ཐམས་ཅད་ཡོད་པར་སྨྲ་བ་རྣམས་ཀྱི་དགེ་ཚུལ་གྱི་བྱ་བ།
རྒྱ་གར་སྐད་དུ། སརྦ་ཨ་སྟི་བཱ་དི་ཤྲ་མ་ཎེ་ར་ཀ་ར་ཎ། བོད་སྐད་དུ། ཐམས་ཅད་ཡོད་པར་སྨྲ་བ་རྣམས་ཀྱི་དགེ་ཚུལ་གྱི་བྱ་བ། ཐམས་ཅད་ཡོད་པར་སྨྲ་བ་རྣམས་ཀྱིས་ཞེས་བྱ་བ་ནི་དུས་གསུམ་དང༌། རྣམ་པར་རིག་བྱེད་མ་ཡིན་པའི་གཟུགས་དང༌། འདུས་མ་བྱས་བཞི་དང༌། ཁ་དོག་བཅུ་གཉིས་དང༌། དབྱིབས་བརྒྱད་དང༌། འདི་དག་ལ་སོགས་པ་རྫས་སུ་ཡོད་པར་འདོད་ཅིང༌། དོན་དམ་པར་ཡང་དེ་བཞིན་དུ་ལྟ་བས་ན་ཐམས་ཅད་ཡོད་པར་སྨྲ་བ་ཞེས་བྱའོ། །རྣམས་ཀྱི་ཞེས་པ་སྔ་མ་འདས་པའི་དགེ་ཚུལ་དང༌། ད་ལྟར་བྱུང་བའི་དགེ་ཚུལ་དང༌། མ་འོངས་པའི་དགེ་ཚུལ་དང༌། དེ་དག་གི་བྱ་བ་ཡིན་པས་ན་རྣམས་ཞེས་བྱའོ། །དགེ་ཚུལ་ཞེས་པ་ནི་ངལ་བ་བྱེད་པའི་དོན་ཏོ། །ཁ་ཏོན་བྱ་བ་ལ་སོགས་པས་དུབ་ཅིང་ངལ་བའི་ཕྱིར་ཏེ། དོན་དུ་ན་དགེ་བ་ལ་བརྟུན་པའམ། དགེ་བ་སྤྱོད་པ་ལ་དགེ་ཚུལ་ཞེས་བྱ་སྟེ། ཞིབ་ཏུ་འོག་ནས་འཆད་དོ། །བྱ་བ་ཞེས་བྱ་བ་ནི་རྣམ་པ་གཉིས་ཏེ། བསྒྲུབ་པར་བྱ་བ་དང༌། བསྲུང་བར་བྱ་བའོ། །དེ་ལ་བསྒྲུབ་པར་བྱ་བ་ནི། བླ་ན་མེད་པའི་བྱང་ཆུབ་བོ། །བསྲུང་བར་བྱ་བ་ནི་ཚུལ་ཏེ་བསླབ་པར་བྱ་བའོ། །ཡང་ན་དགེ་ཚུལ་དུ་གྱུར་པའམ། དགེ་ཚུལ་གྱིས་ཇི་ལྟར་བྱ་བའོ། །མགོན་པོ་ཞེས་བྱ་བ་ནི་སངས་རྒྱས་ལ་བྱ་སྟེ། སེམས་ཅན་ཐམས་ཅད་ཀྱི་མགོན་དང་རྟེན་དང་དཔུང་གཉེན་དུ་གྱུར་པས་ན་མགོན་པོ་ཞེས་བྱའོ། །ཐམས་ཅད་ཅེས་བྱ་བ་ནི་ཕྱི་ནང་གི་རྒྱུ་རྐྱེན་དང༌། དུས་གསུམ་དང༌། དུས་ཀྱིས་བསྐལ་པ་དང༌། རང་བཞིན་གྱིས་བསྐལ་པ་ལ་སོགས་པའོ། །མཁྱེན་དང་ཞེས་པ་ནི། ཐོགས་པ་དང་ཆགས་པ་མི་མངའ་བའི་ཡེ་ཤེས་ཀྱིས་རྟག་ཏུ་སེམས་པ་རྣམས་དང༌། ཤེས་བྱ་མཐའ་དག་མ་ལུས་པར་མཁྱེན་པའོ། །ཆོས་ཞེས་བྱ་བ་ནི་ཉན་ཐོས་ཀྱི་སྡེ་སྣོད་གསུམ་ལ་བྱ་བ་སྟེ། དེ་ལ་འདུལ་བས་ནི་དུལ་བར་བྱས། མདོ་སྡེས་ནི་ཞི་བར་བྱས། མ་མོས་ནི་མྱ་ངན་ལས་འདས་པར་བྱེད་པའི་ཕྱིར་ཆོས་ཞེས་བྱའོ། །ཡང་ན་ཡིག་འབྲུ་ཙམ་ལ་མི་བྱའི། མྱ་ངན་ལས་འདས་པའི་ལམ་གང་ཟག་ལ་བདག་མེད་པའི་ཆོས་སོ། །འཕགས་པའི་ཞེས་བྱ་བ་ནི། ཁམས་གསུམ་གྱི་ཉོན་མོངས་པ་ལས་རིང་དུ་གྱུར་པའམ། རྒྱང་བསྲིངས་པའི་ཕྱིར་འཕགས་པའོ། །ཚོགས་ལ་ཞེས་བྱ་བ་ནི་དེ་ཡང་གང་ཞེ་ན། ཟག་པ་ཟད་པ། ཁུར་བོར་བ།
དགྲ་བཅོམ་པ་དག་སྟེ། སྐྱེས་བུ་ཟུང་བཞི་དང་གང་ཟག་ཡ་བརྒྱད་ཀྱི་ཚོགས་ཏེ། དེ་དག་འདུས་པ་ལ་བྱའོ། །ཡང་ན་ད་ལྟར་གྱི་དགེ་འདུན་བཞི་ཡན་ཆད་དོ། །དེ་ལ་ཟག་པ་ནི་འདོད་པ་དང་མ་རིག་པ་དང༌། ལྟ་བ་དང༌། སྲིད་པའི་ཟག་པའོ། །ཁུར་བོར་བ་ནི་ཕུང་པོ་ལྔའི་ཁུར་བོར་བའོ། །དགྲ་བཅོམ་པ་ནི་ལས་གཅིག་དང་ཉོན་མོངས་པའི་དགྲ་བཅོམ་པའམ་བདག་ཏུ་འཛིན་པའི་དགྲ་བཅོམ་པའོ། །ཕྱག་འཚལ་ཏེ་ཞེས་པ་ནི་དཀོན་མཆོག་གསུམ་ལ་ལུས་དང༌། ངག་དང༌། ཡིད་ཀྱིས་ཕྱག་བྱ་བའོ། །དེ་ལ་ལུས་ཀྱིས་ཕྱག་བྱ་བ་ནི། ལུས་སྨད་ལྔས་ལ་གཏུགས་པའོ། །ངག་གིས་ཕྱག་བྱ་བ་ནི། དཀོན་མཆོག་གསུམ་གྱི་ཡོན་ཏན་བརྗོད་ཅིང་བསྟོད་པ་བྱེད་པའོ། །ཡིད་ཀྱིས་ཕྱག་བྱ་བ་ནི། སངས་རྒྱས་དག་མངོན་པར་བཞུགས་པར་རྩེ་གཅིག་ཏུ་དམིགས་པའོ། །དེ་ལ་ཡང་ནད་པ་ཚབས་པོ་ཆེའི་ནི་ཡན་ལག་དང་ལྡན་པས་བྱའོ། །ནད་པ་ནི་ཡན་ལག་གཉིས་དང་ལྡན་པས་སོ། །མི་ན་བས་ནི་ཡན་ལག་གསུམ་ཀས་སོ། །དགེ་བ་ནི་ལུས་དང་ངག་དང་ཡིད་གསུམ་གྱི་སྒོ་ནས་དགེ་བ་སྟེ། དེ་ལ་ལུས་ཀྱི་སྒོ་ནས་དགེ་བ་ནི། སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་སྤོང་བའོ། །ངག་གི་དགེ་བ་ནི་བརྫུན་དུ་སྨྲ་བ་དང༌། ཕྲ་མ་དང༌། ཐུན་ཚགས་སུ་སྨྲ་བ་དང༌། ཚིག་རྩུབ་མོ་དག་སྤངས་པའོ། །ཡིད་ཀྱི་དགེ་བ་ནི་ལོག་པར་ལྟ་བ་དང༌། ངན་དུ་སེམས་པ་དང༌། ཆགས་སེམས་སྤངས་པའོ། །ཡང་ན་ལུས་ཀྱི་དགེ་བ་སྤྱོད་ལམ་བཞི་མཛེས་པ་དང༌། ངག་གི་དགེ་བཅལ་ཅོལ་དུ་མི་སྨྲ་ཞིང་དུས་སུ་སྨྲ་བ་དང༌། ཡིད་ཀྱི་དགེ་བ་དཀོན་མཆོག་གསུམ་རྗེས་སུ་དྲན་ཞིང་ཚད་མེད་པ་བཞི་དང་ལྡན་པའོ། །ཚུལ་གྱི་ཞེས་བྱ་བ་ནི་དགེ་སྦྱོང་གི་ཚུལ་བཞིའོ། །ཆོ་ག་རྣམས་ཞེས་བྱ་བ་ནི། ཚུལ་ཁྲིམས་བཅུ་དང༌། དགེ་ཚུལ་རྣམས་ཀྱི་ཆོ་གའོ། །མདོ་ཙམ་ཞེས་བྱ་བ་ནི་འདུལ་བ་འབུམ་པའི་ནང་ནས་དགེ་སློང་ཁྲིམས་ཉིས་བརྒྱ་ལྔ་བཅུ་འབྱུང་བ་ལས་དགེ་ཚུལ་མི་སྲུང་བ་ནི་དགེ་འདུན་ལྷག་མ་བཅུ་གསུམ་དུ་ཟད་མོད་ཀྱི། ཐམས་ཅད་ནི་ལྷག་ཏུ་མ་མཆིས་ཏེ་རྩ་བ་ཉི་ཚེ་བཏུས་པས་ན་མདོ་ཙམ་ཞེས་བྱའོ། །ངེས་པར་ཞེས་བྱ་བ་ནི། མཁན་པོས་རང་བཟོ་བྱས་པ་ནི་མ་ཡིན་གསུངས་རབ་ཀྱི་ལུང་
འདུལ་བའི་ནང་ནས་བཏུས་པས་ན་ངེས་པ་ཞེས་བྱ་བའོ། །བཤད་པར་བྱ་ཞེས་པ་ནི་བསྟན་པ་དང་བཤད་པ་དང༌། སྨྲས་པ་ཞེས་པ་ནི་རྣམ་གྲངས་སོ། །ཡང་ན་དེ་ལྟར་ཕྱག་བཙལ་བ་དང༌། དམ་བཅས་པ་དང་གདམས་ངག་ལྟ་བུར་སྟོན་ཏོ། །ཤཱཀྱ་ཞེས་པ་ནི་དེ་ཡང་སྟོན་པ་རྣམས་ཀྱིས་དམ་བཅས་པས་སྔོན་ཏེ། གང་ཞེ་ན། ཁྱིམ་པའི་རིགས་ཡོངས་སུ་དག་པ་དང༌། རབ་ཏུ་བྱུང་བའི་རིགས་ཡེ་ཤེས་ཡོངས་སུ་དག་པར་བསྟན་ཏོ། །དེ་ལ་ཤཱཀྱ་ཞེས་བྱ་བ་ནི་རིགས་བཞི་ཡོད་པས་རྒྱལ་རིགས་ཀྱི་ནང་ན་ཡང་ཤཱཀྱའི་རིགས་གཙང་ཞིང་ཁ་དྲག་པའི་ནང་དུ་བཅོམ་ལྡན་འདས་འདུལ་བའི་དབང་གི་ཕྱིར་དགའ་ལྡན་གནས་ནས་རིགས་དེར་སྐྱེས་པ་ན་རིགས་ལ་མཚན་དུ་གསོལ་ཏོ། །ཤཱཀྱའི་བསྟན་པ་ལ་བདག་ཉིད་དད་པས་རབ་ཏུ་བྱུང་བས་ལུས་བཞིན་བསླབ་པ་བསྲུང་བར་བསྟན་ཏོ། །སེང་གེ་ཞེས་པ་ནི་བྱོལ་སོང་གི་རྒྱལ་པོ་སེང་གེ་རལ་པ་ཅན་ཇི་ལྟར་རི་དགས་ཐམས་ཅད་ཟིལ་གྱིས་གནོན་པ་དེ་བཞིན་དུ་སངས་རྒྱས་ཀྱང་མུ་སྟེགས་ཅན་དང་ཕྱིར་རྒོལ་བ་ཐམས་ཅད་སྦ་བཀོང་ཞིང་ཟིལ་གྱིས་གནོན་པར་མཛད་དེ། །སེང་གེ་དང་འདྲ་བའི་ཕྱིར་དཔེ་དེ་ལས་མཚན་དུ་གསོལ་ཏོ། །འདིས་ནི་རབ་ཏུ་བྱུང་བའི་ཡོངས་སུ་དག་པར་སྟོན་ཏོ། །བསྟན་པ་ལ་ཞེས་པ་ནི་ཉན་ཐོས་ཀྱི་སྡེ་སྣོད་གསུམ་སྟེ། ཐེག་པ་ཆེན་པོའི་གསུང་རབ་མདོ་སྡེ་བཅུ་གཉིས་ལ་བྱའོ། །དད་པས་ཞེས་པ་ནི་དཀོན་མཆོག་གསུམ་དང་ལྡན་པ་བཞི་དང༌། ལས་དང་འབྲས་བུ་ལ་ཡིད་ཆེས་ཤིང་མངོན་པར་དད་པས་སེམས་དང་བའོ། །རབ་ཏུ་བྱུང་བས་ཞེས་པས་རབ་ཏུ་བྱུང་བ་ལ་རྣམ་པ་བཞི་སྟེ། ཕྱི་རོལ་གྱི་རྐྱེན་གྱིས་ཕོངས་ཏེ་རབ་ཏུ་བྱུང་བ་ནི་མ་སྨོས་ཏེ། འདིར་ནི་ཁྱིམ་པའི་མཚན་མ་སྤངས་ཏེ། དགེ་ཚུལ་གྱི་མཚན་མ་དང་ལྡན་པ་ཡིན་གྱི། རྐྱེན་གྱིས་རབ་ཏུ་བྱུང་བ་ནི་མ་ཡིན་ནོ། །བརྟུལ་ཞུགས་ཞེས་པ་ནི་མུ་སྟེགས་ཀྱི་བརྟུལ་ཞུགས་ཞེས་བྱ་བ་ཡོད་མོད་ཀྱི། འདིར་སྦྱངས་པའི་ཡོན་ཏན་བཅུ་གཉིས་ཡི་དམ་དུ་འཛིན་པ་ལ་བརྟུལ་ཞུགས་ཞེས་བྱའོ། །བརྟན་པས་ཞེས་བྱ་བ་ནི་རབ་ཏུ་བྱུང་བ་དེ་ཡང་སྐད་ཅིག་གམ་ལོ་ཟླའི་བར་དུ་སྡོམ་པ་བླངས་ཏེ་དེ་ལ་གནས་པ་མ་ཡིན་གྱི་ན་མ་འཚོའི་བར་དུའམ་སྙིང་བོ་བྱང་ཆུབ་ལ་ཐུག་གི་བར་དུ་ཞེས་དམ་
བཅས་པ་ནི་བརྟན་པས་ཏེ། ཇི་ལྟར་དང་པོ་ཡི་དམ་བཅས་པ་ལས་སླར་མི་ལྡོག་ཅིང་མི་ནུར་བ་ནི་བརྟན་པར་བྱའོ། །སྡོམ་པ་ལ་རྣམ་པ་གསུམ་སྟེ། ཚུལ་ཁྲིམས་ཀྱི་ཡན་ལག་དང༌། བག་བྱ་བའི་ཡན་ལག་དང༌། བརྟུལ་ཞུགས་ཀྱི་ཡན་ལག་གོ །དེ་ལ་ལུས་དང༌། ངག་དང༌། ཡིད་ཀྱི་སྒོ་གསུམ་སྡོམ་པ་ནི་ཚུལ་ཁྲིམས་ཀྱི་ཡན་ལག་ཡིན་ནོ། །ཆང་མི་འཐུང་བ་ནི་བག་བྱ་བའི་ཡན་ལག་གོ །ལྷག་པ་རྣམས་ནི་བརྟུལ་ཞུགས་ཀྱི་ཡན་ལག་གོ །རབ་བསྒྲིམས་ཏེ་ཞེས་པ་ནི་ནན་ཏན་གྱིས་འབད་པའི་དོན་ཏོ། །ཡང་ན་དཀའ་ཐུབ་བསླབ་པ་ལ་ཐེ་ཚོམ་དང་ནེམ་ནུར་མེད་པར་བསླབ་པ་ལ་རིམ་གྲོ་བྱ་བའོ། །ཡང་ན་ཉེས་བྱས་ཡན་ཆད་ལ་འཛེམ་པ་སྟེ། དཔེར་ན་རྒྱལ་བུ་རྒྱང་གྲགས་གཅིག་ཏུ་མར་ཁུ་ཁྱེར་བ་དང་འདྲ་བར་བལྟའོ། །ཡང་ན་བདག་གི་ལུས་ལ་རྨའི་སྐྱོན་སྤངས་པ་བཞིན་དུ་བསྒྲིམས་ཏེ་ཤིན་ཏུ་བག་བྱའོ། །བདག་གི་ལུས་བཞིན་བསླབ་པ་སྲུངས། །ཞེས་པ་ནི་དཔེར་ན་སེམས་ཅན་ཐམས་ཅད་ནི་བདག་གི་ལུས་ལས་འཕགས་པ་མེད་དེ། དེ་ལ་སྐྱོན་བྱུང་དི་དོགས་ནས་རིམ་གྲོ་བྱེད་ཅིང་འབད་པ་དེ་བཞིན་དུ། ཚུལ་དང་པོ་ཆོ་ག་དང་ཁྲིམས་བཅུ་ཐམས་ཅད་ལ་ཡང་སྐྱོན་མི་འབྱུང་བར་བསྲུང་ཞིང་འབད་པར་བྱའོ། །ནམ་གྱི་ཆ་སྨད་མལ་ནས་ལངས། །ཞེས་པ་ནི་རྒྱ་གར་གྱི་ཚུལ་གྱིས་མཚན་གཅིག་ལན་ནམ་གྱི་བཞི་ཆར་བགོས་ཏེ། བཞི་ཆ་གསུམ་འདས་ནས་གཅིག་ལུས་པ་ཙམ་ན་མི་ཉལ་བར་ཙོག་བུར་འདུག་སྟེ་སེམས་གསལ་བར་བྱའོ། །ནམ་ལངས་བར་དུ་ཞེས་པ་ནི་ནམ་མཁའ་ལ་ཉི་མའི་འོད་ཀྱིས་ཁྱབ་པར་བཤད་པའམ། ཡང་ན་ནམ་ལངས་པའི་ཚད་ནི་ལག་མཐིལ་གྱི་རི་མོ་སྣང་བ་ལ་གཟུང་ངོ༌། །ཁ་དོན་དུ་བྱ་ཞེས་བ་ནི་མདོ་སྡེའམ། འདུལ་བའམ། སྔགས་སམ་གང་བསླབ་པ་ལ་རྒྱུན་དུ་དྲན་པར་བྱ་བའི་ཕྱིར་ཁ་དོན་བྱའོ། །གདོང་དང་སོ་ཡི་དྲི་བཀྲུས་ནས། །ཞེས་པ་ནི། ནམ་ལངས་ནས་ཀ་ཤི་པ་ལྟ་བ་ལ་ཕྲག་པ་ལ་ཐོགས་ཏེ། དྲན་པ་དང་ལྡན་བཞིན་དུ་ཕྱི་རོལ་དུ་ཁ་གདོང་དག་པར་བཀྲུའོ། །དེ་ལྟར་ཡང་སྒེག་ཅིང་ཆགས་པའི་ཕྱིར་ནི་མ་ཡིན་གྱི། སྐྱེ་བོ་དག་གིས་མི་འཕྱས་པ་དང༌། དཀོན་མཆོག་གི་སྤྱན་སྔར་མི་མཛེས་པ་སྤངས་པའི་ཕྱིར། ཁ་གདོང་དང་སོའི་དྲི་མ་བཀྲུས་ནས་གཙང་བར་བྱའོ། །རྫོགས་ཞེས་བྱ་བ་ནི་མཁྱེན་པ་དང་
ཡེ་ཤེས་མཐར་ཕྱིན་པར་བྱ་བ་རྫོགས་པ་ལ་བྱ་བའམ། ཡང་ན་བྱང་ཆུབ་ཀྱི་སྤྱོད་པ་མཐར་ཕྱིན་ཏེ་རྫོགས་པ་ལ་ཡང་བྱ། །སངས་པ་ནི་མ་རིག་པ་ལ་སོགས་པའི་གཉིད་དང་མི་ཤེས་པའི་སྒྲིབ་པ་ལས་སངས་པ་སྟེ། དཔེར་ན་མི་གཉིད་ཀྱིས་ལོག་པ་ལས་སངས་པ་བཞིན་ནོ། །རྒྱས་པ་ཞེས་པ་ནི་བསོད་ནམས་དང་ཡེ་ཤེས་ཀྱི་ཚོགས་གང་ཞིག་རྒྱས་པ་སྟེ། དཔེར་ན་པདྨ་རྒྱས་པ་བཞིན་ནོ། །ལ་གུས་ཕྱག་བྱ་ཞེས་པ་ནི་ཡང་དག་པར་རྫོགས་པའི་སངས་རྒྱས་མངོན་སུམ་དུ་བཞུགས་པར་བསམས་ཏེ། དེ་ལ་མཆོད་པ་དང་སྐོར་བ་ལ་སོགས་པ་བྱའོ། །ཡང་དག་པར་རྫོགས་པའི་སངས་རྒྱས་ལ་ཞེས་འབྱུང་བས། ཉན་ཐོས་དག་ལ་མི་བྱ་བར་སྟོན་ཏོ། །བླ་མ་གནས་པའི་སྒོ་གླགས་ལ། །ཞེས་པ་ནི། ཐམས་ཅད་ཀྱི་གམ་དུ་འགྲོ་ན་ཡང་སྒོ་བརྡུང་མོད་ཀྱིས། འོན་ཀྱང་ཞུ་བའི་ཕྱིར་འགྲོ་བ་ཡིན་པས་མཁན་པོའམ་སློབ་དཔོན་གང་ན་བཞུགས་པ་དེ་བླ་མ་ཞེས་བྱའོ། །ལག་པས་དལ་གྱིས་བརྡུང་བར་བྱ། །ཞེས་པ་ནི་ཧ་ཅང་དྲག་པར་མི་བརྡུང་སྟེ། རན་པར་དལ་གྱིས་བརྡུང་བར་བྱས་ཏེ། སུ་ཡིན་ཞེས་ཟེར་ན་མིང་ནས་ཕྱུང་སྟེ་ནང་དུ་ཤོག་ཅིག་ཟེར་ན་འགྲོ་ཞིང་ཅི་ཡང་མི་ཟེར་ན་ལན་གསུམ་གྱི་བར་དུ་བརྡུང་ངོ༌། །འོན་ཀྱང་ཅང་མི་ཟེར་ན་བླ་མ་གཞན་དག་ལ་ཞུས་ལ་མཎྜལ་དག་བྱའོ། །ནང་ཞུགས་གུས་པས་བླ་མ་ལ། །ཞེས་པ་ནི། ནང་དུ་འགྲོ་བའི་ཚ་སྒེ་དལ་གྱིས་ཕྱེ་ལ་ཐུག་ཆོམ་མེད་པར་བྱ། དེ་ནས་ནང་དུ་ཕྱིན་ནས་གུས་པར་ཐལ་མོ་སྦྱར་ཏེ། དེ་ལ་ཐོག་མར་ཕྱག་བྱས་ནས་པུས་མོ་ས་ལ་བཙུགས་ནས་འདུག་པར་བྱའོ། །ཁམས་བདེ་མི་བདེ་ལ་སོགས་དྲི། །ཞེས་པ་ནི། འབྱུང་བ་ཆེན་པོ་བཞིའི་ཁམས་མི་མཉམ་པ་ལས་ནང་དུ་གྱུར་པས་ཐུགས་བདེའམ་མི་བདེ་ཞེས་གུས་པར་སྙུན་གསོལ་ཏོ། །འདི་མན་ཆད་མ་རབས་སྤངས་པར་བྱའོ་ཞེས་སྟོན་ཏོ། །འདི་དག་བྱ་ཞེས་དྲིས་ནས་ནི། །ཞེས་པ་ནི། ཆག་ཆག་གདབ་མཎྜལ་བགྱི་བ་སྤྱིར་སུག་ལས་འཚལ་བགྱི་བ་མཆིས་ན་ཡང་ཚུལ་ལས་མི་འགལ་བར་འཚལ་ཞེས་ཞུའོ། །དཀྱིལ་འཁོར་ཞེས་པ་ནི་གྲུ་བཞི་དང་ཟླུམ་པོ་དང༌། ཟླ་གམ་ལ་སོགས་པའོ། །ལ་སོགས་རྣམས་བྱ་ཞེས་པ་ནི། སྨོན་ལམ་གདབ་པ་ཡན་ཆད་མཆོད་པའི་ཆོ་ག་རྫོགས་པར་བྱེད་པར་འཚལ་པའི་དོན་ཏོ། །ཉ་ཕྱིས་ལ་སོགས་ཆུ་བརྟག་སྟེ། །ཞེས་
པ་ནི། སྲོག་ཆགས་ལ་སྙིང་བརྩེ་བའི་ཕྱིར་ཁར་ཕོར་དུང་ཕོར་ཉ་ཕྱིས་འདབ་མ་བུམ་པ་ལ་སོགས་པའི་ནང་དུ་སྐྱེ་བོ་ཡོད་དམ་མེད་བརྟག་གོ །སྟེང་དང་བར་གཏིང་རིམ་བཞིན་ནོ། །ཞེས་བྱ་བ་ནི་ཉ་ཕྱིས་ལ་སོགས་ཆུས་བཀང་བ་ལ་ཆུའི་སྟེང་དང་དབུས་དང་ཞབས་སུ་ཕྲ་མོ་ཅི་ཡོད་པ་རིམ་པ་བཞིན་དུ་བརྟག་གོ །ཉ་ཕྱིས་ལ་སོགས་མེད་ན་ཡང༌། །ཞེས་བྱ་བ་ནི་ཆུ་བརྟག་པའི་སྣོད་ཉ་ཕྱིས་ལ་སོགས་པ་མེད་ན་འོག་ནས་འབྱུང་བ་བཞིན་བྱའོ། །སྐྱོར་བ་འམ་འདབ་མས་བུམ་པ་དགང༌། །ཞེས་པ་ནི་རྐྱེན་ཞིག་བྱུང་སྟེ་ཆ་བརྟག་པའི་སྣོད་མེད་ན་ལག་པའི་སྐྱོར་བ་འམ་ཤིང་གི་འདབ་མ་འམ་ཤོ་མང་ལ་སོགས་པའི་ནང་དུ་ཆུས་བཀང་སྟེ་བརྟག་གོ །ཆུ་ཡི་སྐྱེ་བོ་ཆེ་ཆུང་རྣམས། །ཞེས་པ་ནི། ཆུའི་ནང་དུ་སྐྱེས་པའི་སྐྱེ་བོ་ཆེ་ཕྲ་རྣམས་ཏེ། ལས་དང་ཉོན་མོངས་པའི་དབང་གིས་སྐྱེས་པས་ན་སྐྱེ་བོ་ཞེས་བྱ་སྟེ། དབང་མེད་པར་སྐྱེའོ་ཞེས་བྱ་བའི་ཐ་ཚིག་གོ །འདིའི་སྐབས་སུ་རྫུ་འཕྲུལ་གྱི་སྤྱན་གྱིས་གཟིགས་པའི་ཚུལ་མི་བྱའོ། །ཡུན་མི་རིང་བ་ར་ནན་ཏན་བལྟ། །ཞེས་པ་ནི། སེམས་ཅན་ཡོད་དམ་མེད་པའི་བརྟགས་པའི་ཚད་ནི། ཤིང་རྟའི་འཁོར་ལོ་འོད་མས་བཀང་བ་གླང་དོར་དྲུག་གིས་ལན་ཅིག་འཁོར་བའི་ཚད་ཀྱིས་བཟུང་སྟེ། དེ་ལས་ཡུན་ཐུང་ན་ཡང་མི་རྟོགས། ཡུན་རིང་ན་ཡང་མིག་སྦྲིད་དེ་མི་མཐོང་བས་ཅི་རན་དུ་བརྟག་པའི་ཚད་ནི་འདི་ཡིན་ནོ། །སྙིང་རྗེ་ཅན་གྱིས་ཁུ་བ་རྣམས། །ཞེས་པ་ནི་སྙིང་རྗེ་ནི་རྒྱུ་ཡིན་ཏེ། དེ་དང་ལྡན་པས་ཚོད་མའི་ཁུ་བ་དང་རྩབ་མོའི་ཁུ་བ་ལ་སོགས་པ་ཤིན་ཏུ་ལེགས་པར་བརྟག་གོ །རབ་ཏུ་བརྟགས་ཏེ་སྤྱད་པར་བྱ། །ཞེས་པ་ནི། ཇི་ལྟར་ཆུ་བརྟགས་པ་བཞིན་དུ་འཕྲལ་དུ་སྤྱད་དུ་དགོས་པའམ། བཏུང་བ་ལ་སོགས་པ་ཡང་དེ་བཞིན་དུ་བརྟག་གོ །སྲོག་ཆགས་ཡོད་ན་ལེགས་པར་བཙག །ཅེས་པ་ནི། སྲོག་ཆགས་ལ་མི་གནོད་པར་བྱ་བའི་ཕྱིར། གལ་ཏེ་ ཆུ་ཚགས་ཀྱི་རས་དེ་ཐགས་བཟང 
་པོ་ཞིག་ལ་བཙགས་ཏེ། ཆུ་འཛག་ཏུ་མི་བཏུབ་པ་དང༌། ཆང་བཙིར་གྱིས་བཙིར་ན་སྲོག་ཆགས་ཞར་བར་འགྱུར་བའི་ཕྱིར་དེ་ལྟར་མི་བྱ་སྟེ། ཆུ་ཚགས་ཀྱི་རས་ཀྱི་དང་དུ་བག་ཡངས་སུ་བཙག་གོ །སྲོག་ཆགས་རྣམས་ལ་གནོད་མི་བྱ། །ཞེས་པ་ནི། ཆུ་ཚགས་ལ་ཆགས་ཤིང་འདུག་པའི་སེམས་ཅན་རྣམས་ཐང་ལ་སོགས་པར་མི་དོར་བར་གང་ནས་འོངས་པའི་གནས་དེར་སླར་ལེགས་པར་
བསྐྱལ་ལོ། །རྩྭ་དང་ཞེས་པ་ནི་གོས་སྐམས་པའམ། བཙོ་བླག་བྱས་པའི་གཞིའི་རྩྭ་དག་གོ །ལྕི་བ་ཞེས་པ་ནི་དཀྱིལ་འཁོར་དང༌། བཀྲུ་བཤལ་བྱ་བ་དང་གནས་ཁང་དུ་བྱུག་པ་ལ་སོགས་པ་དག་གོ །ཤིང་ཞེས་པ་ནི་དགེ་འདུན་དང་མཁན་པོ་དང་སློབ་དཔོན་དག་གིས་གནང་བའི་ཤིང་ངམ། ལྡམ་ལྡུམ་དག་གོ །ལ་སོགས་ཞེས་པ་ནི་དགེ་སློང་དང་དགེ་ཚུལ་གྱི་ཡོ་བྱད་ཀྱི་དགོས་པ་ཀུན་བསྡུའོ། །དགོས་པ་གང་དང་གང་ཡང་རུང༌། །ཞེས་པ་ནི་དགོས་སོ་ཅོག་སྟེ། སྒོ་དང་ཚ་དང་ཚོད་མ་དང༌། འབྲུ་དང་ཤིང་ཐོག་དང་ཞོ་དར་ལ་སོགས་པ་དང༌། ཚོན་དང་སེན་མོད་ཆུ་དང་མེ་ལ་སོགས་པ་བརྟག་གོ །དེ་དག་སྲོག་ཆགས་མེད་པར་བྱ་སྟེ་ཞེས་པ་ནི། རྩྭ་ལ་སོགས་པ་ཅི་དགོས་པ་ཐམས་ཅད་ལ་སེམས་ཅན་མེད་པར་བྱའོ། །སྡོམ་པ་ཞེས་པ་ནི་ལུས་དང་ངག་གི་ཉེས་པ་སྡོམ་པའོ། །སྲོག་ཆགས་ཞེས་པ་ནི་སྐྱེས་གནས་བཞི་ལས་སྐྱེས་པའི་འཚོ་བའི་དབང་པོ་དང་ལྡན་པའོ། །བསད་པ་བསྲུང་ཞེས་པ་ནི། ལུས་དང་ངག་དང་ཡིད་གསུམ་སྔོམ་པ་དང་ལྡན་པས་ལུས་ཀྱི་ཉེས་པ་གསོད་པ་སྟེ་དེ་ཡང་བསྲུང་ངོ༌། །གསོད་པ་ཞེས་པ་ནི་འཚོ་བ་དང་བྲལ་བར་བྱེད་པའོ། །འདི་ཡན་ཆད་ནི་གནོད་པ་སྤངས་པར་བསྟན་པའོ། །བསྟན་ཞེས་པ་ནི་མཁན་པོའམ་སློབ་དཔོན་གྱི་སྒོམ་པ་དང་དགེ་བ་སྤྱོད་པའི་སར་སྟན་ནས་ཁྲིའུ་དག་གང་དགོས་པ་གདིང་ངོ༌། །ཆུ་ཞེས་པ་ནི་ཕྱི་རོལ་ཆེ་ཆུང་དང་རིལ་བ་བཀྲུ་བ་དང༌། ལུས་ཀྱི་ཁྲུས་བྱ་བ་ལ་སོགས་པའི་ཆུའོ། །ས་ཞེས་པ་ནི་ཕྱི་རོལ་ཆེན་པོའི་བཀྲུ་བའི་ས་དང་མཎྜལ་བྱ་བའི་ས་དག་གོ །སོ་ཤིང་ཞེས་པ་ནི་ནང་པར་གྱི་སོ་ཤིང་དག་ཀྱང་བྱས་ཏེ་གཞག་གོ །འདག་པའི་ཆལ་ཡང་སྟ་གོན་བྱ། །ཞེས་པ་ནི་ལྕི་སྐམ་གྱི་རིལ་བུར་བྱས་ཏེ། སྨྱུག་མའི་གསེབ་ཏུ་གཟེར་བུ་ལ་བཅུག་ལ་ཆབ་ཁུང་ཆེ་ཆུང་གི་སར་གཞག་གོ །རྒྱ་གར་གྱི་ནི་བ་གླང་གཞོན་ནུའི་ལྕི་བ་དང་ས་བསྲེས་ཏེ་རིལ་བུར་བྱས་ནས་དེས་འཁྲུ་བས་ན་དེ་དག་འདག་པའི་ཆལ་ཞེས་བྱའོ།། ཡང་ན་བུལ་ཏོག་དང་སག་པས་དྲི་མ་འདག་པར་བྱེད་པས་ན་འདག་པའི་ཆལ་ཞེས་དེ་དག་ཀྱང་མཁན་པོ་དང་སློབ་དཔོན་གྱི་ཕྱིར་སྟ་གོན་བྱའོ། །ལྷུང་བཟེད་བཀྲུ་བ་ལ་སོགས་པ་དང་ཞེས་པ་ནི། བདག་ཉིད་ལྷུང་བཟེད་དང་ཁམ་ཕོར་ཁ་གཟར་ལ་སོགས་པ་བཀྲུས་ཏེ་གྲོང་དུ་འཇུག་པར་བྱའོ། །ཟས་
ཟ་བའི་ཚེ་བཤལ་མ་དང་ཟོས་ཟིན་ནས་བཀྲུ་ཞིང་སྐམས་ཏེ་གནས་སུ་གཞག་གོ །བླ་མའི་དགོས་པ་ཐམས་ཅད་བྱ། །ཞེས་པ་ནི་དགེ་སློང་ཐམས་ཅད་ཀྱང་བླ་མ་བཞིན་གྱི། སྐབས་འདིར་ནི་དེ་དག་ལ་མི་བྱའོ། །གནས་བཅས་པ་རྣམས་བླ་མ་ཞེས་བྱ་སྟེ། དེའི་དགོས་པ་ཐམས་ཅད་ཀྱང་བྱའོ། །འདི་མན་ཆད་ནི་ང་རྒྱལ་མེད་པར་བསླབ་པའི་རིམ་པར་བྱེད་པར་སྟོན་ཏོ། །དེ་ནས་དུས་རིག་ཕྱག་བྱ་སྟེ། །དུས་རྣམ་པ་གཉིས་ཏེ། བསོད་སྙོམས་ལ་འཇུག་པའི་དུས་ཤེས་པར་བྱ་བ་དང༌། གཙུག་ལག་ཁང་ན་འདུག་པའི་ཚེ། གཎྜཱི་བརྡུངས་ན་དུས་སུ་རིག་པར་བྱ་སྟེ་དེ་གཉིས་གང་ཡིན་པ་ལ་ཚུལ་བཞིན་དུ་བྱའོ། །དེ་བཞིན་གུས་པས་ཐལ་སྦྱར་ནས། །ཞེས་པ་ནི་བླ་མ་ལ་གུས་པའི་ཚུལ་དེ་ལྟར་བྱའོ། །འཚལ་མ་འཚལ་ཞེས་བླ་མ་ལ། །ཞེས་པ་ནི་གསུམ་གྱི་ཞུ་བའི་ཚུལ་བཞིན་དུ་བྱའོ། །བརྟུལ་ཞུགས་ཅན་གྱིས་དེ་ལྟར་ཞུ། །ཞེས་པ་ནི་སངས་རྒྱས་ཀྱི་བཀའ་ལུང་བཞིན་དུ་བྱེད་པ་ནི། བརྟུལ་ཞུགས་ཅན་ཞེས་བྱ་སྟེ་དགེ་ཚུལ་བཞིན་དུ་ཞུ་བ་ལ་བྱའོ། །ལག་པ་བཀྲུས་ནས་ཞེས་པ་ནི་གདུགས་ཚོད་ལ་བབ་པའི་ཚེ་ལག་པ་དག་པར་བཀྲུའོ། །ཚུལ་བཞིན་དུ་ཞེས་པ་ནི་ཟན་ཟ་བའི་ཚེ་ཁམ་གྱིས་ཁ་བཀང་སྟེ་མི་སྨྲ་བ་དང༌། ཕུ་ཕུ་དང༌། ཅག་ཅག་དང། རྐན་གཏོགས་པ་དང༌། གཞི་བ་པའི་རོ་མྱང་བ་དང༌། འགྲམ་པ་སྤོ་བ་དང༌། སྒྲ་དང་ཁམ་འཕྲོ་ལ་སོགས་པར་མི་བྱའོ། །དེ་ནི་མི་སྨྲ་ཞེས་པ་ནི་ཟས་ཟ་བའི་ཚེ་བདག་གཙང་སྦྱོར་ཞིག་ཡིན་ན་ནི་སྨྲའོ། །གཙང་སྤྱོར་ཡིན་ཏེ་སྨྲ་ན་ཡང་ཁ་ཟས་ཡོད་བཞིན་སྨྲ་བར་མི་བྱའོ། །ཚོད་རིག་བྱ་ཞེས་པ་ནི་ཧ་ཅང་འགྲངས་པ་ཡང་མ་ཡིན། བཀྲེས་པ་ཡང་མ་ཡིན་པར་ཟས་ཀྱི་ཚོད་རན་པར་བྱའོ། །འཁྲུ་བའི་ནད་ལས་བཟློག་པའི་ཕྱིར། །ཞེས་པ་ནི་ཞིམ་པ་དང་ཆགས་པའི་ཕྱིར་བཟའ་བ་མ་ཡིན་གྱི། དགེ་བ་སྤྱད་པའི་ཕྱིར་ལུས་གསོ་བའོ། །ཅིའི་ཕྱིར་ཞེ་ན། ལུས་ནི་ཁམས་གསུམ་གྱི་སྐྱེ་ཤི་ལས་སྒྲོལ་བའི་གཟིངས་ལྟ་བུ་ཡིན་པས་དེའི་ཕྱིར་ལུས་གསོ་བར་བྱའོ། །བཟའོ་སྙམ་པའི་སེམས་ཀྱིས་བཟའ། །ཞེས་པ་ན་དེ་ལྟ་བུའི་འདུ་ཤེས་ཀྱིས་ཁ་ཟས་བཟའོ། །ཟོས་ཤིང་དེ་བཞིན་འཐུངས་པ་དང༌། །ཞེས་པ་ནི། གདུགས་ཚོད་ཟོས་ཏེ་བཏུང་བ་ལས་རྩ་བ་མོ་འཐུངས་པ་ལ་སོགས་པ་འཐུངས་
ནས་ཚུལ་འོག་ནས་འབྱུང་བ་བཞིན་བྱའོ། །འདི་མན་ཆད་ནི་ཁ་བཀྲུ་བའི་ཆོ་ག་སྟོན་ཏོ། །རུང་བའི་ཆུ་ཡིས་ཞེས་པ་ནི་སྔར་བཙགས་ནས་བཞག་པའི་ཆུ་དེས་ཁ་ལན་གསུམ་བཤལ་ཏེ། བོར་ནས་ལན་ཅིག་ཅི་རན་ཙམ་ཞིག་ལྟོ་བར་བཏུང་ངོ༌། །དེའི་འོག་ཏུ་ཞེས་པ་ནི་ཟས་ཟོས་པའི་འོག་ཏུ་འོག་ནས་འབྱུང་བ་བཞིན་དུ་བྱའོ། །སྦྱིན་པ་ཡང་དག་སྤེལ་བའི་ཕྱིར། །ཞེས་བྱ་བ་ནི་ཁ་བཀྲུས་ནས་ཡོན་བདག་གི་བསོད་ནམས་ཕྱིན་ཅི་ལོག་ཏུ་འཕེལ་བ་དག་དགག་སྟེ། སྔོན་བྲམ་ཟེས་སྨོན་ལམ་བཏབ་པས་དགེ་སློང་ལྔ་བརྒྱ་གླང་དུ་སྐྱེས་པ་དག་དགག་པའི་ཕྱིར་རོ། །སྦྱིན་པའི་ཚིགས་བཅད་གཉིས་ཤིག་བརྗོད། །ཅེས་པ་ནི་ཞལ་ནས་གསུངས་པའི་ཚིགས་བཅད་གཅིག་དང་བདག་ལ་བསྔོ་བའི་ཚིགས་བཅད་གཅིག་སྟེ་གཉིས་ཤིག་བརྗོད་པར་བྱའོ། །འདི་མན་ཆད་ནི་འཚལ་མ་འཚལ་ཞེས་དེའི་འོག་ཏུ་དགེ་བ་ཇི་ལྟར་བྱ་བའི་གོ་རིམས་དང་ཐབས་བསྟན་པའོ། །མན་ངག་ཡོད་ན་བསམ་གཏན་བྱ། །ཞེས་པ་ནི། དགེ་བའི་བཤེས་གཉེན་གྱི་བསམ་གཏན་གྱི་ལུང་སྟོན་པས་ཏེ་བསམ་གཏན་དང་པོ་ནི་འདི་ལྟར་བྱའོ། །དེའི་གཉེན་པོ་ནི་འདི་ལྟར་བསྐྱེད་དོ་ཞེས་ལུང་སྟོན་ནུས་ཡོད་ན་དེའི་མན་ངག་མནོས་ཏེ་བསམ་གཏན་བྱའོ། །རབ་ཏུ་འབད་དེ་བཀླག་པར་བྱ། །ཞེས་པ་ནི་དེ་ལྟར་ལུང་སྟོན་པ་མེད་ན་ལེ་ལོའི་དབང་དུ་མ་གྱུར་ཅིང་སེམས་མ་ཡེངས་པར་ཚིག་དང་དོན་བསྟུན་ཅིང་ཡི་གེའི་འབྲུ་རྣམས་ཀྱང་ཟུར་ཕྱིན་འདོད་ཀྱང་བསམ་ཞིང་བཏོན་ནམ་བཀླག་པ་དག་བྱའོ། །ཡང་དགེ་སྦྱོང་གི་ལས་ནི་གཉིས་ཏེ། སྒོམ་པ་དང་ཀློག་པའོ། །སྡོམ་དང་ཆོ་ག་མཁས་པ་དང༌། །ཞེས་པ་ནི་འཁོར་ལོ་སྡོམ་པ་དང་ལྡན་པ་ལ་བྱ། བསླབ་པ་ལྕི་ཡང་ལས་སུ་བྱའམ། བྱེ་བྲག་ཕྱེད་པར་བྱའོ། །ཡང་ན་སྡོམ་པ་ལ་མཁས་པར་བྱ་བ་ནི་བསླབ་ཚིག་བཅུའི་ཚིག་ལ་མཁས་པའོ། །ཆོ་ག་མཁས་པ་ནི་སྤྱོད་ལམ་བཞིར་ཇི་ལྟར་སྤྱད་པ་དང་མཁན་པོ་ལ་སོགས་པ་ལ་ཇི་ལྟར་སྤྱད་གསལ་བར་བྱེ་བྲག་ཕྱེད་ཅིང་གསལ་བའོ། །ཡང་ན་སྡོམ་པ་ནི་སྒོ་གསུམ་སྡོམ་པའོ། །ཆོ་ག་ནི་གཞུང་ལ་བརྟེན་ཏེ་ཚུལ་ཁྲིམས་བསྲུང་ཞིང་དྲག་དལ་མེད་པར་བི་ཝང་གི་བརྒྱུད་བཞིན་དུ་བྱའོ། །བསྒྲུབ་པ་ལ་ནི་བརྩོན་པར་བྱ། །ཞེས་པ་ནི། སྡོམ་པ་ཇི་ལྟ་བུ་དང༌། ཆོ་ག་ཇི་ལྟར་བྱུང་བ་དེ་བཞིན་དུ་ལུས་དང་ངག་གིས་དེ་བཞིན་དུ་བསྒྲུབ་ཅིང་ཉམས་སུ་ལེན་ནའོ། །དོན་
ཡིད་ཀྱིས་གྱི་ན་ཤེས་པ་ཙམ་དུ་ཟད་དེ། དེ་ཁོ་ན་བཞིན་དུ་མི་བསྒྲུབས་ན་དེ་དག་ལ་མཁས་ཀྱང་དོན་མེད་དོ། །ཡང་ན་སྒྲུབ་པ་ནི་བླ་ན་མེད་པའི་བྱང་ཆུབ་བོ། །བརྩོན་པ་ནི་ནན་ཏན་གྱིས་འབད་པར་བྱའོ། །འདི་ཚུན་ཆད་ནི་ཚུལ་ཁྲིམས་བཅུའི་དངོས་པོར་བསྟན་ཏེ། དེ་དག་ལས་གྱང་རྩ་བ་བཅས་པའི་རིམ་པ་བཞིན་དུ་མ་བཞག་གི་དགེ་བ་བཅུའི་རིམ་པ་ལྟར་བཞག་པས་དང་པོར་སྲོག་གཅོད་པ་འཆད་དེ་དེ་ལ་བསླབ་ཚིག་བཅུ་པ་ཀུན་གྱིས་སྡོམ་པ་མེད་པར་འགྱུར་བ་མ་ཡིན་གྱི། རྩ་བ་བཞི་ལས་གཅིག་ཞིག་པས་མེད་པར་འགྱུར་རོ། །བཞི་པོ་དེ་ཡང་ཡན་ལག་དང་མི་ལྡན་ན་མེད་པ་མ་ཡིན་གྱི། མིའི་རྒྱུད་དང་རྒྱུད་མ་ཡིན་པས་བྱེ་བྲག་དབྱེའོ། །འདི་ནི་དངོས་པོ་ལ་བབ་སྟེ། དེ་ཡང་བསྡུས་པའི་དོན་བཅུའོ། །དེ་ཡང་གང་ཞེ་ན། སྲོག་གཅོད་པ་དང༌། མ་བྱིན་པར་ལེན་པ་དང༌། མི་ཚངས་པར་སྤྱོད་པ་དང༌། བརྫུན་དུ་སྨྲ་བ་དང༌། ཆང་འཐུང་བ་དང༌། གར་ལ་སོགས་པ་བྱེད་པ་དང༌། ཕྲེང་བ་ལ་སོགས་པས་མི་བརྒྱན་པ་དང༌། བླ་མའི་ཁྲི་སྟན་ལ་མི་འདུག་པ་དང༌། དུས་མ་ཡིན་པའི་ཟས་སྤང་བ་དང༌། གསེར་དངུལ་ལེན་པ་སྤང་བ་དང་བཅུའོ། །གསོད་པ་ནི་རྩིས་མགོ་རྣམ་པ་ལྔ་དང་ལྡན་ན་ཕམ་པར་འགྱུར་ཏེ། གང་ཞེ་ན། མི་ཡིན་པ་དང༌། མིར་འདུ་ཤེས་པ་དང། གསོད་སེམས་ཡོད་པ་དང༌། གསོད་པར་སྦྱོར་བ་དང༌། འཚོ་བའི་དབང་པོ་འགག་པ་དང༌། ཡན་ལག་དེ་དག་ལྔ་དང་ལྡན་པས་མིའི་རྒྱུད་གསུམ་ལས་གང་ཡང་རུང་སྟེ། བསྡུས་ན་ཕམ་པར་འགྱུར། ཡན་ལག་གཅིག་དང་མི་ལྡན་ན་ཉེས་བྱས་སུ་འགྱུར། དེ་དང་པོ་བཅས་པ་ནི་སངས་རྒྱས་ཡུལ་སྤྲེའུ་རྫིང་གི་ལྗོངས་ན་བཞུགས་པའི་ཚེ། དགེ་སློང་ཞིག་མི་གཙང་བའི་བསམ་གཏན་བསྒོམས་ནས་ལུས་མི་གཙང་བས་སྐྱོ་བར་གྱུར་ཏེ། དགེ་སློང་དབྱུག་པ་ཅན་ལ་གསོད་དུ་བཅུག་པས་བཅས་སོ། །བརྟུལ་ཞུགས་གནས་པ་ཞེས་པ་ནི་བརྟུལ་ཞུགས་ལ་གནས་པ་ནི་ཁོ་ནས་འབྱུང་སྟེ། སྡོམ་པ་ལ་གནས་པའི་དོན་ཏོ། །སེམས་མ་ཉམས་པ་ཞེས་པ་ནི་རྣམ་པ་བཞི་ལྟ་བུར་སེམས་ཀྱང་མ་ཉམས་པ་སྟེ། གང་ཞེ་ན་འདྲེ་ལ་སོགས་པས་བྱིན་གྱིས་བརླབས་ཏེ། མྱོས་པར་གྱུར་པ་དང་འབྱུང་བ་ཆེན་པོ་བཞིའི་ལས་ཉམས་པར་གྱུར་པ་དང༌། སྔོན་གྱི་ལས་ཀྱི་རྣམ་པར་
སྨིན་པ་ལས་གྱུར་པ་དང༌། གནད་དུ་བབས་ཏེ་བརྒྱལ་ནས་མི་དྲན་པར་འགྱུར་རོ། །ཆེད་དུ་བསམས་ཏེ་མ་ནོར་བར། །ཞེས་པ་ནི་མི་དེ་ཁོ་ན་ཡིན་གྱིས་ཞེས་ཏེ་དེ་ཁོ་ན་ལ་དམིགས་ཏེ་གསད་པར་ཡང་བསམས་ཏེ། གསོད་སེམས་ཡང་ལྡན་ལ་ནོར་ཀྱང་མ་ནོར་བའོ། །མི་གཞན་བདག་གམ་གཞན་རྣམས་ཀྱི། །ཞེས་པ་ནི་གསོད་ན་སྡོམ་པ་མེད་པར་འགྱུར་བས་བདག་ལས་གཞན་པའི་མིའོ། །དེ་ལ་མི་དང་མིར་ཟིན་པའོ། །དེ་ལ་མི་ལ་ཡང་རྣམ་པ་གསུམ་སྟེ། སྐྱེས་པ་དང༌། བུད་མེད་དང༌། མ་ནིང་གསུམ་མོ། །མིར་ཟིན་པ་ནི་མིའི་མངལ་ན་དབང་པོ་གསུམ་དང་ལྡན་པ་ལ་བྱ་སྟེ། འཚོ་བའི་དབང་པོ་དང༌། ཡིད་ཀྱི་དབང་པོ་དང༌། ལུས་ཀྱི་དབང་པོ་སྟེ་གསུམ་དང་ལྡན་པའོ། །གསོད་པར་སྦྱོར་བ་ལ་གཉིས་ཏེ། བདག་གིས་བསམས་པ་འམ། གཞན་ལ་བཅོལ་ཏེ་གསོད་དུ་བཅུག་པའོ། །གཞན་ལ་བཅོལ་བ་ལ་ཡང་རྣམ་པ་གཉིས་ཏེ། བྲིད་པ་ལས་དང༌། མངོན་སུམ་དུ་བཅོལ་བའོ། །བསད་ན་བརྟུལ་ཞུགས་ཉམས་པར་འགྱུར། །ཞེས་པ་ནི། འཚོ་བའི་དབང་པོ་དང་བྲལ་ན་དགེ་ཚུལ་གྱི་སྡོམ་པ་ཞིག་པར་འགྱུར་རོ། །ཚུལ་ཁྲིམས་ལྡན་ནམ་ཞེས་པ་ནི། །གསོད་པར་བྱེད་པའི་ཚིག་སྟེ་ནད་པ་འཆི་བར་བྱ་བའི་ཕྱིར་ཁྱོད་ཀྱིས་བསོད་ནམས་ཀྱི་ཚོགས་ཀྱང་བསགས། ཚུལ་ཁྲིམས་དང་ཡང་ལྡན་པས་མཐོ་རིས་དང་ཐར་པ་ནི་དར་དང་ཡོལ་བས་ཆོད་པ་ཙམ་གྱིས་མྱུར་དུ་ཤི་ཡང་སྡིག་པ་མི་འཕེལ་གྱི། འཆི་བར་རིགས་སོ་ཞེས་བསྔགས་པ་བརྗོད་པའོ། །ཚུལ་ཁྲིམས་འཆལ་ཞེས་པ་ནི་ནང་པ་ལ་ཁྱོད་ཀྱི་ཚུལ་ཁྲིམས་ངན་པའི་སྟེང་དུ་འདིར་ཇི་སྲིད་དེ་གནས་པ་དེ་སྲིད་སྡིག་པ་སོག་ཅིང་འདུག་པས་དམྱལ་བར་ཡུན་རིང་དུ་གནས་པར་འགྱུར་གྱིས་འདུག་པར་མི་རིགས་ཏེ། མྱུར་དུ་འཆི་བར་རིགས་སོ་ཞེས་བསྔགས་པ་བརྗོད་པ་དག་སྨྲ་བའོ། །ཚིག་གིས་གསད་པར་བྱ་བའི་ཡུལ་གསུམ་སྟེ་ཚུལ་ཁྲིམས་དང་ལྡན་པ་དང༌། ཚུལ་ཁྲིམས་ངན་པ་དང་ནད་པ་ལའོ།། དེ་དག་ལ་ཡོ་བྱད་སྡུ་གུ་བདོག་པ་དེ་འདོད་པའི་ཕྱིར་དེ་དག་ལ་འཆི་བའི་བསྔགས་པ་བརྗོད་དེ། །དེས་ཤི་ན་དོམ་པ་ཞིག་གོ །དེ་ལས་བཟློག་པ་ལས་ཤི་འམ་མ་ཤི་ཡང་རུང་སྟེ། ཉེས་བྱས་སུ་འགྱུར་རོ། །དེ་བཞིན་ནད་ཀྱིས་བཏབ་པ་ལ། །ཞེས་པ་ནི་ནད་ཀྱིས་སྡུག་བསྔལ་ཞིང་མི་བདེ་བར་འདུག་པ་
ལ་ཤི་ན་ནད་འདི་དང་བྲལ་བར་འགྱུར་རོ། །འཆི་བའི་རིགས་སོ་ཞེས་བསྔགས་པ་བརྗོད་ཅིང་མཚོན་བྱིན་ནམ་མཚོན་ཐོགས་པ་གཉེར་བའོ། །ནད་པ་བསླང་པ་ལ་དེས་དབུགས་བཅད་དེ་ཤི་བ་ལ་ཉེས་པ་མེད་དོ། །གང་ཐོས་ཞེས་པ་ནི་དེ་ལྟར་དེ་གསུམ་ལ་གང་དང་གང་ཐོས་པའོ། །སྡུག་བསྔལ་ཉམ་ཐག་སྟེ་ཞེས་པ་ནི་ཚུལ་ཁྲིམས་ངན་པ་ཡང་ངན་སོང་གི་རྒྱུ་ཡིན་པས་སྡུག་བསྔལ་ལོ། །ཚུལ་ཁྲིམས་དང་ལྡན་པ་ཡང་ད་ལྟར་ལུས་ལ་སྡུག་བསྔལ་བར་བལྟའོ། །ནད་པ་ནི་འཕྲལ་དུ་ཉམ་ཐག་གོ །ངེས་འཆིའི་ཆོས་གཏམ་དེར་མི་བྱ། །ཞེས་པ་ནི་ངེས་པའམ་གདོན་མི་ཟ་བར་འཆི་བར་འགྱུར་བའི་གཏམ་ནད་པ་དག་ལ་མི་བྱའོ། །སྨན་དང་ཞེས་པ་ནི་ནད་པ་དང་མི་མཐུན་པ་འཆི་བར་འགྱུར་བ་མི་སྦྱིན་ནོ། །དེ་ལ་འཆི་བའི་སྨན་ནི་དཔེར་ན་རྐུན་པོ་ལག་པ་གཅད་པ་མི་དྲུག་ཅུ་ལ་དགེ་སློང་མས་རྩབ་མོ་ལན་ཚྭ་ཅན་གྱི་བྱིན་པས་རྐུན་པོ་ན་བ་ལྟ་བུའོ། །རྩ་བ་མོ་ལན་ཚྭ་ཅན་ནི། རྒྱ་གར་གྱི་སྐད་ཀྱིས་ཀཉྫིན་ཞེས་བྱའོ། །ཁམས་མི་མཉམ་པ་དང་མི་འཕྲོད་པའི་སྨན་ཅི་ཡང་རུང་སྟེ་མི་སྦྱིན་ནོ། །སྔགས་དང་ཞེས་པ་ནི་གསང་སྔགས་ཨ་བྷི་ཙ་ར་སྟེ། མངོན་སྤྱོད་པའོ། །རིག་པ་ཞེས་པ་ནི་འཇིག་རྟེན་དང་འཇིག་རྟེན་ལས་འདས་པའི་རིག་པ་སྟེ། དེ་ལ་འཇིག་རྟེན་པའི་རིག་པ་ནི་མུ་སྟེགས་ཅན་ནམ་བྲམ་ཟེའི་རིག་པའོ། །འཇིག་རྟེན་ལས་འདས་པའི་རིག་པས་ནི་སངས་རྒྱས་པའི་རིག་པ་སྟེ། རིག་པ་དེ་གཉིས་གང་ཡང་རུང་བས་ཕ་རོལ་ལ་གནས་པར་བྱེད་པའོ། །འཆི་བའི་ཕྱོགས་སུ་བཏང་བའམ། །ཞེས་པ་ནི། དགེ་སྦྱོང་ལ་དབང་པོ་ཡོད་ན་མི་དག་འགུམ་ཁུངས་སུ་བཏང་བའམ། ཡང་ན་མི་འཕྲོད་པའི་ཡུལ་དང༌། གནོད་སྦྱིན་གདུག་པའམ། གཅན་ཟན་ཁྲོ་བོའི་གདུག་པའི་གནས་སམ། མི་རྒོད་ཡོད་པའི་ཕྱོགས་སུའམ། ར་རོ་བ་གཡང་ས་ཕྱོགས་སུ་བཏང་བ་ལ་སོགས་པས་ཏེ། འཆི་བར་བསྒྲུབ་པའི་གནས་སུ་བཏང་བའོ། །མི་གཞན་ཞེས་པ་ནི་བདག་བསད་པ་ལ་སྔོམ་པ་ཞིག་པར་མི་འགྱུར་བས་གཞན་མི་ཡིན་པའི་མི་གཞན་དག་གོ །ཐབས་སྣ་ཚོགས་ཀྱིས་ཞེས་པ་ནི་གོང་དུ་སྨོས་པར་ཟད་དོ། །དུག་དང་གཏོར་མ་འཛོལ་དང་ས་མདའ་ལ་སོགས་པས་འཆི་བར་འགྱུར་བའི་ཐབས་འདི་ལྟ་བུ་སྣ་ཚོགས་ཀྱིས་བརྡས་ཀྱང་རུང་རྩས་མགོ་དང་
སྦྱར་ཏེ་དེ་ལ་རྩིས་མགོ་ཚང་བ་མང་ཡང་ལྕི་ཡང་ཡོད་དེ། གསོད་སེམས་དང་མི་ལྡན་པ་ལ་རྩིས་མགོ་གཞན་དང་ལྡན་ཀྱང་ཉེས་བྱས་ཕྲ་མོར་འགྱུར་རོ། །གསོད་སེམས་དང་ལྡན་པ་ལ་མ་ཤི་བ་ནི་ཉེས་བྱས་སྦོམ་པོར་འགྱུར་རོ། །བསད་ན་བརྟུལ་ཞུགས་ཉམས་པར་འགྱུར། །ཞེས་པ་ནི་སྲོག་བཅད་པ་ཙམ་གྱིས་སྡོམ་པ་ཉམས་པར་འགྱུར་ཏེ། མི་བསད་པ་འབའ་ཞིག་གིས་སྡོམ་པ་ཞིག་པར་འགྱུར་རོ། །འདི་མན་ཆད་ཅི་ཞིག་གིས་ལས་སུ་བྱས་ནས་ཀྱང་རུང་སྟེ། དགེ་ཚུལ་དུ་མི་རུང་བར་མི་འགྱུར་བས་གོང་མ་ལས་བྱེ་བྲག་ཏུ་བྱས་པའི་ཕྱིར་རོ། །བྱོལ་སོང་དང་ནི་ཞེས་པ་ནི་བདེ་འགྲོ་ལས་བྱོལ་ཏེ། ངན་འགྲོའི་གནས་སུ་སྐྱེས་པ་ཀླུ་མན་ཆད་དང༌། གྲོག་སྦུར་ཡན་ཆད་དོ། །སེམས་དམྱལ་དང་ཞེས་པ་ནི་དམྱལ་བ་ཆེན་པོར་མ་ཕྱིན་ཀྱང་སོ་སོ་རེ་རེའི་དམྱལ་བས་ཏེ། དཔེར་ན་རྒྱ་མཚོར་སོང་སོང་བ་ལས། རྒྱ་མཚོའི་གླིང་ན་དམྱལ་དང་ཕྲད། །ཅེས་བྱ་བ་ལ་སོགས་པ་ལྟ་བུའོ། །ཡི་དགས་ཞེས་པ་ནི་ཕྱག་དར་ཁྲོད་ཀྱི་འདྲེ་ཡང་ཆད་དོ། །འོན་ཏེ་ལྷ་ཡང་རུང་ཞེས་པ་ནི་ཤིང་ལྷ་ཡན་ཆད་ནས་འགོ་མིན་གྱི་གནས་ཀྱི་ལྷའི་བར་དུའོ། །བསད་ན་ངན་སོང་ལྷུང་བའི་ཞེས་པ་ནི། བྱོལ་སོང་ནས་ལྷའི་བར་དུ་དེ་དག་བསད་ན་ངན་སོང་གསུམ་དུ་ལྟུང་ངོ༌། །སྡིག་པ་སྤོམ་པོ་ཐོབ་པར་འགྱུར། །ཞེས་པ་ནི་དགེ་སྦྱོང་གི་ཚུལ་ཁྲིམས་ལས་ཐལ་བྱུང་དུ་བླངས་པས་སྦོམ་པོ་ཞེས་སྨོས་ཀྱི། དགེ་ཚུལ་ལ་ནི་ཉེས་བྱས་སུ་འགྱུར་རོ། །བརྟུལ་ཞུགས་ཅན་གྱིས་བསད་སྙམ་སྟེ། །ཞེས་པ་ནི་སྔོམ་པ་ལ་གནས་པས་མི་ལ་སོགས་པ་གསོད་པར་སེམས་པས་སོ། །ལུས་དང་ཞེས་པ་ནི་ལུས་ཀྱིས་མདའ་འཕངས་པ་དང་རལ་གྲི་དང་མདུང་ལ་སོགས་པས་འདེབས་པའོ། །ངག་གིས་བཤམས་པ་ལས་ཞེས་པ་ནི་ངག་གིས་འཆི་བའི་བསྔགས་པ་བརྗོད་པ་ལ་སོགས་པའོ། །སྐྱེ་བོ་གསོན་ཡང་དེ་ལ་ནི། །ཞེས་པ་ནི་གསད་པར་ཡང་བསམས་ལ། ཆས་ཀྱང་ཆས་ཏེ་མདའ་ལ་སོགས་པས་ཕོག་གམ་འཆི་བར་འགྱུར་བའི་བསྔགས་པ་བརྗོད་པར་འགྱུར་བ་ལས་བདག་གིས་དེ་ཡང་དག་པར་ཤི་སྙམ་པ་ལས། དེ་ཕྱིས་སོང་སྟེ་མ་ཤི་ཡང་འོག་མ་ལྟར་འགྱུར་རོ། །ཁ་ན་མ་ཐོ་རྣམ་གསུམ་འགྱུར། །ཞེས་པ་ནི་རྣམ་པ་གསུམ་སྟེ། སྦྱོར་བའི་ཁ་ན་མ་ཐོ་བ་དང༌། རྩ་བའི་ཁ་ནམ་ཐོ་བ་དང༌། རྒྱབ་ཀྱི་ཁ་ན་མ་ཐོ་བའོ། །དེ་ལ་
སྦྱོར་བའི་ཁ་ནམ་ཐོ་བ་ནི་ཐོག་མར་གསད་པར་སེམས་པའོ། །རྩ་བའི་ཁ་ན་མ་ཐོ་བ་ནི་གསོད་པའི་ཚེ་སྟེ། ལུས་ཀྱིས་འདེབས་པ་དང༌། ངག་གིས་བསྔགས་པ་བརྗོད་པའི་ཚེ་བསད་སྙམ་པའོ། །རྒྱབ་ཀྱི་ཁ་ན་མ་ཐོ་བ་ནི་ཕྱིས་རྗེས་སུ་ཡི་རང་བ་སྟེ། དུས་གཞན་དུ་ངས་བསད་དེ་ཞེས་ཡི་རང་ཞིང་ཡང་དང་ཡང་དུ་སེམས་པའོ། །དེ་ལྟར་ན་སྦྱོར་བའི་ཁ་ན་མ་ཐོ་བ་དང༌། རྩ་བའི་ཁ་ན་མ་ཐོ་བ་དང༌། རྒྱབ་ཀྱི་ཁ་ན་མ་ཐོ་བའོ། །དེ་ལ་དང་པོ་ནི་འགྱོད་པས་ཚངས། བར་མ་ནི་གང་ཟག་ལ་མཐོལ་བས་ཚངས། ཐ་མ་ནི་དཀོན་མཆོག་གསུམ་དང་དགེ་འདུན་ལ་མཐོལ་བས་ཚངས་པར་འགྱུར་རོ། །དེ་བཞིན་དུ་བསོད་ནམས་ལ་ཡང་རྣམ་པ་གསུམ་དུ་དབྱེ་སྟེ། ལས་ཐམས་ཅད་ལ་ཡང་སྦྱར་རོ། །རྡོ་དབྱུག་ཁུ་ཚུར་འཚོག་པ་དང༌། །ཞེས་པ་ནི་འདི་དག་ཀྱང་གསོད་པའི་ཡན་ལག་ཏུ་བསྡུའོ། །དེ་ལས་གཞན་པའི་གནོད་པ་དག །ཅེས་པ་ནི་རྡོ་དབྱུག་ལ་སོགས་པ་སྦྱོར་བའམ་གནོད་པའི་རྒྱུར་གྱུར་པ་གང་ཡང་རུང་བས་མི་ལ་ཡང་འཚོག་པ་ནས་སྦྱོར་བ་ཡན་ཆད་དུ་ཕ་རོལ་ལ་གནོད་པར་འགྱུར་བའི་བག་མི་བྱའོ། །བ་གླང་ལ་སོགས་གནོད་མི་བྱ། །ཞེས་པ་ནི་ཕྱུགས་སོ་ཅོག་བསྡུ་སྟེ། དེ་དག་ལ་གནོད་པ་མི་བྱའོ། །རྟ་ལ་སོགས་པ་མི་ཞོན་ནོ། །ཞེས་པ་ནི་དཀོན་མཆོག་གསུམ་དང༌། ཕ་མ་དང༌། རྒྱལ་པོའི་ཆད་ལ་མི་འགྲོར་མི་རུང་ཞིང་རྐང་གིས་འགྲོ་མི་ནུས་ཀྱི་བར་དུ་བྱའོ། །མི་ནུས་ན་བཞོན་ཏེ། དེ་ཡང་ཕ་རྐང་ཆག་ལ་ཞོན་པ་བཞིན་དུ་སྙིང་རྗེ་བྱའོ། །འདི་ཡན་ཆད་བསད་པའི་བཤད་པ་འདས།། །།ད་ནི་མ་བྱིན་པར་ལེན་པ་འཆད་དེ། དེ་ཡང་ཡན་ལག་དྲུག་དང་ལྡན་ན་ཕམ་པ་སྟེ་གང་ཞེ་ན། མ་བྱིན་པར་ལེན་པ་དང༌། རྐུ་སེམས་ཡོད་པ་དང༌། རིན་ཐང་ཚང་བ་དང༌། མིས་ཡོངས་སུ་བཟུང་བ་དང༌། བཟུང་བར་འདུ་ཤེས་པ་དང༌། བདག་གིར་བྱས་པའོ། །ཡན་ལག་དེ་རྣམས་དང་ལྡན་ན་ཕམ་པ། དེ་དག་གཅིག་དང་ཡང་མི་ལྡན་ན་ཉེས་བྱས་སུ་འགྱུར་རོ། །དེ་དག་དང་པོ་བཅས་པ་ནི་རྒྱལ་པོའི་ཁབ་འོད་མའི་ཚལ་ན་བཞུགས་པའི་ཚེ་རྫ་བ་ལས་རབ་ཏུ་བྱུང་བའི་དགེ་སློང་ནོར་ཅན་གྱིས་རབ་ཏུ་བྱུང་ཞིང་མ་བྱིན་པར་བླངས་པས་བཅས་སོ། །དགེ་ཚུལ་ཞེས་པ་ནི་དགེ་བའི་ཕྱོགས་ལ་འབད་པའམ། རྩོལ་བར་བྱེད་དེ་དལ་བའི་ཕྱིར་ན་དགེ་ཚུལ་ཞེས་བྱའོ། །
བདག་གམ་གཞན་རྣམས་ཀྱི་ཞེས་པ་ནི་རྐུན་པོ་ལ་རྣམ་པ་གཉིས་ཏེ། བདག་ཉིད་ཀྱིས་རྐུ་བ་དང༌། གཞན་རྣམས་ལ་རྐུ་བ་བཅོལ་བའོ། །བཅོལ་བ་ལ་ཡང་རྣམ་པ་གཉིས་ཏེ། མངོན་སུམ་དུ་བཅོལ་བ་དང༌། ཐ་ན་སྤྲིངས་ནས་བཅོལ་བའོ། །རྐུ་སེམས་ཞེས་པ་ནི་རྐུའོ་སྙམ་པའི་སེམས་ཀྱིས་བརྐུ་བའོ། །མཐུ་དང་ཞེས་པ་ནི་བཙན་ཐབས་སུ་འཕྲོག་པ་ལྟ་བུའོ། །འཇབ་བུ་ཡིས་ཞེས་པ་ནི་རྐུན་པོ་ལ་མང་སྟེ། འཇབ་བུ་དང༌། སྒྱུ་དང༌། གཡོ་དང༌། དོར་ལ་སོགས་པ་བྱས་ཏེ་བརྐུ་བའོ། །འཁྲུལ་པ་མེད་པར་ཞེས་པ་ནི་བདག་གི་ཡིན་པར་འདུ་ཤེས་པ་དང༌། ནོར་བ་མེད་པ་སྟེ། མདོར་ན་བདག་གི་རྫས་སུ་མ་ནོར་བ་སེམས་མྱོས་པ་ལ་སོགས་པར་མ་གྱུར་པ་དེ་ནི་རྐུ་སེམས་དང་ལྡན་པའི་དོན་ཏོ། །མི་གཞན་གྱི་ཞེས་པ་ནི་བདག་གི་རྫས་བརྐུས་ཀྱང་ཕམ་པར་མི་འགྱུར་ཏེ། སྔོན་བཅས་པ་མ་ཡིན་པས་ཡན་ལག་ཏུ་མི་དགོས་པའི་ཕྱིར་རོ། །བདག་ལས་གཞན་ཏེ་ཕ་རོལ་ལོ། །གནས་ནས་ཞེས་པ་ནི་མ་བསྐྱོད་ན་ཇི་ལྟར་རྐུ་སེམས་དང་ལྡན་ཡང་སྔོམ་པ་ཞིག་པར་མི་འགྱུར་ཏེ། མདོར་ན་རྫས་ལ་སོགས་པ་གང་ན་འདུག་པའི་མཚམས་ལས་འདས་པའོ། །མཚམས་ནི་བར་དུ་ནམ་མཁས་ཆོད་པ་དང༌། ས་དག་ལས་སའི་ཁ་དོག་ལྟ་བུ་འདས་པ་དང༌། ཕྱུགས་ཚོན་པོ་ཞིག་ན་རྒྱབ་ལས་མགོའམ་མཇུག་གི་མཐའ་ལས་བྲལ་བ་དང༌། རིད་དེ་མ་ཤི་ན་རྩིབ་མའི་དག་ལ་ལས་བྲལ་བའོ། །མ་ཤ་ལྔ་ཙམ་ཞེས་པ་ནི་ཀཱར་ཥཱ་པ་ཎ་གཅིག་ལ་མ་ཤ་ཀ་ཉི་ཤུ་རི་བས། ཀཱར་ཥཱ་པ་ཎ་བཞི་ཆ་ལ་མ་ཤ་ཀ་ལྔའོ། །དེ་ལ་མ་ཤ་ཀ་ནི་དབྲིའོ། ཀཱར་ཥཱ་པ་ཎ་ནི་དབྲི་བ་མེད་དོ། །དེ་བཞིན་དུ་དངུལ་ལ་ནི་འགྱུར་བ་མེད་དོ། །འབྲུ་དག་ལ་ནི་ཡང་རུང་དུ་འགྱུར་ཏེ། དངུལ་ཞོ་གཅིག་གི་ཆ་ལས་བརྩིས་ཏེ། མ་ཤ་ཀ་ལྔ་ལ་ཕམ་པའོ། །རང་གི་ཡུལ་ནས་བྱུང་བ་གང༌། །ཞེས་པ་ནི་ཡུལ་ཐང་བརྩན་པར་བྱ་སྟེ། བདག་གང་ན་འདུག་པ་དང༌། རྐུན་མོ་ཡུལ་གང་དུ་བྱས་པ་མདོར་ན་ཡུལ་དེ་ཉིད་ཀྱི་རིན་ཐང་བརྩི་བའོ། །ཀཱར་ཥཱ་པ་ཎི་བཞི་ཆ་བརྐུས་ཞེས་པ་ནི་མ་ཤ་ཀ་ལྔ་ནས་ཡར་བརྩིས་ཏེ། ཀཱར་ཥཱ་པ་ཎ་གཅིག་ལ་མ་ཤ་ཀ་ཉི་ཤུ་ཡོད་པས། ཀཱར་ཥཱ་པ་ཎ་གཅིག་ལ་མ་ཤ་ཀ་ཉི་ཤུ་ཡོད་པས། ཀཱར་ཥ་པ་ཎ་བཞི་ཆ་ལས་མ་ཤ་ཀ་ལྔ་སྟེ། རིན་ཐང་བརྩིས་ན་ཞོ་བཞིའི་བརྒྱད་ཆ་གཅིག་གོ །དེ་བརྐུས་ཚུལ་ཁྲིམས་ཞིག་པར་འགྱུར། །ཞེས་པ་ནི་དངུལ་
ཞོ་གཅིག་གི་བརྒྱད་ཆ་ཡོད་པ་དེ་བརྐུས་ན་ཕམ་པར་འགྱུར་རོ། །སྦྱོར་བའི་ཚེ་ན་ཉེས་བྱས་སོ་ཞེས་པ་ནི་དགེ་སློང་གི་ལྟར་ཉེས་པ་རྣམས་མང་དུ་དབྱེར་མེད་དོ། །ཐོག་མར་བརྐུ་བར་བཤམས་པ་ནས། རྫས་དུ་ལ་རང་གནས་ནས་མ་སྤགས་ཀྱི་བར་དུ་ཉེས་བྱས་སུ་འགྱུར་རོ། །རྡོ་ཁུ་ཞེས་པ་ནི་ཉུང་རྡོག་ལྟ་བུ་ལ་སོགས་པའོ། །རྩ་བ་ཞེས་པ་ནི་སྨན་ལ་སོགས་པའོ། །འབྲས་བུ་ཞེས་པ་ནི་ཤིང་ཐོག་སྟེ། ཀུ་ཤུ་དང་ཁམ་བུ་དང་རྒུན་འབྲུམ་ལ་སོགས་པའོ། །ཤིང་ཞེས་པ་ནི་སྐྱེད་ཤིང་ལྟ་བུ་སྟེ་ལོ་མ་དང༌། ཤིང་ཏོག་དང་འབྲས་བུ་བཟང་པོ་སྐྱེས་པའི་ཤིང་ལྟ་བུ་སྟེ། རྩ་གཞན་བཅད་ན་ཉེས་བྱས། རྩ་བ་གཅིག་བཅད་ན་རིན་ཐང་བརྩིའོ། །སྡོང་བུ་ཞེས་པ་ནི་བུར་མ་ཤིང་དང་ལྕུག་མ་ལ་སོགས་པ་ལྟ་བུ་སྟེ། སྤགས་སམ་བཅད་ན་ཕམ་པར་འགྱུར་རོ། །ལོ་མ་ཞེས་པ་ནི་ཤང་རྩེ་དག་བསྡུས་ཏེ་ཚོད་པ་དང་ཡུངས་ཀར་ལྟ་བུ་དག་བརྐུས་ནའོ། །ཤུན་པ་ཞེས་པ་ནི། ཤིང་རྩ་ལ་སོགས་པའོ། །ཆུ་ཞེས་པ་ནི་ཤིང་ཆུ་དང་མྱ་ངམ་དུ་འགྲོ་བའི་བཏུང་ཆུ་རྣམས་ཁྱེར་ཏེ་དོང་བ་ལས་མིའི་བཏུང་ཆུ་བརྐུས་ན་ཕམ་པའོ། །ཕྱུགས་ཀྱིས་བརྐུས་ན་ཉེས་བྱས་སུ་འགྱུར་རོ། །མེ་ཏོག་ཞེས་པ་ནི་མེ་ཏོག་རྣམ་པ་གཉིས་ཏེ་འོག་ནས་འབྱུང་བ་དག་གོ །ཆུ་སྐྱེས་ཞེས་པ་ནི་པདྨོ་ལ་སོགས་པ་ལྟ་བུ་སྟེ། ཆུའི་ནང་དུ་སྐྱེས་པའི་མེ་ཏོག་གོ །ཐང་སྐྱེས་ཞེས་པ་རི་ལས་སྐྱེས་པ་སྟེ། ཐང་ལས་སྐྱེས་པའི་མེ་ཏོག་ཀྱང་བསྡུའོ། །ཞིང་དང་ཞེས་པ་ནི་རྐུ་བ་ལ་རྣམ་པ་གཉིས་ཏེ། ཐམས་ཅད་རྐུ་བ་དང་མུ་ནས་རྐུ་བའོ། །དེ་ཡང་བསྐོར་བ་དང་ཁད་ཀྱིས་རྐུ་བའོ། །དེ་ལ་ཡང་བསྐོར་བ་ནི་ཞིང་དེར་བས་བསྐོར་བ་སྟེ། ཀུན་ནས་ར་བའི་མཚམས་འབྱོར་ཏེ་བདག་པོས་བསམ་པ་ཐག་བཅད་ན་ཕམ་པ། མི་དབང་བ་ལ་ཤགས་འགྱེད་པའམ། དབང་ཡོད་པས་མི་དབང་བཞིན་དུ་ཐོབ་པར་བཅད་ན་ཕམ་པ། རྟོག་ཅེས་པ་ནི་གཉིས་ཏེ། རྐུ་བའམ་མ་རུངས་པར་བྱེད་པས་ཏེ། དཔེར་ན་ཤྭ་ཁ་སྒྱུར་བ་ལྟ་བུ་སྟེ། དེས་མ་རུང་བར་གྱུར་པའི་རིན་ཐང་ཚང་ན་ཕམ་པ། ས་གཞི་དང་ཞེས་པ་ནི་གནས་ཁང་དང་གཙུག་ལག་ཁང་དང་ཚོང་ཁང་དག་གི་གཞི་ལ་སོགས་པ་ལྟ་བུ་སྟེ། ཞིང་རྐུ་བའི་རྩིས་མགོ་ལྟ་བུ་དང་འདྲའོ། །གྲུ་དང་ཞེས་པ་ནི་གྲུ་རྐུ་བ་
ལ་རྣམ་པ་བཞི་སྟེ། ཆུའི་རྒྱུན་དུ་རྐུ་བ་དང༌། རྒྱུན་ལས་གྱེན་དུ་རྐུ་བ་དང༌། ཐད་ཀར་རྐུ་བ་དང༌། བཅིངས་པའི་རྒྱུན་དུ་རྐུ་བའོ། །ཐད་ཀར་རྐུ་བ་ནི་མི་སྣང་བའི་ཚད་ཀྱིས་བཟུང་ངོ༌། །གྱེན་དུ་རྐུ་བ་ནི་གྲུ་གང་འཕགས་པས་ཕམ་གྱི། མ་ངེས་པ་ནི་ཆུའི་ནང་དུ་ནུབ་པས་ཕམ་མོ། །ཤིང་ཞེས་པ་ནི་ལོ་མ་ལ་སོགས་པ་བཟང་པོ་སྐྱེ་བའི་ཤིང་དང༌། ཡང་ན་ཤིང་དག་གོ །ཤོག་མ་དང་ཞེས་པ་ནི་བདག་གི་ཤོ་གམ་འདས་ན་རིན་ཐང་བརྩི། གཞན་གྱི་བདག་གིས་བཟླས་ཏེ་བླངས་ན་ཡང་རིན་ཐང་བརྩི་བདག་ཉིད་ཀྱི་ནོར་མ་ཡིན་ཏེ། དཀོན་མཆོག་དང་ཕ་མ་ལ་སོགས་པ་ནི་ཉེས་བྱས་སུ་འགྱུར་རོ། །དེ་བཞིན་གྲུ་ཡི་བཙས་རྣམས་དང༌། །ཞེས་པ་ནི་གོང་མའི་ཤོ་གམ་བཞིན་དུ་སྒྲོལ་གྲུ་འདས་པའམ་དབྱར་དབབ་པའི་ཕྱིར་གྲུ་ལ་བདག་གྱེན་དུ་འམ་ཆུ་འབྱམ་དང་ཐད་ཀར་ཡང་རུང་སྟེ། ཞོན་ལ་མ་བྱིན་པ་ལ་རིན་ཐང་བརྩིའོ། །སྲོག་ཆགས་རྐང་པ་མེད་པ་དང༌། །ཞེས་པ་ནི་དངོས་སུ་སྦྲུལ་ལྟ་བུ་སྟེ། དེ་ཡང་རྒྱལ་པོའི་གཉེར་བ་ལ་ནན་ཏུར་དག་བྱ་བའི་དགོས་པ་དང༌། འཚེ་བའི་ཕྱིར་ཏེ་ནེའུ་ལེ་དང་སྦྲུལ་འཐབ་པ་དག་མཛའ་བར་བྱས་ནས་འཚོ་བ་ཚོལ་ཏེ་དེ་ལྟ་བུ་བརྐུས་ན་རིན་ཐང་བརྩིའོ། རྐང་གཉིས་ཞེས་པ་ནི་མི་དང་བྱ་སྟེ། དེ་ལ་བྱ་ནི་ཁྲའམ་ལོངས་སྤྱོད་ཀྱི་ཕྱིར་ཁྲུང་ཁྲུང་དང་ངང་པ་ལ་སོགས་པའི་གསོན་མ་དག་གོ །མི་ནི་མཚན་མ་དང༌། དུས་དང་གནས་སུ་ཕྱིན་པས་བསམ་མོ། །བྱ་ནི་རྐུ་བའི་ཕྱིར་སྒྲོགས་པའམ་གནས་ས་ནས་བདག་གི་གནས་སུ་སྦུར་བས་ཕམ། རྐང་མངས་རྐུབ་དང་ཞེས་པ་ནི་རྐང་པ་བཞི་པ་ཡན་ཆད་ལ་བྱ་སྟེ། སྦྲང་སེར་དང་སྲིན་བུ་པད་པ་དང་སྡིག་པ་དག་གོ །དེ་ལ་སྦྲང་སེར་ནི་རྒྱ་མཚོར་དགོས་སོ། །སྲིན་བུ་ནི་སྨན་པ་ལ་དགོས་སོ། །སྡིག་པ་ནི་རྒྱལ་པོའི་ནན་ཏུར་དུ་དགོས་སོ། །བརྟུལ་ཞུགས་ཅན་གྱིས་ཞེས་པ་ནི་བསླབ་ཚིགས་བཅུ་ལ་ཞུགས་པའོ། །མིའི་ནོར་ཞེས་པ་ནི་མདོར་བསྡུས་ཏེ་མིའི་ནོར་དུ་གཏོགས་སོ་ཅོག་གིས་སྡུམ་པ་བཞི་པར་འགྱུར་རོ། །དབྱིག་ལས་ཞེས་པ་ནི་རིན་པོ་ཆེ་ལ་སོགས་པའི་ནོར་ཆེན་པོའོ། །སྩོགས་པ་ཞེས་པ་ནི་གསེར་དང་དངུལ་དང་གཡུ་དང་མུ་ཏིག་དང་དར་ཟབ་ལ་སོགས་པ་ཆུང་དུ་ཡན་ཆད་ཀྱང་བསྡུའོ། །གང་ཡང་རུང་བ་ཞེས་པ་ནི་མདོར་བསྡུས་པའི་ཚིག་གོ །རྐུ་བའི་སེམས་ཀྱིས་གང་བརྐུས་
ཀྱང། །ཞེས་པ་ནི་མཛའ་ཡང་རུང་མི་མཛའ་ཡང་རུང་སྐད་ཅིག་ཙམ་བླངས་པ་ལ་སོགས་ཏེ། རྐུ་སེམས་ཡོད་ན་སྡོམ་པ་ཞིག་པར་འགྱུར་བས། དེ་ལྟར་ཁྱད་པར་དུ་དབྱེ་བའི་ཕྱིར་རྐུ་སེམས་དང་ལྡན་པའི་འདུ་ཤེས་ཀྱིས་མིའི་ནོར་དུ་གཏོགས་པ་གང་ཡང་རུང་འོག་ནས་འབྱུང་བ་བཞིན་དུ་འགྱུར་རོ། །རིན་ཐང་ཚང་ན་སྡོམ་པ་ཞིག །ཅེས་པ་ནི་དངུལ་སྐྱ་ཞོ་གཅིག་གི་བརྒྱུད་པ་ཚང་ན་སྡོམ་པ་ཞིག་པར་འགྱུར་རོ། །ལྷུང་བཟེད་ལ་སོགས་རྐུན་ཁྱེར་ནས། །ཞེས་པ་ནི་འཚོ་བའི་ཡོ་བྱད་ཀྱི་མཆོག་ནི་ལྷུང་བཟེད་དང་ཆོས་གོས་དག་ཡིན། དེ་དག་རྐུན་པོས་ཁྱེར་ན་ཐབས་འོག་ནས་འབྱུང་བ་བཞིན་དུ་བྱའོ། །ཆོས་བཤད་ནས་ནི་བསྒྲུབ་པར་བྱ། །ཞེས་པ་ནི་རྐུན་པོ་ལ་གདོང་ལ་དེ་ནི་དགོས་པ་ལ་ཁྱེར་ལ་ནོར་ཆེན་པོ་མི་རུང་ན་ཕྱིར་བྱིན་ཅིག་ཅེས་བྱ་སྟེ། བྱིན་ན་ནི་ལེགས་ཏེ་དེ་མ་བྱིན་ན་འདི་སྐད་ཅེས་བྱའོ། །འདི་དག་བརྐུས་ནང་ན་སོང་གསུམ་དུ་འགྲོ་བ་ལ་སོགས་པ་བཞིན་དུ་བཤད་དོ། །ཡང་ན་རི་བའི་རིན་གྱིས་བླུ། །ཞེས་པ་ནི་འདི་ལྟར་བྱས་ན་ཤིན་ཏུ་སྡུག་བསྔལ་བར་འགྱུར་གྱིས་སླར་བྱིན་ཅིག་ཅེས་བྱའོ། །དེ་སྟེ་མི་སྟེར་ན་རི་བའི་རིན་གྱིས་བླུའོ། །དེ་ལྟར་མ་བྱས་ཉེས་བྱས་འགྱུར། །ཞེས་པ་ནི་དགེ་སློང་གིས་ཡོ་བྱད་དཀོན་པའི་ཕྱིར་དེ་ལྟར་མ་བྱས་པར་བླངས་ན་ཉེས་བྱས་པའི་དམིགས་པ་ནི་སེམས་ཐག་མ་ཆད་པ་ལས་བྱེ་བྲག་ཏུ་བྱས་ཏེ་བཤད་པ་ཡིན་ནོ། །འདི་ཆེད་དུ་མ་བྱིན་པར་ལེན་པ་འདས་སོ།། །།ད་ནི་མི་ཚངས་པར་སྤྱོད་པ་འཆད་དེ། དེ་ཡང་ཡན་ལག་གསུམ་དང་ལྡན་ན་ཕམ་སྟེ། གང་ཞེ་ན། བཅུག་པ་དང༌། རེག་པ་དང༌། དགའ་བར་ཚོར་བ་གསུམ་དང་ལྡན་པར་ཕོའི་སྒོ་གཉིས་དང་མོའི་སྒོ་གསུམ་སྟེ། གང་དུ་སྤྱད་ཀྱང་བསམ་པ་གཅིག་དང་མི་ལྡན་ན་ཉེས་བྱས་སོ། །དེ་ལ་དང་པོ་བཅས་པ་ནི་སངས་རྒྱས་ཤཱཀྱ་ཐུབ་པ་མངོན་པར་བྱང་ཆུབ་སྟེ། ཉན་ཐོས་ཀྱི་འཁོར་དང་ལྡན་ནས་ལོ་བཅུ་གཉིས་ཀྱི་བར་དུ་ཐམས་ཅད་ཀྱང་ཚངས་པར་སྤྱོད་པ་ལ་གནས་ཏེ་ལྟུང་བ་མེད་དོ། །ལོ་བཅུ་གསུམ་ལ་འདས་ནས་བབ་པའི་ཚེ་ཚོང་དཔོན་གྱི་བུ་བཟང་སྦྱིན་གྱིས་མི་ཚངས་པར་སྤྱད་པ་ལས་ལྟུང་བ་དང་པོ་བཅས་པའོ། །སྡོམ་ཅན་ཞེས་པ་ནི་ཚུལ་ཁྲིམས་བསྲུངས་ཏེ་མ་ཞིག་པར་གནས་པའི་སྡོམ་པ་དང་ལྡན་པས་སྡོམ་པ་
ཅན་ཞེས་བྱའོ། །ཉམས་པ་མེད་སེམས་ཀྱིས་ཞེས་པ་ནི་རྣམ་པ་བཞི་ལྟ་བུ་སེམས་ཀྱང་མ་ཉམས་པ་སྟེ། བཞི་གང་ཞེ་ན། འདྲེ་གདོན་ལ་སོགས་པས་བྱིན་གྱིས་བརླབས་ནས་མྱོས་པ་ལྟ་བུ་མ་ཡིན་པ་དང༌། འབྱུང་བ་ཆེན་པོ་བཞིའི་ཁམས་ཉམས་པར་གྱུར་པ་མ་ཡིན་པ་དང༌། སྔོན་གྱི་ལས་ཀྱི་རྣམ་པར་སྨིན་པ་མ་ཡིན་པ་དང༌། གནད་དུ་བབ་སྟེ་བརྒྱལ་བ་ལྟ་བུ་མ་ཡིན་པ་སྟེ། མདོར་ན་སེམས་དྲན་པ་གསལ་བཞིན་དུ་འོག་མ་ལྟར་བྱས་ན་ཉེས་པར་འགྱུར་རོ། །ཉམས་པ་མེད་པའི་སྒོ་གསུམ་དུ། །ཞེས་པ་ནི་སྐྱེས་པ་ལ་ནི་སྒོ་གཉིས། སྒོ་དེ་དག་མེས་ཚིག་པ་ལྟ་བུའམ། རུལ་བ་ལྟ་བུའམ། ཞིག་པའམ། འབུ་ཞུགས་པ་ལྟ་བུར་མ་གྱུར་པར་འོག་ནས་འབྱུང་བ་བཞིན་དུ་བྱས་ན་ཉེས་པར་འགྱུར་རོ། །ཆགས་པས་ནང་དུ་ནོར་བུ་འདས། །ཞེས་པ་ནི་འདོད་ཆགས་དང་ལྡན་པའི་སེམས་ཀྱིས་བྱས་ནས་ཁའི་ནང་དུ་སོ་ལས་འདས་པ་དང༌། རྐུབ་ནི་འཛུམས་པའི་མཚམས་འདས་པ་དང། མོ་མཚན་ནི་ཕྱི་ཤུན་གྱི་མཚམས་སུ་ནོར་བུ་ནུབ་ཅེས་པས་མཚམས་འདས་ཞེས་བྱའོ། །དགའ་བར་ཚོར་ན་བརྟུལ་ཞུགས་ཉམས། །ཞེས་པ་ནི་བདག་གིར་བྱས་ན་ཞེས་བྱ་བའི་དོན་ཏོ། །ཕས་བྱེད་དམ་ཚུས་བྱེད་ཀྱང་རུང་སྟེ། ཉམས་སུ་ལེན་ན་སྡོམ་པ་ཞིག་གོ །དགེ་སློང་མ་ནི་ཕས་བྱེད་པ་བཅབས་པ་ཡོད་དོ། །དེས་ན་ཁས་བླང་ཞིང་ཉམས་སུ་ལེན་ན་སྡོམ་པ་ཞིག་གོ །སྐྱེས་པ་ཞེས་པ་ནི་དགེ་སློང་མ་ནི་སྐྱེས་པའོ། །ཡང་ན་དགེ་ཚུལ་ཕས་སྐྱེས་པ་ཉིད་ལ་བྱའོ། །བུད་མེད་ཅེས་པ་ནི་དགེ་ཚུལ་ཕ་ནི་དགེ་ཚུལ་ཕ་ལ་བུད་མེད་ཀྱིས་སོ། །མ་ནིང་གིས་ཞེས་པ་ནི་མ་ནིང་ལྔ་སྟེ། མཚན་གཉིས་པ་དང༌། ཟླ་བ་ཕྱེད་ཅིང་འགྱུར་བ་དང༌། མཚན་མ་དང་གསུམ་མོ། །མཚན་ཁང་བོར་ཏེ་མནན་པ་ལས། །ཞེས་པ་ནི་གོང་མ་གསུམ་གྱི་མཐུ་རྩལ་གྱིས་མནན་ཏེ་མི་ཚངས་པར་སྤྱོད་པའོ། །གང་གིས་བདེ་བའི་རོ་མྱོང་བ། །ཞེས་པ་ནི་གང་གིས་ཉམས་སུ་བླངས་ཏེ་དགའ་བར་ཚོར་བའོ། །དེས་ནི་སྙོམ་པ་ཞིག་པར་འགྱུར། །ཞེས་པ་ནི་ཚོར་བ་དེ་ཡང་ཚུལ་ཁྲིམས་མེད་པར་རོ། །ཡན་ལག་སྐྱེས་ནས་ཞེས་པ་ནི་ཕེ་མཚན་འདོད་ཆགས་ཀྱི་ཡན་ལག་སྐྱེས་པ་ཞེས་བྱའོ། །བདེ་བ་འདོད་པས་ཞེས་པ་ནི་འདོད་ཚགས་འདོད་པ་དེ་ཞི་བར་བྱ་བའི་བདེ་བ་འདོད་པ་དང་
དགའ་བར་ཚོར་བའི་བདེ་བ་འདོད་པ་ལ་བྱའོ། །གདུག་པ་སྦྲུལ་གྱི་ཁར་བཅུག་པ། །ཞེས་པ་ནི་ཚུལ་ཁྲིམས་དང་བྲལ་ན་གསོན་ཡང་མི་རུང་སྟེ། དེ་བས་ན་འདོད་ཆགས་ཀྱི་ཉོན་མོངས་པ་དེ་བཟློག་པའི་ཕྱིར་གསུངས་པས་སྦྲུལ་གདུག་པ་རྣམ་པ་གཉིས་ཡོད་དེ། སྒོ་གསུམ་གྱི་སྦྲུལ་དུག་ཅན་ནོ། །དེ་ལ་སྦྲུལ་དུག་ཅན་གྱི་ཁར་བཅུག་སྟེ་ཤི་བ་ནི་ཤི་ཡང་མ་ཤི་ཞེས་བྱའོ། །སྒོ་གསུམ་གྱི་སྦྲུལ་གདུག་པ་ཅན་གྱི་དབང་དུ་གྱུར་ནས་ཚུལ་ཁྲིམས་ཉམས་པ་ནི་ཚེ་རབས་དུ་མར་སྦྲུལ་གྱིས་ཟིན་པར་གྱུར་བསམ་ཤིན་ཡང་ཤི་བ་ཞེས་བྱའོ། །ལུས་ལ་དགའ་ཐུབ་མི་ཞིག་ཅེས་པ་ནི་ལུས་ཀྱི་དཀའ་ཐུབ་གསུམ་ལས་སྐབས་འདིར་ནི་ཚངས་པར་སྤྱོད་པ་ལ་བྱ་སྟེ། དོན་དུ་ན་སྦྲུལ་གདུག་པའི་ཁར་བཅུག་ཀྱང་བླའི། སྡོམ་པ་ཅན་གྱིས་ནམ་དུ་ཡང་ནི་མི་ཚངས་པར་མི་སྤྱོད་དོ། །རྫོགས་སངས་རྒྱས་ཀྱིས་བཀའ་སྩལ་ཏོ། །ཞེས་པ་ནི་དེ་སྐད་ཅེས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀྱིས་བཀའ་སྩལ་ཏོ། །གལ་ཏེ་སྦྲུལ་གྱིས་བསད་གྱུར་ཀྱང༌། །ཞེས་པ་ནི་སྦྲུལ་གདུག་པའི་ཁར་བཅུག་ནས་འཆི་སྟེ་འཆི་བར་གྱུར་ཀྱང་ངོ༌། །ཚུལ་ཁྲིམས་གནས་ལ་དེ་ཕན་ཏེ། །ཞེས་པ་ནི་དེས་ཤི་ན་ཡང་ཚུལ་ཁྲིམས་མི་འཇིག་སྟེ། མེད་པས་མེད་འགྱུར་བས་མཐོ་རིས་སུ་སྐྱེས་པས་ན་དེ་ནི་ཕན་པ་ཞེས་བྱའོ། །ཚུལ་ཁྲིམས་ཉམས་པ་སྡུག་བསྔལ་ཡིན། །ཞེས་པ་ནི་ཆོས་ལ་གནས་པས་མྱུར་དུ་བདག་ཤི་བླའོ། །ཆོས་ལ་རྒྱབ་ཀྱིས་ཕྱོགས་པའང་ཅིར་མི་རུང༌། །ཆོས་གནས་སུམ་ཅུ་རྩ་གསུམ་ལྷ་ཡི་བདེ་བ་འཐོབ། །ཆོས་ཐོབ་བྲལ་བ་མྱུར་དུ་ངན་སོང་འཇིགས་ལྟུང་ངོ༌། །ཁྱིམ་བདག་དེ་ན་ཕས་མི་རྒོད་བརྒྱད་ཅུ་ལ་སྨྲ་བ་དེ་ལྟ་བུ་སྟེ། ཚུལ་ཁྲིམས་མེད་པ་དེ་ནི་སྡུག་བསྔལ་ཡིན་ཏེ། མྱ་ངན་ལས་འདས་པ་ལ་སྒྲིབ་པར་འགྱུར་རོ། །དེ་ལྟ་བས་ན་ཚུལ་ཁྲིམས་དང་མི་ལྡན་པའི་དགེ་སྦྱོར་ནི་ཁང་པ་ཕུག་རྡོལ་ཅན་མེས་ཚིག་པའི་མགལ་དུམ་དང་འདྲའོ། །མྱ་ངན་འདས་ལ་སྒྲིབ་པར་འགྱུར། །ཞེས་པ་ནི་དེ་ལྟར་ཚུལ་ཁྲིམས་ཞིག་པར་གྱུར་ན་ངན་སོང་དུ་ལྟུང་བ་འབའ་ཞིག་ཏུ་ཡང་མ་ཟད་དེ། མྱ་ངན་ལས་འདས་པའི་བར་དུ་ཡང་གཅོད་པར་འགྱུར་རོ། །དེ་འཁོར་བའི་ཡན་ལག་ཐམས་ཅད་ལ་ཡང་མི་ཚངས་པར་སྤྱོད་པ་ཞེས་བྱའོ། །མདོར་
ན་སེམས་བྱང་བའི་ཐབས་ཙམ་དུ་གསུངས་སོ། །ཇི་ལྟར་ཞེ་ན། ལུས་ཀྱིས་དཔྱད་དུ་མེད་ན་ཡིད་ཀྱིས་བརྟགས་པ་མང་དུ་མི་བྱེད་པའི་ཕྱིར་རོ། །འདི་ཡན་ཆད་དུ་མི་ཚངས་པར་སྤྱོད་པའི་བཤད་པ་འདས་སོ།། །།ད་ནི་བརྫུན་དུ་སྨྲ་བ་འཆད་དེ། དེ་ཡང་ཡན་ལག་ལྔ་དང་ལྡན་ན་ཕམ་སྟེ། ལྔ་གང་ཞེ་ན། བླ་མའི་ཆོས་ཡིན་པ་དང༌། འདུ་ཤེས་བསྒྱུར་བ་རང་ཉིད་ཀྱིས་ཁར་སྨྲས་པ་དང༌། ངས་ཐོབ་བོ་ཞེས་བརྗོད་པ་དང་ལྡན་པ་དང༌། གཞན་གྱིས་དོན་གོ་བའོ། །ཡན་ལག་འདི་ལྔ་དང་ལྡན་ན་བསམ་གཏན་དང༌། མངོན་པར་ཤེས་པ་དང༌། དགེ་སྦྱོང་གི་འབྲས་བུ་བཞི་ལ་སོགས་པ་ཐོབ་པོ་ཞེས་པ་ནས་ལྷ་དང་ཀླུ་ལ་སོགས་པ་མཐོང་ངོ་ཞེས་བྱ་བའི་བར་དུ་སྨྲས་ན་ཕམ་པར་འགྱུར་རོ། །ཡན་ལག་གཅིག་དང་མི་ལྡན་ན་ཉེས་བྱས་སུ་འགྱུར་རོ། །དེ་ལ་དང་པོ་བཅས་པ་ནི་སངས་རྒྱས་ཡུལ་ཡངས་པ་ཅན་གྱི་འོད་མའི་གྲོང་འདབ་ན་བཞུགས་པའི་ཚེ། ཉ་པ་ལྔ་བརྒྱལ་དེ་བཞིན་གཤེགས་པས་ཆུ་སྲིན་ཉའི་རིགས་ཀྱི་རྣམ་པར་སྨིན་པ་བཤད་པ་ལས་སེམས་གཡོས་ཏེ། དགེ་སློང་དུ་གྱུར་པ་ལྔ་བརྒྱ་པོས་དེ་མུ་གེ་ཆེན་པོ་ཞིག་བྱུང་སྟེ། ཉ་པའི་རིགས་ཀྱི་གྲོང་འདབ་དུ་སྤྱོད་པ་བཅས་ནས་བདག་ཅག་གཅིག་གིས་གཅིག་ཡོན་ཏན་མེད་པར་བསྟོད་པ་ལས་བཅས། ལྷ་དག་ཀུན་སྨྲ་དང་ཞེས་པ་ནི་ལྷ་དང་ཕན་ཚུན་ལྷན་ཅིག་གཏམ་བྱས་ཏེ། དེ་དང་བདེ་བར་གནས་པ་ལ་སོགས་པ་ན་གཉེན་དང་མཛའ་བའི་ཚུལ་དུ་སྨྲ་བ་ལ་སོགས་པའོ། །གང་ན་བདག་འདུག་ལྷའོ་ཞེས་པ་ནི་ང་གང་ན་བར་ལྷ་དག་འོང་ཞེས་ཟེར་བའོ། །མཐོང་ཞིང་ཞེས་པ་ནི་བདག་གིས་ལྷ་མཐོང་བ་དང༌། ལྷས་ཀྱང་བདག་མཐོང་ཞེས་པའོ། །དེའི་སྒྲ་ཞེས་པ་ནི་གཅིག་གི་སྒྲ་གཅིག་གིས་ཐོས་པའོ། །ཐོས་པར་གྱུར་གང་ཞེས་པ་ནི་ལྷས་སྨྲས་པ་བདག་གིས་ཐོས་པ་དང༌། བདག་གི་སྒྲ་ལྷས་ཐོས་ཞེས་ཟེར་བའོ། །བདག་ཀྱང་དེ་དག་གམ་འགྲོ་དང༌། །ཞེས་བ་ནི་ང་ལྷའི་གན་དུ་འགྲོའོ་ཞེས་ཟེར་བའོ། །དེ་བཞིན་ཞེས་པ་ནི་གང་ཇི་ལྟར་བདག་གིས་ལྷ་མཐོང་བ་དང༌། དེ་དང་གཏམ་བྱས་ཞེས་པ་ནི་ལྷན་ཅིག་འགྲོགས་ནས་ཟེར་བ་དེ་བཞིན་སྨྲའོ། །དྲི་ཟ་ཞེས་པ་ནི་དྲིས་བཅོས་པས་ན་དྲི་ཟ་ཞེས་བྱའོ། །གྲུལ་བུམ་ཞེས་པ་ནི་ཡི་དགས་གླུགས་པ་ཆེན་པོའོ། །ཀླུ་ཞེས་པ་ནི་བྱོལ་
སོང་གི་རྒྱལ་པོའོ། །གནོད་སྦྱིན་ཞེས་པ་ནི་གནོད་སྦྱིན་མདོག་དང་མདངས་འཕྲོག་པའོ། །ལོ་འཕྱེ་ཆེན་པོ་དང་ཞེས་པ་ནི། སྦྲུལ་ལྟ་བུ་གསུས་པས་འགྲོ་བའོ། །ཤ་ཟ་ཡི་དགས་ཞེས་པ་ནི་དངོས་སུ་ཟད། མིའམ་ཅི་ཞེས་པ་ནི་མིའི་ལུས་ལ་རྟ་མགོ་ཅན་ནོ། །མཐོང་ངོ་ཞེས་ལ་སོགས་པ་སྨྲའོ་ཞེས་པ་ནི་དྲི་ཟ་ནས། མི་འམ་ཅིའི་བར་དུ་མིང་གིས་སྨོས་པ་དེ་དག་བདག་གིས་མཐོང་ངོ༌། །དེ་དག་གིས་ཀྱང་བདག་མཐོང༌། དེ་དག་དང་ཡང་ལྷན་ཅིག་ཏུ་འགྲོགས་སོ་ཞེས་ཟེར་བའོ། །བསམ་གཏན་ཞེས་པ་ནི་གཟུགས་ཀྱི་བསམ་གཏན་བཞི་དང༌། གཟུགས་མེད་པའི་བསམ་གཏན་བཞི་པ་སྟེ། འཇིག་རྟེན་གྱི་བསམ་གཏན་བརྒྱད་དོ། །མངོན་ཤེས་ཞེས་པ་ནི། མངོན་པར་ཤེས་པ་ལྔ་འམ་དྲུག་གོ །ཚད་མེད་དང་ཞེས་པ་ནི་ཚད་མེད་པ་བཞིའོ། །རྒྱུན་ཞུགས་ལ་སོགས་འབྲས་བུ་དང༌། །ཞེས་པ་ནི་ཁམས་གསུམ་གྱི་ཉོན་མོངས་པ་མཐོང་བས་སྤང་བར་བྱ་བ་བརྒྱ་རྩ་བརྒྱད་སྤངས་པས་རྒྱུན་དུ་ཞུགས་པའོ། །འདོད་པའི་ཁམས་ཀྱི་བསྒོམ་པར་བྱ་བའི་ཉོན་མོངས་པ་དགུ་སེལ་བས། དྲུག་སྤངས་པ་ནི་ལན་ཅིག་ཕྱིར་འོང་བའོ། །འདོད་པའི་ཁམས་ཀྱི་དགུ་ཆར་སྤངས་པ་ནི། ཕྱིར་མི་འོང་བའོ། །སྲིད་པའི་རྩེ་མོ་མན་ཆད་ཀྱི་ཉོན་མོངས་པ་ཐམས་ཅད་སྤངས་པ་ནི་དགྲ་བཅོམ་པའོ། །ལམ་ལ་རབ་ཏུ་ཞུགས་པའང་རུང་ཞེས་པ་ནི་འཕགས་པའི་ལམ་ཡན་ལག་བརྒྱད་ཐོབ་བོ་ཞེས་བྱ་བ་ལ་སོགས་པའོ། །བདག་གིས་ཐོབ་ཅེས་སྨྲ་ན་ནི་ཞེས་པ་ནི་མི་ལས་བླ་མའི་ཆོས་གང་སྨྲ་བ་དེ་གོང་དུ་བཤད་པའི་ཡོན་ཏན་དེ་ལྟ་བུ་ལ་སོགས་པ་དག་མ་ཐོབ་པར་ཐོབ་ཅེས་སྨྲ་བའོ། །དོན་རིག་པ་ལ་བརྫུན་པའི་ཚིག་ཅེས་པ་ནི་ཕ་རོལ་པོ་དེ་བས་སམ། གླེན་པའམ་བྱིས་པ་ལ་སོགས་པ་ཡིན་ཏེ། ཚུལ་སྨྲ་བ་ལ་འདུ་ཤེས་སྦས་ཏེ། དེས་ཀྱང་དེ་དང་པར་ཤེས་པའམ། རིག་པའི་འདུ་ཤེས་མེད་པར་སྦས་ལ་དོན་གཞན་དུ་འདུག་ལ་ཚིག་གཞན་དུ་སྨྲ་བའོ། །ཁྱད་པར་ཐོབ་པའི་ཞེས་པ་ནི་གོང་མ་ལྟར་ཡོན་ཏན་རྣམ་པ་དེ་དག་ཅིག་ལྟོས་ནས་ཁྱད་པར་དུ་སྨྲ་བའོ། །བདག་ཉིད་ཅན་ཞེས་པ་ནི་དེ་དང་ལྡན་པའི་བདག་ཉིད་དུ་གྱུར་ཏོ་ཞེས་ཟེར་ནའོ། །མ་ཉམས་ཞེས་པ་ནི་མི་དྲན་པར་ཡང་མ་གྱུར་ཏེ། སེམས་ཉམས་པའོ། །ང་རྒྱལ་མེད་བཞིན་དུ་ཞེས་པ་ནི་
མངོན་བའི་ང་རྒྱལ་ཏེ་སྔོན་དགེ་སྦྱོང་དགོན་པའི་ཡུལ་མངོན་སུམ་དུ་བྱུང་བའི་ཕྱིར་ང་རྒྱལ་སྐྱེས་པ་མ་ཡིན་པས་གདེང་མེད་བཞིན་དུ་འོག་མ་ལྟར་སྨྲས་ན་ཉེས་པར་འགྱུར་རོ། །སྨྲས་ན་སྡོམ་པ་ཉམས་པར་འགྱུར། །ཞེས་པ་ནི་སྨྲས་ཏེ་ཕ་རོལ་པོས་དོན་གོ་ན་ཚུལ་ཁྲིམས་མེད་པར་འགྱུར་རོ། །འདི་མན་ཆད་ནི་སྡོམ་པ་ཞིག་པར་མི་འགྱུར་བའི་ཡན་ལག་སྟོན་ཏོ། །ཁྱད་པར་ཐོབ་པ་མ་གཏོགས་པ། །ཞེས་པ་ནི་གོང་དུ་སྣོས་པ་ལྟག་མཐོང་ལ་སོགས་པ་དག་ནི་བསམ་གཏན་ལ་བརྟེན་ནས་མཐོང་བར་འགྱུར་བའི་ཕྱིར། ཁྱད་པར་འཐོབ་དང་གདེང་ཡོད་པ། །དེས་སྨྲས་ན་ནི་ཉེས་པར་མི་འགྱུར་རོ། །དེ་ལས་གཞན་པའི་བརྫུན་ཚིག་རྣམས། །ཞེས་པ་ནི་གོང་དུ་སྨོས་པ་མ་གཏོགས་པར་གཞན་ཅི་ཡང་རུང་བའི་བརྫུན་ཚིག་ནི་བསམ་གཏན་ལ་བརྟེན་ཏེ་མཐོང་བར་མི་དགོས་པ་མཐོང་བ་དང༌། ཤེས་པར་རུང་བ་སྡོམ་པ་ཞིག་པར་མི་གཞག་སྟེ། རྩ་བ་བཞི་ཆར་ཡང་ཉེས་པར་མི་འགྱུར་བར་དབྱེའོ། །འདིར་ཡང་ཉེས་པར་འགྱུར་བར་དབྱེ་སྟེ། གོང་མ་ལས་བརྫུན་ཕྲན་ཚེགས་ཕྱག་དར་ཁྲོད་ན་ཤ་ཟ་དག་མཐོང་ངོ་ཞེས་བྱ་བ་དང༌། ཤེས་བཞིན་གྱིས་བརྫུན་ཕྲན་ཚེགས་དག་སྨྲས་ན་ཉེས་པའི་དམིགས་འོག་མ་ལྟར་འགྱུར་རོ། །དེ་དག་ཐམས་ཅད་སྡིག་མང་འགྱུར། །ཞེས་པ་ནི་དེ་དག་སྨྲས་ན་བསོད་ནམས་མ་ཡིན་པ་མང་དུ་འཕེལ་ཏེ། དེས་ངན་སོང་དུ་ནི་ཁྲིད་པར་བྱེད་ལ་སྡོམ་པ་ནི་འཇིག་པར་མི་འགྱུར་རོ། །དེས་ནི་འོག་མར་ལྟུང་བར་བྱེད། །ཅེས་པ་ནི་ཤེས་བཞིན་དུ་བརྫུན་གྱི་ཚིག་སྨྲས་པ་དེས་ནི་མི་ལས་འོག་མ་གསུམ་དུ་ལྟུང་བར་བྱེད་དོ།། །། འདི་མན་ཆད་ནི་ཕྲ་མོའི་ཉེས་པ་འཆད་དེ། ཇི་ལྟར་མཛའ་བོད་བྱེ་འགྱུར་བའི། །ཞེས་པ་ནི་མི་གཉིས་ཡིད་མཐུན་ཞིང་མཛའ་བ་ད་ལ་ཐབས་གང་གིས་དབྱེ་བར་འགྱུར་བའི་ཚིག་འོག་མ་ལྟ་བུའི་ཚིག་སྨྲས་སོ། །ཕྲ་མའི་ཚིག་རྣམས་སྨྲ་མི་བྱ། །ཞེས་བྱ་བ་ནི་ཞེ་སྡང་གིས་དབྱེ་བའི་ཕྱིར་ཚིག་བདེན་པ་ཡང་རུང་བརྫུན་པ་ཡང་རུང་སྟེ། ཕན་ཚུན་བསྐྱལ་ཞིང་སྨྲ་བར་མི་བྱའོ། །ཕྲ་མ་ལ་རྣམ་པ་གཉིས་ཏེ་ཞེ་སྡང་གིས་དབྱེ་བ་དང༌། ཕན་པར་བྱ་བའི་ཕྱིར་དབྱེ་བ་སྟེ། དེ་ལ་ཕན་པར་བྱ་བའི་ཕྱིར་དབྱེ་བའི་ཕྲ་མ་ཟེར་པ་ནི་ཉེས་པར་མི་གཞག་གོ །འདི་དག་ནི་དགེ་ཚུལ་གྱི་ཁྲིམས་ཀྱི་དངོས་པོ་མ་ཡིན་མོད་
ཀྱི། ངག་གི་ཉེས་པ་སྤང་བའི་སྐབས་སུ་དགེ་བ་བཅུའི་རྒྱུད་ཀྱིས་བསྡམས་ནས་ངག་གི་སྐྱོན་འདི་དག་སྤང་བར་བསྟན་ཏོ། །ཐུན་ཚགས་སུ་ནི་སྨྲ་བ་དང༌། །ཞེས་བྱ་བ་འདི་ཚིག་རྐང་འདིས་ཐུན་ཚགས་སུ་སྨྲ་བ་འཆད་དེ། དགོས་པའི་དོན་མེད་པར་སྒྲུང་གཏམ་དང༌། ལྡེའུ་དང། གླུ་ཚིག་དང༌། སྙན་ངག་དང༌། གར་དང༌། བྲེ་མོ་གཏམ་དང༌། བོན་སྨྲ་བ་ལ་སོགས་པ་སྨྲས་པའོ། །ཚིག་རྩུབ་སྨྲ་བར་མི་བྱའོ། །ཞེས་བྱ་བ་ནི་ཕ་རོལ་ཞེས་འདེ་བས་པའི་ཚིག་དག་སྨྲ་བར་མི་བྱའོ། །འདི་མན་ཆད་ནི་དགེ་སྦྱོང་གི་ཚུལ་བཞི་སྟོན་ཏེ། དེ་ལ་དགེ་སྦྱོང་དུ་གྱུར་ཏམ། དགེ་སྦྱོང་ཞེས་བྱ་བ་དེ་ཐོབ་ནས་འདི་དག་བསྲུང་དགོས་སོ། །ངན་དུ་ཟེར་ལའང་ངན་མི་བརྗོད། །ཅེས་བྱ་བ་ནི་ཕ་རོལ་ཚིག་ངན་པ་ཕའི་ཤ་ཟོ་ཞེས་ཟེར་བ་ལ་སོགས་པའི་ཚིག་ངན་པ་ཟེར་ཡང་ཚུལ་འདིའི་ལན་ཚིག་ངན་པའི་བག་ཟུར་ཡང་སྨྲ་བར་མི་བྱའོ། །གཤེ་ལ་ལན་དུ་སླར་མི་གཤེ། །ཞེས་བྱ་བ་ནི་ཕས་ཚུར་བདག་ལ་ངན་པ་འདི་ཞེས་པ་ལ་སོགས་པའི་ཚིག་ངན་པས་བརྒྱད་བཀག་ཀྱང༌། དེའི་ལན་གཤེ་བའི་ཚིག་དག་ཀྱང་མི་བྱའོ། །མཚང་འབྲུ་བ་ལ་སླར་མི་འབྲུ། །ཞེས་པ་ནི་ཕས་ཚུར་བདག་ལ་སྐྱོན་ཅི་ཡོད་པའི་བག་མཚང་འབྲུ་བ་དེ་ལ་སླར་དེའི་མཚང་འབྲུ་བག་ཙམ་ཡང་མི་བྱའོ། །རྡེག་པ་ལ་ཡང་སླར་མི་རྡེག །ཅེས་བྱ་བ་ནི་ཕས་ཚུར་མཚོན་ཆ་དང༌། དབྱུག་པ་ལ་སོགས་པ་དག་གིས་བདག་ལ་བརྡེག་ཀྱང་དེའི་ལན་དུ་རྡུལ་ཙམ་མི་བྱའོ། །བློ་ལྡན་ཞེས་བྱ་བ་ནི་བློ་དང་ཤེས་རབ་དང་རིག་པ་དང་རྟོགས་པ་དག་ནི་རྣམ་གྲངས་ཏེ། མདོར་ན་ཤེས་རབ་དང་ལྡན་ཞེས་བྱ་བའི་དོན་ཏོ། །བསླབ་པ་འདོད་པ་ཡིས་ཞེས་བྱ་བ་ནི་དེ་བཞིན་གཤེགས་པས་བསྟན་པའི་བསླབ་པའམ། ཚུལ་ཁྲིམས་དེ་ལ་དད་པས་སོ། །བསྒྲིམས་ཏེ་ཞེས་བྱ་བ་ཤིན་ཏུ་ནན་ཏན་དུ་འབད་དོ། །དག་གི་སྐྱོན་རྣམས་སྤང་ཞེས་པ་ནི་ཕ་རོལ་པོའི་ཡིད་མི་དགའ་བར་གྱུར་ན་བདག་ཀྱང་དེས་དམྱལ་བདག་ཏུ་ཁྲིད་པར་བྱད་པས་སྐྱོན་ཏེ། དེ་བས་ན་ངག་གི་སྐྱོན་རྣམས་སྤང་བར་བྱ་བ་ཐམས་ཅད་ལས་བྱུང་བས་ན་དང་པོ་ངག་གི་ཉེས་པ་བསྡམ་པར་བྱའོ། །དེ་ལྟར་འགྱུར་བར་རིག་ནས་ནི། །ཞེས་བྱ་བ་ནི་དེ་ལྟར་ངག་དེའི་ཉེས་པ་བཞི་ནི་བཤད་ད་འདས་སོ།། །།ད་ནི་ལྔ་བ་ལ་བབ་སྟེ། ཆང་མི་བཏུང་བ་འཆད་དོ། །འབྲུ་བཏགས་ཕབས་དང་སྦྱར་བ་ཡི། །ཞེས་བྱ་
བ་ནི་ས་བོན་བཏབ་ནས་ལོ་ཏོག་ལས་སྐྱེས་པའི་གྲོ་ནས་དང་འབྲས་ལ་སོགས་པ་ཀུན་བསྡུས་ཏེ། ལོ་ཏོག་ལས་བཏགས་པའི་ཆང་སྟེ། ཟན་ཆང་ལྟ་བུ་ཕབས་དང་སྦྱར་བ་ཆང་དུ་ཡང་གྱུར། ཆང་དུ་ཡང་འདུ་ཤེས། བདག་གིས་ཀྱང་འཐུངས། མྱོས་པར་ཡང་འགྱུར་ནའོ། །བཏུང་བའི་བྱེ་བྲག་འབྲུ་ཡི་ཆང། །ཞེས་བྱ་བ་ནི་ཆང་གི་རྣམ་གྲངས་ཏེ། རྐུན་འབྲུམ་དང༌། བུར་མ་སྤང་རྩི་ལས་ཆང་དུ་བྱས་པ་དང༌། མེ་ཏོག་དང་ལོ་ཏོག་ཐམས་ཅད་ཀྱི་ཆང་ངོ༌། །དེ་ལ་ཆང་ལ་རྣམ་པ་བཞི་སྟེ། ཁ་དོག་གི་ཆང་དང༌། དྲིའི་ཆང་དང༌། རོའི་ཆང་དང༌། མཆུ་ཆང་གི་དང་བཞིའོ། །དེ་ལ་མཐུ་དང་མི་ལྡན་པར་འཐུངས་པས་ནི་ཉེས་བྱས་ལ་བརྩིའོ། །གཞན་ཡང་རྣམ་པ་མང་དུ་འཆད་དེ། རྒྱ་གར་སྐད་ཀྱིས་པར་མ་འཐུངས་ན་ཉེས་པའོ་ཞེས་འཆད་དོ། །ཡང་རོ་ཅན་མི་བཏུང་སྟེ་འཐུངས་ན་ཉེས་བྱས་སོ་ཞེས་འཆད་དོ། །སྡོང་བུ་ཞེས་བྱ་བ་ནི་བུ་རམ་ཤིང་གི་ཆང་དག་གོ །མེ་ཏོག་གང་ཞེས་བྱ་བ་ནི་སྦྲང་ཆང་དག་གོ །འབྲས་བུ་ལས་ཞེས་བྱ་བ་ནི་རྒུན་ཆང་དག་བསྡུའོ། །སྦྱར་བའི་ཁུ་བ་འབྲས་བུའི་ཆང༌། །ཞེས་བྱ་བ་ནི་ཕབས་དང་སྦྱར་བའི་ཆང་ངོ༌། །དེས་ནི་མྱོས་པར་འགྱུར་རིག་ནས། །ཞེས་བྱ་བ་ནི་རྒྱ་གར་གྱི་སྐད་དུ་མར་ཏ་ཞེས་བྱ་སྟེ། བར་མ་དང་སྦྱོར་བར་འགྱུར་བ་ཀུན་མི་སྣང་སྟེ། དེ་ལ་མདོར་བསྡུས་ཏེ་སྨྲས་པའོ། །སྡོམ་ཅན་ཕན་འདོད་མི་བཏུང་ངོ༌། །ཞེས་བྱ་བ་ནི་ཚུལ་ཁྲིམས་ལ་གནས་པ་བདག་ལ་ཕན་པར་འདོད་པས་གོང་དུ་སྨྲས་པའི་ཆང་དེ་དག་མི་བཏུང་ངོ༌། །དེ་འཐུངས་ནས་ནི་ཞེས་བྱ་བ་ནི་འཐུངས་ན་ཅི་ཉེས་ཤེ་ན། གོང་མ་ལྟར་དུ་འགྱུར་རོ། །དྲན་པ་ཉམས་ན་ཞེས་བྱ་བ་ནི་མྱོས་པའི་བློར་འགྱུར་རོ། །བརྟུལ་ཞུགས་ལྡན་པ་བག་མེད་འགྱུར། །ཞེས་བྱ་བ་ནི་སྡོམ་པ་ལ་ཞུགས་པ། སྡོམ་པ་ལ་གནས་པ། སྡོམ་པ་དང་ལྡན་པ་དེ་ཚུལ་ཁྲིམས་ཞིག་པར་འགྱུར་རོ། །དཔེར་ན་ཆུང་བ་དགེ་བསྙེན་ཅིག་ལ་རྐྱལ་བྱ་བའི་ཕྱིར་ཆང་རྫེའུ་གང་དང་ལུག་ཅིག་བུད་མེད་ཅིག་ཁྲིད་དེ་འོངས་པ་ལས་ཆང་འཐུངས་པ་དང་ཁྲིམས་ལྔ་ཆར་དྲལ་བ་ལྟ་བུའོ། །བག་མེད་པ་ལས་བརྟུལ་ཞུགས་ཉམས། །ཞེས་བྱ་བ་ནི་གོང་མ་བསྣན་ཏེ་སྨྲས་པ་ཙམ་དུ་ཟད་དོ། །ཡང་ན་ཚུལ་ཁྲིམས་ཀྱི་ཡན་ལག་དང༌། བརྟུལ་ཞུགས་ཀྱི་ཡན་ལག་དང་གསུམ་ལུས་དང་ངག་གིས་བསྲུང་བ་སྟེ། ཕམ་པའི་གཞི་ནི་ཚུལ་ཁྲིམས་ཀྱི་ཡན་ལག་
གོ །གླུ་གར་དག་ནི་བརྟུལ་ཞུགས་ཀྱི་ཡན་ལག་སྟེ། ཁྱིམ་པ་ལས་ཁྱད་པར་དུ་བྱའོ། །དེ་བས་སྟོན་པའི་བཀའ་དྲན་བྱ། །ཞེས་བྱ་བ་ནི་སངས་རྒྱས་དེ་ཕྱིན་ཅི་མ་ལོག་པར་སྟོན་པའོ། །དེ་བས་ན་ཇི་སྐད་གསུངས་ཤེ་ན། ཆང་ནི་ཉེས་དགུ་མཚོན་པ་སྟེ། །བག་ཆགས་བསྒྲིབས་པས་རྣལ་འབྱོར་ཉམས། །ཞེས་བཀག་པས་ན་དེའི་བཀའ་དྲན་པར་གཞག་གོ །མྱོས་འགྱུར་ཉེས་པ་འཕེལ་འགྱུར་བ། །ཞེས་བྱ་བ་ནི་ཆང་འཐུངས་པས་མྱོས་པ་ཙམ་དུ་མ་ཟད་ཀྱི་ཉེས་པ་གཞན་ཡང་མང་དུ་འཕེལ་བར་འགྱུར་གྱི། རྩ་མཆོག་ཙམ་ཡང་མི་བཏུང་ངོ༌། །དེ་བས་ན་རྩའི་ཐོར་ཏོ་ལ་ཆགས་པ་ཙམ་ཡང་མི་བཏུང་ན་མང་དུ་འཐུངས་པ་ལྟ་ཅི་སྨོས། ད་འདི་མན་ཆད་དགེ་ཚུལ་གྱི་བསླབ་ཚིགས་བཅུའི་དངོས་པོ་ལ་ལྔ་ནི་འདས། ད་ནི་དྲུག་པ་ལ་བབ་སྟེ། གླུ་གར་མི་བྱ་བར་འཆད་དོ། །གླུ་གར་དེ་བཞིན་སིལ་སྙན་རྣམས། །ཞེས་བྱ་བ་ནི་རོལ་མོའི་སྤྱད་དང་རོལ་མོ་བྱ་བ་ཐམས་ཅད་བསྲུང་བ་སྟེ། བདག་ཉིད་ཀྱང་མི་བྱ། གཞན་བྱེད་དུ་ཡང་མི་གཞུག །བདག་ཉིད་ཉན་པའི་ཕྱིར་ན་དཀོན་མཆོག་གི་སྤྱན་སྔར་བྱེད་དུ་ཡང་མི་གཞུག །བདག་ཉན་པའི་ཕྱིར་མ་ཡིན་མོད་ཀྱི། དཀོན་མཆོག་གསུམ་ལ་མཆོད་པའི་ཕྱིར་ནི་ཉེས་པ་མེད་དོ། །དྲིལ་བུ་དཀྲོལ་བ་དང་དཀོན་མཆོག་གསུམ་ལ་མཆོད་པའི་ཕྱིར་ཉེས་པ་མེད་དོ། །ཆུ་ལ་བྱེའུ་ཟུལ་བྱེད་པ་ལ་སོགས་པ་ཆུ་ལ་རྩེ་བ་སྣ་ཚོགས་ཀྱང་མི་བྱའོ། །རྐྱལ་མི་ཤེས་ན་དབེན་པར་བསླབ་པ་དང་སྨན་པས་བསྒོས་ཏེ། སྨན་གྱི་ཆོ་གས་ཆུའི་ནང་དུ་རྒྱལ་བ་དག་ལ་ཉེས་པ་མེད་དོ། །གླུའི་དབྱངས་ཐམས་ཅད་མི་བྱའོ། །ཆོས་འཆད་པ་དང་ཡི་གེ་ཀློག་པ་དང། དཀོན་མཆོག་གསུམ་ལ་བསྟོད་པའི་ཚེ་དབྱངས་ལེན་པ་ལ་ཉེས་པ་མེད་དོ། །སྡོམ་པ་ལ་གནས་པས་མི་བྱའོ། །བསླབ་ཚིགས་བཅུའི་དངོས་པོ་ལས་དེ་ཡན་ཆད་དྲུག་ནི་འདས། ད་ནི་བདུན་པ་ལ་བབ་སྟེ། ལུས་ལ་སྤོས་ཀྱིས་མི་བྱུག་པ་འཆད་དོ། །ལུས་ལ་སྤོས་ཀྱིས་མི་བྱུག་སྟེ། །ཞེས་བྱ་བ་ནི་ལུས་ལ་དྲི་ཞིམ་པོའི་བག་ཐམས་ཅད་ཀྱིས་མི་བྱུག་མི་བསྐུའོ། །ལུས་ལ་མདངས་བཟང་བ་དང༌། དྲི་ཞིམ་པར་བྱ་བའི་ཕྱིར་རོ། །གོས་ལ་སོགས་པ་ལ་མི་བྱུག་གོ །ཅིའི་ཕྱིར་ཞེ་ན། དེ་དག་ཀྱང་འཁོར་བ་ལ་ཆགས་པའི་རྒྱུ་ཡིན་པའི་ཕྱིར་རོ། །ཙནྡན་ལ་སོགས་མི་བསྐུའོ། །ཞེས་བྱ་བ་ནི་དྲི་
ཞིམ་པོར་སྦྱར་བ་ལ་སོགས་པ་ལུས་ལ་མི་བྱུག་གོ །ཡུང་དང་གུར་གུམ་ལ་སོགས་པས། །ཞེས་བྱ་བ་ནི་མདངས་ནི་གུར་གུམ་དག་མདངས་སེར་པོར་འདོད་པའི་ཕྱིར་མི་བྱའོ། །ཁ་དོག་རྣམས་སུ་བྲི་མི་བྱ། །ཞེས་བྱ་བ་ནི་སེར་པོ་ལ་སོགས་པའི་ཁ་དོག་དག་གོ །མེ་ཏོག་མགོ་རྒྱན་ཕྲེང་བ་དང༌། །ཅེས་བྱ་བ་ནི་མེ་ཏོག་གང་ཡང་རུང༌། སྐུད་པ་དག་དང༌། ཤིང་བུ་དག་ལ་བརྒྱུས་པའི་ཕྲེང་བ་དག་གི་སེ་རལ་ཁ་ལ་སོགས་པར་མི་གདགས་སོ། །བརྟུལ་ཞུགས་ཅན་གྱིས་གདགས་མི་བྱ། །ཞེས་བྱ་བ་ནི་བསླབ་པ་ལ་གནས་པས། འདི་དག་གདགས་པར་མི་བྱའོ། །གསེར་ལ་སོགས་པ་རྣམས་ཀྱིས་ཞེས་བྱ་བ་ནི་གསེར་དངུལ་ལ་སོགས་པའི་སོར་གདུབ་དང༌། རྣ་ཆ་དང༌། མགོ་རྒྱན་དང༌། དཔུང་རྒྱན་དག་གིས་བདག་བརྒྱན་པར་མི་བྱའོ། །དུད་པ་ལ་སོགས་མིག་སྨན་རྣམས། །ཞེས་བྱ་བ་ནི་ལི་ཁྲི་དང་མཚལ་ལ་སོགས་པ་མིག་སྨན་རྣམས་ཀྱིས། མིག་མི་ན་བར་མི་བསྐུའོ། །འདི་ཡན་ཆད་དགེ་ཚུལ་གྱི་བསླབ་ཚིགས་བཅུའི་དངོས་པོ་ལས་བདུན་ནི་འདས། ད་ནི་བརྒྱད་པ་ལ་བབ་སྟེ། བླ་མའི་ཁྲི་ལ་མི་འདུག་པ་འཆད་དེ། ཤིང་ཁྲི་ཁྲུ་གང་མཐོ་བ་དང༌། །ཞེས་བྱ་བ་ནི་ཁྲི་འམ་སྟེགས་བུ་ཁྲུ་གང་ཡན་ཆད་ལས་མཐོ་བ་དག་གོ །བ་སོ་ཞེས་བྱ་བ་ནི་བ་སོ་ལས་བྱས་པའི་ཁྲི་དག་གོ །ལ་སོགས་ཞེས་བྱ་བ་ནི་རིན་པོ་ཆེ་ལ་སོགས་པའོ། །བརྒྱན་པའི་ཁྲི་ཞེས་བྱ་བ་ནི་རིན་པོ་ཆེ་སྣ་ཚོགས་དང༌། གསེར་དངུལ་ལ་སོགས་པས་བརྒྱན་པའི་ཁྲིའོ། །དམའ་ཡང་ཉལ་ཁྲི་བཟང་པོ་ལས། །ཞེས་བྱ་བ་ནི་བ་སོ་དང་རིན་པོ་ཆེ་ལ་སོགས་པས་བརྒྱན་པའི་ཁྲི་ཁྲུ་གང་དུ་མ་ཕྱིན་ཀྱང༌། དེ་ཉིད་རིན་པོ་ཆེའི་ཡིན་པས་དམའ་ཡང་ཉེས་པའོ། །ཆོས་འཆད་པ་དང་ཁ་ཏོན་བྱེད་པ་ལ་གནང་ངོ༌། །ཉལ་ལ་སོགས་པ་མི་བྱའོ། །ཞེས་བྱ་བ་ནི་ཆོས་འཆད་པའི་ལྷའི་ཡུལ་དུ་ཕྱིན་པའི་ཚེ། རིན་པོ་ཆེ་འབའ་ཞིག་སྤྱོད་པ་དང༌། གཞན་ཡང་རིན་པོ་ཆེ་འབའ་ཞིག་སྤྱོད་པའི་ཡུལ་ན་ནི་རིན་པོ་ཆེ་ལ་སོགས་པའི་ཁྲི་ལ་ཉལ་ཞིང་འདུག་ཀྱང་ཉེས་པ་མེད་དོ། །ཆོས་འཆད་པའི་ཚེ་ན་ཁྲི་མཐོན་པོ་ལ་འདུག་ཀྱང་ཉེས་པ་མེད་དོ། །གླུ་གར་ལ་སོགས་པ་ཞེས་བྱ་བ་ནི་བོན་སྨྲང་དང༌། སྒྲུང་གཏམ་དང༌། རྩེད་མོ་དང༌། འབོད་པ་དག་བསྡུའོ། །བསྟན་པ་དང་ཞེས་བྱ་བ་ནི་གླུ་གར་ལ་སོགས་པ་བདག་ཉིད་འདོད་པའོ། །གང་ལས་དྲེགས་པ་སྐྱེ་འགྱུར་བ། །
ཞེས་བྱ་བ་ནི་གོང་དུ་སྨྲས་པ་དེ་དག་ལ་བརྟེན་ནས་རྒྱགས་པས་དང་དྲེགས་པས་ཏྲོག་ཏྲོག་པོར་འགྱུར་བས། དྲེགས་པའི་ཡན་ལག་སྤངས་ནས་ནི། །ཞེས་བྱ་བ་ནི་དེ་ལྟར་དྲེགས་པའི་རྐྱེན་དུ་གྱུར་བ་དེ་དག་སྤངས་ནས། བརྟུལ་ཞུགས་གནས་ཞེས་བརྗོད་པ་ཡིན། །ཞེས་བྱ་བ་སྟེ། བསླབ་པ་ལ་གནས་ཞེའམ་སྡོམ་པ་དང་ལྡན་ཞེས་བྱ་བ་ཡིན་ནོ། །འདི་ཡན་ཆད་དུ་དགེ་ཚུལ་གྱི་བསླབ་ཚིགས་བཅུའི་དངོས་ལས་བརྒྱད་ནི་འདས། ད་ནི་དགུ་པ་ལ་བབ་སྟེ། ཉི་མ་ཕྱེད་མན་ཆད་ཟས་མི་བཟའ་བ་འཆད་དེ། ཉི་མ་ཕྱེད་མཚམས་མན་ཆད་ནས། །སྐྱ་རེངས་མ་ཤར་དུས་མིན་ཏེ། །ཞེས་བྱ་བ་ནི་སྐྱ་རེངས་ལ་རྣམ་པ་གསུམ་སྟེ། སྔོ་རེང་དང༌། སེར་རེང་དང༌། དམར་རེང་ངོ༌། །དེ་ལ་སར་རེང་མེད་པའི་ཚད་ཀྱིས་བཟུང་སྟེ། དེ་ནི་རྒྱལ་བས་དུས་མིན་གསུངས། །ཞེས་བྱ་བ་ནི་ཉི་མ་ཕྱེད་མན་ཆད་ནས་སྐྱ་རེངས་མ་ཤར་གྱི་བར་དུ་ཁ་ཟས་བཟའ་བའི་དུས་མ་ཡིན་ནོ་ཞེས་བདུད་བཞི་ལས་རྒྱལ་བའི་རྒྱལ་བས་གསུངས་སོ། །སྡོམ་ཅན་གྱིས་ནི་དེར་མི་བཟའ། །ཞེས་བྱ་བ་ནི་བསླབ་པ་ལ་གནས་པས་དུས་མ་ཡིན་པ་དེར་བཟའ་བ་ལྔ་དང་བཅའ་བ་ལྔ་དག་མི་བཟའོ། །སྐྱ་རེངས་ཤར་ནས་ཕྱེད་ཀྱི་བར། །ཞེས་བྱ་བ་ནི་དུས་གང་དག་ཏུ་བཟའ་ཞེ་ན། སྐྱ་རེངས་ཤར་ནས་ཉི་མ་ཕྱེད་ཀྱི་བར་དུ་བཟའོ། །དེ་ཡི་སྐབས་སུ་ཟོས་ནས་ནི། །ཞེས་བྱ་བ་ནི། བདག་གིས་ཀྱང་དུས་སུ་ཟོས་པར་ཤེས་བ་དང་སྡོམ་པ་ལ་གནས་པའོ་ཞེས་བྱ་བའི་དོན་ཏོ། །དེ་ལས་བཟློག་པ་ནི་བདག་ཤེས་པའི་སྡོམ་པ་མ་ཡིན་ནོ། །བཟའ་བའི་དུས་སུ་ཟོས་པ་ཡིན། །ཞེས་བྱ་བ་ནི་དེ་ལྟར་སྐྱ་རེངས་ཤར་ནས་ཉི་མ་ཕྱེད་ཕྱེད་ཀྱི་བར་དུ་ཡང་ཡིན་ལ། དུས་ཡིན་པར་ཡང་འདུ་ཤེས་ཡོད་བཞིན་དུ་ཟོས་པ་ནི་བཟའ་བའི་དུས་སུ་ཟོས་པ་ཡིན་ཞེས་བྱའོ། །དུས་མིན་དུས་སུ་འདུ་ཤེས་ནས། །ཞེས་བྱ་བ་ནི་ཉི་མ་ཕྱེད་ཙམ་ཕན་ཆད་ནས་སྐྱ་རེངས་མ་ཤར་གྱི་བར་དུ་བཟའ་བའི་དུས་མ་ཡིན་པ་ལ་དུས་སོ་ཞེས་འདུ་ཤེས་པར་བྱས་ནས་ནམ་ཡང་བཟའ་བར་མི་བྱ་སྟེ། དུས་མ་ཡིན་པ་ལ་འདུ་ཤེས་སོ་ཞེས་འདུ་ཤེས་པར་བྱས་ནས། ནམ་ཡང་བཟའ་བ་ལྔ་དང་བཅའ་བ་ལྔ་དག་བཟའ་བར་མི་བྱའོ། །སྨན་པས་ཉོན་མོངས་བསྒོ་ནས་ནི། །ཞེས་བྱ་བ་ནི་ན་བའི་རྐྱེན་ཅིག་གིས་ཉི་མ་ཕྱེད་མན་ཆད་ནས་སྐྱ་རེངས་མ་ཤར་གྱི་བར་དུ་བཟའ་བའི་
དུས་མ་ཡིན་པའི་ཚེ། སྨན་དཔྱད་ཀྱིས་དེར་ཁ་ཟས་མ་ཟོས་ན་ཉེན་ཆེད་པོར་འགྱུར་གྱིས་ཁ་ཟས་ཟོ་ཤིག་ཅེས་བསྒོ་ན། ནད་པས་ཉེས་པར་མི་འགྱུར་རོ། །འདི་མན་ཆད་ནི་དགེ་ཚུལ་བའི་བསླབ་ཚིགས་བཅུའི་དངོས་པོ་ལས་དགུ་ནི་འདས། ད་ནི་བཅུ་ལ་བབ་སྟེ། གསེར་དངུལ་ལ་མི་རེག་པ་འཆད་དོ། །ས་ལེ་སྦྲམ་ནི་གསེར་ཡིན་ཏེ། །ཞེས་བྱ་བ་ནི་རྒྱ་གར་ལས་གཟུགས་དངུལ་ཅན་ཞས་བྱ་བ་འབྱུང་སྟེ། གསེར་དངུལ་ཞེས་བྱ་བ་གོ་རིམས་བཞིན་དུ་སྦྱར་ཏེ། དངུལ་ཞེས་བྱ་བ་དངུལ་ཉིད་ཡིན། །ཞེས་བྱ་བའོ། །སྦྱིན་བདག་རྣམས་ཀྱིས་དེ་བྱིན་ཞེས་བྱ་བ་ནི་བདག་གི་གསེར་དངུལ་ཡིན་པ་བདག་གི་འདུ་ཤེས་པ་ལ་ཉེས་པར་མ་གྱུར་ཏེ། ད་བས་ན་སྦྱིན་བདག་གིས་ཡིན་པས་རྒྱལ་པོའམ་དད་པའི་བྲམ་ཟེ་ལ་སོགས་པས་བྱིན་ན། བརྟུལ་ཞུགས་ཅན་གྱིས་མི་བླང་ངོ༌། །ཞེས་བྱ་སྟེ། བསླབ་པ་ལ་གནས་པའི་སྡོམ་པ་ཅན་གྱིས་སོ། །བདག་གིས་རུང་བ་མ་ཡིན་འདིས། །ཞེས་བྱ་བ་ནི། གསེར་དངུལ་དེ་དག་དགེ་ཚུལ་གྱིས་བཟུང་བར་མ་བརྟགས་པ་ཡིན་པས་ན་གསེར་དངུལ་འདིས་རུང་བའི་དངོས་པོ་བཙལ་སྙམ་དུ་ཞེས་བྱ་བ་སྟེ། ལྷུང་བཟེད་དམ་ཆོས་གོས་སམ་སྨན་དག་ཏུ་བསྒྱུར་རོ། །དེ་ལྟར་མངོན་པར་བསམས་ནས་ནི། །ཞེས་བྱ་བ་ནི་གོང་དུ་སྨྲས་པ་ལྟར་བསམ་པ་མངོན་པར་འདུ་བྱས་ནས། དེ་ནས་གཞན་ཞིག་ལེན་དུ་གཞུག །ཅེས་བྱ་བ་ནི་དེ་ནས་གདོད་གཡོག་གམ་སྐྱེ་བོ་དག་ལེན་དུ་གཞུག་གོ །དཀོན་མཆོག་གསུམ་གྱི་ཆེད་ཀ་དང༌། །ཞེས་བྱ་བ་ནི་དཀོན་མཆོག་གསུམ་ལ་གསེར་དངུལ་གྱིས་མཆོད་པ་ལ་ནི་ཉེས་པ་མེད་དོ། །ཚངས་པ་མཚུངས་པར་སྤྱོད་རྣམས་ཀྱི། །ཞེས་བྱ་བ་ནི་དགེ་སློང་དང་དགེ་ཚུལ་གྲོགས་པོ་དག་གི་སྟེ། མདོར་ན་བདག་གིས་མ་ཡིན་པའི། །གསེར་དང་དངུལ་ལ་རེག་གྱུར་ཀྱང༌། །ཞེས་བྱ་བ་ནི་རིན་པོ་ཆེ་དག་བསྡུས་ཏེ། དེ་དག་ལ་བདག་གིས་རེག་ཅིང་བཟུང་ཡང༌། ཉེས་པར་འགྱུར་བ་མ་ཡིན་ནོ་ཞེས་བྱ་བ་སྟེ། བསླབ་པ་ཉམས་པར་མི་འགྱུར་རོ། །འདི་མན་ཆད་ནི་དགེ་ཚུལ་དང༌། བླ་མ་དང༌། འོག་མའི་ཁྱད་པར་དང་རིམ་པར་སྟོན་ཏོ། །འདོད་པས་བར་དུ་གཅོད་བྱེད་ཅེས། །རྫོགས་སངས་རྒྱས་ཀྱིས་གསུངས་པ་དེ། །བར་དུ་གཅོད་པར་མི་འགྱུར་ཞེས། །དགེ་ཚུལ་གཏི་མུག་མ་སྨྲ་ཤིག་
ཅེས་བྱ་བ་ནི་སྡེ་བཅས་པའི་དགེ་ཚུལ་ཀཎྜ་ཀ་དང་མ་ཧཱ་ཞེས་བྱ་བ་གཉིས་ཡོད་དེ། དེ་སྐད་ཅེས་ཟེར་བ་ལས་བཅས་ཏེ། དགེ་ཚུལ་བག་མེད་པ་བྱུང་རྒྱལ་དུ་སྨྲ་བ་ཁ་ཅིག་འདི་སྐད་ཅེས་ཟེར། འདོད་པ་དེ་དག་བར་དུ་སྤྱད་ཀྱང་དགེ་བ་སྤྱོད་པ་དང་ཐར་བར་འགྱུར་བ་ལ་བར་དུ་གཅོད་བྱེད་ཅེས་དེ་བཞིན་གཤེགས་པ་ཡང་དག་པར་རྫོགས་པའི་སངས་རྒྱས་ཀྱིས་གསུངས་པ་དེ་སྤྱད་ཀྱང༌། དག་བ་སྤྱོད་པ་དང་ཐར་པར་འགྱུར་བ་དག་གི་བར་ཆད་དག་ཏུ་མི་འགྱུར་རོ། །དགེ་ཚུལ་ཞེས་དགེ་ཚུལ་གཏི་མུག་པ་དག་ལ་མ་སྨྲ་ཤིག །དེ་སྐད་སྨྲས་ན་དགེ་འདུན་གྱིས། །ཞེས་བྱ་བ་ནི་དགེ་ཚུལ་གྱིས་གོང་མ་སྐད་དུ་སྨྲས་ན། དེ་ནི་དགེ་འདུན་གྱིས། ལོངས་སྤྱོད་ཀུན་དང་ཕྲལ་ནས་ནི། །ཞེས་བྱ་སྟེ། ཆོས་ཀྱི་ལོངས་སྤྱོད་དང༌། ཟང་ཟིང་གི་ལོངས་སྤྱོད་དང་ཕྲལ་ནས། གཙུག་ལག་ཁང་ནས་བསྐྲད་པར་བྱ། །ཞེས་བྱ་བ་ནི་གཙུག་ལག་ཁང་གི་ནང་ནས་གཎྜཱི་བརྡུངས་ཏེ། མཚམས་ཀྱི་ཕྱི་རོལ་དུ་ཕྱུང་སྟེ་བསྐྲད་པའོ། །དེ་ནས་རོ་དང་འདྲ་བར་འགྱུར། །ཞེས་བྱ་བ་ནི་དགེ་བའི་ཕྱོགས་ཉམས་པའམ་ཞིག་པས་དགེ་ཚུལ་དེ་རོ་དང་འདྲ་སྟེ་ཇི་ལྟར་རོ་ལ་ཡོན་ཏན་མེད་པ་བཞིན་དུ། དེ་ཡང་དགེ་བའི་ཕྱོགས་ཉམས་པས་རོ་དང་འདྲའོ། །ཡང་ན་རོ་དང་འདྲ་བར་བྱས་ནས་བསྐྲད་ཅེས་འབྱུང་བས་ན། ཤི་བའི་གཎྜཱི་བརྡུངས་ཏེ་བསྐྲད་པའི་ཕྱིར་རོ། །འཕྱར་དང་རྟ་གད་བྱེད་ལ་སོགས། །ཞེས་བྱ་བ་ནི་དགེ་བའི་ཕྱོགས་ལ་སེམས་མི་གནས་ཤིང༌། སྔོན་དགོད་པ་ལ་སོགས་པ་བྱེད་པ་དག་དྲན་ནམ་འཕྱར་རམ་གཡེང་བ་ལ་སོགས་པ་མི་བྱའོ། །བླ་མ་དང་དགེ་འདུན་གྱི་མདུན་དུ་རྟ་གད་ལ་སོགས་པ་རྩེད་མོའི་བག་མི་བྱའོ། །འཆི་བར་བསམས་ཤིང་མི་བྱའོ། །ཞེས་བྱ་བ་ནི་རྐྱེན་གང་ལ་བསམ་སྟེ་མི་བྱ་ཞེ་ན། འཆི་བ་ལ་བསམས་ནས་སོ། །ཅིའི་ཕྱིར་ཞེ་ན། སྐད་ཅིག་མ་སྟེ། དགེ་ཚུལ་དག་སྐད་ཅིག་མ་ལ་འཆི་ཞེས་གསུངས་པ་ལྟ་བུའོ། །གཞན་ཡང་མི་རྟག་པ་ཆེན་པོ་འཆི་བ་དེ་འུ་རེ་འོང་སྟེ། ཇི་ཙམ་ན་འང་བ་གཏོལ་མེད་པས་བསོད་ནམས་མ་བསགས་པར་འཆི་ན་མི་རུང་ངོ་ཞེས་དེ་ལྟ་བུར་བསམས་ནས་མི་བྱའོ། །གླལ་ཚེ་ལག་པས་ཞེས་པ་ནི་སྔོན་དགེ་སྦྱོང་ཞིག་ཁ་གླལ་བའི་ཚེ་ན་གཅིག་གིས་དེར་ཕོ་མཚན་བཅུག་པ་ལས་བཅས་པ་ལྟ་བུའོ། །དགེ་ཚུལ་ལ་དགེ་འདུན་གྱི་ནང་དུ་འདུག་གམ་བླ་
མའི་ཚེ་གླལ་བྲོ་ན་ཁ་མི་གདོང་ཞིང་དགབ་པར་བྱའོ། །སྒྲེགས་པ་ནི་དྲི་ང་བའི་ཕྱིར་ཁ་དགབ་པར་བྱའོ། །སོགས་པ་ཡིས་ཞེས་བྱ་བ་ནི་གོས་དག་གི་མཐའ་འམ། ལོ་མ་དག་གིས། ཁ་དགབ་པར་ཡང་ནན་ཏན་བྱ། །ཞེས་བྱ་བ་སྟེ་རིམ་གྲོ་དང་ནན་ཏན་དག་བྱའོ། །རྒན་ལ་སྦྲིད་བྱུང་ཕྱག་བྱ་སྟེ། ཞེས་བྱ་བ་ནི་བླ་མ་འམ་གོང་མའི་ཁྱད་པར་བསྟན་ཏེ། བདག་པས་རྒན་པ་ཞིག་ཡིན་ན་ནི་དགེ་ཚུལ་དང༌། དགེ་སློང་གང་ཡང་རུང་སྟེ། དེ་དག་སྦྲིད་པ་བྱུང་ནས་ཕྱག་བྱའོ། །གཞོན་ལ་ནད་མེད་གྱུར་ཅེས་བྱ། །ཞེས་བྱ་བ་ནི་བདག་པས་ཁྲིམས་ཀྱིས་གཞོན་པ་ལ་སྦྲིད་པ་བྱུང་ན་ནི་ནད་མེད་གྱུར་ཅེས་བྱའོ། །ཁྱིམ་པའི་སྦྲིད་པ་བྱུང་བ་ལ། །ཡུན་རིངས་སོས་ཞེས་བརྗོད་པར་བྱ། །ཞེས་བྱ་བ་ནི་ཁྱིམ་པ་ཕོ་མོ་དག་ལ་སྦྲིད་པ་བྱུང་ན་ཡུན་དུ་འཚོ་བར་ཤོག་ཅིག་ཅེས་བྱའོ། །བླ་མ་རྣམས་ཀྱི་མདུན་དག་ཏུ། །སྣབས་དང་མཆིལ་མ་མི་འདོར་ཞིང༌། །སོ་ཤིང་བཅའ་བར་མི་བྱའོ། །ཞེས་བྱ་བ་ནི་མཁན་པོ་དང་སློབ་དཔོན་བདག་པས་རྒན་པ་དང༌། མཆོད་རྟེན་དག་གི་མདུན་དག་ཏུ་སྣབས་དང་མཆིལ་མ་དང་སོ་ཤིང་བཅའ་བ་དང༌། འཁྲུལ་པའི་བག་ཐམས་ཅད་མི་འདོར་རོ། །ས་གཞན་དུ་མཆིལ་མ་འདོར་ན་ཡང་སེ་གོལ་བརྡབས་ཏེ་དོར་བར་བྱའོ། །དེ་བཞིན་སྟན་ལ་མི་འདུག་གོ །བླ་མ་དག་འཆག་གམ་འགྲོ་བའི་མདུན་དུ་སྟན་ལ་འདུག་པར་མི་བྱའོ། །མདུན་ན་འཆག་པར་མི་བྱ་ཞིང༌། །ཞེས་བྱ་བ་ནི་ཆོས་འཆད་པ་ལ་སོགས་པའི་ཚེ་དེ་དག་གི་མདུན་དུ་འཆག་པར་མི་བྱའོ། །ཁྱེད་རེངས་སུ་ཡང་མི་འབྱུང་སྟེ། །ཞེས་བྱ་བ་ནི་ཤམ་ཐབས་འབའ་ཞིག་གོན། ཆོས་གོས་མ་གྱོན་པར་འདུག་པར་མི་བྱའོ། །རྒན་ལ་སོགས་པ་སྡོམ་ཅན་གྱི། །ཞེས་བྱ་བ་ནི་མཁན་པོ་དང་སློབ་དཔོན་བདག་པས་གཞོན་པ་ལ་ཡང་ཡོན་ཏན་ཆེ་བ་མཁས་ཤིང་མང་ལ་ཡོན་ཏན་གྱིས་བརྒྱན་པ་ལ། གུས་བཅས་ཞེ་སར་བཅས་པར་བྱ། །ཞེས་བྱ་བ་ནི་འདུད་པ་དང༌། གུས་པ་དང༌། ཕྱག་བཅལ་བ་དང༌། རྗེ་ས་བྱའོ། །ལག་པ་དག་པར་བསྙལ་ནས་ནི། །ཞེས་བྱ་བ་ནི་བདག་ཉིད་སྔར་ལག་པ་དྲི་མ་མེད་པར་ནན་ཏན་དུ་བསྙལ་ནས། བུམ་པ་ལ་སོགས་རྡུལ་མེད་བྱ། །ཞེས་བྱ་བ་སྟེ། རྫ་མ་ལ་སོགས་པ་ཆུ་སྣོད་ཆེ་ཆུང་ཀུན་རྡུལ་དང་དྲི་མ་དག་མེད་པར་བྱས་ནས་སོ། །ཆུ་ཡང་ཡོངས་
སུ་བཙགས་ནས་སུ། །ཞེས་བྱ་བ་ནི་དགོས་པའི་དོན་དུ་ཆུ་ཀུན་བཙགས་ཏེ། ལ་ལ་མ་བཙགས་པ་ལྟ་བུ་མ་ཡིན་གྱི། ཐམས་ཅད་བཙགས་པའི་ཐ་ཚིག་གོ །བརྟགས་ཏེ་རུང་ན་བླང་བར་བྱ། །ཞེས་བྱ་བ་ནི་ཆུ་བཙགས་པ་བའི་ཞིག་གིས་མི་ཆོག་གོ །ཡིད་ཆེས་པར་བརྟགས་ཏེ་སེམས་ཅན་མེད་པར་གྱུར་པའི་ཆུ་དེ་ནི་རུང་བྱའོ། །གནས་མ་བཅས་པར་གནས་མི་བྱ། །ཞེས་བྱ་བ་ནི་མཁན་པོ་དག་མེད་ན་ཡང་བདག་གར་འོངས་པའི་གནས་དེ་ན། དགེ་སློང་ཡོན་ཏན་ཅན་ཆོས་འདུལ་བ་ལ་མཁས་པ་དགེ་སྦྱོང་འཆོས་ཤིང་འདུལ་ནུས་པ་ལ་གསོལ་བ་བཏབ་སྟེ་གནས་པར་བྱའོ། །དགེ་འདུན་མལ་ཆ་ལ་སོགས་ལ། །ཞེས་བྱ་བ་ནི། དགེ་འདུན་གྱི་སྔས་དང་གློ་གནས་དགབ་པ་དང༌། འོག་ཏུ་གདིང་བ་དག་བསྡུའོ། །དྲན་པ་མེད་པར་འདུག་མི་བྱ། །ཞེས་བྱ་བ་ནི་གང་ཟག་གོང་བཞིན་དུ་སྤྱད་དུ་མི་རུང་སྟེ། མཐའ་ལ་གཞར་ཡང་ཅི་ནས་ཀྱང་དགེ་འདུན་གྱི་མལ་ཆ་དག་ལ་མི་གནོད་པ་དྲན་པ་ཉེ་བར་གཞག་ནས་འདུག་པར་བྱའོ། །སྔོན་དགེ་སྦྱོང་རྒྱབ་ནག་ལྟར་གདིང་བ་མེད་པར་དགེ་འདུན་གྱི་མལ་ཆ་དང་སྟན་དག་ལ་ཤམ་ཐབས་རེག་པར་མི་བྱའོ། །དྲན་དང་ལྡན་ན་ཉེས་མེད་དོ། །ཞེས་བྱ་བ་ནི། དགེ་འདུན་གྱི་མལ་ཆ་དང་སྟན་དག་ལ་ཤམ་ཐབས་ཀྱིས་མི་རེག་པར་འདུག་གོ །དྲན་པ་དང་ལྡན་བཞིན་པ་ལ་ཉེས་པ་མེད་དོ། །འདི་མན་ཆད་ནི་མཁན་པོ་དག་ལ་མ་ཞུས་ཀྱང་ཉེས་པ་མེད་པ་སྟོན་ཏེ། སོ་བཀྲུ་བ་དང་ཆུ་བཏུང་དང༌། །ཞེས་བྱ་བ་ནི། སོ་ཤིང་བཟའ་བ་དང༌། བཀྲུ་བ་དང༌། རྐང་ལག་བཀྲུ་བ་དང༌། སྐོམ་ཆུ་བཏུང་བ་དང༌། འདི་དག་ཞུ་མི་དགོས་སོ། །བཤང་གཅི་བྱེད་དུ་འགྲོ་བ་དང༌། །ཞེས་བྱ་བ་ནི་ཕྱི་རོལ་ཆེ་ཆུང་དུ་འགྲོ་བ་དག་གོ །མཚམས་ནང་སྟོན་ལ་ཕྱག་བྱ་བ། །ཞེས་བྱ་བ་ནི་མཚམས་ཀྱི་ནང་དུ་སྐུ་གཟུགས་དང་མཆོད་རྟེན་ལ་ཕྱག་བྱའོ། །དེ་དག་མ་ཞུས་ཉེས་མེད་དོ། །ཞེས་བྱ་བ་ནི་སོ་ཤིང་ཟ་བ་ནས་སྟོན་པའི་སྐུ་གཟུགས་དག་ལ་ཕྱག་བྱ་བའི་བར་དུ་མ་ཞུས་ཀྱང་ཉེས་པ་མེད་དོ། །བརྟུལ་ཞུགས་ཅན་གྱིས་བྱ་བ་གཞན། །ཞེས་བྱ་བ་ནི། བསླབ་པ་ལ་གནས་པས་གོང་དུ་མིང་སྨོས་པ་རྣམས་མ་གཏོགས་པ་གཞན་ཐམས་ཅད་ཞུའོ། །དེ་དག་ཐམས་ཅད་ཡིད་ཀྱིས་བསྡམས་པའི་ཉེས་བྱས་སུ་འགྱུར་རོ། །མཆོད་རྟེན་ལ་སོགས་ཕྱག་བྱ་སྟེ། །ཞེས་བྱ་བ་
ནི་མཆོད་རྟེན་ལ་སོགས་པའི་དོན་ཏོ། །མི་ཉལ་བྱས་ན་དེ་འོག་ཏུ། །ཞེས་བྱ་བ་ནི་སྲོད་ལ་དགེ་བ་ཁ་ཏོན་དག་བྱས་ནས། བླ་མའི་རྐང་བཀྲུས་བླ་མ་ལ། །ཞེས་བྱ་བ་ནི་མཁན་པོ་དང་སློབ་དཔོན་དག་སྲོད་ལ་དགེ་བ་བྱས་ནས་ཉལ་བའི་ཚེ་དེ་དག་གི་རྐང་པ་དག་བཀྲུའོ། །བརྟུལ་ཞུགས་ཅན་གྱི་ཀུན་ཞུས་ཏེ།། ཞེས་བྱ་བ་ནི་བསླབ་པ་ལ་གནས་པས་མལ་དག་བྱའོ། །རྐང་ལག་བཀྲུའོ། །སྲོད་ཐོ་རངས་ཀྱི་དགེ་བ་དག་འཚལ་ལོ་ཞེས་ད་དག་ཀུན་ཞུའོ། །རྐང་པ་གཉི་ཀ་བཀྲུས་ནས་ནི། །ཞེས་བྱ་བ་ནི་བདག་ཉིད་ཀྱི་རྐང་བ་བཀྲུ་བར་བྱ་བའི་དོན་ཏོ། །ནམ་གྱི་ཆ་སྟོད་ཆ་སྨད་ལ། །ཞེ་བྱ་བ་ནི་མཚན་གཅིག་ལ་ཐུན་བཞིར་བགོས་པའི་ཐུན་དང་པོ་དང་ཐ་མ་གཉིས་སོ། །ཡང་ན་སྲོད་དང་ཐོ་རངས་གཉིས་སོ། །བསྒྲིམས་ཏེ་མི་ཉལ་བྱ་བ་སྟེ། །ཞེས་བྱ་བ་ནི་ལྟག་ཏུ་སྨོས་པ་དེ་དག་ལ་བསྒྲིམས་ཏེ་མི་ཉལ་བར་བགྱིའོ། །དེས་ནི་བདེན་པར་སྨྲ་བར་བྱ། །ཞེས་བྱ་བ་ནི་ཇི་ལྟར་ཞུས་པ་དེ་བཞིན་དུ་བསྒྲིམས་ཏེ་བྱས་ན་ནི་བརྫུན་དུ་མི་འགྱུར་གྱི། ཇི་སྐད་དུ་ཞུས་པ་དེ་བཞིན་དུ་མ་བྱས་ན་ཤེས་བཞིན་གྱི་བརྫུན་ཡང་བྱས་སོ་ཞེས་པའི་དོན་ཏོ། །ལྡང་དང་སྣང་བའི་འདུ་ཤེས་ཀྱིས། །ཞེས་བྱ་བ་ནི་ནམ་འདི་ཙམ་ན་ལྡང་ངོ་ཞེས་ནམ་གྱི་མཚན་མ་ཡིད་ལ་སྣང་བར་བྱས་ནས། དེ་ཁོ་ནའི་དུས་སུ་སང་པར་འགྱུར་བའི་ཕྱིར་ལྡང་དང་སྣང་བའི་མཚན་མ་ཡིད་ལ་བྱའོ། །སེང་གེའི་ཉལ་ཐབས་བཞིན་དུ་བྱ། །ཞེས་བྱ་བ་ནི་ཇི་ལྟར་གཅན་གཟན་གྱི་རྒྱལ་པོ་སེང་གེ་ལག་པ་གཡས་པ་འོག་ཏུ་བཅུག་སྟེ་ཉལ་བ་དེ་བཞིན་དུ། ལག་པ་གཡས་པ་འགྲམ་པའི་འོག་ཏུ་བཅར་ཏེ། གཡས་ཕྱོགས་སུ་ཉལ་བའོ། །འདོད་ཆགས་ལ་སྤྱོད་པ་དག་གི་གཡོན་ཕྱོགས་སུ་ཉལ་བས། འདོད་ཆགས་སྤང་བར་སྦྱོར་བ་ཀུན་གཡས་ཕྱོགས་ཀྱིས་ཉལ་བའི་ཕྱིར། དེ་བཞིན་གཤེགས་པ་མྱ་ངན་ལས་འདས་པ་དང་དེ་ལྟ་བུའི་ཚུལ་དུའོ། །དྲན་དང་ལྡན་ཞིང་དགེ་རྒྱུད་དང༌། །ཞེས་བྱ་བ་ནི་དེ་ལྟར་དྲན་པ་དང་ལྡན་པར་བྱས་ནས་ཉལ་ཀར་ཡང་དཀོན་མཆོག་གསུམ་དང༌། མཆོད་རྟེན་ཆེན་པོ་བརྒྱད་ལ་སོགས་པ་དགེ་བའི་རྒྱུན་དུ་བྱས་ནས་ཉལ་ན་རྨི་ལམ་ན་ཡང་དགེ་བ་སྤྱོད་པའི་ཕྱིར་རོ། །དེ་བཞིན་མྱུར་དུ་སད་ནས་ནི། །དེ་ལྟར་བྱས་ནས། ཇི་སྐད་བསྟན་པ་བཞིན་དུ་བྱ། །ཞེས་བྱ་བ་ནི། ཇི་སྐད་ཞུས་པ་དང༌། གོང་
དུ་བསྟན་པ་བཞིན་དུ་བྱའོ། །ཇི་ལྟར་ཉོན་མོངས་མྱུར་ཟད་དང༌། །ཞེས་བྱ་བ་ནི་དེ་དག་འདོར་ཅི་དགོས་ཤེ་ན། ཉོན་མོངས་པ་ལས་འབྱུང་ངོ༌། །ལས་ལས་ཀྱང་ཚེ་འབྱུང་ངོ༌། །ཚེ་ལས་ཀྱང་ཉོན་མོངས་པ་འབྱུང་བའི་ཕྱིར་ཏེ། རྟེན་ཅིང་འབྲེལ་ཏེ་འབྱུང་བ་ཡང་ཚུལ་དེ་ལྟ་བུ་ལགས་ཏེ། དེ་ལྟ་བས་ན་ཉོན་མོངས་པའི་དུག་ཟད་པར་བྱ་བ་ཆེད་ཆེའོ། །བྱང་ཆུབ་དམ་པ་ཐོབ་འགྱུར་བ། །ཞེས་བྱ་བ་ནི་ཉན་ཐོས་དག་བྱང་ཆུབ་ཡིན་མོད་ཀྱི། དེ་དག་དམ་པ་མ་ཡིན་པས་དེ་དག་ལ་ནི་མི་བྱའོ། །བླ་ན་མེད་པའི་བྱང་ཆུབ་མངོན་པར་རྫོགས་པར་སངས་རྒྱས་པ་ལ་དམ་པ་ཞེས་བྱའོ། །དེ་ལ་བྱང་ཆུབ་གོང་མར་བསྒྲུབས་སོ། །མ་ནུས་ན་ཞར་ལ་འགྲུབ་པས་བླ་ན་མེད་པའི་བྱང་ཆུབ་འཐོབ་པར་འགྱུར་བ་ལ། དེ་ལྟར་བསྒྲིམས་དང་ལྡན་པར་བྱ། །ཞེས་བྱ་བ་ནི་སྨོན་ལམ་གདབ་པ་དང་ལྡན་པར་བྱའོ། །ཐམས་ཅད་ཡོད་པར་སྨྲ་བ་རྣམས་ཀྱི་དགེ་ཚུལ་གྱི་བྱ་བ་རྫོགས་སོ།། །།