བཟེད་དམན་པ་ལའང༌། །ལག་པ་འབགས་པས་མི་རེག་སྟེ། །ཚུལ་དེའང་རྐྱེན་དབང་མ་གཏོགས་སོ། །སྡོམ་བརྩོན་གང་ཞིག་བཟའ་བ་སོགས། །བྱིན་ལེན་མ་བྱས་ཟ་བྱེད་ན། །དེ་ཡང་བསླབ་པ་ཟད་བྱེད་དེ། །ཆུ་དང་སོ་ཤིང་མ་གཏོགས་སོ། །གང་ཞིག་མ་ཚོས་ཚོས་པ་འདྲ། །བསོད་སྙོམས་པ་ཡིས་རྙེད་པ་ན། །སྲ་བ་ཉིད་ནི་སུམ་ཆ་བངས། །ཆོས་ལ་བྱིན་ལེན་བྱས་པ་རུང༌། །ཉ་དང་ཤ་དང་འབྲས་བུ་སོགས། །ཁ་དོག་ཡོངས་སུ་གྱུར་པ་ན། །བ་འོ་ལ་སོགས་ལན་གསུམ་ཁོལ། །བྱིན་ལེན་བྱ་བར་རུང་བ་ཉིད། །རེག་ནས་བྱིན་ལེན་མི་བྱ་སྟེ། །ཉམ་ངའི་དུས་ན་བཀག་པ་མེད། །འདབ་མ་ཅན་དང་སོ་ཤིང་དག །འོ་མ་ཅན་ནི་ཡོངས་སུ་སྤང༌། །དགེ་སློང་རྣམས་ལ་སྦྱིན་བདག་གིས། །བཟའ་བ་གལ་ཏེ་བོར་ན་ནི། །སྒྲ་མི་སྙན་པའི་དབང་བྱས་ནས། །དུས་ཡོལ་ནས་ནི་བཟའ་བར་བྱ། །མགུལ་དུ་མིད་པ་མ་ཡིན་ན། །འདི་ལ་བྱིན་ལེན་མི་བྱ་ཞིང༌། །ཇི་སྲིད་འཚོ་བར་བསྒྲུབས་པ་ནི། །བྱིན་རླབས་མ་བྱས་མི་བཅང་ངོ༌། །ཚང་ནི་སོག་པར་མི་ནུས་པ། །སྦྲང་མའམ་ཏི་ཏམ་ཀ་ལ་སོགས། །དེ་ནི་དོར་ནས་སྤྱད་བྱ་སྟེ། །བྱི་བ་སོགས་ཀྱིས་ངེས་པར་འཇིག །ལག་པ་གཉིས་ནི་ལག་པ་དང༌། །དེ་དང་འབྲེལ་ལ་དེས་བྱིན་དང༌། །ལག་པ་དེ་དང་འབྲེལ་པ་ཡིས། །དེ་དང་འབྲེལ་པ་དག་ཏུ་ཡང༌། །བྱིན་ལེན་བྱའོ་མི་བདེན། །རྒྱང་རིང་ན་ཡང་རུང་བ་ཉིད། །
འདི་ལ་ཅང་ཤེས་གླང་པོ་དང༌། །སྤྲེའུ་ཡིས་ཀྱང་བྱིན་ལེན་རུང༌། །མར་དང་འོ་མ་ཉིད་དང་ཞོ། །ཤ་དང་ཉ་སོགས་བདག་ཉིད་ཀྱི། །དོན་དུ་དགེ་སློང་དེར་གནས་པས། །བླང་བར་བྱ་བ་མིན་པ་སྟེ། །ནད་པས་སྟོན་མོའི་དུས་སུ་ནི། །སློང་བར་བྱེད་ལ་ལྟུང་བ་མེད། །མི་ན་བ་ཡིས་སློང་བ་ན། །ཉེས་བྱས་ཟོས་ན་ལྟུང་བྱེད་ཡིན། །བསོད་སྙོམས་དག་ལ་རྒྱུ་བ་ན། །ཁ་རོག་འདུག་སྟེ་སྤྱོད་ཡུལ་དུ། །ཅི་བྱིན་ཞེས་ནི་འདྲི་བ་ལ། །ཇི་ལྟར་འདོད་པ་བླང་བར་བྱ། །སྲོག་ཆགས་བཅས་པའི་ཆུ་རྣམས་ལ། །ཕྱི་རོལ་ཁྲུས་ལ་སོགས་སྤྱོད་དང༌། །ནང་དུ་འཐུང་བར་བརྗོད་པ་ཡིས། །ལོངས་སྤྱོད་ནམ་ཡང་བཀག་པ་ཡིན། །འདིར་ནི་ལྟུང་བྱེད་ལྟུང་བ་ཡི། །རྣམ་པ་གཞན་ནི་ཡོངས་བཙགས་པའོ། །རྩྭ་སོགས་དག་ལ་འདེབས་པ་རྣམས། །གང་འདིར་སླར་ཡང་མ་བྲིས་སོ། །ལོངས་སྤྱོད་བཅས་པའི་ཁྱིམ་གང་ཞིག །སྐྱབས་བཅས་པར་ནི་འདུག་པ་དང༌། །འགྲེང་བ་གནས་སྐབས་དགེ་སློང་ནི། །རྐྱེན་དབང་ལས་གཞན་ལྟུང་བ་ཡིན། །གང་དུ་སྐྱེས་པ་བུད་མེད་བཅས། །ཆགས་ལྡན་འདོད་པ་སྤྱོད་གྱུར་པ། །བུད་མེད་སྐྱེས་པ་ལོངས་སྤྱོད་པས། །དེ་ནི་ལོངས་སྤྱོད་ཅེས་བྱར་བསྟན། །མུ་སྟེགས་རྣམས་ལ་རང་ཉིད་ཀྱི། །ལག་གིས་བཟའ་སོགས་མི་སྦྱིན་ཏེ། །ལྟ་ལས་སླར་ལྡོག་དོན་དུ་ནི། །དུམ་བུར་བྱས་ཏེ་རྗེས་སུ་གནང༌། །སྣོད་ནི་ས་ལ་བཞག་པ་ལ། །སྙིང་རྗེ་ལྡན་པས་སྦྱིན་བྱ་སྟེ། །དེ་ནི་རྗེས་སུ་གཟུང་ཕྱིར་ཡིན། །ནམ་ཡང་གུས་ཕྱིར་མ་ཡིན་ནོ། །འཐབ་ཏུ་བཅས་པའི་དམག་ཚོགས་ལ། །ནམ་ཡང་ལྟ་ཕྱིར་མི་འགྲོ་སྟེ། །དེ་ལྟ་བུ་ཡི་རྐྱེན་དག་གིས། །གྱུར་པ་ལས་ནི་བཀག་པ་མེད། །གལ་ཏེ་དགོས་པས་སོང་ཡང་དེ། །ནུབ་གཉིས་ལས་ནི་ཕར་མི་གནས། །ཡུན་རིངས་དུས་སུ་ནང་དུ་ནི། །གནས་ནའང་གང་ཞིག་འཇིགས་པས་སམ། །རྒྱལ་པོ་འམ་ནི་བློན་པོ་སོགས། །མཛའ་བཤེས་ཚིག་གིས་ཀྱང་རུང་སྟེ། །གནས་པ་ན་ཡང་ཆོ་ག་ནི། །རྟ་དང་གླང་སོགས་ཆེད་མི་ལྟ། །དམག་ཚོགས་རྣམས་ཀྱི་བཀོད་པ་དང༌། །དཔུང་དང་རྒྱལ་མཚན་མཆོག་གི་ཡང༌། །རྒྱལ་པོ་དང་ནི་བློན་པོ་ཡིས། །བཤམས་པ་དཀྲུག་པར་མི་བྱའོ། །དེ་ལ་དཔུང་མཆོག་གང་དུ་དཔུང༌། །དེ་ཡི་བཀོད་པ་
སྤྲས་ལ་བྱ། །གང་དུ་གནས་པའི་རྒྱལ་མཚན་མཆོག །དེ་ནི་རྒྱལ་མཚན་མཆོག་ཅེས་བྱ། །ཁྲོས་པའི་སེམས་ཀྱིས་དགེ་སློང་ལ། །སྡོམ་བརྩོན་རྡེག་པར་བྱེད་མི་རུང༌། །འདྲེན་པས་བླ་མའི་དབང་བྱས་ནས། །བརྡེག་པར་གཟས་པའང་དེ་བཞིན་བཀག །འདིར་ནི་སོར་མོ་གཅིག་གིས་ཀྱང༌། །རྡེག་པར་བྱེད་ན་ཟད་པར་འདོད། །མགོ་བོ་ཁུ་ཚུར་རྐང་དང་ལག །རྡོ་དབྱུག་བོང་བ་སོགས་བརྡེག་ལྟུང༌། །ཕྱགས་མ་ལ་སོགས་ཀྱིས་བརྡེག་ན། །དེ་ཡི་ཉག་མ་ཇི་སྙེད་པ། །དེ་སྙེད་ལུས་ལ་རེག་པའི་གྲངས། །སྡོམ་བརྩོན་དག་ལ་ལྟུང་བྱེད་གསུངས། །དེ་བཞིན་སྲན་ལྗང་དྲུག་སོགས་ཀྱིས། །བརྡེག་ནའང་ལྟུང་བྱེད་ཁོ་ནར་བརྗོད། །དེ་ནི་ལུས་ལ་མ་ཕོག་པར། །འཕངས་པ་ཡང་ནི་ཉེས་བྱས་ཉིད། །མ་རུངས་གདུལ་ཕྱིར་ལྟུང་མེད་དེ། །གཞན་པར་སྔགས་གྲུབ་མཐུ་ལྡན་གྱི། །དགེ་སློང་དག་གིས་བརྡེག་པ་དང༌། །གཟས་པའང་ལྟུང་བར་མི་འགྱུར་རོ།། དགེ་སློང་རྣམས་ཀྱིས་གནས་ངན་ལེན། །ཤེས་ནས་འཆབ་པ་ཡང་བཀག་སྟེ། །འཇིགས་པས་མ་གཏོགས་འཇིགས་གྱུར་ན། །གནས་ངན་ལེན་ནི་བཅབ་བྱ་ཉིད། །ཕས་ཕམ་པ་ཉིད་གཙོར་བྱས་ནས། །ཇི་སྙེད་བཏུང་བར་བརྗོད་པ་དག །དེ་སྙེད་བསླབ་པའི་གཞི་འདི་ལ། །མཁས་པས་གནས་ངན་ལེན་ཅེས་གསུངས། །ནད་པ་མ་ཡིན་དགེ་སློང་ལ། །ཉོན་མོངས་བཅས་པའི་སེམས་ཀྱིས་དེར། །ནམ་ཡང་ཟན་གཅད་མི་བྱའོ། །ཇི་སྟེ་བྱེད་ན་ཟད་བྱེད་ལྟུང༌། །དུས་མ་གཏོགས་པར་མེ་དག་གིས། །ཉེ་བར་སྤོར་བྱེད་སྨད་པར་གསུངས། །མེ་གསོད་པ་དང་བསྲོ་བ་དག །ཉམ་ངའི་དུས་ན་ཉེས་པ་མེད། །སྐྲ་སེན་སྤུ་དང་ངར་སྣབས་དང༌། །མཆིལ་མ་ལུང་པ་འཇུག་པ་དང༌། །མེ་ལྕེ་མེ་མར་མུར་ལ་རེག །ཉེས་བྱས་འགྱུར་རོ་དུས་མ་གཏོགས། །དཀོན་མཆོག་གསུམ་དང་ཕ་མ་དང༌། །ཚངས་པར་མཚུངས་སྤྱོད་བླ་མ་དང༌། །ཆོས་ཀྱི་དོན་དུ་ཉེས་མེད་དེ། །རེག་པའི་དུས་སུ་བརྗོད་པ་ཡིན། །འདུན་པ་དབུལ་ཞེས་སྨྲས་ནས་ནི། །དགེ་འདུན་ལས་ནི་ཉེ་བ་ན། །སྡོམ་བརྩོན་སླར་ཡང་མི་དབུལ་ན། །དེ་ནི་ལྟུང་བས་འཇོམས་པ་ཡིན། །བསྙེན་པར་མ་རྫོགས་གང་ཟག་དང༌། །ནུབ་གཉིས་ལྷན་ཅིག་ཉལ་རུང་སྟེ། །དེ་ལས་
ཕར་ནི་ནུབ་གསུམ་སོགས། །མ་ཡིན་གལ་ཏེ་ཉལ་ན་ལྟུང༌། །ཐམས་ཅད་གཡོ་ཞིང་ཐམས་ཅད་བསྐོར། །གནས་ཁང་བསྐོར་ཞིང་གཡོགས་པ་བཞིན། །ཕལ་ཆེར་གཡོགས་ཤིང་ཀུན་ནས་བསྐོར། །ངོས་བཞི་པ་ཡི་ཁྱམས་བཞིན་བརྟག །ཐམས་ཅད་གཡོགས་ཤིང་ཕལ་ཆེར་བསྐོར། །ངོས་གསུམ་པ་ཡི་ཁྱམས་བཞིན་ཏེ། །ཕལ་ཆེར་གཡོགས་པའི་ཁང་པ་དང༌། །ཁང་བཟངས་བཞིན་ཏེ་རིམ་བཞིན་ནོ། །དེ་ལྟར་ཁྱིམ་ནི་བཞི་པོ་རུ། །སྡོམ་བརྩོན་ལྷན་ཅིག་ཉལ་བྱེད་ན། །ཉི་མ་གསུམ་པའི་སྐྱ་རེངས་འོད། །འཆར་ཚེ་གསལ་པོར་ལྟུང་བ་ཡིན། །སྔོ་དང་སེར་དང་དམར་པོ་སྟེ། །སྐྱ་རེངས་རྣམ་པ་གསུམ་དུ་འདོད། །སྔོན་པོ་ཉིད་ཚེ་འང་ལྟུང་འགྱུར་ན། །གཞན་དག་ཚེ་ན་སྨོས་ཅི་དགོས། །གང་དུ་སྒྲ་དོན་སོ་སོར་གོ །ཁྱམས་དང་ཁང་བཟངས་ལ་སོགས་པར། །དེ་འདྲ་དེར་ཡང་སྡོམ་བརྩོན་ནི། །ཉལ་དུ་རུང་བ་མ་ཡིན་ནོ། །གནང་བ་དང་བཅས་གནས་སུ་ནི། །ནད་པ་དག་ལ་རྗེས་གནང་སྟེ། །དེ་ཡི་ནད་གཡོག་དག་ཀྱང་ངོ༌། །དེ་ལས་གཞན་གྱིས་ནམ་ཡང་མིན། །སྟོབས་ཆུང་མི་ན་བ་ལ་ནི། །ཉིན་མོ་ཉལ་བ་བཀག་པ་ཡིན། །བསམ་གཏན་ཀློག་དང་ལྡན་པ་ལ། །ཡུད་ཙམ་རྗེས་སུ་གནང་བ་ཡིན། །གཉིས་སམ་གསུམ་པོ་དག་གིས་ཀྱང༌། །ཁྲི་གཅིག་ལ་ནི་ཉལ་མི་བྱ། །རྒྱ་ཆེན་ཡིན་ན་གོས་སོགས་ཀྱིས། །བར་ཆད་ཉལ་བ་རྗེས་སུ་གནང༌། །མུན་ཁུང་དག་ཏུ་ས་ལ་མགོ །གཏུགས་ནས་བླ་མར་ཕྱག་མི་བྱ། །དེར་ནི་ཚིག་གི་བྱ་བའམ། །ཡིད་ཀྱིས་ངེས་པར་ཕྱག་བྱའོ། །དགེ་ཚུལ་དང་ནི་ལྷན་ཅིག་ཏུ། །ལམ་དུ་ཉལ་ཚེ་གཉིད་མི་ལོག །མི་ནུས་ལྡང་བློས་སྐྱིལ་ཀྲུང་དག །བཅིངས་ཏེ་ཅུང་ཟད་གཉིད་ལོག་རུང༌། །མ་ནུས་པ་ན་ཉེས་པ་མེད། །ཐམས་ཅད་དུ་ནི་འབད་པ་ཡིས། །དགེ་ཚུལ་དག་ནི་བསྐྱང་བར་བྱ། །སངས་རྒྱས་ལྗོན་ཤིང་མྱུ་གུ་སྟེ། །དེ་ནི་དགྲ་བཅོམ་སྒོ་ང་ཡིན། །དགེ་སློང་བློ་གྲོས་དམན་གང་དང༌། །དགེ་ཚུལ་གང་ཡང་འདི་སྐད་ཆོས། །འདོད་པས་བར་དུ་གཅོད་བསྟན་མོད། །བར་དུ་གཅོད་པ་མིན་སྟོན་ན། །དེ་འདིར་ལན་གསུམ་པར་བཟློག་སྟེ། །འོན་ཀྱང་ལྟ་དེ་མི་གཏོང་ན། །
འདི་ལས་ལྷག་སྡིག་ཡོད་མིན་པས། །དེ་ཡང་རྒྱང་རིང་སྤང་བར་བྱ། །ཉམས་པ་དེ་དང་སྨྲ་བ་དང༌། །ནམ་ཡང་ཡང་དག་སྨྲ་མི་བྱ། །གནས་དང་ལོངས་སྤྱོད་ལ་སོགས་ཀྱང༌། །མི་བྱ་གལ་ཏེ་བྱེད་ན་ལྟུང༌། །ཡང་དག་སྨྲ་བ་ཁ་ཏོན་ཡིན། །སྨྲ་བ་ཀློག་པ་ཡིན་པར་འདོད། །གནས་ས་འདུག་ས་གཅིག་ཏུ་སྟེ། །ལོངས་སྤྱོད་ཆོས་དང་ཟང་ཟིང་ངོ༌། །ལྟ་བ་བཟློག་པའི་ཆེད་དུ་འམ། །ཉེ་དུ་འམ་ནད་པ་ཡིན་ན་ནི། །སྨྲ་ལ་སོགས་པ་རྗེས་སུ་གནང༌། །ལོངས་སྤྱོད་ནམ་ཡང་མ་ཡིན་ནོ། །ཆོས་གོས་གསར་པ་རྙེད་པ་ན། །ཁ་དོག་ངན་པར་བྱས་ཏེ་བཅད། །དེ་ཡང་དཀར་པོ་གསར་པར་དགོངས། །ཁ་དོག་ངན་པ་རྣམ་པ་གསུམ། །རང་བཞིན་དང་ནི་བཅོས་མ་ཡིན། །སྔོན་པོ་དང་ནི་བཙག་ཏུ་གྲགས། །མེ་ཏོག་འབྲས་བུ་འདབ་མ་དང༌། །ཤུན་པའི་ཁུ་བ་ངུར་སྨྲིག་འདོད། །མདོག་བཟངས་གཞན་ནི་མ་ཡིན་ནོ། །དྲག་པོ་སྦྲུལ་གྱི་གདུག་པ་ཡི། །དུག་ལ་རྟག་ཏུ་རེག་བླ་ཡི། །རིན་པོ་ཆེ་ལ་རེག་པ་དང༌། །རིན་ཆེན་སྨོས་པ་དེ་ལྟ་མིན། །ནོར་བུ་མུ་ཏིག་བྱི་རུ་སོགས། །རིན་ཆེན་དེ་རུ་སྨོས་པ་ཡང༌། །གཡུལ་འགྱེད་ཡན་ལག་མཚོན་སོགས་དང༌། །རོལ་མོའི་ཡན་ལག་རྔ་ཟླུམ་སོགས། །གཙུག་ལག་ཁང་དང་སྐྱེད་མོས་ཚལ། །ཐམས་ཅད་ནང་གིར་བརྗོད་པ་ཡིན། །ནང་མ་ཡིན་པར་སླར་ཡང་ནི། །ཕྱི་རོལ་ཉེ་འཁོར་ཡིན་པར་གསུངས། །ཕུག་པའི་ནོར་བུ་མུ་ཏིག་སོགས། །རེག་པ་ལ་ནི་ལྟུང་བྱེད་དེ། །མ་ཕུག་པ་ལ་རེག་པ་དང༌། །མཆིང་བུ་དག་ལ་ཉེས་བྱས་ཉིད། །པི་ཝང་གླིང་བུ་རྔ་ཟླུམ་སོགས། །མཚོན་ཆ་མདའ་དང་གཞུ་སོགས་ཀྱང༌། །ཡན་ལག་ཚང་དང་མ་ཚང་ལ། །རེག་པ་ལྟུང་བྱེད་ཉེས་བྱས་ཡིན། །གཞན་འདིར་གོ་ཆ་ལ་སོགས་ལ། །དགེ་སློང་རེག་ན་ཉེས་བྱས་ཡིན། །མངའ་དང་གཞུ་སོགས་ཆས་པ་ཡི། །མཚོན་ཆ་ལ་རེག་སྨོས་ཅི་དགོས། །སྐུ་གདུང་དང་བཅས་མཆོད་རྟེན་དང༌། །སྐུ་གཟུགས་ལ་རེག་ལྟུང་བྱེད་དེ། །སྐུ་གདུང་མེད་ལ་གང་རེག་པ། །དེ་ལ་ཉེས་བྱས་མངའ་ཡིས་རེག །གར་དང་རོལ་མོ་གླུ་སོགས་དག །མིག་དང་རྣ་བའི་ཡུལ་དུ་བཀག །འཐབ་མོ་བྲེ་མོའི་གཏམ་སོགས་ཀྱིས། །ཉེས་ཞི་མི་བྱེད་འབའ་ཞིག་ཟད། །གར་
དང་གླུ་སོགས་ཆགས་པ་ཡིས། །གང་ཞིག་མཆོད་རྟེན་ཕྱག་བྱེད་ན། །དེར་འགྲོ་གོམ་པ་རེ་རེར་ཡང༌། །ཉེས་བྱས་ཕུང་པོ་རེ་རེ་སོགས། །དེ་ཕྱིར་སྲིད་པ་ཟད་འདོད་པའི། །དགེ་སློང་རྣམས་ཀྱིས་གཟུགས་སྡུག་དང༌། །སྒྲ་སྙན་ལ་སོགས་ཆགས་པ་ཡི། །སེམས་སུ་ནམ་ཡང་མི་བྱའོ། །ས་ལེ་སྦྲམ་སོགས་སྨོས་པ་གང༌། །སྐྱེད་ཚལ་གང་དུ་རྙེད་པ་ན། །རྩྭ་སོགས་དག་གིས་བཀབ་ནས་ནི། །ཞག་བརྒྱད་བར་དུ་བསྲུང་བར་བྱ། །སུ་དག་དོན་གཉེར་བྱུང་ན་དེའི། །མཚན་མ་དྲིས་ནས་བསྟན་པར་བྱ། །མེད་ན་དགེ་འདུན་ནང་ཉིད་དུ། །ཟླ་བ་དྲུག་ཏུ་བརྟག་ཕྱིར་བཞག །གཞན་གྱི་ཁ་དོག་མཚན་མ་དང༌། །ཁྱད་པར་རྟགས་ཀྱིས་མཚོན་ལ་སྦྱིན། །མིན་ན་དགེ་འདུན་ལོངས་སྤྱོད་ཕྱིར། །དེ་ནི་བརྟན་པའི་དངོས་པོར་བྱ། །གལ་ཏེ་གདོད་དབང་བྱས་ནས་ཀྱང༌། །དེ་ཐོབ་བློ་ཆུང་སློང་བྱེད་ན། །དེ་ལ་དེ་ནོར་རིན་གྱིས་སམ། །སྦྱིན་བྱ་སྐྱེད་ནི་ནམ་ཡང་མིན། །སྡོམ་བརྩོན་ཟླ་ཕྱེད་ནང་རོལ་དུ། །དུས་མ་གཏོགས་པར་ཁྲུས་བྱེད་བཀག །ན་དང་ལས་དང་ལམ་དང་རླུང༌། །ཆར་དང་དེ་དག་ཆོགས་སྐྱོན་མེད། །ན་བའི་དུས་ནི་གང་དུ་དེ། །ཁྲུས་བྱས་སོས་པར་གྱུར་ནའོ། །ལས་ལམ་དུས་ནི་སྔར་བཤད་བཞིན། །རླུང་དུ་གྲགས་པའི་དུས་བསྟན་པ། །གང་དུ་ཆོས་གོས་སྣེའུ་ནི། །རླུང་གིས་ཟློག་པར་བྱེད་པའོ། །ལུས་ལ་ཆར་ཐིགས་གཉིས་ཕོག་པ། །ཆར་པའི་དུས་སུ་གྲགས་པ་ཡིན། །རླུང་དང་ཆར་བ་འདྲེས་པ་ནི། །དེ་དག་ཚོགས་པའི་དུས་ཞེས་བསྟན། །གཞན་ཡང་ཚ་བའི་དུས་ཞེས་པ།། ཟླ་བ་ཕྱེད་དང་གསུམ་པའོ། །ཆོས་གོས་མ་ལུས་བཞག་ནས་ཁྲུས། །བྱེད་འདོད་ལྟེ་བར་མ་སླེབ་བྱས། །ཉེས་བྱས་ལྟེ་བ་ནུབ་པར་ནི། །ཁྲུས་བྱེད་དེ་ནི་ཉེས་པར་ཟད། །ཆུ་བོ་ཕ་རོལ་རྒལ་བ་དང༌། །རྒྱལ་བ་སོགས་ལ་འདེབས་བྱེད་རུང༌། །འགའ་ཞིག་ཏུ་ཡང་ཆུ་ཀླུང་དག །ཟབ་མོ་བརྒལ་ལ་ཉེས་པ་མེད། །དགེ་སློང་གྲུར་ཞུགས་ཕ་རོལ་དུ། །ཆུ་བོ་དག་ལ་འགྲོ་བའམ། །གཞན་དུ་རྒྱ་མཚོ་ལ་ཡང་རུང༌། །བཤད་གཅི་སོགས་བྱེད་བཀག་པ་མེད། །འཇུག་ངོགས་གང་དུ་བུད་མེད་དམ། །རྒྱལ་པོ་འམ་ནི་དེ་ཡི་དམག །སྐྱེས་བུ་གཡོན་ཅན་ཁྲུས་བྱེད་པ། །དེ་
ནི་རྒྱང་རིངས་སྤང་བར་བྱ། །འོག་ཏུ་གཏིང་རིང་བྱི་ཟུལ་ལམ། །ཡང་ན་སྟེང་གུ་ཉ་བརྒལ་ལ། །ཆུ་ལ་རྒྱལ་བ་ལ་སོགས་ཀྱང༌། །རྩེད་མོའི་དོན་དུ་མི་བྱའོ། །གལ་ཏེ་རྐྱལ་ནི་སློབ་པའམ། །ནད་དང་བྲལ་བར་འདོད་པ་ཡིས། །ཤིན་ཏུ་དབེན་པའི་གནས་སུ་ནི། །རྐྱལ་ལ་སོགས་པ་ཀུན་དུ་སྤྱད། །ཤེས་བཞིན་རང་ངམ་གཞན་གྱིས་ཀྱང༌། །སྡོམ་བརྩོན་དུད་འགྲོའི་སྐྱེ་གནས་གང༌། །གསོད་ན་ལྟུང་བྱེད་མེ་ལྕེ་ཡིས། །རེག་པའི་སྡུག་བསྔལ་ཉམས་མྱོང་འགྱུར། །ཤེས་བཞིན་ཉོན་མོངས་སེམས་ཀྱིས་ནི། །ཚངས་སྤྱོད་དང་ནི་བཅས་རྣམས་ལ། །འགྱོད་པ་སྐྱེད་བྱེད་ངེས་བཀག་སྟེ། །བྱེད་ན་ལྟུང་བྱེད་གཞན་དུ་མིན། །ཁྱོད་ལོ་ཉི་ཤུ་མ་ལོན་ན། །ཁྱོད་ཀྱི་བསྙེན་རྫོགས་གང་ན་སྟེ། །མཁན་པོའང་ཚུལ་ཁྲིམས་འཆལ་པ་ཡིན། །དེ་ནི་མཚམས་ཀྱི་ཕྱི་རོལ་ཡིན། །འགྱོད་པ་སྐྱེད་པའི་དོན་དུ་ནི། །དེ་ལ་སོགས་པ་སྨྲ་བྱེད་ན། །དེ་ལ་ལྟུང་བྱེད་བདེན་པ་ཡི། །སྐྱོན་འགྱུར་བརྗོད་ན་ཉེས་པ་མེད། །བློ་ཆུང་སོར་མོ་གཅིག་གིས་ཀྱང༌། །དགེ་སློང་རྩེ་ཕྱིར་གཡའ་སྒོག་ན། །ལྟུང་བྱེད་སྨེ་བ་ནག་པོ་དག །སྟོན་པ་ལ་ནི་ཉེས་པ་མེད། །དགའ་གཡེངས་ཆུ་ལ་རྩེད་མོ་དག །བྱེད་ན་ཐད་ལྟུང་འགྱུར་བ་ཡིན། །དེ་ཡང་ཕ་རོལ་ཚུ་རོལ་དུ། །ཕར་བརྒལ་ཆུར་བརྒལ་བྱེད་སོགས་སོ། །མ་བསྲུངས་བུད་མེད་ལྷན་ཅིག་ཏུ། །གལ་ཏེ་ནང་ངམ་ཕྱི་རོལ་དུ། །དགེ་སློང་ཉལ་དུ་མི་རུང་སྟེ། །སྒོ་བཅིངས་པ་ལ་ཉེས་པ་མེད། །འདིར་ནི་ལེགས་དང་ཉེས་སྨྲས་དོན། །གང་ཞིག་སོ་སོར་རྟོགས་དང་ལྡན། །མི་མོ་དེ་ནི་བུད་མེད་ཅེས།། ཤེས་རབ་ལྡན་པས་ཡང་དག་གསུངས། །ཐམས་ཅད་གཡོག་དང་ཡོངས་བསྐོར་ཞེས། །བྱ་བ་འདི་ཡང་སྔ་མ་བཞིན། །ཉལ་བར་བརྗོད་པ་གང་ཡིན་པ། །གློས་ནི་ས་ལ་ཕབ་པའོ། །སྡོམ་བརྩོན་གཉིད་ཀྱིས་ནོན་དུས་སུ། །རེག་པའི་རུང་གིས་སྦར་བ་ཡི། །ལྟུང་བྱེ་མེ་ནི་གང་ཡིན་པ། །ཀུན་ནས་སྲེག་པར་བྱེད་པ་ཡིན། །གནས་ཁང་སོགས་སུ་བུད་མེད་དག །གང་ན་ཡོད་པའི་སྐས་སོགས་བརྟུལ། །སྲུང་བྱེད་བཞག་ནས་དགེ་སློང་ནི། །ཉལ་བ་ལ་ནི་སྨད་པ་ཡིན། །ཁྱད་པར་ཉིན་མོ་ཉལ་བ་ཡི། །ཆོ་ག་ཡང་ནི་འདི་ཡིན་ཏེ། །བདུད་པ་བོར་ནས་རྗེས་སུ་གནང༌། །གཞན་
དུ་ཉེས་བྱས་འགྱུར་པ་ཡིན། །དགེ་སློང་རང་ངམ་གཞན་གྱིས་ཀྱང༌། །དགེ་སློང་སྔགས་པར་བྱེད་པ་བཀག །སེམས་ཅན་ཀུན་ལ་མི་འཇིགས་མཛད། །བླ་མ་སངས་རྒྱས་ལ་དམིགས་ནས། །ཤ་ཟ་གནོད་སྦྱིན་ལ་སོགས་པའི། །སྡིག་ཅན་གཟུགས་ནི་བཟུང་ནས་ཀྱང༌། །དེ་ཡི་གཟུགས་སྒྲ་དྲི་རྣམས་ཀྱིས། །སྔངས་པར་བྱེད་ལ་ཟད་བྱེད་ལྟུང༌། །གྱ་ནོམ་ལྷ་དང་དྲི་ཟ་དང༌། །བྲམ་ཟེ་ལ་སོགས་འཇིགས་པ་ཡིས། །བཟུང་ནས་ཁྱོད་ནི་བསད་ཅེས་བརྗོད། །གལ་ཏེ་བརྡ་ཕྲད་ཉེས་བྱས་ཡིན། །ཕན་པར་འདོད་པས་མི་བཟད་པའི། །སྡུག་བསྔལ་ལྟུང་བའི་འཇིགས་སྐྱེད་ཕྱིར། །དམྱལ་བ་ཡི་དགས་དུད་འགྲོའི་གཟུགས། །གལ་ཏེ་འཇིགས་སྟོན་ཉེས་པ་མེད། །དགེ་སློང་གཞན་གྱི་ལྷུང་བཟེད་སོགས། །ཡོ་བྱད་དངོས་པོ་ནམ་དུ་ཡང༌། །བཞད་གད་ཀྱི་ནི་དབང་བྱས་ནས། །དགེ་སློང་གིས་ནི་སྦེད་པ་བཀག །དགེ་སློང་ཆོས་གོས་བྱིན་པ་ལ། །གདེང་མེད་པར་ནི་ལོངས་སྤྱོད་ན། །ལྟུང་བྱེད་གལ་ཏེ་མཛའ་བོ་འམ། །མཆོད་འོས་བླ་མས་ཉེས་པ་མེད། །སྡོམ་བརྩོན་དགེ་འདུན་ལྷག་མ་ཡིས། །དག་པའི་དགེ་སློང་སྐུར་འདེབས་ན། །ལྟུང་བྱེད་ཉིད་དུ་ངེས་བསྟན་ཏེ། །ཕྱི་མ་རྣམས་ཀྱིས་ཉེས་བྱས་སོ། །ལམ་དུ་སྐྱེས་པ་མེད་པར་ནི། །བུད་མེད་དང་ནི་མི་འགྲོགས་ཏེ། །འགྲོགས་ན་དེ་ཡི་སྤྱི་བོར་ནི། །ལྟུང་བྱེད་གནམ་ལྕགས་འབབ་པར་འགྱུར། །གྲོང་དེར་སྡོམ་བརྩོན་ནམ་སོན་དུས། །ངེས་པར་ལྟུང་བྱེད་ཉིད་འགྱུར་ཏེ། །གྲོང་གི་ལམ་ཕྱེད་ཕྱིན་པ་ན། །ཉེས་བྱས་ཙམ་དུ་བརྗོད་པ་ཡིན། །རང་ཉིད་སྔ་ཕྱི་བྱས་ནས་ནི། །ལམ་མི་ཤེས་པ་བསྟན་པར་བྱ། །ཉམ་ངའི་ལམ་དུ་བུད་མེད་དག །ཁྲིད་ན་ལྟུང་བར་མི་འགྱུར་རོ། །གང་ཞིག་རྐུན་མའི་གྲོགས་དང་འགྲོགས། །དེ་ལའང་ལྟུང་བྱེད་ཀྱིས་རེག་འགྱུར། །འདི་ལ་ཡང་ནི་ཉེས་མེད་ད། །གལ་ཏེ་སྔར་བཞིན་སོང་ནའོ། །ཚངས་བའི་ཤོ་གམ་ལ་སོགས་པས། །འཕྲོག་པར་བྱེད་དེ་རྐུན་མར་འདོད། །གྲོང་དང་ལམ་ལ་སོགས་པ་དག །གང་འཇོམས་དྲག་པོ་སྨོས་ཅི་དགོས། །ལོ་ནི་ཉི་ཤུ་མ་ལོན་འདི། །གང་ཕྱིར་བཀྲེས་སྐོམ་ལ་སོགས་གནོད། །མི་བཟོད་མི་བརྟན་ལུས་བློའི་ཕྱིར། །བསྙེན་པར་རྫོགས་པར་མི་
བྱར་བརྗོད། །མ་ཚང་ལོ་ལ་དེར་ཤེས་བཞིན། །གང་ཞིག་སྨྲ་ཡང་བསྙེན་རྫོགས་ན། །རྫོགས་བྱེད་དེ་དག་ཟད་པར་ལྡན། །ཐེ་ཚོམ་གྱིས་ཀྱང་ལྟུང་བར་བརྗོད། །གང་ཞིག་མ་ཚང་བའི་བློས། །ལོ་ནི་ཚང་བར་སྨྲ་བ་ལ། །རྫོགས་བྱས་ལྟུང་བ་ཡོད་མ་ཡིན། །ཚང་ལ་ཚང་བར་འདུ་ཤེས་གང༌། །ཚང་ལ་ཉིད་སྨྲ་དག་ཀྱང་སྟེ། །ཐེ་ཚོམ་གྱིས་ཀྱང་སྨྲ་བ་ལ། །དེ་ལ་ལྟུང་བ་མེད་པ་ཉིད། །དེ་ལྟར་འདིར་ནི་ཕྱོགས་ཙམ་ཞིག །མདོར་བསྡུས་ནས་ནི་བསྟན་པ་ཡིན། །བརྟུལ་ཞུགས་དང་བཅས་བློ་ལྡན་རྣམས། །ཤིན་ཏུ་ངེས་དང་བཅས་པར་བྱ། །དགེ་སློང་གིས་ནི་ཤེས་བཞིན་དུ། །ས་མི་བརྐོའོ་བརྐོར་མི་གཞུག །སོ་ཕག་འབའ་ཞིག་པ་དག་དང༌། །ཀུན་ནས་བྱེ་མ་ཡིན་ཉེས་མེད། །སྐྱེད་བྱེད་སྐྱེད་བྱེད་མ་ཡིན་པའི། །ས་ནི་རྣམ་པ་གཉིས་སུ་གྲགས། །ཆར་འབབ་རྗེས་སུ་གྱུར་པ་ལ། །ཟླ་བ་དྲུག་གིས་སྐྱེ་བ་སྟེ། །སྐྱེད་བྱེད་ལ་ནི་འདིར་ངེས་ཡིན། །ས་མང་བྱེ་མ་ཉུང་ན་ལྟུང༌། །ཉེས་བྱས་འགྱུར་རོ་བྱེད་མ་དང༌། །གསེག་མ་དང་ནི་རྡོ་བ་དག །ལྷག་པར་བཅས་ལ་མི་སྐྱེའི་ཕྱིར། །ལྟུང་བྱེད་དང་ནི་ཉེས་བྱས་སུ། །འདུལ་བའི་དེ་ཉིད་རིག་པས་བཤད། །ས་གཞི་དང་ནི་རྩིག་ངོས་ལ། །ཕུར་པ་བརྡེག་ན་ལྟུང་བྱེད་ཡིན། །དེ་ཉིད་འདོན་དང་གནོན་པའམ། །འདམ་བསྐྱོད་པ་ལ་ཉེས་བྱས་སོ། །རྩིག་པའང་དེ་བཞིན་ཞལ་ཞལ་ལམ། །ཆུ་དོགས་རྟིབ་ན་ཟད་ལྟུང་འགྱུར། །ཆད་པ་འམ་ནི་གས་པ་ལའང༌། །རྐོ་བར་བྱེད་ན་ཉེས་བྱས་འདོད། །ཆུ་འགྲམ་འདམ་ནི་བསྐྱོད་པ་ལ། །འགྲོ་བར་འདོད་པས་ཉེས་པ་མེད། །རྩིས་ཀྱི་དོན་དུ་རི་མོ་ཡང༌། །སའམ་རྩིག་ངོས་འདྲི་བ་དང༌། །སྐྱེད་མོས་ཚལ་སོགས་རྒྱུ་བ་ན། །འཇིགས་མིན་དུས་སུ་རུང་བ་ཉིད། །དབྱར་གྱི་ཟླ་བ་བཞི་ལས་ནི། །མགྲོན་དུ་བོས་པ་ཁས་མི་བླང༌། །ཡང་ཡང་རྟག་ཏུ་བ་དང་དུས། །སོ་སོར་མགྲོན་དུ་བོས་མ་གཏོགས། །རྟག་ཏུ་མགྲོན་བོས་གང་ཡིན་པ། །གང་དུ་རྟག་པ་ཉིད་དུ་འབོད། །སོ་སོར་མགྲོན་དུ་བོས་པ་ནི། །སོ་སོ་ཐ་དད་ཉིད་ལ་བརྗོད། །དུས་ནི་ཇི་སྲིད་འདོད་པ་དེས། །ཡང་ཡང་ཞེས་བརྗོད་ཡང་ཡང་དང༌། །མགྲོན་བོས་འདི་དག་མ་གཏོགས་པ། །གསལ་པོར་ལྟུང་བྱེད་ཉིད་
དུ་བརྗོད། །གྱ་ནོམ་པ་ལ་པོས་བཞིན་དུ། །སྡོམ་བརྩོན་དམན་པ་སློང་བ་ན། །སློང་བའི་ཚེ་ན་ཉེས་བྱས་ཏེ། །དེ་ལོངས་སྤྱོད་ནའང་ཉེས་བྱས་སོ། །དམན་པ་ལ་ནི་བོས་པ་ན། །བཟང་པོ་སློང་བ་དུས་ཇི་སྲིད། །ཉེས་བྱས་ལོངས་སྤྱོད་པ་ལ་ནི། །ཟད་བྱེད་ལྟུང་བར་བརྗོད་པ་ཡིན། །འོ་མ་ལ་བོས་ཤ་དང་ཞོག །ཡང་ན་འོ་མ་ལ་ནི་མར། །སློང་བའི་ཚེ་ན་ཉེས་བྱས་ཏེ། །ཟོས་ན་ནད་པ་མ་གཏོགས་ལྟུང༌། །དད་ལྡན་ཡོ་བྱད་ཕུན་ཚོགས་ཤིང༌། །སྦྱིན་ཕྱིར་གཏོང་ལ་འཇིགས་མེད་པ། །དེ་ནི་ཡུན་རིངས་བསོད་ནམས་ཕྱིར། །དང་དུ་ལེན་པ་བཀག་པ་མེད། །གང་ཚེ་བསླབ་པ་འདི་ལ་ཁྱོད། །བསླབ་པར་བྱ་ཞེས་དགེ་སློང་གིས། །རབ་བསྐུལ་དེ་ཚེ་ལན་དུ་གང༌། །དེ་ལ་བྱིས་པ་སོགས་བརྗོད་སྨོད། །བློ་ཆུང་དེ་ནི་ལྟུང་བྱེད་ཀྱི། །དབྱུག་པས་ཕོག་ནས་ངེས་པར་འགྱེལ། །འཇིགས་ལྟུང་འབར་བའི་སྒོ་ནས་ནི། །དམྱལ་བའི་མེ་ཡིས་གཡེངས་པར་གྱུར། །བྱེས་པ་ཞེས་བྱ་ངན་སེམས་ཅན། །རྨོངས་པ་མདོ་སོགས་མི་མཁས་པ། །མི་གསལ་འདུལ་བའི་ཚིག་ལ་སྟེ། །མི་མཁས་དེ་ཡི་དོན་ལའོ། །བྱིས་པ་རྨོངས་སོགས་ཚིག་ལས་ནི། །རེ་རེ་ཡིས་ཀྱང་བཟློག་པ་ན། །དམྱལ་བའི་མེར་ནི་འཇུག་བྱེད་པའི། །ལྟུང་བྱེད་ཀྱིས་ནི་དགེ་སློང་ལྟུང༌། །དེ་ཡིས་དེ་ཚིག་བཟུང་ནས་ནི། །མཁས་པ་དག་ལ་དྲི་བར་བྱ། །མཁས་པའི་ཚིག་གིས་བྱ་བ་སྟེ། །ལོང་བ་རྣམས་ཀྱིས་ཚད་མ་དེ། །ཡང་ན་བརྫུན་པ་ཉིད་དུ་ནི། །བྱིས་པ་ལ་སོགས་ཚིག་གིས་ཀྱང༌། །མཁས་པ་མིན་ཡང་བསྒོ་བ་ན། །བདེན་དོན་སྨྲ་ན་ཉེས་པ་མེད། །ཕན་ཚུན་མི་མཐུན་དགེ་སློང་གང༌། །བླགས་སྐབས་ཚོལ་ཞིང་ཅོ་འདྲི་ན། །བྱ་རོག་ཉན་རྣས་འདུག་ན་ནི། །དེ་ཡང་ལྟུང་བྱེད་ཡང་དག་གནས། །གནས་ཁང་ལ་སོགས་བསམ་གཏན་དག །བྱེད་ཚེ་སྒྲ་བརྡ་མ་བྱས་པར། །ཞུགས་པས་སྒྲ་དོན་གཙོ་བོ་ནི། །མ་ཐོས་སྒྲ་ཉན་ཉེས་བྱས་འགྱུར། །དེ་ལྟར་ཁང་བཟངས་སྐས་དང་སྒོ། །ལམ་དུ་འཇུག་ཚེ་ཚུལ་ལྡན་ལ། །ལྟུང་བྱེད་སྔར་བཤད་ཇི་བཞིན་ཏེ། །ཞི་བར་བྱ་ཕྱིར་ཉེས་པ་མེད། །གསོལ་བའི་ལས་ལ་སོགས་པ་ཡི། །ཆོས་ནི་གཏན་ལ་འབེབས་
བའི་གཏམ། །བྱེད་ཚེ་གཞན་ལ་མ་སྨྲས་པར། །སྡོམ་བརྩོན་དེ་བོར་འགྲོ་མི་བྱ། །ལས་ཀྱི་གེགས་སུ་མ་གྱུར་ཏམ། །ཞེས་བསམས་རབ་ཏུ་བསྒོ་བར་བྱ། །དེ་ལྟར་མི་བྱེད་དགེ་སློང་ནི། །མྱུར་དུ་ལྟུང་བྱེད་རྒྱ་མཚོར་ལྟུང༌། །མ་གུས་པ་ལ་ལྟུང་བྱེད་དེ། །དགེ་འདུན་དང་ནི་གང་ཟག་གཉིས། །དགེ་འདུན་ལ་ནི་ལྟུང་བྱེད་བརྗོད། །གང་ཟག་དག་ལ་ཉེས་བྱས་སོ། །དགེ་འདུན་ནང་ན་དགེ་སྐོས་ཀྱི། །ཚིག་ནི་རབ་ཏུ་བཟློག་པ་ཡང༌། །ལྟུང་བྱེད་བླ་མའི་དགེ་འདུན་དང༌། །རྒན་པོ་གང་ཟག་གཞན་ལ་མིན། །དོན་མེད་པ་ཡི་ཚིག་ལ་ནི། །རིགས་པས་ཤད་ཀྱིས་སྦྱང་བ་ཡིས། །ཟློག་བྱེད་སྨྲ་བ་པོ་ལ་འདིར། །ལྟུང་བ་མེད་པར་གསུངས་པ་ཡིན། །འབྲུ་འམ་བཅོས་པའི་ཆང་དག་ནི། །ཀུ་ཤའི་རྩེ་མོ་ཙམ་ཡང་སྤང༌། །འདི་དག་འཐུང་ངམ་སྟེར་ན་ཡང༌། །གཉིས་ཀ་བག་མེད་ཁང་ཆེན་ཡིན། །ཁ་ཡི་ནད་ལ་མཁུར་ཕུག་ཏུ། །བསྲེལ་བ་ཙམ་ལ་ཉེས་པ་མེད། །སྨན་པའི་ངག་གིས་འཐུང་བར་ནི། །སྲོག་ལ་བབ་ཀྱང་འདོད་མི་བྱ། །ཕབས་དང་འབྲས་ཕྱེ་ཟན་གྱི་ཚོགས། །རྣམ་འགྱུར་བྱེ་བྲག་ལས་སྐྱེས་པ། །འཇིག་རྟེན་བཏུང་བའི་ཁྱད་པར་གང༌། །དེ་ནི་འབྲུ་ཡི་ཆང་ཞེས་བྱ། །སྡོང་བུ་མེ་ཏོག་འབྲས་རྣམས་ཀྱི། །ཁུ་བ་རྣམས་ནི་ཡོངས་གྱུར་པ། །བཅོས་པའི་ཚང་དུ་ངེས་བསྟན་ཏེ། །སྦྲང་རྩི་རྒུན་སོགས་ལས་བྱུང་བའོ། །གང་ཚེ་མ་རེད་ཉམས་པ་ཡིས། །མྱོས་བྱེད་ནུས་པ་ཟད་པ་ན། །ཆང་གི་རྒྱུ་མཚན་སྤངས་པའི་ཕྱིར། །འཐུངས་ཀྱང་དེ་ཚེ་ཉེས་པ་མེད། །སུ་ལུ་ཀ་དང་ཞོ་ག་ཆུ། །སུག་ཏ་སྐྱུར་པོ་བཙགས་ནས་ནི། །ཆུ་བསྲེས་བཏུང་བའི་དོན་དུ་ནི། །དུས་མིན་པར་ཡང་བཀག་པ་མེད། །འབྲུ་ཆང་སྐྱུར་པོར་གང་གྱུར་པ། །སུ་ལུ་ཀར་ནི་ཡོངས་སུ་གྲགས། །བཅོས་ཆང་སྐྱུར་པོར་གང་གྱུར་པ། །སུག་ཏ་ཞེས་བྱར་བརྗོད་པའོ།། ཀོ་ཏྲ་བ་སོགས་བཀག་པའི་ཕྱིར། །འབྲུ་ཆང་བཅོས་པའི་ཆང་ཞེས་སྨོས། །མ་རེད་ཉམས་ལ་ཆང་གི་ནི། །དངོས་པོ་བཟློག་ཕྱིར་མྱོས་འགྱུར་སྨོས། །ཆང་གི་མདོག་དང་དེ་བཞིན་དྲི། །རོ་དང་མྱོང་བ་དག་གིས་ཀྱང༌། །གལ་ཏེ་མྱོས་ཟད་ཆང་གི་ནི། །དངོས་མེད་ཉེས་བྱས་གཞིར་འདོད་དོ། །
དེ་ལྟར་ཁ་དོག་ལ་སོགས་པ། །གསུམ་གཉིས་གཅིག་འཐུང་མྱོས་ནུས་ཟད། །གསུམ་གཉིས་དེ་བཞིན་གཅིག་པུ་ལ། །མྱོས་པའི་ནུས་མེད་ཉེས་བྱས་རྣམས། །རྩ་བ་སྡོང་བུ་མེ་ཏོག་འབྲས། །འདབ་མ་ཡང་ནི་མྱོས་བྱེད་དང༌། །ཕབས་དང་ཟན་ཆང་བསྲེས་པ་དག །ཟོས་ན་འགལ་ཚབས་ཅན་དུ་འགྱུར། །སྡོམ་བརྩོན་གྲོགས་ཡོད་མ་སྨྲས་པར། །སྡོམ་གནས་དུས་མིན་གྲོང་འཇུག་ན། །དེ་འདྲའི་རྐྱེན་ལ་ཉེས་པ་མེད། །གཞན་དུ་ཟད་པ་ཐོབ་པར་འགྱུར། །ཉི་མ་ཕྱེད་ཀྱི་མཚམས་གནས་པར། །ཕྱི་མའི་སྐྱ་རེངས་མ་ཤར་བར། །དུས་མ་ཡིན་ཞེས་འདོད་པ་སྟེ། །དུས་དང་དུས་མིན་མཁས་པས་སོ། །དགེ་སློང་དུས་མིན་འཇུག་བྱེད་ཅིང༌། །དུས་མིན་དུས་སུ་འདུ་ཤེས་དང༌། །ཐེ་ཚོམ་གྱིས་ཀྱང་རྣམ་པར་འཇོམས། །དུས་ལ་དུས་མིན་འདུ་ཤེས་དང༌། །ཐེ་ཚོམ་ཟ་ན་ཉེས་བྱས་ཡིན། །ཁྱིམ་པས་ཁྱིམ་དུ་དགེ་སློང་རྣམས། །གང་ཕྱིར་མགྲོན་དུ་བོས་པ་ན། །ནམ་ཡང་ཁྱིམ་གཞན་དག་ཏུ་ནི། །དེ་ནི་དེ་ལྟར་འགྲོ་མི་བྱ། །འཕགས་པའི་ཚོགས་ལ་ཅི་བདེར་ནི། །བདེན་པས་གདུགས་ཚོད་གསོལ་སྨྲས་ནས། །ཁྱིམ་བདག་གིས་ཀྱང་གནང་ན་དེར། །སོང་བ་ལ་ཡང་ཉེས་པ་མེད། །གང་ཞིག་རྒྱལ་པོའི་སྒོ་གཏན་ནམ། །དེ་ཡི་ཉེ་འཁོར་ཉིད་དང་ཡང༌། །སྐྱ་རེངས་ཐ་མ་མ་ཤར་འདས། །བདེར་གནས་དེ་ཡང་སྡིག་བྱེད་ཡིན། །གྲོང་ཁྱེར་རྒྱལ་པོའི་ཕོ་བྲང་དང༌། །གསུམ་པ་བཙུན་མོའི་འཁོར་དག་གི །སྒོ་གཏན་དེ་དང་ཉེ་བ་ན། །ཉེ་འཁོར་ཞེས་ནི་བརྗོད་པ་ཡིན། །དགེ་སློང་ནམ་ནི་མ་ལངས་པར། །མ་ལངས་པ་ཡི་འདུ་ཤེས་ཀྱིས། །གྲོང་ཁྱེར་སྒོ་གཏན་འདས་པ་ལ། །སྡོམ་བརྩོན་ཉེས་བྱས་བསྐྱེད་པར་འགྱུར། །མི་ཡི་བདག་པོའི་སྒོ་འམ་ནི། །བཙུན་མོའི་འཁོར་དུ་འདས་པ་ལ། །མ་ལངས་དེ་རུ་འདུ་ཤེས་སམ། །ཐེ་ཚོམ་གྱིས་ཀྱང་ཟད་ལྷུང་རེག །ཅིག་ཤོས་དག་ཏུ་འདུ་ཤེས་པས།། ཐམས་ཅད་ལ་ནི་ཉེས་བྱས་སོ། །རིན་ཆེན་མ་བསྡུས་ཞེས་བྱ་ནི། །སྦ་བརྟུལ་མ་བྱས་པ་ལ་བརྗོད། །ཟླ་བ་ཕྱེད་ཕྱེད་ཡང་དང་ཡང༌། །སོ་སོར་ཐར་པ་ཐོས་ནས་ཀྱང༌། །འདི་དག་མདོར་ནི་གཏོགས་པ་དང༌། །ཆོས་སུ་རང་བྱུང་གིས་བསྟན་པ། །ཇི་བཞིན་རྣམ་གཞག་དེ་བྱས་དག །མ་
ལུས་བདག་གིས་ད་གདོད་ཤེས། །དེ་ལྟར་གོ་བྱེད་ཚུལ་འཆོས་ཅན། །སྡོམ་བརྩོན་དེ་ནི་ལྟུང་བྱེད་འདོད། །རུས་པ་བ་སོ་རྭ་ཡི་ནི། །རང་བཞིན་ཁབ་རལ་གང་ཞིག་བྱེད། །བློ་ངན་དེ་འདིར་ལྟུང་བྱེད་ཀྱི། །ཆུ་སྲིན་ཁ་རུ་ལྟུང་འདོད་ཡིན། །དེ་ཡིས་ཁབ་རལ་བཅག་ནས་ནི། །ལྟུང་བ་དེ་ནི་བཤགས་བྱ་སྟེ། །རིགས་པའི་ཁབ་རལ་བྱེད་དེ་ལ། །བྱ་བའི་ཆོ་ག་འདི་ཡིན་ཏེ། །སྣུ་གུ་དང་ནི་ཆང་བ་ཡི། །རྣམ་པ་དེ་དང་འཚམ་པའི་ཚད། །ཁབ་དང་གྲི་གུ་ཡང་དག་ལྡན། །དེ་ལས་གཞན་དུ་ནམ་ཡང་མིན། །ཁབ་ཀྱང་ཟངས་མ་འཁར་བ་དང༌། །ར་གན་ལྕགས་དང་རྣམ་པ་བཞི། །གྲི་གུ་ལྕགས་ཉིད་ཁོ་ནར་གསུངས། །དེ་ལ་རབ་འབྲིང་ཐ་མར་འདོད། །རབ་ཚད་སོར་ནི་བརྒྱད་ཤེས་ཏེ། །ཐ་མ་ཡང་ནི་སོར་བཞི་ཡིན། །བྱ་གག་གཤོག་པའི་རྣམ་པ་ནི། །གྲི་གུའི་དབྱིབས་སུ་བྱ་བ་ཡིན། །གང་ཚེ་གྲོང་གཞན་འགྲོ་བ་ན། །དགེ་སློང་རིངས་པར་གྱུར་ཀྱང་དེར། །ཁབ་ཀྱི་བསླབ་བྱ་བསྲུང་པའི་ཕྱིར། །གཅིག་ཙམ་ངེས་པར་ཁྱེར་བར་བྱ། །དགེ་འདུན་ཁྲི་དང་ཁྲིའུ་སོགས། །བྱེད་ན་བདེར་གཤེགས་སོར་གྱིས་ནི། །རྐང་པ་ལ་ནི་སོར་བརྒྱད་བྱ། །ལྷག་པར་དགེ་སློང་མི་བྱའོ། །བདེ་བར་གཤེགས་པའི་སོར་བརྒྱད་ལ། །ཁྲུ་གང་ཚད་དུ་འདོད་པ་ཡིན། །དེ་ལས་ལྷག་པ་དགེ་སློང་གིས། །བཅད་ནས་ལྟུང་བ་སོ་སོར་བཤགས། །ཐོ་མཚམས་དོན་དུ་དགེ་སློང་གིས། །དགེ་འདུན་མལ་སྟན་ལ་སོགས་ལ། །ཤིང་བལ་ལ་སོགས་བདལ་མི་བྱ། །བདལ་ན་དེ་ཟད་ལྟུང་བར་འགྱུར། །ར་བལ་ལུག་བལ་ཀ་ཤ་དང༌། །ཤལ་མ་ལ་ཡི་བལ་ཡང་སྟེ། །དངོས་པོ་དེ་ནི་བསྡུས་ནས་སུ། །ལྟུང་བཤགས་པར་བྱ་བ་ཡིན། །སྟེང་དུ་འགྲེམས་པར་བྱེད་པ་གང༌། །དེ་འདིར་བདལ་བར་ཤེས་པར་བྱ། །གང་དང་འབྲེལ་པས་དགེ་སློང་གི །གོས་དག་མཛེས་པར་མི་འགྱུར་བའོ། །སྲིད་དུ་བདེ་བར་གཤེགས་པ་ཡི། །མཐོ་གསུམ་དེ་ལས་ལྷག་པར་མིན། །ཞེང་དུ་ཕྱེད་དང་གཉིས་ཡོད་དེ། །བརྟུལ་ཞུགས་ཅན་གྱིས་གདེང་བ་བྱ། །ལྷག་པ་བཅད་ནས་ལྟུང་བ་ནི། །གང་ལ་བཤགས་པར་བྱེད་པ་ན། །ཚུལ་ལྡན་དེས་ཀྱང་ཁྱོད་ཀྱི་འདི། །བཅད་དམ་ཞེས་ནི་དྲི་བར་བྱ། །འདི་ཉིད་དབང་བྱས་བཞི་དང་གཉིས། །ཆུ་དང་ཞེང་དུ་བསྔགས་པ་སྟེ། །དགེ་སློང་གཡན་པ་དག་བ་
པ་ནི། །དེ་ལས་ལྷག་ན་ལྟུང་བྱེད་དེ། །དབྱར་གོས་རས་ཆེན་ཞེས་བྱ་བ། །སྲིད་དུ་དྲུག་ཡིན་ཤེས་པར་བྱ། །རྒྱར་ནི་ཕྱེད་དང་གསུམ་ཡིན་ཏེ། །གང་ཕྱིར་སྟོན་པའི་མཐོ་ཡིའོ། །བདེ་བར་གཤེགས་པའི་ཆོས་གོས་ཀྱི། །ཚད་དུ་ཆོས་གོས་མི་བྱ་སྟེ། །མཉམ་པ་འམ་ནི་ལྷག་པར་ཡང༌། །དེ་ལ་མཐོ་ནི་བཅུ་དང་དྲུག །བསླབ་པ་ཉམས་བྱེད་བྱིས་པ་གང༌། །མི་ཟང་ངན་སོང་གསུམ་དག་ཏུ། །དེས་ལྟུང་འཇིགས་བརྒྱ་བསྐྱེད་པས་ན། །དེ་ཕྱིར་ལྟུང་བྱེད་ཅེས་བྱའོ། །ལྟུང་བྱེད་ཡང་དག་བཤད་ནས་ཀྱང༌། །དེ་ཡི་རྗེས་ཐོགས་བརྗོད་པར་བྱ། །རང་གི་མཚན་ཉིད་དབྱེ་བ་ཡིས། །སོ་སོར་བཤགས་པ་རྣམ་པ་བཞི། །སྡོམ་བརྩོན་རང་གི་སྤྱོད་ཡུལ་དུ། །ཉེ་དུ་མ་ཡིན་དགེ་སློང་མ། །དེ་ལས་བསོད་སྙོམས་བླངས་ནས་ནི། །ཟོས་ན་སོ་སོར་བཤགས་པ་ཡིན། །ཁྱིམ་གང་དག་ཏུ་དགེ་སློང་རྣམས། །གསོལ་ཚེ་དགེ་སློང་མ་གང་ཞིག །འདི་ལ་མར་སྦྱིན་འདི་དག་ལ། །ཟས་སོགས་བྱིན་ཞེས་གལ་ཏེ་སྨྲ། །དགེ་སློང་རྣམས་ནི་ཟན་ཟའི་བར། །སྲིང་མོ་མ་སྨྲ་ཞེས་ནི་བཟློག །དེ་ལས་གཅིག་ཀྱང་མི་སྨྲ་ན། །ཀུན་ལ་སོ་སོར་བཤགས་པ་ཡིན། །ནང་དང་བར་དང་ཕྱི་གནས་ནི། །སུམ་ཆར་གདུགས་ཚོད་གསོལ་རྣམས་ཏེ། །དགེ་འདུན་གྱིས་ནི་གནས་བརྟེན་ནམ། །ཡང་ན་གསར་བུ་ཀུན་གྱིས་བརྗོད། །དགེ་སློང་རྣམས་ནི་གསོལ་གྱི་བར། །འདི་ནི་མ་སྨྲ་འདུག་ཅེས་སོ། །དགེ་སློང་མ་ལ་མ་བཟློག་གམ། །ཞེས་ནི་ཕྱི་རོལ་གནས་པས་དྲི། །བར་ནས་བྲ་བ་རྣམས་ཀྱིས་ནི། །མ་དྲིས་ཟོས་ན་ལྟུང་བ་ཡིན། །ཕྱི་རོལ་བ་ལ་ཉེས་བྱས་ཏེ། །གལ་ཏེ་གཅིག་ཀྱང་མི་སྨ་ན། །དགེ་འདུན་གནས་བརྟན་ལ་སོགས་པ། །ཀུན་ལ་སོ་སོར་བཤགས་པ་ཡིན། །དེ་ཡང་ལྟུང་བྱེད་ཇི་བཞིན་དུ། །སྡོམ་བརྩོན་གཅིག་གི་མདུན་དུ་བཤགས། །དགེ་སློང་མ་ཡི་དབྱར་ཁང་དུ། །བསྐོ་ཤམ་བྱེད་ལ་བཀག་པ་མེད། །དེ་ནི་དེ་ཡི་རང་རྫས་ཏེ། །ཁང་བཟངས་རྒྱ་ཆེན་འགར་ཡང་ངོ༌། །དགེ་འདུན་མཐུན་པས་སློབ་པ་ཡི། །ཁྱིམ་གང་བསླབ་པའི་སྡོམ་ཅན་གྱིས། །དགེ་སློང་བྲུ་བས་ཉེན་ན་ཡང༌། །མགྲོན་དུ་མ་བོས་ཟན་མི་བཟའ། །མར་དང་ཞོ་དང་འོ་མ་དང༌། །སྦྲང་རྩི་བུ་རམ་བཏུང་བ་དང༌། །ཉ་ཤ་ཤ་དང་ཤ་སྐམ་དང༌།
མར་དང་བཅས་པ་བཀག་པ་ཡིན། །ལོ་མ་མེ་ཏོག་འབྲས་བུ་སོགས། །དང་དུ་ལེན་པ་འགལ་བ་མེད། །དམ་པའི་ཆོས་ནི་སྟོན་པ་ན། །མལ་སྟན་སྤྱོད་པ་ལ་ཡང་ངོ༌། །སྡོམ་བརྩོན་ཁྱིམ་གཞན་ཟོས་ནས་ནི། །བཟའ་ལྷག་ཁྱིམ་དུ་བྱིས་པ་ལ། །དུམ་བུར་བགོས་ཏེ་སྦྱིན་བྱ་སྟེ། །ཚུལ་ལྡན་ལ་ནི་དེ་དག་དགའ། །གང་ཞིག་འཇིགས་དང་བཅས་པ་ཡི། །དགོན་པའི་གཙུག་ལག་ཁང་གནས་པའི། །དགེ་སློང་ཕྱི་རོལ་འོངས་ནས་ནི། །བཟའ་བ་ལེན་པ་བཀག་པ་ཡིན། །དེ་ཐོབ་དེར་རམ་གཞན་དུ་འམ། །གཙུག་ལག་ཁང་དུ་མི་ཟ་ཡང༌། །ནགས་ཉུལ་ནས་ནི་མ་གཏོགས་ཏེ། །དགེ་སློང་ལ་ནི་ལྟུང་བར་འགྱུར། །དེ་ལྟར་བྱས་ན་ཅི་རིགས་པར། །ཀུན་དགའ་ར་བར་སྡོམ་བརྩོན་མདུན། །བདག་ལ་མི་རིགས་སྨད་པའི་གནས། །བྱུང་ངོ་ཞེས་ནི་སོ་སོར་བཤགས། །དེ་ལྟར་སོ་སོར་བཤགས་རྣམ་བཞི། །གང་དུ་ཇི་བཞིན་བཤད་ནས་ནི། །ད་ནི་གང་ཞིག་བསླབ་པའི་ཆོས། །མང་པོའི་སྐབས་སོན་བསྟན་པར་བྱ། །ཤམ་ཐབས་སྟེང་གི་གོས་གྱོན་པ། །དེ་ནི་ཤིན་ཏུ་ཟླུམ་པོར་བགོ །ཧ་ཅང་རྩེངས་པ་མ་ཡིན་དང༌། །ཧ་ཅང་འཇོལ་བ་མ་ཡིན་བརྗོད། །གླང་པོའི་སྣ་ལྟར་མ་ཡིན་དང༌། །ཏ་ལའི་ལོ་མ་ལྟར་མི་འདོད། །སྦྲུལ་མགོའི་གདེངས་ཀ་ལྟ་བུ་དང༌། །སྦྲུལ་གྱི་མགོ་བོ་ཉིད་ལྟར་མིན། །བརྟུལ་ཞུགས་ལྡན་པས་ཤམ་ཐབས་ནི། །འབྲུ་ཡི་ཕུར་མ་ལྟར་མི་བགོ །སྟོད་གཡོགས་སྟོབས་ཀྱི་ལྷ་བཞིན་དུ། །བགོ་དར་ཡང་ནི་མི་བྱའོ། །ཤིན་ཏུ་བསྡམས་དང་ལེགས་པར་བགོ །གཉའ་ཤིང་གང་ཙམ་ལྟ་བ་དང༌། །ལྟ་བ་མི་ཡེངས་པ་ཡི་ནི། །བརྟུལ་ཞུགས་ཅན་གྱིས་གྲོང་འཇུག་བྱ། །མགོ་བོ་གཡོགས་དང་བརྫེས་པ་ཡིས། །གྲོང་དུ་འཇུག་པར་མི་བྱའོ། །མི་གཟར་བ་དང་གཉའ་གོང་གཟེད། །ཅོག་པུ་དེ་བཞིན་དཀུར་མི་བརྟེན། །སྡོམ་བརྩོན་མཆོང་སོགས་མི་བྱ་ཞིང༌། །ལག་པ་མི་སྦྲེལ་ཕྲག་མི་སྤྲད། །ལུས་དང་ལག་པ་མགོ་བོ་དག །བསྒྱུར་ཞིང་ཀྱོགས་པས་གྲོང་མི་འཇུག །མ་བརྟགས་པ་དང་མ་བསྒོ་དང༌། །ལུས་ཀུན་གྱི་ནི་ལྗིད་མི་དབབ། །རྐང་པ་ཡིས་ནི་རྐང་པ་དང༌། །ལོང་བུས་ལོང་བུ་བསྣོལ་མི་བྱ། །རྐང་པ་མི་རྐྱོང་མི་དགུག་ཅིང༌། །མི་གདང་
བྱིན་པ་བསྣོལ་མི་བྱ། །བརླ་ཡང་ཕན་ཚུན་བསྣོལ་མི་བྱ། །ཁྱིམ་དུ་མཉམ་གཞག་མིན་མི་འདུག །ལྷུང་བཟེད་ལ་ལྟ་མཐར་ཆགས་དང༌། །ཚོད་མ་མཉམ་དང་བྱུར་བུ་ཡིས། །ཡོངས་སུ་བླང་བར་མི་བྱ་ཞིང༌། །ཟས་སྟེང་ལྷུང་བཟེད་མི་གཞག་གོ །བཟའ་བ་ཉེ་བར་མི་སྟོབས་པར། །ལྷུང་བཟེད་སྔར་བཟེད་མི་བྱའོ། །སླར་ཡང་འདོད་པས་ཚོང་མ་དང༌། །ཟན་ནི་ཕན་ཚུན་དགབ་མི་བྱ། །རོ་ལ་ཆགས་པས་མི་བཟའ་ཞིང༌། །ཤིན་ཏུ་མང་པོ་མ་ཡིན་ནོ། །ཟས་ལ་མ་གུས་བརྙས་བཅས་དང༌། །ཁམ་ནི་ཆེ་མིན་ཆུང་མ་ཡིན། །ཁམ་ནི་མ་བཟས་བར་དུ་ནི། །ཁ་གདང་མི་བྱ་འགྲམ་མི་བསྐྱོད། །དགེ་སློང་ཁ་བཀང་སྨྲ་མི་བྱ། །ཟས་ལ་སྒྲ་ནི་གསལ་ཆེས་མིན། །ཙུག་ཙུག་ཞེས་ཀྱང་མི་བྱ་སྟེ། །པུ་པུ་ལ་སོགས་ཀུན་མི་བྱ། །དགེ་སློང་ཟས་ལ་འཕྱས་མི་གདགས། །ཐ་དད་ཕྱེ་ནས་མི་བཟའ་བའོ། །འགྲམ་པ་ཟས་ཀྱིས་མི་དགང་ཞིང༌། །ཁམ་ནི་འཕྲོ་ཡིས་གཅད་མི་བྱ། །ནམ་ཡང་ཟས་ནི་ཟ་བའི་ཚེ། །ལྕེ་བརྐྱང་བ་ཡིས་མ་ཡིན་ནོ། །ལག་པ་དག་ནི་མི་ལྡག་ཅིང༌། །ལྷུང་བཟེད་ཀྱང་ནི་བྱོག་མི་བྱ། །ལག་པ་སྦྲུག་པར་མི་བྱ་སྟེ། །ལྷུང་བཟེད་བསྐྱོམས་པར་མི་བྱའོ། །མཆོད་རྟེན་རྣམ་པར་བྱས་ནས་ནི། །བཅོམ་སྟེ་བཟའ་བར་མི་བྱའོ། །དྲུང་ན་འདུག་པའི་ལྷུང་བཟེད་ལ། །སྨད་པའི་དོན་དུ་མི་ལྟའོ། །ལག་པ་ཟས་དང་བཅས་པ་ཡིས། །ཆུ་སྣོད་དག་ལ་གཟུང་མི་བྱ། །ཟས་དང་བཅས་པའི་ཆུ་ཡིས་ནི། །དྲུང་ན་གནས་ལ་གཏོར་མི་བྱ། །ཟས་བཅས་ཆུ་དང་ཟས་ལྷག་ནི། །ལྷུང་བཟེད་ཀྱིས་ནི་དོར་མི་བྱ། །ཁྱིམ་པས་རྗེས་སུ་གནང་བ་ན། །ཁྱིམ་གཞན་དུ་ནི་ཉེས་པ་མེད། །གད་ཁ་དང་ནི་གཡང་ཁ་དང༌། །དཀན་ངོས་ལྷུང་བཟེད་མི་བཞག་ཅིང༌། །ལངས་ནས་བཀྲུ་བར་མི་བྱའོ། །འབབ་ཆུ་དྲག་ཏུ་འབབ་པ་ཡི། །རྒྱུན་ལས་བཟློག་ནས་ལྷུང་བཟེད་ཀྱིས། །ཆུ་ནི་བླང་བར་མི་བྱའོ། །ལྷུང་བཟེད་ཀུན་ཏུ་མི་རྙེད་ཕྱིར། །འདུག་ལ་འགྲེང་བས་ཆོས་བཤད་མིན། །ཉལ་བ་ལ་ནི་འདུག་པས་མིན། །འདུག་སྟན་དམའ་མོས་མཐོན་པོ་དང༌། །ཕྱི་བཞིན་འོངས་པས་ཆོས་མི་བསྟན། །དེ་བཞིན་ལམ་མིན་འདུག་ནས་ཀྱང༌། །ལམ་ནས་འགྲོ་བ་ལ་ཡང་མིན། །མགོ་ལ་ཞྭ་འམ་ཅོད་པན་
ཐོགས། །ཕྲེང་བའམ་གཙུག་ཏོར་ཅན་ལ་མིན། །གླང་ཆེན་རྟ་དང་ཁྱོགས་ལ་ཞོན། །མཆིལ་ལྷམ་གྱོན་པ་དག་དང་ནི། །གདུགས་འཛིན་པ་དང་དབྱུག་ཐོགས་དང༌། །མགོ་བོ་གཡོགས་པ་ལ་སོགས་པས། །གནས་པ་ལ་ནི་མི་རུང་སྟེ། །དགེ་སློང་དག་གིས་ཆོས་བཤད་པ། །ནད་པ་ལ་ནི་འགལ་བ་མེད། །སྡོམ་བརྩོན་རྐྱེན་མེད་ལངས་ནས་ནི། །བཤང་གཅི་དོར་བའི་བྱ་བ་དག །མི་བྱ་ལུས་ནི་བདེར་གནས་པས། །བྱས་ནས་འགལ་ཚབས་ཅན་དུ་འགྱུར། །གང་ཡང་སྡོམ་ལྡན་དེར་གནས་པས། །ཆུ་འམ་རྩྭ་སྔོན་དག་ལ་ཡང༌། །བཤང་གཅི་དང་ནི་སྐྱུགས་པ་དང༌།། མཆིལ་མ་ངར་སྣབས་མི་དོར་རོ། །ཅི་སྟེ་འདོར་བྱེད་དེ་ལ་འདིར། །ཉེས་བྱས་བསྐྱེད་པར་ཐེ་ཚོམ་མེད། །དེ་འདྲའི་རྐྱེན་དག་བྱུང་ན་ནི། །སྡོམ་བརྩོན་ལྟུང་བ་ཡོད་མ་ཡིན། །རྐྱེན་མ་གཏོགས་པར་མི་གང་ལས། །ལྷག་པར་ཤིང་ལ་འཛེག་མི་བྱ། །ཀུན་མཁྱེན་ཡབ་ཀྱིས་བསྟན་པ་ཡི། །སྤྱོད་པས་རྟག་ཏུ་གནས་པ་སྟེ། །འགྲེང་དང་ཉལ་དང་འདུག་པ་དང༌། །འཆག་པ་ལ་ཡང་དེ་བཞིན་ཏེ། །གང་ཕྱིར་བདག་ནི་མཐའ་ཡས་ཡོན་ཏན་འབྱུང་གནས་ཀྱི། །ཡབ་གཅིག་བདེ་གཤེགས་སྲས་ཡིན་དེས་བསྟན་སྤྱོད་ཡུལ་ནི། །ཆོས་ཀུན་རང་བཞིན་དེ་སེམས་ཞི་བྱེད་རྟོགས་པར་ཡང༌། །འདོད་པས་བདག་ཉིད་ཕྱི་རོལ་གཡོ་བ་བཟློག་པར་བྱ། །དེ་ལྟར་དེ་དག་ཐམས་ཅད་དུ། །ཇི་སྐད་གསུངས་པའི་བསླབ་པ་སྤྱད། །འདི་ནི་བསླབ་པར་བྱ་བའི་ཆོས། །མང་པོ་མདོར་བསྡུས་བསྟན་པ་ཡིན། །དེ་རྗེས་བདུན་གྱི་དབང་བྱས་ནས། །ཞི་བྱེད་བསྟན་པ་དེ་འདིར་བརྗོད། །རྩོད་པ་འཁྲུག་ལོང་རྟག་ཏུ་བརྗོད། །ཞི་བྱེད་དེ་ཡི་རྗེས་ཀྱི་ཆོས། །ཐམས་ཅད་གང་ཟག་ཁྱད་པར་ལས། །ཞི་བྱེད་དེ་ནི་རྣམ་པ་བདུན། །གང་ཞིག་ལུས་ངག་བསྡམས་པ་ཡིས། །གཟུ་བོ་ཡང་དག་སྤྲོ་བྱ་སྟེ། །དགེ་འདུན་མཐའ་དག་དབུས་སུ་དེ། །ཚུལ་བཞིན་ལེགས་པར་འགྲང་བར་བྱ། །འདུན་དང་ཞེ་སྡང་གཏི་མུག་འཇིགས། །རྣམ་སྤང་ཡང་དག་རྩོད་པ་དག །བྱེད་འདོད་དེ་ལ་སྤེད་པ་དང༌། །སྤེད་པ་ཡང་ནི་ཤེས་པའོ། །གཟུ་བོ་རྩོད་པ་མངོན་སུམ་དང༌། །གང་ཟག་དེ་ཡང་མངོན་སུམ་བརྗོད། །ཚུལ་བཞིན་དེ་ཆོས་མངོན་སུམ་དང༌། །སྟོན་པ་ཡི་ནི་བཀའ་བཞིན་ཏེ། །མངོན་
སུམ་དུ་ནི་ཞི་བྱེད་འདི། །མངོན་སུམ་འདུལ་བར་བརྗོད་དེ་གཅིག །བློ་དམན་རྣམས་ཀྱིས་དྲན་པའི་ཕྱིར། །འདི་ནི་ཕྱོགས་ཙམ་བསྟན་པ་ཡིན། །གང་ཡང་དགུ་འམ་བཅུ་ཡིས་སམ། །ལྔ་འམ་དེ་ལས་ལྷག་པས་ཀྱང༌། །གང་མང་གིས་ནི་རྩོད་བ་དག །ཞི་བྱེད་དེ་ནི་གང་མང་བརྗོད། །གལ་ཏེ་གཟུ་བོ་གང་མང་དང༌། །གང་ལ་མདོ་སྡེ་འདུལ་བ་ཡི། །བསྟན་བཅོས་ཤེས་པའི་གནས་བརྟན་ནམ། །གཞན་གྱིས་ཀྱང་རྩོད་མ་ཞི་ན། །ཚོགས་ལ་དབུལ་ལོ་ཚོགས་ཀྱིས་ཀྱང༌། །ཆོས་ལྔ་ལྡན་པས་ཡང་དག་བསྐོ། །སྔར་བཞིན་འདིར་ཡང་ཚུལ་ཤིང་བྲིམ། །གང་དེས་ཚུལ་ཤིང་བྱ་བ་ནི། །ཆོས་དང་ཆོས་མིན་སྟོན་བྱེད་གཉིས། །ཆོས་ཀྱི་ཚུལ་ཤིང་མཆོད་འོས་ཏེ། །དྲང་པོ་དྲི་ཞིམ་རེག་ན་བདེ། །ཅིག་ཤོས་དེ་ལས་བཟློག་པ་སྟེ། །ཡོན་པ་དྲི་ངན་རེག་བྱ་རྩུབ། །ཆོས་ཀྱི་ལག་པ་གཡས་སུ་བཅང༌། །ཅིག་ཤོས་སྟེང་ནས་བཀག་སྟེའོ། །དགེ་འདུན་ཡང་ནི་འདུག་པ་ན། །ནན་ཏན་ལྡན་པས་ལན་གསུམ་པར། །ཆོས་ཀྱི་ཚུལ་ཤིང་དང་པོ་སྟེ། །གནས་བརྟན་སྨོས་ནས་རབ་ཏུ་བྲིམ། །གལ་ཏེ་འདིར་ནི་ཆོས་ཀྱི་བརྡ། །དགེ་བ་རྣམས་ནི་མང་གྱུར་ན། །ཚུལ་ཤིང་དེ་ཡིས་ཆོས་ཀྱི་དོན། །རྩོད་པ་དེ་ཡིས་གོ་བར་བྱ། །དེ་ལ་སྐྱོར་བྱེད་དགེ་སློང་ལ། །སྔར་བཤད་པ་ཡིས་ལྟུང་བར་འགྱུར། །སླར་ཡང་ཅིག་ཤོས་དེ་ལྟ་ནའང༌། །དེ་ནི་ཞི་བར་བརྗོད་པར་བྱ། །ཆོས་མིན་ལས་སྐྱོར་དགེ་སློང་ལ། །དེ་ལྟ་ན་ཡང་ཉེས་བྱས་ཏེ། །གང་མང་ཞེས་ནི་གྲགས་པ་ཡི། །འདུལ་བ་འདི་ནི་དཔའ་བོས་གསུངས། །འདི་ནི་རྩོད་དང་འཁྲུག་ལོང་ལས། །བརྩམས་པའི་འདུལ་བ་གཉིས་པར་གྲགས། །གསུམ་པ་མི་གདམས་རྩོད་ཞི་བྱེད། །འདུལ་བ་རིག་པ་རྣམས་ཀྱིས་གསུངས། །མངོན་སུམ་འདུལ་དང་དེ་བཞིན་དུ། །དྲན་པ་མ་སྨྱོས་པ་ཡིས་འདུལ། །མངོན་སུམ་འདུལ་བ་སྔ་མ་བཞིན། །སྔ་མ་ཇི་ལྟ་དེ་ལྟར་བརྗོད། །དྲན་འདུལ་ཤེས་པར་བྱ་བ་ནི། །གྱད་བུ་ནོར་ལ་སོགས་པའི་ཚིག །དགེ་སློང་མ་ནི་མཛའ་མོས་སྔོན། །སྟོན་པ་ལ་ཞུས་ཇི་བཞིན་ཏེ། །ཚུལ་འདིས་དགེ་སློང་ཁྱེད་ཅག་གིས། །གྱད་བུ་ནོར་ལ་དྲན་འདུལ་སྦྱིན། །འདི་ལྟར་ཡང་ནི་སྦྱིན་བྱ་སྟེ། །དེས་ནི་
རྒན་པའི་མཐའ་ལོགས་བརྗོད། །གསོན་ཅིག་དག་འདུན་བཙུན་པ་རྣམས། །བདག་ལ་ཚུལ་མིན་སོགས་ཀྱིས་བསྐུར། །དེ་ནི་ཚོགས་ལ་དྲན་པ་ཡིས། །འདུལ་བ་བདག་ལ་གནང་ཞེས་གསོལ། །དེ་ལྟར་ལན་གསུམ་བརྗོད་རྗེས་ལ། །དགེ་སློང་གཅིག་གིས་གསོལ་བྱས་ནས། །ཆོས་དང་ལྡན་ཞིང་ཆོ་ག་བཞིན། །དྲན་པས་འདུལ་བ་དེ་ལ་སྦྱིན། །མ་སྨྱོས་འདུལ་བ་གསུངས་པ་ནི། །བྱེ་སྐྱེས་བཞིན་དུ་དེ་ཚེ་དག །སེམས་འཁྲུགས་པའམ་སྨྱོས་པའམ། །བློ་ནི་ཚོར་བས་གཟིར་བ་སྟེ། །དེས་ན་སྡོམ་བརྩོན་རྣམས་ཀྱིས་བདག །དམན་ཕྱིར་ཡང་དང་ཡང་དུ་བསྐུལ།། མ་མྱོས་འདུལ་བ་དགེ་འདུན་ལ། །གསན་དུ་གསོལ་ཞེས་ལན་གསུམ་བརྗོད། །མ་མྱོས་འདུལ་བ་འདི་ལ་ཡང༌། །གསོལ་བ་སྔོན་བརྗོད་ལས་ཀྱིས་སྦྱིན། །དེ་ལྟར་ཚུལ་དེས་རྩོད་ཞི་བ། །མ་མྱོས་པ་ཡི་འདུལ་བས་སོ། །ལྟུང་ཕྱིར་རྩོད་པ་དག་ལ་ཡང༌། །འདུལ་བ་བཞི་ཡིས་མྱུར་དུ་ཞི། །ཡང་དག་ཁས་བླངས་མངོན་སུམ་དང༌། །རྩྭ་བཀྲམ་དེ་ཉིད་ཚུལ་ལ་ནི། །ལྟུང་བར་བཅས་པ་གླེངས་པའམ། །མ་གླེངས་ན་ཡང་དགེ་སློང་གིས། །དགེ་སློང་མདུན་ན་ཙོག་པུ་ཡིས། །འདུག་སྟེ་ཐལ་སྦྱར་ཕྱག་བྱས་ནས། །བརྗོད་དེ་དགོངས་ཤིག་ཁྱོད་ཀྱི་མདུན། །ལྟུང་བ་བཤགས་བརྗོད་དེས་ཀྱང་དེར། །མཐོང་ངམ་ཞེས་དྲི་མཐོང་ལན་སྨྲ། །ཕྱིན་ཅི་མ་ལོག་དེ་ཡི་ཚིག །ཕྱིན་ཆད་ལྟུང་ལ་དགའ་མིན་དྲི། །དགའ་བར་མི་བྱེད་ཅེས་ཚིག་བརྗོད། །ཐབས་ཡིན་ཞེས་ཀྱང་ངེས་བརྗོད་དེ། །ཁས་བླངས་རྩོད་དེ་ཞི་བའོ། །ཕས་ཕམ་ལ་སོགས་ཚོགས་མཆོག་ལ། །ཁས་བླངས་འདུལ་བ་གསོལ་བ་ན། །དེ་ལྟར་རྩོད་དེ་ཞི་དོན་དུ། །ཁས་བླངས་ཉིད་དུ་མཁས་པས་བརྗོད། །འདི་ལྟར་ཡངས་པ་ཅན་དུ་སྔོན། །དགེ་སློང་ནག་པོས་ཆོས་གོས་དག །ཁྱེར་སོང་དགེ་སློང་ཡངས་ཅན་རྣམས། །མཉན་ཡོད་འོངས་པ་ལས་གྱུར་ཏེ། །མངོན་སུམ་རྩོད་པས་འགྲོ་བ་ལ། །མངོན་སུམ་འདུལ་བ་ཡང་དག་བསྟན། །མངོན་སུམ་འདུལ་བའི་དེ་ཉིད་འདི། །སླར་ཡང་རབ་བཤད་བཟླས་པས་སོ། །ཕན་ཚུན་རྩོད་པས་འགྲེལ་བ་ལ། །རྩྭ་བཀྲམ་ལྟ་བུར་རབ་ཏུ་གསུངས། །གནས་བརྟན་གཞན་ཞིག་སོང་ནའང་
དེར། །འདི་ལྟར་ཡང་དག་རྗེས་བསྟན་བྱ། །ཁྱེད་ཅག་རྩོད་ལ་མངོན་དགའ་ཞིང༌། །སླར་ལྡོག་བྱེད་པའང་དཀའ་བར་གནས། །ཁྱོད་འདིར་ལེགས་པ་རྙེད་མིན་ཏེ། །འདི་འདྲ་དགེ་སློང་ཡིན་ནམ་ཅི། །གཞན་ཡང་ཁྱེད་དང་བདག་ཅག་ལ། །ངེས་པར་ལྟུང་བ་གང་བྱུང་བ། །སྦོམ་པོ་འམ་མཐར་ཐུག་སྤངས་ནས་ནི། །དེ་ནི་ཉེར་ཞི་སྤྲོ་བས་གནས། །དེ་ལ་དེས་སྨྲས་མི་ཉན་པའང༌། །མིན་ན་དེ་ཚེ་རང་བཞིན་གནས། །ཅིག་ཤོས་ཀྱི་ནི་ཕྱོགས་ལ་ཡང༌། །དེ་ནི་སྔར་བཞིན་བརྗོད་པར་བྱ། །དེ་ཡང་གལ་ཏེ་མ་ཞི་བའི། །སེམས་ལྡན་དེ་ཚིག་ཉན་མིན་ན། །རྩོད་དེ་ཉེ་བར་ཞི་བ་ནི། །རྩྭ་བཀྲམ་ཚུལ་གང་ཉིད་ཀྱིས་སོ། །ལྟུང་བ་ཁས་བླངས་པ་ལ་ཡང༌། །སླར་ཡང་ལོག་པར་ཤེས་པ་ཡིས། །ཚོགས་ནང་དེ་སླར་ཁས་མི་ལེན། །དགེ་སློང་མེ་བཞི་ཇི་བཞིན་དུ། །འདིར་ཡང་དེ་ཡི་ངོ་བོ་ཉིད། །ཚོལ་བས་དེ་འདུལ་དགེ་སློང་ལ། །སྦྱིན་ཞེས་གཞན་ལ་ཕན་བྱེད་པའི། །འགྲོ་བ་རྣམས་ཀྱི་རྩ་ལག་གསུངས། །དེས་ཀྱང་དེ་ལྟར་རྒན་པ་ཡི། །མཐར་ནི་ཀུན་ལ་གསོལ་བར་བྱ། །དེ་ལ་དེ་བཞིན་ཚོགས་ཀྱིས་ཀྱང༌། །ཆོ་ག་ཐམས་ཅད་སྔ་མ་བཞིན། །བྱ་ཕྱིར་རྩོད་ལ་དགེ་སློང་གི །ཚོགས་ཀྱིས་ཀུན་གྱི་ཞི་བ་ཐོབ། །མི་མཐུན་བྱེད་མིན་ཁ་ཅིག་ལ། །ཞི་བྱེད་དེ་འདིར་ཤེས་པར་བྱ། །འདི་ནི་སོ་སོར་ཐར་པ་ཡི། །མདོ་དོན་མདོར་བསྡུས་ཙམ་ཞིག་སྟེ། །གཞི་ལ་སོགས་པར་གང་གསུངས་པ། །དེ་ཡང་ཅི་ནུས་བརྗོད་པར་བྱ། །རིགས་ངན་རེག་འོས་མ་ཡིན་དང༌། །ཆང་འཚོང་ཁྱིམ་དང་རྒྱལ་པོའི་ཁབ། །སྨད་འཚོང་ཁྱིམ་དུ་བརྗོད་པ་སྟེ། །ལྔ་པོ་དགེ་སློང་སྤྱོད་ཡུལ་མིན། །གྲངས་ཅན་ལ་སོགས་བརྫུན་པ་ཡི། །བསྟན་བཅོས་རྒྱུན་དུ་བདེན་པའི་བློས། །ཀློག་པར་བྱེད་ན་དེ་དག་ལ། །བསོད་སྙོམས་དུག་ཏུ་འགྱུར་བ་ཡིན། །མི་བཟད་ངན་སོང་ནད་ཀྱི་སྨན། །བདེར་གཤེགས་བསྟན་བཅོས་ཤེས་ནས་ནི། །སུན་དབྱུང་ཆེད་དུ་གཞན་དག་གི །བསྟན་བཅོས་ཀྱང་ནི་བལྟ་བར་བྱ། །གང་ཕྱིར་ཀུན་མཁྱེན་དག་པའི་བཀའ། །སྦྲང་རྩིའི་ཚོགས་ཆེན་ཡོད་བཞིན་དུ། །སུ་ཞིག་མུ་སྟེགས་ཀྱིས་བསྟན་པའི། །ནིམ་པ་ཚ་བའི་རོ་མྱོང་བྱེད། །ཁྲིའུ་རྐང་པ་རི་མོ་ཅན། །མུ་
སྟེགས་རྒྱལ་མཚན་ཉིད་ཀྱང་སྟེ། །སྣོད་ཀྱང་ཧ་ཅང་མང་བ་དང༌། །སྣ་ཚོགས་བཀྲ་བ་སྤང་བར་བྱ། །སྐྱོབ་པས་ན་དང་རྒན་པོ་ལ། གཞོན་པ་ཐམས་ཅད་རྗེས་གནང་མཛད། །ཆད་པའི་ལས་ཀྱི་དུས་དག་ལ། །གསང་བའི་གནས་ནི་བཀྲི་བ་ཡང༌། །ཁུར་གྱི་རིམ་པས་འགྲོ་བ་དང༌། དབྱིག་པ་དང་ནི་དྲ་བ་སོགས། །བསམ་གཏན་ཀློག་དང་ལྡན་རྣམས་ལ། །བཅས་པ་གུས་པས་སྔོན་འགྲོ་བྱ། །མིག་སྨན་མཆུ་ཡི་བྱི་དོར་དང༌། །དེ་བཞིན་ཆོས་གོས་དྲི་ཞིམ་དགོད། །སེན་མོ་འཆོས་དང་མགོ་བོའི་ཁྲུས། །གདུགས་དང་མཆིལ་ལྷམ་ཁྲ་བོ་བཀག །ལོ་མ་འམ་ནི་སྨྱིག་མ་ཉིད། །འདི་ཉིད་སྡོམ་བརྩོན་དག་གིས་གདུགས། །རྟག་ཏུ་གྲོང་གི་དབུས་སུ་ནི། །དེ་ཡི་ཡུ་བ་བསྒྲེང་མི་བྱ། །ཡུ་བ་གདུགས་ཀྱི་ཚད་ཉིད་དེ། །ནམ་ཡང་དེ་ལས་རིང་དུ་མིན། །ཁ་གདང་ཚེ་ནི་ནམ་དུ་ཡང༌། །རང་གི་ལག་ལ་སོགས་པས་དགབ། །སྡོམ་བརྩོན་སོ་ཡི་རུས་པ་ནི། །བསྟན་ཏེ་བགད་པར་མི་བྱའོ། །སྒྲ་དབྱངས་ཆུང་དུས་སྟོན་པ་ཡི། །ཡོན་ཏན་བརྗོད་བྱ་དམ་ཆོས་ཀྱི། །དབྱངས་ནི་མངོན་པར་མི་ཤེས་ན། །དབེན་པར་སློབ་པ་བཀག་པ་མེད། །སྟོན་པའི་དམ་ཆོས་མཛེས་ཕྱིར་ཏེ། །ཉོན་མོངས་བཅས་པའི་སེམས་ཀྱིས་མིན། །དགེ་སློང་དགེ་སློང་མ་ལ་སོགས། །རྣམ་པ་ལྔ་ལ་སྟོན་པ་ཡིས། །དབྱར་གནས་པ་དང་དབྱར་གྱི་མཐར། །དགག་དབྱེ་བྱ་བར་རྗེས་སུ་གནང༌། །བསླབ་པ་མཐའ་དག་བླངས་པ་གང༌། །དགེ་སློང་དགེ་སློང་མར་ཤེས་ཏེ། །བཅུ་ཡི་གནས་ལ་དགེ་ཚུལ་ཉིད། །དགེ་ཚུལ་མ་ཡང་དེ་བཞིན་ནོ། །གཅིག་པུ་ལམ་དུ་མི་འགྲོ་ཞིང༌། །ཆུ་བོའི་ཕ་རོལ་རྐྱལ་མི་བྱ། །སྐྱེས་པ་ལ་ནི་མི་རེག་ཅིང༌། །དེ་དང་ལྷན་ཅིག་འདུག་མི་བྱ། །ཁ་ན་མ་ཐོ་མི་བཅབ་ཅིང༌། །སྨྱན་དུ་འགྱུར་བ་མི་བྱ་སྟེ། །འདི་དག་དགེ་སློང་མ་རྣམས་ཀྱི། །ཆོས་དྲུག་ཅེས་ནི་ཡོངས་སུ་བསྒྲགས། །ས་ལེ་སྦྲམ་ནི་ལེན་པ་དང༌། །གསང་བའི་གནས་ཀྱི་སྤུ་འདྲེག་དང༌། །ས་རྣམས་བརྐོ་བར་བྱེད་པ་དང༌། །རྩྭ་སྔོན་ལ་སོགས་གཅོད་པ་དང༌། །བྱིན་ལེན་མ་བྱས་ཟས་ལེན་དང༌། །གསོག་འཇོག་བྱས་པ་ཟ་བ་ལས། །ལྡོག་པ་ཞེས་བྱ་དེ་བཞིན་གཞན། །རྗེས་མཐུན་ཆོས་ནི་དྲུག་ཏུ་འདོད། །གསུང་རབ་ལས་ནི་
གསུངས་པ་ཡི། །དགེ་ཆོས་བཅུ་གཉིས་ལྡན་པ་ཡིས། །འཇིག་རྟེན་མགོན་པོའི་བསྟན་པ་ལ། །དགེ་སློབ་མ་ཡི་མིང་ཅན་ཡིན། །དགེ་འདུན་དག་གི་རྒན་རབས་ཀྱིས། །འབད་པས་ཚེས་གྲངས་དྲན་པར་བྱ། །གཙུག་ལག་ཁང་སྐྱོང་དག་གིས་ཀྱང༌། །ཉིན་རེ་ཚོགས་ཀྱི་ཐད་དུ་བརྗོད། །དུས་རྣམས་ཡང་དག་འཕོ་བ་ན། །ཟླ་ཕྱེད་གསུམ་གསུམ་རྗེས་ལ་ཆད། །ལོ་ལ་ཞག་རེས་མ་ཚང་བའི། །ཟླ་བ་དྲུག་ཏུ་བསྟན་པ་ཡིན། །ལོ་དང་ཟླ་བ་ཟླ་ཤོལ་དག །རྒྱལ་པོའི་བཀའ་ཡིས་ཀྱང་ནི་བསྔགས། །བཀའ་བཙན་གྲགས་ལྡན་ཤེས་རབ་ཅན། །དཔུང་ལྡན་དེ་ཡི་རྗེས་འབྲང་བྱ། །སྣོད་དང་ལག་པ་ལེགས་བཀྲུས་ནས། །བརྟུལ་ཞུགས་ཅན་གྱིས་བྱུག་རིས་བྱ། །ཅི་ནས་ཉི་མའི་དཀྱིལ་འཁོར་དང༌། །མཆོད་རྟེན་ལྟ་བུར་མི་བྱའོ། །སྡོམ་བརྩོན་ལམ་དུ་འགྲོ་བའི་ཚེ། །གང་དུ་ལྷ་ཡི་གཟུགས་དག་མཐོང༌། །དེ་བཞིན་གཤེགས་པའི་ཚིགས་པ་བཅད་ནི། །གུས་པས་སེ་གོལ་གཏོགས་ཏེ་བརྗོད། །དེ་དག་ཕན་དང་གནོད་པ་ཅན། །རྒྱལ་བས་ཉེས་བྱས་དག་ཏུ་བཅས། །དེས་ན་བསླབ་པ་རྗེས་བསྲུང་བས། །རྟག་ཏུ་དྲན་པར་བྱ་བ་ཡིན། །ལྷ་ཡི་གཟུགས་ནི་བྱ་བ་སྟེ། །དེ་ཡི་མཆོད་པ་རང་ཉིད་ཀྱིས། །བསླབ་པ་ཡང་དག་ཐོབ་པའམ། །སྡོམ་གནས་དགེ་སློང་གཞན་གྱིས་སོ། །དགོས་གྲུབ་ཆེད་དུ་གཟུགས་དེ་ལ། །གཏོར་མ་མེ་ཏོག་ལ་སོགས་སྦྱིན། །ལྷ་རྣམས་རང་གི་གནས་སུ་ནི། །མི་མཐུན་པ་དག་མི་སྟོན་ཕྱིར། །འདུས་པ་ཆེན་པོའི་མདོ་ཞེས་པར། །ལྷ་རྣམས་ཀྱིས་ནི་རྗེས་བསྔགས་པས། །སངས་རྒྱས་འཁོར་དུ་གཏོགས་པ་ལ། །ཅི་ནས་གནོད་པ་མི་བྱེད་གསུངས། །མགོན་པོས་སེམས་ཅན་ཐམས་ཅད་ལ། །ཀུན་དུ་བྱམས་པ་རབ་བསྔགས་ཏེ། །གང་ལ་ས་བོན་དེ་ཡོད་ན། །སྲེད་པ་ལས་བྱུང་སྡུག་བསྔལ་མེད། །གང་ཞིག་ལྷ་ནི་གང་དག་ལ། །གུས་པས་མཆོད་བྱེད་དེ་ལ་འདིར། །འཇིག་རྟེན་གནས་པ་གང་ཡིན་དུ། །སྲིད་པའི་ལོངས་སྤྱོད་འདོད་ཐོབ་བྱེད། །གང་ཞིག་སངས་རྒྱས་སྐྱབས་སོང་ནས། །རྣམ་པ་གཞན་གྱིས་གཞན་བསྟེན་ན། །གསལ་པོར་སེམས་ནི་གཡོ་བ་ཅན། །དེ་བརྟེན་འབྲས་བུ་ག་ལ་ཡོད། །ཡུལ་འཁོར་དག་གི་
བསོད་སྙོམས་ཀྱང༌། །འབར་བའི་མེ་མདག་ལྟ་བུར་སྤྱོད། །དུར་སྨྲིག་ཆ་ལུགས་ཙམ་གྱིས་ནི། །དགེ་སློང་རྟགས་སུན་འབྱིན་པ་ཡིན། །བློ་ངན་དྲན་པའི་དོན་དུ་ནི། །འདུལ་བ་ལ་སོགས་བྲི་བྱ་སྟེ། །རང་མིང་བདག་གི་བ་དག་ནི། །དགག་ཕྱིར་སྦྱིན་པའི་ཆོས་ཞེས་བྲི། །མ་དད་པའམ་དང་ཆུང་དག །ཚུལ་ཁྲིམས་ཅན་གྱི་བསྲོ་ཁང་དང༌། །ལུས་ཀྱི་དྲིལ་ཕྱི་བསྐུ་མཉེ་ཡི། །ལས་དག་ལ་ནི་རབ་ཏུ་བཀག །ཁྲིམས་ལྡན་གྱིས་ནི་ཁྲིམས་འཆལ་ལ། །བསྙེན་བཀུར་ཕྱག་སོགས་མི་བྱའོ། །འདི་ནི་ཉེ་གནས་སྐལ་མེད་དོ། །འདི་ཉིད་བསྟན་པའི་ཚེར་མ་ཡིན། །མཁན་པོ་དང་ནི་སློབ་དཔོན་དང༌། །ཕ་མ་དེ་བཞིན་ནད་པ་དག །ཚུལ་ཁྲིམས་ཉམས་ཀྱང་བསྙེན་བཀུར་བྱ། །དེ་ལ་མེད་ན་ཉེ་གནས་ཀྱང༌། །བསོད་སྙོམས་དངོས་པོ་ཕྱེད་དག་ཀྱང༌། །སྡོམ་ལྡན་རྣམས་ཀྱིས་ཕ་མ་བགོ །དེ་དག་དཀའ་བ་བྱེད་པའོ། །རྟག་ཏུ་ཕན་འདོགས་ཀྱང་ཡིན་ཕྱིར། །ཡོངས་སུ་སྤྱད་བྱ་འདི་དག་ནི། །སུས་ཀྱང་ཀུན་དུ་བཟློག་མི་བྱ། །རྐང་པའི་མཐིལ་གྱི་བསྐུ་མཉེ་དང༌། །ཁྲུས་དང་དྲིལ་ཕྱི་སོགས་ཀྱང་ངོ༌། །གལ་ཏེ་དེ་ལ་གཡན་པའི་ནད། །བྱུང་ན་ལོང་བུ་མན་ཆད་དུ། །འདྲུད་དང་སྐུད་དང་རྐང་པ་དག །བཀྲི་བ་ལ་སོགས་པ་ཡང་ངོ༌། །མཆོད་ཕྱིར་ཐོགས་པའི་སི་རལ་ཁ། །རྐང་གདུབ་དག་ཀྱང་མི་གདགས་ཏེ། །རིམས་ལ་སོགས་པ་ཞི་བྱའི་ཕྱིར། །སྐུད་པ་དཔུང་པ་གཡོན་པར་རུང༌། །དེ་ནི་ནད་དང་བྲལ་བ་ན། །རྩིག་པ་ལ་སོགས་ཁུང་བུར་གཞུག །ངེས་པར་སྨན་པའི་མན་ངག་གིས། །ཙནྡན་ལ་སོགས་བྱུག་པར་བྱ། །མ་དད་རིགས་ཅན་སྐྱེ་བོ་དང༌། །ཅི་ནས་དང་སྤོང་མི་འགྱུར་བར། །ཙནྡན་ལ་སོགས་བྱུགས་ནས་ནི། །དཔེན་པར་འདུག་གིས་ཕྱི་རོལ་མིན། །གལ་ཏེ་ཁ་ཅིག་ནན་ཏན་གྱིས། །དྲིས་བྱུག་བསོད་ནམས་འདོད་པ་ན། །རྩིག་ངོས་མཎྜལ་བྱས་ནས་ནི། །དེ་ཡིས་མཐོང་བ་གསལ་ཕྱིར་མནམ། །ནམ་ཡང་དྲི་ནི་རྐང་པར་མིན། །གལ་ཏེ་དད་པ་ཅན་དག་གིས། །ཁས་བླངས་རྗེས་ཐོགས་དེ་ཡི་ཚེ། །ཆུ་མང་པོ་ཡིས་བཀྲུ་བར་བྱ། །མེ་ཏོག་མཛེས་ཤིང་དྲི་ཞིམ་དག །རྙེད་དེ་སྣོམ་པར་འདོད་པ་ན། །མིག་གི་ཆེད་དུ་རྣམ་བསམས་ནས། །བསྣམ་གྱིས་འདོད་ཆགས་བློས་མ་ཡིན། །གང་སུ་ལ་ཡང་མཚོན་ཆ་དག །
མ་དད་སེམས་ཀྱིས་སྦྱིན་མི་བྱ། །སྨན་རྣམས་སྦ་ཕྱིར་ལྕགས་དག་ལས། །བྱས་པའི་སྒོ་ལྕགས་བཅང་བར་བྱ། །ཟངས་ལྕགས་ར་གནས་དང་ནི། །ཤིང་ངམ་ཞ་ཉེ་རྡོ་ལས་བྱས། །རྒྱ་དག་ཐུབ་པས་གང་ཟག་དང༌། །ཚོགས་ལ་ཡང་ནི་རྗེས་སུ་གནང༌། །གང་ཟག་ལ་ནི་ཐོད་པ་དང༌། །ཡན་ལག་དྲུག་གི་རུས་པས་མཚན། །དགེ་འདུན་དག་ལ་ཀུན་རྫོབ་པའི། །ཆོས་ཀྱི་འཁོར་ལོས་རྣམ་པར་མཛེས། །གསལ་མཐོང་རུང་བ་མི་བཅང་སྟེ། །ལྷན་ཅིག་སྤྱོད་པའི་ཚུལ་ངན་བཀག །སྦྱིན་བདག་དད་པ་སྤེལ་བའི་ཕྱིར། །བཅོས་པ་ཉིད་དོ་ཚོགས་ཀྱི་ཡང༌། །མེ་ལོང་ངམ་ནི་ཆུ་སོགས་ལ། །རང་གི་བཞིན་ནི་བལྟ་མི་བྱ། །ལུས་ཀྱི་ན་ཚོད་མཚན་མའམ། །རྨ་དག་ལྟ་ཕྱིར་ཉེས་པ་མེད། །རང་གི་ལུས་སྐྱེས་མི་དགུག་ཅིང༌། །རྡོལ་སོགས་པས་མི་གཞོམ་མོ། །འདོད་ཆགས་མེ་ནི་འཕེལ་བ་ན། །མི་སྡུག་ཆུ་ཡིས་ཞི་བར་བྱ། །གླང་ཆེན་རྨིག་རྗེས་ལྟ་བུ་ཡི། །ས་ཡི་རང་བཞིན་རྐང་ཁྲུས་སྣོད། །འོད་མ་ཏ་ལའི་ལོ་མ་ཡི། །བསིལ་ཡབ་ཀྱང་ནི་རྣམ་པ་གཉིས། །ལོ་མ་ཡལ་འདབ་རས་མ་དག །ཤ་ན་ཐ་ན་བལ་གྱི་སྟེ། །སྦྲང་མ་ལ་སོགས་ཟློག་བྱེད་པ། །རྣམ་པ་ལྔ་ནི་རབ་ཏུ་གནང༌། །ཤིང་ངམ་སྐས་ལ་འཛེག་པ་ན། །ཤམ་ཐབས་མཐའ་སྣ་བཅིང་བར་བྱ། །ལྕི་བའི་ཁུར་ནི་དགེ་སློང་གིས། །ཕལ་པ་བཞིན་དུ་བསྐུར་མི་བྱ། །སོ་མངས་སོགས་ཀྱི་ཡན་ལག་མཆོག །བཤད་པར་བྱ་བ་མ་ཡིན་ནོ། །མགོ་སྐྱེས་ལག་པ་དག་གིས་ཀྱང༌། །གྱེན་དུ་བརྫེ་བར་མི་བྱའོ།། སྐྲ་ལ་རྡུལ་གྱིས་གོས་པ་ན། །ལག་པའམ་ནི་གོས་ཀྱིས་ཀྱང༌། །མགོ་བོ་ཡོངས་སུ་སྦྲུག་ཕྱི་བ། །བརྟུལ་ཞུགས་ལྡན་ལ་ཉེས་པ་མེད། །སྐད་གསང་ཧ་ཅང་ཆེ་ཆུང་གིས། །ཐུབ་པའི་བཀའ་ནི་མི་བརྗོད་དེ། །བརྗོད་བྱ་དང་ནི་མི་འགལ་བར། །ཡུལ་སྐད་དུས་དང་རྗེས་མཐུན་བྱ། །གཙུག་ལག་ཁང་གི་སྟེང་ངོས་ཀྱི། །བྱང་དང་ནུབ་ཀྱི་ཕྱོགས་ཆ་རུ། །བཤང་གཅི་བྱ་བའི་ཁང་པ་དག །བྱ་བ་ཡིན་ཏེ་ཕལ་ཆེར་རོ། །གཙུག་ལག་ཁང་གི་ནང་གི་ངོས། །ལྷོ་དང་ཤར་གྱི་མཚམས་སུ་ནི། །ཆུ་ཡི་སྣོད་དུ་ནུས་ཇི་བཞིན། །ཆུ་དོན་གཉེར་བ་རྣམས་ལ་སྦྱིན། །དགེ་སློང་དམ་ནི་
ཁྱིམ་པ་ཡང༌། །རྒན་པོ་སྦྲིད་པ་བྱུང་བ་ལ། །ཚེ་རིང་གྱུར་ཅིག་ཅེས་བརྗོད་དེ། །དེ་དག་ཚེ་རིང་འདོད་ཕྱིར་རོ། །གསར་བུ་ལ་ནི་རྒན་པོ་ཡིས། །ཨ་རོག་གྱ་ཞེས་བརྗོད་བྱ་སྟེ། །གསར་བུ་ཡིས་ཀྱང་རྒན་པོ་ལ། །ལུས་ཀྱིས་ཕྱག་ནི་བྱ་བ་ཡིན། །ཕྱག་མི་བྱ་དང་མི་བླང་དུས། །བརྟུལ་ལྡན་ཟས་ལ་འཁོད་པ་དང༌། །འོག་གི་ལམ་ནི་མི་གཙང་དང༌། །གོས་གཅིག་གིས་ནི་འདུག་པ་དང༌། །མ་མིད་ན་ཡང་གང་ཞིག་གིས། །ཁ་ནི་ཟས་ཀྱིས་བཀང་པ་ལ། །ཕྱག་མི་བྱ་ཞིང་དེས་ཀྱང་ནི། །གཞན་ལ་ཕྱག་ནི་མི་བྱའོ། །གཞན་ཡང་ཕྱག་བྱའི་ཡུལ་མིན་ཡང༌། །སྦོམ་གུ་སྤྱོད་པ་ལ་སོགས་ཡིན། །སངས་རྒྱས་དང་ནི་སྡོམ་པས་རྒན། །རྟག་ཏུ་དགེ་སློང་ཕྱག་བྱ་གཉིས། །བསྟན་ལ་དམ་པར་བྱ་བ་ཡི། །དགེ་སློང་ཕྱག་ནི་རྣམ་པ་གཉིས། །གཅིག་ནི་དཀྱིལ་འཁོར་ལྔ་པ་སྟེ། །གཞན་གྱི་སྒྱིད་པ་ནས་འཁྱུད་ཡིན། །སྐྲ་ཡི་རང་བཞིན་སྲད་བུ་ཡིས། །ལག་འགྲོ་གཟུང་བར་མི་བྱ་སྟེ། །ཞི་བས་རང་བཞིན་མི་འགྲོ་ན། །དེ་ནི་བསྐྲད་པའི་སྦྱོར་བ་བྱ།། །།བམ་པོ་ལྔ་པ། །ཐ་གུ་ཤིན་ཏུ་འཇམ་པོ་ཡིས། །མགུལ་བར་བཅིངས་ཏེ་ལེགས་པར་དོར། །གཡང་ས་མ་ཡིན་ས་ཕྱོགས་ནི། །འགྲོ་བ་འཚེ་བ་མེད་པར་རོ། །དེ་བཞིན་གཞན་ལ་གནོད་མེད་པར། །བྱི་བ་ལ་སོགས་སྐྱེ་འགྲོ་རྣམས། །དལ་གྱིས་བག་ཡོད་རབ་བཟུང་ནས། །འབད་པས་ཅི་བདེར་དོར་བར་བྱ། །བསླབ་པ་རྗེས་བསྲུངས་བརྩེ་ལྡན་གྱིས། །ཤིག་རྣམས་དལ་གྱིས་བཟུང་ནས་ནི། །བསྡུས་ནས་རྩིག་པ་ལ་སོགས་པའི། །བུ་གར་སྙིང་རྗེ་ཅན་གྱིས་གཞུག །རྩྭ་སྔོན་སྟུག་པོའི་ས་ཕྱོགས་སུ། །རྩ་ཤིག་དག་ཀྱང་དོར་བར་བྱ། །ལྷག་མ་གཞན་ཡང་མ་སྣད་པར། །རང་གི་སྤྱོད་ཡུལ་དག་ཏུ་དོར། །ཆེ་བ་ཕུལ་ཆད་ཆུང་དུ་ཕྱེད། །འབྲིང་པོ་དེ་དག་བར་མ་སྟེ། །འབྲུ་མར་སྣོད་དུ་ཉེར་བསྟན་པ། །རྣམ་གསུམ་དེ་ལས་གང་འདོད་ཅིང༌། །ལམ་འགྲོ་ཆོས་ཀྱི་གཏམ་ཉིད་དམ། །མི་སྨྲ་བ་ཡིས་འགྲོ་བར་བྱ། །ངལ་བསོའི་ཚེ་ན་ཚིགས་བཅད་འདོན། །མཚན་མོའི་གནས་ཚེ་རྒྱུད་གསུམ་པའོ། །ཁྲུ་ནི་བརྒྱ་དང་ལྔ་བཅུ་བརྒྱད། །ཆེ་དང་ཆུང་དང་བར་མ་སྟེ། །རྣམ་གསུམ་བས་མཐར་ཤེས་བྱ་ཞིང༌། །གང་ལ་ཇི་ལྟར་རིགས་པས་
ཀྱང། །ཆུ་རབ་ཆེ་བའི་ས་ཕྱོགས་སམ། །ཆུ་ཡིས་ཁྱབ་པར་ཡང་ནི་རུང༌། །རྗེས་མཐུན་ཉིད་ཀྱིས་ཁྱེར་བྱའམ། །མི་ཁྱེར་བ་ནི་གོ་རིམས་བཞིན། །གལ་ཏེ་སྡོམ་བརྩོན་དགེ་སློང་མ། །རྣམས་ལ་འདུལ་བ་སྟོན་པ་ན། །ཡོལ་བས་བར་དུ་གཅད་བྱ་སྟེ། །གཞན་དུ་འགལ་ཚབས་ཅན་དུ་འགྱུར། །གལ་ཏེ་རྐུན་མས་བོར་ནས་ནི། །ཡོངས་སུ་མ་བཟུང་རྙེད་ལྟ་ན། །སྐྱེ་བོས་གོ་བྱས་ཁྱེར་བ་ལ། །ནམ་ཡང་འགལ་བ་ཡོད་མ་ཡིན། །ཀུན་དགའ་ར་བ་བྱེད་འདོད་པས། །གལ་ཏེ་དགེ་སློང་ལྗོན་ཤིང་བཙུགས། །དེ་ཡིས་ལོ་ལྔའི་བར་དག་ཏུ། །གནས་དེ་མངོན་པར་བལྟ་བར་བྱ། །དགེ་སློང་གིས་ནི་ལྷུང་བཟེད་སོགས། །རྩོད་དང་མནའ་ནི་དོར་མི་རིགས། །ཁྱིམ་པ་རྣམས་ནི་ཤོ་བེ་ཅན། །ཚུལ་ལྡན་ཆོ་ལོང་ཇི་ལྟར་རུང༌། །གང་དུ་སྡོམ་བརྩོན་བུད་མེད་དམ། །དེས་ཀྱང་སྡོམ་ལྡན་མཐོང་བ་ཡིས། །ཆགས་སྐྱེས་གྱུར་ན་དེས་དེ་ཡིས། །སྤྱོད་ཡུལ་དེ་ནི་མྱུར་དུ་སྤང༌། །དགེ་སློང་མ་ནི་ཉེར་འོངས་ན། །བླ་མ་ལྟ་བར་འདོད་གྱུར་ཅིང༌། །དམ་ཆོས་མཉན་པར་ཤེས་པ་ན། །འདིར་ལེགས་འདུག་ཅེས་བརྗོད་བྱ་སྟེ། །སོ་ཕག་ཤིང་སྟན་ཕྱེད་ཚལ་ལམ། །གོར་བུ་དག་གམ་སྲབ་མོ་ཡིས། །སྟན་རུང་གཞན་དག་དགེ་སློང་གི །མདུན་དུ་དགེ་སློང་མ་ཡིས་མིན། །དགེ་སློང་རྣམས་ཀྱི་མལ་སྟན་གྱི། །ལྷག་མ་དགེ་སློང་མ་ལ་གནང༌། །དམན་པ་འམ་ནི་འབྲིང་པོ་སྟེ། །བཟང་པོ་ནམ་ཡང་མ་ཡིན་ནོ། །དགེ་སློང་དགེ་སློང་མ་རྣམས་ཀྱང༌། །ཕན་ཚུན་ལྟུང་བ་བཤགས་པ་རྣམས། །ཕན་ཚུན་དུ་ནི་རང་གི་སྐྱོན། །གང་ཕྱིར་སྒྲོགས་པར་མ་ནུས་ན། །ལྟུང་བའི་ཐེ་ཚོམ་ཚུལ་འདི་ལ། །དགེ་སློང་མས་ནི་གོ་བྱའི་ཕྱིར། །དྲིའོ་བླ་མའི་འདུ་ཤེས་ཀྱིས། །དགེ་སློང་ལ་ནི་ཕྱོགས་གཞན་དུའོ། །གང་ཚེ་དགེ་སློང་མ་གང་ཞེས། །དགེ་སློང་གནས་སུ་འཇུག་ཚེ་དྲི། །ནད་དང་བཅས་པ་མ་ཡིན་ན། །ཤོག་ཅེས་དེས་ཀྱང་བརྗོད་པར་བྱ། །མདོ་སྡེ་ཆོས་མངོན་འདུལ་བ་དང༌། །རྒྱུ་སྐར་དང་ནི་ཉིན་ཞག་ཤེས། །དགོན་པའི་ཕན་ཡོན་འདོད་པ་རྣམས། །གྲོང་ནས་རྒྱང་གྲགས་གནས་པར་བྱ། །ནགས་ཁྲོད་དབེན་པར་འདུག་པ་ལ། །ངེས་པར་ཆོམ་རྐུན་དགའ་སྐྱེད་ཕྱིར། །འབྲུ་མར་ལ་སོགས་ཉེར་མཁོའི་སྣོད། །
མཁས་པས་ཉེ་བར་གཞག་པར་བྱ། །ཚུལ་ལྡན་སྔར་ནི་བཟོ་ཤེས་ཀྱིས། །རང་གི་བཟོ་ཆ་སྤང་བར་བྱ། །སྔོན་ནི་སྨན་པ་འབྲེག་མཁན་ན། །འཆང་བར་བྱེད་ལ་བཀག་པ་མེད། །འཕངས་པའི་ཚེ་ཡང་དགེ་སློང་གིས། །བརྩོན་ལ་དགའ་བ་དོར་མི་བྱ། །རབ་བྱུང་བརྩོན་འགྲུས་ངོ་བོ་ཉིད། །དེ་སྤངས་འགལ་ཚབས་ཅན་དུ་འགྱུར། །བརྩོན་འགྲུས་ཅན་ཡང་སྤྱོད་བཅས་གང༌། །ཡང་དག་རྗེས་སུ་བསྟན་པར་བྱ། །དེ་མེད་དེ་ལ་ལྟ་བ་དང༌། །དད་དང་སྒོམ་པ་ཡོད་མ་ཡིན། །མན་ངག་དང་ནི་བྲལ་བའི་སེམས། །བསམ་གཏན་ལ་ནི་སྦྱར་མི་བྱ། །དེ་སྦྱར་འཁྲུལ་པ་ཉིད་གནས་འགྱུར། །བསམ་གཏན་གང་ཡིན་རྙེད་པར་དཀའ། །གནས་ཁང་གོས་དང་མལ་སྟན་སོགས། །དྲི་ཞིམ་སྤོས་ཀྱིས་བདུག་པ་དང༌། །མེ་ཏོག་དྲི་ཞིམ་བསམ་གཏན་དག །བྱེད་ནའོ་འདི་ལས་གཞན་དུ་མིན། །ལག་གི་བླ་ཡིས་ཤིང་དག་གི །མཚོན་གྱི་ལས་ལ་སོགས་པ་ཡང༌། །ཤིང་དྲུང་ལ་སོགས་མི་མཁོ་བ། །དེ་ཡིས་བྱིན་ན་ཉེས་པ་མེད། །རབ་ཞི་ཀུན་སྤྱོད་ལ་མཁས་པ། །སྤྱོད་ཡུལ་གྱུར་ན་འབད་པ་ཡིས། །དེ་ནི་ལྷན་ཅིག་གནས་པར་བཟུང༌། །མ་བརྟགས་པར་ནི་མ་ཡིན་ནོ། །གལ་ཏེ་ཆུ་དང་མེ་ནང་སོགས། །བུད་མེད་གང་དག་འཆི་འགྱུར་ན། །དགེ་སློང་སྙིང་རྗེ་ལྡན་པ་ཡིས། །དེ་འདོན་བྱེད་ལ་ཉེས་པ་མེད། །གཟུགས་བརྙན་རྣམས་ཀྱི་བཟོ་དག་ནི། །ཤེས་པས་གང་དེ་འདོད་པ་ན། །སྡོམ་ཅན་གྱིས་ནི་བྱ་བ་སྟེ། །འཇིག་རྟེན་སེམས་ནི་བསྲུང་ཕྱིར་རོ། །མཁར་གྱི་སྒོ་དང་དེ་བཞིན་དུ། །ཁང་བཟངས་དང་ནི་ཁང་བཟངས་སྒོར། །བུད་མེད་རྣམས་དང་ལྷན་ཅིག་ཏུ། །འདུག་དང་གཏམ་སོགས་མི་བྱའོ། །དེ་ཕྱིར་གཟུགས་སོགས་རྣམ་ལྔ་ཡི། །འདོད་ཡོན་རྟག་ཏུ་སྤངས་ནས་ཀྱང༌། །རྒྱུན་དུ་དྲན་པ་ཉེར་གཞག་གི །རྣལ་འབྱོར་རྣམས་ནི་ཡང་དག་བསྒོམ། །གང་ཕྱིར་ལམ་འདི་འདས་པ་ཡི། །སངས་རྒྱས་ཕན་བཞེད་ཀུན་གྱི་སྟེ། །སངས་རྒྱས་རང་སངས་རྒྱས་རྣམས་དང༌། །ཉན་ཐོས་རྣམས་ཀྱི་སྔོན་འགྲོ་ཡིན། །བླ་མ་ལེགས་པར་རྣམ་བརྟགས་ནས། །གནས་ནི་ཆོ་ག་བཞིན་དུ་བཟུང༌། །བླ་མས་ཀྱང་ནི་ཡོངས་བརྟགས་པའི། །གནས་པ་ཡོངས་སུ་གཟུང་བར་བྱ། །ཕན་ཚུན་སྐྱོན་དང་བཅས་པ་ཡིས། །
ངེས་པར་འགལ་ཚབས་ཅན་དུ་འགྱུར། །གང་གི་གཉི་ག་དག་ཀྱང་ནི། །ཕན་ཚུན་འདི་ལྟར་ཡོངས་སུ་བརྟག །ཁྲིམས་ལྡན་ནད་གཡོག་བྱེད་པ་དང༌། །ཆོས་དང་ཟང་ཟིང་སེར་སྣ་མེད། །དུས་སུ་འདོམས་པའི་བླ་མ་ནི། །བླ་མའི་ཡོན་ཏན་ཡང་དག་ལྡན། །གནས་པའི་ཚུལ་ལྡན་ཤེས་རབ་ཅན། །དུལ་ཞིང་བཟོད་དང་ལྡན་པ་དང༌། །བླ་མ་ལ་ནི་རྟག་ཏུ་གུས། །བསམ་གཏན་ཀློག་པའི་ལས་དང་ལྡན། །ཕྱག་མི་བྱེད་དང་རང་དབང་ཅན། །མཁན་པོ་དང་ཡང་ཕྲད་པ་ལས། །རྗེས་སུ་བསྟན་པ་མི་སློབ་ཅིང༌། །དེ་བཞིན་མི་མཐུན་ཕྱོགས་ལ་བརྟེན། །འདི་དག་ལ་ནི་གཞན་དེས་ཀྱང༌། །གནས་ཀྱི་ལྟོས་པ་མེད་པ་ཡིན། །འདི་ནི་ངན་པར་ཤེས་བྱས་ཏེ། །སླར་ཡང་གཞན་ནི་ཡང་དག་གཟུང༌། །གཉི་གས་ལྟོས་པ་སྤངས་པ་ལ། །གནས་ནི་འཇིག་པར་བརྗོད་པ་ཡིན། །གཅིག་གིས་ཀྱང་ནི་ལྟོས་བཅས་ན། །སླར་ཡང་གཞན་ནི་མི་གཟུང་ངོ༌། །གང་དུ་དགོས་པས་འགྲོ་བ་ན། །སླར་ཡང་ཕྱིར་འོང་འདོད་པ་ཡིས། །གནས་དེ་ལ་ནི་གོ་བྱས་ཏེ། །སྔ་མ་ཉིད་ལས་གཞན་མི་བཙལ། །གནས་མེད་དག་གི་ཞག་ལྔའི་བར། །ཚོགས་ཀྱི་རྙེད་པ་དབང་བ་ཡིན། །གང་ཕྱིར་གནས་ཀྱང་དེ་ཙམ་ལས། །ལྷག་པ་རུང་བ་མ་ཡིན་ནོ། །སྡོམ་བརྩོན་གྱིས་ནི་དགེ་སློང་དག །དགེ་འདུན་གཙུག་ལག་ཁང་དག་ལས། །མི་དབྱུང་ཆད་པས་གཅད་བྱ་སྟེ། །དགེ་སློང་གནས་ཁང་ལྔ་དག་ཡིན། །གནས་ནི་བཟློག་པར་བྱ་བ་དང༌། །ཀློག་དང་གདམས་ངག་ལོངས་སྤྱོད་དང༌། །ཡང་དག་སྨྲ་བ་དགག་པ་སྟེ། །ཆད་པ་རྣམ་པ་ལྔ་ཞེས་བརྗོད། །ཅི་སྟེ་ཆད་པ་བཟོད་ཉིད་ན། །དེ་ལ་རྗེས་སུ་གནང་བར་འོས། །མི་འོས་པ་ན་གཉི་ག་ལ། །དེ་བྱེད་ན་ནི་འགལ་ཚབས་ཅན། །མ་དད་ལེ་ལོ་ཅན་དག་དང༌། །གདུག་སེམས་ཅན་དང་ཚིག་ངན་ཅན། །སྡིག་པའི་གྲོགས་དང་མ་གུས་པའི། །བཟོད་པ་བླང་བར་མི་བྱའོ། །མཐང་གོས་དང་བཅས་བླ་གོས་བསྐོན། །ཆུ་ཚགས་སྣོད་དང་ཡང་དག་བཅས། །བླ་མས་ལེགས་པར་ཡོངས་བརྟགས་ཏེ། །དགེ་ཚུལ་ཡང་ནི་བསྐྲད་པར་བྱ། །གཞོན་པ་ལ་འོས་ཡོ་བྱད་དྲུག །དགེ་ཚུལ་དེ་ལ་བྱིན་ནས་སུ། །བླ་མས་བསྐྲད་པར་
བྱ་བ་སྟེ། །མིན་ན་བཟོད་པ་བྱ་བར་འོས། །ངེས་པར་དེ་ནི་གནས་མེད་པར། །ཞག་གཅིག་ཀྱང་ནི་འདུག་མི་བྱ། །གཞན་དུ་ལོ་ལྔ་ལོན་གྱུར་ཅིང༌། །འདུལ་བའི་དོན་རིག་ལམ་དུའོ། །གཙུག་ལག་ཁང་གཞན་ཕྱིན་ན་ནི། །དེ་ཡི་ཞག་ལྔ་ཡིས་ཀྱང་ནི། །གནས་ཀྱི་སློབ་དཔོན་བཙལ་བྱ་སྟེ། །དེ་མེད་པར་ནི་འདུག་མི་བྱ། །ཡན་ལག་དྲིལ་ངང་མཚོན་སོགས་ཀྱི། །ལས་ནི་ཆོ་ག་ཇི་བཞིན་དུ། །བླ་མ་རྣམས་ཀྱི་བྱ་བ་སྟེ། །གནས་པ་རྣམས་ཀྱི་ཆོས་ཉིད་དོ། །བླ་མ་ཡོན་ཏན་ཤེས་པས་ཀྱང༌། །རང་གི་བྱ་བ་ཤེས་བྱ་སྟེ། །བླ་མ་དང་ནི་སློབ་མས་ཀྱང༌། །རྟག་ཏུ་ཡོངས་སུ་བསྲུང་བྱ་ཡིན། །ཀློག་པ་ཡི་ནི་སློབ་དཔོན་ལའང༌། །མཁས་པས་ཉེ་གནས་བྱ་བ་སྟེ། །ཀུན་སྤྱོད་ཁྱད་པར་འཕགས་པ་ཀུན། །གནས་ཀྱི་སློབ་དཔོན་དག་ལ་བྱ། །ཀློག་པ་མེད་པར་མི་གནས་ཤིང༌། །གནས་མེད་པར་ཡང་མ་ཡིན་ཏེ། །དེ་ལྟའང་གནས་ཀྱི་སློབ་དཔོན་ལ། །སེམས་ནི་རྟག་ཏུ་ཞེན་པར་བྱ། །སྡེ་སྣོད་གསུམ་ཤེས་ཉོན་མོངས་ཟད། །ལོ་བཅུ་ལོན་པ་མ་ཡིན་ན། །སྟོན་པའི་བཀའ་ནི་མདུན་བྱས་ནས། །དེས་ཀྱང་གནས་ནི་གཟུང་བར་བྱ། །ཟླ་བ་ཕྱེད་དང་དེ་ཕྱེད་ལ། །བརྩོན་པས་ཉིན་རེ་ལན་གསུམ་དུ། །རིང་དང་ཉེ་བར་གནས་པ་ཡི། །གནས་སྟེར་བ་ལ་ཕྱག་བྱའོ། །གང་ཞིག་དཔག་ཚད་ཕྱེད་དང་གསུམ། །གནས་པས་ཟླ་བ་ཕྱེད་ན་སྟེ། །དེ་ཕྱེད་དེ་ཕྱེད་གནས་པ་ཡི། །ལན་གསུམ་དེར་གནས་ཉིད་ཀྱིས་སོ། །གལ་ཏེ་དབྱར་ནི་ཕྱི་མ་ལ། །བླ་མ་དུས་ལས་འདས་གྱུར་ན། །སོ་སོའི་རྟེན་གྱིས་ཕན་ཚུན་དུ། །བལྟས་ཏེ་ཡང་ནི་གནས་པར་བྱ། །དབྱར་ནི་གནས་པར་གྱུར་པ་ན། །གལ་ཏེ་རྒན་པོ་མ་རྙེད་ན། །གནས་ནི་གཉིས་པ་མེད་པའི་ཕྱིར། །དེར་ནི་གསོ་སྦྱོང་མི་བྱའོ། །སྡིག་པའི་སྨན་གྱི་གསོ་སྦྱོང་ནི། །དགག་དབྱེ་བྱས་ནས་ཡང་ནི་བྱ། །གསོ་སྦྱོང་དག་པའི་ཆེད་དུ་སྟེ། །དགག་དབྱེའི་ལས་ཀྱང་དེ་དག་ཉིད། །ཕན་ཚུན་གདམས་པའི་དོན་དུ་ནི། །དགག་དབྱེ་རྗེས་སུ་གནང་བ་ཡིན། །གསོ་སྦྱོང་ཟླ་ཕྱེད་རེ་རེ་ཡི། །སྡིག་རྣམས་ཡོངས་སུ་དག་ཕྱིར་རོ། །གློ་བུར་ལྷགས་དང་གཉུག་མར་གནས། །མཉམ་མམ་ལྷག་པ་ཡིན་ན་ཡང༌། །རྗེས་སུ་བཟླས་པའི་གསོ་སྦྱོང་བྱ། །ཁ་བ་སོ་ག་དབྱར་རྣམས་ཀྱི། །ཟླ་བ་གཉིས་
དང་བཞི་ཡི་ནི། །མར་ངོ་ལ་ནི་བཅུ་བཞི་པའི། །གསོ་སྦྱོང་སྡོམ་བརྩོན་དག་གིས་བྱ། །ས་ག་དང་ནི་ཆུ་སྟོད་དང༌། །དེ་བཞིན་ཁྲུམས་སྨད་སྨིན་དྲུག་དང༌། །རྒྱལ་དང་དབོ་ཞེས་བྱ་བ་ཉིད། །དྲུག་པོའི་མར་ངོ་བཅུ་བཞིར་བརྗོད། །དེ་བཞིན་དེ་ལས་གཞན་དག་ནི། །བཅོ་བརྒྱད་བཅོ་ལྔ་བར་ནི་འདོད། །གློ་བུར་ལྷག་པ་མང་གྱུར་ཅིང༌། །ཅིག་ཤོས་དག་ནི་ཉུང་བ་ན། །གློ་བུར་ལྷག་པའི་ཡོན་ཏན་ཅན། །དེ་དག་འདོད་པས་གསོ་སྦྱོང་བྱ། །དགེ་འདུན་ཐམས་ཅད་ལྟུང་བཅས་ན། །དགེ་སློང་འདུལ་བ་ཤེས་པ་ཡིས། །དགའ་གཅུགས་ཀྱིས་ལེགས་གོ་བྱས་ནས། །རབ་ཏུ་འབད་པས་རིམ་པ་བཞིན། །ཚངས་པ་མཚུངས་སྤྱོད་མངོན་སུམ་དུ། །ཇི་བཞིན་ཡང་དག་མཐོལ་བཤགས་བྱ། །དེ་ལ་བལྟས་ནས་གཞན་དག་ཀྱང༌། །དེ་བཞིན་མཁས་པས་བྱེད་དུ་གཞུག །མཚམས་ཀྱི་མཐའ་མ་མནན་ནས་སམ། །ལ་ལར་ཡང་ནི་དཀྱིལ་འཁོར་པ། །དེ་བཞིན་ལས་ནི་ཐམས་ཅད་ལ། །མཚམས་ནི་བཅད་པར་རུང་བ་ཡིན། །དགེ་འདུན་ཚོགས་པ་མེད་གྱུར་ན། །གང་ཟག་གཅིག་གི་མདུན་ཉིད་དུ། །བྱིན་གྱིས་བརླབ་པོ་དེ་ཡང་ནི། །མེད་ན་རང་གི་སེམས་ཀྱིས་བརྗོད། །དེ་ལྟར་བྱིན་གྱིས་བརླབས་པ་ནི། །བརྟུལ་ཞུགས་ཅན་གྱི་ལྷུང་བཟེད་དང༌། །ཆོས་གོས་འགྱུར་རོ་སེམས་ཀྱིས་ཀྱང༌། །དེ་བཞིན་མགྲོན་དུ་བོས་པ་ཡང༌། །གང་གི་འཁོར་ནི་འདུལ་བ་ཡི། །ཆོ་ག་ལ་ནི་མཁས་ཡོད་ན། །དེ་ལ་གཏད་ནས་ཀྱང་ནི་གནས། །བྱིན་གྱིས་བརླབས་པ་འམ་ཅི་འདོད་པ། །བསླབ་ལ་གུས་ཤིང་འཇིགས་བཅས་ལ། །ལྟུང་བ་བརྟག་པའང་དེ་དང་འདྲ། །དགག་དབྱེ་དེ་ལྟར་ཤེས་བྱ་སྟེ། །དེ་ཡང་ལྔ་ཡི་ཚོགས་ཀྱིས་སོ། །མཐུན་པར་བསམས་པ་བཟང་པོ་ཡིས། །དགག་དབྱེ་བྱ་བ་ཁོ་ན་སྟེ། །དགའ་བས་ཚངས་པ་མཚུངས་སྤྱོད་པ། །གཞན་ལ་སོ་སོར་གུས་པས་སོ། །ཉིན་ཞག་བདུན་ནམ་བརྒྱད་དང་ནི། །བཅུ་རྣམས་ཀྱིས་ནི་དགག་དབྱེ་དག །བྱེད་པན་ནི་འཁོན་ཅན་རྣམས། །རབ་ཏུ་འབད་པས་སྦྱང་བར་བྱ། །ལས་ཀྱི་ཕྱིར་ནི་དཀྱིལ་འཁོར་པ། །བྱའོ་མཐའ་མཚམས་བཀྲོལ་ནས་ཀྱང༌། །མཚམས་གཅིག་ཏུ་ནེ་མ་འདྲེས་པས། །ཚོགས་ཀྱི་ལས་ནི་བྱ་བར་བརྗོད། །ཉི་ཤུ་ཡང་ན་བཅུའམ་ལྔ། །དགེ་སློང་བཞི་ཞེས་བྱ་བ་རྣམས། །ཚོགས་
ཀྱི་ཕྲིན་ལས་འདི་ལྟ་སྟེ། །འདི་དག་ཚོགས་ཞེས་བྱ་བར་གྲགས། །དགེ་འདུན་ཁ་སྐོང་སངས་རྒྱས་ཀྱིས། །བྱ་བའི་ལས་ནི་འགའ་ཡང་མེད། །སངས་རྒྱས་དཀོན་མཆོག་དགེ་འདུན་ལས། །ཐ་དད་དེ་ཡི་ལས་དེའི་མིན། །ཉི་ཤུ་ཡིས་ནི་དབྱུང་བ་སྟེ། །བཅུ་ཡི་ཚོགས་ཀྱིས་བསྙེན་པར་རྫོགས། །ལྔ་རྣམས་ཀྱིས་ནི་དགག་དབྱེ་སྟེ། །བཞི་པོ་རྣམས་ཀྱིས་གསོ་སྦྱོང་ངོ༌། །བརྗོད་པ་ལ་སོགས་ཆོ་ག་བཞིན། །ལས་ནི་གང་དུ་བྱེད་པ་དེ། །གནས་ཞེས་བྱ་བར་བརྗོད་པ་སྟེ། །བཟློག་པ་ལ་ནི་གནས་མི་བརྟག །ཆོས་སྨྲ་བ་ནི་དག་ཉིད་དེ། །དགེ་སློང་མི་སྨྲའི་ཡིད་མ་བཀག་འདི་ནི་མུ་སྟེགས་སྐྱེ་བོ་དག །བླུན་པོ་སྒྲུབ་པ་སྤང་ཕྱིར་རོ། །མཐོང་དང་ཐོས་དང་དོགས་པ་ཡིས། །དངོས་པོ་ཀུན་གྱི་བྱ་བ་སྟེ། །དབྱར་གནས་པ་ན་བརྟུལ་ཞུགས་ཅན། །གནས་གསུམ་གྱིས་ནི་དགག་དབྱེ་བྱ། །བར་ཆད་མ་གཏོགས་གང་དུ་ཡང༌། །དགག་དབྱེ་མ་བྱས་མི་འགྲོ་སྟེ། །མེ་སོགས་བར་ཆད་བྱུང་བ་ན། །རྒྱ་མཚོ་ཡང་ནི་བརྒལ་བར་བྱ། །གླགས་ཚོལ་ཕུང་ཁྲོལ་ཚེམ་རྐུན་དང༌། །རྒྱལ་པོ་མེ་ཡི་བླ་མ་རྣམས། །འདི་དག་གུས་པས་ཉན་ན་ནི། །འདུལ་བ་མི་བཤད་མི་བྱའོ། །དད་པ་ཅན་ནི་ནོར་མེད་དང༌། །དད་ཆུང་རྣམས་ལ་དེ་ཡོད་པ། །རབ་ཏུ་མཉན་ཕྱིར་འབད་པ་ལ། །བཤད་པར་བྱའོ་ལྟུང་བ་མེད། །མདོ་སྡེ་ལ་སོགས་མཁས་པ་རྣམས། །གཞག་པར་བྱ་བར་རབ་ཏུ་གྲགས། །དེ་དག་ལས་ལ་མི་བསྐོ་སྟེ། །འདི་ཉིད་དེ་དག་ཉིད་ཀྱི་ལས། །མདོ་སྡེ་ཆོས་མངོན་འདུལ་བ་རྣམས། །འཛིན་དང་ཚོགས་ལ་ཀློག་པ་དང༌། །ནད་པ་ཚོགས་ཀྱི་རྒན་པོ་སྟེ། །དྲུག་པོ་དག་ལས་མི་བྱེད་པའོ། །དགེ་སློང་མདོ་སོགས་མཁས་པ་ལ། །ལམ་ཕྱེད་འོངས་པ་ཐོས་པ་ན། །ཇི་སྲིད་དཔག་ཚད་ཕྱེད་དང་གསུམ། །བ་དན་བསྒྲེང་སོགས་སྔོན་འགྲོ་བས། །གཎྜཱི་བརྡུངས་ཏེ་དགེ་འདུན་གྱིས། །རང་གི་ནུས་སྦྱར་བསུ་བར་བྱ། །འོངས་ནས་དགའ་བས་རྙེད་པ་ཡང༌། །དེར་དབུལ་ཚོགས་ཀྱིས་ཀྱང་ནི་ཐོབ། །གནས་ཁང་འདུག་སྟན་མལ་སྟན་རྣམས། །དེ་དག་གུས་པས་རྟག་ཏུ་དབུལ། །ཉེ་གནས་ལ་ཡང་ལས་སུ་བསྐོ། །མི་དབབ་པར་ནི་རབ་ཏུ་བཤད། །བསླབ་པ་འཆའ་བ་བདེར་གཤེགས་ཏེ། །སྐྲོད་པ་ལ་ནི་དགེ་འདུན་དབང༌། །དགེ་འདུན་གྱིས་
ནི་ཁྲོས་པ་ཡིས། །རབ་བྱུང་བསླབ་པ་མི་བཅའོ། །དགེ་འདུན་བསམ་པ་ཐ་དད་པས། །བྱས་ན་ཡང་ནི་མ་བྱས་ཡིན། །གཉིས་མེད་གསུངས་པའི་བསླབ་པ་ནི། །སུས་ཀྱང་གཞན་དུ་བྱ་མི་ནུས། །གྲོ་ཞུན་ཟླ་བའི་ཚེས་གཅིག་ནས། །སྔ་མའི་དབྱར་དེ་གཙོ་བོ་ཡིན། །དེ་ཉིད་ཁྲུམས་སྟོད་ཟླ་བ་ཡི། །ཚེས་གཅིག་ནས་ནི་ཕྱི་མར་གྲགས། །ཟླ་གསུམ་དབྱར་ནི་འགྲོ་བ་ཡི། །སྤྱོད་པ་དགེ་སློང་རྣམས་ཀྱིས་སྤང༌། །བྱ་རྣམས་ཀྱིས་ཀྱང་རང་གི་གནས། །དབྱར་གྱི་དུས་སུ་མི་སྤོང་ངོ༌། །ཆུ་སྟོད་ཅན་གྱི་ཟླ་ཕྱེད་ནས། །ཀུན་ནས་ཉེ་ཕྱིར་འབད་པ་ཡིས། །གཙུག་ལག་ཁང་རྣམས་སྦྱོང་བའི་ལས། །བྱི་དོར་ལ་སོགས་བྱ་བ་ཡིན། །བཅོ་ལྔ་ལ་ནི་མ་ལུས་པ། །འདུས་ནས་ཀྱང་ནི་གནས་མལ་དག །དེ་སྟོབས་པ་ནི་ལེགས་བརྟགས་ནས། །སྤྲོ་བར་བྱས་ཏེ་ཀུན་ནས་བསྐོ། །འདུན་དང་ཞེ་སྡང་འཇིགས་རྨོངས་པ། །སྐྱོན་རྣམས་རིང་དུ་སྤངས་ནས་ནི། །གང་ཞིག་བསྟབས་དང་མ་བསྟབས་པ། །མ་ལུས་པ་ནི་ཤེས་པ་བཟུང༌། །དེ་ནས་གཙུག་ལག་ཁང་སྐྱོང་གིས། །ཁྲིམས་སུ་བྱ་བར་རབ་ཏུ་བསྒྲགས། །མཁས་པ་ཡིས་ནི་བདེ་བ་ལ། །རེག་པར་གནས་པའི་ཆེད་དུ་བྱ། །གང་ཞིག་སྤྲོ་བ་གཞི་མེད་པ། །བཞད་གད་རྩོད་པ་མ་ཡིན་ནོ། །གནས་འདི་དག་ཏུ་བྲིམས་པ་ཡི། །ཚུལ་ཤིང་དག་ནི་ལོང་ཞེས་སོ། །གསོལ་བ་འབའ་ཞིག་བྱ་བ་སྟེ། །དེ་རིང་ཚེས་ནི་བཅོ་ལྔ་ལ། །དབྱར་གནས་པ་ཡི་ཆེད་དུ་ནི། །ཚོགས་ཀྱི་ཚུལ་ཤིང་བླང་དུ་གསོལ། །དེ་ནས་རྒན་རིམས་ཇི་བཞིན་དུ། །ཚུལ་ཤིང་བྲིམས་པའི་རྗེས་ལ་ནི། །གནས་ཁང་ལ་སོགས་ཅི་རིགས་པར། །སྦྱིན་ནོ་གནས་མལ་དག་ཀྱང་ངོ༌། །དབྱར་ནི་ཉེ་བའི་དུས་ན་ཡང༌། །དགེ་སློང་གིས་ནི་འབད་པས་བརྟག །གནས་དང་སྤྱོད་ཡུལ་ཉིད་ཀྱང་སྟེ། །ཡོན་ཏན་གྲུབ་པར་འདོད་པས་སོ། །གནས་ཁང་ན་ནི་མཁས་པ་ཡིས། །ཚངས་པ་མཚུངས་པར་སྤྱོད་པ་དང༌། །ཡོན་ཏན་ཅན་དང་ཐོས་པ་འཛིན། །སྙིང་རྗེ་ཅན་ཡིད་དེར་མངོན་ནས། །ཐོག་མར་ལྟུང་བ་མི་འབྱིན་ཅིང༌། །བྱུང་བ་སླར་ཡང་འཆོས་བྱེད་པ། །དེ་ལ་སོགས་པའི་རྣམ་པ་ཡིས། །གནས་ནི་ཡོངས་སུ་བརྟག་པར་བྱ། །སྨན་དང་བསོད་སྙོམས་དག་
ཀྱང་ནི། །གང་དུ་སྙིང་ལས་ཆུང་དུས་རྙེད། །སྨད་འཚོང་ཚོགས་ཀྱིས་གང་བ་དག །མ་ཡིན་དེར་ནི་སྤྱོད་ཡུལ་དག །སྟེང་གཡོགས་ཅན་གནས་དགེ་སློང་གི །མདུན་དུ་དགེ་སློང་ཙོག་པུར་འདུག །འདི་ལ་དབྱར་གནས་ཐོབ་བྱའི་ཕྱིར། །ཇི་ལྟ་དེ་ལྟར་ངེས་པར་བརྗོད། །སྦྱིན་བདག་དང་ནི་ཉེ་གནས་གྲོང༌། །ཞལ་ཏ་བ་དང་ནད་གཡོག་སྨོས། །བདག་མིང་འདི་ཞེས་བགྱི་བ་ཡིས། །ཟླ་གསུམ་དབྱར་གནས་སྔ་མའམ། །ཕྱི་མ་འདི་ལ་གནས་བགྱིད་དེ། །རལ་དང་གྲུམ་པ་བཅོས་པའི་ཕྱིར། །འདི་ཉིད་བདག་གི་དབྱར་ཡིན་ཏེ། །ཕྱི་རོལ་དབྱར་གནས་མ་ཡིན་ནོ། །དེ་ལྟར་དབྱར་ནི་གནས་པ་དང༌། །དེ་ནས་ཕྱི་རོལ་གཞན་དུ་གནས། །ཉེས་བྱས་ཚ་སྒོ་ཅན་གྱི་ཆུ། །ངན་སོང་ཐུར་འབབ་མི་བརྒལ་ལོ། །དགེ་སློང་གཅིག་གི་མདུན་སོང་ལ། །ཞག་བདུན་ཡང་དག་བྱིན་གྱིས་བརླབ། །དགོས་པའི་ཆེད་དུ་མདུན་དུ་འདིར། །མི་འདུག་ཀྱང་ནི་ཉེས་པ་མེད། །ཀུན་དགའ་ར་བ་ལ་སོགས་བཞིའི། །གཞི་ནི་ཉེ་བར་དགོད་པ་དང༌། །མཆོད་རྟེན་མཆོད་དང་ཚོགས་སྟོན་མོ། །ཆད་པའི་ལས་བྱིན་གྲོགས་ཉིད་དང༌། །དགེ་འདུན་ལྷག་མ་དབྱུང་བ་སྟེ། །དགེ་སློང་དགོས་པ་འདི་དག་གིས། །ཞག་བདུན་བྱིན་གྱིས་བརླབས་ནས་ནི། །ཐེ་ཚོམ་མེད་པར་འགྲོ་བར་བྱ། །འདི་དག་ལས་ཀྱང་དགེ་སློང་མའི། །བྱ་བ་སླར་ཡང་ལྷག་མ་ཡིན། །ལྕི་བའི་ཆོས་ཉིད་ལྡན་པ་ཡིས། །དེ་ལས་དབྱུང་བ་མངོན་འདོད་པས། །དགེ་ཚུལ་ལས་ནི་ལྷག་པ་ཡི། །དགེ་སློང་སྡོམ་པ་འདོད་པ་དང༌། །ཆོས་དང་རྗེས་ཆོས་སློབ་པའི་ཕྱིར། །དགེ་ཚུལ་མ་ལས་དགེ་སློང་མ། །ལྷག་མའི་བསླབ་པ་ལ་སློབ་སྟེ། །བསྙེན་པར་རྫོགས་པ་ཐོབ་ཕྱིར་དུ། །ཚངས་སྤྱོད་ཉེར་གནས་འཛིན་ཕྱིར་རོ། །དགེ་སློང་མ་ཡིས་བྱེད་པ་དང༌། །ཡང་ན་གསོལ་བ་ལ་སོགས་ལས། །གསང་སྟེ་སྟོན་པ་ཉིད་དང་ནི། །གང་ཕྱིར་མི་འདོད་མ་ཡིན་ན། །གཉི་གའི་ཚོགས་ལ་བསྙེན་རྫོགས་ནི། །ཁྱིམ་པ་དག་གི་ཁྱིམ་སོང་ལ། །གལ་ཏེ་ཡོད་ན་སྔ་མ་ལས། །ལྷག་པར་བུ་དང་བུ་མོ་རྣམས། །བག་མ་གཏོང་ལེན་ལ་སོགས་དང༌། །ཕ་མ་དཀོན་མཆོག་གསུམ་དང་ནི། །སློབ་དཔོན་ལ་སོགས་དགོས་སྒྲུབ་ལ། །ཞག་བདུན་བརླབས་སམ་ལྷག་པར་རུང༌། །མཚན་མོ་ཉི་
ཤུ་སུམ་ཅུའམ། །ཉིན་ཞག་བཞི་བཅུ་ཡང་ནི་རུང༌། །ཚོགས་ལ་ཞུས་ནས་འགྲོ་བྱ་སྟེ། །ཡུལ་གྱི་དགོས་པ་སྒྲུབ་ཕྱིར་རོ། །དགོས་པ་ཁྱད་པར་འཕགས་པ་ནི། །རྣམ་པར་ཤེས་ཏེ་ཞུས་ནས་ཀྱང༌། །གསོལ་བ་གཅིག་ནི་སྔོན་འགྲོ་བའི། །བརྗོད་པ་འདི་ལ་ཚོགས་ཀྱིས་སྦྱིན། །བསོད་སྙོམས་ཀྱིས་ནི་ཕོངས་པའམ། །སྨན་ཡང་རྙེད་པར་དཀའ་བ་དང༌། །ཉེ་གནས་འགའ་ཡང་མེད་པ་ན། །དབྱར་ནི་དྲལ་ཡང་ཉེས་པ་མེད། །དེ་བཞིན་མི་རུང་སྒྲུབ་པ་ཡིས། །ཚངས་སྤྱོད་ཉམས་པར་བྱེད་པ་སྟེ། །ཉེ་དུ་མ་ཡིན་བུད་མེད་དམ། །རྒྱལ་པོས་མགྲོན་དུ་གཉེར་ནའོ། །དེ་བཞིན་མ་ནིང་ལ་སོགས་ཞེས། །རང་གི་གནས་སུ་བུད་མེད་འགའ། །ཆགས་སྐྱེས་དེ་ནི་བཟློག་དཀའ་ན། །གནས་གཞན་ཡང་དག་བསྟེན་པར་བྱ། །རྒྱལ་པོ་རྐུན་མ་སྦྲུལ་གདུག་དང༌། །མི་དང་མེ་དང་མེ་མིན་དང༌། །ཆུ་ཡི་འཇིགས་པས་དགེ་སློང་དག །སོང་བ་ན་ཡང་ཉེས་པ་མེད། །གང་དུ་སྡིག་པའི་བློ་ཅན་གྱིས། །དགེ་སློང་དགེ་འདུན་འབྱེད་པ་རྩོམ། །དེ་ཐོས་ཕྲད་པས་འཇིགས་པ་ཡིས། །གལ་ཏེ་སོང་ཡང་ཉེས་པ་མེད། །འཇིགས་པ་སྣ་ཚོགས་གཞན་དག་ཀྱང༌། །འཇམ་པོས་བཟློག་ཕྱིར་འགྲོ་བྱ་སྟེ། །མ་སོང་འགལ་ཚབས་ཅན་དུ་འགྱུར། །དེས་དབྱར་དྲལ་ཡང་ཉེས་པ་མེད། །གཙུག་ལག་ཁང་འདིར་འགྲོ་ཞེས་བྱ། །དབྱར་གྱི་དངོས་པོ་འདིའོ་ཞེས། །བརྗོད་དེ་དགེ་སློང་གོ་བྱས་ནས། །མ་སོང་ན་ནི་ཉེས་བྱས་ཡིན། །ཞག་འདུན་ཡང་ནི་ལྷག་པར་ནི། །བྱིན་གྱིས་བརླབ་པོ་དགེ་སློང་གང༌། །བར་དེར་འོངས་ཏེ་སོང་བ་ཡང༌། །བྱིན་རླབས་དེ་ཉིད་གཞན་ཡོད་མིན། །སྔར་གྱི་བྱིན་རླབས་དེ་ཉིད་ནི། །རྒྱུན་མི་འཆད་པར་གནས་པ་ལ། །དེ་སྟོང་རྒྱུ་ཡི་ཚོགས་པ་ནི། །དེ་ལས་གཞན་དུ་མི་འཐོབ་བོ། །མཚམས་བཅིངས་རབ་ཏུ་རྣམ་མང་ལས། །མདོར་བསྡུས་ཚུལ་ནི་རྣམ་པ་བཞི། །འདི་ཡང་མདོར་བསྡུས་དབང་བྱས་ནས། །ཕྱོགས་ཙམ་བསྟན་པ་བརྗོད་པར་བྱ། །དཔག་ཚད་ཕྱེད་དང་གསུམ་པའི་མཚམས། །ཆེན་པོ་དེ་ནི་ཕྱོགས་བཞི་རུ། །ལྗོན་ཤིང་ཆུ་བོ་བྲག་རི་དང༌། །ལམ་ཆེན་སོགས་ཀྱིས་མཚོན་དེ་བཅད། །དགེ་འདུན་ཐམས་ཅད་ཚོགས་པ་ན། །དགེ་སློང་གཅིག་གིས་གསོལ་བ་བྱ། །དེ་བཞིན་བརྗོད་པ་གཅིག་ལས་ཀྱི། །མཚམས་ནི་རབ་ཏུ་
འགྲུབ་ཕྱིར་ཡིན། །ཤར་ཕྱོགས་མཚམས་ནས་ཚུ་རོལ་དུ། །གནས་མལ་ཉིད་ཀྱི་མཐར་ཐུག་པར། །གྲོང་དང་དེ་ཡི་ཉེ་འཁོར་དག །སྤངས་ཏེ་མཚམས་ནི་བཅིང་བར་བྱ། །ཆོས་གོས་དག་དང་མི་འབྲལ་ཕྱིར། །སླར་ཡང་གསོལ་བ་སྔོན་འགྲོ་བའི། །ལས་ཉིད་བྱའོ་ཚུལ་ལྡན་དག ། བདེ་ལ་རེག་པར་གནས་ཕྱིར་རོ། །ཆོས་གོས་གསུམ་པོ་མེད་པར་ཡང༌། །སྡོམ་བརྩོན་མཚམས་འདིར་གནས་རུང་སྟེ། །གྲོང་དང་དེ་ཡི་ཉེ་འཁོར་དག །མ་གཏོགས་གཞན་དུ་ཅི་བདེར་རོ། །སྔར་གྱི་ཆེན་པོ་མི་མཁོ་ན། །ཆུང་ངུ་ཡང་ནི་བྱ་བ་སྟེ། །གསོལ་དང་བཞི་ཡི་ལས་ཉིད་ཀྱིས། །ཆེན་པོ་ཉེ་བར་བཀྲོལ་ནས་ནི། །ཆུང་ངུ་བཅིངས་ནས་སྔ་མ་བཞིན། །མཚན་མ་བརྟན་པོ་རྣམས་ཀྱིས་སོ། །དཀྱིལ་འཁོར་པ་ཞེས་གྲགས་པ་དེར། །ཚོགས་ཀྱི་ལས་ནི་བསྒྲུབ་པར་བྱ། །སྔར་བཞིན་ཆུང་ངུ་བཅིངས་ནས་ཀྱང༌། །དེ་ནས་ཆེན་པོ་བཅིང་བར་བྱ། །གཞན་ཡང་དེར་ནི་གོ་རིམས་འདི། །མཚམས་བཅིང་བ་ལ་གནང་བ་ཡིན། །དགེ་འདུན་ཐམས་ཅད་ཤི་སྲིད་དམ། །ཡང་ན་མཚན་ནི་གཞན་གྱུར་རམ། །བསླབ་པ་ཕུལ་ལམ་མཚམས་ཉིད་ཀྱི། །ཕྱི་རོལ་སྐྱ་རེངས་ཤར་བ་དང༌། །གསོལ་བ་སྔོན་འགྲོའི་ལས་ཀྱིས་ཏེ། །མཚམས་འཇིག་རྒྱུ་ནི་རྣམ་ལྔའོ། །ལྗོན་ཤིང་གཅིག་གི་ཕྱེད་ཆ་འམ། །གཉིས་པ་མཚམས་ཀྱི་ཕུར་པ་སྟེ། །ཕུར་བ་འམ་ནི་ཤིང་གཅིག་ལ། །ཆ་བཞིར་རྣམ་པར་ཕྱེ་བ་ཡིས། །བཞི་ཆར་དུ་ཡང་ཐོབ་པ་སྟེ། །ལྔ་པ་ནམ་ཡང་མ་ཡིན་ནོ། །འོག་ཏུ་ཡང་ནི་དཔག་ཚད་དག །ཕྱེད་དང་གསུམ་མོ་སྟེང་དུ་ཡང༌། །རི་ཡི་སྟེང་གི་ཤིང་རྩེ་འམ། །སྤྱིལ་པོ་ལ་སོགས་པ་ཡི་མཐར། །སྦྱིན་བདག་རྗེས་གཟུང་དོན་གྱི་ཕྱིར། །སྟོན་པ་ཉིད་ཀྱི་སྐུ་གཟུགས་ལ། །སྣ་ཚོགས་རིན་ཆེན་འོད་འབར་བས། །མཛེས་པའི་རྒྱན་སྤུད་རྫས་སུ་གནང༌། །རྣ་རྒྱན་དང་ནི་ལག་གདུབ་དང༌། །རྐང་པ་ལ་སོགས་རྒྱན་རྣམས་ནི། །དགག་གོ་རྨད་བྱུང་འདི་དག་ནི། །ངེས་པར་བུད་མེད་རྒྱན་ཡིན་ན། །སྐྱེས་བུ་སེང་གེ་ཆེན་པོ་ནི། །རྟག་ཏུ་རྗེས་སུ་འཛིན་མཛད་ལ། །སྨད་འཚོང་གྱོན་པ་ལྟ་བུ་ཡི། །བུད་མེད་གོས་ནི་མི་རིགས་སོ། །ཏུཪྻའི་སྒྲ་ཡིས་འདུག་ཁང་དུ། །ལྟད་མོ་པ་ནི་སོང་བའི་ཚེ། །སྐུ་གཟུགས་དག་ལ་བརྒྱན་པ་ཡི། །མཆོད་པ་སླར་
ཡང་བསྡུ་བར་བྱ། །སྐྱེ་བོ་མང་པོ་འདུས་པའི་ཚེ། །ཅ་ཅོའི་སྒྲ་ཡིས་གཡེངས་པ་ན། །དུས་ཚོད་བརྡ་ནི་སྤྲད་པའི་ཕྱིར། །རྔ་འམ་དུང་སོགས་སྦྱར་བྱས་འདོད། །བཅུ་འམ་བརྒྱ་འམ་སྟོང་ཕྲག་ནི། །མདུན་དུ་བྱས་ཏེ་ཉེ་བར་བསྒོ། །རྙེད་པ་བརྟུལ་ཅན་ཅི་འདོད་དག །བལྟས་ཏེ་དེ་སྐལ་རྣམ་པར་བརྟག །བགོས་ནས་དེ་ནི་ཤི་གྱུར་ན། །དེ་སླར་དགེ་འདུན་ཐམས་ཅད་ཀྱི། །མ་བགོས་ན་ཡང་དེ་སྐལ་ནི། །གཞན་དེས་རྣམ་པར་བགོ་བར་བྱ། །སྐལ་དེ་སྦྱིན་བདག་ཁོ་ནའི་སྟེ། །གང་ལ་དེ་ཕུལ་དེ་ཡི་ཡང༌། །ཐམས་ཅད་དུ་ནི་མ་གནང་བ། །དགེ་སློང་རྣམས་ལ་དེ་མི་འོས། །དགེ་སློང་རྣམས་ནི་མགྲོན་བོས་ཤིང༌། །དགེ་སློང་མ་ཡང་མགྲོན་བོས་ན། །མཆོད་སྟོན་ཐ་མ་དེར་ནི་གང༌། །རྙེད་པ་རྒན་པའི་མཐར་བཞག་ན། །གཉི་གས་ཀྱང་ནི་གོ་བའམ། །ཡང་ན་སྦྱིན་བདག་འདོད་པས་སོ། །ཟང་ཟིང་སྐལ་བ་མཉམ་པོར་ནི། །ཀུན་དུ་སྐྱོབ་པ་ལ་ཡང་ཡིན། །དབྱིག་རྣམས་རྣམ་པར་འགོད་འདོད་ན། །དགེ་སློང་མ་ལས་ཆ་གཉིས་ཏེ། །འདི་ལ་བསྙེན་པར་རྫོགས་འདོད་པའི། །དགེ་ཚུལ་ལ་ཡང་ཅི་རིགས་བརྗོད། །དེ་ལས་གཞན་པའི་དགེ་ཚུལ་མ། །རྣམས་ལ་ཡང་ནི་སུམ་ཆ་འོས། །དགེ་སློང་དགེ་སློང་མ་རྣམས་ནི། །སྐལ་བ་མཉམ་པར་བགོ་བྱ་ཉིད། །གང་དུ་དགེ་སློང་མང་གྱུར་ཅིང༌། །དགེ་སློང་མ་ཚོགས་ཉུང་ན་ནི། །དེ་ནི་མཉམ་པོར་མི་བགོ་སྟེ། །རྙེད་པ་རེ་རེའི་གྲངས་ཀྱིས་སོ། །འཇིག་རྟེན་མགོན་པོས་འཇིག་རྟེན་གྱི། །ཡམས་ཀྱི་འཚེ་བ་ཞི་བྱའི་ཕྱིར། །སངས་རྒྱས་སྐུ་གཟུགས་གྲོང་སོགས་སུ། །སྤྱན་དྲང་བར་ནི་གསུངས་པ་ཡིན། །དེར་ནི་ཆག་ཆག་བྱུག་པ་དང༌། །སྲང་གི་བཞི་མདོར་ས་གཞི་ལ། །སྣ་ཚོགས་མེ་ཏོག་བཀོད་པ་ཡིས། །རབ་ཏུ་མཛེས་པར་བྱ་བ་ཡིན། །ཙནྡན་ཨ་གར་ག་པུར་གྱི། །བདུག་སྤོས་ཀུན་ནས་དབུལ་བར་བྱ། །ཕྱོགས་ཀྱི་སྒོ་ནས་དྲི་ཞིམ་དག །དལ་ཞིང་དལ་བའི་རླུང་གིས་བསྐྱོད། །སྒྲ་ཆེན་པ་ཊ་ཧོ་དག་དང༌། །འཁར་རྔ་ཏིང་ཏིང་ཤག་སོགས་སྒྲ། །རྒྱུན་དུ་འབྲུག་སྒྲ་ལྟ་བུ་ཡི། །སྒྲ་ཡི་ཚོགས་རྣམས་རྗེས་སུ་བསྒྲག །ཡང་ཡང་དལ་བ་མེད་པར་ནི། །ནམ་མཁའི་ཁམས་ནི་གང་བ་ཡི། །གྲངས་མང་རོལ་ཆ་སྣ་ཚོགས་དང༌། །གསལ་པོར་དགའ་སྟོན་ཆེན་པོ་
བྱ། །རྒྱལ་མཚན་རྣམས་ནི་ཚར་དུ་ཡང༌། །དངར་རོ་དེ་ཡང་རྣམ་པ་ལྔ། །མཁའ་ལྡིང་སེང་གེ་ཆུ་སྲིན་དང༌། །ཁྱུ་མཆོག་གླང་པོ་ཞེས་བྱ་ཉིད། །རབ་བྱུང་ཆེན་པོ་རྣམས་ཀྱིས་ནི། །ཁྱིམ་པའི་འཁོར་རྣམས་ལ་ནི་སྦྱར། །ཀུན་མཁྱེན་གྲོང་དུ་གཤེགས་པ་ན། །དེ་འདྲ་ལ་སོགས་བསྒྲུབ་པར་བྱ། དེ་ནས་སངས་རྒྱས་མདུན་བདར་ཏེ། །མཐོང་བར་དགའ་བའི་སེམས་པ་ཡིས། །ཀླུ་དང་གནོད་སྦྱིན་ལ་སོགས་པའི། །འཇིགས་པ་ཟད་པར་སེལ་བ་ཡིན། །རྙེད་པ་ཀུན་ནས་ཐོབ་པ་དག །ཚོགས་ཀྱི་ཐད་དུ་བཙོང་བར་བྱ། །དགེ་འདུན་གནས་བརྟན་བློ་ལྡན་གྱིས། །ཤེས་ན་རིན་ཐང་གདབ་པར་བྱ། །ངེས་པར་ཉོ་བར་འདོད་པ་ན། །དེ་ལ་སྐྱེད་པར་རུང་བ་ཡིན། །རིན་ནི་ཐམས་ཅད་མ་གཞལ་བར། །སྡོམ་བརྩོན་དེ་ལོངས་སྤྱད་མི་རུང༌། །དཀོན་མཆོག་གསུམ་ལ་སུ་དག་གིས། །གུས་པས་ཆུང་མ་སོགས་ཕུལ་ན། །དེ་ལ་རིན་ནི་མི་གདབ་སྟེ། །སྦྱིན་བདག་འདོད་པས་གཏང་བར་བྱ། མི་ཁྱོད་གླུ་གར་རོལ་མོ་རྣམས། །བྱོས་ཤིག་ཅེས་ནི་དགེ་སློང་གིས། །ཁྱིམ་པ་རྣམས་ལ་བསྒོ་མི་བྱ། །འདི་ནི་ཚུལ་ལྡན་ལས་མ་ཡིན། །འདི་ལ་ཚུལ་ནི་ཇི་བཞིན་དུ། །མཆོད་ཆ་སྟོན་པ་མཆོད་པ་ནི། །ཇི་ལྟར་མཛེས་པ་དེ་ལྟར་ནི། །བཞིན་བཟངས་འབད་པས་བྱོས་ཤིག་བརྗོད། །མཆོད་པའི་ཕྱིར་ཡང་མཆོད་རྟེན་ལ། །ཕུར་བུ་ལ་སོགས་མི་གཟུགས་ཏེ། །དང་པོ་རྩོམ་པའི་དུས་ཉིད་དུ། །གཟུགས་རྟེན་བྱེད་ལ་ཉེས་པ་མེད། །མར་མེ་འོག་ཏུ་དབུལ་བྱ་སྟེ། །བརྟུལ་ཞུགས་ཅན་གྱིས་སྟེང་དུ་མིན། །དགེ་ཚུལ་ལ་སོགས་གཞན་ཡོད་བཞིན། །མཆོད་བྱའི་སྟེང་དུ་འཛེག་མི་བྱ། །གཞན་དག་མེད་ན་དྲི་ཡི་ཆུས། །སྡོམ་བརྩོན་རྐང་པ་དག་བཀྲུས་ནས། །གུས་པས་སྟོན་པའི་འདུ་ཤེས་ནི། །ཡིད་ལ་བྱེད་པས་རང་གིས་འཛེག །དངོས་པོ་གཅིག་ལྷག་བརྒྱ་དང་ནི། །གསུམ་ལ་སོགས་པ་བྱ་བ་སྟེ། །གཙུག་ལག་ཁང་གི་གློ་དང་འབུར། །དེ་ཡང་ལྔ་བརྩེགས་དག་ཏུ་བརྗོད། །ཀུན་དུ་བདུན་བརྩེགས་བྱ་བ་སྟེ། །དེ་ཡི་སྐར་ཁུང་ནང་སྟེགས་ཅན། །དབུས་སུ་སྟོན་པའི་ཁང་ཆེན་ཏེ། །སྒོ་ནི་ཕྱི་སྒོའི་དྲང་ཐད་དུའོ། །དགེ་སློང་མ་ཡི་དབྱར་ཁང་ནི། །སུམ་བརྩེགས་ལས་ནི་ལྷག་མི་བྱ། །གཙང་ཁང་སྐར་ཁུང་ནང་སྟེགས་ཅན། །ཀུན་དུ་ལྔ་བརྩེགས་
བྱ་བ་ཡིན། །སྐུ་གཟུགས་མཆོད་རྟེན་བདེར་གཤེགས་ཀྱི། །བཀའ་ཡང་མངོན་པར་བྲི་བ་སྟེ། །རྙིངས་སམ་བརླག་ན་དགེ་སློང་གིས། །སླར་ནི་གསོ་བར་འོས་པ་ཡིན། །གང་དུ་གང་ཞིག་སྔར་བྱས་དེར། །འདི་ཉིད་དེ་ལྟར་གཞག་བྱ་སྟེ། །སྔ་མའི་གཟུགས་ལས་ཆུང་དུ་མིན། །ལྷག་པ་ཉིད་དུ་བྱ་བར་བརྗོད། །གཙུག་ལག་ཁང་གི་འདུ་བྱེད་ནི། །སྦྱིན་པ་པོ་ཡི་འདོད་ཇི་བཞིན། །ཆེན་པོ་དང་ནི་ཆུང་དུའང་རུང༌། །མཁས་པས་ཡོ་བྱད་དང་སྦྱར་བྱ། །མཆོད་རྟེན་སྐུ་གཟུགས་གྲིབ་མ་དང༌། །མཎྜལ་ཡང་ནི་འགོམ་མི་བྱ། །དགོས་པའི་ཆེད་དུ་བདེ་གཤེགས་ཀྱི། །ཚིགས་བཅད་སྔོན་དུ་བྱས་ཏེ་བགོམ། །བསོད་སྙོམས་དག་ལ་རྒྱུ་བའི་ཚེ། །སངས་རྒྱས་ལ་སོགས་བརྡ་ཡི་ཚིག །སྡོམ་ཅན་ལ་ནི་སུ་དག་འདྲི། །དེ་ལ་གསལ་པོར་གོ་བར་བྱ། །སངས་རྒྱས་ཞེས་ནི་བརྗོད་པའམ། །ཡང་ན་རྐང་གཉིས་མཆོག་ཅེས་བརྗོད། །སྡུག་བསྔལ་ཟད་ཅེས་ཡང་ན་གཞན། །བདག་གམ་ཆོས་ལམ་གང་དེ་གསུངས། །དེ་བཞིན་དགེ་འདུན་དག་ལ་ཡང༌། །བརྗོད་བྱ་སོ་སོའི་བདག་ཉིད་ཀྱིས། །ཡོན་ཏན་གང་ལ་དེ་དག་འགྱུར། །དེ་ནི་དེ་ལ་བརྗོད་པར་བྱ། །གཅིག་པུ་མགྲོན་དུ་བོས་པ་ལ། །དགེ་སློང་མ་རྣམས་འཁོད་པ་ན། །གང་དུ་དགེ་སློང་ཟས་ཀྱི་ཕྱིར། །འདུག་པའི་སྟན་ནི་དང་པོར་བཞག །དགེ་ཚུལ་གྱིས་ནི་གྲལ་ཡང་རུང༌། །དེ་རུ་འདུག་སྟེ་ཟོས་ནས་ནི། །གལ་ཏེ་དགེ་སློང་ནུས་མེད་ན། །དགེ་སློང་མ་ཡིས་ཡོན་བཤད་བྱ། །གྲོང་རྒྱུ་བ་ལ་སོང་ནས་ནི། །གར་སོང་དེ་དོན་ཞལ་ཏ་བས། །ལེན་བ་དགེ་སློང་མེད་པ་ན། །རྙེད་པ་དེ་ཡི་སྐལ་བ་བཞག །གལ་ཏེ་འོངས་ན་དེ་ཡིའོ། །རྙེད་པ་མཚམས་ཀྱིས་བསྒྲུབ་པ་དང༌། །ཁྲིམས་སུ་བྱས་ལ་བརྟེན་པ་དང༌། །ཅི་འདོད་དགེ་སློང་དགེ་འདུན་རྣམས། །སྦྱིན་བདག་གིས་ནི་བསྙད་པས་སོ། །མངོན་དུ་བ་དང་དབྱར་དང་གནས། །སོ་སོར་སྨོས་པ་དེ་བཞིན་ཏེ། །བརྒྱད་པོ་ཡང་དག་གྲགས་པ་འདི། །ཐོབ་དང་མི་ཐོབ་འབྱེད་པས་སོ། །གདུགས་དང་མེ་ཏོག་རྒྱལ་མཚན་སོགས། །བསྙེན་བཀུར་དང་བཅས་སྡོམ་བརྩོན་རོ། །དགེ་སློང་རྣམས་ཀྱིས་ཡོངས་བསྐོར་ནས། །དུར་ཁྲོད་དུ་ནི་ཁྱེར་བར་བྱ། །མེ་ཆེན་རབ་ཏུ་འབར་བ་ཡིས། །དེར་ནི་ཡོངས་སུ་བརྟགས་
ཏེ་སྦྱང༌། །གལ་ཏེ་ཡོད་ན་མར་དག་དང༌། །ཙནྡན་ལ་སོགས་བྱུག་པར་བྱ། །སྲོག་ཆགས་དང་བཅས་རྨ་ཅན་ནི། །འབད་པས་ས་ནི་བརྐོས་ནས་སུ། །སྦས་ཏེ་དེ་ལ་རྩྭ་དང་ནི། །ལོ་འདབ་སོགས་ཀྱིས་དགབ་པར་བྱ། །ལུས་ཅན་རྣམས་ལ་སྲིན་བུའི་རིགས། །བརྒྱད་ཁྲི་བཞི་སྟོང་ཡོད་པ་རྣམས། །ལྷན་ཅིག་སྐྱེ་ཞིན་འཇིག་པའི་ཕྱིར། །མིང་ཅན་དེ་དག་ཚིག་པར་འགྱུར། །མཐང་གོས་དང་བཅས་བླ་གོས་ཀྱིས། །སྡོམ་བརྩོན་རོ་ནི་གཡོགས་ཏེ་དབྱུང༌། །ལྷུང་བཟེད་ཆོས་གོས་གཞན་ལ་ནི། །བཙོངས་ཏེ་བགོ་བར་འོས་པ་ཡིན། །དེ་རྗེས་མི་རྟག་རྣམ་པའི་ཚུལ།། སྟོན་བྱེད་ཆོས་ཉན་སྦྱིན་བྱ་སྟེ། །འདི་དག་སྐྱོ་བ་བསྐྱེད་ཕྱིར་དང༌། །མྱ་ངན་དག་ཀྱང་བསལ་ཕྱིར་རོ། །གང་ཕྱིར་འདུས་བྱས་ཐམས་ཅད་ནི། །རྐྱེན་གྱིས་གཞན་དུ་འགྱུར་བ་སྟེ། །རྩྭ་རྩེ་རླུང་གིས་བསྐྱོད་པ་ཡི། །ཟིལ་བ་བཞིན་དུ་མི་བརྟན་ནོ། །གང་ཞིག་འཆི་བདག་ཁྲེལ་རྒོད་ཁ། །དགང་དཀའ་དེར་ནི་མི་འཇུག་པ། །མཐོ་རིས་ཡང་དག་ས་སྟོང་དུ། །སྤྱད་དེ་ལ་ཡོད་དམ་ཅི། །ཇི་ལྟར་ས་གཞི་བརྟན་པ་ལ། །སྲེག་པའི་མེ་བྱུང་ཁོ་ན་བཞིན། །རང་བཞིན་སྐྱེས་ཅིག་སྐྱེས་པ་འདིར། །མི་རྣམས་འཆི་བ་དེ་བཞིན་ནོ། །གཟུགས་རིགས་ལོང་ཚོ་ཐོས་པ་དང༌། །ཚུལ་ཁྲིམས་ལ་སོགས་རྟག་མིན་ཏེ། །རྒྱལ་པོ་འཇིག་རྟེན་མགོན་གཅིག་བུ། །གང་གཞན་འདོད་ཆགས་བྲལ་བ་ཡི། །སྡོམ་བརྩོན་ཡང་སྲིད་ཟད་པ་ཡང༌། །ཀུན་དུ་གནས་པ་མ་མཐོང་ན། །གང་གིས་ཇི་སྐད་ཇི་ལྟར་བཟློག །ཚེ་ནི་ཆུ་ཡི་རི་མོ་འདྲ། །དེ་ལྟར་མི་རྟག་ཆོས་བསྟན་ནས། །དེ་ཡི་དངོས་པོའི་ཡོན་ཡང་བཤད། །རྐང་ལག་གདོང་པ་རབ་བཀྲུས་ནས། །མཆོད་རྟེན་བསྐོར་བ་བྱས་ནས་སོ། །ཇི་སྙེད་འདུས་བྱས་དེ་དག་འདིར། །མི་རྟག་ལ་སོགས་ཐུབ་པའི་བཀའ། །དྲན་པ་ཡང་དག་ཐོབ་པ་ཡིས། །གཙུག་ལག་ཁང་དུ་ཞུགས་ནས་ནི། །ལུང་བཞིན་སྐལ་བ་མཉམ་པོར་ནི། །ཤི་བའི་ཡོ་བྱད་སྦྱིན་བྱ་སྟེ། །རོ་ཡི་བསྙེན་བཀུར་ལ་སོགས་འདི། །སྲས་ཀྱི་གཙོ་བོ་རྣམས་ལ་བཅས། །གཎྜཱི་རྒྱུད་གསུམ་མཆོད་རྟེན་ལ། །ཕྱག་བྱེད་ཚེ་ན་གང་ཞིག་ཡོད། །ཚུལ་ཤིང་འབྲིམ་དང་གསོལ་བ་ལ། །གང་ཡོད་དེ་ལ་འོས་པ་ཡིན། །གལ་ཏེ་རྫས་དེ་འགོད་པ་
ན། །བྲེལ་བས་དེར་ཀུན་མ་ཚོགས་ན། །རྣམ་པར་འགྱེད་པས་ཆ་གཉིས་ནི། །རྒན་པོ་གསར་བུ་དག་ལ་སྦྱིན། །དེ་ལྟར་བྱས་པས་དེ་ཡི་ནོར། །མ་ལུས་ལེགས་པར་བགོས་པར་འགྱུར། །གཞན་དག་ཁ་ཅིག་གློ་བུར་དུ། །ལྷགས་ཀྱང་དེ་ལ་སྐལ་པ་མེད། །འཆི་བ་པོ་ཡིས་འདིར་བཞུགས་དག །འདི་སྣོམས་བརྡ་ནི་གལ་ཏེ་སྤྲད། །དེ་ཡིས་བྱམས་སེམས་ཀྱིས་བསྡོས་ན། །དེ་ནི་ཚོགས་ཀྱིས་ཐོབ་པ་ཡིན། གལ་ཏེ་བྱམས་སེམས་མ་ཡིན་པས། །འཚོ་བའི་ཚེ་ན་བསྔོས་ནས་ནི། །གང་ཟག་གིས་ནི་བླངས་ན་ཡང༌། དེ་ལ་ཉེས་པ་ཡོད་མ་ཡིན། །ཁྱིམ་པ་རྣམས་ནི་ལྟོས་བྱས་ཏེ། །བརྟུལ་ཞུགས་འཛིན་པ་དེ་ལྟ་མིན། །དེ་ཕྱིར་གང་ལ་ལྟོས་ཡོད་པའི། །དགེ་སློང་དེ་ལ་དེ་མི་རུང༌། །གཉེན་ལ་ཡོངས་སུ་བསྔོས་པའི་ནོར། །འདི་ནི་ཚེ་འཕོས་རྗེས་ལ་ཡང༌། །གོས་དང་ལྷུང་བཟེད་ལ་སོགས་པ། །དེ་ནི་ཚོགས་ཀྱི་ཐད་དུ་དབུལ། །རྣམ་པར་སྤྱད་དེ་དབུལ་བ་དེས། །ཆོ་ག་བཞིན་དུ་བགོ་བར་བྱ། །རིན་ཆེན་ལ་སོགས་ཡོད་པ་ན། །དེར་ནི་བགོར་མི་རུང་ཞེས་བརྗོད། །དགེ་སློང་ཤི་བའི་ཡོ་བྱད་ནི། །དགེ་སློང་དབང་བར་འོས་པ་ཉིད། །དེ་དག་མེད་ན་དགེ་སློང་མ། །དེ་ཡང་སྲིད་མོ་ཡིན་ཕྱིར་དབང༌། །དགེ་སློང་མ་ནི་ཤི་བའི་ནོར། །དེ་ལ་དགེ་སློང་མ་ཡིན་འདོད། །དེ་དག་མེད་ན་དེ་ལ་ཡང༌། །དགེ་སློང་རྣམས་ནི་བདག་པོར་འདོད། །དགེ་སློང་མེད་པར་དགེ་སློང་དག །ཁྱིམ་པའི་གྲོང་དུ་ཤི་བ་ན། །དེ་ཡི་ནོར་དེ་དེར་ལུས་ན། །གང་ཕྱིར་གཉིས་ཀར་འདོད་ན་ཡང༌། །ཅིག་ཅར་ཉིད་དུ་སློང་བྱེད་ཕྱིར། །གཉི་ག་ལ་ཡང་རུང་བ་ཡིན། །གང་གིས་གང་ལ་དམིགས་ཏེ་བྱིན། །དེ་ནི་ཅི་བདེར་དེ་ཡིར་འགྱུར། །གཙུག་ལག་ཁང་གི་མཚམས་དག་གི །བར་དུ་དགེ་སློང་ཤི་བ་ན། །གང་དུ་མགོ་བོ་བསྟན་པ་དེ། །ཆོས་གོས་ལ་སོགས་དབང་པ་ཡིན། །བུ་ལོན་བླངས་ནས་དགེ་སློང་གང༌། །འཆི་བདག་ཁར་ནི་ཞུགས་པ་ན། །དེ་ནི་འཕགས་པའི་དགེ་འདུན་གྱིས། །དེ་ཡི་ནོར་ལས་སྦྱིན་པར་བྱ། །དགེ་འདུན་དོན་དུ་ཞལ་ཏ་བས། །བུ་ལོན་བླངས་ཏེ་ཤི་བ་ན། །དེ་ཀུན་ཚོགས་ཀྱིས་སྦྱིན་པར་ནི། །ལུང་གིས་ཤིན་ཏུ་ངེས་པ་ཡིན། །གཞན་དུ་བུ་ལོན་ཞལ་ཏ་བས། །
ངེས་པར་འདི་ནི་བླང་བྱ་སྟེ། །རྒན་པོ་རྒན་པོ་གོ་བྱས་ནས། །དབང་པོ་དང་བཅས་ཡི་གེར་བྲི། །ལྷན་ཅིག་གནས་པ་རྣམས་ཀྱིས་ནི། །བ་དན་གོས་དང་མལ་སྟན་སོགས། །འདོད་པའི་འབྲས་བུ་འདོད་པ་ཡིས། །ཚོགས་ལ་ཕུལ་ན་ཉེས་པ་མེད། །གལ་ཏེ་འགྱོད་པའི་མེ་ལྕེ་ཡིས། །དེ་དག་སེམས་ནི་བསྲེགས་པ་ན། །སླར་ཡང་བཟློག་པའི་ཆུ་ཡིས་ནི། །མ་ལུས་ཞི་བར་བྱ་བ་ཉིད། །འདི་ལ་རང་བཞིན་གནས་པ་དང༌། །གཞན་དག་གནས་ནས་ཕྱུང་བ་ཤི། །གཅིག་གི་ཡང་ནི་ཡོ་བྱད་རྣམས། །རང་བཞིན་གནས་ལ་རུང་བ་ཡིན། །མདུན་དུ་ཡོངས་སུ་དག་པའི་བློས། །རང་བཞིན་གནས་པ་མེད་གྱུར་ན། །གནས་ནས་ཕྱུང་བ་ལ་ཡང་ནི། །འདི་ཡིས་དབང་ཐང་བཀག་པ་མེད། །ཡི་གེར་བྲི་བ་བྱས་ནས་ནི། །གལ་ཏེ་ཚོགས་ལ་ཕུལ་བ་ན། །ཤི་ནས་དེ་ནི་བགོ་བྱ་སྟེ། །ནོར་དང་འདྲ་བ་ཉིད་ལས་སོ། །གཙུག་ལག་ཁང་འོས་དེར་གྱུར་པ། །དེ་ནི་དེ་ལ་མཁོ་བ་ཉིད། །མཚོན་ཆ་འཆིང་བྱེད་ཀུན་མ་གཏོགས། །རྒྱལ་པོ་ལ་འོས་རྒྱལ་ལ་བྱིན། །མཚོན་ཆ་ལ་ནི་ཁབ་ལ་སོགས། །རྗེས་མཐུན་དངོས་པོ་བྱ་བ་ཉིད། །དེ་བཤིག་ནས་ནི་རྩ་བ་ཡི། །མཚོན་ཆ་གཞན་དུ་མི་བྱའོ། །མཉམ་པར་གཞག་པས་བདེ་གཤེགས་ཀྱི། །ཚིགས་བཅད་གཅིག་ཙམ་བཀླགས་པ་ན། །ལེགས་གསུངས་དམ་པའི་ཆོས་དག་གི །རྙེད་པ་དེ་ལ་མི་འོས་མིན། །ཐུབ་དབང་དམ་ཆོས་རྣམ་པ་གཉིས། །ལུང་དང་གཞན་ཡང་རྟོགས་པའོ། །ལུང་དེ་འཛིན་པའི་དོན་གྱིས་ན། །ཆོས་ཀྱི་རྙེད་པ་འོས་པ་ཡིན། །ཁྲིམས་ལྡན་སྔར་ནི་དབྱར་གནས་པར། །ཁས་བླངས་གལ་ཏེ་ཤི་བའམ། །བསླབ་པ་ཕུལ་ལམ་གཞན་གྱུར་ཀྱང༌། །དབྱར་གྱི་རྙེད་པ་འོས་པ་ཡིན། །བདེ་གཤེགས་སྲས་ཀྱི་ལྷུན་པོའི་ཆེད། །སྐུ་གཟུགས་མཆོད་རྟེན་བྱ་བར་འོས། །ཟུར་བཞི་ལོགས་མཉམ་མཛེས་བྱས་ནས། །བང་རིམ་ལ་སོགས་གཞན་རིམ་བཞིན། །དེ་ཡང་གཉིས་གསུམ་བཞི་དང་ལྔ། །འབྲས་བུའི་རིམ་པ་གདུགས་ཀྱི་ཚད། །མཆོད་རྟེན་བྱི་བོ་ཡོན་ཏན་ཅན། །སོ་སོའི་སྐྱེ་བོ་རྣམས་ལ་འོས། །འདི་ཡི་མཐར་ནི་སྟོན་པ་ཡི། །གདུགས་ཀྱི་ཆེད་ལ་ངེས་པ་མེད། །བརྒྱ་ལྷག་རི་བར་བྱེ་བ་སྙེད། །མཆོད་རྟེན་ཡང་ནི་བྱ་བར་འོས། །དམན་
པ་བསེ་རུའི་སྤྱོད་པ་ལ། །གདུགས་ནི་རིམ་པ་བཅུ་གསུམ་སྟེ། །དེ་ལ་ཆར་ཁབ་མེད་པ་དག །བྱའོ་ཞེས་ནི་ཐོས་པ་ཡིན། །ལོགས་དག་ཏུ་ནི་སློབ་མ་ཟུང༌། །སྟོན་པའི་མཆོད་རྟེན་དབུས་སུ་སྟེ། །ལྷག་མ་རྣམས་ནི་གྲལ་རིམ་བཞིན། །དེ་ཡི་ཕྱི་རོལ་འཕགས་མིན་རྣམས། །སློབ་མ་རྣམས་ནི་ཕན་ཚུན་དུ། །རབ་གུས་མཉན་པས་བསྙེན་བཀུར་བྱ། །དགེ་འདུན་གྱིས་ཀྱང་ཆོ་ག་བཞིན། །སྨན་དག་གིས་ཀྱང་ཉེ་བར་བསྡུ། །ལྷུང་བཟེད་ཆུ་གཙང་དྲི་མ་མེད། །ཁྲུས་ཕྱིར་ནད་པ་སློང་ལ་སྦྱིན། །ལྷུང་བཟེད་ལན་གསུམ་བཀྲུས་ནས་ཀྱང༌། །སངས་རྒྱས་ཚིགས་བཅད་བཟླས་ནས་སོ། །སྨན་དག་བྱིན་ལེན་བྱས་ནས་ནི། །ཚུལ་ལྡན་ནད་པ་ལ་ནི་སྦྱིན། །བྱིན་ལེན་སྟོབས་པ་མེད་ན་ནི། །རང་ཉིད་ལེན་པ་ལ་ཡང་རུང༌། །ཆོས་གོས་བྱིན་གྱིས་བརླབས་པ་དག །ནད་པ་ལ་ནི་མི་བསླང་སྟེ། །ཡང་ན་དེ་ཡིས་ཕུལ་ཡང་ནི། །དགེ་སློང་རྣམས་ཀྱིས་བགོ་མི་བྱ། །གང་འདིར་ཆགས་པས་དེ་ལེན་དང༌། །སྦྱིན་བདག་དེ་ལྟར་བསྐུལ་བ་དང༌། །ངེས་པར་འགེགས་པ་ཉིད་ལ་བརྩོན། །དེ་དག་གསུམ་ཆར་སྐྱོན་དང་བཅས། །འཕགས་མིན་འཕགས་པའི་ནད་ལ་ཡང༌། །ནམ་ཡང་ལེ་ལོ་མི་བྱ་སྟེ། །འཁྲུལ་འཁོར་ལ་སོགས་སྦྱོར་བ་དང༌། །སྨན་པ་དད་པ་ཆུང་བས་མིན། །སངས་རྒྱས་ལ་མཆོད་ཚོགས་སྟོན་མོ། །ནད་པ་གལ་ཏེ་གསོ་བྱེད་ན། །ངན་ཞིང་སྨན་ཡང་བྱིན་བརླབས་ཏེ། །ཆོས་གོས་སོགས་ཀྱིས་བྱ་བ་ཡིན། །དེ་ལ་ནོར་མེད་གྱུར་ལྟ་ན། །གང་ཡོད་གཞན་ལས་བསླངས་ནས་ཀྱང༌། །ནུས་པ་ཇི་བཞིན་བསྒྲུབ་བྱ་སྟེ། །དེ་ཡིས་དད་པ་སྐྱེད་ཕྱིར་རོ། །ཐ་ན་རྡོ་གུ་མེ་ཏོག་དང༌། །ཕྱེ་མ་དང་ནི་བུམ་པའི་ཆུ། །བསྟེན་ནས་ཀྱང་ནི་མཆོད་པ་དག །དེ་ཡིས་ཉེ་བར་བསྟན་བཞིན་བྱ། །གང་ཞིག་དོན་མིན་ནད་ཀྱིས་གཟིར། །ནོར་ལ་ཡོངས་སུ་ཆགས་པ་ན། །འབད་པས་དེ་ནི་བླངས་ནས་དེར། །མཆོད་དང་བརྟུལ་ཞུགས་ཅན་སྟོན་བྱ། །རང་གི་ལྷུང་བཟེད་གོས་སོགས་ཀྱང༌། །དེ་ལ་བྱིན་ནས་དེ་ཡི་ཚེ། །ནད་གཡོག་གིས་ནི་བདེ་གཤེགས་སོགས། །མཆོད་པའི་ལས་ལ་བརྩོན་པར་བྱ། །ཁྱད་པར་དུ་ཡང་ནོར་བདག་ལ། །ཆགས་པས་གང་དུ་སྲོག་མི་འཆད། །ཅི་འདོད་དེ་ཡི་ལྷུང་བཟེད་སོགས། །ཡོན་ཏན་ལྡན་པ་གཞན་ལ་དབུལ། །དགེ་
སློང་ཚུལ་ཁྲིམས་ལྡན་ཡང་སྔོན། །ལྷུང་བཟེད་ལ་ནི་ཆགས་བཞིན་ཤི། །རང་གི་ལྷུང་བཟེད་ནང་དུ་ནི། །གདུག་པ་ཅན་གྱི་སྤྲུལ་དུ་སྐྱེས། །སྨན་དང་སྔགས་ཀྱི་སྦྱོར་བ་ཡིས། །གཞང་འབྲུམ་ལེགས་པར་གསོ་བྱ་སྟེ། །སྨན་པའི་མན་ངག་མེད་པར་ནི། །སེན་མོ་སོགས་ཀྱིས་གཅད་མི་བྱ། །གང་ལ་སློབ་མ་ལ་སོགས་པའི། །ནད་གཡོགས་མེད་ཅིང་སྨན་མེད་ན། །དེ་ལ་སྨན་དག་སྦྱིན་པ་དང༌། །ནད་གཡོག་ཀྱང་ནི་ཚོགས་ཀྱིས་བྱ། །མཛེ་ཅན་གྱིས་ནི་དགེ་འདུན་གྱི། །མལ་སྟན་ཉེར་སྤྱོད་སྤང་བྱ་སྟེ། །རྫིང་བུ་ལྗོན་ཤིང་ཉེ་འཁོར་དང༌། །སྤངས་འདུག་ས་ལ་སོགས་སོ། །ཁང་བཟངས་དང་ནི་ཁྱམས་ཀྱི་སྒོ། །གཡོས་ཁང་བཤད་གཅིའི་ཁང་པར་ནི། །མི་འདུག་དབེན་པར་གནས་བྱ་སྟེ། །དེ་ནི་ཚོགས་ཀྱིས་བསྐྱང་བར་འོས། །གཙུག་ལག་ཁང་གི་བདག་པོར་ནི། །ཤི་འམ་བཅིངས་སམ་རིང་སོང་ན། །དཀའ་བས་ཀྱང་ནི་ལོ་ལྔའི་བར། །གཙུག་ལག་ཁང་དུ་ལེགས་གནས་བྱ། །ལོ་ལྔ་ལོན་ནས་དེ་དྲུང་གེ །གཙུག་ལག་ཁང་རྟེན་རྙེད་པ་དག །བླངས་ཏེ་དེ་རུ་གནས་བྱ་སྟེ། །བསྲུང་ཕྱིར་གསོ་སྦྱོང་ཐ་དད་དོ། །དེ་ལྟར་ལོ་ནི་བཅུར་གནས་ཀྱང༌། །དེར་ནི་འཛིན་པོ་མེད་པ་ན། །མལ་སྟན་ལ་སོགས་དེ་བྱིན་ནས། །གཙུག་ལག་ཁང་གཞན་གནས་པར་བྱ། །འགྲོ་འདོད་རྣམས་ཀྱིས་ཅི་འདོད་པར། །སྒོ་བསྡམས་རྒྱས་བཏབ་འགྲོ་བྱ་སྟེ། །སླར་ཡང་དེ་ནི་འཇུག་པ་ན། །དེ་ལ་འདུག་གནས་སྦྱིན་པར་བྱ། །གཙུག་ལག་ཁང་གཞན་དབང་བའི་དཀོར། །དགེ་སློང་གཞན་དུ་སྤྱོད་པ་བཀག །དགོས་པའི་ཕྱིར་དུ་དེ་མཐུན་པས། །ཡོངས་སུ་སྤྱོད་ལ་ཉེས་པ་མེད། །སྦྱིན་བདག་རྣམས་ཀྱིས་མལ་སྟན་དག །གཙུག་ལག་ཁང་དུ་ཕུལ་བ་གང༌། །མི་འདོད་ཀྱང་ནི་དེ་ལྟ་བུ། །གཞན་དུ་དབུལ་དུ་གཞུག་མི་བྱ། །ཚོགས་ཀྱི་གོས་ནི་གྱོན་ནས་ཀྱང༌། །དགེ་སློང་རང་གི་ལས་བྱེད་བཀག །གོས་བཀྲུ་བ་དང་ཚོན་ལ་སོགས། །དེ་བཞིན་གཞན་ཡང་ཆེན་པོ་གང༌། །ཆར་དང་ཁ་བ་འབབ་པ་ན། །བླ་གབ་མེད་པར་མི་གཞག་ཅིག །བཤར་གཅི་ཡི་ནི་ས་དག་ཏུ། །དེ་གྱོན་པ་ནི་བཀག་པ་ཡིན། །གནས་མལ་གནས་སྐྱོང་མ་གཏད་པར། །མཚན་མོའི་དུས་སུ་འགྲོ་མི་བྱ།། །།བམ་པོ་དྲུག་པ། གཏོད་པ་ན་ཡང་ཡུལ་གཅིག་ལ། །གོ་བར་བྱས་ཏེ་
བཞག་པར་འདོད། །ཚོགས་ཀྱི་འདུག་སྟན་ལ་སོགས་ཀྱང༌། །རྒན་རིམས་བཞིན་དུ་སྦྱིན་བྱ་སྟེ། །གློ་བུར་ལྷགས་པའི་ཆེད་དུ་ཡང༌། །དངོས་པོ་གང་ཡང་ཀུན་ཏུ་གཞག །གནས་ཀྱི་དབྱེ་བས་དགོན་པར་ཡང༌། །རྒན་རིམས་སོགས་ལ་ཅི་འདོད་པར། །ས་དང་ཤིང་གི་ཕུག་ལ་སོགས།། རིམ་པ་ཇི་བཞིན་ཐོབ་པ་ཡིན། །དགོན་པའི་གློ་བུར་ལྷགས་པ་ལའང༌། །དངོས་པོའི་སྐལ་བ་གཞག་བྱ་སྟེ། །ཆོས་གོས་ལ་སོགས་སྦས་ནས་ནི། །གནས་བྱ་གཞན་དུ་ལྟུང་བར་འགྱུར། །གང་དུ་ས་གཞི་ཁྲུ་དོ་ཡི། །ཚད་ཙམ་ལ་ཡང་མལ་དག་གནང༌། །ཞབས་ཚགས་ཅན་དང་སོ་ཤིང་སོགས། །ཕ་གུ་དང་ནི་སྨན་གྱི་སྣོད། །ཀུན་ནས་འཇམ་པོར་བྱུགས་ཏེ་བྱ། །གནས་ཁང་སོགས་སུ་འགྲོ་འདོད་པས། །སངས་རྒྱས་སྲས་ཀྱི་འདུག་གནས་ནི། །གཞི་གནས་འགྲོ་བར་མི་བཞེད་དོ། །གནས་ཁང་འགྱེད་པ་ལ་སོགས་དུས། །མ་བསྒོ་བར་ནི་འགྲོ་བ་ནི། །སླར་ཡང་རྒན་རིམས་ཇི་བཞིན་དུ། །འདོད་ཀྱང་དེ་ལ་འོས་མ་ཡིན། །གསར་བུ་རྣམས་དང་དེ་མཉམ་པར། །གནས་མལ་བཟའ་བ་འབྲས་བུ་དང༌། །མེ་ཏོག་ལ་སོགས་སྦྱིན་པ་ཉིད། །བསྟན་པ་འདི་ལ་ཆོས་ཉིད་དོ། །ནད་ཚབས་ཆེ་ལ་གནས་ཁང་གཞན། །ཇི་ལྟར་འདོད་བཞིན་སྦྱིན་བྱ་སྟེ། །ཇི་སྲིད་ནད་སོས་གྱུར་གྱི་བར། །ཁས་ལེན་མི་བྱེད་ན་ཡང་སྦྱིན། །གཙུག་ལག་ཁང་གི་ཕྱི་རོལ་དུ། །གོས་སྟན་མཐོང་ན་ནང་གཞུག་ཅིང༌། །རྒན་པོ་ན་དང་ཉམ་ཆུང་གིས། །དགེ་སྐོས་དག་ལ་གོ་བར་བྱ། །དགེ་འདུན་མལ་སྟན་ཡོ་བྱད་དག །མེ་ཡིས་ཚིག་གམ་ཆུས་ཁྱེར་ན། །བདག་ཉིད་ཀྱིས་ནི་རྗེས་བསྲུང་སྟེ། །ངེས་པར་བསྐྱང་ངོ་གྲོགས་མེད་ན། །དང་པོ་གང་ཟག་རྣམས་ཀྱི་སྟེ། །ཕྱི་ནས་ཚོགས་ཀྱི་དེ་ནས་ཆོས། །དེ་ནས་བདེ་བར་གཤེགས་པ་སྟེ། །འདི་ནི་དབྱུང་བའི་རིམ་པར་འདོད། །གོ་སྐབས་འབྱེད་བཅུག་ངེས་བརྟགས་ཏེ། །གང་ཕྱིར་ཐབས་ཀྱིས་བསྒྲུབ་པ་ཉིད། །དོན་གཉེར་དེ་ཡིས་དགེ་སློང་ལ། །མདོའམ་འདུལ་ཉིད་དྲིས་ཏེའོ། །འདུག་པའི་ཐད་དུ་ཉེ་བས་སམ། །དེ་ཡིས་འགྲོ་བཞིན་དུ་ཡང་རུང༌། །སྡོམ་བརྩོན་རང་ལ་བལྟ་བ་ཡིས། །ཀློག་དང་ཉེ་བར་བསྟན་པ་སྦྱིན། །ཉེ་བར་བསྟན་པ་འཛིན་པས་ཀྱང༌། །བླ་མ་སངས་རྒྱས་དང་པོར་གུས། །རྩེ་གཅིག་ཉལ་བས་སྤངས་ནས་ནི། །ཉེ་བར་བསྟན་པ་ལན་གསུམ་
བཟུང༌། །ཉེ་བར་བསྟན་པ་སྟོན་པ་པོ། །འདི་ཡིས་སྒྲ་ནི་མི་ཐོས་པའི། །ཕྱོགས་དེར་དེ་ལ་གཏད་ནས་ནི། །ལན་བརྒྱའི་བར་དུ་ཡང་ནི་བཟླ། །འདོན་དང་རྗེས་སུ་འདོན་སོགས་ཀྱི། །དབྱངས་ཀྱིས་ཐུབ་པའི་གསུང་མི་བསྒྲག །ཡུལ་སྐད་དག་དང་རྗེས་མཐུན་པས། །འདོན་པར་བྱེད་ལ་འགལ་བ་མེད། །སྡོམ་བརྩོན་གང་ཞིག་ཁང་བཟངས་ཀྱི། །ཀ་བ་ལྗོན་ཤིང་རྩིག་པ་ལའང༌། །རབ་ཏུ་བཏེག་ན་འགལ་ཚབས་ཅན། །དེ་ཡི་ཕྱིར་ན་དེ་མི་སྤྱད། །དཔུང་རྒྱན་དང་ནི་གཞན་མིན་པ། །སོ་སོར་འབྲང་མ་ལ་སོགས་གདགས། །ཕན་འདོད་སྔགས་ནི་བཟླ་བྱ་སྟེ། །གནོད་གྱུར་གསང་སྔགས་མ་ཡིན་ནོ། །ལྷ་གཞན་ཕྱག་འཚལ་མཆོད་པ་ནི། །གསང་སྔགས་ཕྱིར་ཡང་བཀག་པ་ཡིན། །དཀོན་མཆོག་གསུམ་ལ་ཕྱག་བྱས་ནས། །གཞན་གྱི་གསང་སྔགས་བརྗོད་པར་བྱ། །ལྷུང་བཟེད་ཁ་སྦུབ་བྱས་པ་ལ། །སྟན་དང་སྟོན་མོ་བཟའ་བ་བཀག །དམ་པའི་ཆོས་ནི་སྟོན་པ་ན། །དད་ལྡན་རྣམས་ཀྱིས་འདུས་བྱས་བསྟེན། །ས་གཞི་གོས་ཀྱིས་གཡོགས་པ་ལ། །འདུས་བྱས་མི་རྟག་འདུ་ཤེས་ཀྱིས། །དགེ་སློང་རྣམས་ཀྱིས་འགྲོ་བ་གནང༌། །སྡོམ་བརྩོན་ཆོས་གོས་གསུམ་འཛིན་ལ། །ཁྲུས་ཀྱི་རས་བསྲེལ་རྗེས་སུ་གནང༌། །ས་བོན་ཆོས་པར་དཀའ་བའི་རིགས། །རླངས་པས་ཕོག་པ་སྤྱད་དུ་རུང༌། །སྒྲེགས་པ་བྱུང་བ་དོར་ནས་ནི། །གུས་པས་ཁ་ནང་བཀྲུ་བར་བྱ། །སྔོན་ལས་བཟློག་དཀའ་ལས་གྲུབ་པའི། །མེད་པ་གཉིས་ཡོད་མ་གཏོགས་སོ། །མངོན་མཚན་ཅན་དག་འཆང་བ་ནི། །དགེ་འདུན་ཉིད་ལ་རྗེས་སུ་གནང༌། །བསོད་སྙོམས་པ་ཡི་ཆོས་གོས་ལ། །མདུད་པ་བོར་བ་ལ་སོགས་མིན། །ཐམས་ཅད་ཁ་དོག་གཅིག་པ་ཡི། །གོས་རྣམས་ཉེ་བར་ལོངས་སྤྱད་མིན། །མེ་ཏོག་འབྲས་བུ་ཤིང་སོགས་དྲུང༌། །གཅི་སོགས་ཀུན་ཏུ་སྤྱད་པ་སྤང༌། །སྟེང་དུ་ཤིང་ལས་བྱ་བ་སྟེ། །རྡོ་ཡི་སྐས་ནི་མ་ཡིན་ནོ། །རླུང་ནད་ཅན་གྱིས་ཕྱག་མི་བྱ། །དེ་ལ་ཡང་ནི་གཞན་གྱིས་མིན། །ལུས་གཙང་བྱི་དོར་བྱས་ནས་ནི། །ཆོས་གོས་ལེགས་པར་བགོ་བར་བྱ། །དེ་ལུས་མཉེད་པའི་བསམ་པ་ཡིས། །བསྐུ་མཉེ་བྱས་ལ་ཉེས་པ་མེད། །ལི་ཤའི་མེ་ཏོག་ལ་སོགས་པ། །རྙེད་ན་དབེན་པར་འདུག་ནས་ནི། །སྦྱིན་བདག་རྣམས་ལ་ཕན་འདོད་ཅིང༌། །ལྟ་བྱེད་ཚིམ་རྒྱས་དོན་དུ་བསྣམ། །ཆོས་
གོས་འཇམ་ཕྱིས་བྱས་པ་སྔོན། །དགའ་བོ་ལ་ནི་མཛེས་མས་བྱིན། །སྐུར་འདེབས་གྱུར་གསན་ཐུབ་དབང་གིས། །དགག་པའི་ཚུལ་འདི་རབ་ཏུ་གསུངས། །བརྡུངས་ནས་འཇམ་པོར་བྱས་པ་ཡི། །ཆོས་གོས་བཅད་བར་མི་བྱ་སྟེ། །དེ་ནི་སུ་ཞིག་འཆང་བྱེད་པ། །ངེས་པར་འགལ་ཚབས་ཅན་དུ་འགྱུར། །ཕག་གི་ཡན་ལག་ལ་སོགས་དང༌། །བུ་རམ་ཤིང་ལ་སོགས་པ་དག །ཆོམ་རྐུན་གྱིས་ནི་བོར་བ་གང༌། །སྐྱེ་བོས་མཐོང་བ་བླང་བར་བྱ། །རྒྱབ་དང་མགོ་བོ་རྐེད་པ་ཡིས། །ཁུར་པོ་ཁུར་བའི་སྡོམ་བརྩོན་གང༌། །དེ་ཡི་འགལ་ཚབས་སྡུག་བསྔལ་གྱིས། །འཇིག་རྟེན་ཕ་རོལ་གཟིར་བར་བྱེད། །སྲིན་བུས་ལ་བ་རིན་པོ་ཆེ། །ཟོས་པ་ལ་ནི་ནིམ་པ་དང༌། །འདབ་མ་བདུན་པ་ལ་སོགས་པའི། །ལོ་མའི་ཕྱེ་མས་བསྒོ་བར་གསུངས། །ཕ་ནི་དབུལ་པོ་མ་ཡིན་པས། །བུ་ལ་ནོར་སྐལ་སྟེར་བ་ན། །ཚུལ་ཁྲིམས་ལྡན་པས་བླངས་ནས་ནི། །དཀོན་མཆོག་གསུམ་གྱི་དགོས་པ་བྱ། །མཚམས་གཞན་གནས་པས་དེ་ཡི་ཚེ། །འདུན་པ་ཕུལ་ན་ཉེས་བྱས་ཏེ། །འབུལ་དུ་བཅུག་ཀྱང་མི་འཆགས་པས། །ངེས་པར་ཉེས་བྱས་ལས་གཞན་མིན། །ལ་བ་ལ་སོགས་བཟང་པོ་གང༌། །ཚོགས་ཀྱི་ཅི་བདེར་ཐོབ་པ་ན། །དེ་ནི་བཙོངས་ཏེ་བགོ་བྱ་ཡི། །གཤག་ཅིང་གཏུབ་པར་མི་བྱའོ། །གནས་མལ་རབ་ཏུ་མ་བརྟགས་པར། །ཉལ་བ་ལ་ནི་ཉེས་བྱས་འགྱུར། །རྟ་དང་ཁྱིམ་བྱ་བར་ཏེ་ཀེ །གླང་སོགས་འཐབ་དུ་གཞུག་མི་བྱ། །བདེ་གཤེགས་ཀྱིས་ནི་གཉིས་པོ་ལ། །པུས་འཁྱུད་རྗེས་སུ་གནང་བ་སྟེ། །ལུས་ནི་ནད་ཀྱིས་ཉམས་པ་དང༌། །གཞན་ཡང་རྒན་པོ་དེ་ལའོ། །གནས་ནས་འགྲོ་བར་འདོད་པ་ཡིས། །སླར་ཡང་འོང་བར་འདོད་པ་ན། །གནས་མལ་ཀུན་ནས་སྦྱངས་ནས་ནི། །ལེགས་པར་གཏད་དེ་འགྲོ་བར་བྱ། །གང་ལ་གཏད་པ་དེ་ཡིས་ཀྱང༌། །དེ་ནི་འབད་པས་ཀུན་ཏུ་བསྲུང༌། །འོངས་ནས་སླར་ཡང་སྦྱིན་བྱ་སྟེ། །རྟགས་སམ་གོ་བར་བྱས་ཏེའོ། །གང་སྔོན་བྲང་འགྲོ་མ་མཐོང་ནས། །མནན་པས་དགེ་སློང་བཟུང་ནས་ནི། །གཉིས་ཀ་ཡང་ནི་ཤི་བར་གྱུར། །དེས་ན་འདི་ནི་གོ་བྱེད་ཡིན། །བརྟུལ་ཞུགས་ཅན་གྱིས་ཟླ་ཕྱེད་དེར། །ཚེས་བརྒྱད་དང་ནི་བཅོ་ལྔ་ལ། །གནས་མལ་ལེགས་པར་སྦྱང་བར་བྱ། །མ་སྦྱངས་ན་ནི་
བསླབ་ནི་འཐོབ། །གནས་ཁང་བཟང་པོ་དེར་བསྒྲུབས་པ། །ཚོགས་ལ་ཉེ་བར་མཁོ་བ་ཡང༌། །སྔོན་དུ་གང་འོས་ཐོབ་པས་སྦྱང༌། །རྒན་རིམས་ཇི་བཞིན་འདིར་ཡོད་མིན། །བྱ་བ་ཡོངས་སུ་རྫོགས་པ་ན། །སྣོད་སྤྱད་དང་ནི་ཡོ་བྱད་གོས། །སྔོན་དུ་བླངས་ནས་ཁྱེར་བྱ་སྟེ། །ཕལ་བའི་ལས་ཀྱིས་མ་ཡིན་ནོ། །ཚོགས་ཀྱི་གནས་མལ་བཟང་པོ་ཉིད། །གང་ཟག་དབང་ལ་དེ་མི་འདོད། །རྒྱབ་རྟེན་བཅས་པའི་སྟན་དག་ནི། །གཉིས་ཀ་ལ་ཡང་རྗེས་སུ་གནང༌། །ལོ་གསུམ་ཁྱད་པར་ཞུགས་པ་དང༌། །ལྷན་ཅིག་སྟན་གཅིག་ལ་མི་འདུག །དགེ་སློང་བསྙེན་པར་མ་རྫོགས་དང༌། །ལྷན་ཅིག་སྟན་ལ་རུང་མ་ཡིན། །མཁན་པོ་དང་ནི་སློབ་མ་ཡང༌། །ཁྱིམ་པའི་ཁྱིམ་དུ་རྗེས་སུ་གནང༌། །སྟན་ཅིག་ལ་འདུག་དེར་ཡང་ནི། །གཉིས་པ་ཅུང་ཟད་མེད་ནའོ། །མལ་སྟན་ལ་སོགས་བླངས་ནས་ནི། །འཇིགས་བཅས་གཞན་དུ་འགྲོ་བ་ན། །སྡོམ་བརྩོན་གྱིས་དེར་ལོངས་སྤྱད་ནས། །འཇིགས་བྲལ་ཚེ་ན་གཏད་པར་བྱ། །འདི་ལ་འཇིགས་དང་བྲལ་ནས་ནི། །སྔར་བཞིན་ཡང་དག་ཡོངས་སུ་སྤྱད། །རྡོལ་དང་རལ་དང་ཟགས་པ་དག །ཆོ་ག་བཞིན་དུ་བཅོས་པར་བྱ། །གང་དེར་གདིང་བ་ལ་སོགས་པ། །སྤྱད་མི་བཟོད་དག་ལོངས་སྤྱོད་ཕྱིར། །དེ་ཡིས་ས་ལྕིར་ལེགས་བསྲེས་ནས། །རྩིག་པའི་ཁུང་བུ་ལ་སོགས་བྱུག །དེ་ལྟར་ལེགས་པར་སྦྱར་ན་ནི། །སྦྱིན་འབྲས་བདེ་བའི་དོན་དུ་འགྱུར། །སྦྱིན་བདག་རྣམས་ཀྱི་བསོད་ནམས་རྒྱུན། །མི་འཆད་པ་ཡི་རྒྱུ་ཡིན་ནོ། །གཙུག་ལག་ཁང་གཞན་རྙེད་པ་ནི། །སྤྱད་དེ་གཞན་དུ་གནས་པ་ན། །དེ་ཡིས་གོང་ངམ་དུ་ན་ཡང༌། །ཐམས་ཅད་རིན་ཚད་གཞལ་བར་བྱ། །དགེ་འདུན་དག་གི་གནས་མལ་ལ། །ཤེས་བྱེད་མཚན་མ་གདབ་པར་བྱ། །ཆེ་གེའི་སྦྱིན་བྱའི་ཆོས་ཡིན་ཞེས། །མཛེས་པའི་ཡི་གེ་རྣམས་ཀྱིས་སོ། །ཁྲི་སྟེང་ཁྲི་ནི་བརྩེགས་པ་ལ། །དགེ་སློང་འདུག་པར་བྱེད་པ་དེ། །ཉེས་བྱས་དུང་གི་སྒྲ་གཅན་གྱིས། །བདས་ཏེ་དེ་ནི་འོག་ཏུ་ལྟུང༌། །དགེ་ཚུལ་གང་ཞིག་དད་པ་ཅན། །སློབ་ལ་རབ་གུས་བློ་ལྡན་གྱི། །ཚོགས་ལ་གོ་བྱས་དེ་དག་གི །གནས་མལ་ལ་ནི་རུང་བ་ཉིད། །ཀོ་ལྤགས་ལས་གྱུར་མལ་སྟན་དག །ཡུལ་གྱི་དབུས་སུ་བཀག་པ་སྟེ། །ཁྱིམ་པའི་ཁྱིམ་དུ་འདུག་ཙམ་རུང༌། །དེར་ཡང་ཉལ་བ་
གནང་མ་ཡིན། །གཙུག་ལག་ཁང་གི་སྒོ་དྲུང་དུ། །དོམ་ལྤགས་ཉིད་ཀྱི་རྗེས་སུ་གནང༌། །ཀོ་ལྤགས་ཀྱི་ནི་མལ་སྟན་དག །མཐའ་འཁོབ་ཏུ་ནི་ཉེས་པ་མེད། །ངོ་མཚར་ནོར་བུ་མུ་ཏིག་སོགས། །རིན་ཆེན་མཆོག་གིས་མཛེས་པ་ལ། །གསེར་དང་བ་སོ་ལ་སོགས་རྐང། །མལ་སྟན་ཆེན་པོ་ཞེས་བྱར་བརྗོད། །གང་གི་སྟེང་དུ་བརླ་འདུག་ནས། །རྐང་བརྐྱང་ས་ལ་མི་རེག་པ། །མལ་སྟན་ཁྱད་པར་འདི་འདྲ་ཡང༌། །དེ་ནི་མལ་སྟན་མཐོན་པོར་འདོད། །འདི་དག་བསྙེན་གནས་སྡོམ་པར་ནི། །ཁྱིམ་པ་ལ་ཡང་རབ་བཀག་སྟེ། །དེ་འདིར་གཉིས་ཀ་དགེ་སློང་ལ། །ཅི་ཕྱིར་དགག་པར་མི་འོས་མིན། །ཁྲིའུ་ལ་ནི་གཅིག་པུར་འདུག །གཉིས་ནི་ཤིང་ཁྲི་བརྟན་པའོ། །བརྟན་དང་མི་བརྟན་ཤེས་བྱས་ནས། །ཤིང་ཁྲི་ལ་ནི་གསུམ་སོགས་ཀྱང༌། །གཎྜཱི་བརྡུངས་ནས་ཞུས་ཏེའམ། །ཚུལ་ཤིང་བྲིམ་པ་དག་གིས་ཀྱང༌། །རྙེད་པ་འགེད་བྱེད་དེ་ཡི་ཚེ། །དགེ་སློང་ཀུན་ལ་གོ་བར་བྱ། །ཤི་སོགས་བརྡ་ནི་སྤྲོད་བྱེད་པའི། །བྱིའོ་ལ་སོགས་གཎྜཱི་ལྔ། །དགེ་སློང་རྣམས་ཀྱིས་བརྡུང་བ་ནི། །འགལ་མེད་རྗེས་སུ་གནང་བ་ཡིན། །ལན་ཅིག་ཀུན་ཏུ་བཏེག་པ་ཡིས། །གང་དུ་རབ་ཏུ་བརྡུང་བ་ནི། །དེ་ནི་ཤི་བར་མཚོན་བྱེད་པ། །བྱིའོ་ཉིད་བརྗོད་དང་པོའོ། །གང་དུ་ལན་གཉིས་བཏེག་པས་བརྡུང༌། །དེ་ནི་གཉིས་པ་ལས་སུ་ཤེས། །དེ་ཉིད་གཅིག་གི་ལྷག་པར་ནི། །འདུ་བ་ཞེས་བྱར་མངོན་པར་བརྗོད། །དེས་མེད་གནོད་བྱུང་གཎྜཱི་སྟེ། །དེ་ཡང་འཇིག་རྟེན་གོ་བྱེད་ཡིན། །སྒྲ་ལྡན་ཁར་གསིལ་འཁྲོལ་བ་ནི། །བསམ་གཏན་པ་རྣམས་གོ་བྱེད་ཉིད། །གཙུག་ལག་ཁང་དུ་གློ་བུར་གང༌། །འཇུག་ཚེ་ཕྱི་རོལ་རྐང་གཉིས་བཀྲུ། །སྤྲུག་གམ་ཡང་ན་ཕྱི་བྱ་སྟེ། །ཆུ་འམ་ཡང་ན་ལོ་མས་སོ། །ནང་ཞུགས་ཉེ་བར་ཕྱིན་པ་ན། །བརྟུལ་ཞུགས་ཅན་ཐད་ཕྱག་བྱ་སྟེ། །དེས་ཀྱང་དེ་ལ་ཅི་ནུས་སུ། །དེ་དག་ལ་ནི་བྱ་བ་ཡིན། །དཀའ་ཐུབ་ཅན་གྱིས་ཐོག་མར་ནི། །དགེ་འདུན་དག་གི་ནང་ཁྲིམས་དྲི། །དེ་ཡིས་སྟོན་པའི་བཀའ་བཞིན་དུ། །ཡང་དག་རྗེས་སུ་བསྲུང་བར་བྱ། །གཙུག་ལག་ཁང་དུ་དགེ་སློང་ལ། །གནོད་བྱེད་དུ་ནི་མི་འགྱུར་བ། །ཡོན་ཏན་འཕེལ་དུ་རུང་བ་གང༌། །དེ་འདྲ་དགེ་སློང་རྣམས་ཀྱིས་བཅའ། །ཤེས་བྱ་མ་ལུས་དེ་ཉིད་ནི། །
མཁྱེན་པའི་དེ་བཞིན་གཤེགས་པ་ལ། །བརྟུལ་ཞུགས་ཅན་གྱིས་ཚེ་ལྡན་དང༌། །རིགས་རུས་མཚན་ནས་སྨོས་པ་དང༌། །ཡུལ་ནས་བརྗོད་པར་མི་བྱའོ། །རྒན་པོ་དག་ལ་གསར་བུ་ཡིས། །བཙུན་པ་ཞེས་ནི་བརྗོད་བྱ་སྟེ། །གསར་བུ་ལ་ནི་རྒན་པོས་ཀྱང༌། །ཚེ་ལྡན་ཞེས་བརྗོད་གཞན་དུ་མིན། །རིགས་པ་ཡིས་ནི་ཅི་ནུས་སུ། །ཉལ་ཉིལ་ངེས་པར་བསལ་བར་བྱ། །ཚེས་བརྒྱད་དང་ནི་བཅུ་བཞི་ལ། །གཎྜཱི་བརྡུང་ནས་གནས་པས་སོ། །བཤང་གཅི་མཆིལ་མ་ངར་སྣབས་དང༌། །ཁྲག་ཀྱང་ངེས་པར་འདོར་བ་ན། །སྒྲ་བཅས་སེ་གོལ་གཏོགས་བྱ་སྟེ། །བསླབ་པ་ཟད་པར་མི་འདོད་ནའོ། །རྩྭ་སྔོན་དང་ནི་ཆུ་དག་ལ། །དོར་བར་བྱ་བ་མ་ཡིན་ནོ། །ས་གཞི་གཙང་མའི་ཕྱོགས་དག་དང༌། །གང་དུ་འགལ་མཐོང་དེར་ཡང་མིན། །ཉིན་མཚན་བདེར་གནས་དགེ་སློང་གིས། །ཏམ་པོ་ལ་ནི་མི་བཟའ་སྟེ། །དགེ་སློང་རིགས་པ་བསྟན་པ་ཡི། །ནད་པ་ལ་ནི་ཉེས་པ་མེད། །དུས་མིན་ཟས་ལ་བཀག་པ་ཡིས། །འབྲས་བུ་གང་ཡང་མི་བཟའ་སྟེ། །མཁས་པ་རྣམས་ཀྱིས་ཆོས་འདུལ་ལས། །གནང་བ་དེ་སྤྱད་མདོར་བསྡུས་ཡིན། །དགའ་བོའི་མིག་སྨན་ཐུར་མ་སོགས། །ཐུབ་པས་ཇི་སྐད་མདོར་གསུངས་བཞིན། །དེ་བཞིན་དགེ་སློང་རྣམས་ཀྱིས་འདིར། །བཟའ་བ་བག་ཡོད་ཡོངས་སུ་སྤྱད། །གཙུག་ལག་ཁང་ནང་དགེ་སློང་གིས། །སྐྲ་དང་ཁ་སྤུ་བྲེག་མི་བྱ། །ནད་པས་ས་གཞི་གཙང་མ་ལ། །གོས་དག་བཏིང་སྟེ་བྲེག་པར་བྱ། །སྐྲ་སོགས་འབྲེག་པར་བྱེད་པ་ལ། །རྒན་རིམས་ཇི་བཞིན་རྗེས་སུ་གནང༌། །ཉུང་དུ་ཙམ་ཞིག་བྲེགས་ན་ཡང༌། །གསར་བུའི་འཕྲོ་ནི་མི་གཅད་དོ། །དང་པོར་མགོ་བོ་ཡང་ནི་ཁ། །དེ་ནས་སྣ་ཡི་གཙང་སྦྲ་དང། །དེ་འོག་རྐང་ལག་སེན་མོ་སྟེ། །ལས་བྱེད་རིམ་པ་འདི་དག་གོ །སྐྲ་ནི་ཆན་པས་མི་བྲེག་སྟེ། །བརྟུལ་ཞུགས་ཅན་ལ་གནང་བ་ནི། །འགའ་ཞིག་གནས་སུ་རྨ་ཉེ་ན། །ཆད་པས་གཅད་དུ་རུང་བ་ཡིན། །ནད་པ་ལ་ནི་གོ་བྱས་ནས། །ཚངས་སྤྱོད་རྣམ་པར་མཁས་པ་ཡིས། །ཀུན་ཁྱབ་ཕྱོགས་སུ་དྲན་ལྡན་པས། །སྤུ་དག་བྲེགས་སོགས་རུང་བ་ཡིན། །ཟླ་འདྲ་འབྲས་བུའི་རྣམ་པའམ། །དེ་བཞིན་སྤུ་གྲིའི་སོ་ལྟ་བུར། །གཅད་དོ་རྩི་ཡིས་མི་བྱུག་ཅིང༌། །དག་ཕྱིར་ཡིན་ཏེ་མཛེས་ཕྱིར་མིན། །དགོན་པ་བ་ཡིས་སོར་གཉིས་ལས། །ལྷག་པར་སྐྲ་སྐྱེ་གཞག་མི་བྱ། །གྲོང་གི་མཐར་གནས་བརྟུལ་ལྡན་
གྱིས། །སོར་གཉིས་ཡང་ནི་མི་རུང་སྨད། །སྐྲ་རྣམས་བྲེགས་ཟིན་རྗེས་ཐོགས་ལ། །དག་པའི་དོན་དུ་ཁྲུས་བྱའོ། །སྡོམ་བརྩོན་རྐྱེན་དབང་ལྡན་གྱུར་ན། །ཡན་ལག་ལྔ་རྣམས་བཀྲུ་བར་གནང༌། །དགེ་འདུན་སྤྱི་ཁང་ཉེར་གནས་སུ། །སྤུ་གྲི་ཡ་སོགས་སྣོད་བཅས་བཞག །སྐྲ་སོགས་ལས་ལ་མཁས་ན་ནི། །དབེན་པར་བྱེད་ལ་བཀག་པ་མེད། །སོ་ཤིང་བྱས་ཤིང་ཁ་བཀྲུས་ནས། །དམ་པའི་ཆོས་ནི་བཤད་བྱ་སྟེ། །ཟས་དུས་ཡང་ནི་དེ་ཉིད་ལས། །གཞན་དུ་འོས་པ་མ་ཡིན་ནོ། །དེ་ཡང་རྣམ་གསུམ་རིང་ཤོས་ནི། །སོར་ནི་བཅུ་གཉིས་ཤེས་པར་བྱ། །བརྒྱད་ནི་ཆུང་དུ་དེ་ཡི་དབུས།། བར་མ་ཞེས་ནི་བརྗོད་པ་ཡིན། །དེ་དོར་ནས་ཀྱང་ལྕེ་བཞར་གྱིས། །འབད་དེ་ལྕེ་ནི་བཞར་བར་བྱ། །ཁར་བ་ཟངས་དང་ར་གན་ལྕགས། །ལྕེ་བཞར་རྣམ་པ་བཞི་ཡིན་ནོ། །གྲོང་གི་ཐ་མར་གནས་པ་ཡིས། །དེ་དག་ཉེར་བསྒྲུབ་གཞན་ཡང་ནི། །མེད་ན་ལེགས་པར་བྲུད་པ་ཡི། །ཤིང་ཚལ་གྱིས་ཀྱང་བཞར་རུང་ཉིད། །གལ་ཏེ་ཤིང་ཚལ་ཡང་མེད་ན། །ཁ་དང་ལྕེ་ཡི་དྲི་མ་ནི། །ཇི་ལྟར་སུས་ཀྱང་མི་མཐོང་བར། །ལྕི་བར་བཅས་པའི་ཆུ་ཡིས་སྦྱང༌། །སྔོན་བྱུང་དུག་ཅན་སྤྲུལ་ཤི་བས། །བྲམ་ཟེའི་བུར་སྐྱེས་གྱུར་པ་ཞིག །རབ་བྱུང་དེ་ཡི་ལྕེ་ཡི་དྲིས། །རྣམ་སྦྱང་ཉེས་པ་མང་པོར་གྱུར། །དང་པོར་སྦྲང་མ་སོ་ཤིང་གིས། །དེ་ཡིས་རྩངས་པ་ཤི་གྱུར་ཏེ། །དེ་ཡིས་ནེ་ལེ་དེ་ལ་གང༌། །རེག་པས་མཐའ་དག་ཤི་བར་གྱུར། །དེ་ཡི་དྲི་དོར་ཐམས་ཅད་དུ། །འགྲོ་བ་རྣམས་ནི་རིམ་གྱིས་ཤི། །དེ་ཡི་ཕྱིར་ན་བཅོམ་ལྡན་འདས། །ཐུགས་རྗེ་ལྡན་པས་བཀག་པ་ཡིན། །ཚུལ་ལྡན་རྣམས་ཀྱི་སོ་ཤིང་ནི། །བཀྲུས་ནས་ཡོངས་སུ་དོར་བར་བྱ། ཆུ་དག་མེད་ནས་ལ་ཡང༌། །བྲུད་དེ་ཡོངས་སུ་དོར་བར་བྱ། །གཅི་བ་དང་ནི་བཤད་པ་དང༌། །སོ་ཤིང་བཅའ་བའི་བྱ་བ་སྟེ། །རྣམ་པ་གསུམ་པོ་དགེ་སློང་གིས། །སྒྲིབ་གཡོགས་ཅན་གྱི་ཕྱོགས་སུ་བྱ། །དགེ་སློང་དག་ལ་རིམ་གཅིག་པའི། །མཆིལ་ལྷམ་བཅང་བ་རྗེས་སུ་གནང༌། །མཆིལ་ལྷམ་རིམ་པ་མང་པོ་ཅན། །མ་བརྟགས་པར་ནི་བཅད་མི་བྱ། །སྒྲ་ཅན་དང་ནི་རིན་པོ་ཆེ། །བཅད་དུ་རུང་བ་མ་ཡིན་ནོ། །ཚུལ་ཁྲིམས་ལན་པས་ལོངས་སྤྱོད་ན། །དགེ་འདུན་གྱི་ལ་ཉེས་པ་མེད། །ལྷགས་རླུང་ཅན་གྱི་ས་ཕྱོགས་སམ། །ཁ་བ་ཅན་དུ་ཉིན་མོ་ཡང༌། །རྐང་པའི་གནས་སྐབས་རིག་བྱ་སྟེ། །ཡུ་བ་ཅན་ཡང་རྗེས་སུ་གནང༌། །སྟག་དང་སེང་གེ་
དྲེད་དང་རྟ། །གླང་པོའི་པགས་པས་བྱ་བ་མིན། །གཞན་དག་ཀྱང་ནི་དེ་དག་གི །རྒྱུས་པ་ཅན་ནི་རྣམ་པར་སྤངས། །གཞན་ཡང་སྡེར་མོ་ཅན་དང་ནི། །མཆེ་བ་ཅན་ནི་མི་བཅང་སྟ། །སྤྱང་ཁྱི་བྱི་བ་ལ་སོགས་པའི། །པགས་པས་བྱས་པའི་མཆིལ་ལྷམ་ཡང༌། །གཙུག་ལག་ཁང་དུ་ཐམས་ཅད་དུ། །ཤིང་གི་མཆིལ་ལྷམ་མི་རུང་སྟེ། །བཤད་དང་གཅི་བའི་ཁང་པ་དང༌། །ཁྱིམ་པའི་གྲོང་དུ་ཉེས་པ་མེད། །འོད་མ་མུན་ཛ་ལ་སོགས་པའི། །རང་བཞིན་མཆིལ་ལྷམ་མི་བཅང་སྟེ། །རླུང་ཁྲག་ནད་ཀྱིས་ཉེན་པ་ཡི། །ནད་པ་དག་ལ་བཀག་པ་མེད། །གྲུ་ལ་སོགས་པ་མེད་པ་ན། །གླང་པོ་རྟ་དང་མ་ཧེ་དང༌། །ཁྱུ་མཆོག་རྔ་མོའི་མཇུག་མ་ལ། །འཇུས་ཏེ་བརྒལ་བ་བཀག་པ་མེད། །ཚོགས་ལ་འབད་པས་ཐམས་ཅད་དུ། །བསྲུང་ལ་རག་ལས་ཡོད་མ་ཡིན། །རྒྱལ་པོའི་སྐལ་བ་ལེན་པ་དང༌། །ཞིང་གི་བྱ་བ་རྗེས་སུ་གནང༌། །གཙུག་ལག་ཁང་དུ་ཆར་སོགས་ཀྱི། །འཇིགས་པ་རྣམས་ཀྱིས་གཡེངས་པ་ན། །ཚོགས་ཀྱི་ནགས་ཀྱི་ལོ་ཏོག་ནི། །འབད་པས་རང་གིས་བསྐུར་བར་བྱ། །དགེ་འདུན་གྱི་ནི་བ་ལང་སོགས། །རབ་ཏུ་འབད་པས་བསྲུང་བར་བྱ། །ཁུར་ཁོལ་ཤོད་ཅིག་སོད་ཅིག་ཅེས། །ཚིག་ངན་བརྗོད་པར་མི་བྱའོ། །དགེ་ཚུལ་ལ་སོགས་གང་རྣམས་ཀྱིས། །ལམ་དུ་ལམ་བརྒྱགས་ཁུར་བ་ན། །དེས་དོན་བསྐུར་བྱ་ཆུ་ལ་ཡང༌། །དགེ་སློང་གིས་ནི་བསྒྲལ་བར་བྱ། །དུབ་པ་ན་ཡང་བསྐུར་བྱ་ཞིང༌། །དེ་ནི་དེ་ཡིས་བྱིན་བརླབས་ཏེ། །སེམས་ཀྱི་འགྱོད་པ་མེད་པས་ནི། །ཐེ་གུ་ལ་སོགས་སྦྱོར་བས་སོ། །རྐུན་པོས་སྐྲག་གྱུར་བོར་བ་འམ། །བརྒལ་དཀའི་ཆུ་ལ་བོ་བ་ཡང༌། །དེ་ནི་ལེགས་བླངས་ཕྱུང་ནས་ཀྱང༌། །ཡོངས་སུ་སྤྱོད་ལ་བཀག་པ་མེད། །བཟའ་བཅའ་རྫས་སོགས་ཀྱིས་གང་བའི། །ཤིང་རྟ་བགྲོད་དཀའི་ལམ་དུའམ། །ཁ་ལོ་བ་ཡི་སྟན་མ་གཏོགས། །འབད་པས་དགེ་སློང་རྣམས་ཀྱིས་བཀྲི། །འདི་ལ་འདི་གཉིས་འོས་ཡིན་པས། །གྲུ་ནི་འདམ་སོགས་ཟིན་པ་ན། །གྲུ་གདོང་རྣམ་པར་སྤངས་ནས་ནི། །དེ་ནི་དགེ་སློང་རྣམས་ཀྱིས་བཀྲི། །རླུང་སོགས་མེད་ན་ཚོན་གྱི་ལས། །བྱའོ་ཉི་མ་ངན་པར་མིན། །འདི་ལ་གང་དུ་སྐྱོན་འབྱུང་བའི། །ས་ཡི་ཆ་དང་ཉིན་གུང་མིན། །མཁས་པས་ཕལ་ཆེར་རྡུལ་དང་ཆར། །རླུང་དང་ཉི་དུས་མ་ཡིན་ཏེ། །འདི་ནི་ཁང་བཟང་ས་སོགས་དོན་དུ། །ས་གཞི་གཙང་མར་སྦྱངས་ནས་སོ། །དགེ་
སློང་རྣམས་ནི་རྩོད་པ་དག །བྱེད་ན་ཆོས་ལྡན་ལྷན་ཅིག་པས། །མ་གུས་བྱེད་པ་དེ་དག་ནི། །ཡལ་བར་མི་དོར་དགག་པར་བྱ། །ཁྲིམས་འཆལ་གྱུར་ལ་ཁྲིམས་ལྡན་གྱིས། །ཚུལ་མཉམ་རྣམས་ལ་མང་ཐོས་ཀྱིས། །ཐོས་པ་མཉམ་ལ་སྤོབས་པ་ཅན། །སྤོབས་པ་མཉམ་ལའང་ཕུལ་བྱུང་གིས། །གང་ཞིག་དང་པོར་རྩོད་པ་ལ། །དེ་ཡི་ཚིག་གིས་འདུལ་གྱུར་བ། །སྤོབས་ཅན་ཉིད་ལའང་གང་ལྷག་པ། །དེ་དག་ཚིག་གིས་འདུལ་བ་ཡིན། །རབ་ཏུ་ངེས་དང་ལྡན་པ་ཡིས། །རྩོད་པ་ཡོངས་སུ་རྟོག་པ་པོས། །ཕན་ཚུན་ནང་ཁོ་ན་བསྟན་པ་ལ། །ཡང་ན་བཏང་སྙོམས་གཞག་པར་བྱ། །མི་མཐུན་པས་ཀྱང་ལམ་དག་ཏུ། །ཕྲད་ན་རྒན་ལ་ཕྱག་བྱ་སྟེ། །དེས་ཀྱང་ནང་མེད་གྱུར་ཅིག་བརྗོད། །གཞན་དུ་གཉིས་ཀ་ལྟུང་བར་འགྱུར། །བསྲོ་ཁང་ཁྲུས་ཀྱི་གནས་སུ་ནི། །སྒོ་དྲུང་སྲུང་མ་གཞག་བྱ་སྟེ། །དགེ་སློང་རྣམས་ནི་ཁྲུས་སྲོད་དག །བྱེད་པ་མ་དད་བཟློག་ཕྱིར་རོ། །སྡོམ་བརྩོན་སྣ་ཚོགས་ཚོན་དག་གིས། །རི་མེའི་ཆོ་ག་དེ་དག་གནང༌། །གང་དག་ལ་ནི་རུང་བའི་ལས། །སེམས་ཅན་རྣམ་པ་མ་གཏོགས་སོ། །གནས་ཁང་དག་ཏུ་རུས་པ་ཡི། །ཚོགས་བཅས་དུར་ཁྲོད་ཆེན་པོ་བྲི། །གཅེར་བུ་སོ་གཙིགས་འཇིགས་པ་ཡི། །ཐོད་པའི་ཕྲང་བ་རྒྱན་དུ་བྱ། །རྩ་བའི་སྒོར་ནི་དབང་ཕྱུག་ཆེ། །ཀུན་དགའ་བཞིན་གྱི་དཀྱིལ་འཁོར་ཅན། །ལག་ན་བེ་ཅོན་ཐོགས་པ་ཡི། །གནོད་སྦྱིན་རྣམས་ཀྱི་བདག་པོ་བྲི། །ཆོ་འཕྲུལ་བད་མ་རྒྱས་པ་ལ། །བདེར་གཤེགས་གཟུགས་མང་བཞུགས་པ་དང༌། །སྲིད་པའི་འཁོར་ལོའི་བར་དག་ཏུ། །སྒོ་ཁང་ལོགས་ནི་གཉིས་སུའོ། །གཙང་ཁང་སྒོར་ནི་གནོད་སྦྱིན་རྣམས། །མེ་ཏོག་ཕྲེང་ཐོགས་བྲི་བྱ་སྟེ། །གུས་པས་བཟའ་བ་མང་ཐོགས་ནི། །ཁྱམས་ཀྱི་བཀོད་པའི་ས་དག་ཏུའོ། །མཛོད་སྒོར་གནོད་སྦྱིན་ཆེན་པོ་ནི། །ལག་ན་རིན་ཆེན་མྱུ་གུའི་མིང༌། །ཁ་ནས་རིན་ཆེན་མང་སྐྱུག་པ། །གསེར་གྱི་བུམ་པ་བཟང་ཐོགས་པའོ། །ཀུན་ནས་འདུ་བའི་ཁང་པར་ནི། །བརྟུལ་ལྡན་རྒན་ཞིང་རྒན་པ་རྣམས། །ཆོས་དང་མངོན་བརྗོད་འཆད་པ་ནི། །བྱེད་པ་མངོན་པར་གནས་པ་བྲི། །བསྲོ་ཁང་མེ་ཡི་གནས་སུ་ནི། །མདོ་སྡེ་ལྷ་ཡི་ཕོ་ཉ་བྲི། །ནད་པའི་སྔས་སུ་སྐུ་གཟུགས་ནི། །ནད་པའི་དབུགས་འབྱིན་བླ་མར་མཛད། །སྣ་ཚོགས་རྒྱན་གྱིས་ཕུན་ཚོགས་པའི། །ཀླུ་མོ་ཆུ་ཡི་
གནས་སུ་སྟེ། །དུར་ཁྲོད་འཇིགས་སུ་རུང་བ་ནི། །བཤད་དང་གཅི་བའི་ཁང་པར་རོ། །ཁང་བཟངས་དག་གི་ངོས་དག་ཏུ། །ཐུབ་པའི་སྔོན་གྱི་སྐྱེས་རབས་བྲི། །དཔེར་ན་ཐམས་ཅད་སྒྲོལ་དང་ནི། །ཟླ་འོད་བཟོད་པར་སྨྲ་ལ་སོགས། །གཙུག་ལག་ཁང་སོགས་འདུལ་བ་ལ། །འཇིག་རྟེན་མངོན་པར་དད་འཕེལ་ཕྱིར། །རི་མོའི་ཆོ་ག་བརྗོད་པ་འདི། །ཐུགས་རྗེ་ཅན་གྱིས་ལེགས་པར་གནང༌། །ཁྱམས་དང་ཁང་བཟངས་རྣམས་སུ་ནི། །ཆེད་དུ་མེ་སྦར་མི་བྱ་སྟེ། །དགོས་པས་དེ་དང་མཐུན་པར་ནི། །མདག་མ་ཡོངས་སུ་སྤྱད་པར་བཞེད། །ས་གཞི་ཡོངས་སུ་སྦྱངས་པ་ལ། །མེ་ནི་བཏང་བར་མི་བྱ་སྟེ། །དེ་ཕྱིར་དེ་ནི་སྦར་བའི་ཕྱིར། །མེ་ལིང་རྗེས་སུ་གནང་བ་ཡིན། །སངས་རྒྱས་ཚོགས་ཀྱི་རྒན་པོ་དང༌། །རྒྱལ་པོ་དང་ནི་སློབ་དཔོན་དང༌། །དེ་བཞིན་མཁན་པོ་ཉིད་ཀྱི་བཀའ། །གང་ཞིག་རིགས་ན་འདའ་མི་བྱ། །དང་པོ་འདིར་ནི་གང་ཅུང་ཟད། །གནང་མེད་བཀག་པ་མེད་པ་ནི། །གང་ཞིག་རུང་དང་མཐུན་པ་ན། །དེ་ནི་ཐེ་ཚོམ་མེད་པར་སྤྱད། །མི་རུང་བ་དང་ཉེ་ལྟ་ན། །སྡོམ་བརྩོན་རྣམས་ཀྱིས་དེ་མི་སྤྱད། །འདི་ནི་ཆོས་འདུལ་མདོར་བསྡུས་པ། །བསྟན་བཅོས་སྒྲོན་མ་ལྟ་བུར་གཞག །འདུལ་བ་འམ་ནི་མདོ་སྡེ་ཡི། །གླེང་གཞི་གསལ་པོར་མ་དྲན་ན། །བཞུགས་པའི་གྲོང་ཁྱེར་རྣམས་ཀྱི་མིང༌། །གང་འདོད་དོན་ནི་སྨོས་པར་བྱ། །མཉན་ཡོད་གནས་བཅས་ཙམ་པ་ཀ །བཱ་རཱ་ཎ་སཱི་ཡངས་པ་ཅན། །རྒྱལ་པོའི་ཁབ་ཅེས་གྲགས་པ་སྟེ། །འདི་དག་གྲོང་ཁྱེར་ཆེན་པོར་ཤེས། །ཁྱིམ་བདག་མགོན་མེད་ཟས་སྦྱིན་ཏེ། །ས་བདག་མི་དབང་གསལ་རྒྱལ་བརྗོད། །བུད་མེད་རྣམས་ལ་ས་ག་སྟེ། །བརྗེད་ངས་དག་ནི་སྨོས་པར་བྱ། །གྲོང་ཁྱེར་བཱ་རཱ་ཎ་སཱི་སྟེ། །ས་བདག་ཡང་ནི་ཚངས་སྦྱིན་ནོ། །སྐྱེས་པ་འམ་དེ་བཞིན་བུད་མེད་ལ། །བསྙེན་གནས་སྟེར་ན་བསྒྲུབ་བྱ་བ། །དང་པོའི་སྦྱོར་བ་གང་ཡིན་ལ། །ཀློག་པ་དྲན་པ་མི་གས་ལ་ན། །བསླབ་པའི་གཞི་ནི་མཐར་ཐུག་པ། །འདི་ནི་ཐུབ་པས་གསུངས་པ་ཡིན། །ཐོག་མར་བཱ་རཱ་ཎ་སཱིར་ནི། །ཆོས་ཀྱི་འཁོར་ལོ་བསྐོར་བ་ན། །ལྔ་སྡེ་བཟང་ལ་ཕན་བཞེད་པས། །མདོ་སྡེ་བཅོམ་ལྡན་འདས་ཀྱིས་གསུངས། །གཉིས་པའང་གང་གི་འཁོར་ཀུན་ནི། །གཟུགས་ལ་སོགས་པ་ཕུང་པོར་བཅས། །བདག་འཛིན་ཞགས་པ་གཅིག་
བུ་ཡིས། །འཆིང་པ་མཐའ་དག་རྣམ་གྲོལ་མཛད། །ལྔ་སྡེ་བཟང་རྣམས་ཉིད་ཀྱི་ཕྱིར། །གོས་དག་ལེགས་བགོས་འཚམ་དང་མཛེས། །ཟླུམ་པོ་ལ་སོགས་ཐ་སྙད་ཀྱིས། །བསླབ་གཞི་ཡང་དག་གསུངས་པ་ཡིན། །ཇི་ལྟར་གནས་ནི་གཙང་མའི་ལྷ། །བག་ཡོད་གོས་ཡོངས་གྱོན་བྱེད་པ། །དེ་བཞིན་ཐུབ་པས་དགེ་སློང་ལ། །ཟླུམ་པོར་རབ་ཏུ་གསུངས་པ་ཡིན། །ཐུབ་པས་རིམ་པ་འདི་ཡིས་ནི། །བཟང་སྦྱིན་ལ་སོགས་མཐོ་རིས་དང༌། །ཐར་པ་འདོད་པ་དེ་དག་ལ། །བསླབ་པའི་གཞི་ཡང་བཅའ་བར་མཛད། །སོ་གའི་དུས་ན་མཐའ་མེད་པའི། །རྒྱ་མཚོར་འཇུག་པ་ཇི་བཞིན་དུ། །གང་གིས་དང་པོར་འདུལ་བ་ལ། །ཚུལ་ཁྲིམས་དྲི་མ་སྦྱོང་མཛད་པ། །དྲུག་སྡེ་བདག་ཉིད་ཆེན་པོ་རྣམས། །ངོ་མཚར་བཅས་པའི་སྤོབས་པ་ཅན། །མཚོན་པ་མེད་ཀྱང་གྲུབ་པ་སྟེ། །བཟང་པོ་དེ་དག་དྲང་སྲོང་ཆེ། །དགའ་བོ་ཉེ་དགའ་འགྲོ་མགྱོགས་དང༌། །འཆར་ཀ་འདུན་པ་ནམ་སོ་སྟེ། །མཁས་པ་དཔའ་པོ་དྲུག་སྡེར་གྲགས། །སངས་རྒྱས་བསྟན་པ་བསྲུང་བར་མཛད། །སླར་ཡང་དེ་དག་ཤིན་ཏུ་བཟང༌། །རབ་བསྔགས་མུན་པ་འཇོམས་བྱེད་པ། །མཁས་པ་རྣམས་ཀྱིས་གང་ལྟར་ཡང༌། །འདུལ་བ་ལས་ནི་འདའ་མི་བྱེད། །སངས་རྒྱས་སྲས་སུ་གང་གྱུར་པ། །དེ་དག་ཡོན་ཏན་བསམ་མི་ཁྱབ། །གང་འདིར་ཉེ་བར་བསྟན་པ་ནི། །རྟོགས་པར་བྱེད་པའི་བཤེས་གཉེན་མཆོག །ཡུན་རིངས་བསགས་སྡིག་མི་ཤེས་པས། །འགྲོ་བ་གཉིད་ཀྱིས་ལོག་པ་འདི། །གང་གིས་དམ་ཆོས་བསྟན་པ་ཡི། །ལག་པས་བསྐུལ་ཏེ་སད་མཛད་པའོ། །ཡུན་རིངས་གོམས་པས་བསྐྱེད་པ་ཡི། །ཐུགས་རྗེས་ཐུགས་ནི་བརླན་པ་སྟེ། །བདག་ཉིད་ཆེན་པོའི་མཛད་པ་ནི། །རྣམ་བཅུ་གདོན་མི་ཟ་བ་ཡིན། །གཞན་དག་བྱང་ཆུབ་ལུང་བསྟན་དང༌། །བྱང་ཆུབ་སེམས་བསྐྱེད་བསྟན་པ་དང༌། །སྐུ་ཚེ་ལྔ་ཆ་འདོར་བ་དང༌། །མཆོག་གཉིས་རབ་ཏུ་བྱུང་བ་དང༌། །སངས་རྒྱས་གདུལ་བྱ་འདུལ་བ་དང༌། །མཚམས་གཅད་པ་ནི་བསྒྲུབ་པ་དང༌། །ཆོ་འཕྲུལ་རབ་ཏུ་བསྟན་པ་དང༌། །ལྷ་ཡི་གནས་སུ་གཤེགས་པ་དང༌། །ལས་ཀྱི་དབྱེ་བ་བཤད་པ་དང༌། །ཡབ་ཡུམ་བདེན་པ་མཐོང་བ་ལ། །ཇི་སྲིད་མ་བཀོད་དེ་སྲིད་པར། །མྱ་ངན་འདའ་བར་མི་མཛད་དོ། །གང་གིས་ཐུབ་པའི་
བསྟན་པ་འདི། །འཇིག་རྟེན་སྣང་མཛད་རིན་པོ་ཆེ། །རྒྱ་མཚོ་སྒྲོལ་བའི་གྲུ་ལྟ་བུ། །སྡུད་པོ་རྣམས་ལ་ཕྱག་འཚལ་ལོ། །གང་ཞིག་མང་དུ་ཐོས་པ་ཡིས། །སྐྱེ་བའི་ལྕགས་སྒྲོག་རྣམ་གྲོལ་བ། །ཐོས་འཛིན་མདོ་སྡེའི་སྡེ་སྣོད་ཀྱི། །སྡུད་པོ་འཕགས་པ་ཀུན་དགའ་ལའང༌། །གང་གིས་ངན་སོང་སྦྲུལ་གདུག་ནི། །འདུལ་བའི་ལེགས་བཤད་དྲི་མེད་པའི། །སྔགས་ཀྱིས་གསོ་བར་མཛད་པ་དང༌། །འཕགས་པ་ཉེ་བ་འཁོར་ལ་ཡང༌། །གང་གིས་ཀུན་ནས་མ་མོ་ཡི། །སྡེ་སྣོད་རབ་ཏུ་བསྟན་པ་ཡིས། །སྒྲོན་མ་བཞིན་དུ་གསལ་མཛད་པ། །བློ་ལྡན་འཕགས་པ་འོད་སྲུངས་ལའང༌། །རྒྱལ་པོའི་ཁབ་ཏུ་སྡེ་སྣོད་གསུམ། །འདིས་ལེགས་ཐམས་ཅད་བསྡུས་པ་ཡིན། །ལྷར་བཅས་མི་ཡི་འཇིག་རྟེན་དུ། །སྣང་བ་ཆེར་མཛད་འདི་ཡིན་ནོ། །གང་དུ་ཐོས་ལྡན་འདི་དག་དང༌། །དགྲ་བཅོམ་སྡིག་པ་རིང་སྤངས་པ། །ལྔ་བརྒྱ་པོ་ནི་དམ་པའི་ཆོས། །ཡང་དག་བསྡུས་པའི་དབང་པོར་གྲགས། །བརྒྱ་བྱིན་ཐོག་མར་བྱས་པ་ཡི། །ལྷ་རྣམས་དམ་ཆེས་གུས་པ་ཡིས། །གང་དུ་འདུས་པ་ཆེན་པོས་ནི། །ནམ་མཁའི་ངོས་ནི་རྒྱན་དུ་བྱས། །རྒྱལ་པོའི་ཁབ་ཀྱི་མཐར་ཡང་ནི། །ས་གཞི་ལྷ་རྣམས་མེ་ཏོག་ནི། །ལག་ནས་ཀུན་ཏུ་འཐོར་བ་ཡིས། །གང་དུ་དེ་ནི་ཡུན་རིངས་མཛེས། །གང་ཚེ་དམ་ཆོས་རིན་ཆེན་མཆོག །ནུབ་ཉམས་འདམ་དུ་བྱིང་བ་བཞིན། །ལྷ་དང་མི་རྣམས་དོགས་འཇིགས་པ། །བསྡུས་པས་སླར་ཡང་ཡིད་སོས་མཛད། །གང་ཕྱིར་ཐུབ་པས་དམ་པའི་ཆོས་འདི་ནི། །སྐྱེ་དགུ་གསོ་བྱེད་སྐྱོབ་པའི་དཔུང་བྲལ་བ། །སྡུག་བསྔལ་མ་ལུས་ཉེར་ཞིའི་དོན་བསྒྲུབ་ཕྱིར། །བརྩོན་པས་འཁོར་བར་ཡུན་རིངས་སྤྱོད་པ་ན། །འོད་འབར་དབུ་ནི་མགུལ་གོས་བཅས་པ་དང༌། །རང་གི་ཤ་དང་རུས་དུམ་ཁྲག་རྒྱུན་བཏང༌། །སྲས་ཀྱང་ཟླ་ཚེས་ཆ་འདྲ་ཡིད་འོང་བའི། །བཙུན་མོ་མཆོག་སྦྱིན་དཔག་མེད་གང་དོན་ཕྱིར། །བདེར་གཤེགས་དཔལ་བརྙེས་ཞི་ལམ་ཆོས་བསྟན་འདི། །ཇི་སྲིད་མ་ནུབ་པར་དུ་རྣམ་ཀུན་ནས། །སྙོམ་ལས་དོན་མེད་ལྟུང་བ་རྣམ་སྤངས་ཏེ། །ཞི་བའི་དོན་དུ་ཡང་དག་བརྩོན་པར་བྱ། །བདེར་བཤེགས་བཀའ་ནི་མི་རྣམས་ཚིག་ལས་ཁྱད་འཕགས་ཕྱིར། །ཆོས་གང་ཅུང་ཟད་སྤྲོས་ཀྱང་སྙན་དང་གས་མཆོག་གྱུར་ཏེ། །བསམ་པའི་ཐབས་ཀྱིས་བསྒྲུབ་འབྲས་ཁ་ན་མ་ཐོ་མེད། །འདི་དེ་ལས་གཞན་བེ་ཤ་ཀས་ཀྱང་
བྱས་པ་ལ། །གང་ཞིག་མ་ཚང་ལྷག་གམ་ཡང་ན་གཞན་དུ་བྱས། །སྔར་བཤད་རྣམས་ལས་གོ་རིམས་འཆོལ་བར་བཤད་ཀྱང་རུང༌། །དེ་ཀུན་རང་བཞིན་ཞི་བའི་བསམ་པས་བཟོད་པར་མཛོད། །ཉམ་ངའི་ལམ་དུ་ལོང་བ་རྡེག་འཆོས་མིན་ནམ་ཅི། །དགེ་སློང་ཆོས་འདུལ་ཐིག་ལེར་བྱས་མཛེས་མེ་ཏོག་ཕྲེང་རྒྱུད་ལེགས་བརྒྱུས་ལས། །གང་ཐོབ་བསོད་ནམས་དཔལ་དེས་འཁོར་བའི་ལུས་ཅན་རྣམས་དང་ལྷན་ཅིག་བདག །འདོད་པའི་འདམ་ལས་རྣམ་པར་བརྒལ་ནས་དད་སོགས་ཡོན་ཏན་ཀུན་གྱིས་བརྒྱན། །མྱ་ངན་འདས་པར་ཚེར་བས་གཞན་དུའང་བསྙེན་པར་རྫོགས་པ་བྱེད་པར་ཤོག །གང་དག་ཚུལ་ཁྲིམས་དྲི་མེད་གནས་འདོད་ཅིང༌། །མྱ་ངན་འདས་པའི་གྲོང་ཁྱེར་འཇུག་འདོད་པ། །རྟག་ཏུ་ཚིག་ལེར་བྱས་པའི་དོན་འདི་ཉིད། །ཀློག་དང་འདོན་དང་སེམས་པ་ཉིད་དུ་ཤོག །ཇི་ལྟར་འཇིག་རྟེན་རྒ་ནད་འཆི་བའི་གདུང་བས་གདུངས། །ཇི་སྲིད་དུས་ན་འདོད་ཆགས་མེ་ཡིས་དགའ་མགུར་བསྲེག །དེ་ལྟར་དེ་སྲིད་སེམས་རྒྱུན་དྲི་མ་ངན་འཁྲུད་པའི། །བདེར་གཤེགས་བཀའ་ནི་གང་གཱའི་ཆུ་བཞིན་གནས་གྱུར་ཅིག །འཕགས་པ་གཞི་ཐམས་ཅད་ཡོད་པར་སྨྲ་བའི་འདུལ་བ་ཚིག་ལེའུར་བྱས་པ། མེ་ཏོག་གི་ཕྲེང་རྒྱུད་ཅེས་བྱ་བ། །འདུལ་བ་འཛིན་པ་ཆེན་པོ་འཕགས་པ་དགེ་འདུན་འབངས་ཀྱི་སློབ་མ། དཔལ་འཕགས་པས་གའི་ལྷས་མཛད་པ་རྫོགས་སོ།། །།བལ་པོའི་པཎྜི་ཏ་ཛ་ཡཱ་ཀ་ར་དང༌། བོད་ཀྱི་ལོ་ཙཱ་བ་དགེ་སློང་པྲ་ཛྙཱ་ཀཱི་རྟིས་བསྒྱུར་ཅིང་ཞུས་ཏེ་གཏན་ལ་ཕབ་པའོ།། །།རྒྱ་གར་ཤར་ཕྱོགས་ས་དན་ག་རའི་པཎྜི་ཏ་བ་ན་རདྣ་མ་ཧཱ་སྠི་བཱི་ར་ལ་གཏུགས་ཏེ། སྒྲའི་དོན་ལ་མཁས་པ་རོང་སྟོན་ཤེས་བྱ་ཀུན་རིག་གིས། འགྱུར་ཅུང་ཟད་བཅོས་ཏེ་གཏན་ལ་ཕབ་པའོ།།